📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑀁

𑀥𑀸𑀢𑀼𑀫𑀸𑀮𑀸

𑁧𑁫. 𑀲𑀭𑀯𑀕𑁆𑀕𑀧𑀜𑁆𑀘𑀓𑀦𑁆𑀢𑀺𑀓 𑀲𑀼𑀤𑁆𑀥𑀲𑁆𑀲𑀭𑀥𑀸𑀢𑀼

𑀇𑀢𑁄 ¶ 𑀧𑀭𑀁 𑀢𑀼 𑀲𑀭𑀢𑁄, 𑀓𑀓𑀸𑀭𑀦𑁆𑀢𑀸𑀤𑀺𑀪𑁂𑀤𑀢𑁄;

𑀥𑀸𑀢𑀼𑀬𑁄 𑀥𑀸𑀢𑀼𑀦𑀺𑀧𑁆𑀨𑀦𑁆𑀦-𑀭𑀽𑀧𑀸𑀦𑀺 𑀯𑀺𑀯𑀺𑀥𑀸𑀦𑀺 𑀘.

𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀫𑁆𑀳𑀺, 𑀚𑀺𑀦𑀧𑀸𑀞𑁂 𑀬𑀣𑀸𑀩𑀮𑀁;

𑀦𑀬𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸, 𑀲𑀫𑀸𑀲𑁂𑀦 𑀓𑀣𑁂𑀲𑁆𑀲’𑀳𑀁.

𑀇 𑀕𑀢𑀺𑀬𑀁. 𑀬𑁂𑀲𑀁 𑀥𑀸𑀢𑀽𑀦𑀁 𑀕𑀢𑀺𑀅𑀢𑁆𑀣𑁄, 𑀩𑀼𑀤𑁆𑀥𑀺𑀧𑀺 𑀢𑁂𑀲𑀁 𑀅𑀢𑁆𑀣𑁄. 𑀧𑀯𑀢𑁆𑀢𑀺𑀧𑀸𑀧𑀼𑀡𑀸𑀦𑀺𑀧𑀺. 𑀢𑀢𑁆𑀭 𑀕𑀫𑀦𑀁 𑀤𑀼𑀯𑀺𑀥𑀁 𑀓𑀸𑀬𑀕𑀫𑀦𑀁 𑀜𑀸𑀡𑀕𑀫𑀦𑀜𑁆𑀘. 𑀢𑁂𑀲𑀼 𑀓𑀸𑀬𑀕𑀫𑀦𑀁 𑀦𑀸𑀫 𑀇𑀭𑀺𑀬𑀸𑀧𑀣𑀕𑀫𑀦𑀁, 𑀜𑀸𑀡𑀕𑀫𑀦𑀁 𑀦𑀸𑀫 𑀜𑀸𑀡𑀼𑀧𑁆𑀧𑀢𑁆𑀢𑀺, 𑀢𑀲𑁆𑀫𑀸 𑀧𑀬𑁄𑀕𑀸𑀦𑀼𑀭𑀽𑀧𑁂𑀦 ‘‘𑀕𑀘𑁆𑀙𑀢𑀻’’𑀢𑀺 𑀧𑀤𑀲𑁆𑀲 ‘‘𑀚𑀸𑀦𑀸𑀢𑀻’’𑀢𑀺𑀧𑀺 𑀅𑀢𑁆𑀣𑁄 𑀪𑀯𑀢𑀺, ‘‘𑀧𑀯𑀢𑁆𑀢𑀢𑀻’’𑀢𑀺𑀧𑀺 𑀅𑀢𑁆𑀣𑁄 𑀪𑀯𑀢𑀺, ‘‘𑀧𑀸𑀧𑀼𑀡𑀸𑀢𑀻’’𑀢𑀺𑀧𑀺 𑀅𑀢𑁆𑀣𑁄 𑀪𑀯𑀢𑀺, 𑀇𑀭𑀺𑀬𑀸𑀧𑀣𑀕𑀫𑀦𑁂𑀦 𑀕𑀘𑁆𑀙𑀢𑀻𑀢𑀺𑀧𑀺 𑀅𑀢𑁆𑀣𑁄 𑀪𑀯𑀢𑀺, 𑀜𑀸𑀡𑀕𑀫𑀦𑁂𑀦 𑀕𑀘𑁆𑀙𑀢𑀻𑀢𑀺𑀧𑀺 𑀅𑀢𑁆𑀣𑁄 𑀪𑀯𑀢𑀺. 𑀢𑀣𑀸 𑀳𑀺 ‘‘𑀲𑀻𑀖𑀁 𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼 𑀇𑀭𑀺𑀬𑀸𑀧𑀣𑀕𑀫𑀦𑀁 ‘‘𑀕𑀫𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀼𑀦𑁆𑀤𑀭𑀁 𑀦𑀺𑀩𑁆𑀩𑀸𑀦𑀁 𑀕𑀢𑁄. ‘‘𑀕𑀢𑀺𑀫𑀸’’𑀢𑀺𑀆𑀤𑀻𑀲𑀼 ¶ 𑀧𑀦 𑀜𑀸𑀡𑀕𑀫𑀦𑀁. 𑀏𑀯𑀁 𑀲𑀩𑁆𑀩𑁂𑀲𑀫𑁆𑀧𑀺 𑀕𑀢𑁆𑀬𑀢𑁆𑀣𑀸𑀦𑀁 𑀥𑀸𑀢𑀽𑀦𑀁 𑀬𑀣𑀸𑀧𑀬𑁄𑀕𑀁 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀢𑀲𑁆𑀲𑀺𑀫𑀸𑀦𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺 𑁋 𑀇𑀢𑀺, 𑀏𑀢𑀺, 𑀉𑀤𑁂𑀢𑀺. 𑀓𑀸𑀭𑀺𑀢𑁂 ‘‘𑀉𑀤𑀸𑀬𑀢𑀻’’𑀢𑀺 𑀭𑀽𑀧𑀁 𑀪𑀯𑀢𑀺. 𑀉𑀝𑁆𑀞𑀸𑀧𑁂𑀢𑀻𑀢𑀺 𑀳𑀺 𑀅𑀢𑁆𑀣𑁄, 𑀤𑀼𑀓𑀸𑀭𑁄 𑀆𑀕𑀫𑁄. 𑀉𑀧𑁂𑀢𑀺, 𑀲𑀫𑀼𑀧𑁂𑀢𑀺, 𑀯𑁂𑀢𑀺, 𑀅𑀧𑁂𑀢𑀺, 𑀅𑀯𑁂𑀢𑀺, 𑀅𑀦𑁆𑀯𑁂𑀢𑀺, 𑀲𑀫𑁂𑀢𑀺, 𑀅𑀪𑀺𑀲𑀫𑁂𑀢𑀺, 𑀲𑀫𑀬𑁄, 𑀅𑀪𑀺𑀲𑀫𑀬𑁄, 𑀈𑀤𑀺, 𑀉𑀤𑀺, 𑀏𑀓𑁄𑀤𑀺, 𑀧𑀡𑁆𑀟𑀺𑀢𑁄, 𑀇𑀢𑁄, 𑀉𑀤𑀺𑀢𑁄, 𑀉𑀧𑁂𑀢𑁄, 𑀲𑀫𑀼𑀧𑁂𑀢𑁄, 𑀅𑀦𑁆𑀯𑀺𑀢𑁄, 𑀅𑀧𑁂𑀢𑁄, 𑀲𑀫𑁂𑀢𑁄, 𑀏𑀢𑀩𑁆𑀩𑁄, 𑀧𑀘𑁆𑀘𑁂𑀢𑀩𑁆𑀩𑁄, 𑀧𑀝𑀺𑀬𑀫𑀸𑀦𑁄, 𑀧𑀝𑀺𑀘𑁆𑀘𑁄, 𑀏𑀦𑁆𑀢𑁄, 𑀅𑀥𑀺𑀧𑁆𑀧𑁂𑀢𑁄, 𑀅𑀥𑀺𑀧𑁆𑀧𑀸𑀬𑁄, 𑀧𑀘𑁆𑀘𑀬𑁄, 𑀅𑀜𑁆𑀜𑀸𑀦𑀺𑀧𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. ‘‘𑀇𑀢𑀸, 𑀇𑀢’’𑀦𑁆𑀢𑀺𑀆𑀤𑀺𑀦𑀸 𑀬𑀣𑀸𑀭𑀳𑀁 𑀇𑀢𑁆𑀣𑀺𑀦𑀧𑀼𑀁𑀲𑀓𑀯𑀲𑁂𑀦𑀧𑀺. 𑀧𑀘𑁆𑀘𑁂𑀢𑀼𑀁, 𑀉𑀧𑁂𑀢𑀼𑀁, 𑀲𑀫𑀼𑀧𑁂𑀢𑀼𑀁, 𑀅𑀦𑁆𑀯𑁂𑀢𑀼𑀁, 𑀲𑀫𑁂𑀢𑀼𑀁, 𑀅𑀪𑀺𑀲𑀫𑁂𑀢𑀼𑀁, 𑀇𑀘𑁆𑀘, 𑀧𑀝𑀺𑀘𑁆𑀘, 𑀲𑀫𑁂𑀘𑁆𑀘, 𑀅𑀪𑀺𑀲𑀫𑁂𑀘𑁆𑀘, 𑀅𑀧𑁂𑀘𑁆𑀘, 𑀉𑀧𑁂𑀘𑁆𑀘, 𑀧𑀝𑀺𑀫𑀼𑀔𑀁 𑀇𑀢𑁆𑀯𑀸, 𑀇𑀢𑁆𑀯𑀸𑀦, 𑀉𑀧𑁂𑀢𑁆𑀯𑀸, 𑀉𑀧𑁂𑀢𑁆𑀯𑀸𑀦, 𑀉𑀧𑁂𑀢𑀼𑀦, 𑀅𑀜𑁆𑀜𑀸𑀦𑀺𑀧𑀺 𑀩𑀼𑀤𑁆𑀥𑀯𑀘𑀦𑀸𑀦𑀼𑀭𑀽𑀧𑀢𑁄 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀇𑀢𑀺𑀇𑀢𑀺 𑀓𑁆𑀭𑀺𑀬𑀸𑀲𑀤𑁆𑀤𑁄, 𑀲𑀼𑀢𑁆𑀢𑀦𑁆𑀢𑁂𑀲𑀼 𑀦 𑀤𑀺𑀲𑁆𑀲𑀢𑀺;

𑀇𑀤𑀫𑁂𑀢𑁆𑀣 𑀦 𑀯𑀢𑁆𑀢𑀩𑁆𑀩𑀁, 𑀤𑀲𑁆𑀲𑀦𑀸𑀬𑁂𑀯 𑀫𑁂 𑀭𑀼𑀢𑁄.

‘‘𑀇𑀢𑀸𑀬𑀁 𑀓𑁄𑀥𑀭𑀽𑀧𑁂𑀦’’, 𑀇𑀢𑀺 𑀧𑀸𑀴𑀺 𑀳𑀺 𑀤𑀺𑀲𑁆𑀲𑀢𑀺;

𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑀫𑁆𑀳𑀺, 𑀫𑀼𑀦𑀺𑀦𑀸𑀳𑀘𑁆𑀘 𑀪𑀸𑀲𑀺𑀢𑀸;

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂 𑀓𑁄𑀥𑀁 𑀦𑀺𑀦𑁆𑀤𑀦𑁆𑀢𑁂𑀦 𑁋

‘‘𑀇𑀢𑀸𑀬𑀁 𑀓𑁄𑀥𑀭𑀽𑀧𑁂𑀦, 𑀫𑀘𑁆𑀘𑀼𑀯𑁂𑀲𑁄 𑀕𑀼𑀳𑀸𑀲𑀬𑁄;

𑀢𑀁 𑀤𑀫𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑁂, 𑀧𑀜𑁆𑀜𑀸𑀯𑀻𑀭𑀺𑀬𑁂𑀦 𑀤𑀺𑀝𑁆𑀞𑀺𑀬𑀸’’𑀢𑀺.

𑀢𑀢𑁆𑀭 𑀇𑀢𑀸𑀬𑀦𑁆𑀢𑀺 𑀇𑀢𑀺 𑀅𑀬𑀦𑁆𑀢𑀺 𑀙𑁂𑀤𑁄. 𑀇𑀢𑀺𑀇𑀢𑀺 𑀘 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦𑁂𑀢𑁆𑀣 𑀲𑀼𑀢𑁆𑀢𑀧𑀤𑀢𑁆𑀣𑁄 𑁋 𑀬𑁄 ¶ 𑀤𑁄𑀲𑁄 𑀮𑁄𑀓𑁂 ‘‘𑀓𑁄𑀥𑁄’’𑀢𑀺 𑀮𑁄𑀓𑀺𑀬𑀫𑀳𑀸𑀚𑀦𑁂𑀦 𑀯𑀼𑀘𑁆𑀘𑀢𑀺, 𑀦𑀸𑀬𑀁 𑀅𑀢𑁆𑀣𑀢𑁄 𑀓𑁄𑀥𑁄𑀢𑀺 𑀯𑀢𑁆𑀢𑀩𑁆𑀩𑁄. 𑀓𑀺𑀦𑁆𑀢𑀺 𑀧𑀦 𑀯𑀢𑁆𑀢𑀩𑁆𑀩𑁄, 𑀏𑀲𑁄 𑀳𑀺 𑀲𑀭𑀻𑀭𑀲𑀗𑁆𑀔𑀸𑀢𑀕𑀼𑀳𑀸𑀲𑀬𑁄 𑀫𑀘𑁆𑀘𑀼𑀭𑀸𑀚𑀸 𑀏𑀯 𑀓𑁄𑀥𑀯𑀲𑁂𑀦 𑀧𑀫𑀤𑁆𑀤𑀦𑁆𑀢𑁄 𑀲𑀢𑁆𑀢𑀲𑀦𑁆𑀢𑀸𑀦𑁂 𑀕𑀘𑁆𑀙𑀢𑀻𑀢𑀺 𑀯𑀢𑁆𑀢𑀩𑁆𑀩𑁄. 𑀢𑀁 𑀏𑀯𑀭𑀽𑀧𑀁 ‘‘𑀫𑀘𑁆𑀘𑀼𑀭𑀸𑀚𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀩𑀳𑀼𑀦𑁄 𑀚𑀦𑀲𑁆𑀲 𑀅𑀦𑀢𑁆𑀣𑀓𑀭𑀁 𑀓𑁄𑀥𑀁 𑀳𑀺𑀢𑀓𑀸𑀫𑁄 𑀤𑀫𑁂𑀦 𑀧𑀜𑁆𑀜𑀸𑀬 𑀯𑀻𑀭𑀺𑀬𑁂𑀦 𑀤𑀺𑀝𑁆𑀞𑀺𑀬𑀸 𑀘 𑀙𑀺𑀦𑁆𑀤𑁂𑀬𑁆𑀬𑀸𑀢𑀺.

𑀏𑀢𑀻𑀢𑀺 𑀇𑀫𑀲𑁆𑀲 𑀧𑀦 𑀆𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. ‘‘𑀏𑀢𑀻’’𑀢𑀺 𑀏𑀢𑁆𑀣 𑀳𑀺 𑀆𑀉𑀧𑀲𑀕𑁆𑀕𑁄 𑀲𑀦𑁆𑀥𑀺𑀓𑀺𑀘𑁆𑀘𑁂𑀦 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀦 𑀧𑀸𑀓𑀝𑁄 𑀯𑀮𑀸𑀳𑀓𑀸𑀯𑀢𑁆𑀣𑀭𑀺𑀢𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬. 𑀢𑀣𑀸 𑀳𑀺 𑀏𑀢𑁆𑀣 𑀆 𑀇𑀢𑀺 𑀏𑀢𑀻𑀢𑀺 𑀲𑀦𑁆𑀥𑀺𑀯𑀺𑀕𑁆𑀕𑀳𑁄 𑀪𑀯𑀢𑀺, 𑀆𑀓𑀸𑀭𑀲𑁆𑀲 𑀘 𑀇𑀓𑀸𑀭𑁂𑀦 𑀧𑀭𑁂𑀦 𑀲𑀤𑁆𑀥𑀺𑀁𑀬𑁂𑀯 𑀏𑀓𑀸𑀭𑀸𑀤𑁂𑀲𑁄. 𑀢𑀲𑁆𑀫𑀸 ‘‘𑀅𑀬𑀁 𑀲𑁄 𑀲𑀸𑀭𑀣𑀻 𑀏𑀢𑀺. 𑀏𑀢𑀼 𑀯𑁂𑀲𑁆𑀲𑀦𑁆𑀢𑀭𑁄 𑀭𑀸𑀚𑀸’’𑀢𑀺𑀆𑀤𑀻𑀲𑀼 ‘‘𑀆𑀕𑀘𑁆𑀙𑀢𑀺, 𑀆𑀕𑀘𑁆𑀙𑀢𑀽’’𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀓𑀣𑁂𑀢𑀩𑁆𑀩𑁄. 𑀩𑁆𑀬𑀸𑀓𑀭𑀡𑀲𑀢𑁆𑀣𑁂𑀧𑀺 𑀳𑀺 𑀆 𑀇𑀢𑀺 𑀏𑀢𑀻𑀢𑀺 𑀲𑀦𑁆𑀥𑀺𑀯𑀺𑀕𑁆𑀕𑀳𑁄 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀦𑀻𑀢𑀺 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀸𑀢𑀩𑁆𑀩𑀸. 𑀅𑀣 𑀯𑀸 𑀇𑀢𑀻𑀢𑀺 𑀭𑀲𑁆𑀲𑀯𑀲𑁂𑀦 𑀯𑀼𑀢𑁆𑀢𑀁 𑀧𑀤𑀁 𑀕𑀫𑀦𑀁 𑀩𑁄𑀥𑁂𑀢𑀺, 𑀏𑀢𑀻𑀢𑀺 𑀯𑀼𑀤𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑀁 𑀧𑀦 𑀬𑀣𑀸𑀧𑀬𑁄𑀕𑀁 𑀆𑀕𑀫𑀦𑀸𑀤𑀻𑀦𑀺. 𑀫𑀢𑁆𑀢𑀸𑀯𑀲𑁂𑀦𑀧𑀺 𑀳𑀺 𑀧𑀤𑀸𑀦𑀺 𑀲𑀯𑀺𑀲𑁂𑀲𑀢𑁆𑀣𑀸𑀦𑀺 𑀪𑀯𑀦𑁆𑀢𑀺. 𑀢𑀁 𑀬𑀣𑀸? 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄, 𑀭𑀝𑁆𑀞𑀸 𑀧𑀩𑁆𑀩𑀸𑀚𑀺𑀢𑁄𑀢𑀺. 𑀲𑀜𑁆𑀜𑁄𑀕𑀸𑀲𑀜𑁆𑀜𑁄𑀕𑀯𑀲𑁂𑀦𑀧𑀺, 𑀢𑀁 𑀬𑀣𑀸? 𑀕𑀸𑀫𑀸 𑀦𑀺𑀕𑁆𑀕𑀘𑁆𑀙𑀢𑀺. 𑀬𑀲𑀁 𑀧𑁄𑀲𑁄 𑀦𑀺𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀦𑀻𑀢𑀺 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀸𑀢𑀩𑁆𑀩𑀸. 𑀏𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

𑀇 𑀕𑀢𑀺𑀬𑀦𑁆𑀢𑀺 𑀓𑀣𑀺𑀢𑀸, 𑀥𑀸𑀢𑀼 𑀯𑀼𑀤𑁆𑀥𑀺𑀁 𑀕𑀢𑀸 𑀬𑀤𑀸;

𑀢𑀤𑀸 𑀆𑀕𑀫𑀦𑀢𑁆𑀣𑀲𑁆𑀲, 𑀯𑀸𑀘𑀺𑀓𑀸 𑀧𑀸𑀬𑀢𑁄 𑀯𑀲𑀸.

𑀇𑀭𑀺𑀬𑀸𑀧𑀣𑀢𑁆𑀣𑀢𑁄 𑀳𑁂-𑀲𑀸 𑀦𑀺𑀘𑁆𑀘𑀸𑀕𑀫𑀯𑀸𑀘𑀺𑀓𑀸;

‘‘𑀅𑀬𑀁 𑀲𑁄 𑀲𑀸𑀭𑀣𑀻 𑀏𑀢𑀺’’, 𑀇𑀘𑁆𑀘𑀸𑀤𑁂𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀅𑀦𑀺𑀭𑀺𑀬𑀸𑀧𑀣𑀢𑁆𑀣𑁂𑀦 ¶ , 𑀯𑀢𑁆𑀢𑀦𑁂 𑀕𑀫𑀦𑁂𑀧𑀺 𑀘;

𑀆𑀕𑀫𑀦𑁂 𑀘 𑀳𑁄𑀢𑀻𑀢𑀺, 𑀥𑀻𑀫𑀸 𑀮𑀓𑁆𑀔𑁂𑀬𑁆𑀬 𑀢𑀁 𑀬𑀣𑀸.

‘‘𑀧𑀝𑀺𑀘𑁆𑀘 𑀨𑀮𑀫𑁂𑀢𑀻’’𑀢𑀺, 𑀏𑀯𑀫𑀸𑀤𑀻𑀲𑀼 𑀯𑀢𑁆𑀢𑀦𑁂;

𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸 𑀇𑀓𑀸𑀭𑀯𑁆𑀳𑀸, 𑀏𑀲𑀸 𑀥𑀸𑀢𑀼 𑀧𑀯𑀢𑁆𑀢𑀢𑀺.

‘‘𑀅𑀢𑁆𑀣𑀫𑁂𑀦𑁆𑀢𑀫𑁆𑀳𑀺 𑀲𑀽𑀭𑀺𑀬𑁂, 𑀯𑀸𑀴𑀸’’ 𑀇𑀘𑁆𑀘𑀸𑀤𑀻𑀲𑀼 𑀧𑀦;

𑀕𑀢𑁂, ‘‘𑀏𑀢𑀻𑀢𑀺 𑀇𑀢𑀻’’𑀢𑀺-𑀆𑀤𑀺𑀲𑁆𑀯𑀸𑀕𑀫𑀦𑁂 𑀲𑀺𑀬𑀸.

𑀢𑀣𑀸 𑀳𑀺 𑀈𑀢𑀻𑀢𑀺 𑀅𑀦𑀢𑁆𑀣𑀸𑀬 𑀏𑀢𑀺 𑀆𑀕𑀘𑁆𑀙𑀢𑀻𑀢𑀺 𑀈𑀢𑀺, 𑀉𑀧𑀤𑁆𑀤𑀯𑁄, 𑀇𑀢𑀺 𑀆𑀕𑀫𑀦𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀆𑀳 𑀘 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀬𑀁 ‘‘𑀏𑀢𑀻𑀢𑀺 𑀈𑀢𑀺, 𑀆𑀕𑀦𑁆𑀢𑀼𑀓𑀸𑀦𑀁 𑀅𑀓𑀼𑀲𑀮𑀪𑀸𑀕𑀻𑀦𑀁 𑀩𑁆𑀬𑀲𑀦𑀳𑁂𑀢𑀽𑀦𑀁 𑀏𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺.

𑀇𑀤𑀸𑀦𑀺 𑀬𑀣𑀸𑀭𑀳𑀁 𑀦𑀺𑀧𑀸𑀢𑀸𑀔𑁆𑀬𑀸𑀢𑀦𑀸𑀫𑀺𑀓𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀇𑀢𑀺𑀇𑀢𑁄 𑀲𑀤𑁆𑀤𑀸𑀦𑀫𑀢𑁆𑀣𑀼𑀤𑁆𑀥𑀸𑀭𑁄 𑀯𑀼𑀘𑁆𑀘𑀢𑁂 𑁋 𑀢𑀢𑁆𑀣 𑀇𑀢𑀺𑀲𑀤𑁆𑀤𑁄 𑀳𑁂𑀢𑀼𑀧𑀭𑀺𑀲𑀫𑀸𑀧𑀦𑀸𑀤𑀺𑀧𑀤𑀢𑁆𑀣 𑀯𑀺𑀧𑀭𑀺𑀬𑀸𑀬 𑀧𑀓𑀸𑀭𑀸𑀯𑀥𑀸𑀭𑀡 𑀦𑀺𑀤𑀲𑁆𑀲𑀦𑀸𑀤𑀺𑀅𑀦𑁂𑀓𑀢𑁆𑀣𑀧𑁆𑀧𑀪𑁂𑀤𑁄. 𑀢𑀣𑀸 𑀳𑁂𑀲 ‘‘𑀭𑀼𑀧𑁆𑀧𑀢𑀻𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀢𑀲𑁆𑀫𑀸 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀻𑀲𑀼 𑀳𑁂𑀢𑀼𑀅𑀢𑁆𑀣𑁂 𑀤𑀺𑀲𑁆𑀲𑀢𑀺. ‘‘𑀢𑀲𑁆𑀫𑀸𑀢𑀺𑀳 𑀫𑁂 𑀪𑀺𑀓𑁆𑀔𑀯𑁂 𑀥𑀫𑁆𑀫𑀤𑀸𑀬𑀸𑀤𑀸 𑀪𑀯𑀣, 𑀫𑀸 𑀆𑀫𑀺𑀲𑀤𑀸𑀬𑀸𑀤𑀸. 𑀅𑀢𑁆𑀣𑀺 𑀫𑁂 𑀢𑀼𑀫𑁆𑀳𑁂𑀲𑀼 𑀅𑀦𑀼𑀓𑀫𑁆𑀧𑀸, 𑀓𑀺𑀦𑁆𑀢𑀺 𑀫𑁂 𑀲𑀸𑀯𑀓𑀸 𑀥𑀫𑁆𑀫𑀤𑀸𑀬𑀸𑀤𑀸 𑀪𑀯𑁂𑀬𑁆𑀬𑀼𑀁, 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸’’𑀢𑀺𑀆𑀤𑀻𑀲𑀼 𑀧𑀭𑀺𑀲𑀫𑀸𑀧𑀦𑁂. ‘‘𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸 𑀯𑀺𑀲𑀽𑀓𑀤𑀲𑁆𑀲𑀦𑀸 𑀧𑀝𑀺𑀯𑀺𑀭𑀢𑁄’’𑀢𑀺𑀆𑀤𑀻𑀲𑀼 𑀆𑀤𑀺𑀅𑀢𑁆𑀣𑁄. ‘‘𑀫𑀸𑀕𑀡𑁆𑀟𑀺𑀬𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀫𑀪𑀺𑀮𑀸𑀧𑁄’’𑀢𑀺𑀆𑀤𑀻𑀲𑀼 𑀧𑀤𑀢𑁆𑀣𑀯𑀺𑀧𑀭𑀺𑀬𑀸𑀬𑁂. ‘‘𑀇𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀲𑀧𑁆𑀧𑀝𑀺𑀪𑀬𑁄 𑀩𑀸𑀮𑁄, 𑀅𑀧𑁆𑀧𑀝𑀺𑀪𑀬𑁄 𑀧𑀡𑁆𑀟𑀺𑀢𑁄. 𑀲𑀉𑀧𑀤𑁆𑀤𑀯𑁄 𑀩𑀸𑀮𑁄, 𑀅𑀦𑀼𑀧𑀤𑁆𑀤𑀯𑁄 ¶ 𑀧𑀡𑁆𑀟𑀺𑀢𑁄. 𑀲𑀉𑀧𑀲𑀕𑁆𑀕𑁄 𑀩𑀸𑀮𑁄, 𑀅𑀦𑀼𑀧𑀲𑀕𑁆𑀕𑁄 𑀧𑀡𑁆𑀟𑀺𑀢𑁄’’𑀢𑀺𑀆𑀤𑀻𑀲𑀼 𑀧𑀓𑀸𑀭𑁄. ‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸 𑀆𑀤𑀦𑁆𑀤 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀓𑀺𑀁 𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬’’𑀦𑁆𑀢𑀺𑀆𑀤𑀻𑀲𑀼 𑀅𑀯𑀥𑀸𑀭𑀡𑁂. ‘‘𑀅𑀢𑁆𑀣𑀻𑀢𑀺 𑀔𑁄 𑀓𑀘𑁆𑀘𑀸𑀦 𑀅𑀬𑀫𑁂𑀓𑁄 𑀅𑀦𑁆𑀢𑁄, 𑀦𑀢𑁆𑀣𑀻𑀢𑀺 𑀔𑁄 𑀓𑀘𑁆𑀘𑀸𑀦 𑀅𑀬𑀁 𑀤𑀼𑀢𑀺𑀬𑁄 𑀅𑀦𑁆𑀢𑁄’’𑀢𑀺𑀆𑀤𑀻𑀲𑀼 𑀦𑀺𑀤𑀲𑁆𑀲𑀦𑁂. 𑀦𑀺𑀧𑀸𑀢𑀯𑀲𑁂𑀦𑁂𑀯 𑀢𑁂 𑀧𑀬𑁄𑀕𑀸 𑀕𑀳𑁂𑀢𑀩𑁆𑀩𑀸. ‘‘𑀇𑀢𑀸𑀬𑀁 𑀓𑁄𑀥𑀭𑀽𑀧𑁂𑀦𑀸’’𑀢𑀺 𑀏𑀢𑁆𑀣 𑀧𑀦 𑀆𑀔𑁆𑀬𑀸𑀢𑀯𑀲𑁂𑀦 𑀕𑀫𑀦𑁂 𑀇𑀢𑀺𑀲𑀤𑁆𑀤𑁄 𑀤𑀺𑀲𑁆𑀲𑀢𑀺. 𑀅𑀬𑀫𑁂𑀯𑀢𑁆𑀣𑁄 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀦𑀺𑀧𑀸𑀢𑀢𑁆𑀣𑁄 𑀧𑀦 𑀦 𑀇𑀘𑁆𑀙𑀺𑀢𑀩𑁆𑀩𑁄, 𑀯𑀺𑀜𑁆𑀜𑀽𑀦𑀁 𑀅𑀢𑁆𑀣𑀕𑁆𑀕𑀳𑀡𑁂 𑀓𑁄𑀲𑀮𑁆𑀮𑀼𑀧𑀸𑀤𑀦𑀢𑁆𑀣𑀁 𑀓𑁂𑀯𑀮𑀁 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀆𑀕𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀢𑀭𑁄 𑀧𑀦 𑁋

𑀕𑀢𑁆𑀬𑀢𑁆𑀣𑁂 𑀘𑀺𑀫𑀲𑀤𑁆𑀤𑀢𑁆𑀣𑁂, 𑀇𑀢𑁄𑀲𑀤𑁆𑀤𑁄 𑀧𑀯𑀢𑁆𑀢𑀢𑀺;

𑀅𑀦𑁆𑀯𑀺𑀢𑁄’’𑀢𑀺 𑀳𑀺 𑀕𑀢𑁆𑀬𑀢𑁆𑀣𑁂, 𑀧𑀘𑁆𑀘𑀢𑁆𑀢𑀯𑀘𑀦𑀁 𑀪𑀯𑁂.

𑀇𑀫𑀲𑀤𑁆𑀤𑀲𑁆𑀲 𑀅𑀢𑁆𑀣𑀫𑁆𑀳𑀺, 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀪𑀯𑁂;

‘‘𑀇𑀢𑁄 𑀲𑀸 𑀤𑀓𑁆𑀔𑀺𑀡𑀸 𑀤𑀺𑀲𑀸’’, 𑀇𑀢𑀺𑀆𑀤𑀻𑀲𑀼 𑀧𑀸𑀴𑀺𑀲𑀼.

𑀕𑀢𑁆𑀬𑀢𑁆𑀣𑁄 𑀇𑀘𑁆𑀙𑀺𑀢𑁄 𑀏𑀢𑁆𑀣, 𑀇𑀢𑀭𑀢𑁆𑀣𑁄 𑀦 𑀇𑀘𑁆𑀙𑀺𑀢𑁄;

𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑀸 𑀯𑀼𑀢𑁆𑀢𑁄, 𑀓𑁄𑀲𑀮𑁆𑀮𑀢𑁆𑀣𑀸𑀬 𑀯𑀺𑀜𑁆𑀜𑀼𑀦𑀁.

𑀇𑀥 𑀧𑀦 𑀲𑀫𑀬𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑀁 𑀲𑀦𑀺𑀩𑁆𑀩𑀘𑀦𑀁 𑀯𑀢𑁆𑀢𑀩𑁆𑀩𑀫𑁆𑀧𑀺 𑀅𑀯𑀢𑁆𑀯𑀸 𑀉𑀧𑀭𑀺 𑀅𑀬𑀥𑀸𑀢𑀼𑀯𑀺𑀲𑀬𑁂𑀬𑁂𑀯 𑀯𑀓𑁆𑀔𑀸𑀫 𑀇 𑀏 𑀅𑀬𑀥𑀸𑀢𑀼𑀯𑀲𑁂𑀦 𑀢𑀺𑀥𑀸𑀢𑀼𑀫𑀬𑀢𑁆𑀢𑀸 𑀲𑀫𑀬𑀲𑀤𑁆𑀤𑀲𑁆𑀲. 𑀢𑀢𑁆𑀭 𑀇𑀢𑀻𑀢𑀺 𑀇𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢𑀧𑀤𑀲𑁆𑀲 𑀘 ‘‘𑀏𑀢𑀺, 𑀉𑀤𑁂𑀢𑀻’’𑀢𑀺𑀆𑀤𑀻𑀦𑀜𑁆𑀘 𑀏𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢𑀧𑀤𑀸𑀦𑀁 𑀅𑀜𑁆𑀜𑁂𑀲𑀜𑁆𑀘 𑀏𑀯𑀭𑀽𑀧𑀸𑀦𑀁 𑀧𑀤𑀫𑀸𑀮𑀸 𑀬𑀣𑀸𑀭𑀳𑀁 𑀬𑁂𑀪𑀼𑀬𑁆𑀬𑁂𑀦 𑀅𑀢𑁆𑀢𑀦𑁄𑀧𑀤𑀸𑀦𑀺 𑀯𑀚𑁆𑀚𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀸. 𑀈𑀤𑀺𑀲𑁂𑀲𑀼 𑀳𑀺 𑀞𑀸𑀦𑁂𑀲𑀼 𑀤𑀼𑀓𑁆𑀓𑀭𑀸 𑀓𑁆𑀭𑀺𑀬𑀸𑀧𑀤𑀫𑀸𑀮𑀸. 𑀬𑀲𑁆𑀫𑀸 𑀧𑀦 𑀇𑀫𑀲𑁆𑀫𑀺𑀁 𑀧𑀓𑀭𑀡𑁂 𑀲𑀼𑀓𑀭𑀸 𑀘 𑀤𑀼𑀓𑁆𑀓𑀭𑀸 𑀘 𑀢𑁆𑀬𑀦𑁆𑀢𑀧𑀤𑀫𑀸𑀮𑀸 𑀚𑀸𑀦𑀺𑀢𑀩𑁆𑀩𑀸 ¶ , 𑀢𑀲𑁆𑀫𑀸 𑀪𑀽𑀯𑀸𑀤𑀺𑀕𑀡𑀸𑀤𑀻𑀲𑀼 𑀅𑀝𑁆𑀞𑀲𑀼 𑀕𑀡𑁂𑀲𑀼 𑀯𑀺𑀳𑀺𑀢𑁂𑀳𑀺 𑀙𑀦𑁆𑀦𑀯𑀼𑀢𑀺𑀬𑀸 𑀯𑀘𑀦𑁂𑀳𑀺 𑀲𑀩𑁆𑀩𑀲𑀸𑀥𑀸𑀭𑀡𑀁 𑀅𑀲𑀩𑁆𑀩𑀲𑀸𑀥𑀸𑀭𑀡𑀜𑁆𑀘 𑀧𑀤𑀫𑀸𑀮𑀸𑀦𑀬𑀁 𑀩𑁆𑀭𑀽𑀫 𑁋

𑀅𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢-𑀧𑀤𑀸𑀦𑀁 𑀧𑀦𑁆𑀢𑀺𑀬𑁄 𑀩𑀼𑀥𑁄;

𑀪𑀯𑀢𑀺 𑀭𑀼𑀦𑁆𑀥𑀢𑀸𑀤𑀻𑀦𑀁, 𑀬𑁄𑀚𑁂 𑀲𑀩𑁆𑀩𑀢𑁆𑀣 𑀲𑀩𑁆𑀩𑀣𑀸.

𑀇𑀢𑀺 𑀏𑀢𑀻’’𑀢𑀺 𑀘𑁂𑀢𑁂𑀲𑀁, 𑀧𑀤𑀸𑀦𑀁 𑀧𑀦 𑀧𑀦𑁆𑀢𑀺𑀬𑁄;

𑀲𑀼𑀤𑁆𑀥𑀲𑁆𑀲𑀭𑀧𑀼𑀩𑁆𑀩𑀓𑀸𑀦𑀁, 𑀬𑁄𑀚𑁂 𑀯𑀺𑀜𑁆𑀜𑀽 𑀬𑀣𑀸𑀭𑀳𑀁.

𑀆𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢-𑀧𑀤𑀸𑀦𑀜𑁆𑀘𑀸𑀧𑀺 𑀧𑀦𑁆𑀢𑀺𑀬𑁄;

‘‘𑀬𑀸𑀢𑀺 𑀲𑀼𑀡𑀸𑀢𑀺 𑀅𑀲𑁆𑀦𑀸-𑀢𑀺’’ 𑀇𑀘𑁆𑀘𑀸𑀤𑀻𑀦𑀁 𑀬𑀣𑀸𑀭𑀳𑀁.

𑀇𑀯𑀡𑁆𑀡𑀸𑀦𑀦𑁆𑀢𑀭𑀢𑁆𑀬𑀦𑁆𑀢-𑀧𑀤𑀸𑀦𑀫𑀧𑀺 𑀧𑀸𑀴𑀺𑀬𑁄;

𑀬𑁄𑀚𑁂 ‘‘𑀭𑀼𑀦𑁆𑀥𑀺𑀢𑀺 𑀭𑀼𑀦𑁆𑀥𑀻𑀢𑀺’’-𑀇𑀘𑁆𑀘𑀸𑀤𑀻𑀦𑀁 𑀬𑀣𑀸𑀭𑀳𑀁.

𑀉𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢-𑀲𑀼𑀢𑀺𑀇𑀢𑀺 𑀧𑀤𑀲𑁆𑀲 𑀘;

𑀧𑁂𑀭𑀡𑀢𑁆𑀣𑁂 𑀧𑀯𑀢𑁆𑀢𑀲𑁆𑀲, 𑀬𑁄𑀚𑁂 𑀫𑀸𑀮𑀁 𑀬𑀣𑀸𑀭𑀳𑀁.

𑀏𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢-𑀧𑀤𑀸𑀦𑀫𑁆𑀧𑀺 𑀬𑀣𑀸𑀭𑀳𑀁;

‘‘𑀚𑁂𑀢𑀺 𑀭𑀼𑀦𑁆𑀥𑁂𑀢𑀺 𑀓𑀸𑀭𑁂𑀢𑀺, 𑀓𑀸𑀭𑀸𑀧𑁂𑀢𑀻’’𑀢𑀺𑀆𑀤𑀻𑀦𑀁.

𑀑𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢-𑀧𑀤𑀸𑀦𑀫𑁆𑀧𑀺 𑀧𑀤𑀓𑁆𑀓𑀫𑁂;

‘‘𑀓𑀭𑁄𑀢𑀺 𑀪𑁄𑀢𑀺 𑀳𑁄𑀢𑀻’’𑀢𑀺-𑀆𑀤𑀻𑀦𑀁 𑀬𑀼𑀢𑁆𑀢𑀺𑀢𑁄𑀯𑀤𑁂;

𑀇𑀘𑁆𑀘𑁂𑀯𑀁 𑀲𑀢𑁆𑀢𑀥𑀸 𑀯𑀼𑀢𑁆𑀢𑁄, 𑀧𑀤𑀫𑀸𑀮𑀸𑀦𑀬𑁄 𑀫𑀬𑀸;

𑀇𑀢𑁄 𑀫𑀼𑀢𑁆𑀢𑁄 𑀦𑀬𑁄 𑀦𑀸𑀫, 𑀦𑀢𑁆𑀣𑀺 𑀓𑁄𑀘𑀺 𑀓𑁆𑀭𑀺𑀬𑀸𑀧𑀤𑁂.

‘‘𑀆𑀤𑀢𑁆𑀢𑁂 𑀓𑀼𑀭𑀼𑀢𑁂 𑀧𑁂𑀢𑁂’’, 𑀇𑀘𑁆𑀘𑀸𑀤𑀺 𑀦𑀬𑀤𑀲𑁆𑀲𑀦𑀸;

𑀬𑀣𑀸𑀭𑀳𑀁 𑀬𑀼𑀢𑁆𑀢𑀺𑀢𑁄𑀢𑀺, 𑀯𑀘𑀦𑀁 𑀏𑀢𑁆𑀣 𑀪𑀸𑀲𑀺𑀢𑀁.

𑀇𑀤𑀸𑀦𑀺 𑀇𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢𑀧𑀤𑀲𑁆𑀲 𑀓𑀫𑁄 𑀯𑀼𑀘𑁆𑀘𑀢𑁂 𑁋 𑀇𑀢𑀺, 𑀇𑀦𑁆𑀢𑀺. 𑀇𑀲𑀺, 𑀇𑀣. 𑀇𑀫𑀺, 𑀇𑀫. 𑀅𑀧𑀭𑀺𑀧𑀼𑀡𑁆𑀡𑁄 𑀯𑀢𑁆𑀢𑀫𑀸𑀦𑀸𑀦𑀬𑁄. 𑀇𑀢𑀼, 𑀇𑀦𑁆𑀢𑀼. 𑀇𑀳𑀺, 𑀇𑀣. 𑀇𑀫𑀺, 𑀇𑀫. 𑀅𑀧𑀭𑀺𑀧𑀼𑀡𑁆𑀡𑁄 𑀧𑀜𑁆𑀘𑀫𑀻𑀦𑀬𑁄. 𑀏𑀢𑁆𑀣 𑀘 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀸𑀲𑀦𑀸𑀦𑀼𑀭𑀽𑀧𑀪𑀸𑀯𑀲𑁆𑀲 𑀇𑀫𑀸𑀦𑀺 𑀲𑀸𑀥𑀓𑀧𑀤𑀸𑀦𑀺 ¶ ‘‘𑀯𑁂𑀢𑀺, 𑀅𑀧𑁂𑀢𑀺, 𑀅𑀦𑁆𑀯𑁂𑀢𑀻’’𑀢𑀺. 𑀢𑀢𑁆𑀣 𑀯𑀺 𑀇𑀢𑀺 𑀯𑁂𑀢𑀺. 𑀯𑀺𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄, 𑀇𑀢𑀺𑀲𑀤𑁆𑀤𑁄 𑀳𑁂𑀢𑁆𑀣 𑀕𑀫𑀦𑀁 𑀩𑁄𑀥𑁂𑀢𑀺. 𑀢𑀣𑀸 𑀅𑀧 𑀇𑀢𑀺 𑀅𑀧𑁂𑀢𑀺. 𑀅𑀧𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀼 𑀇𑀢𑀺 𑀅𑀦𑁆𑀯𑁂𑀢𑀺. 𑀅𑀦𑀼𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀕𑀭𑀽 𑀧𑀦 𑀅𑀦𑀼 𑀏𑀢𑀺 𑀅𑀦𑁆𑀯𑁂𑀢𑀻𑀢𑀺 𑀯𑀤𑀦𑁆𑀢𑀺. 𑀢𑀁 𑁋

‘‘𑀬𑀣𑀸 𑀆𑀭𑀜𑁆𑀜𑀓𑀁 𑀦𑀸𑀕𑀁, 𑀤𑀦𑁆𑀢𑀺𑀁 𑀅𑀦𑁆𑀯𑁂𑀢𑀺 𑀳𑀢𑁆𑀣𑀺𑀦𑀻;

𑀚𑁂𑀲𑁆𑀲𑀦𑁆𑀢𑀁 𑀕𑀺𑀭𑀺𑀤𑀼𑀕𑁆𑀕𑁂𑀲𑀼, 𑀲𑀫𑁂𑀲𑀼 𑀯𑀺𑀲𑀫𑁂𑀲𑀼 𑀘;

𑀏𑀯𑀁 𑀢𑀁 𑀅𑀦𑀼𑀕𑀘𑁆𑀙𑀸𑀫𑀺, 𑀧𑀼𑀢𑁆𑀢𑁂 𑀆𑀤𑀸𑀬 𑀧𑀘𑁆𑀙𑀢𑁄’’𑀢𑀺.

𑀇𑀫𑀸𑀬 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀺 ‘‘𑀚𑁂𑀲𑁆𑀲𑀦𑁆𑀢𑀁 𑀅𑀦𑁆𑀯𑁂𑀢𑀻’’𑀢𑀺 𑀯𑀘𑀦𑀢𑁄 ‘‘𑀅𑀦𑀼𑀕𑀘𑁆𑀙𑀸𑀫𑀻’’𑀢𑀺 𑀯𑀘𑀦𑀢𑁄 𑀘. 𑀢𑀣𑀸 𑀳𑀺 𑀏𑀢𑀺𑀲𑀤𑁆𑀤𑁄 𑀬𑀢𑁆𑀣 𑀘𑁂 𑀇𑀭𑀺𑀬𑀸𑀧𑀣𑀯𑀸𑀘𑀓𑁄, 𑀢𑀢𑁆𑀣 𑀆𑀕𑀫𑀦𑀁𑀬𑁂𑀯 𑀚𑁄𑀢𑁂𑀢𑀺, 𑀦 𑀕𑀫𑀦𑀁, 𑀢𑀲𑁆𑀫𑀸 𑀆𑀕𑀫𑀦𑀢𑁆𑀣𑀲𑁆𑀲 𑀅𑀬𑀼𑀢𑁆𑀢𑀺𑀢𑁄 𑀕𑀫𑀦𑀢𑁆𑀣𑀲𑁆𑀲 𑀘 𑀬𑀼𑀢𑁆𑀢𑀺𑀢𑁄 𑀯𑀺 𑀇𑀢𑀺𑀆𑀤𑀺𑀦𑀸 𑀙𑁂𑀤𑁄 𑀜𑁂𑀬𑁆𑀬𑁄. 𑀏𑀢𑁂𑀲𑀜𑁆𑀘 𑀇𑀢𑀺𑀲𑀤𑁆𑀤𑀯𑀲𑁂𑀦 𑀓𑀢𑀙𑁂𑀤𑀸𑀦𑀁 𑀅𑀢𑁆𑀣𑀺𑀪𑀸𑀯𑀁 𑀬𑀼𑀢𑁆𑀢𑀺𑀪𑀸𑀯𑀜𑁆𑀘 ‘‘𑀇𑀢𑀸𑀬𑀁 𑀓𑁄𑀥𑀭𑀽𑀧𑁂𑀦𑀸’’𑀢𑀺 𑀧𑀸𑀴𑀺𑀬𑁂𑀯 𑀲𑀸𑀥𑁂𑀢𑀺, 𑀢𑀲𑁆𑀫𑀸𑀬𑁂𑀯 ‘‘𑀅𑀦𑀼 𑀇𑀢𑀺, 𑀅𑀦𑀼 𑀇𑀦𑁆𑀢𑀺, 𑀅𑀦𑀼 𑀇𑀲𑀻’’𑀢𑀺𑀆𑀤𑀺𑀦𑀸 ‘‘𑀅𑀦𑁆𑀯𑁂𑀢𑀻’’𑀢𑀺𑀆𑀤𑀻𑀦𑀁 𑀙𑁂𑀤𑁂 𑀮𑀩𑁆𑀪𑀫𑀸𑀦𑀦𑀬𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀯𑀢𑁆𑀢𑀫𑀸𑀦𑀸𑀧𑀜𑁆𑀘𑀫𑀻𑀦𑀬𑁄 𑀧𑀭𑀲𑁆𑀲𑀧𑀤𑀯𑀲𑁂𑀦 𑀤𑀲𑁆𑀲𑀺𑀢𑁄. 𑀲𑀢𑁆𑀢𑀫𑀻𑀭𑀽𑀧𑀸𑀤𑀻𑀦𑀺 𑀲𑀩𑁆𑀩𑀣𑀸 𑀅𑀧𑁆𑀧𑀲𑀺𑀤𑁆𑀥𑀸𑀦𑀺.

𑀇𑀫𑀸𑀦𑀺 𑀧𑀦 𑀪𑀯𑀺𑀲𑁆𑀲𑀦𑁆𑀢𑀺𑀬𑀸 𑀭𑀽𑀧𑀸𑀦𑀺, 𑀲𑀺𑀢𑁆𑀢𑀸 𑀢𑁂 𑀮𑀳𑀼𑀫𑁂𑀲𑁆𑀲𑀢𑀺. 𑀇𑀲𑁆𑀲𑀢𑀺, 𑀇𑀲𑁆𑀲𑀦𑁆𑀢𑀺. 𑀇𑀲𑁆𑀲𑀲𑀺, 𑀇𑀲𑁆𑀲𑀣. 𑀇𑀲𑁆𑀲𑀸𑀫𑀺, 𑀇𑀲𑁆𑀲𑀸𑀫. 𑀇𑀲𑁆𑀲𑀢𑁂, 𑀇𑀲𑁆𑀲𑀦𑁆𑀢𑁂. 𑀇𑀲𑁆𑀲𑀲𑁂, 𑀇𑀲𑁆𑀲𑀯𑁆𑀳𑁂. 𑀇𑀲𑁆𑀲𑀁, 𑀇𑀲𑁆𑀲𑀸𑀫𑁆𑀳𑁂. 𑀅𑀲𑀩𑁆𑀩𑀥𑀸𑀢𑀼𑀓𑀢𑁆𑀢𑁂𑀧𑀺 𑀲𑀼𑀤𑁆𑀥𑀲𑁆𑀲𑀭𑀢𑁆𑀢𑀸 𑀥𑀸𑀢𑀼𑀲𑁆𑀲 𑀇𑀓𑀸𑀭𑀸𑀕𑀫𑁄 𑀦 𑀮𑀩𑁆𑀪𑀢𑀺. 𑀧𑀭𑀺𑀧𑀼𑀡𑁆𑀡𑁄 𑀪𑀯𑀺𑀲𑁆𑀲𑀦𑁆𑀢𑀻𑀦𑀬𑁄.

𑀅𑀣 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀸 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺, 𑀇𑀲𑁆𑀲𑀸, 𑀇𑀲𑁆𑀲𑀁𑀲𑀼. 𑀇𑀲𑁆𑀲𑁂, 𑀇𑀲𑁆𑀲𑀣. 𑀇𑀲𑁆𑀲𑀁, 𑀇𑀲𑁆𑀲𑀫𑁆𑀳𑀸. 𑀇𑀲𑁆𑀲𑀣, 𑀇𑀲𑁆𑀲𑀺𑀲𑀼. 𑀇𑀲𑁆𑀲𑀲𑁂, 𑀇𑀲𑁆𑀲𑀯𑁆𑀳𑁂. 𑀇𑀲𑁆𑀲𑀁, 𑀇𑀲𑁆𑀲𑀸𑀫𑁆𑀳𑀲𑁂. 𑀓𑀸𑀮𑀸𑀢𑀺𑀧𑀢𑁆𑀢𑀺𑀪𑀸𑀯𑁂 ¶ 𑀘 𑀅𑀲𑀩𑁆𑀩𑀥𑀸𑀢𑀼𑀓𑀢𑁆𑀢𑁂 𑀘 𑀲𑀦𑁆𑀢𑁂𑀧𑀺 𑀲𑀼𑀤𑁆𑀥𑀲𑁆𑀲𑀭𑀢𑁆𑀢𑀸 𑀥𑀸𑀢𑀼𑀲𑁆𑀲 𑀅𑀓𑀸𑀭𑀺𑀓𑀸𑀭𑀸𑀕𑀫𑁄 𑀦 𑀮𑀩𑁆𑀪𑀢𑀺 𑀅𑀦𑁂𑀓𑀦𑁆𑀢𑀺𑀓𑀢𑁆𑀢𑀸 𑀯𑀸 𑀅𑀦𑀼𑀧𑀧𑀦𑁆𑀦𑀢𑁆𑀢𑀸 𑀘 𑀅𑀓𑀸𑀭𑀸𑀕𑀫𑁄 𑀦 𑀳𑁄𑀢𑀺. 𑀤𑁆𑀯𑀺𑀦𑁆𑀦𑀜𑁆𑀳𑁂𑀢𑁆𑀣 𑀲𑀼𑀤𑁆𑀥𑀲𑁆𑀲𑀭𑀸𑀦𑀁 𑀅𑀦𑀦𑁆𑀢𑀭𑀺𑀓𑀸𑀦𑀁 𑀏𑀓𑀢𑁄𑀲𑀦𑁆𑀦𑀺𑀧𑀸𑀢𑁄 𑀅𑀦𑀼𑀧𑀧𑀢𑁆𑀢𑀺. 𑀧𑀭𑀺𑀧𑀼𑀡𑁆𑀡𑁄 𑀓𑀸𑀮𑀸𑀢𑀺𑀧𑀢𑁆𑀢𑀺𑀦𑀬𑁄.

𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀲𑀸𑀝𑁆𑀞𑀓𑀣𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀲𑁄𑀢𑀽𑀦𑀁 𑀧𑀬𑁄𑀕𑀢𑁆𑀣𑁂𑀲𑀼 𑀧𑀭𑀫𑀓𑁄𑀲𑀮𑁆𑀮𑀚𑀦𑀦𑀢𑁆𑀣𑀁 ‘‘𑀦𑀦𑀼 𑀢𑁂 𑀲𑀼𑀢𑀁 𑀩𑁆𑀭𑀸𑀳𑁆𑀫𑀡 𑀪𑀜𑁆𑀜𑀫𑀸𑀦𑁂, 𑀤𑁂𑀯𑀸 𑀦 𑀇𑀲𑁆𑀲𑀦𑁆𑀢𑀺 𑀧𑀼𑀭𑀺𑀲𑀧𑀭𑀓𑁆𑀓𑀫𑀲𑁆𑀲𑀸’’𑀢𑀺 𑀧𑀸𑀴𑀺𑀢𑁄 𑀦𑀬𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑀺 𑀪𑀯𑀺𑀲𑁆𑀲𑀦𑁆𑀢𑀺𑀬𑀸 𑀭𑀽𑀧𑁂𑀳𑀺 𑀲𑀩𑁆𑀩𑀲𑁄 𑀲𑀫𑀸𑀦𑀸𑀦𑀺 𑀅𑀲𑀫𑀸𑀦𑀢𑁆𑀣𑀸𑀦𑀺 𑀯𑀢𑁆𑀢𑀫𑀸𑀦𑀺𑀓𑀭𑀽𑀧𑀸𑀦𑀺 𑀘 𑀈𑀲𑀓𑀁 𑀅𑀜𑁆𑀜𑀫𑀜𑁆𑀜𑀁 𑀲𑀫𑀸𑀦𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀻𑀓𑀸𑀮𑀸𑀢𑀺𑀧𑀢𑁆𑀢𑀻𑀦𑀁 𑀭𑀽𑀧𑀸𑀦𑀺 𑀘 𑀧𑀓𑀸𑀲𑀬𑀺𑀲𑁆𑀲𑀸𑀫 𑁋 𑀯𑀢𑁆𑀢𑀫𑀸𑀦𑀸𑀯𑀲𑁂𑀦 𑀢𑀸𑀯 ‘‘𑀇𑀲𑁆𑀲𑀢𑀺, 𑀇𑀲𑁆𑀲𑀦𑁆𑀢𑀺. 𑀇𑀲𑁆𑀲𑀲𑀺, 𑀇𑀲𑁆𑀲𑀣𑀸’’𑀢𑀺 𑀲𑀩𑁆𑀩𑀁 𑀬𑁄𑀚𑁂𑀢𑀩𑁆𑀩𑀁. 𑀅𑀢𑁆𑀣𑁄 𑀧𑀦 ‘‘𑀇𑀲𑁆𑀲𑀁 𑀓𑀭𑁄𑀢𑀻’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑁄. 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀣𑁂 𑀪𑀯𑀺𑀲𑁆𑀲𑀦𑁆𑀢𑀻𑀯𑀲𑁂𑀦 ‘‘𑀇𑀲𑁆𑀲𑀺𑀲𑁆𑀲𑀢𑀺, 𑀇𑀲𑁆𑀲𑀺𑀲𑁆𑀲𑀦𑁆𑀢𑀺. 𑀇𑀲𑁆𑀲𑀺𑀲𑁆𑀲𑀲𑀺, 𑀇𑀲𑁆𑀲𑀺𑀲𑁆𑀲𑀣𑀸’’𑀢𑀺 𑀧𑀭𑀺𑀧𑀼𑀡𑁆𑀡𑀁 𑀬𑁄𑀚𑁂𑀢𑀩𑁆𑀩𑀁. 𑀅𑀢𑁆𑀣𑁄 𑀧𑀦 ‘‘𑀇𑀲𑁆𑀲𑀁 𑀓𑀭𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑁄. 𑀓𑀸𑀮𑀸𑀢𑀺𑀧𑀢𑁆𑀢𑀺𑀯𑀲𑁂𑀦 𑀧𑀦 ‘‘𑀇𑀲𑁆𑀲𑀺𑀲𑁆𑀲𑀸, 𑀇𑀲𑁆𑀲𑀺𑀲𑁆𑀲𑀁𑀲𑀼. 𑀇𑀲𑁆𑀲𑀺𑀲𑁆𑀲𑁂, 𑀇𑀲𑁆𑀲𑀺𑀲𑁆𑀲𑀣𑀸’’𑀢𑀺 𑀧𑀭𑀺𑀧𑀼𑀡𑁆𑀡𑀁 𑀬𑁄𑀚𑁂𑀢𑀩𑁆𑀩𑀁, 𑀅𑀢𑁆𑀣𑁄 𑀧𑀦 ‘‘𑀇𑀲𑁆𑀲𑀁 𑀅𑀓𑀭𑀺𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑁄. 𑀥𑀸𑀢𑁆𑀯𑀦𑁆𑀢𑀭𑀯𑀲𑁂𑀦 𑀲𑀁𑀲𑀦𑁆𑀤𑀦𑀸𑀦𑀬𑁄𑀬𑀁.

𑀇𑀤𑀸𑀦𑀺 𑀏𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢𑀧𑀤𑀲𑁆𑀲 𑀓𑀫𑁄 𑀯𑀼𑀘𑁆𑀘𑀢𑁂 𑁋

𑀏𑀢𑀺, 𑀏𑀦𑁆𑀢𑀺. 𑀏𑀲𑀺, 𑀏𑀣. 𑀏𑀫𑀺, 𑀏𑀫.

𑀏𑀢𑀼, 𑀏𑀦𑁆𑀢𑀼. 𑀏𑀳𑀺, 𑀏𑀣. 𑀏𑀫𑀺, 𑀏𑀫.

𑀦 𑀘 𑀅𑀧𑁆𑀧𑀢𑁆𑀯𑀸 𑀤𑀼𑀓𑁆𑀔𑀦𑁆𑀢𑀁, 𑀯𑀺𑀲𑁆𑀲𑀸𑀲𑀁 𑀏𑀬𑁆𑀬 𑀧𑀡𑁆𑀟𑀺𑀢𑁄;

𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑁆𑀯𑀸, 𑀯𑁂𑀤𑁂𑀳𑀲𑁆𑀲 𑀬𑀲𑀲𑁆𑀲𑀺𑀦𑁄;

𑀬𑀤𑀸 𑀢𑁂 𑀧𑀳𑀺𑀡𑀺𑀲𑁆𑀲𑀸𑀫𑀺, 𑀢𑀤𑀸 𑀏𑀬𑁆𑀬𑀸𑀲𑀺 𑀔𑀢𑁆𑀢𑀺𑀬.

𑀏𑀬𑁆𑀬 ¶ , 𑀏𑀬𑁆𑀬𑀼𑀁. 𑀏𑀬𑁆𑀬𑀸𑀲𑀺, 𑀏𑀬𑁆𑀬𑀸𑀣. 𑀏𑀬𑁆𑀬𑀸𑀫𑀺, 𑀏𑀬𑁆𑀬𑀸𑀫. 𑀏𑀣, 𑀏𑀭𑀁. 𑀏𑀣𑁄, 𑀏𑀬𑁆𑀬𑀸𑀯𑁆𑀳𑁄. 𑀏𑀬𑁆𑀬𑀁, 𑀏𑀬𑁆𑀬𑀸𑀫𑁆𑀳𑁂.

𑀲𑁄 𑀧𑀼𑀭𑀺𑀲𑁄 𑀏𑀬𑁆𑀬, 𑀢𑁂 𑀏𑀬𑁆𑀬𑀼𑀁. 𑀢𑁆𑀯𑀁 𑀏𑀬𑁆𑀬𑀸𑀲𑀺, 𑀢𑀼𑀫𑁆𑀳𑁂 𑀏𑀬𑁆𑀬𑀸𑀣. 𑀅𑀳𑀁 𑀏𑀬𑁆𑀬𑀸𑀫𑀺, 𑀫𑀬𑀁 𑀏𑀬𑁆𑀬𑀸𑀫. 𑀲𑁄 𑀧𑀼𑀭𑀺𑀲𑁄 𑀏𑀣, 𑀢𑁂 𑀏𑀭𑀁. 𑀢𑁆𑀯𑀁 𑀏𑀣𑁄, 𑀢𑀼𑀫𑁆𑀳𑁂 𑀏𑀬𑁆𑀬𑀸𑀯𑁆𑀳𑁄. 𑀅𑀳𑀁 𑀏𑀬𑁆𑀬𑀁, 𑀫𑀬𑀁 𑀏𑀬𑁆𑀬𑀸𑀫𑁆𑀳𑁂.

𑀧𑀭𑁄𑀓𑁆𑀔𑀸𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀭𑀽𑀧𑀸𑀦𑀺 𑀲𑀩𑁆𑀩𑀲𑁄 𑀅𑀧𑁆𑀧𑀲𑀺𑀤𑁆𑀥𑀸𑀦𑀺.

𑀏𑀲𑁆𑀲𑀢𑀺, 𑀏𑀲𑁆𑀲𑀦𑁆𑀢𑀺. 𑀏𑀲𑁆𑀲𑀲𑀺, 𑀏𑀲𑁆𑀲𑀣. 𑀏𑀲𑁆𑀲𑀸𑀫𑀺, 𑀏𑀲𑁆𑀲𑀸𑀫. 𑀏𑀲𑁆𑀲𑀢𑁂, 𑀏𑀲𑁆𑀲𑀦𑁆𑀢𑁂. 𑀏𑀲𑁆𑀲𑀲𑁂, 𑀏𑀲𑁆𑀲𑀯𑁆𑀳𑁂. 𑀏𑀲𑁆𑀲𑀁, 𑀏𑀲𑁆𑀲𑀸𑀫𑁆𑀳𑁂.

𑀲𑀫𑁆𑀫𑁄𑀤𑀫𑀸𑀦𑀸 𑀕𑀘𑁆𑀙𑀦𑁆𑀢𑀺, 𑀚𑀸𑀮𑀫𑀸𑀤𑀸𑀬 𑀧𑀓𑁆𑀔𑀺𑀦𑁄;

𑀬𑀤𑀸 𑀢𑁂 𑀯𑀺𑀯𑀤𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀏𑀳𑀺𑀦𑁆𑀢𑀺 𑀫𑁂 𑀯𑀲𑀁.

‘‘𑀅𑀪𑀺𑀤𑁄𑀲𑀕𑀢𑁄 𑀇𑀤𑀸𑀦𑀺 𑀏𑀳𑀻’’𑀢𑀺 𑀯𑀘𑀦𑀤𑀲𑁆𑀲𑀦𑀢𑁄 𑀅𑀧𑀭𑀸𑀦𑀺𑀧𑀺 𑀪𑀯𑀺𑀲𑁆𑀲𑀦𑁆𑀢𑀻𑀭𑀽𑀧𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀺.

𑀏𑀳𑀺𑀢𑀺, 𑀏𑀳𑀺𑀦𑁆𑀢𑀺. 𑀏𑀳𑀺𑀲𑀺, 𑀏𑀳𑀺𑀣. 𑀏𑀳𑀺𑀫𑀺, 𑀏𑀳𑀺𑀫. 𑀏𑀳𑀺𑀢𑁂, 𑀏𑀳𑀺𑀦𑁆𑀢𑁂. 𑀏𑀳𑀺𑀲𑁂, 𑀏𑀳𑀺𑀯𑁆𑀳𑁂. 𑀏𑀳𑀺𑀲𑁆𑀲𑀁, 𑀏𑀳𑀺𑀲𑁆𑀲𑀸𑀫𑁆𑀳𑁂.

𑀏𑀲𑁆𑀲𑀸, 𑀏𑀲𑁆𑀲𑀁𑀲𑀼. 𑀏𑀲𑁆𑀲𑁂, 𑀏𑀲𑁆𑀲𑀣. 𑀏𑀲𑁆𑀲𑀁 𑀏𑀲𑁆𑀲𑀸𑀫𑁆𑀳𑀸. 𑀏𑀲𑁆𑀲𑀣, 𑀏𑀲𑁆𑀲𑀺𑀲𑀼. 𑀏𑀲𑁆𑀲𑀲𑁂, 𑀏𑀲𑁆𑀲𑀯𑁆𑀳𑁂. 𑀏𑀲𑁆𑀲𑀺𑀁, 𑀏𑀲𑁆𑀲𑀸𑀫𑁆𑀳𑀲𑁂.

𑀅𑀣𑀸𑀧𑀭𑁄𑀧𑀺 𑀏𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢𑀧𑀤𑀓𑁆𑀓𑀫𑁄 𑀪𑀯𑀢𑀺;

𑀉𑀤𑁂𑀢𑀺, 𑀉𑀤𑁂𑀦𑁆𑀢𑀺; 𑀉𑀤𑁂𑀲𑀺, 𑀉𑀤𑁂𑀣; 𑀉𑀤𑁂𑀫𑀺, 𑀉𑀤𑁂𑀫.

𑀉𑀤𑁂𑀢𑀼, 𑀉𑀤𑁂𑀦𑁆𑀢𑀼. 𑀉𑀤𑁂𑀳𑀺, 𑀉𑀤𑁂𑀣. 𑀉𑀤𑁂𑀫𑀺, 𑀉𑀤𑁂𑀫, 𑀉𑀤𑀸𑀫𑀲𑁂.

𑀉𑀤𑁂𑀬𑁆𑀬, 𑀉𑀤𑁂𑀬𑁆𑀬𑀼𑀁. 𑀲𑁂𑀲𑀁 𑀦𑁂𑀬𑁆𑀬𑀁. 𑀉𑀤𑀺𑀲𑁆𑀲𑀢𑀺, 𑀉𑀤𑀺𑀲𑁆𑀲𑀦𑁆𑀢𑀺. 𑀲𑁂𑀲𑀁 𑀦𑁂𑀬𑁆𑀬𑀁. 𑀉𑀤𑀺𑀲𑁆𑀲𑀸, 𑀉𑀤𑀺𑀲𑁆𑀲𑀁𑀲𑀼. 𑀲𑁂𑀲𑀁 𑀦𑁂𑀬𑁆𑀬𑀁.

𑀇𑀫𑀸𑀦𑀺 𑀲𑀼𑀤𑁆𑀥𑀲𑁆𑀲𑀭𑀥𑀸𑀢𑀼𑀭𑀽𑀧𑀸𑀦𑀺.

𑀓𑀓𑀸𑀭𑀦𑁆𑀢𑀥𑀸𑀢𑀼

𑀓𑀼 ¶ 𑀲𑀤𑁆𑀤𑁂 𑀓𑁂 𑀘. 𑀓𑁄𑀢𑀺, 𑀓𑀯𑀢𑀺, 𑀓𑀸𑀬𑀢𑀺, 𑀏𑀯𑀁 𑀓𑀢𑁆𑀢𑀼𑀧𑀤𑀸𑀦𑀺 𑀪𑀯𑀦𑁆𑀢𑀺. 𑀓𑀼𑀬𑁆𑀬𑀢𑀺, 𑀓𑀺𑀬𑁆𑀬𑀢𑀺, 𑀏𑀯𑀁 𑀓𑀫𑁆𑀫𑀧𑀤𑀸𑀦𑀺. 𑀓𑀸𑀦𑀦𑀁, 𑀓𑀩𑁆𑀩𑀁, 𑀚𑀸𑀢𑀓𑀁, 𑀏𑀯𑀁 𑀦𑀸𑀫𑀺𑀓𑀧𑀤𑀸𑀦𑀺. 𑀓𑀼𑀢𑁆𑀯𑀸, 𑀓𑀼𑀢𑁆𑀯𑀸𑀦, 𑀓𑀯𑀺𑀢𑁆𑀯𑀸, 𑀓𑀯𑀺𑀢𑁆𑀯𑀸𑀦, 𑀓𑀸𑀯𑀺𑀢𑁆𑀯𑀸, 𑀓𑀸𑀯𑀺𑀢𑁆𑀯𑀸𑀦, 𑀓𑀸𑀬𑀺𑀢𑀼𑀁, 𑀏𑀯𑀁 𑀅𑀩𑁆𑀬𑀬𑀧𑀤𑀸𑀦𑀺.

𑀢𑀢𑁆𑀭 𑀓𑀸𑀦𑀦𑀦𑁆𑀢𑀺 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂 𑀓𑀯𑀢𑀺 𑀲𑀤𑁆𑀤𑀁 𑀓𑀭𑁄𑀢𑀻𑀢𑀺 𑀓𑀸𑀦𑀦𑀁, 𑀯𑀦𑀁. 𑀢𑀣𑀸 𑀳𑀺 𑁋

‘‘𑀞𑀺𑀢𑁂 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂, 𑀲𑀦𑁆𑀦𑀺𑀲𑀻𑀯𑁂𑀲𑀼 𑀧𑀓𑁆𑀔𑀺𑀲𑀼;

𑀲𑀡𑀢𑁂𑀯 𑀩𑁆𑀭𑀳𑀸𑀭𑀜𑁆𑀜𑀁, 𑀲𑀸 𑀭𑀢𑀺 𑀧𑀝𑀺𑀪𑀸𑀢𑀺 𑀫’’𑀦𑁆𑀢𑀺

𑀯𑀼𑀢𑁆𑀢𑀁. 𑀅𑀣 𑀯𑀸 𑀓𑁄𑀓𑀺𑀮𑀫𑀬𑀽𑀭𑀸𑀤𑀬𑁄 𑀓𑀯𑀦𑁆𑀢𑀺 𑀲𑀤𑁆𑀤𑀸𑀬𑀦𑁆𑀢𑀺 𑀓𑀽𑀚𑀦𑁆𑀢𑀺 𑀏𑀢𑁆𑀣𑀸𑀢𑀺 𑀓𑀸𑀦𑀦𑀁. 𑀫𑀦𑁄𑀳𑀭𑀢𑀸𑀬 𑀅𑀯𑀲𑁆𑀲𑀁 𑀓𑀼𑀬𑁆𑀬𑀢𑀺 𑀧𑀡𑁆𑀟𑀺𑀢𑁂𑀳𑀻𑀢𑀺 𑀓𑀩𑁆𑀩𑀁. 𑀓𑀸𑀯𑀺𑀬𑀁. 𑀓𑀸𑀯𑁂𑀬𑁆𑀬𑀁. 𑀅𑀜𑁆𑀜𑀢𑁆𑀭 𑀧𑀦 𑀓𑀯𑀻𑀦𑀁 𑀇𑀤𑀦𑁆𑀢𑀺 𑀓𑀩𑁆𑀩𑀦𑁆𑀢𑀺 𑀢𑀤𑁆𑀥𑀺𑀢𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀓𑁂𑀘𑀺 𑀢𑀼 𑀓𑀸𑀩𑁆𑀬𑀦𑁆𑀢𑀺 𑀲𑀤𑁆𑀤𑀭𑀽𑀧𑀁 𑀇𑀘𑁆𑀙𑀦𑁆𑀢𑀺, 𑀦 𑀢𑀁 𑀧𑀸𑀯𑀘𑀦𑁂 𑀧𑀫𑀸𑀡𑀁 𑀲𑀓𑁆𑀓𑀝𑀪𑀸𑀲𑀸𑀪𑀸𑀯𑀢𑁄. 𑀲𑀓𑁆𑀓𑀝𑀪𑀸𑀲𑀸𑀢𑁄𑀧𑀺 𑀳𑀺 𑀆𑀘𑀭𑀺𑀬𑀸 𑀦𑀬𑀁 𑀕𑀡𑁆𑀳𑀦𑁆𑀢𑀺. 𑀚𑀸𑀢𑀁 𑀪𑀽𑀢𑀁 𑀅𑀢𑀻𑀢𑀁 𑀪𑀕𑀯𑀢𑁄 𑀘𑀭𑀺𑀬𑀁, 𑀢𑀁 𑀓𑀻𑀬𑀢𑀺 𑀓𑀣𑀻𑀬𑀢𑀺 𑀏𑀢𑁂𑀦𑀸𑀢𑀺 𑀚𑀸𑀢𑀓𑀁. 𑀚𑀸𑀢𑀓𑀧𑀸𑀴𑀺 𑀳𑀺 𑀇𑀥 ‘‘𑀚𑀸𑀢𑀓’’𑀦𑁆𑀢𑀺 𑀯𑀼𑀢𑁆𑀢𑀸. 𑀅𑀜𑁆𑀜𑀢𑁆𑀭 𑀧𑀦 𑀚𑀸𑀢𑀁 𑀏𑀯 𑀚𑀸𑀢𑀓𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀢𑀣𑀸 𑀳𑀺 𑀚𑀸𑀢𑀓𑀲𑀤𑁆𑀤𑁄 𑀤𑁂𑀲𑀦𑀸𑀬𑀫𑁆𑀧𑀺 𑀯𑀢𑁆𑀢𑀢𑀺 ‘‘𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫’’𑀦𑁆𑀢𑀺𑀆𑀤𑀻𑀲𑀼. 𑀚𑀸𑀢𑀺𑀬𑀫𑁆𑀧𑀺 𑀯𑀢𑁆𑀢𑀢𑀺 ‘‘𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀻’’𑀢𑀺𑀆𑀤𑀻𑀲𑀼.

𑀧𑀓𑁆𑀓 𑀦𑀻𑀘𑀕𑀢𑀺𑀬𑀁. 𑀦𑀻𑀘𑀕𑀫𑀦𑀁 𑀦𑀸𑀫 𑀳𑀻𑀦𑀕𑀫𑀦𑀁 𑀳𑀻𑀦𑀧𑁆𑀧𑀯𑀢𑁆𑀢𑀺 𑀯𑀸. 𑀦𑀻𑀘𑀲𑀤𑁆𑀤𑁄 𑀳𑀺 𑀳𑀻𑀦𑀯𑀸𑀘𑀓𑁄 ‘‘𑀦𑀻𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄’’𑀢𑀺 𑀏𑀢𑁆𑀣 𑀯𑀺𑀬. 𑀧𑀓𑁆𑀓𑀢𑀺 𑀓𑁆𑀭𑀺𑀬𑀸𑀧𑀤𑀫𑁂𑀢𑁆𑀣 𑀤𑀺𑀲𑁆𑀲𑀢𑀺, 𑀦 𑀦𑀸𑀫𑀺𑀓𑀧𑀤𑀁. 𑀬𑀢𑁆𑀣 𑀬𑀢𑁆𑀣 𑀦𑀸𑀫𑀺𑀓𑀧𑀤𑀁 𑀦 𑀤𑀺𑀲𑁆𑀲𑀢𑀺, 𑀢𑀢𑁆𑀣 𑀢𑀢𑁆𑀣 𑀦𑀸𑀫𑀺𑀓𑀧𑀤𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 ¶ 𑀕𑀳𑁂𑀢𑀩𑁆𑀩𑀁. 𑀓𑁆𑀭𑀺𑀬𑀸𑀧𑀤𑀫𑁂𑀯 𑀳𑀺 𑀤𑀼𑀤𑁆𑀤𑀲𑀁, 𑀓𑁆𑀭𑀺𑀬𑀸𑀧𑀤𑁂 𑀯𑀺𑀚𑁆𑀚𑀫𑀸𑀦𑁂 𑀦𑀸𑀫𑀺𑀓𑀧𑀤𑀁 𑀦𑀢𑁆𑀣𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀢𑀲𑁆𑀫𑀸 𑀅𑀦𑁆𑀢𑀫𑀲𑁄 ‘‘𑀧𑀓𑁆𑀓𑀦𑀁, 𑀢𑀓𑀦𑀁’’ 𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀪𑀸𑀯𑀯𑀸𑀘𑀓𑀸𑀦𑀺 𑀦𑀸𑀫𑀺𑀓𑀧𑀤𑀸𑀦𑀺 𑀲𑀩𑁆𑀩𑀸𑀲𑀼 𑀥𑀸𑀢𑀽𑀲𑀼 𑀬𑀣𑀸𑀭𑀳𑀁 𑀮𑀩𑁆𑀪𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀓 𑀳𑀲𑀦𑁂. 𑀳𑀲𑀦𑀁 𑀳𑀸𑀲𑁄. 𑀢𑀓𑀢𑀺.

𑀢𑀓𑀺 𑀓𑀺𑀘𑁆𑀙𑀚𑀻𑀯𑀦𑁂. 𑀓𑀺𑀘𑁆𑀙𑀚𑀻𑀯𑀦𑀁 𑀓𑀲𑀺𑀭𑀚𑀻𑀯𑀦𑀁. 𑀢𑀗𑁆𑀓𑀢𑀺. 𑀆𑀢𑀗𑁆𑀓𑀢𑀺. 𑀆𑀢𑀗𑁆𑀓𑁄. 𑀆𑀢𑀗𑁆𑀓𑁄𑀢𑀺 𑀓𑀺𑀘𑁆𑀙𑀚𑀻𑀯𑀺𑀢𑀓𑀭𑁄 𑀭𑁄𑀕𑁄, 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 ‘‘𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀸𑀴𑀺𑀧𑁆𑀧𑀤𑁂𑀲𑁂 𑀇𑀢𑀺 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀲𑀼𑀁 ‘‘𑀆𑀩𑀸𑀥𑁄𑀢𑀺 𑀯𑀺𑀲𑀪𑀸𑀕𑀯𑁂𑀤𑀦𑀸 𑀯𑀼𑀘𑁆𑀘𑀢𑀺, 𑀬𑀸 𑀏𑀓𑀤𑁂𑀲𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀓𑀮𑀲𑀭𑀻𑀭𑀁 𑀅𑀬𑀧𑀝𑁆𑀝𑁂𑀦 𑀩𑀦𑁆𑀥𑀺𑀢𑁆𑀯𑀸 𑀯𑀺𑀬 𑀕𑀡𑁆𑀳𑀸𑀢𑀺. 𑀆𑀢𑀗𑁆𑀓𑁄𑀢𑀺 𑀓𑀺𑀘𑁆𑀙𑀚𑀻𑀯𑀺𑀢𑀓𑀭𑁄 𑀭𑁄𑀕𑁄. 𑀅𑀣 𑀯𑀸 𑀬𑀸𑀧𑁂𑀢𑀩𑁆𑀩𑀭𑁄𑀕𑁄 𑀆𑀢𑀗𑁆𑀓𑁄, 𑀇𑀢𑀭𑁄 𑀆𑀩𑀸𑀥𑁄. 𑀔𑀼𑀤𑁆𑀤𑀓𑁄 𑀯𑀸 𑀭𑁄𑀕𑁄 𑀆𑀢𑀗𑁆𑀓𑁄, 𑀩𑀮𑀯𑀸 𑀆𑀩𑀸𑀥𑁄. 𑀓𑁂𑀘𑀺 𑀧𑀦 ‘𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑁄 𑀆𑀩𑀸𑀥𑁄, 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑁄 𑀆𑀢𑀗𑁆𑀓𑁄’𑀢𑀺 𑀯𑀤𑀦𑁆𑀢𑀻’’𑀢𑀺.

𑀆𑀢𑀗𑁆𑀓𑁄 𑀆𑀫𑀬𑁄 𑀭𑁄𑀕𑁄,

𑀩𑁆𑀬𑀸𑀥𑀸’𑀩𑀸𑀥𑁄 𑀕𑀤𑁄 𑀭𑀼𑀚𑀸;

𑀅𑀓𑀮𑁆𑀮𑀜𑁆𑀘𑁂𑀯 𑀕𑁂𑀮𑀜𑁆𑀜𑀁,

𑀦𑀸𑀫𑀁 𑀭𑁄𑀕𑀸𑀪𑀺𑀥𑀸𑀦𑀓𑀁.

𑀲𑀼𑀓 𑀕𑀢𑀺𑀬𑀁. 𑀲𑁄𑀓𑀢𑀺, 𑀲𑀼𑀓𑁄, 𑀲𑀼𑀓𑀻. 𑀢𑀢𑁆𑀭 𑀲𑀼𑀓𑁄𑀢𑀺 𑀲𑀼𑀯𑁄. 𑀲𑁄𑀓𑀢𑀺 𑀫𑀦𑀸𑀧𑁂𑀦 𑀕𑀫𑀦𑁂𑀦 𑀕𑀘𑁆𑀙𑀢𑀻𑀢𑀺 𑀲𑀼𑀓𑁄. 𑀢𑀲𑁆𑀲 𑀪𑀭𑀺𑀬𑀸 𑀲𑀼𑀓𑀻.

𑀩𑀼𑀓𑁆𑀓 𑀪𑀲𑁆𑀲𑀦𑁂. 𑀇𑀥 𑀪𑀲𑁆𑀲𑀦𑀁 𑀦𑀸𑀫 𑀲𑀼𑀦𑀔𑀪𑀲𑁆𑀲𑀦𑀁 𑀅𑀥𑀺𑀧𑁆𑀧𑁂𑀢𑀁 ‘‘𑀲𑀼𑀦𑀔𑁄 𑀪𑀲𑁆𑀲𑀺𑀢𑁆𑀯𑀸’’𑀢𑀺 𑀏𑀢𑁆𑀣 𑀯𑀺𑀬, 𑀦 ‘‘𑀆𑀯𑀸𑀲𑁄 𑀕𑁄𑀘𑀭𑀁 ¶ 𑀪𑀲𑁆𑀲’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀯𑀘𑀦𑀲𑀗𑁆𑀔𑀸𑀢𑀁 𑀪𑀲𑁆𑀲𑀦𑀁, 𑀩𑀼𑀓𑁆𑀓𑀢𑀺 𑀲𑀸.

𑀥𑀓 𑀧𑀝𑀺𑀖𑀸𑀢𑁂 𑀕𑀢𑀺𑀬𑀜𑁆𑀘. 𑀧𑀝𑀺𑀖𑀸𑀢𑁄 𑀧𑀝𑀺𑀳𑀦𑀦𑀁. 𑀥𑀓𑀢𑀺.

𑀘𑀓 𑀢𑀺𑀢𑁆𑀢𑀺𑀧𑀝𑀺𑀖𑀸𑀢𑁂𑀲𑀼. 𑀢𑀺𑀢𑁆𑀢𑀺 𑀢𑀧𑁆𑀧𑀦𑀁, 𑀧𑀝𑀺𑀖𑀸𑀢𑀁 𑀧𑀝𑀺𑀳𑀦𑀦𑀁𑀯. 𑀘𑀓𑀢𑀺.

𑀅𑀓 𑀓𑀼𑀝𑀺𑀮𑀕𑀢𑀺𑀬𑀁. 𑀅𑀓𑀢𑀺. 𑀏𑀢𑀸 𑀓𑀼𑀆𑀤𑀺𑀓𑀸 𑀅𑀓𑀧𑀭𑀺𑀬𑀦𑁆𑀢𑀸 𑀥𑀸𑀢𑀼𑀬𑁄 𑀧𑀭𑀲𑁆𑀲 𑀪𑀸𑀲𑀸𑀢𑀺 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀯𑀤𑀦𑁆𑀢𑀺. 𑀢𑁂𑀲𑀁 𑀫𑀢𑁂 𑀏𑀢𑀸 ‘‘𑀢𑀺 𑀅𑀦𑁆𑀢𑀺, 𑀢𑀼 𑀅𑀦𑁆𑀢𑀼’’ 𑀇𑀘𑁆𑀘𑀸𑀤𑀻𑀦𑀁𑀬𑁂𑀯 𑀯𑀺𑀲𑀬𑁄. 𑀧𑀸𑀴𑀺𑀬𑀁 𑀧𑀦 𑀦𑀺𑀬𑀫𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀦 𑀢𑀁 𑀇𑀥 𑀧𑀫𑀸𑀡𑀁.

𑀇 𑀅𑀚𑁆𑀛𑀬𑀦𑁂. 𑀅𑀚𑁆𑀛𑀬𑀦𑀁 𑀉𑀘𑁆𑀘𑀸𑀭𑀡𑀁 𑀲𑀺𑀓𑁆𑀔𑀦𑀁 𑀯𑀸, 𑀅𑀬𑀢𑀺, 𑀅𑀥𑀻𑀬𑀢𑀺, 𑀅𑀚𑁆𑀛𑀬𑀢𑀺, 𑀅𑀥𑀻𑀢𑁂, 𑀅𑀚𑁆𑀛𑁂𑀦𑀁, 𑀅𑀚𑁆𑀛𑀸𑀬𑀓𑁄. 𑀤𑀺𑀩𑁆𑀩𑀁 𑀅𑀥𑀻𑀬𑀲𑁂 𑀫𑀸𑀬𑀁. 𑀅𑀥𑀻𑀬𑀦𑁆𑀢𑀺 𑀫𑀳𑀸𑀭𑀸𑀚, 𑀤𑀺𑀩𑁆𑀩𑀫𑀸𑀬𑀺𑀥 𑀧𑀡𑁆𑀟𑀺𑀢𑀸. 𑀅𑀚𑁆𑀛𑁂𑀦𑀫𑀭𑀺𑀬𑀸 𑀧𑀣𑀯𑀺𑀁 𑀚𑀦𑀺𑀦𑁆𑀤𑀸. 𑀢𑀢𑁆𑀣 𑀅𑀚𑁆𑀛𑀸𑀬𑀓𑁄𑀢𑀺 𑀅𑀚𑁆𑀛𑀬𑀢𑀻𑀢𑀺 𑀅𑀚𑁆𑀛𑀸𑀬𑀓𑁄, 𑀫𑀦𑁆𑀢𑁂 𑀧𑀭𑀺𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄.

𑀉 𑀲𑀤𑁆𑀤𑁂. 𑀅𑀯𑀢𑀺, 𑀅𑀯𑀦𑁆𑀢𑀺. 𑀅𑀯𑀲𑀺. 𑀏𑀢𑁆𑀣 ‘‘𑀬𑁄 𑀆𑀢𑀼𑀫𑀸𑀦𑀁 𑀲𑀬𑀫𑁂𑀯 𑀧𑀸𑀯𑀸’’𑀢𑀺 𑀧𑀸𑀴𑀺 𑀧𑀧𑀼𑀩𑁆𑀩𑀲𑁆𑀲 𑀉𑀥𑀸𑀢𑀼𑀲𑁆𑀲 𑀧𑀬𑁄𑀕𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀧𑀧𑀼𑀩𑁆𑀩𑀲𑁆𑀲 𑀯𑀤𑀥𑀸𑀢𑀼𑀲𑁆𑀲 𑀤𑀓𑀸𑀭𑀮𑁄𑀧𑀧𑁆𑀧𑀬𑁄𑀕𑁄𑀢𑀺𑀧𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺.

𑀯𑀗𑁆𑀓 𑀓𑁄𑀝𑀺𑀮𑁆𑀮𑁂. 𑀯𑀗𑁆𑀓𑀢𑀺. 𑀯𑀗𑁆𑀓𑀁. 𑀯𑀗𑁆𑀓𑀲𑀤𑁆𑀤𑁄 𑀳𑀺 𑀯𑀓𑁆𑀓𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄, 𑀯𑀓𑁆𑀓𑀲𑀤𑁆𑀤𑁄 𑀘 𑀯𑀗𑁆𑀓𑀲𑀤𑁆𑀤𑁂𑀦. 𑀢𑀣𑀸 𑀳𑀺 𑁋

‘‘𑀬𑀁 𑀦𑀺𑀲𑁆𑀲𑀺𑀢𑀸 𑀚𑀕𑀢𑀺𑀭𑀼𑀳𑀁, 𑀲𑁆𑀯𑀸𑀬𑀁 𑀅𑀕𑁆𑀕𑀺𑀁 𑀧𑀫𑀼𑀜𑁆𑀘𑀢𑀺;

𑀤𑀺𑀲𑀸 𑀪𑀚𑀣 𑀯𑀓𑁆𑀓𑀗𑁆𑀕𑀸, 𑀚𑀸𑀢𑀁 𑀲𑀭𑀡𑀢𑁄 𑀪𑀬’’𑀦𑁆𑀢𑀺.

𑀧𑀸𑀴𑀺 ¶ 𑀤𑀺𑀲𑁆𑀲𑀢𑀺. 𑀅𑀬𑀁 𑀧𑀦 𑀯𑀓𑁆𑀓𑀲𑀤𑁆𑀤𑁄 𑀲𑀓𑁆𑀓𑀝𑀪𑀸𑀲𑀁 𑀧𑀢𑁆𑀯𑀸 𑀓𑀓𑀸𑀭𑀭𑀓𑀸𑀭𑀲𑀜𑁆𑀜𑁄𑀕𑀓𑁆𑀔𑀭𑀺𑀓𑁄 𑀪𑀯𑀢𑀺, 𑀥𑀸𑀢𑀼𑀪𑀸𑀯𑁄 𑀧𑀦𑀲𑁆𑀲 𑀧𑁄𑀭𑀸𑀡𑁂𑀳𑀺 𑀦 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀓𑁆𑀭𑀺𑀬𑀸𑀧𑀤𑀁 𑀦 𑀤𑀺𑀝𑁆𑀞𑀁. 𑀇𑀫𑀲𑁆𑀲 𑀧𑀦 𑀯𑀗𑁆𑀓𑀲𑀤𑁆𑀤𑀲𑁆𑀲 ‘‘𑀯𑀗𑁆𑀓 𑀓𑁄𑀝𑀺𑀮𑁆𑀮𑁂’’𑀢𑀺 𑀥𑀸𑀢𑀼𑀪𑀸𑀯𑁄 𑀯𑀼𑀢𑁆𑀢𑁄, ‘‘𑀯𑀗𑁆𑀓𑀢𑀻’’𑀢𑀺 𑀓𑁆𑀭𑀺𑀬𑀸𑀧𑀤𑀜𑁆𑀘, 𑀧𑀸𑀴𑀺𑀬𑀁 𑀢𑀼 ‘‘𑀯𑀗𑁆𑀓𑀢𑀻’’𑀢𑀺 𑀓𑁆𑀭𑀺𑀬𑀸𑀧𑀤𑀁 𑀦 𑀤𑀺𑀝𑁆𑀞𑀁, 𑀢𑀣𑀸 𑀪𑀸𑀯𑀯𑀸𑀘𑀓𑁄 𑀯𑀗𑁆𑀓𑀲𑀤𑁆𑀤𑁄𑀧𑀺. 𑀯𑀸𑀘𑁆𑀘𑀮𑀺𑀗𑁆𑀕𑁄 𑀧𑀦 𑀅𑀦𑁂𑀓𑁂𑀲𑀼 𑀞𑀸𑀦𑁂𑀲𑀼 𑀤𑀺𑀝𑁆𑀞𑁄. 𑀢𑀢𑁆𑀢 𑀯𑀗𑁆𑀓𑀢𑀻𑀢𑀺 𑀓𑁆𑀭𑀺𑀬𑀸𑀧𑀤𑀁 𑀧𑀸𑀴𑀺𑀬𑀁 𑀅𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀕𑀳𑁂𑀢𑀩𑁆𑀩𑀫𑁂𑀯 𑀦𑀸𑀣𑀢𑀻𑀢𑀺 𑀓𑁆𑀭𑀺𑀬𑀸𑀧𑀤𑀫𑀺𑀯. 𑀪𑀸𑀯𑀯𑀸𑀘𑀓𑀲𑁆𑀲 𑀧𑀦 𑀯𑀗𑁆𑀓𑀲𑀤𑁆𑀤𑀲𑁆𑀲 𑀅𑀢𑁆𑀣𑀺𑀢𑀸 𑀦𑀢𑁆𑀣𑀺𑀢𑀸 𑀘 𑀧𑀸𑀴𑀺𑀆𑀤𑀻𑀲𑀼 𑀧𑀼𑀦𑀧𑁆𑀧𑀼𑀦𑀁 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸. 𑀓𑁂𑀘𑁂𑀢𑁆𑀣 𑀯𑀤𑁂𑀬𑁆𑀬𑀼𑀁 ‘‘𑀬𑀤𑀺 𑀪𑀸𑀯𑀯𑀸𑀘𑀓𑁄 𑀯𑀗𑁆𑀓𑀲𑀤𑁆𑀤𑁄 𑀦𑀢𑁆𑀣𑀺, 𑀓𑀣𑀁 ‘𑀅𑀝𑁆𑀞𑀯𑀗𑁆𑀓𑀁 𑀫𑀡𑀺𑀭𑀢𑀦𑀁 𑀉𑀴𑀸𑀭’𑀦𑁆𑀢𑀺 𑀏𑀢𑁆𑀣 𑀲𑀫𑀸𑀲𑁄’’𑀢𑀺. 𑀏𑀢𑁆𑀣 𑀧𑀦 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀯𑀗𑁆𑀓𑀁 𑀅𑀝𑁆𑀞𑀯𑀗𑁆𑀓𑀁, 𑀦 𑀅𑀝𑁆𑀞𑀯𑀗𑁆𑀓𑀸𑀦𑀺 𑀬𑀲𑁆𑀲𑀸𑀢𑀺. 𑀤𑀩𑁆𑀩𑀯𑀸𑀘𑀓𑁄 𑀳𑀺 𑀯𑀗𑁆𑀓𑀲𑀤𑁆𑀤𑁄, 𑀦 𑀪𑀸𑀯𑀯𑀸𑀘𑀓𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀯𑀗𑁆𑀓𑀁 𑀯𑀓𑁆𑀓𑀜𑁆𑀘 𑀓𑀼𑀝𑀺𑀮𑀁, 𑀚𑀺𑀫𑁆𑀳𑀜𑁆𑀘 𑀭𑀺𑀫𑁆𑀳𑀫𑀦𑀼𑀚𑀼;

𑀯𑀗𑁆𑀓𑀲𑀤𑁆𑀤𑀸𑀤𑀬𑁄 𑀏𑀢𑁂, 𑀯𑀸𑀘𑁆𑀘𑀮𑀺𑀗𑁆𑀕𑀸 𑀢𑀺𑀮𑀺𑀗𑁆𑀕𑀺𑀓𑀸.

𑀅𑀣 𑀯𑀸 𑀯𑀗𑁆𑀓𑀲𑀤𑁆𑀤𑁄𑀬𑀁, ‘‘𑀯𑀗𑁆𑀓𑀖𑀲𑁆𑀢𑀸’’𑀢𑀺𑀆𑀤𑀺𑀲𑀼;

𑀩𑀴𑀺𑀲𑁂 𑀕𑀺𑀭𑀺𑀪𑁂𑀤𑁂 𑀘, 𑀯𑀢𑁆𑀢𑀢𑁂 𑀲 𑀧𑀼𑀫𑀸 𑀢𑀤𑀸.

𑀅𑀬𑀜𑁆𑀳𑀺 ‘‘𑀢𑁂’𑀫𑁂 𑀚𑀦𑀸 𑀯𑀗𑁆𑀓𑀖𑀲𑁆𑀢𑀸 𑀲𑀬𑀦𑁆𑀢𑀺. 𑀬𑀣𑀸𑀧𑀺 𑀫𑀘𑁆𑀙𑁄 𑀩𑀴𑀺𑀲𑀁, 𑀯𑀗𑁆𑀓𑀁 𑀫𑀁𑀲𑁂𑀦 𑀙𑀸𑀤𑀺𑀢𑀁. 𑀯𑀗𑁆𑀓𑀖𑀲𑁆𑀢𑁄𑀯 𑀅𑀫𑁆𑀩𑀼𑀚𑁄’’𑀢𑀺𑀆𑀤𑀻𑀲𑀼 𑀩𑀴𑀺𑀲𑁂 𑀯𑀢𑁆𑀢𑀢𑀺.

𑀏𑀢𑁆𑀣 𑀲𑀺𑀬𑀸 ‘‘𑀦𑀦𑀼 𑀘 𑀪𑁄 ‘𑀬𑀣𑀸𑀧𑀺 𑀫𑀘𑁆𑀙𑁄 𑀩𑀴𑀺𑀲𑀁, 𑀯𑀗𑁆𑀓𑀁 𑀫𑀁𑀲𑁂𑀦 𑀙𑀸𑀤𑀺𑀢’𑀦𑁆𑀢𑀺 𑀏𑀢𑁆𑀣 𑀯𑀗𑁆𑀓𑀲𑀤𑁆𑀤𑁄 𑀕𑀼𑀡𑀯𑀸𑀘𑀓𑁄 𑀯𑀺𑀲𑁂𑀲𑀦𑀲𑀤𑁄, 𑀬𑁂𑀦 𑀩𑀴𑀺𑀲𑁄 𑀯𑀺𑀲𑁂𑀲𑀺𑀢𑁄, 𑀢𑁂𑀦 𑀯𑀗𑁆𑀓𑀁 𑀓𑀼𑀝𑀺𑀮𑀁 𑀩𑀴𑀺𑀲𑀦𑁆𑀢𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻’’𑀢𑀺? 𑀢𑀦𑁆𑀦, 𑀯𑀗𑁆𑀓𑀲𑀤𑁆𑀤𑁂 𑀅𑀯𑀼𑀢𑁆𑀢𑁂𑀧𑀺 𑀩𑀴𑀺𑀲𑀲𑀪𑀸𑀯𑀲𑁆𑀲 𑀯𑀗𑁆𑀓𑀢𑁆𑀢𑀸 𑀓𑀼𑀝𑀺𑀮𑀢𑁆𑀣𑁄 𑀧𑀸𑀓𑀝𑁄𑀢𑀺 𑀦𑀢𑁆𑀣𑀺 𑀯𑀺𑀲𑁂𑀲𑀦𑀲𑀤𑁆𑀤𑁂𑀦 ¶ 𑀧𑀬𑁄𑀚𑀦𑀁. 𑀇𑀤𑀁 𑀧𑀦 ‘‘𑀩𑀴𑀺𑀲𑀁 𑀯𑀗𑁆𑀓’’𑀦𑁆𑀢𑀺 𑀯𑀘𑀦𑀁 ‘‘𑀳𑀢𑁆𑀣𑀺 𑀦𑀸𑀕𑁄. 𑀲𑀭𑁄𑀭𑀼𑀳𑀁 𑀧𑀤𑀼𑀫𑀁. 𑀳𑀢𑁆𑀣𑀻 𑀘 𑀓𑀼𑀜𑁆𑀚𑀭𑁄 𑀦𑀸𑀕𑁄’’𑀢𑀺𑀆𑀤𑀺𑀯𑀘𑀦𑀫𑀺𑀯 𑀧𑀭𑀺𑀬𑀸𑀬𑀯𑀘𑀦𑀁, 𑀢𑀲𑁆𑀫𑀸 ‘‘𑀯𑀗𑁆𑀓’’𑀦𑁆𑀢𑀺 𑀧𑀤𑀲𑁆𑀲 ‘‘𑀓𑀼𑀝𑀺𑀮’’𑀦𑁆𑀢𑀺 𑀅𑀢𑁆𑀣𑁄 𑀦 𑀕𑀳𑁂𑀢𑀩𑁆𑀩𑁄. 𑀅𑀣 𑀯𑀸 𑀬𑀣𑀸 ‘‘𑀬𑀣𑀸 𑀆𑀭𑀜𑁆𑀜𑀓𑀁 𑀦𑀸𑀕𑀁, 𑀤𑀦𑁆𑀢𑀺𑀁 𑀅𑀦𑁆𑀯𑁂𑀢𑀺 𑀳𑀢𑁆𑀣𑀺𑀦𑀻’’𑀢𑀺 𑀏𑀢𑁆𑀣 𑀦𑀸𑀕𑀲𑀤𑁆𑀤𑀲𑁆𑀲 𑀤𑀦𑁆𑀢𑀻𑀲𑀤𑁆𑀤𑀲𑁆𑀲 𑀘 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀸 𑀬𑀯𑀘𑀦𑀢𑁆𑀢𑁂𑀧𑀺 𑀤𑀦𑁆𑀢𑀺𑀦𑁆𑀢𑀺 𑀫𑀦𑁄𑀭𑀫𑀤𑀦𑁆𑀢𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄 𑀲𑀁𑀯𑀡𑁆𑀡𑀺𑀢𑁄, 𑀢𑀣𑀸 ‘‘𑀩𑀴𑀺𑀲𑀁 𑀯𑀗𑁆𑀓’’𑀦𑁆𑀢𑀺 𑀇𑀫𑁂𑀲𑀫𑁆𑀧𑀺 𑀅𑀜𑁆𑀜𑀫𑀜𑁆𑀜𑀁 𑀧𑀭𑀺𑀬𑀸𑀬𑀯𑀘𑀦𑀢𑁆𑀢𑁂𑀧𑀺 𑀯𑀗𑁆𑀓𑀦𑁆𑀢𑀺 𑀓𑀼𑀝𑀺𑀮𑀦𑁆𑀢𑀺 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀲𑀢𑀺 𑀅𑀢𑁆𑀣𑁄 𑀲𑀸𑀮𑀭𑀸𑀚𑀸 𑀯𑀺𑀬 𑀲𑀼𑀨𑀼𑀮𑁆𑀮𑀺𑀢𑁄 𑀳𑁄𑀢𑀺, 𑀤𑁂𑀲𑀦𑀸 𑀘 𑀯𑀺𑀮𑀸𑀲𑀧𑁆𑀧𑀢𑁆𑀢𑀸, 𑀦 𑀧𑀦 ‘‘𑀯𑀗𑁆𑀓𑀁 𑀩𑀴𑀺𑀲’’𑀦𑁆𑀢𑀺 𑀲𑀤𑁆𑀤𑀸𑀦𑀁 𑀕𑀼𑀡𑀕𑀼𑀡𑀻𑀯𑀲𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁄 𑀇𑀘𑁆𑀙𑀺𑀢𑀩𑁆𑀩𑁄 ‘‘𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 ‘‘𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺 𑀇𑀫𑁂𑀲𑀁 𑀯𑀺𑀬 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑀲𑁆𑀲 𑀅𑀦𑀺𑀘𑁆𑀙𑀺𑀢𑀩𑁆𑀩𑀢𑁆𑀢𑀸. 𑀦 𑀳𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁄 𑀧𑁄𑀭𑀸𑀡𑁂𑀳𑀺 𑀅𑀦𑀼𑀫𑀢𑁄.

‘‘𑀬𑀢𑁆𑀣 𑀏𑀢𑀸𑀤𑀺𑀲𑁄 𑀲𑀢𑁆𑀣𑀸, 𑀮𑁄𑀓𑁂 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄;

𑀢𑀣𑀸𑀕𑀢𑁄 𑀩𑀮𑀧𑁆𑀧𑀢𑁆𑀢𑁄, 𑀲𑀫𑁆𑀩𑀼𑀤𑁆𑀥𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺,

‘‘𑀩𑀼𑀤𑁆𑀥𑀁 𑀩𑀼𑀤𑁆𑀥𑀁 𑀦𑀺𑀔𑀺𑀮𑀯𑀺𑀲𑀬𑀁 𑀲𑀼𑀤𑁆𑀥𑀺𑀬𑀸 𑀬𑀸𑀯 𑀲𑀼𑀤𑁆𑀥𑀺’’𑀦𑁆𑀢𑀺 𑀘 𑀆𑀤𑀻𑀲𑀼 𑀧𑀦 𑀅𑀦𑀼𑀫𑀢𑁄. 𑀏𑀢𑁆𑀣 𑀳𑀺 ‘‘𑀏𑀢𑀸𑀤𑀺𑀲𑁄’’𑀢𑀺 𑀘 ‘‘𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄’’𑀢𑀺 𑀘 ‘‘𑀢𑀣𑀸𑀕𑀢𑁄’’𑀢𑀺 𑀘 ‘‘𑀩𑀮𑀧𑁆𑀧𑀢𑁆𑀢𑁄’’𑀢𑀺 𑀘 ‘‘𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀘 ‘‘𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺 𑀘 𑀇𑀫𑀸𑀦𑀺 ‘‘𑀲𑀢𑁆𑀣𑀸’’𑀢𑀺 𑀅𑀦𑁂𑀦 𑀧𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀸𑀦𑀺. 𑀢𑀣𑀸 ‘‘𑀩𑀼𑀤𑁆𑀥𑀁 𑀩𑀼𑀤𑁆𑀥’’𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀧𑀘𑁆𑀙𑀺𑀫𑀁 𑀧𑀼𑀭𑀺𑀫𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀁 𑀪𑀯𑀢𑀺.

𑀇𑀢𑀺 ‘‘𑀬𑀣𑀸𑀧𑀺 𑀫𑀘𑁆𑀙𑁄 𑀩𑀴𑀺𑀲𑀁, 𑀯𑀗𑁆𑀓𑀁 𑀫𑀁𑀲𑁂𑀦 𑀙𑀸𑀤𑀺𑀢’’𑀦𑁆𑀢𑀺 𑀏𑀢𑁆𑀣 𑀯𑀗𑁆𑀓𑀲𑀤𑁆𑀤𑁄 𑀩𑀴𑀺𑀲𑀲𑁆𑀲𑀸𑀪𑀺𑀥𑀸𑀦𑀦𑁆𑀢𑀭𑀁, 𑀦 𑀕𑀼𑀡𑀯𑀸𑀘𑀓𑁄. 𑀏𑀯𑀁 𑀯𑀗𑁆𑀓𑀲𑀤𑁆𑀤𑁄 𑀩𑀴𑀺𑀲𑁂 𑀯𑀢𑁆𑀢𑀢𑀺. ‘‘𑀓𑀗𑁆𑀓𑀁 𑀕𑀘𑁆𑀙𑀸𑀫 𑀧𑀩𑁆𑀩𑀢𑀁. 𑀤𑀽𑀭𑁂 𑀯𑀗𑁆𑀓𑀢𑀧𑀩𑁆𑀩𑀢𑁄’’𑀢𑀺𑀆𑀤𑀻𑀲𑀼 ¶ 𑀧𑀦 𑀕𑀺𑀭𑀺𑀯𑀺𑀲𑁂𑀲𑁂 𑀯𑀢𑁆𑀢𑀢𑀺. 𑀏𑀢𑁆𑀣 𑀘 ‘‘𑀯𑀗𑁆𑀓𑀧𑀩𑁆𑀩𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀲𑀼𑀔𑀼𑀘𑁆𑀘𑀸𑀭𑀡𑀢𑁆𑀣𑀁 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀫𑀚𑁆𑀛𑁂 𑀅𑀦𑀺𑀫𑀺𑀢𑁆𑀢𑀁 𑀢𑀓𑀸𑀭𑀸𑀕𑀫𑀁 𑀓𑀢𑁆𑀯𑀸 ‘‘𑀯𑀗𑁆𑀓𑀢𑀧𑀩𑁆𑀩𑀢𑁄’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀯𑀗𑁆𑀓𑁄𑀬𑁂𑀯 𑀯𑀗𑁆𑀓𑀢𑀸, 𑀬𑀣𑀸 𑀤𑁂𑀯𑁄 𑀏𑀯 𑀤𑁂𑀯𑀢𑀸. 𑀬𑀣𑀸 𑀘 𑀤𑀺𑀲𑀸 𑀏𑀯 𑀤𑀺𑀲𑀢𑀸𑀢𑀺, 𑀏𑀯𑀁 𑀢𑀸𑀧𑀘𑁆𑀘𑀬𑀯𑀲𑁂𑀦 𑀯𑀗𑁆𑀓𑀢𑀸 𑀘 𑀲𑀸 𑀧𑀩𑁆𑀩𑀢𑁄 𑀘𑀸𑀢𑀺 ‘‘𑀯𑀗𑁆𑀓𑀢𑀧𑀩𑁆𑀩𑀢𑁄’’𑀢𑀺 𑀯𑀼𑀢𑁆𑀢𑀁, 𑀫𑀚𑁆𑀛𑁂 𑀭𑀲𑁆𑀲𑀯𑀲𑁂𑀦 𑀘𑁂𑀢𑀁 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀯𑀗𑁆𑀓𑀫𑀲𑁆𑀲 𑀲𑀡𑁆𑀞𑀸𑀦𑀫𑀢𑁆𑀣𑀻𑀢𑀺 𑀯𑀗𑁆𑀓𑀢𑁄𑀢𑀺 𑀫𑀦𑁆𑀢𑀼𑀅𑀢𑁆𑀣𑁂 𑀢𑀧𑀘𑁆𑀘𑀬𑁄, 𑀬𑀣𑀸 𑀧𑀩𑁆𑀩𑀫𑀲𑁆𑀲 𑀅𑀢𑁆𑀣𑀻𑀢𑀺 𑀧𑀩𑁆𑀩𑀢𑁄𑀢𑀺. 𑀏𑀯𑀁 𑀯𑀗𑁆𑀓𑀢𑁄 𑀘 𑀲𑁄 𑀧𑀩𑁆𑀩𑀢𑁄 𑀘𑀸𑀢𑀺 𑀯𑀗𑁆𑀓𑀢𑀧𑀩𑁆𑀩𑀢𑁄. ‘‘𑀯𑀗𑁆𑀓𑀧𑀩𑁆𑀩𑀢𑁄’’ 𑀇𑀘𑁆𑀘𑁂𑀯 𑀯𑀸 𑀧𑀡𑁆𑀡𑀢𑁆𑀢𑀺, 𑀧𑀸𑀤𑀓𑁆𑀔𑀭𑀧𑀸𑀭𑀺𑀧𑀽𑀭𑀺𑀬𑀸 𑀧𑀦 ‘‘𑀤𑀽𑀭𑁂 𑀯𑀗𑁆𑀓𑀢𑀧𑀩𑁆𑀩𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀮𑁄𑀓 𑀤𑀲𑁆𑀲𑀦𑁂. 𑀮𑁄𑀓𑀢𑀺. 𑀮𑁄𑀓𑁄. 𑀆𑀮𑁄𑀓𑁄𑀢𑀺 𑀅𑀜𑁆𑀜𑀸𑀦𑀺𑀧𑀺 𑀭𑀽𑀧𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀘𑀼𑀭𑀸𑀤𑀺𑀕𑀡𑀁 𑀧𑀦 𑀧𑀢𑁆𑀯𑀸 𑀇𑀫𑀺𑀲𑁆𑀲𑀸 ‘‘𑀮𑁄𑀓𑁂𑀢𑀺, 𑀮𑁄𑀓𑀬𑀢𑀺, 𑀑𑀮𑁄𑀓𑁂𑀢𑀺, 𑀑𑀮𑁄𑀓𑀬𑀢𑀻’’𑀢𑀺𑀆𑀤𑀺𑀦𑀸 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀮𑁄𑀓𑁄𑀢𑀺 𑀢𑀬𑁄 𑀮𑁄𑀓𑀸 𑀲𑀗𑁆𑀔𑀸𑀭𑀮𑁄𑀓𑁄 𑀲𑀢𑁆𑀢𑀮𑁄𑀓𑁄 𑀑𑀓𑀸𑀲𑀮𑁄𑀓𑁄𑀢𑀺. 𑀢𑀢𑁆𑀣 ‘‘𑀏𑀓𑁄 𑀮𑁄𑀓𑁄, 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 𑀆𑀕𑀢𑁄 𑀲𑀗𑁆𑀔𑀸𑀭𑁄 𑀏𑀯 𑀮𑁄𑀓𑁄 𑀲𑀗𑁆𑀔𑀸𑀭𑀮𑁄𑀓𑁄. 𑀲𑀢𑁆𑀢𑀸 𑀏𑀯 𑀮𑁄𑀓𑁄 𑀲𑀢𑁆𑀢𑀮𑁄𑀓𑁄. 𑀘𑀓𑁆𑀓𑀯𑀸𑀴𑀲𑀗𑁆𑀔𑀸𑀢𑁄 𑀑𑀓𑀸𑀲𑁄 𑀏𑀯 𑀮𑁄𑀓𑁄 𑀑𑀓𑀸𑀲𑀮𑁄𑀓𑁄, 𑀬𑁄 ‘‘𑀪𑀸𑀚𑀦𑀮𑁄𑀓𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀢𑁂𑀲𑀼 𑀲𑀗𑁆𑀔𑀸𑀭𑁄 𑀮𑀼𑀚𑁆𑀚𑀢𑀻𑀢𑀺 𑀮𑁄𑀓𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀮𑀼𑀚𑁆𑀚𑀢𑀺 𑀧𑀮𑀼𑀚𑁆𑀚𑀢𑀻𑀢𑀺 𑀔𑁄 𑀪𑀺𑀓𑁆𑀔𑀼 𑀢𑀲𑁆𑀫𑀸 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀮𑁄𑀓𑀺𑀬𑀢𑀺 𑀏𑀢𑁆𑀣 𑀧𑀼𑀜𑁆𑀜𑀧𑀸𑀧𑀁 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺 𑀲𑀢𑁆𑀢𑁄 𑀮𑁄𑀓𑁄. 𑀮𑁄𑀓𑀺𑀬𑀢𑀺 𑀯𑀺𑀘𑀺𑀢𑁆𑀢𑀸𑀓𑀸𑀭𑀢𑁄 𑀤𑀺𑀲𑁆𑀲𑀢𑀻𑀢𑀺 𑀘𑀓𑁆𑀓𑀯𑀸𑀴𑀲𑀗𑁆𑀔𑀸𑀢𑁄 𑀑𑀓𑀸𑀲𑁄 𑀮𑁄𑀓𑁄. 𑀬𑀲𑁆𑀫𑀸 𑀧𑀦 𑀮𑁄𑀓𑀲𑀤𑁆𑀤𑁄 𑀲𑀫𑀽𑀳𑁂𑀧𑀺 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀮𑁄𑀓𑀺𑀬𑀢𑀺 𑀲𑀫𑀼𑀤𑀸𑀬𑀯𑀲𑁂𑀦 ¶ 𑀧𑀜𑁆𑀜𑀸𑀧𑀺𑀬𑀢𑀻𑀢𑀺 𑀮𑁄𑀓𑁄, 𑀲𑀫𑀽𑀳𑁄𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀣 𑀯𑀸 𑀮𑁄𑀓𑁄𑀢𑀺 𑀢𑀬𑁄 𑀮𑁄𑀓𑀸 𑀓𑀺𑀮𑁂𑀲𑀮𑁄𑀓𑁄 𑀪𑀯𑀮𑁄𑀓𑁄 𑀇𑀦𑁆𑀤𑁆𑀭𑀺𑀬𑀮𑁄𑀓𑁄𑀢𑀺. 𑀢𑁂𑀲𑀁 𑀲𑀭𑀽𑀧𑀁 𑀘𑀼𑀭𑀸𑀤𑀺𑀕𑀡𑁂 𑀓𑀣𑁂𑀲𑁆𑀲𑀸𑀫 𑀩𑀳𑀼𑀯𑀺𑀥𑀢𑀜𑁆𑀘. 𑀩𑀳𑀺𑀤𑁆𑀥𑀸 𑀧𑀦 𑀓𑀯𑀻𑀳𑀺 ‘‘𑀮𑁄𑀓𑁄 𑀢𑀼 𑀪𑀼𑀯𑀦𑁂 𑀚𑀦𑁂’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁.

𑀲𑀺𑀮𑁄𑀓 𑀲𑀗𑁆𑀖𑀸𑀢𑁂. 𑀲𑀗𑁆𑀖𑀸𑀢𑁄 𑀧𑀺𑀡𑁆𑀟𑀦𑀁. 𑀲𑀺𑀮𑁄𑀓𑀢𑀺, 𑀲𑀺𑀮𑁄𑀓𑁄, 𑀲𑀺𑀮𑁄𑀓𑀫𑀦𑀼𑀓𑀲𑁆𑀲𑀸𑀫𑀺. 𑀅𑀓𑁆𑀔𑀭𑀧𑀤𑀦𑀺𑀬𑀫𑀺𑀢𑁄 𑀯𑀘𑀦𑀲𑀗𑁆𑀖𑀸𑀢𑁄 𑀲𑀺𑀮𑁄𑀓𑁄. 𑀲𑁄 𑀧𑀚𑁆𑀚𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸 𑀳𑀺 ‘‘𑀲𑀺𑀮𑁄𑀓𑁄 𑀬𑀲𑀲𑁆𑀲𑀺 𑀧𑀚𑁆𑀚𑁂’’𑀢𑀺 𑀓𑀯𑀬𑁄 𑀯𑀤𑀦𑁆𑀢𑀺.

𑀤𑁂𑀓 𑀥𑁂𑀓 𑀲𑀤𑁆𑀤𑀼𑀲𑁆𑀲𑀸𑀳𑁂𑀲𑀼. 𑀲𑀤𑁆𑀤𑁄 𑀭𑀯𑁄, 𑀉𑀲𑁆𑀲𑀸𑀳𑁄 𑀯𑀸𑀬𑀸𑀫𑁄. 𑀤𑁂𑀓𑀢𑀺. 𑀥𑁂𑀓𑀢𑀺.

𑀭𑁂𑀓 𑀲𑀓𑀺 𑀲𑀗𑁆𑀓𑀸𑀬𑀁. 𑀭𑁂𑀓𑀢𑀺. 𑀲𑀗𑁆𑀓𑀢𑀺, 𑀢𑀲𑁆𑀫𑀺𑀁 𑀫𑁂 𑀲𑀗𑁆𑀓𑀢𑁂 𑀫𑀦𑁄. 𑀲𑀗𑁆𑀓𑀸.

𑀅𑀓𑀺 𑀮𑀓𑁆𑀔𑀡𑁂. 𑀅𑀗𑁆𑀓𑀢𑀺, 𑀅𑀗𑁆𑀓𑁄, 𑀲𑀲𑀗𑁆𑀓𑁄.

𑀫𑀓𑀺 𑀫𑀡𑁆𑀟𑀦𑁂. 𑀫𑀡𑁆𑀟𑀦𑀁 𑀪𑀽𑀲𑀦𑀁, 𑀫𑀗𑁆𑀓𑀢𑀺.

𑀓𑀢 𑀮𑁄𑀮𑀺𑀬𑁂. 𑀮𑁄𑀮𑀪𑀸𑀯𑁄 𑀮𑁄𑀮𑀺𑀬𑀁 𑀬𑀣𑀸 𑀤𑀓𑁆𑀔𑀺𑀬𑀁. 𑀓𑀓𑀢𑀺, 𑀓𑀸𑀓𑁄, 𑀓𑀸𑀓𑀻. 𑀏𑀢𑁆𑀣 ‘‘𑀓𑀸𑀓𑁄, 𑀥𑀗𑁆𑀓𑁄, 𑀯𑀸𑀬𑀲𑁄, 𑀩𑀮𑀺, 𑀪𑁄𑀚𑀺, 𑀅𑀭𑀺𑀝𑁆𑀞𑁄’’𑀢𑀺 𑀇𑀫𑀸𑀦𑀺 𑀓𑀸𑀓𑀸𑀪𑀺𑀥𑀸𑀦𑀸𑀦𑀺.

𑀓𑀼𑀓 𑀯𑀓 𑀆𑀤𑀸𑀦𑁂. 𑀓𑀼𑀓𑀢𑀺, 𑀯𑀓𑀢𑀺, 𑀓𑁄𑀓𑁄, 𑀯𑀓𑁄. 𑀏𑀢𑁆𑀣 𑀓𑁄𑀓𑁄𑀢𑀺 𑀅𑀭𑀜𑁆𑀜𑀲𑀼𑀦𑀔𑁄. 𑀯𑀓𑁄𑀢𑀺 𑀔𑀼𑀤𑁆𑀤𑀓𑀯𑀦𑀤𑀻𑀧𑀺𑀓𑁄, 𑀩𑁆𑀬𑀕𑁆𑀖𑁄𑀢𑀺𑀧𑀺 𑀯𑀤𑀦𑁆𑀢𑀺.

𑀯𑀓 𑀤𑀺𑀢𑁆𑀢𑀺𑀬𑀁 𑀧𑀝𑀺𑀖𑀸𑀢𑁂 𑀘. 𑀤𑀺𑀢𑁆𑀢𑀺 𑀲𑁄𑀪𑀸, 𑀯𑀓𑀢𑀺.

𑀓𑀓𑀺 ¶ 𑀯𑀓𑀺 𑀲𑀓𑁆𑀓 𑀢𑀺𑀓 𑀝𑀺𑀓 𑀲𑁂𑀓 𑀕𑀢𑁆𑀬𑀢𑁆𑀣𑀸. 𑀓𑀗𑁆𑀓𑀢𑀺, 𑀯𑀗𑁆𑀓𑀢𑀺, 𑀲𑀓𑁆𑀓𑀢𑀺, 𑀦𑀺𑀲𑀓𑁆𑀓𑀢𑀺, 𑀧𑀭𑀺𑀲𑀓𑁆𑀓𑀢𑀺, 𑀑𑀲𑀓𑁆𑀓𑀢𑀺, 𑀯𑀥𑀸𑀬 𑀧𑀭𑀺𑀲𑀓𑁆𑀓𑀦𑀁. 𑀩𑀺𑀴𑀸𑀭𑀦𑀺𑀲𑀓𑁆𑀓𑀫𑀢𑁆𑀢𑀫𑁆𑀧𑀺. 𑀢𑁂𑀓𑀢𑀺, 𑀝𑁂𑀓𑀢𑀺, 𑀝𑀻𑀓𑀸 𑀲𑁂𑀓𑀢𑀺. 𑀏𑀢𑁆𑀣 𑀝𑀻𑀓𑀸𑀢𑀺 𑀝𑀺𑀓𑀺𑀬𑀢𑀺 𑀚𑀸𑀦𑀺𑀬𑀢𑀺 𑀲𑀁𑀯𑀡𑁆𑀡𑀦𑀸𑀬 𑀅𑀢𑁆𑀣𑁄 𑀏𑀢𑀸𑀬𑀸𑀢𑀺 𑀝𑀻𑀓𑀸. 𑀏𑀢𑀸 𑀇𑀥𑀸𑀢𑀼𑀆𑀤𑀺𑀓𑀸 𑀲𑁂𑀓𑀧𑀭𑀺𑀬𑀦𑁆𑀢𑀸 𑀥𑀸𑀢𑀼𑀬𑁄 ‘‘𑀅𑀢𑁆𑀢𑀦𑁄𑀪𑀸𑀲𑀸’’𑀢𑀺 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀯𑀤𑀦𑁆𑀢𑀺. 𑀢𑁂𑀲𑀁 𑀫𑀢𑁂 𑀏𑀢𑀸 ‘‘𑀢𑁂 𑀅𑀦𑁆𑀢𑁂, 𑀢𑀁 𑀅𑀦𑁆𑀢𑀁’’𑀇𑀘𑁆𑀘𑀸𑀤𑀻𑀦𑀁𑀬𑁂𑀯 𑀯𑀺𑀲𑀬𑁄, 𑀧𑀸𑀯𑀘𑀦𑁂 𑀧𑀦 𑀦𑀺𑀬𑀫𑁄 𑀦𑀢𑁆𑀣𑀺.

𑀳𑀺𑀓𑁆𑀓 𑀅𑀩𑁆𑀬𑀢𑁆𑀢𑀲𑀤𑁆𑀤𑁂. 𑀅𑀩𑁆𑀬𑀢𑁆𑀢𑀲𑀤𑁆𑀤𑁄 𑀅𑀯𑀺𑀪𑀸𑀯𑀺𑀢𑀢𑁆𑀣𑀲𑀤𑁆𑀤𑁄 𑀦𑀺𑀭𑀢𑁆𑀣𑀓𑀲𑀤𑁆𑀤𑁄 𑀘. 𑀳𑀺𑀓𑁆𑀓𑀢𑀺, 𑀳𑀺𑀓𑁆𑀓𑀢𑁂. 𑀇𑀫𑀁 ‘‘𑀉𑀪𑀬𑀢𑁄𑀪𑀸𑀲𑀸’’𑀢𑀺 𑀯𑀤𑀦𑁆𑀢𑀺. 𑀇𑀤𑀁 𑀢𑀼 𑀧𑀸𑀯𑀘𑀦𑁂𑀦 𑀲𑀁𑀲𑀦𑁆𑀤𑀢𑀺. 𑀧𑀭𑀲𑁆𑀲𑀢𑁆𑀢𑀦𑁄𑀪𑀸𑀲𑀸𑀦𑀜𑁆𑀳𑀺 𑀥𑀸𑀢𑀽𑀦𑀁 ‘‘𑀪𑀯𑀢𑀺, 𑀪𑀯𑀢𑁂, 𑀩𑀸𑀥𑀢𑁂, 𑀩𑀸𑀥𑀢𑀻’’𑀢𑀺𑀆𑀤𑀺𑀦𑀸 𑀬𑁂𑀪𑀼𑀬𑁆𑀬𑁂𑀦 𑀤𑁆𑀯𑀺𑀥𑀸 𑀤𑁆𑀯𑀺𑀥𑀸 𑀭𑀽𑀧𑀸𑀦𑀺 𑀲𑀸𑀲𑀦𑁂 𑀤𑀺𑀲𑁆𑀲𑀦𑁆𑀢𑀺.

𑀇𑀫𑀸𑀦𑀺 𑀓𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀔𑀓𑀸𑀭𑀦𑁆𑀢𑀥𑀸𑀢𑀼

𑀔𑀸 𑀧𑀓𑀣𑀦𑁂 𑀔𑁆𑀬𑀸 𑀘. 𑀧𑀓𑀣𑀦𑀁 𑀆𑀘𑀺𑀓𑁆𑀔𑀦𑀁 𑀤𑁂𑀲𑀦𑀁 𑀯𑀸. 𑀔𑀸𑀢𑀺, 𑀲𑀗𑁆𑀔𑀸𑀢𑀺. 𑀆𑀧𑀼𑀩𑁆𑀩𑀢𑁆𑀢𑁂 𑀯𑀺𑀲𑀤𑀺𑀲𑀪𑀸𑀯𑁂𑀦 𑀔𑀸𑀢𑁆𑀬𑀓𑁆𑀔𑀭𑀲𑁆𑀲 𑀤𑁆𑀯𑀺𑀢𑁆𑀢𑀁, 𑀆𑀓𑀸𑀭𑀲𑁆𑀲 𑀘 𑀲𑀜𑁆𑀜𑁄𑀕𑀧𑀼𑀩𑁆𑀩𑀢𑁆𑀢𑀸 𑀭𑀲𑁆𑀲𑀢𑁆𑀢𑀁, 𑀅𑀓𑁆𑀔𑀸𑀢𑀺. 𑀅𑀓𑁆𑀔𑀸𑀲𑀺 𑀧𑀼𑀭𑀺𑀲𑀼𑀢𑁆𑀢𑀫𑁄. 𑀅𑀓𑁆𑀔𑁂𑀬𑁆𑀬𑀁 𑀢𑁂 𑀅𑀳𑀁 𑀅𑀬𑁆𑀬𑁂. 𑀥𑀫𑁆𑀫𑁄 𑀲𑀗𑁆𑀔𑀸𑀬𑀢𑀺. 𑀅𑀓𑁆𑀔𑀸𑀬𑀢𑀺. 𑀅𑀢𑁆𑀭 𑀧𑀦 𑀓𑀓𑀸𑀭𑀮𑁄𑀧𑁄. 𑀲𑁆𑀯𑀸𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄. 𑀲𑀗𑁆𑀔𑀸𑀢𑁄. 𑀅𑀓𑁆𑀔𑀸𑀢𑁄. 𑀅𑀓𑁆𑀔𑀸𑀢𑀸𑀭𑁄 𑀢𑀣𑀸𑀕𑀢𑀸. 𑀲𑀗𑁆𑀔𑀸𑀢𑀸 𑀲𑀩𑁆𑀩𑀥𑀫𑁆𑀫𑀸𑀦𑀁 𑀯𑀺𑀥𑀼𑀭𑁄. 𑀲𑀗𑁆𑀔𑀸, 𑀧𑀝𑀺𑀲𑀗𑁆𑀔𑀸. 𑀓𑁆𑀭𑀺𑀬𑀁 𑀆𑀓𑁆𑀬𑀸𑀢𑀺 𑀓𑀣𑁂𑀢𑀻𑀢𑀺 𑀆𑀔𑁆𑀬𑀸𑀢𑀁. 𑀓𑁂𑀘𑀺 ¶ 𑀧𑀦 ‘‘𑀲𑁆𑀯𑀸𑀔𑀸𑀢𑁄’’𑀢𑀺 𑀘 ‘‘𑀲𑁆𑀯𑀸𑀓𑁆𑀔𑁆𑀬𑀸𑀢𑁄’’𑀢𑀺 𑀘 ‘‘𑀲𑁆𑀯𑀸𑀔𑁆𑀬𑀸𑀢𑁄’’𑀢𑀺 𑀘 𑀧𑀤𑀫𑀺𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀧𑀘𑁆𑀙𑀺𑀫𑀸𑀦𑀺 𑀲𑀓𑁆𑀓𑀝𑀪𑀸𑀲𑀸𑀢𑁄 𑀦𑀬𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀺, 𑀇𑀢𑀭𑀁 𑀬𑀣𑀸𑀞𑀺𑀢𑀭𑀽𑀧𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦, 𑀅𑀢𑁄 𑀬𑀣𑀸𑀤𑀲𑁆𑀲𑀺𑀢𑀧𑀤𑀸𑀦𑀺𑀬𑁂𑀯 𑀧𑀲𑀢𑁆𑀣𑀢𑀭𑀸𑀦𑀺. 𑀢𑀢𑁆𑀣 𑀲𑀗𑁆𑀔𑀸𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄 𑀦𑀻𑀬𑀢𑁂 𑁋 𑀲𑀗𑁆𑀔𑀸𑀲𑀤𑁆𑀤𑁄 𑀜𑀸𑀡𑀓𑁄𑀝𑁆𑀞𑀸𑀲𑀧𑀜𑁆𑀜𑀢𑁆𑀢𑀺𑀕𑀡𑀦𑀸𑀲𑀼 𑀤𑀺𑀲𑁆𑀲𑀢𑀺. ‘‘𑀲𑀗𑁆𑀔𑀸𑀬𑁂𑀓𑀁 𑀧𑀝𑀺𑀲𑁂𑀯𑀢𑀻’’𑀢𑀺𑀆𑀤𑀻𑀲𑀼 𑀳𑀺 𑀜𑀸𑀡𑁂 𑀤𑀺𑀲𑁆𑀲𑀢𑀺. ‘‘𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸 𑀲𑀫𑀼𑀤𑀸𑀘𑀭𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀓𑁄𑀝𑁆𑀞𑀸𑀲𑁂. ‘‘𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸’’𑀢𑀺𑀆𑀤𑀻𑀲𑀼 𑀧𑀜𑁆𑀜𑀢𑁆𑀢𑀺𑀬𑀁. ‘‘𑀦 𑀲𑀼𑀓𑀭𑀁 𑀲𑀗𑁆𑀔𑀸𑀢𑀼’’𑀦𑁆𑀢𑀺𑀆𑀤𑀻𑀲𑀼 𑀕𑀡𑀦𑀸𑀬𑀁. 𑀏𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀜𑀸𑀡𑀧𑀜𑁆𑀜𑀢𑁆𑀢𑀺𑀓𑁄𑀝𑁆𑀞𑀸𑀲-𑀕𑀡𑀦𑀸𑀲𑀼 𑀧𑀤𑀺𑀲𑁆𑀲𑀢𑀺;

𑀲𑀗𑁆𑀔𑀸𑀲𑀤𑁆𑀤𑁄𑀢𑀺 𑀤𑀻𑀧𑁂𑀬𑁆𑀬, 𑀥𑀫𑁆𑀫𑀤𑀻𑀧𑀲𑁆𑀲 𑀲𑀸𑀲𑀦𑁂’’𑀢𑀺.

𑀔𑀺 𑀔𑀬𑁂. 𑀔𑀺𑀬𑀦𑀥𑀫𑁆𑀫𑀁 𑀔𑀻𑀬𑀢𑀺. 𑀲𑀸𑀲𑀦𑀸𑀦𑀼𑀭𑀽𑀧𑁂𑀦 𑀲𑀭𑁂 𑀇𑀓𑀸𑀭𑀲𑁆𑀲 𑀇𑀬𑁆𑀬𑀸𑀤𑁂𑀲𑁄, 𑀔𑀺𑀬𑁆𑀬𑀢𑀺. ‘‘𑀔𑀬𑁄, 𑀔𑀁’’ 𑀇𑀘𑁆𑀘𑀧𑀺 𑀭𑀽𑀧𑀸𑀦𑀺 𑀜𑁂𑀬𑁆𑀬𑀸𑀦𑀺. 𑀢𑀢𑁆𑀣 𑀔𑀬𑁄𑀢𑀺 𑀔𑀺𑀬𑀦𑀁 𑀔𑀬𑁄. 𑀅𑀣 𑀯𑀸 𑀔𑀺𑀬𑀦𑁆𑀢𑀺 𑀓𑀺𑀮𑁂𑀲𑀸 𑀏𑀢𑁆𑀣𑀸𑀢𑀺 𑀔𑀬𑁄, 𑀫𑀕𑁆𑀕𑀦𑀺𑀩𑁆𑀩𑀸𑀦𑀸𑀦𑀺. 𑀔𑀬𑀲𑀗𑁆𑀔𑀸𑀢𑁂𑀦 𑀫𑀕𑁆𑀕𑁂𑀦 𑀧𑀸𑀧𑀼𑀡𑀺𑀬𑀢𑁆𑀢𑀸 𑀨𑀮𑀫𑁆𑀧𑀺 𑀔𑀬𑁄. 𑀔𑀦𑁆𑀢𑀺 𑀢𑀼𑀘𑁆𑀙𑀁 𑀲𑀼𑀜𑁆𑀜𑀁 𑀯𑀺𑀯𑀺𑀢𑁆𑀢𑀁 𑀭𑀺𑀢𑁆𑀢𑀁, 𑀔𑀦𑁆𑀢𑀺 𑀯𑀸 𑀆𑀓𑀸𑀲𑁄.

𑀔𑀺 𑀦𑀺𑀯𑀸𑀲𑁂. 𑀔𑀻𑀬𑀢𑀺, 𑀔𑀺𑀬𑁆𑀬𑀢𑀺 𑀯𑀸. 𑀲𑀸𑀲𑀦𑀸𑀦𑀼𑀭𑀽𑀧𑁂𑀦 𑀇𑀓𑀸𑀭𑀲𑁆𑀲 𑀈𑀬 𑀇𑀬𑁆𑀬𑀸𑀤𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀅𑀬𑀁 𑀤𑀺𑀯𑀸𑀤𑀺𑀕𑀡𑁂𑀧𑀺 𑀧𑀓𑁆𑀔𑀺𑀧𑀺𑀢𑀩𑁆𑀩𑁄. 𑀔𑀁 𑀔𑀬𑀁. 𑀅𑀪𑀺𑀭𑀫𑀡𑀻𑀬𑀁 𑀭𑀸𑀚𑀓𑁆𑀔𑀬𑀁. 𑀢𑀢𑁆𑀣 𑀔𑀻𑀬𑀢𑀻𑀢𑀺 𑀦𑀺𑀯𑀲𑀢𑀺. 𑀔𑀦𑁆𑀢𑀺 𑀘𑀓𑁆𑀔𑀸𑀤𑀺𑀇𑀦𑁆𑀤𑁆𑀭𑀺𑀬𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀦𑀺𑀯𑀸𑀲𑀝𑁆𑀞𑁂𑀦. 𑀔𑀬𑀦𑁆𑀢𑀺 𑀦𑀺𑀯𑁂𑀲𑀦𑀁. 𑀭𑀸𑀚𑀓𑁆𑀔𑀬𑀦𑁆𑀢𑀺 𑀭𑀜𑁆𑀜𑁄 𑀦𑀺𑀯𑁂𑀲𑀦𑀁. 𑀅𑀢𑁆𑀭𑀸𑀬𑀁 𑀧𑀸𑀴𑀺 𑁋

‘‘𑀲𑀘𑁂 ¶ 𑀘 𑀅𑀚𑁆𑀚 𑀥𑀸𑀭𑁂𑀲𑀺, 𑀓𑀼𑀫𑀸𑀭𑀁 𑀘𑀸𑀭𑀼𑀤𑀲𑁆𑀲𑀦𑀁;

𑀓𑀼𑀲𑁂𑀦 𑀚𑀸𑀢𑀔𑀢𑁆𑀢𑀺𑀬𑀁, 𑀲𑀯𑀡𑁆𑀡𑀫𑀡𑀺𑀫𑁂𑀔𑀮𑀁;

𑀧𑀽𑀚𑀺𑀢𑀸 𑀜𑀸𑀢𑀺𑀲𑀗𑁆𑀖𑁂𑀳𑀺, 𑀦 𑀕𑀘𑁆𑀙𑀲𑀺 𑀬𑀫𑀓𑁆𑀔𑀬’’𑀦𑁆𑀢𑀺.

𑀢𑀢𑁆𑀣 𑀬𑀫𑀓𑁆𑀔𑀬𑀦𑁆𑀢𑀺 𑀬𑀫𑀦𑀺𑀯𑁂𑀲𑀦𑀁.

𑀔𑀼 𑀲𑀤𑁆𑀤𑁂. 𑀔𑁄𑀢𑀺 𑀔𑀯𑀢𑀺.

𑀔𑁂 𑀔𑀸𑀤𑀦𑀲𑀢𑁆𑀢𑀸𑀲𑀼. 𑀔𑀸𑀬𑀢𑀺. 𑀉𑀦𑁆𑀤𑀽𑀭𑀸 𑀔𑀸𑀬𑀦𑁆𑀢𑀺. 𑀯𑀺𑀓𑁆𑀔𑀸𑀬𑀺𑀢𑀓𑀁. 𑀕𑁄𑀔𑀸𑀬𑀺𑀢𑀓𑀁. 𑀅𑀲𑁆𑀲𑀺𑀭𑀻 𑀯𑀺𑀬 𑀔𑀸𑀬𑀢𑀺. 𑀤𑀺𑀲𑀸𑀧𑀺 𑀫𑁂 𑀦 𑀧𑀓𑁆𑀔𑀸𑀬𑀦𑁆𑀢𑀺. 𑀏𑀢𑁆𑀣𑀸𑀤𑀺𑀫𑁆𑀳𑀺 𑀓𑀸𑀬𑀢𑀻𑀢𑀺 𑀔𑀸𑀤𑀢𑀺. 𑀅𑀣 𑀯𑀸 𑀉𑀧𑀝𑁆𑀞𑀸𑀢𑀺 𑀧𑀜𑁆𑀜𑀸𑀬𑀢𑀺.

𑀲𑀼𑀔 𑀤𑀼𑀓𑁆𑀔 𑀢𑀓𑁆𑀭𑀺𑀬𑀸𑀬𑀁. 𑀢𑀓𑁆𑀭𑀺𑀬𑀸𑀢𑀺 𑀲𑀼𑀔𑀤𑀼𑀓𑁆𑀔𑀸𑀦𑀁 𑀯𑁂𑀤𑀦𑀸𑀦𑀁 𑀓𑁆𑀭𑀺𑀬𑀸, 𑀲𑀼𑀔𑀦𑀁 𑀤𑀼𑀓𑁆𑀔𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀓𑀫𑁆𑀫𑀓𑀸 𑀇𑀫𑁂 𑀥𑀸𑀢𑀯𑁄. 𑀲𑀼𑀔𑀢𑀺, 𑀤𑀼𑀓𑁆𑀔𑀢𑀺. 𑀲𑀼𑀔𑀁, 𑀤𑀼𑀓𑁆𑀔𑀁. 𑀲𑀼𑀔𑀺𑀢𑁄, 𑀤𑀼𑀓𑁆𑀔𑀺𑀢𑁄. 𑀲𑀼𑀔𑀁 𑀲𑀸𑀢𑀁 𑀧𑀻𑀡𑀦𑀁, 𑀤𑀼𑀓𑁆𑀔𑀁 𑀯𑀺𑀖𑀸𑀢𑀁 𑀅𑀖𑀁 𑀓𑀺𑀮𑁂𑀲𑁄. 𑀢𑀢𑁆𑀣 𑀲𑀼𑀔𑀦𑁆𑀢𑀺 𑀲𑀼𑀔𑀬𑀢𑀻𑀢𑀺 𑀲𑀼𑀔𑀁. 𑀬𑀲𑁆𑀲𑀼𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀼𑀔𑀺𑀢𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀦𑁆𑀢𑀺 𑀤𑀼𑀓𑁆𑀔𑀬𑀢𑀻𑀢𑀺 𑀤𑀼𑀓𑁆𑀔𑀁. 𑀬𑀲𑁆𑀲𑀼𑀧𑁆𑀧𑀚𑁆𑀚𑀢𑀺, 𑀢𑀁 𑀤𑀼𑀓𑁆𑀔𑀺𑀢𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀸𑀦𑀺 𑀦𑀺𑀩𑁆𑀩𑀘𑀦𑀸𑀦𑀺 𑀓𑀸𑀭𑀺𑀢𑀯𑀲𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁 𑀅𑀝𑁆𑀞𑀓𑀣𑀸𑀬𑀁 𑀲𑀼𑀔𑀤𑀼𑀓𑁆𑀔𑀲𑀤𑁆𑀤𑀢𑁆𑀣𑀁 𑀯𑀤𑀦𑁆𑀢𑁂𑀳𑀺 𑀕𑀭𑀽𑀳𑀺 𑀲𑀼𑀔𑀬𑀢𑀺 𑀤𑀼𑀓𑁆𑀔𑀬𑀢𑀺𑀲𑀤𑁆𑀤𑀸𑀦𑀁 𑀓𑀫𑁆𑀫𑀢𑁆𑀣𑀫𑀸𑀤𑀸𑀬 𑀯𑀺𑀯𑀭𑀡𑀲𑁆𑀲 𑀓𑀢𑀢𑁆𑀢𑀸. 𑀢𑀣𑀸 𑀳𑀺 ‘‘𑀲𑀼𑀔𑁂𑀢𑀺 𑀲𑀼𑀔𑀬𑀢𑀺, 𑀲𑀼𑀔𑀸𑀧𑁂𑀢𑀺 𑀲𑀼𑀔𑀸𑀧𑀬𑀢𑀺, 𑀤𑀼𑀓𑁆𑀔𑁂𑀢𑀺 𑀤𑀼𑀓𑁆𑀔𑀬𑀢𑀺, 𑀤𑀼𑀓𑁆𑀔𑀸𑀧𑁂𑀢𑀺 𑀤𑀼𑀓𑁆𑀔𑀸𑀧𑀬𑀢𑀻’’𑀢𑀺 𑀇𑀫𑀸𑀦𑀺 𑀢𑁂𑀲𑀁 𑀓𑀸𑀭𑀺𑀢𑀧𑀤𑀭𑀽𑀧𑀸𑀦𑀺, 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀧𑀻𑀡𑁂𑀢𑀻𑀢𑀺 𑀘, 𑀲𑀼𑀔𑀬𑀢𑀺 𑀲𑀼𑀔𑀁, 𑀤𑀼𑀓𑁆𑀔𑀬𑀢𑀻𑀢𑀺 𑀤𑀼𑀓𑁆𑀔𑀦𑁆𑀢𑀺 𑀘,

‘‘𑀲𑀘𑁂 ¶ 𑀘 𑀓𑀺𑀫𑁆𑀳𑀺𑀘𑀺 𑀓𑀸𑀮𑁂,

𑀫𑀭𑀡𑀁 𑀫𑁂 𑀧𑀼𑀭𑁂 𑀲𑀺𑀬𑀸;

𑀧𑀼𑀢𑁆𑀢𑁂 𑀘 𑀫𑁂 𑀧𑀧𑀼𑀢𑁆𑀢𑁂 𑀘,

𑀲𑀼𑀔𑀸𑀧𑁂𑀬𑁆𑀬 𑀫𑀳𑁄𑀲𑀥𑁄’’𑀢𑀺 𑀘

𑀧𑀸𑀴𑀺𑀆𑀤𑀺𑀤𑀲𑁆𑀲𑀦𑀢𑁄. 𑀲𑀤𑁆𑀤𑀲𑀢𑁆𑀣𑁂 𑀧𑀦 𑀥𑀸𑀢𑀼𑀧𑀸𑀞𑀲𑀗𑁆𑀔𑁂𑀧𑁂 𑀘 𑀇𑀫𑁂 𑀥𑀸𑀢𑀯𑁄 𑀘𑀼𑀭𑀸𑀤𑀺𑀕𑀡𑁂𑀬𑁂𑀯 𑀯𑀼𑀢𑁆𑀢𑀸. ‘‘𑀲𑀼𑀔𑀬𑀢𑀺 𑀤𑀼𑀓𑁆𑀔𑀬𑀢𑀻’’𑀢𑀺 𑀘 𑀅𑀓𑀸𑀭𑀺𑀢𑀸𑀦𑀺 𑀲𑀼𑀤𑁆𑀥𑀓𑀢𑁆𑀢𑀼𑀧𑀤𑀸𑀦𑀺 𑀇𑀘𑁆𑀙𑀺𑀢𑀸𑀦𑀺. 𑀫𑀬𑀁 𑀢𑀼 𑀢𑁂𑀲𑀁 𑀢𑀩𑁆𑀩𑀘𑀦𑀁 𑀲𑀼𑀤𑁆𑀥𑀓𑀢𑁆𑀢𑀭𑀺 𑀘 𑀢𑀸𑀦𑀺 𑀧𑀤𑀭𑀽𑀧𑀸𑀦𑀺 𑀦 𑀇𑀘𑁆𑀙𑀸𑀫 𑀧𑀸𑀴𑀺𑀆𑀤𑀻𑀳𑀺 𑀯𑀺𑀭𑀼𑀤𑁆𑀥𑀢𑁆𑀢𑀸, 𑀢𑀲𑁆𑀫𑀸𑀬𑁂𑀯 𑀢𑁂 𑀇𑀫𑀲𑁆𑀫𑀺𑀁 𑀪𑀽𑀯𑀸𑀤𑀺𑀕𑀡𑁂 𑀯𑀼𑀢𑁆𑀢𑀸. 𑀅𑀬𑀜𑁆𑀳𑀺 𑀲𑀼𑀤𑁆𑀥𑀓𑀢𑁆𑀢𑀼𑀯𑀺𑀲𑀬𑁂 𑀅𑀲𑁆𑀫𑀸𑀓𑀁 𑀭𑀼𑀘𑀺 ‘‘𑀲𑀼𑀔𑀢𑀻𑀢𑀺 𑀲𑀼𑀔𑀺𑀢𑁄, 𑀤𑀼𑀓𑁆𑀔𑀢𑀻𑀢𑀺 𑀤𑀼𑀓𑁆𑀔𑀺𑀢𑁄’’𑀢𑀺.

𑀦𑀦𑀼 𑀘 𑀪𑁄 ‘‘𑀲𑀼𑀔𑀢𑀺 𑀤𑀼𑀓𑁆𑀔𑀢𑀻’’𑀢𑀺 𑀓𑁆𑀭𑀺𑀬𑀸𑀧𑀤𑀸𑀦𑀺 𑀩𑀼𑀤𑁆𑀥𑀯𑀘𑀦𑁂 𑀦 𑀤𑀺𑀲𑁆𑀲𑀦𑁆𑀢𑀻𑀢𑀺? 𑀲𑀘𑁆𑀘𑀁, 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀝𑁆𑀞𑀓𑀣𑀸𑀦𑀬𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑁆𑀢𑀸 𑀤𑀺𑀲𑁆𑀲𑀦𑁆𑀢𑀺𑀬𑁂𑀯 𑀦𑀸𑀫. 𑀦 𑀳𑀺 𑀲𑀩𑁆𑀩𑀣𑀸 𑀲𑀩𑁆𑀩𑁂𑀲𑀁 𑀥𑀸𑀢𑀽𑀦𑀁 𑀭𑀽𑀧𑀸𑀦𑀺 𑀲𑀸𑀲𑀦𑁂 𑀮𑁄𑀓𑁂 𑀯𑀸 𑀮𑀩𑁆𑀪𑀦𑁆𑀢𑀺, 𑀏𑀓𑀘𑁆𑀘𑀸𑀦𑀺 𑀧𑀦 𑀮𑀩𑁆𑀪𑀦𑁆𑀢𑀺, 𑀏𑀓𑀘𑁆𑀘𑀸𑀦𑀺 𑀦 𑀮𑀩𑁆𑀪𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀦𑀬𑀯𑀲𑁂𑀦 𑀮𑀩𑁆𑀪𑀦𑁆𑀢𑀺𑀬𑁂𑀯. ‘‘𑀓𑀧𑁆𑀧𑀬𑀯𑁆𑀳𑁄 𑀧𑀢𑀺𑀲𑁆𑀲𑀢𑀸’’𑀢𑀺 𑀳𑀺 𑀤𑀺𑀝𑁆𑀞𑁂 ‘‘𑀘𑀭𑀯𑁆𑀳𑁄 𑀪𑀼𑀜𑁆𑀚𑀯𑁆𑀳𑁄’’𑀢𑀺𑀆𑀤𑀻𑀦𑀺𑀧𑀺 𑀦𑀬𑀯𑀲𑁂𑀦 𑀤𑀺𑀝𑁆𑀞𑀸𑀦𑀺𑀬𑁂𑀯 𑀦𑀸𑀫.

𑀢𑀢𑁆𑀭 𑀧𑀦𑀸𑀬𑀁 𑀦𑀬𑁄. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀤𑀻𑀲𑀼 𑀳𑀺 ‘‘𑀏𑀓𑀤𑁆𑀯𑀺𑀬𑁄𑀚𑀦𑀫𑀢𑁆𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀕𑀢𑀲𑁆𑀲 𑀯𑀸𑀬𑁄 𑀓𑀼𑀧𑁆𑀧𑀢𑀺, 𑀕𑀢𑁆𑀢𑀸𑀦𑀺 𑀤𑀼𑀓𑁆𑀔𑀦𑁆𑀢𑀻’’𑀢𑀺 𑀏𑀯𑀁 𑀪𑀽𑀯𑀸𑀤𑀺𑀕𑀡𑀺𑀓𑀁 𑀅𑀓𑀫𑁆𑀫𑀓𑀁 𑀲𑀼𑀤𑁆𑀥𑀓𑀢𑁆𑀢𑀼𑀯𑀸𑀘𑀓𑀁 ‘‘𑀤𑀼𑀓𑁆𑀔𑀦𑁆𑀢𑀻’’𑀢𑀺 𑀓𑁆𑀭𑀺𑀬𑀸𑀧𑀤𑀁 𑀤𑀺𑀲𑁆𑀲𑀢𑀺. 𑀢𑀲𑁆𑀫𑀺𑀁 𑀤𑀺𑀝𑁆𑀞𑀺𑀬𑁂𑀯 ‘‘𑀲𑀼𑀔𑀢𑀺, 𑀲𑀼𑀔𑀦𑁆𑀢𑀺. 𑀲𑀼𑀔𑀲𑀺, 𑀲𑀼𑀔𑀣. 𑀲𑀼𑀔𑀸𑀫𑀺, 𑀲𑀼𑀔𑀸𑀫𑀸’’𑀢𑀺𑀆𑀤𑀻𑀦𑀺 𑀘 ‘‘𑀤𑀼𑀓𑁆𑀔𑀢𑀺, 𑀤𑀼𑀓𑁆𑀔𑀦𑁆𑀢𑀺. 𑀤𑀼𑀓𑁆𑀔𑀲𑀺, 𑀤𑀼𑀓𑁆𑀔𑀣𑀸’’𑀢𑀺𑀆𑀤𑀻𑀦𑀺𑀘 𑀤𑀺𑀝𑁆𑀞𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺 𑀤𑀺𑀝𑁆𑀞𑁂𑀦 𑀅𑀤𑀺𑀝𑁆𑀞𑀲𑁆𑀲 𑀢𑀸𑀤𑀺𑀲𑀲𑁆𑀲 𑀅𑀦𑀯𑀚𑁆𑀚𑀲𑁆𑀲 𑀦𑀬𑀲𑁆𑀲 𑀕𑀳𑁂𑀢𑀩𑁆𑀩𑀢𑁆𑀢𑀸, 𑀢𑀲𑁆𑀫𑀸 ‘‘𑀲𑀼𑀔𑀢𑀻𑀢𑀺 𑀲𑀼𑀔𑀺𑀢𑁄, 𑀤𑀼𑀓𑁆𑀔𑀢𑀻𑀢𑀺 𑀤𑀼𑀓𑁆𑀔𑀺𑀢𑁄’’𑀢𑀺 𑀪𑀽𑀯𑀸𑀤𑀺𑀦𑀬𑁄 𑀏𑀯 𑀕𑀳𑁂𑀢𑀩𑁆𑀩𑁄, 𑀦 𑀧𑀦 𑀘𑀼𑀭𑀸𑀤𑀺𑀦𑀬𑁄. 𑀅𑀧𑀭𑀫𑁆𑀧𑁂𑀢𑁆𑀣 𑀦𑀺𑀩𑁆𑀩𑀘𑀦𑀁, 𑀲𑀼𑀔𑀁 𑀲𑀜𑁆𑀚𑀸𑀢𑀁 ¶ 𑀏𑀢𑀲𑁆𑀲𑀸𑀢𑀺 𑀲𑀼𑀔𑀺𑀢𑁄, 𑀲𑀜𑁆𑀚𑀸𑀢𑀲𑀼𑀔𑁄𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀤𑀼𑀓𑁆𑀔𑀺𑀢𑁄𑀢𑀺 𑀏𑀢𑁆𑀣𑀸𑀧𑀺. 𑀅𑀣 𑀯𑀸 𑀲𑀼𑀔𑁂𑀦 𑀇𑀢𑁄 𑀧𑀯𑀢𑁆𑀢𑁄𑀢𑀺 𑀲𑀼𑀔𑀺𑀢𑁄. 𑀏𑀲 𑀦𑀬𑁄 ‘‘𑀤𑀼𑀓𑁆𑀔𑀺𑀢𑁄’’𑀢𑀺 𑀏𑀢𑁆𑀣𑀸𑀧𑀺. 𑀤𑀼𑀮𑁆𑀮𑀪𑀸𑀬𑀁 𑀦𑀻𑀢𑀺 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀸𑀢𑀩𑁆𑀩𑀸.

𑀫𑁄𑀓𑁆𑀔 𑀫𑀼𑀘𑁆𑀘𑀦𑁂. 𑀅𑀓𑀫𑁆𑀫𑀓𑁄𑀬𑀁 𑀥𑀸𑀢𑀼. 𑀫𑁄𑀓𑁆𑀔𑀢𑀺. 𑀫𑁄𑀓𑁆𑀔𑁄. 𑀧𑀸𑀢𑀺𑀫𑁄𑀓𑁆𑀔𑁄. 𑀓𑀸𑀭𑀺𑀢𑁂 ‘‘𑀫𑁄𑀓𑁆𑀔𑁂𑀢𑀺, 𑀫𑁄𑀓𑁆𑀔𑀬𑀢𑀺, 𑀫𑁄𑀓𑁆𑀔𑀸𑀧𑁂𑀢𑀺, 𑀫𑁄𑀓𑁆𑀔𑀸𑀧𑀬𑀢𑀻’’𑀢𑀺 𑀭𑀽𑀧𑀸𑀦𑀺. 𑀓𑁂𑀘𑀺 𑀧𑀦𑀺𑀫𑀁 ‘‘𑀫𑁄𑀓𑁆𑀔 𑀫𑁄𑀘𑀦𑁂’’𑀢𑀺 𑀧𑀞𑀺𑀢𑁆𑀯𑀸 𑀘𑀼𑀭𑀸𑀤𑀺𑀕𑀡𑁂 𑀧𑀓𑁆𑀔𑀺𑀧𑀦𑁆𑀢𑀺. 𑀢𑁂𑀲𑀁 𑀫𑀢𑁂 ‘‘𑀫𑁄𑀓𑁆𑀔𑁂𑀢𑀺, 𑀫𑁄𑀓𑁆𑀔𑀬𑀢𑀻’’𑀢𑀺 𑀲𑀼𑀤𑁆𑀥𑀓𑀢𑁆𑀢𑀼𑀧𑀤𑀸𑀦𑀺 𑀪𑀯𑀦𑁆𑀢𑀺. 𑀏𑀢𑀸𑀦𑀺 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬 𑀘 𑀯𑀺𑀭𑀼𑀚𑁆𑀛𑀦𑁆𑀢𑀺. 𑀢𑀣𑀸 𑀳𑀺 ‘‘𑀫𑁄𑀓𑁆𑀔𑀦𑁆𑀢𑀺 𑀫𑀸𑀭𑀩𑀦𑁆𑀥𑀦𑀸. 𑀦 𑀫𑁂 𑀲𑀫𑀡𑁂 𑀫𑁄𑀓𑁆𑀔𑀲𑀺. 𑀫𑀳𑀸𑀬𑀜𑁆𑀜𑀁 𑀬𑀚𑀺𑀲𑁆𑀲𑀸𑀫, 𑀏𑀯𑀁 𑀫𑁄𑀓𑁆𑀔𑀸𑀫 𑀧𑀸𑀧𑀓𑀸’’𑀢𑀺 𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀦𑁆𑀢𑀺. ‘‘𑀬𑁄 𑀦𑀁 𑀧𑀸𑀢𑀺 𑀭𑀓𑁆𑀔𑀢𑀺, 𑀢𑀁 𑀫𑁄𑀓𑁆𑀔𑁂𑀢𑀺 𑀫𑁄𑀘𑁂𑀢𑀺 𑀆𑀧𑀸𑀬𑀺𑀓𑀸𑀤𑀻𑀳𑀺 𑀤𑀼𑀓𑁆𑀔𑁂𑀳𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑁄’’𑀢𑀺 𑀅𑀝𑁆𑀞𑀓𑀣𑀸𑀬 𑀘 𑀯𑀺𑀭𑀼𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀧𑀸𑀴𑀺𑀬𑀁 ‘‘𑀫𑁄𑀓𑁆𑀔𑁂𑀲𑀺 𑀫𑁄𑀓𑁆𑀔𑁂𑀫𑀸’’𑀢𑀺 𑀘 𑀅𑀯𑀢𑁆𑀯𑀸 ‘‘𑀫𑁄𑀓𑁆𑀔𑀲𑀺, 𑀫𑁄𑀓𑁆𑀔𑀸𑀫𑀸’’𑀢𑀺 𑀲𑀼𑀤𑁆𑀥𑀓𑀢𑁆𑀢𑀼𑀯𑀸𑀘𑀓𑀁 𑀯𑀼𑀢𑁆𑀢𑀁, 𑀢𑀜𑁆𑀘 𑀔𑁄 𑀅𑀧𑀸𑀤𑀸𑀦𑀯𑀺𑀲𑀬𑀁 𑀓𑀢𑁆𑀯𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀫𑁄𑀓𑁆𑀔𑁂𑀢𑀺, 𑀫𑁄𑀘𑁂𑀢𑀻’’𑀢𑀺 𑀳𑁂𑀢𑀼𑀓𑀢𑁆𑀢𑀼𑀯𑀸𑀘𑀓𑀁 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀅𑀧𑀸𑀤𑀸𑀦𑀯𑀺𑀲𑀬𑀁𑀬𑁂𑀯 𑀓𑀢𑁆𑀯𑀸. 𑀏𑀯𑀁 𑀇𑀫𑀲𑁆𑀲 𑀥𑀸𑀢𑀼𑀦𑁄 𑀲𑀼𑀤𑁆𑀥𑀓𑀢𑁆𑀢𑀼𑀯𑀺𑀲𑀬𑁂 𑀅𑀓𑀫𑁆𑀫𑀓𑀪𑀸𑀯𑁄 𑀯𑀺𑀤𑀺𑀢𑁄, 𑀳𑁂𑀢𑀼𑀓𑀢𑁆𑀢𑀼𑀯𑀺𑀲𑀬𑁂 𑀏𑀓𑀓𑀫𑁆𑀫𑀓𑀪𑀸𑀯𑁄 𑀯𑀺𑀤𑀺𑀢𑁄 𑀫𑀼𑀘 𑀧𑀘 𑀙𑀺𑀤𑀸𑀤𑀬𑁄 𑀯𑀺𑀬. 𑀫𑁄𑀓𑁆𑀔𑀥𑀸𑀢𑀼 𑀤𑁆𑀯𑀺𑀕𑀡𑀺𑀓𑁄𑀢𑀺 𑀘𑁂? 𑀦, 𑀅𑀦𑁂𑀓𑁂𑀲𑀼 𑀲𑀸𑀝𑁆𑀞𑀓𑀣𑁂𑀲𑀼 𑀧𑀸𑀴𑀺𑀧𑁆𑀧𑀤𑁂𑀲𑁂𑀲𑀼 ‘‘𑀫𑁄𑀓𑁆𑀔𑁂𑀢𑀺, 𑀫𑁄𑀓𑁆𑀔𑀬𑀢𑀻’’𑀢𑀺 𑀲𑀼𑀤𑁆𑀥𑀓𑀢𑁆𑀢𑀼𑀭𑀽𑀧𑀸𑀦𑀁 𑀅𑀤𑀲𑁆𑀲𑀦𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀓𑀓𑁆𑀔 𑀳𑀲𑀦𑁂. 𑀓𑀓𑁆𑀔𑀢𑀺.

𑀑𑀔 𑀭𑀸𑀔 𑀮𑀸𑀔 𑀤𑀸𑀔 𑀥𑀸𑀔 𑀲𑁄𑀲𑀦𑀸𑀮𑀫𑀢𑁆𑀣𑁂𑀲𑀼. 𑀑𑀔𑀢𑀺. 𑀭𑀸𑀔𑀢𑀺. 𑀮𑀸𑀔𑀢𑀺. 𑀤𑀸𑀔𑀢𑀺. 𑀥𑀸𑀔𑀢𑀺.

𑀲𑀸𑀔 ¶ 𑀩𑁆𑀬𑀸𑀧𑀦𑁂. 𑀲𑀸𑀔𑀢𑀺. 𑀲𑀸𑀔𑀸.

𑀉𑀔 𑀦𑀔 𑀫𑀔 𑀭𑀔 𑀮𑀔 𑀭𑀔𑀺 𑀮𑀔𑀺 𑀇𑀔𑀺 𑀭𑀺𑀔𑀺 𑀕𑀢𑁆𑀬𑀢𑁆𑀣𑀸. 𑀉𑀔𑀢𑀺. 𑀦𑀔𑀢𑀺. 𑀫𑀔𑀢𑀺. 𑀭𑀔𑀢𑀺. 𑀮𑀔𑀢𑀺. 𑀭𑀗𑁆𑀔𑀢𑀺. 𑀮𑀗𑁆𑀔𑀢𑀺. 𑀇𑀗𑁆𑀔𑀢𑀺. 𑀭𑀺𑀗𑁆𑀔𑀢𑀺.

𑀭𑀓𑁆𑀔 𑀧𑀸𑀮𑀦𑁂. 𑀭𑀓𑁆𑀔𑀢𑀺. 𑀭𑀓𑁆𑀔𑀸, 𑀭𑀓𑁆𑀔𑀡𑀁, 𑀲𑀻𑀮𑀁 𑀭𑀓𑁆𑀔𑀺𑀢𑁄 𑀤𑁂𑀯𑀤𑀢𑁆𑀢𑁄, 𑀲𑀻𑀮𑀁 𑀭𑀓𑁆𑀔𑀺𑀢𑀁 𑀤𑁂𑀯𑀤𑀢𑁆𑀢𑁂𑀦, 𑀲𑀻𑀮𑀁 𑀭𑀓𑁆𑀔𑀓𑁄 𑀤𑁂𑀯𑀤𑀢𑁆𑀢𑁄.

𑀅𑀓𑁆𑀔 𑀩𑁆𑀬𑀢𑁆𑀢𑀺𑀲𑀗𑁆𑀔𑀸𑀢𑁂𑀲𑀼. 𑀅𑀓𑁆𑀔𑀢𑀺, 𑀅𑀓𑁆𑀔𑀺, 𑀅𑀓𑁆𑀔𑀁.

𑀦𑀺𑀓𑁆𑀔 𑀘𑀼𑀫𑁆𑀩𑀦𑁂. 𑀦𑀺𑀓𑁆𑀔𑀢𑀺, 𑀦𑀺𑀓𑁆𑀔𑀁.

𑀦𑀓𑁆𑀔 𑀕𑀢𑀺𑀬𑀁. 𑀦𑀓𑁆𑀔𑀢𑀺. 𑀦𑀓𑁆𑀔𑀢𑁆𑀢𑀁. 𑀏𑀢𑁆𑀣 𑀦𑀓𑁆𑀔𑀢𑁆𑀢𑀦𑁆𑀢𑀺 𑀏𑀢𑁆𑀢𑁄 𑀇𑀢𑁄 𑀘𑀸𑀢𑀺 𑀯𑀺𑀲𑀫𑀕𑀢𑀺𑀬𑀸 𑀅𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀯𑀻𑀣𑀺𑀬𑀸𑀯 𑀕𑀫𑀦𑁂𑀦 𑀦𑀓𑁆𑀔𑀦𑀁 𑀕𑀫𑀦𑀁 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀦𑀓𑁆𑀔𑀢𑁆𑀢𑀁. 𑀧𑁄𑀭𑀸𑀡𑀸 𑀧𑀦 ‘‘𑀦𑀓𑁆𑀔𑀭𑀦𑁆𑀢𑀺 𑀦 𑀦𑀲𑁆𑀲𑀦𑁆𑀢𑀻𑀢𑀺 𑀦𑀓𑁆𑀔𑀢𑁆𑀢𑀸𑀦𑀻’’𑀢𑀺 𑀓𑀣𑀬𑀺𑀁𑀲𑀼. ‘‘𑀦𑀓𑁆𑀔𑀢𑁆𑀢𑀁, 𑀚𑁄𑀢𑀺, 𑀦𑀺𑀭𑀺𑀓𑁆𑀔𑀁, 𑀪𑀁’’ 𑀇𑀘𑁆𑀘𑁂𑀢𑁂 𑀧𑀭𑀺𑀬𑀸𑀬𑀸.

𑀯𑁂𑀓𑁆𑀔 𑀯𑁂𑀓𑁆𑀔𑀦𑁂. 𑀯𑁂𑀓𑁆𑀔𑀢𑀺.

𑀫𑀓𑁆𑀔 𑀲𑀗𑁆𑀔𑀢𑁂. 𑀫𑀓𑁆𑀔𑀢𑀺.

𑀢𑀓𑁆𑀔 𑀢𑀧𑀦𑁂. 𑀢𑀧𑀦𑀁 𑀲𑀁𑀯𑀭𑀡𑀁. 𑀢𑀓𑁆𑀔𑀢𑀺.

𑀲𑀼𑀓𑁆𑀔 𑀅𑀦𑀸𑀤𑀭𑁂. 𑀲𑀼𑀓𑁆𑀔𑀢𑀺.

𑀓𑀔𑀺 𑀯𑀔𑀺 𑀫𑀔𑀺 𑀓𑀗𑁆𑀔𑀸𑀬𑀁. 𑀲𑀢𑁆𑀣𑀭𑀺 𑀓𑀗𑁆𑀔𑀢𑀺. 𑀯𑀗𑁆𑀔𑀢𑀺, 𑀫𑀗𑁆𑀔𑀢𑀺. ‘‘𑀓𑀗𑁆𑀔𑀸 𑀓𑀗𑁆𑀔𑀸𑀬𑀦𑀸 𑀓𑀗𑁆𑀔𑀸𑀬𑀺𑀢𑀢𑁆𑀢𑀁 𑀯𑀺𑀫𑀢𑀺 𑀯𑀺𑀘𑀺𑀓𑀺𑀘𑁆𑀙𑀸 𑀤𑁆𑀯𑁂𑀴𑁆𑀳𑀓𑀁 𑀤𑁆𑀯𑁂𑀥𑀸𑀧𑀣𑁄 𑀲𑀁𑀲𑀬𑁄 𑀅𑀦𑁂𑀓𑀁𑀲𑀕𑀸𑀳𑁄 𑀆𑀲𑀧𑁆𑀧𑀦𑀸 𑀧𑀭𑀺𑀲𑀧𑁆𑀧𑀦𑀸 𑀅𑀧𑀭𑀺𑀬𑁄𑀕𑀸𑀳𑀦𑀸 𑀣𑀫𑁆𑀪𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀫𑀦𑁄𑀯𑀺𑀮𑁂𑀔𑁄’’ 𑀇𑀘𑁆𑀘𑁂𑀢𑁂 𑀓𑀗𑁆𑀔𑀸𑀧𑀭𑀺𑀬𑀸𑀬𑀸. 𑀏𑀢𑁂𑀲𑀼 𑀧𑀦 𑁋

𑀯𑀢𑁆𑀢𑀦𑁆𑀢𑀺 ¶ 𑀮𑁄𑀓𑀯𑁄𑀳𑀸𑀭𑁂, ‘‘𑀓𑀗𑁆𑀔𑀸 𑀯𑀺𑀫𑀢𑀺 𑀲𑀁𑀲𑀬𑁄;

𑀯𑀺𑀘𑀺𑀓𑀺𑀘𑁆𑀙𑀸’’𑀢𑀺 𑀏𑀢𑀸𑀦𑀺, 𑀦𑀸𑀫𑀸𑀦𑀺𑀬𑁂𑀯 𑀧𑀸𑀬𑀢𑁄.

𑀓𑀔𑀺 𑀇𑀘𑁆𑀘𑀸𑀬𑀁. 𑀥𑀦𑀁 𑀓𑀗𑁆𑀔𑀢𑀺, 𑀅𑀪𑀺𑀓𑀗𑁆𑀔𑀢𑀺, 𑀦𑀸𑀪𑀺𑀓𑀗𑁆𑀔𑀸𑀫𑀺 𑀫𑀭𑀡𑀁. 𑀅𑀪𑀺𑀓𑀗𑁆𑀔𑀺𑀢𑀁 𑀥𑀦𑀁.

𑀤𑀔𑀺 𑀥𑀔𑀺 𑀖𑁄𑀭𑀯𑀸𑀲𑀺𑀢𑁂 𑀓𑀗𑁆𑀔𑀸𑀬𑀜𑁆𑀘. 𑀤𑀗𑁆𑀔𑀢𑀺. 𑀥𑀗𑁆𑀔𑀢𑀺.

𑀉𑀓𑁆𑀔 𑀲𑁂𑀘𑀦𑁂. 𑀉𑀓𑁆𑀔𑀢𑀺.

𑀓𑀔 𑀳𑀲𑀦𑁂. 𑀓𑀔𑀢𑀺.

𑀚𑀓𑁆𑀔 𑀪𑀓𑁆𑀔𑀡𑁂 𑀘. 𑀳𑀲𑀦𑀸𑀦𑀼𑀓𑀟𑁆𑀠𑀦𑀢𑁆𑀣𑀁 𑀘𑀓𑀸𑀭𑁄. 𑀚𑀓𑁆𑀔𑀢𑀺.

𑀮𑀺𑀔 𑀮𑁂𑀔𑀦𑁂. 𑀮𑀺𑀔𑀢𑀺, 𑀲𑀮𑁆𑀮𑁂𑀔𑀢𑀺. 𑀅𑀢𑀺𑀲𑀮𑁆𑀮𑁂𑀔𑀢𑁂𑀯𑀸𑀬𑀁 𑀲𑀫𑀡𑁄. 𑀮𑁂𑀔𑀸, 𑀮𑁂𑀔𑀦𑀁, 𑀮𑁂𑀔𑀓𑁄, 𑀮𑀺𑀔𑀺𑀢𑀁, 𑀲𑀮𑁆𑀮𑁂𑀔𑀧𑀝𑀺𑀧𑀢𑁆𑀢𑀺, 𑀏𑀢𑀸 𑀤𑀔𑀺𑀆𑀤𑀺𑀓𑀸 𑀮𑀺𑀔𑀧𑀭𑀺𑀬𑀦𑁆𑀢𑀸 ‘‘𑀧𑀭𑀲𑁆𑀲𑀪𑀸𑀲𑀸’’𑀢𑀺 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀯𑀤𑀦𑁆𑀢𑀺.

𑀥𑀼𑀓𑁆𑀔 𑀥𑀺𑀓𑁆𑀔 𑀲𑀦𑁆𑀤𑀻𑀧𑀦𑀓𑀺𑀮𑁂𑀲𑀦𑀚𑀻𑀯𑀦𑁂𑀲𑀼. 𑀥𑀼𑀓𑁆𑀔𑀢𑀺. 𑀥𑀺𑀓𑁆𑀔𑀢𑀺. 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀧𑀦 ‘‘𑀥𑀼𑀓𑁆𑀔𑀢𑁂 𑀥𑀺𑀓𑁆𑀔𑀢𑁂’’𑀢𑀺 𑀅𑀢𑁆𑀢𑀦𑁄𑀪𑀸𑀲𑀁 𑀯𑀤𑀦𑁆𑀢𑀺. 𑀢𑀣𑀸 𑀇𑀢𑁄 𑀧𑀭𑀸𑀦𑀺 𑀭𑀽𑀧𑀸𑀦𑀺𑀧𑀺.

𑀭𑀼𑀓𑁆𑀔 𑀯𑀓𑁆𑀔 𑀯𑀭𑀡𑁂. 𑀯𑀭𑀡𑀁 𑀲𑀁𑀯𑀭𑀡𑀁. 𑀭𑀼𑀓𑁆𑀔𑀢𑀺. 𑀯𑀓𑁆𑀔𑀢𑀺. 𑀭𑀼𑀓𑁆𑀔𑁄, 𑀯𑀓𑁆𑀔𑁄. 𑀏𑀢𑁆𑀣 𑀘 𑀯𑀓𑁆𑀔𑁄𑀢𑀺 𑀭𑀼𑀓𑁆𑀔𑁄𑀬𑁂𑀯. 𑀢𑀣𑀸 𑀳𑀺 ‘‘𑀲𑀸𑀤𑀽𑀦𑀺 𑀭𑀫𑀡𑀻𑀬𑀸𑀦𑀺, 𑀲𑀦𑁆𑀢𑀺 𑀯𑀓𑁆𑀔𑀸 𑀅𑀭𑀜𑁆𑀜𑀚𑀸’’𑀢𑀺 𑀚𑀸𑀢𑀓𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀇𑀫𑀸𑀦𑀺 𑀧𑀦 𑀭𑀼𑀓𑁆𑀔𑀲𑁆𑀲 𑀦𑀸𑀫𑀸𑀦𑀺 𑁋

‘‘𑀭𑀼𑀓𑁆𑀔𑁄 𑀫𑀳𑀻𑀭𑀼𑀳𑁄 𑀯𑀓𑁆𑀔𑁄, 𑀧𑀸𑀤𑀧𑁄 𑀚𑀕𑀢𑀻𑀭𑀼𑀳𑁄;

𑀅𑀕𑁄 𑀦𑀕𑁄 𑀓𑀼𑀚𑁄 𑀲𑀸𑀔𑀻, 𑀲𑀸𑀮𑁄 𑀘 𑀯𑀺𑀝𑀧𑀻 𑀢𑀭𑀼;

𑀤𑀼𑀫𑁄 𑀨𑀮𑀻 𑀢𑀼 𑀨𑀮𑀯𑀸, 𑀕𑀘𑁆𑀙𑁄 𑀢𑀼 𑀔𑀼𑀤𑁆𑀤𑀧𑀸𑀤𑀧𑁄’’𑀢𑀺.

𑀓𑁂𑀘𑁂𑀢𑁆𑀣 𑀯𑀤𑁂𑀬𑁆𑀬𑀼𑀁 ‘‘𑀦𑀦𑀼 𑀘 𑀲𑀸𑀮𑀲𑀤𑁆𑀤𑁂𑀦 𑀲𑀸𑀮𑀭𑀼𑀓𑁆𑀔𑁄𑀬𑁂𑀯 𑀯𑀼𑀢𑁆𑀢𑁄, 𑀦𑀸𑀜𑁆𑀜𑁄 ‘𑀲𑀸𑀮𑀸 𑀨𑀦𑁆𑀤𑀦𑀫𑀸𑀮𑀼𑀯𑀸’𑀢𑀺 𑀧𑀬𑁄𑀕𑀤𑀲𑁆𑀲𑀦𑀢𑁄, 𑀅𑀣 𑀓𑀺𑀫𑀢𑁆𑀣𑀁 𑀲𑀸𑀮𑀲𑀤𑁆𑀤𑁂𑀦 𑀬𑁄 𑀓𑁄𑀘𑀺 𑀭𑀼𑀓𑁆𑀔𑁄 ¶ 𑀯𑀼𑀢𑁆𑀢𑁄’’𑀢𑀺? 𑀦 𑀲𑀸𑀮𑀭𑀼𑀓𑁆𑀔𑁄𑀬𑁂𑀯 𑀲𑀸𑀮𑀲𑀤𑁆𑀤𑁂𑀦 𑀯𑀼𑀢𑁆𑀢𑁄, 𑀅𑀣 𑀔𑁄 𑀲𑀸𑀮𑀭𑀼𑀓𑁆𑀔𑁂𑀧𑀺 𑀯𑀦𑀧𑁆𑀧𑀢𑀺𑀚𑁂𑀝𑁆𑀞𑀭𑀼𑀓𑁆𑀔𑁂𑀧𑀺 𑀬𑀲𑁆𑀫𑀺𑀁 𑀓𑀲𑁆𑀫𑀺𑀜𑁆𑀘𑀺 𑀭𑀼𑀓𑁆𑀔𑁂𑀧𑀺 ‘‘𑀲𑀸𑀮𑁄’’𑀢𑀺 𑀯𑁄𑀳𑀸𑀭𑀲𑁆𑀲 𑀤𑀲𑁆𑀲𑀦𑀢𑁄 𑀅𑀜𑁆𑀜𑁂𑀧𑀺 𑀭𑀼𑀓𑁆𑀔𑀸 𑀯𑀼𑀢𑁆𑀢𑀸. 𑀢𑀣𑀸 𑀳𑀺 𑀲𑀸𑀮𑀭𑀼𑀓𑁆𑀔𑁄𑀧𑀺 ‘‘𑀲𑀸𑀮𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 ‘‘𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂 𑀕𑀸𑀫𑀲𑁆𑀲 𑀯𑀸 𑀦𑀺𑀕𑀫𑀲𑁆𑀲 𑀯𑀸 𑀅𑀯𑀺𑀤𑀽𑀭𑁂 𑀫𑀳𑀦𑁆𑀢𑀁 𑀲𑀸𑀮𑀯𑀦𑀁, 𑀢𑀜𑁆𑀘𑀲𑁆𑀲 𑀏𑀮𑀡𑁆𑀟𑁂𑀳𑀺 𑀲𑀜𑁆𑀙𑀦𑁆𑀦𑀁. 𑀅𑀦𑁆𑀢𑀭𑁂𑀦 𑀬𑀫𑀓𑀲𑀸𑀮𑀸𑀦’’𑀦𑁆𑀢𑀺. 𑀯𑀦𑀧𑁆𑀧𑀢𑀺𑀚𑁂𑀝𑁆𑀞𑀭𑀼𑀓𑁆𑀔𑁄𑀧𑀺. 𑀬𑀣𑀸𑀳 𑁋

‘‘𑀢𑀯𑁂𑀯 𑀤𑁂𑀯 𑀯𑀺𑀚𑀺𑀢𑁂, 𑀢𑀯𑁂𑀯𑀼𑀬𑁆𑀬𑀸𑀦𑀪𑀽𑀫𑀺𑀬𑀸;

𑀉𑀚𑀼𑀯𑀁𑀲𑀸 𑀫𑀳𑀸𑀲𑀸𑀮𑀸, 𑀦𑀻𑀮𑁄𑀪𑀸𑀲𑀸 𑀫𑀦𑁄𑀭𑀫𑀸’’𑀢𑀺.

𑀬𑁄 𑀓𑁄𑀘𑀺 𑀭𑀼𑀓𑁆𑀔𑁄𑀧𑀺. 𑀬𑀣𑀸𑀳 ‘‘𑀅𑀣 𑀔𑁄 𑀢𑀁 𑀪𑀺𑀓𑁆𑀔𑀯𑁂 𑀫𑀸𑀮𑀼𑀯𑀩𑀻𑀚𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀸𑀮𑀫𑀽𑀮𑁂 𑀦𑀺𑀧𑀢𑁂𑀬𑁆𑀬𑀸’’𑀢𑀺. 𑀅𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀲𑀸𑀮𑀭𑀼𑀓𑁆𑀔𑁂 𑀚𑁂𑀝𑁆𑀞𑀭𑀼𑀓𑁆𑀔𑁂,

𑀬𑀲𑁆𑀫𑀺𑀁 𑀓𑀲𑁆𑀫𑀺𑀜𑁆𑀘𑀺 𑀧𑀸𑀤𑀧𑁂;

𑀲𑀸𑀮𑁄 𑀇𑀢𑀺 𑀭𑀯𑁄 𑀲𑀸𑀮𑀸,

𑀲𑀦𑁆𑀥𑀸𑀕𑀸𑀭𑁂 𑀣𑀺𑀬𑀁 𑀲𑀺𑀬𑀸’’𑀢𑀺.

𑀲𑀺𑀓𑁆𑀔 𑀯𑀺𑀚𑁆𑀚𑁄𑀧𑀸𑀤𑀸𑀦𑁂. 𑀲𑀺𑀓𑁆𑀔𑀢𑀺. 𑀲𑀺𑀓𑁆𑀔𑀸, 𑀲𑀺𑀓𑁆𑀔𑀦𑀁, 𑀲𑀺𑀓𑁆𑀔𑀺𑀢𑀁 𑀲𑀺𑀧𑁆𑀧𑀁, 𑀲𑀺𑀓𑁆𑀔𑀓𑁄, 𑀲𑀺𑀓𑁆𑀔𑀺𑀢𑁄, 𑀲𑁂𑀓𑁆𑀔𑁄, 𑀅𑀲𑁂𑀓𑁆𑀔𑁄. 𑀓𑀓𑀸𑀭𑀮𑁄𑀧𑁂 ‘‘𑀲𑁂𑀔𑁄 𑀅𑀲𑁂𑀔𑁄’’𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀢𑀢𑁆𑀣 𑀲𑀺𑀓𑁆𑀔𑀺𑀢𑁄𑀢𑀺 𑀲𑀜𑁆𑀚𑀸𑀢𑀲𑀺𑀓𑁆𑀔𑁄, 𑀅𑀲𑀺𑀓𑁆𑀔𑀻𑀢𑀺 𑀯𑀸 𑀲𑀺𑀓𑁆𑀔𑀺𑀢𑁄, 𑀢𑀣𑀸 𑀳𑀺 𑀓𑀢𑁆𑀢𑀼𑀧𑁆𑀧𑀬𑁄𑀕𑁄 𑀤𑀺𑀲𑁆𑀲𑀢𑀺 ‘‘𑀅𑀳𑀁 𑀔𑁄 𑀧𑀦 𑀲𑀼𑀲𑀺𑀓𑁆𑀔𑀺𑀢𑁄 𑀅𑀦𑀯𑀬𑁄 𑀲𑀓𑁂 𑀆𑀘𑀭𑀺𑀬𑀓𑁂 𑀓𑀼𑀫𑁆𑀪𑀓𑀸𑀭𑀓𑀫𑁆𑀫𑁂’’𑀢𑀺.

𑀪𑀺𑀓𑁆𑀔 𑀬𑀸𑀘𑀦𑁂. 𑀪𑀺𑀓𑁆𑀔𑀢𑀺. 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀸, 𑀪𑀺𑀓𑁆𑀔𑀦𑀁, 𑀪𑀺𑀓𑁆𑀔𑀓𑁄, 𑀪𑀺𑀓𑁆𑀔𑀺𑀢𑀁 𑀪𑁄𑀚𑀦𑀁. 𑀏𑀢𑁆𑀣 𑀧𑀦 ‘‘𑀪𑀺𑀓𑁆𑀔𑀼 𑀬𑀢𑀺 𑀲𑀫𑀡𑁄 𑀫𑀼𑀦𑀺 𑀧𑀩𑁆𑀩𑀚𑀺𑀢𑁄 ¶ 𑀅𑀦𑀕𑀸𑀭𑁄 𑀢𑀧𑀲𑁆𑀲𑀻 𑀢𑀧𑁄𑀥𑀦𑁄’’ 𑀇𑀘𑁆𑀘𑁂𑀢𑀸𑀦𑀺 𑀧𑀭𑀺𑀬𑀸𑀬𑀯𑀘𑀦𑀸𑀦𑀺. 𑀏𑀢𑁂𑀲𑀼 𑀲𑀸𑀲𑀦𑁂 ‘‘𑀪𑀺𑀓𑁆𑀔𑀽’’𑀢𑀺 𑀉𑀧𑀲𑀫𑁆𑀧𑀦𑁆𑀦𑁄 𑀯𑀼𑀘𑁆𑀘𑀢𑀺. 𑀓𑀤𑀸𑀘𑀺 𑀧𑀦 ‘‘𑀪𑀺𑀓𑁆𑀔𑀼𑀲𑀢𑀁 𑀪𑁄𑀚𑁂𑀲𑀺, 𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀪𑁄𑀚𑁂𑀲𑀻’’𑀢𑀺𑀆𑀤𑀻𑀲𑀼 𑀲𑀸𑀫𑀡𑁂𑀭𑁂𑀧𑀺𑀉𑀧𑀸𑀤𑀸𑀬 ‘‘𑀪𑀺𑀓𑁆𑀔𑀽’’𑀢𑀺 𑀯𑁄𑀳𑀸𑀭𑁄 𑀧𑀯𑀢𑁆𑀢𑀢𑀺, 𑀢𑀸𑀧𑀲𑀸𑀧𑀺 𑀘 𑀲𑀫𑀡𑀲𑀤𑁆𑀤𑀸𑀤𑀻𑀳𑀺 𑀯𑀼𑀘𑁆𑀘𑀦𑁆𑀢𑀺, ‘‘𑀅𑀳𑀽 𑀅𑀢𑀻𑀢𑀫𑀤𑁆𑀥𑀸𑀦𑁂, 𑀲𑀫𑀡𑁄 𑀔𑀦𑁆𑀢𑀺𑀤𑀻𑀧𑀦𑁄’’𑀢𑀺𑀆𑀤𑀺 𑀏𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀤𑀓𑁆𑀔 𑀯𑀼𑀤𑁆𑀥𑀺𑀬𑀁 𑀲𑀻𑀖𑀢𑁆𑀢𑁂 𑀘. 𑀤𑀓𑁆𑀔𑀢𑀺, 𑀤𑀓𑁆𑀔𑀺𑀡𑀸, 𑀤𑀓𑁆𑀔𑁄. 𑀤𑀓𑁆𑀔𑀦𑁆𑀢𑀺 𑀯𑀤𑁆𑀥𑀦𑁆𑀢𑀺 𑀲𑀢𑁆𑀢𑀸 𑀏𑀢𑀸𑀬 𑀬𑀣𑀸𑀥𑀺𑀧𑁆𑀧𑁂𑀢𑀸𑀳𑀺 𑀲𑀫𑁆𑀧𑀢𑁆𑀢𑀻𑀳𑀺 𑀇𑀤𑁆𑀥𑀸 𑀯𑀼𑀤𑁆𑀥𑀸 𑀉𑀓𑁆𑀓𑀁𑀲𑀕𑀢𑀸 𑀳𑁄𑀦𑁆𑀢𑀻𑀢𑀺 𑀤𑀓𑁆𑀔𑀺𑀡𑀸, 𑀤𑀸𑀢𑀩𑁆𑀩𑀯𑀢𑁆𑀣𑀼. 𑀤𑀓𑁆𑀔𑀢𑀺 𑀓𑀼𑀲𑀮𑀓𑀫𑁆𑀫𑁂 𑀅𑀜𑁆𑀜𑀲𑁆𑀫𑀺𑀜𑁆𑀘 𑀓𑀺𑀘𑁆𑀘𑀸𑀓𑀺𑀘𑁆𑀘𑁂 𑀅𑀤𑀦𑁆𑀥𑀢𑀸𑀬 𑀲𑀻𑀖𑀁 𑀕𑀘𑁆𑀙𑀢𑀻𑀢𑀺 𑀤𑀓𑁆𑀔𑁄, 𑀙𑁂𑀓𑁄, 𑀬𑁄 ‘‘𑀓𑀼𑀲𑀮𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺.

𑀤𑀺𑀓𑁆𑀔 𑀫𑀼𑀡𑁆𑀟𑀺𑀑𑀧𑀦𑀬𑀦𑀦𑀺𑀬𑀫𑀩𑁆𑀩𑀢𑀸𑀤𑁂𑀲𑁂𑀲𑀼. 𑀤𑀺𑀓𑁆𑀔𑀥𑀸𑀢𑀼 𑀫𑀼𑀡𑁆𑀟𑀺𑀬𑁂, 𑀉𑀧𑀦𑀬𑀦𑁂, 𑀦𑀺𑀬𑀫𑁂, 𑀯𑀢𑁂, 𑀆𑀤𑁂𑀲𑁂 𑀘 𑀧𑀯𑀢𑁆𑀢𑀢𑀺. 𑀤𑀺𑀓𑁆𑀔𑀢𑀺. 𑀤𑀺𑀓𑁆𑀔𑀺𑀢𑁄 𑀫𑀼𑀡𑁆𑀟𑁄. 𑀏𑀢𑁆𑀣 𑀲𑀺𑀬𑀸 𑁋 𑀦𑀦𑀼 𑀘 𑀪𑁄 𑀲𑀭𑀪𑀗𑁆𑀕𑀚𑀸𑀢𑀓𑁂 ‘‘𑀕𑀦𑁆𑀥𑁄 𑀇𑀲𑀻𑀦𑀁 𑀘𑀺𑀭𑀤𑀺𑀓𑁆𑀔𑀺𑀢𑀸𑀦𑀁, 𑀓𑀸𑀬𑀸 𑀘𑀼𑀢𑁄 𑀕𑀘𑁆𑀙𑀢𑀺 𑀫𑀸𑀮𑀼𑀢𑁂𑀦𑀸’’𑀢𑀺 𑀏𑀢𑀲𑁆𑀫𑀺𑀁 𑀧𑀤𑁂𑀲𑁂 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 ‘‘𑀘𑀺𑀭𑀤𑀺𑀓𑁆𑀔𑀺𑀢𑀸𑀦𑀦𑁆𑀢𑀺 𑀘𑀺𑀭𑀧𑀩𑁆𑀩𑀚𑀺𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀢𑀢𑁆𑀣 ‘‘𑀘𑀺𑀭𑀫𑀼𑀡𑁆𑀟𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 𑀇𑀥 ‘‘𑀤𑀺𑀓𑁆𑀔𑀥𑀸𑀢𑀼 𑀫𑀼𑀡𑁆𑀟𑀺𑀬𑁂 𑀯𑀼𑀢𑁆𑀢𑀸’’𑀢𑀺? 𑀲𑀘𑁆𑀘𑀁, 𑀢𑀢𑁆𑀣 𑀧𑀦 𑀤𑀺𑀓𑁆𑀔𑀺𑀢𑀲𑀤𑁆𑀤𑀲𑁆𑀲 𑀧𑀩𑁆𑀩𑀚𑀺𑀢𑁂 𑀯𑀢𑁆𑀢𑀦𑀢𑁄 ‘‘𑀘𑀺𑀭𑀧𑀩𑁆𑀩𑀚𑀺𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀥𑀸𑀢𑀼𑀅𑀢𑁆𑀣𑀲𑁆𑀲 𑀯𑀺𑀪𑀸𑀯𑀦𑀢𑁆𑀣𑀁. 𑀇𑀤 𑀧𑀦 𑀥𑀸𑀢𑀼𑀅𑀢𑁆𑀣𑀯𑀺𑀪𑀸𑀯𑀦𑀢𑁆𑀣𑀁 𑀫𑀼𑀡𑁆𑀟𑀺𑀬𑁂 𑀯𑀼𑀢𑁆𑀢𑀸. 𑀢𑀸𑀧𑀲𑀸 𑀳𑀺 𑀫𑀼𑀡𑁆𑀟𑀺𑀬𑀢𑁆𑀣𑀯𑀸𑀘𑀓𑁂𑀦 𑀤𑀺𑀓𑁆𑀔𑀺𑀢𑀲𑀤𑁆𑀤𑁂𑀦 𑀯𑀢𑁆𑀢𑀼𑀁 𑀬𑀼𑀢𑁆𑀢𑀸. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀘𑀓𑁆𑀓𑀯𑀢𑁆𑀢𑀺𑀲𑀼𑀢𑁆𑀢𑀢𑁆𑀣𑀯𑀡𑁆𑀡𑀦𑀸𑀬𑀁 ‘‘𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸’’𑀢𑀺 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀅𑀢𑁆𑀣𑀯𑀺𑀯𑀭𑀡𑁂 ‘‘𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀦𑁆𑀢𑀸𑀧𑀺 𑀳𑀺 𑀧𑀞𑀫𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀦𑁆𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀧𑀭𑀽𑀴𑁆𑀳𑀓𑁂𑀲𑁂 ¶ 𑀩𑀦𑁆𑀥𑀺𑀢𑁆𑀯𑀸 𑀯𑀺𑀯𑀭𑀦𑁆𑀢𑀺, 𑀢𑁂𑀦 𑀯𑀼𑀢𑁆𑀢𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸’’𑀢𑀺 𑀏𑀯𑀁 𑀅𑀢𑁆𑀣𑁄 𑀲𑀁𑀯𑀡𑁆𑀡𑀺𑀢𑁄.

𑀇𑀓𑁆𑀔 𑀤𑀲𑁆𑀲𑀦𑀗𑁆𑀓𑁂𑀲𑀼. 𑀇𑀓𑁆𑀔𑀢𑀺, 𑀉𑀧𑁂𑀓𑁆𑀔𑀢𑀺, 𑀅𑀧𑁂𑀓𑁆𑀔𑀢𑀺. 𑀉𑀧𑁂𑀓𑁆𑀔𑀸, 𑀅𑀧𑁂𑀓𑁆𑀔𑀸, 𑀧𑀘𑁆𑀘𑀯𑁂𑀓𑁆𑀔𑀡𑀸. 𑀓𑀓𑀸𑀭𑀮𑁄𑀧𑁂 ‘‘𑀉𑀧𑁂𑀔𑀸, 𑀅𑀧𑁂𑀔𑀸, 𑀉𑀧𑀲𑀫𑁆𑀧𑀤𑀸𑀧𑁂𑀔𑁄’’𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺.

𑀤𑀼𑀓𑁆𑀔 𑀳𑀺𑀁𑀲𑀸𑀕𑀢𑀻𑀲𑀼. 𑀤𑀓𑁆𑀔𑀢𑀺. 𑀤𑀓𑁆𑀔𑀓𑁄.

𑀘𑀺𑀓𑁆𑀔 𑀘𑀓𑁆𑀔 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁. 𑀘𑀺𑀓𑁆𑀔𑀢𑀺, 𑀆𑀘𑀺𑀓𑁆𑀔𑀢𑀺, 𑀅𑀩𑁆𑀪𑀸𑀘𑀺𑀓𑁆𑀔𑀢𑀺. 𑀆𑀘𑀺𑀓𑁆𑀔𑀓𑁄. 𑀘𑀓𑁆𑀔𑀢𑀺, 𑀘𑀓𑁆𑀔𑀼. 𑀏𑀢𑁆𑀣 𑀘𑀓𑁆𑀔𑀽𑀢𑀺 𑀘𑀓𑁆𑀔𑀢𑀻𑀢𑀺 𑀘𑀓𑁆𑀔𑀼, 𑀲𑀫𑀯𑀺𑀲𑀫𑀁 𑀅𑀪𑀺𑀩𑁆𑀬𑀢𑁆𑀢𑀁 𑀯𑀤𑀦𑁆𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 ‘‘𑀲𑀽𑀧𑀁 𑀘𑀓𑁆𑀔𑀢𑀺, 𑀫𑀥𑀼𑀁 𑀘𑀓𑁆𑀔𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀬𑀲𑁆𑀫𑀸 𑀅𑀲𑁆𑀲𑀸𑀤𑀢𑁆𑀣𑁄𑀧𑀺 𑀘𑀓𑁆𑀔𑀼𑀲𑀤𑁆𑀤𑁄 𑀪𑀯𑀢𑀺, 𑀢𑀲𑁆𑀫𑀸 ‘‘𑀘𑀓𑁆𑀔𑀢𑀺 𑀯𑀺𑀜𑁆𑀜𑀸𑀡𑀸𑀥𑀺𑀝𑁆𑀞𑀺𑀢𑀁 𑀭𑀽𑀧𑀁 𑀅𑀲𑁆𑀲𑀸𑀤𑁂𑀦𑁆𑀢𑀁 𑀯𑀺𑀬 𑀳𑁄𑀢𑀻’’𑀢𑀺 𑀅𑀲𑁆𑀲𑀸𑀤𑀢𑁆𑀣𑁄𑀧𑀺 𑀕𑀳𑁂𑀢𑀩𑁆𑀩𑁄. ‘‘𑀘𑀓𑁆𑀔𑀼𑀁 𑀔𑁄 𑀫𑀸𑀕𑀡𑁆𑀟𑀺𑀬𑀁 𑀭𑀽𑀧𑀸𑀭𑀸𑀫𑀁 𑀭𑀽𑀧𑀭𑀢𑀁 𑀭𑀽𑀧𑀲𑀫𑁆𑀫𑀼𑀤𑀺𑀢’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀲𑀢𑀺𑀧𑀺 𑀲𑁄𑀢𑀸𑀤𑀻𑀦𑀁 𑀲𑀤𑁆𑀤𑀸𑀭𑀸𑀫𑀢𑀸𑀤𑀺𑀪𑀸𑀯𑁂 𑀦𑀺𑀭𑀽𑀴𑁆𑀳𑀢𑁆𑀢𑀸 𑀦𑀬𑀦𑁂 𑀏𑀯 𑀘𑀓𑁆𑀔𑀼𑀲𑀤𑁆𑀤𑁄 𑀧𑀯𑀢𑁆𑀢𑀢𑀺 𑀧𑀗𑁆𑀓𑀚𑀸𑀤𑀺𑀲𑀤𑁆𑀤𑀸 𑀯𑀺𑀬 𑀧𑀤𑀼𑀫𑀸𑀤𑀻𑀲𑀼.

𑀘𑀓𑁆𑀔’𑀓𑁆𑀔𑀺 𑀦𑀬𑀦𑀁, 𑀮𑁄𑀘𑀦𑀁 𑀤𑀺𑀝𑁆𑀞𑀺 𑀤𑀲𑁆𑀲𑀦𑀁;

𑀧𑁂𑀓𑁆𑀔𑀦𑀁 𑀅𑀘𑁆𑀙𑀺 𑀧𑀫𑁆𑀳𑀁 𑀢𑀼, ‘‘𑀧𑀔𑀼𑀫’’𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑀏𑀢𑀸 𑀭𑀼𑀓𑁆𑀔𑀸𑀤𑀺𑀓𑀸 𑀘𑀓𑁆𑀔𑀧𑀭𑀺𑀬𑀦𑁆𑀢𑀸 ‘‘𑀅𑀢𑁆𑀢𑀦𑁄𑀪𑀸𑀲𑀸’’𑀢𑀺 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀯𑀤𑀦𑁆𑀢𑀺.

𑀔𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀕𑀓𑀸𑀭𑀦𑁆𑀢𑀥𑀸𑀢𑀼

𑀕𑀼 𑀓𑀭𑀻𑀲𑀼𑀲𑁆𑀲𑀕𑁆𑀕𑁂. 𑀓𑀭𑀻𑀲𑀼𑀲𑁆𑀲𑀕𑁆𑀕𑁄 𑀯𑀘𑁆𑀘𑀓𑀭𑀡𑀁. 𑀕𑀯𑀢𑀺. 𑀕𑁂 𑀲𑀤𑁆𑀤𑁂. 𑀕𑀸𑀬𑀢𑀺. 𑀕𑀻𑀢𑀁.

𑀯𑀕𑁆𑀕 ¶ 𑀕𑀢𑀺𑀬𑀁. 𑀯𑀕𑁆𑀕𑀢𑀺. 𑀯𑀕𑁆𑀕𑁄, 𑀯𑀕𑁆𑀕𑀺𑀢𑀁. 𑀏𑀢𑁆𑀣 𑀲𑀫𑀼𑀤𑀸𑀬𑀯𑀲𑁂𑀦 𑀯𑀕𑁆𑀕𑀦𑀁 𑀧𑀯𑀢𑁆𑀢𑀦𑀁 𑀯𑀕𑁆𑀕𑁄. 𑀯𑀕𑁆𑀕𑀺𑀢𑀦𑁆𑀢𑀺 𑀕𑀫𑀦𑀁. 𑀢𑀣𑀸 𑀳𑀺 𑀦𑀸𑀕𑀧𑁂𑀢𑀯𑀢𑁆𑀣𑀼𑀅𑀝𑁆𑀞𑀓𑀣𑀸𑀬𑀁 ‘‘𑀬𑁄 𑀲𑁄 𑀫𑀚𑁆𑀛𑁂 𑀅𑀲𑁆𑀲𑀢𑀭𑀻𑀭𑀣𑁂𑀦 𑀘𑀢𑀼𑀩𑁆𑀪𑀺 𑀬𑀼𑀢𑁆𑀢𑁂𑀦 𑀲𑀼𑀯𑀕𑁆𑀕𑀺𑀢𑁂𑀦. 𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑁄 𑀅𑀳𑀼 𑀫𑀚𑁆𑀛𑀺𑀫𑁄 𑀲𑁄, 𑀅𑀫𑀘𑁆𑀙𑀭𑀻 𑀤𑀸𑀦𑀧𑀢𑀻 𑀯𑀺𑀭𑁄𑀘𑀢𑀻’’𑀢𑀺 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀅𑀢𑁆𑀣𑀁 𑀯𑀤𑀦𑁆𑀢𑁂𑀳𑀺 ‘‘𑀲𑀼𑀯𑀕𑁆𑀕𑀺𑀢𑁂𑀦𑀸𑀢𑀺 𑀲𑀼𑀦𑁆𑀤𑀭𑀕𑀫𑀦𑁂𑀦𑀸’’𑀢𑀺. 𑀓𑀺𑀜𑁆𑀘𑀺 𑀪𑀺𑀬𑁆𑀬𑁄 𑀓𑁆𑀭𑀺𑀬𑀸𑀧𑀤𑀫𑁆𑀧𑀺 𑀘 𑀤𑀺𑀝𑁆𑀞𑀁 ‘‘𑀥𑀼𑀦𑀦𑁆𑀢𑀺 𑀯𑀕𑁆𑀕𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺 𑀘𑀫𑁆𑀩𑀭𑁂’’𑀢𑀺.

𑀭𑀕𑀺 𑀮𑀕𑀺 𑀅𑀕𑀺 𑀯𑀕𑀺 𑀫𑀕𑀺 𑀇𑀕𑀺 𑀭𑀺𑀕𑀺 𑀮𑀺𑀕𑀺 𑀢𑀕𑀺 𑀲𑀕𑀺 𑀕𑀫𑀦𑁂 𑀘. 𑀘𑀓𑀸𑀭𑁄 𑀕𑀢𑀺𑀧𑁂𑀓𑁆𑀔𑀓𑁄. 𑀭𑀗𑁆𑀕𑀢𑀺. 𑀭𑀗𑁆𑀕𑁄. 𑀮𑀗𑁆𑀕𑀢𑀺. 𑀮𑀗𑁆𑀕𑁄, 𑀮𑀗𑁆𑀕𑀻. 𑀅𑀗𑁆𑀕𑀢𑀺, 𑀅𑀗𑁆𑀕𑁂𑀢𑀺. 𑀅𑀗𑁆𑀕𑁄, 𑀲𑀫𑀗𑁆𑀕𑀻, 𑀲𑀫𑀗𑁆𑀕𑀺𑀢𑀸, 𑀅𑀗𑁆𑀕𑀁, 𑀅𑀗𑁆𑀕𑀡𑀁. 𑀯𑀗𑁆𑀕𑀢𑀺. 𑀯𑀗𑁆𑀕𑁄. 𑀫𑀗𑁆𑀕𑀢𑀺. 𑀫𑀗𑁆𑀕𑁄, 𑀉𑀧𑀗𑁆𑀕𑁄, 𑀫𑀗𑁆𑀕𑀮𑀁. 𑀇𑀗𑁆𑀕𑀢𑀺. 𑀇𑀗𑁆𑀕𑀺𑀢𑀁. 𑀭𑀺𑀗𑁆𑀕𑀢𑀺. 𑀭𑀺𑀗𑁆𑀕𑀦𑀁. 𑀮𑀺𑀗𑁆𑀕𑀢𑀺. 𑀮𑀺𑀗𑁆𑀕𑀦𑀁. 𑀉𑀮𑁆𑀮𑀺𑀗𑁆𑀕𑀢𑀺, 𑀉𑀮𑁆𑀮𑀺𑀗𑁆𑀕𑀦𑀁. 𑀢𑀗𑁆𑀕𑀢𑀺. 𑀢𑀗𑁆𑀕𑀦𑀁. 𑀲𑀗𑁆𑀕𑀢𑀺. 𑀲𑀗𑁆𑀕𑀦𑀁. 𑀢𑀢𑁆𑀣 𑀅𑀗𑁆𑀕𑀦𑁆𑀢𑀺 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀯𑀢𑁆𑀣𑀽𑀦𑀁 𑀅𑀯𑀬𑀯𑁄, 𑀲𑀭𑀻𑀭𑀫𑁆𑀧𑀺 𑀓𑀸𑀭𑀡𑀫𑁆𑀧𑀺 𑀘 𑀯𑀼𑀘𑁆𑀘𑀢𑀺. 𑀅𑀗𑁆𑀕𑀡𑀦𑁆𑀢𑀺 𑀓𑀢𑁆𑀣𑀘𑀺 𑀓𑀺𑀮𑁂𑀲𑀸 𑀯𑀼𑀘𑁆𑀘𑀦𑁆𑀢𑀺 ‘‘𑀭𑀸𑀕𑁄 𑀅𑀗𑁆𑀕𑀡’’𑀦𑁆𑀢𑀺𑀆𑀤𑀻𑀲𑀼. 𑀭𑀸𑀕𑀸𑀤𑀬𑁄 𑀳𑀺 𑀅𑀗𑁆𑀕𑀦𑁆𑀢𑀺 𑀏𑀢𑁂𑀳𑀺 𑀢𑀁𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀸 𑀦𑀺𑀳𑀻𑀦𑀪𑀸𑀯𑀁 𑀕𑀘𑁆𑀙𑀦𑁆𑀢𑀻𑀢𑀺 ‘‘𑀅𑀗𑁆𑀕𑀡𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀓𑀢𑁆𑀣𑀘𑀺 𑀫𑀮𑀁 𑀯𑀸 𑀧𑀗𑁆𑀓𑁄 𑀯𑀸 ‘‘𑀢𑀲𑁆𑀲𑁂𑀯 𑀭𑀚𑀲𑁆𑀲 𑀯𑀸 𑀅𑀗𑁆𑀕𑀡𑀲𑁆𑀲 𑀯𑀸 𑀧𑀳𑀸𑀦𑀸𑀬 𑀯𑀸𑀬𑀫𑀢𑀻’’𑀢𑀺𑀆𑀤𑀻𑀲𑀼. 𑀅𑀜𑁆𑀚𑀢𑀺 𑀫𑀓𑁆𑀔𑁂𑀢𑀻𑀢𑀺 𑀳𑀺 𑀅𑀗𑁆𑀕𑀡𑀁, 𑀫𑀮𑀸𑀤𑀺. 𑀓𑀢𑁆𑀣𑀘𑀺 𑀢𑀣𑀸𑀭𑀽𑀧𑁄 𑀯𑀺𑀯𑀝𑀧𑁆𑀧𑀤𑁂𑀲𑁄 ‘‘𑀘𑁂𑀢𑀺𑀬𑀗𑁆𑀕𑀡𑀁, 𑀩𑁄𑀥𑀺𑀬𑀗𑁆𑀕𑀡’’𑀦𑁆𑀢𑀺𑀆𑀤𑀻𑀲𑀼. 𑀅𑀜𑁆𑀚𑀢𑀺 𑀢𑀢𑁆𑀣 𑀞𑀺𑀢𑀁 𑀅𑀢𑀺𑀲𑀼𑀦𑁆𑀤𑀭𑀢𑀸𑀬 𑀅𑀪𑀺𑀩𑁆𑀬𑀜𑁆𑀚𑁂𑀢𑀻𑀢𑀺 𑀳𑀺 𑀅𑀗𑁆𑀕𑀡𑀁, 𑀯𑀺𑀯𑀝𑁄 𑀪𑀽𑀫𑀺𑀧𑁆𑀧𑀤𑁂𑀲𑁄. 𑀇𑀘𑁆𑀘𑁂𑀯𑀁 𑁋

𑀭𑀸𑀕𑀸𑀤𑀻𑀲𑀼 𑀓𑀺𑀮𑁂𑀲𑁂𑀲𑀼, 𑀧𑀗𑁆𑀓𑁂 𑀓𑀸𑀬𑀫𑀮𑀫𑁆𑀳𑀺 𑀘;

𑀯𑀺𑀯𑀝𑁂 𑀪𑀽𑀫𑀺𑀪𑀸𑀕𑁂 𑀘, ‘‘𑀅𑀗𑁆𑀕𑀡’’𑀦𑁆𑀢𑀺 𑀭𑀯𑁄 𑀕𑀢𑁄.

𑀬𑀼𑀕𑀺 ¶ 𑀚𑀼𑀕𑀺 𑀯𑀚𑁆𑀚𑀦𑁂. 𑀬𑀼𑀗𑁆𑀕𑀢𑀺. 𑀚𑀼𑀗𑁆𑀕𑀢𑀺.

𑀭𑀕𑀺 𑀲𑀗𑁆𑀓𑀸𑀬𑀁. 𑀭𑀗𑁆𑀕𑀢𑀺.

𑀮𑀕 𑀲𑀗𑁆𑀕𑁂𑀘. 𑀘 𑀓𑀸𑀭𑁄 𑀅𑀦𑀦𑁆𑀢𑀭𑀯𑀼𑀢𑁆𑀢𑀸𑀧𑁂𑀓𑁆𑀔𑀓𑁄. 𑀮𑀕𑀢𑀺. 𑀘 𑀚𑀢𑁄 𑀦 𑀳𑁄𑀢𑀺 𑀮𑀕𑀦𑀁. 𑀩𑀴𑀺𑀲𑁂 𑀮𑀕𑁆𑀕𑁄.

𑀣𑀕𑀁 𑀲𑀁𑀯𑀭𑀡𑁂. 𑀣𑀕𑀢𑀺.

𑀅𑀕𑁆𑀕 𑀓𑀼𑀝𑀺𑀮𑀕𑀢𑀺𑀬𑀁. 𑀅𑀕𑁆𑀕𑀢𑀻𑀢𑀺 𑀅𑀕𑁆𑀕𑀺, 𑀓𑀼𑀝𑀺𑀮𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑀅𑀕𑁆𑀕𑀺 𑀥𑀽𑀫𑀲𑀺𑀔𑁄 𑀚𑁄𑀢𑀺, 𑀚𑀸𑀢𑀯𑁂𑀤𑁄 𑀲𑀺𑀔𑀻 𑀕𑀺𑀦𑀺;

𑀅𑀕𑁆𑀕𑀺𑀦𑀺 𑀪𑀸𑀡𑀼𑀫𑀸 𑀢𑁂𑀚𑁄, 𑀧𑀸𑀯𑀓𑁄 𑀢𑀺𑀯𑀓𑁄’𑀦𑀮𑁄.

𑀳𑀼𑀢𑀸𑀲𑀦𑁄 𑀥𑀽𑀫𑀓𑁂𑀢𑀼, 𑀯𑁂𑀲𑁆𑀲𑀸𑀦𑀭𑁄 𑀘 𑀅𑀘𑁆𑀘𑀺𑀫𑀸;

𑀖𑀢𑀸𑀲𑀦𑁄 𑀯𑀸𑀬𑀼𑀲𑀔𑁄, 𑀤𑀳𑀦𑁄 𑀓𑀡𑁆𑀳𑀯𑀢𑁆𑀢𑀦𑀺.

𑀏𑀢𑀸 𑀕𑀼𑀆𑀤𑀺𑀓𑀸 𑀅𑀕𑁆𑀕𑀧𑀭𑀺𑀬𑀦𑁆𑀢𑀸 ‘‘𑀧𑀭𑀲𑁆𑀲𑀪𑀸𑀲𑀸’’𑀢𑀺 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀯𑀤𑀦𑁆𑀢𑀺.

𑀕𑀸 𑀕𑀢𑀺𑀬𑀁. 𑀕𑀸𑀢𑀺.

𑀕𑀼 𑀲𑀤𑁆𑀤𑁂. 𑀕𑀯𑀢𑀺.

𑀕𑀼 𑀉𑀕𑁆𑀕𑀫𑁂. 𑀉𑀕𑁆𑀕𑀫𑁄 𑀉𑀕𑁆𑀕𑀫𑀦𑀁 𑀧𑀸𑀓𑀝𑀢𑀸. 𑀕𑀯𑀢𑀺. 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀧𑀦𑀺𑀫𑀸𑀲𑀁 ‘‘𑀕𑀸𑀢𑁂 𑀕𑀯𑀢𑁂’’𑀢𑀺 𑀅𑀢𑁆𑀢𑀦𑁄𑀪𑀸𑀲𑀢𑁆𑀢𑀁 𑀯𑀤𑀦𑁆𑀢𑀺.

𑀕𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀖𑀓𑀸𑀭𑀦𑁆𑀢𑀥𑀸𑀢𑀼

𑀖𑀸 𑀕𑀦𑁆𑀥𑁄𑀧𑀸𑀤𑀸𑀦𑁂. 𑀖𑀸𑀢𑀺. 𑀖𑀸𑀦𑀁. 𑀕𑀦𑁆𑀥𑀁 𑀖𑀢𑁆𑀯𑀸. 𑀅𑀢𑁆𑀭𑀸𑀬𑀁 𑀧𑀸𑀴𑀺 ‘‘𑀕𑀦𑁆𑀥𑀁 𑀖𑀢𑁆𑀯𑀸 𑀲𑀢𑀺 𑀫𑀼𑀝𑁆𑀞𑀸’’𑀢𑀺. 𑀏𑀢𑀺𑀲𑁆𑀲𑀸 𑀧𑀦 𑀤𑀺𑀯𑀸𑀤𑀺𑀕𑀡𑀁 𑀧𑀢𑁆𑀢𑀸𑀬 ‘‘𑀖𑀸𑀬𑀢𑀺 𑀖𑀸𑀬𑀺𑀢𑁆𑀯𑀸’’𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺.

𑀖𑀼 ¶ 𑀅𑀪𑀺𑀕𑀫𑀦𑁂. 𑀅𑀪𑀺𑀕𑀫𑀦𑀁 𑀅𑀥𑀺𑀕𑀫𑀦𑀁. 𑀖𑁄𑀢𑀺.

𑀚𑀕𑁆𑀖 𑀳𑀲𑀦𑁂. 𑀚𑀕𑁆𑀖𑀢𑀺, 𑀲𑀜𑁆𑀚𑀕𑁆𑀖𑀢𑀺. 𑀲𑀜𑁆𑀚𑀕𑁆𑀖𑀺𑀢𑁆𑀣𑁄 𑀫𑀬𑀸 𑀲𑀳. 𑀚𑀕𑁆𑀖𑀺𑀢𑀼𑀫𑁆𑀧𑀺 𑀦 𑀲𑁄𑀪𑀢𑀺. 𑀚𑀕𑁆𑀖𑀺𑀢𑁆𑀯𑀸.

𑀢𑀕𑁆𑀖 𑀧𑀸𑀮𑀦𑁂. 𑀢𑀕𑁆𑀖𑀢𑀺.

𑀲𑀺𑀖𑀺 𑀆𑀖𑀸𑀦𑁂. 𑀆𑀖𑀸𑀦𑀁 𑀖𑀸𑀦𑁂𑀦 𑀕𑀦𑁆𑀥𑀸𑀦𑀼𑀪𑀯𑀦𑀁. 𑀲𑀺𑀗𑁆𑀖𑀢𑀺, 𑀉𑀧𑀲𑀺𑀗𑁆𑀖𑀢𑀺. 𑀉𑀧𑀲𑀺𑀗𑁆𑀖𑀺𑀢𑁆𑀯𑀸. 𑀆𑀭𑀸 𑀲𑀺𑀗𑁆𑀖𑀸𑀫𑀺 𑀯𑀸𑀭𑀺𑀚𑀁. 𑀏𑀢𑀸 ‘‘𑀧𑀭𑀲𑁆𑀲𑀪𑀸𑀲𑀸’’𑀢𑀺 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀯𑀤𑀦𑁆𑀢𑀺.

𑀖𑀼 𑀲𑀤𑁆𑀤𑁂. 𑀖𑁄𑀢𑀺, 𑀖𑀯𑀢𑀺.

𑀭𑀖𑀺 𑀮𑀖𑀺 𑀕𑀢𑁆𑀬𑀓𑁆𑀔𑁂𑀧𑁂. 𑀕𑀢𑁆𑀬𑀓𑁆𑀔𑁂𑀧𑁄 𑀕𑀢𑀺𑀬𑀸 𑀅𑀓𑁆𑀔𑁂𑀧𑁄. 𑀭𑀗𑁆𑀖𑀢𑀺, 𑀮𑀗𑁆𑀖𑀢𑀺, 𑀉𑀮𑁆𑀮𑀗𑁆𑀖𑀢𑀺. 𑀮𑀗𑁆𑀖𑀺𑀢𑀸, 𑀉𑀮𑁆𑀮𑀗𑁆𑀖𑀺𑀓𑀸𑀧𑀻𑀢𑀺, 𑀮𑀗𑁆𑀖𑀺𑀢𑁆𑀯𑀸.

𑀫𑀖𑀺 𑀓𑁂𑀢𑀯𑁂 𑀘. 𑀘𑀓𑀸𑀭𑁄 𑀧𑀼𑀩𑁆𑀩𑀢𑁆𑀣𑀸𑀧𑁂𑀓𑁆𑀔𑁄. 𑀫𑀗𑁆𑀖𑀢𑀺.

𑀭𑀸𑀖 𑀮𑀸𑀖 𑀲𑀸𑀫𑀢𑁆𑀣𑀺𑀬𑁂. 𑀭𑀸𑀖𑀢𑀺. 𑀮𑀸𑀖𑀢𑀺.

𑀤𑀸𑀖 𑀆𑀬𑀸𑀲𑁂 𑀘. 𑀆𑀬𑀸𑀲𑁄 𑀓𑀺𑀮𑀫𑀦𑀁. 𑀘𑀓𑀸𑀭𑁄 𑀲𑀸𑀫𑀢𑁆𑀣𑀺𑀬𑀸𑀧𑁂𑀓𑁆𑀔𑀓𑁄. 𑀤𑀸𑀖𑀢𑀺. 𑀦𑀺𑀤𑀸𑀖𑁄.

𑀲𑀺𑀮𑀸𑀖 𑀓𑀢𑁆𑀣𑀦𑁂. 𑀓𑀢𑁆𑀣𑀦𑀁 𑀧𑀲𑀁𑀲𑀦𑀁. 𑀲𑀺𑀮𑀸𑀖𑀢𑀺. 𑀲𑀺𑀮𑀸𑀖𑀸. 𑀩𑀼𑀤𑁆𑀥𑀲𑁆𑀲 𑀲𑀺𑀮𑀸𑀖𑀢𑁂. 𑀲𑀺𑀮𑀸𑀖𑀺𑀢𑁆𑀯𑀸. ‘‘𑀅𑀢𑁆𑀢𑀦𑁄𑀪𑀸𑀲𑀸’’𑀢𑀺 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀯𑀤𑀦𑁆𑀢𑀺.

𑀖 𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀇𑀢𑀺 𑀪𑀽𑀯𑀸𑀤𑀸𑀕𑀡𑁂 𑀓𑀯𑀕𑁆𑀕𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺

𑀲𑀫𑀢𑁆𑀢𑀸𑀦𑀺.

𑀘𑀓𑀸𑀭𑀦𑁆𑀢𑀥𑀸𑀢𑀼

𑀇𑀤𑀸𑀦𑀺 ¶ 𑀘𑀯𑀕𑁆𑀕𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺 𑀯𑀼𑀘𑁆𑀘𑀦𑁆𑀢𑁂 𑁋

𑀲𑀼𑀘 𑀲𑁄𑀓𑁂. 𑀲𑁄𑀘𑀢𑀺. 𑀲𑁄𑀓𑁄, 𑀲𑁄𑀘𑀦𑀸, 𑀲𑁄𑀘𑀁, 𑀲𑁄𑀘𑀦𑁆𑀢𑁄, 𑀲𑁄𑀘𑀦𑁆𑀢𑀻, 𑀲𑁄𑀘𑀦𑁆𑀢𑀁 𑀓𑀼𑀮𑀁, 𑀲𑁄𑀘𑀺𑀢𑁆𑀯𑀸.

𑀓𑀼𑀘 𑀲𑀤𑁆𑀤𑁂 𑀢𑀸𑀭𑁂. 𑀢𑀸𑀭𑀲𑀤𑁆𑀤𑁄 𑀅𑀘𑁆𑀘𑀼𑀘𑁆𑀘𑀲𑀤𑁆𑀤𑁄. 𑀓𑁄𑀘𑀢𑀺. 𑀉𑀘𑁆𑀘𑀲𑀤𑁆𑀤𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑀓𑀼𑀜𑁆𑀘 𑀓𑁄𑀝𑀺𑀮𑁆𑀮’𑀧𑁆𑀧𑀻𑀪𑀸𑀯𑁂𑀲𑀼. 𑀓𑀼𑀜𑁆𑀘𑀢𑀺. 𑀓𑀼𑀜𑁆𑀘𑀺𑀓𑀸, 𑀓𑀼𑀜𑁆𑀘𑀺𑀢𑀓𑁂𑀲𑁄. 𑀓𑀼𑀜𑁆𑀘𑀺𑀢𑁆𑀯𑀸.

𑀮𑀼𑀜𑁆𑀘 𑀅𑀧𑀦𑀬𑀦𑁂. 𑀮𑀼𑀜𑁆𑀘𑀢𑀺. 𑀮𑀼𑀜𑁆𑀘𑀓𑁄, 𑀮𑀼𑀜𑁆𑀘𑀺𑀢𑀼𑀁, 𑀮𑀼𑀜𑁆𑀘𑀺𑀢𑁆𑀯𑀸.

𑀅𑀜𑁆𑀘𑀼 𑀕𑀢𑀺𑀧𑀽𑀚𑀦𑀸𑀲𑀼. 𑀫𑀕𑁆𑀕𑀁 𑀅𑀜𑁆𑀘𑀢𑀺. 𑀩𑀼𑀤𑁆𑀥𑀁 𑀅𑀜𑁆𑀘𑀢𑀺. 𑀉𑀤𑁆𑀥𑀁 𑀅𑀦𑀼𑀕𑁆𑀕𑀦𑁆𑀢𑁆𑀯𑀸 𑀢𑀺𑀭𑀺𑀬𑀁 𑀅𑀜𑁆𑀘𑀺𑀢𑁄𑀢𑀺 𑀢𑀺𑀭𑀘𑁆𑀙𑀸𑀦𑁄. 𑀓𑀝𑀼𑀓𑀜𑁆𑀘𑀼𑀓𑀢𑀸.

𑀯𑀜𑁆𑀘𑀼 𑀘𑀜𑁆𑀘𑀼 𑀢𑀜𑁆𑀘𑀼 𑀕𑀢𑀺𑀬𑀁. 𑀯𑀜𑁆𑀘𑀢𑀺. 𑀘𑀜𑁆𑀘𑀢𑀺. 𑀢𑀜𑁆𑀘𑀢𑀺. 𑀫𑀜𑁆𑀘𑀢𑀺. 𑀲𑀦𑁆𑀢𑀺 𑀧𑀸𑀤𑀸 𑀅𑀯𑀜𑁆𑀘𑀦𑀸. 𑀅𑀯𑀜𑁆𑀘𑀦𑀸𑀢𑀺 𑀯𑀜𑁆𑀘𑀺𑀢𑀼𑀁 𑀕𑀦𑁆𑀢𑀼𑀁 𑀅𑀲𑀫𑀢𑁆𑀣𑀸.

𑀕𑀼𑀘𑀼 𑀕𑀡𑁂𑀘𑀼 𑀣𑁂𑀬𑁆𑀬𑀓𑀭𑀡𑁂. 𑀣𑁂𑀦𑀦𑀁 𑀣𑁂𑀬𑁆𑀬𑀁, 𑀘𑁄𑀭𑀺𑀓𑀸. 𑀢𑀲𑁆𑀲 𑀓𑁆𑀭𑀺𑀬𑀸 𑀣𑁂𑀬𑁆𑀬𑀓𑀭𑀡𑀁. 𑀕𑁄𑀘𑀢𑀺. 𑀕𑀡𑁂𑀘𑀢𑀺.

𑀅𑀘𑁆𑀘 𑀧𑀽𑀚𑀸𑀬𑀁 𑀅𑀘𑁆𑀘𑀢𑀺. 𑀩𑁆𑀭𑀳𑁆𑀫𑀸𑀲𑀼𑀭𑀲𑀼𑀭𑀘𑁆𑀘𑀺𑀢𑁄.

𑀢𑀘𑁆𑀘 𑀳𑀺𑀁𑀲𑀸𑀬𑀁. 𑀢𑀘𑁆𑀘𑀢𑀺.

𑀘𑀘𑁆𑀘 𑀚𑀘𑁆𑀘 𑀧𑀭𑀺𑀪𑀸𑀲𑀦𑀯𑀚𑁆𑀚𑀦𑁂𑀲𑀼. 𑀘𑀘𑁆𑀘𑀢𑀺. 𑀚𑀘𑁆𑀘𑀢𑀺.

𑀓𑀼𑀘 𑀲𑀁𑀧𑀘𑁆𑀘𑀦𑀓𑁄𑀝𑀺𑀮𑁆𑀮𑀧𑀝𑀺𑀓𑁆𑀓𑀫𑀯𑀺𑀮𑁂𑀔𑀦𑁂𑀲𑀼. 𑀓𑀼𑀘𑀢𑀺, 𑀲𑀗𑁆𑀓𑀼𑀘𑀢𑀺. 𑀲𑀗𑁆𑀓𑁄𑀘𑁄.

𑀢𑀘 𑀲𑀁𑀯𑀭𑀡𑁂. 𑀲𑀁𑀯𑀭𑀡𑀁 𑀭𑀓𑁆𑀔𑀡𑀁. 𑀢𑀘𑀢𑀺. 𑀢𑀘𑁄.

𑀤𑀺𑀘 ¶ 𑀣𑀼𑀢𑀺𑀬𑀁. 𑀤𑀺𑀘𑀢𑀺.

𑀓𑀼𑀘 𑀲𑀗𑁆𑀓𑁄𑀘𑀦𑁂. 𑀓𑁄𑀘𑀢𑀺, 𑀲𑀗𑁆𑀓𑁄𑀘𑀢𑀺. 𑀲𑀗𑁆𑀓𑁄𑀘𑁄.

𑀩𑁆𑀬𑀸𑀘 𑀩𑁆𑀬𑀸𑀚𑀺𑀓𑀭𑀡𑁂. 𑀩𑁆𑀬𑀸𑀚𑀺𑀓𑀭𑀡𑀁 𑀩𑁆𑀬𑀸𑀚𑀺𑀓𑁆𑀭𑀺𑀬𑀸. 𑀩𑁆𑀬𑀸𑀘𑀢𑀺.

𑀯𑀘 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁. 𑀯𑀺𑀬𑀢𑁆𑀢𑀲𑁆𑀲 𑀏𑀲𑀸 𑀯𑀺𑀬𑀢𑁆𑀢𑀺, 𑀢𑀺𑀲𑁆𑀲𑀁 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁, 𑀯𑀺𑀬𑀢𑁆𑀢𑀸𑀬𑀁 𑀯𑀸𑀘𑀸𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀬𑀢𑁆𑀢𑀲𑁆𑀲 𑀳𑀺 𑀯𑀤𑀢𑁄 𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀯𑀸𑀘𑀸 𑀯𑀺𑀬𑀢𑁆𑀢𑀸 𑀦𑀸𑀫 𑀯𑀼𑀘𑁆𑀘𑀢𑀺. 𑀬𑀣𑀸 𑀧𑀦 𑀓𑀼𑀘𑁆𑀙𑀺𑀲𑀤𑁆𑀤𑀢𑀺𑀭𑀘𑁆𑀙𑀸𑀦𑀕𑀢𑀸𑀤𑀺𑀲𑀤𑁆𑀤𑁄 ‘‘𑀅𑀩𑁆𑀬𑀢𑁆𑀢𑀲𑀤𑁆𑀤𑁄’’𑀢𑀺 𑀯𑀼𑀘𑁆𑀘𑀢𑀺, 𑀦 𑀏𑀯𑀁 𑀯𑀘𑀦𑀲𑀗𑁆𑀔𑀸𑀢𑁄 𑀲𑀤𑁆𑀤𑁄 ‘‘𑀅𑀩𑁆𑀬𑀢𑁆𑀢𑀲𑀤𑁆𑀤𑁄’’𑀢𑀺 𑀯𑀼𑀘𑁆𑀘𑀢𑀺 𑀯𑀺𑀜𑁆𑀜𑀸𑀢𑀢𑁆𑀣𑀢𑁆𑀢𑀸. ‘‘𑀯𑀢𑁆𑀢𑀺, 𑀯𑀘𑀢𑀺, 𑀯𑀘𑀦𑁆𑀢𑀺. 𑀯𑀘𑀲𑀺’’ 𑀇𑀘𑁆𑀘𑀸𑀤𑀻𑀦𑀺 𑀲𑀼𑀤𑁆𑀥𑀓𑀢𑁆𑀢𑀼𑀧𑀤𑀸𑀦𑀺. ‘‘𑀯𑀸𑀘𑁂𑀢𑀺, 𑀯𑀸𑀘𑁂𑀦𑁆𑀢𑀺’’ 𑀇𑀘𑁆𑀘𑀸𑀤𑀻𑀦𑀺 𑀳𑁂𑀢𑀼𑀓𑀢𑁆𑀢𑀼𑀧𑀤𑀸𑀦𑀺. ‘‘𑀅𑀢𑁆𑀣𑀸𑀪𑀺𑀲𑀫𑀬𑀸 𑀥𑀻𑀭𑁄, 𑀧𑀡𑁆𑀟𑀺𑀢𑁄𑀢𑀺 𑀧𑀯𑀼𑀘𑁆𑀘𑀢𑀺. 𑀯𑀼𑀘𑁆𑀘𑀦𑁆𑀢𑀺. 𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸 𑀮𑁄𑀓𑁂, 𑀤𑁂𑀯𑀥𑀫𑁆𑀫𑀸𑀢𑀺 𑀯𑀼𑀘𑁆𑀘𑀭𑁂’’ 𑀇𑀘𑁆𑀘𑀸𑀤𑀻𑀦𑀺 𑀓𑀫𑁆𑀫𑀧𑀤𑀸𑀦𑀺. 𑀕𑀭𑀽 𑀧𑀦 𑀯𑀓𑀸𑀭𑀲𑁆𑀲 𑀉𑀓𑀸𑀭𑀸𑀤𑁂𑀲𑀯𑀲𑁂𑀦 ‘‘𑀉𑀢𑁆𑀢𑀁 𑀉𑀘𑁆𑀘𑀢𑁂 𑀉𑀘𑁆𑀘𑀦𑁆𑀢𑁂’’𑀢𑀺𑀆𑀤𑀻𑀦𑀺 𑀇𑀘𑁆𑀙𑀦𑁆𑀢𑀺, 𑀢𑀸𑀦𑀺 𑀲𑀸𑀲𑀦𑁂 𑀅𑀧𑁆𑀧𑀲𑀺𑀤𑁆𑀥𑀸𑀦𑀺, 𑀲𑀓𑁆𑀓𑀝𑀪𑀸𑀲𑀸𑀦𑀼𑀮𑁄𑀫𑀸𑀦𑀺. 𑀲𑀸𑀲𑀦𑀲𑁆𑀫𑀺𑀜𑁆𑀳𑀺 𑀭𑀓𑀸𑀭𑀸𑀕𑀫𑀯𑀺𑀲𑀬𑁂 𑀦𑀺𑀧𑀼𑀩𑁆𑀩𑀲𑁆𑀲𑁂𑀯 𑀯𑀘𑀲𑁆𑀲 𑀯𑀲𑁆𑀲 𑀉𑀓𑀸𑀭𑀸𑀤𑁂𑀲𑁄 𑀲𑀺𑀤𑁆𑀥𑁄 ‘‘𑀦𑀺𑀭𑀼𑀢𑁆𑀢𑀺, 𑀦𑀺𑀭𑀼𑀢𑁆𑀢𑀁, 𑀦𑁂𑀭𑀼𑀢𑁆𑀢’’𑀦𑁆𑀢𑀺. 𑀯𑀘𑀦𑀁, 𑀯𑀸𑀘𑀸, 𑀯𑀘𑁄, 𑀯𑀘𑀻, 𑀯𑀼𑀢𑁆𑀢𑀁, 𑀧𑀯𑀼𑀢𑁆𑀢𑀁, 𑀯𑀼𑀘𑁆𑀘𑀫𑀸𑀦𑀁, 𑀅𑀥𑀺𑀯𑀘𑀦𑀁, 𑀯𑀢𑁆𑀢𑀩𑁆𑀩𑀁, 𑀯𑀘𑀦𑀻𑀬𑀁, 𑀇𑀫𑀸𑀦𑀺 𑀦𑀸𑀫𑀺𑀓𑀧𑀤𑀸𑀦𑀺. 𑀯𑀢𑁆𑀢𑀼𑀁, 𑀯𑀢𑁆𑀢𑀯𑁂, 𑀯𑀢𑁆𑀯𑀸, 𑀯𑀢𑁆𑀯𑀸𑀦, 𑀇𑀫𑀸𑀦𑀺 𑀢𑀼𑀫𑀦𑁆𑀢𑀸𑀤𑀻𑀦𑀺 ‘‘𑀧𑀭𑀲𑁆𑀲𑀪𑀸𑀲𑀸’’𑀢𑀺 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀯𑀤𑀦𑁆𑀢𑀺.

𑀢𑀢𑁆𑀣 𑀯𑀢𑁆𑀢𑀻𑀢𑀺 𑀯𑀤𑀢𑀺. 𑀆𑀔𑁆𑀬𑀸𑀢𑀧𑀤𑀜𑁆𑀳𑁂𑀢𑀁. 𑀅𑀢𑁆𑀣𑀲𑀁𑀯𑀡𑁆𑀡𑀓𑁂𑀳𑀺𑀧𑀺 ‘‘𑀯𑀢𑁆𑀢𑀺 𑀏𑀢𑀸𑀬𑀸𑀢𑀺 𑀯𑀸𑀘𑀸’’𑀢𑀺 𑀦𑀺𑀩𑁆𑀩𑀘𑀦𑀫𑀼𑀤𑀸𑀳𑀝𑀁. 𑀲𑀤𑁆𑀤𑀲𑀢𑁆𑀣𑁂 𑀘 𑀢𑀸𑀤𑀺𑀲𑀁 𑀆𑀔𑁆𑀬𑀸𑀢𑀧𑀤𑀁 𑀤𑀺𑀝𑁆𑀞𑀁. 𑀏𑀢𑁆𑀣 𑀧𑀦𑁂𑀓𑁂 𑀯𑀤𑀦𑁆𑀢𑀺 ‘‘𑀯𑀘𑀢𑀺, 𑀯𑀘𑀦𑁆𑀢𑀻𑀢𑀺𑀆𑀤𑀻𑀦𑀺 𑀓𑁆𑀭𑀺𑀬𑀸𑀧𑀤𑀭𑀽𑀧𑀸𑀦𑀺 𑀩𑀼𑀤𑁆𑀥𑀯𑀘𑀦𑁂 𑀅𑀝𑁆𑀞𑀓𑀣𑀸𑀝𑀻𑀓𑀸𑀲𑀼 𑀲𑀢𑁆𑀣𑁂𑀲𑀼 𑀘 𑀅𑀦𑀸𑀕𑀢𑀢𑁆𑀢𑀸 𑀙𑀟𑁆𑀟𑁂𑀢𑀩𑁆𑀩𑀸𑀦𑀻’’𑀢𑀺. 𑀢𑀦𑁆𑀦, 𑀬𑀲𑁆𑀫𑀸 𑀲𑀸𑀲𑀦𑁂 ‘‘𑀅𑀯𑀘, 𑀅𑀯𑀘𑀺𑀁𑀲𑀽’’𑀢𑀺 𑀲𑀼𑀤𑁆𑀥𑀓𑀢𑁆𑀢𑀼𑀧𑀤𑀸𑀦𑀺 𑀘 ‘‘𑀯𑀸𑀘𑁂𑀢𑀺, 𑀯𑀸𑀘𑁂𑀦𑁆𑀢𑀻’’𑀢𑀺𑀆𑀤𑀻𑀦𑀺 𑀳𑁂𑀢𑀼𑀓𑀢𑁆𑀢𑀼𑀧𑀤𑀸𑀦𑀺 𑀘 𑀤𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 ¶ 𑀩𑀼𑀤𑁆𑀥𑀯𑀘𑀦𑀸𑀤𑀻𑀲𑀼 𑀅𑀦𑀸𑀕𑀢𑀸𑀦𑀺𑀧𑀺 ‘‘𑀯𑀘𑀢𑀺, 𑀯𑀘𑀦𑁆𑀢𑀻’’𑀢𑀺𑀆𑀤𑀻𑀦𑀺 𑀭𑀽𑀧𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀯𑀘𑁂𑀬𑁆𑀬, 𑀯𑀼𑀘𑁆𑀘𑀢𑀼, 𑀯𑀼𑀘𑁆𑀘𑁂𑀬𑁆𑀬. 𑀲𑁂𑀲𑀁 𑀲𑀩𑁆𑀩𑀁 𑀲𑀩𑁆𑀩𑀢𑁆𑀣 𑀯𑀺𑀢𑁆𑀣𑀸𑀭𑀢𑁄 𑀕𑀳𑁂𑀢𑀩𑁆𑀩𑀁.

𑀧𑀭𑁄𑀓𑁆𑀔𑀸𑀭𑀽𑀧𑀸𑀦𑀺 𑀯𑀤𑀸𑀫 𑁋 𑀯𑀘, 𑀯𑀘𑀼. 𑀯𑀘𑁂, 𑀯𑀘𑀺𑀢𑁆𑀣. 𑀯𑀘𑀁, 𑀯𑀘𑀺𑀫𑁆𑀳. 𑀯𑀘𑀺𑀢𑁆𑀣, 𑀯𑀘𑀺𑀭𑁂. 𑀯𑀘𑀺𑀢𑁆𑀣𑁄, 𑀯𑀘𑀺𑀯𑁆𑀳𑁄. 𑀯𑀘𑀺𑀁, 𑀯𑀘𑀺𑀫𑁆𑀳𑁂.

𑀳𑀺𑀬𑁆𑀬𑀢𑁆𑀢𑀦𑀻𑀭𑀽𑀧𑀸𑀦𑀺 𑀯𑀤𑀸𑀫 𑁋 𑀅𑀯𑀘𑀸, 𑀅𑀯𑀘𑀽. 𑀅𑀯𑀘𑁄, 𑀅𑀯𑀘𑀼𑀢𑁆𑀣. 𑀅𑀯𑁄𑀘𑀁, 𑀅𑀯𑀘𑀼𑀫𑁆𑀳. 𑀅𑀯𑀘𑀼𑀢𑁆𑀣, 𑀅𑀯𑀘𑀼𑀢𑁆𑀣𑀼𑀁. 𑀅𑀯𑀘𑀲𑁂, 𑀅𑀯𑀘𑀼𑀯𑁆𑀳𑀁. 𑀅𑀯𑀘𑀺𑀁, 𑀅𑀯𑀘𑀫𑁆𑀳𑀲𑁂.

𑀅𑀚𑁆𑀚𑀢𑀦𑀻𑀭𑀽𑀧𑀸𑀦𑀺 𑀯𑀤𑀸𑀫 𑁋 𑀅𑀯𑀘𑀺, 𑀅𑀯𑁄𑀘𑀼𑀁, 𑀅𑀯𑀘𑀺𑀁𑀲𑀼. 𑀅𑀯𑁄𑀘𑁄, 𑀅𑀯𑁄𑀘𑀼𑀢𑁆𑀣. 𑀅𑀯𑁄𑀘𑀺𑀁, 𑀅𑀯𑁄𑀘𑀼𑀫𑁆𑀳. 𑀅𑀯𑁄𑀘𑀸, 𑀅𑀯𑁄𑀘𑀼. 𑀅𑀯𑀘𑀲𑁂, 𑀅𑀯𑁄𑀘𑀺𑀯𑀁. 𑀅𑀯𑁄𑀘𑀁, 𑀅𑀯𑁄𑀘𑀺𑀫𑁆𑀳𑁂.

𑀪𑀯𑀺𑀲𑁆𑀲𑀦𑁆𑀢𑀻𑀭𑀽𑀧𑀸𑀦𑀺 𑀯𑀤𑀸𑀫 𑁋 𑀯𑀓𑁆𑀔𑀢𑀺, 𑀯𑀓𑁆𑀔𑀦𑁆𑀢𑀺. 𑀯𑀓𑁆𑀔𑀲𑀺, 𑀯𑀓𑁆𑀔𑀣. 𑀯𑀓𑁆𑀔𑀸𑀫𑀺, 𑀯𑀓𑁆𑀔𑀸𑀫. 𑀯𑀓𑁆𑀔𑀢𑁂, 𑀯𑀓𑁆𑀔𑀦𑁆𑀢𑁂. 𑀯𑀓𑁆𑀔𑀲𑁂, 𑀯𑀓𑁆𑀔𑀯𑁆𑀳𑁂. 𑀯𑀓𑁆𑀔𑀲𑁆𑀲𑀁 𑀯𑀓𑁆𑀔𑀫𑁆𑀳𑁂.

𑀇𑀫𑁂𑀲𑀁 𑀧𑀦 𑀧𑀤𑀸𑀦𑀁 ‘‘𑀓𑀣𑁂𑀲𑁆𑀲𑀢𑀺, 𑀓𑀣𑁂𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀯𑀓𑁆𑀔 𑀭𑁄𑀲𑁂𑀢𑀺 𑀥𑀸𑀢𑀼𑀲𑁆𑀲 𑀘 ‘‘𑀯𑀓𑁆𑀔𑀢𑀺, 𑀯𑀓𑁆𑀔𑀦𑁆𑀢𑀺. 𑀯𑀓𑁆𑀔𑀲𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀅𑀯𑀲𑀸𑀦𑁂 𑀉𑀢𑁆𑀢𑀫𑀧𑀼𑀭𑀺𑀲𑁂𑀓𑀯𑀘𑀦𑀝𑁆𑀞𑀸𑀦𑁂 ‘‘𑀯𑀓𑁆𑀔𑁂𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀅𑀢𑁆𑀣𑁄 𑀧𑀦𑀺𑀫𑁂𑀲𑀁 ‘‘𑀭𑁄𑀲𑀢𑀺, 𑀭𑁄𑀲𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑁄. 𑀅𑀬𑀁 𑀯𑀘𑀯𑀓𑁆𑀔𑀥𑀸𑀢𑀽𑀦𑀁 𑀪𑀯𑀺𑀲𑁆𑀲𑀦𑁆𑀢𑀻𑀯𑀢𑁆𑀢𑀫𑀸𑀦𑀸𑀯𑀲𑁂𑀦 𑀭𑀽𑀧𑀲𑀁𑀲𑀦𑁆𑀤𑀦𑀸𑀦𑀬𑁄. 𑀅𑀧𑀭𑀸𑀦𑀺𑀧𑀺 𑀯𑀘𑀥𑀸𑀢𑀼𑀲𑁆𑀲 𑀪𑀯𑀺𑀲𑁆𑀲𑀦𑁆𑀢𑀻 𑀲𑀳𑀺𑀢𑀸𑀦𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺 𑁋 𑀯𑀓𑁆𑀔𑀺𑀲𑁆𑀲𑀢𑀺, 𑀯𑀓𑁆𑀔𑀺𑀲𑁆𑀲𑀦𑁆𑀢𑀺. 𑀯𑀓𑁆𑀔𑀺𑀲𑁆𑀲𑀲𑀺, 𑀯𑀓𑁆𑀔𑀺𑀲𑁆𑀲𑀣. 𑀯𑀓𑁆𑀔𑀺𑀲𑁆𑀲𑀸𑀫𑀺, 𑀯𑀓𑁆𑀔𑀺𑀲𑁆𑀲𑀸𑀫. 𑀯𑀓𑁆𑀔𑀺𑀲𑁆𑀲𑀢𑁂, 𑀯𑀓𑁆𑀔𑀺𑀲𑁆𑀲𑀦𑁆𑀢𑁂. 𑀯𑀓𑁆𑀔𑀺𑀲𑁆𑀲𑀲𑁂, 𑀯𑀓𑁆𑀔𑀺𑀲𑁆𑀲𑀯𑁆𑀳𑁂. 𑀯𑀓𑁆𑀔𑀺𑀲𑁆𑀲𑀁, 𑀯𑀓𑁆𑀔𑀺𑀲𑁆𑀲𑀸𑀫𑁆𑀳𑁂.

𑀅𑀢𑁆𑀭𑀸𑀬𑀁 𑀧𑀸𑀴𑀺 𑁋

‘‘𑀅𑀪𑀻𑀢𑀓𑀧𑁆𑀧𑁂 𑀘𑀭𑀺𑀢𑀁, 𑀞𑀧𑀬𑀺𑀢𑁆𑀯𑀸 𑀪𑀯𑀸𑀪𑀯𑁂;

𑀇𑀫𑀫𑁆𑀳𑀺 𑀓𑀧𑁆𑀧𑁂 𑀘𑀭𑀺𑀢𑀁, 𑀧𑀯𑀓𑁆𑀔𑀺𑀲𑁆𑀲𑀁 𑀲𑀼𑀡𑁄𑀳𑀺 𑀫𑁂’’𑀢𑀺.

𑀕𑀤𑁆𑀭𑀢𑀧𑀜𑁆𑀳𑁂𑀧𑀺 ¶ ‘‘𑀭𑀸𑀚𑀸 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀕𑀳𑀧𑀢𑀺 𑀧𑀢𑀺𑀭𑀽𑀧𑀁 𑀆𑀲𑀦𑀁 𑀜𑀢𑁆𑀯𑀸 𑀦𑀺𑀲𑀻𑀤𑀣𑀸𑀢𑀺 𑀯𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀏𑀯𑀫𑀸𑀤𑀺𑀅𑀝𑁆𑀞𑀓𑀣𑀸𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸𑀬𑁂𑀯 𑀏𑀤𑀺𑀲𑀻 𑀧𑀤𑀫𑀸𑀮𑀸 𑀭𑀘𑀺𑀢𑀸. 𑀯𑀓𑁆𑀔 𑀭𑁄𑀲𑁂𑀢𑀺 𑀥𑀸𑀢𑀼𑀲𑁆𑀲𑀧𑀺 𑀪𑀯𑀺𑀲𑁆𑀲𑀦𑁆𑀢𑀻𑀲𑀳𑀺𑀢𑀸𑀦𑀺 𑀭𑀽𑀧𑀸𑀦𑀺 ‘‘𑀯𑀓𑁆𑀔𑀺𑀲𑁆𑀲𑀢𑀺, 𑀯𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀻𑀦𑀺 𑀪𑀯𑀦𑁆𑀢𑀺. 𑀅𑀢𑁆𑀣𑁄 𑀧𑀦𑀺𑀫𑁂𑀲𑀁 ‘‘𑀭𑁄𑀲𑀺𑀲𑁆𑀲𑀢𑀺, 𑀭𑁄𑀲𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑁄. 𑀅𑀬𑀁 𑀯𑀘𑀯𑀓𑁆𑀔𑀥𑀸𑀢𑀽𑀦𑀁 𑀪𑀯𑀺𑀲𑁆𑀲𑀦𑁆𑀢𑀻𑀯𑀲𑁂𑀦𑁂𑀯 𑀭𑀽𑀧𑀲𑀁𑀲𑀦𑁆𑀤𑀦𑀸𑀦𑀬𑁄.

𑀅𑀯𑀘𑀺𑀲𑁆𑀲𑀸, 𑀯𑀘𑀺𑀲𑁆𑀲𑀸, 𑀅𑀯𑀘𑀺𑀲𑁆𑀲𑀁𑀲𑀼, 𑀯𑀘𑀺𑀲𑁆𑀲𑀁𑀲𑀼. 𑀲𑁂𑀲𑀁 𑀲𑀩𑁆𑀩𑀁 𑀦𑁂𑀬𑁆𑀬𑀁. 𑀇𑀥 𑀧𑀦 𑀯𑀼𑀢𑁆𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑀁 𑀯𑀢𑁆𑀢𑀩𑁆𑀩𑀫𑁆𑀧𑀺 𑀅𑀯𑀢𑁆𑀯𑀸 𑀉𑀧𑀭𑀺𑀬𑁂𑀯 𑀓𑀣𑁂𑀲𑁆𑀲𑀸𑀫 𑀇𑀢𑁄 𑀅𑀢𑀺𑀯𑀺𑀬 𑀯𑀢𑁆𑀢𑀩𑁆𑀩𑀝𑁆𑀞𑀸𑀦𑀢𑁆𑀢𑀸.

𑀘𑀼 𑀘𑀯𑀦𑁂. 𑀘𑀯𑀢𑀺. 𑀓𑀸𑀭𑀺𑀢𑁂 ‘‘𑀘𑀸𑀯𑁂𑀢𑀻’’𑀢𑀺 𑀭𑀽𑀧𑀁. 𑀤𑁂𑀯𑀓𑀸𑀬𑀸 𑀘𑀼𑀢𑁄. 𑀘𑀼𑀢𑀁 𑀧𑀤𑀼𑀫𑀁. 𑀘𑀯𑀺𑀢𑀼𑀁, 𑀘𑀯𑀺𑀢𑁆𑀯𑀸.

𑀮𑁄𑀘 𑀤𑀲𑁆𑀲𑀦𑁂. 𑀮𑁄𑀘𑀢𑀺. 𑀮𑁄𑀘𑀦𑀁.

𑀲𑁂𑀘 𑀲𑁂𑀘𑀦𑁂. 𑀲𑁂𑀘𑀢𑀺.

𑀲𑀘 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁. 𑀲𑀘𑀢𑀺.

𑀓𑀘 𑀩𑀦𑁆𑀥𑀦𑁂. 𑀓𑀘𑀢𑀺.

𑀫𑀘 𑀫𑀼𑀘𑀺 𑀓𑀓𑁆𑀓𑀦𑁂. 𑀓𑀓𑁆𑀓𑀦𑀁 𑀲𑀭𑀻𑀭𑁂 𑀉𑀩𑁆𑀩𑀝𑁆𑀝𑀦𑀁. 𑀫𑀘𑀢𑀺. 𑀫𑀼𑀜𑁆𑀘𑀢𑀺. 𑀫𑀘𑀺 𑀥𑀸𑀭𑀡𑀼𑀘𑁆𑀙𑀸𑀬𑀧𑀽𑀚𑀦𑁂𑀲𑀼. 𑀥𑀸𑀭𑀡𑀁 𑀉𑀘𑁆𑀙𑀸𑀬𑁄 𑀧𑀽𑀚𑀦𑀦𑁆𑀢𑀺 𑀢𑀬𑁄 𑀅𑀢𑁆𑀣𑀸. 𑀢𑀢𑁆𑀣 𑀉𑀘𑁆𑀙𑀸𑀬𑁄 𑀫𑀮𑀳𑀭𑀡𑀁. 𑀫𑀜𑁆𑀘𑀢𑀺. 𑀫𑀜𑁆𑀘𑁄, 𑀫𑀜𑁆𑀘𑀦𑀁. 𑀫𑀜𑁆𑀘𑀢𑀺 𑀧𑀼𑀕𑁆𑀕𑀮𑀁 𑀥𑀸𑀭𑁂𑀢𑀻𑀢𑀺 𑀫𑀜𑁆𑀘𑁄.

𑀧𑀘 𑀩𑁆𑀬𑀢𑁆𑀢𑀺𑀓𑀭𑀡𑁂. 𑀧𑀘𑀢𑀺. 𑀧𑀸𑀓𑁄, 𑀧𑀭𑀺𑀧𑀸𑀓𑁄, 𑀯𑀺𑀧𑀸𑀓𑁄, 𑀧𑀓𑁆𑀓𑀁 𑀨𑀮𑀁.

𑀣𑀼𑀘 𑀧𑀲𑀸𑀤𑁂. 𑀣𑁄𑀘𑀢𑀺.

𑀯𑀘 𑀯𑀘𑀺 𑀤𑀺𑀢𑁆𑀢𑀺𑀬𑀁. 𑀯𑀘𑀢𑀺. 𑀯𑀜𑁆𑀘𑀢𑀺.

𑀭𑀼𑀘 ¶ 𑀤𑀺𑀢𑁆𑀢𑀺𑀬𑀁 𑀭𑁄𑀘𑀦𑁂 𑀘. 𑀤𑀺𑀢𑁆𑀢𑀺 𑀲𑁄𑀪𑀸. 𑀭𑁄𑀘𑀦𑀁 𑀭𑀼𑀘𑀺. 𑀭𑁄𑀘𑀢𑀺. 𑀯𑁂𑀭𑁄𑀘𑀦𑁄. 𑀲𑀫𑀡𑀲𑁆𑀲 𑀭𑁄𑀘𑀢𑁂 𑀲𑀘𑁆𑀘𑀁. 𑀢𑀲𑁆𑀲 𑀢𑁂 𑀲𑀕𑁆𑀕𑀓𑀸𑀫𑀲𑁆𑀲, 𑀏𑀓𑀢𑁆𑀢𑀫𑀼𑀧𑀭𑁄𑀘𑀺𑀢𑀁. 𑀅𑀬𑀜𑁆𑀘 𑀤𑀺𑀯𑀸𑀤𑀺𑀕𑀡𑁂 𑀭𑀼𑀘𑀺𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 ‘‘𑀭𑀼𑀘𑁆𑀘𑀢𑀻’’𑀢𑀺 𑀭𑀽𑀧𑀁 𑀚𑀦𑁂𑀢𑀺. 𑀢𑁂𑀦 ‘‘𑀕𑀫𑀦𑀁 𑀫𑀬𑁆𑀳 𑀭𑀼𑀘𑁆𑀘𑀢𑀻’’𑀢𑀺 𑀧𑀸𑀴𑀺 𑀤𑀺𑀲𑁆𑀲𑀢𑀺. 𑀘𑀼𑀭𑀸𑀤𑀺𑀕𑀡𑁂 𑀧𑀦 𑀭𑀼𑀘𑀺𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 ‘‘𑀭𑁄𑀘𑁂𑀢𑀺 𑀭𑁄𑀘𑀬𑀢𑀻’’𑀢𑀺 𑀭𑀽𑀧𑀸𑀦𑀺 𑀚𑀦𑁂𑀢𑀺. 𑀢𑁂𑀦 ‘‘𑀓𑀺𑀁 𑀦𑀼 𑀚𑀸𑀢𑀺𑀁 𑀦 𑀭𑁄𑀘𑁂𑀲𑀻’’𑀢𑀺𑀆𑀤𑀺𑀓𑀸 𑀧𑀸𑀴𑀺𑀬𑁄 𑀤𑀺𑀲𑁆𑀲𑀦𑁆𑀢𑀺. 𑀢𑁂𑀕𑀡𑀺𑀓𑁄𑀬𑀁 𑀥𑀸𑀢𑀼.

𑀧𑀘 𑀲𑀁𑀧𑀸𑀓𑁂. 𑀧𑀘𑀢𑀺, 𑀧𑀘𑀦𑁆𑀢𑀺. 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀧𑀦 ‘‘𑀅𑀢𑁆𑀢𑀦𑁄𑀪𑀸𑀲𑀸’’𑀢𑀺 𑀯𑀤𑀦𑁆𑀢𑀺.

𑀅𑀜𑁆𑀘 𑀩𑁆𑀬𑀬𑀕𑀢𑀺𑀬𑀁. 𑀩𑁆𑀬𑀬𑀕𑀢𑀺 𑀯𑀺𑀦𑀸𑀲𑀕𑀢𑀺. 𑀅𑀜𑁆𑀘𑀢𑀺.

𑀬𑀸𑀘 𑀬𑀸𑀘𑀦𑀸𑀬𑀁. 𑀩𑁆𑀭𑀸𑀳𑁆𑀫𑀡𑁄 𑀦𑀸𑀕𑀁 𑀫𑀡𑀺𑀁 𑀬𑀸𑀘𑀢𑀺. 𑀦𑀸𑀕𑁄 𑀫𑀡𑀺𑀁 𑀬𑀸𑀘𑀺𑀢𑁄 𑀩𑁆𑀭𑀸𑀳𑁆𑀫𑀡𑁂𑀦. 𑀢𑁂 𑀢𑀁 𑀅𑀲𑁆𑀲𑁂 𑀅𑀬𑀸𑀘𑀺𑀲𑀼𑀁. 𑀲𑁄 𑀢𑀁 𑀭𑀣𑀫𑀬𑀸𑀘𑀣. 𑀤𑁂𑀯𑀤𑀢𑁆𑀢𑀁 𑀆𑀬𑀸𑀘𑀢𑀺. 𑀏𑀯𑀁 𑀲𑀼𑀤𑁆𑀥𑀓𑀢𑁆𑀢𑀭𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀸𑀳𑁆𑀫𑀡𑁂𑀦 𑀦𑀸𑀕𑀁 𑀫𑀡𑀺𑀁 𑀬𑀸𑀘𑁂𑀢𑀺, 𑀬𑀸𑀘𑀬𑀢𑀺, 𑀬𑀸𑀘𑀸𑀧𑁂𑀢𑀺, 𑀬𑀸𑀘𑀸𑀧𑀬𑀢𑀺. 𑀏𑀯𑀁 𑀳𑁂𑀢𑀼𑀓𑀢𑁆𑀢𑀭𑀺. 𑀭𑀸𑀚𑀸 𑀩𑁆𑀭𑀸𑀳𑁆𑀫𑀡𑁂𑀦 𑀥𑀦𑀁 𑀬𑀸𑀘𑀺𑀬𑀢𑀺, 𑀬𑀸𑀘𑀬𑀺𑀬𑀢𑀺, 𑀬𑀸𑀘𑀸𑀧𑀺𑀬𑀢𑀺, 𑀬𑀸𑀘𑀸𑀧𑀬𑀺𑀬𑀢𑀺. 𑀏𑀯𑀁 𑀓𑀫𑁆𑀫𑀦𑀺. 𑀬𑀸𑀘𑀁, 𑀬𑀸𑀘𑀦𑁆𑀢𑁄, 𑀬𑀸𑀘𑀦𑁆𑀢𑀻, 𑀬𑀸𑀘𑀦𑁆𑀢𑀁 𑀓𑀼𑀮𑀁. 𑀬𑀸𑀘𑀫𑀸𑀦𑁄, 𑀬𑀸𑀘𑀫𑀸𑀦𑀸, 𑀬𑀸𑀘𑀫𑀸𑀦𑀁 𑀓𑀼𑀮𑀁. 𑀬𑀸𑀘𑀓𑁄, 𑀬𑀸𑀘𑀦𑀸, 𑀬𑀸𑀘𑀺𑀢𑀩𑁆𑀩𑀁, 𑀬𑀸𑀘𑀺𑀢𑀼𑀁, 𑀬𑀸𑀘𑀺𑀢𑁆𑀯𑀸𑀦, 𑀬𑀸𑀘𑀺𑀢𑀼𑀦, 𑀬𑀸𑀘𑀺𑀬, 𑀬𑀸𑀘𑀺𑀬𑀸𑀦. 𑀏𑀯𑀁 𑀦𑀸𑀫𑀺𑀓𑀧𑀤𑀸𑀦𑀺 𑀢𑀼𑀫𑀦𑁆𑀢𑀸𑀤𑀻𑀦𑀺 𑀘 𑀪𑀯𑀦𑁆𑀢𑀺.

𑀧𑀘 𑀧𑀸𑀓𑁂. 𑀑𑀤𑀦𑀁 𑀧𑀘𑀢𑀺. ‘‘𑀉𑀪𑀬𑀢𑁄𑀪𑀸𑀲𑀸’’𑀢𑀺 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀯𑀤𑀦𑁆𑀢𑀺. 𑀬𑀣𑀸 𑀧𑀦 𑀲𑀸𑀲𑀦𑁂 ‘‘𑀧𑀡𑁆𑀟𑀺𑀢𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺 ¶ 𑀯𑀘𑀥𑀸𑀢𑀼𑀲𑁆𑀲 𑀓𑀫𑁆𑀫𑀦𑀺 𑀭𑀽𑀧𑀁 𑀧𑀲𑀺𑀤𑁆𑀥𑀁, 𑀦 𑀢𑀣𑀸 𑀧𑀘𑀥𑀸𑀢𑀼𑀲𑁆𑀲. 𑀏𑀯𑀁 𑀲𑀦𑁆𑀢𑁂𑀧𑀺 𑀕𑀭𑀽 ‘‘𑀢𑀬𑀸 𑀧𑀘𑁆𑀘𑀢𑁂 𑀑𑀤𑀦𑁄’’𑀢𑀺 𑀢𑀲𑁆𑀲 𑀓𑀫𑁆𑀫𑀦𑀺 𑀭𑀽𑀧𑀁 𑀯𑀤𑀦𑁆𑀢𑀺. 𑀲𑀸𑀲𑀦𑁂 𑀧𑀦 𑀅𑀯𑀺𑀲𑁂𑀲𑀢𑁄 ‘‘𑀧𑀘𑁆𑀘𑀢𑁂’’𑀢𑀺 𑀯𑀸 ‘‘𑀧𑀘𑁆𑀘𑀢𑀻’’𑀢𑀺 𑀯𑀸 𑀯𑀼𑀢𑁆𑀢𑀲𑁆𑀲𑀧𑀺 𑀧𑀤𑀲𑁆𑀲 𑀅𑀓𑀫𑁆𑀫𑀓𑁄𑀬𑁂𑀯 𑀤𑀺𑀯𑀸𑀤𑀺𑀕𑀡𑀺𑀓𑁄 𑀧𑀬𑁄𑀕𑁄 𑀇𑀘𑁆𑀙𑀺𑀢𑀩𑁆𑀩𑁄 ‘‘𑀤𑁂𑀯𑀤𑀢𑁆𑀢𑁄 𑀦𑀺𑀭𑀬𑁂 𑀧𑀘𑁆𑀘𑀢𑀺. 𑀬𑀸𑀯 𑀧𑀸𑀧𑀁 𑀦 𑀧𑀘𑁆𑀘𑀢𑀻’’𑀢𑀺𑀆𑀤𑀺𑀤𑀲𑁆𑀲𑀦𑀢𑁄. 𑀓𑁂𑀘𑁂𑀢𑁆𑀣 𑀯𑀤𑁂𑀬𑁆𑀬𑀼𑀁 ‘‘𑀲𑀬𑀫𑁂𑀯 𑀧𑀻𑀬𑀢𑁂 𑀧𑀸𑀦𑀻𑀬𑀦𑁆𑀢𑀺𑀆𑀤𑀺 𑀯𑀺𑀬 𑀪𑀽𑀯𑀸𑀤𑀺𑀕𑀡𑀧𑀓𑁆𑀔𑀺𑀓𑁄 𑀓𑀫𑁆𑀫𑀓𑀢𑁆𑀢𑀼𑀧𑁆𑀧𑀬𑁄𑀕𑁄 𑀏𑀲, 𑀢𑀲𑁆𑀫𑀸 ‘𑀲𑀬𑀫𑁂𑀯𑀸’𑀢𑀺 𑀧𑀤𑀁 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 ‘𑀲𑀬𑀫𑁂𑀯 𑀤𑁂𑀯𑀤𑀢𑁆𑀢𑁄 𑀧𑀘𑁆𑀘𑀢𑀻’𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄’’𑀢𑀺 𑀢𑀦𑁆𑀦, ‘‘𑀲𑀬𑀫𑁂𑀯 𑀧𑀻𑀬𑀢𑁂 𑀧𑀸𑀦𑀻𑀬’’𑀦𑁆𑀢𑀺 𑀏𑀢𑁆𑀣 𑀳𑀺 𑀧𑀸𑀦𑀻𑀬𑀁 𑀫𑀦𑀼𑀲𑁆𑀲𑀸 𑀧𑀺𑀯𑀦𑁆𑀢𑀺, 𑀦 𑀧𑀸𑀦𑀻𑀬𑀁 𑀧𑀸𑀦𑀻𑀬𑀁 𑀧𑀺𑀯𑀢𑀺. 𑀫𑀦𑀼𑀲𑁆𑀲𑁂𑀳𑁂𑀯 𑀢𑀁 𑀧𑀻𑀬𑀢𑁂, 𑀦 𑀲𑀬𑀁. 𑀏𑀯𑀁 𑀧𑀭𑀲𑁆𑀲 𑀧𑀸𑀦𑀓𑁆𑀭𑀺𑀬𑀁 𑀧𑀝𑀺𑀘𑁆𑀘 𑀓𑀫𑁆𑀫𑀪𑀽𑀢𑀫𑁆𑀧𑀺 𑀢𑀁 𑀲𑀼𑀓𑀭𑀧𑀸𑀦𑀓𑁆𑀭𑀺𑀬𑀸𑀯𑀲𑁂𑀦 𑀲𑀼𑀓𑀭𑀢𑁆𑀢𑀸 𑀅𑀢𑁆𑀢𑀦𑀸𑀯 𑀲𑀺𑀚𑁆𑀛𑀦𑁆𑀢𑀁 𑀯𑀺𑀬 𑀳𑁄𑀢𑀻𑀢𑀺 ‘‘𑀲𑀬𑀫𑁂𑀯 𑀧𑀻𑀬𑀢𑁂 𑀧𑀸𑀦𑀻𑀬’’𑀦𑁆𑀢𑀺 𑀭𑀽𑀴𑁆𑀳𑀺𑀬𑀸 𑀧𑀬𑁄𑀕𑁄 𑀓𑀢𑁄.

‘‘𑀲𑀬𑀫𑁂𑀯 𑀓𑀝𑁄 𑀓𑀭𑀺𑀬𑀢𑁂’’𑀢𑀺 𑀏𑀢𑁆𑀣𑀸𑀧𑀺 𑀓𑀝𑀁 𑀫𑀦𑀼𑀲𑁆𑀲𑀸 𑀓𑀭𑁄𑀦𑁆𑀢𑀺, 𑀦 𑀓𑀝𑀁 𑀓𑀝𑁄 𑀓𑀭𑁄𑀢𑀺. 𑀫𑀦𑀼𑀲𑁆𑀲𑁂𑀳𑁂𑀯 𑀓𑀝𑁄 𑀓𑀭𑀺𑀬𑀢𑁂, 𑀦 𑀲𑀬𑀁. 𑀏𑀯𑀁 𑀧𑀭𑀲𑁆𑀲 𑀓𑀭𑀡𑀓𑁆𑀭𑀺𑀬𑀁 𑀧𑀝𑀺𑀘𑁆𑀘 𑀓𑀫𑁆𑀫𑀪𑀽𑀢𑁄𑀧𑀺 𑀲𑁄 𑀲𑀼𑀓𑀭𑀡 𑀓𑁆𑀭𑀺𑀬𑀸𑀯𑀲𑁂𑀦 𑀲𑀼𑀓𑀭𑀢𑁆𑀢𑀸 𑀅𑀢𑁆𑀢𑀦𑀸𑀯 𑀲𑀺𑀚𑁆𑀛𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 ‘‘𑀲𑀬𑀫𑁂𑀯 𑀓𑀝𑁄 𑀓𑀭𑀺𑀬𑀢𑁂’’𑀢𑀺 𑀭𑀽𑀴𑁆𑀳𑀺𑀬𑀸 𑀧𑀬𑁄𑀕𑁄 𑀓𑀢𑁄.

𑀏𑀢𑁆𑀣 𑀬𑀣𑀸 𑀲𑀬𑀁𑀲𑀤𑁆𑀤𑁄 𑀧𑀸𑀦𑀻𑀬𑀁 𑀧𑀸𑀦𑀻𑀬𑁂𑀦𑁂𑀯 𑀧𑀻𑀬𑀢𑁂, 𑀦 𑀅𑀫𑁆𑀳𑁂𑀳𑀺. 𑀓𑀝𑁄 𑀓𑀝𑁂𑀦𑁂𑀯 𑀓𑀭𑀺𑀬𑀢𑁂, 𑀦 𑀅𑀫𑁆𑀳𑁂𑀳𑀻𑀢𑀺 𑀲𑀓𑀫𑁆𑀫𑀓𑀯𑀺𑀲𑀬𑀢𑁆𑀢𑀸 𑀧𑀬𑁄𑀕𑀸𑀦𑀁 𑀅𑀜𑁆𑀜𑀲𑁆𑀲 𑀓𑁆𑀭𑀺𑀬𑀸𑀧𑀝𑀺𑀲𑁂𑀥𑀦𑀲𑀗𑁆𑀔𑀸𑀢𑀁 𑀅𑀢𑁆𑀣𑀯𑀺𑀲𑁂𑀲𑀁 𑀯𑀤𑀢𑀺, 𑀦 𑀢𑀣𑀸 ‘‘𑀤𑁂𑀯𑀤𑀢𑁆𑀢𑁄 𑀦𑀺𑀭𑀬𑁂 𑀧𑀘𑁆𑀘𑀢𑀺, 𑀓𑀫𑁆𑀫𑀁 𑀧𑀘𑁆𑀘𑀢𑀻’’𑀢𑀺𑀆𑀤𑀻𑀲𑀼 𑀢𑀼𑀫𑁆𑀳𑁂𑀳𑀺 𑀅𑀚𑁆𑀛𑀸𑀳𑀭𑀺𑀢𑁄 𑀲𑀬𑀁𑀲𑀤𑁆𑀤𑁄 𑀅𑀢𑁆𑀣𑀯𑀺𑀲𑁂𑀲𑀁 𑀯𑀤𑀢𑀺 𑀅𑀓𑀫𑁆𑀫𑀓𑀯𑀺𑀲𑀬𑀢𑁆𑀢𑀸 𑀏𑀢𑁂𑀲𑀁 𑀧𑀬𑁄𑀕𑀸𑀦𑀁. 𑀏𑀯𑀁 ¶ ‘‘𑀤𑁂𑀯𑀤𑀢𑁆𑀢𑁄’’𑀢𑀺𑀆𑀤𑀺𑀓𑀲𑁆𑀲 𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲 𑀅𑀓𑀫𑁆𑀫𑀓𑀓𑀢𑁆𑀢𑀼𑀯𑀸𑀘𑀓𑀢𑁆𑀢𑀸 𑀓𑀫𑁆𑀫𑀭𑀳𑀺𑀢𑀲𑀼𑀤𑁆𑀥𑀓𑀢𑁆𑀢𑀼𑀯𑀸𑀘𑀓𑀢𑁆𑀢𑀸 𑀘 ‘‘𑀧𑀘𑁆𑀘𑀢𑀻’’𑀢𑀺 𑀇𑀤𑀁 𑀤𑀺𑀯𑀸𑀤𑀺𑀕𑀡𑀺𑀓𑀭𑀽𑀧𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀘𑀥𑀸𑀢𑀼 𑀲𑀤𑁆𑀤𑀲𑀢𑁆𑀣𑁂 𑀤𑀺𑀯𑀸𑀤𑀺𑀕𑀡 𑀯𑀼𑀢𑁆𑀢𑁄 𑀦𑀢𑁆𑀣𑀻𑀢𑀺 𑀘𑁂? 𑀦𑀢𑁆𑀣𑀺 𑀯𑀸 𑀅𑀢𑁆𑀣𑀺 𑀯𑀸, 𑀓𑀺𑀫𑁂𑀢𑁆𑀣 𑀲𑀤𑁆𑀤𑀲𑀢𑁆𑀣𑀁 𑀓𑀭𑀺𑀲𑁆𑀲𑀢𑀺, 𑀧𑀸𑀴𑀺 𑀏𑀯 𑀧𑀫𑀸𑀡𑀁, 𑀢𑀲𑁆𑀫𑀸 𑀫𑀬𑀁 𑀮𑁄𑀓𑀯𑁄𑀳𑀸𑀭𑀓𑀼𑀲𑀮𑀲𑁆𑀲 𑀪𑀕𑀯𑀢𑁄 𑀧𑀸𑀴𑀺𑀦𑀬𑀜𑁆𑀜𑁂𑀯 𑀕𑀳𑁂𑀢𑁆𑀯𑀸 𑀇𑀫𑀁 𑀧𑀘𑀥𑀸𑀢𑀼𑀁 𑀤𑀺𑀯𑀸𑀤𑀺𑀕𑀡𑁂𑀧𑀺 𑀧𑀓𑁆𑀔𑀺𑀧𑀺𑀲𑁆𑀲𑀸𑀫. 𑀢𑀣𑀸 𑀳𑀺 𑀥𑀫𑁆𑀫𑀧𑀸𑀮𑀸𑀘𑀭𑀺𑀬 𑀅𑀦𑀼𑀭𑀼𑀤𑁆𑀥𑀸𑀘𑀭𑀺𑀬𑀸𑀤𑀻𑀳𑀺 𑀅𑀪𑀺𑀲𑀗𑁆𑀔𑀢𑀸 𑀤𑀺𑀯𑀸𑀤𑀺𑀕𑀡𑀺𑀓𑀧𑁆𑀧𑀬𑁄𑀕𑀸 𑀤𑀺𑀲𑁆𑀲𑀦𑁆𑀢𑀺 𑁋-

𑀜𑀸𑀡𑀬𑀼𑀢𑁆𑀢𑀯𑀭𑀁 𑀢𑀢𑁆𑀣, 𑀤𑀢𑁆𑀯𑀸 𑀲𑀦𑁆𑀥𑀺𑀁 𑀢𑀺𑀳𑁂𑀢𑀼𑀓𑀁;

𑀧𑀘𑁆𑀙𑀸 𑀧𑀘𑁆𑀘𑀢𑀺 𑀧𑀸𑀓𑀸𑀦𑀁, 𑀧𑀯𑀢𑁆𑀢𑁂 𑀅𑀝𑁆𑀞𑀓𑁂 𑀤𑀼𑀯𑁂.

𑀅𑀲𑀗𑁆𑀔𑀸𑀭𑀁 𑀲𑀲𑀗𑁆𑀔𑀸𑀭-𑀯𑀺𑀧𑀸𑀓𑀸𑀦𑀺 𑀘 𑀧𑀘𑁆𑀘𑀢𑀺

𑀇𑀘𑁆𑀘𑁂𑀯𑀫𑀸𑀤𑀬𑁄. 𑀏𑀢𑁆𑀣 𑀧𑀦 𑀢𑁂𑀲𑀁 𑀇𑀤𑀫𑁂𑀯 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀺. 𑀬𑁂 𑀘𑀼𑀭𑀸𑀤𑀺𑀕𑀡𑀫𑁆𑀳𑀺 𑀲𑀓𑀫𑁆𑀫𑀓𑀪𑀸𑀯𑁂𑀦 𑀪𑀽𑀯𑀸𑀤𑀺𑀕𑀡𑁂 𑀘 𑀅𑀓𑀫𑁆𑀫𑀓𑀪𑀸𑀯𑁂𑀦 𑀧𑀯𑀢𑁆𑀢𑀲𑁆𑀲 𑀪𑀽𑀥𑀸𑀢𑀼𑀲𑁆𑀲𑁂𑀯 𑀪𑀽𑀯𑀸𑀤𑀺𑀕𑀡𑁂 𑀧𑀯𑀢𑁆𑀢𑀲𑁆𑀲 𑀲𑀓𑀫𑀓𑀲𑁆𑀲𑀧𑀺 𑀲𑀢𑁄 𑀤𑀺𑀯𑀸𑀤𑀺𑀕𑀡𑀁 𑀧𑀢𑁆𑀯𑀸 𑀅𑀓𑀫𑁆𑀫𑀓𑀪𑀽𑀢𑀲𑁆𑀲 𑀧𑀘𑀥𑀸𑀢𑀼𑀲𑁆𑀲 𑀲𑀓𑀫𑁆𑀫𑀓𑀢𑁆𑀢𑀫𑀺𑀘𑁆𑀙𑀦𑁆𑀢𑀺. 𑀏𑀢𑀜𑁆𑀳𑀺 𑀲𑀸𑀝𑁆𑀞𑀓𑀣𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀓𑀼𑀢𑁄 𑀮𑀩𑁆𑀪𑀸, 𑀢𑀲𑁆𑀫𑀸 𑀪𑀕𑀯𑀢𑁄 𑀧𑀸𑀯𑀘𑀦𑁂 𑀲𑁄𑀢𑀽𑀦𑀁 𑀲𑀁𑀲𑀬𑀲𑀫𑀼𑀕𑁆𑀖𑀸𑀝𑀢𑁆𑀣𑀁 𑀏𑀢𑁆𑀣 𑀇𑀫𑀁 𑀦𑀻𑀢𑀺𑀁 𑀧𑀝𑁆𑀞𑀧𑁂𑀫 𑁋

𑀯𑀺𑀦𑀸𑀧𑀺 𑀉𑀧𑀲𑀕𑁆𑀕𑁂𑀦, 𑀕𑀡𑀦𑀸𑀦𑀢𑁆𑀢𑀬𑁄𑀕𑀢𑁄;

𑀲𑀓𑀫𑁆𑀫𑀸𑀓𑀫𑁆𑀫𑀓𑀸 𑀳𑁄𑀦𑁆𑀢𑀺, 𑀥𑀸𑀢𑀽 𑀧𑀘𑀪𑀺𑀤𑀸𑀤𑀬𑁄.

𑀧𑀼𑀭𑀺𑀲𑁄 𑀑𑀤𑀦𑀁 𑀧𑀘𑀢𑀺. 𑀲 𑀪𑀽𑀢𑀧𑀘𑀦𑀺𑀁 𑀧𑀘𑀺. 𑀑𑀤𑀦𑁄 𑀧𑀘𑁆𑀘𑀢𑀺. 𑀓𑀫𑁆𑀫𑀁 𑀧𑀘𑁆𑀘𑀢𑀺. 𑀯𑀻𑀳𑀺𑀲𑀻𑀲𑀁 𑀧𑀘𑁆𑀘𑀢𑀺. 𑀭𑀼𑀓𑁆𑀔𑀨𑀮𑀸𑀦𑀺 𑀧𑀘𑁆𑀘𑀦𑁆𑀢𑀺. 𑀦𑀸𑀕𑁄 𑀧𑀸𑀓𑀸𑀭𑀁 𑀪𑀺𑀦𑁆𑀤𑀢𑀺. 𑀢𑀴𑀸𑀓𑀧𑀸𑀴𑀺 𑀪𑀺𑀚𑁆𑀚𑀢𑀺. 𑀪𑀺𑀚𑁆𑀚𑀦𑀥𑀫𑁆𑀫𑀁 𑀪𑀺𑀚𑁆𑀚𑀢𑀺. 𑀏𑀢𑁆𑀣 𑀘 𑀲𑀬𑀁𑀲𑀤𑁆𑀤𑀁 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 ‘‘𑀲𑀬𑀫𑁂𑀯 𑀑𑀤𑀦𑁄 𑀧𑀘𑁆𑀘𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀧𑀺 ‘‘𑀧𑀼𑀭𑀺𑀲𑁄 𑀲𑀬𑀫𑁂𑀯 𑀧𑀸𑀡𑀁 𑀳𑀦𑀢𑀺. 𑀪𑀕𑀯𑀸 𑀲𑀬𑀫𑁂𑀯 ¶ 𑀜𑁂𑀬𑁆𑀬𑀥𑀫𑁆𑀫𑀁 𑀅𑀩𑀼𑀚𑁆𑀛𑀻’’𑀢𑀺 𑀧𑀬𑁄𑀕𑁂𑀲𑀼 𑀧𑀭𑀲𑁆𑀲 𑀆𑀡𑀢𑁆𑀢𑀺𑀲𑀫𑁆𑀪𑀽𑀢𑀳𑀦𑀦𑀓𑁆𑀭𑀺𑀬𑀸𑀧𑀝𑀺𑀲𑁂𑀥𑀫𑀺𑀯 𑀧𑀭𑁄𑀧𑀤𑁂𑀲𑀲𑀫𑁆𑀪𑀽𑀢𑀩𑀼𑀚𑁆𑀛𑀦𑀓𑁆𑀭𑀺𑀬𑀸𑀧𑀝𑀺𑀲𑁂𑀥𑀦𑀫𑀺𑀯 𑀘 𑀅𑀜𑁆𑀜𑀲𑁆𑀲 𑀓𑁆𑀭𑀺𑀬𑀸𑀧𑀝𑀺𑀲𑁂𑀥𑀦𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀬𑁄 𑀲𑀬𑀁𑀲𑀤𑁆𑀤𑀯𑀲𑁂𑀦 𑀓𑀫𑁆𑀫𑀓𑀢𑁆𑀢𑀼𑀪𑀸𑀯𑀧𑀭𑀺𑀓𑀧𑁆𑀧𑁄, 𑀢𑀁 𑀦 𑀧𑀫𑀸𑀡𑀁. 𑀲𑀬𑀁𑀲𑀤𑁆𑀤𑁄 𑀳𑀺 𑀲𑀼𑀤𑁆𑀥𑀓𑀢𑁆𑀢𑀼𑀅𑀢𑁆𑀣𑁂𑀧𑀺 𑀤𑀺𑀲𑁆𑀲𑀢𑀺, 𑀦 𑀓𑁂𑀯𑀮𑀁 ‘‘𑀲𑀬𑀫𑁂𑀯 𑀧𑀻𑀬𑀢𑁂 𑀧𑀸𑀦𑀻𑀬’’𑀦𑁆𑀢𑀺𑀆𑀤𑀻𑀲𑀼 𑀓𑀫𑁆𑀫𑀢𑁆𑀣𑁂𑀬𑁂𑀯, 𑀢𑀲𑁆𑀫𑀸 𑀲𑀸𑀲𑀦𑀸𑀦𑀼𑀭𑀽𑀧𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 𑀦𑀬𑀜𑁆𑀜𑀽𑀳𑀺.

𑀯𑀺𑀦𑀸𑀧𑀺 𑀉𑀧𑀲𑀕𑁆𑀕𑁂𑀦, 𑀯𑀺𑀦𑀸𑀧𑀺 𑀘 𑀕𑀡𑀦𑁆𑀢𑀭𑀁;

𑀲𑀓𑀫𑁆𑀫𑀸𑀓𑀫𑁆𑀫𑀓𑀸 𑀳𑁄𑀦𑁆𑀢𑀺, 𑀅𑀢𑁆𑀣𑀢𑁄 𑀤𑀺𑀯𑀼𑀆𑀤𑀬𑁄.

𑀓𑀸𑀫𑀕𑀼𑀡𑁂𑀳𑀺 𑀤𑀺𑀩𑁆𑀩𑀢𑀺. 𑀧𑀘𑁆𑀘𑀸𑀫𑀺𑀢𑁆𑀢𑁂 𑀤𑀺𑀩𑁆𑀩𑀢𑀺. 𑀅𑀜𑁆𑀜𑀸𑀦𑀺𑀧𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀕𑀡𑀦𑁆𑀢𑀭𑀜𑁆𑀘𑁄𑀧𑀲𑀕𑁆𑀕𑀁, 𑀯𑀺𑀦𑀸𑀧𑀺 𑀅𑀢𑁆𑀣𑀦𑀸𑀦𑀢𑀁;

𑀧𑀬𑁄𑀕𑀢𑁄 𑀲𑀓𑀫𑁆𑀫𑀸 𑀘, 𑀅𑀓𑀫𑁆𑀫𑀸 𑀘 𑀕𑀫𑀸𑀤𑀬𑁄.

𑀧𑀼𑀭𑀺𑀲𑁄 𑀫𑀕𑁆𑀕𑀁 𑀕𑀘𑁆𑀙𑀢𑀺. 𑀕𑀫𑁆𑀪𑀻𑀭𑁂𑀲𑀼𑀧𑀺 𑀅𑀢𑁆𑀣𑁂𑀲𑀼 𑀜𑀸𑀡𑀁 𑀕𑀘𑁆𑀙𑀢𑀺. 𑀥𑀫𑁆𑀫𑀁 𑀘𑀭𑀢𑀺. 𑀢𑀢𑁆𑀣 𑀢𑀢𑁆𑀣 𑀘𑀭𑀢𑀺.

𑀕𑀡𑀦𑁆𑀢𑀭𑀜𑁆𑀘𑁄𑀧𑀲𑀕𑁆𑀕𑀁, 𑀧𑀬𑁄𑀕𑀜𑁆𑀘𑀢𑁆𑀣𑀦𑀸𑀦𑀢𑀁;

𑀯𑀺𑀦𑀸𑀧𑀺 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺, 𑀤𑀺𑀲𑀸𑀤𑀻 𑀭𑀽𑀧𑀪𑁂𑀤𑀢𑁄.

𑀧𑀸𑀲𑀸𑀤𑀁 𑀧𑀲𑁆𑀲𑀢𑀺, 𑀧𑀸𑀲𑀸𑀤𑀁 𑀤𑀓𑁆𑀔𑀢𑀺 𑀧𑀸𑀲𑀸𑀤𑁄 𑀤𑀺𑀲𑁆𑀲𑀢𑀺. 𑀅𑀜𑁆𑀜𑀸𑀦𑀺𑀧𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀲𑀪𑀸𑀯𑀢𑁄 𑀲𑀓𑀫𑁆𑀫𑀸 𑀢𑀼, 𑀭𑀼𑀤𑀥𑀸𑀢𑀸𑀤𑀬𑁄 𑀫𑀢𑀸;

𑀲𑀪𑀸𑀯𑀢𑁄 𑀅𑀓𑀫𑁆𑀫𑀸 𑀘, 𑀦𑀦𑁆𑀤𑀥𑀸𑀢𑀸𑀤𑀬𑁄 𑀫𑀢𑀸.

𑀫𑀢𑀁 𑀯𑀸 𑀅𑀫𑁆𑀫 𑀭𑁄𑀤𑀦𑁆𑀢𑀺, 𑀇𑀥 𑀦𑀦𑁆𑀤𑀢𑀺 𑀧𑁂𑀘𑁆𑀘 𑀦𑀦𑁆𑀤𑀢𑀺.

𑀉𑀧𑀲𑀕𑁆𑀕𑀯𑀲𑁂𑀦𑁂𑀓𑁂, 𑀲𑀓𑀫𑁆𑀫𑀸𑀧𑀺 𑀅𑀓𑀫𑁆𑀫𑀓𑀸;

𑀲𑀫𑁆𑀪𑀯𑀦𑁆𑀢𑀺 𑀢𑀣𑁂𑀓𑀘𑁆𑀘𑁂, 𑀅𑀓𑀫𑁆𑀫𑀸𑀧𑀺 𑀲𑀓𑀫𑁆𑀫𑀓𑀸.

𑀏𑀓𑀘𑁆𑀘𑁂 ¶ 𑀢𑀼𑀧𑀲𑀕𑁆𑀕𑁂𑀳𑀺, 𑀲𑀓𑀫𑁆𑀫𑀸 𑀘 𑀲𑀓𑀫𑁆𑀫𑀓𑀸;

𑀅𑀓𑀫𑁆𑀫𑀓𑀸 𑀅𑀓𑀫𑁆𑀫𑀸 𑀘, 𑀏𑀲𑀢𑁆𑀣𑁄𑀧𑁂𑀢𑁆𑀣 𑀤𑀻𑀧𑀺𑀢𑁄;

𑀧𑀼𑀭𑀺𑀲𑁄 𑀕𑀸𑀫𑀸 𑀦𑀺𑀕𑁆𑀕𑀘𑁆𑀙𑀢𑀺, 𑀥𑀦𑀁 𑀅𑀥𑀺𑀕𑀘𑁆𑀙𑀢𑀺, 𑀧𑀼𑀭𑀺𑀲𑁄 𑀧𑀸𑀡𑀁 𑀅𑀪𑀺𑀪𑀯𑀢𑀺, 𑀳𑀺𑀫𑀯𑀢𑀸 𑀧𑀪𑀯𑀦𑁆𑀢𑀺 𑀫𑀳𑀸𑀦𑀤𑀺𑀬𑁄. 𑀅𑀜𑁆𑀜𑀸𑀦𑀺𑀧𑀺 𑀧𑀬𑁄𑀕𑀸𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀢𑀢𑁆𑀣 𑀬𑀤𑀺 𑀲𑀸𑀲𑀦𑁂 𑀧𑀘𑀥𑀸𑀢𑀼𑀲𑁆𑀲 𑀓𑀫𑁆𑀫𑀦𑀺 𑀭𑀽𑀧𑀁 𑀲𑀺𑀬𑀸, ‘‘𑀧𑀼𑀭𑀺𑀲𑁂𑀦 𑀓𑀫𑁆𑀫𑀁 𑀓𑀭𑀺𑀬𑀢𑀻’’𑀢𑀺 𑀧𑀬𑁄𑀕𑁄 𑀯𑀺𑀬 ‘‘𑀧𑀼𑀭𑀺𑀲𑁂𑀦 𑀑𑀤𑀦𑁄 𑀧𑀘𑀺𑀬𑀢𑀻’’𑀢𑀺 𑀧𑀬𑁄𑀕𑁄 𑀇𑀘𑁆𑀙𑀺𑀢𑀩𑁆𑀩𑁄. 𑀬𑁂 𑀧𑀦 𑀕𑀭𑀽 ‘‘𑀢𑀬𑀸 𑀧𑀘𑁆𑀘𑀢𑁂 𑀑𑀤𑀦𑁄’’𑀢𑀺𑀆𑀤𑀻𑀦𑀺 𑀇𑀘𑁆𑀙𑀦𑁆𑀢𑀺, 𑀢𑁂 𑀲𑀤𑁆𑀤𑀲𑀢𑁆𑀣𑀦𑀬𑀁 𑀦𑀺𑀲𑁆𑀲𑀸𑀬 𑀯𑀤𑀦𑁆𑀢𑀺 𑀫𑀜𑁆𑀜𑁂. 𑀏𑀯𑀁 𑀲𑀦𑁆𑀢𑁂𑀧𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀬𑀼𑀢𑁆𑀢𑀸𑀦𑀺 𑀘𑁂, 𑀕𑀳𑁂𑀢𑀩𑁆𑀩𑀸𑀦𑀺. 𑀓𑀸𑀭𑀺𑀢𑁂 ‘‘𑀧𑀼𑀭𑀺𑀲𑁄 𑀧𑀼𑀭𑀺𑀲𑁂𑀦 𑀧𑀼𑀭𑀺𑀲𑀁 𑀯𑀸 𑀑𑀤𑀦𑀁 𑀧𑀸𑀘𑁂𑀢𑀺, 𑀧𑀸𑀘𑀬𑀢𑀺, 𑀧𑀸𑀘𑀸𑀧𑁂𑀢𑀺, 𑀧𑀸𑀘𑀸𑀧𑀬𑀢𑀺. 𑀧𑀼𑀭𑀺𑀲𑁂𑀦 𑀧𑀼𑀭𑀺𑀲𑁄 𑀑𑀤𑀦𑀁 𑀧𑀸𑀘𑀺𑀬𑀢𑀺, 𑀧𑀸𑀘𑀬𑀺𑀬𑀢𑀺, 𑀧𑀸𑀘𑀸𑀧𑀺𑀬𑀢𑀺, 𑀧𑀸𑀘𑀸𑀧𑀬𑀺𑀬𑀢𑀻’’𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. ‘‘𑀬𑀣𑀸 𑀤𑀡𑁆𑀟𑁂𑀦 𑀕𑁄𑀧𑀸𑀮𑁄, 𑀕𑀸𑀯𑀁 𑀧𑀸𑀘𑁂𑀢𑀺 𑀕𑁄𑀘𑀭’’𑀦𑁆𑀢𑀺𑀆𑀤𑀻𑀲𑀼 𑀅𑀜𑁆𑀜𑁄𑀧𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀧𑀘𑀁, 𑀧𑀘𑀦𑁆𑀢𑁄, 𑀧𑀘𑀦𑁆𑀢𑀻, 𑀧𑀘𑀫𑀸𑀦𑁄, 𑀧𑀘𑀫𑀸𑀦𑀸. 𑀧𑀸𑀢𑀩𑁆𑀩𑀁, 𑀧𑀘𑀺𑀢𑀁, 𑀧𑀘𑀺𑀢𑀩𑁆𑀩𑀁, 𑀧𑀘𑀦𑀻𑀬𑀁, 𑀧𑀘𑀺𑀢𑀼𑀁, 𑀧𑀘𑀺𑀢𑁆𑀯𑀸. 𑀏𑀢𑁆𑀣 𑀘 ‘‘𑀇𑀫𑀲𑁆𑀲 𑀫𑀁𑀲𑀜𑁆𑀘 𑀧𑀸𑀢𑀩𑁆𑀩’’𑀦𑁆𑀢𑀺 𑀧𑀬𑁄𑀕𑁄 𑀉𑀤𑀸𑀳𑀭𑀡𑀁. ‘‘𑀧𑀘𑀢𑀺, 𑀧𑀘𑀦𑁆𑀢𑀺. 𑀧𑀘𑀲𑀻’’𑀢𑀺𑀆𑀤𑀺 𑀧𑀤𑀓𑁆𑀓𑀫𑁄 𑀲𑀼𑀩𑁄𑀥𑁄.

𑀲𑀺𑀘 𑀖𑀭𑀡𑁂. 𑀲𑁂𑀘𑀢𑀺, 𑀲𑁂𑀓𑁄, ‘‘𑀉𑀪𑀢𑁄𑀪𑀸𑀲𑀸’’𑀢𑀺 𑀯𑀤𑀦𑁆𑀢𑀺.

𑀇𑀫𑀸𑀦𑀺 𑀘𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀙𑀓𑀸𑀭𑀦𑁆𑀢𑀥𑀸𑀢𑀼

𑀧𑀭𑀲𑁆𑀲𑀪𑀸𑀲𑀸𑀤𑀺𑀪𑀸𑀯𑀁, 𑀲𑀩𑁆𑀩𑁂𑀲𑀁 𑀥𑀸𑀢𑀼𑀦𑀁 𑀇𑀢𑁄;

𑀧𑀭𑀁 𑀦 𑀩𑁆𑀬𑀸𑀓𑀭𑀺𑀲𑁆𑀲𑀁 𑀲𑁄, 𑀲𑀸𑀲𑀦𑁂 𑀈𑀭𑀺𑀢𑁄 𑀦 𑀳𑀺.

𑀙𑀼 ¶ 𑀙𑁂𑀤𑀦𑁂. 𑀙𑁄𑀢𑀺. 𑀙𑁄𑀢𑁆𑀯𑀸𑀦 𑀫𑁄𑀴𑀺𑀁 𑀯𑀭𑀕𑀦𑁆𑀥𑀯𑀸𑀲𑀺𑀢𑀁. 𑀅𑀘𑁆𑀙𑁄𑀘𑁆𑀙𑀼𑀁𑀯𑀢 𑀪𑁄 𑀭𑀼𑀓𑁆𑀔𑀁.

𑀫𑀺𑀮𑁂𑀙 𑀅𑀯𑀺𑀬𑀢𑁆𑀢𑀸𑀬𑀁 𑀯𑀸𑀘𑀸𑀬𑀁. 𑀫𑀺𑀮𑁂𑀘𑁆𑀙𑀢𑀺, 𑀫𑀺𑀮𑀓𑁆𑀔𑀼. 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀧𑀘𑁆𑀘𑀸𑀚𑀸𑀢𑁄 𑀳𑁄𑀢𑀺 𑀫𑀺𑀮𑀓𑁆𑀔𑀽𑀲𑀼 𑀅𑀯𑀺𑀜𑁆𑀜𑀸𑀢𑀸𑀭𑁂𑀲𑀼.

𑀯𑀙𑀺 𑀇𑀘𑁆𑀙𑀸𑀬𑀁. 𑀯𑀜𑁆𑀙𑀢𑀺. 𑀯𑀜𑁆𑀙𑀺𑀢𑀁 𑀥𑀦𑀁.

𑀅𑀙𑀺 𑀆𑀬𑀸𑀫𑁂. 𑀅𑀜𑁆𑀘𑀢𑀺. 𑀤𑀻𑀖𑀁 𑀯𑀸 𑀅𑀜𑁆𑀙𑀦𑁆𑀢𑁄 𑀤𑀻𑀖𑀁 𑀅𑀜𑁆𑀙𑀸𑀫𑀻𑀢𑀺 𑀧𑀚𑀸𑀦𑀸𑀢𑀺.

𑀳𑀼𑀘𑁆𑀙 𑀓𑁄𑀝𑀺𑀮𑁆𑀮𑁂. 𑀳𑀼𑀘𑁆𑀙𑀢𑀺.

𑀫𑀼𑀘𑁆𑀙 𑀫𑁄𑀳𑀫𑀼𑀘𑁆𑀙𑀸𑀲𑀼. 𑀫𑀼𑀘𑁆𑀙𑀢𑀺. 𑀫𑀼𑀘𑁆𑀙𑀺𑀢𑁄 𑀯𑀺𑀲𑀯𑁂𑀕𑁂𑀦, 𑀯𑀺𑀲𑀜𑁆𑀜𑀻 𑀲𑀫𑀧𑀚𑁆𑀚𑀣. 𑀫𑀼𑀘𑁆𑀙𑀸, 𑀫𑀼𑀘𑁆𑀙𑀺𑀢𑁆𑀯𑀸.

𑀨𑀼𑀙 𑀯𑀺𑀲𑀭𑀡𑁂 𑀨𑁄𑀙𑀢𑀺.

𑀬𑀼𑀙 𑀧𑀫𑀸𑀤𑁂. 𑀬𑀼𑀘𑁆𑀙𑀢𑀺.

𑀉𑀙𑀺 𑀉𑀜𑁆𑀙𑁂. 𑀉𑀜𑁆𑀙𑁄 𑀧𑀭𑀺𑀬𑁂𑀲𑀦𑀁. 𑀉𑀜𑁆𑀙𑀢𑀺. 𑀉𑀜𑁆𑀙𑀸𑀘𑀭𑀺𑀬𑀸𑀬 𑀈𑀳𑀣.

𑀉𑀙 𑀧𑀺𑀧𑀸𑀲𑀸𑀬𑀁. 𑀉𑀙𑀢𑀺.

𑀧𑀼𑀘𑁆𑀙 𑀧𑀜𑁆𑀳𑁂 𑀧𑀼𑀘𑁆𑀙𑀢𑀺. 𑀧𑀼𑀘𑁆𑀙𑀺𑀢𑀸, 𑀧𑀼𑀘𑁆𑀙𑀓𑁄, 𑀧𑀼𑀝𑁆𑀞𑁄, 𑀧𑀼𑀘𑁆𑀙𑀺𑀢𑁄, 𑀧𑀼𑀘𑁆𑀙𑀸. 𑀪𑀺𑀓𑁆𑀔𑀼 𑀯𑀺𑀦𑀬𑀥𑀭𑀁 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀧𑀼𑀘𑁆𑀙𑀺, 𑀧𑀼𑀘𑁆𑀙𑀺𑀢𑀼𑀁. 𑀧𑀼𑀘𑁆𑀙𑀺𑀢𑁆𑀯𑀸. 𑀏𑀢𑁆𑀣 𑀘 𑀧𑀜𑁆𑀘𑀯𑀺𑀥𑀸 𑀧𑀼𑀘𑁆𑀙𑀸 𑀅𑀤𑀺𑀝𑁆𑀞𑀚𑁄𑀢𑀦𑀸𑀧𑀼𑀘𑁆𑀙𑀸 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸𑀧𑀼𑀘𑁆𑀙𑀸 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀧𑀼𑀘𑁆𑀙𑀸 𑀅𑀦𑀼𑀫𑀢𑀺𑀧𑀼𑀘𑁆𑀙𑀸 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀢𑀺. 𑀢𑀸𑀲𑀁 𑀦𑀸𑀦𑀢𑁆𑀢𑀁 𑀅𑀝𑁆𑀞𑀲𑀸𑀮𑀺𑀦𑀺𑀬𑀸𑀤𑀺𑀢𑁄 𑀕𑀳𑁂𑀢𑀩𑁆𑀩𑀁.

𑀯𑀺𑀘𑁆𑀙 𑀕𑀢𑀺𑀬𑀁. 𑀯𑀺𑀘𑁆𑀙𑀢𑀺. 𑀯𑀺𑀘𑁆𑀙𑀺𑀓𑀸.

𑀯𑀘𑁆𑀙𑀼 ¶ 𑀙𑁂𑀤𑀦𑁂. 𑀯𑀼𑀘𑁆𑀙𑀢𑀺. 𑀯𑀼𑀢𑁆𑀢𑀸, 𑀯𑀼𑀢𑁆𑀢𑀯𑀸, 𑀯𑀼𑀢𑁆𑀢𑀲𑀺𑀭𑁄. 𑀯𑀓𑀸𑀭𑀕𑀢𑀲𑁆𑀲 𑀅𑀓𑀸𑀭𑀲𑁆𑀲 𑀉𑀢𑁆𑀢𑀁.

𑀯𑀼𑀢𑁆𑀢𑀲𑀤𑁆𑀤𑁄 𑀓𑁂𑀲𑁄𑀳𑀭𑀡𑁂𑀧𑀺 𑀤𑀺𑀲𑁆𑀲𑀢𑀺 ‘‘𑀓𑀸𑀧𑀝𑀺𑀓𑁄 𑀫𑀸𑀡𑀯𑁄 𑀤𑀳𑀭𑁄 𑀯𑀼𑀢𑁆𑀢𑀲𑀺𑀭𑁄’’𑀢𑀺𑀆𑀤𑀻𑀲𑀼. 𑀏𑀢𑁆𑀣 𑀘 𑀲𑀺𑀭𑀲𑀤𑁆𑀤𑁂𑀦 𑀲𑀺𑀭𑁄𑀭𑀼𑀳𑀸 𑀯𑀼𑀢𑁆𑀢𑀸 𑀬𑀣𑀸 𑀫𑀜𑁆𑀘𑀲𑀤𑁆𑀤𑁂𑀦 𑀫𑀜𑁆𑀘𑀝𑁆𑀞𑀸, 𑀘𑀓𑁆𑀔𑀼𑀲𑀤𑁆𑀤𑁂𑀦 𑀘 𑀘𑀓𑁆𑀔𑀼𑀦𑀺𑀲𑁆𑀲𑀺𑀢𑀁 𑀯𑀺𑀜𑁆𑀜𑀸𑀡𑀁. 𑀭𑁄𑀧𑀺𑀢𑁂𑀧𑀺 ‘‘𑀬𑀣𑀸 𑀲𑀸𑀭𑀤𑀺𑀓𑀁 𑀩𑀻𑀚𑀁, 𑀔𑁂𑀢𑁆𑀢𑁂 𑀯𑀼𑀢𑁆𑀢𑀁 𑀯𑀺𑀭𑀽𑀳𑀢𑀻’’𑀢𑀺𑀆𑀤𑀻𑀲𑀼. 𑀓𑀣𑀺𑀢𑁂𑀧𑀺 ‘‘𑀯𑀼𑀢𑁆𑀢𑀫𑀺𑀤𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸’’𑀢𑀺𑀆𑀤𑀺𑀲𑀼. 𑀅𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

𑀯𑀘𑁆𑀙𑀼𑀯𑀧𑀯𑀘𑀯𑀲𑀸, 𑀯𑀼𑀢𑁆𑀢𑀲𑀤𑁆𑀤𑁄 𑀧𑀯𑀢𑁆𑀢𑀢𑀺;

𑀓𑁂𑀲𑁄𑀳𑀸𑀭𑁂 𑀭𑁄𑀧𑀺𑀢𑁂 𑀘, 𑀓𑀣𑀺𑀢𑁂 𑀘 𑀬𑀣𑀸𑀓𑁆𑀓𑀫𑀦𑁆𑀢𑀺.

𑀅𑀧𑀭𑁄 𑀦𑀬𑁄 𑁋 𑀯𑀼𑀢𑁆𑀢𑀲𑀤𑁆𑀤𑁄 ‘‘𑀦𑁄 𑀘 𑀔𑁄 𑀧𑀝𑀺𑀯𑀼𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 𑀯𑀸𑀧𑀲𑀫𑀻𑀓𑀭𑀡𑁂 𑀤𑀺𑀲𑁆𑀲𑀢𑀺. ‘‘𑀧𑀦𑁆𑀦𑀮𑁄𑀫𑁄 𑀧𑀭𑀤𑀢𑁆𑀢𑀯𑀼𑀢𑁆𑀢𑁄’’𑀢𑀺𑀆𑀤𑀻𑀲𑀼 𑀚𑀻𑀯𑀺𑀢𑀯𑀼𑀢𑁆𑀢𑀺𑀬𑀁. ‘‘𑀧𑀡𑁆𑀟𑀼𑀧𑀮𑀸𑀲𑁄 𑀩𑀦𑁆𑀥𑀦𑀸 𑀧𑀯𑀼𑀢𑁆𑀢𑁄’’𑀢𑀺𑀆𑀤𑀻𑀲𑀼 𑀅𑀧𑀕𑀫𑁂. ‘‘𑀕𑀻𑀢𑀁 𑀧𑀯𑀼𑀢𑁆𑀢𑀁 𑀲𑀫𑀻𑀳𑀺𑀢’’𑀦𑁆𑀢𑀺𑀆𑀤𑀻𑀲𑀼 𑀧𑀸𑀯𑀘𑀦𑀯𑀲𑁂𑀦 𑀧𑀯𑀢𑁆𑀢𑀺𑀢𑁂. 𑀮𑁄𑀓𑁂 𑀧𑀦 ‘‘𑀯𑀼𑀢𑁆𑀢𑁄 𑀧𑀸𑀭𑀸𑀬𑀦𑁄’’𑀢𑀺𑀆𑀤𑀻𑀲𑀼 𑀅𑀚𑁆𑀛𑁂𑀦𑁂 𑀤𑀺𑀲𑁆𑀲𑀢𑀺, 𑀅𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺

‘‘𑀯𑀸𑀧𑀲𑀫𑀻𑀓𑀭𑀡𑁂 𑀘, 𑀅𑀣𑁄 𑀚𑀻𑀯𑀺𑀢𑀯𑀼𑀢𑁆𑀢𑀺𑀬𑀁;

𑀅𑀧𑀕𑀫𑁂 𑀧𑀸𑀯𑀘𑀦-𑀯𑀲𑁂𑀦 𑀘 𑀧𑀯𑀢𑁆𑀢𑀺𑀢𑁂;

𑀅𑀚𑁆𑀛𑁂𑀦𑁂 𑀘𑁂𑀯𑀫𑁂𑀢𑁂𑀲𑀼, 𑀯𑀼𑀢𑁆𑀢𑀲𑀤𑁆𑀤𑁄 𑀧𑀤𑀺𑀲𑁆𑀲𑀢𑀻’’𑀢𑀺.

𑀅𑀧𑀭𑁄𑀧𑀺 𑀦𑀬𑁄 𑁋 𑀯𑀼𑀢𑁆𑀢𑀲𑀤𑁆𑀤𑁄 𑀲𑀉𑀧𑀲𑀕𑁆𑀕𑁄𑀘 𑀅𑀦𑀼𑀧𑀲𑀕𑁆𑀕𑁄 𑀘 𑀯𑀧𑀦𑁂 𑀯𑀸𑀧𑀲𑀫𑀻𑀓𑀭𑀡𑁂 𑀓𑁂𑀲𑁄𑀳𑀸𑀭𑁂 𑀚𑀻𑀯𑀺𑀢𑀯𑀼𑀢𑁆𑀢𑀺𑀬𑀁 𑀧𑀫𑀼𑀢𑁆𑀢𑀪𑀸𑀯𑁂 ¶ 𑀧𑀸𑀯𑀘𑀦𑀯𑀲𑁂𑀦 𑀧𑀯𑀢𑁆𑀢𑀺𑀢𑁂 𑀅𑀚𑁆𑀛𑁂𑀦𑁂 𑀓𑀣𑀦𑁂𑀢𑀺 𑀏𑀯𑀫𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑁂𑀲 𑁋

‘‘𑀕𑀸𑀯𑁄 𑀢𑀲𑁆𑀲 𑀧𑀚𑀸𑀬𑀦𑁆𑀢𑀺, 𑀔𑁂𑀢𑁆𑀢𑁂 𑀯𑀼𑀢𑁆𑀢𑀁 𑀯𑀺𑀭𑀽𑀳𑀢𑀺;

𑀯𑀼𑀢𑁆𑀢𑀸𑀦𑀁 𑀨𑀮𑀫𑀲𑁆𑀦𑀸𑀢𑀺, 𑀬𑁄 𑀫𑀺𑀢𑁆𑀢𑀸𑀦𑀁 𑀦 𑀤𑀼𑀩𑁆𑀪𑀢𑀻’’𑀢𑀺

𑀆𑀤𑀻𑀲𑀼 𑀯𑀧𑀦𑁂 𑀆𑀕𑀢𑁄. ‘‘𑀦𑁄 𑀘 𑀔𑁄 𑀧𑀝𑀺𑀯𑀼𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 𑀅𑀝𑁆𑀞𑀤𑀦𑁆𑀢𑀓𑀸𑀤𑀻𑀳𑀺 𑀯𑀸𑀧𑀲𑀫𑀻𑀓𑀭𑀡𑁂. ‘‘𑀓𑀸𑀧𑀝𑀺𑀓𑁄 𑀫𑀸𑀡𑀯𑁄 𑀤𑀳𑀭𑁄 𑀯𑀼𑀢𑁆𑀢𑀲𑀺𑀭𑁄’’𑀢𑀺𑀆𑀤𑀻𑀲𑀼 𑀓𑁂𑀲𑁄𑀳𑀭𑀡𑁂. ‘‘𑀧𑀦𑁆𑀦𑀮𑁄𑀫𑁄 𑀧𑀭𑀤𑀢𑁆𑀢𑀯𑀼𑀢𑁆𑀢𑁄 𑀫𑀺𑀕𑀪𑀽𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 𑀚𑀻𑀯𑀺𑀢𑀯𑀼𑀢𑁆𑀢𑀺𑀬𑀁. ‘‘𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀡𑁆𑀟𑀼𑀧𑀮𑀸𑀲𑁄 𑀩𑀦𑁆𑀥𑀦𑀸 𑀧𑀯𑀼𑀢𑁆𑀢𑁄 𑀅𑀪𑀩𑁆𑀩𑁄 𑀳𑀭𑀺𑀢𑀢𑁆𑀣𑀸𑀬𑀸’’𑀢𑀺𑀆𑀤𑀻𑀲𑀼 𑀩𑀦𑁆𑀥𑀦𑀢𑁄 𑀧𑀫𑀼𑀢𑁆𑀢𑀪𑀸𑀯𑁂. ‘‘𑀬𑁂𑀲𑀫𑀺𑀤𑀁 𑀏𑀢𑀭𑀳𑀺 𑀧𑁄𑀭𑀸𑀡𑀁 𑀫𑀦𑁆𑀢𑀧𑀤𑀁 𑀕𑀻𑀢𑀁 𑀧𑀯𑀼𑀢𑁆𑀢𑀁 𑀲𑀫𑀻𑀳𑀺𑀢’’𑀦𑁆𑀢𑀺𑀆𑀤𑀻𑀲𑀼 𑀧𑀸𑀯𑀘𑀦𑀪𑀸𑀯𑁂𑀦 𑀧𑀯𑀢𑁆𑀢𑀺𑀢𑁂. 𑀮𑁄𑀓𑁂 𑀧𑀦 ‘‘𑀯𑀼𑀢𑁆𑀢𑁄 𑀕𑀡𑁄, 𑀯𑀼𑀢𑁆𑀢𑁄 𑀧𑀸𑀭𑀸𑀬𑀦𑁄’’𑀢𑀺𑀆𑀤𑀻𑀲𑀼 𑀅𑀚𑁆𑀛𑁂𑀦𑁂. ‘‘𑀯𑀼𑀢𑁆𑀢𑀁 𑀔𑁄 𑀧𑀦𑁂𑀢𑀁 𑀪𑀕𑀯𑀢𑀸, 𑀥𑀫𑁆𑀫𑀤𑀸𑀬𑀸𑀤𑀸 𑀫𑁂 𑀪𑀺𑀓𑁆𑀔𑀯𑁂 𑀪𑀯𑀣, 𑀫𑀸 𑀆𑀫𑀺𑀲𑀤𑀸𑀬𑀸𑀤𑀸’’𑀢𑀺𑀆𑀤𑀻𑀲𑀼 𑀓𑀣𑀦𑁂. 𑀅𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

𑀯𑀧 𑀯𑀢𑀼 𑀯𑀘𑁆𑀙𑀼𑀯𑀘-𑀥𑀸𑀢𑀽𑀦𑀁 𑀯𑀲𑀢𑁄 𑀫𑀢𑁄;

𑀲𑁄𑀧𑀲𑀕𑁆𑀕𑁄 𑀦𑁄𑀧𑀲𑀕𑁆𑀕𑁄, 𑀯𑀼𑀢𑁆𑀢𑀲𑀤𑁆𑀤𑁄 𑀬𑀣𑀸𑀭𑀳𑀁.

𑀯𑀧𑀦𑁂 𑀘 𑀯𑀸𑀧𑀲𑀫𑀻-𑀓𑀭𑀡𑁂 𑀫𑀼𑀡𑁆𑀟𑀢𑀸𑀬 𑀘;

𑀚𑀻𑀯𑀯𑀼𑀢𑁆𑀬𑀁 𑀧𑀫𑀼𑀢𑁆𑀢𑀢𑁆𑀣𑁂, 𑀯𑀲𑀸 𑀧𑀸𑀯𑀘𑀦𑀲𑁆𑀲 𑀢𑀼;

𑀧𑀯𑀢𑁆𑀢𑀺𑀢𑁂 𑀘 𑀅𑀚𑁆𑀛𑁂𑀦𑁂, 𑀓𑀣𑀦𑁂 𑀘𑀸𑀢𑀺 𑀮𑀓𑁆𑀔𑀬𑁂;

𑀢𑀘𑁆𑀙 𑀢𑀦𑀼𑀓𑀭𑀡𑁂. 𑀢𑀘𑁆𑀙𑀢𑀺. 𑀢𑀘𑁆𑀙𑀓𑁄 𑀤𑀸𑀭𑀼𑀁.

𑀙𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀚𑀓𑀸𑀭𑀦𑁆𑀢𑀥𑀸𑀢𑀼

𑀚𑀺𑀚𑀬𑁂. 𑀚𑁂𑀢𑀺. 𑀚𑀬𑀢𑀺, 𑀧𑀭𑀸𑀚𑀬𑀢𑀺. 𑀥𑀫𑁆𑀫𑀁 𑀘𑀭𑀦𑁆𑀢𑁄 𑀲𑀸𑀫𑀺𑀓𑀁 𑀧𑀭𑀸𑀚𑁂𑀢𑀺. 𑀥𑀫𑁆𑀫𑀁 𑀘𑀭𑀦𑁆𑀢𑁄 𑀧𑀭𑀚𑁆𑀚𑀢𑀺. 𑀭𑀸𑀚𑀸𑀦𑀁 𑀚𑀬𑀸𑀧𑁂𑀲𑀼𑀁. 𑀚𑀬𑀸𑀧𑁂𑀢𑁆𑀯𑀸. 𑀏𑀢𑁆𑀣 𑀚𑀬𑀸𑀧𑁂𑀲𑀼𑀦𑁆𑀢𑀺 ‘‘𑀚𑀬𑀢𑀼 𑀪𑀯’’𑀦𑁆𑀢𑀺 𑀆𑀲𑀻𑀲𑀯𑀘𑀦𑀁 𑀯𑀤𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀚𑀬𑀦𑀁, 𑀚𑀺𑀢𑀁, 𑀚𑀬𑁄, 𑀯𑀺𑀚𑀺𑀢𑀁, 𑀚𑀺𑀦𑁄, 𑀚𑁂𑀢𑀸, 𑀚𑁂𑀢𑁄, 𑀚𑀺𑀢𑁄 𑀫𑀸𑀭𑁄, 𑀫𑀸𑀭𑀁 𑀚𑀺𑀢𑁄, 𑀚𑀺𑀢𑀯𑀸, 𑀚𑀺𑀢𑀸𑀯𑀻, 𑀯𑀺𑀚𑀺𑀢𑀸𑀯𑀻, 𑀫𑀸𑀭𑀚𑀺, 𑀮𑁄𑀓𑀚𑀺, 𑀑𑀥𑀺𑀚𑀺𑀦𑁄, 𑀅𑀦𑁄𑀥𑀺𑀚𑀺𑀦𑁄, 𑀚𑀺𑀢𑁄. 𑀯𑀺𑀚𑀺𑀢𑁄, 𑀚𑁂𑀢𑀼𑀁, 𑀯𑀺𑀚𑁂𑀢𑀼𑀁, 𑀚𑀺𑀢𑁆𑀯𑀸, 𑀯𑀺𑀚𑀺𑀢𑁆𑀯𑀸. 𑀇𑀫𑀲𑁆𑀲 𑀧𑀦 𑀥𑀸𑀢𑀼𑀲𑁆𑀲 𑀓𑀺𑀬𑀸𑀤𑀺𑀕𑀡𑀁 𑀧𑀢𑁆𑀢𑀲𑁆𑀲 ‘‘𑀚𑀺𑀦𑀸𑀢𑀺 𑀚𑀺𑀦𑀺𑀢𑁆𑀯𑀸’’𑀢𑁆𑀬𑀸𑀤𑀻𑀦𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺.

𑀚𑀺 𑀅𑀪𑀺𑀪𑀯𑀦𑁂. 𑀚𑁂𑀢𑀺. 𑀚𑀺𑀦𑁄. 𑀧𑀼𑀩𑁆𑀩𑁂 𑀯𑀺𑀬 𑀭𑀽𑀧𑀸𑀦𑀺. 𑀏𑀢𑁆𑀣 𑀘 ‘‘𑀢𑀼𑀫𑁆𑀳𑁂𑀳𑀺 𑀆𑀦𑀦𑁆𑀤 𑀲𑀧𑁆𑀧𑀼𑀭𑀺𑀲𑁂𑀳𑀺 𑀯𑀺𑀚𑀺𑀢𑀁, 𑀧𑀘𑁆𑀙𑀺𑀫𑀸 𑀚𑀦𑀢𑀸𑀲𑀸𑀮𑀺𑀫𑀁𑀲𑁄𑀤𑀦𑀁 𑀅𑀢𑀺𑀫𑀜𑁆𑀜𑀺𑀲𑁆𑀲𑀢𑀻’’𑀢𑀺 𑀧𑀸𑀴𑀺 𑀅𑀪𑀺𑀪𑀯𑀦𑀢𑁆𑀣𑀲𑀸𑀥𑀓𑀸. 𑀏𑀢𑁆𑀣 𑀳𑀺 𑀯𑀺𑀚𑀺𑀢𑀦𑁆𑀢𑀺 𑀅𑀥𑀺𑀪𑀽𑀢𑀦𑁆𑀢𑀺 𑀅𑀢𑁆𑀣𑁄.

𑀚𑀼 𑀕𑀢𑀺𑀬𑀁. 𑀏𑀢𑁆𑀣 𑀲𑀻𑀖𑀕𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀚𑀯𑀢𑀺. 𑀚𑀯𑀦𑀁, 𑀚𑀯𑁄, 𑀚𑀯𑀁, 𑀚𑀯𑀦𑁆𑀢𑁄, 𑀚𑀯𑀦𑀘𑀺𑀢𑁆𑀢𑀁, 𑀚𑀯𑀦𑀧𑀜𑁆𑀜𑁄, 𑀚𑀯𑀦𑀳𑀁𑀲𑁄. 𑀫𑀦𑁄𑀚𑀯𑀁 𑀕𑀘𑁆𑀙𑀢𑀺 𑀬𑁂𑀦𑀓𑀸𑀫𑀁.

𑀚𑁂𑀔𑀬𑁂. 𑀚𑀻𑀬𑀢𑀺. 𑀏𑀓𑀸𑀭𑀲𑁆𑀲 𑀈𑀬𑀸𑀤𑁂𑀲𑁄. 𑀲𑀸𑀲𑀦𑀸𑀦𑀼𑀭𑀽𑀧𑁂𑀦 ‘‘𑀓𑀺𑀁 𑀫𑀁 𑀥𑀦𑁂𑀦 𑀚𑀻𑀬𑁂𑀣𑀸’’𑀢𑀺 𑀳𑀺 𑀧𑀸𑀴𑀺 𑀤𑀺𑀲𑁆𑀲𑀢𑀺. 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀧𑀦 ‘‘𑀚𑀸𑀬𑀢𑀻’’𑀢𑀺 𑀭𑀽𑀧𑀁 𑀯𑀤𑀦𑁆𑀢𑀺.

𑀲𑀚𑁆𑀚 𑀕𑀢𑀺𑀬𑀁. 𑀲𑀚𑁆𑀚𑀢𑀺.

𑀓𑀼𑀚𑀼 𑀔𑀼𑀚𑀼 𑀣𑁂𑀬𑁆𑀬𑀓𑀭𑀡𑁂. 𑀓𑁄𑀚𑀢𑀺. 𑀔𑁄𑀚𑀢𑀺.

𑀯𑀚 𑀕𑀢𑀺𑀬𑀁. 𑀥𑀚 𑀥𑀚𑀺 𑀘. 𑀯𑀚𑀢𑀺. 𑀅𑀩𑁆𑀩𑀚𑀢𑀺. 𑀫𑀦𑀼𑀲𑁆𑀲𑀢𑁆𑀢𑀜𑁆𑀘 𑀅𑀩𑁆𑀩𑀚𑁂. 𑀯𑀚𑁄, 𑀯𑀚𑀦𑀁, 𑀧𑀯𑀚𑀦𑀁, 𑀧𑀩𑁆𑀩𑀚𑁆𑀚𑀸, 𑀧𑀩𑁆𑀩𑀚𑀺𑀢𑁄, 𑀧𑀩𑁆𑀩𑀸𑀚𑀺𑀢𑁄.

𑀲𑀓𑀸 𑀭𑀝𑁆𑀞𑀸 𑀧𑀩𑁆𑀩𑀸𑀚𑀺𑀢𑁄, 𑀅𑀜𑁆𑀜𑀁 𑀚𑀦𑀧𑀤𑀁 𑀕𑀢𑁄;

𑀫𑀳𑀦𑁆𑀢𑀁 𑀓𑁄𑀝𑁆𑀞𑀁 𑀓𑀬𑀺𑀭𑀸𑀣, 𑀤𑀼𑀭𑀼𑀢𑁆𑀢𑀸𑀦𑀁 𑀦𑀺𑀥𑁂𑀢𑀯𑁂.

𑀥𑀚𑀢𑀺. 𑀥𑀚𑁄. 𑀥𑀜𑁆𑀚𑀢𑀺. 𑀥𑀜𑁆𑀚𑀦𑀁. 𑀏𑀢𑁆𑀣 𑀥𑀚𑁄𑀢𑀺 𑀓𑁂𑀢𑀼. 𑀥𑀜𑁆𑀚𑀦𑀦𑁆𑀢𑀺 𑀕𑀫𑀦𑀁.

𑀅𑀚 𑀔𑁂𑀧𑀦𑁂 𑀘. 𑀕𑀢𑀺𑀅𑀧𑁂𑀓𑁆𑀔𑀓𑁄𑀬𑁂𑀯 𑀘𑀓𑀸𑀭𑁄. 𑀅𑀚𑀢𑀺. 𑀅𑀚𑁄. 𑀏𑀢𑁆𑀣 𑀅𑀚𑁄𑀢𑀺 𑀏𑀴𑀓𑁄. 𑀇𑀫𑀸𑀦𑀺 𑀧𑀦𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀸𑀦𑀺 ‘‘𑀅𑀚𑁄 𑀏𑀴𑀓𑁄 𑀉𑀭𑀩𑁆𑀪𑁄 𑀅𑀯𑀺 𑀫𑁂𑀡𑁆𑀟𑁄’’𑀢𑀺. 𑀢𑀢𑁆𑀣 𑀉𑀭𑀩𑁆𑀪𑁄𑀢𑀺 𑀏𑀴𑀓𑁄, 𑀬𑁄 ‘‘𑀅𑀚𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀅𑀯𑀻𑀢𑀺 𑀭𑀢𑁆𑀢𑀮𑁄𑀫𑁄 𑀏𑀴𑀓𑁄. 𑀫𑁂𑀡𑁆𑀟𑁄𑀢𑀺 𑀓𑀼𑀝𑀺𑀮𑀲𑀺𑀗𑁆𑀕𑁄 𑀏𑀴𑀓𑁄. 𑀢𑀣𑀸 𑀳𑀺 𑀚𑀦𑀓𑀚𑀸𑀢𑀓𑁂 𑀅𑀚𑀭𑀣𑀢𑁄 𑀫𑁂𑀡𑁆𑀟𑀭𑀣𑀸 𑀯𑀺𑀲𑀼𑀁 𑀯𑀼𑀢𑁆𑀢𑀸. 𑀅𑀧𑀺𑀘 𑀅𑀚𑁂𑀴𑀓𑀦𑁆𑀢𑀺 𑀅𑀚𑀢𑁄 𑀏𑀴𑀓𑀲𑁆𑀲 𑀯𑀺𑀲𑀼𑀁 𑀯𑀘𑀦𑀢𑁄 𑀏𑀴𑀓𑀲𑀤𑁆𑀤𑁂𑀦 𑀫𑁂𑀡𑁆𑀟𑁄𑀧𑀺 𑀕𑀳𑁂𑀢𑀩𑁆𑀩𑁄, 𑀫𑀳𑁄𑀲𑀥𑀚𑀸𑀢𑀓𑀝𑁆𑀞𑀓𑀣𑀸𑀬𑀜𑁆𑀳𑀺 𑀫𑁂𑀡𑁆𑀟𑁂𑀴𑀓𑀸𑀦𑀁 𑀦𑀺𑀩𑁆𑀩𑀺𑀲𑁂𑀲𑀢𑀸 𑀯𑀼𑀢𑁆𑀢𑀸𑀢𑀺.

𑀅𑀚𑁆𑀚 𑀲𑀚𑁆𑀚 𑀅𑀚𑁆𑀚𑀦𑁂. 𑀅𑀚𑁆𑀚𑀦𑀁 𑀅𑀚𑁆𑀚𑀦𑀓𑁆𑀭𑀺𑀬𑀸. 𑀅𑀚𑁆𑀚𑀢𑀺. 𑀲𑀚𑁆𑀚𑀢𑀺.

𑀓𑀚𑁆𑀚 𑀩𑁆𑀬𑀣𑀦𑁂. 𑀩𑁆𑀬𑀣𑀦𑀁 𑀳𑀺𑀁𑀲𑀸. 𑀓𑀚𑁆𑀚𑀢𑀺.

𑀔𑀚𑁆𑀚 𑀫𑀚𑁆𑀚𑀦𑁂 𑀘. 𑀫𑀚𑁆𑀚𑀦𑀁 𑀲𑀼𑀤𑁆𑀥𑀺. 𑀩𑁆𑀬𑀣𑀦𑀸𑀧𑁂𑀓𑁆𑀔𑁄 𑀘𑀓𑀸𑀭𑁄. 𑀔𑀚𑁆𑀚𑀢𑀺. 𑀔𑀚𑁆𑀚𑀽𑀭𑁄.

𑀔𑀚 𑀫𑀦𑁆𑀣𑁂. 𑀫𑀦𑁆𑀣𑁄 𑀯𑀺𑀮𑁄𑀴𑀦𑀁. 𑀔𑀚𑀢𑀺.

𑀔𑀚𑀺 𑀕𑀢𑀺𑀯𑁂𑀓𑀮𑁆𑀮𑁂. 𑀓𑀺𑀲𑁆𑀲 𑀪𑀦𑁆𑀢𑁂 𑀅𑀬𑁆𑀬𑁄 𑀔𑀜𑁆𑀚𑀢𑀻𑀢𑀺. 𑀉𑀪𑁄 𑀔𑀜𑁆𑀚𑀸. 𑀔𑀜𑁆𑀚𑀦𑀁, 𑀔𑀜𑁆𑀚𑀺𑀢𑀼𑀁, 𑀔𑀜𑁆𑀚𑀺𑀢𑁆𑀯𑀸.

𑀔𑀚 𑀓𑀫𑁆𑀧𑀦𑁂. 𑀔𑀚𑀢𑀺. 𑀏𑀚𑀸. 𑀏𑀢𑁆𑀣 𑀘 𑀏𑀚𑀸𑀢𑀺 𑀮𑀸𑀪𑀸𑀤𑀺𑀁 𑀧𑀝𑀺𑀘𑁆𑀘 𑀏𑀚𑀢𑀺 𑀓𑀫𑁆𑀧𑀢𑀻𑀢𑀺 𑀏𑀚𑀸, 𑀩𑀮𑀯𑀢𑀡𑁆𑀳𑀸𑀬𑁂𑀢𑀁 𑀦𑀸𑀫𑀁.

𑀩𑀼𑀚 𑀯𑀚𑀺𑀭𑀦𑀺𑀩𑁆𑀩𑁂𑀲𑁂. 𑀯𑀚𑀺𑀭𑀦𑀺𑀕𑁆𑀖𑁄𑀲𑁂𑀢𑀺 𑀓𑁂𑀘𑀺 𑀯𑀺𑀤𑀽 𑀯𑀤𑀦𑁆𑀢𑀺. 𑀩𑁄𑀚𑀢𑀺.

𑀔𑀺𑀚 ¶ 𑀓𑀼𑀚𑀺 𑀕𑀼𑀚𑀺 𑀅𑀩𑁆𑀬𑀢𑁆𑀢𑀲𑀤𑁆𑀤𑁂. 𑀔𑀺𑀚𑀢𑀺. 𑀓𑀼𑀜𑁆𑀚𑀢𑀺. 𑀕𑀼𑀜𑁆𑀚𑀢𑀺.

𑀮𑀚 𑀮𑀸𑀚 𑀢𑀚𑁆𑀚 𑀪𑀲𑁆𑀲𑀦𑁂. 𑀮𑀚𑀢𑀺. 𑀮𑀸𑀚𑀢𑀺. 𑀢𑀚𑁆𑀚𑀢𑀺.

𑀮𑀚𑀺 𑀤𑀺𑀢𑁆𑀢𑀺𑀬𑀜𑁆𑀘. 𑀪𑀲𑁆𑀲𑀦𑀸𑀧𑁂𑀓𑁆𑀔𑁄 𑀘𑀓𑀸𑀭𑁄. 𑀮𑀜𑁆𑀚𑀢𑀺. 𑀢𑀢𑀺𑀬𑁄 𑀦𑀬𑀮𑀜𑁆𑀚𑀓𑁄. 𑀮𑀜𑁆𑀚𑁂𑀢𑀺 𑀧𑀓𑀸𑀲𑁂𑀢𑀺 𑀲𑀼𑀢𑁆𑀢𑀢𑁆𑀣𑀦𑁆𑀢𑀺 𑀮𑀜𑁆𑀚𑀓𑁄.

𑀚𑀚 𑀚𑀚𑀺 𑀬𑀼𑀤𑁆𑀥𑁂. 𑀬𑀼𑀚𑁆𑀛𑀦𑀁 𑀬𑀼𑀤𑁆𑀥𑀁. 𑀚𑀚𑀢𑀺. 𑀚𑀜𑁆𑀚𑀢𑀺.

𑀢𑀼𑀚 𑀳𑀺𑀁𑀲𑀸𑀬𑀁. 𑀢𑁄𑀚𑀢𑀺.

𑀢𑀼𑀚𑀺 𑀩𑀮𑀦𑁂 𑀘. 𑀩𑀮𑀦𑀁 𑀩𑀮𑀦𑀓𑁆𑀭𑀺𑀬𑀸. 𑀳𑀺𑀁𑀲𑀸𑀧𑁂𑀓𑁆𑀔𑀓𑁄 𑀘𑀓𑀸𑀭𑁄. 𑀢𑀼𑀜𑁆𑀚𑀢𑀺.

𑀕𑀚 𑀓𑀼𑀚𑀺 𑀫𑀼𑀚𑀺 𑀕𑀚𑁆𑀚 𑀲𑀤𑁆𑀤𑀢𑁆𑀣𑀸. 𑀕𑀚𑀢𑀺. 𑀓𑀼𑀜𑁆𑀚𑀢𑀺. 𑀫𑀼𑀜𑁆𑀚𑀢𑀺. 𑀕𑀚𑁄 𑀕𑀚𑁆𑀚𑀢𑀺, 𑀫𑁂𑀖𑁄 𑀕𑀚𑁆𑀚𑀢𑀺. 𑀬𑀢𑁆𑀣 𑀤𑀸𑀲𑁄 𑀆𑀫𑀚𑀸𑀢𑁄, 𑀞𑀺𑀢𑁄 𑀣𑀼𑀮𑁆𑀮𑀸𑀦𑀺 𑀕𑀚𑁆𑀚𑀢𑀺. 𑀫𑀡𑀺 𑀕𑀚𑁆𑀚𑀢𑀺. 𑀜𑀸𑀡𑀕𑀚𑁆𑀚𑀦𑀁 𑀕𑀚𑁆𑀚𑀢𑀺. 𑀕𑀚𑁆𑀚𑀺𑀢𑀼𑀁 𑀲𑀫𑀢𑁆𑀣𑁄. 𑀕𑀚𑁆𑀚𑀺𑀢𑀸. 𑀕𑀚𑁆𑀚𑀺𑀢𑁆𑀯𑀸. 𑀢𑀢𑁆𑀣 𑀕𑀚𑁄𑀢𑀺 𑀳𑀢𑁆𑀣𑀻. 𑀳𑀢𑁆𑀣𑀺𑀲𑁆𑀲 𑀳𑀺 𑀅𑀦𑁂𑀓𑀸𑀦𑀺 𑀦𑀸𑀫𑀸𑀦𑀺 𑁋

𑀳𑀢𑁆𑀣𑀻 𑀦𑀸𑀕𑁄 𑀕𑀚𑁄 𑀤𑀦𑁆𑀢𑀻, 𑀓𑀼𑀜𑁆𑀚𑀭𑁄 𑀯𑀸𑀭𑀡𑁄 𑀓𑀭𑀻;

𑀫𑀸𑀢𑀗𑁆𑀕𑁄 𑀤𑁆𑀯𑀺𑀭𑀤𑁄 𑀲𑀝𑁆𑀞𑀺-𑀳𑀸𑀬𑀦𑁄’𑀦𑁂𑀓𑀧𑁄 𑀇𑀪𑁄.

𑀣𑀫𑁆𑀪𑁄 𑀭𑀫𑁆𑀫𑁄 𑀤𑁆𑀯𑀺𑀧𑁄 𑀘𑁂𑀯, 𑀳𑀢𑁆𑀣𑀺𑀦𑀻 𑀢𑀼 𑀓𑀭𑁂𑀡𑀼𑀓𑀸;

𑀳𑀢𑁆𑀣𑀺𑀧𑁄𑀢𑁄 𑀳𑀢𑁆𑀣𑀺𑀘𑁆𑀙𑀸𑀧𑁄, 𑀪𑀺𑀗𑁆𑀓𑁄 𑀘 𑀓𑀮𑀪𑁄 𑀪𑀯𑁂.

𑀘𑀚 𑀘𑀸𑀕𑁂. 𑀘𑀚𑀢𑀺. 𑀧𑀭𑀺𑀘𑁆𑀘𑀚𑀢𑀺. 𑀘𑀸𑀕𑁄. 𑀧𑀭𑀺𑀘𑁆𑀘𑀸𑀕𑁄. 𑀘𑀚𑀦𑀁. 𑀘𑀚𑀁, 𑀘𑀚𑀦𑁆𑀢𑁄. 𑀘𑀚𑀫𑀸𑀦𑁄.

𑀲𑀦𑁆𑀚 𑀲𑀗𑁆𑀕𑁂. 𑀲𑀗𑁆𑀕𑁄 𑀮𑀕𑀦𑀁. 𑀲𑀜𑁆𑀘𑀢𑀺. 𑀲𑀢𑁆𑀢𑁄. 𑀲𑀚𑀦𑀁, 𑀲𑀢𑁆𑀢𑀺. 𑀆𑀲𑀢𑁆𑀢𑀺. 𑀲𑀚𑀺𑀢𑀼𑀁. 𑀲𑀚𑀺𑀢𑁆𑀯𑀸.

𑀈𑀚 𑀕𑀢𑀺𑀬𑀁. 𑀈𑀚𑀢𑀺.

𑀪𑀚𑀺 𑀪𑀚𑁆𑀚𑀦𑁂. 𑀪𑀚𑁆𑀚𑀦𑀁 𑀢𑀸𑀧𑀓𑀭𑀡𑀁. 𑀢𑀺𑀮𑀸𑀦𑀺 𑀪𑀚𑁆𑀚𑀢𑀺. 𑀧𑀼𑀭𑀺𑀲𑁂𑀦 𑀪𑀚𑁆𑀚𑀫𑀸𑀦𑀸𑀦𑀺 𑀢𑀺𑀮𑀸𑀦𑀺.

𑀏𑀚 ¶ 𑀪𑁂𑀚 𑀪𑀸𑀚 𑀤𑀺𑀢𑁆𑀢𑀺𑀬𑀁. 𑀤𑀺𑀢𑁆𑀢𑀺 𑀲𑁄𑀪𑀸. 𑀏𑀚𑀢𑀺. 𑀪𑁂𑀚𑀢𑀺. 𑀪𑀸𑀚𑀢𑀺.

𑀢𑀺𑀚 𑀦𑀺𑀲𑀸𑀦𑁂, 𑀔𑀫𑀸𑀬𑀜𑁆𑀘. 𑀦𑀺𑀲𑀸𑀦𑀁 𑀢𑀺𑀓𑁆𑀔𑀢𑀸𑀓𑀭𑀡𑀁. 𑀔𑀫𑀸 𑀔𑀦𑁆𑀢𑀺. 𑀢𑁂𑀚𑀢𑀺. 𑀢𑀺𑀢𑀺𑀓𑁆𑀔𑀢𑀺. 𑀢𑁂𑀚𑀦𑁄. 𑀢𑁂𑀚𑁄. 𑀢𑀢𑁆𑀣 𑀢𑁂𑀚𑀦𑁄𑀢𑀺 𑀓𑀡𑁆𑀟𑁄 𑀲𑀭𑁄 𑀉𑀲𑀼. 𑀢𑁂𑀚𑁄𑀢𑀺 𑀲𑀽𑀭𑀺𑀬𑁄. 𑀅𑀣 𑀯𑀸 𑀢𑁂𑀚𑁄𑀢𑀺 𑀢𑁂𑀚𑀦𑀁 𑀉𑀲𑁆𑀫𑀸 𑀉𑀡𑁆𑀳𑀢𑁆𑀢𑀁 𑀢𑀸𑀧𑁄. 𑀢𑁂𑀚𑁄𑀢𑀺 𑀯𑀸 𑀆𑀦𑀼𑀪𑀸𑀯𑁄 𑀧𑀪𑀸𑀯𑁄.

𑀲𑀜𑁆𑀚 𑀧𑀭𑀺𑀲𑁆𑀲𑀕𑁆𑀕𑁂, 𑀆𑀮𑀺𑀗𑁆𑀕𑀦𑀁 𑀧𑀭𑀺𑀲𑁆𑀲𑀕𑁆𑀕𑁄. 𑀲𑀜𑁆𑀚𑀢𑀺.

𑀔𑀚𑀺 𑀤𑀸𑀦𑁂, 𑀕𑀢𑀺𑀬𑀜𑁆𑀘. 𑀔𑀜𑁆𑀚𑀢𑀺. 𑀔𑀜𑁆𑀚𑀦𑀁.

𑀭𑀸𑀚 𑀤𑀺𑀢𑁆𑀢𑀺𑀬𑀁 𑀪𑀸𑀚 𑀘. 𑀭𑀸𑀚𑀢𑀺. 𑀪𑀸𑀚𑀢𑀺. 𑀭𑀸𑀚𑀸. 𑀭𑀸𑀚𑀺𑀦𑀻. 𑀯𑀦𑀭𑀸𑀚𑀺. 𑀭𑀸𑀚𑀺𑀢𑁆𑀯𑀸. 𑀯𑀺𑀭𑀸𑀚𑀺𑀢𑁆𑀯𑀸. 𑀅𑀢𑁆𑀭 𑀯𑀺𑀜𑁆𑀜𑀽𑀦𑀫𑀢𑁆𑀣𑀯𑀺𑀯𑀭𑀡𑁂 𑀓𑁄𑀲𑀮𑁆𑀮𑀚𑀦𑀦𑀢𑁆𑀣𑀁 𑀲𑀺𑀮𑁄𑀓𑀁 𑀭𑀘𑀬𑀸𑀫 𑁋

𑀫’𑀳𑀸’𑀭𑀸𑀚 𑀫𑀳𑀸𑀭𑀸𑀚, 𑀫𑀳𑀸𑀭𑀸𑀚 𑀫𑀫𑁂𑀯’𑀳𑀺;

𑀦𑁂’𑀢𑀲𑁆𑀲 𑀇𑀢𑀺 𑀯𑀢𑁆𑀯𑀸𑀦, 𑀤𑁆𑀯𑁂 𑀚𑀦𑀸 𑀓𑀮𑀳𑀁 𑀓𑀭𑀼𑀁.

𑀏𑀢𑁆𑀣 𑀘 𑀧𑀞𑀫𑀧𑀸𑀤𑀲𑁆𑀲 𑀤𑀼𑀢𑀺𑀬𑀧𑀤𑁂 ‘‘𑀫𑁂 𑀅𑀳𑀺 𑀫𑀳𑀻’’𑀢𑀺 𑀙𑁂𑀤𑁄 ‘‘𑀧𑀼𑀢𑁆𑀢𑀸 𑀫𑁂 𑀅𑀢𑁆𑀣𑀺 𑀧𑀼𑀢𑁆𑀢𑀸 𑀫𑀢𑁆𑀣𑀻’’𑀢𑀺 𑀯𑀺𑀬. ‘‘𑀫𑀳𑀺 𑀅𑀭𑀸𑀚 𑀫𑀳𑀸𑀭𑀸𑀚𑀸’’𑀢𑀺 𑀘 𑀙𑁂𑀤𑁄 ‘‘𑀬𑁄𑀧𑀺 𑀅𑀬𑀁 𑀬𑁄𑀧𑀸𑀬’’𑀦𑁆𑀢𑀺 𑀯𑀺𑀬. 𑀏𑀢𑁆𑀣 𑀅𑀭𑀸𑀚𑀲𑀤𑁆𑀤𑁄 ‘‘𑀅𑀢𑀺𑀓𑀭𑀫𑀓𑀭𑀸𑀘𑀭𑀺𑀬𑀸’’𑀢𑀺 𑀏𑀢𑁆𑀣 𑀅𑀓𑀭𑀻𑀢𑀺 𑀅𑀢𑁆𑀣𑀯𑀸𑀘𑀓𑁄 𑀅𑀓𑀭𑀲𑀤𑁆𑀤𑁄 𑀯𑀺𑀬 𑀆𑀔𑁆𑀬𑀸𑀢𑀧𑀭𑁄𑀓𑁆𑀔𑀸𑀯𑀺𑀪𑀢𑁆𑀢𑀺𑀓𑁄 𑀤𑀝𑁆𑀞𑀩𑁆𑀩𑁄. 𑀅𑀭𑀸𑀚 𑀯𑀺𑀭𑁄𑀘𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦 𑀕𑀸𑀣𑀸𑀬 𑀧𑀺𑀡𑁆𑀟𑀢𑁆𑀣𑁄 ‘‘𑀫𑀳𑀸𑀭𑀸𑀚 𑀫𑁂 𑀅𑀳𑀺 𑀅𑀭𑀸𑀚, 𑀫𑀫 𑀏𑀯 𑀅𑀳𑀺 𑀅𑀭𑀸𑀚, 𑀦 𑀏𑀢𑀲𑁆𑀲 𑀇𑀢𑀺 𑀯𑀢𑁆𑀯𑀸 𑀤𑁆𑀯𑁂 𑀅𑀳𑀺𑀢𑀼𑀡𑁆𑀟𑀺𑀓𑀚𑀦𑀸 𑀓𑀮𑀳𑀁 𑀓𑀭𑀺𑀁𑀲𑀽’’𑀢𑀺.

𑀭𑀦𑁆𑀚 𑀭𑀸𑀕𑁂. 𑀪𑀺𑀓𑁆𑀔𑀼 𑀘𑀻𑀯𑀭𑀁 𑀭𑀚𑀢𑀺. 𑀲𑀢𑁆𑀢𑁄 𑀭𑀽𑀧𑀸𑀤𑀻𑀲𑀼 𑀭𑀜𑁆𑀚𑀢𑀺. 𑀭𑀚𑀦𑀁. 𑀭𑀚𑀓𑁄. 𑀭𑀸𑀕𑁄. 𑀯𑀺𑀭𑀸𑀕𑁄. 𑀳𑀮𑀺𑀤𑁆𑀤𑀺𑀭𑀸𑀕𑁄. 𑀭𑀸𑀚𑀸. 𑀭𑀸𑀚𑀺𑀦𑀻. 𑀇𑀫𑀲𑁆𑀲 𑀘 𑀤𑀺𑀯𑀸𑀤𑀺𑀕𑀡𑀁 𑀧𑀢𑁆𑀢𑀲𑁆𑀲 ‘‘𑀭𑀚𑁆𑀚𑀢𑀺 𑀯𑀺𑀭𑀚𑁆𑀚𑀢𑀻’’𑀢𑀺 𑀭𑀽𑀧𑀸𑀦𑀺 ¶ 𑀪𑀯𑀦𑁆𑀢𑀺. 𑀢𑀢𑁆𑀣 𑀭𑀚𑀦𑀦𑁆𑀢𑀺 𑀭𑀚𑀦𑀯𑀢𑁆𑀣𑀼. 𑀭𑀚𑀓𑁄𑀢𑀺 𑀭𑀚𑀓𑀸𑀭𑁄 𑀯𑀢𑁆𑀣𑀥𑁄𑀯𑀦𑀓𑁄. 𑀭𑀸𑀕𑁄𑀢𑀺 𑀭𑀚𑁆𑀚𑀦𑁆𑀢𑀺 𑀲𑀢𑁆𑀢𑀸 𑀢𑁂𑀦, 𑀲𑀬𑀁 𑀯𑀸 𑀭𑀜𑁆𑀚𑀢𑀺, 𑀭𑀜𑁆𑀚𑀦𑀫𑀢𑁆𑀢𑀫𑁂𑀯 𑀯𑀸 𑀏𑀢𑀦𑁆𑀢𑀺 𑀭𑀸𑀕𑁄, 𑀢𑀡𑁆𑀳𑀸. 𑀇𑀫𑀸𑀦𑀺 𑀧𑀦 𑀢𑀤𑀪𑀺𑀥𑀸𑀦𑀸𑀦𑀺 𑁋

𑀭𑀸𑀕𑁄 𑀮𑁄𑀪𑁄 𑀢𑀲𑀺𑀡𑀸 𑀘, 𑀢𑀡𑁆𑀳𑀸 𑀏𑀚𑀸 𑀯𑀺𑀲𑀢𑁆𑀢𑀺𑀓𑀸;

𑀲𑀢𑁆𑀢𑀺 𑀆𑀲𑀢𑁆𑀢𑀺 𑀫𑀼𑀘𑁆𑀙𑀸 𑀘, 𑀮𑀼𑀩𑁆𑀪𑀺𑀢𑀢𑁆𑀢𑀜𑁆𑀘 𑀮𑀼𑀩𑁆𑀪𑀦𑀸.

𑀓𑀸𑀫𑁄 𑀦𑀺𑀓𑀸𑀫𑀦𑀸 𑀇𑀘𑁆𑀙𑀸, 𑀦𑀺𑀓𑀦𑁆𑀢𑀺 𑀘 𑀦𑀺𑀬𑀦𑁆𑀢𑀺 𑀘;

𑀯𑀦𑀜𑁆𑀘 𑀯𑀦𑀣𑁄 𑀘𑁂𑀯, 𑀅𑀧𑁂𑀓𑁆𑀔𑀸 𑀪𑀯𑀦𑁂𑀢𑁆𑀢𑀺 𑀘.

𑀅𑀦𑀼𑀭𑁄𑀥𑁄 𑀘 𑀲𑀸𑀭𑀸𑀕𑁄, 𑀲𑀗𑁆𑀕𑁄 𑀧𑀗𑁆𑀓𑁄 𑀘 𑀲𑀺𑀩𑁆𑀩𑀺𑀦𑀻;

𑀦𑀦𑁆𑀤𑀻𑀭𑀸𑀕𑁄 𑀅𑀦𑀼𑀦𑀬𑁄, 𑀕𑁂𑀥𑁄 𑀲𑀜𑁆𑀚𑀦𑀦𑀻 𑀢𑀣𑀸;

𑀚𑀦𑀺𑀓𑀸 𑀧𑀡𑀺𑀥𑀺 𑀘𑁂𑀯, 𑀅𑀚𑁆𑀛𑁄𑀲𑀸𑀦𑀦𑁆𑀢𑀺𑀦𑁂𑀓𑀥𑀸.

𑀯𑀺𑀭𑀸𑀕𑁄𑀢𑀺 𑀫𑀕𑁆𑀕𑁄 𑀦𑀺𑀩𑁆𑀩𑀸𑀦𑀜𑁆𑀘. 𑀭𑀸𑀚𑀸𑀢𑀺 𑀧𑀣𑀯𑀺𑀲𑁆𑀲𑀭𑁄. 𑀏𑀢𑁆𑀣 𑀥𑀸𑀢𑀼𑀤𑁆𑀯𑀬𑀯𑀲𑁂𑀦 𑀦𑀺𑀩𑁆𑀩𑀘𑀦𑀸𑀦𑀺 𑀦𑀺𑀬𑁆𑀬𑀦𑁆𑀢𑁂. 𑀦𑀸𑀦𑀸𑀲𑀫𑁆𑀧𑀢𑁆𑀢𑀻𑀳𑀺 𑀭𑀸𑀚𑀢𑀺 𑀤𑀺𑀩𑁆𑀩𑀢𑀺 𑀯𑀺𑀭𑁄𑀘𑀢𑀻𑀢𑀺 𑀭𑀸𑀚𑀸. 𑀤𑀸𑀦𑀜𑁆𑀘 𑀧𑀺𑀬𑀯𑀘𑀦𑀜𑁆𑀘 𑀅𑀢𑁆𑀣𑀘𑀭𑀺𑀬𑀸 𑀘 𑀲𑀫𑀸𑀦𑀢𑁆𑀢𑀢𑀸 𑀘𑀸𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀅𑀢𑁆𑀢𑀦𑀺 𑀫𑀳𑀸𑀚𑀦𑀁 𑀭𑀜𑁆𑀚𑁂𑀢𑀻𑀢𑀺𑀧𑀺 𑀭𑀸𑀚𑀸. 𑀭𑀸𑀚𑀺𑀦𑀻𑀢𑀺 𑀭𑀸𑀚𑀪𑀭𑀺𑀬𑀸. 𑀢𑁂𑀲𑀁 𑀅𑀪𑀺𑀥𑀸𑀦𑀸𑀦𑀺 𑀯𑀼𑀘𑁆𑀘𑀦𑁆𑀢𑁂 𑀲𑀳𑀸𑀪𑀺𑀥𑀸𑀦𑀦𑁆𑀢𑀭𑁂𑀳𑀺 𑁋

𑀭𑀸𑀚𑀸 𑀪𑀽𑀧𑀢𑀺 𑀤𑁂𑀯𑁄 𑀘, 𑀫𑀦𑀼𑀚𑀺𑀦𑁆𑀤𑁄 𑀤𑀺𑀲𑀫𑁆𑀧𑀢𑀺;

𑀧𑀢𑁆𑀣𑀺𑀯𑁄 𑀚𑀕𑀢𑀺𑀧𑀸𑀮𑁄, 𑀪𑀽𑀪𑀼𑀚𑁄 𑀧𑀣𑀯𑀺𑀲𑁆𑀲𑀭𑁄.

𑀭𑀝𑁆𑀞𑀸𑀥𑀺𑀧𑁄 𑀪𑀽𑀫𑀺𑀧𑀸𑀮𑁄, 𑀫𑀦𑀼𑀲𑁆𑀲𑀺𑀦𑁆𑀤𑁄 𑀚𑀦𑀸𑀥𑀺𑀧𑁄;

𑀦𑀭𑀺𑀦𑁆𑀤𑁄 𑀔𑀢𑁆𑀢𑀺𑀬𑁄 𑀘𑁂𑀯, 𑀔𑁂𑀢𑁆𑀢𑀲𑁆𑀲𑀸𑀫𑀺 𑀧𑀪𑀸𑀯𑀓𑁄.

𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑁄 𑀭𑀸𑀚𑀸𑀢𑀺, 𑀓𑀣𑀺𑀢𑁄 𑀇𑀢𑀭𑁄 𑀧𑀦;

𑀭𑀸𑀚𑀜𑁆𑀜𑁄 𑀔𑀢𑁆𑀢𑀺𑀬𑁄 𑀘𑀸𑀢𑀺, 𑀯𑀼𑀢𑁆𑀢𑁄 𑀔𑀢𑁆𑀢𑀺𑀬𑀚𑀸𑀢𑀺𑀓𑁄.

𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑁄 𑀅𑀦𑀼𑀭𑀸𑀚𑀸, 𑀉𑀧𑀭𑀸𑀚𑀸𑀢𑀺 𑀪𑀸𑀲𑀺𑀢𑁄;

𑀘𑀢𑀼𑀤𑁆𑀤𑀻𑀧𑀻 𑀭𑀸𑀚𑀭𑀸𑀚𑀸, 𑀘𑀓𑁆𑀓𑀯𑀢𑁆𑀢𑀻𑀢𑀺 𑀪𑀸𑀲𑀺𑀢𑁄.

𑀭𑀸𑀚𑀺𑀦𑀻 ¶ 𑀉𑀧𑀭𑀻 𑀤𑁂𑀯𑀻, 𑀫𑀳𑁂𑀲𑀻 𑀪𑀽𑀪𑀼𑀚𑀗𑁆𑀕𑀦𑀸;

𑀔𑀢𑁆𑀢𑀺𑀬𑀸 𑀭𑀸𑀚𑀧𑀤𑀼𑀫𑀻, 𑀔𑀢𑁆𑀢𑀺𑀬𑀸𑀦𑀻 𑀘 𑀔𑀢𑁆𑀢𑀺𑀬𑀻;

𑀇𑀢𑁆𑀣𑀸𑀕𑀸𑀭𑀦𑁆𑀢𑀼 𑀑𑀭𑁄𑀥𑁄, 𑀉𑀧𑀭𑀻𑀢𑀺𑀧𑀺 𑀯𑀼𑀘𑁆𑀘𑀢𑀺.

𑀪𑀚 𑀲𑁂𑀯𑀸𑀬𑀁. 𑀪𑀚𑀢𑀺. 𑀪𑀚𑀦𑀸. 𑀲𑀫𑁆𑀪𑀚𑀦𑀸. 𑀪𑀢𑁆𑀢𑀺. 𑀲𑀫𑁆𑀪𑀢𑁆𑀢𑀺. 𑀪𑀢𑁆𑀢𑀸.

𑀬𑀚 𑀤𑁂𑀯𑀧𑀽𑀚𑀲𑀗𑁆𑀕𑀢𑀓𑀭𑀡𑀤𑀸𑀦𑀥𑀫𑁆𑀫𑁂𑀲𑀼. 𑀤𑁂𑀯𑀧𑀽𑀚𑀕𑁆𑀕𑀳𑀡𑁂𑀦 𑀩𑀼𑀤𑁆𑀥𑀸𑀤𑀺𑀧𑀽𑀚𑀸 𑀕𑀳𑀺𑀢𑀸. 𑀲𑀗𑁆𑀕𑀢𑀓𑀭𑀡𑀁 𑀲𑀫𑁄𑀥𑀸𑀦𑀓𑀭𑀡𑀁. 𑀢𑀣𑀸 𑀳𑀺 𑀅𑀥𑀺𑀫𑀼𑀢𑁆𑀢𑀢𑁆𑀣𑁂𑀭𑀯𑀢𑁆𑀣𑀼𑀫𑁆𑀳𑀺 ‘‘𑀬𑀤𑀢𑁆𑀣𑀺 𑀲𑀗𑁆𑀕𑀢𑀁 𑀓𑀺𑀜𑁆𑀘𑀺, 𑀪𑀯𑁄 𑀯𑀸 𑀬𑀢𑁆𑀣 𑀮𑀩𑁆𑀪𑀢𑀻’’𑀢𑀺 𑀕𑀸𑀣𑀸𑀬𑀁 𑀲𑀗𑁆𑀕𑀢𑀲𑀤𑁆𑀤𑁂𑀦 𑀲𑀫𑁄𑀥𑀸𑀦𑀁 𑀯𑀼𑀢𑁆𑀢𑀁. 𑀤𑀸𑀦𑀁 𑀧𑀭𑀺𑀘𑁆𑀘𑀸𑀕𑁄. 𑀥𑀫𑁆𑀫𑁄 𑀛𑀸𑀦𑀲𑀻𑀮𑀸𑀤𑀺. 𑀏𑀢𑁂𑀲𑁆𑀯𑀢𑁆𑀣𑁂𑀲𑀼 𑀬𑀚𑀥𑀸𑀢𑀼 𑀯𑀢𑁆𑀢𑀢𑀺. 𑀧𑀼𑀧𑁆𑀨𑁂𑀳𑀺 𑀩𑀼𑀤𑁆𑀥𑀁 𑀬𑀚𑀢𑀺. 𑀤𑁂𑀯𑀢𑀁 𑀬𑀚𑀢𑀺. 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀪𑀕𑀯𑀸 𑀬𑀚𑀺𑀬𑀢𑀺. 𑀇𑀚𑁆𑀚𑀢𑀺. 𑀬𑀺𑀝𑁆𑀞𑀁. 𑀬𑀜𑁆𑀜𑁄. 𑀬𑀸𑀕𑁄. 𑀥𑀫𑁆𑀫𑀬𑀸𑀕𑁄. 𑀬𑀚𑀫𑀸𑀦𑁄 𑀲𑀓𑁂 𑀧𑀼𑀭𑁂. 𑀬𑀺𑀝𑁆𑀞𑀼𑀁, 𑀬𑀚𑀺𑀢𑀼𑀁. 𑀧𑀼𑀣𑀼𑀬𑀜𑁆𑀜𑀁 𑀬𑀚𑀺𑀢𑁆𑀯𑀸𑀦. 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀁 𑀫𑀳𑀸𑀬𑀜𑁆𑀜𑀁 𑀓𑀢𑁆𑀢𑀼𑀓𑀸𑀫𑁄.

𑀫𑀚𑁆𑀚 𑀲𑀁𑀲𑀼𑀤𑁆𑀥𑀺𑀬𑀁. 𑀫𑀚𑁆𑀚𑀢𑀺. 𑀩𑀸𑀳𑀺𑀭𑀁 𑀧𑀭𑀺𑀫𑀚𑁆𑀚𑀢𑀺. 𑀪𑀽𑀫𑀺𑀁 𑀲𑀫𑁆𑀫𑀚𑁆𑀚𑀢𑀺. 𑀫𑀚𑁆𑀚𑀦𑀁. 𑀲𑀫𑁆𑀫𑀚𑁆𑀚𑀦𑀻.

𑀦𑀺𑀜𑁆𑀚𑀺 𑀲𑀼𑀤𑁆𑀥𑀺𑀬𑀁. 𑀦𑀺𑀜𑁆𑀚𑀢𑀺. 𑀧𑀦𑀺𑀜𑁆𑀚𑀢𑀺. 𑀦𑀺𑀜𑁆𑀚𑀺𑀢𑀼𑀁. 𑀧𑀦𑀺𑀜𑁆𑀚𑀺𑀢𑀼𑀁. 𑀦𑀺𑀜𑁆𑀚𑀺𑀢𑁆𑀯𑀸. 𑀧𑀦𑀺𑀜𑁆𑀚𑀺𑀢𑁆𑀯𑀸. 𑀅𑀬𑀁 𑀧𑀦 𑀧𑀸𑀴𑀺 ‘‘𑀢𑀢𑁄 𑀢𑁆𑀯𑀁 𑀫𑁄𑀕𑁆𑀕𑀮𑁆𑀮𑀸𑀦 𑀉𑀝𑁆𑀞𑀸𑀬𑀸𑀲𑀦𑀸 𑀉𑀤𑀓𑁂𑀦 𑀅𑀓𑁆𑀔𑀻𑀦𑀺 𑀧𑀦𑀺𑀜𑁆𑀚𑀺𑀢𑁆𑀯𑀸 𑀤𑀺𑀲𑀸 𑀅𑀦𑀼𑀮𑁄𑀓𑁂𑀬𑁆𑀬𑀸𑀲𑀻’’𑀢𑀺.

𑀦𑀺𑀚𑀺 𑀅𑀩𑁆𑀬𑀢𑁆𑀢𑀲𑀤𑁆𑀤𑁂. 𑀦𑀺𑀜𑁆𑀚𑀢𑀺.

𑀪𑀚 𑀧𑀸𑀓𑁂. 𑀢𑀺𑀮𑀸𑀦𑀺 𑀪𑀚𑁆𑀚𑀢𑀺. 𑀪𑀚𑁆𑀚𑀫𑀸𑀦𑀸 𑀢𑀺𑀮𑀸𑀦𑀺 𑀘.

𑀉𑀚𑀼 𑀅𑀚𑁆𑀚𑀯𑁂. 𑀅𑀚𑁆𑀚𑀯𑀁 𑀉𑀚𑀼𑀪𑀸𑀯𑁄. 𑀑𑀚𑀢𑀺. 𑀉𑀚𑀼.

𑀲𑀚 ¶ 𑀯𑀺𑀲𑁆𑀲𑀕𑁆𑀕𑀧𑀭𑀺𑀲𑁆𑀲𑀚𑁆𑀚𑀦𑀩𑁆𑀪𑀼𑀓𑁆𑀓𑀺𑀭𑀡𑁂𑀲𑀼. 𑀲𑀚𑀢𑀺. 𑀮𑁄𑀓𑁆𑀬𑀁 𑀲𑀚𑀦𑁆𑀢𑀁 𑀉𑀤𑀓𑀁.

𑀭𑀼𑀚 𑀪𑀗𑁆𑀕𑁂. 𑀭𑀼𑀚𑀢𑀺. 𑀭𑀼𑀚𑀸. 𑀭𑁄𑀕𑁄. 𑀏𑀢𑁆𑀣 𑀭𑀼𑀚𑀸𑀢𑀺 𑀩𑁆𑀬𑀸𑀥𑀺 𑀭𑀼𑀚𑀦𑀝𑁆𑀞𑁂𑀦. 𑀭𑁄𑀕𑁄𑀢𑀺 𑀭𑀼𑀚𑀢𑀺 𑀪𑀜𑁆𑀚𑀢𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀻𑀢𑀺 𑀭𑁄𑀕𑁄, 𑀩𑁆𑀬𑀸𑀥𑀺𑀬𑁂𑀯, 𑀬𑁄 ‘‘𑀆𑀢𑀗𑁆𑀓𑁄’’𑀢𑀺𑀧𑀺 ‘‘𑀆𑀩𑀸𑀥𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺.

𑀪𑀼𑀚 𑀓𑁄𑀝𑀺𑀮𑁆𑀮𑁂. 𑀆𑀯𑀺𑀧𑀼𑀩𑁆𑀩𑁄 𑀅𑀜𑁆𑀜𑀢𑁆𑀣𑁂𑀲𑀼 𑀘. 𑀉𑀭𑀕𑁄 𑀪𑀼𑀚𑀢𑀺. 𑀆𑀪𑀼𑀚𑀢𑀺. 𑀪𑀺𑀓𑁆𑀔𑀼 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀢𑀺, 𑀊𑀭𑀼𑀩𑀤𑁆𑀥𑀸𑀲𑀦𑀁 𑀩𑀦𑁆𑀥𑀢𑀻𑀢𑀺 𑀅𑀢𑁆𑀣𑁄. 𑀫𑀳𑀸𑀲𑀫𑀼𑀤𑁆𑀤𑁄 𑀆𑀪𑀼𑀚𑀢𑀺, 𑀆𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀧𑀦 ‘‘𑀑𑀲𑀓𑁆𑀓𑀢𑀻’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. ‘‘𑀯𑀡𑁆𑀡𑀤𑀸𑀦’’𑀦𑁆𑀢𑀺 𑀆𑀪𑀼𑀚𑀢𑀺, 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀫𑀽𑀮𑀸𑀦𑀺 𑀯𑀺𑀪𑀼𑀚𑀢𑀻𑀢𑀺 𑀫𑀽𑀮𑀯𑀺𑀪𑀼𑀚𑁄, 𑀭𑀣𑁄. 𑀏𑀢𑁆𑀣 𑀘 𑀯𑀺𑀪𑀼𑀚𑀢𑀻𑀢𑀺 𑀙𑀺𑀦𑁆𑀤𑀢𑀺. 𑀪𑁄𑀕𑁄. 𑀪𑁄𑀕𑀻. 𑀆𑀪𑁄𑀕𑁄. 𑀆𑀪𑀼𑀚𑀺𑀢𑁆𑀯𑀸. 𑀏𑀢𑁆𑀣 𑀘 𑀪𑁄𑀕𑁄𑀢𑀺 𑀪𑀼𑀚𑀬𑀢𑀺 𑀓𑀼𑀝𑀺𑀮𑀁 𑀓𑀭𑀺𑀬𑀢𑀻𑀢𑀺 𑀪𑁄𑀕𑁄, 𑀅𑀳𑀺𑀲𑀭𑀻𑀭𑀁. 𑀪𑁄𑀕𑀻𑀢𑀺 𑀲𑀧𑁆𑀧𑁄.

𑀭𑀚𑀺 𑀯𑀺𑀚𑁆𑀛𑀦𑁂. 𑀦𑀸𑀕𑁄 𑀤𑀦𑁆𑀢𑁂𑀳𑀺 𑀪𑀽𑀫𑀺𑀁 𑀭𑀜𑁆𑀚𑀢𑀺. 𑀆𑀭𑀜𑁆𑀚𑀢𑀺. 𑀏𑀢𑁆𑀣 𑀘 ‘‘𑀢𑀣𑀸𑀕𑀢𑀭𑀜𑁆𑀚𑀺𑀢𑀁 𑀇𑀢𑀺𑀧𑀻’’𑀢𑀺 𑀦𑁂𑀢𑁆𑀢𑀺𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. 𑀢𑀲𑁆𑀲𑀢𑁆𑀣𑁄 ‘‘𑀇𑀤𑀁 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀢𑀣𑀸𑀕𑀢𑀕𑀦𑁆𑀥𑀳𑀢𑁆𑀣𑀺𑀦𑁄 𑀫𑀳𑀸𑀯𑀚𑀺𑀭𑀜𑀸𑀡𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀤𑀦𑁆𑀢𑁂𑀳𑀺 𑀭𑀜𑁆𑀚𑀺𑀢𑀁 𑀆𑀭𑀜𑁆𑀚𑀺𑀢𑀁, 𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀁 𑀆𑀭𑀜𑁆𑀚𑀦𑀝𑁆𑀞𑀸𑀦𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀻’’𑀢𑀺. 𑀭𑀜𑁆𑀚𑀺𑀢𑀦𑁆𑀢𑀺 𑀳𑀺 𑀭𑀜𑁆𑀚𑀢𑀺 𑀯𑀺𑀚𑁆𑀛𑀢𑀺 𑀏𑀢𑁆𑀣𑀸𑀢𑀺 𑀭𑀼𑀜𑁆𑀚𑀺𑀢𑀁, 𑀭𑀜𑁆𑀚𑀦𑀝𑁆𑀞𑀸𑀦𑀁. ‘‘𑀇𑀤𑀁 𑀦𑁂𑀲𑀁 𑀧𑀤𑀓𑁆𑀓𑀦𑁆𑀢’’𑀦𑁆𑀢𑀺𑀆𑀤𑀺𑀫𑁆𑀳𑀺 𑀯𑀺𑀬 𑀏𑀢𑀲𑁆𑀲 𑀲𑀤𑁆𑀤𑀲𑁆𑀲 𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸 𑀅𑀥𑀺𑀓𑀭𑀡𑀢𑁆𑀣𑀲𑀫𑁆𑀪𑀯𑀢𑁄.

𑀯𑀺𑀚𑀻 𑀪𑀬𑀘𑀮𑀦𑁂𑀲𑀼. 𑀈𑀓𑀸𑀭𑀦𑁆𑀢𑁄𑀬𑀁 𑀥𑀸𑀢𑀼, 𑀢𑁂𑀦𑀲𑁆𑀲 𑀲𑀦𑀺𑀕𑁆𑀕𑀳𑀻𑀢𑀸𑀕𑀫𑀸𑀦𑀺 𑀭𑀽𑀧𑀸𑀦𑀺 𑀦 𑀲𑀦𑁆𑀢𑀺. 𑀯𑁂𑀚𑀢𑀺. 𑀯𑁂𑀕𑁄. 𑀥𑀫𑁆𑀫𑀲𑀁𑀯𑁂𑀕𑁄. 𑀲𑀁𑀯𑀺𑀕𑁄 𑀯𑁂𑀕𑁂𑀦 𑀧𑀮𑀸𑀬𑀺. 𑀦𑀤𑀻𑀯𑁂𑀕𑁄. 𑀊𑀫𑀺𑀯𑁂𑀕𑁄 ¶ , 𑀯𑀸𑀢𑀯𑁂𑀕𑁄. 𑀏𑀢𑁆𑀣 𑀥𑀫𑁆𑀫𑀲𑀁𑀯𑁂𑀕𑁄𑀢𑀺 𑀲𑀳𑁄𑀢𑁆𑀢𑀧𑁆𑀧𑀁 𑀜𑀸𑀡𑀁. ‘‘𑀯𑁂𑀕𑁄, 𑀚𑀯𑁄, 𑀭𑀬𑁄’’𑀢𑀺 𑀇𑀫𑁂 𑀏𑀓𑀢𑁆𑀣𑀸. 𑀤𑀺𑀯𑀸𑀤𑀺𑀕𑀡𑀁 𑀧𑀦 𑀧𑀢𑁆𑀢𑀲𑁆𑀲 ‘‘𑀯𑀺𑀚𑁆𑀚𑀢𑀺 𑀲𑀁𑀯𑀺𑀚𑁆𑀚𑀢𑀺 𑀉𑀩𑁆𑀩𑀺𑀚𑁆𑀚𑀢𑀻’’𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺 𑀤𑁆𑀯𑀺𑀕𑀡𑀺𑀓𑀢𑁆𑀢𑀸.

𑀮𑀚𑁆𑀚 𑀮𑀚𑁆𑀚𑀦𑁂. 𑀮𑀚𑁆𑀚𑀢𑀺. 𑀮𑀚𑁆𑀚𑀸. 𑀮𑀚𑁆𑀚𑀸𑀢𑀺 𑀳𑀺𑀭𑀻. 𑀬𑀸 ‘‘𑀯𑀺𑀭𑀺𑀴𑀦𑀸’’𑀢𑀺𑀧𑀺 𑀯𑀼𑀘𑁆𑀘𑀢𑀺.

𑀯𑀴𑀚𑀺 𑀧𑀭𑀺𑀪𑁄𑀕𑁂. 𑀯𑀴𑀜𑁆𑀚𑀢𑀺.

𑀓𑀼𑀚𑁆𑀚 𑀅𑀥𑁄𑀫𑀼𑀔𑀻𑀓𑀭𑀡𑁂. 𑀓𑀼𑀚𑁆𑀚𑀢𑀺. 𑀦𑀺𑀓𑀼𑀚𑁆𑀚𑀢𑀺. 𑀉𑀓𑁆𑀓𑀼𑀚𑁆𑀚𑀢𑀺. 𑀧𑀝𑀺𑀓𑀼𑀚𑁆𑀚𑀢𑀺. 𑀦𑀺𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬. 𑀅𑀜𑁆𑀜𑀺𑀲𑁆𑀲𑀸 𑀧𑀸𑀢𑀺𑀬𑀸 𑀧𑀝𑀺𑀓𑀼𑀚𑁆𑀚𑀢𑀺. 𑀅𑀯𑀓𑀼𑀚𑁆𑀚𑁄 𑀦𑀺𑀧𑀚𑁆𑀚𑀳𑀁. 𑀢𑀢𑁆𑀣 𑀓𑀼𑀚𑁆𑀚𑀢𑀺 𑀦𑀺𑀓𑀼𑀚𑁆𑀚𑀢𑀻𑀢𑀺 𑀇𑀫𑀸𑀦𑀺 ‘‘𑀘𑀭𑀢𑀺 𑀯𑀺𑀘𑀭𑀢𑀻’’𑀢𑀺 𑀧𑀤𑀸𑀦𑀺 𑀯𑀺𑀬 𑀲𑀫𑀸𑀦𑀢𑁆𑀣𑀸𑀦𑀺, 𑀅𑀥𑁄𑀫𑀼𑀔𑀁 𑀓𑀭𑁄𑀢𑀻𑀢𑀺 𑀳𑀺 𑀅𑀢𑁆𑀣𑁄. 𑀉𑀓𑁆𑀓𑀼𑀚𑁆𑀚𑀢𑀻𑀢𑀺 𑀉𑀧𑀭𑀺𑀫𑀼𑀔𑀁 𑀓𑀭𑁄𑀢𑀺. 𑀧𑀝𑀺𑀓𑀼𑀚𑁆𑀚𑀢𑀻𑀢𑀺 𑀫𑀼𑀔𑁂 𑀫𑀼𑀔𑀁 𑀞𑀧𑁂𑀢𑀺.

𑀫𑀼𑀚𑁆𑀚 𑀑𑀲𑀻𑀤𑀦𑁂. 𑀫𑀼𑀚𑁆𑀚𑀢𑀺. 𑀦𑀺𑀫𑀼𑀚𑁆𑀚𑀢𑀺. 𑀦𑀺𑀫𑀼𑀕𑁆𑀕𑁄. 𑀉𑀫𑁆𑀫𑀼𑀕𑁆𑀕𑁄.

𑀑𑀧𑀼𑀚𑀺 𑀯𑀺𑀮𑀺𑀫𑁆𑀧𑀦𑁂. 𑀕𑁄𑀫𑀬𑁂𑀦 𑀧𑀣𑀯𑀺𑀁 𑀑𑀧𑀼𑀜𑁆𑀚𑀢𑀺.

𑀚𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀛𑀓𑀸𑀭𑀦𑁆𑀢𑀥𑀸𑀢𑀼

𑀛𑁂 𑀘𑀺𑀦𑁆𑀢𑀸𑀬𑀁. 𑀛𑀸𑀬𑀢𑀺, 𑀦𑀺𑀚𑁆𑀛𑀸𑀬𑀢𑀺, 𑀉𑀧𑀦𑀺𑀚𑁆𑀛𑀸𑀬𑀢𑀺, 𑀉𑀚𑁆𑀛𑀸𑀬𑀢𑀺, 𑀲𑀚𑁆𑀛𑀸𑀬𑀢𑀺. 𑀛𑀸𑀦𑀁, 𑀦𑀺𑀚𑁆𑀛𑀸𑀦𑀁, 𑀉𑀧𑀦𑀺𑀚𑁆𑀛𑀸𑀦𑀁, 𑀉𑀚𑁆𑀛𑀸𑀬𑀦𑀁, 𑀲𑀚𑁆𑀛𑀸𑀬𑀦𑀁. 𑀦𑀺𑀚𑁆𑀛𑀢𑁆𑀢𑀺. 𑀉𑀧𑀚𑁆𑀛𑀸, 𑀉𑀧𑀚𑁆𑀛𑀸𑀬𑁄. 𑀛𑀸𑀬𑀻, 𑀅𑀚𑁆𑀛𑀸𑀬𑀓𑁄.

𑀢𑀢𑁆𑀣 𑀛𑀸𑀬𑀦𑀦𑁆𑀢𑀺 𑀤𑀼𑀯𑀺𑀥𑀁 𑀛𑀸𑀬𑀦𑀁 𑀲𑁄𑀪𑀦𑀫𑀲𑁄𑀪𑀦𑀜𑁆𑀘. 𑀢𑁂𑀲𑀼 𑀲𑁄𑀪𑀦𑀁 ‘‘𑀛𑀸𑀬𑀻 𑀢𑀧𑀢𑀺 𑀩𑁆𑀭𑀸𑀳𑁆𑀫𑀡𑁄. 𑀛𑀸𑀬𑀸𑀫𑀺 ¶ 𑀅𑀓𑀼𑀢𑁄𑀪𑀬𑁄’’𑀢𑀺𑀆𑀤𑀻𑀲𑀼 𑀤𑀝𑁆𑀞𑀩𑁆𑀩𑀁. 𑀅𑀲𑁄𑀪𑀦𑀁 𑀧𑀦 ‘‘𑀢𑀢𑁆𑀣 𑀢𑀢𑁆𑀣 𑀛𑀸𑀬𑀦𑁆𑀢𑁄 𑀦𑀺𑀲𑀻𑀤𑀺. 𑀅𑀥𑁄𑀫𑀼𑀔𑁄 𑀧𑀚𑁆𑀛𑀸𑀬𑀦𑁆𑀢𑁄 𑀦𑀺𑀲𑀻𑀤𑀻’’𑀢𑀺𑀆𑀤𑀻𑀲𑀼 𑀤𑀝𑁆𑀞𑀩𑁆𑀩𑀁. 𑀛𑀸𑀬𑀻𑀢𑀺 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀯𑀸 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀯𑀸 𑀛𑀸𑀬𑀦𑀲𑀻𑀮𑁄 𑀘𑀺𑀦𑁆𑀢𑀦𑀲𑀻𑀮𑁄. 𑀛𑀸𑀬𑀻 𑀛𑀸𑀦𑀯𑀸𑀢𑀺 𑀅𑀢𑁆𑀣𑁄. 𑀅𑀚𑁆𑀛𑀸𑀬𑀓𑁄𑀢𑀺 𑀇𑀤𑀁 ‘‘𑀦 𑀤𑀸𑀦𑀺𑀫𑁂 𑀛𑀸𑀬𑀦𑁆𑀢𑀺, 𑀦 𑀤𑀸𑀦𑀺𑀫𑁂 𑀛𑀸𑀬𑀦𑁆𑀢𑀻𑀢𑀺 𑀔𑁄 𑀯𑀸𑀲𑁂𑀝𑁆𑀞 𑀅𑀚𑁆𑀛𑀸𑀬𑀓𑀸 𑀅𑀚𑁆𑀛𑀸𑀬𑀓𑀸𑀢𑁆𑀯𑁂𑀯 𑀢𑀢𑀺𑀬𑀁 𑀅𑀓𑁆𑀔𑀭𑀁 𑀉𑀧𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺 𑀏𑀯𑀁 𑀧𑀞𑀫𑀓𑀧𑁆𑀧𑀺𑀓𑀓𑀸𑀮𑁂 𑀛𑀸𑀦𑀯𑀺𑀭𑀳𑀺𑀢𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀕𑀭𑀳𑀯𑀘𑀦𑀁 𑀉𑀧𑁆𑀧𑀦𑁆𑀦𑀁, 𑀇𑀤𑀸𑀦𑀺 𑀧𑀦 𑀢𑀁 𑀅𑀚𑁆𑀛𑀸𑀬𑀢𑀻𑀢𑀺 𑀅𑀚𑁆𑀛𑀸𑀬𑀓𑁄, 𑀫𑀦𑁆𑀢𑁂 𑀧𑀭𑀺𑀯𑀢𑁆𑀢𑁂𑀢𑀻𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀧𑀲𑀁𑀲𑀸𑀯𑀘𑀦𑀁 𑀓𑀢𑁆𑀯𑀸 𑀯𑁄𑀳𑀭𑀦𑁆𑀢𑀻𑀢𑀺. 𑀅𑀬𑀁 𑀧𑀦𑀢𑁆𑀣𑁄 ‘‘𑀅𑀥𑀺𑀧𑀼𑀩𑁆𑀩𑀲𑁆𑀲 𑀇 𑀅𑀚𑁆𑀛𑀬𑀦𑁂’’𑀢𑀺 𑀥𑀸𑀢𑀼𑀲𑁆𑀲 𑀯𑀲𑁂𑀦 𑀕𑀳𑁂𑀢𑀩𑁆𑀩𑁄. 𑀏𑀯𑀁 𑀅𑀥𑀺𑀧𑀼𑀩𑁆𑀩𑀲𑁆𑀲 𑀇𑀥𑀸𑀢𑀼𑀲𑁆𑀲 𑀯𑀲𑁂𑀦 𑀇𑀫𑀲𑁆𑀲 𑀥𑀸𑀢𑀼𑀲𑁆𑀲 𑀅𑀢𑁆𑀣𑀧𑀭𑀺𑀯𑀢𑁆𑀢𑀦𑀁 𑀪𑀯𑀢𑀺. 𑀬𑀁 𑀲𑀦𑁆𑀥𑀸𑀬 ‘‘𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄’’𑀢𑀺 𑀯𑀼𑀢𑁆𑀢𑀁.

𑀛𑁂 𑀤𑀺𑀢𑁆𑀢𑀺𑀬𑀁. 𑀤𑀻𑀧𑁄 𑀛𑀸𑀬𑀢𑀺, 𑀤𑀸𑀭𑀽𑀦𑀺 𑀛𑀸𑀬𑀦𑁆𑀢𑀺. 𑀏𑀢𑁆𑀣 𑀛𑀸𑀬𑀢𑀻𑀢𑀺 𑀚𑀮𑀢𑀺. 𑀛𑀸𑀬𑀦𑀚𑀮𑀦𑀲𑀤𑁆𑀤𑀸 𑀳𑀺 𑀏𑀓𑀢𑁆𑀣𑀸.

𑀚𑀚𑁆𑀛 𑀧𑀭𑀺𑀪𑀸𑀲𑀦𑀢𑀚𑁆𑀚𑀦𑁂𑀲𑀼. 𑀚𑀚𑁆𑀛𑀢𑀺.

𑀉𑀚𑁆𑀛 𑀉𑀲𑁆𑀲𑀕𑁆𑀕𑁂. 𑀉𑀲𑁆𑀲𑀕𑁆𑀕𑁄 𑀙𑀟𑁆𑀟𑀦𑀁. 𑀉𑀚𑁆𑀛𑀢𑀺. 𑀉𑀚𑁆𑀛𑀺𑀢𑀁.

𑀛𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀜𑀓𑀸𑀭𑀦𑁆𑀢𑀥𑀸𑀢𑀼

𑀜𑀸 𑀅𑀯𑀩𑁄𑀥𑀦𑁂. ‘‘𑀜𑀸𑀢𑀺, 𑀜𑀦𑁆𑀢𑀺, 𑀜𑀸𑀲𑀺. 𑀜𑀸𑀢𑀼, 𑀜𑀦𑁆𑀢𑀼. 𑀜𑁂𑀬𑁆𑀬, 𑀜𑁂𑀬𑁆𑀬𑀼’’𑀦𑁆𑀢𑀺𑀆𑀤𑀻𑀦𑀺 𑀬𑀣𑀸𑀧𑀸𑀯𑀘𑀦𑀁 𑀕𑀳𑁂𑀢𑀩𑁆𑀩𑀸𑀦𑀺. 𑀜𑀸𑀢𑀺, 𑀜𑀸𑀢𑀓𑁄, 𑀅𑀜𑁆𑀜𑁄, 𑀜𑀢𑁆𑀢𑀁, 𑀜𑀢𑁆𑀢𑀺, 𑀧𑀜𑁆𑀜𑀢𑁆𑀢𑀺, 𑀯𑀺𑀜𑁆𑀜𑀢𑁆𑀢𑀺, 𑀲𑀜𑁆𑀜𑀢𑁆𑀢𑀺, 𑀲𑀜𑁆𑀜𑀸, 𑀲𑀜𑁆𑀜𑀸𑀡𑀁, 𑀧𑀜𑁆𑀜𑀸, 𑀧𑀜𑁆𑀜𑀸𑀡𑀁, 𑀜𑀸𑀡𑀁, 𑀯𑀺𑀜𑁆𑀜𑀸𑀡𑀁.

𑀢𑀢𑁆𑀣 ¶ 𑀜𑀸𑀢𑀻𑀢𑀺 𑀚𑀸𑀦𑀸𑀢𑀺. 𑀧𑀼𑀦 𑀜𑀸𑀢𑀻𑀢𑀺 𑀩𑀦𑁆𑀥𑀼. 𑀲𑁄 𑀳𑀺 ‘‘𑀅𑀬𑀁 𑀅𑀫𑁆𑀳𑀸𑀓’’𑀦𑁆𑀢𑀺 𑀜𑀸𑀢𑀩𑁆𑀩𑀝𑁆𑀞𑁂𑀦 𑀜𑀸𑀢𑀻𑀢𑀺. 𑀏𑀯𑀁 𑀜𑀸𑀢𑀓𑁄. 𑀅𑀜𑁆𑀜𑁄𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀬𑁄 𑀅𑀢𑁆𑀣𑁂 𑀦 𑀜𑀸𑀢𑀺 𑀦 𑀚𑀸𑀦𑀸𑀢𑀻𑀢𑀺 𑀅𑀜𑁆𑀜𑁄, 𑀅𑀯𑀺𑀤𑁆𑀯𑀸 𑀩𑀸𑀮𑁄𑀢𑀺 𑀅𑀢𑁆𑀣𑁄. 𑀜𑀢𑁆𑀢𑀦𑁆𑀢𑀺 𑀚𑀸𑀦𑀦𑀪𑀸𑀯𑁄. ‘‘𑀬𑀸𑀯𑀤𑁂𑀯 𑀅𑀦𑀢𑁆𑀣𑀸𑀬, 𑀜𑀢𑁆𑀢𑀁 𑀩𑀸𑀮𑀲𑁆𑀲 𑀚𑀸𑀬𑀢𑀻’’𑀢𑀺 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. 𑀲𑀜𑁆𑀜𑀸𑀡𑀦𑁆𑀢𑀺 𑀘𑀺𑀳𑀦𑀁. 𑀓𑀸𑀭𑀺𑀢𑁂 ‘‘𑀜𑀸𑀧𑁂𑀢𑀺 𑀲𑀜𑁆𑀜𑀸𑀧𑁂𑀢𑀺 𑀯𑀺𑀜𑁆𑀜𑀸𑀧𑀬𑀢𑀻’’𑀢𑀺𑀆𑀤𑀻𑀦𑀺 𑀪𑀯𑀦𑁆𑀢𑀺. 𑀬𑀲𑁆𑀫𑀸 𑀧𑀦 ‘‘𑀅𑀜𑁆𑀜𑀸𑀢𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀅𑀢𑁆𑀢𑀢𑁆𑀣𑀁 𑀯𑀸 𑀧𑀭𑀢𑁆𑀣𑀁 𑀯𑀸 𑀜𑀲𑁆𑀲𑀢𑀺. 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀁. 𑀏𑀓𑀘𑁆𑀘𑁂 𑀦𑀩𑁆𑀪𑀜𑁆𑀜𑀁𑀲𑀼, 𑀏𑀓𑀘𑁆𑀘𑁂 𑀅𑀩𑁆𑀪𑀜𑁆𑀜𑀁𑀲𑀽’’𑀢𑀺 𑀧𑀸𑀴𑀺𑀬𑁄 𑀤𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀜𑀸𑀢𑀻𑀢𑀺𑀆𑀤𑀻𑀦𑀺 𑀆𑀔𑁆𑀬𑀸𑀢𑀺𑀓𑀧𑀤𑀸𑀦𑀺 𑀤𑀺𑀝𑁆𑀞𑀸𑀦𑀺𑀬𑁂𑀯 𑀳𑁄𑀦𑁆𑀢𑀺 𑀦𑀬𑀯𑀲𑁂𑀦. 𑀢𑀣𑀸 𑀳𑀺 𑀅𑀜𑁆𑀜𑀸𑀢𑀻𑀢𑀺 𑀏𑀢𑁆𑀣 𑀆𑀇𑀢𑀺 𑀉𑀧𑀲𑀕𑁆𑀕𑁄, 𑀲𑁄 𑀧𑀭𑀲𑁆𑀲𑀓𑁆𑀔𑀭𑀲𑁆𑀲 𑀲𑀜𑁆𑀜𑁄𑀕𑀼𑀘𑁆𑀘𑀸𑀭𑀡𑀺𑀘𑁆𑀙𑀸𑀬 𑀭𑀲𑁆𑀲𑀁 𑀓𑀢𑁆𑀯𑀸 𑀦𑀺𑀤𑁆𑀤𑀺𑀝𑁆𑀞𑁄. 𑀜𑀸𑀢𑀻𑀢𑀺 𑀲𑀸𑀲𑀦𑁂 𑀆𑀔𑁆𑀬𑀸𑀢𑀺𑀓𑀧𑀤𑀁 𑀤𑀺𑀝𑁆𑀞𑀁, 𑀢𑀲𑁆𑀫𑀸𑀬𑁂𑀯 ‘‘𑀜𑀸𑀢𑀺, 𑀜𑀦𑁆𑀢𑀺. 𑀜𑀸𑀲𑀻’’𑀢𑀺𑀆𑀤𑀺𑀦𑀸 𑀧𑀤𑀫𑀸𑀮𑀸𑀓𑀭𑀡𑁂 𑀦𑀢𑁆𑀣𑁂𑀯 𑀤𑁄𑀲𑁄.

𑀜𑀸 𑀫𑀸𑀭𑀡𑀢𑁄𑀲𑀦𑀦𑀺𑀲𑀸𑀦𑁂𑀲𑀼. 𑀫𑀸𑀭𑀡𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀭𑀡𑀁. 𑀢𑁄𑀲𑀦𑀁 𑀢𑀼𑀝𑁆𑀞𑀺. 𑀦𑀺𑀲𑀸𑀦𑀁 𑀢𑀺𑀓𑁆𑀔𑀢𑀸. 𑀜𑀢𑁆𑀢𑀺. 𑀫𑀦𑀼𑀜𑁆𑀜𑀁. 𑀧𑀜𑁆𑀜𑀢𑁆𑀢𑀺.

𑀏𑀢𑁆𑀣 𑀜𑀢𑁆𑀢𑀻𑀢𑀺 𑀫𑀸𑀭𑁂𑀢𑀻𑀢𑀺 𑀯𑀸 𑀢𑁄𑀲𑁂𑀢𑀻𑀢𑀺 𑀯𑀸 𑀦𑀺𑀲𑁂𑀢𑀻𑀢𑀺 𑀯𑀸 𑀅𑀢𑁆𑀣𑁄. 𑀅𑀬𑀜𑁆𑀘 𑀜𑀢𑁆𑀢𑀺𑀲𑀤𑁆𑀤𑁄 ‘‘𑀯𑀢𑁆𑀢𑀺 𑀏𑀢𑀸𑀬𑀸𑀢𑀺 𑀯𑀸𑀘𑀸’’𑀢𑀺 𑀏𑀢𑁆𑀣 𑀯𑀢𑁆𑀢𑀺𑀲𑀤𑁆𑀤𑁄 𑀯𑀺𑀬 𑀆𑀔𑁆𑀬𑀸𑀢𑀺𑀓𑀧𑀤𑀦𑁆𑀢𑀺 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀆𑀤𑀢𑁆𑀢𑁂𑀢𑀺 𑀏𑀢𑁆𑀣 𑀯𑀺𑀪𑀢𑁆𑀢𑀺𑀪𑀽𑀢𑀲𑁆𑀲 𑀢𑁂𑀲𑀤𑁆𑀤𑀲𑁆𑀲 𑀯𑀺𑀬 𑀯𑀺𑀪𑀢𑁆𑀢𑀺𑀪𑀽𑀢𑀲𑁆𑀲 𑀢𑀺𑀲𑀤𑁆𑀤𑀲𑁆𑀲 𑀲𑀜𑁆𑀜𑁄𑀕𑀪𑀸𑀯𑁄 𑀘 𑀥𑀸𑀢𑀼𑀅𑀦𑁆𑀢𑀲𑁆𑀲𑀭𑀲𑁆𑀲 𑀭𑀲𑁆𑀲𑀢𑁆𑀢𑀜𑁆𑀘. 𑀫𑀦𑀼𑀜𑁆𑀜𑀦𑁆𑀢𑀺 𑀫𑀦𑀁 𑀆𑀪𑀼𑀲𑁄 𑀜𑁂𑀢𑀺 𑀢𑁄𑀲𑁂𑀢𑀻𑀢𑀺 𑀫𑀦𑀼𑀜𑁆𑀜𑀁. 𑀅𑀬𑀫𑀢𑁆𑀣𑁄 𑀫𑀦𑀲𑀤𑁆𑀤𑀽𑀧𑀧𑀤𑀲𑁆𑀲 𑀆𑀧𑀼𑀩𑁆𑀩𑀲𑁆𑀲𑀺𑀫𑀲𑁆𑀲 𑀜𑀸𑀥𑀸𑀢𑀼𑀲𑁆𑀲 𑀯𑀲𑁂𑀦 𑀤𑀝𑁆𑀞𑀩𑁆𑀩𑁄. 𑀧𑀜𑁆𑀜𑀢𑁆𑀢𑀻𑀢𑀺 𑀦𑀸𑀦𑀧𑁆𑀧𑀓𑀸𑀭𑀢𑁄 𑀧𑀯𑀢𑁆𑀢𑀺𑀦𑀺𑀯𑀸𑀭𑀡𑁂𑀦 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀜𑀢𑁆𑀢𑀺 ¶ 𑀫𑀸𑀭𑀡𑀁 𑀧𑀜𑁆𑀜𑀢𑁆𑀢𑀺. 𑀅𑀣 𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀸𑀦𑀁 𑀥𑀫𑁆𑀫𑀤𑁂𑀲𑀦𑀸𑀬 𑀘𑀺𑀢𑁆𑀢𑁂 𑀅𑀦𑁂𑀓𑀯𑀺𑀥𑁂𑀦 𑀲𑁄𑀫𑀦𑀲𑁆𑀲𑀼𑀧𑁆𑀧𑀸𑀤𑀦𑀁. 𑀅𑀢𑀺𑀔𑀺𑀡𑀩𑀼𑀤𑁆𑀥𑀻𑀦𑀁 𑀅𑀦𑁂𑀓𑀯𑀺𑀥𑁂𑀦 𑀜𑀸𑀡𑀢𑀺𑀔𑀺𑀡𑀓𑀭𑀡𑀜𑁆𑀘 𑀧𑀜𑁆𑀜𑀢𑁆𑀢𑀺 𑀦𑀸𑀫, 𑀢𑀣𑀸 𑀲𑁄𑀢𑀽𑀦𑀁 𑀘𑀺𑀢𑁆𑀢𑀢𑁄𑀲𑀦𑁂𑀦 𑀘𑀺𑀢𑁆𑀢𑀦𑀺𑀲𑀸𑀦𑁂𑀦 𑀘 𑀧𑀜𑁆𑀜𑀸𑀧𑀦𑀁 𑀧𑀜𑁆𑀜𑀢𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀢𑀺 𑀪𑀽𑀯𑀸𑀤𑀺𑀕𑀡𑁂 𑀘𑀯𑀕𑁆𑀕𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺

𑀲𑀫𑀢𑁆𑀢𑀸𑀦𑀺.

𑀝𑀓𑀸𑀭𑀦𑁆𑀢𑀥𑀸𑀢𑀼

𑀇𑀤𑀸𑀦𑀺 𑀝𑀯𑀕𑁆𑀕𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺 𑀯𑀼𑀘𑁆𑀘𑀦𑁆𑀢𑁂 𑁋

𑀲𑁄𑀝𑀼 𑀕𑀩𑁆𑀩𑁂. 𑀕𑀩𑁆𑀩𑀁 𑀤𑀩𑁆𑀩𑀦𑀁. 𑀲𑁄𑀝𑀢𑀺.

𑀬𑁄𑀝𑀼 𑀲𑀫𑁆𑀩𑀦𑁆𑀥𑁂. 𑀬𑁄𑀝𑀢𑀺.

𑀫𑁂𑀝𑀼 𑀫𑀺𑀮𑁂𑀝𑀼 𑀉𑀫𑁆𑀫𑀸𑀤𑁂. 𑀫𑁂𑀝𑀢𑀺. 𑀫𑀺𑀮𑁂𑀝𑀢𑀺.

𑀓𑀝 𑀯𑀲𑁆𑀲𑀸𑀯𑀭𑀡𑁂𑀲𑀼. 𑀓𑀝𑀢𑀺.

𑀲𑀝 𑀧𑀭𑀺𑀪𑀸𑀲𑀦𑁂. 𑀲𑀝𑀢𑀺.

𑀮𑀝 𑀩𑀸𑀮𑁆𑀬𑁂 𑀘. 𑀧𑀼𑀩𑁆𑀩𑀸𑀧𑁂𑀓𑁆𑀔𑀸𑀬 𑀘𑀓𑀸𑀭𑁄. 𑀮𑀝𑀢𑀺. 𑀮𑀸𑀝𑁄.

𑀲𑀝 𑀭𑀼𑀚𑀸𑀯𑀺𑀲𑀭𑀡𑀕𑀢𑁆𑀬𑀸𑀯𑀲𑀸𑀦𑁂𑀲𑀼. 𑀭𑀼𑀚𑀸 𑀧𑀻𑀴𑀸. 𑀯𑀺𑀲𑀭𑀡𑀁 𑀯𑀺𑀧𑁆𑀨𑀭𑀡𑀁. 𑀕𑀢𑁆𑀬𑀸𑀯𑀲𑀸𑀦𑀁 𑀕𑀢𑀺𑀬𑀸 𑀅𑀯𑀲𑀸𑀦𑀁 𑀑𑀲𑀸𑀦𑀁 𑀅𑀪𑀸𑀯𑀓𑀭𑀡𑀁, 𑀦𑀺𑀲𑀻𑀤𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀝𑀢𑀺. 𑀲𑀸𑀝𑁄 𑀯𑀼𑀘𑁆𑀘𑀢𑀺 𑀲𑀸𑀝𑀓𑁄.

𑀯𑀝 𑀯𑁂𑀥𑀦𑁂. 𑀯𑀝𑀢𑀺. 𑀯𑀝𑁄. 𑀯𑀸𑀝𑁄.

𑀔𑀺𑀝 𑀉𑀢𑁆𑀢𑀸𑀲𑀦𑁂. 𑀔𑁂𑀝𑀢𑀺, 𑀆𑀔𑁂𑀝𑀓𑁄, 𑀔𑁂𑀝𑁄, 𑀉𑀓𑁆𑀔𑁂𑀝𑀺𑀢𑁄, 𑀲𑀫𑀼𑀓𑁆𑀔𑁂𑀝𑀺𑀢𑁄.

𑀲𑀺𑀝 𑀅𑀦𑀸𑀤𑀭𑁂. 𑀲𑁂𑀝𑀢𑀺.

𑀚𑀝 ¶ 𑀖𑀝 𑀲𑀗𑁆𑀖𑀸𑀢𑁂. 𑀚𑀝𑀢𑀺. 𑀚𑀝𑀸, 𑀚𑀝𑀺𑀮𑁄, 𑀚𑀝𑀻. 𑀅𑀦𑁆𑀢𑁄𑀚𑀝𑀸 𑀩𑀳𑀺𑀚𑀝𑀸, 𑀚𑀝𑀸𑀬 𑀚𑀝𑀺𑀢𑀸 𑀧𑀚𑀸. 𑀓𑀸𑀭𑀺𑀢𑁂 ‘‘𑀲𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝𑀁. 𑀅𑀭𑀳𑀢𑁆𑀢𑀫𑀕𑁆𑀕𑀓𑁆𑀔𑀡𑁂 𑀯𑀺𑀚𑀝𑁂𑀢𑀺 𑀦𑀸𑀫𑀸’’𑀢𑀺 𑀧𑀬𑁄𑀕𑁄.

𑀪𑀝 𑀪𑀢𑁆𑀢𑀺𑀬𑀁. 𑀪𑀝𑀢𑀺. 𑀪𑀝𑁄. 𑀯𑁂𑀢𑀦𑀁 𑀪𑀝𑀓𑁄 𑀬𑀣𑀸.

𑀢𑀝 𑀉𑀲𑁆𑀲𑀬𑁂. 𑀉𑀲𑁆𑀲𑀬𑁄 𑀆𑀭𑁄𑀳𑁄 𑀉𑀩𑁆𑀩𑁂𑀥𑁄. 𑀢𑀝𑀢𑀺. 𑀢𑀝𑁄, 𑀕𑀺𑀭𑀺𑀢𑀝𑁄, 𑀦𑀤𑀻𑀢𑀝𑁄, 𑀢𑀝𑀻, 𑀢𑀝𑀁.

𑀔𑀝 𑀓𑀁𑀲𑁂. 𑀔𑀝𑀢𑀺. 𑀔𑀝𑁄.

𑀦𑀝 𑀦𑀢𑀺𑀬𑀁. 𑀦𑀝𑀢𑀺. 𑀦𑀝𑁄, 𑀦𑀸𑀝𑀓𑀁.

𑀧𑀺𑀝 𑀲𑀤𑁆𑀤𑀲𑀗𑁆𑀖𑀸𑀝𑁂𑀲𑀼. 𑀧𑁂𑀝𑀢𑀺. 𑀧𑁂𑀝𑀓𑁄, 𑀧𑀺𑀝𑀓𑀁. 𑀧𑀺𑀝𑀓𑀲𑀤𑁆𑀤𑁄 ‘‘𑀫𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦𑀸’’𑀢𑀺𑀆𑀤𑀻𑀲𑀼 𑀧𑀭𑀺𑀬𑀢𑁆𑀢𑀺𑀬𑀁 𑀤𑀺𑀲𑁆𑀲𑀢𑀺. ‘‘𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀓𑀼𑀤𑀸𑀮𑀧𑀺𑀝𑀓𑀁 𑀆𑀤𑀸𑀬𑀸’’𑀢𑀺𑀆𑀤𑀻𑀲𑀼 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀪𑀸𑀚𑀦𑁂.

𑀳𑀝 𑀤𑀺𑀢𑁆𑀢𑀺𑀬𑀁. 𑀳𑀝𑀢𑀺. 𑀳𑀸𑀝𑀓𑀁, 𑀳𑀝𑀓𑀁. 𑀬𑀁 𑀚𑀸𑀢𑀭𑀽𑀧𑀁 𑀳𑀝𑀓𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀲𑀝 𑀅𑀯𑀬𑀯𑁂. 𑀲𑀝𑀢𑀺.

𑀮𑀼𑀝 𑀯𑀺𑀮𑁄𑀞𑀦𑁂. 𑀮𑁄𑀝𑀢𑀺.

𑀘𑀺𑀝 𑀧𑁂𑀲𑀦𑁂. 𑀘𑁂𑀝𑀢𑀺. 𑀘𑁂𑀝𑀓𑁄.

𑀯𑀺𑀝 𑀲𑀤𑁆𑀤𑁂. 𑀯𑁂𑀝𑀢𑀺. 𑀯𑁂𑀝𑀓𑁄.

𑀅𑀝 𑀧𑀝 𑀇𑀝 𑀓𑀺𑀝 𑀓𑀝 𑀕𑀢𑀺𑀬𑀁. 𑀅𑀝𑀢𑀺. 𑀧𑀝𑀢𑀺. 𑀏𑀝𑀢𑀺. 𑀓𑁂𑀝𑀢𑀺. 𑀓𑀝𑀢𑀺. 𑀧𑀝𑁄 𑀇𑀘𑁆𑀘𑁂𑀯 𑀦𑀸𑀫𑀺𑀓𑀧𑀤𑀁 𑀤𑀺𑀝𑁆𑀞𑀁. 𑀧𑀝𑀢𑀺 𑀚𑀺𑀡𑁆𑀡𑀪𑀸𑀯𑀁 ¶ 𑀕𑀘𑁆𑀙𑀢𑀻𑀢𑀺 𑀧𑀝𑁄. 𑀧𑀝𑁄𑀢𑀺 𑀯𑀢𑁆𑀣𑀁. 𑀯𑀢𑁆𑀣𑀲𑁆𑀲 𑀳𑀺 𑀅𑀦𑁂𑀓𑀸𑀦𑀺 𑀦𑀸𑀫𑀸𑀦𑀺 𑁋

𑀧𑀝𑁄 𑀘𑁄𑀴𑁄 𑀲𑀸𑀝𑀓𑁄 𑀘, 𑀯𑀸𑀲𑁄 𑀯𑀲𑀦𑀫𑀁𑀲𑀼𑀓𑀁;

𑀤𑀼𑀲𑁆𑀲𑀫𑀘𑁆𑀙𑀸𑀤𑀦𑀁 𑀯𑀢𑁆𑀣𑀁, 𑀘𑁂𑀮𑀁 𑀯𑀲𑀦𑀺 𑀅𑀫𑁆𑀩𑀭𑀁.

𑀫𑀼𑀝 𑀧𑀫𑀤𑁆𑀤𑀦𑁂. 𑀫𑁄𑀝𑀢𑀺.

𑀘𑀼𑀝 𑀅𑀧𑁆𑀧𑀻𑀪𑀸𑀯𑁂. 𑀘𑁄𑀝𑀢𑀺.

𑀯𑀝𑀺 𑀯𑀺𑀪𑀸𑀚𑀦𑁂. 𑀯𑀝𑀢𑀺. 𑀯𑀡𑁆𑀝𑁄.

𑀭𑀼𑀝𑀺 𑀮𑀼𑀝𑀺 𑀣𑁂𑀬𑁆𑀬𑁂. 𑀭𑀼𑀡𑁆𑀝𑀢𑀺. 𑀮𑀼𑀡𑁆𑀝𑀢𑀺. 𑀭𑀼𑀡𑁆𑀝𑀓𑁄. 𑀮𑀼𑀡𑁆𑀝𑀓𑁄.

𑀨𑀼𑀝 𑀯𑀺𑀲𑀭𑀡𑁂 𑀨𑁄𑀝𑀢𑀺. 𑀨𑁄𑀝𑁄.

𑀘𑁂𑀝 𑀘𑁂𑀝𑀸𑀬𑀁. 𑀘𑁂𑀝𑀢𑀺. 𑀘𑁂𑀝𑀓𑁄.

𑀖𑀼𑀝 𑀧𑀭𑀺𑀯𑀢𑁆𑀢𑀦𑁂. 𑀖𑁄𑀝𑀢𑀺.

𑀭𑀼𑀝 𑀮𑀼𑀝 𑀧𑀝𑀺𑀖𑀸𑀢𑁂. 𑀭𑁄𑀝𑀢𑀺. 𑀮𑁄𑀝𑀢𑀺.

𑀖𑀝 𑀘𑁂𑀢𑀸𑀬𑀁. 𑀖𑀝𑀢𑀺. 𑀖𑀝𑁄. 𑀖𑀝𑁄 𑀯𑀼𑀘𑁆𑀘𑀢𑀺 𑀓𑀼𑀫𑁆𑀪𑁄. 𑀇𑀫𑀸𑀦𑀺 𑀢𑀤𑀪𑀺𑀥𑀸𑀦𑀸𑀦𑀺 𑁋

𑀖𑀝𑁄 𑀓𑀼𑀫𑁆𑀪𑁄 𑀖𑀝𑀻 𑀓𑀼𑀫𑁆𑀪𑀻, 𑀢𑀼𑀡𑁆𑀟𑀺𑀓𑀺𑀭𑁄 𑀢𑀼 𑀉𑀓𑁆𑀔𑀮𑀻;

𑀫𑀳𑀦𑁆𑀢𑀪𑀸𑀚𑀦𑀁 𑀘𑀸𑀝𑀺, 𑀅𑀢𑀺𑀔𑀼𑀤𑁆𑀤𑀁 𑀓𑀼𑀝𑁆𑀝𑀁 𑀪𑀯𑁂;

𑀘𑀝 𑀪𑀝 𑀧𑀭𑀺𑀪𑀸𑀲𑀦𑁂 𑀤𑁂𑀝 𑀘. 𑀘𑀝𑀢𑀺. 𑀪𑀝𑀢𑀺. 𑀤𑁂𑀝𑀢𑀺.

𑀓𑀼𑀝 𑀓𑁄𑀝𑀺𑀮𑁆𑀮𑁂. 𑀓𑀼𑀝𑀢𑀺. 𑀧𑀝𑀺𑀓𑀼𑀝𑀢𑀺.

𑀧𑀼𑀝 𑀲𑀁𑀓𑀺𑀮𑁂𑀲𑀦𑁂. 𑀧𑀼𑀝𑀢𑀺.

𑀘𑀼𑀝 𑀙𑀼𑀝 𑀓𑀼𑀝 𑀙𑁂𑀤𑀦𑁂. 𑀘𑀼𑀝𑀢𑀺. 𑀙𑀼𑀝𑀢𑀺. 𑀓𑀼𑀝𑀢𑀺.

𑀨𑀼𑀝 𑀯𑀺𑀓𑀲𑀦𑁂. 𑀨𑀼𑀝𑀢𑀺.

𑀫𑀼𑀝 𑀅𑀕𑁆𑀕𑀺𑀲𑀤𑁆𑀤𑀧𑀓𑁆𑀔𑁂𑀧𑀫𑀤𑁆𑀤𑀦𑁂𑀲𑀼. 𑀫𑀼𑀝𑀢𑀺.

𑀢𑀼𑀝 𑀓𑀮𑀳𑀓𑀫𑁆𑀫𑀦𑀺. 𑀢𑀼𑀝𑀢𑀺.

𑀖𑀼𑀝 𑀧𑀝𑀺𑀖𑀸𑀢𑁂. 𑀖𑀼𑀝𑀢𑀺. 𑀖𑁄𑀝𑀓𑁄.

𑀝𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀞𑀓𑀸𑀭𑀦𑁆𑀢𑀥𑀸𑀢𑀼

𑀞𑀸 ¶ 𑀕𑀢𑀺𑀦𑀺𑀯𑀢𑁆𑀢𑀺𑀬𑀁. 𑀕𑀢𑀺𑀦𑀺𑀯𑀢𑁆𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀕𑀫𑀦𑀲𑁆𑀲𑀼𑀧𑀘𑁆𑀙𑁂𑀤𑁄. 𑀞𑀸𑀢𑀺, 𑀞𑀦𑁆𑀢𑀺. 𑀢𑀺𑀝𑁆𑀞𑀢𑀺. 𑀧𑀢𑀺𑀝𑁆𑀞𑀸𑀢𑀺. 𑀅𑀥𑀺𑀝𑁆𑀞𑀸𑀢𑀺. 𑀅𑀥𑀺𑀝𑁆𑀞𑁂𑀢𑀺. 𑀲𑀡𑁆𑀞𑀸𑀢𑀺. 𑀲𑀡𑁆𑀞𑀳𑀢𑀺. 𑀅𑀥𑀺𑀝𑁆𑀞𑀳𑀢𑀺. 𑀉𑀧𑀝𑁆𑀞𑀳𑀢𑀺. 𑀞𑀸𑀢𑀼. 𑀢𑀺𑀝𑁆𑀞𑀢𑀼. 𑀢𑀺𑀝𑁆𑀞𑁂𑀬𑁆𑀬. 𑀅𑀝𑁆𑀞, 𑀅𑀝𑁆𑀞𑀼. 𑀅𑀝𑁆𑀞𑀸, 𑀅𑀝𑁆𑀞𑀽, 𑀅𑀝𑁆𑀞𑀸𑀲𑀺, 𑀅𑀝𑁆𑀞𑀁𑀲𑀼. 𑀬𑀸𑀯𑀲𑁆𑀲 𑀓𑀸𑀬𑁄 𑀞𑀲𑁆𑀲𑀢𑀺. 𑀢𑀺𑀝𑁆𑀞𑀺𑀲𑁆𑀲𑀢𑀺. 𑀉𑀧𑀲𑁆𑀲𑀼𑀢𑀺 𑀢𑀺𑀝𑁆𑀞𑀺𑀲𑁆𑀲𑀣. 𑀅𑀝𑁆𑀞𑀺𑀲𑁆𑀲𑀸, 𑀅𑀝𑁆𑀞𑀺𑀲𑁆𑀲𑀁𑀲𑀼. 𑀅𑀢𑀺𑀝𑁆𑀞𑀺𑀲𑁆𑀲𑀸, 𑀅𑀢𑀺𑀝𑁆𑀞𑀺𑀲𑁆𑀲𑀁𑀲𑀼. 𑀞𑀸𑀢𑀼𑀁, 𑀉𑀧𑀝𑁆𑀞𑀸𑀢𑀼𑀁. 𑀉𑀧𑀝𑁆𑀞𑀳𑀺𑀢𑀼𑀁. 𑀅𑀥𑀺𑀝𑁆𑀞𑀸𑀢𑀼𑀁. 𑀅𑀥𑀺𑀝𑁆𑀞𑀳𑀺𑀢𑀼𑀁. 𑀞𑀢𑁆𑀯𑀸, 𑀅𑀥𑀺𑀝𑁆𑀞𑀺𑀢𑁆𑀯𑀸. 𑀉𑀧𑀝𑁆𑀞𑀳𑀺𑀢𑁆𑀯𑀸, 𑀅𑀥𑀺𑀝𑁆𑀞𑀳𑀺𑀢𑁆𑀯𑀸. 𑀞𑀸𑀦𑀁, 𑀞𑀺𑀢𑀺, 𑀲𑀡𑁆𑀞𑀺𑀢𑀺, 𑀅𑀯𑀝𑁆𑀞𑀺𑀢𑀺. 𑀲𑀡𑁆𑀞𑀸𑀦𑀁, 𑀧𑀝𑁆𑀞𑀸𑀦𑀁. 𑀉𑀧𑀝𑁆𑀞𑀸𑀓𑁄, 𑀞𑀺𑀢𑁄. 𑀧𑀩𑁆𑀩𑀢𑀝𑁆𑀞𑁄 𑀪𑀽𑀫𑀝𑁆𑀞𑁄. 𑀉𑀧𑀝𑁆𑀞𑀳𑀁 𑀇𑀘𑁆𑀘𑀸𑀤𑀻𑀦𑀺.

𑀢𑀢𑁆𑀣 𑀞𑀸𑀦𑀲𑀤𑁆𑀤𑁄 𑀇𑀲𑁆𑀲𑀭𑀺𑀬𑀞𑀺𑀢𑀺𑀔𑀡𑀓𑀸𑀭𑀡𑁂𑀲𑀼 𑀤𑀺𑀲𑁆𑀲𑀢𑀺. ‘‘𑀓𑀺𑀁 𑀧𑀦𑀸𑀬𑀲𑁆𑀫𑀸 𑀤𑁂𑀯𑀸𑀦𑀫𑀺𑀦𑁆𑀤𑁄 𑀓𑀫𑁆𑀫𑀁 𑀓𑀢𑁆𑀯𑀸 𑀇𑀫𑀁 𑀞𑀸𑀦𑀁 𑀧𑀢𑁆𑀢𑁄’’𑀢𑀺𑀆𑀤𑀻𑀲𑀼 𑀳𑀺 𑀇𑀲𑁆𑀲𑀭𑀺𑀬𑁂 𑀤𑀺𑀲𑁆𑀲𑀢𑀺. ‘‘𑀞𑀸𑀦𑀓𑀼𑀲𑀮𑁄 𑀳𑁄𑀢𑀺 𑀅𑀓𑁆𑀔𑀡𑀯𑁂𑀥𑀻’’𑀢𑀺𑀆𑀤𑀻𑀲𑀼 𑀞𑀺𑀢𑀺𑀬𑀁. ‘‘𑀞𑀸𑀦𑀲𑁄𑀧𑁂𑀢𑀁 𑀢𑀣𑀸𑀕𑀢𑀁 𑀧𑀝𑀺𑀪𑀸𑀢𑀻’’𑀢𑀺𑀆𑀤𑀻𑀲𑀼 𑀔𑀡𑁂. ‘‘𑀞𑀸𑀦𑀜𑁆𑀘 𑀞𑀸𑀦𑀲𑁄 𑀜𑀢𑁆𑀯𑀸 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀲𑁄’’𑀢𑀺𑀆𑀤𑀻𑀲𑀼 𑀓𑀸𑀭𑀡𑁂. 𑀓𑀸𑀭𑀡𑀜𑁆𑀳𑀺 𑀬𑀲𑁆𑀫𑀸 𑀢𑀢𑁆𑀣 𑀨𑀮𑀁 𑀢𑀺𑀝𑁆𑀞𑀢𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀪𑀸𑀯𑁂𑀦, 𑀢𑀲𑁆𑀫𑀸 𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀇𑀲𑁆𑀲𑀭𑀺𑀬𑁂 𑀞𑀺𑀢𑀺𑀬𑀜𑁆𑀘, 𑀔𑀡𑀲𑁆𑀫𑀺𑀫𑁆𑀧𑀺 𑀘 𑀓𑀸𑀭𑀡𑁂;

𑀘𑀢𑀽𑀲𑁆𑀯𑀢𑁆𑀣𑁂𑀲𑀼 𑀏𑀢𑁂𑀲𑀼, 𑀞𑀸𑀦𑀲𑀤𑁆𑀤𑁄 𑀧𑀯𑀢𑁆𑀢𑀢𑀻𑀢𑀺.

𑀞𑁂 𑀲𑀤𑁆𑀤𑀲𑀗𑁆𑀓𑀸𑀢𑁂𑀲𑀼. 𑀞𑀻𑀬𑀢𑀺.

𑀞𑁂 𑀯𑁂𑀞𑀦𑁂. 𑀞𑀸𑀬𑀢𑀺.

𑀧𑀞 ¶ 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁. 𑀥𑀫𑁆𑀫𑀁 𑀧𑀞𑀢𑀺. 𑀧𑀸𑀞𑁄, 𑀦𑀓𑁆𑀔𑀢𑁆𑀢𑀧𑀸𑀞𑀓𑁄, 𑀲𑁄 𑀳𑁄𑀭𑀧𑀸𑀞𑀓𑀁 𑀧𑀼𑀘𑁆𑀙𑀺. 𑀲𑀩𑁆𑀩𑀧𑀸𑀞𑀻 𑀪𑀯𑀺𑀲𑁆𑀲𑀢𑀺. 𑀧𑀞𑀺𑀢𑀼𑀁, 𑀧𑀞𑀺𑀢𑀯𑁂, 𑀧𑀞𑀺𑀢𑁆𑀯𑀸, 𑀧𑀞𑀺𑀢𑁆𑀯𑀸𑀦, 𑀧𑀞𑀺𑀢𑀼𑀦, 𑀧𑀞𑀺𑀬, 𑀧𑀞𑀺𑀬𑀸𑀦.

𑀏𑀯𑀁𑀯𑀺𑀥𑀁 𑀢𑀼𑀁𑀧𑀘𑁆𑀘𑀬𑀦𑁆𑀢𑀸𑀤𑀺𑀯𑀺𑀪𑀸𑀕𑀁 𑀲𑀩𑁆𑀩𑀢𑁆𑀣 𑀬𑀣𑀸𑀭𑀳𑀁 𑀯𑀢𑁆𑀢𑀼𑀓𑀸𑀫𑀸𑀧𑀺 𑀕𑀦𑁆𑀣 𑀯𑀺𑀢𑁆𑀣𑀸𑀭𑀪𑀬𑁂𑀦 𑀦 𑀯𑀤𑀸𑀫. 𑀅𑀯𑀼𑀢𑁆𑀢𑁄𑀧𑀺 𑀈𑀤𑀺𑀲𑁄 𑀯𑀺𑀪𑀸𑀕𑁄 𑀦𑀬𑀸𑀦𑀼𑀲𑀸𑀭𑁂𑀦 𑀬𑀣𑀸𑀲𑀫𑁆𑀪𑀯𑀁 𑀲𑀩𑁆𑀩𑀢𑁆𑀣 𑀬𑁄𑀚𑁂𑀢𑀩𑁆𑀩𑁄. 𑀬𑀢𑁆𑀣 𑀧𑀦 𑀧𑀸𑀴𑀺𑀦𑀺𑀤𑀲𑁆𑀲𑀦𑀸𑀤𑀺𑀯𑀺𑀲𑁂𑀲𑁄 𑀇𑀘𑁆𑀙𑀺𑀢𑀩𑁆𑀩𑁄 𑀳𑁄𑀢𑀺, 𑀢𑀢𑁆𑀣𑁂𑀯𑁂𑀢𑀁 𑀤𑀲𑁆𑀲𑁂𑀲𑁆𑀲𑀸𑀫.

𑀯𑀞 𑀣𑀽𑀮𑀺𑀬𑁂. 𑀯𑀞𑀢𑀺. 𑀯𑀞𑀭𑁄. 𑀯𑀞𑀭𑁄𑀢𑀺 𑀣𑀽𑀮𑀖𑀦𑀲𑀭𑀻𑀭𑀲𑁆𑀫𑀺𑀁 𑀯𑀢𑁆𑀢𑀩𑁆𑀩𑀯𑀘𑀦𑀁. 𑀢𑀣𑀸 𑀳𑀺 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 ‘‘𑀯𑀞𑀭𑁄𑀢𑀺 𑀣𑀽𑀮𑁄, 𑀣𑀽𑀮𑁄 𑀘 𑀖𑀦𑀲𑀭𑀻𑀭𑁄 𑀘𑀸𑀬𑀁 𑀪𑀺𑀓𑁆𑀔𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁.

𑀫𑀞 𑀦𑀺𑀯𑀸𑀲𑁂. 𑀫𑀞𑀢𑀺. 𑀫𑀞𑁄.

𑀓𑀞 𑀓𑀺𑀘𑁆𑀙𑀚𑀻𑀯𑀦𑁂. 𑀓𑀞𑀢𑀺. 𑀓𑀞𑁄.

𑀭𑀞 𑀧𑀭𑀺𑀪𑀸𑀲𑀦𑁂. 𑀭𑀞𑀢𑀺.

𑀲𑀸𑀞 𑀩𑀮𑀓𑁆𑀓𑀸𑀭𑁂. 𑀩𑀮𑀓𑁆𑀓𑀸𑀭𑁄 𑀦𑀸𑀫 𑀅𑀢𑁆𑀢𑀦𑁄 𑀩𑀮𑁂𑀦 𑀬𑀣𑀸𑀚𑁆𑀛𑀸𑀲𑀬𑀁 𑀤𑀩𑁆𑀩𑀮𑀲𑁆𑀲 𑀅𑀪𑀺𑀪𑀯𑀦𑀁. 𑀲𑀸𑀞𑀢𑀺. 𑀲𑀸𑀞𑁄.

𑀉𑀞 𑀭𑀼𑀞 𑀮𑀼𑀞 𑀉𑀧𑀖𑀸𑀢𑁂. 𑀑𑀞𑀢𑀺. 𑀭𑁄𑀞𑀢𑀺. 𑀮𑁄𑀞𑀢𑀺.

𑀧𑀺𑀞 𑀳𑀺𑀁𑀲𑀸𑀲𑀁𑀓𑀺𑀮𑁂𑀲𑁂𑀲𑀼. 𑀧𑁂𑀞𑀢𑀺. 𑀧𑀺𑀞𑀭𑁄.

𑀲𑀞 𑀓𑁂𑀢𑀯𑁂 𑀘. 𑀧𑀼𑀩𑁆𑀩𑀢𑁆𑀣𑁂𑀲𑀼 𑀘𑀓𑀸𑀭𑁄. 𑀲𑀞𑀢𑀺. 𑀲𑀞𑁄 𑀲𑀞𑁄𑀢𑀺 𑀓𑁂𑀭𑀸𑀝𑀺𑀓𑁄 𑀯𑀼𑀘𑁆𑀘𑀢𑀺.

𑀲𑀼𑀞 𑀕𑀢𑀺𑀧𑀝𑀺𑀖𑀸𑀢𑁂. 𑀕𑀫𑀦𑀧𑀝𑀺𑀳𑀦𑀦𑀁 𑀕𑀢𑀺𑀧𑀝𑀺𑀖𑀸𑀢𑁄. 𑀲𑁄𑀞𑀢𑀺.

𑀓𑀼𑀞𑀺 𑀮𑀼𑀞𑀺 𑀆𑀮𑀲𑁆𑀲𑀺𑀬𑁂 𑀘. 𑀘𑀓𑀸𑀭𑁄 𑀧𑀼𑀩𑁆𑀩𑀢𑁆𑀣𑁂 𑀘. 𑀓𑀼𑀡𑁆𑀞𑀢𑀺. 𑀓𑀼𑀡𑁆𑀞𑁄. 𑀮𑀼𑀡𑁆𑀞𑀢𑀺. 𑀮𑀼𑀡𑁆𑀞𑁄.

𑀲𑀼𑀞𑀺 ¶ 𑀲𑁄𑀲𑀦𑁂. 𑀲𑀼𑀡𑁆𑀞𑀢𑀺.

𑀭𑀼𑀞𑀺 𑀮𑀼𑀞𑀺 𑀅𑀞𑀺 𑀕𑀢𑀺𑀬𑀁. 𑀭𑀼𑀡𑁆𑀞𑀢𑀺. 𑀮𑀼𑀡𑁆𑀞𑀢𑀺. 𑀅𑀡𑁆𑀞𑀢𑀺.

𑀯𑁂𑀞 𑀯𑁂𑀞𑀦𑁂. 𑀯𑁂𑀞𑀢𑀺, 𑀦𑀺𑀩𑁆𑀩𑁂𑀞𑀢𑀺. 𑀯𑁂𑀞𑀦𑀁, 𑀦𑀺𑀩𑁆𑀩𑁂𑀞𑀦𑀁.

𑀯𑀞𑀺 𑀏𑀓𑀘𑀭𑀺𑀬𑀸𑀬𑀁. 𑀯𑀡𑁆𑀞𑀢𑀺.

𑀫𑀞 𑀓𑀼𑀞𑀺 𑀲𑁄𑀓𑁂. 𑀫𑀞𑀢𑀺. 𑀓𑀼𑀡𑁆𑀞𑀢𑀺.

𑀏𑀞 𑀳𑁂𑀞 𑀯𑀺𑀩𑀸𑀥𑀸𑀬𑀁. 𑀏𑀞𑀢𑀺. 𑀳𑁂𑀞𑀢𑀺. 𑀯𑀺𑀳𑁂𑀞𑀢𑀺. 𑀯𑀺𑀳𑁂𑀞𑀦𑀁.

𑀮𑀼𑀞 𑀧𑀝𑀺𑀖𑀸𑀢𑁂. 𑀮𑁄𑀞𑀢𑀺.

𑀧𑀞 𑀯𑀺𑀔𑁆𑀬𑀸𑀦𑁂. 𑀧𑀞𑀢𑀺.

𑀮𑀼𑀞 𑀲𑀁𑀓𑀺𑀮𑁂𑀲𑁂. 𑀮𑁄𑀞𑀢𑀺.

𑀞𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀟𑀓𑀸𑀭𑀦𑁆𑀢𑀥𑀸𑀢𑀼

𑀟𑀺 𑀯𑀺𑀳𑀸𑀬𑀲𑀕𑀢𑀺𑀬𑀁 𑀕𑀫𑀦𑀫𑀢𑁆𑀢𑁂 𑀘. 𑀟𑁂𑀢𑀺, 𑀟𑀬𑀢𑀺. 𑀟𑁂𑀫𑀸𑀦𑁄. 𑀉𑀘𑁆𑀘𑁂 𑀲𑀓𑀼𑀡 𑀟𑁂𑀫𑀸𑀦. 𑀬𑁂 𑀫𑀁 𑀧𑀼𑀭𑁂 𑀧𑀘𑁆𑀘𑀼𑀟𑁆𑀟𑁂𑀦𑁆𑀢𑀺.

𑀟𑀺 𑀔𑀺𑀧𑀦𑀼𑀟𑁆𑀟𑀦𑁂𑀲𑀼. 𑀟𑁂𑀢𑀺. 𑀉𑀟𑁆𑀟𑁂𑀢𑀺.

𑀇𑀢𑁄 𑀩𑀳𑀺𑀤𑁆𑀥𑀸 𑀧𑀸𑀲𑀡𑁆𑀟𑀸, 𑀤𑀺𑀝𑁆𑀞𑀻𑀲𑀼 𑀧𑀲𑀻𑀤𑀦𑁆𑀢𑀺 𑀢𑁂;

𑀦 𑀢𑁂𑀲𑀁 𑀥𑀫𑁆𑀫𑀁 𑀭𑁄𑀘𑁂𑀫𑀺, 𑀦 𑀢𑁂 𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀸.

𑀏𑀢𑁆𑀣 𑀘 𑀧𑀸𑀲𑀡𑁆𑀟𑀸𑀢𑀺 𑀧𑀸𑀲𑀁 𑀟𑁂𑀦𑁆𑀢𑀻𑀢𑀺 𑀧𑀸𑀲𑀡𑁆𑀟𑀸, 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑁂𑀲𑀼 𑀤𑀺𑀝𑁆𑀞𑀺𑀧𑀸𑀲𑀁 𑀔𑀺𑀧𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀢𑀡𑁆𑀳𑀸𑀧𑀸𑀲𑀁 𑀤𑀺𑀝𑁆𑀞𑀺𑀧𑀸𑀲𑀜𑁆𑀘 𑀟𑁂𑀦𑁆𑀢𑀺 𑀉𑀟𑁆𑀟𑁂𑀦𑁆𑀢𑀻𑀢𑀺 𑀧𑀸𑀲𑀡𑁆𑀟𑀸.

𑀫𑀼𑀟𑀺 ¶ 𑀓𑀡𑁆𑀟𑀦𑁂. 𑀫𑀼𑀡𑁆𑀟𑀢𑀺. 𑀓𑀼𑀫𑀸𑀭𑀁 𑀫𑀼𑀡𑁆𑀟𑀺𑀁𑀲𑀼. 𑀫𑀼𑀡𑁆𑀟𑁄.

𑀘𑀼𑀟𑁆𑀟 𑀳𑀸𑀯𑀓𑀭𑀡𑁂. 𑀘𑀼𑀟𑁆𑀟𑀢𑀺.

𑀅𑀟𑁆𑀟 𑀅𑀪𑀺𑀬𑁄𑀕𑁂. 𑀅𑀟𑁆𑀟𑀢𑀺.

𑀕𑀟𑀺 𑀯𑀤𑀦𑁂𑀓𑀤𑁂𑀲𑁂. 𑀕𑀡𑁆𑀟𑀢𑀺. 𑀕𑀡𑁆𑀟𑁄.

𑀳𑀼𑀟𑀺 𑀧𑀺𑀟𑀺 𑀲𑀗𑁆𑀖𑀸𑀢𑁂. 𑀳𑀼𑀡𑁆𑀟𑀢𑀺. 𑀧𑀺𑀡𑁆𑀟𑀢𑀺. 𑀧𑀺𑀡𑁆𑀟𑁄.

𑀳𑀺𑀟𑀺 𑀕𑀢𑀺𑀬𑀁. 𑀳𑀺𑀡𑁆𑀟𑀢𑀺, 𑀆𑀳𑀺𑀡𑁆𑀟𑀢𑀺.

𑀓𑀼𑀟𑀺 𑀤𑀸𑀳𑁂. 𑀓𑀼𑀡𑁆𑀟𑀢𑀺. 𑀓𑀼𑀡𑁆𑀟𑁄.

𑀯𑀟𑀺 𑀫𑀟𑀺 𑀯𑁂𑀞𑀦𑁂. 𑀯𑀡𑁆𑀟𑀢𑀺. 𑀫𑀡𑁆𑀟𑀢𑀺. 𑀫𑀡𑁆𑀟𑀮𑀁.

𑀪𑀟𑀺 𑀧𑀭𑀺𑀪𑀸𑀲𑀦𑁂. 𑀪𑀡𑁆𑀟𑀢𑀺. 𑀪𑀡𑁆𑀟𑀦𑀁. 𑀪𑀡𑁆𑀟𑁄.

𑀫𑀟𑀺 𑀫𑀚𑁆𑀚𑀦𑁂. 𑀫𑀡𑁆𑀟𑀢𑀺. 𑀫𑀡𑁆𑀟𑀦𑀁.

𑀢𑀼𑀟𑀺 𑀢𑁄𑀴𑀦𑁂. 𑀢𑀼𑀡𑁆𑀟𑀢𑀺. 𑀢𑀼𑀡𑁆𑀟𑁄. 𑀢𑀼𑀡𑁆𑀟𑁂𑀦𑀸𑀤𑀸𑀬 𑀕𑀘𑁆𑀙𑁂𑀬𑁆𑀬.

𑀪𑀼𑀟𑀺 𑀪𑀭𑀡𑁂. 𑀪𑀼𑀡𑁆𑀟𑀢𑀺.

𑀘𑀟𑀺 𑀓𑁄𑀧𑁂. 𑀘𑀡𑁆𑀟𑀢𑀺. 𑀘𑀡𑁆𑀟𑁄. 𑀘𑀡𑁆𑀟𑀸𑀮𑁄, 𑀘𑀡𑁆𑀟𑀺𑀓𑁆𑀓𑀁.

𑀲𑀟𑀺 𑀭𑀼𑀚𑀸𑀬𑀁. 𑀲𑀡𑁆𑀟𑀢𑀺. 𑀲𑀡𑁆𑀟𑁄.

𑀢𑀟𑀺 𑀢𑀸𑀴𑀦𑁂. 𑀢𑀡𑁆𑀟𑀢𑀺. 𑀯𑀺𑀢𑀡𑁆𑀟𑀸.

𑀧𑀟𑀺 𑀕𑀢𑀺𑀬𑀁. 𑀧𑀡𑁆𑀟𑀢𑀺. 𑀧𑀡𑁆𑀟𑀸, 𑀧𑀡𑁆𑀟𑀺𑀢𑁄. 𑀏𑀢𑁆𑀣 𑀧𑀡𑁆𑀟𑀸𑀢𑀺 𑀧𑀜𑁆𑀜𑀸. 𑀲𑀸 𑀳𑀺 𑀲𑀼𑀔𑀼𑀫𑁂𑀲𑀼𑀧𑀺 𑀅𑀢𑁆𑀣𑁂𑀲𑀼 𑀧𑀡𑁆𑀟𑀢𑀺 𑀕𑀘𑁆𑀙𑀢𑀺 𑀤𑀼𑀓𑁆𑀔𑀸𑀤𑀻𑀦𑀁 𑀧𑀻𑀴𑀦𑀸𑀤𑀺𑀓𑀫𑁆𑀧𑀺 𑀆𑀓𑀸𑀭𑀁 𑀚𑀸𑀦𑀸𑀢𑀻𑀢𑀺 ‘‘𑀧𑀡𑁆𑀟𑀸’’𑀢𑀺 𑀯𑀼𑀘𑁆𑀘𑀢𑀺. 𑀧𑀡𑁆𑀟𑀺𑀢𑁄𑀢𑀺 𑀧𑀡𑁆𑀟𑀸𑀬 𑀇𑀢𑁄 𑀕𑀢𑁄 𑀧𑀯𑀢𑁆𑀢𑁄𑀢𑀺 𑀧𑀡𑁆𑀟𑀺𑀢𑁄. 𑀅𑀣 𑀯𑀸 𑀲𑀜𑁆𑀚𑀸𑀢𑀸 𑀧𑀡𑁆𑀟𑀸 𑀏𑀢𑀲𑁆𑀲𑀸𑀢𑀺 𑀧𑀡𑁆𑀟𑀺𑀢𑁄. 𑀧𑀡𑁆𑀟𑀢𑀺 𑀜𑀸𑀡𑀕𑀢𑀺𑀬𑀸 𑀕𑀘𑁆𑀙𑀢𑀻𑀢𑀺𑀧𑀺 𑀧𑀡𑁆𑀟𑀺𑀢𑁄. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀬𑀁 ¶ 𑀯𑀼𑀢𑁆𑀢𑀁 ‘‘𑀧𑀡𑁆𑀟𑀦𑁆𑀢𑀻𑀢𑀺 𑀧𑀡𑁆𑀟𑀺𑀢𑀸. 𑀲𑀦𑁆𑀤𑀺𑀝𑁆𑀞𑀺𑀓𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑁂𑀲𑀼 𑀜𑀸𑀡𑀕𑀢𑀺𑀬𑀸 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄’’𑀢𑀺.

𑀕𑀟𑀺 𑀫𑀤𑁂. 𑀕𑀡𑁆𑀟𑀢𑀺.

𑀔𑀟𑀺 𑀫𑀦𑁆𑀣𑁂. 𑀔𑀡𑁆𑀟𑀢𑀺. 𑀔𑀡𑁆𑀟𑀺𑀢𑁄, 𑀔𑀡𑁆𑀟𑁄.

𑀮𑀟𑀺 𑀚𑀺𑀯𑁆𑀳𑀸𑀫𑀣𑀦𑁂. 𑀮𑀡𑁆𑀟𑀢𑀺. 𑀮𑀡𑁆𑀟𑁄.

𑀟𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀟𑀓𑀸𑀭𑀦𑁆𑀢𑀥𑀸𑀢𑀼

𑀯𑀟𑁆𑀠 𑀯𑀟𑁆𑀠𑀦𑁂. 𑀯𑀟𑁆𑀠𑀢𑀺. 𑀲𑀺𑀭𑀺𑀯𑀟𑁆𑀠𑀓𑁄, 𑀥𑀦𑀯𑀟𑁆𑀠𑀓𑁄, 𑀯𑀟𑁆𑀠𑀺𑀢𑁄, 𑀩𑀼𑀟𑁆𑀠𑁄. 𑀏𑀢𑁆𑀣 𑀘 𑀯𑀓𑀸𑀭𑀲𑁆𑀲 𑀩𑀓𑀸𑀭𑁄, 𑀅𑀓𑀸𑀭𑀲𑁆𑀲 𑀘𑀼𑀓𑀸𑀭𑁄.

𑀓𑀟𑁆𑀠 𑀆𑀓𑀟𑁆𑀠𑀦𑁂. 𑀓𑀟𑁆𑀠𑀢𑀺, 𑀆𑀓𑀟𑁆𑀠𑀢𑀺, 𑀦𑀺𑀓𑀟𑁆𑀠𑀢𑀺. 𑀅𑀓𑀸𑀫𑀸 𑀧𑀭𑀺𑀓𑀟𑁆𑀠𑀦𑁆𑀢𑀺, 𑀉𑀮𑀽𑀓𑀜𑁆𑀜𑁂𑀯 𑀯𑀸𑀬𑀲𑀸.

𑀇𑀫𑀸𑀦𑀺 𑀠𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀡𑀓𑀸𑀭𑀦𑁆𑀢𑀥𑀸𑀢𑀼

𑀅𑀡 𑀭𑀡 𑀯𑀡 𑀪𑀡 𑀫𑀡 𑀓𑀡 𑀲𑀤𑁆𑀤𑁂. 𑀅𑀡𑀢𑀺. 𑀅𑀡𑀓𑁄 𑀩𑁆𑀭𑀸𑀳𑁆𑀫𑀡𑁄. 𑀭𑀡𑀢𑀺. 𑀭𑀡𑀁. 𑀯𑀡𑀢𑀺. 𑀯𑀸𑀡𑀓𑁄. 𑀪𑀡𑀢𑀺. 𑀪𑀸𑀡𑀓𑁄. 𑀫𑀡𑀢𑀺. 𑀫𑀡𑀺𑀓𑁄. 𑀓𑀡𑀢𑀺. 𑀓𑀸𑀡𑁄. 𑀢𑀢𑁆𑀣 𑀩𑁆𑀭𑀸𑀳𑁆𑀫𑀡𑁄𑀢𑀺 𑀩𑁆𑀭𑀳𑁆𑀫𑀁 𑀅𑀡𑀢𑀻𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀫𑀦𑁆𑀢𑁂 𑀲𑀚𑁆𑀛𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀧𑀦 ‘‘𑀩𑁆𑀭𑀳𑁆𑀫𑀼𑀦𑁄 𑀅𑀧𑀘𑁆𑀘𑀁 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀯𑀤𑀦𑁆𑀢𑀺. 𑀅𑀭𑀺𑀬𑀸 𑀧𑀦 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄𑀢𑀺.

𑀩𑁆𑀭𑀸𑀳𑁆𑀫𑀡𑁄 ¶ 𑀲𑁄𑀢𑁆𑀢𑀺𑀬𑁄 𑀯𑀺𑀧𑁆𑀧𑁄, 𑀪𑁄𑀯𑀸𑀤𑀻 𑀩𑁆𑀭𑀳𑁆𑀫𑀩𑀦𑁆𑀥𑀼 𑀘;

𑀩𑁆𑀭𑀳𑁆𑀫𑀲𑀽𑀦𑀼 𑀤𑁆𑀯𑀺𑀚𑁄 𑀩𑁆𑀭𑀳𑁆𑀫𑀸, 𑀓𑀫𑀮𑀸𑀲𑀦𑀲𑀽𑀦𑀼 𑀘;

𑀭𑀡𑀲𑀤𑁆𑀤𑁄 ‘‘𑀲𑀭𑀡𑀸 𑀥𑀫𑁆𑀫𑀸 𑀅𑀭𑀡𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀓𑀺𑀮𑁂𑀲𑁂𑀲𑀼 𑀯𑀢𑁆𑀢𑀢𑀺. 𑀓𑀺𑀮𑁂𑀲𑀸 𑀳𑀺 𑀭𑀡𑀦𑁆𑀢𑀺 𑀓𑀦𑁆𑀤𑀦𑁆𑀢𑀺 𑀏𑀢𑁂𑀳𑀻𑀢𑀺 𑀭𑀡𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.

‘‘𑀥𑀦𑀼𑀕𑁆𑀕𑀳𑁄 𑀅𑀲𑀤𑀺𑀲𑁄, 𑀭𑀸𑀚𑀧𑀼𑀢𑁆𑀢𑁄 𑀫𑀳𑀩𑁆𑀩𑀮𑁄;

𑀲𑀩𑁆𑀩𑀸𑀫𑀺𑀢𑁆𑀢𑁂 𑀭𑀡𑀁 𑀓𑀢𑁆𑀯𑀸, 𑀲𑀁𑀬𑀫𑀁 𑀅𑀚𑁆𑀛𑀼𑀧𑀸𑀕𑀫𑀻’’𑀢𑀺

𑀏𑀢𑁆𑀣 𑀬𑀼𑀤𑁆𑀥𑁂 𑀯𑀢𑁆𑀢𑀢𑀺. 𑀭𑀡𑀁 𑀓𑀢𑁆𑀯𑀸𑀢𑀺 𑀳𑀺 𑀬𑀼𑀤𑁆𑀥𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀢𑀺𑀡𑀜𑁆𑀘 𑀓𑀝𑁆𑀞𑀜𑁆𑀘 𑀭𑀡𑀁 𑀓𑀭𑁄𑀦𑁆𑀢𑀸, 𑀥𑀸𑀯𑀺𑀁𑀲𑀼 𑀢𑁂 𑀅𑀝𑁆𑀞𑀤𑀺𑀲𑀸 𑀲𑀫𑀦𑁆𑀢𑀢𑁄’’𑀢𑀺 𑀏𑀢𑁆𑀣 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀓𑀭𑀡𑁂 𑀯𑀢𑁆𑀢𑀢𑀺. 𑀭𑀡𑀁 𑀓𑀭𑁄𑀦𑁆𑀢𑀸𑀢𑀺 𑀳𑀺 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀭𑁄𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀅𑀢𑁆𑀣𑀯𑀺𑀯𑀭𑀡𑀫𑁆𑀧𑀺 𑀲𑀤𑁆𑀤𑀲𑀗𑁆𑀔𑀸𑀢𑀫𑀢𑁆𑀣𑀁 𑀅𑀦𑁆𑀢𑁄𑀬𑁂𑀯 𑀓𑀢𑁆𑀯𑀸 𑀅𑀥𑀺𑀧𑁆𑀧𑀸𑀬𑀢𑁆𑀣𑀯𑀲𑁂𑀦 𑀓𑀢𑀁, 𑀦 𑀥𑀸𑀢𑀼𑀦𑀸𑀦𑀢𑁆𑀣𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀥𑀸𑀢𑀽𑀦𑀫𑀢𑁆𑀣𑀸𑀢𑀺𑀲𑀬𑀬𑁄𑀕𑁄𑀧𑀺 𑀪𑀯𑀢𑀺, 𑀢𑁂𑀦 𑀏𑀯𑀁 𑀅𑀢𑁆𑀣𑀯𑀺𑀯𑀭𑀡𑀁 𑀓𑀢𑀦𑁆𑀢𑀺𑀧𑀺 𑀤𑀝𑁆𑀞𑀩𑁆𑀩𑀁.

𑀪𑀡 𑀪𑀡𑀦𑁂. 𑀧𑀭𑀺𑀢𑁆𑀢𑀁 𑀪𑀡𑀢𑀺, 𑀯𑀘𑀦𑀁 𑀪𑀡𑀢𑀺. 𑀤𑀻𑀖𑀪𑀸𑀡𑀓𑁄, 𑀧𑀺𑀬𑀪𑀸𑀡𑀻, 𑀪𑀸𑀡𑀯𑀸𑀭𑁄. 𑀏𑀢𑁆𑀣 𑀪𑀸𑀡𑀯𑀸𑀭𑁄𑀢𑀺 𑁋

‘‘𑀅𑀝𑁆𑀞𑀓𑁆𑀔𑀭𑀸 𑀏𑀓𑀧𑀤𑀁, 𑀏𑀓𑀸 𑀕𑀸𑀣𑀸 𑀘𑀢𑀼𑀧𑁆𑀧𑀤𑀁;

𑀕𑀸𑀣𑀸 𑀘𑁂𑀓𑀸𑀫𑀢𑁄 𑀕𑀦𑁆𑀣𑁄, 𑀕𑀦𑁆𑀣𑁄 𑀩𑀸𑀢𑁆𑀢𑀺𑀁𑀲𑀢𑀓𑁆𑀔𑀭𑁄;

𑀩𑀸𑀢𑁆𑀢𑀺𑀁𑀲𑀓𑁆𑀔𑀭𑀕𑀦𑁆𑀣𑀸𑀦𑀁, 𑀧𑀜𑁆𑀜𑀸𑀲𑀁 𑀤𑁆𑀯𑀺𑀲𑀢𑀁 𑀧𑀦;

𑀪𑀸𑀡𑀯𑀸𑀭𑁄 𑀫𑀢𑁄 𑀏𑀓𑁄, 𑀲𑁆𑀯𑀝𑁆𑀞𑀓𑁆𑀔𑀭𑀲𑀳𑀲𑁆𑀲𑀓𑁄’’𑀢𑀺.

𑀏𑀯𑀁 𑀅𑀝𑁆𑀞𑀓𑁆𑀔𑀭𑀲𑀳𑀲𑁆𑀲𑀧𑀭𑀺𑀫𑀸𑀡𑁄 𑀧𑀸𑀞𑁄 𑀯𑀼𑀘𑁆𑀘𑀢𑀺.

𑀑𑀡𑀁 𑀅𑀧𑀦𑀬𑀦𑁂. 𑀑𑀡𑀢𑀺.

𑀲𑁄𑀡 𑀯𑀡𑁆𑀡𑀕𑀢𑀻𑀲𑀼. 𑀲𑁄𑀡𑀢𑀺, 𑀲𑁄𑀡𑁄.

𑀲𑁄𑀡 ¶ 𑀲𑀺𑀮𑁄𑀡 𑀲𑀗𑁆𑀖𑀸𑀢𑁂. 𑀲𑁄𑀡𑀢𑀺. 𑀲𑀺𑀮𑁄𑀡𑀢𑀺.

𑀖𑀺𑀡𑀺 𑀖𑀼𑀡𑀺 𑀖𑀡𑀺 𑀕𑀳𑀡𑁂. 𑀖𑀺𑀡𑁆𑀡𑀢𑀺. 𑀖𑀼𑀡𑁆𑀡𑀢𑀺. 𑀖𑀡𑁆𑀡𑀢𑀺.

𑀖𑀼𑀡 𑀖𑀼𑀡𑁆𑀡 𑀕𑀫𑀦𑁂. 𑀖𑁄𑀡𑀢𑀺. 𑀖𑀼𑀡𑁆𑀡𑀢𑀺.

𑀧𑀡 𑀩𑁆𑀬𑀯𑀳𑀸𑀭𑁂, 𑀣𑀼𑀢𑀺𑀬𑀜𑁆𑀘. 𑀧𑀡𑀢𑀺 𑀯𑀸𑀡𑀺𑀚𑁄, 𑀯𑁄𑀳𑀸𑀭𑀁 𑀓𑀭𑁄𑀢𑀺 𑀇𑀘𑁆𑀘𑀢𑁆𑀣𑁄. 𑀲𑀤𑁆𑀥𑁄 𑀩𑀼𑀤𑁆𑀥𑀁 𑀧𑀡𑀢𑀺, 𑀣𑁄𑀫𑀬𑀢𑀺 𑀇𑀘𑁆𑀘𑀢𑁆𑀣𑁄, 𑀆𑀧𑀡𑀁, 𑀲𑀸𑀧𑀡𑁄 𑀕𑀸𑀫𑁄.

𑀕𑀡 𑀭𑀡 𑀕𑀢𑀺𑀬𑀁. 𑀕𑀡𑀢𑀺. 𑀭𑀡𑀢𑀺.

𑀘𑀡 𑀲𑀡 𑀤𑀸𑀦𑁂. 𑀘𑀡𑀢𑀺. 𑀲𑀡𑀢𑀺.

𑀨𑀡 𑀕𑀢𑀺𑀬𑀁. 𑀨𑀡𑀢𑀺. 𑀨𑀡𑀁.

𑀯𑁂𑀡𑀼 𑀜𑀸𑀡𑀘𑀺𑀦𑁆𑀢𑀸𑀦𑀺𑀲𑀸𑀫𑀦𑁂𑀲𑀼. 𑀯𑁂𑀡𑀢𑀺.

𑀧𑀻𑀡 𑀧𑀻𑀡𑀦𑁂. 𑀧𑀻𑀡𑀦𑀁 𑀧𑀭𑀺𑀧𑀼𑀡𑁆𑀡𑀢𑀸. 𑀧𑀻𑀡𑀢𑀺. 𑀧𑀻𑀡𑁄 𑀤𑀺𑀯𑀸 𑀦 𑀪𑀼𑀜𑁆𑀚𑀢𑀺, 𑀧𑀻𑀡𑁄𑀭𑀓𑁆𑀔𑀁𑀲𑀩𑀸𑀳𑀼.

𑀫𑀺𑀡 𑀳𑀺𑀁𑀲𑀸𑀬𑀁. 𑀫𑀺𑀡𑀢𑀺.

𑀤𑀼𑀡 𑀕𑀢𑀺𑀬𑀜𑁆𑀘. 𑀳𑀺𑀁𑀲𑀸𑀧𑁂𑀓𑁆𑀔𑀓𑁄 𑀘𑀓𑀸𑀭𑁄. 𑀤𑀼𑀡𑀢𑀺.

𑀲𑀡 𑀅𑀩𑁆𑀬𑀢𑁆𑀢𑀲𑀤𑁆𑀤𑁂. 𑀲𑀡𑀢𑀺. 𑀲𑀡𑀢𑁂𑀯 𑀩𑁆𑀭𑀳𑁆𑀫𑀸𑀭𑀜𑁆𑀜𑀁. 𑀲𑀡𑀢𑁂𑀯𑀸𑀢𑀺 𑀦𑀤𑀢𑀺 𑀯𑀺𑀬.

𑀢𑀼𑀡 𑀓𑁄𑀝𑀺𑀮𑁆𑀮𑁂. 𑀢𑁄𑀡𑀢𑀺.

𑀧𑀼𑀡 𑀦𑀺𑀧𑀼𑀡𑁂. 𑀧𑀼𑀡𑀢𑀺, 𑀦𑀺𑀧𑀼𑀡𑀢𑀺. 𑀦𑀺𑀧𑀼𑀡𑀥𑀫𑁆𑀫𑁄. 𑀏𑀢𑁆𑀣 𑀘 𑀦𑀺𑀧𑀼𑀡𑀲𑀡𑁆𑀳𑀲𑀼𑀔𑀼𑀫𑀲𑀤𑁆𑀤𑀸 𑀯𑁂𑀯𑀘𑀦𑀲𑀤𑁆𑀤𑀸 𑀓𑀼𑀲𑀮𑀙𑁂𑀓𑀤𑀓𑁆𑀔𑀲𑀤𑁆𑀤𑀸 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀫𑀼𑀡 𑀧𑀝𑀺𑀜𑁆𑀜𑀸𑀡𑁂. 𑀫𑀼𑀡𑀢𑀺.

𑀓𑀼𑀡 𑀲𑀤𑁆𑀤𑁄𑀧𑀓𑀭𑀡𑁂. 𑀓𑁄𑀡𑀢𑀺.

𑀘𑀼𑀡 ¶ 𑀙𑁂𑀤𑀦𑁂. 𑀘𑁄𑀡𑀢𑀺.

𑀫𑀡 𑀘𑀸𑀕𑁂. 𑀯𑁂𑀭𑀁 𑀫𑀡𑀢𑀻𑀢𑀺 𑀯𑁂𑀭𑀫𑀡𑀺.

𑀨𑀼𑀡 𑀯𑀺𑀓𑀺𑀭𑀡𑁂 𑀯𑀺𑀥𑀼𑀦𑀦𑁂 𑀘. 𑀨𑀼𑀡𑀢𑀺. 𑀅𑀗𑁆𑀕𑀸𑀭𑀓𑀸𑀲𑀼𑀁 𑀅𑀧𑀭𑁂 𑀨𑀼𑀡𑀦𑁆𑀢𑀺.

𑀇𑀫𑀸𑀦𑀺 𑀡𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀇𑀢𑀺 𑀪𑀽𑀯𑀸𑀤𑀺𑀕𑀡𑁂 𑀝𑀯𑀕𑁆𑀕𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺

𑀲𑀫𑀢𑁆𑀢𑀸𑀦𑀺.

𑀢𑀓𑀸𑀭𑀦𑁆𑀢𑀥𑀸𑀢𑀼

𑀅𑀣 𑀢𑀯𑀕𑁆𑀕𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺 𑀯𑀼𑀘𑁆𑀘𑀦𑁆𑀢𑁂 𑁋

𑀢𑁂 𑀧𑀸𑀮𑀦𑁂. 𑀧𑀸𑀮𑀦𑀁 𑀭𑀓𑁆𑀔𑀡𑀁. 𑀢𑀸𑀬𑀢𑀺. 𑀢𑀸𑀡𑀁, 𑀕𑁄𑀢𑁆𑀢𑀁, 𑀦𑀓𑁆𑀔𑀢𑁆𑀢𑀁. 𑀅𑀖𑀲𑁆𑀲 𑀢𑀸𑀢𑀸. 𑀓𑀺𑀘𑁆𑀙𑁂𑀦𑀸𑀥𑀺𑀕𑀢𑀸 𑀪𑁄𑀕𑀸, 𑀢𑁂 𑀢𑀸𑀢𑁄 𑀯𑀺𑀥𑀫𑀺 𑀥𑀫𑀁. 𑀢𑀢𑁆𑀣 𑀕𑁄𑀢𑁆𑀢𑀦𑁆𑀢𑀺 𑀕𑀁 𑀢𑀸𑀬𑀢𑀻𑀢𑀺 𑀕𑁄𑀢𑁆𑀢𑀁. ‘‘𑀕𑁄𑀢𑀫𑁄 𑀓𑀲𑁆𑀲𑀧𑁄’’𑀢𑀺 𑀳𑀺 𑀆𑀤𑀺𑀦𑀸 𑀧𑀯𑀢𑁆𑀢𑀫𑀸𑀦𑀁 𑀕𑀁 𑀯𑀘𑀦𑀁 𑀩𑀼𑀤𑁆𑀥𑀺𑀜𑁆𑀘 𑀢𑀸𑀬𑀢𑀺 𑀏𑀓𑀁𑀲𑀺𑀓𑀯𑀺𑀲𑀬𑀢𑀸𑀬 𑀭𑀓𑁆𑀔𑀢𑀻𑀢𑀺 𑀕𑁄𑀢𑁆𑀢𑀁. 𑀬𑀣𑀸 𑀳𑀺 𑀩𑀼𑀤𑁆𑀥𑀺 𑀆𑀭𑀫𑁆𑀫𑀡𑀪𑀽𑀢𑁂𑀦 𑀅𑀢𑁆𑀣𑁂𑀦 𑀯𑀺𑀦𑀸 𑀦 𑀯𑀢𑁆𑀢𑀢𑀺, 𑀢𑀣𑀸 𑀅𑀪𑀺𑀥𑀸𑀦𑀁 𑀅𑀪𑀺𑀥𑁂𑀬𑁆𑀬𑀪𑀽𑀢𑁂𑀦, 𑀢𑀲𑁆𑀫𑀸 𑀲𑁄 𑀕𑁄𑀢𑁆𑀢𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀢𑀸𑀦𑀺 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀓𑁄 𑀧𑀦 𑀲𑁄𑀢𑀺? 𑀅𑀜𑁆𑀜𑀓𑀼𑀮𑀧𑀭𑀫𑁆𑀧𑀭𑀸𑀲𑀸𑀥𑀸𑀭𑀡𑀁 𑀢𑀲𑁆𑀲 𑀓𑀼𑀮𑀲𑁆𑀲 𑀆𑀤𑀺𑀧𑀼𑀭𑀺𑀲𑀲𑀫𑁆𑀫𑀼𑀤𑀺𑀢𑀁 𑀢𑀁𑀓𑀼𑀮𑀧𑀭𑀺𑀬𑀸𑀧𑀦𑁆𑀦𑀲𑀸𑀥𑀸𑀭𑀡𑀁 𑀲𑀸𑀫𑀜𑁆𑀜𑀭𑀽𑀧𑀁.

𑀦𑀓𑁆𑀔𑀢𑁆𑀢𑀦𑁆𑀢𑀺 𑀯𑀺𑀲𑀫𑀕𑀢𑀺𑀬𑀸 𑀅𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀯𑀻𑀣𑀺𑀬𑀸𑀯 𑀕𑀫𑀦𑁂𑀦 𑀦𑀓𑁆𑀔𑀦𑀁 𑀕𑀫𑀦𑀁 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀦𑀓𑁆𑀔𑀢𑁆𑀢𑀁, 𑀢𑀁 𑀧𑀦 𑀅𑀲𑁆𑀲𑀬𑀼𑀚𑀸𑀤𑀺𑀯𑀲𑁂𑀦 𑀲𑀢𑁆𑀢𑀯𑀻𑀲𑀢𑀺𑀯𑀺𑀥𑀁 𑀳𑁄𑀢𑀺. 𑀢𑀣𑀸 𑀳𑀺 𑀅𑀲𑁆𑀲𑀬𑀼𑀚𑁄 ¶ 𑀪𑀭𑀡𑀻 𑀓𑀢𑁆𑀢𑀺𑀓𑀸 𑀭𑁄𑀳𑀡𑀻 𑀫𑀺𑀕𑀲𑀺𑀭𑁄 𑀅𑀤𑁆𑀤𑀸 𑀧𑀼𑀦𑀩𑁆𑀩𑀲𑀼 𑀨𑀼𑀲𑁆𑀲𑁄 𑀅𑀲𑁆𑀲𑀮𑀺𑀲𑁄 𑀫𑀸𑀖𑁄 𑀧𑀼𑀩𑁆𑀩𑀨𑀕𑁆𑀕𑀼𑀡𑀻 𑀉𑀢𑁆𑀢𑀭𑀨𑀕𑁆𑀕𑀼𑀡𑀻 𑀳𑀢𑁆𑀣𑁄 𑀘𑀺𑀢𑁆𑀢𑀁 𑀲𑁆𑀯𑀸𑀢𑀺 𑀯𑀺𑀲𑀸𑀔𑀸 𑀅𑀦𑀼𑀭𑀸𑀥𑀸 𑀚𑁂𑀝𑁆𑀞𑀸 𑀫𑀽𑀮𑀁 𑀧𑀼𑀩𑁆𑀩𑀸𑀲𑀴𑁆𑀳𑀁 𑀉𑀢𑁆𑀢𑀭𑀸𑀲𑀴𑁆𑀳𑀁 𑀲𑀸𑀯𑀡𑀁 𑀥𑀦𑀲𑀺𑀝𑁆𑀞𑀸 𑀲𑀢𑀪𑀺𑀲𑀢𑁆𑀢𑀁 𑀧𑀼𑀩𑁆𑀩𑀪𑀤𑁆𑀤𑀧𑀤𑀁 𑀉𑀢𑁆𑀢𑀭𑀪𑀤𑁆𑀤𑀧𑀤𑀁 𑀭𑁂𑀯𑀢𑀻 𑀘𑀸𑀢𑀺 𑀲𑀢𑁆𑀢𑀯𑀻𑀲𑀢𑀺 𑀦𑀓𑁆𑀔𑀢𑁆𑀢𑀸𑀦𑀺. 𑀢𑀸𑀦𑀺 𑀧𑀦 𑀅𑀢𑁆𑀢𑀦𑁄 𑀕𑀫𑀦𑀝𑁆𑀞𑀸𑀦𑀁 𑀈𑀲𑀓𑀫𑁆𑀧𑀺 𑀦 𑀯𑀺𑀚𑀳𑀦𑁆𑀢𑀺 𑀓𑀺𑀜𑁆𑀘𑀺 𑀲𑀻𑀖𑀁 𑀓𑀺𑀜𑁆𑀘𑀺 𑀤𑀦𑁆𑀥𑀁, 𑀓𑀤𑀸𑀘𑀺 𑀲𑀻𑀖𑀁, 𑀓𑀤𑀸𑀘𑀺 𑀤𑀦𑁆𑀥𑀁, 𑀏𑀢𑁆𑀢𑁄 𑀇𑀢𑁄 𑀘𑀸𑀢𑀺 𑀏𑀯𑀁 𑀯𑀺𑀲𑀫𑀕𑀢𑀺𑀬𑀸 𑀅𑀕𑀦𑁆𑀢𑁆𑀯𑀸 𑀬𑀦𑁆𑀢𑀘𑀓𑁆𑀓𑁂 𑀧𑀝𑀺𑀧𑀸𑀝𑀺𑀬𑀸 𑀬𑁄𑀚𑀺𑀢𑀸𑀦𑀺 𑀯𑀺𑀬 𑀲𑀫𑀧𑁆𑀧𑀫𑀸𑀡𑀕𑀢𑀺𑀬𑀸 𑀅𑀢𑁆𑀢𑀦𑁄 𑀯𑀻𑀣𑀺𑀬𑀸𑀯 𑀕𑀘𑁆𑀙𑀦𑁆𑀢𑀸𑀦𑀺 𑀫𑀡𑁆𑀟𑀮𑀸𑀓𑀸𑀭𑁂𑀦 𑀲𑀺𑀦𑁂𑀭𑀼𑀁 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀏𑀯𑀁 𑀇𑀫𑀸𑀦𑀺 𑀦𑀓𑁆𑀔𑀦𑀁 𑀕𑀫𑀦𑀁 𑀢𑀸𑀬𑀦𑁆𑀢𑀺 𑀭𑀓𑁆𑀔𑀦𑁆𑀢𑀻𑀢𑀺 𑀦𑀓𑁆𑀔𑀢𑁆𑀢𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑁄𑀭𑀸𑀡𑀸 𑀧𑀦 𑀔𑀭𑀥𑀸𑀢𑀼𑀯𑀲𑁂𑀦 ‘‘𑀦𑀓𑁆𑀔𑀭𑀦𑁆𑀢𑀺 𑀦 𑀦𑀲𑁆𑀲𑀦𑁆𑀢𑀻𑀢𑀺 𑀦𑀓𑁆𑀔𑀢𑁆𑀢𑀸𑀦𑀻’’𑀢𑀺 𑀆𑀯𑁄𑀘𑀼𑀁, ‘‘𑀦𑀓𑁆𑀔𑀢𑁆𑀢𑀁 𑀚𑁄𑀢𑀺 𑀭𑀺𑀓𑁆𑀔𑀁 𑀢𑀁’’ 𑀇𑀘𑁆𑀘𑁂𑀢𑀸𑀦𑀺 𑀦𑀓𑁆𑀔𑀢𑁆𑀢𑀢𑀸𑀭𑀓𑀸𑀦𑀁 𑀦𑀸𑀫𑀸𑀦𑀺. ‘‘𑀉𑀴𑀼 𑀢𑀸𑀭𑀸 𑀢𑀸𑀭𑀓𑀸’’𑀢𑀺 𑀇𑀫𑀸𑀦𑀺 𑀧𑀦 𑀲𑀩𑁆𑀩𑀸𑀲𑀫𑁆𑀧𑀺 𑀢𑀸𑀭𑀓𑀸𑀦𑀁 𑀲𑀸𑀥𑀸𑀭𑀡𑀦𑀸𑀫𑀸𑀦𑀺. 𑀑𑀲𑀥𑀻𑀢𑀺 𑀧𑀦 𑀢𑀸𑀭𑀓𑀸𑀯𑀺𑀲𑁂𑀲𑀲𑁆𑀲 𑀦𑀸𑀫𑀁.

𑀘𑀺𑀢𑀺 𑀲𑀜𑁆𑀜𑀸𑀡𑁂. 𑀲𑀜𑁆𑀜𑀸𑀡𑀁 𑀘𑀺𑀳𑀦𑀁 𑀮𑀓𑁆𑀔𑀡𑀓𑀭𑀡𑀁. 𑀘𑁂𑀢𑀢𑀺. 𑀘𑀺𑀳𑀦𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀈𑀓𑀸𑀭𑀦𑁆𑀢𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀅𑀲𑁆𑀫𑀸 𑀥𑀸𑀢𑀼𑀢𑁄 𑀲𑀓𑀺 𑀲𑀗𑁆𑀓𑀸𑀬𑀦𑁆𑀢𑀺 𑀥𑀸𑀢𑀼𑀢𑁄 𑀯𑀺𑀬 𑀦𑀺𑀕𑁆𑀕𑀳𑀻𑀢𑀸𑀕𑀫𑁄 𑀦 𑀳𑁄𑀢𑀺. 𑀏𑀲 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼.

𑀧𑀢 𑀕𑀢𑀺𑀬𑀁. 𑀧𑀢𑀢𑀺. 𑀧𑀧𑀢𑀢𑀺 𑀧𑀧𑀸𑀢𑀁, 𑀧𑀧𑀢𑁂𑀬𑁆𑀬𑀳𑀁. 𑀧𑀸𑀧𑀢𑁆𑀢𑀁 𑀦𑀺𑀭𑀬𑀁 𑀪𑀼𑀲𑀁. 𑀅𑀳𑀁𑀲𑀤𑁆𑀤𑁂𑀦 𑀬𑁄𑀚𑁂𑀢𑀩𑁆𑀩𑀁, 𑀧𑀸𑀧𑀢𑁆𑀢𑀁 𑀧𑀧𑀢𑀺𑀢𑁄𑀲𑁆𑀫𑀻𑀢𑀺 𑀅𑀢𑁆𑀣𑁄. 𑀧𑀸𑀧𑀢𑁆𑀣 𑀦𑀺𑀭𑀬𑀁 𑀪𑀼𑀲𑀁, 𑀲𑁄𑀓𑀼𑀫𑀸𑀭𑁄𑀢𑀺 𑀬𑁄𑀚𑁂𑀢𑀩𑁆𑀩𑀁, 𑀧𑀸𑀧𑀢𑁆𑀣 𑀧𑀧𑀢𑀺𑀢𑁄𑀢𑀺 𑀅𑀢𑁆𑀣𑁄. 𑀧𑀭𑁄𑀓𑁆𑀔𑀸𑀧𑀤𑀜𑁆𑀳𑀺𑀏𑀢𑀁 𑀤𑁆𑀯𑀬𑀁. ‘‘𑀧𑀸𑀯𑀤𑀁 𑀧𑀸𑀯𑀤𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀉𑀧𑀲𑀕𑁆𑀕𑀧𑀤𑀲𑁆𑀲 𑀤𑀻𑀖𑀪𑀸𑀯𑁄, 𑀢𑀢𑁄 𑀅𑀁𑀲𑀤𑁆𑀤𑀲𑁆𑀲 𑀢𑁆𑀢𑀁𑀆𑀤𑁂𑀲𑁄, 𑀅𑀲𑀤𑁆𑀤𑀲𑁆𑀲 𑀘 𑀢𑁆𑀣𑀸𑀤𑁂𑀲𑁄 𑀪𑀯𑀢𑀺. 𑀅𑀘𑀺𑀦𑁆𑀢𑁂𑀬𑁆𑀬𑁄 𑀳𑀺 𑀧𑀸𑀴𑀺𑀦𑀬𑁄.

𑀅𑀢 ¶ 𑀲𑀸𑀢𑀘𑁆𑀘𑀕𑀫𑀦𑁂. 𑀲𑀸𑀢𑀘𑁆𑀘𑀕𑀫𑀦𑀁 𑀦𑀺𑀭𑀦𑁆𑀢𑀭𑀕𑀫𑀦𑀁. 𑀅𑀢𑀢𑀺. 𑀬𑀲𑁆𑀫𑀸 𑀧𑀦 𑀅𑀢𑀥𑀸𑀢𑀼 𑀲𑀸𑀢𑀘𑁆𑀘𑀕𑀫𑀦𑀢𑁆𑀣𑀯𑀸𑀘𑀺𑀓𑀸, 𑀢𑀲𑁆𑀫𑀸 𑀪𑀯𑀸𑀪𑀯𑀁 𑀥𑀸𑀯𑀦𑁆𑀢𑁄 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀸𑀤𑀺𑀪𑁂𑀤𑀁 𑀅𑀦𑁂𑀓𑀯𑀺𑀳𑀺𑀢𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀅𑀢𑀢𑀺 𑀲𑀢𑀢𑀁 𑀕𑀘𑁆𑀙𑀢𑀺 𑀧𑀸𑀧𑀼𑀡𑀸𑀢𑀺 𑀅𑀥𑀺𑀕𑀘𑁆𑀙𑀢𑀻𑀢𑀺 𑀅𑀢𑁆𑀢𑀸𑀢𑀺𑀧𑀺 𑀦𑀺𑀩𑁆𑀩𑀘𑀦𑀫𑀺𑀘𑁆𑀙𑀺𑀢𑀩𑁆𑀩𑀁. 𑀅𑀢𑁆𑀣𑀦𑁆𑀢𑀭𑀯𑀲𑁂𑀦 𑀧𑀦 ‘‘𑀆𑀳𑀺𑀢𑁄 𑀅𑀳𑀁𑀫𑀸𑀦𑁄 𑀏𑀢𑁆𑀣𑀸𑀢𑀺 𑀅𑀢𑁆𑀢𑀸, 𑀅𑀢𑁆𑀢𑀪𑀸𑀯𑁄’’𑀢𑀺 𑀘 ‘‘𑀲𑀼𑀔𑀤𑀼𑀓𑁆𑀔𑀁 𑀅𑀤𑀢𑀺 𑀅𑀦𑀼𑀪𑀯𑀢𑀻𑀢𑀺 𑀅𑀢𑁆𑀢𑀸’’𑀢𑀺 𑀘 ‘‘𑀅𑀢𑁆𑀢𑀫𑀦𑁄𑀢𑀺 𑀧𑀻𑀢𑀺𑀲𑁄𑀫𑀦𑀲𑁆𑀲𑁂𑀦 𑀕𑀳𑀺𑀢𑀫𑀦𑁄’’𑀢𑀺 𑀘 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀬𑀢𑁆𑀣 𑀬𑀢𑁆𑀣 𑀬𑀣𑀸 𑀬𑀣𑀸 𑀅𑀢𑁆𑀣𑁄 𑀮𑀩𑁆𑀪𑀢𑀺, 𑀢𑀢𑁆𑀣 𑀢𑀢𑁆𑀣 𑀢𑀣𑀸 𑀢𑀣𑀸 𑀅𑀢𑁆𑀣𑀲𑁆𑀲 𑀕𑀳𑁂𑀢𑀩𑁆𑀩𑀢𑁄𑀢𑀺.

𑀘𑀼𑀢 𑀆𑀲𑁂𑀘𑀦𑁂 𑀔𑀭𑀡𑁂 𑀘. 𑀘𑁄𑀢𑀢𑀺.

𑀅𑀢𑀺 𑀩𑀦𑁆𑀥𑀦𑁂. 𑀅𑀦𑁆𑀢𑀢𑀺. 𑀅𑀦𑁆𑀢𑀁. 𑀅𑀦𑁆𑀢𑀺𑀬𑀢𑀺𑀩𑀦𑁆𑀥𑀺𑀬𑀢𑀺 𑀅𑀦𑁆𑀢𑀕𑀼𑀡𑁂𑀦𑀸𑀢𑀺 𑀅𑀦𑁆𑀢𑀁. 𑀇𑀥 𑀅𑀦𑁆𑀢 𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄 𑀯𑀼𑀘𑁆𑀘𑀢𑁂 ‘‘𑀅𑀦𑁆𑀢𑀁 𑀅𑀦𑁆𑀢𑀕𑀼𑀡𑀁 𑀉𑀤𑀭𑀺𑀬’’𑀦𑁆𑀢𑀺 𑀏𑀢𑁆𑀣 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀦𑁆𑀢𑁄𑀕𑀥𑀁 𑀓𑀼𑀡𑀧𑀦𑁆𑀢𑀁 𑀅𑀦𑁆𑀢𑀁 𑀦𑀸𑀫. ‘‘𑀓𑀸𑀬𑀩𑀦𑁆𑀥𑀦𑀲𑁆𑀲 𑀅𑀦𑁆𑀢𑁄 𑀚𑀻𑀭𑀢𑀺. 𑀳𑀭𑀺𑀢𑀦𑁆𑀢𑀁 𑀯𑀸’’𑀢𑀺 𑀏𑀢𑁆𑀣 𑀅𑀦𑁆𑀢𑀺𑀫𑀫𑀭𑀺𑀬𑀸𑀤𑀦𑁆𑀢𑁄 𑀅𑀦𑁆𑀢𑁄 𑀦𑀸𑀫. ‘‘𑀅𑀦𑁆𑀢𑀫𑀺𑀤𑀁 𑀪𑀺𑀓𑁆𑀔𑀯𑁂 𑀚𑀻𑀯𑀺𑀓𑀸𑀦’’𑀦𑁆𑀢𑀺 𑀏𑀢𑁆𑀣 𑀮𑀸𑀫𑀓𑀦𑁆𑀢𑁄. ‘‘𑀲𑀓𑁆𑀓𑀸𑀬𑁄 𑀏𑀓𑁄 𑀅𑀦𑁆𑀢𑁄’’𑀢𑀺 𑀏𑀢𑁆𑀣 𑀓𑁄𑀝𑁆𑀞𑀸𑀲𑀦𑁆𑀢𑁄. ‘‘𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲 𑀲𑀧𑁆𑀧𑀘𑁆𑀘𑀬𑀲𑀗𑁆𑀔𑀬𑀸’’𑀢𑀺 𑀏𑀢𑁆𑀣 𑀓𑁄𑀝𑀦𑁆𑀢𑁄. 𑀇𑀘𑁆𑀘𑁂𑀯𑀁 𑁋

𑀓𑀼𑀡𑀧𑀦𑁆𑀢𑀁 ¶ 𑀅𑀦𑁆𑀢𑀺𑀫𑀜𑁆𑀘, 𑀫𑀭𑀺𑀬𑀸𑀤𑁄 𑀘 𑀮𑀸𑀫𑀓𑀁;

𑀓𑁄𑀝𑁆𑀞𑀸𑀲𑁄 𑀓𑁄𑀝𑀺’𑀫𑁂 𑀅𑀢𑁆𑀣𑁄, 𑀅𑀦𑁆𑀢𑀲𑀤𑁆𑀤𑁂𑀦 𑀪𑀸𑀲𑀺𑀢𑀸.

𑀓𑀺𑀢 𑀦𑀺𑀯𑀸𑀲𑁂 𑀭𑁄𑀕𑀸𑀧𑀦𑀬𑀦𑁂 𑀘. 𑀓𑁂𑀢𑀢𑀺. 𑀲𑀸𑀓𑁂𑀢𑀁 𑀦 𑀕𑀭𑀁, 𑀦𑀺𑀓𑁂𑀢𑁄, 𑀦𑀺𑀓𑁂𑀢𑀁 𑀧𑀸𑀯𑀺𑀲𑀺. 𑀆𑀫𑁄𑀤𑀫𑀸𑀦𑁄 𑀕𑀘𑁆𑀙𑀢𑀺 𑀲𑀦𑁆𑀦𑀺𑀓𑁂𑀢𑀁. 𑀢𑀺𑀓𑀺𑀘𑁆𑀙𑀢𑀺, 𑀘𑀺𑀓𑀺𑀘𑁆𑀙𑀢𑀺, 𑀘𑀺𑀓𑀺𑀘𑁆𑀙𑀸, 𑀘𑀺𑀓𑀺𑀘𑁆𑀙𑀓𑁄. 𑀢𑀢𑁆𑀣 𑀲𑀸𑀓𑁂𑀢𑀦𑁆𑀢𑀺 𑀲𑀸𑀬𑀁 𑀕𑀳𑀺𑀢𑀯𑀲𑀦𑀝𑁆𑀞𑀸𑀦𑀢𑁆𑀢𑀸 𑀲𑀸𑀓𑁂𑀢𑀁, 𑀬𑀁𑀲𑀤𑁆𑀤𑀮𑁄𑀧𑁄.

𑀬𑀢 𑀧𑀢𑀺𑀬𑀢𑀦𑁂. 𑀧𑀢𑀺𑀬𑀢𑀦𑀁 𑀯𑀸𑀬𑀸𑀫𑀓𑀭𑀡𑀁. 𑀬𑀢𑀢𑀺. 𑀬𑀢𑀺, 𑀬𑀢𑀯𑀸, 𑀧𑀬𑀢𑀦𑀁, 𑀆𑀬𑀢𑀦𑀁, 𑀮𑁄𑀓𑀸𑀬𑀢𑀁. 𑀏𑀢𑁆𑀣 𑀆𑀬𑀢𑀦𑀦𑁆𑀢𑀺 𑀆𑀬𑀢𑀦𑀢𑁄 𑀆𑀬𑀢𑀦𑀁, 𑀘𑀓𑁆𑀔𑀼𑀭𑀽𑀧𑀸𑀤𑀻𑀦𑀺. 𑀏𑀢𑀸𑀦𑀺 𑀳𑀺 𑀢𑀁𑀤𑁆𑀯𑀸𑀭𑀸𑀭𑀫𑁆𑀫𑀡𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀲𑁂𑀦 𑀲𑁂𑀦 𑀅𑀦𑀼𑀪𑀯𑀦𑀸𑀤𑀺𑀓𑀺𑀘𑁆𑀘𑁂𑀦 𑀆𑀬𑀢𑀦𑁆𑀢𑀺 𑀉𑀝𑁆𑀞𑀳𑀦𑁆𑀢𑀺 𑀖𑀝𑀦𑁆𑀢𑀺 𑀯𑀸𑀬𑀫𑀦𑁆𑀢𑀺 𑀏𑀢𑁂𑀲𑀽𑀢𑀺 ‘‘𑀆𑀬𑀢𑀦𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀢𑁆𑀣 𑀧𑀦 𑀦𑀻𑀢𑀦𑀼𑀥𑀸𑀢𑀽𑀦𑀁 𑀯𑀲𑁂𑀦𑀧𑀺 𑀆𑀬𑀢𑀦𑀲𑀤𑁆𑀤𑀢𑁆𑀣𑁄 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸, 𑀲𑁄 𑀉𑀢𑁆𑀢𑀭𑀺 𑀆𑀯𑀺𑀪𑀯𑀺𑀲𑁆𑀲𑀢𑀺.

𑀆𑀬𑀢𑀦𑀲𑀤𑁆𑀤𑁄 𑀦𑀺𑀯𑀸𑀲𑀝𑁆𑀞𑀸𑀦𑁂 𑀆𑀓𑀭𑁂 𑀲𑀫𑁄𑀲𑀭𑀡𑀝𑁆𑀞𑀸𑀦𑁂 𑀲𑀜𑁆𑀚𑀸𑀢𑀺𑀤𑁂𑀲𑁂 𑀓𑀸𑀭𑀡𑁂 𑀘. 𑀢𑀣𑀸 𑀳𑀺 ‘‘𑀮𑁄𑀓𑁂 𑀇𑀲𑁆𑀲𑀭𑀸𑀬𑀢𑀦𑀁 𑀯𑀸𑀲𑀼𑀤𑁂𑀯𑀸𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀦𑀺𑀯𑀸𑀲𑀝𑁆𑀞𑀸𑀦𑁂 𑀆𑀬𑀢𑀦𑀲𑀤𑁆𑀤𑁄 𑀯𑀢𑁆𑀢𑀢𑀺. ‘‘𑀲𑀼𑀯𑀡𑁆𑀡𑀸𑀬𑀢𑀦𑀁 𑀭𑀚𑀢𑀸𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀆𑀓𑀭𑁂. 𑀲𑀸𑀲𑀦𑁂 𑀧𑀦 ‘‘𑀫𑀦𑁄𑀭𑀫𑁂 𑀆𑀬𑀢𑀦𑁂, 𑀲𑁂𑀯𑀦𑁆𑀢𑀺 𑀦𑀁 𑀯𑀺𑀳𑀗𑁆𑀕𑀫𑀸’’𑀢𑀺𑀆𑀤𑀻𑀲𑀼 𑀲𑀫𑁄𑀲𑀭𑀡𑀝𑁆𑀞𑀸𑀦𑁂. ‘‘𑀤𑀓𑁆𑀔𑀺𑀡𑀸𑀧𑀣𑁄 𑀕𑀼𑀦𑁆𑀦𑀁 𑀆𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀲𑀜𑁆𑀚𑀸𑀢𑀺𑀤𑁂𑀲𑁂. ‘‘𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀺 𑀲𑀢𑀺 𑀲𑀢𑀺𑀆𑀬𑀢𑀦𑁂’’𑀢𑀺𑀆𑀤𑀻𑀲𑀼 𑀓𑀸𑀭𑀡𑁂 𑀯𑀢𑁆𑀢𑀢𑀻𑀢𑀺 ¶ 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘 𑀦𑀸𑀦𑀸𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀯𑀲𑁂𑀦 𑀕𑀳𑁂𑀢𑀩𑁆𑀩𑁄.

𑀦𑀺𑀯𑀸𑀲𑁂 𑀆𑀓𑀸𑀭𑁂 𑀘𑁂𑀯, 𑀚𑀸𑀢𑀺𑀤𑁂𑀲𑁂 𑀘 𑀓𑀸𑀭𑀡𑁂;

𑀲𑀫𑁄𑀲𑀭𑀡𑀝𑁆𑀞𑀸𑀦𑁂 𑀘, 𑀆𑀬𑀢𑀦𑀭𑀯𑁄 𑀕𑀢𑁄.

𑀮𑁄𑀓𑀸𑀬𑀢𑀁 𑀦𑀸𑀫 ‘‘𑀲𑀩𑁆𑀩𑀁 𑀉𑀘𑁆𑀙𑀺𑀝𑁆𑀞𑀁, 𑀲𑀩𑁆𑀩𑀁 𑀦𑀼𑀘𑁆𑀙𑀺𑀝𑁆𑀞𑀁. 𑀲𑁂𑀢𑁄 𑀓𑀸𑀓𑁄, 𑀓𑀸𑀴𑁄 𑀩𑀓𑁄 𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦𑀸’’𑀢𑀺 𑀏𑀯𑀫𑀸𑀤𑀺𑀦𑀺𑀭𑀢𑁆𑀣𑀓𑀓𑀸𑀭𑀡𑀧𑀝𑀺𑀲𑀁𑀬𑀼𑀢𑁆𑀢𑀁 𑀢𑀺𑀢𑁆𑀣𑀺𑀬𑀲𑀢𑁆𑀣𑀁, 𑀬𑀁 𑀮𑁄𑀓𑁂 ‘‘𑀯𑀺𑀢𑀡𑁆𑀟𑀲𑀢𑁆𑀣’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀬𑀜𑁆𑀘 𑀲𑀦𑁆𑀥𑀸𑀬 𑀩𑁄𑀥𑀺𑀲𑀢𑁆𑀢𑁄 𑀅𑀲𑀫𑀥𑀼𑀭𑁄 𑀯𑀺𑀥𑀼𑀭𑀧𑀡𑁆𑀟𑀺𑀢𑁄 ‘‘𑀦 𑀲𑁂𑀯𑁂 𑀮𑁄𑀓𑀸𑀬𑀢𑀺𑀓𑀁, 𑀦𑁂𑀢𑀁 𑀧𑀜𑁆𑀜𑀸𑀬 𑀯𑀟𑁆𑀠𑀦’’𑀦𑁆𑀢𑀺 𑀆𑀳. 𑀆𑀬𑀢𑀺𑀁 𑀳𑀺𑀢𑀁 𑀢𑁂𑀦 𑀮𑁄𑀓𑁄 𑀦 𑀬𑀢𑀢𑀺 𑀦 𑀈𑀳𑀢𑀻𑀢𑀺 𑀮𑁄𑀓𑀸𑀬𑀢𑀁, 𑀓𑀺𑀦𑁆𑀢𑀁? 𑀯𑀺𑀢𑀡𑁆𑀟𑀲𑀢𑁆𑀣𑀁. 𑀢𑀜𑁆𑀳𑀺 𑀕𑀦𑁆𑀣𑀁 𑀦𑀺𑀲𑁆𑀲𑀸𑀬 𑀲𑀢𑁆𑀢𑀸 𑀧𑀼𑀜𑁆𑀜𑀓𑁆𑀭𑀺𑀬𑀸𑀬 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀅𑀜𑁆𑀜𑀢𑁆𑀣𑀸𑀧𑀺 𑀳𑀺 𑀏𑀯𑀁 𑀯𑀼𑀢𑁆𑀢𑀁 ‘‘𑀮𑁄𑀓𑀸𑀬𑀢𑀲𑀺𑀧𑁆𑀧𑀦𑁆𑀢𑀺 ‘𑀓𑀸𑀓𑁄 𑀲𑁂𑀢𑁄, 𑀅𑀝𑁆𑀞𑀻𑀦𑀁 𑀲𑁂𑀢𑀢𑁆𑀢𑀸, 𑀩𑀮𑀸𑀓𑀸 𑀭𑀢𑁆𑀢𑀸, 𑀮𑁄𑀳𑀺𑀢𑀲𑁆𑀲 𑀭𑀢𑁆𑀢𑀢𑁆𑀢𑀸’𑀢𑀺 𑀏𑀯𑀫𑀸𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀧𑀭𑀮𑁄𑀓𑀦𑀺𑀩𑁆𑀩𑀸𑀦𑀸𑀦𑀁 𑀧𑀝𑀺𑀲𑁂𑀥𑀓𑀁 𑀯𑀺𑀢𑀡𑁆𑀟𑀲𑀢𑁆𑀣𑀲𑀺𑀧𑁆𑀧’’𑀦𑁆𑀢𑀺.

𑀬𑀼𑀢 𑀚𑀼𑀢 𑀪𑀸𑀲𑀦𑁂. 𑀪𑀸𑀲𑀦𑀁 𑀉𑀤𑀻𑀭𑀡𑀁. 𑀬𑁄𑀢𑀢𑀺. 𑀚𑁄𑀢𑀢𑀺.

𑀚𑀼𑀢𑀤𑀺𑀢𑁆𑀢𑀺𑀬𑀁. 𑀚𑁄𑀢𑀢𑀺, 𑀯𑀺𑀚𑁆𑀚𑁄𑀢𑀢𑀺. 𑀚𑀼𑀢𑀺, 𑀚𑁄𑀢𑀺. 𑀓𑀸𑀭𑀺𑀢𑁂 ‘‘𑀚𑁄𑀢𑁂𑀢𑀺, 𑀚𑁄𑀢𑀬𑀺𑀢𑁆𑀯𑀸𑀦 𑀲𑀤𑁆𑀥𑀫𑁆𑀫’’𑀦𑁆𑀢𑀺 𑀧𑀬𑁄𑀕𑀸. 𑀏𑀢𑁆𑀣 𑀘 𑀚𑀼𑀢𑀻𑀢𑀺 𑀆𑀮𑁄𑀓𑁄 𑀲𑀺𑀭𑀺 𑀯𑀸. 𑀚𑁄𑀢𑀻𑀢𑀺 𑀧𑀢𑀸𑀧𑁄. 𑀅𑀣 𑀯𑀸 𑀚𑁄𑀢𑀻𑀢𑀺 𑀘𑀦𑁆𑀤𑀸𑀤𑀻𑀦𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢 𑀲𑀺𑀭𑀺𑀫𑀸𑀯𑀺𑀫𑀸𑀦 𑀯𑀢𑁆𑀣𑀼𑀅𑀝𑁆𑀞𑀓𑀣𑀸𑀬𑀁 ‘‘𑀚𑁄𑀢𑀻𑀢𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀦𑀓𑁆𑀔𑀢𑁆𑀢𑀢𑀸𑀭𑀓𑀸𑀦𑀁 𑀲𑀸𑀥𑀸𑀭𑀡𑀦𑀸𑀫’’𑀦𑁆𑀢𑀺. 𑀅𑀣 𑀯𑀸 ‘‘𑀚𑁄𑀢𑀺 𑀚𑁄𑀢𑀺𑀧𑀭𑀸𑀬𑀡𑁄’’𑀢𑀺 𑀯𑀘𑀦𑀢𑁄 𑀬𑁄 𑀓𑁄𑀘𑀺 𑀚𑁄𑀢𑀢𑀺 𑀔𑀢𑁆𑀢𑀺𑀬𑀓𑀼𑀮𑀸𑀤𑀻𑀲𑀼 𑀚𑀸𑀢𑀢𑁆𑀢𑀸 𑀘 𑀭𑀽𑀧𑀲𑁄𑀪𑀸𑀬𑀼𑀢𑁆𑀢𑀢𑁆𑀢𑀸 𑀘, 𑀲𑁄 ‘‘𑀚𑁄𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀲𑀺𑀢 ¶ 𑀯𑀡𑁆𑀡𑁄. 𑀲𑀺𑀢𑀥𑀸𑀢𑀼 𑀲𑁂𑀢𑀯𑀡𑁆𑀡𑁂 𑀯𑀢𑁆𑀢𑀢𑀺. 𑀓𑀺𑀜𑁆𑀘𑀸𑀧𑁂𑀢𑁆𑀣 𑀯𑀡𑁆𑀡𑀲𑀸𑀫𑀜𑁆𑀜𑀁 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀇𑀥 𑀦𑀻𑀮𑀧𑀻𑀢𑀸𑀤𑀻𑀲𑀼 𑀲𑁂𑀢𑀯𑀡𑁆𑀡𑁄𑀬𑁂𑀯 𑀕𑀳𑁂𑀢𑀩𑁆𑀩𑁄 𑀧𑀬𑁄𑀕𑀤𑀲𑁆𑀲𑀦𑀯𑀲𑁂𑀦. 𑀲𑁂𑀢𑀢𑀺. 𑀲𑁂𑀢𑀁 𑀯𑀢𑁆𑀣𑀁. 𑀯𑀸𑀘𑁆𑀘𑀮𑀺𑀗𑁆𑀕𑀢𑁆𑀢𑀸 𑀧𑀦 𑀲𑁂𑀢𑀲𑀤𑁆𑀤𑁄 𑀢𑀺𑀮𑀺𑀗𑁆𑀕𑁄 𑀕𑀳𑁂𑀢𑀩𑁆𑀩𑁄.

𑀲𑁂𑀢𑀁 𑀲𑀺𑀢𑀁 𑀲𑀼𑀘𑀺 𑀲𑀼𑀓𑁆𑀓𑀁, 𑀧𑀡𑁆𑀟𑀭𑀁 𑀥𑀯𑀮𑀫𑁆𑀧𑀺 𑀘;

𑀅𑀓𑀡𑁆𑀳𑀁 𑀕𑁄𑀭𑀫𑁄𑀤𑀸𑀢𑀁, 𑀲𑁂𑀢𑀦𑀸𑀫𑀸𑀦𑀺 𑀳𑁄𑀦𑁆𑀢𑀺 𑀳𑀺.

𑀯𑀢𑀼 𑀯𑀢𑁆𑀢𑀦𑁂. 𑀯𑀢𑁆𑀢𑀢𑀺, 𑀧𑀯𑀢𑁆𑀢𑀢𑀺, 𑀲𑀁𑀯𑀢𑁆𑀢𑀢𑀺, 𑀅𑀦𑀼𑀯𑀢𑁆𑀢𑀢𑀺, 𑀧𑀭𑀺𑀯𑀢𑁆𑀢𑀢𑀺. 𑀧𑀯𑀢𑁆𑀢𑀁.

𑀓𑀺𑀮𑁄𑀢 𑀅𑀤𑁆𑀤𑀪𑀸𑀯𑁂. 𑀅𑀤𑁆𑀤𑀪𑀸𑀯𑁄 𑀢𑀺𑀦𑁆𑀢𑀪𑀸𑀯𑁄. 𑀓𑀺𑀮𑁄𑀢𑀢𑀺, 𑀧𑀓𑀺𑀮𑁄𑀢𑀢𑀺, 𑀢𑁂𑀫𑁂𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀭𑀺𑀢𑁂 𑀧𑀓𑀺𑀮𑁄𑀢𑁂𑀢𑀺, 𑀧𑀓𑀺𑀮𑁄𑀢𑀬𑀢𑀺. 𑀉𑀡𑁆𑀳𑁄𑀤𑀓𑀲𑁆𑀫𑀺𑀁 𑀧𑀓𑀺𑀮𑁄𑀢𑀬𑀺𑀢𑁆𑀯𑀸, 𑀢𑁂𑀫𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀯𑀢 𑀬𑀸𑀘𑀦𑁂. 𑀯𑀢𑀢𑀺.

𑀓𑀺𑀢 𑀜𑀸𑀡𑁂. 𑀓𑁂𑀢𑀢𑀺. 𑀓𑁂𑀢𑀦𑀁, 𑀓𑁂𑀢𑀓𑁄, 𑀲𑀗𑁆𑀓𑁂𑀢𑁄.

𑀓𑀢𑀺 𑀲𑀼𑀢𑁆𑀢𑀚𑀦𑀦𑁂. 𑀲𑀼𑀢𑁆𑀢𑀁 𑀓𑀦𑁆𑀢𑀢𑀺.

𑀓𑀢𑀺 𑀙𑁂𑀤𑀦𑁂. 𑀫𑀁𑀲𑀁 𑀓𑀦𑁆𑀢𑀢𑀺, 𑀯𑀺𑀓𑀦𑁆𑀢𑀢𑀺, 𑀅𑀬𑁄𑀓𑀦𑁆𑀢𑁄. 𑀲𑀮𑁆𑀮𑀓𑀦𑁆𑀢𑁄 𑀫𑀳𑀸𑀯𑀻𑀭𑁄. 𑀫𑀸 𑀦𑁄 𑀅𑀚𑁆𑀚 𑀯𑀺𑀓𑀦𑁆𑀢𑀺𑀁𑀲𑀼, 𑀭𑀜𑁆𑀜𑁄 𑀲𑀽𑀤𑀸 𑀫𑀳𑀸𑀦𑀲𑁂.

𑀘𑀢𑀻 𑀳𑀺𑀁𑀲𑀸𑀕𑀦𑁆𑀥𑁂𑀲𑀼. 𑀈𑀓𑀸𑀭𑀦𑁆𑀢𑀢𑁆𑀢𑀸 𑀇𑀫𑀲𑁆𑀫𑀸 𑀦𑀺𑀕𑁆𑀕𑀳𑀻𑀢𑀸𑀕𑀫𑁄 𑀦 𑀳𑁄𑀢𑀺. 𑀘𑀢𑀢𑀺.

𑀢𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀣𑀓𑀸𑀭𑀦𑁆𑀢𑀥𑀸𑀢𑀼

𑀣𑀸 ¶ 𑀕𑀢𑀺𑀦𑀺𑀯𑀢𑁆𑀢𑀺𑀬𑀁. 𑀣𑀸𑀢𑀺. 𑀅𑀯𑀢𑁆𑀣𑀸, 𑀯𑀯𑀢𑁆𑀣𑀸𑀦𑀁, 𑀯𑀯𑀢𑁆𑀣𑀺𑀢𑀁, 𑀯𑀦𑀣𑁄. ‘‘𑀙𑁂𑀢𑁆𑀯𑀸 𑀯𑀦𑀁 𑀯𑀦𑀣𑀜𑁆𑀘𑀸’’𑀢𑀺 𑀏𑀢𑁆𑀣 𑀳𑀺 𑀫𑀳𑀦𑁆𑀢𑀸 𑀭𑀼𑀓𑁆𑀔𑀸 𑀯𑀦𑀁 𑀦𑀸𑀫, 𑀔𑀼𑀤𑁆𑀤𑀓𑀸 𑀧𑀦 𑀢𑀲𑁆𑀫𑀺𑀁 𑀯𑀦𑁂 𑀞𑀺𑀢𑀢𑁆𑀢𑀸 𑀯𑀦𑀣𑁄 𑀦𑀸𑀫 𑀯𑀼𑀘𑁆𑀘𑀦𑁆𑀢𑀺.

𑀣𑀼 𑀣𑀼𑀢𑀺𑀬𑀁. 𑀣𑀯𑀢𑀺, 𑀅𑀪𑀺𑀢𑁆𑀣𑀯𑀢𑀺. 𑀣𑀯𑀦𑀸, 𑀅𑀪𑀺𑀢𑁆𑀣𑀯𑀦𑀸, 𑀣𑀼𑀢𑀺, 𑀅𑀪𑀺𑀢𑁆𑀣𑀼𑀢𑀺.

𑀬𑀤𑀺 𑀳𑀺 𑀭𑀽𑀧𑀺𑀦𑀻 𑀲𑀺𑀬𑀸, 𑀧𑀜𑁆𑀜𑀸 𑀫𑁂 𑀯𑀲𑀼𑀫𑀢𑀻 𑀦 𑀲𑀫𑁂𑀬𑁆𑀬;

𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄, 𑀨𑀮𑀫𑁂𑀢𑀁 𑀜𑀸𑀡𑀣𑀯𑀦𑀸𑀬.

𑀢𑁂𑀳𑀺 𑀣𑀼𑀢𑀺𑀧𑁆𑀧𑀲𑀢𑁆𑀣𑁄 𑀲𑁄, 𑀬𑁂𑀦𑀺𑀤𑀁 𑀣𑀯𑀺𑀢𑀁 𑀜𑀸𑀡𑀁, 𑀩𑀼𑀤𑁆𑀥𑀲𑁂𑀝𑁆𑀞𑁄 𑀘 𑀣𑁄𑀫𑀺𑀢𑁄. 𑀢𑀢𑁆𑀭 𑀣𑀯𑀦𑀸𑀢𑀺 𑀧𑀲𑀁𑀲𑀦𑀸. 𑀧𑀲𑀁𑀲𑀸𑀬 𑀳𑀺 𑀅𑀦𑁂𑀓𑀸𑀦𑀺 𑀦𑀸𑀫𑀸𑀦𑀺.

𑀣𑀯𑀦𑀸 𑀘 𑀧𑀲𑀁𑀲𑀸 𑀘, 𑀲𑀺𑀮𑀸𑀖𑀸 𑀯𑀡𑁆𑀡𑀦𑀸 𑀣𑀼𑀢𑀺;

𑀧𑀦𑀼𑀢𑀺 𑀣𑁄𑀫𑀦𑀸 𑀯𑀡𑁆𑀡𑁄, 𑀓𑀢𑁆𑀣𑀦𑀸 𑀕𑀼𑀡𑀓𑀺𑀢𑁆𑀢𑀦𑀁;

𑀣𑁂 𑀲𑀤𑁆𑀤𑀲𑀗𑁆𑀖𑀸𑀢𑁂𑀲𑀼. 𑀣𑀻𑀬𑀢𑀺, 𑀧𑀢𑀺𑀢𑁆𑀣𑀻𑀬𑀢𑀺. 𑀣𑀻. 𑀅𑀢𑁆𑀭𑀺𑀫𑀸 𑀧𑀸𑀴𑀺𑀬𑁄 𑁋 𑀅𑀪𑀺𑀲𑀚𑁆𑀚𑀢𑀺 𑀓𑀼𑀧𑁆𑀧𑀢𑀺 𑀩𑁆𑀬𑀸𑀧𑀚𑁆𑀚𑀢𑀺 𑀧𑀢𑀺𑀢𑁆𑀣𑀻𑀬𑀢𑀺, 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑀼𑀓𑀭𑁄𑀢𑀺. 𑀣𑀺𑀬𑁄 𑀦𑀁 𑀧𑀭𑀺𑀪𑀸𑀲𑀺𑀁𑀲𑀽𑀢𑀺. 𑀢𑀢𑁆𑀭 ‘‘𑀣𑀻𑀬𑀢𑀺 𑀧𑀢𑀺𑀢𑁆𑀣𑀻𑀬𑀢𑀻’’𑀢𑀺𑀫𑀸𑀦𑀺 𑀏𑀓𑀸𑀭𑀲𑁆𑀲𑀻𑀬𑀸𑀤𑁂𑀲𑀯𑀲𑁂𑀦 𑀲𑀫𑁆𑀪𑀽𑀢𑀸𑀦𑀺. 𑀣𑀻𑀬𑀢𑀺 𑀲𑀗𑁆𑀖𑀸𑀢𑀁 𑀕𑀘𑁆𑀙𑀢𑀺 𑀕𑀩𑁆𑀪𑁄 𑀏𑀢𑀺𑀲𑁆𑀲𑀸𑀢𑀺 𑀣𑀻. 𑀆𑀘𑀭𑀺𑀬𑀸 𑀧𑀦 𑀇𑀢𑁆𑀣𑀻𑀲𑀤𑁆𑀤𑀲𑁆𑀲𑁂𑀯 𑀏𑀯𑀁 𑀦𑀺𑀩𑁆𑀩𑀘𑀦𑀁 𑀯𑀤𑀦𑁆𑀢𑀺, 𑀦 𑀣𑀻𑀲𑀤𑁆𑀤𑀲𑁆𑀲.

𑀕𑀩𑁆𑀪𑁄 𑀣𑀻𑀬𑀢𑀺 𑀏𑀢𑀺𑀲𑁆𑀲𑀸, 𑀇𑀢𑀺 𑀣𑀻 𑀇𑀢𑀺 𑀦𑁄 𑀭𑀼𑀘𑀺;

𑀕𑀩𑁆𑀪𑁄 𑀣𑀻𑀬𑀢𑀺 𑀏𑀢𑀺𑀲𑁆𑀲𑀸, 𑀇𑀢𑀺 𑀇𑀢𑁆𑀣𑀻𑀢𑀺 𑀆𑀘𑀭𑀺𑀬𑀸.

𑀢𑁂𑀲𑀁 𑀲𑀼𑀤𑀼𑀓𑁆𑀓𑀭𑁄𑀯𑀸𑀤𑁂, ‘‘𑀇𑀢𑁆𑀣𑀻’’𑀢𑀺 𑀧𑀤𑀲𑀫𑁆𑀪𑀯𑁄;

𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑀧𑀢𑁆𑀢𑁄, 𑀦𑀺𑀘𑁆𑀙𑀬𑀁 𑀪𑁄 𑀲𑀼𑀡𑀸𑀣 𑀫𑁂.

𑀣𑀻𑀲𑀤𑁆𑀤𑁂𑀦 ¶ 𑀲𑀫𑀸𑀦𑀢𑁆𑀣𑁄, 𑀇𑀢𑁆𑀣𑀻𑀲𑀤𑁆𑀤𑁄 𑀬𑀢𑁄 𑀢𑀢𑁄;

𑀣𑀻𑀲𑀤𑁆𑀤𑁂 𑀮𑀩𑁆𑀪𑀫𑀸𑀦𑀢𑁆𑀣𑀁, 𑀇𑀢𑁆𑀣𑀻𑀲𑀤𑁆𑀤𑀫𑁆𑀳𑀺 𑀭𑁄𑀧𑀺𑀬.

𑀅𑀧𑁆𑀧𑀸𑀦𑀁 𑀩𑀳𑀼𑀢𑀸 𑀜𑀸𑀬𑁂, 𑀕𑀳𑀺𑀢𑁂 𑀲𑀢𑀺 𑀬𑀼𑀚𑁆𑀚𑀢𑀺;

𑀢𑀣𑀸 𑀳𑀺 ‘‘𑀤𑁆𑀯𑁂 𑀤𑀼𑀯𑁂, 𑀢𑀡𑁆𑀳𑀸, 𑀢𑀲𑀺𑀡𑀸’’𑀢𑀺 𑀦𑀺𑀤𑀲𑁆𑀲𑀦𑀁.

𑀅𑀣 𑀯𑀸 𑀧𑀦 ‘‘𑀇𑀢𑁆𑀣𑀻’’𑀢𑀺-𑀇𑀤𑀁 𑀯𑀡𑁆𑀡𑀸𑀕𑀫𑀸𑀤𑀺𑀢𑁄;

𑀦𑀺𑀭𑀼𑀢𑁆𑀢𑀺𑀮𑀓𑁆𑀔𑀡𑁂𑀦𑀸𑀧𑀺, 𑀲𑀺𑀚𑁆𑀛𑀢𑀻𑀢𑀺 𑀧𑀓𑀸𑀲𑀬𑁂.

𑀇𑀘𑁆𑀙𑀢𑀻𑀢𑀺 𑀦𑀭𑁂 𑀇𑀢𑁆𑀣𑀻, 𑀇𑀘𑁆𑀙𑀸𑀧𑁂𑀢𑀻𑀢𑀺 𑀯𑀸 𑀧𑀦;

𑀇𑀤𑀁 𑀦𑀺𑀩𑁆𑀩𑀘𑀦𑀜𑁆𑀘𑀸𑀧𑀺 𑀜𑁂𑀬𑁆𑀬𑀁 𑀦𑀺𑀩𑁆𑀩𑀘𑀦𑀢𑁆𑀣𑀺𑀦𑀸.

𑀅𑀢𑁆𑀭𑀺𑀫𑀸𑀦𑀺 𑀇𑀢𑁆𑀣𑀻𑀦𑀫𑀪𑀺𑀥𑀸𑀦𑀸𑀦𑀺 𑁋

𑀇𑀢𑁆𑀣𑀻 𑀣𑀻 𑀯𑀦𑀺𑀢𑀸 𑀦𑀸𑀭𑀻, 𑀅𑀩𑀮𑀸 𑀪𑀻𑀭𑀼 𑀲𑀼𑀦𑁆𑀤𑀭𑀻;

𑀓𑀦𑁆𑀢𑀸 𑀲𑀻𑀫𑀦𑀺𑀦𑀻 𑀫𑀸𑀢𑀼-𑀕𑀸𑀫𑁄 𑀧𑀺𑀬𑀸 𑀘 𑀓𑀸𑀫𑀺𑀦𑀻.

𑀭𑀫𑀡𑀻 𑀧𑀫𑀤𑀸 𑀤𑀬𑀺𑀢𑀸, 𑀮𑀮𑀦𑀸 𑀫𑀳𑀺𑀮𑀸’𑀗𑁆𑀕𑀦𑀸;

𑀢𑀸𑀲𑀁𑀬𑁂𑀯 𑀘 𑀦𑀸𑀫𑀸𑀦𑀺, 𑀅𑀯𑀢𑁆𑀣𑀸𑀢𑁄 𑀇𑀫𑀸𑀦𑀺𑀧𑀺.

𑀕𑁄𑀭𑀻 𑀘 𑀤𑀸𑀭𑀺𑀓𑀸 𑀓𑀜𑁆𑀜𑀸, 𑀓𑀼𑀫𑀸𑀭𑀻 𑀘 𑀓𑀼𑀫𑀸𑀭𑀺𑀓𑀸;

𑀬𑀼𑀯𑀢𑀻 𑀢𑀭𑀼𑀡𑀻 𑀫𑀸𑀡-𑀯𑀺𑀓𑀸 𑀣𑁂𑀭𑀻 𑀫𑀳𑀮𑁆𑀮𑀺𑀓𑀸.

𑀢𑀣𑀸 𑀳𑀺 𑀅𑀝𑁆𑀞𑀯𑀲𑁆𑀲𑀺𑀓𑀸 𑀕𑁄𑀭𑀻𑀢𑀺𑀧𑀺 𑀤𑀸𑀭𑀺𑀓𑀸𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀤𑀲𑀯𑀲𑁆𑀲𑀺𑀓𑀸 𑀓𑀜𑁆𑀜𑀸𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀺𑀩𑁆𑀩𑀺𑀤𑁆𑀥𑀸 𑀯𑀸 𑀬𑁄𑀩𑁆𑀩𑀦𑀺𑀢𑁆𑀣𑀻 𑀓𑀜𑁆𑀜𑀸𑀢𑀺 𑀯𑀼𑀘𑁆𑀘𑀢𑀺. 𑀤𑁆𑀯𑀸𑀤𑀲𑀯𑀲𑁆𑀲𑀺𑀓𑀸 𑀓𑀼𑀫𑀸𑀭𑀻𑀢𑀺𑀧𑀺 𑀯𑀼𑀘𑁆𑀘𑀢𑀺 𑀓𑀼𑀫𑀸𑀭𑀺𑀓𑀸𑀢𑀺𑀧𑀺. 𑀅𑀣𑁄 𑀚𑀭𑀁 𑀅𑀧𑁆𑀧𑀢𑁆𑀢𑀸 𑀬𑀼𑀯𑀢𑀻𑀢𑀺𑀧𑀺 𑀢𑀭𑀼𑀡𑀻𑀢𑀺𑀧𑀺 𑀫𑀸𑀡𑀯𑀺𑀓𑀸𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀚𑀭𑀁 𑀧𑀢𑁆𑀢𑀸 𑀧𑀦 𑀣𑁂𑀭𑀻𑀢𑀺𑀧𑀺 𑀫𑀳𑀮𑁆𑀮𑀺𑀓𑀸𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀧𑀼𑀭𑀺𑀲𑁂𑀲𑀼𑀧𑀺 𑀅𑀬𑀁 𑀦𑀬𑁄 𑀬𑀣𑀸𑀭𑀳𑀁 𑀯𑁂𑀤𑀺𑀢𑀩𑁆𑀩𑁄.

𑀓𑀺𑀜𑁆𑀘𑀸𑀧𑁂𑀢𑁆𑀣 𑀏𑀯𑀁 𑀦𑀺𑀬𑀫𑁄 𑀯𑀼𑀢𑁆𑀢𑁄, 𑀢𑀣𑀸𑀧𑀺 𑀓𑀢𑁆𑀣𑀘𑀺 𑀅𑀦𑀺𑀬𑀫𑀯𑀲𑁂𑀦𑀧𑀺 𑀯𑁄𑀳𑀸𑀭𑁄 𑀧𑀯𑀢𑁆𑀢𑀢𑀺. 𑀢𑀣𑀸 𑀳𑀺 ‘‘𑀭𑀸𑀚𑀸 𑀓𑀼𑀫𑀸𑀭𑀫𑀸𑀤𑀸𑀬, 𑀭𑀸𑀚𑀧𑀼𑀢𑁆𑀢𑀻 𑀘 𑀤𑀸𑀭𑀺𑀓’’𑀦𑁆𑀢𑀺 𑀘 ‘‘𑀅𑀘𑁆𑀙𑀸 𑀓𑀡𑁆𑀳𑀸𑀚𑀺𑀦𑀁 𑀓𑀜𑁆𑀜’’𑀦𑁆𑀢𑀺 𑀘 𑀇𑀫𑀸𑀲𑀁 𑀤𑁆𑀯𑀺𑀦𑁆𑀦𑀁 𑀧𑀸𑀴𑀻𑀦𑀁 𑀯𑀲𑁂𑀦 𑀬𑀸 𑀇𑀢𑁆𑀣𑀻 𑀤𑀸𑀭𑀺𑀓𑀸𑀲𑀤𑁆𑀤𑁂𑀦 𑀯𑀢𑁆𑀢𑀩𑁆𑀩𑀸, 𑀲𑀸 𑀓𑀜𑁆𑀜𑀸𑀲𑀤𑁆𑀤𑁂𑀦𑀧𑀺 𑀯𑀢𑁆𑀢𑀩𑁆𑀩𑀸 𑀚𑀸𑀢𑀸. 𑀬𑀸𑀧𑀺 ¶ 𑀘 𑀓𑀜𑁆𑀜𑀸𑀲𑀤𑁆𑀤𑁂𑀦 𑀯𑀢𑁆𑀢𑀩𑁆𑀩𑀸, 𑀲𑀸𑀧𑀺 𑀤𑀸𑀭𑀺𑀓𑀸𑀲𑀤𑁆𑀤𑁂𑀦 𑀯𑀢𑁆𑀢𑀩𑁆𑀩𑀸 𑀚𑀸𑀢𑀸. 𑀢𑀣𑀸 ‘‘𑀭𑀸𑀚𑀸 𑀓𑀼𑀫𑀸𑀭𑀫𑀸𑀤𑀸𑀬, 𑀭𑀸𑀚𑀧𑀼𑀢𑁆𑀢𑀻 𑀘 𑀤𑀸𑀭𑀺𑀓’’𑀦𑁆𑀢𑀺 𑀘 ‘‘𑀓𑀼𑀫𑀸𑀭𑀺𑀬𑁂 𑀉𑀧𑀲𑁂𑀦𑀺𑀬𑁂, 𑀦𑀺𑀘𑁆𑀘𑀁 𑀦𑀺𑀕𑀴𑀫𑀡𑁆𑀟𑀺𑀢𑁂’’𑀢𑀺 𑀘 𑀇𑀫𑀸𑀲𑀁 𑀧𑀦 𑀧𑀸𑀴𑀻𑀦𑀁 𑀯𑀲𑁂𑀦 𑀬𑀸 𑀇𑀢𑁆𑀣𑀻 𑀤𑀸𑀭𑀺𑀓𑀸𑀲𑀤𑁂𑀦 𑀯𑀢𑁆𑀢𑀩𑁆𑀩𑀸, 𑀲𑀸 𑀓𑀼𑀫𑀸𑀭𑀺𑀓𑀸𑀲𑀤𑁆𑀤𑁂𑀦𑀧𑀺 𑀯𑀢𑁆𑀢𑀩𑁆𑀩𑀸 𑀚𑀸𑀢𑀸. 𑀬𑀸 𑀘 𑀧𑀦 𑀓𑀼𑀫𑀸𑀭𑀻𑀲𑀤𑁆𑀤𑁂𑀦 𑀯𑀢𑁆𑀢𑀩𑁆𑀩𑀸, 𑀲𑀸𑀧𑀺 𑀤𑀸𑀭𑀺𑀓𑀸𑀲𑀤𑁆𑀤𑁂𑀦 𑀯𑀢𑁆𑀢𑀩𑁆𑀩𑀸 𑀚𑀸𑀢𑀸. 𑀅𑀧𑀺𑀘𑁂𑀢𑁆𑀣 ‘‘𑀭𑀸𑀚𑀓𑀜𑁆𑀜𑀸 𑀭𑀼𑀘𑀸 𑀦𑀸𑀫𑀸’’𑀢𑀺 𑀘 ‘‘𑀢𑀢𑁄 𑀫𑀤𑁆𑀤𑀺𑀫𑁆𑀧𑀺 𑀦𑁆𑀳𑀸𑀧𑁂𑀲𑀼𑀁, 𑀲𑀺𑀯𑀺𑀓𑀜𑁆𑀜𑀸 𑀲𑀫𑀸𑀕𑀢𑀸’’𑀢𑀺 𑀘 𑀇𑀫𑀸𑀲𑀁 𑀤𑁆𑀯𑀺𑀦𑁆𑀦𑀁 𑀧𑀸𑀴𑀻𑀦𑀁 𑀤𑀲𑁆𑀲𑀦𑀢𑁄 𑀬𑀸 𑀅𑀦𑀺𑀩𑁆𑀩𑀺𑀤𑁆𑀥𑀸 𑀯𑀸 𑀳𑁄𑀢𑀼 𑀦𑀺𑀩𑁆𑀩𑀺𑀤𑁆𑀥𑀸 𑀯𑀸, 𑀬𑀸𑀯 𑀚𑀭𑀁 𑀦 𑀧𑀸𑀧𑀼𑀡𑀸𑀢𑀺, 𑀢𑀸𑀯 𑀲𑀸 𑀓𑀜𑁆𑀜𑀸𑀬𑁂𑀯 𑀦𑀸𑀫𑀸𑀢𑀺𑀧𑀺 𑀯𑁂𑀤𑀺𑀢𑀩𑁆𑀩𑀁.

𑀓𑁂𑀘𑁂𑀢𑁆𑀣 𑀯𑀤𑁂𑀬𑁆𑀬𑀼𑀁 𑁋 𑀬𑀁 𑀢𑀼𑀫𑁆𑀳𑁂𑀳𑀺 ‘‘𑀅𑀝𑁆𑀞𑀯𑀲𑁆𑀲𑀺𑀓𑀸 𑀕𑁄𑀭𑀻𑀢𑀺𑀧𑀺 𑀤𑀸𑀭𑀺𑀓𑀸𑀢𑀺𑀧𑀺 𑀯𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁, 𑀏𑀢𑀲𑁆𑀫𑀺𑀁 𑀧𑀦 𑀯𑀘𑀦𑁂 ‘‘𑀬𑀤𑀸𑀳𑀁 𑀤𑀸𑀭𑀓𑁄 𑀳𑁄𑀫𑀺, 𑀚𑀸𑀢𑀺𑀬𑀸 𑀅𑀝𑁆𑀞𑀯𑀲𑁆𑀲𑀺𑀓𑁄’’𑀢𑀺 𑀯𑀘𑀦𑀢𑁄 𑀅𑀝𑁆𑀞𑀯𑀲𑁆𑀲𑁄 𑀤𑀸𑀭𑀓𑁄 𑀳𑁄𑀢𑀼, ‘‘𑀢𑀢𑁆𑀣𑀤𑁆𑀤𑀲𑀓𑀼𑀫𑀸𑀭𑀁 𑀲𑁄, 𑀭𑀫𑀫𑀸𑀦𑀁 𑀲𑀓𑁂 𑀧𑀼𑀭𑁂’’𑀢𑀺 𑀧𑀸𑀴𑀺𑀬𑀁 𑀧𑀦 𑀧𑀼𑀢𑁆𑀢𑀤𑀸𑀭𑁂𑀳𑀺 𑀲𑀁𑀯𑀤𑁆𑀥𑁄 𑀯𑁂𑀲𑁆𑀲𑀦𑁆𑀢𑀭𑀫𑀳𑀸𑀭𑀸𑀚𑀸 𑀓𑀣𑀁 ‘‘𑀓𑀼𑀫𑀸𑀭𑁄’’𑀢𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀺𑀲𑁆𑀲𑀢𑀺 𑀤𑁆𑀯𑀸𑀤𑀲𑀯𑀲𑁆𑀲𑀸𑀢𑀺𑀓𑁆𑀓𑀦𑁆𑀢𑀢𑁆𑀢𑀸? 𑀬𑀼𑀚𑁆𑀚𑀢𑁂𑀯 𑀪𑀕𑀯𑀢𑁄 𑀇𑀘𑁆𑀙𑀸𑀯𑀲𑁂𑀦. 𑀪𑀕𑀯𑀸 𑀳𑀺 𑀥𑀫𑁆𑀫𑀺𑀲𑁆𑀲𑀭𑀢𑁆𑀢𑀸 𑀯𑁄𑀳𑀸𑀭𑀓𑀼𑀲𑀮𑀢𑀸𑀬 𑀘 𑀬𑀁 𑀬𑀁 𑀯𑁂𑀦𑁂𑀬𑁆𑀬𑀚𑀦𑀸𑀦𑀼𑀭𑀽𑀧𑀁 𑀤𑁂𑀲𑀦𑀁 𑀤𑁂𑀲𑁂𑀢𑀼𑀁 𑀇𑀘𑁆𑀙𑀢𑀺, 𑀢𑀁 𑀢𑀁 𑀤𑁂𑀲𑁂𑀢𑀺 𑀏𑀯, 𑀢𑀲𑁆𑀫𑀸 𑀪𑀕𑀯𑀢𑀸 𑀢𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀅𑀢𑁆𑀣𑀺𑀢𑀁 𑀲𑀦𑁆𑀥𑀸𑀬 𑀓𑀼𑀫𑀸𑀭𑀧𑀭𑀺𑀳𑀸𑀭𑁂𑀦 𑀯𑀤𑁆𑀥𑀺𑀢𑀢𑁆𑀢𑀜𑁆𑀘 𑀏𑀯𑀁 𑀤𑁂𑀲𑀦𑀸 𑀓𑀢𑀸. 𑀢𑀣𑀸 𑀳𑀺 𑀆𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀓𑀼𑀫𑀸𑀭𑀧𑀭𑀺𑀳𑀸𑀭𑁂𑀦 𑀯𑀤𑁆𑀥𑀺𑀢𑀢𑁆𑀢𑀸 𑀫𑀳𑀮𑁆𑀮𑀓𑁄𑀧𑀺 𑀲𑀫𑀸𑀦𑁄 𑀓𑀼𑀫𑀸𑀭𑀓𑀲𑁆𑀲𑀧𑁄𑀢𑁆𑀯𑁂𑀯 𑀯𑁄𑀳𑀭𑀺𑀬𑀢𑀺. ‘‘𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻’’𑀢𑀺 𑀏𑀢𑁆𑀣 𑀧𑀦 𑀲𑀺𑀭𑀲𑁆𑀫𑀺𑀁 𑀧𑀮𑀺𑀢𑁂𑀲𑀼 𑀚𑀸𑀢𑁂𑀲𑀼𑀧𑀺 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀢𑀲𑁆𑀫𑀺𑀁 𑀣𑁂𑀭𑁂 𑀅𑀥𑀺𑀫𑀢𑁆𑀢𑀯𑀺𑀲𑁆𑀲𑀸𑀲𑁄 ¶ 𑀳𑀼𑀢𑁆𑀯𑀸 𑀓𑁄𑀫𑀸𑀭𑀯𑀸𑀤𑁂𑀦 𑀑𑀯𑀤𑀦𑁆𑀢𑁄 𑀓𑀼𑀫𑀸𑀭𑀓𑁄𑀢𑀺 𑀅𑀯𑁄𑀘𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀉𑀤𑀸𑀦𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀢𑁆𑀢𑀸 𑀚𑀸𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀜𑁆𑀘𑀤𑀲𑀯𑀲𑁆𑀲𑀁, 𑀢𑀸𑀯 𑀓𑀼𑀫𑀸𑀭𑀓𑀸, 𑀩𑀸𑀮𑀸𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺, 𑀢𑀢𑁄 𑀧𑀭𑀁 𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀬𑀼𑀯𑀸𑀦𑁄’’𑀢𑀺 𑀯𑀼𑀢𑁆𑀢𑀁.

𑀫𑀦𑁆𑀣 𑀫𑀢𑁆𑀣 𑀯𑀺𑀮𑁄𑀴𑀦𑁂. 𑀫𑀦𑁆𑀣𑀢𑀺. 𑀫𑀦𑁆𑀣𑀜𑁆𑀘 𑀫𑀥𑀼𑀧𑀺𑀡𑁆𑀟𑀺𑀓𑀜𑁆𑀘 𑀆𑀤𑀸𑀬. 𑀅𑀪𑀺𑀫𑀢𑁆𑀣𑀢𑀺 𑀤𑀼𑀫𑁆𑀫𑁂𑀥𑀁 𑀯𑀚𑀺𑀭𑀁𑀯𑀫𑁆𑀳𑀫𑀬𑀁 𑀫𑀡𑀺𑀁. 𑀲𑀺𑀦𑁂𑀭𑀼𑀁 𑀫𑀢𑁆𑀣𑀁 𑀓𑀢𑁆𑀯𑀸.

𑀓𑀼𑀣𑀺 𑀧𑀼𑀣𑀺 𑀮𑀼𑀣𑀺 𑀳𑀺𑀁𑀲𑀸𑀲𑀁𑀓𑀺𑀮𑁂𑀲𑁂𑀲𑀼. 𑀓𑀼𑀦𑁆𑀣𑀢𑀺. 𑀓𑀼𑀦𑁆𑀣𑁄, 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀁. 𑀤𑀺𑀲𑁆𑀯𑀸𑀦 𑀧𑀢𑀺𑀢𑀁 𑀲𑀸𑀫𑀁, 𑀧𑀼𑀢𑁆𑀢𑀓𑀁 𑀧𑀁𑀲𑀼𑀓𑀼𑀦𑁆𑀣𑀺𑀢𑀁. 𑀧𑀼𑀦𑁆𑀣𑀢𑀺. 𑀮𑀼𑀦𑁆𑀣𑀢𑀺.

𑀦𑀸𑀣 𑀬𑀸𑀘𑀦𑁄𑀧𑀢𑀸𑀧𑀺𑀲𑁆𑀲𑀭𑀺𑀬𑀸𑀲𑀻𑀲𑀸𑀲𑀼. 𑀦𑀸𑀣𑀥𑀸𑀢𑀼 𑀬𑀸𑀘𑀦𑁂 𑀉𑀧𑀢𑀸𑀧𑁂 𑀇𑀲𑁆𑀲𑀭𑀺𑀬𑁂 𑀆𑀲𑀻𑀲𑀦𑁂 𑀘𑀸𑀢𑀺 𑀘𑀢𑀽𑀲𑁆𑀯𑀢𑁆𑀣𑁂𑀲𑀼 𑀯𑀢𑁆𑀢𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 ‘‘𑀦𑀸𑀣𑀢𑀻𑀢𑀺 𑀦𑀸𑀣𑁄, 𑀯𑁂𑀦𑁂𑀬𑁆𑀬𑀸𑀦𑀁 𑀳𑀺𑀢𑀲𑀼𑀔𑀁 𑀆𑀲𑀻𑀲𑀢𑀺 𑀧𑀢𑁆𑀣𑁂𑀢𑀺, 𑀧𑀭𑀲𑀦𑁆𑀢𑀸𑀦𑀕𑀢𑀁 𑀯𑀸 𑀓𑀺𑀮𑁂𑀲𑀩𑁆𑀬𑀲𑀦𑀁 𑀉𑀧𑀢𑀸𑀧𑁂𑀢𑀺, ‘‘𑀲𑀸𑀥𑀼 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀓𑀸𑀮𑁂𑀦 𑀓𑀸𑀮𑀁 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑁂𑀬𑁆𑀬𑀸’𑀢𑀺𑀆𑀤𑀺𑀦𑀸 𑀢𑀁 𑀢𑀁 𑀳𑀺𑀢𑀧𑀝𑀺𑀧𑀢𑁆𑀢𑀺𑀁 𑀬𑀸𑀘𑀢𑀻𑀢𑀺 𑀅𑀢𑁆𑀣𑁄, 𑀧𑀭𑀫𑁂𑀦 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀩𑁆𑀩𑀲𑀢𑁆𑀢𑁂 𑀯𑀸 𑀕𑀼𑀡𑁂𑀳𑀺 𑀈𑀲𑀢𑀺 𑀅𑀪𑀺𑀪𑀯𑀢𑀻𑀢𑀺 𑀧𑀭𑀫𑀺𑀲𑁆𑀲𑀭𑁄 𑀪𑀕𑀯𑀸 ‘𑀦𑀸𑀣𑁄’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀦𑀸𑀣𑀢𑀻𑀢𑀺 𑀦𑀸𑀣𑁄’’𑀢𑀺. 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀧𑀦 𑀢𑁂𑀲𑀼 𑀘𑀢𑀽𑀲𑀼 𑀅𑀢𑁆𑀣𑁂𑀲𑀼 𑀦𑀸𑀣 𑀦𑀸𑀥 𑀇𑀢𑀺 𑀥𑀸𑀢𑀼𑀤𑁆𑀯𑀬𑀁 𑀧𑀞𑀦𑁆𑀢𑀺. 𑀅𑀢𑁆𑀢𑀦𑁄𑀪𑀸𑀲𑀢𑁆𑀢𑀸 𑀧𑀦 𑀢𑀲𑁆𑀲 ‘‘𑀦𑀸𑀣𑀢𑁂 𑀦𑀸𑀥𑀢𑁂’’𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺.

𑀏𑀢𑁆𑀣 𑀲𑀺𑀬𑀸 ‘‘𑀬𑀤𑀺 𑀬𑀸𑀘𑀦𑀢𑁆𑀣𑁂𑀦 𑀦𑀸𑀣𑀢𑀻𑀢𑀺 𑀦𑀸𑀣𑁄, 𑀏𑀯𑀁 𑀲𑀦𑁆𑀢𑁂 𑀬𑁄 𑀓𑁄𑀘𑀺 𑀬𑀸𑀘𑀓𑁄 𑀤𑀮𑀺𑀤𑁆𑀤𑁄, 𑀲𑁄 𑀏𑀯 𑀦𑀸𑀣𑁄 ¶ 𑀲𑀺𑀬𑀸. 𑀬𑁄 𑀧𑀦 𑀅𑀬𑀸𑀘𑀓𑁄 𑀲𑀫𑀺𑀤𑁆𑀥𑁄, 𑀲𑁄 𑀦 𑀦𑀸𑀣𑀢𑀺 𑀦 𑀬𑀸𑀘𑀢𑀻𑀢𑀺 𑀅𑀦𑀸𑀣𑁄 𑀲𑀺𑀬𑀸’’𑀢𑀺? 𑀦, 𑀦𑀸𑀣𑀲𑀤𑁆𑀤𑁄 𑀳𑀺 𑀬𑀸𑀘𑀦𑀢𑁆𑀣𑀸𑀤𑀻𑀲𑀼 𑀧𑀯𑀢𑁆𑀢𑀫𑀸𑀦𑁄 𑀮𑁄𑀓𑀲𑀗𑁆𑀓𑁂𑀢𑀯𑀲𑁂𑀦 𑀉𑀢𑁆𑀢𑀫𑀧𑀼𑀭𑀺𑀲𑁂𑀲𑀼 𑀦𑀺𑀭𑀽𑀴𑁆𑀳𑁄, 𑀪𑀕𑀯𑀸 𑀘 𑀉𑀢𑁆𑀢𑀫𑁂𑀲𑀼 𑀲𑀸𑀢𑀺𑀲𑀬𑀁 𑀉𑀢𑁆𑀢𑀫𑁄, 𑀢𑁂𑀦 𑀢𑀁 𑀢𑀁 𑀳𑀺𑀢𑀧𑀝𑀺𑀧𑀢𑁆𑀢𑀺𑀁 𑀬𑀸𑀘𑀢𑀻𑀢𑀺 𑀦𑀸𑀣𑀲𑀤𑁆𑀤𑀲𑁆𑀲𑀢𑁆𑀣𑁄 𑀯𑀼𑀢𑁆𑀢𑁄. 𑀅𑀦𑀸𑀣𑀲𑀤𑁆𑀤𑁄 𑀧𑀦 𑀇𑀢𑁆𑀢𑀭𑀚𑀦𑁂𑀲𑀼 𑀦𑀺𑀭𑀽𑀴𑁆𑀳𑁄, 𑀲𑁄 𑀘 𑀔𑁄 ‘‘𑀦 𑀦𑀸𑀣𑁄𑀢𑀺 𑀅𑀦𑀸𑀣𑁄. 𑀦𑀢𑁆𑀣𑀺 𑀦𑀸𑀣𑁄 𑀏𑀢𑀲𑁆𑀲𑀸𑀢𑀺 𑀯𑀸 𑀅𑀦𑀸𑀣𑁄’’𑀢𑀺 𑀤𑀩𑁆𑀩𑀧𑀝𑀺𑀲𑁂𑀥𑀯𑀲𑁂𑀦, 𑀦 𑀧𑀦 ‘‘𑀦 𑀦𑀸𑀣𑀢𑀺 𑀦 𑀬𑀸𑀘𑀢𑀻𑀢𑀺 𑀅𑀦𑀸𑀣𑁄’’𑀢𑀺 𑀥𑀸𑀢𑀼𑀅𑀢𑁆𑀣𑀧𑀝𑀺𑀲𑁂𑀥𑀯𑀲𑁂𑀦. 𑀬𑁄 𑀳𑀺 𑀅𑀜𑁆𑀜𑀲𑁆𑀲 𑀲𑀭𑀡𑀁 𑀕𑀢𑀺 𑀧𑀢𑀺𑀝𑁆𑀞𑀸 𑀳𑁄𑀢𑀺, 𑀲𑁄 𑀦𑀸𑀣𑁄, 𑀬𑁄 𑀘 𑀅𑀜𑁆𑀜𑀲𑁆𑀲 𑀲𑀭𑀡𑀁 𑀕𑀢𑀺 𑀧𑀢𑀺𑀝𑁆𑀞𑀸 𑀦 𑀳𑁄𑀢𑀺, 𑀦𑀸𑀧𑀺 𑀅𑀢𑁆𑀢𑀦𑁄 𑀅𑀜𑁆𑀜𑁄 𑀲𑀭𑀡𑀁 𑀕𑀢𑀺 𑀧𑀢𑀺𑀝𑁆𑀞𑀸 𑀳𑁄𑀢𑀺, 𑀲𑁄 𑀅𑀦𑀸𑀣𑁄𑀢𑀺 𑀯𑀼𑀘𑁆𑀘𑀢𑀺 𑀲𑀗𑁆𑀓𑁂𑀢𑀯𑀲𑁂𑀦. 𑀢𑀣𑀸 𑀳𑀺 ‘‘𑀲𑀗𑁆𑀓𑁂𑀢𑀯𑀘𑀦𑀁 𑀲𑀘𑁆𑀘𑀁, 𑀮𑁄𑀓𑀲𑀫𑁆𑀫𑀼𑀢𑀺𑀓𑀸𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 ‘‘𑀮𑁄𑀓𑀦𑀸𑀣𑁄 𑀢𑀼𑀯𑀁 𑀏𑀓𑁄, 𑀲𑀭𑀡𑀁 𑀲𑀩𑁆𑀩𑀧𑀸𑀡𑀺𑀦’’𑀦𑁆𑀢𑀺 𑀘 ‘‘𑀅𑀦𑀸𑀣𑀸𑀦𑀁 𑀪𑀯𑀁 𑀦𑀸𑀣𑁄’’𑀢𑀺 𑀘 𑁋

‘‘𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀦𑁂𑀓𑀓𑁄𑀝𑀺𑀲𑀢𑀁 𑀥𑀦𑀁;

𑀦𑀸𑀣𑀸𑀦𑀸𑀣𑀸𑀦𑀁 𑀤𑀢𑁆𑀯𑀸𑀦, 𑀳𑀺𑀫𑀯𑀦𑁆𑀢𑀫𑀼𑀧𑀸𑀕𑀫𑀺’’𑀦𑁆𑀢𑀺 𑀘

𑀧𑀸𑀴𑀺𑀬𑁄 𑀦𑀺𑀤𑀲𑁆𑀲𑀦𑀸𑀦𑀺 𑀪𑀯𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀲𑀸𑀲𑀦𑁂 𑀘 𑀮𑁄𑀓𑁂 𑀘 𑀬𑀸𑀘𑀓𑁄 ‘‘𑀦𑀸𑀣𑁄’’𑀢𑀺 𑀦 𑀯𑀼𑀘𑁆𑀘𑀢𑀺, 𑀅𑀬𑀸𑀘𑀓𑁄 𑀘 ‘‘𑀅𑀦𑀸𑀣𑁄’’𑀢𑀺. 𑀮𑁄𑀓𑀲𑁆𑀲 𑀧𑀦 𑀲𑀭𑀡𑀁 ‘‘𑀦𑀸𑀣𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀲 𑀲𑀭𑀡𑀁 𑀦 𑀯𑀺𑀚𑁆𑀚𑀢𑀺, 𑀲𑁄 ‘‘𑀅𑀦𑀸𑀣𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸 𑀲𑀫𑀺𑀤𑁆𑀥𑁄 ‘‘𑀦𑀸𑀣𑁄’’𑀢𑀺 𑀯𑀼𑀘𑁆𑀘𑀢𑀺, 𑀅𑀲𑀫𑀺𑀤𑁆𑀥𑁄 ‘‘𑀅𑀦𑀸𑀣𑁄’’𑀢𑀺. 𑀢𑀲𑁆𑀫𑀸 𑀧𑀜𑁆𑀜𑀯𑀢𑀸 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼 𑀥𑀸𑀢𑀼𑀅𑀢𑁆𑀣𑀫𑀢𑁆𑀢𑁂𑀦 𑀮𑁄𑀓𑀲𑀫𑀜𑁆𑀜𑀁 𑀅𑀦𑀢𑀺𑀥𑀸𑀯𑀺𑀢𑁆𑀯𑀸 𑀬𑀣𑀸𑀦𑀼𑀭𑀽𑀧𑀁 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀬𑀜𑁆𑀘 𑀦𑀻𑀢𑀺 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀸𑀢𑀩𑁆𑀩𑀸.

𑀯𑀺𑀣𑀼 ¶ 𑀬𑀸𑀘𑀦𑁂. 𑀯𑁂𑀣𑀢𑀺.

𑀲𑀣 𑀲𑁂𑀞𑀺𑀮𑁆𑀮𑁂. 𑀲𑀣𑀢𑀺. 𑀲𑀣𑀮𑁄 𑀳𑀺 𑀧𑀭𑀺𑀩𑁆𑀩𑀸𑀚𑁄, 𑀪𑀺𑀬𑁆𑀬𑁄 𑀆𑀓𑀺𑀭𑀢𑁂 𑀭𑀚𑀁. 𑀲𑀺𑀞𑀺𑀮𑁄𑀢𑀺𑀧𑀺 𑀧𑀸𑀴𑀺 𑀤𑀺𑀲𑁆𑀲𑀢𑀺. 𑀢𑀤𑀸 𑀞𑀺𑀓𑀸𑀭𑁄 𑀫𑀼𑀤𑁆𑀥𑀚𑁄 𑀕𑀳𑁂𑀢𑀩𑁆𑀩𑁄.

𑀓𑀣𑀺 𑀓𑁄𑀝𑀺𑀮𑁆𑀮𑁂. 𑀓𑀦𑁆𑀣𑀢𑀺.

𑀓𑀢𑁆𑀣 𑀲𑀺𑀮𑀸𑀖𑀸𑀬𑀁. 𑀓𑀢𑁆𑀣𑀢𑀺, 𑀯𑀺𑀓𑀢𑁆𑀣𑀢𑀺. 𑀓𑀢𑁆𑀣𑀦𑀸, 𑀯𑀺𑀓𑀢𑁆𑀣𑀦𑀸. 𑀢𑀢𑁆𑀣 𑀓𑀢𑁆𑀣𑀢𑀻𑀢𑀺 𑀧𑀲𑀁𑀲𑀢𑀺. 𑀯𑀺𑀓𑀢𑁆𑀣𑀢𑀻𑀢𑀺 𑀯𑀺𑀭𑀽𑀧𑀁 𑀓𑀢𑁆𑀣𑀢𑀺 𑀅𑀪𑀽𑀢𑀯𑀢𑁆𑀣𑀼𑀤𑀻𑀧𑀦𑀢𑁄. 𑀏𑀢𑁆𑀣 𑀘 ‘‘𑀩𑀳𑀼𑀫𑁆𑀧𑀺 𑀲𑁄 𑀯𑀺𑀓𑀢𑁆𑀣𑁂𑀬𑁆𑀬, 𑀅𑀜𑁆𑀜𑀁 𑀚𑀦𑀧𑀤𑀁 𑀕𑀢𑁄’’𑀢𑀺 𑀘 ‘‘𑀇𑀥𑁂𑀓𑀘𑁆𑀘𑁄 𑀓𑀢𑁆𑀣𑀻 𑀳𑁄𑀢𑀺 𑀯𑀺𑀓𑀢𑁆𑀣𑀻, 𑀲𑁄 𑀓𑀢𑁆𑀣𑀢𑀺 ‘𑀅𑀳𑀫𑀲𑁆𑀫𑀺 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀯𑀸 𑀯𑀢𑁆𑀢𑀲𑀫𑁆𑀧𑀦𑁆𑀦𑁄𑀢𑀺 𑀯𑀸 𑀯𑀺𑀓𑀢𑁆𑀣𑀢𑀻’𑀢𑀺’’ 𑀘 𑀆𑀤𑀬𑁄 𑀧𑀬𑁄𑀕𑀸.

𑀩𑁆𑀬𑀣 𑀤𑀼𑀓𑁆𑀔𑀪𑀬𑀘𑀮𑀦𑁂𑀲𑀼. 𑀩𑁆𑀬𑀣𑀢𑀺. 𑀪𑀦𑁆𑀢𑀸 𑀩𑁆𑀬𑀣𑀺𑀢𑀫𑀸𑀦𑀲𑀸. 𑀢𑀢𑁄 𑀓𑀼𑀫𑀸𑀭𑀸𑀩𑁆𑀬𑀣𑀺𑀢𑀸, 𑀲𑀼𑀢𑁆𑀯𑀸 𑀮𑀼𑀤𑁆𑀤𑀲𑁆𑀲 𑀪𑀸𑀲𑀺𑀢𑀁. 𑀇𑀢𑁆𑀣𑁂𑀢𑀁 𑀤𑁆𑀯𑀬𑀁 𑀘𑀮𑀜𑁆𑀘𑁂𑀯 𑀩𑁆𑀬𑀣𑀜𑁆𑀘.

𑀲𑀼𑀣 𑀓𑀼𑀣 𑀓𑀣 𑀳𑀺𑀁𑀲𑀸𑀬𑀁. 𑀲𑁄𑀣𑀢𑀺. 𑀓𑁄𑀣𑀢𑀺. 𑀓𑀣𑀢𑀺.

𑀧𑀣 𑀕𑀢𑀺𑀬𑀁. 𑀧𑀣𑀢𑀺. 𑀧𑀣𑁄. 𑀧𑀣𑁄𑀢𑀺 𑀫𑀕𑁆𑀕𑁄. 𑀲𑁄 𑀤𑀼𑀯𑀺𑀥𑁄 𑀫𑀳𑀸𑀚𑀦𑁂𑀦 𑀧𑀤𑀲𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑁄 𑀧𑀓𑀢𑀺𑀫𑀕𑁆𑀕𑁄 𑀘 𑀧𑀡𑁆𑀟𑀺𑀢𑁂𑀳𑀺𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑁄 𑀧𑀝𑀺𑀧𑀤𑀸𑀲𑀗𑁆𑀔𑀸𑀢𑁄 𑀅𑀭𑀺𑀬𑀫𑀕𑁆𑀕𑁄 𑀘𑀸𑀢𑀺. 𑀢𑀢𑁆𑀣 𑀧𑀓𑀢𑀺𑀫𑀕𑁆𑀕𑁄 𑀉𑀧𑁆𑀧𑀦𑁆𑀦𑀓𑀺𑀘𑁆𑀘𑀸𑀓𑀺𑀘𑁆𑀘𑁂𑀳𑀺 𑀚𑀦𑁂𑀳𑀺 𑀧𑀣𑀺𑀬𑀢𑀺 𑀕𑀘𑁆𑀙𑀺𑀬𑀢𑀻𑀢𑀺 𑀧𑀣𑁄, 𑀧𑀝𑀺𑀧𑀤𑀸 𑀧𑀦 𑀅𑀫𑀢𑀫𑀳𑀸𑀧𑀼𑀭𑀁 𑀕𑀦𑁆𑀢𑀼𑀓𑀸𑀫𑁂𑀳𑀺 𑀓𑀼𑀮𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀸𑀧𑀸𑀣𑁂𑀬𑁆𑀬𑀁 𑀕𑀳𑁂𑀢𑁆𑀯𑀸 𑀧𑀣𑀺𑀬𑀢𑀺 𑀧𑀝𑀺𑀧𑀚𑁆𑀚𑀺𑀬𑀢𑀻𑀢𑀺 𑀧𑀣𑁄. 𑀅𑀣 𑀯𑀸 𑀧𑀸𑀣𑁂𑀢𑀺 𑀓𑀸𑀭𑀓𑀁 𑀧𑀼𑀕𑁆𑀕𑀮𑀁 𑀕𑀫𑁂𑀢𑀺 𑀦𑀺𑀩𑁆𑀩𑀸𑀦𑀁 𑀲𑀫𑁆𑀧𑀸𑀧𑁂𑀢𑀻𑀢𑀺 𑀯𑀸 𑀧𑀣𑁄 ¶ , 𑀧𑀝𑀺𑀧𑀤𑀸𑀬𑁂𑀯. 𑀫𑀕𑁆𑀕𑀸𑀪𑀺𑀥𑀸𑀦𑀁 𑀘𑀼𑀭𑀸𑀤𑀺𑀕𑀡𑁂 𑀫𑀕𑁆𑀕𑀥𑀸𑀢𑀼𑀓𑀣𑀦𑀝𑁆𑀞𑀸𑀦𑁂 𑀓𑀣𑁂𑀲𑁆𑀲𑀸𑀫.

𑀓𑀣 𑀦𑀺𑀧𑁆𑀧𑀸𑀓𑁂. 𑀓𑀣𑀢𑀺.

𑀫𑀣 𑀯𑀺𑀮𑁄𑀣𑀦𑁂. 𑀫𑀣𑀢𑀺.

𑀧𑁄𑀣 𑀧𑀭𑀺𑀬𑀸𑀬𑀦𑀪𑀸𑀯𑁂. 𑀧𑁄𑀣𑀢𑀺. 𑀧𑁄𑀣𑀓𑁄. 𑀧𑁄𑀣𑁂𑀢𑀻𑀢𑀺 𑀅𑀬𑀁 𑀘𑀼𑀭𑀸𑀤𑀺𑀕𑀡𑁂𑀧𑀺 𑀯𑀢𑁆𑀢𑀢𑀺. 𑀢𑁂𑀦 ‘‘𑀲𑀫𑀦𑁆𑀢𑀸 𑀅𑀦𑀼𑀧𑀭𑀺𑀬𑁂𑀬𑁆𑀬𑀼𑀁, 𑀦𑀺𑀧𑁆𑀧𑁄𑀣𑁂𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀸’’𑀢𑀺 𑀧𑀬𑁄𑀕𑁄 𑀤𑀺𑀲𑁆𑀲𑀢𑀺.

𑀕𑁄𑀢𑁆𑀣 𑀯𑀁𑀲𑁂. 𑀕𑁄𑀢𑁆𑀣𑀢𑀺. 𑀕𑁄𑀢𑁆𑀣𑀼𑀮𑁄, 𑀕𑁄𑀢𑁆𑀣𑀼.

𑀧𑀼𑀣𑀼 𑀯𑀺𑀢𑁆𑀣𑀸𑀭𑁂. 𑀧𑁄𑀣𑀢𑀺. 𑀧𑀼𑀣𑀯𑀻.

𑀣𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀤𑀓𑀸𑀭𑀦𑁆𑀢𑀥𑀸𑀢𑀼

𑀤𑀸 𑀤𑀸𑀦𑁂. 𑀆𑀧𑀼𑀩𑁆𑀩𑁄 𑀕𑀳𑀡𑁂. 𑀲𑀤𑁆𑀥𑁄 𑀤𑀸𑀦𑀁 𑀤𑀤𑀸𑀢𑀺 𑀤𑁂𑀢𑀺, 𑀲𑀻𑀮𑀁 𑀆𑀤𑀤𑀸𑀢𑀺 𑀆𑀤𑁂𑀢𑀺. 𑀇𑀫𑀸𑀦𑀺 𑀲𑀼𑀤𑁆𑀥𑀓𑀢𑁆𑀢𑀼𑀧𑀤𑀸𑀦𑀺 𑀢𑀤𑁆𑀤𑀻𑀧𑀓𑀢𑁆𑀢𑀸. 𑀲𑀤𑁆𑀥𑁄 𑀅𑀲𑁆𑀲𑀤𑁆𑀥𑀁 𑀤𑀸𑀦𑀁 𑀤𑀸𑀧𑁂𑀢𑀺, 𑀲𑀻𑀮𑀁 𑀆𑀤𑀧𑁂𑀢𑀺, 𑀲𑀫𑀸𑀤𑀧𑁂𑀢𑀺. 𑀬𑁂 𑀥𑀫𑁆𑀫𑀫𑁂𑀯𑀸𑀤𑀧𑀬𑀦𑁆𑀢𑀺 𑀲𑀦𑁆𑀢𑁄. 𑀇𑀫𑀸𑀦𑀺 𑀓𑀸𑀭𑀺𑀢𑀧𑀤𑀸𑀦𑀺 𑀳𑁂𑀢𑀼𑀓𑀢𑁆𑀢𑀼𑀧𑀤𑀸𑀦𑀻𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺 𑀢𑀤𑁆𑀤𑀻𑀧𑀓𑀢𑁆𑀢𑀸. 𑀲𑀤𑁆𑀥𑁂𑀦 𑀤𑀸𑀦𑀁 𑀤𑀻𑀬𑀢𑀺, 𑀲𑀻𑀮𑀁 𑀆𑀤𑀻𑀬𑀢𑀺, 𑀲𑀫𑀸𑀤𑀻𑀬𑀢𑀺, 𑀇𑀫𑀸𑀦𑀺 𑀓𑀫𑁆𑀫𑀧𑀤𑀸𑀦𑀺 𑀢𑀤𑁆𑀤𑀻𑀧𑀓𑀢𑁆𑀢𑀸. 𑀅𑀬𑀜𑁆𑀘 𑀤𑀸 𑀤𑀸𑀦𑁂𑀢𑀺 𑀥𑀸𑀢𑀼 𑀲𑀸𑀲𑀦𑀸𑀦𑀼𑀭𑀽𑀧𑀲𑀼𑀢𑀺𑀯𑀲𑁂𑀦 𑀤𑀺𑀯𑀸𑀤𑀺𑀕𑀡𑀁 𑀧𑀢𑁆𑀯𑀸 𑀲𑀼𑀧𑀦𑀓𑁆𑀭𑀺𑀬𑀁 𑀯𑀤𑀦𑁆𑀢𑁄 ‘‘𑀤𑀸𑀬𑀢𑀺 𑀦𑀺𑀤𑁆𑀤𑀸𑀬𑀢𑀺 𑀦𑀺𑀤𑁆𑀤𑀸’’𑀢𑀺 𑀲𑀦𑀸𑀫𑀧𑀤𑀸𑀦𑀺 𑀲𑀼𑀤𑁆𑀥𑀓𑀢𑁆𑀢𑀼𑀧𑀤𑀸𑀦𑀺 𑀚𑀦𑀬𑀢𑀺. 𑀤𑀸𑀦𑀫𑀯𑀔𑀡𑁆𑀟𑀦𑀜𑁆𑀘 𑀯𑀤𑀦𑁆𑀢𑁄 ‘‘𑀤𑀺𑀬𑀢𑀺 𑀤𑀸𑀦𑀁 𑀤𑀸𑀢𑁆𑀢’’𑀦𑁆𑀢𑀺 𑀲𑀦𑀸𑀫𑀧𑀤𑀸𑀦𑀺 𑀲𑀼𑀤𑁆𑀥𑀓𑀢𑁆𑀢𑀼𑀧𑀤𑀸𑀦𑀺 𑀚𑀦𑀬𑀢𑀺. 𑀲𑀼𑀤𑁆𑀥𑀺𑀁𑀯𑀤𑀦𑁆𑀢𑁄 ‘‘𑀤𑀸𑀬𑀢𑀺 𑀯𑁂𑀤𑀸𑀬𑀢𑀺 𑀯𑁄𑀤𑀸𑀦’’𑀦𑁆𑀢𑀺 𑀲𑀦𑀸𑀫𑀧𑀤𑀸𑀦𑀺 𑀲𑀼𑀤𑁆𑀥𑀓𑀢𑁆𑀢𑀼𑀧𑀤𑀸𑀦𑀺 𑀚𑀦𑀬𑀢𑀺, 𑀇𑀫𑀲𑁆𑀫𑀺𑀁 𑀧𑀦 𑀪𑀽𑀯𑀸𑀤𑀺𑀕𑀡𑁂 𑀤𑀸𑀦𑀁 𑀯𑀤𑀦𑁆𑀢𑁄 𑀆𑀧𑀼𑀩𑁆𑀩𑀯𑀲𑁂𑀦 𑀕𑀳𑀡𑀜𑁆𑀘 ¶ 𑀯𑀤𑀦𑁆𑀢𑁄 ‘‘𑀤𑀤𑀸𑀢𑀺 𑀤𑁂𑀢𑀺 𑀆𑀤𑀤𑀸𑀢𑀺 𑀆𑀤𑁂𑀢𑀺 𑀤𑀸𑀦𑀁 𑀆𑀤𑀸𑀦’’𑀦𑁆𑀢𑀺 𑀲𑀦𑀸𑀫𑀧𑀤𑀸𑀦𑀺 𑀲𑀼𑀤𑁆𑀥𑀓𑀢𑁆𑀢𑀼𑀧𑀤𑀸𑀦𑀺 𑀚𑀦𑀬𑀢𑀺. 𑀢𑀣𑀸 𑀓𑀼𑀘𑁆𑀙𑀺𑀢𑀕𑀫𑀦𑀁 𑀯𑀤𑀦𑁆𑀢𑁄 ‘‘𑀤𑀸𑀢𑀺 𑀲𑀼𑀤𑁆𑀤𑀸𑀢𑀺 𑀲𑀼𑀤𑁆𑀤𑁄 𑀲𑀼𑀤𑁆𑀤𑀻’’𑀢𑀺 𑀲𑀦𑀸𑀫𑀧𑀤𑀸𑀦𑀺 𑀲𑀼𑀤𑁆𑀥𑀓𑀢𑁆𑀢𑀼𑀧𑀤𑀸𑀦𑀺 𑀚𑀦𑀬𑀢𑀻𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀘𑁂𑀢𑁆𑀣, 𑀏𑀯𑀫𑀜𑁆𑀜𑀢𑁆𑀭𑀸𑀧𑀺 𑀬𑀣𑀸𑀲𑀫𑁆𑀪𑀯𑀁 𑀯𑀺𑀲𑁂𑀲𑁄 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄 𑀦𑀬𑀜𑁆𑀜𑀽𑀳𑀺.

𑀇𑀤𑀸𑀦𑀺𑀲𑁆𑀲 𑀦𑀸𑀫𑀧𑀤𑀸𑀦𑀺 𑀢𑀼𑀫𑀦𑁆𑀢𑀸𑀤𑀻𑀦𑀺 𑀩𑁆𑀭𑀽𑀫. ‘‘𑀤𑀸𑀦𑀁, 𑀤𑁂𑀬𑁆𑀬𑀁, 𑀤𑀸𑀢𑀩𑁆𑀩𑀁, 𑀩𑁆𑀭𑀳𑁆𑀫𑀤𑁂𑀬𑁆𑀬𑀁, 𑀤𑀺𑀦𑁆𑀦𑀁, 𑀤𑀸𑀬𑀓𑁄, 𑀤𑀸𑀬𑀺𑀓𑀸, 𑀤𑀓𑁆𑀔𑀺𑀡𑀸’’ 𑀇𑀘𑁆𑀘𑀸𑀤𑀻𑀦𑀺, ‘‘𑀤𑀸𑀢𑀼𑀁, 𑀧𑀤𑀸𑀢𑀼𑀁, 𑀤𑀸𑀢𑀯𑁂, 𑀧𑀤𑀸𑀢𑀯𑁂, 𑀤𑀢𑁆𑀯𑀸, 𑀤𑀢𑁆𑀯𑀸𑀦, 𑀤𑀤𑀸𑀢𑀼𑀦, 𑀤𑀤𑀺𑀢𑁆𑀯𑀸, 𑀤𑀤𑀺𑀢𑁆𑀯𑀸𑀦, 𑀤𑀤𑀺𑀬, 𑀤𑀚𑁆𑀚𑀸, 𑀤𑀤𑀺𑀬𑀸𑀦, 𑀆𑀤𑀸𑀢𑀼𑀁, 𑀆𑀤𑀸𑀬, 𑀆𑀤𑀺𑀬’’ 𑀇𑀘𑁆𑀘𑀸𑀤𑀻𑀦𑀺 𑀘 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀢𑀢𑁆𑀣 𑀤𑀸𑀦𑀦𑁆𑀢𑀺 𑀤𑀸𑀢𑀩𑁆𑀩𑀁, 𑀤𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀢𑁆𑀣𑁂 𑀦 𑀤𑁂𑀬𑁆𑀬𑀥𑀫𑁆𑀫𑁄 𑀤𑀸𑀦𑀘𑁂𑀢𑀦𑀸 𑀘 𑀯𑀼𑀘𑁆𑀘𑀢𑀺. 𑀓𑀲𑁆𑀫𑀸 𑀧𑀦 𑀢𑀢𑁆𑀣 𑀤𑀺𑀦𑁆𑀦𑀲𑀤𑁆𑀤𑁄𑀬𑁂𑀯 𑀓𑀣𑀺𑀬𑀢𑀺, 𑀦 𑀤𑀢𑁆𑀢𑀲𑀤𑁆𑀤𑁄𑀢𑀺? 𑀅𑀓𑀣𑀦𑁂 𑀓𑀸𑀭𑀡𑀫𑀢𑁆𑀣𑀺. ‘‘𑀤𑀸𑀦𑀁 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀻𑀲𑀼 𑀳𑀺 𑀤𑀺𑀦𑁆𑀦𑀲𑀤𑁆𑀤𑀝𑁆𑀞𑀸𑀦𑁂 𑀤𑀢𑁆𑀢𑀲𑀤𑁆𑀤𑁄 𑀦 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀦 𑀓𑀣𑀺𑀬𑀢𑀺.

𑀕𑀼𑀡𑀪𑀽𑀢𑁄 𑀤𑀢𑁆𑀢𑀲𑀤𑁆𑀤𑁄, 𑀦 𑀤𑀺𑀝𑁆𑀞𑁄 𑀚𑀺𑀦𑀪𑀸𑀲𑀺𑀢𑁂;

‘‘𑀫𑀦𑀲𑀸 𑀤𑀸𑀦𑀁 𑀫𑀬𑀸 𑀤𑀺𑀦𑁆𑀦𑀁’’, 𑀇𑀢𑀺 𑀤𑀺𑀦𑁆𑀦𑀧𑀤𑀁 𑀯𑀺𑀬.

‘‘𑀤𑁂𑀯𑀤𑀢𑁆𑀢𑁄 𑀬𑀜𑁆𑀜𑀤𑀢𑁆𑀢𑁄, 𑀤𑀢𑁆𑀢𑁄’’ 𑀇𑀢𑀺 𑀘 𑀆𑀤𑀺𑀓𑁄;

𑀧𑀡𑁆𑀡𑀢𑁆𑀢𑀺𑀯𑀘𑀦𑁂 𑀤𑀺𑀝𑁆𑀞𑁄, 𑀲𑀫𑀸𑀲𑀩𑁆𑀬𑀸𑀲𑀢𑁄 𑀧𑀦.

𑀢𑀲𑁆𑀫𑀸 ‘‘𑀤𑁂𑀯𑀤𑀢𑁆𑀢𑁄’’𑀢𑀺𑀆𑀤𑀻𑀲𑀼 ‘‘𑀤𑁂𑀯𑁂𑀦 𑀤𑀺𑀦𑁆𑀦𑁄’’𑀢𑀺 𑀲𑀫𑀸𑀲𑀁 𑀓𑀢𑁆𑀯𑀸 𑀧𑀡𑁆𑀡𑀢𑁆𑀢𑀺𑀯𑀘𑀦𑀢𑁆𑀢𑀸 𑀤𑀺𑀦𑁆𑀦𑀲𑀤𑁆𑀤𑀲𑁆𑀲 𑀤𑀢𑁆𑀢𑀸𑀤𑁂𑀲𑁄 𑀓𑀸𑀢𑀩𑁆𑀩𑁄 𑀲𑀸𑀲𑀦𑀸𑀦𑀼𑀭𑀽𑀧𑁂𑀦. 𑀉𑀧𑀭𑀺 𑀳𑀺 ‘‘𑀤𑀺𑀦𑁆𑀦𑀲𑁆𑀲 𑀤𑀢𑁆𑀢𑁄 𑀓𑁆𑀯𑀘𑀺 𑀧𑀡𑁆𑀡𑀢𑁆𑀢𑀺𑀬’’𑀦𑁆𑀢𑀺 𑀮𑀓𑁆𑀔𑀡𑀁 𑀧𑀲𑁆𑀲𑀺𑀲𑁆𑀲𑀣. 𑀅𑀬𑀫𑁂𑀯 𑀳𑀺 𑀲𑀸𑀲𑀦𑁂 𑀦𑀻𑀢𑀺 𑀅𑀯𑀺𑀮𑀗𑁆𑀖𑀦𑀻𑀬𑀸. 𑀇𑀤𑀁 𑀧𑀦𑁂𑀢𑁆𑀣 𑀯𑀯𑀢𑁆𑀣𑀸𑀦𑀁 𑁋

𑀲𑀓𑁆𑀓𑀝𑁂 𑀤𑀢𑁆𑀢𑀲𑀤𑁆𑀤𑁄𑀯, 𑀤𑀺𑀦𑁆𑀦𑀲𑀤𑁆𑀤𑁄 𑀦 𑀤𑀺𑀲𑁆𑀲𑀢𑀺;

𑀩𑁆𑀬𑀸𑀲𑀫𑁆𑀳𑀺 𑀤𑀺𑀦𑁆𑀦𑀲𑀤𑁆𑀤𑁄𑀯, 𑀤𑀢𑁆𑀢𑀲𑀤𑁆𑀤𑁄 𑀦 𑀧𑀸𑀴𑀺𑀬𑀁.

‘‘𑀫𑀦𑀲𑀸 ¶ 𑀤𑀸𑀦𑀁 𑀫𑀬𑀸 𑀤𑀺𑀦𑁆𑀦𑀁, 𑀤𑀸𑀦𑀁 𑀤𑀺𑀦𑁆𑀦𑁄’’𑀢𑀺𑀆𑀤𑀺𑀲𑀼;

‘‘𑀥𑀫𑁆𑀫𑀤𑀺𑀦𑁆𑀦𑀸 𑀫𑀳𑀸𑀫𑀸𑀬𑀸’’, 𑀇𑀘𑁆𑀘𑀸𑀤𑀻𑀲𑀼 𑀘 𑀧𑀸𑀴𑀺𑀲𑀼.

𑀇𑀢𑀺 𑀩𑁆𑀬𑀸𑀲𑀲𑀫𑀸𑀲𑀸𑀦𑀁, 𑀯𑀲𑀸 𑀤𑁆𑀯𑁂𑀥𑀸 𑀧𑀯𑀢𑁆𑀢𑀢𑀺;

𑀤𑀺𑀦𑁆𑀦𑀲𑀤𑁆𑀤𑁄𑀢𑀺 𑀤𑀻𑀧𑁂𑀬𑁆𑀬, 𑀦 𑀲𑁄 𑀲𑀓𑁆𑀓𑀝𑀪𑀸𑀲𑀺𑀢𑁂.

𑀕𑀼𑀡𑀪𑀽𑀢𑁄 𑀤𑀢𑁆𑀢𑀲𑀤𑁆𑀤𑁄, 𑀅𑀲𑀫𑀸𑀲𑀫𑁆𑀳𑀺 𑀓𑁂𑀯𑀮𑁄;

𑀦 𑀤𑀺𑀲𑁆𑀲𑀢𑀺 𑀫𑀼𑀦𑀺𑀫𑀢𑁂, 𑀤𑀺𑀦𑁆𑀦𑀲𑀤𑁆𑀤𑁄𑀯 𑀓𑁂𑀯𑀮𑁄.

𑀢𑁂𑀦𑁂𑀯 𑀤𑀺𑀦𑁆𑀦𑀲𑀤𑁆𑀤𑀲𑁆𑀲, 𑀤𑀢𑁆𑀢𑀸𑀤𑁂𑀲𑁄 𑀓𑀢𑁄 𑀫𑀬𑀸;

‘‘𑀤𑀢𑁆𑀢𑀁 𑀲𑀺𑀭𑀧𑁆𑀧𑀤𑀸𑀦’’𑀦𑁆𑀢𑀺, 𑀓𑀯𑀬𑁄 𑀧𑀦 𑀅𑀩𑁆𑀭𑀯𑀼𑀁.

𑀏𑀤𑀺𑀲𑁄 𑀧𑀸𑀴𑀺𑀬𑀁 𑀦𑀢𑁆𑀣𑀺, 𑀦𑀬𑁄 𑀢𑀲𑁆𑀫𑀸 𑀦 𑀲𑁄 𑀯𑀭𑁄;

‘‘𑀤𑀢𑁆𑀢𑁄’’𑀢𑀺 𑀪𑀽𑀭𑀺𑀤𑀢𑁆𑀢𑀲𑁆𑀲, 𑀲𑀜𑁆𑀜𑀸 𑀧𑀡𑁆𑀡𑀢𑁆𑀢𑀺𑀬𑀁 𑀕𑀢𑀸.

‘‘𑀩𑁆𑀭𑀳𑁆𑀫𑀤𑀢𑁆𑀢𑁄 𑀩𑀼𑀤𑁆𑀥𑀤𑀢𑁆𑀢𑁄, 𑀤𑀢𑁆𑀢𑁄’’ 𑀇𑀢𑀺 𑀳𑀺 𑀲𑀸𑀲𑀦𑁂;

𑀧𑀡𑁆𑀡𑀢𑁆𑀢𑀺𑀬𑀁 𑀤𑀢𑁆𑀢𑀲𑀤𑁆𑀤𑁄, 𑀅𑀲𑀫𑀸𑀲𑀲𑀫𑀸𑀲𑀺𑀓𑁄.

‘‘𑀧𑀭𑀤𑀢𑁆𑀢𑀪𑁄𑀚𑀦’’𑀦𑁆𑀢𑀺, 𑀏𑀯𑀫𑀸𑀤𑀻𑀲𑀼 𑀧𑀸𑀴𑀺𑀲𑀼;

𑀲𑀫𑀸𑀲𑁂 𑀕𑀼𑀡𑀪𑀽𑀢𑁄𑀬𑀁, 𑀤𑀢𑁆𑀢𑀲𑀤𑁆𑀤𑁄 𑀧𑀢𑀺𑀝𑁆𑀞𑀺𑀢𑁄.

‘‘𑀫𑀦𑀲𑀸 𑀤𑀸𑀦𑀁 𑀫𑀬𑀸 𑀤𑀺𑀦𑁆𑀦𑀁, 𑀤𑀸𑀦𑀁 𑀤𑀺𑀦𑁆𑀦𑁄’’𑀢𑀺𑀆𑀤𑀺𑀲𑀼;

𑀕𑀼𑀡𑀪𑀽𑀢𑁄 𑀤𑀺𑀦𑁆𑀦𑀲𑀤𑁆𑀤𑁄, 𑀅𑀲𑀫𑀸𑀲𑀫𑁆𑀳𑀺 𑀤𑀺𑀲𑁆𑀲𑀢𑀺.

‘‘𑀤𑀺𑀦𑁆𑀦𑀸𑀤𑀸𑀬𑀻 𑀥𑀫𑁆𑀫𑀤𑀺𑀦𑁆𑀦𑀸’’, 𑀇𑀘𑁆𑀘𑁂𑀯𑀫𑀸𑀤𑀻𑀲𑀼 𑀧𑀦;

𑀲𑀫𑀸𑀲𑁂 𑀕𑀼𑀡𑀧𑀡𑁆𑀡𑀢𑁆𑀢𑀺-𑀪𑀸𑀯𑁂𑀦𑁂𑀲 𑀧𑀤𑀺𑀲𑁆𑀲𑀢𑀺.

𑀓𑁄𑀘𑀺 ¶ 𑀧𑀦 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀕𑀭𑀼 𑀏𑀯𑀁 𑀲𑀤𑁆𑀤𑀭𑀘𑀦𑀫𑀓𑀸𑀲𑀺 𑁋

‘‘𑀬𑀲𑁆𑀲𑀗𑁆𑀓𑀼𑀭𑁂𑀳𑀺 𑀚𑀺𑀫𑀼𑀢𑀫𑁆𑀩𑀼𑀚𑀮𑁄𑀤𑀺𑀢𑁂𑀳𑀺,

𑀯𑀸𑀢𑁂𑀭𑀺𑀢𑁂𑀳𑀺 𑀧𑀢𑀺𑀢𑁂𑀳𑀺 𑀲𑀼𑀡𑁂𑀳𑀺 𑀢𑁂𑀳𑀺.

𑀚𑁂𑀦𑀦𑁆𑀢𑀘𑀻𑀯𑀭𑀫𑀲𑁄𑀪𑀣 𑀩𑁆𑀭𑀳𑁆𑀫𑀤𑀢𑁆𑀢𑀁,

𑀯𑀦𑁆𑀤𑀸𑀫𑀺 𑀢𑀁 𑀘𑀮𑀤𑀮𑀁 𑀯𑀭𑀩𑁄𑀥𑀺𑀭𑀼𑀓𑁆𑀔’’𑀦𑁆𑀢𑀺.

𑀏𑀢𑁆𑀣 𑀘 𑀩𑁆𑀭𑀳𑁆𑀫𑀤𑀢𑁆𑀢𑀦𑁆𑀢𑀺 𑀇𑀤𑀁 𑀲𑀓𑁆𑀓𑀝𑀪𑀸𑀲𑀸𑀢𑁄 𑀦𑀬𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀦 𑀧𑀸𑀴𑀺𑀢𑁄. 𑀧𑀸𑀴𑀺𑀦𑀬𑀜𑁆𑀳𑀺𑀧𑀢𑁆𑀯𑀸 ‘‘𑀩𑁆𑀭𑀳𑁆𑀫𑀤𑀢𑁆𑀢𑀺𑀬’’𑀦𑁆𑀢𑀺 𑀯𑀸 ‘‘𑀩𑁆𑀭𑀳𑁆𑀫𑀤𑀺𑀦𑁆𑀦’’𑀦𑁆𑀢𑀺 𑀯𑀸 ‘‘𑀤𑁂𑀯𑀤𑀢𑁆𑀢𑀺𑀬’’𑀦𑁆𑀢𑀺 𑀯𑀸 ‘‘𑀤𑁂𑀯𑀤𑀺𑀦𑁆𑀦’’𑀦𑁆𑀢𑀺 𑀯𑀸 𑀭𑀽𑀧𑁂𑀦 𑀪𑀯𑀺𑀢𑀩𑁆𑀩𑀁. 𑀢𑀣𑀸 𑀳𑀺 ‘‘𑀩𑁄𑀥𑀺𑀲𑀢𑁆𑀢𑁄 𑀘 𑀫𑀤𑁆𑀤𑀻 𑀘 𑀲𑀫𑁆𑀫𑁄𑀤𑀫𑀸𑀦𑀸 𑀲𑀓𑁆𑀓𑀤𑀢𑁆𑀢𑀺𑀬𑁂 𑀅𑀲𑁆𑀲𑀫𑁂 𑀯𑀲𑀺𑀁𑀲𑀽’’𑀢𑀺 𑀧𑀸𑀴𑀺𑀦𑀬𑀸𑀦𑀼𑀭𑀽𑀧𑁄 𑀅𑀝𑁆𑀞𑀓𑀣𑀸𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀏𑀢𑁆𑀣𑁂𑀯𑀁 𑀯𑀤𑀸𑀫 𑁋

‘‘𑀤𑀢𑁆𑀢𑀲𑀤𑁆𑀤𑀲𑁆𑀲 𑀞𑀸𑀦𑀫𑁆𑀳𑀺, ‘‘𑀤𑀢𑁆𑀢𑀺𑀬’’𑀦𑁆𑀢𑀺 𑀭𑀯𑁄 𑀕𑀢𑁄;

𑀤𑁂𑀯𑀤𑀢𑁆𑀢𑀺𑀬𑀧𑀢𑁆𑀢𑁄 𑀘, 𑀅𑀲𑁆𑀲𑀫𑁄 𑀲𑀓𑁆𑀓𑀤𑀢𑁆𑀢𑀺𑀬𑁄’’𑀢𑀺.

𑀅𑀬𑀁 𑀦𑀻𑀢𑀺 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀸𑀢𑀩𑁆𑀩𑀸. 𑀅𑀢𑁆𑀭 𑀧𑀦 𑀧𑀭𑀺𑀧𑀼𑀡𑁆𑀡𑀸𑀧𑀭𑀺𑀧𑀼𑀡𑁆𑀡𑀯𑀲𑁂𑀦 𑀬𑀣𑀸𑀭𑀳𑀁 𑀧𑀤𑀓𑁆𑀓𑀫𑁄 𑀪𑀯𑀢𑀺.

𑀤𑀤𑀸𑀢𑀺, 𑀤𑀤𑀦𑁆𑀢𑀺. 𑀤𑀤𑀸𑀲𑀺, 𑀤𑀤𑀸𑀣. 𑀤𑀤𑀸𑀫𑀺, 𑀤𑀤𑀸𑀫. 𑀤𑀤𑀸𑀢𑀼, 𑀤𑀤𑀦𑁆𑀢𑀼. 𑀤𑀤𑀸𑀳𑀺, 𑀤𑀤𑀸𑀣. 𑀤𑀤𑀸𑀫𑀺, 𑀤𑀤𑀸𑀫, 𑀤𑀤𑀸𑀫𑀲𑁂. 𑀤𑀤𑁂𑀬𑁆𑀬, 𑀤𑀤𑁂, 𑀤𑀚𑁆𑀚𑀸. 𑀤𑀚𑁆𑀚𑀸 𑀲𑀧𑁆𑀧𑀼𑀭𑀺𑀲𑁄 𑀤𑀸𑀦𑀁. 𑀤𑀤𑁂𑀬𑁆𑀬𑀼𑀁, 𑀤𑀚𑁆𑀚𑀼𑀁. 𑀧𑀺𑀢𑀸 𑀫𑀸𑀢𑀸 𑀘 𑀢𑁂 𑀤𑀚𑁆𑀚𑀼𑀁. 𑀤𑀤𑁂𑀬𑁆𑀬𑀸𑀲𑀺, 𑀤𑀚𑁆𑀚𑀸𑀲𑀺, 𑀤𑀚𑁆𑀚𑁂𑀲𑀺 𑀇𑀘𑁆𑀘𑀧𑀺. 𑀤𑀚𑁆𑀚𑀸𑀲𑀺 𑀅𑀪𑀬𑀁 𑀫𑀫. 𑀫𑀸𑀢𑀭𑀁 𑀓𑁂𑀦 𑀤𑁄𑀲𑁂𑀦, 𑀤𑀚𑁆𑀚𑀸𑀲𑀺 𑀤𑀓𑀭𑀓𑁆𑀔𑀺𑀦𑁄. 𑀲𑀻𑀮𑀯𑀦𑁆𑀢𑁂𑀲𑀼 𑀤𑀚𑁆𑀚𑁂𑀲𑀺, 𑀤𑀸𑀦𑀁 𑀫𑀤𑁆𑀤𑀺 𑀬𑀣𑀸𑀭𑀳𑀁. 𑀤𑀤𑁂𑀬𑁆𑀬𑀸𑀣, 𑀤𑀚𑁆𑀚𑀸𑀣. 𑀤𑀤𑁂𑀬𑁆𑀬𑀸𑀫𑀺, 𑀤𑀚𑁆𑀚𑀸𑀫𑀺, 𑀤𑀤𑁂𑀬𑁆𑀬𑀸𑀫, 𑀤𑀚𑁆𑀚𑀸𑀫. 𑀤𑀤𑁂𑀣, 𑀤𑀤𑁂𑀭𑀁. 𑀤𑀤𑁂𑀣𑁄, 𑀤𑀤𑁂𑀬𑁆𑀬𑀸𑀯𑁆𑀳𑁄, 𑀤𑀚𑁆𑀚𑀸𑀯𑁆𑀳𑁄. 𑀤𑀤𑁂𑀬𑁆𑀬𑀁, 𑀤𑀚𑁆𑀚𑀁. 𑀦𑁂𑀯 𑀤𑀚𑁆𑀚𑀁 𑀫𑀳𑁄𑀲𑀥𑀁. 𑀤𑀤𑁂𑀬𑁆𑀬𑀸𑀫𑁆𑀳𑁂, 𑀤𑀚𑁆𑀚𑀸𑀫𑁆𑀳𑁂. 𑀅𑀬𑀫𑀲𑁆𑀫𑀸𑀓𑀁 𑀔𑀦𑁆𑀢𑀺. 𑀕𑀭𑀽𑀦𑀁 𑀧𑀦 𑀔𑀦𑁆𑀢𑀺 𑀅𑀜𑁆𑀜𑀣𑀸 𑀪𑀯𑀢𑀺. 𑀢𑀣𑀸 𑀳𑀺 𑁋

𑀕𑀭𑀽 ‘‘𑀤𑀚𑁆𑀚𑀢𑀺 𑀤𑀚𑁆𑀚𑀦𑁆𑀢𑀺’’, 𑀇𑀢𑀺𑀆𑀤𑀺𑀦𑀬𑁂𑀦 𑀢𑀼;

𑀅𑀝𑁆𑀞𑀦𑁆𑀦𑀫𑁆𑀧𑀺 𑀯𑀺𑀪𑀢𑁆𑀢𑀻𑀦𑀁, 𑀯𑀲𑁂𑀦𑀸𑀳𑀼 𑀧𑀤𑀓𑁆𑀓𑀫𑀁.

𑀧𑀸𑀴𑀺𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸, 𑀢𑀜𑁆𑀘𑁂 𑀬𑀼𑀚𑁆𑀚𑀢𑀺 𑀕𑀡𑁆𑀳𑀣;

𑀦 𑀳𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦, 𑀧𑀸𑀴𑀺𑀬𑁄 𑀧𑀝𑀺𑀪𑀦𑁆𑀢𑀺 𑀦𑁄.

𑀢𑀢𑁆𑀣 ¶ 𑀅𑀲𑁆𑀫𑀸𑀓𑀁 𑀔𑀦𑁆𑀢𑀺𑀬𑀸 ‘‘𑀤𑀚𑁆𑀚𑀸 𑀤𑀚𑁆𑀚’’𑀦𑁆𑀢𑀺𑀆𑀤𑀻𑀦𑀺 𑀬𑁆𑀬𑀓𑀸𑀭𑀲𑀳𑀺𑀢𑁂𑀬𑁂𑀯 𑀲𑀢𑁆𑀢𑀫𑀺𑀬𑀸 𑀧𑀤𑀭𑀽𑀧𑁂 𑀲𑀺𑀚𑁆𑀛𑀦𑁆𑀢𑀺. ‘‘𑀤𑀚𑁆𑀚𑀸 𑀲𑀧𑁆𑀧𑀼𑀭𑀺𑀲𑁄 𑀤𑀸𑀦’’𑀦𑁆𑀢𑀺 𑀏𑀢𑁆𑀣 𑀳𑀺 ‘‘𑀤𑀚𑁆𑀚𑀸 𑀇𑀤𑀁 ‘‘𑀤𑀤𑁂𑀬𑁆𑀬𑀸’’𑀢𑀺 𑀧𑀤𑀭𑀽𑀧𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀬𑁆𑀬𑀓𑀸𑀭𑁂 𑀧𑀭𑁂 𑀲𑀭𑀮𑁄𑀧𑀁 𑀓𑀢𑁆𑀯𑀸 𑀢𑀢𑁄 𑀢𑀺𑀡𑁆𑀡𑀁 𑀩𑁆𑀬𑀜𑁆𑀚𑀦𑀸𑀦𑀁 𑀲𑀁𑀬𑁄𑀕𑀜𑁆𑀘 𑀢𑀻𑀲𑀼𑀲𑀜𑁆𑀜𑁄𑀕𑀩𑁆𑀬𑀜𑁆𑀚𑀦𑁂𑀲𑀼 𑀤𑁆𑀯𑀺𑀦𑁆𑀦𑀁 𑀲𑀭𑀽𑀧𑀸𑀦𑀫𑁂𑀓𑀲𑁆𑀲 𑀮𑁄𑀧𑀜𑁆𑀘 𑀤𑁆𑀬𑀓𑀸𑀭𑀲𑀜𑁆𑀜𑁄𑀕𑀲𑁆𑀲 𑀘 𑀚𑀓𑀸𑀭𑀤𑁆𑀯𑀬𑀁 𑀓𑀢𑁆𑀯𑀸 𑀢𑀢𑁄 𑀤𑀻𑀖𑀯𑀲𑁂𑀦𑀼𑀘𑁆𑀘𑀸𑀭𑀺𑀢𑀩𑁆𑀩𑀢𑁆𑀢𑀸 𑀅𑀦𑀺𑀫𑀺𑀢𑁆𑀢𑀁 𑀤𑀻𑀖𑀪𑀸𑀯𑀁 𑀓𑀢𑁆𑀯𑀸 𑀦𑀺𑀧𑁆𑀨𑀚𑁆𑀚𑀢𑀺. 𑀏𑀯𑀁 𑀲𑀸𑀲𑀦𑀲𑁆𑀲𑀸𑀦𑀼𑀭𑀽𑀧𑁄 𑀯𑀡𑁆𑀡𑀲𑀦𑁆𑀥𑀺 𑀪𑀯𑀢𑀺. 𑀤𑀼𑀯𑀺𑀥𑁄 𑀳𑀺 𑀲𑀦𑁆𑀥𑀺 𑀧𑀤𑀲𑀦𑁆𑀥𑀺 𑀯𑀡𑁆𑀡𑀲𑀦𑁆𑀥𑀻𑀢𑀺. 𑀢𑁂𑀲𑀼 𑀬𑀢𑁆𑀣 𑀧𑀤𑀘𑁆𑀙𑁂𑀤𑁄 𑀮𑀩𑁆𑀪𑀢𑀺, 𑀲𑁄 𑀧𑀤𑀲𑀦𑁆𑀥𑀺. 𑀬𑀣𑀸? 𑀢𑀢𑁆𑀭𑀸𑀬𑀁. 𑀬𑀢𑁆𑀣 𑀧𑀦 𑀦 𑀮𑀩𑁆𑀪𑀢𑀺, 𑀲𑁄 𑀯𑀡𑁆𑀡𑀲𑀦𑁆𑀥𑀺. 𑀬𑀣𑀸? 𑀅𑀢𑁆𑀭𑀚𑁄. 𑀬𑀣𑀸 𑀘 𑀲𑀼𑀕𑀢𑁄, 𑀬𑀣𑀸 𑀘 𑀧𑀤𑁆𑀥𑀸𑀦𑀺. 𑀏𑀯𑀁 𑀤𑀼𑀯𑀺𑀥𑁂𑀲𑀼 𑀲𑀦𑁆𑀥𑀻𑀲𑀼 ‘‘𑀤𑀚𑁆𑀚𑀸’’𑀢𑀺 𑀅𑀬𑀁 𑀯𑀡𑁆𑀡𑀲𑀦𑁆𑀥𑀺 𑀏𑀯.

𑀅𑀧𑀭𑁄𑀧𑀺 𑀭𑀽𑀧𑀦𑀬𑁄 𑀪𑀯𑀢𑀺 𑀢𑁆𑀯𑀸𑀧𑀘𑁆𑀘𑀬𑀦𑁆𑀢𑀯𑀲𑁂𑀦 𑁋

‘‘𑀅𑀬𑀁 𑀲𑁄 𑀇𑀦𑁆𑀤𑀓𑁄 𑀬𑀓𑁆𑀔𑁄, 𑀤𑀚𑁆𑀚𑀸 𑀤𑀸𑀦𑀁 𑀧𑀭𑀺𑀢𑁆𑀢𑀓𑀁;

𑀅𑀢𑀺𑀭𑁄𑀘𑀢𑀺 𑀅𑀫𑁆𑀳𑁂𑀳𑀺, 𑀘𑀦𑁆𑀤𑁄 𑀢𑀸𑀭𑀕𑀡𑁂 𑀬𑀣𑀸’’𑀢𑀺

𑀤𑀲𑁆𑀲𑀦𑀢𑁄. 𑀏𑀢𑁆𑀣 𑀳𑀺 𑀤𑀚𑁆𑀚𑀸𑀢𑀺 𑀤𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀧𑀦 𑀤𑀢𑁆𑀯𑀸𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀁 ‘‘𑀤𑀤𑀺𑀬𑁆𑀬’’ 𑀇𑀢𑀺 𑀧𑀤𑀭𑀽𑀧𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀬𑁆𑀬𑀓𑀸𑀭𑁂 𑀧𑀭𑁂 𑀲𑀭𑀮𑁄𑀧𑀁 𑀓𑀢𑁆𑀯𑀸 𑀲𑀜𑁆𑀜𑁄𑀕𑁂𑀲𑀼 𑀲𑀭𑀽𑀧𑀮𑁄𑀧𑀜𑁆𑀘 𑀢𑀢𑁄 𑀤𑁆𑀬𑀓𑀸𑀭𑀲𑀜𑁆𑀜𑁄𑀕𑀲𑁆𑀲 𑀚𑁆𑀚𑀓𑀸𑀭𑀤𑁆𑀯𑀬𑀁 𑀤𑀻𑀖𑀢𑁆𑀢𑀜𑁆𑀘 𑀓𑀢𑁆𑀯𑀸 𑀦𑀺𑀧𑁆𑀨𑀚𑁆𑀚𑀢𑀺.

𑀅𑀣𑀸𑀧𑀭𑁄𑀧𑀺 𑀭𑀽𑀧𑀦𑀬𑁄 𑀪𑀯𑀢𑀺 𑀓𑀫𑁆𑀫𑀦𑀺 𑀬𑀧𑀘𑁆𑀘𑀬𑀯𑀲𑁂𑀦. 𑀢𑀣𑀸 𑀳𑀺 ‘‘𑀧𑁂𑀢𑀸𑀦𑀁 𑀤𑀓𑁆𑀔𑀺𑀡𑀁 𑀤𑀚𑁆𑀚𑀸’’𑀢𑀺 𑀘 ‘‘𑀤𑀓𑁆𑀔𑀺𑀡𑀸 𑀤𑀚𑁆𑀚𑀸’’𑀢𑀺 𑀘 𑀤𑁆𑀯𑁂 𑀧𑀸𑀞𑀸 𑀤𑀺𑀲𑁆𑀲𑀦𑁆𑀢𑀺. 𑀢𑀢𑁆𑀣 𑀧𑀘𑁆𑀙𑀺𑀫𑀲𑁆𑀲 𑀤𑀚𑁆𑀚𑀸𑀢𑀺 𑀤𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄 𑀓𑀫𑁆𑀫𑀦𑀺 𑀬𑀧𑀘𑁆𑀘𑀬𑀯𑀲𑁂𑀦. 𑀇𑀥 𑀧𑀦 𑀤𑀸𑀥𑀸𑀢𑀼𑀢𑁄 𑀬𑀧𑀘𑁆𑀘𑀬𑀁 𑀓𑀢𑁆𑀯𑀸 𑀥𑀸𑀢𑀼𑀲𑁆𑀲 𑀤𑁆𑀯𑀺𑀢𑁆𑀢𑀜𑁆𑀘 𑀧𑀼𑀩𑁆𑀩𑀲𑁆𑀲 𑀭𑀲𑁆𑀲𑀢𑁆𑀢𑀜𑁆𑀘 𑀢𑀢𑁄 𑀬𑀓𑀸𑀭𑁂 𑀧𑀭𑁂 ¶ 𑀲𑀭𑀮𑁄𑀧𑀁 𑀲𑀜𑁆𑀜𑁄𑀕𑀪𑀸𑀯𑀜𑁆𑀘 𑀚𑁆𑀚𑀓𑀸𑀭𑀤𑁆𑀯𑀬𑀜𑁆𑀘 𑀇𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑀸 𑀆𑀧𑀘𑁆𑀘𑀬𑀸𑀤𑀺𑀜𑁆𑀘 𑀓𑀢𑁆𑀯𑀸 ‘‘𑀤𑀚𑁆𑀚𑀸’’𑀢𑀺 𑀦𑀺𑀧𑁆𑀨𑀚𑁆𑀚𑀢𑀺. 𑀏𑀯𑀁 ‘‘𑀤𑀚𑁆𑀚𑀸 𑀤𑀤𑁂𑀬𑁆𑀬𑀸’’𑀢𑀺 𑀘 ‘‘𑀤𑀚𑁆𑀚𑀸 𑀤𑀤𑀺𑀬𑁆𑀬 𑀤𑀢𑁆𑀯𑀸’’𑀢𑀺 𑀘 ‘‘𑀤𑀚𑁆𑀚𑀸 𑀤𑀸𑀢𑀩𑁆𑀩𑀸’’𑀢𑀺 𑀘 𑀏𑀢𑀸𑀦𑀺 𑀧𑀘𑁆𑀘𑁂𑀓𑀁 𑀧𑀭𑀺𑀬𑀸𑀬𑀯𑀘𑀦𑀸𑀦𑀺 𑀪𑀯𑀦𑁆𑀢𑀺. ‘‘𑀤𑀚𑁆𑀚𑀼𑀁. 𑀤𑀚𑁆𑀚𑀸𑀲𑀺, 𑀤𑀚𑁆𑀚𑀸𑀣. 𑀤𑀚𑁆𑀚𑀸𑀫𑀺, 𑀤𑀚𑁆𑀚𑀸𑀫. 𑀤𑀚𑁆𑀚𑀸𑀯𑁆𑀳𑁄, 𑀤𑀚𑁆𑀚’’𑀦𑁆𑀢𑀺 𑀏𑀢𑀸𑀦𑀺𑀧𑀺 ‘‘𑀤𑀤𑁂𑀬𑁆𑀬𑀼𑀁 𑀤𑀤𑁂𑀬𑁆𑀬𑀸𑀲𑀻’’𑀢𑀺𑀆𑀤𑀺𑀦𑀸 𑀧𑀤𑀭𑀽𑀧𑀸𑀦𑀺 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀬𑁆𑀬𑀓𑀸𑀭𑁂 𑀧𑀭𑁂 𑀲𑀭𑀮𑁄𑀧𑀁 𑀲𑀜𑁆𑀜𑁄𑀕𑁂𑀲𑀼 𑀲𑀭𑀽𑀧𑀮𑁄𑀧𑀁 𑀤𑁆𑀬𑀓𑀸𑀭𑀲𑀫𑀜𑁆𑀜𑁄𑀕𑀲𑁆𑀲 𑀚𑁆𑀚𑀓𑀸𑀭𑀤𑁆𑀯𑀬𑀜𑁆𑀘 𑀓𑀢𑁆𑀯𑀸 𑀦𑀺𑀧𑁆𑀨𑀚𑁆𑀚𑀦𑁆𑀢𑀺. 𑀏𑀢𑁂𑀲𑀼 𑀤𑀚𑁆𑀚𑀸𑀲𑀻𑀢𑀺 𑀬𑀁 𑀭𑀽𑀧𑀁 𑀢𑀲𑁆𑀲𑀸𑀯𑀬𑀯𑀲𑁆𑀲 𑀆𑀓𑀸𑀭𑀲𑁆𑀲 𑀏𑀓𑀸𑀭𑀁 𑀓𑀢𑁆𑀯𑀸 𑀅𑀧𑀭𑀫𑁆𑀧𑀺 ‘‘𑀤𑀚𑁆𑀚𑁂𑀲𑀻’’𑀢𑀺 𑀭𑀽𑀧𑀁 𑀪𑀯𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀲 𑀦𑀬𑁄 𑀅𑀜𑁆𑀜𑀢𑁆𑀭𑀸𑀧𑀺 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑁄.

𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑀲𑁆𑀲 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀸𑀴𑀺𑀦𑀬𑁄 𑀅𑀘𑀺𑀦𑁆𑀢𑁂𑀬𑁆𑀬𑁄𑀬𑁂𑀯 𑀳𑁄𑀢𑀺, 𑀕𑀫𑁆𑀪𑀻𑀭𑁄 𑀤𑀼𑀓𑁆𑀔𑁄𑀕𑀸𑀴𑁆𑀳𑁄, 𑀦 𑀬𑁂𑀦 𑀓𑁂𑀦𑀘𑀺 𑀮𑀓𑁆𑀔𑀡𑁂𑀦 𑀲𑀸𑀥𑁂𑀢𑀩𑁆𑀩𑁄, 𑀬𑀣𑀸𑀢𑀦𑁆𑀢𑀺 𑀯𑀺𑀭𑀘𑀺𑀢𑁂𑀳𑁂𑀯 𑀮𑀓𑁆𑀔𑀡𑁂𑀳𑀺 𑀲𑀸𑀥𑁂𑀢𑀩𑁆𑀩𑁄. 𑀢𑀣𑀸 𑀳𑀺 ‘‘𑀔𑀢𑁆𑀢𑀺𑀬𑀸 𑀢𑀺𑀢𑁆𑀣𑀺𑀬𑀸 𑀘𑁂𑀢𑀺𑀬𑀸𑀦𑀻’’𑀢𑀺𑀆𑀤𑀻𑀲𑀼 𑀬𑀓𑀸𑀭𑁂 𑀧𑀭𑁂 𑀲𑀭𑀮𑁄𑀧𑁄 𑀪𑀯𑀢𑀺, 𑀢𑁂𑀦 ‘‘𑀅𑀣𑁂𑀢𑁆𑀣𑁂𑀓𑀲𑀢𑀁 𑀔𑀢𑁆𑀬𑀸. 𑀏𑀯𑀫𑁆𑀧𑀺 𑀢𑀺𑀢𑁆𑀣𑁆𑀬𑀸 𑀧𑀼𑀣𑀼𑀲𑁄 𑀯𑀤𑀦𑁆𑀢𑀺. 𑀆𑀭𑀸𑀫𑀭𑀼𑀓𑁆𑀔𑀘𑁂𑀢𑁆𑀬𑀸𑀦𑀻’’𑀢𑀺 𑀧𑀬𑁄𑀕𑀸 𑀤𑀺𑀲𑁆𑀲𑀦𑁆𑀢𑀺. 𑀢𑀣𑀸 ‘‘𑀲𑀸𑀓𑀘𑁆𑀙𑀢𑀺 𑀢𑀘𑁆𑀙’’𑀦𑁆𑀢𑀺 𑀏𑀢𑁆𑀣𑀸𑀧𑀺 ‘‘𑀲𑀳 𑀓𑀣𑀬𑀢𑀻’’𑀢𑀺𑀯𑀸 ‘‘𑀲𑀁𑀓𑀣𑀬𑀢𑀻’’𑀢𑀺 𑀯𑀸 ‘‘𑀢𑀣𑁆𑀬’’𑀦𑁆𑀢𑀺 𑀘 𑀧𑀤𑀭𑀽𑀧𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀲𑀳𑀲𑀤𑁆𑀤𑀲𑁆𑀲 𑀳𑀓𑀸𑀭𑀮𑁄𑀧𑀁, 𑀲𑀁𑀲𑀤𑁆𑀤𑁂 𑀘 𑀦𑀺𑀕𑁆𑀕𑀳𑀻𑀢𑀮𑁄𑀧𑀁 𑀓𑀢𑁆𑀯𑀸 𑀲𑀓𑀸𑀭𑀕𑀢𑀲𑁆𑀲 𑀲𑀭𑀲𑁆𑀲 𑀤𑀻𑀖𑀁 𑀓𑀢𑁆𑀯𑀸 𑀬𑀓𑀸𑀭𑁂 𑀧𑀭𑁂 𑀲𑀭𑀮𑁄𑀧𑀁 𑀓𑀢𑁆𑀯𑀸 𑀢𑀢𑁄 𑀣𑁆𑀬𑀓𑀸𑀭𑀲𑀜𑁆𑀜𑁄𑀕𑀲𑁆𑀲 𑀘𑁆𑀙𑀬𑀼𑀕𑀁 𑀓𑀢𑁆𑀯𑀸 𑀯𑀺𑀲𑀪𑀸𑀕𑀲𑀜𑁆𑀜𑁄𑀕𑁂 𑀏𑀓𑁄 𑀏𑀓𑀲𑁆𑀲 𑀲𑀪𑀸𑀕𑀢𑁆𑀢𑀫𑀸𑀧𑀚𑁆𑀚𑀢𑀺. 𑀢𑁂𑀦 ‘‘𑀲𑀸𑀓𑀘𑁆𑀙𑀢𑀺 𑀢𑀘𑁆𑀙’’𑀦𑁆𑀢𑀺 𑀭𑀽𑀧𑀸𑀦𑀺 𑀲𑀺𑀚𑁆𑀛𑀦𑁆𑀢𑀺. 𑀢𑀣𑀸 𑀳𑀺 ‘‘𑀅𑀜𑁆𑀜𑀫𑀜𑁆𑀜𑀁 𑀲𑀸𑀓𑀘𑁆𑀙𑀺𑀁𑀲𑀼. 𑀓𑀸𑀮𑁂𑀦 𑀥𑀫𑁆𑀫𑀲𑀸𑀓𑀘𑁆𑀙𑀸. 𑀪𑀽𑀢𑀁 𑀢𑀘𑁆𑀙𑀁. 𑀬𑀣𑀸𑀢𑀣𑀺𑀬𑀁 𑀯𑀺𑀤𑀺𑀢𑁆𑀯𑀸𑀧𑀺 𑀥𑀫𑁆𑀫𑀁, 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬𑀸’’𑀢𑀺 ¶ 𑀲𑀯𑀺𑀓𑀧𑀸𑀦𑀺 𑀧𑀬𑁄𑀕𑀸𑀦𑀺 𑀤𑀺𑀲𑁆𑀲𑀦𑁆𑀢𑀺. ‘‘𑀦𑀚𑁆𑀚𑀸’’𑀢𑀺𑀆𑀤𑀻𑀲𑀼𑀧𑀺 ‘‘𑀦𑀤𑀺𑀬𑀸’’𑀢𑀺𑀆𑀤𑀻𑀦𑀺 𑀧𑀤𑀭𑀽𑀧𑀸𑀦𑀺 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀯𑀡𑁆𑀡𑀲𑀦𑁆𑀥𑀺𑀯𑀲𑁂𑀦 𑀬𑀓𑀸𑀭𑁂 𑀧𑀭𑁂 𑀮𑁄𑀧𑀯𑀺𑀥𑀺 𑀮𑀩𑁆𑀪𑀢𑀺𑀬𑁂𑀯. 𑀯𑀺𑀯𑀺𑀥𑁄 𑀳𑀺 𑀲𑀸𑀲𑀦𑀸𑀦𑀼𑀓𑀽𑀮𑁄 𑀭𑀽𑀧𑀦𑀺𑀧𑁆𑀨𑀸𑀤𑀦𑀼𑀧𑀸𑀬𑁄, 𑀉𑀧𑀭𑀺 𑀘 𑀏𑀢𑁂𑀲𑀁 𑀲𑀸𑀥𑀦𑀢𑁆𑀣𑀁 ‘‘𑀲𑀭𑀮𑁄𑀧𑁄 𑀬𑀫𑀦𑀭𑀸𑀤𑀻𑀲𑀽’’𑀢𑀺𑀆𑀤𑀻𑀦𑀺 𑀮𑀓𑁆𑀔𑀡𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺. 𑀢𑀢𑁆𑀣 𑁋

‘‘𑀤𑀚𑁆𑀚𑀸 𑀤𑀚𑁆𑀚𑀼’’𑀦𑁆𑀢𑀺𑀆𑀤𑀻𑀦𑀺, 𑀲𑀢𑁆𑀢𑀫𑀻𑀦𑀁 𑀯𑀲𑁂𑀦 𑀫𑁂;

𑀯𑀼𑀢𑁆𑀢𑀸𑀦𑀺 𑀬𑁄𑀕𑀺𑀭𑀸𑀚𑀲𑁆𑀲, 𑀲𑀸𑀲𑀦𑀢𑁆𑀣𑀁 𑀫𑀳𑁂𑀲𑀺𑀦𑁄.

𑀅𑀢𑁆𑀭𑀺𑀤𑀁 𑀯𑀢𑁆𑀢𑀩𑁆𑀩𑀁, 𑀓𑀺𑀜𑁆𑀘𑀸𑀧𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 ‘‘𑀫𑀸𑀢𑀭𑀁 𑀢𑁂𑀦 𑀤𑁄𑀲𑁂𑀦, 𑀤𑀚𑁆𑀚𑀸𑀳𑀁 𑀤𑀓𑀭𑀓𑁆𑀔𑀺𑀦𑁄’’𑀢𑀺 𑀏𑀢𑁆𑀣 𑀤𑀚𑁆𑀚𑀦𑁆𑀢𑀺 𑀧𑀤𑀲𑁆𑀲 ‘‘𑀤𑀫𑁆𑀫𑀻’’𑀢𑀺 𑀯𑀢𑁆𑀢𑀫𑀸𑀦𑀸𑀯𑀲𑁂𑀦 𑀯𑀺𑀯𑀭𑀡𑀁 𑀓𑀢𑀁, 𑀢𑀣𑀸𑀧𑀺 𑀲𑀢𑁆𑀢𑀫𑀻𑀧𑀬𑁄𑀕𑁄𑀬𑁂𑀯. 𑀆𑀘𑀭𑀺𑀬𑀸 𑀳𑀺 ‘‘𑀲𑀢𑁆𑀢𑀫𑀻𑀧𑀬𑁄𑀕𑁄 𑀅𑀬’’𑀦𑁆𑀢𑀺 𑀚𑀸𑀦𑀦𑁆𑀢𑀸𑀧𑀺 ‘‘𑀓𑀤𑀸𑀘𑀺 𑀅𑀜𑁆𑀜𑁂 𑀧𑀭𑀺𑀓𑀧𑁆𑀧𑀢𑁆𑀣𑀫𑁆𑀧𑀺 𑀕𑀡𑁆𑀳𑁂𑀬𑁆𑀬𑀼’’𑀦𑁆𑀢𑀺 𑀆𑀲𑀗𑁆𑀓𑀸𑀬 𑀏𑀯𑀁 𑀯𑀺𑀯𑀭𑀡𑀫𑀓𑀁𑀲𑀼. 𑀢𑀣𑀸 𑀓𑀺𑀜𑁆𑀘𑀸𑀧𑀺 𑀢𑁂𑀳𑀺 ‘‘𑀅𑀦𑀸𑀧𑀭𑀸𑀥𑀓𑀫𑁆𑀫𑀦𑁆𑀢𑀁, 𑀦 𑀤𑀚𑁆𑀚𑀁 𑀤𑀓𑀭𑀓𑁆𑀔𑀺𑀦𑁄’’𑀢𑀺 𑀏𑀢𑁆𑀣 𑀦 𑀤𑀚𑁆𑀚𑀦𑁆𑀢𑀺 𑀧𑀤𑀲𑁆𑀲 ‘‘𑀦𑀸𑀳𑀁 𑀤𑀓𑀭𑀓𑁆𑀔𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀪𑀯𑀺𑀲𑁆𑀲𑀦𑁆𑀢𑀻𑀯𑀲𑁂𑀦 𑀯𑀺𑀯𑀭𑀡𑀁 𑀓𑀢𑀁, 𑀢𑀣𑀸𑀧𑀺 𑀲𑀢𑁆𑀢𑀫𑀻𑀧𑀬𑁄𑀕𑁄𑀬𑁂𑀯, 𑀅𑀦𑀸𑀕𑀢𑀁 𑀧𑀦 𑀧𑀝𑀺𑀘𑁆𑀘 𑀯𑀢𑁆𑀢𑀩𑁆𑀩𑀢𑁆𑀣𑀢𑁆𑀢𑀸 𑀏𑀯𑀁 𑀯𑀺𑀯𑀭𑀡𑀁 𑀓𑀢𑀁. ‘‘𑀦𑁂𑀯 𑀤𑀚𑁆𑀚𑀁 𑀫𑀳𑁄𑀲𑀥’’𑀦𑁆𑀢𑀺 𑀏𑀢𑁆𑀣 𑀧𑀦 ‘‘𑀦 𑀢𑁆𑀯𑁂𑀯 𑀤𑀤𑁂𑀬𑁆𑀬’’𑀦𑁆𑀢𑀺 𑀲𑀢𑁆𑀢𑀫𑀻𑀧𑀬𑁄𑀕𑀯𑀲𑁂𑀦𑁂𑀯 𑀯𑀺𑀯𑀭𑀡𑀁 𑀓𑀢𑀦𑁆𑀢𑀺. 𑀏𑀯𑀁 𑀤𑀚𑁆𑀚𑀁𑀧𑀤𑀲𑁆𑀲 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀸𑀦𑀺 𑀧𑀭𑁄𑀓𑁆𑀔𑀸𑀤𑀺𑀯𑀲𑁂𑀦 𑀧𑀤𑀓𑁆𑀓𑀫𑁄 𑀓𑀣𑀺𑀬𑀢𑀺. ‘‘𑀤𑀤, 𑀤𑀤𑀽. 𑀤𑀤𑀽’’𑀢𑀺 𑀘 𑀇𑀤𑀁 ‘‘𑀦𑀸𑀭𑀤𑁄 𑀇𑀢𑀺 𑀦𑀸𑀫𑁂𑀦, 𑀓𑀲𑁆𑀲𑀧𑁄 𑀇𑀢𑀺 𑀫𑀁 𑀯𑀺𑀤𑀽’’𑀢𑀺𑀆𑀤𑀻𑀲𑀼 𑀯𑀺𑀤𑀽𑀲𑀤𑁆𑀤𑁂𑀦 𑀲𑀫𑀁. 𑀤𑀤𑁂, 𑀤𑀤𑀺𑀢𑁆𑀣, 𑀤𑀤𑀁, 𑀤𑀤𑀺𑀫𑁆𑀳. 𑀤𑀤𑀺𑀢𑁆𑀣, 𑀤𑀤𑀺𑀭𑁂. 𑀤𑀤𑀺𑀢𑁆𑀣𑁄, 𑀤𑀤𑀺𑀯𑁆𑀳𑁄.

𑀏𑀢𑁆𑀣 𑀘 𑀤𑀤𑀺𑀢𑁆𑀣𑁄𑀢𑀺 𑀇𑀤𑀁 ‘‘𑀲𑀜𑁆𑀚𑀕𑁆𑀖𑀺𑀢𑁆𑀣𑁄 𑀫𑀬𑀸 𑀲𑀳. 𑀫𑀸 𑀓𑀺𑀲𑀺𑀢𑁆𑀣𑁄 𑀫𑀬𑀸 𑀯𑀺𑀦𑀸. 𑀫𑀸 𑀦𑀁 𑀓𑀮𑀮𑁂 𑀅𑀓𑁆𑀓𑀫𑀺𑀢𑁆𑀣𑁄’’𑀢𑀺𑀆𑀤𑀻𑀲𑀼 ‘‘𑀲𑀜𑁆𑀚𑀕𑁆𑀖𑀺𑀢𑁆𑀣𑁄’’𑀢𑀺𑀆𑀤𑀻𑀳𑀺 ¶ 𑀲𑀫𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀮𑀩𑁆𑀪𑀫𑀸𑀦𑀯𑀲𑁂𑀦 𑀲𑀤𑀺𑀲𑀢𑀸 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸. 𑀤𑀤𑀁, 𑀤𑀤𑀺𑀫𑁆𑀳𑁂. 𑀧𑀭𑁄𑀓𑁆𑀔𑀸𑀲𑀳𑀺𑀪𑀭𑀽𑀧𑀸𑀦𑀺.

𑀅𑀤𑀤𑀸, 𑀅𑀤𑀤𑀽. 𑀅𑀤𑀤𑁂, 𑀅𑀤𑀤𑀢𑁆𑀣. 𑀅𑀤𑀤𑀁, 𑀅𑀤𑀤𑀫𑁆𑀳. 𑀅𑀤𑀤𑀢𑁆𑀣, 𑀅𑀤𑀤𑀢𑁆𑀣𑀼𑀁. 𑀅𑀤𑀤𑀲𑁂, 𑀅𑀤𑀤𑀯𑁆𑀳𑀁. 𑀅𑀤𑀤𑀺𑀁 𑀅𑀤𑀤𑀫𑁆𑀳𑀲𑁂. 𑀇𑀢𑀺 𑀅𑀦𑀓𑀸𑀭𑀧𑀼𑀩𑁆𑀩𑀫𑁆𑀧𑀺 𑀭𑀽𑀧𑀁 𑀕𑀳𑁂𑀢𑀩𑁆𑀩𑀁 ‘‘𑀬𑁂𑀲𑀁 𑀦𑁄 𑀦 𑀤𑀤𑀫𑁆𑀳𑀲𑁂’’𑀢𑀺 𑀤𑀲𑁆𑀲𑀦𑀢𑁄. 𑀳𑀺𑀬𑁆𑀬𑀢𑁆𑀢𑀦𑀻𑀲𑀳𑀺𑀢𑀭𑀽𑀧𑀸𑀦𑀺.

𑀅𑀤𑀤𑀺, 𑀅𑀤𑀤𑀼𑀁, 𑀅𑀤𑀤𑀺𑀁𑀲𑀼. 𑀅𑀤𑀤𑁄, 𑀅𑀤𑀤𑀺𑀢𑁆𑀣. 𑀅𑀤𑀤𑀺𑀁, 𑀅𑀤𑀤𑀺𑀫𑁆𑀳𑀸. 𑀅𑀤𑀤𑀸, 𑀅𑀤𑀤𑀽. 𑀅𑀤𑀤𑀲𑁂, 𑀅𑀤𑀤𑀺𑀯𑁆𑀳𑀁. 𑀅𑀤𑀤𑀁, 𑀅𑀤𑀤𑀺𑀫𑁆𑀳𑁂. 𑀅𑀚𑁆𑀚𑀢𑀦𑀻𑀲𑀳𑀺𑀢𑀭𑀽𑀧𑀸𑀦𑀺.

‘‘𑀤𑀤𑀺𑀲𑁆𑀲𑀢𑀺, 𑀤𑀤𑀺𑀲𑁆𑀲𑀦𑁆𑀢𑀺’’ 𑀇𑀘𑁆𑀘𑀸𑀤𑀺 𑀲𑀩𑁆𑀩𑀁 𑀦𑁂𑀬𑁆𑀬𑀁. 𑀪𑀯𑀺𑀲𑁆𑀲𑀦𑁆𑀢𑀻𑀲𑀳𑀺𑀢𑀭𑀽𑀧𑀸𑀦𑀺.

‘‘𑀅𑀤𑀤𑀺𑀲𑀸, 𑀤𑀤𑀺𑀲𑁆𑀲𑀸, 𑀅𑀤𑀤𑀺𑀲𑁆𑀲𑀁𑀲𑀼, 𑀤𑀤𑀺𑀲𑁆𑀲𑀁𑀲𑀼’’ 𑀇𑀘𑁆𑀘𑀸𑀤𑀺 𑀘 𑀲𑀩𑁆𑀩𑀁 𑀦𑁂𑀬𑁆𑀬𑀁. 𑀓𑀸𑀮𑀸𑀢𑀺𑀧𑀢𑁆𑀢𑀺𑀲𑀳𑀺𑀢𑀭𑀽𑀧𑀸𑀦𑀺.

𑀅𑀧𑀭𑀸𑀦𑀺𑀧𑀺 𑀯𑀢𑁆𑀢𑀫𑀸𑀦𑀸𑀤𑀺𑀲𑀳𑀺𑀢𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀤𑁂𑀢𑀺, 𑀤𑁂𑀦𑁆𑀢𑀺. 𑀤𑁂𑀲𑀺, 𑀤𑁂𑀣. 𑀤𑁂𑀫𑀺, 𑀤𑀫𑁆𑀫𑀺, 𑀤𑁂𑀫, 𑀤𑀫𑁆𑀫. 𑀤𑁂𑀢𑀼, 𑀤𑁂𑀦𑁆𑀢𑀼. 𑀤𑁂𑀳𑀺, 𑀤𑁂𑀣. 𑀤𑁂𑀫𑀺, 𑀤𑀫𑁆𑀫𑀺, 𑀤𑁂𑀫, 𑀤𑀫𑁆𑀫. 𑀅𑀢𑁆𑀢𑀦𑁄𑀧𑀤𑀸𑀦𑀺 𑀅𑀧𑁆𑀧𑀲𑀺𑀤𑁆𑀥𑀸𑀦𑀺. 𑀲𑀢𑁆𑀢𑀫𑀻𑀦𑀬𑁄 𑀘 𑀧𑀭𑁄𑀓𑁆𑀔𑀸𑀦𑀬𑁄 𑀘 𑀅𑀧𑁆𑀧𑀲𑀺𑀤𑁆𑀥𑁄. 𑀳𑀺𑀬𑀼𑀢𑁆𑀢𑀦𑀻𑀦𑀬𑁄 𑀧𑀦 𑀅𑀚𑁆𑀚𑀢𑀦𑀻𑀦𑀬𑁄 𑀘 𑀓𑁄𑀘𑀺 𑀓𑁄𑀘𑀺 𑀧𑀲𑀺𑀤𑁆𑀥𑁄 𑀧𑀸𑀴𑀺𑀬𑀁 𑀆𑀕𑀢𑀢𑁆𑀢𑀸, 𑀲𑀓𑁆𑀓𑀸 𑀘 ‘‘𑀅𑀤𑀸, 𑀅𑀤𑀽, 𑀅𑀤𑁄, 𑀅𑀤’’𑀦𑁆𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀼𑀁. 𑀢𑀣𑀸 𑀳𑀺 𑀦𑀬𑁄 𑀤𑀺𑀲𑁆𑀲𑀢𑀺. 𑀅𑀤𑀸 𑀤𑀸𑀦𑀁 𑀧𑀼𑀭𑀺𑀦𑁆𑀤𑀤𑁄. 𑀯𑀭𑀜𑁆𑀘𑁂𑀫𑁂 𑀅𑀤𑁄 𑀲𑀓𑁆𑀓. 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀤𑀁 𑀕𑀚𑀁. 𑀅𑀤𑀸𑀲𑀺𑀫𑁂. 𑀅𑀤𑀁𑀲𑀼 𑀢𑁂 𑀫𑀫𑁄𑀓𑀸𑀲𑀁. 𑀅𑀤𑀸𑀲𑀺𑀁 𑀩𑁆𑀭𑀸𑀳𑁆𑀫𑀡𑁂 𑀢𑀤𑀸𑀢𑀺. ‘‘𑀤𑀲𑁆𑀲𑀢𑀺, 𑀤𑀲𑁆𑀲𑀦𑁆𑀢𑀺’’ 𑀇𑀘𑁆𑀘𑀸𑀤𑀺 𑀲𑀩𑁆𑀩𑀁 𑀦𑁂𑀬𑁆𑀬𑀁. ‘‘𑀅𑀤𑀲𑁆𑀲𑀸, 𑀤𑀲𑁆𑀲𑀸, 𑀅𑀤𑀲𑁆𑀲𑀁𑀲𑀼, 𑀤𑀲𑁆𑀲𑀁𑀲𑀼, 𑀤𑀲𑁆𑀲𑀺𑀁𑀲𑀼’’ 𑀇𑀘𑁆𑀘𑀸𑀤𑀺 𑀘 𑀲𑀩𑁆𑀩𑀁 𑀦𑁂𑀬𑁆𑀬𑀁.

𑀢𑀣𑀸 ¶ 𑀆𑀤𑀤𑀸𑀢𑀺, 𑀆𑀤𑀤𑀦𑁆𑀢𑀺. 𑀆𑀤𑀤𑀸𑀲𑀺, 𑀆𑀤𑀤𑀸𑀣. 𑀆𑀤𑀤𑀸𑀫𑀺, 𑀆𑀤𑀤𑀸𑀫. 𑀓𑀘𑁆𑀘𑀸𑀬𑀦𑀫𑀢𑁂 ‘‘𑀆𑀤𑀢𑁆𑀢𑁂’’𑀢𑀺 𑀅𑀢𑁆𑀢𑀦𑁄𑀧𑀤𑀁 𑀯𑀼𑀢𑁆𑀢𑀁. 𑀏𑀯𑀁 ‘‘𑀆𑀤𑀤𑀸𑀢𑀼, 𑀆𑀤𑀤𑁂𑀬𑁆𑀬’’ 𑀇𑀘𑁆𑀘𑀸𑀤𑀺 𑀲𑀩𑁆𑀩𑀁 𑀦𑁂𑀬𑁆𑀬𑀁. 𑀆𑀤𑁂𑀢𑀼 𑀆𑀤𑁂𑀬𑁆𑀬 𑀇𑀘𑁆𑀘𑀸𑀤𑀺 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀫𑁂𑀯 𑀘 ‘‘𑀤𑀸𑀧𑁂𑀢𑀺, 𑀆𑀤𑀸𑀧𑁂𑀢𑀻’’𑀢𑀺𑀆𑀤𑀻𑀦𑀺𑀧𑀺 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀤𑀸𑀓𑀼𑀘𑁆𑀙𑀺𑀢𑁂 𑀕𑀫𑀦𑁂. 𑀤𑀸𑀢𑀺. 𑀲𑀼𑀤𑁆𑀤𑀸𑀢𑀺. 𑀲𑀼𑀤𑁆𑀤𑁄, 𑀲𑀼𑀤𑁆𑀤𑀻. 𑀢𑀢𑁆𑀣 𑀲𑀼𑀤𑁆𑀤𑁄𑀢𑀺 𑀲𑀼𑀤𑁆𑀤𑀸𑀢𑀻𑀢𑀺 𑀲𑀼𑀤𑁆𑀤𑁄, 𑀧𑀭𑀧𑁄𑀣𑀦𑀸𑀤𑀺𑀮𑀼𑀤𑁆𑀤𑀸𑀘𑀸𑀭𑀓𑀫𑁆𑀫𑀼𑀦𑀸 𑀤𑀸𑀭𑀼𑀓𑀫𑁆𑀫𑀸𑀤𑀺𑀔𑀼𑀤𑁆𑀤𑀸𑀘𑀸𑀭𑀓𑀫𑁆𑀫𑀼𑀦𑀸 𑀘 𑀮𑀳𑀼𑀁 𑀮𑀳𑀼𑀁 𑀓𑀼𑀘𑁆𑀙𑀺𑀢𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀲𑀼 𑀇𑀢𑀺 𑀲𑀻𑀖𑀢𑁆𑀣𑁂 𑀦𑀺𑀧𑀸𑀢𑁄, 𑀤𑀸 𑀇𑀢𑀺 𑀕𑀭𑀳𑀢𑁆𑀣𑁄 𑀥𑀸𑀢𑀼 𑀓𑀼𑀘𑁆𑀙𑀺𑀢𑀕𑀢𑀺𑀯𑀸𑀘𑀓𑀢𑁆𑀢𑀸. 𑀲𑀼𑀤𑁆𑀤𑀲𑁆𑀲 𑀪𑀭𑀺𑀬𑀸 𑀲𑀼𑀤𑁆𑀤𑀻.

𑀤𑀼 𑀕𑀢𑀺𑀬𑀁. 𑀤𑀯𑀢𑀺. 𑀤𑀼𑀫𑁄. 𑀏𑀢𑁆𑀣 𑀘 𑀤𑀯𑀢𑀺 𑀕𑀘𑁆𑀙𑀢𑀺 𑀫𑀽𑀮𑀓𑁆𑀔𑀦𑁆𑀥𑀲𑀸𑀔𑀸𑀯𑀺𑀝𑀧𑀧𑀢𑁆𑀢𑀧𑀮𑁆𑀮𑀯𑀧𑀼𑀧𑁆𑀨𑀨𑀮𑁂𑀳𑀺 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀧𑀸𑀧𑀼𑀡𑀸𑀢𑀻𑀢𑀺 𑀤𑀼𑀫𑁄.

𑀤𑁂𑀲𑁄𑀥𑀦𑁂. 𑀲𑁄𑀥𑀦𑀁 𑀧𑀭𑀺𑀬𑁄𑀤𑀸𑀧𑀦𑀁. 𑀤𑀸𑀬𑀢𑀺. 𑀤𑀸𑀬𑀦𑀁. 𑀬𑀣𑀸 𑀕𑀸𑀬𑀢𑀺, 𑀕𑀸𑀬𑀦𑀁. 𑀤𑀸𑀬𑀺𑀢𑀼𑀁, 𑀤𑀸𑀬𑀺𑀢𑁆𑀯𑀸, 𑀥𑀸𑀢𑀸𑀯𑀬𑀯𑀲𑁆𑀲𑁂𑀓𑀸𑀭𑀲𑁆𑀲 𑀆𑀬𑀸𑀤𑁂𑀲𑁄. ‘‘𑀤𑀸𑀢𑀼𑀁, 𑀤𑀢𑁆𑀯𑀸’’ 𑀇𑀘𑁆𑀘𑀧𑀺 𑀭𑀽𑀧𑀸𑀦𑀺.

𑀢𑀢𑁆𑀭 𑀤𑀸𑀢𑀼𑀦𑁆𑀢𑀺 𑀲𑁄𑀥𑁂𑀢𑀼𑀁. 𑀤𑀢𑁆𑀯𑀸𑀢𑀺 𑀲𑁄𑀥𑁂𑀢𑁆𑀯𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀢𑀣𑀸 𑀳𑀺 ‘‘𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 𑀦𑀧𑁆𑀧𑀝𑀺𑀩𑀮𑁄 𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀅𑀦𑀼𑀬𑁄𑀕𑀁 𑀤𑀸𑀢𑀼’’𑀦𑁆𑀢𑀺 𑀏𑀢𑁆𑀣 𑀤𑀸𑀢𑀼𑀦𑁆𑀢𑀺 𑀧𑀤𑀲𑁆𑀲 𑀲𑁄𑀥𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀓𑁂𑀘𑀺 ‘‘𑀤𑀸𑀦𑀢𑁆𑀣’’𑀦𑁆𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁. 𑀦 𑀳𑀺 𑀬𑁄 𑀧𑀭𑁂𑀳𑀺 𑀅𑀦𑀼𑀬𑀼𑀜𑁆𑀚𑀺𑀬𑀢𑀺, 𑀲𑁄 𑀅𑀦𑀼𑀬𑁄𑀕𑀁 𑀤𑁂𑀢𑀺 𑀦𑀸𑀫𑀸𑀢𑀺. 𑀢𑀲𑁆𑀫𑀸 ‘‘𑀆𑀘𑀭𑀺𑀬𑀲𑁆𑀲 𑀅𑀦𑀼𑀬𑁄𑀕𑀁 𑀤𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀧𑀘𑁆𑀘𑀸𑀕𑀘𑁆𑀙𑀻’’𑀢𑀺𑀆𑀤𑀻𑀲𑀼𑀧𑀺 𑀅𑀦𑀼𑀬𑁄𑀕𑀁 𑀤𑀢𑁆𑀯𑀸𑀢𑀺 𑀅𑀦𑀼𑀬𑁄𑀕𑀁 𑀲𑁄𑀥𑁂𑀢𑁆𑀯𑀸𑀢𑀺 𑀅𑀢𑁆𑀣𑁄𑀬𑁂𑀯 𑀕𑀳𑁂𑀢𑀩𑁆𑀩𑁄. 𑀢𑀣𑀸 ¶ 𑀳𑀺 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 ‘‘𑀅𑀦𑀼𑀬𑁄𑀕𑀤𑀸𑀧𑀦𑀢𑁆𑀣’’𑀦𑁆𑀢𑀺 𑀏𑀢𑀲𑁆𑀫𑀺𑀁 𑀧𑀤𑁂𑀲𑁂 𑀏𑀲𑁄𑀬𑁂𑀯𑀢𑁆𑀣𑁄 𑀯𑀺𑀪𑀸𑀯𑀺𑀢𑁄. 𑀓𑀣𑀁? 𑀅𑀦𑀼𑀬𑁄𑀕𑀤𑀸𑀧𑀦𑀢𑁆𑀣𑀦𑁆𑀢𑀺 𑀅𑀦𑀼𑀬𑁄𑀕𑀁 𑀲𑁄𑀥𑀸𑀧𑁂𑀢𑀼𑀁. 𑀯𑀺𑀫𑀤𑁆𑀤𑀓𑁆𑀔𑀫𑀜𑁆𑀳𑀺 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀅𑀢𑁆𑀣𑀢𑁄 𑀅𑀦𑀼𑀬𑁄𑀕𑀁 𑀲𑁄𑀥𑁂𑀢𑀺 𑀦𑀸𑀫, 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀘 𑀦𑀁 𑀲𑁄𑀥𑀸𑀧𑁂𑀢𑀺 𑀦𑀸𑀫𑀸𑀢𑀺. 𑀇𑀤𑀫𑁆𑀧𑀺 𑀘 𑀢𑁂𑀳𑀺 𑀯𑀼𑀢𑁆𑀢𑀁. 𑀤𑀸𑀢𑀼𑀦𑁆𑀢𑀺 𑀲𑁄𑀥𑁂𑀢𑀼𑀁. 𑀓𑁂𑀘𑀺 ‘‘𑀤𑀸𑀦𑀢𑁆𑀣’’𑀦𑁆𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁. 𑀦 𑀳𑀺 𑀬𑁄 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀲𑁄 𑀏𑀯 𑀢𑀢𑁆𑀣 𑀅𑀦𑀼𑀬𑁄𑀕𑀁 𑀤𑁂𑀢𑀻𑀢𑀺. 𑀲𑀫𑀦𑁆𑀢𑀧𑀝𑁆𑀞𑀸𑀦𑀫𑀳𑀸𑀧𑀓𑀭𑀡 𑀲𑀁𑀯𑀡𑁆𑀡𑀦𑀸𑀬𑀫𑁆𑀧𑀺 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 ‘‘𑀤𑀸𑀦𑀁 𑀤𑀢𑁆𑀯𑀸𑀢𑀺 𑀢𑀁 𑀘𑁂𑀢𑀦𑀁 𑀧𑀭𑀺𑀬𑁄𑀤𑀸𑀧𑁂𑀢𑁆𑀯𑀸’’𑀢𑀺 𑀲𑁄𑀥𑀦𑀢𑁆𑀣𑁄 𑀯𑀼𑀢𑁆𑀢𑁄. 𑀤𑀼𑀮𑁆𑀮𑀪𑀸 𑀅𑀬𑀁 𑀦𑀻𑀢𑀺 𑀲𑀸𑀥𑀼𑀓𑀁 𑀘𑀺𑀢𑁆𑀢𑁂 𑀞𑀧𑁂𑀢𑀩𑁆𑀩𑀸.

𑀤𑁂 𑀧𑀸𑀮𑀦𑁂. 𑀤𑀻𑀬𑀢𑀺. 𑀤𑀸𑀦𑀁, 𑀉𑀤𑁆𑀤𑀸𑀦𑀁 𑀤𑀸𑀬𑀺𑀢𑀼𑀁, 𑀤𑀸𑀬𑀺𑀢𑁆𑀯𑀸. 𑀢𑀢𑁆𑀣 𑀤𑀸𑀦𑀦𑁆𑀢𑀺 𑀤𑀼𑀕𑁆𑀕𑀢𑀺𑀢𑁄 𑀤𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀤𑀸𑀦𑀁, 𑀤𑀸𑀦𑀘𑁂𑀢𑀦𑀸. 𑀉𑀤𑁆𑀤𑀸𑀦𑀦𑁆𑀢𑀺 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀓𑁆𑀔𑀫𑀸𑀦𑀲𑁆𑀲 𑀯𑀸 𑀯𑀺𑀧𑁆𑀧𑀓𑀺𑀡𑁆𑀡𑀪𑀸𑀯𑁂𑀦 𑀦𑀲𑁆𑀲𑀺𑀢𑀼𑀁 𑀅𑀤𑀢𑁆𑀯𑀸 𑀉𑀤𑁆𑀥𑀁 𑀤𑀸𑀦𑀁 𑀭𑀓𑁆𑀔𑀡𑀁 𑀉𑀤𑁆𑀤𑀸𑀦𑀁, 𑀲𑀗𑁆𑀕𑀳𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀉𑀤𑁆𑀤𑀸𑀦𑀦𑁆𑀢𑀺 𑀧𑀘𑁆𑀙𑀼𑀤𑁆𑀤𑀸𑀦𑀸𑀤𑀺𑀓𑀁 𑀉𑀤𑁆𑀤𑀸𑀦𑀁.

𑀔𑀸𑀤 𑀪𑀓𑁆𑀔𑀦𑁂. 𑀔𑀸𑀤𑀢𑀺. 𑀔𑀸𑀤𑀺𑀓𑀸, 𑀔𑀸𑀤𑀦𑀁, 𑀅𑀜𑁆𑀜𑀫𑀜𑁆𑀜𑀔𑀸𑀤𑀺𑀓𑀸. 𑀧𑀼𑀩𑁆𑀩𑀨𑀮𑀔𑀸𑀤𑀺𑀓𑀸, 𑀔𑀚𑁆𑀚𑀁, 𑀔𑀸𑀤𑀦𑀻𑀬𑀁, 𑀔𑀦𑁆𑀥𑀸.

𑀢𑀢𑁆𑀣 𑀔𑀚𑁆𑀚𑀦𑁆𑀢𑀺 𑀧𑀽𑀯𑁄. 𑀔𑀸𑀤𑀦𑀻𑀬𑀦𑁆𑀢𑀺 𑀧𑀽𑀯𑀨𑀮𑀸𑀨𑀮𑀸𑀤𑀺. ‘‘𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸’’𑀢𑀺 𑀯𑀺𑀲𑀼𑀁 𑀪𑁄𑀚𑀦𑀻𑀬𑀲𑁆𑀲 𑀯𑀘𑀦𑀢𑁄 𑀔𑀸𑀤𑀦𑀁 𑀦𑀸𑀫 𑀔𑀚𑁆𑀚𑀲𑁆𑀲 𑀯𑀸 𑀔𑀸𑀤𑀦𑀻𑀬𑀲𑁆𑀲 𑀯𑀸 𑀪𑀓𑁆𑀔𑀦𑀁. 𑀅𑀧𑀺𑀘 𑀳𑀺𑀁𑀲𑀸𑀧𑀺 ‘‘𑀔𑀸𑀤𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀤𑀼𑀓𑁆𑀔𑀸𑀤𑀻𑀳𑀺 𑀔𑀚𑁆𑀚𑀦𑁆𑀢𑀻𑀢𑀺 𑀔𑀦𑁆𑀥𑀸, 𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀸𑀦𑀺. ‘‘𑀘𑀻𑀯𑀭𑀸𑀦𑀺 𑀦𑀲𑁆𑀲𑀦𑁆𑀢𑀺𑀧𑀺 𑀟𑀬𑁆𑀳𑀦𑁆𑀢𑀺𑀧𑀺 𑀉𑀦𑁆𑀤𑀽𑀭𑁂𑀳𑀺𑀧𑀺 𑀔𑀚𑁆𑀚𑀦𑁆𑀢𑀻’’𑀢𑀺 𑀏𑀢𑁆𑀣 𑀯𑀺𑀬 𑀔𑀚𑁆𑀚𑀦𑁆𑀢𑀺 𑀲𑀤𑁆𑀤𑁄 𑀓𑀫𑁆𑀫𑀢𑁆𑀣𑁄.

𑀩𑀤 ¶ 𑀣𑁂𑀭𑀺𑀬𑁂. 𑀣𑀺𑀭𑀪𑀸𑀯𑁄 𑀣𑁂𑀭𑀺𑀬𑀁, 𑀬𑀣𑀸 𑀤𑀓𑁆𑀔𑀺𑀬𑀁. 𑀩𑀤𑀢𑀺. 𑀩𑀤𑀭𑀻, 𑀩𑀤𑀭𑀁. 𑀅𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

𑀓𑀓𑁆𑀓𑀦𑁆𑀥𑀼 𑀩𑀤𑀭𑀻 𑀓𑁄𑀮𑀻, 𑀓𑁄𑀮𑀁 𑀓𑀼𑀮𑀯𑀫𑀺𑀘𑁆𑀘𑀧𑀺;

𑀢𑁂𑀦𑀺𑀮𑀁 𑀩𑀤𑀭𑀜𑁆𑀘𑀸𑀢𑀺, 𑀦𑀸𑀫𑀁 𑀭𑀼𑀓𑁆𑀔𑀲𑁆𑀲 𑀓𑁄𑀮𑀺𑀬𑀸𑀢𑀺.

𑀔𑀤 𑀥𑀺𑀢𑀺𑀳𑀺𑀁𑀲𑀸𑀲𑀼 𑀘. 𑀣𑁂𑀭𑀺𑀬𑀸𑀧𑁂𑀓𑁆𑀔𑀸𑀬 𑀘𑀓𑀸𑀭𑁄. 𑀔𑀤𑀢𑀺. 𑀔𑀤𑀺𑀭𑁄.

𑀕𑀤 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁. 𑀕𑀤𑀢𑀺. 𑀆𑀕𑀤𑀦𑀁, 𑀢𑀣𑁄 𑀆𑀕𑀤𑁄 𑀏𑀢𑀲𑁆𑀲𑀸𑀢𑀺 𑀢𑀣𑀸𑀕𑀢𑁄. 𑀲𑀼𑀝𑁆𑀞𑀼 𑀕𑀤𑀢𑀻𑀢𑀺 𑀲𑀼𑀕𑀤𑁄.

𑀭𑀤 𑀯𑀺𑀮𑁂𑀔𑀦𑁂. 𑀭𑀤𑀢𑀺. 𑀭𑀤𑀦𑁄, 𑀭𑀤𑁄, 𑀤𑀸𑀞𑀸𑀭𑀤𑁄. 𑀅𑀢𑁆𑀭 𑀭𑀤𑀦𑁄𑀢𑀺 𑀤𑀦𑁆𑀢𑁄.

𑀦𑀤 𑀅𑀩𑁆𑀬𑀢𑁆𑀢𑀲𑀤𑁆𑀤𑁂. 𑀲𑀻𑀳𑁄 𑀦𑀤𑀢𑀺, 𑀧𑀡𑀤𑀢𑀺. 𑀦𑀸𑀤𑁄, 𑀦𑀤𑀻. 𑀧𑀩𑁆𑀩𑀢𑁂𑀲𑀼 𑀯𑀦𑀸𑀤𑀻𑀲𑀼 𑀦𑀤𑀢𑀻𑀢𑀺 𑀦𑀤𑀻. 𑀦𑀤 𑀇 𑀇𑀢𑀺 𑀥𑀸𑀢𑀼𑀤𑁆𑀯𑀬𑀯𑀲𑁂𑀦 𑀧𑀦 ‘‘𑀦𑀤𑀦𑁆𑀢𑀻 𑀕𑀘𑁆𑀙𑀢𑀻𑀢𑀺 𑀦𑀤𑀻’’𑀢𑀺𑀧𑀺 𑀦𑀺𑀩𑁆𑀩𑀘𑀦𑀁 𑀯𑀤𑀦𑁆𑀢𑀺.

𑀓𑁂𑀘𑁂𑀢𑁆𑀣 𑀯𑀤𑁂𑀬𑁆𑀬𑀼𑀁 𑀬𑀸 𑀧𑀦𑁂𑀲𑀸 ‘‘𑀦𑀤 𑀅𑀩𑁆𑀬𑀢𑁆𑀢𑀲𑀤𑁆𑀤𑁂’𑀢𑀺 𑀥𑀸𑀢𑀼 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢𑀸, 𑀲𑀸 𑀓𑀺𑀁𑀦𑀺𑀘𑁆𑀘𑀫𑀩𑁆𑀬𑀢𑁆𑀢𑀲𑀤𑁆𑀤𑁂𑀬𑁂𑀯 𑀯𑀢𑁆𑀢𑀢𑀺, 𑀉𑀤𑀸𑀳𑀼 𑀓𑀢𑁆𑀣𑀘𑀺 𑀯𑀺𑀬𑀢𑁆𑀢𑀺𑀬𑀫𑁆𑀧𑀺 𑀯𑀸𑀘𑀸𑀬𑀁 𑀯𑀢𑁆𑀢𑀢𑀻’’𑀢𑀺? 𑀦𑀺𑀘𑁆𑀘𑀫𑀩𑁆𑀬𑀢𑁆𑀢𑀲𑀤𑁆𑀤𑁂𑀬𑁂𑀯 𑀯𑀢𑁆𑀢𑀢𑀻𑀢𑀺. 𑀬𑀚𑁆𑀚𑁂𑀯𑀁 ‘‘𑀲𑀻𑀳𑁄 𑀦𑀤𑀢𑀻’’𑀢𑀺𑀆𑀤𑀻𑀲𑀼 𑀢𑀺𑀭𑀘𑁆𑀙𑀸𑀦𑀕𑀢𑀸𑀤𑀺𑀲𑀤𑁆𑀤𑀪𑀸𑀯𑁂𑀦 𑀅𑀯𑀺𑀪𑀸𑀯𑀺𑀢𑀢𑁆𑀣𑀢𑀸𑀬 𑀦𑀤𑀲𑀤𑁆𑀤𑁄 𑀅𑀩𑁆𑀬𑀢𑁆𑀢𑀲𑀤𑁆𑀤𑁄 𑀳𑁄𑀢𑀼, ‘‘𑀲𑀻𑀳𑁄 𑀯𑀺𑀬 𑀅𑀬𑀁 𑀧𑀼𑀭𑀺𑀲𑁄 𑀦𑀤𑀢𑀻’’𑀢𑀺𑀆𑀤𑀻𑀲𑀼 𑀧𑀦 𑀫𑀦𑀼𑀲𑁆𑀲𑀪𑀸𑀲𑀸𑀧𑀺 𑀅𑀩𑁆𑀬𑀢𑁆𑀢𑀲𑀤𑁆𑀤𑁄 𑀲𑀺𑀬𑀸𑀢𑀺? 𑀢𑀦𑁆𑀦 𑀯𑀺𑀬𑀢𑁆𑀢𑀸𑀧𑀺 𑀲𑀫𑀸𑀦𑀸 𑀫𑀦𑀼𑀲𑁆𑀲𑀪𑀸𑀲𑀸 𑀲𑀻𑀳𑁄 𑀯𑀺𑀬𑀸𑀢𑀺 𑀏𑀯𑀁 𑀲𑀫𑀼𑀧𑁂𑀓𑁆𑀔𑀸𑀯𑀲𑁂𑀦 𑀲𑀻𑀳𑀧𑀤𑀢𑁆𑀣𑀲𑁆𑀲𑀸𑀧𑁂𑀓𑁆𑀔𑀦𑀢𑁄 𑀦𑀤𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀲𑀺𑀬𑀢𑀺 ¶ , 𑀦 𑀧𑀼𑀭𑀺𑀲𑀸𑀧𑁂𑀓𑁆𑀔𑀦𑀯𑀲𑁂𑀦. 𑀬𑀣𑀸 𑀳𑀺 𑀯𑀮𑀸𑀳𑀓𑀽𑀧𑀫𑀸𑀯𑀲𑁂𑀦 𑀓𑀣𑀺𑀢𑀁, ‘‘𑀓𑀣𑀜𑁆𑀘 𑀧𑀼𑀕𑁆𑀕𑀮𑁄 𑀕𑀚𑁆𑀚𑀺𑀢𑀸 𑀘 𑀯𑀲𑁆𑀲𑀺𑀢𑀸 𑀘 𑀳𑁄𑀢𑀻’’𑀢𑀺 𑀧𑀸𑀴𑀺𑀬𑀁 𑀕𑀚𑁆𑀚𑀦𑀁 𑀯𑀲𑁆𑀲𑀦𑀜𑁆𑀘 𑀧𑀼𑀕𑁆𑀕𑀮𑁂 𑀅𑀮𑀩𑁆𑀪𑀫𑀸𑀦𑀫𑁆𑀧𑀺 𑀯𑀮𑀸𑀳𑀓𑀲𑁆𑀲 𑀕𑀚𑁆𑀚𑀦𑀯𑀲𑁆𑀲𑀦𑀲𑀤𑀺𑀲𑀢𑀸𑀬 𑀪𑀸𑀲𑀦𑀓𑀭𑀡𑀓𑁆𑀭𑀺𑀬𑀸𑀬𑀽𑀧𑀮𑀩𑁆𑀪𑀦𑀢𑁄 𑀯𑀢𑁆𑀢𑀩𑁆𑀩𑀫𑁂𑀯 𑀳𑁄𑀢𑀺, 𑀏𑀯𑀫𑁂𑀯 𑀦𑀺𑀩𑁆𑀪𑀬𑀪𑀸𑀯𑁂𑀦 𑀲𑀻𑀳𑀦𑀸𑀤𑀲𑀤𑀺𑀲𑀺𑀬𑀸 𑀯𑀸𑀘𑀸𑀬 𑀦𑀺𑀘𑁆𑀙𑀭𑀡𑀢𑁄 𑀲𑀻𑀳𑁄 𑀯𑀺𑀬 𑀦𑀤𑀢𑀻𑀢𑀺 𑀅𑀯𑀺𑀪𑀸𑀯𑀺𑀢𑀢𑁆𑀣𑀯𑀦𑁆𑀢𑁂𑀦 𑀦𑀤𑀲𑀤𑁆𑀤𑁂𑀦 𑀫𑀦𑀼𑀲𑁆𑀲𑀪𑀸𑀲𑀸𑀧𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸 𑀳𑁄𑀢𑀺.

𑀏𑀢𑁆𑀣 𑀘 𑀅𑀫𑁆𑀩𑀨𑀮𑀽𑀧𑀫𑀸𑀤𑀬𑁄𑀧𑀺 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸. 𑀦 𑀳𑀺 𑀧𑀓𑁆𑀓𑀸𑀫𑀓𑀢𑀸𑀤𑀻𑀦𑀺 𑀧𑀼𑀕𑁆𑀕𑀮𑁂𑀲𑀼 𑀯𑀺𑀚𑁆𑀚𑀦𑁆𑀢𑀺, 𑀅𑀣 𑀔𑁄 𑀅𑀫𑁆𑀩𑀨𑀮𑀸𑀤𑀻𑀲𑀼 𑀏𑀯 𑀯𑀺𑀚𑁆𑀚𑀦𑁆𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀪𑀕𑀯𑀢𑀸 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀲𑀤𑀺𑀲𑀢𑁆𑀢𑀁 𑀯𑀺𑀪𑀸𑀯𑁂𑀢𑀼𑀁 𑀅𑀫𑁆𑀩𑀨𑀮𑀽𑀧𑀫𑀸𑀤𑀬𑁄 𑀯𑀼𑀢𑁆𑀢𑀸, 𑀏𑀯𑀫𑁂𑀯 𑀦𑀤𑀲𑀤𑁆𑀤𑁄 𑀅𑀩𑁆𑀬𑀢𑁆𑀢𑀲𑀤𑁆𑀤𑀪𑀸𑀯𑁂𑀦 𑀢𑀺𑀭𑀘𑁆𑀙𑀸𑀦𑀕𑀢𑀲𑀤𑁆𑀤𑀸𑀤𑀻𑀲𑀼 𑀏𑀯 𑀯𑀢𑁆𑀢𑀩𑁆𑀩𑁄𑀧𑀺 𑀅𑀢𑁆𑀣𑀦𑁆𑀢𑀭𑀯𑀺𑀪𑀸𑀯𑀦𑀢𑁆𑀣𑀁 ‘‘𑀲𑀻𑀳𑁄 𑀯𑀺𑀬 𑀦𑀤𑀢𑀻’’𑀢𑀺𑀆𑀤𑀻𑀲𑀼 𑀫𑀦𑀼𑀲𑁆𑀲𑀪𑀸𑀲𑀸𑀬𑀫𑁆𑀧𑀺 𑀭𑀽𑀴𑁆𑀳𑀺𑀬𑀸 𑀯𑀼𑀢𑁆𑀢𑁄, 𑀦 𑀲𑀪𑀸𑀯𑀢𑁄. 𑀢𑀣𑀸 𑀳𑀺 𑀲𑀪𑀸𑀯𑀢𑁄 𑀦𑀤𑀲𑀤𑁆𑀤𑁂𑀦𑀧𑀺 𑀯𑀲𑁆𑀲𑀺𑀢𑀲𑀤𑁆𑀤𑀸𑀤𑀻𑀳𑀺𑀧𑀺 𑀫𑀦𑀼𑀲𑁆𑀲𑀪𑀸𑀲𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸 𑀦 𑀳𑁄𑀢𑀻𑀢𑀺. 𑀬𑀤𑀺 𑀏𑀯𑀁 𑁋

‘‘𑀲𑀼𑀯𑀺𑀚𑀸𑀦𑀁 𑀲𑀺𑀗𑁆𑀕𑀸𑀮𑀸𑀦𑀁, 𑀲𑀓𑀼𑀡𑀸𑀦𑀜𑁆𑀘 𑀯𑀲𑁆𑀲𑀺𑀢𑀁;

𑀫𑀦𑀼𑀲𑁆𑀲𑀯𑀲𑁆𑀲𑀺𑀢𑀁 𑀭𑀸𑀚, 𑀤𑀼𑀩𑁆𑀩𑀺𑀚𑀸𑀦𑀢𑀭𑀁 𑀢𑀢𑁄’’𑀢𑀺

𑀏𑀢𑁆𑀣 𑀓𑀲𑁆𑀫𑀸 𑀯𑀲𑁆𑀲𑀺𑀢𑀲𑀤𑁆𑀤𑁂𑀦 𑀫𑀦𑀼𑀲𑁆𑀲𑀪𑀸𑀲𑀸 𑀦𑀺𑀤𑁆𑀤𑀺𑀲𑀺𑀬𑀢𑀻𑀢𑀺? 𑀲𑀘𑁆𑀘𑀁 𑀫𑀦𑀼𑀲𑁆𑀲𑀪𑀸𑀲𑀸𑀧𑀺 𑀯𑀲𑁆𑀲𑀺𑀢𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀝𑁆𑀞𑀸 𑀤𑀺𑀲𑁆𑀲𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀸 ‘‘𑀲𑀼𑀯𑀺𑀚𑀸𑀦𑀁 𑀲𑀺𑀗𑁆𑀕𑀸𑀮𑀸𑀦𑀁, 𑀲𑀓𑀼𑀡𑀸𑀦𑀜𑁆𑀘 𑀯𑀲𑁆𑀲𑀺𑀢’’𑀦𑁆𑀢𑀺 𑀯𑀲𑁆𑀲𑀺𑀢𑀲𑀤𑁆𑀤𑀯𑀲𑁂𑀦 𑀧𑀬𑁄𑀕𑀲𑁆𑀲 𑀯𑀘𑀦𑀢𑁄 𑀢𑀤𑀦𑀼𑀭𑀽𑀧𑀁 𑀦𑀺𑀤𑁆𑀤𑀺𑀲𑀺𑀢𑀼𑀁 𑀅𑀭𑀳𑀢𑀻𑀢𑀺 𑀫𑀦𑁆𑀢𑁆𑀯𑀸 𑀯𑀲𑁆𑀲𑀺𑀢𑀲𑀤𑁆𑀤𑀲𑀤𑀺𑀲𑀻 𑀦𑀺𑀤𑁆𑀤𑀺𑀝𑁆𑀞𑀸. 𑀦 𑀳𑀺 ‘‘𑀫𑀦𑀼𑀲𑁆𑀲𑁄 𑀯𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀯𑀺𑀲𑀼𑀁 𑀧𑀬𑁄𑀕𑀸 𑀤𑀺𑀲𑁆𑀲𑀦𑁆𑀢𑀺, ‘‘𑀲𑀓𑀼𑀡𑁄 𑀯𑀲𑁆𑀲𑀢𑀺, 𑀓𑀽𑀚𑀢𑀻’’𑀢𑀺𑀆𑀤𑀺𑀦𑀸 𑀧𑀦 𑀧𑀬𑁄𑀕𑀸 𑀤𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 ‘‘𑀲𑀗𑁆𑀕𑀸𑀫𑀁 𑀑𑀢𑀭𑀺𑀢𑁆𑀯𑀸𑀦, 𑀲𑀻𑀳𑀦𑀸𑀤𑀁 𑀦𑀤𑀺 𑀓𑀼𑀲𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀬𑀣𑀸𑀭𑀳𑀁 ¶ 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀏𑀯𑀁 𑀦𑀤𑀥𑀸𑀢𑀼 𑀲𑀪𑀸𑀯𑀢𑁄 𑀅𑀩𑁆𑀬𑀢𑁆𑀢𑀲𑀤𑁆𑀤𑁂𑀬𑁂𑀯 𑀳𑁄𑀢𑀺, 𑀦 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀤𑁆𑀤 𑀕𑀢𑀺𑀬𑀁 𑀬𑀸𑀘𑀦𑁂 𑀘. 𑀅𑀤𑁆𑀤𑀢𑀺.

𑀦𑀤𑁆𑀤 𑀕𑀤𑁆𑀤 𑀲𑀤𑁆𑀤𑁂. 𑀦𑀤𑁆𑀤𑀢𑀺. 𑀕𑀤𑁆𑀤𑀢𑀺.

𑀢𑀤𑁆𑀤 𑀳𑀺𑀁𑀲𑀸𑀬𑀁. 𑀢𑀤𑁆𑀤𑀢𑀺.

𑀓𑀤𑁆𑀤 𑀓𑀼𑀘𑁆𑀙𑀺𑀢𑁂 𑀲𑀤𑁆𑀤𑁂. 𑀓𑀤𑁆𑀤𑀢𑀺. 𑀓𑀤𑁆𑀤𑀫𑁄.

𑀔𑀤𑁆𑀤 𑀤𑀁𑀲𑀦𑁂. 𑀤𑀁𑀲𑀦𑀫𑀺𑀳 𑀤𑀦𑁆𑀢𑀲𑀼𑀓𑀢𑀓𑀢𑁆𑀢𑀺𑀓𑀸 𑀓𑁆𑀭𑀺𑀬𑀸 𑀅𑀪𑀺𑀥𑀻𑀬𑀢𑁂. 𑀲𑀪𑀸𑀯𑀢𑁆𑀢𑀸 𑀥𑀸𑀢𑀼𑀬𑀸 𑀲𑀸𑀥𑀦𑀧𑁆𑀧𑀬𑁄𑀕𑀲𑀫𑀯𑀸𑀬𑀻. 𑀔𑀤𑁆𑀤𑀢𑀺.

𑀅𑀤𑀺 𑀩𑀦𑁆𑀥𑀦𑁂. 𑀅𑀦𑁆𑀤𑀢𑀺. 𑀅𑀦𑁆𑀤𑀼. 𑀅𑀦𑁆𑀤𑀼𑀲𑀤𑁆𑀤𑁄𑀧𑀦𑁂𑀢𑁆𑀣 𑀇𑀢𑁆𑀣𑀺𑀮𑀺𑀗𑁆𑀕𑁄 𑀕𑀳𑁂𑀢𑀩𑁆𑀩𑁄 𑀧𑀸𑀴𑀺𑀬𑀁 𑀇𑀢𑁆𑀣𑀺𑀮𑀺𑀗𑁆𑀕𑀧𑁆𑀧𑀬𑁄𑀕𑀤𑀲𑁆𑀲𑀦𑀢𑁄 ‘‘𑀲𑁂𑀬𑁆𑀬𑀣𑀸𑀧𑀺 𑀯𑀸𑀲𑁂𑀝𑁆𑀞 𑀅𑀬𑀁 𑀅𑀘𑀺𑀭𑀯𑀢𑀻 𑀦𑀤𑀻 𑀧𑀽𑀭𑀸 𑀉𑀤𑀓𑀲𑁆𑀲 𑀲𑀫𑀢𑀺𑀢𑁆𑀢𑀺𑀓𑀸 𑀓𑀸𑀓𑀧𑁂𑀬𑁆𑀬𑀸, 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀧𑀸𑀭𑀢𑁆𑀣𑀺𑀓𑁄 𑀧𑀸𑀭𑀕𑀯𑁂𑀲𑀻 𑀧𑀸𑀭𑀕𑀸𑀫𑀻 𑀧𑀸𑀭𑀁 𑀢𑀭𑀺𑀢𑀼𑀓𑀸𑀫𑁄, 𑀲𑁄 𑀑𑀭𑀺𑀫𑀢𑀻𑀭𑁂 𑀤𑀴𑁆𑀳𑀸𑀬 𑀅𑀦𑁆𑀤𑀼𑀬𑀸 𑀧𑀘𑁆𑀙𑀸𑀩𑀸𑀳𑀁 𑀕𑀸𑀴𑁆𑀳𑀩𑀦𑁆𑀥𑀦𑀩𑀦𑁆𑀥𑁄’’𑀢𑀺. 𑀢𑀢𑁆𑀭 𑀅𑀦𑁆𑀤𑀽𑀢𑀺 𑀬𑀁 𑀓𑀺𑀜𑁆𑀘𑀺 𑀩𑀦𑁆𑀥𑀦𑀁 𑀯𑀸. ‘‘𑀬𑀣𑀸 𑀅𑀦𑁆𑀤𑀼𑀖𑀭𑁂 𑀧𑀼𑀭𑀺𑀲𑁄’’𑀢𑀺 𑀳𑀺 𑀯𑀼𑀢𑁆𑀢𑀁. 𑀩𑀦𑁆𑀥𑀦𑀯𑀺𑀲𑁂𑀲𑁄 𑀯𑀸, ‘‘𑀅𑀦𑁆𑀤𑀼𑀩𑀦𑁆𑀥𑀦𑀸𑀤𑀻𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀧𑀮𑀸𑀬𑀺𑀁𑀲𑀽’’𑀢𑀺 𑀳𑀺 𑀯𑀼𑀢𑁆𑀢𑀁. 𑀅𑀧𑀺𑀘 𑀅𑀦𑁆𑀤𑀦𑀝𑁆𑀞𑁂𑀦 𑀩𑀦𑁆𑀥𑀦𑀝𑁆𑀞𑁂𑀦 𑀅𑀦𑁆𑀤𑀼 𑀯𑀺𑀬𑀸𑀢𑀺𑀧𑀺 𑀅𑀦𑁆𑀤𑀼, 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀇𑀫𑁂 𑀔𑁄 𑀯𑀸𑀲𑁂𑀝𑁆𑀞 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀅𑀦𑁆𑀤𑀽𑀢𑀺𑀧𑀺 𑀩𑀦𑁆𑀥𑀦𑀦𑁆𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺. 𑀦𑀺𑀕𑁆𑀕𑀳𑀻𑀢𑀸𑀕𑀫𑀯𑀲𑁂𑀦𑀸𑀬𑀁 𑀥𑀸𑀢𑀼 𑀯𑀼𑀢𑁆𑀢𑀸. 𑀓𑀢𑁆𑀣𑀘𑀺 𑀧𑀦 𑀯𑀺𑀕𑀢𑀦𑀺𑀕𑁆𑀕𑀳𑀻𑀢𑀸𑀕𑀫𑁄𑀧𑀺 𑀳𑁄𑀢𑀺, 𑀢𑀁 𑀬𑀣𑀸? ‘‘𑀅𑀯𑀺𑀚𑁆𑀚𑀸 𑀪𑀺𑀓𑁆𑀔𑀯𑁂 𑀧𑀼𑀩𑁆𑀩𑀗𑁆𑀕𑀫𑀸 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑁆𑀯𑀤𑁂𑀯 𑀅𑀳𑀺𑀭𑀺𑀓’’𑀦𑁆𑀢𑀺 𑀧𑀸𑀴𑀺. 𑀏𑀢𑁆𑀣 𑀅𑀦𑀼𑀅𑀦𑁆𑀤𑀢𑀺 𑀅𑀦𑀼𑀩𑀦𑁆𑀥𑀢𑀻𑀢𑀺 𑀅𑀦𑁆𑀯𑀤𑀺. 𑀅𑀦𑁆𑀯𑀤𑀺 𑀏𑀯 𑀅𑀦𑁆𑀯𑀤𑁂𑀯𑀸𑀢𑀺 𑀓𑀺𑀢𑀯𑀺𑀕𑁆𑀕𑀳𑁄 𑀲𑀦𑁆𑀥𑀺𑀯𑀺𑀕𑁆𑀕𑀳𑁄 𑀘 ¶ 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀦𑁆𑀯𑀤𑁂𑀯𑀸𑀢𑀺 𑀅𑀦𑀼𑀩𑀦𑁆𑀥𑀫𑀸𑀦𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀯𑀺𑀚𑁆𑀚𑀫𑀳𑀺𑀭𑀺𑀓𑀁 𑀅𑀦𑀼𑀩𑀦𑁆𑀥𑀫𑀸𑀦𑀫𑁂𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀇𑀤𑀺 𑀧𑀭𑀫𑀺𑀲𑁆𑀲𑀭𑀺𑀬𑁂 𑀇𑀦𑁆𑀤𑀢𑀺. 𑀇𑀦𑁆𑀤𑀦𑀁, 𑀇𑀦𑁆𑀤𑁄.

𑀏𑀢𑁆𑀣 𑀇𑀦𑁆𑀤𑁄𑀢𑀺 𑀅𑀥𑀺𑀧𑀢𑀺𑀪𑀽𑀢𑁄 𑀬𑁄 𑀓𑁄𑀘𑀺. 𑀲𑁄 𑀳𑀺 𑀇𑀦𑁆𑀤𑀢𑀺 𑀧𑀭𑁂𑀲𑀼 𑀇𑀲𑁆𑀲𑀭𑀺𑀬𑀁 𑀧𑀸𑀧𑀼𑀡𑀸𑀢𑀻𑀢𑀺 𑀇𑀦𑁆𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀧𑀺𑀘 𑀇𑀦𑁆𑀤𑁄𑀢𑀺 𑀲𑀓𑁆𑀓𑁄. 𑀲𑀓𑁆𑀓𑀲𑁆𑀲 𑀳𑀺 𑀅𑀦𑁂𑀓𑀸𑀦𑀺 𑀦𑀸𑀫𑀸𑀦𑀺 𑁋

𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄 𑀇𑀦𑁆𑀤𑁄, 𑀯𑀢𑁆𑀭𑀪𑀽 𑀧𑀸𑀓𑀲𑀸𑀲𑀦𑁄;

𑀲𑀳𑀲𑁆𑀲𑀦𑁂𑀢𑁆𑀢𑁄 𑀫𑀖𑀯𑀸, 𑀤𑁂𑀯𑀭𑀸𑀚𑀸 𑀲𑀼𑀚𑀫𑁆𑀧𑀢𑀺.

𑀲𑀳𑀲𑁆𑀲𑀓𑁆𑀔𑁄 𑀤𑀲𑀲𑀢-𑀮𑁄𑀘𑀦𑁄 𑀯𑀚𑀺𑀭𑀸𑀯𑀼𑀥𑁄;

𑀳𑀽𑀢𑀧𑀢𑀺 𑀫𑀳𑀺𑀦𑁆𑀤𑁄 𑀘, 𑀓𑁄𑀲𑀺𑀬𑁄 𑀤𑁂𑀯𑀓𑀼𑀜𑁆𑀚𑀭𑁄.

𑀲𑀼𑀭𑀸𑀥𑀺𑀧𑁄 𑀲𑀼𑀭𑀦𑀸𑀣𑁄, 𑀯𑀸𑀲𑀯𑁄 𑀢𑀺𑀤𑀺𑀯𑀸𑀥𑀺𑀪𑀽;

𑀚𑀫𑁆𑀩𑀸𑀭𑀺 𑀘𑁂𑀯 𑀯𑀚𑀺𑀭-𑀳𑀢𑁆𑀣𑁄 𑀅𑀲𑀼𑀭𑀲𑀸𑀲𑀦𑁄;

𑀕𑀦𑁆𑀥𑀭𑀸𑀚𑀸 𑀤𑁂𑀯𑀺𑀦𑁆𑀤𑁄, 𑀲𑀼𑀭𑀺𑀦𑁆𑀤𑁄 𑀅𑀲𑀼𑀭𑀸𑀪𑀺𑀪𑀽𑀢𑀺.

𑀏𑀯𑀁 𑀅𑀦𑁂𑀓𑀸𑀦𑀺 𑀦𑀸𑀫𑀸𑀦𑀺. 𑀏𑀓𑁄𑀧𑀺 𑀳𑀺 𑀅𑀢𑁆𑀣𑁄 𑀅𑀦𑁂𑀓𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑀸𑀬 𑀅𑀦𑁂𑀓𑀦𑀸𑀫𑁄. 𑀢𑁂𑀦𑀸𑀳 𑀪𑀕𑀯𑀸 𑁋

𑀲𑀓𑁆𑀓𑁄 𑀫𑀳𑀸𑀮𑀺 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀫𑀖𑁄 𑀦𑀸𑀫 𑀫𑀸𑀡𑀯𑁄 𑀅𑀳𑁄𑀲𑀺, 𑀢𑀲𑁆𑀫𑀸 ‘‘𑀫𑀖𑀯𑀸’’𑀢𑀺 𑀯𑀼𑀘𑁆𑀘𑀢𑀺. 𑀲𑀓𑁆𑀓𑁄 𑀫𑀳𑀸𑀮𑀺 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀧𑀼𑀭𑁂 𑀤𑀸𑀦𑀁 𑀅𑀤𑀸𑀲𑀺, 𑀢𑀲𑁆𑀫𑀸 ‘‘𑀧𑀼𑀭𑀺𑀦𑁆𑀤𑀤𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀓𑁆𑀓𑁄 𑀫𑀳𑀸𑀮𑀺 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀅𑀤𑀸𑀲𑀺, 𑀢𑀲𑁆𑀫𑀸 ‘‘𑀲𑀓𑁆𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀓𑁆𑀓𑁄 𑀫𑀳𑀸𑀮𑀺 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀆𑀯𑀸𑀲𑀁 𑀅𑀤𑀸𑀲𑀺, 𑀢𑀲𑁆𑀫𑀸 ‘‘𑀯𑀸𑀲𑀯𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀓𑁆𑀓𑁄 𑀫𑀳𑀸𑀮𑀺 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀳𑀲𑁆𑀲𑀁 𑀅𑀢𑁆𑀣𑀸𑀦𑀁 𑀫𑀼𑀳𑀼𑀢𑁆𑀢𑁂𑀦 ¶ 𑀘𑀺𑀦𑁆𑀢𑁂𑀢𑀺, 𑀢𑀲𑁆𑀫𑀸 ‘‘𑀲𑀳𑀲𑁆𑀲𑀓𑁆𑀔𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀓𑁆𑀓𑀲𑁆𑀲 𑀫𑀳𑀸𑀮𑀺 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀲𑀼𑀚𑀸 𑀦𑀸𑀫 𑀅𑀲𑀼𑀭𑀓𑀜𑁆𑀜𑀸 𑀧𑀚𑀸𑀧𑀢𑀺, 𑀢𑀲𑁆𑀫𑀸 ‘‘𑀲𑀼𑀚𑀫𑁆𑀧𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑀓𑁆𑀓𑁄 𑀫𑀳𑀸𑀮𑀺 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀁 𑀭𑀚𑁆𑀚𑀁 𑀓𑀸𑀭𑁂𑀢𑀺, 𑀢𑀲𑁆𑀫𑀸 ‘‘𑀤𑁂𑀯𑀸𑀦𑀫𑀺𑀦𑁆𑀤𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀏𑀯𑀫𑁂𑀓𑀲𑁆𑀲𑀸𑀧𑀺 𑀅𑀢𑁆𑀣𑀲𑁆𑀲 𑀅𑀦𑁂𑀓𑀸𑀦𑀺 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀲𑀦𑁆𑀢𑀺.

𑀢𑀣𑀸 𑀳𑀺 𑀬𑁂𑀦 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑁂𑀦 𑀢𑀸𑀯𑀢𑀺𑀁𑀲𑀸𑀥𑀺𑀧𑀢𑀺𑀫𑁆𑀳𑀺 𑀇𑀦𑁆𑀤𑀲𑀤𑁆𑀤𑁄 𑀧𑀯𑀢𑁆𑀢𑁄, 𑀦 𑀢𑁂𑀦 𑀢𑀢𑁆𑀣 𑀲𑀓𑁆𑀓𑀸𑀤𑀺𑀲𑀤𑁆𑀤𑀸 𑀧𑀯𑀢𑁆𑀢𑀸, 𑀅𑀣 𑀔𑁄 𑀅𑀜𑁆𑀜𑁂𑀦. 𑀢𑀣𑀸 𑀬𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀁 𑀧𑀜𑁆𑀜𑀸𑀲𑀤𑁆𑀤𑁄 𑀧𑀯𑀢𑁆𑀢𑁄, 𑀦 𑀢𑁂𑀦 𑀢𑀢𑁆𑀣 𑀯𑀺𑀚𑁆𑀚𑀸𑀤𑀺𑀲𑀤𑁆𑀤𑀸. 𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀼𑀩𑁆𑀩𑀗𑁆𑀕𑀫𑀪𑀸𑀯𑁂𑀦 𑀉𑀧𑁆𑀧𑀦𑁆𑀦𑀥𑀫𑁆𑀫𑀲𑁆𑀫𑀺𑀁 𑀘𑀺𑀢𑁆𑀢𑀲𑀤𑁆𑀤𑁄 𑀧𑀯𑀢𑁆𑀢𑁄, 𑀦 𑀢𑁂𑀦 𑀢𑀢𑁆𑀣 𑀯𑀺𑀜𑁆𑀜𑀸𑀡𑀸𑀤𑀺𑀲𑀤𑁆𑀤𑀸. 𑀦 𑀳𑀺 𑀯𑀺𑀦𑀸 𑀓𑁂𑀦𑀘𑀺 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑁂𑀦 𑀲𑀤𑁆𑀤𑁄 𑀧𑀯𑀢𑁆𑀢𑀢𑀻𑀢𑀺. 𑀏𑀓𑁄𑀧𑀺 𑀅𑀢𑁆𑀣𑁄 𑀲𑀫𑁆𑀫𑀼𑀢𑁆𑀬𑀢𑁆𑀣𑁄 𑀘 𑀧𑀭𑀫𑀢𑁆𑀣𑁄 𑀘 𑀅𑀦𑁂𑀓𑀲𑀤𑁆𑀤𑀧𑁆𑀧𑀯𑁆𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑀸𑀬 𑀅𑀦𑁂𑀓𑀦𑀸𑀫𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀢𑁆𑀣 𑀲𑀺𑀬𑀸 ‘‘𑀦𑀸𑀫𑀸𑀦𑀻𑀢𑀺 𑀯𑀤𑀣, 𑀓𑀺𑀁 𑀦𑀸𑀫𑀁 𑀦𑀸𑀫𑀸’’𑀢𑀺. 𑀯𑀼𑀘𑁆𑀘𑀢𑁂 𑁋 𑀈𑀤𑀺𑀲𑁂 𑀞𑀸𑀦𑁂 𑀅𑀢𑁆𑀣𑁂𑀲𑀼 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 ‘‘𑀦𑀸𑀫’’𑀦𑁆𑀢𑀺 𑀕𑀳𑀺𑀢𑀁, 𑀬𑀁 ‘‘𑀮𑀺𑀗𑁆𑀕’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀳𑀺 ‘‘𑀦𑀸𑀫’’𑀦𑁆𑀢𑀺 𑀘 ‘‘𑀮𑀺𑀗𑁆𑀕’’𑀦𑁆𑀢𑀺 𑀘 𑀲𑀤𑁆𑀤𑁄𑀧𑀺 𑀯𑀼𑀘𑁆𑀘𑀢𑀺, ‘‘𑀅𑀜𑁆𑀜𑀁 𑀲𑁄𑀪𑀦𑀁 𑀦𑀸𑀫𑀁 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀺. 𑀮𑀺𑀗𑁆𑀕𑀜𑁆𑀘 𑀦𑀺𑀧𑁆𑀧𑀚𑁆𑀚𑀢𑁂’’𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀲𑀪𑀸𑀯𑀥𑀫𑁆𑀫𑀪𑀽𑀢𑀁 𑀦𑀸𑀫𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀁 𑀅𑀢𑁆𑀣𑁂𑀲𑀼 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀫𑁆𑀧𑀺 𑀯𑀼𑀘𑁆𑀘𑀢𑀺 ‘‘𑀦𑀸𑀫𑀕𑁄𑀢𑁆𑀢𑀁 𑀦 𑀚𑀻𑀭𑀢𑀺. 𑀲𑀢𑀮𑀺𑀗𑁆𑀕𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀇𑀢𑀺 𑀦𑀸𑀫𑀲𑀤𑁆𑀤𑁂𑀦𑀧𑀺 𑀮𑀺𑀗𑁆𑀕𑀲𑀤𑁆𑀤𑁂𑀦𑀧𑀺 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀲𑁆𑀲 𑀓𑀣𑀦𑀁 𑀤𑀝𑁆𑀞𑀩𑁆𑀩𑀁. 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀜𑁆𑀘 𑀦𑀸𑀫 𑀮𑁄𑀓𑀲𑀗𑁆𑀓𑁂𑀢𑀲𑀺𑀤𑁆𑀥𑁄 𑀢𑀁𑀢𑀁𑀯𑀘𑀦𑀢𑁆𑀣𑀦𑀺𑀬𑀢𑁄 𑀲𑀸𑀫𑀜𑁆𑀜𑀸𑀓𑀸𑀭𑀯𑀺𑀲𑁂𑀲𑁄𑀢𑀺 𑀕𑀳𑁂𑀢𑀩𑁆𑀩𑀁. 𑀲𑁄 𑀏𑀯𑀁𑀪𑀽𑀢𑁄𑀬𑁂𑀯 𑀲𑀸𑀫𑀜𑁆𑀜𑀸𑀓𑀸𑀭𑀯𑀺𑀲𑁂𑀲𑁄 𑀦𑀸𑀫 𑀧𑀜𑁆𑀜𑀢𑁆𑀢𑀻𑀢𑀺 𑀧𑀼𑀩𑁆𑀩𑀸𑀘𑀭𑀺𑀬𑀸 𑀯𑀤𑀦𑁆𑀢𑀺 ¶ . 𑀲𑁄 𑀳𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀤𑁆𑀤𑀁 𑀦𑀸𑀫𑁂𑀢𑀺 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀦𑀸𑀫𑀲𑀜𑁆𑀜𑀁 𑀓𑀭𑁄𑀢𑀻𑀢𑀺 𑀦𑀸𑀫𑀁, 𑀧𑀓𑀸𑀭𑁂𑀳𑀺 𑀜𑀸𑀧𑀦𑀢𑁄 𑀧𑀜𑁆𑀜𑀢𑁆𑀢𑀺 𑀘. 𑀲𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀲𑁆𑀲 𑀧𑀦 𑀲𑀤𑁆𑀤𑀲𑁆𑀲 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀲𑀘𑁆𑀘𑀸𑀦𑀁 𑀧𑀓𑀸𑀭𑁂𑀳𑀺 𑀜𑀸𑀧𑀦𑀢𑁄 𑀧𑀜𑁆𑀜𑀢𑁆𑀢𑀺𑀪𑀸𑀯𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀲𑀤𑁆𑀤𑀲𑁆𑀲𑁂𑀯 𑀳𑀺 𑀏𑀓𑀦𑁆𑀢𑁂𑀦 𑀧𑀜𑁆𑀜𑀢𑁆𑀢𑀺𑀪𑀸𑀯𑁄 𑀇𑀘𑁆𑀙𑀺𑀢𑀩𑁆𑀩𑁄 ‘‘𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸’’𑀢𑀺 𑀘 ‘‘𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸’’𑀢𑀺 𑀘 ‘‘𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸’’𑀢𑀺 𑀘 𑀧𑀸𑀴𑀺𑀤𑀲𑁆𑀲𑀦𑀢𑁄. 𑀇𑀥 𑀧𑀦 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀸𑀥𑀺𑀓𑀸𑀭𑀢𑁆𑀢𑀸 𑀦𑀸𑀫𑀯𑀲𑁂𑀦 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄. 𑀏𑀯𑀁 𑀅𑀦𑁂𑀓𑀯𑀺𑀥𑀲𑁆𑀲 𑀲𑀸𑀫𑀜𑁆𑀜𑀸𑀓𑀸𑀭𑀯𑀺𑀲𑁂𑀲𑁄𑀢𑀺 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀕𑀳𑀺𑀢𑀲𑁆𑀲 𑀦𑀸𑀫𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀲𑁆𑀲 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀲𑁆𑀲 𑀯𑀲𑁂𑀦 𑀏𑀓𑁄𑀧𑀺 𑀜𑁂𑀬𑁆𑀬𑀢𑁆𑀣𑁄 𑀅𑀦𑁂𑀓𑀮𑀺𑀗𑁆𑀕𑁄𑀢𑀺 𑀕𑀳𑁂𑀢𑀩𑁆𑀩𑁄. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀲𑀼𑀳𑁂𑀫𑀦𑁆𑀢𑁄 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁄 𑁋

‘‘𑀲𑀢𑀮𑀺𑀗𑁆𑀕𑀲𑁆𑀲 𑀅𑀢𑁆𑀣𑀲𑁆𑀲, 𑀲𑀢𑀮𑀓𑁆𑀔𑀡𑀥𑀸𑀭𑀺𑀦𑁄;

𑀏𑀓𑀗𑁆𑀕𑀤𑀲𑁆𑀲𑀻 𑀤𑀼𑀫𑁆𑀫𑁂𑀥𑁄, 𑀲𑀢𑀤𑀲𑁆𑀲𑀻𑀯 𑀧𑀡𑁆𑀟𑀺𑀢𑁄’’𑀢𑀺.

𑀏𑀯𑀁 𑀲𑀩𑁆𑀩𑀸𑀪𑀺𑀥𑀸𑀦𑁂𑀲𑀼𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀬𑀣𑀸𑀭𑀳𑀁 𑀅𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄 𑀦𑀬𑀜𑁆𑀜𑀽𑀳𑀺.

𑀯𑀺𑀤𑀺 𑀅𑀯𑀬𑀯𑁂. 𑀯𑀺𑀦𑁆𑀤𑀢𑀺. 𑀬𑀤𑀺 𑀅𑀪𑀺𑀥𑀸𑀦𑀫𑀢𑁆𑀣𑀺, ‘‘𑀯𑀺𑀦𑁆𑀤𑁄’’𑀢𑀺 𑀤𑀺𑀲𑁆𑀲𑀢𑀺. 𑀬𑀣𑀸 𑀓𑀡𑁆𑀟𑀢𑀺. 𑀓𑀡𑁆𑀟𑁄.

𑀔𑀺𑀤𑀺 𑀅𑀯𑀬𑀯𑁂𑀢𑀺 𑀘𑀦𑁆𑀤𑀯𑀺𑀤𑀼𑀦𑁄 𑀯𑀤𑀦𑁆𑀢𑀺. 𑀢𑁂𑀲𑀁 𑀫𑀢𑁂 ‘‘𑀔𑀺𑀦𑁆𑀤𑀢𑀻’’𑀢𑀺 𑀭𑀽𑀧𑀁.

𑀦𑀺𑀤𑀺 𑀓𑀼𑀘𑁆𑀙𑀸𑀬𑀁. 𑀓𑀼𑀘𑁆𑀙𑀸𑀲𑀤𑁆𑀤𑁄 𑀕𑀭𑀳𑀢𑁆𑀣𑁄. 𑀦𑀺𑀦𑁆𑀤𑀢𑀺. 𑀦𑀺𑀦𑁆𑀤𑀸.

𑀧𑁄𑀭𑀸𑀡𑀫𑁂𑀢𑀁 𑀅𑀢𑀼𑀮, 𑀦𑁂𑀢𑀁 𑀅𑀚𑁆𑀚𑀢𑀦𑀸𑀫𑀺𑀯;

𑀦𑀺𑀦𑁆𑀤𑀦𑁆𑀢𑀺 𑀢𑀼𑀡𑁆𑀳𑀺𑀫𑀸𑀲𑀻𑀦𑀁, 𑀦𑀺𑀦𑁆𑀤𑀦𑁆𑀢𑀺 𑀩𑀳𑀼𑀪𑀸𑀡𑀺𑀦𑀁;

𑀫𑀺𑀢𑀪𑀸𑀡𑀺𑀫𑁆𑀧𑀺 𑀦𑀺𑀦𑁆𑀤𑀦𑁆𑀢𑀺, 𑀦𑀢𑁆𑀣𑀺 𑀮𑁄𑀓𑁂 𑀅𑀦𑀺𑀦𑁆𑀤𑀺𑀢𑁄.

𑀅𑀯𑀡𑁆𑀡𑁄 ¶ 𑀅𑀕𑀼𑀡𑁄 𑀦𑀺𑀦𑁆𑀤𑀸, 𑀕𑀭𑀳𑀸 𑀅𑀬𑀲𑁄𑀧𑀺 𑀘;

𑀅𑀲𑀺𑀮𑁄𑀓𑁄 𑀅𑀓𑀺𑀢𑁆𑀢𑀺 𑀘, 𑀅𑀲𑀺𑀮𑀸𑀖𑀸 𑀘 𑀅𑀢𑁆𑀣𑀼𑀢𑀺.

𑀦𑀦𑁆𑀤 𑀲𑀫𑀺𑀤𑁆𑀥𑀺𑀬𑀁. 𑀅𑀓𑀫𑁆𑀫𑀺𑀓𑀸 𑀥𑀸𑀢𑀼. 𑀦𑀦𑁆𑀤𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸. 𑀦𑀦𑁆𑀤𑀸𑀬 𑀦𑀼𑀦 𑀫𑀭𑀡𑁂𑀦. 𑀦𑀦𑁆𑀤𑀲𑀺 𑀲𑀺𑀭𑀺𑀯𑀸𑀳𑀦. 𑀦𑀦𑁆𑀤𑀦𑀁 𑀯𑀦𑀁. 𑀅𑀪𑀺𑀲𑀤𑁆𑀤𑀬𑁄𑀕𑁂 𑀧𑀦𑀸𑀬𑀁 𑀲𑀓𑀫𑁆𑀫𑀓𑁄𑀧𑀺. 𑀅𑀪𑀺𑀦𑀦𑁆𑀤𑀦𑁆𑀢𑀺 𑀆𑀕𑀢𑀁 𑀦𑀸𑀪𑀺𑀦𑀦𑁆𑀤𑀦𑁆𑀢𑀺 𑀫𑀭𑀡𑀁.

𑀲𑀺𑀭𑀻𑀯 𑀭𑀽𑀧𑀺𑀦𑀺𑀁 𑀤𑀺𑀲𑁆𑀯𑀸, 𑀦𑀦𑁆𑀤𑀺𑀢𑀁 𑀆𑀲𑀺 𑀢𑀁 𑀓𑀼𑀮𑀁;

𑀢𑁂𑀦 𑀦𑀦𑁆𑀤𑀸𑀢𑀺 𑀫𑁂 𑀦𑀸𑀫𑀁, 𑀲𑀼𑀦𑁆𑀤𑀭𑀁 𑀧𑀯𑀭𑀁 𑀅𑀳𑀼.

𑀭𑀫𑁆𑀫𑀁 𑀯𑁂𑀴𑀼𑀯𑀦𑀁 𑀬𑁂𑀦, 𑀦 𑀤𑀺𑀝𑁆𑀞𑀁 𑀲𑀼𑀕𑀢𑀸𑀮𑀬𑀁;

𑀦 𑀢𑁂𑀦 𑀦𑀦𑁆𑀤𑀦𑀁 𑀤𑀺𑀝𑁆𑀞𑀁, 𑀇𑀢𑀺 𑀫𑀜𑁆𑀜𑁂 𑀫𑀳𑁂𑀲𑀬𑀁.

𑀬𑁂𑀦 𑀯𑁂𑀴𑀼𑀯𑀦𑀁 𑀤𑀺𑀝𑁆𑀞𑀁, 𑀦𑀭𑀦𑀦𑁆𑀤𑀦𑀦𑀦𑁆𑀤𑀦𑀁;

𑀲𑀼𑀤𑀺𑀝𑁆𑀞𑀁 𑀦𑀦𑁆𑀤𑀦𑀁 𑀢𑁂𑀦, 𑀅𑀫𑀭𑀺𑀦𑁆𑀤𑀲𑀼𑀦𑀦𑁆𑀤𑀦𑀁.

𑀘𑀤𑀺 𑀳𑀺𑀮𑀸𑀤𑀦𑁂 𑀤𑀺𑀢𑁆𑀢𑀺𑀬𑀜𑁆𑀘. 𑀳𑀺𑀮𑀸𑀤𑀦𑀁 𑀲𑀼𑀔𑀦𑀁. 𑀤𑀺𑀢𑁆𑀢𑀺 𑀲𑁄𑀪𑀸. 𑀘𑀦𑁆𑀤𑀢𑀺. 𑀘𑀦𑁆𑀤𑀦𑁄, 𑀘𑀦𑁆𑀤𑁄.

𑀏𑀢𑁆𑀣 𑀘 𑀘𑀦𑁆𑀤𑀦𑀲𑁆𑀲𑀧𑀺 𑀅𑀦𑁂𑀓𑀸𑀦𑀺 𑀦𑀸𑀫𑀸𑀦𑀺 𑁋 𑀘𑀦𑁆𑀤𑀦𑀁, 𑀕𑀦𑁆𑀥𑀲𑀸𑀭𑁄, 𑀫𑀮𑀬𑀚𑁄, 𑀲𑀼𑀯𑀡𑁆𑀡𑀘𑀦𑁆𑀤𑀦𑀁, 𑀳𑀭𑀺𑀘𑀦𑁆𑀤𑀦𑀁, 𑀭𑀢𑁆𑀢𑀘𑀦𑁆𑀤𑀦𑀁, 𑀕𑁄𑀲𑀻𑀢𑀘𑀦𑁆𑀤𑀦𑀁. 𑀘𑀦𑁆𑀤𑀬𑀢𑀺 𑀳𑀺𑀮𑀸𑀤𑀬𑀢𑀺 𑀲𑀻𑀢𑀕𑀼𑀡𑀲𑀫𑀗𑁆𑀕𑀺𑀢𑀸𑀬 𑀲𑀢𑁆𑀢𑀸𑀦𑀁 𑀧𑀮𑀺𑀴𑀸𑀳𑀁 𑀯𑀽𑀧𑀲𑀫𑁂𑀦𑁆𑀢𑀁 𑀲𑀼𑀔𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀘𑀦𑁆𑀤𑀦𑀁. 𑀘𑀦𑁆𑀤𑁄𑀢𑀺 𑀲𑁄𑀫𑁄, 𑀲𑁄𑀧𑀺 𑀘𑀦𑁆𑀤𑀬𑀢𑀺 𑀳𑀺𑀮𑀸𑀤𑀬𑀢𑀺 𑀲𑀻𑀢𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸 𑀅𑀢𑁆𑀢𑀦𑁄 𑀧𑀪𑀸𑀬 𑀲𑀢𑁆𑀢𑀸𑀦𑀁 𑀧𑀭𑀺𑀴𑀸𑀳𑀁 𑀯𑀽𑀧𑀲𑀫𑁂𑀦𑁆𑀢𑁄 𑀲𑀼𑀔𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀘𑀦𑁆𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀘𑀦𑁆𑀤𑀢𑀺 𑀤𑀺𑀩𑁆𑀩𑀢𑀺 𑀲𑀺𑀭𑀺𑀬𑀸 𑀯𑀺𑀭𑁄𑀘𑀢𑀻𑀢𑀺 𑀘𑀦𑁆𑀤𑁄. 𑀆𑀕𑀫𑀝𑁆𑀞𑀓𑀣𑀸𑀲𑀼 𑀧𑀦 ‘‘𑀙𑀦𑁆𑀤𑀁 𑀚𑀦𑁂𑀢𑀻𑀢𑀺 𑀘𑀦𑁆𑀤𑁄’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀸𑀧𑀺 𑀅𑀦𑁂𑀓𑀸𑀦𑀺 𑀦𑀸𑀫𑀸𑀦𑀺 𑁋

𑀘𑀦𑁆𑀤𑁄 ¶ 𑀦𑀓𑁆𑀔𑀢𑁆𑀢𑀭𑀸𑀚𑀸 𑀘, 𑀇𑀦𑁆𑀤𑀼 𑀲𑁄𑀫𑁄 𑀦𑀺𑀲𑀸𑀓𑀭𑁄;

𑀘𑀦𑁆𑀤𑀺𑀫𑀸 𑀫𑀸 𑀦𑀺𑀲𑀸𑀦𑀸𑀣𑁄, 𑀑𑀲𑀥𑀻 𑀲𑁄 𑀦𑀺𑀲𑀸𑀧𑀢𑀺.

𑀉𑀴𑀼𑀭𑀸𑀚𑀸 𑀲𑀲𑀗𑁆𑀓𑁄 𑀘, 𑀳𑀺𑀫𑀭𑀁𑀲𑀺 𑀲𑀲𑀻𑀧𑀺 𑀘;

𑀤𑁆𑀯𑀺𑀚𑀭𑀸𑀚𑀸 𑀲𑀲𑀥𑀭𑁄, 𑀢𑀸𑀭𑀸𑀧𑀢𑀺 𑀳𑀺𑀫𑀁𑀲𑀼 𑀘.

𑀓𑀼𑀫𑀼𑀤𑀩𑀦𑁆𑀥𑀯𑁄 𑀘𑁂𑀯, 𑀫𑀺𑀕𑀗𑁆𑀓𑁄 𑀘 𑀓𑀮𑀸𑀦𑀺𑀥𑀺;

𑀲𑀼𑀥𑀁 𑀲𑀼𑀥𑀺 𑀥𑀽𑀧𑀺 𑀬𑀽𑀧-𑀭𑀲𑁆𑀫𑀺 𑀘𑁂𑀯 𑀔𑀫𑀸𑀓𑀭𑁄;

𑀦𑀓𑁆𑀔𑀢𑁆𑀢𑁂𑀲𑁄 𑀘 𑀭𑀚𑀦𑀻-𑀓𑀭𑁄 𑀲𑀼𑀩𑁆𑀪𑀁𑀲𑀼 𑀏𑀯 𑀘.

𑀢𑀤𑀺 𑀘𑁂𑀢𑀸𑀬𑀁. 𑀢𑀦𑁆𑀤𑀢𑀺. 𑀢𑀦𑁆𑀤𑀻.

𑀓𑀤𑀺 𑀓𑀮𑀤𑀺 𑀅𑀯𑁆𑀳𑀸𑀦𑁂 𑀭𑁄𑀤𑀦𑁂 𑀘. 𑀓𑀦𑁆𑀤𑀢𑀺, 𑀧𑀓𑁆𑀓𑀦𑁆𑀤𑀢𑀺. 𑀧𑀓𑁆𑀓𑀦𑁆𑀤𑀼𑀁, 𑀓𑀦𑁆𑀤𑀦𑁆𑀢𑁄, 𑀓𑀮𑀦𑁆𑀤𑀓𑁄.

𑀓𑀮𑀺𑀤𑀺 𑀧𑀭𑀺𑀤𑁂𑀯𑀦𑁂. 𑀓𑀮𑀺𑀦𑁆𑀤𑀢𑀺.

𑀔𑁄𑀤 𑀧𑀝𑀺𑀖𑀸𑀢𑁂. 𑀔𑁄𑀤𑀢𑀺.

𑀔𑀦𑁆𑀤 𑀕𑀢𑀺𑀲𑁄𑀲𑀦𑁂𑀲𑀼. 𑀔𑀦𑁆𑀤𑀢𑀺. 𑀔𑀦𑁆𑀤𑁄. 𑀔𑀦𑁆𑀤𑁄 𑀦𑀸𑀫 𑀏𑀓𑁄 𑀤𑁂𑀯𑁄, 𑀬𑁄 ‘‘𑀓𑀼𑀫𑀸𑀭𑁄 𑀲𑀢𑁆𑀢𑀺𑀥𑀭𑁄’’𑀢𑀺 𑀘 𑀯𑀼𑀘𑁆𑀘𑀢𑀺.

𑀔𑀼𑀤𑀺 𑀆𑀧𑀯𑀦𑁂. 𑀔𑀼𑀦𑁆𑀤𑀢𑀺.

𑀲𑀺𑀤𑀺 𑀲𑀻𑀢𑀺𑀬𑁂. 𑀲𑀻𑀢𑀺𑀬𑀁 𑀲𑀻𑀢𑀺𑀪𑀸𑀯𑁄. 𑀲𑀺𑀦𑁆𑀤𑀢𑀺. 𑀲𑁄𑀲𑀺𑀦𑁆𑀤𑁄, 𑀲𑁄𑀢𑀢𑁆𑀢𑁄.

𑀯𑀦𑁆𑀤 𑀅𑀪𑀺𑀯𑀸𑀤𑀦𑀣𑀼𑀢𑀻𑀲𑀼. 𑀯𑀦𑁆𑀤𑀢𑀺, 𑀅𑀪𑀺𑀯𑀦𑁆𑀤𑀢𑀺. 𑀅𑀪𑀺𑀯𑀦𑁆𑀤𑀦𑀸, 𑀯𑀦𑁆𑀤𑀦𑀁, 𑀯𑀦𑁆𑀤𑀓𑁄.

𑀏𑀢𑁆𑀣 𑀧𑀦 𑀯𑀦𑁆𑀤𑀢𑀻𑀢𑀺 𑀧𑀤𑀲𑁆𑀲 𑀦𑀫𑀲𑁆𑀲𑀢𑀺 𑀣𑁄𑀫𑁂𑀢𑀺 𑀯𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀲𑀼𑀢𑁆𑀢𑀦𑁆𑀢𑀝𑀻𑀓𑀸𑀓𑀸𑀭𑁄 ‘‘𑀯𑀦𑁆𑀤𑁂𑀢𑀺 𑀯𑀦𑁆𑀤𑀸𑀫𑀺 𑀣𑁄𑀫𑁂𑀫𑀺 𑀯𑀸’’𑀢𑀺 𑀆𑀳.

𑀪𑀤𑀺 𑀓𑀮𑁆𑀮𑀸𑀡𑁂 𑀲𑁄𑀔𑀺𑀬𑁂 𑀘. 𑀓𑀮𑁆𑀮𑀸𑀡𑀁 𑀓𑀮𑁆𑀬𑀸𑀡𑀁, 𑀲𑁄𑀔𑀺𑀬𑀁 𑀲𑀼𑀔𑀺𑀦𑁄 𑀪𑀸𑀯𑁄, 𑀲𑀼𑀔𑀫𑀺𑀘𑁆𑀘𑁂𑀯𑀢𑁆𑀣𑁄. 𑀪𑀦𑁆𑀤𑀢𑀺. 𑀪𑀦𑁆𑀤𑀓𑁄, 𑀪𑀤𑁆𑀤𑁄, 𑀪𑀤𑁆𑀭𑁄.

𑀫𑀤𑀺 ¶ 𑀣𑀼𑀢𑀺𑀫𑁄𑀤𑀫𑀤𑀲𑀼𑀧𑀦𑀕𑀢𑀻𑀲𑀼. 𑀫𑀦𑁆𑀤𑀢𑀺. 𑀫𑀦𑁆𑀤𑁄.

𑀏𑀢𑁆𑀣 𑀧𑀦 𑀫𑀦𑁆𑀤𑁄𑀢𑀺 𑀅𑀜𑁆𑀜𑀸𑀡𑀻𑀧𑀺 𑀩𑀸𑀮𑀤𑀸𑀭𑀓𑁄𑀧𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀅𑀜𑁆𑀜𑀸𑀡𑀻 𑀫𑀦𑁆𑀤𑀢𑀺 𑀅𑀜𑁆𑀜𑀸𑀡𑀪𑀸𑀯𑁂𑀦 𑀅𑀧𑁆𑀧𑀲𑀁𑀲𑀺𑀢𑀩𑁆𑀩𑀫𑁆𑀧𑀺 𑀧𑀼𑀕𑁆𑀕𑀮𑀁 𑀣𑁄𑀫𑁂𑀢𑀻𑀢𑀺 𑀫𑀦𑁆𑀤𑁄. 𑀫𑀦𑁆𑀤𑀢𑀺 𑀅𑀫𑁄𑀤𑀺𑀢𑀩𑁆𑀩𑀝𑁆𑀞𑀸𑀦𑁂𑀧𑀺 𑀫𑁄𑀤𑀢𑀻𑀢𑀺 𑀫𑀦𑁆𑀤𑁄. 𑀫𑀦𑁆𑀤𑀢𑀺 𑀤𑀸𑀦𑀲𑀻𑀮𑀸𑀤𑀺𑀧𑀼𑀜𑁆𑀜𑀓𑁆𑀭𑀺𑀬𑀸𑀲𑀼 𑀧𑀫𑀚𑁆𑀚𑀢𑀻𑀢𑀺 𑀫𑀦𑁆𑀤𑁄. 𑀫𑀦𑁆𑀤𑀢𑀺 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀳𑀺𑀢𑀸𑀳𑀺𑀢𑀁 𑀅𑀘𑀺𑀦𑁆𑀢𑁂𑀦𑁆𑀢𑁄 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀤𑀻𑀳𑀺 𑀅𑀢𑁆𑀢𑀦𑁄 𑀓𑀸𑀬𑀁 𑀲𑀜𑁆𑀚𑀸𑀢𑀫𑁂𑀤𑀁 𑀓𑀼𑀭𑀼𑀫𑀸𑀦𑁄 𑀲𑀼𑀧𑀢𑀻𑀢𑀺 𑀫𑀦𑁆𑀤𑁄. 𑀫𑀦𑁆𑀤𑀢𑀺 𑀅𑀬𑀼𑀢𑁆𑀢𑀁 𑀧𑀭𑁂𑀲𑀁 𑀓𑁆𑀭𑀺𑀬𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑁂𑀦 𑀕𑀘𑁆𑀙𑀢𑀺 𑀕𑀡𑁆𑀳𑀸𑀢𑀻𑀢𑀺 𑀫𑀦𑁆𑀤𑁄. 𑀅𑀣 𑀯𑀸 𑀫𑀦𑁆𑀤𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀕𑀩𑁆𑀪𑀁 𑀕𑀘𑁆𑀙𑀢𑀻𑀢𑀺 𑀫𑀦𑁆𑀤𑁄. 𑀯𑀼𑀢𑁆𑀢𑀜𑁆𑀳𑀺 𑀪𑀕𑀯𑀢𑀸 ‘‘𑀧𑀼𑀦𑀧𑁆𑀧𑀼𑀦𑀁 𑀕𑀩𑁆𑀪𑀫𑀼𑀧𑁂𑀢𑀺 𑀫𑀦𑁆𑀤𑁄’’𑀢𑀺. 𑀩𑀸𑀮𑀤𑀸𑀭𑀓𑁄 𑀧𑀦 𑀫𑀦𑁆𑀤𑀢𑀺 𑀬𑀼𑀢𑁆𑀢𑀸𑀬𑀼𑀢𑁆𑀢𑀫𑀚𑀸𑀦𑀦𑁆𑀢𑁄 𑀉𑀢𑁆𑀢𑀸𑀦𑀲𑁂𑀬𑁆𑀬𑀁𑀧𑀭𑀺𑀯𑀢𑁆𑀢𑀦𑀲𑁂𑀬𑁆𑀬𑀁 𑀯𑀸 𑀲𑀼𑀧𑀢𑀻𑀢𑀺 𑀫𑀦𑁆𑀤𑁄. 𑀢𑀣𑀸 𑀳𑀺 𑁋

‘‘𑀦𑁄𑀦𑀻𑀢𑀲𑀼𑀔𑀼𑀫𑀸𑀮𑀁 𑀫𑀁, 𑀚𑀸𑀢𑀧𑀮𑁆𑀮𑀯𑀓𑁄𑀫𑀮𑀁;

𑀫𑀦𑁆𑀤𑀁 𑀉𑀢𑁆𑀢𑀸𑀦𑀲𑀬𑀦𑀁, 𑀧𑀺𑀲𑀸𑀘𑀪𑀬𑀢𑀚𑁆𑀚𑀺𑀢𑀸.

𑀧𑀸𑀤𑀫𑀽𑀮𑁂 𑀫𑀳𑁂𑀲𑀺𑀲𑁆𑀲, 𑀲𑀸𑀬𑁂𑀲𑀼𑀁 𑀤𑀻𑀦𑀫𑀸𑀦𑀲𑀸;

𑀇𑀤𑀁 𑀤𑀤𑀸𑀫 𑀢𑁂 𑀦𑀸𑀣, 𑀲𑀭𑀡𑀁 𑀳𑁄𑀳𑀺 𑀦𑀸𑀬𑀓𑀸’’𑀢𑀺

𑀯𑀼𑀢𑁆𑀢𑀁, 𑀇𑀢𑀺 𑀉𑀢𑁆𑀢𑀸𑀦𑀲𑀬𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀦𑁆𑀤𑀤𑀲𑀓𑀁, 𑀢𑀸𑀯 ‘‘𑀫𑀦𑁆𑀤𑁄’’𑀢𑀺 ‘‘𑀤𑀸𑀭𑀓𑁄’’𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀧𑁆𑀧𑀢𑁆𑀣𑀯𑀸𑀘𑀓𑁄𑀧𑀺 𑀧𑀦 𑀫𑀦𑁆𑀤𑀲𑀤𑁆𑀤𑁄 𑀳𑁄𑀢𑀺, 𑀲𑁄 𑀧𑀸𑀝𑀺𑀧𑀤𑀺𑀓𑀢𑁆𑀢𑀸 𑀇𑀥 𑀦𑀸𑀥𑀺𑀧𑁆𑀧𑁂𑀢𑁄, 𑀅𑀣 𑀯𑀸 𑀫𑀦𑁆𑀤𑀢𑀺 𑀅𑀧𑁆𑀧𑀪𑀸𑀯𑁂𑀦 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑀯𑀲𑁂𑀦𑀧𑀺 𑀕𑀳𑁂𑀢𑀩𑁆𑀩𑁄.

𑀫𑀼𑀤 𑀳𑀸𑀲𑁂. 𑀳𑀲𑀦𑀁 𑀳𑀸𑀲𑁄 𑀢𑀼𑀝𑁆𑀞𑀺. 𑀫𑁄𑀤𑀢𑀺, 𑀧𑀫𑁄𑀤𑀢𑀺. 𑀲𑀫𑁆𑀫𑁄𑀤𑀢𑀺. 𑀲𑀫𑁆𑀫𑁄𑀤𑀓𑁄. 𑀲𑀫𑁆𑀫𑁄𑀤𑀫𑀸𑀦𑀸 𑀕𑀘𑁆𑀙𑀦𑁆𑀢𑀺 𑀫𑀼𑀤𑀺𑀢𑀸. 𑀫𑀼𑀤𑀸.

𑀳𑀤 ¶ 𑀓𑀭𑀻𑀲𑁄𑀲𑁆𑀲𑀕𑁆𑀕𑁂. 𑀓𑀭𑀻𑀲𑁄𑀲𑁆𑀲𑀕𑁆𑀕𑁄 𑀦𑀸𑀫 𑀓𑀭𑀻𑀲𑀲𑁆𑀲 𑀑𑀲𑁆𑀲𑀚𑁆𑀚𑀦𑀁 𑀯𑀺𑀲𑁆𑀲𑀚𑁆𑀚𑀦𑀁. 𑀳𑀤𑀢𑀺. 𑀉𑀳𑀤𑀢𑀺. 𑀳𑀤𑀦𑁄.

𑀏𑀢𑁆𑀣 𑀘 ‘‘𑀬𑁂𑀲𑀁 𑀦𑁄 𑀲𑀦𑁆𑀣𑀢𑁂 𑀤𑀸𑀭𑀓𑀸 𑀉𑀳𑀤𑀦𑁆𑀢𑀺𑀧𑀺 𑀉𑀫𑁆𑀫𑀺𑀳𑀦𑁆𑀢𑀺𑀧𑀻’’𑀢𑀺 𑀅𑀬𑀁 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁, 𑀢𑀢𑁆𑀭 𑀉𑀳𑀤𑀦𑁆𑀢𑀺𑀧𑀻𑀢𑀺 𑀯𑀘𑁆𑀘𑀫𑁆𑀧𑀺 𑀓𑀭𑁄𑀦𑁆𑀢𑀺. 𑀉𑀫𑁆𑀫𑀺𑀳𑀦𑁆𑀢𑀺𑀧𑀻𑀢𑀺 𑀧𑀲𑁆𑀲𑀸𑀯𑀫𑁆𑀧𑀺 𑀓𑀭𑁄𑀦𑁆𑀢𑀺. 𑀧𑀘𑁆𑀙𑀺𑀫𑀧𑀤𑀲𑁆𑀲𑀢𑁆𑀣𑁄 𑀫𑀺𑀳 𑀲𑁂𑀘𑀦𑁂𑀢𑀺 𑀥𑀸𑀢𑀼𑀯𑀲𑁂𑀦 𑀤𑀝𑁆𑀞𑀩𑁆𑀩𑁄. 𑀅𑀬𑀁 𑀧𑀦 𑀘𑀼𑀭𑀸𑀤𑀺𑀕𑀡𑁂𑀧𑀺 𑀯𑀢𑁆𑀢𑀢𑀺 𑀤𑁆𑀯𑀺𑀕𑀡𑀺𑀓𑀢𑁆𑀢𑀸. 𑀇𑀫𑀲𑁆𑀫𑀺𑀜𑁆𑀳𑀺 𑀞𑀸𑀦𑁂 ‘‘𑀫𑀼𑀢𑁆𑀢𑁂𑀢𑀺 𑀑𑀳𑀤𑁂𑀢𑀺 𑀘𑀸’’𑀢𑀺 𑀘𑀭𑀺𑀬𑀸𑀧𑀺𑀝𑀓𑀧𑀸𑀴𑀺𑀧𑁆𑀧𑀤𑁂𑀲𑁄 𑀦𑀺𑀤𑀲𑁆𑀲𑀦𑀁. 𑀢𑀢𑁆𑀣 𑀫𑀼𑀢𑁆𑀢𑁂𑀢𑀻𑀢𑀺 𑀧𑀲𑁆𑀲𑀸𑀯𑀁 𑀓𑀭𑁄𑀢𑀺. 𑀑𑀳𑀤𑁂𑀢𑀻𑀢𑀺 𑀓𑀭𑀻𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑀺.

𑀉𑀤 𑀫𑁄𑀤𑁂 𑀓𑀻𑀴𑀸𑀬𑀜𑁆𑀘. 𑀉𑀤𑀢𑀺. 𑀉𑀤𑀸𑀦𑀁. 𑀉𑀤𑀕𑁆𑀕𑁄.

𑀢𑀢𑁆𑀣 𑀉𑀤𑀸𑀦𑀦𑁆𑀢𑀺 𑀓𑁂𑀦𑀝𑁆𑀞𑁂𑀦 𑀉𑀤𑀸𑀦𑀁? 𑀉𑀤𑀸𑀦𑀦𑀝𑁆𑀞𑁂𑀦. 𑀓𑀺𑀫𑀺𑀤𑀁 𑀉𑀤𑀸𑀦𑀦𑀁 𑀦𑀸𑀫? 𑀧𑀻𑀪𑀺𑀯𑁂𑀕𑀲𑀫𑀼𑀝𑁆𑀞𑀸𑀧𑀺𑀢𑁄 𑀉𑀤𑀸𑀳𑀸𑀭𑁄. 𑀬𑀣𑀸 𑀳𑀺 𑀬𑀁 𑀢𑁂𑀮𑀸𑀤𑀺 𑀫𑀺𑀦𑀺𑀢𑀩𑁆𑀩𑀯𑀢𑁆𑀣𑀼 𑀫𑀸𑀦𑀁𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀯𑀺𑀲𑁆𑀲𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀁 ‘‘𑀅𑀯𑀲𑁂𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀜𑁆𑀘 𑀚𑀮𑀁 𑀢𑀴𑀸𑀓𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀁 ‘‘𑀑𑀖𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑁂𑀯 𑀬𑀁 𑀧𑀻𑀢𑀺𑀯𑁂𑀕𑀲𑀫𑀼𑀝𑁆𑀞𑀸𑀧𑀺𑀢𑀁 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀁 𑀳𑀤𑀬𑀁 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀲𑁄 𑀅𑀥𑀺𑀓𑁄 𑀳𑀼𑀢𑁆𑀯𑀸 𑀅𑀦𑁆𑀢𑁄 𑀅𑀲𑀡𑁆𑀞𑀳𑀺𑀢𑁆𑀯𑀸 𑀯𑀘𑀻𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀦𑁆𑀢𑁄 𑀧𑀝𑀺𑀕𑁆𑀕𑀸𑀳𑀓𑀦𑀺𑀭𑀧𑁂𑀓𑁆𑀔𑁄 𑀉𑀤𑀸𑀳𑀸𑀭𑀯𑀺𑀲𑁂𑀲𑁄 ‘‘𑀉𑀤𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀉𑀤𑀕𑁆𑀕𑁄𑀢𑀺 𑀲𑀜𑁆𑀚𑀸𑀢𑀲𑁄𑀫𑀦𑀲𑁆𑀲𑁄.

𑀓𑀼𑀤 𑀔𑀼𑀤 𑀕𑀼𑀤 𑀓𑀻𑀴𑀸𑀬𑀫𑁂𑀯. 𑀓𑁄𑀤𑀢𑀺. 𑀔𑁄𑀤𑀢𑀺. 𑀕𑁄𑀤𑀢𑀺.

𑀲𑀽𑀤 𑀧𑀕𑁆𑀖𑀭𑀡𑁂. 𑀲𑀽𑀤𑀢𑀺. 𑀲𑀼𑀢𑁆𑀢𑀁. 𑀲𑀽𑀤𑁄. 𑀭𑀜𑁆𑀜𑁄 𑀲𑀽𑀤𑀸 𑀫𑀳𑀸𑀦𑀲𑁂.

𑀏𑀢𑁆𑀣 ¶ 𑀘 𑀲𑀼𑀢𑁆𑀢𑀦𑁆𑀢𑀺 𑀲𑀽𑀤𑀢𑀺 𑀥𑁂𑀦𑀼 𑀯𑀺𑀬 𑀔𑀻𑀭𑀁 𑀅𑀢𑁆𑀣𑁂 𑀧𑀕𑁆𑀖𑀭𑀸𑀧𑁂𑀢𑀻𑀢𑀺 𑀲𑀼𑀢𑁆𑀢𑀁, 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁. 𑀲𑀓𑀫𑁆𑀫𑀺𑀓𑀥𑀸𑀢𑀼𑀢𑁆𑀢𑀸 𑀧𑀦 ‘‘𑀧𑀕𑁆𑀖𑀭𑀸𑀧𑁂𑀢𑀻’’𑀢𑀺 𑀓𑀸𑀭𑀺𑀢𑀯𑀲𑁂𑀦 𑀅𑀢𑁆𑀣𑁄 𑀓𑀣𑁂𑀢𑀼𑀁 𑀮𑀩𑁆𑀪𑀢𑀺. 𑀢𑀣𑀸 𑀳𑀺 ‘‘𑀓𑀭𑁄𑀢𑀻’’𑀢𑀺 𑀧𑀤𑀲𑁆𑀲 ‘‘𑀦𑀺𑀧𑁆𑀨𑀸𑀤𑁂𑀢𑀻’’𑀢𑀺 𑀅𑀢𑁆𑀣𑁄 𑀓𑀣𑁂𑀢𑀼𑀁 𑀮𑀩𑁆𑀪𑀢𑀺. 𑀲𑀽𑀤𑁄𑀢𑀺 𑀪𑀢𑁆𑀢𑀓𑀸𑀭𑁄. 𑀬𑁄 ‘‘𑀆𑀴𑀸𑀭𑀺𑀓𑁄, 𑀑𑀤𑀦𑀺𑀓𑁄, 𑀲𑀽𑀧𑀓𑀸𑀭𑁄, 𑀭𑀲𑀓𑁄’’𑀢𑀺 𑀘 𑀯𑀼𑀘𑁆𑀘𑀢𑀺. 𑀲𑀽𑀤𑀢𑀺 ‘‘𑀏𑀯𑀜𑁆𑀘𑁂𑀯𑀜𑁆𑀘 𑀓𑀢𑁂 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀲𑀼𑀕𑀦𑁆𑀥𑀁 𑀫𑀦𑀸𑀧𑀁 𑀲𑀼𑀭𑀲𑀜𑁆𑀘 𑀪𑀯𑀺𑀲𑁆𑀲𑀢𑀻’’𑀢𑀺 𑀭𑀦𑁆𑀥𑀦𑀓𑁆𑀭𑀺𑀬𑀸𑀬 𑀲𑀼𑀓𑀼𑀲𑀮𑀢𑀸𑀬 𑀭𑀲𑀁 𑀧𑀕𑁆𑀖𑀭𑀸𑀧𑁂𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀲𑀽𑀤𑁄.

𑀭𑀳𑀤 𑀅𑀩𑁆𑀬𑀢𑁆𑀢𑀲𑀤𑁆𑀤𑁂. 𑀭𑀳𑀤𑀢𑀺. 𑀭𑀳𑀤𑁄.

𑀳𑀺𑀮𑀸𑀤𑀺 𑀲𑀼𑀔𑁂 𑀘. 𑀘𑀓𑀸𑀭𑁄 𑀧𑀼𑀩𑁆𑀩𑀢𑁆𑀣𑀸𑀧𑁂𑀓𑁆𑀔𑀓𑁄. 𑀳𑀺𑀮𑀸𑀤𑀢𑀺. 𑀳𑀺𑀮𑀸𑀤𑀦𑀁, 𑀳𑀺𑀮𑀸𑀤𑁄, 𑀫𑁂𑀢𑁆𑀢𑀸𑀲𑀳𑀸𑀬𑀓𑀢𑀲𑀢𑁆𑀢𑀫𑀳𑀸𑀳𑀺𑀮𑀸𑀤𑁄.

𑀲𑀤𑁆𑀤 𑀓𑀼𑀘𑁆𑀙𑀺𑀢𑁂 𑀲𑀤𑁆𑀤𑁂. 𑀲𑀤𑁆𑀤𑀢𑀺.

𑀫𑀺𑀤 𑀲𑁆𑀦𑁂𑀳𑁂. 𑀲𑁆𑀦𑁂𑀳𑁄 𑀦𑀸𑀫 𑀯𑀲𑀸𑀲𑀗𑁆𑀔𑀸𑀢𑁄 𑀲𑁆𑀦𑁂𑀳𑁄 𑀧𑀻𑀢𑀺𑀲𑁆𑀦𑁂𑀳𑁄𑀢𑀺 𑀤𑀼𑀯𑀺𑀥𑁄. 𑀇𑀥 𑀧𑀦 𑀯𑀲𑀸𑀲𑀗𑁆𑀔𑀸𑀢𑁄 𑀲𑁆𑀦𑁂𑀳𑁄 𑀅𑀥𑀺𑀧𑁆𑀧𑁂𑀢𑁄, 𑀫𑁂𑀤𑀢𑀺 𑀫𑁂𑀤𑁄.

𑀏𑀢𑁆𑀣 𑀘 𑀫𑁂𑀤𑀢𑀻𑀢𑀺 𑀫𑁂𑀤𑀲𑀳𑀺𑀢𑁄 𑀪𑀯𑀢𑀺 𑀅𑀬𑀁 𑀧𑀼𑀭𑀺𑀲𑁄𑀢𑀺 𑀅𑀢𑁆𑀣𑁄. 𑀫𑁂𑀤𑁄 𑀦𑀸𑀫 𑀣𑀽𑀮𑀲𑁆𑀲 𑀲𑀓𑀮𑀲𑀭𑀻𑀭𑀁 𑀨𑀭𑀺𑀢𑁆𑀯𑀸 𑀓𑀺𑀲𑀲𑁆𑀲 𑀚𑀗𑁆𑀖𑀫𑀁𑀲𑀸𑀤𑀻𑀦𑀺 𑀦𑀺𑀲𑁆𑀲𑀸𑀬 𑀞𑀺𑀢𑁄 𑀧𑀢𑁆𑀣𑀺𑀦𑁆𑀦𑀲𑀺𑀦𑁂𑀳𑁄, 𑀲𑁄 𑀯𑀡𑁆𑀡𑁂𑀦 𑀳𑀮𑀺𑀤𑁆𑀤𑀺𑀯𑀡𑁆𑀡𑁄 𑀳𑁄𑀢𑀺. 𑀓𑀸𑀭𑀺𑀢𑁂 ‘‘𑀫𑁂𑀤𑁂𑀢𑀺 𑀫𑁂𑀤𑀬𑀢𑀻’’𑀢𑀺 𑀭𑀽𑀧𑀸𑀦𑀺. 𑀢𑀣𑀸 𑀳𑀺 ‘‘𑀢𑁂 𑀇𑀫𑀁 𑀓𑀸𑀬𑀁 𑀩𑀮𑀁 𑀕𑀸𑀳𑁂𑀦𑁆𑀢𑀺 𑀦𑀸𑀫 𑀩𑁆𑀭𑀽𑀳𑁂𑀦𑁆𑀢𑀺 𑀦𑀸𑀫 𑀫𑁂𑀤𑁂𑀦𑁆𑀢𑀺 𑀦𑀸𑀫𑀸’’𑀢𑀺 𑀧𑀸𑀴𑀺 𑀤𑀺𑀲𑁆𑀲𑀢𑀺. 𑀢𑀢𑁆𑀣 𑀫𑁂𑀤𑁂𑀦𑁆𑀢𑀻𑀢𑀺 𑀲𑀜𑁆𑀚𑀸𑀢𑀫𑁂𑀤𑀁 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀺𑀲𑁆𑀲𑀸 𑀧𑀦 𑀥𑀸𑀢𑀼𑀬𑀸 𑀤𑀺𑀯𑀸𑀤𑀺𑀕𑀡𑀁 𑀧𑀢𑁆𑀢𑀸𑀬 𑀧𑀻𑀢𑀺𑀲𑀺𑀦𑁂𑀳𑀢𑁆𑀣𑁂 ‘‘𑀫𑁂𑀚𑁆𑀚𑀢𑀻’’𑀢𑀺 𑀲𑀼𑀤𑁆𑀥𑀓𑀢𑁆𑀢𑀼𑀭𑀽𑀧𑀁 𑀪𑀯𑀢𑀺. 𑀘𑀼𑀭𑀸𑀤𑀺𑀕𑀡𑀁 𑀧𑀦 ¶ 𑀧𑀢𑁆𑀢𑀸𑀬 ‘‘𑀫𑁂𑀤𑁂𑀢𑀺 𑀫𑁂𑀤𑀬𑀢𑀻’’𑀢𑀺 𑀲𑀼𑀤𑁆𑀥𑀓𑀢𑁆𑀢𑀼𑀭𑀽𑀧𑀸𑀦𑀺 𑀪𑀯𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀺𑀤 𑀫𑁄𑀘𑀦𑁂. 𑀲𑀺𑀤𑀢𑀺. 𑀲𑁂𑀤𑁄.

𑀲𑀦𑁆𑀤 𑀧𑀲𑀯𑀦𑁂. 𑀧𑀲𑀯𑀦𑀁 𑀲𑀦𑁆𑀤𑀦𑀁 𑀅𑀯𑀺𑀘𑁆𑀙𑁂𑀤𑀧𑁆𑀧𑀯𑀢𑁆𑀢𑀺. 𑀲𑀦𑁆𑀤𑀢𑀺 𑀉𑀤𑀓𑀁. 𑀫𑀳𑀦𑁆𑀢𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄.

𑀏𑀢𑁆𑀣 𑀘 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄𑀢𑀺 𑀧𑀼𑀜𑁆𑀜𑀧𑁆𑀧𑀯𑀸𑀳𑁄, 𑀧𑀼𑀜𑁆𑀜𑀦𑀤𑀻𑀢𑀺𑀧𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺.

𑀫𑀤𑁆𑀤 𑀫𑀤𑁆𑀤𑀦𑁂. 𑀫𑀤𑁆𑀤𑀪𑀺, 𑀧𑀫𑀤𑁆𑀤𑀢𑀺. 𑀫𑀸𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑁄. 𑀓𑀡𑁆𑀝𑀓𑀁 𑀫𑀤𑁆𑀤𑀢𑀺.

𑀓𑀤𑀺 𑀯𑁂𑀮𑀫𑁆𑀩𑁂. 𑀯𑀺𑀮𑀫𑁆𑀩𑀪𑀸𑀯𑁄 𑀯𑁂𑀮𑀫𑁆𑀩𑁄. 𑀓𑀦𑁆𑀤𑀢𑀺.

𑀓𑀤 𑀅𑀯𑁆𑀳𑀸𑀦𑁂 𑀭𑁄𑀤𑀦𑁂 𑀘. 𑀓𑀤𑀢𑀺.

𑀔𑀤𑀺 𑀉𑀚𑁆𑀛𑀦𑁂. 𑀙𑀦𑁆𑀤𑀢𑀺.

𑀲𑀤 𑀲𑀸𑀤𑀦𑁂. 𑀲𑀤𑀢𑀺. 𑀅𑀲𑁆𑀲𑀸𑀤𑁄.

𑀲𑀻𑀤 𑀯𑀺𑀲𑀭𑀡𑀕𑀢𑁆𑀬𑀸𑀯𑀲𑀸𑀦𑁂𑀲𑀼. 𑀯𑀺𑀲𑀭𑀡𑀁 𑀯𑀺𑀧𑁆𑀨𑀭𑀡𑀁. 𑀕𑀢𑁆𑀬𑀸𑀯𑀲𑀸𑀦𑀁 𑀕𑀫𑀦𑀲𑁆𑀲 𑀅𑀯𑀲𑀸𑀦𑀁 𑀑𑀲𑀸𑀦𑀁 𑀅𑀪𑀸𑀯𑀓𑀭𑀡𑀁, 𑀦𑀺𑀲𑀻𑀤𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀻𑀤𑀢𑀺, 𑀮𑀸𑀩𑀽𑀦𑀺 𑀲𑀻𑀤𑀦𑁆𑀢𑀺. 𑀲𑀁𑀲𑀻𑀤𑀢𑀺, 𑀑𑀲𑀻𑀤𑀢𑀺, 𑀧𑀲𑀻𑀤𑀢𑀺, 𑀯𑀺𑀧𑁆𑀧𑀲𑀻𑀤𑀢𑀺. 𑀧𑀲𑀸𑀤𑁄. 𑀧𑀲𑀦𑁆𑀦𑁄. 𑀯𑀺𑀧𑁆𑀧𑀲𑀦𑁆𑀦𑁄. 𑀧𑀲𑀸𑀤𑀓𑁄. 𑀧𑀲𑀸𑀤𑀺𑀢𑁄. 𑀧𑀸𑀲𑀸𑀤𑁄. 𑀑𑀲𑀻𑀤𑀸𑀧𑀓𑁄. 𑀓𑀼𑀲𑀻𑀢𑁄. 𑀆𑀲𑀻𑀦𑁄. 𑀦𑀺𑀲𑀺𑀦𑁆𑀦𑁄. 𑀦𑀺𑀲𑀺𑀦𑁆𑀦𑀓𑁄. 𑀲𑀦𑁆𑀦𑀺𑀲𑀻𑀯𑁂𑀲𑀼 𑀧𑀓𑁆𑀔𑀺𑀲𑀼. 𑀦𑀺𑀲𑀻𑀤𑀦𑀁, 𑀦𑀺𑀲𑀺𑀦𑁆𑀦𑀁. 𑀦𑀺𑀲𑀚𑁆𑀚𑀸. 𑀕𑁄𑀦𑀺𑀲𑀸𑀤𑁄, 𑀉𑀧𑀦𑀺𑀲𑀸. 𑀲𑀻𑀤𑁂𑀢𑀺. 𑀲𑀻𑀤𑀬𑀢𑀺. 𑀲𑀻𑀤𑀸𑀧𑁂𑀢𑀺. 𑀲𑀻𑀤𑀸𑀧𑀬𑀢𑀺. 𑀧𑀲𑀸𑀤𑁂𑀢𑀺. 𑀦𑀺𑀲𑀻𑀤𑀺𑀢𑀼𑀁. 𑀦𑀺𑀲𑀻𑀤𑀸𑀧𑁂𑀢𑀼𑀁, 𑀦𑀺𑀲𑀸𑀤𑁂𑀢𑀼𑀁, 𑀦𑀺𑀲𑀻𑀤𑀸𑀧𑁂𑀢𑀺, 𑀦𑀺𑀲𑀻𑀤𑀸𑀧𑁂𑀢𑁆𑀯𑀸. 𑀉𑀘𑁆𑀙𑀗𑁆𑀕𑁂 𑀫𑀁 𑀦𑀺𑀲𑀸𑀤𑁂𑀢𑁆𑀯𑀸, 𑀧𑀺𑀢𑀸 𑀅𑀢𑁆𑀣𑀸𑀦𑀼𑀲𑀸𑀲𑀢𑀺. 𑀦𑀺𑀲𑀻𑀤𑀺𑀢𑁆𑀯𑀸𑀢𑀺𑀧𑀺 𑀧𑀸𑀞𑁄. 𑀦𑀺𑀲𑀻𑀤𑀺𑀢𑁆𑀯𑀸. 𑀦𑀺𑀲𑀻𑀤𑀺𑀢𑁆𑀯𑀸𑀦. 𑀦𑀺𑀲𑀻𑀤𑀺𑀢𑀼𑀦 ¶ . 𑀦𑀺𑀲𑀻𑀤𑀺𑀬. 𑀦𑀺𑀲𑀻𑀤𑀺𑀬𑀸𑀦. 𑀲𑀁𑀲𑀻𑀤𑀺𑀢𑁆𑀯𑀸. 𑀅𑀯𑀲𑀻𑀤𑀺𑀢𑁆𑀯𑀸. 𑀑𑀲𑀻𑀤𑀺𑀢𑁆𑀯𑀸.

𑀢𑀢𑁆𑀣 𑀓𑀼𑀲𑀻𑀢𑁄𑀢𑀺 𑀯𑀻𑀭𑀺𑀬𑁂𑀦𑀸𑀥𑀺𑀕𑀦𑁆𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀅𑀮𑀸𑀪𑀢𑁄 𑀓𑀼𑀘𑁆𑀙𑀺𑀢𑁂𑀦𑀸𑀓𑀸𑀭𑁂𑀦 𑀲𑀻𑀤𑀢𑀻𑀢𑀺 𑀓𑀼𑀲𑀻𑀢𑁄. 𑀅𑀣 𑀯𑀸 𑀲𑀬𑀫𑁆𑀧𑀺 𑀓𑀼𑀘𑁆𑀙𑀺𑀢𑁂𑀦𑀸𑀓𑀸𑀭𑁂𑀦 𑀲𑀻𑀤𑀢𑀺 𑀅𑀜𑁆𑀜𑁂𑀧𑀺 𑀲𑀻𑀤𑀸𑀧𑁂𑀢𑀺 𑀢𑀁 𑀦𑀺𑀲𑁆𑀲𑀸𑀬 𑀅𑀜𑁆𑀜𑁂𑀲𑀁 𑀲𑀻𑀤𑀦𑀲𑁆𑀲 𑀲𑀫𑁆𑀪𑀯𑀢𑁄𑀢𑀺 𑀓𑀼𑀲𑀻𑀢𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋

‘‘𑀧𑀭𑀺𑀢𑁆𑀢𑀁 𑀓𑀝𑁆𑀞𑀫𑀸𑀭𑀽𑀬𑁆𑀳, 𑀬𑀣𑀸 𑀲𑀻𑀤𑁂 𑀫𑀳𑀡𑁆𑀡𑀯𑁂;

𑀏𑀯𑀁 𑀓𑀼𑀲𑀻𑀢𑀫𑀸𑀕𑀫𑁆𑀫, 𑀲𑀸𑀥𑀚𑀻𑀯𑀻𑀧𑀺 𑀲𑀻𑀤𑀢𑀻’’𑀢𑀺;

𑀓𑀼𑀲𑀻𑀢𑁄𑀢𑀺 𑀘𑁂𑀢𑁆𑀣 𑀤𑀲𑁆𑀲 𑀢𑀢𑁆𑀢𑀁 ‘‘𑀲𑀼𑀕𑀢𑁄’’𑀢𑀺 𑀏𑀢𑁆𑀣 𑀯𑀺𑀬 ‘‘𑀲𑀢𑀲𑁆𑀫𑀻𑀢𑀺 𑀳𑁄𑀢𑀻’’𑀢𑀺 𑀏𑀢𑁆𑀣 𑀯𑀺𑀬 𑀘. 𑀢𑀣𑀸 𑀳𑀺 𑀲𑀻𑀤𑀢𑀻𑀢𑀺 𑀲𑀢𑀁, 𑀅𑀦𑀺𑀘𑁆𑀘𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀫𑀺𑀦𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀯𑀼𑀢𑁆𑀢𑀸. 𑀲𑀢𑀇𑀢𑀺 𑀘𑁂𑀢𑁆𑀣 𑀅𑀯𑀺𑀪𑀢𑁆𑀢𑀺𑀓𑁄 𑀦𑀺𑀤𑁆𑀤𑁂𑀲𑁄. 𑀲𑀦𑁆𑀦𑀺𑀲𑀻𑀯𑁂𑀲𑀽𑀢𑀺 𑀧𑀭𑀺𑀲𑁆𑀲𑀫𑀯𑀺𑀦𑁄𑀤𑀦𑀢𑁆𑀣𑀁 𑀲𑀩𑁆𑀩𑀲𑁄 𑀦𑀺𑀲𑀻𑀤𑀦𑁆𑀢𑁂𑀲𑀼, 𑀯𑀺𑀲𑁆𑀲𑀫𑀫𑀸𑀦𑁂𑀲𑀽𑀢𑀺 𑀅𑀢𑁆𑀣𑁄, 𑀤𑀓𑀸𑀭𑀲𑁆𑀲 𑀯𑀓𑀸𑀭𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄. 𑀦𑀺𑀲𑀻𑀤𑀦𑀦𑁆𑀢𑀺 𑀦𑀺𑀲𑀻𑀤𑀦𑀓𑁆𑀭𑀺𑀬𑀸. 𑀫𑀜𑁆𑀘𑀧𑀻𑀞𑀸𑀤𑀺𑀓𑀁 𑀯𑀸 𑀆𑀲𑀦𑀁. 𑀢𑀜𑁆𑀳𑀺 𑀦𑀺𑀲𑀻𑀤𑀦𑁆𑀢𑀺 𑀏𑀢𑁆𑀣𑀸𑀢𑀺 𑀦𑀺𑀲𑀻𑀤𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀲𑀺𑀦𑁆𑀦𑀦𑁆𑀢𑀺 𑀦𑀺𑀲𑀻𑀤𑀦𑀓𑁆𑀭𑀺𑀬𑀸 𑀏𑀯. 𑀏𑀢𑁆𑀣 𑀧𑀦 ‘‘𑀕𑀢𑁂 𑀞𑀺𑀢𑁂 𑀦𑀺𑀲𑀺𑀦𑁆𑀦𑁂 𑀲𑀼𑀢𑁆𑀢𑁂 𑀚𑀸𑀕𑀭𑀺𑀢𑁂 𑀪𑀸𑀲𑀺𑀢𑁂 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺. 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀭𑀳𑁄 𑀫𑀜𑁆𑀜𑁂 𑀢𑀬𑀸 𑀦𑀺𑀲𑀺𑀦𑁆𑀦𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑀤𑀳𑀢𑀻𑀢𑀺𑀆𑀤𑀻𑀲𑀼 𑀘𑀲𑁆𑀲 𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀳𑀺 𑀕𑀫𑀦𑀁 𑀕𑀪𑀁, 𑀞𑀸𑀦𑀁 𑀞𑀺𑀢𑀁, 𑀦𑀺𑀲𑀻𑀤𑀦𑀁 𑀦𑀺𑀲𑀦𑁆𑀦𑀁, 𑀲𑀼𑀧𑀦𑀁 𑀲𑀼𑀢𑁆𑀢𑀁, 𑀚𑀸𑀕𑀭𑀡𑀁 𑀚𑀸𑀕𑀭𑀺𑀢𑀁, 𑀪𑀸𑀲𑀦𑀁 𑀪𑀸𑀲𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀲𑀚𑁆𑀚𑀸𑀢𑀺 𑀦𑀺𑀲𑀻𑀤𑀦𑀸. 𑀕𑁄𑀦𑀺𑀲𑀸𑀤𑁄𑀢𑀺 𑀕𑁄𑀦𑀺𑀲𑀚𑁆𑀚𑀦𑀸. 𑀉𑀧𑀦𑀺𑀲𑀸𑀢𑀺 𑀉𑀧𑀦𑀺𑀲𑀻𑀤𑀢𑀺 𑀨𑀮𑀁 𑀏𑀢𑁆𑀣𑀸𑀢𑀺 𑀉𑀧𑀦𑀺𑀲𑀸, 𑀓𑀸𑀭𑀡𑀁. 𑀦𑀺𑀲𑀸𑀤𑁂𑀢𑀼𑀦𑁆𑀢𑀺 𑀦𑀺𑀲𑀻𑀤𑀸𑀧𑁂𑀢𑀼𑀁. 𑀦𑀺𑀲𑀸𑀤𑁂𑀢𑁆𑀯𑀸𑀢𑀺 𑀦𑀺𑀲𑀻𑀤𑀸𑀧𑁂𑀢𑁆𑀯𑀸.

𑀪𑀸𑀯𑁂 ¶ 𑀦𑀧𑀼𑀁𑀲𑀓𑁄 𑀜𑁂𑀬𑁆𑀬𑁄, 𑀦𑀺𑀲𑀺𑀦𑁆𑀦𑀦𑁆𑀢𑀺 𑀭𑀯𑁄 𑀧𑀦;

𑀯𑀸𑀘𑁆𑀘𑀮𑀺𑀗𑁆𑀕𑁄 𑀢𑀺𑀮𑀺𑀗𑁆𑀕𑁄 𑀲𑁄, 𑀕𑀢𑀸𑀤𑀻𑀲𑀼𑀧𑁆𑀬𑀬𑀁 𑀦𑀬𑁄.

𑀘𑀤 𑀬𑀸𑀘𑀦𑁂. 𑀬𑀸𑀘𑀦𑀁 𑀅𑀚𑁆𑀛𑁂𑀲𑀦𑀁. 𑀘𑀤𑀢𑀺.

𑀫𑀺𑀤 𑀫𑁂𑀤 𑀫𑁂𑀥𑀸𑀳𑀺𑀁𑀲𑀸𑀲𑀼. 𑀫𑀺𑀤𑀢𑀺. 𑀫𑁂𑀤𑀢𑀺.

𑀦𑀺𑀤 𑀦𑁂𑀤 𑀓𑀼𑀘𑁆𑀙𑀸𑀲𑀦𑁆𑀦𑀺𑀓𑀭𑀺𑀲𑁂𑀲𑀼. 𑀓𑀼𑀘𑁆𑀙𑀸 𑀕𑀭𑀳𑀸. 𑀲𑀦𑁆𑀦𑀺𑀓𑀭𑀺𑀲𑀁 𑀯𑁄𑀳𑀸𑀭𑀯𑀺𑀲𑁂𑀲𑁄. 𑀦𑀺𑀤𑀢𑀺. 𑀦𑁂𑀤𑀢𑀺.

𑀩𑀼𑀦𑁆𑀤𑀺 𑀦𑀺𑀲𑀸𑀦𑁂. 𑀦𑀺𑀲𑀸𑀦𑀁 𑀢𑁂𑀚𑀦𑀁 𑀢𑀺𑀓𑁆𑀔𑀢𑀸. 𑀩𑀼𑀦𑁆𑀤𑀢𑀺. 𑀩𑁄𑀦𑁆𑀤𑀺.

𑀏𑀢𑁆𑀣 𑀘 𑀩𑁄𑀦𑁆𑀤𑀻𑀢𑀺 𑀲𑀭𑀻𑀭𑀁. 𑀢𑀜𑁆𑀳𑀺 𑀩𑀼𑀦𑁆𑀤𑀸𑀦𑀺 𑀢𑀺𑀓𑁆𑀔𑀸𑀦𑀺 𑀧𑀺𑀲𑀼𑀡𑀨𑀭𑀼𑀲𑀯𑀸𑀘𑀸𑀤𑀻𑀦𑀺 𑀯𑀸 𑀧𑀜𑁆𑀜𑀸𑀯𑀻𑀭𑀺𑀬𑀸𑀤𑀻𑀦𑀺 𑀯𑀸 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀩𑁄𑀦𑁆𑀤𑀻𑀢𑀺 𑀯𑀼𑀘𑁆𑀘𑀢𑀺, 𑀲𑀜𑁆𑀜𑁄𑀕𑀧𑀭𑀢𑁆𑀢𑁂𑀧𑀺 𑀉𑀓𑀸𑀭𑀲𑁆𑀲𑁄𑀓𑀸𑀭𑀸𑀤𑁂𑀲𑁄, 𑀧𑀸𑀧𑀓𑀮𑁆𑀬𑀸𑀡𑀚𑀦𑀯𑀲𑁂𑀦𑁂𑀲 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀩𑁄𑀦𑁆𑀤𑀺𑀲𑀤𑁆𑀤𑀲𑁆𑀲 𑀲𑀭𑀻𑀭𑀯𑀸𑀘𑀓𑀢𑀸 𑀧𑀦 𑁋

‘‘𑀦𑀸𑀳𑀁 𑀧𑀼𑀦 𑀦 𑀘 𑀧𑀼𑀦, 𑀦 𑀘𑀸𑀧𑀺 𑀅𑀧𑀼𑀦𑀧𑁆𑀧𑀼𑀦𑀁;

𑀳𑀢𑁆𑀣𑀺𑀩𑁄𑀦𑁆𑀤𑀺𑀁 𑀧𑀯𑁂𑀓𑁆𑀔𑀸𑀫𑀺, 𑀢𑀣𑀸 𑀳𑀺 𑀪𑀬𑀢𑀚𑁆𑀚𑀺𑀢𑁄’’𑀢𑀺𑀆𑀤𑀻𑀲𑀼

𑀤𑀝𑁆𑀞𑀩𑁆𑀩𑀸. 𑀇𑀫𑀸𑀦𑀺𑀲𑁆𑀲 𑀦𑀸𑀫𑀸𑀦𑀺 𑁋

𑀓𑀸𑀬𑁄 𑀤𑁂𑀳𑀁 𑀲𑀭𑀻𑀭𑀜𑁆𑀘, 𑀯𑀧𑀼 𑀩𑀺𑀫𑁆𑀩𑀜𑁆𑀘 𑀯𑀺𑀕𑁆𑀕𑀳𑀁;

𑀩𑁄𑀦𑁆𑀤𑀺 𑀕𑀢𑁆𑀢𑀁 𑀢𑀦𑀼 𑀘𑁂𑀯, 𑀅𑀢𑁆𑀢𑀪𑀸𑀯𑁄 𑀢𑀣𑀽𑀧𑀥𑀺;

𑀲𑀫𑀼𑀲𑁆𑀲𑀬𑁄𑀢𑀺 𑀘𑁂𑀢𑀸𑀦𑀺, 𑀤𑁂𑀳𑀦𑀸𑀫𑀸𑀦𑀺 𑀳𑁄𑀦𑁆𑀢𑀺 𑀳𑀺.

𑀯𑀤 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁. 𑀯𑀤𑀢𑀺, 𑀯𑀚𑁆𑀚𑀢𑀺. 𑀯𑀤𑁂𑀢𑀺, 𑀑𑀯𑀤𑀢𑀺, 𑀑𑀯𑀤𑁂𑀢𑀺, 𑀧𑀝𑀺𑀯𑀤𑀢𑀺. 𑀅𑀪𑀺𑀯𑀤𑀢𑀺, 𑀅𑀦𑀼𑀯𑀤𑀢𑀺, 𑀉𑀧𑀯𑀤𑀢𑀺, 𑀅𑀧𑀯𑀤𑀢𑀺. 𑀦𑀺𑀯𑀤𑀢𑀺. 𑀅𑀜𑁆𑀜𑀸𑀦𑀺𑀧𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀢𑀢𑁆𑀣 ‘‘𑀯𑀚𑁆𑀚𑀦𑁆𑀢𑀼 𑀪𑁄𑀦𑁆𑀢𑁄 𑀅𑀫𑁆𑀫’’𑀦𑁆𑀢𑀺 𑀧𑀸𑀴𑀺𑀤𑀲𑁆𑀲𑀦𑀢𑁄 𑀯𑀚𑁆𑀚𑀢𑀻𑀢𑀺 𑀧𑀤𑀁 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 𑀕𑀭𑀽 ‘‘𑀯𑀚𑁆𑀚𑁂𑀢𑀻’’𑀢𑀺 𑀭𑀽𑀧𑀁 𑀇𑀘𑁆𑀙𑀦𑁆𑀢𑀺, 𑀢𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀬𑀼𑀢𑁆𑀢𑀜𑁆𑀘𑁂 𑀕𑀳𑁂𑀢𑀩𑁆𑀩𑀁, ‘‘𑀉𑀧𑀸𑀲𑀓𑁄 𑀪𑀺𑀓𑁆𑀔𑀼𑀁 𑀯𑀤𑁂𑀢𑀺. 𑀢𑁂𑀦 𑀬𑁄𑀕𑁂𑀦 𑀚𑀦𑀓𑀸𑀬𑀁, 𑀑𑀯𑀤𑁂𑀢𑀺 𑀫𑀳𑀸𑀫𑀼𑀦𑀻’’𑀢𑀺 𑀘 𑀤𑀲𑁆𑀲𑀦𑀢𑁄 𑀯𑀤𑁂𑀢𑀺 𑀑𑀯𑀤𑁂𑀢𑀻𑀢𑀺 𑀘 𑀯𑀼𑀢𑁆𑀢𑀁. 𑀲𑀩𑁆𑀩𑀸𑀦𑁂𑀢𑀸𑀦𑀺 𑀲𑀼𑀤𑁆𑀥𑀓𑀢𑁆𑀢𑀼𑀧𑀤𑀸𑀦𑀺.

𑀑𑀯𑀸𑀤𑁂𑀢𑀺 ¶ , 𑀯𑀸𑀤𑀬𑀢𑀺, 𑀯𑀸𑀤𑀸𑀧𑁂𑀢𑀺, 𑀯𑀸𑀤𑀸𑀧𑀬𑀢𑀺. 𑀯𑀚𑁆𑀚𑁂𑀦𑁆𑀢𑁄, 𑀯𑀚𑁆𑀚𑀬𑀦𑁆𑀢𑁄, 𑀇𑀫𑀸𑀦𑀺 𑀳𑁂𑀢𑀼𑀓𑀢𑁆𑀢𑀼𑀧𑀤𑀸𑀦𑀺.

𑀓𑀫𑁆𑀫𑁂 ‘‘𑀯𑀤𑀺𑀬𑀢𑀺, 𑀑𑀯𑀤𑀺𑀬𑀢𑀺, 𑀯𑀚𑁆𑀚𑀺𑀬𑀢𑀺. 𑀯𑀤𑀺𑀬𑀫𑀸𑀦𑁄, 𑀯𑀚𑁆𑀚𑀫𑀸𑀦𑁄, 𑀑𑀯𑀤𑀺𑀬𑀫𑀸𑀦𑁄, 𑀑𑀯𑀚𑁆𑀚𑀫𑀸𑀦𑁄 𑀦 𑀓𑀭𑁄𑀢𑀺 𑀲𑀸𑀲𑀦𑀁’’ 𑀇𑀘𑁆𑀘𑀸𑀤𑀻𑀦𑀺 𑀪𑀯𑀦𑁆𑀢𑀺. ‘‘𑀯𑀸𑀤𑁄, 𑀑𑀯𑀸𑀤𑁄, 𑀧𑀝𑀺𑀯𑀸𑀤𑁄, 𑀧𑀯𑀸𑀤𑁄, 𑀅𑀪𑀺𑀯𑀸𑀤𑀦𑀁, 𑀅𑀦𑀼𑀯𑀸𑀤𑁄, 𑀉𑀧𑀯𑀸𑀤𑁄, 𑀅𑀧𑀯𑀸𑀤𑁄, 𑀯𑀺𑀯𑀸𑀤𑁄, 𑀦𑀺𑀯𑀸𑀤𑀦𑀁, 𑀯𑀚𑁆𑀚𑀁, 𑀯𑀤𑀦𑀁’’ 𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀦𑀸𑀫𑀺𑀓𑀧𑀤𑀸𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

‘‘𑀯𑀤𑀺𑀢𑀼𑀁, 𑀯𑀤𑀺𑀢𑁆𑀯𑀸, 𑀯𑀺𑀯𑀤𑀺𑀢𑁆𑀯𑀸’’ 𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀘 𑀢𑀼𑀫𑀦𑁆𑀢𑀸𑀤𑀻𑀦𑀺 𑀧𑀤𑀸𑀦𑀺.

𑀢𑀢𑁆𑀣 𑀯𑀸𑀤𑁄𑀢𑀺 𑀓𑀣𑀸. 𑀯𑀤𑀺𑀢𑀩𑁆𑀩𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀯𑀚𑁆𑀚𑀁, 𑀓𑀺𑀁 𑀢𑀁? 𑀯𑀘𑀦𑀁. 𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦, 𑀲𑀫𑀗𑁆𑀕𑀺𑀦𑀻 𑀲𑀸𑀫𑀺𑀓𑁂𑀦 𑀳𑁄𑀫𑀻𑀢𑀺 𑀏𑀢𑁆𑀣 𑀳𑀺 𑀯𑀘𑀦𑀁 ‘‘𑀯𑀚𑁆𑀚’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀤𑀦𑀁, 𑀫𑀼𑀔𑀁. 𑀫𑀼𑀔𑀲𑁆𑀲 𑀳𑀺 𑀇𑀫𑀸𑀦𑀺 𑀦𑀸𑀫𑀸𑀦𑀺 𑁋

𑀯𑀤𑀦𑀁 𑀮𑀧𑀦𑀁 𑀢𑀼𑀡𑁆𑀟𑀁, 𑀫𑀼𑀔 𑀫𑀲𑁆𑀲𑀜𑁆𑀘 𑀆𑀦𑀦𑀁;

𑀲𑀽𑀓𑀭𑀸𑀤𑀺𑀫𑀼𑀔𑀁 𑀢𑀼𑀡𑁆𑀟-𑀫𑀺𑀢𑀺 𑀜𑁂𑀬𑁆𑀬𑀁 𑀯𑀺𑀲𑁂𑀲𑀢𑁄.

𑀢𑀢𑁆𑀭 𑀯𑀤𑀢𑀻𑀢𑀺 𑀧𑀺𑀢𑀸 𑀧𑀼𑀢𑁆𑀢𑀁 𑀯𑀤𑀢𑀺. 𑀅𑀧𑀺𑀘 𑀯𑀤𑀢𑀻𑀢𑀺 𑀪𑁂𑀭𑀻 𑀯𑀤𑀢𑀺, 𑀦𑀸𑀤𑀁 𑀫𑀼𑀜𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀯𑀚𑁆𑀚𑀢𑀻𑀢𑀺 𑀏𑀢𑁆𑀣𑀸𑀧𑀺.

𑀢𑀢𑁆𑀭𑀸𑀬𑀁 𑀧𑀤𑀫𑀸𑀮𑀸, 𑀯𑀤𑀢𑀺, 𑀯𑀤𑀦𑁆𑀢𑀺. 𑀯𑀤𑀲𑀺, 𑀯𑀤𑀣. 𑀯𑀤𑀸𑀫𑀺, 𑀯𑀤𑀸𑀫. 𑀯𑀤𑀢𑁂, 𑀯𑀤𑀦𑁆𑀢𑁂. 𑀯𑀤𑀲𑁂, 𑀯𑀤𑀯𑁆𑀳𑁂. 𑀯𑀤𑁂, 𑀯𑀤𑀫𑁆𑀳𑁂.

𑀯𑀤𑀢𑀼, 𑀯𑀤𑀦𑁆𑀢𑀼. 𑀯𑀤𑀸𑀳𑀺, 𑀯𑀤, 𑀯𑀤𑀣. 𑀯𑀤𑀸𑀫𑀺, 𑀯𑀤𑀸𑀫. 𑀯𑀤𑀢𑀁, 𑀯𑀤𑀦𑁆𑀢𑀁. 𑀯𑀤𑀲𑁆𑀲𑀼, 𑀯𑀤𑀯𑁆𑀳𑁄. 𑀯𑀤𑁂, 𑀯𑀤𑀸𑀫𑀲𑁂.

𑀯𑀚𑁆𑀚𑀢𑀺, 𑀯𑀚𑁆𑀚𑀦𑁆𑀢𑀺. 𑀯𑀚𑁆𑀚𑀲𑀺, 𑀯𑀚𑁆𑀚𑀣. 𑀯𑀚𑁆𑀚𑀸𑀫𑀺, 𑀯𑀚𑁆𑀚𑀸𑀫. 𑀯𑀚𑁆𑀚𑀢𑁂, 𑀯𑀚𑁆𑀚𑀦𑁆𑀢𑁂. 𑀯𑀚𑁆𑀚𑀲𑁂, 𑀯𑀚𑁆𑀚𑀯𑁆𑀳𑁂. 𑀯𑀚𑁆𑀚𑁂, 𑀯𑀚𑁆𑀚𑀫𑁆𑀳𑁂.

𑀯𑀚𑁆𑀚𑀢𑀼 ¶ , 𑀯𑀚𑁆𑀚𑀦𑁆𑀢𑀼. 𑀯𑀚𑁆𑀚𑀸𑀳𑀺, 𑀯𑀚𑁆𑀚, 𑀯𑀚𑁆𑀚𑀣. 𑀯𑀚𑁆𑀚𑀸𑀫𑀺, 𑀯𑀚𑁆𑀚𑀸𑀫. 𑀯𑀚𑁆𑀚𑀢𑀁, 𑀯𑀚𑁆𑀚𑀦𑁆𑀢𑀁. 𑀯𑀚𑁆𑀚𑀲𑁆𑀲𑀼, 𑀯𑀚𑁆𑀚𑀯𑁆𑀳𑁄. 𑀯𑀚𑁆𑀚𑁂, 𑀯𑀚𑁆𑀚𑀸𑀫𑁆𑀳𑀲𑁂. 𑀇𑀫𑀸 𑀤𑁆𑀯𑁂 𑀧𑀤𑀫𑀸𑀮𑀸 𑀯𑀤𑀥𑀸𑀢𑀼𑀲𑁆𑀲 𑀯𑀚𑁆𑀚𑀸𑀤𑁂𑀲𑀯𑀲𑁂𑀦 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀢𑁆𑀭𑀸𑀬𑀁 𑀲𑀼𑀔𑀼𑀫𑀢𑁆𑀣𑀯𑀺𑀦𑀺𑀘𑁆𑀙𑀬𑁄, ‘‘𑀫𑀸𑀦𑀼𑀲𑁆𑀲𑀓𑀸 𑀘 𑀤𑀺𑀩𑁆𑀩𑀸 𑀘, 𑀢𑀽𑀭𑀺𑀬𑀸 𑀯𑀚𑁆𑀚𑀦𑁆𑀢𑀺 𑀢𑀸𑀯𑀤𑁂’’𑀢𑀺 𑀧𑀸𑀴𑀺. 𑀏𑀢𑁆𑀣 𑀯𑀚𑁆𑀚𑀦𑁆𑀢𑀻𑀢𑀺 𑀇𑀤𑀁 𑀲𑀼𑀤𑁆𑀥𑀓𑀢𑁆𑀢𑀼𑀧𑀤𑀁 𑀢𑀤𑁆𑀤𑀻𑀧𑀓𑀢𑁆𑀢𑀸. 𑀓𑀺𑀁 𑀯𑀺𑀬?

‘‘𑀉𑀤𑀻𑀭𑀬𑀦𑁆𑀢𑀼 𑀲𑀗𑁆𑀔𑀧𑀡𑀯𑀸, 𑀯𑀤𑀦𑁆𑀢𑀼 𑀏𑀓𑀧𑁄𑀓𑁆𑀔𑀭𑀸;

𑀦𑀤𑀦𑁆𑀢𑀼 𑀪𑁂𑀈 𑀲𑀦𑁆𑀦𑀤𑁆𑀥𑀸, 𑀯𑀕𑁆𑀕𑀽 𑀯𑀤𑀦𑁆𑀢𑀼 𑀤𑀼𑀦𑁆𑀤𑀼𑀪𑀻’’𑀢𑀺

𑀏𑀢𑁆𑀣 ‘‘𑀉𑀤𑀻𑀭𑀬𑀦𑁆𑀢𑀼 𑀯𑀤𑀦𑁆𑀢𑀼’’𑀆𑀤𑀻𑀦𑀺 𑀯𑀺𑀬. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀯𑀚𑁆𑀚𑀦𑁆𑀢𑀻𑀢𑀺 𑀯𑀚𑁆𑀚𑀺𑀁𑀲𑀽𑀢𑀺 𑀅𑀢𑀻𑀢𑀯𑀘𑀦𑁂 𑀯𑀢𑁆𑀢𑀫𑀸𑀦𑀯𑀘𑀦𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀲𑀼𑀤𑁆𑀥𑀓𑀢𑁆𑀢𑀼𑀯𑀲𑁂𑀦 𑀯𑀺𑀯𑀭𑀡𑀁 𑀓𑀢𑀁, 𑀢𑀲𑁆𑀫𑀸 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀯𑀤𑀥𑀸𑀢𑀼𑀲𑁆𑀲 𑀯𑀚𑁆𑀚𑀸𑀤𑁂𑀲𑁄 𑀤𑀝𑁆𑀞𑀩𑁆𑀩𑁄.

‘‘𑀲𑀗𑁆𑀔𑀸 𑀘 𑀧𑀡𑀯𑀸 𑀘𑁂𑀯, 𑀅𑀣𑁄𑀧𑀺 𑀤𑀺𑀡𑁆𑀟𑀺𑀫𑀸 𑀩𑀳𑀽;

𑀅𑀦𑁆𑀢𑀮𑀺𑀓𑁆𑀔𑀫𑁆𑀳𑀺 𑀯𑀚𑁆𑀚𑀦𑁆𑀢𑀺, 𑀤𑀺𑀲𑁆𑀯𑀸𑀦𑀘𑁆𑀙𑁂𑀭𑀓𑀁 𑀦𑀪𑁂’’𑀢𑀺

𑀏𑀢𑁆𑀣 𑀧𑀦 𑀯𑀚𑁆𑀚𑀦𑁆𑀢𑀻𑀢𑀺 𑀳𑁂𑀢𑀼𑀓𑀢𑁆𑀢𑀼𑀧𑀤𑀁 𑀢𑀤𑁆𑀤𑀻𑀧𑀓𑀢𑁆𑀢𑀸. 𑀢𑀜𑁆𑀘 𑀔𑁄 𑀯𑀡𑁆𑀡𑀲𑀦𑁆𑀥𑀺𑀯𑀺𑀲𑀬𑀢𑁆𑀢𑀸 𑀯𑀸𑀤𑀬𑀦𑁆𑀢𑀻𑀢𑀺 𑀓𑀸𑀭𑀺𑀢𑀧𑀤𑀭𑀽𑀧𑁂𑀦 𑀲𑀺𑀤𑁆𑀥𑀁. 𑀢𑀣𑀸 𑀳𑀺 ‘‘𑀯𑀸𑀤𑀬𑀦𑁆𑀢𑀻’’𑀢𑀺 𑀧𑀤𑀭𑀽𑀧𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀬𑀓𑀸𑀭𑁂 𑀧𑀭𑁂 𑀲𑀭𑀮𑁄𑀧𑁄 𑀓𑀢𑁄, 𑀤𑁆𑀬𑀓𑀸𑀭𑀲𑀜𑁆𑀜𑁄𑀕𑀲𑁆𑀲 𑀚𑁆𑀚𑀓𑀸𑀭𑀤𑁆𑀯𑀬𑀁 𑀧𑀼𑀩𑁆𑀩𑀓𑁆𑀔𑀭𑀲𑁆𑀲 𑀭𑀲𑁆𑀲𑀢𑁆𑀢𑀜𑁆𑀘 𑀪𑀯𑀢𑀺. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀯𑀚𑁆𑀚𑀦𑁆𑀢𑀻𑀢𑀺 𑀯𑀸𑀤𑀬𑀦𑁆𑀢𑀻’’𑀢𑀺 𑀳𑁂𑀢𑀼𑀓𑀢𑁆𑀢𑀼𑀯𑀲𑁂𑀦 𑀯𑀺𑀯𑀭𑀡𑀁. 𑀢𑀣𑀸 𑀳𑀺 ‘‘𑀤𑁂𑀯𑀢𑀸 𑀦𑀪𑁂 𑀅𑀘𑁆𑀙𑁂𑀭𑀓𑀁 𑀪𑀕𑀯𑀢𑁄 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀅𑀦𑁆𑀢𑀮𑀺𑀓𑁆𑀔𑁂 𑀏𑀢𑀸𑀦𑀺 𑀲𑀗𑁆𑀔𑀧𑀡𑀯𑀸𑀤𑀻𑀦𑀺 𑀢𑀽𑀭𑀺𑀬𑀸𑀦𑀺 𑀯𑀸𑀤𑀬𑀦𑁆𑀢𑀻’’𑀢𑀺 𑀳𑁂𑀢𑀼𑀓𑀢𑁆𑀢𑀼𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 𑀪𑀯𑀢𑀺, 𑀢𑀲𑁆𑀫𑀸 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀯𑀤𑀲𑁆𑀲 𑀯𑀚𑁆𑀚𑀸𑀤𑁂𑀲𑁄 𑀦 𑀪𑀯𑀢𑀺.

𑀓𑁂𑀘𑁂𑀢𑁆𑀣 𑀯𑀤𑁂𑀬𑁆𑀬𑀼𑀁 ‘‘𑀅𑀦𑁆𑀢𑀮𑀺𑀓𑁆𑀔𑀫𑁆𑀳𑀺 𑀯𑀚𑁆𑀚𑀦𑁆𑀢𑀺, 𑀤𑀺𑀲𑁆𑀯𑀸𑀦𑀘𑁆𑀙𑁂𑀭𑀓𑀁 𑀦𑀪𑁂’’𑀢𑀺 𑀏𑀢𑁆𑀣𑀸𑀧𑀺 ‘‘𑀯𑀚𑁆𑀚𑀦𑁆𑀢𑀻’’𑀢𑀺 𑀧𑀤𑀁 𑀲𑀼𑀤𑁆𑀥𑀓𑀢𑁆𑀢𑀼𑀧𑀤𑀫𑁂𑀯, 𑀦 𑀳𑁂𑀢𑀼𑀓𑀢𑁆𑀢𑀼𑀧𑀤𑀁 ¶ ‘‘𑀯𑀚𑁆𑀚𑀦𑁆𑀢𑀻𑀢𑀺 𑀯𑀸𑀤𑀬𑀦𑁆𑀢𑀻’’𑀢𑀺 𑀯𑀺𑀯𑀭𑀡𑁂 𑀓𑀢𑁂𑀧𑀺, 𑀢𑀣𑀸 𑀳𑀺 ‘‘𑀬𑁂 𑀓𑁂𑀘𑀺𑀫𑁂 𑀤𑀺𑀝𑁆𑀞𑀺𑀧𑀭𑀺𑀩𑁆𑀩𑀲𑀸𑀦𑀸, ‘‘𑀇𑀤𑀫𑁂𑀯 𑀲𑀘𑁆𑀘’𑀦𑁆𑀢𑀺 𑀯𑀺𑀯𑀸𑀤𑀬𑀦𑁆𑀢𑀻’’𑀢𑀺 𑀘 ‘‘𑀏𑀯𑀫𑁆𑀧𑀺 𑀯𑀺𑀕𑁆𑀕𑀬𑁆𑀳 𑀯𑀺𑀯𑀸𑀤𑀬𑀦𑁆𑀢𑀻’’𑀢𑀺 𑀘 𑀏𑀯𑀫𑀸𑀤𑀻𑀲𑀼 𑀯𑀤𑀦𑁆𑀢𑀺𑀧𑀤𑁂𑀦 𑀲𑀫𑀸𑀦𑀢𑁆𑀣𑀁 ‘‘𑀯𑀸𑀤𑀬𑀦𑁆𑀢𑀻’’𑀢𑀺 𑀧𑀤𑀜𑁆𑀘 𑀲𑀸𑀲𑀦𑁂 𑀤𑀺𑀝𑁆𑀞’’𑀦𑁆𑀢𑀺? 𑀢𑀦𑁆𑀦, ‘‘𑀤𑀺𑀲𑁆𑀯𑀸’’𑀢𑀺 𑀤𑀲𑁆𑀲𑀦𑀓𑁆𑀭𑀺𑀬𑀸𑀯𑀘𑀦𑀢𑁄. 𑀦 𑀳𑀺 𑀲𑀗𑁆𑀔𑀧𑀡𑀯𑀸𑀤𑀻𑀦𑀁 𑀧𑀸𑀝𑀺𑀳𑀸𑀭𑀺𑀬𑀸𑀤𑀺𑀤𑀲𑁆𑀲𑀦𑀁 𑀉𑀧𑀧𑀚𑁆𑀚𑀢𑀺 𑀤𑀲𑁆𑀲𑀦𑀘𑀺𑀢𑁆𑀢𑀲𑁆𑀲 𑀅𑀪𑀸𑀯𑀢𑁄𑀢𑀺. 𑀲𑀘𑁆𑀘𑀁, 𑀢𑀣𑀸𑀧𑀺 𑁋

‘‘𑀭𑀸𑀤𑀦𑁆𑀢𑁂 𑀤𑀸𑀭𑀓𑁂 𑀤𑀺𑀲𑁆𑀯𑀸, 𑀉𑀩𑁆𑀩𑀺𑀤𑁆𑀥𑀸 𑀯𑀺𑀧𑀼𑀮𑀸 𑀤𑀼𑀫𑀸;

𑀲𑀬𑀫𑁂𑀯𑁄𑀦𑀫𑀺𑀢𑁆𑀯𑀸𑀦, 𑀉𑀧𑀕𑀘𑁆𑀙𑀦𑁆𑀢𑀺 𑀤𑀸𑀭𑀓𑁂’’𑀢𑀺

𑀏𑀢𑁆𑀣 𑀯𑀺𑀬 𑀉𑀧𑀘𑀭𑀺𑀢𑀢𑁆𑀢𑀸 𑀉𑀧𑀧𑀚𑁆𑀚𑀢𑁂𑀯 𑀤𑀲𑁆𑀲𑀦𑀯𑀘𑀦𑀁. 𑀢𑀲𑁆𑀫𑀸 ‘‘𑀯𑀚𑁆𑀚𑀦𑁆𑀢𑀻𑀢𑀺 𑀯𑀸𑀤𑀬𑀦𑁆𑀢𑀻’’𑀢𑀺 𑀯𑀺𑀯𑀭𑀡𑀁 𑀲𑀼𑀤𑁆𑀥𑀓𑀢𑁆𑀢𑀼𑀯𑀲𑁂𑀦 𑀓𑀢𑀦𑁆𑀢𑀺? 𑀢𑀦𑁆𑀦, 𑀳𑁂𑀝𑁆𑀞𑀸 𑁋

‘‘𑀲𑀗𑁆𑀕𑀻𑀢𑀺𑀬𑁄 𑀘 𑀯𑀢𑁆𑀢𑀦𑁆𑀢𑀺, 𑀅𑀫𑁆𑀩𑀭𑁂 𑀅𑀦𑀺𑀮𑀜𑁆𑀚𑀲𑁂;

𑀘𑀫𑁆𑀫𑀦𑀤𑁆𑀥𑀸𑀦𑀺 𑀯𑀸𑀤𑁂𑀦𑁆𑀢𑀺, 𑀤𑀺𑀲𑁆𑀯𑀸𑀦𑀘𑁆𑀙𑁂𑀭𑀓𑀁 𑀦𑀪𑁂’’𑀢𑀺

𑀇𑀫𑀺𑀦𑁆𑀦𑀸 𑀕𑀸𑀣𑀸𑀬 ‘‘𑀯𑀸𑀤𑁂𑀦𑁆𑀢𑀻𑀢𑀺 𑀯𑀸𑀤𑀬𑀦𑁆𑀢𑀺 𑀤𑁂𑀯𑀢𑀸’’𑀢𑀺 𑀲𑀧𑀸𑀞𑀲𑁂𑀲𑀲𑁆𑀲 𑀅𑀢𑁆𑀣𑀯𑀺𑀯𑀭𑀡𑀲𑁆𑀲 𑀳𑁂𑀢𑀼𑀓𑀢𑁆𑀢𑀼𑀯𑀲𑁂𑀦 𑀓𑀢𑀢𑁆𑀢𑀸. 𑀅𑀣𑀸𑀧𑀺 𑀯𑀤𑁂𑀬𑁆𑀬𑀼𑀁 ‘‘𑀲𑀗𑁆𑀔𑀸 𑀘 𑀧𑀡𑀯𑀸 𑀘𑁂𑀯, 𑀅𑀣𑁄𑀧𑀺 𑀤𑀺𑀡𑁆𑀟𑀺𑀫𑀸 𑀩𑀳𑀽’𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀯𑀚𑁆𑀚𑀦𑁆𑀢𑀻𑀢𑀺 𑀧𑀤𑀁 𑀓𑀫𑁆𑀫𑀯𑀸𑀘𑀓𑀧𑀤’’𑀦𑁆𑀢𑀺 𑀘𑁂? 𑀢𑀫𑁆𑀧𑀺 𑀦, 𑀓𑀫𑁆𑀫𑀯𑀲𑁂𑀦 𑀯𑀺𑀯𑀭𑀡𑀲𑁆𑀲 𑀅𑀓𑀢𑀢𑁆𑀢𑀸, 𑀓𑀢𑁆𑀢𑀼𑀯𑀲𑁂𑀦 𑀧𑀦 𑀓𑀢𑀢𑁆𑀢𑀸𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀤𑁆𑀯𑀺𑀕𑀡𑀺𑀓𑁄 𑀯𑀤𑀥𑀸𑀢𑀼 𑀪𑀽𑀯𑀸𑀤𑀺𑀕𑀡𑀺𑀓𑁄 𑀘 𑀘𑀼𑀭𑀸𑀤𑀺𑀕𑀡𑀺𑀓𑁄 𑀘. 𑀲𑁄 𑀳𑀺 𑀪𑀽𑀯𑀸𑀤𑀺𑀕𑀡𑁂 𑀯𑀢𑁆𑀢𑀦𑁆𑀢𑁄 ‘‘𑀯𑀤𑀢𑀺 𑀯𑀚𑁆𑀚𑀢𑀻’’𑀢𑀺 𑀲𑀼𑀤𑁆𑀥𑀓𑀢𑁆𑀢𑀼𑀭𑀽𑀧𑀸𑀦𑀺 𑀚𑀦𑁂𑀢𑁆𑀯𑀸 ‘‘𑀯𑀸𑀤𑁂𑀢𑀺, 𑀯𑀸𑀤𑀬𑀢𑀺, 𑀯𑀸𑀤𑀸𑀧𑁂𑀢𑀺, 𑀯𑀸𑀤𑀸𑀧𑀬𑀢𑀻’’𑀢𑀺 𑀘𑀢𑁆𑀢𑀸𑀭𑀺 𑀳𑁂𑀢𑀼𑀓𑀢𑁆𑀢𑀼𑀭𑀽𑀧𑀸𑀦𑀺 𑀚𑀦𑁂𑀢𑀺, 𑀘𑀼𑀭𑀸𑀤𑀺𑀕𑀡𑁂 𑀧𑀦 ‘‘𑀯𑀸𑀤𑁂𑀢𑀺, 𑀯𑀸𑀤𑀬𑀢𑀻’’𑀢𑀺 ¶ 𑀲𑀼𑀤𑁆𑀥𑀓𑀢𑁆𑀢𑀼𑀭𑀽𑀧𑀸𑀦𑀺 𑀚𑀦𑁂𑀢𑁆𑀯𑀸 ‘‘𑀯𑀸𑀤𑀸𑀧𑁂𑀢𑀺, 𑀯𑀸𑀤𑀸𑀧𑀬𑀢𑀻’’𑀢𑀺 𑀘 𑀤𑁆𑀯𑁂 𑀳𑁂𑀢𑀼𑀓𑀢𑁆𑀢𑀼𑀭𑀽𑀧𑀸𑀦𑀺 𑀚𑀦𑁂𑀢𑀺, 𑀢𑀲𑁆𑀫𑀸 𑀲𑀸𑀲𑀦𑁂 ‘‘𑀯𑀸𑀤𑁂𑀦𑁆𑀢𑀺 𑀯𑀸𑀤𑀬𑀦𑁆𑀢𑀻’’𑀢𑀺 𑀲𑀼𑀤𑁆𑀥𑀓𑀢𑁆𑀢𑀼𑀧𑀤𑀸𑀦𑀺 𑀤𑀺𑀲𑁆𑀲𑀦𑁆𑀢𑀺. ‘‘𑀯𑀤𑁂𑀬𑁆𑀬, 𑀯𑀤𑁂𑀬𑁆𑀬𑀼𑀁’’ 𑀇𑀘𑁆𑀘𑀸𑀤𑀺 𑀲𑀩𑁆𑀩𑀁 𑀦𑁂𑀬𑁆𑀬𑀁. ‘‘𑀯𑀚𑁆𑀚𑁂𑀬𑁆𑀬, 𑀯𑀚𑁆𑀚𑁂𑀬𑁆𑀬𑀼𑀁’’ 𑀇𑀘𑁆𑀘𑀸𑀤𑀺 𑀘 𑀲𑀩𑁆𑀩𑀁 𑀦𑁂𑀬𑁆𑀬𑀁 𑀯𑀚𑁆𑀚𑀸𑀤𑁂𑀲𑀯𑀲𑁂𑀦.

𑀅𑀣 𑀯𑀸 𑀯𑀤𑁂𑀬𑁆𑀬, 𑀯𑀤𑁂𑀬𑁆𑀬𑀼𑀁, 𑀯𑀚𑁆𑀚𑀼𑀁. 𑀧𑀺𑀢𑀸 𑀫𑀸𑀢𑀸 𑀘 𑀢𑁂 𑀤𑀚𑁆𑀚𑀼𑀦𑁆𑀢𑀺 𑀧𑀤𑀫𑀺𑀯. 𑀏𑀢𑁆𑀣 𑀘 ‘‘𑀯𑀚𑁆𑀚𑀼𑀁 𑀯𑀸 𑀢𑁂 𑀦 𑀯𑀸 𑀯𑀚𑁆𑀚𑀼𑀁, 𑀦𑀢𑁆𑀣𑀺 𑀦𑀸𑀲𑀸𑀬 𑀭𑀽𑀳𑀦𑀸’’𑀢𑀺 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. 𑀯𑀤𑁂𑀬𑁆𑀬𑀼𑀁 𑀯𑀸𑀦 𑀯𑀤𑁂𑀬𑁆𑀬𑀼𑀁𑀯𑀸𑀢𑀺 𑀅𑀢𑁆𑀣𑁄. 𑀯𑀤𑁂𑀬𑁆𑀬𑀸𑀲𑀺, 𑀯𑀚𑁆𑀚𑀸𑀲𑀺, 𑀯𑀚𑁆𑀚𑁂𑀲𑀺 𑀇𑀘𑁆𑀘𑀧𑀺. 𑀯𑀼𑀢𑁆𑀢𑁄 𑀯𑀚𑁆𑀚𑀸𑀲𑀺 𑀯𑀦𑁆𑀤𑀦𑀁. 𑀯𑀚𑁆𑀚𑁂𑀲𑀺 𑀔𑁄 𑀢𑁆𑀯𑀁 𑀯𑀸𑀫𑀽𑀭𑀁. 𑀯𑀤𑁂𑀬𑁆𑀬𑀸𑀣, 𑀯𑀚𑁆𑀚𑀸𑀣. 𑀅𑀫𑁆𑀫𑀁 𑀅𑀭𑁄𑀕𑀁 𑀯𑀚𑁆𑀚𑀸𑀣. 𑀯𑀤𑁂𑀬𑁆𑀬𑀸𑀫𑀺, 𑀯𑀚𑁆𑀚𑀸𑀫𑀺, 𑀯𑀤𑁂𑀬𑁆𑀬𑀸𑀫, 𑀯𑀚𑁆𑀚𑀸𑀫. 𑀯𑀤𑁂𑀣, 𑀯𑀤𑁂𑀭𑀁. 𑀯𑀤𑁂𑀣𑁄, 𑀯𑀤𑁂𑀬𑁆𑀬𑀸𑀯𑁆𑀳𑁄, 𑀯𑀚𑁆𑀚𑀸𑀯𑁆𑀳𑁄. 𑀯𑀤𑁂𑀬𑁆𑀬𑀁, 𑀯𑀚𑁆𑀚𑀁, 𑀯𑀤𑁂𑀬𑁆𑀬𑀸𑀫𑁆𑀳𑁂, 𑀯𑀚𑁆𑀚𑀸𑀫𑁆𑀳𑁂. 𑀧𑀼𑀩𑁆𑀩𑁂 𑀯𑀺𑀬 𑀇𑀥𑀸𑀧𑀺 𑀬𑀓𑀸𑀭𑁂 𑀧𑀭𑁂 𑀲𑀭𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀅𑀜𑁆𑀜𑀸𑀦𑀺𑀧𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀸𑀦𑀺.

𑀇𑀤𑀸𑀦𑀺 𑀧𑀭𑁄𑀓𑁆𑀔𑀸𑀤𑀺𑀭𑀽𑀧𑀸𑀦𑀺 𑀓𑀣𑀬𑀸𑀫. 𑀯𑀤, 𑀧𑀸𑀯𑀤, 𑀬𑀣𑀸 𑀩𑀪𑀼𑀯. 𑀤𑀓𑀸𑀭𑀮𑁄𑀧𑁂 ‘‘𑀧𑀸𑀯’’ 𑀇𑀢𑀺𑀧𑀺 𑀭𑀽𑀧𑀁 𑀪𑀯𑀢𑀺, ‘‘𑀧𑀝𑀺𑀧𑀁 𑀯𑀤𑁂𑀳𑀺 𑀪𑀤𑁆𑀤𑀦𑁆𑀢𑁂’’𑀢𑀺 𑀏𑀢𑁆𑀣 ‘‘𑀧𑀝𑀺𑀧’’𑀦𑁆𑀢𑀺 𑀧𑀤𑀁 𑀯𑀺𑀬. 𑀢𑀣𑀸 𑀳𑀺 ‘‘𑀬𑁄 𑀆𑀢𑀼𑀫𑀸𑀦𑀁 𑀲𑀬𑀫𑁂𑀯 𑀧𑀸𑀯’’ 𑀇𑀢𑀺 𑀧𑀸𑀴𑀺 𑀤𑀺𑀲𑁆𑀲𑀢𑀺. 𑀏𑀢𑁆𑀣 𑀧𑀲𑀤𑁆𑀤𑁄 𑀉𑀧𑀲𑀕𑁆𑀕𑁄 𑀤𑀻𑀖𑀁 𑀓𑀢𑁆𑀯𑀸 𑀯𑀼𑀢𑁆𑀢𑁄 ‘‘𑀧𑀸𑀯𑀤𑀢𑀺 𑀧𑀸𑀯𑀘𑀦’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬, 𑀧𑀸𑀯𑀸𑀢𑀺 𑀘 𑀇𑀤𑀁 𑀅𑀢𑀻𑀢𑀯𑀘𑀦𑀁, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀢𑀻𑀢𑀯𑀘𑀦𑀁 𑀇𑀤𑀦𑁆𑀢𑀺 𑀚𑀸𑀦𑀦𑁆𑀢𑁄𑀧𑀺 𑀕𑀭𑀼 𑀯𑀢𑁆𑀢𑀫𑀸𑀦𑀯𑀘𑀦𑀯𑀲𑁂𑀦 ‘‘𑀧𑀸𑀯𑀸𑀢𑀺 𑀯𑀤𑀢𑀻’’𑀢𑀺 𑀯𑀺𑀯𑀭𑀡𑀫𑀓𑀸𑀲𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀓𑀸𑀮𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀅𑀢𑁆𑀣𑀲𑁆𑀲 𑀯𑀢𑁆𑀢𑀩𑁆𑀩𑀢𑁆𑀢𑀸.

𑀆𑀬𑀲𑁆𑀫𑀸𑀧𑀺 𑀘 𑀲𑀸𑀭𑀺𑀧𑀼𑀢𑁆𑀢𑁄 𑀦𑀺𑀤𑁆𑀤𑁂𑀲𑁂 ‘‘𑀬𑁄 𑀆𑀢𑀼𑀫𑀸𑀦𑀁 𑀲𑀬𑀫𑁂𑀯 𑀧𑀸𑀯𑀸’’𑀢𑀺 𑀧𑀤𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀆𑀢𑀼𑀫𑀸 𑀯𑀼𑀘𑁆𑀘𑀢𑀺 𑀅𑀢𑁆𑀢𑀸, 𑀲𑀬𑀫𑁂𑀯 𑀧𑀸𑀯𑀸𑀢𑀺 𑀲𑀬𑀫𑁂𑀯 𑀅𑀢𑁆𑀢𑀸𑀦𑀁 𑀧𑀸𑀯𑀤𑀢𑀺, ‘‘𑀅𑀳𑀫𑀲𑁆𑀫𑀺 ¶ 𑀲𑀻𑀮𑀲𑀫𑁆𑀧𑀦𑁆𑀦𑁄’’𑀢𑀺 𑀯𑀸 ‘‘𑀯𑀢𑀲𑀫𑁆𑀧𑀦𑁆𑀦𑁄’’𑀢𑀺 𑀯𑀸𑀢𑀺 𑀯𑀢𑁆𑀢𑀫𑀸𑀦𑀯𑀘𑀦𑁂𑀦 𑀅𑀢𑁆𑀣𑀁 𑀦𑀺𑀤𑁆𑀤𑀺𑀲𑀺. 𑀅𑀣 𑀯𑀸 𑀧𑀸𑀯𑀸𑀢𑀺 𑀇𑀤𑀁 𑀦 𑀓𑁂𑀯𑀮𑀁 𑀯𑀤𑀥𑀸𑀢𑀼𑀯𑀲𑁂𑀦𑁂𑀯 𑀦𑀺𑀧𑁆𑀨𑀦𑁆𑀦𑀁, 𑀅𑀣 𑀔𑁄 𑀉𑀥𑀸𑀢𑀼𑀯𑀲𑁂𑀦𑀧𑀺. 𑀢𑀣𑀸 𑀳𑀺 𑀇𑀤𑀁 𑀧𑀧𑀼𑀩𑁆𑀩𑀲𑁆𑀲 𑀉𑀲𑀤𑁆𑀤𑁂 𑀇𑀢𑀺 𑀥𑀸𑀢𑀼𑀲𑁆𑀲 𑀧𑀬𑁄𑀕𑁂 𑀉𑀓𑀸𑀭𑀲𑁆𑀲 𑀑𑀓𑀸𑀭𑀸𑀤𑁂𑀲𑀁 𑀓𑀢𑁆𑀯𑀸 𑀢𑀢𑁄 𑀧𑀭𑁄𑀓𑁆𑀔𑀸𑀪𑀽𑀢𑁂 𑀅𑀓𑀸𑀭𑁂 𑀧𑀭𑁂 𑀑𑀓𑀸𑀭𑀲𑁆𑀲 𑀆𑀯𑀸𑀤𑁂𑀲𑀁 𑀢𑀢𑁄 𑀘 𑀲𑀦𑁆𑀥𑀺𑀓𑀺𑀘𑁆𑀘𑀁 𑀓𑀢𑁆𑀯𑀸 𑀲𑀺𑀚𑁆𑀛𑀢𑀺, 𑀢𑀲𑁆𑀫𑀸 𑀉𑀥𑀸𑀢𑀼𑀲𑁆𑀲 𑀯𑀤𑀥𑀸𑀢𑀼𑀬𑀸 𑀲𑀫𑀸𑀦𑀢𑁆𑀣𑀢𑁆𑀢𑀸 𑀢𑀦𑁆𑀦𑀺𑀧𑁆𑀨𑀦𑁆𑀦𑀭𑀽𑀧𑀲𑁆𑀲 𑀘 𑀯𑀤𑀥𑀸𑀢𑀼𑀬𑀸 𑀦𑀺𑀧𑁆𑀨𑀦𑁆𑀦𑀭𑀽𑀧𑁂𑀦 𑀲𑀫𑀸𑀦𑀭𑀽𑀧𑀢𑁆𑀢𑀸 ‘‘𑀲𑀬𑀫𑁂𑀯 𑀅𑀢𑁆𑀢𑀸𑀦𑀁 𑀧𑀸𑀯𑀤𑀢𑀻’’𑀢𑀺 𑀯𑀤𑀥𑀸𑀢𑀼𑀯𑀲𑁂𑀦 𑀦𑀺𑀤𑁆𑀤𑀺𑀲𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀤𑀸𑀦𑀺 𑀯𑀺𑀘𑁆𑀙𑀺𑀦𑁆𑀦𑀸 𑀧𑀤𑀫𑀸𑀮𑀸 𑀖𑀝𑀻𑀬𑀢𑀺. 𑀯𑀤, 𑀯𑀤𑀼𑀁. 𑀯𑀤𑁂, 𑀯𑀤𑀺𑀢𑁆𑀣, 𑀯𑀤𑀁, 𑀯𑀤𑀺𑀫𑁆𑀳. 𑀯𑀤𑀺𑀢𑁆𑀣, 𑀯𑀤𑀺𑀭𑁂. 𑀯𑀤𑀺𑀢𑁆𑀣𑁄, 𑀯𑀤𑀺𑀯𑁆𑀳𑁄. 𑀯𑀤𑀺𑀁, 𑀯𑀤𑀺𑀫𑁆𑀳𑁂. 𑀧𑀸𑀯𑀤, 𑀧𑀸𑀯 𑀇𑀘𑁆𑀘𑀧𑀺. 𑀧𑀸𑀯𑀤𑀼. 𑀧𑀸𑀯𑀤𑁂, 𑀧𑀸𑀯𑀤𑀺𑀢𑁆𑀣. 𑀧𑀸𑀯𑀤𑀁, 𑀧𑀸𑀯𑀤𑀺𑀫𑁆𑀳. 𑀧𑀸𑀯𑀤𑀺𑀢𑁆𑀣, 𑀧𑀸𑀯𑀤𑀺𑀭𑁂. 𑀧𑀸𑀯𑀤𑀺𑀢𑁆𑀣𑁄, 𑀧𑀸𑀯𑀤𑀺𑀯𑁆𑀳𑁄. 𑀧𑀸𑀯𑀤𑀺𑀁, 𑀧𑀸𑀯𑀤𑀺𑀫𑁆𑀳𑁂. 𑀢𑀣𑀸 ‘‘𑀯𑀚𑁆𑀚, 𑀯𑀚𑁆𑀚𑀼’’ 𑀇𑀘𑁆𑀘𑀸𑀤𑀻𑀦𑀺 𑀧𑀭𑁄𑀓𑁆𑀔𑀸𑀭𑀽𑀧𑀸𑀦𑀺.

‘‘𑀅𑀯𑀤𑀸, 𑀅𑀯𑀤𑀽. 𑀅𑀯𑀚𑁆𑀚𑀸, 𑀅𑀯𑀚𑁆𑀚𑀽’’ 𑀇𑀘𑁆𑀘𑀸𑀤𑀻𑀦𑀺 𑀳𑀺𑀬𑁆𑀬𑀢𑁆𑀢𑀦𑀻𑀭𑀽𑀧𑀸𑀦𑀺.

‘‘𑀅𑀯𑀤𑀺, 𑀯𑀤𑀺, 𑀅𑀯𑀤𑀼𑀁, 𑀯𑀤𑀼𑀁, 𑀅𑀯𑀤𑀺𑀁𑀲𑀼, 𑀯𑀤𑀺𑀁𑀲𑀼. 𑀅𑀯𑀚𑁆𑀚𑀺, 𑀯𑀚𑁆𑀚𑀺’’ 𑀇𑀘𑁆𑀘𑀸𑀤𑀻𑀦𑀺 𑀅𑀚𑁆𑀚𑀢𑀦𑀻𑀭𑀽𑀧𑀸𑀦𑀺.

‘‘𑀯𑀤𑀺𑀲𑁆𑀲𑀢𑀺, 𑀯𑀤𑀺𑀲𑁆𑀲𑀦𑁆𑀢𑀺. 𑀯𑀚𑁆𑀚𑀺𑀲𑁆𑀲𑀢𑀺, 𑀯𑀚𑁆𑀚𑀺𑀲𑁆𑀲𑀦𑁆𑀢𑀺’’ 𑀇𑀘𑁆𑀘𑀸𑀤𑀻𑀦𑀺 𑀪𑀯𑀺𑀲𑁆𑀲𑀦𑁆𑀢𑀻𑀭𑀽𑀧𑀸𑀦𑀺.

‘‘𑀅𑀯𑀤𑀺𑀲𑁆𑀲𑀸, 𑀯𑀤𑀺𑀲𑁆𑀲𑀸, 𑀅𑀯𑀚𑁆𑀚𑀺𑀲𑁆𑀲𑀸, 𑀯𑀚𑁆𑀚𑀺𑀲𑁆𑀲𑀸’’ 𑀇𑀘𑁆𑀘𑀸𑀤𑀻𑀦𑀺 𑀓𑀸𑀮𑀸𑀢𑀺𑀧𑀢𑁆𑀢𑀺𑀭𑀽𑀧𑀸𑀦𑀺. 𑀲𑁂𑀲𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀬𑀣𑀸𑀲𑀫𑁆𑀪𑀯𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸𑀦𑀺. 𑀬𑀸 𑀧𑀦𑁂𑀢𑁆𑀣 𑀯𑀤𑀥𑀸𑀢𑀼 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁 𑀯𑀼𑀢𑁆𑀢𑀸, 𑀲𑀸 𑀓𑀢𑁆𑀣𑀘𑀺 ‘‘𑀯𑀤𑀦𑁆𑀢𑀁 𑀏𑀓𑀧𑁄𑀓𑁆𑀔𑀭𑀸. 𑀪𑁂𑀭𑀺𑀯𑀸𑀤𑀓𑁄’’𑀢𑀺𑀆𑀤𑀻𑀲𑀼 𑀅𑀩𑁆𑀬𑀢𑁆𑀢𑀲𑀤𑁆𑀤𑁂𑀧𑀺 𑀯𑀢𑁆𑀢𑀢𑀺 𑀉𑀧𑀘𑀭𑀺𑀢𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀯𑀺𑀤 ¶ 𑀜𑀸𑀡𑁂. 𑀜𑀸𑀡𑀁 𑀚𑀸𑀦𑀦𑀁. 𑀯𑀺𑀤𑀢𑀺. 𑀯𑁂𑀤𑁄. 𑀯𑀺𑀤𑀽. 𑀓𑀸𑀭𑀺𑀢𑁂 ‘‘𑀯𑁂𑀤𑁂𑀢𑀺. 𑀯𑁂𑀤𑀬𑀢𑀺. 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺. 𑀯𑁂𑀤𑀬𑀦𑁆𑀢𑀺 𑀘 𑀢𑁂 𑀢𑀼𑀝𑁆𑀞𑀺𑀁, 𑀤𑁂𑀯𑀸 𑀫𑀸𑀦𑀼𑀲𑀓𑀸 𑀉𑀪𑁄’’𑀢𑀺 𑀧𑀬𑁄𑀕𑀸. 𑀢𑀢𑁆𑀣 𑀧𑀯𑁂𑀤𑁂𑀢𑀻𑀢𑀺 𑀩𑁄𑀥𑁂𑀢𑀺 𑀜𑀸𑀧𑁂𑀢𑀺 𑀧𑀓𑀸𑀲𑁂𑀢𑀺. 𑀯𑁂𑀤𑁄𑀢𑀺 𑀯𑀺𑀤𑀢𑀺 𑀲𑀼𑀔𑀼𑀫𑀫𑁆𑀧𑀺 𑀓𑀸𑀭𑀡𑀁 𑀆𑀚𑀸𑀦𑀸𑀢𑀻𑀢𑀺 𑀯𑁂𑀤𑁄, 𑀧𑀜𑁆𑀜𑀸𑀬𑁂𑀢𑀁 𑀦𑀸𑀫𑀁. ‘‘𑀯𑁂𑀤𑁂𑀳𑀫𑀼𑀦𑀻’’𑀢𑀺 𑀏𑀢𑁆𑀣 𑀳𑀺 𑀜𑀸𑀡𑀁 𑀯𑁂𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀯𑁂𑀤𑁄𑀢𑀺 𑀯𑀸 𑀯𑁂𑀤𑀕𑀦𑁆𑀣𑀲𑁆𑀲𑀧𑀺 𑀦𑀸𑀫𑀁 𑀯𑀺𑀤𑀦𑁆𑀢𑀺 𑀚𑀸𑀦𑀦𑁆𑀢𑀺 𑀏𑀢𑁂𑀦 𑀉𑀘𑁆𑀘𑀸𑀭𑀺𑀢𑀫𑀢𑁆𑀢𑁂𑀦 𑀢𑀤𑀸𑀥𑀸𑀭𑀁 𑀧𑀼𑀕𑁆𑀕𑀮𑀁 ‘‘𑀩𑁆𑀭𑀸𑀳𑁆𑀫𑀡𑁄 𑀅𑀬’’𑀦𑁆𑀢𑀺, 𑀯𑀺𑀤𑀦𑁆𑀢𑀺 𑀯𑀸 𑀏𑀢𑁂𑀦 𑀩𑁆𑀭𑀸𑀳𑁆𑀫𑀡𑀸 𑀅𑀢𑁆𑀢𑀦𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀦𑁆𑀢𑀺 𑀯𑁂𑀤𑁄. 𑀲𑁄 𑀧𑀦 𑀇𑀭𑀼𑀯𑁂𑀤𑀬𑀚𑀼𑀯𑁂𑀤𑀲𑀸𑀫𑀯𑁂𑀤𑀯𑀲𑁂𑀦 𑀢𑀺𑀯𑀺𑀥𑁄. 𑀆𑀣𑀩𑁆𑀩𑀡𑀯𑁂𑀤𑀁 𑀧𑀦 𑀧𑀡𑀻𑀢𑀚𑁆𑀛𑀸𑀲𑀬𑀸 𑀦 𑀲𑀺𑀓𑁆𑀔𑀦𑁆𑀢𑀺 𑀧𑀭𑀽𑀧𑀖𑀸𑀢𑀲𑀳𑀺𑀢𑀢𑁆𑀢𑀸. 𑀢𑀲𑁆𑀫𑀸 𑀧𑀸𑀴𑀺𑀬𑀁 ‘‘𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽’’𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀬𑁂𑀯 ‘‘𑀙𑀦𑁆𑀤𑁄, 𑀫𑀦𑁆𑀢𑁄, 𑀲𑀼𑀢𑀻’’𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺.

𑀧𑀜𑁆𑀜𑀸𑀬𑀁 𑀢𑀼𑀝𑁆𑀞𑀺𑀬𑀁 𑀯𑁂𑀤𑁂, 𑀯𑁂𑀤𑀲𑀤𑁆𑀤𑁄 𑀧𑀯𑀢𑁆𑀢𑀢𑀺;

𑀧𑀸𑀯𑀓𑁂𑀧𑀺 𑀘 𑀲𑁄 𑀤𑀺𑀝𑁆𑀞𑁄, 𑀚𑀸𑀢𑀲𑀤𑁆𑀤𑀧𑀼𑀭𑁂𑀘𑀭𑁄;

𑀧𑀘𑁆𑀙𑀸𑀦𑀼𑀕𑁂 𑀚𑀸𑀢𑀲𑀤𑁆𑀤𑁂, 𑀲𑀢𑀺 𑀢𑀼𑀝𑁆𑀞𑀚𑀦𑁂𑀧𑀺 𑀘;

‘‘𑀯𑁂𑀤𑀕𑀽 𑀲𑀩𑁆𑀩𑀥𑀫𑁆𑀫𑁂’’𑀢𑀺 𑀏𑀢𑁆𑀣𑀸𑀧𑀺 𑀯𑀺𑀤𑀺𑀢𑁂𑀲𑀼 𑀘.

𑀯𑀺𑀤𑀽𑀢𑀺 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑁄. 𑀲𑁄 𑀳𑀺 𑀬𑀣𑀸𑀲𑀪𑀸𑀯𑀢𑁄 𑀓𑀫𑁆𑀫𑀜𑁆𑀘 𑀨𑀮𑀜𑁆𑀘 𑀓𑀼𑀲𑀮𑀸𑀤𑀺𑀪𑁂𑀤𑁂 𑀘 𑀥𑀫𑁆𑀫𑁂 𑀯𑀺𑀤𑀢𑀻𑀢𑀺 ‘‘𑀯𑀺𑀤𑀽’’𑀢𑀺 𑀯𑀼𑀘𑁆𑀘𑀢𑀺.

𑀭𑀼𑀤 𑀅𑀲𑁆𑀲𑀼𑀯𑀺𑀫𑁄𑀘𑀦𑁂, 𑀲𑀓𑀫𑁆𑀫𑀺𑀓𑀯𑀲𑁂𑀦𑀺𑀫𑀺𑀲𑁆𑀲𑀸 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀭𑁄𑀤𑀢𑀺, 𑀭𑀼𑀤𑀢𑀺 𑀇𑀘𑁆𑀘𑀧𑀺. 𑀭𑀼𑀡𑁆𑀡𑀁. 𑀭𑀼𑀤𑀺𑀢𑀁. 𑀭𑁄𑀤𑀦𑀁. 𑀭𑁄𑀤𑀦𑁆𑀢𑁄. 𑀭𑁄𑀤𑀫𑀸𑀦𑁄. 𑀭𑁄𑀤𑀦𑁆𑀢𑀻. 𑀭𑁄𑀤𑀫𑀸𑀦𑀸. 𑀭𑀼𑀤𑀫𑀼𑀔𑀸. 𑀭𑀼𑀤𑀁. 𑀭𑀼𑀤𑀦𑁆𑀢𑁄.

𑀢𑀢𑁆𑀣 ¶ 𑀭𑁄𑀤𑀢𑀻𑀢𑀺 𑀓𑀺𑀁 𑀭𑁄𑀤𑀢𑀺? 𑀫𑀢𑀁 𑀧𑀼𑀢𑁆𑀢𑀁 𑀯𑀸 𑀪𑀸𑀢𑀭𑀁 𑀯𑀸 𑀭𑁄𑀤𑀢𑀺. 𑀢𑀢𑁆𑀭𑀸𑀬𑀁 𑀧𑀸𑀴𑀺 ‘‘𑀦𑀸𑀳𑀁 𑀪𑀦𑁆𑀢𑁂 𑀏𑀢𑀁 𑀭𑁄𑀤𑀸𑀫𑀺, 𑀬𑀁 𑀫𑀁 𑀪𑀦𑁆𑀢𑁂 𑀪𑀕𑀯𑀸 𑀏𑀯𑀫𑀸𑀳’’. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 ‘‘𑀬𑀁 𑀫𑀁 𑀪𑀦𑁆𑀢𑁂 𑀪𑀕𑀯𑀸 𑀏𑀯𑀫𑀸𑀳, 𑀅𑀳𑀁 𑀏𑀢𑀁 𑀪𑀕𑀯𑀢𑁄 𑀩𑁆𑀬𑀸𑀓𑀭𑀡𑀁 𑀦 𑀧𑀭𑁄𑀤𑀸𑀫𑀺 𑀦 𑀧𑀭𑀺𑀤𑁂𑀯𑀸𑀫𑀺 𑀦 𑀅𑀦𑀼𑀢𑁆𑀣𑀼𑀦𑀸𑀫𑀻’𑀢𑀺 𑀏𑀯𑀁 𑀲𑀓𑀫𑁆𑀫𑀺𑀓𑀯𑀲𑁂𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀅𑀲𑁆𑀲𑀼𑀫𑀼𑀜𑁆𑀘𑀦𑀫𑀢𑁆𑀢𑁂𑀦.

‘𑀫𑀢𑀁 𑀯𑀸 𑀅𑀫𑁆𑀫 𑀭𑁄𑀤𑀦𑁆𑀢𑀺, 𑀬𑁄 𑀯𑀸 𑀚𑀻𑀯𑀁 𑀦 𑀤𑀺𑀲𑁆𑀲𑀢𑀺;

𑀚𑀻𑀯𑀦𑁆𑀢𑀁 𑀅𑀫𑁆𑀫 𑀧𑀲𑁆𑀲𑀦𑁆𑀢𑀺, 𑀓𑀲𑁆𑀫𑀸 𑀫𑀁 𑀅𑀫𑁆𑀫 𑀭𑁄𑀤𑀲𑀻’𑀢𑀺

𑀅𑀬𑀜𑁆𑀘𑁂𑀢𑁆𑀣 𑀧𑀬𑁄𑀕𑁄’’𑀢𑀺 𑀇𑀤𑀫𑀝𑁆𑀞𑀓𑀣𑀸𑀯𑀘𑀦𑀁. 𑀇𑀤𑀁 𑀧𑀦 𑀝𑀻𑀓𑀸𑀯𑀘𑀦𑀁 𑁋 ‘‘𑀬𑀣𑀸 𑀲𑀓𑀫𑁆𑀫𑀓𑀸 𑀥𑀸𑀢𑀼𑀲𑀤𑁆𑀤𑀸 𑀅𑀢𑁆𑀣𑀯𑀺𑀲𑁂𑀲𑀯𑀲𑁂𑀦 𑀅𑀓𑀫𑁆𑀫𑀓𑀸 𑀳𑁄𑀦𑁆𑀢𑀺 ‘𑀯𑀺𑀩𑀼𑀤𑁆𑀥𑁄 𑀧𑀼𑀭𑀺𑀲𑁄 𑀯𑀺𑀩𑀼𑀤𑁆𑀥𑁄 𑀓𑀫𑀮𑀲𑀡𑁆𑀟𑁄’𑀢𑀺, 𑀏𑀯𑀁 𑀅𑀢𑁆𑀣𑀯𑀺𑀲𑁂𑀲𑀯𑀲𑁂𑀦 𑀅𑀓𑀫𑁆𑀫𑀓𑀸𑀧𑀺 𑀲𑀓𑀫𑁆𑀫𑀓𑀸 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘𑀦 𑀧𑀭𑀺𑀤𑁂𑀯𑀸𑀫𑀺 𑀦 𑀅𑀦𑀼𑀢𑁆𑀣𑀼𑀦𑀸𑀫𑀻’𑀢𑀺 𑀆𑀳. 𑀅𑀦𑀼𑀢𑁆𑀣𑀼𑀦𑀲𑀤𑁆𑀤𑁄 𑀲𑀓𑀫𑁆𑀫𑀓𑀯𑀲𑁂𑀦 𑀧𑀬𑀼𑀚𑁆𑀚𑀢𑀺 ‘𑀧𑀼𑀭𑀸𑀡𑀸𑀦𑀺 𑀅𑀦𑀼𑀢𑁆𑀣𑀼𑀦’𑀦𑁆𑀢𑀺𑀆𑀤𑀻𑀲𑀼. 𑀅𑀬𑀜𑁆𑀘𑁂𑀢𑁆𑀣 𑀧𑀬𑁄𑀕𑁄𑀢𑀺 𑀇𑀫𑀺𑀦𑀸 𑀕𑀸𑀣𑀸𑀬 𑀅𑀦𑀼𑀢𑁆𑀣𑀼𑀦𑀦𑀁 𑀭𑀼𑀤𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀲𑁆𑀲𑁂𑀢𑀻’’𑀢𑀺.

𑀤𑀮𑀺𑀤𑁆𑀤 𑀤𑀼𑀕𑁆𑀕𑀢𑀺𑀬𑀁. 𑀤𑀼𑀓𑁆𑀔𑀲𑁆𑀲 𑀕𑀢𑀺 𑀧𑀢𑀺𑀝𑁆𑀞𑀸𑀢𑀺 𑀤𑀼𑀕𑁆𑀕𑀢𑀻𑀢𑀺 𑀅𑀬𑀁 𑀅𑀢𑁆𑀣𑁄 ‘‘𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 𑀬𑀼𑀚𑁆𑀚𑀢𑀺, 𑀇𑀥 𑀧𑀦 𑀇𑀤𑀁 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀜𑁆𑀜𑁄 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀓𑀣𑀁 𑀤𑀼𑀕𑁆𑀕𑀢𑀻𑀢𑀺? 𑀤𑀼𑀓𑁆𑀔𑁂𑀦 𑀓𑀺𑀘𑁆𑀙𑁂𑀦 𑀕𑀢𑀺 𑀕𑀫𑀦𑀁 𑀅𑀦𑁆𑀦𑀧𑀸𑀦𑀸𑀤𑀺𑀮𑀸𑀪𑁄 𑀤𑀼𑀕𑁆𑀕𑀢𑀻𑀢𑀺. 𑀤𑀮𑀺𑀤𑁆𑀤𑀢𑀺. 𑀤𑀮𑀺𑀤𑁆𑀤𑁄, 𑀤𑀮𑀺𑀤𑁆𑀤𑀻, 𑀤𑀸𑀮𑀺𑀤𑁆𑀤𑀺𑀬𑀁. 𑀢𑀢𑁆𑀣 𑀤𑀮𑀺𑀤𑁆𑀤𑀢𑀻𑀢𑀺 𑀲𑀩𑁆𑀩𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀧𑀭𑀁 𑀬𑀸𑀘𑀺𑀢𑁆𑀯𑀸 𑀏𑀯 𑀤𑀼𑀓𑁆𑀔𑁂𑀦 𑀅𑀥𑀺𑀕𑀘𑁆𑀙𑀢𑀺, 𑀦 𑀅𑀬𑀸𑀘𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀤𑀼𑀮𑀺𑀤𑁆𑀤𑁄𑀢𑀺 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑁄. 𑀤𑀮𑀺𑀤𑁆𑀤𑀻𑀢𑀺 𑀤𑀼𑀕𑁆𑀕𑀢𑀸 𑀦𑀸𑀭𑀻. 𑀤𑀮𑀺𑀤𑁆𑀤𑀲𑁆𑀲 𑀪𑀸𑀯𑁄 𑀤𑀸𑀮𑀺𑀤𑁆𑀤𑀺𑀬𑀁. 𑀏𑀢𑁆𑀣 𑀘 𑀲𑀩𑁆𑀩𑀫𑁂𑀯 ‘‘𑀤𑀮𑀺𑀤𑁆𑀤𑀢𑀻’’𑀢𑀺 𑀮𑁄𑀓𑀺𑀓𑀧𑁆𑀧𑀬𑁄𑀕𑀤𑀲𑁆𑀲𑀦𑀢𑁄 ‘‘𑀤𑀮𑀺𑀤𑁆𑀤𑀢𑀻’’𑀢𑀺 𑀓𑁆𑀭𑀺𑀬𑀸𑀧𑀤𑀁 𑀯𑀺𑀪𑀸𑀯𑀺𑀢𑀁. 𑀲𑀸𑀲𑀦𑁂 𑀧𑀦 ¶ 𑀢𑀁 𑀓𑁆𑀭𑀺𑀬𑀸𑀧𑀤𑀁 𑀦 𑀆𑀕𑀢𑀁, ‘‘𑀤𑀮𑀺𑀤𑁆𑀤𑁄 𑀤𑀮𑀺𑀤𑁆𑀤𑀻’’𑀢𑀺 𑀦𑀸𑀫𑀧𑀤𑀸𑀦𑀺𑀬𑁂𑀯 𑀆𑀕𑀢𑀸𑀦𑀺. 𑀅𑀦𑀸𑀕𑀢𑀫𑁆𑀧𑀺 𑀢𑀁 ‘‘𑀦𑀸𑀣𑀢𑀻’’𑀢𑀺 𑀧𑀤𑀫𑀺𑀯 𑀲𑀸𑀲𑀦𑀸𑀦𑀼𑀮𑁄𑀫𑀢𑁆𑀢𑀸 𑀕𑀳𑁂𑀢𑀩𑁆𑀩𑀫𑁂𑀯. 𑀕𑀭𑀽 𑀧𑀦 𑀓𑀘𑁆𑀘𑀸𑀬𑀦𑀫𑀢𑀯𑀲𑁂𑀦 𑀤𑀮 𑀤𑀼𑀕𑁆𑀕𑀢𑀺𑀫𑁆𑀳𑀻𑀢𑀺 𑀤𑀼𑀕𑁆𑀕𑀢𑀺𑀯𑀸𑀘𑀓𑀤𑀮𑀥𑀸𑀢𑀼𑀢𑁄 𑀇𑀤𑁆𑀤𑀧𑀘𑁆𑀘𑀬𑀁 𑀓𑀢𑁆𑀯𑀸 ‘‘𑀤𑀮𑀺𑀤𑁆𑀤𑁄’’𑀢𑀺 𑀦𑀸𑀫𑀧𑀤𑀁 𑀤𑀲𑁆𑀲𑁂𑀲𑀼𑀁.

𑀢𑀼𑀤 𑀩𑁆𑀬𑀣𑀦𑁂. 𑀢𑀼𑀤𑀢𑀺, 𑀯𑀺𑀢𑀼𑀤𑀢𑀺. 𑀓𑀫𑁆𑀫𑀦𑀺 ‘‘𑀢𑀼𑀚𑁆𑀚𑀢𑀺, 𑀯𑀺𑀢𑀼𑀚𑁆𑀚𑀫𑀸𑀦𑁄, 𑀯𑁂𑀤𑀦𑀸𑀪𑀺𑀪𑀼𑀦𑁆𑀦𑁄’’𑀢𑀺 𑀭𑀽𑀧𑀸𑀦𑀺.

𑀢𑀼𑀤𑀦𑁆𑀢𑀺 𑀯𑀸𑀘𑀸𑀳𑀺 𑀚𑀦𑀸 𑀅𑀲𑀜𑁆𑀜𑀢𑀸,

𑀲𑀭𑁂𑀳𑀺 𑀲𑀗𑁆𑀕𑀸𑀫𑀕𑀢𑀁𑀯 𑀓𑀼𑀜𑁆𑀚𑀭𑀁;

𑀲𑀼𑀢𑁆𑀯𑀸𑀦 𑀯𑀸𑀓𑁆𑀬𑀁 𑀨𑀭𑀼𑀲𑀁 𑀉𑀤𑀻𑀭𑀺𑀢𑀁,

𑀅𑀥𑀺𑀯𑀸𑀲𑀬𑁂 𑀪𑀺𑀓𑁆𑀔𑀼 𑀅𑀤𑀼𑀝𑁆𑀞𑀘𑀺𑀢𑁆𑀢𑁄;

𑀦𑀼𑀤 𑀧𑁂𑀭𑀡𑁂. 𑀧𑁂𑀭𑀡𑀁 𑀘𑀼𑀡𑁆𑀡𑀺𑀓𑀭𑀡𑀁 𑀧𑀺𑀲𑀦𑀁, 𑀦𑀼𑀤𑀢𑀺, 𑀧𑀦𑀼𑀤𑀢𑀺. 𑀧𑀦𑀼𑀤𑀦𑀁.

𑀯𑀺𑀤𑀺 𑀮𑀸𑀪𑁂. 𑀯𑀺𑀦𑁆𑀤𑀢𑀺. 𑀉𑀝𑁆𑀞𑀸𑀢𑀸 𑀯𑀺𑀦𑁆𑀤𑀢𑁂 𑀥𑀦𑀁. 𑀕𑁄𑀯𑀺𑀦𑁆𑀤𑁄.

𑀔𑀤𑀺 𑀧𑀭𑀺𑀖𑀸𑀢𑁂. 𑀧𑀭𑀺𑀖𑀸𑀢𑀁 𑀲𑀫𑀦𑁆𑀢𑀢𑁄 𑀳𑀦𑀦𑀁. 𑀔𑀦𑁆𑀤𑀢𑀺.

𑀤𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀥𑀓𑀸𑀭𑀦𑁆𑀢𑀥𑀸𑀢𑀼

𑀥𑀸 𑀥𑀸𑀭𑀡𑁂. 𑀤𑀥𑀸𑀢𑀺, 𑀯𑀺𑀤𑀥𑀸𑀢𑀺. 𑀬𑀁 𑀧𑀡𑁆𑀟𑀺𑀢𑁄 𑀦𑀺𑀧𑀼𑀡𑀁 𑀲𑀁𑀯𑀺𑀥𑁂𑀢𑀺. 𑀦𑀺𑀥𑀺𑀁 𑀦𑀺𑀥𑁂𑀢𑀺. 𑀦𑀺𑀥𑀺 𑀦𑀸𑀫 𑀦𑀺𑀥𑀻𑀬𑀢𑀺. 𑀢𑀸𑀯 𑀲𑀼𑀦𑀺𑀳𑀺𑀢𑁄 𑀲𑀦𑁆𑀢𑁄. 𑀬𑀢𑁄 𑀦𑀺𑀥𑀺𑀁 𑀧𑀭𑀺𑀳𑀭𑀺. 𑀦𑀺𑀤𑀳𑀢𑀺. 𑀓𑀼𑀳𑀺𑀁 𑀤𑁂𑀯 𑀦𑀺𑀤𑀳𑀸𑀫𑀺. 𑀧𑀭𑀺𑀤𑀳𑀢𑀺. 𑀬𑁄 𑀯𑀢𑁆𑀢𑀁 𑀧𑀭𑀺𑀤𑀳𑀺𑀲𑁆𑀲𑀢𑀺. 𑀥𑀲𑁆𑀲𑀢𑀺. 𑀧𑀭𑀺𑀥𑀲𑁆𑀲𑀢𑀺. 𑀩𑀸𑀮𑁄𑀢𑀺 𑀧𑀭𑀁 𑀧𑀤𑀳𑀢𑀺. 𑀲𑀓𑁆𑀬𑀸 𑀔𑁄 𑀅𑀫𑁆𑀩𑀝𑁆𑀞 𑀭𑀸𑀚𑀸𑀦𑀁 ¶ 𑀉𑀓𑁆𑀓𑀸𑀓𑀁 𑀧𑀺𑀢𑀸𑀫𑀳𑀁 𑀤𑀳𑀦𑁆𑀢𑀺. 𑀲𑀤𑁆𑀤𑀳𑀢𑀺 𑀢𑀣𑀸𑀕𑀢𑀲𑁆𑀲 𑀩𑁄𑀥𑀺𑀁. 𑀲𑀤𑁆𑀥𑀸, 𑀲𑀤𑁆𑀤𑀳𑀦𑀸, 𑀲𑀤𑁆𑀥𑀸𑀢𑀩𑁆𑀩𑀁, 𑀲𑀤𑁆𑀤𑀳𑀺𑀢𑀩𑁆𑀩𑀁, 𑀲𑀤𑁆𑀥𑀸𑀬𑀺𑀓𑁄, 𑀧𑀘𑁆𑀘𑀬𑀺𑀓𑁄. 𑀲𑀤𑁆𑀥𑁂𑀬𑁆𑀬𑀯𑀘𑀲𑀸 𑀉𑀧𑀸𑀲𑀺𑀓𑀸. 𑀲𑀤𑁆𑀤𑀳𑀺𑀢𑀼𑀁, 𑀲𑀤𑁆𑀤𑀳𑀺𑀢𑁆𑀯𑀸. 𑀯𑀺𑀲𑁂𑀲𑀸𑀥𑀸𑀦𑀁. 𑀲𑁄𑀢𑀸𑀯𑀥𑀸𑀦𑀁. 𑀲𑁄𑀢𑀁 𑀑𑀤𑀳𑀢𑀺. 𑀑𑀳𑀺𑀢𑀲𑁄𑀢𑁄. 𑀲𑁄𑀢𑀁 𑀑𑀤𑀳𑀺𑀢𑁆𑀯𑀸. 𑀫𑀘𑁆𑀘𑀼𑀥𑁂𑀬𑁆𑀬𑀁, 𑀫𑀸𑀭𑀥𑁂𑀬𑁆𑀬𑀁, 𑀦𑀸𑀫𑀥𑁂𑀬𑁆𑀬𑀁, 𑀥𑀸𑀢𑀼, 𑀥𑀸𑀢𑀸, 𑀯𑀺𑀥𑀸𑀢𑀸. 𑀯𑀺𑀥𑀺. 𑀅𑀪𑀺𑀥𑀸𑀦𑀁, 𑀅𑀪𑀺𑀥𑁂𑀬𑁆𑀬𑀁, 𑀦𑀺𑀥𑀸𑀦𑀯𑀢𑀻 𑀯𑀸𑀘𑀸, 𑀆𑀥𑀸𑀦𑀕𑀸𑀳𑀻, 𑀲𑀦𑁆𑀥𑀺. 𑀅𑀜𑁆𑀜𑀸𑀦𑀺𑀧𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀯𑀺𑀧𑀼𑀩𑁆𑀩𑁄 𑀥𑀸 𑀓𑀭𑁄𑀢𑁆𑀬𑀢𑁆𑀣𑁂, 𑀅𑀪𑀺𑀧𑀼𑀩𑁆𑀩𑁄 𑀢𑀼 𑀪𑀸𑀲𑀦𑁂;

𑀦𑁆𑀬𑀸𑀲𑀁𑀧𑀼𑀩𑁆𑀩𑁄 𑀬𑀣𑀸𑀬𑁄𑀕𑀁, 𑀦𑁆𑀬𑀸𑀲𑀸𑀭𑁄𑀧𑀦𑀲𑀦𑁆𑀥𑀺𑀲𑀼.

𑀇𑀫𑀲𑁆𑀫𑀸 𑀧𑀦 𑀥𑀸𑀥𑀸𑀢𑀼𑀢𑁄 𑀧𑀼𑀩𑁆𑀩𑀲𑁆𑀲 𑀅𑀧𑀺 𑀇𑀘𑁆𑀘𑀼𑀧𑀲𑀕𑁆𑀕𑀲𑁆𑀲 𑀅𑀓𑀸𑀭𑁄 𑀓𑁆𑀯𑀘𑀺 𑀦𑀺𑀘𑁆𑀘𑀁 𑀮𑁄𑀧𑀁 𑀧𑀧𑁆𑀧𑁄𑀢𑀺, 𑀓𑁆𑀯𑀘𑀺 𑀦𑀺𑀘𑁆𑀘𑀁 𑀮𑁄𑀧𑀁 𑀦 𑀧𑀧𑁆𑀧𑁄𑀢𑀺. 𑀅𑀢𑁆𑀭 𑀮𑁄𑀧𑁄 𑀯𑀼𑀘𑁆𑀘𑀢𑁂, 𑀤𑁆𑀯𑀸𑀭𑀁 𑀧𑀺𑀤𑀳𑀢𑀺, 𑀤𑁆𑀯𑀸𑀭𑀁 𑀧𑀺𑀤𑀳𑀦𑁆𑀢𑁄, 𑀧𑀺𑀤𑀳𑀺𑀢𑀼𑀁, 𑀧𑀺𑀤𑀳𑀺𑀢𑁆𑀯𑀸, 𑀏𑀯𑀁 𑀅𑀓𑀸𑀭𑀮𑁄𑀧𑁄 𑀪𑀯𑀢𑀺. 𑀤𑁆𑀯𑀸𑀭𑀁 𑀅𑀧𑀺𑀤𑀳𑀺𑀢𑁆𑀯𑀸, 𑀏𑀯𑀁 𑀅𑀓𑀸𑀭𑀮𑁄𑀧𑁄 𑀦 𑀪𑀯𑀢𑀺. 𑀏𑀢𑁆𑀣 𑀳𑀺 𑀅𑀓𑀸𑀭𑁄 𑀅𑀧𑀺𑀉𑀧𑀲𑀕𑁆𑀕𑀲𑁆𑀲 𑀅𑀯𑀬𑀯𑁄 𑀦 𑀳𑁄𑀢𑀺. 𑀓𑀺𑀦𑁆𑀢𑀺 𑀘𑁂? 𑀧𑀝𑀺𑀲𑁂𑀥𑀢𑁆𑀣𑀯𑀸𑀘𑀓𑁄 𑀦𑀺𑀧𑀸𑀢𑁄𑀬𑁂𑀯, 𑀉𑀧𑀲𑀕𑁆𑀕𑀸𑀯𑀬𑀯𑁄 𑀧𑀦 𑀅𑀤𑀲𑁆𑀲𑀦𑀁 𑀕𑀢𑁄, 𑀅𑀬𑀁 𑀦𑀺𑀘𑁆𑀘𑀸𑀮𑁄𑀧𑁄. 𑀏𑀯𑀁 𑀥𑀸𑀥𑀸𑀢𑀼𑀢𑁄 𑀧𑀼𑀩𑁆𑀩𑀲𑁆𑀲 𑀅𑀧𑀺 𑀇𑀘𑁆𑀘𑀼𑀧𑀲𑀕𑁆𑀕𑀲𑁆𑀲 𑀅𑀓𑀸𑀭𑁄 𑀓𑁆𑀯𑀘𑀺 𑀦𑀺𑀘𑁆𑀘𑀁 𑀮𑁄𑀧𑀁 𑀧𑀧𑁆𑀧𑁄𑀢𑀺, 𑀓𑁆𑀯𑀘𑀺 𑀦𑀺𑀘𑁆𑀘𑀁 𑀮𑁄𑀧𑀁 𑀦 𑀧𑀧𑁆𑀧𑁄𑀢𑀺. 𑀇𑀤𑀁 𑀅𑀘𑁆𑀙𑀭𑀺𑀬𑀁 𑀇𑀤𑀁 𑀅𑀩𑁆𑀪𑀼𑀢𑀁. 𑀬𑀢𑁆𑀭 𑀳𑀺 𑀦𑀸𑀫 𑀪𑀕𑀯𑀢𑁄 𑀧𑀸𑀯𑀘𑀦𑁂 𑀏𑀯𑀭𑀽𑀧𑀧𑁄𑀧𑀺 𑀦𑀬𑁄 𑀲𑀦𑁆𑀤𑀺𑀲𑁆𑀲𑀢𑀺 𑀯𑀺𑀜𑁆𑀜𑀽𑀦𑀁 𑀳𑀤𑀬𑀯𑀺𑀫𑁆𑀳𑀸𑀧𑀦𑀓𑀭𑁄, 𑀬𑁄 𑀏𑀓𑀲𑁆𑀫𑀺𑀁𑀬𑁂𑀯 𑀥𑀸𑀢𑀼𑀫𑁆𑀳𑀺 𑀏𑀓𑀲𑁆𑀫𑀺𑀁𑀬𑁂𑀯 𑀉𑀧𑀲𑀕𑁆𑀕𑁂 𑀏𑀓𑀲𑁆𑀫𑀺𑀁𑀬𑁂𑀯𑀢𑁆𑀣𑁂 𑀓𑁆𑀯𑀘𑀺 𑀮𑁄𑀧𑀸𑀮𑁄𑀧𑀯𑀲𑁂𑀦 𑀯𑀺𑀪𑀚𑀺𑀢𑀼𑀁 𑀮𑀩𑁆𑀪𑀢𑀺. 𑀇𑀤𑀸𑀦𑀺 𑀫𑀬𑀁 𑀲𑁄𑀢𑀽𑀦𑀁 𑀧𑀭𑀫𑀓𑁄𑀲𑀮𑁆𑀮𑀚𑀦𑀦𑀢𑁆𑀣𑀁 𑀢𑀤𑀼𑀪𑀬𑀫𑁆𑀧𑀺 𑀆𑀓𑀸𑀭𑀁 𑀏𑀓𑀚𑁆𑀛𑀁 𑀓𑀭𑁄𑀦𑁆𑀢𑀸 𑀢𑀤𑀸𑀓𑀸𑀭𑀯𑀢𑀺𑀁 𑀚𑀺𑀦𑀯𑀭𑀧𑀸𑀴𑀺𑀁 𑀆𑀦𑀬𑀸𑀫 𑁋

‘‘𑀕𑀗𑁆𑀕𑀁 ¶ 𑀫𑁂 𑀧𑀺𑀤𑀳𑀺𑀲𑁆𑀲𑀦𑁆𑀢𑀺, 𑀦 𑀢𑀁 𑀲𑀓𑁆𑀓𑁄𑀫𑀺 𑀩𑁆𑀭𑀸𑀳𑁆𑀫𑀡;

𑀅𑀧𑀺𑀥𑁂𑀢𑀼𑀁 𑀫𑀳𑀸𑀲𑀺𑀦𑁆𑀥𑀼𑀁, 𑀢𑀁 𑀓𑀣𑀁 𑀲𑁄 𑀪𑀯𑀺𑀲𑁆𑀲𑀢𑀺;

𑀦 𑀢𑁂 𑀲𑀓𑁆𑀓𑁄𑀫𑀺 𑀅𑀓𑁆𑀔𑀸𑀢𑀼𑀁, 𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀧𑀼𑀘𑁆𑀙𑀺𑀢𑁄.

𑀘𑀺𑀢𑁆𑀢𑀢𑁆𑀣𑀲𑀸𑀥𑀦𑀺𑀁 𑀏𑀢𑀁, 𑀕𑀸𑀣𑀁 𑀲𑀫𑁆𑀪𑀯𑀚𑀸𑀢𑀓𑁂;

𑀧𑀜𑁆𑀜𑀸𑀲𑀫𑁆𑀪𑀯𑀫𑀺𑀘𑁆𑀙𑀦𑁆𑀢𑁄, 𑀓𑀭𑁂 𑀘𑀺𑀢𑁆𑀢𑁂 𑀲𑀼𑀫𑁂𑀥𑀲𑁄’’𑀢𑀺.

𑀥𑀼 𑀕𑀢𑀺𑀣𑁂𑀭𑀺𑀬𑁂𑀲𑀼. 𑀕𑀢𑀺 𑀕𑀫𑀦𑀁, 𑀣𑁂𑀭𑀺𑀬𑀁 𑀣𑀺𑀭𑀪𑀸𑀯𑁄. 𑀥𑀯𑀢𑀺. 𑀥𑀼𑀯𑀁.

𑀏𑀢𑁆𑀣 𑀘 𑀥𑀼𑀯𑀦𑁆𑀢𑀺 𑀣𑀺𑀭𑀁. ‘‘𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄’’𑀢𑀺𑀆𑀤𑀻𑀲𑀼 𑀯𑀺𑀬, 𑀢𑀲𑁆𑀫𑀸 𑀥𑀼𑀯𑀦𑁆𑀢𑀺 𑀣𑀺𑀭𑀁 𑀓𑀺𑀜𑁆𑀘𑀺 𑀥𑀫𑁆𑀫𑀚𑀸𑀢𑀁. 𑀅𑀣 𑀯𑀸 𑀥𑀼𑀯𑀦𑁆𑀢𑀺 𑀇𑀤𑀁 𑀕𑀢𑀺𑀣𑁂𑀭𑀺𑀬𑀢𑁆𑀣𑀯𑀲𑁂𑀦 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀅𑀥𑀺𑀯𑀘𑀦𑀁 𑀪𑀯𑀺𑀢𑀼𑀫𑀭𑀳𑀢𑀺. 𑀢𑀜𑁆𑀳𑀺 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀲𑁄𑀓𑀸𑀤𑀺𑀢𑁄 𑀫𑀼𑀘𑁆𑀘𑀺𑀢𑀼𑀓𑀸𑀫𑁂𑀳𑀺 𑀥𑀯𑀺𑀢𑀩𑁆𑀩𑀁 𑀕𑀦𑁆𑀢𑀩𑁆𑀩𑀦𑁆𑀢𑀺 𑀥𑀼𑀯𑀁, 𑀉𑀧𑁆𑀧𑀸𑀤𑀯𑀬𑀸𑀪𑀸𑀯𑁂𑀦 𑀯𑀸 𑀦𑀺𑀘𑁆𑀘𑀲𑀪𑀸𑀯𑀢𑁆𑀢𑀸 𑀥𑀯𑀢𑀺 𑀣𑀺𑀭𑀁 𑀲𑀲𑁆𑀲𑀢𑀁 𑀪𑀯𑀢𑀻𑀢𑀺 𑀥𑀼𑀯𑀁. 𑀬𑀜𑁆𑀳𑀺 𑀲𑀦𑁆𑀥𑀸𑀬 𑀪𑀕𑀯𑀢𑀸 ‘‘𑀥𑀼𑀯𑀜𑁆𑀘 𑀯𑁄 𑀪𑀺𑀓𑁆𑀔𑀯𑁂 𑀤𑁂𑀲𑁂𑀲𑁆𑀲𑀸𑀫𑀺 𑀥𑀼𑀯𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤’’𑀦𑁆𑀢𑀺 𑀯𑀼𑀢𑁆𑀢𑀁. 𑀥𑀼𑀯𑀲𑀤𑁆𑀤𑁄 ‘‘𑀯𑀘𑀦𑀁 𑀥𑀼𑀯𑀲𑀲𑁆𑀲𑀢’’𑀦𑁆𑀢𑀺 𑀏𑀢𑁆𑀣 𑀣𑀺𑀭𑁂 𑀯𑀢𑁆𑀢𑀢𑀺. ‘‘𑀥𑀼𑀯𑀜𑁆𑀘 𑀪𑀺𑀓𑁆𑀔𑀯𑁂 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀏𑀢𑁆𑀣 𑀦𑀺𑀩𑁆𑀩𑀸𑀦𑁂. ‘‘𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀻’’𑀢𑀺 𑀏𑀢𑁆𑀣 𑀧𑀦 𑀏𑀓𑀁𑀲𑁂 𑀦𑀺𑀧𑀸𑀢𑀧𑀤𑀪𑀸𑀯𑁂𑀦 𑀯𑀢𑁆𑀢𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀥𑀽 𑀯𑀺𑀥𑀽𑀦𑀦𑁂. 𑀊𑀓𑀸𑀭𑀲𑁆𑀲 𑀊𑀯𑀢𑁆𑀢𑀁. 𑀥𑀽𑀯𑀢𑀺. 𑀥𑀽𑀯𑀺𑀢𑀸, 𑀥𑀽𑀯𑀺𑀢𑀩𑁆𑀩𑀁. 𑀭𑀲𑁆𑀲𑀢𑁆𑀢𑁂 ‘‘𑀥𑀼𑀢𑁄, 𑀥𑀼𑀢𑀯𑀸’’ 𑀇𑀘𑁆𑀘𑀧𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺.

𑀥𑁂 𑀧𑀸𑀦𑁂. 𑀥𑀬𑀢𑀺, 𑀥𑀻𑀬𑀢𑀺. 𑀥𑁂𑀦.

𑀏𑀢𑁆𑀣 𑀘 𑀥𑁂𑀦𑀽𑀢𑀺 𑀥𑀬𑀢𑀺 𑀧𑀺𑀯𑀢𑀺 𑀇𑀢𑁄 𑀔𑀻𑀭𑀁 𑀧𑁄𑀢𑀓𑁄𑀢𑀺 𑀥𑁂𑀦𑀼, ‘‘𑀕𑁄𑀥𑁂𑀦𑀼, 𑀅𑀲𑁆𑀲𑀥𑁂𑀦𑀼, 𑀫𑀺𑀕𑀥𑁂𑀦𑀽’’𑀢𑀺 𑀥𑁂𑀦𑀼𑀲𑀤𑁆𑀤𑁄 𑀲𑀸𑀫𑀜𑁆𑀜𑀯𑀲𑁂𑀦 𑀲𑀧𑁄𑀢𑀺𑀓𑀸𑀲𑀼 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀻𑀲𑀼 𑀯𑀢𑁆𑀢𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀬𑁂𑀪𑀼𑀬𑁆𑀬𑁂𑀦 𑀕𑀸𑀯𑀺𑀬𑀁 𑀯𑀢𑁆𑀢𑀢𑀺. 𑀢𑀣𑀸 𑀳𑀺 ‘‘𑀲𑀢𑁆𑀢 𑀥𑁂𑀦𑀼𑀲𑀢𑁂 𑀤𑀢𑁆𑀯𑀸’’𑀢𑀺 𑀧𑀸𑀴𑀺 𑀤𑀺𑀲𑁆𑀲𑀢𑀺.

𑀲𑀺𑀥𑀼 ¶ 𑀕𑀢𑀺𑀬𑀁 𑀲𑁂𑀥𑀢𑀺, 𑀦𑀺𑀲𑁂𑀥𑀢𑀺, 𑀧𑀝𑀺𑀲𑁂𑀥𑀢𑀺. 𑀲𑀺𑀤𑁆𑀥𑁄, 𑀧𑀲𑀺𑀤𑁆𑀥𑁄, 𑀦𑀺𑀲𑀺𑀤𑁆𑀥𑁄, 𑀧𑀝𑀺𑀲𑀺𑀤𑁆𑀥𑁄, 𑀧𑀝𑀺𑀲𑁂𑀥𑀺𑀢𑁄, 𑀧𑀝𑀺𑀲𑁂𑀥𑀓𑁄, 𑀧𑀝𑀺𑀲𑁂𑀥𑁄, 𑀧𑀝𑀺𑀲𑁂𑀥𑀺𑀢𑀼𑀁, 𑀧𑀝𑀺𑀲𑁂𑀥𑀺𑀢𑁆𑀯𑀸. 𑀇𑀥 𑀅𑀘𑀺𑀦𑁆𑀢𑁂𑀬𑁆𑀬𑀩𑀮𑀢𑁆𑀢𑀸 𑀉𑀧𑀲𑀕𑁆𑀕𑀸𑀦𑀁 𑀢𑀁𑀬𑁄𑀕𑁂 𑀲𑀺𑀥𑀼𑀥𑀸𑀢𑀼𑀲𑁆𑀲 𑀦𑀸𑀦𑀧𑁆𑀧𑀓𑀸𑀭𑀸 𑀅𑀢𑁆𑀣𑀸 𑀲𑀫𑁆𑀪𑀯𑀦𑁆𑀢𑀺, 𑀅𑀜𑁆𑀜𑁂𑀲𑀫𑁆𑀧𑀺 𑀏𑀯𑀫𑁂𑀯.

𑀲𑀺𑀥𑀼 𑀲𑀢𑁆𑀣𑁂 𑀫𑀗𑁆𑀕𑀮𑁆𑀬𑁂 𑀘. 𑀲𑀢𑁆𑀣𑀁 𑀲𑀸𑀲𑀦𑀁, 𑀫𑀗𑁆𑀕𑀮𑁆𑀬𑀁 𑀧𑀸𑀧𑀯𑀺𑀦𑀸𑀲𑀦𑀁 𑀯𑀼𑀤𑁆𑀥𑀺𑀓𑀸𑀭𑀡𑀁 𑀯𑀸. 𑀲𑁂𑀥𑀢𑀺. 𑀲𑀺𑀤𑁆𑀥𑁄, 𑀧𑀲𑀺𑀤𑁆𑀥𑁄, 𑀧𑀲𑀺𑀤𑁆𑀥𑀺.

𑀤𑀥 𑀥𑀸𑀭𑀡𑁂. 𑀚𑀦𑀲𑁆𑀲 𑀢𑀼𑀝𑁆𑀞𑀺𑀁 𑀤𑀥𑀢𑁂𑀢𑀺 𑀤𑀥𑀺. 𑀥𑀓𑀸𑀭𑀲𑁆𑀲 𑀳𑀓𑀸𑀭𑀢𑁆𑀢𑁂 ‘‘𑀤𑀳𑀢𑀻’’𑀢𑀺 𑀭𑀽𑀧𑀁. 𑀅𑀬𑀁 𑀇𑀢𑁆𑀣𑀻 𑀇𑀫𑀁 𑀇𑀢𑁆𑀣𑀺𑀁 𑀅𑀬𑁆𑀬𑀺𑀓𑀁 𑀤𑀳𑀢𑀺. 𑀇𑀫𑁂 𑀧𑀼𑀭𑀺𑀲𑀸 𑀇𑀫𑀁 𑀧𑀼𑀭𑀺𑀲𑀁 𑀧𑀺𑀢𑀸𑀫𑀳𑀁 𑀤𑀳𑀦𑁆𑀢𑀺. 𑀘𑀺𑀢𑁆𑀢𑀁 𑀲𑀫𑀸𑀤𑀳𑀸𑀢𑀩𑁆𑀩𑀁. 𑀲𑀫𑀸𑀤𑀳𑀁 𑀘𑀺𑀢𑁆𑀢𑀁.

𑀏𑀥 𑀯𑀼𑀤𑁆𑀥𑀺𑀬𑀁 𑀮𑀸𑀪𑁂 𑀘. 𑀏𑀥𑀢𑀺. 𑀏𑀥𑁄, 𑀲𑀼𑀔𑁂𑀥𑀺𑀢𑁄. 𑀕𑀫𑁆𑀪𑀻𑀭𑁂 𑀕𑀸𑀥𑀫𑁂𑀥𑀢𑀺.

𑀏𑀢𑁆𑀣 𑀘 𑀏𑀥𑁄𑀢𑀺 𑀏𑀥𑀢𑀺. 𑀯𑀟𑁆𑀠𑀢𑀺 𑀏𑀢𑁂𑀦 𑀧𑀸𑀯𑀓𑁄𑀢𑀺 𑀏𑀥𑁄. 𑀇𑀦𑁆𑀤𑀦𑀁, 𑀉𑀧𑀸𑀤𑀸𑀦𑀁. 𑀲𑀼𑀔𑁂𑀥𑀺𑀢𑁄𑀢𑀺 𑀲𑀼𑀔𑁂𑀦 𑀏𑀥𑀺𑀢𑁄, 𑀲𑀼𑀔𑀲𑀁𑀯𑀟𑁆𑀠𑀺𑀢𑁄𑀢𑀺 𑀅𑀢𑁆𑀣𑁄. 𑀕𑀸𑀥𑀫𑁂𑀥𑀢𑀻𑀢𑀺 𑀕𑀸𑀥𑀁 𑀧𑀢𑀺𑀝𑁆𑀞𑀺𑀢𑀁 𑀏𑀥𑀢𑀺 𑀮𑀪𑀢𑀺.

𑀩𑀤𑁆𑀥 𑀲𑀁𑀳𑀭𑀺𑀲𑁂. 𑀲𑀁𑀳𑀭𑀺𑀲𑁄 𑀯𑀺𑀦𑀺𑀩𑀤𑁆𑀥𑀓𑁆𑀭𑀺𑀬𑀸. 𑀩𑀤𑁆𑀥𑀢𑀺, 𑀯𑀺𑀦𑀺𑀩𑀤𑁆𑀥𑀢𑀺. 𑀯𑀺𑀦𑀺𑀩𑀤𑁆𑀥𑀸.

𑀕𑀸𑀥 𑀧𑀢𑀺𑀝𑁆𑀞𑀸𑀦𑀺𑀲𑁆𑀲𑀬𑀕𑀦𑁆𑀥𑁂𑀲𑀼. 𑀕𑀸𑀥𑀢𑀺. 𑀕𑀸𑀥𑀁 𑀓𑀢𑁆𑀢𑀸. 𑀕𑀫𑁆𑀪𑀻𑀭𑀢𑁄 𑀅𑀕𑀸𑀥𑀁.

𑀩𑀸𑀥 𑀯𑀺𑀮𑁄𑀴𑀦𑁂 𑀩𑀸𑀥𑀢𑀺, 𑀯𑀺𑀩𑀸𑀥𑀢𑀺. 𑀆𑀩𑀸𑀥𑁄. 𑀆𑀩𑀸𑀥𑀢𑀺 𑀘𑀺𑀢𑁆𑀢𑀁 𑀯𑀺𑀮𑁄𑀴𑁂𑀢𑀻𑀢𑀺 𑀆𑀩𑀸𑀥𑁄.

𑀦𑀸𑀥 ¶ 𑀬𑀸𑀘𑀦𑀸𑀤𑀻𑀲𑀼. 𑀦𑀸𑀥𑀢𑀺. 𑀦𑀸𑀥𑀦𑀁.

𑀩𑀦𑁆𑀥 𑀩𑀦𑁆𑀥𑀦𑁂 𑀩𑀦𑁆𑀥𑀢𑀺. 𑀩𑀦𑁆𑀥𑀦𑀓𑁄, 𑀩𑀦𑁆𑀥𑁄, 𑀩𑀦𑁆𑀥𑀸𑀧𑀺𑀢𑁄, 𑀧𑀝𑀺𑀩𑀦𑁆𑀥𑁄, 𑀩𑀦𑁆𑀥𑀦𑀁, 𑀩𑀦𑁆𑀥𑁄, 𑀲𑀫𑁆𑀩𑀦𑁆𑀥𑀦𑀁, 𑀲𑀫𑁆𑀩𑀦𑁆𑀥𑁄, 𑀧𑀩𑀦𑁆𑀥𑁄, 𑀩𑀦𑁆𑀥𑀼.

𑀢𑀢𑁆𑀣 𑀩𑀦𑁆𑀥𑀦𑀦𑁆𑀢𑀺 𑀩𑀦𑁆𑀥𑀦𑁆𑀢𑀺 𑀲𑀢𑁆𑀢𑁂 𑀏𑀢𑁂𑀦𑀸𑀢𑀺 𑀩𑀦𑁆𑀥𑀦𑀁, 𑀲𑀗𑁆𑀔𑀮𑀺𑀓𑀸𑀤𑀺. ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀯𑀁𑀲𑁄’’𑀢𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀝𑁆𑀞𑁂𑀦 𑀩𑀦𑁆𑀥𑀼, 𑀣𑁂𑀭𑀕𑀸𑀣𑀸𑀲𑀁𑀯𑀡𑁆𑀡𑀦𑀸𑀬𑀁 𑀧𑀦 ‘‘𑀧𑁂𑀫𑀩𑀦𑁆𑀥𑀦𑁂𑀦 𑀩𑀦𑁆𑀥𑀽’’𑀢𑀺 𑀯𑀼𑀢𑁆𑀢𑀁.

𑀤𑀥𑀺 𑀅𑀲𑀻𑀖𑀘𑀸𑀭𑁂. 𑀅𑀲𑀻𑀖𑀘𑀸𑀭𑁄 𑀅𑀲𑀻𑀖𑀧𑁆𑀧𑀯𑀢𑁆𑀢𑀺. 𑀤𑀦𑁆𑀥𑀢𑀺. 𑀤𑀦𑁆𑀥𑁄, 𑀤𑀦𑁆𑀥𑀧𑀜𑁆𑀜𑁄. 𑀬𑁄 𑀤𑀦𑁆𑀥𑀓𑀸𑀮𑁂 𑀢𑀭𑀢𑀺, 𑀢𑀭𑀡𑀻𑀬𑁂 𑀘 𑀤𑀦𑁆𑀥𑀢𑀺.

𑀯𑀤𑁆𑀥 𑀯𑀤𑁆𑀥𑀦𑁂. 𑀯𑀤𑁆𑀥𑀢𑀺. 𑀯𑀤𑁆𑀥𑀺, 𑀯𑀼𑀤𑁆𑀥𑀺, 𑀯𑀤𑁆𑀥𑁄, 𑀯𑀼𑀤𑁆𑀥𑁄, 𑀚𑀸𑀢𑀺𑀯𑀼𑀤𑁆𑀥𑁄, 𑀕𑀼𑀡𑀯𑀼𑀤𑁆𑀥𑁄, 𑀯𑀬𑁄𑀯𑀼𑀤𑁆𑀥𑁄.

𑀬𑁂 𑀯𑀼𑀤𑁆𑀥𑀫𑀧𑀘𑀸𑀬𑀦𑁆𑀢𑀺, 𑀦𑀭𑀸 𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀸;

𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀸𑀲𑀁𑀲𑀸, 𑀲𑀫𑁆𑀧𑀭𑀸𑀬𑁂 𑀘 𑀲𑀼𑀕𑁆𑀕𑀢𑀺𑀁.

𑀲𑀥𑀼 𑀲𑀤𑁆𑀤𑀓𑀼𑀘𑁆𑀙𑀺𑀬𑀁. 𑀲𑀥𑀢𑀺.

𑀧𑀺𑀴𑀥𑀺 𑀅𑀮𑀗𑁆𑀓𑀸𑀭𑁂. 𑀧𑀺𑀴𑀦𑁆𑀥𑀢𑀺. 𑀧𑀺𑀴𑀦𑁆𑀥𑀦𑀁.

𑀧𑀺𑀴𑀦𑁆𑀥𑀦𑀫𑀮𑀗𑁆𑀓𑀸𑀭𑁄, 𑀫𑀡𑁆𑀟𑀦𑀜𑁆𑀘 𑀯𑀺𑀪𑀽𑀲𑀦𑀁;

𑀧𑀲𑀸𑀥𑀦𑀜𑁆𑀘𑀸𑀪𑀭𑀡𑀁, 𑀧𑀭𑀺𑀬𑀸𑀬𑀸 𑀇𑀫𑁂 𑀫𑀢𑀸.

𑀫𑁂𑀥 𑀳𑀺𑀁𑀲𑀸𑀬𑀁 𑀲𑀗𑁆𑀕𑀫𑁂 𑀘. 𑀫𑁂𑀥𑀢𑀺. 𑀫𑁂𑀥𑀸, 𑀫𑁂𑀥𑀸𑀯𑀻. 𑀅𑀢𑁆𑀭 𑀫𑁂𑀥𑀸𑀢𑀺 𑀅𑀲𑀦𑀺 𑀯𑀺𑀬 𑀲𑀺𑀮𑀼𑀘𑁆𑀘𑀬𑁂 𑀓𑀺𑀮𑁂𑀲𑁂 𑀫𑁂𑀥𑀢𑀺 𑀳𑀺𑀁𑀲𑀢𑀻𑀢𑀺 𑀫𑁂𑀥𑀸. 𑀫𑁂𑀥𑀢𑀺 𑀯𑀸 𑀲𑀺𑀭𑀺𑀬𑀸 𑀲𑀻𑀮𑀸𑀤𑀻𑀳𑀺 𑀘 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂𑀳𑀺 𑀲𑀳 𑀕𑀘𑁆𑀙𑀢𑀺 𑀦 𑀏𑀓𑀺𑀓𑀸 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀫𑁂𑀥𑀸, 𑀧𑀜𑁆𑀜𑀸𑀬𑁂𑀢𑀁 𑀦𑀸𑀫𑀁. 𑀢𑀣𑀸 𑀳𑀺 𑁋

‘‘𑀧𑀜𑁆𑀜𑀸 ¶ 𑀳𑀺 𑀲𑁂𑀝𑁆𑀞𑀸 𑀓𑀼𑀲𑀮𑀸 𑀯𑀤𑀦𑁆𑀢𑀺,

𑀦𑀓𑁆𑀔𑀢𑁆𑀢𑀭𑀸𑀚𑀸𑀭𑀺𑀯 𑀢𑀸𑀭𑀓𑀸𑀦𑀁;

𑀲𑀻𑀮𑀁 𑀲𑀺𑀭𑀻 𑀘𑀸𑀧𑀺 𑀲𑀢𑀜𑁆𑀘 𑀥𑀫𑁆𑀫𑁄,

𑀅𑀦𑁆𑀯𑀸𑀬𑀺𑀓𑀸 𑀧𑀜𑁆𑀜𑀯𑀢𑁄 𑀪𑀯𑀦𑁆𑀢𑀻’’𑀢𑀺

𑀯𑀼𑀢𑁆𑀢𑀁. 𑀫𑁂𑀥𑀸𑀯𑀻𑀢𑀺 𑀥𑀫𑁆𑀫𑁄𑀚𑀧𑀜𑁆𑀜𑀸𑀬 𑀘 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄.

𑀲𑀥𑀼 𑀫𑀥𑀼 𑀉𑀦𑁆𑀤𑁂. 𑀲𑀥𑀢𑀺. 𑀫𑀥𑀢𑀺. 𑀫𑀥𑀼.

𑀩𑀼𑀥 𑀩𑁄𑀥𑀦𑁂. 𑀩𑁄𑀥𑀢𑀺. 𑀩𑀼𑀤𑁆𑀥𑁄. 𑀅𑀪𑀺𑀲𑀫𑁆𑀩𑀼𑀤𑁆𑀥𑀸𑀦𑁄. 𑀲𑀫𑁆𑀩𑀼𑀤𑁆𑀥𑀁. 𑀅𑀲𑀫𑁆𑀩𑀼𑀤𑁆𑀥𑀁. 𑀩𑁄𑀥𑀺. 𑀤𑀺𑀯𑀸𑀤𑀺𑀕𑀡𑁂𑀧𑀺 𑀅𑀬𑀁 𑀤𑀺𑀲𑁆𑀲𑀢𑀺. 𑀢𑀢𑁆𑀭𑀳𑀺 ‘‘𑀩𑀼𑀚𑁆𑀛𑀢𑀻’’𑀢𑀺 𑀭𑀽𑀧𑀁, 𑀇𑀥 𑀧𑀦 ‘‘𑀩𑁄𑀥𑀢𑀻’’𑀢𑀺 𑀭𑀽𑀧𑀁. ‘‘𑀬𑁄 𑀦𑀺𑀦𑁆𑀤𑀁 𑀅𑀧𑀩𑁄𑀥𑀢𑀻’’𑀢𑀺 𑀧𑀸𑀴𑀺 𑀤𑀺𑀲𑁆𑀲𑀢𑀺. 𑀓𑀸𑀭𑀺𑀢𑁂 𑀧𑀦 ‘‘𑀩𑁄𑀥𑁂𑀢𑀺’’ 𑀇𑀘𑁆𑀘𑀸𑀤𑀻𑀦𑀺.

𑀬𑀼𑀥 𑀲𑀫𑁆𑀧𑀳𑀸𑀭𑁂. 𑀬𑁄𑀥𑀢𑀺. 𑀬𑁄𑀥𑁄. 𑀬𑁄𑀥𑁂𑀣 𑀫𑀸𑀭𑀁 𑀧𑀜𑁆𑀜𑀸𑀯𑀼𑀥𑁂𑀦. 𑀬𑀼𑀤𑁆𑀥𑀁. 𑀘𑀭𑀡𑀸𑀬𑀼𑀥𑁄, 𑀘𑀭𑀡𑀸𑀯𑀼𑀥𑁄 𑀯𑀸. 𑀆𑀯𑀼𑀥𑀁. 𑀤𑀺𑀯𑀸𑀤𑀺𑀕𑀡𑀺𑀓𑀲𑁆𑀲 𑀧𑀦𑀲𑁆𑀲 ‘‘𑀬𑀼𑀚𑁆𑀛𑀢𑀻’’𑀢𑀺 𑀭𑀽𑀧𑀁.

𑀤𑀻𑀥𑀺 𑀤𑀺𑀢𑁆𑀢𑀺𑀯𑁂𑀥𑀦𑁂𑀲𑀼. 𑀤𑀻𑀥𑀢𑀺. 𑀤𑀻𑀥𑀺𑀢𑀺. 𑀏𑀢𑁆𑀣 𑀘 𑀤𑀻𑀥𑀺𑀢𑀻𑀢𑀺 𑀭𑀲𑁆𑀫𑀺. 𑀅𑀦𑁂𑀓𑀸𑀦𑀺 𑀳𑀺 𑀭𑀲𑁆𑀫𑀺𑀦𑀸𑀫𑀸𑀦𑀺.

𑀭𑀲𑁆𑀫𑀺 𑀆𑀪𑀸 𑀧𑀪𑀸 𑀭𑀁𑀲𑀺, 𑀤𑀺𑀢𑁆𑀢𑀺 𑀪𑀸 𑀭𑀼𑀘𑀺 𑀤𑀻𑀥𑀺𑀢𑀺;

𑀫𑀭𑀻𑀘𑀺 𑀚𑀼𑀢𑀺 𑀪𑀸𑀡𑁆𑀯’𑀲𑀼, 𑀫𑀬𑀽𑀔𑁄 𑀓𑀺𑀭𑀡𑁄 𑀓𑀭𑁄;

𑀦𑀸𑀕𑀥𑀸𑀫𑁄 𑀘 𑀆𑀮𑁄𑀓𑁄, 𑀇𑀘𑁆𑀘𑁂𑀢𑁂 𑀭𑀲𑁆𑀫𑀺𑀯𑀸𑀘𑀓𑀸.

𑀘𑀓𑀸𑀭𑀦𑁆𑀢𑀭𑀽𑀧𑀸𑀦𑀺.

𑀦𑀓𑀸𑀭𑀦𑁆𑀢𑀥𑀸𑀢𑀼

𑀦𑀻 𑀦𑀬𑁂. 𑀦𑁂𑀢𑀺, 𑀦𑀬𑀢𑀺, 𑀯𑀺𑀦𑁂𑀢𑀺. 𑀯𑀺𑀦𑁂𑀬𑁆𑀬 𑀳𑀤𑀬𑁂 𑀤𑀭𑀁. 𑀆𑀦𑁂𑀢𑀺. 𑀆𑀦𑀬𑀢𑀺. 𑀦𑁂𑀢𑀸. 𑀯𑀺𑀦𑁂𑀢𑀸. 𑀦𑀸𑀬𑀓𑁄. 𑀦𑁂𑀬𑁆𑀬𑁄 ¶ . 𑀯𑁂𑀦𑁂𑀬𑁆𑀬𑁄. 𑀯𑁂𑀦𑀬𑀺𑀓𑁄. 𑀯𑀺𑀦𑀻𑀢𑁄 𑀧𑀼𑀭𑀺𑀲𑁄. 𑀦𑀻𑀬𑀫𑀸𑀦𑁂 𑀧𑀺𑀲𑀸𑀘𑁂𑀦, 𑀓𑀺𑀦𑁆𑀦𑀼 𑀢𑀸𑀢 𑀉𑀤𑀺𑀓𑁆𑀔𑀢𑀺. 𑀦𑀻𑀬𑀦𑁆𑀢𑁄. 𑀦𑁂𑀢𑁆𑀢𑀁. 𑀦𑁂𑀢𑁆𑀢𑀺. 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸. 𑀦𑁂𑀢𑁆𑀢𑀺𑀓𑁄. 𑀉𑀤𑀓𑀜𑁆𑀳𑀺 𑀦𑀬𑀦𑁆𑀢𑀺 𑀦𑁂𑀢𑁆𑀢𑀺𑀓𑀸. 𑀦𑁂𑀢𑁆𑀢𑀸. 𑀦𑁂𑀢𑁆𑀢𑁂 𑀉𑀚𑀼𑀁 𑀕𑀢𑁂 𑀲𑀢𑀺. 𑀦𑀬𑁄. 𑀯𑀺𑀦𑀬𑁄. 𑀆𑀬𑀢𑀦𑀁. 𑀦𑁂𑀢𑀼𑀁. 𑀯𑀺𑀦𑁂𑀢𑀼𑀁. 𑀦𑁂𑀢𑁆𑀯𑀸. 𑀯𑀺𑀦𑁂𑀢𑁆𑀯𑀸 𑀇𑀘𑁆𑀘𑀸𑀤𑀻𑀦𑀺.

𑀢𑀢𑁆𑀣 𑀦𑁂𑀢𑁆𑀢𑀦𑁆𑀢𑀺 𑀲𑀫𑀯𑀺𑀲𑀫𑀁 𑀤𑀲𑁆𑀲𑁂𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀦𑁂𑀢𑀻𑀢𑀺 𑀦𑁂𑀢𑁆𑀢𑀁, 𑀘𑀓𑁆𑀔𑀼. 𑀦𑁂𑀢𑁆𑀢𑀻𑀢𑀺 𑀦𑁂𑀦𑁆𑀢𑀺 𑀏𑀢𑀸𑀬 𑀲𑀢𑁆𑀢𑁂𑀢𑀺 𑀦𑁂𑀢𑁆𑀢𑀺, 𑀭𑀚𑁆𑀚𑀼. 𑀪𑀯𑀦𑁂𑀢𑁆𑀢𑀻𑀢𑀺 𑀪𑀯𑀭𑀚𑁆𑀚𑀼, 𑀢𑀡𑁆𑀳𑀸𑀬𑁂𑀢𑀁 𑀦𑀸𑀫𑀁. 𑀢𑀸𑀬 𑀳𑀺 𑀲𑀢𑁆𑀢𑀸 𑀕𑁄𑀡𑀸 𑀯𑀺𑀬 𑀕𑀻𑀯𑀸𑀬 𑀩𑀦𑁆𑀥𑀺𑀢𑁆𑀯𑀸 𑀢𑀁 𑀢𑀁 𑀪𑀯𑀁 𑀦𑀺𑀬𑁆𑀬𑀦𑁆𑀢𑀺, 𑀢𑀲𑁆𑀫𑀸 𑀪𑀯𑀦𑁂𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀦𑁂𑀢𑁆𑀢𑀺𑀓𑀸𑀢𑀺 𑀓𑀲𑁆𑀲𑀓𑀸. 𑀦𑁂𑀢𑁆𑀢𑀸𑀢𑀺 𑀕𑀯𑀚𑁂𑀝𑁆𑀞𑀓𑁄 𑀬𑀽𑀣𑀧𑀢𑀺. 𑀦𑀬𑁄𑀢𑀺 𑀦𑀬𑀦𑀁 𑀕𑀫𑀦𑀁 𑀦𑀬𑁄, 𑀧𑀸𑀴𑀺𑀕𑀢𑀺. 𑀅𑀣 𑀯𑀸 𑀢𑀢𑁆𑀣 𑀢𑀢𑁆𑀣 𑀦𑁂𑀢𑀩𑁆𑀩𑁄𑀢𑀺 𑀦𑀬𑁄, 𑀲𑀤𑀺𑀲𑀪𑀸𑀯𑁂𑀦 𑀦𑁂𑀢𑀩𑁆𑀩𑀸𑀓𑀸𑀭𑁄. 𑀦𑀻𑀬𑀢𑀻𑀢𑀺 𑀦𑀬𑁄, 𑀢𑀣𑀢𑁆𑀢𑀦𑀬𑀸𑀤𑀺. 𑀦𑀻𑀬𑀢𑀺 𑀏𑀢𑁂𑀦𑀸𑀢𑀺 𑀦𑀬𑁄, 𑀅𑀦𑁆𑀢𑀤𑁆𑀯𑀬𑀯𑀺𑀯𑀚𑁆𑀚𑀦𑀦𑀬𑀸𑀤𑀺.

𑀢𑀣𑀸 𑀳𑀺 𑀙𑀩𑁆𑀩𑀺𑀥𑁄 𑀦𑀬𑁄 𑀢𑀣𑀢𑁆𑀢𑀦𑀬𑁄 𑀧𑀢𑁆𑀢𑀺𑀦𑀬𑁄 𑀤𑁂𑀲𑀦𑀸𑀦𑀬𑁄 𑀅𑀦𑁆𑀢𑀤𑁆𑀯𑀬𑀯𑀺𑀯𑀚𑁆𑀚𑀦𑀦𑀬𑁄 𑀅𑀘𑀺𑀦𑁆𑀢𑁂𑀬𑁆𑀬𑀦𑀬𑁄 𑀅𑀥𑀺𑀧𑁆𑀧𑀸𑀬𑀦𑀬𑁄𑀢𑀺. 𑀢𑁂𑀲𑀼 𑀢𑀣𑀢𑁆𑀢𑀦𑀬𑁄 𑀅𑀦𑁆𑀢𑀤𑁆𑀯𑀬𑀯𑀺𑀯𑀚𑁆𑀚𑀦𑀦𑀬𑁂𑀦 𑀦𑀻𑀬𑀢𑀺, 𑀧𑀢𑁆𑀢𑀺𑀦𑀬𑁄 𑀅𑀘𑀺𑀦𑁆𑀢𑁂𑀬𑁆𑀬𑀦𑀬𑁂𑀦, 𑀤𑁂𑀲𑀦𑀸𑀦𑀬𑁄 𑀅𑀥𑀺𑀧𑁆𑀧𑀸𑀬𑀦𑀬𑁂𑀦 𑀦𑀻𑀬𑀢𑀺. 𑀏𑀢𑁆𑀣𑀸𑀤𑀺𑀫𑁆𑀳𑀺 𑀢𑀺𑀯𑀺𑀥𑁄 𑀦𑀬𑁄 𑀓𑀫𑁆𑀫𑀲𑀸𑀥𑀦𑁂𑀦 𑀦𑀻𑀬𑀢𑀻𑀢𑀺 ‘‘𑀦𑀬𑁄’’𑀢𑀺 𑀯𑀼𑀘𑁆𑀘𑀢𑀺, 𑀧𑀘𑁆𑀙𑀺𑀫𑁄 𑀧𑀦 𑀢𑀺𑀯𑀺𑀥𑁄 𑀦𑀬𑁄 𑀓𑀭𑀡𑀲𑀸𑀥𑀦𑁂𑀦 𑀦𑀻𑀬𑀢𑀺 𑀏𑀢𑁂𑀦 𑀢𑀣𑀢𑁆𑀢𑀸𑀤𑀺𑀦𑀬𑀢𑁆𑀢𑀬𑀫𑀺𑀢𑀺 ‘‘𑀦𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀧𑀧𑀜𑁆𑀘𑀺𑀬𑀫𑀸𑀦𑁂 𑀕𑀦𑁆𑀣𑀯𑀺𑀢𑁆𑀣𑀸𑀭𑁄 𑀲𑀺𑀬𑀸𑀢𑀺 𑀯𑀺𑀢𑁆𑀣𑀸𑀭𑁄 𑀦 𑀤𑀲𑁆𑀲𑀺𑀢𑁄.

𑀅𑀧𑀭𑁄𑀧𑀺 ¶ 𑀘𑀢𑀼𑀩𑁆𑀩𑀺𑀥𑁄 𑀦𑀬𑁄 𑀏𑀓𑀢𑁆𑀢𑀦𑀬𑁄 𑀦𑀸𑀦𑀢𑁆𑀢𑀦𑀬𑁄 𑀅𑀩𑁆𑀬𑀸𑀧𑀸𑀭𑀦𑀬𑁄 𑀏𑀯𑀁𑀥𑀫𑁆𑀫𑀢𑀸𑀦𑀬𑁄𑀢𑀺.

𑀯𑀺𑀦𑁂𑀢𑀺 𑀲𑀢𑁆𑀢𑁂 𑀏𑀢𑁆𑀣, 𑀏𑀢𑁂𑀦𑀸𑀢𑀺 𑀯𑀸 𑀯𑀺𑀦𑀬𑁄. 𑀓𑀸𑀬𑀯𑀸𑀘𑀸𑀦𑀁 𑀯𑀺𑀦𑀬𑀦𑀢𑁄𑀧𑀺 𑀯𑀺𑀦𑀬𑁄. 𑀆𑀬𑀢𑀦𑀦𑁆𑀢𑀺 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀧𑀯𑀢𑁆𑀢𑀁 𑀅𑀢𑀻𑀯 𑀆𑀬𑀢𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀬𑀸𑀯 𑀦 𑀦𑀺𑀯𑀢𑁆𑀢𑀢𑀺, 𑀢𑀸𑀯 𑀦𑀬𑀢𑁂𑀯 𑀧𑀯𑀢𑁆𑀢𑀢𑁂𑀯𑀸𑀢𑀺 𑀆𑀬𑀢𑀦𑀁.

𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀼𑀤𑁆𑀥𑀸𑀭𑁄. ‘‘𑀆𑀬𑀢𑀦𑀦𑁆𑀢𑀺 𑀅𑀲𑁆𑀲𑀸𑀦𑀁 𑀓𑀫𑁆𑀩𑁄𑀚𑁄 𑀆𑀬𑀢𑀦𑀁, 𑀕𑀼𑀦𑁆𑀦𑀁 𑀤𑀓𑁆𑀔𑀺𑀡𑀸𑀧𑀣𑁄 𑀆𑀬𑀢𑀦’’𑀦𑁆𑀢𑀺 𑀏𑀢𑁆𑀣 𑀲𑀜𑁆𑀚𑀸𑀢𑀺𑀝𑁆𑀞𑀸𑀦𑀁 𑀆𑀬𑀅𑀦𑀁 𑀦𑀸𑀫. ‘‘𑀫𑀦𑁄𑀭𑀫𑁂 𑀆𑀬𑀢𑀦𑁂, 𑀲𑁂𑀯𑀦𑁆𑀢𑀺 𑀦𑀁 𑀯𑀺𑀳𑀗𑁆𑀕𑀫𑀸.

𑀙𑀸𑀬𑀁 𑀙𑀸𑀬𑀢𑁆𑀣𑀺𑀦𑁄 𑀬𑀦𑁆𑀢𑀺, 𑀨𑀮𑀢𑁆𑀣𑀁 𑀨𑀮𑀪𑁄𑀚𑀺𑀦𑁄’’𑀢𑀺 𑀏𑀢𑁆𑀣 𑀲𑀫𑁄𑀲𑀭𑀡𑀝𑁆𑀞𑀸𑀦𑀁. ‘‘𑀧𑀜𑁆𑀘𑀺𑀫𑀸𑀦𑀺 𑀪𑀺𑀓𑁆𑀔𑀯𑁂 𑀯𑀺𑀫𑀼𑀢𑁆𑀢𑀸𑀬𑀢𑀦𑀸𑀦𑀻’’𑀢𑀺 𑀏𑀢𑁆𑀣 𑀓𑀸𑀭𑀡𑀁. 𑀅𑀜𑁆𑀜𑁂𑀧𑀺 𑀧𑀦 𑀧𑀬𑁄𑀕𑀸 𑀬𑀢 𑀧𑀢𑀺𑀬𑀢𑀦𑁂𑀢𑀺 𑀏𑀢𑁆𑀣 𑀧𑀓𑀸𑀲𑀺𑀢𑀸.

𑀦𑀻 𑀧𑀸𑀧𑀦𑁂. 𑀦𑁂𑀢𑀺, 𑀦𑀬𑀢𑀺. 𑀦𑀬𑀦𑀁.

𑀦𑀼 𑀣𑀼𑀢𑀺𑀬𑀁. 𑀦𑁄𑀢𑀺, 𑀦𑀯𑀢𑀺. 𑀦𑀼𑀢𑁄.

𑀣𑀦 𑀧𑀦 𑀥𑀦 𑀲𑀤𑁆𑀤𑁂. 𑀣𑀦𑀢𑀺. 𑀧𑀦𑀢𑀺. 𑀥𑀦𑀢𑀺.

𑀓𑀦 𑀤𑀺𑀢𑁆𑀢𑀺𑀓𑀦𑁆𑀢𑀻𑀲𑀼. 𑀓𑀦𑀢𑀺. 𑀓𑀜𑁆𑀜𑀸. 𑀓𑀦𑀓𑀁.

𑀏𑀢𑁆𑀣 𑀘 𑀬𑁄𑀩𑁆𑀩𑀦𑀺𑀪𑀸𑀯𑁂 𑀞𑀺𑀢𑀢𑁆𑀢𑀸 𑀭𑀽𑀧𑀯𑀺𑀮𑀸𑀲𑁂𑀦 𑀓𑀦𑀢𑀺 𑀤𑀺𑀧𑁆𑀧𑀢𑀺 𑀯𑀺𑀭𑁄𑀘𑀢𑀻𑀢𑀺 𑀓𑀜𑁆𑀜𑀸. 𑀅𑀣 𑀯𑀸 𑀓𑀦𑀺𑀬𑀢𑀺 𑀓𑀸𑀫𑀺𑀬𑀪𑀺 𑀅𑀪𑀺𑀧𑀢𑁆𑀣𑀺𑀬𑀢𑀺 𑀧𑀼𑀭𑀺𑀲𑁂𑀳𑀻𑀢𑀺𑀧𑀺 𑀓𑀜𑁆𑀜𑀸, 𑀬𑁄𑀩𑁆𑀩𑀦𑀺𑀢𑁆𑀣𑀻. 𑀓𑀦𑀓𑀦𑁆𑀢𑀺 𑀓𑀦𑀢𑀺, 𑀓𑀦𑀻𑀬𑀢𑀻𑀢𑀺 𑀯𑀸 𑀓𑀦𑀓𑀁, 𑀲𑀼𑀯𑀡𑁆𑀡𑀁. 𑀲𑀼𑀯𑀡𑁆𑀡𑀲𑁆𑀲 𑀳𑀺 𑀅𑀦𑁂𑀓𑀸𑀦𑀺 𑀦𑀸𑀫𑀸𑀦𑀺.

𑀲𑀼𑀯𑀡𑁆𑀡𑀁 𑀓𑀦𑀓𑀁 𑀳𑁂𑀫𑀁, 𑀓𑀜𑁆𑀘𑀦𑀁 𑀳𑀝𑀓𑀫𑁆𑀧𑀺 𑀘;

𑀚𑀸𑀢𑀭𑀽𑀧𑀁 𑀢𑀧𑀦𑀻𑀬𑀁, 𑀯𑀡𑁆𑀡𑀁 𑀢𑀩𑁆𑀪𑁂𑀤𑀓𑀸 𑀧𑀦;

𑀚𑀫𑁆𑀩𑀼𑀦𑀤𑀁 𑀲𑀺𑀗𑁆𑀕𑀺𑀓𑀜𑁆𑀘, 𑀘𑀸𑀫𑀺𑀓𑀭𑀦𑁆𑀢𑀺 𑀪𑀸𑀲𑀺𑀢𑀸.

𑀯𑀦 ¶ 𑀲𑀦 𑀲𑀫𑁆𑀪𑀢𑁆𑀢𑀺𑀬𑀁. 𑀯𑀦𑀢𑀺. 𑀯𑀦𑀁. 𑀲𑀦𑀢𑀺.

𑀢𑀢𑁆𑀣 𑀯𑀦𑀦𑁆𑀢𑀺. 𑀢𑀁 𑀲𑀫𑁆𑀪𑀚𑀦𑁆𑀢𑀺 𑀫𑀬𑀽𑀭𑀓𑁄𑀓𑀺𑀮𑀸𑀤𑀬𑁄 𑀲𑀢𑁆𑀢𑀸𑀢𑀺 𑀯𑀦𑀁, 𑀅𑀭𑀜𑁆𑀜𑀁. 𑀯𑀦𑀢𑀺 𑀲𑀫𑁆𑀪𑀚𑀢𑀺 𑀲𑀁𑀓𑀺𑀮𑁂𑀲𑀧𑀼𑀕𑁆𑀕𑀮𑀦𑁆𑀢𑀺 𑀯𑀦𑀁, 𑀢𑀡𑁆𑀳𑀸.

𑀫𑀦 𑀅𑀩𑁆𑀪𑀸𑀲𑁂. 𑀫𑀦𑀢𑀺. 𑀫𑀦𑁄.

𑀫𑀸𑀦 𑀯𑀻𑀫𑀁𑀲𑀸𑀬𑀁, 𑀯𑀻𑀫𑀁𑀲𑀢𑀺. 𑀯𑀻𑀫𑀁𑀲𑀸.

𑀚𑀦 𑀲𑀼𑀦 𑀲𑀤𑁆𑀤𑁂. 𑀚𑀦𑀢𑀺. 𑀲𑀼𑀦𑀢𑀺.

𑀏𑀢𑁆𑀣 𑀘 ‘‘𑀓𑀲𑁆𑀫𑀸 𑀢𑁂 𑀏𑀓𑁄 𑀪𑀼𑀚𑁄 𑀚𑀦𑀢𑀺, 𑀏𑀓𑁄 𑀢𑁂 𑀦 𑀚𑀦𑀢𑀻 𑀪𑀼𑀚𑁄’’𑀢𑀺 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. 𑀢𑀢𑁆𑀣 𑀚𑀦𑀢𑀻𑀢𑀺 𑀲𑀼𑀦𑀢𑀺 𑀲𑀤𑁆𑀤𑀁 𑀓𑀭𑁄𑀢𑀺.

𑀔𑀦𑀼 𑀅𑀯𑀤𑀸𑀭𑀡𑁂 𑀔𑀦𑀢𑀺. 𑀲𑀼𑀔𑀁. 𑀤𑀼𑀓𑁆𑀔𑀁. 𑀔𑀢𑁄 𑀆𑀯𑀸𑀝𑁄.

𑀢𑀢𑁆𑀣 𑀲𑀼𑀔𑀦𑁆𑀢𑀺 𑀲𑀼𑀝𑁆𑀞𑀼 𑀤𑀼𑀓𑁆𑀔𑀁 𑀔𑀦𑀢𑀻𑀢𑀺 𑀲𑀼𑀔𑀁. 𑀤𑀼𑀝𑁆𑀞𑀼 𑀔𑀦𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀦𑁆𑀢𑀺 𑀤𑀼𑀓𑁆𑀔𑀁. 𑀅𑀜𑁆𑀜𑀫𑀜𑁆𑀜𑀧𑀝𑀺𑀧𑀓𑁆𑀔𑀸 𑀳𑀺 𑀏𑀢𑁂 𑀥𑀫𑁆𑀫𑀸. 𑀤𑁆𑀯𑀺𑀥𑀸 𑀘𑀺𑀢𑁆𑀢𑀁 𑀔𑀦𑀢𑀻𑀢𑀺 𑀯𑀸 𑀤𑀼𑀓𑁆𑀔𑀁. 𑀘𑀼𑀭𑀸𑀤𑀺𑀕𑀡𑀯𑀲𑁂𑀦 𑀧𑀦 ‘‘𑀲𑀼𑀔𑀬𑀢𑀻𑀢𑀺 𑀲𑀼𑀔𑀁, 𑀤𑀼𑀓𑁆𑀔𑀬𑀢𑀻𑀢𑀺 𑀤𑀼𑀓𑁆𑀔’’𑀦𑁆𑀢𑀺 𑀦𑀺𑀩𑁆𑀩𑀘𑀦𑀸𑀦𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀲𑀫𑀸𑀲𑀧𑀅𑀯𑀲𑁂𑀦 ‘‘𑀲𑀼𑀓𑀭𑀁 𑀔𑀫𑀲𑁆𑀲𑀸𑀢𑀺 𑀲𑀼𑀔𑀁, 𑀤𑀼𑀓𑁆𑀓𑀭𑀁 𑀔𑀫𑀲𑁆𑀲𑀸𑀢𑀺 𑀤𑀼𑀓𑁆𑀔’’𑀦𑁆𑀢𑀺 𑀦𑀺𑀩𑁆𑀩𑀘𑀦𑀸𑀦𑀺𑀧𑀺 𑀯𑀺𑀯𑀺𑀥𑀸 𑀳𑀺 𑀲𑀤𑁆𑀤𑀸𑀦𑀁 𑀩𑁆𑀬𑀼𑀧𑁆𑀧𑀢𑁆𑀢𑀺 𑀧𑀯𑀢𑁆𑀢𑀺 𑀦𑀺𑀫𑀺𑀢𑁆𑀢𑀜𑁆𑀘.

𑀤𑀸𑀦 𑀅𑀯𑀔𑀡𑁆𑀟𑀦𑁂. 𑀤𑀸𑀦𑀢𑀺. 𑀅𑀧𑀤𑀸𑀦𑀁.

𑀲𑀸𑀦 𑀢𑁂𑀚𑀦𑁂. 𑀢𑁂𑀚𑀦𑀁 𑀦𑀺𑀲𑀸𑀦𑀁. 𑀲𑀸𑀦𑀢𑀺.

𑀳𑀦 𑀳𑀺𑀁𑀲𑀸𑀕𑀢𑀻𑀲𑀼. 𑀏𑀢𑁆𑀣 𑀧𑀦 𑀳𑀺𑀁𑀲𑀸𑀯𑀘𑀦𑁂𑀦 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀻𑀴𑀦𑀜𑁆𑀘 𑀤𑀡𑁆𑀟𑀸𑀤𑀻𑀳𑀺 𑀧𑀳𑀭𑀡𑀜𑁆𑀘 𑀕𑀳𑀺𑀢𑀁, 𑀢𑀲𑁆𑀫𑀸 𑀳𑀦 𑀳𑀺𑀁𑀲𑀸𑀧𑀳𑀭𑀡𑀕𑀢𑀻𑀲𑀽𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀢𑀣𑀸 𑀳𑀺 ‘‘𑀭𑀸𑀚𑀸𑀦𑁄 𑀘𑁄𑀭𑀁 𑀕𑀳𑁂𑀢𑁆𑀯𑀸 𑀳𑀦𑁂𑀬𑁆𑀬𑀼𑀁 𑀯𑀸 𑀩𑀦𑁆𑀥𑁂𑀬𑁆𑀬𑀼𑀁 𑀯𑀸’’𑀢𑀺. 𑀧𑀸𑀞𑀲𑁆𑀲 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀦𑁆𑀢𑁂𑀳𑀺 ‘‘𑀳𑀦𑁂𑀬𑁆𑀬𑀼𑀦𑁆𑀢𑀺 𑀧𑁄𑀣𑁂𑀬𑁆𑀬𑀼𑀜𑁆𑀘𑁂𑀯 𑀙𑀺𑀦𑁆𑀤𑁂𑀬𑁆𑀬𑀼𑀜𑁆𑀘𑀸’’𑀢𑀺 ¶ 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀙𑁂𑀤𑀦𑀁 𑀦𑀸𑀫 𑀳𑀢𑁆𑀣𑀧𑀸𑀤𑀸𑀤𑀺𑀙𑁂𑀤𑀦𑀁 𑀯𑀸 𑀲𑀻𑀲𑀘𑁆𑀙𑁂𑀤𑀯𑀲𑁂𑀦 𑀫𑀸𑀭𑀡𑀁 𑀯𑀸. 𑀳𑀦𑀲𑁆𑀲 𑀯𑀥𑀸𑀤𑁂𑀲𑁄 𑀖𑀸𑀢𑀸𑀤𑁂𑀲𑁄 𑀘 𑀪𑀯𑀢𑀺, 𑀳𑀦𑁆𑀢𑀺 𑀳𑀦𑀢𑀺, 𑀳𑀦𑀦𑁆𑀢𑀺. 𑀳𑀦𑀲𑀺, 𑀳𑀦𑀣. 𑀲𑁂𑀲𑀁 𑀲𑀩𑁆𑀩𑀁 𑀦𑁂𑀬𑁆𑀬𑀁.

𑀳𑀺𑀁𑀲𑀸𑀤𑀬𑁄 𑀘𑀢𑁆𑀢𑀸𑀭𑁄 𑀅𑀢𑁆𑀣𑀸 𑀮𑀩𑁆𑀪𑀦𑁆𑀢𑀺. ‘‘𑀳𑀦𑁆𑀢𑀺 𑀳𑀢𑁆𑀣𑁂𑀳𑀺 𑀧𑀸𑀤𑁂𑀳𑀻’’𑀢𑀺 𑀏𑀢𑁆𑀣 𑀧𑀦 𑀳𑀦𑁆𑀢𑀻𑀢𑀺 𑀧𑀳𑀭𑀢𑀻𑀢𑀺 𑀅𑀢𑁆𑀣𑁄. ‘‘𑀓𑀼𑀤𑁆𑀥𑁄 𑀳𑀺 𑀧𑀺𑀢𑀭𑀁 𑀳𑀦𑁆𑀢𑀺. 𑀯𑀺𑀓𑁆𑀓𑁄𑀲𑀫𑀸𑀦𑀸 𑀢𑀺𑀩𑁆𑀩𑀸𑀳𑀺, 𑀳𑀦𑁆𑀢𑀺 𑀦𑁂𑀲𑀁 𑀯𑀭𑀁 𑀯𑀭’’𑀦𑁆𑀢𑀺. 𑀏𑀢𑁆𑀣 𑀳𑀦𑁆𑀢𑀻𑀢𑀺 𑀫𑀸𑀭𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀯𑀥𑀢𑀺, 𑀯𑀥𑁂𑀢𑀺, 𑀖𑀸𑀢𑁂𑀢𑀺’’ 𑀇𑀘𑁆𑀘𑀧𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀢𑀢𑁆𑀣 ‘‘𑀯𑀥𑀢𑀺 𑀦 𑀭𑁄𑀤𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀢𑁆𑀢𑀸𑀦𑀁 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀭𑁄𑀤𑀢𑀻’’𑀢𑀺𑀆𑀤𑀻𑀲𑀼 𑀯𑀥𑁄 𑀧𑀳𑀭𑀡𑀁. 𑀧𑀸𑀡𑀁 𑀯𑀥𑁂𑀢𑀺. 𑀧𑀸𑀡𑀯𑀥𑁄. ‘‘𑀏𑀲 𑀯𑀥𑁄 𑀔𑀡𑁆𑀟𑀳𑀸𑀮𑀲𑁆𑀲. 𑀲𑀢𑁆𑀢𑁂 𑀖𑀸𑀢𑁂𑀢𑀻’’𑀢𑀺 𑀘 𑀆𑀤𑀻𑀲𑀼 𑀯𑀥𑁄 𑀫𑀸𑀭𑀡𑀁.

‘‘𑀉𑀧𑀸𑀳𑀦𑀁, 𑀯𑀥𑀽’’𑀢𑀺 𑀘 𑀏𑀢𑁆𑀣 𑀳𑀦𑀯𑀥𑀲𑀤𑁆𑀤𑀢𑁆𑀣𑁄𑀕𑀫𑀦𑀁. ‘‘𑀧𑀼𑀭𑀺𑀲𑀁 𑀳𑀦𑀢𑀺. 𑀲𑀻𑀢𑀁 𑀉𑀡𑁆𑀳𑀁 𑀧𑀝𑀺𑀳𑀦𑀢𑀺’’ 𑀇𑀘𑁆𑀘𑀸𑀤𑀻𑀦𑀺 𑀓𑀢𑁆𑀢𑀼𑀧𑀤𑀸𑀦𑀺. 𑀤𑁂𑀯𑀤𑀢𑁆𑀢𑁄 𑀬𑀜𑁆𑀜𑀤𑀢𑁆𑀢𑁂𑀦 𑀳𑀜𑁆𑀜𑀢𑀺. 𑀢𑀢𑁄 𑀯𑀸𑀢𑀸𑀢𑀧𑁂 𑀖𑁄𑀭𑁂, 𑀲𑀜𑁆𑀚𑀸𑀢𑁂 𑀧𑀝𑀺𑀳𑀜𑁆𑀜𑀢𑀺. 𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲𑁂𑀓𑀸𑀭𑀢𑁆𑀢𑀁, 𑀬𑀣𑀸 ‘‘𑀯𑀦𑀧𑁆𑀧𑀕𑀼𑀫𑁆𑀩𑁂’’𑀢𑀺. 𑀯𑀺𑀳𑀸𑀭𑁂𑀦𑀸𑀢𑀺 𑀧𑀤𑀁 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀇𑀘𑁆𑀘𑀸𑀤𑀻𑀦𑀺 𑀓𑀫𑁆𑀫𑀧𑀤𑀸𑀦𑀺. 𑀳𑀦𑁆𑀢𑀸. 𑀳𑀢𑁄. 𑀯𑀥𑀓𑁄. 𑀯𑀥𑀽. 𑀆𑀖𑀸𑀢𑁄. 𑀉𑀧𑀖𑀸𑀢𑁄. 𑀖𑀸𑀢𑀓𑁄. 𑀧𑀝𑀺𑀖𑁄. 𑀲𑀗𑁆𑀖𑁄. 𑀩𑁆𑀬𑀕𑁆𑀖𑁄. 𑀲𑀓𑀼𑀡𑀕𑁆𑀖𑀺. 𑀳𑀦𑁆𑀢𑀼𑀁, 𑀳𑀦𑀺𑀢𑀼𑀁, 𑀳𑀦𑁆𑀢𑁆𑀯𑀸, 𑀳𑀦𑀺𑀢𑁆𑀯𑀸. 𑀯𑀚𑁆𑀛𑁂𑀢𑁆𑀯𑀸, 𑀯𑀥𑀺𑀢𑁆𑀯𑀸 𑀇𑀘𑁆𑀘𑀸𑀤𑀻𑀦𑀺 𑀲𑀦𑀸𑀫𑀺𑀓𑀸𑀦𑀺 𑀢𑀼𑀫𑀦𑁆𑀢𑀸𑀤𑀺𑀧𑀤𑀸𑀦𑀺.

𑀢𑀢𑁆𑀣 𑀉𑀧𑀸𑀳𑀦𑀦𑁆𑀢𑀺 𑀢𑀁 𑀢𑀁 𑀞𑀸𑀦𑀁 𑀉𑀧𑀳𑀦𑀦𑁆𑀢𑀺 𑀉𑀧𑀕𑀘𑁆𑀙𑀦𑁆𑀢𑀺 𑀢𑀢𑁄 𑀘 𑀆𑀳𑀦𑀦𑁆𑀢𑀺 𑀆𑀕𑀘𑁆𑀙𑀦𑁆𑀢𑀺 𑀏𑀢𑁂𑀦𑀸𑀢𑀺 𑀉𑀧𑀸𑀳𑀦𑀁. 𑀯𑀥𑀽𑀢𑀺 𑀓𑀺𑀮𑁂𑀲𑀯𑀲𑁂𑀦 𑀲𑀼𑀦𑀔𑀫𑁆𑀧𑀺 𑀉𑀧𑀕𑀫𑀦𑀲𑀻𑀮𑀸𑀢𑀺 𑀯𑀥𑀽, 𑀲𑀩𑁆𑀩𑀸𑀲𑀁 𑀇𑀢𑁆𑀣𑀻𑀦𑀁 ¶ 𑀲𑀸𑀥𑀸𑀭𑀡𑀫𑁂𑀢𑀁. 𑀅𑀣 𑀯𑀸 𑀯𑀥𑀽𑀢𑀺 𑀲𑀼𑀡𑀺𑀲𑀸. 𑀢𑀣𑀸 𑀳𑀺 ‘‘𑀢𑁂𑀦 𑀳𑀺 𑀯𑀥𑀼 𑀬𑀤𑀸 𑀉𑀢𑀼𑀦𑀻 𑀅𑀳𑁄𑀲𑀺, 𑀧𑀼𑀧𑁆𑀨𑀁 𑀢𑁂 𑀉𑀧𑁆𑀧𑀦𑁆𑀦𑀁, 𑀅𑀣 𑀫𑁂 𑀆𑀭𑁄𑀘𑁂𑀬𑁆𑀬𑀸𑀲𑀻’’𑀢𑀺 𑀏𑀢𑁆𑀣 𑀯𑀥𑀽𑀢𑀺 𑀲𑀼𑀡𑀺𑀲𑀸 𑀯𑀼𑀘𑁆𑀘𑀢𑀺. 𑀲𑀸 𑀧𑀦 ‘‘𑀅𑀬𑀁 𑀦𑁄 𑀧𑀼𑀢𑁆𑀢𑀲𑁆𑀲 𑀪𑀭𑀺𑀬𑀸’’𑀢𑀺 𑀲𑀲𑁆𑀲𑀼𑀲𑀲𑀼𑀭𑁂𑀳𑀺 𑀅𑀥𑀺𑀕𑀦𑁆𑀢𑀩𑁆𑀩𑀸 𑀚𑀸𑀦𑀺𑀢𑀩𑁆𑀩𑀸𑀢𑀺 𑀯𑀥𑀽𑀢𑀺 𑀯𑀼𑀘𑁆𑀘𑀢𑀺. 𑀕𑀢𑁆𑀬𑀢𑁆𑀣𑀸𑀦𑀁 𑀓𑀢𑁆𑀣𑀘𑀺 𑀩𑀼𑀤𑁆𑀥𑀺𑀬𑀢𑁆𑀣𑀓𑀣𑀦𑀢𑁄 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑁂𑀯. ‘‘𑀲𑀼𑀡𑁆𑀳𑀸, 𑀲𑀼𑀡𑀺𑀲𑀸, 𑀯𑀥𑀽’’ 𑀇𑀘𑁆𑀘𑁂𑀢𑁂 𑀧𑀭𑀺𑀬𑀸𑀬𑀸. 𑀲𑀗𑁆𑀖𑁄𑀢𑀺 𑀪𑀺𑀓𑁆𑀔𑀼𑀲𑀫𑀽𑀳𑁄. 𑀲𑀫𑀕𑁆𑀕𑀁 𑀓𑀫𑁆𑀫𑀁 𑀲𑀫𑀼𑀧𑀕𑀘𑁆𑀙𑀢𑀻𑀢𑀺 𑀲𑀗𑁆𑀖𑁄, 𑀲𑀼𑀝𑁆𑀞𑀼 𑀯𑀸 𑀓𑀺𑀮𑁂𑀲𑁂 𑀳𑀦𑁆𑀢𑀺 𑀢𑁂𑀦 𑀢𑁂𑀦 𑀫𑀕𑁆𑀕𑀸𑀲𑀺𑀦𑀸 𑀫𑀸𑀭𑁂𑀢𑀻𑀢𑀺𑀧𑀺 𑀲𑀗𑁆𑀖𑁄, 𑀧𑀼𑀣𑀼𑀚𑁆𑀚𑀦𑀸𑀭𑀺𑀬𑀯𑀲𑁂𑀦 𑀯𑀼𑀢𑁆𑀢𑀸𑀦𑁂𑀢𑀸𑀦𑀺. 𑀯𑀺𑀯𑀺𑀥𑁂 𑀲𑀢𑁆𑀢𑁂 𑀆𑀳𑀦𑀢𑀺 𑀪𑀼𑀲𑁄 𑀖𑀸𑀢𑁂𑀢𑀻𑀢𑀺 𑀩𑁆𑀬𑀕𑁆𑀖𑁄. 𑀲𑁄 𑀏𑀯 ‘‘𑀯𑀺𑀬𑀕𑁆𑀖𑁄, 𑀯𑀕𑁆𑀖𑁄’’𑀢𑀺 𑀘 𑀯𑀼𑀘𑁆𑀘𑀢𑀺. 𑀅𑀧𑀭𑀫𑁆𑀧𑀺 𑀧𑀼𑀡𑁆𑀟𑀭𑀻𑀓𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀤𑀼𑀩𑁆𑀩𑀮𑁂 𑀲𑀓𑀼𑀡𑁂 𑀳𑀦𑁆𑀢𑀻𑀢𑀺 𑀲𑀓𑀼𑀡𑀕𑁆𑀖𑀺, 𑀲𑁂𑀦𑁄, 𑀅𑀬𑀁 𑀧𑀦 𑀳𑀦𑀥𑀸𑀢𑀼 𑀤𑀺𑀯𑀸𑀤𑀺𑀕𑀡𑁂 ‘‘𑀧𑀝𑀺𑀳𑀜𑁆𑀜𑀢𑀻’’𑀢𑀺 𑀅𑀓𑀫𑁆𑀫𑀓𑀁 𑀓𑀢𑁆𑀢𑀼𑀧𑀤𑀁 𑀚𑀦𑁂𑀢𑀺. 𑀢𑀣𑀸 𑀳𑀺 ‘‘𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀺𑀬𑁂 𑀲𑁄𑀢𑁂 𑀧𑀝𑀺𑀳𑀜𑁆𑀜𑀢𑀻’’𑀢𑀺𑀆𑀤𑀺𑀓𑀸 𑀧𑀸𑀴𑀺𑀬𑁄 𑀤𑀺𑀲𑁆𑀲𑀦𑁆𑀢𑀺.

𑀅𑀦 𑀧𑀸𑀡𑀦𑁂. 𑀧𑀸𑀡𑀦𑀁 𑀲𑀲𑀦𑀁. 𑀅𑀦𑀢𑀺. 𑀆𑀦𑀁, 𑀧𑀸𑀦𑀁. ‘‘𑀢𑀢𑁆𑀣 𑀆𑀦𑀦𑁆𑀢𑀺 𑀅𑀲𑁆𑀲𑀸𑀲𑁄. 𑀧𑀸𑀦𑀦𑁆𑀢𑀺 𑀧𑀲𑁆𑀲𑀸𑀲𑁄. 𑀏𑀢𑁂𑀲𑀼 𑀅𑀲𑁆𑀲𑀸𑀲𑁄𑀢𑀺 𑀩𑀳𑀺 𑀦𑀺𑀓𑁆𑀔𑀫𑀦𑀯𑀸𑀢𑁄. 𑀧𑀲𑁆𑀲𑀸𑀲𑁄𑀢𑀺 𑀅𑀦𑁆𑀢𑁄 𑀧𑀯𑀺𑀲𑀦𑀯𑀸𑀢𑁄’’𑀢𑀺 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀲𑀼𑀢𑁆𑀢𑀦𑁆𑀢𑀝𑁆𑀞𑀓𑀣𑀸𑀲𑀼 𑀧𑀦 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀆𑀕𑀢𑀁. 𑀢𑀢𑁆𑀣 𑀬𑀲𑁆𑀫𑀸 𑀲𑀩𑁆𑀩𑁂𑀲𑀫𑁆𑀧𑀺 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑀓𑀸𑀮𑁂 𑀧𑀞𑀫𑀁 𑀅𑀩𑁆𑀪𑀦𑁆𑀢𑀭𑀯𑀸𑀢𑁄 𑀩𑀳𑀺 𑀦𑀺𑀓𑁆𑀔𑀫𑀢𑀺, 𑀧𑀘𑁆𑀙𑀸 𑀩𑀸𑀳𑀺𑀭𑀯𑀸𑀢𑁄 𑀲𑀼𑀔𑀼𑀫𑀁 𑀭𑀚𑀁 𑀕𑀳𑁂𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑀁 𑀧𑀯𑀺𑀲𑀦𑁆𑀢𑁄 𑀢𑀸𑀮𑀼𑀁 𑀆𑀳𑀘𑁆𑀘 𑀦𑀺𑀩𑁆𑀩𑀸𑀬𑀢𑀺, 𑀢𑀲𑁆𑀫𑀸 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 ‘‘𑀅𑀲𑁆𑀲𑀸𑀲𑁄𑀢𑀺 𑀩𑀳𑀺 𑀦𑀺𑀓𑁆𑀔𑀫𑀦𑀯𑀸𑀢𑁄, 𑀧𑀲𑁆𑀲𑀸𑀲𑁄𑀢𑀺 𑀅𑀦𑁆𑀢𑁄 𑀧𑀯𑀺𑀲𑀦𑀯𑀸𑀢𑁄’’𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀲𑀼 ¶ 𑀤𑁆𑀯𑀻𑀲𑀼 𑀦𑀬𑁂𑀲𑀼 𑀯𑀺𑀦𑀬𑀦𑀬𑁂𑀦 𑀅𑀦𑁆𑀢𑁄 𑀉𑀝𑁆𑀞𑀺𑀢𑀲𑀲𑀦𑀁 𑀅𑀲𑁆𑀲𑀸𑀲𑁄, 𑀩𑀳𑀺 𑀉𑀝𑁆𑀞𑀺𑀢𑀲𑀲𑀦𑀁 𑀧𑀲𑁆𑀲𑀸𑀲𑁄. 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀧𑀦 𑀩𑀳𑀺 𑀉𑀝𑁆𑀞𑀳𑀺𑀢𑁆𑀯𑀸𑀧𑀺 𑀅𑀦𑁆𑀢𑁄 𑀲𑀲𑀦𑀢𑁄 𑀅𑀲𑁆𑀲𑀸𑀲𑁄. 𑀅𑀦𑁆𑀢𑁄 𑀉𑀝𑁆𑀞𑀳𑀺𑀢𑁆𑀯𑀸𑀧𑀺 𑀩𑀳𑀺 𑀲𑀲𑀦𑀢𑁄 𑀧𑀲𑁆𑀲𑀸𑀲𑁄. 𑀅𑀬𑀫𑁂𑀯 𑀘 𑀦𑀬𑁄 ‘‘𑀅𑀲𑁆𑀲𑀸𑀲𑀸𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀲𑀢𑀺𑀬𑀸 𑀅𑀦𑀼𑀕𑀘𑁆𑀙𑀢𑁄 𑀅𑀚𑁆𑀛𑀢𑁆𑀢𑀁 𑀯𑀺𑀓𑁆𑀔𑁂𑀧𑀕𑀢𑁂𑀦 𑀘𑀺𑀢𑁆𑀢𑁂𑀦 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘𑀸’’𑀢𑀺, ‘‘𑀧𑀲𑁆𑀲𑀸𑀲𑀸𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀲𑀢𑀺𑀬𑀸 𑀅𑀦𑀼𑀕𑀘𑁆𑀙𑀢𑁄 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀕𑀢𑁂𑀦 𑀘𑀺𑀢𑁆𑀢𑁂𑀦 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀲𑀸𑀭𑀤𑁆𑀥𑀸 𑀘 𑀳𑁄𑀦𑁆𑀢𑀺 𑀇𑀜𑁆𑀚𑀺𑀢𑀸 𑀘 𑀨𑀦𑁆𑀤𑀺𑀢𑀸 𑀘𑀸’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀲𑀫𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀥𑀦 𑀥𑀜𑁆𑀜𑁂. 𑀥𑀦𑀦𑀁 𑀥𑀜𑁆𑀜𑀁, 𑀲𑀺𑀭𑀺𑀧𑀼𑀜𑁆𑀜𑀧𑀜𑁆𑀜𑀸𑀦𑀁 𑀲𑀫𑁆𑀧𑀤𑀸𑀢𑀺 𑀅𑀢𑁆𑀣𑁄. 𑀥𑀸𑀢𑀼𑀅𑀢𑁆𑀣𑁄 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀪𑀸𑀯𑀯𑀲𑁂𑀦 𑀓𑀣𑀺𑀬𑀢𑀺 𑀞𑀧𑁂𑀢𑁆𑀯𑀸 𑀯𑀓𑁆𑀓𑀭𑀼𑀓𑁆𑀔𑀢𑀘𑁂𑀢𑀺 𑀏𑀯𑀫𑀸𑀤𑀺𑀧𑁆𑀧𑀪𑁂𑀤𑀁. 𑀬𑀣𑀸 𑀪𑀸𑀯𑀢𑁆𑀣𑁂 𑀯𑀢𑁆𑀢𑀫𑀸𑀦𑁂𑀦 𑀬𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀦𑀓𑀸𑀭𑀲𑁆𑀲 𑀬𑁆𑀬𑀓𑀸𑀭𑀁 𑀓𑀢𑁆𑀯𑀸 𑀣𑁂𑀦𑀦𑀁 𑀣𑁂𑀬𑁆𑀬𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀥 𑀬𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀦𑀓𑀸𑀭𑀲𑁆𑀲 𑀜𑁆𑀜𑀓𑀸𑀭𑀁 𑀓𑀢𑁆𑀯𑀸 𑀥𑀦𑀦𑀁 𑀥𑀜𑁆𑀜𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀥𑀦𑀺𑀦𑁄 𑀯𑀸 𑀪𑀸𑀯𑁄 𑀥𑀜𑁆𑀜𑀁, 𑀢𑀲𑁆𑀫𑀺𑀁 𑀥𑀜𑁆𑀜𑁂. 𑀥𑀦𑁆𑀢𑀺, 𑀥𑀦𑀢𑀺. 𑀥𑀦𑀺𑀢𑀁. 𑀥𑀜𑁆𑀜𑀁. 𑀬𑀲𑁆𑀫𑀸 𑀧𑀦 𑀥𑀜𑁆𑀜𑀲𑀤𑁆𑀤𑁂𑀦 𑀲𑀺𑀭𑀺𑀧𑀼𑀜𑁆𑀜𑀧𑀜𑁆𑀜𑀸𑀲𑀫𑁆𑀧𑀤𑀸 𑀕𑀳𑀺𑀢𑀸, 𑀢𑀲𑁆𑀫𑀸 ‘‘𑀥𑀜𑁆𑀜𑀧𑀼𑀜𑁆𑀜𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀻’’𑀢𑀺𑀆𑀤𑀻𑀲𑀼 𑀥𑀜𑁆𑀜𑀲𑀤𑁆𑀤𑁂𑀦 𑀲𑀺𑀭𑀺𑀧𑀜𑁆𑀜𑀸𑀯 𑀕𑀳𑁂𑀢𑀩𑁆𑀩𑀸 𑀧𑀼𑀜𑁆𑀜𑀲𑁆𑀲 𑀯𑀺𑀲𑀼𑀁 𑀯𑀘𑀦𑀢𑁄.

‘‘𑀦𑀤𑀢𑁄 𑀧𑀭𑀺𑀲𑀸𑀬𑀦𑁆𑀢𑁂, 𑀯𑀸𑀤𑀺𑀢𑀩𑁆𑀩𑀧𑀳𑀸𑀭𑀺𑀦𑁄;

𑀬𑁂 𑀢𑁂 𑀤𑀓𑁆𑀔𑀦𑁆𑀢𑀺 𑀯𑀤𑀦𑀁, 𑀥𑀜𑁆𑀜𑀸 𑀢𑁂 𑀦𑀭𑀧𑀼𑀗𑁆𑀕𑀯.

𑀤𑀻𑀖𑀗𑁆𑀕𑀼𑀮𑀻 𑀢𑀫𑁆𑀩𑀦𑀔𑁂, 𑀲𑀼𑀪𑁂 𑀆𑀬𑀢𑀧𑀡𑁆𑀳𑀺𑀓𑁂;

𑀬𑁂 𑀧𑀸𑀤𑁂 𑀧𑀡𑀫𑀺𑀲𑁆𑀲𑀦𑁆𑀢𑀺, 𑀢𑁂𑀧𑀺 𑀥𑀜𑁆𑀜𑀸 𑀕𑀼𑀡𑀦𑁆𑀥𑀭.

𑀫𑀥𑀼𑀭𑀸𑀦𑀺 𑀧𑀳𑀝𑁆𑀞𑀸𑀦𑀺, 𑀤𑁄𑀲𑀕𑁆𑀖𑀸𑀦𑀺 𑀳𑀺𑀢𑀸𑀦𑀺 𑀘;

𑀬𑁂𑀢𑁂𑀯𑀸𑀓𑁆𑀬𑀸𑀦𑀺 𑀲𑁄𑀲𑁆𑀲𑀦𑁆𑀢𑀺, 𑀢𑁂𑀧𑀺 𑀥𑀜𑁆𑀜𑀸𑀦𑀭𑀼𑀢𑁆𑀢𑀫𑀸’’𑀢𑀺

𑀏𑀯𑀫𑀸𑀤𑀻𑀲𑀼 ¶ 𑀧𑀦 𑀥𑀜𑁆𑀜𑀲𑀤𑁆𑀤𑁂𑀦 𑀧𑀼𑀜𑁆𑀜𑀲𑀫𑁆𑀧𑀤𑀸 𑀕𑀳𑁂𑀢𑀩𑁆𑀩𑀸, 𑀧𑀼𑀜𑁆𑀜𑀲𑀫𑁆𑀧𑀤𑀸𑀬 𑀯𑀸 𑀲𑀤𑁆𑀥𑀺𑀁 𑀲𑀺𑀭𑀺𑀧𑀜𑁆𑀜𑀸𑀲𑀫𑁆𑀧𑀤𑀸𑀧𑀺 𑀕𑀳𑁂𑀢𑀩𑁆𑀩𑀸. 𑀇𑀤𑀫𑁂𑀢𑁆𑀣 𑀦𑀺𑀩𑁆𑀩𑀘𑀦𑀁 ‘‘𑀥𑀜𑁆𑀜𑀁 𑀲𑀺𑀭𑀺𑀧𑀼𑀜𑁆𑀜𑀧𑀜𑁆𑀜𑀸𑀲𑀫𑁆𑀧𑀤𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀥𑀜𑁆𑀜𑀸’’𑀢𑀺. ‘‘𑀥𑀜𑁆𑀜𑀁 𑀫𑀗𑁆𑀕𑀮𑀲𑀫𑁆𑀫𑀢’’𑀦𑁆𑀢𑀺 𑀏𑀢𑁆𑀣 𑀢𑀼 ‘‘𑀉𑀢𑁆𑀢𑀫𑀭𑀢𑀦𑀁 𑀇𑀤’’𑀦𑁆𑀢𑀺 𑀥𑀦𑀸𑀬𑀺𑀢𑀩𑁆𑀩𑀁 𑀲𑀤𑁆𑀥𑀸𑀬𑀺𑀢𑀩𑁆𑀩𑀦𑁆𑀢𑀺 𑀥𑀜𑁆𑀜𑀁, 𑀲𑀺𑀭𑀺𑀲𑀫𑁆𑀧𑀦𑁆𑀦𑀁 𑀧𑀼𑀜𑁆𑀜𑀲𑀫𑁆𑀧𑀦𑁆𑀦𑀁 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑀦𑁆𑀢𑀺𑀧𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. ‘‘𑀥𑀜𑁆𑀜𑀁 𑀥𑀦𑀁 𑀭𑀚𑀢𑀁 𑀚𑀸𑀢𑀭𑀽𑀧’’𑀦𑁆𑀢𑀺 𑀘 𑀆𑀤𑀻𑀲𑀼 ‘‘𑀦𑀢𑁆𑀣𑀺 𑀥𑀜𑁆𑀜𑀲𑀫𑀁 𑀥𑀦’’𑀦𑁆𑀢𑀺 𑀯𑀘𑀦𑀢𑁄 𑀥𑀦𑀸𑀬𑀺𑀢𑀩𑁆𑀩𑀦𑁆𑀢𑀺 𑀥𑀜𑁆𑀜𑀁, 𑀓𑀺𑀁 𑀢𑀁? 𑀧𑀼𑀩𑁆𑀩𑀡𑁆𑀡𑀁. 𑀅𑀧𑀺𑀘 𑀑𑀲𑀥𑀺𑀯𑀺𑀲𑁂𑀲𑁄𑀧𑀺 𑀥𑀜𑁆𑀜𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀥𑀦𑀲𑀤𑁆𑀤𑀲𑁆𑀲 𑀘 𑀧𑀦 𑀲𑀫𑀸𑀲𑀯𑀲𑁂𑀦 ‘‘𑀅𑀥𑀦𑁄, 𑀦𑀺𑀤𑁆𑀥𑀦𑁄’’𑀢𑀺 𑀘 𑀦𑀢𑁆𑀣𑀺 𑀥𑀦𑀁 𑀏𑀢𑀲𑁆𑀲𑀸𑀢𑀺 𑀅𑀢𑁆𑀣𑁂𑀦 𑀤𑀮𑀺𑀤𑁆𑀤𑀧𑀼𑀕𑁆𑀕𑀮𑁄 𑀯𑀼𑀘𑁆𑀘𑀢𑀺. ‘‘𑀦𑀺𑀥𑀦𑀁 𑀬𑀸𑀢𑀻’’𑀢𑀺𑀏𑀢𑁆𑀣 𑀢𑀼 𑀓𑀫𑁆𑀧𑀦𑀢𑁆𑀣𑀯𑀸𑀘𑀓𑀲𑁆𑀲 𑀥𑀽𑀥𑀸𑀢𑀼𑀲𑁆𑀲 𑀯𑀲𑁂𑀦 𑀯𑀺𑀦𑀸𑀲𑁄 𑀦𑀺𑀥𑀦𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀫𑀼𑀦 𑀕𑀢𑀺𑀬𑀁. 𑀫𑀼𑀦𑀢𑀺.

𑀘𑀺𑀦𑁂 𑀫𑀜𑁆𑀜𑀦𑀸𑀬𑀁. 𑀅𑀮𑀼𑀢𑁆𑀢𑀦𑁆𑀢𑁄𑀬𑀁 𑀥𑀸𑀢𑀼, 𑀬𑀣𑀸 𑀕𑀺𑀮𑁂, 𑀬𑀣𑀸 𑀘 𑀫𑀺𑀮𑁂. 𑀘𑀺𑀦𑀸𑀬𑀢𑀺, 𑀑𑀘𑀺𑀦𑀸𑀬𑀢𑀺. ‘‘𑀲𑀩𑁆𑀩𑁄 𑀢𑀁 𑀚𑀦𑁄 𑀑𑀘𑀺𑀦𑀸𑀬𑀢𑀽’’𑀢𑀺 𑀇𑀤𑀫𑁂𑀢𑁆𑀣 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. 𑀑𑀘𑀺𑀦𑀸𑀬𑀢𑀢𑀺 𑀅𑀯𑀫𑀜𑁆𑀜𑀢𑀽𑀢𑀺.

𑀇𑀢𑀺 𑀪𑀽𑀯𑀸𑀤𑀺𑀕𑀡𑁂 𑀢𑀯𑀕𑁆𑀕𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺

𑀲𑀫𑀢𑁆𑀢𑀸𑀦𑀺.

𑀧𑀓𑀸𑀭𑀦𑁆𑀢𑀥𑀸𑀢𑀼

𑀇𑀤𑀸𑀦𑀺 𑀧𑀯𑀕𑁆𑀕𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺 𑀯𑀼𑀘𑁆𑀘𑀦𑁆𑀢𑁂 𑁋

𑀧𑀸 𑀧𑀸𑀦𑁂. 𑀧𑀸𑀦𑀁 𑀧𑀺𑀯𑀦𑀁. ‘‘𑀧𑀸𑀢𑀺, 𑀧𑀸𑀦𑁆𑀢𑀺. 𑀧𑀸𑀢𑀼, 𑀧𑀸𑀦𑁆𑀢𑀼’’ 𑀇𑀘𑁆𑀘𑀸𑀤𑀺 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀁.

𑀔𑀺𑀧𑁆𑀧𑀁 𑀕𑀻𑀯𑀁 𑀧𑀲𑀸𑀭𑁂𑀳𑀺, 𑀦 𑀢𑁂 𑀤𑀲𑁆𑀲𑀸𑀫𑀺 𑀚𑀻𑀯𑀺𑀢𑀁;

𑀅𑀬𑀜𑁆𑀳𑀺𑀢𑁂 𑀫𑀬𑀸 𑀭𑀽𑀴𑁆𑀳𑁄, 𑀲𑀭𑁄 𑀧𑀸𑀲𑁆𑀲𑀢𑀺 𑀮𑁄𑀳𑀺𑀢𑀦𑁆𑀢𑀺.

𑀅𑀢𑁆𑀭 ¶ 𑀳𑀺 𑀧𑀸𑀲𑁆𑀲𑀢𑀻𑀢𑀺 𑀧𑀺𑀯𑀺𑀲𑁆𑀲𑀢𑀺. ‘‘𑀧𑀸𑀲𑁆𑀲𑀢𑀺, 𑀧𑀸𑀲𑁆𑀲𑀦𑁆𑀢𑀺. 𑀧𑀸𑀲𑁆𑀲𑀲𑀺, 𑀧𑀸𑀲𑁆𑀲𑀣. 𑀧𑀸𑀲𑁆𑀲𑀸𑀫𑀺, 𑀧𑀸𑀲𑁆𑀲𑀸𑀫’’ 𑀇𑀘𑁆𑀘𑀸𑀤𑀺𑀦𑀸, ‘‘𑀅𑀧𑀲𑁆𑀲𑀸, 𑀅𑀧𑀲𑁆𑀲𑀁𑀲𑀼’’ 𑀇𑀘𑁆𑀘𑀸𑀤𑀺𑀦𑀸 𑀘 𑀦𑀬𑁂𑀦 𑀲𑁂𑀲𑀁 𑀲𑀩𑁆𑀩𑀁 𑀬𑁄𑀚𑁂𑀢𑀩𑁆𑀩𑀁 𑀦𑀬𑀜𑁆𑀜𑀽𑀳𑀺. 𑀓𑁄 𑀳𑀺 𑀲𑀫𑀢𑁆𑀣𑁄 𑀲𑀩𑁆𑀩𑀸𑀦𑀺 𑀩𑀼𑀤𑁆𑀥𑀯𑀘𑀦𑀲𑀸𑀕𑀭𑁂 𑀯𑀺𑀘𑀺𑀢𑁆𑀭𑀸𑀦𑀺 𑀯𑀺𑀧𑁆𑀧𑀓𑀺𑀡𑁆𑀡𑀭𑀽𑀧𑀦𑁆𑀢𑀭𑀭𑀢𑀦𑀸𑀦𑀺 𑀉𑀤𑁆𑀥𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁, 𑀢𑀲𑁆𑀫𑀸 𑀲𑀩𑁆𑀩𑀸𑀲𑀼𑀧𑀺 𑀥𑀸𑀢𑀽𑀲𑀼 𑀲𑀗𑁆𑀔𑁂𑀧𑁂𑀦 𑀕𑀳𑀡𑀽𑀧𑀸𑀬𑀫𑀢𑁆𑀢𑀫𑁂𑀯 𑀤𑀲𑁆𑀲𑀺𑀢𑀁. 𑀧𑀺𑀯𑀢𑀺, 𑀧𑀺𑀯𑀦𑁆𑀢𑀺. 𑀧𑀺𑀯𑀁, 𑀧𑀺𑀯𑀦𑁆𑀢𑁄, 𑀧𑀺𑀯𑀫𑀸𑀦𑁄, 𑀧𑀺𑀯𑀁 𑀪𑀸𑀕𑀺𑀭𑀲𑁄𑀤𑀓𑀁. 𑀓𑀸𑀭𑀺𑀢𑁂 𑀓𑀼𑀫𑀸𑀭𑀁 𑀔𑀻𑀭𑀁 𑀧𑀸𑀬𑁂𑀢𑀺. 𑀫𑀼𑀳𑀼𑀢𑁆𑀢𑀁 𑀢𑀡𑁆𑀳𑀸𑀲𑀫𑀦𑀁, 𑀔𑀻𑀭𑀁 𑀢𑁆𑀯𑀁 𑀧𑀸𑀬𑀺𑀢𑁄 𑀫𑀬𑀸. 𑀓𑀫𑁆𑀫𑁂 𑀧𑀻𑀬𑀢𑀺, 𑀧𑀻𑀢𑀁. 𑀢𑀼𑀫𑀸𑀤𑀻𑀲𑀼 ‘‘𑀧𑀸𑀢𑀼𑀁, 𑀧𑀺𑀯𑀺𑀢𑀼𑀁, 𑀧𑀺𑀢𑁆𑀯𑀸, 𑀧𑀺𑀯𑀺𑀢𑁆𑀯𑀸, 𑀧𑀸𑀬𑁂𑀢𑁆𑀯𑀸’’ 𑀇𑀘𑁆𑀘𑀸𑀤𑀻𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀅𑀜𑁆𑀜𑁂𑀲𑀼𑀧𑀺 𑀞𑀸𑀦𑁂𑀲𑀼 𑀧𑀸𑀴𑀺𑀦𑀬𑀸𑀦𑀼𑀭𑀽𑀧𑁂𑀦 𑀲𑀤𑁆𑀤𑀭𑀽𑀧𑀸𑀦𑀺 𑀏𑀯𑀫𑁂𑀯 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀧𑀸 𑀭𑀓𑁆𑀔𑀡𑁂. 𑀧𑀸𑀢𑀺. 𑀦𑀺𑀧𑀸𑀢𑀺. 𑀧𑀺𑀢𑀸, 𑀕𑁄𑀧𑁄.

𑀧𑀸 𑀧𑀽𑀭𑀡𑁂. 𑀧𑀸𑀢𑀺, 𑀯𑀺𑀧𑁆𑀧𑀸𑀢𑀺. 𑀯𑀺𑀧𑁆𑀧𑁄.

𑀯𑀺𑀧𑁆𑀧𑁄𑀢𑀺 𑀩𑁆𑀭𑀸𑀳𑁆𑀫𑀡𑁄. 𑀲𑁄 𑀳𑀺 𑀯𑀺𑀧𑁆𑀧𑁂𑀢𑀺 𑀧𑀽𑀭𑁂𑀢𑀺 𑀯𑀺𑀲𑀺𑀝𑁆𑀞𑁂𑀦 𑀯𑁂𑀤𑀼𑀘𑁆𑀘𑀸𑀭𑀡𑀸𑀤𑀺𑀦𑀸 𑀅𑀢𑁆𑀢𑀦𑁄 𑀩𑁆𑀭𑀸𑀳𑁆𑀫𑀡𑀓𑀫𑁆𑀫𑁂𑀦 𑀮𑁄𑀓𑀲𑁆𑀲 𑀅𑀚𑁆𑀛𑀸𑀲𑀬𑀁 𑀅𑀢𑁆𑀢𑀦𑁄 𑀘 𑀳𑀤𑀬𑁂 𑀯𑁂𑀤𑀸𑀦𑀻𑀢𑀺 𑀯𑀺𑀧𑁆𑀧𑁄𑀢𑀺 𑀯𑀼𑀘𑁆𑀘𑀢𑀺. ‘‘𑀚𑀸𑀢𑁄 𑀯𑀺𑀧𑁆𑀧𑀓𑀼𑀮𑁂 𑀅𑀳’’𑀦𑁆𑀢𑀺 𑀏𑀢𑁆𑀣 𑀳𑀺 𑀩𑁆𑀭𑀸𑀳𑁆𑀫𑀡𑁄 ‘‘𑀯𑀺𑀧𑁆𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀓𑀼𑀮𑀁 𑀯𑀺𑀧𑁆𑀧𑀓𑀼𑀮𑀦𑁆𑀢𑀺.

𑀧𑀽 𑀧𑀯𑀦𑁂. 𑀧𑀯𑀢𑀺. 𑀧𑀼𑀢𑁆𑀢𑁄, 𑀧𑀼𑀜𑁆𑀜𑀁. 𑀏𑀢𑁆𑀣 𑀧𑀼𑀢𑁆𑀢𑁄𑀢𑀺 𑀅𑀢𑁆𑀢𑀦𑁄 𑀓𑀼𑀮𑀁 𑀧𑀯𑀢𑀺 𑀲𑁄𑀥𑁂𑀢𑀻𑀢𑀺 𑀧𑀼𑀢𑁆𑀢𑁄. 𑀓𑀺𑀬𑀸𑀤𑀺𑀕𑀡𑀁 𑀧𑀦 𑀧𑀢𑁆𑀯𑀸 ‘‘𑀧𑀼𑀦𑀸𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁.

𑀧𑀼𑀢𑁆𑀢𑁄’𑀢𑁆𑀭𑀚𑁄 𑀲𑀼𑀢𑁄 𑀲𑀽𑀦𑀼,

𑀢𑀦𑀼𑀚𑁄 𑀢𑀦𑀬𑁄’𑀭𑀲𑁄;

𑀧𑀼𑀢𑁆𑀢𑀦𑀢𑁆𑀢𑀸𑀤𑀬𑁄 𑀘𑀸𑀣,

𑀅𑀧𑀘𑁆𑀘𑀦𑁆𑀢𑀺 𑀧𑀯𑀼𑀘𑁆𑀘𑀭𑁂.

𑀇𑀢𑁆𑀣𑀺𑀮𑀺𑀗𑁆𑀕𑀫𑁆𑀳𑀺 ¶ 𑀯𑀢𑁆𑀢𑀩𑁆𑀩𑁂, 𑀧𑀼𑀢𑁆𑀢𑀻𑀢𑀺 𑀅𑀢𑁆𑀭𑀚𑀸𑀢𑀺 𑀘;

𑀯𑀢𑁆𑀢𑀩𑁆𑀩𑀁 𑀲𑁂𑀲𑀝𑁆𑀞𑀸𑀦𑁂𑀲𑀼, 𑀬𑀣𑀸𑀭𑀳𑀫𑀼𑀤𑀻𑀭𑀬𑁂;

𑀧𑀸𑀴𑀺𑀬𑀜𑁆𑀳𑀺 𑀅𑀢𑁆𑀭𑀚𑀸𑀢𑀺, 𑀇𑀢𑁆𑀣𑀻 𑀧𑀼𑀢𑁆𑀢𑀻 𑀓𑀣𑀺𑀬𑀢𑀺;

𑀏𑀢𑁆𑀣 𑀧𑀦 𑁋

‘‘𑀢𑀢𑁄 𑀤𑁆𑀯𑁂 𑀲𑀢𑁆𑀢𑀭𑀢𑁆𑀢𑀲𑁆𑀲, 𑀯𑁂𑀤𑁂𑀳𑀲𑁆𑀲𑀢𑁆𑀭𑀚𑀸 𑀧𑀺𑀬𑀸;

𑀭𑀸𑀚𑀓𑀜𑁆𑀜𑀸 𑀭𑀼𑀘𑀸 𑀦𑀸𑀫, 𑀥𑀸𑀢𑀺𑀫𑀸𑀢𑀭𑀫𑀩𑁆𑀭𑀯𑀻’’𑀢𑀺

𑀅𑀬𑀁 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. ‘‘𑀧𑀼𑀢𑁆𑀢𑀻, 𑀥𑀻𑀢𑀸, 𑀤𑀼𑀳𑀺𑀢𑀸, 𑀅𑀢𑁆𑀢𑀚𑀸’’𑀢𑀺 𑀇𑀘𑁆𑀘𑁂𑀢𑁂 𑀧𑀭𑀺𑀬𑀸𑀬𑀸. 𑀏𑀯𑀁 𑀅𑀢𑁆𑀭𑀚𑀸𑀢𑀺 𑀇𑀢𑁆𑀣𑀺𑀯𑀸𑀘𑀓𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀤𑀲𑁆𑀲𑀦𑀢𑁄 𑀲𑀼𑀢𑀲𑀤𑁆𑀤𑀸𑀤𑀻𑀲𑀼𑀧𑀺 𑀇𑀢𑁆𑀣𑀺𑀮𑀺𑀗𑁆𑀕𑀦𑀬𑁄 𑀮𑀩𑁆𑀪𑀫𑀸𑀦𑀸𑀮𑀩𑁆𑀪𑀫𑀸𑀦𑀯𑀲𑁂𑀦 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄. 𑀢𑀣𑀸 𑀳𑀺 𑀮𑁄𑀓𑁂 ‘‘𑀯𑁂𑀲𑁆𑀲𑁄, 𑀲𑀼𑀤𑁆𑀤𑁄, 𑀦𑀭𑁄, 𑀓𑀺𑀁𑀧𑀼𑀭𑀺𑀲𑁄’’ 𑀇𑀘𑁆𑀘𑀸𑀤𑀻𑀦𑀁 𑀬𑀼𑀕𑀴𑀪𑀸𑀯𑁂𑀦 ‘‘𑀯𑁂𑀲𑁆𑀲𑀻, 𑀲𑀼𑀤𑁆𑀤𑀻, 𑀦𑀸𑀭𑀻, 𑀓𑀺𑀁𑀧𑀼𑀭𑀺𑀲𑀻’’𑀢𑀺𑀆𑀤𑀻𑀦𑀺 𑀇𑀢𑁆𑀣𑀺𑀯𑀸𑀘𑀓𑀸𑀦𑀺 𑀮𑀺𑀗𑁆𑀕𑀸𑀦𑀺 𑀤𑀺𑀲𑁆𑀲𑀦𑁆𑀢𑀺. ‘‘𑀧𑀼𑀭𑀺𑀲𑁄 𑀧𑀼𑀫𑀸’’ 𑀇𑀘𑁆𑀘𑀸𑀤𑀻𑀦𑀁 𑀧𑀦 𑀬𑀼𑀕𑀴𑀪𑀸𑀯𑁂𑀦 𑀇𑀢𑁆𑀣𑀺𑀯𑀸𑀘𑀓𑀸𑀦𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀦𑀺 𑀦 𑀤𑀺𑀲𑁆𑀲𑀦𑁆𑀢𑀺. 𑀧𑀼𑀜𑁆𑀜𑀦𑁆𑀢𑀺 𑀏𑀢𑁆𑀣 𑀧𑀦 𑀅𑀢𑁆𑀢𑀦𑁄 𑀓𑀸𑀭𑀓𑀁 𑀧𑀯𑀢𑀺 𑀲𑁄𑀥𑁂𑀢𑀻𑀢𑀺 𑀧𑀼𑀜𑁆𑀜𑀁. 𑀓𑀺𑀬𑀸𑀤𑀺𑀕𑀡𑀁 𑀧𑀦 𑀧𑀢𑁆𑀯𑀸 𑀧𑀼𑀦𑀸𑀢𑀻𑀢𑀺 𑀧𑀼𑀜𑁆𑀜𑀦𑁆𑀢𑀺 𑀯𑀢𑁆𑀢𑀩𑁆𑀩𑀁.

𑀅𑀜𑁆𑀜𑁄 𑀅𑀢𑁆𑀣𑁄𑀧𑀺 𑀯𑀢𑁆𑀢𑀩𑁆𑀩𑁄, 𑀦𑀺𑀭𑀼𑀢𑁆𑀢𑀺𑀮𑀓𑁆𑀔𑀡𑀲𑁆𑀲𑀺𑀢𑁄;

𑀢𑀲𑁆𑀫𑀸 𑀦𑀺𑀩𑁆𑀩𑀘𑀦𑀁 𑀜𑁂𑀬𑁆𑀬𑀁, 𑀚𑀦𑀧𑀽𑀚𑀸𑀤𑀺𑀢𑁄 𑀇𑀥.

𑀧𑀭𑀁 𑀧𑀼𑀚𑁆𑀚𑀪𑀯𑀁 𑀚𑀦𑁂𑀢𑀻𑀢𑀺 𑀧𑀼𑀜𑁆𑀜𑀁. 𑀲𑀤𑀸 𑀧𑀽𑀚𑀺𑀢𑀁 𑀯𑀸 𑀚𑀦𑁂𑀢𑀻𑀢𑀺 𑀧𑀼𑀜𑁆𑀜𑀁. 𑀚𑀦𑀁 𑀅𑀢𑁆𑀢𑀓𑀸𑀭𑀁 𑀧𑀼𑀦𑀸𑀢𑀻𑀢𑀺 𑀧𑀼𑀜𑁆𑀜𑀁. 𑀅𑀲𑁂𑀲𑀁 𑀅𑀧𑀼𑀜𑁆𑀜𑀁 𑀧𑀼𑀦𑀸𑀢𑀻𑀢𑀺 𑀧𑀼𑀜𑁆𑀜𑀁.

𑀓𑀮𑁆𑀬𑀸𑀡𑀁 𑀓𑀼𑀲𑀮𑀁 𑀧𑀼𑀜𑁆𑀜𑀁, 𑀲𑀼𑀪𑀫𑀺𑀘𑁆𑀘𑁂𑀯 𑀦𑀺𑀤𑁆𑀤𑀺𑀲𑁂;

𑀓𑀫𑁆𑀫𑀲𑁆𑀲 𑀓𑀼𑀲𑀮𑀲𑁆𑀲𑀸𑀥𑀺-𑀯𑀘𑀦𑀁 𑀯𑀘𑀦𑁂 𑀧𑀝𑀼.

𑀧𑁂 𑀕𑀢𑀺𑀬𑀁. 𑀧𑁂𑀢𑀺, 𑀧𑁂𑀦𑁆𑀢𑀺. 𑀧𑁂𑀲𑀺, 𑀧𑁂𑀣. 𑀇𑀥 𑀪𑀺𑀓𑁆𑀔𑀯𑁂 𑀏𑀓𑀘𑁆𑀘𑁄 𑀅𑀲𑁆𑀲𑀔𑀴𑀼𑀗𑁆𑀓𑁄 𑀧𑁂𑀳𑀻𑀢𑀺 𑀯𑀼𑀢𑁆𑀢𑁄 𑀯𑀺𑀤𑁆𑀥𑁄 𑀲𑀫𑀸𑀦𑁄 𑀘𑁄𑀤𑀺𑀢𑁄 𑀲𑀸𑀭𑀣𑀺𑀦𑀸 𑀧𑀘𑁆𑀙𑀢𑁄 𑀧𑀝𑀺𑀲𑀓𑁆𑀓𑀢𑀺, 𑀧𑀺𑀝𑁆𑀞𑀺𑀢𑁄 𑀭𑀣𑀁 𑀧𑀝𑀺𑀯𑀢𑁆𑀢𑁂𑀢𑀺. 𑀉𑀫𑁆𑀫𑀕𑁆𑀕𑀁 𑀕𑀡𑁆𑀳𑀸𑀢𑀺, 𑀉𑀩𑁆𑀩𑀝𑀼𑀫𑀁 𑀭𑀣𑀁 𑀓𑀭𑁄𑀢𑀺.

𑀧𑁂 ¶ 𑀯𑀼𑀤𑁆𑀥𑀺𑀬𑀁 𑀧𑀬𑀢𑀺. 𑀧𑀸𑀬𑁄, 𑀅𑀧𑀸𑀬𑁄. 𑀏𑀢𑁆𑀣 𑀅𑀧𑀸𑀬𑁄𑀢𑀺 𑀦𑀢𑁆𑀣𑀺 𑀧𑀸𑀬𑁄 𑀯𑀼𑀤𑁆𑀥𑀺 𑀏𑀢𑁆𑀣𑀸𑀢𑀺 𑀅𑀧𑀸𑀬𑁄. 𑀅𑀬𑀥𑀸𑀢𑀼𑀯𑀲𑁂𑀦𑀧𑀺 𑀅𑀢𑁆𑀣𑁄 𑀦𑁂𑀢𑀩𑁆𑀩𑁄, 𑀅𑀬𑀢𑁄 𑀯𑀼𑀤𑁆𑀥𑀺𑀢𑁄, 𑀲𑀼𑀔𑀢𑁄 𑀯𑀸 𑀅𑀧𑁂𑀢𑁄𑀢𑀺 𑀅𑀧𑀸𑀬𑁄, 𑀦𑀺𑀭𑀬𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀧𑁂𑀢𑁆𑀢𑀺𑀯𑀺𑀲𑀬𑀅𑀲𑀼𑀭𑀓𑀸𑀬𑀸.

𑀧𑁂 𑀲𑁄𑀲𑀦𑁂. 𑀧𑀸𑀬𑀢𑀺, 𑀧𑀬𑀢𑀺 𑀯𑀸. 𑀦𑀺𑀧𑀓𑁄. 𑀏𑀢𑁆𑀣 𑀦𑀺𑀧𑀓𑁄 𑀦𑀺𑀧𑀬𑀢𑀺 𑀯𑀺𑀲𑁄𑀲𑁂𑀢𑀺 𑀧𑀝𑀺𑀧𑀓𑁆𑀔𑀁, 𑀢𑀢𑁄 𑀯𑀸 𑀅𑀢𑁆𑀢𑀸𑀦𑀁 𑀦𑀺𑀧𑀸𑀢𑀺 𑀭𑀓𑁆𑀔𑀢𑀻𑀢𑀺 𑀦𑀺𑀧𑀓𑁄, 𑀲𑀫𑁆𑀧𑀚𑀸𑀦𑁄.

𑀕𑀼𑀧 𑀭𑀓𑁆𑀔𑀡𑁂. 𑀕𑁄𑀧𑀢𑀺. 𑀕𑁄𑀧𑀓𑁄.

𑀦𑀕𑀭𑀁 𑀬𑀣𑀸 𑀧𑀘𑁆𑀘𑀦𑁆𑀢𑀁, 𑀕𑀼𑀢𑁆𑀢𑀁 𑀲𑀸𑀦𑁆𑀢𑀭𑀩𑀸𑀳𑀺𑀭𑀁.

𑀏𑀯𑀁 𑀕𑁄𑀧𑁂𑀣 𑀅𑀢𑁆𑀢𑀸𑀦𑀁, 𑀔𑀡𑁄 𑀯𑁂 𑀫𑀸 𑀉𑀧𑀘𑁆𑀘𑀕𑀸.

𑀕𑁄𑀧𑁂𑀣𑀸𑀢𑀺 𑀕𑁄𑀧𑁂𑀬𑁆𑀬 𑀭𑀓𑁆𑀔𑁂𑀬𑁆𑀬.

𑀯𑀧 𑀲𑀦𑁆𑀢𑀸𑀦𑁂. 𑀯𑀧𑀢𑀺.

𑀲𑀧 𑀲𑀫𑀯𑀸𑀬𑁂. 𑀲𑀧𑀢𑀺.

𑀘𑀼𑀧 𑀫𑀦𑁆𑀤𑀕𑀢𑀺𑀬𑀁. 𑀘𑁄𑀧𑀢𑀺.

𑀢𑀼𑀧 𑀳𑀺𑀁𑀲𑀸𑀬𑀁. 𑀢𑁄𑀧𑀢𑀺. 𑀢𑀼𑀧𑁆𑀧𑀢𑀺.

𑀕𑀼𑀧 𑀕𑁄𑀧𑀦𑀚𑀺𑀕𑀼𑀘𑁆𑀙𑀦𑁂𑀲𑀼. 𑀕𑁄𑀧𑀢𑀺, 𑀚𑀺𑀕𑀼𑀘𑁆𑀙𑀢𑀺. 𑀚𑀺𑀕𑀼𑀘𑁆𑀙𑀁, 𑀚𑀺𑀕𑀼𑀘𑁆𑀙𑀫𑀸𑀦𑁄. 𑀚𑁂𑀕𑀼𑀘𑁆𑀙𑀻. 𑀚𑀺𑀕𑀼𑀘𑁆𑀙𑀺𑀢𑁆𑀯𑀸 𑀇𑀘𑁆𑀘𑀸𑀤𑀻𑀦𑀺.

𑀓𑀧𑀼 𑀳𑀺𑀁𑀲𑀸𑀢𑀓𑁆𑀓𑀮𑀕𑀦𑁆𑀥𑁂𑀲𑀼. 𑀓𑀧𑁆𑀧𑀢𑀺. 𑀓𑀧𑁆𑀧𑀽𑀭𑁄.

𑀓𑀧𑀼 𑀲𑀸𑀫𑀢𑁆𑀣𑀺𑀬𑁂. 𑀇𑀤𑀁 𑀅𑀫𑁆𑀳𑀸𑀓𑀁 𑀓𑀧𑁆𑀧𑀢𑀺. 𑀦𑁂𑀢𑀁 𑀅𑀫𑁆𑀳𑁂𑀲𑀼 𑀓𑀧𑁆𑀧𑀢𑀺.

𑀓𑀧 𑀓𑀭𑀼𑀡𑀸𑀬𑀁. 𑀓𑀧𑀢𑀺. 𑀓𑀧𑀡𑁄, 𑀓𑀸𑀧𑀜𑁆𑀜𑀁. 𑀢𑀢𑁆𑀣 𑀓𑀧𑀢𑀻𑀢𑀺 𑀓𑀭𑀼𑀡𑀸𑀬𑀢𑀺, 𑀓𑀸𑀧𑀜𑁆𑀜𑀦𑁆𑀢𑀺 𑀓𑀧𑀡𑀪𑀸𑀯𑁄.

𑀲𑀧 ¶ 𑀅𑀓𑁆𑀓𑁄𑀲𑁂. 𑀲𑀧𑀢𑀺. 𑀲𑀧𑀣𑁄, 𑀅𑀪𑀺𑀲𑀧𑀣𑁄, 𑀅𑀪𑀺𑀲𑀧𑀺𑀢𑁄, 𑀲𑀧𑀦𑀓𑁄.

𑀯𑀧 𑀩𑀻𑀚𑀦𑀺𑀓𑁆𑀔𑁂𑀧𑁂. 𑀩𑀻𑀚𑀁 𑀯𑀧𑀢𑀺. 𑀯𑀸𑀧𑀓𑁄. 𑀯𑀸𑀧𑀺𑀢𑀁 𑀥𑀜𑁆𑀜𑀁. 𑀯𑀼𑀢𑁆𑀢𑀁 𑀩𑀻𑀚𑀁 𑀧𑀼𑀭𑀺𑀲𑁂𑀦. 𑀩𑀻𑀚𑀁 𑀯𑀧𑁆𑀧𑀢𑀺. 𑀯𑀧𑁆𑀧𑀫𑀗𑁆𑀕𑀮𑀁.

𑀲𑀼𑀧 𑀲𑀬𑀦𑁂. 𑀲𑀼𑀧𑀢𑀺. 𑀲𑀼𑀔𑀁 𑀲𑀼𑀧𑀦𑁆𑀢𑀺 𑀫𑀼𑀦𑀬𑁄, 𑀬𑁂 𑀇𑀢𑁆𑀣𑀻𑀲𑀼 𑀦 𑀩𑀚𑁆𑀛𑀭𑁂. 𑀲𑀼𑀢𑁆𑀢𑁄 𑀧𑀼𑀭𑀺𑀲𑁄, 𑀲𑀼𑀧𑀦𑀁, 𑀲𑀼𑀢𑁆𑀢𑀁.

𑀔𑀺𑀧 𑀧𑁂𑀭𑀡𑁂. 𑀧𑁂𑀭𑀡𑀁 𑀘𑀼𑀡𑁆𑀡𑀺𑀓𑀭𑀡𑀁 𑀧𑀺𑀲𑀦𑀁. 𑀔𑁂𑀧𑀢𑀺. 𑀔𑁂𑀧𑀓𑁄.

𑀔𑀺𑀧 𑀅𑀩𑁆𑀬𑀢𑁆𑀢𑀲𑀤𑁆𑀤𑁂. 𑀔𑀺𑀧𑀢𑀺. 𑀔𑀺𑀧𑀺𑀢𑀲𑀤𑁆𑀤𑁄. 𑀬𑀤𑀸 𑀘 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄, 𑀔𑀺𑀧𑀺 𑀮𑁄𑀓𑀕𑁆𑀕𑀦𑀸𑀬𑀓𑁄.

𑀔𑀺𑀧 𑀙𑀟𑁆𑀟𑀦𑁄. 𑀔𑀺𑀧𑀢𑀺, 𑀉𑀓𑁆𑀔𑀺𑀧𑀢𑀺, 𑀯𑀺𑀓𑁆𑀔𑀺𑀧𑀢𑀺, 𑀅𑀯𑀔𑀺𑀧𑀢𑀺, 𑀲𑀁𑀔𑀺𑀧𑀢𑀺. 𑀔𑀺𑀢𑁆𑀢𑀁, 𑀉𑀓𑁆𑀔𑀺𑀢𑁆𑀢𑀁, 𑀧𑀓𑁆𑀔𑀺𑀢𑁆𑀢𑀁, 𑀯𑀺𑀓𑁆𑀔𑀺𑀢𑁆𑀢𑀁 𑀇𑀘𑁆𑀘𑀸𑀤𑀻𑀦𑀺.

𑀑𑀧 𑀦𑀺𑀝𑁆𑀞𑀼𑀪𑀦𑁂. 𑀦𑀺𑀝𑁆𑀞𑀼𑀪𑀦𑀁 𑀔𑁂𑀴𑀧𑀸𑀢𑀦𑀁. 𑀑𑀧𑀢𑀺. 𑀑𑀲𑀥𑀁 𑀲𑀗𑁆𑀔𑀭𑀺𑀢𑁆𑀯𑀸 𑀫𑀼𑀔𑁂 𑀔𑁂𑀴𑀁 𑀑𑀧𑀺.

𑀮𑀺𑀧𑀺 𑀉𑀧𑀮𑁂𑀧𑁂. 𑀮𑁂𑀧𑀢𑀺. 𑀮𑀺𑀢𑁆𑀢𑀁 𑀧𑀭𑀫𑁂𑀦 𑀢𑁂𑀚𑀲𑀸.

𑀔𑀺𑀧𑀺 𑀕𑀢𑀺𑀬𑀁. 𑀔𑀺𑀫𑁆𑀧𑀢𑀺.

𑀟𑀺𑀧 𑀔𑁂𑀧𑁂. 𑀟𑁂𑀧𑀢𑀺.

𑀦𑀺𑀤𑀧𑀺 𑀦𑀺𑀤𑀫𑁆𑀧𑀦𑁂. 𑀦𑀺𑀤𑀫𑁆𑀧𑀦𑀁 𑀦𑀸𑀫 𑀲𑀲𑁆𑀲𑀭𑀼𑀓𑁆𑀔𑀸𑀤𑀻𑀲𑀼 𑀯𑀻𑀳𑀺𑀲𑀻𑀲𑀁 𑀯𑀸 𑀯𑀭𑀓𑀲𑀻𑀲𑀁 𑀯𑀸 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀔𑀼𑀤𑁆𑀤𑀓𑀲𑀸𑀔𑀁 𑀯𑀸 𑀅𑀪𑀜𑁆𑀚𑀺𑀢𑁆𑀯𑀸 𑀬𑀣𑀸𑀞𑀺𑀢𑀫𑁂𑀯 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀢𑁆𑀯𑀸 𑀩𑀻𑀚𑀫𑀢𑁆𑀢𑀲𑁆𑀲𑁂𑀯 𑀯𑀸 𑀧𑀡𑁆𑀡𑀫𑀢𑁆𑀢𑀲𑁆𑀲𑁂𑀯 𑀯𑀸 𑀕𑀳𑀡𑀁. 𑀧𑀼𑀭𑀺𑀲𑁄 𑀯𑀻𑀳𑀺𑀲𑀻𑀲𑀁 𑀦𑀺𑀤𑀫𑁆𑀧𑀢𑀺, 𑀭𑀼𑀓𑁆𑀔𑀧𑀢𑁆𑀢𑀁 𑀦𑀺𑀤𑀫𑁆𑀧𑀢𑀺. 𑀦𑀺𑀤𑀫𑁆𑀧𑀓𑁄, 𑀦𑀺𑀤𑀫𑁆𑀧𑀺𑀢𑀁, 𑀦𑀺𑀤𑀫𑁆𑀧𑀺𑀢𑀼𑀁, 𑀦𑀺𑀤𑀫𑁆𑀧𑀺𑀢𑁆𑀯𑀸.

𑀢𑀧 ¶ 𑀤𑀺𑀢𑁆𑀢𑀺𑀬𑀁. 𑀤𑀺𑀢𑁆𑀢𑀺 𑀯𑀺𑀭𑁄𑀘𑀦𑀁. 𑀤𑀺𑀯𑀸 𑀢𑀧𑀢𑀺𑀆𑀤𑀺𑀘𑁆𑀘𑁄.

𑀢𑀧 𑀉𑀩𑁆𑀩𑁂𑀕𑁂. 𑀉𑀩𑁆𑀩𑁂𑀕𑁄 𑀉𑀢𑁆𑀭𑀸𑀲𑁄 𑀪𑀻𑀭𑀼𑀢𑀸. 𑀢𑀧𑀢𑀺, 𑀉𑀢𑁆𑀢𑀧𑀢𑀺. 𑀑𑀢𑁆𑀢𑀧𑁆𑀧𑀁, 𑀑𑀢𑁆𑀢𑀧𑁆𑀧𑀺𑀬𑀁 𑀥𑀦𑀁.

𑀢𑀧 𑀥𑀽𑀧 𑀲𑀦𑁆𑀢𑀸𑀧𑁂. 𑀢𑀧𑀢𑀺. 𑀢𑀧𑁄𑀥𑀦𑀁, 𑀆𑀢𑀸𑀧𑁄. 𑀆𑀢𑀸𑀧𑀻. 𑀆𑀢𑀧𑀁. 𑀥𑀽𑀧𑀢𑀺, 𑀲𑀦𑁆𑀥𑀽𑀧𑀦𑁄, 𑀓𑀫𑁆𑀫𑁂 𑀢𑀸𑀧𑀺𑀬𑀢𑀺. 𑀥𑀽𑀧𑀺𑀬𑀢𑀺. 𑀪𑀸𑀯𑁂 𑀢𑀸𑀧𑀦𑀁, 𑀢𑀸𑀧𑁄, 𑀧𑀭𑀺𑀢𑀸𑀧𑁄, 𑀲𑀦𑁆𑀢𑀸𑀧𑁄. 𑀥𑀽𑀧𑀦𑀁.

𑀧𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀨𑀓𑀸𑀭𑀦𑁆𑀢𑀥𑀸𑀢𑀼

𑀧𑀼𑀧𑁆𑀨 𑀯𑀺𑀓𑀲𑀦𑁂. 𑀅𑀓𑀫𑁆𑀫𑀓𑁄 𑀘𑀸𑀬𑀁 𑀲𑀓𑀫𑁆𑀫𑀓𑁄 𑀘. 𑀧𑀼𑀧𑁆𑀨𑀢𑀺. 𑀧𑀼𑀧𑁆𑀨𑀁, 𑀧𑀼𑀧𑁆𑀨𑀦𑀁, 𑀧𑀼𑀧𑁆𑀨𑀺𑀢𑁄, 𑀧𑀼𑀧𑁆𑀨𑀺𑀢𑀼𑀁, 𑀧𑀼𑀧𑁆𑀨𑀺𑀢𑁆𑀯𑀸. 𑀧𑀼𑀧𑁆𑀨𑀦𑁆𑀢𑀺 𑀧𑀼𑀧𑁆𑀨𑀺𑀦𑁄 𑀤𑀼𑀫𑀸. 𑀣𑀮𑀚𑀸 𑀤𑀓𑀚𑀸 𑀧𑀼𑀧𑁆𑀨𑀸, 𑀲𑀩𑁆𑀩𑁂 𑀧𑀼𑀧𑁆𑀨𑀦𑁆𑀢𑀺 𑀢𑀸𑀯𑀤𑁂. 𑀫𑀜𑁆𑀚𑀽𑀲𑀓𑁄 𑀦𑀸𑀫 𑀭𑀼𑀓𑁆𑀔𑁄 𑀬𑀢𑁆𑀢𑀓𑀸𑀦𑀺 𑀉𑀤𑀓𑁂 𑀯𑀸 𑀣𑀮𑁂 𑀯𑀸 𑀧𑀼𑀧𑁆𑀨𑀸𑀦𑀺, 𑀲𑀩𑁆𑀩𑀸𑀦𑀺 𑀧𑀼𑀧𑁆𑀨𑀢𑀺.

𑀢𑀼𑀨 𑀳𑀺𑀁𑀲𑀸𑀬𑀁. 𑀢𑁄𑀨𑀢𑀺.

𑀤𑀨 𑀤𑀨𑀺 𑀯𑀧𑁆𑀨 𑀕𑀢𑀺𑀬𑀁. 𑀤𑀨𑀢𑀺. 𑀤𑀫𑁆𑀨𑀢𑀺. 𑀯𑀧𑁆𑀨𑀢𑀺.

𑀤𑀺𑀨 𑀓𑀣𑀦𑀬𑀼𑀤𑁆𑀥𑀦𑀺𑀦𑁆𑀤𑀸𑀳𑀺𑀁𑀲𑀸𑀤𑀸𑀦𑁂𑀲𑀼. 𑀤𑁂𑀨𑀢𑀺. 𑀤𑁂𑀨𑁄.

𑀢𑀨 𑀢𑀺𑀢𑁆𑀢𑀺𑀬𑀁. 𑀢𑀺𑀢𑁆𑀢𑀺 𑀢𑀧𑁆𑀧𑀦𑀁, 𑀢𑀨𑀢𑀺.

𑀤𑀼𑀨 𑀉𑀧𑀓𑁆𑀓𑀺𑀮𑁂𑀲𑁂. 𑀉𑀧𑀓𑁆𑀓𑀺𑀮𑀺𑀲𑁆𑀲𑀦𑀁 𑀉𑀧𑀓𑁆𑀓𑀺𑀮𑁂𑀲𑁄. 𑀤𑁄𑀨𑀢𑀺.

𑀕𑀼𑀨 𑀕𑀦𑁆𑀣𑁂. 𑀕𑀦𑁆𑀣𑁄 𑀕𑀦𑁆𑀣𑀺𑀓𑀭𑀡𑀁. 𑀕𑁄𑀨𑀢𑀺.

𑀨𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀩𑀓𑀸𑀭𑀦𑁆𑀢𑀥𑀸𑀢𑀼

𑀪𑀩𑁆𑀩 ¶ 𑀳𑀺𑀁𑀲𑀸𑀬𑀁. 𑀪𑀩𑁆𑀩𑀢𑀺. 𑀪𑀩𑁆𑀩𑁄.

𑀧𑀩𑁆𑀩 𑀯𑀩𑁆𑀩 𑀫𑀩𑁆𑀩 𑀓𑀩𑁆𑀩 𑀔𑀩𑁆𑀩 𑀕𑀩𑁆𑀩 𑀲𑀩𑁆𑀩 𑀘𑀩𑁆𑀩 𑀕𑀢𑀺𑀬𑀁. 𑀧𑀩𑁆𑀩𑀢𑀺. 𑀯𑀩𑁆𑀩𑀢𑀺. 𑀫𑀩𑁆𑀩𑀢𑀺. 𑀓𑀩𑁆𑀩𑀢𑀺. 𑀔𑀩𑁆𑀩𑀢𑀺. 𑀕𑀩𑁆𑀩𑀢𑀺. 𑀲𑀩𑁆𑀩𑀢𑀺. 𑀘𑀩𑁆𑀩𑀢𑀺.

𑀅𑀩𑁆𑀩 𑀲𑀩𑁆𑀩 𑀳𑀺𑀁𑀲𑀸𑀬𑀜𑁆𑀘. 𑀕𑀢𑁆𑀬𑀸𑀧𑁂𑀓𑁆𑀔𑀸𑀬 𑀘𑀓𑀸𑀭𑁄. 𑀅𑀩𑁆𑀩𑀢𑀺. 𑀲𑀩𑁆𑀩𑀢𑀺.

𑀓𑀼𑀩𑀺 𑀅𑀘𑁆𑀙𑀸𑀤𑀦𑁂. 𑀓𑀼𑀩𑁆𑀩𑀢𑀺.

𑀮𑀼𑀩𑀺 𑀢𑀼𑀩𑀺 𑀅𑀤𑁆𑀤𑀦𑁂. 𑀮𑀼𑀫𑁆𑀩𑀢𑀺. 𑀢𑀼𑀫𑁆𑀩𑀢𑀺. 𑀮𑀼𑀫𑁆𑀩𑀺𑀦𑀻𑀯𑀦𑀁. 𑀉𑀤𑀓𑀢𑀼𑀫𑁆𑀩𑁄. 𑀅𑀣𑁄𑀧𑀺 𑀤𑁆𑀯𑁂 𑀘 𑀢𑀼𑀫𑁆𑀩𑀸𑀦𑀺.

𑀘𑀼𑀩𑀺 𑀯𑀤𑀦𑀲𑀁𑀬𑁄𑀕𑁂. 𑀧𑀼𑀢𑁆𑀢𑀁 𑀫𑀼𑀤𑁆𑀥𑀦𑀺 𑀘𑀼𑀫𑁆𑀩𑀢𑀺. 𑀫𑀼𑀔𑁂 𑀘𑀼𑀫𑁆𑀩𑀢𑀺. 𑀏𑀢𑁆𑀣 𑀲𑀺𑀬𑀸 ‘‘𑀬𑀤𑀺 𑀯𑀤𑀦𑀲𑀁𑀬𑁄𑀕𑁂 𑀘𑀼𑀩𑀺𑀥𑀸𑀢𑀼 𑀯𑀢𑁆𑀢𑀢𑀺, 𑀓𑀣𑀁 𑀅𑀫𑁆𑀩𑀼𑀥𑀭𑀩𑀺𑀦𑁆𑀤𑀼𑀘𑀼𑀫𑁆𑀩𑀺𑀢𑀓𑀽𑀝𑁄𑀢𑀺 𑀏𑀢𑁆𑀣 𑀅𑀯𑀤𑀦𑁂 𑀅𑀯𑀺𑀜𑁆𑀜𑀸𑀡𑀓𑁂 𑀧𑀩𑁆𑀩𑀢𑀓𑀽𑀝𑁂 𑀅𑀫𑁆𑀩𑀼𑀥𑀭𑀩𑀺𑀦𑁆𑀤𑀽𑀦𑀁 𑀘𑀼𑀫𑁆𑀩𑀦𑀁 𑀯𑀼𑀢𑁆𑀢’’𑀦𑁆𑀢𑀺? 𑀲𑀘𑁆𑀘𑀁, 𑀢𑀁 𑀧𑀦 𑀘𑀼𑀫𑁆𑀩𑀦𑀸𑀓𑀸𑀭𑀲𑀤𑀺𑀲𑁂𑀦𑀸𑀓𑀸𑀭𑁂𑀦 𑀲𑀫𑁆𑀪𑀯𑀁 𑀘𑁂𑀢𑀲𑀺 𑀞𑀧𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀬𑀣𑀸 𑀅𑀤𑀲𑁆𑀲𑀦𑀲𑀫𑁆𑀪𑀯𑁂𑀧𑀺 𑀤𑀲𑁆𑀲𑀦𑀲𑀤𑀺𑀲𑁂𑀦𑀸𑀓𑀸𑀭𑁂𑀦 𑀲𑀫𑁆𑀪𑀽𑀢𑀢𑁆𑀢𑀸 ‘‘𑀭𑁄𑀤𑀦𑁆𑀢𑁂 𑀤𑀸𑀭𑀓𑁂 𑀤𑀺𑀲𑁆𑀯𑀸, 𑀉𑀩𑁆𑀩𑀺𑀤𑁆𑀥𑀸 𑀯𑀺𑀧𑀼𑀮𑀸 𑀤𑀼𑀫𑀸’’𑀢𑀺 𑀅𑀘𑀓𑁆𑀔𑀼𑀓𑀸𑀦𑀫𑁆𑀧𑀺 𑀭𑀼𑀓𑁆𑀔𑀸𑀦𑀁 𑀤𑀲𑁆𑀲𑀦𑀁 𑀯𑀼𑀢𑁆𑀢𑀁, 𑀏𑀯𑀫𑀺𑀥𑀸𑀧𑀺 𑀘𑀼𑀫𑁆𑀩𑀦𑀸𑀓𑀸𑀭𑀲𑀤𑀺𑀲𑁂𑀦𑀸𑀓𑀸𑀭𑁂𑀦 𑀲𑀫𑁆𑀪𑀽𑀢𑀢𑁆𑀢𑀸 𑀅𑀯𑀤𑀦𑀸𑀦𑀫𑁆𑀧𑀺 𑀅𑀫𑁆𑀩𑀼𑀥𑀭𑀩𑀺𑀦𑁆𑀤𑀽𑀦𑀁 𑀘𑀼𑀫𑁆𑀩𑀦𑀁 𑀯𑀼𑀢𑁆𑀢𑀁. 𑀲𑀪𑀸𑀯𑀢𑁄 𑀧𑀦 𑀅𑀯𑀺𑀜𑁆𑀜𑀸𑀡𑀓𑀸𑀦𑀁 𑀤𑀲𑁆𑀲𑀦𑀘𑀼𑀫𑁆𑀩𑀦𑀸𑀤𑀻𑀦𑀺 𑀘 𑀦𑀢𑁆𑀣𑀺, 𑀲𑀯𑀺𑀜𑁆𑀜𑀸𑀡𑀓𑀸𑀦𑀁𑀬𑁂𑀯 𑀢𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀅𑀬𑀁 𑀦𑀬𑁄 𑀓𑀫𑀼 𑀧𑀤𑀯𑀺𑀓𑁆𑀔𑁂𑀧𑁂𑀢𑀺𑀆𑀤𑀻𑀲𑀼𑀧𑀺 𑀦𑁂𑀢𑀩𑁆𑀩𑁄.

𑀉𑀩𑁆𑀩𑀺 𑀢𑀼𑀩𑁆𑀩𑀺 𑀣𑀼𑀩𑁆𑀩𑀺 𑀤𑀼𑀩𑁆𑀩𑀺 𑀥𑀼𑀩𑁆𑀩𑀺 𑀳𑀺𑀁𑀲𑀢𑁆𑀣𑀸. 𑀉𑀩𑁆𑀩𑀢𑀺. 𑀢𑀼𑀩𑁆𑀩𑀢𑀺. 𑀣𑀼𑀩𑁆𑀩𑀢𑀺. 𑀤𑀼𑀩𑁆𑀩𑀢𑀺. 𑀤𑀼𑀩𑁆𑀩𑀸. 𑀥𑀼𑀩𑁆𑀩𑀢𑀺. 𑀏𑀢𑁆𑀣 𑀤𑀼𑀩𑁆𑀩𑀸𑀢𑀺 𑀤𑀩𑁆𑀩𑀢𑀺𑀡𑀁, 𑀬𑀁 ‘‘𑀢𑀺𑀭𑀺𑀬𑀸 𑀦𑀸𑀫 𑀢𑀺𑀡𑀚𑀸𑀢𑀻’’𑀢𑀺 𑀧𑀸𑀴𑀺𑀬𑀁 𑀆𑀕𑀢𑀁. 𑀏𑀢𑁆𑀣 𑀘 𑀤𑀼𑀩𑁆𑀩𑀸𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀁, 𑀤𑀩𑁆𑀩𑀦𑁆𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀫𑀼𑀩𑁆𑀩𑀺 ¶ 𑀩𑀦𑁆𑀥𑀦𑁂. 𑀫𑀼𑀩𑁆𑀩𑀢𑀺.

𑀓𑀼𑀩𑁆𑀩𑀺 𑀉𑀕𑁆𑀕𑀫𑁂. 𑀓𑀼𑀩𑁆𑀩𑀢𑀺.

𑀧𑀼𑀩𑁆𑀩 𑀧𑀩𑁆𑀩 𑀲𑀩𑁆𑀩 𑀧𑀽𑀭𑀡𑁂. 𑀧𑀼𑀩𑁆𑀩𑀢𑀺. 𑀧𑀩𑁆𑀩𑀢𑀺. 𑀲𑀩𑁆𑀩𑀢𑀺. 𑀏𑀢𑁆𑀢 𑀲𑀺𑀬𑀸 ‘‘𑀦𑀦𑀼 𑀪𑁄 𑀧𑀼𑀩𑁆𑀩𑀲𑀩𑁆𑀩𑀲𑀤𑁆𑀤𑀸 𑀲𑀩𑁆𑀩𑀦𑀸𑀫𑀸𑀦𑀺, 𑀓𑀲𑁆𑀫𑀸 𑀧𑀦𑁂𑀢𑁂 𑀥𑀸𑀢𑀼𑀘𑀺𑀦𑁆𑀢𑀸𑀬𑀁 𑀕𑀳𑀺𑀢𑀸’’𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑀩𑁆𑀩𑀦𑀸𑀫𑁂𑀲𑀼 𑀘 𑀢𑀼𑀫𑀦𑁆𑀢𑀸𑀤𑀺𑀯𑀺𑀭𑀳𑀺𑀢𑁂𑀲𑀼 𑀘 𑀦𑀺𑀧𑀸𑀢𑁂𑀲𑀼 𑀉𑀧𑀲𑀕𑁆𑀕𑁂𑀲𑀼 𑀘 𑀥𑀸𑀢𑀼𑀘𑀺𑀦𑁆𑀢𑀸 𑀦𑀸𑀫 𑀦𑀢𑁆𑀣𑀺, 𑀇𑀫𑀸𑀦𑀺 𑀧𑀦 𑀲𑀩𑁆𑀩𑀦𑀸𑀫𑀸𑀦𑀺 𑀦 𑀳𑁄𑀦𑁆𑀢𑀺. 𑀓𑁂𑀯𑀮𑀁 𑀲𑀼𑀢𑀺𑀲𑀸𑀫𑀜𑁆𑀜𑁂𑀦 𑀲𑀩𑁆𑀩𑀦𑀸𑀫𑀸𑀦𑀺 𑀯𑀺𑀬 𑀉𑀧𑀝𑁆𑀞𑀳𑀦𑁆𑀢𑀺, 𑀢𑁂𑀦 𑀢𑁂 𑀢𑀩𑁆𑀪𑀸𑀯𑀫𑀼𑀢𑁆𑀢𑀢𑁆𑀢𑀸 𑀥𑀸𑀢𑀼𑀘𑀺𑀦𑁆𑀢𑀸𑀬𑀁 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀕𑀳𑀺𑀢𑀸 ‘‘𑀧𑀼𑀩𑁆𑀩𑀢𑀺 𑀲𑀩𑁆𑀩𑀢𑀻’’𑀢𑀺 𑀧𑀬𑁄𑀕𑀤𑀲𑁆𑀲𑀦𑀢𑁄𑀢𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀩𑀼𑀤𑁆𑀥𑀯𑀘𑀦𑁂 𑀏𑀢𑀸𑀦𑀺 𑀭𑀽𑀧𑀸𑀦𑀺 𑀦 𑀲𑀦𑁆𑀢𑀻𑀢𑀺? 𑀅𑀦𑀸𑀕𑀫𑀦𑀪𑀸𑀯𑁂𑀦 𑀦 𑀲𑀦𑁆𑀢𑀺, 𑀦 𑀅𑀯𑀺𑀚𑁆𑀚𑀫𑀸𑀦𑀪𑀸𑀯𑁂𑀦. 𑀓𑀺𑀜𑁆𑀘𑀸𑀧𑀺 𑀩𑀼𑀤𑁆𑀥𑀯𑀘𑀦𑁂𑀲𑀼 𑀏𑀢𑀸𑀦𑀺 𑀭𑀽𑀧𑀸𑀦𑀺 𑀦 𑀲𑀦𑁆𑀢𑀺, 𑀢𑀣𑀸𑀧𑀺 𑀧𑁄𑀭𑀸𑀡𑁂𑀳𑀺 𑀅𑀦𑀼𑀫𑀢𑀸 𑀧𑀼𑀭𑀸𑀡𑀪𑀸𑀲𑀸𑀢𑀺 𑀕𑀳𑁂𑀢𑀩𑁆𑀩𑀸𑀦𑀺, 𑀬𑀣𑀸 ‘‘𑀦𑀸𑀣𑀢𑀻𑀢𑀺 𑀦𑀸𑀣𑁄’’𑀢𑀺 𑀏𑀢𑁆𑀣 ‘‘𑀦𑀸𑀣𑀢𑀻’’𑀢𑀺 𑀭𑀽𑀧𑀁 𑀩𑀼𑀤𑁆𑀥𑀯𑀘𑀦𑁂 𑀅𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀕𑀳𑁂𑀢𑀩𑁆𑀩𑀁 𑀳𑁄𑀢𑀺, 𑀏𑀯𑀁 𑀇𑀫𑀸𑀦𑀺𑀧𑀺. 𑀢𑀲𑁆𑀫𑀸 𑀯𑁄𑀳𑀸𑀭𑁂𑀲𑀼 𑀯𑀺𑀜𑁆𑀜𑀽𑀦𑀁 𑀓𑁄𑀲𑀮𑁆𑀮𑀢𑁆𑀣𑀸𑀬 𑀲𑀸𑀲𑀦𑁂 𑀅𑀯𑀺𑀚𑁆𑀚𑀫𑀸𑀦𑀸𑀧𑀺 𑀲𑀸𑀲𑀦𑀸𑀦𑀼𑀭𑀽𑀧𑀸 𑀮𑁄𑀓𑀺𑀓𑀧𑁆𑀧𑀬𑁄𑀕𑀸 𑀕𑀳𑁂𑀢𑀩𑁆𑀩𑀸𑀢𑀺 ‘‘𑀧𑀼𑀩𑁆𑀩𑀢𑀺 𑀲𑀩𑁆𑀩𑀢𑀻’’𑀢𑀺 𑀭𑀽𑀧𑀸𑀦𑀺 𑀕𑀳𑀺𑀢𑀸𑀦𑀺. 𑀏𑀲 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀞𑀸𑀦𑁂𑀲𑀼 𑀯𑁂𑀤𑀺𑀢𑀩𑁆𑀩𑁄.

𑀘𑀫𑁆𑀩 𑀅𑀤𑀦𑁂. 𑀘𑀫𑁆𑀩𑀢𑀺.

𑀓𑀩𑁆𑀩 𑀔𑀩𑁆𑀩 𑀕𑀩𑁆𑀩 𑀤𑀩𑁆𑀩𑁂. 𑀤𑀩𑁆𑀩𑁄 𑀅𑀳𑀗𑁆𑀓𑀸𑀭𑁄. 𑀓𑀩𑁆𑀩𑀢𑀺. 𑀔𑀩𑁆𑀩𑀢𑀺. 𑀕𑀩𑁆𑀩𑀢𑀺.

𑀅𑀩𑀺 𑀤𑀩𑀺 𑀲𑀤𑁆𑀤𑁂. 𑀅𑀫𑁆𑀩𑀢𑀺. 𑀅𑀫𑁆𑀩𑀸, 𑀅𑀫𑁆𑀩𑀼. 𑀤𑀫𑁆𑀩𑀢𑀺.

𑀮𑀩𑀺 𑀅𑀯𑀲𑀁𑀲𑀦𑁂. 𑀅𑀯𑀲𑀁𑀲𑀦𑀁 𑀅𑀯𑀮𑀫𑁆𑀩𑀦𑀁. 𑀮𑀫𑁆𑀩𑀢𑀺, 𑀯𑀺𑀮𑀫𑁆𑀩𑀢𑀺, 𑀩𑁆𑀬𑀸𑀮𑀫𑁆𑀩𑀢𑀺. 𑀦𑀻𑀘𑁂 𑀘𑁄’𑀮𑀫𑁆𑀩𑀢𑁂 𑀲𑀽𑀭𑀺𑀬𑁄. 𑀆𑀮𑀫𑁆𑀩𑀢𑀺 ¶ . 𑀆𑀮𑀫𑁆𑀩𑀦𑀁, 𑀢𑀤𑀸𑀮𑀫𑁆𑀩𑀦𑀁, 𑀢𑀤𑀸𑀮𑀫𑁆𑀩𑀡𑀁, 𑀢𑀤𑀸𑀮𑀫𑁆𑀩𑀁 𑀯𑀸. 𑀮𑀸𑀩𑀼. 𑀅𑀮𑀸𑀩𑀼 𑀯𑀸, 𑀅𑀓𑀸𑀭𑁄 𑀳𑀺 𑀢𑀩𑁆𑀪𑀸𑀯𑁂.

𑀩𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀪𑀓𑀸𑀭𑀦𑁆𑀢𑀥𑀸𑀢𑀼

𑀪𑀸 𑀤𑀺𑀢𑁆𑀢𑀺𑀬𑀁. 𑀘𑀦𑁆𑀤𑁄 𑀪𑀸𑀢𑀺, 𑀧𑀜𑁆𑀳𑀸 𑀫𑀁 𑀧𑀝𑀺𑀪𑀸𑀢𑀺. 𑀭𑀢𑁆𑀢𑀺 𑀯𑀺𑀪𑀸𑀢𑀺. 𑀪𑀸𑀡𑀼, 𑀧𑀝𑀺𑀪𑀸𑀦𑀁. 𑀯𑀺𑀪𑀸𑀢𑀸 𑀭𑀢𑁆𑀢𑀺.

𑀪𑀻 𑀪𑀬𑁂. 𑀪𑀸𑀬𑀢𑀺. 𑀪𑀬𑀁, 𑀪𑀬𑀸𑀦𑀓𑁄, 𑀪𑀻𑀫𑁄, 𑀪𑀻𑀫𑀲𑁂𑀦𑁄, 𑀪𑀻𑀭𑀼, 𑀪𑀻𑀭𑀼𑀓𑁄, 𑀪𑀻𑀭𑀼𑀓𑀚𑀸𑀢𑀺𑀓𑁄. 𑀓𑀸𑀭𑀺𑀢𑁂 ‘‘𑀪𑀸𑀬𑁂𑀢𑀺, 𑀪𑀸𑀬𑀬𑀢𑀺, 𑀪𑀸𑀬𑀸𑀧𑁂𑀢𑀺, 𑀪𑀸𑀬𑀸𑀧𑀬𑀢𑀻’’𑀢𑀺 𑀭𑀽𑀧𑀸𑀦𑀺.

𑀲𑀪𑀼 𑀲𑀫𑁆𑀪𑀼 𑀳𑀺𑀁𑀲𑀸𑀬𑀁. 𑀲𑀪𑀢𑀺. 𑀲𑀫𑁆𑀪𑀢𑀺.

𑀲𑀼𑀫𑁆𑀪 𑀪𑀸𑀲𑀦𑁂 𑀘. 𑀘𑀓𑀸𑀭𑁄 𑀳𑀺𑀁𑀲𑀸𑀧𑁂𑀓𑁆𑀔𑀓𑁄. 𑀲𑀼𑀫𑁆𑀪𑀢𑀺. 𑀲𑀼𑀫𑁆𑀪𑁄. 𑀓𑀼𑀲𑀼𑀫𑁆𑀪𑁄.

𑀏𑀢𑁆𑀣 𑀲𑀼𑀫𑁆𑀪𑁄𑀢𑀺 𑀆𑀯𑀸𑀝𑁄. ‘‘𑀲𑀼𑀫𑁆𑀪𑀁 𑀦𑀺𑀓𑁆𑀔𑀦𑀸𑀳𑀻’’𑀢𑀺 𑀇𑀤𑀫𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀓𑀼𑀲𑀼𑀫𑁆𑀪𑁄𑀢𑀺 𑀔𑀼𑀤𑁆𑀤𑀓𑀆𑀯𑀸𑀝𑁄, ‘‘𑀧𑀩𑁆𑀩𑀢𑀓𑀦𑁆𑀤𑀭𑀧𑀤𑀭𑀲𑀸𑀔𑀸𑀧𑀭𑀺𑀧𑀽𑀭𑀸 𑀓𑀼𑀲𑀼𑀫𑁆𑀪𑁂 𑀧𑀭𑀺𑀧𑀽𑀭𑁂𑀦𑁆𑀢𑀻’’𑀢𑀺 𑀇𑀤𑀫𑁂𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀅𑀩𑁆𑀪 𑀯𑀩𑁆𑀪 𑀫𑀩𑁆𑀪 𑀕𑀢𑀺𑀬𑀁. 𑀅𑀩𑁆𑀪𑀢𑀺. 𑀅𑀩𑁆𑀪𑁄. 𑀯𑀩𑁆𑀪𑀢𑀺. 𑀫𑀩𑁆𑀪𑀢𑀺.

𑀏𑀢𑁆𑀣 𑀅𑀩𑁆𑀪𑁄𑀢𑀺 𑀫𑁂𑀖𑁄. 𑀲𑁄 𑀳𑀺 𑀅𑀩𑁆𑀪𑀢𑀺 𑀅𑀦𑁂𑀓𑀲𑀢𑀧𑀝𑀮𑁄 𑀳𑀼𑀢𑁆𑀯𑀸 𑀕𑀘𑁆𑀙𑀢𑀻𑀢𑀺 ‘‘𑀅𑀩𑁆𑀪𑁄’’𑀢𑀺 𑀯𑀼𑀘𑁆𑀘𑀢𑀺. ‘‘𑀯𑀺𑀚𑁆𑀚𑀼𑀫𑀸𑀮𑀻 𑀲𑀢𑀓𑁆𑀓𑀓𑀽’’𑀢𑀺 𑀯𑀼𑀢𑁆𑀢𑀁. 𑀲𑀢𑀓𑁆𑀓𑀓𑀽𑀢𑀺 𑀘 𑀅𑀦𑁂𑀓𑀲𑀢𑀧𑀝𑀮𑁄. 𑀏𑀢𑁆𑀣 𑀘 𑀅𑀩𑁆𑀪𑀲𑀤𑁆𑀤𑁄 𑀢𑀺𑀮𑀺𑀗𑁆𑀕𑀺𑀓𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 ¶ 𑀳𑀺 𑀅𑀬𑀁 ‘‘𑀅𑀩𑁆𑀪𑀼𑀝𑁆𑀞𑀺𑀢𑁄𑀯 𑀲 𑀬𑀸𑀢𑀺, 𑀲 𑀕𑀘𑁆𑀙𑀁 𑀦 𑀦𑀺𑀯𑀢𑁆𑀢𑀢𑀻’’𑀢𑀺 𑀏𑀢𑁆𑀣 𑀧𑀼𑀮𑁆𑀮𑀺𑀗𑁆𑀕𑁄. ‘‘𑀅𑀩𑁆𑀪𑀸, 𑀫𑀳𑀺𑀓𑀸, 𑀥𑀽𑀫𑁄, 𑀭𑀚𑁄, 𑀭𑀸𑀳𑀽’’𑀢𑀺 𑀏𑀢𑁆𑀣 𑀇𑀢𑁆𑀣𑀺𑀮𑀺𑀗𑁆𑀕𑁄. ‘‘𑀅𑀩𑁆𑀪𑀸𑀦𑀺 𑀘𑀦𑁆𑀤𑀫𑀡𑁆𑀟𑀮𑀁 𑀙𑀸𑀤𑁂𑀦𑁆𑀢𑀻’’𑀢𑀺 𑀏𑀢𑁆𑀣 𑀦𑀧𑀼𑀁𑀲𑀓𑀮𑀺𑀗𑁆𑀕𑁄.

𑀇𑀫𑀸𑀦𑀺 𑀧𑀦 𑀫𑁂𑀖𑀲𑁆𑀲 𑀦𑀸𑀫𑀸𑀦𑀺 𑁋

𑀫𑁂𑀖𑁄 𑀯𑀮𑀸𑀳𑀓𑁄 𑀮𑀗𑁆𑀖𑀺, 𑀚𑀻𑀫𑀽𑀢𑁄 𑀅𑀫𑁆𑀩𑀼𑀤𑁄 𑀖𑀦𑁄;

𑀥𑀸𑀭𑀸𑀥𑀭𑁄 𑀅𑀫𑁆𑀩𑀼𑀥𑀭𑁄, 𑀧𑀚𑁆𑀚𑀼𑀦𑁆𑀦𑁄 𑀳𑀺𑀫𑀕𑀩𑁆𑀪𑀓𑁄.

𑀬𑀪 𑀫𑁂𑀣𑀼𑀦𑁂. 𑀫𑀺𑀣𑀼𑀦𑀲𑁆𑀲 𑀚𑀦𑀤𑁆𑀯𑀬𑀲𑁆𑀲 𑀇𑀤𑀁 𑀓𑀫𑁆𑀫𑀁 𑀫𑁂𑀣𑀽𑀦𑀁, 𑀢𑀲𑁆𑀫𑀺𑀁 𑀫𑁂𑀣𑀼𑀦𑁂 𑀬𑀪𑀥𑀸𑀢𑀼 𑀯𑀢𑁆𑀢𑀢𑀺. 𑀬𑀪𑀢𑀺. 𑀬𑀸𑀪𑀲𑁆𑀲𑀁.

𑀏𑀢𑁆𑀣 𑀘 ‘‘𑀫𑁂𑀣𑀼𑀦’’𑀦𑁆𑀢𑀺 𑀏𑀲𑀸 𑀲𑀩𑁆𑀪𑀺𑀯𑀸𑀘𑀸, 𑀮𑀚𑁆𑀚𑀸𑀲𑀫𑁆𑀧𑀦𑁆𑀦𑁂𑀳𑀺 𑀧𑀼𑀕𑁆𑀕𑀮𑁂𑀳𑀺 𑀯𑀢𑁆𑀢𑀩𑁆𑀩𑀪𑀸𑀲𑀸𑀪𑀸𑀯𑀢𑁄. 𑀢𑀣𑀸 𑀳𑀺 ‘‘𑀫𑁂𑀣𑀼𑀦𑁄 𑀥𑀫𑁆𑀫𑁄 𑀦 𑀧𑀝𑀺𑀲𑁂𑀯𑀺𑀢𑀩𑁆𑀩𑁄’’𑀢𑀺 𑀘 ‘‘𑀦 𑀫𑁂 𑀭𑀸𑀚𑀸 𑀲𑀔𑀸 𑀳𑁄𑀢𑀺, 𑀦 𑀭𑀸𑀚𑀸 𑀳𑁄𑀢𑀺 𑀫𑁂𑀣𑀼𑀦𑁄’’𑀢𑀺 𑀘 𑀲𑁄𑀪𑀦𑁂 𑀯𑀸𑀘𑀸𑀯𑀺𑀲𑀬𑁂 𑀅𑀬𑀁 𑀪𑀸𑀲𑀸 𑀆𑀕𑀢𑀸. ‘‘𑀬𑀪𑀢𑀻’’𑀢𑀺𑀆𑀤𑀺𑀓𑀸 𑀧𑀦 𑀪𑀸𑀲𑀸 ‘‘𑀲𑀺𑀔𑀭𑀡𑀻’’𑀢𑀺𑀆𑀤𑀺𑀓𑀸 𑀪𑀸𑀲𑀸 𑀯𑀺𑀬 𑀅𑀲𑀫𑁆𑀪𑀺𑀯𑀸𑀘𑀸. 𑀦 𑀳𑀺 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑁄 𑀮𑁄𑀓𑀺𑀬𑀚𑀦𑁄𑀧𑀺 𑀈𑀤𑀺𑀲𑀺𑀁 𑀯𑀸𑀘𑀁 𑀪𑀸𑀲𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀥𑀺𑀫𑀢𑁆𑀢𑀼𑀓𑁆𑀓𑀁𑀲𑀕𑀢𑀳𑀺𑀭𑁄𑀢𑁆𑀢𑀧𑁆𑀧𑁄𑀧𑀺 𑀪𑀕𑀯𑀸 𑀫𑀳𑀸𑀓𑀭𑀼𑀡𑀸𑀬 𑀲𑀜𑁆𑀘𑁄𑀤𑀺𑀢𑀳𑀤𑀬𑁄 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀧𑀭𑀺𑀲𑀫𑀚𑁆𑀛𑁂 𑀅𑀪𑀸𑀲𑀺. 𑀅𑀳𑁄 𑀢𑀣𑀸𑀕𑀢𑀲𑁆𑀲 𑀫𑀳𑀸𑀓𑀭𑀼𑀡𑀸𑀢𑀺.

𑀇𑀫𑀸𑀦𑀺 𑀧𑀦 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀦𑀸𑀫𑀸𑀦𑀺 𑁋

𑀲𑀁𑀯𑁂𑀲𑀦𑀁 𑀦𑀺𑀤𑁆𑀥𑀼𑀯𑀦𑀁, 𑀫𑁂𑀣𑀼𑀦𑀁 𑀲𑀽𑀭𑀢𑀁 𑀭𑀢𑀁;

𑀩𑁆𑀬𑀣𑀬𑁄 𑀕𑀸𑀫𑀥𑀫𑁆𑀫𑁄 𑀘, 𑀬𑀸𑀪𑀲𑁆𑀲𑀁 𑀫𑁄𑀳𑀦𑀁 𑀭𑀢𑀺.

𑀅𑀲𑀤𑁆𑀥𑀫𑁆𑀫𑁄 𑀘 𑀯𑀲𑀮-𑀥𑀫𑁆𑀫𑁄 𑀫𑀻𑀴𑁆𑀳𑀲𑀼𑀔𑀫𑁆𑀧𑀺 𑀘;

𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺, 𑀤𑁆𑀯𑀦𑁆𑀤𑁄 𑀕𑀫𑁆𑀫𑁄’𑀤𑀓𑀦𑁆𑀢𑀺𑀓𑁄.

𑀲𑀺𑀪 𑀯𑀺𑀪 𑀓𑀢𑁆𑀣𑀦𑁂. 𑀲𑀺𑀪𑀢𑀺. 𑀯𑀺𑀪𑀢𑀺.

𑀤𑁂𑀪 ¶ 𑀅𑀪𑀺 𑀤𑀪𑀺 𑀲𑀤𑁆𑀤𑁂. 𑀤𑁂𑀪𑀢𑀺. 𑀅𑀫𑁆𑀪𑀢𑀺. 𑀅𑀫𑁆𑀪𑁄. 𑀤𑀫𑁆𑀪𑀢𑀺.

𑀏𑀢𑁆𑀣 𑀘 𑀅𑀫𑁆𑀪𑁄 𑀯𑀼𑀘𑁆𑀘𑀢𑀺 𑀉𑀤𑀓𑀁. 𑀢𑀜𑁆𑀳𑀺 𑀦𑀺𑀚𑁆𑀚𑀻𑀯𑀫𑁆𑀧𑀺 𑀲𑀫𑀸𑀦𑀁 𑀑𑀖𑀓𑀸𑀮𑀸𑀤𑀻𑀲𑀼 𑀯𑀺𑀲𑁆𑀲𑀦𑁆𑀤𑀫𑀸𑀦𑀁 𑀅𑀫𑁆𑀪𑀢𑀺 𑀲𑀤𑁆𑀤𑀁 𑀓𑀭𑁄𑀢𑀻𑀢𑀺 𑀅𑀫𑁆𑀪𑁄𑀢𑀺 𑀯𑀼𑀘𑁆𑀘𑀢𑀺.

𑀇𑀫𑀸𑀦𑀺𑀲𑁆𑀲 𑀦𑀸𑀫𑀸𑀦𑀺 𑁋

𑀧𑀸𑀦𑀻𑀬𑀁 𑀉𑀤𑀓𑀁 𑀢𑁄𑀬𑀁, 𑀚𑀮𑀁 𑀧𑀸𑀢𑁄 𑀘 𑀅𑀫𑁆𑀩𑀼 𑀘;

𑀤𑀓𑀁 𑀓𑀁 𑀲𑀮𑀺𑀮𑀁 𑀯𑀸𑀭𑀺, 𑀆𑀧𑁄 𑀅𑀫𑁆𑀪𑁄 𑀧𑀧𑀫𑁆𑀧𑀺 𑀘.

𑀦𑀻𑀭𑀜𑁆𑀘 𑀓𑁂𑀧𑀼𑀓𑀁 𑀧𑀸𑀦𑀺, 𑀅𑀫𑀢𑀁 𑀏𑀮𑀫𑁂𑀯 𑀘,

𑀆𑀧𑁄𑀦𑀸𑀫𑀸𑀦𑀺 𑀏𑀢𑀸𑀦𑀺, 𑀆𑀕𑀢𑀸𑀦𑀺 𑀢𑀢𑁄 𑀢𑀢𑁄.

𑀏𑀢𑁆𑀣 𑀘 ‘‘𑀯𑀸𑀮𑀕𑁆𑀕𑁂𑀲𑀼 𑀘 𑀓𑁂𑀧𑀼𑀓𑁂. 𑀧𑀺𑀯𑀺𑀢𑀜𑁆𑀘 𑀢𑁂𑀲𑀁 𑀪𑀼𑀲𑀁 𑀳𑁄𑀢𑀺 𑀧𑀸𑀦𑀻’’𑀢𑀺𑀆𑀤𑀬𑁄 𑀧𑀬𑁄𑀕𑀸 𑀤𑀲𑁆𑀲𑁂𑀢𑀩𑁆𑀩𑀸.

𑀣𑀪𑀺 𑀔𑀪𑀺 𑀧𑀝𑀺𑀩𑀤𑁆𑀥𑁂 𑀣𑀫𑁆𑀪𑀢𑀺, 𑀯𑀺𑀢𑁆𑀣𑀫𑁆𑀪𑀢𑀺. 𑀔𑀫𑁆𑀪𑀢𑀺, 𑀯𑀺𑀓𑁆𑀔𑀫𑁆𑀪𑀢𑀺. 𑀣𑀫𑁆𑀪𑁄. 𑀣𑀤𑁆𑀥𑁄, 𑀉𑀧𑀢𑁆𑀣𑀫𑁆𑀪𑁄. 𑀉𑀧𑀢𑁆𑀣𑀫𑁆𑀪𑀺𑀦𑀻. 𑀯𑀺𑀓𑁆𑀔𑀫𑁆𑀪𑁄. 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑁄.

𑀚𑀪 𑀚𑀪𑀺 𑀕𑀢𑁆𑀢𑀯𑀺𑀦𑀸𑀫𑁂. 𑀚𑀪𑀢𑀺. 𑀚𑀫𑁆𑀪𑀢𑀺, 𑀯𑀺𑀚𑀫𑁆𑀪𑀢𑀺. 𑀯𑀺𑀚𑀫𑁆𑀪𑀦𑀁, 𑀯𑀺𑀚𑀫𑁆𑀪𑀺𑀢𑀸. 𑀯𑀺𑀚𑀫𑁆𑀪𑀦𑁆𑀢𑁄, 𑀯𑀺𑀚𑀫𑁆𑀪𑀫𑀸𑀦𑁄, 𑀯𑀺𑀚𑀫𑁆𑀪𑀺𑀢𑁄.

𑀲𑀩𑁆𑀪 𑀓𑀣𑀦𑁂. 𑀲𑀩𑁆𑀪𑀢𑀺.

𑀯𑀩𑁆𑀪 𑀪𑁄𑀚𑀦𑁂. 𑀯𑀩𑁆𑀪𑀢𑀺.

𑀕𑀩𑁆𑀪 𑀥𑀸𑀭𑀡𑁂. 𑀕𑀩𑁆𑀪𑀢𑀺. 𑀕𑀩𑁆𑀪𑁄.

𑀏𑀢𑁆𑀣 𑀕𑀩𑁆𑀪𑁄𑀢𑀺 𑀫𑀸𑀢𑀼𑀓𑀼𑀘𑁆𑀙𑀺𑀧𑀺 𑀯𑀼𑀘𑁆𑀘𑀢𑀺 𑀓𑀼𑀘𑁆𑀙𑀺𑀕𑀢𑀧𑀼𑀢𑁆𑀢𑁄𑀧𑀺. 𑀢𑀣𑀸 𑀳𑀺 ‘‘𑀬𑀫𑁂𑀓𑀭𑀢𑁆𑀢𑀺𑀁 𑀧𑀞𑀫𑀁, 𑀕𑀩𑁆𑀪𑁂 𑀯𑀲𑀢𑀺 𑀫𑀸𑀡𑀯𑁄’’𑀢𑀺 𑀏𑀢𑁆𑀣 𑀫𑀸𑀢𑀼𑀓𑀼𑀘𑁆𑀙𑀺 ‘‘𑀕𑀩𑁆𑀪𑁄’’𑀢𑀺 𑀯𑀼𑀘𑁆𑀘𑀢𑀺. ‘‘𑀕𑀩𑁆𑀪𑁄 𑀫𑁂 𑀤𑁂𑀯 𑀧𑀢𑀺𑀝𑁆𑀞𑀺𑀢𑁄. 𑀕𑀩𑁆𑀪𑁄 𑀘 𑀧𑀢𑀺𑀢𑁄 𑀙𑀫𑀸’’𑀢𑀺 𑀘 𑀏𑀢𑁆𑀣 𑀧𑀦 𑀓𑀼𑀘𑁆𑀙𑀺𑀕𑀢𑀧𑀼𑀢𑁆𑀢𑁄. 𑀅𑀧𑀺𑀘 𑀕𑀩𑁆𑀪𑁄𑀢𑀺 𑀆𑀯𑀸𑀲𑀯𑀺𑀲𑁂𑀲𑁄. ‘‘𑀕𑀩𑁆𑀪𑀁 ¶ 𑀧𑀯𑀺𑀝𑁆𑀞𑁄’’𑀢𑀺𑀆𑀤𑀻𑀲𑀼 𑀳𑀺 𑀑𑀯𑀭𑀓𑁄 ‘‘𑀕𑀩𑁆𑀪𑁄’’𑀢𑀺 𑀯𑀼𑀘𑁆𑀘𑀢𑀺.

𑀭𑀪 𑀭𑀸𑀪𑀲𑁆𑀲𑁂. 𑀆𑀧𑀼𑀩𑁆𑀩𑁄 𑀭𑀪 𑀳𑀺𑀁𑀲𑀸𑀓𑀭𑀡𑀯𑀸𑀬𑀫𑀦𑁂𑀲𑀼. 𑀭𑀸𑀪𑀲𑁆𑀲𑀁 𑀭𑀸𑀪𑀲𑀪𑀸𑀯𑁄. 𑀢𑀁𑀲𑀫𑀗𑁆𑀕𑀺𑀦𑁄 𑀧𑀦 𑀧𑀸𑀴𑀺𑀬𑀁 ‘‘𑀘𑀡𑁆𑀟𑀸 𑀭𑀼𑀤𑁆𑀥𑀸 𑀭𑀪𑀲𑀸’’𑀢𑀺 𑀏𑀯𑀁 𑀆𑀕𑀢𑀸.

𑀢𑀢𑁆𑀣 𑀭𑀪𑀲𑀸𑀢𑀺 𑀓𑀭𑀡𑀼𑀢𑁆𑀢𑀭𑀺𑀬𑀸. 𑀭𑀪𑀢𑀺, 𑀆𑀭𑀪𑀢𑀺, 𑀲𑀫𑀸𑀭𑀪𑀢𑀺, 𑀆𑀭𑀫𑁆𑀪𑀢𑀺. 𑀭𑀪𑀲𑁄. 𑀆𑀭𑀫𑁆𑀪𑁄. 𑀲𑀫𑀸𑀭𑀫𑁆𑀪𑁄, 𑀆𑀭𑀪𑀦𑁆𑀢𑁄. 𑀲𑀫𑀸𑀭𑀪𑀦𑁆𑀢𑁄. 𑀆𑀭𑀤𑁆𑀥𑀁 𑀫𑁂 𑀯𑀻𑀭𑀺𑀬𑀁. 𑀲𑀸𑀭𑀫𑁆𑀪𑀁. 𑀅𑀦𑀸𑀭𑀫𑁆𑀪𑀁. 𑀲𑀸𑀭𑀫𑁆𑀪𑁄 𑀢𑁂 𑀦 𑀯𑀺𑀚𑁆𑀚𑀢𑀺. 𑀧𑀓𑀸𑀭𑀡𑀸𑀭𑀫𑁆𑀪𑁄. 𑀯𑀻𑀭𑀺𑀬𑀸𑀭𑀫𑁆𑀪𑁄. 𑀆𑀭𑀪𑀺𑀢𑀼𑀁. 𑀆𑀭𑀪𑀺𑀢𑁆𑀯𑀸. 𑀆𑀭𑀩𑁆𑀪.

𑀏𑀢𑁆𑀣 𑀯𑀻𑀭𑀺𑀬𑀸𑀭𑀫𑁆𑀪𑁄𑀢𑀺 𑀯𑀻𑀭𑀺𑀬𑀲𑀗𑁆𑀔𑀸𑀢𑁄 𑀆𑀭𑀫𑁆𑀪𑁄. 𑀆𑀭𑀫𑁆𑀪𑀲𑀤𑁆𑀤𑁄 𑀓𑀫𑁆𑀫𑁂 𑀆𑀧𑀢𑁆𑀢𑀺𑀬𑀁 𑀓𑁆𑀭𑀺𑀬𑀸𑀬 𑀯𑀻𑀭𑀺𑀬𑁂 𑀳𑀺𑀁𑀲𑀸𑀬 𑀯𑀺𑀓𑁄𑀧𑀦𑁂𑀢𑀺 𑀅𑀦𑁂𑀓𑁂𑀲𑀼 𑀅𑀢𑁆𑀣𑁂𑀲𑀼 𑀆𑀕𑀢𑁄.

‘‘𑀬𑀁 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀲𑀫𑁆𑀪𑁄𑀪𑀺, 𑀲𑀩𑁆𑀩𑀁 𑀆𑀭𑀫𑁆𑀪𑀧𑀘𑁆𑀘𑀬𑀸;

𑀆𑀭𑀫𑁆𑀪𑀸𑀦𑀁 𑀦𑀺𑀭𑁄𑀥𑁂𑀦, 𑀦𑀢𑁆𑀣𑀺 𑀤𑀼𑀓𑁆𑀔𑀲𑁆𑀲 𑀲𑀫𑁆𑀪𑀯𑁄’’𑀢𑀺

𑀏𑀢𑁆𑀣 𑀳𑀺 𑀓𑀫𑁆𑀫𑀁 𑀆𑀭𑀫𑁆𑀪𑁄𑀢𑀺 𑀆𑀕𑀢𑀁. ‘‘𑀆𑀭𑀫𑁆𑀪𑀢𑀺 𑀘 𑀯𑀺𑀧𑁆𑀧𑀝𑀺𑀲𑀸𑀭𑀻 𑀘 𑀳𑁄𑀢𑀻’’𑀢𑀺 𑀏𑀢𑁆𑀣 𑀆𑀧𑀢𑁆𑀢𑀺. ‘‘𑀫𑀳𑀸𑀬𑀜𑁆𑀜𑀸 𑀫𑀳𑀸𑀭𑀫𑁆𑀪𑀸, 𑀦 𑀢𑁂 𑀳𑁄𑀦𑁆𑀢𑀺 𑀫𑀳𑀧𑁆𑀨𑀮𑁆𑀮𑀸’’𑀢𑀺 𑀏𑀢𑁆𑀣 𑀬𑀽𑀧𑀼𑀲𑁆𑀲𑀸𑀧𑀦𑀸𑀤𑀺𑀓𑁆𑀭𑀺𑀬𑀸. ‘‘𑀆𑀭𑀫𑁆𑀪𑀣 𑀦𑀺𑀓𑁆𑀓𑀫𑀣, 𑀬𑀼𑀜𑁆𑀚𑀣 𑀩𑀼𑀤𑁆𑀥𑀲𑀸𑀲𑀦𑁂’’𑀢𑀺 𑀏𑀢𑁆𑀣 𑀯𑀻𑀭𑀺𑀬𑀁. ‘‘𑀲𑀫𑀡𑀁 𑀕𑁄𑀢𑀫𑀁 𑀉𑀤𑁆𑀤𑀺𑀲𑁆𑀲 𑀧𑀸𑀡𑀁 𑀆𑀭𑀫𑁆𑀪𑀦𑁆𑀢𑀻’’𑀢𑀺 𑀏𑀢𑁆𑀣 𑀳𑀺𑀁𑀲𑀸. ‘‘𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺 𑀏𑀢𑁆𑀣 𑀙𑁂𑀤𑀦𑀪𑀜𑁆𑀚𑀦𑀸𑀤𑀺𑀓𑀁 𑀯𑀺𑀓𑁄𑀧𑀦𑀁. 𑀇𑀘𑁆𑀘𑁂𑀯𑀁 𑁋

𑀓𑀫𑁆𑀫𑁂 ¶ 𑀆𑀧𑀢𑁆𑀢𑀺𑀬𑀜𑁆𑀘𑁂𑀯, 𑀯𑀻𑀭𑀺𑀬𑁂 𑀳𑀺𑀁𑀲𑀸𑀓𑁆𑀭𑀺𑀬𑀸𑀲𑀼 𑀘;

𑀯𑀺𑀓𑁄𑀧𑀦𑁂 𑀘 𑀆𑀭𑀫𑁆𑀪-𑀲𑀤𑁆𑀤𑁄 𑀳𑁄𑀢𑀻𑀢𑀺 𑀦𑀺𑀤𑁆𑀤𑀺𑀲𑁂;

𑀮𑀪 𑀮𑀸𑀪𑁂. 𑀮𑀪𑀢𑀺, 𑀮𑀩𑁆𑀪𑀢𑀺. 𑀮𑀸𑀪𑁄, 𑀮𑀤𑁆𑀥𑀁, 𑀅𑀮𑀢𑁆𑀣, 𑀅𑀮𑀢𑁆𑀣𑀼𑀁.

𑀲𑀼𑀪 𑀤𑀺𑀢𑁆𑀢𑀺𑀬𑀁. 𑀲𑁄𑀪𑀢𑀺. 𑀲𑁄𑀪𑀸, 𑀲𑁄𑀪𑀦𑀁, 𑀲𑁄𑀪𑀺𑀢𑁄.

𑀔𑀼𑀪 𑀲𑀜𑁆𑀘𑀮𑀦𑁂. 𑀔𑁄𑀪𑀢𑀺, 𑀲𑀗𑁆𑀔𑁄𑀪𑀢𑀺. 𑀳𑀢𑁆𑀣𑀺𑀦𑀸𑀕𑁂 𑀧𑀤𑀺𑀦𑁆𑀦𑀫𑁆𑀳𑀺, 𑀔𑀼𑀩𑁆𑀪𑀺𑀢𑁆𑀣 𑀦𑀕𑀭𑀁 𑀢𑀤𑀸. 𑀔𑁄𑀪𑀸, 𑀲𑀗𑁆𑀔𑁄𑀪𑁄.

𑀦𑀪 𑀢𑀼𑀪 𑀳𑀺𑀁𑀲𑀸𑀬𑀁. 𑀦𑀪𑀢𑀺. 𑀢𑀼𑀪𑀢𑀺.

𑀲𑀫𑁆𑀪 𑀯𑀺𑀲𑁆𑀲𑀸𑀲𑁂. 𑀲𑀫𑁆𑀪𑀢𑀺. 𑀲𑀫𑁆𑀪𑀢𑁆𑀢𑀺, 𑀲𑀫𑁆𑀪𑀢𑁆𑀢𑁄.

𑀮𑀼𑀪 𑀯𑀺𑀫𑁄𑀳𑀦𑁂. 𑀮𑁄𑀪𑀢𑀺, 𑀧𑀮𑁄𑀪𑀢𑀺. 𑀣𑀼𑀮𑁆𑀮𑀓𑀼𑀫𑀸𑀭𑀻𑀧𑀮𑁄𑀪𑀦𑀁. 𑀓𑀸𑀭𑀺𑀢𑁂 𑀧𑀦 ‘‘𑀮𑁄𑀪𑁂𑀢𑀺, 𑀧𑀮𑁄𑀪𑁂𑀢𑀺, 𑀧𑀮𑁄𑀪𑁂𑀢𑁆𑀯𑀸’’𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀤𑀺𑀯𑀸𑀤𑀺𑀕𑀡𑀁 𑀧𑀦 𑀧𑀢𑁆𑀯𑀸 𑀕𑀺𑀤𑁆𑀥𑀺𑀬𑀢𑁆𑀣𑁂 ‘‘𑀮𑀼𑀩𑁆𑀪𑀢𑀻’’𑀢𑀺 𑀭𑀽𑀧𑀁 𑀪𑀯𑀢𑀺.

𑀤𑀪𑀺 𑀕𑀦𑁆𑀣𑀦𑁂. 𑀤𑀫𑁆𑀪𑀢𑀺. 𑀤𑀫𑁆𑀪𑀦𑀁.

𑀭𑀼𑀪𑀺 𑀦𑀺𑀯𑀸𑀭𑀡𑁂. 𑀭𑀼𑀫𑁆𑀪𑀢𑀺, 𑀲𑀦𑁆𑀦𑀺𑀭𑀼𑀫𑁆𑀪𑀢𑀺. 𑀲𑀦𑁆𑀦𑀺𑀭𑀼𑀫𑁆𑀪𑁄, 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸.

𑀉𑀪 𑀉𑀩𑁆𑀪 𑀉𑀫𑁆𑀪 𑀧𑀽𑀭𑀡𑁂. 𑀉𑀪𑀢𑀺. 𑀉𑀩𑁆𑀪𑀢𑀺. 𑀉𑀫𑁆𑀪𑀢𑀺. 𑀉𑀪𑀦𑀸. 𑀉𑀩𑁆𑀪𑀦𑀸. 𑀉𑀫𑁆𑀪𑀦𑀸. 𑀑𑀪𑁄. 𑀓𑁂𑀝𑀼𑀪𑀁. 𑀉𑀩𑁆𑀪𑀁. 𑀓𑀼𑀫𑁆𑀪𑁄. 𑀓𑀼𑀫𑁆𑀪𑀻. 𑀓𑀸𑀭𑀺𑀢𑁂 ‘‘𑀑𑀪𑁂𑀢𑀺. 𑀉𑀩𑁆𑀪𑁂𑀢𑀺. 𑀉𑀫𑁆𑀪𑁂𑀢𑀻’’𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺.

𑀢𑀢𑁆𑀣 𑀓𑁂𑀝𑀼𑀪𑀦𑁆𑀢𑀺 𑀓𑁆𑀭𑀺𑀬𑀸𑀓𑀧𑁆𑀧𑀯𑀺𑀓𑀧𑁆𑀧𑁄 𑀓𑀯𑀻𑀦𑀁 𑀉𑀧𑀓𑀸𑀭𑀺𑀬𑀲𑀢𑁆𑀣𑀁. 𑀇𑀤𑀁 𑀧𑀦𑁂𑀢𑁆𑀣 𑀦𑀺𑀩𑁆𑀩𑀘𑀦𑀁 𑀓𑀺𑀝𑁂𑀢𑀺 𑀕𑀫𑁂𑀢𑀺 𑀓𑁆𑀭𑀺𑀬𑀸𑀤𑀺𑀯𑀺𑀪𑀸𑀕𑀁, 𑀢𑀁 𑀯𑀸 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀢𑁄 𑀓𑁂𑀝𑁂𑀦𑁆𑀢𑁄 𑀕𑀫𑁂𑀦𑁆𑀢𑁄 𑀑𑀪𑁂𑀢𑀺 𑀧𑀽𑀭𑁂𑀢𑀻𑀢𑀺 𑀓𑁂𑀝𑀼𑀢𑀁 𑀓𑀺𑀝𑀉𑀪𑀥𑀸𑀢𑀼𑀯𑀲𑁂𑀦. 𑀉𑀩𑁆𑀪𑀢𑀺 𑀉𑀩𑁆𑀪𑁂𑀢𑀺 ¶ 𑀧𑀽𑀭𑁂𑀢𑀻𑀢𑀺 𑀉𑀩𑁆𑀪𑀁, 𑀧𑀽𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀘𑀭𑀺𑀬𑀸𑀧𑀺𑀝𑀓𑁂𑀧𑀺 𑀳𑀺 𑀈𑀤𑀺𑀲𑀻 𑀲𑀤𑁆𑀤𑀕𑀢𑀺 𑀤𑀺𑀲𑁆𑀲𑀢𑀺, 𑀢𑀁 𑀬𑀣𑀸? ‘‘𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺, 𑀅𑀘𑁆𑀘𑀼𑀩𑁆𑀪𑀁 𑀲𑀸𑀕𑀭𑀽𑀧𑀫’’𑀦𑁆𑀢𑀺. 𑀢𑀢𑁆𑀣 𑀘 𑀅𑀘𑁆𑀘𑀼𑀩𑁆𑀪𑀦𑁆𑀢𑀺 𑀅𑀢𑀺𑀯𑀺𑀬 𑀬𑀸𑀘𑀓𑀸𑀦𑀁 𑀅𑀚𑁆𑀛𑀸𑀲𑀬𑀁 𑀧𑀽𑀭𑀡𑀁. 𑀅𑀓𑁆𑀔𑀼𑀫𑁆𑀪𑀦𑁆𑀢𑀺𑀧𑀺 𑀧𑀸𑀞𑁄. 𑀓𑀼𑀫𑁆𑀪𑁄𑀢𑀺 𑀓𑀁 𑀯𑀼𑀘𑁆𑀘𑀢𑀺 𑀉𑀤𑀓𑀁, 𑀢𑁂𑀦 𑀉𑀩𑁆𑀪𑁂𑀢𑀩𑁆𑀩𑁄𑀢𑀺 𑀓𑀼𑀫𑁆𑀪𑁄, 𑀲𑁄 𑀏𑀯 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀓𑀼𑀫𑁆𑀪𑀻. 𑀏𑀢𑁆𑀣 𑀘 ‘‘𑀓𑀼𑀫𑁆𑀪𑀻 𑀥𑁄𑀯𑀢𑀺 𑀑𑀦𑀢𑁄’’𑀢𑀺 𑀧𑀬𑁄𑀕𑁄.

𑀓𑀼𑀫𑁆𑀪𑀲𑀤𑁆𑀤𑁄 𑀖𑀝𑁂 𑀳𑀢𑁆𑀣𑀺-𑀲𑀺𑀭𑁄𑀧𑀺𑀡𑁆𑀟𑁂 𑀤𑀲𑀫𑁆𑀩𑀡𑁂;

𑀧𑀯𑀢𑁆𑀢𑀢𑀻𑀢𑀺 𑀯𑀺𑀜𑁆𑀜𑁂𑀬𑁆𑀬𑁄, 𑀯𑀺𑀜𑁆𑀜𑀼𑀦𑀸 𑀦𑀬𑀤𑀲𑁆𑀲𑀺𑀦𑀸.

𑀪𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀫𑀓𑀸𑀭𑀦𑁆𑀢𑀥𑀸𑀢𑀼

𑀫𑀸 𑀫𑀸𑀦𑁂 𑀲𑀤𑁆𑀤𑁂 𑀘. 𑀫𑀸𑀢𑀺. 𑀫𑀸𑀢𑀸. 𑀏𑀢𑁆𑀣 𑀫𑀸𑀢𑀸𑀢𑀺 𑀚𑀦𑀺𑀓𑀸 𑀯𑀸 𑀘𑀽𑀴𑀫𑀸𑀢𑀸 𑀯𑀸 𑀫𑀳𑀸𑀫𑀸𑀢𑀸 𑀯𑀸.

𑀫𑀽 𑀩𑀦𑁆𑀥𑀦𑁂. 𑀫𑀯𑀢𑀺. 𑀓𑀺𑀬𑀸𑀤𑀺𑀕𑀡𑀲𑁆𑀲 𑀧𑀦𑀲𑁆𑀲 ‘‘𑀫𑀼𑀦𑀸𑀢𑀻’’𑀢𑀺 𑀭𑀽𑀧𑀁.

𑀫𑁂 𑀧𑀝𑀺𑀤𑀸𑀦𑀆𑀤𑀸𑀦𑁂𑀲𑀼. 𑀫𑁂𑀢𑀺, 𑀫𑀬𑀢𑀺. 𑀫𑁂𑀥𑀸.

𑀏𑀢𑁆𑀣 𑀫𑁂𑀥𑀸𑀢𑀺 𑀧𑀜𑁆𑀜𑀸. 𑀲𑀸 𑀳𑀺 𑀲𑀼𑀔𑀼𑀫𑀫𑁆𑀧𑀺 𑀅𑀢𑁆𑀣𑀁 𑀥𑀫𑁆𑀫𑀜𑁆𑀘 𑀔𑀺𑀧𑁆𑀧𑀫𑁂𑀯 𑀫𑁂𑀢𑀺 𑀘 𑀥𑀸𑀭𑁂𑀢𑀺 𑀘𑀸𑀢𑀺 𑀫𑁂𑀥𑀸𑀢𑀺 𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀧𑀦 𑀫𑁂𑀢𑀻𑀢𑀺 𑀕𑀡𑁆𑀳𑀸𑀢𑀺. 𑀢𑀣𑀸 𑀳𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀯𑀼𑀢𑁆𑀢𑀁 ‘‘𑀅𑀲𑀦𑀺 𑀯𑀺𑀬 𑀲𑀺𑀮𑀼𑀘𑁆𑀘𑀬𑁂 𑀓𑀺𑀮𑁂𑀲𑁂 𑀫𑁂𑀥𑀢𑀺 𑀳𑀺𑀁𑀲𑀢𑀻𑀢𑀺 𑀫𑁂𑀥𑀸, 𑀔𑀺𑀧𑁆𑀧𑀁 𑀕𑀳𑀡𑀥𑀸𑀭𑀡𑀝𑁆𑀞𑁂𑀦 𑀯𑀸 𑀫𑁂𑀥𑀸’’𑀢𑀺. 𑀲𑀗𑁆𑀕𑀫𑀢𑁆𑀣𑀯𑀸𑀘𑀓𑀲𑁆𑀲 𑀧𑀦 𑀫𑁂𑀥𑀥𑀸𑀢𑀼𑀲𑁆𑀲 𑀯𑀲𑁂𑀦 𑀫𑁂𑀥𑀢𑀺 𑀲𑀻𑀮𑀲𑀫𑀸𑀥𑀺𑀆𑀤𑀻𑀳𑀺 𑀲𑀤𑁆𑀥𑀫𑁆𑀫𑁂𑀳𑀺 𑀲𑀺𑀭𑀺𑀬𑀸 𑀘 𑀲𑀗𑁆𑀕𑀘𑁆𑀙𑀢𑀻𑀢𑀺 𑀫𑁂𑀥𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀏𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀤𑁆𑀯𑀺𑀥𑀸𑀢𑀼𑀬𑁂𑀓𑀥𑀸𑀢𑀼𑀬𑀸 ¶ , 𑀤𑁆𑀯𑀺𑀭𑀢𑁆𑀣𑀯𑀢𑀺𑀬𑀸𑀧𑀺 𑀘;

𑀫𑁂𑀥𑀸𑀲𑀤𑁆𑀤𑀲𑁆𑀲 𑀦𑀺𑀧𑁆𑀨𑀢𑁆𑀢𑀺𑀁, 𑀚𑀜𑁆𑀜𑀸 𑀲𑀼𑀕𑀢𑀲𑀸𑀲𑀦𑁂’’𑀢𑀺.

𑀑𑀫𑀸 𑀲𑀸𑀫𑀢𑁆𑀣𑀺𑀬𑁂. 𑀲𑀸𑀫𑀢𑁆𑀣𑀺𑀬𑀁 𑀲𑀫𑀢𑁆𑀣𑀪𑀸𑀯𑁄. 𑀅𑀮𑀼𑀢𑁆𑀢𑀦𑁆𑀢𑁄𑀬𑀁 𑀥𑀸𑀢𑀼, 𑀑𑀫𑀸𑀢𑀺, 𑀑𑀫𑀦𑁆𑀢𑀺.

𑀅𑀢𑁆𑀭𑀸𑀬𑀁 𑀧𑀸𑀴𑀺 ‘‘𑀑𑀫𑀸𑀢𑀺 𑀪𑀦𑁆𑀢𑁂 𑀪𑀕𑀯𑀸 𑀇𑀤𑁆𑀥𑀺𑀬𑀸 𑀫𑀦𑁄𑀫𑀬𑁂𑀦 𑀓𑀸𑀬𑁂𑀦 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀲𑀗𑁆𑀓𑀫𑀺𑀢𑀼’’𑀦𑁆𑀢𑀺. 𑀢𑀢𑁆𑀣 𑀑𑀫𑀸𑀢𑀻𑀢𑀺 𑀧𑀳𑁄𑀢𑀺 𑀲𑀓𑁆𑀓𑁄𑀢𑀺.

𑀢𑀺𑀫𑀼 𑀅𑀤𑁆𑀤𑀪𑀸𑀯𑁂. 𑀅𑀤𑁆𑀤𑀪𑀸𑀯𑁄 𑀢𑀺𑀦𑁆𑀢𑀪𑀸𑀯𑁄. 𑀢𑁂𑀫𑀢𑀺. 𑀢𑀺𑀦𑁆𑀢𑁄, 𑀢𑁂𑀫𑀺𑀬𑁄. 𑀢𑁂𑀫𑀺𑀢𑀼𑀓𑀸𑀫𑀸 𑀢𑁂𑀫𑀺𑀁𑀲𑀼.

𑀏𑀢𑁆𑀣 𑀢𑁂𑀫𑀺𑀬𑁄𑀢𑀺 𑀏𑀯𑀁𑀦𑀸𑀫𑀓𑁄 𑀓𑀸𑀲𑀺𑀭𑀜𑁆𑀜𑁄 𑀧𑀼𑀢𑁆𑀢𑁄 𑀩𑁄𑀥𑀺𑀲𑀢𑁆𑀢𑁄. 𑀲𑁄 𑀳𑀺 𑀭𑀜𑁆𑀜𑁄 𑀘𑁂𑀯 𑀫𑀳𑀸𑀚𑀦𑀲𑁆𑀲 𑀘 𑀳𑀤𑀬𑀁 𑀢𑁂𑀫𑁂𑀦𑁆𑀢𑁄 𑀅𑀤𑁆𑀤𑀪𑀸𑀯𑀁 𑀧𑀸𑀧𑁂𑀦𑁆𑀢𑁄 𑀲𑀻𑀢𑀮𑀪𑀸𑀯𑀁 𑀚𑀦𑁂𑀦𑁆𑀢𑁄 𑀚𑀸𑀢𑁄𑀢𑀺 ‘‘𑀢𑁂𑀫𑀺𑀬𑁄’’𑀢𑀺 𑀯𑀼𑀘𑁆𑀘𑀢𑀺.

𑀦𑀺𑀢𑀫𑀺 𑀓𑀺𑀮𑀫𑀦𑁂. 𑀦𑀺𑀢𑀫𑁆𑀫𑀢𑀺. 𑀳𑀤𑀬𑀁 𑀤𑀬𑁆𑀳𑀢𑁂 𑀦𑀺𑀢𑀫𑁆𑀫𑀸𑀫𑀺.

𑀘𑀫𑀼 𑀙𑀫𑀼 𑀚𑀧𑀼 𑀛𑀫𑀼 𑀉𑀫𑀼 𑀚𑀺𑀫𑀼 𑀅𑀤𑀦𑁂. 𑀘𑀫𑀢𑀺. 𑀘𑀫𑀽. 𑀘𑀫𑀽𑀢𑀺 𑀲𑁂𑀦𑀸. 𑀙𑀫𑀢𑀺. 𑀚𑀫𑀢𑀺. 𑀛𑀫𑀢𑀺. 𑀉𑀫𑀢𑀺. 𑀚𑁂𑀫𑀢𑀺.

𑀓𑀫𑀼 𑀧𑀤𑀯𑀺𑀓𑁆𑀔𑁂𑀧𑁂. 𑀧𑀤𑀯𑀺𑀓𑁆𑀔𑁂𑀧𑁄 𑀧𑀤𑀲𑀸 𑀕𑀫𑀦𑀁. 𑀇𑀤𑀁 𑀧𑀦 𑀯𑁄𑀳𑀸𑀭𑀲𑀻𑀲𑀫𑀢𑁆𑀢𑀁 𑀯𑀘𑀦𑀁, 𑀢𑀲𑁆𑀫𑀸 ‘‘𑀦𑀸𑀲𑁆𑀲 𑀓𑀸𑀬𑁂 𑀅𑀕𑁆𑀕𑀺 𑀯𑀸 𑀯𑀺𑀲𑀁 𑀯𑀸 𑀲𑀢𑁆𑀣𑀁 𑀯𑀸 𑀓𑀫𑀢𑀻’’𑀢𑀺𑀆𑀤𑀻𑀲𑀼 𑀅𑀧𑀤𑀯𑀺𑀓𑁆𑀔𑁂𑀧𑀢𑁆𑀣𑁄𑀧𑀺 𑀕𑀳𑁂𑀢𑀩𑁆𑀩𑁄. 𑀓𑀫𑀢𑀺. 𑀘𑀗𑁆𑀓𑀫𑀢𑀺, 𑀅𑀢𑀺𑀓𑁆𑀓𑀫𑀢𑀺. 𑀅𑀪𑀺𑀓𑁆𑀓𑀫𑀢𑀺. 𑀧𑀝𑀺𑀓𑁆𑀓𑀫𑀢𑀺. 𑀧𑀓𑁆𑀓𑀫𑀢𑀺. 𑀧𑀭𑀓𑁆𑀓𑀫𑀢𑀺. 𑀯𑀺𑀓𑁆𑀓𑀫𑀢𑀺. 𑀦𑀺𑀓𑁆𑀓𑀫𑀢𑀺. 𑀲𑀗𑁆𑀓𑀫𑀢𑀺. 𑀲𑀗𑁆𑀓𑀫𑀦𑀁. 𑀲𑀗𑁆𑀓𑀦𑁆𑀢𑀺. 𑀓𑀫𑀦𑀁. 𑀘𑀗𑁆𑀓𑀫𑀦𑀁. 𑀅𑀢𑀺𑀓𑁆𑀓𑀫𑁄. 𑀅𑀪𑀺𑀓𑁆𑀓𑀫𑁄. 𑀧𑀝𑀺𑀓𑁆𑀓𑀫𑁄. 𑀧𑀓𑁆𑀓𑀫𑁄. 𑀯𑀺𑀓𑁆𑀓𑀫𑁄. 𑀦𑀺𑀓𑁆𑀓𑀫𑁄. 𑀅𑀢𑀺𑀓𑁆𑀓𑀦𑁆𑀢𑁄 𑀧𑀼𑀭𑀺𑀲𑁄. 𑀅𑀪𑀺𑀓𑁆𑀓𑀦𑁆𑀢𑀸 𑀭𑀢𑁆𑀢𑀺. 𑀦𑀺𑀓𑁆𑀔𑀫𑀢𑀺. 𑀅𑀪𑀺𑀦𑀺𑀓𑁆𑀔𑀫𑀢𑀺. 𑀓𑀸𑀭𑀺𑀢𑁂 ¶ 𑀦𑀺𑀓𑁆𑀔𑀸𑀫𑁂𑀢𑀺. 𑀅𑀜𑁆𑀜𑀸𑀦𑀺𑀧𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀬𑀲𑁆𑀫𑀸 𑀧𑀦𑀸𑀬𑀁 𑀥𑀸𑀢𑀼 𑀘𑀼𑀭𑀸𑀤𑀺𑀕𑀡𑀁 𑀧𑀢𑁆𑀯𑀸 𑀇𑀘𑁆𑀙𑀸𑀓𑀦𑁆𑀢𑀺 𑀬𑀢𑁆𑀣𑁂𑀲𑀼 𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀢𑁂𑀧𑀺 𑀅𑀢𑁆𑀣𑁂 𑀉𑀧𑀲𑀕𑁆𑀕𑀯𑀺𑀲𑁂𑀲𑀺𑀢𑁂 𑀓𑀢𑁆𑀯𑀸 𑀇𑀥 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑀁 𑀯𑀢𑁆𑀢𑀩𑁆𑀩𑀫𑁆𑀧𑀺 𑀅𑀯𑀢𑁆𑀯𑀸 𑀉𑀧𑀭𑀺 𑀘𑀼𑀭𑀸𑀤𑀺𑀕𑀡𑁂𑀬𑁂𑀯 𑀓𑀣𑁂𑀲𑁆𑀲𑀸𑀫.

𑀬𑀫𑀼 𑀉𑀧𑀭𑀫𑁂. 𑀉𑀧𑀭𑀫𑁄 𑀯𑀺𑀭𑀫𑀦𑀁. 𑀬𑀫𑀪𑀺. 𑀬𑀫𑁄. ‘‘𑀧𑀭𑁂 𑀘 𑀦 𑀯𑀺𑀚𑀸𑀦𑀦𑁆𑀢𑀺, 𑀫𑀬𑀫𑁂𑀢𑁆𑀣 𑀬𑀫𑀸𑀫𑀲𑁂’’𑀢𑀺 𑀇𑀤𑀫𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀢𑀢𑁆𑀣 𑀬𑀫𑀸𑀫𑀲𑁂𑀢𑀺 𑀉𑀧𑀭𑀫𑀸𑀫, 𑀦𑀲𑁆𑀲𑀸𑀫, 𑀫𑀭𑀸𑀫𑀸𑀢𑀺 𑀅𑀢𑁆𑀣𑁄.

𑀦𑀫 𑀩𑀳𑀼𑀢𑁆𑀢𑁂 𑀲𑀤𑁆𑀤𑁂. 𑀩𑀳𑀼𑀢𑁆𑀢𑁄 𑀲𑀤𑁆𑀤𑁄 𑀦𑀸𑀫 𑀉𑀕𑁆𑀕𑀢𑀲𑀤𑁆𑀤𑁄. 𑀦𑀫𑀢𑀺.

𑀅𑀫 𑀤𑀫 𑀳𑀫𑁆𑀫 𑀫𑀺𑀫 𑀙𑀫 𑀕𑀢𑀺𑀫𑁆𑀳𑀺. 𑀅𑀫𑀢𑀺. 𑀤𑀫𑀢𑀺. 𑀳𑀫𑁆𑀫𑀢𑀺. 𑀫𑀺𑀫𑀢𑀺. 𑀙𑀫𑀢𑀺. 𑀙𑀫𑀸.

𑀙𑀫𑀸𑀢𑀺 𑀧𑀣𑀯𑀻. 𑀙𑀫𑀸𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 𑀤𑀝𑁆𑀞𑀩𑁆𑀩𑁄, ‘‘𑀦 𑀙𑀫𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀆𑀲𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀅𑀕𑀺𑀮𑀸𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀸 𑀓𑀭𑀡𑀻𑀬𑀸’’𑀢𑀺 𑀘 ‘‘𑀙𑀫𑀸𑀬𑀁 𑀧𑀭𑀺𑀯𑀢𑁆𑀢𑀸𑀫𑀺 𑀯𑀸𑀭𑀺𑀘𑀭𑁄𑀯 𑀖𑀫𑁆𑀫𑁂’’𑀢𑀺 𑀘 𑀧𑀬𑁄𑀕𑀤𑀲𑁆𑀲𑀦𑀢𑁄. 𑀲𑁄 𑀘 𑀔𑁄 𑀲𑀢𑁆𑀢𑀳𑀺 𑀅𑀝𑁆𑀞𑀳𑀺 𑀯𑀸 𑀯𑀺𑀪𑀢𑁆𑀢𑀻𑀳𑀺 𑀤𑁆𑀯𑀻𑀲𑀼 𑀘 𑀯𑀘𑀦𑁂𑀲𑀼 𑀬𑁄𑀚𑁂𑀢𑀩𑁆𑀩𑁄. 𑀙𑀫𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀏𑀢𑁆𑀣𑀸𑀢𑀺 𑀙𑀫𑀸.

𑀥𑀫 𑀲𑀤𑁆𑀤𑀕𑁆𑀕𑀺𑀲𑀁 𑀬𑁄𑀕𑁂𑀲𑀼. 𑀥𑀫𑀥𑀸𑀢𑀼 𑀲𑀤𑁆𑀤𑁂 𑀘 𑀫𑀼𑀔𑀯𑀸𑀢𑁂𑀦 𑀲𑀤𑁆𑀥𑀺𑀁 𑀅𑀕𑁆𑀕𑀺𑀲𑀁𑀬𑁄𑀕𑁂 𑀘 𑀯𑀢𑁆𑀢𑀢𑀺. 𑀢𑀢𑁆𑀣 𑀧𑀞𑀫𑀢𑁆𑀣𑁂 ‘‘𑀲𑀗𑁆𑀔𑀁 𑀥𑀫𑀢𑀺. 𑀲𑀗𑁆𑀔𑀥𑀫𑀓𑁄. 𑀪𑁂𑀭𑀺𑀁 𑀥𑀫𑀢𑀺. 𑀪𑁂𑀭𑀺𑀥𑀫𑀓𑁄. 𑀥𑀫𑁂 𑀥𑀫𑁂 𑀦𑀸𑀢𑀺𑀥𑀫𑁂’’𑀢𑀺 𑀧𑀬𑁄𑀕𑁄. 𑀤𑀼𑀢𑀺𑀬𑀢𑁆𑀣𑁂 ‘‘𑀅𑀕𑁆𑀕𑀺𑀁 𑀥𑀫𑀢𑀺. 𑀲𑀫𑀼𑀝𑁆𑀞𑀸𑀧𑁂𑀢𑀺 𑀅𑀢𑁆𑀢𑀸𑀦𑀁, 𑀅𑀡𑀼𑀁 𑀅𑀕𑁆𑀕𑀺𑀁𑀯 𑀲𑀦𑁆𑀥𑀫’’𑀦𑁆𑀢𑀺 𑀧𑀬𑁄𑀕𑁄.

𑀪𑀸𑀫 𑀓𑁄𑀥𑁂. 𑀪𑀸𑀫𑀢𑀺.

𑀦𑀫𑀼 ¶ 𑀦𑀫𑀦𑁂. 𑀦𑀫𑀢𑀺. 𑀦𑀫𑁄. 𑀦𑀢𑀁, 𑀦𑀫𑀦𑀁. 𑀦𑀢𑀺. 𑀦𑀫𑀁. 𑀦𑀫𑀫𑀸𑀦𑁄. 𑀦𑀫𑀦𑁆𑀢𑁄. 𑀦𑀫𑀺𑀢𑁄. 𑀦𑀸𑀫𑀁. 𑀦𑀸𑀫𑀺𑀢𑀁. 𑀦𑀫𑀺𑀢𑀼𑀁. 𑀦𑀢𑁆𑀯𑀸, 𑀦𑀢𑁆𑀯𑀸𑀦. 𑀦𑀫𑀺𑀢𑁆𑀯𑀸, 𑀦𑀫𑀺𑀢𑁆𑀯𑀸𑀦, 𑀦𑀫𑀺𑀢𑀼𑀦. 𑀓𑀸𑀭𑀺𑀢𑁂 ‘‘𑀦𑀸𑀫𑁂𑀢𑀺, 𑀦𑀸𑀫𑀬𑀢𑀺. 𑀦𑀸𑀫𑁂𑀢𑁆𑀯𑀸. 𑀦𑀸𑀫𑀬𑀺𑀢𑁆𑀯𑀸’’𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀢𑀢𑁆𑀭 𑀳𑀺 ‘‘𑀦𑀫𑀢𑀺 𑀦𑀫𑀺𑀢𑁆𑀯𑀸’’𑀢𑀺 𑀏𑀯𑀁𑀧𑀓𑀸𑀭𑀸𑀦𑀺 𑀧𑀤𑀸𑀦𑀺 𑀦𑀫𑀦𑀢𑁆𑀣𑁂 𑀯𑀦𑁆𑀤𑀦𑀸𑀬𑀜𑁆𑀘 𑀤𑀝𑁆𑀞𑀩𑁆𑀩𑀸𑀦𑀺, ‘‘𑀦𑀫𑁄 𑀦𑀢𑁆𑀯𑀸’’𑀢𑀺 𑀏𑀯𑀁𑀧𑀓𑀸𑀭𑀸𑀦𑀺 𑀧𑀦 𑀯𑀦𑁆𑀤𑀦𑀸𑀬𑀫𑁂𑀯. 𑀅𑀢𑁆𑀭𑀸𑀬𑀫𑀼𑀧𑀮𑀓𑁆𑀔𑀡𑀫𑀢𑁆𑀢𑀸 𑀧𑀬𑁄𑀕𑀭𑀘𑀦𑀸 𑁋

𑀭𑀼𑀓𑁆𑀔𑁄 𑀨𑀮𑀻 𑀨𑀮𑀪𑀸𑀭𑀕𑀭𑀼𑀢𑀸𑀬 𑀦𑀫𑀺𑀢𑁆𑀯𑀸𑀦 𑀪𑀺𑀚𑁆𑀚𑀢𑀺;

𑀯𑀼𑀤𑁆𑀥𑁄 𑀚𑀭𑀸𑀚𑀚𑁆𑀚𑀭𑀢𑀸𑀬 𑀦𑀫𑀢𑀺 𑀦𑀫𑀺𑀢𑁆𑀯𑀸 𑀕𑀘𑁆𑀙𑀢𑀺;

𑀲𑀤𑁆𑀥𑁄 𑀩𑀼𑀤𑁆𑀥𑀁 𑀦𑀫𑀢𑀺 𑀦𑀫𑀺𑀢𑁆𑀯𑀸 𑀕𑀘𑁆𑀙𑀢𑀺;

𑀦𑀫𑁄 𑀩𑀼𑀤𑁆𑀥𑀲𑁆𑀲 𑀲𑀢𑁆𑀣𑀸𑀭𑀁 𑀦𑀢𑁆𑀯𑀸𑀦 𑀅𑀕𑀫𑀸𑀲𑀻𑀢𑀺;

𑀏𑀢𑁆𑀣 𑀦𑀫𑁄𑀢𑀺 𑀧𑀤𑀁 𑀦𑀺𑀧𑀸𑀢𑁂𑀲𑀼𑀧𑀺 𑀮𑀩𑁆𑀪𑀢𑀺. 𑀢𑁂𑀦 𑀳𑀺 𑀧𑀘𑁆𑀘𑀢𑁆𑀢𑁄𑀧𑀬𑁄𑀕𑀯𑀘𑀦𑀸𑀦𑀺 𑀅𑀪𑀺𑀦𑁆𑀦𑀭𑀽𑀧𑀸𑀦𑀺 𑀤𑀺𑀲𑁆𑀲𑀦𑁆𑀢𑀺 ‘‘𑀤𑁂𑀯𑀭𑀸𑀚 𑀦𑀫𑁄 𑀢𑁆𑀬𑀢𑁆𑀣𑀼. 𑀦𑀫𑁄 𑀓𑀢𑁆𑀯𑀸 𑀫𑀳𑁂𑀲𑀺𑀦𑁄’’𑀢𑀺. 𑀉𑀧𑀲𑀕𑁆𑀕𑁂𑀳𑀺𑀧𑀺 𑀅𑀬𑀁 𑀬𑁄𑀚𑁂𑀢𑀩𑁆𑀩𑀸 ‘‘𑀧𑀡𑀫𑀢𑀺, 𑀧𑀡𑀸𑀫𑁄, 𑀉𑀡𑁆𑀡𑀫𑀢𑀺, 𑀉𑀡𑁆𑀡𑀢𑀺’’ 𑀇𑀘𑁆𑀘𑀸𑀤𑀺𑀦𑀸.

𑀔𑀫𑀼 𑀲𑀳𑀦𑁂. 𑀔𑀫𑀢𑀺. 𑀔𑀦𑁆𑀢𑀺. 𑀔𑀫𑁄, 𑀔𑀫𑀦𑀁, 𑀏𑀯𑀁 𑀪𑀸𑀯𑁂. 𑀓𑀢𑁆𑀢𑀭𑀺 𑀧𑀦 ‘‘𑀔𑀦𑁆𑀢𑀸. 𑀔𑀫𑀺𑀢𑀸. 𑀔𑀫𑁄 𑀳𑁄𑀢𑀺 𑀲𑀻𑀢𑀲𑁆𑀲𑀧𑀺 𑀉𑀡𑁆𑀳𑀲𑁆𑀲𑀧𑀻’’𑀢𑀺 𑀧𑀬𑁄𑀕𑀸.

𑀲𑀫 𑀅𑀤𑀲𑁆𑀲𑀦𑁂. 𑀲𑀫𑀢𑀺, 𑀯𑀽𑀧𑀲𑀫𑀢𑀺 𑀅𑀕𑁆𑀕𑀺.

𑀬𑀫 𑀧𑀭𑀺𑀯𑁂𑀲𑀦𑁂. 𑀬𑀫𑀢𑀺. 𑀬𑀫𑁄. 𑀬𑀫𑀭𑀸𑀚𑀸.

𑀲𑀫 𑀲𑀤𑁆𑀤𑁂. 𑀲𑀫𑀢𑀺.

𑀲𑀫 𑀣𑀫 𑀯𑁂𑀮𑀫𑁆𑀩𑁂. 𑀲𑀫𑀢𑀺. 𑀣𑀫𑀢𑀺.

𑀯𑀸𑀬𑀫 𑀈𑀳𑀸𑀬𑀁. 𑀯𑀸𑀬𑀫𑀢𑀺. 𑀯𑀸𑀬𑀸𑀫𑁄.

𑀕𑀫𑀼 ¶ 𑀕𑀢𑀺𑀬𑀁. 𑀕𑀘𑁆𑀙𑀢𑀺. 𑀕𑀫𑀓𑁄. 𑀕𑀢𑁄. 𑀕𑀢𑀺. 𑀕𑀫𑀦𑀁. 𑀓𑀸𑀭𑀺𑀢𑁂 ‘‘𑀕𑀫𑁂𑀢𑀺, 𑀕𑀫𑀬𑀢𑀺, 𑀕𑀘𑁆𑀙𑀸𑀧𑁂𑀢𑀻’’𑀢𑀺𑀆𑀤𑀻𑀦𑀺 𑀪𑀯𑀦𑁆𑀢𑀺.

𑀭𑀫𑀼 𑀓𑀻𑀴𑀸𑀬𑀁. 𑀭𑀫𑀢𑀺. 𑀯𑀺𑀭𑀫𑀢𑀺. 𑀧𑀝𑀺𑀯𑀺𑀭𑀫𑀢𑀺. 𑀉𑀧𑀭𑀫𑀢𑀺. 𑀆𑀭𑀢𑀺. 𑀯𑀺𑀭𑀢𑀺. 𑀧𑀝𑀺𑀯𑀺𑀭𑀢𑀺. 𑀉𑀧𑀭𑀢𑀺. 𑀯𑁂𑀭𑀫𑀡𑀺. 𑀯𑀺𑀭𑀫𑀡𑀁. 𑀭𑀢𑀺. 𑀭𑀫𑀡𑀁. 𑀭𑀢𑁄. 𑀆𑀭𑀢𑁄 𑀯𑀺𑀭𑀢𑁄 𑀧𑀝𑀺𑀯𑀺𑀭𑀢𑁄. 𑀉𑀧𑀭𑀢𑁄, 𑀉𑀧𑀭𑀫𑁄. 𑀆𑀭𑀸𑀫𑁄.

𑀯𑀫𑀼 𑀉𑀕𑁆𑀕𑀺𑀭𑀡𑁂. 𑀯𑀫𑀢𑀺. 𑀯𑀫𑀣𑀼. 𑀯𑀫𑁆𑀫𑀺𑀓𑁄.

𑀥𑀻𑀭𑀢𑁆𑀣𑀼 𑀢𑀁 𑀯𑀺𑀲𑀁 𑀯𑀦𑁆𑀢𑀁, 𑀬𑀫𑀳𑀁 𑀚𑀻𑀯𑀺𑀢𑀓𑀸𑀭𑀡𑀸;

𑀯𑀦𑁆𑀢𑀁 𑀧𑀘𑁆𑀘𑀸𑀯𑀫𑀺𑀲𑁆𑀲𑀸𑀫𑀺, 𑀫𑀢𑀁 𑀫𑁂 𑀚𑀻𑀯𑀺𑀢𑀸 𑀯𑀭𑀁.

𑀢𑀢𑁆𑀣 𑀯𑀫𑁆𑀫𑀺𑀓𑁄𑀢𑀺 𑀯𑀫𑀢𑀻𑀢𑀺, 𑀯𑀦𑁆𑀢𑀓𑁄𑀢𑀺, 𑀯𑀦𑁆𑀢𑀼𑀲𑁆𑀲𑀬𑁄𑀢𑀺, 𑀯𑀦𑁆𑀢𑀲𑀺𑀦𑁂𑀳𑀲𑀫𑁆𑀩𑀦𑁆𑀥𑁄𑀢𑀺 𑀯𑀫𑁆𑀫𑀺𑀓𑁄. 𑀲𑁄 𑀳𑀺 𑀅𑀳𑀺𑀦𑀓𑀼𑀮𑀉𑀦𑁆𑀤𑀽𑀭𑀖𑀭𑀕𑁄𑀴𑀺𑀓𑀸𑀤𑀬𑁄 𑀦𑀸𑀦𑀧𑁆𑀧𑀓𑀸𑀭𑁂 𑀧𑀸𑀡𑀓𑁂 𑀯𑀫𑀢𑀻𑀢𑀺 𑀯𑀫𑁆𑀫𑀺𑀓𑁄. 𑀉𑀧𑀘𑀺𑀓𑀸𑀳𑀺 𑀯𑀦𑁆𑀢𑀓𑁄𑀢𑀺 𑀯𑀫𑁆𑀫𑀺𑀓𑁄. 𑀉𑀧𑀘𑀺𑀓𑀸𑀳𑀺 𑀯𑀫𑀺𑀢𑁆𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀉𑀓𑁆𑀔𑀺𑀢𑁆𑀢𑀧𑀁𑀲𑀼𑀘𑀼𑀡𑁆𑀡𑁂𑀦 𑀓𑀝𑀺𑀧𑁆𑀧𑀫𑀸𑀡𑁂𑀦𑀧𑀺 𑀧𑁄𑀭𑀺𑀲𑀧𑁆𑀧𑀫𑀸𑀡𑁂𑀦𑀧𑀺 𑀉𑀲𑁆𑀲𑀺𑀢𑁄𑀢𑀺 𑀯𑀫𑁆𑀫𑀺𑀓𑁄. 𑀉𑀧𑀘𑀺𑀓𑀸𑀳𑀺 𑀯𑀦𑁆𑀢𑀔𑁂𑀴𑀲𑀺𑀦𑁂𑀳𑁂𑀦 𑀆𑀩𑀤𑁆𑀥𑀢𑀸𑀬 𑀲𑀢𑁆𑀢𑀲𑀢𑁆𑀢𑀸𑀳𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂𑀧𑀺 𑀦 𑀯𑀺𑀧𑁆𑀧𑀓𑀺𑀭𑀬𑀢𑀺, 𑀦𑀺𑀤𑀸𑀖𑁂𑀧𑀺 𑀢𑀢𑁄 𑀧𑀁𑀲𑀼𑀫𑀼𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀢𑀲𑁆𑀫𑀺𑀁 𑀫𑀼𑀝𑁆𑀞𑀺𑀦𑀸 𑀧𑀻𑀴𑀺𑀬𑀫𑀸𑀦𑁂 𑀲𑀺𑀦𑁂𑀳𑁄𑀯 𑀦𑀺𑀓𑁆𑀔𑀫𑀢𑀺, 𑀏𑀯𑀁 𑀯𑀦𑁆𑀢𑀲𑀺𑀦𑁂𑀳𑀲𑀫𑁆𑀩𑀦𑁆𑀥𑁄𑀢𑀺 𑀯𑀫𑁆𑀫𑀺𑀓𑁄.

𑀏𑀢𑁆𑀣 𑀧𑀦 ‘‘𑀪𑀕𑀯𑀸, 𑀳𑀺𑀫𑀯𑀸’’𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀦 𑀓𑁂𑀯𑀮𑀁 𑀯𑀦𑁆𑀢𑀼𑀧𑀘𑁆𑀘𑀬𑀯𑀲𑁂𑀦𑁂𑀯 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀸𑀦𑀺, 𑀅𑀣 𑀔𑁄 𑀯𑀫𑀼𑀥𑀸𑀢𑀼𑀯𑀲𑁂𑀦𑀧𑀺 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀸𑀦𑀺, 𑀢𑁂𑀦𑀸𑀳 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀓𑀸𑀭𑀓𑁄 ‘‘𑀬𑀲𑁆𑀫𑀸 𑀧𑀦 𑀢𑀻𑀲𑀼 𑀪𑀯𑁂𑀲𑀼 𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀕𑀫𑀦𑀫𑀦𑁂𑀦 𑀯𑀦𑁆𑀢𑀁, 𑀢𑀲𑁆𑀫𑀸 ‘‘𑀪𑀯𑁂𑀲𑀼 𑀯𑀦𑁆𑀢𑀕𑀫𑀦𑁄’𑀢𑀺 𑀯𑀢𑁆𑀢𑀩𑁆𑀩𑁂 𑀪𑀯𑀲𑀤𑁆𑀤𑀢𑁄 𑀪𑀓𑀸𑀭𑀁, 𑀕𑀫𑀦𑀲𑀤𑁆𑀤𑀢𑁄 𑀕𑀓𑀸𑀭𑀁, 𑀯𑀦𑁆𑀢𑀲𑀤𑁆𑀤𑀢𑁄 𑀯𑀓𑀸𑀭𑀜𑁆𑀘 𑀤𑀻𑀖𑀁 𑀓𑀢𑁆𑀯𑀸 𑀆𑀤𑀸𑀬 𑀪𑀕𑀯𑀸𑀢𑀺 𑀯𑀼𑀘𑁆𑀘𑀢𑀺, 𑀬𑀣𑀸 𑀮𑁄𑀓𑁂 ‘𑀫𑁂𑀳𑀦𑀲𑁆𑀲 ¶ 𑀔𑀲𑁆𑀲 𑀫𑀸𑀮𑀸’𑀢𑀺 𑀯𑀢𑁆𑀢𑀩𑁆𑀩𑁂 𑀫𑁂𑀔𑀮𑀸’’𑀢𑀺 𑀯𑀤𑀢𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀲𑀤𑁆𑀤𑀲𑀺𑀤𑁆𑀥𑀺 𑀤𑀲𑁆𑀲𑀺𑀢𑀸.

𑀏𑀢𑁆𑀣, 𑀲𑀺𑀬𑀸 ‘‘𑀯𑀺𑀲𑀫𑀫𑀺𑀤𑀁 𑀦𑀺𑀤𑀲𑁆𑀲𑀦𑀁, 𑀬𑁂𑀦 ‘𑀫𑁂𑀳𑀦𑀲𑁆𑀲 𑀔𑀲𑁆𑀲 𑀫𑀸𑀮𑀸’𑀢𑀺 𑀏𑀢𑁆𑀣 𑀫𑁂𑀓𑀸𑀭𑀔𑀓𑀸𑀭𑀮𑀸𑀓𑀸𑀭𑀸𑀦𑀁 𑀓𑀫𑀢𑁄 𑀕𑀳𑀡𑀁 𑀤𑀺𑀲𑁆𑀲𑀢𑀺, ‘‘𑀪𑀯𑁂𑀲𑀼 𑀯𑀦𑁆𑀢𑀕𑀫𑀦𑁄’𑀢𑀺 𑀏𑀢𑁆𑀣 𑀧𑀦 𑀪𑀓𑀸𑀭𑀯𑀓𑀸𑀭𑀕𑀓𑀸𑀭𑀸𑀦𑀁 𑀓𑀫𑀢𑁄 𑀕𑀳𑀡𑀁 𑀦 𑀤𑀺𑀲𑁆𑀲𑀢𑀻’’𑀢𑀺? 𑀲𑀘𑁆𑀘𑀁, 𑀇𑀥 𑀧𑀦 ‘‘𑀅𑀕𑁆𑀕𑀸𑀳𑀺𑀢𑁄, 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀕𑀼𑀡𑀲𑀤𑁆𑀤𑀲𑁆𑀲 𑀧𑀭𑀦𑀺𑀧𑀸𑀢𑀯𑀲𑁂𑀦 ‘‘𑀪𑀯𑁂𑀲𑀼 𑀕𑀫𑀦𑀯𑀦𑁆𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂𑀧𑀺 𑀏𑀯𑀫𑀯𑀢𑁆𑀯𑀸 𑀲𑀤𑁆𑀤𑀲𑀢𑁆𑀣𑁂 𑀬𑁂𑀪𑀼𑀬𑁆𑀬𑁂𑀦 𑀕𑀼𑀡𑀲𑀤𑁆𑀤𑀸𑀦𑀁 𑀧𑀼𑀩𑁆𑀩𑀦𑀺𑀧𑀸𑀢𑀪𑁆𑀯𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸 𑀲𑀤𑁆𑀤𑀲𑀢𑁆𑀣𑀯𑀺𑀤𑀽𑀦𑀁 𑀓𑁂𑀲𑀜𑁆𑀘 𑀯𑀺𑀜𑁆𑀜𑀽𑀦𑀁 𑀫𑀦𑀁 𑀢𑁄𑀲𑁂𑀢𑀼𑀁 ‘‘𑀪𑀕𑀯𑀸’’𑀢𑀺 𑀧𑀤𑁂 𑀅𑀓𑁆𑀔𑀭𑀓𑁆𑀓𑀫𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀅𑀢𑁆𑀣𑀫𑀢𑁆𑀢𑀦𑀺𑀤𑀲𑁆𑀲𑀦𑀯𑀲𑁂𑀦 ‘‘𑀆𑀳𑀺𑀢𑀕𑁆𑀕𑀺, 𑀲𑀫𑁆𑀧𑀦𑁆𑀦𑀯𑀺𑀚𑁆𑀚𑀸𑀘𑀭𑀡𑁄’’𑀢𑀺𑀆𑀤𑀻𑀦𑀺 𑀯𑀺𑀬 𑀧𑀼𑀩𑁆𑀩𑀦𑀺𑀧𑀸𑀢𑀯𑀲𑁂𑀦 ‘‘𑀪𑀯𑁂𑀲𑀼 𑀯𑀦𑁆𑀢𑀕𑀫𑀦𑁄’’𑀢𑀺 𑀯𑀼𑀢𑁆𑀢𑀁. 𑀈𑀤𑀺𑀲𑀲𑁆𑀫𑀺𑀜𑁆𑀳𑀺 𑀞𑀸𑀦𑁂 ‘‘𑀆𑀳𑀺𑀢𑀕𑁆𑀕𑀻’’𑀢𑀺 𑀯𑀸 ‘‘𑀅𑀕𑁆𑀕𑀸𑀳𑀺𑀢𑁄’’𑀢𑀺 𑀯𑀸 ‘‘𑀙𑀺𑀦𑁆𑀦𑀳𑀢𑁆𑀣𑁄’’𑀢𑀺 𑀯𑀸 ‘‘𑀳𑀢𑁆𑀣𑀘𑁆𑀙𑀺𑀦𑁆𑀦𑁄’’𑀢𑀺 𑀯𑀸 𑀧𑀤𑁂𑀲𑀼 𑀬𑀣𑀸 𑀢𑀣𑀸 𑀞𑀺𑀢𑁂𑀲𑀼𑀧𑀺 𑀅𑀢𑁆𑀣𑀲𑁆𑀲 𑀅𑀬𑀼𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑀸𑀦𑀢𑁆𑀣𑀢𑁆𑀢𑀸 𑀢𑁂𑀲𑀁 𑀲𑀤𑁆𑀤𑀸𑀦𑀁.

𑀯𑁂𑀤𑀚𑀸𑀢𑁄𑀢𑀺𑀆𑀤𑀻𑀲𑀼 𑀧𑀦 𑀞𑀸𑀦𑁂𑀲𑀼 𑀅𑀢𑁆𑀣𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 ‘‘𑀪𑀕𑀯𑀸’’𑀢𑀺 𑀧𑀤𑀲𑁆𑀲 𑀯𑀫𑀼𑀥𑀸𑀢𑀼𑀯𑀲𑁂𑀦𑀧𑀺 𑀦𑀺𑀧𑁆𑀨𑀢𑁆𑀢𑀺 𑀤𑀲𑁆𑀲𑀺𑀢𑀸, 𑀢𑀝𑁆𑀝𑀻𑀓𑀸𑀬𑀫𑁆𑀧𑀺 𑀘 𑀤𑀲𑁆𑀲𑀺𑀢𑀸 ‘‘𑀪𑀕𑁂 𑀯𑀫𑀻𑀢𑀺 𑀪𑀕𑀯𑀸. 𑀪𑀸𑀕𑁂 𑀯𑀫𑀻𑀢𑀺 𑀪𑀕𑀯𑀸’’𑀢𑀺. 𑀦𑀺𑀩𑁆𑀩𑀘𑀦𑀁 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀪𑀕𑀲𑀗𑁆𑀔𑀸𑀢𑀁 𑀲𑀺𑀭𑀺𑀁 𑀇𑀲𑁆𑀲𑀭𑀺𑀬𑀁 𑀬𑀲𑀜𑁆𑀘 𑀯𑀫𑀺 𑀉𑀕𑁆𑀕𑀺𑀭𑀺 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀅𑀦𑀧𑁂𑀓𑁆𑀔𑁄 𑀙𑀟𑁆𑀟𑀬𑀻𑀢𑀺 𑀪𑀕𑀯𑀸. 𑀅𑀣 𑀯𑀸 𑀪𑀸𑀦𑀺 𑀦𑀸𑀫 𑀦𑀓𑁆𑀔𑀢𑁆𑀢𑀸𑀦𑀺, 𑀢𑁂𑀳𑀺 𑀲𑀫𑀁 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀪𑀕𑀸, 𑀲𑀺𑀦𑁂𑀭𑀼𑀬𑀼𑀕𑀦𑁆𑀥𑀭𑀉𑀢𑁆𑀢𑀭𑀓𑀼𑀭𑀼𑀳𑀺𑀫𑀯𑀦𑁆𑀢𑀸𑀤𑀺𑀪𑀸𑀚𑀦𑀮𑁄𑀓𑀸, 𑀯𑀺𑀲𑁂𑀲𑀲𑀦𑁆𑀦𑀺𑀲𑁆𑀲𑀬𑀲𑁄𑀪𑀸𑀓𑀧𑁆𑀧𑀝𑁆𑀞𑀺𑀬𑀪𑀸𑀯𑀢𑁄. 𑀢𑁂𑀧𑀺 𑀪𑀕𑀯𑀸 𑀯𑀫𑀺 𑀢𑀦𑁆𑀦𑀺𑀯𑀸𑀲𑀺𑀲𑀢𑁆𑀢𑀸𑀯𑀸𑀲𑀲𑀫𑀢𑀺𑀓𑁆𑀓𑀫𑀦𑀢𑁄 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀧𑀚𑀳𑀻𑀢𑀺 𑀪𑀕𑀯𑀸.

𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀁 ¶ 𑀬𑀲𑁆𑀫𑀸, 𑀬𑀲𑀁 𑀇𑀲𑁆𑀲𑀭𑀺𑀬𑀁 𑀲𑀼𑀔𑀁;

𑀧𑀳𑀸𑀲𑀺 𑀮𑁄𑀓𑀘𑀺𑀢𑁆𑀢𑀜𑁆𑀘, 𑀲𑀼𑀕𑀢𑁄 𑀪𑀕𑀯𑀸 𑀢𑀢𑁄.

𑀢𑀣𑀸 𑀔𑀦𑁆𑀥𑀸𑀬𑀢𑀦𑀥𑀸𑀢𑀸𑀤𑀺𑀪𑁂𑀤𑁂 𑀥𑀫𑁆𑀫𑀓𑁄𑀝𑁆𑀞𑀸𑀲𑁂 𑀲𑀩𑁆𑀩𑀁 𑀧𑀧𑀜𑁆𑀘 𑀲𑀩𑁆𑀩𑀁 𑀬𑁄𑀕𑀁 𑀲𑀩𑁆𑀩𑀁 𑀕𑀦𑁆𑀣𑀁 𑀲𑀩𑁆𑀩𑀁 𑀲𑀁𑀬𑁄𑀚𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀫𑀢𑀁 𑀥𑀸𑀢𑀼𑀁 𑀲𑀫𑀥𑀺𑀕𑀘𑁆𑀙𑀦𑁆𑀢𑁄 𑀯𑀫𑀺 𑀉𑀕𑁆𑀕𑀺𑀭𑀺 𑀅𑀦𑀧𑁂𑀓𑁆𑀔𑁄 𑀙𑀟𑁆𑀟𑀬𑀺 𑀦 𑀧𑀘𑁆𑀘𑀸𑀯𑀫𑀻𑀢𑀺 𑀪𑀕𑀯𑀸. 𑀅𑀣 𑀯𑀸 𑀲𑀩𑁆𑀩𑁂𑀧𑀺 𑀓𑀼𑀲𑀮𑀸𑀓𑀼𑀲𑀮𑁂 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑁂 𑀳𑀻𑀦𑀧𑁆𑀧𑀡𑀻𑀢𑁂 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑁂 𑀥𑀫𑁆𑀫𑁂 𑀅𑀭𑀺𑀬𑀫𑀕𑁆𑀕𑀜𑀸𑀡𑀫𑀼𑀔𑁂𑀦 𑀯𑀫𑀺 𑀉𑀕𑁆𑀕𑀺𑀭𑀺 𑀅𑀦𑀧𑁂𑀓𑁆𑀔𑁄 𑀧𑀭𑀺𑀘𑁆𑀘𑀚𑀺 𑀧𑀚𑀳𑀻𑀢𑀺 𑀪𑀕𑀯𑀸.

𑀔𑀦𑁆𑀥𑀸𑀬𑀢𑀦𑀥𑀸𑀢𑀸𑀤𑀻, 𑀥𑀫𑁆𑀫𑀪𑁂𑀤𑀸 𑀫𑀳𑁂𑀲𑀺𑀦𑀸;

𑀓𑀡𑁆𑀳𑀲𑀼𑀓𑁆𑀓𑀸 𑀬𑀢𑁄 𑀯𑀦𑁆𑀢𑀸, 𑀢𑀢𑁄𑀧𑀺 𑀩𑀕𑀯𑀸 𑀫𑀢𑁄.

𑀚𑀸𑀢𑀓𑀝𑁆𑀞𑀓𑀣𑀸𑀬𑀁 𑀧𑀦 𑀳𑀺𑀫𑀯𑀸𑀢𑀺 𑀧𑀤𑀲𑁆𑀲 𑀯𑀫𑀼𑀥𑀸𑀢𑀼𑀯𑀲𑁂𑀦𑀧𑀺 𑀦𑀺𑀧𑁆𑀨𑀢𑁆𑀢𑀺 𑀤𑀲𑁆𑀲𑀺𑀢𑀸. 𑀢𑀣𑀸 𑀳𑀺 𑀲𑀫𑁆𑀪𑀯𑀚𑀸𑀢𑀓𑀝𑁆𑀞𑀓𑀣𑀸𑀬𑀁 ‘‘𑀳𑀺𑀫𑀯𑀸𑀢𑀺 𑀳𑀺𑀫𑀧𑀸𑀢𑀲𑀫𑀬𑁂 𑀳𑀺𑀫𑀬𑀼𑀢𑁆𑀢𑁄𑀢𑀺 𑀳𑀺𑀫𑀯𑀸. 𑀕𑀺𑀫𑁆𑀳𑀓𑀸𑀮𑁂 𑀳𑀺𑀫𑀁 𑀯𑀫𑀢𑀻𑀢𑀺 𑀳𑀺𑀫𑀯𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀚𑀸𑀢𑀓𑀝𑁆𑀞𑀓𑀣𑀸𑀬𑀁 ‘‘𑀳𑀺𑀫𑀯𑀸’’𑀢𑀺 𑀧𑀤𑀲𑁆𑀲 𑀯𑀫𑀼𑀥𑀸𑀢𑀼𑀯𑀲𑁂𑀦𑀧𑀺 𑀦𑀺𑀧𑁆𑀨𑀢𑁆𑀢𑀺 𑀤𑀲𑁆𑀲𑀺𑀢𑀸, 𑀅𑀬𑀁 𑀦𑀬𑁄 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼𑀧𑀺 𑀦𑁂𑀢𑀩𑁆𑀩𑁄. ‘‘𑀕𑀼𑀡𑀯𑀸𑀕𑀡𑀯𑀸’’𑀢𑀺𑀆𑀤𑀻𑀲𑀼 𑀧𑀦 𑀦 𑀦𑁂𑀢𑀩𑁆𑀩𑁄. 𑀬𑀤𑀺 𑀦𑀬𑁂𑀬𑁆𑀬, ‘‘𑀕𑀼𑀡𑀯𑀸 𑀕𑀡𑀯𑀸’’𑀢𑀺 𑀧𑀤𑀸𑀦𑀁 ‘‘𑀦𑀺𑀕𑁆𑀕𑀼𑀡𑁄 𑀧𑀭𑀺𑀳𑀻𑀦𑀕𑀼𑀡𑁄’’𑀢𑀺 𑀏𑀯𑀫𑀸𑀤𑀺𑀅𑀢𑁆𑀣𑁄 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀅𑀬𑀁 𑀦𑀬𑁄 𑀲𑀩𑁆𑀩𑀢𑁆𑀣𑀧𑀺 𑀦 𑀦𑁂𑀢𑀩𑁆𑀩𑁄. 𑀏𑀢𑁆𑀣 𑀲𑀺𑀬𑀸 ‘‘𑀬𑀤𑀺 ‘‘𑀪𑀕𑀯𑀸’𑀢𑀺𑀆𑀤𑀺𑀧𑀤𑀸𑀦𑀁 𑀯𑀫𑀼𑀥𑀸𑀢𑀼𑀯𑀲𑁂𑀦 𑀦𑀺𑀧𑁆𑀨𑀢𑁆𑀢𑀺 𑀳𑁄𑀢𑀺, 𑀓𑀣𑀁 ‘‘𑀪𑀕𑀯𑀦𑁆𑀢𑁄, 𑀪𑀕𑀯𑀦𑁆𑀢’’𑀦𑁆𑀢𑀺𑀆𑀤𑀻𑀦𑀺 𑀲𑀺𑀚𑁆𑀛𑀦𑁆𑀢𑀻’’𑀢𑀺? 𑀬𑀣𑀸 ‘‘𑀪𑀕𑀯𑀸’’𑀢𑀺 𑀧𑀤𑀁 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀲𑀺𑀚𑁆𑀛𑀢𑀺, 𑀢𑀣𑀸 𑀢𑀸𑀦𑀺𑀧𑀺 𑀢𑁂𑀦𑁂𑀯 𑀲𑀺𑀚𑁆𑀛𑀦𑁆𑀢𑀺. 𑀅𑀘𑀺𑀦𑁆𑀢𑁂𑀬𑁆𑀬𑁄 𑀳𑀺 𑀦𑀺𑀭𑀼𑀢𑁆𑀢𑀺𑀦𑀬𑁄 𑀓𑁂𑀯𑀮𑀁 𑀅𑀢𑁆𑀣𑀬𑀼𑀢𑁆𑀢𑀺𑀧𑀝𑀺𑀩𑀦𑁆𑀥𑀫𑀢𑁆𑀢𑁄𑀯, 𑀅𑀢𑁆𑀣𑀬𑀼𑀢𑁆𑀢𑀺𑀬𑀁 𑀲𑀢𑀺 𑀦𑀺𑀧𑁆𑀨𑀸𑀤𑁂𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀸𑀦𑀺𑀧𑀺 𑀭𑀽𑀧𑀸𑀦𑀺 𑀅𑀦𑁂𑀦𑁂𑀯 𑀲𑀺𑀚𑁆𑀛𑀦𑁆𑀢𑀺. 𑀏𑀢𑁆𑀣 𑀘 ¶ 𑀬𑀁 𑀦𑀺𑀭𑀼𑀢𑁆𑀢𑀺𑀮𑀓𑁆𑀔𑀡𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀉𑀧𑀭𑀺 𑀭𑀽𑀧𑀦𑀺𑀧𑁆𑀨𑀸𑀤𑀦𑀸𑀥𑀺𑀓𑀸𑀭𑁂 𑀉𑀤𑀸𑀳𑀭𑀡𑁂𑀳𑀺 𑀲𑀤𑁆𑀥𑀺𑀁 𑀧𑀓𑀸𑀲𑁂𑀲𑁆𑀲𑀸𑀫.

𑀇𑀥 𑀲𑀸𑀭𑀫𑀢𑁂 𑀫𑀼𑀦𑀺𑀭𑀸𑀚𑀫𑀢𑁂,

𑀧𑀭𑀫𑀁 𑀧𑀝𑀼𑀢𑀁 𑀲𑀼𑀚𑀦𑁄 𑀧𑀺𑀳𑀬𑀁;

𑀯𑀺𑀧𑀼𑀮𑀢𑁆𑀣𑀥𑀭𑀁 𑀥𑀦𑀺𑀦𑀻𑀢𑀺𑀫𑀺𑀫𑀁,

𑀲𑀢𑀢𑀁 𑀪𑀚𑀢𑀁 𑀫𑀢𑀺𑀲𑀼𑀤𑁆𑀥𑀓𑀭𑀁.

𑀇𑀢𑀺 𑀦𑀯𑀗𑁆𑀕𑁂 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀩𑁆𑀬𑀧𑁆𑀧𑀣𑀕𑀢𑀻𑀲𑀼 𑀯𑀺𑀜𑁆𑀜𑀼𑀦𑀁

𑀓𑁄𑀲𑀮𑁆𑀮𑀢𑁆𑀣𑀸𑀬 𑀓𑀢𑁂 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑁂

𑀲𑀭𑀯𑀕𑁆𑀕𑀧𑀜𑁆𑀘𑀓𑀦𑁆𑀢𑀺𑀓𑁄 𑀦𑀸𑀫 𑀥𑀸𑀢𑀼𑀯𑀺𑀪𑀸𑀕𑁄

𑀧𑀦𑁆𑀦𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁬. 𑀪𑀽𑀯𑀸𑀤𑀺𑀕𑀡𑀺𑀓𑀧𑀭𑀺𑀘𑁆𑀙𑁂𑀤

𑀇𑀢𑁄 𑀧𑀭𑀁 𑀅𑀯𑀕𑁆𑀕𑀦𑁆𑀢𑀸, 𑀫𑀺𑀲𑁆𑀲𑀓𑀸 𑀘𑁂𑀯 𑀥𑀸𑀢𑀼𑀬𑁄;

𑀯𑀓𑁆𑀔𑀸𑀫𑀺 𑀥𑀸𑀢𑀼𑀪𑁂𑀤𑀸𑀤𑀺-𑀓𑀼𑀲𑀮𑀲𑁆𑀲 𑀫𑀢𑀸𑀦𑀼𑀕𑀸.

𑀬𑀓𑀸𑀭𑀦𑁆𑀢𑀥𑀸𑀢𑀼

𑀬𑀸 𑀕𑀢𑀺𑀧𑀸𑀧𑀼𑀡𑁂𑀲𑀼. 𑀬𑀸𑀢𑀺, 𑀬𑀦𑁆𑀢𑀺. 𑀬𑀸𑀢𑀼, 𑀬𑀦𑁆𑀢𑀼. 𑀬𑁂𑀬𑁆𑀬, 𑀬𑁂𑀬𑁆𑀬𑀼𑀁, 𑀅𑀦𑀼𑀧𑀭𑀺𑀬𑁂𑀬𑁆𑀬𑀼𑀁. 𑀬𑀣𑀸𑀲𑀫𑁆𑀪𑀯𑀁 𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀬𑀦𑁆𑀢𑁄 𑀧𑀼𑀭𑀺𑀲𑁄. 𑀬𑀦𑁆𑀢𑀻 𑀇𑀢𑁆𑀣𑀻. 𑀬𑀦𑁆𑀢𑀁 𑀓𑀼𑀮𑀁. 𑀬𑀸𑀦𑀁, 𑀉𑀧𑀬𑀸𑀦𑀁, 𑀉𑀬𑁆𑀬𑀸𑀦𑀁 𑀇𑀘𑁆𑀘𑀸𑀤𑀻𑀦𑀺. 𑀤𑀺𑀯𑀸𑀤𑀺𑀕𑀡𑀺𑀓𑀲𑁆𑀲 𑀧𑀦𑀲𑁆𑀲 ‘‘𑀬𑀸𑀬𑀢𑀺, 𑀬𑀸𑀬𑀦𑁆𑀢𑀻’’𑀢𑀺𑀆𑀤𑀻𑀦𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺.

𑀢𑀢𑁆𑀭 𑀬𑀸𑀦𑀦𑁆𑀢𑀺𑀆𑀤𑀻𑀲𑀼 𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀬𑀸𑀦𑀁, 𑀭𑀣𑀲𑀓𑀝𑀸𑀤𑀺. 𑀉𑀧𑀬𑀦𑁆𑀢𑀺 𑀏𑀢𑁂𑀦 𑀇𑀲𑁆𑀲𑀭𑀲𑁆𑀲 𑀯𑀸 𑀧𑀺𑀬𑀫𑀦𑀸𑀧𑀲𑁆𑀲 𑀯𑀸 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑀻𑀢𑀺 𑀉𑀧𑀬𑀸𑀦𑀁, 𑀧𑀡𑁆𑀡𑀸𑀓𑀸𑀭𑀁. ‘‘𑀉𑀧𑀬𑀸𑀦𑀸𑀦𑀺 𑀫𑁂 𑀤𑀚𑁆𑀚𑀼𑀁, 𑀭𑀸𑀚𑀧𑀼𑀢𑁆𑀢 𑀢𑀬𑀺 𑀕𑀢𑁂’’𑀢𑀺 𑀏𑀢𑁆𑀣 𑀳𑀺 𑀧𑀡𑁆𑀡𑀸𑀓𑀸𑀭𑀸𑀦𑀺 ‘‘𑀉𑀧𑀬𑀸𑀦𑀸𑀦𑀻’’𑀢𑀺 ¶ 𑀯𑀼𑀘𑁆𑀘𑀦𑁆𑀢𑀺. 𑀲𑀫𑁆𑀧𑀦𑁆𑀦𑀤𑀲𑁆𑀲𑀦𑀻𑀬𑀧𑀼𑀧𑁆𑀨𑀨𑀮𑀸𑀤𑀺𑀢𑀸𑀬 𑀉𑀤𑁆𑀥𑀁 𑀑𑀮𑁄𑀓𑁂𑀦𑁆𑀢𑀸 𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀏𑀢𑁆𑀣𑀸𑀢𑀺 𑀉𑀬𑁆𑀬𑀸𑀦𑀁.

𑀩𑁆𑀬𑀸 𑀉𑀫𑁆𑀫𑀻𑀲𑀦𑁂. 𑀩𑁆𑀬𑀸𑀢𑀺, 𑀩𑁆𑀬𑀦𑁆𑀢𑀺. 𑀩𑁆𑀬𑀸𑀲𑀺, 𑀩𑁆𑀬𑀸𑀣. 𑀩𑁆𑀬𑀸𑀫𑀺, 𑀩𑁆𑀬𑀸𑀫. 𑀬𑀣𑀸𑀲𑀫𑁆𑀪𑀯𑀁 𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀢𑀢𑁆𑀭 𑀧𑀦𑀸𑀬𑀁 𑀧𑀸𑀴𑀺 ‘‘𑀬𑀸𑀯 𑀩𑁆𑀬𑀸𑀢𑀺 𑀦𑀺𑀫𑁆𑀫𑀻𑀲𑀢𑀺, 𑀢𑀢𑁆𑀭𑀸𑀧𑀺 𑀭𑀲𑀢𑀺𑀩𑁆𑀩𑀬𑁄’’𑀢𑀺. 𑀢𑀢𑁆𑀣 𑀬𑀸𑀯 𑀩𑁆𑀬𑀸𑀢𑀻𑀢𑀺 𑀬𑀸𑀯 𑀉𑀫𑁆𑀫𑀻𑀲𑀢𑀺, 𑀧𑀼𑀭𑀸𑀡𑀪𑀸𑀲𑀸 𑀏𑀲𑀸, 𑀅𑀬𑀜𑁆𑀳𑀺 𑀬𑀲𑁆𑀫𑀺𑀁 𑀓𑀸𑀮𑁂 𑀩𑁄𑀥𑀺𑀲𑀢𑁆𑀢𑁄 𑀘𑀽𑀴𑀩𑁄𑀥𑀺𑀧𑀭𑀺𑀩𑁆𑀩𑀸𑀚𑀓𑁄 𑀅𑀳𑁄𑀲𑀺, 𑀢𑀲𑁆𑀫𑀺𑀁 𑀓𑀸𑀮𑁂 𑀫𑀦𑀼𑀲𑁆𑀲𑀸𑀦𑀁 𑀯𑁄𑀳𑀸𑀭𑁄.

𑀬𑀼 𑀫𑀺𑀲𑁆𑀲𑀦𑁂 𑀕𑀢𑀺𑀬𑀜𑁆𑀘. 𑀬𑁄𑀢𑀺, 𑀬𑀯𑀢𑀺. 𑀆𑀬𑀼, 𑀬𑁄𑀦𑀺.

𑀢𑀢𑁆𑀣 ‘‘𑀆𑀬𑀽’’𑀢𑀺 𑀆𑀲𑀤𑁆𑀤𑁄 𑀉𑀧𑀲𑀕𑁆𑀕𑁄. 𑀆𑀬𑀯𑀦𑁆𑀢𑀺 𑀫𑀺𑀲𑁆𑀲𑀻𑀪𑀯𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀦𑀸𑀢𑀺 𑀆𑀬𑀼. 𑀅𑀣 𑀯𑀸 𑀆𑀬𑀯𑀦𑁆𑀢𑀺 𑀆𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺 𑀢𑀲𑁆𑀫𑀺𑀁 𑀲𑀢𑀺 𑀅𑀭𑀽𑀧𑀥𑀫𑁆𑀫𑀸𑀢𑀺 𑀆𑀬𑀼. 𑀢𑀣𑀸 𑀳𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀯𑀼𑀢𑁆𑀢𑀁 ‘‘𑀆𑀬𑀯𑀦𑀝𑁆𑀞𑁂𑀦 𑀆𑀬𑀼. 𑀢𑀲𑁆𑀫𑀺𑀜𑁆𑀳𑀺 𑀲𑀢𑀺 𑀅𑀭𑀽𑀧𑀥𑀫𑁆𑀫𑀸 𑀆𑀬𑀯𑀦𑁆𑀢𑀺 𑀆𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀆𑀬𑀽𑀢𑀺 𑀯𑀼𑀘𑁆𑀘𑀢𑀻’’𑀢𑀺. ‘‘𑀆𑀬𑀼, 𑀚𑀻𑀯𑀺𑀢𑀁, 𑀧𑀸𑀡𑁄’’ 𑀇𑀘𑁆𑀘𑁂𑀢𑁂 𑀧𑀭𑀺𑀬𑀸𑀬𑀸 𑀮𑁄𑀓𑀯𑁄𑀳𑀸𑀭𑀯𑀲𑁂𑀦. 𑀅𑀪𑀺𑀥𑀫𑁆𑀫𑀯𑀲𑁂𑀦 𑀧𑀦 ‘‘𑀞𑀺𑀢𑀺 𑀬𑀧𑀦𑀸 𑀬𑀸𑀧𑀦𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁’’ 𑀇𑀘𑁆𑀘𑁂𑀢𑁂𑀧𑀺 𑀢𑁂𑀳𑁂𑀯 𑀲𑀤𑁆𑀥𑀺𑀁 𑀧𑀭𑀺𑀬𑀸𑀬𑀸. 𑀬𑁄𑀦𑀻𑀢𑀺 𑀅𑀡𑁆𑀟𑀚𑀸𑀤𑀻𑀦𑀁 𑀅𑀡𑁆𑀟𑀚𑀸𑀤𑀻𑀳𑀺 𑀲𑀤𑁆𑀥𑀺𑀁 𑀬𑀸𑀬 𑀫𑀺𑀲𑁆𑀲𑀻𑀪𑀸𑀯𑁄 𑀳𑁄𑀢𑀺, 𑀲𑀸 𑀬𑁄𑀦𑀺. 𑀇𑀤𑀁 𑀧𑀦𑁂𑀢𑁆𑀣 𑀦𑀺𑀩𑁆𑀩𑀘𑀦𑀁 ‘‘𑀬𑀯𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀸 𑀏𑀓𑀚𑀸𑀢𑀺𑀲𑀫𑀦𑁆𑀯𑀬𑁂𑀦 𑀅𑀜𑁆𑀜𑀫𑀜𑁆𑀜𑀁 𑀫𑀺𑀲𑁆𑀲𑀓𑀸 𑀳𑁄𑀦𑁆𑀢𑀻𑀢𑀺 𑀬𑁄𑀦𑀺’’ 𑀇𑀢𑀺. 𑀏𑀢𑁆𑀣 𑀘 𑀬𑁄𑀦𑀺𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄 𑀦𑀻𑀬𑀢𑁂. 𑀬𑁄𑀦𑀻𑀢𑀺 𑀔𑀦𑁆𑀥𑀓𑁄𑀝𑁆𑀞𑀸𑀲𑀲𑁆𑀲𑀧𑀺 𑀓𑀸𑀭𑀡𑀲𑁆𑀲𑀧𑀺 𑀧𑀲𑁆𑀲𑀸𑀯𑀫𑀕𑁆𑀕𑀲𑁆𑀲𑀧𑀺 𑀦𑀸𑀫𑀁. ‘‘𑀘𑀢𑀲𑁆𑀲𑁄 𑀦𑀸𑀕𑀬𑁄𑀦𑀺𑀬𑁄. 𑀘𑀢𑀲𑁆𑀲𑁄 𑀲𑀼𑀧𑀡𑁆𑀡𑀬𑁄𑀦𑀺𑀬𑁄’’𑀢𑀺 𑀏𑀢𑁆𑀣 𑀳𑀺 𑀔𑀦𑁆𑀥𑀓𑁄𑀝𑁆𑀞𑀸𑀲𑁄 𑀬𑁄𑀦𑀺 𑀦𑀸𑀫. ‘‘𑀬𑁄𑀦𑀺 ¶ 𑀳𑁂𑀲𑀸 𑀪𑀽𑀫𑀺𑀚 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬𑀸’’𑀢𑀺 𑀏𑀢𑁆𑀣 𑀓𑀸𑀭𑀡𑀁. ‘‘𑀦 𑀘𑀸𑀳𑀁 𑀩𑁆𑀭𑀸𑀳𑁆𑀫𑀡𑀁 𑀩𑁆𑀭𑀽𑀫𑀺, 𑀬𑁄𑀦𑀺𑀚𑀁 𑀫𑀢𑁆𑀢𑀺𑀲𑀫𑁆𑀪𑀯’’𑀦𑁆𑀢𑀺 𑀏𑀢𑁆𑀣 𑀧𑀲𑁆𑀲𑀸𑀯𑀫𑀕𑁆𑀕𑁄. 𑀏𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

𑀔𑀦𑁆𑀥𑀸𑀦𑀜𑁆𑀘𑀸𑀧𑀺 𑀓𑁄𑀝𑁆𑀞𑀸𑀲𑁂, 𑀫𑀼𑀢𑁆𑀢𑀫𑀕𑁆𑀕𑁂 𑀘 𑀓𑀸𑀭𑀡𑁂;

𑀇𑀫𑁂𑀲𑀼 𑀢𑀻𑀲𑀼 𑀅𑀢𑁆𑀣𑁂𑀲𑀼, 𑀬𑁄𑀦𑀺𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑀩𑁆𑀬𑁂 𑀲𑀁𑀯𑀭𑀡𑁂. 𑀩𑁆𑀬𑀸𑀬𑀢𑀺.

𑀩𑁆𑀬𑁂 𑀧𑀯𑀢𑁆𑀢𑀺𑀬𑀁. 𑀩𑁆𑀬𑁂𑀢𑀺 𑀲𑀳𑀩𑁆𑀬𑁄.

𑀏𑀢𑁆𑀣 𑀲𑀳𑀩𑁆𑀬𑁄𑀢𑀺 𑀲𑀳 𑀩𑁆𑀬𑁂𑀢𑀺 𑀲𑀳 𑀧𑀯𑀢𑁆𑀢𑀢𑀻𑀢𑀺 𑀲𑀳𑀩𑁆𑀬𑁄, 𑀲𑀳𑀸𑀬𑁄, 𑀏𑀓𑀪𑀯𑀽𑀧𑀕𑁄 𑀯𑀸. 𑀢𑀣𑀸 𑀳𑀺 ‘‘𑀢𑀸𑀯𑀢𑀺𑀁𑀲𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀦𑁆𑀦𑁄’’𑀢𑀺𑀆𑀤𑀻𑀲𑀼 𑀏𑀓𑀪𑀯𑀽𑀧𑀕𑁄 ‘‘𑀲𑀳𑀩𑁆𑀬𑁄’’𑀢𑀺 𑀯𑀼𑀘𑁆𑀘𑀢𑀺.

𑀳𑀬 𑀕𑀢𑀺𑀬𑀁. 𑀳𑀬𑀢𑀺. 𑀳𑀬𑁄. 𑀳𑀬𑁄𑀢𑀺 𑀅𑀲𑁆𑀲𑁄. 𑀲𑁄 𑀳𑀺 𑀳𑀬𑀢𑀺 𑀲𑀻𑀖𑀁 𑀕𑀘𑁆𑀙𑀢𑀻𑀢𑀺 𑀳𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀸𑀦𑀺 𑀧𑀦𑀲𑁆𑀲 𑀦𑀸𑀫𑀸𑀦𑀺 𑁋

𑀅𑀲𑁆𑀲𑁄 𑀢𑀼𑀭𑀗𑁆𑀕𑁄 𑀢𑀼𑀭𑀕𑁄, 𑀯𑀸𑀚𑀻 𑀯𑀸𑀳𑁄 𑀳𑀬𑁄𑀧𑀺 𑀘;

𑀢𑀩𑁆𑀪𑁂𑀤𑀸 𑀲𑀺𑀦𑁆𑀥𑀯𑁄 𑀘𑁂𑀯, 𑀕𑁄𑀚𑁄 𑀅𑀲𑁆𑀲𑀢𑀭𑁄𑀧𑀺 𑀘.

𑀓𑀸𑀭𑀡𑀸𑀓𑀸𑀭𑀡𑀜𑁆𑀜𑀽 𑀢𑀼, 𑀆𑀚𑀸𑀦𑀻𑀬𑁄 𑀳𑀬𑀼𑀢𑁆𑀢𑀫𑁄;

𑀖𑁄𑀝𑀓𑁄 𑀢𑀼 𑀔𑀴𑀼𑀗𑁆𑀓𑀲𑁆𑀲𑁄, 𑀯𑀴𑀯𑁄𑀢𑀺 𑀘 𑀯𑀼𑀘𑁆𑀘𑀢𑀺;

𑀅𑀲𑁆𑀲𑀧𑁄𑀢𑁄 𑀓𑀺𑀲𑁄𑀭𑁄𑀢𑀺, 𑀔𑀴𑀼𑀗𑁆𑀓𑁄𑀢𑀺𑀧𑀺 𑀯𑀼𑀘𑁆𑀘𑀢𑀺;

𑀳𑀭𑀺𑀬 𑀕𑀢𑀺𑀕𑁂𑀮𑀜𑁆𑀜𑁂𑀲𑀼. 𑀳𑀭𑀺𑀬𑀢𑀺.

𑀅𑀬 𑀯𑀬 𑀧𑀬 𑀫𑀬 𑀢𑀬 𑀘𑀬 𑀭𑀬 𑀕𑀢𑀺𑀬𑀁. 𑀅𑀬𑀢𑀺. 𑀯𑀬𑀢𑀺. 𑀧𑀬𑀢𑀺. 𑀫𑀬𑀢𑀺. 𑀢𑀬𑀢𑀺. 𑀘𑀬𑀢𑀺. 𑀭𑀬𑀢𑀺. 𑀅𑀬𑁄, 𑀲𑀫𑀬𑁄, 𑀯𑀬𑁄, 𑀧𑀬𑁄, 𑀭𑀬𑁄. 𑀫𑀬𑀢𑀬𑀘𑀬𑀥𑀸𑀢𑀽𑀦𑀁 𑀦𑀸𑀫𑀺𑀓𑀧𑀤𑀸𑀦𑀺 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸𑀦𑀺.

𑀢𑀢𑁆𑀣 ¶ 𑀅𑀬𑁄𑀢𑀺 𑀓𑀸𑀴𑀮𑁄𑀳𑀁, 𑀅𑀬𑀢𑀺 𑀦𑀸𑀦𑀸𑀓𑀫𑁆𑀫𑀸𑀭𑀓𑀺𑀘𑁆𑀘𑁂𑀲𑀼 𑀉𑀧𑀬𑁄𑀕𑀁 𑀕𑀘𑁆𑀙𑀢𑀻𑀢𑀺 𑀅𑀬𑁄. 𑀯𑀬𑁄𑀢𑀺 𑀧𑀞𑀫𑀯𑀬𑀸𑀤𑀺𑀆𑀬𑀼𑀓𑁄𑀝𑁆𑀞𑀸𑀲𑁄, 𑀯𑀬𑀢𑀺 𑀧𑀭𑀺𑀳𑀸𑀦𑀺𑀁 𑀕𑀘𑁆𑀙𑀢𑀻𑀢𑀺 𑀯𑀬𑁄. 𑀧𑀬𑁄𑀢𑀺 𑀔𑀻𑀭𑀲𑁆𑀲𑀧𑀺 𑀉𑀤𑀓𑀲𑁆𑀲𑀧𑀺 𑀦𑀸𑀫𑀁, 𑀧𑀬𑀢𑀺 𑀚𑀦𑁂𑀦 𑀧𑀸𑀢𑀩𑁆𑀩𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀧𑀬𑁄. 𑀭𑀬𑁄𑀢𑀺 𑀯𑁂𑀕𑁄, 𑀬𑁄 ‘‘𑀚𑀯𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀭𑀬𑀦𑀁 𑀚𑀯𑀦𑀁 𑀭𑀬𑁄. 𑀏𑀢𑁆𑀣 𑀲𑀫𑀬𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄 𑀯𑀼𑀘𑁆𑀘𑀢𑁂 𑀅𑀳 𑀦𑀺𑀩𑁆𑀩𑀘𑀦𑁂𑀦. 𑀲𑀫𑀬𑀲𑀤𑁆𑀤𑁄 𑁋

𑀲𑀫𑀯𑀸𑀬𑁂 𑀔𑀡𑁂 𑀓𑀸𑀮𑁂, 𑀲𑀫𑀬𑁂 𑀳𑁂𑀢𑀼𑀤𑀺𑀝𑁆𑀞𑀺𑀲𑀼;

𑀧𑀝𑀺𑀮𑀸𑀪𑁂 𑀧𑀳𑀸𑀦𑁂 𑀘, 𑀧𑀝𑀺𑀯𑁂𑀥𑁂 𑀘 𑀤𑀺𑀲𑁆𑀲𑀢𑀺.

𑀢𑀣𑀸 𑀳𑀺 ‘‘𑀅𑀧𑁆𑀧𑁂𑀯 𑀦𑀸𑀫 𑀲𑁆𑀯𑁂𑀧𑀺 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘 𑀉𑀧𑀸𑀤𑀸𑀬𑀸’’𑀢𑀺 𑀏𑀯𑀫𑀸𑀤𑀻𑀲𑀼 𑀲𑀫𑀯𑀸𑀬𑁄 𑀅𑀢𑁆𑀣𑁄. ‘‘𑀏𑀓𑁄𑀯 𑀔𑁄 𑀪𑀺𑀓𑁆𑀔𑀯𑁂 𑀔𑀡𑁄 𑀘 𑀲𑀫𑀬𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬𑀸’’𑀢𑀺𑀆𑀤𑀻𑀲𑀼 𑀔𑀡𑁄. ‘‘𑀉𑀡𑁆𑀳𑀲𑀫𑀬𑁄 𑀧𑀭𑀺𑀴𑀸𑀳𑀲𑀫𑀬𑁄’’𑀢𑀺𑀆𑀤𑀻𑀲𑀼 𑀓𑀸𑀮𑁄. ‘‘𑀫𑀳𑀸𑀲𑀫𑀬𑁄 𑀧𑀯𑀦𑀲𑁆𑀫𑀺’’𑀦𑁆𑀢𑀺𑀆𑀤𑀻𑀲𑀼 𑀲𑀫𑀽𑀳𑁄. ‘‘𑀲𑀫𑀬𑁄𑀧𑀺 𑀔𑁄 𑀢𑁂 𑀪𑀤𑁆𑀤𑀸𑀮𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑁄 𑀅𑀳𑁄𑀲𑀻’’𑀢𑀺𑀆𑀤𑀻𑀲𑀼 𑀳𑁂𑀢𑀼. ‘‘𑀢𑁂𑀦 𑀲𑀫𑀬𑁂𑀦 𑀉𑀕𑁆𑀕𑀸𑀳𑀫𑀸𑀦𑁄 𑀧𑀭𑀺𑀩𑁆𑀩𑀸𑀚𑀓𑁄 𑀲𑀫𑀡𑀫𑀼𑀡𑁆𑀟𑀺𑀓𑀸𑀧𑀼𑀢𑁆𑀢𑁄 𑀲𑀫𑀬𑀧𑁆𑀧𑀯𑀸𑀤𑀓𑁂 𑀢𑀺𑀦𑁆𑀤𑀼𑀓𑀸𑀘𑀻𑀭𑁂 𑀏𑀓𑀲𑀸𑀮𑀓𑁂 𑀫𑀮𑁆𑀮𑀺𑀓𑀸𑀬 𑀆𑀭𑀸𑀫𑁂 𑀧𑀝𑀺𑀯𑀲𑀢𑀻’’𑀢𑀺𑀆𑀤𑀻𑀲𑀼 𑀤𑀺𑀝𑁆𑀞𑀺.

‘‘𑀤𑀺𑀝𑁆𑀞𑁂 𑀥𑀫𑁆𑀫𑁂 𑀘 𑀬𑁄 𑀅𑀢𑁆𑀣𑁄, 𑀬𑁄 𑀘𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄;

𑀅𑀢𑁆𑀣𑀸𑀪𑀺𑀲𑀫𑀬𑀸 𑀥𑀻𑀭𑁄, 𑀧𑀡𑁆𑀟𑀺𑀢𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺

𑀆𑀤𑀻𑀲𑀼 ¶ 𑀧𑀝𑀺𑀮𑀸𑀪𑁄. ‘‘𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸 𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀧𑀳𑀸𑀦𑀁. ‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄 𑀲𑀗𑁆𑀔𑀢𑀝𑁆𑀞𑁄 𑀲𑀦𑁆𑀢𑀸𑀧𑀝𑁆𑀞𑁄 𑀅𑀪𑀺𑀲𑀫𑀬𑀝𑁆𑀞𑁄’’𑀢𑀺𑀆𑀤𑀻𑀲𑀼 𑀧𑀝𑀺𑀯𑁂𑀥𑁄. 𑀏𑀢𑁆𑀣 𑀘 𑀉𑀧𑀲𑀕𑁆𑀕𑀸𑀦𑀁 𑀚𑁄𑀢𑀓𑀫𑀢𑁆𑀢𑀢𑁆𑀢𑀸 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀸𑀘𑀓𑁄 𑀲𑀫𑀬𑀲𑀤𑁆𑀤𑁄 𑀏𑀯𑀸𑀢𑀺 𑀲𑀫𑀬𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂𑀧𑀺 𑀲𑀉𑀧𑀲𑀕𑁆𑀕𑁄 𑀅𑀪𑀺𑀲𑀫𑀬𑀲𑀤𑁆𑀤𑁄 𑀯𑀼𑀢𑁆𑀢𑁄.

𑀢𑀢𑁆𑀣 𑀲𑀳𑀓𑀸𑀭𑀻𑀓𑀸𑀭𑀡𑀢𑀸𑀬 𑀲𑀦𑁆𑀦𑀺𑀚𑁆𑀛𑀁 𑀲𑀫𑁂𑀢𑀺 𑀲𑀫𑀯𑁂𑀢𑀻𑀢𑀺 𑀲𑀫𑀬𑁄, 𑀲𑀫𑀯𑀸𑀬𑁄. 𑀲𑀫𑁂𑀢𑀺 𑀲𑀫𑀸𑀕𑀘𑁆𑀙𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀏𑀢𑁆𑀣 𑀢𑀤𑀸𑀥𑀸𑀭𑀧𑀼𑀕𑁆𑀕𑀮𑁄𑀢𑀺 𑀲𑀫𑀬𑁄, 𑀔𑀡𑁄. 𑀲𑀫𑁂𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸 𑀲𑀗𑁆𑀕𑀘𑁆𑀙𑀦𑁆𑀢𑀺 𑀥𑀫𑁆𑀫𑀸 𑀲𑀳𑀚𑀸𑀢𑀥𑀫𑁆𑀫𑁂𑀳𑀺 𑀉𑀧𑁆𑀧𑀸𑀤𑀸𑀤𑀻𑀳𑀺 𑀯𑀸𑀢𑀺 𑀲𑀫𑀬𑁄, 𑀓𑀸𑀮𑁄. 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀢𑀸𑀬 𑀅𑀢𑁆𑀣𑀢𑁄 𑀅𑀪𑀽𑀢𑁄𑀧𑀺 𑀳𑀺 𑀓𑀸𑀮𑁄 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀅𑀥𑀺𑀓𑀭𑀡𑀁 𑀓𑀭𑀡𑀁 𑀯𑀺𑀬 𑀘 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑁂𑀦 𑀭𑀽𑀧𑁂𑀦 𑀯𑁄𑀳𑀭𑀺𑀬𑀢𑀻𑀢𑀺. 𑀲𑀫𑀁, 𑀲𑀳 𑀯𑀸 𑀅𑀯𑀬𑀯𑀸𑀦𑀁 𑀅𑀬𑀦𑀁 𑀧𑀯𑀢𑁆𑀢𑀺 𑀅𑀯𑀝𑁆𑀞𑀸𑀦𑀦𑁆𑀢𑀺 𑀲𑀫𑀬𑁄, 𑀲𑀫𑀽𑀳𑁄, 𑀬𑀣𑀸 ‘‘𑀲𑀫𑀼𑀤𑀸𑀬𑁄’’𑀢𑀺. 𑀅𑀯𑀬𑀯𑀲𑀳𑀸𑀯𑀝𑁆𑀞𑀸𑀦𑀫𑁂𑀯 𑀳𑀺 𑀲𑀫𑀽𑀳𑁄. 𑀧𑀘𑁆𑀘𑀬𑀦𑁆𑀢𑀭𑀲𑀫𑀸𑀕𑀫𑁂 𑀏𑀢𑀺 𑀨𑀮𑀁 𑀏𑀢𑀲𑁆𑀫𑀸 𑀉𑀧𑁆𑀧𑀚𑁆𑀚𑀢𑀺 𑀧𑀯𑀢𑁆𑀢𑀢𑀺 𑀘𑀸𑀢𑀺 𑀲𑀫𑀬𑁄, 𑀳𑁂𑀢𑀼, 𑀬𑀣𑀸 ‘‘𑀲𑀫𑀼𑀤𑀬𑁄’’𑀢𑀺. 𑀲𑀫𑁂𑀢𑀺 𑀲𑀁𑀬𑁄𑀚𑀦𑀪𑀸𑀯𑀢𑁄 𑀲𑀫𑁆𑀩𑀦𑁆𑀥𑀸 𑀏𑀢𑀺 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀧𑀯𑀢𑁆𑀢𑀢𑀺, 𑀤𑀴𑁆𑀳𑀕𑁆𑀕𑀳𑀡𑀪𑀸𑀯𑀢𑁄 𑀯𑀸 𑀲𑀁𑀬𑀼𑀢𑁆𑀢𑀸 𑀅𑀬𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺 𑀲𑀢𑁆𑀢𑀸 𑀬𑀣𑀸𑀪𑀺𑀦𑀺𑀯𑁂𑀲𑀁 𑀏𑀢𑁂𑀦𑀸𑀢𑀺 𑀲𑀫𑀬𑁄, 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑁂𑀦 𑀳𑀺 𑀲𑀢𑁆𑀢𑀸 𑀅𑀢𑀺𑀯𑀺𑀬 𑀩𑀚𑁆𑀛𑀦𑁆𑀢𑀺. 𑀲𑀫𑀺𑀢𑀺 𑀲𑀗𑁆𑀕𑀢𑀺 𑀲𑀫𑁄𑀥𑀸𑀦𑀦𑁆𑀢𑀺 𑀲𑀫𑀬𑁄, 𑀧𑀝𑀺𑀮𑀸𑀪𑁄. 𑀲𑀫𑀲𑁆𑀲 𑀦𑀺𑀭𑁄𑀥𑀲𑁆𑀲 𑀬𑀸𑀦𑀁, 𑀲𑀫𑁆𑀫𑀸 𑀯𑀸 𑀬𑀸𑀦𑀁 𑀅𑀧𑀕𑀫𑁄 𑀅𑀧𑁆𑀧𑀯𑀢𑁆𑀢𑀻𑀢𑀺 𑀲𑀫𑀬𑁄, 𑀧𑀳𑀸𑀦𑀁. 𑀜𑀸𑀡𑁂𑀦 𑀅𑀪𑀺𑀫𑀼𑀔𑀁 𑀲𑀫𑁆𑀫𑀸 𑀏𑀢𑀩𑁆𑀩𑁄 𑀅𑀥𑀺𑀕𑀦𑁆𑀢𑀩𑁆𑀩𑁄𑀢𑀺 𑀲𑀫𑀬𑁄, 𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑁄 𑀲𑀪𑀸𑀯𑁄, 𑀅𑀪𑀺𑀫𑀼𑀔𑀪𑀸𑀯𑁂𑀦 𑀲𑀫𑁆𑀫𑀸 𑀏𑀢𑀺 𑀕𑀘𑁆𑀙𑀢𑀺 𑀩𑀼𑀚𑁆𑀛𑀢𑀻𑀢𑀺 𑀲𑀫𑀬𑁄. 𑀬𑀣𑀸𑀪𑀽𑀢𑀲𑀪𑀸𑀯𑀸𑀯𑀩𑁄𑀥𑁄. 𑀏𑀯𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀫𑀬𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀦𑀦𑀼 ¶ 𑀘 𑀅𑀢𑁆𑀣𑀫𑀢𑁆𑀢𑀁 𑀧𑀢𑀺 𑀲𑀤𑁆𑀤𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑀻𑀢𑀺 𑀦 𑀏𑀓𑁂𑀦 𑀲𑀤𑁆𑀤𑁂𑀦 𑀅𑀦𑁂𑀓𑁂 𑀅𑀢𑁆𑀣𑀸 𑀅𑀪𑀺𑀥𑀻𑀬𑀦𑁆𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁 𑀲𑀤𑁆𑀤𑀯𑀺𑀲𑁂𑀲𑁂 𑀅𑀧𑁂𑀓𑁆𑀔𑀺𑀢𑁂. 𑀲𑀤𑁆𑀤𑀯𑀺𑀲𑁂𑀲𑁂 𑀳𑀺 𑀅𑀧𑁂𑀓𑁆𑀔𑀫𑀸𑀦𑁂 𑀏𑀓𑁂𑀦 𑀲𑀤𑁆𑀤𑁂𑀦 𑀅𑀦𑁂𑀓𑀢𑁆𑀣𑀸𑀪𑀺𑀥𑀸𑀦𑀁 𑀦 𑀲𑀫𑁆𑀪𑀯𑀢𑀺. 𑀦 𑀳𑀺 𑀬𑁄 𑀓𑀸𑀮𑀢𑁆𑀣𑁄 𑀲𑀫𑀬𑀲𑀤𑁆𑀤𑁄, 𑀲𑁄𑀬𑁂𑀯 𑀲𑀫𑀽𑀳𑀸𑀤𑀺𑀅𑀢𑁆𑀣𑀁 𑀯𑀤𑀢𑀺. 𑀏𑀢𑁆𑀣 𑀧𑀦 𑀢𑁂𑀲𑀁 𑀢𑁂𑀲𑀁 𑀅𑀢𑁆𑀣𑀸𑀦𑀁 𑀲𑀫𑀬 𑀲𑀤𑁆𑀤𑀯𑀘𑀦𑀻𑀬𑀢𑀸 𑀲𑀸𑀫𑀜𑁆𑀜𑀫𑀼𑀧𑀸𑀤𑀸𑀬 𑀅𑀦𑁂𑀓𑀢𑁆𑀣𑀢𑀸 𑀲𑀫𑀬𑀲𑀤𑁆𑀤𑀲𑁆𑀲 𑀯𑀼𑀢𑁆𑀢𑀸. 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑀼𑀤𑁆𑀥𑀸𑀭𑁂 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀢𑁄 𑀬𑀸𑀢𑁄 𑀅𑀬𑀢𑁄 𑀘, 𑀦𑀺𑀧𑁆𑀨𑀢𑁆𑀢𑀺𑀁 𑀲𑀫𑀼𑀤𑀻𑀭𑀬𑁂;

𑀯𑀺𑀜𑁆𑀜𑀽 𑀲𑀫𑀬𑀲𑀤𑁆𑀤𑀲𑁆𑀲, 𑀲𑀫𑀯𑀸𑀬𑀸𑀤𑀺𑀯𑀸𑀘𑀺𑀦𑁄.

𑀇𑀢𑁄 𑀬𑀸𑀢𑁄 𑀅𑀬𑀢𑁄 𑀘, 𑀲𑀫𑀸𑀦𑀢𑁆𑀣𑁂𑀳𑀺 𑀥𑀸𑀢𑀼𑀳𑀺;

𑀏𑀯𑀁 𑀲𑀫𑀸𑀦𑀭𑀽𑀧𑀸𑀦𑀺, 𑀪𑀯𑀦𑁆𑀢𑀻𑀢𑀺 𑀘 𑀈𑀭𑀬𑁂.

𑀦𑀬 𑀭𑀓𑁆𑀔𑀡𑁂 𑀘. 𑀘𑀓𑀸𑀭𑁄 𑀕𑀢𑀺𑀧𑁂𑀓𑁆𑀔𑀓𑁄. 𑀦𑀬𑀢𑀺. 𑀦𑀬𑁄. 𑀦𑀬𑁄𑀢𑀺 𑀦𑀬𑀦𑀁 𑀕𑀫𑀦𑀦𑁆𑀢𑀺 𑀦𑀬𑁄, 𑀧𑀸𑀴𑀺𑀕𑀢𑀺. 𑀦𑀬𑀦𑁆𑀢𑀺 𑀯𑀸 𑀭𑀓𑁆𑀔𑀦𑁆𑀢𑀺 𑀅𑀢𑁆𑀣𑀁 𑀏𑀢𑁂𑀦𑀸𑀢𑀺 𑀦𑀬𑁄, 𑀢𑀣𑀢𑁆𑀢𑀦𑀬𑀸𑀤𑀺.

𑀤𑀬 𑀤𑀸𑀦𑀕𑀢𑀺𑀳𑀺𑀁𑀲𑀸𑀤𑀸𑀦𑀭𑀓𑁆𑀔𑀸𑀲𑀼. 𑀤𑀬𑀢𑀺. 𑀤𑀬𑀸.

𑀤𑀬𑀸𑀢𑀺 𑀫𑁂𑀢𑁆𑀢𑀸𑀧𑀺 𑀯𑀼𑀘𑁆𑀘𑀢𑀺 𑀓𑀭𑀼𑀡𑀸𑀧𑀺. ‘‘𑀤𑀬𑀸𑀧𑀦𑁆𑀦𑁄’’𑀢𑀺 𑀏𑀢𑁆𑀣 𑀳𑀺 𑀫𑁂𑀢𑁆𑀢𑀸 ‘‘𑀤𑀬𑀸’’𑀢𑀺, 𑀫𑁂𑀢𑁆𑀢𑀘𑀺𑀢𑁆𑀢𑀢𑀁 𑀆𑀧𑀦𑁆𑀦𑁄𑀢𑀺 𑀳𑀺 𑀅𑀢𑁆𑀣𑁄. ‘‘𑀅𑀤𑀬𑀸𑀧𑀦𑁆𑀦𑁄’’𑀢𑀺 𑀏𑀢𑁆𑀣 𑀧𑀦 𑀓𑀭𑀼𑀡𑀸 ‘‘𑀤𑀬𑀸’’𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀓𑁆𑀓𑀭𑀼𑀡𑀢𑀁 𑀆𑀧𑀦𑁆𑀦𑁄𑀢𑀺 𑀳𑀺 𑀅𑀢𑁆𑀣𑁄. 𑀏𑀯𑀁 𑀤𑀬𑀸𑀲𑀤𑁆𑀤𑀲𑁆𑀲 𑀫𑁂𑀢𑁆𑀢𑀸𑀓𑀭𑀼𑀡𑀸𑀲𑀼 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀳𑀺 𑀅𑀪𑀺𑀥𑀫𑁆𑀫𑀝𑀻𑀓𑀸𑀬𑀁 𑀯𑀼𑀢𑁆𑀢𑀁 ‘‘𑀤𑀬𑀸𑀲𑀤𑁆𑀤𑁄 𑀬𑀢𑁆𑀣 𑀬𑀢𑁆𑀣 𑀧𑀯𑀢𑁆𑀢𑀢𑀺, 𑀢𑀢𑁆𑀣 𑀢𑀢𑁆𑀣 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑁄. 𑀤𑀬𑀸𑀲𑀤𑁆𑀤𑁄 𑀳𑀺 𑀅𑀦𑀼𑀭𑀓𑁆𑀔𑀡𑀢𑁆𑀣𑀁 𑀅𑀦𑁆𑀢𑁄𑀦𑀻𑀢𑀁 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁄 𑀫𑁂𑀢𑁆𑀢𑀸𑀬 𑀘 𑀓𑀭𑀼𑀡𑀸𑀬 𑀘 𑀧𑀯𑀢𑁆𑀢𑀢𑀻’’𑀢𑀺.

𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀤𑀬𑀢𑀺 𑀤𑀤𑀸𑀢𑀺 𑀲𑀢𑁆𑀢𑀸𑀦𑀁 𑀅𑀪𑀬𑀁 𑀏𑀢𑀸𑀬𑀸𑀢𑀺 𑀤𑀬𑀸. 𑀤𑀬𑀢𑀺 𑀕𑀘𑁆𑀙𑀢𑀺 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 ¶ 𑀧𑀸𑀧𑀓𑀮𑁆𑀬𑀸𑀡𑀚𑀦𑁂𑀲𑀼 𑀲𑀫𑀁 𑀯𑀢𑁆𑀢𑀢𑀺, 𑀲𑀻𑀢𑁂𑀦 𑀲𑀫𑀁 𑀨𑀭𑀦𑁆𑀢𑀁 𑀭𑀚𑁄𑀫𑀮𑀜𑁆𑀘 𑀧𑀯𑀸𑀳𑁂𑀦𑁆𑀢𑀁 𑀉𑀤𑀓𑀫𑀺𑀯𑀸𑀢𑀺𑀧𑀺 𑀤𑀬𑀸, 𑀫𑁂𑀢𑁆𑀢𑀸. 𑀤𑀬𑀢𑀺 𑀯𑀸 𑀳𑀺𑀁𑀲𑀢𑀺 𑀓𑀸𑀭𑀼𑀡𑀺𑀓𑀁 𑀬𑀸𑀯 𑀬𑀣𑀸𑀥𑀺𑀧𑁆𑀧𑁂𑀢𑀁 𑀧𑀭𑀲𑁆𑀲 𑀳𑀺𑀢𑀦𑀺𑀧𑁆𑀨𑀢𑁆𑀢𑀺𑀁 𑀦 𑀧𑀸𑀧𑀼𑀡𑀸𑀢𑀺, 𑀢𑀸𑀯𑀸𑀢𑀺 𑀤𑀬𑀸. 𑀤𑀬𑀢𑀺 𑀅𑀦𑀼𑀕𑁆𑀕𑀡𑁆𑀳𑀸𑀢𑀺 𑀧𑀸𑀧𑀚𑀦𑀫𑁆𑀧𑀺 𑀲𑀚𑁆𑀚𑀦𑁄 𑀏𑀢𑀸𑀬𑀸𑀢𑀺𑀧𑀺 𑀤𑀬𑀸. 𑀤𑀬𑀢𑀺 𑀅𑀢𑁆𑀢𑀦𑁄 𑀲𑀼𑀔𑀫𑁆𑀧𑀺 𑀧𑀳𑀸𑀬 𑀔𑁂𑀤𑀁 𑀕𑀡𑁆𑀳𑀸𑀢𑀺 𑀲𑀚𑁆𑀚𑀦𑁄 𑀏𑀢𑀸𑀬𑀸𑀢𑀺 𑀤𑀬𑀸. 𑀤𑀬𑀦𑁆𑀢𑀺 𑀕𑀡𑁆𑀳𑀦𑁆𑀢𑀺 𑀏𑀢𑀸𑀬 𑀫𑀳𑀸𑀩𑁄𑀥𑀺𑀲𑀢𑁆𑀢𑀸 𑀩𑀼𑀤𑁆𑀥𑀪𑀸𑀯𑀸𑀬 𑀅𑀪𑀺𑀦𑀻𑀳𑀸𑀭𑀓𑀭𑀡𑀓𑀸𑀮𑁂 𑀳𑀢𑁆𑀣𑀕𑀢𑀫𑁆𑀧𑀺 𑀅𑀭𑀳𑀢𑁆𑀢𑀨𑀮𑀁 𑀙𑀟𑁆𑀟𑁂𑀢𑁆𑀯𑀸 𑀲𑀁𑀲𑀸𑀭𑀲𑀸𑀕𑀭𑀢𑁄 𑀲𑀢𑁆𑀢𑁂 𑀲𑀫𑀼𑀤𑁆𑀥𑀭𑀺𑀢𑀼𑀓𑀸𑀫𑀸 𑀅𑀦𑀲𑁆𑀲𑀸𑀲𑀓𑀭𑀁 𑀅𑀢𑀺𑀪𑀬𑀸𑀦𑀓𑀁 𑀫𑀳𑀦𑁆𑀢𑀁 𑀲𑀁𑀲𑀸𑀭𑀤𑀼𑀓𑁆𑀔𑀁, 𑀧𑀘𑁆𑀙𑀺𑀫𑀪𑀯𑁂 𑀘 𑀲𑀳 𑀅𑀫𑀢𑀥𑀸𑀢𑀼𑀧𑀝𑀺𑀮𑀸𑀪𑁂𑀦 𑀅𑀦𑁂𑀓𑀕𑀼𑀡𑀲𑀫𑀮𑀗𑁆𑀓𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘𑀸𑀢𑀺𑀧𑀺 𑀤𑀬𑀸, 𑀓𑀭𑀼𑀡𑀸. 𑀓𑀭𑀼𑀡𑀸𑀫𑀽𑀮𑀓𑀸 𑀳𑀺 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸.

𑀅𑀧𑀭𑁄 𑀦𑀬𑁄 𑁋 𑀤𑀬𑀦𑁆𑀢𑀺 𑀅𑀦𑀼𑀭𑀓𑁆𑀔𑀦𑁆𑀢𑀺 𑀲𑀢𑁆𑀢𑁂 𑀏𑀢𑀸𑀬, 𑀲𑀬𑀁 𑀯𑀸 𑀅𑀦𑀼𑀤𑀬𑀢𑀺, 𑀅𑀦𑀼𑀤𑀬𑀫𑀢𑁆𑀢𑀫𑁂𑀯 𑀯𑀸 𑀏𑀢𑀦𑁆𑀢𑀺 𑀤𑀬𑀸, 𑀫𑁂𑀢𑁆𑀢𑀸 𑀘𑁂𑀯 𑀓𑀭𑀼𑀡𑀸 𑀘. 𑀓𑀺𑀜𑁆𑀘𑀺 𑀧𑀬𑁄𑀕𑀫𑁂𑀢𑁆𑀣 𑀓𑀣𑀬𑀸𑀫 ‘‘𑀲𑁂𑀬𑁆𑀬𑀣𑀸𑀧𑀺 𑀕𑀳𑀧𑀢𑀺 𑀕𑀺𑀚𑁆𑀛𑁄 𑀯𑀸 𑀓𑀗𑁆𑀓𑁄 𑀯𑀸 𑀓𑀼𑀮𑀮𑁄 𑀯𑀸 𑀫𑀁𑀲𑀧𑁂𑀲𑀺𑀁 𑀆𑀤𑀸𑀬 𑀤𑀬𑁂𑀬𑁆𑀬. 𑀧𑀼𑀢𑁆𑀢𑁂𑀲𑀼 𑀫𑀤𑁆𑀤𑀻 𑀤𑀬𑁂𑀲𑀺, 𑀲𑀲𑁆𑀲𑀼𑀬𑀸 𑀲𑀲𑀼𑀭𑀫𑁆𑀳𑀺 𑀘. 𑀤𑀬𑀺𑀢𑀩𑁆𑀩𑁄 𑀭𑀣𑁂𑀲𑀪’’. 𑀢𑀢𑁆𑀣 𑀤𑀬𑁂𑀬𑁆𑀬𑀸𑀢𑀺 𑀉𑀧𑁆𑀧𑀢𑀺𑀢𑁆𑀯𑀸 𑀕𑀘𑁆𑀙𑁂𑀬𑁆𑀬, 𑀕𑀢𑁆𑀬𑀢𑁆𑀣𑀯𑀲𑁂𑀦𑁂𑀢𑀁 𑀤𑀝𑁆𑀞𑀩𑁆𑀩𑀁. 𑀤𑀬𑁂𑀲𑀻𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑀁 𑀓𑀭𑁂𑀬𑁆𑀬𑀸𑀲𑀺. 𑀤𑀬𑀺𑀢𑀩𑁆𑀩𑁄𑀢𑀺 𑀧𑀺𑀬𑀸𑀬𑀺𑀢𑀩𑁆𑀩𑁄. 𑀉𑀪𑀬𑀫𑁆𑀧𑁂𑀢𑀁 𑀯𑀺𑀯𑀭𑀡𑀁 𑀭𑀓𑁆𑀔𑀡𑀢𑁆𑀣𑀁 𑀅𑀦𑁆𑀢𑁄𑀕𑀥𑀁 𑀓𑀢𑁆𑀯𑀸 𑀅𑀥𑀺𑀧𑁆𑀧𑀸𑀬𑀢𑁆𑀣𑀯𑀲𑁂𑀦 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀊𑀬𑀻 𑀢𑀦𑁆𑀢𑀲𑀦𑁆𑀢𑀸𑀦𑁂. 𑀊𑀬𑀢𑀺. 𑀊𑀢𑁄, 𑀊𑀢𑀯𑀸.

𑀧𑀽𑀬𑀻 𑀯𑀺𑀲𑀭𑀡𑁂 𑀤𑀼𑀕𑁆𑀕𑀦𑁆𑀥𑁂 𑀘. 𑀧𑀽𑀬𑀢𑀺. 𑀧𑀽𑀢𑁄, 𑀧𑀽𑀢𑀯𑀸. 𑀧𑀽𑀢𑀺𑀫𑀘𑁆𑀙𑀁 𑀓𑀼𑀲𑀕𑁆𑀕𑁂𑀦, 𑀬𑁄 𑀦𑀭𑁄 𑀉𑀧𑀦𑀬𑁆𑀳𑀢𑀺.

𑀓𑀦𑀼𑀬𑀻 ¶ 𑀲𑀤𑁆𑀤𑁂. 𑀓𑀦𑀼𑀬𑀢𑀺. 𑀓𑀦𑀼𑀢𑁄, 𑀓𑀦𑀼𑀢𑀯𑀸.

𑀔𑀫𑀸𑀬 𑀯𑀺𑀥𑀽𑀦𑀦𑁂. 𑀔𑀫𑀸𑀬𑀢𑀺. 𑀔𑀫𑀸𑀢𑁄, 𑀔𑀫𑀸𑀢𑀯𑀸.

𑀨𑀸𑀬𑀺 𑀧𑀸𑀬𑀺 𑀯𑀼𑀤𑁆𑀥𑀺𑀬𑀁. 𑀨𑀸𑀬𑀢𑀺. 𑀨𑀻𑀢𑁄, 𑀨𑀢𑀯𑀸.

𑀢𑀢𑁆𑀣 𑀢𑀢𑀯𑀦𑁆𑀢𑀼𑀧𑀘𑁆𑀘𑀬𑀸, 𑀬𑀓𑀸𑀭𑀮𑁄𑀧𑁄, 𑀥𑀸𑀢𑁆𑀯𑀦𑁆𑀢𑀲𑁆𑀲 𑀲𑀭𑀲𑁆𑀲 𑀇𑀓𑀸𑀭𑀸𑀤𑁂𑀲𑁄 𑀘 𑀤𑀝𑁆𑀞𑀩𑁆𑀩𑁄. 𑀏𑀲 𑀦𑀬𑁄 ‘‘𑀧𑀽𑀢𑁄 𑀧𑀽𑀢𑀯𑀸’’𑀢𑀺𑀆𑀤𑀻𑀲𑀼𑀧𑀺 𑀬𑀣𑀸𑀲𑀫𑁆𑀪𑀯𑀁 𑀤𑀝𑁆𑀞𑀩𑁆𑀩𑁄. 𑀧𑀸𑀬𑀢𑀺. 𑀧𑀸𑀬𑁄. 𑀅𑀧𑀸𑀬𑁄. 𑀏𑀢𑁆𑀣 𑀘 𑀦𑀢𑁆𑀣𑀺 𑀧𑀸𑀬𑁄 𑀯𑀼𑀤𑁆𑀥𑀺 𑀏𑀢𑁆𑀣𑀸𑀢𑀺 𑀅𑀧𑀸𑀬𑁄. 𑀅𑀣 𑀯𑀸 𑀧𑀦 𑀅𑀬𑀢𑁄 𑀲𑀼𑀔𑀢𑁄 𑀅𑀧𑁂𑀢𑁄𑀢𑀺 𑀅𑀧𑀸𑀬𑁄𑀢𑀺𑀧𑀺 𑀦𑀺𑀩𑁆𑀩𑀘𑀦𑀻𑀬𑀁. 𑀅𑀧𑀸𑀬𑁄𑀢𑀺 𑀘 𑀦𑀺𑀭𑀬𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀧𑁂𑀢𑁆𑀢𑀺𑀯𑀺𑀲𑀬𑁄 𑀅𑀲𑀼𑀭𑀓𑀸𑀬𑁄𑀢𑀺 𑀘𑀢𑁆𑀢𑀸𑀭𑁄 𑀅𑀧𑀸𑀬𑀸.

𑀢𑀸𑀬𑀼 𑀲𑀦𑁆𑀢𑀸𑀦𑀧𑀸𑀮𑀦𑁂𑀲𑀼. 𑀢𑀸𑀬𑀢𑀺. 𑀢𑀸𑀬𑀦𑀁. 𑀤𑀺𑀯𑀸𑀤𑀺𑀕𑀡𑁂 𑀧𑀦 𑀢𑀸 𑀧𑀸𑀮𑀦𑁂𑀢𑀺 𑀥𑀸𑀢𑀼𑀁 𑀧𑀲𑁆𑀲𑀣, 𑀢𑀲𑁆𑀲 ‘‘𑀢𑀸𑀬𑀢𑀺 𑀢𑀸𑀡’’𑀦𑁆𑀢𑀺 𑀭𑀽𑀧𑀸𑀦𑀺. 𑀉𑀪𑀬𑁂𑀲𑀁 𑀓𑁆𑀭𑀺𑀬𑀸𑀧𑀤𑀁 𑀲𑀫𑀁. 𑀅𑀓𑀸𑀭𑀬𑀓𑀸𑀭𑀧𑀘𑁆𑀘𑀬𑀫𑀢𑁆𑀢𑁂𑀦𑁂𑀯 𑀦𑀸𑀦𑀢𑁆𑀢𑀁, 𑀦𑀸𑀫𑀺𑀓𑀧𑀤𑀸𑀦𑀺 𑀧𑀦 𑀯𑀺𑀲𑀤𑀺𑀲𑀸𑀦𑀺 ‘‘𑀢𑀸𑀬𑀦𑀁, 𑀢𑀸𑀡’’𑀦𑁆𑀢𑀺.

𑀘𑀸𑀬𑀼 𑀧𑀽𑀚𑀸𑀦𑀺𑀲𑀸𑀫𑀦𑁂𑀲𑀼. 𑀧𑀽𑀚𑀸 𑀧𑀽𑀚𑀦𑀸. 𑀦𑀺𑀲𑀸𑀫𑀦𑀁 𑀑𑀮𑁄𑀓𑀦𑀁 𑀲𑀯𑀦𑀜𑁆𑀘 𑀯𑀼𑀘𑁆𑀘𑀢𑀺. ‘‘𑀇𑀗𑁆𑀖 𑀫𑀤𑁆𑀤𑀺 𑀦𑀺𑀲𑀸𑀫𑁂𑀳𑀺. 𑀦𑀺𑀲𑀸𑀫𑀬𑀣 𑀲𑀸𑀥𑀯𑁄’’𑀢𑀺 𑀘 𑀆𑀤𑀻𑀲𑀼 𑀳𑀺 𑀑𑀮𑁄𑀓𑀦𑀲𑀯𑀦𑀸𑀦𑀺 𑀦𑀺𑀲𑀸𑀫𑀦𑀲𑀤𑁆𑀤𑁂𑀦 𑀯𑀼𑀢𑁆𑀢𑀸𑀦𑀺. 𑀅𑀧𑀺𑀘 𑀜𑀸𑀡𑁂𑀦 𑀉𑀧𑀧𑀭𑀺𑀓𑁆𑀔𑀡𑀫𑁆𑀧𑀺 𑀦𑀺𑀲𑀸𑀫𑀦𑀫𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀘𑀸𑀬𑀢𑀺, 𑀅𑀧𑀘𑀸𑀬𑀢𑀺. 𑀅𑀦𑀕𑀸𑀭𑁂 𑀧𑀩𑁆𑀩𑀚𑀺𑀢𑁂, 𑀅𑀧𑀘𑁂 𑀩𑁆𑀭𑀳𑁆𑀫𑀘𑀸𑀭𑀺𑀬𑁂. 𑀬𑁂 𑀯𑀼𑀤𑁆𑀥𑀫𑀧𑀘𑀸𑀬𑀦𑁆𑀢𑀺. 𑀅𑀧𑀘𑀺𑀢𑀺𑀁 𑀤𑀲𑁆𑀲𑁂𑀢𑀺. 𑀦𑀺𑀘𑁆𑀘𑀁 𑀯𑀼𑀤𑁆𑀥𑀸𑀧𑀘𑀸𑀬𑀺𑀦𑁄.

𑀬𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀭𑀓𑀸𑀭𑀦𑁆𑀢𑀥𑀸𑀢𑀼

𑀭𑀸 ¶ 𑀆𑀤𑀸𑀦𑁂. 𑀭𑀸𑀢𑀺.

𑀭𑀺 𑀲𑀦𑁆𑀢𑀸𑀦𑁂. 𑀭𑁂𑀢𑀺. 𑀭𑁂𑀡𑀼. 𑀭𑁂𑀡𑀽𑀢𑀺 𑀭𑀚𑁄.

𑀭𑀼 𑀕𑀢𑀺𑀬𑀁 𑀭𑁄𑀲𑀦𑁂 𑀘. 𑀭𑀯𑀢𑀺, 𑀯𑀺𑀭𑀯𑀢𑀺.

𑀭𑀼 𑀲𑀤𑁆𑀤𑁂. 𑀭𑁄𑀢𑀺, 𑀭𑀯𑀢𑀺. 𑀭𑀯𑁄, 𑀉𑀧𑀭𑀯𑁄. 𑀭𑀼𑀢𑀫𑀦𑀼𑀜𑁆𑀜𑀁 𑀭𑀼𑀘𑀺𑀬𑀸 𑀘 𑀧𑀺𑀝𑁆𑀞𑀺. 𑀭𑀼𑀢𑀦𑁆𑀢𑀺 𑀭𑀯𑀦𑀁 𑀭𑀼𑀢𑀁, 𑀲𑀤𑁆𑀤𑁄.

𑀭𑁂 𑀲𑀤𑁆𑀤𑁂. 𑀭𑀸𑀬𑀢𑀺. 𑀭𑀸. 𑀭𑀢𑁆𑀢𑀺. 𑀏𑀢𑁆𑀣 𑀘 𑀭𑀸𑀢𑀺 𑀲𑀤𑁆𑀤𑁄. 𑀭𑀢𑁆𑀢𑀻𑀢𑀺 𑀦𑀺𑀲𑀸𑀲𑀗𑁆𑀔𑀸𑀢𑁄 𑀲𑀢𑁆𑀢𑀸𑀦𑀁 𑀲𑀤𑁆𑀤𑀲𑁆𑀲 𑀯𑀽𑀧𑀲𑀫𑀓𑀸𑀮𑁄. 𑀭𑀸 𑀢𑀺𑀬𑁆𑀬𑀢𑀺 𑀉𑀘𑁆𑀙𑀺𑀚𑁆𑀚𑀢𑀺 𑀏𑀢𑁆𑀣𑀸𑀢𑀺 𑀭𑀢𑁆𑀢𑀺.

𑀩𑁆𑀭𑀽 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁. 𑀅𑀧𑀺 𑀳𑀦𑁆𑀢𑁆𑀯𑀸 𑀳𑀢𑁄 𑀩𑁆𑀭𑀽𑀢𑀺.

𑀩𑁆𑀭𑀯𑀻𑀢𑀺, 𑀩𑁆𑀭𑀼𑀦𑁆𑀢𑀺. 𑀩𑁆𑀭𑀽𑀲𑀺, 𑀩𑁆𑀭𑀽𑀣. 𑀩𑁆𑀭𑀽𑀫𑀺, 𑀩𑁆𑀭𑀽𑀫. 𑀩𑁆𑀭𑀽𑀢𑁂, 𑀩𑁆𑀭𑀼𑀯𑀦𑁆𑀢𑁂. 𑀩𑁆𑀭𑀽𑀲𑁂, 𑀩𑁆𑀭𑀼𑀯𑁆𑀳𑁂. 𑀩𑁆𑀭𑀼𑀯𑁂, 𑀩𑁆𑀭𑀼𑀫𑁆𑀳𑁂.

𑀩𑁆𑀭𑀽𑀢𑀼, 𑀩𑁆𑀭𑀼𑀯𑀺𑀢𑀼, 𑀩𑁆𑀭𑀼𑀯𑀦𑁆𑀢𑀼. 𑀩𑁆𑀭𑀽𑀳𑀺, 𑀩𑁆𑀭𑀽𑀣. 𑀩𑁆𑀭𑀽𑀫𑀺, 𑀩𑁆𑀭𑀽𑀫. 𑀩𑁆𑀭𑀽𑀢𑀁, 𑀩𑁆𑀭𑀼𑀯𑀦𑁆𑀢𑀁.

𑀏𑀢𑁆𑀣 𑀘 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑁂 ‘‘𑀧𑀼𑀦 𑀪𑀯𑀁 𑀕𑁄𑀢𑀫𑁄 𑀩𑁆𑀭𑀼𑀯𑀺𑀢𑀽’’𑀢𑀺 𑀧𑀸𑀴𑀺𑀤𑀲𑁆𑀲𑀦𑀢𑁄 ‘‘𑀩𑁆𑀭𑀼𑀯𑀺𑀢𑀽’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀩𑁆𑀩𑀢𑁆𑀣𑀸𑀧𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀦𑀬𑁄 𑀕𑀳𑁂𑀢𑀩𑁆𑀩𑁄.

𑀩𑁆𑀭𑀼𑀯𑁂𑀬𑁆𑀬, 𑀩𑁆𑀭𑀼𑀯𑁂, 𑀩𑁆𑀭𑀼𑀯𑁂𑀬𑁆𑀬𑀼𑀁. 𑀩𑁆𑀭𑀼𑀯𑁂𑀬𑁆𑀬𑀸𑀲𑀺, 𑀩𑁆𑀭𑀼𑀯𑁂𑀬𑁆𑀬𑀸𑀣. 𑀩𑁆𑀭𑀼𑀯𑁂𑀬𑁆𑀬𑀸𑀫𑀺, 𑀩𑁆𑀭𑀼𑀯𑁂𑀬𑁆𑀬𑀸𑀫. 𑀩𑁆𑀭𑀼𑀯𑁂𑀣, 𑀩𑁆𑀭𑀼𑀯𑁂𑀭𑀁. 𑀩𑁆𑀭𑀼𑀯𑁂𑀣𑁄, 𑀩𑁆𑀭𑀼𑀯𑁂𑀬𑁆𑀬𑀸𑀯𑁆𑀳𑁄. 𑀩𑁆𑀭𑀼𑀯𑁂𑀬𑁆𑀬𑀁. 𑀩𑁆𑀭𑀼𑀯𑁂𑀬𑁆𑀬𑀸𑀫𑁆𑀳𑁂.

𑀧𑀩𑁆𑀭𑀽𑀢𑀺. 𑀅𑀦𑀼𑀩𑁆𑀭𑀽𑀢𑀺. 𑀧𑀩𑁆𑀭𑀽𑀢𑀼, 𑀅𑀦𑀼𑀩𑁆𑀭𑀽𑀢𑀼. 𑀧𑀩𑁆𑀭𑀼𑀯𑁂𑀬𑁆𑀬, 𑀅𑀦𑀼𑀩𑁆𑀭𑀼𑀯𑁂𑀬𑁆𑀬. 𑀏𑀯𑀁 𑀲𑀩𑁆𑀩𑀢𑁆𑀣 𑀧𑀅𑀦𑀼𑀉𑀧𑀲𑀕𑁆𑀕𑁂𑀳𑀺𑀧𑀺 𑀬𑀣𑀸𑀲𑀫𑁆𑀪𑀯𑀁 𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸.

𑀆𑀳, 𑀆𑀳𑀼. 𑀩𑁆𑀭𑀯𑁂, 𑀩𑁆𑀭𑀯𑀺𑀢𑁆𑀣, 𑀩𑁆𑀭𑀯𑀺𑀭𑁂. 𑀩𑁆𑀭𑀯𑀺𑀢𑁆𑀣𑁄, 𑀩𑁆𑀭𑀯𑀺𑀯𑁆𑀳𑁄. 𑀩𑁆𑀭𑀯𑀺𑀁, 𑀩𑁆𑀭𑀯𑀺𑀫𑁆𑀳𑁂. 𑀧𑀭𑁄𑀓𑁆𑀔𑀸𑀯𑀲𑁂𑀦 𑀯𑀼𑀢𑁆𑀢𑀸𑀦𑀺.

𑀅𑀩𑁆𑀭𑀯𑀸 ¶ , 𑀅𑀩𑁆𑀭𑀯𑀽. 𑀅𑀩𑁆𑀭𑀯𑁄, 𑀅𑀩𑁆𑀭𑀯𑀢𑁆𑀣. 𑀅𑀩𑁆𑀭𑀯𑀁, 𑀅𑀩𑁆𑀭𑀯𑀫𑁆𑀳𑀸. 𑀅𑀩𑁆𑀭𑀯𑀢𑁆𑀣, 𑀅𑀩𑁆𑀭𑀯𑀢𑁆𑀣𑀼𑀁. 𑀅𑀩𑁆𑀭𑀯𑀲𑁂, 𑀅𑀩𑁆𑀭𑀯𑁆𑀳𑀁. 𑀅𑀩𑁆𑀭𑀯𑀺𑀁, 𑀅𑀩𑁆𑀭𑀯𑀺𑀫𑁆𑀳𑀲𑁂. 𑀳𑀺𑀬𑁆𑀬𑀢𑁆𑀢𑀦𑀻𑀯𑀲𑁂𑀦 𑀯𑀼𑀢𑁆𑀢𑀸𑀦𑀺.

𑀅𑀩𑁆𑀭𑀯𑀺, 𑀅𑀩𑁆𑀭𑀯𑀼𑀁. 𑀅𑀩𑁆𑀭𑀯𑁄, 𑀅𑀩𑁆𑀭𑀯𑀺𑀢𑁆𑀣. 𑀅𑀩𑁆𑀭𑀯𑀺𑀁, 𑀅𑀩𑁆𑀭𑀯𑀺𑀫𑁆𑀳𑀸. 𑀅𑀩𑁆𑀭𑀯𑀸, 𑀅𑀩𑁆𑀭𑀯𑀽. 𑀅𑀩𑁆𑀭𑀯𑀲𑁂, 𑀅𑀩𑁆𑀭𑀯𑀺𑀯𑁆𑀳𑀁. 𑀅𑀩𑁆𑀭𑀯𑀁, 𑀅𑀩𑁆𑀭𑀯𑀺𑀫𑁆𑀳𑁂. 𑀅𑀚𑁆𑀚𑀢𑀦𑀻𑀯𑀲𑁂𑀦 𑀯𑀼𑀢𑁆𑀢𑀸𑀦𑀺.

𑀩𑁆𑀭𑀼𑀯𑀺𑀲𑁆𑀲𑀢𑀺, 𑀩𑁆𑀭𑀼𑀯𑀺𑀲𑁆𑀲𑀦𑁆𑀢𑀺. 𑀅𑀩𑁆𑀭𑀯𑀺𑀲𑁆𑀲𑀸, 𑀅𑀩𑁆𑀭𑀯𑀺𑀲𑁆𑀲𑀁𑀲𑀼. 𑀲𑁂𑀲𑀁 𑀲𑀩𑁆𑀩𑀁 𑀦𑁂𑀢𑀩𑁆𑀩𑀁. 𑀓𑀫𑁆𑀫𑀧𑀤𑀁 𑀅𑀧𑁆𑀧𑀲𑀺𑀤𑁆𑀥𑀁. 𑀲𑀘𑁂 𑀧𑀦 𑀲𑀺𑀬𑀸, ‘‘𑀩𑁆𑀭𑀽𑀬𑀢𑀻’’𑀢𑀺 𑀲𑀺𑀬𑀸 ‘‘𑀮𑀼𑀬𑀢𑀺, 𑀮𑀽𑀬𑀢𑀻’’𑀢𑀺 𑀧𑀤𑀸𑀦𑀺 𑀯𑀺𑀬.

𑀚𑀻𑀭 𑀩𑁆𑀭𑀽𑀳𑀦𑁂. 𑀩𑁆𑀭𑀽𑀳𑀦𑀁 𑀯𑀟𑁆𑀠𑀦𑀁. 𑀚𑀻𑀭𑀢𑀺. 𑀚𑀻𑀭𑀁. 𑀚𑀻𑀭𑀫𑀸𑀦𑁄. 𑀚𑀻𑀭𑀡𑀁. 𑀅𑀧𑁆𑀧𑀲𑁆𑀲𑀼𑀢𑀸𑀬𑀁 𑀧𑀼𑀭𑀺𑀲𑁄, 𑀩𑀮𑀺𑀩𑀤𑁆𑀤𑁄𑀯 𑀚𑀻𑀭𑀢𑀺.

𑀧𑀽𑀭 𑀧𑀽𑀭𑀡𑁂. 𑀧𑀽𑀭𑀢𑀺. 𑀧𑀽𑀭𑀢𑁄𑀯 𑀫𑀳𑁄𑀤𑀥𑀺. 𑀲𑀩𑁆𑀩𑁂 𑀧𑀽𑀭𑁂𑀦𑁆𑀢𑀼 𑀲𑀗𑁆𑀓𑀧𑁆𑀧𑀸. 𑀧𑀽𑀭𑀺𑀢𑀼𑀁, 𑀧𑀽𑀭𑀺𑀢𑁆𑀯𑀸, 𑀧𑀽𑀭𑀁, 𑀧𑀽𑀭𑀺𑀢𑀁. 𑀧𑀼𑀡𑁆𑀡𑀁, 𑀧𑀭𑀺𑀧𑀼𑀡𑁆𑀡𑀁. 𑀲𑀫𑁆𑀧𑀼𑀡𑁆𑀡𑀁, 𑀧𑀽𑀭𑀡𑀁. 𑀧𑀽𑀭𑀡𑁄 𑀓𑀲𑁆𑀲𑀧𑁄. 𑀓𑀸𑀭𑀺𑀢𑁂 ‘‘𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑀺, 𑀧𑀽𑀭𑀬𑀢𑀺, 𑀧𑀽𑀭𑀸𑀧𑁂𑀢𑀺, 𑀧𑀽𑀭𑀸𑀧𑀬𑀢𑀺. 𑀧𑀽𑀭𑁂𑀢𑁆𑀯𑀸, 𑀧𑀽𑀭𑀬𑀺𑀢𑁆𑀯𑀸, 𑀧𑀽𑀭𑀸𑀧𑁂𑀢𑁆𑀯𑀸, 𑀧𑀽𑀭𑀸𑀧𑀬𑀺𑀢𑁆𑀯𑀸, 𑀧𑀭𑀺𑀧𑀽𑀭𑁂𑀢𑁆𑀯𑀸’’ 𑀇𑀘𑁆𑀘𑀸𑀤𑀻𑀦𑀺 𑀪𑀯𑀦𑁆𑀢𑀺.

𑀖𑁄𑀭 𑀕𑀢𑀺𑀧𑀝𑀺𑀖𑀸𑀢𑁂. 𑀕𑀢𑀺𑀧𑀝𑀺𑀖𑀸𑀢𑀁 𑀕𑀢𑀺𑀧𑀝𑀺𑀳𑀦𑀦𑀁. 𑀖𑁄𑀭𑀢𑀺.

𑀥𑁄𑀭 𑀕𑀢𑀺𑀘𑀸𑀢𑀼𑀭𑀺𑀬𑁂. 𑀕𑀢𑀺𑀘𑀸𑀢𑀼𑀭𑀺𑀬𑀁 𑀕𑀢𑀺𑀙𑁂𑀓𑀪𑀸𑀯𑁄. 𑀥𑁄𑀭𑁂𑀢𑀺.

𑀲𑀭 𑀕𑀢𑀺𑀬𑀁. 𑀲𑀭𑀢𑀺, 𑀯𑀺𑀲𑀭𑀢𑀺, 𑀉𑀲𑁆𑀲𑀭𑀢𑀺. 𑀉𑀲𑁆𑀲𑀸𑀭𑀡𑀸. 𑀲𑀭𑁄. 𑀲𑀁𑀲𑀸𑀭𑁄 𑀇𑀘𑁆𑀘𑀸𑀤𑀻𑀦𑀺. 𑀢𑀢𑁆𑀣 𑀲𑀭𑁄𑀢𑀺 𑀭𑀳𑀤𑁄. 𑀲𑀁𑀲𑀸𑀭𑁄𑀢𑀺 𑀯𑀝𑁆𑀝𑀁, 𑀬𑁄 ‘‘𑀪𑀯𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺.

𑀘𑀭 𑀘𑀭𑀡𑁂. 𑀘𑀭𑀢𑀺, 𑀯𑀺𑀘𑀭𑀢𑀺, 𑀅𑀦𑀼𑀘𑀭𑀢𑀺, 𑀲𑀜𑁆𑀘𑀭𑀢𑀺.

𑀘𑀭 ¶ 𑀕𑀢𑀺𑀪𑀓𑁆𑀔𑀦𑁂𑀲𑀼. 𑀘𑀭𑀢𑀺, 𑀯𑀺𑀘𑀭𑀢𑀺, 𑀅𑀦𑀼𑀘𑀭𑀢𑀺, 𑀲𑀜𑁆𑀘𑀭𑀢𑀺, 𑀧𑀝𑀺𑀘𑀭𑀢𑀺. 𑀘𑀭𑀺𑀬𑀸. 𑀘𑀭𑀺𑀢𑀸. 𑀘𑀸𑀭𑁄. 𑀯𑀺𑀘𑀸𑀭𑁄. 𑀅𑀦𑀼𑀯𑀺𑀘𑀸𑀭𑁄. 𑀉𑀧𑀯𑀺𑀘𑀸𑀭𑁄. 𑀘𑀭𑀡𑀁. 𑀘𑀸𑀭𑀓𑁄. 𑀑𑀘𑀭𑀓𑁄. 𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀘𑁆𑀘𑀸𑀤𑀻𑀦𑀺.

𑀢𑀢𑁆𑀣 𑀘𑀭𑀢𑀻𑀢𑀺 𑀕𑀘𑁆𑀙𑀢𑀺, 𑀪𑀓𑁆𑀔𑀢𑀺 𑀯𑀸. 𑀢𑀣𑀸 𑀳𑀺 𑀘𑀭𑀦𑁆𑀢𑀺 𑀧𑀤𑀲𑁆𑀲 𑀕𑀘𑁆𑀙𑀦𑁆𑀢𑁄 𑀔𑀸𑀤𑀦𑁆𑀢𑁄 𑀘𑀸𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺 𑀕𑀭𑀽. 𑀧𑀝𑀺𑀘𑀭𑀢𑀻𑀢𑀺 𑀧𑀝𑀺𑀘𑁆𑀙𑀸𑀤𑁂𑀢𑀺. 𑀘𑀸𑀭𑀓𑁄𑀢𑀺 𑀢𑀁𑀧𑀯𑁂𑀲𑀺𑀢𑀸𑀦𑀁 𑀲𑀢𑁆𑀢𑀸𑀦𑀁 𑀲𑀼𑀔𑀁 𑀘𑀭𑀢𑀺 𑀪𑀓𑁆𑀔𑀢𑀻𑀢𑀺 𑀘𑀸𑀭𑀓𑁄, 𑀭𑁄𑀥𑁄. 𑀑𑀘𑀭𑀓𑁄𑀢𑀺 𑀅𑀥𑁄𑀘𑀸𑀭𑀻. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀤𑀸𑀦𑀫𑁆𑀧𑀺 𑀯𑁂𑀬𑁆𑀬𑀸𑀯𑀘𑁆𑀘𑀫𑁆𑀧𑀺 𑀲𑀺𑀓𑁆𑀔𑀸𑀧𑀤𑀫𑁆𑀧𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑁄𑀧𑀺 𑀥𑀫𑁆𑀫𑀤𑁂𑀲𑀦𑀸𑀧𑀺 𑀫𑁂𑀣𑀼𑀦𑀯𑀺𑀭𑀢𑀺𑀧𑀺 𑀲𑀤𑀸𑀭𑀲𑀦𑁆𑀢𑁄𑀲𑁄𑀧𑀺 𑀉𑀧𑁄𑀲𑀣𑁄𑀧𑀺 𑀅𑀭𑀺𑀬𑀫𑀕𑁆𑀕𑁄𑀧𑀺 𑀲𑀓𑀮𑀁 𑀲𑀸𑀲𑀦𑀫𑁆𑀧𑀺 𑀅𑀚𑁆𑀛𑀸𑀲𑀬𑁄𑀧𑀺 𑀯𑀼𑀘𑁆𑀘𑀢𑀺.

𑀓𑀺𑀦𑁆𑀢𑁂 𑀯𑀢𑀁 𑀓𑀺𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁,

𑀓𑀺𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;

𑀇𑀤𑁆𑀥𑀺𑀚𑀼𑀢𑀺𑀩𑀮𑀯𑀻𑀭𑀺𑀬𑀽𑀧𑀧𑀢𑁆𑀢𑀺,

𑀇𑀤𑀜𑁆𑀘 𑀢𑁂 𑀦𑀸𑀕 𑀫𑀳𑀸𑀯𑀺𑀫𑀸𑀦𑀁.

𑀅𑀳𑀜𑁆𑀘 𑀪𑀭𑀺𑀬𑀸 𑀘 𑀫𑀦𑀼𑀲𑁆𑀲𑀮𑁄𑀓𑁂,

𑀲𑀤𑁆𑀥𑀸 𑀉𑀪𑁄 𑀤𑀸𑀦𑀧𑀢𑀻 𑀅𑀳𑀼𑀫𑁆𑀳𑀸;

𑀑𑀧𑀸𑀦𑀪𑀽𑀢𑀁 𑀫𑁂 𑀖𑀭𑀁 𑀢𑀤𑀸𑀲𑀺,

𑀲𑀦𑁆𑀢𑀧𑁆𑀧𑀺𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘.

𑀢𑀁 𑀫𑁂 𑀯𑀢𑀁 𑀢𑀁 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁,

𑀢𑀲𑁆𑀲 𑀲𑀼𑀘𑀺𑀡𑁆𑀡𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄;

𑀇𑀤𑁆𑀥𑀺𑀚𑀼𑀢𑀺𑀩𑀮𑀯𑀻𑀭𑀺𑀬𑀽𑀧𑀧𑀢𑁆𑀢𑀺,

𑀇𑀤𑀜𑁆𑀘 𑀫𑁂 𑀥𑀻𑀭 𑀫𑀳𑀸𑀯𑀺𑀫𑀸𑀦’’𑀦𑁆𑀢𑀺

𑀇𑀫𑀲𑁆𑀫𑀺𑀜𑁆𑀳𑀺 𑀧𑀼𑀡𑁆𑀡𑀓𑀚𑀸𑀢𑀓𑁂 𑀤𑀸𑀦𑀁 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁.

‘‘𑀓𑁂𑀦 ¶ 𑀧𑀸𑀡𑀺 𑀓𑀸𑀫𑀤𑀤𑁄, 𑀓𑁂𑀦 𑀧𑀸𑀡𑀺 𑀫𑀥𑀼𑀲𑁆𑀲𑀯𑁄;

𑀓𑁂𑀦 𑀢𑁂 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀧𑀼𑀜𑁆𑀜𑀁 𑀧𑀸𑀡𑀺𑀫𑁆𑀳𑀺 𑀇𑀚𑁆𑀛𑀢𑀺.

𑀢𑁂𑀦 𑀧𑀸𑀡𑀺 𑀓𑀸𑀫𑀤𑀤𑁄, 𑀢𑁂𑀦 𑀧𑀸𑀡𑀺 𑀫𑀥𑀼𑀲𑁆𑀲𑀯𑁄;

𑀢𑁂𑀦 𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀧𑀼𑀜𑁆𑀜𑀁 𑀧𑀸𑀡𑀺𑀫𑁆𑀳𑀺 𑀇𑀚𑁆𑀛𑀢𑀻’’𑀢𑀺

𑀇𑀫𑀲𑁆𑀫𑀺𑀁 𑀅𑀗𑁆𑀓𑀼𑀭𑀧𑁂𑀢𑀯𑀢𑁆𑀣𑀼𑀫𑁆𑀳𑀺 𑀯𑁂𑀬𑁆𑀬𑀸𑀯𑀘𑁆𑀘𑀁 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀇𑀤𑀁 𑀔𑁄 𑀢𑀁 𑀪𑀺𑀓𑁆𑀔𑀯𑁂 𑀢𑀺𑀢𑁆𑀢𑀺𑀭𑀺𑀬𑀁 𑀦𑀸𑀫 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀳𑁄𑀲𑀻’’𑀢𑀺 𑀇𑀫𑀲𑁆𑀫𑀺𑀁 𑀢𑀺𑀢𑁆𑀢𑀺𑀭𑀚𑀸𑀢𑀓𑁂 𑀲𑀺𑀓𑁆𑀔𑀸𑀧𑀤𑀁 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀢𑀁 𑀔𑁄 𑀧𑀦 𑀧𑀜𑁆𑀘𑀲𑀺𑀔 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑁂𑀯 𑀦𑀺𑀩𑁆𑀩𑀺𑀤𑀸𑀬 𑀦 𑀯𑀺𑀭𑀸𑀕𑀸𑀬…𑀧𑁂… 𑀬𑀸𑀯𑀤𑁂𑀯 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸’’𑀢𑀺 𑀇𑀫𑀲𑁆𑀫𑀺𑀁 𑀫𑀳𑀸𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑁂 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀸. ‘‘𑀏𑀓𑀲𑁆𑀫𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀫𑀺𑀁, 𑀲𑀳𑀲𑁆𑀲𑀁 𑀫𑀘𑁆𑀘𑀼𑀳𑀸𑀬𑀺𑀦𑁄’’𑀢𑀺 𑀏𑀢𑁆𑀣 𑀥𑀫𑁆𑀫𑀤𑁂𑀲𑀦𑀸 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀸. ‘‘𑀧𑀭𑁂 𑀅𑀩𑁆𑀭𑀳𑁆𑀫𑀘𑀸𑀭𑀻 𑀪𑀯𑀺𑀲𑁆𑀲𑀦𑁆𑀢𑀺, 𑀫𑀬𑀫𑁂𑀢𑁆𑀣 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀲𑀮𑁆𑀮𑁂𑀔𑀲𑀼𑀢𑁆𑀢𑁂 𑀫𑁂𑀣𑀼𑀦𑀯𑀺𑀭𑀢𑀺 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀸.

𑀫𑀬𑀜𑁆𑀘 𑀪𑀭𑀺𑀬𑀸 𑀦𑀸𑀢𑀺𑀓𑁆𑀓𑀫𑀸𑀫,

𑀅𑀫𑁆𑀳𑁂 𑀘 𑀪𑀭𑀺𑀬𑀸 𑀦𑀸𑀢𑀺𑀓𑁆𑀓𑀫𑀦𑁆𑀢𑀺;

𑀅𑀜𑁆𑀜𑀢𑁆𑀭 𑀢𑀸𑀳 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫;

𑀢𑀲𑁆𑀫𑀸 𑀳𑀺 𑀅𑀫𑁆𑀳𑀁 𑀤𑀳𑀭𑀸 𑀦 𑀫𑀻𑀬𑀭𑁂’’𑀢𑀺

𑀫𑀳𑀸𑀥𑀫𑁆𑀫𑀧𑀸𑀮𑀚𑀸𑀢𑀓𑁂 𑀲𑀤𑀸𑀭𑀲𑀦𑁆𑀢𑁄𑀲𑁄 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑁄.

𑀳𑀻𑀦𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀔𑀢𑁆𑀢𑀺𑀬𑁂 𑀉𑀧𑀧𑀚𑁆𑀚𑀢𑀺;

𑀫𑀚𑁆𑀛𑀺𑀫𑁂𑀦 𑀘 𑀤𑁂𑀯𑁂𑀲𑀼, 𑀉𑀢𑁆𑀢𑀫𑁂𑀦 𑀯𑀺𑀲𑀼𑀚𑁆𑀛𑀢𑀻’’𑀢𑀺

𑀏𑀯𑀁 𑀦𑀺𑀫𑀺𑀚𑀸𑀢𑀓𑁂 𑀅𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀓𑀢𑁄 𑀉𑀧𑁄𑀲𑀣𑁄 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑁄. ‘‘𑀇𑀤𑀁 𑀔𑁄 𑀧𑀦 𑀧𑀜𑁆𑀘𑀲𑀺𑀔 𑀩𑁆𑀭𑀳𑁆𑀫𑀘𑀭𑀺𑀬𑀁 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬…𑀧𑁂… 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺 ¶ 𑀫𑀳𑀸𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑀲𑁆𑀫𑀺𑀁𑀬𑁂𑀯 𑀅𑀭𑀺𑀬𑀫𑀕𑁆𑀕𑁄 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑁄. ‘‘𑀢𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁 𑀧𑀼𑀣𑀼𑀪𑀽𑀢𑀁 𑀬𑀸𑀯𑀤𑁂𑀯 𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢’’𑀦𑁆𑀢𑀺 𑀧𑀸𑀲𑀸𑀤𑀺𑀓𑀲𑀼𑀢𑁆𑀢𑁂 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀲𑀓𑀮𑀁 𑀲𑀸𑀲𑀦𑀁 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁.

‘‘𑀅𑀧𑀺 𑀅𑀢𑀭𑀫𑀸𑀦𑀸𑀦𑀁, 𑀨𑀮𑀸𑀲𑀸𑀯 𑀲𑀫𑀺𑀚𑁆𑀛𑀢𑀺;

𑀯𑀺𑀧𑀓𑁆𑀓𑀩𑁆𑀭𑀳𑁆𑀫𑀘𑀭𑀺𑀬𑁄𑀲𑁆𑀫𑀺, 𑀏𑀯𑀁 𑀚𑀸𑀦𑀸𑀳𑀺 𑀕𑀸𑀫𑀡𑀻’’𑀢𑀺

𑀏𑀢𑁆𑀣 𑀅𑀚𑁆𑀛𑀸𑀲𑀬𑁄 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑁄. 𑀇𑀘𑁆𑀘𑁂𑀯𑀁 𑁋

𑀤𑀸𑀦𑀁 𑀯𑁂𑀬𑁆𑀬𑀸𑀯𑀝𑀺𑀬𑀜𑁆𑀘, 𑀲𑀺𑀓𑁆𑀔𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀓𑀸;

𑀥𑀫𑁆𑀫𑀓𑁆𑀔𑀸𑀦𑀁 𑀫𑁂𑀣𑀼𑀦𑀢𑀸-𑀯𑀺𑀭𑀢𑀺 𑀘 𑀉𑀧𑁄𑀲𑀣𑁄.

𑀲𑀤𑀸𑀭𑁂𑀲𑀼 𑀘 𑀲𑀦𑁆𑀢𑁄𑀲𑁄, 𑀅𑀭𑀺𑀬𑀫𑀕𑁆𑀕𑁄 𑀘 𑀲𑀸𑀲𑀦𑀁;

𑀅𑀚𑁆𑀛𑀸𑀲𑀬𑁄 𑀘𑀺𑀫𑁂 𑀩𑁆𑀭𑀳𑁆𑀫-𑀘𑀭𑀺𑀬𑀲𑀤𑁆𑀤𑁂𑀦 𑀯𑀼𑀘𑁆𑀘𑀭𑁂.

𑀳𑀼𑀭 𑀓𑁄𑀝𑀺𑀮𑁆𑀮𑁂. 𑀳𑀼𑀭𑀢𑀺.

𑀲𑀭 𑀲𑀤𑁆𑀤𑁄𑀧𑀢𑀸𑀧𑁂𑀲𑀼. 𑀲𑀭𑀢𑀺. 𑀲𑀭𑁄, 𑀲𑀭𑀡𑀁.

𑀏𑀢𑁆𑀣 𑀘 𑀲𑀭𑁄𑀢𑀺 𑀲𑀤𑁆𑀤𑁄𑀧𑀺 𑀯𑀼𑀘𑁆𑀘𑀢𑀺 𑀉𑀲𑀼𑀧𑀺. 𑀲𑀭𑀡𑀦𑁆𑀢𑀺 𑀲𑀭𑀢𑀺 𑀉𑀧𑀢𑀸𑀧𑁂𑀢𑀺 𑀳𑀺𑀁𑀲𑀢𑀺 𑀲𑀭𑀡𑀕𑀢𑀸𑀦𑀁 𑀢𑁂𑀦𑁂𑀯 𑀲𑀭𑀡𑀕𑀫𑀦𑁂𑀦 𑀪𑀬𑀁 𑀲𑀦𑁆𑀢𑀸𑀧𑀁 𑀤𑀼𑀓𑁆𑀔𑀁 𑀤𑀼𑀕𑁆𑀕𑀢𑀺𑀁 𑀧𑀭𑀺𑀓𑀺𑀮𑁂𑀲𑀜𑁆𑀘𑀸𑀢𑀺 𑀲𑀭𑀡𑀁, 𑀩𑀼𑀤𑁆𑀥𑀸𑀤𑀺𑀭𑀢𑀦𑀢𑁆𑀢𑀬𑀁. 𑀅𑀣 𑀯𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀫𑀦𑀼𑀲𑁆𑀲𑀸 ‘‘𑀅𑀫𑁆𑀳𑀸𑀓𑀁 𑀲𑀭𑀡𑀫𑀺𑀤’’𑀦𑁆𑀢𑀺 𑀲𑀭𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑀺, 𑀢𑀁 𑀢𑀢𑁆𑀣 𑀘 𑀯𑀸𑀘𑀁 𑀦𑀺𑀘𑁆𑀙𑀭𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀘𑀸𑀢𑀺𑀧𑀺 𑀲𑀭𑀡𑀁.

𑀲𑀭 𑀘𑀺𑀦𑁆𑀢𑀸𑀬𑀁. 𑀲𑀭𑀢𑀺, 𑀲𑀼𑀲𑀭𑀢𑀺 𑀇𑀘𑁆𑀘𑀧𑀺 𑀧𑀬𑁄𑀕𑁄. 𑀅𑀧𑁆𑀧𑀓𑁆𑀔𑀭𑀸𑀦𑀜𑁆𑀳𑀺 𑀩𑀳𑀼𑀪𑀸𑀯𑁄 𑀅𑀜𑁆𑀜𑀣𑀸𑀪𑀸𑀯𑁄 𑀘 𑀳𑁄𑀢𑀺, 𑀬𑀣𑀸 ‘‘𑀤𑁆𑀯𑁂, 𑀤𑀼𑀯𑁂, 𑀢𑀡𑁆𑀳𑀸 𑀢𑀲𑀺𑀡𑀸, 𑀧𑀫𑁆𑀳𑀁, 𑀧𑀔𑀼𑀫’’𑀦𑁆𑀢𑀺. 𑀅𑀦𑀼𑀲𑁆𑀲𑀭𑀢𑀺, 𑀧𑀝𑀺𑀲𑁆𑀲𑀭𑀢𑀺. 𑀲𑀭𑀦𑁆𑀢𑀺 𑀏𑀢𑀸𑀬 𑀲𑀢𑁆𑀢𑀸, 𑀲𑀬𑀁 𑀯𑀸 𑀲𑀭𑀢𑀺, 𑀲𑀭𑀡𑀫𑀢𑁆𑀢𑀫𑁂𑀯 𑀯𑀸 𑀏𑀢𑀦𑁆𑀢𑀺 𑀲𑀢𑀺. 𑀅𑀦𑀼𑀲𑁆𑀲𑀢𑀺, 𑀧𑀝𑀺𑀲𑁆𑀲𑀢𑀺. 𑀲𑀭𑀢𑀻𑀢𑀺 𑀲𑀢𑁄. 𑀧𑀼𑀦𑀧𑁆𑀧𑀼𑀦𑀁 𑀲𑀭𑀢𑀻𑀢𑀺 𑀧𑀝𑀺𑀲𑁆𑀲𑀢𑁄.

𑀤𑁆𑀯𑀭 ¶ 𑀲𑀁𑀯𑀭𑀡𑁂. 𑀲𑀁𑀯𑀭𑀡𑀁 𑀭𑀓𑁆𑀔𑀡𑀸. 𑀤𑁆𑀯𑀭𑀢𑀺. 𑀤𑁆𑀯𑀸𑀭𑀁. 𑀤𑁆𑀯𑀺𑀲𑀤𑁆𑀤𑀽𑀧𑀧𑀤𑀅𑀭𑀥𑀸𑀢𑀼𑀯𑀲𑁂𑀦𑀧𑀺 𑀇𑀤𑀁 𑀭𑀽𑀧𑀁 𑀲𑀺𑀚𑁆𑀛𑀢𑀺. 𑀢𑀢𑁆𑀭𑀺𑀫𑀸𑀦𑀺 𑀦𑀺𑀩𑁆𑀩𑀘𑀦𑀸𑀦𑀺 𑁋 𑀤𑁆𑀯𑀭𑀦𑁆𑀢𑀺 𑀲𑀁𑀯𑀭𑀦𑁆𑀢𑀺 𑀭𑀓𑁆𑀔𑀦𑁆𑀢𑀺 𑀏𑀢𑁂𑀦𑀸𑀢𑀺 𑀤𑁆𑀯𑀸𑀭𑀁, 𑀅𑀣 𑀯𑀸 𑀤𑁆𑀯𑁂 𑀓𑀯𑀸𑀝𑀸 𑀅𑀭𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀢𑀺𑀧𑀺 𑀤𑁆𑀯𑀸𑀭𑀦𑁆𑀢𑀺. 𑀕𑁂𑀳𑀤𑁆𑀯𑀸𑀭𑀫𑁆𑀧𑀺 𑀓𑀸𑀬𑀤𑁆𑀯𑀸𑀭𑀸𑀤𑀻𑀦𑀺𑀧𑀺 𑀉𑀧𑀸𑀬𑁄𑀧𑀺 𑀤𑁆𑀯𑀸𑀭𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀸𑀴𑀺𑀬𑀁 𑀢𑀼 ‘‘𑀤𑁆𑀯𑀸𑀭𑀁 𑀤𑁆𑀯𑀸𑀭𑀸’’𑀢𑀺 𑀘 𑀇𑀢𑁆𑀣𑀺𑀦𑀧𑀼𑀁𑀲𑀓𑀯𑀲𑁂𑀦 𑀤𑁆𑀯𑀸𑀭𑀲𑀤𑁆𑀤𑁄 𑀯𑀼𑀢𑁆𑀢𑁄. 𑀢𑀣𑀸 𑀳𑀺 ‘‘𑀤𑁆𑀯𑀸𑀭𑀫𑁆𑀧𑀺 𑀲𑀼𑀭𑀓𑁆𑀔𑀺𑀢𑀁 𑀳𑁄𑀢𑀻’’𑀢𑀺 𑀘 ‘‘𑀤𑁆𑀯𑀸𑀭𑀸𑀧𑁂𑀲𑀸’’𑀢𑀺 𑀘 𑀢𑀲𑁆𑀲 𑀤𑁆𑀯𑀺𑀮𑀺𑀗𑁆𑀕𑀢𑀸 𑀯𑀼𑀢𑁆𑀢𑀸.

𑀕𑀭 𑀖𑀭 𑀲𑁂𑀘𑀦𑁂. 𑀕𑀭𑀢𑀺. 𑀖𑀭𑀢𑀺. 𑀖𑀭𑀁.

𑀥𑀽𑀭 𑀳𑀼𑀘𑁆𑀙𑀦𑁂. 𑀳𑀼𑀘𑁆𑀙𑀦 𑀓𑁄𑀝𑀺𑀮𑁆𑀮𑀁. 𑀥𑀽𑀭𑀢𑀺.

𑀢𑀭 𑀧𑁆𑀮𑀯𑀦𑀲𑀭𑀡𑁂𑀲𑀼. 𑀢𑀭𑀢𑀺. 𑀢𑀭𑀡𑀁. 𑀢𑀺𑀢𑁆𑀣𑀁. 𑀢𑀺𑀡𑁆𑀡𑁄. 𑀉𑀢𑁆𑀢𑀺𑀡𑁆𑀡𑁄. 𑀑𑀢𑀺𑀡𑁆𑀡𑁄 𑀇𑀘𑁆𑀘𑀸𑀤𑀻𑀦𑀺. 𑀢𑀢𑁆𑀣 𑀢𑀭𑀡𑀁 𑀯𑀼𑀘𑁆𑀘𑀢𑀺 𑀦𑀸𑀯𑀸, 𑀢𑀭𑀢𑀺 𑀉𑀤𑀓𑀧𑀺𑀝𑁆𑀞𑁂 𑀧𑁆𑀮𑀯𑀢𑀺, 𑀢𑀭𑀦𑁆𑀢𑀺 𑀉𑀢𑁆𑀢𑀭𑀦𑁆𑀢𑀺 𑀯𑀸 𑀦𑀤𑀺𑀁 𑀏𑀢𑁂𑀦𑀸𑀢𑀺 𑀅𑀢𑁆𑀣𑁂𑀦.

𑀦𑀸𑀯𑀸 𑀧𑁆𑀮𑀯𑁄 𑀢𑀭𑀁 𑀧𑁄𑀢𑁄, 𑀢𑀭𑀡𑀁 𑀉𑀢𑁆𑀢𑀭𑀁 𑀢𑀣𑀸;

𑀚𑀮𑀬𑀸𑀦𑀦𑁆𑀢𑀺 𑀏𑀢𑀸𑀦𑀺, 𑀦𑀸𑀯𑀸𑀦𑀸𑀫𑀸𑀦𑀺 𑀳𑁄𑀦𑁆𑀢𑀺 𑀢𑀼.

𑀢𑀭 𑀲𑀫𑁆𑀪𑀫𑁂. 𑀲𑀫𑁆𑀪𑀫𑁄 𑀅𑀦𑀯𑀝𑁆𑀞𑀸𑀦𑀁. 𑀢𑀭𑀢𑀺. 𑀢𑀭𑀺𑀢𑁄. 𑀢𑀼𑀭𑀗𑁆𑀕𑁄.

𑀏𑀢𑁆𑀣 𑀘 ‘‘𑀲𑁄 𑀫𑀸𑀲𑀔𑁂𑀢𑁆𑀢𑀁 𑀢𑀭𑀺𑀢𑁄 𑀅𑀯𑀸𑀲𑀭𑀺’’𑀦𑁆𑀢𑀺 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. 𑀢𑀢𑁆𑀣 𑀢𑀭𑀺𑀢𑁄𑀢𑀺 𑀢𑀼𑀭𑀺𑀢𑁄 𑀲𑀫𑁆𑀪𑀫𑀦𑁆𑀢𑁄. 𑀅𑀯𑀸𑀲𑀭𑀺𑀦𑁆𑀢𑀺 𑀉𑀧𑀕𑀘𑁆𑀙𑀺𑀁 𑀉𑀧𑀯𑀺𑀲𑀺𑀁 𑀯𑀸.

𑀚𑀭 𑀭𑁄𑀕𑁂. 𑀏𑀢𑁆𑀣 𑀚𑀭𑀭𑁄𑀕𑁄𑀬𑁂𑀯 ‘‘𑀭𑁄𑀕𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄 𑀧𑀬𑁄𑀕𑀯𑀲𑁂𑀦. 𑀚𑀭𑀲𑀤𑁆𑀤𑀲𑁆𑀲 𑀳𑀺 𑀚𑀭𑀭𑁄𑀕𑁂 𑀧𑀯𑀢𑁆𑀢𑀦𑀺𑀬𑀫𑀦𑀢𑁆𑀣𑀁 ‘‘𑀭𑁄𑀕𑁂’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀅𑀜𑁆𑀜𑁄 𑀭𑁄𑀕𑁄 𑀇𑀥 𑀭𑁄𑀕𑀲𑀤𑁆𑀤𑁂𑀦 𑀦 𑀯𑀼𑀘𑁆𑀘𑀢𑀺. 𑀚𑀭𑀢𑀺. 𑀚𑀭𑁄. 𑀲𑀚𑁆𑀚𑀭𑁄. 𑀧𑀚𑁆𑀚𑀭𑀭𑁄𑀕𑁄. 𑀚𑀭𑁂𑀦 𑀧𑀻𑀴𑀺𑀢𑀸 𑀫𑀦𑀼𑀲𑁆𑀲𑀸. 𑀬𑀢𑁆𑀣 𑀢𑀼 𑀅𑀬𑀁 𑀯𑀬𑁄𑀳𑀸𑀦𑀺𑀯𑀸𑀘𑀓𑁄 ¶ , 𑀢𑀢𑁆𑀣 𑀧𑀬𑁄𑀕𑁂 ‘‘𑀚𑀻𑀭𑀢𑀺, 𑀚𑀭𑀸’’𑀢𑀺 𑀘𑀲𑁆𑀲 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺.

𑀤𑀭 𑀪𑀬𑁂. 𑀤𑀭𑀢𑀺. 𑀤𑀭𑀻. ‘‘𑀩𑀻𑀮𑀸𑀲𑀬𑀸 𑀤𑀭𑀻𑀲𑀬𑀸’’𑀢𑀺 𑀦𑀺𑀤𑀲𑁆𑀲𑀦𑀁. 𑀢𑀢𑁆𑀣 𑀤𑀭𑀻𑀢𑀺 𑀪𑀸𑀬𑀺𑀢𑀩𑁆𑀩𑀝𑁆𑀞𑁂𑀦 𑀤𑀭𑀻.

𑀤𑀭 𑀆𑀤𑀭𑀸𑀦𑀸𑀤𑀭𑁂𑀲𑀼. 𑀤𑀭𑀢𑀺, 𑀆𑀤𑀭𑀢𑀺, 𑀅𑀦𑀸𑀤𑀭𑀢𑀺. 𑀆𑀤𑀭𑁄, 𑀅𑀦𑀸𑀤𑀭𑁄.

𑀏𑀢𑁆𑀣 𑀘 𑀤𑀭𑀢𑀻𑀢𑀺 𑀤𑀭𑀁 𑀓𑀭𑁄𑀢𑀻𑀢𑀺 𑀘 𑀅𑀦𑀸𑀤𑀭𑀁 𑀓𑀭𑁄𑀢𑀻𑀢𑀺 𑀘 𑀅𑀢𑁆𑀣𑁄. 𑀬𑀣𑀸 𑀳𑀺 𑀆𑀭𑀓𑀸𑀲𑀤𑁆𑀤𑁄 𑀤𑀽𑀭𑀸𑀲𑀦𑁆𑀦𑀯𑀸𑀘𑀓𑁄, 𑀢𑀣𑀸𑀬𑀫𑁆𑀧𑀺 𑀤𑀭𑀥𑀸𑀢𑀼 𑀆𑀤𑀭𑀸𑀦𑀸𑀤𑀭𑀯𑀸𑀘𑀓𑁄 𑀤𑀝𑁆𑀞𑀩𑁆𑀩𑁄. 𑀤𑀭𑀲𑀤𑁆𑀤𑁄 𑀘 𑀓𑀸𑀬𑀤𑀭𑀣𑁂 𑀘𑀺𑀢𑁆𑀢𑀤𑀭𑀣𑁂 𑀓𑀺𑀮𑁂𑀲𑀤𑀭𑀣𑁂 𑀘 𑀯𑀢𑁆𑀢𑀢𑀺. 𑀅𑀬𑀜𑁆𑀳𑀺 𑁋

𑀆𑀤𑀺𑀢𑁆𑀢𑀁 𑀯𑀢 𑀫𑀁 𑀲𑀦𑁆𑀢𑀁, 𑀖𑀢𑀲𑀺𑀢𑁆𑀢𑀁𑀯 𑀧𑀸𑀯𑀓𑀁;

𑀯𑀸𑀭𑀺𑀦𑀸 𑀯𑀺𑀬 𑀑𑀲𑀺𑀜𑁆𑀘𑀺, 𑀲𑀩𑁆𑀩𑀁 𑀦𑀺𑀩𑁆𑀩𑀸𑀧𑀬𑁂 𑀤𑀭’’𑀦𑁆𑀢𑀺

𑀏𑀢𑁆𑀣 𑀓𑀸𑀬𑀤𑀭𑀣𑁂 𑀘𑀺𑀢𑁆𑀢𑀤𑀭𑀣𑁂 𑀘 𑀯𑀢𑁆𑀢𑀢𑀺. ‘‘𑀯𑀻𑀢𑀤𑁆𑀤𑀭𑁄 𑀯𑀻𑀢𑀲𑁄𑀓𑁄 𑀯𑀻𑀢𑀲𑀮𑁆𑀮𑁄, 𑀲𑀬𑀁 𑀅𑀪𑀺𑀜𑁆𑀜𑀸𑀬 𑀅𑀪𑀸𑀲𑀺 𑀩𑀼𑀤𑁆𑀥𑁄’’𑀢𑀺 𑀏𑀢𑁆𑀣 𑀧𑀦 𑀓𑀺𑀮𑁂𑀲𑀤𑀭𑀣𑁂 𑀯𑀢𑁆𑀢𑀢𑀺. 𑀯𑀻𑀢𑀤𑁆𑀤𑀭𑁄𑀢𑀺 𑀳𑀺 𑀅𑀕𑁆𑀕𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀯𑀺𑀕𑀢𑀓𑀺𑀮𑁂𑀲𑀤𑀭𑀣𑁄𑀢𑀺 𑀅𑀢𑁆𑀣𑁄.

𑀦𑀭 𑀦𑀬𑀦𑁂. 𑀦𑀭𑀢𑀺. 𑀦𑀭𑁄, 𑀦𑀸𑀭𑀻.

𑀏𑀢𑁆𑀣 𑀦𑀭𑁄𑀢𑀺 𑀧𑀼𑀭𑀺𑀲𑁄. 𑀲𑁄 𑀳𑀺 𑀦𑀭𑀢𑀺 𑀦𑁂𑀢𑀻𑀢𑀺 𑀦𑀭𑁄. 𑀬𑀣𑀸 𑀧𑀞𑀫𑀧𑀓𑀢𑀺𑀪𑀽𑀢𑁄 𑀲𑀢𑁆𑀢𑁄 𑀤𑀢𑀭𑀸𑀬 𑀧𑀓𑀢𑀺𑀬𑀸 𑀲𑁂𑀝𑁆𑀞𑀝𑁆𑀞𑁂𑀦 𑀧𑀼𑀭𑀺 𑀉𑀘𑁆𑀘𑀸𑀝𑁆𑀞𑀸𑀦𑁂 𑀲𑁂𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀼𑀭𑀺𑀲𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀦𑀬𑀦𑀝𑁆𑀞𑁂𑀦 𑀦𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀼𑀢𑁆𑀢𑀪𑀸𑀢𑀼𑀪𑀽𑀢𑁄𑀧𑀺 𑀳𑀺 𑀧𑀼𑀕𑁆𑀕𑀮𑁄 𑀫𑀸𑀢𑀼𑀚𑁂𑀝𑁆𑀞𑀪𑀕𑀺𑀦𑀻𑀦𑀁 𑀦𑁂𑀢𑀼𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀧𑀕𑁂𑀯 𑀇𑀢𑀭𑁄 𑀇𑀢𑀭𑀸𑀲𑀁. 𑀦𑀸𑀭𑀻𑀢𑀺 𑀦𑀭𑁂𑀦 𑀬𑁄𑀕𑀢𑁄, 𑀦𑀭𑀲𑁆𑀲𑀸𑀬𑀦𑁆𑀢𑀺 𑀯𑀸 𑀦𑀸𑀭𑀻. 𑀅𑀧𑀭𑀫𑁆𑀧𑁂𑀢𑁆𑀣 𑀦𑀭𑀲𑀤𑁆𑀤𑀲𑁆𑀲 𑀦𑀺𑀩𑁆𑀩𑀘𑀦𑀁, 𑀦𑀭𑀺𑀬𑀢𑀺 𑀲𑀓𑁂𑀦 ¶ 𑀓𑀫𑁆𑀫𑁂𑀦 𑀦𑀺𑀬𑁆𑀬𑀢𑀻𑀢𑀺 𑀦𑀭𑁄, 𑀲𑀢𑁆𑀢𑁄 𑀫𑀦𑀼𑀲𑁆𑀲𑁄 𑀯𑀸. ‘‘𑀓𑀫𑁆𑀫𑁂𑀦 𑀦𑀺𑀬𑁆𑀬𑀢𑁂𑀑 𑀮𑁄𑀓𑁄’’𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀭𑀲𑀤𑁆𑀤𑀲𑁆𑀲 𑀢𑀸𑀯 𑀧𑀼𑀭𑀺𑀲𑀯𑀘𑀦𑁂 ‘‘𑀦𑀭𑀸 𑀘 𑀅𑀣 𑀦𑀸𑀭𑀺𑀬𑁄’’𑀢𑀺 𑀦𑀺𑀤𑀲𑁆𑀲𑀦𑀁. 𑀲𑀢𑁆𑀢𑀫𑀦𑀼𑀲𑁆𑀲𑀯𑀘𑀦𑁂 𑀧𑀦 ‘‘𑀩𑀼𑀤𑁆𑀥𑁄 𑀅𑀬𑀁 𑀏𑀤𑀺𑀲𑀓𑁄 𑀦𑀭𑀼𑀢𑁆𑀢𑀫𑁄. 𑀆𑀫𑁄𑀤𑀺𑀢𑀸 𑀦𑀭𑀫𑀭𑀽’’𑀢𑀺 𑀘 𑀦𑀺𑀤𑀲𑁆𑀲𑀦𑀁, 𑀢𑀲𑁆𑀫𑀸 ‘‘𑀦𑀭𑁄𑀢𑀺 𑀧𑀼𑀭𑀺𑀲𑁄, 𑀦𑀭𑁄𑀢𑀺 𑀲𑀢𑁆𑀢𑁄, 𑀦𑀭𑁄𑀢𑀺 𑀫𑀦𑀼𑀲𑁆𑀲𑁄’’𑀢𑀺 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀲𑀫𑁆𑀪𑀯𑀁 𑀅𑀢𑁆𑀣𑁄 𑀲𑀁𑀯𑀡𑁆𑀡𑁂𑀢𑀩𑁆𑀩𑁄.

𑀳𑀭 𑀳𑀭𑀡𑁂. 𑀳𑀭𑀡𑀁 𑀧𑀯𑀢𑁆𑀢𑀦𑀁. 𑀳𑀭𑀢𑀺. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺. 𑀯𑀺𑀳𑀸𑀲𑀺. 𑀯𑀺𑀳𑀁𑀲𑀼. 𑀯𑀺𑀳𑀭𑀺𑀲𑁆𑀲𑀢𑀺. 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀺𑀲𑁆𑀲𑀢𑀺. 𑀯𑁄𑀳𑀭𑀢𑀺. 𑀲𑀁𑀯𑁄𑀳𑀭𑀢𑀺. 𑀲𑀩𑁆𑀩𑁄 𑀳𑀭𑀢𑀺 𑀯𑀸. 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑁄, 𑀭𑀽𑀧𑀺𑀬𑀲𑀩𑁆𑀩𑁄𑀳𑀸𑀭𑁄 𑀯𑀸. 𑀧𑀸𑀝𑀺𑀳𑀸𑀭𑀺𑀬𑀁. 𑀧𑀻𑀢𑀺𑀧𑀸𑀫𑁄𑀚𑁆𑀚𑀳𑀸𑀭𑁄. 𑀯𑀺𑀳𑀸𑀭𑁄. 𑀯𑁄𑀳𑀸𑀭𑁄. 𑀅𑀪𑀺𑀳𑀸𑀭𑁄. 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺. 𑀲𑀸𑀲𑀦𑁂 𑀯𑀺𑀳𑀭𑀁, 𑀯𑀺𑀳𑀭𑀦𑁆𑀢𑁄, 𑀯𑀺𑀳𑀭𑀫𑀸𑀦𑁄. 𑀯𑀺𑀳𑀸𑀢𑀩𑁆𑀩𑀁, 𑀯𑀺𑀳𑀭𑀺𑀢𑀼𑀁. 𑀯𑀺𑀳𑀭𑀺𑀢𑁆𑀯𑀸. 𑀅𑀜𑁆𑀜𑀸𑀦𑀺𑀧𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀢𑀢𑁆𑀣 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀓𑀢𑀓𑀺𑀘𑁆𑀘𑁂𑀦 𑀧𑀘𑁆𑀙𑀸 𑀳𑀭𑀺𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀧𑀸𑀝𑀺𑀳𑀸𑀭𑀺𑀬𑀁. 𑀧𑀝𑀻𑀢𑀺 𑀳𑀺 𑀅𑀬𑀁 𑀲𑀤𑁆𑀤𑁄 ‘‘𑀧𑀘𑁆𑀙𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀩𑁄𑀥𑁂𑀢𑀺 ‘‘𑀢𑀲𑁆𑀫𑀺𑀁 𑀧𑀝𑀺𑀧𑀯𑀺𑀝𑁆𑀞𑀫𑁆𑀳𑀺, 𑀅𑀜𑁆𑀜𑁄 𑀆𑀕𑀜𑁆𑀙𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀯𑀺𑀳𑀸𑀭𑁄𑀢𑀺 𑀞𑀸𑀦𑀦𑀺𑀲𑀚𑁆𑀚𑀸𑀤𑀺𑀦𑀸 𑀯𑀺𑀳𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀺𑀳𑀸𑀭𑁄, 𑀪𑀺𑀓𑁆𑀔𑀽𑀦𑀁 𑀆𑀯𑀸𑀲𑁄. 𑀯𑀺𑀳𑀭𑀡𑀁 𑀯𑀸 𑀯𑀺𑀳𑀸𑀭𑁄, 𑀯𑀺𑀳𑀭𑀡𑀓𑁆𑀭𑀺𑀬𑀸. 𑀯𑁄𑀳𑀸𑀭𑁄𑀢𑀺 𑀩𑁆𑀬𑀯𑀳𑀸𑀭𑁄𑀧𑀺 𑀧𑀡𑁆𑀡𑀢𑁆𑀢𑀺𑀧𑀺 𑀯𑀘𑀦𑀫𑁆𑀧𑀺 𑀘𑁂𑀢𑀦𑀸𑀧𑀺. 𑀢𑀢𑁆𑀣

𑀬𑁄 𑀳𑀺 𑀓𑁄𑀘𑀺 𑀫𑀦𑀼𑀲𑁆𑀲𑁂𑀲𑀼, 𑀯𑁄𑀳𑀸𑀭𑀁 𑀉𑀧𑀚𑀻𑀯𑀢𑀺;

𑀏𑀯𑀁 𑀯𑀸𑀲𑁂𑀝𑁆𑀞 𑀚𑀸𑀦𑀸𑀢𑀺, 𑀯𑀸𑀡𑀺𑀚𑁄 𑀲𑁄 𑀦𑀩𑁆𑀭𑀸𑀳𑁆𑀫𑀡𑁄’’𑀢𑀺.

𑀅𑀬𑀁 ¶ 𑀩𑁆𑀬𑀯𑀳𑀸𑀭𑀯𑁄𑀳𑀸𑀭𑁄 𑀦𑀸𑀫. ‘‘𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄’’𑀢𑀺 𑀅𑀬𑀁 𑀧𑀡𑁆𑀡𑀢𑁆𑀢𑀺𑀯𑁄𑀳𑀸𑀭𑁄 𑀦𑀸𑀫. 𑀢𑀣𑀸 𑀢𑀣𑀸 𑀯𑁄𑀳𑀭𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑀻𑀢𑀺 𑀅𑀬𑀁 𑀯𑀘𑀦𑀯𑁄𑀳𑀸𑀭𑁄 𑀦𑀸𑀫. ‘‘𑀅𑀝𑁆𑀞 𑀅𑀭𑀺𑀬𑀯𑁄𑀳𑀸𑀭𑀸, 𑀅𑀝𑁆𑀞 𑀅𑀦𑀭𑀺𑀬𑀯𑁄𑀳𑀸𑀭𑀸’’𑀢𑀺 𑀅𑀬𑀁 𑀘𑁂𑀢𑀦𑀸𑀯𑁄𑀳𑀸𑀭𑁄 𑀦𑀸𑀫. 𑀇𑀘𑁆𑀘𑁂𑀯𑀁 𑁋

𑀩𑁆𑀬𑀯𑀳𑀸𑀭𑁂 𑀯𑀘𑀦𑁂 𑀘, 𑀧𑀡𑁆𑀡𑀢𑁆𑀢𑀺𑀘𑁂𑀢𑀦𑀸𑀲𑀼 𑀘;

𑀯𑁄𑀳𑀸𑀭𑀲𑀤𑁆𑀤𑁄 𑀘𑀢𑀽𑀲𑀼, 𑀇𑀫𑁂𑀲𑁆𑀯𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺.

𑀳𑀭 𑀅𑀧𑀦𑀬𑀦𑁂. 𑀅𑀧𑀦𑀬𑀦𑀁 𑀦𑀻𑀳𑀭𑀡𑀁. 𑀤𑁄𑀲𑀁 𑀳𑀭𑀢𑀺. 𑀦𑀻𑀳𑀭𑀢𑀺. 𑀦𑀻𑀳𑀸𑀭𑁄, 𑀧𑀭𑀺𑀳𑀭𑀢𑀺. 𑀧𑀭𑀺𑀳𑀸𑀭𑁄. 𑀭𑀚𑁄𑀳𑀭𑀡𑀁. 𑀲𑀩𑁆𑀩𑀤𑁄𑀲𑀳𑀭𑁄 𑀥𑀫𑁆𑀫𑁄. 𑀪𑀕𑀯𑀢𑁄 𑀘 𑀲𑀸𑀲𑀦𑀲𑁆𑀲 𑀘 𑀧𑀝𑀺𑀧𑀓𑁆𑀔𑁂 𑀢𑀺𑀢𑁆𑀣𑀺𑀬𑁂 𑀳𑀭𑀢𑀻𑀢𑀺 𑀧𑀸𑀝𑀺𑀳𑀸𑀭𑀺𑀬𑀁. 𑀫𑀢𑁆𑀢𑀸𑀯𑀡𑁆𑀡𑀪𑁂𑀤𑁂𑀦𑁂𑀢𑁆𑀣 ‘‘𑀧𑀸𑀝𑀺𑀳𑁂𑀭𑀁 𑀧𑀸𑀝𑀺𑀳𑀻𑀭𑀁 𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀢𑀻𑀡𑀺 𑀧𑀤𑀭𑀽𑀧𑀸𑀦𑀺, 𑀪𑀯𑀦𑁆𑀢𑀺.

𑀳𑀭 𑀆𑀤𑀸𑀦𑁂. 𑀅𑀤𑀺𑀦𑁆𑀦𑀁 𑀳𑀭𑀢𑀺. 𑀳𑀭𑀺𑀲𑁆𑀲𑀢𑀺. 𑀳𑀸𑀳𑀺𑀢𑀺 𑀇𑀘𑁆𑀘𑀧. ‘‘𑀔𑀭𑀸𑀚𑀺𑀦𑀁 𑀧𑀭 𑀲𑀼𑀜𑁆𑀘, 𑀔𑀸𑀭𑀺𑀓𑀸𑀚𑀜𑁆𑀘 𑀳𑀸𑀳𑀺𑀢𑀻’’𑀢𑀺 𑀇𑀤𑀫𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀆𑀳𑀭𑀢𑀺, 𑀅𑀯𑀳𑀭𑀢𑀺, 𑀲𑀁𑀳𑀭𑀢𑀺, 𑀅𑀧𑀳𑀭𑀢𑀺, 𑀉𑀧𑀳𑀭𑀢𑀺, 𑀧𑀳𑀭𑀢𑀺, 𑀲𑀫𑁆𑀧𑀳𑀭𑀢𑀺, 𑀲𑀫𑀸𑀳𑀭𑀢𑀺. 𑀫𑀦𑁄𑀳𑀭𑁄 𑀧𑀸𑀲𑀸𑀤𑁄. 𑀧𑀭𑀲𑁆𑀲𑀳𑀭𑀡𑀁. 𑀆𑀳𑀸𑀭𑁄, 𑀅𑀯𑀳𑀸𑀭𑁄, 𑀲𑀁𑀳𑀸𑀭𑁄, 𑀉𑀧𑀳𑀸𑀭𑁄, 𑀲𑀫𑁆𑀧𑀳𑀸𑀭𑁄, 𑀲𑀫𑀸𑀳𑀸𑀭𑁄. 𑀳𑀭𑀺𑀬𑁆𑀬𑀢𑀺, 𑀆𑀳𑀭𑀺𑀬𑁆𑀬𑀢𑀺. 𑀆𑀳𑀭𑀺𑀬𑁆𑀬𑀦𑁆𑀢𑀺. 𑀆𑀳𑀝𑀁, 𑀳𑀭𑀺𑀢𑀼𑀁, 𑀆𑀳𑀭𑀺𑀢𑀼𑀁, 𑀆𑀳𑀭𑀺𑀢𑁆𑀯𑀸, 𑀆𑀳𑀭𑀺𑀢𑁆𑀯𑀸𑀦. 𑀅𑀜𑁆𑀜𑀸𑀦𑀺𑀧𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀥𑀭 𑀥𑀭𑀡𑁂. 𑀥𑀭𑀡𑀁 𑀯𑀺𑀚𑁆𑀚𑀫𑀸𑀦𑀢𑀸. 𑀥𑀭𑀢𑀺. 𑀥𑀭𑀢𑁂 𑀲𑀢𑁆𑀣𑀼𑀲𑀸𑀲𑀦𑀁.

𑀥𑀭 𑀅𑀯𑀺𑀤𑁆𑀥𑀁𑀲𑀦𑁂. 𑀦𑀺𑀩𑁆𑀩𑀸𑀦𑀁 𑀦𑀺𑀘𑁆𑀘𑀁 𑀥𑀭𑀢𑀺.

𑀔𑀭 𑀔𑀬𑁂. 𑀔𑀭𑀢𑀺. 𑀔𑀭𑀡𑀁. 𑀦𑀓𑁆𑀔𑀭𑀦𑁆𑀢𑀺 𑀦 𑀔𑀺𑀬𑁆𑀬𑀦𑁆𑀢𑀻𑀢𑀺 𑀅𑀓𑁆𑀔𑀭𑀸𑀦𑀺. 𑀦𑀓𑁆𑀔𑀭𑀦𑁆𑀢𑀺 𑀦 𑀦𑀲𑁆𑀲𑀦𑁆𑀢𑀻𑀢𑀺 𑀦𑀓𑁆𑀔𑀢𑁆𑀢𑀸𑀦𑀻𑀢𑀺 𑀧𑁄𑀭𑀸𑀡𑀸.

𑀚𑀸𑀕𑀭𑀦𑀺𑀤𑁆𑀤𑀓𑁆𑀔𑀬𑁂 ¶ 𑀚𑀸𑀕𑀭𑀢𑀺. 𑀚𑀸𑀕𑀭𑁄, 𑀚𑀸𑀕𑀭𑀡𑀁, 𑀚𑀸𑀕𑀭𑀁. 𑀤𑀻𑀖𑀸 𑀚𑀸𑀕𑀭𑀢𑁄 𑀭𑀢𑁆𑀢𑀺. 𑀚𑀸𑀕𑀭𑀫𑀸𑀦𑁄. 𑀅𑀬𑀜𑁆𑀘 𑀥𑀸𑀢𑀼 𑀢𑀦𑀸𑀤𑀺𑀕𑀡𑀁 𑀧𑀢𑁆𑀯𑀸 ‘‘𑀚𑀸𑀕𑀭𑁄𑀢𑀺, 𑀧𑀝𑀺𑀚𑀸𑀕𑀭𑁄𑀢𑀻’’𑀢𑀺 𑀭𑀽𑀧𑀸𑀦𑀺 𑀚𑀦𑁂𑀢𑀺.

𑀈𑀭 𑀯𑀘𑀦𑁂 𑀕𑀢𑀺𑀓𑀫𑁆𑀧𑀦𑁂𑀲𑀼 𑀘. 𑀈𑀭𑀢𑀺. 𑀈𑀭𑀺𑀢𑀁. 𑀏𑀭𑀺𑀢𑀁. 𑀲𑀫𑀻𑀭𑀡𑁄. 𑀚𑀺𑀦𑁂𑀭𑀺𑀢𑁄 𑀥𑀫𑁆𑀫𑁄. 𑀓𑀼𑀧𑁆𑀧𑀦𑁆𑀢𑀺 𑀯𑀸𑀢𑀲𑁆𑀲𑀧𑀺 𑀏𑀭𑀺𑀢𑀲𑁆𑀲.

𑀢𑀢𑁆𑀣 𑀲𑀫𑀻𑀭𑀡𑁄𑀢𑀺 𑀯𑀸𑀢𑁄. 𑀲𑁄 𑀳𑀺 𑀲𑀫𑀻𑀭𑀢𑀺 𑀯𑀸𑀬𑀢𑀺, 𑀲𑀫𑀻𑀭𑁂𑀢𑀺 𑀘 𑀭𑀼𑀓𑁆𑀔𑀲𑀸𑀔𑀸𑀧𑀡𑁆𑀡𑀸𑀤𑀻𑀦𑀺 𑀲𑀼𑀝𑁆𑀞𑀼 𑀓𑀫𑁆𑀧𑁂𑀢𑀻𑀢𑀺 ‘‘𑀲𑀫𑀻𑀭𑀡𑁄’’𑀢𑀺 𑀯𑀼𑀘𑁆𑀘𑀢𑀺.

𑀳𑀭𑁂 𑀮𑀚𑁆𑀚𑀸𑀬𑀁. 𑀅𑀮𑀼𑀢𑁆𑀢𑀦𑁆𑀢𑁄𑀬𑀫𑁂𑀓𑀸𑀭𑀦𑁆𑀢𑁄 𑀥𑀸𑀢𑀼, 𑀕𑀺𑀮𑁂 𑀧𑀻𑀢𑀺𑀓𑁆𑀔𑀬𑁂𑀢𑀺 𑀥𑀸𑀢𑀼 𑀯𑀺𑀬. 𑀳𑀭𑀸𑀬𑀢𑀺. 𑀳𑀭𑀸𑀬𑀦𑀁. 𑀅𑀝𑁆𑀝𑀻𑀬𑀸𑀫𑀺 𑀳𑀭𑀸𑀬𑀸𑀫𑀺.

𑀏𑀢𑁆𑀣 𑀳𑀭𑀸𑀬𑀢𑀻𑀢𑀺 𑀮𑀚𑁆𑀚𑀢𑀺, 𑀳𑀺𑀭𑀺𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑀧𑀭 𑀧𑀸𑀮𑀦𑀧𑀽𑀭𑀡𑁂𑀲𑀼. ‘‘𑀧𑀭𑀢𑀺, 𑀧𑀭𑀫𑁄’’𑀢𑀺𑀫𑀲𑁆𑀲 𑀭𑀽𑀧𑀸𑀦𑀺, 𑀦𑀭 𑀦𑀬𑀦𑁂𑀢𑀺 𑀥𑀸𑀢𑀼𑀲𑁆𑀲 ‘‘𑀦𑀭𑀢𑀺 𑀦𑀭𑁄’’𑀢𑀺 𑀭𑀽𑀧𑀸𑀦𑀺 𑀯𑀺𑀬.

𑀢𑀢𑁆𑀣 𑀧𑀭𑀢𑀻𑀢𑀺 𑀧𑀸𑀮𑁂𑀢𑀺, 𑀧𑀽𑀭𑀢𑀺 𑀯𑀸. 𑀲𑀼𑀤𑁆𑀥𑀓𑀢𑁆𑀢𑀼𑀯𑀲𑁂𑀦𑀺𑀤𑀁 𑀧𑀤𑀁 𑀯𑀼𑀢𑁆𑀢𑀁. 𑀳𑁂𑀢𑀼𑀓𑀢𑁆𑀢𑀼𑀯𑀲𑁂𑀦 𑀳𑀺 ‘‘𑀧𑀸𑀭𑁂𑀢𑀺 𑀧𑀸𑀭𑀬𑀢𑀻’’𑀢𑀺𑀆𑀤𑀻𑀦𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀧𑀭𑀫𑁄𑀢𑀺 𑀧𑀸𑀮𑀓𑁄 𑀧𑀽𑀭𑀓𑁄 𑀯𑀸. 𑀏𑀢𑁆𑀣 𑀘 ‘‘𑀧𑀸𑀭𑀫𑀻’’𑀢𑀺 𑀧𑀤𑀁 𑀏𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁. 𑀢𑀣𑀸 𑀳𑀺 𑀧𑀸𑀭𑀫𑀻𑀢𑀺 𑀧𑀭𑀢𑀺, 𑀧𑀸𑀭𑁂𑀢𑀺 𑀘𑀸𑀢𑀺 𑀧𑀭𑀫𑁄, 𑀤𑀸𑀦𑀸𑀤𑀻𑀦𑀁 𑀕𑀼𑀡𑀸𑀦𑀁 𑀧𑀸𑀮𑀓𑁄 𑀧𑀽𑀭𑀓𑁄 𑀘 𑀫𑀳𑀸𑀩𑁄𑀥𑀺𑀲𑀢𑁆𑀢𑁄. 𑀧𑀭𑀫𑀲𑁆𑀲 𑀇𑀤𑀁, 𑀧𑀭𑀫𑀲𑁆𑀲 𑀯𑀸 𑀪𑀸𑀯𑁄, 𑀓𑀫𑁆𑀫𑀁 𑀯𑀸 𑀧𑀸𑀭𑀫𑀻, 𑀤𑀸𑀦𑀸𑀤𑀺𑀓𑁆𑀭𑀺𑀬𑀸. 𑀕𑀭𑀽𑀳𑀺 𑀧𑀦 ‘‘𑀧𑀽𑀭𑁂𑀢𑀻𑀢𑀺 𑀧𑀭𑀫𑁄, 𑀤𑀸𑀦𑀸𑀤𑀻𑀦𑀁 𑀕𑀼𑀡𑀸𑀦𑀁 𑀧𑀽𑀭𑀓𑁄 𑀧𑀸𑀮𑀓𑁄 𑀘𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀯𑀻𑀫𑀁𑀲𑀺𑀢𑀩𑀁.

𑀯𑀭 𑀯𑀭𑀡𑁂. 𑀯𑀭𑀢𑀺. 𑀯𑀸𑀭𑀡𑁄, 𑀯𑀭𑀼𑀡𑁄.

𑀕𑀺𑀭 ¶ 𑀦𑀺𑀕𑁆𑀕𑀺𑀭𑀡𑁄. 𑀦𑀺𑀕𑁆𑀕𑀺𑀭𑀡𑀁 𑀧𑀕𑁆𑀖𑀭𑀡𑀁. 𑀕𑀺𑀭𑀢𑀺, 𑀕𑀺𑀭𑀺.

𑀏𑀢𑁆𑀣 𑀕𑀺𑀭𑀻𑀢𑀺 𑀧𑀩𑁆𑀩𑀢𑀸, 𑀬𑁄 ‘𑀲𑁂𑀮𑁄’’𑀢𑀺𑀆𑀤𑀻𑀳𑀺 𑀅𑀦𑁂𑀓𑁂𑀳𑀺 𑀦𑀸𑀫𑁂𑀳𑀺 𑀓𑀣𑀺𑀬𑀢𑀺. 𑀲𑁄 𑀳𑀺 𑀲𑀦𑁆𑀥𑀺𑀲𑀗𑁆𑀔𑀸𑀢𑁂𑀳𑀺 𑀧𑀩𑁆𑀩𑁂𑀳𑀺 𑀘𑀺𑀢𑀢𑁆𑀢𑀸 𑀧𑀩𑁆𑀩𑀫𑀲𑁆𑀲 𑀅𑀢𑁆𑀣𑀻𑀢𑀺 𑀧𑀩𑁆𑀩𑀢𑁄. 𑀳𑀺𑀫𑀯𑀫𑀦𑀸𑀤𑀺𑀯𑀲𑁂𑀦 𑀚𑀮𑀲𑁆𑀲 𑀲𑀸𑀭𑀪𑀽𑀢𑀸𑀦𑀁 𑀪𑁂𑀲𑀚𑁆𑀚𑀸𑀤𑀺𑀯𑀢𑁆𑀣𑀽𑀦𑀜𑁆𑀘 𑀕𑀺𑀭𑀡𑀢𑁄 𑀕𑀺𑀭𑀻𑀢𑀺 𑀯𑀼𑀘𑁆𑀘𑀢𑀺.

𑀇𑀫𑀸𑀦𑀺 𑀧𑀦𑀲𑁆𑀲 𑀦𑀸𑀫𑀸𑀦𑀺 𑁋

𑀧𑀩𑁆𑀩𑀢𑁄 𑀅𑀘𑀮𑁄 𑀲𑁂𑀮𑁄, 𑀦𑀕𑁄 𑀕𑀺𑀭𑀺 𑀫𑀳𑀻𑀥𑀭𑁄;

𑀅𑀤𑁆𑀤𑀺 𑀲𑀺𑀮𑀼𑀘𑁆𑀘𑀬𑁄 𑀘𑀸𑀢𑀺, 𑀕𑀺𑀭𑀺𑀧𑀡𑁆𑀡𑀢𑁆𑀢𑀺𑀬𑁄 𑀇𑀫𑀸.

𑀲𑀼𑀭 𑀇𑀲𑁆𑀲𑀭𑀺𑀬𑀤𑀺𑀢𑁆𑀢𑀻𑀲𑀼. 𑀲𑀼𑀭𑀢𑀺. 𑀲𑀼𑀭𑁄, 𑀅𑀲𑀼𑀭𑁄.

𑀢𑀢𑁆𑀭 𑀲𑀭𑁄𑀢𑀺 𑀲𑀼𑀭𑀢𑀺 𑀈𑀲𑀢𑀺 𑀤𑁂𑀯𑀺𑀲𑁆𑀲𑀭𑀺𑀬𑀁 𑀧𑀸𑀧𑀼𑀡𑀸𑀢𑀺 𑀯𑀺𑀭𑁄𑀘𑀢𑀺 𑀘𑀸𑀢𑀺 𑀲𑀼𑀭𑁄. 𑀲𑀼𑀦𑁆𑀤𑀭𑀸 𑀭𑀸 𑀯𑀸𑀘𑀸 𑀅𑀲𑁆𑀲𑀸𑀢𑀺 𑀯𑀸 𑀲𑀼𑀭𑁄, 𑀤𑁂𑀯𑁄. 𑀤𑁂𑀯𑀸𑀪𑀺𑀥𑀸𑀦𑀸𑀦𑀺 𑀤𑀺𑀯𑀸𑀤𑀺𑀕𑀡𑁂 𑀧𑀓𑀸𑀲𑁂𑀲𑁆𑀲𑀸𑀫. 𑀅𑀲𑀼𑀭𑁄𑀢𑀺 𑀤𑁂𑀯𑁄 𑀯𑀺𑀬 𑀦 𑀲𑀼𑀭𑀢𑀺 𑀦 𑀈𑀲𑀢𑀺 𑀦 𑀯𑀺𑀭𑁄𑀘𑀢𑀺 𑀘𑀸𑀢𑀺 𑀅𑀲𑀼𑀭𑁄. 𑀲𑀼𑀭𑀸𑀦𑀁 𑀯𑀸 𑀧𑀝𑀺𑀧𑀓𑁆𑀔𑁄 𑀫𑀺𑀢𑁆𑀢𑀧𑀝𑀺𑀧𑀓𑁆𑀔𑀸 𑀅𑀫𑀺𑀢𑁆𑀢𑀸 𑀯𑀺𑀬𑀸𑀢𑀺 𑀅𑀲𑀼𑀭𑁄, 𑀤𑀸𑀦𑀯𑁄, 𑀬𑁄 ‘‘𑀧𑀼𑀩𑁆𑀩𑀤𑁂𑀯𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀳𑀺 𑀓𑀼𑀫𑁆𑀪𑀚𑀸𑀢𑀓𑁂 𑀯𑀼𑀢𑁆𑀢𑀁 𑁋

‘‘𑀬𑀁 𑀯𑁂 𑀧𑀺𑀯𑀺𑀢𑁆𑀯𑀸 𑀧𑀼𑀩𑁆𑀩𑀤𑁂𑀯𑀸 𑀧𑀫𑀢𑁆𑀢𑀸,

𑀢𑀺𑀤𑀺𑀯𑀸 𑀘𑀼𑀢𑀸 𑀲𑀲𑁆𑀲𑀢𑀺𑀬𑀸 𑀲𑀫𑀸𑀬𑀸;

𑀢𑀁 𑀢𑀸𑀤𑀺𑀲𑀁 𑀫𑀚𑁆𑀚𑀫𑀺𑀫𑀁 𑀦𑀺𑀭𑀢𑁆𑀣𑀁,

𑀚𑀸𑀦𑀁 𑀫𑀳𑀸𑀭𑀸𑀚 𑀓𑀣𑀁 𑀧𑀺𑀯𑁂𑀬𑁆𑀬𑀸’’𑀢𑀺.

𑀲𑀕𑀸𑀣𑀸𑀯𑀕𑁆𑀕𑀲𑀁𑀯𑀡𑁆𑀡𑀦𑀸𑀬𑀁 𑀧𑀦 ‘‘𑀦 𑀲𑀼𑀭𑀁 𑀧𑀺𑀯𑀺𑀫𑁆𑀳, 𑀦 𑀲𑀼𑀭𑀁 𑀧𑀺𑀯𑀺𑀫𑁆𑀳𑀸’𑀢𑀺 𑀆𑀳𑀁𑀲𑀼, 𑀢𑀢𑁄 𑀧𑀝𑁆𑀞𑀸𑀬 𑀅𑀲𑀼𑀭𑀸 𑀦𑀸𑀫 𑀚𑀸𑀢𑀸’’𑀢𑀺 𑀯𑀼𑀢𑁆𑀢𑀁.

𑀇𑀫𑀸𑀦𑀺 ¶ 𑀢𑀤𑀪𑀺𑀥𑀸𑀦𑀸𑀦𑀺 𑁋

𑀅𑀲𑀼𑀭𑁄 𑀧𑀼𑀩𑁆𑀩𑀤𑁂𑀯𑁄 𑀘, 𑀤𑀸𑀦𑀯𑁄 𑀤𑁂𑀯𑀢𑀸𑀭𑀺 𑀢𑀼;

𑀦𑀸𑀫𑀸𑀦𑀺 𑀅𑀲𑀼𑀭𑀸𑀦𑀦𑁆𑀢𑀺, 𑀇𑀫𑀸𑀦𑀺 𑀦𑀺𑀤𑁆𑀤𑀺𑀲𑁂 𑀯𑀺𑀤𑀽.

𑀧𑀸𑀓𑁄 𑀇𑀢𑀺 𑀢𑀼 𑀬𑀁 𑀦𑀸𑀫𑀁, 𑀏𑀓𑀲𑁆𑀲 𑀅𑀲𑀼𑀭𑀲𑁆𑀲 𑀢𑀼;

𑀧𑀡𑁆𑀡𑀢𑁆𑀢𑀻𑀢𑀺𑀧𑀺 𑀏𑀓𑀘𑁆𑀘𑁂, 𑀕𑀭𑀯𑁄 𑀧𑀦 𑀅𑀩𑁆𑀭𑀯𑀼𑀁.

𑀓𑀼𑀭 𑀲𑀤𑁆𑀤𑁂 𑀅𑀓𑁆𑀓𑁄𑀲𑁂 𑀘. 𑀓𑀼𑀭𑀢𑀺. 𑀓𑀼𑀭𑀭𑁄, 𑀓𑀼𑀭𑀭𑀻. 𑀓𑀼𑀫𑁆𑀫𑁄, 𑀓𑀼𑀫𑁆𑀫𑀻.

𑀔𑀼𑀭 𑀙𑁂𑀤𑀦𑁂 𑀯𑀺𑀮𑁂𑀔𑀦𑁂 𑀘. 𑀔𑀼𑀭𑀢𑀺. 𑀔𑀼𑀭𑁄.

𑀫𑀼𑀭 𑀲𑀁𑀯𑁂𑀞𑀦𑁂. 𑀫𑀼𑀭𑀢𑀺. 𑀫𑀼𑀭𑁄, 𑀫𑁄𑀭𑁄.

𑀖𑀼𑀭 𑀅𑀪𑀺𑀫𑀢𑁆𑀢 𑀲𑀤𑁆𑀤𑁂𑀲𑀼. 𑀖𑀼𑀭𑀢𑀺. 𑀖𑁄𑀭𑁄.

𑀧𑀼𑀭 𑀅𑀕𑁆𑀕𑀕𑀫𑀦𑁂. 𑀅𑀕𑁆𑀕𑀕𑀫𑀦𑀁 𑀦𑀸𑀫 𑀧𑀥𑀸𑀦𑀕𑀫𑀦𑀁, 𑀧𑀞𑀫𑀫𑁂𑀯 𑀕𑀫𑀦𑀁 𑀯𑀸. 𑀧𑀼𑀭𑀢𑀺. 𑀧𑀼𑀭𑀁, 𑀧𑀼𑀭𑀻. 𑀅𑀯𑀸𑀧𑀼𑀭𑀢𑀺. 𑀅𑀯𑀸𑀧𑀼𑀭𑁂𑀢𑀁 𑀅𑀫𑀢𑀲𑁆𑀲 𑀤𑁆𑀯𑀸𑀭𑀁. 𑀅𑀯𑀸𑀧𑀼𑀭𑀡𑀁 𑀆𑀤𑀸𑀬 𑀕𑀘𑁆𑀙𑀢𑀺.

𑀢𑀢𑁆𑀣 𑀧𑀼𑀭𑀦𑁆𑀢𑀺 𑀭𑀸𑀚𑀥𑀸𑀦𑀻. 𑀢𑀣𑀸 𑀳𑀺 ‘‘𑀦𑀕𑀭𑀁 𑀧𑀼𑀭𑀁 𑀧𑀼𑀭𑀻 𑀭𑀸𑀚𑀥𑀸𑀦𑀻’’𑀢𑀺 𑀏𑀢𑁂 𑀧𑀭𑀺𑀬𑀸𑀬𑀸. ‘‘𑀏𑀲𑁄 𑀆𑀴𑀸𑀭𑀺𑀓𑁄 𑀧𑁄𑀲𑁄, 𑀓𑀼𑀫𑀸𑀭𑀻 𑀧𑀼𑀭𑀫𑀦𑁆𑀢𑀭𑁂’’𑀢𑀺𑀆𑀤𑀻𑀲𑀼 𑀧𑀦 𑀕𑁂𑀳𑀁 ‘‘𑀧𑀼𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀥𑀸𑀦𑀢𑀸𑀬 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀫𑀦𑁂𑀦 𑀕𑀦𑁆𑀢𑀩𑁆𑀩𑀦𑁆𑀢𑀺 𑀧𑀼𑀭𑀁, 𑀭𑀸𑀚𑀥𑀸𑀦𑀻 𑀘𑁂𑀯 𑀕𑁂𑀳𑀜𑁆𑀘. 𑀅𑀯𑀸𑀧𑀼𑀭𑀡𑀦𑁆𑀢𑀺 𑀅𑀯𑀸𑀧𑀼𑀭𑀦𑁆𑀢𑀺 𑀯𑀺𑀯𑀭𑀦𑁆𑀢𑀺 𑀤𑁆𑀯𑀸𑀭𑀁 𑀏𑀢𑁂𑀦𑀸𑀢𑀺 𑀅𑀯𑀸𑀧𑀼𑀭𑀡𑀁, 𑀬𑀁 ‘‘𑀓𑀼𑀜𑁆𑀘𑀺𑀓𑀸’’𑀢𑀺𑀧𑀺 ‘‘𑀢𑀸𑀴𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀅𑀯𑀸𑀧𑀼𑀭𑀢𑀻𑀢𑀺𑀆𑀤𑀻𑀲𑀼 𑀅𑀯 𑀆𑀇𑀘𑁆𑀘𑀼𑀪𑁄 𑀉𑀧𑀲𑀕𑁆𑀕𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀨𑀭 𑀨𑀭𑀡𑁂. 𑀨𑀭𑀡𑀁 𑀦𑀸𑀫 𑀩𑁆𑀬𑀸𑀧𑀦𑀁 𑀕𑀫𑀦𑀁 𑀯𑀸. 𑀲𑀫𑀁 𑀨𑀭𑀢𑀺 𑀲𑀻𑀢𑁂𑀦. 𑀆𑀳𑀸𑀭𑀢𑁆𑀣𑀁 𑀨𑀭𑀢𑀺. 𑀨𑀭𑀡𑀁.

𑀕𑀭 𑀉𑀕𑁆𑀕𑀫𑁂. 𑀕𑀭𑀢𑀺. 𑀕𑀭𑀼.

𑀕𑀭𑀽𑀢𑀺 ¶ 𑀫𑀸𑀢𑀸𑀧𑀺𑀢𑀸𑀤𑀬𑁄 𑀕𑀸𑀭𑀯𑀬𑀼𑀢𑁆𑀢𑀧𑀼𑀕𑁆𑀕𑀮𑀸. 𑀢𑁂 𑀳𑀺 𑀕𑀭𑀦𑁆𑀢𑀺 𑀉𑀕𑁆𑀕𑀘𑁆𑀙𑀦𑁆𑀢𑀺 𑀉𑀕𑁆𑀕𑀢𑀸 𑀧𑀸𑀓𑀝𑀸 𑀳𑁄𑀦𑁆𑀢𑀻𑀢𑀺 𑀕𑀭𑀽𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀧𑀺𑀘 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀪𑀸𑀭𑀺𑀬𑀝𑁆𑀞𑁂𑀦 𑀕𑀭𑀽𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀕𑀭𑀼𑀲𑀤𑁆𑀤𑁄 ‘‘𑀇𑀤𑀫𑀸𑀲𑀦𑀁 𑀅𑀢𑁆𑀭 𑀪𑀯𑀁 𑀦𑀺𑀲𑀻𑀤𑀢𑀼, 𑀪𑀯𑀜𑁆𑀳𑀺 𑀫𑁂 𑀅𑀜𑁆𑀜𑀢𑀭𑁄 𑀕𑀭𑀽𑀦’’𑀦𑁆𑀢𑀺 𑀏𑀢𑁆𑀣 𑀫𑀸𑀢𑀸𑀧𑀺𑀢𑀽𑀲𑀼 𑀤𑀺𑀲𑁆𑀲𑀢𑀺. ‘‘𑀲𑀦𑀭𑀸𑀫𑀭𑀮𑁄𑀓𑀕𑀭𑀼’’𑀦𑁆𑀢𑀺 𑀏𑀢𑁆𑀣 𑀲𑀩𑁆𑀩𑀮𑁄𑀓𑀸𑀘𑀭𑀺𑀬𑁂 𑀲𑀩𑁆𑀩𑀜𑁆𑀜𑀼𑀫𑁆𑀳𑀺. 𑀅𑀧𑀺𑀘 𑀕𑀭𑀼𑀲𑀤𑁆𑀤𑁄 𑀅𑀜𑁆𑀜𑁂𑀲𑁆𑀯𑀢𑁆𑀣𑁂𑀲𑀼𑀧𑀺 𑀤𑀺𑀲𑁆𑀲𑀢𑀺. 𑀲𑀩𑁆𑀩𑀫𑁂𑀢𑀁 𑀏𑀓𑀢𑁄 𑀓𑀢𑁆𑀯𑀸 𑀅𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

𑀫𑀸𑀢𑀸𑀧𑀺𑀢𑀸𑀘𑀭𑀺𑀬𑁂𑀲𑀼, 𑀤𑀼𑀚𑁆𑀚𑀭𑁂 𑀅𑀮𑀳𑀼𑀫𑁆𑀳𑀺 𑀘;

𑀫𑀳𑀦𑁆𑀢𑁂 𑀘𑀼𑀕𑁆𑀕𑀢𑁂 𑀘𑁂𑀯, 𑀦𑀺𑀙𑁂𑀓𑀸𑀤𑀺𑀓𑀭𑁂𑀲𑀼 𑀘;

𑀢𑀣𑀸 𑀯𑀡𑁆𑀡𑀯𑀺𑀲𑁂𑀲𑁂𑀲𑀼, 𑀕𑀭𑀼𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑀓𑁂𑀘𑀺 𑀧𑀦𑀸𑀘𑀭𑀺𑀬𑀸 ‘‘𑀕𑀭𑀼 𑀕𑀭𑀽’’𑀢𑀺 𑀘 𑀤𑁆𑀯𑀺𑀥𑀸 𑀕𑀳𑁂𑀢𑁆𑀯𑀸 𑀪𑀸𑀭𑀺𑀬𑀯𑀸𑀘𑀓𑀢𑁆𑀢𑁂 𑀕𑀭𑀼𑀲𑀤𑁆𑀤𑁄 𑀞𑀺𑀢𑁄. 𑀆𑀘𑀭𑀺𑀬𑀯𑀸𑀘𑀓𑀢𑁆𑀢𑁂 𑀧𑀦 𑀕𑀼𑀭𑀼𑀲𑀤𑁆𑀤𑁄𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀧𑀸𑀴𑀺𑀯𑀺𑀲𑀬𑁂 𑀳𑀺 𑀲𑀩𑁆𑀩𑁂𑀲𑀫𑁆𑀧𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀅𑀢𑁆𑀣𑀸𑀦𑀁 𑀯𑀸𑀘𑀓𑀢𑁆𑀢𑁂 𑀕𑀭𑀼𑀲𑀤𑁆𑀤𑁄𑀬𑁂𑀯 𑀇𑀘𑁆𑀙𑀺𑀢𑀩𑁆𑀩𑁄, 𑀅𑀓𑀸𑀭𑀲𑁆𑀲 𑀆𑀓𑀸𑀭𑀪𑀸𑀯𑁂 ‘‘𑀕𑀸𑀭𑀯’’𑀦𑁆𑀢𑀺 𑀲𑀯𑀼𑀤𑁆𑀥𑀺𑀓𑀲𑁆𑀲 𑀢𑀤𑁆𑀥𑀺𑀢𑀦𑁆𑀢𑀧𑀤𑀲𑁆𑀲 𑀤𑀲𑁆𑀲𑀦𑀢𑁄. 𑀲𑀓𑁆𑀓𑀝𑀪𑀸𑀲𑀸𑀯𑀺𑀲𑀬𑁂 𑀧𑀦 𑀕𑀼𑀭𑀼𑀲𑀤𑁆𑀤𑁄𑀬𑁂𑀯 𑀇𑀘𑁆𑀙𑀺𑀢𑀩𑁆𑀩𑁄, 𑀉𑀓𑀸𑀭𑀲𑁆𑀲 𑀯𑀼𑀤𑁆𑀥𑀺𑀪𑀸𑀯𑁂 𑀅𑀜𑁆𑀜𑀣𑀸 𑀢𑀤𑁆𑀥𑀺𑀢𑀦𑁆𑀢𑀧𑀤𑀲𑁆𑀲 𑀤𑀲𑁆𑀲𑀦𑀢𑁄.

𑀫𑀭 𑀧𑀸𑀡𑀘𑀸𑀕𑁂. 𑀫𑀭𑀢𑀺. 𑀫𑀢𑁆𑀢𑀼𑀁. 𑀫𑀭𑀺𑀢𑁆𑀯𑀸. 𑀳𑁂𑀢𑀼𑀓𑀢𑁆𑀢𑀭𑀺 ‘‘𑀧𑀼𑀭𑀺𑀲𑁄 𑀧𑀼𑀭𑀺𑀲𑀁 𑀫𑀸𑀭𑁂𑀢𑀺, 𑀫𑀸𑀭𑀬𑀢𑀺. 𑀧𑀼𑀭𑀺𑀲𑁄 𑀧𑀼𑀭𑀺𑀲𑁂𑀦 𑀧𑀼𑀭𑀺𑀲𑀁 𑀫𑀸𑀭𑀸𑀧𑁂𑀢𑀺, 𑀫𑀸𑀭𑀸𑀧𑀬𑀢𑀺. 𑀧𑀼𑀭𑀺𑀲𑁄 𑀧𑀼𑀭𑀺𑀲𑀁 𑀫𑀸𑀭𑁂𑀢𑀼𑀁 𑀫𑀸𑀭𑁂𑀢𑁆𑀯𑀸’’ 𑀇𑀘𑁆𑀘𑀸𑀤𑀻𑀦𑀺 𑀭𑀽𑀧𑀸𑀦𑀺. 𑀫𑀘𑁆𑀘𑁄. 𑀫𑀭𑀼. 𑀫𑀭𑀡𑀁, 𑀫𑀘𑁆𑀘𑀼. 𑀫𑀝𑁆𑀝𑀼. 𑀫𑀸𑀭𑁄.

𑀢𑀢𑁆𑀣 𑀫𑀢𑁆𑀢𑀼𑀦𑁆𑀢𑀺 𑀫𑀭𑀺𑀢𑀼𑀁. 𑀢𑀣𑀸 𑀳𑀺 𑀅𑀮𑀻𑀦𑀲𑀢𑁆𑀢𑀼𑀚𑀸𑀢𑀓𑁂 ‘‘𑀬𑁄 𑀫𑀢𑁆𑀢𑀼𑀫𑀺𑀘𑁆𑀙𑁂 𑀧𑀺𑀢𑀼𑀦𑁄 𑀧𑀫𑁄𑀓𑁆𑀔𑀸’’𑀢𑀺 𑀧𑀸𑀴𑀺 𑀤𑀺𑀲𑁆𑀲𑀢𑀺. 𑀫𑀘𑁆𑀘𑁄𑀢𑀺 𑀫𑀭𑀺𑀢𑀩𑁆𑀩𑀲𑀪𑀸𑀯𑀢𑀸𑀬 ‘‘𑀫𑀘𑁆𑀘𑁄’’𑀢𑀺 𑀮𑀤𑁆𑀥𑀦𑀸𑀫𑁄 𑀲𑀢𑁆𑀢𑁄 ¶ . 𑀫𑀭𑀽𑀢𑀺 𑀤𑀻𑀖𑀸𑀬𑀼𑀓𑁄𑀧𑀺 𑀲𑀫𑀸𑀦𑁄 𑀫𑀭𑀡𑀲𑀻𑀮𑁄𑀢𑀺 𑀫𑀭𑀼, 𑀤𑁂𑀯𑁄. 𑀫𑀭𑀡𑀦𑁆𑀢𑀺 𑀘𑀼𑀢𑀺.

𑀫𑀭𑀡𑀁 𑀅𑀦𑁆𑀢𑀓𑁄 𑀫𑀘𑁆𑀘𑀼, 𑀳𑀺𑀦𑁆𑀤𑀁 𑀓𑀸𑀮𑁄 𑀘 𑀫𑀝𑁆𑀝𑀼 𑀘;

𑀦𑀺𑀓𑁆𑀔𑁂𑀧𑁄 𑀘𑀼𑀢𑀺 𑀘𑁂𑀢𑀸𑀦𑀺, 𑀦𑀸𑀫𑀸𑀦𑀺 𑀫𑀭𑀡𑀲𑁆𑀲 𑀯𑁂.

𑀫𑀸𑀭𑁄𑀢𑀺 𑀲𑀢𑁆𑀢𑀸𑀦𑀁 𑀓𑀼𑀲𑀮𑀁 𑀫𑀸𑀭𑁂𑀢𑀻𑀢𑀺 𑀫𑀸𑀭𑁄, 𑀓𑀸𑀫𑀤𑁂𑀯𑁄.

𑀇𑀫𑀸𑀦𑀺𑀲𑁆𑀲 𑀦𑀸𑀫𑀸𑀦𑀺 𑁋

𑀫𑀸𑀭𑁄 𑀦𑀫𑀼𑀘𑀺 𑀓𑀡𑁆𑀳𑁄 𑀘, 𑀯𑀲𑀯𑀢𑁆𑀢𑀺 𑀧𑀚𑀸𑀧𑀢𑀺;

𑀧𑀫𑀢𑁆𑀢𑀩𑀦𑁆𑀥𑀼 𑀫𑀤𑁆𑀤𑀦𑁄, 𑀧𑀸𑀧𑀺𑀫𑀸 𑀤𑀩𑁆𑀩𑀓𑁄𑀧𑀺 𑀘;

𑀓𑀦𑁆𑀤𑀧𑁆𑀧𑁄 𑀘 𑀭𑀢𑀺𑀧𑀢𑀺, 𑀓𑀸𑀫𑁄 𑀘 𑀓𑀼𑀲𑀼𑀫𑀸𑀬𑀼𑀥𑁄.

𑀅𑀜𑁆𑀜𑁂 𑀅𑀜𑁆𑀜𑀸𑀦𑀺𑀧𑀺 𑀦𑀸𑀫𑀸𑀦𑀺 𑀯𑀤𑀦𑁆𑀢𑀺, 𑀢𑀸𑀦𑀺 𑀲𑀸𑀲𑀦𑀸𑀦𑀼𑀮𑁄𑀫𑀸𑀦𑀺 𑀦 𑀳𑁄𑀦𑁆𑀢𑀻𑀢𑀺 𑀇𑀥 𑀦 𑀤𑀲𑁆𑀲𑀺𑀢𑀸𑀦𑀺. 𑀅𑀝𑁆𑀞𑀓𑀣𑀸𑀲𑀼 𑀧𑀦 ‘‘𑀫𑀸𑀭𑁄, 𑀦𑀫𑀼𑀘𑀺, 𑀓𑀡𑁆𑀳𑁄, 𑀧𑀫𑀢𑁆𑀢𑀩𑀦𑁆𑀥𑀽’’𑀢𑀺 𑀘𑀢𑁆𑀢𑀸𑀭𑁄𑀯 𑀦𑀸𑀫𑀸𑀦𑀺 𑀆𑀕𑀢𑀸𑀦𑀺.

𑀏𑀢𑁆𑀣 𑀘 𑀫𑀸𑀭𑁄𑀢𑀺 𑀤𑁂𑀯𑀧𑀼𑀢𑁆𑀢𑀫𑀸𑀭𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘 𑀫𑀸𑀭𑀸 𑀓𑀺𑀮𑁂𑀲𑀫𑀸𑀭𑁄 𑀔𑀦𑁆𑀥𑀫𑀸𑀭𑁄 𑀅𑀪𑀺𑀲𑀗𑁆𑀔𑀸𑀭𑀫𑀸𑀭𑁄 𑀫𑀘𑁆𑀘𑀼𑀫𑀸𑀭𑁄 𑀤𑁂𑀯𑀧𑀼𑀢𑁆𑀢𑀫𑀸𑀭𑁄𑀢𑀺.

𑀥𑀭 𑀅𑀯𑀢𑁆𑀣𑀸𑀦𑁂. 𑀥𑀭𑀢𑀺.

𑀪𑀭 𑀧𑁄𑀲𑀦𑁂. 𑀪𑀭𑀢𑀺. 𑀪𑀭𑀺𑀢𑁄, 𑀪𑀢𑁆𑀢𑀸.

𑀣𑀭 𑀲𑀦𑁆𑀣𑀭𑀡𑁂. 𑀣𑀭𑀢𑀺, 𑀲𑀦𑁆𑀣𑀭𑀢𑀺. 𑀲𑀦𑁆𑀣𑀭𑀡𑀁.

𑀤𑀭 𑀯𑀺𑀤𑀸𑀭𑀡𑁂. 𑀪𑀽𑀫𑀺𑀁 𑀤𑀭𑀢𑀺. 𑀓𑀼𑀤𑀸𑀮𑁄.

𑀤𑀭 𑀤𑀸𑀳𑁂. 𑀓𑀸𑀬𑁄 𑀤𑀭𑀢𑀺. 𑀤𑀭𑁄, 𑀤𑀭𑀣𑁄.

𑀢𑀺𑀭 𑀅𑀥𑁄𑀕𑀢𑀺𑀬𑀁. 𑀢𑀺𑀭𑀢𑀺. 𑀢𑀺𑀭𑀘𑁆𑀙𑀸𑀦𑁄, 𑀢𑀺𑀭𑀘𑁆𑀙𑀸 𑀯𑀸.

𑀅𑀭 𑀕𑀢𑀺𑀬𑀁. 𑀅𑀭𑀢𑀺. 𑀅𑀢𑁆𑀣𑀁, 𑀅𑀢𑁆𑀣𑁄, 𑀉𑀢𑀼.

𑀏𑀢𑁆𑀣 ¶ 𑀅𑀢𑁆𑀣𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁. 𑀢𑀁 𑀢𑀁 𑀲𑀢𑁆𑀢𑀓𑀺𑀘𑁆𑀘𑀁 𑀅𑀭𑀢𑀺 𑀯𑀢𑁆𑀢𑁂𑀢𑀻𑀢𑀺 𑀉𑀢𑀼.

𑀭𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀮𑀓𑀸𑀭𑀦𑁆𑀢𑀥𑀸𑀢𑀼

𑀮𑀸 𑀆𑀤𑀸𑀦𑁂. 𑀮𑀸𑀢𑀺. 𑀮𑀸𑀦𑀁, 𑀕𑀭𑀼𑀴𑁄, 𑀲𑀻𑀳𑀴𑁄, 𑀭𑀸𑀳𑀼𑀮𑁄, 𑀓𑀼𑀲𑀮𑀁, 𑀩𑀸𑀮𑁄, 𑀫𑀳𑀮𑁆𑀮𑀓𑁄, 𑀫𑀳𑀮𑁆𑀮𑀺𑀓𑀸.

𑀢𑀢𑁆𑀭 𑀕𑀭𑀼𑀴𑁄𑀢𑀺 𑀕𑀭𑀼𑀁 𑀮𑀸𑀢𑀺 𑀆𑀤𑀤𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀕𑀭𑀼𑀴𑁄, 𑀬𑁄 ‘‘𑀲𑀼𑀧𑀡𑁆𑀡𑁄, 𑀤𑀺𑀚𑀸𑀥𑀺𑀧𑁄, 𑀦𑀸𑀕𑀸𑀭𑀺, 𑀓𑀭𑁄𑀝𑀻’’𑀢𑀺 𑀘 𑀯𑀼𑀘𑁆𑀘𑀢𑀺. 𑀲𑀻𑀳𑀴𑁄𑀢𑀺 𑀲𑀻𑀳𑀁 𑀮𑀸𑀢𑀺 𑀆𑀤𑀤𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀲𑀻𑀳𑀴𑁄, 𑀧𑀼𑀩𑁆𑀩𑀧𑀼𑀭𑀺𑀲𑁄. 𑀢𑀩𑁆𑀩𑀁𑀲𑁂 𑀚𑀸𑀢𑀸 𑀏𑀢𑀭𑀳𑀺 𑀲𑀩𑁆𑀩𑁂𑀧𑀺 𑀲𑀻𑀳𑀴𑀸 𑀦𑀸𑀫 𑀚𑀸𑀢𑀸.

𑀭𑀸𑀳𑀼𑀮𑁄𑀢𑀺𑀆𑀤𑀻𑀲𑀼 𑀧𑀦 𑀭𑀸𑀳𑀼 𑀯𑀺𑀬 𑀮𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀭𑀸𑀳𑀼𑀮𑁄, 𑀓𑁄 𑀲𑁄? 𑀲𑀺𑀓𑁆𑀔𑀸𑀓𑀸𑀫𑁄 𑀆𑀬𑀲𑁆𑀫𑀸 𑀭𑀸𑀳𑀼𑀮𑀪𑀤𑁆𑀤𑁄 𑀩𑀼𑀤𑁆𑀥𑀧𑀼𑀢𑁆𑀢𑁄. 𑀢𑀲𑁆𑀲 𑀳𑀺 𑀚𑀸𑀢𑀤𑀺𑀯𑀲𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 ‘‘𑀧𑀼𑀢𑁆𑀢𑀲𑁆𑀲 𑀫𑁂 𑀢𑀼𑀝𑁆𑀞𑀺𑀁 𑀦𑀺𑀯𑁂𑀤𑁂𑀣𑀸’’𑀢𑀺 𑀉𑀬𑁆𑀬𑀸𑀦𑁂 𑀓𑀻𑀴𑀦𑁆𑀢𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀸𑀲𑀦𑀁 𑀧𑀳𑀺𑀡𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀲𑀼𑀢𑁆𑀯𑀸 ‘‘𑀭𑀸𑀳𑀼 𑀚𑀸𑀢𑁄 𑀩𑀦𑁆𑀥𑀦𑀁 𑀚𑀸𑀢’’𑀦𑁆𑀢𑀺 𑀆𑀳. 𑀧𑀼𑀢𑁆𑀢𑀲𑁆𑀲 𑀳𑀺 𑀚𑀸𑀬𑀦𑀁 𑀭𑀸𑀳𑀼𑀕𑁆𑀕𑀳𑁄 𑀯𑀺𑀬 𑀳𑁄𑀢𑀺. 𑀢𑀡𑁆𑀳𑀸𑀓𑀺𑀮𑀺𑀲𑁆𑀲𑀦𑀢𑀸𑀧𑀸𑀤𑀦𑀢𑁄 𑀩𑀸𑀴𑁆𑀳𑁂𑀦 𑀘 𑀲𑀗𑁆𑀔𑀮𑀺𑀓𑀸𑀤𑀺𑀩𑀦𑁆𑀥𑀦𑁂𑀦 𑀩𑀦𑁆𑀥𑀁 𑀯𑀺𑀬 𑀳𑁄𑀢𑀺 𑀫𑀼𑀘𑁆𑀘𑀺𑀢𑀼𑀁 𑀅𑀧𑁆𑀧𑀤𑀸𑀦𑀢𑁄𑀢𑀺 ‘‘𑀭𑀸𑀳𑀼 𑀚𑀸𑀢𑁄 𑀩𑀦𑁆𑀥𑀦𑀁 𑀚𑀸𑀢’’𑀦𑁆𑀢𑀺 𑀆𑀳. 𑀭𑀸𑀚𑀸 ‘‘𑀓𑀺𑀁 𑀫𑁂 𑀧𑀼𑀢𑁆𑀢𑁄 𑀅𑀯𑀘𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀫𑁂 𑀦𑀢𑁆𑀢𑀸 ‘𑀭𑀸𑀳𑀼𑀮𑁄’ 𑀢𑁆𑀯𑁂𑀯 𑀳𑁄𑀢𑀽’’𑀢𑀺 𑀆𑀳, 𑀢𑀢𑁄 𑀧𑀝𑁆𑀞𑀸𑀬 𑀓𑀼𑀫𑀸𑀭𑁄 𑀭𑀸𑀳𑀼𑀮𑁄 𑀦𑀸𑀫 𑀚𑀸𑀢𑁄.

𑀫𑀳𑀸𑀧𑀤𑀸𑀦𑀲𑀼𑀢𑁆𑀢𑀝𑀻𑀓𑀸𑀬𑀜𑁆𑀳𑀺 ¶ ‘‘𑀭𑀸𑀳𑀼 𑀚𑀸𑀢𑁄’’𑀢𑀺 𑀏𑀢𑁆𑀣 ‘‘𑀭𑀸𑀳𑀽𑀢𑀺 𑀭𑀸𑀳𑀼𑀕𑁆𑀕𑀳𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀦 ‘‘𑀭𑀸𑀳𑀼𑀮𑁄’’𑀢𑀺 𑀯𑀘𑀦𑀲𑁆𑀲𑀢𑁆𑀣𑀁 𑀧𑀸𑀓𑀝𑀁 𑀓𑀸𑀢𑀼𑀁 𑀅𑀥𑀺𑀧𑁆𑀧𑀸𑀬𑀢𑁆𑀣𑀯𑀲𑁂𑀦 𑀯𑀼𑀢𑁆𑀢𑀁. 𑀦 𑀳𑀺 𑀓𑁂𑀯𑀮𑁄 ‘‘𑀭𑀸𑀳𑀽’’𑀢𑀺 𑀲𑀤𑁆𑀤𑁄 ‘‘𑀭𑀸𑀳𑀼𑀕𑁆𑀕𑀳𑁄’’𑀢𑀺 𑀅𑀢𑁆𑀣𑀁 𑀯𑀤𑀢𑀺, 𑀅𑀣 𑀔𑁄 𑀚𑀸𑀢𑀲𑀤𑁆𑀤𑀲𑀫𑁆𑀩𑀦𑁆𑀥𑀁 𑀮𑀪𑀺𑀢𑁆𑀯𑀸 𑀯𑀤𑀢𑀺. 𑀢𑀣𑀸 𑀳𑀺 ‘‘𑀭𑀸𑀳𑀼 𑀚𑀸𑀢𑁄’’𑀢𑀺 𑀩𑁄𑀥𑀺𑀲𑀢𑁆𑀢𑁂𑀦 𑀯𑀼𑀢𑁆𑀢𑀯𑀘𑀦𑀲𑁆𑀲 ‘‘𑀭𑀸𑀳𑀼𑀕𑁆𑀕𑀳𑁄 𑀚𑀸𑀢𑁄’’𑀢𑀺 𑀅𑀢𑁆𑀣𑁆ौ 𑀪𑀯𑀢𑀺, 𑀢𑀲𑁆𑀫𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 ‘‘𑀫𑀫 𑀦𑀢𑁆𑀢𑀸 𑀭𑀸𑀳𑀼 𑀯𑀺𑀬 𑀮𑀸𑀢𑀻𑀢𑀺 𑀭𑀸𑀳𑀼𑀮𑁄𑀢𑀺 𑀯𑀢𑁆𑀢𑀩𑁆𑀩𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀭𑀸𑀳𑀼𑀮𑁄𑀢𑁆𑀯𑁂𑀯 𑀳𑁄𑀢𑀽’’𑀢𑀺 𑀆𑀳𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀓𑁂𑀘𑀺 𑀧𑀦 ‘‘𑀭𑀸𑀳𑀼𑀮𑁄 𑀚𑀸𑀢𑁄 𑀩𑀦𑁆𑀥𑀦𑀁 𑀚𑀸𑀢’’𑀦𑁆𑀢𑀺 𑀧𑀞𑀦𑁆𑀢𑀺, 𑀓𑀢𑁆𑀣𑀘𑀺 𑀧𑁄𑀢𑁆𑀣𑀓𑁂 𑀘 𑀮𑀺𑀔𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁, 𑀅𑀢𑁆𑀣𑀲𑁆𑀲 𑀅𑀬𑀼𑀢𑁆𑀢𑀺𑀢𑁄 𑀝𑀻𑀓𑀸𑀬 𑀘 𑀲𑀤𑁆𑀥𑀺𑀁𑀯𑀺𑀭𑁄𑀘𑀢𑁄. 𑀦 𑀳𑀺 ‘‘𑀭𑀸𑀳𑀼𑀮𑁄’’𑀢𑀺 𑀓𑀼𑀫𑀸𑀭𑀲𑁆𑀲 𑀦𑀸𑀫𑀁 𑀧𑀞𑀫𑀁 𑀉𑀧𑁆𑀧𑀦𑁆𑀦𑀁, 𑀧𑀘𑁆𑀙𑀸𑀬𑁂𑀯 𑀧𑀦 𑀉𑀧𑁆𑀧𑀦𑁆𑀦𑀁 𑀅𑀬𑁆𑀬𑀓𑁂𑀦 𑀤𑀺𑀦𑁆𑀦𑀢𑁆𑀢𑀸, 𑀢𑀲𑁆𑀫𑀸 𑀢𑀤𑀸 𑀩𑁄𑀥𑀺𑀲𑀢𑁆𑀢𑁂𑀦 ‘‘𑀭𑀸𑀳𑀼𑀮𑁄 𑀚𑀸𑀢𑁄’’𑀢𑀺 𑀯𑀢𑁆𑀢𑀼𑀁 𑀦 𑀬𑀼𑀚𑁆𑀚𑀢𑀺. 𑀬𑀣𑀸 𑀳𑀺 𑀅𑀦𑀪𑀺𑀲𑀺𑀢𑁆𑀢𑁂 𑀅𑀭𑀸𑀚𑀺𑀦𑀺 𑀧𑀼𑀕𑁆𑀕𑀮𑁂 ‘‘𑀫𑀳𑀸𑀭𑀸𑀚𑀸’’𑀢𑀺 𑀯𑁄𑀳𑀸𑀭𑁄 𑀦𑀧𑁆𑀧𑀯𑀢𑁆𑀢𑀢𑀺. 𑀝𑀻𑀓𑀸𑀬𑀜𑁆𑀘 ‘‘𑀭𑀸𑀳𑀽𑀢𑀺 𑀭𑀸𑀳𑀼𑀕𑁆𑀕𑀳𑁄’’𑀢𑀺 𑀯𑀼𑀢𑁆𑀢𑀁. 𑀅𑀣𑀸𑀧𑀺 𑀢𑁂𑀲𑀁 𑀲𑀺𑀬𑀸 ‘‘𑀭𑀸𑀳𑀼𑀮𑁄 𑀚𑀸𑀢𑁄 𑀩𑀦𑁆𑀥𑀦𑀁 𑀚𑀸𑀢’’𑀦𑁆𑀢𑀺 𑀧𑀤𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀏𑀯 𑀝𑀻𑀓𑀸𑀬𑀁 ‘‘𑀭𑀸𑀳𑀼𑀕𑁆𑀕𑀳𑁄’’𑀢𑀺 𑀪𑀸𑀯𑀯𑀲𑁂𑀦 𑀮𑀸𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄 𑀆𑀤𑀸𑀦𑀢𑁆𑀣𑁄 𑀕𑀳𑀲𑀤𑁆𑀤𑁄 𑀯𑀼𑀢𑁆𑀢𑁄𑀢𑀺 𑀏𑀯𑀫𑁆𑀧𑀺 𑀦𑀼𑀧𑀧𑀚𑁆𑀚𑀢𑀺, ‘‘𑀭𑀸𑀳𑀼𑀮𑀸𑀦𑀁 𑀚𑀸𑀢𑀁 𑀩𑀦𑁆𑀥𑀦𑀁 𑀚𑀸𑀢’’𑀦𑁆𑀢𑀺 𑀧𑀸𑀞𑀲𑁆𑀲 𑀯𑀢𑁆𑀢𑀩𑁆𑀩𑀢𑁆𑀢𑀸. 𑀭𑀸𑀳𑀼𑀮𑁄𑀢𑀺 𑀳𑀺 𑀇𑀤𑀁 𑀧𑀤𑀁 ‘‘𑀲𑀻𑀳𑀴𑁄’’𑀢𑀺 𑀧𑀤𑀁 𑀯𑀺𑀬 𑀤𑀩𑁆𑀩𑀯𑀸𑀘𑀓𑀁, 𑀦 𑀓𑀤𑀸𑀘𑀺𑀧𑀺 𑀪𑀸𑀯𑀯𑀸𑀘𑀓𑀁, 𑀢𑀲𑁆𑀫𑀸 ‘‘𑀭𑀸𑀳𑀼𑀮𑁄 𑀚𑀸𑀢𑁄 𑀩𑀦𑁆𑀥𑀦𑀁 𑀚𑀸𑀢’’𑀦𑁆𑀢𑀺 𑀏𑀢𑀁 𑀏𑀓𑀘𑁆𑀘𑁂𑀳𑀺 𑀤𑀼𑀭𑁄𑀧𑀺𑀢𑀁 𑀧𑀸𑀞𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀭𑀸𑀳𑀼 𑀚𑀸𑀢𑁄 𑀩𑀦𑁆𑀥𑀦𑀁 𑀚𑀸𑀢’’𑀦𑁆𑀢𑀺 𑀅𑀬𑀫𑁂𑀯 𑀧𑀸𑀞𑁄 𑀕𑀳𑁂𑀢𑀩𑁆𑀩𑁄, 𑀲𑀸𑀭𑀢𑁄 𑀘 𑀧𑀘𑁆𑀘𑁂𑀢𑀩𑁆𑀩𑁄 𑀲𑀼𑀧𑀭𑀺𑀲𑀼𑀤𑁆𑀥𑁂𑀲𑀼 𑀅𑀦𑁂𑀓𑁂𑀲𑀼 𑀧𑁄𑀢𑁆𑀣𑀓𑁂𑀲𑀼 𑀤𑀺𑀝𑁆𑀞𑀢𑁆𑀢𑀸, 𑀧𑁄𑀭𑀸𑀡𑁂𑀳𑀺 𑀘 𑀕𑀫𑁆𑀪𑀻𑀭𑀲𑀼𑀔𑀼𑀫𑀜𑀸𑀡𑁂𑀳𑀺 𑀆𑀘𑀭𑀺𑀬𑀧𑀘𑀸𑀭𑀺𑀬𑁂𑀳𑀺 𑀧𑀞𑀺𑀢𑀢𑁆𑀢𑀸.

𑀅𑀬𑀁 ¶ 𑀧𑀦𑁂𑀢𑁆𑀣 𑀲𑀸𑀥𑀺𑀧𑁆𑀧𑀸𑀬𑀸 𑀅𑀢𑁆𑀣𑀧𑁆𑀧𑀓𑀸𑀲𑀦𑀸 𑁋 𑀭𑀸𑀳𑀼 𑀚𑀸𑀢𑁄𑀢𑀺 𑀩𑁄𑀥𑀺𑀲𑀢𑁆𑀢𑁄 𑀧𑀼𑀢𑁆𑀢𑀲𑁆𑀲 𑀚𑀸𑀢𑀲𑀸𑀲𑀦𑀁 𑀲𑀼𑀢𑁆𑀯𑀸 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 ‘‘𑀇𑀤𑀸𑀦𑀺 𑀫𑀫 𑀭𑀸𑀳𑀼 𑀚𑀸𑀢𑁄’’𑀢𑀺 𑀯𑀤𑀢𑀺, 𑀫𑀼𑀘𑁆𑀘𑀺𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀫𑀫 𑀕𑀳𑀡𑀢𑁆𑀣𑀁 𑀭𑀸𑀳𑀼 𑀉𑀧𑁆𑀧𑀦𑁆𑀦𑁄𑀢𑀺 𑀳𑀺 𑀅𑀢𑁆𑀣𑁄. 𑀩𑀦𑁆𑀥𑀦𑀁 𑀚𑀸𑀢𑀦𑁆𑀢𑀺 𑀇𑀫𑀺𑀦𑀸 ‘‘𑀫𑀫 𑀩𑀦𑁆𑀥𑀦𑀁 𑀚𑀸𑀢’’𑀦𑁆𑀢𑀺 𑀯𑀤𑀢𑀺. 𑀢𑀣𑀸 𑀳𑀺 𑀝𑀻𑀓𑀸𑀬𑀁 𑀯𑀼𑀢𑁆𑀢𑀁 ‘‘𑀭𑀸𑀳𑀽𑀢𑀺 𑀭𑀸𑀳𑀼𑀕𑁆𑀕𑀳𑁄’’𑀢𑀺. 𑀢𑀢𑁆𑀣 𑀭𑀸𑀳𑀼𑀕𑁆𑀕𑀳𑁄𑀢𑀺 𑀕𑀡𑁆𑀳𑀸𑀢𑀻𑀢𑀺 𑀕𑀳𑁄, 𑀭𑀸𑀳𑀼 𑀏𑀯 𑀕𑀳𑁄 𑀭𑀸𑀳𑀼𑀕𑁆𑀕𑀳𑁄, 𑀫𑀫 𑀕𑀸𑀳𑀓𑁄 𑀭𑀸𑀳𑀼 𑀚𑀸𑀢𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀕𑀳𑀡𑀁 𑀕𑀳𑁄, 𑀭𑀸𑀳𑀼𑀦𑁄 𑀕𑀳𑁄 𑀭𑀸𑀳𑀼𑀕𑁆𑀕𑀳𑁄, 𑀭𑀸𑀳𑀼𑀕𑁆𑀕𑀳𑀡𑀁 𑀫𑀫 𑀚𑀸𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀢𑁆𑀢𑁄 𑀳𑀺 𑀭𑀸𑀳𑀼𑀲𑀤𑀺𑀲𑁄. 𑀧𑀺𑀢𑀸 𑀘𑀦𑁆𑀤𑀲𑀤𑀺𑀲𑁄 𑀧𑀼𑀢𑁆𑀢𑀭𑀸𑀳𑀼𑀦𑀸 𑀕𑀳𑀺𑀢𑀢𑁆𑀢𑀸.

𑀏𑀓𑀘𑁆𑀘𑁂 𑀧𑀦 ‘‘𑀭𑀸𑀳𑀼𑀮𑁄𑀢𑁆𑀯𑁂𑀯 𑀳𑁄𑀢𑀽’’𑀢𑀺 𑀇𑀫𑀁 𑀧𑀤𑁂𑀲𑀁 𑀤𑀺𑀲𑁆𑀯𑀸 ‘‘𑀭𑀸𑀳𑀼 𑀚𑀸𑀢𑁄’’𑀢𑀺 𑀯𑀼𑀢𑁆𑀢𑁂 𑀇𑀫𑀺𑀦𑀸 𑀦 𑀲𑀫𑁂𑀢𑀺, ‘‘𑀭𑀸𑀳𑀼𑀮𑁄 𑀚𑀸𑀢𑁄’’𑀢𑀺 𑀯𑀼𑀢𑁆𑀢𑁂𑀬𑁂𑀯 𑀧𑀦 𑀲𑀫𑁂𑀢𑀻𑀢𑀺 𑀫𑀜𑁆𑀜𑀫𑀸𑀦𑀸 𑀏𑀯𑀁 𑀧𑀸𑀞𑀁 𑀧𑀞𑀦𑁆𑀢𑀺 𑀮𑀺𑀔𑀦𑁆𑀢𑀺 𑀘, 𑀢𑀲𑁆𑀫𑀸 𑀲𑁄 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀧𑀞𑀺𑀢𑁄 𑀤𑀼𑀭𑁄𑀧𑀺𑀢𑁄 𑀧𑀸𑀞𑁄 𑀦 𑀕𑀳𑁂𑀢𑀩𑁆𑀩𑁄, 𑀬𑀣𑀸𑀯𑀼𑀢𑁆𑀢𑁄 𑀧𑁄𑀭𑀸𑀡𑀓𑁄 𑀧𑁄𑀭𑀸𑀡𑀸𑀘𑀭𑀺𑀬𑁂𑀳𑀺 𑀅𑀪𑀺𑀫𑀢𑁄 𑀧𑀸𑀞𑁄𑀬𑁂𑀯 𑀆𑀬𑀲𑁆𑀫𑀦𑁆𑀢𑁂𑀳𑀺 𑀕𑀳𑁂𑀢𑀩𑁆𑀩𑁄 𑀅𑀢𑁆𑀣𑀲𑁆𑀲 𑀬𑀼𑀢𑁆𑀢𑀺𑀢𑁄, 𑀝𑀻𑀓𑀸𑀬 𑀘 𑀲𑀤𑁆𑀥𑀺𑀁 𑀅𑀯𑀺𑀭𑁄𑀥𑀢𑁄𑀢𑀺.

𑀢𑀢𑁆𑀣 𑀓𑀼𑀲𑀮𑀦𑁆𑀢𑀺 𑀓𑀼𑀘𑁆𑀙𑀺𑀢𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀲𑀸𑀦𑀢𑁄 𑀢𑀦𑀼𑀓𑀭𑀡𑀢𑁄 𑀜𑀸𑀡𑀁 𑀓𑀼𑀲𑀁 𑀦𑀸𑀫, 𑀢𑁂𑀦 𑀓𑀼𑀲𑁂𑀦 𑀮𑀸𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀓𑀼𑀲𑀮𑀁. 𑀩𑀸𑀮𑁄𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀲𑀗𑁆𑀔𑀸𑀢𑁂 𑀤𑁆𑀯𑁂 𑀅𑀦𑀢𑁆𑀣𑁂 𑀤𑁂𑀯𑀤𑀢𑁆𑀢𑀓𑁄𑀓𑀸𑀮𑀺𑀓𑀸𑀤𑀬𑁄 𑀯𑀺𑀬 𑀮𑀸𑀢𑀺 𑀆𑀤𑀤𑀸𑀢𑀻𑀢𑀺 𑀩𑀸𑀮𑁄. 𑀇𑀫𑀸𑀦𑀺 𑀧𑀦 𑀢𑀁𑀦𑀸𑀫𑀸𑀦𑀺 𑁋

𑀩𑀸𑀮𑁄 𑀅𑀯𑀺𑀤𑁆𑀯𑀸 𑀅𑀜𑁆𑀜𑁄 𑀘, 𑀅𑀜𑁆𑀜𑀸𑀡𑀻 𑀅𑀯𑀺𑀘𑀓𑁆𑀔𑀡𑁄;

𑀅𑀧𑀡𑁆𑀟𑀺𑀢𑁄 𑀅𑀓𑀼𑀲𑀮𑁄, 𑀤𑀼𑀫𑁆𑀫𑁂𑀥𑁄 𑀓𑀼𑀫𑀢𑀺 𑀚𑀴𑁄.

𑀏𑀴𑀫𑀽𑀕𑁄 ¶ 𑀘 𑀦𑀺𑀧𑁆𑀧𑀜𑁆𑀜𑁄, 𑀤𑀼𑀫𑁆𑀫𑁂𑀥𑀻 𑀅𑀯𑀺𑀤𑀽 𑀫𑀕𑁄;

𑀅𑀯𑀺𑀜𑁆𑀜𑀽 𑀅𑀦𑁆𑀥𑀩𑀸𑀮𑁄 𑀘, 𑀤𑀼𑀧𑁆𑀧𑀜𑁆𑀜𑁄 𑀘 𑀅𑀯𑀺𑀤𑁆𑀤𑀲𑀼.

𑀫𑀳𑀮𑁆𑀮𑀓𑁄𑀢𑀺 𑀫𑀳𑀢𑁆𑀢𑀁 𑀮𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀫𑀳𑀮𑁆𑀮𑀓𑁄, 𑀚𑀺𑀡𑁆𑀡𑀧𑀼𑀭𑀺𑀲𑁄. 𑀇𑀫𑀸𑀦𑀺𑀲𑁆𑀲 𑀦𑀸𑀫𑀸𑀦𑀺 𑁋

𑀚𑀺𑀡𑁆𑀡𑁄 𑀫𑀳𑀮𑁆𑀮𑀓𑁄 𑀯𑀼𑀤𑁆𑀥𑁄, 𑀩𑀼𑀤𑁆𑀥𑁄 𑀯𑀼𑀟𑁆𑀠𑁄 𑀘 𑀓𑀢𑁆𑀢𑀭𑁄;

𑀣𑁂𑀭𑁄 𑀘𑀸𑀢𑀺 𑀇𑀫𑁂 𑀲𑀤𑁆𑀤𑀸, 𑀚𑀺𑀡𑁆𑀡𑀧𑀜𑁆𑀜𑀢𑁆𑀢𑀺𑀬𑁄 𑀲𑀺𑀬𑀼𑀁.

𑀢𑀣𑀸 𑀳𑀺 𑁋

‘‘𑀤𑀼𑀭𑁂 𑀅𑀧𑀲𑁆𑀲𑀁 𑀣𑁂𑀭𑁄𑀯, 𑀘𑀓𑁆𑀔𑀼𑀁 𑀬𑀸𑀘𑀺𑀢𑀼𑀫𑀸𑀕𑀢𑁄’’;

𑀏𑀯𑀫𑀸𑀤𑀻𑀲𑀼 𑀤𑀝𑁆𑀞𑀩𑁆𑀩𑁄, 𑀣𑁂𑀭𑀲𑀤𑁆𑀤𑁄 𑀫𑀳𑀮𑁆𑀮𑀓𑁂.

𑀇𑀫𑀸𑀦𑀺 𑀧𑀦 𑀦𑀸𑀫𑀸𑀦𑀺 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀯𑀢𑁆𑀢𑀩𑁆𑀩𑀸𑀦𑀺 𑁋

𑀚𑀺𑀡𑁆𑀡𑀸 𑀫𑀳𑀮𑁆𑀮𑀺𑀓𑀸 𑀯𑀼𑀤𑁆𑀥𑀻, 𑀩𑀼𑀤𑁆𑀥𑀻 𑀯𑀼𑀟𑁆𑀠𑀻 𑀘 𑀓𑀢𑁆𑀢𑀭𑀸;

𑀣𑁂𑀭𑀻 𑀘𑀸𑀢𑀺 𑀇𑀫𑁂 𑀲𑀤𑁆𑀤𑀸, 𑀦𑀸𑀫𑀁 𑀚𑀺𑀡𑁆𑀡𑀸𑀬 𑀇𑀢𑁆𑀣𑀺𑀬𑀸;

𑀤𑀮 𑀨𑀮 𑀯𑀺𑀲𑀭𑀡𑁂. 𑀤𑀮𑀢𑀺. 𑀨𑀮𑀢𑀺. 𑀤𑀮𑀺𑀢𑁄 𑀭𑀼𑀓𑁆𑀔𑁄. 𑀨𑀮𑀺𑀢𑁄 𑀪𑀽𑀫𑀺𑀪𑀸𑀕𑁄.

𑀅𑀮 𑀪𑀽𑀲𑀦𑁂. 𑀅𑀮𑀢𑀺. 𑀅𑀮𑀗𑁆𑀓𑀸𑀭𑁄, 𑀅𑀮𑀗𑁆𑀓𑀢𑁄, 𑀅𑀮𑀗𑁆𑀓𑀢𑀁. ‘‘𑀲𑀸𑀮𑀗𑁆𑀓𑀸𑀦𑀦𑀬𑁄𑀕𑁂𑀧𑀺, 𑀲𑀸𑀮𑀗𑁆𑀓𑀸𑀦𑀦𑀯𑀚𑁆𑀚𑀺𑀢𑀸’’𑀢𑀺 𑀇𑀫𑀺𑀲𑁆𑀲𑀜𑁆𑀳𑀺 𑀓𑀯𑀻𑀦𑀁 𑀓𑀩𑁆𑀩𑀭𑀘𑀦𑀸𑀬𑀁 𑀅𑀮𑀗𑁆𑀓𑀲𑀤𑁆𑀤𑁄 𑀪𑀽𑀲𑀦𑀯𑀺𑀲𑁂𑀲𑀁 𑀯𑀤𑀢𑀺. 𑀓𑁂𑀘𑀺 𑀧𑀦𑁂𑀢𑁆𑀣 𑀅𑀮 𑀪𑀽𑀲𑀦𑀧𑀭𑀺𑀬𑀸𑀧𑀦𑀯𑀸𑀭𑀦𑁂𑀲𑀽𑀢𑀺 𑀥𑀸𑀢𑀼𑀁 𑀧𑀞𑀦𑁆𑀢𑀺, ‘‘𑀅𑀮𑀢𑀻’’𑀢𑀺 𑀘 𑀭𑀽𑀧𑀁 𑀇𑀘𑁆𑀙𑀦𑁆𑀢𑀺. 𑀫𑀬𑀁 𑀧𑀦 𑀅𑀮𑀥𑀸𑀢𑀼𑀲𑁆𑀲 𑀧𑀭𑀺𑀬𑀢𑁆𑀢𑀺𑀦𑀺𑀯𑀸𑀭𑀡𑀢𑁆𑀣𑀯𑀸𑀘𑀓𑀢𑁆𑀢𑀁 𑀦 𑀇𑀘𑁆𑀙𑀸𑀫 𑀧𑀬𑁄𑀕𑀸𑀤𑀲𑁆𑀲𑀦𑀢𑁄. 𑀦𑀺𑀧𑀸𑀢𑀪𑀽𑀢𑁄 𑀧𑀦 𑀅𑀮𑀁𑀲𑀤𑁆𑀤𑁄 𑀧𑀭𑀺𑀬𑀢𑁆𑀢𑀺𑀦𑀺𑀯𑀸𑀭𑀡𑀢𑁆𑀣𑀯𑀸𑀘𑀓𑁄 𑀤𑀺𑀲𑁆𑀲𑀢𑀺 ‘‘𑀅𑀮𑀫𑁂𑀢𑀁 𑀲𑀩𑁆𑀩𑀁. 𑀅𑀮𑀁 𑀫𑁂 𑀢𑁂𑀦 𑀭𑀚𑁆𑀚𑁂𑀦𑀸’’𑀢𑀺𑀆𑀤𑀻𑀲𑀼.

𑀫𑀻𑀮 𑀦𑀺𑀫𑁂𑀮𑀦𑁂. 𑀫𑀻𑀮𑀢𑀺, 𑀦𑀺𑀫𑀻𑀮𑀢𑀺, 𑀉𑀫𑁆𑀫𑀻𑀮𑀢𑀺. 𑀦𑀺𑀫𑀻𑀮𑀦𑀁.

𑀩𑀺𑀮 𑀧𑀢𑀺𑀢𑁆𑀣𑀫𑁆𑀪𑁂. 𑀩𑀺𑀮𑀢𑀺.

𑀦𑀻𑀮 ¶ 𑀯𑀡𑁆𑀡𑁂. 𑀦𑀻𑀮𑀯𑀢𑁆𑀣𑀁.

𑀲𑀻𑀮 𑀲𑀫𑀸𑀥𑀺𑀫𑁆𑀳𑀺. 𑀲𑀻𑀮𑀢𑀺. 𑀲𑀻𑀮𑀁, 𑀲𑀻𑀮𑀦𑀁.

𑀏𑀢𑁆𑀣 𑀲𑀻𑀮𑀦𑁆𑀢𑀺 𑀲𑀻𑀮𑀦𑀝𑁆𑀞𑁂𑀦 𑀲𑀻𑀮𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 ‘‘𑀲𑀻𑀮𑀦𑁆𑀢𑀺 𑀓𑁂𑀦𑀝𑁆𑀞𑁂𑀦 𑀲𑀻𑀮𑀁? 𑀲𑀻𑀮𑀦𑀝𑁆𑀞𑁂𑀦 𑀲𑀻𑀮𑀁, 𑀓𑀺𑀫𑀺𑀤𑀁 𑀲𑀻𑀮𑀦𑀁 𑀦𑀸𑀫? 𑀲𑀫𑀸𑀥𑀸𑀦𑀁 𑀯𑀸 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀲𑀼𑀲𑀻𑀮𑁆𑀬𑀯𑀲𑁂𑀦 𑀅𑀯𑀺𑀧𑁆𑀧𑀓𑀺𑀡𑁆𑀡𑀢𑀸𑀢𑀺 𑀅𑀢𑁆𑀣𑁄. 𑀉𑀧𑀥𑀸𑀭𑀡𑀁 𑀯𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀢𑀺𑀝𑁆𑀞𑀸𑀦𑀯𑀲𑁂𑀦 𑀆𑀥𑀸𑀭𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀏𑀢𑀤𑁂𑀯 𑀳𑀺 𑀏𑀢𑁆𑀣 𑀅𑀢𑁆𑀣𑀤𑁆𑀯𑀬𑀁 𑀲𑀤𑁆𑀤𑀮𑀓𑁆𑀔𑀡𑀯𑀺𑀤𑀽 𑀅𑀦𑀼𑀚𑀸𑀦𑀦𑁆𑀢𑀺. 𑀅𑀜𑁆𑀜𑁂 𑀧𑀦 ‘𑀲𑀺𑀭𑀝𑁆𑀞𑁄 𑀲𑀻𑀮𑀝𑁆𑀞𑁄, 𑀲𑀻𑀢𑀮𑀝𑁆𑀞𑁄 𑀲𑀻𑀮𑀝𑁆𑀞𑁄’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦𑁂𑀢𑁆𑀣 𑀅𑀢𑁆𑀣𑀁 𑀯𑀡𑁆𑀡𑁂𑀦𑁆𑀢𑀻’’𑀢𑀺. 𑀢𑀢𑁆𑀣 ‘‘𑀅𑀢𑁆𑀣𑀤𑁆𑀯𑀬𑀁 𑀲𑀤𑁆𑀤𑀮𑀓𑁆𑀔𑀡 𑀯𑀺𑀤𑀽 𑀅𑀦𑀼𑀚𑀸𑀦𑀦𑁆𑀢𑀻’’𑀢𑀺 𑀇𑀤𑀁 ‘‘𑀲𑀻𑀮 𑀲𑀫𑀸𑀥𑀺𑀫𑁆𑀳𑀺 𑀲𑀻𑀮 𑀉𑀧𑀥𑀸𑀭𑀡𑁂’’𑀢𑀺 𑀤𑁆𑀯𑀺𑀕𑀡𑀺𑀓𑀲𑁆𑀲 𑀲𑀻𑀮𑀥𑀸𑀢𑀼𑀲𑁆𑀲 𑀅𑀢𑁆𑀣𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀫𑀲𑁆𑀲 𑀳𑀺 𑀘𑀼𑀭𑀸𑀤𑀺𑀕𑀡𑀁 𑀧𑀢𑁆𑀢𑀲𑁆𑀲 𑀉𑀧𑀥𑀸𑀭𑀡𑁂 ‘‘𑀲𑀻𑀮𑁂𑀢𑀺, 𑀲𑀻𑀮𑀬𑀢𑀻’’𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺, 𑀉𑀧𑀥𑀸𑀭𑁂𑀢𑀻𑀢𑀺𑀧𑀺 𑀢𑁂𑀲𑀁 𑀅𑀢𑁆𑀣𑁄. 𑀇𑀥 𑀧𑀦 𑀪𑀽𑀯𑀸𑀤𑀺𑀕𑀡𑀺𑀓𑀢𑁆𑀢𑀸 𑀲𑀫𑀸𑀥𑀸𑀦𑀢𑁆𑀣𑁂 ‘‘𑀲𑀻𑀮𑀢𑀻’’𑀢𑀺 𑀭𑀽𑀧𑀁 𑀪𑀯𑀢𑀺, 𑀲𑀫𑀸𑀥𑀺𑀬𑀢𑀻𑀢𑀺 𑀢𑀲𑁆𑀲 𑀅𑀢𑁆𑀣𑁄. 𑀧𑀼𑀦𑀧𑀺 𑀏𑀢𑁆𑀣 𑀲𑁄𑀢𑀽𑀦𑀁 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀦𑀺𑀩𑁆𑀩𑀘𑀦𑀸𑀦𑀺 𑀯𑀼𑀘𑁆𑀘𑀦𑁆𑀢𑁂. 𑀲𑀻𑀮𑀢𑀺 𑀲𑀫𑀸𑀥𑀺𑀬𑀢𑀺 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀲𑀼𑀲𑀻𑀮𑁆𑀬𑀯𑀲𑁂𑀦 𑀦 𑀯𑀺𑀧𑁆𑀧𑀓𑀺𑀭𑀢𑀻𑀢𑀺 𑀲𑀻𑀮𑀁. 𑀅𑀣 𑀯𑀸 𑀲𑀻𑀮𑀦𑁆𑀢𑀺 𑀲𑀫𑀸𑀤𑀳𑀦𑁆𑀢𑀺 𑀘𑀺𑀢𑁆𑀢𑀁 𑀏𑀢𑁂𑀦𑀸𑀢𑀺 𑀲𑀻𑀮𑀁. 𑀇𑀫𑀸𑀦𑀺 𑀪𑀽𑀯𑀸𑀤𑀺𑀕𑀡𑀺𑀓𑀯𑀲𑁂𑀦 𑀦𑀺𑀩𑁆𑀩𑀘𑀦𑀸𑀦𑀺. 𑀘𑀼𑀭𑀸𑀤𑀺𑀕𑀡𑀺𑀓𑀯𑀲𑁂𑀦 𑀧𑀦 𑀲𑀻𑀮𑁂𑀢𑀺 𑀓𑀼𑀲𑀮𑁂 𑀥𑀫𑁆𑀫𑁂 𑀉𑀧𑀥𑀸𑀭𑁂𑀢𑀺 𑀧𑀢𑀺𑀝𑁆𑀞𑀸𑀪𑀸𑀯𑁂𑀦 𑀪𑀼𑀲𑁄 𑀥𑀸𑀭𑁂𑀢𑀻𑀢𑀺 𑀲𑀻𑀮𑀁. 𑀲𑀻𑀮𑁂𑀦𑁆𑀢𑀺 𑀯𑀸 𑀏𑀢𑁂𑀦 𑀓𑀼𑀲𑀮𑁂 𑀥𑀫𑁆𑀫𑁂 𑀉𑀧𑀥𑀸𑀭𑁂𑀦𑁆𑀢𑀺 𑀪𑀼𑀲𑁄 𑀥𑀸𑀭𑁂𑀦𑁆𑀢𑀺 𑀲𑀸𑀥𑀯𑁄𑀢𑀺 𑀲𑀻𑀮𑀦𑁆𑀢𑀺 𑀦𑀺𑀩𑁆𑀩𑀘𑀦𑀸𑀦𑀺.

𑀓𑀺𑀮 𑀩𑀦𑁆𑀥𑁂. 𑀓𑀺𑀮𑀢𑀺. 𑀓𑀺𑀮𑀁.

𑀓𑀽𑀮 𑀆𑀯𑀭𑀡𑁂. 𑀓𑀼𑀮𑀢𑀺. 𑀓𑀽𑀮𑀁. 𑀯𑀳𑁂 𑀭𑀼𑀓𑁆𑀔𑁂 𑀧𑀓𑀽𑀮𑀚𑁂. 𑀓𑀽𑀮𑀁 𑀩𑀦𑁆𑀥𑀢𑀺. 𑀦𑀤𑀻𑀓𑀽𑀮𑁂 𑀯𑀲𑀸𑀫𑀳𑀁. 𑀓𑀽𑀮𑀢𑀺 𑀆𑀯𑀭𑀢𑀺 𑀉𑀤𑀓𑀁 𑀩𑀳𑀺 𑀦𑀺𑀓𑁆𑀔𑀫𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀓𑀽𑀮𑀁.

𑀲𑀽𑀮 ¶ 𑀭𑀼𑀚𑀸𑀬𑀁. 𑀲𑀽𑀮𑀢𑀺. 𑀲𑀽𑀮𑀁. 𑀓𑀡𑁆𑀡𑀲𑀽𑀮𑀁 𑀦 𑀚𑀦𑁂𑀢𑀺.

𑀢𑀽𑀮 𑀦𑀺𑀓𑁆𑀓𑀭𑀻𑀲𑁂. 𑀦𑀺𑀓𑁆𑀓𑀭𑀻𑀲𑀁 𑀦𑀸𑀫 𑀓𑀭𑀻𑀲𑀫𑀢𑁆𑀢𑁂𑀦𑀧𑀺 𑀅𑀫𑀺𑀦𑁂𑀢𑀩𑁆𑀩𑀢𑁄 𑀮𑀳𑀼𑀪𑀸𑀯𑁄𑀬𑁂𑀯. 𑀢𑀽𑀮𑀢𑀺. 𑀢𑀽𑀮𑀁 𑀪𑀝𑁆𑀞𑀁𑀯 𑀫𑀸𑀮𑀼𑀢𑁄.

𑀧𑀼𑀮 𑀲𑀗𑁆𑀖𑀸𑀢𑁂. 𑀧𑀼𑀮𑀢𑀺. 𑀧𑀜𑁆𑀘𑀧𑀼𑀮𑀺.

𑀫𑀽𑀮 𑀧𑀢𑀺𑀝𑁆𑀞𑀸𑀬𑀁 𑀫𑀽𑀮𑀢𑀺. 𑀫𑀽𑀮𑀁. 𑀫𑀽𑀮𑀲𑀤𑁆𑀤𑁄 ‘‘𑀫𑀽𑀮𑀸𑀦𑀺 𑀉𑀤𑁆𑀥𑀭𑁂𑀬𑁆𑀬 𑀅𑀦𑁆𑀢𑀫𑀲𑁄 𑀉𑀲𑁆𑀲𑀻𑀭𑀦𑀸𑀴𑀺𑀫𑀢𑁆𑀢𑀸𑀦𑀺𑀧𑀻’’𑀢𑀺𑀆𑀤𑀻𑀲𑀼 𑀫𑀽𑀮𑀫𑀽𑀮𑁂 𑀤𑀺𑀲𑁆𑀲𑀢𑀺. ‘‘𑀮𑁄𑀪𑁄 𑀅𑀓𑀼𑀲𑀮𑀫𑀽𑀮’’𑀦𑁆𑀢𑀺𑀆𑀤𑀻𑀲𑀼 𑀅𑀲𑀸𑀥𑀸𑀭𑀡𑀳𑁂𑀢𑀼𑀫𑁆𑀳𑀺. ‘‘𑀬𑀸𑀯𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂 𑀙𑀸𑀬𑀸 𑀨𑀭𑀢𑀺, 𑀦𑀺𑀯𑀸𑀢𑁂 𑀧𑀡𑁆𑀡𑀸𑀦𑀺 𑀧𑀢𑀦𑁆𑀢𑀺, 𑀏𑀢𑁆𑀢𑀸𑀯𑀢𑀸 𑀭𑀼𑀓𑁆𑀔𑀫𑀽𑀮’’𑀦𑁆𑀢𑀺𑀆𑀤𑀻𑀲𑀼 𑀲𑀫𑀻𑀧𑁂. 𑀅𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

𑀫𑀽𑀮𑀫𑀽𑀮𑁂 𑀫𑀽𑀮𑀲𑀤𑁆𑀤𑁄, 𑀧𑀤𑀺𑀲𑁆𑀲𑀢𑀺 𑀢𑀣𑁂𑀯 𑀘;

𑀅𑀲𑀸𑀥𑀸𑀭𑀡𑀳𑁂𑀢𑀼𑀫𑁆𑀳𑀺, 𑀲𑀫𑀻𑀧𑀫𑁆𑀳𑀺 𑀘 𑀯𑀢𑁆𑀢𑀢𑀺.

𑀨𑀮 𑀦𑀺𑀩𑁆𑀩𑀢𑁆𑀢𑀺𑀬𑀁. 𑀭𑀼𑀓𑁆𑀔𑁄 𑀨𑀮𑀢𑀺. 𑀭𑀼𑀓𑁆𑀔𑀨𑀮𑀸𑀦𑀺 𑀪𑀼𑀜𑁆𑀚𑀦𑁆𑀢𑀸. 𑀫𑀳𑀧𑁆𑀨𑀮𑀁 𑀫𑀳𑀸𑀦𑀺𑀲𑀁𑀲𑀁. 𑀲𑁄𑀢𑀸𑀧𑀢𑁆𑀢𑀺𑀨𑀮𑀁. 𑀢𑀢𑁆𑀣 𑀨𑀮𑀦𑁆𑀢𑀺 𑀫𑀳𑀸𑀦𑀺𑀩𑁆𑀩𑀢𑁆𑀢𑀺𑀓𑀁.

𑀨𑀮 𑀪𑁂𑀤𑁂. 𑀨𑀮𑀢𑀺. 𑀫𑀼𑀤𑁆𑀥𑀸 𑀢𑁂 𑀨𑀮𑀢𑀼 𑀲𑀢𑁆𑀢𑀥𑀸. 𑀧𑀸𑀤𑀸 𑀨𑀮𑀺𑀁𑀲𑀼. 𑀢𑀢𑁆𑀣 𑀨𑀮𑀢𑀽𑀢𑀺 𑀪𑀚𑁆𑀚𑀺𑀢𑀼.

𑀨𑀮 𑀅𑀩𑁆𑀬𑀢𑁆𑀢𑀲𑀤𑁆𑀤𑁂. 𑀅𑀲𑀦𑀻 𑀨𑀮𑀢𑀺. 𑀤𑁆𑀯𑁂𑀫𑁂 𑀪𑀺𑀓𑁆𑀔𑀯𑁂 𑀅𑀲𑀦𑀺𑀬𑀸 𑀨𑀮𑀦𑁆𑀢𑀺𑀬𑀸 𑀦 𑀲𑀦𑁆𑀢𑀲𑀦𑁆𑀢𑀺. 𑀨𑀮𑀦𑁆𑀢𑀺𑀬𑀸𑀢𑀺 𑀲𑀤𑁆𑀤𑀁 𑀓𑀭𑁄𑀦𑁆𑀢𑀺𑀬𑀸.

𑀘𑀼𑀮𑁆𑀮 𑀳𑀸𑀯𑀓𑀭𑀡𑁂. 𑀳𑀸𑀯𑀓𑀭𑀡𑀁 𑀯𑀺𑀮𑀸𑀲𑀓𑀭𑀡𑀁. 𑀘𑀼𑀮𑁆𑀮𑀢𑀺.

𑀨𑀼𑀮𑁆𑀮 ¶ 𑀯𑀺𑀓𑀲𑀦𑀪𑁂𑀤𑁂𑀲𑀼. 𑀨𑀼𑀮𑁆𑀮𑀢𑀺. 𑀨𑀼𑀮𑁆𑀮𑀁. 𑀨𑀼𑀮𑁆𑀮𑀺𑀢𑁄 𑀓𑀺𑀁𑀲𑀼𑀓𑁄. 𑀲𑀼𑀨𑀼𑀮𑁆𑀮𑀺𑀢𑀫𑀭𑀯𑀺𑀦𑁆𑀤𑀯𑀦𑀁.

𑀅𑀲𑀻𑀢𑀺𑀳𑀢𑁆𑀣𑀫𑀼𑀩𑁆𑀩𑁂𑀥𑁄, 𑀤𑀻𑀧𑀗𑁆𑀓𑀭𑁄 𑀫𑀳𑀸𑀫𑀼𑀦𑀺;

𑀲𑁄𑀪𑀢𑀺 𑀤𑀻𑀧𑀭𑀼𑀓𑁆𑀔𑁄𑀯, 𑀲𑀸𑀮𑀭𑀸𑀚𑀸𑀯 𑀨𑀼𑀮𑁆𑀮𑀺𑀢𑁄.

𑀔𑀡𑁆𑀟𑀨𑀼𑀮𑁆𑀮𑀧𑀝𑀺𑀲𑀗𑁆𑀔𑀭𑀡𑀁.

𑀘𑀺𑀮𑁆𑀮 𑀲𑁂𑀞𑀺𑀮𑁆𑀮𑁂. 𑀲𑀺𑀞𑀺𑀮𑀪𑀸𑀯𑁄 𑀲𑁂𑀞𑀺𑀮𑁆𑀮𑀁. 𑀘𑀺𑀮𑁆𑀮𑀢𑀺.

𑀯𑁂𑀮𑀼 𑀘𑁂𑀮𑀼 𑀓𑁂𑀮𑀼 𑀔𑁂𑀮𑀼 𑀧𑁂𑀮𑀼 𑀩𑁂𑀮𑀼 𑀲𑁂𑀮𑀼 𑀲𑀮 𑀢𑀺𑀮 𑀕𑀢𑀺𑀬𑀁. 𑀯𑁂𑀮𑀢𑀺. 𑀘𑁂𑀮𑀢𑀺. 𑀓𑁂𑀮𑀢𑀺. 𑀔𑁂𑀮𑀢𑀺. 𑀧𑁂𑀮𑀢𑀺. 𑀩𑁂𑀮𑀢𑀺. 𑀲𑁂𑀮𑀢𑀺. 𑀲𑀮𑀢𑀺. 𑀢𑀺𑀮𑀢𑀺. 𑀘𑁂𑀮𑀁, 𑀩𑁂𑀮𑀓𑁄. 𑀏𑀢𑁆𑀣 𑀘𑁂𑀮𑀦𑁆𑀢𑀺 𑀯𑀢𑁆𑀣𑀁. 𑀧𑁂𑀮𑀓𑁄𑀢𑀺 𑀲𑀲𑁄.

𑀔𑀮 𑀘𑀮𑀦𑁂. 𑀔𑀮𑀢𑀺. 𑀔𑀮𑁄. 𑀔𑀮𑁄𑀢𑀺 𑀤𑀼𑀚𑁆𑀚𑀦𑁄 𑀅𑀲𑀸𑀥𑀼 𑀅𑀲𑀧𑁆𑀧𑀼𑀭𑀺𑀲𑁄 𑀧𑀸𑀧𑀚𑀦𑁄.

𑀔𑀮 𑀲𑀜𑁆𑀘𑀺𑀦𑀦𑁂. 𑀔𑀮𑀢𑀺. 𑀔𑀮𑀁. 𑀔𑀮𑀦𑁆𑀢𑀺 𑀯𑀻𑀳𑀺𑀝𑁆𑀞𑀧𑀦𑁄𑀓𑀸𑀲𑀪𑀽𑀢𑀁 𑀪𑀽𑀫𑀺𑀫𑀡𑁆𑀟𑀮𑀁. 𑀢𑀜𑁆𑀳𑀺 𑀔𑀮𑀦𑁆𑀢𑀺 𑀲𑀜𑁆𑀘𑀺𑀦𑀦𑁆𑀢𑀺 𑀭𑀸𑀲𑀺𑀁 𑀓𑀭𑁄𑀦𑁆𑀢𑀺 𑀏𑀢𑁆𑀣 𑀥𑀜𑁆𑀜𑀸𑀦𑀻𑀢𑀺 𑀔𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀔𑀮𑀁 𑀲𑀸𑀮𑀁 𑀧𑀲𑀼𑀁 𑀔𑁂𑀢𑁆𑀢𑀁, 𑀕𑀦𑁆𑀢𑀸 𑀘𑀲𑁆𑀲 𑀅𑀪𑀺𑀓𑁆𑀔𑀡’’𑀦𑁆𑀢𑀺 𑀧𑀬𑁄𑀕𑁄.

𑀕𑀺𑀮 𑀅𑀚𑁆𑀛𑁄𑀳𑀭𑀡𑁂. 𑀕𑀺𑀮𑀢𑀺. 𑀕𑀺𑀮𑀫𑀓𑁆𑀔𑀁 𑀧𑀼𑀭𑀺𑀲𑁄 𑀦 𑀩𑀼𑀚𑁆𑀛𑀢𑀺.

𑀕𑀮 𑀅𑀤𑀦𑁂. 𑀕𑀮𑀢𑀺. 𑀕𑀮𑁄. 𑀕𑀮𑀦𑁆𑀢𑀺 𑀅𑀤𑀦𑁆𑀢𑀺 𑀅𑀚𑁆𑀛𑁄𑀳𑀭𑀦𑁆𑀢𑀺 𑀏𑀢𑁂𑀦𑀸𑀢𑀺 𑀕𑀮𑁄. 𑀕𑀮𑁄𑀢𑀺 𑀕𑀻𑀯𑀸 𑀯𑀼𑀘𑁆𑀘𑀢𑀺.

𑀲𑀮 𑀲𑀮𑁆𑀮 𑀆𑀲𑀼𑀕𑀢𑀺𑀬𑀁. 𑀆𑀲𑀼𑀕𑀢𑀺 𑀲𑀻𑀖𑀕𑀫𑀦𑀁. 𑀲𑀮𑀢𑀺. 𑀲𑀮𑁆𑀮𑀢𑀺. 𑀲𑀮𑁆𑀮𑀁. 𑀏𑀢𑁆𑀣 𑀘 ‘‘𑀲𑀮𑁆𑀮𑀁 𑀉𑀲𑀼 𑀲𑀭𑁄 𑀲𑀮𑁆𑀮𑁄 𑀓𑀡𑁆𑀟𑁄 𑀢𑁂𑀚𑀦𑁄’’𑀢𑀺 𑀧𑀭𑀺𑀬𑀸𑀬𑀸 𑀏𑀢𑁂.

𑀔𑁄𑀮 𑀕𑀢𑀺𑀧𑀝𑀺𑀖𑀸𑀢𑁂. 𑀔𑁄𑀮𑀢𑀺.

𑀕𑀺𑀮𑁂 ¶ 𑀧𑀻𑀢𑀺𑀓𑁆𑀔𑀬𑁂. 𑀕𑀺𑀮𑀸𑀬𑀢𑀺. 𑀕𑀺𑀮𑀸𑀦𑁄, 𑀕𑁂𑀮𑀜𑁆𑀜𑀁. 𑀕𑀺𑀮𑀸𑀦𑁄𑀢𑀺 𑀅𑀓𑀮𑁆𑀮𑀓𑁄. 𑀯𑀺𑀦𑀬𑁂𑀧𑀺 𑀳𑀺 𑀯𑀼𑀢𑁆𑀢𑀁 ‘‘𑀦𑀸𑀳𑀁 𑀅𑀓𑀮𑁆𑀮𑀓𑁄’’𑀢𑀺. 𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀦𑀸𑀳𑀁 𑀅𑀓𑀮𑁆𑀮𑀓𑁄𑀢𑀺 𑀦𑀸𑀳𑀁 𑀕𑀺𑀮𑀸𑀦𑁄’’𑀢𑀺 𑀯𑀼𑀢𑁆𑀢𑀁.

𑀫𑀺𑀮𑁂 𑀕𑀢𑁆𑀢𑀯𑀺𑀦𑀸𑀫𑁂. 𑀫𑀺𑀮𑀸𑀬𑀢𑀺. 𑀫𑀺𑀮𑀸𑀬𑀦𑁄, 𑀫𑀺𑀮𑀸𑀬𑀦𑁆𑀢𑁄, 𑀫𑀺𑀮𑀸𑀬𑀫𑀸𑀦𑁄.

𑀓𑁂𑀮𑁂 𑀫𑀫𑀸𑀬𑀦𑁂. 𑀫𑀫𑀸𑀬𑀦𑀁 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 ‘‘𑀫𑀫 𑀇𑀤’’𑀦𑁆𑀢𑀺 𑀕𑀳𑀡𑀁. 𑀓𑁂𑀮𑀸𑀬𑀢𑀺. 𑀢𑁆𑀯𑀁 𑀓𑀁 𑀓𑁂𑀮𑀸𑀬𑀢𑀺.

𑀲𑀮 𑀘𑀮𑀦𑁂 𑀲𑀁𑀯𑀭𑀡𑁂 𑀘, 𑀯𑀮 𑀯𑀮𑁆𑀮 𑀘𑀮𑀦𑁂 𑀘. 𑀲𑀁𑀯𑀭𑀡𑀸𑀧𑁂𑀓𑁆𑀔𑀸𑀬𑀁 𑀘𑀓𑀸𑀭𑁄. 𑀲𑀮𑀢𑀺. 𑀓𑀼𑀲𑀮𑀁. 𑀯𑀮𑀢𑀺. 𑀯𑀮𑁆𑀮𑀢𑀺. 𑀯𑀮𑁆𑀮𑀽𑀭𑁄.

𑀢𑀢𑁆𑀣 𑀓𑀼𑀲𑀮𑀦𑁆𑀢𑀺 𑀓𑀼𑀘𑁆𑀙𑀺𑀢𑁂 𑀧𑀸𑀧𑀥𑀫𑁆𑀫𑁂 𑀲𑀮𑀬𑀢𑀺 𑀘𑀮𑀬𑀢𑀺 𑀓𑀫𑁆𑀧𑁂𑀢𑀺 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀓𑀼𑀲𑀮𑀁. 𑀓𑀼𑀘𑁆𑀙𑀺𑀢𑀁 𑀅𑀧𑀸𑀬𑀤𑁆𑀯𑀸𑀭𑀁 𑀲𑀮𑀦𑁆𑀢𑀺 𑀲𑀁𑀯𑀭𑀦𑁆𑀢𑀺 𑀧𑀺𑀤𑀳𑀦𑁆𑀢𑀺 𑀲𑀸𑀥𑀯𑁄 𑀏𑀢𑁂𑀦𑀸𑀢𑀺 𑀓𑀼𑀲𑀮𑀁. 𑀯𑀮𑁆𑀮𑀦𑁆𑀢𑀺 𑀲𑀁𑀯𑀭𑀦𑁆𑀢𑀺 𑀭𑀓𑁆𑀔𑀦𑁆𑀢𑀺 𑀇𑀢𑁄 𑀓𑀸𑀓𑀲𑁂𑀦𑀸𑀤𑀬𑁄 𑀲𑀢𑁆𑀢𑁂 𑀅𑀔𑀸𑀤𑀦𑀢𑁆𑀣𑀸𑀬𑀸𑀢𑀺 𑀯𑀮𑁆𑀮𑀽𑀭𑁄.

𑀫𑀮 𑀫𑀮𑁆𑀮 𑀥𑀸𑀭𑀡𑁂. 𑀫𑀮𑀢𑀺. 𑀫𑀮𑀁. 𑀫𑀮𑁆𑀮𑀢𑀺. 𑀫𑀮𑁆𑀮𑁄.

𑀪𑀮 𑀪𑀮𑁆𑀮 𑀧𑀭𑀺𑀪𑀸𑀲𑀦𑀳𑀺𑀁𑀲𑀸𑀤𑀸𑀦𑁂𑀲𑀼. 𑀪𑀮𑀢𑀺. 𑀪𑀮𑁆𑀮𑀢𑀺.

𑀓𑀮 𑀲𑀗𑁆𑀔𑁆𑀬𑀸𑀦𑁂. 𑀓𑀮𑀢𑀺. 𑀓𑀮𑀸, 𑀓𑀸𑀮𑁄.

𑀏𑀢𑁆𑀣 𑀓𑀮𑀸𑀢𑀺 𑀲𑁄𑀴𑀲𑀪𑀸𑀕𑀸𑀤𑀺𑀪𑀸𑀕𑁄. 𑀓𑀸𑀮𑁄𑀢𑀺 ‘‘𑀏𑀢𑁆𑀢𑀓𑁄 𑀅𑀢𑁆𑀓𑁆𑀓𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀓𑀮𑀺𑀢𑀩𑁆𑀩𑁄 𑀲𑀗𑁆𑀔𑀸𑀢𑀩𑁆𑀩𑁄𑀢𑀺 𑀓𑀸𑀮𑁄, 𑀧𑀼𑀩𑁆𑀩𑀡𑁆𑀳𑀸𑀤𑀺𑀲𑀫𑀬𑁄.

𑀓𑀮𑁆𑀮 𑀅𑀲𑀤𑁆𑀤𑁂. 𑀅𑀲𑀤𑁆𑀤𑁄. 𑀦𑀺𑀲𑁆𑀲𑀤𑁆𑀤𑁄. 𑀓𑀮𑁆𑀮𑀢𑀺.

𑀚𑀮 𑀤𑀺𑀢𑁆𑀢𑀺𑀬𑀁. 𑀚𑀮𑀢𑀺. 𑀚𑀮𑀁, 𑀚𑀮𑀦𑁆𑀢𑁄, 𑀧𑀚𑁆𑀚𑀮𑀦𑁆𑀢𑁄, 𑀚𑀮𑀫𑀸𑀦𑁄.

𑀓𑁄 ¶ 𑀏𑀢𑀺 𑀲𑀺𑀭𑀺𑀬𑀸 𑀚𑀮𑀁. 𑀚𑀮𑀁𑀯 𑀬𑀲𑀲𑀸 𑀅𑀝𑁆𑀞𑀸, 𑀤𑁂𑀯𑀤𑀢𑁆𑀢𑁄𑀢𑀺 𑀫𑁂 𑀲𑀼𑀢𑀁. 𑀲𑀤𑁆𑀥𑀫𑁆𑀫𑀧𑀚𑁆𑀚𑁄𑀢𑁄 𑀚𑀮𑀺𑀢𑁄.

𑀳𑀼𑀮 𑀘𑀮𑀦𑁂. 𑀳𑀼𑀮𑀢𑀺. 𑀳𑀮𑁄. 𑀳𑀮𑁄𑀢𑀺 𑀨𑀸𑀮𑁄, 𑀲𑁄 𑀳𑀺 𑀳𑁄𑀮𑁂𑀢𑀺 𑀪𑀽𑀫𑀺𑀁 𑀪𑀺𑀦𑁆𑀤𑀦𑁆𑀢𑁄 𑀫𑀢𑁆𑀢𑀺𑀓𑀔𑀡𑁆𑀟𑀁 𑀘𑀸𑀮𑁂𑀢𑀻𑀢𑀺 ‘‘𑀳𑀮𑁄’’𑀢𑀺 𑀯𑀼𑀘𑁆𑀘𑀢𑀺 𑀉𑀓𑀸𑀭𑀲𑁆𑀲 𑀅𑀓𑀸𑀭𑀁 𑀓𑀢𑁆𑀯𑀸.

𑀘𑀮 𑀓𑀫𑁆𑀧𑀦𑁂. 𑀘𑀮𑀢𑀺. 𑀘𑀮𑀺𑀢𑁄, 𑀅𑀘𑀮𑁄. 𑀫𑀳𑀦𑁆𑀢𑁄 𑀪𑀽𑀫𑀺𑀘𑀸𑀮𑁄. 𑀘𑀮𑀦𑀁, 𑀘𑀸𑀮𑁄.

𑀚𑀮 𑀥𑀜𑁆𑀜𑁂. 𑀚𑀮𑀢𑀺. 𑀚𑀮𑀁.

𑀝𑀮 𑀝𑀼𑀮 𑀯𑁂𑀮𑀫𑁆𑀩𑁂. 𑀝𑀮𑀢𑀺. 𑀝𑀼𑀮𑀢𑀺.

𑀣𑀮 𑀞𑀸𑀦𑁂. 𑀣𑀮𑀢𑀺. 𑀣𑀮𑁄. 𑀣𑀮𑁄𑀢𑀺 𑀦𑀺𑀭𑀼𑀤𑀓𑀧𑁆𑀧𑀤𑁂𑀲𑁄. 𑀧𑀩𑁆𑀩𑀚𑁆𑀚𑀸𑀦𑀺𑀩𑁆𑀩𑀸𑀦𑁂𑀲𑀼𑀧𑀺 𑀢𑀁𑀲𑀤𑀺𑀲𑀢𑁆𑀢𑀸 𑀢𑀩𑁆𑀩𑁄𑀳𑀸𑀭𑁄. 𑀬𑀣𑀸 𑀳𑀺 𑀮𑁄𑀓𑁂 𑀉𑀤𑀓𑁄𑀖𑁂𑀦 𑀅𑀦𑁄𑀢𑁆𑀣𑀭𑀡𑀝𑁆𑀞𑀸𑀦𑀁 ‘‘𑀣𑀮𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀓𑀺𑀮𑁂𑀲𑁄𑀖𑁂𑀦 𑀅𑀦𑁄𑀢𑁆𑀣𑀭𑀡𑀻𑀬𑀢𑁆𑀢𑀸 𑀧𑀩𑁆𑀩𑀚𑁆𑀚𑀸 𑀦𑀺𑀩𑁆𑀩𑀸𑀦𑀜𑁆𑀘 ‘‘𑀣𑀮𑁄’’𑀢𑀺 𑀯𑀼𑀘𑁆𑀘𑀢𑀺, ‘‘𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀳𑀺 𑀯𑀼𑀢𑁆𑀢𑀁.

𑀨𑀸𑀮 𑀯𑀺𑀮𑁂𑀔𑀦𑁂. 𑀨𑀸𑀮𑀢𑀺 𑀪𑀽𑀫𑀺𑀁 𑀯𑀺𑀮𑁂𑀔𑀢𑀺 𑀪𑀺𑀦𑁆𑀤𑀢𑀻𑀢𑀺 𑀨𑀸𑀮𑁄.

𑀦𑀮 𑀕𑀦𑁆𑀣𑁂. 𑀦𑀮𑀢𑀺.

𑀩𑀮 𑀧𑀸𑀡𑀦𑁂. 𑀇𑀳 𑀧𑀸𑀡𑀦𑀁 𑀚𑀻𑀯𑀦𑀁 𑀲𑀲𑀦𑀜𑁆𑀘. 𑀩𑀮𑀢𑀺. 𑀩𑀮𑀁, 𑀩𑀸𑀮𑁄.

𑀏𑀢𑁆𑀣 𑀩𑀮𑀦𑁆𑀢𑀺 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀩𑀮𑀁, 𑀓𑀸𑀬𑀩𑀮𑀪𑁄𑀕𑀩𑀮𑀸𑀤𑀺𑀓𑀁 𑀩𑀮𑀁. 𑀅𑀣 𑀯𑀸 𑀩𑀮𑀦𑁆𑀢𑀺 𑀲𑀫𑁆𑀫𑀸𑀚𑀻𑀯𑀦𑀁 𑀚𑀻𑀯𑀦𑁆𑀢𑀺 𑀏𑀢𑁂𑀦𑀸𑀢𑀺 𑀩𑀮𑀁, 𑀲𑀤𑁆𑀥𑀸𑀤𑀺𑀓𑀁 𑀩𑀮𑀁. 𑀆𑀕𑀫𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀅𑀲𑁆𑀲𑀤𑁆𑀥𑀺𑀬𑁂 𑀦 𑀓𑀫𑁆𑀧𑀢𑀻𑀢𑀺 𑀲𑀤𑁆𑀥𑀸𑀩𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀤𑀴𑁆𑀳𑀝𑁆𑀞𑁂𑀦 𑀩𑀮𑀦𑁆𑀢𑀺 𑀯𑀢𑁆𑀢𑀩𑁆𑀩𑀸𑀦𑀁 𑀲𑀤𑁆𑀥𑀸𑀤𑀻𑀦𑀁 𑀅𑀓𑀫𑁆𑀧𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 ¶ 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀥𑀸𑀢𑀽𑀦𑀁 𑀅𑀢𑁆𑀣𑀸𑀢𑀺𑀲𑀬𑀬𑁄𑀕𑀢𑁄 𑀅𑀲𑁆𑀲𑀤𑁆𑀥𑀺𑀬𑀸𑀤𑀻𑀦𑀁 𑀅𑀪𑀺𑀪𑀯𑀦𑁂𑀦 𑀲𑀤𑁆𑀥𑀸𑀤𑀺𑀩𑀮𑀸𑀦𑀁 𑀅𑀪𑀺𑀪𑀯𑀦𑀢𑁆𑀣𑁄𑀧𑀺 𑀕𑀳𑁂𑀢𑀩𑁆𑀩𑁄 ‘‘𑀅𑀩𑀮𑀸 𑀦𑀁 𑀩𑀮𑀺𑀬𑀦𑁆𑀢𑀻’’𑀢𑀺 𑀏𑀢𑁆𑀣 𑀯𑀺𑀬. 𑀩𑀸𑀮𑁄𑀢𑀺 𑀩𑀮𑀢𑀺 𑀅𑀲𑁆𑀲𑀲𑀢𑀺 𑀘𑁂𑀯 𑀧𑀲𑁆𑀲𑀲𑀢𑀺 𑀘𑀸𑀢𑀺 𑀩𑀸𑀮𑁄, 𑀅𑀲𑁆𑀲𑀲𑀺𑀢𑀧𑀲𑁆𑀲𑀲𑀺𑀢𑀫𑀢𑁆𑀢𑁂𑀦 𑀚𑀻𑀯𑀢𑀺, 𑀦 𑀲𑁂𑀝𑁆𑀞𑁂𑀦 𑀧𑀜𑁆𑀜𑀸𑀚𑀻𑀯𑀺𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀩𑀮𑀦𑁆𑀢𑀻𑀢𑀺 𑀩𑀸𑀮𑀸, 𑀅𑀲𑁆𑀲𑀲𑀺𑀢𑀧𑀲𑁆𑀲𑀲𑀺𑀢𑀫𑀢𑁆𑀢𑁂𑀦 𑀚𑀻𑀯𑀦𑁆𑀢𑀺, 𑀦 𑀧𑀜𑁆𑀜𑀸𑀚𑀻𑀯𑀺𑀢𑁂𑀦𑀸𑀢𑀺 𑀅𑀢𑁆𑀣𑁄’’𑀢𑀺. 𑀧𑀜𑁆𑀜𑀸𑀚𑀻𑀯𑀺𑀦𑁄𑀬𑁂𑀯 𑀳𑀺 𑀚𑀻𑀯𑀺𑀢𑀁 𑀲𑁂𑀝𑁆𑀞𑀁 𑀦𑀸𑀫. 𑀢𑁂𑀦𑀸𑀳 𑀪𑀕𑀯𑀸 ‘‘𑀧𑀜𑁆𑀜𑀸𑀚𑀻𑀯𑀺𑀁 𑀚𑀻𑀯𑀺𑀢𑀫𑀸𑀳𑀼 𑀲𑁂𑀝𑁆𑀞’’𑀦𑁆𑀢𑀺.

𑀧𑀼𑀮 𑀫𑀳𑀢𑁆𑀢𑁂. 𑀧𑀼𑀮𑀢𑀺. 𑀯𑀺𑀧𑀼𑀮𑀁.

𑀓𑀼𑀮 𑀲𑀗𑁆𑀔𑀸𑀦𑁂 𑀩𑀦𑁆𑀥𑀼𑀫𑁆𑀳𑀺 𑀘. 𑀓𑁄𑀮𑀢𑀺. 𑀓𑀼𑀮𑀁, 𑀓𑁄𑀮𑁄.

𑀲𑀮 𑀕𑀫𑀦𑁂. 𑀲𑀮𑀢𑀺.

𑀓𑀺𑀮 𑀧𑀻𑀢𑀺𑀬 𑀓𑀻𑀴𑀦𑁂𑀲𑀼. 𑀧𑀻𑀢𑀲𑁆𑀲 𑀪𑀸𑀯𑁄 𑀧𑀻𑀢𑀺𑀬𑀁 𑀬𑀣𑀸 𑀤𑀓𑁆𑀔𑀺𑀬𑀁. 𑀓𑀻𑀴𑀦𑀁 𑀓𑀻𑀴𑀸𑀬𑁂𑀯. 𑀓𑀺𑀮𑀢𑀺.

𑀇𑀮 𑀓𑀫𑁆𑀧𑀦𑁂. 𑀇𑀮𑀢𑀺. 𑀏𑀮𑀁, 𑀏𑀮𑀸. 𑀏𑀢𑁆𑀣 𑀏𑀮𑀁 𑀯𑀼𑀘𑁆𑀘𑀢𑀺 𑀤𑁄𑀲𑁄. 𑀓𑁂𑀦𑀝𑁆𑀞𑁂𑀦? 𑀓𑀫𑁆𑀧𑀦𑀝𑁆𑀞𑁂𑀦. 𑀤𑁄𑀲𑁄𑀢𑀺 𑀘𑁂𑀢𑁆𑀣 𑀅𑀕𑀼𑀡𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀧𑀝𑀺𑀖𑁄. ‘‘𑀦𑁂𑀮𑀗𑁆𑀕𑁄 𑀲𑁂𑀢𑀧𑀘𑁆𑀙𑀸𑀤𑁄’’𑀢𑀺 𑀇𑀤𑀫𑁂𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀅𑀧𑀺𑀘 𑀏𑀮𑀁 𑀯𑀼𑀘𑁆𑀘𑀢𑀺 𑀉𑀤𑀓𑀁. 𑀢𑀣𑀸 𑀳𑀺 ‘‘𑀏𑀮𑀫𑁆𑀩𑀼𑀚𑀁 𑀓𑀡𑁆𑀝𑀓𑀺𑀁 𑀯𑀸𑀭𑀺𑀚𑀁 𑀬𑀣𑀸’’𑀢𑀺 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀅𑀢𑁆𑀣𑀁 𑀦𑀺𑀤𑁆𑀤𑀺𑀲𑀦𑁆𑀢𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 ‘‘𑀏𑀮𑀁 𑀯𑀼𑀘𑁆𑀘𑀢𑀺 𑀉𑀤𑀓’’𑀦𑁆𑀢𑀺 𑀆𑀳. 𑀏𑀮𑀸𑀢𑀺 𑀮𑀸𑀮𑀸 𑀯𑀼𑀘𑁆𑀘𑀢𑀺 ‘‘𑀏𑀮𑀫𑀽𑀕𑁄’’𑀢𑀺 𑀏𑀢𑁆𑀣 𑀯𑀺𑀬. 𑀅𑀧𑀺𑀘 𑀏𑀮𑀸𑀢𑀺 𑀔𑁂𑀴𑁄 𑀯𑀼𑀘𑁆𑀘𑀢𑀺 ‘‘𑀲𑀼𑀢𑁆𑀯𑀸 𑀦𑁂𑀮𑀧𑀢𑀺𑀁 𑀯𑀸𑀘𑀁, 𑀯𑀸𑀴𑀸 𑀧𑀦𑁆𑀣𑀸 𑀅𑀧𑀓𑁆𑀓𑀫𑀼’’𑀦𑁆𑀢𑀺 𑀏𑀢𑁆𑀣 𑀯𑀺𑀬. 𑀏𑀢𑁆𑀣 𑀦𑁂𑀮𑀧𑀢𑀺𑀁 𑀯𑀸𑀘𑀦𑁆𑀢𑀺 𑀔𑁂𑀴𑀩𑀺𑀦𑁆𑀤𑀼𑀦𑀺𑀧𑀸𑀢𑀯𑀺𑀭𑀳𑀺𑀢𑀁 ¶ 𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀮𑀸𑀮𑀸𑀔𑁂𑀴𑀯𑀸𑀘𑀓𑀲𑁆𑀲 𑀢𑀼 𑀏𑀮𑀸𑀲𑀤𑁆𑀤𑀲𑁆𑀲 𑀅𑀜𑁆𑀜𑀁 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁. 𑀅𑀦𑁂𑀓𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀸 𑀳𑀺 𑀲𑀤𑁆𑀤𑀸. 𑀓𑀺𑀁 𑀯𑀸 𑀅𑀜𑁆𑀜𑁂𑀦 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑁂𑀦, 𑀇𑀮 𑀓𑀫𑁆𑀧𑀦𑁂𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀓𑀫𑁆𑀧𑀦𑀁 𑀏𑀯 𑀮𑀸𑀮𑀸𑀔𑁂𑀴𑀯𑀸𑀘𑀓𑀲𑁆𑀲 𑀏𑀮𑀸𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁, 𑀢𑀲𑁆𑀫𑀸 𑀇𑀮𑀦𑁆𑀢𑀺 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑀪𑀸𑀯𑁂𑀦 𑀓𑀫𑁆𑀧𑁂𑀦𑁆𑀢𑀺 𑀳𑀤𑀬𑀘𑀮𑀦𑀁 𑀧𑀸𑀧𑀼𑀡𑀦𑁆𑀢𑀺 𑀚𑀦𑀸 𑀏𑀢𑁆𑀣𑀸𑀢𑀺 𑀏𑀮𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀲𑀫𑀸𑀦𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀸𑀬𑁂𑀯 𑀳𑀺 𑀲𑀤𑁆𑀤𑀸 𑀮𑁄𑀓𑀲𑀗𑁆𑀓𑁂𑀢𑀯𑀲𑁂𑀦 𑀦𑀸𑀦𑀸𑀧𑀤𑀢𑁆𑀣𑀯𑀸𑀘𑀓𑀸𑀧𑀺 𑀪𑀯𑀦𑁆𑀢𑀺. 𑀢𑀁 𑀬𑀣𑀸? 𑀳𑀺𑀦𑁄𑀢𑀺 𑀕𑀘𑁆𑀙𑀢𑀻𑀢𑀺 𑀳𑁂𑀢𑀼, 𑀲𑀧𑁆𑀧𑀢𑀺 𑀕𑀘𑁆𑀙𑀢𑀻𑀢𑀺 𑀲𑀧𑁆𑀧𑁄, 𑀕𑀘𑁆𑀙𑀢𑀻𑀢𑀺 𑀕𑁄𑀢𑀺. 𑀢𑀣𑀸 𑀅𑀲𑀫𑀸𑀦𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀸𑀬𑁂𑀯 𑀲𑀫𑀸𑀦𑀧𑀤𑀢𑁆𑀣𑀯𑀸𑀘𑀓𑀸𑀧𑀺 𑀪𑀯𑀦𑁆𑀢𑀺. 𑀢𑀁 𑀬𑀣𑀸? 𑀭𑀜𑁆𑀘𑀢𑀻𑀢𑀺 𑀭𑀸𑀚𑀸, 𑀪𑀽𑀫𑀺𑀁 𑀧𑀸𑀮𑁂𑀢𑀻𑀢𑀺 𑀪𑀽𑀫𑀺𑀧𑀸𑀮𑁄, 𑀦𑀭𑁂 𑀇𑀦𑁆𑀤𑀢𑀻𑀢𑀺 𑀦𑀭𑀺𑀦𑁆𑀤𑁄𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣𑀸𑀧𑀺 𑀯𑀺𑀪𑀸𑀯𑁂𑀢𑀩𑁆𑀩𑁄.

𑀇𑀮 𑀕𑀢𑀺𑀬𑀁. 𑀇𑀮𑀢𑀺.

𑀳𑀺𑀮 𑀳𑀸𑀯𑀓𑀭𑀡𑁂. 𑀳𑁂𑀮𑀢𑀺.

𑀲𑀺𑀮 𑀉𑀜𑁆𑀙𑁂. 𑀲𑀺𑀮𑀢𑀺.

𑀢𑀺𑀮 𑀲𑀺𑀦𑁂𑀳𑀦𑁂. 𑀢𑀺𑀮𑀢𑀺. 𑀢𑀺𑀮𑀁, 𑀢𑁂𑀮𑀁, 𑀢𑀺𑀮𑁄.

𑀘𑀺𑀮 𑀯𑀲𑀦𑁂. 𑀘𑀺𑀮𑀢𑀺.

𑀯𑀮 𑀯𑀺𑀮𑀸𑀲𑀦𑁂. 𑀯𑀮𑀢𑀺.

𑀧𑀺𑀮 𑀕𑀳𑀡𑁂. 𑀧𑀺𑀮𑀢𑀺.

𑀫𑀺𑀮 𑀲𑀺𑀦𑁂𑀳𑀦𑁂. 𑀫𑀺𑀮𑀢𑀺.

𑀨𑀼𑀮 𑀲𑀜𑁆𑀘𑀮𑁂 𑀨𑀭𑀡𑁂 𑀘. 𑀨𑀼𑀮𑀢𑀺.

𑀮𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀯𑀓𑀸𑀭𑀦𑁆𑀢𑀥𑀸𑀢𑀼

𑀯𑀸 ¶ 𑀕𑀢𑀺𑀕𑀦𑁆𑀥𑀦𑁂𑀲𑀼. 𑀯𑀸𑀢𑀺. 𑀯𑀸𑀢𑁄.

𑀯𑀻 𑀧𑀚𑀦𑀓𑀦𑁆𑀢𑀺 𑀅𑀲𑀦𑀔𑀸𑀤𑀦 𑀕𑀢𑀻𑀲𑀼. 𑀧𑀚𑀦𑀁 𑀘𑀮𑀦𑀁. 𑀓𑀦𑁆𑀢𑀺 𑀅𑀪𑀺𑀭𑀼𑀘𑀺. 𑀅𑀲𑀦𑀁 𑀪𑀢𑁆𑀢𑀧𑀭𑀺𑀪𑁄𑀕𑁄. 𑀔𑀸𑀤𑀦𑀁 𑀧𑀽𑀯𑀸𑀤𑀺𑀪𑀓𑁆𑀔𑀦𑀁. 𑀕𑀢𑀺 𑀕𑀫𑀦𑀁. 𑀯𑁂𑀢𑀺.

𑀯𑁂 𑀢𑀦𑁆𑀢𑀲𑀦𑁆𑀢𑀸𑀦𑁂. 𑀯𑀸𑀬𑀢𑀺. 𑀢𑀦𑁆𑀢𑀯𑀸𑀬𑁄.

𑀯𑁂 𑀲𑁄𑀲𑀦𑁂. 𑀯𑀸𑀬𑀢𑀺.

𑀥𑀺𑀯𑀼 𑀔𑀺𑀯𑀼 𑀦𑀺𑀤𑀲𑁆𑀲𑀦𑁂. 𑀥𑁂𑀯𑀢𑀺. 𑀔𑁂𑀯𑀢𑀺.

𑀣𑀺𑀯𑀼 𑀤𑀺𑀢𑁆𑀢𑀺𑀬𑀁. 𑀣𑁂𑀯𑀢𑀺. 𑀫𑀥𑀼𑀫𑀥𑀼𑀓𑀸 𑀣𑁂𑀯𑀦𑁆𑀢𑀺.

𑀚𑀻𑀯 𑀧𑀸𑀡𑀥𑀸𑀭𑀡𑁂. 𑀚𑀻𑀯𑀢𑀺. 𑀚𑀻𑀯𑀺𑀢𑀁, 𑀚𑀻𑀯𑁄, 𑀚𑀻𑀯𑀺𑀓𑀸. 𑀅𑀢𑁆𑀣𑀺 𑀦𑁄 𑀚𑀻𑀯𑀺𑀓𑀸 𑀤𑁂𑀯, 𑀲𑀸 𑀘 𑀬𑀸𑀤𑀺𑀲𑀓𑀻𑀤𑀺𑀲𑀸. 𑀚𑀻𑀯𑀺𑀢𑀁 𑀓𑀧𑁆𑀧𑁂𑀢𑀺.

𑀧𑀺𑀯 𑀫𑀺𑀯 𑀢𑀺𑀯 𑀦𑀺𑀯 𑀣𑀽𑀮𑀺𑀬𑁂. 𑀧𑀺𑀯𑀢𑀺. 𑀧𑀺𑀯𑀭𑁄. 𑀫𑀺𑀯𑀢𑀺. 𑀢𑀺𑀯𑀢𑀺. 𑀦𑀺𑀯𑀢𑀺.

𑀏𑀢𑁆𑀣 𑀘 𑀧𑀺𑀯𑀭𑁄𑀢𑀺 𑀓𑀘𑁆𑀙𑀧𑁄, 𑀬𑁄 𑀓𑁄𑀘𑀺 𑀯𑀸 𑀣𑀽𑀮𑀲𑀭𑀻𑀭𑁄. 𑀢𑀣𑀸 𑀳𑀺 ‘‘𑀧𑀺𑀯𑀭𑁄 𑀓𑀘𑁆𑀙𑀧𑁂 𑀣𑀽𑀮𑁂’’𑀢𑀺 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀁.

𑀅𑀯 𑀧𑀸𑀮𑀦𑁂. 𑀅𑀯𑀢𑀺. 𑀩𑀼𑀤𑁆𑀥𑁄 𑀫𑀫 𑀅𑀯𑀢𑀁.

𑀪𑀯 𑀕𑀢𑀺𑀬𑀁. 𑀲𑀯𑀢𑀺.

𑀓𑀯 𑀯𑀡𑁆𑀡𑁂. 𑀓𑀯𑀢𑀺.

𑀔𑀺𑀯𑀼 𑀫𑀤𑁂. 𑀔𑀺𑀯𑀢𑀺.

𑀥𑁄𑀯𑀼 𑀥𑁄𑀯𑀦𑁂. 𑀥𑁄𑀯𑀢𑀺.

𑀤𑁂𑀯𑀼 ¶ 𑀤𑁂𑀯 𑀤𑁂𑀯𑀦𑁂. 𑀤𑁂𑀯𑀢𑀺 𑀆𑀤𑁂𑀯𑀢𑀺, 𑀧𑀭𑀺𑀤𑁂𑀯𑀢𑀺, 𑀆𑀤𑁂𑀯𑁄, 𑀧𑀭𑀺𑀤𑁂𑀯𑁄, 𑀆𑀤𑁂𑀯𑀦𑀸, 𑀧𑀭𑀺𑀤𑁂𑀯𑀦𑀸, 𑀆𑀤𑁂𑀯𑀺𑀢𑀢𑁆𑀢𑀁, 𑀧𑀭𑀺𑀤𑁂𑀯𑀺𑀢𑀢𑁆𑀢𑀁.

𑀲𑁂𑀯𑀼 𑀓𑁂𑀯𑀼 𑀔𑁂𑀯𑀼 𑀕𑁂𑀯𑀼 𑀕𑀺𑀮𑁂𑀯𑀼 𑀫𑁂𑀯𑀼 𑀫𑀺𑀮𑁂𑀯𑀼 𑀲𑁂𑀘𑀦𑁂. 𑀲𑁂𑀯𑀢𑀺. 𑀓𑁂𑀯𑀢𑀺. 𑀔𑁂𑀯𑀢𑀺. 𑀕𑁂𑀯𑀢𑀺. 𑀕𑀺𑀮𑁂𑀯𑀢𑀺. 𑀫𑁂𑀯𑀢𑀺 𑀫𑀺𑀮𑁂𑀯𑀢𑀺.

𑀤𑁂𑀯𑀼 𑀧𑁆𑀮𑀼𑀢𑀕𑀢𑀺𑀬𑀁. 𑀧𑁆𑀮𑀼𑀢𑀕𑀢𑀺 𑀧𑀭𑀺𑀧𑁆𑀮𑀼𑀢𑀕𑀫𑀦𑀁. 𑀤𑁂𑀯𑀢𑀺.

𑀥𑀸𑀢𑀼 𑀕𑀢𑀺𑀲𑀼𑀤𑁆𑀥𑀺𑀬𑀁. 𑀥𑀸𑀯𑀢𑀺, 𑀯𑀺𑀥𑀸𑀯𑀢𑀺. 𑀆𑀥𑀸𑀯𑀢𑀺, 𑀧𑀭𑀺𑀥𑀸𑀯𑀢𑀺. 𑀥𑀸𑀯𑀓𑁄.

𑀘𑀺𑀯𑀼 𑀆𑀤𑀸𑀦𑀲𑀁𑀯𑀭𑁂𑀲𑀼. 𑀘𑀺𑀯𑀢𑀺.

𑀘𑁂𑀯𑀺 𑀘𑁂𑀢𑀦𑀸𑀢𑀼𑀮𑁆𑀬𑁂. 𑀘𑁂𑀯𑀢𑀺.

𑀯𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀲𑀓𑀸𑀭𑀦𑁆𑀢𑀥𑀸𑀢𑀼

𑀲𑀸 𑀧𑀸𑀓𑁂. 𑀲𑀸𑀢𑀺.

𑀲𑀺 𑀲𑁂𑀯𑀸𑀬𑀁. 𑀲𑁂𑀯𑀢𑀺. 𑀲𑁂𑀯𑀦𑀸, 𑀲𑁂𑀯𑀓𑁄, 𑀲𑁂𑀯𑀺𑀢𑁄, 𑀲𑀺𑀯𑁄, 𑀲𑀺𑀯𑀁.

𑀦𑀺𑀳𑀻𑀬𑀢𑀺 𑀧𑀼𑀭𑀺𑀲𑁄 𑀦𑀺𑀳𑀻𑀦𑀲𑁂𑀯𑀻,

𑀦 𑀘 𑀳𑀸𑀬𑁂𑀣 𑀓𑀤𑀸𑀘𑀺 𑀢𑀼𑀮𑁆𑀬𑀲𑁂𑀯𑀻;

𑀲𑁂𑀝𑁆𑀞𑀫𑀼𑀧𑀕𑀫𑀁 𑀉𑀤𑁂𑀢𑀺 𑀔𑀺𑀧𑁆𑀧𑀁,

𑀢𑀲𑁆𑀫𑀸 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀢𑀭𑀁 𑀪𑀚𑁂𑀣;

𑀲𑀺 𑀕𑀢𑀺𑀩𑀼𑀤𑁆𑀥𑀻𑀲𑀼. 𑀲𑁂𑀢𑀺, 𑀅𑀢𑀺𑀲𑁂𑀢𑀺. 𑀅𑀢𑀺𑀲𑀺𑀢𑀼𑀁, 𑀅𑀢𑀺𑀲𑀺𑀢𑁆𑀯𑀸, 𑀲𑁂𑀢𑀼.

𑀲𑀻 ¶ 𑀲𑀬𑁂. 𑀲𑀬𑁄 𑀲𑀼𑀧𑀦𑀁. 𑀲𑁂𑀢𑀺. 𑀲𑀬𑀢𑀺. 𑀲𑁂𑀦𑀁. 𑀲𑀬𑀦𑀁.

𑀲𑀼 𑀕𑀢𑀺𑀬𑀁. 𑀲𑀯𑀢𑀺. 𑀧𑀲𑀯𑀢𑀺. 𑀧𑀲𑀼𑀢𑁄, 𑀲𑀼𑀢𑁄.

𑀏𑀢𑁆𑀣 𑀲𑀼𑀢𑁄𑀢𑀺 𑀤𑀽𑀢𑁄, ‘‘𑀯𑀺𑀢𑁆𑀢𑀺𑀜𑁆𑀳𑀺 𑀫𑀁 𑀯𑀺𑀦𑁆𑀤𑀢𑀺 𑀲𑀼𑀢 𑀤𑀺𑀲𑁆𑀯𑀸’’𑀢𑀺 ‘‘𑀤𑁂𑀯𑀲𑀼𑀢𑁄 𑀘 𑀫𑀸𑀢𑀮𑀻’’𑀢𑀺 𑀘 𑀇𑀫𑀸𑀦𑀺 𑀢𑀢𑁆𑀣 𑀧𑀬𑁄𑀕𑀸𑀦𑀺.

𑀲𑀼 𑀲𑀯𑀦𑁂. 𑀲𑀯𑀦𑀁 𑀲𑀦𑁆𑀤𑀦𑀁. 𑀲𑀯𑀢𑀺. 𑀆𑀲𑀯𑁄.

𑀲𑀽 𑀧𑀲𑀯𑁂. 𑀧𑀲𑀯𑁄 𑀚𑀦𑀦𑀁. 𑀲𑀯𑀢𑀺, 𑀧𑀲𑀯𑀢𑀺. 𑀲𑀼𑀢𑁆𑀢𑀁.

𑀏𑀢𑁆𑀣 𑀧𑀦 𑀲𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁂 𑀲𑀯𑀢𑀺 𑀚𑀦𑁂𑀢𑀻𑀢𑀺 𑀲𑀼𑀢𑁆𑀢𑀁, 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁, 𑀢𑀤𑀜𑁆𑀜𑀫𑁆𑀧𑀺 𑀯𑀸 𑀳𑀢𑁆𑀣𑀺𑀲𑀼𑀢𑁆𑀢𑀸𑀤𑀺 𑀲𑀼𑀢𑁆𑀢𑀁.

𑀲𑀽 𑀧𑀸𑀡𑀕𑀩𑁆𑀪𑀯𑀺𑀫𑁄𑀘𑀦𑁂𑀲𑀼. 𑀲𑀽𑀢𑀺. 𑀧𑀲𑀽𑀢𑀺. 𑀧𑀲𑀽𑀢𑁄.

𑀲𑀼 𑀧𑁂𑀭𑀡𑁂. 𑀲𑀼𑀢𑀺.

𑀲𑁂 𑀔𑀬𑁂. 𑀲𑀻𑀬𑀢𑀺. 𑀏𑀓𑀸𑀭𑀲𑁆𑀲𑀻𑀬𑀸𑀤𑁂𑀲𑁄.

𑀲𑁂 𑀧𑀸𑀓𑁂. 𑀲𑁂𑀢𑀺.

𑀲𑁂 𑀕𑀢𑀺𑀬𑀁. 𑀲𑁂𑀢𑀺. 𑀲𑁂𑀢𑀼.

𑀳𑀺𑀁𑀲 𑀳𑀺𑀁𑀲𑀸𑀬𑀁. 𑀳𑀺𑀁𑀲𑀢𑀺. 𑀳𑀺𑀁𑀲𑀓𑁄, 𑀳𑀺𑀁𑀲𑀦𑀸, 𑀳𑀺𑀁𑀲𑀸.

𑀇𑀲𑁆𑀲 𑀇𑀲𑁆𑀲𑀸𑀬𑀁. 𑀇𑀲𑁆𑀲𑀢𑀺. 𑀧𑀼𑀭𑀺𑀲𑀧𑀭𑀓𑁆𑀓𑀫𑀲𑁆𑀲 𑀤𑁂𑀯𑀸 𑀦 𑀇𑀲𑁆𑀲𑀦𑁆𑀢𑀺. 𑀇𑀲𑁆𑀲𑀸, 𑀇𑀲𑁆𑀲𑀸𑀬𑀦𑀸.

𑀦𑀫𑀲𑁆𑀲 𑀯𑀦𑁆𑀤𑀦𑀸𑀦𑀢𑀺𑀬𑀁. 𑀯𑀦𑁆𑀤𑀦𑀸𑀦𑀢𑀺 𑀦𑀸𑀫 𑀯𑀦𑁆𑀤𑀦𑀸𑀲𑀗𑁆𑀔𑀸𑀢𑀁 𑀦𑀫𑀦𑀁, 𑀲𑀓𑀫𑁆𑀫𑀓𑁄𑀬𑁂𑀯𑀸𑀬𑀁 𑀥𑀸𑀢𑀼, 𑀦 𑀦𑀫𑀼𑀥𑀸𑀢𑀼 𑀯𑀺𑀬 𑀲𑀓𑀫𑁆𑀫𑀓𑁄 𑀘𑁂𑀯 𑀅𑀓𑀫𑁆𑀫𑀓𑁄 𑀘. 𑀦𑀫𑀲𑁆𑀲𑀢𑀺.

𑀖𑀼𑀲 𑀲𑀤𑁆𑀤𑁂. 𑀖𑀼𑀲𑀢𑀺, 𑀖𑁄𑀲𑀢𑀺. 𑀧𑀝𑀺𑀖𑁄𑀲𑁄, 𑀦𑀺𑀕𑁆𑀖𑁄𑀲𑁄, 𑀯𑀘𑀻𑀖𑁄𑀲𑁄.

𑀘𑀼𑀲 ¶ 𑀧𑀸𑀦𑁂. 𑀘𑀼𑀲𑀢𑀺.

𑀧𑀼𑀲 𑀩𑀼𑀤𑁆𑀥𑀺𑀬𑀁. 𑀧𑀼𑀲𑀢𑀺. 𑀧𑁄𑀲𑁄. 𑀲𑀫𑁆𑀧𑀻𑀴𑁂 𑀫𑀫 𑀧𑁄𑀲𑀦𑀁. 𑀧𑁄𑀲𑀦𑀦𑁆𑀢𑀺 𑀯𑀟𑁆𑀠𑀦𑀁.

𑀫𑀼𑀲 𑀣𑁂𑀬𑁆𑀬𑁂. 𑀣𑁂𑀦𑀦𑀁 𑀣𑁂𑀬𑁆𑀬𑀁 𑀘𑁄𑀭𑀺𑀓𑀸. 𑀫𑀼𑀲𑀢𑀺. 𑀤𑀼𑀤𑁆𑀤𑀺𑀓𑁆𑀔𑁄 𑀘𑀓𑁆𑀔𑀼𑀫𑀼𑀲𑀦𑁄. 𑀫𑀼𑀲𑀮𑁄.

𑀧𑀼𑀲 𑀧𑀲𑀯𑁂. 𑀧𑀼𑀲𑀢𑀺.

𑀯𑀸𑀲𑀺 𑀪𑀽𑀲 𑀅𑀮𑀗𑁆𑀓𑀸𑀭𑁂. 𑀯𑀸𑀲𑀢𑀺. 𑀪𑀽𑀲𑀢𑀺, 𑀯𑀺𑀪𑀽𑀲𑀢𑀺. 𑀪𑀽𑀲𑀦𑀁, 𑀯𑀺𑀪𑀽𑀲𑀦𑀁.

𑀉𑀲 𑀭𑀼𑀚𑀸𑀬𑀁. 𑀉𑀲𑀢𑀺.

𑀇𑀲 𑀉𑀘𑁆𑀙𑁂. 𑀏𑀲𑀢𑀺. 𑀇𑀲𑀺.

𑀏𑀢𑁆𑀣 𑀧𑀦 𑀲𑀻𑀮𑀸𑀤𑀬𑁄 𑀕𑀼𑀡𑁂 𑀏𑀲𑀦𑁆𑀢𑀻𑀢𑀺 𑀇𑀲𑀬𑁄, 𑀩𑀼𑀤𑁆𑀥𑀸𑀤𑀬𑁄 𑀅𑀭𑀺𑀬𑀸 𑀢𑀸𑀧𑀲𑀧𑀩𑁆𑀩𑀚𑁆𑀚𑀸𑀬 𑀘 𑀧𑀩𑁆𑀩𑀚𑀺𑀢𑀸 𑀦𑀭𑀸. ‘‘𑀇𑀲𑀺 𑀢𑀸𑀧𑀲𑁄 𑀚𑀝𑀺𑀮𑁄 𑀚𑀝𑀻 𑀚𑀝𑀸𑀥𑀭𑁄’’𑀢𑀺 𑀏𑀢𑁂 𑀢𑀸𑀧𑀲𑀧𑀭𑀺𑀬𑀸𑀬𑀸.

𑀓𑀲 𑀯𑀺𑀮𑁂𑀔𑀦𑁂. 𑀓𑀲𑀢𑀺, 𑀓𑀲𑁆𑀲𑀢𑀺. 𑀓𑀲𑁆𑀲𑀓𑁄, 𑀆𑀓𑀸𑀲𑁄.

𑀏𑀢𑁆𑀣 𑀓𑀲𑁆𑀲𑀓𑁄𑀢𑀺 𑀓𑀲𑀺𑀓𑀸𑀭𑀓𑁄. 𑀆𑀓𑀸𑀲𑁄𑀢𑀺 𑀦𑀪𑀁. 𑀢𑀜𑁆𑀳𑀺 𑀦 𑀓𑀲𑁆𑀲𑀢𑀻𑀢𑀺 𑀆𑀓𑀸𑀲𑁄. 𑀓𑀲𑀺𑀢𑀼𑀁 𑀯𑀺𑀮𑁂𑀔𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀢𑁆𑀣𑁄. 𑀇𑀫𑀸𑀦𑀺 𑀢𑀤𑀪𑀺𑀥𑀸𑀦𑀸𑀦𑀺 𑁋

𑀆𑀓𑀸𑀲𑁄 𑀅𑀫𑁆𑀩𑀭𑀁 𑀅𑀩𑁆𑀪𑀁, 𑀅𑀦𑁆𑀢𑀮𑀺𑀓𑁆𑀔’𑀫𑀖𑀁 𑀦𑀪𑀁;

𑀯𑁂𑀳𑀸𑀲𑁄 𑀕𑀕𑀦𑀁 𑀤𑁂𑀯𑁄, 𑀔’𑀫𑀸𑀤𑀺𑀘𑁆𑀘𑀧𑀣𑁄𑀧𑀺 𑀘.

𑀢𑀸𑀭𑀸𑀧𑀣𑁄 𑀘 𑀦𑀓𑁆𑀔𑀢𑁆𑀢-𑀧𑀣𑁄 𑀭𑀯𑀺𑀧𑀣𑁄𑀧𑀺 𑀘;

𑀯𑁂𑀳𑀸𑀬𑀲𑀁 𑀯𑀸𑀬𑀼𑀧𑀣𑁄, 𑀅𑀧𑀣𑁄 𑀅𑀦𑀺𑀮𑀜𑁆𑀚𑀲𑀁.

𑀓𑀲 ¶ 𑀲𑀺𑀲 𑀚𑀲 𑀛𑀲 𑀯𑀲 𑀫𑀲 𑀤𑀺𑀲 𑀚𑀼𑀲 𑀬𑀼𑀲 𑀳𑀺𑀁𑀲𑀢𑁆𑀣𑀸. 𑀓𑀲𑀢𑀺. 𑀲𑀺𑀲𑀢𑀺. 𑀚𑀲𑀢𑀺. 𑀛𑀲𑀢𑀺. 𑀯𑀲𑀢𑀺. 𑀫𑀲𑀢𑀺. 𑀫𑀲𑀓𑁄. 𑀑𑀫𑀲𑀢𑀺, 𑀑𑀫𑀲𑀯𑀸𑀤𑁄. 𑀤𑀺𑀲𑀢𑀺. 𑀚𑀼𑀲𑀢𑀺. 𑀬𑀽𑀲𑀢𑀺.

𑀢𑀢𑁆𑀣 𑀑𑀫𑀲𑀢𑀻𑀢𑀺 𑀯𑀺𑀚𑁆𑀛𑀢𑀺. 𑀑𑀫𑀲𑀯𑀸𑀤𑁄𑀢𑀺 𑀧𑀭𑁂𑀲𑀁 𑀲𑀽𑀘𑀺𑀬𑀸 𑀯𑀺𑀬 𑀯𑀺𑀚𑁆𑀛𑀦𑀯𑀸𑀤𑁄. 𑀫𑀲𑀓𑁄𑀢𑀺 𑀫𑀓𑀲𑁄.

𑀪𑀲𑁆𑀲 𑀪𑀲𑁆𑀲𑀦𑁂. 𑀪𑀲𑁆𑀲𑀦𑁆𑀢𑀺 𑀓𑀣𑀦𑀁 𑀯𑀼𑀘𑁆𑀘𑀢𑀺 ‘‘𑀆𑀯𑀸𑀲𑁄 𑀕𑁄𑀘𑀭𑁄 𑀪𑀲𑁆𑀲𑀁. 𑀪𑀲𑁆𑀲𑀓𑀸𑀭𑀓’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀪𑀲𑁆𑀲𑀢𑀺. 𑀪𑀝𑁆𑀞𑀁. 𑀪𑀝𑁆𑀞𑀦𑁆𑀢𑀺 𑀪𑀸𑀲𑀺𑀢𑀁, 𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀧𑀦 𑁋

‘‘𑀲𑀼𑀪𑀸𑀲𑀺𑀢𑀸 𑀅𑀢𑁆𑀣𑀯𑀢𑀻, 𑀕𑀸𑀣𑀸𑀬𑁄 𑀢𑁂 𑀫𑀳𑀸𑀫𑀼𑀦𑀺;

𑀦𑀺𑀚𑁆𑀛𑀢𑁆𑀢𑁄𑀫𑁆𑀳𑀺 𑀲𑀼𑀪𑀝𑁆𑀞𑁂𑀦, 𑀢𑁆𑀯𑀜𑁆𑀘 𑀫𑁂 𑀲𑀭𑀡𑀁 𑀪𑀯𑀸’’𑀢𑀺

𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. 𑀢𑀢𑁆𑀣 𑀦𑀺𑀚𑁆𑀛𑀢𑁆𑀢𑁄𑀢𑀺 𑀦𑀺𑀚𑁆𑀛𑀸𑀧𑀺𑀢𑁄 𑀥𑀫𑁆𑀫𑁄𑀚𑀧𑀜𑁆𑀜𑀸𑀬 𑀧𑀜𑁆𑀜𑀢𑁆𑀢𑀺𑀕𑀢𑁄 𑀅𑀫𑁆𑀳𑀺. 𑀲𑀼𑀪𑀝𑁆𑀞𑁂𑀦𑀸𑀢𑀺 𑀲𑀼𑀪𑀸𑀲𑀺𑀢𑁂𑀦.

𑀚𑀺𑀲𑀼 𑀦𑀺𑀲𑀼 𑀯𑀺𑀲𑀼 𑀫𑀺𑀲𑀼 𑀯𑀲𑁆𑀲 𑀲𑁂𑀘𑀦𑁂. 𑀚𑁂𑀲𑀢𑀺. 𑀦𑁂𑀲𑀢𑀺. 𑀯𑁂𑀲𑀢𑀺. 𑀫𑁂𑀲𑀢𑀺. 𑀤𑁂𑀯𑁄 𑀯𑀲𑁆𑀲𑀢𑀺.

𑀫𑀭𑀺𑀲𑀼 𑀲𑀳𑀦𑁂 𑀘. 𑀘𑀓𑀸𑀭𑁄 𑀲𑁂𑀘𑀦𑀸𑀧𑁂𑀓𑁆𑀔𑀓𑁄. 𑀫𑀭𑀺𑀲𑀢𑀺.

𑀧𑀼𑀲 𑀧𑁄𑀲𑀦𑁂. 𑀧𑁄𑀲𑀢𑀺. 𑀧𑁄𑀲𑁄. 𑀓𑀫𑁆𑀫𑀘𑀺𑀢𑁆𑀢𑀉𑀢𑀼𑀆𑀳𑀺𑀆𑀭𑁂𑀳𑀺 𑀧𑁄𑀲𑀺𑀬𑀢𑀻𑀢𑀺 𑀧𑁄𑀲𑁄. ‘‘𑀅𑀜𑁆𑀜𑁂𑀧𑀺 𑀤𑁂𑀯𑁄 𑀧𑁄𑀲𑁂𑀢𑀻’’𑀢𑀺 𑀤𑀲𑁆𑀲𑀦𑀢𑁄 𑀧𑀦 𑀘𑀼𑀭𑀸𑀤𑀺𑀕𑀡𑁂𑀧𑀺 𑀇𑀫𑀁 𑀥𑀸𑀢𑀼𑀁 𑀯𑀓𑁆𑀔𑀸𑀫.

𑀧𑀺𑀲𑀼 𑀲𑀺𑀮𑀺𑀲𑀼 𑀧𑀼𑀲𑀼 𑀧𑀮𑀼𑀲𑀼 𑀉𑀲𑀼 𑀉𑀧𑀤𑀸𑀳𑁂. 𑀧𑁂𑀲𑀢𑀺. 𑀲𑀺𑀮𑁂𑀲𑀢𑀺. 𑀲𑀺𑀮𑁂𑀲𑁄. 𑀧𑁄𑀲𑀢𑀺. 𑀧𑀮𑁄𑀲𑀢𑀺. 𑀑𑀲𑀢𑀺. 𑀉𑀲𑀼.

𑀖𑀲𑀼 𑀲𑀁𑀳𑀭𑀺𑀲𑁂. 𑀲𑀁𑀳𑀭𑀺𑀲𑁄 𑀲𑀗𑁆𑀖𑀝𑁆𑀝𑀦𑀁. 𑀖𑀲𑁆𑀲𑀢𑀺.

𑀳𑀲𑀼 𑀆𑀮𑀺𑀗𑁆𑀕𑁂. 𑀆𑀮𑀺𑀗𑁆𑀕𑁄 𑀉𑀧𑀕𑀽𑀳𑀦𑀁. 𑀳𑀲𑁆𑀲𑀢𑀺.

𑀳𑀲 ¶ 𑀳𑀲𑀦𑁂. 𑀳𑀲𑀢𑀺. 𑀅𑀲𑁆𑀲𑀸 𑀳𑀲𑀦𑁆𑀢𑀺, 𑀆𑀚𑀸𑀦𑀻𑀬𑀸 𑀳𑀲𑀦𑁆𑀢𑀺, 𑀧𑀳𑀲𑀢𑀺, 𑀉𑀳𑀲𑀢𑀺. 𑀓𑀸𑀭𑀺𑀢𑁂 ‘‘𑀳𑀸𑀲𑁂𑀢𑀺’’𑀇𑀘𑁆𑀘𑀸𑀤𑀺, 𑀉𑀳𑀲𑀺𑀬𑀫𑀸𑀦𑁄, 𑀳𑀸𑀲𑁄, 𑀧𑀳𑀸𑀲𑁄, 𑀳𑀲𑀦𑀁, 𑀧𑀳𑀲𑀦𑀁, 𑀳𑀲𑀺𑀢𑀁. 𑀳𑀓𑀸𑀭𑀮𑁄𑀧𑁂𑀦 𑀫𑀦𑁆𑀤𑀳𑀲𑀦𑀁 ‘‘𑀲𑀺𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺 ‘‘𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀻’’𑀢𑀺𑀆𑀤𑀻𑀲𑀼.

𑀢𑀢𑁆𑀣 𑀉𑀳𑀲𑀢𑀻𑀢𑀺 𑀅𑀯𑀳𑀲𑀢𑀺. 𑀉𑀤𑀲𑀺𑀬𑀫𑀸𑀦𑁄𑀢𑀺 𑀅𑀯𑀳𑀲𑀺𑀬𑀫𑀸𑀦𑁄. 𑀢𑀢𑁆𑀭𑀸𑀬𑀁 𑀧𑀸𑀴𑀺 ‘‘𑀇𑀥 𑀪𑀺𑀓𑁆𑀔𑀼𑀁 𑀅𑀭𑀜𑁆𑀜𑀕𑀢𑀁 𑀯𑀸 𑀭𑀼𑀓𑁆𑀔𑀫𑀽𑀮𑀕𑀢𑀁 𑀯𑀸 𑀲𑀼𑀜𑁆𑀜𑀸𑀕𑀸𑀭𑀕𑀢𑀁 𑀯𑀸 𑀫𑀸𑀢𑀼𑀕𑀸𑀫𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀳𑀲𑀢𑀺’’ 𑀇𑀢𑀺 𑀘 ‘‘𑀲𑁄 𑀫𑀸𑀢𑀼𑀕𑀸𑀫𑁂𑀦 𑀉𑀳𑀲𑀺𑀬𑀫𑀸𑀦𑁄’’ 𑀇𑀢𑀺 𑀘. 𑀳𑀸𑀲𑁄𑀢𑀺 𑀳𑀲𑀦𑀁 𑀯𑀸 𑀲𑁄𑀫𑀦𑀲𑁆𑀲𑀁 𑀯𑀸 ‘‘𑀳𑀸𑀲𑁄 𑀫𑁂 𑀉𑀧𑀧𑀚𑁆𑀚𑀣𑀸’’𑀢𑀺𑀆𑀤𑀻𑀲𑀼 𑀯𑀺𑀬.

𑀢𑀼𑀲 𑀳𑀲 𑀳𑀺𑀲 𑀭𑀲 𑀲𑀤𑁆𑀤𑁂. 𑀢𑀼𑀲𑀢𑀺, 𑀳𑀲𑀢𑀺, 𑀳𑀺𑀲𑀢𑀺, 𑀭𑀲𑀢𑀺, 𑀭𑀲𑀺𑀢𑀁. 𑀅𑀢𑁆𑀭𑀸𑀬𑀁 𑀧𑀸𑀴𑀺 ‘‘𑀪𑁂𑀭𑀺𑀬𑁄 𑀲𑀩𑁆𑀩𑀸 𑀯𑀚𑁆𑀚𑀦𑁆𑀢𑀼, 𑀯𑀻𑀡𑀸 𑀲𑀩𑁆𑀩𑀸 𑀭𑀲𑀦𑁆𑀢𑀼 𑀢𑀸’’ 𑀇𑀢𑀺.

𑀭𑀲 𑀅𑀲𑁆𑀲𑀸𑀤𑀦𑁂. 𑀭𑀲𑀢𑀺. 𑀭𑀲𑁄.

𑀭𑀲 𑀅𑀲𑁆𑀲𑀸𑀤𑀲𑀺𑀦𑁂𑀳𑁂𑀲𑀼. 𑀭𑀲𑀢𑀺. 𑀭𑀲𑁄.

𑀭𑀲 𑀳𑀸𑀦𑀺𑀬𑀁. 𑀭𑀲𑀢𑀺. 𑀭𑀲𑀦𑀁, 𑀭𑀲𑁄.

𑀅𑀢𑁆𑀭𑀸𑀬𑀁 𑀧𑀸𑀴𑀺 𑁋

‘‘𑀦𑀳𑁂𑀯 𑀞𑀺𑀢 𑀦𑀸’𑀲𑀻𑀦𑀁, 𑀦 𑀲𑀬𑀸𑀦𑀁 𑀦 𑀧𑀤𑁆𑀥𑀕𑀼𑀁;

𑀬𑀸𑀯 𑀩𑁆𑀬𑀸𑀢𑀺 𑀦𑀺𑀫𑀻𑀲𑀢𑀺, 𑀢𑀢𑁆𑀭𑀸𑀧𑀺 𑀭𑀲𑀢𑀺𑀩𑁆𑀩𑀬𑁄’’𑀢𑀺.

𑀢𑀢𑁆𑀣 𑀭𑀲𑀢𑀺𑀩𑁆𑀩𑀬𑁄𑀢𑀺 𑀲𑁄 𑀲𑁄 𑀯𑀬𑁄 𑀭𑀲𑀢𑀺 𑀧𑀭𑀺𑀳𑀸𑀬𑀢𑀺, 𑀦 𑀯𑀟𑁆𑀠𑀢𑀻𑀢𑀺 𑀅𑀢𑁆𑀣𑁄.

𑀮𑀲 𑀲𑀺𑀮𑁂𑀲𑀦𑀓𑀻𑀴𑀦𑁂𑀲𑀼. 𑀮𑀲𑀢𑀺. 𑀮𑀸𑀲𑁄. 𑀮𑀲𑀻 𑀘 𑀢𑁂 𑀦𑀺𑀧𑁆𑀧𑀮𑀺𑀢𑀸. 𑀮𑀲𑀺 𑀯𑀼𑀘𑁆𑀘𑀢𑀺 𑀫𑀢𑁆𑀣𑀮𑀼𑀗𑁆𑀕𑀁. 𑀦𑀺𑀧𑁆𑀧𑀮𑀺𑀢𑀸𑀢𑀺 𑀦𑀺𑀓𑁆𑀔𑀦𑁆𑀢𑀸.

𑀦𑀺𑀲 ¶ 𑀲𑀫𑀸𑀥𑀺𑀫𑁆𑀳𑀺. 𑀲𑀫𑀸𑀥𑀺 𑀲𑀫𑀸𑀥𑀸𑀦𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀸. 𑀦𑁂𑀲𑀢𑀺.

𑀫𑀺𑀲 𑀫𑀲 𑀲𑀤𑁆𑀤𑁂 𑀭𑁄𑀲𑁂 𑀘. 𑀫𑁂𑀲𑀢𑀺. 𑀫𑀲𑀢𑀺. 𑀫𑁂𑀲𑁄. 𑀫𑀲𑀓𑁄.

𑀧𑀺𑀲𑀺 𑀧𑁂𑀲𑀼 𑀕𑀢𑀺𑀬𑀁. 𑀧𑀺𑀲𑀢𑀺. 𑀧𑁂𑀲𑀢𑀺.

𑀲𑀲𑀼 𑀳𑀺𑀁𑀲𑀸𑀬𑀁. 𑀲𑀲𑀢𑀺. 𑀲𑀢𑁆𑀣𑀁. 𑀲𑀢𑁆𑀣𑀁 𑀯𑀼𑀘𑁆𑀘𑀢𑀺 𑀅𑀲𑀺.

𑀲𑀁𑀲 𑀣𑀼𑀢𑀺𑀬𑀜𑁆𑀘. 𑀘𑀓𑀸𑀭𑁄 𑀳𑀺𑀁𑀲𑀸𑀧𑁂𑀓𑁆𑀔𑀸𑀬. 𑀲𑀁𑀲𑀢𑀺, 𑀧𑀲𑀁𑀲𑀢𑀺. 𑀧𑀲𑀁𑀲𑀸, 𑀧𑀲𑀁𑀲𑀦𑀸. 𑀧𑀲𑀢𑁆𑀣𑁄 𑀪𑀕𑀯𑀸. 𑀧𑀲𑀁𑀲𑀫𑀸𑀦𑁄, 𑀧𑀲𑀁𑀲𑀺𑀢𑁄, 𑀧𑀲𑀁𑀲𑀓𑁄, 𑀧𑀲𑀁𑀲𑀺𑀢𑀩𑁆𑀩𑁄, 𑀧𑀲𑀁𑀲𑀦𑀻𑀬𑁄, 𑀧𑀸𑀲𑀁𑀲𑁄, 𑀧𑀲𑀁𑀲𑀺𑀢𑁆𑀯𑀸 𑀇𑀘𑁆𑀘𑀸𑀤𑀻𑀦𑀺.

𑀤𑀺𑀲 𑀧𑁂𑀓𑁆𑀔𑀦𑁂. 𑀏𑀢𑀺𑀲𑁆𑀲𑀸 𑀧𑀦 𑀦𑀸𑀦𑀸𑀭𑀽𑀧𑀸𑀦𑀺 𑀪𑀯𑀦𑁆𑀢𑀺 𑁋 ‘‘𑀤𑀺𑀲𑁆𑀲𑀢𑀺 𑀧𑀤𑀺𑀲𑁆𑀲𑀢𑀺’’ 𑀇𑀘𑁆𑀘𑀸𑀤𑀺 𑀅𑀓𑀫𑁆𑀫𑀓𑀁. ‘‘𑀧𑀲𑁆𑀲𑀢𑀺 𑀤𑀓𑁆𑀔𑀢𑀺’’𑀇𑀘𑁆𑀘𑀸𑀤𑀺 𑀲𑀓𑀫𑁆𑀫𑀓𑀁.

𑀤𑀺𑀲𑁆𑀲𑀢𑀼, 𑀧𑀲𑁆𑀲𑀢𑀼, 𑀤𑀓𑁆𑀔𑀢𑀼. 𑀤𑀺𑀲𑁆𑀲𑁂𑀬𑁆𑀬, 𑀧𑀲𑁆𑀲𑁂𑀬𑁆𑀬, 𑀤𑀓𑁆𑀔𑁂𑀬𑁆𑀬. 𑀤𑀺𑀲𑁆𑀲𑁂, 𑀧𑀲𑁆𑀲𑁂, 𑀤𑀓𑁆𑀔𑁂. 𑀤𑀺𑀲𑁆𑀲, 𑀧𑀲𑁆𑀲, 𑀤𑀓𑁆𑀔. 𑀅𑀤𑀺𑀲𑁆𑀲𑀸, 𑀅𑀧𑀲𑁆𑀲𑀸. 𑀅𑀤𑁆𑀤𑀸 𑀲𑀻𑀤𑀦𑁆𑀢𑀭𑁂 𑀦𑀕𑁂. 𑀅𑀤𑁆𑀤𑀓𑁆𑀔𑀸, 𑀅𑀤𑁆𑀤𑀓𑁆𑀔𑀼𑀁, 𑀅𑀤𑀲𑁆𑀲𑀼𑀁. 𑀅𑀤𑀲𑁆𑀲𑀺, 𑀅𑀧𑀲𑁆𑀲𑀺, 𑀅𑀤𑀓𑁆𑀔𑀺.

𑀤𑀲𑁆𑀲𑀺𑀲𑁆𑀲𑀢𑀺, 𑀧𑀲𑁆𑀲𑀺𑀲𑁆𑀲𑀢𑀺, 𑀤𑀓𑁆𑀔𑀺𑀲𑁆𑀲𑀢𑀺. 𑀅𑀤𑀲𑁆𑀲𑀺𑀲𑁆𑀲𑀸, 𑀅𑀧𑀲𑁆𑀲𑀺𑀲𑁆𑀲𑀸, 𑀤𑀓𑁆𑀔𑀺𑀲𑁆𑀲𑀸. 𑀏𑀯𑀁 𑀯𑀢𑁆𑀢𑀫𑀸𑀦𑀧𑀜𑁆𑀘𑀫𑀺𑀬𑀸𑀤𑀺𑀯𑀲𑁂𑀦 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸𑀦𑀺. 𑀓𑀸𑀭𑀺𑀢𑁂 ‘‘𑀤𑀲𑁆𑀲𑁂𑀢𑀺 𑀤𑀲𑁆𑀲𑀬𑀢𑀻’’𑀢𑀺 𑀭𑀽𑀧𑀸𑀦𑀺. 𑀓𑀫𑁆𑀫𑁂 ‘‘𑀧𑀲𑁆𑀲𑀺𑀬𑀢𑀺’’ 𑀇𑀘𑁆𑀘𑀸𑀤𑀻𑀦𑀺.

𑀤𑀺𑀲𑀸. 𑀧𑀲𑁆𑀲𑁄. 𑀧𑀲𑁆𑀲𑀁. 𑀧𑀲𑁆𑀲𑀺𑀢𑀸. 𑀤𑀲𑁆𑀲𑁂𑀢𑀸. 𑀤𑀲𑁆𑀲𑀦𑀁. 𑀯𑀺𑀧𑀲𑁆𑀲𑀦𑀸, 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀦𑀸𑀫𑀺𑀓𑀧𑀤𑀸𑀦𑀺. 𑀢𑀤𑀢𑁆𑀣𑁂 𑀧𑀦 𑀢𑀼𑀫𑀢𑁆𑀣𑁂 𑀘 ‘‘𑀤𑀓𑁆𑀔𑀺𑀢𑀸𑀬𑁂’’𑀢𑀺 𑀭𑀽𑀧𑀁. ‘‘𑀆𑀕𑀢𑀸𑀫𑁆𑀳 𑀇𑀫𑀁 𑀥𑀫𑁆𑀫𑀲𑀫𑀬𑀁, 𑀤𑀓𑁆𑀔𑀺𑀢𑀸𑀬𑁂 𑀅𑀧𑀭𑀸𑀚𑀺𑀢𑀲𑀗𑁆𑀖’’𑀦𑁆𑀢𑀺 𑀳𑀺 𑀧𑀸𑀴𑀺. 𑀇𑀫𑀲𑁆𑀫𑀺𑀁 𑀧𑀦 𑀧𑀸𑀴𑀺𑀧𑁆𑀧𑀤𑁂𑀲𑁂 ‘‘𑀤𑀓𑁆𑀔𑀺𑀢𑀸𑀬𑁂’’𑀢𑀺 𑀇𑀤𑀁 𑀢𑀤𑀢𑁆𑀣𑁂 𑀢𑀼𑀫𑀢𑁆𑀣𑁂 𑀯𑀸 𑀘𑀢𑀼𑀢𑁆𑀣𑀺𑀬𑀸 𑀭𑀽𑀧𑀁. 𑀢𑀣𑀸 ¶ 𑀳𑀺 𑀤𑀓𑁆𑀔𑀺𑀢𑀸𑀬𑁂𑀢𑀺 𑀇𑀫𑀲𑁆𑀲 𑀤𑀲𑁆𑀲𑀦𑀢𑁆𑀣𑀸𑀬𑀸𑀢𑀺 𑀯𑀸 𑀧𑀲𑁆𑀲𑀺𑀢𑀼𑀦𑁆𑀢𑀺 𑀯𑀸 𑀅𑀢𑁆𑀣𑁄 𑀬𑁄𑀚𑁂𑀢𑀩𑁆𑀩𑁄. 𑀤𑀺𑀲𑀸𑀢𑀺𑀆𑀤𑀻𑀲𑀼 𑀧𑀦 𑀧𑀼𑀭𑀢𑁆𑀣𑀺𑀫𑀸𑀤𑀺𑀪𑁂𑀤𑀸𑀧𑀺 𑀤𑀺𑀲𑀸𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋

‘‘𑀤𑀺𑀲𑀸 𑀘𑀢𑀲𑁆𑀲𑁄 𑀯𑀺𑀤𑀺𑀲𑀸 𑀘𑀢𑀲𑁆𑀲𑁄,

𑀉𑀤𑁆𑀥𑀁 𑀅𑀥𑁄 𑀤𑀲 𑀤𑀺𑀲𑀢𑀸 𑀇𑀫𑀸𑀬𑁄;

𑀓𑀢𑀫𑀁 𑀤𑀺𑀲𑀁 𑀢𑀺𑀝𑁆𑀞𑀢𑀺 𑀦𑀸𑀕𑀭𑀸𑀚𑀸,

𑀬𑀫𑀤𑁆𑀤𑀲𑀸 𑀲𑀼𑀧𑀺𑀦𑁂 𑀙𑀩𑁆𑀩𑀺𑀲𑀸𑀡’’𑀦𑁆𑀢𑀺.

𑀫𑀸𑀢𑀸𑀧𑀺𑀢𑀸𑀤𑀬𑁄𑀧𑀺. 𑀬𑀣𑀸𑀳 𑁋

‘‘𑀫𑀸𑀢𑀸𑀧𑀺𑀢𑀸 𑀤𑀺𑀲𑀸 𑀧𑀼𑀩𑁆𑀩𑀸, 𑀆𑀘𑀭𑀺𑀬𑀸 𑀤𑀓𑁆𑀔𑀺𑀡𑀸 𑀤𑀺𑀲𑀸;

𑀧𑀼𑀢𑁆𑀢𑀤𑀸𑀭𑀸 𑀤𑀺𑀲𑀸 𑀧𑀘𑁆𑀙𑀸, 𑀫𑀺𑀢𑁆𑀢𑀸𑀫𑀘𑁆𑀘𑀸 𑀘 𑀉𑀢𑁆𑀢𑀭𑀸;

𑀤𑀸𑀲𑀓𑀫𑁆𑀫𑀓𑀭𑀸 𑀳𑁂𑀝𑁆𑀞𑀸, 𑀉𑀤𑁆𑀥𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸;

𑀏𑀢𑀸 𑀤𑀺𑀲𑀸 𑀦𑀫𑀲𑁆𑀲𑁂𑀬𑁆𑀬, 𑀅𑀮𑀫𑀢𑁆𑀢𑁄 𑀓𑀼𑀮𑁂 𑀕𑀺𑀳𑀻’’𑀢𑀺;

𑀧𑀘𑁆𑀘𑀬𑀤𑀸𑀬𑀓𑀸𑀧𑀺. 𑀬𑀣𑀸𑀳 𑁋 ‘‘𑀅𑀕𑀸𑀭𑀺𑀦𑁄 𑀅𑀦𑁆𑀦𑀤𑀧𑀸𑀦𑀯𑀢𑁆𑀣𑀤𑀸, 𑀅𑀯𑁆𑀳𑀸𑀬𑀺𑀓𑀸 𑀦𑀫𑁆𑀧𑀺 𑀤𑀺𑀲𑀁 𑀯𑀤𑀦𑁆𑀢𑀻’’𑀢𑀺.

𑀦𑀺𑀩𑁆𑀩𑀸𑀦𑀫𑁆𑀧𑀺. 𑀬𑀣𑀸𑀳 𑁋

‘‘𑀏𑀢𑀸𑀤𑀺𑀲𑀸 𑀧𑀭𑀫𑀸 𑀲𑁂𑀢𑀓𑁂𑀢𑀼,

𑀬𑀁 𑀧𑀢𑁆𑀯𑀸 𑀦𑀺𑀤𑁆𑀤𑀼𑀓𑁆𑀔𑀸 𑀲𑀼𑀔𑀺𑀦𑁄 𑀪𑀯𑀦𑁆𑀢𑀻’’𑀢𑀺;

𑀏𑀯𑀁 𑀤𑀺𑀲𑀸𑀲𑀤𑁆𑀤𑁂𑀦 𑀯𑀼𑀘𑁆𑀘𑀫𑀸𑀦𑀁 𑀅𑀢𑁆𑀣𑀭𑀽𑀧𑀁 𑀜𑀢𑁆𑀯𑀸 𑀇𑀤𑀸𑀦𑀺𑀲𑁆𑀲 𑀦𑀺𑀩𑁆𑀩𑀘𑀦𑀫𑁂𑀯𑀁 𑀤𑀝𑁆𑀞𑀩𑁆𑀩𑀁. 𑀤𑀺𑀲𑁆𑀲𑀢𑀺 𑀘𑀦𑁆𑀤𑀸𑀯𑀝𑁆𑀝𑀦𑀸𑀤𑀺𑀯𑀲𑁂𑀦 ‘‘𑀅𑀬𑀁 𑀧𑀼𑀭𑀺𑀫𑀸 𑀅𑀬𑀁 𑀧𑀘𑁆𑀙𑀺𑀫𑀸’’𑀢𑀺𑀆𑀤𑀺𑀦𑀸 𑀦𑀸𑀦𑀧𑁆𑀧𑀓𑀸𑀭𑀢𑁄 𑀧𑀜𑁆𑀜𑀸𑀬𑀢𑀻𑀢𑀺 𑀤𑀺𑀲𑀸, 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀤𑀬𑁄. 𑀢𑀣𑀸 ‘‘𑀇𑀫𑁂 𑀅𑀫𑁆𑀳𑀸𑀓𑀁 𑀕𑀭𑀼𑀝𑁆𑀞𑀸𑀦’𑀦𑁆𑀢𑀺𑀆𑀤𑀺𑀦𑀸 𑀧𑀲𑁆𑀲𑀺𑀢𑀩𑁆𑀩𑀸𑀢𑀺 𑀤𑀺𑀲𑀸, 𑀫𑀸𑀢𑀸𑀧𑀺𑀢𑀸𑀤𑀬𑁄. 𑀤𑀺𑀲𑁆𑀲𑀦𑁆𑀢𑀺 𑀲𑀓𑀸𑀬 𑀧𑀼𑀜𑁆𑀜𑀓𑁆𑀭𑀺𑀬𑀸𑀬 𑀇𑀫𑁂 𑀤𑀸𑀬𑀓𑀸𑀢𑀺 𑀧𑀜𑁆𑀜𑀸𑀬𑀦𑁆𑀢𑀻𑀢𑀺 𑀤𑀺𑀲𑀸, 𑀧𑀘𑁆𑀘𑀬𑀤𑀸𑀬𑀓𑀸. 𑀤𑀺𑀲𑁆𑀲𑀢𑀺 𑀉𑀧𑁆𑀧𑀸𑀤𑀯𑀬𑀸𑀪𑀸𑀯𑁂𑀦 𑀦𑀺𑀘𑁆𑀘𑀥𑀫𑁆𑀫𑀢𑁆𑀢𑀸 𑀲𑀩𑁆𑀩𑀓𑀸𑀮𑀫𑁆𑀧𑀺 𑀯𑀺𑀚𑁆𑀚𑀢𑀻𑀢𑀺 𑀤𑀺𑀲𑀸, 𑀦𑀺𑀩𑁆𑀩𑀸𑀦𑀁. 𑀧𑀲𑁆𑀲𑁄𑀢𑀺 𑀓𑀸𑀭𑀡𑀸𑀓𑀸𑀭𑀡𑀁 ¶ 𑀧𑀲𑁆𑀲𑀢𑀻𑀢𑀺 𑀧𑀲𑁆𑀲𑁄. 𑀏𑀯𑀁 𑀧𑀲𑁆𑀲𑀢𑀻𑀢𑀺 𑀧𑀲𑁆𑀲𑀁. 𑀅𑀢𑁆𑀭𑀸𑀬𑀁 𑀧𑀸𑀴𑀺 𑁋

‘‘𑀧𑀲𑁆𑀲𑀢𑀺 𑀧𑀲𑁆𑀲𑁄 𑀧𑀲𑁆𑀲𑀦𑁆𑀢𑀁, 𑀅𑀧𑀲𑁆𑀲𑀦𑁆𑀢𑀫𑁆𑀧𑀺 𑀧𑀲𑁆𑀲𑀢𑀺;

𑀅𑀧𑀲𑁆𑀲𑀦𑁆𑀢𑁄 𑀅𑀧𑀲𑁆𑀲𑀦𑁆𑀢𑀁, 𑀧𑀲𑁆𑀲𑀦𑁆𑀢𑀫𑁆𑀧𑀺 𑀦 𑀧𑀲𑁆𑀲𑀢𑀻’’𑀢𑀺.

𑀧𑀲𑁆𑀲𑀢𑀻𑀢𑀺 𑀧𑀲𑁆𑀲𑀺𑀢𑀸. 𑀤𑀲𑁆𑀲𑁂𑀢𑀻𑀢𑀺 𑀤𑀲𑁆𑀲𑀺𑀢𑀸. 𑀤𑀲𑁆𑀲𑀦𑀦𑁆𑀢𑀺 𑀤𑀲𑁆𑀲𑀦𑀓𑁆𑀭𑀺𑀬𑀸. 𑀅𑀧𑀺𑀘 𑀤𑀲𑁆𑀲𑀦𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀢𑀜𑁆𑀳𑀺 𑀭𑀽𑀧𑀸𑀭𑀫𑁆𑀫𑀡𑀁 𑀧𑀲𑁆𑀲𑀢𑀻𑀢𑀺 𑀤𑀲𑁆𑀲𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 ‘‘𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀥𑀫𑁆𑀫𑀸’’𑀢𑀺 𑀯𑀘𑀦𑀢𑁄 𑀤𑀲𑁆𑀲𑀦𑀁 𑀦𑀸𑀫 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄. 𑀓𑀲𑁆𑀫𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀤𑀲𑁆𑀲𑀦𑀁? 𑀧𑀞𑀫𑀁 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀢𑁄. 𑀦𑀦𑀼 𑀕𑁄𑀢𑁆𑀭𑀪𑀽 𑀧𑀞𑀫𑀢𑀭𑀁 𑀧𑀲𑁆𑀲𑀢𑀻𑀢𑀺? 𑀦𑁄 𑀦 𑀧𑀲𑁆𑀲𑀢𑀺, 𑀤𑀺𑀲𑁆𑀯𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀧𑀦 𑀦 𑀓𑀭𑁄𑀢𑀺 𑀲𑀁𑀬𑁄𑀚𑀦𑀸𑀦𑀁 𑀅𑀧𑁆𑀧𑀳𑀸𑀦𑀢𑁄, 𑀢𑀲𑁆𑀫𑀸 ‘‘𑀧𑀲𑁆𑀲𑀢𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀬𑀢𑁆𑀣 𑀓𑀢𑁆𑀣𑀘𑀺 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸𑀧𑀺 𑀧𑀡𑁆𑀡𑀸𑀓𑀸𑀭𑀁 𑀤𑀢𑁆𑀯𑀸 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀬𑀸 𑀅𑀤𑀺𑀝𑁆𑀞𑀢𑁆𑀢𑀸 𑀅𑀚𑁆𑀚𑀸𑀧𑀺 𑀭𑀸𑀚𑀸𑀦𑀁 𑀦 𑀧𑀲𑁆𑀲𑀸𑀫𑀻𑀢𑀺 𑀯𑀤𑀦𑁆𑀢𑁄 𑀕𑀸𑀫𑀯𑀸𑀲𑀻 𑀦𑀺𑀤𑀲𑁆𑀲𑀦𑀁.

𑀯𑀺𑀧𑀲𑁆𑀲𑀦𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀔𑀦𑁆𑀥𑀸𑀦𑀁 𑀯𑀺𑀧𑀲𑁆𑀲𑀦𑀓𑀁 𑀜𑀸𑀡𑀁. 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀧𑀺 𑀯𑀺𑀧𑀲𑁆𑀲𑀦𑀸𑀧𑀺 𑀫𑀕𑁆𑀕𑁄𑀧𑀺 𑀨𑀮𑀫𑁆𑀧𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀫𑁆𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁆𑀧𑀺 𑀯𑀼𑀘𑁆𑀘𑀢𑀺. ‘‘𑀅𑀧𑁆𑀧𑀫𑀢𑁆𑀢𑁄 𑀲𑀫𑀸𑀦𑁄 𑀜𑀸𑀡𑀤𑀲𑁆𑀲𑀦𑀁 𑀆𑀭𑀸𑀥𑁂𑀢𑀻’’𑀢𑀺 𑀏𑀢𑁆𑀣 𑀳𑀺 𑀤𑀺𑀩𑁆𑀩𑀘𑀓𑁆𑀔𑀼 𑀜𑀸𑀡𑀤𑀲𑁆𑀲𑀦𑀁 𑀦𑀸𑀫. ‘‘𑀜𑀸𑀡𑀤𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀻’’𑀢𑀺 𑀏𑀢𑁆𑀣 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. ‘‘𑀅𑀪𑀩𑁆𑀩𑀸 𑀢𑁂 𑀜𑀸𑀡𑀤𑀲𑁆𑀲𑀦𑀸𑀬 𑀅𑀦𑀼𑀢𑁆𑀢𑀭𑀸𑀬 𑀲𑀫𑁆𑀩𑁄𑀥𑀸𑀬𑀸’’𑀢𑀺 𑀏𑀢𑁆𑀣 𑀫𑀕𑁆𑀕𑁄, ‘‘𑀅𑀬𑀫𑀜𑁆𑀜𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺 𑀏𑀢𑁆𑀣 𑀨𑀮𑀜𑀸𑀡𑀁. ‘‘𑀜𑀸𑀡𑀜𑁆𑀘 𑀧𑀦 𑀫𑁂 𑀤𑀲𑁆𑀲𑀦𑀁 𑀉𑀤𑀧𑀸𑀤𑀺, 𑀅𑀓𑀼𑀧𑁆𑀧𑀸 𑀫𑁂 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺 𑀏𑀢𑁆𑀣 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. ‘‘𑀜𑀸𑀡𑀜𑁆𑀘 ¶ 𑀧𑀦 𑀫𑁂 𑀤𑀲𑁆𑀲𑀦𑀁 𑀉𑀤𑀧𑀸𑀤𑀺 𑀲𑀢𑁆𑀢𑀸𑀳𑀓𑀸𑀮𑀗𑁆𑀓𑀢𑁄 𑀆𑀴𑀸𑀭𑁄 𑀓𑀸𑀮𑀸𑀫𑁄’’𑀢𑀺 𑀏𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. 𑀏𑀢𑁆𑀣𑁂𑀢𑀁 𑀪𑀯𑀢𑀺 𑁋

‘‘𑀤𑀺𑀩𑁆𑀩𑀘𑀓𑁆𑀔𑀼𑀧𑀺 𑀫𑀕𑁆𑀕𑁄𑀧𑀺, 𑀨𑀮𑀜𑁆𑀘𑀸𑀧𑀺 𑀯𑀺𑀧𑀲𑁆𑀲𑀦𑀸;

𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀫𑁆𑀧𑀺, 𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀸𑀧𑀺 𑀘;

𑀜𑀸𑀡𑀤𑀲𑁆𑀲𑀦𑀲𑀤𑁆𑀤𑁂𑀦, 𑀇𑀫𑁂 𑀅𑀢𑁆𑀣𑀸 𑀧𑀯𑀼𑀘𑁆𑀘𑀭𑁂’’𑀢𑀺.

𑀤𑀁𑀲 𑀤𑀁𑀲𑀦𑁂. 𑀤𑀁𑀲𑀢𑀺, 𑀯𑀺𑀤𑀁𑀲𑀢𑀺. 𑀤𑀦𑁆𑀢𑁄. 𑀓𑀸𑀭𑀺𑀢𑁂 𑀆𑀮𑁄𑀓𑀁 𑀯𑀺𑀤𑀁𑀲𑁂𑀢𑀺.

𑀏𑀲 𑀩𑀼𑀤𑁆𑀥𑀺𑀬𑀁. 𑀏𑀲𑀢𑀺.

𑀲𑀁𑀲 𑀓𑀣𑀦𑁂. 𑀲𑀁𑀲𑀢𑀺. 𑀬𑁄 𑀫𑁂 𑀲𑀁𑀲𑁂 𑀫𑀳𑀸𑀦𑀸𑀕𑀁.

𑀓𑀺𑀮𑀺𑀲 𑀩𑀸𑀥𑀦𑁂. 𑀓𑀺𑀮𑀺𑀲𑀢𑀺. 𑀓𑀺𑀮𑁂𑀲𑁄.

𑀏𑀢𑁆𑀣 𑀩𑀸𑀥𑀦𑀝𑁆𑀞𑁂𑀦 𑀭𑀸𑀕𑀸𑀤𑀬𑁄𑀧𑀺 ‘‘𑀓𑀺𑀮𑁂𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺 𑀤𑀼𑀓𑁆𑀔𑀫𑁆𑀧𑀺. 𑀏𑀢𑁂𑀲𑀼 𑀤𑀼𑀓𑁆𑀔𑀯𑀲𑁂𑀦 𑁋

‘‘𑀇𑀤𑀜𑁆𑀘 𑀧𑀘𑁆𑀘𑀬𑀁 𑀮𑀤𑁆𑀥𑀸, 𑀧𑀼𑀩𑁆𑀩𑁂 𑀓𑀺𑀮𑁂𑀲𑀫𑀢𑁆𑀢𑀦𑁄;

𑀆𑀦𑀦𑁆𑀤𑀺𑀬𑀁 𑀯𑀺𑀘𑀭𑀺𑀁𑀲𑀼, 𑀭𑀫𑀡𑀻𑀬𑁂 𑀕𑀺𑀭𑀺𑀩𑁆𑀩𑀚𑁂’’𑀢𑀺

𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀺𑀯𑀸𑀤𑀺𑀕𑀡𑀁 𑀧𑀦 𑀧𑀢𑁆𑀢𑀲𑁆𑀲 ‘‘𑀓𑀺𑀮𑀺𑀲𑁆𑀲𑀢𑀻’’𑀢𑀺 𑀭𑀽𑀧𑀁.

𑀯𑀲 𑀲𑀺𑀦𑁂𑀳𑀦𑁂. 𑀯𑀲𑀢𑀺. 𑀯𑀲𑀸.

𑀏𑀢𑁆𑀣 𑀘 𑀯𑀲𑀸 𑀦𑀸𑀫 𑀯𑀺𑀮𑀻𑀦𑀲𑀺𑀦𑁂𑀳𑁄. 𑀲𑀸 𑀯𑀡𑁆𑀡𑀢𑁄 𑀦𑀸𑀴𑀺𑀓𑁂𑀭𑀢𑁂𑀮𑀯𑀡𑁆𑀡𑀸. 𑀆𑀘𑀸𑀫𑁂 𑀆𑀲𑀺𑀢𑁆𑀢𑀢𑁂𑀮𑀯𑀡𑁆𑀡𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑀈𑀲 𑀳𑀺𑀁𑀲𑀸𑀕𑀢𑀺𑀤𑀲𑁆𑀲𑀦𑁂𑀲𑀼. 𑀈𑀲𑀢𑀺. 𑀈𑀲𑁄.

𑀪𑀸𑀲𑀩𑁆𑀬𑀢𑁆𑀢𑀸𑀬𑀁 𑀯𑀸𑀘𑀸𑀬𑀁. 𑀪𑀸𑀲𑀢𑀺. 𑀪𑀸𑀲𑀸, 𑀪𑀸𑀲𑀺𑀢𑀁, 𑀪𑀸𑀢𑀸. 𑀧𑀭𑀺𑀪𑀸𑀲𑀢𑀺. 𑀧𑀭𑀺𑀪𑀸𑀲𑀸, 𑀧𑀭𑀺𑀪𑀸𑀲𑀓𑁄.

𑀢𑀢𑁆𑀭 ¶ 𑀪𑀸𑀲𑀦𑁆𑀢𑀺 𑀅𑀢𑁆𑀣𑀁 𑀏𑀢𑀸𑀬𑀸𑀢𑀺 𑀪𑀸𑀲𑀸, 𑀫𑀸𑀕𑀥𑀪𑀸𑀲𑀸𑀤𑀺. 𑀪𑀸𑀲𑀺𑀢𑀦𑁆𑀢𑀺 𑀯𑀘𑀦𑀁. 𑀯𑀘𑀦𑀢𑁆𑀣𑁄 𑀳𑀺 𑀪𑀸𑀲𑀺𑀢𑀲𑀤𑁆𑀤𑁄 𑀦𑀺𑀘𑁆𑀘𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 ‘‘𑀲𑀼𑀢𑁆𑀯𑀸 𑀮𑀼𑀤𑁆𑀤𑀲𑁆𑀲 𑀪𑀸𑀲𑀺𑀢’’𑀦𑁆𑀢𑀺. 𑀯𑀸𑀘𑁆𑀘𑀮𑀺𑀗𑁆𑀕𑁄 𑀧𑀦 𑀪𑀸𑀲𑀺𑀢𑀲𑀤𑁆𑀤𑁄 𑀢𑀺𑀮𑀺𑀗𑁆𑀕𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 ‘‘𑀪𑀸𑀲𑀺𑀢𑁄 𑀥𑀫𑁆𑀫𑁄, 𑀪𑀸𑀲𑀺𑀢𑀁 𑀘𑀢𑀼𑀲𑀘𑁆𑀘𑀁, 𑀪𑀸𑀲𑀺𑀢𑀸 𑀯𑀸𑀘𑀸’’𑀢𑀺. 𑀧𑀼𑀩𑁆𑀩𑁂 𑀪𑀸𑀲𑀢𑀻𑀢𑀺 𑀪𑀸𑀢𑀸, 𑀚𑁂𑀝𑁆𑀞𑀪𑀸𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀳𑀺 𑀧𑀼𑀩𑁆𑀩𑁂 𑀚𑀸𑀢𑀢𑁆𑀢𑀸 𑀏𑀯𑀁 𑀯𑀢𑁆𑀢𑀼𑀁𑀮𑀪𑀢𑀺. 𑀓𑀺𑀜𑁆𑀘𑀸𑀧𑀺 𑀪𑀸𑀢𑀼𑀲𑀤𑁆𑀤𑁄 ‘‘𑀪𑀸𑀢𑀺𑀓𑀲𑀢𑀁, 𑀲𑀢𑁆𑀢𑀪𑀸𑀢𑀭𑁄. 𑀪𑀸𑀢𑀭𑀁 𑀓𑁂𑀦 𑀤𑁄𑀲𑁂𑀦, 𑀤𑀼𑀚𑁆𑀚𑀸𑀲𑀺 𑀤𑀓𑀭𑀓𑁆𑀔𑀺𑀦𑁄’’𑀢𑀺𑀆𑀤𑀻𑀲𑀼 𑀚𑁂𑀝𑁆𑀞𑀓𑀦𑀺𑀝𑁆𑀞𑀪𑀸𑀢𑀽𑀲𑀼 𑀯𑀢𑁆𑀢𑀢𑀺, 𑀢𑀣𑀸𑀧𑀺 𑀬𑁂𑀪𑀼𑀬𑁆𑀬𑁂𑀦 𑀚𑁂𑀝𑁆𑀞𑀓𑁂 𑀦𑀺𑀭𑀽𑀝𑁆𑀞𑁄, ‘‘𑀪𑀸𑀢𑀸’’𑀢𑀺 𑀳𑀺 𑀯𑀼𑀢𑁆𑀢𑁂 𑀚𑁂𑀝𑁆𑀞𑀪𑀸𑀢𑀸𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀓𑀢𑁆𑀣𑀘𑀺 𑀞𑀸𑀦𑁂 ‘‘𑀓𑀦𑀺𑀝𑁆𑀞𑀪𑀸𑀢𑀸’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁.

𑀦𑀦𑀼 𑀘 𑀪𑁄 𑀓𑀢𑁆𑀣𑀘𑀺 ‘‘𑀚𑁂𑀝𑁆𑀞𑀪𑀸𑀢𑀸’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺? 𑀲𑀘𑁆𑀘𑀁, 𑀢𑀁 𑀧𑀦 𑀪𑀸𑀢𑀸𑀲𑀤𑁆𑀤𑀲𑁆𑀲 𑀓𑀦𑀺𑀝𑁆𑀞𑁂𑀧𑀺 𑀯𑀢𑁆𑀢𑀦𑀢𑁄 𑀧𑀸𑀓𑀝𑀻𑀓𑀭𑀡𑀢𑁆𑀣𑀁 ‘‘𑀚𑁂𑀝𑁆𑀞𑀪𑀸𑀢𑀸’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀳𑀭𑀺𑀡𑁂𑀲𑀼 𑀯𑀢𑁆𑀢𑀫𑀸𑀦𑀲𑁆𑀲 𑀫𑀺𑀕𑀲𑀤𑁆𑀤𑀲𑁆𑀲 𑀓𑀤𑀸𑀘𑀺 𑀅𑀯𑀲𑁂𑀲𑀘𑀢𑀼𑀧𑁆𑀧𑀤𑁂𑀲𑀼𑀧𑀺 𑀯𑀢𑁆𑀢𑀦𑀢𑁄 ‘‘𑀳𑀭𑀺𑀡𑀫𑀺𑀕𑁄’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀸𑀘𑀁 𑀪𑀸𑀲𑀦𑁆𑀢𑀺, 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀘 𑀕𑁄𑀳𑀢𑁆𑀣𑀺𑀫𑀳𑀺𑀁𑀲𑀅𑀘𑁆𑀙𑀲𑀽𑀓𑀭𑀲𑀲𑀩𑀺𑀴𑀸𑀭𑀸𑀤𑀻𑀲𑀼 𑀲𑀸𑀫𑀜𑁆𑀜𑀯𑀲𑁂𑀦 𑀫𑀺𑀕𑀲𑀤𑁆𑀤𑁂 𑀯𑀢𑁆𑀢𑀫𑀸𑀦𑁂𑀧𑀺 ‘‘𑀫𑀺𑀕𑀘𑀫𑁆𑀫𑀁 𑀫𑀺𑀕𑀫𑀁𑀲’’𑀦𑁆𑀢𑀺 𑀆𑀕𑀢𑀝𑁆𑀞𑀸𑀦𑁂 ‘‘𑀳𑀭𑀺𑀡𑀲𑁆𑀲𑀸’’𑀢𑀺 𑀯𑀺𑀲𑁂𑀲𑀦𑀲𑀤𑁆𑀤𑀁 𑀯𑀺𑀦𑀸𑀧𑀺 ‘‘𑀳𑀭𑀺𑀡𑀫𑀺𑀕𑀘𑀫𑁆𑀫𑀁 𑀳𑀭𑀺𑀡𑀫𑀺𑀕𑀫𑀁𑀲’’𑀦𑁆𑀢𑀺 𑀯𑀺𑀲𑁂𑀲𑀢𑁆𑀣𑀸𑀥𑀺𑀕𑀫𑁄 𑀳𑁄𑀢𑀺, 𑀏𑀢𑁆𑀣 𑀦 𑀕𑁄𑀳𑀢𑁆𑀣𑀺𑀆𑀤𑀻𑀦𑀁 𑀘𑀫𑁆𑀫𑀁 𑀯𑀸 𑀫𑀁𑀲𑀁 𑀯𑀸 𑀯𑀺𑀜𑁆𑀜𑀸𑀬𑀢𑀺. 𑀢𑀣𑀸 ‘‘𑀫𑀺𑀕𑀫𑀁𑀲𑀁 𑀔𑀸𑀤𑀦𑁆𑀢𑀻’’𑀢𑀺 𑀯𑀘𑀦𑀲𑁆𑀲 𑀕𑁄𑀳𑀢𑁆𑀣𑀺𑀆𑀤𑀻𑀦𑀁 𑀫𑀁𑀲𑀁 𑀔𑀸𑀤𑀦𑁆𑀢𑀻𑀢𑀺 𑀅𑀢𑁆𑀣𑁄 𑀦 𑀲𑀫𑁆𑀪𑀯𑀢𑀺, 𑀏𑀯𑀫𑁂𑀯 𑀓𑀢𑁆𑀣𑀘𑀺 𑀯𑀺𑀦𑀸𑀧𑀺 𑀚𑁂𑀝𑁆𑀞𑀓𑀇𑀢𑀺 𑀯𑀺𑀲𑁂𑀲𑀦𑀲𑀤𑁆𑀤𑀁 ‘‘𑀪𑀸𑀢𑀸’’𑀢𑀺 𑀯𑀼𑀢𑁆𑀢𑁂𑀬𑁂𑀯 ‘‘𑀚𑁂𑀝𑁆𑀞𑀓𑀪𑀸𑀢𑀸’’𑀢𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻𑀢𑀺. 𑀦𑀦𑀼 𑀘 𑀪𑁄 ‘‘𑀫𑀺𑀕𑀘𑀫𑁆𑀫𑀁, 𑀫𑀺𑀕𑀫𑀁𑀲’’𑀦𑁆𑀢𑀺 𑀏𑀢𑁆𑀣 𑀘𑀫𑁆𑀫𑀫𑀁𑀲𑀲𑀤𑁆𑀤𑁂𑀳𑁂𑀯 ¶ 𑀯𑀺𑀲𑁂𑀲𑀢𑁆𑀣𑀸𑀥𑀺𑀕𑀫𑁄 𑀳𑁄𑀢𑀻𑀢𑀺? 𑀦 𑀳𑁄𑀢𑀺, 𑀫𑀺𑀕𑀲𑀤𑁆𑀤𑀲𑁆𑀲 𑀇𑀯 𑀘𑀫𑁆𑀫𑀫𑀁𑀲𑀲𑀤𑁆𑀤𑀸𑀦𑀁 𑀲𑀸𑀫𑀜𑁆𑀜𑀯𑀲𑁂𑀦 𑀯𑀢𑁆𑀢𑀦𑀢𑁄, 𑀏𑀯𑀜𑁆𑀘 𑀲𑀢𑀺 𑀓𑁂𑀦 𑀯𑀺𑀲𑁂𑀲𑀢𑁆𑀣𑀸𑀥𑀺𑀕𑀫𑁄 𑀳𑁄𑀢𑀻𑀢𑀺 𑀘𑁂? 𑀮𑁄𑀓𑀲𑀗𑁆𑀓𑁂𑀢𑀯𑀲𑁂𑀦, 𑀢𑀣𑀸 𑀳𑀺 𑀫𑀺𑀕𑀲𑀤𑁆𑀤𑁂 𑀘 𑀘𑀫𑁆𑀫𑀲𑀤𑁆𑀤𑀸𑀤𑀻𑀲𑀼 𑀘 𑀲𑀸𑀫𑀜𑁆𑀜𑀯𑀲𑁂𑀦 𑀯𑀢𑁆𑀢𑀫𑀸𑀦𑁂𑀲𑀼𑀧𑀺 𑀮𑁄𑀓𑀲𑀗𑁆𑀓𑁂𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀕𑁄𑀳𑀢𑁆𑀣𑀺𑀆𑀤𑀻𑀦𑀁 𑀘𑀫𑁆𑀫𑀸𑀤𑀻𑀦𑀺 𑀦 𑀜𑀸𑀬𑀦𑁆𑀢𑀺 𑀮𑁄𑀓𑁂𑀦, 𑀅𑀣 𑀔𑁄 𑀳𑀭𑀺𑀡𑀘𑀫𑁆𑀫𑀸𑀤𑀻𑀦𑀺𑀬𑁂𑀯 𑀜𑀸𑀬𑀦𑁆𑀢𑀺. ‘‘𑀲𑀗𑁆𑀓𑁂𑀢𑀯𑀘𑀦𑀁 𑀲𑀘𑁆𑀘𑀁, 𑀮𑁄𑀓𑀲𑀫𑁆𑀫𑀼𑀢𑀺 𑀓𑀸𑀭𑀡’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀕𑀺𑀮𑁂𑀲𑀼 𑀅𑀦𑁆𑀯𑀺𑀘𑁆𑀙𑀸𑀬𑀁. 𑀧𑀼𑀦𑀧𑁆𑀧𑀼𑀦𑀁 𑀇𑀘𑁆𑀙𑀸 𑀅𑀦𑁆𑀯𑀺𑀘𑁆𑀙𑀸. 𑀕𑀺𑀮𑁂𑀲𑀢𑀺.

𑀬𑁂𑀲𑀼 𑀧𑀬𑀢𑀦𑁂. 𑀬𑁂𑀲𑀢𑀺.

𑀚𑁂𑀲𑀼 𑀦𑁂𑀲𑀼 𑀏𑀲𑀼 𑀳𑁂𑀲𑀼 𑀕𑀢𑀺𑀬𑀁. 𑀚𑁂𑀲𑀢𑀺. 𑀦𑁂𑀲𑀢𑀺. 𑀏𑀲𑀢𑀺. 𑀳𑁂𑀲𑀢𑀺. 𑀥𑀸𑀢𑁆𑀯𑀦𑁆𑀢𑀲𑁆𑀲 𑀧𑀦 𑀲𑀜𑁆𑀜𑁄𑀕𑀯𑀲𑁂𑀦 ‘‘𑀚𑁂𑀲𑁆𑀲𑀢𑀺, 𑀦𑁂𑀲𑁆𑀲𑀢𑀻’’𑀢𑀺𑀆𑀤𑀻𑀦𑀺𑀧𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀚𑁂𑀲𑁆𑀲𑀫𑀸𑀦𑁄. 𑀚𑁂𑀲𑁆𑀲𑀁, 𑀚𑁂𑀲𑁆𑀲𑀦𑁆𑀢𑁄. 𑀏𑀢𑁆𑀣 𑀘 𑁋

‘‘𑀬𑀣𑀸 𑀆𑀭𑀜𑁆𑀜𑀓𑀁 𑀦𑀸𑀕𑀁, 𑀤𑀦𑁆𑀢𑀺𑀁 𑀅𑀦𑁆𑀯𑁂𑀢𑀺 𑀳𑀢𑁆𑀣𑀺𑀦𑀻;

𑀚𑁂𑀲𑁆𑀲𑀦𑁆𑀢𑀁 𑀕𑀺𑀭𑀺𑀤𑀼𑀕𑁆𑀕𑁂𑀲𑀼, 𑀲𑀫𑁂𑀲𑀼 𑀯𑀺𑀲𑀫𑁂𑀲𑀼 𑀘𑀸’’𑀢𑀺

𑀧𑀸𑀴𑀺 𑀦𑀺𑀤𑀲𑁆𑀲𑀦𑀁.

𑀤𑁂𑀲𑀼 𑀳𑁂𑀲𑀼 𑀅𑀩𑁆𑀬𑀢𑁆𑀢𑀲𑀤𑁆𑀤𑁂. 𑀤𑁂𑀲𑀢𑀺. 𑀳𑁂𑀲𑀢𑀺.

𑀓𑀸𑀲 𑀲𑀤𑁆𑀤𑀓𑀼𑀘𑁆𑀙𑀸𑀬𑀁. 𑀓𑀸𑀲𑀢𑀺, 𑀉𑀓𑁆𑀓𑀸𑀲𑀢𑀺. 𑀓𑀸𑀲𑁄. 𑀓𑀸𑀲𑀁 𑀲𑀸𑀲𑀁 𑀤𑀭𑀁 𑀩𑀮𑁆𑀬𑀁, 𑀔𑀻𑀡𑀫𑁂𑀥𑁄 𑀦𑀺𑀕𑀘𑁆𑀙𑀢𑀺.

𑀓𑀸𑀲𑀼 𑀪𑀸𑀲𑀼 𑀤𑀺𑀢𑁆𑀢𑀺𑀬𑀁. 𑀤𑀺𑀢𑁆𑀢𑀻𑀢𑀺 𑀧𑀸𑀓𑀝𑀢𑀸, 𑀯𑀺𑀭𑀸𑀚𑀦𑀢𑀸 𑀯𑀸. 𑀓𑀸𑀲𑀢𑀺, 𑀧𑀓𑀸𑀲𑀢𑀺. 𑀧𑀓𑀸𑀲𑀢𑀺 𑀢𑁂𑀚𑁄. 𑀤𑀽𑀭𑁂 𑀲𑀦𑁆𑀢𑁄 𑀧𑀓𑀸𑀲𑁂𑀦𑁆𑀢𑀺. 𑀪𑀸𑀲𑀢𑀺. 𑀧𑀪𑀸𑀲𑀢𑀺 𑀫𑀺𑀤𑀁 𑀩𑁆𑀬𑀫𑁆𑀳𑀁. 𑀧𑀓𑀸𑀲𑁄. 𑀓𑀸𑀲𑀼 𑀑𑀪𑀸𑀲𑁄.

𑀢𑀢𑁆𑀭 ¶ 𑀧𑀓𑀸𑀲𑀢𑀻𑀢𑀺 𑀧𑀓𑀸𑀲𑁄, 𑀧𑀸𑀓𑀝𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀼𑀘𑁆𑀙𑀪𑀸𑀯𑁂𑀦 𑀧𑀼𑀜𑁆𑀚𑀪𑀸𑀯𑁂𑀦 𑀯𑀸 𑀓𑀸𑀲𑀢𑀺 𑀧𑀓𑀸𑀲𑀢𑀺 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀓𑀸𑀲𑀼. ‘‘𑀓𑀸𑀲𑀼’’ 𑀇𑀢𑀺 𑀆𑀯𑀸𑀝𑁄𑀧𑀺 𑀯𑀼𑀘𑁆𑀘𑀢𑀺 𑀭𑀸𑀲𑀺𑀧𑀺.

‘‘𑀓𑀺𑀁𑀦𑀼 𑀲𑀦𑁆𑀢𑀭𑀫𑀸𑀦𑁄𑀯, 𑀓𑀸𑀲𑀼𑀁 𑀔𑀦𑀲𑀺 𑀲𑀸𑀭𑀣𑀺;

𑀧𑀼𑀝𑁆𑀞𑁄 𑀫𑁂 𑀲𑀫𑁆𑀫 𑀅𑀓𑁆𑀔𑀸𑀳𑀺, 𑀓𑀺𑀁𑀓𑀸𑀲𑀼𑀬𑀸 𑀓𑀭𑀺𑀲𑁆𑀲𑀲𑀻’’𑀢𑀺

𑀏𑀢𑁆𑀣 𑀳𑀺 𑀆𑀯𑀸𑀝𑁄 𑀓𑀸𑀲𑀼 𑀦𑀸𑀫. ‘‘𑀅𑀗𑁆𑀕𑀸𑀭𑀓𑀸𑀲𑀼𑀁 𑀅𑀧𑀭𑁂 𑀨𑀼𑀡𑀦𑁆𑀢𑀺, 𑀦𑀭𑀸 𑀭𑀼𑀤𑀦𑁆𑀢𑀸 𑀧𑀭𑀺𑀤𑀟𑁆𑀠𑀕𑀢𑁆𑀢𑀸’’𑀢𑀺 𑀏𑀢𑁆𑀣 𑀭𑀸𑀲𑀺. 𑀓𑀸𑀭𑀺𑀢𑁂 𑁋 𑀧𑀓𑀸𑀲𑁂𑀢𑀻𑀢𑀺 𑀧𑀓𑀸𑀲𑀓𑁄. 𑀑𑀪𑀸𑀲𑁂𑀢𑀻𑀢𑀺 𑀑𑀪𑀸𑀲𑀓𑁄. 𑀓𑀫𑁆𑀫𑁂 𑀧𑀓𑀸𑀲𑀺𑀬𑀢𑀻𑀢𑀺 𑀧𑀓𑀸𑀲𑀺𑀢𑁄. 𑀏𑀯𑀁 𑀪𑀸𑀲𑀺𑀢𑁄. 𑀪𑀸𑀯𑁂 𑁋 𑀓𑀸𑀲𑀦𑀸. 𑀲𑀗𑁆𑀓𑀸𑀲𑀦𑀸. 𑀧𑀓𑀸𑀲𑀦𑀸. 𑀢𑀼𑀫𑀦𑁆𑀢𑀸𑀤𑀺𑀢𑁆𑀢𑁂 ‘‘𑀧𑀓𑀸𑀲𑀺𑀢𑀼𑀁, 𑀧𑀓𑀸𑀲𑁂𑀢𑀼𑀁, 𑀑𑀪𑀸𑀲𑀺𑀢𑀼𑀁, 𑀑𑀪𑀸𑀲𑁂𑀢𑀼𑀁. 𑀧𑀓𑀸𑀲𑀺𑀢𑁆𑀯𑀸, 𑀧𑀓𑀸𑀲𑁂𑀢𑁆𑀯𑀸, 𑀑𑀪𑀸𑀲𑀺𑀢𑁆𑀯𑀸, 𑀑𑀪𑀸𑀲𑁂𑀢𑁆𑀯𑀸’’𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀢𑀤𑁆𑀥𑀺𑀢𑁂 𑀪𑀸𑀲𑀼 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀪𑀸𑀲𑀼𑀭𑁄, 𑀧𑀪𑀲𑁆𑀲𑀭𑁄 𑀬𑁄 𑀓𑁄𑀘𑀺. 𑀪𑀸𑀲𑀼𑀭𑁄𑀢𑀺 𑀯𑀸 𑀓𑁂𑀲𑀭𑀲𑀻𑀳𑁄. 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀪𑀸𑀲𑀼𑀲𑀤𑁆𑀤𑁄 ‘‘𑀭𑀸𑀚 𑀤𑀺𑀢𑁆𑀢𑀺𑀬’’𑀦𑁆𑀢𑀺 𑀏𑀢𑁆𑀣 𑀭𑀸𑀚𑀲𑀤𑁆𑀤𑁄 𑀯𑀺𑀬 𑀯𑀺𑀭𑀸𑀚𑀦𑀯𑀸𑀘𑀓𑁄 𑀲𑀺𑀬𑀸, 𑀢𑀲𑁆𑀫𑀸 𑀭𑀽𑀧𑀲𑀺𑀭𑀺𑀬𑀸 𑀯𑀺𑀭𑀸𑀚𑀦𑀲𑀫𑁆𑀧𑀦𑁆𑀦𑀢𑀸𑀬 𑀪𑀸𑀲𑀼 𑀯𑀺𑀭𑀸𑀚𑀦𑀢𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀪𑀸𑀲𑀼𑀭𑁄𑀢𑀺 𑀦𑀺𑀩𑁆𑀩𑀘𑀦𑀁 𑀜𑁂𑀬𑁆𑀬𑀁.

𑀦𑀸𑀲𑀼 𑀭𑀸𑀲𑀼 𑀲𑀤𑁆𑀤𑁂. 𑀦𑀸𑀲𑀢𑀺. 𑀭𑀸𑀲𑀢𑀺. 𑀦𑀸𑀲𑀸, 𑀦𑀸𑀲𑀺𑀓𑀸.

𑀢𑀢𑁆𑀭 𑀦𑀸𑀲𑀸𑀢𑀺 𑀳𑀢𑁆𑀣𑀺𑀲𑁄𑀡𑁆𑀟𑀸𑀧𑀺 𑀦𑀸𑀲𑀸𑀢𑀺 𑀯𑀼𑀘𑁆𑀘𑀢𑀺 ‘‘𑀲𑀘𑁂 𑀫𑀁 𑀦𑀸𑀕𑀦𑀸𑀲𑀽𑀭𑀽, 𑀑𑀮𑁄𑀓𑁂𑀬𑁆𑀬 𑀧𑀪𑀸𑀯𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀫𑀦𑀼𑀲𑁆𑀲𑀸𑀤𑀻𑀦𑀁 𑀦𑀸𑀲𑀺𑀓𑀸𑀧𑀺 𑀦𑀸𑀲𑀸𑀢𑀺 𑀯𑀼𑀘𑁆𑀘𑀢𑀺 ‘‘𑀬𑁄 𑀢𑁂 𑀳𑀢𑁆𑀣𑁂 𑀘 𑀧𑀸𑀤𑁂 𑀘, 𑀓𑀡𑁆𑀡𑀦𑀸𑀲𑀜𑁆𑀘 𑀙𑁂𑀤𑀬𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀦𑀸𑀲𑀦𑁆𑀢𑀺 𑀅𑀩𑁆𑀬𑀢𑁆𑀢𑀲𑀤𑁆𑀤𑀁 𑀓𑀭𑁄𑀦𑁆𑀢𑀺 𑀏𑀢𑀸𑀬𑀸𑀢𑀺 𑀦𑀸𑀲𑀸. 𑀦𑀸𑀲𑀸 𑀏𑀯 𑀦𑀸𑀲𑀺𑀓𑀸. 𑀬𑀢𑁆𑀣 𑀦𑀺𑀩𑁆𑀩𑀘𑀦𑀁 𑀦 𑀯𑀤𑀸𑀫, 𑀢𑀢𑁆𑀣 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀅𑀧𑁆𑀧𑀲𑀺𑀤𑁆𑀥𑀢𑁆𑀢𑀸 ¶ 𑀯𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀅𑀯𑀼𑀢𑁆𑀢𑀫𑁆𑀧𑀺 𑀧𑀬𑁄𑀕𑀯𑀺𑀘𑀓𑁆𑀔𑀡𑁂𑀳𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀅𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

𑀦𑀸𑀲𑀸 𑀲𑁄𑀡𑁆𑀟𑀸 𑀓𑀭𑁄 𑀳𑀢𑁆𑀣𑁄,

𑀳𑀢𑁆𑀣𑀺𑀤𑀩𑁆𑀩𑁂 𑀲𑀫𑀸 𑀫𑀢𑀸;

𑀦𑀸𑀲𑀸 𑀘 𑀦𑀸𑀲𑀺𑀓𑀸 𑀘 𑀤𑁆𑀯𑁂,

𑀦𑀭𑀸𑀤𑀻𑀲𑀼 𑀲𑀫𑀸 𑀫𑀢𑀸’’𑀢𑀺.

𑀦𑀲 𑀓𑁄𑀝𑀺𑀮𑁆𑀮𑁂. 𑀦𑀲𑀢𑀺.

𑀪𑀺𑀲𑀺 𑀪𑀬𑁂. 𑀪𑀺𑀁𑀲𑀢𑀺. 𑀪𑀺𑀁𑀲𑀦𑀓𑁄. 𑀢𑀤𑀸𑀲𑀺 𑀬𑀁 𑀪𑀺𑀁𑀲𑀦𑀓𑀁. 𑀪𑁂𑀲𑁆𑀫𑀸𑀓𑀸𑀬𑁄.

𑀆𑀲𑀺𑀲𑀺 𑀇𑀘𑁆𑀙𑀸𑀬𑀁. 𑀆𑀧𑀼𑀩𑁆𑀩𑁄 𑀲𑀺𑀲𑀺 𑀇𑀘𑁆𑀙𑀸𑀬𑀁 𑀯𑀢𑁆𑀢𑀢𑀺. 𑀆𑀲𑀺𑀲𑀢𑀺. 𑀆𑀲𑀺𑀲𑀢𑁂𑀯 𑀧𑀼𑀭𑀺𑀲𑁄. 𑀆𑀲𑀺𑀲𑀦𑀸. 𑀆𑀲𑀺𑀲𑀢𑁆𑀢𑀁. 𑀆𑀲𑀺𑀲𑀦𑁆𑀢𑁄, 𑀆𑀲𑀺𑀲𑀫𑀸𑀦𑁄, 𑀆𑀲𑀫𑀸𑀦𑁄. ‘‘𑀲𑀼𑀕𑁆𑀕𑀢𑀺𑀫𑀸𑀲𑀫𑀸𑀦𑀸’’𑀢𑀺 𑀧𑀸𑀴𑀺 𑀏𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀕𑀲𑀼 𑀅𑀤𑀦𑁂. 𑀕𑀲𑀢𑀺.

𑀖𑀼𑀲𑀻 𑀓𑀦𑁆𑀢𑀺𑀓𑀭𑀡𑁂. 𑀈𑀓𑀸𑀭𑀦𑁆𑀢𑁄𑀬𑀁, 𑀢𑁂𑀦 𑀇𑀢𑁄 𑀦 𑀦𑀺𑀕𑁆𑀕𑀳𑀻𑀢𑀸𑀕𑀫𑁄. 𑀖𑀼𑀲𑀢𑀺.

𑀧𑀁𑀲𑀼 𑀪𑀁𑀲𑀼 𑀅𑀯𑀲𑀁𑀲𑀦𑁂. 𑀧𑀁𑀲𑀢𑀺. 𑀪𑀁𑀲𑀢𑀺.

𑀥𑀁𑀲𑀼 𑀕𑀢𑀺𑀬𑀁. 𑀥𑀁𑀲𑀢𑀺. 𑀭𑀚𑁄 𑀦𑀼𑀤𑁆𑀥𑀁𑀲𑀢𑀺 𑀉𑀤𑁆𑀥𑀁.

𑀧𑀲 𑀯𑀺𑀢𑁆𑀣𑀸𑀭𑁂. 𑀧𑀲𑀢𑀺. 𑀧𑀲𑀼.

𑀓𑀼𑀲 𑀅𑀯𑁆𑀳𑀸𑀦𑁂 𑀭𑁄𑀤𑀦𑁂 𑀘. 𑀓𑁄𑀲𑀢𑀺, 𑀧𑀓𑁆𑀓𑁄𑀲𑀢𑀺. 𑀧𑀓𑁆𑀓𑁄𑀲𑀓𑁄, 𑀧𑀓𑁆𑀓𑁄𑀲𑀺𑀢𑁄, 𑀧𑀓𑁆𑀓𑁄𑀲𑀦𑀁.

𑀓𑀲𑁆𑀲 𑀕𑀢𑀺𑀬𑀁. 𑀓𑀲𑁆𑀲𑀢𑀺, 𑀧𑀭𑀺𑀓𑀲𑁆𑀲𑀢𑀺. 𑀧𑀝𑀺𑀓𑀲𑁆𑀲𑀢𑀺. 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬. 𑀧𑀝𑀺𑀓𑀲𑁆𑀲𑁂𑀬𑁆𑀬𑀸𑀢𑀺 𑀆𑀓𑀟𑁆𑀠𑁂𑀬𑁆𑀬, 𑀫𑀽𑀮𑀸𑀧𑀢𑁆𑀢𑀺𑀬𑀁𑀬𑁂𑀯 𑀧𑀢𑀺𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀅𑀲 ¶ 𑀤𑀺𑀢𑁆𑀬𑀸𑀤𑀸𑀦𑁂𑀲𑀼 𑀘. 𑀘𑀓𑀸𑀭𑁄 𑀕𑀢𑀺𑀧𑁂𑀓𑁆𑀔𑀓𑁄. 𑀅𑀲𑀢𑀺.

𑀤𑀺𑀲 𑀆𑀤𑀸𑀦𑀲𑀁𑀯𑀭𑀡𑁂𑀲𑀼. 𑀤𑀺𑀲𑁆𑀲𑀢𑀺 𑀧𑀼𑀭𑀺𑀲𑁄.

𑀤𑀸𑀲𑀼 𑀤𑀸𑀦𑁂. 𑀤𑀸𑀲𑀢𑀺.

𑀭𑁄𑀲 𑀪𑀬𑁂. 𑀭𑁄𑀲𑀢𑀺. 𑀭𑁄𑀲𑀓𑁄.

𑀪𑁂𑀲𑀼 𑀘𑀮𑀦𑁂. 𑀪𑁂𑀲𑀢𑀺.

𑀧𑀲 𑀩𑀸𑀥𑀦𑀨𑀲𑁆𑀲𑀦𑁂𑀲𑀼. 𑀧𑀲𑀢𑀺. 𑀧𑀸𑀲𑁄, 𑀦𑀸𑀕𑀧𑀸𑀲𑁄, 𑀳𑀢𑁆𑀣𑀧𑀸𑀲𑁄.

𑀮𑀲 𑀓𑀦𑁆𑀢𑀺𑀬𑀁. 𑀮𑀲𑀢𑀺, 𑀅𑀪𑀺𑀮𑀲𑀢𑀺, 𑀯𑀺𑀮𑀲𑀢𑀺. 𑀮𑀸𑀲𑁄, 𑀯𑀺𑀮𑀸𑀲𑁄, 𑀯𑀺𑀮𑀲𑀦𑀁.

𑀘𑀲 𑀪𑀓𑁆𑀔𑀡𑁂. 𑀘𑀲𑀢𑀺.

𑀓𑀲 𑀳𑀺𑀁𑀲𑀸𑀬𑀁. 𑀓𑀲𑀢𑀺.

𑀢𑀺𑀲 𑀢𑀺𑀢𑁆𑀢𑀺𑀬𑀁. 𑀢𑀺𑀢𑁆𑀢𑀺 𑀢𑀧𑁆𑀧𑀦𑀁 𑀧𑀭𑀺𑀧𑀼𑀡𑁆𑀡𑀢𑀸 𑀲𑀼𑀳𑀺𑀢𑀢𑀸. 𑀢𑀺𑀲𑀢𑀺. 𑀢𑀺𑀢𑁆𑀢𑀺.

𑀯𑀲 𑀦𑀺𑀯𑀸𑀲𑁂. 𑀯𑀲𑀢𑀺, 𑀯𑀲𑀺𑀬𑀢𑀺, 𑀯𑀘𑁆𑀙𑀢𑀺. 𑀯𑀢𑁆𑀣𑀼, 𑀯𑀢𑁆𑀣𑀁, 𑀧𑀭𑀺𑀯𑀸𑀲𑁄, 𑀦𑀺𑀯𑀸𑀲𑁄, 𑀆𑀯𑀸𑀲𑁄, 𑀉𑀧𑀯𑀸𑀲𑁄, 𑀉𑀧𑁄𑀲𑀣𑁄, 𑀯𑀺𑀧𑁆𑀧𑀯𑀸𑀲𑁄, 𑀘𑀺𑀭𑀧𑁆𑀧𑀯𑀸𑀲𑀻, 𑀘𑀺𑀭𑀧𑁆𑀧𑀯𑀼𑀢𑁆𑀣𑁄, 𑀯𑀲𑀺𑀢𑁆𑀯𑀸, 𑀯𑀢𑁆𑀢𑀼𑀁, 𑀯𑀲𑀺𑀢𑀼𑀁 𑀇𑀘𑁆𑀘𑀸𑀤𑀻𑀦𑀺.

𑀅𑀢𑁆𑀭 𑀉𑀧𑀯𑀸𑀲𑁄𑀢𑀺 𑀅𑀦𑁆𑀦𑁂𑀦 𑀯𑀚𑁆𑀚𑀺𑀢𑁄 𑀯𑀸𑀲𑁄 𑀉𑀧𑀯𑀸𑀲𑁄. 𑀉𑀧𑁄𑀲𑀣𑁄𑀢𑀺 𑀉𑀧𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀉𑀧𑁄𑀲𑀣𑁄, 𑀉𑀧𑀯𑀲𑀦𑁆𑀢𑀺 𑀲𑀻𑀮𑁂𑀦 𑀯𑀸 𑀅𑀦𑀲𑀦𑁂𑀦 𑀯𑀸 𑀉𑀧𑁂𑀢𑀸 𑀳𑀼𑀢𑁆𑀯𑀸 𑀯𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀼𑀤𑁆𑀥𑀸𑀭𑁄 𑁋 ‘‘𑀆𑀬𑀸𑀫𑀸𑀯𑀼𑀲𑁄 𑀓𑀧𑁆𑀧𑀺𑀦 𑀉𑀧𑁄𑀲𑀣𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺𑀆𑀤𑀻𑀲𑀼 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 ¶ 𑀉𑀧𑁄𑀲𑀣𑁄. ‘‘𑀏𑀯𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀔𑁄 𑀯𑀺𑀲𑀸𑀔𑁂 𑀉𑀧𑁄𑀲𑀣𑁄 𑀉𑀧𑀯𑀼𑀢𑁆𑀣𑁄’’𑀢𑀺𑀆𑀤𑀻𑀲𑀼 𑀲𑀻𑀮𑀁. ‘‘𑀲𑀼𑀤𑁆𑀥𑀲𑁆𑀲 𑀯𑁂 𑀲𑀤𑀸 𑀨𑀕𑁆𑀕𑀼, 𑀲𑀼𑀤𑁆𑀥𑀲𑁆𑀲𑀼𑀧𑁄𑀲𑀣𑁄 𑀲𑀤𑀸’’𑀢𑀺𑀆𑀤𑀻𑀲𑀼 𑀉𑀧𑀯𑀸𑀲𑁄. ‘‘𑀉𑀧𑁄𑀲𑀣𑁄 𑀦𑀸𑀫 𑀦𑀸𑀕𑀭𑀸𑀚𑀸’’𑀢𑀺𑀆𑀤𑀻𑀲𑀼 𑀧𑀜𑁆𑀜𑀢𑁆𑀢𑀺. ‘‘𑀦 𑀪𑀺𑀓𑁆𑀔𑀯𑁂 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸’’𑀢𑀺𑀆𑀤𑀻𑀲𑀼 𑀉𑀧𑀯𑀲𑀺𑀢𑀩𑁆𑀩𑀤𑀺𑀯𑀲𑁄𑀢𑀺.

𑀯𑀲 𑀓𑀦𑁆𑀢𑀺𑀬𑀁. 𑀯𑀘𑁆𑀙𑀢𑀺. 𑀚𑀺𑀦𑀯𑀘𑁆𑀙𑀬𑁄.

𑀲𑀲 𑀲𑀼𑀲𑀦𑁂. 𑀲𑀲𑀢𑀺. 𑀲𑀲𑁄.

𑀲𑀲 𑀧𑀸𑀡𑀦𑁂. 𑀲𑀲𑀢𑀺. 𑀲𑀢𑁄𑀯 𑀅𑀲𑁆𑀲𑀲𑀢𑀺, 𑀲𑀢𑁄𑀯 𑀧𑀲𑁆𑀲𑀲𑀢𑀺. 𑀲𑀲𑁄, 𑀲𑀲𑀦𑀁. 𑀅𑀲𑁆𑀲𑀸𑀲𑁄 𑀧𑀲𑁆𑀲𑀸𑀲𑁄 𑀅𑀲𑁆𑀲𑀲𑀦𑁆𑀢𑁄 𑀧𑀲𑁆𑀲𑀲𑀦𑁆𑀢𑁄.

𑀅𑀲 𑀪𑀼𑀯𑀺. 𑀅𑀢𑁆𑀣𑀺. 𑀅𑀲.

𑀏𑀢𑁆𑀣 𑀅𑀢𑁆𑀣𑀻𑀢𑀺 𑀆𑀔𑁆𑀬𑀸𑀢𑀧𑀤𑀁. 𑀦 𑀅𑀢𑁆𑀣𑀺 𑀔𑀻𑀭𑀸 𑀩𑁆𑀭𑀸𑀳𑁆𑀫𑀡𑀻. 𑀅𑀢𑁆𑀣𑀺𑀢𑀸, 𑀅𑀢𑁆𑀣𑀺𑀪𑀸𑀯𑁄, ‘‘𑀬𑀁 𑀓𑀺𑀜𑁆𑀘𑀺 𑀭𑀢𑀦𑀁 𑀅𑀢𑁆𑀣𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀦𑀺𑀧𑀸𑀢𑀧𑀤𑀁. 𑀢𑀲𑁆𑀫𑀸 𑀅𑀢𑁆𑀣𑀻𑀢𑀺 𑀧𑀤𑀁 𑀆𑀔𑁆𑀬𑀸𑀢𑀦𑀺𑀧𑀸𑀢𑀯𑀲𑁂𑀦 𑀤𑀼𑀯𑀺𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀲𑀇𑀢𑀺 𑀅𑀯𑀺𑀪𑀢𑁆𑀢𑀺𑀓𑀁 𑀦𑀸𑀫𑀺𑀓𑀧𑀤𑀁. 𑀏𑀢𑁆𑀣 𑀘 ‘‘𑀅𑀲𑀲𑁆𑀫𑀻𑀢𑀺 𑀳𑁄𑀢𑀻’’𑀢𑀺 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. 𑀢𑀢𑁆𑀣 𑀅𑀢𑁆𑀣𑀻𑀢𑀺 𑀅𑀲, 𑀦𑀺𑀘𑁆𑀘𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀫𑀺𑀦𑀸 𑀲𑀲𑁆𑀲𑀢𑀤𑀺𑀝𑁆𑀞𑀺 𑀯𑀼𑀢𑁆𑀢𑀸.

𑀢𑀢𑁆𑀭𑀸𑀬𑀁 𑀧𑀤𑀫𑀸𑀮𑀸 𑁋 ‘‘𑀅𑀢𑁆𑀣𑀺, 𑀲𑀦𑁆𑀢𑀺. 𑀅𑀲𑀺, 𑀅𑀢𑁆𑀣. 𑀅𑀲𑁆𑀫𑀺, 𑀅𑀲𑁆𑀫, 𑀅𑀫𑁆𑀳𑀺, 𑀅𑀫𑁆𑀳’’ 𑀇𑀘𑁆𑀘𑁂𑀢𑀸𑀦𑀺 𑀧𑀲𑀺𑀤𑁆𑀥𑀸𑀦𑀺. ‘‘𑀅𑀢𑁆𑀣𑀼, 𑀲𑀦𑁆𑀢𑀼. 𑀆𑀳𑀺, 𑀅𑀢𑁆𑀣. 𑀅𑀲𑁆𑀫𑀺, 𑀅𑀲𑁆𑀫 𑀅𑀫𑁆𑀳𑀺, 𑀅𑀫𑁆𑀳’’ 𑀇𑀘𑁆𑀘𑁂𑀢𑀸𑀦𑀺 𑀘, ‘‘𑀲𑀺𑀬𑀸, 𑀅𑀲𑁆𑀲, 𑀲𑀺𑀬𑀼𑀁, 𑀅𑀲𑁆𑀲𑀼, 𑀲𑀺𑀬𑀁𑀲𑀼. 𑀅𑀲𑁆𑀲, 𑀅𑀲𑁆𑀲𑀣. 𑀲𑀺𑀬𑀁, 𑀅𑀲𑁆𑀲, 𑀅𑀲𑁆𑀲𑀸𑀫’’ 𑀇𑀘𑁆𑀘𑁂𑀢𑀸𑀦𑀺 𑀘 𑀧𑀲𑀺𑀤𑁆𑀥𑀸𑀦𑀺.

𑀏𑀢𑁆𑀣 𑀧𑀦 ‘‘𑀢𑁂𑀲𑀜𑁆𑀘 𑀔𑁄 𑀪𑀺𑀓𑁆𑀔𑀯𑁂 𑀲𑀫𑀕𑁆𑀕𑀸𑀦𑀁 𑀲𑀫𑁆𑀫𑁄𑀤𑀫𑀸𑀦𑀸𑀦𑀁…𑀧𑁂… 𑀲𑀺𑀬𑀁𑀲𑀼 𑀤𑁆𑀯𑁂 𑀪𑀺𑀓𑁆𑀔𑀽 𑀅𑀪𑀺𑀥𑀫𑁆𑀫𑁂 𑀦𑀸𑀦𑀸𑀯𑀸𑀤𑀸’’𑀢𑀺 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁 ¶ . 𑀢𑀢𑁆𑀣 𑀲𑀺𑀬𑀁𑀲𑀽𑀢𑀺 𑀪𑀯𑁂𑀬𑁆𑀬𑀼𑀁. 𑀅𑀪𑀺𑀥𑀫𑁆𑀫𑁂𑀢𑀺 𑀯𑀺𑀲𑀺𑀝𑁆𑀞𑁂 𑀥𑀫𑁆𑀫𑁂.

𑀇𑀤𑀸𑀦𑀺 𑀲𑀺𑀬𑀸𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄 𑀧𑀪𑁂𑀤𑁄 𑀘 𑀯𑀼𑀘𑁆𑀘𑀢𑁂. 𑀲𑀺𑀬𑀸𑀢𑀺 𑀏𑀓𑀁𑀲𑁂 𑀘 𑀯𑀺𑀓𑀧𑁆𑀧𑀦𑁂 𑀘 ‘‘𑀧𑀣𑀯𑀻𑀥𑀸𑀢𑀼 𑀲𑀺𑀬𑀸 𑀅𑀚𑁆𑀛𑀢𑁆𑀢𑀺𑀓𑀸, 𑀲𑀺𑀬𑀸 𑀩𑀸𑀳𑀺𑀭𑀸’’𑀢𑀺 𑀏𑀓𑀁𑀲𑁂. ‘‘𑀲𑀺𑀬𑀸 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀧𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑁄’’𑀢𑀺 𑀯𑀺𑀓𑀧𑁆𑀧𑀦𑁂.

𑀲𑀺𑀬𑀸𑀢𑀺 𑀏𑀓𑀫𑀸𑀭𑀔𑁆𑀬𑀸𑀢𑀧𑀤𑀁, 𑀏𑀓𑀫𑀩𑁆𑀬𑀬𑀧𑀤𑀁. 𑀆𑀔𑁆𑀬𑀸𑀢𑀢𑁆𑀢𑁂 𑀏𑀓𑀯𑀘𑀦𑀦𑁆𑀢𑀁, 𑀅𑀩𑁆𑀬𑀬𑀢𑁆𑀢𑁂 𑀬𑀣𑀸𑀧𑀸𑀯𑀘𑀦𑀁. ‘‘𑀧𑀼𑀢𑁆𑀢𑀸 𑀫𑀢𑁆𑀣𑀺 𑀥𑀦𑀸 𑀫𑀢𑁆𑀣𑀻’’𑀢𑀺 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀅𑀩𑁆𑀬𑀬𑀧𑀤𑀫𑀺𑀯 𑀏𑀓𑀯𑀘𑀦𑀦𑁆𑀢𑀫𑁆𑀧𑀺 𑀩𑀳𑀼𑀯𑀘𑀦𑀦𑁆𑀢𑀫𑁆𑀧𑀺 𑀪𑀯𑀢𑀺. 𑀢𑀲𑁆𑀲𑀸𑀔𑁆𑀬𑀸𑀢𑀢𑁆𑀢𑁂 𑀧𑀬𑁄𑀕𑁄𑀯𑀺𑀤𑀺𑀢𑁄𑀯. 𑀅𑀩𑁆𑀬𑀬𑀢𑁆𑀢𑁂 𑀧𑀦 ‘‘𑀲𑀼𑀔𑀁 𑀦 𑀲𑀼𑀔𑀲𑀳𑀕𑀢𑀁, 𑀲𑀺𑀬𑀸 𑀧𑀻𑀢𑀺𑀲𑀳𑀕𑀢’’𑀦𑁆𑀢𑀺 ‘‘𑀇𑀫𑁂 𑀥𑀫𑁆𑀫𑀸 𑀲𑀺𑀬𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸’’𑀢𑀺 𑀘 𑀏𑀓𑀯𑀘𑀦𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣 𑀥𑀸𑀢𑀼𑀬𑀸 𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀧𑀭𑁄𑀓𑁆𑀔𑀸𑀬𑀁 ‘‘𑀇𑀢𑀺𑀳 𑀅𑀲 𑀇𑀢𑀺𑀳 𑀅𑀲𑀸’’𑀢𑀺 𑀤𑀲𑁆𑀲𑀦𑀢𑁄 𑀅𑀲 𑀇𑀢𑀺 𑀧𑀤𑀁 𑀕𑀳𑁂𑀢𑀩𑁆𑀩𑀁. 𑀳𑀺𑀬𑁆𑀬𑀢𑁆𑀢𑀦𑀻𑀭𑀽𑀧𑀸𑀦𑀺 𑀅𑀧𑁆𑀧𑀲𑀺𑀤𑁆𑀥𑀸𑀦𑀺. 𑀅𑀚𑁆𑀚𑀢𑀦𑀺𑀬𑀸 𑀧𑀦 ‘‘𑀆𑀲𑀺, 𑀆𑀲𑀺𑀁𑀲𑀼, 𑀆𑀲𑀼𑀁. 𑀆𑀲𑀺, 𑀆𑀲𑀺𑀢𑁆𑀣. 𑀆𑀲𑀺𑀁, 𑀆𑀲𑀺𑀫𑁆𑀳𑀸’’ 𑀇𑀘𑁆𑀘𑁂𑀢𑀸𑀦𑀺 𑀧𑀲𑀺𑀤𑁆𑀥𑀸𑀦𑀺. 𑀪𑀯𑀺𑀲𑁆𑀲𑀦𑁆𑀢𑀺𑀬𑀸 ‘‘𑀪𑀯𑀺𑀲𑁆𑀲𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺’’ 𑀇𑀘𑁆𑀘𑀸𑀤𑀻𑀦𑀺. 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀸 ‘‘𑀅𑀪𑀯𑀺𑀲𑁆𑀲𑀸, 𑀅𑀪𑀯𑀺𑀲𑁆𑀲𑀁𑀲𑀼’’ 𑀇𑀘𑁆𑀘𑀸𑀤𑀻𑀦𑀺 𑀪𑀯𑀦𑁆𑀢𑀺.

𑀲𑀸𑀲 𑀅𑀦𑀼𑀲𑀺𑀝𑁆𑀞𑀺𑀬𑀁. 𑀲𑀸𑀲𑀢𑀺, 𑀅𑀦𑀼𑀲𑀸𑀲𑀢𑀺. 𑀓𑀫𑁆𑀫𑀦𑁆𑀢𑀁 𑀯𑁄 𑀲𑀸𑀲𑀢𑀺, 𑀲𑀸𑀲𑀦𑀁, 𑀅𑀦𑀼𑀲𑀸𑀲𑀦𑀁, 𑀅𑀦𑀼𑀲𑀸𑀲𑀦𑀻, 𑀅𑀦𑀼𑀲𑀺𑀝𑁆𑀞𑀺, 𑀲𑀢𑁆𑀣𑀸, 𑀲𑀢𑁆𑀣𑀁, 𑀅𑀦𑀼𑀲𑀸𑀲𑀓𑁄, 𑀅𑀦𑀼𑀲𑀸𑀲𑀺𑀓𑀸.

𑀢𑀢𑁆𑀭 𑀲𑀸𑀲𑀦𑀦𑁆𑀢𑀺 𑀅𑀥𑀺𑀲𑀻𑀮𑀸𑀤𑀺𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀲𑀸𑀲𑀦𑀁, 𑀧𑀭𑀺𑀬𑀢𑁆𑀢𑀺𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀲𑀗𑁆𑀔𑀸𑀢𑀁 𑀯𑀸 𑀲𑀸𑀲𑀦𑀁. 𑀢𑀜𑁆𑀳𑀺 𑀲𑀸𑀲𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸𑀢𑀺 ‘‘𑀲𑀸𑀲𑀦’’𑀦𑁆𑀢𑀺 𑀧𑀯𑀼𑀘𑁆𑀘𑀢𑀺. 𑀅𑀧𑀺𑀘 𑀲𑀸𑀲𑀦𑀦𑁆𑀢𑀺 ‘‘𑀭𑀜𑁆𑀜𑁄 ¶ 𑀲𑀸𑀲𑀦𑀁 𑀧𑁂𑀲𑁂𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀧𑀸𑀧𑁂𑀢𑀩𑁆𑀩𑀯𑀘𑀦𑀁. 𑀢𑀣𑀸 𑀲𑀸𑀲𑀦𑀦𑁆𑀢𑀺 𑀑𑀯𑀸𑀤𑁄, 𑀬𑁄 ‘‘𑀅𑀦𑀼𑀲𑀸𑀲𑀦𑀻’’𑀢𑀺 𑀘, ‘‘𑀅𑀦𑀼𑀲𑀺𑀝𑁆𑀞𑀻’’𑀢𑀺 𑀘 𑀯𑀼𑀘𑁆𑀘𑀢𑀺. 𑀲𑀢𑁆𑀣𑀸𑀢𑀺 𑀢𑀺𑀯𑀺𑀥𑀬𑀸𑀦𑀫𑀼𑀔𑁂𑀦 𑀲𑀤𑁂𑀯𑀓𑀁 𑀮𑁄𑀓𑀁 𑀲𑀸𑀲𑀢𑀻𑀢𑀺 𑀲𑀢𑁆𑀣𑀸, 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀬𑀣𑀸𑀭𑀳𑀁 𑀲𑀢𑁆𑀢𑁂 𑀅𑀦𑀼𑀲𑀸𑀲𑀢𑀻𑀢𑀺 𑀅𑀢𑁆𑀣𑁄. 𑀲𑀢𑁆𑀣𑀦𑁆𑀢𑀺 𑀲𑀤𑁆𑀤𑁂 𑀘 𑀅𑀢𑁆𑀣𑁂 𑀘 𑀲𑀸𑀲𑀢𑀺 𑀆𑀘𑀺𑀓𑁆𑀔𑀢𑀺 𑀏𑀢𑁂𑀦𑀸𑀢𑀺 𑀲𑀢𑁆𑀣𑀁. 𑀓𑀺𑀁𑀢𑀁? 𑀩𑁆𑀬𑀸𑀓𑀭𑀡𑀁.

𑀈𑀲 𑀇𑀲𑁆𑀲𑀭𑀺𑀬𑁂. 𑀇𑀲𑁆𑀲𑀭𑀺𑀬𑀁 𑀇𑀲𑁆𑀲𑀭𑀪𑀸𑀯𑁄. 𑀈𑀲𑀢𑀺. 𑀯𑀗𑁆𑀕𑀻𑀲𑁄, 𑀚𑀦𑀧𑀤𑁂𑀲𑁄, 𑀫𑀦𑀼𑀚𑁂𑀲𑁄.

𑀢𑀢𑁆𑀭 𑀯𑀗𑁆𑀕𑀻𑀲𑁄𑀢𑀺 𑀯𑀸𑀘𑀸𑀬 𑀈𑀲𑁄 𑀇𑀲𑁆𑀲𑀭𑁄𑀢𑀺 𑀯𑀗𑁆𑀕𑀻𑀲𑁄. 𑀓𑁄 𑀲𑁄? 𑀆𑀬𑀲𑁆𑀫𑀸 𑀯𑀗𑁆𑀕𑀻𑀲𑁄 𑀅𑀭𑀳𑀸. 𑀆𑀳 𑀘 𑀲𑀬𑀫𑁂𑀯 𑁋

‘‘𑀯𑀗𑁆𑀕𑁂 𑀚𑀸𑀢𑁄𑀢𑀺 𑀯𑀗𑁆𑀕𑀻𑀲𑁄, 𑀯𑀘𑀦𑁂 𑀇𑀲𑁆𑀲𑀭𑁄𑀢𑀺 𑀘;

‘𑀯𑀗𑁆𑀕𑀻𑀲𑁄’ 𑀇𑀢𑀺 𑀫𑁂 𑀦𑀸𑀫𑀁, 𑀅𑀪𑀯𑀻 𑀮𑁄𑀓𑀲𑀫𑁆𑀫𑀢’’𑀦𑁆𑀢𑀺;

𑀆𑀲 𑀉𑀧𑀯𑁂𑀲𑀦𑁂. 𑀉𑀧𑀯𑁂𑀲𑀦𑀁 𑀦𑀺𑀲𑀻𑀤𑀦𑀁 ‘‘𑀆𑀲𑀦𑁂 𑀉𑀧𑀯𑀺𑀝𑁆𑀞𑁄 𑀲𑀗𑁆𑀖𑁄’’𑀢𑀺 𑀏𑀢𑁆𑀣 𑀯𑀺𑀬. 𑀆𑀲𑀢𑀺. 𑀅𑀘𑁆𑀙𑀢𑀺. 𑀆𑀲𑀻𑀦𑁄. 𑀆𑀲𑀦𑀁. 𑀉𑀧𑀸𑀲𑀢𑀺. 𑀉𑀧𑀸𑀲𑀓𑁄.

𑀢𑀢𑁆𑀣 𑀆𑀲𑀦𑀦𑁆𑀢𑀺 𑀆𑀲𑀢𑀺 𑀦𑀺𑀲𑀻𑀤𑀢𑀺 𑀏𑀢𑁆𑀣𑀸𑀢𑀺 𑀆𑀲𑀦𑀁, 𑀬𑀁 𑀓𑀺𑀜𑁆𑀘𑀺 𑀦𑀺𑀲𑀻𑀤𑀦𑀬𑁄𑀕𑁆𑀕𑀁 𑀫𑀜𑁆𑀘𑀧𑀻𑀞𑀸𑀤𑀺.

𑀓𑀲𑀻 𑀕𑀢𑀺𑀲𑁄𑀲𑀦𑁂𑀲𑀼. 𑀈𑀓𑀸𑀭𑀦𑁆𑀢𑁄𑀬𑀁 𑀥𑀸𑀢𑀼, 𑀢𑁂𑀦𑀺𑀢𑁄 𑀦 𑀦𑀺𑀕𑁆𑀕𑀳𑀻𑀢𑀸𑀕𑀫𑁄. 𑀓𑀲𑀢𑀺.

𑀦𑀺𑀲𑀻 𑀘𑀼𑀫𑁆𑀩𑀦𑁂. 𑀦𑀺𑀲𑀢𑀺.

𑀤𑀺𑀲𑀻 𑀅𑀧𑁆𑀧𑀻𑀢𑀺𑀬𑀁. 𑀥𑀫𑁆𑀫𑀁 𑀤𑁂𑀲𑁆𑀲𑀢𑀺. 𑀤𑀺𑀲𑁄. 𑀤𑀺𑀝𑁆𑀞𑁄. 𑀤𑁂𑀲𑁆𑀲𑀻. 𑀤𑁂𑀲𑁆𑀲𑁄. 𑀤𑁂𑀲𑁆𑀲𑀺𑀬𑁄.

𑀢𑀢𑁆𑀭 𑀤𑀺𑀲𑁄𑀢𑀺 𑀘 𑀤𑀺𑀝𑁆𑀞𑁄𑀢𑀺 𑀘 𑀧𑀘𑁆𑀘𑀸𑀫𑀺𑀢𑁆𑀢𑀲𑁆𑀲𑀸𑀥𑀺𑀯𑀘𑀦𑀫𑁂𑀢𑀁. 𑀲𑁄 𑀳𑀺 𑀧𑀭𑁂 𑀤𑁂𑀲𑁆𑀲𑀢𑀺 𑀦𑀧𑁆𑀧𑀺𑀬𑀸𑀬𑀢𑀺, 𑀧𑀭𑁂𑀳𑀺 𑀯𑀸 𑀤𑁂𑀲𑁆𑀲𑀺𑀬𑀢𑀺 𑀧𑀺𑀬𑁄 ¶ 𑀦 𑀓𑀭𑀺𑀬𑀢𑀻𑀢𑀺 ‘‘𑀤𑀺𑀲𑁄’’𑀢𑀺 𑀘 ‘‘𑀤𑀺𑀝𑁆𑀞𑁄’’𑀢𑀺 𑀘 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀤𑀺𑀲𑁄𑀢𑀺 𑀘𑁄𑀭𑁄 𑀯𑀸𑀧𑀘𑁆𑀘𑀸𑀫𑀺𑀢𑁆𑀢𑁄 𑀯𑀸. 𑀤𑀺𑀝𑁆𑀞𑁄𑀢𑀺 𑀧𑀘𑁆𑀘𑀸𑀫𑀺𑀢𑁆𑀢𑁄𑀬𑁂𑀯. 𑀅𑀢𑁆𑀭𑀺𑀫𑁂 𑀧𑀬𑁄𑀕𑀸 𑁋

‘‘𑀤𑀺𑀲𑁄 𑀤𑀺𑀲𑀁 𑀬𑀁 𑀢𑀁 𑀓𑀬𑀺𑀭𑀸, 𑀯𑁂𑀭𑀻 𑀯𑀸 𑀧𑀦 𑀯𑁂𑀭𑀺𑀦𑀁;

𑀫𑀺𑀘𑁆𑀙𑀸𑀧𑀡𑀺𑀳𑀺𑀢𑀁 𑀘𑀺𑀢𑁆𑀢𑀁, 𑀧𑀸𑀧𑀺𑀬𑁄 𑀦𑀁 𑀢𑀢𑁄 𑀓𑀭𑁂’’𑀢𑀺 𑀘.

‘‘𑀤𑀺𑀲𑀸 𑀳𑀺 𑀫𑁂 𑀥𑀫𑁆𑀫𑀓𑀣𑀁 𑀲𑀼𑀡𑀦𑁆𑀢𑀽’’𑀢𑀺 𑀘, ‘‘𑀤𑀺𑀲𑀸 𑀳𑀺 𑀫𑁂 𑀢𑁂 𑀫𑀦𑀼𑀲𑁆𑀲𑁂 𑀪𑀚𑀦𑁆𑀢𑀼 𑀬𑁂 𑀥𑀫𑁆𑀫𑀫𑁂𑀯𑀸𑀤𑀧𑀬𑀦𑁆𑀢𑀺 𑀲𑀦𑁆𑀢𑁄’’𑀢𑀺 𑀘,

‘‘𑀬𑀲𑁆𑀲𑁂𑀢𑁂 𑀘𑀢𑀼𑀭𑁄 𑀥𑀫𑁆𑀫𑀸, 𑀯𑀸𑀦𑀭𑀺𑀦𑁆𑀤 𑀬𑀣𑀸 𑀢𑀯;

𑀲𑀘𑁆𑀘𑀁 𑀥𑀫𑁆𑀫𑁄 𑀥𑀺𑀢𑀺 𑀘𑀸𑀕𑁄, 𑀤𑀺𑀝𑁆𑀞𑀁 𑀲𑁄 𑀅𑀢𑀺𑀯𑀢𑁆𑀢𑀢𑀻’’𑀢𑀺 𑀘.

𑀤𑁂𑀲𑁆𑀲𑀻𑀢𑀺 𑀤𑁂𑀲𑁆𑀲𑀦𑀲𑀻𑀮𑁄 𑀅𑀧𑁆𑀧𑀺𑀬𑀸𑀬𑀦𑀲𑀻𑀮𑁄𑀢𑀺 𑀤𑁂𑀲𑁆𑀲𑀻. ‘‘𑀥𑀫𑁆𑀫𑀓𑀸𑀫𑁄 𑀪𑀯𑀁 𑀳𑁄𑀢𑀺, 𑀥𑀫𑁆𑀫𑀤𑁂𑀲𑁆𑀲𑀻 𑀧𑀭𑀸𑀪𑀯𑁄’’𑀢𑀺 𑀇𑀤𑀫𑁂𑀢𑁆𑀣 𑀧𑀬𑁄𑀕𑀦𑀺𑀤𑀲𑁆𑀲𑀦𑀁. 𑀤𑁂𑀲𑁆𑀲𑁄𑀢𑀺 𑀅𑀧𑁆𑀧𑀺𑀬𑁄, 𑀢𑀣𑀸 𑀤𑁂𑀲𑁆𑀲𑀺𑀬𑁄𑀢𑀺. 𑀏𑀢𑁆𑀣 𑀘 𑁋

‘‘𑀦 𑀫𑁂 𑀤𑁂𑀲𑁆𑀲𑀸 𑀉𑀪𑁄 𑀧𑀼𑀢𑁆𑀢𑀸, 𑀫𑀤𑁆𑀤𑀻𑀤𑁂𑀯𑀻 𑀦 𑀤𑁂𑀲𑁆𑀲𑀺𑀬𑀸;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀺𑀬𑀁 𑀫𑀬𑁆𑀳𑀁, 𑀢𑀲𑁆𑀫𑀸 𑀧𑀺𑀬𑁂 𑀅𑀤𑀸𑀲𑀳’’𑀦𑁆𑀢𑀺 𑀘,

‘‘𑀦 𑀫𑁂 𑀲𑀸 𑀩𑁆𑀭𑀸𑀳𑁆𑀫𑀡𑀻 𑀤𑁂𑀲𑁆𑀲𑀸, 𑀦𑀧𑀺 𑀫𑁂 𑀩𑀮𑀁 𑀦 𑀯𑀺𑀚𑁆𑀚𑀢𑀻’’𑀢𑀺 𑀘,

‘‘𑀫𑀸𑀢𑀸 𑀧𑀺𑀢𑀸 𑀦 𑀫𑁂 𑀤𑁂𑀲𑁆𑀲𑀸, 𑀦𑀧𑀺 𑀤𑁂𑀲𑁆𑀲𑀁 𑀫𑀳𑀸𑀬𑀲𑀁;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀺𑀬𑀁 𑀫𑀬𑁆𑀳𑀁, 𑀢𑀲𑁆𑀫𑀸 𑀯𑀢𑀫𑀥𑀺𑀝𑁆𑀞𑀳𑀺’’𑀦𑁆𑀢𑀺 𑀘

𑀧𑀬𑁄𑀕𑀸. 𑀲𑀩𑁆𑀩𑀢𑁆𑀣 𑀫𑁂𑀢𑀺 𑀘 𑀫𑀬𑁆𑀳𑀦𑁆𑀢𑀺 𑀘 𑀲𑀸𑀫𑀺𑀯𑀘𑀦𑀁 𑀤𑀝𑁆𑀞𑀩𑁆𑀩𑀁.

𑀇𑀫𑀸𑀦𑀺 𑀧𑀦 𑀧𑀘𑁆𑀘𑀸𑀫𑀺𑀢𑁆𑀢𑀲𑁆𑀲 𑀦𑀸𑀫𑀸𑀦𑀺 𑁋

‘‘𑀧𑀘𑁆𑀘𑀫𑀺𑀢𑁆𑀢𑁄 𑀭𑀺𑀧𑀼 𑀤𑀺𑀝𑁆𑀞𑁄, 𑀤𑀺𑀲𑁄 𑀯𑁂𑀭𑀻 𑀘 𑀲𑀢𑁆𑀯’𑀭𑀺;

𑀅𑀫𑀺𑀢𑁆𑀢𑁄 𑀘 𑀲𑀧𑀢𑁆𑀢𑁄 𑀘, 𑀏𑀯𑀁 𑀧𑀡𑁆𑀡𑀢𑁆𑀢𑀺𑀓𑀸𑀭𑀺𑀲𑀽’’𑀢𑀺.

𑀏𑀲𑀼 𑀕𑀢𑀺𑀬𑀁. 𑀏𑀲𑀢𑀺.

𑀪𑀲𑁆𑀲 ¶ 𑀪𑀲𑁆𑀲𑀦𑀤𑀺𑀢𑁆𑀢𑀻𑀲𑀼. 𑀪𑀲𑁆𑀲𑀦𑀁 𑀯𑀘𑀦𑀁. 𑀤𑀺𑀢𑁆𑀢𑀺 𑀲𑁄𑀪𑀸. 𑀪𑀲𑁆𑀲𑀢𑀺. 𑀪𑀲𑁆𑀲𑀁, 𑀧𑀪𑀲𑁆𑀲𑀭𑀁.

𑀥𑀺𑀲 𑀲𑀤𑁆𑀤𑁂. 𑀥𑀺𑀲𑀢𑀺.

𑀤𑀺𑀲 𑀅𑀢𑀺𑀲𑀚𑁆𑀚𑀦𑁂. 𑀤𑀺𑀲𑀢𑀺, 𑀉𑀧𑀤𑀺𑀲𑀢𑀺, 𑀲𑀦𑁆𑀤𑀺𑀲𑀢𑀺, 𑀦𑀺𑀤𑁆𑀤𑀺𑀲𑀢𑀺, 𑀧𑀘𑁆𑀘𑀸𑀤𑀺𑀲𑀢𑀺, 𑀧𑀝𑀺𑀲𑀦𑁆𑀤𑀺𑀲𑀢𑀺, 𑀉𑀤𑁆𑀤𑀺𑀲𑀢𑀺. 𑀤𑁂𑀲𑁄, 𑀉𑀤𑁆𑀤𑁂𑀲𑁄 𑀇𑀘𑁆𑀘𑀸𑀤𑀻𑀦𑀺.

𑀧𑀺𑀲𑀼 𑀅𑀯𑀬𑀯𑁂. 𑀧𑀺𑀲𑀢𑀺.

𑀇𑀲𑀺 𑀕𑀢𑀺𑀬𑀁. 𑀇𑀲𑀢𑀺.

𑀨𑀼𑀲 𑀲𑀫𑁆𑀨𑀲𑁆𑀲𑁂. 𑀨𑀼𑀲𑀢𑀺. 𑀨𑀲𑁆𑀲𑁄, 𑀨𑀼𑀲𑀦𑀸, 𑀲𑀫𑁆𑀨𑀼𑀲𑀦𑀸, 𑀲𑀫𑁆𑀨𑀼𑀲𑀺𑀢𑀢𑁆𑀢𑀁. 𑀏𑀯𑀭𑀽𑀧𑁄 𑀓𑀸𑀬𑀲𑀫𑁆𑀨𑀲𑁆𑀲𑁄 𑀅𑀳𑁄𑀲𑀺. 𑀨𑁄𑀝𑁆𑀞𑀩𑁆𑀩𑀁, 𑀨𑀼𑀲𑀺𑀢𑀁. 𑀤𑁂𑀯𑁄 𑀘 𑀏𑀓𑀫𑁂𑀓𑀁 𑀨𑀼𑀲𑀸𑀬𑀢𑀺. 𑀨𑀼𑀝𑁆𑀞𑀼𑀁, 𑀨𑀼𑀲𑀺𑀢𑀼𑀁, 𑀨𑀼𑀲𑀺𑀢𑁆𑀯𑀸, 𑀨𑀼𑀲𑀺𑀢𑁆𑀯𑀸𑀦, 𑀨𑀼𑀲𑀺𑀬, 𑀨𑀼𑀲𑀺𑀬𑀸𑀦. 𑀨𑀼𑀲𑁆𑀲 𑀨𑀼𑀲𑁆𑀲 𑀩𑁆𑀬𑀦𑁆𑀢𑀺𑀁 𑀓𑀭𑁄𑀢𑀺.

𑀢𑀢𑁆𑀭 𑀨𑀲𑁆𑀲𑁄𑀢𑀺 𑀆𑀭𑀫𑁆𑀫𑀡𑀁 𑀨𑀼𑀲𑀦𑁆𑀢𑀺 𑀏𑀢𑁂𑀦, 𑀲𑀬𑀁 𑀯𑀸 𑀨𑀼𑀲𑀢𑀺, 𑀨𑀼𑀲𑀦𑀫𑀢𑁆𑀢𑀫𑁂𑀯 𑀯𑀸 𑀏𑀢𑀦𑁆𑀢𑀺 𑀨𑀲𑁆𑀲𑁄, 𑀆𑀭𑀫𑁆𑀫𑀡𑁂 𑀨𑀼𑀲𑀦𑀮𑀓𑁆𑀔𑀡𑁄 𑀥𑀫𑁆𑀫𑁄.

𑀭𑀼𑀲 𑀭𑀺𑀲 𑀳𑀺𑀁𑀲𑀸𑀬𑀁. 𑀭𑁄𑀲𑀢𑀺. 𑀭𑀺𑀲𑀢𑀺. 𑀧𑀼𑀭𑀺𑀲𑁄.

𑀏𑀢𑁆𑀣 𑀘 ‘‘𑀧𑀼𑀁 𑀯𑀼𑀘𑁆𑀘𑀢𑀺 𑀦𑀺𑀭𑀬𑁄, 𑀢𑀁 𑀭𑀺𑀲𑀢𑀻𑀢𑀺 𑀧𑀼𑀭𑀺𑀲𑁄’’𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺.

𑀭𑀺𑀲 𑀕𑀢𑀺𑀬𑀁. 𑀭𑁂𑀲𑀢𑀺.

𑀯𑀺𑀲 𑀧𑀯𑁂𑀲𑀦𑁂. 𑀯𑀺𑀲𑀢𑀺, 𑀧𑀯𑀺𑀲𑀢𑀺. 𑀧𑀯𑁂𑀲𑁄, 𑀧𑀯𑁂𑀲𑀦𑀁, 𑀦𑀺𑀯𑁂𑀲𑀦𑀁, 𑀧𑀯𑀺𑀲𑀁. 𑀏𑀢𑁆𑀣 𑀦𑀺𑀯𑁂𑀲𑀦𑀁 𑀯𑀼𑀘𑁆𑀘𑀢𑀺 𑀕𑁂𑀳𑀁.

𑀫𑀲 𑀆𑀫𑀲𑀦𑁂. 𑀫𑀲𑀢𑀺, 𑀆𑀫𑀲𑀢𑀺, 𑀧𑀭𑀸𑀫𑀲𑀢𑀺. 𑀧𑀭𑀸𑀫𑀸𑀲𑁄, 𑀧𑀭𑀸𑀫𑀲𑀦𑀁.

𑀏𑀢𑁆𑀣 ¶ 𑀧𑀭𑀸𑀫𑀸𑀲𑁄𑀢𑀺 𑀧𑀭𑀢𑁄 𑀆𑀫𑀲𑀢𑀻𑀢𑀺 𑀧𑀭𑀸𑀫𑀸𑀲𑁄, 𑀅𑀦𑀺𑀘𑁆𑀘𑀸𑀤𑀺𑀥𑀫𑁆𑀫𑁂 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀡𑁆𑀳𑀸𑀢𑀻𑀢𑀺 𑀅𑀢𑁆𑀣𑁄. ‘‘𑀧𑀭𑀸𑀫𑀸𑀲𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀓𑀼𑀫𑁆𑀫𑀕𑁆𑀕𑁄 𑀫𑀺𑀘𑁆𑀙𑀸𑀧𑀣𑁄’’𑀢𑀺𑀆𑀤𑀻𑀦𑀺 𑀩𑀳𑀽𑀦𑀺 𑀯𑁂𑀯𑀘𑀦𑀧𑀤𑀸𑀦𑀺 𑀅𑀪𑀺𑀥𑀫𑁆𑀫𑀢𑁄 𑀕𑀳𑁂𑀢𑀩𑁆𑀩𑀸𑀦𑀺.

𑀇𑀲𑀼 𑀇𑀘𑁆𑀙𑀸𑀬𑀁. 𑀇𑀘𑁆𑀙𑀢𑀺, 𑀲𑀫𑁆𑀧𑀝𑀺𑀘𑁆𑀙𑀢𑀺. 𑀲𑀫𑁆𑀧𑀝𑀺𑀘𑁆𑀙𑀦𑀁, 𑀇𑀘𑁆𑀙𑀸, 𑀅𑀪𑀺𑀘𑁆𑀙𑀸, 𑀇𑀘𑁆𑀙𑀁, 𑀇𑀘𑁆𑀙𑀫𑀸𑀦𑁄.

𑀯𑁂𑀲𑀼 𑀤𑀸𑀦𑁂. 𑀯𑁂𑀘𑁆𑀙𑀢𑀺, 𑀧𑀯𑁂𑀘𑁆𑀙𑀢𑀺, 𑀧𑀯𑁂𑀘𑁆𑀙𑁂𑀢𑀺. 𑀧𑀯𑁂𑀘𑁆𑀙𑀁, 𑀧𑀯𑁂𑀘𑁆𑀙𑀦𑁆𑀢𑁄.

𑀦𑀺𑀲 𑀩𑀤𑁆𑀥𑀸𑀬𑀁. 𑀩𑀤𑁆𑀥𑀸𑀢𑀺 𑀯𑀺𑀦𑀺𑀩𑀤𑁆𑀥𑁄, 𑀅𑀳𑀗𑁆𑀓𑀸𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀦𑀺𑀲𑀢𑀺.

𑀚𑀼𑀲𑀺 𑀧𑀻𑀢𑀺𑀲𑁂𑀯𑀦𑁂𑀲𑀼. 𑀚𑁄𑀲𑀢𑀺.

𑀇𑀲 𑀧𑀭𑀺𑀬𑁂𑀲𑀦𑁂. 𑀏𑀲𑀢𑀺. 𑀇𑀲𑀺, 𑀇𑀝𑁆𑀞𑀁, 𑀅𑀦𑀺𑀝𑁆𑀞𑀁, 𑀏𑀲𑀁, 𑀏𑀲𑀫𑀸𑀦𑁄.

𑀲𑀁𑀓𑀲𑁂 𑀅𑀘𑁆𑀙𑀦𑁂. 𑀅𑀘𑁆𑀙𑀦𑀁 𑀦𑀺𑀲𑀻𑀤𑀦𑀁. 𑀲𑀗𑁆𑀓𑀲𑀸𑀬𑀢𑀺.

𑀲𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀳𑀓𑀸𑀭𑀦𑁆𑀢𑀥𑀸𑀢𑀼

𑀳𑀸 𑀘𑀸𑀕𑁂. 𑀚𑀳𑀢𑀺, 𑀯𑀺𑀚𑀳𑀢𑀺. 𑀯𑀺𑀚𑀳𑀦𑀁, 𑀚𑀳𑀺𑀢𑀼𑀁, 𑀚𑀳𑀸𑀢𑀯𑁂, 𑀚𑀳𑀺𑀢𑁆𑀯𑀸, 𑀚𑀳𑀸𑀬.

𑀫𑁆𑀳𑀻 𑀈𑀲𑀁𑀳𑀲𑀦𑁂. 𑀫𑁆𑀳𑀬𑀢𑁂, 𑀉𑀫𑁆𑀳𑀬𑀢𑁂 𑀯𑀺𑀫𑁆𑀳𑀬𑀢𑁂.

𑀢𑀢𑁆𑀣 𑀫𑁆𑀳𑀬𑀢𑁂𑀢𑀺 𑀲𑀺𑀢𑀁 𑀓𑀭𑁄𑀢𑀺. 𑀉𑀫𑁆𑀳𑀬𑀢𑁂𑀢𑀺 𑀧𑀳𑀝𑁆𑀞𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀯𑀺𑀫𑁆𑀳𑀬𑀢𑁂𑀢𑀺 𑀯𑀺𑀫𑁆𑀳𑀬𑀦𑀁 𑀓𑀭𑁄𑀢𑀺. 𑀢𑀢𑁆𑀭𑀸𑀬𑀁 𑀧𑀸𑀴𑀺 ‘‘𑀦 𑀦𑀁 𑀉𑀫𑁆𑀳𑀬𑀢𑁂 𑀤𑀺𑀲𑁆𑀯𑀸. 𑀧𑁂𑀓𑁆𑀔𑀺𑀢𑁂𑀦 𑀫𑁆𑀳𑀺𑀢𑁂𑀦 𑀘. 𑀫𑁆𑀳𑀺𑀢𑀧𑀼𑀩𑁆𑀩𑀁𑀯 ¶ 𑀪𑀸𑀲𑀢𑀺. 𑀬𑀤𑀸 𑀉𑀫𑁆𑀳𑀬𑀫𑀸𑀦𑀸 𑀫𑀁, 𑀭𑀸𑀚𑀧𑀼𑀢𑁆𑀢𑀻 𑀉𑀤𑀺𑀓𑁆𑀔𑀢𑀺. 𑀉𑀫𑁆𑀳𑀸𑀧𑁂𑀬𑁆𑀬 𑀧𑀪𑀸𑀯𑀢𑀻. 𑀧𑀫𑁆𑀳𑀸𑀧𑁂𑀬𑁆𑀬 𑀧𑀪𑀸𑀯𑀢𑀻’’𑀢𑀺.

𑀢𑀢𑁆𑀣 𑀉𑀫𑁆𑀳𑀬𑀫𑀸𑀦𑀸𑀢𑀺 𑀧𑀳𑀝𑁆𑀞𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀳𑀲𑀫𑀸𑀦𑀸. 𑀉𑀫𑁆𑀳𑀸𑀧𑁂𑀬𑁆𑀬𑀸𑀢𑀺 𑀲𑀺𑀢𑀯𑀲𑁂𑀦 𑀧𑀳𑀁𑀲𑁂𑀬𑁆𑀬. 𑀧𑀫𑁆𑀳𑀸𑀧𑁂𑀬𑁆𑀬𑀸𑀢𑀺 𑀫𑀳𑀸𑀳𑀲𑀺𑀢𑀯𑀲𑁂𑀦 𑀧𑀭𑀺𑀳𑀸𑀲𑁂𑀬𑁆𑀬.

𑀳𑀼 𑀤𑀸𑀦𑁂. 𑀳𑀯𑀢𑀺. 𑀳𑀼𑀢𑀺.

𑀳𑀼 𑀧𑀲𑀚𑁆𑀚𑀓𑀭𑀡𑁂. 𑀧𑀲𑀚𑁆𑀚𑀓𑀭𑀡𑀁 𑀧𑀓𑀸𑀭𑁂𑀦 𑀲𑀚𑁆𑀚𑀦𑀓𑁆𑀭𑀺𑀬𑀸. 𑀳𑀯𑀢𑀺. 𑀳𑀼𑀢𑁄, 𑀳𑀼𑀢𑀯𑀸, 𑀳𑀼𑀢𑀸𑀯𑀻, 𑀆𑀳𑀼𑀢𑀺.

𑀳𑀽 𑀲𑀢𑁆𑀢𑀸𑀬𑀁. 𑀳𑁄𑀢𑀺, 𑀳𑁄𑀦𑁆𑀢𑀺. 𑀳𑁄𑀲𑀺, 𑀳𑁄𑀣. 𑀳𑁄𑀫𑀺, 𑀳𑁄𑀫. 𑀧𑀳𑁄𑀢𑀺, 𑀧𑀳𑁄𑀦𑁆𑀢𑀺. 𑀧𑀳𑀽𑀢𑀁, 𑀧𑀳𑀽𑀢𑀸, 𑀓𑀼𑀢𑁄 𑀧𑀳𑀽𑀢𑀸 𑀓𑀮𑀳𑀸 𑀯𑀺𑀯𑀸𑀤𑀸. 𑀳𑁄𑀦𑁆𑀢𑁄, 𑀳𑁄𑀦𑁆𑀢𑀸, 𑀳𑁄𑀦𑁆𑀢𑀁, 𑀧𑀳𑁄𑀦𑁆𑀢𑁄. 𑀧𑀘𑁆𑀙𑀸𑀲𑀫𑀡𑁂𑀦 𑀳𑁄𑀢𑀩𑁆𑀩𑀁. 𑀳𑁄𑀢𑀼𑀁 𑀳𑁄𑀢𑀼𑀬𑁂, 𑀧𑀳𑁄𑀢𑀼𑀁, 𑀳𑀼𑀢𑁆𑀯𑀸𑀦. 𑀯𑀢𑁆𑀢𑀫𑀸𑀦𑀸𑀯𑀺𑀪𑀢𑁆𑀢𑀺𑀭𑀽𑀧𑀸𑀤𑀻𑀦𑀺. 𑀏𑀢𑁆𑀣 𑀧𑀲𑀺𑀤𑁆𑀥𑀭𑀽𑀧𑀸𑀦𑁂𑀯 𑀕𑀳𑀺𑀢𑀸𑀦𑀺.

𑀳𑁄𑀢𑀼, 𑀳𑁄𑀦𑁆𑀢𑀼. 𑀳𑁄𑀲𑀺, 𑀳𑁄𑀣. 𑀳𑁄𑀫𑀺, 𑀳𑁄𑀫. 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺𑀭𑀽𑀧𑀸𑀦𑀺. 𑀏𑀢𑁆𑀣𑀸𑀧𑀺 𑀧𑀲𑀺𑀤𑁆𑀥𑀭𑀽𑀧𑀸𑀦𑁂𑀯 𑀕𑀳𑀺𑀢𑀸𑀦𑀺.

𑀳𑀼𑀯𑁂𑀬𑁆𑀬, 𑀳𑀼𑀯𑁂𑀬𑁆𑀬𑀼𑀁. 𑀳𑀼𑀯𑁂𑀬𑁆𑀬𑀸𑀲𑀺, 𑀳𑀼𑀯𑁂𑀬𑁆𑀬𑀸𑀣. 𑀳𑀼𑀯𑁂𑀬𑁆𑀬𑀸𑀫𑀺, 𑀳𑀼𑀯𑁂𑀬𑁆𑀬𑀸𑀫. 𑀳𑀼𑀯𑁂𑀣, 𑀳𑀼𑀯𑁂𑀭𑀁. 𑀳𑀼𑀯𑁂𑀣𑁄, 𑀳𑀼𑀯𑁂𑀬𑁆𑀬𑀸𑀯𑁆𑀳𑁄. 𑀳𑀼𑀯𑁂𑀬𑁆𑀬𑀁, 𑀳𑀼𑀯𑁂𑀬𑁆𑀬𑀸𑀫𑁆𑀳𑁂. 𑀲𑀢𑁆𑀢𑀫𑀺𑀬𑀸 𑀭𑀽𑀧𑀸𑀦𑀺. 𑀏𑀢𑁆𑀣 𑀧𑀦 ‘‘𑀉𑀧𑀓𑁄 𑀆𑀚𑀻𑀯𑀓𑁄 ‘𑀳𑀼𑀯𑁂𑀬𑁆𑀬 𑀧𑀸𑀯𑀼𑀲𑁄’𑀢𑀺 𑀯𑀢𑁆𑀯𑀸 𑀲𑀻𑀲𑀁 𑀑𑀓𑀫𑁆𑀧𑁂𑀢𑁆𑀯𑀸 𑀉𑀫𑁆𑀫𑀕𑁆𑀕𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀫𑀻’’𑀢𑀺 𑀧𑀸𑀴𑀺𑀬𑀁 𑀳𑀼𑀯𑁂𑀬𑁆𑀬𑀸𑀢𑀺 𑀧𑀤𑀲𑁆𑀲 𑀤𑀲𑁆𑀲𑀦𑀢𑁄 𑀦𑀬𑀯𑀲𑁂𑀦 ‘𑀳𑀼𑀯𑁂𑀬𑁆𑀬, 𑀳𑀼𑀯𑁂𑀬𑁆𑀬𑀼’’𑀦𑁆𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀸𑀦𑀺. 𑀳𑀼𑀧𑁂𑀬𑁆𑀬𑀸𑀢𑀺𑀧𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀬𑀣𑀸 𑀧𑀘𑁆𑀘𑀧𑁂𑀓𑁆𑀔𑀡𑀸. 𑀢𑀩𑁆𑀩𑀲𑁂𑀦 ‘‘𑀳𑀼𑀧𑁂𑀬𑁆𑀬, 𑀳𑀼𑀧𑁂𑀬𑁆𑀬𑀼𑀁 ¶ . 𑀳𑀼𑀧𑁂𑀬𑁆𑀬𑀸𑀲𑀻’’𑀢𑀺𑀆𑀤𑀺𑀦𑀸 𑀯𑀓𑀸𑀭𑀲𑁆𑀲 𑀧𑀓𑀸𑀭𑀸𑀤𑁂𑀲𑀪𑀽𑀢𑀸𑀦𑀺 𑀭𑀽𑀧𑀸𑀦𑀺𑀧𑀺 𑀕𑀳𑁂𑀢𑀩𑁆𑀩𑀸𑀦𑀺.

𑀅𑀧𑀭𑁄 𑀦𑀬𑁄 𑁋 𑀳𑁂𑀬𑁆𑀬, 𑀳𑁂𑀬𑁆𑀬𑀼𑀁. 𑀳𑁂𑀬𑁆𑀬𑀸𑀲𑀺, 𑀳𑁂𑀬𑁆𑀬𑀸𑀣. 𑀳𑁂𑀬𑁆𑀬𑀸𑀫𑀺, 𑀳𑁂𑀬𑁆𑀬𑀸𑀫. 𑀳𑁂𑀣, 𑀳𑁂𑀭𑀁. 𑀳𑁂𑀣𑁄, 𑀳𑁂𑀬𑁆𑀬𑀸𑀯𑁆𑀳𑁄. 𑀳𑁂𑀬𑁆𑀬𑀁, 𑀳𑁂𑀬𑁆𑀬𑀸𑀫𑁆𑀳𑁂. 𑀇𑀫𑀸𑀦𑀺 𑀅𑀝𑁆𑀞𑀓𑀣𑀸𑀦𑀬𑁂𑀦 𑀕𑀳𑀺𑀢𑀭𑀽𑀧𑀸𑀦𑀺. 𑀏𑀢𑁆𑀣 𑀧𑀦 ‘‘𑀦 𑀘 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀲𑀘𑁂 𑀳𑁂𑀬𑁆𑀬, 𑀉𑀧𑁆𑀧𑀸𑀤𑀲𑁆𑀲𑀸𑀧𑀺 𑀉𑀧𑁆𑀧𑀸𑀤𑁄 𑀧𑀸𑀧𑀼𑀡𑁂𑀬𑁆𑀬𑀸’’𑀢𑀺 𑀇𑀤𑀫𑁆𑀧𑀺 𑀦𑀺𑀤𑀲𑁆𑀲𑀦𑀁 𑀤𑀝𑁆𑀞𑀩𑁆𑀩𑀁.

𑀳𑀼𑀯, 𑀳𑀼𑀯𑀼. 𑀳𑀼𑀯𑁂, 𑀳𑀼𑀯𑀺𑀢𑁆𑀣. 𑀳𑀼𑀯𑀁, 𑀳𑀼𑀯𑀺𑀫𑁆𑀳. 𑀳𑀼𑀯𑀺𑀢𑁆𑀣, 𑀳𑁄𑀣 𑀇𑀘𑁆𑀘𑀧𑀺 𑀲𑀜𑁆𑀜𑁄𑀕𑀢𑀓𑀸𑀭𑀮𑁄𑀧𑁂𑀦 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀢𑀣𑀸𑀳𑀺 ‘‘𑀓𑀲𑀺𑀭𑀸 𑀚𑀻𑀯𑀺𑀓𑀸 𑀳𑁄𑀣𑀸’’𑀢𑀺 𑀧𑀤𑀲𑁆𑀲𑀢𑁆𑀣𑀁 𑀯𑀡𑁆𑀡𑁂𑀦𑁆𑀢𑁂𑀳𑀺 ‘‘𑀤𑀼𑀓𑁆𑀔𑀸 𑀦𑁄 𑀚𑀻𑀯𑀺𑀓𑀸 𑀅𑀳𑁄𑀲𑀻’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀳𑀼𑀯𑀺𑀭𑁂. 𑀳𑀼𑀯𑀺𑀢𑁆𑀣𑁄, 𑀳𑀼𑀯𑀺𑀯𑁆𑀳𑁄. 𑀳𑀼𑀯𑀺𑀁, 𑀳𑀼𑀯𑀺𑀫𑁆𑀳𑁂. 𑀧𑀭𑁄𑀓𑁆𑀔𑀸𑀬 𑀭𑀽𑀧𑀸𑀦𑀺.

𑀅𑀳𑀼𑀯𑀸, 𑀅𑀳𑀼𑀯𑀽. 𑀅𑀳𑀼𑀯𑁄, 𑀅𑀳𑀼𑀯𑀢𑁆𑀣. 𑀅𑀳𑀼𑀯𑀁, 𑀅𑀳𑀼𑀯𑀫𑁆𑀳. 𑀅𑀳𑀼𑀯𑀢𑁆𑀣, 𑀅𑀳𑀼𑀯𑀢𑁆𑀣𑀼𑀁. 𑀅𑀳𑀼𑀯𑀲𑁂, 𑀅𑀳𑀼𑀯𑀯𑁆𑀳𑀁. 𑀅𑀳𑀼𑀯𑀺𑀁, 𑀅𑀳𑀼𑀯𑀫𑁆𑀳𑀲𑁂. 𑀳𑀺𑀬𑁆𑀬𑀢𑁆𑀢𑀦𑀻𑀭𑀽𑀧𑀸𑀦𑀺.

𑀏𑀢𑁆𑀣 𑀅𑀳𑀼𑀯𑀫𑁆𑀳𑀲𑁂𑀢𑀺 𑀫𑀬𑀁 𑀪𑀯𑀫𑁆𑀳𑀲𑁂𑀢𑀺 𑀅𑀢𑁆𑀣𑁄. ‘‘𑀅𑀓𑀭𑀫𑁆𑀳𑀲 𑀢𑁂 𑀓𑀺𑀘𑁆𑀘𑀁, 𑀬𑀁 𑀩𑀮𑀁 𑀅𑀳𑀼𑀯𑀫𑁆𑀳𑀲𑁂’’𑀢𑀺 𑀧𑀸𑀴𑀺𑀬𑀁 𑀧𑀦 ‘‘𑀅𑀳𑀼𑀯 𑀅𑀫𑁆𑀳𑀲𑁂’’ 𑀇𑀢𑀺 𑀯𑀸 𑀧𑀤𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄 ‘‘𑀅𑀳𑀼 𑀅𑀫𑁆𑀳𑀲𑁂’’𑀢𑀺 𑀯𑀸. 𑀧𑀘𑁆𑀙𑀺𑀫𑀦𑀬𑁂 𑀯𑀓𑀸𑀭𑀸𑀕𑀫𑁄 ‘‘𑀅𑀳𑀼𑀯𑀸’’𑀢𑀺 𑀘 ‘‘𑀅𑀳𑀽’’𑀢𑀺 𑀘 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀅𑀫𑁆𑀳𑀦𑁆𑀢𑀺 𑀅𑀫𑁆𑀳𑀸𑀓𑀁. 𑀲𑁂𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀫𑁆𑀳𑀸𑀓𑀁 𑀬𑀁 𑀩𑀮𑀁 𑀅𑀳𑁄𑀲𑀺, 𑀫𑀬𑀁 𑀢𑁂𑀦 𑀩𑀮𑁂𑀦 𑀢𑀯 𑀓𑀺𑀘𑁆𑀘𑀁 𑀅𑀓𑀭𑀫𑁆𑀳𑀸𑀢𑀺.

𑀅𑀳𑁄𑀲𑀺, 𑀅𑀳𑀼𑀁, 𑀅𑀳𑁂𑀲𑀼𑀁. 𑀅𑀳𑀼𑀯𑁄, 𑀅𑀳𑀼𑀯𑀺𑀢𑁆𑀣. 𑀅𑀳𑁄𑀲𑀺𑀢𑁆𑀣𑀇𑀘𑁆𑀘𑀧𑀺. 𑀅𑀳𑁄𑀲𑀺𑀁, 𑀅𑀳𑀼𑀯𑀸𑀲𑀺𑀁 𑀇𑀘𑁆𑀘𑀧𑀺, 𑀅𑀳𑁄𑀲𑀺𑀫𑁆𑀳𑀸, 𑀅𑀳𑀼𑀫𑁆𑀳𑀸 ¶ . 𑀅𑀳𑀼𑀯𑀸, 𑀅𑀳𑀼𑀯𑀼, 𑀅𑀳𑀼𑀯𑀲𑁂, 𑀅𑀳𑀼𑀯𑀺𑀯𑁆𑀳𑀁. 𑀅𑀳𑀼𑀯𑀁, 𑀅𑀳𑀼𑀁 𑀇𑀘𑁆𑀘𑀧𑀺. 𑀅𑀳𑀼𑀯𑀺𑀫𑁆𑀳𑁂. 𑀅𑀚𑁆𑀚𑀢𑀦𑀺𑀬𑀸 𑀭𑀽𑀧𑀸𑀦𑀺.

𑀏𑀢𑁆𑀣 ‘‘𑀅𑀳𑀁 𑀓𑁂𑀯𑀝𑁆𑀝𑀕𑀸𑀫𑀲𑁆𑀫𑀺𑀁, 𑀅𑀳𑀼𑀁 𑀓𑁂𑀯𑀝𑁆𑀝𑀤𑀸𑀭𑀓𑁄’’𑀢𑀺 𑀤𑀲𑁆𑀲𑀦𑀢𑁄 ‘‘𑀅𑀳𑀼’’𑀦𑁆𑀢𑀺 𑀯𑀼𑀢𑁆𑀢𑀁, 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. ‘‘𑀅𑀳𑀁 𑀪𑀤𑀦𑁆𑀢𑁂 𑀅𑀳𑀼𑀯𑀸𑀲𑀺𑀁 𑀧𑀼𑀩𑁆𑀩𑁂 𑀲𑀼𑀫𑁂𑀥𑀦𑀸𑀫𑀲𑁆𑀲 𑀚𑀺𑀦𑀲𑁆𑀲 𑀲𑀸𑀯𑀓𑁄’’𑀢𑀺 𑀤𑀲𑁆𑀲𑀦𑀢𑁄 ‘‘𑀅𑀳𑀼𑀯𑀸𑀲𑀺’’𑀦𑁆𑀢𑀺 𑀇𑀘𑁆𑀘𑁂𑀯𑀢𑁆𑀣𑁄. 𑀢𑀣𑀸 𑀳𑀺 𑀅𑀦𑁂𑀓𑀯𑀡𑁆𑀡𑀯𑀺𑀫𑀸𑀦𑀯𑀢𑁆𑀣𑀼𑀅𑀝𑁆𑀞𑀓𑀣𑀸𑀬𑀁 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀅𑀢𑁆𑀣𑀁 𑀯𑀡𑁆𑀡𑁂𑀦𑁆𑀢𑁂𑀳𑀺 𑀅𑀳𑀼𑀯𑀸𑀲𑀺𑀦𑁆𑀢𑀺 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄.

‘‘𑀳𑁂𑀲𑁆𑀲𑀢𑀺, 𑀳𑁂𑀳𑀺𑀲𑁆𑀲𑀢𑀺, 𑀳𑁂𑀳𑀺𑀢𑀺, 𑀳𑁄𑀳𑀺𑀢𑀻’’𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀪𑀯𑀺𑀲𑁆𑀲𑀦𑁆𑀢𑀺𑀬𑀸 𑀫𑀸𑀢𑀺𑀓𑀸𑀧𑀤𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀇𑀤𑀸𑀦𑀺 𑀢𑀸𑀦𑀺 𑀯𑀺𑀪𑀚𑀺𑀲𑁆𑀲𑀸𑀫𑀺 𑁋 𑀳𑁂𑀲𑁆𑀲𑀸𑀢𑀺, 𑀳𑁂𑀲𑁆𑀲𑀦𑁆𑀢𑀺. 𑀳𑁂𑀲𑁆𑀲𑀲𑀺, 𑀳𑁂𑀲𑁆𑀲𑀣. 𑀳𑁂𑀲𑁆𑀲𑀸𑀫𑀺, 𑀳𑁂𑀲𑁆𑀲𑀸𑀫. 𑀳𑁂𑀲𑁆𑀲𑀢𑁂, 𑀳𑁂𑀲𑁆𑀲𑀦𑁆𑀢𑁂. 𑀳𑁂𑀲𑁆𑀲𑀲𑁂, 𑀳𑁂𑀲𑁆𑀲𑀯𑁆𑀳𑁂. 𑀳𑁂𑀲𑁆𑀲𑀁, 𑀳𑁂𑀲𑁆𑀲𑀸𑀫𑁆𑀳𑁂. 𑀇𑀫𑀸𑀦𑀺 ‘‘𑀅𑀦𑀸𑀕𑀢𑀫𑁆𑀳𑀺 𑀅𑀤𑁆𑀥𑀸𑀦𑁂, 𑀳𑁂𑀲𑁆𑀲𑀸𑀫 𑀲𑀫𑁆𑀫𑀼𑀔𑀸 𑀇𑀫’’𑀦𑁆𑀢𑀺 𑀤𑀲𑁆𑀲𑀦𑀢𑁄 𑀯𑀼𑀢𑁆𑀢𑀸𑀦𑀺.

𑀳𑁂𑀳𑀺𑀲𑁆𑀲𑀢𑀺, 𑀳𑁂𑀳𑀺𑀲𑁆𑀲𑀦𑁆𑀢𑀺. 𑀳𑁂𑀳𑀺𑀲𑁆𑀲𑀲𑀺. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀳𑁄𑀳𑀺𑀲𑁆𑀲𑀢𑀺, 𑀳𑁄𑀳𑀺𑀲𑁆𑀲𑀦𑁆𑀢𑀺. 𑀳𑁄𑀳𑀺𑀲𑁆𑀲𑀲𑀺. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀳𑁂𑀳𑀺𑀢𑀺, 𑀳𑁂𑀳𑀺𑀦𑁆𑀢𑀺. 𑀳𑁂𑀳𑀺𑀲𑀺. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀳𑁄𑀳𑀺𑀢𑀺, 𑀳𑁄𑀳𑀺𑀦𑁆𑀢𑀺. 𑀳𑁄𑀳𑀺𑀲𑀺. 𑀲𑁂𑀲𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀪𑀯𑀺𑀲𑁆𑀲𑀦𑁆𑀢𑀺𑀬𑀸 𑀭𑀽𑀧𑀸𑀦𑀺.

𑀅𑀳𑀼𑀯𑀺𑀲𑁆𑀲𑀸, 𑀅𑀳𑀼𑀯𑀺𑀲𑁆𑀲𑀁𑀲𑀼. 𑀅𑀳𑀼𑀯𑀺𑀲𑁆𑀲𑀲𑁂, 𑀅𑀳𑀼𑀯𑀺𑀲𑁆𑀲𑀣. 𑀅𑀳𑀼𑀯𑀺𑀲𑁆𑀲𑀁, 𑀅𑀳𑀼𑀯𑀺𑀲𑁆𑀲𑀫𑁆𑀳𑀸. 𑀅𑀳𑀼𑀯𑀺𑀲𑁆𑀲𑀣, 𑀅𑀳𑀼𑀯𑀺𑀲𑁆𑀲𑀺𑀲𑀼. 𑀅𑀳𑀼𑀯𑀺𑀲𑁆𑀲𑀲𑁂 ¶ , 𑀅𑀳𑀼𑀯𑀺𑀲𑁆𑀲𑀯𑁆𑀳𑁂. 𑀅𑀳𑀼𑀯𑀺𑀲𑁆𑀲𑀺𑀁, 𑀅𑀳𑀼𑀯𑀺𑀲𑁆𑀲𑀸𑀫𑁆𑀳𑀲𑁂. 𑀓𑀸𑀮𑀸𑀢𑀺𑀧𑀢𑁆𑀢𑀺𑀭𑀽𑀧𑀸𑀦𑀺.

𑀯𑁆𑀳𑁂 𑀅𑀯𑁆𑀳𑀸𑀬𑀦𑁂 𑀩𑀤𑁆𑀥𑀸𑀬𑀁 𑀲𑀤𑁆𑀤𑁂 𑀘. 𑀅𑀯𑁆𑀳𑀸𑀬𑀦𑀁 𑀧𑀓𑁆𑀓𑁄𑀲𑀦𑀁. 𑀩𑀤𑁆𑀥𑀸𑀢𑀺 𑀅𑀳𑀗𑁆𑀓𑀸𑀭𑁄, 𑀖𑀝𑁆𑀝𑀦𑀁 𑀯𑀸 𑀲𑀸𑀭𑀫𑁆𑀪𑀓𑀭𑀡𑀁 𑀯𑀸. 𑀲𑀤𑁆𑀤𑁄 𑀭𑀯𑁄. 𑀯𑁆𑀳𑁂𑀢𑀺, 𑀯𑁆𑀳𑀸𑀬𑀢𑀺, 𑀅𑀯𑁆𑀳𑁂𑀢𑀺, 𑀅𑀯𑁆𑀳𑀸𑀬𑀢𑀺, 𑀅𑀯𑁆𑀳𑀸𑀲𑀺 𑀇𑀘𑁆𑀘𑀧𑀺. 𑀓𑀘𑁆𑀘𑀸𑀬𑀦𑁄 𑀫𑀸𑀡𑀯𑀓𑁄𑀲𑁆𑀫𑀺 𑀭𑀸𑀚, 𑀅𑀦𑀽𑀦𑀦𑀸𑀫𑁄 𑀇𑀢𑀺 𑀫𑀯𑁆𑀳𑀬𑀦𑁆𑀢𑀺. 𑀆𑀲𑀤𑁆𑀤𑁄 𑀉𑀧𑀲𑀕𑁆𑀕𑁄𑀯, 𑀲𑁄 𑀲𑀜𑁆𑀜𑁄𑀕𑀧𑀭𑀢𑁆𑀢𑀸 𑀭𑀲𑁆𑀲𑁄 𑀚𑀸𑀢𑁄. 𑀅𑀯𑁆𑀳𑀺𑀢𑁄. 𑀅𑀦𑀯𑁆𑀳𑀺𑀢𑁄 𑀢𑀢𑁄 𑀆𑀕𑀸. 𑀅𑀯𑁆𑀳𑀸, 𑀅𑀯𑁆𑀳𑀸𑀬𑀦𑀸. 𑀯𑀸𑀭𑀡𑀯𑁆𑀳𑀬𑀦𑀸 𑀭𑀼𑀓𑁆𑀔𑀸. 𑀓𑀸𑀫𑀯𑁆𑀳𑁂 𑀯𑀺𑀲𑀬𑁂. 𑀓𑀼𑀫𑀸𑀭𑁄 𑀘𑀦𑁆𑀤𑀲𑀯𑁆𑀳𑀬𑁄.

‘‘𑀲𑀢𑁆𑀢𑀢𑀦𑁆𑀢𑀺𑀁 𑀲𑀼𑀫𑀥𑀼𑀭𑀁,

𑀭𑀸𑀫𑀡𑁂𑀬𑁆𑀬𑀁 𑀅𑀯𑀸𑀘𑀬𑀺𑀁;

𑀲𑁄 𑀫𑀁 𑀭𑀗𑁆𑀕𑀫𑁆𑀳𑀺 𑀅𑀯𑁆𑀳𑁂𑀢𑀺,

𑀲𑀭𑀡𑀁 𑀫𑁂 𑀳𑁄𑀳𑀺 𑀓𑁄𑀲𑀺𑀬𑀸’’𑀢𑀺.

𑀏𑀢𑁆𑀣 𑀅𑀯𑁆𑀳𑁂𑀢𑀻𑀢𑀺 𑀲𑀸𑀭𑀫𑁆𑀪𑀯𑀲𑁂𑀦 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀤𑀲𑁆𑀲𑁂𑀢𑀼𑀁 𑀲𑀗𑁆𑀖𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. ‘‘𑀲𑀫𑀸𑀕𑀢𑁂 𑀏𑀓𑀲𑀢𑀁 𑀲𑀫𑀕𑁆𑀕𑁂, 𑀅𑀯𑁆𑀳𑁂𑀢𑁆𑀣 𑀬𑀓𑁆𑀔𑁄 𑀅𑀯𑀺𑀓𑀫𑁆𑀧𑀫𑀸𑀦𑁄’’𑀢𑀺 𑀏𑀢𑁆𑀣𑀸𑀧𑀺 𑀲𑀸𑀭𑀫𑁆𑀪𑀯𑀲𑁂𑀦 𑀖𑀝𑁆𑀝𑀦𑀁 𑀅𑀯𑁆𑀳𑀸𑀬𑀦𑀁 𑀦𑀸𑀫.

‘‘𑀢𑀢𑁆𑀣 𑀦𑀘𑁆𑀘𑀦𑁆𑀢𑀺 𑀕𑀸𑀬𑀦𑁆𑀢𑀺, 𑀅𑀯𑁆𑀳𑀸𑀬𑀦𑁆𑀢𑀺 𑀯𑀭𑀸𑀯𑀭𑀁;

𑀅𑀘𑁆𑀙𑀭𑀸 𑀯𑀺𑀬 𑀤𑁂𑀯𑁂𑀲𑀼, 𑀦𑀸𑀭𑀺𑀬𑁄 𑀲𑀫𑀮𑀗𑁆𑀓𑀢𑀸’’𑀢𑀺

𑀏𑀢𑁆𑀣 𑀧𑀦 𑀅𑀯𑁆𑀳𑀸𑀬𑀦𑁆𑀢𑀺 𑀯𑀭𑀸𑀯𑀭𑀦𑁆𑀢𑀺 𑀯𑀭𑀢𑁄 𑀯𑀭𑀁 𑀦𑀘𑁆𑀘𑀜𑁆𑀘 𑀕𑀻𑀢𑀜𑁆𑀘 𑀓𑀭𑁄𑀦𑁆𑀢𑀺𑀬𑁄 𑀲𑀸𑀭𑀫𑁆𑀪𑀁 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀧𑀜𑁆𑀳 𑀧𑀼𑀘𑁆𑀙𑀸𑀬𑀁. 𑀪𑀺𑀓𑁆𑀔𑀼 𑀕𑀭𑀼𑀁 𑀧𑀜𑁆𑀳𑀁 𑀧𑀜𑁆𑀳𑀢𑀺. 𑀧𑀜𑁆𑀳𑁄. 𑀅𑀬𑀁 𑀧𑀦 𑀧𑀸𑀴𑀺 ‘‘𑀧𑀭𑀺𑀧𑀼𑀘𑁆𑀙𑀢𑀺 𑀧𑀭𑀺𑀧𑀜𑁆𑀳𑀢𑀺 𑀇𑀤𑀁 𑀪𑀦𑁆𑀢𑁂 𑀓𑀣𑀁 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄’’𑀢𑀺. 𑀧𑀜𑁆𑀳𑀲𑀤𑁆𑀤𑁄 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 𑀕𑀳𑁂𑀢𑀩𑁆𑀩𑁄. ‘‘𑀧𑀜𑁆𑀳𑁄 𑀫𑀁 ¶ 𑀧𑀝𑀺𑀪𑀸𑀢𑀺, 𑀢𑀁 𑀲𑀼𑀡𑀸’’𑀢𑀺 𑀬𑁂𑀪𑀼𑀬𑁆𑀬𑁂𑀦 𑀧𑀼𑀮𑁆𑀮𑀺𑀗𑁆𑀕𑀧𑁆𑀧𑀬𑁄𑀕𑀤𑀲𑁆𑀲𑀦𑀢𑁄. 𑀓𑀢𑁆𑀣𑀘𑀺 𑀧𑀦 𑀇𑀢𑁆𑀣𑀺𑀮𑀺𑀗𑁆𑀕𑁄𑀧𑀺 𑀪𑀯𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑁄𑀧𑀺. 𑀢𑀣𑀸 𑀳𑀺 ‘‘𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸. 𑀓𑁄𑀡𑁆𑀟𑀜𑁆𑀜 𑀧𑀜𑁆𑀳𑀸𑀦𑀺 𑀯𑀺𑀬𑀸𑀓𑀭𑁄𑀳𑀻’’𑀢𑀺 𑀢𑀤𑁆𑀤𑀻𑀧𑀺𑀓𑀸 𑀧𑀸𑀴𑀺𑀬𑁄 𑀤𑀺𑀲𑁆𑀲𑀦𑁆𑀢𑀺, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀯𑀸 𑀢𑀢𑁆𑀣 𑀤𑀝𑁆𑀞𑀩𑁆𑀩𑁄.

𑀧𑀜𑁆𑀳 𑀇𑀘𑁆𑀙𑀸𑀬𑀁. 𑀧𑀜𑁆𑀳𑀢𑀺. 𑀧𑀜𑁆𑀳𑁄. 𑀏𑀢𑁆𑀣 𑀘 𑀧𑀜𑁆𑀳𑁄𑀢𑀺 𑀜𑀸𑀢𑀼𑀁 𑀇𑀘𑁆𑀙𑀺𑀢𑁄 𑀅𑀢𑁆𑀣𑁄. 𑀇𑀤𑀁 𑀧𑀦𑁂𑀢𑁆𑀣 𑀦𑀺𑀩𑁆𑀩𑀘𑀦𑀁 𑀧𑀜𑁆𑀳𑀺𑀬𑀢𑀺 𑀜𑀸𑀢𑀼𑀁 𑀇𑀘𑁆𑀙𑀺𑀬𑀢𑀺 𑀲𑁄𑀢𑀺 𑀧𑀜𑁆𑀳𑁄𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀯𑀺𑀲𑁆𑀲𑀚𑁆𑀚𑀺𑀢𑀫𑁆𑀳𑀺 𑀧𑀜𑁆𑀳𑁂’’𑀢𑀺 𑀇𑀫𑀺𑀲𑁆𑀲𑀸 𑀦𑁂𑀢𑁆𑀢𑀺𑀧𑀸𑀴𑀺𑀬𑀸 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀦𑁆𑀢𑁂𑀦 ‘‘𑀧𑀜𑁆𑀳𑁂𑀢𑀺 𑀜𑀸𑀢𑀼𑀁 𑀇𑀘𑁆𑀙𑀺𑀢𑁂 𑀅𑀢𑁆𑀣𑁂’’𑀢𑀺.

𑀫𑀺𑀳 𑀲𑁂𑀘𑀦𑁂. 𑀫𑀺𑀳𑀢𑀺, 𑀉𑀫𑁆𑀫𑀺𑀳𑀢𑀺. 𑀫𑁂𑀖𑁄, 𑀫𑁂𑀳𑀦𑀁.

𑀢𑀢𑁆𑀣 𑀉𑀫𑁆𑀫𑀺𑀳𑀢𑀻𑀢𑀺 𑀧𑀲𑁆𑀲𑀸𑀯𑀁 𑀓𑀭𑁄𑀢𑀺. 𑀫𑁂𑀖𑁄𑀢𑀺 𑀫𑀺𑀳𑀢𑀺 𑀲𑀺𑀜𑁆𑀘𑀢𑀺 𑀮𑁄𑀓𑀁 𑀯𑀲𑁆𑀲𑀥𑀸𑀭𑀸𑀳𑀻𑀢𑀺 𑀫𑁂𑀖𑁄, 𑀧𑀚𑁆𑀚𑀼𑀦𑁆𑀦𑁄. 𑀫𑁂𑀳𑀦𑀦𑁆𑀢𑀺 𑀇𑀢𑁆𑀣𑀻𑀦𑀁 𑀕𑀼𑀬𑁆𑀳𑀝𑁆𑀞𑀸𑀦𑀁.

𑀤𑀳 𑀪𑀲𑁆𑀫𑀻𑀓𑀭𑀡𑁂 𑀥𑀸𑀭𑀡𑁂 𑀘. 𑀆𑀕𑀸𑀭𑀸𑀦𑀺 𑀅𑀕𑁆𑀕𑀺 𑀤𑀳𑀢𑀺. 𑀅𑀬𑀁 𑀧𑀼𑀭𑀺𑀲𑁄 𑀇𑀫𑀁 𑀇𑀢𑁆𑀣𑀺𑀁 𑀅𑀬𑁆𑀬𑀺𑀓𑀁 𑀤𑀳𑀢𑀺, 𑀫𑀫 𑀅𑀬𑁆𑀬𑀺𑀓𑀸𑀢𑀺 𑀥𑀸𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀬𑀁 𑀇𑀢𑁆𑀣𑀻 𑀅𑀬𑁆𑀬𑀺𑀓𑀸 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀢𑁆𑀭 𑀧𑀦𑀸𑀬𑀁 𑀧𑀸𑀴𑀺 ‘‘𑀲𑀓𑁆𑀬𑀸 𑀔𑁄 𑀅𑀫𑁆𑀩𑀝𑁆𑀞 𑀭𑀸𑀚𑀸𑀦𑀁 𑀉𑀓𑁆𑀓𑀸𑀓𑀁 𑀧𑀺𑀢𑀸𑀫𑀳𑀁 𑀤𑀳𑀦𑁆𑀢𑀻’’𑀢𑀺. 𑀅𑀕𑁆𑀕𑀺𑀦𑀸 𑀤𑀟𑁆𑀠𑀁 𑀕𑁂𑀳𑀁, 𑀤𑀬𑁆𑀳𑀢𑀺, 𑀤𑀬𑁆𑀳𑀫𑀸𑀦𑀁. 𑀤𑀲𑁆𑀲 𑀟𑀸𑀤𑁂𑀲𑁂 ‘‘𑀟𑀳𑀢𑀻’’𑀢𑀺 𑀭𑀽𑀧𑀁. ‘‘𑀟𑀳𑀦𑁆𑀢𑀁 𑀩𑀸𑀮𑀫𑀦𑁆𑀯𑁂𑀢𑀺, 𑀪𑀲𑁆𑀫𑀸𑀙𑀦𑁆𑀦𑁄𑀯 𑀧𑀸𑀯𑀓𑁄’’𑀢𑀺𑀆𑀤𑀬𑁄 𑀧𑀬𑁄𑀕𑀸 𑀏𑀢𑁆𑀣 𑀦𑀺𑀤𑀲𑁆𑀲𑀦𑀸𑀦𑀺 𑀪𑀯𑀦𑁆𑀢𑀺.

𑀘𑀳 𑀧𑀭𑀺𑀲𑀓𑁆𑀓𑀦𑁂. 𑀘𑀳𑀢𑀺.

𑀭𑀳 𑀘𑀸𑀕𑁂. 𑀭𑀳𑀢𑀺. 𑀭𑀳𑁄, 𑀭𑀳𑀺𑀢𑁄.

𑀭𑀳𑀺 𑀕𑀢𑀺𑀬𑀁. 𑀭𑀳𑀢𑀺. 𑀭𑀳𑁄, 𑀭𑀳𑀁.

𑀤𑀳𑀺 ¶ 𑀩𑀳𑀺 𑀯𑀼𑀤𑁆𑀥𑀺𑀬𑀁. 𑀤𑀳𑀢𑀺. 𑀩𑀳𑀢𑀺.

𑀩𑀳𑀺 𑀲𑀤𑁆𑀥𑁂 𑀘. 𑀘𑀓𑀸𑀭𑁄 𑀯𑀼𑀤𑁆𑀥𑀸𑀧𑁂𑀓𑁆𑀔𑁄. 𑀩𑀳𑀢𑀺.

𑀢𑀼𑀳𑀺 𑀤𑀼𑀳𑀺 𑀅𑀤𑁆𑀤𑀦𑁂. 𑀢𑀼𑀳𑀢𑀺. 𑀤𑀼𑀳𑀢𑀺.

𑀅𑀭𑀳 𑀫𑀳 𑀧𑀽𑀚𑀸𑀬𑀁. 𑀅𑀭𑀳𑀢𑀺. 𑀅𑀭𑀳𑀁, 𑀅𑀭𑀳𑀸. 𑀫𑀳𑀢𑀺.

𑀫𑀳𑀦𑀁, 𑀫𑀳𑁄. 𑀯𑀺𑀳𑀸𑀭𑀫𑀳𑁄. 𑀘𑁂𑀢𑀺𑀬𑀫𑀳𑁄.

𑀢𑀢𑁆𑀭 𑀦𑀺𑀓𑁆𑀓𑀺𑀮𑁂𑀲𑀢𑁆𑀢𑀸 𑀏𑀓𑀦𑁆𑀢𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑁂𑀦 𑀅𑀢𑁆𑀢𑀦𑁄 𑀓𑀢𑀧𑀽𑀚𑀸𑀲𑀓𑁆𑀓𑀸𑀭𑀸𑀤𑀻𑀦𑀁 𑀫𑀳𑀧𑁆𑀨𑀮𑀪𑀸𑀯𑀓𑀭𑀡𑁂𑀦 𑀅𑀭𑀳𑀡𑀻𑀬𑁄 𑀧𑀽𑀚𑀦𑀻𑀬𑁄𑀢𑀺 𑀅𑀭𑀳𑀸, 𑀔𑀻𑀡𑀸𑀲𑀯𑁄.

𑀈𑀳 𑀘𑁂𑀢𑀸𑀬𑀁. 𑀈𑀳𑀢𑀺. 𑀈𑀳𑀸. 𑀈𑀳𑀸 𑀯𑀼𑀘𑁆𑀘𑀢𑀺 𑀯𑀻𑀭𑀺𑀬𑀁.

𑀯𑀳 𑀫𑀳 𑀩𑀼𑀤𑁆𑀥𑀺𑀬𑀁. 𑀯𑀳𑀢𑀺, 𑀫𑀳𑀢𑀺.

𑀅𑀳𑀺 𑀧𑀺𑀮𑀳𑀺 𑀕𑀢𑀺𑀬𑀁. 𑀅𑀳𑀢𑀺. 𑀧𑀺𑀮𑀳𑀢𑀺, 𑀅𑀳𑀺.

𑀏𑀢𑁆𑀣 𑀘 𑀅𑀳𑀻𑀢𑀺 𑀦𑀺𑀧𑁆𑀧𑀸𑀤𑁄𑀧𑀺 𑀲𑀫𑀸𑀦𑁄 𑀅𑀳𑀢𑀺 𑀕𑀘𑁆𑀙𑀢𑀺 𑀕𑀦𑁆𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀅𑀳𑀺.

𑀕𑀭𑀳 𑀓𑀮𑀳 𑀓𑀼𑀘𑁆𑀙𑀦𑁂. 𑀕𑀭𑀳𑀢𑀺. 𑀕𑀭𑀳𑀸, 𑀓𑀮𑀳𑀢𑀺, 𑀓𑀮𑀳𑁄.

𑀯𑀭𑀳 𑀯𑀮𑀳 𑀧𑀥𑀸𑀦𑀺𑀬𑁂 𑀧𑀭𑀺𑀪𑀸𑀲𑀦𑀳𑀺𑀁𑀲𑀸𑀤𑀸𑀦𑁂𑀲𑀼 𑀘. 𑀯𑀭𑀳𑀢𑀺. 𑀯𑀮𑀳𑀢𑀺. 𑀯𑀭𑀸𑀳𑁄.

𑀏𑀢𑁆𑀣 𑀘 𑀯𑀭𑀸𑀳𑁄𑀢𑀺 𑀲𑀽𑀓𑀭𑁄𑀧𑀺 𑀳𑀢𑁆𑀣𑀻𑀧𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀳𑀺 ‘‘𑀏𑀦𑁂𑀬𑁆𑀬𑀸 𑀘 𑀯𑀭𑀸𑀳𑀸 𑀘. 𑀫𑀳𑀸𑀯𑀭𑀸𑀳𑁄𑀯 𑀦𑀺𑀯𑀸𑀧𑀧𑀼𑀝𑁆𑀞𑁄’’𑀢𑀺𑀆𑀤𑀻𑀲𑀼 𑀲𑀽𑀓𑀭𑁄 ‘‘𑀯𑀭𑀸𑀳𑁄’’𑀢𑀺 𑀦𑀸𑀫𑁂𑀦 𑀯𑀼𑀘𑁆𑀘𑀢𑀺. ‘‘𑀫𑀳𑀸𑀯𑀭𑀸𑀳𑀲𑁆𑀲 𑀦𑀤𑀻𑀲𑀼 𑀚𑀕𑁆𑀕𑀢𑁄, 𑀪𑀺𑀲𑀁 𑀖𑀲𑀫𑀸𑀦𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀧𑀦 𑀳𑀢𑁆𑀣𑀻 ‘‘𑀯𑀭𑀸𑀳𑁄’’𑀢𑀺 𑀦𑀸𑀫𑁂𑀦 𑀯𑀼𑀘𑁆𑀘𑀢𑀺. 𑀫𑀳𑀸𑀯𑀭𑀸𑀳𑀲𑁆𑀲𑀸𑀢𑀺 𑀳𑀺 𑀫𑀳𑀸𑀳𑀢𑁆𑀣𑀺𑀦𑁄𑀢𑀺 𑀅𑀢𑁆𑀣𑁄.

𑀯𑁂𑀳𑀼 𑀚𑁂𑀳𑀼 𑀯𑀸𑀳𑀼 𑀧𑀬𑀢𑀦𑁂. 𑀯𑁂𑀳𑀢𑀺, 𑀚𑁂𑀳𑀢𑀺. 𑀯𑀸𑀳𑀢𑀺. 𑀯𑀸𑀳𑀦𑁄.

𑀯𑀸𑀳𑀦𑁄 ¶ 𑀯𑀼𑀘𑁆𑀘𑀢𑀺 𑀅𑀲𑁆𑀲𑁄. 𑀲𑁄 𑀳𑀺 𑀯𑀸𑀳𑀦𑁆𑀢𑀺 𑀲𑀗𑁆𑀕𑀸𑀫𑀸𑀤𑀻𑀲𑀼 𑀓𑀺𑀘𑁆𑀘𑁂 𑀉𑀧𑁆𑀧𑀦𑁆𑀦𑁂 𑀧𑀬𑀢𑀦𑁆𑀢𑀺 𑀯𑀻𑀭𑀺𑀬𑀁 𑀓𑀭𑁄𑀦𑁆𑀢𑀺, 𑀏𑀢𑁂𑀦𑀸𑀢𑀺 𑀯𑀸𑀳𑀦𑁄𑀢𑀺 𑀯𑀼𑀘𑁆𑀘𑀢𑀺.

𑀤𑀸𑀳𑀼 𑀦𑀺𑀤𑁆𑀤𑀓𑁆𑀔𑀬𑁂. 𑀤𑀸𑀳𑀢𑀺.

𑀊𑀳 𑀯𑀺𑀢𑀓𑁆𑀓𑁂. 𑀊𑀳𑀢𑀺, 𑀆𑀬𑀽𑀳𑀢𑀺, 𑀯𑀺𑀬𑀽𑀳𑀢𑀺, 𑀩𑁆𑀬𑀽𑀳𑀢𑀺 𑀅𑀧𑁄𑀳𑀢𑀺. 𑀊𑀳𑀦𑀁, 𑀆𑀬𑀽𑀳𑀦𑀁, 𑀩𑁆𑀬𑀽𑀳𑁄, 𑀅𑀧𑁄𑀳𑁄.

𑀢𑀢𑁆𑀣 𑀊𑀳𑀢𑀻𑀢𑀺 𑀯𑀺𑀢𑀓𑁆𑀓𑁂𑀢𑀺, 𑀆𑀬𑀽𑀳𑀢𑀻𑀢𑀺 𑀯𑀸𑀬𑀫𑀢𑀺, 𑀯𑀺𑀬𑀽𑀳𑀢𑀻𑀢𑀺 𑀧𑀁𑀲𑀼𑀁 𑀉𑀤𑁆𑀥𑀭𑀢𑀺. 𑀏𑀯𑀁 𑀩𑁆𑀬𑀽𑀳𑀢𑀻𑀢𑀺 𑀏𑀢𑁆𑀣𑀸𑀧𑀺. 𑀅𑀧𑁄𑀳𑀢𑀻𑀢𑀺 𑀙𑀟𑁆𑀟𑁂𑀢𑀺, 𑀅𑀣 𑀯𑀸 𑀯𑀺𑀯𑁂𑀘𑁂𑀢𑀺.

𑀕𑀸𑀳𑀼 𑀯𑀺𑀮𑁄𑀴𑀦𑁂. 𑀕𑀸𑀳𑀢𑀺. 𑀕𑀸𑀳𑁄, 𑀘𑀦𑁆𑀤𑀕𑁆𑀕𑀸𑀳𑁄, 𑀲𑀽𑀭𑀺𑀬𑀕𑁆𑀕𑀸𑀳𑁄, 𑀦𑀓𑁆𑀔𑀢𑁆𑀢𑀕𑁆𑀕𑀸𑀳𑁄.

𑀕𑀳 𑀕𑀳𑀡𑁂. 𑀕𑀳𑀢𑀺, 𑀧𑀕𑁆𑀕𑀳𑀢𑀺. 𑀆𑀳𑀼𑀢𑀺𑀁𑀧𑀕𑁆𑀕𑀳𑀺𑀲𑁆𑀲𑀸𑀫𑀺. 𑀧𑀕𑁆𑀕𑀳𑁄, 𑀧𑀕𑁆𑀕𑀸𑀳𑁄.

𑀧𑀕𑁆𑀕𑀳𑁄𑀢𑀺 𑀧𑀢𑁆𑀢𑁄. 𑀧𑀕𑁆𑀕𑀸𑀳𑁄𑀢𑀺 𑀯𑀻𑀭𑀺𑀬𑀁.

𑀲𑀳 𑀧𑀭𑀺𑀲𑀳𑀦𑁂. 𑀧𑀭𑀺𑀲𑀳𑀦𑀁 𑀔𑀦𑁆𑀢𑀺. 𑀲𑀳𑀢𑀺. 𑀲𑀳𑁄, 𑀅𑀲𑀳𑁄, 𑀅𑀲𑀬𑁆𑀳𑁄.

𑀭𑀼𑀳 𑀘𑀫𑁆𑀫𑀦𑀺 𑀧𑀸𑀢𑀼𑀪𑀸𑀯𑁂. 𑀭𑀼𑀳𑀢𑀺. 𑀭𑀼𑀓𑁆𑀔𑁄.

𑀫𑀸𑀢𑀼 𑀫𑀸𑀦𑁂. 𑀫𑀸𑀳𑀢𑀺.

𑀕𑀼𑀳𑀽 𑀲𑀁𑀯𑀭𑀡𑁂. 𑀕𑀼𑀳𑀢𑀺 𑀦𑀺𑀕𑁆𑀕𑀼𑀳𑀢𑀺. 𑀕𑀼𑀳𑁄, 𑀕𑀼𑀬𑁆𑀳𑀓𑁄.

𑀯𑀳 𑀧𑀸𑀧𑀼𑀡𑁂. 𑀯𑀳𑀢𑀺. 𑀯𑀸𑀭𑀺𑀯𑀳𑁄.

𑀤𑀼𑀳 𑀧𑀧𑀽𑀭𑀡𑁂. 𑀤𑀼𑀳𑀢𑀺, 𑀤𑁄𑀳𑀢𑀺. 𑀤𑀼𑀬𑁆𑀳𑀫𑀸𑀦𑀸 𑀕𑀸𑀯𑀻.

𑀤𑀺𑀳 𑀉𑀧𑀘𑀬𑁂. 𑀤𑁂𑀳𑀢𑀺. 𑀤𑁂𑀳𑁄. 𑀤𑁂𑀳𑁄𑀢𑀺 𑀲𑀭𑀻𑀭𑀁.

𑀮𑀺𑀳 ¶ 𑀅𑀲𑁆𑀲𑀸𑀤𑀦𑁂. 𑀮𑁂𑀳𑀢𑀺, 𑀧𑀮𑁂𑀳𑀢𑀺. 𑀮𑁂𑀳𑀦𑀻𑀬𑀁. 𑀅𑀢𑁆𑀭𑀸𑀬𑀁 𑀧𑀸𑀴𑀺 ‘‘𑀲𑀼𑀦𑀔𑀸 𑀳𑀺𑀫𑀲𑁆𑀲 𑀧𑀮𑀺𑀳𑀺𑀁𑀲𑀼 𑀧𑀸𑀤𑁂’’𑀢𑀺. 𑀅𑀬𑀁 𑀧𑀦𑀢𑁆𑀣𑁄 𑁋 𑀲𑀼𑀦𑀔𑀸 𑀇𑀫𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀸𑀤𑀢𑀮𑁂 𑀅𑀢𑁆𑀢𑀦𑁄 𑀚𑀺𑀯𑁆𑀳𑀸𑀬 𑀧𑀮𑀺𑀳𑀺𑀁𑀲𑀽𑀢𑀺.

𑀑𑀳 𑀘𑀸𑀕𑁂. 𑀑𑀳𑀢𑀺. 𑀲𑀩𑁆𑀩𑀫𑀦𑀢𑁆𑀣𑀁 𑀅𑀧𑁄𑀳𑀢𑀺. 𑀅𑀧𑁄𑀳𑁄.

𑀩𑁆𑀭𑀳𑁆𑀫 𑀉𑀕𑁆𑀕𑀫𑁂. 𑀩𑁆𑀭𑀳𑀢𑀺. 𑀩𑁆𑀭𑀳𑀸.

𑀤𑀳 𑀣𑀳 𑀳𑀺𑀁𑀲𑀢𑁆𑀣𑀸. 𑀤𑀳𑀢𑀺. 𑀣𑀳𑀢𑀺.

𑀩𑁆𑀭𑀽𑀳 𑀯𑀟𑁆𑀠𑀦𑁂. 𑀉𑀧𑀭𑀽𑀧𑀭𑀺 𑀩𑁆𑀭𑀽𑀳𑀢𑀻𑀢𑀺 𑀩𑁆𑀭𑀳𑁆𑀫𑀸. 𑀓𑀸𑀭𑀺𑀢𑁂 ‘‘𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀬𑁄𑀕𑁄.

𑀩𑁆𑀭𑀳𑁆𑀫𑀸𑀢𑀺 𑀢𑁂𑀳𑀺 𑀢𑁂𑀳𑀺 𑀕𑀼𑀡𑀯𑀺𑀲𑁂𑀲𑁂𑀳𑀺 𑀩𑁆𑀭𑀽𑀳𑀺𑀢𑁄𑀢𑀺 𑀩𑁆𑀭𑀳𑁆𑀫𑀸. 𑀩𑁆𑀭𑀳𑁆𑀫𑀸𑀢𑀺 𑀫𑀳𑀸𑀩𑁆𑀭𑀳𑁆𑀫𑀸𑀧𑀺 𑀯𑀼𑀘𑁆𑀘𑀢𑀺 𑀢𑀣𑀸𑀕𑀢𑁄𑀧𑀺 𑀩𑁆𑀭𑀸𑀳𑁆𑀫𑀡𑁄𑀧𑀺 𑀫𑀸𑀢𑀸𑀧𑀺𑀢𑀭𑁄𑀧𑀺 𑀲𑁂𑀝𑁆𑀞𑀫𑁆𑀧𑀺. ‘‘𑀲𑀳𑀲𑁆𑀲𑁄 𑀩𑁆𑀭𑀳𑁆𑀫𑀸 𑀤𑁆𑀯𑀺𑀲𑀳𑀲𑁆𑀲𑁄 𑀩𑁆𑀭𑀳𑁆𑀫𑀸’’𑀢𑀺𑀆𑀤𑀻𑀲𑀼 𑀳𑀺 𑀫𑀳𑀸𑀩𑁆𑀭𑀳𑁆𑀫𑀸 ‘‘𑀩𑁆𑀭𑀳𑁆𑀫𑀸’’𑀢𑀺 𑀯𑀼𑀘𑁆𑀘𑀢𑀺. ‘‘𑀩𑁆𑀭𑀳𑁆𑀫𑀸𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀏𑀢𑁆𑀣 𑀢𑀣𑀸𑀕𑀢𑁄.

‘‘𑀢𑀫𑁄𑀦𑀼𑀤𑁄 𑀩𑀼𑀤𑁆𑀥𑁄 𑀲𑀫𑀦𑁆𑀢𑀘𑀓𑁆𑀔𑀼,

𑀮𑁄𑀓𑀦𑁆𑀢𑀕𑀽 𑀲𑀩𑁆𑀩𑀪𑀯𑀸𑀢𑀺𑀯𑀢𑁆𑀢𑁄;

𑀅𑀦𑀸𑀲𑀯𑁄 𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀳𑀻𑀦𑁄,

𑀲𑀘𑁆𑀘𑀯𑁆𑀳𑀬𑁄 𑀩𑁆𑀭𑀳𑁆𑀫𑁂 𑀉𑀧𑀸𑀲𑀺𑀢𑁄 𑀫𑁂’’𑀢𑀺

𑀏𑀢𑁆𑀣 𑀩𑁆𑀭𑀸𑀳𑁆𑀫𑀡𑁄. ‘‘𑀩𑁆𑀭𑀳𑁆𑀫𑀸𑀢𑀺 𑀫𑀸𑀢𑀸𑀧𑀺𑀢𑀭𑁄, 𑀧𑀼𑀩𑁆𑀩𑀸𑀘𑀭𑀺𑀬𑀸𑀢𑀺 𑀯𑀼𑀘𑁆𑀘𑀭𑁂’’𑀢𑀺 𑀏𑀢𑁆𑀣 𑀫𑀸𑀢𑀸𑀧𑀺𑀢𑀭𑁄. ‘‘𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀻’’𑀢𑀺 𑀏𑀢𑁆𑀣 𑀲𑁂𑀝𑁆𑀞𑀁. 𑀏𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀫𑀳𑀸𑀩𑁆𑀭𑀳𑁆𑀫𑀦𑀺 ¶ 𑀯𑀺𑀧𑁆𑀧𑁂 𑀘, 𑀅𑀣𑁄 𑀫𑀸𑀢𑀸𑀧𑀺𑀢𑀽𑀲𑀼 𑀘;

𑀢𑀣𑀸𑀕𑀢𑁂 𑀘 𑀲𑁂𑀝𑁆𑀞𑁂 𑀘, 𑀩𑁆𑀭𑀳𑁆𑀫𑀲𑀤𑁆𑀤𑁄 𑀧𑀯𑀢𑁆𑀢𑀢𑀻’’𑀢𑀺.

𑀅𑀧𑀭𑁄 𑀦𑀬𑁄 𑁋 𑀩𑁆𑀭𑀳𑁆𑀫𑀸𑀢𑀺 𑀢𑀺𑀯𑀺𑀥𑀸 𑀩𑁆𑀭𑀳𑁆𑀫𑀸𑀦𑁄 𑀲𑀫𑁆𑀫𑀼𑀢𑀺𑀩𑁆𑀭𑀳𑁆𑀫𑀸𑀦𑁄 𑀉𑀧𑀧𑀢𑁆𑀢𑀺𑀩𑁆𑀭𑀳𑁆𑀫𑀸𑀦𑁄 𑀯𑀺𑀲𑀼𑀤𑁆𑀥𑀺𑀩𑁆𑀭𑀳𑁆𑀫𑀸𑀦𑁄𑀢𑀺.

‘‘𑀲𑀫𑁆𑀧𑀦𑁆𑀦𑀁 𑀲𑀸𑀮𑀺𑀓𑁂𑀤𑀸𑀭𑀁, 𑀲𑀼𑀯𑀸 𑀪𑀼𑀜𑁆𑀚𑀦𑁆𑀢𑀺 𑀓𑁄𑀲𑀺𑀬;

𑀧𑀝𑀺𑀯𑁂𑀤𑁂𑀫𑀺 𑀢𑁂 𑀩𑁆𑀭𑀳𑁆𑀫𑁂, 𑀦 𑀦𑁂 𑀯𑀸𑀭𑁂𑀢𑀼𑀫𑀼𑀲𑁆𑀲𑀳𑁂,

𑀧𑀭𑀺𑀩𑁆𑀩𑀚 𑀫𑀳𑀸𑀩𑁆𑀭𑀳𑁆𑀫𑁂, 𑀧𑀘𑀦𑁆𑀢𑀜𑁆𑀜𑁂𑀧𑀺 𑀧𑀸𑀡𑀺𑀦𑁄’’𑀢𑀺 𑀘

𑀏𑀯𑀫𑀸𑀤𑀻𑀲𑀼 𑀳𑀺 𑀩𑁆𑀭𑀳𑁆𑀫𑀲𑀤𑁆𑀤𑁂𑀦 𑀲𑀫𑁆𑀫𑀼𑀢𑀺𑀩𑁆𑀭𑀳𑁆𑀫𑀸𑀦𑁄 𑀯𑀼𑀢𑁆𑀢𑀸.

‘‘𑀅𑀧𑀸𑀭𑀼𑀢𑀸 𑀢𑁂𑀲𑀁 𑀅𑀫𑀢𑀲𑁆𑀲 𑀤𑁆𑀯𑀸𑀭𑀸,

𑀬𑁂 𑀲𑁄𑀢𑀯𑀦𑁆𑀢𑁄 𑀧𑀫𑀼𑀜𑁆𑀘𑀦𑁆𑀢𑀼 𑀲𑀤𑁆𑀥𑀁;

𑀯𑀺𑀳𑀺𑀁𑀲𑀲𑀜𑁆𑀜𑀻 𑀧𑀕𑀼𑀡𑀁 𑀦 𑀪𑀸𑀲𑀺𑀁,

𑀥𑀫𑁆𑀫𑀁 𑀧𑀡𑀻𑀢𑀁 𑀫𑀦𑀼𑀚𑁂𑀲𑀼 𑀩𑁆𑀭𑀳𑁆𑀫𑁂,

𑀅𑀣 𑀔𑁄 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀻’’𑀢𑀺 𑀘 𑀏𑀯𑀫𑀸𑀤𑀻𑀲𑀼 𑀩𑁆𑀭𑀳𑁆𑀫𑀲𑀤𑁆𑀤𑁂𑀦 𑀉𑀧𑀧𑀢𑁆𑀢𑀺𑀩𑁆𑀭𑀳𑁆𑀫𑀸. ‘‘𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 𑀩𑁆𑀭𑀳𑁆𑀫𑀦𑁆𑀢𑀺 𑀅𑀭𑀺𑀬𑀥𑀫𑁆𑀫𑁄 𑀯𑀼𑀘𑁆𑀘𑀢𑀺. 𑀢𑀢𑁄 𑀦𑀺𑀩𑁆𑀩𑀢𑁆𑀢𑀸 𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑁂𑀧𑀺 𑀅𑀭𑀺𑀬𑀸 𑀯𑀺𑀲𑀼𑀤𑁆𑀥𑀺𑀩𑁆𑀭𑀳𑁆𑀫𑀸𑀦𑁄 𑀦𑀸𑀫 𑀧𑀭𑀫𑀢𑁆𑀣𑀩𑁆𑀭𑀳𑁆𑀫𑀢𑀸𑀬. 𑀯𑀺𑀲𑁂𑀲𑀢𑁄 𑀧𑀦 ‘‘𑀩𑁆𑀭𑀳𑁆𑀫𑀸𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀯𑀘𑀦𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀉𑀢𑁆𑀢𑀫𑀩𑁆𑀭𑀳𑁆𑀫𑀸 𑀦𑀸𑀫 𑀲𑀤𑁂𑀯𑀓𑁂 𑀮𑁄𑀓𑁂 𑀩𑁆𑀭𑀳𑁆𑀫𑀪𑀽𑀢𑁂𑀳𑀺 𑀕𑀼𑀡𑁂𑀳𑀺 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑀺𑀢𑁄. 𑀏𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀲𑀫𑁆𑀫𑀼𑀢𑀺𑀬𑀼𑀧𑀧𑀢𑁆𑀢𑀻𑀦𑀁, 𑀯𑀺𑀲𑀼𑀤𑁆𑀥𑀻𑀦𑀁 𑀯𑀲𑁂𑀦 𑀘;

𑀩𑁆𑀭𑀳𑁆𑀫𑀸𑀦𑁄 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺, 𑀉𑀢𑁆𑀢𑀫𑁂𑀦 𑀘𑀢𑀼𑀩𑁆𑀩𑀺𑀥𑀸’’𑀢𑀺.

𑀥𑀺𑀫𑁆𑀳 ¶ 𑀦𑀺𑀝𑁆𑀞𑀼𑀪𑀦𑁂. 𑀥𑀺𑀫𑁆𑀳𑁂𑀢𑀺. ‘‘𑀧𑀝𑀺𑀯𑀸𑀫𑀕𑀢𑀁 𑀲𑀮𑁆𑀮𑀁, 𑀧𑀲𑁆𑀲 𑀥𑀺𑀫𑁆𑀳𑀸𑀫𑀺 𑀮𑁄𑀳𑀺𑀢’’𑀦𑁆𑀢𑀺 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁.

𑀢𑀢𑁆𑀣 𑀥𑀺𑀫𑁆𑀳𑀸𑀫𑀻𑀢𑀺 𑀦𑀺𑀝𑁆𑀞𑀼𑀪𑀸𑀫𑀻𑀢𑀺 𑀅𑀢𑁆𑀣𑁄.

𑀳𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀴𑀓𑀸𑀭𑀦𑁆𑀢𑀥𑀸𑀢𑀼

𑀩𑀺𑀴 𑀅𑀓𑁆𑀓𑁄𑀲𑁂. 𑀩𑁂𑀴𑀢𑀺. 𑀩𑀺𑀴𑀸𑀭𑁄.

𑀓𑀻𑀴 𑀯𑀺𑀳𑀸𑀭𑁂. 𑀓𑀻𑀴𑀢𑀺. 𑀓𑀻𑀴𑀸.

𑀅𑀴 𑀉𑀕𑁆𑀕𑀫𑁂. 𑀅𑀴𑀢𑀺. 𑀯𑀸𑀴𑁄.

𑀮𑀴 𑀯𑀺𑀮𑀸𑀲𑁂. 𑀮𑀴𑀢𑀺. 𑀮𑀴𑀺𑀢𑁄 𑀅𑀲𑁆𑀲𑁄.

𑀓𑀴 𑀫𑀤𑁂 𑀓𑀓𑁆𑀓𑀲𑁆𑀲𑁂 𑀘. 𑀓𑀓𑁆𑀓𑀲𑁆𑀲𑀁 𑀓𑀲𑁆𑀲𑀲𑀺𑀬𑀁 𑀨𑀭𑀼𑀲𑀪𑀸𑀯𑁄. 𑀓𑀴𑀢𑀺.

𑀢𑀼𑀴 𑀢𑁄𑀴𑀦𑁂. 𑀢𑁄𑀴𑀢𑀺.

𑀳𑀼𑀴 𑀳𑁄𑀴 𑀕𑀢𑀺𑀬𑀁. 𑀳𑀼𑀴𑀢𑀺. 𑀳𑁄𑀴𑀢𑀺.

𑀭𑁄𑀴 𑀅𑀦𑀸𑀤𑀭𑁂. 𑀭𑁄𑀴𑀢𑀺.

𑀮𑁄𑀴 𑀉𑀫𑁆𑀫𑀸𑀤𑁂. 𑀮𑁄𑀬𑀢𑀺.

𑀳𑁂𑀴 𑀳𑁄𑀴 𑀅𑀦𑀸𑀤𑀭𑁂. 𑀳𑁂𑀴𑀢𑀺. 𑀳𑁄𑀴𑀢𑀺.

𑀯𑀸𑀴 𑀆𑀮𑀧𑁂. 𑀯𑀸𑀴𑀢𑀺.

𑀤𑀸𑀴 𑀥𑀸𑀴 𑀯𑀺𑀲𑀭𑀡𑁂. 𑀤𑀸𑀴𑀢𑀺. 𑀥𑀸𑀴𑀢𑀺.

𑀳𑀴 𑀲𑀺𑀮𑀸𑀖𑀸𑀬𑀁. 𑀳𑀴𑀢𑀺.

𑀳𑀻𑀴 𑀅𑀦𑀸𑀤𑀭𑁂. 𑀳𑀻𑀴𑀢𑀺. 𑀳𑀻𑀴𑀸, 𑀳𑀻𑀴𑀺𑀓𑁄, 𑀳𑀻𑀴𑀺𑀢𑁄.

𑀓𑀴 ¶ 𑀲𑁂𑀘𑀦𑁂. 𑀓𑀴𑀢𑀺. 𑀓𑀴𑀦𑀁.

𑀳𑁂𑀴 𑀯𑁂𑀞𑀦𑁂. 𑀳𑁂𑀴𑀢𑀺.

𑀈𑀴 𑀣𑀼𑀢𑀺𑀬𑀁. 𑀈𑀴𑀢𑀺.

𑀚𑀼𑀴 𑀕𑀢𑀺𑀬𑀁. 𑀚𑀼𑀴𑀢𑀺, 𑀚𑁄𑀴𑀢𑀺.

𑀧𑀼𑀴 𑀫𑀼𑀴 𑀲𑀼𑀔𑀦𑁂. 𑀧𑀼𑀴𑀢𑀺. 𑀫𑀼𑀴𑀢𑀺.

𑀕𑀼𑀴 𑀭𑀓𑁆𑀔𑀸𑀬𑀁. 𑀕𑀼𑀴𑀢𑀺. 𑀕𑀼𑀴𑁄.

𑀚𑀼𑀴 𑀩𑀦𑁆𑀥𑀦𑁂. 𑀚𑀼𑀴𑀢𑀺.

𑀓𑀼𑀴 𑀖𑀲𑀦𑁂. 𑀓𑀼𑀴𑀢𑀺.

𑀔𑀼𑀴 𑀩𑀸𑀮𑁆𑀬𑁂 𑀘. 𑀘𑀓𑀸𑀭𑁄 𑀖𑀲𑀦𑀸𑀧𑁂𑀓𑁆𑀔𑀓𑁄. 𑀔𑀼𑀴𑀢𑀺.

𑀲𑀼𑀴 𑀩𑀼𑀴 𑀲𑀁𑀯𑀭𑀡𑁂. 𑀲𑀼𑀴𑀢𑀺. 𑀩𑀼𑀴𑀢𑀺.

𑀧𑀼𑀴 𑀲𑀗𑁆𑀖𑀸𑀢𑁂. 𑀧𑀼𑀴𑀢𑀺. 𑀧𑀼𑀴𑀺𑀦𑀁.

𑀲𑀴 𑀅𑀩𑁆𑀬𑀢𑁆𑀢𑀲𑀤𑁆𑀤𑁂. 𑀲𑀴𑀢𑀺. 𑀲𑀸𑀴𑀺𑀓𑁄, 𑀲𑀸𑀴𑀺𑀓𑀸.

‘‘𑀉𑀲𑀪𑁄𑀯 𑀫𑀳𑀻 𑀦𑀤𑀢𑀺,

𑀫𑀺𑀕𑀭𑀸𑀚𑀸𑀯 𑀓𑀽𑀚𑀢𑀺;

𑀲𑀼𑀲𑀼𑀫𑀸𑀭𑁄𑀯 𑀲𑀴𑀢𑀺,

𑀓𑀺𑀁 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀺𑀤𑀲𑁆𑀲𑀦𑀁;

𑀇𑀫𑀸𑀦𑀺 𑀴𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀇𑀢𑀺 𑀪𑀽𑀯𑀸𑀤𑀺𑀕𑀡𑁂 𑀅𑀯𑀕𑁆𑀕𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺 𑀲𑀫𑀢𑁆𑀢𑀸𑀦𑀺. 𑀏𑀢𑁆𑀢𑀸𑀯𑀢𑀸 𑀲𑀩𑁆𑀩𑀸𑀧𑀺 𑀪𑀽𑀯𑀸𑀤𑀺𑀕𑀡𑁂 𑀥𑀸𑀢𑀼𑀬𑁄 𑀧𑀓𑀸𑀲𑀺𑀢𑀸.

𑀇𑀤𑀸𑀦𑀺 𑀪𑀽𑀯𑀸𑀤𑀺𑀕𑀡𑀺𑀓𑀥𑀸𑀢𑀽𑀦𑀁𑀬𑁂𑀯 𑀓𑀸𑀘𑀺 𑀅𑀲𑀫𑀸𑀦𑀲𑀼𑀢𑀺𑀓𑀸, 𑀓𑀸𑀘𑀺 𑀅𑀲𑀫𑀸𑀦𑀦𑁆𑀢𑀺𑀓𑀸. 𑀢𑀸𑀲𑀼 𑀓𑀸𑀘𑀺 𑀲𑀫𑀸𑀦𑀢𑁆𑀣𑀯𑀲𑁂𑀦 𑀲𑀫𑁄𑀥𑀸𑀦𑁂𑀢𑁆𑀯𑀸 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀸, 𑀢𑀸𑀬𑁂𑀯 𑀥𑀸𑀢𑀼𑀬𑁄 𑀏𑀓𑀤𑁂𑀲𑁂𑀦 𑀭𑀽𑀧𑀯𑀺𑀪𑀸𑀯𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀧𑀓𑀸𑀲𑀬𑀺𑀲𑁆𑀲𑀸𑀫. 𑀢𑀁 𑀬𑀣𑀸?

𑀳𑀽 ¶ 𑀪𑀽 𑀲𑀢𑁆𑀢𑀸𑀬𑀁 𑀳𑁄𑀢𑀺, 𑀪𑀯𑀢𑀺. 𑀧𑀳𑁄𑀢𑀺, 𑀧𑀪𑀯𑀢𑀺. 𑀳𑀼𑀯𑁂𑀬𑁆𑀬 𑀧𑀸𑀯𑀼𑀲𑁄. 𑀲𑀘𑁂 𑀉𑀧𑁆𑀧𑀸𑀤𑁄 𑀳𑁂𑀬𑁆𑀬. 𑀅𑀚𑁂𑀲𑀺 𑀬𑀓𑁆𑀔𑁄 𑀦𑀭𑀯𑀻𑀭𑀲𑁂𑀝𑁆𑀞𑀁, 𑀢𑀢𑁆𑀣𑀧𑁆𑀧𑀦𑀸𑀤𑁄 𑀢𑀼𑀫𑀼𑀮𑁄 𑀩𑀳𑀽𑀯. 𑀅𑀫𑁆𑀩𑀸’𑀬𑀁 𑀅𑀳𑀼𑀯𑀸 𑀧𑀼𑀭𑁂. 𑀅𑀳𑀼 𑀭𑀸𑀚𑀸 𑀯𑀺𑀤𑁂𑀳𑀸𑀦𑀁. 𑀧𑀳𑀽𑀢𑀁 𑀫𑁂 𑀥𑀦𑀁 𑀲𑀓𑁆𑀓. 𑀧𑀳𑀽𑀢𑀫𑀭𑀺𑀬𑁄 𑀧𑀓𑀭𑁄𑀢𑀺 𑀧𑀼𑀜𑁆𑀜𑀁. 𑀧𑀳𑀽𑀢𑀯𑀺𑀢𑁆𑀢𑁄 𑀧𑀼𑀭𑀺𑀲𑁄. 𑀧𑀳𑀽𑀢𑀚𑀺𑀯𑁆𑀳𑁄 𑀪𑀕𑀯𑀸. 𑀧𑀺𑀬𑀧𑁆𑀧𑀪𑀽𑀢𑀸 𑀓𑀮𑀳𑀸 𑀯𑀺𑀯𑀸𑀤𑀸. 𑀧𑀘𑁆𑀙𑀸𑀲𑀫𑀡𑁂𑀦 𑀳𑁄𑀢𑀩𑁆𑀩𑀁. 𑀪𑀯𑀺𑀢𑀩𑁆𑀩𑀁. 𑀳𑁄𑀢𑀼𑀁, 𑀳𑁂𑀢𑀼𑀬𑁂, 𑀪𑀯𑀺𑀢𑀼𑀁. 𑀳𑀼𑀢𑁆𑀯𑀸, 𑀳𑀼𑀢𑁆𑀯𑀸𑀦. 𑀪𑀯𑀺𑀢𑁆𑀯𑀸, 𑀪𑀯𑀺𑀢𑁆𑀯𑀸𑀦.

𑀏𑀢𑁆𑀣 𑀧𑀦 ‘‘𑀅𑀢𑁆𑀣𑀺 𑀳𑁂𑀳𑀺𑀢𑀺 𑀲𑁄 𑀫𑀕𑁆𑀕𑁄, 𑀦 𑀲𑁄 𑀲𑀓𑁆𑀓𑀸 𑀦 𑀳𑁂𑀢𑀼𑀬𑁂’’𑀢𑀺 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. 𑀢𑀢𑁆𑀣 𑀦𑀳𑁂𑀢𑀼𑀬𑁂𑀢𑀺 𑀅𑀪𑀯𑀺𑀢𑀼𑀁. 𑀳𑀽𑀥𑀸𑀢𑀼𑀢𑁄 𑀢𑀼𑀁𑀧𑀘𑁆𑀘𑀬𑀲𑁆𑀲 𑀢𑀯𑁂𑀧𑀘𑁆𑀘𑀬𑀲𑁆𑀲 𑀯𑀸 𑀢𑀼𑀬𑁂 𑀆𑀤𑁂𑀲𑁄, 𑀊𑀓𑀸𑀭𑀲𑁆𑀲 𑀘 𑀏𑀓𑀸𑀭𑀸𑀤𑁂𑀲𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀳𑁂𑀢𑀼𑀪𑀸𑀯𑀸𑀬 𑀦 𑀦 𑀲𑀓𑁆𑀓𑀸𑀢𑀺𑀧𑀺 𑀅𑀢𑁆𑀣𑁄. 𑀅𑀬𑀁 𑀧𑀦𑀢𑁆𑀣𑁄 𑀇𑀥 𑀦𑀸𑀥𑀺𑀧𑁆𑀧𑁂𑀢𑁄, 𑀧𑀼𑀭𑀺𑀫𑁄𑀬𑁂𑀯𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄 𑀳𑁄𑀢𑀺𑀲𑁆𑀲 𑀥𑀸𑀢𑀼𑀦𑁄 𑀧𑀬𑁄𑀕𑀪𑀸𑀯𑀸𑀬 𑀉𑀤𑀸𑀳𑀭𑀺𑀢𑀧𑀤𑀲𑁆𑀲𑀢𑁆𑀣𑀪𑀸𑀯𑀢𑁄. 𑀢𑀢𑁆𑀣 𑀧𑀳𑁄𑀢𑀻𑀢𑀺 𑀇𑀤𑀁 𑀯𑀢𑁆𑀣𑀁 𑀯𑀺𑀧𑀼𑀮𑀪𑀸𑀯𑁂𑀦 𑀘𑀻𑀯𑀭𑀁 𑀓𑀸𑀢𑀼𑀁 𑀧𑀳𑁄𑀢𑀺, 𑀦𑁄 𑀦𑀧𑁆𑀧𑀳𑁄𑀢𑀺. 𑀧𑀳𑁄𑀢𑀻𑀢𑀺 𑀯𑀸 𑀧𑀼𑀭𑀺𑀲𑁄 𑀅𑀭𑀬𑁄 𑀚𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀅𑀣 𑀯𑀸 𑀧𑀳𑁄𑀢𑀻𑀢𑀺 𑀳𑁄𑀢𑀺. 𑀧𑀪𑀯𑀢𑀻𑀢𑀺 𑀲𑀦𑁆𑀤𑀢𑀺. 𑀧𑀳𑀽𑀢𑀦𑁆𑀢𑀺 𑀯𑀺𑀧𑀼𑀮𑀁, 𑀫𑀳𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀳𑀽𑀢𑀯𑀺𑀢𑁆𑀢𑁄𑀢𑀺 𑀯𑀺𑀧𑀼𑀮𑀯𑀺𑀢𑁆𑀢𑁄 𑀫𑀳𑀤𑁆𑀥𑀦𑁄. 𑀧𑀳𑀽𑀢𑀚𑀺𑀯𑁆𑀳𑁄𑀢𑀺 𑀲𑀼𑀧𑀼𑀣𑀼𑀮𑀲𑀼𑀤𑀻𑀖𑀲𑀼𑀫𑀼𑀤𑀼𑀓𑀚𑀺𑀯𑁆𑀳𑁄, 𑀧𑀺𑀬𑀧𑁆𑀧𑀪𑀽𑀢𑀸𑀢𑀺 𑀧𑀺𑀬𑀢𑁄 𑀦𑀺𑀩𑁆𑀩𑀢𑁆𑀢𑀸.

𑀕𑀫𑀼 𑀲𑀧𑁆𑀧 𑀕𑀢𑀺𑀬𑀁. 𑀕𑀘𑁆𑀙𑀢𑀺, 𑀕𑀫𑀢𑀺, 𑀖𑀫𑁆𑀫𑀢𑀺, 𑀆𑀕𑀘𑁆𑀙𑀢𑀺, 𑀉𑀕𑁆𑀕𑀘𑁆𑀙𑀢𑀺, 𑀅𑀢𑀺𑀕𑀘𑁆𑀙𑀢𑀺, 𑀧𑀝𑀺𑀕𑀘𑁆𑀙𑀢𑀺, 𑀅𑀯𑀕𑀘𑁆𑀙𑀢𑀺, 𑀅𑀥𑀺𑀕𑀘𑁆𑀙𑀢𑀺, 𑀅𑀦𑀼𑀕𑀘𑁆𑀙𑀢𑀺, 𑀉𑀧𑀕𑀘𑁆𑀙𑀢𑀺, 𑀅𑀧𑀕𑀘𑁆𑀙𑀢𑀺, 𑀯𑀺𑀕𑀘𑁆𑀙𑀢𑀺, 𑀦𑀺𑀕𑀘𑁆𑀙𑀢𑀺, 𑀦𑀺𑀕𑁆𑀕𑀘𑁆𑀙𑀢𑀺. 𑀅𑀜𑁆𑀜𑀸𑀦𑀺𑀧𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. ‘‘𑀲𑀫𑀼𑀕𑁆𑀕𑀘𑁆𑀙𑀢𑀻’’𑀢𑀺𑀆𑀤𑀺𑀦𑀸 𑀉𑀧𑀲𑀕𑁆𑀕𑀤𑁆𑀯𑀬𑀯𑀲𑁂𑀦𑀧𑀺 ¶ 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀲𑀧𑁆𑀧𑀢𑀺, 𑀲𑀁𑀲𑀧𑁆𑀧𑀢𑀺, 𑀧𑀭𑀺𑀲𑀧𑁆𑀧𑀢𑀺. 𑀅𑀜𑁆𑀜𑀸𑀦𑀺𑀧𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀢𑀢𑁆𑀣 𑀕𑀫𑀢𑀻𑀢𑀺 𑀕𑀘𑁆𑀙𑀢𑀺. 𑀓𑀸𑀭𑀺𑀢𑁂 ‘‘𑀤𑁂𑀯𑀤𑀢𑁆𑀢𑀁 𑀕𑀫𑁂𑀢𑀺 𑀕𑀫𑀬𑀢𑀻’’𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. ‘‘𑀅𑀧𑀸𑀬𑀁 𑀕𑀫𑁂𑀢𑀻𑀢𑀺 𑀅𑀧𑀸𑀬𑀕𑀫𑀦𑀻𑀬’’𑀦𑁆𑀢𑀺 𑀇𑀤𑀫𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀘𑀼𑀭𑀸𑀤𑀺𑀕𑀡𑀁 𑀧𑀢𑁆𑀢𑀲𑁆𑀲 𑀆𑀧𑀼𑀩𑁆𑀩𑀲𑁆𑀲 𑀇𑀫𑀲𑁆𑀲 ‘‘𑀆𑀕𑀫𑁂𑀢𑀺, 𑀆𑀕𑀫𑀬𑀢𑀺, 𑀆𑀕𑀫𑁂𑀦𑁆𑀢𑁄, 𑀆𑀕𑀫𑀬𑀫𑀸𑀦𑁄’’𑀢𑀺 𑀲𑀼𑀤𑁆𑀥𑀓𑀢𑁆𑀢𑀼𑀭𑀽𑀧𑀸𑀦𑀺 𑀪𑀯𑀦𑁆𑀢𑀺.

𑀢𑀢𑁆𑀣 𑀆𑀕𑀫𑁂𑀢𑀻𑀢𑀺 𑀫𑀼𑀳𑀼𑀢𑁆𑀢𑀁 𑀅𑀥𑀺𑀯𑀸𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀖𑀫𑁆𑀫𑀢𑀻𑀢𑀺 𑀕𑀘𑁆𑀙𑀢𑀺. 𑀆𑀕𑀘𑁆𑀙𑀢𑀻𑀢𑀺 𑀆𑀬𑀸𑀢𑀺. 𑀉𑀕𑁆𑀕𑀘𑁆𑀙𑀢𑀻𑀢𑀺 𑀉𑀬𑁆𑀬𑀸𑀢𑀺 𑀉𑀤𑁆𑀥𑀁 𑀕𑀘𑁆𑀙𑀢𑀺. 𑀅𑀢𑀺𑀕𑀘𑁆𑀙𑀢𑀻𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀧𑀝𑀺𑀕𑀘𑁆𑀙𑀢𑀻𑀢𑀺 𑀧𑀼𑀦 𑀕𑀘𑁆𑀙𑀢𑀺. 𑀅𑀯𑀕𑀘𑁆𑀙𑀢𑀻𑀢𑀺 𑀚𑀸𑀦𑀸𑀢𑀺. 𑀅𑀥𑀺𑀕𑀘𑁆𑀙𑀢𑀻𑀢𑀺 𑀮𑀪𑀢𑀺 𑀚𑀸𑀦𑀸𑀢𑀺 𑀯𑀸. 𑀅𑀦𑀼𑀕𑀘𑁆𑀙𑀢𑀻𑀢𑀺 𑀧𑀘𑁆𑀙𑀢𑁄 𑀕𑀘𑁆𑀙𑀢𑀺. 𑀉𑀧𑀕𑀘𑁆𑀙𑀢𑀻𑀢𑀺 𑀲𑀫𑀻𑀧𑀁 𑀕𑀘𑁆𑀙𑀢𑀺. 𑀅𑀧𑀕𑀘𑁆𑀙𑀢𑀻𑀢𑀺 𑀅𑀧𑁂𑀢𑀺. 𑀯𑀺𑀕𑀘𑁆𑀙𑀢𑀻𑀢𑀺 𑀯𑀺𑀕𑀫𑀢𑀺. 𑀦𑀺𑀕𑀘𑁆𑀙𑀢𑀻𑀢𑀺 𑀮𑀪𑀢𑀺. ‘‘𑀬𑀲𑀁 𑀧𑁄𑀲𑁄 𑀦𑀺𑀕𑀘𑁆𑀙𑀢𑀻’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀁. 𑀦𑀺𑀕𑁆𑀕𑀘𑁆𑀙𑀢𑀻𑀢𑀺 𑀦𑀺𑀓𑁆𑀔𑀫𑀢𑀺. 𑀲𑀧𑁆𑀧𑀢𑀻𑀢𑀺 𑀕𑀘𑁆𑀙𑀢𑀺. 𑀲𑀁𑀲𑀧𑁆𑀧𑀢𑀻𑀢𑀺 𑀲𑀁𑀲𑀭𑀦𑁆𑀢𑁄 𑀕𑀘𑁆𑀙𑀢𑀺. 𑀧𑀭𑀺𑀲𑀧𑁆𑀧𑀢𑀻𑀢𑀺 𑀲𑀫𑀦𑁆𑀢𑀢𑁄 𑀕𑀘𑁆𑀙𑀢𑀺.

𑀇𑀤𑀸𑀦𑀺 𑀧𑀦 𑀯𑀺𑀜𑁆𑀜𑀽𑀦𑀁 𑀲𑀸𑀝𑁆𑀞𑀓𑀣𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀧𑀭𑀫𑀓𑁄𑀲𑀮𑁆𑀮𑀚𑀦𑀦𑀢𑁆𑀣𑀁 𑀲𑀧𑁆𑀧𑀬𑁄𑀕𑀁 𑀧𑀤𑀫𑀸𑀮𑀁 𑀓𑀣𑀬𑀸𑀫. 𑀲𑁂𑀬𑁆𑀬𑀣𑀺𑀤𑀁? 𑀲𑁄 𑀕𑀘𑁆𑀙𑀢𑀺, 𑀢𑁂 𑀕𑀘𑁆𑀙𑀦𑁆𑀢𑀺, 𑀕𑀘𑁆𑀙𑀭𑁂. 𑀢𑁆𑀯𑀁 𑀕𑀘𑁆𑀙𑀲𑀺, 𑀢𑀼𑀫𑁆𑀳𑁂 𑀕𑀘𑁆𑀙𑀣. 𑀅𑀳𑀁 𑀕𑀘𑁆𑀙𑀸𑀫𑀺, 𑀫𑀬𑀁 𑀕𑀘𑁆𑀙𑀸𑀫. 𑀲𑁄 𑀕𑀘𑁆𑀙𑀢𑁂, 𑀢𑁂 𑀕𑀘𑁆𑀙𑀦𑁆𑀢𑁂. 𑀢𑁆𑀯𑀁 𑀕𑀘𑁆𑀙𑀲𑁂, 𑀢𑀼𑀫𑁆𑀳𑁂 𑀕𑀘𑁆𑀙𑀯𑁆𑀳𑁂. 𑀅𑀳𑀁 𑀕𑀘𑁆𑀙𑁂, 𑀫𑀬𑀁 𑀕𑀘𑁆𑀙𑀸𑀫𑁆𑀳𑁂. 𑀯𑀢𑁆𑀢𑀫𑀸𑀦𑀸𑀬 𑀭𑀽𑀧𑀸𑀦𑀺.

𑀲𑁄 𑀕𑀘𑁆𑀙𑀢𑀼, 𑀢𑁂 𑀕𑀘𑁆𑀙𑀦𑁆𑀢𑀼. 𑀢𑁆𑀯𑀁 𑀕𑀘𑁆𑀙𑀸𑀳𑀺, 𑀕𑀘𑁆𑀙, 𑀕𑀘𑁆𑀙𑀲𑁆𑀲𑀼, 𑀢𑀼𑀫𑁆𑀳𑁂 𑀕𑀘𑁆𑀙𑀣. 𑀅𑀳𑀁 𑀕𑀘𑁆𑀙𑀸𑀫𑀺, 𑀫𑀬𑀁 𑀕𑀘𑁆𑀙𑀸𑀫. 𑀲𑁄 𑀕𑀘𑁆𑀙𑀢𑀁, 𑀢𑁂 𑀕𑀘𑁆𑀙𑀦𑁆𑀢𑀁. 𑀢𑁆𑀯𑀁 𑀕𑀘𑁆𑀙𑀲𑁆𑀲𑀼, 𑀢𑀼𑀫𑁆𑀳𑁂 𑀕𑀘𑁆𑀙𑀯𑁆𑀳𑁄. 𑀅𑀳𑀁 𑀕𑀘𑁆𑀙𑁂, 𑀫𑀬𑀁 𑀕𑀘𑁆𑀙𑀸𑀫𑀲𑁂. 𑀧𑀜𑁆𑀘𑀫𑀺𑀬𑀸 𑀭𑀽𑀧𑀸𑀦𑀺.

𑀲𑁄 ¶ 𑀕𑀘𑁆𑀙𑁂𑀬𑁆𑀬, 𑀕𑀘𑁆𑀙𑁂, 𑀢𑁂 𑀕𑀘𑁆𑀙𑁂𑀬𑁆𑀬𑀼𑀁. 𑀢𑁆𑀯𑀁 𑀕𑀘𑁆𑀙𑁂𑀬𑁆𑀬𑀸𑀲𑀺, 𑀢𑀼𑀫𑁆𑀳𑁂 𑀕𑀘𑁆𑀙𑁂𑀬𑁆𑀬𑀸𑀣. 𑀅𑀳𑀁 𑀕𑀘𑁆𑀙𑁂𑀬𑁆𑀬𑀸𑀫𑀺, 𑀫𑀬𑀁 𑀕𑀘𑁆𑀙𑁂𑀬𑁆𑀬𑀸𑀫, 𑀕𑀘𑁆𑀙𑁂𑀫𑀼. 𑀲𑁄 𑀕𑀘𑁆𑀙𑁂𑀣, 𑀢𑁂 𑀕𑀘𑁆𑀙𑁂𑀭𑀁. 𑀢𑁆𑀯𑀁 𑀕𑀘𑁆𑀙𑁂𑀣𑁄, 𑀢𑀼𑀫𑁆𑀳𑁂 𑀕𑀘𑁆𑀙𑁂𑀬𑁆𑀬𑀸𑀯𑁆𑀳𑁄. 𑀅𑀳𑀁 𑀕𑀘𑁆𑀙𑁂𑀬𑁆𑀬𑀁, 𑀫𑀬𑀁 𑀕𑀘𑁆𑀙𑁂𑀬𑁆𑀬𑀸𑀫𑁆𑀳𑁂. 𑀲𑀢𑁆𑀢𑀫𑀺𑀬𑀸 𑀭𑀽𑀧𑀸𑀦𑀺.

𑀲𑁄 𑀕𑀘𑁆𑀙, 𑀢𑁂 𑀕𑀘𑁆𑀙𑀼. 𑀢𑁆𑀯𑀁 𑀕𑀘𑁆𑀙𑁂, 𑀢𑀼𑀫𑁆𑀳𑁂 𑀕𑀘𑁆𑀙𑀺𑀢𑁆𑀣, 𑀕𑀜𑁆𑀙𑀺𑀢𑁆𑀣. 𑀅𑀳𑀁 𑀕𑀘𑁆𑀙𑀁, 𑀫𑀬𑀁 𑀕𑀘𑁆𑀙𑀺𑀫𑁆𑀳, 𑀕𑀜𑁆𑀙𑀺𑀫𑁆𑀳. 𑀲𑁄 𑀕𑀘𑁆𑀙𑀺𑀢𑁆𑀣, 𑀕𑀜𑁆𑀙𑀺𑀢𑁆𑀣, 𑀢𑁂 𑀕𑀘𑁆𑀙𑀺𑀭𑁂. 𑀢𑁆𑀯𑀁 𑀕𑀘𑁆𑀙𑀺𑀢𑁆𑀣𑁄, 𑀢𑀼𑀫𑁆𑀳𑁂 𑀕𑀘𑁆𑀙𑀺𑀯𑁆𑀳𑁄. 𑀅𑀳𑀁 𑀕𑀘𑁆𑀙𑀺𑀁, 𑀕𑀜𑁆𑀙𑀺𑀁, 𑀫𑀬𑀁 𑀕𑀘𑁆𑀙𑀺𑀫𑁆𑀳𑁂. 𑀧𑀭𑁄𑀓𑁆𑀔𑀸𑀬 𑀭𑀽𑀧𑀸𑀦𑀺.

𑀲𑁄 𑀅𑀕𑀘𑁆𑀙𑀸, 𑀢𑁂 𑀅𑀕𑀘𑁆𑀙𑀽. 𑀢𑁆𑀯𑀁 𑀅𑀕𑀘𑁆𑀙𑁂, 𑀢𑀼𑀫𑁆𑀳𑁂 𑀅𑀕𑀘𑁆𑀙𑀣. 𑀅𑀳𑀁 𑀅𑀕𑀘𑁆𑀙𑀁, 𑀫𑀬𑀁 𑀅𑀕𑀘𑁆𑀙𑀫𑁆𑀳𑀸. 𑀲𑁄 𑀅𑀕𑀘𑁆𑀙𑀣, 𑀢𑁂 𑀅𑀕𑀘𑁆𑀙𑀢𑁆𑀣𑀼𑀁. 𑀢𑁆𑀯𑀁 𑀅𑀕𑀘𑁆𑀙𑀲𑁂, 𑀢𑀼𑀫𑁆𑀳𑁂 𑀅𑀕𑀘𑁆𑀙𑀺𑀯𑁆𑀳𑀁. 𑀅𑀳𑀁 𑀅𑀕𑀘𑁆𑀙𑀁, 𑀫𑀬𑀁 𑀅𑀕𑀘𑁆𑀙𑀺𑀫𑁆𑀳𑁂. 𑀅𑀚𑁆𑀚𑀢𑀦𑀺𑀬𑀸 𑀭𑀽𑀧𑀸𑀦𑀺.

𑀲𑁄 𑀕𑀘𑁆𑀙𑀺𑀲𑁆𑀲𑀢𑀺, 𑀢𑁂 𑀕𑀘𑁆𑀙𑀺𑀲𑁆𑀲𑀦𑁆𑀢𑀺. 𑀢𑁆𑀯𑀁 𑀕𑀘𑁆𑀙𑀺𑀲𑁆𑀲𑀲𑀺, 𑀢𑀼𑀫𑁆𑀳𑁂 𑀕𑀘𑁆𑀙𑀺𑀲𑁆𑀲𑀣. 𑀅𑀳𑀁 𑀕𑀘𑁆𑀙𑀺𑀲𑁆𑀲𑀸𑀫𑀺, 𑀫𑀬𑀁 𑀕𑀘𑁆𑀙𑀺𑀲𑁆𑀲𑀸𑀫. 𑀲𑁄 𑀕𑀘𑁆𑀙𑀺𑀲𑁆𑀲𑀢𑁂, 𑀢𑁂 𑀕𑀘𑁆𑀙𑀺𑀲𑁆𑀲𑀦𑁆𑀢𑁂. 𑀢𑁆𑀯𑀁 𑀕𑀘𑁆𑀙𑀺𑀲𑁆𑀲𑀲𑁂, 𑀢𑀼𑀫𑁆𑀳𑁂 𑀕𑀘𑁆𑀙𑀺𑀲𑁆𑀲𑀯𑁆𑀳𑁂. 𑀅𑀳𑀁 𑀕𑀘𑁆𑀙𑀺𑀲𑁆𑀲𑀁, 𑀫𑀬𑀁 𑀕𑀘𑁆𑀙𑀺𑀲𑁆𑀲𑀸𑀫𑁆𑀳𑁂. 𑀪𑀯𑀺𑀲𑁆𑀲𑀦𑁆𑀢𑀺𑀬𑀸 𑀭𑀽𑀧𑀸𑀦𑀺.

𑀲𑁄 𑀅𑀕𑀘𑁆𑀙𑀺𑀲𑁆𑀲𑀸, 𑀢𑁂 𑀅𑀕𑀘𑁆𑀙𑀺𑀲𑁆𑀲𑀁𑀲𑀼. 𑀢𑁆𑀯𑀁 𑀅𑀕𑀘𑁆𑀙𑀺𑀲𑁆𑀲𑁂, 𑀢𑀼𑀫𑁆𑀳𑁂 𑀅𑀕𑀘𑁆𑀙𑀺𑀲𑁆𑀲𑀣. 𑀅𑀳𑀁 𑀅𑀕𑀘𑁆𑀙𑀺𑀲𑁆𑀲𑀁, 𑀫𑀬𑀁 𑀅𑀕𑀘𑁆𑀙𑀺𑀲𑁆𑀲𑀸𑀫𑁆𑀳𑀸. 𑀲𑁄 𑀅𑀕𑀘𑁆𑀙𑀺𑀲𑁆𑀲𑀣, 𑀢𑁂 𑀅𑀕𑀘𑁆𑀙𑀺𑀲𑁆𑀲𑀺𑀲𑀼. 𑀢𑁆𑀯𑀁 𑀅𑀕𑀘𑁆𑀙𑀺𑀲𑁆𑀲𑀲𑁂, 𑀢𑀼𑀫𑁆𑀳𑁂 𑀅𑀕𑀘𑁆𑀙𑀺𑀲𑁆𑀲𑀯𑁆𑀳𑁂. 𑀅𑀳𑀁 𑀅𑀕𑀘𑁆𑀙𑀺𑀲𑁆𑀲𑀁, 𑀫𑀬𑀁 𑀅𑀕𑀘𑁆𑀙𑀺𑀲𑁆𑀲𑀸𑀫𑁆𑀳𑀲𑁂. 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀸 𑀭𑀽𑀧𑀸𑀦𑀺.

𑀢𑀢𑁆𑀣 𑀅𑀚𑁆𑀚𑀢𑀦𑀺𑀬𑀸 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀸 𑀘 𑀅𑀓𑀸𑀭𑀸𑀕𑀫𑀁 𑀲𑀩𑁆𑀩𑁂𑀲𑀼 𑀧𑀼𑀭𑀺𑀲𑁂𑀲𑀼 𑀲𑀩𑁆𑀩𑁂𑀲𑀼 𑀯𑀘𑀦𑁂𑀲𑀼 𑀮𑀩𑁆𑀪𑀫𑀸𑀦𑀫𑁆𑀧𑀺 𑀲𑀸𑀲𑀦𑁂 𑀅𑀦𑀺𑀬𑀢𑀁 𑀳𑀼𑀢𑁆𑀯𑀸 𑀮𑀩𑁆𑀪𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 ‘‘𑀅𑀕𑀘𑁆𑀙𑀺, 𑀕𑀘𑁆𑀙𑀺, 𑀅𑀕𑀘𑁆𑀙𑀺𑀲𑁆𑀲𑀸, 𑀕𑀘𑁆𑀙𑀺𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀤𑁆𑀯𑁂 𑀤𑁆𑀯𑁂 𑀭𑀽𑀧𑀸𑀦𑀺 𑀤𑀺𑀲𑁆𑀲𑀦𑁆𑀢𑀺. 𑀕𑀫𑀢𑀺, 𑀕𑀫𑀦𑁆𑀢𑀺. 𑀕𑀫𑀢𑀼, 𑀕𑀫𑀦𑁆𑀢𑀼. 𑀕𑀫𑁂𑀬𑁆𑀬. 𑀕𑀫𑁂𑀬𑁆𑀬𑀼𑀁. 𑀲𑁂𑀲𑀁 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀇𑀤𑀸𑀦𑀺 ¶ 𑀧𑀭𑁄𑀓𑁆𑀔𑀸𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀲𑀼 𑀯𑀺𑀲𑁂𑀲𑁄 𑀯𑀼𑀘𑁆𑀘𑀢𑁂 𑁋 𑀲𑁄 𑀧𑀼𑀭𑀺𑀲𑁄 𑀫𑀕𑁆𑀕𑀁 𑀕, 𑀲𑀸 𑀇𑀢𑁆𑀣𑀻 𑀖𑀭’𑀫𑀸𑀕. 𑀢𑁂 𑀫𑀕𑁆𑀕𑀁 𑀕𑀼, 𑀢𑀸 𑀖𑀭’𑀫𑀸𑀕𑀼. 𑀏𑀓𑀸𑀭𑀲𑁆𑀲 𑀅𑀓𑀸𑀭𑀸𑀤𑁂𑀲𑀁 𑀢𑁆𑀯𑀁 𑀫𑀕𑁆𑀕𑀁 𑀕, 𑀢𑁆𑀯𑀁 𑀖𑀭’’𑀫𑀸𑀕. 𑀢𑀼𑀫𑁆𑀳𑁂 𑀫𑀕𑁆𑀕𑀁 𑀕𑀼𑀢𑁆𑀣, 𑀢𑀼𑀫𑁆𑀳𑁂 𑀖𑀭’𑀫𑀸𑀕𑀼𑀢𑁆𑀣. 𑀅𑀳𑀁 𑀫𑀕𑁆𑀕𑀁 𑀕𑀁, 𑀅𑀳𑀁 𑀖𑀭’𑀫𑀸𑀕𑀁. 𑀅𑀳𑀁 𑀢𑀁 𑀧𑀼𑀭𑀺𑀲𑀁 𑀅𑀦𑁆𑀯𑀕𑀁, 𑀫𑀬𑀁 𑀫𑀕𑁆𑀕𑀁 𑀕𑀼𑀫𑁆𑀳, 𑀫𑀬𑀁 𑀖𑀭𑀁 𑀆𑀕𑀼𑀫𑁆𑀳, 𑀫𑀬𑀁 𑀢𑀁 𑀧𑀼𑀭𑀺𑀲𑀁 𑀅𑀦𑁆𑀯𑀕𑀼𑀫𑁆𑀳. 𑀅𑀬𑀁 𑀢𑀸𑀯 𑀧𑀭𑁄𑀓𑁆𑀔𑀸𑀬 𑀯𑀺𑀲𑁂𑀲𑁄.

‘‘𑀲𑁄 𑀫𑀕𑁆𑀕𑀁 𑀅𑀕𑀫𑀸, 𑀢𑁂 𑀫𑀕𑁆𑀕𑀁 𑀅𑀕𑀫𑀽’’ 𑀇𑀘𑁆𑀘𑀸𑀤𑀺 𑀳𑀺𑀬𑁆𑀬𑀢𑁆𑀢𑀦𑀺𑀬𑀸 𑀭𑀽𑀧𑀁. ‘‘𑀲𑁄 𑀅𑀕𑀫𑀺, 𑀢𑁂 𑀅𑀕𑀫𑀼𑀁, 𑀢𑁂 𑀕𑀼𑀁’’ 𑀇𑀘𑁆𑀘𑀸𑀤𑀺 𑀅𑀚𑁆𑀚𑀢𑀦𑀺𑀬𑀸 𑀭𑀽𑀧𑀁.

𑀇𑀤𑀸𑀦𑀺 𑀢𑁂𑀲𑀁 𑀧𑀤𑀭𑀽𑀧𑀸𑀦𑀺 𑀧𑀸𑀓𑀝𑀻𑀓𑀭𑀡𑀢𑁆𑀣𑀁 𑀓𑀺𑀜𑁆𑀘𑀺 𑀲𑀼𑀢𑁆𑀢𑀁 𑀓𑀣𑀬𑀸𑀫 𑁋 ‘‘𑀲𑁄𑀧𑀸𑀕𑀸 𑀲𑀫𑀺𑀢𑀺𑀁 𑀯𑀦𑀁. 𑀅𑀣𑁂𑀢𑁆𑀣 𑀧𑀜𑁆𑀘𑀫𑁄 𑀆𑀕𑀸. 𑀆𑀕𑀼𑀁 𑀤𑁂𑀯𑀸 𑀬𑀲𑀲𑁆𑀲𑀺𑀦𑁄. 𑀫𑀸𑀳𑀁 𑀓𑀸𑀓𑁄𑀯 𑀤𑀼𑀫𑁆𑀫𑁂𑀥𑁄, 𑀓𑀸𑀫𑀸𑀦𑀁 𑀯𑀲𑀫𑀦𑁆𑀯𑀕𑀁. 𑀅𑀕𑀫𑀸 𑀭𑀸𑀚𑀕𑀳𑀁 𑀩𑀼𑀤𑁆𑀥𑁄. 𑀯𑀗𑁆𑀓𑀁 𑀅𑀕𑀫𑀼 𑀧𑀩𑁆𑀩𑀢𑀁. 𑀩𑁆𑀭𑀸𑀳𑁆𑀫𑀡𑀸 𑀉𑀧𑀕𑀘𑁆𑀙𑀼 𑀫’’𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀪𑀯𑀦𑁆𑀢𑀺.

𑀕 𑀕𑀼 𑀕 𑀕𑀼𑀢𑁆𑀣 𑀕𑀁 𑀕𑀼𑀫𑁆𑀳, 𑀅𑀕𑀼 𑀅𑀕𑀫𑀼 𑀅𑀕𑀫𑀼𑀁;

𑀅𑀕𑀫𑀸’𑀕𑀫𑀺 𑀕𑀘𑁆𑀙𑀦𑁆𑀢𑀺, 𑀆𑀤𑀺𑀪𑁂𑀤𑀁 𑀫𑀦𑁂 𑀓𑀭𑁂.

𑀇𑀤𑀸𑀦𑀺 𑀦𑀸𑀫𑀺𑀓𑀧𑀤𑀸𑀦𑀺 𑀯𑀼𑀘𑁆𑀘𑀦𑁆𑀢𑁂 𑁋 𑀕𑀢𑁄, 𑀕𑀦𑁆𑀢𑀸, 𑀕𑀘𑁆𑀙𑀁, 𑀕𑀘𑁆𑀙𑀦𑁆𑀢𑀻, 𑀕𑀘𑁆𑀙𑀦𑁆𑀢𑀁 𑀓𑀼𑀮𑀁, 𑀲𑀳𑀕𑀢𑀁, 𑀕𑀢𑀺, 𑀕𑀫𑀦𑀁, 𑀕𑀫𑁄, 𑀆𑀕𑀫𑁄, 𑀅𑀯𑀕𑀫𑁄, 𑀕𑀦𑁆𑀢𑀩𑁆𑀩𑀁, 𑀕𑀫𑀦𑀻𑀬𑀁, 𑀕𑀫𑁆𑀫𑀁, 𑀕𑀫𑁆𑀫𑀫𑀸𑀦𑀁, 𑀕𑀫𑀺𑀬𑀫𑀸𑀦𑀁, 𑀕𑁄, 𑀫𑀸𑀢𑀼𑀕𑀸𑀫𑁄, 𑀳𑀺𑀗𑁆𑀕𑀼, 𑀚𑀕𑀼, 𑀇𑀦𑁆𑀤𑀕𑀽, 𑀫𑁂𑀥𑀕𑁄 𑀇𑀘𑁆𑀘𑀸𑀤𑀻𑀦𑀺, 𑀓𑀸𑀭𑀺𑀢𑁂 𑁋 𑀕𑀘𑁆𑀙𑀸𑀧𑁂𑀢𑀺, 𑀕𑀘𑁆𑀙𑀸𑀧𑀬𑀢𑀺, 𑀕𑀘𑁆𑀙𑁂𑀢𑀺, 𑀕𑀘𑁆𑀙𑀬𑀢𑀺, 𑀕𑀫𑁆𑀫𑁂𑀢𑀺. 𑀓𑀫𑁆𑀫𑁂 𑁋 𑀕𑀫𑁆𑀫𑀢𑀺, 𑀕𑀫𑀺𑀬𑀢𑀺, 𑀅𑀥𑀺𑀕𑀫𑁆𑀫𑀢𑀺, 𑀅𑀥𑀺𑀕𑀫𑀺𑀬𑀢𑀺. 𑀢𑀼𑀫𑀦𑁆𑀢𑀸𑀤𑀺𑀢𑁆𑀢𑁂 ‘‘𑀕𑀦𑁆𑀢𑀼𑀁, 𑀕𑀫𑀺𑀢𑀼𑀁, 𑀕𑀦𑁆𑀢𑁆𑀯𑀸, 𑀕𑀦𑁆𑀢𑁆𑀯𑀸𑀦, 𑀕𑀫𑀺𑀢𑁆𑀯𑀸, 𑀕𑀫𑀺𑀢𑁆𑀯𑀸𑀦, 𑀕𑀫𑀺𑀬, 𑀕𑀫𑀺𑀬𑀸𑀦, 𑀕𑀫𑁆𑀫, 𑀆𑀕𑀫𑁆𑀫, 𑀆𑀕𑀦𑁆𑀢𑁆𑀯𑀸, 𑀅𑀥𑀺𑀕𑀫𑁆𑀫, 𑀅𑀥𑀺𑀕𑀦𑁆𑀢𑁆𑀯𑀸’’ 𑀇𑀘𑁆𑀘𑀸𑀤𑀻𑀦𑀺 ¶ . 𑀲𑀧𑁆𑀧𑀥𑀸𑀢𑀼𑀲𑁆𑀲 𑀧𑀦 ‘‘𑀲𑀧𑁆𑀧𑁄, 𑀲𑀧𑁆𑀧𑀺𑀦𑀻, 𑀧𑀻𑀞𑀲𑀧𑁆𑀧𑀻, 𑀲𑀧𑁆𑀧𑀺’’ 𑀇𑀘𑁆𑀘𑀸𑀤𑀻𑀦𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺.

𑀢𑀢𑁆𑀣 𑀲𑀳𑀕𑀢𑀲𑀤𑁆𑀤𑁄 𑀢𑀩𑁆𑀪𑀸𑀯𑁂 𑀯𑁄𑀓𑀺𑀡𑁆𑀡𑁂 𑀦𑀺𑀲𑁆𑀲𑀬𑁂 𑀆𑀭𑀫𑁆𑀫𑀡𑁂 𑀲𑀁𑀲𑀝𑁆𑀞𑁂𑀢𑀺 𑀇𑀫𑁂𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀢𑁆𑀣 ‘‘𑀬𑀸𑀬𑀁 𑀢𑀡𑁆𑀳𑀸 𑀧𑁄𑀦𑁄𑀩𑁆𑀪𑀯𑀺𑀓𑀸 𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸’’𑀢𑀺 𑀢𑀩𑁆𑀪𑀸𑀯𑁂 𑀯𑁂𑀤𑀺𑀢𑀩𑁆𑀩𑁄, 𑀦𑀦𑁆𑀤𑀺𑀭𑀸𑀕𑀪𑀽𑀢𑀸𑀢𑀺 𑀅𑀢𑁆𑀣𑁄. ‘‘𑀬𑀸𑀬𑀁 𑀪𑀺𑀓𑁆𑀔𑀯𑁂 𑀯𑀻𑀫𑀁𑀲𑀸 𑀓𑁄𑀲𑀚𑁆𑀚𑀲𑀳𑀕𑀢𑀸 𑀓𑁄𑀲𑀚𑁆𑀚𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀯𑁄𑀓𑀺𑀡𑁆𑀡𑁂 𑀯𑁂𑀤𑀺𑀢𑀩𑁆𑀩𑁄, 𑀅𑀦𑁆𑀢𑀭𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀓𑁄𑀲𑀚𑁆𑀚𑁂𑀦 𑀯𑁄𑀓𑀺𑀡𑁆𑀡𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. ‘‘𑀅𑀝𑁆𑀞𑀺𑀓𑀲𑀜𑁆𑀜𑀸𑀲𑀳𑀕𑀢𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀻’’𑀢𑀺 𑀦𑀺𑀲𑁆𑀲𑀬𑁂 𑀯𑁂𑀤𑀺𑀢𑀩𑁆𑀩𑁄, 𑀅𑀝𑁆𑀞𑀺𑀓𑀲𑀜𑁆𑀜𑀁 𑀦𑀺𑀲𑁆𑀲𑀸𑀬 𑀅𑀝𑁆𑀞𑀺𑀓𑀲𑀜𑁆𑀜𑀁 𑀪𑀸𑀯𑁂𑀢𑁆𑀯𑀸 𑀧𑀝𑀺𑀮𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. ‘‘𑀮𑀸𑀪𑀻 𑀳𑁄𑀢𑀺 𑀭𑀽𑀧𑀲𑀳𑀕𑀢𑀸𑀦𑀁 𑀯𑀸 𑀲𑀫𑀸𑀧𑀢𑁆𑀢𑀻𑀦𑀁 𑀅𑀭𑀽𑀧𑀲𑀳𑀕𑀢𑀸𑀦𑀁 𑀯𑀸’’𑀢𑀺 𑀆𑀭𑀫𑁆𑀫𑀡𑁂, 𑀭𑀽𑀧𑀸𑀭𑀽𑀧𑀸𑀭𑀫𑁆𑀫𑀡𑀸𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀇𑀤𑀁 𑀲𑀼𑀔𑀁 𑀇𑀫𑀸𑀬 𑀧𑀻𑀢𑀺𑀬𑀸 𑀲𑀳𑀕𑀢𑀁 𑀲𑀳𑀚𑀸𑀢𑀁 𑀲𑀫𑁆𑀧𑀬𑀼𑀢𑁆𑀢’’𑀦𑁆𑀢𑀺 𑀲𑀁𑀲𑀝𑁆𑀞𑁂, 𑀇𑀫𑀺𑀲𑁆𑀲𑀸 𑀧𑀻𑀢𑀺𑀬𑀸 𑀲𑀁𑀲𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

𑀢𑀩𑁆𑀪𑀸𑀯𑁂 𑀘𑁂𑀯 𑀯𑁄𑀓𑀺𑀡𑁆𑀡𑁂, 𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑁂𑀲𑀼 𑀘;

𑀲𑀁𑀲𑀝𑁆𑀞𑁂 𑀘 𑀲𑀳𑀕𑀢-𑀲𑀤𑁆𑀤𑁄 𑀤𑀺𑀲𑁆𑀲𑀢𑀺 𑀧𑀜𑁆𑀘𑀲𑀼;

𑀕𑀢𑀻𑀢𑀺 𑀕𑀢𑀺𑀕𑀢𑀺 𑀦𑀺𑀩𑁆𑀩𑀢𑁆𑀢𑀺𑀕𑀪𑀺 𑀅𑀚𑁆𑀛𑀸𑀲𑀬𑀕𑀢𑀺 𑀯𑀺𑀪𑀯𑀕𑀢𑀺 𑀦𑀺𑀧𑁆𑀨𑀢𑁆𑀢𑀺𑀕𑀢𑀺 𑀜𑀸𑀡𑀕𑀢𑀻𑀢𑀺 𑀩𑀳𑀼𑀯𑀺𑀥𑀸 𑀕𑀢𑀺 𑀦𑀸𑀫.

𑀢𑀢𑁆𑀣 ‘‘𑀢𑀁 𑀕𑀢𑀺𑀁 𑀧𑁂𑀘𑁆𑀘 𑀕𑀘𑁆𑀙𑀸𑀫𑀻’’𑀢𑀺 𑀘 ‘‘𑀬𑀲𑁆𑀲 𑀕𑀢𑀺𑀁 𑀦 𑀚𑀸𑀦𑀦𑁆𑀢𑀺, 𑀤𑁂𑀯𑀸 𑀕𑀦𑁆𑀥𑀩𑁆𑀩𑀫𑀸𑀦𑀼𑀲𑀸’’𑀢𑀺 𑀘 𑀅𑀬𑀁 𑀕𑀢𑀺𑀕𑀢𑀺𑀦𑀸𑀫. ‘‘𑀇𑀫𑁂𑀲𑀁 ¶ 𑀔𑁄 𑀅𑀳𑀁 𑀪𑀺𑀓𑁆𑀔𑀽𑀦𑀁 𑀲𑀻𑀮𑀯𑀦𑁆𑀢𑀸𑀦𑀁 𑀦𑁂𑀯 𑀚𑀸𑀦𑀸𑀫𑀺 𑀕𑀢𑀺𑀁𑀯𑀸 𑀅𑀕𑀢𑀺𑀁𑀯𑀸’’𑀢𑀺 𑀅𑀬𑀁 𑀦𑀺𑀩𑁆𑀩𑀢𑁆𑀢𑀺𑀕𑀢𑀺 𑀦𑀸𑀫. ‘‘𑀏𑀯𑀁 𑀔𑁄 𑀢𑁂 𑀅𑀳𑀁 𑀩𑁆𑀭𑀳𑁆𑀫𑁂 𑀕𑀢𑀺𑀜𑁆𑀘 𑀚𑀸𑀦𑀸𑀫𑀺 𑀚𑀼𑀢𑀺𑀜𑁆𑀘 𑀚𑀸𑀦𑀸𑀫𑀻’’𑀢𑀺 𑀅𑀬𑀁 𑀅𑀚𑁆𑀛𑀸𑀲𑀬𑀕𑀢𑀺 𑀦𑀸𑀫. ‘‘𑀯𑀺𑀪𑀯𑁄 𑀕𑀢𑀺 𑀥𑀫𑁆𑀫𑀸𑀦𑀁, 𑀦𑀺𑀩𑁆𑀩𑀸𑀦𑀁 𑀅𑀭𑀳𑀢𑁄 𑀕𑀢𑀻’’𑀢𑀺 𑀅𑀬𑀁 𑀯𑀺𑀪𑀯𑀕𑀢𑀺 𑀦𑀸𑀫. ‘‘𑀤𑁆𑀯𑁂 𑀕𑀢𑀺𑀬𑁄 𑀪𑀯𑀦𑁆𑀢𑀺 𑀅𑀦𑀜𑁆𑀜𑀸’’𑀢𑀺 𑀅𑀬𑀁 𑀦𑀺𑀧𑁆𑀨𑀢𑁆𑀢𑀺𑀕𑀢𑀺 𑀦𑀸𑀫. ‘‘𑀢𑀁 𑀢𑀢𑁆𑀣 𑀕𑀢𑀺𑀫𑀸 𑀥𑀺𑀪𑀺𑀫𑀸’’𑀢𑀺 𑀘 ‘‘𑀲𑀼𑀦𑁆𑀤𑀭𑀁 𑀦𑀺𑀩𑁆𑀩𑀸𑀦𑀁 𑀕𑀢𑁄’’𑀢𑀺 𑀘 𑀅𑀬𑀁 𑀜𑀸𑀡𑀕𑀢𑀺 𑀦𑀸𑀫. 𑀏𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

𑀕𑀢𑀺𑀕𑀢𑁆𑀬𑀜𑁆𑀘 𑀦𑀺𑀩𑁆𑀩𑀢𑁆𑀬𑀁, 𑀯𑀺𑀪𑀯𑀚𑁆𑀛𑀸𑀲𑀬𑁂𑀲𑀼 𑀘;

𑀦𑀺𑀧𑁆𑀨𑀢𑁆𑀢𑀺𑀬𑀜𑁆𑀘 𑀜𑀸𑀡𑁂 𑀘, 𑀕𑀢𑀺𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑀕𑀘𑁆𑀙𑀢𑀻𑀢𑀺 𑀕𑁄. 𑀫𑀸𑀢𑀼𑀬𑀸 𑀲𑀫𑀪𑀸𑀯𑀁 𑀫𑀺𑀲𑁆𑀲𑀻𑀪𑀸𑀯𑀜𑁆𑀘 𑀕𑀘𑁆𑀙𑀢𑀺 𑀧𑀸𑀧𑀼𑀡𑀸𑀢𑀻𑀢𑀺 𑀫𑀸𑀢𑀼𑀕𑀸𑀫𑁄. 𑀭𑁄𑀕𑀁 𑀳𑀺𑀁𑀲𑀦𑁆𑀢𑀁 𑀕𑀘𑁆𑀙𑀢𑀻𑀢𑀺 𑀳𑀺𑀗𑁆𑀕𑀼.

𑀇𑀫𑀸𑀦𑀺 𑀢𑀲𑁆𑀲 𑀦𑀸𑀫𑀸𑀦𑀺

𑀳𑀺𑀗𑁆𑀕𑀼 𑀳𑀺𑀗𑁆𑀕𑀼𑀚𑀢𑀼𑀘𑁆𑀘𑁂𑀯, 𑀢𑀣𑀸 𑀳𑀺𑀗𑁆𑀕𑀼𑀲𑀺𑀧𑀸𑀝𑀺𑀓𑀸;

𑀳𑀺𑀗𑁆𑀕𑀼𑀚𑀸𑀢𑀻𑀢𑀺 𑀓𑀣𑀺𑀢𑀸, 𑀯𑀺𑀦𑀬𑀝𑁆𑀞𑀓𑀣𑀸𑀬 𑀳𑀺.

𑀚𑀕𑀽𑀢𑀺 𑀘𑀼𑀢𑀺𑀢𑁄 𑀚𑀸𑀢𑀺𑀁 𑀕𑀘𑁆𑀙𑀢𑀻𑀢𑀺 𑀚𑀕𑀼. 𑀇𑀦𑁆𑀤𑁆𑀭𑀺𑀬𑁂𑀦 𑀕𑀘𑁆𑀙𑀢𑀻𑀢𑀺 𑀇𑀦𑁆𑀤𑀕𑀽. 𑀅𑀣 𑀯𑀸 𑀇𑀦𑁆𑀤𑀪𑀽𑀢𑁂𑀦 𑀓𑀫𑁆𑀫𑀼𑀦𑀸 𑀕𑀘𑁆𑀙𑀢𑀻𑀢𑀺 𑀇𑀦𑁆𑀤𑀕𑀼. ‘‘𑀳𑀺𑀦𑁆𑀤𑀕𑀽’’𑀢𑀺𑀧𑀺 𑀧𑀸𑀴𑀺. 𑀢𑀢𑁆𑀣 𑀳𑀺𑀦𑁆𑀤𑀦𑁆𑀢𑀺 𑀫𑀭𑀡𑀁. 𑀢𑀁 𑀕𑀘𑁆𑀙𑀢𑀻𑀢𑀺 𑀳𑀺𑀦𑁆𑀤𑀕𑀽. 𑀲𑀩𑁆𑀩𑀫𑁂𑀢𑀁 𑀲𑀢𑁆𑀢𑀸𑀥𑀺𑀯𑀘𑀦𑀁, 𑀮𑀺𑀗𑁆𑀕𑀢𑁄 𑀧𑀼𑀮𑁆𑀮𑀺𑀗𑁆𑀕𑀁. 𑀫𑁂𑀥𑀕𑁄𑀢𑀺 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀜𑁆𑀘 𑀧𑀭𑀜𑁆𑀘 𑀫𑁂𑀥𑀫𑀸𑀦𑁄 𑀳𑀺𑀁𑀲𑀫𑀸𑀦𑁄 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀫𑁂𑀥𑀕𑁄, 𑀓𑀮𑀳𑁄. ‘‘𑀢𑀢𑁄 𑀲𑀫𑁆𑀫𑀦𑁆𑀢𑀺 𑀫𑁂𑀥𑀕𑀸’’𑀢𑀺 𑀏𑀢𑁆𑀣 𑀳𑀺 𑀓𑀮𑀳𑁄 𑀫𑁂𑀥𑀕𑀲𑀤𑁆𑀤𑁂𑀦 𑀪𑀕𑀯𑀢𑀸 𑀯𑀼𑀢𑁆𑀢𑁄. 𑀕𑀫𑀺𑀢𑁆𑀯𑀸𑀢𑀺 𑀏𑀢𑁆𑀣 𑁋

‘‘𑀇𑀲𑀺𑀯𑁆𑀳𑀬𑀁 𑀕𑀫𑀺𑀢𑁆𑀯𑀸𑀦, 𑀯𑀺𑀦𑀺𑀢𑁆𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂;

𑀢𑀢𑁄 𑀯𑀺𑀦𑁂𑀲𑀺 𑀪𑀕𑀯𑀸, 𑀕𑀦𑁆𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑀳𑀺𑀁 𑀢𑀳𑀺’’𑀦𑁆𑀢𑀺

𑀅𑀬𑀁 ¶ 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. 𑀲𑀧𑁆𑀧𑁄𑀢𑀺 𑀲𑀧𑁆𑀧𑀢𑀻𑀢𑀺 𑀲𑀧𑁆𑀧𑁄, 𑀲𑀁𑀲𑀧𑁆𑀧𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 ‘‘𑀬𑁄 𑀓𑀸𑀫𑁂 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀧𑁆𑀧𑀲𑁆𑀲𑁂𑀯 𑀧𑀤𑀸𑀲𑀺𑀭𑁄’’𑀢𑀺 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀦𑀺𑀤𑁆𑀤𑁂𑀲𑁂 ‘‘𑀲𑀧𑁆𑀧𑁄 𑀯𑀼𑀘𑁆𑀘𑀢𑀺 𑀅𑀳𑀺. 𑀓𑁂𑀦𑀝𑁆𑀞𑁂𑀦 𑀲𑀧𑁆𑀧𑁄? 𑀲𑀁𑀲𑀧𑁆𑀧𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀲𑀧𑁆𑀧𑁄. 𑀪𑀼𑀚𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀪𑀼𑀚𑀕𑁄. 𑀉𑀭𑁂𑀦 𑀕𑀘𑁆𑀙𑀢𑀻𑀢𑀺 𑀉𑀭𑀕𑁄. 𑀧𑀦𑁆𑀦𑀲𑀺𑀭𑁄 𑀕𑀘𑁆𑀙𑀢𑀻𑀢𑀺 𑀧𑀦𑁆𑀦𑀕𑁄. 𑀲𑀭𑀻𑀭𑁂𑀦 𑀲𑀧𑁆𑀧𑀢𑀻𑀢𑀺 𑀲𑀭𑀻𑀲𑀧𑁄. 𑀩𑀺𑀮𑁂 𑀲𑀬𑀢𑀻𑀢𑀺 𑀩𑀺𑀮𑀸𑀲𑀬𑁄. 𑀤𑀸𑀞𑀸 𑀢𑀲𑁆𑀲 𑀆𑀯𑀼𑀥𑁄𑀢𑀺 𑀤𑀸𑀞𑀸𑀯𑀼𑀥𑁄. 𑀯𑀺𑀲𑀁 𑀢𑀲𑁆𑀲𑀖𑁄𑀭𑀦𑁆𑀢𑀺 𑀖𑁄𑀭𑀯𑀺𑀲𑁄. 𑀚𑀺𑀯𑁆𑀳𑀸 𑀢𑀲𑁆𑀲 𑀤𑀼𑀯𑀺𑀥𑀸𑀢𑀺 𑀤𑀼𑀚𑀺𑀯𑁆𑀳𑁄. 𑀤𑁆𑀯𑀻𑀳𑀺 𑀚𑀺𑀯𑁆𑀳𑀸𑀳𑀺 𑀭𑀲𑀁 𑀲𑀸𑀬𑀢𑀻𑀢𑀺 𑀤𑁆𑀯𑀺𑀭𑀲𑀜𑁆𑀜𑀽’’𑀢𑀺. 𑀲𑀧𑁆𑀧𑀺𑀦𑀻𑀢𑀺 𑀉𑀭𑀕𑀻. 𑀧𑀻𑀞𑀲𑀧𑁆𑀧𑀻𑀢𑀺 𑀧𑀻𑀞𑁂𑀦 𑀲𑀧𑁆𑀧𑀢𑀺 𑀕𑀘𑁆𑀙𑀢𑀻𑀢𑀺 𑀧𑀻𑀞𑀲𑀧𑁆𑀧𑀻, 𑀧𑀗𑁆𑀕𑀼𑀴𑁄. 𑀲𑀧𑁆𑀧𑀻𑀢𑀺 𑀬𑁄 𑀦 𑀧𑀭𑀺𑀪𑀼𑀜𑁆𑀚𑀢𑀺, 𑀢𑀲𑁆𑀲 𑀩𑀮𑀸𑀬𑀼𑀯𑀟𑁆𑀠𑀦𑀢𑁆𑀣𑀁 𑀲𑀧𑁆𑀧𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀲𑀧𑁆𑀧𑀺, 𑀖𑀢𑀁.

𑀲𑀓𑁆𑀓 𑀝𑁂𑀓 𑀮𑀗𑁆𑀖 𑀕𑀢𑁆𑀬𑀢𑁆𑀢𑀸. 𑀲𑀓𑁆𑀓𑀢𑀺, 𑀦𑀺𑀲𑀓𑁆𑀓𑀢𑀺, 𑀧𑀭𑀺𑀲𑀓𑁆𑀓𑀢𑀺. 𑀦𑀺𑀲𑀓𑁆𑀓𑁄, 𑀧𑀭𑀺𑀲𑀓𑁆𑀓𑀦𑀁. 𑀝𑁂𑀓𑀢𑀺. 𑀝𑀻𑀓𑀸. 𑀮𑀗𑁆𑀖𑀢𑀺, 𑀉𑀮𑁆𑀮𑀗𑁆𑀖𑀢𑀺, 𑀑𑀮𑀗𑁆𑀖𑀢𑀺, 𑀮𑀗𑁆𑀖𑀓𑁄, 𑀉𑀮𑁆𑀮𑀗𑁆𑀖𑀺𑀓𑀸 𑀧𑀻𑀢𑀺.

𑀓𑁂 𑀭𑁂 𑀕𑁂 𑀲𑀤𑁆𑀤𑁂. 𑀓𑀸𑀬𑀢𑀺. 𑀭𑀸𑀬𑀢𑀺. 𑀕𑀸𑀬𑀢𑀺. 𑀚𑀸𑀢𑀓𑀁. 𑀭𑀸. 𑀕𑀻𑀢𑀁. 𑀓𑀸𑀬𑀺𑀢𑀼𑀁. 𑀭𑀸𑀬𑀺𑀢𑀼𑀁, 𑀕𑀸𑀬𑀺𑀢𑀼𑀁. 𑀓𑀸𑀬𑀺𑀢𑁆𑀯𑀸. 𑀭𑀸𑀬𑀺𑀢𑁆𑀯𑀸. 𑀕𑀸𑀬𑀺𑀢𑁆𑀯𑀸.

𑀢𑀢𑁆𑀣 𑀚𑀸𑀢𑀓𑀦𑁆𑀢𑀺 𑀚𑀸𑀢𑀁 𑀪𑀽𑀢𑀁 𑀅𑀢𑀻𑀢𑀁 𑀅𑀢𑁆𑀢𑀦𑁄 𑀘𑀭𑀺𑀢𑀁 𑀓𑀸𑀬𑀢𑀺 𑀓𑀣𑁂𑀢𑀺 𑀪𑀕𑀯𑀸 𑀏𑀢𑁂𑀦𑀸𑀢𑀺 𑀚𑀸𑀢𑀓𑀁. 𑀚𑀸𑀢𑀓𑀧𑀸𑀴𑀺 𑀳𑀺 𑀇𑀥 𑀚𑀸𑀢𑀓𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀢𑁆𑀭 𑀧𑀦 𑀚𑀸𑀢𑀁 𑀏𑀯𑀁 𑀚𑀸𑀢𑀓𑀦𑁆𑀢𑀺 𑀕𑀳𑁂𑀢𑀩𑁆𑀩𑀸. 𑀢𑀣𑀸 𑀳𑀺 𑀚𑀸𑀢𑀓𑀲𑀤𑁆𑀤𑁄 𑀧𑀭𑀺𑀬𑀢𑁆𑀢𑀺𑀬𑀫𑁆𑀧𑀺 𑀯𑀢𑁆𑀢𑀢𑀺 ‘‘𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫’’𑀦𑁆𑀢𑀺𑀆𑀤𑀻𑀲𑀼, 𑀚𑀸𑀢𑀺𑀬𑀫𑁆𑀧𑀺 𑀯𑀢𑁆𑀢𑀢𑀺 ‘‘𑀚𑀸𑀢𑀓𑀁 𑀲𑀫𑁄𑀥𑀸𑀦𑁂𑀲𑀻’’𑀢𑀺𑀆𑀤𑀻𑀲𑀼. 𑀭𑀸 𑀯𑀼𑀘𑁆𑀘𑀢𑀺 𑀲𑀤𑁆𑀤𑁄. 𑀕𑀻𑀢𑀦𑁆𑀢𑀺 𑀕𑀸𑀬𑀦𑀁.

𑀔𑁂 ¶ 𑀚𑁂 𑀲𑁂 𑀔𑀬𑁂. 𑀔𑀸𑀬𑀢𑀺. 𑀚𑀸𑀬𑀢𑀺. 𑀲𑀸𑀬𑀢𑀺. 𑀔𑀬𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑀏𑀢𑁆𑀣 𑀧𑀦 𑀲𑀺𑀬𑀸 ‘‘𑀦𑀦𑀼 𑀘 𑀪𑁄 𑀔𑀸𑀬𑀢𑀻𑀢𑀺 𑀧𑀤𑀲𑁆𑀲 𑀔𑀸𑀤𑀢𑀻𑀢𑀺 𑀯𑀸 𑀧𑀜𑁆𑀜𑀸𑀬𑀢𑀻𑀢𑀺 𑀯𑀸 𑀅𑀢𑁆𑀣𑁄 𑀪𑀯𑀢𑀺, 𑀢𑀣𑀸 𑀚𑀸𑀬𑀢𑀻𑀢𑀺 𑀧𑀤𑀲𑁆𑀲 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀅𑀢𑁆𑀣𑁄, 𑀲𑀸𑀬𑀢𑀻𑀢𑀺 𑀧𑀤𑀲𑁆𑀲 𑀭𑀲𑀁 𑀅𑀲𑁆𑀲𑀸𑀤𑁂𑀢𑀻𑀢𑀺 𑀅𑀢𑁆𑀣𑁄, 𑀏𑀯𑀁 𑀲𑀦𑁆𑀢𑁂 𑀪𑁄 𑀓𑀲𑁆𑀫𑀸 𑀇𑀥 𑀏𑀯𑀁 𑀅𑀢𑁆𑀣𑁄 𑀢𑀼𑀫𑁆𑀳𑁂𑀳𑀺 𑀓𑀣𑀺𑀬𑀢𑀻’’𑀢𑀺? 𑀲𑀘𑁆𑀘𑀁, 𑀥𑀸𑀢𑀽𑀦𑀦𑁆𑀢𑀼 𑀅𑀦𑁂𑀓𑀢𑁆𑀣𑀢𑁆𑀢𑀸 𑀏𑀯𑀁 𑀅𑀢𑁆𑀣𑁄 𑀓𑀣𑁂𑀢𑀼𑀁 𑀮𑀩𑁆𑀪𑀢𑀺. 𑀢𑀣𑀸 𑀳𑀺 ‘‘𑀅𑀧𑁆𑀧𑀲𑁆𑀲𑀼𑀢𑀸𑀬𑀁 𑀧𑀼𑀭𑀺𑀲𑁄, 𑀩𑀮𑀺𑀩𑀤𑁆𑀤𑁄𑀯 𑀚𑀻𑀭𑀢𑀻’’𑀢𑀺 𑀏𑀢𑁆𑀣 𑀚𑀻𑀭𑀢𑀻𑀢𑀺 𑀅𑀬𑀁 𑀲𑀤𑁆𑀤𑁄 𑀚𑀭𑀁 𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑀁 𑀅𑀯𑀢𑁆𑀯𑀸 𑀯𑀟𑁆𑀠𑀢𑀻𑀢𑀺 𑀅𑀢𑁆𑀣𑀫𑁂𑀯 𑀯𑀤𑀢𑀺, 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁.

𑀕𑀼 𑀖𑀼 𑀓𑀼 𑀉 𑀲𑀤𑁆𑀤𑁂. 𑀕𑀯𑀢𑀺. 𑀖𑀯𑀢𑀺. 𑀓𑀯𑀢𑀺. 𑀅𑀯𑀢𑀺.

𑀔𑀼 𑀭𑀼 𑀓𑀼 𑀲𑀤𑁆𑀤𑁂. 𑀔𑁄𑀢𑀺. 𑀭𑁄𑀢𑀺. 𑀓𑁄𑀢𑀺.

𑀘𑀼 𑀚𑀼 𑀧𑀼 𑀧𑁆𑀮𑀼 𑀕𑀸 𑀲𑁂 𑀕𑀢𑀺𑀬𑀁. 𑀘𑀯𑀢𑀺. 𑀚𑀯𑀢𑀺. 𑀧𑀯𑀢𑀺. 𑀧𑁆𑀮𑀯𑀢𑀺. 𑀕𑀸𑀢𑀺. 𑀲𑁂𑀢𑀺. 𑀘𑀯𑀦𑀁, 𑀘𑀼𑀢𑀺. 𑀚𑀯𑀦𑀁, 𑀚𑀯𑁄. 𑀧𑀯𑀦𑀁, 𑀧𑁆𑀮𑀯𑀦𑀁. 𑀕𑀸𑀦𑀁. 𑀲𑁂𑀢𑀼. 𑀧𑁄𑀢𑁄. 𑀧𑁆𑀮𑀯𑁄.

𑀏𑀢𑁆𑀣 𑀕𑀸𑀦𑀦𑁆𑀢𑀺 𑀕𑀫𑀦𑀁. 𑀧𑁄𑀢𑁄𑀢𑀺 𑀧𑀯𑀢𑀺 𑀕𑀘𑁆𑀙𑀢𑀺 𑀉𑀤𑀓𑁂 𑀏𑀢𑁂𑀦𑀸𑀢𑀺 𑀧𑁄𑀢𑁄, 𑀦𑀸𑀯𑀸. 𑀢𑀣𑀸 𑀧𑁆𑀮𑀯𑀢𑀺 𑀦 𑀲𑀻𑀤𑀢𑀻𑀢𑀺 𑀧𑁆𑀮𑀯𑁄, 𑀦𑀸𑀯𑀸 𑀏𑀯. ‘‘𑀪𑀺𑀦𑁆𑀦𑀧𑁆𑀮𑀯𑁄 𑀲𑀸𑀕𑀭𑀲𑁆𑀲𑁂𑀯 𑀫𑀚𑁆𑀛𑁂’’𑀢𑀺 𑀳𑀺 𑀚𑀸𑀢𑀓𑀧𑀸𑀴𑀺 𑀤𑀺𑀲𑁆𑀲𑀢𑀺. ‘‘𑀦𑀸𑀯𑀸, 𑀧𑁄𑀢𑁄, 𑀧𑁆𑀮𑀯𑁄, 𑀚𑀮𑀬𑀸𑀦𑀁, 𑀢𑀭𑀡’’𑀦𑁆𑀢𑀺 𑀦𑀸𑀯𑀸𑀪𑀺𑀥𑀸𑀦𑀸𑀦𑀺.

𑀥𑁂 𑀣𑁂 𑀲𑀤𑁆𑀤𑀲𑀗𑁆𑀖𑀸𑀢𑁂𑀲𑀼. 𑀥𑀸𑀬𑀢𑀺. 𑀣𑀸𑀬𑀢𑀺. 𑀪𑀸𑀯𑁂 𑁋 𑀥𑀺𑀬𑀢𑀺, 𑀣𑀺𑀬𑀢𑀺. 𑀇𑀢𑁆𑀣𑀻. 𑀣𑀻.

𑀤𑁂 𑀢𑁂 𑀧𑀸𑀮𑀦𑁂. 𑀤𑀸𑀬𑀢𑀺. 𑀤𑀬𑀸. 𑀢𑀸𑀡𑀁.

𑀭𑀸 𑀮𑀸 𑀆𑀤𑀸𑀦𑁂. 𑀭𑀸𑀢𑀺. 𑀮𑀸𑀢𑀺.

𑀅𑀢𑀺 𑀅𑀤𑀺 𑀩𑀦𑁆𑀥𑀦𑁂. 𑀅𑀦𑁆𑀢𑀢𑀺. 𑀅𑀦𑁆𑀤𑀢𑀺. 𑀅𑀦𑁆𑀢𑀁. 𑀅𑀦𑁆𑀤𑀼.

𑀚𑀼𑀢𑀲𑀼𑀪 ¶ 𑀭𑀼𑀘 𑀤𑀺𑀢𑁆𑀢𑀺𑀬𑀁. 𑀚𑁄𑀢𑀢𑀺. 𑀲𑁄𑀪𑀢𑀺. 𑀭𑁄𑀘𑀢𑀺, 𑀯𑀺𑀭𑁄𑀘𑀢𑀺.

𑀅𑀓 𑀅𑀕 𑀓𑀼𑀝𑀺𑀮𑀸𑀬𑀁 𑀕𑀢𑀺𑀬𑀁. 𑀅𑀓𑀢𑀺. 𑀅𑀕𑀢𑀺.

𑀦𑀸𑀣 𑀦𑀸𑀥 𑀬𑀸𑀘𑀦𑁄𑀧𑀢𑀸𑀧𑀺𑀲𑁆𑀲𑀭𑀺𑀬𑀸𑀲𑀻𑀲𑀸𑀲𑀼. 𑀦𑀸𑀣𑀢𑀺. 𑀦𑀸𑀥𑀢𑀺.

𑀲𑀮 𑀳𑀼𑀮 𑀘𑀮 𑀓𑀫𑁆𑀧𑀦𑁂. 𑀲𑀮𑀢𑀺. 𑀳𑀼𑀮𑀢𑀺. 𑀘𑀮𑀢𑀺. 𑀓𑀼𑀲𑀮𑀁.

𑀏𑀢𑁆𑀣 𑀘 𑀓𑀼𑀘𑁆𑀙𑀺𑀢𑁂 𑀧𑀸𑀧𑀓𑁂 𑀥𑀫𑁆𑀫𑁂 𑀲𑀮𑀬𑀢𑀻𑀢𑀺 𑀓𑀼𑀲𑀮𑀁, 𑀳𑁂𑀢𑀼𑀓𑀢𑁆𑀢𑀼𑀯𑀲𑁂𑀦𑀺𑀤𑀁 𑀦𑀺𑀩𑁆𑀩𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 ‘‘𑀓𑀼𑀘𑁆𑀙𑀺𑀢𑁂 𑀧𑀸𑀧𑀓𑁂 𑀥𑀫𑁆𑀫𑁂 𑀲𑀮𑀬𑀦𑁆𑀢𑀺 𑀘𑀮𑀬𑀦𑁆𑀢𑀺 𑀓𑀫𑁆𑀧𑁂𑀦𑁆𑀢𑀺 𑀯𑀺𑀤𑁆𑀥𑀁𑀲𑁂𑀦𑁆𑀢𑀻𑀢𑀺 𑀓𑀼𑀲𑀮𑀸’’𑀢𑀺 𑀳𑁂𑀢𑀼𑀓𑀢𑁆𑀢𑀼𑀯𑀲𑁂𑀦 𑀅𑀢𑁆𑀣𑁄 𑀓𑀣𑀺𑀢𑁄. 𑀇𑀤𑀁 𑀲𑀮𑀥𑀸𑀢𑀼𑀯𑀲𑁂𑀦 𑀓𑀼𑀲𑀮𑀲𑀤𑁆𑀤𑀲𑁆𑀲 𑀦𑀺𑀩𑁆𑀩𑀘𑀦𑀁. 𑀅𑀜𑁆𑀜𑁂𑀲𑀫𑁆𑀧𑀺 𑀥𑀸𑀢𑀽𑀦𑀁 𑀯𑀲𑁂𑀦 𑀓𑀼𑀲𑀮𑀲𑀤𑁆𑀤𑀲𑁆𑀲 𑀦𑀺𑀩𑁆𑀩𑀘𑀦𑀁 𑀪𑀯𑀢𑀺. 𑀢𑀣𑀸 𑀳𑀺 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀅𑀜𑁆𑀜𑀸𑀦𑀺𑀧𑀺 𑀦𑀺𑀩𑁆𑀩𑀘𑀦𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀓𑀣𑀁? ‘‘𑀓𑀼𑀘𑁆𑀙𑀺𑀢𑁂𑀦 𑀯𑀸 𑀆𑀓𑀸𑀭𑁂𑀦 𑀲𑀬𑀦𑁆𑀢𑀻𑀢𑀺 𑀓𑀼𑀲𑀸, 𑀢𑁂 𑀅𑀓𑀼𑀲𑀮𑀥𑀫𑁆𑀫𑀲𑀗𑁆𑀔𑀸𑀢𑁂 𑀓𑀼𑀲𑁂 𑀮𑀼𑀦𑀦𑁆𑀢𑀺 𑀙𑀺𑀦𑁆𑀤𑀦𑁆𑀢𑀻𑀢𑀺 𑀓𑀼𑀲𑀮𑀸. 𑀓𑀼𑀘𑁆𑀙𑀺𑀢𑀸𑀦𑀁 𑀯𑀸 𑀲𑀸𑀦𑀢𑁄 𑀢𑀦𑀼𑀓𑀭𑀡𑀢𑁄 𑀜𑀸𑀡𑀁 𑀓𑀼𑀲𑀁 𑀦𑀸𑀫, 𑀢𑁂𑀦 𑀓𑀼𑀲𑁂𑀦 𑀮𑀸𑀢𑀩𑁆𑀩𑀸𑀢𑀺 𑀓𑀼𑀲𑀮𑀸, 𑀕𑀳𑁂𑀢𑀩𑁆𑀩𑀸 𑀧𑀯𑀢𑁆𑀢𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀯𑀸 𑀓𑀼𑀲𑀸 𑀉𑀪𑀬𑀪𑀸𑀕𑀕𑀢𑀁 𑀳𑀢𑁆𑀣𑀧𑁆𑀧𑀤𑁂𑀲𑀁 𑀮𑀼𑀦𑀦𑁆𑀢𑀺, 𑀏𑀯𑀫𑀺𑀫𑁂𑀧𑀺 𑀉𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀉𑀪𑀬𑀪𑀸𑀕𑀕𑀢𑀁 𑀓𑀺𑀮𑁂𑀲𑀧𑀓𑁆𑀔𑀁 𑀮𑀼𑀦𑀦𑁆𑀢𑀺, 𑀢𑀲𑁆𑀫𑀸 𑀓𑀼𑀲𑀸 𑀯𑀺𑀬 𑀮𑀼𑀦𑀦𑁆𑀢𑀻𑀢𑀺𑀧𑀺 𑀓𑀼𑀲𑀮𑀸’’𑀢𑀺. 𑀏𑀯𑀁 𑀅𑀜𑁆𑀜𑀸𑀦𑀺𑀧𑀺 𑀦𑀺𑀩𑁆𑀩𑀘𑀦𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀢𑀢𑁆𑀭 ‘‘𑀥𑀫𑁆𑀫𑀸’’ 𑀇𑀢𑀺 𑀧𑀤𑀸𑀧𑁂𑀓𑁆𑀔𑀁 𑀓𑀢𑁆𑀯𑀸 𑀢𑀤𑀦𑀼𑀭𑀽𑀧𑀮𑀺𑀗𑁆𑀕𑀯𑀘𑀦𑀯𑀲𑁂𑀦 ‘‘𑀓𑀼𑀲𑀮𑀸’’𑀢𑀺 𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀇𑀥 𑀧𑀦 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑀯𑀲𑁂𑀦 ‘‘𑀓𑀼𑀲𑀮’’𑀦𑁆𑀢𑀺 𑀦𑀧𑀼𑀁𑀲𑀓𑁂𑀓𑀯𑀘𑀦𑀦𑀺𑀤𑁆𑀤𑁂𑀲𑁄 𑀅𑀫𑁆𑀳𑁂𑀳𑀺 𑀓𑀢𑁄. 𑀧𑀼𑀜𑁆𑀜𑀯𑀸𑀘𑀓𑁄 𑀳𑀺 𑀓𑀼𑀲𑀮𑀲𑀤𑁆𑀤𑁄 𑀆𑀭𑁄𑀕𑁆𑀬𑀯𑀸𑀘𑀓𑁄 𑀘 𑀏𑀓𑀦𑁆𑀢𑁂𑀦 𑀦𑀧𑀼𑀁𑀲𑀓𑀮𑀺𑀗𑁆𑀕𑁄, 𑀇𑀢𑀭𑀢𑁆𑀣𑀯𑀸𑀘𑀓𑁄 𑀧𑀦 𑀢𑀺𑀮𑀺𑀗𑁆𑀕𑀺𑀓𑁄, 𑀬𑀣𑀸 𑀓𑀼𑀲𑀮𑁄 𑀨𑀲𑁆𑀲𑁄, 𑀓𑀼𑀲𑀮𑀸 𑀯𑁂𑀤𑀦𑀸. 𑀓𑀼𑀲𑀮𑀁 𑀘𑀺𑀢𑁆𑀢𑀦𑁆𑀢𑀺. 𑀓𑀼𑀲𑀮𑀲𑀤𑁆𑀤𑁄 ¶ 𑀇𑀫𑀲𑁆𑀫𑀺𑀁 𑀪𑀽𑀯𑀸𑀤𑀺𑀕𑀡𑁂 𑀮𑀸𑀥𑀸𑀢𑀼𑀲𑀮𑀥𑀸𑀢𑀼𑀯𑀲𑁂𑀦 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀪𑀽𑀯𑀸𑀤𑀺𑀕𑀡𑁂 𑀲𑀫𑁄𑀥𑀸𑀦𑀕𑀢𑀥𑀸𑀢𑀼𑀬𑁄 𑀲𑀫𑀢𑁆𑀢𑀸.

𑀇𑀘𑁆𑀘𑁂𑀯𑀁 𑁋

𑀯𑀺𑀢𑁆𑀣𑀸𑀭𑀢𑁄 𑀘 𑀲𑀗𑁆𑀔𑁂𑀧𑀸, 𑀪𑀽𑀯𑀸𑀤𑀻𑀦𑀁 𑀕𑀡𑁄 𑀫𑀬𑀸;

𑀬𑁄 𑀯𑀺𑀪𑀢𑁆𑀢𑁄 𑀲𑀉𑀤𑁆𑀤𑁂𑀲𑁄, 𑀲𑀦𑀺𑀤𑁆𑀤𑁂𑀲𑁄 𑀬𑀣𑀸𑀭𑀳𑀁.

𑀉𑀧𑀲𑀕𑁆𑀕𑀦𑀺𑀧𑀸𑀢𑁂𑀳𑀺, 𑀦𑀸𑀦𑀸𑀅𑀢𑁆𑀣𑀬𑀼𑀢𑁂𑀳𑀺 𑀘;

𑀬𑁄𑀚𑁂𑀢𑁆𑀯𑀸𑀦 𑀧𑀤𑀸𑀦𑁂𑀢𑁆𑀣, 𑀤𑀲𑁆𑀲𑀺𑀢𑀸𑀦𑀺 𑀯𑀺𑀲𑀼𑀁 𑀯𑀺𑀲𑀼𑀁.

𑀧𑀸𑀴𑀺𑀦𑀺𑀤𑀲𑁆𑀲𑀦𑀸𑀤𑀻𑀳𑀺, 𑀤𑀲𑁆𑀲𑀺𑀢𑀸𑀦𑀺 𑀲𑀳𑁂𑀯 𑀢𑀼;

𑀢𑁆𑀬𑀸𑀤𑁆𑀬𑀦𑁆𑀢𑀸𑀦𑀺 𑀘 𑀭𑀽𑀧𑀸𑀦𑀺, 𑀲𑁆𑀬𑀸𑀦𑁆𑀬𑀦𑁆𑀢𑀸𑀦𑀺 𑀘 𑀲𑀩𑁆𑀩𑀲𑁄.

𑀧𑀤𑀸𑀦𑀁 𑀲𑀤𑀺𑀲𑀢𑁆𑀢𑀜𑁆𑀘, 𑀢𑀣𑀸 𑀯𑀺𑀲𑀤𑀺𑀲𑀢𑁆𑀢𑀦𑀁;

𑀘𑁄𑀤𑀦𑀸𑀧𑀭𑀺𑀳𑀸𑀭𑁂𑀳𑀺, 𑀲𑀳𑀺𑀢𑁄 𑀘𑀢𑁆𑀣𑀦𑀺𑀘𑁆𑀙𑀬𑁄.

𑀅𑀢𑁆𑀣𑀼𑀤𑁆𑀥𑀸𑀭𑁄’𑀪𑀺𑀥𑀸𑀦𑀜𑁆𑀘, 𑀮𑀺𑀗𑁆𑀕𑀢𑁆𑀢𑀬𑀯𑀺𑀫𑀺𑀲𑁆𑀲𑀦𑀁;

𑀅𑀪𑀺𑀥𑁂𑀬𑁆𑀬𑀓𑀮𑀺𑀗𑁆𑀕𑁂𑀲𑀼, 𑀲𑀯𑀺𑀲𑁂𑀲𑀧𑀤𑀸𑀦𑀺 𑀘.

𑀦𑀸𑀦𑀸𑀧𑀤𑀩𑀳𑀼𑀧𑁆𑀧𑀤-𑀲𑀫𑁄𑀥𑀸𑀦𑀜𑁆𑀘 𑀤𑀲𑁆𑀲𑀺𑀢𑀁;

𑀭𑀽𑀴𑁆𑀳𑀻𑀲𑀤𑁆𑀤𑀸𑀤𑀬𑁄 𑀘𑁂𑀯, 𑀲𑀼𑀯𑀺𑀪𑀢𑁆𑀢𑀸 𑀅𑀦𑀸𑀓𑀼𑀮𑀸.

𑀲𑀩𑁆𑀩𑀦𑀸𑀫𑀁 𑀲𑀩𑁆𑀩𑀦𑀸𑀫-𑀲𑀤𑀺𑀲𑀸𑀦𑀺 𑀧𑀤𑀸𑀦𑀺 𑀘;

𑀦𑀸𑀦𑀸𑀧𑀤𑁂𑀳𑀺 𑀬𑁄𑀚𑁂𑀢𑀼𑀁, 𑀤𑀲𑁆𑀲𑀺𑀢𑀸𑀦𑀺 𑀬𑀣𑀸𑀭𑀳𑀁.

𑀢𑀼𑀫𑀦𑁆𑀢𑀸𑀦𑀺 𑀘 𑀭𑀽𑀧𑀸𑀦𑀺, 𑀢𑁆𑀯𑀸𑀤𑁆𑀬𑀦𑁆𑀢𑀸𑀦𑀺 𑀘 𑀯𑀺𑀜𑁆𑀜𑀽𑀦𑀁;

𑀧𑀺𑀝𑀓𑁂 𑀧𑀸𑀝𑀯𑀢𑁆𑀣𑀸𑀬, 𑀲𑀩𑁆𑀩𑀫𑁂𑀢𑀁 𑀧𑀓𑀸𑀲𑀺𑀢𑀁.

𑀬𑁂 𑀲𑀤𑁆𑀤𑀦𑀻𑀢𑀺𑀫𑁆𑀳𑀺 𑀇𑀫𑀁 𑀯𑀺𑀪𑀸𑀕𑀁,

𑀚𑀸𑀦𑀦𑁆𑀢𑀺 𑀲𑀫𑁆𑀫𑀸 𑀫𑀼𑀦𑀺𑀲𑀸𑀲𑀦𑁂 𑀢𑁂;

𑀅𑀢𑁆𑀣𑁂𑀲𑀼 𑀲𑀩𑁆𑀩𑁂𑀲𑀼𑀧𑀺 𑀯𑀻𑀢𑀓𑀗𑁆𑀔𑀸,

𑀅𑀘𑁆𑀙𑀫𑁆𑀪𑀺𑀦𑁄 𑀲𑀻𑀳𑀲𑀫𑀸 𑀪𑀯𑀦𑁆𑀢𑀺.

𑀯𑀺𑀪𑀽𑀢𑀪𑀼𑀢𑀕𑁆𑀕𑀲𑀬𑀫𑁆𑀪𑀼𑀘𑀓𑁆𑀓𑁂 ¶ ,

𑀲𑀼𑀪𑀽𑀢𑀪𑀽𑀭𑀺𑀁 𑀯𑀤𑀢𑀸 𑀦𑀭𑀸𑀦𑀁;

𑀬𑁄 𑀲𑀤𑁆𑀤𑀦𑀻𑀢𑀺𑀫𑁆𑀳𑀺 𑀪𑀼𑀯𑀸𑀤𑀺𑀓𑀡𑁆𑀟𑁄,

𑀯𑀼𑀢𑁆𑀢𑁄 𑀫𑀬𑀸 𑀢𑀁 𑀪𑀚𑀣𑀢𑁆𑀣𑀓𑀸𑀫𑁄.

𑀇𑀢𑀺 𑀦𑀯𑀗𑁆𑀕𑁂 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀩𑁆𑀬𑀧𑁆𑀧𑀣𑀕𑀢𑀻𑀲𑀼 𑀯𑀺𑀜𑁆𑀜𑀽𑀦𑀁

𑀓𑁄𑀲𑀮𑁆𑀮𑀢𑁆𑀣𑀸𑀬 𑀓𑀢𑁂 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑁂

𑀧𑀦𑁆𑀦𑀭𑀲𑀳𑀺 𑀧𑀭𑀺𑀘𑁆𑀙𑁂𑀤𑁂𑀳𑀺 𑀫𑀡𑁆𑀟𑀺𑀢𑁄 𑀪𑀽𑀯𑀸𑀤𑀺𑀕𑀡𑁄 𑀦𑀸𑀫

𑀲𑁄𑀴𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁭. 𑀭𑀼𑀥𑀸𑀤𑀺𑀙𑀓𑁆𑀓

𑀭𑀼𑀥𑀸𑀤𑀺𑀕𑀡𑀺𑀓

𑀇𑀢𑁄 𑀧𑀭𑀁 𑀧𑀯𑀓𑁆𑀔𑀸𑀫𑀺, 𑀭𑀼𑀥𑀸𑀤𑀺𑀓𑀕𑀡𑀸𑀤𑀬𑁄;

𑀲𑀸𑀲𑀦𑀲𑁆𑀲𑁄𑀧𑀓𑀸𑀭𑀸𑀬, 𑀕𑀡𑁂 𑀢𑀼 𑀙𑀩𑁆𑀩𑀺𑀥𑁂 𑀓𑀣𑀁.

𑀭𑀼𑀥𑀺 𑀆𑀯𑀭𑀡𑁂. 𑀭𑀼𑀥𑀺𑀥𑀸𑀢𑀼 𑀆𑀯𑀭𑀡𑁂 𑀯𑀢𑁆𑀢𑀢𑀺. 𑀏𑀢𑁆𑀣 𑀆𑀯𑀭𑀡𑀁 𑀦𑀸𑀫 𑀧𑀺𑀤𑀳𑀦𑀁 𑀯𑀸 𑀧𑀭𑀺𑀭𑀼𑀦𑁆𑀥𑀦𑀁 𑀯𑀸 𑀧𑀮𑀺𑀩𑀼𑀤𑁆𑀥𑀦𑀁 𑀯𑀸 𑀳𑀭𑀺𑀢𑀼𑀁 𑀯𑀸 𑀅𑀧𑁆𑀧𑀤𑀸𑀦𑀁, 𑀲𑀩𑁆𑀩𑀫𑁂𑀢𑀁 𑀯𑀝𑁆𑀝𑀢𑀺. 𑀭𑀼𑀦𑁆𑀥𑀢𑀺, 𑀭𑀼𑀦𑁆𑀥𑀺𑀢𑀺, 𑀭𑀼𑀦𑁆𑀥𑀻𑀢𑀺, 𑀭𑀼𑀦𑁆𑀥𑁂𑀢𑀺, 𑀅𑀯𑀭𑀼𑀦𑁆𑀥𑁂𑀢𑀺. 𑀓𑀫𑁆𑀫𑀦𑀺 𑁋 𑀫𑀕𑁆𑀕𑁄 𑀧𑀼𑀭𑀺𑀲𑁂𑀦 𑀭𑀼𑀦𑁆𑀥𑀺𑀬𑀢𑀺. 𑀭𑁄𑀥𑁄, 𑀑𑀭𑁄𑀥𑁄, 𑀯𑀺𑀭𑁄𑀥𑁄, 𑀧𑀝𑀺𑀯𑀺𑀭𑁄𑀥𑁄, 𑀯𑀺𑀭𑀼𑀤𑁆𑀥𑁄, 𑀧𑀝𑀺𑀯𑀺𑀭𑀼𑀤𑁆𑀥𑁄, 𑀧𑀭𑀺𑀭𑀼𑀤𑁆𑀥𑁄. 𑀭𑀼𑀦𑁆𑀥𑀺𑀢𑀼𑀁, 𑀧𑀭𑀺𑀭𑀼𑀦𑁆𑀥𑀺𑀢𑀼𑀁. 𑀭𑀼𑀦𑁆𑀥𑀺𑀢𑁆𑀯𑀸. 𑀧𑀭𑀺𑀭𑀼𑀦𑁆𑀥𑀺𑀢𑁆𑀯𑀸.

𑀢𑀢𑁆𑀭 𑀭𑁄𑀥𑁄𑀢𑀺 𑀘𑀸𑀭𑀓𑁄. 𑀲𑁄 𑀳𑀺 𑀭𑀼𑀦𑁆𑀥𑀢𑀺 𑀧𑀯𑁂𑀲𑀺𑀢𑀸𑀦𑀁 𑀓𑀼𑀭𑀽𑀭𑀓𑀫𑁆𑀫𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀕𑀫𑀦𑀁 𑀆𑀯𑀭𑀢𑀻𑀢𑀺 𑀭𑁄𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀑𑀭𑁄𑀥𑁄𑀢𑀺 𑀭𑀸𑀚𑀼𑀩𑁆𑀩𑀭𑀻, 𑀲𑀸 𑀧𑀦 𑀬𑀣𑀸𑀓𑀸𑀫𑀘𑀸𑀭𑀁 𑀘𑀭𑀺𑀢𑀼𑀁 𑀅𑀧𑁆𑀧𑀤𑀸𑀦𑁂𑀦 𑀑𑀭𑀼𑀦𑁆𑀥𑀺𑀬𑀢𑀺 𑀅𑀯𑀭𑀼𑀦𑁆𑀥𑀺𑀬𑀢𑀻𑀢𑀺 𑀑𑀭𑁄𑀥𑁄. 𑀯𑀺𑀭𑁄𑀥𑁄𑀢𑀺 𑀅𑀦𑀦𑀼𑀓𑀽𑀮𑀢𑀸. 𑀧𑀝𑀺𑀯𑀺𑀭𑁄𑀥𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀅𑀦𑀦𑀼𑀓𑀽𑀮𑀢𑀸. 𑀯𑀺𑀭𑀼𑀤𑁆𑀥𑁄𑀢𑀺 𑀯𑀺𑀭𑁄𑀥𑀁 𑀆𑀧𑀦𑁆𑀦𑁄. 𑀧𑀝𑀺𑀯𑀺𑀭𑀼𑀤𑁆𑀥𑁄𑀢𑀺 𑀧𑀝𑀺𑀲𑀢𑁆𑀢𑀼𑀪𑀸𑀯𑁂𑀦 ¶ 𑀯𑀺𑀭𑁄𑀥𑀁 𑀆𑀧𑀦𑁆𑀦𑁄. 𑀧𑀭𑀺𑀭𑀼𑀤𑁆𑀥𑁄𑀢𑀺 𑀕𑀳𑀡𑀢𑁆𑀣𑀸𑀬 𑀲𑀫𑁆𑀧𑀭𑀺𑀯𑀸𑀭𑀺𑀢𑁄. 𑀯𑀼𑀢𑁆𑀢𑀜𑁆𑀳𑀺 ‘‘𑀬𑀣𑀸 𑀅𑀭𑀻𑀳𑀺 𑀧𑀭𑀺𑀭𑀼𑀤𑁆𑀥𑁄, 𑀯𑀺𑀚𑁆𑀚𑀦𑁆𑀢𑁂 𑀕𑀫𑀦𑁂 𑀧𑀣𑁂’’𑀢𑀺. 𑀅𑀯𑀭𑀼𑀤𑁆𑀥𑁄𑀢𑀺 𑀧𑀩𑁆𑀩𑀸𑀚𑀺𑀢𑁄.

𑀫𑀼𑀘 𑀫𑁄𑀘𑀦𑁂. 𑀫𑀺𑀕𑀁 𑀩𑀦𑁆𑀥𑀦𑀸 𑀫𑀼𑀜𑁆𑀘𑀢𑀺. 𑀫𑀼𑀜𑁆𑀘𑀦𑀁, 𑀫𑁄𑀘𑀦𑀁. 𑀤𑀼𑀓𑁆𑀔𑀧𑁆𑀧𑀫𑁄𑀘𑀦𑀁, 𑀫𑁄𑀘𑁄.

𑀫𑁄𑀘𑁄𑀢𑀺 𑀘𑁂𑀢𑁆𑀣 𑀅𑀝𑁆𑀞𑀺𑀓𑀓𑀤𑀮𑀻𑀭𑀼𑀓𑁆𑀔𑁄. 𑀫𑀼𑀜𑁆𑀘𑀺𑀢𑀼𑀁. 𑀫𑀼𑀜𑁆𑀘𑀺𑀢𑁆𑀯𑀸. 𑀓𑀸𑀭𑀺𑀢𑁂 ‘‘𑀫𑁄𑀘𑁂𑀢𑀺, 𑀫𑁄𑀘𑁂𑀢𑀼𑀁, 𑀫𑁄𑀘𑁂𑀢𑁆𑀯𑀸’’𑀢𑀺𑀆𑀤𑀻𑀦𑀺.

𑀭𑀺𑀘 𑀯𑀺𑀭𑁂𑀘𑀦𑁂. 𑀭𑀺𑀜𑁆𑀘𑀢𑀺. 𑀭𑀺𑀜𑁆𑀘𑀦𑀁, 𑀯𑀺𑀭𑁂𑀘𑀦𑀁, 𑀯𑀺𑀭𑁂𑀓𑁄, 𑀯𑀺𑀭𑁂𑀘𑀓𑁄. 𑀭𑀺𑀜𑁆𑀘𑀺𑀢𑀼𑀁. 𑀭𑀺𑀜𑁆𑀘𑀺𑀢𑁆𑀯𑀸.

𑀲𑀺𑀘 𑀧𑀕𑁆𑀖𑀭𑀡𑁂. 𑀉𑀤𑀓𑁂𑀦 𑀪𑀽𑀫𑀺𑀁 𑀲𑀺𑀜𑁆𑀘𑀢𑀺. 𑀧𑀼𑀢𑁆𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺. 𑀅𑀪𑀺𑀲𑁂𑀓𑁄. 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑁄 𑀔𑀢𑁆𑀢𑀺𑀬𑁄. 𑀲𑀺𑀜𑁆𑀘 𑀪𑀺𑀓𑁆𑀔𑀼 𑀇𑀫𑀁 𑀦𑀸𑀯𑀁, 𑀲𑀺𑀢𑁆𑀢𑀸 𑀢𑁂 𑀮𑀳𑀼𑀫𑁂𑀲𑁆𑀲𑀢𑀺. 𑀲𑀺𑀢𑁆𑀢𑀝𑁆𑀞𑀸𑀦𑀁. 𑀲𑀺𑀜𑁆𑀘𑀺𑀢𑀼𑀁. 𑀲𑀺𑀜𑁆𑀘𑀺𑀢𑁆𑀯𑀸.

𑀬𑀼𑀚 𑀬𑁄𑀕𑁂. 𑀬𑀼𑀜𑁆𑀚𑀢𑀺, 𑀅𑀦𑀼𑀬𑀼𑀜𑁆𑀚𑀢𑀺. 𑀓𑀫𑁆𑀫𑀦𑀺 ‘‘𑀬𑀼𑀜𑁆𑀚𑀺𑀬𑀢𑀻’’𑀢𑀺 𑀭𑀽𑀧𑀸𑀦𑀺. 𑀓𑁂𑀘𑀺 ‘‘𑀬𑀼𑀜𑁆𑀚𑀢𑁂’’𑀢𑀺 𑀇𑀘𑁆𑀙𑀦𑁆𑀢𑀺. 𑀬𑀼𑀜𑁆𑀚𑀦𑀁, 𑀲𑀁𑀬𑁄𑀕𑁄, 𑀅𑀦𑀼𑀬𑁄𑀕𑁄, 𑀪𑀸𑀯𑀦𑀸𑀦𑀼𑀬𑀼𑀢𑁆𑀢𑁄, 𑀲𑀜𑁆𑀜𑁄𑀕𑁄, 𑀲𑀜𑁆𑀜𑁄𑀚𑀦𑀁, 𑀅𑀢𑁆𑀣𑀬𑁄𑀚𑀦𑀸. 𑀤𑀻𑀖𑀁 𑀲𑀦𑁆𑀢𑀲𑁆𑀲 𑀬𑁄𑀚𑀦𑀁. 𑀬𑀼𑀜𑁆𑀚𑀺𑀢𑀼𑀁, 𑀅𑀦𑀼𑀬𑀼𑀜𑁆𑀚𑀺𑀢𑀼𑀁. 𑀅𑀦𑀼𑀬𑀼𑀜𑁆𑀚𑀺𑀢𑁆𑀯𑀸. 𑀬𑁄𑀚𑁂𑀢𑀺. 𑀢𑀢𑁆𑀣 𑀲𑀁𑀬𑁄𑀚𑀦𑀦𑁆𑀢𑀺 𑀩𑀦𑁆𑀥𑀦𑀁 𑀓𑀸𑀫𑀭𑀸𑀕𑀸𑀤𑀺. 𑀬𑁄𑀚𑀦𑀦𑁆𑀢𑀺 𑁋

𑀯𑀺𑀤𑀢𑁆𑀣𑀺 𑀤𑁆𑀯𑀸𑀤𑀲𑀗𑁆𑀕𑀼𑀮𑁆𑀬𑁄, 𑀢𑀤𑁆𑀯𑀬𑀁 𑀭𑀢𑀦𑀁 𑀫𑀢𑀁;

𑀲𑀢𑁆𑀢𑀭𑀢𑀦𑀺𑀓𑀸 𑀬𑀝𑁆𑀞𑀺, 𑀉𑀲𑀪𑀁 𑀯𑀻𑀲𑀬𑀝𑁆𑀞𑀺𑀓𑀁;

𑀕𑀸𑀯𑀼𑀢𑀁 𑀉𑀲𑀪𑀸𑀲𑀻𑀢𑀺, 𑀬𑁄𑀚𑀦𑀁 𑀘𑀢𑀼𑀕𑀸𑀯𑀼𑀢𑀁.

𑀪𑀼𑀚 𑀧𑀸𑀮𑀦𑀩𑁆𑀬𑀯𑀳𑀭𑀡𑁂𑀲𑀼. 𑀧𑀸𑀮𑀦𑀁 𑀭𑀓𑁆𑀔𑀡𑀁. 𑀩𑁆𑀬𑀯𑀳𑀭𑀡𑀁 𑀅𑀚𑁆𑀛𑁄𑀳𑀭𑀡𑀁. 𑀪𑀼𑀜𑁆𑀚𑀢𑀺, 𑀧𑀭𑀺𑀪𑀼𑀜𑁆𑀚𑀢𑀺, 𑀲𑀁𑀪𑀼𑀜𑁆𑀚𑀢𑀺. 𑀤𑀸𑀲𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺. 𑀓𑀸𑀭𑀺𑀢𑁂 ‘‘𑀪𑁄𑀚𑁂𑀢𑀺 𑀪𑁄𑀚𑀬𑀢𑀻’’𑀢𑀺𑀆𑀤𑀻𑀦𑀺 𑀭𑀽𑀧𑀸𑀦𑀺. 𑀪𑁄𑀚𑀦𑀁, 𑀲𑀫𑁆𑀪𑁄𑀕𑁄, 𑀫𑀳𑀺𑀪𑀼𑀚𑁄, 𑀕𑀸𑀫𑀪𑁄𑀚𑀓𑁄 ¶ , 𑀉𑀧𑀪𑁄𑀕𑁄, 𑀧𑀭𑀺𑀪𑁄𑀕𑁄. 𑀪𑀼𑀢𑁆𑀢𑁄 𑀑𑀤𑀦𑁄 𑀪𑀯𑀢𑀸. 𑀲𑀘𑁂 𑀪𑀼𑀢𑁆𑀢𑁄 𑀪𑀯𑁂𑀬𑁆𑀬𑀸𑀳𑀁. 𑀑𑀤𑀦𑀁 𑀪𑀼𑀢𑁆𑀢𑁄 𑀪𑀼𑀢𑁆𑀢𑀯𑀸 𑀪𑀼𑀢𑁆𑀢𑀸𑀯𑀻. 𑀢𑀼𑀫𑀦𑁆𑀢𑀸𑀤𑀺𑀢𑁆𑀢𑁂 ‘‘𑀪𑀼𑀜𑁆𑀚𑀺𑀢𑀼𑀁, 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀪𑁄𑀚𑁂𑀢𑀼𑀁, 𑀪𑁄𑀚𑀬𑀺𑀢𑀼𑀁, 𑀪𑀼𑀜𑁆𑀚𑀺𑀢𑁆𑀯𑀸, 𑀪𑀼𑀜𑁆𑀚𑀺𑀢𑁆𑀯𑀸𑀦, 𑀪𑀼𑀜𑁆𑀚𑀺𑀬, 𑀪𑀼𑀜𑁆𑀚𑀺𑀬𑀸𑀦, 𑀪𑁄𑀚𑁂𑀢𑁆𑀯𑀸, 𑀪𑁄𑀚𑁂𑀢𑁆𑀯𑀸𑀦, 𑀪𑁄𑀚𑀬𑀺𑀢𑁆𑀯𑀸, 𑀪𑁄𑀚𑀬𑀺𑀢𑁆𑀯𑀸𑀦’’ 𑀇𑀘𑁆𑀘𑀸𑀤𑀻𑀦𑀺 𑀧𑀭𑀺𑀲𑀤𑁆𑀤𑀸𑀤𑀻𑀳𑀺 𑀯𑀺𑀲𑁂𑀲𑀺𑀢𑀩𑁆𑀩𑀸𑀦𑀺.

𑀢𑀢𑁆𑀭 𑀪𑀼𑀜𑁆𑀚𑀢𑀻𑀢𑀺 𑀪𑀢𑁆𑀢𑀁 𑀪𑀼𑀜𑁆𑀚𑀢𑀺, 𑀪𑁄𑀚𑀦𑀻𑀬𑀁 𑀪𑀼𑀜𑁆𑀚𑀢𑀺. 𑀢𑀣𑀸 𑀳𑀺 ‘‘𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀔𑀸𑀤𑀢𑀺 𑀯𑀸 𑀪𑀼𑀜𑁆𑀚𑀢𑀺 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀧𑀺𑀘 𑀓𑀤𑀸𑀘𑀺 𑀔𑀸𑀤𑀦𑀻𑀬𑁂𑀧𑀺 ‘‘𑀪𑀼𑀜𑁆𑀚𑀢𑀻’’𑀢𑀺 𑀯𑁄𑀳𑀸𑀭𑁄 𑀤𑀺𑀲𑁆𑀲𑀢𑀺. ‘‘𑀨𑀮𑀸𑀦𑀺 𑀔𑀼𑀤𑁆𑀤𑀓𑀧𑁆𑀧𑀸𑀦𑀺, 𑀪𑀼𑀜𑁆𑀚 𑀭𑀸𑀚 𑀯𑀭𑀸𑀯𑀭’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀧𑀝𑀺𑀲𑁂𑀯𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑁂𑀯 𑀘 𑀧𑀝𑀺𑀲𑁂𑀯𑀢𑀻𑀢𑀺 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀅𑀢𑁆𑀣𑁄 𑀲𑀁𑀯𑀡𑁆𑀡𑀺𑀬𑀢𑀺. 𑀅𑀧𑀺𑀘 ‘‘𑀓𑀸𑀫𑁂 𑀪𑀼𑀜𑁆𑀚𑀢𑀻’’𑀢𑀺 𑀘 ‘‘𑀧𑀜𑁆𑀘𑀓𑀸𑀫𑀕𑀼𑀡𑁂 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺 𑀘 𑀤𑀲𑁆𑀲𑀦𑀢𑁄 𑀧𑀦 𑀪𑀼𑀜𑁆𑀚𑀦𑀧𑀭𑀺𑀪𑀼𑀜𑁆𑀚𑀦𑀲𑀤𑁆𑀤𑀸 𑀧𑀝𑀺𑀲𑁂𑀯𑀦𑀢𑁆𑀣𑁂𑀦 𑀓𑀢𑁆𑀣𑀘𑀺 𑀲𑀫𑀸𑀦𑀢𑁆𑀣𑀸𑀧𑀺 𑀳𑁄𑀦𑁆𑀢𑀻𑀢𑀺 𑀅𑀯𑀕𑀦𑁆𑀢𑀩𑁆𑀩𑀸. 𑀲𑀁𑀪𑀼𑀜𑁆𑀚𑀢𑀻𑀢𑀺 𑀲𑀫𑁆𑀪𑁄𑀕𑀁 𑀓𑀭𑁄𑀢𑀺, 𑀏𑀓𑀢𑁄 𑀯𑀸𑀲𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀲𑀺𑀬𑀸 ‘‘𑀦𑀦𑀼 𑀘 𑀪𑁄 𑀅𑀢𑁆𑀭 𑀪𑀼𑀚𑀥𑀸𑀢𑀼 𑀧𑀸𑀮𑀦𑀩𑁆𑀬𑀯𑀳𑀭𑀡𑁂𑀲𑀼 𑀯𑀼𑀢𑁆𑀢𑁄, 𑀲𑁄 𑀓𑀣𑀁 𑀏𑀢𑁆𑀢𑀓𑁂𑀲𑀼𑀧𑀺 𑀅𑀢𑁆𑀣𑁂𑀲𑀼 𑀯𑀢𑁆𑀢𑀢𑀻’’𑀢𑀺? 𑀯𑀢𑁆𑀢𑀢𑁂𑀯, 𑀅𑀦𑁂𑀓𑀢𑁆𑀣𑀸 𑀳𑀺 𑀥𑀸𑀢𑀯𑁄, 𑀢𑁂 𑀉𑀧𑀲𑀕𑁆𑀕𑀲𑀳𑀸𑀬𑁂 𑀮𑀪𑀺𑀢𑁆𑀯𑀸𑀧𑀺 𑀅𑀦𑁂𑀓𑀢𑁆𑀣𑀢𑀭𑀸𑀯 𑀳𑁄𑀦𑁆𑀢𑀺. 𑀇𑀢𑁄 𑀧𑀝𑁆𑀞𑀸𑀬 𑀢𑀼𑀫𑀦𑁆𑀢𑀸𑀤𑀻𑀦𑀺 𑀭𑀽𑀧𑀸𑀦𑀺 𑀦 𑀯𑀓𑁆𑀔𑀸𑀫. 𑀬𑀢𑁆𑀣 𑀧𑀦 𑀯𑀺𑀲𑁂𑀲𑁄 𑀤𑀺𑀲𑁆𑀲𑀢𑀺, 𑀢𑀢𑁆𑀣 𑀯𑀓𑁆𑀔𑀸𑀫.

𑀓𑀢𑀺 𑀙𑁂𑀤𑀦𑁂. 𑀓𑀦𑁆𑀢𑀢𑀺, 𑀯𑀺𑀓𑀦𑁆𑀢𑀢𑀺. 𑀲𑀮𑁆𑀮𑀓𑀢𑁆𑀢𑁄.

𑀪𑀺𑀤𑀺 𑀯𑀺𑀤𑀸𑀭𑀡𑁂. 𑀪𑀺𑀦𑁆𑀤𑀢𑀺. 𑀅𑀦𑀸𑀕𑀢𑀢𑁆𑀣𑁂 𑀯𑀢𑁆𑀢𑀩𑁆𑀩𑁂 ‘‘𑀪𑁂𑀚𑁆𑀚𑀺𑀲𑁆𑀲𑀢𑀺, 𑀪𑀺𑀦𑁆𑀤𑀺𑀲𑁆𑀲𑀢𑀻’’𑀢𑀺 𑀤𑁆𑀯𑀺𑀥𑀸 𑀪𑀯𑀦𑁆𑀢𑀺 𑀭𑀽𑀧𑀸𑀦𑀺. 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀪𑀺𑀦𑁆𑀤𑀢𑀻𑀢𑀺 𑀪𑀺𑀓𑁆𑀔𑀼. 𑀢𑁂𑀦𑀸𑀳 𑁋

‘‘𑀦 ¶ 𑀢𑁂𑀦 𑀪𑀺𑀓𑁆𑀔𑀼 𑀲𑁄 𑀳𑁄𑀢𑀺, 𑀬𑀸𑀯𑀢𑀸 𑀪𑀺𑀓𑁆𑀔𑀢𑁂 𑀧𑀭𑁂;

𑀯𑀺𑀲𑀁 𑀥𑀫𑁆𑀫𑀁 𑀲𑀫𑀸𑀤𑀸𑀬, 𑀪𑀺𑀓𑁆𑀔𑀼 𑀳𑁄𑀢𑀺 𑀦 𑀢𑀸𑀯𑀢𑀸.

𑀬𑁄𑀥 𑀧𑀼𑀜𑁆𑀜𑀜𑁆𑀘 𑀧𑀸𑀧𑀜𑁆𑀘, 𑀩𑀸𑀳𑀺𑀢𑁆𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁;

𑀲𑀗𑁆𑀔𑀸𑀬 𑀮𑁄𑀓𑁂 𑀘𑀭𑀢𑀺, 𑀲𑀯𑁂 ‘𑀪𑀺𑀓𑁆𑀔𑀽’𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀇𑀤𑀜𑁆𑀘 𑀔𑀻𑀡𑀸𑀲𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀲𑀫𑀡𑀸𑀧𑀺 𑀬𑀣𑀸𑀲𑀫𑁆𑀪𑀯𑀁 ‘‘𑀪𑀺𑀓𑁆𑀔𑀽’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀧𑀸𑀧𑀼𑀡𑀦𑁆𑀢𑀺𑀬𑁂𑀯. 𑀲𑀗𑁆𑀖𑀁 𑀪𑀺𑀦𑁆𑀤𑀢𑀻𑀢𑀺 𑀲𑀗𑁆𑀖𑀪𑁂𑀤𑀓𑁄. 𑀤𑁂𑀯𑀤𑀢𑁆𑀢𑁂𑀦 𑀲𑀗𑁆𑀖𑁄 𑀪𑀺𑀦𑁆𑀦𑁄,. 𑀪𑀺𑀦𑁆𑀤𑀺𑀬𑀢𑀻𑀢𑀺 𑀪𑀺𑀦𑁆𑀦𑁄𑀢𑀺 𑀳𑀺 𑀦𑀺𑀩𑁆𑀩𑀘𑀦𑀁. 𑀦 𑀢𑁂 𑀓𑀝𑁆𑀞𑀸𑀦𑀺 𑀪𑀺𑀦𑁆𑀦𑀸𑀦𑀺. 𑀪𑀺𑀦𑁆𑀤𑀢𑀻𑀢𑀺 𑀪𑁂𑀢𑁆𑀢𑀸.

𑀙𑀺𑀤𑀺 𑀤𑁆𑀯𑁂𑀥𑀸𑀓𑀭𑀡𑁂. 𑀙𑀺𑀦𑁆𑀤𑀢𑀻𑀢𑀺 𑀙𑁂𑀤𑀓𑁄, 𑀏𑀯𑀁 𑀙𑁂𑀢𑁆𑀢𑀸. 𑀓𑁂𑀲𑁂 𑀙𑁂𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀙𑀺𑀦𑁆𑀤𑀺𑀬𑀢𑀻𑀢𑀺 𑀙𑀺𑀦𑁆𑀦𑁄. 𑀙𑀺𑀦𑁆𑀦𑁄𑀧𑀺 𑀭𑀼𑀓𑁆𑀔𑁄 𑀧𑀼𑀦𑀤𑁂𑀯 𑀭𑀽𑀳𑀢𑀺. 𑀇𑀤𑀁 𑀧𑀦 𑀪𑀺𑀤𑀺𑀙𑀺𑀤𑀺𑀤𑁆𑀯𑀬𑀁 𑀤𑀺𑀯𑀸𑀤𑀺𑀕𑀡𑀁 𑀧𑀢𑁆𑀯𑀸 ‘‘𑀪𑀺𑀚𑁆𑀚𑀢𑀺 𑀙𑀺𑀚𑁆𑀚𑀢𑀻’’𑀢𑀺 𑀲𑀼𑀤𑁆𑀥𑀓𑀢𑁆𑀢𑀼𑀯𑀸𑀘𑀓𑀁 𑀭𑀽𑀧𑀤𑁆𑀯𑀬𑀁 𑀚𑀦𑁂𑀢𑀺, 𑀢𑀲𑁆𑀫𑀸 ‘‘𑀪𑀺𑀚𑁆𑀚𑀢𑀻𑀢𑀺 𑀪𑀺𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀲𑀼𑀤𑁆𑀥𑀓𑀢𑁆𑀢𑀼𑀯𑀲𑁂𑀦𑀧𑀺 𑀦𑀺𑀩𑁆𑀩𑀘𑀦𑀁 𑀓𑀸𑀢𑀩𑁆𑀩𑀁.

𑀢𑀤𑀺 𑀳𑀺𑀁𑀲𑀸𑀦𑀸𑀤𑀭𑁂𑀲𑀼. 𑀢𑀦𑁆𑀤𑀢𑀺. 𑀢𑀦𑁆𑀤𑀻, 𑀢𑀤𑁆𑀤𑀼. 𑀢𑀤𑁆𑀤𑀢𑀺 𑀓𑀘𑁆𑀙𑀼.

𑀉𑀤𑀺 𑀧𑀲𑀯𑀓𑀺𑀮𑁂𑀤𑀦𑁂𑀲𑀼. 𑀧𑀲𑀯𑀦𑀁 𑀲𑀦𑁆𑀤𑀦𑀁. 𑀓𑀺𑀮𑁂𑀤𑀦𑀁 𑀢𑀺𑀦𑁆𑀤𑀢𑀸. 𑀉𑀦𑁆𑀤𑀢𑀺. 𑀉𑀦𑁆𑀤𑀽𑀭𑁄, 𑀲𑀫𑀼𑀤𑁆𑀤𑁄.

𑀯𑀺𑀤 𑀮𑀸𑀪𑁂. 𑀯𑀺𑀦𑁆𑀤𑀢𑀺. 𑀕𑁄𑀯𑀺𑀦𑁆𑀤𑁄, 𑀯𑀺𑀢𑁆𑀢𑀺. 𑀏𑀢𑁆𑀣 𑀯𑀺𑀢𑁆𑀢𑀻𑀢𑀺 𑀅𑀦𑀼𑀪𑀯𑀦𑀁, 𑀯𑁂𑀤𑀦𑀸 𑀯𑀸.

𑀯𑀺𑀤 𑀢𑀼𑀝𑁆𑀞𑀺𑀬𑀁. 𑀯𑀺𑀦𑁆𑀤𑀢𑀺, 𑀦𑀺𑀩𑁆𑀩𑀺𑀦𑁆𑀤𑀢𑀺. 𑀦𑀺𑀩𑁆𑀩𑀺𑀦𑁆𑀤𑀦𑀁. 𑀯𑀺𑀭𑀚𑁆𑀚𑀢𑀺. 𑀦𑀺𑀩𑁆𑀩𑀺𑀦𑁆𑀤𑁄 𑀓𑀸𑀫𑀭𑀢𑀺𑀬𑀸. 𑀯𑀺𑀢𑁆𑀢𑀺, 𑀯𑀺𑀢𑁆𑀢𑀁, 𑀯𑁂𑀤𑁄. 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁 𑀥𑀫𑁆𑀫𑀯𑁂𑀤𑀁.

𑀏𑀢𑁆𑀣 𑀯𑀺𑀢𑁆𑀢𑀻𑀢𑀺 𑀲𑁄𑀫𑀦𑀲𑁆𑀲𑀁. ‘‘𑀯𑀺𑀢𑁆𑀢𑀺 𑀳𑀺 𑀫𑀁 𑀯𑀺𑀦𑁆𑀤𑀢𑀺 𑀲𑀼𑀢 𑀤𑀺𑀲𑁆𑀯𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀯𑀺𑀢𑁆𑀢𑀦𑁆𑀢𑀺 𑀯𑀺𑀢𑁆𑀢𑀺𑀚𑀦𑀦𑀢𑁆𑀢𑀸 𑀯𑀺𑀢𑁆𑀢𑀲𑀗𑁆𑀔𑀸𑀢𑀁 𑀥𑀦𑀁. 𑀯𑁂𑀤𑁄𑀢𑀺 ¶ 𑀕𑀦𑁆𑀣𑁄𑀧𑀺 𑀜𑀸𑀡𑀫𑁆𑀧𑀺 𑀲𑁄𑀫𑀦𑀲𑁆𑀲𑀫𑁆𑀧𑀺 𑀯𑀼𑀘𑁆𑀘𑀢𑀺. ‘‘𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽’’𑀢𑀺𑀆𑀤𑀻𑀲𑀼 𑀳𑀺 𑀕𑀦𑁆𑀣𑁄 ‘‘𑀯𑁂𑀤𑁄’’𑀢𑀺 𑀯𑀼𑀘𑁆𑀘𑀢𑀺. ‘‘𑀩𑁆𑀭𑀸𑀳𑁆𑀫𑀡𑀁 𑀯𑁂𑀤𑀕𑀼𑀫𑀪𑀺𑀚𑀜𑁆𑀜𑀸 𑀅𑀓𑀺𑀜𑁆𑀘𑀦𑀁 𑀓𑀸𑀫𑀪𑀯𑁂 𑀅𑀲𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 𑀜𑀸𑀡𑀁. ‘‘𑀬𑁂 𑀯𑁂𑀤𑀚𑀸𑀢𑀸 𑀯𑀺𑀘𑀭𑀦𑁆𑀢𑀺 𑀮𑁄𑀓𑁂’’𑀢𑀺𑀆𑀤𑀻𑀲𑀼 𑀲𑁄𑀫𑀦𑀲𑁆𑀲𑀁.

𑀯𑁂𑀤𑀕𑀦𑁆𑀣𑁂 𑀘 𑀜𑀸𑀡𑁂 𑀘, 𑀲𑁄𑀫𑀦𑀲𑁆𑀲𑁂 𑀘 𑀯𑀢𑁆𑀢𑀢𑀺;

𑀯𑁂𑀤𑀲𑀤𑁆𑀤𑁄 𑀇𑀫𑀁 𑀦𑀸𑀦𑀸-𑀥𑀸𑀢𑀼𑀢𑁄 𑀲𑀫𑀼𑀤𑀻𑀭𑀬𑁂.

𑀮𑀺𑀧 𑀮𑀺𑀫𑁆𑀧𑀦𑁂. 𑀮𑀺𑀫𑁆𑀧𑀢𑀺, 𑀮𑀺𑀫𑁆𑀧𑀓𑁄. 𑀅𑀯𑀮𑁂𑀧𑁄. 𑀅𑀯𑀮𑁂𑀧𑁄𑀢𑀺 𑀅𑀳𑀗𑁆𑀓𑀸𑀭𑁄.

𑀮𑀼𑀧 𑀅𑀘𑁆𑀙𑁂𑀤𑀦𑁂. 𑀮𑀼𑀫𑁆𑀧𑀢𑀺. 𑀯𑀺𑀮𑀼𑀫𑁆𑀧𑀓𑁄, 𑀯𑀺𑀮𑀼𑀢𑁆𑀢𑁄 𑀯𑀺𑀮𑁄𑀧𑁄.

𑀯𑀺𑀮𑀼𑀫𑁆𑀧𑀢𑁂𑀯 𑀧𑀼𑀭𑀺𑀲𑁄, 𑀬𑀸𑀯𑀲𑁆𑀲 𑀉𑀧𑀓𑀧𑁆𑀧𑀢𑀺;

𑀬𑀤𑀸 𑀘𑀜𑁆𑀜𑁂 𑀯𑀺𑀮𑀼𑀫𑁆𑀧𑀦𑁆𑀢𑀺, 𑀲𑁄 𑀯𑀺𑀮𑀼𑀢𑁆𑀢𑁄 𑀯𑀺𑀮𑀼𑀫𑁆𑀧𑀢𑀻𑀢𑀺.

𑀧𑀺𑀲 𑀘𑀼𑀡𑁆𑀡𑀦𑁂. 𑀧𑀺𑀁𑀲𑀢𑀺. 𑀧𑀺𑀲𑀓𑁄. 𑀧𑀺𑀲𑀼𑀡𑀸 𑀯𑀸𑀘𑀸. 𑀆𑀕𑀫𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀅𑀢𑁆𑀢𑀦𑁄 𑀧𑀺𑀬𑀪𑀸𑀯𑀁 𑀧𑀭𑀲𑁆𑀲 𑀘 𑀲𑀼𑀜𑁆𑀜𑀪𑀸𑀯𑀁 𑀬𑀸𑀬 𑀯𑀸𑀘𑀸𑀬 𑀪𑀸𑀲𑀢𑀺, 𑀲𑀸 𑀧𑀺𑀲𑀼𑀡𑀸 𑀯𑀸𑀘𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀦𑀺𑀭𑀼𑀢𑁆𑀢𑀺𑀮𑀓𑁆𑀔𑀡𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀳𑀺𑀲𑀺 𑀯𑀺𑀳𑀺𑀁𑀲𑀸𑀬𑀁. 𑀳𑀺𑀁𑀲𑀢𑀺, 𑀯𑀺𑀳𑀺𑀁𑀲𑀢𑀺. 𑀳𑀺𑀁𑀲𑀓𑁄.

𑀅𑀳𑀺𑀁𑀲𑀓𑁄𑀢𑀺 𑀫𑁂 𑀦𑀸𑀫𑀁, 𑀳𑀺𑀁𑀲𑀓𑀲𑁆𑀲 𑀧𑀼𑀭𑁂 𑀲𑀢𑁄;

𑀅𑀚𑁆𑀚𑀸𑀳𑀁 𑀲𑀘𑁆𑀘𑀦𑀸𑀫𑁄𑀫𑁆𑀳𑀺, 𑀦 𑀦𑀁 𑀳𑀺𑀁𑀲𑀸𑀫𑀺 𑀓𑀺𑀜𑁆𑀘𑀦𑀁.

𑀳𑀺𑀁𑀲𑀺𑀢𑀩𑁆𑀩𑀁 𑀓𑀺𑀁𑀲𑀢𑀻𑀢𑀺 𑀲𑀻𑀳𑁄. 𑀆𑀤𑀺𑀅𑀦𑁆𑀢𑀓𑁆𑀔𑀭𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀲𑀤𑁆𑀤𑀲𑀺𑀤𑁆𑀥𑀺, 𑀬𑀣𑀸 ‘‘𑀓𑀦𑁆𑀢𑀦𑀝𑁆𑀞𑁂𑀦 𑀢𑀓𑁆𑀓’’𑀦𑁆𑀢𑀺. 𑀯𑀺𑀳𑁂𑀲𑀓𑁄, 𑀯𑀺𑀳𑁂𑀲𑀦𑀁.

𑀲𑀼𑀫𑁆𑀪 ¶ 𑀧𑀳𑀸𑀭𑁂. 𑀬𑁄 𑀦𑁄 𑀕𑀸𑀯𑁄𑀯 𑀲𑀼𑀫𑁆𑀪𑀢𑀺. 𑀧𑀭𑀺𑀲𑀼𑀫𑁆𑀪𑀢𑀺. 𑀲𑀼𑀫𑁆𑀪𑁄𑀢𑀺. 𑀅𑀢𑁆𑀭𑀺𑀫𑁂 𑀧𑀸𑀴𑀺𑀢𑁄 𑀧𑀬𑁄𑀕𑀸 𑁋

‘‘𑀲𑀁𑀲𑀼𑀫𑁆𑀪𑀫𑀸𑀦𑀸 𑀅𑀢𑁆𑀢𑀸𑀦𑀁, 𑀓𑀸𑀮𑀫𑀸𑀕𑀫𑀬𑀸𑀫𑀲𑁂’’𑀢𑀺 𑀘,

‘‘𑀓𑁂𑀲𑀕𑁆𑀕𑀳𑀡𑀫𑀼𑀓𑁆𑀔𑁂𑀧𑀸, 𑀪𑀽𑀫𑁆𑀬𑀸 𑀘 𑀧𑀭𑀺𑀲𑀼𑀫𑁆𑀪𑀦𑀸;

𑀤𑀢𑁆𑀯𑀸 𑀘 𑀦𑁄 𑀧𑀓𑁆𑀓𑀫𑀢𑀺, 𑀩𑀳𑀼𑀤𑀼𑀓𑁆𑀔𑀁 𑀅𑀦𑀧𑁆𑀧𑀓’’𑀦𑁆𑀢𑀺 𑀘,

‘‘𑀪𑀽𑀫𑀺𑀁 𑀲𑀼𑀫𑁆𑀪𑀸𑀫𑀺 𑀯𑁂𑀕𑀲𑀸’’𑀢𑀺 𑀘.

𑀅𑀜𑁆𑀜𑀢𑁆𑀣 𑀧𑀦 𑀅𑀜𑁆𑀜𑀸𑀧𑀺 𑀯𑀼𑀢𑁆𑀢𑀸. 𑀢𑀸 𑀇𑀥 𑀅𑀦𑀼𑀧𑀧𑀢𑁆𑀢𑀺𑀢𑁄 𑀦 𑀯𑀼𑀢𑁆𑀢𑀸. 𑀓𑁂𑀘𑁂𑀢𑁆𑀣 𑀫𑀜𑁆𑀜𑁂𑀬𑁆𑀬𑀼𑀁, 𑀬𑀣𑀸 𑀪𑀽𑀯𑀸𑀤𑀺𑀕𑀡𑁂 ‘‘𑀲𑀓𑀺 𑀲𑀗𑁆𑀓𑀸𑀬𑀁 𑀔𑀚𑀺 𑀕𑀢𑀺𑀯𑁂𑀓𑀮𑁆𑀮𑁂’’𑀢𑀺𑀆𑀤𑀻𑀦𑀁 𑀥𑀸𑀢𑀽𑀦𑀁 𑀧𑀝𑀺𑀮𑀤𑁆𑀥𑀯𑀕𑁆𑀕𑀦𑁆𑀢𑀪𑀸𑀯𑀲𑁆𑀲 𑀦𑀺𑀕𑁆𑀕𑀳𑀻𑀢𑀸𑀕𑀫𑀲𑁆𑀲 𑀯𑀲𑁂𑀦 ‘‘𑀲𑀗𑁆𑀓𑀢𑀺 𑀔𑀜𑁆𑀚𑀢𑀻’’𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺, 𑀢𑀣𑀸 𑀇𑀫𑀲𑁆𑀫𑀺𑀁 𑀭𑀼𑀥𑀸𑀤𑀺𑀕𑀡𑁂 ‘‘𑀫𑀼𑀘 𑀫𑁄𑀘𑀦𑁂 𑀓𑀢𑀺 𑀙𑁂𑀤𑀦𑁂’’𑀢𑀺𑀆𑀤𑀻𑀦𑀁 𑀥𑀸𑀢𑀽𑀦𑀁 𑀧𑀝𑀺𑀮𑀤𑁆𑀥𑀯𑀕𑁆𑀕𑀦𑁆𑀢𑀪𑀸𑀯𑀲𑁆𑀲 𑀦𑀺𑀕𑁆𑀕𑀳𑀻𑀢𑀸𑀕𑀫𑀲𑁆𑀲 𑀯𑀲𑁂𑀦 ‘‘𑀫𑀼𑀜𑁆𑀘𑀢𑀺 𑀓𑀦𑁆𑀢𑀢𑀻’’𑀢𑀺𑀆𑀤𑀻𑀦𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂 𑀓𑁄 𑀇𑀫𑁂𑀲𑀁 𑀢𑁂𑀲𑀜𑁆𑀘 𑀯𑀺𑀲𑁂𑀲𑁄𑀢𑀺? 𑀏𑀢𑁆𑀣 𑀯𑀼𑀘𑁆𑀘𑀢𑁂 𑁋 𑀬𑁂 𑀪𑀽𑀯𑀸𑀤𑀺𑀕𑀡𑀲𑁆𑀫𑀺𑀁 𑀅𑀦𑁂𑀓𑀲𑁆𑀲𑀭𑀸 𑀅𑀲𑀁𑀬𑁄𑀕𑀦𑁆𑀢𑀸 𑀇𑀓𑀸𑀭𑀦𑁆𑀢𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀸, 𑀢𑁂 𑀆𑀔𑁆𑀬𑀸𑀢𑀢𑁆𑀢𑀜𑁆𑀘 𑀦𑀸𑀫𑀺𑀓𑀢𑁆𑀢𑀜𑁆𑀘 𑀧𑀢𑁆𑀯𑀸 𑀲𑀼𑀤𑁆𑀥𑀓𑀢𑁆𑀢𑀼𑀳𑁂𑀢𑀼𑀓𑀢𑁆𑀢𑀼𑀯𑀺𑀲𑀬𑁂𑀲𑀼 𑀏𑀓𑀦𑁆𑀢𑀢𑁄 𑀦𑀺𑀕𑁆𑀕𑀳𑀻𑀢𑀸𑀕𑀫𑁂𑀦 𑀦𑀺𑀧𑁆𑀨𑀦𑁆𑀦𑀭𑀽𑀧𑀸 𑀪𑀯𑀦𑁆𑀢𑀺, 𑀦 𑀓𑀢𑁆𑀣𑀘𑀺𑀧𑀺 𑀢𑁂𑀲𑀁 𑀯𑀺𑀦𑀸 𑀦𑀺𑀕𑁆𑀕𑀳𑀻𑀢𑀸𑀕𑀫𑁂𑀦 𑀭𑀽𑀧𑀧𑁆𑀧𑀯𑀢𑁆𑀢𑀺 𑀤𑀺𑀲𑁆𑀲𑀢𑀺. 𑀢𑀁 𑀬𑀣𑀸? 𑀲𑀗𑁆𑀓𑀢𑀺, 𑀲𑀗𑁆𑀓𑀸, 𑀔𑀜𑁆𑀚𑀢𑀺, 𑀔𑀜𑁆𑀚𑁄 𑀇𑀘𑁆𑀘𑀸𑀤𑀺. 𑀅𑀬𑀁 𑀅𑀦𑁂𑀓𑀲𑁆𑀲𑀭𑀸𑀦𑀁 𑀇𑀓𑀸𑀭𑀦𑁆𑀢𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀸𑀦𑀁 𑀪𑀽𑀯𑀸𑀤𑀺𑀕𑀡𑀺𑀓𑀸𑀦𑀁 𑀯𑀺𑀲𑁂𑀲𑁄.

𑀬𑁂 𑀘 𑀭𑀼𑀥𑀸𑀤𑀺𑀕𑀡𑀲𑁆𑀫𑀺𑀁 𑀅𑀦𑁂𑀓𑀲𑁆𑀲𑀭𑀸 𑀅𑀲𑀁𑀬𑁄𑀕𑀦𑁆𑀢𑁆𑀯𑀸 𑀅𑀓𑀸𑀭𑀦𑁆𑀢𑀯𑀲𑁂𑀦 𑀯𑀸 𑀉𑀓𑀸𑀭𑀦𑁆𑀢𑀯𑀲𑁂𑀦 𑀯𑀸 𑀦𑀺𑀤𑁆𑀤𑀺𑀝𑁆𑀞𑀸, 𑀢𑁂 𑀆𑀔𑁆𑀬𑀸𑀢𑀢𑁆𑀢𑀁 𑀧𑀢𑁆𑀯𑀸 𑀲𑀼𑀤𑁆𑀥𑀓𑀢𑁆𑀢𑀼𑀯𑀺𑀲𑀬𑁂𑀬𑁂𑀯 𑀏𑀓𑀦𑁆𑀢𑀢𑁄 𑀦𑀺𑀕𑁆𑀕𑀳𑀻𑀢𑀸𑀕𑀫𑁂𑀦 𑀦𑀺𑀧𑁆𑀨𑀦𑁆𑀦𑀭𑀽𑀧𑀸 𑀪𑀯𑀦𑁆𑀢𑀺, 𑀦 𑀳𑁂𑀢𑀼𑀓𑀢𑁆𑀢𑀼𑀯𑀺𑀲𑀬𑁂. 𑀦𑀸𑀫𑀺𑀓𑀢𑁆𑀢𑀁 𑀧𑀦 𑀲𑀳𑀦𑀺𑀕𑁆𑀕𑀳𑀻𑀢𑀸𑀕𑀫𑁂𑀦 𑀯𑀺𑀦𑀸 𑀘 𑀦𑀺𑀕𑁆𑀕𑀳𑀻𑀢𑀸𑀕𑀫𑁂𑀦 𑀦𑀺𑀧𑁆𑀨𑀦𑁆𑀦𑀭𑀽𑀧𑀸 𑀪𑀯𑀦𑁆𑀢𑀺. 𑀬𑀢𑁆𑀣 ¶ 𑀯𑀺𑀦𑀸 𑀦𑀺𑀕𑁆𑀕𑀳𑀻𑀢𑀸𑀕𑀫𑁂𑀦 𑀦𑀺𑀧𑁆𑀨𑀦𑁆𑀦𑀭𑀽𑀧𑀸, 𑀢𑀢𑁆𑀣 𑀲𑀲𑀁𑀬𑁄𑀕𑀭𑀽𑀧𑀸𑀬𑁂𑀯 𑀪𑀯𑀦𑁆𑀢𑀺. 𑀢𑀁 𑀬𑀣𑀸? 𑀫𑀼𑀜𑁆𑀘𑀢𑀺, 𑀫𑀼𑀜𑁆𑀘𑀸𑀧𑁂𑀢𑀺, 𑀫𑁄𑀘𑁂𑀢𑀺, 𑀫𑁄𑀘𑀸𑀧𑁂𑀢𑀺. 𑀙𑀺𑀦𑁆𑀤𑀸𑀧𑁂𑀢𑀺. 𑀙𑁂𑀤𑁂𑀢𑀺, 𑀙𑁂𑀤𑀸𑀧𑁂𑀢𑀺. 𑀙𑀺𑀦𑁆𑀤𑀦𑀁, 𑀙𑁂𑀤𑁄. 𑀫𑀼𑀜𑁆𑀘𑀦𑀁, 𑀫𑁄𑀘𑀦𑀁. 𑀓𑀦𑁆𑀢𑀢𑀺, 𑀓𑀦𑁆𑀢𑀦𑀁, 𑀲𑀮𑁆𑀮𑀓𑀢𑁆𑀢𑁄. 𑀧𑀺𑀝𑁆𑀞𑀺𑀫𑀁𑀲𑀸𑀦𑀺 𑀅𑀢𑁆𑀢𑀦𑁄, 𑀲𑀸𑀫𑀁 𑀉𑀓𑁆𑀓𑀘𑁆𑀘 𑀔𑀸𑀤𑀲𑀺 𑀇𑀘𑁆𑀘𑀸𑀤𑀻𑀦𑀺. 𑀢𑀢𑁆𑀣 𑀉𑀓𑁆𑀓𑀘𑁆𑀘𑀸𑀢𑀺 𑀉𑀓𑁆𑀓𑀦𑁆𑀢𑀺𑀢𑁆𑀯𑀸, 𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀦𑀦𑀼 𑀘 𑀪𑁄 𑀏𑀯𑀁 𑀲𑀦𑁆𑀢𑁂 𑀆𑀔𑁆𑀬𑀸𑀢𑀦𑀸𑀫𑀺𑀓𑀪𑀸𑀯𑀁 𑀧𑀢𑁆𑀯𑀸 𑀲𑀼𑀤𑁆𑀥𑀓𑀢𑁆𑀢𑀼𑀳𑁂𑀢𑀼𑀓𑀢𑁆𑀢𑀼𑀯𑀺𑀲𑀬𑁂𑀲𑀼 𑀏𑀓𑀦𑁆𑀢𑀢𑁄 𑀧𑀝𑀺𑀮𑀤𑁆𑀥𑀦𑀺𑀕𑁆𑀕𑀳𑀻𑀢𑀸𑀕𑀫𑁂𑀳𑀺 𑀲𑀓𑀺 𑀔𑀚𑀺 𑀆𑀤𑀻𑀳𑀺𑀬𑁂𑀯 𑀭𑀼𑀥𑀸𑀤𑀺𑀕𑀡𑀺𑀓𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀦 𑀧𑀦 𑀫𑀼𑀘𑀙𑀺𑀤𑀺𑀆𑀤𑀻𑀳𑀻𑀢𑀺? 𑀢𑀦𑁆𑀦, 𑀫𑀼𑀘𑀙𑀺𑀤𑀺𑀆𑀤𑀻𑀳𑀺𑀬𑁂𑀯 𑀭𑀼𑀥𑀸𑀤𑀺𑀕𑀡𑀺𑀓𑁂𑀳𑀺 𑀪𑀯𑀺𑀢𑀩𑁆𑀩𑀁 𑀭𑀼𑀘𑀥𑀸𑀢𑀼𑀬𑀸 𑀲𑀫𑀸𑀦𑀕𑀢𑀺𑀓𑀢𑁆𑀢𑀸, 𑀢𑀣𑀸 𑀳𑀺 𑀬𑀣𑀸 ‘‘𑀭𑀼𑀦𑁆𑀥𑀺𑀲𑁆𑀲, 𑀭𑀼𑀦𑁆𑀥𑀬𑀢𑀺, 𑀭𑀼𑀦𑁆𑀥𑀸𑀧𑁂𑀢𑀺, 𑀭𑀼𑀦𑁆𑀥𑀦𑀁, 𑀭𑁄𑀥𑁄, 𑀯𑀺𑀭𑁄𑀥𑁄’’𑀢𑀺𑀆𑀤𑀻𑀲𑀼 𑀦𑀺𑀕𑁆𑀕𑀳𑀻𑀢𑀸𑀕𑀫𑀸𑀦𑀺𑀕𑁆𑀕𑀳𑀻𑀢𑀸𑀕𑀫𑀯𑀲𑁂𑀦 𑀤𑁆𑀯𑀺𑀧𑁆𑀧𑀓𑀸𑀭𑀸𑀦𑀺 𑀭𑀽𑀧𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀢𑀣𑀸 𑀫𑀼𑀘𑀙𑀺𑀤𑀺𑀆𑀤𑀻𑀦𑀫𑁆𑀧𑀻𑀢𑀺.

𑀦𑀦𑀼 𑀓𑀘𑁆𑀘𑀸𑀬𑀦𑁂 𑀦𑀺𑀕𑁆𑀕𑀳𑀻𑀢𑀸𑀕𑀫𑀲𑁆𑀲 𑀦𑀺𑀘𑁆𑀘𑀯𑀺𑀥𑀸𑀦𑀢𑁆𑀣𑀁 ‘‘𑀭𑀼𑀥𑀸𑀤𑀺𑀢𑁄 𑀦𑀺𑀕𑁆𑀕𑀳𑀻𑀢𑀧𑀼𑀩𑁆𑀩𑀜𑁆𑀘𑀸’’𑀢𑀺 𑀮𑀓𑁆𑀔𑀡𑀁 𑀯𑀼𑀢𑁆𑀢𑀦𑁆𑀢𑀺? 𑀲𑀘𑁆𑀘𑀁, 𑀢𑀁 𑀧𑀦 𑀓𑁆𑀭𑀺𑀬𑀸𑀧𑀤𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀤𑀺 𑀘 𑀦𑀸𑀫𑀺𑀓𑀧𑀤𑀢𑁆𑀢𑀫𑁆𑀧𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀪𑀯𑁂𑀬𑁆𑀬, ‘‘𑀯𑀺𑀭𑁄𑀥𑁄’’𑀢𑀺𑀆𑀤𑀻𑀦𑀁 𑀤𑀲𑁆𑀲𑀦𑀢𑁄 𑀯𑀸𑀲𑀤𑁆𑀤𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀯𑀸𑀲𑀤𑁆𑀤𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀼𑀢𑁆𑀢𑀁, 𑀢𑁂𑀦 𑀜𑀸𑀬𑀢𑀺 𑀓𑁆𑀭𑀺𑀬𑀸𑀧𑀤𑀢𑁆𑀢𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺.

𑀦𑀦𑀼 𑀘 𑀪𑁄 𑀏𑀯𑀁 𑀲𑀦𑁆𑀢𑁂 𑀲𑀓𑀺𑀔𑀚𑀺𑀆𑀤𑀻𑀦𑀁 𑀦𑀺𑀘𑁆𑀘𑀁 𑀲𑀦𑀺𑀕𑁆𑀕𑀳𑀻𑀢𑀸𑀕𑀫𑀓𑁆𑀭𑀺𑀬𑀸𑀧𑀤𑀢𑁆𑀢𑀁𑀬𑁂𑀯 𑀲𑀦𑁆𑀥𑀸𑀬 ‘‘𑀭𑀼𑀥𑀸𑀤𑀺𑀢𑁄 𑀦𑀺𑀕𑁆𑀕𑀳𑀻𑀢𑀧𑀼𑀩𑁆𑀩𑀜𑁆𑀘𑀸’’𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀲𑀓𑁆𑀓𑀸 𑀫𑀦𑁆𑀢𑀼𑀦𑁆𑀢𑀺? 𑀦 𑀲𑀓𑁆𑀓𑀸, 𑀲𑀓𑀺𑀔𑀚𑀺𑀆𑀤𑀻𑀦𑀁 𑀭𑀼𑀥𑀥𑀸𑀢𑀼𑀬𑀸 𑀅𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀦𑀸𑀫𑀺𑀓𑀢𑁆𑀢𑁂 𑀤𑁆𑀯𑀺𑀧𑁆𑀧𑀓𑀸𑀭𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀢𑀣𑀸 𑀳𑀺 𑀬𑁂𑀲𑀁 𑀬𑀸 𑀦𑀸𑀫𑀺𑀓𑀢𑁆𑀢𑁂 𑀦𑀺𑀕𑁆𑀕𑀳𑀻𑀢𑀸𑀕𑀫𑀸𑀦𑀺𑀕𑁆𑀕𑀳𑀻𑀢𑀸𑀕𑀫𑀯𑀲𑁂𑀦 𑀤𑁆𑀯𑀺𑀧𑁆𑀧𑀓𑀸𑀭𑀯𑀦𑁆𑀢𑀢𑀸, 𑀲𑀸 ¶ 𑀏𑀯 𑀢𑁂𑀲𑀁 𑀭𑀼𑀥𑀸𑀤𑀺𑀕𑀡𑀪𑀸𑀯𑀲𑁆𑀲 𑀮𑀓𑁆𑀔𑀡𑀁. 𑀢𑀜𑁆𑀘 𑀲𑀓𑀺𑀔𑀚𑀺𑀆𑀤𑀻𑀦𑀁 𑀦𑀢𑁆𑀣𑀺. ‘‘𑀲𑀗𑁆𑀓𑀸 𑀔𑀜𑁆𑀚𑁄’’𑀢𑀺𑀆𑀤𑀺𑀦𑀸 𑀳𑀺 𑀦𑀸𑀫𑀢𑁆𑀢𑁂 𑀏𑀓𑁄𑀬𑁂𑀯 𑀧𑀓𑀸𑀭𑁄 𑀤𑀺𑀲𑁆𑀲𑀢𑀺 𑀲𑀦𑀺𑀕𑁆𑀕𑀳𑀻𑀢𑀸𑀕𑀫𑁄, ‘‘𑀓𑀫𑀼 𑀧𑀤𑀯𑀺𑀓𑁆𑀔𑁂𑀧𑁂’’𑀇𑀘𑁆𑀘𑀸𑀤𑀻𑀦𑀁 𑀧𑀦 ‘‘𑀓𑀫𑁄, 𑀓𑀫𑀦𑀁, 𑀘𑀗𑁆𑀓𑀫𑁄, 𑀘𑀗𑁆𑀓𑀫𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀸𑀫𑀺𑀓𑀢𑁆𑀢𑁂 𑀤𑁆𑀯𑀺𑀧𑁆𑀧𑀓𑀸𑀭𑀯𑀦𑁆𑀢𑀢𑀸𑀲𑀫𑁆𑀪𑀯𑁂𑀧𑀺 𑀦𑀺𑀕𑁆𑀕𑀳𑀻𑀢𑀸𑀕𑀫𑀲𑁆𑀲 𑀅𑀩𑁆𑀪𑀸𑀲𑀯𑀺𑀲𑀬𑁂 𑀧𑀯𑀢𑁆𑀢𑀢𑁆𑀢𑀸 𑀲𑀸 𑀤𑁆𑀯𑀺𑀧𑁆𑀧𑀓𑀸𑀭𑀯𑀦𑁆𑀢𑀢𑀸 𑀭𑀼𑀥𑀸𑀤𑀺𑀕𑀡𑀪𑀸𑀯𑀲𑁆𑀲 𑀮𑀓𑁆𑀔𑀡𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀅𑀩𑁆𑀪𑀸𑀲𑀯𑀺𑀲𑀬𑁂 𑀧𑀯𑀢𑁆𑀢𑀁 𑀦𑀺𑀕𑁆𑀕𑀳𑀻𑀢𑀸𑀕𑀫𑀁 𑀯𑀚𑁆𑀚𑁂𑀢𑁆𑀯𑀸 𑀬𑀸 𑀤𑁆𑀯𑀺𑀧𑁆𑀧𑀓𑀸𑀭𑀯𑀦𑁆𑀢𑀢𑀸, 𑀲𑀸𑀬𑁂𑀯 𑀭𑀼𑀥𑀸𑀤𑀺𑀕𑀡𑀺𑀓𑀪𑀸𑀯𑀲𑁆𑀲 𑀮𑀓𑁆𑀔𑀡𑀦𑁆𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀸𑀢𑀩𑁆𑀩𑀁. 𑀅𑀬𑀁 𑀦𑀬𑁄 𑀅𑀢𑀻𑀯 𑀲𑀼𑀔𑀼𑀫𑁄 𑀲𑀫𑁆𑀫𑀸 𑀫𑀦𑀲𑀺 𑀓𑀸𑀢𑀩𑁆𑀩𑁄.

𑀭𑀼𑀥𑀸𑀤𑀻 𑀏𑀢𑁆𑀢𑀓𑀸 𑀤𑀺𑀝𑁆𑀞𑀸, 𑀥𑀸𑀢𑀯𑁄 𑀫𑁂 𑀬𑀣𑀸𑀩𑀮𑀁;

𑀲𑀼𑀢𑁆𑀢𑁂𑀲𑁆𑀯𑀜𑁆𑀜𑁂𑀧𑀺 𑀧𑁂𑀓𑁆𑀔𑀺𑀢𑁆𑀯𑀸, 𑀕𑀡𑁆𑀳𑀯𑁆𑀳𑁄 𑀅𑀢𑁆𑀣𑀬𑀼𑀢𑁆𑀢𑀺𑀢𑁄𑀢𑀺.

𑀤𑀼𑀥𑀸𑀤𑀺𑀕𑀡𑁄𑀬𑀁.

𑀤𑀺𑀯𑀸𑀤𑀺𑀕𑀡𑀺𑀓

𑀤𑀺𑀯𑀼 𑀓𑀻𑀴𑀸𑀯𑀺𑀚𑀺𑀕𑀺𑀲𑀸𑀩𑁆𑀬𑀯𑀳𑀸𑀭𑀚𑀼𑀢𑀺𑀣𑀼𑀢𑀺𑀓𑀦𑁆𑀢𑀺𑀕𑀢𑀺𑀲𑀢𑁆𑀢𑀻𑀲𑀼. 𑀏𑀢𑁆𑀣 𑀘 𑀓𑀻𑀴𑀸𑀢𑀺 𑀮𑀴𑀦𑀸, 𑀯𑀺𑀳𑀸𑀭𑁄 𑀯𑀸. 𑀮𑀴𑀦𑀸𑀢𑀺 𑀘 𑀮𑀴𑀺𑀢𑀸𑀦𑀼𑀪𑀯𑀦𑀯𑀲𑁂𑀦 𑀭𑀫𑀡𑀁. 𑀯𑀺𑀳𑀸𑀭𑁄 𑀇𑀭𑀺𑀬𑀸𑀧𑀣𑀧𑀭𑀺𑀯𑀢𑁆𑀢𑀦𑀸𑀤𑀺𑀦𑀸 𑀯𑀢𑁆𑀢𑀦𑀁. 𑀯𑀺𑀚𑀺𑀕𑀺𑀲𑀸𑀢𑀺 𑀯𑀺𑀚𑀬𑀺𑀘𑁆𑀙𑀸. 𑀩𑁆𑀬𑀯𑀳𑀸𑀭𑁄𑀢𑀺 𑀯𑁄𑀳𑀸𑀭𑁄. 𑀚𑀼𑀢𑀻𑀢𑀺 𑀲𑁄𑀪𑀸. 𑀣𑀼𑀢𑀻𑀢𑀺 𑀣𑁄𑀫𑀦𑀸. 𑀓𑀦𑁆𑀢𑀻𑀢𑀺 𑀓𑀫𑀦𑀻𑀬𑀢𑀸. 𑀕𑀢𑀻𑀢𑀺 𑀕𑀫𑀦𑀁. 𑀲𑀢𑁆𑀢𑀻𑀢𑀺 𑀲𑀸𑀫𑀢𑁆𑀣𑀺𑀬𑀁. 𑀇𑀫𑁂𑀲𑀼 𑀅𑀢𑁆𑀣𑁂𑀲𑀼 𑀤𑀺𑀯𑀼𑀥𑀸𑀢𑀼 𑀯𑀢𑁆𑀢𑀢𑀺. 𑀤𑀺𑀩𑁆𑀩𑀢𑀺. 𑀤𑁂𑀯𑁄. 𑀤𑁂𑀯𑀻. 𑀤𑁂𑀯𑀢𑀸.

𑀏𑀢𑁆𑀣 𑀤𑁂𑀯𑁄𑀢𑀺 𑀢𑀺𑀯𑀺𑀥𑀸 𑀤𑁂𑀯𑀸 𑀲𑀫𑁆𑀫𑀼𑀢𑀺𑀤𑁂𑀯𑀸 𑀉𑀧𑀧𑀢𑁆𑀢𑀺𑀤𑁂𑀯𑀸 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀢𑀺. 𑀢𑁂𑀲𑀼 𑀫𑀳𑀸𑀲𑀫𑁆𑀫𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀮𑁄𑀓𑁂𑀦 ‘‘𑀤𑁂𑀯𑀸’’𑀢𑀺 𑀲𑀫𑁆𑀫𑀢𑀢𑁆𑀢𑀸 𑀭𑀸𑀚𑀭𑀸𑀚𑀓𑀼𑀫𑀸𑀭𑀸𑀤𑀬𑁄 𑀲𑀫𑁆𑀫𑀼𑀢𑀺𑀤𑁂𑀯𑀸 ¶ 𑀦𑀸𑀫. 𑀤𑁂𑀯𑀮𑁄𑀓𑁂 𑀉𑀧𑀧𑀦𑁆𑀦𑀸 𑀉𑀧𑀧𑀢𑁆𑀢𑀺𑀤𑁂𑀯𑀸 𑀦𑀸𑀫. 𑀔𑀻𑀡𑀸𑀲𑀯𑀸 𑀯𑀺𑀲𑀼𑀤𑁆𑀥𑀺𑀤𑁂𑀯𑀸 𑀦𑀸𑀫. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀲𑀫𑁆𑀫𑀼𑀢𑀺𑀤𑁂𑀯𑀸 𑀦𑀸𑀫 𑀭𑀸𑀚𑀸𑀦𑁄 𑀤𑁂𑀯𑀺𑀬𑁄 𑀓𑀼𑀫𑀸𑀭𑀸. 𑀉𑀧𑀧𑀢𑁆𑀢𑀺𑀤𑁂𑀯𑀸 𑀦𑀸𑀫 𑀪𑀼𑀫𑁆𑀫𑀤𑁂𑀯𑁂 𑀉𑀧𑀸𑀤𑀸𑀬 𑀢𑀤𑀼𑀢𑁆𑀢𑀭𑀺𑀤𑁂𑀯𑀸. 𑀯𑀺𑀲𑀼𑀤𑁆𑀥𑀺𑀤𑁂𑀯𑀸 𑀦𑀸𑀫 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀔𑀻𑀡𑀸𑀲𑀯𑀸’’𑀢𑀺.

𑀇𑀤𑀁 𑀧𑀦𑁂𑀢𑁆𑀣 𑀦𑀺𑀩𑁆𑀩𑀘𑀦𑀁 𑁋 𑀤𑀺𑀩𑁆𑀩𑀦𑁆𑀢𑀺 𑀓𑀸𑀫𑀕𑀼𑀡𑀛𑀸𑀦𑀸𑀪𑀺𑀜𑁆𑀜𑀸𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑀸𑀤𑀻𑀳𑀺 𑀓𑀻𑀴𑀦𑁆𑀢𑀺, 𑀢𑁂𑀲𑀼 𑀯𑀸 𑀯𑀺𑀳𑀭𑀦𑁆𑀢𑀻𑀢𑀺 𑀤𑁂𑀯𑀸. 𑀤𑀺𑀩𑁆𑀩𑀦𑁆𑀢𑀺 𑀬𑀣𑀸𑀪𑀺𑀮𑀸𑀲𑀺𑀢𑀁 𑀯𑀺𑀲𑀬𑀁 𑀅𑀧𑁆𑀧𑀝𑀺𑀖𑀸𑀢𑁂𑀦 𑀕𑀘𑁆𑀙𑀦𑁆𑀢𑀻𑀢𑀺 𑀤𑁂𑀯𑀸. 𑀤𑀺𑀩𑁆𑀩𑀦𑁆𑀢𑀺 𑀬𑀣𑀺𑀘𑁆𑀙𑀺𑀢𑀦𑀺𑀧𑁆𑀨𑀸𑀤𑀦𑁂 𑀲𑀓𑁆𑀓𑁄𑀦𑁆𑀢𑀻𑀢𑀺 𑀤𑁂𑀯𑀸. 𑀅𑀣 𑀯𑀸 𑀢𑀁𑀢𑀁𑀩𑁆𑀬𑀲𑀦𑀦𑀺𑀢𑁆𑀣𑀭𑀡𑀢𑁆𑀣𑀺𑀓𑁂𑀳𑀺 𑀲𑀭𑀡𑀁 𑀧𑀭𑀸𑀬𑀡𑀦𑁆𑀢𑀺 𑀤𑁂𑀯𑀦𑀻𑀬𑀸 𑀅𑀪𑀺𑀢𑁆𑀣𑀯𑀦𑀻𑀬𑀸𑀢𑀺 𑀤𑁂𑀯𑀸. 𑀲𑁄𑀪𑀸𑀯𑀺𑀲𑁂𑀲𑀬𑁄𑀕𑁂𑀦 𑀓𑀫𑀦𑀻𑀬𑀸𑀢𑀺 𑀯𑀸 𑀤𑁂𑀯𑀸.

𑀏𑀢𑁆𑀣 𑀘 𑀣𑀼𑀢𑀺𑀓𑀦𑁆𑀢𑀺 𑀅𑀢𑁆𑀣𑀸 𑀓𑀫𑁆𑀫𑀲𑀸𑀥𑀦𑀯𑀲𑁂𑀦 𑀤𑀝𑁆𑀞𑀩𑁆𑀩𑀸, 𑀓𑀻𑀴𑀸𑀤𑀬𑁄 𑀙 𑀅𑀢𑁆𑀣𑀸 𑀓𑀢𑁆𑀢𑀼𑀲𑀸𑀥𑀦𑀯𑀲𑁂𑀦. 𑀓𑁂𑀘𑀺 𑀧𑀦 ‘‘𑀤𑀺𑀯𑀼 𑀓𑀻𑀴𑀸𑀯𑀺𑀚𑀺𑀕𑀺𑀲𑀸𑀩𑁆𑀬𑀯𑀳𑀸𑀭𑀚𑀼𑀢𑀺𑀣𑀼𑀢𑀺𑀕𑀢𑀻𑀲𑀽’’𑀢𑀺 𑀧𑀞𑀦𑁆𑀢𑀺. 𑀓𑁂𑀘𑀺 ‘‘𑀕𑀢𑀻’’𑀢𑀺 𑀧𑀤𑀁 𑀯𑀺𑀳𑀸𑀬 ‘‘𑀚𑀼𑀢𑀺𑀣𑀼𑀢𑀻𑀲𑀽’’𑀢𑀺 𑀧𑀞𑀦𑁆𑀢𑀺. 𑀓𑁂𑀘𑀺 ‘‘𑀣𑀼𑀢𑀻’’𑀢𑀺 𑀧𑀤𑀁 𑀯𑀺𑀳𑀸𑀬 ‘‘𑀚𑀼𑀢𑀺𑀕𑀢𑀻𑀲𑀽’’𑀢𑀺 𑀧𑀞𑀦𑁆𑀢𑀺, 𑀓𑁂𑀘𑀺 𑀧𑀦 𑀤𑀺𑀯𑀼𑀥𑀸𑀢𑀼𑀁 ‘‘𑀲𑀢𑁆𑀢𑀺𑀣𑀼𑀢𑀺𑀓’’𑀦𑁆𑀢𑀺𑀅𑀢𑁆𑀣𑁂𑀧𑀺 𑀇𑀘𑁆𑀙𑀦𑁆𑀢𑀺. 𑀢𑁂𑀦𑀸𑀳 𑀅𑀪𑀺𑀥𑀫𑁆𑀫𑀲𑁆𑀲 𑀅𑀦𑀼𑀝𑀻𑀓𑀸𑀓𑀸𑀭𑁄 ‘‘𑀤𑁂𑀯𑀲𑀤𑁆𑀤𑁄 𑀬𑀣𑀸 𑀓𑀻𑀴𑀸𑀯𑀺𑀚𑀺𑀕𑀺𑀲𑀸𑀯𑁄𑀳𑀸𑀭𑀚𑀼𑀢𑀺𑀕𑀢𑀺𑀅𑀢𑁆𑀣𑁄, 𑀏𑀯𑀁 𑀲𑀢𑁆𑀢𑀺𑀅𑀪𑀺𑀢𑁆𑀣𑀯𑀓𑀫𑀦𑀢𑁆𑀣𑁄𑀧𑀺 𑀳𑁄𑀢𑀺 𑀥𑀸𑀢𑀼𑀲𑀤𑁆𑀤𑀸𑀦𑀁 𑀅𑀦𑁂𑀓𑀢𑁆𑀣𑀪𑀸𑀯𑀢𑁄’’𑀢𑀺𑀆𑀤𑀺.

𑀇𑀤𑀁 𑀧𑀦 𑀬𑀣𑀸𑀯𑀼𑀢𑁆𑀢𑁂𑀲𑀼 𑀲𑀫𑁆𑀫𑀼𑀢𑀺𑀤𑁂𑀯𑀸𑀤𑀻𑀲𑀼 𑀧𑀘𑁆𑀘𑁂𑀓𑀁 𑀦𑀺𑀩𑁆𑀩𑀘𑀦𑀁 𑁋 𑀤𑀺𑀩𑁆𑀩𑀦𑁆𑀢𑀺 𑀓𑀻𑀴𑀦𑁆𑀢𑀺 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀇𑀲𑁆𑀲𑀭𑀺𑀬𑀁 𑀓𑀭𑁄𑀦𑁆𑀢𑀻𑀢𑀺 𑀤𑁂𑀯𑀸, 𑀭𑀸𑀚𑀸𑀦𑁄. 𑀤𑀺𑀩𑁆𑀩𑀦𑁆𑀢𑀺 𑀓𑀻𑀴𑀦𑁆𑀢𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺, 𑀧𑀝𑀺𑀧𑀓𑁆𑀔𑁂 𑀯𑀸 𑀯𑀺𑀚𑁂𑀢𑀼𑀁 𑀇𑀘𑁆𑀙𑀦𑁆𑀢𑀺, 𑀯𑁄𑀳𑀭𑀦𑁆𑀢𑀺 𑀘 𑀮𑁄𑀓𑀲𑁆𑀲 𑀬𑀼𑀢𑁆𑀢𑀸𑀬𑀼𑀢𑁆𑀢𑀁, 𑀚𑁄𑀢𑀦𑁆𑀢𑀺 𑀧𑀭𑀫𑀸𑀬 𑀲𑀭𑀻𑀭𑀚𑀼𑀢𑀺𑀬𑀸, 𑀣𑁄𑀫𑀺𑀬𑀦𑁆𑀢𑀺 𑀢𑀩𑁆𑀪𑀸𑀯𑀢𑁆𑀣𑀺𑀓𑁂𑀳𑀺, 𑀓𑀸𑀫𑀺𑀬𑀦𑁆𑀢𑀺 𑀤𑀝𑁆𑀞𑀼𑀁 𑀲𑁄𑀢𑀼𑀜𑁆𑀘 ¶ 𑀲𑁄𑀪𑀸𑀯𑀺𑀲𑁂𑀲𑀬𑁄𑀕𑁂𑀦, 𑀕𑀘𑁆𑀙𑀦𑁆𑀢𑀺 𑀘 𑀬𑀣𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀅𑀧𑁆𑀧𑀝𑀺𑀳𑀢𑀕𑀫𑀦𑁂𑀦, 𑀲𑀓𑁆𑀓𑁄𑀦𑁆𑀢𑀺 𑀘 𑀆𑀦𑀼𑀪𑀸𑀯𑀲𑀫𑁆𑀧𑀢𑁆𑀢𑀺𑀬𑀸 𑀢𑀁𑀢𑀁𑀓𑀺𑀘𑁆𑀘𑀁 𑀦𑀺𑀧𑁆𑀨𑀸𑀤𑁂𑀢𑀼𑀦𑁆𑀢𑀺 𑀤𑁂𑀯𑀸, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀬𑁄. 𑀓𑀻𑀴𑀦𑁆𑀢𑀺 𑀧𑀭𑀫𑀸𑀬 𑀛𑀸𑀦𑀓𑀻𑀴𑀸𑀬, 𑀯𑀺𑀚𑁂𑀢𑀼𑀁 𑀇𑀘𑁆𑀙𑀦𑁆𑀢𑀺 𑀧𑀝𑀺𑀧𑀓𑁆𑀔𑀁, 𑀧𑀭𑀫𑀲𑀼𑀔𑀼𑀫𑀜𑀸𑀡𑀯𑀺𑀲𑁂𑀲𑀯𑀺𑀲𑀬𑀁 𑀅𑀢𑁆𑀣𑀜𑁆𑀘 𑀯𑁄𑀳𑀭𑀦𑁆𑀢𑀺, 𑀚𑁄𑀢𑀦𑁆𑀢𑀺 𑀲𑀩𑁆𑀩𑀓𑀺𑀮𑁂𑀲𑀤𑁄𑀲𑀓𑀮𑀼𑀲𑀸𑀪𑀸𑀯𑀸 𑀧𑀭𑀫𑀯𑀺𑀲𑀼𑀤𑁆𑀥𑀸𑀬 𑀜𑀸𑀡𑀚𑀼𑀢𑀺𑀬𑀸, 𑀣𑁄𑀫𑀺𑀬𑀦𑁆𑀢𑀺 𑀘 𑀯𑀺𑀜𑁆𑀜𑀸𑀢𑀲𑀪𑀸𑀯𑁂𑀳𑀺 𑀧𑀭𑀫𑀦𑀺𑀫𑁆𑀫𑀮𑀕𑀼𑀡𑀯𑀺𑀲𑁂𑀲𑀬𑁄𑀕𑀢𑁄, 𑀓𑀸𑀫𑀺𑀬𑀦𑁆𑀢𑀺 𑀘 𑀅𑀦𑀼𑀢𑁆𑀢𑀭𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀢𑀸𑀬 𑀤𑀝𑁆𑀞𑀼𑀁 𑀲𑁄𑀢𑀼𑀁 𑀧𑀽𑀚𑀺𑀢𑀼𑀜𑁆𑀘, 𑀕𑀘𑁆𑀙𑀦𑁆𑀢𑀺 𑀘 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀁 𑀅𑀧𑀘𑁆𑀘𑀸𑀕𑀫𑀦𑀻𑀬𑀸𑀬 𑀕𑀢𑀺𑀬𑀸, 𑀲𑀓𑁆𑀓𑁄𑀦𑁆𑀢𑀺 𑀘 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀢𑁂 𑀢𑁂 𑀲𑀢𑁆𑀢𑁂 𑀳𑀺𑀢𑁂 𑀦𑀺𑀬𑁄𑀚𑁂𑀢𑀼𑀁 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀲𑀼𑀔𑁂 𑀘 𑀧𑀢𑀺𑀝𑁆𑀞𑀸𑀧𑁂𑀢𑀼𑀦𑁆𑀢𑀺 𑀤𑁂𑀯𑀸, 𑀯𑀺𑀲𑀼𑀤𑁆𑀥𑀺𑀤𑁂𑀯𑀸.

𑀤𑁂𑀯𑀲𑀤𑁆𑀤 ‘‘𑀯𑀺𑀤𑁆𑀥𑁂 𑀯𑀺𑀕𑀢𑀯𑀮𑀸𑀳𑀓𑁂 𑀤𑁂𑀯𑁂’’𑀢𑀺𑀆𑀤𑀻𑀲𑀼 𑀅𑀚𑀝𑀸𑀓𑀸𑀲𑁂 𑀆𑀕𑀢𑁄. ‘‘𑀤𑁂𑀯𑁄 𑀘 𑀣𑁄𑀓𑀁 𑀣𑁄𑀓𑀁 𑀨𑀼𑀲𑀸𑀬𑀢𑀻’’𑀢𑀺𑀆𑀤𑀻𑀲𑀼 𑀫𑁂𑀖𑁂. ‘‘𑀅𑀬𑀜𑁆𑀳𑀺 𑀤𑁂𑀯 𑀓𑀼𑀫𑀸𑀭𑁄’’𑀢𑀺𑀆𑀤𑀻𑀲𑀼 𑀔𑀢𑁆𑀢𑀺𑀬𑁂. ‘‘𑀅𑀳𑀁 𑀤𑁂𑀯 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀜𑁆𑀜𑀲𑁆𑀲 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 𑀓𑀺𑀜𑁆𑀘𑀺 𑀪𑀬𑀁 𑀦 𑀧𑀲𑁆𑀲𑀸𑀫𑀻’’𑀢𑀺𑀆𑀤𑀻𑀲𑀼 𑀇𑀲𑁆𑀲𑀭𑀧𑀼𑀕𑁆𑀕𑀮𑁂. ‘‘𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺 𑀤𑁂𑀯𑁄 𑀫𑀜𑁆𑀜𑁂’’𑀢𑀺𑀆𑀤𑀻𑀲𑀼 𑀉𑀧𑀧𑀢𑁆𑀢𑀺𑀤𑁂𑀯𑁂. ‘‘𑀤𑁂𑀯𑀸𑀢𑀺𑀤𑁂𑀯𑀁 𑀦𑀭𑀤𑀫𑁆𑀫𑀲𑀸𑀭𑀣𑀺’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀲𑀼𑀤𑁆𑀥𑀺𑀤𑁂𑀯𑁂 𑀆𑀕𑀢𑁄.

𑀤𑁂𑀯𑀻𑀢𑀺 𑀭𑀸𑀚𑀪𑀭𑀺𑀬𑀸𑀧𑀺 𑀤𑁂𑀯𑀥𑀻𑀢𑀸𑀧𑀺 ‘‘𑀤𑁂𑀯𑀻’’𑀢𑀺 𑀯𑀼𑀘𑁆𑀘𑀢𑀺. 𑀤𑁂𑀯𑀲𑁆𑀲 𑀪𑀭𑀺𑀬𑀸𑀢𑀺 𑀳𑀺 𑀤𑁂𑀯𑀻, 𑀲𑀸𑀧𑀺 𑀅𑀢𑁆𑀣𑀢𑁄 ‘‘𑀤𑀺𑀩𑁆𑀩𑀢𑀻𑀢𑀺 𑀤𑁂𑀯𑀻’’𑀢𑀺 𑀯𑀢𑁆𑀢𑀩𑁆𑀩𑀸, 𑀬𑀣𑀸 ‘‘𑀪𑀺𑀓𑁆𑀔𑀢𑀻𑀢𑀺 𑀪𑀺𑀓𑁆𑀔𑀼𑀦𑀻’’𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀯𑀺𑀫𑀸𑀦𑀯𑀢𑁆𑀣𑀼𑀅𑀝𑁆𑀞𑀓𑀣𑀸𑀬𑀁 ‘‘𑀤𑀺𑀩𑁆𑀩𑀢𑀺 𑀅𑀢𑁆𑀢𑀦𑁄 𑀧𑀼𑀜𑁆𑀜𑀺𑀤𑁆𑀥𑀺𑀬𑀸 𑀓𑀻𑀴𑀢𑀻𑀢𑀺 𑀤𑁂𑀯𑀻’’𑀢𑀺.

𑀤𑁂𑀯𑀢𑀸𑀢𑀺 ¶ 𑀤𑁂𑀯𑀧𑀼𑀢𑁆𑀢𑁄𑀧𑀺 𑀩𑁆𑀭𑀳𑁆𑀫𑀸𑀧𑀺 𑀤𑁂𑀯𑀥𑀻𑀢𑀸𑀧𑀺. ‘‘𑀅𑀣 𑀔𑁄 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀼𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸’’𑀢𑀺𑀆𑀤𑀻𑀲𑀼 𑀳𑀺 𑀤𑁂𑀯𑀧𑀼𑀢𑁆𑀢𑁄 ‘‘𑀤𑁂𑀯𑀢𑀸’’𑀢𑀺 𑀯𑀼𑀢𑁆𑀢𑁄 ‘‘𑀤𑁂𑀯𑁄𑀬𑁂𑀯 𑀤𑁂𑀯𑀢𑀸’’𑀢𑀺 𑀓𑀢𑁆𑀯𑀸, 𑀢𑀣𑀸 ‘‘𑀢𑀸 𑀤𑁂𑀯𑀢𑀸 𑀲𑀢𑁆𑀢𑀲𑀢𑀸 𑀉𑀴𑀸𑀭𑀸, 𑀩𑁆𑀭𑀳𑁆𑀫𑀸 𑀯𑀺𑀫𑀸𑀦𑀸 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀩𑁆𑀭𑀳𑁆𑀫𑀸𑀦𑁄.

‘‘𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀬𑀸 𑀢𑁆𑀯𑀁 𑀢𑀺𑀝𑁆𑀞𑀲𑀺 𑀤𑁂𑀯𑀢𑁂;

𑀑𑀪𑀸𑀲𑁂𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀑𑀲𑀥𑀻 𑀯𑀺𑀬 𑀢𑀸𑀭𑀓𑀸’’𑀢𑀺-

𑀆𑀤𑀻𑀲𑀼 𑀤𑁂𑀯𑀥𑀻𑀢𑀸.

𑀇𑀫𑀸𑀦𑀺 𑀉𑀧𑀧𑀢𑁆𑀢𑀺𑀤𑁂𑀯𑀸𑀦𑀁 𑀦𑀸𑀫𑀸𑀦𑀺 𑁋

𑀤𑁂𑀯𑁄 𑀲𑀼𑀭𑁄 𑀘 𑀯𑀺𑀩𑀼𑀥𑁄, 𑀦𑀺𑀚𑁆𑀚𑀭𑁄 𑀅𑀫𑀭𑁄 𑀫𑀭𑀼;

𑀲𑀼𑀥𑀸𑀲𑀻 𑀢𑀺𑀤𑀲𑁄 𑀲𑀕𑁆𑀕-𑀯𑀸𑀲𑀻 𑀅𑀦𑀺𑀫𑀺𑀲𑁄𑀧𑀺 𑀘;

𑀤𑀺𑀯𑁄𑀓𑁄’𑀫𑀢𑀧𑀸𑀬𑀻 𑀘, 𑀲𑀕𑁆𑀕𑀝𑁆𑀞𑁄 𑀤𑁂𑀯𑀢𑀸𑀦𑀺 𑀘.

𑀔𑀺 𑀔𑀬𑁂. 𑀔𑀺𑀬𑀢𑀺. 𑀔𑀬𑁄. 𑀔𑀺𑀬𑀦𑀁. 𑀭𑀸𑀕𑀓𑁆𑀔𑀬𑁄.

𑀔𑀺 𑀦𑀺𑀯𑀸𑀲𑁂 𑀓𑁄𑀥𑀳𑀺𑀁𑀲𑀸𑀲𑀼 𑀘. 𑀔𑀺𑀬𑀢𑀺. 𑀦 𑀕𑀘𑁆𑀙𑀲𑀺 𑀬𑀫𑀓𑁆𑀔𑀬𑀁. 𑀦𑀸𑀕𑀤𑀸𑀦𑁂𑀦 𑀔𑀺𑀬𑀦𑁆𑀢𑀺.

𑀢𑀢𑁆𑀣 𑀔𑀺𑀬𑀢𑀻𑀢𑀺 𑀦𑀺𑀯𑀲𑀢𑀺. 𑀬𑀫𑀓𑁆𑀔𑀬𑀦𑁆𑀢𑀺 𑀬𑀫𑀦𑀺𑀯𑁂𑀲𑀦𑀁. 𑀔𑀺𑀬𑀦𑁆𑀢𑀻𑀢𑀺 𑀓𑀼𑀚𑁆𑀛𑀦𑁆𑀢𑀺 𑀳𑀺𑀁𑀲𑀦𑁆𑀢𑀺 𑀯𑀸.

𑀖𑀸 𑀕𑀦𑁆𑀥𑁄𑀧𑀸𑀤𑀸𑀦𑁂. 𑀖𑀸𑀬𑀢𑀻𑀢𑀺 𑀖𑀸𑀦𑀁. 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑀼𑀁 𑀖𑀸𑀬𑀺𑀢𑁆𑀯𑀸.

𑀭𑀼𑀘 𑀭𑁄𑀘𑀦𑁂. 𑀭𑁄𑀘𑀦𑀁 𑀭𑀼𑀘𑀺. 𑀪𑀢𑁆𑀢𑀁 𑀫𑁂 𑀭𑀼𑀘𑁆𑀘𑀢𑀺. 𑀪𑀢𑁆𑀢𑀫𑁆𑀧𑀺𑀢𑀲𑁆𑀲 𑀦 𑀭𑀼𑀘𑁆𑀘𑀢𑀺. 𑀧𑀩𑁆𑀩𑀚𑁆𑀚𑀸 𑀫𑀫 𑀭𑀼𑀘𑁆𑀘𑀢𑀺. 𑀭𑀼𑀘𑁆𑀘𑀺𑀢𑀼𑀁, 𑀭𑀼𑀘𑁆𑀘𑀺𑀢𑁆𑀯𑀸. 𑀓𑁂𑀘𑀺 𑀧𑀦 𑀇𑀫𑀲𑁆𑀫𑀺𑀁 𑀤𑀺𑀯𑀸𑀤𑀺𑀕𑀡𑁂 ‘‘𑀭𑀼𑀘 𑀤𑀺𑀢𑁆𑀢𑀺𑀫𑁆𑀳𑀻’’𑀢𑀺 𑀧𑀞𑀦𑁆𑀢𑀺. 𑀢𑀁 𑀦 𑀬𑀼𑀢𑁆𑀢𑀁 𑀓𑀢𑁆𑀣𑀘𑀺𑀧𑀺 𑀤𑀺𑀢𑁆𑀢𑀺𑀲𑀗𑁆𑀔𑀸𑀢𑀲𑁄𑀪𑀦𑀢𑁆𑀣𑀯𑀸𑀘𑀓𑀲𑁆𑀲 ¶ 𑀭𑀼𑀘𑀥𑀸𑀢𑀼𑀦𑁄 ‘‘𑀭𑀼𑀘𑁆𑀘𑀢𑀻’’𑀢𑀺 𑀭𑀽𑀧𑀸𑀪𑀸𑀯𑀢𑁄. 𑀢𑀲𑁆𑀫𑀸 𑀏𑀯𑀁 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀁, 𑀤𑀺𑀢𑁆𑀢𑀺𑀭𑀼𑀘𑀻𑀦𑀁 𑀯𑀸𑀘𑀓𑁄 𑀭𑀼𑀘𑀥𑀸𑀢𑀼 𑀪𑀼𑀯𑀸𑀤𑀺𑀕𑀡𑀺𑀓𑁄. 𑀢𑀲𑁆𑀲 𑀳𑀺 ‘‘𑀭𑁄𑀘𑀢𑀺, 𑀯𑀺𑀭𑁄𑀘𑀢𑀺. 𑀏𑀓𑀢𑁆𑀢𑀫𑀼𑀧𑀭𑁄𑀘𑀺𑀢’’𑀦𑁆𑀢𑀺 𑀭𑀽𑀧𑀸𑀦𑀺𑀬𑁂𑀯 𑀪𑀯𑀦𑁆𑀢𑀺, 𑀦 ‘‘𑀭𑀼𑀘𑁆𑀘𑀢𑀻’’𑀢𑀺 𑀭𑀽𑀧𑀁. 𑀭𑀼𑀘𑀺𑀬𑀸𑀬𑁂𑀯 𑀯𑀸𑀘𑀓𑁄 𑀧𑀦 𑀤𑀺𑀯𑀸𑀤𑀺𑀕𑀡𑀺𑀓𑁄𑀧𑀺 𑀳𑁄𑀢𑀺 𑀘𑀼𑀭𑀸𑀤𑀺𑀕𑀡𑀺𑀓𑁄𑀧𑀺. 𑀢𑀲𑁆𑀲 𑀳𑀺 𑀤𑀺𑀯𑀸𑀤𑀺𑀕𑀡𑀺𑀓𑀓𑀸𑀮𑁂 ‘‘𑀕𑀫𑀦𑀁 𑀫𑀬𑁆𑀳𑀁 𑀭𑀼𑀘𑁆𑀘𑀢𑀻’’𑀢𑀺 𑀭𑀽𑀧𑀁. 𑀘𑀼𑀭𑀸𑀤𑀺𑀕𑀡𑀺𑀓𑀓𑀸𑀮𑁂 ‘‘𑀓𑀺𑀁 𑀦𑀼 𑀚𑀸𑀢𑀺𑀁 𑀦 𑀭𑁄𑀘𑁂𑀲𑀻’’𑀢𑀺 𑀭𑀽𑀧𑀁. 𑀆𑀧𑀼𑀩𑁆𑀩𑁄 𑀘𑁂 𑀆𑀘𑀺𑀓𑁆𑀔𑀦𑁂 𑀯𑀢𑁆𑀢𑀢𑀺, ‘‘𑀆𑀭𑁄𑀘𑁂𑀢𑀺, 𑀆𑀭𑁄𑀘𑀬𑀢𑀻’’𑀢𑀺 𑀭𑀽𑀧𑀸𑀦𑀺 𑀤𑀺𑀲𑁆𑀲𑀦𑁆𑀢𑀺.

𑀫𑀼𑀘 𑀫𑁄𑀓𑁆𑀔𑁂. 𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀢𑀺. 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀢𑀺. 𑀫𑀼𑀢𑁆𑀢𑀺, 𑀯𑀺𑀫𑀼𑀢𑁆𑀢𑀺, 𑀅𑀥𑀺𑀫𑀼𑀢𑁆𑀢𑀺, 𑀫𑀼𑀘𑁆𑀘𑀫𑀸𑀦𑁄.

𑀉𑀘 𑀲𑀫𑀯𑀸𑀬𑁂. 𑀉𑀘𑁆𑀘𑀢𑀺. 𑀑𑀓𑁄, 𑀊𑀓𑀸, 𑀉𑀓𑁆𑀓𑀸.

𑀑𑀓𑁄𑀢𑀺 𑀉𑀤𑀓𑀫𑁆𑀧𑀺 𑀆𑀯𑀸𑀲𑁄𑀧𑀺. ‘‘𑀑𑀓𑀧𑀼𑀡𑁆𑀡𑁂𑀳𑀺 𑀘𑀻𑀯𑀭𑁂𑀳𑀻’’𑀢𑀺 𑀘, ‘‘𑀯𑀸𑀭𑀺𑀚𑁄𑀯 𑀣𑀮𑁂 𑀔𑀺𑀢𑁆𑀢𑁄, 𑀑𑀓𑀫𑁄𑀓𑀢𑀫𑀼𑀩𑁆𑀪𑀢𑁄’’𑀢𑀺 𑀘𑁂𑀢𑁆𑀣 𑀧𑀬𑁄𑀕𑁄. 𑀊𑀓𑀸𑀢𑀺 𑀲𑀻𑀲𑁂 𑀦𑀺𑀩𑁆𑀩𑀢𑁆𑀢𑀓𑀺𑀫𑀺𑀯𑀺𑀲𑁂𑀲𑁄.

𑀉𑀓𑁆𑀓𑀸𑀢𑀺 𑀤𑀻𑀧𑀺𑀓𑀸𑀤𑀬𑁄 𑀯𑀼𑀘𑁆𑀘𑀦𑁆𑀢𑀺. ‘‘𑀉𑀓𑁆𑀓𑀸𑀲𑀼 𑀥𑀸𑀭𑀺𑀬𑀫𑀸𑀦𑀸𑀲𑀽’’𑀢𑀺 𑀳𑀺 𑀆𑀕𑀢𑀝𑁆𑀞𑀸𑀦𑁂 𑀤𑀻𑀧𑀺𑀓𑀸 ‘‘𑀉𑀓𑁆𑀓𑀸’’𑀢𑀺 𑀯𑀼𑀘𑁆𑀘𑀢𑀺. ‘‘𑀉𑀓𑁆𑀓𑀁 𑀩𑀦𑁆𑀥𑁂𑀬𑁆𑀬, 𑀉𑀓𑁆𑀓𑀁 𑀩𑀦𑁆𑀥𑀺𑀢𑁆𑀯𑀸, 𑀉𑀓𑁆𑀓𑀸𑀫𑀼𑀔𑀁 𑀆𑀮𑀺𑀫𑁆𑀧𑁂𑀬𑁆𑀬𑀸’’𑀢𑀺 𑀆𑀕𑀢𑀝𑁆𑀞𑀸𑀦𑁂 𑀅𑀗𑁆𑀕𑀸𑀭𑀓𑀧𑀮𑁆𑀮𑀁. ‘‘𑀓𑀫𑁆𑀫𑀸𑀭𑀸𑀦𑀁 𑀬𑀣𑀸 𑀉𑀓𑁆𑀓𑀸, 𑀅𑀦𑁆𑀢𑁄 𑀛𑀸𑀬𑀢𑀺 𑀦𑁄 𑀩𑀳𑀻’’𑀢𑀺 𑀆𑀕𑀢𑀝𑁆𑀞𑀸𑀦𑁂 𑀓𑀫𑁆𑀫𑀸𑀭𑀼𑀤𑁆𑀥𑀦𑀁. ‘‘𑀏𑀯𑀁 𑀯𑀺𑀧𑀸𑀓𑁄 𑀉𑀓𑁆𑀓𑀸𑀧𑀸𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀕𑀢𑀝𑁆𑀞𑀸𑀦𑁂 𑀯𑀸𑀢𑀯𑁂𑀕𑁄 ‘‘𑀉𑀓𑁆𑀓𑀸’’𑀢𑀺 𑀯𑀼𑀘𑁆𑀘𑀢𑀺. ‘‘𑀲𑀡𑁆𑀟𑀸𑀲𑁂𑀦 𑀚𑀸𑀢𑀭𑀽𑀧𑀁 ¶ 𑀕𑀳𑁂𑀢𑁆𑀯𑀸 𑀉𑀓𑁆𑀓𑀸𑀫𑀼𑀔𑁂 𑀧𑀓𑁆𑀔𑀺𑀧𑁂𑀬𑁆𑀬𑀸’’𑀢𑀺 𑀆𑀕𑀢𑀝𑁆𑀞𑀸𑀦𑁂 𑀲𑀼𑀯𑀡𑁆𑀡𑀓𑀸𑀭𑀸𑀦𑀁 𑀫𑀽𑀲𑀸 ‘‘𑀉𑀓𑁆𑀓𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀘𑁆𑀘𑁂𑀯𑀁 𑁋

𑀤𑀻𑀧𑀺𑀓𑀸𑀯𑀸𑀢𑀯𑁂𑀕𑁂𑀲𑀼, 𑀓𑀫𑁆𑀫𑀸𑀭𑀸𑀦𑀜𑁆𑀘 𑀉𑀤𑁆𑀥𑀦𑁂;

𑀫𑀽𑀲𑀸𑀬𑀫𑁆𑀧𑀺 𑀘 𑀅𑀗𑁆𑀕𑀸𑀭-𑀓𑀧𑀮𑁆𑀮𑁂 𑀘𑀸𑀢𑀺 𑀧𑀜𑁆𑀘𑀲𑀼;

𑀯𑀺𑀲𑀬𑁂𑀲𑀼 𑀧𑀦𑁂𑀢𑁂𑀲𑀼, 𑀉𑀓𑁆𑀓𑀸𑀲𑀤𑁆𑀤𑁄 𑀧𑀯𑀢𑁆𑀢𑀢𑀺;

𑀙𑁂 𑀙𑁂𑀤𑀦𑁂. 𑀙𑀺𑀬𑀢𑀺, 𑀙𑀺𑀬𑀦𑁆𑀢𑀺. 𑀅𑀯𑀘𑁆𑀙𑀺𑀢𑀁, 𑀅𑀯𑀘𑁆𑀙𑀸𑀢𑀁. 𑀙𑁂𑀢𑁆𑀯𑀸𑀦 𑀫𑁄𑀴𑀺𑀁 𑀯𑀭𑀕𑀦𑁆𑀥𑀯𑀸𑀲𑀺𑀢𑀁.

𑀲𑀚 𑀲𑀗𑁆𑀕𑁂. 𑀲𑀗𑁆𑀕𑁄 𑀮𑀕𑀦𑀁. 𑀲𑀚𑁆𑀚𑀢𑀺. 𑀲𑀚𑁆𑀚𑀦𑀁, 𑀲𑀚𑁆𑀚𑀺𑀢𑁄, 𑀲𑀢𑁆𑀢𑁄.

𑀬𑀼𑀚 𑀲𑀫𑀸𑀥𑀺𑀫𑁆𑀳𑀺. 𑀲𑀫𑀸𑀥𑀸𑀦𑀁 𑀲𑀫𑀸𑀥𑀺, 𑀓𑀸𑀬𑀓𑀫𑁆𑀫𑀸𑀤𑀻𑀦𑀁 𑀲𑀫𑁆𑀫𑀸𑀧𑀬𑁄𑀕𑀯𑀲𑁂𑀦 𑀅𑀯𑀺𑀧𑁆𑀧𑀓𑀺𑀡𑁆𑀡𑀢𑀸𑀢𑀺 𑀅𑀢𑁆𑀣𑁄. 𑀬𑀼𑀚𑁆𑀚𑀢𑀺. 𑀬𑁄𑀕𑁄, 𑀬𑁄𑀕𑀻.

𑀏𑀢𑁆𑀣 𑀬𑁄𑀕𑁄𑀢𑀺 𑀯𑀻𑀭𑀺𑀬𑀁. 𑀢𑀜𑁆𑀳𑀺 𑁋

‘‘𑀯𑀸𑀬𑀫𑁂𑀣𑁂𑀯 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀲𑁆𑀲𑀸𑀫𑀺 𑀯𑁄’𑀳’𑀫𑀢𑁆𑀢𑀸𑀦𑀁, 𑀬𑀣𑀸 𑀇𑀘𑁆𑀙𑀺𑀁 𑀢𑀣𑀸 𑀅𑀳𑀼’’𑀦𑁆𑀢𑀺

𑀯𑀘𑀦𑀢𑁄 𑀅𑀯𑀲𑁆𑀲𑀁 𑀓𑀸𑀢𑀼𑀁 𑀬𑀼𑀚𑁆𑀚𑀢𑀺 𑀉𑀧𑀧𑀚𑁆𑀚𑀢𑀻𑀢𑀺 𑀬𑁄𑀕𑁄𑀢𑀺 𑀯𑀼𑀘𑁆𑀘𑀢𑀺.

𑀭𑀦𑁆𑀚 𑀭𑀸𑀕𑁂. 𑀭𑀚𑁆𑀚𑀢𑀺. 𑀯𑀺𑀭𑀚𑁆𑀚𑀢𑀺. 𑀭𑀚𑁆𑀚𑀫𑀸𑀦𑁄, 𑀭𑀚𑁆𑀚𑀁, 𑀭𑀚𑁆𑀚𑀦𑁆𑀢𑁄, 𑀭𑀸𑀕𑁄, 𑀯𑀺𑀭𑀸𑀕𑁄, 𑀭𑀚𑁆𑀚𑀦𑀁, 𑀯𑀺𑀭𑀚𑁆𑀚𑀦𑀁, 𑀭𑀚𑀦𑀻𑀬𑀁. 𑀉𑀧𑀲𑀕𑁆𑀕𑀯𑀲𑁂𑀦 𑀅𑀜𑁆𑀜𑁄 𑀅𑀢𑁆𑀣𑁄 𑀪𑀯𑀢𑀺. 𑀲𑀫𑁆𑀳𑀸 𑀭𑀝𑁆𑀞𑀸 𑀦𑀺𑀭𑀚𑁆𑀚𑀢𑀺, 𑀅𑀢𑁆𑀢𑀦𑁄 𑀭𑀝𑁆𑀞𑀸 𑀦𑀺𑀕𑁆𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑀢𑀢𑁆𑀣 𑀯𑀺𑀭𑀸𑀕𑁄𑀢𑀺 𑀯𑀺𑀭𑀚𑁆𑀚𑀦𑁆𑀢𑀺 𑀏𑀢𑁆𑀣 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀢𑀺 𑀯𑀺𑀭𑀸𑀕𑁄, 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑁄 𑀘.

𑀯𑀺𑀚𑀻 𑀪𑀬𑀘𑀮𑀦𑁂𑀲𑀼. 𑀯𑀺𑀚𑁆𑀚𑀢𑀺, 𑀲𑀁𑀯𑀺𑀚𑁆𑀚𑀢𑀺. 𑀲𑀁𑀯𑁂𑀕𑁄, 𑀲𑀁𑀯𑁂𑀚𑀦𑀻𑀬𑀁. 𑀉𑀩𑁆𑀩𑀺𑀚𑁆𑀚𑀢𑀺. 𑀉𑀩𑁆𑀩𑁂𑀕𑁄, 𑀉𑀩𑁆𑀩𑀺𑀕𑁆𑀕𑀳𑀤𑀬𑁄.

𑀮𑀼𑀚 ¶ 𑀯𑀺𑀦𑀸𑀲𑁂. 𑀮𑀼𑀚𑁆𑀚𑀢𑀻𑀢𑀺 𑀮𑁄𑀓𑁄. 𑀮𑁄𑀧𑁄, 𑀮𑀼𑀢𑁆𑀢𑀺, 𑀮𑀼𑀚𑁆𑀚𑀦𑀁, 𑀮𑀼𑀢𑁆𑀢𑁄.

𑀞𑀸 𑀕𑀢𑀺𑀦𑀺𑀯𑀢𑁆𑀢𑀺𑀬𑀁. 𑀞𑀸𑀬𑀢𑀺. 𑀞𑀸𑀬𑀻, 𑀞𑀺𑀢𑀺, 𑀞𑀸𑀦𑀁, 𑀞𑀺𑀢𑁄, 𑀢𑀢𑁆𑀭𑀝𑁆𑀞𑁄, 𑀢𑀺𑀝𑁆𑀞𑀁, 𑀓𑀧𑁆𑀧𑀝𑁆𑀞𑀸𑀬𑀻, 𑀆𑀲𑀪𑀝𑁆𑀞𑀸𑀦𑀝𑁆𑀞𑀸𑀬𑀻.

‘‘𑀲𑀼𑀔𑀁 𑀲𑀬𑀸𑀫𑀺 𑀞𑀸𑀬𑀸𑀫𑀺, 𑀲𑀼𑀔𑀁 𑀓𑀧𑁆𑀧𑁂𑀫𑀺 𑀚𑀻𑀯𑀺𑀢𑀁;

𑀅𑀳𑀢𑁆𑀣𑀧𑀸𑀲𑁄 𑀫𑀸𑀭𑀲𑁆𑀲, 𑀅𑀳𑁄 𑀲𑀢𑁆𑀣𑀸𑀦𑀼𑀓𑀫𑁆𑀧𑀓𑁄’’𑀢𑀺

𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. 𑀮𑀸𑀧𑀁 𑀕𑁄𑀘𑀭𑀝𑁆𑀞𑀸𑀬𑀺𑀦𑀦𑁆𑀢𑀺 𑀘. 𑀢𑀢𑁆𑀣 𑀞𑀸𑀬𑀸𑀫𑀻𑀢𑀺 𑀢𑀺𑀝𑁆𑀞𑀸𑀫𑀺.

𑀟𑀺𑀕𑀢𑀺𑀬𑀁. 𑀟𑀺𑀬𑀢𑀺. 𑀟𑁂𑀫𑀸𑀦𑁄. 𑀟𑀺𑀦𑁄 𑀯𑀸. ‘‘𑀉𑀘𑁆𑀘𑁂 𑀲𑀓𑀼𑀡 𑀟𑁂𑀫𑀸𑀦, 𑀧𑀢𑁆𑀢𑀬𑀸𑀦 𑀯𑀺𑀳𑀗𑁆𑀕𑀫. 𑀯𑀚𑁆𑀚𑁂𑀲𑀺 𑀔𑁄 𑀢𑁆𑀯𑀁 𑀯𑀸𑀫𑀽𑀭𑀼’’𑀦𑁆𑀢𑀺 𑀦𑀺𑀤𑀲𑁆𑀲𑀦𑀁.

𑀏𑀢𑁆𑀣 𑀟𑀺𑀬𑀢𑀻𑀢𑀺 𑀟𑁂𑀫𑀸𑀦𑁄𑀢𑀺 𑀦𑀺𑀩𑁆𑀩𑀘𑀦𑀁 𑀕𑀳𑁂𑀢𑀩𑁆𑀩𑀁.

𑀢𑀸 𑀧𑀸𑀮𑀦𑁂. 𑀢𑀸𑀬𑀢𑀺. 𑀅𑀖𑀲𑁆𑀲 𑀢𑀸𑀢𑀸. 𑀲𑁄 𑀦𑀽𑀦 𑀓𑀧𑀡𑁄 𑀢𑀸𑀢𑁄, 𑀘𑀺𑀭𑀁 𑀭𑀼𑀚𑁆𑀚𑀢𑀺 𑀅𑀲𑁆𑀲𑀫𑁂. 𑀢𑀸𑀡𑀁, 𑀧𑀭𑀺𑀢𑁆𑀢𑀁, 𑀕𑁄𑀢𑁆𑀢𑀁. 𑀢𑁆𑀯𑀁 𑀔𑁄𑀲𑀺 𑀉𑀧𑀸𑀲𑀓 𑀓𑀢𑀓𑀮𑁆𑀬𑀸𑀡𑁄 𑀓𑀢𑀪𑀻𑀭𑀼𑀢𑁆𑀢𑀸𑀡𑁄.

𑀢𑀢𑁆𑀭 𑀧𑀭𑀺𑀢𑁆𑀢𑀦𑁆𑀢𑀺 𑀫𑀳𑀸𑀢𑁂𑀚𑀯𑀦𑁆𑀢𑀢𑀸𑀬 𑀲𑀫𑀦𑁆𑀢𑀢𑁄 𑀲𑀢𑁆𑀢𑀸𑀦𑀁 𑀪𑀬𑀁 𑀉𑀧𑀤𑁆𑀤𑀯𑀁 𑀉𑀧𑀲𑀕𑁆𑀕𑀜𑁆𑀘 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀧𑀭𑀺𑀢𑁆𑀢𑀁, 𑀕𑀁 𑀢𑀸𑀬𑀢𑀻𑀢𑀺 𑀕𑁄𑀢𑁆𑀢𑀁.

𑀦𑀢 𑀕𑀢𑁆𑀢𑀯𑀺𑀦𑀸𑀫𑁂. 𑀕𑀢𑁆𑀢𑀯𑀺𑀦𑀸𑀫𑁄 𑀕𑀢𑁆𑀢𑀯𑀺𑀓𑁆𑀔𑁂𑀧𑁄. 𑀦𑀘𑁆𑀘𑀢𑀺. 𑀦𑀘𑁆𑀘𑀁. 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄.

𑀤𑀸 𑀲𑁄𑀥𑀦𑁂. 𑀤𑀸𑀬𑀢𑀺. 𑀤𑀸𑀦𑀁. 𑀅𑀦𑀼𑀬𑁄𑀕𑀤𑀸𑀧𑀦𑀢𑁆𑀣𑀁. 𑀅𑀦𑀼𑀬𑁄𑀕𑀁 𑀤𑀢𑁆𑀯𑀸. 𑀤𑀸𑀦𑀁 𑀤𑀢𑁆𑀯𑀸.

𑀤𑀸 ¶ 𑀲𑀼𑀧𑀦𑁂. 𑀤𑀸𑀬𑀢𑀺. 𑀦𑀺𑀤𑁆𑀤𑀸𑀬𑀢𑀺. 𑀦𑀺𑀤𑁆𑀤𑀸𑀬𑀦𑀁, 𑀦𑀺𑀤𑁆𑀤𑀸𑀬𑀫𑀸𑀦𑁄, 𑀦𑀺𑀤𑁆𑀤𑀸𑀬𑀦𑁆𑀢𑁄.

𑀤𑀸𑀤𑀸𑀦𑁂. 𑀧𑀼𑀭𑀺𑀲𑁄 𑀤𑀸𑀦𑀁 𑀤𑀸𑀬𑀢𑀺. 𑀆𑀧𑀼𑀩𑁆𑀩𑁄 𑀕𑀳𑀡𑁂. 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺. 𑀲𑀻𑀮𑀁 𑀲𑀫𑀸𑀤𑀺𑀬𑀢𑀺. 𑀓𑀫𑁆𑀫𑁂 𑁋 𑀧𑀼𑀭𑀺𑀲𑁂𑀦 𑀤𑀸𑀦𑀁 𑀤𑀻𑀬𑀢𑀺, 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺. 𑀓𑀸𑀭𑀺𑀢𑁂 𑁋 𑀆𑀤𑀧𑁂𑀢𑀺, 𑀲𑀫𑀸𑀤𑀧𑁂𑀢𑀺, 𑀆𑀤𑀧𑀬𑀢𑀺, 𑀲𑀫𑀸𑀤𑀧𑀬𑀢𑀺, 𑀬𑁂 𑀥𑀫𑁆𑀫𑀫𑁂𑀯𑀸𑀤𑀧𑀬𑀦𑁆𑀢𑀺 𑀲𑀦𑁆𑀢𑁄.

𑀤𑀸 𑀅𑀯𑀔𑀡𑁆𑀟𑀦𑁂. 𑀤𑀺𑀬𑀢𑀺, 𑀤𑀺𑀬𑀦𑁆𑀢𑀺. 𑀧𑀭𑀺𑀢𑁆𑀢𑀁.

𑀏𑀢𑁆𑀣 𑀘 𑀧𑀭𑀺𑀢𑁆𑀢𑀦𑁆𑀢𑀺 𑀲𑀫𑀦𑁆𑀢𑀢𑁄 𑀔𑀡𑁆𑀟𑀺𑀢𑀢𑁆𑀢𑀸 𑀧𑀭𑀺𑀢𑁆𑀢𑀁. 𑀅𑀧𑁆𑀧𑀫𑀢𑁆𑀢𑀓𑀜𑁆𑀳𑀺 𑀕𑁄𑀫𑀬𑀧𑀺𑀡𑁆𑀟𑀁 𑀧𑀭𑀺𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀧𑀭𑀺𑀢𑁆𑀢𑀦𑁆𑀢𑀺 𑀅𑀧𑁆𑀧𑀓𑀲𑁆𑀲 𑀦𑀸𑀫𑀁 𑀓𑀸𑀫𑀸𑀯𑀘𑀭𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀅𑀧𑁆𑀧𑁂𑀲𑀓𑁆𑀔𑀢𑁆𑀢𑀸.

𑀤𑀸 𑀲𑀼𑀤𑁆𑀥𑀺𑀬𑀁. 𑀤𑀸𑀬𑀢𑀺. 𑀯𑁄𑀤𑀸𑀬𑀢𑀺. 𑀯𑁄𑀤𑀸𑀦𑀁. 𑀅𑀓𑀫𑁆𑀫𑀓𑁄𑀬𑀁 𑀥𑀸𑀢𑀼. 𑀢𑀣𑀸 𑀳𑀺 ‘‘𑀯𑁄𑀤𑀸𑀬𑀢𑀺 𑀲𑀼𑀚𑁆𑀛𑀢𑀺 𑀏𑀢𑁂𑀦𑀸𑀢𑀺 𑀯𑁄𑀤𑀸𑀦𑀁, 𑀲𑀫𑀣𑀯𑀺𑀧𑀲𑁆𑀲𑀦𑀸’’𑀢𑀺 𑀦𑁂𑀢𑁆𑀢𑀺𑀲𑀁𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀁.

𑀤𑀻 𑀔𑀬𑁂. 𑀤𑀻𑀬𑀢𑁂. 𑀤𑀻𑀦𑁄, 𑀆𑀤𑀻𑀦𑀯𑁄.

𑀢𑀢𑁆𑀭 𑀤𑀻𑀦𑁄𑀢𑀺 𑀧𑀭𑀺𑀓𑁆𑀔𑀻𑀡𑀜𑀸𑀢𑀺𑀥𑀦𑀸𑀤𑀺𑀪𑀸𑀯𑁂𑀦 𑀤𑀼𑀓𑁆𑀔𑀺𑀢𑁄. 𑀆𑀤𑀻𑀦𑀯𑁄𑀢𑀺𑀆𑀤𑀻𑀦𑀁 𑀤𑀼𑀓𑁆𑀔𑀁 𑀯𑀸𑀢𑀺 𑀅𑀥𑀺𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺𑀆𑀤𑀻𑀦𑀯𑁄, 𑀤𑁄𑀲𑁄.

𑀤𑀼 𑀧𑀭𑀺𑀢𑀸𑀧𑁂. 𑀤𑀼𑀬𑀢𑁂. 𑀤𑀼𑀦𑁄, 𑀤𑀽𑀢𑁄.

𑀪𑀺𑀤𑀺 𑀪𑀺𑀚𑁆𑀚𑀦𑁂. 𑀪𑀺𑀚𑁆𑀚𑀦𑀥𑀫𑁆𑀫𑀁 𑀪𑀺𑀚𑁆𑀚𑀢𑀺. 𑀪𑀺𑀚𑁆𑀚𑀢𑀻𑀢𑀺 𑀪𑀺𑀦𑁆𑀦𑁄. 𑀪𑀺𑀚𑁆𑀚𑀦𑀁 𑀪𑁂𑀤𑁄.

𑀙𑀺𑀤𑀺 𑀙𑀺𑀚𑁆𑀚𑀦𑁂. 𑀲𑀼𑀢𑁆𑀢𑀁 𑀙𑀺𑀚𑁆𑀚𑀢𑀺. 𑀙𑀺𑀚𑁆𑀚𑀢𑀻𑀢𑀺 𑀙𑀺𑀦𑁆𑀦𑁄. 𑀏𑀯𑀁 𑀙𑀺𑀤𑁆𑀤𑀁. 𑀙𑀺𑀚𑁆𑀚𑀦𑀁 𑀙𑁂𑀤𑁄.

𑀔𑀺𑀤𑀺 ¶ 𑀤𑀻𑀦𑀺𑀬𑁂. 𑀤𑀻𑀦𑀪𑀸𑀯𑁄 𑀤𑀻𑀦𑀺𑀬𑀁, 𑀬𑀣𑀸 𑀤𑀓𑁆𑀔𑀺𑀬𑀁. 𑀔𑀺𑀚𑁆𑀚𑀢𑀺, 𑀔𑀺𑀦𑁆𑀦𑁄, 𑀅𑀔𑀺𑀦𑁆𑀦𑀫𑀢𑀺, 𑀔𑁂𑀤𑁄, 𑀔𑁂𑀤𑀗𑁆𑀕𑀢𑁄 𑀮𑁄𑀓𑀳𑀺𑀢𑀸𑀬 𑀦𑀸𑀣𑁄.

𑀏𑀢𑁆𑀣 𑀔𑁂𑀤𑀗𑁆𑀕𑀢𑁄𑀢𑀺 𑀓𑀸𑀬𑀺𑀓𑀤𑀼𑀓𑁆𑀔𑀲𑀗𑁆𑀔𑀸𑀢𑀁 𑀧𑀭𑀺𑀲𑁆𑀲𑀫𑀁 𑀧𑀢𑁆𑀢𑁄, 𑀤𑀼𑀓𑁆𑀔𑀫𑀦𑀼𑀪𑀯𑀻𑀢𑀺 𑀅𑀢𑁆𑀣𑁄.

𑀧𑀤 𑀕𑀢𑀺𑀬𑀁. 𑀧𑀚𑁆𑀚𑀢𑀺. 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀢𑀺. 𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀚𑁆𑀚𑀢𑀺. 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺. 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀅𑀓𑀫𑁆𑀫𑀓𑀫𑁆𑀧𑀺 𑀪𑀯𑀢𑀺, 𑀢𑁂𑀲𑀁 𑀅𑀥𑀫𑁆𑀫𑁄 𑀆𑀧𑀚𑁆𑀚𑀢𑀺, 𑀧𑀚𑁆𑀚𑁄, 𑀩𑁆𑀬𑀕𑁆𑀖𑀧𑀚𑁆𑀚𑁄, 𑀲𑀫𑁆𑀧𑀤𑀸𑀬𑁄.

𑀏𑀢𑁆𑀣 𑀘 𑀧𑀚𑁆𑀚𑁄𑀢𑀺 𑀫𑀕𑁆𑀕𑁄. 𑀩𑁆𑀬𑀕𑁆𑀖𑀧𑀚𑁆𑀚𑁂 𑀲𑀤𑁆𑀤𑀼𑀮𑀧𑀣𑁂 𑀚𑀸𑀢𑁄𑀢𑀺 𑀩𑁆𑀬𑀕𑁆𑀖𑀧𑀚𑁆𑀚𑁄, 𑀏𑀯𑀁𑀦𑀸𑀫𑀓𑁄 𑀓𑀼𑀮𑀧𑀼𑀢𑁆𑀢𑁄. 𑀲𑀫𑁆𑀧𑀤𑀺𑀬𑀢𑀺 𑀜𑀸𑀧𑀺𑀬𑀢𑀺 𑀥𑀫𑁆𑀫𑁄 𑀏𑀢𑁂𑀦𑀸𑀢𑀺 𑀲𑀫𑁆𑀧𑀤𑀸𑀬𑁄, 𑀅𑀓𑁆𑀔𑀸𑀢𑀸.

𑀯𑀺𑀤 𑀲𑀢𑁆𑀢𑀸𑀬𑀁. 𑀲𑀢𑁆𑀢𑀸 𑀯𑀺𑀚𑁆𑀚𑀫𑀸𑀦𑀸𑀓𑀸𑀭𑁄. 𑀯𑀺𑀚𑁆𑀚𑀢𑀺, 𑀲𑀁𑀯𑀺𑀚𑁆𑀚𑀢𑀺. 𑀚𑀸𑀢𑀯𑁂𑀤𑁄, 𑀯𑀺𑀚𑁆𑀚𑀸, 𑀅𑀯𑀺𑀚𑁆𑀚𑀸, 𑀯𑀺𑀤𑀺𑀢𑁄.

𑀢𑀢𑁆𑀣 𑀚𑀸𑀢𑀯𑁂𑀤𑁄𑀢𑀺 𑀅𑀕𑁆𑀕𑀺. 𑀲𑁄 𑀳𑀺 𑀚𑀸𑀢𑁄𑀯 𑀯𑁂𑀤𑀬𑀢𑀺 𑀥𑀽𑀫𑀚𑀸𑀮𑀼𑀝𑁆𑀞𑀸𑀦𑁂𑀦 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀚𑀸𑀢𑀯𑁂𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀚𑁆𑀚𑀸𑀢𑀺 𑀥𑀫𑁆𑀫𑀸𑀦𑀁 𑀲𑀪𑀸𑀯𑀁 𑀯𑀺𑀤𑀺𑀢𑀁 𑀓𑀭𑁄𑀢𑀻𑀢𑀺 𑀯𑀺𑀚𑁆𑀚𑀸, 𑀜𑀸𑀡𑀁. 𑀅𑀯𑀺𑀚𑁆𑀚𑀸𑀢𑀺 𑀔𑀦𑁆𑀥𑀸𑀦𑀁 𑀭𑀸𑀲𑀝𑁆𑀞𑀁, 𑀆𑀬𑀢𑀦𑀸𑀦𑀁 𑀆𑀬𑀢𑀦𑀝𑁆𑀞𑀁, 𑀥𑀸𑀢𑀽𑀦𑀁 𑀲𑀼𑀜𑁆𑀜𑀝𑁆𑀞𑀁, 𑀲𑀘𑁆𑀘𑀸𑀦𑀁 𑀢𑀣𑀝𑁆𑀞𑀁, 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀥𑀺𑀧𑀢𑀺𑀬𑀝𑁆𑀞𑀁 𑀅𑀯𑀺𑀤𑀺𑀢𑀁 𑀓𑀭𑁄𑀢𑀻𑀢𑀺 𑀅𑀯𑀺𑀚𑁆𑀚𑀸. 𑀤𑀼𑀓𑁆𑀔𑀸𑀤𑀻𑀦𑀁 𑀧𑀻𑀴𑀦𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀁 𑀘𑀢𑀼𑀩𑁆𑀩𑀺𑀥𑀁 𑀅𑀢𑁆𑀣𑀁 𑀅𑀯𑀺𑀤𑀺𑀢𑀁 𑀓𑀭𑁄𑀢𑀻𑀢𑀺 𑀅𑀯𑀺𑀚𑁆𑀚𑀸, 𑀫𑁄𑀳𑁄.

𑀫𑀤 𑀉𑀫𑁆𑀫𑀸𑀤𑁂. 𑀉𑀫𑁆𑀫𑀸𑀤𑁄 𑀦𑀸𑀫 𑀫𑀼𑀬𑁆𑀳 𑀦𑀁 𑀯𑀸 𑀲𑀢𑀺𑀯𑀺𑀧𑁆𑀧𑀯𑀸𑀲𑁄 𑀯𑀸 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑁄 𑀯𑀸. 𑀫𑀚𑁆𑀚𑀢𑀺, 𑀧𑀫𑀚𑁆𑀚𑀢𑀺. 𑀫𑀢𑁆𑀢𑁄, 𑀲𑀼𑀭𑀸𑀫𑀤𑀫𑀢𑁆𑀢𑁄. 𑀫𑀢𑁆𑀢𑁄 𑀅𑀳𑀁 𑀫𑀳𑀸𑀭𑀸𑀚. 𑀧𑀼𑀢𑁆𑀢𑀫𑀁𑀲𑀸𑀦𑀺 𑀔𑀸𑀤𑀬𑀺𑀁. 𑀫𑀢𑁆𑀢𑀳𑀢𑁆𑀣𑀻, 𑀧𑀫𑀢𑁆𑀢𑁄, 𑀉𑀫𑁆𑀫𑀢𑁆𑀢𑁄.

𑀅𑀧𑁆𑀧𑀫𑀸𑀤𑁄 ¶ 𑀅𑀫𑀢𑀁 𑀧𑀤𑀁, 𑀧𑀫𑀸𑀤𑁄 𑀫𑀘𑁆𑀘𑀼𑀦𑁄 𑀧𑀤𑀁;

𑀅𑀧𑁆𑀧𑀫𑀢𑁆𑀢𑀸 𑀦 𑀫𑀺𑀬𑁆𑀬𑀦𑁆𑀢𑀺, 𑀬𑁂 𑀧𑀫𑀢𑁆𑀢𑀸 𑀬𑀣𑀸 𑀫𑀢𑀸.

𑀫𑀺𑀤 𑀲𑀺𑀦𑁂𑀳𑀦𑁂. 𑀫𑁂𑀚𑁆𑀚𑀢𑀺. 𑀫𑁂𑀢𑁆𑀢𑀸, 𑀫𑁂𑀢𑁆𑀢𑀺, 𑀫𑀺𑀢𑁆𑀢𑀁, 𑀫𑀺𑀢𑁆𑀢𑁄.

𑀅𑀦𑁆𑀢𑀭𑀥𑀸 𑀅𑀤𑀲𑁆𑀲𑀦𑁂. 𑀅𑀦𑁆𑀢𑀭𑀧𑀼𑀩𑁆𑀩𑁄 𑀥𑀸𑀥𑀸𑀢𑀼 𑀯𑀺𑀚𑁆𑀚𑀫𑀸𑀦𑀲𑁆𑀲 𑀯𑀢𑁆𑀣𑀼𑀦𑁄 𑀅𑀤𑀲𑁆𑀲𑀦𑁂 𑀯𑀢𑁆𑀢𑀢𑀺. 𑀅𑀦𑁆𑀢𑀭𑀥𑀸𑀬𑀢𑀺. 𑀅𑀦𑁆𑀢𑀭𑀥𑀸𑀦𑀁, 𑀅𑀦𑁆𑀢𑀭𑀥𑀸𑀬𑀦𑁆𑀢𑁄. 𑀲𑀸 𑀤𑁂𑀯𑀢𑀸 𑀅𑀦𑁆𑀢𑀭𑀳𑀺𑀢𑀸. 𑀅𑀦𑁆𑀢𑀭𑀸𑀧𑀺𑀥𑀸𑀬𑀢𑀺.

𑀩𑀼𑀥 𑀅𑀯𑀕𑀫𑀦𑁂. 𑀅𑀯𑀕𑀫𑀦𑀁 𑀚𑀸𑀦𑀦𑀁. 𑀩𑀼𑀚𑁆𑀛𑀢𑀺, 𑀩𑀼𑀤𑁆𑀥𑁄, 𑀩𑀼𑀤𑁆𑀥𑀺, 𑀩𑀼𑀤𑁆𑀥𑀁, 𑀩𑁄𑀥𑁄, 𑀩𑁄𑀥𑀺. 𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀺. 𑀲𑀓𑀮𑀁 𑀩𑀼𑀤𑁆𑀥𑁄, 𑀩𑀼𑀤𑁆𑀥𑀯𑀸, 𑀯𑀺𑀩𑁄𑀥𑁂𑀢𑀺, 𑀩𑁄𑀥𑁂𑀢𑀸, 𑀩𑀼𑀤𑁆𑀥𑁄, 𑀯𑀺𑀩𑀼𑀤𑁆𑀥𑁄 𑀇𑀘𑁆𑀘𑀸𑀤𑀻𑀦𑀺.

𑀢𑀢𑁆𑀭 𑀩𑀼𑀤𑁆𑀥𑁄𑀢𑀺 𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄, 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄. 𑀅𑀣 𑀯𑀸 𑀧𑀸𑀭𑀫𑀺𑀢𑀸𑀧𑀭𑀺𑀪𑀸𑀯𑀺𑀢𑀸𑀬 𑀧𑀜𑁆𑀜𑀸𑀬 𑀲𑀩𑁆𑀩𑀫𑁆𑀧𑀺 𑀜𑁂𑀬𑁆𑀬𑀁 𑀅𑀩𑀼𑀚𑁆𑀛𑀻𑀢𑀺 𑀩𑀼𑀤𑁆𑀥𑁄. 𑀓𑁂𑀘𑀺 𑀧𑀦 𑀓𑀫𑁆𑀫𑁂𑀦𑀧𑀺 𑀩𑀼𑀤𑁆𑀥𑀲𑀤𑁆𑀤𑀲𑁆𑀲 𑀲𑀺𑀤𑁆𑀥𑀁 𑀇𑀘𑁆𑀙𑀦𑁆𑀢𑀸 𑀏𑀯𑀁 𑀦𑀺𑀩𑁆𑀩𑀘𑀦𑀁 𑀓𑀭𑁄𑀦𑁆𑀢𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸𑀢𑀺 𑀅𑀥𑀺𑀕𑀢𑀕𑀼𑀡𑀯𑀺𑀲𑁂𑀲𑁂𑀳𑀺 𑀔𑀻𑀡𑀸𑀲𑀯𑁂𑀳𑀺 𑀩𑀼𑀚𑁆𑀛𑀺𑀢𑀩𑁆𑀩𑁄𑀢𑀺 𑀩𑀼𑀤𑁆𑀥𑁄’’𑀢𑀺. 𑀯𑀺𑀢𑁆𑀣𑀸𑀭𑁄 𑀧𑀦 𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑁄. 𑀩𑀼𑀤𑁆𑀥𑀻𑀢𑀺 𑀩𑀼𑀚𑁆𑀛𑀢𑀻𑀢𑀺 𑀩𑀼𑀤𑁆𑀥𑀺. 𑀏𑀯𑀁 𑀩𑀼𑀤𑁆𑀥𑀁 𑀩𑁄𑀥𑁄 𑀩𑁄𑀥𑀺 𑀘. 𑀅𑀣 𑀯𑀸 𑀩𑀼𑀚𑁆𑀛𑀦𑀁 𑀩𑀼𑀤𑁆𑀥𑀺. 𑀏𑀯𑀁 𑀩𑁄𑀥𑁄 𑀩𑁄𑀥𑀺 𑀘, 𑀲𑀩𑁆𑀩𑀫𑁂𑀢𑀁 𑀧𑀜𑁆𑀜𑀸𑀬𑀸𑀥𑀺𑀯𑀘𑀦𑀁.

𑀇𑀤𑀸𑀦𑀺 𑀩𑁄𑀥𑀺𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑀁 𑀯𑀤𑀸𑀫. 𑀩𑁄𑀥𑀻𑀢𑀺 𑀳𑀺 𑀭𑀼𑀓𑁆𑀔𑁄𑀧𑀺 𑀫𑀕𑁆𑀕𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁆𑀧𑀺 𑀦𑀺𑀩𑁆𑀩𑀸𑀦𑀫𑁆𑀧𑀺 𑀏𑀯𑀁𑀧𑀡𑁆𑀡𑀢𑁆𑀢𑀺𑀓𑁄 𑀧𑀼𑀕𑁆𑀕𑀮𑁄𑀧𑀺 𑀯𑀼𑀘𑁆𑀘𑀢𑀺, 𑀢𑀣𑀸 𑀳𑀺 ‘‘𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀘, ‘‘𑀅𑀦𑁆𑀢𑀭𑀸 𑀘 𑀩𑁄𑀥𑀺𑀁 𑀅𑀦𑁆𑀢𑀭𑀸 𑀘 𑀕𑀬’’𑀦𑁆𑀢𑀺 𑀘 𑀆𑀕𑀢𑀝𑁆𑀞𑀸𑀦𑁂 𑀭𑀼𑀓𑁆𑀔𑁄 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀺. ‘‘𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡’’𑀦𑁆𑀢𑀺 ¶ 𑀆𑀕𑀢𑀝𑁆𑀞𑀸𑀦𑁂 𑀫𑀕𑁆𑀕𑁄. ‘‘𑀧𑀧𑁆𑀧𑁄𑀢𑀺 𑀩𑁄𑀥𑀺𑀁 𑀯𑀭𑀪𑀽𑀭𑀺 𑀲𑀼𑀫𑁂𑀥𑀲𑁄’’𑀢𑀺 𑀆𑀕𑀢𑀝𑁆𑀞𑀸𑀦𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. ‘‘𑀧𑀢𑁆𑀯𑀸𑀦 𑀩𑁄𑀥𑀺𑀁 𑀅𑀫𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺 𑀆𑀕𑀢𑀝𑁆𑀞𑀸𑀦𑁂 𑀦𑀺𑀩𑁆𑀩𑀸𑀦𑀁. ‘‘𑀩𑁄𑀥𑀺 𑀪𑀦𑁆𑀢𑁂 𑀭𑀸𑀚𑀓𑀼𑀫𑀸𑀭𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’’𑀢𑀺 ‘‘𑀅𑀭𑀺𑀬𑀲𑀸𑀯𑀓𑁄 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀘 𑀆𑀕𑀢𑀝𑁆𑀞𑀸𑀦𑁂 𑀏𑀯𑀁𑀧𑀡𑁆𑀡𑀢𑁆𑀢𑀺𑀓𑁄 𑀧𑀼𑀕𑁆𑀕𑀮𑁄.

𑀅𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

𑀭𑀼𑀓𑁆𑀔𑁂 𑀫𑀕𑁆𑀕𑁂 𑀘 𑀦𑀺𑀩𑁆𑀩𑀸𑀦𑁂, 𑀜𑀸𑀡𑁂 𑀲𑀩𑁆𑀩𑀜𑁆𑀜𑀼𑀢𑀸𑀬 𑀘;

𑀢𑀣𑀸 𑀧𑀡𑁆𑀡𑀢𑁆𑀢𑀺𑀬𑀜𑁆𑀘𑁂𑀯, 𑀩𑁄𑀥𑀺𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑀩𑀼𑀚𑁆𑀛𑀢𑀻𑀢𑀺 𑀩𑀼𑀚𑁆𑀛𑀺𑀢𑀸, 𑀩𑁄𑀥𑁂𑀢𑀻𑀢𑀺 𑀩𑁄𑀥𑁂𑀢𑀸.

𑀏𑀢𑁆𑀣 𑀘 𑀓𑁄𑀘𑀺 𑀧𑀬𑁄𑀕𑁄 𑀢𑀼𑀫𑀦𑁆𑀢𑀸𑀤𑀻𑀦𑀺 𑀘 𑀭𑀽𑀧𑀸𑀦𑀺 𑀯𑀼𑀘𑁆𑀘𑀦𑁆𑀢𑁂 𑁋 ‘‘𑀕𑀼𑀬𑁆𑀳𑀫𑀢𑁆𑀣𑀫𑀲𑀫𑁆𑀩𑀼𑀤𑁆𑀥𑀁, 𑀲𑀫𑁆𑀩𑁄𑀥𑀬𑀢𑀺 𑀬𑁄 𑀦𑀭𑁄. 𑀧𑀭𑀁 𑀲𑀫𑁆𑀩𑀼𑀤𑁆𑀥𑀼𑀫𑀭𑀳𑀢𑀺. 𑀩𑀼𑀚𑁆𑀛𑀺𑀢𑀼𑀁, 𑀩𑀼𑀤𑁆𑀥𑀼𑀁, 𑀩𑀼𑀚𑁆𑀛𑀺𑀢𑁆𑀯𑀸, 𑀩𑀼𑀚𑁆𑀛𑀺𑀢𑁆𑀯𑀸𑀦, 𑀩𑀼𑀚𑁆𑀛𑀺𑀢𑀼𑀦, 𑀩𑀼𑀤𑁆𑀥𑀺𑀬, 𑀩𑀼𑀤𑁆𑀥𑀺𑀬𑀸𑀦, 𑀩𑀼𑀤𑁆𑀥𑀸, 𑀩𑀼𑀤𑁆𑀥𑀸𑀦’’ 𑀇𑀢𑀺 𑀪𑀯𑀦𑁆𑀢𑀺.

𑀢𑀢𑁆𑀭 𑀅𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀧𑀭𑁂𑀳𑀺 𑀅𑀜𑁆𑀜𑀸𑀢𑀁, ‘‘𑀅𑀲𑀫𑁆𑀩𑁄𑀥’’𑀦𑁆𑀢𑀺𑀧𑀺 𑀧𑀸𑀞𑁄, 𑀧𑀭𑁂𑀲𑀁 𑀩𑁄𑀥𑁂𑀢𑀼𑀁 𑀅𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀩𑀼𑀤𑁆𑀥𑀼𑀦𑁆𑀢𑀺 𑀲𑀁𑀩𑀼𑀚𑁆𑀛𑀺𑀢𑀼𑀁. 𑀩𑀼𑀤𑁆𑀥𑀸𑀢𑀺 𑀩𑀼𑀚𑁆𑀛𑀺𑀢𑁆𑀯𑀸, 𑀏𑀯𑀁 𑀩𑀼𑀤𑁆𑀥𑀸𑀦𑀸𑀢𑀺 𑀏𑀢𑁆𑀣𑀸𑀧𑀺.

𑀓𑁂𑀘𑀺 𑀧𑀦 ‘‘𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂 ‘𑀩𑁄𑀥𑀺𑀫𑀕𑁆𑀕𑁂𑀦 𑀩𑀼𑀥𑁆𑀯𑀸’𑀢𑀺 𑀘, ‘‘𑀩𑀼𑀥𑁆𑀯𑀸 𑀩𑁄𑀥𑀺𑀢𑀮𑁂 𑀬𑀫𑀸𑀳 𑀲𑀼𑀕𑀢𑁄’𑀢𑀺 𑀘 𑀥𑀓𑀸𑀭𑀯𑀓𑀸𑀭𑀲𑀜𑁆𑀜𑁄𑀕𑀯𑀢𑁄 𑀧𑀤𑀲𑁆𑀲 𑀤𑀲𑁆𑀲𑀦𑀢𑁄 𑀢𑁆𑀯𑀸𑀧𑀘𑁆𑀘𑀬𑀦𑁆𑀢𑀪𑀸𑀯𑀢𑁄 𑀘 𑀥𑀓𑀸𑀭𑀯𑀓𑀸𑀭𑀲𑀁𑀬𑁄𑀕𑀯𑀲𑁂𑀦 ‘‘𑀩𑀼𑀥𑁆𑀯𑀸’’𑀢𑀺 𑀧𑀤𑀲𑀺𑀤𑁆𑀥𑀺 𑀇𑀘𑁆𑀙𑀺𑀢𑀩𑁆𑀩𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑀸𑀤𑀺𑀲𑀲𑁆𑀲 𑀧𑀤𑀭𑀽𑀧𑀲𑁆𑀲 𑀩𑀼𑀤𑁆𑀥𑀯𑀘𑀦𑁂 𑀅𑀤𑀲𑁆𑀲𑀦𑀢𑁄 𑀘, 𑀩𑀼𑀤𑁆𑀥𑀯𑀘𑀦𑀲𑁆𑀲 𑀅𑀦𑀦𑀼𑀓𑀽𑀮𑀢𑀸𑀬 𑀘, 𑀧𑀭𑀺𑀲𑀼𑀤𑁆𑀥𑁂 𑀘 𑀧𑁄𑀭𑀸𑀡𑀧𑁄𑀢𑁆𑀣𑀓𑁂 ¶ 𑀯𑀓𑀸𑀭𑀲𑀁𑀬𑁄𑀕𑀯𑀺𑀕𑀢𑀲𑁆𑀲 ‘‘𑀩𑁄𑀥𑀺𑀫𑀕𑁆𑀕𑁂𑀦 𑀩𑀼𑀤𑁆𑀥𑀸’’𑀢𑀺𑀘, ‘‘𑀩𑀼𑀤𑁆𑀥𑀸 𑀩𑁄𑀥𑀺𑀢𑀮𑁂’’𑀢𑀺 𑀘 𑀧𑀤𑀲𑁆𑀲 𑀤𑀲𑁆𑀲𑀦𑀢𑁄 𑀦 𑀕𑀳𑁂𑀢𑀩𑁆𑀩𑀁. 𑀢𑀣𑀸 𑀳𑀺 𑀦 𑀢𑀸𑀤𑀺𑀲𑁄 𑀧𑀸𑀞𑁄 𑀩𑀼𑀤𑁆𑀥𑀯𑀘𑀦𑀲𑁆𑀲 𑀅𑀦𑀼𑀓𑀽𑀮𑁄 𑀳𑁄𑀢𑀻𑀢𑀺. 𑀦 𑀳𑀺 𑀩𑀼𑀤𑁆𑀥𑀯𑀘𑀦𑁂 𑀯𑀲𑁆𑀲𑀲𑀢𑀫𑁆𑀧𑀺 𑀯𑀲𑁆𑀲𑀲𑀳𑀲𑁆𑀲𑀫𑁆𑀧𑀺 𑀧𑀭𑀺𑀬𑁂𑀲𑀦𑁆𑀢𑀸 𑀢𑀸𑀤𑀺𑀲𑀁 𑀯𑀓𑀸𑀭𑀥𑀓𑀸𑀭𑀲𑀜𑁆𑀜𑁄𑀕𑀧𑀤𑀁 𑀧𑀲𑁆𑀲𑀺𑀲𑁆𑀲𑀦𑁆𑀢𑀺. 𑀏𑀯𑀁 ‘‘𑀩𑀼𑀥𑁆𑀯𑀸’’𑀢𑀺 𑀧𑀤𑀭𑀽𑀧𑀲𑁆𑀲 𑀩𑀼𑀤𑁆𑀥𑀯𑀘𑀦𑀲𑁆𑀲 𑀅𑀦𑀦𑀼𑀓𑀽𑀮𑀢𑀸 𑀤𑀝𑁆𑀞𑀩𑁆𑀩𑀸. 𑀢𑀜𑁆𑀳𑀺 𑀲𑀓𑁆𑀓𑀝𑀕𑀦𑁆𑀣𑁂 𑀓𑀢𑀧𑀭𑀺𑀘𑀬𑀪𑀸𑀯𑁂𑀦 𑀯𑀜𑁆𑀘𑀺𑀢𑁂𑀳𑀺 𑀯𑀺𑀤𑀽𑀳𑀺 𑀇𑀘𑁆𑀙𑀺𑀢𑀁, 𑀦 𑀲𑀤𑁆𑀥𑀫𑁆𑀫𑀦𑀻𑀢𑀺𑀯𑀺𑀤𑀽𑀳𑀺. 𑀏𑀢𑁆𑀣 𑀇𑀫𑀸𑀦𑀺 𑀦𑀺𑀤𑀲𑁆𑀲𑀦𑀧𑀤𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺 𑁋

𑀓𑁄 𑀫𑀁 𑀯𑀺𑀤𑁆𑀥𑀸 𑀦𑀺𑀮𑀻𑀬𑀢𑀺. 𑀮𑀤𑁆𑀥𑀸 𑀫𑀘𑁆𑀘𑁄 𑀬𑀤𑀺𑀘𑁆𑀙𑀢𑀺. 𑀮𑀤𑁆𑀥𑀸𑀦 𑀧𑀼𑀩𑁆𑀩𑀸𑀧𑀭𑀺𑀬𑀁 𑀯𑀺𑀲𑁂𑀲𑀁, 𑀅𑀤𑀲𑁆𑀲𑀦𑀁 𑀫𑀘𑁆𑀘𑀼𑀭𑀸𑀚𑀲𑁆𑀲 𑀕𑀘𑁆𑀙𑁂.

𑀉𑀫𑁆𑀫𑀸𑀤𑀦𑁆𑀢𑀺𑀫𑀳𑀁 𑀤𑀺𑀝𑁆𑀞𑀸, 𑀆𑀫𑀼𑀓𑁆𑀓𑀫𑀡𑀺𑀓𑀼𑀡𑁆𑀟𑀮𑀁;

𑀦 𑀲𑀼𑀧𑀸𑀫𑀺 𑀤𑀺𑀯𑀸𑀭𑀢𑁆𑀢𑀺𑀁, 𑀲𑀳𑀲𑁆𑀲𑀁𑀯 𑀧𑀭𑀸𑀚𑀺𑀢𑁄’’𑀢𑀺;

𑀢𑀢𑁆𑀣 𑀯𑀺𑀤𑁆𑀥𑀸𑀢𑀺 𑀯𑀺𑀚𑁆𑀛𑀺𑀢𑁆𑀯𑀸. 𑀮𑀤𑁆𑀥𑀸𑀢𑀺 𑀮𑀪𑀺𑀢𑁆𑀯𑀸. 𑀮𑀤𑁆𑀥𑀸𑀦𑀸𑀢𑀺 𑀮𑀪𑀺𑀢𑁆𑀯𑀸𑀦. 𑀤𑀺𑀝𑁆𑀞𑀸𑀢𑀺 𑀤𑀺𑀲𑁆𑀯𑀸. 𑀇𑀢𑀺 ‘‘𑀯𑀺𑀤𑁆𑀥𑀸 𑀮𑀤𑁆𑀥𑀸 𑀮𑀤𑁆𑀥𑀸𑀦 𑀤𑀺𑀝𑁆𑀞𑀸’’𑀢𑀺 𑀧𑀤𑀸𑀦𑀺 𑀢𑁆𑀯𑀸𑀧𑀘𑁆𑀘𑀬𑁂𑀦 𑀲𑀤𑁆𑀥𑀺𑀁 𑀕𑀢𑀸𑀦𑀺𑀧𑀺 𑀲𑀜𑁆𑀜𑁄𑀕𑀯𑀲𑁂𑀦 𑀯𑀓𑀸𑀭𑀧𑀝𑀺𑀩𑀤𑁆𑀥𑀸𑀦𑀺 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀩𑀼𑀤𑁆𑀥𑀸 𑀩𑀼𑀤𑁆𑀥𑀸𑀦’’ 𑀇𑀘𑁆𑀘𑁂𑀢𑀸𑀦𑀺𑀧𑀺 ‘‘𑀮𑀤𑁆𑀥𑀸 𑀮𑀤𑁆𑀥𑀸𑀦’’ 𑀇𑀘𑁆𑀘𑀸𑀤𑀻𑀦𑀺 𑀯𑀺𑀬 𑀧𑀭𑀺𑀳𑀻𑀦𑀯𑀓𑀸𑀭𑀲𑀜𑁆𑀜𑁄𑀕𑀸𑀦𑀺 𑀏𑀯 𑀕𑀳𑁂𑀢𑀩𑁆𑀩𑀸𑀦𑀺. 𑀬𑁂 ‘‘𑀩𑀼𑀥𑁆𑀯𑀸’’𑀢𑀺 𑀭𑀽𑀧𑀁 𑀇𑀘𑁆𑀙𑀦𑁆𑀢𑀺 𑀧𑀞𑀦𑁆𑀢𑀺 𑀘, 𑀫𑀜𑁆𑀜𑁂 𑀢𑁂 𑀢𑁆𑀯𑀸𑀧𑀘𑁆𑀘𑀬𑁄 𑀯𑀜𑁆𑀘𑁂𑀢𑀺, 𑀢𑁂𑀦 𑀢𑁂 𑀯𑀜𑁆𑀘𑀦𑀁 𑀧𑀸𑀧𑀼𑀡𑀦𑁆𑀢𑀺, 𑀢𑀲𑁆𑀫𑀸 𑀢𑀸𑀤𑀺𑀲𑀁 𑀭𑀽𑀧𑀁 𑀅𑀕𑁆𑀕𑀳𑁂𑀢𑁆𑀯𑀸 𑀬𑁄 𑀲𑀤𑁆𑀤𑀦𑀻𑀢𑀺𑀬𑀁 𑀲𑀤𑁆𑀤𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄, 𑀲𑁄𑀬𑁂𑀯 𑀆𑀬𑀲𑁆𑀫𑀦𑁆𑀢𑁂𑀳𑀺 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑁄.

𑀩𑀼𑀥 𑀩𑁄𑀥𑀦𑁂. 𑀲𑀓𑀫𑁆𑀫𑀓𑀸𑀓𑀫𑁆𑀫𑀓𑁄𑀬𑀁 𑀥𑀸𑀢𑀼. 𑀢𑀣𑀸 𑀳𑀺 𑀩𑁄𑀥𑀦𑀲𑀤𑁆𑀤𑀼𑀘𑁆𑀘𑀸𑀭𑀡𑁂𑀦 𑀚𑀸𑀦𑀦𑀁 𑀯𑀺𑀓𑀲𑀦𑀁 𑀦𑀺𑀤𑁆𑀤𑀓𑁆𑀔𑀬𑁄 𑀘 𑀕𑀳𑀺𑀢𑁄, 𑀢𑀲𑁆𑀫𑀸 ‘‘𑀩𑀼𑀥 𑀜𑀸𑀡𑁂, 𑀩𑀼𑀥 𑀯𑀺𑀓𑀲𑀦𑁂, 𑀩𑀼𑀥 𑀦𑀺𑀤𑁆𑀤𑀓𑁆𑀔𑀬𑁂’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀩𑀼𑀚𑁆𑀛𑀢𑀺 𑀪𑀕𑀯𑀸, 𑀥𑀫𑁆𑀫𑁂 𑀩𑀼𑀚𑁆𑀛𑀢𑀺, 𑀧𑀩𑀼𑀚𑁆𑀛𑀢𑀺, 𑀧𑀤𑀼𑀫𑀁 𑀩𑀼𑀚𑁆𑀛𑀢𑀺. 𑀧𑀼𑀭𑀺𑀲𑁄 𑀩𑀼𑀤𑁆𑀥𑁄, 𑀧𑀩𑀼𑀤𑁆𑀥𑁄, 𑀩𑁄𑀥𑀢𑀺, 𑀧𑀩𑁄𑀥𑀢𑀺 𑀇𑀘𑁆𑀘𑀸𑀤𑀻𑀦𑀺.

𑀲𑀁𑀥𑀸 ¶ 𑀲𑀦𑁆𑀥𑀺𑀫𑁆𑀳𑀺. 𑀲𑀁𑀧𑀼𑀩𑁆𑀩𑁄 𑀥𑀸𑀥𑀸𑀢𑀼 𑀲𑀦𑁆𑀥𑀺𑀫𑁆𑀳𑀺 𑀯𑀢𑁆𑀢𑀢𑀺. 𑀦𑁂𑀯𑀲𑁆𑀲 𑀫𑀤𑁆𑀤𑀻 𑀪𑀸𑀓𑀼𑀝𑀺, 𑀦 𑀲𑀦𑁆𑀥𑀺𑀬𑀢𑀺 𑀦 𑀭𑁄𑀤𑀢𑀺. 𑀦 𑀲𑀦𑁆𑀥𑀺𑀬𑀢𑀻𑀢𑀺 𑀇𑀤𑀁 𑀅𑀜𑁆𑀜𑁂𑀳𑀺 𑀧𑀓𑀭𑀡𑁂𑀳𑀺 𑀅𑀲𑀸𑀥𑀸𑀭𑀡𑀁 𑀤𑀺𑀯𑀸𑀤𑀺𑀭𑀽𑀧𑀁.

𑀥𑀦𑀼 𑀬𑀸𑀘𑀦𑁂. 𑀫𑀸𑀢𑀸 𑀳𑀺 𑀢𑀯 𑀇𑀭𑀦𑁆𑀥𑀢𑀺, 𑀯𑀺𑀥𑀭𑀲𑁆𑀲 𑀳𑀤𑀬𑀁 𑀥𑀦𑀺𑀬𑁆𑀬𑀢𑀺. 𑀇𑀤𑀫𑁆𑀧𑀺 𑀅𑀲𑀸𑀥𑀸𑀭𑀡𑀁 𑀤𑀺𑀯𑀸𑀤𑀺𑀭𑀽𑀧𑀁.

𑀥𑀻 𑀅𑀦𑀸𑀤𑀭𑁂. 𑀥𑀻𑀬𑀢𑁂. 𑀥𑀻𑀦𑁄.

𑀬𑀼𑀥 𑀲𑀫𑁆𑀧𑀳𑀸𑀭𑁂. 𑀬𑀼𑀚𑁆𑀛𑀢𑀺. 𑀬𑁄𑀥𑁄, 𑀬𑀼𑀤𑁆𑀥𑀁, 𑀘𑀭𑀡𑀸𑀬𑀼𑀥𑁄, 𑀬𑀓𑀸𑀭𑀲𑁆𑀲 𑀯𑀓𑀸𑀭𑀪𑀸𑀯𑁂 ‘‘𑀆𑀯𑀼𑀥’’𑀦𑁆𑀢𑀺 𑀭𑀽𑀧𑀁. 𑀢𑀢𑁆𑀭 𑀘𑀭𑀡𑀸𑀬𑀼𑀥𑁄𑀢𑀺 𑀓𑀼𑀓𑁆𑀓𑀼𑀝𑁄.

𑀓𑀼𑀥 𑀓𑁄𑀧𑁂. 𑀓𑀼𑀚𑁆𑀛𑀢𑀺. 𑀓𑁄𑀥𑁄, 𑀓𑀼𑀚𑁆𑀛𑀦𑀸, 𑀓𑀼𑀚𑁆𑀛𑀺𑀢𑀢𑁆𑀢𑀁. 𑀓𑀼𑀤𑁆𑀥𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀓𑀼𑀤𑁆𑀥𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺.

𑀲𑀼𑀥 𑀲𑁄𑀘𑁂𑀬𑁆𑀬𑁂. 𑀲𑁄𑀘𑁂𑀬𑁆𑀬𑀁 𑀲𑀼𑀘𑀺𑀪𑀸𑀯𑁄. 𑀲𑀼𑀚𑁆𑀛𑀢𑀺. 𑀲𑀼𑀤𑁆𑀥𑀺, 𑀯𑀺𑀲𑀼𑀤𑁆𑀥𑀺, 𑀲𑀼𑀚𑁆𑀛𑀦𑀁, 𑀲𑀼𑀤𑁆𑀥𑁄, 𑀯𑀺𑀲𑀼𑀤𑁆𑀥𑁄, 𑀧𑀭𑀺𑀲𑀼𑀤𑁆𑀥𑁄. 𑀓𑀸𑀭𑀺𑀢𑁂 ‘‘𑀲𑁄𑀥𑁂𑀢𑀺, 𑀲𑁄𑀥𑀓𑁄’’ 𑀇𑀘𑁆𑀘𑀸𑀤𑀻𑀦𑀺.

𑀲𑀺𑀥𑀼 𑀲𑀁𑀭𑀸𑀥𑀦𑁂. 𑀲𑀺𑀚𑁆𑀛𑀢𑀺. 𑀲𑀺𑀤𑁆𑀥𑀺.

𑀭𑀥 𑀳𑀺𑀁𑀲𑀸𑀬𑀁. 𑀭𑀚𑁆𑀛𑀢𑀺, 𑀯𑀺𑀭𑀚𑁆𑀛𑀢𑀺, 𑀅𑀧𑀭𑀚𑁆𑀛𑀢𑀺. 𑀅𑀧𑀭𑀸𑀥𑁄.

𑀭𑀸𑀥 𑀲𑀸𑀥 𑀲𑀁𑀲𑀺𑀤𑁆𑀥𑀺𑀬𑀁. 𑀭𑀸𑀥𑀬𑀢𑀺, 𑀲𑀸𑀥𑀬𑀢𑀺. 𑀆𑀭𑀸𑀥𑀦𑀁, 𑀲𑀸𑀥𑀦𑀁. 𑀲𑀧𑀭𑀳𑀺𑀢𑀁 𑀲𑀸𑀥𑁂𑀢𑀻𑀢𑀺 𑀲𑀸𑀥𑀼, 𑀲𑀧𑁆𑀧𑀼𑀭𑀺𑀲𑁄. 𑀅𑀘𑁆𑀘𑀦𑁆𑀢𑀁 𑀲𑀸𑀥𑁂𑀢𑀩𑁆𑀩𑀦𑁆𑀢𑀺 𑀲𑀸𑀥𑀼, 𑀮𑀤𑁆𑀥𑀓𑀁 𑀲𑀼𑀦𑁆𑀤𑀭𑀁 𑀤𑀸𑀦𑀲𑀻𑀮𑀸𑀤𑀺.

𑀯𑀺𑀥 𑀯𑀺𑀚𑁆𑀛𑀦𑁂. 𑀯𑀺𑀚𑁆𑀛𑀢𑀺. 𑀧𑀝𑀺𑀯𑀺𑀚𑁆𑀛𑀢𑀺. 𑀔𑀡 𑀯𑀺𑀤𑁆𑀥, 𑀯𑀺𑀥𑀼, 𑀯𑀺𑀚𑁆𑀛𑀦𑀓𑁄, 𑀯𑀺𑀤𑁆𑀥𑁄, 𑀧𑀝𑀺𑀯𑀺𑀤𑁆𑀥𑁄, 𑀯𑀺𑀚𑁆𑀛𑀦𑀁, 𑀯𑁂𑀥𑁄, 𑀧𑀝𑀺𑀯𑁂𑀥𑁄, 𑀯𑀺𑀚𑁆𑀛𑀺𑀢𑁆𑀯𑀸, 𑀯𑀺𑀤𑁆𑀥𑀸, 𑀯𑀺𑀤𑁆𑀥𑀸𑀦. 𑀓𑁄 𑀫𑀁 𑀯𑀺𑀤𑁆𑀥𑀸 𑀦𑀺𑀮𑀻𑀬𑀢𑀺.

𑀇𑀥 𑀯𑀼𑀤𑁆𑀥𑀺𑀬𑀁. 𑀇𑀚𑁆𑀛𑀢𑀺, 𑀲𑀫𑀺𑀚𑁆𑀛𑀢𑀺. 𑀇𑀤𑁆𑀥𑀺, 𑀇𑀚𑁆𑀛𑀦𑀁, 𑀲𑀫𑀺𑀚𑁆𑀛𑀦𑀁, 𑀇𑀤𑁆𑀥𑁄. 𑀢𑀢𑁆𑀣 𑀇𑀤𑁆𑀥𑀻𑀢𑀺 𑀇𑀚𑁆𑀛𑀦𑀁 𑀇𑀤𑁆𑀥𑀺. 𑀇𑀚𑁆𑀛𑀦𑁆𑀢𑀺 𑀯𑀸 𑀲𑀢𑁆𑀢𑀸 𑀏𑀢𑀸𑀬 𑀇𑀤𑁆𑀥𑀸 𑀯𑀼𑀤𑁆𑀥𑀸 𑀉𑀓𑁆𑀓𑀁𑀲𑀕𑀢𑀸 𑀳𑁄𑀦𑁆𑀢𑀻𑀢𑀺 𑀇𑀤𑁆𑀥𑀺.

𑀕𑀺𑀥𑀼 ¶ 𑀅𑀪𑀺𑀓𑀗𑁆𑀔𑀸𑀬𑀁. 𑀕𑀺𑀚𑁆𑀛𑀢𑀺, 𑀕𑀺𑀚𑁆𑀛𑁄. 𑀕𑀤𑁆𑀥𑁄. 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄. 𑀓𑀸𑀫𑀕𑀺𑀤𑁆𑀥𑁄 𑀦 𑀚𑀸𑀦𑀸𑀲𑀺. 𑀕𑁂𑀥𑁄.

𑀭𑀼𑀥𑀺 𑀆𑀯𑀭𑀡𑁂. 𑀭𑀼𑀚𑁆𑀛𑀢𑀺, 𑀯𑀺𑀭𑀼𑀚𑁆𑀛𑀢𑀺, 𑀧𑀝𑀺𑀯𑀺𑀭𑀼𑀚𑁆𑀛𑀢𑀺. 𑀯𑀺𑀭𑁄𑀥𑀓𑁄, 𑀯𑀺𑀭𑀼𑀤𑁆𑀥𑁄. 𑀭𑁄𑀥𑁄, 𑀯𑀺𑀭𑁄𑀥𑁄, 𑀧𑀝𑀺𑀯𑀺𑀭𑁄𑀥𑁄, 𑀅𑀦𑀼𑀯𑀺𑀭𑁄𑀥𑁄.

𑀅𑀦𑀼𑀯𑀺𑀥𑀸 𑀅𑀦𑀼𑀓𑀭𑀡𑁂. 𑀅𑀦𑀼𑀯𑀺𑀧𑀼𑀩𑁆𑀩𑁄 𑀥𑀸𑀥𑀸𑀢𑀼 𑀅𑀦𑀼𑀓𑁆𑀭𑀺𑀬𑀸𑀬𑀁 𑀯𑀢𑁆𑀢𑀢𑀺. 𑀧𑀼𑀭𑀺𑀲𑁄 𑀅𑀜𑁆𑀜𑀲𑁆𑀲 𑀧𑀼𑀭𑀺𑀲𑀲𑁆𑀲 𑀓𑁆𑀭𑀺𑀬𑀁 𑀅𑀦𑀼𑀯𑀺𑀥𑀻𑀬𑀢𑀺 𑀢𑀢𑁆𑀭𑀸𑀬𑀁 𑀧𑀸𑀴𑀺 𑁋

𑀤𑀽𑀲𑀺𑀢𑁄 𑀕𑀺𑀭𑀺𑀤𑀢𑁆𑀢𑁂𑀦, 𑀳𑀬𑁄 𑀲𑀸𑀫𑀲𑁆𑀲 𑀧𑀡𑁆𑀟𑀯𑁄;

𑀧𑁄𑀭𑀸𑀡𑀁 𑀧𑀓𑀢𑀺𑀁 𑀳𑀺𑀢𑁆𑀯𑀸, 𑀢𑀲𑁆𑀲𑁂𑀯𑀸𑀦𑀼𑀯𑀺𑀥𑀻𑀬𑀢𑀻’’𑀢𑀺.

𑀇𑀤𑀫𑁆𑀧𑀺 𑀅𑀲𑀸𑀥𑀸𑀭𑀡𑀁 𑀤𑀺𑀯𑀸𑀤𑀺𑀭𑀽𑀧𑀁.

𑀅𑀦𑀼𑀭𑀼𑀥 𑀓𑀸𑀫𑁂. 𑀓𑀸𑀫𑁄 𑀇𑀘𑁆𑀙𑀸. 𑀅𑀦𑀼𑀧𑀼𑀩𑁆𑀩𑁄 𑀭𑀼𑀥𑀥𑀸𑀢𑀼 𑀇𑀘𑁆𑀙𑀸𑀬𑀁 𑀯𑀢𑁆𑀢𑀢𑀺. 𑀅𑀦𑀼𑀭𑀼𑀤𑁆𑀥𑁄, 𑀅𑀦𑀼𑀭𑁄𑀥𑁄. 𑀅𑀦𑀼𑀲𑁆𑀫𑀸𑀢𑀺 𑀓𑀺𑀁 𑀯𑀺𑀭𑁄𑀥𑁄.

𑀢𑀢𑁆𑀣 𑀅𑀦𑀼𑀭𑀼𑀤𑁆𑀥𑁄𑀢𑀺 𑀅𑀦𑀼𑀭𑀼𑀚𑁆𑀛𑀢𑀺 𑀧𑀡𑀻𑀢𑀁 𑀧𑀡𑀻𑀢𑀁 𑀯𑀢𑁆𑀣𑀼𑀁 𑀓𑀸𑀫𑁂𑀢𑀻𑀢𑀺 𑀅𑀦𑀼𑀭𑀼𑀤𑁆𑀥𑁄. 𑀅𑀦𑀼𑀭𑁄𑀥𑁄𑀢𑀺 𑀅𑀦𑀼𑀓𑀽𑀮𑀢𑀸. 𑀅𑀬𑀁 𑀧𑀸𑀴𑀺 ‘‘𑀲𑁄 𑀉𑀧𑁆𑀧𑀦𑁆𑀦𑀁 𑀮𑀸𑀪𑀁 𑀅𑀦𑀼𑀭𑀼𑀚𑁆𑀛𑀢𑀺, 𑀅𑀮𑀸𑀪𑁂 𑀧𑀝𑀺𑀯𑀺𑀭𑀼𑀚𑁆𑀛𑀢𑀻’’𑀢𑀺.

𑀩𑁆𑀬𑀥 𑀢𑀸𑀴𑀦𑁂. 𑀩𑁆𑀬𑀚𑁆𑀛𑀢𑀺. 𑀩𑁆𑀬𑀸𑀥𑁄. 𑀩𑁆𑀬𑀸𑀥𑁄𑀢𑀺 𑀮𑀼𑀤𑁆𑀥𑁄. 𑀢𑀁 𑀢𑀁 𑀫𑀺𑀕𑀁 𑀩𑁆𑀬𑀚𑁆𑀛𑀢𑀺 𑀢𑀸𑀴𑁂𑀢𑀺 𑀳𑀺𑀁𑀲𑀢𑀻𑀢𑀺 𑀩𑁆𑀬𑀸𑀥𑁄.

𑀕𑀼𑀥 𑀧𑀭𑀺𑀯𑁂𑀞𑀦𑁂. 𑀕𑀼𑀚𑁆𑀛𑀢𑀺. 𑀕𑁄𑀥𑀸.

𑀫𑀦 𑀜𑀸𑀡𑁂. 𑀫𑀜𑁆𑀜𑀢𑀺, 𑀅𑀯𑀫𑀜𑁆𑀜𑀢𑀺, 𑀅𑀢𑀺𑀫𑀜𑁆𑀜𑀢𑀺. 𑀲𑁂𑀬𑁆𑀬𑀸𑀤𑀺𑀯𑀲𑁂𑀦 𑀫𑀜𑁆𑀜𑀢𑀻𑀢𑀺 𑀫𑀸𑀦𑁄. ‘‘𑀫𑀜𑁆𑀜𑀦𑀸, 𑀫𑀜𑁆𑀜𑀺𑀢𑀢𑁆𑀢𑀁, 𑀫𑀸𑀦𑁄, 𑀅𑀳𑀗𑁆𑀓𑀸𑀭𑁄, 𑀉𑀦𑁆𑀦𑀢𑀺, 𑀓𑁂𑀢𑀼, 𑀧𑀕𑁆𑀕𑀳𑁄, 𑀅𑀯𑀮𑁂𑀧𑁄’’𑀢𑀺 𑀧𑀭𑀺𑀬𑀸𑀬𑀸.

𑀚𑀦 ¶ 𑀚𑀦𑀦𑁂. 𑀲𑀓𑀫𑁆𑀫𑀓𑁄𑀬𑀁 𑀥𑀸𑀢𑀼. ‘‘𑀚𑀜𑁆𑀜𑀢𑀻’’𑀢𑀺𑀫𑀲𑁆𑀲 𑀭𑀽𑀧𑀁, 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀭𑀺𑀢𑁂 𑁋 𑀚𑀦𑁂𑀲𑀺 𑀨𑀼𑀲𑁆𑀲𑀢𑀻 𑀫𑀫𑀁. 𑀚𑀦𑀬𑀢𑀺, 𑀲𑀼𑀔𑀁 𑀚𑀦𑁂𑀢𑀺, 𑀚𑀦𑀬𑀢𑀻𑀢𑀺 𑀚𑀦𑀓𑁄, 𑀧𑀺𑀢𑀸, 𑀬𑁄 𑀓𑁄𑀘𑀺 𑀯𑀸 𑀦𑀺𑀩𑁆𑀩𑀢𑁆𑀢𑁂𑀢𑀸. 𑀧𑀼𑀣𑀼 𑀓𑀺𑀮𑁂𑀲𑁂 𑀚𑀦𑁂𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑁄. 𑀢𑀢𑁆𑀣 ‘‘𑀚𑀦𑁂𑀢𑀺 𑀚𑀦𑀬𑀢𑀻’’𑀢𑀺 𑀭𑀽𑀧𑀸𑀦𑀺 𑀘𑀼𑀭𑀸𑀤𑀺𑀕𑀡𑀁 𑀧𑀢𑁆𑀯𑀸 𑀲𑀼𑀤𑁆𑀥𑀓𑀢𑁆𑀢𑀼𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀓𑀭𑁄𑀢𑀻𑀢𑀺 𑀳𑀺 𑀢𑁂𑀲𑀁 𑀅𑀢𑁆𑀣𑁄. 𑀳𑁂𑀢𑀼𑀓𑀢𑁆𑀢𑀼𑀯𑀲𑁂𑀦𑀧𑀺 𑀢𑀤𑀢𑁆𑀣𑁄 𑀯𑀢𑁆𑀢𑀩𑁆𑀩𑁄 ‘‘𑀦𑀺𑀩𑁆𑀩𑀢𑁆𑀢𑁂𑀢𑀻’’𑀢𑀺.

𑀚𑀦𑀻 𑀧𑀸𑀢𑀼𑀪𑀸𑀯𑁂. 𑀈𑀓𑀸𑀭𑀦𑁆𑀢𑁄𑀬𑀁 𑀅𑀓𑀫𑁆𑀫𑀓𑁄 𑀥𑀸𑀢𑀼, 𑀯𑀺𑀧𑀼𑀩𑁆𑀩𑁄 𑀘𑁂, 𑀲𑀓𑀫𑁆𑀫𑀓𑁄. 𑀧𑀼𑀢𑁆𑀢𑁄 𑀚𑀸𑀬𑀢𑀺, 𑀚𑀸𑀢𑁄. 𑀧𑀼𑀣𑀼 𑀓𑀺𑀮𑁂𑀲𑀸 𑀚𑀸𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀧𑀼𑀣𑀼𑀚𑁆𑀚𑀦𑁄. 𑀚𑀦𑀦𑀁 𑀚𑀸𑀢𑀺, ‘‘𑀲𑀜𑁆𑀚𑀸𑀢𑀺, 𑀦𑀺𑀩𑁆𑀩𑀢𑁆𑀢𑀺, 𑀅𑀪𑀺𑀦𑀺𑀩𑁆𑀩𑀢𑁆𑀢𑀺, 𑀔𑀦𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑁄’’𑀢𑀺 𑀧𑀭𑀺𑀬𑀸𑀬𑀸. 𑀇𑀢𑁆𑀣𑀻 𑀧𑀼𑀢𑁆𑀢𑀁 𑀯𑀺𑀚𑀸𑀬𑀢𑀺, 𑀇𑀢𑁆𑀣𑀻 𑀧𑀼𑀢𑁆𑀢𑀁 𑀯𑀺𑀚𑀸𑀢𑀸. 𑀲𑁄 𑀧𑀼𑀭𑀺𑀲𑁄 𑀯𑀺𑀚𑀸𑀢𑀫𑀸𑀢𑀼𑀬𑀸𑀧𑀺 𑀅𑀫𑀦𑀸𑀧𑁄. 𑀉𑀧𑀯𑀺𑀚𑀜𑁆𑀜𑀸 𑀇𑀢𑁆𑀣𑀻. 𑀓𑀸𑀭𑀺𑀢𑁂 ‘‘𑀚𑀸𑀧𑁂𑀢𑀺, 𑀚𑀸𑀧𑀬𑀢𑀺. 𑀅𑀢𑁆𑀣𑀚𑀸𑀧𑀺𑀓𑀸 𑀧𑀜𑁆𑀜𑀸’’𑀢𑀺 𑀭𑀽𑀧𑀸𑀦𑀺.

𑀳𑀦 𑀳𑀺𑀁𑀲𑀸𑀬𑀁. 𑀇𑀥 𑀳𑀺𑀁𑀲𑀸𑀯𑀘𑀦𑁂𑀦 𑀖𑀝𑁆𑀝𑀦𑀁 𑀕𑀳𑁂𑀢𑀩𑁆𑀩𑀁. 𑀲𑀤𑁆𑀤𑁄 𑀲𑁄𑀢𑀫𑁆𑀳𑀺 𑀳𑀜𑁆𑀜𑀢𑀺. 𑀧𑀝𑀺𑀳𑀜𑁆𑀜𑀢𑀺. 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀺𑀮𑁂 𑀲𑁄𑀢𑁂 𑀧𑀝𑀺𑀳𑀜𑁆𑀜𑀢𑀺. 𑀇𑀫𑀸𑀦𑀺 𑀓𑀢𑁆𑀢𑀼𑀧𑀤𑀸𑀦𑀺. 𑀪𑀽𑀯𑀸𑀤𑀺𑀕𑀡𑀁 𑀧𑀦 𑀧𑀢𑁆𑀯𑀸 ‘‘𑀮𑁄𑀳𑁂𑀦 𑀯𑁂 𑀳𑀜𑁆𑀜𑀢𑀺 𑀚𑀸𑀢𑀭𑀽𑀧𑀁, 𑀦 𑀚𑀸𑀢𑀭𑀽𑀧𑁂𑀦 𑀳𑀦𑀦𑁆𑀢𑀺 𑀮𑁄𑀳’’𑀦𑁆𑀢𑀺 𑀧𑀸𑀴𑀺𑀬𑀁 ‘‘𑀳𑀜𑁆𑀜𑀢𑀻’’𑀢𑀺 𑀧𑀤𑀁 𑀓𑀫𑁆𑀫𑀧𑀤𑀁, 𑀚𑀸𑀢𑀭𑀽𑀧𑀁 𑀮𑁄𑀳𑁂𑀦 𑀓𑀫𑁆𑀫𑀸𑀭𑁂𑀳𑀺 𑀳𑀜𑁆𑀜𑀢𑀻𑀢𑀺 𑀅𑀢𑁆𑀣𑁄. ‘‘𑀳𑀦𑀦𑁆𑀢𑀻’’𑀢𑀺 𑀧𑀤𑀁 𑀓𑀢𑁆𑀢𑀼𑀧𑀤𑀁, 𑀮𑁄𑀳𑀁 𑀚𑀸𑀢𑀭𑀽𑀧𑁂𑀦 𑀓𑀫𑁆𑀫𑀸𑀭𑀸 𑀳𑀦𑀦𑁆𑀢𑀻𑀢𑀺 𑀳𑀺 𑀅𑀢𑁆𑀣𑁄. 𑀏𑀢𑁆𑀣 𑀳𑀦𑀦𑀁 𑀧𑀳𑀭𑀡𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀭𑀽𑀧 𑀭𑀼𑀧𑁆𑀧𑀦𑁂. 𑀭𑀼𑀧𑁆𑀧𑀦𑀁 𑀓𑀼𑀧𑁆𑀧𑀦𑀁 𑀖𑀝𑁆𑀝𑀦𑀁 𑀧𑀻𑀴𑀦𑀁. 𑀭𑀼𑀧𑁆𑀧𑀢𑀺. 𑀭𑀽𑀧𑀁, 𑀭𑀼𑀧𑁆𑀧𑀦𑀁. 𑀇𑀫𑀲𑁆𑀲 𑀧𑀦 ‘‘𑀭𑀽𑀧 𑀭𑀽𑀧𑀓𑁆𑀭𑀺𑀬𑀸𑀬’’𑀦𑁆𑀢𑀺 𑀘𑀼𑀭𑀸𑀤𑀺𑀕𑀡𑁂 𑀞𑀺𑀢𑀲𑁆𑀲 ‘‘𑀭𑀽𑀧𑁂𑀢𑀺 𑀭𑀽𑀧𑀬𑀢𑀻’’𑀢𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺.

𑀢𑀢𑁆𑀣 ¶ 𑀭𑀽𑀧𑀦𑁆𑀢𑀺 𑀓𑁂𑀦𑀝𑁆𑀞𑁂𑀦 𑀭𑀽𑀧𑀁? 𑀭𑀼𑀧𑁆𑀧𑀦𑀝𑁆𑀞𑁂𑀦 𑀭𑀽𑀧𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀓𑀺𑀜𑁆𑀘 𑀪𑀺𑀓𑁆𑀔𑀯𑁂 𑀭𑀽𑀧𑀁? 𑀭𑀼𑀧𑁆𑀧𑀢𑀻𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀢𑀲𑁆𑀫𑀸 ‘𑀭𑀽𑀧’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀦 𑀭𑀼𑀧𑁆𑀧𑀢𑀺? 𑀲𑀻𑀢𑁂𑀦𑀧𑀺 𑀭𑀼𑀧𑁆𑀧𑀢𑀺, 𑀉𑀡𑁆𑀳𑁂𑀦𑀧𑀺 𑀭𑀼𑀧𑁆𑀧𑀢𑀺, 𑀚𑀺𑀖𑀘𑁆𑀙𑀸𑀬𑀧𑀺 𑀭𑀼𑀧𑁆𑀧𑀢𑀺, 𑀧𑀺𑀧𑀸𑀲𑀸𑀬𑀧𑀺 𑀭𑀼𑀧𑁆𑀧𑀢𑀺, 𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑁂𑀦𑀧𑀺 𑀭𑀼𑀧𑁆𑀧𑀢𑀺, 𑀭𑀼𑀧𑁆𑀧𑀢𑀻𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀢𑀲𑁆𑀫𑀸 ‘𑀭𑀼𑀧’𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀢𑀢𑁆𑀣 𑀭𑀼𑀧𑁆𑀧𑀢𑀻𑀢𑀺 𑀓𑀼𑀧𑁆𑀧𑀢𑀺 𑀖𑀝𑁆𑀝𑀺𑀬𑀢𑀺 𑀧𑀻𑀴𑀺𑀬𑀢𑀺, 𑀪𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀪𑀺𑀚𑁆𑀚𑀢𑀻𑀢𑀺 𑀯𑀺𑀓𑀸𑀭𑀁 𑀆𑀧𑀚𑁆𑀚𑀢𑀺, 𑀯𑀺𑀓𑀸𑀭𑀸𑀧𑀢𑁆𑀢𑀺 𑀘 𑀲𑀻𑀢𑀸𑀤𑀺𑀲𑀦𑁆𑀦𑀺𑀧𑀸𑀢𑁂 𑀯𑀺𑀲𑀤𑀺𑀲𑀭𑀽𑀧𑀧𑁆𑀧𑀯𑀢𑁆𑀢𑀺𑀬𑁂𑀯. 𑀏𑀢𑁆𑀣 𑀘 𑀓𑀼𑀧𑁆𑀧𑀢𑀻𑀢𑀺 𑀏𑀢𑁂𑀦 𑀓𑀢𑁆𑀢𑀼𑀅𑀢𑁆𑀣𑁂 𑀭𑀽𑀧𑀧𑀤𑀲𑀺𑀤𑁆𑀥𑀺𑀁 𑀤𑀲𑁆𑀲𑁂𑀢𑀺, 𑀖𑀝𑁆𑀝𑀺𑀬𑀢𑀺 𑀧𑀻𑀴𑀺𑀬𑀢𑀻𑀢𑀺 𑀏𑀢𑁂𑀳𑀺 𑀓𑀫𑁆𑀫𑀢𑁆𑀣𑁂. 𑀓𑁄𑀧𑀸𑀤𑀺𑀓𑁆𑀭𑀺𑀬𑀸𑀬𑁂𑀯 𑀳𑀺 𑀭𑀼𑀧𑁆𑀧𑀦𑀓𑁆𑀭𑀺𑀬𑀸𑀢𑀺, 𑀲𑁄 𑀧𑀦 𑀓𑀢𑁆𑀢𑀼𑀪𑀽𑀢𑁄 𑀓𑀫𑁆𑀫𑀪𑀽𑀢𑁄 𑀘 𑀅𑀢𑁆𑀣𑁄 𑀪𑀺𑀚𑁆𑀚𑀫𑀸𑀦𑁄 𑀦𑀸𑀫 𑀳𑁄𑀢𑀻𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 ‘‘𑀪𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁.

𑀅𑀣 𑀯𑀸 𑀭𑀼𑀧𑁆𑀧𑀢𑀻𑀢𑀺 𑀭𑀽𑀧𑀦𑁆𑀢𑀺 𑀓𑀫𑁆𑀫𑀓𑀢𑁆𑀢𑀼𑀢𑁆𑀣𑁂 𑀭𑀽𑀧𑀧𑀤𑀲𑀺𑀤𑁆𑀥𑀺 𑀯𑀼𑀢𑁆𑀢𑀸. 𑀯𑀺𑀓𑀸𑀭𑁄 𑀳𑀺 𑀭𑀼𑀧𑁆𑀧𑀦𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀦𑁂𑀯 𑀪𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄𑀢𑀺 𑀓𑀫𑁆𑀫𑀓𑀢𑁆𑀢𑀼𑀢𑁆𑀣𑁂𑀦 𑀪𑀺𑀚𑁆𑀚𑀢𑀻𑀢𑀺 𑀲𑀤𑁆𑀤𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀬𑀤𑀸 𑀓𑀫𑁆𑀫𑀢𑁆𑀣𑁂 ‘‘𑀭𑀼𑀧𑁆𑀧𑀢𑀻’’𑀢𑀺 𑀧𑀤𑀁, 𑀢𑀤𑀸 ‘‘𑀲𑀻𑀢𑁂𑀦𑀸’’𑀢𑀺𑀆𑀤𑀺 𑀓𑀢𑁆𑀢𑀼𑀅𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀬𑀤𑀸 𑀧𑀦 ‘‘𑀭𑀼𑀧𑁆𑀧𑀢𑀻’’𑀢𑀺 𑀧𑀤𑀁 𑀓𑀢𑁆𑀢𑀼𑀅𑀢𑁆𑀣𑁂 𑀓𑀫𑁆𑀫𑀓𑀢𑁆𑀢𑀼𑀅𑀢𑁆𑀣𑁂 𑀯𑀸, 𑀢𑀤𑀸 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀁 𑀤𑀝𑁆𑀞𑀩𑁆𑀩𑀁.

𑀭𑀽𑀧𑀲𑀤𑁆𑀤𑁄 𑀔𑀦𑁆𑀥 𑀪𑀯 𑀦𑀺𑀫𑀺𑀢𑁆𑀢 𑀧𑀘𑁆𑀘𑀬 𑀲𑀭𑀻𑀭 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀻𑀲𑀼 𑀅𑀢𑁆𑀣𑁂𑀲𑀼 𑀯𑀢𑁆𑀢𑀢𑀺. 𑀅𑀬𑀜𑁆𑀳𑀺 ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀏𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁂 𑀯𑀢𑁆𑀢𑀢𑀺. ‘‘𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀻’’𑀢𑀺 𑀏𑀢𑁆𑀣 𑀭𑀽𑀧𑀪𑀯𑁂. ‘‘𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀩𑀳𑀺𑀤𑁆𑀥𑀸𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺 ¶ 𑀏𑀢𑁆𑀣 𑀓𑀲𑀺𑀡𑀦𑀺𑀫𑀺𑀢𑁆𑀢𑁂. ‘‘𑀲𑀭𑀽𑀧𑀸 𑀪𑀺𑀓𑁆𑀔𑀯𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀦𑁄 𑀅𑀭𑀽𑀧𑀸’’𑀢𑀺 𑀏𑀢𑁆𑀣 𑀧𑀘𑁆𑀘𑀬𑁂. ‘‘𑀆𑀓𑀸𑀲𑁄 𑀧𑀭𑀺𑀯𑀸𑀭𑀺𑀢𑁄 𑀭𑀽𑀧𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺 𑀏𑀢𑁆𑀣 𑀲𑀭𑀻𑀭𑁂. ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀏𑀢𑁆𑀣 𑀯𑀡𑁆𑀡𑁂. ‘‘𑀭𑀽𑀧𑀧𑁆𑀧𑀫𑀸𑀡𑁄 𑀭𑀽𑀧𑀧𑁆𑀧𑀲𑀦𑁆𑀦𑁄’’𑀢𑀺 𑀏𑀢𑁆𑀣 𑀲𑀡𑁆𑀞𑀸𑀦𑁂. 𑀇𑀘𑁆𑀘𑁂𑀯𑀁 𑁋

𑀔𑀦𑁆𑀥𑁂 𑀪𑀯𑁂 𑀦𑀺𑀫𑀺𑀢𑁆𑀢𑁂 𑀘, 𑀲𑀭𑀻𑀭𑁂 𑀧𑀘𑁆𑀘𑀬𑁂𑀧𑀺 𑀘;

𑀯𑀡𑁆𑀡𑁂 𑀲𑀡𑁆𑀞𑀸𑀦𑀆𑀤𑀺𑀫𑁆𑀳𑀺, 𑀭𑀽𑀧𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑀓𑀼𑀧 𑀓𑁄𑀧𑁂. 𑀓𑀼𑀧𑁆𑀧𑀢𑀺. 𑀓𑀼𑀧𑁆𑀧𑀦𑁆𑀢𑀺 𑀯𑀸𑀢𑀲𑁆𑀲𑀧𑀺 𑀏𑀭𑀺𑀢𑀲𑁆𑀲. 𑀓𑁄𑀧𑁄, 𑀧𑀓𑁄𑀧𑁄. 𑀯𑀘𑀻𑀧𑀓𑁄𑀧𑀁 𑀭𑀓𑁆𑀔𑁂𑀬𑁆𑀬.

𑀢𑀧 𑀲𑀦𑁆𑀢𑀸𑀧𑁂. 𑀢𑀧𑁆𑀧𑀢𑀺, 𑀲𑀦𑁆𑀢𑀧𑁆𑀧𑀢𑀺. 𑀲𑀦𑁆𑀢𑀸𑀧𑁄.

𑀢𑀧 𑀧𑀻𑀡𑀦𑁂. 𑀢𑀧𑁆𑀧𑀢𑀺. 𑀢𑀧𑁆𑀧𑀦𑀁.

𑀤𑀧 𑀳𑀸𑀲𑁂. 𑀤𑀧𑁆𑀧𑀢𑀺.

𑀤𑀻𑀧 𑀤𑀺𑀢𑁆𑀢𑀺𑀬𑀁. 𑀤𑀺𑀧𑁆𑀧𑀢𑀺. 𑀤𑀻𑀧𑁄.

𑀮𑀼𑀧 𑀅𑀤𑀲𑁆𑀲𑀦𑁂. 𑀮𑀼𑀧𑁆𑀧𑀦𑀁, 𑀮𑁄𑀧𑁄, 𑀮𑀼𑀢𑁆𑀢𑀺.

𑀔𑀺𑀧 𑀧𑁂𑀭𑀡𑁂. 𑀔𑀺𑀧𑁆𑀧𑀢𑀺. 𑀔𑀺𑀧𑁆𑀧𑀁.

𑀮𑀼𑀪 𑀕𑀺𑀤𑁆𑀥𑀺𑀬𑀁. 𑀮𑀼𑀩𑁆𑀪𑀢𑀺. 𑀅𑀢𑁆𑀢𑀦𑁄𑀬𑁂𑀯 𑀚𑀡𑁆𑀡𑀼𑀓𑀁 𑀑𑀮𑀼𑀩𑁆𑀪 𑀢𑀺𑀝𑁆𑀞𑀢𑀺. 𑀮𑀼𑀩𑁆𑀪𑀦𑀁, 𑀮𑁄𑀪𑁄, 𑀮𑀼𑀩𑁆𑀪𑀺𑀢𑁆𑀯𑀸, 𑀮𑀼𑀩𑁆𑀪𑀺𑀢𑁆𑀯𑀸𑀦, 𑀮𑀼𑀩𑁆𑀪𑀺𑀬, 𑀮𑀼𑀩𑁆𑀪𑀺𑀬𑀸𑀦, 𑀑𑀮𑀼𑀩𑁆𑀪𑀺𑀢𑁆𑀯𑀸, 𑀑𑀮𑀼𑀩𑁆𑀪𑀺𑀢𑁆𑀯𑀸𑀦, 𑀑𑀮𑀼𑀩𑁆𑀪𑀺𑀬, 𑀑𑀮𑀼𑀩𑁆𑀪𑀺𑀬𑀸𑀦, 𑀮𑀼𑀩𑁆𑀪𑀺𑀢𑀼𑀁, 𑀑𑀮𑀼𑀩𑁆𑀪𑀺𑀢𑀼𑀁.

𑀢𑀢𑁆𑀣 𑀮𑁄𑀪𑁄𑀢𑀺 𑀮𑀼𑀩𑁆𑀪𑀦𑁆𑀢𑀺 𑀢𑁂𑀦 𑀲𑀢𑁆𑀢𑀸, 𑀲𑀬𑀁 𑀯𑀸 𑀮𑀼𑀩𑁆𑀪𑀢𑀺, 𑀮𑀼𑀩𑁆𑀪𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀮𑁄𑀪𑁄. 𑀏𑀢𑁆𑀣 𑀧𑀦 ‘‘𑀮𑁄𑀪𑁄 𑀮𑀼𑀩𑁆𑀪𑀦𑀸 ¶ 𑀮𑀼𑀩𑁆𑀪𑀺𑀢𑀢𑁆𑀢𑀁 𑀭𑀸𑀕𑁄 𑀢𑀡𑁆𑀳𑀸 𑀢𑀲𑀺𑀡𑀸 𑀫𑀼𑀘𑁆𑀙𑀸 𑀏𑀚𑀸 𑀯𑀦𑀁 𑀯𑀦𑀣𑁄’’ 𑀇𑀘𑁆𑀘𑀸𑀤𑀻𑀦𑀺 𑀮𑁄𑀪𑀲𑁆𑀲 𑀩𑀳𑀼𑀦𑀸𑀫𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀔𑀼𑀪 𑀲𑀜𑁆𑀘𑀮𑀦𑁂. 𑀔𑀼𑀩𑁆𑀪𑀢𑀺, 𑀲𑀁𑀔𑀼𑀩𑁆𑀪𑀢𑀺. 𑀔𑀼𑀩𑁆𑀪𑀺𑀢𑁆𑀣𑀦𑀕𑀭𑀁. 𑀲𑀗𑁆𑀔𑁄𑀪𑁄. 𑀓𑀸𑀭𑀺𑀢𑁂 𑁋 𑀔𑁄𑀪𑁂𑀢𑀺, 𑀔𑁄𑀪𑀬𑀢𑀺.

𑀲𑀫𑀼 𑀉𑀧𑀲𑀫𑁂. 𑀘𑀺𑀢𑁆𑀢𑀁 𑀲𑀫𑁆𑀫𑀢𑀺, 𑀉𑀧𑀲𑀫𑁆𑀫𑀢𑀺, 𑀯𑀽𑀧𑀲𑀫𑁆𑀫𑀢𑀺, 𑀲𑀫𑀡𑁄, 𑀲𑀦𑁆𑀢𑀺, 𑀲𑀦𑁆𑀢𑁄.

𑀏𑀢𑁆𑀣 𑀲𑀫𑀡𑁄𑀢𑀺 𑀲𑀫𑁆𑀫𑀢𑀺 𑀲𑀦𑁆𑀢𑀘𑀺𑀢𑁆𑀢𑁄 𑀪𑀯𑀢𑀻𑀢𑀺 𑀲𑀫𑀡𑁄. 𑀓𑀸𑀭𑀺𑀢𑀯𑀲𑁂𑀦 𑀧𑀦 𑀓𑀺𑀮𑁂𑀲𑁂 𑀲𑀫𑁂𑀢𑀺 𑀉𑀧𑀲𑀫𑁂𑀢𑀻𑀢𑀺 𑀲𑀫𑀡𑁄𑀢𑀺 𑀦𑀺𑀩𑁆𑀩𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 ‘‘𑀬𑀁 𑀲𑀫𑁂𑀢𑀻𑀢𑀺 𑀇𑀤𑀁 𑀅𑀭𑀺𑀬𑀁. 𑀲𑀫𑀬𑀢𑀻𑀢𑀺𑀥 𑀲𑀢𑁆𑀢𑀸𑀦’’𑀦𑁆𑀢𑀺 𑀤𑁆𑀯𑁂 𑀓𑀸𑀭𑀺𑀢𑀭𑀽𑀧𑀸𑀦𑀺.

𑀲𑀫𑀼 𑀔𑁂𑀤𑁂 𑀦𑀺𑀭𑁄𑀥𑁂 𑀘. 𑀔𑁂𑀤𑁄. 𑀓𑀺𑀮𑀫𑀦𑀁. 𑀦𑀺𑀭𑁄𑀥𑁄 𑀅𑀪𑀸𑀯𑀕𑀫𑀦𑀁. 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀓𑀸𑀬𑁄 𑀲𑀫𑁆𑀫𑀢𑀺. 𑀅𑀕𑁆𑀕𑀺 𑀲𑀫𑁆𑀫𑀢𑀺. 𑀲𑀦𑁆𑀢𑁄.

𑀲𑀦𑁆𑀢𑀲𑀤𑁆𑀤𑁄 ‘‘𑀤𑀻𑀖𑀁 𑀲𑀦𑁆𑀢𑀲𑁆𑀲 𑀬𑁄𑀚𑀦’’𑀦𑁆𑀢𑀺𑀆𑀤𑀻𑀲𑀼 𑀓𑀺𑀮𑀦𑁆𑀢𑀪𑀸𑀯𑁂 𑀆𑀕𑀢𑁄. ‘‘𑀅𑀬𑀜𑁆𑀘 𑀯𑀺𑀢𑀓𑁆𑀓𑁄 𑀅𑀬𑀜𑁆𑀘 𑀯𑀺𑀘𑀸𑀭𑁄 𑀲𑀦𑁆𑀢𑀸 𑀳𑁄𑀦𑁆𑀢𑀺 𑀲𑀫𑀺𑀢𑀸’’𑀢𑀺𑀆𑀤𑀻𑀲𑀼 𑀦𑀺𑀭𑀼𑀤𑁆𑀥𑀪𑀸𑀯𑁂. ‘‘𑀅𑀥𑀺𑀕𑀢𑁄 𑀔𑁄 𑀫𑁆𑀬𑀸𑀬𑀁 𑀥𑀫𑁆𑀫𑁄 𑀕𑀫𑁆𑀪𑀻𑀭𑁄 𑀤𑀼𑀤𑁆𑀤𑀲𑁄 𑀤𑀼𑀭𑀦𑀼𑀩𑁄𑀥𑁄 𑀲𑀦𑁆𑀢𑁄 𑀧𑀡𑀻𑀢𑁄’’𑀢𑀺𑀆𑀤𑀻𑀲𑀼 𑀲𑀦𑁆𑀢𑀜𑀸𑀡𑀕𑁄𑀘𑀭𑀢𑀸𑀬𑀁. ‘‘𑀉𑀧𑀲𑀦𑁆𑀢𑀲𑁆𑀲 𑀲𑀤𑀸 𑀲𑀢𑀻𑀫𑀢𑁄’’𑀢𑀺𑀆𑀤𑀻𑀲𑀼 𑀓𑀺𑀮𑁂𑀲𑀯𑀽𑀧𑀲𑀫𑁂. ‘‘𑀲𑀦𑁆𑀢𑁄 𑀳𑀯𑁂 𑀲𑀩𑁆𑀪𑀺 𑀧𑀯𑁂𑀤𑀬𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀲𑀸𑀥𑀽𑀲𑀼. ‘‘𑀧𑀜𑁆𑀘𑀺𑀫𑁂 𑀪𑀺𑀓𑁆𑀔𑀯𑁂 𑀫𑀳𑀸𑀘𑁄𑀭𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸’’𑀢𑀺𑀆𑀤𑀻𑀲𑀼 𑀅𑀢𑁆𑀣𑀺𑀪𑀸𑀯𑁂. 𑀏𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀓𑀺𑀮𑀦𑁆𑀢𑀢𑁆𑀢𑁂 ¶ 𑀦𑀺𑀭𑀼𑀤𑁆𑀥𑀢𑁆𑀢𑁂, 𑀲𑀦𑁆𑀢𑀥𑀻𑀕𑁄𑀘𑀭𑀢𑁆𑀢𑀦𑁂;

𑀓𑀺𑀮𑁂𑀲𑀽𑀧𑀲𑀫𑁂 𑀘𑁂𑀯, 𑀅𑀢𑁆𑀣𑀺𑀪𑀸𑀯𑁂 𑀘 𑀲𑀸𑀥𑀼𑀲𑀼;

𑀇𑀫𑁂𑀲𑀼 𑀙𑀲𑀼 𑀞𑀸𑀦𑁂𑀲𑀼, 𑀲𑀦𑁆𑀢𑀲𑀤𑁆𑀤𑁄 𑀧𑀦𑀸𑀕𑀢𑁄’’𑀢𑀺.

𑀤𑀫𑀼 𑀤𑀫𑀦𑁂. 𑀤𑀫𑁆𑀫𑀢𑀺. 𑀤𑀦𑁆𑀢𑁄, 𑀤𑀫𑁄, 𑀤𑀫𑀦𑀁. 𑀓𑀸𑀭𑀺𑀢𑁂 ‘‘𑀘𑀺𑀢𑁆𑀢𑀁 𑀤𑀫𑁂𑀢𑀺, 𑀤𑀫𑀬𑀢𑀻’’𑀢𑀺 𑀭𑀽𑀧𑀸𑀦𑀺.

𑀢𑀢𑁆𑀣 𑀤𑀫𑁄𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀻𑀦𑀁 𑀏𑀢𑀁 𑀦𑀸𑀫𑀁. ‘‘𑀲𑀘𑁆𑀘𑁂𑀦 𑀤𑀦𑁆𑀢𑁄 𑀤𑀫𑀲𑀸 𑀉𑀧𑁂𑀢𑁄. 𑀯𑁂𑀤𑀦𑁆𑀢𑀕𑀽 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄’’𑀢𑀺 𑀏𑀢𑁆𑀣 𑀳𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 ‘‘𑀤𑀫𑁄’’𑀢𑀺 𑀯𑀼𑀢𑁆𑀢𑁄. ‘‘𑀬𑀤𑀺 𑀲𑀘𑁆𑀘𑀸 𑀤𑀫𑀸 𑀘𑀸𑀕𑀸, 𑀔𑀦𑁆𑀢𑁆𑀬𑀸 𑀪𑀺𑀬𑁆𑀬𑁄𑀥 𑀯𑀺𑀚𑁆𑀚𑀢𑀻’’𑀢𑀺 𑀏𑀢𑁆𑀣 𑀧𑀜𑁆𑀜𑀸 ‘‘𑀤𑀫𑁄’’𑀢𑀺 𑀯𑀼𑀢𑁆𑀢𑀸. ‘‘𑀤𑀸𑀦𑁂𑀦 𑀤𑀫𑁂𑀦 𑀲𑀁𑀬𑀫𑁂𑀦 𑀲𑀘𑁆𑀘𑀯𑀚𑁆𑀚𑁂𑀦𑀸’’𑀢𑀺 𑀏𑀢𑁆𑀣 𑀉𑀧𑁄𑀲𑀣𑀓𑀫𑁆𑀫𑀁 ‘‘𑀤𑀫𑁄’’𑀢𑀺 𑀯𑀼𑀢𑁆𑀢𑀁. ‘‘𑀤𑀫𑀼𑀧𑀲𑀫𑁂𑀦𑀸’’𑀢𑀺 𑀏𑀢𑁆𑀣 𑀔𑀦𑁆𑀢𑀺 ‘‘𑀤𑀫𑁄’’𑀢𑀺 𑀯𑀼𑀢𑁆𑀢𑀸. 𑀇𑀘𑁆𑀘𑁂𑀯𑀁 𑁋

‘‘𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀧𑀜𑁆𑀜𑀸, 𑀔𑀦𑁆𑀢𑀺 𑀘𑀸𑀧𑀺 𑀉𑀧𑁄𑀲𑀣𑁄;

𑀇𑀫𑁂 𑀅𑀢𑁆𑀣𑀸 𑀧𑀯𑀼𑀘𑁆𑀘𑀦𑁆𑀢𑀺, 𑀤𑀫𑀲𑀤𑁆𑀤𑁂𑀦 𑀲𑀸𑀲𑀦𑁂’’𑀢𑀺.

𑀬𑀸 𑀕𑀢𑀺𑀧𑀸𑀧𑀼𑀡𑁂𑀲𑀼. 𑀬𑀸𑀬𑀢𑀺, 𑀬𑀸𑀬𑀦𑁆𑀢𑀺. 𑀧𑀭𑀺𑀬𑀸𑀬𑁄. 𑀬𑀸𑀬𑀫𑀸𑀦𑁄 𑀫𑀳𑀸𑀭𑀸𑀚𑀸, 𑀅𑀤𑁆𑀤𑀸 𑀲𑀻𑀤𑀦𑁆𑀢𑀭𑁂 𑀦𑀕𑁂. 𑀬𑀸𑀬𑀦𑁆𑀢𑁄. 𑀬𑀸𑀬𑀦𑁆𑀢𑀫𑀦𑀼𑀬𑀸𑀬𑀢𑀺. 𑀬𑀸𑀢𑀸𑀦𑀼𑀬𑀸𑀬𑀻. 𑀬𑀸𑀬𑀺𑀢𑀼𑀁, 𑀬𑀸𑀬𑀺𑀢𑁆𑀯𑀸 𑀇𑀘𑁆𑀘𑀸𑀤𑀻𑀦𑀺.

𑀏𑀢𑁆𑀣 𑀧𑀭𑀺𑀬𑀸𑀬𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄 𑀯𑀼𑀘𑁆𑀘𑀢𑁂, 𑀧𑀭𑀺𑀬𑀸𑀬𑀲𑀤𑁆𑀤𑁄 𑀯𑀸𑀭𑀤𑁂𑀲𑀦𑀸𑀓𑀸𑀭𑀡𑁂𑀲𑀼 𑀲𑀫𑀦𑁆𑀢𑀢𑁄 𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑁂 𑀘 𑀲𑀤𑀺𑀲𑁂 𑀘 𑀯𑀢𑁆𑀢𑀢𑀺. ‘‘𑀓𑀲𑁆𑀲 𑀦𑀼 𑀔𑁄 𑀆𑀦𑀦𑁆𑀤 𑀅𑀚𑁆𑀚 𑀧𑀭𑀺𑀬𑀸𑀬𑁄 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀺𑀢𑀼’’𑀦𑁆𑀢𑀺𑀆𑀤𑀻𑀲𑀼 𑀳𑀺 𑀯𑀸𑀭𑁂 𑀯𑀢𑁆𑀢𑀢𑀺. ‘‘𑀫𑀥𑀼𑀧𑀺𑀡𑁆𑀟𑀺𑀓𑀧𑀭𑀺𑀬𑀸𑀬𑁄𑀢𑀺𑀦𑀁 𑀥𑀸𑀭𑁂𑀳𑀻’’𑀢𑀺𑀆𑀤𑀻𑀲𑀼 𑀤𑁂𑀲𑀦𑀸𑀬𑀁. ‘‘𑀇𑀫𑀺𑀦𑀸𑀧𑀺 𑀔𑁄 𑀢𑁂 𑀭𑀸𑀚𑀜𑁆𑀜 𑀧𑀭𑀺𑀬𑀸𑀬𑁂𑀦 𑀏𑀯𑀁 𑀳𑁄𑀢𑀽’’𑀢𑀺𑀆𑀤𑀻𑀲𑀼 ¶ 𑀓𑀸𑀭𑀡𑁂. ‘‘𑀧𑀭𑀺𑀬𑀸𑀬𑀧𑀣𑁄’’𑀢𑀺𑀆𑀤𑀻𑀲𑀼 𑀲𑀫𑀦𑁆𑀢𑀢𑁄 𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑁂. ‘‘𑀓𑁄𑀧𑀲𑀤𑁆𑀤𑁄 𑀔𑁄𑀪𑀧𑀭𑀺𑀬𑀸𑀬𑁄’’𑀢𑀺𑀆𑀤𑀻𑀲𑀼 𑀲𑀤𑀺𑀲𑁂 𑀯𑀢𑁆𑀢𑀢𑀺. 𑀇𑀘𑁆𑀘𑁂𑀯𑀁 𑁋

𑀧𑀭𑀺𑀬𑀸𑀬𑀭𑀯𑁄 𑀯𑀸𑀭-𑀤𑁂𑀲𑀦𑀸𑀓𑀸𑀭𑀡𑁂𑀲𑀼 𑀘;

𑀲𑀫𑀦𑁆𑀢𑀢𑁄𑀯 𑀕𑀦𑁆𑀢𑀩𑁆𑀩-𑀝𑁆𑀞𑀸𑀦𑁂 𑀘 𑀲𑀤𑀺𑀲𑁂 𑀲𑀺𑀬𑀸.

𑀭𑀺 𑀯𑀲𑀦𑁂. 𑀭𑀺𑀬𑀢𑀺.

𑀯𑀺𑀮𑀻 𑀯𑀺𑀮𑀻𑀦𑀪𑀸𑀯𑁂. 𑀲𑀧𑁆𑀧𑀺 𑀯𑀺𑀮𑀻𑀬𑀢𑀺. 𑀓𑀸𑀭𑀺𑀢𑁂 𑀯𑀺𑀮𑀸𑀧𑀬𑀢𑀺.

𑀯𑀸 𑀕𑀢𑀺𑀕𑀦𑁆𑀥𑀦𑁂𑀲𑀼. 𑀯𑀸𑀬𑀢𑀺. 𑀯𑀸𑀬𑁄, 𑀯𑀸𑀢𑁄.

𑀲𑀺𑀯𑀼 𑀢𑀦𑁆𑀢𑀲𑀦𑁆𑀢𑀸𑀦𑁂. 𑀲𑀺𑀩𑁆𑀩𑀢𑀺, 𑀲𑀁𑀲𑀺𑀩𑁆𑀩𑀢𑀺. 𑀲𑀺𑀩𑁆𑀩𑀁, 𑀲𑀺𑀩𑁆𑀩𑀦𑁆𑀢𑁄. 𑀓𑀸𑀭𑀺𑀢𑁂 𑁋 𑀲𑀺𑀩𑁆𑀩𑁂𑀢𑀺, 𑀲𑀺𑀩𑁆𑀩𑀬𑀢𑀺, 𑀲𑀺𑀩𑁆𑀩𑀸𑀧𑁂𑀢𑀺, 𑀲𑀺𑀩𑁆𑀩𑀸𑀧𑀬𑀢𑀺.

𑀲𑀺𑀯𑀼 𑀕𑀢𑀺𑀲𑁄𑀲𑀦𑁂𑀲𑀼. 𑀲𑀺𑀩𑁆𑀩𑀢𑀺.

𑀥𑀺𑀯𑀼 𑀔𑀺𑀯𑀼 𑀦𑀺𑀤𑀲𑁆𑀲𑀦𑁂. 𑀥𑀺𑀩𑁆𑀩𑀢𑀺. 𑀔𑀺𑀩𑁆𑀩𑀢𑀺.

𑀲𑀸 𑀢𑀦𑀼𑀓𑀭𑀡𑁂. 𑀲𑀺𑀬𑀢𑀺, 𑀲𑀺𑀬𑀦𑁆𑀢𑀺.

𑀲𑀸 𑀅𑀦𑁆𑀢𑀓𑀫𑁆𑀫𑀦𑀺. 𑀲𑀺𑀬𑀢𑀺 𑀅𑀦𑀯𑀲𑁂𑀲𑀢𑁄 𑀫𑀸𑀦𑀁 𑀲𑀺𑀬𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀢𑀻𑀢𑀺 𑀅𑀕𑁆𑀕𑀫𑀕𑁆𑀕𑁄 𑀫𑀸𑀦𑀲𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁.

𑀲𑀸 𑀅𑀲𑁆𑀲𑀸𑀤𑀦𑁂. 𑀭𑀲𑀁 𑀲𑀸𑀬𑀢𑀺. 𑀲𑀸𑀬𑀺𑀢𑀁, 𑀲𑀸𑀬𑀦𑀁.

𑀲𑀺 𑀧𑀸𑀡𑀺𑀧𑁆𑀧𑀲𑀯𑁂. 𑀲𑀽𑀬𑀢𑀺, 𑀧𑀲𑀽𑀬𑀢𑀺. 𑀧𑀲𑀽𑀢𑀸 𑀕𑀸𑀯𑀻.

𑀓𑀼𑀲𑀼 𑀳𑀭𑀡𑀤𑀺𑀢𑁆𑀢𑀻𑀲𑀼. 𑀓𑀼𑀲𑀬𑀢𑀺.

𑀲𑀺𑀮𑀺𑀲 𑀆𑀮𑀺𑀗𑁆𑀕𑀦𑁂. 𑀲𑀺𑀮𑀺𑀲𑁆𑀲𑀢𑀺. 𑀲𑀺𑀮𑁂𑀲𑁄.

𑀓𑀺𑀮𑀺𑀲 𑀉𑀧𑀢𑀸𑀧𑁂. 𑀓𑀺𑀮𑀺𑀲𑁆𑀲𑀢𑀺, 𑀲𑀁𑀓𑀺𑀮𑀺𑀲𑁆𑀲𑀢𑀺. 𑀓𑀺𑀮𑁂𑀲𑁄, 𑀲𑀁𑀓𑀺𑀮𑁂𑀲𑁄. 𑀇𑀓𑀸𑀭𑀮𑁄𑀧𑁂 𑀓𑁆𑀮𑀺𑀲𑁆𑀲𑀢𑀺 𑀓𑁆𑀮𑁂𑀲𑁄 ¶ 𑀇𑀘𑁆𑀘𑀸𑀤𑀻𑀦𑀺. 𑀅𑀧𑀺𑀘 𑀫𑀮𑀻𑀦𑀢𑀸𑀧𑀺 𑀓𑀺𑀮𑀺𑀲𑀲𑀤𑁆𑀤𑁂𑀦 𑀯𑀼𑀘𑁆𑀘𑀢𑀺, 𑀓𑀺𑀮𑀺𑀝𑁆𑀞𑀯𑀢𑁆𑀣𑀁 𑀧𑀭𑀺𑀤𑀳𑀢𑀺. ‘‘𑀘𑀺𑀢𑁆𑀢𑁂𑀦 𑀲𑀁𑀓𑀺𑀮𑀺𑀝𑁆𑀞𑁂𑀦, 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺 𑀫𑀸𑀡𑀯𑀸’’𑀢𑀺𑀆𑀤𑀻𑀲𑀼 𑀥𑀸𑀢𑀽𑀦𑀁 𑀅𑀦𑁂𑀓𑀢𑁆𑀣𑀢𑀸𑀬.

𑀫𑀲 𑀅𑀧𑁆𑀧𑀻𑀪𑀸𑀯𑁂 𑀔𑀫𑀸𑀬𑀜𑁆𑀘. 𑀫𑀲𑁆𑀲𑀢𑀺.

𑀮𑀻𑀲 𑀅𑀧𑁆𑀧𑀻𑀪𑀸𑀯𑁂. 𑀮𑀺𑀲𑁆𑀲𑀢𑀺. 𑀮𑁂𑀲𑁄. ‘‘𑀮𑀺𑀲 𑀮𑁂𑀲𑀦𑁂’’𑀢𑀺𑀧𑀺 𑀧𑀞𑀦𑁆𑀢𑀺 𑀆𑀘𑀭𑀺𑀬𑀸.

𑀢𑀲 𑀧𑀺𑀧𑀸𑀲𑀸𑀬𑀁. 𑀢𑀲𑁆𑀲𑀢𑀺, 𑀧𑀭𑀺𑀢𑀲𑁆𑀲𑀢𑀺. 𑀧𑀭𑀺𑀢𑀲𑁆𑀲𑀦𑀸, 𑀢𑀲𑀺𑀡𑀸, 𑀢𑀲𑀺𑀢𑁄.

𑀤𑀼𑀲 𑀤𑁄𑀲𑀦𑁂. 𑀤𑀼𑀲𑁆𑀲𑀢𑀺. 𑀤𑁄𑀲𑁄, 𑀤𑁄𑀲𑀦𑀁, 𑀤𑁄𑀲𑀺𑀢𑁄.

𑀤𑀼𑀲 𑀅𑀧𑁆𑀧𑀻𑀢𑀺𑀬𑀁. 𑀤𑀼𑀲𑁆𑀲𑀢𑀺, 𑀧𑀤𑀼𑀲𑁆𑀲𑀢𑀺. 𑀤𑁄𑀲𑁄, 𑀧𑀤𑁄𑀲𑁄, 𑀤𑀼𑀝𑁆𑀞𑁄, 𑀧𑀤𑀼𑀝𑁆𑀞𑁄, 𑀤𑀽𑀲𑀓𑁄, 𑀤𑀽𑀲𑀺𑀢𑁄, 𑀤𑀽𑀲𑀦𑀸.

𑀅𑀲𑀼 𑀔𑁂𑀧𑁂. 𑀔𑁂𑀧𑁄 𑀔𑀺𑀧𑀦𑀁. 𑀅𑀲𑁆𑀲𑀢𑀺. 𑀦𑀺𑀭𑀲𑁆𑀲𑀢𑀺𑀆𑀤𑀺𑀬𑀢𑀺 𑀘 𑀥𑀫𑁆𑀫𑀁. 𑀇𑀲𑁆𑀲𑀸𑀲𑁄.

𑀏𑀢𑁆𑀣 𑀘 𑀦𑀺𑀭𑀲𑁆𑀲𑀢𑀻𑀢𑀺 𑀙𑀟𑁆𑀟𑁂𑀢𑀺 𑀲𑀢𑁆𑀣𑀸𑀭𑀁 𑀢𑀣𑀸 𑀥𑀫𑁆𑀫𑀓𑁆𑀔𑀸𑀦𑀸𑀤𑀻𑀦𑀺. 𑀇𑀲𑁆𑀲𑀸𑀲𑁄𑀢𑀺 𑀉𑀲𑀼𑀁 𑀅𑀲𑁆𑀲𑀢𑀺 𑀔𑀺𑀧𑀢𑀻𑀢𑀺 𑀇𑀲𑁆𑀲𑀸𑀲𑁄, 𑀥𑀦𑀼𑀕𑁆𑀕𑀳𑁄.

𑀬𑀲𑀼 𑀧𑀬𑀢𑀦𑁂. 𑀬𑀲𑁆𑀲𑀢𑀺. 𑀦𑀺𑀬𑀲𑀓𑀫𑁆𑀫𑀁.

𑀏𑀢𑁆𑀣 𑀘 𑀬𑁂𑀦 𑀯𑀺𑀦𑀬𑀓𑀫𑁆𑀫𑁂𑀦 ‘‘𑀦𑀺𑀲𑁆𑀲𑀸𑀬 𑀢𑁂 𑀯𑀢𑁆𑀣𑀩𑁆𑀩’’𑀦𑁆𑀢𑀺 𑀦𑀺𑀬𑀲𑁆𑀲𑀺𑀬𑀢𑀺 𑀪𑀚𑀸𑀧𑀺𑀬𑀢𑀻𑀢𑀺 𑀦𑀺𑀬𑀲𑁄 𑀩𑀸𑀮𑀁, 𑀢𑀁 𑀦𑀺𑀬𑀲𑀓𑀫𑁆𑀫𑀁 𑀦𑀸𑀫. ‘‘𑀓𑀭𑁄𑀳𑀺 𑀫𑁂 𑀬𑀓𑁆𑀔 𑀦𑀺𑀬𑀲𑀓𑀫𑁆𑀫’’𑀦𑁆𑀢𑀺 𑀏𑀢𑁆𑀣 𑀧𑀦 𑀦𑀺𑀕𑁆𑀕𑀳𑀓𑀫𑁆𑀫𑀁 𑀦𑀺𑀬𑀲𑀓𑀫𑁆𑀫𑀁 𑀦𑀸𑀫.

𑀪𑀲𑁆𑀲 𑀪𑀲𑁆𑀲𑀦𑁂. 𑀪𑀲𑁆𑀲𑀢𑀺. 𑀪𑀲𑁆𑀲𑀁, 𑀪𑀲𑁆𑀲𑀓𑀸𑀭𑀓𑁄.

𑀯𑀲 𑀲𑀤𑁆𑀤𑁂. 𑀲𑀓𑀼𑀡𑁄 𑀯𑀲𑁆𑀲𑀢𑀺. 𑀅𑀥𑀫𑁄 𑀫𑀺𑀕𑀚𑀸𑀢𑀸𑀦𑀁, 𑀲𑀺𑀗𑁆𑀕𑀸𑀮𑁄 𑀢𑀸𑀢 𑀯𑀲𑁆𑀲𑀢𑀺. 𑀫𑀡𑁆𑀟𑀽𑀓𑁄 𑀯𑀲𑁆𑀲𑀢𑀺.

𑀦𑀲 ¶ 𑀅𑀤𑀲𑁆𑀲𑀦𑁂. 𑀦𑀲𑁆𑀲𑀦𑀥𑀫𑁆𑀫𑀁 𑀦𑀲𑁆𑀲𑀢𑀺. 𑀧𑀦𑀲𑁆𑀲𑀢𑀺. 𑀯𑀺𑀦𑀲𑁆𑀲𑀢𑀺. 𑀦𑀲𑁆𑀲 𑀯𑀲𑀮𑀺, 𑀘𑀭 𑀧𑀺𑀭𑁂 𑀯𑀺𑀦𑀲𑁆𑀲. 𑀦𑀝𑁆𑀞𑁄, 𑀯𑀺𑀦𑀝𑁆𑀞𑁄. 𑀓𑀸𑀭𑀺𑀢𑁂 𑁋 𑀦𑀸𑀲𑁂𑀢𑀺, 𑀦𑀸𑀲𑀬𑀢𑀺.

𑀲𑀼𑀲 𑀲𑁄𑀲𑀦𑁂. 𑀧𑀡𑁆𑀡𑀁 𑀲𑀼𑀲𑁆𑀲𑀢𑀺. 𑀓𑀸𑀭𑀺𑀢𑁂 𑁋 𑀯𑀸𑀢𑁄 𑀧𑀡𑁆𑀡𑀁 𑀲𑁄𑀲𑁂𑀢𑀺, 𑀲𑁄𑀲𑀬𑀢𑀺. 𑀓𑀫𑁆𑀫𑁂 𑁋 𑀯𑀸𑀢𑁂𑀦 𑀧𑀡𑁆𑀡𑀁 𑀲𑁄𑀲𑀺𑀬𑀢𑀺. 𑀪𑀸𑀯𑁂 𑀓𑁆𑀭𑀺𑀬𑀸𑀧𑀤𑀫𑀧𑁆𑀧𑀲𑀺𑀤𑁆𑀥𑀁. 𑀲𑁄𑀲𑁄, 𑀲𑀼𑀓𑁆𑀔𑀁 𑀓𑀝𑁆𑀞𑀁. 𑀲𑀼𑀲𑁆𑀲𑀁, 𑀲𑀼𑀲𑁆𑀲𑀦𑁆𑀢𑁄. 𑀲𑀼𑀲𑁆𑀲𑀫𑀸𑀦𑁄 𑀤𑀳𑀤𑁄.

𑀢𑀼𑀲 𑀢𑀼𑀝𑁆𑀞𑀺𑀬𑀁. 𑀢𑀼𑀲𑁆𑀲𑀢𑀺, 𑀲𑀦𑁆𑀢𑀼𑀲𑁆𑀲𑀢𑀺. 𑀲𑀦𑁆𑀢𑀼𑀝𑁆𑀞𑀺, 𑀲𑀦𑁆𑀢𑁄𑀲𑁄, 𑀢𑁄𑀲𑀦𑀁, 𑀢𑀼𑀝𑁆𑀞𑀩𑁆𑀩𑀁, 𑀢𑀼𑀲𑁆𑀲𑀺𑀢𑀩𑁆𑀩𑀁, 𑀢𑀼𑀲𑀺𑀢𑀸. 𑀓𑀸𑀭𑀺𑀢𑁂 ‘‘𑀢𑁄𑀲𑁂𑀢𑀺’’ 𑀇𑀘𑁆𑀘𑀸𑀤𑀻𑀦𑀺.

𑀳𑀸 𑀧𑀭𑀺𑀳𑀸𑀦𑀺𑀬𑀁. 𑀳𑀸𑀬𑀢𑀺, 𑀧𑀭𑀺𑀳𑀸𑀬𑀢𑀺. 𑀳𑀸𑀬𑀦𑁆𑀢𑀺 𑀢𑀢𑁆𑀣 𑀯𑀴𑀯𑀸. 𑀪𑀸𑀯𑁂 ‘‘𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀮𑁄𑀫𑀳𑀁𑀲𑁄 𑀯𑀸, 𑀲𑁄 𑀧𑀳𑀻𑀬𑀺𑀲𑁆𑀲𑀢𑀻’’𑀢𑀺 𑀘 ‘‘𑀭𑀸𑀕𑁄 𑀧𑀳𑀻𑀬𑀢𑀻’’𑀢𑀺 𑀘 𑀭𑀽𑀧𑀁. 𑀓𑀫𑁆𑀫𑁂 𑀓𑁆𑀭𑀺𑀬𑀸𑀧𑀤𑀫𑀧𑁆𑀧𑀲𑀺𑀤𑁆𑀥𑀁. ‘‘𑀭𑀸𑀕𑁄 𑀧𑀳𑀻𑀬𑀢𑀻’’𑀢𑀺 𑀇𑀤𑀁 𑀧𑀦 ‘‘𑀳𑀸 𑀘𑀸𑀕𑁂’’𑀢𑀺 𑀯𑀼𑀢𑁆𑀢𑀲𑁆𑀲 𑀪𑀽𑀯𑀸𑀤𑀺𑀕𑀡𑀺𑀓𑀥𑀸𑀢𑀼𑀲𑁆𑀲 𑀭𑀽𑀧𑀁 ‘‘𑀭𑀸𑀕𑀁 𑀧𑀚𑀳𑀢𑀻’’𑀢𑀺 𑀓𑀢𑁆𑀢𑀼𑀧𑀤𑀲𑁆𑀲 𑀤𑀲𑁆𑀲𑀦𑀢𑁄.

𑀦𑀳 𑀩𑀦𑁆𑀥𑀦𑁂. 𑀦𑀬𑁆𑀳𑀢𑀺. 𑀉𑀧𑀦𑀬𑁆𑀳𑀢𑀺. 𑀲𑀦𑁆𑀦𑀬𑁆𑀳𑀢𑀺. 𑀲𑀦𑁆𑀦𑀸𑀳𑁄. 𑀲𑀦𑁆𑀦𑀤𑁆𑀥𑁄.

𑀫𑀼𑀳 𑀯𑁂𑀘𑀺𑀢𑁆𑀢𑁂. 𑀫𑀼𑀬𑁆𑀳𑀢𑀺, 𑀲𑀫𑁆𑀫𑀼𑀬𑁆𑀳𑀢𑀺, 𑀧𑀫𑀼𑀬𑁆𑀳𑀢𑀺. 𑀫𑁄𑀳𑁄, 𑀧𑀫𑁄𑀳𑁄. 𑀫𑀽𑀴𑁆𑀳𑁄. 𑀫𑁄𑀫𑀽𑀳𑁄 𑀧𑀼𑀭𑀺𑀲𑁄. 𑀫𑁄𑀫𑀽𑀳𑀁 𑀘𑀺𑀢𑁆𑀢𑀁. 𑀓𑀸𑀭𑀺𑀢𑁂 𑁋 𑀫𑁄𑀳𑁂𑀢𑀺. 𑀧𑀫𑁄𑀳𑀓𑁄. 𑀏𑀢𑁆𑀣 𑀘 𑀫𑁄𑀫𑀽𑀳𑁄𑀢𑀺 𑀅𑀯𑀺𑀲𑀤𑀢𑀸𑀬 𑀫𑁄𑀫𑀽𑀳𑁄, 𑀫𑀳𑀸𑀫𑀽𑀴𑁆𑀳𑁄𑀢𑀺 𑀅𑀢𑁆𑀣𑁄.

𑀲𑀳 𑀲𑀼𑀳 𑀲𑀢𑁆𑀢𑀺𑀬𑀁. 𑀲𑀬𑁆𑀳𑀢𑀺. 𑀲𑀼𑀬𑁆𑀳𑀢𑀺.

𑀦𑁆𑀳𑀸 ¶ 𑀲𑁄𑀘𑁂𑀬𑁆𑀬𑁂. 𑀦𑁆𑀳𑀸𑀬𑀢𑀺, 𑀅𑀧𑁆𑀧𑀓𑁆𑀔𑀭𑀸𑀦𑀁 𑀩𑀳𑀼𑀪𑀸𑀯𑁂 𑀦𑀳𑀸𑀬𑀢𑀺. 𑀦𑀳𑀸𑀬𑀺𑀢𑁆𑀯𑀸, 𑀦𑁆𑀳𑀸𑀬𑀺𑀢𑁆𑀯𑀸. 𑀦𑀳𑀸𑀦𑀁, 𑀦𑁆𑀳𑀸𑀦𑀁. 𑀲𑀻𑀲𑀁 𑀦𑁆𑀳𑀸𑀢𑁄. 𑀏𑀢𑁆𑀣 𑀘 𑀲𑀻𑀲𑀁 𑀦𑁆𑀳𑀸𑀢𑁄𑀢𑀺 𑀲𑀻𑀲𑀁 𑀥𑁄𑀯𑀺𑀢𑁆𑀯𑀸 𑀦𑁆𑀳𑀸𑀢𑁄𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 𑀧𑁄𑀭𑀸𑀡𑁂𑀳𑀺 𑀅𑀦𑀼𑀫𑀢𑀢𑁆𑀢𑀸.

𑀲𑀺𑀦𑀺𑀳 𑀧𑀻𑀢𑀺𑀬𑀁. 𑀲𑀺𑀦𑀺𑀬𑁆𑀳𑀢𑀺. 𑀲𑀺𑀦𑁂𑀳𑀓𑁄, 𑀲𑀺𑀦𑁂𑀳𑀺𑀢𑁄, 𑀲𑀺𑀦𑀺𑀤𑁆𑀥𑁄. 𑀧𑀼𑀢𑁆𑀢𑁂 𑀲𑀺𑀦𑁂𑀳𑁄 𑀅𑀚𑀸𑀬𑀣. 𑀇𑀓𑀸𑀭𑀮𑁄𑀧𑁂𑀦 𑀲𑁆𑀦𑁂𑀳𑁄. 𑀢𑀣𑀸 𑀳𑀺 ‘‘𑀦𑀺𑀲𑁆𑀦𑁂𑀳𑀫𑀪𑀺𑀓𑀗𑁆𑀔𑀸𑀫𑀻’’𑀢𑀺 𑀧𑀸𑀴𑀺 𑀤𑀺𑀲𑁆𑀲𑀢𑀺.

𑀯𑀺𑀭𑀺𑀴 𑀮𑀚𑁆𑀚𑀸𑀬𑀁 𑀘𑁄𑀤𑀦𑁂 𑀘. 𑀯𑀺𑀭𑀺𑀴𑀺𑀢𑁄. 𑀮𑀚𑁆𑀚𑀸𑀯𑀲𑁂𑀦 𑀅𑀢𑁆𑀣𑁄 𑀧𑀲𑀺𑀤𑁆𑀥𑁄, 𑀦 𑀘𑁄𑀤𑀦𑀸𑀯𑀲𑁂𑀦. 𑀢𑀣𑀸 𑀳𑀺 ‘‘𑀯𑀺𑀭𑀺𑀴𑀺𑀢𑁄𑀢𑀺 𑀮𑀚𑁆𑀚𑀺𑀢𑁄’’𑀢𑀺 𑀅𑀢𑁆𑀣𑀲𑀁𑀯𑀡𑁆𑀡𑀓𑀸 𑀕𑀭𑀽 𑀯𑀤𑀦𑁆𑀢𑀺 ‘‘𑀮𑀚𑁆𑀚𑀦𑀸𑀓𑀸𑀭𑀧𑁆𑀧𑀢𑁆𑀢𑁄’’𑀢𑀺 𑀘.

𑀤𑀺𑀯𑀸𑀤𑀻 𑀏𑀢𑁆𑀢𑀓𑀸 𑀤𑀺𑀝𑁆𑀞𑀸, 𑀥𑀸𑀢𑀯𑁄 𑀫𑁂 𑀬𑀣𑀸𑀩𑀮𑀁;

𑀲𑀼𑀢𑁆𑀢𑁂𑀲𑁆𑀯𑀜𑁆𑀜𑁂𑀧𑀺 𑀧𑁂𑀓𑁆𑀔𑀺𑀢𑁆𑀯𑀸, 𑀕𑀡𑁆𑀳𑀯𑁆𑀳𑁄 𑀅𑀢𑁆𑀣𑀬𑀼𑀢𑁆𑀢𑀺𑀢𑁄𑀢𑀺.

𑀤𑀺𑀯𑀸𑀤𑀺𑀕𑀡𑁄𑀬𑀁.

𑀲𑁆𑀯𑀸𑀤𑀺𑀕𑀡𑀺𑀓

𑀲𑀼 𑀲𑀯𑀦𑁂. ‘‘𑀲𑀼𑀡𑁄𑀢𑀺, 𑀲𑀼𑀡𑀸𑀢𑀺. 𑀲𑀼𑀡𑀺𑀁𑀲𑀼. 𑀧𑀝𑀺𑀲𑁆𑀲𑀼𑀡𑀺, 𑀧𑀝𑀺𑀲𑁆𑀲𑀼𑀡𑀺𑀁𑀲𑀼. 𑀅𑀲𑁆𑀲𑁄𑀲𑀺, 𑀅𑀲𑁆𑀲𑁄𑀲𑀼𑀁. 𑀧𑀘𑁆𑀘𑀲𑁆𑀲𑁄𑀲𑀺, 𑀧𑀘𑁆𑀘𑀲𑁆𑀲𑁄𑀲𑀼𑀁’’ 𑀇𑀘𑁆𑀘𑀸𑀤𑀻𑀦𑀺, ‘‘𑀲𑀼𑀡𑀺𑀲𑁆𑀲𑀢𑀺, 𑀲𑁄𑀲𑁆𑀲𑀢𑀺’’ 𑀇𑀘𑁆𑀘𑀸𑀤𑀻𑀦𑀺 𑀘 𑀪𑀯𑀦𑁆𑀢𑀺. 𑀅𑀩𑁆𑀪𑀸𑀲𑀯𑀺𑀲𑀬𑁂 ‘‘𑀲𑀼𑀲𑁆𑀲𑀽𑀲𑀢𑀺, 𑀲𑀼𑀲𑁆𑀲𑀽𑀲𑀸’’ 𑀇𑀘𑁆𑀘𑀸𑀤𑀻𑀦𑀺. 𑀅𑀦𑀩𑁆𑀪𑀸𑀲𑀯𑀺𑀲𑀬𑁂 𑁋 𑀲𑀸𑀯𑀓𑁄, 𑀲𑁄𑀢𑁄, 𑀲𑀼𑀡𑀁, 𑀲𑀼𑀡𑀦𑁆𑀢𑁄, 𑀲𑀼𑀡𑀫𑀸𑀦𑁄, 𑀲𑀼𑀬𑁆𑀬𑀫𑀸𑀦𑁄, 𑀲𑀯𑀦𑀁, 𑀲𑀼𑀢𑀁. 𑀅𑀲𑀼𑀬𑀺𑀢𑁆𑀣𑀸𑀢𑀺 𑀯𑀸 𑀲𑀼𑀢𑀁. 𑀲𑀼𑀢𑀯𑀸, 𑀲𑁄𑀢𑀁, 𑀲𑁄𑀡𑁄, 𑀲𑀼𑀡𑀺𑀢𑀼𑀁, 𑀲𑁄𑀢𑀼𑀁. 𑀲𑀼𑀡𑀺𑀢𑁆𑀯𑀸, 𑀲𑀼𑀡𑀺𑀬, 𑀲𑀼𑀡𑀺𑀬𑀸𑀦, 𑀲𑀼𑀢𑁆𑀯𑀸, 𑀲𑀼𑀢𑁆𑀯𑀸𑀦. 𑀓𑀸𑀭𑀺𑀢𑁂 𑁋 𑀲𑀸𑀯𑁂𑀢𑀺, 𑀲𑀸𑀯𑀬𑀢𑀺. 𑀓𑀫𑁆𑀫𑁂 𑁋 𑀲𑀤𑁆𑀤𑁄 𑀲𑀼𑀬𑁆𑀬𑀢𑀺, 𑀲𑀽𑀬𑀢𑀺 𑀘. 𑀪𑀸𑀯𑁂 𑀧𑀤𑀭𑀽𑀧𑀫𑀧𑁆𑀧𑀲𑀺𑀤𑁆𑀥𑀁.

𑀢𑀢𑁆𑀣 ¶ 𑀲𑀸𑀯𑀓𑁄𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁄, 𑀲𑁄 𑀤𑀼𑀯𑀺𑀥𑁄 𑀆𑀕𑀢𑀧𑁆𑀨𑀮𑁄 𑀅𑀦𑀸𑀕𑀢𑀧𑁆𑀨𑀮𑁄 𑀘, 𑀢𑀢𑁆𑀣 𑀆𑀕𑀢𑀧𑁆𑀨𑀮𑁄 𑀲𑀯𑀦𑀦𑁆𑀢𑁂 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑁄𑀢𑀺 ‘‘𑀲𑀸𑀯𑀓𑁄’’𑀢𑀺 𑀯𑀼𑀘𑁆𑀘𑀢𑀺, 𑀇𑀢𑀭𑁄 𑀕𑀭𑀽𑀦𑀁 𑀑𑀯𑀸𑀤𑀁 𑀲𑀼𑀡𑀸𑀢𑀻𑀢𑀺 ‘‘𑀲𑀸𑀯𑀓𑁄’’𑀢𑀺. 𑀲𑀸𑀯𑀓𑁄, 𑀅𑀦𑁆𑀢𑁂𑀯𑀸𑀲𑀺𑀓𑁄, 𑀲𑀺𑀲𑁆𑀲𑁄𑀢𑀺 𑀧𑀭𑀺𑀬𑀸𑀬𑀸.

𑀏𑀢𑁆𑀣 𑀲𑀼𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑀁 𑀯𑀤𑀸𑀫 𑀲𑀤𑁆𑀥𑀺𑀁 𑀲𑁄𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂𑀦. 𑀲𑀼𑀢𑀲𑀤𑁆𑀤𑁄 𑀲𑀉𑀧𑀲𑀕𑁆𑀕𑁄 𑀅𑀦𑀼𑀧𑀲𑀕𑁆𑀕𑁄 𑀘 𑀅𑀦𑀼𑀧𑀧𑀤𑁂𑀦, 𑀲𑀼𑀢𑀲𑀤𑁆𑀤𑁄 𑀘 𑁋

𑀕𑀫𑀦𑁂 𑀯𑀺𑀲𑁆𑀲𑀼𑀢𑁂 𑀢𑀺𑀦𑁆𑀢𑁂, 𑀦𑀺𑀬𑁄𑀕𑁄’𑀧𑀘𑀺𑀢𑁂𑀧𑀺 𑀘;

𑀲𑀤𑁆𑀤𑁂 𑀘 𑀲𑁄𑀢𑀤𑁆𑀯𑀸𑀭𑀸𑀦𑀼-𑀲𑀸𑀭𑀜𑀸𑀢𑁂𑀲𑀼 𑀤𑀺𑀲𑁆𑀲𑀢𑀺.

𑀢𑀣𑀸 𑀳𑀺 ‘‘𑀲𑁂𑀦𑀸𑀬 𑀧𑀲𑀼𑀢𑁄’’𑀢𑀺𑀆𑀤𑀻𑀲𑀼 𑀕𑀘𑁆𑀙𑀦𑁆𑀢𑁄𑀢𑀺 𑀅𑀢𑁆𑀣𑁄. ‘‘𑀲𑀼𑀢𑀥𑀫𑁆𑀫𑀲𑁆𑀲 𑀧𑀲𑁆𑀲𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀲𑁆𑀲𑀼𑀢𑀥𑀫𑁆𑀫𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀅𑀯𑀲𑁆𑀲𑀼𑀢𑀸 𑀅𑀯𑀲𑁆𑀲𑀼𑀢𑀲𑁆𑀲 𑀧𑀼𑀭𑀺𑀲𑀧𑀼𑀕𑁆𑀕𑀮𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀢𑀺𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀬𑁂 𑀛𑀸𑀦𑀧𑁆𑀧𑀲𑀼𑀢𑀸 𑀥𑀻𑀭𑀸’’𑀢𑀺𑀆𑀤𑀻𑀲𑀼 𑀅𑀦𑀼𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. ‘‘𑀢𑀼𑀫𑁆𑀳𑁂𑀳𑀺 𑀧𑀼𑀜𑁆𑀜𑀁 𑀧𑀲𑀼𑀢𑀁 𑀅𑀦𑀧𑁆𑀧𑀓’’𑀦𑁆𑀢𑀺𑀆𑀤𑀻𑀲𑀼 𑀉𑀧𑀘𑀺𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢’’𑀦𑁆𑀢𑀺𑀆𑀤𑀻𑀲𑀼 𑀲𑀤𑁆𑀤𑁄𑀢𑀺 𑀅𑀢𑁆𑀣𑁄. ‘‘𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺 𑀲𑀼𑀢𑀥𑀭𑁄 𑀲𑀼𑀢𑀲𑀦𑁆𑀦𑀺𑀘𑀬𑁄’’𑀢𑀺𑀆𑀤𑀻𑀲𑀼 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑀯𑀺𑀜𑁆𑀜𑀸𑀢𑀥𑀫𑁆𑀫𑀥𑀭𑁄𑀢𑀺 𑀅𑀢𑁆𑀣𑁄.

𑀲𑁄𑀢𑀲𑀤𑁆𑀤𑁄𑀧𑀺 𑀅𑀦𑁂𑀓𑀢𑁆𑀣𑀧𑁆𑀧𑀪𑁂𑀤𑁄. 𑀢𑀣𑀸 𑀳𑁂𑀲 𑁋

𑀫𑀁𑀲𑀯𑀺𑀜𑁆𑀜𑀸𑀡𑀜𑀸𑀡𑁂𑀲𑀼, 𑀢𑀡𑁆𑀳𑀸𑀤𑀻𑀲𑀼 𑀘 𑀤𑀺𑀲𑁆𑀲𑀢𑀺;

𑀥𑀸𑀭𑀸𑀬𑀁 𑀅𑀭𑀺𑀬𑀫𑀕𑁆𑀕𑁂, 𑀘𑀺𑀢𑁆𑀢𑀲𑀦𑁆𑀢𑀢𑀺𑀬𑀫𑁆𑀧𑀺 𑀘.

‘‘𑀲𑁄𑀢𑀸𑀬𑀢𑀦𑀁 ¶ , 𑀲𑁄𑀢𑀥𑀸𑀢𑀼, 𑀲𑁄𑀢𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺𑀆𑀤𑀻𑀲𑀼 𑀲𑁄𑀢𑀲𑀤𑁆𑀤𑁄 𑀫𑀁𑀲𑀲𑁄𑀢𑁂 𑀤𑀺𑀲𑁆𑀲𑀢𑀺, ‘‘𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀲𑁄𑀢𑀯𑀺𑀜𑁆𑀜𑀸𑀡𑁂. ‘‘𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸’’𑀢𑀺𑀆𑀤𑀻𑀲𑀼 𑀜𑀸𑀡𑀲𑁄𑀢𑁂. ‘‘𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀦𑁆𑀢𑀺, 𑀬𑀸𑀦𑀺 𑀏𑀢𑀸𑀦𑀺 𑀲𑁄𑀢𑀸𑀦𑀺 𑀫𑀬𑀸 𑀓𑀺𑀢𑁆𑀢𑀺𑀢𑀸𑀦𑀺 𑀧𑀓𑀺𑀢𑁆𑀢𑀺𑀢𑀸𑀦𑀺 𑀆𑀘𑀺𑀓𑁆𑀔𑀺𑀢𑀸𑀦𑀺 𑀤𑁂𑀲𑀺𑀢𑀸𑀦𑀺 𑀧𑀜𑁆𑀜𑀧𑀺𑀢𑀸𑀦𑀺 𑀧𑀝𑁆𑀞𑀧𑀺𑀢𑀸𑀦𑀺 𑀯𑀺𑀯𑀭𑀺𑀢𑀸𑀦𑀺 𑀯𑀺𑀪𑀢𑁆𑀢𑀸𑀦𑀺 𑀉𑀢𑁆𑀢𑀸𑀦𑀻𑀓𑀢𑀸𑀦𑀺 𑀧𑀓𑀸𑀲𑀺𑀢𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁? 𑀢𑀡𑁆𑀳𑀸𑀲𑁄𑀢𑁄 𑀤𑀺𑀝𑁆𑀞𑀺𑀲𑁄𑀢𑁄 𑀓𑀺𑀮𑁂𑀲𑀲𑁄𑀢𑁄 𑀤𑀼𑀘𑁆𑀘𑀭𑀺𑀢𑀲𑁄𑀢𑁄 𑀅𑀯𑀺𑀚𑁆𑀚𑀸𑀲𑁄𑀢𑁄’’𑀢𑀺𑀆𑀤𑀻𑀲𑀼 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼. ‘‘𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀫𑀳𑀦𑁆𑀢𑀁 𑀤𑀸𑀭𑀼𑀓𑁆𑀔𑀦𑁆𑀥𑀁 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦’’𑀦𑁆𑀢𑀺𑀆𑀤𑀻𑀲𑀼 𑀉𑀤𑀓𑀥𑀸𑀭𑀸𑀬𑀁. ‘‘𑀅𑀭𑀺𑀬𑀲𑁆𑀲𑁂𑀢𑀁 𑀆𑀯𑀼𑀲𑁄 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀅𑀥𑀺𑀯𑀘𑀦𑀁, 𑀬𑀤𑀺𑀤𑀁 𑀲𑁄𑀢𑁄’’𑀢𑀺𑀆𑀤𑀻𑀲𑀼 𑀅𑀭𑀺𑀬𑀫𑀕𑁆𑀕𑁂. ‘‘𑀧𑀼𑀭𑀺𑀲𑀲𑁆𑀲 𑀘 𑀯𑀺𑀜𑁆𑀜𑀸𑀡𑀲𑁄𑀢𑀁 𑀧𑀚𑀸𑀦𑀸𑀢𑀺 𑀉𑀪𑀬𑀢𑁄 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀇𑀥𑀮𑁄𑀓𑁂 𑀧𑀢𑀺𑀝𑁆𑀞𑀺𑀢𑀜𑁆𑀘 𑀧𑀭𑀮𑁄𑀓𑁂 𑀧𑀢𑀺𑀝𑁆𑀞𑀺𑀢𑀜𑁆𑀘𑀸’’𑀢𑀺𑀆𑀤𑀻𑀲𑀼 𑀘𑀺𑀢𑁆𑀢𑀲𑀦𑁆𑀢𑀢𑀺𑀬𑀦𑁆𑀢𑀺.

𑀲𑁄𑀡𑁄𑀢𑀺 𑀲𑀼𑀦𑀔𑁄. 𑀲𑁄 𑀳𑀺 𑀲𑀸𑀫𑀺𑀓𑀲𑁆𑀲 𑀯𑀘𑀦𑀁 𑀲𑀼𑀡𑀸𑀢𑀻𑀢𑀺 𑀲𑁄𑀡𑁄𑀢𑀺 𑀯𑀼𑀘𑁆𑀘𑀢𑀺.

𑀇𑀫𑀸𑀦𑀺 𑀢𑀤𑀪𑀺𑀥𑀸𑀦𑀸𑀦𑀺 𑁋

𑀲𑀼𑀦𑀔𑁄 𑀲𑀸𑀭𑀫𑁂𑀬𑁆𑀬𑁄 𑀘, 𑀲𑀼𑀡𑁄 𑀲𑀽𑀦𑁄 𑀘 𑀓𑀼𑀓𑁆𑀓𑀼𑀭𑁄;

𑀲𑁄𑀡𑁄 𑀲𑁆𑀯𑀸𑀦𑁄 𑀲𑀼𑀯𑀸𑀦𑁄 𑀘, 𑀲𑀸𑀴𑀼𑀭𑁄 𑀫𑀺𑀕𑀤𑀁𑀲𑀦𑁄.

𑀲𑀸 𑀲𑀼𑀦𑀺𑀥𑀸𑀢𑀺’𑀫𑁂 𑀲𑀤𑁆𑀤𑀸, 𑀧𑀼𑀫𑀸𑀦𑁂𑀲𑀼 𑀧𑀯𑀢𑁆𑀢𑀭𑁂;

𑀲𑀼𑀦𑀔𑀻 𑀓𑀼𑀓𑁆𑀓𑀼𑀭𑀻 𑀲𑀻’𑀢𑀺, 𑀇𑀫𑁂 𑀇𑀢𑁆𑀣𑀻𑀲𑀼 𑀯𑀢𑁆𑀢𑀭𑁂.

𑀲𑀼𑀦𑀔𑀸 𑀲𑀸𑀭𑀫𑁂𑀬𑁆𑀬𑀸𑀢𑀺, 𑀆𑀤𑀺 𑀩𑀳𑀼𑀯𑀘𑁄 𑀧𑀦;

𑀧𑀯𑀢𑁆𑀢𑀢𑀺 𑀧𑀼𑀫𑀺𑀢𑁆𑀣𑀻𑀲𑀼, 𑀅𑀜𑁆𑀜𑀢𑁆𑀭𑀸𑀧𑀺 𑀅𑀬𑀁 𑀦𑀬𑁄;

𑀓𑀼𑀓𑁆𑀓𑀼𑀭𑁄𑀢𑀺 ¶ 𑀅𑀬𑀁 𑀢𑀢𑁆𑀣, 𑀩𑀸𑀮𑀓𑀸𑀮𑁂 𑀭𑀯𑁂𑀦 𑀯𑁂;

𑀫𑀳𑀮𑁆𑀮𑀓𑁂𑀧𑀺 𑀲𑀼𑀦𑀔𑁂, 𑀭𑀽𑀴𑁆𑀳𑀺𑀬𑀸 𑀲𑀫𑁆𑀧𑀯𑀢𑁆𑀢𑀢𑀺.

𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀓𑀼𑀓𑁆𑀓𑀼𑀭𑀚𑀸𑀢𑀓𑁂 ‘‘𑀬𑁂 𑀓𑀼𑀓𑁆𑀓𑀼𑀭𑀸 𑀭𑀸𑀚𑀓𑀼𑀮𑀫𑁆𑀳𑀺 𑀯𑀟𑁆𑀠𑀸, 𑀓𑁄𑀮𑁂𑀬𑁆𑀬𑀓𑀸 𑀯𑀡𑁆𑀡𑀩𑀮𑀽𑀧𑀧𑀦𑁆𑀦𑀸’’𑀢𑀺𑀇𑀫𑀲𑁆𑀫𑀺𑀁𑀧𑀤𑁂𑀲𑁂 𑀏𑀯𑀫𑀢𑁆𑀣𑀁 𑀯𑀡𑁆𑀡𑀬𑀺𑀁𑀲𑀼 ‘‘𑀬𑁂 𑀓𑀼𑀓𑁆𑀓𑀼𑀭𑀸𑀢𑀺 𑀬𑁂 𑀲𑀼𑀦𑀔𑀸. 𑀬𑀣𑀸 𑀳𑀺 𑀢𑀭𑀼𑀡𑁄𑀧𑀺 𑀧𑀲𑁆𑀲𑀸𑀯𑁄 𑀧𑀽𑀢𑀺𑀫𑀼𑀢𑁆𑀢𑀦𑁆𑀢𑀺 𑀢𑀤𑀳𑀼𑀚𑀸𑀢𑁄𑀧𑀺 𑀲𑀺𑀗𑁆𑀕𑀸𑀮𑁄 ‘‘𑀚𑀭𑀲𑀺𑀗𑁆𑀕𑀸𑀮𑁄’𑀢𑀺, 𑀓𑁄𑀫𑀮𑀸𑀧𑀺 𑀕𑀴𑀸𑀘𑀻𑀮𑀢𑀸 ‘𑀧𑀽𑀢𑀺𑀮𑀢𑀸’𑀢𑀺, 𑀲𑀼𑀯𑀡𑁆𑀡𑀯𑀡𑁆𑀡𑁄𑀧𑀺 𑀓𑀸𑀬𑁄 ‘𑀧𑀽𑀢𑀺𑀓𑀸𑀬𑁄’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑁂𑀯 𑀯𑀲𑁆𑀲𑀲𑀢𑀺𑀓𑁄𑀧𑀺 𑀲𑀼𑀦𑀔𑁄 ‘𑀓𑀼𑀓𑁆𑀓𑀼𑀭𑁄’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀫𑀳𑀮𑁆𑀮𑀓𑀸 𑀓𑀸𑀬𑀽𑀧𑀧𑀦𑁆𑀦𑀸𑀧𑀺 𑀢𑁂 ‘𑀓𑀼𑀓𑁆𑀓𑀼𑀭𑀸’𑀢𑁆𑀯𑁂𑀯 𑀯𑀼𑀢𑁆𑀢𑀸’’𑀢𑀺.

𑀓𑀺 𑀳𑀺𑀁𑀲𑀸𑀬𑀁. 𑀓𑀺𑀡𑁄𑀢𑀺, 𑀓𑀺𑀡𑀸𑀢𑀺, 𑀓𑀺𑀡𑀦𑁆𑀢𑀺.

𑀲𑀓 𑀲𑀸𑀫𑀢𑁆𑀣𑀺𑀬𑁂. 𑀲𑀫𑀢𑁆𑀣𑀪𑀸𑀯𑁄 𑀲𑀸𑀫𑀢𑁆𑀣𑀺𑀬𑀁, 𑀬𑀣𑀸 𑀤𑀓𑁆𑀔𑀺𑀬𑀁. 𑀲𑀓𑁆𑀓𑀼𑀡𑀸𑀢𑀺, 𑀲𑀓𑁆𑀓𑀼𑀡𑀦𑁆𑀢𑀺. 𑀅𑀲𑀓𑁆𑀔𑀺. 𑀲𑀓𑁆𑀔𑀺𑀲𑁆𑀲𑀢𑀺. 𑀲𑀓𑁆𑀓𑁄. 𑀲𑀓𑁆𑀓𑀻.

𑀏𑀢𑁆𑀣 𑀲𑀓𑁆𑀓𑁄𑀢𑀺 𑀤𑁂𑀯𑀭𑀸𑀚𑀸. 𑀲𑁄 𑀳𑀺 𑀧𑀭𑀳𑀺𑀢𑀁 𑀲𑀓𑀳𑀺𑀢𑀜𑁆𑀘 𑀓𑀸𑀢𑀼𑀁 𑀲𑀓𑁆𑀓𑀼𑀡𑀸𑀢𑀻𑀢𑀺 𑀲𑀓𑁆𑀓𑁄. 𑀅𑀧𑀺𑀘 𑀲𑀓𑁆𑀬𑀓𑀼𑀮𑀚𑀸𑀢𑁄 𑀬𑁄 𑀓𑁄𑀘𑀺𑀧𑀺. 𑀢𑀣𑀸 𑀳𑀺 ‘‘𑀅𑀣 𑀔𑁄 𑀫𑀳𑀸𑀦𑀸𑀫𑁄 𑀲𑀓𑁆𑀓𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀪𑀕𑀯𑀦𑁆𑀢𑀜𑁆𑀘 𑀧𑀺𑀗𑁆𑀕𑀺𑀬𑁄 𑀫𑀁 𑀲𑀓𑁆𑀓 𑀲𑀫𑀼𑀤𑁆𑀥𑀭𑀸𑀳𑀻𑀢𑀺 𑀆𑀮𑀧𑀺. 𑀲𑀓𑁆𑀬𑀸 𑀯𑀢 𑀪𑁄 𑀓𑀼𑀫𑀸𑀭𑀸 𑀧𑀭𑀫𑀲𑀓𑁆𑀬𑀸 𑀯𑀢 𑀪𑁄 𑀓𑀼𑀫𑀸𑀭𑀸’’𑀢𑀺 𑀯𑀘𑀦𑀫𑀼𑀧𑀸𑀤𑀸𑀬 𑀲𑀩𑁆𑀩𑁂𑀧𑀺 𑀲𑀓𑁆𑀬𑀓𑀼𑀮𑁂 𑀚𑀸𑀢𑀸 ‘‘𑀲𑀓𑁆𑀬𑀸’’𑀢𑀺 𑀘 ‘‘𑀲𑀸𑀓𑀺𑀬𑀸’’𑀢𑀺 𑀘 ‘‘𑀲𑀓𑁆𑀓𑀸’’𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀏𑀢𑁆𑀣 𑀲𑁆𑀯𑀸𑀤𑀺𑀢𑁆𑀢𑁂𑀧𑀺 𑀅𑀦𑁂𑀓𑀲𑁆𑀲𑀭𑀥𑀸𑀢𑀼𑀢𑁄 𑀏𑀓𑁄𑀯 𑀉𑀡𑀸𑀧𑀘𑁆𑀘𑀬𑁄 𑀳𑁄𑀢𑀺, 𑀦 𑀡𑀼 𑀡𑀸𑀧𑀘𑁆𑀘𑀬𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀔𑀻 ¶ 𑀔𑀬𑁂. 𑀔𑀻𑀡𑁄𑀢𑀺. 𑀔𑀻𑀡𑀸𑀢𑀺. 𑀔𑀻𑀡𑀸 𑀚𑀸𑀢𑀺. 𑀔𑀻𑀡𑁄. 𑀅𑀬𑁄𑀕𑀸 𑀪𑀽𑀭𑀺𑀲𑀗𑁆𑀔𑀬𑁄.

𑀕𑁂 𑀲𑀤𑁆𑀤𑁂. 𑀕𑀺𑀡𑁄𑀢𑀺, 𑀕𑀺𑀡𑀸𑀢𑀺.

𑀘𑀺 𑀘𑀬𑁂. 𑀡𑀓𑀸𑀭𑀲𑁆𑀲 𑀦𑀓𑀸𑀭𑀢𑁆𑀢𑀁. 𑀧𑀸𑀓𑀸𑀭𑀁 𑀘𑀺𑀦𑁄𑀢𑀺. 𑀘𑀺𑀢𑀁 𑀓𑀼𑀲𑀮𑀁. 𑀘𑁂𑀢𑁄 𑀧𑀼𑀕𑁆𑀕𑀮𑁄.

𑀭𑀼 𑀉𑀧𑀢𑀸𑀧𑁂. 𑀭𑀼𑀡𑁄𑀢𑀺, 𑀭𑀼𑀡𑀸𑀢𑀺.

𑀭𑀸𑀥 𑀲𑀸𑀥 𑀲𑀁𑀲𑀺𑀤𑁆𑀥𑀺𑀬𑀁. 𑀭𑀸𑀥𑀼𑀡𑀸𑀢𑀺. 𑀲𑀸𑀥𑀼𑀡𑀸𑀢𑀺. 𑀭𑀸𑀥𑀦𑀁. 𑀆𑀭𑀸𑀥𑀦𑀁. 𑀲𑀸𑀥𑀦𑀁.

𑀧𑀻 𑀧𑀻𑀢𑀺𑀬𑀁. 𑀧𑀻𑀡𑁄𑀢𑀺, 𑀧𑀻𑀡𑀸𑀢𑀺. 𑀧𑀻𑀢𑀺, 𑀧𑀺𑀬𑁄.

𑀅𑀧 𑀧𑀸𑀧𑀼𑀡𑁂 𑀲𑀫𑁆𑀪𑀼 𑀘. 𑀧𑀸𑀧𑀼𑀡𑁄𑀢𑀺, 𑀧𑀸𑀧𑀼𑀡𑀸𑀢𑀺. 𑀧𑀢𑁆𑀢𑁄. 𑀲𑀩𑁆𑀩𑀜𑁆𑀜𑀼𑀢𑀁 𑀲𑀢𑁆𑀣𑀸 𑀧𑀢𑁆𑀢𑁄. 𑀲𑀫𑁆𑀧𑀢𑁆𑀢𑁄 𑀬𑀫𑀲𑀸𑀥𑀦𑀁. 𑀲𑀫𑁆𑀪𑀼𑀡𑀸𑀢𑀺, 𑀦 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀅𑀪𑀺𑀲𑀫𑁆𑀪𑀼𑀡𑀸𑀢𑀺. 𑀲𑀫𑁆𑀪𑀼𑀡𑀦𑁆𑀢𑁄, 𑀅𑀪𑀺𑀲𑀫𑁆𑀪𑀼𑀡𑀫𑀸𑀦𑁄.

𑀢𑀢𑁆𑀣 𑀧𑀢𑁆𑀢𑁄𑀢𑀺 𑀧𑀲𑀤𑁆𑀤𑁄 𑀉𑀧𑀲𑀕𑁆𑀕𑁄 ‘‘𑀧𑀧𑁆𑀧𑁄𑀢𑀻’’𑀢𑀺 𑀏𑀢𑁆𑀣 𑀧𑀲𑀤𑁆𑀤𑁄 𑀯𑀺𑀬. 𑀢𑀣𑀸 𑀳𑀺 ‘‘𑀧𑀢𑁆𑀢𑁄’’𑀢𑀺 𑀏𑀢𑁆𑀣 𑀧𑀸𑀧𑀼𑀡𑀻𑀢𑀺 𑀅𑀢𑁆𑀣𑁂 𑀧𑀧𑀼𑀩𑁆𑀩𑀲𑁆𑀲 𑀅𑀧𑀥𑀸𑀢𑀼𑀲𑁆𑀲 𑀧𑀓𑀸𑀭𑁂 𑀮𑀼𑀢𑁆𑀢𑁂 𑀢𑀧𑀘𑁆𑀘𑀬𑀲𑁆𑀲 𑀤𑁆𑀯𑀺𑀪𑀸𑀯𑁄 𑀪𑀯𑀢𑀺. 𑀢𑀢𑁆𑀣 𑀦 𑀅𑀪𑀺𑀲𑀫𑁆𑀪𑀼𑀡𑀸𑀢𑀻𑀢𑀺 𑀦 𑀲𑀫𑁆𑀧𑀸𑀧𑀼𑀡𑀸𑀢𑀺, 𑀦 𑀲𑀸𑀥𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀔𑀺𑀧 𑀔𑁂𑀧𑁂. 𑀔𑀺𑀧𑀼𑀡𑀸𑀢𑀺. 𑀔𑀺𑀧𑁆𑀧𑀁. 𑀔𑀺𑀧𑁆𑀧𑀦𑁆𑀢𑀺 𑀫𑀘𑁆𑀙𑀧𑀜𑁆𑀚𑀭𑁄.

𑀆𑀧 𑀩𑁆𑀬𑀸𑀧𑀦𑁂. 𑀆𑀧𑀼𑀡𑀸𑀢𑀺. 𑀆𑀧𑁄.

𑀫𑀺 𑀧𑀓𑁆𑀔𑁂𑀧𑀦𑁂. 𑀫𑀺𑀦𑁄𑀢𑀺. 𑀫𑀺𑀢𑁆𑀢𑁄.

𑀏𑀢𑁆𑀣 𑀘 𑀲𑀩𑁆𑀩𑀕𑀼𑀬𑁆𑀳𑁂𑀲𑀼 𑀦𑀺𑀫𑀺𑀬𑀢𑀺 𑀧𑀓𑁆𑀔𑀺𑀧𑀺𑀬𑀢𑀻𑀢𑀺 𑀫𑀺𑀢𑁆𑀢𑁄. ‘‘𑀫𑀺𑀢𑁆𑀢𑁄 𑀳𑀯𑁂 𑀲𑀢𑁆𑀢𑀧𑀤𑁂𑀦 𑀳𑁄𑀢𑀻’’𑀢𑀺 𑀯𑀘𑀦𑀁 𑀧𑀦 𑀯𑁄𑀳𑀸𑀭𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀅𑀢𑁆𑀣𑀯𑀲𑁂𑀦. 𑀯𑀼𑀘𑁆𑀘𑁂𑀬𑁆𑀬 𑀘𑁂, 𑀬𑁄 𑀓𑁄𑀘𑀺 𑀅𑀯𑀺𑀲𑁆𑀲𑀸𑀲𑀺𑀓𑁄 ¶ 𑀅𑀢𑁆𑀢𑀦𑁄 𑀧𑀝𑀺𑀯𑀺𑀭𑀼𑀤𑁆𑀥𑁄𑀧𑀺 𑀘 𑀫𑀺𑀢𑁆𑀢𑁄 𑀦𑀸𑀫 𑀪𑀯𑁂𑀬𑁆𑀬, 𑀦 𑀘𑁂𑀯𑀁 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀘 𑀧𑀦 𑀤𑀝𑁆𑀞𑀩𑁆𑀩𑀁 ‘‘𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑀫𑀢𑁆𑀢𑁂𑀦𑀧𑀺 𑀲𑀳 𑀕𑀘𑁆𑀙𑀦𑁆𑀢𑁄 𑀲𑀳 𑀕𑀘𑁆𑀙𑀦𑁆𑀢𑀲𑁆𑀲 𑀧𑀺𑀬𑀯𑀸𑀘𑀸𑀦𑀺𑀘𑁆𑀙𑀸𑀭𑀡𑁂𑀦 𑀅𑀜𑁆𑀜𑀫𑀜𑁆𑀜𑀁 𑀆𑀮𑀸𑀧𑀲𑀮𑁆𑀮𑀸𑀧𑀓𑀭𑀡𑀫𑀢𑁆𑀢𑁂𑀦 𑀫𑀺𑀢𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀓𑀺𑀁𑀓𑀸𑀭𑀡𑀸? 𑀤𑀴𑁆𑀳𑀯𑀺𑀲𑁆𑀲𑀸𑀲𑁄 𑀫𑀺𑀢𑁆𑀢𑁄 𑀦𑀸𑀫 𑀦 𑀪𑀯𑁂𑀬𑁆𑀬𑀸𑀢𑀺 𑀫𑀺𑀢𑁆𑀢𑀲𑁆𑀲 𑀕𑀼𑀡𑀧𑀲𑀁𑀲𑀸𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺.

𑀯𑀼 𑀲𑀁𑀯𑀭𑀡𑁂. 𑀯𑀼𑀡𑁄𑀢𑀺, 𑀯𑀼𑀡𑀸𑀢𑀺, 𑀲𑀁𑀯𑀼𑀡𑁄𑀢𑀺, 𑀲𑀁𑀯𑀼𑀡𑀸𑀢𑀺. 𑀧𑀡𑁆𑀟𑀺𑀢𑁄 𑀲𑀻𑀮𑀲𑀁𑀯𑀼𑀢𑁄.

𑀲𑀼 𑀅𑀪𑀺𑀲𑀯𑁂. 𑀅𑀪𑀺𑀲𑀯𑁄 𑀦𑀸𑀫 𑀧𑀻𑀴𑀦𑀁 𑀫𑀦𑁆𑀣𑀦𑀁 𑀲𑀦𑁆𑀥𑀸𑀦𑀁 𑀲𑀺𑀦𑁆𑀳𑀸𑀦𑀁 𑀯𑀸. 𑀲𑀼𑀡𑁄𑀢𑀺, 𑀲𑀼𑀡𑀸𑀢𑀺.

𑀲𑀺 𑀩𑀦𑁆𑀥𑀦𑁂. 𑀲𑀺𑀦𑁄𑀢𑀺.

𑀲𑀺 𑀦𑀺𑀲𑀸𑀦𑁂. 𑀲𑀺𑀡𑁄𑀢𑀺, 𑀲𑀺𑀡𑀸𑀢𑀺. 𑀦𑀺𑀲𑀺𑀢𑀲𑀢𑁆𑀣𑀁.

𑀦 𑀳𑀺 𑀦𑀽𑀦𑀸𑀬𑀁 𑀲𑀸 𑀔𑀼𑀚𑁆𑀚𑀸, 𑀮𑀪𑀢𑀺 𑀚𑀺𑀯𑁆𑀳𑀸𑀬 𑀙𑁂𑀤𑀦𑀁;

𑀲𑀼𑀦𑀺𑀲𑀺𑀢𑁂𑀦 𑀲𑀢𑁆𑀣𑁂𑀦, 𑀏𑀯𑀁 𑀤𑀼𑀩𑁆𑀪𑀸𑀲𑀺𑀢𑀁 𑀪𑀡𑀁;

𑀏𑀢𑁆𑀣 𑀪𑀡𑀦𑁆𑀢𑀺 𑀪𑀡𑀦𑁆𑀢𑀻.

𑀯𑀼𑀲 𑀧𑀸𑀕𑀩𑁆𑀩𑀺𑀬𑁂. 𑀧𑀸𑀕𑀩𑁆𑀩𑀺𑀬𑀁 𑀦𑀸𑀫 𑀓𑀸𑀬𑀯𑀸𑀘𑀸𑀫𑀦𑁂𑀳𑀺 𑀧𑀕𑀩𑁆𑀩𑀪𑀸𑀯𑁄. 𑀯𑀼𑀲𑀼𑀡𑀸𑀢𑀺.

𑀅𑀲𑀼 𑀩𑁆𑀬𑀸𑀧𑀦𑁂. 𑀅𑀲𑀼𑀡𑀸𑀢𑀺. 𑀅𑀲𑁆𑀲𑀼.

𑀳𑀺 𑀕𑀢𑀺𑀩𑀼𑀤𑁆𑀥𑀻𑀲𑀼 𑀉𑀧𑀢𑀸𑀧𑁂 𑀘. 𑀳𑀺𑀦𑁄𑀢𑀺.

𑀏𑀢𑁆𑀣 𑀧𑀦 𑀅𑀲𑀫𑀸𑀦𑀦𑁆𑀢𑀢𑁆𑀢𑁂𑀧𑀺 𑀲𑀫𑀸𑀦𑀢𑁆𑀣𑀸𑀦𑀁 𑀲𑀫𑁄𑀥𑀸𑀦𑀁 𑀯𑀼𑀘𑁆𑀘𑀢𑀺.

𑀢𑀺𑀓 𑀢𑀺𑀕 𑀲𑀖 𑀤𑀺𑀓𑁆𑀔 𑀓𑀺𑀯𑀺 𑀘𑀺𑀭𑀺 𑀚𑀺𑀭𑀺 𑀤𑀸𑀲 𑀤𑀼 𑀳𑀺𑀁𑀲𑀸𑀬𑀁. 𑀢𑀺𑀓𑀼𑀡𑀸𑀢𑀺. 𑀢𑀺𑀕𑀼𑀡𑀸𑀢𑀺. 𑀲𑀖𑀼𑀡𑀸𑀢𑀺. 𑀤𑀺𑀓𑁆𑀔𑀼𑀡𑀸𑀢𑀺. 𑀓𑀺𑀯𑀼𑀡𑀸𑀢𑀺 ¶ . 𑀘𑀺𑀭𑀼𑀡𑀸𑀢𑀺. 𑀚𑀺𑀭𑀼𑀡𑀸𑀢𑀺. 𑀤𑀸𑀲𑀼𑀡𑀸𑀢𑀺. 𑀤𑀼𑀡𑁄𑀢𑀺, 𑀤𑀼𑀡𑀸𑀢𑀻𑀢𑀺 𑀭𑀽𑀧𑀸𑀦𑀺 𑀳𑀺𑀁𑀲𑀸𑀯𑀸𑀘𑀓𑀸𑀦𑀺 𑀪𑀯𑀦𑁆𑀢𑀺.

𑀲𑀼𑀯𑀸𑀤𑀻 𑀏𑀢𑁆𑀢𑀓𑀸 𑀤𑀺𑀝𑁆𑀞𑀸, 𑀥𑀸𑀢𑀯𑁄 𑀫𑁂 𑀬𑀣𑀸𑀩𑀮𑀁;

𑀲𑀼𑀢𑁆𑀢𑁂𑀲𑁆𑀯𑀜𑁆𑀜𑁂𑀧𑀺 𑀧𑁂𑀓𑁆𑀔𑀺𑀢𑁆𑀯𑀸, 𑀕𑀡𑀯𑁆𑀳𑁄 𑀅𑀢𑁆𑀣𑀬𑀼𑀢𑁆𑀢𑀺𑀢𑁄.

𑀲𑁆𑀯𑀸𑀤𑀺𑀕𑀡𑁄𑀬𑀁.

𑀓𑀺𑀬𑀸𑀤𑀺𑀕𑀡𑀺𑀓

𑀓𑀻 𑀤𑀩𑁆𑀩𑀯𑀺𑀦𑀺𑀫𑀬𑁂. 𑀤𑀩𑁆𑀩𑀯𑀺𑀦𑀺𑀫𑀬𑁄 𑀓𑀬𑀯𑀺𑀓𑁆𑀓𑀬𑀯𑀲𑁂𑀦 𑀪𑀡𑁆𑀟𑀲𑁆𑀲 𑀧𑀭𑀺𑀯𑀢𑁆𑀢𑀦𑀁. 𑀓𑀺𑀡𑀸𑀢𑀺, 𑀓𑀺𑀡𑀦𑁆𑀢𑀺. 𑀯𑀺𑀓𑁆𑀓𑀺𑀡𑀸𑀢𑀺, 𑀯𑀺𑀓𑁆𑀓𑀺𑀡𑀦𑁆𑀢𑀺. 𑀓𑁂𑀢𑀼𑀁, 𑀓𑀺𑀡𑀺𑀢𑀼𑀁. 𑀯𑀺𑀓𑁆𑀓𑁂𑀢𑀼𑀁, 𑀯𑀺𑀓𑁆𑀓𑀺𑀡𑀺𑀢𑀼𑀁. 𑀓𑀺𑀡𑀺𑀢𑁆𑀯𑀸, 𑀯𑀺𑀓𑁆𑀓𑀺𑀡𑀺𑀢𑁆𑀯𑀸. 𑀓𑀻𑀢𑀁 𑀪𑀡𑁆𑀟𑀁. 𑀓𑀬𑁄, 𑀯𑀺𑀓𑁆𑀓𑀬𑁄. 𑀯𑀺𑀓𑁆𑀓𑀺𑀡𑁂𑀬𑁆𑀬 𑀳𑀦𑁂𑀬𑁆𑀬 𑀯𑀸.

𑀔𑀺 𑀕𑀢𑀺𑀬𑀁. 𑀔𑀺𑀡𑀸𑀢𑀺. 𑀅𑀢𑀺𑀔𑀺𑀡𑁄 𑀲𑀭𑁄. 𑀔𑀁, 𑀔𑀸𑀦𑀺. 𑀦𑀓𑀸𑀭𑀲𑁆𑀲 𑀡𑀓𑀸𑀭𑀢𑁆𑀢𑀁.

𑀢𑀢𑁆𑀣 𑀔𑀺𑀡𑀸𑀢𑀻𑀢𑀺 𑀕𑀘𑁆𑀙𑀢𑀺. 𑀅𑀢𑀺𑀔𑀺𑀦𑁄𑀢𑀺 𑀅𑀢𑀺𑀕𑀢𑁄. 𑀅𑀢𑁆𑀭𑀸𑀬𑀁 𑀧𑀸𑀴𑀺 ‘‘𑀲𑁂𑀦𑁆𑀢𑀺 𑀘𑀸𑀧𑀸𑀢𑀺𑀔𑀺𑀡𑀸𑀯, 𑀧𑀼𑀭𑀸𑀡𑀸𑀦𑀺 𑀅𑀦𑀼𑀢𑁆𑀣𑀼𑀦’’𑀦𑁆𑀢𑀺. 𑀢𑀢𑁆𑀣 𑀘𑀸𑀧𑀸𑀢𑀺𑀔𑀺𑀡𑀸’𑀢𑀺 𑀘𑀸𑀧𑀢𑁄 𑀅𑀢𑀺𑀔𑀺𑀡𑀸 𑀅𑀢𑀺𑀕𑀢𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀘𑀸𑀧𑀸𑀢𑀺𑀔𑀺𑀡𑀸𑀢𑀺 𑀘𑀸𑀧𑀢𑁄 𑀅𑀢𑀺𑀔𑀺𑀡𑀸 𑀘𑀸𑀧𑀸 𑀯𑀺𑀦𑀺𑀫𑀼𑀢𑁆𑀢𑀸𑀢𑀺 𑀅𑀢𑁆𑀣𑁄’’𑀢𑀺 𑀧𑀤𑀢𑁆𑀣𑀯𑀺𑀯𑀭𑀡𑀁 𑀓𑀢𑀁, 𑀢𑀫𑁆𑀧𑀺 𑀕𑀢𑀢𑁆𑀣𑀜𑁆𑀜𑁂𑀯 𑀲𑀦𑁆𑀥𑀸𑀬 𑀅𑀥𑀺𑀧𑁆𑀧𑀸𑀬𑀢𑁆𑀣𑀯𑀲𑁂𑀦 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀭 𑀔𑀦𑁆𑀢𑀺 𑀲𑀕𑁆𑀕𑁄. 𑀲𑁄 𑀳𑀺 𑀓𑀢𑀧𑀼𑀜𑁆𑀜𑁂𑀳𑀺 𑀕𑀦𑁆𑀢𑀩𑁆𑀩𑀢𑁆𑀢𑀸 ‘‘𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀔𑀸𑀦𑀻𑀢𑀺 𑀲𑀕𑁆𑀕𑀸.

𑀘𑀺 𑀘𑀬𑁂. 𑀧𑀼𑀜𑁆𑀜𑀁 𑀘𑀺𑀦𑀸𑀢𑀺. 𑀧𑀸𑀓𑀸𑀭𑀁 𑀘𑀺𑀦𑀸𑀢𑀺. 𑀧𑀸𑀭𑀫𑀺𑀬𑁄 𑀯𑀺𑀘𑀺𑀦𑀸𑀢𑀺, 𑀯𑀺𑀘𑀺𑀦𑀢𑀺 𑀘. 𑀧𑀼𑀧𑁆𑀨𑀁 𑀑𑀘𑀺𑀦𑀸𑀢𑀺, 𑀑𑀘𑀺𑀦𑀢𑀺 𑀯𑀸. 𑀧𑀘𑀺𑀦𑀸𑀢𑀺. 𑀧𑀘𑀺𑀦𑀺𑀢𑁆𑀯𑀸. 𑀘𑀺𑀢𑀁 𑀓𑀼𑀲𑀮𑀁. 𑀘𑀬𑁄 𑀲𑀜𑁆𑀘𑀬𑁄. 𑀘𑀺𑀢𑁄 𑀧𑀸𑀓𑀸𑀭𑁄. 𑀘𑀺𑀦𑀸𑀢𑀻𑀢𑀺 𑀘𑁂𑀢𑁄, 𑀇𑀝𑁆𑀞𑀓𑀯𑀟𑁆𑀠𑀓𑀻. 𑀬𑁄 𑀲𑀢𑁆𑀢𑁄 𑀧𑀼𑀜𑁆𑀜𑀲𑀜𑁆𑀘𑀬𑁄 ¶ . ‘‘𑀲𑀜𑁆𑀘𑀬𑁄 𑀭𑀸𑀲𑀺 𑀲𑀫𑀽𑀳𑁄 𑀧𑀺𑀡𑁆𑀟𑁄 𑀕𑀡𑁄 𑀲𑀗𑁆𑀖𑁄 𑀓𑀤𑀫𑁆𑀩𑁄 𑀯𑀕𑁆𑀕𑁄 𑀓𑀭𑁄 𑀖𑀝𑀸’’𑀇𑀘𑁆𑀘𑁂𑀯𑀫𑀸𑀤𑀬𑁄 𑀧𑀭𑀺𑀬𑀸𑀬𑀸.

𑀚𑀺 𑀚𑀬𑁂. 𑀚𑀺𑀦𑀸𑀢𑀺, 𑀯𑀺𑀚𑀺𑀦𑀸𑀢𑀺, 𑀚𑀺𑀦𑀺𑀬𑀢𑀺. 𑀚𑁂𑀢𑀸, 𑀚𑀺𑀦𑁄. 𑀚𑀺𑀢𑁄 𑀫𑀸𑀭𑁄. 𑀫𑀸𑀭𑀁 𑀚𑀺𑀢𑁄. 𑀚𑀺𑀢𑀯𑀸, 𑀚𑀺𑀢𑀸𑀯𑀻, 𑀚𑀺𑀢𑀩𑁆𑀩𑁄, 𑀚𑁂𑀬𑁆𑀬𑁄, 𑀚𑀬𑀦𑀁, 𑀚𑀺𑀢𑀁, 𑀯𑀺𑀚𑀺𑀢𑀁, 𑀚𑀬𑁄, 𑀧𑀭𑀸𑀚𑀬𑀦𑀁, 𑀧𑀭𑀸𑀚𑀬𑁄. 𑀬𑀲𑁆𑀲 𑀚𑀺𑀢𑀁 𑀦𑀸𑀯𑀚𑀻𑀬𑀢𑀺. 𑀚𑀺𑀢𑀫𑀲𑁆𑀲 𑀦𑁄𑀬𑀸𑀢𑀺 𑀓𑁄𑀘𑀺 𑀮𑁄𑀓𑁂. 𑀚𑀬𑁄 𑀳𑀺 𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄 𑀅𑀬𑀁, 𑀫𑀸𑀭𑀲𑁆𑀲 𑀘 𑀧𑀸𑀧𑀺𑀫𑀢𑁄 𑀧𑀭𑀸𑀚𑀬𑁄.

𑀢𑀢𑁆𑀣 𑀚𑁂𑀢𑀸𑀢𑀺 𑀚𑀺𑀦𑀸𑀢𑀻𑀢𑀺 𑀚𑁂𑀢𑀸, 𑀬𑁄 𑀓𑁄𑀘𑀺 𑀧𑀼𑀕𑁆𑀕𑀮𑁄. 𑀅𑀚𑀺𑀦𑀻𑀢𑀺 𑀚𑀺𑀦𑁄, 𑀲𑀩𑁆𑀩𑀜𑁆𑀜𑀽 𑀥𑀫𑁆𑀫𑀭𑀸𑀚𑀸. 𑀓𑀺𑀁 𑀲𑁄 𑀅𑀚𑀺𑀦𑀺? 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀫𑀸𑀭𑀸𑀤𑀺𑀅𑀭𑀬𑁄 𑀘. 𑀇𑀢𑀺 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀫𑀸𑀭𑀸𑀤𑀬𑁄 𑀘 𑀅𑀭𑀬𑁄 𑀅𑀚𑀺𑀦𑀻𑀢𑀺 𑀚𑀺𑀦𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀫𑀸𑀤𑀺𑀲𑀸 𑀯𑁂 𑀚𑀺𑀦𑀸 𑀳𑁄𑀦𑁆𑀢𑀺, 𑀬𑁂 𑀧𑀢𑁆𑀢𑀸 𑀆𑀲𑀯𑀓𑁆𑀔𑀬𑀁;

𑀚𑀺𑀢𑀸 𑀫𑁂 𑀧𑀸𑀧𑀓𑀸 𑀥𑀫𑁆𑀫𑀸, 𑀢𑀲𑁆𑀫𑀸𑀳𑀁 𑀉𑀧𑀓 𑀚𑀺𑀦𑁄’’𑀢𑀺,

‘‘𑀢𑀣𑀸𑀕𑀢𑁄 𑀪𑀺𑀓𑁆𑀔𑀯𑁂 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄’’𑀢𑀺 𑀘.

𑀚𑀺𑀦𑀲𑀤𑁆𑀤𑁄 𑀳𑀺 𑀓𑁂𑀯𑀮𑁄 𑀲𑀩𑁆𑀩𑀜𑁆𑀜𑀼𑀫𑁆𑀳𑀺 𑀧𑀯𑀢𑁆𑀢𑀢𑀺, 𑀲𑁄𑀧𑀧𑀤𑁄 𑀧𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀻𑀲𑀼 𑀢𑀫𑁆𑀳𑀺 𑀘 𑀬𑀣𑀸𑀭𑀳𑀁 𑀧𑀯𑀢𑁆𑀢𑀢𑀺. ‘‘𑀧𑀘𑁆𑀘𑁂𑀓𑀚𑀺𑀦𑁄, 𑀑𑀥𑀺𑀚𑀺𑀦𑁄, 𑀅𑀦𑁄𑀥𑀺𑀚𑀺𑀦𑁄, 𑀯𑀺𑀧𑀸𑀓𑀚𑀺𑀦𑁄, 𑀅𑀯𑀺𑀧𑀸𑀓𑀚𑀺𑀦𑁄’’𑀢𑀺 𑀇𑀫𑀸𑀦𑁂𑀢𑁆𑀣 𑀦𑀺𑀤𑀲𑁆𑀲𑀦𑀧𑀤𑀸𑀦𑀺.

𑀚𑀺 𑀚𑀸𑀦𑀺𑀬𑀁. 𑀚𑀺𑀦𑀸𑀢𑀺, 𑀦 𑀚𑀺𑀦𑀸𑀢𑀺 𑀦 𑀚𑀸𑀧𑀬𑁂, 𑀚𑀺𑀦𑁄 𑀭𑀣𑀲𑁆𑀲𑀁 𑀫𑀡𑀺𑀓𑀼𑀡𑁆𑀟𑀮𑁂 𑀘, 𑀧𑀼𑀢𑁆𑀢𑁂 𑀘 𑀤𑀸𑀭𑁂 𑀘 𑀢𑀣𑁂𑀯 𑀚𑀺𑀦𑁄. 𑀚𑀺𑀦𑁄 𑀥𑀦𑀜𑁆𑀘 𑀤𑀸𑀲𑁂 𑀘.

𑀜𑀸 ¶ 𑀅𑀯𑀩𑁄𑀥𑀦𑁂. 𑀚𑀸𑀦𑀸𑀢𑀺, 𑀜𑀸𑀬𑀢𑀺, 𑀦𑀸𑀬𑀢𑀺. 𑀅𑀦𑀺𑀫𑀺𑀢𑁆𑀢𑀸 𑀦 𑀦𑀸𑀬𑀭𑁂. 𑀚𑀜𑁆𑀜𑀸 𑀲𑁄 𑀬𑀤𑀺 𑀳𑀸𑀧𑀬𑁂. 𑀫𑀸 𑀫𑀁 𑀚𑀜𑁆𑀜𑀽𑀢𑀺 𑀇𑀘𑁆𑀙𑀢𑀺. ‘‘𑀇𑀫𑁂 𑀅𑀫𑁆𑀳𑀸𑀓’’𑀦𑁆𑀢𑀺 𑀜𑀸𑀢𑀩𑁆𑀩𑀝𑁆𑀞𑁂𑀦 𑀜𑀸𑀢𑀺, 𑀜𑀸𑀢𑀓𑁄. 𑀜𑀸𑀢𑀺𑀫𑀺𑀢𑁆𑀢𑀸 𑀲𑀼𑀳𑀚𑁆𑀚𑀸 𑀘. 𑀜𑀸𑀢𑀓𑁄 𑀦𑁄 𑀦𑀺𑀲𑀺𑀦𑁆𑀦𑁄𑀢𑀺. 𑀜𑀸𑀢𑀩𑁆𑀩𑀁 𑀜𑁂𑀬𑁆𑀬𑀁, 𑀲𑀗𑁆𑀔𑀸𑀭𑀯𑀺𑀓𑀸𑀭𑀮𑀓𑁆𑀔𑀡𑀦𑀺𑀩𑁆𑀩𑀸𑀦𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑀸. 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀜𑁂𑀬𑁆𑀬𑀲𑀤𑁆𑀤𑁄 𑀏𑀓𑀦𑁆𑀢𑁂𑀦 𑀦𑀧𑀼𑀁𑀲𑀓𑁄, 𑀯𑀸𑀘𑁆𑀘𑀮𑀺𑀗𑁆𑀕𑀢𑁆𑀢𑁂 𑀲𑀩𑁆𑀩𑀮𑀺𑀗𑁆𑀕𑀺𑀓𑁄, 𑀬𑀣𑀸? 𑀜𑁂𑀬𑁆𑀬𑁄 𑀨𑀲𑁆𑀲𑁄. 𑀜𑁂𑀬𑁆𑀬𑀸 𑀯𑁂𑀤𑀦𑀸. 𑀜𑁂𑀬𑁆𑀬𑀁 𑀘𑀺𑀢𑁆𑀢𑀁. 𑀜𑁂𑀬𑁆𑀬𑁄 𑀧𑀼𑀭𑀺𑀲𑁄, 𑀜𑁂𑀬𑁆𑀬𑀸 𑀇𑀢𑁆𑀣𑀻, 𑀜𑁂𑀬𑁆𑀬𑀁 𑀥𑀦𑀦𑁆𑀢𑀺 𑀘.

𑀣𑀼 𑀅𑀪𑀺𑀢𑁆𑀣𑀯𑁂. 𑀣𑀼𑀦𑀸𑀢𑀺. 𑀅𑀪𑀺𑀢𑁆𑀣𑀼𑀦𑀸𑀢𑀺. 𑀣𑀼𑀢𑀺, 𑀅𑀪𑀺𑀢𑁆𑀣𑀼𑀢𑀺. 𑀣𑀯𑀦𑀸, 𑀅𑀪𑀺𑀢𑁆𑀣𑀯𑀦𑀸, 𑀣𑀼𑀢𑁄, 𑀅𑀪𑀺𑀢𑁆𑀣𑀼𑀢𑁄.

𑀣𑀼 𑀦𑀺𑀢𑁆𑀣𑀼𑀦𑀦𑁂. 𑀣𑀼𑀦𑀸𑀢𑀺.

𑀉𑀝𑁆𑀞𑁂𑀳𑀺 𑀭𑁂𑀯𑀢𑁂 𑀲𑀼𑀧𑀸𑀧𑀥𑀫𑁆𑀫𑁂,

𑀅𑀧𑀸𑀭𑀼𑀢𑀤𑁆𑀯𑀸𑀭𑁂 𑀅𑀤𑀸𑀦𑀲𑀻𑀮𑁂;

𑀦𑁂𑀲𑁆𑀲𑀸𑀫 𑀢𑀁 𑀬𑀢𑁆𑀣 𑀣𑀼𑀦𑀦𑁆𑀢𑀺 𑀤𑀼𑀕𑁆𑀕𑀢𑀸,

𑀲𑀫𑀧𑁆𑀧𑀺𑀢𑀸 𑀦𑁂𑀭𑀬𑀺𑀓𑀸 𑀤𑀼𑀓𑁆𑀔𑁂𑀦;

𑀧𑀼𑀭𑀸𑀡𑀸𑀦𑀺 𑀅𑀦𑀼𑀢𑁆𑀣𑀼𑀦’’𑀦𑁆𑀢𑀺 𑀘 𑀧𑀬𑁄𑀕𑁄.

𑀤𑀼 𑀳𑀺𑀁𑀲𑀸𑀬𑀁. 𑀤𑀼𑀦𑀸𑀢𑀺. 𑀫𑀺𑀢𑁆𑀢𑀤𑁆𑀤𑀼. 𑀤𑀼𑀫𑁄.

𑀏𑀢𑁆𑀣 𑀫𑀺𑀢𑁆𑀢𑀤𑁆𑀤𑀽𑀢𑀺 𑀫𑀺𑀢𑁆𑀢𑀁 𑀤𑀼𑀦𑀸𑀢𑀺 𑀳𑀺𑀁𑀲𑀢𑀺 𑀤𑀼𑀩𑁆𑀪𑀢𑀻𑀢𑀺 𑀫𑀺𑀢𑁆𑀢𑀤𑁆𑀤𑀼. 𑀅𑀢𑁆𑀭 ‘‘𑀯𑁂𑀤𑀸 𑀦 𑀢𑀸𑀡𑀸𑀬 𑀪𑀯𑀦𑁆𑀢𑀺 𑀢𑀲𑁆𑀲, 𑀫𑀺𑀢𑁆𑀢𑀤𑁆𑀤𑀼𑀦𑁄 𑀪𑀽𑀦𑀳𑀼𑀦𑁄 𑀦𑀭𑀲𑁆𑀲𑀸’’𑀢𑀺 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. 𑀤𑀼𑀫𑁄𑀢𑀺 𑀤𑀼𑀦𑀺𑀬𑀢𑀺 𑀕𑁂𑀳𑀲𑀫𑁆𑀪𑀸𑀭𑀸𑀤𑀺𑀅𑀢𑁆𑀣𑀸𑀬 𑀳𑀺𑀁𑀲𑀺𑀬𑀢𑀺 𑀙𑀺𑀦𑁆𑀤𑀺𑀬𑀢𑀺, 𑀧𑀡𑁆𑀡𑀧𑀼𑀧𑁆𑀨𑀸𑀤𑀺𑀅𑀢𑁆𑀣𑀺𑀓𑁂𑀳𑀺 𑀯𑀸 𑀧𑀡𑁆𑀡𑀧𑀼𑀧𑁆𑀨𑀸𑀤𑀺𑀳𑀭𑀡𑁂𑀦 𑀧𑀻𑀴𑀺𑀬𑀢𑀻𑀢𑀺 𑀤𑀼𑀫𑁄.

𑀥𑀽 𑀓𑀫𑁆𑀧𑀦𑁂. 𑀥𑀼𑀦𑀸𑀢𑀺. 𑀥𑀽𑀫𑁄, 𑀥𑁄𑀦𑀸, 𑀥𑁄𑀦𑁄, 𑀥𑀼𑀢𑁄. 𑀥𑀼𑀦𑀦𑁆𑀢𑁄 𑀯𑀸𑀓𑀘𑀻𑀭𑀸𑀦𑀺, 𑀕𑀘𑁆𑀙𑀸𑀫𑀺 𑀅𑀫𑁆𑀩𑀭𑁂 𑀢𑀤𑀸.

𑀢𑀢𑁆𑀣 ¶ 𑀥𑀽𑀫𑁄𑀢𑀺 𑀥𑀼𑀦𑀸𑀢𑀺 𑀓𑀫𑁆𑀧𑀢𑀻𑀢𑀺 𑀥𑀽𑀫𑁄. 𑀥𑀽𑀫𑀲𑀤𑁆𑀤𑁄 𑀓𑁄𑀥𑁂 𑀢𑀡𑁆𑀳𑀸𑀬 𑀯𑀺𑀢𑀓𑁆𑀓𑁂 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀥𑀫𑁆𑀫𑀤𑁂𑀲𑀦𑀸𑀬𑀁 𑀧𑀓𑀢𑀺𑀥𑀽𑀫𑁂𑀢𑀺 𑀇𑀫𑁂𑀲𑀼 𑀅𑀢𑁆𑀣𑁂𑀲𑀼 𑀯𑀢𑁆𑀢𑀢𑀺. ‘‘𑀓𑁄𑀥𑁄 𑀥𑀽𑀫𑁄 𑀪𑀲𑁆𑀫𑀸𑀦𑀺 𑀫𑁄𑀲𑀯𑀚𑁆𑀚’’𑀦𑁆𑀢𑀺 𑀏𑀢𑁆𑀣 𑀳𑀺 𑀓𑁄𑀥𑁂 𑀯𑀢𑁆𑀢𑀢𑀺. ‘‘𑀇𑀘𑁆𑀙𑀸 𑀥𑀽𑀫𑀸𑀬𑀺𑀢𑁄 𑀲𑀤𑀸’’𑀢𑀺 𑀏𑀢𑁆𑀣 𑀢𑀡𑁆𑀳𑀸𑀬𑀁. ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀥𑀽𑀫𑀸𑀬𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻’’𑀢𑀺 𑀏𑀢𑁆𑀣 𑀯𑀺𑀢𑀓𑁆𑀓𑁂.

‘‘𑀧𑀗𑁆𑀓𑁄 𑀘 𑀓𑀸𑀫𑀸 𑀧𑀮𑀺𑀧𑁄 𑀘 𑀓𑀸𑀫𑀸,

𑀪𑀬𑀜𑁆𑀘 𑀫𑁂𑀢𑀁 𑀢𑀺𑀫𑀼𑀮𑀁 𑀧𑀯𑀼𑀢𑁆𑀢𑀁;

𑀭𑀚𑁄 𑀘 𑀥𑀽𑀫𑁄 𑀘 𑀫𑀬𑀸 𑀧𑀓𑀸𑀲𑀺𑀢𑁄,

𑀳𑀺𑀢𑁆𑀯𑀸 𑀢𑀼𑀯𑀁 𑀧𑀩𑁆𑀩𑀚 𑀩𑁆𑀭𑀳𑁆𑀫𑀤𑀢𑁆𑀢𑀸’’𑀢𑀺

𑀏𑀢𑁆𑀣 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼. ‘‘𑀥𑀽𑀫𑀁 𑀓𑀢𑁆𑀢𑀸 𑀳𑁄𑀢𑀻’’𑀢𑀺 𑀏𑀢𑁆𑀣 𑀥𑀫𑁆𑀫𑀤𑁂𑀲𑀦𑀸𑀬𑀁. ‘‘𑀥𑀚𑁄 𑀭𑀣𑀲𑁆𑀲 𑀧𑀜𑁆𑀜𑀸𑀦𑁄, 𑀥𑀽𑀫𑁄 𑀧𑀜𑁆𑀜𑀸𑀦𑀫𑀕𑁆𑀕𑀺𑀦𑁄’’𑀢𑀺 𑀏𑀢𑁆𑀣 𑀧𑀓𑀢𑀺𑀥𑀽𑀫𑁂. 𑀇𑀘𑁆𑀘𑁂𑀯𑀁 𑁋

𑀓𑁄𑀥𑀢𑀡𑁆𑀳𑀸𑀯𑀺𑀢𑀓𑁆𑀓𑁂𑀲𑀼, 𑀧𑀜𑁆𑀘𑀓𑀸𑀫𑀕𑀼𑀡𑁂𑀲𑀼 𑀘;

𑀤𑁂𑀲𑀦𑀸𑀬𑀜𑁆𑀘 𑀧𑀓𑀢𑀺-𑀥𑀽𑀫𑁂 𑀥𑀽𑀫𑁄 𑀧𑀯𑀢𑁆𑀢𑀢𑀺.

𑀥𑁄𑀦𑀸𑀢𑀺 𑀧𑀜𑁆𑀜𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀦𑀺𑀤𑁆𑀤𑁂𑀲𑁂 ‘‘𑀥𑁄𑀦𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀓𑀺𑀁𑀓𑀸𑀭𑀡𑀸 𑀥𑁄𑀦𑀸𑀢𑀺 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸? 𑀬𑀁 𑀢𑀸𑀬 𑀧𑀜𑁆𑀜𑀸𑀬 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀥𑀼𑀢𑀜𑁆𑀘 𑀥𑁄𑀢𑀜𑁆𑀘 𑀲𑀦𑁆𑀥𑁄𑀢𑀜𑁆𑀘 𑀦𑀺𑀤𑁆𑀥𑁄𑀢𑀜𑁆𑀘, 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀥𑀼𑀢𑀜𑁆𑀘 𑀥𑁄𑀢𑀜𑁆𑀘 𑀲𑀦𑁆𑀥𑁄𑀢𑀜𑁆𑀘 𑀦𑀺𑀤𑁆𑀥𑁄𑀢𑀜𑁆𑀘. 𑀢𑀁𑀓𑀸𑀭𑀡𑀸 𑀥𑁄𑀦𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸. 𑀅𑀣 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀥𑀼𑀢𑀸 𑀘 𑀥𑁄𑀢𑀸 𑀘 𑀲𑀦𑁆𑀥𑁄𑀢𑀸 𑀘 𑀦𑀺𑀤𑁆𑀥𑁄𑀢𑀸 𑀘, 𑀢𑀁𑀓𑀸𑀭𑀡𑀸 𑀥𑁄𑀦𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸’’𑀢𑀺. ‘‘𑀥𑁄𑀦𑀲𑁆𑀲 𑀳𑀺 𑀦𑀢𑁆𑀣𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂, 𑀧𑀓𑀧𑁆𑀧𑀺𑀢𑀸 𑀤𑀺𑀝𑁆𑀞𑀺 𑀪𑀯𑀸𑀪𑀯𑁂𑀲𑀽’’𑀢𑀺 𑀅𑀬𑀫𑁂𑀢𑁆𑀣 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁 ¶ . 𑀅𑀢𑁆𑀭 𑀥𑁄𑀦𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀥𑁄𑀦𑁄, 𑀢𑀲𑁆𑀲 𑀥𑁄𑀦𑀲𑁆𑀲𑀸𑀢𑀺 𑀦𑀺𑀩𑁆𑀩𑀘𑀦𑀁. 𑀥𑀸𑀢𑀽𑀦𑀫𑀦𑁂𑀓𑀢𑁆𑀣𑀢𑀸𑀬 𑀥𑀽𑀥𑀸𑀢𑀼 𑀓𑀫𑁆𑀧𑀦𑀢𑁆𑀣𑁂𑀧𑀺 𑀥𑁄𑀯𑀦𑀢𑁆𑀣𑁂𑀧𑀺 𑀯𑀢𑁆𑀢𑀢𑀺.

𑀫𑀼𑀦 𑀜𑀸𑀡𑁂. 𑀫𑀼𑀦𑀸𑀢𑀺. 𑀫𑁄𑀦𑀁, 𑀫𑀼𑀦𑀺. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀥𑀸𑀢𑀼𑀬𑀸 𑀆𑀔𑁆𑀬𑀸𑀢𑀢𑁆𑀢𑁂 𑀏𑀓𑀦𑁆𑀢𑁂𑀦 𑀅𑀦𑁆𑀢𑀮𑁄𑀧𑁄 𑀪𑀯𑀢𑀺. 𑀲𑁄𑀪𑀺𑀢𑀢𑁆𑀣𑁂𑀭𑀕𑀸𑀣𑀸𑀬𑀁 𑀧𑀦 𑀅𑀦𑀸𑀕𑀢𑀯𑀘𑀦𑁂 𑀉𑀓𑀸𑀭𑀲𑁆𑀲 𑀯𑀼𑀤𑁆𑀥𑀺𑀯𑀲𑁂𑀦 ‘‘𑀅𑀳𑀁 𑀫𑁄𑀦𑁂𑀦 𑀫𑁄𑀦𑀺𑀲𑁆𑀲’’𑀦𑁆𑀢𑀺 𑀭𑀽𑀧𑀦𑁆𑀢𑀭𑀜𑁆𑀘 𑀤𑀺𑀲𑁆𑀲𑀢𑀺. 𑀢𑀢𑁆𑀣 𑀫𑁄𑀦𑀺𑀲𑁆𑀲𑀦𑁆𑀢𑀺 𑀚𑀸𑀦𑀺𑀲𑁆𑀲𑀁. 𑀦𑀸𑀫𑀢𑁆𑀢𑁂 𑀅𑀦𑁆𑀢𑀮𑁄𑀧𑁄 𑀦 𑀳𑁄𑀢𑀺. 𑀢𑀢𑁆𑀣 𑀫𑁄𑀦𑀦𑁆𑀢𑀺 𑀓𑀺𑀜𑁆𑀘𑀸𑀧𑀺 ‘‘𑀦 𑀫𑁄𑀦𑁂𑀦 𑀫𑀼𑀦𑀺 𑀳𑁄𑀢𑀻’’𑀢𑀺 𑀏𑀢𑁆𑀣 𑀢𑀼𑀡𑁆𑀳𑀻𑀪𑀸𑀯𑁄 ‘‘𑀫𑁄𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸𑀧𑀺 𑀇𑀥 ‘‘𑀜𑀸𑀡𑁂’’𑀢𑀺 𑀯𑀘𑀦𑀢𑁄 𑀦 𑀲𑁄 𑀅𑀥𑀺𑀧𑁆𑀧𑁂𑀢𑁄, 𑀜𑀸𑀡𑀫𑁂𑀯𑀸𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀸𑀲𑀗𑁆𑀔𑀸𑀢𑀁 𑀫𑀕𑁆𑀕𑀜𑀸𑀡𑀫𑁄𑀦𑀫𑁆𑀧𑀺 𑀕𑀳𑁂𑀢𑀩𑁆𑀩𑀁. 𑀫𑀼𑀦𑀻𑀢𑀺 𑀫𑀼𑀦𑀸𑀢𑀺 𑀚𑀸𑀦𑀸𑀢𑀺 𑀳𑀺𑀢𑀸𑀳𑀺𑀢𑀁 𑀧𑀭𑀺𑀘𑁆𑀙𑀺𑀦𑁆𑀤𑀢𑀻𑀢𑀺 𑀫𑀼𑀦𑀺. 𑀅𑀣 𑀯𑀸 𑀔𑀦𑁆𑀥𑀸𑀤𑀺𑀮𑁄𑀓𑁂 𑀢𑀼𑀮𑀁 𑀆𑀭𑁄𑀧𑁂𑀢𑁆𑀯𑀸 𑀫𑀺𑀦𑀦𑁆𑀢𑁄 𑀯𑀺𑀬 ‘‘𑀇𑀫𑁂 𑀅𑀚𑁆𑀛𑀢𑁆𑀢𑀺𑀓𑀸 𑀔𑀦𑁆𑀥𑀸, 𑀇𑀫𑁂 𑀩𑀸𑀳𑀺𑀭𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀇𑀫𑁂 𑀉𑀪𑁄 𑀅𑀢𑁆𑀣𑁂 𑀫𑀼𑀦𑀸𑀢𑀻𑀢𑀺 𑀫𑀼𑀦𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀦 𑀫𑁄𑀦𑁂𑀦 𑀫𑀼𑀦𑀺 𑀳𑁄𑀢𑀺, 𑀫𑀽𑀴𑁆𑀳𑀭𑀽𑀧𑁄 𑀅𑀯𑀺𑀤𑁆𑀤𑀲𑀼;

𑀬𑁄 𑀘 𑀢𑀼𑀮𑀁𑀯 𑀧𑀕𑁆𑀕𑀬𑁆𑀳, 𑀯𑀭𑀫𑀸𑀤𑀸𑀬 𑀧𑀡𑁆𑀟𑀺𑀢𑁄.

𑀧𑀸𑀧𑀸𑀦𑀺 𑀧𑀭𑀺𑀯𑀚𑁆𑀚𑁂𑀢𑀺, 𑀲 𑀫𑀼𑀦𑀺 𑀢𑁂𑀦 𑀲𑁄 𑀫𑀼𑀦𑀺;

𑀬𑁄 𑀫𑀼𑀦𑀸𑀢𑀺 𑀉𑀪𑁄 𑀮𑁄𑀓𑁂, 𑀫𑀼𑀦𑀺 𑀢𑁂𑀦 𑀧𑀯𑀼𑀘𑁆𑀘𑀢𑀻’’𑀢𑀺.

𑀅𑀧𑀭𑀸𑀧𑁂𑀢𑁆𑀣 𑀪𑀯𑀢𑀺 𑀅𑀢𑁆𑀣𑀯𑀺𑀪𑀸𑀯𑀦𑀸. 𑀫𑀼𑀦𑀻𑀢𑀺 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁, 𑀓𑀸𑀬𑀫𑁄𑀦𑁂𑀬𑁆𑀬𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀁, 𑀢𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀼𑀕𑁆𑀕𑀮𑁄 ‘‘𑀫𑀼𑀦𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀧𑀦𑁂𑀲 𑀅𑀕𑀸𑀭𑀺𑀬𑀫𑀼𑀦𑀺 𑀅𑀦𑀕𑀸𑀭𑀺𑀬𑀫𑀼𑀦𑀺 𑀲𑁂𑀓𑁆𑀔𑀫𑀼𑀦𑀺 𑀅𑀲𑁂𑀓𑁆𑀔𑀫𑀼𑀦𑀺 𑀧𑀘𑁆𑀘𑁂𑀓𑀫𑀼𑀦𑀺 𑀫𑀼𑀦𑀺𑀫𑀼𑀦𑀻𑀢𑀺 𑀅𑀦𑁂𑀓𑀯𑀺𑀥𑁄 ¶ . 𑀢𑀢𑁆𑀣 𑀅𑀕𑀸𑀭𑀺𑀬𑀫𑀼𑀦𑀻𑀢𑀺 𑀕𑀺𑀳𑀺𑀧𑀺 𑀆𑀕𑀢𑀨𑀮𑁄 𑀯𑀺𑀜𑁆𑀜𑀸𑀢𑀲𑀸𑀲𑀦𑁄. 𑀅𑀦𑀕𑀸𑀭𑀺𑀬𑀫𑀼𑀦𑀻𑀢𑀺 𑀢𑀣𑀸𑀭𑀽𑀧𑁄𑀯 𑀧𑀩𑁆𑀩𑀚𑀺𑀢𑁄. 𑀲𑁂𑀓𑁆𑀔𑀫𑀼𑀦𑀻𑀢𑀺 𑀲𑀢𑁆𑀢 𑀲𑁂𑀓𑁆𑀔𑀸. 𑀅𑀲𑁂𑀓𑁆𑀔𑀫𑀼𑀦𑀻𑀢𑀺 𑀔𑀻𑀡𑀸𑀲𑀯𑁄. 𑀧𑀘𑁆𑀘𑁂𑀓𑀫𑀼𑀦𑀻𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑁄. 𑀫𑀼𑀦𑀺𑀫𑀼𑀦𑀻𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀢𑀣𑀸 𑀳𑀺 𑀆𑀬𑀲𑁆𑀫𑀸𑀧𑀺 𑀲𑀸𑀭𑀺𑀧𑀼𑀢𑁆𑀢𑁄 𑀆𑀳 ‘‘𑀫𑀼𑀦𑀻𑀢𑀺 𑀯𑀼𑀘𑁆𑀘𑀢𑀺 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺.

𑀧𑀽 𑀧𑀯𑀦𑁂. 𑀧𑀯𑀦𑀁 𑀲𑁄𑀥𑀦𑀁. 𑀧𑀼𑀦𑀸𑀢𑀺. 𑀧𑀼𑀜𑁆𑀜𑀁, 𑀧𑀼𑀢𑁆𑀢𑁄, 𑀤𑀦𑁆𑀢𑀧𑁄𑀡𑀁.

𑀏𑀢𑁆𑀣 𑀘 𑀧𑀼𑀜𑁆𑀜𑀦𑁆𑀢𑀺 𑀅𑀢𑁆𑀢𑀦𑁄 𑀓𑀸𑀭𑀓𑀁 𑀧𑀼𑀦𑀸𑀢𑀺 𑀲𑁄𑀥𑁂𑀢𑀻𑀢𑀺 𑀧𑀼𑀜𑁆𑀜𑀁. 𑀅𑀣 𑀯𑀸 𑀬𑀢𑁆𑀣 𑀲𑀬𑀁 𑀉𑀧𑁆𑀧𑀦𑁆𑀦𑀁 𑀢𑀁𑀲𑀦𑁆𑀢𑀸𑀦𑀁 𑀧𑀼𑀦𑀸𑀢𑀺 𑀯𑀺𑀲𑁄𑀥𑁂𑀢𑀻𑀢𑀺 𑀧𑀼𑀜𑁆𑀜𑀁. 𑀓𑀺𑀦𑁆𑀢𑀁? 𑀲𑀼𑀘𑀭𑀺𑀢𑀁 𑀓𑀼𑀲𑀮𑀓𑀫𑁆𑀫𑀁. 𑀲𑀓𑀫𑁆𑀫𑀺𑀓𑀢𑁆𑀢𑀸 𑀥𑀸𑀢𑀼𑀲𑁆𑀲 𑀓𑀸𑀭𑀺𑀢𑀯𑀲𑁂𑀦 𑀅𑀢𑁆𑀣𑀯𑀺𑀯𑀭𑀡𑀁 𑀮𑀩𑁆𑀪𑀢𑀺. 𑀧𑀼𑀢𑁆𑀢𑁄𑀢𑀺 𑀅𑀢𑁆𑀢𑀦𑁄 𑀓𑀼𑀮𑀁 𑀧𑀼𑀦𑀸𑀢𑀺 𑀲𑁄𑀥𑁂𑀢𑀻𑀢𑀺 𑀧𑀼𑀢𑁆𑀢𑁄. 𑀏𑀯𑀜𑁆𑀘 𑀲𑀢𑀺 𑀳𑀻𑀦𑀚𑀘𑁆𑀘𑀸𑀦𑀁 𑀘𑀡𑁆𑀟𑀸𑀮𑀸𑀤𑀻𑀦𑀁 𑀧𑀼𑀢𑁆𑀢𑁄 𑀦𑀸𑀫 𑀦 𑀪𑀯𑁂𑀬𑁆𑀬𑀸𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀤𑁆𑀤𑀸𑀦𑀫𑀢𑁆𑀣𑀓𑀣𑀦𑀲𑁆𑀲 𑀦𑀸𑀦𑀧𑁆𑀧𑀓𑀸𑀭𑁂𑀦 𑀧𑀯𑀢𑁆𑀢𑀺𑀢𑁄, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀧𑀺𑀢𑀼 𑀳𑀤𑀬𑀁 𑀧𑀽𑀭𑁂𑀢𑀻𑀢𑀺 𑀧𑀼𑀢𑁆𑀢𑁄𑀢𑀺 𑀏𑀯𑀫𑀸𑀤𑀺𑀦𑀸𑀧𑀺 𑀦𑀺𑀩𑁆𑀩𑀘𑀦𑀁 𑀕𑀳𑁂𑀢𑀩𑁆𑀩𑀫𑁂𑀯. 𑀦𑀸𑀦𑀸𑀥𑀸𑀢𑀼𑀯𑀲𑁂𑀦𑀧𑀺 𑀳𑀺 𑀧𑀤𑀸𑀦𑀺 𑀲𑀺𑀤𑁆𑀥𑀺𑀁 𑀲𑀫𑀼𑀧𑀕𑀘𑁆𑀙𑀦𑁆𑀢𑀺.

𑀧𑀼𑀢𑁆𑀢𑁄 𑀘 𑀦𑀸𑀫 𑀅𑀢𑁆𑀭𑀚𑁄 𑀔𑁂𑀢𑁆𑀭𑀚𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀤𑀺𑀦𑁆𑀦𑀓𑁄𑀢𑀺 𑀘𑀢𑀼𑀩𑁆𑀩𑀺𑀥𑁄. 𑀢𑀢𑁆𑀣 𑀅𑀢𑁆𑀢𑀸𑀦𑀁 𑀧𑀝𑀺𑀘𑁆𑀘 𑀚𑀸𑀢𑁄 𑀅𑀢𑁆𑀭𑀚𑁄 𑀦𑀸𑀫. 𑀲𑀬𑀦𑀧𑀻𑀞𑁂 𑀧𑀮𑁆𑀮𑀗𑁆𑀓𑁂 𑀉𑀭𑁂𑀢𑀺 𑀏𑀯𑀫𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑁄 𑀔𑁂𑀢𑁆𑀭𑀚𑁄 𑀦𑀸𑀫. 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀼𑀕𑁆𑀕𑀡𑁆𑀳𑀦𑀓𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀦𑀸𑀫. 𑀧𑁄𑀲𑀸𑀧𑀦𑀢𑁆𑀣𑀸𑀬 𑀤𑀺𑀦𑁆𑀦𑁄 𑀤𑀺𑀦𑁆𑀦𑀓𑁄 𑀦𑀸𑀫 𑀤𑀦𑁆𑀢𑀧𑁄𑀡𑀦𑁆𑀢𑀺 𑀤𑀦𑁆𑀢𑁂 𑀧𑀼𑀦𑀦𑁆𑀢𑀺 𑀯𑀺𑀲𑁄𑀥𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀤𑀦𑁆𑀢𑀧𑁄𑀡𑀁, 𑀤𑀦𑁆𑀢𑀓𑀝𑁆𑀞𑀁.

𑀧𑀻 𑀢𑀧𑁆𑀧𑀦𑀓𑀦𑁆𑀢𑀻𑀲𑀼. 𑀧𑀺𑀡𑀸𑀢𑀻𑀢𑀺 𑀧𑀻𑀢𑀺. 𑀏𑀢𑁆𑀣 𑀘 𑀧𑀻𑀢𑀻𑀢𑀺 𑀧𑀻𑀡𑀦𑀁 𑀧𑀻𑀢𑀺, 𑀢𑀧𑁆𑀧𑀦𑀁 𑀓𑀦𑁆𑀢𑀻𑀢𑀺 𑀘 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀁 𑀪𑀸𑀯𑀯𑀲𑁂𑀦 𑀦𑀺𑀩𑁆𑀩𑀘𑀦𑀁. 𑀇𑀤𑀁 ¶ 𑀧𑀦 𑀳𑁂𑀢𑀼𑀓𑀢𑁆𑀢𑀼𑀯𑀲𑁂𑀦 𑀧𑀺𑀡𑀬𑀢𑀻𑀢𑀺 𑀧𑀻𑀢𑀺, 𑀢𑀧𑁆𑀧𑁂𑀢𑀻𑀢𑀺 𑀅𑀢𑁆𑀣𑁄.

𑀲𑀸 𑀧𑀦𑁂𑀲𑀸 𑀔𑀼𑀤𑁆𑀤𑀓𑀸𑀧𑀻𑀢𑀺 𑀔𑀡𑀺𑀓𑀸𑀧𑀻𑀢𑀺 𑀑𑀓𑁆𑀓𑀦𑁆𑀢𑀺𑀓𑀸𑀧𑀻𑀢𑀺 𑀉𑀩𑁆𑀩𑁂𑀕𑀸𑀧𑀻𑀢𑀺 𑀨𑀭𑀡𑀸𑀧𑀻𑀢𑀻𑀢𑀺 𑀧𑀜𑁆𑀘𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀔𑀼𑀤𑁆𑀤𑀓𑀸𑀧𑀻𑀢𑀺 𑀲𑀭𑀻𑀭𑁂 𑀮𑁄𑀫𑀳𑀁𑀲𑀦𑀫𑀢𑁆𑀢𑀫𑁂𑀯 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺. 𑀔𑀡𑀺𑀓𑀸𑀧𑀻𑀢𑀺 𑀔𑀡𑁂 𑀔𑀡𑁂 𑀯𑀺𑀚𑁆𑀚𑀼𑀧𑁆𑀧𑀸𑀤𑀲𑀤𑀺𑀲𑀸 𑀳𑁄𑀢𑀺. 𑀑𑀓𑁆𑀓𑀦𑁆𑀢𑀺𑀓𑀸𑀧𑀻𑀢𑀺 𑀲𑀫𑀼𑀤𑁆𑀤𑀢𑀻𑀭𑀁 𑀯𑀻𑀘𑀺 𑀯𑀺𑀬 𑀓𑀸𑀬𑀁 𑀑𑀓𑁆𑀓𑀫𑀺𑀢𑁆𑀯𑀸 𑀑𑀓𑁆𑀓𑀫𑀺𑀢𑁆𑀯𑀸 𑀪𑀺𑀚𑁆𑀚𑀢𑀺. 𑀉𑀩𑁆𑀩𑁂𑀕𑀸𑀧𑀻𑀢𑀺 𑀩𑀮𑀯𑀢𑀻 𑀳𑁄𑀢𑀺 𑀓𑀸𑀬𑀁 𑀉𑀤𑁆𑀥𑀕𑁆𑀕𑀁 𑀓𑀢𑁆𑀯𑀸 𑀆𑀓𑀸𑀲𑁂 𑀮𑀗𑁆𑀖𑀸𑀧𑀦𑀧𑁆𑀧𑀫𑀸𑀡𑀸 𑀳𑁄𑀢𑀺. 𑀨𑀭𑀡𑀸𑀧𑀻𑀢𑀺𑀬𑀸 𑀧𑀦 𑀉𑀧𑁆𑀧𑀦𑁆𑀦𑀸𑀬 𑀲𑀓𑀮𑀲𑀭𑀻𑀭𑀁 𑀥𑀫𑀺𑀢𑁆𑀯𑀸 𑀧𑀽𑀭𑀺𑀢𑀯𑀢𑁆𑀣𑀺 𑀯𑀺𑀬 𑀫𑀳𑀢𑀸 𑀉𑀤𑀓𑁄𑀖𑁂𑀦 𑀧𑀓𑁆𑀔𑀦𑁆𑀤𑀧𑀩𑁆𑀩𑀢𑀓𑀼𑀘𑁆𑀙𑀺 𑀯𑀺𑀬 𑀘 𑀅𑀦𑀼𑀧𑀭𑀺𑀨𑀼𑀝𑀁 𑀳𑁄𑀢𑀺, 𑀏𑀯𑀁 𑀧𑀜𑁆𑀘𑀯𑀺𑀥𑀸 𑀧𑀻𑀢𑀺, 𑀲𑀸 𑀲𑀫𑁆𑀧𑀺𑀬𑀸𑀬𑀦𑀮𑀓𑁆𑀔𑀡𑀢𑁆𑀢𑀸 ‘‘𑀧𑀺𑀡𑀸𑀢𑀻’’𑀢𑀺 𑀧𑀻𑀢𑀻𑀢𑀺 𑀲𑀼𑀤𑁆𑀥𑀓𑀢𑁆𑀢𑀼𑀯𑀲𑁂𑀦𑀧𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺. 𑀏𑀢𑁆𑀣 ‘‘𑀧𑀺𑀬𑀸𑀬𑀢𑀺, 𑀧𑀺𑀢𑀸, 𑀧𑀺𑀬𑁄, 𑀧𑁂𑀫𑁄’’𑀢𑀺𑀆𑀤𑀻𑀦𑀺 𑀧𑀻𑀥𑀸𑀢𑀼𑀬𑀸 𑀏𑀯 𑀭𑀽𑀧𑀸𑀦𑀺. 𑀢𑀢𑁆𑀣 ‘‘𑀧𑀼𑀢𑁆𑀢𑀁 𑀧𑀺𑀬𑀸𑀬𑀢𑀻𑀢𑀺 𑀧𑀺𑀢𑀸’’𑀢𑀺 𑀯𑀤𑀦𑁆𑀢𑀺. 𑀧𑀺𑀬𑀸𑀬𑀺𑀢𑀩𑁆𑀩𑁄𑀢𑀺 𑀧𑀺𑀬𑁄. 𑀧𑁂𑀫𑀦𑀁 𑀧𑁂𑀫𑁄.

𑀫𑀸 𑀧𑀭𑀺𑀫𑀸𑀡𑁂. 𑀫𑀺𑀦𑀸𑀢𑀺. 𑀫𑀸𑀦𑀁, 𑀧𑀭𑀺𑀫𑀸𑀡𑀁, 𑀫𑀢𑁆𑀢𑀁, 𑀫𑀢𑁆𑀢𑀸, 𑀫𑀦𑁄, 𑀯𑀺𑀫𑀸𑀦𑀁, 𑀫𑀺𑀦𑀺𑀢𑀩𑁆𑀩𑀁, 𑀫𑁂𑀢𑀩𑁆𑀩𑀁, 𑀙𑀸𑀬𑀸 𑀫𑁂𑀢𑀩𑁆𑀩𑀸. 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀅𑀦𑀻𑀬𑀧𑀘𑁆𑀘𑀬𑁄 𑀦 𑀮𑀩𑁆𑀪𑀢𑀺.

𑀏𑀢𑁆𑀣 𑀫𑀦𑁄𑀢𑀺 𑀏𑀓𑀸𑀬 𑀦𑀸𑀴𑀺𑀬𑀸 𑀏𑀓𑀸𑀬 𑀘 𑀢𑀼𑀮𑀸𑀬 𑀫𑀺𑀦𑀫𑀸𑀦𑁄 𑀯𑀺𑀬 𑀆𑀭𑀫𑁆𑀫𑀡𑀁 𑀫𑀺𑀦𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀢𑀻𑀢𑀺 𑀫𑀦𑁄. 𑀯𑀺𑀲𑁂𑀲𑀢𑁄 𑀫𑀺𑀦𑀺𑀬𑀢𑁂 𑀧𑀭𑀺𑀘𑁆𑀙𑀺𑀦𑁆𑀤𑀺𑀬𑀢𑁂𑀢𑀺 𑀯𑀺𑀫𑀸𑀦𑀁, 𑀤𑁂𑀯𑀸𑀦𑀁 𑀧𑀼𑀜𑁆𑀜𑀩𑀮𑁂𑀦 𑀦𑀺𑀩𑁆𑀩𑀢𑁆𑀢𑀩𑁆𑀬𑀫𑁆𑀳𑀁 𑀤𑁂𑀯𑀦𑀺𑀓𑁂𑀢𑀁. 𑀬𑀁 𑀯𑀺𑀫𑀸𑀦𑀁 𑀉𑀧𑀲𑁄𑀪𑀺𑀢𑀁, 𑀧𑀪𑀸𑀲𑀢𑀺𑀫𑀺𑀤𑀁 𑀩𑁆𑀬𑀫𑁆𑀳𑀦𑁆𑀢𑀺 𑀘 𑀆𑀤𑀺𑀦𑀸 𑀣𑁄𑀫𑀺𑀬𑀢𑀺.

𑀫𑀻 𑀳𑀺𑀁𑀲𑀸𑀬𑀁. 𑀫𑀺𑀦𑀸𑀢𑀺. 𑀫𑀻𑀦𑁄, 𑀓𑀼𑀫𑀻𑀦𑀁.

𑀏𑀢𑁆𑀣 ¶ 𑀫𑀻𑀦𑁄𑀢𑀺 𑀫𑀘𑁆𑀙𑁄. 𑀫𑀘𑁆𑀙𑀲𑁆𑀲 𑀳𑀺 ‘‘𑀫𑀻𑀦𑁄 𑀫𑀘𑁆𑀙𑁄 𑀅𑀫𑁆𑀩𑀼𑀚𑁄 𑀯𑀸𑀭𑀺𑀚𑁄 𑀯𑀸𑀭𑀺𑀘𑀭𑁄’’𑀢𑀺 𑀅𑀦𑁂𑀓𑀸𑀦𑀺 𑀦𑀸𑀫𑀸𑀦𑀺. 𑀯𑀺𑀲𑁂𑀲𑀦𑀸𑀫𑀸𑀦𑀺 𑀧𑀦 ‘‘𑀅𑀫𑀭𑁄 𑀔𑀮𑀺𑀲𑁄 𑀘𑀦𑁆𑀤𑀓𑀼𑀮𑁄 𑀓𑀦𑁆𑀤𑀨𑀮𑀺 𑀇𑀦𑁆𑀤𑀨𑀮𑀺 𑀇𑀦𑁆𑀤𑀯𑀮𑁄 𑀓𑀼𑀮𑀺𑀲𑁄 𑀯𑀸𑀫𑀺 𑀓𑀼𑀗𑁆𑀓𑀼𑀢𑀮𑁄 𑀓𑀡𑁆𑀟𑀺𑀓𑁄 𑀲𑀓𑀼𑀮𑁄 𑀫𑀗𑁆𑀕𑀼𑀭𑁄 𑀲𑀺𑀗𑁆𑀕𑀻 𑀲𑀢𑀯𑀗𑁆𑀓𑁄 𑀭𑁄𑀳𑀺𑀢𑁄 𑀧𑀸𑀞𑀻𑀦𑁄 𑀓𑀸𑀡𑁄 𑀲𑀯𑀗𑁆𑀓𑁄 𑀧𑀸𑀯𑀼𑀲𑁄’’ 𑀇𑀘𑁆𑀘𑁂𑀯𑀫𑀸𑀤𑀻𑀦𑀺, ‘‘𑀢𑀺𑀫𑀺 𑀢𑀺𑀫𑀺𑀗𑁆𑀕𑀮𑁄’’ 𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀘 𑀪𑀯𑀦𑁆𑀢𑀺. 𑀓𑀼𑀫𑀻𑀦𑀦𑁆𑀢𑀺 𑀓𑀼𑀘𑁆𑀙𑀺𑀢𑁂𑀦𑀸𑀓𑀸𑀭𑁂𑀦 𑀫𑀘𑁆𑀙𑁂 𑀫𑀺𑀦𑀦𑁆𑀢𑀺 𑀳𑀺𑀁𑀲𑀦𑁆𑀢𑀺 𑀏𑀢𑁂𑀦𑀸𑀢𑀺 𑀓𑀼𑀫𑀻𑀦𑀁, 𑀫𑀘𑁆𑀙𑀩𑀦𑁆𑀥𑀦𑀧𑀜𑁆𑀚𑀭𑁄. 𑀲𑁄 𑀧𑀦 𑀧𑀸𑀴𑀺𑀬𑀁 𑀓𑀼𑀫𑀻𑀦𑀲𑀤𑁆𑀤𑁂𑀦 𑀯𑀼𑀘𑁆𑀘𑀢𑀺. 𑀢𑀣𑀸 𑀳𑀺 𑁋

‘‘𑀯𑀸𑀭𑀺𑀚𑀲𑁆𑀲𑁂𑀯 𑀫𑁂 𑀲𑀢𑁄, 𑀩𑀦𑁆𑀥𑀲𑁆𑀲 𑀓𑀼𑀫𑀺𑀦𑀸𑀫𑀼𑀔𑁂;

𑀅𑀓𑁆𑀓𑁄𑀲𑀢𑀺 𑀧𑀳𑀭𑀢𑀺, 𑀧𑀺𑀬𑁂 𑀧𑀼𑀢𑁆𑀢𑁂 𑀅𑀧𑀲𑁆𑀲𑀢𑁄’’𑀢𑀺

𑀧𑀸𑀴𑀺 𑀤𑀺𑀲𑁆𑀲𑀢𑀺.

𑀫𑀽 𑀩𑀦𑁆𑀥𑀦𑁂. 𑀫𑀼𑀦𑀸𑀢𑀺. 𑀫𑀼𑀦𑀺.

𑀏𑀢𑁆𑀣 𑀫𑀼𑀦𑀻𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀫𑀼𑀦𑀸𑀢𑀺 𑀫𑀯𑀢𑀺 𑀩𑀦𑁆𑀥𑀢𑀺 𑀭𑀸𑀕𑀤𑁄𑀲𑀸𑀤𑀺𑀯𑀲𑀁 𑀕𑀦𑁆𑀢𑀼𑀁 𑀦 𑀤𑁂𑀢𑀻𑀢𑀺 𑀫𑀼𑀦𑀺.

𑀭𑀺 𑀕𑀢𑀺𑀤𑁂𑀲𑀦𑁂𑀲𑀼. 𑀭𑀺𑀓𑀸𑀢𑀺. 𑀭𑁂𑀡𑀼. 𑀦𑀓𑀸𑀭𑀲𑁆𑀲 𑀡𑀢𑁆𑀢𑀁.

𑀮𑀻 𑀲𑀺𑀮𑁂𑀲𑁂. 𑀮𑀺𑀦𑀸𑀢𑀺, 𑀦𑀺𑀮𑀺𑀦𑀸𑀢𑀺. 𑀮𑀻𑀦𑀁, 𑀲𑀮𑁆𑀮𑀻𑀦𑀁, 𑀧𑀝𑀺𑀲𑀮𑁆𑀮𑀸𑀦𑀁.

𑀯𑀻 𑀢𑀦𑁆𑀢𑀲𑀦𑁆𑀢𑀸𑀦𑁂. 𑀯𑀢𑁆𑀣𑀁 𑀯𑀺𑀦𑀸𑀢𑀺. 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀘𑀻𑀯𑀭𑀁 𑀯𑀺𑀦𑀸𑀳𑀺. 𑀓𑀫𑁆𑀫𑁂 𑁋 𑀇𑀤𑀁 𑀔𑁄 𑀆𑀯𑀼𑀲𑁄 𑀘𑀻𑀯𑀭𑀁 𑀫𑀁 𑀉𑀤𑁆𑀤𑀺𑀲𑁆𑀲 𑀯𑀺𑀬𑁆𑀬𑀢𑀺. 𑀯𑀻𑀢𑀁. 𑀲𑀼𑀯𑀻𑀢𑀁. 𑀅𑀧𑁆𑀧𑀓𑀁 𑀳𑁄𑀢𑀺 𑀯𑁂𑀢𑀩𑁆𑀩𑀁. 𑀓𑀸𑀭𑀺𑀢𑁂 ‘‘𑀯𑀸𑀬𑀸𑀧𑁂𑀢𑀺, 𑀢𑀦𑁆𑀢𑀯𑀸𑀬𑁂𑀳𑀺 𑀘𑀻𑀯𑀭𑀁 𑀯𑀸𑀬𑀸𑀧𑁂𑀲𑁆𑀲𑀸𑀫𑀸’𑀢𑀺 𑀘𑀻𑀯𑀭𑀁 𑀯𑀸𑀬𑀸𑀧𑁂𑀲𑀼𑀁’’ 𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀪𑀯𑀦𑁆𑀢𑀺.

𑀯𑀻 𑀳𑀺𑀁𑀲𑀸𑀬𑀁. 𑀯𑀺𑀦𑀸𑀢𑀺. 𑀯𑁂𑀡𑀼. 𑀯𑁂𑀡𑀽𑀢𑀺 𑀯𑀁𑀲𑁄.

𑀮𑀽 ¶ 𑀙𑁂𑀤𑀦𑁂. 𑀮𑀼𑀦𑀸𑀢𑀺. 𑀮𑁄𑀡𑀁, 𑀓𑀼𑀲𑀮𑀁, 𑀩𑀸𑀮𑁄, 𑀮𑀽𑀢𑁄.

𑀏𑀢𑁆𑀣 𑀘 𑀮𑁄𑀡𑀦𑁆𑀢𑀺 𑀮𑀼𑀦𑀸𑀢𑀺 𑀯𑀻𑀢𑀭𑀲𑀪𑀸𑀯𑀁 𑀯𑀺𑀦𑀸𑀲𑁂𑀢𑀺 𑀲𑀭𑀲𑀪𑀸𑀯𑀁 𑀓𑀭𑁄𑀢𑀻𑀢𑀺 𑀮𑁄𑀡𑀁, 𑀮𑀯𑀡𑀁. 𑀓𑀼𑀲𑁄 𑀯𑀺𑀬 𑀳𑀢𑁆𑀣𑀧𑁆𑀧𑀤𑁂𑀲𑀁 𑀅𑀓𑀼𑀲𑀮𑀥𑀫𑁆𑀫𑁂 𑀮𑀼𑀦𑀸𑀢𑀻𑀢𑀺 𑀓𑀼𑀲𑀮𑀁, 𑀅𑀦𑀯𑀚𑁆𑀚𑀇𑀝𑁆𑀞𑀯𑀺𑀧𑀸𑀓𑀮𑀓𑁆𑀔𑀡𑁄 𑀥𑀫𑁆𑀫𑁄. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑁂 𑀤𑁆𑀯𑁂 𑀅𑀢𑁆𑀣𑁂 𑀮𑀼𑀦𑀸𑀢𑀻𑀢𑀺 𑀩𑀸𑀮𑁄, 𑀅𑀯𑀺𑀤𑁆𑀯𑀸. 𑀮𑀽𑀢𑁄𑀢𑀺 𑀫𑀓𑁆𑀓𑀝𑀓𑁄 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀳𑀺 𑀲𑀼𑀢𑁆𑀢𑀁 ‘‘𑀮𑀽𑀢𑀲𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀬𑀽𑀲𑀁 𑀧𑀸𑀢𑀼𑀁 𑀧𑀝𑀗𑁆𑀕𑀫𑀓𑁆𑀔𑀺𑀓𑀸𑀤𑀻𑀦𑀁 𑀚𑀻𑀯𑀺𑀢𑀁 𑀮𑀼𑀦𑀸𑀢𑀻𑀢𑀺 𑀮𑀽𑀢𑁄.

𑀲𑀺 𑀩𑀦𑁆𑀥𑀦𑁂. 𑀲𑀺𑀦𑀸𑀢𑀺. 𑀲𑀻𑀫𑀸, 𑀲𑀻𑀲𑀁.

𑀏𑀢𑁆𑀣 𑀲𑀻𑀫𑀸𑀢𑀺 𑀲𑀺𑀦𑀻𑀬𑀢𑁂 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀓𑀫𑁆𑀫𑀯𑀸𑀘𑀸𑀬 𑀩𑀦𑁆𑀥𑀺𑀬𑀢𑁂𑀢𑀺 𑀲𑀻𑀫𑀸. 𑀲𑀸 𑀤𑀼𑀯𑀺𑀥𑀸 𑀩𑀤𑁆𑀥𑀲𑀻𑀫𑀸 𑀅𑀩𑀤𑁆𑀥𑀲𑀻𑀫𑀸𑀢𑀺. 𑀢𑀸𑀲𑀼 𑀅𑀩𑀤𑁆𑀥𑀲𑀻𑀫𑀸 𑀫𑀭𑀺𑀬𑀸𑀤𑀓𑀭𑀡𑀯𑀲𑁂𑀦 ‘‘𑀲𑀻𑀫𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀺𑀦𑀸𑀢𑀺 𑀩𑀦𑁆𑀥𑀢𑀺 𑀓𑁂𑀲𑁂 𑀫𑁄𑀴𑀺𑀓𑀭𑀡𑀯𑀲𑁂𑀦 𑀏𑀢𑁆𑀣𑀸𑀢𑀺 𑀲𑀻𑀲𑀁. 𑀅𑀜𑁆𑀜𑀸𑀦𑀺𑀧𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀲𑀸 𑀧𑀸𑀓𑁂. 𑀲𑀺𑀦𑀸𑀢𑀺.

𑀲𑀼 𑀳𑀺𑀁𑀲𑀸𑀬𑀁. 𑀲𑀼𑀡𑀸𑀢𑀺. 𑀧𑀭𑀲𑀼. 𑀧𑀭𑀁 𑀲𑀼𑀡𑀦𑁆𑀢𑀺 𑀳𑀺𑀁𑀲𑀦𑁆𑀢𑀺 𑀏𑀢𑁂𑀦𑀸𑀢𑀺 𑀧𑀭𑀲𑀼.

𑀅𑀲 𑀪𑁄𑀚𑀦𑁂. 𑀯𑀼𑀢𑁆𑀢𑀸𑀦𑀁 𑀨𑀮𑀫𑀲𑁆𑀦𑀸𑀢𑀺. 𑀅𑀲𑀦𑀁.

𑀏𑀢𑁆𑀣 𑀅𑀲𑀦𑀦𑁆𑀢𑀺 𑀆𑀳𑀸𑀭𑁄. 𑀲𑁄 𑀳𑀺 𑀅𑀲𑀺𑀬𑀢𑀺 𑀪𑀼𑀜𑁆𑀚𑀺𑀬𑀢𑀻𑀢𑀺 ‘‘𑀅𑀲𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀅𑀲𑁆𑀦𑀸𑀣 𑀔𑀸𑀤𑀣 𑀧𑀺𑀯𑀣𑀸’’𑀢𑀺 𑀇𑀤𑀫𑁂𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀓𑀺𑀮𑀺𑀲 𑀯𑀺𑀩𑀸𑀥𑀦𑁂. 𑀓𑀺𑀮𑀺𑀲𑁆𑀦𑀸𑀢𑀺. 𑀓𑀺𑀮𑁂𑀲𑁄.

𑀏𑀢𑁆𑀣 𑀘 𑀓𑀺𑀮𑁂𑀲𑁄𑀢𑀺 𑀭𑀸𑀕𑀸𑀤𑀬𑁄𑀧𑀺 𑀤𑀼𑀓𑁆𑀔𑀫𑁆𑀧𑀺 𑀯𑀼𑀘𑁆𑀘𑀢𑀺.

𑀉𑀤𑁆𑀥𑀲 𑀉𑀜𑁆𑀙𑁂. 𑀉𑀜𑁆𑀙𑁄 𑀧𑀭𑀺𑀬𑁂𑀲𑀦𑀁. 𑀉𑀤𑁆𑀥𑀲𑁆𑀦𑀸𑀢𑀺.

𑀇𑀲 ¶ 𑀅𑀪𑀺𑀓𑁆𑀔𑀡𑁂. 𑀇𑀲𑁆𑀦𑀸𑀢𑀺.

𑀯𑀺𑀲 𑀯𑀺𑀧𑁆𑀧𑀬𑁄𑀕𑁂. 𑀯𑀺𑀲𑁆𑀦𑀸𑀢𑀺. 𑀯𑀺𑀲𑀁.

𑀧𑀼𑀲 𑀲𑀺𑀦𑁂𑀳𑀲𑀯𑀦𑀧𑀽𑀭𑀡𑁂𑀲𑀼. 𑀧𑀼𑀲𑁆𑀦𑀸𑀢𑀺.

𑀧𑀼𑀲 𑀧𑁄𑀲𑀦𑁂. 𑀧𑀼𑀲𑁆𑀦𑀸𑀢𑀺.

𑀫𑀼𑀲 𑀣𑁂𑀬𑁆𑀬𑁂. 𑀫𑀼𑀲𑁆𑀦𑀸𑀢𑀺. 𑀫𑀼𑀲𑀮𑁄.

𑀓𑀺𑀬𑀸𑀤𑀻 𑀏𑀢𑁆𑀢𑀓𑀸 𑀤𑀺𑀝𑁆𑀞𑀸, 𑀥𑀸𑀢𑀯𑁄 𑀫𑁂 𑀬𑀣𑀸𑀩𑀮𑀁;

𑀲𑀼𑀢𑁆𑀢𑁂𑀲𑁆𑀯𑀜𑁆𑀜𑁂𑀧𑀺 𑀧𑁂𑀓𑁆𑀔𑀺𑀢𑁆𑀯𑀸, 𑀕𑀡𑁆𑀳𑀯𑁆𑀳𑁄 𑀅𑀢𑁆𑀣𑀬𑀼𑀢𑁆𑀢𑀺𑀢𑁄.

𑀲𑀸𑀲𑀦𑀸 𑀮𑁄𑀓𑀢𑁄 𑀘𑁂𑀢𑁂,

𑀤𑀲𑁆𑀲𑀺𑀢𑀸 𑀢𑁂𑀲𑀼 𑀮𑁄𑀓𑀢𑁄;

𑀲𑀸𑀲𑀦𑀲𑁆𑀲𑁄𑀧𑀓𑀸𑀭𑀸𑀬,

𑀯𑀼𑀢𑁆𑀢𑀸 𑀢𑀤𑀦𑀼𑀭𑀽𑀧𑀓𑀸.

𑀓𑀺𑀬𑀸𑀤𑀺𑀕𑀡𑁄𑀬𑀁.

𑀕𑀳𑀸𑀤𑀺𑀕𑀡𑀺𑀓

𑀇𑀤𑀸𑀦𑀺 𑀕𑀳𑀸𑀤𑀺𑀕𑀡𑁄 𑀯𑀼𑀘𑁆𑀘𑀢𑁂. 𑀏𑀢𑁆𑀣𑁂𑀓𑁂 𑀏𑀯𑀁 𑀫𑀜𑁆𑀜𑀦𑁆𑀢𑀺.

𑀕𑀳𑀸𑀤𑀻𑀦𑀁 𑀕𑀡𑁄 𑀦𑀸𑀫, 𑀧𑀘𑁆𑀘𑁂𑀓𑀁 𑀦𑀼𑀧𑀮𑀩𑁆𑀪𑀢𑀺;

𑀅𑀣𑀫𑁂𑀓𑁄 𑀕𑀳𑀥𑀸𑀢𑀼, 𑀕𑀳𑀸𑀤𑀻𑀦𑀁 𑀕𑀡𑁄 𑀲𑀺𑀬𑀸.

𑀬𑀢𑁄 𑀧𑁆𑀧𑀡𑁆𑀳𑀸 𑀧𑀭𑀸 𑀳𑁂𑀬𑁆𑀬𑀼𑀁, 𑀥𑀸𑀢𑀼𑀢𑁄 𑀚𑀺𑀦𑀲𑀸𑀲𑀦𑁂;

𑀢𑁂𑀧𑀺 𑀅𑀜𑁆𑀜𑁂 𑀦 𑀯𑀺𑀚𑁆𑀚𑀦𑁆𑀢𑀺, 𑀅𑀜𑁆𑀜𑀢𑁆𑀭 𑀕𑀳𑀥𑀸𑀢𑀼𑀬𑀸.

𑀇𑀢𑀺 𑀘𑀺𑀦𑁆𑀢𑀸𑀬 𑀏𑀓𑀘𑁆𑀘𑁂, 𑀕𑀳𑀥𑀸𑀢𑀼𑀁 𑀓𑀺𑀬𑀸𑀤𑀺𑀦𑀁;

𑀧𑀓𑁆𑀔𑀺𑀧𑀺𑀁𑀲𑀼 𑀕𑀡𑁂 𑀏𑀯𑀁, 𑀦 𑀯𑀤𑀺𑀁𑀲𑀼 𑀕𑀳𑀸𑀤𑀺𑀓𑀁.

𑀦 𑀢𑁂𑀲𑀁 𑀕𑀳𑀡𑀁 𑀥𑀻𑀭𑁄, 𑀕𑀡𑁆𑀳𑁂𑀬𑁆𑀬 𑀲𑀼𑀯𑀺𑀘𑀓𑁆𑀔𑀡𑁄;

𑀬𑀢𑁄 𑀓𑀘𑁆𑀘𑀸𑀬𑀦𑁂 𑀯𑀼𑀢𑁆𑀢𑁄, 𑀕𑀳𑀸𑀤𑀻𑀦𑀁 𑀕𑀡𑁄 𑀯𑀺𑀲𑀼𑀁.

‘‘𑀕𑀳𑀸𑀤𑀺𑀢𑁄 𑀧𑁆𑀧𑀡𑁆𑀳𑀸’’ 𑀇𑀢𑀺, 𑀮𑀓𑁆𑀔𑀡𑀁 𑀯𑀤𑀢𑀸 𑀳𑀺 𑀲𑁄;

𑀓𑀘𑁆𑀘𑀸𑀬𑀦𑁂𑀦 𑀕𑀭𑀼𑀦𑀸, 𑀤𑀲𑁆𑀲𑀺𑀢𑁄 𑀦𑀦𑀼 𑀲𑀸𑀲𑀦𑁂.

𑀲𑀘𑁂 ¶ 𑀯𑀺𑀲𑀼𑀁 𑀕𑀳𑀸𑀤𑀻𑀦𑀁, 𑀕𑀡𑁄 𑀦𑀸𑀫 𑀦 𑀮𑀩𑁆𑀪𑀢𑀺;

𑀕𑀳𑀸𑀤𑀺𑀤𑀻𑀧𑀓𑁂 𑀲𑀼𑀢𑁆𑀢𑁂, 𑀳𑀺𑀢𑁆𑀯𑀸𑀦 𑀩𑀸𑀳𑀺𑀭𑀁 𑀇𑀤𑀁.

‘‘𑀕𑀳𑀢𑁄 𑀧𑁆𑀧𑀡𑁆𑀳𑀸’’ 𑀇𑀘𑁆𑀘𑁂𑀯, 𑀯𑀢𑁆𑀢𑀩𑁆𑀩𑀁 𑀅𑀣 𑀯𑀸 𑀧𑀦;

‘‘𑀓𑀺𑀬𑀸𑀤𑀺𑀢𑁄 𑀦𑀸𑀧𑁆𑀧𑀡𑁆𑀳𑀸’’𑀢𑀺, 𑀓𑀸𑀢𑀩𑁆𑀩𑀁 𑀏𑀓𑀮𑀓𑁆𑀔𑀡𑀁.

𑀬𑀲𑁆𑀫𑀸 𑀢𑀣𑀸 𑀦 𑀯𑀼𑀢𑁆𑀢𑀜𑁆𑀘, 𑀦 𑀓𑀢𑀜𑁆𑀘𑁂𑀓𑀮𑀓𑁆𑀔𑀡𑀁;

𑀢𑀲𑁆𑀫𑀸 𑀅𑀬𑀁 𑀯𑀺𑀲𑀼𑀁𑀬𑁂𑀯, 𑀕𑀡𑁄 𑀇𑀘𑁆𑀘𑁂𑀯 𑀜𑀸𑀬𑀢𑀺.

‘‘𑀲𑀭𑀸 𑀲𑀭𑁂 𑀮𑁄𑀧’’𑀫𑀺𑀢𑀺-𑀆𑀤𑀻𑀦𑀺 𑀮𑀓𑁆𑀔𑀡𑀸𑀦𑀺𑀯;

𑀕𑀫𑁆𑀪𑀻𑀭𑀁 𑀮𑀓𑁆𑀔𑀡𑀁 𑀏𑀢𑀁, 𑀤𑀼𑀚𑁆𑀚𑀸𑀦𑀁 𑀢𑀓𑁆𑀓𑀕𑀸𑀳𑀺𑀦𑀸.

𑀉𑀲𑀸𑀤𑀬𑁄𑀧𑀺 𑀲𑀦𑁆𑀥𑀸𑀬, 𑀆𑀤𑀺𑀕𑁆𑀕𑀳𑁄 𑀓𑀢𑁄 𑀢𑀳𑀺𑀁;

𑀢𑀣𑀸 𑀳𑀺 ‘‘𑀉𑀡𑁆𑀳𑀸𑀧𑁂𑀢𑀻’’𑀢𑀺, 𑀆𑀤𑀺𑀭𑀽𑀧𑀸𑀦𑀺 𑀤𑀺𑀲𑁆𑀲𑀭𑁂.

𑀇𑀤𑀸𑀦𑀺 𑀧𑀸𑀓𑀝𑀁 𑀓𑀢𑁆𑀯𑀸, 𑀆𑀤𑀺𑀲𑀤𑁆𑀤𑀨𑀮𑀁 𑀅𑀳𑀁;

𑀲𑀧𑁆𑀧𑀬𑁄𑀕𑀁 𑀕𑀳𑀸𑀤𑀻𑀦𑀁, 𑀕𑀡𑀁 𑀯𑀓𑁆𑀔𑀸𑀫𑀺 𑀫𑁂 𑀲𑀼𑀡.

𑀕𑀳 𑀉𑀧𑀸𑀤𑀸𑀦𑁂. 𑀉𑀧𑀸𑀤𑀸𑀦𑀁 𑀕𑀳𑀡𑀁, 𑀦 𑀓𑀺𑀮𑁂𑀲𑀼𑀧𑀸𑀤𑀸𑀦𑀁. 𑀉𑀧𑀲𑀤𑁆𑀤𑁄 𑀳𑁂𑀢𑁆𑀣 𑀦 𑀓𑀺𑀜𑁆𑀘𑀺 𑀅𑀢𑁆𑀣𑀯𑀺𑀲𑁂𑀲𑀁 𑀯𑀤𑀢𑀺. 𑀅𑀣 𑀯𑀸 𑀓𑀸𑀬𑁂𑀦 𑀘𑀺𑀢𑁆𑀢𑁂𑀦 𑀯𑀸 𑀉𑀧𑀕𑀦𑁆𑀢𑁆𑀯𑀸 𑀆𑀤𑀸𑀦𑀁 𑀕𑀳𑀡𑀁 𑀉𑀧𑀸𑀤𑀸𑀦𑀦𑁆𑀢𑀺 𑀲𑀫𑀻𑀧𑀢𑁆𑀣𑁄 𑀉𑀧𑀲𑀤𑁆𑀤𑁄. 𑀓𑀢𑁆𑀣𑀘𑀺 𑀳𑀺 𑀉𑀧𑀲𑀤𑁆𑀤𑁄 𑀆𑀤𑀸𑀦𑀲𑀤𑁆𑀤𑀲𑀳𑀺𑀢𑁄 𑀤𑀴𑁆𑀳𑀕𑁆𑀕𑀳𑀡𑁂 𑀯𑀢𑁆𑀢𑀢𑀺 ‘‘𑀓𑀸𑀫𑀼𑀧𑀸𑀤𑀸𑀦’’𑀦𑁆𑀢𑀺𑀆𑀤𑀻𑀲𑀼. 𑀇𑀥 𑀧𑀦 𑀤𑀴𑁆𑀳𑀕𑁆𑀕𑀳𑀡𑀁 𑀯𑀸 𑀳𑁄𑀢𑀼 𑀲𑀺𑀣𑀺𑀮𑀕𑁆𑀕𑀳𑀡𑀁 𑀯𑀸, 𑀬𑀁 𑀓𑀺𑀜𑁆𑀘𑀺 𑀕𑀳𑀡𑀁 𑀉𑀧𑀸𑀤𑀸𑀦𑀫𑁂𑀯, 𑀢𑀲𑁆𑀫𑀸 𑀕𑀳𑀥𑀸𑀢𑀼 𑀕𑀳𑀡𑁂 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀖𑁂𑀧𑁆𑀧𑀢𑀺, 𑀕𑀡𑁆𑀳𑀸𑀢𑀺 𑀯𑀸. 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀅𑀥𑀺𑀕𑀡𑁆𑀳𑀸𑀢𑀺, 𑀧𑀕𑁆𑀕𑀡𑁆𑀳𑀸𑀢𑀺, 𑀦𑀺𑀕𑁆𑀕𑀡𑁆𑀳𑀸𑀢𑀺. 𑀧𑀥𑀸𑀦𑀕𑀡𑁆𑀳𑀦𑀓𑁄. 𑀕𑀡𑁆𑀳𑀺𑀢𑀼𑀁, 𑀉𑀕𑁆𑀕𑀡𑁆𑀳𑀺𑀢𑀼𑀁. 𑀕𑀡𑁆𑀳𑀺𑀢𑁆𑀯𑀸, 𑀉𑀕𑁆𑀕𑀡𑁆𑀳𑀺𑀢𑁆𑀯𑀸. 𑀅𑀜𑁆𑀜𑀣𑀸𑀧𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀅𑀳𑀁 𑀚𑀸𑀮𑀺𑀁 𑀕𑀳𑁂𑀲𑁆𑀲𑀸𑀫𑀺. 𑀕𑀳𑁂𑀢𑀼𑀁. 𑀕𑀳𑁂𑀢𑁆𑀯𑀸. 𑀉𑀕𑁆𑀕𑀸𑀳𑀓𑁄, 𑀲𑀗𑁆𑀕𑀸𑀳𑀓𑁄, 𑀅𑀚𑁆𑀛𑁄𑀕𑀸𑀴𑁆𑀳𑁄. 𑀓𑀸𑀭𑀺𑀢𑁂 ‘‘𑀕𑀡𑁆𑀳𑀸𑀧𑁂𑀢𑀺, 𑀕𑀡𑁆𑀳𑀸𑀧𑀬𑀢𑀺, 𑀅𑀜𑁆𑀜𑀢𑀭𑀁 𑀲𑀢𑀺𑀧𑀝𑁆𑀞𑀸𑀦𑀁 𑀉𑀕𑁆𑀕𑀡𑁆𑀳𑀸𑀧𑁂𑀦𑁆𑀢𑀺, 𑀲𑀤𑁆𑀥𑀺𑀁 𑀅𑀫𑀘𑁆𑀘𑀲𑀳𑀲𑁆𑀲𑁂𑀦 𑀕𑀡𑁆𑀳𑀸𑀧𑁂𑀢𑁆𑀯𑀸. 𑀉𑀧𑀚𑁆𑀛𑀁 𑀕𑀸𑀳𑀸𑀧𑁂𑀢𑀩𑁆𑀩𑁄. 𑀉𑀧𑀚𑁆𑀛𑀁 𑀕𑀸𑀳𑀸𑀧𑁂𑀢𑁆𑀯𑀸 ¶ . 𑀕𑀸𑀳𑁂𑀢𑀺, 𑀕𑀸𑀳𑀬𑀢𑀺, 𑀕𑀸𑀳𑀸𑀧𑁂𑀲𑁆𑀲𑀢𑀺. 𑀕𑀸𑀳𑀸𑀧𑀬𑀦𑁆𑀢𑀺 𑀲𑀩𑁆𑀪𑀸𑀯𑀁. 𑀕𑀸𑀳𑀓𑁄, 𑀕𑀸𑀳𑁂𑀢𑁆𑀯𑀸’’ 𑀇𑀘𑁆𑀘𑀸𑀤𑀻𑀦𑀺. 𑀓𑀫𑁆𑀫𑀦𑀺 𑁋 𑀕𑀬𑁆𑀳𑀢𑀺, 𑀲𑀗𑁆𑀕𑀬𑁆𑀳𑀢𑀺, 𑀕𑀡𑁆𑀳𑀺𑀬𑀢𑀺 𑀯𑀸. 𑀢𑀣𑀸 𑀳𑀺 ‘‘𑀕𑀡𑁆𑀳𑀺𑀬𑀦𑁆𑀢𑀺 𑀉𑀕𑁆𑀕𑀡𑁆𑀳𑀺𑀬𑀦𑁆𑀢𑀻’’𑀢𑀺 𑀦𑀺𑀤𑁆𑀤𑁂𑀲𑀧𑀸𑀴𑀺 𑀤𑀺𑀲𑁆𑀲𑀢𑀺. ‘‘𑀕𑁂𑀳𑀁, 𑀕𑀸𑀳𑁄, 𑀧𑀭𑀺𑀕𑁆𑀕𑀳𑁄, 𑀲𑀗𑁆𑀕𑀸𑀳𑀓𑁄, 𑀲𑀗𑁆𑀕𑀳𑁂𑀢𑀸’’ 𑀇𑀘𑁆𑀘𑀸𑀤𑀻𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀢𑀢𑁆𑀭 𑀅𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢𑀧𑀤𑀸𑀦𑀁 ‘‘𑀖𑁂𑀧𑁆𑀧𑀢𑀺, 𑀖𑁂𑀧𑁆𑀧𑀦𑁆𑀢𑀺. 𑀖𑁂𑀧𑁆𑀧𑀲𑀻’’𑀢𑀺 𑀘 ‘‘𑀕𑀡𑁆𑀳𑀢𑀺, 𑀕𑀡𑁆𑀳𑀦𑁆𑀢𑀺. 𑀕𑀡𑁆𑀳𑀲𑀻’’𑀢𑀺 𑀘 𑀆𑀤𑀺𑀦𑀸 𑀦𑀬𑁂𑀦 𑀲𑀩𑁆𑀩𑀸𑀲𑀼 𑀯𑀺𑀪𑀢𑁆𑀢𑀻𑀲𑀼 𑀲𑀩𑁆𑀩𑀣𑀸 𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸. 𑀆𑀓𑀸𑀭𑁂𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢𑀧𑀤𑀸𑀦𑀁 ‘‘𑀕𑀡𑁆𑀳𑀸𑀢𑀺 𑀕𑀡𑁆𑀳𑀸𑀧𑁂𑀢𑀻’’𑀢𑀺𑀆𑀤𑀺𑀦𑀸 𑀬𑀣𑀸𑀲𑀫𑁆𑀪𑀯𑀁 𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸 𑀯𑀚𑁆𑀚𑁂𑀢𑀩𑁆𑀩𑀝𑁆𑀞𑀸𑀦𑀁 𑀯𑀚𑁆𑀚𑁂𑀢𑁆𑀯𑀸.

𑀇𑀫𑀸𑀦𑀺 𑀧𑀦 𑀧𑀲𑀺𑀤𑁆𑀥𑀸𑀦𑀺 𑀓𑀸𑀦𑀺𑀘𑀺 𑀅𑀚𑁆𑀚𑀢𑀦𑀻𑀭𑀽𑀧𑀸𑀦𑀺 ‘‘𑀅𑀕𑁆𑀕𑀳𑀻 𑀫𑀢𑁆𑀢𑀺𑀓𑀸𑀧𑀢𑁆𑀢𑀁. 𑀅𑀕𑁆𑀕𑀳𑀼𑀁, 𑀅𑀕𑁆𑀕𑀳𑀺𑀁𑀲𑀼, 𑀅𑀕𑁆𑀕𑀳𑁂𑀲𑀼’’𑀦𑁆𑀢𑀺. 𑀪𑀯𑀺𑀲𑁆𑀲𑀦𑁆𑀢𑀻𑀆𑀤𑀻𑀲𑀼 𑀕𑀳𑁂𑀲𑁆𑀲𑀢𑀺, 𑀕𑀳𑁂𑀲𑁆𑀲𑀦𑁆𑀢𑀺. 𑀲𑁂𑀲𑀁 𑀧𑀭𑀺𑀧𑀼𑀡𑁆𑀡𑀁 𑀓𑀸𑀢𑀩𑁆𑀩𑀁. 𑀅𑀕𑁆𑀕𑀳𑀺𑀲𑁆𑀲𑀸, 𑀅𑀕𑁆𑀕𑀳𑀺𑀲𑁆𑀲𑀁𑀲𑀼. 𑀲𑁂𑀲𑀁 𑀧𑀭𑀺𑀧𑀼𑀡𑁆𑀡𑀁 𑀓𑀸𑀢𑀩𑁆𑀩𑀁.

𑀉𑀲 𑀤𑀸𑀳𑁂. 𑀤𑀸𑀳𑁄 𑀉𑀡𑁆𑀳𑀁. 𑀉𑀲𑀢𑀺 𑀤𑀳𑀢𑀻𑀢𑀺 𑀉𑀡𑁆𑀳𑀁. 𑀉𑀡𑁆𑀳𑀲𑀤𑁆𑀤𑁄 ‘‘𑀉𑀡𑁆𑀳𑀁 𑀪𑀢𑁆𑀢𑀁 𑀪𑀼𑀜𑁆𑀚𑀢𑀻’’𑀢𑀺𑀆𑀤𑀻𑀲𑀼 𑀤𑀩𑁆𑀩𑀫𑀧𑁂𑀓𑁆𑀔𑀢𑀺, ‘‘𑀲𑀻𑀢𑀁 𑀉𑀡𑁆𑀳𑀁 𑀧𑀝𑀺𑀳𑀦𑀢𑀻’’𑀢𑀺𑀆𑀤𑀻𑀲𑀼 𑀧𑀦 𑀕𑀼𑀡𑀁 𑀉𑀡𑁆𑀳𑀪𑀸𑀯𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸. 𑀉𑀡𑁆𑀳𑀪𑀸𑀯𑁄 𑀳𑀺 𑀲𑀻𑀢𑀪𑀸𑀯𑁄 𑀘 𑀕𑀼𑀡𑁄.

𑀢𑀲 𑀯𑀺𑀧𑀸𑀲𑀸𑀬𑀁. 𑀢𑀡𑁆𑀳𑀸. 𑀓𑁂𑀦𑀝𑁆𑀞𑁂𑀦 𑀢𑀡𑁆𑀳𑀸? 𑀢𑀲𑁆𑀲𑀢𑀺 𑀧𑀭𑀺𑀢𑀲𑁆𑀲𑀢𑀻𑀢𑀺 𑀅𑀢𑁆𑀣𑁂𑀦.

𑀚𑀼𑀲𑀺 𑀧𑀻𑀢𑀺𑀲𑁂𑀯𑀦𑁂𑀲𑀼. 𑀚𑀼𑀡𑁆𑀳𑁄 𑀲𑀫𑀬𑁄. 𑀓𑀸𑀴𑁂 𑀯𑀸 𑀬𑀤𑀺 𑀯𑀸 𑀚𑀼𑀡𑁆𑀳𑁂, 𑀬𑀤𑀸 𑀯𑀸𑀬𑀢𑀺 𑀫𑀸𑀮𑀼𑀢𑁄.

𑀢𑀢𑁆𑀣 𑀚𑀼𑀡𑁆𑀳𑁄𑀢𑀺 𑀚𑁄𑀲𑁂𑀢𑀺 𑀮𑁄𑀓𑀲𑁆𑀲 𑀧𑀻𑀢𑀺𑀁𑀲𑁄𑀫𑀦𑀲𑁆𑀲𑀜𑁆𑀘 𑀉𑀧𑁆𑀧𑀸𑀤𑁂𑀢𑀻𑀢𑀺 𑀚𑀼𑀡𑁆𑀳𑁄.

𑀚𑀼𑀢 ¶ 𑀤𑀺𑀢𑁆𑀢𑀺𑀬𑀁. 𑀚𑀼𑀡𑁆𑀳𑀸 𑀭𑀢𑁆𑀢𑀺. 𑀚𑁄𑀢𑀢𑀺 𑀲𑀬𑀁 𑀦𑀺𑀧𑁆𑀧𑀪𑀸𑀧𑀺 𑀲𑀫𑀸𑀦𑀸 𑀘𑀦𑁆𑀤𑀢𑀸𑀭𑀓𑀧𑁆𑀧𑀪𑀸𑀲𑁂𑀦𑀧𑀺 𑀤𑀺𑀩𑁆𑀩𑀢𑀺 𑀯𑀺𑀭𑁄𑀘𑀢𑀺 𑀲𑀧𑁆𑀧𑀪𑀸 𑀳𑁄𑀢𑀻𑀢𑀺 𑀚𑀼𑀡𑁆𑀳𑀸.

𑀲𑀸 𑀢𑀦𑀼𑀓𑀭𑀡𑁂. 𑀲𑀡𑁆𑀳𑀯𑀸𑀘𑀸. 𑀲𑀺𑀬𑀢𑀺 𑀢𑀦𑀼𑀓𑀭𑀺𑀬𑀢𑀺, 𑀦 𑀨𑀭𑀼𑀲𑀪𑀸𑀯𑁂𑀦 𑀓𑀓𑁆𑀓𑀲𑀸 𑀓𑀭𑀺𑀬𑀢𑀻𑀢𑀺 𑀲𑀡𑁆𑀳𑀸.

𑀲𑁄 𑀅𑀦𑁆𑀢𑀓𑀫𑁆𑀫𑀦𑀺. 𑀲𑀡𑁆𑀳𑀁, 𑀜𑀸𑀡𑀁. 𑀲𑀺𑀬𑀢𑀺 𑀲𑀬𑀁 𑀲𑀼𑀔𑀼𑀫𑀪𑀸𑀯𑁂𑀦 𑀅𑀢𑀺𑀲𑀼𑀔𑀼𑀫𑀫𑁆𑀧𑀺 𑀅𑀢𑁆𑀣𑀁 𑀅𑀦𑁆𑀢𑀁 𑀓𑀭𑁄𑀢𑀺 𑀦𑀺𑀧𑁆𑀨𑀢𑁆𑀢𑀺𑀁 𑀧𑀸𑀧𑁂𑀢𑀻𑀢𑀺 𑀲𑀡𑁆𑀳𑀁.

𑀢𑀺𑀚 𑀦𑀺𑀲𑀸𑀦𑁂. 𑀦𑀺𑀲𑀸𑀦𑀁 𑀢𑀺𑀓𑁆𑀔𑀢𑀸. 𑀢𑀺𑀡𑁆𑀳𑁄 𑀧𑀭𑀲𑀼. 𑀢𑀺𑀢𑀺𑀓𑁆𑀔𑀢𑀻𑀢𑀺 𑀢𑀺𑀡𑁆𑀳𑁄.

𑀲𑀺 𑀲𑁂𑀯𑀸𑀬𑀁. 𑀅𑀢𑁆𑀢𑀦𑁄 𑀳𑀺𑀢𑀫𑀸𑀲𑀻𑀲𑀦𑁆𑀢𑁂𑀳𑀺 𑀲𑁂𑀯𑀺𑀬𑀢𑁂𑀢𑀺 𑀲𑀺𑀧𑁆𑀧𑀁, 𑀬𑀁 𑀓𑀺𑀜𑁆𑀘𑀺 𑀚𑀻𑀯𑀺𑀢𑀳𑁂𑀢𑀼 𑀲𑀺𑀓𑁆𑀔𑀺𑀢𑀩𑁆𑀩𑀁 𑀲𑀺𑀧𑁆𑀧𑀸𑀬𑀢𑀦𑀁. 𑀅𑀧𑀺𑀘 𑀲𑀺𑀧𑁆𑀧𑀦𑁆𑀢𑀺 𑀅𑀝𑁆𑀞𑀸𑀭𑀲 𑀫𑀳𑀸𑀲𑀺𑀧𑁆𑀧𑀸𑀦𑀺 𑁋 𑀲𑀼𑀢𑀺 𑀲𑀽𑀭𑀫𑀢𑀺 𑀩𑁆𑀬𑀸𑀓𑀭𑀡𑀁 𑀙𑀦𑁆𑀤𑁄𑀯𑀺𑀘𑀺𑀢𑀺 𑀦𑀺𑀭𑀼𑀢𑁆𑀢𑀺 𑀚𑁄𑀢𑀺𑀲𑀢𑁆𑀣𑀁 𑀲𑀺𑀓𑁆𑀔𑀸 𑀫𑁄𑀓𑁆𑀔𑀜𑀸𑀡𑀁 𑀓𑁆𑀭𑀺𑀬𑀸𑀯𑀺𑀥𑀺 𑀥𑀦𑀼𑀩𑁆𑀩𑁂𑀤𑁄 𑀳𑀢𑁆𑀣𑀺𑀲𑀺𑀓𑁆𑀔𑀸 𑀓𑀸𑀫𑀢𑀦𑁆𑀢𑀁 𑀅𑀲𑁆𑀲𑀮𑀓𑁆𑀔𑀡𑀁 𑀧𑀼𑀭𑀸𑀡𑀁 𑀇𑀢𑀺𑀳𑀸𑀲𑁄 𑀦𑀻𑀢𑀺 𑀢𑀓𑁆𑀓𑁄 𑀯𑁂𑀚𑁆𑀚𑀓𑀜𑁆𑀘𑀸𑀢𑀺.

𑀓𑀼 𑀓𑀼𑀘𑁆𑀙𑀸𑀬𑀁. 𑀓𑀼𑀘𑁆𑀙𑀸 𑀕𑀭𑀳𑀸. 𑀓𑀡𑁆𑀳𑀸 𑀥𑀫𑁆𑀫𑀸. 𑀓𑀡𑁆𑀳𑁄 𑀧𑀼𑀭𑀺𑀲𑁄.

𑀢𑀢𑁆𑀣 𑀓𑀡𑁆𑀳𑀸𑀢𑀺 𑀅𑀧𑀪𑀲𑁆𑀲𑀭𑀪𑀸𑀯𑀓𑀭𑀡𑀢𑁆𑀢𑀸 𑀧𑀡𑁆𑀟𑀺𑀢𑁂𑀳𑀺 𑀓𑀼𑀘𑁆𑀙𑀺𑀢𑀩𑁆𑀩𑀸 𑀕𑀭𑀳𑀺𑀢𑀩𑁆𑀩𑀸𑀢𑀺 𑀓𑀡𑁆𑀳𑀸, 𑀅𑀓𑀼𑀲𑀮𑀥𑀫𑁆𑀫𑀸. 𑀓𑀸𑀴𑀯𑀡𑁆𑀡𑀢𑁆𑀢𑀸 𑀲𑀼𑀯𑀡𑁆𑀡𑀯𑀡𑁆𑀡𑀸𑀤𑀺𑀓𑀁 𑀉𑀧𑀦𑀺𑀥𑀸𑀬 𑀓𑀼𑀘𑁆𑀙𑀺𑀢𑀩𑁆𑀩𑁄 𑀦𑀺𑀦𑁆𑀤𑀺𑀢𑀩𑁆𑀩𑁄𑀢𑀺 𑀓𑀡𑁆𑀳𑁄, 𑀓𑀸𑀴𑀯𑀡𑁆𑀡𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀓𑀡𑁆𑀳𑁄 𑀯𑀢𑀸𑀬𑀁 𑀧𑀼𑀭𑀺𑀲𑁄, 𑀓𑀡𑁆𑀳𑀁 𑀪𑀼𑀜𑁆𑀚𑀢𑀺 𑀪𑁄𑀚𑀦𑀁;

𑀓𑀡𑁆𑀳𑁂 𑀪𑀽𑀫𑀺𑀧𑁆𑀧𑀤𑁂𑀲𑀲𑁆𑀫𑀺𑀁, 𑀦 𑀫𑀬𑁆𑀳𑀁 𑀫𑀦𑀲𑁄 𑀧𑀺𑀬𑁄’’𑀢𑀺 𑀘,

‘‘𑀦 ¶ 𑀓𑀡𑁆𑀳𑁄 𑀢𑀘𑀲𑀸 𑀳𑁄𑀢𑀺,

𑀅𑀦𑁆𑀢𑁄𑀲𑀸𑀭𑁄 𑀳𑀺 𑀩𑁆𑀭𑀸𑀳𑁆𑀫𑀡𑁄;

𑀬𑀲𑁆𑀫𑀺𑀁 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺,

𑀲 𑀯𑁂 𑀓𑀡𑁆𑀳𑁄 𑀲𑀼𑀚𑀫𑁆𑀧𑀢𑀻’’𑀢𑀺 𑀘.

𑀇𑀘𑁆𑀘𑁂𑀯𑀁 𑁋

𑀕𑀳𑀸𑀤𑀺𑀓𑁂 𑀥𑀸𑀢𑀼𑀕𑀡𑁂, 𑀲𑀦𑁆𑀥𑀸𑀬 𑀢𑀲𑀺𑀆𑀤𑀬𑁄;

𑀆𑀤𑀺𑀕𑁆𑀕𑀳𑁄 𑀓𑀢𑁄 𑀧𑁆𑀧𑀡𑁆𑀳𑀸, 𑀕𑀳𑀸𑀤𑀻𑀲𑀼 𑀬𑀣𑀸𑀭𑀳𑀁.

𑀕𑀳𑀢𑁄 𑀥𑀸𑀢𑀼𑀢𑁄 𑀳𑀺 𑀧𑁆𑀧𑁄,𑀆𑀔𑁆𑀬𑀸𑀢𑀢𑁆𑀢𑁂𑀯𑀤𑀺𑀲𑁆𑀲𑀢𑀺;

𑀆𑀔𑁆𑀬𑀸𑀢𑀢𑁆𑀢𑁂 𑀘 𑀦𑀸𑀫𑀢𑁆𑀢𑁂, 𑀡𑁆𑀳𑀸𑀲𑀤𑁆𑀤𑁄 𑀉𑀲𑀢𑁄 𑀢𑀣𑀸.

𑀉𑀲𑀕𑀳𑁂𑀳𑀺 𑀅𑀜𑁆𑀜𑀲𑁆𑀫𑀸, 𑀦𑀸𑀫𑀢𑁆𑀢𑁂𑀯 𑀤𑀼𑀯𑁂 𑀫𑀢𑀸;

𑀏𑀯𑀁 𑀯𑀺𑀲𑁂𑀲𑀢𑁄 𑀜𑁂𑀬𑁆𑀬𑁄, 𑀕𑀳𑀸𑀤𑀺𑀕𑀡𑀦𑀺𑀘𑁆𑀙𑀬𑁄.

𑀏𑀢𑁆𑀣 𑀧𑀦 𑀓𑀺𑀜𑁆𑀘𑀸𑀧𑀺 𑀲𑀸𑀲𑀦𑁂 ‘‘𑀢𑀡𑁆𑀳𑀸𑀬𑀢𑀻’’𑀢𑀺 𑀓𑁆𑀭𑀺𑀬𑀸𑀧𑀤𑀫𑁆𑀧𑀺 𑀤𑀺𑀲𑁆𑀲𑀢𑀺, 𑀢𑀣𑀸𑀧𑀺 𑀢𑀲𑁆𑀲 ‘‘𑀧𑀩𑁆𑀩𑀢𑀸𑀬𑀢𑀺, 𑀫𑁂𑀢𑁆𑀢𑀸𑀬𑀢𑀻’’𑀢𑀺𑀆𑀤𑀻𑀦𑀺 𑀯𑀺𑀬 𑀦𑀸𑀫𑀲𑁆𑀫𑀸 𑀯𑀺𑀳𑀺𑀢𑀲𑁆𑀲 𑀆𑀬𑀧𑀘𑁆𑀘𑀬𑀲𑁆𑀲 𑀯𑀲𑁂𑀦 𑀲𑀺𑀤𑁆𑀥𑀢𑁆𑀢𑀸 𑀓𑁆𑀭𑀺𑀬𑀸𑀧𑀤𑀢𑁆𑀢𑁂𑀧𑀺 𑀡𑁆𑀳𑀸𑀧𑀘𑁆𑀘𑀬𑁄 𑀫𑀼𑀔𑁆𑀬𑀢𑁄 𑀮𑀩𑁆𑀪𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. ‘‘𑀢𑀡𑁆𑀳𑀸𑀬𑀢𑀻’’𑀢𑀺 𑀳𑀺 𑀇𑀤𑀁 𑀡𑁆𑀳𑀸𑀧𑀘𑁆𑀘𑀬𑀯𑀢𑀸 𑀢𑀲𑀥𑀸𑀢𑀼𑀢𑁄 𑀦𑀺𑀧𑁆𑀨𑀦𑁆𑀦𑀢𑀡𑁆𑀳𑀸𑀲𑀤𑁆𑀤𑀲𑁆𑀫𑀸 𑀧𑀭𑀲𑁆𑀲 𑀆𑀬𑀧𑀘𑁆𑀘𑀬𑀲𑁆𑀲 𑀯𑀲𑁂𑀦 𑀦𑀺𑀧𑁆𑀨𑀦𑁆𑀦𑀁. 𑀢𑀣𑀸 𑀓𑀺𑀜𑁆𑀘𑀸𑀧𑀺 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸𑀬𑀁 ‘‘𑀯𑀸𑀲𑀺𑀨𑀮𑀁 𑀢𑀸𑀧𑁂𑀢𑁆𑀯𑀸 𑀉𑀤𑀓𑀁 𑀯𑀸 𑀔𑀻𑀭𑀁 𑀯𑀸 𑀉𑀡𑁆𑀳𑀸𑀧𑁂𑀢𑀻’’𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 ‘‘𑀉𑀡𑁆𑀳𑀸𑀧𑁂𑀢𑀻’’𑀢𑀺 𑀳𑁂𑀢𑀼𑀓𑀢𑁆𑀢𑀼𑀯𑀸𑀘𑀓𑀁 𑀓𑁆𑀭𑀺𑀬𑀸𑀧𑀤𑀁 𑀤𑀺𑀲𑁆𑀲𑀢𑀺, 𑀢𑀣𑀸𑀧𑀺 𑀢𑀲𑁆𑀲 𑀡𑁆𑀳𑀸𑀧𑀘𑁆𑀘𑀬𑀯𑀢𑀸 𑀉𑀲𑀥𑀸𑀢𑀼𑀢𑁄 𑀦𑀺𑀧𑁆𑀨𑀦𑁆𑀦𑀉𑀡𑁆𑀳𑀸𑀲𑀤𑁆𑀤𑀢𑁄 𑀯𑀺𑀳𑀺𑀢𑀲𑁆𑀲 𑀓𑀸𑀭𑀺𑀢𑀲𑀜𑁆𑀜𑀲𑁆𑀲 𑀡𑀸𑀧𑁂𑀧𑀘𑁆𑀘𑀬𑀲𑁆𑀲 𑀯𑀲𑁂𑀦 𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀓𑁆𑀭𑀺𑀬𑀸𑀧𑀤𑀢𑁆𑀢𑁂𑀧𑀺 𑀡𑁆𑀳𑀸𑀧𑀘𑁆𑀘𑀬𑁄 𑀫𑀼𑀔𑁆𑀬𑀢𑁄 𑀮𑀩𑁆𑀪𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. ‘‘𑀉𑀡𑁆𑀳𑀸𑀧𑁂𑀢𑀻’’𑀢𑀺 𑀇𑀤𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀉𑀡𑁆𑀳𑀸𑀲𑀤𑁆𑀤𑀢𑁄 𑀡𑀸𑀧𑁂𑀧𑀘𑁆𑀘𑀬𑀯𑀲𑁂𑀦 𑀦𑀺𑀧𑁆𑀨𑀦𑁆𑀦𑀁, 𑀏𑀢𑀲𑁆𑀫𑀺𑀁 𑀤𑀺𑀝𑁆𑀞𑁂 ‘‘𑀉𑀡𑁆𑀳𑀸𑀧𑀬𑀢𑀻’’𑀢𑀺 𑀧𑀤𑀫𑁆𑀧𑀺 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺.

𑀓𑀺𑀜𑁆𑀘 ¶ 𑀪𑀺𑀬𑁆𑀬𑁄 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 ‘‘𑀉𑀡𑁆𑀳𑀸𑀧𑁂𑀢𑀻’’𑀢𑀺 𑀓𑀸𑀭𑀺𑀢𑀧𑀤𑀲𑁆𑀲 𑀤𑀺𑀝𑁆𑀞𑀢𑁆𑀢𑀸𑀬𑁂𑀯 ‘‘𑀉𑀡𑁆𑀳𑀢𑀻’’𑀢𑀺 𑀓𑀢𑁆𑀢𑀼𑀧𑀤𑀫𑁆𑀧𑀺 𑀦𑀬𑀢𑁄 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺 𑀓𑀢𑁆𑀢𑀼𑀓𑀸𑀭𑀺𑀢𑀧𑀤𑀸𑀦𑀁 𑀏𑀓𑀥𑀸𑀢𑀼𑀫𑁆𑀳𑀺 𑀉𑀧𑀮𑀩𑁆𑀪𑀫𑀸𑀦𑀢𑁆𑀢𑀸, 𑀬𑀣𑀸? 𑀕𑀡𑁆𑀳𑀢𑀺, 𑀕𑀡𑁆𑀳𑀸𑀧𑁂𑀢𑀺, 𑀕𑀘𑁆𑀙𑀢𑀺, 𑀕𑀘𑁆𑀙𑀸𑀧𑁂𑀢𑀻𑀢𑀺, 𑀢𑀲𑁆𑀫𑀸 ‘‘𑀉𑀲 𑀤𑀸𑀳𑁂’’𑀢𑀺 𑀥𑀸𑀢𑀼𑀲𑁆𑀲 ‘‘𑀉𑀡𑁆𑀳𑀢𑀻’’𑀢𑀺 𑀭𑀽𑀧𑀁 𑀉𑀧𑀮𑀩𑁆𑀪𑀢𑀻𑀢𑀺 𑀫𑀦𑁆𑀢𑁆𑀯𑀸 ‘‘𑀉𑀡𑁆𑀳𑀢𑀻𑀢𑀺 𑀉𑀡𑁆𑀳’’𑀦𑁆𑀢𑀺 𑀦𑀺𑀩𑁆𑀩𑀘𑀦𑀁 𑀓𑀸𑀢𑀩𑁆𑀩𑀁. 𑀇𑀢𑀺 𑀧𑁆𑀧𑀧𑀘𑁆𑀘𑀬𑁄 𑀕𑀳𑀢𑁄 𑀘 𑀅𑀜𑁆𑀜𑀢𑁄 𑀘 𑀏𑀓𑀥𑀸 𑀮𑀩𑁆𑀪𑀢𑀺, 𑀡𑁆𑀳𑀸𑀧𑀘𑁆𑀘𑀬𑁄 𑀧𑀦 𑀕𑀳𑀢𑁄 𑀉𑀲𑀢𑁄 𑀘 𑀤𑁆𑀯𑀺𑀥𑀸 𑀅𑀜𑁆𑀜𑀢𑁄 𑀏𑀓𑀥𑀸 𑀮𑀩𑁆𑀪𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀺𑀜𑁆𑀘𑀸𑀧𑁂𑀢𑁆𑀣 𑀏𑀯𑀁 𑀦𑀺𑀬𑀫𑁄 𑀯𑀼𑀢𑁆𑀢𑁄, 𑀢𑀣𑀸𑀧𑀺 𑀲𑀸𑀝𑁆𑀞𑀓𑀣𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀅𑀜𑁆𑀜𑀸𑀦𑀺𑀧𑀺 𑀏𑀓𑁂𑀓𑀲𑁆𑀲 𑀥𑀸𑀢𑀼𑀲𑁆𑀲 𑀦𑀸𑀫𑀺𑀓𑀧𑀤𑀸𑀦𑀺 𑀤𑁆𑀯𑁂 𑀤𑁆𑀯𑁂 𑀓𑁆𑀭𑀺𑀬𑀸𑀧𑀤𑀸𑀦𑀺 𑀯𑀺𑀘𑀺𑀦𑀺𑀢𑀩𑁆𑀩𑀸𑀦𑀺. 𑀬𑁂𑀦 𑀧𑀦 𑀩𑀼𑀤𑁆𑀥𑀯𑀘𑀦𑀸𑀦𑀼𑀭𑀽𑀧𑁂𑀦 𑀦𑀬𑁂𑀦 𑀕𑀳𑀸𑀤𑀺𑀕𑀡𑁂 𑀆𑀤𑀺𑀲𑀤𑁆𑀤𑁂𑀦 𑀢𑀲𑀥𑀸𑀢𑀸𑀤𑀬𑁄 𑀅𑀫𑁆𑀳𑁂𑀳𑀺 𑀕𑀳𑀺𑀢𑀸, 𑀇𑀫𑀲𑁆𑀫𑀸 𑀦𑀬𑀸 𑀅𑀜𑁆𑀜𑁄 𑀦𑀬𑁄 𑀧𑀲𑀢𑁆𑀣𑀢𑀭𑁄 𑀦𑀢𑁆𑀣𑀺, 𑀅𑀬𑀫𑁂𑀯 𑀧𑀲𑀢𑁆𑀣𑀢𑀭𑁄, 𑀢𑀲𑁆𑀫𑀸 𑀅𑀬𑀁 𑀦𑀻𑀢𑀺 𑀲𑀸𑀲𑀦𑀝𑁆𑀞𑀺𑀢𑀺𑀬𑀸 𑀆𑀬𑀲𑁆𑀫𑀦𑁆𑀢𑁂𑀳𑀺 𑀲𑀸𑀥𑀼𑀓𑀁 𑀥𑀸𑀭𑁂𑀢𑀩𑁆𑀩𑀸 𑀯𑀸𑀘𑁂𑀢𑀩𑁆𑀩𑀸 𑀘.

𑀕𑀳𑀸𑀤𑀻 𑀏𑀢𑁆𑀢𑀓𑀸 𑀤𑀺𑀝𑁆𑀞𑀸, 𑀥𑀸𑀢𑀯𑁄 𑀫𑁂 𑀬𑀣𑀸𑀩𑀮𑀁;

𑀲𑀼𑀢𑁆𑀢𑁂𑀲𑁆𑀯𑀜𑁆𑀜𑁂𑀧𑀺 𑀧𑁂𑀓𑁆𑀔𑀺𑀢𑁆𑀯𑀸, 𑀕𑀡𑁆𑀳𑀯𑁆𑀳𑁄 𑀅𑀢𑁆𑀣𑀬𑀼𑀢𑁆𑀢𑀺𑀢𑁄.

𑀕𑀳𑀸𑀤𑀺𑀕𑀡𑁄𑀬𑀁.

𑀢𑀦𑀸𑀤𑀺𑀕𑀡𑀺𑀓

𑀢𑀦𑀼 𑀯𑀺𑀢𑁆𑀣𑀸𑀭𑁂. 𑀢𑀦𑁄𑀢𑀺. 𑀆𑀬𑀢𑀦𑀁, 𑀢𑀦𑀼. 𑀓𑀫𑁆𑀫𑀦𑀺 ‘‘𑀢𑀦𑀺𑀬𑁆𑀬𑀢𑀺, 𑀢𑀦𑀺𑀬𑁆𑀬𑀦𑁆𑀢𑀺. 𑀯𑀺𑀢𑀦𑀺𑀬𑁆𑀬𑀢𑀻’’𑀢𑀺 𑀭𑀽𑀧𑀸𑀦𑀺. 𑀅𑀢𑁆𑀭𑀸𑀬𑀁 𑀧𑀸𑀴𑀺 ‘‘𑀬𑀣𑀸 𑀳𑀺 𑀆𑀲𑀪𑀁 𑀘𑀫𑁆𑀫𑀁, 𑀧𑀣𑀩𑁆𑀬𑀸 𑀯𑀺𑀢𑀦𑀺𑀬𑁆𑀬𑀢𑀻’’𑀢𑀺. 𑀕𑀭𑀽 𑀧𑀦 ‘‘𑀧𑀢𑀸𑀬𑀢𑁂, 𑀧𑀢𑀜𑁆𑀜𑀢𑀻’’𑀢𑀺 𑀭𑀽𑀧𑀸𑀦𑀺 𑀯𑀤𑀦𑁆𑀢𑀺. 𑀢𑀦𑀺𑀢𑀼𑀁, 𑀢𑀦𑀺𑀢𑁆𑀯𑀸𑀦. 𑀢𑀼𑀫𑀦𑁆𑀢𑀸𑀤𑀺𑀭𑀽𑀧𑀸𑀦𑀺.

𑀢𑀢𑁆𑀣 ¶ 𑀆𑀬𑀢𑀦𑀦𑁆𑀢𑀺 𑀆𑀬𑀪𑀽𑀢𑁂 𑀥𑀫𑁆𑀫𑁂 𑀢𑀦𑁄𑀢𑀺 𑀯𑀺𑀢𑁆𑀣𑀸𑀭𑁂𑀢𑀻𑀢𑀺 𑀆𑀬𑀢𑀦𑀁. 𑀢𑀦𑀽𑀢𑀺 𑀲𑀭𑀻𑀭𑀁. 𑀢𑀜𑁆𑀳𑀺 𑀓𑀮𑀮𑀢𑁄 𑀧𑀝𑁆𑀞𑀸𑀬 𑀓𑀫𑁆𑀫𑀸𑀤𑀻𑀳𑀺 𑀬𑀣𑀸𑀲𑀫𑁆𑀪𑀯𑀁 𑀢𑀦𑀺𑀬𑁆𑀬𑀢𑀺 𑀯𑀺𑀢𑁆𑀣𑀸𑀭𑀺𑀬𑀢𑀺 𑀫𑀳𑀢𑁆𑀢𑀁 𑀧𑀸𑀧𑀺𑀬𑀢𑀻𑀢𑀺 ‘‘𑀢𑀦𑀽’’𑀢𑀺 𑀯𑀼𑀘𑁆𑀘𑀢𑀺. ‘‘𑀢𑀦𑀼 𑀯𑀧𑀼 𑀲𑀭𑀻𑀭𑀁 𑀧𑀼𑀁 𑀓𑀸𑀬𑁄 𑀤𑁂𑀳𑁄’’𑀢𑀺𑀆𑀤𑀬𑁄 𑀲𑀭𑀻𑀭𑀯𑀸𑀘𑀓𑀸 𑀲𑀤𑁆𑀤𑀸. 𑀲𑀭𑀻𑀭𑀁 𑀔𑀦𑁆𑀥𑀧𑀜𑁆𑀘𑀓𑀁. 𑀬𑀜𑁆𑀳𑀺 𑀫𑀳𑀸𑀚𑀦𑁄 𑀲𑀭𑀻𑀭𑀦𑁆𑀢𑀺 𑀯𑀤𑀢𑀺, 𑀢𑀁 𑀧𑀭𑀫𑀢𑁆𑀣𑀢𑁄 𑀔𑀦𑁆𑀥𑀧𑀜𑁆𑀘𑀓𑀫𑀢𑁆𑀢𑀫𑁂𑀯, 𑀦 𑀢𑀢𑁄 𑀅𑀢𑁆𑀢𑀸 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸 𑀉𑀧𑀮𑀩𑁆𑀪𑀢𑀺. ‘‘𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀦𑀁 𑀢𑀦𑀼𑀢𑁆𑀢𑀓𑀭𑀁 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀘𑀺𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 𑀧𑀦 𑀢𑀦𑀼𑀲𑀤𑁆𑀤𑁄 𑀅𑀧𑁆𑀧𑀢𑁆𑀣𑀯𑀸𑀘𑀓𑁄, 𑀅𑀧𑁆𑀧𑀢𑁆𑀣𑀯𑀸𑀘𑀓𑀲𑁆𑀲 𑀘 𑀢𑀲𑁆𑀲 𑀓𑁆𑀭𑀺𑀬𑀸𑀧𑀤𑀁 𑀦 𑀧𑀲𑁆𑀲𑀸𑀫, 𑀢𑀲𑁆𑀫𑀸 𑀦𑀺𑀧𑀸𑀢𑀧𑀤𑁂𑀦 𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀢𑀦𑀼𑀲𑀤𑁆𑀤𑁄 𑀦𑀺𑀧𑀸𑀢𑀧𑀤𑀦𑁆𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀫𑁆𑀧𑀺 𑀦 𑀧𑀲𑁆𑀲𑀸𑀫, 𑀦𑀺𑀘𑁆𑀙𑀬𑁂𑀦 𑀧𑀦 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑁄𑀢𑀺 𑀕𑀳𑁂𑀢𑀩𑁆𑀩𑁄.

𑀢𑀦𑁄𑀢𑀺, 𑀢𑀦𑁄𑀦𑁆𑀢𑀺. 𑀢𑀦𑁄𑀲𑀺, 𑀢𑀦𑁄𑀣. 𑀢𑀦𑁄𑀫𑀺, 𑀢𑀦𑁄𑀫. 𑀢𑀦𑀼𑀢𑁂, 𑀢𑀦𑀼𑀦𑁆𑀢𑁂. 𑀢𑀦𑀼𑀲𑁂, 𑀢𑀦𑀼𑀲𑁂, 𑀢𑀦𑀼𑀯𑁆𑀳𑁂. 𑀢𑀦𑁂, 𑀢𑀦𑀼𑀫𑁆𑀳𑁂. 𑀲𑁂𑀲𑀁 𑀬𑀣𑀸𑀲𑀫𑁆𑀪𑀯𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀢𑀦𑁄𑀢𑀼, 𑀢𑀦𑁄𑀦𑁆𑀢𑀼. 𑀢𑀦𑁂𑀬𑁆𑀬, 𑀢𑀦𑁂, 𑀢𑀦𑁂𑀬𑁆𑀬𑀼𑀁. 𑀯𑀺𑀢𑀦, 𑀯𑀺𑀢𑀦𑀼. 𑀅𑀢𑀦𑀸, 𑀅𑀢𑀦𑀼. 𑀅𑀫𑁆𑀫𑀸𑀬 𑀧𑀢𑀦𑀼 𑀓𑁂𑀲𑀸. 𑀅𑀢𑀦𑀺, 𑀅𑀢𑀦𑀺𑀁𑀲𑀼. 𑀢𑀦𑀺𑀲𑁆𑀲𑀢𑀺, 𑀢𑀦𑀺𑀲𑁆𑀲𑀦𑁆𑀢𑀺. 𑀅𑀢𑀦𑀺𑀲𑁆𑀲𑀸, 𑀅𑀢𑀦𑀺𑀲𑁆𑀲𑀁𑀲𑀼. 𑀓𑀫𑁆𑀫𑀦𑀺 ‘‘𑀢𑀦𑀺𑀬𑁆𑀬𑀢𑀺, 𑀢𑀦𑀺𑀬𑁆𑀬𑀦𑁆𑀢𑀺. 𑀢𑀦𑀺𑀬𑁆𑀬𑀲𑀻’’𑀢𑀺𑀆𑀤𑀺𑀦𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀲𑀓 𑀲𑀢𑁆𑀢𑀺𑀬𑀁. 𑀲𑀢𑁆𑀢𑀺 𑀲𑀫𑀢𑁆𑀣𑀪𑀸𑀯𑁄. 𑀲𑀓𑁆𑀓𑁄𑀢𑀺 𑀲𑀓𑁆𑀓𑁄. 𑀯𑀺𑀜𑁆𑀜𑀸𑀧𑁂𑀢𑀼𑀁 𑀅𑀲𑀓𑁆𑀔𑀺. 𑀲𑀓𑁆𑀔𑀺𑀲𑁆𑀲𑀲𑀺. 𑀲𑀓𑁆𑀔𑀢𑀺. 𑀢𑁆𑀯𑀫𑁆𑀧𑀺 𑀅𑀫𑁆𑀫 𑀧𑀩𑁆𑀩𑀚𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺. 𑀲𑀓𑁆𑀓𑀢𑁂 𑀚𑀭𑀸𑀬 𑀧𑀝𑀺𑀓𑀫𑁆𑀫𑀁 𑀓𑀸𑀢𑀼𑀦𑁆𑀢𑀺 𑀧𑀸𑀴𑀺.

𑀢𑀢𑁆𑀣 ¶ 𑀲𑀓𑁆𑀓𑁄𑀢𑀺 𑀤𑁂𑀯𑀭𑀸𑀚𑀸. 𑀲𑁄 𑀳𑀺 𑀅𑀢𑁆𑀣𑀸𑀦𑀁 𑀲𑀳𑀲𑁆𑀲𑀫𑁆𑀧𑀺 𑀫𑀼𑀳𑀼𑀢𑁆𑀢𑁂𑀦 𑀘𑀺𑀦𑁆𑀢𑀦𑀲𑀫𑀢𑁆𑀣𑀢𑀸𑀬 𑀲𑀧𑀭𑀳𑀺𑀢𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 ‘‘𑀲𑀓𑁆𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀜𑁆𑀜𑀢𑁆𑀭 𑀧𑀦 𑀥𑀸𑀢𑀽𑀦𑀁 𑀅𑀯𑀺𑀲𑀬𑁂 𑀢𑀤𑁆𑀥𑀺𑀢𑀯𑀲𑁂𑀦 𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀅𑀤𑀸𑀲𑀻𑀢𑀺 𑀲𑀓𑁆𑀓𑁄𑀢𑀺 𑀏𑀯𑀫𑁆𑀧𑀺 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀲𑀓𑁆𑀓𑀲𑀤𑁆𑀤𑁄 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀲𑀸𑀥𑁂𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑀺 𑀪𑀕𑀯𑀢𑀸 ‘‘𑀲𑀓𑁆𑀓𑁄 𑀫𑀳𑀸𑀮𑀺 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄 𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀅𑀤𑀸𑀲𑀺, 𑀢𑀲𑁆𑀫𑀸 ‘𑀲𑀓𑁆𑀓𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀲𑀓𑁆𑀓𑁄𑀦𑁆𑀢𑁄. 𑀲𑀓𑁆𑀓𑁄𑀦𑁆𑀢𑀻. 𑀲𑀓𑁆𑀓𑁄𑀦𑁆𑀢𑀁 𑀓𑀼𑀮𑀁.

𑀔𑀼𑀡𑀼 𑀔𑀺𑀡𑀼 𑀳𑀺𑀁𑀲𑀸𑀬𑀁. 𑀔𑀼𑀡𑁄𑀢𑀺. 𑀔𑀺𑀡𑁄𑀢𑀺.

𑀇𑀡𑀼 𑀕𑀢𑀺𑀬𑀁. 𑀇𑀡𑁄𑀢𑀺. 𑀇𑀡𑀁 𑀇𑀡𑀸𑀬𑀺𑀓𑁄.

𑀢𑀺𑀡𑀼 𑀅𑀤𑀦𑁂. 𑀢𑀺𑀡𑁄𑀢𑀺. 𑀢𑀺𑀡𑀁. 𑀏𑀢𑁆𑀣 𑀢𑀺𑀡𑀦𑁆𑀢𑀺 𑀬𑀯𑀲𑀁. 𑀢𑀜𑁆𑀳𑀺 𑀢𑀺𑀡𑀺𑀬𑀢𑁂 𑀢𑀺𑀡𑀪𑀓𑁆𑀔𑁂𑀳𑀺 𑀕𑁄𑀡𑀸𑀤𑀻𑀳𑀺 𑀅𑀤𑀺𑀬𑀢𑁂 𑀔𑀸𑀤𑀺𑀬𑀢𑁂𑀢𑀺 𑀢𑀺𑀡𑀁.

𑀖𑀺𑀡𑀼 𑀤𑀺𑀢𑁆𑀢𑀺𑀬𑀁. 𑀖𑀺𑀡𑁄𑀢𑀺.

𑀳𑀦𑀼 𑀅𑀧𑀦𑀬𑀦𑁂. 𑀅𑀧𑀦𑀬𑀦𑀁 𑀅𑀦𑀸𑀮𑀸𑀧𑀓𑀭𑀡𑀁 𑀦𑀺𑀩𑁆𑀩𑀘𑀦𑀢𑀸𑀓𑀭𑀡𑀁. 𑀳𑀦𑁄𑀢𑀺. 𑀳𑀦𑀼𑀢𑁂.

𑀧𑀦𑀼 𑀤𑀸𑀦𑁂 𑀧𑀦𑁄𑀢𑀺. 𑀧𑀦𑀼𑀢𑁂.

𑀫𑀦𑀼 𑀩𑁄𑀥𑀦𑁂. 𑀫𑀦𑁄𑀢𑀺. 𑀫𑀦𑀼𑀢𑁂. 𑀫𑀦𑁄. 𑀫𑀦𑀁. 𑀫𑀸𑀦𑀲𑀁. 𑀫𑀦𑀼𑀲𑁆𑀲𑁄. 𑀫𑀸𑀦𑀯𑁄. 𑀫𑀸𑀡𑀯𑁄.

𑀏𑀢𑁆𑀣 𑀫𑀦𑁄𑀢𑀺 𑀫𑀦𑀼𑀢𑁂 𑀩𑀼𑀚𑁆𑀛𑀢𑀻𑀢𑀺 𑀫𑀦𑁄, 𑀏𑀯𑀁 𑀫𑀦𑀁. 𑀇𑀫𑁂𑀲𑀁 𑀧𑀦 𑀤𑁆𑀯𑀺𑀦𑁆𑀦𑀁 𑀫𑀦𑀲𑀤𑁆𑀤𑀸𑀦𑀁 ‘‘𑀬𑀲𑁆𑀫𑀺𑀁 𑀫𑀦𑁄 𑀦𑀺𑀯𑀺𑀲𑀢𑀺. 𑀲𑀦𑁆𑀢𑀁 𑀢𑀲𑁆𑀲 𑀫𑀦𑀁 𑀳𑁄𑀢𑀻’’𑀢𑀺𑀆𑀤𑀻𑀲𑀼 𑀧𑀼𑀦𑁆𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑀸 𑀤𑀝𑁆𑀞𑀩𑁆𑀩𑀸. 𑀫𑀸𑀦𑀲𑀦𑁆𑀢𑀺 𑀭𑀸𑀕𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀅𑀭𑀳𑀢𑁆𑀢𑀫𑁆𑀧𑀺. ‘‘𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀧𑀸𑀲𑁄, 𑀬𑁆𑀯𑀸𑀬𑀁 ¶ 𑀘𑀭𑀢𑀺 𑀫𑀸𑀦𑀲𑁄’’𑀢𑀺 𑀏𑀢𑁆𑀣 𑀳𑀺 𑀭𑀸𑀕𑁄 𑀫𑀸𑀦𑀲𑀁. ‘‘𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲’’𑀦𑁆𑀢𑀺 𑀏𑀢𑁆𑀣 𑀘𑀺𑀢𑁆𑀢𑀁. ‘‘𑀅𑀧𑁆𑀧𑀢𑁆𑀢𑀫𑀸𑀦𑀲𑁄 𑀲𑁂𑀓𑁆𑀔𑁄, 𑀓𑀸𑀮𑀁 𑀓𑀬𑀺𑀭𑀸 𑀚𑀦𑁂 𑀲𑀼𑀢𑁄’’𑀢𑀺 𑀏𑀢𑁆𑀣 𑀅𑀭𑀳𑀢𑁆𑀢𑀁. 𑀏𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑁋

𑀭𑀸𑀕𑁄 𑀘𑀺𑀢𑁆𑀢𑀁 𑀅𑀭𑀳𑀢𑁆𑀢𑀜𑁆𑀘, ‘‘𑀫𑀸𑀦𑀲’’𑀦𑁆𑀢𑀺 𑀲𑀫𑀻𑀭𑀺𑀢𑀁;

𑀲𑀢𑁆𑀣𑀼𑀦𑁄 𑀲𑀸𑀲𑀦𑁂 𑀧𑀸𑀧-𑀲𑀸𑀲𑀦𑁂’𑀔𑀺𑀮𑀲𑀸𑀲𑀦𑁂.

𑀢𑀢𑁆𑀣 𑀲𑀫𑁆𑀧𑀬𑀼𑀢𑁆𑀢𑀫𑀦𑀲𑀺 𑀪𑀯𑁄𑀢𑀺 𑀭𑀸𑀕𑁄 𑀫𑀸𑀦𑀲𑁄. 𑀫𑀦𑁄 𑀏𑀯 𑀫𑀸𑀦𑀲𑀦𑁆𑀢𑀺 𑀓𑀢𑁆𑀯𑀸 𑀘𑀺𑀢𑁆𑀢𑀁 𑀫𑀸𑀦𑀲𑀁. 𑀅𑀦𑀯𑀲𑁂𑀲𑀢𑁄 𑀫𑀸𑀦𑀁 𑀲𑀺𑀬𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀢𑀻𑀢𑀺 𑀅𑀕𑁆𑀕𑀫𑀕𑁆𑀕𑁄 𑀫𑀸𑀦𑀲𑀁. 𑀢𑀦𑁆𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀧𑀦 𑀅𑀭𑀳𑀢𑁆𑀢𑀲𑁆𑀲 𑀫𑀸𑀦𑀲𑀢𑀸 𑀤𑀝𑁆𑀞𑀩𑁆𑀩𑀸. 𑀫𑀦𑀽𑀢𑀺 𑀲𑀢𑁆𑀢𑁄. ‘‘𑀬𑁂𑀦 𑀘𑀓𑁆𑀔𑀼𑀧𑀲𑀸𑀤𑁂𑀦, 𑀭𑀽𑀧𑀸𑀦𑀺 𑀫𑀦𑀼 𑀧𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀳𑀺 ‘‘𑀫𑀦𑀽’’𑀢𑀺 𑀲𑀢𑁆𑀢𑁄 𑀯𑀼𑀢𑁆𑀢𑁄. 𑀅𑀣 𑀯𑀸 𑀫𑀦𑀽𑀢𑀺 𑀧𑀞𑀫𑀓𑀧𑁆𑀧𑀺𑀓𑀓𑀸𑀮𑁂 𑀫𑀦𑀼𑀲𑁆𑀲𑀸𑀦𑀁 𑀫𑀸𑀢𑀸𑀧𑀺𑀪𑀼𑀝𑁆𑀞𑀸𑀦𑁂 𑀞𑀺𑀢𑁄 𑀫𑀦𑀼𑀦𑀸𑀫𑀓𑁄 𑀧𑀼𑀭𑀺𑀲𑁄, 𑀬𑁄 𑀲𑀸𑀲𑀦𑁂 ‘‘𑀫𑀳𑀸𑀲𑀫𑁆𑀫𑀢𑀭𑀸𑀚𑀸’’𑀢𑀺 𑀯𑀼𑀢𑁆𑀢𑁄. 𑀲𑁄 𑀳𑀺 𑀲𑀓𑀮𑀮𑁄𑀓𑀲𑁆𑀲 𑀳𑀺𑀢𑀁 𑀓𑀸𑀢𑀼𑀁 𑀫𑀦𑀼𑀢𑁂 𑀚𑀸𑀦𑀸𑀢𑀻𑀢𑀺 ‘‘𑀫𑀦𑀽’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀩𑀮𑀁 𑀅𑀢𑁆𑀢𑀦𑁄 𑀳𑀺𑀢𑀁 𑀫𑀦𑀼𑀢𑁂 𑀚𑀸𑀦𑀸𑀢𑀻𑀢𑀺 𑀫𑀦𑀼𑀲𑁆𑀲𑁄, 𑀫𑀦𑀲𑁆𑀲 𑀯𑀸 𑀉𑀲𑁆𑀲𑀦𑁆𑀦𑀢𑁆𑀢𑀸 𑀫𑀦𑀼𑀲𑁆𑀲𑁄. 𑀅𑀣 𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀫𑀦𑀼𑀦𑁄 𑀅𑀧𑀘𑁆𑀘𑀁 𑀫𑀦𑀼𑀲𑁆𑀲𑁄. 𑀏𑀯𑀁 𑀫𑀸𑀦𑀯𑁄 𑀫𑀸𑀡𑀯𑁄 𑀘, 𑀦𑀓𑀸𑀭𑀲𑁆𑀲 𑀳𑀺 𑀡𑀓𑀸𑀭𑁂 𑀓𑀢𑁂 ‘‘𑀫𑀸𑀡𑀯𑁄’’𑀢𑀺 𑀭𑀽𑀧𑀁 𑀲𑀺𑀚𑁆𑀛𑀢𑀺. 𑀓𑁂𑀘𑀺 𑀧𑀦𑀸𑀳𑀼 ‘‘𑀤𑀦𑁆𑀢𑀚𑀦𑀓𑀸𑀭𑀲𑀳𑀺𑀢𑁄 𑀫𑀸𑀦𑀯𑀲𑀤𑁆𑀤𑁄 𑀲𑀩𑁆𑀩𑀲𑀢𑁆𑀢𑀲𑀸𑀥𑀸𑀭𑀡𑀯𑀘𑀦𑁄, 𑀫𑀼𑀤𑁆𑀥𑀚𑀡𑀓𑀸𑀭𑀲𑀳𑀺𑀢𑁄 𑀧𑀦 𑀫𑀸𑀡𑀯𑀲𑀤𑁆𑀤𑁄 𑀓𑀼𑀘𑁆𑀙𑀺𑀢𑀫𑀽𑀴𑁆𑀳𑀸𑀧𑀘𑁆𑀘𑀯𑀘𑀦𑁄’’𑀢𑀺, 𑀢𑀁 𑀯𑀻𑀫𑀁𑀲𑀺𑀢𑁆𑀯𑀸 𑀬𑀼𑀢𑁆𑀢𑀜𑁆𑀘𑁂, 𑀕𑀳𑁂𑀢𑀩𑁆𑀩𑀁, 𑀦 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 ‘‘𑀫𑀸𑀡𑀯𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑀯𑀘𑀦𑁂 𑀇𑀤𑀁 𑀯𑀘𑀦𑀁 𑀯𑀺𑀭𑀼𑀚𑁆𑀛𑀢𑀻’’𑀢𑀺 𑀅𑀦𑁆𑀢𑀭𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂 𑀅𑀦𑁆𑀢𑀭𑀅𑀦𑁆𑀢𑀭𑀺𑀓𑀸𑀲𑀤𑁆𑀤𑀸𑀦𑀫𑁆𑀧𑀺 𑀆𑀳𑀭𑀡𑀲𑁆𑀲 𑀤𑀲𑁆𑀲𑀦𑀢𑁄.

𑀢𑀢𑁆𑀭 ¶ 𑀧𑀦𑀸𑀬𑀁 𑀯𑀻𑀫𑀁𑀲𑀦𑀸 𑁋 𑀘𑀽𑀴𑀓𑀫𑁆𑀫𑀯𑀺𑀪𑀗𑁆𑀕𑀲𑀼𑀢𑁆𑀢𑀲𑁆𑀫𑀺𑀜𑁆𑀳𑀺 ‘‘𑀲𑀼𑀪𑁄 𑀫𑀸𑀡𑀯𑁄𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑁄’’𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 ‘‘𑀲𑀼𑀪𑁄𑀢𑀺 𑀲𑁄 𑀓𑀺𑀭 𑀤𑀲𑁆𑀲𑀦𑀻𑀬𑁄 𑀅𑀳𑁄𑀲𑀺 𑀧𑀸𑀲𑀸𑀤𑀺𑀓𑁄, 𑀢𑁂𑀦𑀲𑁆𑀲 𑀅𑀗𑁆𑀕𑀲𑀼𑀪𑀢𑀸𑀬 ‘𑀲𑀼𑀪𑁄’𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼. ‘𑀫𑀸𑀡𑀯𑁄’𑀢𑀺 𑀧𑀦 𑀢𑀁 𑀢𑀭𑀼𑀡𑀓𑀸𑀮𑁂 𑀯𑁄𑀳𑀭𑀺𑀁𑀲𑀼, 𑀲𑁄 𑀫𑀳𑀮𑁆𑀮𑀓𑀓𑀸𑀮𑁂𑀧𑀺 𑀢𑁂𑀦𑁂𑀯 𑀯𑁄𑀳𑀸𑀭𑁂𑀦 𑀯𑁄𑀳𑀭𑀺𑀬𑀢𑀻’’𑀢𑀺 𑀏𑀯𑀁 𑀫𑀼𑀤𑁆𑀥𑀚𑀡𑀓𑀸𑀭𑀲𑁆𑀲 𑀫𑀸𑀡𑀯𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄, 𑀢𑀝𑁆𑀝𑀻𑀓𑀸𑀬𑀫𑁆𑀧𑀺 𑀕𑀭𑀽𑀳𑀺 ‘‘𑀬𑀁 𑀅𑀧𑀘𑁆𑀘𑀁 𑀓𑀼𑀘𑁆𑀙𑀺𑀢𑀁 𑀫𑀼𑀤𑁆𑀥𑀁 𑀯𑀸, 𑀢𑀢𑁆𑀣 𑀮𑁄𑀓𑁂 𑀫𑀸𑀡𑀯𑀯𑁄𑀳𑀸𑀭𑁄, 𑀬𑁂𑀪𑀼𑀬𑁆𑀬𑁂𑀦 𑀘 𑀲𑀢𑁆𑀢𑀸 𑀤𑀳𑀭𑀓𑀸𑀮𑁂 𑀫𑀼𑀤𑁆𑀥𑀥𑀸𑀢𑀼𑀓𑀸 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘𑀢𑀭𑀼𑀡𑀓𑀸𑀮𑁂 𑀯𑁄𑀳𑀭𑀺𑀁𑀲𑀽’’𑀢𑀺, 𑀏𑀯𑀁 𑀫𑀼𑀤𑁆𑀥𑀚𑀡𑀓𑀸𑀭𑀲𑁆𑀲 𑀫𑀸𑀡𑀯𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄. 𑀇𑀤𑀸𑀦𑀺 𑀫𑀸𑀡𑀯𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄 𑀪𑀯𑀢𑀺, 𑀫𑀸𑀡𑀯𑁄𑀢𑀺 𑀲𑀢𑁆𑀢𑁄𑀧𑀺 𑀘𑁄𑀭𑁄𑀧𑀺 𑀢𑀭𑀼𑀡𑁄𑀧𑀺 𑀯𑀼𑀘𑁆𑀘𑀢𑀺. ‘‘𑀘𑁄𑀤𑀺𑀢𑀸 𑀤𑁂𑀯𑀤𑀽𑀢𑁂𑀳𑀺, 𑀬𑁂 𑀧𑀫𑀚𑁆𑀚𑀦𑁆𑀢𑀺 𑀫𑀸𑀡𑀯𑀸’’𑀢𑀺𑀆𑀤𑀻𑀲𑀼 𑀳𑀺 𑀲𑀢𑁆𑀢𑁄 ‘‘𑀫𑀸𑀡𑀯𑁄’’𑀢𑀺 𑀯𑀼𑀢𑁆𑀢𑁄. ‘‘𑀫𑀸𑀡𑀯𑁂𑀳𑀺 𑀲𑀳 𑀕𑀘𑁆𑀙𑀦𑁆𑀢𑀺 𑀓𑀢𑀓𑀫𑁆𑀫𑁂𑀳𑀺𑀧𑀺 𑀅𑀓𑀢𑀓𑀫𑁆𑀫𑁂𑀳𑀺𑀧𑀻’’𑀢𑀺𑀆𑀤𑀻𑀲𑀼 𑀘𑁄𑀭𑁄. ‘‘𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄’’𑀢𑀺𑀆𑀤𑀻𑀲𑀼 𑀢𑀭𑀼𑀡𑁄 ‘‘𑀫𑀸𑀡𑀯𑁄’’𑀢𑀺 𑀯𑀼𑀢𑁆𑀢𑁄.

𑀅𑀧𑁆𑀧 𑀧𑀸𑀧𑀼𑀡𑁂. 𑀅𑀧𑁆𑀧𑁄𑀢𑀺. 𑀆𑀧𑁄.

𑀏𑀢𑁆𑀣 𑀆𑀧𑁄𑀢𑀺 𑀅𑀧𑁆𑀧𑁄𑀢𑀺 𑀢𑀁 𑀢𑀁 𑀞𑀸𑀦𑀁 𑀯𑀺𑀲𑁆𑀲𑀭𑀢𑀻𑀢𑀺 𑀆𑀧𑁄.

𑀫𑀸 𑀧𑀭𑀺𑀫𑀸𑀡𑁂. 𑀫𑀺𑀦𑁄𑀢𑀺. 𑀉𑀧𑀫𑀸, 𑀉𑀧𑀫𑀸𑀦𑀁, 𑀯𑀺𑀫𑀸𑀦𑀁. 𑀅𑀜𑁆𑀜𑀸𑀦𑀺𑀧𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀏𑀢𑁆𑀣 𑀘 𑀬𑀸 𑀅𑀘𑁆𑀘𑀦𑁆𑀢𑀁 𑀦 𑀫𑀺𑀦𑁄𑀢𑀺 𑀦 𑀯𑀺𑀘𑁆𑀙𑀺𑀦𑁆𑀤𑀢𑀺, 𑀲𑀸 𑀫𑀸𑀦𑀲𑁆𑀲 𑀲𑀫𑀻𑀧𑁂 𑀯𑀢𑁆𑀢𑀢𑀻𑀢𑀺 𑀉𑀧𑀫𑀸 𑀬𑀣𑀸 ‘‘𑀕𑁄𑀡𑁄 𑀯𑀺𑀬 𑀕𑀯𑀚𑁄’’𑀢𑀺. 𑀉𑀧𑀫𑀸𑀦𑀦𑁆𑀢𑀺 ¶ 𑀉𑀧𑀫𑀸 𑀏𑀯. 𑀢𑀣𑀸 𑀳𑀺 ‘‘𑀯𑀻𑀢𑁄𑀧𑀫𑀸𑀦𑀫𑀧𑁆𑀧𑀫𑀸𑀡𑀫𑀦𑀸𑀣𑀦𑀸𑀣’’𑀦𑁆𑀢𑀺. 𑀏𑀢𑁆𑀣 𑀯𑀻𑀢𑁄𑀧𑀫𑀸𑀦𑀦𑁆𑀢𑀺 𑀇𑀫𑀲𑁆𑀲 𑀯𑀻𑀢𑁄𑀧𑀫𑀁, 𑀦𑀺𑀭𑀼𑀧𑀫𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀉𑀧𑀫𑀸𑀦𑀦𑁆𑀢𑀺 𑀉𑀧𑀫𑁂𑀢𑀩𑁆𑀩𑀸𑀓𑀸𑀭𑁄 ‘‘𑀲𑀻𑀳𑁄 𑀯𑀺𑀬 𑀪𑀕𑀯𑀸’’𑀢𑀺. 𑀏𑀢𑁆𑀣 𑀳𑀺 𑀲𑀻𑀳𑁄 𑀉𑀧𑀫𑀸, 𑀪𑀕𑀯𑀸 𑀉𑀧𑀫𑁂𑀬𑁆𑀬𑁄 𑀢𑁂𑀚𑁄𑀧𑀭𑀓𑁆𑀓𑀫𑀸𑀤𑀻𑀳𑀺 𑀉𑀧𑀫𑁂𑀢𑀩𑁆𑀩𑀢𑁆𑀢𑀸, 𑀢𑁂𑀚𑁄𑀧𑀭𑀓𑁆𑀓𑀫𑀸𑀤𑀬𑁄 𑀉𑀧𑀫𑁂𑀢𑀩𑁆𑀩𑀸𑀓𑀸𑀭𑁄. 𑀏𑀢𑁆𑀣 𑀧𑀦 𑀲𑀸𑀢𑀺𑀲𑀬𑀢𑁆𑀢𑀸 𑀓𑀺𑀜𑁆𑀘𑀸𑀧𑀺 𑀲𑀻𑀳𑀲𑁆𑀲 𑀢𑁂𑀚𑀸𑀤𑀻𑀳𑀺 𑀪𑀕𑀯𑀢𑁄 𑀢𑁂𑀚𑀸𑀤𑀺𑀉𑀧𑀫𑁂𑀢𑀩𑁆𑀩𑀸𑀓𑀸𑀭𑁄 𑀦𑀢𑁆𑀣𑀺, 𑀢𑀣𑀸𑀧𑀺 𑀳𑀻𑀦𑀽𑀧𑀫𑀸𑀯𑀲𑁂𑀦 ‘‘𑀲𑀻𑀳𑁄 𑀯𑀺𑀬 𑀪𑀕𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀫𑀸𑀦𑀦𑁆𑀢𑀺 𑀉𑀢𑀼𑀲𑀫𑀼𑀝𑁆𑀞𑀸𑀦𑀢𑁆𑀢𑁂𑀧𑀺 𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀢𑁆𑀢𑀸 𑀓𑀫𑁆𑀫𑁂𑀦 𑀯𑀺𑀲𑁂𑀲𑀢𑁄 𑀫𑀺𑀦𑀺𑀬𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀬𑀢𑀻𑀢𑀺 𑀯𑀺𑀫𑀸𑀦𑀁.

𑀓𑀭 𑀓𑀭𑀡𑁂. ‘‘𑀓𑀭𑁄𑀢𑀺, 𑀓𑀬𑀺𑀭𑀢𑀺, 𑀓𑀼𑀩𑁆𑀩𑀢𑀺, 𑀓𑁆𑀭𑀼𑀩𑁆𑀩𑀢𑀺, 𑀧𑀓𑀭𑁄𑀢𑀺, 𑀉𑀧𑀓𑀭𑁄𑀢𑀺, 𑀅𑀧𑀓𑀭𑁄𑀢𑀺, 𑀧𑀝𑀺𑀓𑀭𑁄𑀢𑀺, 𑀦𑀺𑀭𑀸𑀓𑀭𑁄𑀢𑀺, 𑀧𑀝𑀺𑀲𑀗𑁆𑀔𑀭𑁄𑀢𑀺, 𑀅𑀪𑀺𑀲𑀗𑁆𑀔𑀭𑁄𑀢𑀺’’ 𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀓𑀢𑁆𑀢𑀭𑀺 𑀪𑀯𑀦𑁆𑀢𑀺. 𑀓𑀫𑁆𑀫𑁂 𑀧𑀸𑀴𑀺𑀦𑀬𑀯𑀲𑁂𑀦 𑀇𑀓𑀸𑀭𑀸𑀕𑀫𑀝𑁆𑀞𑀸𑀦𑁂 𑀬𑀓𑀸𑀭𑀲𑁆𑀲 𑀤𑁆𑀯𑁂𑀪𑀸𑀯𑁄. 𑀢𑀲𑁆𑀫𑀺𑀁𑀬𑁂𑀯𑀞𑀸𑀦𑁂 𑀭𑀬𑀓𑀸𑀭𑀸𑀦𑀁 𑀯𑀺𑀧𑀭𑀺𑀬𑀸𑀬𑁂 𑀲𑀢𑀺 𑀦 𑀤𑁆𑀯𑁂𑀪𑀸𑀯𑁄. 𑀢𑀣𑀸 𑀈𑀓𑀸𑀭𑀸𑀕𑀫𑀝𑁆𑀞𑀸𑀦𑁂 ‘‘𑀓𑀭𑀺𑀬𑁆𑀬𑀢𑀺, 𑀓𑀬𑀺𑀭𑀢𑀺, 𑀓𑀭𑀻𑀬𑀢𑀺, 𑀓𑀬𑁆𑀬𑀢𑀺, 𑀧𑀓𑀭𑀻𑀬𑀢𑀺, 𑀧𑀓𑀭𑀺𑀬𑁆𑀬𑀢𑀺, 𑀧𑀝𑀺𑀲𑀗𑁆𑀔𑀭𑀺𑀬𑁆𑀬𑀢𑀺, 𑀅𑀪𑀺𑀲𑀗𑁆𑀔𑀭𑀺𑀬𑁆𑀬𑀢𑀺’’ 𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀓𑀫𑁆𑀫𑀦𑀺 𑀪𑀯𑀦𑁆𑀢𑀺.

𑀏𑀢𑁆𑀣 𑀘 𑀓𑀬𑀺𑀭𑀢𑀻𑀢𑀺 𑀧𑀤𑀁 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀤𑀺𑀲𑁆𑀲𑀢𑀺 𑀓𑀢𑁆𑀢𑀭𑀺 𑀓𑀫𑁆𑀫𑁂 𑀘. 𑀢𑁂𑀲 𑀓𑀢𑁆𑀢𑀼𑀯𑀲𑁂𑀦 ‘‘𑀧𑀼𑀭𑀺𑀲𑁄 𑀓𑀫𑁆𑀫𑀁 𑀓𑀬𑀺𑀭𑀢𑀻’’𑀢𑀺 𑀬𑁄𑀚𑁂𑀢𑀩𑁆𑀩𑀁, 𑀓𑀫𑁆𑀫𑀯𑀲𑁂𑀦 𑀧𑀦 𑀅𑀬𑀁 𑀧𑀸𑀴𑀺 ‘‘𑀓𑀼𑀝𑀺 𑀫𑁂 𑀓𑀬𑀺𑀭𑀢𑀺 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀸’’𑀢𑀺. 𑀢𑀢𑁆𑀣 𑀘 𑀓𑀢𑁆𑀢𑀼𑀯𑀲𑁂𑀦 𑀯𑀼𑀢𑁆𑀢𑀁 𑀓𑀢𑁆𑀢𑀼𑀧𑀤𑀁 𑀬𑀺𑀭𑀧𑀘𑁆𑀘𑀬𑁂𑀦 𑀲𑀺𑀤𑁆𑀥𑀁. 𑀓𑀫𑁆𑀫𑀯𑀲𑁂𑀦 𑀧𑀦 𑀯𑀼𑀢𑁆𑀢𑀁 𑀓𑀫𑁆𑀫𑀧𑀤𑀁 𑀇𑀓𑀸𑀭𑀸𑀕𑀫𑀲𑁆𑀲 𑀆𑀤𑀺𑀅𑀦𑁆𑀢𑀪𑀽𑀢𑀸𑀦𑀁 𑀭𑀬𑀓𑀸𑀭𑀸𑀦𑀁 𑀯𑀺𑀧𑀭𑀺𑀬𑀸𑀬𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀓𑀸𑀭𑁂𑀢𑀺, 𑀓𑀸𑀭𑀬𑀢𑀺, 𑀓𑀸𑀭𑀸𑀧𑁂𑀢𑀺, 𑀓𑀸𑀭𑀸𑀧𑀬𑀢𑀻’’𑀢𑀺 𑀘𑀢𑁆𑀢𑀸𑀭𑀺 𑀓𑀸𑀭𑀺𑀢𑀭𑀽𑀧𑀸𑀦𑀺, 𑀬𑀸𑀦𑀺 ‘‘𑀳𑁂𑀢𑀼𑀓𑀢𑁆𑀢𑀼𑀭𑀽𑀧𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺 𑀢𑀤𑁆𑀤𑀻𑀧𑀓𑀢𑁆𑀢𑀸.

𑀇𑀤𑀸𑀦𑀺 ¶ 𑀧𑀦 𑀧𑀤𑀫𑀸𑀮𑀸 𑀯𑀢𑁆𑀢𑀩𑁆𑀩𑀸, 𑀢𑀢𑁆𑀭 𑀧𑀞𑀫𑀁 ‘‘𑀓𑀼𑀩𑁆𑀩𑀢𑀻’’𑀢𑀺 𑀧𑀤𑀲𑁆𑀲𑁂𑀯 𑀧𑀤𑀫𑀸𑀮𑀁 𑀬𑁄𑀚𑁂𑀲𑁆𑀲𑀸𑀫 𑀲𑀩𑁆𑀩𑀸𑀲𑀼 𑀯𑀺𑀪𑀢𑁆𑀢𑀻𑀲𑀼 𑀏𑀓𑀸𑀓𑀸𑀭𑁂𑀦 𑀬𑁄𑀚𑁂𑀢𑀩𑁆𑀩𑀢𑁆𑀢𑀸. ‘‘𑀓𑀭𑁄𑀢𑀻’’𑀢𑀺 𑀑𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢𑀧𑀤𑀲𑁆𑀲 𑀧𑀦 ‘‘𑀓𑀸𑀭𑁂𑀢𑀻’’𑀢𑀺 𑀏𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢𑀧𑀤𑀲𑁆𑀲 𑀘 𑀧𑀤𑀫𑀸𑀮𑀁 𑀬𑀣𑀸𑀲𑀫𑁆𑀪𑀯𑀁 𑀧𑀘𑁆𑀙𑀸 𑀬𑁄𑀚𑁂𑀲𑁆𑀲𑀸𑀫 𑀏𑀓𑀸𑀓𑀸𑀭𑁂𑀦 𑀅𑀬𑁄𑀚𑁂𑀢𑀩𑁆𑀩𑀢𑁆𑀢𑀸.

𑀢𑀢𑁆𑀭 𑀓𑀼𑀩𑁆𑀩𑀢𑀺, 𑀓𑀼𑀩𑁆𑀩𑀦𑁆𑀢𑀺. 𑀓𑀼𑀩𑁆𑀩𑀲𑀺, 𑀓𑀼𑀩𑁆𑀩𑀣. 𑀓𑀼𑀩𑁆𑀩𑀸𑀫𑀺, 𑀓𑀼𑀩𑁆𑀩𑀸𑀫. 𑀓𑀼𑀩𑁆𑀩𑀢𑁂, 𑀓𑀼𑀩𑁆𑀩𑀦𑁆𑀢𑁂. 𑀓𑀼𑀩𑁆𑀩𑀲𑁂, 𑀓𑀼𑀩𑁆𑀩𑀯𑁆𑀳𑁂. 𑀓𑀼𑀩𑁆𑀩𑁂, 𑀓𑀼𑀩𑁆𑀩𑀫𑁆𑀳𑁂. 𑀯𑀢𑁆𑀢𑀫𑀸𑀦𑀸𑀯𑀲𑁂𑀦 𑀯𑀼𑀢𑁆𑀢𑀭𑀽𑀧𑀸𑀦𑀺.

𑀧𑀜𑁆𑀘𑀫𑀺𑀬𑀸𑀤𑀻𑀦𑀁 𑀯𑀲𑁂𑀦 𑀧𑀦 𑀓𑀼𑀩𑁆𑀩𑀢𑀼, 𑀓𑀼𑀩𑁆𑀩𑀦𑁆𑀢𑀼. 𑀓𑀼𑀩𑁆𑀩𑁂𑀬𑁆𑀬, 𑀓𑀼𑀩𑁆𑀩𑁂𑀬𑁆𑀬𑀼𑀁. 𑀲𑁂𑀲𑀁 ‘‘𑀪𑀯𑀢𑀺, 𑀪𑀯𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑀩𑁆𑀩𑀢𑁆𑀣 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

‘‘𑀓𑀭𑀺𑀬𑀢𑀻’’𑀢𑀺𑀆𑀤𑀻𑀦𑀺𑀧𑀺 𑀅 𑀓𑀸𑀭𑀸𑀦𑀦𑁆𑀢𑀭𑀢𑁆𑀬𑀦𑁆𑀢𑀧𑀤𑀸𑀦𑀺 𑀏𑀯𑀫𑁂𑀯 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀏𑀢𑁆𑀣 𑀘 ‘‘𑀓𑀼𑀩𑁆𑀩𑀢𑀺, 𑀓𑀼𑀩𑁆𑀩𑀦𑁆𑀢𑀺. 𑀓𑀼𑀩𑁆𑀩𑀲𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸 𑀅𑀬𑀁 𑀧𑀤𑀫𑀸𑀮𑀸 𑀧𑀸𑀴𑀺𑀦𑀬𑀤𑀲𑁆𑀲𑀦𑀢𑁄 𑀏𑀤𑀺𑀲𑀻 𑀯𑀼𑀢𑁆𑀢𑀸. 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀧𑀦 𑀲𑀸𑀲𑀦𑀺𑀓𑀸 𑀲𑀤𑁆𑀤𑀲𑀢𑁆𑀣𑁂𑀬𑁂𑀯 𑀆𑀤𑀭𑀁 𑀓𑀢𑁆𑀯𑀸 ‘‘𑀓𑀼𑀩𑁆𑀩𑀢𑀺, 𑀓𑀼𑀩𑁆𑀩𑀲𑀻’’𑀢𑀺 𑀏𑀯𑀁𑀧𑀓𑀸𑀭𑀸𑀦𑀺 𑀭𑀽𑀧𑀸𑀦𑀺 𑀧𑀸𑀴𑀺𑀬𑀁 𑀦𑀢𑁆𑀣𑀻𑀢𑀺 𑀫𑀜𑁆𑀜𑀦𑁆𑀢𑀸 𑀦 𑀇𑀘𑁆𑀙𑀦𑁆𑀢𑀺. 𑀢𑁂𑀳𑀺 𑀲𑀤𑁆𑀤𑀲𑀢𑁆𑀣𑁂 𑀯𑀺𑀬 𑀧𑀸𑀴𑀺𑀬𑀫𑁆𑀧𑀺 ‘‘𑀅𑀲𑀦𑁆𑀢𑁄 𑀦𑀸𑀦𑀼𑀓𑀼𑀩𑁆𑀩𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀑𑀓𑀸𑀭𑀧𑀘𑁆𑀘𑀬𑀲𑁆𑀲𑀸𑀤𑁂𑀲𑀪𑀽𑀢𑁄 𑀉𑀓𑀸𑀭𑁄 𑀲𑀭𑁂𑀬𑁂𑀯 𑀧𑀭𑁂 𑀯𑀓𑀸𑀭𑀁 𑀧𑀧𑁆𑀧𑁄𑀢𑀻𑀢𑀺 𑀫𑀜𑁆𑀜𑀫𑀸𑀦𑀸 ‘‘𑀓𑀼𑀩𑁆𑀩𑀦𑁆𑀢𑀺, 𑀓𑀼𑀩𑁆𑀩𑀦𑁆𑀢𑁂’’𑀢𑀺𑀆𑀤𑀻𑀦𑀺𑀬𑁂𑀯 𑀭𑀽𑀧𑀸𑀦𑀺 𑀇𑀘𑁆𑀙𑀦𑁆𑀢𑀺, 𑀧𑀭𑀲𑀭𑀲𑁆𑀲𑀸𑀪𑀸𑀯𑀢𑁄 ‘‘𑀓𑀼𑀩𑁆𑀩𑀢𑀺, 𑀓𑀼𑀩𑁆𑀩𑀲𑀻’’𑀢𑀺𑀆𑀤𑀻𑀦𑀺 𑀧𑀸𑀴𑀺𑀬𑀁 𑀦𑀢𑁆𑀣𑀻𑀢𑀺 𑀦 𑀇𑀘𑁆𑀙𑀦𑁆𑀢𑀺. 𑀫𑀬𑀁 𑀧𑀦 𑀧𑀸𑀴𑀺𑀦𑀬𑀤𑀲𑁆𑀲𑀦𑀢𑁄 𑀢𑀸𑀦𑀺 𑀭𑀽𑀧𑀸𑀦𑀺 𑀇𑀘𑁆𑀙𑀸𑀫. 𑀅𑀢𑁆𑀭 𑀲𑁄𑀢𑀸𑀭𑀸𑀦𑀁 𑀓𑀗𑁆𑀔𑀸𑀯𑀺𑀦𑁄𑀤𑀦𑀢𑁆𑀣𑀁 𑀓𑀺𑀜𑁆𑀘𑀺 𑀧𑀸𑀴𑀺𑀦𑀬𑀁 𑀯𑀤𑀸𑀫 𑁋 ‘‘𑀲𑀻𑀮𑀯𑀦𑁆𑀢𑁄 𑀦 𑀓𑀼𑀩𑁆𑀩𑀦𑁆𑀢𑀺, 𑀩𑀸𑀮𑁄 𑀲𑀻𑀮𑀸𑀦𑀺 𑀓𑀼𑀩𑁆𑀩𑀢𑀻’’𑀢𑀺 𑀘, ‘‘𑀓𑀲𑁆𑀫𑀸 𑀪𑀯𑀁 𑀯𑀺𑀚𑀦𑀫𑀭𑀜𑁆𑀜𑀦𑀺𑀲𑁆𑀲𑀺𑀢𑁄, 𑀢𑀧𑁄 𑀇𑀥 𑀓𑁆𑀭𑀼𑀩𑁆𑀩𑀢𑀻’’𑀢𑀺 𑀘, ‘‘𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀧𑀓𑁆𑀭𑀼𑀩𑁆𑀩𑀫𑀸𑀦𑁄’’𑀢𑀺 𑀘. 𑀈𑀤𑀺𑀲𑁂𑀲𑀼 𑀧𑀦 𑀞𑀸𑀦𑁂𑀲𑀼 𑀅𑀓𑀸𑀭𑀸𑀕𑀫𑁄 𑀓𑀸𑀢𑀩𑁆𑀩𑁄 ¶ . 𑀅𑀘𑀺𑀦𑁆𑀢𑁂𑀬𑁆𑀬𑁄 𑀳𑀺 𑀧𑀸𑀴𑀺𑀦𑀬𑁄, 𑀬𑁂𑀪𑀼𑀬𑁆𑀬𑁂𑀦 𑀲𑀤𑁆𑀤𑀲𑀢𑁆𑀣𑀦𑀬𑀯𑀺𑀤𑀽𑀭𑁄 𑀘. 𑀢𑀣𑀸 𑀳𑀺 𑀬𑀣𑀸 ‘‘𑀅𑀕𑁆𑀕𑀺𑀦𑀺𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀧𑀯𑀺𑀲𑀦𑁆𑀢𑀻’’𑀢𑀺 𑀧𑀸𑀴𑀺𑀕𑀢𑀺𑀤𑀲𑁆𑀲𑀦𑀢𑁄 ‘‘𑀅𑀕𑁆𑀕𑀺𑀦𑀺, 𑀅𑀕𑁆𑀕𑀺𑀦𑀻, 𑀅𑀕𑁆𑀕𑀺𑀦𑀬𑁄. 𑀅𑀕𑁆𑀕𑀺𑀦𑀺𑀁, 𑀅𑀕𑁆𑀕𑀺𑀦𑀻, 𑀅𑀕𑁆𑀕𑀺𑀦𑀬𑁄. 𑀅𑀕𑁆𑀕𑀺𑀦𑀺𑀦𑀸’’𑀢𑀺 𑀧𑀤𑀫𑀸𑀮𑀸 𑀓𑀸𑀢𑀩𑁆𑀩𑀸 𑀳𑁄𑀢𑀺, 𑀏𑀯𑀫𑁂𑀯 ‘‘𑀩𑀸𑀮𑁄 𑀲𑀻𑀮𑀸𑀦𑀺 𑀓𑀼𑀩𑁆𑀩𑀢𑀻’’𑀢𑀺 𑀧𑀸𑀴𑀺𑀕𑀢𑀺𑀤𑀲𑁆𑀲𑀦𑀢𑁄 ‘‘𑀓𑀼𑀩𑁆𑀩𑀢𑀺, 𑀓𑀼𑀩𑁆𑀩𑀦𑁆𑀢𑀺. 𑀓𑀼𑀩𑁆𑀩𑀲𑀻’’𑀢𑀺 𑀧𑀤𑀫𑀸𑀮𑀸𑀧𑀺 𑀬𑁄𑀚𑁂𑀢𑀩𑁆𑀩𑀸𑀯.

𑀬𑀣𑀸 𑀘 ‘‘𑀩𑀳𑀼𑀫𑁆𑀧𑁂𑀢𑀁 𑀅𑀲𑀩𑁆𑀪𑀺 𑀚𑀸𑀢𑀯𑁂𑀤𑀸’’𑀢𑀺 𑀧𑀸𑀴𑀺𑀕𑀢𑀺𑀤𑀲𑁆𑀲𑀦𑀢𑁄 ‘‘𑀲𑀦𑁆𑀢𑁄 𑀲𑀩𑁆𑀪𑀻𑀳𑀺 𑀲𑀤𑁆𑀥𑀺𑀁 𑀲𑀢𑀁 𑀥𑀫𑁆𑀫𑁄 𑀦 𑀚𑀭𑀁 𑀉𑀧𑁂𑀢𑀻𑀢𑀺 𑀧𑀯𑁂𑀤𑀬𑀦𑁆𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀕𑀢𑀺𑀤𑀲𑁆𑀲𑀦𑀢𑁄 𑀘 ‘‘𑀲𑀩𑁆𑀪𑀺, 𑀲𑀩𑁆𑀪𑀻, 𑀲𑀩𑁆𑀪𑀬𑁄. 𑀲𑀩𑁆𑀪𑀺𑀁, 𑀲𑀩𑁆𑀪𑀻, 𑀲𑀩𑁆𑀪𑀬𑁄. 𑀲𑀩𑁆𑀪𑀺𑀦𑀸’’𑀢𑀺 𑀧𑀤𑀫𑀸𑀮𑀸 𑀬𑁄𑀚𑁂𑀢𑀩𑁆𑀩𑀸 𑀳𑁄𑀢𑀺, 𑀏𑀯𑀫𑁂𑀯 ‘‘𑀩𑀸𑀮𑁄 𑀲𑀻𑀮𑀸𑀦𑀺 𑀓𑀼𑀩𑁆𑀩𑀢𑀻’’𑀢𑀺 𑀧𑀸𑀴𑀺𑀕𑀢𑀺𑀤𑀲𑁆𑀲𑀦𑀢𑁄 ‘‘𑀓𑀼𑀩𑁆𑀩𑀢𑀺, 𑀓𑀼𑀩𑁆𑀩𑀦𑁆𑀢𑀺. 𑀓𑀼𑀩𑁆𑀩𑀲𑀻’’𑀢𑀺 𑀧𑀤𑀫𑀸𑀮𑀸𑀧𑀺 𑀬𑁄𑀚𑁂𑀢𑀩𑁆𑀩𑀸𑀯. 𑀢𑀣𑀸 ‘‘𑀓𑁆𑀭𑀼𑀩𑁆𑀩𑀢𑀺, 𑀓𑁆𑀭𑀼𑀩𑁆𑀩𑀦𑁆𑀢𑀺. 𑀓𑁆𑀭𑀼𑀩𑁆𑀩𑀲𑀻’’𑀢𑀺𑀆𑀤𑀺 𑀲𑀩𑁆𑀩𑀁 𑀲𑀩𑁆𑀩𑀢𑁆𑀣 𑀬𑁄𑀚𑁂𑀢𑀩𑁆𑀩𑀁.

𑀇𑀤𑀸𑀦𑀺 𑀬𑀣𑀸𑀧𑀝𑀺𑀜𑁆𑀜𑀸𑀢𑀸 𑀧𑀤𑀫𑀸𑀮𑀸 𑀅𑀦𑀼𑀧𑁆𑀧𑀢𑁆𑀢𑀸. 𑀓𑀭𑁄𑀢𑀺, 𑀓𑀭𑁄𑀦𑁆𑀢𑀺. 𑀓𑀭𑁄𑀲𑀺, 𑀓𑀭𑁄𑀣. 𑀓𑀭𑁄𑀫𑀺, 𑀓𑀼𑀫𑁆𑀫𑀺, 𑀓𑀭𑁄𑀫, 𑀓𑀼𑀫𑁆𑀫. 𑀓𑀼𑀭𑀼𑀢𑁂, 𑀓𑀼𑀩𑁆𑀩𑀦𑁆𑀢𑁂. 𑀓𑀼𑀭𑀼𑀲𑁂, 𑀓𑀼𑀭𑀼𑀯𑁆𑀳𑁂. 𑀓𑀭𑁂, 𑀓𑀭𑀼𑀫𑁆𑀳𑁂. 𑀯𑀢𑁆𑀢𑀫𑀸𑀦𑀸𑀯𑀲𑁂𑀦 𑀯𑀼𑀢𑁆𑀢𑀭𑀽𑀧𑀸𑀦𑀺.

𑀓𑀭𑁄𑀢𑀼, 𑀓𑀼𑀭𑀼𑀢𑀼, 𑀓𑀭𑁄𑀦𑁆𑀢𑀼. 𑀓𑀭𑁄𑀳𑀺, 𑀓𑀭𑁄𑀣. 𑀓𑀭𑁄𑀫𑀺, 𑀓𑀼𑀫𑁆𑀫𑀺, 𑀓𑀭𑁄𑀫, 𑀓𑀼𑀫𑁆𑀫. 𑀓𑀼𑀭𑀼𑀢𑀁, 𑀓𑀼𑀩𑁆𑀩𑀦𑁆𑀢𑀁. 𑀓𑀭𑀲𑁆𑀲𑀼, 𑀓𑀼𑀭𑀼𑀲𑁆𑀲𑀼, 𑀓𑀼𑀭𑀼𑀯𑁆𑀳𑁄. 𑀓𑀭𑁂, 𑀓𑀼𑀩𑁆𑀩𑀸𑀫𑀲𑁂. 𑀧𑀜𑁆𑀘𑀫𑀻𑀯𑀲𑁂𑀦 𑀯𑀼𑀢𑁆𑀢𑀭𑀽𑀧𑀸𑀦𑀺.

𑀏𑀢𑁆𑀣 𑀧𑀦 𑀓𑁄𑀘𑀺 𑀯𑀤𑁂𑀬𑁆𑀬 𑁋

‘‘𑀦 𑀦𑁄 𑀯𑀺𑀯𑀸𑀳𑁄 𑀦𑀸𑀕𑁂𑀳𑀺, 𑀓𑀢𑀧𑀼𑀩𑁆𑀩𑁄 𑀓𑀼𑀤𑀸𑀘𑀦𑀁;

𑀢𑀁 𑀯𑀺𑀯𑀸𑀳𑀁 𑀅𑀲𑀁𑀬𑀼𑀢𑁆𑀢𑀁, 𑀓𑀣𑀁 𑀅𑀫𑁆𑀳𑁂 𑀓𑀭𑁄𑀫𑀲𑁂’’𑀢𑀺

𑀧𑀸𑀴𑀺𑀤𑀲𑁆𑀲𑀦𑀢𑁄 ¶ ‘‘𑀓𑀭𑁄𑀫𑀲𑁂’’𑀢𑀺 𑀧𑀤𑀁 𑀓𑀲𑁆𑀫𑀸 𑀇𑀥 𑀦 𑀯𑀼𑀢𑁆𑀢𑀁, 𑀦𑀦𑀼 𑀓𑀭𑀥𑀸𑀢𑀼𑀢𑁄 𑀧𑀭𑀁 𑀑𑀓𑀸𑀭𑀁 𑀧𑀝𑀺𑀘𑁆𑀘 𑀆𑀫𑀲𑁂𑀯𑀘𑀦𑀲𑁆𑀲𑀸𑀯𑀬𑀯𑀪𑀽𑀢𑁄 𑀆𑀓𑀸𑀭𑁄 𑀮𑁄𑀧𑀁 𑀧𑀧𑁆𑀧𑁄𑀢𑀻𑀢𑀺? 𑀢𑀦𑁆𑀦, ‘‘𑀓𑀭𑁄𑀫𑀲𑁂’’𑀢𑀺 𑀏𑀢𑁆𑀣 ‘‘𑀆𑀫𑀲𑁂’’𑀢𑀺 𑀯𑀘𑀦𑀲𑁆𑀲 𑀅𑀪𑀸𑀯𑀢𑁄 𑀫𑀯𑀘𑀦𑀲𑁆𑀲 𑀲𑀩𑁆𑀪𑀸𑀯𑀢𑁄. 𑀏𑀢𑁆𑀣 𑀳𑀺 𑀲𑁂𑀓𑀸𑀭𑁄 𑀆𑀕𑀫𑁄, 𑀢𑀲𑁆𑀫𑀸 ‘‘𑀓𑀭𑁄𑀫𑀸’’𑀢𑀺 𑀯𑀢𑁆𑀢𑀫𑀸𑀦𑀸𑀯𑀘𑀦𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄, 𑀦 𑀧𑀦 𑀧𑀜𑁆𑀘𑀫𑀻𑀯𑀘𑀦𑀯𑀲𑁂𑀦. 𑀏𑀯𑀁𑀪𑀽𑀢𑁄 𑀘 𑀲𑁂𑀓𑀸𑀭𑁄 𑀓𑀢𑁆𑀣𑀘𑀺 𑀦𑀸𑀫𑀺𑀓𑀧𑀤𑀢𑁄 𑀧𑀭𑁄 𑀳𑁄𑀢𑀺 ‘‘𑀬𑁂 𑀓𑁂𑀘𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸𑀲𑁂. 𑀬𑀁 𑀩𑀮𑀁 𑀅𑀳𑀼𑀯𑀫𑁆𑀳𑀲𑁂’’𑀢𑀺𑀆𑀤𑀻𑀲𑀼. 𑀓𑀢𑁆𑀣𑀘𑀺 𑀧𑀦𑀸𑀔𑁆𑀬𑀸𑀢𑀺𑀓𑀧𑀤𑀢𑁄 𑀲𑀸𑀤𑁂𑀲𑀦𑀺𑀭𑀸𑀤𑁂𑀲𑀯𑀲𑁂𑀦 𑁋

‘‘𑀅𑀓𑀭𑀫𑁆𑀳𑀲 𑀢𑁂 𑀓𑀺𑀘𑁆𑀘𑀁; 𑀑𑀓𑁆𑀓𑀦𑁆𑀢𑀸𑀫𑀲𑀺 𑀪𑀽𑀢𑀸𑀦𑀺;

𑀲𑀼𑀢𑀁 𑀦𑁂𑀢𑀁 𑀅𑀪𑀺𑀡𑁆𑀳𑀲𑁄, 𑀢𑀲𑁆𑀫𑀸 𑀏𑀯𑀁 𑀯𑀤𑁂𑀫𑀲𑁂’’𑀢𑀺

𑀆𑀤𑀻𑀲𑀼.

𑀓𑀭𑁂𑀬𑁆𑀬, 𑀓𑀭𑁂𑀬𑁆𑀬𑀼𑀁. 𑀓𑀭𑁂𑀬𑁆𑀬𑀸𑀲𑀺, 𑀓𑀭𑁂𑀬𑁆𑀬𑀸𑀣. 𑀓𑀭𑁂𑀬𑁆𑀬𑀸𑀫𑀺, 𑀓𑀭𑁂𑀬𑁆𑀬𑀸𑀫. 𑀓𑀼𑀩𑁆𑀩𑁂𑀣, 𑀓𑀼𑀩𑁆𑀩𑁂𑀭𑀁. 𑀓𑀼𑀩𑁆𑀩𑁂𑀣𑁄, 𑀓𑀼𑀩𑁆𑀩𑁂𑀬𑁆𑀬𑀯𑁆𑀳𑁄. 𑀓𑀭𑁂𑀬𑁆𑀬𑀁, 𑀓𑀭𑁂, 𑀓𑀭𑁂𑀬𑁆𑀬𑀸𑀫𑁆𑀳𑁂. 𑀲𑀢𑁆𑀢𑀫𑀻𑀯𑀲𑁂𑀦 𑀯𑀼𑀢𑁆𑀢𑀭𑀽𑀧𑀸𑀦𑀺.

𑀓𑀭, 𑀓𑀭𑀼. 𑀓𑀭𑁂, 𑀓𑀭𑀺𑀢𑁆𑀣. 𑀓𑀭𑀁, 𑀓𑀭𑀺𑀫𑁆𑀳. 𑀓𑀭𑀺𑀢𑁆𑀣, 𑀓𑀭𑀺𑀭𑁂. 𑀓𑀭𑀺𑀢𑁆𑀣𑁄, 𑀓𑀭𑀺𑀯𑁆𑀳𑁄. 𑀓𑀭𑀺𑀁, 𑀓𑀭𑀺𑀫𑁆𑀳𑁂. 𑀧𑀭𑁄𑀓𑁆𑀔𑀸𑀯𑀲𑁂𑀦 𑀯𑀼𑀢𑁆𑀢𑀭𑀽𑀧𑀸𑀦𑀺.

𑀏𑀢𑁆𑀣 𑀓𑀭𑀸𑀢𑀺 𑀧𑀼𑀭𑀺𑀲𑁄 𑀓𑀫𑁆𑀫𑀁 𑀓𑀭𑀻𑀢𑀺 𑀧𑀞𑀫𑀧𑀼𑀭𑀺𑀲𑀬𑁄𑀚𑀦𑀸𑀬 𑀬𑁄𑀚𑁂𑀢𑀩𑁆𑀩𑀁. ‘‘𑀆𑀕𑀼𑀁 𑀓𑀭 𑀫𑀳𑀸𑀭𑀸𑀚, 𑀅𑀓𑀭𑀁 𑀓𑀫𑁆𑀫𑀤𑀼𑀓𑁆𑀓𑀝’’𑀦𑁆𑀢𑀺 𑀏𑀢𑁆𑀣𑀸𑀧𑀺 ‘‘𑀫𑀳𑀸𑀭𑀸𑀚 𑀪𑀯𑀁 𑀆𑀕𑀼𑀁 𑀓𑀭𑀻’’𑀢𑀺 𑀧𑀞𑀫𑀧𑀼𑀭𑀺𑀲𑀬𑁄𑀚𑀦𑀸𑀬 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀲𑀢𑀺 𑀅𑀬𑀁 𑀧𑀬𑁄𑀕𑁄 ‘‘𑀫𑀜𑁆𑀜𑁂 𑀪𑀯𑀁 𑀧𑀢𑁆𑀣𑀬𑀢𑀺, 𑀭𑀜𑁆𑀜𑁄 𑀪𑀭𑀺𑀬𑀁 𑀧𑀢𑀺𑀩𑁆𑀩𑀢’’𑀦𑁆𑀢𑀺𑀆𑀤𑀬𑁄 𑀯𑀺𑀬 𑀧𑀞𑀫𑀧𑀼𑀭𑀺𑀲𑀧𑁆𑀧𑀬𑁄𑀕𑁄 𑀪𑀯𑀢𑀺.

𑀚𑀸𑀢𑀓𑀝𑁆𑀞𑀓𑀣𑀸𑀬𑀁 ¶ 𑀧𑀦 𑀫𑀚𑁆𑀛𑀺𑀫𑀧𑀼𑀭𑀺𑀲𑀧𑁆𑀧𑀬𑁄𑀕𑁄 𑀯𑀼𑀢𑁆𑀢𑁄 ‘‘𑀆𑀕𑀼𑀁 𑀓𑀭𑀸𑀢𑀺 𑀫𑀳𑀸𑀭𑀸𑀚 𑀢𑁆𑀯𑀁 𑀫𑀳𑀸𑀧𑀭𑀸𑀥𑀁 𑀫𑀳𑀸𑀧𑀸𑀧𑀁 𑀓𑀭𑀺. 𑀤𑀼𑀓𑁆𑀓𑀝𑀦𑁆𑀢𑀺 𑀬𑀁 𑀓𑀢𑀁 𑀤𑀼𑀓𑁆𑀓𑀝𑀁 𑀳𑁄𑀢𑀺,𑀢𑀁 𑀮𑀸𑀫𑀓𑀁 𑀓𑀫𑁆𑀫𑀁 𑀅𑀓𑀭’’𑀦𑁆𑀢𑀺, 𑀢𑀲𑁆𑀫𑀸 𑀚𑀸𑀢𑀓𑀝𑁆𑀞𑀓𑀣𑀸𑀯𑀲𑁂𑀦𑀸𑀧𑀺 𑀓𑀤𑀸𑀘𑀺 𑀓𑀭𑀇𑀢𑀺 𑀘 𑀓𑀭𑀻𑀢𑀺 𑀘 𑀅𑀓𑀭𑀦𑁆𑀢𑀺 𑀘 𑀫𑀚𑁆𑀛𑀺𑀫𑀧𑀼𑀭𑀺𑀲𑀧𑁆𑀧𑀬𑁄𑀕𑁄 𑀪𑀯𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀬𑁂𑀪𑀼𑀬𑁆𑀬𑀯𑀲𑁂𑀦 𑀧𑀦 ‘‘𑀧𑀼𑀭𑀺𑀲𑁄 𑀓𑀫𑁆𑀫𑀁 𑀓𑀭, 𑀧𑀼𑀭𑀺𑀲𑁄 𑀓𑀫𑁆𑀫𑀁 𑀓𑀭𑀺, 𑀅𑀳𑀁 𑀓𑀫𑁆𑀫𑀁 𑀅𑀓𑀭’’𑀦𑁆𑀢𑀺 𑀧𑀞𑀫𑀼𑀢𑁆𑀢𑀫𑀧𑀼𑀭𑀺𑀲𑀧𑁆𑀧𑀬𑁄𑀕𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀣 𑀘 𑀓𑀭𑀇𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀪𑀢𑁆𑀢𑀺𑀯𑀲𑁂𑀦, 𑀓𑀭𑀻𑀢𑀺 𑀅𑀚𑁆𑀚𑀢𑀦𑀻𑀯𑀲𑁂𑀦, 𑀅𑀓𑀭𑀦𑁆𑀢𑀺 𑀳𑀺𑀬𑁆𑀬𑀢𑁆𑀢𑀦𑀻𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀓𑀭𑀺𑀢𑁆𑀣𑁄’’𑀢𑀺 𑀧𑀤𑀁 ‘‘𑀅𑀜𑁆𑀜𑀁 𑀪𑀢𑁆𑀢𑀸𑀭𑀁 𑀧𑀭𑀺𑀬𑁂𑀲, 𑀫𑀸 𑀓𑀺𑀲𑀺𑀢𑁆𑀣𑁄 𑀫𑀬𑀸 𑀯𑀺𑀦𑀸’’𑀢𑀺 𑀏𑀢𑁆𑀣 ‘‘𑀓𑀺𑀲𑀺𑀢𑁆𑀣𑁄’’𑀢𑀺 𑀧𑀤𑁂𑀦 𑀲𑀫𑀁 𑀧𑀭𑁄𑀓𑁆𑀔𑀸𑀬𑀢𑁆𑀢𑀦𑁄𑀧𑀤𑀫𑀚𑁆𑀛𑀺𑀫𑀧𑀼𑀭𑀺𑀲𑁂𑀓𑀯𑀘𑀦𑀯𑀲𑁂𑀦, 𑀏𑀤𑀺𑀲𑁄 𑀧𑀦 𑀦𑀬𑁄 𑀅𑀜𑁆𑀜𑀢𑁆𑀭𑀸𑀧𑀺 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑁄.

𑀅𑀓𑀸, 𑀅𑀓𑀭𑀸, 𑀅𑀓𑀭 𑀇𑀢𑀺 𑀭𑀲𑁆𑀲𑀧𑀸𑀞𑁄𑀧𑀺. 𑀅𑀓𑀭𑀼. 𑀏𑀢𑁆𑀣 ‘‘𑀲𑀩𑁆𑀩𑀸𑀭𑀺𑀯𑀺𑀚𑀬𑀁 𑀅𑀓𑀸’’𑀢𑀺 𑀧𑀤𑀁 𑀦𑀺𑀤𑀲𑁆𑀲𑀦𑀁. 𑀅𑀓𑀭𑀸𑀢𑀺 𑀧𑀼𑀭𑀺𑀲𑁄 𑀓𑀫𑁆𑀫𑀁 𑀅𑀓𑀸𑀲𑀻𑀢𑀺 𑀅𑀢𑀻𑀢𑀓𑁆𑀭𑀺𑀬𑀸𑀯𑀸𑀘𑀓𑁄 𑀧𑀞𑀫𑀧𑀼𑀭𑀺𑀲𑀧𑁆𑀧𑀬𑁄𑀕𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 ‘‘𑀭𑀚𑁆𑀚𑀲𑁆𑀲 𑀓𑀺𑀭 𑀲𑁄 𑀪𑀻𑀢𑁄, 𑀅𑀓𑀭𑀸 𑀆𑀮𑀬𑁂 𑀩𑀳𑀽’’𑀢𑀺 𑀧𑀸𑀴𑀺 𑀤𑀺𑀲𑁆𑀲𑀢𑀺. ‘‘𑀫𑀸 𑀫𑁂𑀢𑀁 𑀅𑀓𑀭𑀸 𑀓𑀫𑁆𑀫𑀁, 𑀫𑀸 𑀫𑁂 𑀉𑀤𑀓𑀫𑀸𑀳𑀭𑀻’’𑀢𑀺 𑀏𑀢𑁆𑀣 𑀧𑀦 𑀲𑀦𑁆𑀢𑁂𑀧𑀺 𑀅𑀢𑀻𑀢𑀯𑀸𑀘𑀓𑀧𑀝𑁆𑀞𑀫𑀧𑀼𑀭𑀺𑀲𑀧𑁆𑀧𑀬𑁄𑀕𑀪𑀸𑀯𑁂 𑀫𑀸𑀲𑀤𑁆𑀤𑀬𑁄𑀕𑀢𑁄 𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀯𑀺𑀪𑀢𑁆𑀢𑀺𑀬𑁄 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺𑀅𑀢𑁆𑀣𑁂 𑀅𑀦𑀼𑀢𑁆𑀢𑀓𑀸𑀮𑀺𑀓𑀸 𑀳𑀼𑀢𑁆𑀯𑀸 ‘‘𑀢𑁆𑀯𑀁 𑀫𑀸 𑀓𑀭𑁄𑀲𑀺, 𑀫𑀸 𑀆𑀳𑀭𑀲𑀻’’𑀢𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑀧𑁆𑀧𑀬𑁄𑀕𑀸𑀭𑀳𑀸 𑀪𑀯𑀦𑁆𑀢𑀺.

𑀓𑀺𑀜𑁆𑀘 𑀪𑀺𑀬𑁆𑀬𑁄 ‘‘𑀚𑀭𑀸𑀥𑀫𑁆𑀫𑀁 𑀫𑀸 𑀚𑀻𑀭𑀻𑀢𑀺 𑀅𑀮𑀩𑁆𑀪𑀦𑁂𑀬𑁆𑀬𑀁 𑀞𑀸𑀦’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀲𑀦𑁆𑀢𑁂𑀧𑀺 𑀅𑀢𑀻𑀢𑀯𑀸𑀘𑀓𑀧𑀞𑀫𑀧𑀼𑀭𑀺𑀲𑀧𑁆𑀧𑀬𑁄𑀕𑀪𑀸𑀯𑁂 𑀫𑀸𑀲𑀤𑁆𑀤𑀬𑁄𑀕𑀢𑁄 𑀅𑀚𑁆𑀚𑀢𑀦𑀻𑀯𑀺𑀪𑀢𑁆𑀢𑀺𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺𑀅𑀢𑁆𑀣𑁂 𑀅𑀦𑀼𑀢𑁆𑀢𑀓𑀸𑀮𑀺𑀓𑀸 𑀳𑀼𑀢𑁆𑀯𑀸 ‘‘𑀫𑀸 𑀚𑀻𑀭𑀢𑀽’’𑀢𑀺𑀆𑀤𑀺𑀦𑀸 𑀧𑀞𑀫𑀧𑀼𑀭𑀺𑀲𑀧𑁆𑀧𑀬𑁄𑀕𑀸𑀭𑀳𑀸 ¶ 𑀪𑀯𑀦𑁆𑀢𑀺. 𑀢𑁂𑀦𑀸𑀳𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 ‘‘𑀚𑀭𑀸𑀥𑀫𑁆𑀫𑀁 𑀫𑀸 𑀚𑀻𑀭𑀻𑀢𑀺 𑀬𑀁 𑀫𑀬𑁆𑀳𑀁 𑀚𑀭𑀸𑀲𑀪𑀸𑀯𑀁, 𑀢𑀁 𑀫𑀸 𑀚𑀻𑀭𑀺𑀢𑀼. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀻’’𑀢𑀺. 𑀬𑀁 𑀧𑀦𑀫𑁆𑀳𑁂𑀳𑀺 ‘‘𑀅𑀓𑀭 𑀇𑀢𑀺 𑀭𑀲𑁆𑀲𑀧𑀸𑀞𑁄𑀧𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀲 ‘‘𑀅𑀢𑀺𑀓𑀭’𑀫𑀓𑀭𑀸’𑀘𑀭𑀺𑀬, 𑀫𑀬𑁆𑀳𑀫𑁆𑀧𑁂𑀢𑀁 𑀦 𑀭𑀼𑀘𑁆𑀘𑀢𑀻’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀯𑀲𑁂𑀦 𑀅𑀢𑁆𑀣𑀺𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀲𑁆𑀲𑀸𑀬𑀫𑀢𑁆𑀣𑁄 ‘‘𑀆𑀘𑀭𑀺𑀬 𑀪𑀯𑀁 𑀅𑀢𑀺𑀓𑁆𑀓𑀦𑁆𑀢𑀓𑀭𑀡𑀁 𑀅𑀓𑀭𑀸’’𑀢𑀺 𑀧𑀞𑀫𑀧𑀼𑀭𑀺𑀲𑀯𑀲𑁂𑀦 𑀕𑀳𑁂𑀢𑀩𑁆𑀩𑁄. 𑀅𑀧𑀺𑀘 ‘‘𑀪𑀯’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀅𑀢𑁆𑀣𑁂 ‘‘𑀢𑁆𑀯’’𑀦𑁆𑀢𑀺 𑀯𑀘𑀦𑀁 𑀯𑀢𑁆𑀢𑀩𑁆𑀩𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 ‘‘𑀆𑀘𑀭𑀺𑀬 𑀢𑁆𑀯𑀁 𑀅𑀢𑀺𑀓𑁆𑀓𑀦𑁆𑀢𑀓𑀭𑀡𑀁 𑀓𑀭𑁄𑀲𑀻’’𑀢𑀺 𑀬𑁄𑀚𑀦𑀸𑀧𑀺 𑀓𑀸𑀢𑀩𑁆𑀩𑀸𑀯.

𑀅𑀓𑀭𑁄, 𑀅𑀓𑀢𑁆𑀣, 𑀅𑀓𑀭𑁄𑀣. 𑀅𑀓𑀭𑀁, 𑀅𑀓𑀁, 𑀅𑀓𑀭𑀫𑁆𑀳, 𑀅𑀓𑀫𑁆𑀳. 𑀏𑀢𑁆𑀣 ‘‘𑀲𑀁𑀯𑀟𑁆𑀠𑀬𑀺𑀢𑁆𑀯𑀸 𑀧𑀼𑀴𑀺𑀦𑀁, 𑀅𑀓𑀁 𑀧𑀼𑀴𑀺𑀦𑀘𑁂𑀢𑀺𑀬’’𑀦𑁆𑀢𑀺 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. 𑀅𑀓𑀢𑁆𑀣, 𑀅𑀓𑀢𑁆𑀣𑀼𑀁. 𑀅𑀓𑀼𑀭𑀼𑀲𑁂, 𑀅𑀓𑀭𑀯𑁆𑀳𑀁. 𑀅𑀓𑀭𑀺𑀁, 𑀅𑀓𑀭𑀁, 𑀅𑀓𑀭𑀫𑁆𑀳𑀲𑁂. 𑀳𑀺𑀬𑁆𑀬𑀢𑁆𑀢𑀦𑀻𑀯𑀲𑁂𑀦 𑀯𑀼𑀢𑁆𑀢𑀭𑀽𑀧𑀸𑀦𑀺.

𑀏𑀢𑁆𑀣 𑀘 𑀧𑀜𑁆𑀘𑀯𑀺𑀥𑁄 𑀲𑁂𑀓𑀸𑀭𑁄 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑁄. 𑀢𑀣𑀸 𑀳𑀺 𑀧𑀜𑁆𑀘𑀯𑀺𑀥𑁄 𑀲𑁂𑀓𑀸𑀭𑁄 𑀧𑀤𑀸𑀯𑀬𑀯 𑀅𑀧𑀤𑀸𑀯𑀬𑀯𑀅𑀦𑁂𑀓𑀦𑁆𑀢𑀧𑀤𑀸𑀯𑀬𑀯 𑀲𑁄𑀲𑀤𑁆𑀤𑀢𑁆𑀣 𑀆𑀤𑁂𑀲𑀯𑀲𑁂𑀦. 𑀢𑀢𑁆𑀣 𑀧𑀤𑀸𑀯𑀬𑀯𑁄 𑀲𑁂𑀓𑀸𑀭𑁄 ‘‘𑀢𑁆𑀯𑀁 𑀓𑀫𑁆𑀫𑀁 𑀓𑀼𑀭𑀼𑀲𑁂, 𑀢𑁆𑀯𑀁 𑀅𑀢𑁆𑀣𑀓𑀼𑀲𑀮𑁄 𑀅𑀪𑀯𑀲𑁂’’𑀢𑀺𑀆𑀤𑀻𑀲𑀼 𑀤𑀝𑁆𑀞𑀩𑁆𑀩𑁄. 𑀅𑀧𑀤𑀸𑀯𑀬𑀯𑁄 𑀧𑀦 ‘‘𑀢𑀲𑁆𑀫𑀸 𑀏𑀯𑀁 𑀯𑀤𑁂𑀫𑀲𑁂. 𑀫𑀽𑀮𑀸 𑀅𑀓𑀼𑀲𑀮𑀸 𑀲𑀫𑀽𑀳𑀢𑀸𑀲𑁂’’𑀢𑀺𑀆𑀤𑀻𑀲𑀼 𑀤𑀝𑁆𑀞𑀩𑁆𑀩𑁄. 𑀅𑀦𑁂𑀓𑀦𑁆𑀢𑀧𑀤𑀸𑀯𑀬𑀯𑁄 ‘‘𑀅𑀭𑁄𑀕𑀸 𑀘 𑀪𑀯𑀸𑀫𑀲𑁂. 𑀫𑀡𑀺𑀁 𑀢𑀸𑀢 𑀕𑀡𑁆𑀳𑀸𑀫𑀲𑁂’’𑀆𑀤𑀻𑀲𑀼 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀣 𑀳𑀺 𑀲𑁂𑀓𑀸𑀭𑁄 𑀬𑀤𑀺 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺𑀬𑀁 𑀆𑀫𑀲𑁂𑀯𑀘𑀦𑀲𑁆𑀲𑀸𑀯𑀬𑀯𑁄, 𑀢𑀤𑀸 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀸𑀦𑀁 𑀧𑀢𑁆𑀣𑀦𑀸𑀲𑀻𑀲𑀦𑀢𑁆𑀣𑀸𑀦𑀁 ‘‘𑀪𑀯𑀸𑀫𑀲𑁂, 𑀕𑀡𑁆𑀳𑀸𑀫𑀲𑁂’’𑀢𑀺 𑀧𑀤𑀸𑀦𑀁 𑀅𑀯𑀬𑀯𑁄 𑀳𑁄𑀢𑀺. 𑀬𑀤𑀺 𑀧𑀦 𑀆𑀕𑀫𑁄, 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀸𑀦𑀁 𑀧𑀢𑁆𑀣𑀦𑀸𑀲𑀻𑀲𑀦𑀢𑁆𑀣𑀸𑀦𑀁 ‘‘𑀪𑀯𑀸𑀫, 𑀕𑀡𑁆𑀳𑀸𑀫𑀸’’𑀢𑀺 𑀧𑀤𑀸𑀦𑀁 𑀅𑀯𑀬𑀯𑁄 𑀦 𑀳𑁄𑀢𑀺, 𑀏𑀯𑀁 ‘‘𑀪𑀯𑀸𑀫𑀲𑁂’’𑀢𑀺𑀆𑀤𑀻𑀲𑀼 ¶ 𑀲𑁂𑀓𑀸𑀭𑀲𑁆𑀲 𑀅𑀦𑁂𑀓𑀦𑁆𑀢𑀧𑀤𑀸𑀯𑀬𑀯𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁄𑀲𑀤𑁆𑀤𑀢𑁆𑀣𑁄 ‘‘𑀏𑀲𑁂𑀲𑁂 𑀏𑀓𑁂 𑀏𑀓𑀝𑁆𑀞𑁂’’𑀢𑀺 𑀏𑀢𑁆𑀣 𑀤𑀝𑁆𑀞𑀩𑁆𑀩𑁄. 𑀏𑀲𑁂𑀲𑁂𑀢𑀺 𑀇𑀫𑀲𑁆𑀲 𑀳𑀺 ‘‘𑀏𑀲𑁄𑀲𑁄 𑀏𑀓𑁄 𑀏𑀓𑀝𑁆𑀞𑁄’’𑀢𑀺 𑀅𑀢𑁆𑀣𑁄. 𑀆𑀤𑁂𑀲𑁄 ‘‘𑀅𑀓𑀭𑀫𑁆𑀳𑀲 𑀢𑁂 𑀓𑀺𑀘𑁆𑀘’’𑀦𑁆𑀢𑀺 𑀏𑀢𑁆𑀣, ‘‘𑀑𑀓𑁆𑀓𑀦𑁆𑀢𑀸𑀫𑀲𑀺 𑀪𑀽𑀢𑀸𑀦𑀻’’𑀢𑀺 𑀘𑁂𑀢𑁆𑀣 𑀤𑀝𑁆𑀞𑀩𑁆𑀩𑁄 𑀏𑀓𑀸𑀭𑀲𑁆𑀲 𑀅𑀓𑀸𑀭𑀺𑀓𑀸𑀭𑀸𑀤𑁂𑀲𑀓𑀭𑀡𑀯𑀲𑁂𑀦. 𑀢𑀢𑁆𑀣 ‘‘𑀅𑀓𑀭𑀫𑁆𑀳𑀲 𑀢𑁂 𑀓𑀺𑀘𑁆𑀘’’𑀦𑁆𑀢𑀺 𑀇𑀫𑀲𑁆𑀲 ‘‘𑀅𑀓𑀭𑀫𑁆𑀳𑀲𑁂 𑀢𑁂 𑀓𑀺𑀘𑁆𑀘’’𑀦𑁆𑀢𑀺 𑀅𑀢𑁆𑀣𑁄. ‘‘𑀅𑀓𑀭𑀫𑁆𑀳𑀲𑁂’’𑀢𑀺 𑀘𑁂𑀢𑁆𑀣 𑀲𑀘𑁂 𑀲𑁂𑀓𑀸𑀭𑁄 𑀆𑀕𑀫𑁄, 𑀢𑀤𑀸 ‘‘𑀓𑀭𑀫𑁆𑀳𑀸’’𑀢𑀺 𑀧𑀤𑀁 𑀳𑀺𑀬𑁆𑀬𑀢𑁆𑀢𑀦𑀻𑀧𑀭𑀲𑁆𑀲𑀧𑀤𑁂 𑀉𑀢𑁆𑀢𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑀦𑁆𑀢𑀁. 𑀲𑀘𑁂 𑀧𑀦 𑀫𑁆𑀳𑀲𑁂𑀯𑀘𑀦𑀲𑁆𑀲𑀸𑀯𑀬𑀯𑁄, 𑀢𑀤𑀸 ‘‘𑀅𑀓𑀭𑀫𑁆𑀳𑀲𑁂’’𑀢𑀺 𑀧𑀤𑀁 𑀳𑀺𑀬𑁆𑀬𑀢𑁆𑀢𑀦𑀻𑀅𑀢𑁆𑀢𑀦𑁄𑀧𑀤𑁂 𑀉𑀢𑁆𑀢𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑀦𑁆𑀢𑀁. 𑀏𑀯𑀁 𑀧𑀜𑁆𑀘𑀯𑀺𑀥𑁄 𑀲𑁂𑀓𑀸𑀭𑁄 𑀪𑀯𑀢𑀻𑀢𑀺 𑀅𑀯𑀕𑀦𑁆𑀢𑀩𑁆𑀩𑀁.

𑀅𑀓𑀭𑀺, 𑀓𑀭𑀺, 𑀅𑀓𑀸𑀲𑀺, 𑀅𑀓𑀭𑀼𑀁, 𑀅𑀓𑀭𑀺𑀁𑀲𑀼, 𑀅𑀓𑀁𑀲𑀼, 𑀅𑀓𑀁𑀲𑀼𑀁. 𑀅𑀓𑀭𑁄, 𑀅𑀓𑀭𑀺𑀢𑁆𑀣, 𑀅𑀓𑀸𑀲𑀺𑀢𑁆𑀣.

𑀏𑀢𑁆𑀣 𑀘 𑀅𑀓𑀭𑁄𑀢𑀺 𑀢𑁆𑀯𑀁 𑀅𑀓𑀭𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. ‘‘𑀅𑀓𑀭𑁄’’ 𑀇𑀢𑀺 𑀳𑀺 𑀧𑀤𑀁 ‘‘𑀯𑀭𑀜𑁆𑀘𑁂 𑀫𑁂 𑀅𑀤𑁄 𑀲𑀓𑁆𑀓𑀸’’𑀢𑀺 𑀏𑀢𑁆𑀣 𑀫𑀚𑁆𑀛𑀺𑀫𑀧𑀼𑀭𑀺𑀲𑁂𑀓𑀯𑀘𑀦𑀢𑁆𑀣𑀁 ‘‘𑀅𑀤𑁄’’𑀢𑀺 𑀧𑀤𑀫𑀺𑀯 𑀤𑀝𑁆𑀞𑀩𑁆𑀩𑀁 𑀧𑀸𑀴𑀺𑀬𑀁 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑁂𑀧𑀺 𑀦𑀬𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑁆𑀢𑀸. 𑀕𑀭𑀽 𑀧𑀦 ‘‘𑀅𑀓𑀭𑁄’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 ‘‘𑀅𑀓𑀸𑀲𑀻’’𑀢𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑀯𑀘𑀦𑀁 𑀇𑀘𑁆𑀙𑀦𑁆𑀢𑀺. 𑀢𑀸𑀤𑀺𑀲𑀜𑁆𑀳𑀺 𑀧𑀤𑀁 𑀬𑁂𑀪𑀼𑀬𑁆𑀬𑁂𑀦 𑀧𑀞𑀫𑀧𑀼𑀭𑀺𑀲𑀯𑀘𑀦𑀫𑁂𑀯 𑀳𑁄𑀢𑀺. 𑀢𑀣𑀸 𑀳𑀺 ‘‘𑀅𑀤𑀸𑀲𑀺 𑀫𑁂, 𑀅𑀓𑀸𑀲𑀺 𑀫𑁂’’𑀢𑀺 𑀧𑀞𑀫𑀧𑀼𑀭𑀺𑀲𑀧𑀸𑀴𑀺𑀬𑁄 𑀩𑀳𑀽 𑀲𑀦𑁆𑀤𑀺𑀲𑁆𑀲𑀦𑁆𑀢𑀺. ‘‘𑀫𑀸𑀓𑀸𑀲𑀺 𑀫𑀼𑀔𑀲𑀸 𑀧𑀸𑀧𑀁, 𑀫𑀸 𑀔𑁄 𑀲𑀽𑀓𑀭𑀫𑀼𑀔𑁄 𑀅𑀳𑀽’’𑀢𑀺𑀆𑀤𑀻𑀲𑀼 𑀧𑀦 𑀫𑀸𑀲𑀤𑁆𑀤𑀬𑁄𑀕𑀢𑁄 ‘‘𑀢𑁆𑀯𑀁 𑀧𑀸𑀧𑀁 𑀫𑀸 𑀅𑀓𑀸𑀲𑀺, 𑀫𑀸 𑀲𑀽𑀓𑀭𑀫𑀼𑀔𑁄 𑀅𑀳𑁄𑀲𑀻’’𑀢𑀺 𑀧𑀤𑀬𑁄𑀚𑀦𑀸 𑀓𑀸𑀢𑀩𑁆𑀩𑀸 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀓𑀭𑀺𑀁 ¶ , 𑀓𑀭𑀺𑀁, 𑀅𑀓𑀸𑀲𑀺𑀁, 𑀅𑀓𑀭𑀺𑀫𑁆𑀳, 𑀓𑀭𑀺𑀫𑁆𑀳, 𑀅𑀓𑀸𑀲𑀺𑀫𑁆𑀳. 𑀅𑀓𑀭𑀸, 𑀅𑀓𑀭𑀽. 𑀅𑀓𑀭𑀼𑀲𑁂, 𑀅𑀓𑀭𑀺𑀯𑁆𑀳𑀁. 𑀅𑀓𑀭𑀁, 𑀅𑀓𑀭𑀺𑀫𑁆𑀳𑁂. 𑀅𑀚𑁆𑀚𑀢𑀦𑀻𑀯𑀲𑁂𑀦 𑀯𑀼𑀢𑁆𑀢𑀭𑀽𑀧𑀸𑀦𑀺.

𑀓𑀭𑀺𑀲𑁆𑀲𑀢𑀺, 𑀓𑀭𑀺𑀲𑁆𑀲𑀦𑁆𑀢𑀺. 𑀓𑀭𑀺𑀲𑁆𑀲𑀲𑀺, 𑀓𑀭𑀺𑀲𑁆𑀲𑀣. 𑀓𑀭𑀺𑀲𑁆𑀲𑀸𑀫𑀺, 𑀓𑀭𑀺𑀲𑁆𑀲𑀸𑀫. 𑀓𑀭𑀺𑀲𑁆𑀲𑀢𑁂, 𑀓𑀭𑀺𑀲𑁆𑀲𑀦𑁆𑀢𑁂. 𑀓𑀭𑀺𑀲𑁆𑀲𑀲𑁂, 𑀓𑀭𑀺𑀲𑁆𑀲𑀯𑁆𑀳𑁂. 𑀓𑀭𑀺𑀲𑁆𑀲𑀁, 𑀓𑀲𑁆𑀲𑀁 𑀇𑀘𑁆𑀘𑀧𑀺. 𑀢𑀣𑀸 𑀳𑀺 𑀧𑀸𑀴𑀺 𑀤𑀺𑀲𑁆𑀲𑀢𑀺 ‘‘𑀓𑀲𑁆𑀲𑀁 𑀧𑀼𑀭𑀺𑀲𑀓𑀸𑀭𑀺𑀬’’𑀦𑁆𑀢𑀺. 𑀓𑀭𑀺𑀲𑁆𑀲𑀫𑁆𑀳𑁂. 𑀢𑀣𑀸 𑀓𑀸𑀳𑀢𑀺, 𑀓𑀸𑀳𑀦𑁆𑀢𑀺. 𑀓𑀸𑀳𑀲𑀺, 𑀓𑀸𑀳𑀣. 𑀓𑀸𑀳𑀸𑀫𑀺, 𑀓𑀸𑀳𑀸𑀫. 𑀓𑀸𑀳𑀺𑀢𑀺, 𑀓𑀸𑀳𑀺𑀦𑁆𑀢𑀺. 𑀓𑀸𑀳𑀺𑀲𑀺 𑀇𑀘𑁆𑀘𑁂𑀯𑀫𑀸𑀤𑀺𑀦𑀸 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀪𑀯𑀺𑀲𑁆𑀲𑀦𑁆𑀢𑀻𑀯𑀲𑁂𑀦 𑀯𑀼𑀢𑁆𑀢𑀭𑀽𑀧𑀸𑀦𑀺.

𑀅𑀓𑀭𑀺𑀲𑁆𑀲𑀸, 𑀅𑀓𑀭𑀺𑀲𑁆𑀲, 𑀅𑀓𑀭𑀺𑀲𑁆𑀲𑀁𑀲𑀽𑀢𑀺 𑀲𑁂𑀲𑀁 𑀲𑀩𑁆𑀩𑀁 𑀬𑁄𑀚𑁂𑀢𑀩𑁆𑀩𑀁. 𑀓𑀸𑀮𑀸𑀢𑀺𑀧𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑀭𑀽𑀧𑀸𑀦𑀺.

𑀓𑀬𑀺𑀭𑀢𑀺, 𑀓𑀬𑀺𑀭𑀦𑁆𑀢𑀺. 𑀓𑀬𑀺𑀭𑀲𑀺, 𑀓𑀬𑀺𑀭𑀸𑀣. 𑀓𑀬𑀺𑀭𑀸𑀫𑀺, 𑀓𑀬𑀺𑀭𑀸𑀫. 𑀓𑀬𑀺𑀭𑀢𑁂. 𑀲𑁂𑀲𑀁 𑀬𑁄𑀚𑁂𑀢𑀩𑁆𑀩𑀁. 𑀯𑀢𑁆𑀢𑀫𑀸𑀦𑀸𑀯𑀲𑁂𑀦 𑀯𑀼𑀢𑁆𑀢𑀭𑀽𑀧𑀸𑀦𑀺.

𑀓𑀬𑀺𑀭𑀢𑀼, 𑀓𑀬𑀺𑀭𑀦𑁆𑀢𑀼. 𑀲𑁂𑀲𑀁 𑀬𑁄𑀚𑁂𑀢𑀩𑁆𑀩𑀁. 𑀧𑀜𑁆𑀘𑀫𑀻𑀯𑀲𑁂𑀦 𑀯𑀼𑀢𑁆𑀢𑀭𑀽𑀧𑀸𑀦𑀺.

𑀓𑀬𑀺𑀭𑀸, 𑀓𑀼𑀬𑀺𑀭𑀸. 𑀓𑀬𑀺𑀭𑀼𑀁. 𑀅𑀢𑁆𑀭𑀸𑀬𑀁 𑀧𑀸𑀴𑀺 ‘‘𑀓𑀼𑀫𑁆𑀪𑀺𑀫𑁆𑀳𑀺𑀧’𑀜𑁆𑀚𑀮𑀺𑀁 𑀓𑀼𑀬𑀺𑀭𑀸, 𑀘𑀸𑀢𑀜𑁆𑀘𑀸𑀧𑀺 𑀧𑀤𑀓𑁆𑀔𑀺𑀡’’𑀦𑁆𑀢𑀺. 𑀢𑀢𑁆𑀣 𑀓𑀼𑀫𑁆𑀪𑀺𑀫𑁆𑀳𑀺𑀧𑀺 𑀅𑀜𑁆𑀚𑀮𑀺𑀦𑁆𑀢𑀺 𑀙𑁂𑀤𑁄. 𑀓𑀬𑀺𑀭𑀸𑀲𑀺, 𑀓𑀬𑀺𑀭𑀸𑀣. 𑀓𑀬𑀺𑀭𑀸𑀫𑀺, 𑀓𑀬𑀺𑀭𑀸𑀫. 𑀓𑀬𑀺𑀭𑁂𑀣, 𑀓𑀬𑀺𑀭𑁂𑀭𑀁. 𑀓𑀬𑀺𑀭𑁂𑀣𑁄, 𑀓𑀬𑀺𑀭𑀸𑀯𑁆𑀳𑁄. 𑀓𑀬𑀺𑀭𑀁, 𑀓𑀬𑀺𑀭𑀸𑀫𑁆𑀳𑁂. 𑀲𑀢𑁆𑀢𑀫𑀻𑀯𑀲𑁂𑀦 𑀯𑀼𑀢𑁆𑀢𑀭𑀽𑀧𑀸𑀦𑀺.

𑀢𑀢𑁆𑀣 𑀓𑀬𑀺𑀭𑀸𑀢𑀺 𑀇𑀤𑀁 ‘‘𑀧𑀼𑀜𑁆𑀜𑀜𑁆𑀘𑁂 𑀧𑀼𑀭𑀺𑀲𑁄 𑀓𑀬𑀺𑀭𑀸’’𑀢𑀺 𑀤𑀲𑁆𑀲𑀦𑀢𑁄 𑀧𑀞𑀫𑀧𑀼𑀭𑀺𑀲𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁, ‘‘𑀅𑀥𑀫𑁆𑀫𑀁 𑀲𑀸𑀭𑀣𑀺 𑀓𑀬𑀺𑀭𑀸’’𑀢𑀺 𑀏𑀢𑁆𑀣𑀸𑀧𑀺 ‘‘𑀲𑀸𑀭𑀣𑀺 𑀪𑀯𑀁 𑀅𑀥𑀫𑁆𑀫𑀁 𑀓𑀭𑁂𑀬𑁆𑀬𑀸’’𑀢𑀺 ¶ 𑀧𑀞𑀫𑀧𑀼𑀭𑀺𑀲𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁, 𑀦 𑀫𑀚𑁆𑀛𑀺𑀫𑀧𑀼𑀭𑀺𑀲𑀯𑀲𑁂𑀦. 𑀅𑀣 𑀯𑀸 ‘‘𑀓𑀬𑀺𑀭𑀸𑀲𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀲𑀺𑀓𑀸𑀭𑀮𑁄𑀧𑀁 𑀓𑀢𑁆𑀯𑀸 ‘‘𑀓𑀬𑀺𑀭𑀸’’𑀢𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁.

𑀏𑀢𑁆𑀣 𑀧𑀦 𑀲𑀺𑀬𑀸 𑁋 𑀬𑀣𑀸 ‘‘𑀧𑀼𑀢𑁆𑀢𑀁 𑀮𑀪𑁂𑀣 𑀯𑀭𑀤’’𑀦𑁆𑀢𑀺 𑀧𑀸𑀴𑀺𑀬𑀁 ‘‘𑀮𑀪𑁂𑀣𑀸’’𑀢𑀺 𑀇𑀫𑀲𑁆𑀲 𑀧𑀤𑀲𑁆𑀲 ‘‘𑀲𑀩𑁆𑀪𑀺𑀭𑁂𑀯 𑀲𑀫𑀸𑀲𑁂𑀣, 𑀲𑀩𑁆𑀪𑀺 𑀓𑀼𑀩𑁆𑀩𑁂𑀣 𑀲𑀦𑁆𑀣𑀯’’𑀦𑁆𑀢𑀺𑀆𑀤𑀻𑀲𑀼 ‘‘𑀲𑀫𑀸𑀲𑁂𑀣𑀸’’𑀢𑀺𑀆𑀤𑀻𑀦𑀁 𑀯𑀺𑀬 𑀧𑀞𑀫𑀧𑀼𑀭𑀺𑀲𑀯𑀲𑁂𑀦 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀼𑀭𑀺𑀲𑀯𑀺𑀧𑀮𑁆𑀮𑀸𑀲𑀁 𑀓𑀢𑁆𑀯𑀸 ‘‘𑀮𑀪𑁂𑀬𑁆𑀬’’𑀦𑁆𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑀯𑀲𑁂𑀦𑀢𑁆𑀣𑁄 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀕𑀳𑀺𑀢𑁄, 𑀢𑀣𑀸 𑀢𑀼𑀫𑁆𑀳𑁂𑀳𑀺𑀧𑀺 ‘‘𑀅𑀥𑀫𑁆𑀫𑀁 𑀲𑀸𑀭𑀣𑀺 𑀓𑀬𑀺𑀭𑀸’’𑀢𑀺 𑀏𑀢𑁆𑀣 ‘‘𑀓𑀬𑀺𑀭𑀸’’𑀢𑀺 𑀧𑀤𑀲𑁆𑀲 𑀧𑀼𑀭𑀺𑀲𑀯𑀺𑀧𑀮𑁆𑀮𑀸𑀲𑀁 𑀓𑀢𑁆𑀯𑀸 ‘‘𑀓𑀭𑁂𑀬𑁆𑀬𑀸𑀲𑀻’’𑀢𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑀯𑀲𑁂𑀦𑀢𑁆𑀣𑁄 𑀯𑀢𑁆𑀢𑀩𑁆𑀩𑁄, 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺𑀧𑀺 ‘‘𑀓𑀭𑁂𑀬𑁆𑀬𑀸𑀲𑀻’’𑀢𑀺 𑀢𑀤𑀢𑁆𑀣𑁄 𑀯𑀼𑀢𑁆𑀢𑁄𑀢𑀺? 𑀲𑀘𑁆𑀘𑀁, 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀯𑁄𑀳𑀸𑀭𑀢𑁆𑀣𑁂𑀲𑀼 𑀧𑀭𑀫𑀓𑁄𑀲𑀮𑁆𑀮𑀲𑀫𑀦𑁆𑀦𑀸𑀕𑀢𑀢𑁆𑀢𑀸 ‘‘𑀢𑁆𑀯’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀅𑀢𑁆𑀣𑁂 𑀪𑀯𑀁𑀲𑀤𑁆𑀤𑁄 𑀧𑀯𑀢𑁆𑀢𑀢𑀺, ‘‘𑀪𑀯’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀅𑀢𑁆𑀣𑁂 𑀢𑁆𑀯𑀁𑀲𑀤𑁆𑀤𑁄 𑀧𑀯𑀢𑁆𑀢𑀢𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀥𑀺𑀧𑁆𑀧𑀸𑀬𑀢𑁆𑀣𑀯𑀲𑁂𑀦 ‘‘𑀓𑀭𑁂𑀬𑁆𑀬𑀸𑀲𑀻’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀦 𑀧𑀼𑀭𑀺𑀲𑀯𑀺𑀧𑀮𑁆𑀮𑀸𑀲𑀯𑀲𑁂𑀦. 𑀢𑀣𑀸 𑀳𑀺 ‘‘𑀧𑀼𑀢𑁆𑀢𑀁 𑀮𑀪𑁂𑀣 𑀯𑀭𑀤’’𑀦𑁆𑀢𑀺 𑀇𑀫𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 ‘‘𑀮𑀪𑁂𑀣𑀸’’𑀢𑀺 𑀉𑀮𑁆𑀮𑀺𑀗𑁆𑀕𑀺𑀢𑁆𑀯𑀸 ‘‘𑀮𑀪𑁂𑀬𑁆𑀬’’𑀦𑁆𑀢𑀺 𑀧𑀼𑀭𑀺𑀲𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑀺𑀯𑀭𑀡𑀁 𑀓𑀢𑀁. ‘‘𑀅𑀥𑀫𑁆𑀫𑀁 𑀲𑀸𑀭𑀣𑀺 𑀓𑀬𑀺𑀭𑀸’’𑀢𑀺 𑀇𑀫𑀲𑁆𑀲 𑀧𑀦 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀬𑀺𑀭𑀸’’𑀢𑀺 𑀉𑀮𑁆𑀮𑀺𑀗𑁆𑀕𑀺𑀢𑁆𑀯𑀸 ‘‘𑀓𑀭𑁂𑀬𑁆𑀬𑀸𑀲𑀻’’𑀢𑀺 𑀯𑀺𑀯𑀭𑀡𑀁 𑀓𑀢𑀁, 𑀢𑀲𑁆𑀫𑀸 ‘‘𑀅𑀥𑀫𑁆𑀫𑀁 𑀲𑀸𑀭𑀣𑀺 𑀓𑀬𑀺𑀭𑀸’’𑀢𑀺 𑀏𑀢𑁆𑀣 𑀧𑀼𑀭𑀺𑀲𑀯𑀺𑀧𑀮𑁆𑀮𑀸𑀲𑁄 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄. 𑀅𑀣 𑀯𑀸 𑀬𑀣𑀸 ‘‘𑀧𑀼𑀢𑁆𑀢𑀁 𑀮𑀪𑁂𑀣 𑀯𑀭𑀤’’𑀦𑁆𑀢𑀺 𑀏𑀢𑁆𑀣 𑀘 ‘‘𑀓𑀸𑀬𑁂 𑀭𑀚𑁄 𑀦 𑀮𑀺𑀫𑁆𑀧𑁂𑀣𑀸’’𑀢𑀺𑀆𑀤𑀻𑀲𑀼 𑀏𑀣𑀯𑀘𑀦𑀁 𑀕𑀳𑀺𑀢𑀁, 𑀏𑀯𑀁 𑀏𑀣𑀯𑀘𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀮𑀪𑁂 𑀅𑀣𑀸’’𑀢𑀺 𑀧𑀤𑀘𑁆𑀙𑁂𑀤𑁄 𑀓𑀭𑀡𑀻𑀬𑁄. 𑀏𑀯𑀜𑁆𑀳𑀺 𑀲𑀢𑀺 𑀧𑀼𑀭𑀺𑀲𑀯𑀺𑀧𑀮𑁆𑀮𑀸𑀲𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀢𑀢𑁆𑀣 𑀮𑀪𑁂𑀢𑀺 𑀲𑀢𑁆𑀢𑀫𑀺𑀬𑀸 ¶ 𑀉𑀢𑁆𑀢𑀫𑀧𑀼𑀭𑀺𑀲𑀯𑀘𑀦𑀁 ‘‘𑀯𑀚𑁆𑀛𑀜𑁆𑀘𑀸𑀧𑀺 𑀧𑀫𑁄𑀘𑀬𑁂’’𑀢𑀺 𑀧𑀤𑀫𑀺𑀯. 𑀅𑀣𑀸𑀢𑀺 𑀅𑀥𑀺𑀓𑀸𑀭𑀦𑁆𑀢𑀭𑁂 𑀦𑀺𑀧𑀸𑀢𑁄 𑀧𑀤𑀧𑀽𑀭𑀡𑁂 𑀯𑀸. 𑀏𑀢𑁆𑀣 𑀘 𑀅𑀥𑀺𑀓𑀸𑀭𑀦𑁆𑀢𑀭𑀯𑀲𑁂𑀦 𑀅𑀧𑀭𑀫𑁆𑀧𑀺 𑀯𑀭𑀁 𑀧𑀼𑀢𑁆𑀢𑀁 𑀮𑀪𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀤𑁆𑀯𑀺𑀦𑁆𑀦𑀫𑀢𑁆𑀣𑀸𑀦𑀁 𑀉𑀧𑁆𑀧𑀢𑁆𑀢𑀺 𑀤𑀺𑀲𑁆𑀲𑀢𑀺, 𑀬𑀲𑁆𑀫𑀸 𑀘𑁂𑀢𑁂𑀲𑀼 𑀤𑁆𑀯𑀻𑀲𑀼 𑀤𑀼𑀚𑁆𑀚𑀸𑀦𑁄 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄, 𑀢𑀲𑁆𑀫𑀸 𑀤𑁆𑀯𑁂𑀧𑀺 𑀅𑀢𑁆𑀣𑀸 𑀕𑀳𑁂𑀢𑀩𑁆𑀩𑀸𑀯.

𑀏𑀢𑁆𑀣 𑀧𑀦 𑀓𑀺𑀜𑁆𑀘𑀸𑀧𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀯𑀺𑀪𑀢𑁆𑀢𑀺𑀯𑀺𑀧𑀮𑁆𑀮𑀸𑀲𑁄 𑀯𑀘𑀦𑀯𑀺𑀧𑀮𑁆𑀮𑀸𑀲𑁄 𑀓𑀸𑀮𑀯𑀺𑀧𑀮𑁆𑀮𑀸𑀲𑁄 𑀧𑀼𑀭𑀺𑀲𑀯𑀺𑀧𑀮𑁆𑀮𑀸𑀲𑁄 𑀅𑀓𑁆𑀔𑀭𑀯𑀺𑀧𑀮𑁆𑀮𑀸𑀲𑁄𑀢𑀺 𑀙𑀩𑁆𑀩𑀺𑀥𑁄 𑀯𑀺𑀧𑀮𑁆𑀮𑀸𑀲𑁄 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑁄, 𑀢𑀣𑀸𑀧𑀺 𑀲𑁄 𑀉𑀧𑀭𑀺 𑀆𑀯𑀺𑀪𑀯𑀺𑀲𑁆𑀲𑀢𑀻𑀢𑀺 𑀦 𑀤𑀲𑁆𑀲𑀺𑀢𑁄. 𑀢𑀢𑁆𑀭 𑀓𑀬𑀺𑀭𑀸𑀣𑀸𑀢𑀺 𑀧𑀤𑀁 𑀲𑀢𑁆𑀢𑀫𑀺𑀬𑀸 𑀧𑀭𑀲𑁆𑀲𑀧𑀤𑀯𑀲𑁂𑀦 𑀅𑀢𑁆𑀢𑀦𑁄𑀧𑀤𑀯𑀲𑁂𑀦 𑀘 𑀤𑁆𑀯𑀺𑀥𑀸 𑀪𑀺𑀚𑁆𑀚𑀢𑀺, 𑀢𑀣𑀸 𑀫𑀚𑁆𑀛𑀺𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑀯𑀲𑁂𑀦 𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑀯𑀲𑁂𑀦 𑀘. 𑀢𑀣𑀸 𑀳𑀺 ‘‘𑀬𑀣𑀸 𑀧𑀼𑀜𑁆𑀜𑀸𑀦𑀺 𑀓𑀬𑀺𑀭𑀸𑀣, 𑀤𑀤𑀦𑁆𑀢𑀸 𑀅𑀧𑀭𑀸𑀧𑀭’’𑀦𑁆𑀢𑀺 𑀏𑀢𑁆𑀣 ‘‘𑀓𑀬𑀺𑀭𑀸𑀣𑀸’’𑀢𑀺 𑀇𑀤𑀁 𑀲𑀢𑁆𑀢𑀫𑀺𑀬𑀸 𑀧𑀭𑀲𑁆𑀲𑀧𑀤𑀯𑀲𑁂𑀦 𑀫𑀚𑁆𑀛𑀺𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑀯𑀲𑁂𑀦 𑀘 𑀯𑀼𑀢𑁆𑀢𑀁. 𑀬𑀣𑀸𑀦𑀼𑀭𑀽𑀧𑀁 𑀧𑀼𑀜𑁆𑀜𑀸𑀦𑀺 𑀓𑀭𑁂𑀬𑁆𑀬𑀸𑀣𑀬𑁂𑀯𑀸𑀢𑀺 𑀳𑀺 𑀅𑀢𑁆𑀣𑁄. ‘‘𑀓𑀬𑀺𑀭𑀸𑀣 𑀥𑀻𑀭𑁄 𑀧𑀼𑀜𑁆𑀜𑀸𑀦𑀻’’𑀢𑀺 𑀏𑀢𑁆𑀣 𑀧𑀦 ‘‘𑀓𑀬𑀺𑀭𑀸𑀣𑀸’’𑀢𑀺 𑀇𑀤𑀁 𑀲𑀢𑁆𑀢𑀫𑀺𑀬𑀸 𑀅𑀢𑁆𑀢𑀦𑁄𑀧𑀤𑀯𑀲𑁂𑀦 𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑀯𑀲𑁂𑀦 𑀘 𑀯𑀼𑀢𑁆𑀢𑀁. 𑀓𑀭𑁂𑀬𑁆𑀬𑀸𑀢𑀺 𑀳𑀺 𑀅𑀢𑁆𑀣𑁄. 𑀇𑀥 𑀧𑀭𑁄𑀓𑁆𑀔𑀸𑀤𑀺𑀯𑀲𑁂𑀦 𑀬𑀺𑀭𑀧𑀘𑁆𑀘𑀬𑀲𑀳𑀺𑀢𑀸𑀦𑀺 𑀭𑀽𑀧𑀸𑀦𑀺 𑀬𑁂𑀪𑀼𑀬𑁆𑀬𑁂𑀦 𑀲𑀸𑀲𑀦𑁂 𑀅𑀧𑁆𑀧𑀲𑀺𑀤𑁆𑀥𑀸𑀦𑀻𑀢𑀺 𑀦 𑀤𑀲𑁆𑀲𑀺𑀢𑀸𑀦𑀺.

𑀅𑀢𑁆𑀢𑀦𑁄 𑀨𑀮𑀁 𑀓𑀭𑁄𑀢𑀻𑀢𑀺 𑀓𑀸𑀭𑀡𑀁. 𑀓𑀭𑁄𑀢𑀻𑀢𑀺 𑀓𑀢𑁆𑀢𑀸, 𑀏𑀯𑀁 𑀓𑀸𑀭𑀓𑁄 𑀓𑀸𑀭𑀓𑀁 𑀯𑀸. 𑀏𑀢𑁆𑀣 𑀳𑀺 𑀓𑀸𑀭𑀓𑀲𑀤𑁆𑀤𑁄 𑀬𑀢𑁆𑀣 𑀓𑀢𑁆𑀢𑀼𑀓𑀸𑀭𑀓𑀓𑀫𑁆𑀫𑀓𑀸𑀭𑀓𑀸𑀤𑀺𑀯𑀸𑀘𑀓𑁄, 𑀢𑀢𑁆𑀣 𑀧𑀼𑀮𑁆𑀮𑀺𑀗𑁆𑀕𑁄𑀧𑀺 𑀳𑁄𑀢𑀺, 𑀬𑁂𑀪𑀼𑀬𑁆𑀬𑁂𑀦 𑀦𑀧𑀼𑀁𑀲𑀓𑀮𑀺𑀗𑁆𑀕𑁄𑀧𑀺. 𑀬𑀢𑁆𑀣 𑀧𑀦 𑀭𑀚𑀢𑀓𑀸𑀭𑀓𑀫𑁆𑀫𑀓𑀸𑀭𑀮𑁄𑀳𑀓𑀸𑀭𑀸𑀤𑀺𑀯𑀸𑀘𑀓𑁄, 𑀢𑀢𑁆𑀣 𑀧𑀼𑀮𑁆𑀮𑀺𑀗𑁆𑀕𑁄 𑀏𑀯. 𑀓𑀸𑀭𑀸𑀧𑁂𑀢𑀻𑀢𑀺 𑀓𑀸𑀭𑀸𑀧𑀓𑁄. 𑀓𑀭𑀁, 𑀓𑀼𑀩𑁆𑀩𑀁, 𑀓𑁆𑀭𑀼𑀩𑁆𑀩𑀁, 𑀓𑀭𑁄𑀦𑁆𑀢𑁄, 𑀓𑀼𑀩𑁆𑀩𑀦𑁆𑀢𑁄, 𑀓𑀼𑀩𑁆𑀩𑀸𑀦𑁄, 𑀓𑀼𑀭𑀼𑀫𑀸𑀦𑁄, 𑀧𑀓𑁆𑀭𑀼𑀁𑀩𑁆𑀩𑀫𑀸𑀦𑁄 ¶ . 𑀓𑀸𑀭𑀺𑀓𑀸, 𑀓𑀸𑀭𑀸𑀧𑀺𑀓𑀸. 𑀓𑀭𑁄𑀦𑁆𑀢𑀻, 𑀓𑀼𑀩𑁆𑀩𑀦𑁆𑀢𑀻. 𑀓𑀸𑀭𑀓𑀁 𑀓𑀼𑀮𑀁. 𑀓𑀸𑀭𑀸𑀧𑀓𑀁, 𑀓𑀭𑁄𑀦𑁆𑀢𑀁, 𑀓𑀼𑀩𑁆𑀩𑀦𑁆𑀢𑀁, 𑀓𑀼𑀭𑀼𑀫𑀸𑀦𑀁. 𑀲𑀗𑁆𑀔𑀸𑀭𑁄, 𑀧𑀭𑀺𑀓𑁆𑀔𑀸𑀭𑁄, 𑀧𑀭𑀺𑀓𑁆𑀔𑀢𑁄, 𑀧𑀼𑀭𑀓𑁆𑀔𑀢𑁄, 𑀓𑀭𑀡𑀁, 𑀓𑁆𑀭𑀺𑀬𑀸. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀧𑀦 ‘‘𑀓𑁆𑀭𑀺𑀬𑀸’’ 𑀇𑀘𑁆𑀘𑀧𑀺 𑀧𑀤𑀫𑀺𑀘𑁆𑀙𑀦𑁆𑀢𑀺. 𑀏𑀢𑁆𑀣 𑀓𑁆𑀭𑀺𑀬𑀸𑀲𑀤𑁆𑀤𑁄 𑀓𑀺𑀜𑁆𑀘𑀸𑀧𑀺 ‘‘𑀅𑀨𑀮𑀸 𑀳𑁄𑀢𑀺 𑀅𑀓𑁆𑀭𑀼𑀩𑁆𑀩𑀢𑁄’’𑀢𑀺𑀆𑀤𑀻𑀲𑀼 𑀓𑀓𑀸𑀭𑀭𑀓𑀸𑀭𑀲𑀁𑀬𑁄𑀕𑀯𑀦𑁆𑀢𑀸𑀦𑀺 𑀧𑀤𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀢𑀣𑀸𑀧𑀺 𑀓𑁆𑀮𑁂𑀲𑀲𑀤𑁆𑀤𑁄 𑀯𑀺𑀬 𑀧𑀸𑀴𑀺𑀬𑀁 𑀦 𑀤𑀺𑀲𑁆𑀲𑀢𑀺, 𑀅𑀤𑀺𑀲𑁆𑀲𑀫𑀸𑀦𑁄𑀧𑀺 𑀲𑁄 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀤𑀻𑀳𑀺 𑀕𑀭𑀽𑀳𑀺 𑀕𑀳𑀺𑀢𑀢𑁆𑀢𑀸 𑀕𑀳𑁂𑀢𑀩𑁆𑀩𑁄𑀯. 𑀢𑀣𑀸 𑀳𑀺 ‘‘𑀓𑁆𑀭𑀺𑀬𑀸𑀓𑁆𑀭𑀺𑀬𑀸𑀧𑀢𑁆𑀢𑀺𑀯𑀺𑀪𑀸𑀕𑀤𑁂𑀲𑀓𑁄’’𑀢𑀺𑀆𑀤𑀺𑀓𑀸 𑀲𑀤𑁆𑀤𑀭𑀘𑀦𑀸 𑀤𑀺𑀲𑁆𑀲𑀢𑀺.

𑀓𑀸𑀢𑀼𑀁, 𑀓𑀢𑁆𑀢𑀼𑀁. 𑀓𑀸𑀢𑀯𑁂, 𑀓𑀸𑀭𑁂𑀢𑀼𑀁. 𑀓𑀢𑁆𑀯𑀸, 𑀓𑀢𑁆𑀯𑀸𑀦, 𑀓𑀸𑀢𑀼𑀦, 𑀓𑀭𑀺𑀢𑁆𑀯𑀸, 𑀓𑀭𑀺𑀢𑁆𑀯𑀸𑀦, 𑀓𑀘𑁆𑀘, 𑀅𑀥𑀺𑀓𑀘𑁆𑀘, 𑀓𑀭𑀺𑀬, 𑀓𑀭𑀺𑀬𑀸𑀦, 𑀧𑀼𑀭𑀓𑁆𑀔𑀺𑀢𑁆𑀯𑀸, 𑀓𑀸𑀭𑁂𑀢𑁆𑀯𑀸. 𑀅𑀜𑁆𑀜𑀸𑀦𑀺𑀧𑀺 𑀢𑀼𑀫𑀦𑁆𑀢𑀸𑀤𑀻𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀢𑀢𑁆𑀭 𑀓𑀘𑁆𑀘𑀸𑀢𑀺 𑀓𑀢𑁆𑀯𑀸. 𑀅𑀥𑀺𑀓𑀘𑁆𑀘𑀸𑀢𑀺 𑀅𑀥𑀺𑀓𑀁 𑀓𑀢𑁆𑀯𑀸. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀧𑀦 𑀲𑀤𑁆𑀤𑀲𑀢𑁆𑀣𑀦𑀬𑀁 𑀦𑀺𑀲𑁆𑀲𑀸𑀬 ‘‘𑀅𑀥𑀺𑀓𑀺𑀘𑁆𑀘’’ 𑀇𑀢𑀺 𑀭𑀽𑀧𑀁 𑀇𑀘𑁆𑀙𑀦𑁆𑀢𑀺, 𑀫𑀬𑀁 𑀧𑀦𑁂𑀢𑀸𑀤𑀺𑀲𑀁 𑀭𑀽𑀧𑀁 𑀧𑀸𑀴𑀺𑀬𑀸 𑀅𑀦𑀼𑀓𑀽𑀮𑀁 𑀦 𑀳𑁄𑀢𑀻𑀢𑀺 𑀦 𑀇𑀘𑁆𑀙𑀸𑀫. 𑀢𑀣𑀸 𑀳𑀺 𑀣𑁂𑀭𑀺𑀓𑀸𑀕𑀸𑀣𑀸𑀬𑀁 𑀕𑁄𑀢𑀫𑀺𑀬𑀸 𑀧𑀭𑀺𑀦𑀺𑀩𑁆𑀩𑀸𑀦𑀯𑀘𑀦𑁂 ‘‘𑀧𑀤𑀓𑁆𑀔𑀺𑀡𑀁 𑀓𑀘𑁆𑀘 𑀦𑀺𑀧𑀘𑁆𑀘 𑀧𑀸𑀤𑁂’’𑀢𑀺 𑀧𑀸𑀴𑀺 𑀤𑀺𑀲𑁆𑀲𑀢𑀺. 𑀢𑀢𑁆𑀣 𑀳𑀺 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀘𑁆𑀘𑀸𑀢𑀺 𑀧𑀤𑀲𑁆𑀲 𑀤𑀲𑁆𑀲𑀦𑁂𑀦 𑀅𑀥𑀺𑀓𑀘𑁆𑀘𑀸𑀢𑀺 𑀧𑀤𑀫𑁆𑀧𑀺 𑀤𑀺𑀝𑁆𑀞𑀫𑁂𑀯 𑀳𑁄𑀢𑀺, 𑀏𑀲 𑀦𑀬𑁄 𑀅𑀜𑁆𑀜𑀢𑁆𑀭𑀸𑀧𑀺 𑀬𑀣𑀸𑀭𑀳𑀁 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀸𑀦𑀺 𑀓𑀭𑁄𑀢𑀺𑀲𑁆𑀲 𑀥𑀸𑀢𑀼𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑀁 𑀅𑀢𑁆𑀣𑀸𑀢𑀺𑀲𑀬𑀬𑁄𑀕𑀁 𑀓𑀣𑀬𑀸𑀫 𑁋 𑀢𑀡𑁆𑀳𑀗𑁆𑀓𑀭𑁄. 𑀓𑀸𑀭𑀡𑀸. 𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀧𑀓𑁆𑀭𑀼𑀩𑁆𑀩𑀫𑀸𑀦𑁄. 𑀲𑀦𑁆𑀢𑁂 𑀦 𑀓𑀼𑀭𑀼𑀢𑁂 𑀧𑀺𑀬𑀦𑁆𑀢𑀺.

𑀢𑀢𑁆𑀭 ¶ 𑀢𑀡𑁆𑀳𑀗𑁆𑀓𑀭𑁄𑀢𑀺 𑀯𑁂𑀦𑁂𑀬𑁆𑀬𑀸𑀦𑀁 𑀢𑀡𑁆𑀳𑀁 𑀮𑁄𑀪𑀁 𑀓𑀭𑁄𑀢𑀺 𑀳𑀺𑀁𑀲𑀢𑀻𑀢𑀺 𑀢𑀡𑁆𑀳𑀗𑁆𑀓𑀭𑁄. 𑀅𑀣 𑀯𑀸 𑀭𑀽𑀧𑀓𑀸𑀬𑀥𑀫𑁆𑀫𑀓𑀸𑀬𑀲𑀫𑁆𑀧𑀢𑁆𑀢𑀺𑀬𑀸 𑀅𑀢𑁆𑀢𑀦𑀺 𑀲𑀓𑀮𑀮𑁄𑀓𑀲𑁆𑀲 𑀢𑀡𑁆𑀳𑀁 𑀲𑀺𑀦𑁂𑀳𑀁 𑀓𑀭𑁄𑀢𑀺 𑀚𑀦𑁂𑀢𑀻𑀢𑀺 𑀢𑀡𑁆𑀳𑀗𑁆𑀓𑀭𑁄. 𑀓𑀸𑀭𑀡𑀸𑀢𑀺 𑀳𑀺𑀁𑀲𑀦𑀸. 𑀧𑀓𑁆𑀭𑀼𑀩𑁆𑀩𑀫𑀸𑀦𑁄𑀢𑀺 𑀳𑀺𑀁𑀲𑀫𑀸𑀦𑁄. 𑀲𑀦𑁆𑀢𑁂 𑀦 𑀓𑀼𑀭𑀼𑀢𑁂 𑀧𑀺𑀬𑀦𑁆𑀢𑀺 𑀲𑀧𑁆𑀧𑀼𑀭𑀺𑀲𑁂 𑀅𑀢𑁆𑀢𑀦𑁄 𑀧𑀺𑀬𑁂 𑀇𑀝𑁆𑀞𑁂 𑀓𑀦𑁆𑀢𑁂 𑀫𑀦𑀸𑀧𑁂 𑀦 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀧𑀺𑀬𑀁 𑀧𑀺𑀬𑀸𑀬𑀫𑀸𑀦𑁄 𑀢𑀼𑀲𑁆𑀲𑀫𑀸𑀦𑁄 𑀫𑁄𑀤𑀫𑀸𑀦𑁄 𑀲𑀦𑁆𑀢𑁂 𑀦 𑀓𑀼𑀭𑀼𑀢𑁂 𑀦 𑀲𑁂𑀯𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸 ‘‘𑀭𑀸𑀚𑀸𑀦𑀁 𑀲𑁂𑀯𑀢𑀻’’𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀭𑀸𑀚𑀸𑀦𑀁 𑀧𑀺𑀬𑀁 𑀓𑀼𑀭𑀼𑀢𑁂𑀢𑀺 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀫𑀦𑁆𑀢𑁂𑀦𑁆𑀢𑀺, 𑀤𑀼𑀮𑁆𑀮𑀪𑀸𑀬𑀁 𑀦𑀻𑀢𑀺 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀸𑀢𑀩𑁆𑀩𑀸.

𑀏𑀢𑁆𑀣 𑀘 𑀧𑀭𑀺𑀓𑁆𑀔𑀸𑀭𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄 𑀦𑀻𑀬𑀢𑁂, ‘‘𑀧𑀭𑀺𑀓𑁆𑀔𑀸𑀭𑁄𑀢𑀺 𑀲𑀢𑁆𑀢𑀳𑀺 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀳𑀺 𑀲𑀼𑀧𑀭𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀻𑀲𑀼 𑀧𑀭𑀺𑀯𑀸𑀭𑁄 𑀯𑀼𑀘𑁆𑀘𑀢𑀺. ‘‘𑀭𑀣𑁄 𑀲𑁂𑀢𑀧𑀭𑀺𑀓𑁆𑀔𑀸𑀭𑁄, 𑀛𑀸𑀦𑀓𑁆𑀔𑁄 𑀘𑀓𑁆𑀓𑀯𑀻𑀭𑀺𑀬𑁄’’𑀢𑀺𑀆𑀤𑀻𑀲𑀼 𑀅𑀮𑀗𑁆𑀓𑀸𑀭𑁄. ‘‘𑀬𑁂 𑀘𑀺𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸’’𑀢𑀺𑀆𑀤𑀻𑀲𑀼 𑀲𑀫𑁆𑀪𑀸𑀭𑁄. 𑀏𑀢𑁆𑀣𑁂𑀢𑀜𑁆𑀳𑀺 𑀯𑀼𑀘𑁆𑀘𑀢𑀺 𑁋

𑀲𑀸𑀲𑀦𑀜𑁆𑀜𑀽𑀳𑀺 𑀯𑀺𑀜𑁆𑀜𑀽𑀳𑀺, 𑀧𑀭𑀺𑀓𑁆𑀔𑀸𑀭𑁄𑀢𑀺 𑀲𑀸𑀲𑀦𑁂;

𑀧𑀭𑀺𑀯𑀸𑀭𑁄 𑀅𑀮𑀗𑁆𑀓𑀸𑀭𑁄, 𑀲𑀫𑁆𑀪𑀸𑀭𑁄 𑀘 𑀧𑀯𑀼𑀘𑁆𑀘𑀢𑀺.

𑀚𑀸𑀕𑀭 𑀦𑀺𑀤𑁆𑀤𑀓𑁆𑀔𑀬𑁂. 𑀚𑀸𑀕𑀭𑁄𑀢𑀺. 𑀚𑀸𑀕𑀭𑀁. 𑀤𑀻𑀖𑀸 𑀚𑀸𑀕𑀭𑀢𑁄 𑀭𑀢𑁆𑀢𑀺.

𑀢𑀦𑀸𑀤𑀻 𑀏𑀢𑁆𑀢𑀓𑀸 𑀤𑀺𑀝𑁆𑀞𑀸, 𑀥𑀸𑀢𑀯𑁄 𑀫𑁂 𑀬𑀣𑀸𑀩𑀮𑀁;

𑀲𑀼𑀢𑁆𑀢𑁂𑀲𑁆𑀯𑀜𑁆𑀜𑁂𑀧𑀺 𑀧𑁂𑀓𑁆𑀔𑀺𑀢𑁆𑀯𑀸, 𑀕𑀡𑁆𑀳𑀯𑁆𑀳𑁄 𑀅𑀢𑁆𑀣𑀬𑀼𑀢𑁆𑀢𑀺𑀢𑁄𑀢𑀺.

𑀢𑀦𑀸𑀤𑀺𑀕𑀡𑁄𑀬𑀁.

𑀭𑀼𑀥𑀸𑀤𑀺𑀙𑀓𑁆𑀓𑀁 ¶ 𑀯𑀺𑀯𑀺𑀥𑀢𑁆𑀣𑀲𑀸𑀭𑀁,

𑀫𑀢𑀺𑀗𑁆𑀓𑀭𑀁 𑀯𑀺𑀜𑁆𑀜𑀼𑀚𑀦𑀸𑀥𑀺𑀭𑀸𑀫𑀁;

𑀉𑀴𑀸𑀭𑀙𑀦𑁆𑀤𑁂𑀳𑀺 𑀲𑀼𑀲𑁂𑀯𑀦𑀻𑀬𑀁,

𑀲𑀼𑀯𑀡𑁆𑀡𑀳𑀁𑀲𑁂𑀳𑀺 𑀲𑀼𑀘𑀺𑀁𑀯 𑀞𑀸𑀦𑀁.

𑀇𑀢𑀺 𑀦𑀯𑀗𑁆𑀕𑁂 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀩𑁆𑀬𑀧𑁆𑀧𑀣𑀕𑀢𑀻𑀲𑀼 𑀯𑀺𑀜𑁆𑀜𑀽𑀦𑀁

𑀓𑁄𑀲𑀮𑁆𑀮𑀢𑁆𑀣𑀸𑀬 𑀓𑀢𑁂 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑁂 𑀭𑀼𑀥𑀸𑀤𑀺𑀙𑀓𑁆𑀓𑀁

𑀦𑀸𑀫

𑀲𑀢𑁆𑀢𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁮. 𑀘𑀼𑀭𑀸𑀤𑀺𑀕𑀡𑀧𑀭𑀺𑀤𑀻𑀧𑀦

𑀇𑀢𑁄 𑀧𑀭𑀁 𑀧𑀯𑀓𑁆𑀔𑀸𑀫𑀺, 𑀧𑀘𑀼𑀭𑀢𑁆𑀣𑀳𑀺𑀢𑀓𑁆𑀓𑀭𑀁;

𑀘𑀼𑀭𑀸𑀤𑀺𑀓𑀕𑀡𑀦𑀸𑀫𑀁, 𑀦𑀸𑀫𑀢𑁄 𑀅𑀝𑁆𑀞𑀫𑀁 𑀕𑀡𑀁.

𑀘𑀼𑀭 𑀣𑁂𑀬𑁆𑀬𑁂. 𑀣𑁂𑀦𑀦𑀁 𑀣𑁂𑀬𑁆𑀬𑀁, 𑀘𑁄𑀭𑀺𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀺𑀁 𑀣𑁂𑀬𑁆𑀬𑁂 𑀘𑀼𑀭𑀥𑁆𑀢𑀼 𑀯𑀢𑁆𑀢𑀢𑀺. 𑀘𑁄𑀭𑁂𑀢𑀺, 𑀘𑁄𑀭𑀬𑀢𑀺, 𑀘𑁄𑀭𑁄, 𑀘𑁄𑀭𑀻, 𑀘𑁄𑀭𑀺𑀓𑀸, 𑀘𑁄𑀭𑁂𑀢𑀼, 𑀘𑁄𑀭𑀬𑀺𑀢𑀼𑀁, 𑀘𑁄𑀭𑁂𑀢𑁆𑀯𑀸, 𑀘𑁄𑀭𑀬𑀺𑀢𑁆𑀯𑀸. 𑀓𑀢𑁆𑀢𑀼𑀢𑁆𑀣𑁂𑀲𑀼 𑀡𑁂𑀡𑀬𑀢𑀸 𑀘𑀼𑀭𑀸𑀤𑀺𑀕𑀡𑀮𑀓𑁆𑀔𑀡𑀁. 𑀓𑀸𑀭𑀺𑀢𑁂 𑁋 𑀘𑁄𑀭𑀸𑀧𑁂𑀢𑀺, 𑀘𑁄𑀭𑀸𑀧𑀬𑀢𑀺, 𑀘𑁄𑀭𑀸𑀧𑁂𑀢𑀼𑀁, 𑀘𑁄𑀭𑀸𑀧𑀬𑀺𑀢𑀼𑀁, 𑀘𑁄𑀭𑀸𑀧𑁂𑀢𑁆𑀯𑀸, 𑀘𑁄𑀭𑀸𑀧𑀬𑀺𑀢𑁆𑀯𑀸. 𑀓𑀫𑁆𑀫𑁂𑀥𑀦𑀁 𑀘𑁄𑀭𑁂𑀳𑀺 𑀘𑁄𑀭𑀺𑀬𑀢𑀺, 𑀘𑁄𑀭𑀺𑀢𑀁 𑀥𑀦𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀓𑀓𑀸𑀭𑀦𑁆𑀢𑀥𑀸𑀢𑀼

𑀮𑁄𑀓 𑀤𑀲𑁆𑀲𑀦𑁂. 𑀮𑁄𑀓𑁂𑀢𑀺, 𑀮𑁄𑀓𑀬𑀢𑀺, 𑀑𑀮𑁄𑀓𑁂𑀢𑀺, 𑀑𑀮𑁄𑀓𑀬𑀢𑀺, 𑀉𑀮𑁆𑀮𑁄𑀓𑁂𑀢𑀺, 𑀉𑀮𑁆𑀮𑁄𑀓𑀬𑀢𑀺, 𑀅𑀧𑀮𑁄𑀓𑁂𑀢𑀺, 𑀅𑀧𑀮𑁄𑀓𑀬𑀢𑀺, 𑀆𑀮𑁄𑀓𑁂𑀢𑀺, 𑀆𑀮𑁄𑀓𑀬𑀢𑀺, 𑀯𑀺𑀮𑁄𑀓𑁂𑀢𑀺, 𑀯𑀺𑀮𑁄𑀓𑀬𑀢𑀺. 𑀮𑁄𑀓𑁄, 𑀆𑀮𑁄𑀓𑁄, 𑀮𑁄𑀓𑀦𑀁, 𑀑𑀮𑁄𑀓𑀦𑀁, 𑀉𑀮𑁆𑀮𑁄𑀓𑀦𑀁, 𑀆𑀮𑁄𑀓𑀦𑀁, 𑀯𑀺𑀮𑁄𑀓𑀦𑀁, 𑀅𑀧𑀮𑁄𑀓𑀦𑀁, 𑀅𑀯𑀮𑁄𑀓𑀦𑀁. 𑀑𑀮𑁄𑀓𑁂𑀢𑀼𑀁, 𑀑𑀮𑁄𑀓𑀬𑀺𑀢𑀼𑀁, 𑀑𑀮𑁄𑀓𑁂𑀢𑁆𑀯𑀸, 𑀑𑀮𑁄𑀓𑀬𑀺𑀢𑁆𑀯𑀸. 𑀓𑀸𑀭𑀺𑀢𑁂 𑀧𑀦 ‘‘𑀑𑀮𑁄𑀓𑀸𑀧𑁂𑀢𑀺, 𑀑𑀮𑁄𑀓𑀸𑀧𑀬𑀢𑀺, 𑀑𑀮𑁄𑀓𑀸𑀧𑁂𑀢𑀼𑀁, 𑀑𑀮𑁄𑀓𑀸𑀧𑀬𑀺𑀢𑀼𑀁, 𑀑𑀮𑁄𑀓𑀸𑀧𑁂𑀢𑁆𑀯𑀸 ¶ , 𑀑𑀮𑁄𑀓𑀸𑀧𑀬𑀺𑀢𑁆𑀯𑀸’’ 𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣𑀸𑀧𑀺.

𑀢𑀢𑁆𑀣 𑀮𑁄𑀓𑁄𑀢𑀺 𑀢𑀬𑁄 𑀮𑁄𑀓𑀸 𑀲𑀗𑁆𑀔𑀸𑀭𑀮𑁄𑀓𑁄 𑀲𑀢𑁆𑀢𑀮𑁄𑀓𑁄 𑀑𑀓𑀸𑀲𑀮𑁄𑀓𑁄𑀢𑀺. 𑀢𑀢𑁆𑀣 ‘‘𑀏𑀓𑁄 𑀮𑁄𑀓𑁄 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 𑀆𑀕𑀢𑀝𑁆𑀞𑀸𑀦𑁂 𑀲𑀗𑁆𑀔𑀸𑀭𑀮𑁄𑀓𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺 𑀯𑀸 ‘𑀅𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺 𑀯𑀸’’𑀢𑀺 𑀆𑀕𑀢𑀝𑁆𑀞𑀸𑀦𑁂 𑀲𑀢𑁆𑀢𑀮𑁄𑀓𑁄.

‘‘𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀳𑀭𑀦𑁆𑀢𑀺,

𑀤𑀺𑀲𑀸 𑀪𑀦𑁆𑀢𑀺 𑀯𑀺𑀭𑁄𑀘𑀫𑀸𑀦𑀸;

𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁄,

𑀏𑀢𑁆𑀣 𑀢𑁂 𑀯𑀢𑁆𑀢𑀢𑁂 𑀯𑀲𑁄’’𑀢𑀺

𑀆𑀕𑀢𑀝𑁆𑀞𑀸𑀦𑁂 𑀑𑀓𑀸𑀲𑀮𑁄𑀓𑁄.

𑀅𑀣 𑀯𑀸 𑀮𑁄𑀓𑁄𑀢𑀺 𑀢𑀺𑀯𑀺𑀥𑁄 𑀮𑁄𑀓𑁄 𑀓𑀺𑀮𑁂𑀲𑀮𑁄𑀓𑁄 𑀪𑀯𑀮𑁄𑀓𑁄 𑀇𑀦𑁆𑀤𑁆𑀭𑀺𑀬𑀮𑁄𑀓𑁄𑀢𑀺. 𑀢𑀢𑁆𑀣 𑀭𑀸𑀕𑀸𑀤𑀺𑀓𑀺𑀮𑁂𑀲𑀩𑀳𑀼𑀮𑀢𑀸𑀬 𑀓𑀸𑀫𑀸𑀯𑀘𑀭𑀲𑀢𑁆𑀢𑀸 𑀓𑀺𑀮𑁂𑀲𑀮𑁄𑀓𑁄. 𑀛𑀸𑀦𑀸𑀪𑀺𑀜𑁆𑀜𑀸𑀧𑀭𑀺𑀩𑀼𑀤𑁆𑀥𑀺𑀬𑀸 𑀭𑀽𑀧𑀸𑀯𑀘𑀭𑀲𑀢𑁆𑀢𑀸 𑀪𑀯𑀮𑁄𑀓𑁄. 𑀆𑀦𑁂𑀜𑁆𑀚𑀲𑀫𑀸𑀥𑀺𑀩𑀳𑀼𑀮𑀢𑀸𑀬 𑀯𑀺𑀲𑀤𑀺𑀦𑁆𑀤𑁆𑀭𑀺𑀬𑀢𑁆𑀢𑀸 𑀅𑀭𑀽𑀧𑀸𑀯𑀘𑀭𑀲𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀮𑁄𑀓𑁄. 𑀅𑀣 𑀯𑀸 𑀓𑀺𑀮𑀺𑀲𑁆𑀲𑀦𑀁 𑀓𑀺𑀮𑁂𑀲𑁄, 𑀯𑀺𑀧𑀸𑀓𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀤𑀼𑀓𑁆𑀔𑀩𑀳𑀼𑀮𑀢𑀸𑀬 𑀅𑀧𑀸𑀬𑁂𑀲𑀼 𑀲𑀢𑁆𑀢𑀸 𑀓𑀺𑀮𑁂𑀲𑀮𑁄𑀓𑁄. 𑀢𑀤𑀜𑁆𑀜𑁂 𑀲𑀢𑁆𑀢𑀸 𑀲𑀫𑁆𑀧𑀢𑁆𑀢𑀺𑀪𑀯𑀪𑀸𑀯𑀢𑁄 𑀪𑀯𑀮𑁄𑀓𑁄. 𑀢𑀢𑁆𑀣 𑀬𑁂 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀓𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀲𑀢𑁆𑀢𑀸, 𑀲𑁄 𑀇𑀦𑁆𑀤𑁆𑀭𑀺𑀬𑀮𑁄𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀚𑀸𑀢𑀓𑀝𑁆𑀞𑀓𑀣𑀸𑀬𑀁 𑀧𑀦 𑁋

‘‘𑀲𑀗𑁆𑀔𑀸𑀭𑀮𑁄𑀓𑁄 𑀲𑀢𑁆𑀢𑀮𑁄𑀓𑁄 𑀑𑀓𑀸𑀲𑀮𑁄𑀓𑁄 𑀔𑀦𑁆𑀥𑀮𑁄𑀓𑁄 𑀆𑀬𑀢𑀦𑀮𑁄𑀓𑁄 𑀥𑀸𑀢𑀼𑀮𑁄𑀓𑁄𑀢𑀺 ¶ 𑀅𑀦𑁂𑀓𑀯𑀺𑀥𑁄 𑀮𑁄𑀓𑁄. 𑀏𑀢𑁆𑀣 ‘𑀏𑀓𑁄 𑀮𑁄𑀓𑁄 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸…𑀧𑁂… 𑀅𑀝𑁆𑀞𑀸𑀭𑀲 𑀮𑁄𑀓𑀸 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄’𑀢𑀺 𑀏𑀢𑁆𑀣 𑀲𑀗𑁆𑀔𑀸𑀭𑀮𑁄𑀓𑁄 𑀯𑀼𑀢𑁆𑀢𑁄. 𑀔𑀦𑁆𑀥𑀮𑁄𑀓𑀸𑀤𑀬𑁄 𑀢𑀤𑀦𑁆𑀢𑁄𑀕𑀥𑀸𑀬𑁂𑀯. ‘𑀅𑀬𑀁 𑀮𑁄𑀓𑁄 𑀧𑀭𑁄 𑀮𑁄𑀓𑁄 𑀩𑁆𑀭𑀳𑁆𑀫𑀮𑁄𑀓𑁄 𑀲𑀤𑁂𑀯𑀓𑁄’𑀢𑀺𑀆𑀤𑀻𑀲𑀼 𑀧𑀦 𑀲𑀢𑁆𑀢𑀮𑁄𑀓𑁄 𑀯𑀼𑀢𑁆𑀢𑁄. ‘𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀳𑀭𑀦𑁆𑀢𑀺, 𑀤𑀺𑀲𑀸 𑀪𑀦𑁆𑀢𑀺 𑀯𑀺𑀭𑁄𑀘𑀫𑀸𑀦𑀸. 𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁄, 𑀏𑀢𑁆𑀣 𑀢𑁂𑀯𑀢𑁆𑀢𑀢𑁂 𑀯𑀲𑁄’𑀢𑀺 𑀏𑀢𑁆𑀣 𑀑𑀓𑀸𑀲𑀮𑁄𑀓𑁄 𑀯𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁.

𑀅𑀢𑁆𑀣𑀢𑁄 𑀧𑀦 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀁 𑀔𑀦𑁆𑀥𑀸𑀦𑀁 𑀲𑀫𑀽𑀳𑁄 𑀲𑀦𑁆𑀢𑀸𑀦𑁄 𑀘 𑀲𑀢𑁆𑀢𑀮𑁄𑀓𑁄, 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀯𑀺𑀲𑀢𑁆𑀢𑀢𑀸𑀬 𑀲𑀢𑁆𑀢𑁄, 𑀮𑁄𑀓𑀺𑀬𑀢𑀺 𑀏𑀢𑁆𑀣 𑀓𑀼𑀲𑀮𑀸𑀓𑀼𑀲𑀮𑀁 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺. 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀁 𑀭𑀽𑀧𑀸𑀦𑀁 𑀲𑀫𑀽𑀳𑁄 𑀲𑀦𑁆𑀢𑀸𑀦𑁄 𑀘 𑀑𑀓𑀸𑀲𑀮𑁄𑀓𑁄, 𑀮𑁄𑀓𑀺𑀬𑀦𑁆𑀢𑀺 𑀏𑀢𑁆𑀣 𑀢𑀲𑀸 𑀣𑀸𑀯𑀭𑀸 𑀘, 𑀢𑁂𑀲𑀜𑁆𑀘 𑀑𑀓𑀸𑀲𑀪𑀽𑀢𑁄𑀢𑀺, 𑀢𑀤𑀸𑀥𑀸𑀭𑀡𑀢𑀸𑀬 𑀳𑁂𑀲 ‘‘𑀪𑀸𑀚𑀦𑀮𑁄𑀓𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀤𑀼𑀯𑀺𑀥𑁄𑀧𑀺 𑀘𑁂𑀲 𑀭𑀽𑀧𑀸𑀤𑀺𑀥𑀫𑁆𑀫𑁂 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀢𑁆𑀢𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀪𑀽𑀢𑁄 𑀅𑀧𑀭𑀫𑀢𑁆𑀣𑀲𑀪𑀸𑀯𑁄 𑀲𑀧𑁆𑀧𑀘𑁆𑀘𑀬𑁂 𑀧𑀦 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀢𑁆𑀢𑀸 𑀢𑀤𑀼𑀪𑀬𑀲𑁆𑀲𑀸𑀧𑀺 𑀉𑀧𑀸𑀤𑀸𑀦𑀸𑀦𑀁 𑀯𑀲𑁂𑀦 𑀧𑀭𑀺𑀬𑀸𑀬𑀢𑁄 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸 𑀉𑀧𑀘𑀭𑀺𑀢𑀩𑁆𑀩𑀸, 𑀢𑀤𑀼𑀪𑀬𑁂 𑀔𑀦𑁆𑀥𑀸 𑀲𑀗𑁆𑀔𑀸𑀭𑀮𑁄𑀓𑁄, 𑀧𑀘𑁆𑀘𑀬𑁂𑀳𑀺 𑀲𑀗𑁆𑀔𑀭𑀺𑀬𑀦𑁆𑀢𑀺, 𑀮𑀼𑀚𑁆𑀚𑀦𑁆𑀢𑀺 𑀧𑀮𑀼𑀚𑁆𑀚𑀦𑁆𑀢𑀺 𑀘𑀸𑀢𑀺 𑀏𑀢𑁆𑀣 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀫𑀕𑁆𑀕𑀨𑀮𑀥𑀫𑁆𑀫𑀸𑀦𑀫𑁆𑀧𑀺 𑀲𑀢𑀺𑀧𑀺 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀢𑁆𑀢𑁂 𑀢𑁂𑀪𑀽𑀫𑀺𑀓𑀥𑀫𑁆𑀫𑀸𑀦𑀁𑀬𑁂𑀯 ‘‘𑀮𑁄𑀓𑁄’’𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀦𑀢𑁆𑀣𑀺 𑀮𑁄𑀓𑀢𑀸𑀧𑀚𑁆𑀚𑀦𑀁. 𑀢𑀣𑀸 𑀳𑀺 𑀢𑁂 ‘‘𑀮𑁄𑀓𑀼𑀢𑁆𑀢𑀭𑀸’’𑀢𑀺 𑀯𑀼𑀢𑁆𑀢𑀸.

𑀆𑀮𑁄𑀓𑁄𑀢𑀺 𑀭𑀲𑁆𑀫𑀺, 𑀆𑀮𑁄𑀓𑁂𑀦𑁆𑀢𑀺 𑀏𑀢𑁂𑀦 𑀪𑀼𑀲𑁄 𑀧𑀲𑁆𑀲𑀦𑁆𑀢𑀺 𑀚𑀦𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀯𑀸𑀢𑀺 𑀆𑀮𑁄𑀓𑁄. 𑀑𑀮𑁄𑀓𑀦𑀦𑁆𑀢𑀺 ¶ 𑀳𑁂𑀝𑁆𑀞𑀸 𑀧𑁂𑀓𑁆𑀔𑀦𑀁. 𑀯𑀺𑀮𑁄𑀓𑀦𑀦𑁆𑀢𑀺 𑀉𑀤𑁆𑀥𑀁 𑀧𑁂𑀓𑁆𑀔𑀦𑀁. 𑀆𑀮𑁄𑀓𑀦𑀦𑁆𑀢𑀺 𑀧𑀼𑀭𑀢𑁄 𑀧𑁂𑀓𑁆𑀔𑀦𑀁. 𑀯𑀺𑀮𑁄𑀓𑀦𑀦𑁆𑀢𑀺 𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀧𑁂𑀓𑁆𑀔𑀦𑀁, 𑀯𑀺𑀯𑀺𑀥𑀸 𑀯𑀸 𑀧𑁂𑀓𑁆𑀔𑀦𑀁. 𑀅𑀧𑀮𑁄𑀓𑀦𑀦𑁆𑀢𑀺 ‘‘𑀲𑀗𑁆𑀖𑀁 𑀅𑀧𑀮𑁄𑀓𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀚𑀸𑀦𑀸𑀧𑀦𑀁. 𑀅𑀯𑀮𑁄𑀓𑀦𑀦𑁆𑀢𑀺 ‘‘𑀦𑀸𑀕𑀸𑀯𑀮𑁄𑀓𑀺𑀢𑀁 𑀅𑀯𑀮𑁄𑀓𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀧𑀼𑀭𑀺𑀫𑀓𑀸𑀬𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑁂𑀓𑁆𑀔𑀦𑀁. ‘‘𑀆𑀮𑁄𑀓𑀺𑀢𑁂 𑀯𑀺𑀮𑁄𑀓𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀻’’𑀢𑀺 𑀏𑀢𑁆𑀣𑀸𑀧𑀺 𑀪𑀸𑀯𑀯𑀲𑁂𑀦 𑀆𑀮𑁄𑀓𑀦𑀁 𑀆𑀮𑁄𑀓𑀺𑀢𑀁 𑀯𑀺𑀮𑁄𑀓𑀦𑀁 𑀯𑀺𑀮𑁄𑀓𑀺𑀢𑀦𑁆𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀣𑀓 𑀧𑀝𑀺𑀖𑀸𑀢𑁂. 𑀣𑀓𑁂𑀢𑀺, 𑀣𑀓𑀬𑀢𑀺 𑀤𑁆𑀯𑀸𑀭𑀁 𑀧𑀼𑀭𑀺𑀲𑁄.

𑀢𑀓𑁆𑀓 𑀯𑀺𑀢𑀓𑁆𑀓𑁂. 𑀢𑀓𑁆𑀓𑁂𑀢𑀺, 𑀯𑀺𑀢𑀓𑁆𑀓𑁂𑀢𑀺, 𑀯𑀺𑀢𑀓𑁆𑀓𑀬𑀢𑀺. 𑀢𑀓𑁆𑀓𑁄, 𑀯𑀺𑀢𑀓𑁆𑀓𑁄, 𑀯𑀺𑀢𑀓𑁆𑀓𑀺𑀢𑀸.

𑀢𑀢𑁆𑀣 𑀢𑀓𑁆𑀓𑀦𑀁 𑀢𑀓𑁆𑀓𑁄, 𑀊𑀳𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀏𑀯𑀁 𑀯𑀺𑀢𑀓𑁆𑀓𑁄. 𑀅𑀣 𑀯𑀸 𑀯𑀺𑀢𑀓𑁆𑀓𑁂𑀦𑁆𑀢𑀺 𑀏𑀢𑁂𑀦, 𑀲𑀬𑀁 𑀯𑀸 𑀯𑀺𑀢𑀓𑁆𑀓𑁂𑀢𑀺, 𑀯𑀺𑀢𑀓𑁆𑀓𑀦𑀫𑀢𑁆𑀢𑀫𑁂𑀯 𑀯𑀸 𑀏𑀢𑀦𑁆𑀢𑀺 𑀯𑀺𑀢𑀓𑁆𑀓𑁄. ‘‘𑀢𑀓𑁆𑀓𑁄, 𑀯𑀺𑀢𑀓𑁆𑀓𑁄, 𑀅𑀧𑁆𑀧𑀦𑀸, 𑀩𑁆𑀬𑀧𑁆𑀧𑀦𑀸, 𑀘𑁂𑀢𑀲𑁄 𑀅𑀪𑀺𑀦𑀺𑀭𑁄𑀧𑀦𑀸’’𑀢𑀺 𑀅𑀪𑀺𑀥𑀫𑁆𑀫𑁂 𑀧𑀭𑀺𑀬𑀸𑀬𑀲𑀤𑁆𑀤𑀸 𑀯𑀼𑀢𑁆𑀢𑀸. 𑀯𑀺𑀢𑀓𑁆𑀓𑁂𑀢𑀻𑀢𑀺 𑀯𑀺𑀢𑀓𑁆𑀓𑀺𑀢𑀸, 𑀧𑀼𑀕𑁆𑀕𑀮𑁄. ‘‘𑀅𑀯𑀺𑀢𑀓𑁆𑀓𑀺𑀢𑀸 𑀫𑀘𑁆𑀘𑀼𑀫𑀼𑀧𑀩𑁆𑀩𑀚𑀦𑁆𑀢𑀻’’𑀢𑀺 𑀧𑀸𑀴𑀺.

𑀅𑀓𑀺 𑀮𑀓𑁆𑀔𑀡𑁂. 𑀮𑀓𑁆𑀔𑀡𑀁 𑀲𑀜𑁆𑀜𑀸𑀡𑀁, 𑀲𑀜𑁆𑀚𑀸𑀦𑀦𑀓𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑁆𑀭𑀺𑀤𑀁 𑀲𑀮𑁆𑀮𑀓𑁆𑀔𑀺𑀢𑀩𑁆𑀩𑀁. 𑀬𑁂 𑀇𑀫𑀲𑁆𑀫𑀺𑀁 𑀘𑀼𑀭𑀸𑀤𑀺𑀕𑀡𑁂 𑀅𑀦𑁂𑀓𑀲𑁆𑀲𑀭𑀸 𑀅𑀲𑀁𑀬𑁄𑀕𑀦𑁆𑀢𑀸 𑀇𑀓𑀸𑀭𑀸𑀦𑀼𑀩𑀦𑁆𑀥𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀸 𑀥𑀸𑀢𑀯𑁄, 𑀢𑁂 𑀏𑀯𑀁𑀯𑀼𑀢𑁆𑀢𑁂𑀳𑀺 𑀇𑀫𑁂𑀳𑀺 𑀢𑀻𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀆𑀔𑁆𑀬𑀸𑀢𑀢𑁆𑀢𑀁 𑀦𑀸𑀫𑀺𑀓𑀢𑁆𑀢𑀜𑁆𑀘 𑀧𑀸𑀧𑀼𑀡𑀦𑁆𑀢𑀸 𑀏𑀓𑀦𑁆𑀢𑀢𑁄 𑀦𑀺𑀕𑁆𑀕𑀳𑀻𑀢𑀸𑀕𑀫𑁂𑀦 𑀦𑀺𑀧𑁆𑀨𑀦𑁆𑀦𑀭𑀽𑀧𑀸𑀬𑁂𑀯 𑀪𑀯𑀦𑁆𑀢𑀺, 𑀦 𑀓𑀢𑁆𑀣𑀘𑀺𑀧𑀺 𑀯𑀺𑀕𑀢𑀦𑀺𑀕𑁆𑀕𑀳𑀻𑀢𑀸𑀕𑀫𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀅𑀗𑁆𑀓𑁂𑀢𑀺, 𑀅𑀗𑁆𑀓𑀬𑀢𑀺. 𑀅𑀗𑁆𑀓𑀦𑀁, 𑀅𑀗𑁆𑀓𑁄 ¶ . 𑀲𑀫𑀸𑀲𑁂 𑀧𑀦 ‘‘𑀲𑀲𑀗𑁆𑀓𑁄, 𑀘𑀓𑁆𑀓𑀗𑁆𑀓𑀺𑀢𑀘𑀭𑀡𑁄’’𑀢𑀺𑀆𑀤𑀻𑀦𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺.

𑀲𑀓𑁆𑀓 𑀯𑀓𑁆𑀓 𑀪𑀸𑀲𑀦𑁂. 𑀲𑀓𑁆𑀓𑁂𑀢𑀺, 𑀲𑀓𑁆𑀓𑀬𑀢𑀺. 𑀯𑀓𑁆𑀓𑁂𑀢𑀺, 𑀯𑀓𑁆𑀓𑀬𑀢𑀺.

𑀦𑀓𑁆𑀓 𑀯𑀓𑁆𑀓 𑀦𑀸𑀲𑀦𑁂. 𑀦𑀓𑁆𑀓𑁂𑀢𑀺, 𑀦𑀓𑁆𑀓𑀬𑀢𑀺. 𑀯𑀓𑁆𑀓𑁂𑀢𑀺, 𑀯𑀓𑁆𑀓𑀬𑀢𑀺.

𑀘𑀓𑁆𑀓 𑀘𑀼𑀓𑁆𑀓 𑀩𑁆𑀬𑀣𑀦𑁂. 𑀘𑀓𑁆𑀓𑁂𑀢𑀺, 𑀘𑀓𑁆𑀓𑀬𑀢𑀺. 𑀘𑀼𑀓𑁆𑀓𑁂𑀢𑀺, 𑀘𑀼𑀓𑁆𑀓𑀬𑀢𑀺. 𑀘𑀓𑁆𑀓𑀁. 𑀘𑀓𑁆𑀓𑀦𑁆𑀢𑀺 𑀓𑁂𑀦𑀝𑁆𑀞𑁂𑀦 𑀘𑀓𑁆𑀓𑀁? 𑀘𑀓𑁆𑀓𑁂𑀢𑀺 𑀩𑁆𑀬𑀣𑀢𑀺 𑀳𑀺𑀁𑀲𑀢𑀻𑀢𑀺 𑀅𑀢𑁆𑀣𑁂𑀦 𑀘𑀓𑁆𑀓𑀁. 𑀘𑀓𑁆𑀓𑀲𑀤𑁆𑀤𑁄 𑁋

𑀲𑀫𑁆𑀧𑀢𑁆𑀢𑀺𑀬𑀁 𑀮𑀓𑁆𑀔𑀡𑁂 𑀘, 𑀭𑀣𑀗𑁆𑀕𑁂 𑀇𑀭𑀺𑀬𑀸𑀧𑀣𑁂;

𑀤𑀸𑀦𑁂 𑀭𑀢𑁆𑀦𑀥𑀫𑁆𑀫𑀔𑀼𑀭-𑀘𑀓𑁆𑀓𑀸𑀤𑀻𑀲𑀼 𑀧𑀤𑀺𑀲𑁆𑀲𑀢𑀺;

‘‘𑀘𑀢𑁆𑀢𑀸𑀭𑀺𑀫𑀸𑀦𑀺 𑀪𑀺𑀓𑁆𑀔𑀯𑁂 𑀘𑀓𑁆𑀓𑀸𑀦𑀺 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺𑀆𑀤𑀻𑀲𑀼 𑀳𑀺 𑀅𑀬𑀁 𑀲𑀫𑁆𑀧𑀢𑁆𑀢𑀺𑀬𑀁 𑀤𑀺𑀲𑁆𑀲𑀢𑀺. ‘‘𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀸𑀦𑀺 𑀚𑀸𑀢𑀸𑀦𑀻’’𑀢𑀺 𑀏𑀢𑁆𑀣 𑀮𑀓𑁆𑀔𑀡𑁂. ‘‘𑀘𑀓𑁆𑀓𑀁𑀯 𑀯𑀳𑀢𑁄 𑀧𑀤’’𑀦𑁆𑀢𑀺 𑀏𑀢𑁆𑀣 𑀭𑀣𑀗𑁆𑀕𑁂. ‘‘𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭’’𑀦𑁆𑀢𑀺 𑀏𑀢𑁆𑀣 𑀇𑀭𑀺𑀬𑀸𑀧𑀣𑁂. ‘‘𑀤𑀤 𑀪𑀼𑀜𑁆𑀚 𑀘 𑀫𑀸 𑀘𑀧𑁆𑀧𑀫𑀸𑀤𑁄, 𑀘𑀓𑁆𑀓𑀁 𑀯𑀢𑁆𑀢𑀲𑁆𑀲𑀼 𑀧𑀸𑀡𑀺𑀦’’𑀦𑁆𑀢𑀺 𑀏𑀢𑁆𑀣 𑀤𑀸𑀦𑁂. ‘‘𑀤𑀺𑀩𑁆𑀩𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀻’’𑀢𑀺 𑀏𑀢𑁆𑀣 𑀭𑀢𑀦𑀘𑀓𑁆𑀓𑁂. ‘‘𑀫𑀬𑀸 𑀧𑀯𑀢𑁆𑀢𑀺𑀢𑀁 𑀘𑀓𑁆𑀓’’𑀦𑁆𑀢𑀺 𑀏𑀢𑁆𑀣 𑀥𑀫𑁆𑀫𑀘𑀓𑁆𑀓𑁂. ‘‘𑀇𑀘𑁆𑀙𑀸𑀳𑀢𑀲𑁆𑀲 𑀧𑁄𑀲𑀲𑁆𑀲, 𑀘𑀓𑁆𑀓𑀁 𑀪𑀫𑀢𑀺 𑀫𑀢𑁆𑀣𑀓𑁂’’𑀢𑀺 𑀏𑀢𑁆𑀣 𑀔𑀼𑀭𑀘𑀓𑁆𑀓𑁂. ‘‘𑀔𑀼𑀭𑀧𑀭𑀺𑀬𑀦𑁆𑀢𑁂𑀦 𑀘𑁂𑀧𑀺 𑀘𑀓𑁆𑀓𑁂𑀦𑀸’’𑀢𑀺 𑀏𑀢𑁆𑀣 𑀧𑀳𑀭𑀡𑀘𑀓𑁆𑀓𑁂. ‘‘𑀅𑀲𑀦𑀺𑀯𑀺𑀘𑀓𑁆𑀓’’𑀦𑁆𑀢𑀺 𑀏𑀢𑁆𑀣 𑀅𑀲𑀦𑀺𑀫𑀡𑁆𑀟𑀮𑁂𑀢𑀺.

𑀢𑀓𑀺 ¶ 𑀩𑀦𑁆𑀥𑀦𑁂. 𑀢𑀗𑁆𑀓𑁂𑀢𑀺, 𑀢𑀗𑁆𑀓𑀬𑀢𑀺.

𑀅𑀓𑁆𑀓 𑀣𑀯𑀦𑁂. 𑀣𑀯𑀦𑀁 𑀣𑀼𑀢𑀺. 𑀅𑀓𑁆𑀓𑁂𑀢𑀺, 𑀅𑀓𑁆𑀓𑀬𑀢𑀺. 𑀅𑀓𑁆𑀓𑁄. 𑀅𑀓𑁆𑀓𑁄𑀢𑀺 𑀲𑀽𑀭𑀺𑀬𑁄. 𑀲𑁄 𑀳𑀺 𑀫𑀳𑀸𑀚𑀼𑀢𑀺𑀢𑀸𑀬 𑀅𑀓𑁆𑀓𑀺𑀬𑀢𑀺 𑀅𑀪𑀺𑀢𑁆𑀣𑀯𑀺𑀬𑀢𑀺 𑀢𑀧𑁆𑀧𑀲𑀦𑁆𑀦𑁂𑀳𑀺 𑀚𑀦𑁂𑀳𑀻𑀢𑀺 𑀅𑀓𑁆𑀓𑁄. 𑀢𑀣𑀸 𑀳𑀺 𑀢𑀲𑁆𑀲 ‘‘𑀦𑀢𑁆𑀣𑀺 𑀲𑀽𑀭𑀺𑀬𑀲𑀫𑀸 𑀆𑀪𑀸. 𑀉𑀤𑁂𑀢𑀬𑀁 𑀘𑀓𑁆𑀔𑀼𑀫𑀸 𑀏𑀓𑀭𑀸𑀚𑀸’’𑀢𑀺𑀆𑀤𑀺𑀦𑀸 𑀅𑀪𑀺𑀓𑁆𑀔𑀼𑀢𑀺 𑀤𑀺𑀲𑁆𑀲𑀢𑀺.

𑀳𑀺𑀓𑁆𑀓 𑀳𑀺𑀁𑀲𑀸𑀬𑀁. 𑀳𑀺𑀓𑁆𑀓𑁂𑀢𑀺, 𑀳𑀺𑀓𑁆𑀓𑀬𑀢𑀺.

𑀦𑀺𑀓𑁆𑀓 𑀧𑀭𑀺𑀫𑀸𑀡𑁂. 𑀦𑀺𑀓𑁆𑀓𑁂𑀢𑀺, 𑀦𑀺𑀓𑁆𑀓𑀬𑀢𑀺.

𑀩𑀼𑀓𑁆𑀓 𑀪𑀲𑁆𑀲𑀦𑁂. 𑀏𑀢𑁆𑀣 𑀲𑀼𑀦𑀔𑀪𑀲𑁆𑀲𑀦𑀁 𑀪𑀲𑁆𑀲𑀦𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, 𑀦 𑀯𑀸𑀘𑀸𑀲𑀗𑁆𑀔𑀸𑀢𑀁 𑀪𑀲𑁆𑀲𑀦𑀁. 𑀩𑀼𑀓𑁆𑀓𑁂𑀢𑀺, 𑀩𑀼𑀓𑁆𑀓𑀬𑀢𑀺. 𑀏𑀢𑁆𑀣 𑀘 ‘‘𑀩𑀼𑀓𑁆𑀓𑀬𑀢𑀺 𑀲𑀸 𑀘𑁄𑀭𑁂’’ 𑀇𑀢𑀺 𑀮𑁄𑀓𑀺𑀬𑀧𑁆𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀪𑀽𑀯𑀸𑀤𑀺𑀕𑀡𑁂 𑀧𑀦 ‘‘𑀩𑀼𑀓𑁆𑀓𑀢𑀺 𑀲𑀸’’𑀢𑀺 𑀭𑀽𑀧𑀁 𑀪𑀯𑀢𑀺. 𑀅𑀜𑁆𑀜𑁄 𑀢𑀼 ‘‘𑀩𑀼𑀓𑁆𑀓 𑀧𑀭𑀺𑀪𑀸𑀲𑀦𑁂’’ 𑀇𑀢𑀺 𑀧𑀞𑀢𑀺, 𑀏𑀯𑀁 𑀧𑀞𑀦𑁆𑀢𑁂𑀧𑀺 𑀲𑀼𑀦𑀔𑀪𑀲𑁆𑀲𑀦𑀫𑁂𑀯𑀸𑀥𑀺𑀧𑁆𑀧𑁂𑀢𑀁.

𑀤𑀓 𑀮𑀓 𑀅𑀲𑁆𑀲𑀸𑀤𑀦𑁂. 𑀤𑀓𑁂𑀢𑀺, 𑀤𑀓𑀬𑀢𑀺. 𑀮𑀓𑁂𑀢𑀺, 𑀮𑀓𑀬𑀢𑀺.

𑀢𑀓𑁆𑀓 𑀮𑁄𑀓 𑀪𑀸𑀲𑀸𑀬𑀁. 𑀢𑀓𑁆𑀓𑁂𑀢𑀺, 𑀢𑀓𑁆𑀓𑀬𑀢𑀺. 𑀮𑁄𑀓𑁂𑀢𑀺, 𑀮𑁄𑀓𑀬𑀢𑀺.

𑀘𑀺𑀓 𑀲𑀺𑀓 𑀆𑀫𑀲𑀦𑁂. 𑀘𑀺𑀓𑁂𑀢𑀺, 𑀘𑀺𑀓𑀬𑀢𑀺. 𑀲𑀺𑀓𑁂𑀢𑀺, 𑀲𑀺𑀓𑀬𑀢𑀺.

𑀓𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀔𑀓𑀸𑀭𑀦𑁆𑀢𑀥𑀸𑀢𑀼

𑀮𑀓𑁆𑀔 𑀤𑀲𑁆𑀲𑀦𑀗𑁆𑀓𑁂𑀲𑀼. 𑀤𑀲𑁆𑀲𑀦𑀁 𑀧𑀲𑁆𑀲𑀦𑀁. 𑀅𑀗𑁆𑀓𑁄 𑀮𑀜𑁆𑀚𑀦𑀁. 𑀮𑀓𑁆𑀔𑁂𑀢𑀺, 𑀮𑀓𑁆𑀔𑀬𑀢𑀺. 𑀲𑀮𑁆𑀮𑀓𑁆𑀔𑁂𑀢𑀺, 𑀲𑀮𑁆𑀮𑀓𑁆𑀔𑀬𑀢𑀺. 𑀮𑀓𑁆𑀔𑀁 𑀯𑀺𑀚𑁆𑀛𑀢𑀺 𑀉𑀲𑀼𑀦𑀸, 𑀮𑀓𑁆𑀔𑀁 𑀓𑀭𑁄𑀢𑀺.

𑀕𑀗𑁆𑀕𑀸𑀬 ¶ 𑀯𑀸𑀮𑀼𑀓𑀸 𑀔𑀻𑀬𑁂, 𑀉𑀤𑀓𑀁 𑀔𑀻𑀬𑁂 𑀫𑀳𑀡𑁆𑀡𑀯𑁂;

𑀫𑀳𑀺𑀬𑀸 𑀫𑀢𑁆𑀢𑀺𑀓𑀸 𑀔𑀻𑀬𑁂, 𑀮𑀓𑁆𑀔𑁂 𑀦 𑀫𑀫 𑀩𑀼𑀤𑁆𑀥𑀺𑀬𑀸.

𑀓𑀧𑁆𑀧𑀮𑀓𑁆𑀔𑀡𑀁. 𑀕𑁄𑀮𑀓𑁆𑀔𑀡𑀁. 𑀇𑀢𑁆𑀣𑀺𑀮𑀓𑁆𑀔𑀡𑀁. 𑀥𑀫𑁆𑀫𑀸𑀦𑀁 𑀮𑀓𑁆𑀔𑀡𑀁. 𑀲𑀮𑁆𑀮𑀓𑁆𑀔𑀦𑀸. 𑀉𑀧𑀮𑀓𑁆𑀔𑀦𑀸. 𑀧𑀘𑁆𑀘𑀼𑀧𑀮𑀓𑁆𑀔𑀦𑀸. 𑀮𑀓𑁆𑀔𑀥𑀸𑀢𑀼𑀬𑀸 𑀬𑀼𑀧𑀘𑁆𑀘𑀬𑀦𑁆𑀢𑀸𑀬 𑀲𑀫𑀸𑀤𑀺𑀧𑀼𑀩𑁆𑀩𑀸𑀦𑀁 𑀭𑀽𑀧𑀸𑀦𑀁 𑀦𑀓𑀸𑀭𑁄 𑀤𑀦𑁆𑀢𑀚𑁄.

𑀪𑀓𑁆𑀔 𑀅𑀤𑀦𑁂. 𑀪𑀓𑁆𑀔𑁂𑀢𑀺, 𑀪𑀓𑁆𑀔𑀬𑀢𑀺. 𑀪𑀓𑁆𑀔𑁄 𑀦𑁄 𑀮𑀤𑁆𑀥𑁄. 𑀪𑀓𑁆𑀔𑀬𑀦𑁆𑀢𑀺 𑀫𑀺𑀕𑀸𑀥𑀫𑀸. 𑀪𑀽𑀯𑀸𑀤𑀺𑀕𑀡𑁂 𑀧𑀦 ‘‘𑀪𑀓𑁆𑀔𑀢𑀻’’𑀢𑀺 𑀭𑀽𑀧𑀁.

𑀦𑀓𑁆𑀔 𑀲𑀫𑁆𑀩𑀦𑁆𑀥𑁂. 𑀦𑀓𑁆𑀔𑁂𑀢𑀺, 𑀦𑀓𑁆𑀔𑀬𑀢𑀺.

𑀫𑀓𑁆𑀔 𑀫𑀓𑁆𑀔𑀦𑁂. 𑀫𑀓𑁆𑀔𑁂𑀢𑀺, 𑀫𑀓𑁆𑀔𑀬𑀢𑀺. 𑀫𑀓𑁆𑀔𑁄, 𑀫𑀓𑁆𑀔𑀻. 𑀢𑀢𑁆𑀣 𑀫𑀓𑁆𑀔𑁄𑀢𑀺 𑀧𑀭𑁂𑀳𑀺 𑀓𑀢𑀕𑀼𑀡𑀁 𑀫𑀓𑁆𑀔𑁂𑀢𑀺 𑀧𑀺𑀲𑀢𑀻𑀢𑀺 𑀫𑀓𑁆𑀔𑁄, 𑀕𑀼𑀡𑀥𑀁𑀲𑀦𑀸. ‘‘𑀫𑀓𑁆𑀔𑀁 𑀅𑀲𑀳𑀫𑀸𑀦𑁄’’𑀢𑀺 𑀏𑀢𑁆𑀣 𑀧𑀦 𑀅𑀢𑁆𑀢𑀦𑀺 𑀧𑀭𑁂𑀳𑀺 𑀓𑀢𑀁 𑀅𑀯𑀫𑀜𑁆𑀜𑀦𑀁 𑀫𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺.

𑀬𑀓𑁆𑀔 𑀧𑀽𑀚𑀸𑀬𑀁. 𑀬𑀓𑁆𑀔𑁂𑀢𑀺, 𑀬𑀓𑁆𑀔𑀬𑀢𑀺. 𑀬𑀓𑁆𑀔𑁄. 𑀬𑀓𑁆𑀔𑁄𑀢𑀺 𑀫𑀳𑀸𑀦𑀼𑀪𑀸𑀯𑁄 𑀲𑀢𑁆𑀢𑁄. 𑀢𑀣𑀸 𑀳𑀺 ‘‘𑀧𑀼𑀘𑁆𑀙𑀸𑀫𑀺 𑀢𑀁 𑀫𑀳𑀸𑀬𑀓𑁆𑀔, 𑀲𑀩𑁆𑀩𑀪𑀽𑀢𑀸𑀦𑀫𑀺𑀲𑁆𑀲𑀭𑀸’’𑀢𑀺 𑀏𑀢𑁆𑀣 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 ‘‘𑀬𑀓𑁆𑀔𑁄’’𑀢𑀺 𑀯𑀼𑀢𑁆𑀢𑁄. 𑀅𑀣 𑀯𑀸 𑀬𑀓𑁆𑀔𑁄𑀢𑀺 𑀬𑀓𑁆𑀔𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑁄. 𑀲𑀩𑁆𑀩𑁂𑀧𑀺 𑀯𑀸 𑀲𑀢𑁆𑀢𑀸 ‘‘𑀬𑀓𑁆𑀔𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. ‘‘𑀧𑀭𑀫𑀬𑀓𑁆𑀔𑀯𑀺𑀲𑀼𑀤𑁆𑀥𑀺𑀁 𑀧𑀜𑁆𑀜𑀸𑀧𑁂𑀦𑁆𑀢𑀻’’𑀢𑀺 𑀏𑀢𑁆𑀣 𑀳𑀺 𑀬𑀓𑁆𑀔𑀲𑀤𑁆𑀤𑁄 𑀲𑀢𑁆𑀢𑁂 𑀯𑀢𑁆𑀢𑀢𑀺. 𑀢𑀣𑀸 𑀳𑀺 𑀬𑀓𑁆𑀔𑁄𑀧𑀺 𑀲𑀢𑁆𑀢𑁄𑀧𑀺 𑀤𑁂𑀯𑁄𑀧𑀺 𑀲𑀓𑁆𑀓𑁄𑀧𑀺 𑀔𑀻𑀡𑀸𑀲𑀯𑁄𑀧𑀺 𑀬𑀓𑁆𑀔𑁄𑀬𑁂𑀯 𑀦𑀸𑀫, 𑀫𑀳𑀸𑀦𑀼𑀪𑀸𑀯𑀢𑀸𑀬 𑀬𑀓𑁆𑀔𑀺𑀬𑀢𑀺 𑀲𑀭𑀡𑀕𑀢𑁂𑀳𑀺 𑀚𑀦𑁂𑀳𑀺 𑀦𑀸𑀦𑀸𑀧𑀘𑁆𑀘𑀬𑁂𑀳𑀺 𑀦𑀸𑀦𑀸𑀩𑀮𑀻𑀳𑀺 𑀘 𑀧𑀽𑀚𑀺𑀬𑀢𑀻𑀢𑀺 𑀬𑀓𑁆𑀔𑁄.

𑀲𑀢𑁆𑀢𑁂 𑀤𑁂𑀯𑁂 𑀘 𑀲𑀓𑁆𑀓𑁂 𑀘, 𑀔𑀻𑀡𑀸𑀲𑀯𑁂 𑀘 𑀭𑀓𑁆𑀔𑀲𑁂;

𑀧𑀜𑁆𑀘𑀲𑁆𑀯𑁂𑀢𑁂𑀲𑀼 𑀅𑀢𑁆𑀣𑁂𑀲𑀼, 𑀬𑀓𑁆𑀔𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑀮𑀓𑁆𑀔 ¶ 𑀆𑀮𑁄𑀘𑀦𑁂. 𑀮𑀓𑁆𑀔𑁂𑀢𑀺, 𑀮𑀓𑁆𑀔𑀬𑀢𑀺. 𑀮𑀓𑁆𑀔𑀁 𑀯𑀺𑀚𑁆𑀛𑀢𑀺 𑀉𑀲𑀼𑀦𑀸.

𑀫𑁄𑀓𑁆𑀔 𑀆𑀲𑀦𑁂. 𑀫𑁄𑀓𑁆𑀔𑁂𑀢𑀺, 𑀫𑁄𑀓𑁆𑀔𑀬𑀢𑀺.

𑀭𑀼𑀓𑁆𑀔 𑀨𑀸𑀭𑀼𑀲𑁆𑀲𑁂. 𑀨𑀸𑀭𑀼𑀲𑁆𑀲𑀁 𑀨𑀭𑀼𑀲𑀪𑀸𑀯𑁄. 𑀭𑀼𑀓𑁆𑀔𑁂𑀢𑀺, 𑀭𑀼𑀓𑁆𑀔𑀬𑀢𑀺. 𑀲𑀫𑀸𑀲𑁂 ‘‘𑀭𑀼𑀓𑁆𑀔𑀓𑁂𑀲𑁄, 𑀅𑀢𑀺𑀭𑀼𑀓𑁆𑀔𑀯𑀘𑀦𑁄’’𑀢𑀺 𑀭𑀽𑀧𑀸𑀦𑀺. 𑀏𑀢𑁆𑀣 𑀘 ‘‘𑀲𑀫𑀡𑁄 𑀅𑀬𑀁 𑀧𑀸𑀧𑁄 𑀅𑀢𑀺𑀭𑀼𑀓𑁆𑀔𑀯𑀸𑀘𑁄’’𑀢𑀺 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. 𑀢𑀢𑁆𑀣 𑀅𑀢𑀺𑀭𑀼𑀓𑁆𑀔𑀯𑀸𑀘𑁄𑀢𑀺 𑀅𑀢𑀺𑀨𑀭𑀼𑀲𑀯𑀘𑀦𑁄𑀢𑀺 𑀅𑀢𑁆𑀣𑁄.

𑀔𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀕𑀓𑀸𑀭𑀦𑁆𑀢𑀥𑀸𑀢𑀼

𑀮𑀺𑀗𑁆𑀕 𑀘𑀺𑀢𑁆𑀢𑀻𑀓𑀭𑀡𑁂. 𑀘𑀺𑀢𑁆𑀢𑀻𑀓𑀭𑀡𑀁 𑀯𑀺𑀘𑀺𑀢𑁆𑀭𑀪𑀸𑀯𑀓𑀭𑀡𑀁. 𑀮𑀺𑀗𑁆𑀕𑁂𑀢𑀺, 𑀮𑀺𑀗𑁆𑀕𑀬𑀢𑀺, 𑀮𑀺𑀗𑁆𑀕𑀁. 𑀏𑀢𑁆𑀣 𑀮𑀺𑀗𑁆𑀕𑀁 𑀦𑀸𑀫 𑀤𑀻𑀖𑀭𑀲𑁆𑀲𑀓𑀺𑀲𑀣𑀽𑀮𑀧𑀭𑀺𑀫𑀡𑁆𑀟𑀮𑀸𑀤𑀺𑀪𑁂𑀤𑀁 𑀲𑀡𑁆𑀞𑀸𑀦𑀦𑁆𑀢𑀺 𑀕𑀳𑀡𑁂 𑀅𑀢𑀻𑀯 𑀬𑀼𑀚𑁆𑀚𑀢𑀺. 𑀢𑀜𑁆𑀳𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀯𑀺𑀘𑀺𑀢𑁆𑀭𑀁 𑀳𑁄𑀢𑀺, 𑀮𑀺𑀗𑁆𑀕𑀻𑀬𑀢𑀺 𑀯𑀺𑀘𑀺𑀢𑁆𑀢𑀁 𑀓𑀭𑀺𑀬𑀢𑀺 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀓𑀫𑁆𑀫𑁂𑀳𑀺 𑀉𑀢𑀼𑀦𑀸 𑀯𑀸 𑀘𑀼𑀡𑁆𑀡𑀸𑀤𑀻𑀳𑀺 𑀯𑀸 𑀲𑀭𑀻𑀭𑀫𑀺𑀢𑀺 𑀮𑀺𑀗𑁆𑀕𑀁, 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑀢𑀺𑀡𑀭𑀼𑀓𑁆𑀔𑀸𑀤𑀺𑀓𑀼𑀡𑁆𑀟𑀮𑀓𑀭𑀡𑁆𑀟𑀓𑀸𑀤𑀻𑀲𑀼 𑀧𑀯𑀢𑁆𑀢𑀲𑀡𑁆𑀞𑀸𑀦𑀯𑀲𑁂𑀦𑁂𑀢𑀁 𑀤𑀝𑁆𑀞𑀩𑁆𑀩𑀁. 𑀮𑀺𑀗𑁆𑀕𑀲𑀤𑁆𑀤𑁄 𑀲𑀤𑁆𑀤𑁂 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑁂 𑀇𑀢𑁆𑀣𑀺𑀩𑁆𑀬𑀜𑁆𑀚𑀦𑁂 𑀧𑀼𑀭𑀺𑀲𑀩𑁆𑀬𑀜𑁆𑀚𑀦𑁂 𑀲𑀜𑁆𑀜𑀸𑀡𑁂 𑀆𑀓𑀸𑀭𑁂 𑀘𑀸𑀢𑀺 𑀇𑀫𑁂𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀅𑀬𑀜𑁆𑀳𑀺 ‘‘𑀭𑀼𑀓𑁆𑀔𑁄𑀢𑀺 𑀯𑀘𑀦𑀁 𑀮𑀺𑀗𑁆𑀕’’𑀦𑁆𑀢𑀺 𑀏𑀢𑁆𑀣 𑀲𑀤𑁆𑀤𑁂 𑀤𑀺𑀲𑁆𑀲𑀢𑀺. ‘‘𑀲𑀢𑀮𑀺𑀗𑁆𑀕𑀲𑁆𑀲 𑀅𑀢𑁆𑀣𑀲𑁆𑀲𑀸’’𑀢𑀺 𑀏𑀢𑁆𑀣 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑁂. ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀇𑀢𑁆𑀣𑀺𑀮𑀺𑀗𑁆𑀕𑀁 𑀧𑀸𑀢𑀼𑀪𑀯𑀢𑀻’’𑀢𑀺 𑀏𑀢𑁆𑀣 𑀇𑀢𑁆𑀣𑀺𑀩𑁆𑀬𑀜𑁆𑀚𑀦𑁂. ‘‘𑀧𑀼𑀭𑀺𑀲𑀮𑀺𑀗𑁆𑀕𑀦𑀺𑀫𑀺𑀢𑁆𑀢𑀓𑀼𑀢𑁆𑀢𑀸𑀓𑀧𑁆𑀧𑀸𑀦’’𑀦𑁆𑀢𑀺 𑀏𑀢𑁆𑀣 𑀧𑀼𑀭𑀺𑀲𑀩𑁆𑀬𑀜𑁆𑀚𑀦𑁂. ‘‘𑀢𑁂𑀦 𑀮𑀺𑀗𑁆𑀕𑁂𑀦 𑀚𑀸𑀦𑀸𑀫, 𑀥𑀼𑀯𑀁 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀲𑀜𑁆𑀜𑀸𑀡𑁂 ¶ . ‘‘𑀢𑁂𑀳𑀺 𑀮𑀺𑀗𑁆𑀕𑁂𑀳𑀺 𑀢𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀢𑁂𑀳𑀺 𑀆𑀓𑀸𑀭𑁂𑀳𑀺 𑀆𑀕𑀦𑁆𑀢𑀼𑀓𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄 ‘‘𑀆𑀕𑀦𑁆𑀢𑀼𑀓𑀸 𑀇𑀫𑁂’’𑀢𑀺 𑀏𑀢𑁆𑀣 𑀆𑀓𑀸𑀭𑁂 𑀤𑀺𑀲𑁆𑀲𑀢𑀺.

𑀲𑀤𑁆𑀤𑁂 𑀘 𑀢𑀦𑁆𑀦𑀺𑀫𑀺𑀢𑁆𑀢𑁂 𑀘, 𑀓𑀸𑀝𑀓𑁄𑀝𑀘𑀺𑀓𑀸𑀬 𑀘;

𑀮𑀓𑁆𑀔𑀡𑁂 𑀘𑁂𑀯 𑀆𑀓𑀸𑀭𑁂, 𑀮𑀺𑀗𑁆𑀕𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑀫𑀕 𑀅𑀦𑁆𑀯𑁂𑀲𑀦𑁂. 𑀫𑀕𑁂𑀢𑀺, 𑀫𑀕𑀬𑀢𑀺. 𑀫𑀺𑀕𑁄, 𑀫𑀕𑁄, 𑀫𑀕𑁄, 𑀫𑀕𑀬𑀫𑀸𑀦𑁄.

𑀏𑀢𑁆𑀣 𑀘 ‘‘𑀬𑀣𑀸 𑀩𑀺𑀴𑀸𑀭𑁄 𑀫𑀽𑀲𑀺𑀓𑀁 𑀫𑀕𑀬𑀫𑀸𑀦𑁄’’𑀢𑀺 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. ‘‘𑀫𑀺𑀕𑁄’’𑀢𑀺 𑀘 ‘‘𑀫𑀕𑁄’’𑀢𑀺 𑀘 𑀘𑀢𑀼𑀧𑁆𑀧𑀤𑁄 𑀧𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀫𑀺𑀕𑁄𑀢𑀺 𑀫𑀕𑀬𑀢𑀺 𑀇𑀢𑁄 𑀘𑀺𑀢𑁄 𑀕𑁄𑀘𑀭𑀁 𑀅𑀦𑁆𑀯𑁂𑀲𑀢𑀺 𑀧𑀭𑀺𑀬𑁂𑀲𑀢𑀻𑀢𑀺 𑀫𑀺𑀕𑁄. 𑀏𑀯𑀁 𑀫𑀕𑁄. 𑀏𑀢𑁆𑀣 𑀯𑀺𑀲𑁂𑀲𑀢𑁄 𑀳𑀭𑀺𑀡 𑀫𑀺𑀕𑁄 𑀫𑀺𑀕𑁄 𑀦𑀸𑀫. 𑀲𑀸𑀫𑀜𑁆𑀜𑀢𑁄 𑀧𑀦 𑀅𑀯𑀲𑁂𑀲𑀸𑀧𑀺 𑀘𑀢𑀼𑀧𑁆𑀧𑀤𑀸 ‘‘𑀫𑀺𑀕𑁄’’ 𑀇𑀘𑁆𑀘𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀢𑀣𑀸 𑀳𑀺 𑀲𑀼𑀲𑀻𑀫𑀚𑀸𑀢𑀓𑁂 ‘‘𑀓𑀸𑀴𑀸 𑀫𑀺𑀕𑀸 𑀲𑁂𑀢𑀤𑀦𑁆𑀢𑀸 𑀢𑀯 𑀇𑀫𑁂, 𑀧𑀭𑁄𑀲𑀳𑀲𑁆𑀲𑀁 𑀳𑁂𑀫𑀚𑀸𑀮𑀸𑀪𑀺𑀲𑀜𑁆𑀙𑀦𑁆𑀦𑀸’’𑀢𑀺 𑀏𑀢𑀲𑁆𑀫𑀺𑀁 𑀧𑀸𑀴𑀺𑀧𑁆𑀧𑀤𑁂𑀲𑁂 𑀳𑀢𑁆𑀣𑀺𑀦𑁄𑀧𑀺 𑀫𑀺𑀕𑀲𑀤𑁆𑀤𑁂𑀦 𑀯𑀼𑀢𑁆𑀢𑀸 ‘‘𑀓𑀸𑀴𑀫𑀺𑀕𑀸’’𑀢𑀺. 𑀅𑀣 𑀯𑀸 𑀫𑀕𑀺𑀬𑀢𑀺 𑀚𑀻𑀯𑀺𑀢𑀓𑀧𑁆𑀧𑀦𑀢𑁆𑀣𑀸𑀬 𑀫𑀁𑀲𑀸𑀤𑀻𑀳𑀺 𑀅𑀢𑁆𑀣𑀺𑀓𑁂𑀳𑀺 𑀮𑀼𑀤𑁆𑀤𑁂𑀳𑀺 𑀅𑀦𑁆𑀯𑁂𑀲𑀺𑀬𑀢𑀺 𑀧𑀭𑀺𑀬𑁂𑀲𑀺𑀬𑀢𑀻𑀢𑀺 𑀫𑀺𑀕𑁄, 𑀅𑀭𑀜𑁆𑀜𑀚𑀸𑀢𑀸 𑀲𑀲𑀧𑀲𑀤𑀳𑀭𑀺𑀡𑁂𑀡𑁂𑀬𑁆𑀬𑀸𑀤𑀬𑁄 𑀘𑀢𑀼𑀧𑁆𑀧𑀸𑀤𑀸, 𑀏𑀯𑀁 𑀫𑀕𑁄. ‘‘𑀅𑀢𑁆𑀣𑀁 𑀦 𑀮𑀪𑀢𑁂 𑀫𑀕𑁄’’𑀢𑀺 𑀏𑀢𑁆𑀣 𑀧𑀦 𑀫𑀕𑁄 𑀯𑀺𑀬𑀸𑀢𑀺 𑀫𑀕𑁄, 𑀩𑀸𑀮𑁄𑀢𑀺 𑀅𑀢𑁆𑀣𑁄.

𑀫𑀕𑁆𑀕 𑀕𑀯𑁂𑀲𑀦𑁂. 𑀫𑀕𑁆𑀕𑁂𑀢𑀺, 𑀫𑀕𑁆𑀕𑀬𑀢𑀺. 𑀫𑀕𑁆𑀕𑁄, 𑀫𑀕𑁆𑀕𑀦𑀁.

𑀏𑀢𑁆𑀣 𑀘 𑀫𑀕𑁆𑀕𑁄𑀢𑀺 𑀧𑀝𑀺𑀧𑀤𑀸𑀬 𑀘 𑀧𑀓𑀢𑀺𑀫𑀕𑁆𑀕𑀲𑁆𑀲 𑀘 𑀉𑀧𑀸𑀬𑀲𑁆𑀲 𑀘 𑀅𑀥𑀺𑀯𑀘𑀦𑀁. ‘‘𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁, 𑀯𑀸𑀘𑀦𑀸𑀫𑀕𑁆𑀕𑀦𑀺𑀲𑁆𑀲𑀺𑀢’’𑀦𑁆𑀢𑀺𑀆𑀤𑀻𑀲𑀼 𑀧𑀦 𑀓𑀣𑀸𑀧𑀩𑀦𑁆𑀥𑁄𑀧𑀺 ‘‘𑀫𑀕𑁆𑀕𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀭 𑀧𑀝𑀺𑀧𑀤𑀸 𑀏𑀓𑀦𑁆𑀢𑀢𑁄 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀤𑀼𑀓𑁆𑀔𑀸𑀤𑀻𑀳𑀺 𑀧𑀻𑀴𑀺𑀢𑁂𑀳𑀺 𑀲𑀢𑁆𑀢𑁂𑀳𑀺 𑀤𑀼𑀓𑁆𑀔𑀓𑁆𑀔𑀬𑀁 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀢𑁆𑀣𑀸𑀬 𑀫𑀕𑁆𑀕𑀺𑀢𑀩𑁆𑀩𑁄 𑀕𑀯𑁂𑀲𑀺𑀢𑀩𑁆𑀩𑁄𑀢𑀺 𑀫𑀕𑁆𑀕𑁄. 𑀧𑀓𑀢𑀺𑀫𑀕𑁆𑀕𑁄 ¶ 𑀧𑀦 𑀫𑀕𑁆𑀕𑀫𑀽𑀴𑁆𑀳𑁂𑀳𑀺 𑀫𑀕𑁆𑀕𑀺𑀢𑀩𑁆𑀩𑁄𑀢𑀺 𑀫𑀕𑁆𑀕𑁄. 𑀧𑀓𑀢𑀺𑀫𑀕𑁆𑀕𑀫𑀽𑀴𑁆𑀳𑁂𑀳𑀺 𑀘 𑀧𑀝𑀺𑀧𑀤𑀸𑀲𑀗𑁆𑀔𑀸𑀢𑀸𑀭𑀺𑀬𑀫𑀕𑁆𑀕𑀫𑀽𑀴𑁆𑀳𑀸 𑀏𑀯 𑀩𑀳𑀯𑁄 𑀲𑀦𑁆𑀢𑀺. 𑀧𑀓𑀢𑀺𑀫𑀕𑁆𑀕𑁄 𑀳𑀺 𑀓𑀤𑀸𑀘𑀺 𑀏𑀯 𑀅𑀤𑁆𑀥𑀺𑀓𑀸𑀦𑀁 𑀫𑀼𑀬𑁆𑀳𑀢𑀺, ‘‘𑀏𑀲 𑀫𑀕𑁆𑀕𑁄’’𑀢𑀺 𑀦𑀸𑀬𑀓𑀸 𑀦 𑀤𑀼𑀮𑁆𑀮𑀪𑀸. 𑀅𑀭𑀺𑀬𑀫𑀕𑁆𑀕𑁄 𑀧𑀦 𑀲𑀩𑁆𑀩𑀤𑀸𑀬𑁂𑀯 𑀲𑀩𑁆𑀩𑀮𑁄𑀓𑀲𑁆𑀲 𑀫𑀼𑀬𑁆𑀳𑀢𑀺, 𑀦𑀸𑀬𑀓𑀸 𑀧𑀭𑀫𑀤𑀼𑀮𑁆𑀮𑀪𑀸. 𑀢𑀲𑁆𑀫𑀸 𑀲𑁄 𑀏𑀯 𑀅𑀯𑀺𑀚𑁆𑀚𑀸𑀲𑀫𑁆𑀫𑀽𑀴𑁆𑀳𑁂𑀳𑀺 𑀫𑀕𑁆𑀕𑀺𑀢𑀩𑁆𑀩𑁄𑀢𑀺 𑀫𑀕𑁆𑀕𑁄. 𑀅𑀜𑁆𑀜𑁂𑀲𑀁 𑀧𑀦 𑀤𑁆𑀯𑀺𑀦𑁆𑀦𑀁 𑀥𑀸𑀢𑀽𑀦𑀁 𑀯𑀲𑁂𑀦𑀧𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺 𑀕𑀭𑀽 ‘‘𑀓𑀺𑀮𑁂𑀲𑁂 𑀫𑀸𑀭𑁂𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀫𑀕𑁆𑀕𑁄’’𑀢𑀺. 𑀢𑀁 𑀢𑀁 𑀓𑀺𑀘𑁆𑀘𑀁 𑀳𑀺𑀢𑀁 𑀯𑀸 𑀦𑀺𑀧𑁆𑀨𑀸𑀤𑁂𑀢𑀼𑀓𑀸𑀫𑁂𑀳𑀺 𑀫𑀕𑁆𑀕𑀺𑀬𑀢𑀺 𑀕𑀯𑁂𑀲𑀺𑀬𑀢𑀻𑀢𑀺 𑀫𑀕𑁆𑀕𑁄, 𑀉𑀧𑀸𑀬𑁄. 𑀫𑀕𑁆𑀕𑀲𑀤𑁆𑀤𑁄 𑀳𑀺 ‘‘𑀅𑀪𑀺𑀥𑀫𑁆𑀫𑀓𑀣𑀸𑀫𑀕𑁆𑀕𑀁, 𑀤𑁂𑀯𑀸𑀦𑀁 𑀲𑀫𑁆𑀧𑀯𑀢𑁆𑀢𑀬𑀻’’𑀢𑀺 𑀏𑀢𑁆𑀣 𑀉𑀧𑀸𑀬𑁂𑀧𑀺 𑀯𑀢𑁆𑀢𑀢𑀺. 𑀢𑀣𑀸 𑀳𑀺 𑀅𑀪𑀺𑀥𑀫𑁆𑀫𑀝𑀻𑀓𑀸𑀬𑀁 ‘‘𑀫𑀕𑁆𑀕𑁄𑀢𑀺 𑀉𑀧𑀸𑀬𑁄, 𑀔𑀦𑁆𑀥𑀸𑀬𑀢𑀦𑀸𑀤𑀻𑀦𑀁 𑀓𑀼𑀲𑀮𑀸𑀤𑀻𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀯𑀩𑁄𑀥𑀲𑁆𑀲 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀲𑁆𑀲𑁂𑀯 𑀯𑀸 𑀉𑀧𑀸𑀬𑀪𑀸𑀯𑀢𑁄 𑀅𑀪𑀺𑀥𑀫𑁆𑀫𑀓𑀣𑀸𑀫𑀕𑁆𑀕𑁄’’𑀢𑀺 𑀯𑀼𑀢𑁆𑀢𑁄, 𑀧𑀩𑀦𑁆𑀥𑁄 𑀯𑀸 ‘‘𑀫𑀕𑁆𑀕𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀳𑀺 𑀤𑀻𑀖𑀢𑁆𑀢𑀸 𑀫𑀕𑁆𑀕𑁄 𑀯𑀺𑀬𑀸𑀢𑀺 𑀫𑀕𑁆𑀕𑁄, 𑀢𑀲𑁆𑀫𑀸 𑀅𑀪𑀺𑀥𑀫𑁆𑀫𑀓𑀣𑀸𑀧𑀩𑀦𑁆𑀥𑁄 𑀅𑀪𑀺𑀥𑀫𑁆𑀫𑀓𑀣𑀸𑀫𑀕𑁆𑀕𑁄𑀢𑀺 𑀯𑀼𑀢𑁆𑀢𑁄. 𑀇𑀤𑀸𑀦𑀺 𑀧𑀓𑀢𑀺𑀧𑀝𑀺𑀧𑀤𑀸𑀫𑀕𑁆𑀕𑀸𑀦𑀁 𑀦𑀸𑀫𑀸𑀦𑀺 𑀓𑀣𑀬𑀸𑀫. 𑀢𑁂𑀲𑀼 𑀧𑀓𑀢𑀺𑀫𑀕𑁆𑀕𑀲𑁆𑀲 𑁋

‘‘𑀫𑀕𑁆𑀕𑁄 𑀧𑀦𑁆𑀣𑁄 𑀧𑀣𑁄 𑀧𑀚𑁆𑀚𑁄, 𑀅𑀜𑁆𑀛𑀲𑀁 𑀯𑀝𑀼𑀫𑀸’𑀬𑀦𑀁;

𑀅𑀤𑁆𑀥𑀸𑀦’𑀫𑀤𑁆𑀥𑀸 𑀧𑀤𑀯𑀻, 𑀯𑀢𑁆𑀢𑀦𑀺 𑀘𑁂𑀯 𑀲𑀦𑁆𑀢𑀢𑀻’’𑀢𑀺

𑀇𑀫𑀸𑀦𑀺 𑀦𑀸𑀫𑀸𑀦𑀺. 𑀧𑀝𑀺𑀧𑀤𑀸𑀫𑀕𑁆𑀕𑀲𑁆𑀲 𑀧𑀦 𑁋

‘‘𑀫𑀕𑁆𑀕𑁄 𑀧𑀦𑁆𑀣𑁄 𑀧𑀣𑁄 𑀧𑀚𑁆𑀚𑁄, 𑀅𑀜𑁆𑀚𑀲𑀁 𑀯𑀝𑀼𑀫𑀸’𑀬𑀦𑀁;

𑀦𑀸𑀯 𑀉𑀢𑁆𑀢𑀭 𑀲𑁂𑀢𑀼 𑀘, 𑀓𑀼𑀮𑁆𑀮𑁄 𑀘 𑀪𑀺𑀲𑀺 𑀲𑀗𑁆𑀓𑀫𑁄’’𑀢𑀺

𑀅𑀦𑁂𑀓𑀸𑀦𑀺 𑀦𑀸𑀫𑀸𑀦𑀺. 𑀏𑀢𑁆𑀣 𑀧𑀦 𑀓𑁂𑀘𑀺 ‘‘𑀦𑀸𑀯𑀸𑀢𑀺𑀆𑀤𑀻𑀦𑀺 𑀧𑀓𑀢𑀺𑀫𑀕𑁆𑀕𑀲𑁆𑀲 𑀦𑀸𑀫𑀸𑀦𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁, 𑀧𑀓𑀢𑀺𑀫𑀕𑁆𑀕𑀲𑁆𑀲 𑀓𑀺𑀲𑁆𑀫𑀺𑀜𑁆𑀘𑀺𑀧𑀺 𑀧𑀸𑀴𑀺𑀧𑁆𑀧𑀤𑁂𑀲𑁂 ‘‘𑀦𑀸𑀯𑀸’’𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀯𑀼𑀢𑁆𑀢𑀝𑁆𑀞𑀸𑀦𑀸𑀪𑀸𑀯𑀢𑁄, 𑀅𑀪𑀺𑀥𑀸𑀦𑀲𑀢𑁆𑀣𑁂𑀲𑀼 𑀘 ‘‘𑀦𑀸𑀯𑀸’’ 𑀇𑀘𑁆𑀘𑀸𑀤𑀺𑀓𑀸𑀦𑀁 𑀢𑀤𑀪𑀺𑀥𑀸𑀦𑀸𑀦𑀁 𑀅𑀦𑀸𑀕𑀢𑀢𑁆𑀢𑀸.

𑀅𑀬𑀁 ¶ 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄 𑁋 𑀦𑀸𑀯𑀸𑀯𑀺𑀬𑀸𑀢𑀺 𑀦𑀸𑀯𑀸, 𑀉𑀢𑁆𑀢𑀭𑀦𑁆𑀢𑀺 𑀏𑀢𑁂𑀦𑀸𑀢𑀺 𑀉𑀢𑁆𑀢𑀭𑀁, 𑀦𑀸𑀯𑀸𑀬𑁂𑀯 𑀉𑀢𑁆𑀢𑀭𑀦𑁆𑀢𑀺. 𑀅𑀬𑀜𑁆𑀳𑀺 𑀦𑀸𑀯𑀸𑀧𑀭𑀺𑀬𑀸𑀬𑁄 ‘‘𑀢𑀭𑀁, 𑀢𑀭𑀡𑀁, 𑀧𑁄𑀢𑁄, 𑀧𑁆𑀮𑀯𑁄’’𑀢𑀺. 𑀇𑀫𑁂𑀧𑀺 𑀢𑀁𑀧𑀭𑀺𑀬𑀸𑀬𑀸𑀬𑁂𑀯. 𑀉𑀢𑁆𑀢𑀭𑀁 𑀯𑀺𑀬𑀸𑀢𑀺 𑀉𑀢𑁆𑀢𑀭𑀁. 𑀲𑁂𑀢𑀼 𑀯𑀺𑀬𑀸𑀢𑀺 𑀲𑁂𑀢𑀼. 𑀓𑀼𑀮𑁆𑀮𑁄 𑀯𑀺𑀬𑀸𑀢𑀺 𑀓𑀼𑀮𑁆𑀮𑁄. 𑀪𑀺𑀲𑀺 𑀯𑀺𑀬𑀸𑀢𑀺 𑀪𑀺𑀲𑀺. 𑀲𑀗𑁆𑀓𑀫𑁄 𑀯𑀺𑀬, 𑀲𑀗𑁆𑀓𑀫𑀦𑁆𑀢𑀺 𑀯𑀸 𑀏𑀢𑁂𑀦𑀸𑀢𑀺 𑀲𑀗𑁆𑀓𑀫𑁄, 𑀲𑀩𑁆𑀩𑀫𑁂𑀢𑀁 𑀅𑀭𑀺𑀬𑀫𑀕𑁆𑀕𑀲𑁆𑀲𑁂𑀯 𑀦𑀸𑀫𑀁, 𑀦 𑀧𑀓𑀢𑀺𑀫𑀕𑁆𑀕𑀲𑁆𑀲. 𑀢𑀣𑀸 𑀳𑀺 ‘‘𑀥𑀫𑁆𑀫𑀦𑀸𑀯𑀁 𑀲𑀫𑀸𑀭𑀽𑀬𑁆𑀳, 𑀲𑀦𑁆𑀢𑀸𑀭𑁂𑀲𑁆𑀲𑀁 𑀲𑀤𑁂𑀯𑀓’’𑀦𑁆𑀢𑀺 𑀘, ‘‘𑀥𑀫𑁆𑀫𑀲𑁂𑀢𑀼𑀁 𑀤𑀴𑁆𑀳𑀁 𑀓𑀢𑁆𑀯𑀸, 𑀦𑀺𑀩𑁆𑀩𑀼𑀢𑁄 𑀲𑁄 𑀦𑀭𑀸𑀲𑀪𑁄’’𑀢𑀺 𑀘, ‘‘𑀓𑀼𑀮𑁆𑀮𑁄’𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀅𑀭𑀺𑀬𑀫𑀕𑁆𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀘 𑀏𑀯𑀫𑀸𑀤𑀺𑀦𑀸 𑀢𑀢𑁆𑀣 𑀢𑀢𑁆𑀣 𑀪𑀕𑀯𑀢𑀸 𑀅𑀭𑀺𑀬𑀫𑀕𑁆𑀕𑁄 ‘‘𑀦𑀸𑀯𑀸’’𑀢𑀺𑀆𑀤𑀻𑀳𑀺 𑀅𑀦𑁂𑀓𑁂𑀳𑀺 𑀦𑀸𑀫𑁂𑀳𑀺 𑀯𑀼𑀢𑁆𑀢𑁄. 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺𑀧𑀺 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀬𑀁 ‘‘𑀩𑀤𑁆𑀥𑀸 𑀪𑀺𑀲𑀺 𑀲𑀼𑀲𑀗𑁆𑀔𑀢𑀸 𑀪𑀕𑀯𑀸’’𑀢𑀺 𑀏𑀢𑀲𑁆𑀫𑀺𑀁 𑀧𑀤𑁂𑀲𑁂 𑀏𑀯𑀁 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀓𑀢𑀸 ‘‘𑀪𑀺𑀲𑀻𑀢𑀺 𑀧𑀢𑁆𑀣𑀭𑀺𑀢𑁆𑀯𑀸 𑀧𑀼𑀣𑀼𑀮𑀁 𑀓𑀢𑁆𑀯𑀸 𑀩𑀤𑁆𑀥𑀸 ‘𑀓𑀼𑀮𑁆𑀮𑀸’𑀢𑀺 𑀯𑀼𑀘𑁆𑀘𑀢𑀺 𑀮𑁄𑀓𑁂, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀧𑀦 𑀅𑀭𑀺𑀬𑀫𑀕𑁆𑀕𑁄’𑀢𑀺.

‘𑀫𑀕𑁆𑀕𑁄 𑀧𑀚𑁆𑀚𑁄 𑀧𑀣𑁄 𑀧𑀦𑁆𑀣𑁄, 𑀅𑀜𑁆𑀚𑀲𑀁 𑀯𑀝𑀼𑀫𑀸’𑀬𑀦𑀁;

𑀦𑀸𑀯𑀸 𑀉𑀢𑁆𑀢𑀭 𑀲𑁂𑀢𑀼 𑀘, 𑀓𑀼𑀮𑁆𑀮𑁄 𑀘 𑀪𑀺𑀲𑀺 𑀲𑀗𑁆𑀓𑀫𑁄;

𑀅𑀤𑁆𑀥𑀸𑀦𑀁 𑀧𑀪𑀯𑁄’𑀘𑁆𑀘𑁂𑀯, 𑀢𑀢𑁆𑀣 𑀢𑀢𑁆𑀣 𑀧𑀓𑀸𑀲𑀺𑀢𑁄’’𑀢𑀺.

𑀏𑀯𑀁 𑀆𑀘𑀭𑀺𑀬𑁂𑀳𑀺 𑀓𑀢𑀸𑀬 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀬 𑀤𑀲𑁆𑀲𑀦𑀢𑁄 𑀘 ‘‘𑀦𑀸𑀯𑀸𑀢𑀺𑀆𑀤𑀻𑀦𑀺𑀧𑀺 𑀧𑀓𑀢𑀺𑀫𑀕𑁆𑀕𑀲𑁆𑀲 𑀦𑀸𑀫𑀸𑀦𑀻’’𑀢𑀺 𑀯𑀘𑀦𑀁 𑀦 𑀕𑀳𑁂𑀢𑀩𑁆𑀩𑀁, 𑀬𑀣𑀸𑀯𑀼𑀢𑁆𑀢𑀫𑁂𑀯 𑀯𑀘𑀦𑀁 𑀕𑀳𑁂𑀢𑀩𑁆𑀩𑀁.

𑀓𑁄𑀘𑀺 𑀧𑀦𑁂𑀢𑁆𑀣 𑀏𑀯𑀁 𑀯𑀤𑁂𑀬𑁆𑀬 ‘‘𑀥𑀫𑁆𑀫𑀲𑁂𑀢𑀼𑀁 𑀤𑀴𑁆𑀳𑀁 𑀓𑀢𑁆𑀯𑀸’𑀢𑀺 𑀏𑀢𑁆𑀣 ‘𑀥𑀫𑁆𑀫𑀲𑁂𑀢𑀼𑀦𑁆𑀢𑀺 𑀫𑀕𑁆𑀕𑀲𑁂𑀢𑀼’𑀦𑁆𑀢𑀺 𑀯𑀘𑀦𑀢𑁄 𑀥𑀫𑁆𑀫𑀲𑀤𑁆𑀤𑁄 𑀫𑀕𑁆𑀕𑁂 𑀯𑀢𑁆𑀢𑀢𑀺, 𑀦 𑀲𑁂𑀢𑀼𑀲𑀤𑁆𑀤𑁄’’𑀢𑀺. 𑀢𑀦𑁆𑀦, 𑀥𑀫𑁆𑀫𑀲𑀤𑁆𑀤𑁄 𑀯𑀺𑀬 𑀲𑁂𑀢𑀼𑀲𑀤𑁆𑀤𑁄𑀧𑀺 𑀫𑀕𑁆𑀕𑁂 𑀯𑀢𑁆𑀢𑀢𑀻𑀢𑀺 𑀲𑁂𑀢𑀼 𑀯𑀺𑀬𑀸𑀢𑀺 𑀲𑁂𑀢𑀼, 𑀥𑀫𑁆𑀫𑁄 𑀏𑀯 𑀲𑁂𑀢𑀼 𑀥𑀫𑁆𑀫𑀲𑁂𑀢𑀽𑀢𑀺 𑀅𑀢𑁆𑀣𑀯𑀲𑁂𑀦, 𑀏𑀲 𑀦𑀬𑁄 𑀅𑀜𑁆𑀜𑀢𑁆𑀭𑀸𑀧𑀺. 𑀅𑀧𑀭𑀫𑁆𑀧𑀺 𑀯𑀤𑁂𑀬𑁆𑀬 ¶ ‘‘𑀦𑀦𑀼 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀦𑁆𑀢𑀝𑁆𑀞𑀓𑀣𑀸𑀬𑀁 ‘𑀤𑀓𑁆𑀔𑀺𑀡𑀼𑀢𑁆𑀢𑀭𑁂𑀦 𑀩𑁄𑀥𑀺𑀫𑀡𑁆𑀟𑀁 𑀧𑀯𑀺𑀲𑀺𑀢𑁆𑀯𑀸 𑀅𑀲𑁆𑀲𑀢𑁆𑀣𑀤𑀼𑀫𑀭𑀸𑀚𑀸𑀦𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀼𑀩𑁆𑀩𑀼𑀢𑁆𑀢𑀭𑀪𑀸𑀕𑁂 𑀞𑀺𑀢𑁄’𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀤𑀓𑁆𑀔𑀺𑀡𑀼𑀢𑁆𑀢𑀭𑀲𑀤𑁆𑀤𑁂𑀦 𑀤𑀓𑁆𑀔𑀺𑀡𑁄 𑀫𑀕𑁆𑀕𑁄 𑀯𑀼𑀢𑁆𑀢𑁄’’𑀢𑀺. 𑀦, 𑀅𑀦𑁂𑀓𑁂𑀲𑀼 𑀧𑀸𑀴𑀺𑀧𑁆𑀧𑀤𑁂𑀲𑁂𑀲𑀼 𑀅𑀝𑁆𑀞𑀓𑀣𑀸𑀧𑀤𑁂𑀲𑁂𑀲𑀼 𑀘 𑀅𑀪𑀺𑀥𑀸𑀦𑀲𑀢𑁆𑀣𑁂𑀲𑀼 𑀘 𑀫𑀕𑁆𑀕𑀯𑀸𑀘𑀓𑀲𑁆𑀲 𑀉𑀢𑁆𑀢𑀭𑀲𑀤𑁆𑀤𑀲𑁆𑀲 𑀅𑀦𑀸𑀕𑀢𑀢𑁆𑀢𑀸, 𑀢𑀲𑁆𑀫𑀸 𑀢𑀢𑁆𑀣 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 ‘‘𑀤𑀓𑁆𑀔𑀺𑀡𑀤𑀺𑀲𑀢𑁄 𑀕𑀦𑁆𑀢𑀩𑁆𑀩𑁄 𑀉𑀢𑁆𑀢𑀭𑀤𑀺𑀲𑀸𑀪𑀸𑀕𑁄 𑀤𑀓𑁆𑀔𑀺𑀡𑀼𑀢𑁆𑀢𑀭𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁𑀪𑀽𑀢𑁂𑀦 𑀤𑀓𑁆𑀔𑀺𑀡𑀼𑀢𑁆𑀢𑀭𑁂𑀦 𑀩𑁄𑀥𑀺𑀫𑀡𑁆𑀟𑀧𑀯𑀺𑀲𑀦𑀁 𑀲𑀦𑁆𑀥𑀸𑀬 𑀤𑀓𑁆𑀔𑀺𑀡𑀼𑀢𑁆𑀢𑀭𑁂𑀦 𑀩𑁄𑀥𑀺𑀫𑀡𑁆𑀟𑀁 𑀧𑀯𑀺𑀲𑀺𑀢𑁆𑀯𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺. 𑀅𑀣 𑀯𑀸 𑀤𑀓𑁆𑀔𑀺𑀡𑀼𑀢𑁆𑀢𑀭𑁂𑀦𑀸𑀢𑀺 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀼𑀢𑁆𑀢𑀭𑁂𑀦, 𑀏𑀢𑁆𑀣 𑀆𑀤𑀺𑀅𑀯𑀲𑀸𑀦𑀕𑁆𑀕𑀳𑀡𑁂𑀦 𑀫𑀚𑁆𑀛𑀲𑁆𑀲𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀕𑀳𑀡𑀁𑀬𑁂𑀯 𑀳𑀺 𑀬𑀁 𑀚𑀸𑀢𑀓𑀦𑀺𑀤𑀸𑀦𑁂 𑀯𑀼𑀢𑁆𑀢𑀁 ‘‘𑀩𑁄𑀥𑀺𑀲𑀢𑁆𑀢𑁄 𑀢𑀺𑀡𑀁 𑀕𑀳𑁂𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑀁 𑀆𑀭𑀽𑀬𑁆𑀳 𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁂 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀅𑀝𑁆𑀞𑀸𑀲𑀺, 𑀢𑀲𑁆𑀫𑀺𑀁 𑀔𑀡𑁂 𑀤𑀓𑁆𑀔𑀺𑀡𑀘𑀓𑁆𑀓𑀯𑀸𑀴𑀁 𑀑𑀲𑀻𑀤𑀺𑀢𑁆𑀯𑀸 𑀳𑁂𑀝𑁆𑀞𑀸 𑀅𑀯𑀻𑀘𑀺𑀲𑀫𑁆𑀧𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺, 𑀉𑀢𑁆𑀢𑀭𑀘𑀓𑁆𑀓𑀯𑀸𑀴𑀁 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀉𑀧𑀭𑀺 𑀪𑀯𑀕𑁆𑀕𑀧𑁆𑀧𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺, 𑀩𑁄𑀥𑀺𑀲𑀢𑁆𑀢𑁄 𑀇𑀤𑀁 𑀲𑀫𑁆𑀩𑁄𑀥𑀺𑀧𑀸𑀧𑀼𑀡𑀝𑁆𑀞𑀸𑀦𑀁 𑀦 𑀪𑀯𑀢𑀺 𑀫𑀜𑁆𑀜𑁂𑀢𑀺 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀧𑀘𑁆𑀙𑀺𑀫𑀤𑀺𑀲𑀸𑀪𑀸𑀕𑀁 𑀕𑀦𑁆𑀢𑁆𑀯𑀸 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀅𑀝𑁆𑀞𑀸𑀲𑀻’’𑀢𑀺𑀆𑀤𑀺, 𑀢𑁂𑀦 𑀲𑀫𑁂𑀢𑀺. 𑀅𑀣𑀸𑀧𑀺 𑀯𑀤𑁂𑀬𑁆𑀬 ‘‘𑀬𑀤𑀺 𑀉𑀢𑁆𑀢𑀭𑀲𑀤𑁆𑀤𑁄 𑀤𑀺𑀲𑀸𑀯𑀸𑀘𑀓𑁄, 𑀏𑀯𑀜𑁆𑀘 𑀲𑀢𑀺 ‘‘𑀤𑀓𑁆𑀔𑀺𑀡𑀼𑀢𑁆𑀢𑀭𑁂𑀦𑀸’’𑀢𑀺 𑀏𑀦𑀬𑁄𑀕𑀁 𑀅𑀯𑀢𑁆𑀯𑀸 ‘‘𑀤𑀓𑁆𑀔𑀺𑀡𑀼𑀢𑁆𑀢𑀭𑀸𑀬𑀸’’𑀢𑀺 𑀆𑀬𑀬𑁄𑀕𑁄 𑀯𑀢𑁆𑀢𑀩𑁆𑀩𑁄’’𑀢𑀺. 𑀢𑀦𑁆𑀦, 𑀤𑀺𑀲𑀸𑀯𑀸𑀘𑀓𑀲𑁆𑀲𑀧𑀺 𑀲𑀤𑁆𑀤𑀲𑁆𑀲 ‘‘𑀉𑀢𑁆𑀢𑀭𑁂𑀦 𑀦𑀤𑀻 𑀲𑀻𑀢𑀸, 𑀕𑀫𑁆𑀪𑀻𑀭𑀸 𑀤𑀼𑀭𑀢𑀺𑀓𑁆𑀓𑀫𑀸’’𑀢𑀺 𑀏𑀦𑀬𑁄𑀕𑀯𑀲𑁂𑀦 𑀯𑀘𑀦𑀢𑁄. 𑀅𑀧𑀺𑀘 𑀤𑀺𑀲𑀸𑀪𑀸𑀕𑀁 𑀲𑀦𑁆𑀥𑀸𑀬 ‘‘𑀤𑀓𑁆𑀔𑀺𑀡𑀼𑀢𑁆𑀢𑀭𑁂𑀦𑀸’’𑀢𑀺 𑀯𑀘𑀦𑀁 𑀯𑀼𑀢𑁆𑀢𑀁. 𑀤𑀺𑀲𑀸𑀪𑀸𑀕𑁄 𑀳𑀺 𑀤𑀺𑀲𑀸 𑀏𑀯𑀸𑀢𑀺 𑀦𑀺𑀝𑁆𑀞𑀫𑁂𑀢𑁆𑀣𑀸𑀯𑀕𑀦𑁆𑀢𑀩𑁆𑀩𑀁.

𑀕𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀖𑀓𑀸𑀭𑀦𑁆𑀢𑀥𑀸𑀢𑀼

𑀮𑀺𑀖𑀺 ¶ 𑀪𑀸𑀲𑀦𑁂. 𑀮𑀗𑁆𑀖𑁂𑀢𑀺, 𑀮𑀗𑁆𑀖𑀬𑀢𑀺. 𑀏𑀢𑀸𑀦𑀺 𑀩𑀼𑀤𑁆𑀥𑀯𑀘𑀦𑁂 𑀅𑀧𑁆𑀧𑀲𑀺𑀤𑁆𑀥𑀸𑀦𑀺𑀧𑀺 𑀮𑁄𑀓𑀺𑀓𑀧𑁆𑀧𑀬𑁄𑀕𑀤𑀲𑁆𑀲𑀦𑀯𑀲𑁂𑀦 𑀆𑀕𑀢𑀸𑀦𑀺. 𑀲𑀸𑀲𑀦𑀲𑁆𑀫𑀺𑀜𑁆𑀳𑀺 𑀪𑀽𑀯𑀸𑀤𑀺𑀕𑀡𑀘𑀼𑀭𑀸𑀤𑀺𑀕𑀡𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀕𑀢𑁆𑀬𑀢𑁆𑀣𑀯𑀸𑀘𑀓𑀉𑀮𑁆𑀮𑀗𑁆𑀖𑀦𑀢𑁆𑀣𑀧𑀭𑀺𑀤𑀻𑀧𑀓𑀲𑁆𑀲 𑀥𑀸𑀢𑀼𑀲𑁆𑀲 𑀭𑀽𑀧𑀁 𑀅𑀢𑀻𑀯 𑀧𑀲𑀺𑀤𑁆𑀥𑀁.

𑀮𑀗𑁆𑀖 𑀮𑀗𑁆𑀖𑀦𑁂. 𑀮𑀗𑁆𑀖𑁂𑀢𑀺, 𑀮𑀗𑁆𑀖𑀬𑀢𑀺.

‘‘𑀅𑀢𑀺𑀓𑀭’𑀫𑀓𑀭𑀸’𑀘𑀭𑀺𑀬, 𑀫𑀬𑁆𑀳𑀫𑁆𑀧𑁂𑀢𑀁 𑀦 𑀭𑀼𑀘𑁆𑀘𑀢𑀺;

𑀘𑀢𑀼𑀢𑁆𑀣𑁂 𑀮𑀗𑁆𑀖𑀬𑀺𑀢𑁆𑀯𑀸𑀦, 𑀧𑀜𑁆𑀘𑀫𑀺𑀬𑀫𑁆𑀧𑀺 𑀆𑀯𑀼𑀢𑁄’’𑀢𑀺

𑀇𑀫𑀲𑁆𑀫𑀺𑀁 𑀲𑀢𑁆𑀢𑀺𑀮𑀗𑁆𑀖𑀦𑀚𑀸𑀢𑀓𑁂 𑀘𑀼𑀭𑀸𑀤𑀺𑀕𑀡𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀕𑀢𑁆𑀬𑀢𑁆𑀣𑀯𑀸𑀘𑀓𑀲𑁆𑀲 𑀉𑀮𑁆𑀮𑀗𑁆𑀖𑀦𑀢𑁆𑀣𑀧𑀭𑀺𑀤𑀻𑀧𑀓𑀲𑁆𑀲 𑀮𑀗𑁆𑀖𑀥𑀸𑀢𑀼𑀲𑁆𑀲 ‘‘𑀮𑀗𑁆𑀖𑀬𑀺𑀢𑁆𑀯𑀸, 𑀮𑀗𑁆𑀖𑀬𑀺𑀢𑁆𑀯𑀸𑀦𑀸’’𑀢𑀺 𑀭𑀽𑀧𑁂 𑀤𑀺𑀝𑁆𑀞𑁂𑀬𑁂𑀯 ‘‘𑀮𑀗𑁆𑀖𑁂𑀢𑀺, 𑀮𑀗𑁆𑀖𑀬𑀢𑀻’’𑀢𑀺 𑀭𑀽𑀧𑀸𑀦𑀺 𑀤𑀺𑀝𑁆𑀞𑀸𑀦𑀺 𑀏𑀯 𑀳𑁄𑀦𑁆𑀢𑀺. 𑀪𑀸𑀲𑀢𑁆𑀣𑀯𑀸𑀘𑀓𑀲𑁆𑀲 𑀧𑀦 𑀢𑀣𑀸𑀭𑀽𑀧𑀸𑀦𑀺 𑀭𑀽𑀧𑀸𑀦𑀺 𑀦 𑀤𑀺𑀝𑁆𑀞𑀸𑀦𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀤𑀻𑀖𑀤𑀲𑁆𑀲𑀻𑀳𑀺 𑀅𑀪𑀺𑀫𑀢𑀢𑁆𑀢𑀸 𑀪𑀸𑀲𑀢𑁆𑀣𑀯𑀸𑀘𑀺𑀓𑀸𑀧𑀺 𑀮𑀗𑁆𑀖𑀥𑀸𑀢𑀼 𑀅𑀢𑁆𑀣𑀻𑀢𑀺 𑀕𑀳𑁂𑀢𑀩𑁆𑀩𑀸, 𑀏𑀯𑀁 𑀲𑀩𑁆𑀩𑁂𑀲𑀼𑀧𑀺 𑀪𑀽𑀯𑀸𑀤𑀺𑀕𑀡𑀸𑀤𑀻𑀲𑀼 𑀲𑀸𑀲𑀦𑁂 𑀅𑀧𑁆𑀧𑀲𑀺𑀤𑁆𑀥𑀸𑀦𑀫𑁆𑀧𑀺 𑀭𑀽𑀧𑀸𑀦𑀁 𑀲𑀸𑀲𑀦𑀸𑀦𑀼𑀓𑀽𑀮𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀅𑀦𑀦𑀼𑀓𑀽𑀮𑀸𑀦𑀜𑁆𑀘 𑀅𑀧𑁆𑀧𑀲𑀺𑀤𑁆𑀥𑀸𑀦𑀁 𑀙𑀟𑁆𑀟𑀦𑀁.

𑀅𑀖 𑀧𑀸𑀧𑀓𑀭𑀡𑁂. 𑀅𑀖𑁂𑀢𑀺, 𑀅𑀖𑀬𑀢𑀺. 𑀅𑀖𑀁, 𑀅𑀖𑁄, 𑀅𑀦𑀖𑁄.

𑀢𑀢𑁆𑀣 𑀅𑀖𑀦𑁆𑀢𑀺 𑀤𑀼𑀓𑁆𑀔𑀁. ‘‘𑀅𑀖𑀦𑁆𑀢𑀁 𑀧𑀝𑀺𑀲𑁂𑀯𑀺𑀲𑁆𑀲𑀁. 𑀯𑀦𑁂 𑀯𑀸𑀴𑀫𑀺𑀕𑀸𑀓𑀺𑀡𑁆𑀡𑁂. 𑀔𑀕𑁆𑀕𑀤𑀻𑀧𑀺𑀦𑀺𑀲𑁂𑀯𑀺𑀢𑁂’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀁. 𑀅𑀖𑁄𑀢𑀺 𑀓𑀺𑀮𑁂𑀲𑁄. 𑀢𑁂𑀦 𑀅𑀖𑁂𑀦 𑀅𑀭𑀳𑀸 𑀅𑀦𑀖𑁄. 𑀢𑀢𑁆𑀣 𑀅𑀖𑀬𑀦𑁆𑀢𑀺 𑀧𑀸𑀧𑀁 𑀓𑀭𑁄𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀦𑀸𑀢𑀺 𑀅𑀖𑀁, 𑀓𑀺𑀦𑁆𑀢𑀁? 𑀤𑀼𑀓𑁆𑀔𑀁, 𑀏𑀯𑀁 𑀅𑀖𑁄. 𑀦𑀦𑀼 𑀘 𑀲𑀧𑁆𑀧𑀼𑀭𑀺𑀲𑀸 𑀤𑀼𑀓𑁆𑀔𑀳𑁂𑀢𑀼𑀧𑀺 𑀓𑀺𑀮𑁂𑀲𑀳𑁂𑀢𑀼𑀧𑀺 𑀘 𑀅𑀢𑁆𑀢𑀦𑁄 𑀲𑀼𑀔𑀢𑁆𑀣𑀸𑀬 𑀧𑀸𑀧𑀁 𑀦 𑀓𑀭𑁄𑀦𑁆𑀢𑀺. 𑀢𑀣𑀸 𑀳𑀺 𑁋

‘‘𑀦 ¶ 𑀧𑀡𑁆𑀟𑀺𑀢𑀸 𑀅𑀢𑁆𑀢𑀲𑀼𑀔𑀲𑁆𑀲 𑀳𑁂𑀢𑀼,

𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀲𑀫𑀸𑀘𑀭𑀦𑁆𑀢𑀺;

𑀤𑀼𑀓𑁆𑀔𑁂𑀦 𑀨𑀼𑀝𑁆𑀞𑀸 𑀔𑀮𑀺𑀢𑀸𑀧𑀺 𑀲𑀦𑁆𑀢𑀸,

𑀙𑀦𑁆𑀤𑀸 𑀘 𑀤𑁄𑀲𑀸 𑀦 𑀚𑀳𑀦𑁆𑀢𑀺 𑀥𑀫𑁆𑀫’’𑀦𑁆𑀢𑀺

𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 ‘‘𑀅𑀖 𑀧𑀸𑀧𑀓𑀭𑀡𑁂’’𑀢𑀺 𑀥𑀸𑀢𑀼 𑀘 ‘‘𑀅𑀖𑀬𑀦𑁆𑀢𑀺 𑀧𑀸𑀧𑀁 𑀓𑀭𑁄𑀦𑁆𑀢𑀺 𑀲𑀢𑁆𑀢𑀸 𑀏𑀢𑁂𑀦𑀸𑀢𑀺 𑀅𑀖’’𑀦𑁆𑀢𑀺𑀆𑀤𑀺𑀯𑀘𑀦𑀜𑁆𑀘 𑀯𑀼𑀢𑁆𑀢𑀦𑁆𑀢𑀺? 𑀲𑀘𑁆𑀘𑀁, 𑀬𑁂𑀪𑀼𑀬𑁆𑀬𑁂𑀦 𑀧𑀦 𑀲𑀢𑁆𑀢𑀸 𑀤𑀼𑀓𑁆𑀔𑀸𑀤𑀺𑀳𑁂𑀢𑀼 𑀧𑀸𑀧𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀏𑀢𑁂𑀲𑀼 𑀲𑀧𑁆𑀧𑀼𑀭𑀺𑀲𑀸 𑀏𑀯 𑀦 𑀓𑀭𑁄𑀦𑁆𑀢𑀺, 𑀇𑀢𑀭𑁂 𑀓𑀭𑁄𑀦𑁆𑀢𑀺. 𑀏𑀯𑀁 𑀧𑀸𑀧𑀓𑀭𑀡𑀲𑁆𑀲 𑀳𑀺 𑀤𑀼𑀓𑁆𑀔𑀁 𑀓𑀺𑀮𑁂𑀲𑁄 𑀘 𑀳𑁂𑀢𑀼. 𑀢𑀣𑀸 𑀳𑀺 𑁋

𑀲𑀼𑀔𑀻𑀧𑀺 𑀳𑁂𑀓𑁂 𑀦 𑀓𑀭𑁄𑀦𑁆𑀢𑀺 𑀧𑀸𑀧𑀁,

𑀅𑀯𑀡𑁆𑀡𑀲𑀁𑀲𑀕𑁆𑀕𑀪𑀬𑀸 𑀧𑀼𑀦𑁂𑀓𑁂;

𑀧𑀳𑀽 𑀲𑀫𑀸𑀦𑁄 𑀯𑀺𑀧𑀼𑀮𑀢𑁆𑀣𑀘𑀺𑀦𑁆𑀢𑀻,

𑀓𑀺𑀁𑀓𑀸𑀭𑀡𑀸 𑀫𑁂 𑀦 𑀓𑀭𑁄𑀲𑀺 𑀤𑀼𑀓𑁆𑀔’’𑀦𑁆𑀢𑀺

𑀯𑀼𑀢𑁆𑀢𑀁. 𑀅𑀬𑀜𑁆𑀳𑀺 𑀕𑀸𑀣𑀸 𑀤𑀼𑀓𑁆𑀔𑀳𑁂𑀢𑀼𑀧𑀺 𑀲𑀢𑁆𑀢𑀸 𑀧𑀸𑀧𑀁 𑀓𑀭𑁄𑀦𑁆𑀢𑀻𑀢𑀺 𑀏𑀢𑀫𑀢𑁆𑀣𑀁 𑀤𑀻𑀧𑁂𑀢𑀺. ‘‘𑀓𑀼𑀤𑁆𑀥𑁄 𑀳𑀺 𑀧𑀺𑀢𑀭𑀁 𑀳𑀦𑁆𑀢𑀺, 𑀓𑀼𑀤𑁆𑀥𑁄 𑀳𑀦𑁆𑀢𑀺 𑀲𑀫𑀸𑀢𑀭’’𑀦𑁆𑀢𑀺 𑀅𑀬𑀁 𑀧𑀦 𑀓𑀺𑀮𑁂𑀲𑀳𑁂𑀢𑀼𑀧𑀺 𑀧𑀸𑀧𑀁 𑀓𑀭𑁄𑀦𑁆𑀢𑀻𑀢𑀺 𑀏𑀢𑀫𑀢𑁆𑀣𑀁 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀅𑀫𑁆𑀳𑁂𑀳𑀺 ‘‘𑀅𑀖 𑀧𑀸𑀧𑀓𑀭𑀡𑁂’’𑀢𑀺𑀆𑀤𑀺𑀯𑀘𑀦𑀁 𑀯𑀼𑀢𑁆𑀢𑀁.

𑀖𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀘𑀓𑀸𑀭𑀦𑁆𑀢𑀥𑀸𑀢𑀼

𑀮𑁄𑀘 𑀤𑀲𑁆𑀲𑀦𑁂. 𑀮𑁄𑀘𑁂𑀢𑀺, 𑀮𑁄𑀘𑀬𑀢𑀺. 𑀮𑁄𑀘𑀦𑀁. 𑀭𑀽𑀧𑀸𑀭𑀫𑁆𑀫𑀡𑀁 𑀮𑁄𑀘𑀬𑀢𑀺 𑀧𑀲𑁆𑀲𑀢𑀻𑀢𑀺 𑀮𑁄𑀘𑀦𑀁, 𑀘𑀓𑁆𑀔𑀼.

𑀓𑀺𑀘𑀺 𑀫𑀤𑁆𑀤𑀦𑁂. 𑀓𑀺𑀜𑁆𑀘𑁂𑀢𑀺, 𑀓𑀺𑀜𑁆𑀘𑀬𑀢𑀺. 𑀓𑀺𑀜𑁆𑀘𑀦𑀁, 𑀅𑀓𑀺𑀜𑁆𑀘𑀦𑁄.

𑀢𑀢𑁆𑀣 ¶ 𑀓𑀺𑀜𑁆𑀘𑀦𑀦𑁆𑀢𑀺 𑀧𑀮𑀺𑀩𑁄𑀥𑁄. 𑀓𑀺𑀜𑁆𑀘𑁂𑀢𑀺 𑀲𑀢𑁆𑀢𑁂 𑀫𑀤𑁆𑀤𑀢𑀻𑀢𑀺 𑀓𑀺𑀜𑁆𑀘𑀦𑀁. 𑀓𑀺𑀜𑁆𑀘𑀦𑀲𑀤𑁆𑀤𑁄 𑀫𑀤𑁆𑀤𑀦𑀢𑁆𑀣𑁂 𑀯𑀢𑁆𑀢𑀢𑀺. 𑀫𑀦𑀼𑀲𑁆𑀲𑀸 𑀳𑀺 𑀯𑀻𑀳𑀺𑀁 𑀫𑀤𑁆𑀤𑀦𑁆𑀢𑀸 𑀕𑁄𑀡𑀁 ‘‘𑀓𑀺𑀜𑁆𑀘𑁂𑀳𑀺 𑀓𑀸𑀧𑀺𑀮, 𑀓𑀺𑀜𑁆𑀘𑁂𑀳𑀺 𑀓𑀸𑀧𑀺𑀮𑀸’’𑀢𑀺 𑀯𑀤𑀦𑁆𑀢𑀺.

𑀧𑀘𑀺 𑀯𑀺𑀢𑁆𑀣𑀸𑀭𑁂. 𑀧𑀜𑁆𑀘𑁂𑀢𑀺, 𑀧𑀜𑁆𑀘𑀬𑀢𑀺. 𑀧𑀧𑀜𑁆𑀘𑁂𑀢𑀺, 𑀧𑀧𑀜𑁆𑀘𑀬𑀢𑀺. 𑀧𑀧𑀜𑁆𑀘𑀸.

𑀏𑀢𑁆𑀣 𑀧𑀧𑀜𑁆𑀘𑀸𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀬𑁄. 𑀏𑀢𑀸 𑀳𑀺 𑀅𑀢𑁆𑀢𑀦𑀺𑀲𑁆𑀲𑀺𑀢𑀸𑀦𑀁 𑀲𑀢𑁆𑀢𑀸𑀦𑀁 𑀲𑀁𑀲𑀸𑀭𑀁 𑀧𑀧𑀜𑁆𑀘𑁂𑀦𑁆𑀢𑀺 𑀯𑀺𑀢𑁆𑀣𑀺𑀦𑁆𑀦𑀁 𑀓𑀭𑁄𑀦𑁆𑀢𑀻𑀢𑀺 𑀧𑀧𑀜𑁆𑀘𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀣 𑀯𑀸 𑀧𑀧𑀜𑁆𑀘𑁂𑀦𑁆𑀢𑀺 𑀬𑀢𑁆𑀣 𑀲𑀬𑀁 𑀉𑀧𑁆𑀧𑀦𑁆𑀦𑀸 𑀢𑀁𑀲𑀦𑁆𑀢𑀸𑀦𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑀺 𑀘𑀺𑀭𑀁 𑀞𑀧𑁂𑀦𑁆𑀢𑀻𑀢𑀺 𑀧𑀧𑀜𑁆𑀘𑀸. 𑀮𑁄𑀓𑀺𑀬𑀸 𑀧𑀦 ‘‘𑀅𑀫𑁆𑀳𑀸𑀓𑀁 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑀸𑀦𑀁 𑀧𑀧𑀜𑁆𑀘𑁄 𑀳𑁄𑀢𑀻’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀸 𑀓𑀸𑀮𑀲𑁆𑀲 𑀘𑀺𑀭𑀪𑀸𑀯𑀁 𑀧𑀧𑀜𑁆𑀘𑁄𑀢𑀺 𑀯𑀤𑀦𑁆𑀢𑀺, 𑀲𑀸𑀲𑀦𑁂 𑀧𑀦 𑀤𑁆𑀯𑀬𑀫𑁆𑀧𑀺 𑀮𑀩𑁆𑀪𑀢𑀺.

𑀲𑀺𑀘𑁆𑀘 𑀓𑀼𑀟𑁆𑀟𑀦𑁂. 𑀲𑀺𑀘𑁆𑀘𑁂𑀢𑀺, 𑀲𑀺𑀘𑁆𑀘𑀬𑀢𑀺.

𑀯𑀜𑁆𑀘𑀼 𑀧𑀮𑀫𑁆𑀪𑀦𑁂. 𑀧𑀮𑀫𑁆𑀪𑀦𑀁 𑀉𑀧𑀮𑀸𑀧𑀦𑀁. 𑀯𑀜𑁆𑀘𑁂𑀢𑀺, 𑀯𑀜𑁆𑀘𑀬𑀢𑀺. 𑀯𑀜𑁆𑀘𑀓𑁄, 𑀯𑀜𑁆𑀘𑀦𑀁. 𑀪𑀽𑀯𑀸𑀤𑀺𑀕𑀡𑁂 𑀧𑀦 𑀯𑀜𑁆𑀘𑀥𑀸𑀢𑀼 𑀕𑀢𑁆𑀬𑀢𑁆𑀣𑁂 𑀯𑀢𑁆𑀢𑀢𑀺. ‘‘𑀲𑀦𑁆𑀢𑀺 𑀧𑀸𑀤𑀸 𑀅𑀯𑀜𑁆𑀘𑀦𑀸’’𑀢𑀺 𑀳𑀺 𑀧𑀸𑀴𑀺

𑀘𑀘𑁆𑀘 𑀅𑀚𑁆𑀛𑀬𑀦𑁂. 𑀘𑀘𑁆𑀘𑁂𑀢𑀺, 𑀘𑀘𑁆𑀘𑀬𑀢𑀺.

𑀘𑀼 𑀘𑀯𑀦𑁂. 𑀘𑀸𑀯𑁂𑀢𑀺, 𑀘𑀸𑀯𑀬𑀢𑀺. 𑀅𑀜𑁆𑀜𑁄 ‘‘𑀘𑀼 𑀲𑀳𑀦𑁂’’ 𑀇𑀢𑀺 𑀩𑁆𑀭𑀼𑀢𑁂. 𑀘𑀸𑀯𑁂𑀢𑀺, 𑀘𑀸𑀯𑀬𑀢𑀺, 𑀲𑀳𑀢𑀻𑀢𑀺 𑀅𑀢𑁆𑀣𑁄.

𑀅𑀜𑁆𑀘𑀼 𑀯𑀺𑀲𑁂𑀲𑀦𑁂. 𑀅𑀜𑁆𑀘𑁂𑀢𑀺, 𑀅𑀜𑁆𑀘𑀬𑀢𑀺.

𑀮𑁄𑀘 𑀪𑀸𑀲𑀸𑀬𑀁. 𑀮𑁄𑀘𑁂𑀢𑀺, 𑀮𑁄𑀘𑀬𑀢𑀺. 𑀮𑁄𑀘𑀦𑀁, 𑀮𑁄𑀘𑀬𑀢𑀺 𑀲𑀫𑀯𑀺𑀲𑀫𑀁 𑀆𑀘𑀺𑀓𑁆𑀔𑀦𑁆𑀢𑀁 𑀯𑀺𑀬 𑀪𑀯𑀢𑀻𑀢𑀺 𑀮𑁄𑀘𑀦𑀁, 𑀘𑀓𑁆𑀔𑀼.

𑀭𑀘 𑀧𑀢𑀺𑀬𑀢𑀦𑁂. 𑀭𑀘𑁂𑀢𑀺, 𑀭𑀘𑀬𑀢𑀺. 𑀭𑀘𑀦𑀸, 𑀯𑀺𑀭𑀘𑀺𑀢𑀁, 𑀓𑁂𑀲𑀭𑀘𑀦𑀸, 𑀕𑀸𑀣𑀸𑀭𑀘𑀦𑀸.

𑀲𑀽𑀘 ¶ 𑀧𑁂𑀲𑀼𑀜𑁆𑀜𑁂. 𑀧𑀺𑀲𑀼𑀡𑀪𑀸𑀯𑁄 𑀧𑁂𑀲𑀼𑀜𑁆𑀜𑀁. 𑀲𑀽𑀘𑁂𑀢𑀺, 𑀲𑀽𑀘𑀬𑀢𑀺. 𑀲𑀽𑀘𑀓𑁄.

𑀧𑀘𑁆𑀘 𑀲𑀁𑀬𑀫𑀦𑁂. 𑀧𑀘𑁆𑀘𑁂𑀢𑀺, 𑀧𑀘𑁆𑀘𑀬𑀢𑀺.

𑀭𑀺𑀘 𑀯𑀺𑀬𑁄𑀚𑀦𑀲𑀫𑁆𑀧𑀚𑁆𑀚𑀦𑁂𑀲𑀼. 𑀭𑁂𑀘𑁂𑀢𑀺, 𑀭𑁂𑀘𑀬𑀢𑀺. 𑀲𑁂𑀝𑁆𑀞𑀺𑀧𑀼𑀢𑁆𑀢𑀁 𑀯𑀺𑀭𑁂𑀘𑁂𑀬𑁆𑀬. 𑀯𑀺𑀭𑁂𑀘𑁂𑀢𑀺, 𑀯𑀺𑀭𑁂𑀘𑀬𑀢𑀺. 𑀯𑀺𑀭𑁂𑀘𑀓𑁄, 𑀯𑀺𑀭𑁂𑀘𑀦𑀁.

𑀯𑀘 𑀪𑀸𑀲𑀦𑁂. 𑀯𑀘𑁂𑀢𑀺, 𑀯𑀘𑀬𑀢𑀺. 𑀪𑀽𑀯𑀸𑀤𑀺𑀕𑀡𑁂𑀧𑀺 𑀅𑀬𑀁 𑀯𑀢𑁆𑀢𑀢𑀺. 𑀢𑀤𑀸 𑀢𑀲𑁆𑀲𑀸 ‘‘𑀯𑀢𑁆𑀢𑀺, 𑀯𑀘𑀢𑀺, 𑀅𑀯𑁄𑀘, 𑀅𑀯𑁄𑀘𑀼’’𑀦𑁆𑀢𑀺𑀆𑀤𑀻𑀦𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀓𑀸𑀭𑀺𑀢𑁂 𑀧𑀦 ‘‘𑀅𑀦𑁆𑀢𑁂𑀯𑀸𑀲𑀺𑀓𑀁 𑀥𑀫𑁆𑀫𑀁 𑀯𑀸𑀘𑁂𑀢𑀺, 𑀯𑀸𑀘𑀬𑀢𑀻’’𑀢𑀺 𑀭𑀽𑀧𑀸𑀦𑀺. 𑀯𑀢𑁆𑀢𑀼𑀁, 𑀯𑀢𑁆𑀢𑀯𑁂, 𑀯𑀢𑁆𑀯𑀸, 𑀯𑀼𑀢𑁆𑀢𑀁, 𑀯𑀼𑀘𑁆𑀘𑀢𑀺.

𑀅𑀘𑁆𑀘 𑀧𑀽𑀚𑀸𑀬𑀁. 𑀅𑀘𑁆𑀘𑁂𑀢𑀺, 𑀅𑀘𑁆𑀘𑀬𑀢𑀺. 𑀩𑁆𑀭𑀳𑁆𑀫𑀸𑀲𑀼𑀭𑀲𑀼𑀭𑀘𑁆𑀘𑀺𑀢𑁄.

𑀲𑀽𑀘 𑀕𑀦𑁆𑀥𑀦𑁂. 𑀲𑀼𑀘𑁂𑀢𑀺, 𑀲𑀽𑀘𑀬𑀢𑀺. 𑀲𑀽𑀘𑀓𑁄, 𑀲𑀼𑀢𑁆𑀢𑀁.

𑀏𑀢𑁆𑀣 𑀘 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸𑀤𑀺𑀪𑁂𑀤𑁂 𑀅𑀢𑁆𑀣𑁂 𑀲𑀽𑀘𑁂𑀢𑀻𑀢𑀺 𑀲𑀼𑀢𑁆𑀢𑀁. 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁.

𑀓𑀘 𑀤𑀺𑀢𑁆𑀢𑀺𑀬𑀁. 𑀓𑀘𑁆𑀘𑁂𑀢𑀺, 𑀓𑀘𑁆𑀘𑀬𑀢𑀺. 𑀓𑀘𑁆𑀘𑁄.

𑀏𑀢𑁆𑀣 𑀓𑀘𑁆𑀘𑁄𑀢𑀺 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀓𑀘𑁆𑀘𑁂𑀢𑀺 𑀤𑀺𑀩𑁆𑀩𑀢𑀺 𑀯𑀺𑀭𑁄𑀘𑀢𑀻𑀢𑀺 𑀓𑀘𑁆𑀘𑁄, 𑀏𑀯𑀁𑀦𑀸𑀫𑀓𑁄 𑀆𑀤𑀺𑀧𑀼𑀭𑀺𑀲𑁄, 𑀢𑀩𑁆𑀩𑀁𑀲𑁂 𑀚𑀸𑀢𑀸 𑀧𑀼𑀭𑀺𑀲𑀸 ‘‘𑀓𑀘𑁆𑀘𑀸𑀦𑀸’’𑀢𑀺𑀧𑀺 ‘‘𑀓𑀘𑁆𑀘𑀸𑀬𑀦𑀸’’𑀢𑀺𑀧𑀺 ‘‘𑀓𑀸𑀢𑀺𑀬𑀸𑀦𑀸’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺, 𑀇𑀢𑁆𑀣𑀺𑀬𑁄 𑀧𑀦 ‘‘𑀓𑀘𑁆𑀘𑀸𑀦𑀻’’𑀢𑀺𑀧𑀺 ‘‘𑀓𑀘𑁆𑀘𑀸𑀬𑀦𑀻’’𑀢𑀺𑀧𑀺 ‘‘𑀓𑀸𑀢𑀺𑀬𑀸𑀦𑀻’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺.

𑀘𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀙𑀓𑀸𑀭𑀦𑁆𑀢𑀥𑀸𑀢𑀼

𑀫𑀺𑀮𑁂𑀙 ¶ 𑀅𑀩𑁆𑀬𑀢𑁆𑀢𑀸𑀬𑀁 𑀯𑀸𑀘𑀸𑀬𑀁. 𑀫𑀺𑀮𑁂𑀘𑁆𑀙𑁂𑀢𑀺, 𑀫𑀺𑀮𑁂𑀘𑁆𑀙𑀬𑀢𑀺. 𑀫𑀺𑀮𑀓𑁆𑀔𑀼.

𑀏𑀢𑁆𑀣 𑀫𑀺𑀮𑀓𑁆𑀔𑀽𑀢𑀺 𑀫𑀺𑀮𑁂𑀘𑁆𑀙𑁂𑀢𑀺 𑀅𑀩𑁆𑀬𑀢𑁆𑀢𑀯𑀸𑀘𑀁 𑀪𑀸𑀲𑀢𑀻𑀢𑀺 𑀫𑀺𑀮𑀓𑁆𑀔𑀼.

𑀓𑀼𑀘𑁆𑀙 𑀅𑀯𑀓𑁆𑀔𑁂𑀧𑁂. 𑀅𑀯𑀓𑁆𑀔𑁂𑀧𑁄 𑀅𑀥𑁄𑀔𑀺𑀧𑀦𑀁. 𑀓𑀼𑀘𑁆𑀙𑁂𑀢𑀺, 𑀓𑀼𑀘𑁆𑀙𑀬𑀢𑀺.

𑀯𑀺𑀘𑁆𑀙 𑀪𑀸𑀲𑀸𑀬𑀁. 𑀯𑀺𑀘𑁆𑀙𑁂𑀢𑀺, 𑀯𑀺𑀘𑁆𑀙𑀬𑀢𑀺.

𑀙𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀚𑀓𑀸𑀭𑀦𑁆𑀢𑀥𑀸𑀢𑀼

𑀯𑀚𑁆𑀚 𑀯𑀚𑁆𑀚𑀦𑁂. 𑀯𑀚𑁆𑀚𑁂𑀢𑀺, 𑀯𑀚𑁆𑀚𑀬𑀢𑀺. 𑀧𑀭𑀺𑀯𑀚𑁆𑀚𑀦𑀓𑁄. 𑀯𑀚𑁆𑀚𑀺𑀢𑁄 𑀲𑀻𑀮𑀯𑀦𑁆𑀢𑁂𑀳𑀺, 𑀓𑀣𑀁 𑀪𑀺𑀓𑁆𑀔𑀼 𑀓𑀭𑀺𑀲𑁆𑀲𑀲𑀻𑀢𑀺.

𑀢𑀼𑀚𑁆𑀚 𑀩𑀮𑀧𑀸𑀮𑀦𑁂𑀲𑀼. 𑀢𑀼𑀚𑁆𑀚𑁂𑀢𑀺, 𑀢𑀼𑀚𑁆𑀚𑀬𑀢𑀺.

𑀢𑀼𑀚𑀺 𑀧𑀺𑀚𑀺 𑀳𑀺𑀁𑀲𑀸𑀩𑀮𑀤𑀸𑀦𑀦𑀺𑀓𑁂𑀢𑀦𑁂𑀲𑀼. 𑀦𑀺𑀓𑁂𑀢𑀦𑀁 𑀦𑀺𑀯𑀸𑀲𑁄. 𑀢𑀼𑀜𑁆𑀚𑁂𑀢𑀺, 𑀢𑀼𑀜𑁆𑀚𑀬𑀢𑀺. 𑀧𑀺𑀜𑁆𑀚𑁂𑀢𑀺. 𑀧𑀺𑀜𑁆𑀚𑀬𑀢𑀺.

𑀔𑀚𑀺 𑀓𑀺𑀘𑁆𑀙𑀚𑀻𑀯𑀦𑁂. 𑀔𑀜𑁆𑀚𑁂𑀢𑀺, 𑀔𑀜𑁆𑀚𑀬𑀢𑀺. 𑀔𑀜𑁆𑀚𑁄.

𑀔𑀚𑀺 𑀭𑀓𑁆𑀔𑀡𑁂. 𑀢𑀸𑀤𑀺𑀲𑀸𑀦𑀺𑀬𑁂𑀯 𑀭𑀽𑀧𑀸𑀦𑀺. 𑀪𑀽𑀯𑀸𑀤𑀺𑀕𑀡𑁂 ‘‘𑀔𑀚𑀺 𑀕𑀢𑀺𑀯𑁂𑀓𑀮𑁆𑀮𑁂𑀢𑀺 𑀇𑀫𑀺𑀲𑁆𑀲𑀸 ‘‘𑀔𑀜𑁆𑀚𑀢𑀻’’𑀢𑀺 𑀭𑀽𑀧𑀁.

𑀧𑀽𑀚 𑀧𑀽𑀚𑀸𑀬𑀁. 𑀧𑀽𑀚𑁂𑀢𑀺, 𑀧𑀽𑀚𑀬𑀢𑀺. 𑀧𑀽𑀚𑀸. 𑀏𑀲𑀸𑀯 𑀧𑀽𑀚𑀦𑀸 𑀲𑁂𑀬𑁆𑀬𑁄. 𑀧𑀽𑀚𑀓𑁄, 𑀧𑀽𑀚𑀺𑀢𑁄, 𑀧𑀽𑀚𑀦𑀻𑀬𑁄, 𑀧𑀽𑀚𑀦𑁂𑀬𑁆𑀬𑁄, 𑀧𑀽𑀚𑁂𑀢𑀩𑁆𑀩𑁄, 𑀧𑀼𑀚𑁆𑀚𑁄.

𑀕𑀚 ¶ 𑀫𑀤𑁆𑀤𑀦𑀲𑀤𑁆𑀤𑁂𑀲𑀼. 𑀕𑀚𑁂𑀢𑀺, 𑀕𑀚𑀬𑀢𑀺. 𑀕𑀚𑁄.

𑀢𑀺𑀚 𑀦𑀺𑀲𑀸𑀦𑁂. 𑀢𑁂𑀚𑁂𑀢𑀺, 𑀢𑁂𑀚𑀬𑀢𑀺.

𑀯𑀚 𑀫𑀕𑁆𑀕𑀦𑀲𑀗𑁆𑀔𑀸𑀭𑁂𑀲𑀼. 𑀯𑀚𑁂𑀢𑀺, 𑀯𑀚𑀬𑀢𑀺.

𑀢𑀚𑁆𑀚 𑀲𑀦𑁆𑀢𑀚𑁆𑀚𑀦𑁂. 𑀢𑀚𑁆𑀚𑁂𑀢𑀺, 𑀢𑀚𑁆𑀚𑀬𑀢𑀺. 𑀲𑀦𑁆𑀢𑀚𑁆𑀚𑁂𑀢𑀺, 𑀲𑀦𑁆𑀢𑀚𑁆𑀚𑀬𑀢𑀺. 𑀲𑀦𑁆𑀢𑀚𑁆𑀚𑀺𑀢𑁄.

𑀅𑀚𑁆𑀚 𑀧𑀝𑀺𑀲𑀚𑁆𑀚𑀦𑁂. 𑀅𑀚𑁆𑀚𑁂𑀢𑀺, 𑀅𑀚𑁆𑀚𑀬𑀢𑀺.

𑀲𑀚𑁆𑀚 𑀲𑀚𑁆𑀚𑀦𑁂. 𑀲𑀚𑁆𑀚𑁂𑀢𑀺, 𑀲𑀚𑁆𑀚𑀬𑀢𑀺 𑀤𑀸𑀦𑀁. 𑀕𑀫𑀦𑀲𑀚𑁆𑀚𑁄 𑀳𑀼𑀢𑁆𑀯𑀸.

𑀪𑀚 𑀯𑀺𑀲𑁆𑀲𑀸𑀲𑁂. 𑀪𑀚𑁂𑀢𑀺, 𑀪𑀚𑀬𑀢𑀺. 𑀪𑀽𑀯𑀸𑀤𑀺𑀕𑀡𑁂 𑀧𑀦 ‘‘𑀪𑀚𑀢𑀻’’𑀢𑀺 𑀭𑀽𑀧𑀁, 𑀪𑀢𑁆𑀢𑀺, 𑀲𑀫𑁆𑀪𑀢𑁆𑀢𑀺.

𑀢𑀼𑀚𑀺 𑀧𑀺𑀚𑀺 𑀮𑀼𑀚𑀺 𑀪𑀚𑀺 𑀪𑀸𑀲𑀸𑀬𑀁. 𑀢𑀼𑀜𑁆𑀚𑁂𑀢𑀺, 𑀢𑀼𑀜𑁆𑀚𑀬𑀢𑀺. 𑀧𑀺𑀜𑁆𑀚𑁂𑀢𑀺, 𑀧𑀺𑀜𑁆𑀚𑀬𑀢𑀺. 𑀮𑀼𑀜𑁆𑀚𑁂𑀢𑀺, 𑀮𑀼𑀜𑁆𑀚𑀬𑀢𑀺. 𑀪𑀜𑁆𑀚𑁂𑀢𑀺, 𑀪𑀜𑁆𑀚𑀬𑀢𑀺. 𑀓𑀣𑁂𑀢𑀻𑀢𑀺 𑀅𑀢𑁆𑀣𑁄.

𑀭𑀼𑀚 𑀳𑀺𑀁𑀲𑀸𑀬𑀁. 𑀭𑁄𑀚𑁂𑀢𑀺, 𑀭𑁄𑀚𑀬𑀢𑀺. 𑀭𑁄𑀕𑁄.

𑀪𑀸𑀚 𑀧𑀼𑀣𑀓𑀫𑁆𑀫𑀦𑀺. 𑀧𑀼𑀣𑀓𑀫𑁆𑀫𑀁 𑀧𑀼𑀣𑀓𑁆𑀓𑀭𑀡𑀁, 𑀯𑀺𑀲𑀼𑀁 𑀓𑁆𑀭𑀺𑀬𑀸𑀢𑀺 𑀅𑀢𑁆𑀣𑁄. 𑀪𑀸𑀚𑁂𑀢𑀺, 𑀪𑀸𑀚𑀬𑀢𑀺. 𑀯𑀺𑀪𑀸𑀚𑁂𑀢𑀺, 𑀯𑀺𑀪𑀸𑀚𑀬𑀢𑀺. 𑀯𑀺𑀪𑀢𑁆𑀢𑀺.

𑀲𑀪𑀸𑀚 𑀲𑀻𑀢𑀺𑀲𑁂𑀯𑀦𑁂𑀲𑀼. 𑀲𑀪𑀸𑀚𑁂𑀢𑀺, 𑀲𑀪𑀸𑀚𑀬𑀢𑀺.

𑀮𑀚 𑀧𑀓𑀸𑀲𑀦𑁂. 𑀮𑀚𑁂𑀢𑀺, 𑀮𑀚𑀬𑀢𑀺. 𑀮𑀸𑀚𑀸.

𑀬𑀼𑀚 𑀲𑀁𑀬𑀫𑀦𑁂. 𑀲𑀁𑀧𑀼𑀩𑁆𑀩𑁄 𑀩𑀦𑁆𑀥𑀦𑁂. 𑀬𑁄𑀚𑁂𑀢𑀺, 𑀬𑁄𑀚𑀬𑀢𑀺. 𑀲𑀁𑀬𑁄𑀚𑁂𑀢𑀺, 𑀲𑀁𑀬𑁄𑀚𑀬𑀢𑀺. 𑀲𑀁𑀬𑁄𑀚𑀦𑀁.

𑀫𑀚𑁆𑀚 𑀲𑁄𑀘𑁂𑀬𑁆𑀬𑀸𑀮𑀗𑁆𑀓𑀸𑀭𑁂𑀲𑀼. 𑀫𑀚𑁆𑀚𑁂𑀢𑀺, 𑀫𑀚𑁆𑀚𑀬𑀢𑀺. 𑀲𑀫𑁆𑀫𑀚𑁆𑀚𑁂𑀢𑀺, 𑀲𑀫𑁆𑀫𑀚𑁆𑀚𑀬𑀢𑀺. 𑀲𑀫𑁆𑀫𑀚𑁆𑀚𑀸.

𑀪𑀸𑀚 ¶ 𑀪𑀸𑀚𑀦𑀤𑀸𑀦𑁂𑀲𑀼. 𑀪𑀸𑀚𑁂𑀢𑀺, 𑀪𑀸𑀚𑀬𑀢𑀺. 𑀓𑀣𑀁 𑀯𑁂𑀲𑁆𑀲𑀦𑁆𑀢𑀭𑁄 𑀧𑀼𑀢𑁆𑀢𑁄, 𑀕𑀚𑀁 𑀪𑀸𑀚𑁂𑀢𑀺 𑀲𑀜𑁆𑀘𑀬.

𑀚𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀛𑀜𑀦𑁆𑀢𑀸 𑀅𑀧𑁆𑀧𑀲𑀺𑀤𑁆𑀥𑀸. 𑀲𑀤𑁆𑀤𑀲𑀢𑁆𑀣𑁂 𑀧𑀦 ‘‘𑀜𑀸 𑀦𑀺𑀬𑁄𑀚𑀦𑁂’’𑀢𑀺 𑀧𑀞𑀦𑁆𑀢𑀺, 𑀭𑀽𑀧𑀁 𑀧𑀦 𑀩𑀼𑀤𑁆𑀥𑀯𑀘𑀦𑀸𑀦𑀼𑀓𑀽𑀮𑀁 𑀦 𑀪𑀯𑀢𑀺, 𑀢𑀲𑁆𑀫𑀸 𑀦 𑀤𑀲𑁆𑀲𑀺𑀢𑀁 𑀅𑀫𑁆𑀳𑁂𑀳𑀺.

𑀝𑀓𑀸𑀭𑀦𑁆𑀢𑀥𑀸𑀢𑀼

𑀖𑀝𑁆𑀝 𑀖𑀝𑁆𑀝𑀦𑁂. 𑀖𑀝𑁆𑀝𑀦𑀁 𑀯𑀸𑀬𑀸𑀫𑀓𑀭𑀡𑀁. 𑀖𑀝𑁆𑀝𑁂𑀢𑀺, 𑀖𑀝𑁆𑀝𑀬𑀢𑀺. 𑀏𑀢𑁆𑀣 𑀢𑀼 ‘‘𑀖𑀝𑁆𑀝𑁂𑀲𑀺, 𑀖𑀝𑁆𑀝𑁂𑀲𑀺, 𑀓𑀺𑀁𑀓𑀸𑀭𑀡𑀸 𑀖𑀝𑁆𑀝𑁂𑀲𑀺, 𑀅𑀳𑀁 𑀢𑀁 𑀚𑀸𑀦𑀸𑀫𑀻’’𑀢𑀺 𑀦𑀺𑀤𑀲𑁆𑀲𑀦𑀁.

𑀖𑀝 𑀲𑀗𑁆𑀖𑀸𑀢𑁂. 𑀧𑀼𑀩𑁆𑀩𑁂 𑀯𑀺𑀬 𑀓𑁆𑀭𑀺𑀬𑀸𑀧𑀤𑀸𑀦𑀺, 𑀦𑀸𑀫𑀺𑀓𑀢𑁆𑀢𑁂 ‘‘𑀖𑀝𑁄, 𑀖𑀝𑀸’’𑀢𑀺 𑀭𑀽𑀧𑀸𑀦𑀺. 𑀏𑀢𑁆𑀣 𑀕𑀝𑁄𑀢𑀺 𑀧𑀸𑀦𑀻𑀬𑀖𑀝𑁄. 𑀖𑀝𑀸𑀢𑀺 𑀲𑀫𑀽𑀳𑁄 ‘‘𑀫𑀘𑁆𑀙𑀖𑀝𑀸’’𑀢𑀺𑀆𑀤𑀻𑀲𑀼 𑀯𑀺𑀬.

𑀖𑀝𑁆𑀝 𑀘𑀮𑀦𑁂. 𑀖𑀝𑁆𑀝𑁂𑀢𑀺, 𑀖𑀝𑁆𑀝𑀬𑀢𑀺.

𑀦𑀝 𑀅𑀯𑀲𑀦𑁆𑀤𑀦𑁂. 𑀅𑀯𑀲𑀦𑁆𑀤𑀦𑀁 𑀕𑀢𑁆𑀢𑀯𑀺𑀓𑁆𑀔𑁂𑀧𑁄. 𑀦𑀝𑁂𑀢𑀺, 𑀦𑀝𑀬𑀢𑀺.

𑀘𑀼𑀝 𑀙𑀼𑀝 𑀓𑀼𑀝𑁆𑀝 𑀙𑁂𑀤𑀦𑁂. 𑀘𑀼𑀝𑁂𑀢𑀺, 𑀘𑀼𑀝𑀬𑀢𑀺. 𑀙𑀼𑀝𑁂𑀢𑀺, 𑀙𑀼𑀝𑀬𑀢𑀺. 𑀓𑀼𑀝𑁆𑀝𑁂𑀢𑀺, 𑀓𑀼𑀝𑁆𑀝𑀬𑀢𑀺.

𑀧𑀼𑀝𑁆𑀝 𑀘𑀝𑁆𑀝 𑀅𑀧𑁆𑀧𑀪𑀸𑀯𑁂. 𑀧𑀼𑀝𑁆𑀝𑁂𑀢𑀺, 𑀧𑀼𑀝𑁆𑀝𑀬𑀢𑀺. 𑀘𑀼𑀝𑁆𑀝𑁂𑀢𑀺, 𑀘𑀼𑀝𑁆𑀝𑀬𑀢𑀺, 𑀅𑀧𑁆𑀧𑀁 𑀪𑀯𑀢𑀻𑀢𑀺 𑀅𑀢𑁆𑀣𑁄.

𑀫𑀼𑀝 𑀲𑀜𑁆𑀘𑀼𑀡𑁆𑀡𑀦𑁂. 𑀫𑁄𑀝𑁂𑀢𑀺, 𑀫𑁄𑀝𑀬𑀢𑀺.

𑀅𑀝𑁆𑀝 𑀲𑀼𑀝𑁆𑀝 𑀅𑀦𑀸𑀤𑀭𑁂. 𑀅𑀝𑁆𑀝𑁂𑀢𑀺, 𑀅𑀝𑁆𑀝𑀬𑀢𑀺. 𑀲𑀼𑀝𑁆𑀝𑁂𑀢𑀺, 𑀲𑀼𑀝𑁆𑀝𑀬𑀢𑀺.

𑀔𑀝𑁆𑀝 ¶ 𑀲𑀁𑀯𑀭𑀡𑁂 𑀔𑀝𑁆𑀝𑁂𑀢𑀺, 𑀔𑀝𑁆𑀝𑀬𑀢𑀺.

𑀲𑀝𑁆𑀝 𑀳𑀺𑀁𑀲𑀸𑀩𑀮𑀤𑀸𑀦𑀦𑀺𑀓𑁂𑀢𑀦𑁂𑀲𑀼. 𑀲𑀝𑁆𑀝𑁂𑀢𑀺, 𑀲𑀝𑁆𑀝𑀬𑀢𑀺.

𑀢𑀼𑀯𑀝𑁆𑀝 𑀦𑀺𑀧𑀚𑁆𑀚𑀸𑀬𑀁. 𑀢𑀼𑀯𑀝𑁆𑀝𑁂𑀢𑀺, 𑀢𑀼𑀯𑀝𑁆𑀝𑀬𑀢𑀺. 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀏𑀓𑀫𑀜𑁆𑀘𑁂 𑀢𑀼𑀯𑀝𑁆𑀝𑁂𑀦𑁆𑀢𑀺.

𑀙𑀝𑁆𑀝 𑀙𑀝𑁆𑀝𑀦𑁂. 𑀙𑀝𑁆𑀝𑁂𑀢𑀺, 𑀙𑀝𑁆𑀝𑀬𑀢𑀺. 𑀅𑀢𑁆𑀭𑀸𑀬𑀁 𑀧𑀸𑀴𑀺 𑁋 𑀲𑀘𑁂 𑀲𑁄 𑀙𑀝𑁆𑀝𑁂𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄𑀘𑁂 𑀙𑀝𑁆𑀝𑁂𑀢𑀺, 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀭𑀽𑀧𑀺𑀬𑀙𑀝𑁆𑀝𑀓𑁄 𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑁄.

𑀧𑀼𑀝 𑀳𑀺𑀁𑀲𑀸𑀬𑀁. 𑀧𑁄𑀝𑁂𑀢𑀺, 𑀧𑁄𑀝𑀬𑀢𑀺.

𑀓𑀻𑀝 𑀩𑀦𑁆𑀥𑁂. 𑀩𑀦𑁆𑀥𑁄 𑀩𑀦𑁆𑀥𑀦𑀁. 𑀓𑀻𑀝𑁂𑀢𑀺, 𑀓𑀻𑀝𑀬𑀢𑀺. 𑀓𑀻𑀝𑁄.

𑀘𑀼𑀝𑀺 𑀙𑁂𑀤𑀦𑁂. 𑀘𑀼𑀡𑁆𑀝𑁂𑀢𑀺, 𑀘𑀼𑀡𑁆𑀝𑀬𑀢𑀺.

𑀮𑀼𑀝𑀺 𑀣𑁂𑀬𑁆𑀬𑁂. 𑀮𑀼𑀡𑁆𑀝𑁂𑀢𑀺, 𑀮𑀼𑀡𑁆𑀝𑀬𑀢𑀺.

𑀓𑀽𑀝 𑀅𑀧𑁆𑀧𑀲𑀸𑀤𑁂. 𑀓𑀽𑀝𑁂𑀢𑀺, 𑀓𑀽𑀝𑀬𑀢𑀺. 𑀓𑀽𑀝𑀁 𑀭𑀚𑀢𑀁. 𑀓𑀽𑀝𑀸 𑀕𑀸𑀯𑀻. 𑀓𑀼𑀝𑀢𑀸𑀧𑀲𑁄.

𑀘𑀼𑀝 𑀧𑀼𑀝 𑀨𑀼𑀝 𑀯𑀺𑀪𑁂𑀤𑁂. 𑀘𑀼𑀝𑁂𑀢𑀺, 𑀘𑀼𑀝𑀬𑀢𑀺. 𑀧𑁄𑀝𑁂𑀢𑀺, 𑀧𑁄𑀝𑀬𑀢𑀺. 𑀨𑁄𑀝𑁂𑀢𑀺, 𑀨𑁄𑀝𑀬𑀢𑀺. 𑀅𑀗𑁆𑀕𑀼𑀮𑀺𑀬𑁄 𑀨𑁄𑀝𑁂𑀲𑀼𑀁.

𑀖𑀝 𑀲𑀗𑁆𑀖𑀸𑀝𑁂 𑀳𑀦𑁆𑀢𑁆𑀬𑀢𑁆𑀣𑁂 𑀘. 𑀖𑀝𑁂𑀢𑀺, 𑀖𑀝𑀬𑀢𑀺.

𑀧𑀝 𑀧𑀼𑀝 𑀮𑀼𑀝 𑀖𑀝 𑀖𑀝𑀺 𑀪𑀸𑀲𑀸𑀬𑀁. 𑀧𑀸𑀝𑁂𑀢𑀺, 𑀧𑀸𑀝𑀬𑀢𑀺. 𑀧𑁄𑀝𑁂𑀢𑀺, 𑀧𑁄𑀝𑀬𑀢𑀺. 𑀮𑁄𑀝𑁂𑀢𑀺, 𑀮𑁄𑀝𑀬𑀢𑀺. 𑀖𑀸𑀝𑁂𑀢𑀺, 𑀖𑀸𑀝𑀬𑀢𑀺. 𑀖𑀡𑁆𑀝𑁂𑀢𑀺, 𑀖𑀡𑁆𑀝𑀬𑀢𑀺.

𑀧𑀝 𑀯𑀝 𑀕𑀦𑁆𑀣𑁂. 𑀧𑀝𑁂𑀢𑀺, 𑀧𑀝𑀬𑀢𑀺. 𑀯𑀝𑁂𑀢𑀺, 𑀯𑀝𑀬𑀢𑀺.

𑀔𑁂𑀝 𑀪𑀓𑁆𑀔𑀡𑁂. 𑀔𑁂𑀝𑁂𑀢𑀺, 𑀔𑁂𑀝𑀬𑀢𑀺.

𑀔𑁄𑀝 𑀔𑁂𑀧𑁂. 𑀔𑁄𑀝𑁂𑀢𑀺, 𑀔𑁄𑀝𑀬𑀢𑀺.

𑀓𑀼𑀝𑀺 𑀤𑀸𑀳𑁂. 𑀓𑀼𑀝𑁂𑀢𑀺, 𑀓𑀼𑀝𑀬𑀢𑀺.

𑀬𑀼𑀝 𑀲𑀁𑀲𑀕𑁆𑀕𑁂. 𑀬𑁄𑀝𑁂𑀢𑀺, 𑀬𑁄𑀝𑀬𑀢𑀺.

𑀯𑀝 𑀯𑀺𑀪𑀚𑀦𑁂. 𑀯𑀝𑁂𑀢𑀺, 𑀯𑀝𑀬𑀢𑀺.

𑀝𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀞𑀓𑀸𑀭𑀦𑁆𑀢𑀥𑀸𑀢𑀼

𑀲𑀞 ¶ 𑀲𑀗𑁆𑀔𑀸𑀭𑀕𑀢𑀻𑀲𑀼. 𑀲𑀞𑁂𑀢𑀺, 𑀲𑀞𑀬𑀢𑀺.

𑀲𑀼𑀞 𑀆𑀮𑀲𑀺𑀬𑁂. 𑀲𑁄𑀞𑁂𑀢𑀺, 𑀲𑁄𑀞𑀬𑀢𑀺.

𑀲𑀼𑀞𑀺 𑀲𑁄𑀲𑀦𑁂. 𑀲𑀼𑀡𑁆𑀞𑁂𑀢𑀺, 𑀲𑀼𑀡𑁆𑀞𑀬𑀢𑀺.

𑀲𑀞 𑀲𑀺𑀮𑀸𑀖𑀸𑀬𑀁. 𑀲𑀞𑁂𑀢𑀺, 𑀲𑀞𑀬𑀢𑀺.

𑀲𑀞 𑀅𑀲𑀫𑁆𑀫𑀸𑀪𑀸𑀲𑀦𑁂. 𑀲𑀞𑁂𑀢𑀺. 𑀲𑀞𑀬𑀢𑀺, 𑀲𑀞𑁄.

𑀏𑀢𑁆𑀣 𑀲𑀞𑁄𑀢𑀺 𑀓𑁂𑀭𑀸𑀝𑀺𑀓𑁄. 𑀲𑀞𑀬𑀢𑀻𑀢𑀺 𑀲𑀞𑁄, 𑀦 𑀲𑀫𑁆𑀫𑀸 𑀪𑀸𑀲𑀢𑀻𑀢𑀺 𑀅𑀢𑁆𑀣𑁄.

𑀲𑀞 𑀓𑁂𑀢𑀯𑁂. 𑀭𑀽𑀧𑀁 𑀢𑀸𑀤𑀺𑀲𑀫𑁂𑀯.

‘‘𑀲𑀼𑀤𑀲𑁆𑀲𑀁 𑀯𑀚𑁆𑀚𑀫𑀜𑁆𑀜𑁂𑀲𑀁, 𑀅𑀢𑁆𑀢𑀦𑁄 𑀧𑀦 𑀤𑀼𑀤𑁆𑀤𑀲𑀁…𑀧𑁂…

𑀅𑀢𑁆𑀢𑀦𑁄 𑀧𑀦 𑀙𑀸𑀤𑁂𑀢𑀺, 𑀓𑀮𑀺𑀁𑀯 𑀓𑀺𑀢𑀯𑀸𑀲𑀞𑁄’’𑀢𑀺.

𑀏𑀢𑁆𑀣 𑀲𑀸𑀓𑀼𑀡𑀺𑀓𑁄 ‘‘𑀓𑀺𑀢𑀯𑀸’’𑀢𑀺 𑀯𑀼𑀢𑁆𑀢𑁄. 𑀢𑀲𑁆𑀲 𑀇𑀤𑀁 𑀓𑁂𑀢𑀯𑀁, 𑀢𑀲𑁆𑀫𑀺𑀁 𑀓𑁂𑀢𑀯𑁂 𑀅𑀬𑀁 𑀥𑀸𑀢𑀼 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.

𑀓𑀞𑀺 𑀲𑁄𑀓𑁂. 𑀓𑀡𑁆𑀞𑁂𑀢𑀺, 𑀓𑀡𑁆𑀞𑀬𑀢𑀺.

𑀞𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀟𑀓𑀸𑀭𑀦𑁆𑀢𑀥𑀸𑀢𑀼

𑀧𑀝𑀺 𑀧𑀭𑀺𑀳𑀸𑀲𑁂. 𑀧𑀡𑁆𑀟𑁂𑀢𑀺, 𑀧𑀡𑁆𑀟𑀬𑀢𑀺. 𑀉𑀧𑁆𑀧𑀡𑁆𑀟𑁂𑀢𑀺, 𑀉𑀧𑁆𑀧𑀡𑁆𑀟𑀬𑀢𑀺. 𑀫𑀦𑀼𑀲𑁆𑀲𑀸𑀦𑀁 𑀦𑀁 𑀪𑀺𑀓𑁆𑀔𑀼𑀦𑀺𑀁 𑀉𑀧𑁆𑀧𑀡𑁆𑀟𑀺𑀁𑀲𑀼.

𑀮𑀟𑀺 𑀉𑀓𑁆𑀔𑁂𑀧𑁂. 𑀮𑀡𑁆𑀟𑁂𑀢𑀺, 𑀮𑀡𑁆𑀟𑀬𑀢𑀺.

𑀔𑀟𑀺 𑀓𑀟𑀺 𑀙𑁂𑀤𑁂. 𑀔𑀡𑁆𑀟𑁂𑀢𑀺, 𑀔𑀡𑁆𑀟𑀬𑀢𑀺. 𑀓𑀡𑁆𑀟𑁂𑀢𑀺, 𑀓𑀡𑁆𑀟𑀬𑀢𑀺. 𑀔𑀡𑁆𑀟𑁄, 𑀓𑀡𑁆𑀟𑁄.

𑀧𑀺𑀟𑀺 ¶ 𑀲𑀗𑁆𑀖𑀸𑀢𑁂. 𑀧𑀺𑀡𑁆𑀟𑁂𑀢𑀺, 𑀧𑀺𑀡𑁆𑀟𑀬𑀢𑀺. 𑀧𑀺𑀡𑁆𑀟𑁄.

𑀏𑀢𑁆𑀣 𑀘 𑀧𑀺𑀡𑁆𑀟𑁄𑀢𑀺 𑀲𑀫𑀽𑀳𑀲𑀗𑁆𑀔𑀸𑀢𑁄 𑀓𑀮𑀸𑀧𑁄𑀧𑀺 ‘‘𑀘𑁄𑀴𑀁 𑀧𑀺𑀡𑁆𑀟𑁄 𑀭𑀢𑀺 𑀔𑀺𑀟𑁆𑀟𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑁄 𑀆𑀳𑀸𑀭𑀲𑀗𑁆𑀔𑀸𑀢𑁄 𑀧𑀺𑀡𑁆𑀟𑁄𑀧𑀺 𑀧𑀺𑀡𑁆𑀟𑁄𑀬𑁂𑀯.

𑀓𑀼𑀟𑀺 𑀯𑁂𑀥𑀦𑁂. 𑀓𑀼𑀡𑁆𑀟𑁂𑀢𑀺, 𑀓𑀼𑀡𑁆𑀟𑀬𑀢𑀺. 𑀓𑀼𑀡𑁆𑀟𑀮𑀁.

𑀫𑀟𑀺 𑀪𑀽𑀲𑀸𑀬𑀁 𑀳𑀲𑀦𑁂 𑀘. 𑀫𑀡𑁆𑀟𑁂𑀢𑀺, 𑀫𑀡𑁆𑀟𑀬𑀢𑀺. 𑀫𑀡𑁆𑀟𑁄, 𑀫𑀡𑁆𑀟𑀦𑀁, 𑀫𑀡𑁆𑀟𑀺𑀢𑁄.

𑀪𑀟𑀺 𑀓𑀮𑁆𑀬𑀸𑀡𑁂. 𑀓𑀮𑁆𑀬𑀸𑀡𑀁 𑀓𑀮𑁆𑀬𑀸𑀡𑀢𑀸. 𑀪𑀡𑁆𑀟𑁂𑀢𑀺, 𑀪𑀡𑁆𑀟𑀬𑀢𑀺. 𑀪𑀡𑁆𑀟𑁄.

𑀏𑀢𑁆𑀣 𑀘 𑀪𑀡𑁆𑀟𑁄𑀢𑀺 𑀥𑀦𑀁, 𑀅𑀮𑀗𑁆𑀓𑀸𑀭𑁄 𑀯𑀸. ‘‘𑀪𑀡𑁆𑀟𑀁 𑀕𑀡𑁆𑀳𑀸𑀢𑀺. 𑀲𑀫𑀮𑀗𑁆𑀓𑀭𑀺𑀢𑁆𑀯𑀸 𑀪𑀡𑁆𑀟𑁂𑀦𑀸’’𑀢𑀺 𑀘 𑀆𑀤𑀻𑀲𑀼 𑀯𑀺𑀬.

𑀤𑀡𑁆𑀟 𑀤𑀡𑁆𑀟𑀯𑀺𑀦𑀺𑀧𑀸𑀢𑁂. 𑀤𑀡𑁆𑀟𑁂𑀢𑀺, 𑀤𑀡𑁆𑀟𑀬𑀢𑀺. 𑀤𑀡𑁆𑀟𑁄.

𑀙𑀟𑁆𑀟 𑀙𑀟𑁆𑀟𑀦𑁂. 𑀙𑀟𑁆𑀟𑁂𑀢𑀺, 𑀙𑀟𑁆𑀟𑀬𑀢𑀺. 𑀙𑀟𑁆𑀟𑀦𑀓𑁄. 𑀙𑀟𑁆𑀟𑀺𑀬𑀢𑀺, 𑀙𑀟𑁆𑀟𑀺𑀢𑁄. 𑀙𑀟𑁆𑀟𑀺𑀢𑀼𑀁, 𑀙𑀟𑁆𑀟𑀬𑀺𑀢𑀼𑀁, 𑀙𑀟𑁆𑀟𑁂𑀢𑁆𑀯𑀸, 𑀙𑀟𑁆𑀟𑀬𑀺𑀢𑁆𑀯𑀸.

𑀟𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀠𑀓𑀸𑀭𑀦𑁆𑀢𑀥𑀸𑀢𑀼

𑀯𑀟𑁆𑀠 𑀆𑀓𑀺𑀭𑀡𑁂. 𑀓𑀁𑀲𑀧𑀸𑀢𑀺𑀬𑀸 𑀧𑀸𑀬𑀸𑀲𑀁 𑀯𑀟𑁆𑀠𑁂𑀢𑀺, 𑀯𑀟𑁆𑀠𑀬𑀢𑀺. 𑀪𑀢𑁆𑀢𑀁 𑀯𑀟𑁆𑀠𑁂𑀢𑁆𑀯𑀸 𑀅𑀤𑀸𑀲𑀺.

𑀇𑀫𑀸𑀦𑀺 𑀠𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀡𑀓𑀸𑀭𑀦𑁆𑀢𑀥𑀸𑀢𑀼

𑀯𑀡𑁆𑀡 𑀯𑀡𑁆𑀡𑀓𑁆𑀭𑀺𑀬𑀸𑀯𑀺𑀢𑁆𑀣𑀸𑀭𑀕𑀼𑀡𑀯𑀘𑀦𑁂𑀲𑀼. 𑀯𑀡𑁆𑀡𑁄 𑀧𑀲𑀁𑀲𑀸. 𑀓𑁆𑀭𑀺𑀬𑀸 𑀓𑀭𑀡𑀁. 𑀯𑀺𑀢𑁆𑀣𑀸𑀭𑁄 𑀯𑀺𑀢𑁆𑀣𑀺𑀦𑁆𑀦𑀢𑀸. 𑀕𑀼𑀡𑁄 𑀲𑀻𑀮𑀸𑀤𑀺𑀥𑀫𑁆𑀫𑁄. 𑀯𑀘𑀦𑀁 ¶ 𑀯𑀸𑀘𑀸. 𑀯𑀡𑁆𑀡𑁂𑀢𑀺, 𑀯𑀡𑁆𑀡𑀬𑀢𑀺. 𑀯𑀡𑁆𑀡𑁄, 𑀯𑀡𑁆𑀡𑀁, 𑀲𑀼𑀯𑀡𑁆𑀡𑀁, 𑀲𑀁𑀯𑀡𑁆𑀡𑀦𑀸.

𑀯𑀡𑁆𑀡𑀲𑀤𑁆𑀤𑁄 𑀙𑀯𑀺𑀣𑀼𑀢𑀺𑀓𑀼𑀮𑀯𑀕𑁆𑀕𑀓𑀸𑀭𑀡𑀲𑀡𑁆𑀞𑀸𑀦𑀧𑀫𑀸𑀡𑀭𑀽𑀧𑀸𑀬𑀢𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀢𑁆𑀣 ‘‘𑀲𑀼𑀯𑀡𑁆𑀡𑀯𑀡𑁆𑀡𑁄𑀲𑀺 𑀪𑀕𑀯𑀸’’𑀢𑀺 𑀏𑀯𑀫𑀸𑀤𑀻𑀲𑀼 𑀙𑀯𑀺𑀬𑀁. ‘‘𑀓𑀤𑀸 𑀲𑀜𑁆𑀜𑀽𑀴𑁆𑀳𑀸 𑀧𑀦 𑀢𑁂 𑀕𑀳𑀧𑀢𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀡𑁆𑀡𑀸’’𑀢𑀺 𑀏𑀯𑀫𑀸𑀤𑀻𑀲𑀼 𑀣𑀼𑀢𑀺𑀬𑀁. ‘‘𑀘𑀢𑁆𑀢𑀸𑀭𑁄𑀫𑁂 𑀪𑁄 𑀕𑁄𑀢𑀫 𑀯𑀡𑁆𑀡𑀸’’𑀢𑀺𑀏𑀯𑀫𑀸𑀤𑀻𑀲𑀼 𑀓𑀼𑀮𑀯𑀕𑁆𑀕𑁂. ‘‘𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀕𑀦𑁆𑀥𑀣𑁂𑀦𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 𑀓𑀸𑀭𑀡𑁂. ‘‘𑀫𑀳𑀦𑁆𑀢𑀁 𑀳𑀢𑁆𑀣𑀺𑀭𑀸𑀚𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸’’𑀢𑀺𑀏𑀯𑀫𑀸𑀤𑀻𑀲𑀼 𑀲𑀡𑁆𑀞𑀸𑀦𑁂. ‘‘𑀢𑀬𑁄 𑀧𑀢𑁆𑀢𑀲𑁆𑀲 𑀯𑀡𑁆𑀡𑀸’’𑀢𑀺 𑀏𑀯𑀫𑀸𑀤𑀻𑀲𑀼 𑀧𑀫𑀸𑀡𑁂. ‘‘𑀯𑀡𑁆𑀡𑁄 𑀕𑀦𑁆𑀥𑁄 𑀭𑀲𑁄 𑀑𑀚𑀸’’𑀢𑀺 𑀏𑀯𑀫𑀸𑀤𑀻𑀲𑀼 𑀭𑀽𑀧𑀸𑀬𑀢𑀦𑁂𑀢𑀺.

𑀢𑀢𑁆𑀣 𑀙𑀯𑀺𑀬𑀦𑁆𑀢𑀺 𑀙𑀯𑀺𑀕𑀢𑀸 𑀯𑀡𑁆𑀡𑀥𑀸𑀢𑀼 𑀏𑀯 ‘‘𑀲𑀼𑀯𑀡𑁆𑀡𑀯𑀡𑁆𑀡𑁄’’𑀢𑀺 𑀏𑀢𑁆𑀣 𑀯𑀡𑁆𑀡𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀢𑀺 𑀅𑀧𑀭𑁂. 𑀯𑀡𑁆𑀡𑀦𑀁 𑀓𑀺𑀢𑁆𑀢𑀺𑀬𑀸 𑀉𑀕𑁆𑀖𑁄𑀲𑀦𑀦𑁆𑀢𑀺 𑀯𑀡𑁆𑀡𑁄, 𑀣𑀼𑀢𑀺. 𑀯𑀡𑁆𑀡𑀺𑀬𑀢𑀺 𑀅𑀲𑀗𑁆𑀓𑀭𑀢𑁄 𑀯𑀯𑀢𑁆𑀣𑀧𑀺𑀬𑀢𑀻𑀢𑀺 𑀯𑀡𑁆𑀡𑁄, 𑀓𑀼𑀮𑀯𑀕𑁆𑀕𑁄. 𑀯𑀡𑁆𑀡𑀺𑀬𑀢𑀺 𑀨𑀮𑀁 𑀏𑀢𑁂𑀦 𑀬𑀣𑀸𑀲𑀪𑀸𑀯𑀢𑁄 𑀯𑀺𑀪𑀸𑀯𑀺𑀬𑀢𑀻𑀢𑀺 𑀯𑀡𑁆𑀡𑁄, 𑀓𑀸𑀭𑀡𑀁, 𑀯𑀡𑁆𑀡𑀁 𑀤𑀻𑀖𑀭𑀲𑁆𑀲𑀸𑀤𑀺𑀯𑀲𑁂𑀦 𑀲𑀡𑁆𑀞𑀳𑀦𑀦𑁆𑀢𑀺 𑀯𑀡𑁆𑀡𑁄, 𑀲𑀡𑁆𑀞𑀸𑀦𑀁. 𑀯𑀡𑁆𑀡𑀺𑀬𑀢𑀺 𑀅𑀟𑁆𑀠𑀫𑀳𑀦𑁆𑀢𑀸𑀤𑀺𑀯𑀲𑁂𑀦 𑀧𑀫𑀺𑀬𑀢𑀻𑀢𑀺 𑀯𑀡𑁆𑀡𑁄, 𑀧𑀫𑀸𑀡𑀁. 𑀯𑀡𑁆𑀡𑁂𑀢𑀺 𑀯𑀺𑀓𑀸𑀭𑀫𑀸𑀧𑀚𑁆𑀚𑀫𑀸𑀦𑀁 𑀳𑀤𑀬𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀢𑀻𑀢𑀺 𑀯𑀡𑁆𑀡𑁄, 𑀭𑀽𑀧𑀸𑀬𑀢𑀦𑀁. 𑀏𑀯𑀁 𑀢𑁂𑀦 𑀢𑁂𑀦 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑁂𑀦 𑀯𑀡𑁆𑀡𑀲𑀤𑁆𑀤𑀲𑁆𑀲 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀧𑀭𑀫𑁆𑀧𑀺 ¶ 𑀯𑀡𑁆𑀡𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑀁 𑀯𑀤𑀸𑀫. 𑀯𑀡𑁆𑀡𑀲𑀤𑁆𑀤𑁄 𑀲𑀡𑁆𑀞𑀸𑀦𑀚𑀸𑀢𑀺 𑀭𑀽𑀧𑀸𑀬𑀢𑀦𑀓𑀸𑀭𑀡𑀧𑀫𑀸𑀡𑀕𑀼𑀡𑀧𑀲𑀁𑀲𑀸𑀚𑀸𑀢𑀭𑀽𑀧𑀧𑀼𑀴𑀺𑀦𑀓𑁆𑀔𑀭𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀅𑀬𑀜𑁆𑀳𑀺 ‘‘𑀫𑀳𑀦𑁆𑀢𑀁 𑀲𑀧𑁆𑀧𑀭𑀸𑀚𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀲𑀡𑁆𑀞𑀸𑀦𑁂 𑀤𑀺𑀲𑁆𑀲𑀢𑀺, ‘‘𑀩𑁆𑀭𑀸𑀳𑁆𑀫𑀡𑁄𑀯 𑀲𑁂𑀝𑁆𑀞𑁄 𑀯𑀡𑁆𑀡𑁄, 𑀳𑀻𑀦𑁄 𑀅𑀜𑁆𑀜𑁄 𑀯𑀡𑁆𑀡𑁄’’𑀢𑀺𑀆𑀤𑀻𑀲𑀼 𑀚𑀸𑀢𑀺𑀬𑀁. ‘‘𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄’’𑀢𑀺𑀆𑀤𑀻𑀲𑀼 𑀭𑀽𑀧𑀸𑀬𑀢𑀦𑁂.

‘‘𑀦 𑀳𑀭𑀸𑀫𑀺 𑀦 𑀪𑀜𑁆𑀚𑀸𑀫𑀺, 𑀆𑀭𑀸 𑀲𑀺𑀗𑁆𑀖𑀸𑀫𑀺 𑀯𑀸𑀭𑀺𑀚𑀁;

𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀕𑀦𑁆𑀥𑀣𑁂𑀦𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺

𑀆𑀤𑀻𑀲𑀼 𑀓𑀸𑀭𑀡𑁂. ‘‘𑀢𑀬𑁄 𑀧𑀢𑁆𑀢𑀲𑁆𑀲 𑀯𑀡𑁆𑀡𑀸’’𑀢𑀺𑀆𑀤𑀻𑀲𑀼 𑀧𑀫𑀸𑀡𑁂. ‘‘𑀓𑀤𑀸 𑀲𑀜𑁆𑀜𑀽𑀴𑁆𑀳𑀸 𑀧𑀦 𑀢𑁂 𑀕𑀳𑀧𑀢𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀡𑁆𑀡𑀸’’𑀢𑀺𑀆𑀤𑀻𑀲𑀼 𑀕𑀼𑀡𑁂. ‘‘𑀯𑀡𑁆𑀡𑀸𑀭𑀳𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀻’’𑀢𑀺𑀆𑀤𑀻𑀲𑀼 𑀧𑀲𑀁𑀲𑀸𑀬𑀁. ‘‘𑀯𑀡𑁆𑀡𑀁 𑀅𑀜𑁆𑀚𑀦𑀯𑀡𑁆𑀡𑁂𑀦, 𑀓𑀸𑀮𑀺𑀗𑁆𑀕𑀫𑁆𑀳𑀺 𑀯𑀦𑀺𑀫𑁆𑀳𑀲𑁂’’𑀢𑀺 𑀏𑀢𑁆𑀣 𑀚𑀸𑀢𑀭𑀽𑀧𑁂. ‘‘𑀅𑀓𑀺𑀮𑀸𑀲𑀼𑀦𑁄 𑀯𑀡𑁆𑀡𑀧𑀣𑁂 𑀔𑀡𑀦𑁆𑀢𑀸’’𑀢𑀺 𑀏𑀢𑁆𑀣 𑀧𑀼𑀴𑀺𑀦𑁂. ‘‘𑀯𑀡𑁆𑀡𑀸𑀕𑀫𑁄 𑀯𑀡𑁆𑀡𑀯𑀺𑀧𑀭𑀺𑀬𑀸𑀬𑁄’’𑀢𑀺𑀆𑀤𑀻𑀲𑀼 𑀅𑀓𑁆𑀔𑀭𑁂 𑀤𑀺𑀲𑁆𑀲𑀢𑀺. 𑀇𑀘𑁆𑀘𑁂𑀯𑀁 𑀲𑀩𑁆𑀩𑀣𑀸𑀧𑀺 𑁋

𑀙𑀯𑀺𑀬𑀁 𑀣𑀼𑀢𑀺𑀬𑀁 𑀳𑁂𑀫𑁂, 𑀓𑀼𑀮𑀯𑀕𑁆𑀕𑁂 𑀘 𑀓𑀸𑀭𑀡𑁂;

𑀲𑀡𑁆𑀞𑀸𑀦𑁂 𑀘 𑀧𑀫𑀸𑀡𑁂 𑀘, 𑀭𑀽𑀧𑀸𑀬𑀢𑀦𑀚𑀸𑀢𑀺𑀲𑀼;

𑀕𑀼𑀡𑀓𑁆𑀔𑀭𑁂𑀲𑀼 𑀧𑀼𑀴𑀺𑀦𑁂, 𑀯𑀡𑁆𑀡𑀲𑀤𑁆𑀤𑁄 𑀧𑀯𑀢𑁆𑀢𑀢𑀺;

𑀲𑀼𑀯𑀡𑁆𑀡𑀲𑀤𑁆𑀤𑁄 𑀙𑀯𑀺𑀲𑀫𑁆𑀧𑀢𑁆𑀢𑀺𑀕𑀭𑀼𑀴𑀚𑀸𑀢𑀭𑀽𑀧𑁂𑀲𑀼 𑀆𑀕𑀢𑁄. 𑀅𑀬𑀜𑁆𑀳𑀺 ‘‘𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂, 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂’’𑀢𑀺, ‘‘𑀲𑀼𑀯𑀡𑁆𑀡𑀢𑀸 𑀲𑀼𑀲𑁆𑀲𑀭𑀢𑀸’’𑀢𑀺 ¶ 𑀘 𑀏𑀯𑀫𑀸𑀤𑀻𑀲𑀼 𑀙𑀯𑀺𑀲𑀫𑁆𑀧𑀢𑁆𑀢𑀺𑀬𑀁 𑀆𑀕𑀢𑁄. ‘‘𑀓𑀸𑀓𑀁 𑀲𑀼𑀯𑀡𑁆𑀡𑀸 𑀧𑀭𑀺𑀯𑀸𑀭𑀬𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀕𑀭𑀼𑀴𑁂. ‘‘𑀲𑀼𑀯𑀡𑁆𑀡𑀯𑀡𑁆𑀡𑁄 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄’’𑀢𑀺𑀆𑀤𑀻𑀲𑀼 𑀚𑀸𑀢𑀭𑀽𑀧𑁂𑀢𑀺.

𑀧𑀼𑀡 𑀲𑀗𑁆𑀖𑀸𑀢𑁂. 𑀧𑀼𑀡𑁂𑀢𑀺, 𑀧𑀼𑀡𑀬𑀢𑀺.

𑀘𑀼𑀡 𑀲𑀗𑁆𑀓𑁄𑀘𑀦𑁂. 𑀘𑀼𑀡𑁂𑀢𑀺, 𑀘𑀼𑀡𑀬𑀢𑀺.

𑀘𑀼𑀡𑁆𑀡 𑀧𑁂𑀭𑀡𑁂. 𑀘𑀼𑀡𑁆𑀡𑁂𑀢𑀺, 𑀘𑀼𑀡𑁆𑀡𑀬𑀢𑀺. 𑀘𑀼𑀡𑁆𑀡𑀁. 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀭𑁄𑀢𑀺.

𑀲𑀡 𑀤𑀸𑀦𑁂. 𑀲𑀡𑁂𑀢𑀺, 𑀲𑀡𑀬𑀢𑀺.

𑀓𑀼𑀡 𑀲𑀗𑁆𑀓𑁄𑀘𑀦𑁂. 𑀓𑀼𑀡𑁂𑀢𑀺, 𑀓𑀼𑀡𑀬𑀢𑀺. 𑀓𑀼𑀡𑁄. 𑀓𑀼𑀡𑀳𑀢𑁆𑀣𑁄. 𑀳𑀢𑁆𑀣𑁂𑀦 𑀓𑀼𑀡𑀻.

𑀢𑀽𑀡 𑀧𑀽𑀭𑀡𑁂. 𑀢𑀽𑀡𑁂𑀢𑀺, 𑀢𑀽𑀡𑀬𑀢𑀺. 𑀢𑀽𑀡𑀻.

𑀏𑀢𑁆𑀣 𑀢𑀽𑀡𑀻𑀢𑀺 𑀲𑀭𑀓𑀮𑀸𑀧𑁄. 𑀲𑀸 𑀳𑀺 𑀢𑀽𑀡𑁂𑀦𑁆𑀢𑀺 𑀧𑀽𑀭𑁂𑀦𑁆𑀢𑀺 𑀲𑀭𑁂 𑀏𑀢𑁆𑀣𑀸𑀢𑀺 𑀢𑀽𑀡𑀻.

𑀪𑀽𑀡 𑀪𑀸𑀲𑀸𑀬𑀁. 𑀪𑀽𑀡𑁂𑀢𑀺, 𑀪𑀽𑀡𑀬𑀢𑀺.

𑀓𑀡 𑀦𑀺𑀫𑀻𑀮𑀦𑁂. 𑀓𑀸𑀡𑁂𑀢𑀺, 𑀓𑀸𑀡𑀬𑀢𑀺. 𑀓𑀸𑀡𑁄.

𑀏𑀢𑁆𑀣 𑀓𑀸𑀡𑁄𑀢𑀺 𑀏𑀓𑁂𑀦 𑀯𑀸 𑀤𑁆𑀯𑀻𑀳𑀺 𑀯𑀸 𑀅𑀓𑁆𑀔𑀻𑀳𑀺 𑀧𑀭𑀺𑀳𑀻𑀦𑀓𑁆𑀔𑀺. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀧𑀦 ‘‘𑀓𑀸𑀡𑁄 𑀦𑀸𑀫 𑀏𑀓𑀓𑁆𑀔𑀺𑀦𑀸 𑀓𑀸𑀡𑁄, 𑀅𑀦𑁆𑀥𑁄 𑀦𑀸𑀫 𑀉𑀪𑀬𑀓𑁆𑀔𑀺𑀓𑀸𑀡𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀓𑀸𑀡𑀦𑁆𑀥𑀲𑀤𑁆𑀤𑀸𑀦𑀁 𑀏𑀓𑀢𑁆𑀣𑀲𑀦𑁆𑀦𑀺𑀧𑀸𑀢𑁂 𑀬𑀼𑀚𑁆𑀚𑀢𑀺. 𑀇𑀢𑀭𑀣𑀸 𑀓𑀸𑀡𑀓𑀘𑁆𑀙𑀧𑁄𑀧𑀫𑀲𑀼𑀢𑁆𑀢𑁂 𑀯𑀼𑀢𑁆𑀢𑁄 𑀓𑀘𑁆𑀙𑀧𑁄 𑀏𑀓𑀲𑁆𑀫𑀺𑀁 𑀓𑀸𑀡𑁄 𑀲𑀺𑀬𑀸, 𑀏𑀓𑀓𑁆𑀔𑀺𑀓𑀸𑀡𑁄 𑀘 𑀧𑀦 𑀧𑀼𑀭𑀺𑀲𑁄 ‘‘𑀅𑀦𑁆𑀥𑁄’’𑀢𑀺 𑀦 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸, 𑀢𑀲𑁆𑀫𑀸 𑀢𑁂𑀲𑀫𑀬𑀼𑀕𑀴𑀢𑁆𑀢𑁂 𑀏𑀓𑁂𑀓𑀲𑁆𑀲 𑀬𑀣𑀸𑀲𑀫𑁆𑀪𑀯𑀁 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀫𑀸𑀓𑀸𑀭𑀸𑀦𑀁 𑀯𑀸𑀘𑀓𑀢𑀸 𑀤𑀝𑁆𑀞𑀩𑁆𑀩𑀸. 𑀢𑀣𑀸 𑀳𑀺 𑀓𑁄𑀲𑀮𑀲𑀁𑀬𑀼𑀢𑁆𑀢𑀝𑁆𑀞𑀓𑀣𑀸𑀬𑀁 ‘‘𑀓𑀸𑀡𑁄𑀢𑀺 𑀏𑀓𑀘𑁆𑀙𑀺𑀓𑀸𑀡𑁄 𑀯𑀸 ¶ 𑀉𑀪𑀬𑀘𑁆𑀙𑀺𑀓𑀸𑀡𑁄 𑀯𑀸’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 ‘‘𑀑𑀯𑀤𑁂𑀬𑁆𑀬𑀸𑀦𑀼𑀲𑀸𑀲𑁂𑀬𑁆𑀬𑀸’’𑀢𑀺 𑀏𑀢𑁆𑀣 𑀑𑀯𑀸𑀤𑀸𑀦𑀼𑀲𑀸𑀲𑀦𑀸𑀦𑀁 𑀯𑀺𑀬 𑀲𑀯𑀺𑀲𑁂𑀲𑀢𑀸 𑀅𑀯𑀺𑀲𑁂𑀲𑀢𑀸 𑀘 𑀤𑀝𑁆𑀞𑀩𑁆𑀩𑀸.

𑀕𑀡 𑀲𑀗𑁆𑀔𑁆𑀬𑀸𑀦𑁂. 𑀕𑀡𑁂𑀢𑀺, 𑀕𑀡𑀬𑀢𑀺. 𑀕𑀡𑀦𑀸, 𑀕𑀡𑁄.

𑀏𑀢𑁆𑀣 𑀕𑀡𑀦𑀸𑀢𑀺 𑀲𑀗𑁆𑀔𑁆𑀬𑀸. 𑀕𑀡𑁄𑀢𑀺 𑀪𑀺𑀓𑁆𑀔𑀼𑀲𑀫𑀽𑀳𑁄. 𑀬𑁂𑀲𑀁 𑀯𑀸 𑀓𑁂𑀲𑀜𑁆𑀘𑀺 𑀲𑀫𑀽𑀳𑁄. 𑀲𑀫𑀽𑀳𑀲𑁆𑀲 𑀘 𑀅𑀦𑁂𑀓𑀸𑀦𑀺 𑀦𑀸𑀫𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁 𑁋

𑀲𑀗𑁆𑀖𑁄 𑀕𑀡𑁄 𑀲𑀫𑀽𑀳𑁄 𑀘,

𑀔𑀦𑁆𑀥𑁄 𑀲𑀦𑁆𑀦𑀺𑀘𑀬𑁄 𑀘𑀬𑁄;

𑀲𑀫𑀼𑀘𑁆𑀘𑀬𑁄 𑀘 𑀦𑀺𑀘𑀬𑁄,

𑀯𑀕𑁆𑀕𑁄 𑀧𑀽𑀕𑁄 𑀘 𑀭𑀸𑀲𑀺 𑀘.

𑀓𑀸𑀬𑁄 𑀦𑀺𑀓𑀸𑀬𑁄 𑀦𑀺𑀓𑀭𑁄,

𑀓𑀤𑀫𑁆𑀩𑁄 𑀯𑀺𑀲𑀭𑁄 𑀖𑀝𑀸;

𑀲𑀫𑀼𑀤𑀸𑀬𑁄 𑀘 𑀲𑀦𑁆𑀤𑁂𑀳𑁄,

𑀲𑀗𑁆𑀖𑀸𑀢𑁄 𑀲𑀫𑀬𑁄 𑀓𑀭𑁄.

𑀑𑀖𑁄 𑀧𑀼𑀜𑁆𑀚𑁄 𑀓𑀮𑀸𑀧𑁄 𑀘,

𑀧𑀺𑀡𑁆𑀟𑁄 𑀚𑀸𑀮𑀜𑁆𑀘 𑀫𑀡𑁆𑀟𑀮𑀁;

𑀲𑀡𑁆𑀟𑁄 𑀧𑀯𑀸𑀳𑁄 𑀇𑀘𑁆𑀘𑁂𑀢𑁂,

𑀲𑀫𑀽𑀳𑀢𑁆𑀣𑀸𑀪𑀺𑀥𑀸𑀬𑀓𑀸𑀢𑀺.

𑀓𑀺𑀜𑁆𑀘𑀸𑀧𑀺 𑀏𑀢𑁂 𑀲𑀗𑁆𑀖𑀕𑀡𑀲𑀫𑀽𑀳𑀸𑀤𑀬𑁄 𑀲𑀤𑁆𑀤𑀸 𑀲𑀫𑀽𑀳𑀢𑁆𑀣𑀯𑀸𑀘𑀓𑀸, 𑀢𑀣𑀸𑀧𑀺 𑀲𑀗𑁆𑀖𑀕𑀡𑀲𑀤𑁆𑀤𑀸𑀬𑁂𑀯 𑀯𑀺𑀦𑀸𑀧𑀺 𑀯𑀺𑀲𑁂𑀲𑀓𑀧𑀤𑁂𑀦 𑀪𑀺𑀓𑁆𑀔𑀼𑀲𑀫𑀽𑀳𑁂 𑀯𑀢𑁆𑀢𑀦𑁆𑀢𑀺, 𑀦𑀸𑀜𑁆𑀜𑁂, 𑀅𑀜𑁆𑀜𑁂 𑀧𑀦 𑀲𑀗𑁆𑀖𑀕𑀡𑀲𑀤𑁆𑀤𑁂𑀳𑀺 𑀲𑀤𑁆𑀥𑀺𑀁 𑀅𑀜𑁆𑀜𑀫𑀜𑁆𑀜𑀜𑁆𑀘 𑀓𑀤𑀸𑀘𑀺 𑀲𑀫𑀸𑀦𑀢𑁆𑀣𑀯𑀺𑀲𑀬𑀸 𑀳𑁄𑀦𑁆𑀢𑀺, 𑀓𑀤𑀸𑀘𑀺 𑀅𑀲𑀫𑀸𑀦𑀢𑁆𑀣𑀯𑀺𑀲𑀬𑀸, 𑀢𑀲𑁆𑀫𑀸 𑀬𑀣𑀸𑀧𑀸𑀯𑀘𑀦𑀁 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁂𑀦 𑀬𑁄𑀚𑁂𑀢𑀩𑁆𑀩𑀸. ‘‘𑀏𑀓𑁄, 𑀤𑁆𑀯𑁂’’𑀢𑀺𑀆𑀤𑀺𑀦𑀸 𑀕𑀡𑁂𑀢𑀩𑁆𑀩𑁄𑀢𑀺 𑀕𑀡𑁄.

𑀓𑀡𑁆𑀡 ¶ 𑀲𑀯𑀦𑁂. 𑀓𑀡𑁆𑀡𑁂𑀢𑀺, 𑀓𑀡𑁆𑀡𑀬𑀢𑀺. 𑀓𑀡𑁆𑀡𑁄. 𑀓𑀡𑁆𑀡𑀬𑀦𑁆𑀢𑀺 𑀲𑀤𑁆𑀤𑀁 𑀲𑀼𑀡𑀦𑁆𑀢𑀺 𑀏𑀢𑁂𑀦𑀸𑀢𑀺 𑀓𑀡𑁆𑀡𑁄, 𑀬𑁄 𑀮𑁄𑀓𑁂 ‘‘𑀲𑀯𑀦𑀁, 𑀲𑁄𑀢’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺.

𑀓𑀼𑀡 𑀕𑀼𑀡 𑀆𑀫𑀦𑁆𑀢𑀦𑁂. 𑀓𑀼𑀡𑁂𑀢𑀺, 𑀓𑀼𑀡𑀬𑀢𑀺. 𑀕𑀼𑀡𑁂𑀢𑀺, 𑀕𑀼𑀡𑀬𑀢𑀺. 𑀕𑀼𑀡𑁄. 𑀕𑁄𑀡𑁄.

𑀏𑀢𑁆𑀣 𑀕𑀼𑀡𑁄𑀢𑀺 𑀲𑀻𑀮𑀸𑀤𑀬𑁄 𑀥𑀫𑁆𑀫𑀸, 𑀓𑁂𑀦𑀝𑁆𑀞𑁂𑀦 𑀢𑁂 𑀕𑀼𑀡𑀸. 𑀕𑁄𑀡𑀸𑀧𑀺𑀬𑀢𑀺 𑀆𑀫𑀦𑁆𑀢𑀸𑀧𑀺𑀬𑀢𑀺 𑀅𑀢𑁆𑀢𑀦𑀺 𑀧𑀢𑀺𑀝𑁆𑀞𑀺𑀢𑁄 𑀧𑀼𑀕𑁆𑀕𑀮𑁄 𑀤𑀝𑁆𑀞𑀼𑀁 𑀲𑁄𑀢𑀼𑀁 𑀧𑀽𑀚𑀺𑀢𑀼𑀜𑁆𑀘 𑀇𑀘𑁆𑀙𑀦𑁆𑀢𑁂𑀳𑀺 𑀚𑀦𑁂𑀳𑀻𑀢𑀺 𑀕𑀼𑀡𑁄. 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀲𑀻𑀮𑀸𑀤𑀺𑀥𑀫𑁆𑀫𑀸𑀦𑀁 𑀆𑀫𑀦𑁆𑀢𑀸𑀧𑀦𑀁 𑀦𑀢𑁆𑀣𑀺, 𑀢𑀣𑀸𑀧𑀺 𑀢𑀁𑀳𑁂𑀢𑀼𑀆𑀫𑀦𑁆𑀢𑀦𑀁 𑀦𑀺𑀫𑀦𑁆𑀢𑀦𑀜𑁆𑀘 𑀢𑁂𑀬𑁂𑀯 𑀓𑀭𑁄𑀦𑁆𑀢𑀺 𑀦𑀸𑀫𑀸𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑁋

‘‘𑀬𑀣𑀸𑀧𑀺 𑀔𑁂𑀢𑁆𑀢𑀲𑀫𑁆𑀧𑀦𑁆𑀦𑁂,

𑀩𑀻𑀚𑀁 𑀅𑀧𑁆𑀧𑀫𑁆𑀧𑀺 𑀭𑁄𑀧𑀺𑀢𑀁;

𑀲𑀫𑁆𑀫𑀸 𑀥𑀸𑀭𑀁 𑀧𑀯𑀲𑁆𑀲𑀦𑁆𑀢𑁂,

𑀨𑀮𑀁 𑀢𑁄𑀲𑁂𑀢𑀺 𑀓𑀲𑁆𑀲𑀓’’𑀦𑁆𑀢𑀺

𑀏𑀢𑁆𑀣 𑀓𑀲𑁆𑀲𑀓𑀲𑁆𑀲 𑀢𑀼𑀝𑁆𑀞𑀺𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀢𑁆𑀢𑀸 𑀳𑁂𑀢𑀼𑀯𑀲𑁂𑀦 𑀦𑀺𑀘𑁆𑀘𑁂𑀢𑀦𑀲𑁆𑀲𑀧𑀺 𑀨𑀮𑀲𑁆𑀲 𑀢𑁄𑀲𑀦𑀁 𑀯𑀼𑀢𑁆𑀢𑀁, 𑀏𑀯𑀫𑀺𑀥𑀸𑀧𑀺 𑀆𑀫𑀦𑁆𑀢𑀸𑀧𑀦𑀓𑀸𑀭𑀡𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀁. 𑀅𑀜𑁆𑀜𑁂 𑀧𑀦 ‘‘𑀕𑀼𑀜𑁆𑀚𑀦𑁆𑀢𑁂 𑀅𑀩𑁆𑀬𑀬𑀦𑁆𑀢𑁂 𑀇𑀢𑀺 𑀕𑀼𑀡𑀸’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀢𑀤𑀦𑀼𑀭𑀽𑀧𑀁 𑀧𑀦 𑀥𑀸𑀢𑀼𑀲𑀤𑁆𑀤𑀁 𑀦 𑀧𑀲𑁆𑀲𑀸𑀫, ‘‘𑀕𑀼𑀡 𑀆𑀫𑀦𑁆𑀢𑀦𑁂’’ 𑀇𑀘𑁆𑀘𑁂𑀯 𑀧𑀲𑁆𑀲𑀸𑀫, 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀯𑀡 𑀕𑀢𑁆𑀢𑀯𑀺𑀘𑀼𑀡𑁆𑀡𑀦𑁂. 𑀯𑀡𑁂𑀢𑀺, 𑀯𑀡𑀬𑀢𑀺. 𑀯𑀡𑁄.

𑀏𑀢𑁆𑀣 𑀯𑀡𑁄𑀢𑀺 𑀅𑀭𑀼. 𑀲𑀸 𑀳𑀺 𑀲𑀭𑀻𑀭𑀁 𑀯𑀡𑀬𑀢𑀺 𑀯𑀺𑀘𑀼𑀡𑁆𑀡𑁂𑀢𑀺 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁 𑀓𑀭𑁄𑀢𑀻𑀢𑀺 𑀯𑀡𑁄𑀢𑀺 𑀯𑀼𑀘𑁆𑀘𑀢𑀺.

𑀧𑀡𑁆𑀡 𑀳𑀭𑀺𑀢𑁂. 𑀧𑀡𑁆𑀡𑁂𑀢𑀺, 𑀧𑀡𑁆𑀡𑀬𑀢𑀺. 𑀢𑀸𑀮𑀧𑀡𑁆𑀡𑀁. 𑀲𑀽𑀧𑁂𑀬𑁆𑀬𑀧𑀡𑁆𑀡𑀁.

𑀏𑀢𑁆𑀣 ¶ 𑀘 𑀳𑀭𑀺𑀢𑀪𑀸𑀯𑀯𑀺𑀕𑀢𑁂𑀧𑀺 𑀯𑀢𑁆𑀣𑀼𑀲𑁆𑀫𑀺𑀁 𑀧𑀡𑁆𑀡𑀪𑀸𑀯𑁄 𑀭𑀽𑀴𑁆𑀳𑀺𑀢𑁄 𑀧𑀯𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. ‘‘𑀧𑀡𑁆𑀡𑀁, 𑀧𑀢𑁆𑀢𑀁, 𑀧𑀮𑀸𑀲𑁄, 𑀤𑀮𑀁’’ 𑀇𑀘𑁆𑀘𑁂𑀢𑁂 𑀲𑀫𑀸𑀦𑀢𑁆𑀣𑀸.

𑀧𑀡 𑀩𑁆𑀬𑀯𑀳𑀸𑀭𑁂. 𑀧𑀡𑁂𑀢𑀺, 𑀧𑀡𑀬𑀢𑀺. 𑀭𑀸𑀚𑀸 𑀘 𑀤𑀡𑁆𑀟𑀁 𑀕𑀭𑀼𑀓𑀁 𑀧𑀡𑁂𑀢𑀺.

𑀇𑀫𑀸𑀦𑀺 𑀡𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀢𑀓𑀸𑀭𑀦𑁆𑀢𑀥𑀸𑀢𑀼

𑀘𑀺𑀦𑁆𑀢 𑀘𑀺𑀦𑁆𑀢𑀸𑀬𑀁. 𑀘𑀺𑀦𑁆𑀢𑁂𑀢𑀺, 𑀘𑀺𑀦𑁆𑀢𑀬𑀢𑀺. 𑀘𑀺𑀢𑁆𑀢𑀁, 𑀘𑀺𑀦𑁆𑀢𑀸, 𑀘𑀺𑀦𑁆𑀢𑀦𑀸, 𑀘𑀺𑀦𑁆𑀢𑀦𑀓𑁄. 𑀓𑀸𑀭𑀺𑀢𑁂 ‘‘𑀘𑀺𑀦𑁆𑀢𑀸𑀧𑁂𑀢𑀺, 𑀘𑀺𑀦𑁆𑀢𑀸𑀧𑀬𑀢𑀻’’𑀢𑀺 𑀭𑀽𑀧𑀸𑀦𑀺.

𑀢𑀢𑁆𑀣 𑀘𑀺𑀢𑁆𑀢𑀦𑁆𑀢𑀺 𑀆𑀭𑀫𑁆𑀫𑀡𑀁 𑀘𑀺𑀦𑁆𑀢𑁂𑀢𑀻𑀢𑀺 𑀘𑀺𑀢𑁆𑀢𑀁, 𑀯𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄, 𑀲𑀩𑁆𑀩𑀘𑀺𑀢𑁆𑀢𑀲𑀸𑀥𑀸𑀭𑀡𑀯𑀲𑁂𑀦𑁂𑀢𑀁 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀲𑀺𑀬𑀸 𑁋 𑀓𑀲𑁆𑀫𑀸 ‘‘𑀆𑀭𑀫𑁆𑀫𑀡𑀁 𑀘𑀺𑀦𑁆𑀢𑁂𑀢𑀻𑀢𑀺 𑀘𑀺𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸𑀧𑀺 ‘‘𑀯𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁, 𑀦𑀦𑀼 𑀘𑀺𑀦𑁆𑀢𑀦𑀯𑀺𑀚𑀸𑀦𑀦𑀸 𑀦𑀸𑀦𑀸𑀲𑀪𑀸𑀯𑀸. 𑀦 𑀳𑀺 ‘‘𑀘𑀺𑀦𑁆𑀢𑁂𑀢𑀻’’𑀢𑀺 𑀧𑀤𑀲𑁆𑀲 ‘‘𑀯𑀺𑀚𑀸𑀦𑀸𑀢𑀻’’𑀢𑀺 𑀅𑀢𑁆𑀣𑁄 𑀲𑀫𑁆𑀪𑀯𑀢𑀺, 𑀤𑀼𑀧𑁆𑀧𑀜𑁆𑀜𑀲𑁆𑀲 𑀳𑀺 𑀦𑀸𑀦𑀧𑁆𑀧𑀓𑀸𑀭𑁂𑀳𑀺 𑀘𑀺𑀦𑁆𑀢𑀬𑀢𑁄𑀧𑀺 𑀲𑀼𑀔𑀼𑀫𑀢𑁆𑀣𑀸𑀥𑀺𑀕𑀫𑁄 𑀦 𑀳𑁄𑀢𑀻𑀢𑀺? 𑀲𑀘𑁆𑀘𑀁, ‘‘𑀯𑀺𑀚𑀸𑀦𑀸𑀢𑀻’’𑀢𑀺 𑀇𑀤𑀁 𑀧𑀤𑀁 𑀘𑀺𑀢𑁆𑀢𑀲𑁆𑀲 𑀲𑀜𑁆𑀜𑀸𑀧𑀜𑁆𑀜𑀸𑀓𑀺𑀘𑁆𑀘𑁂𑀳𑀺 𑀯𑀺𑀲𑀺𑀝𑁆𑀞𑀯𑀺𑀲𑀬𑀕𑁆𑀕𑀳𑀡𑀁 𑀤𑀻𑀧𑁂𑀢𑀼𑀁 𑀯𑀼𑀢𑁆𑀢𑀁 𑀲𑀩𑁆𑀩𑀘𑀺𑀢𑁆𑀢𑀲𑀸𑀥𑀸𑀭𑀡𑀢𑁆𑀢𑀸 𑀘𑀺𑀢𑁆𑀢𑀲𑀤𑁆𑀤𑀲𑁆𑀲. 𑀬𑀜𑁆𑀳𑀺 𑀥𑀫𑁆𑀫𑀚𑀸𑀢𑀁 ‘‘𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀤𑁂𑀯 𑀯𑀺𑀜𑁆𑀜𑀸𑀡𑀁, 𑀢𑀲𑁆𑀫𑀸 𑀯𑀺𑀚𑀸𑀦𑀦𑀢𑁆𑀣𑀁 𑀕𑀳𑁂𑀢𑁆𑀯𑀸 𑀲𑀜𑁆𑀜𑀸𑀧𑀜𑁆𑀜𑀸𑀓𑀺𑀘𑁆𑀘𑀸𑀯𑀺𑀲𑀺𑀝𑁆𑀞𑀯𑀺𑀲𑀬𑀕𑁆𑀕𑀳𑀡𑀁 𑀤𑀻𑀧𑁂𑀢𑀼𑀁 ‘‘𑀯𑀺𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀁.

𑀇𑀤𑀸𑀦𑀺 𑀅𑀜𑁆𑀜𑀕𑀡𑀺𑀓𑀥𑀸𑀢𑀼𑀯𑀲𑁂𑀦𑀧𑀺 𑀦𑀺𑀩𑁆𑀩𑀘𑀦𑀁 𑀧𑀓𑀸𑀲𑀬𑀸𑀫 𑁋 𑀲𑀩𑁆𑀩𑁂𑀲𑀼 𑀘𑀺𑀢𑁆𑀢𑁂𑀲𑀼 𑀬𑀁 𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀫𑀳𑀸𑀓𑁆𑀭𑀺𑀬𑀘𑀺𑀢𑁆𑀢𑀁, 𑀢𑀁 𑀚𑀯𑀦𑀯𑀻𑀣𑀺𑀯𑀲𑁂𑀦 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀁 𑀘𑀺𑀦𑁄𑀢𑀻𑀢𑀺 𑀘𑀺𑀢𑁆𑀢𑀁, 𑀯𑀺𑀧𑀸𑀓𑀁 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀘𑀺𑀢𑀦𑁆𑀢𑀺 𑀘𑀺𑀢𑁆𑀢𑀁, 𑀇𑀤𑀁 𑀘𑀺𑀥𑀸𑀢𑀼𑀯𑀲𑁂𑀦 𑀦𑀺𑀩𑁆𑀩𑀘𑀦𑀁. 𑀬𑀁 𑀓𑀺𑀜𑁆𑀘𑀺 𑀮𑁄𑀓𑁂 𑀯𑀺𑀘𑀺𑀢𑁆𑀢𑀁 𑀲𑀺𑀧𑁆𑀧𑀚𑀸𑀢𑀁, 𑀲𑀩𑁆𑀩𑀲𑁆𑀲 𑀢𑀲𑁆𑀲 ¶ 𑀘𑀺𑀢𑁆𑀢𑁂𑀦𑁂𑀯 𑀓𑀭𑀡𑀢𑁄 𑀘𑀺𑀢𑁆𑀢𑁂𑀢𑀺 𑀯𑀺𑀘𑀺𑀢𑁆𑀢𑁂𑀢𑀺 𑀯𑀺𑀘𑀺𑀢𑁆𑀢𑀁 𑀓𑀭𑀺𑀬𑀢𑀺 𑀏𑀢𑁂𑀦𑀸𑀢𑀺 𑀘𑀺𑀢𑁆𑀢𑀁, 𑀘𑀺𑀢𑁆𑀢𑀓𑀭𑀡𑀢𑀸𑀬 𑀘𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀇𑀤𑀁 𑀘𑀺𑀢𑁆𑀢𑀥𑀸𑀢𑀼𑀯𑀲𑁂𑀦 𑀦𑀺𑀩𑁆𑀩𑀘𑀦𑀁. 𑀘𑀺𑀢𑁆𑀢𑀢𑀸𑀬 𑀘𑀺𑀢𑁆𑀢𑀁, 𑀇𑀤𑀁 𑀧𑀸𑀝𑀺𑀧𑀤𑀺𑀓𑀯𑀲𑁂𑀦 𑀦𑀺𑀩𑁆𑀩𑀘𑀦𑀁. 𑀢𑁂𑀦𑀸𑀳𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 ‘‘𑀲𑀩𑁆𑀩𑀫𑁆𑀧𑀺 𑀬𑀣𑀸𑀦𑀼𑀭𑀽𑀧𑀢𑁄 𑀘𑀺𑀢𑁆𑀢𑀢𑀸𑀬 𑀘𑀺𑀢𑁆𑀢𑀁, 𑀘𑀺𑀢𑁆𑀢𑀓𑀭𑀡𑀢𑀸𑀬 𑀘𑀺𑀢𑁆𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺.

𑀏𑀢𑁆𑀣 𑀳𑀺 𑀘𑀺𑀢𑁆𑀢𑀲𑁆𑀲 𑀲𑀭𑀸𑀕𑀲𑀤𑁄𑀲𑀸𑀤𑀺𑀪𑁂𑀤𑀪𑀺𑀦𑁆𑀦𑀢𑁆𑀢𑀸 𑀲𑀫𑁆𑀧𑀬𑀼𑀢𑁆𑀢𑀪𑀽𑀫𑀺𑀆𑀭𑀫𑁆𑀫𑀡𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀸𑀥𑀺𑀧𑀢𑀻𑀦𑀁 𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀘𑀺𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀺𑀜𑁆𑀘𑀸𑀧𑀺 𑀏𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀏𑀯𑀁 𑀯𑀺𑀘𑀺𑀢𑁆𑀢𑀢𑀸 𑀦𑀢𑁆𑀣𑀺, 𑀢𑀣𑀸𑀧𑀺 𑀯𑀺𑀘𑀺𑀢𑁆𑀢𑀸𑀦𑀁 𑀅𑀦𑁆𑀢𑁄𑀕𑀥𑀢𑁆𑀢𑀸 𑀲𑀫𑀼𑀤𑀸𑀬𑀯𑁄𑀳𑀸𑀭𑁂𑀦 𑀅𑀯𑀬𑀯𑁄𑀧𑀺 ‘‘𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀬𑀣𑀸 𑀧𑀩𑁆𑀩𑀢𑀦𑀤𑀻𑀲𑀫𑀼𑀤𑁆𑀤𑀸𑀤𑀺𑀏𑀓𑀤𑁂𑀲𑁂𑀲𑀼 𑀤𑀺𑀝𑁆𑀞𑁂𑀲𑀼 𑀧𑀩𑁆𑀩𑀢𑀸𑀤𑀬𑁄 𑀤𑀺𑀝𑁆𑀞𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀦𑀸𑀳𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 ‘‘𑀓𑀸𑀫𑀜𑁆𑀘𑁂𑀢𑁆𑀣 𑀏𑀓𑀫𑁂𑀯 𑀏𑀯𑀁 𑀘𑀺𑀢𑁆𑀢𑀁 𑀦 𑀳𑁄𑀢𑀺, 𑀘𑀺𑀢𑁆𑀢𑀸𑀦𑀁 𑀧𑀦 𑀅𑀦𑁆𑀢𑁄𑀕𑀥𑀢𑁆𑀢𑀸 𑀏𑀢𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀏𑀓𑀫𑁆𑀧𑀺 𑀘𑀺𑀢𑁆𑀢𑀢𑀸𑀬 ‘𑀘𑀺𑀢𑁆𑀢’𑀦𑁆𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺.

𑀏𑀢𑁆𑀣 𑀘 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀫𑀢𑁆𑀣𑀸𑀦𑀁 𑀯𑀺𑀦𑀺𑀘𑁆𑀙𑀬𑁄 𑀩𑀯𑀢𑀺. 𑀓𑀣𑀁? 𑀬𑀲𑁆𑀫𑀸 𑀬𑀢𑁆𑀣 𑀬𑀢𑁆𑀣 𑀬𑀣𑀸 𑀬𑀣𑀸 𑀅𑀢𑁆𑀣𑁄 𑀮𑀩𑁆𑀪𑀢𑀺, 𑀢𑀢𑁆𑀣 𑀢𑀢𑁆𑀣 𑀢𑀣𑀸 𑀢𑀣𑀸 𑀕𑀳𑁂𑀢𑀩𑁆𑀩𑁄. 𑀢𑀲𑁆𑀫𑀸 𑀬𑀁 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑁂𑀦 𑀘𑀺𑀦𑁄𑀢𑀺, 𑀬𑀜𑁆𑀘 𑀓𑀫𑁆𑀫𑀼𑀦𑀸 𑀅𑀪𑀺𑀲𑀗𑁆𑀔𑀢𑀢𑁆𑀢𑀸 𑀘𑀺𑀢𑀁, 𑀢𑀁 𑀢𑁂𑀦 𑀓𑀸𑀭𑀡𑁂𑀦 𑀘𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦 𑀢𑀣𑀸 𑀦 𑀳𑁄𑀢𑀺, 𑀢𑀁 𑀧𑀭𑀺𑀢𑁆𑀢𑀓𑁆𑀭𑀺𑀬𑀤𑁆𑀯𑀬𑀁 𑀅𑀦𑁆𑀢𑀺𑀫𑀚𑀯𑀦𑀜𑁆𑀘 𑀮𑀩𑁆𑀪𑀫𑀸𑀦𑀘𑀺𑀦𑁆𑀢𑀦𑀯𑀺𑀘𑀺𑀢𑁆𑀢𑀢𑀸𑀤𑀺𑀯𑀲𑁂𑀦 𑀘𑀺𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀳𑀲𑀺𑀢𑀼𑀧𑁆𑀧𑀸𑀤𑁄 𑀧𑀦 𑀅𑀜𑁆𑀜𑀚𑀯𑀦𑀕𑀢𑀺𑀓𑁄𑀬𑁂𑀯𑀸𑀢𑀺.

𑀇𑀫𑀸𑀦𑀺 𑀘𑀺𑀢𑁆𑀢𑀲𑁆𑀲 𑀦𑀸𑀫𑀸𑀦𑀺 𑁋

𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀜𑁆𑀘, 𑀯𑀺𑀜𑁆𑀜𑀸𑀡𑀁 𑀳𑀤𑀬𑀁 𑀫𑀦𑀁;

𑀦𑀸𑀫𑀸𑀦𑁂𑀢𑀸𑀦𑀺 𑀯𑁄𑀳𑀸𑀭-𑀧𑀣𑁂 𑀯𑀢𑁆𑀢𑀦𑁆𑀢𑀺 𑀧𑀸𑀬𑀢𑁄.

𑀘𑀺𑀢𑁆𑀢𑀲𑀤𑁆𑀤𑁄 ¶ 𑀧𑀜𑁆𑀜𑀢𑁆𑀢𑀺𑀬𑀁 𑀯𑀺𑀜𑁆𑀜𑀸𑀡𑁂 𑀯𑀺𑀘𑀺𑀢𑁆𑀢𑁂 𑀘𑀺𑀢𑁆𑀢𑀓𑀫𑁆𑀫𑁂 𑀅𑀘𑁆𑀙𑀭𑀺𑀬𑁂𑀢𑀺 𑀏𑀯𑀫𑀸𑀤𑀻𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀅𑀬𑀜𑁆𑀳𑀺 ‘‘𑀘𑀺𑀢𑁆𑀢𑁄 𑀕𑀳𑀧𑀢𑀺. 𑀘𑀺𑀢𑁆𑀢𑀫𑀸𑀲𑁄’’𑀢𑀺𑀆𑀤𑀻𑀲𑀼 𑀧𑀜𑁆𑀜𑀢𑁆𑀢𑀺𑀬𑀁 𑀤𑀺𑀲𑁆𑀲𑀢𑀺. ‘‘𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀜𑁆𑀜𑀸𑀡𑁂. ‘‘𑀯𑀺𑀘𑀺𑀢𑁆𑀢𑀯𑀢𑁆𑀣𑀸𑀪𑀭𑀡𑀸’’𑀢𑀺𑀆𑀤𑀻𑀲𑀼 𑀯𑀺𑀘𑀺𑀢𑁆𑀢𑁂. ‘‘𑀤𑀺𑀝𑁆𑀞𑀁 𑀯𑁄 𑀪𑀺𑀓𑁆𑀔𑀯𑁂 𑀘𑀭𑀡𑀁 𑀦𑀸𑀫 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 𑀘𑀺𑀢𑁆𑀢𑀓𑀫𑁆𑀫𑁂. ‘‘𑀇𑀗𑁆𑀖 𑀫𑀤𑁆𑀤𑀺 𑀦𑀺𑀲𑀸𑀫𑁂𑀳𑀺, 𑀘𑀺𑀢𑁆𑀢𑀭𑀽𑀧𑀁𑀯 𑀤𑀺𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 𑀅𑀘𑁆𑀙𑀭𑀺𑀬𑁂𑀢𑀺.

𑀘𑀺𑀢 𑀲𑀜𑁆𑀘𑁂𑀢𑀦𑁂. 𑀘𑁂𑀢𑁂𑀢𑀺, 𑀘𑁂𑀢𑀬𑀢𑀺. 𑀭𑀢𑁆𑀢𑁄 𑀔𑁄 𑀩𑁆𑀭𑀸𑀳𑁆𑀫𑀡 𑀭𑀸𑀕𑁂𑀦 𑀅𑀪𑀺𑀪𑀽𑀢𑁄 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀧𑀭𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺, 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀺. 𑀆𑀓𑀗𑁆𑀔𑀢𑀺 𑀘𑁂𑀢𑀬𑀢𑀺, 𑀢𑀁 𑀦𑀺𑀲𑁂𑀥 𑀚𑀼𑀢𑀺𑀦𑁆𑀥𑀭. 𑀘𑁂𑀢𑀦𑀸, 𑀲𑀜𑁆𑀘𑁂𑀢𑀦𑀸. 𑀘𑁂𑀢𑀬𑀺𑀢𑀁, 𑀘𑁂𑀢𑁂𑀢𑁆𑀯𑀸, 𑀘𑁂𑀢𑀬𑀺𑀢𑁆𑀯𑀸. 𑀲𑀜𑁆𑀘𑀺𑀘𑁆𑀘 𑀧𑀸𑀡𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺.

𑀢𑀢𑁆𑀣 𑀘𑁂𑀢𑀦𑀸𑀢𑀺 𑀘𑁂𑀢𑀬𑀢𑀻𑀢𑀺 𑀘𑁂𑀢𑀦𑀸, 𑀲𑀤𑁆𑀥𑀺𑀁 𑀅𑀢𑁆𑀢𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀆𑀭𑀫𑁆𑀫𑀡𑁂 𑀅𑀪𑀺𑀲𑀦𑁆𑀤𑀳𑀢𑀻𑀢𑀺 𑀅𑀢𑁆𑀣𑁄. 𑀲𑀜𑁆𑀘𑁂𑀢𑀦𑀸𑀢𑀺 𑀉𑀧𑀲𑀕𑁆𑀕𑀯𑀲𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀘𑁂𑀢𑀬𑀺𑀢𑀦𑁆𑀢𑀺 𑀘𑁂𑀢𑀦𑀸𑀓𑀸𑀭𑁄. 𑀲𑀜𑁆𑀘𑀺𑀘𑁆𑀘𑀸𑀢𑀺 𑀲𑀬𑀁 𑀜𑀢𑁆𑀯𑀸, 𑀘𑁂𑀘𑁆𑀘 𑀅𑀪𑀺𑀯𑀺𑀢𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀫𑀸𑀦𑀺 𑀘𑁂𑀢𑀦𑀸𑀬 𑀦𑀸𑀫𑀸𑀦𑀺 𑁋

𑀲𑀜𑁆𑀘𑁂𑀢𑀦𑀸 𑀘𑁂𑀢𑀬𑀺𑀢𑀁, 𑀘𑁂𑀢𑀦𑀸 𑀓𑀫𑁆𑀫𑀫𑁂𑀯 𑀘;

𑀓𑀫𑁆𑀫𑀜𑁆𑀳𑀺 ‘‘𑀘𑁂𑀢𑀦𑀸’’ 𑀢𑁆𑀯𑁂𑀯, 𑀚𑀺𑀦𑁂𑀦𑀸𑀳𑀘𑁆𑀘 𑀪𑀸𑀲𑀺𑀢𑀁.

𑀅𑀢𑁆𑀭𑀸𑀬𑀁 𑀧𑀸𑀴𑀺 ‘‘𑀘𑁂𑀢𑀦𑀸𑀳𑀁 𑀪𑀺𑀓𑁆𑀔𑀯𑁂 𑀓𑀫𑁆𑀫𑀁 𑀯𑀤𑀸𑀫𑀺, 𑀘𑁂𑀢𑀬𑀺𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸’’𑀢𑀺.

𑀫𑀦𑁆𑀢 ¶ 𑀕𑀼𑀢𑁆𑀢𑀪𑀸𑀲𑀦𑁂. 𑀫𑀦𑁆𑀢𑁂𑀢𑀺, 𑀫𑀦𑁆𑀢𑀬𑀢𑀺, 𑀦𑀺𑀫𑀦𑁆𑀢𑁂𑀢𑀺, 𑀦𑀺𑀫𑀦𑁆𑀢𑀬𑀢𑀺, 𑀆𑀫𑀦𑁆𑀢𑁂𑀢𑀺, 𑀆𑀫𑀦𑁆𑀢𑀬𑀢𑀺. 𑀚𑀦𑀸 𑀲𑀗𑁆𑀕𑀫𑁆𑀫 𑀫𑀦𑁆𑀢𑁂𑀦𑁆𑀢𑀺, 𑀫𑀦𑁆𑀢𑀬𑀦𑁆𑀢𑀺, 𑀫𑀦𑁆𑀢𑀬𑀺𑀁𑀲𑀼 𑀭𑀳𑁄𑀕𑀢𑀸. 𑀦𑀺𑀫𑀦𑁆𑀢𑀬𑀺𑀢𑁆𑀣 𑀭𑀸𑀚𑀸𑀦𑀁. 𑀆𑀫𑀦𑁆𑀢𑀬𑀺𑀢𑁆𑀣 𑀤𑁂𑀯𑀺𑀦𑁆𑀤𑁄, 𑀯𑀺𑀲𑀼𑀓𑀫𑁆𑀫𑀁 𑀫𑀳𑀺𑀤𑁆𑀥𑀺𑀓𑀁. 𑀫𑀦𑁆𑀢𑀸, 𑀫𑀦𑁆𑀢𑁄. 𑀓𑀸𑀭𑀺𑀢𑁂 ‘‘𑀫𑀦𑁆𑀢𑀸𑀧𑁂𑀢𑀺, 𑀫𑀦𑁆𑀢𑀸𑀧𑀬𑀢𑀻’’𑀢𑀺 𑀭𑀽𑀧𑀸𑀦𑀺.

𑀏𑀢𑁆𑀣 𑀫𑀦𑁆𑀢𑀸𑀢𑀺 𑀧𑀜𑁆𑀜𑀸, ‘‘𑀕𑀯𑁂𑀲𑀦𑀲𑀜𑁆𑀜𑀸’’𑀢𑀺𑀧𑀺 𑀯𑀤𑀦𑁆𑀢𑀺. 𑀫𑀦𑁆𑀢𑁄𑀢𑀺 𑀕𑀼𑀢𑁆𑀢𑀪𑀸𑀲𑀦𑀁. ‘‘𑀉𑀧𑀲𑁆𑀲𑀼𑀢𑀺𑀓𑀸𑀧𑀺 𑀲𑀼𑀡𑀦𑁆𑀢𑀺 𑀫𑀦𑁆𑀢𑀁, 𑀢𑀲𑁆𑀫𑀸 𑀳𑀺 𑀫𑀦𑁆𑀢𑁄 𑀔𑀺𑀧𑁆𑀧𑀫𑀼𑀧𑁂𑀢𑀺 𑀪𑁂𑀤’’𑀦𑁆𑀢𑀺 𑀏𑀢𑁆𑀣 𑀳𑀺 𑀕𑀼𑀢𑁆𑀢𑀪𑀸𑀲𑀦𑀁 ‘‘𑀫𑀦𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀧𑀺𑀘 𑀫𑀦𑁆𑀢𑁄𑀢𑀺 𑀙𑀴𑀗𑁆𑀕𑀫𑀦𑁆𑀢𑁄. 𑀯𑀼𑀢𑁆𑀢𑀜𑁆𑀘 ‘‘𑀬𑁂 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀺, 𑀙𑀴𑀗𑁆𑀕𑀁 𑀩𑁆𑀭𑀳𑁆𑀫𑀘𑀺𑀦𑁆𑀢𑀺𑀢’’𑀦𑁆𑀢𑀺. 𑀏𑀢𑁆𑀣 𑀲𑀺𑀓𑁆𑀔𑀸 𑀦𑀺𑀭𑀼𑀢𑁆𑀢𑀺 𑀓𑀧𑁆𑀧 𑀩𑁆𑀬𑀸𑀓𑀭𑀡 𑀚𑁄𑀢𑀺𑀲𑀢𑁆𑀣 𑀙𑀦𑁆𑀤𑁄𑀯𑀺𑀘𑀺𑀢𑀺𑀯𑀲𑁂𑀦 𑀫𑀦𑁆𑀢𑁄 ‘‘𑀙𑀴𑀗𑁆𑀕𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀢𑀸𑀦𑀺 𑀏𑀯 𑀙 ‘‘𑀯𑁂𑀤𑀗𑁆𑀕𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑁂𑀤𑁄 𑀏𑀯 𑀳𑀺 ‘‘𑀫𑀦𑁆𑀢𑁄, 𑀲𑀼𑀢𑀻’’𑀢𑀺 𑀘 𑀯𑀼𑀢𑁆𑀢𑁄. 𑀅𑀣 𑀯𑀸 𑀫𑀦𑁆𑀢𑁄𑀢𑀺 𑀯𑁂𑀤𑀸𑀤𑀺𑀯𑀺𑀚𑁆𑀚𑀸.

𑀬𑀦𑁆𑀢 𑀲𑀗𑁆𑀓𑁄𑀘𑀦𑁂. 𑀬𑀦𑁆𑀢𑁂𑀢𑀺, 𑀬𑀦𑁆𑀢𑀬𑀢𑀺. 𑀬𑀦𑁆𑀢𑀁, 𑀢𑁂𑀮𑀬𑀦𑁆𑀢𑀁 𑀬𑀣𑀸𑀘𑀓𑁆𑀓𑀁, 𑀏𑀯𑀁 𑀓𑀫𑁆𑀧𑀢𑀺 𑀫𑁂𑀤𑀦𑀻.

𑀲𑀢𑁆𑀢 𑀕𑀢𑀺𑀬𑀁. 𑀲𑀢𑁆𑀢𑁂𑀢𑀺, 𑀲𑀢𑁆𑀢𑀬𑀢𑀺.

𑀲𑀦𑁆𑀢 𑀆𑀫𑀧𑁆𑀧𑀬𑁄𑀕𑁂. 𑀆𑀫𑀧𑁆𑀧𑀬𑁄𑀕𑁄 𑀦𑀸𑀫 𑀉𑀲𑁆𑀲𑀦𑁆𑀦𑀓𑁆𑀭𑀺𑀬𑀸. 𑀲𑀦𑁆𑀢𑁂𑀢𑀺, 𑀲𑀦𑁆𑀢𑀬𑀢𑀺.

𑀓𑀺𑀢𑁆𑀢 𑀲𑀁𑀲𑀦𑁆𑀤𑀦𑁂. 𑀓𑀺𑀢𑁆𑀢𑁂𑀢𑀺, 𑀓𑀺𑀢𑁆𑀢𑀬𑀢𑀺. ‘‘𑀬𑁂 𑀯𑁄𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀕𑀺𑀭𑀸𑀳𑀺 𑀅𑀦𑀼𑀧𑀼𑀩𑁆𑀩𑀲𑁄. 𑀓𑀺𑀢𑁆𑀢𑀦𑀸 𑀧𑀭𑀺𑀓𑀺𑀢𑁆𑀢𑀦𑀸’’𑀢𑀺𑀆𑀤𑀻𑀲𑀼 𑀧𑀦 𑀓𑀢𑁆𑀣𑀦𑀸 ‘‘𑀓𑀺𑀢𑁆𑀢𑀦𑀸’’𑀢𑀺 𑀯𑀼𑀘𑁆𑀘𑀢𑀺.

𑀢𑀦𑁆𑀢 𑀓𑀼𑀝𑀼𑀫𑁆𑀩𑀥𑀸𑀭𑀡𑁂. 𑀢𑀦𑁆𑀢𑁂𑀢𑀺, 𑀢𑀦𑁆𑀢𑀬𑀢𑀺. 𑀲𑀢𑀦𑁆𑀢𑁄, 𑀲𑀧𑁆𑀧𑀥𑀸𑀦𑁄𑀢𑀺 𑀅𑀢𑁆𑀣𑁄.

𑀬𑀢 ¶ 𑀦𑀺𑀓𑀸𑀭𑁄𑀧𑀓𑀸𑀭𑁂𑀲𑀼. 𑀬𑀢𑁂𑀢𑀺, 𑀬𑀢𑀬𑀢𑀺. 𑀦𑀻𑀢𑁄 𑀘 𑀧𑀝𑀺𑀤𑀸𑀦𑁂, 𑀬𑀢𑀥𑀸𑀢𑀼 𑀦𑀺𑀉𑀧𑀲𑀕𑁆𑀕𑀢𑁄 𑀧𑀭𑁄 𑀧𑀝𑀺𑀤𑀸𑀦𑁂 𑀯𑀢𑁆𑀢𑀢𑀺, 𑀦𑀺𑀬𑁆𑀬𑀸𑀢𑁂𑀢𑀺, 𑀦𑀺𑀬𑁆𑀬𑀸𑀢𑀬𑀢𑀺. 𑀢𑀓𑀸𑀭𑀲𑁆𑀲 𑀧𑀦 𑀤𑀓𑀸𑀭𑀢𑁆𑀢𑁂 𑀓𑀢𑁂 ‘‘𑀦𑀺𑀬𑁆𑀬𑀸𑀤𑁂𑀢𑀺, 𑀦𑀺𑀬𑁆𑀬𑀸𑀤𑀬𑀢𑀺. 𑀭𑀣𑀁 𑀦𑀺𑀬𑁆𑀬𑀸𑀤𑀬𑀺𑀢𑁆𑀯𑀸𑀦, 𑀅𑀡𑀡𑁄 𑀏𑀳𑀺 𑀲𑀸𑀭𑀣𑀻’’𑀢𑀺 𑀭𑀽𑀧𑀸𑀦𑀺.

𑀯𑀢𑀼 𑀪𑀸𑀲𑀸𑀬𑀁. 𑀯𑀢𑁆𑀢𑁂𑀢𑀺, 𑀯𑀢𑁆𑀢𑀬𑀢𑀺.

𑀧𑀢 𑀕𑀢𑀺𑀬𑀁. 𑀧𑀢𑁂𑀢𑀺, 𑀧𑀢𑀬𑀢𑀺.

𑀯𑀸𑀢 𑀕𑀢𑀺𑀲𑀼𑀔𑀲𑁂𑀯𑀦𑁂𑀲𑀼. 𑀕𑀢𑀺 𑀲𑀼𑀔𑀁 𑀲𑁂𑀯𑀦𑀦𑁆𑀢𑀺 𑀢𑀬𑁄 𑀅𑀢𑁆𑀣𑀸. 𑀢𑀢𑁆𑀣 𑀲𑀼𑀔𑀦𑀁 𑀲𑀼𑀔𑀁. 𑀯𑀸𑀢𑁂𑀢𑀺, 𑀯𑀸𑀢𑀬𑀢𑀺. 𑀯𑀸𑀢𑁄, 𑀯𑀸𑀢𑀧𑀼𑀧𑁆𑀨𑀁. 𑀘𑀻𑀯𑀭𑀲𑁆𑀲 𑀅𑀦𑀼𑀯𑀸𑀢𑁄.

𑀓𑁂𑀢 𑀆𑀫𑀦𑁆𑀢𑀦𑁂. 𑀓𑁂𑀢𑁂𑀢𑀺, 𑀓𑁂𑀢𑀬𑀢𑀺. 𑀓𑁂𑀢𑀓𑁄.

𑀲𑀢𑁆𑀢 𑀲𑀦𑁆𑀢𑀸𑀦𑀓𑁆𑀭𑀺𑀬𑀸𑀬𑀁. 𑀲𑀦𑁆𑀢𑀸𑀦𑀓𑁆𑀭𑀺𑀬𑀸 𑀦𑀸𑀫 𑀧𑀩𑀦𑁆𑀥𑀓𑁆𑀭𑀺𑀬𑀸 𑀅𑀯𑀺𑀘𑁆𑀙𑁂𑀤𑀓𑀭𑀡𑀁. 𑀲𑀢𑁆𑀢𑁂𑀢𑀺, 𑀲𑀢𑁆𑀢𑀬𑀢𑀺. 𑀲𑀢𑁆𑀢𑁄.

‘‘𑀓𑀺𑀦𑁆𑀦𑀼 𑀲𑀦𑁆𑀢𑀭𑀫𑀸𑀦𑁄𑀯, 𑀮𑀸𑀬𑀺𑀢𑁆𑀯𑀸 𑀳𑀭𑀺𑀢𑀁 𑀢𑀺𑀡𑀁;

𑀔𑀸𑀤 𑀔𑀸𑀤𑀸𑀢𑀺 𑀮𑀧𑀲𑀺, 𑀕𑀢𑀲𑀢𑁆𑀢𑀁 𑀚𑀭𑀕𑁆𑀕𑀯’’𑀦𑁆𑀢𑀺

𑀧𑀸𑀴𑀺𑀬𑀁 𑀧𑀦 ‘‘𑀕𑀢𑀲𑀢𑁆𑀢𑀁 𑀚𑀭𑀕𑁆𑀕𑀯’’𑀦𑁆𑀢𑀺 𑀧𑀸𑀞𑀲𑁆𑀲 ‘‘𑀯𑀺𑀕𑀢𑀚𑀻𑀯𑀺𑀢𑀁 𑀚𑀺𑀡𑁆𑀡𑀕𑁄𑀡’’𑀦𑁆𑀢𑀺 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀲𑀼𑀁. 𑀇𑀫𑀺𑀦𑀸 𑀲𑀢𑁆𑀢𑀲𑀤𑁆𑀤𑀲𑁆𑀲 𑀚𑀻𑀯𑀺𑀢𑀯𑀘𑀦𑀁 𑀯𑀺𑀬 𑀤𑀺𑀲𑁆𑀲𑀢𑀺, ‘‘𑀦 𑀲𑀼𑀓𑀭𑀸 𑀉𑀜𑁆𑀙𑁂𑀦 𑀧𑀕𑁆𑀕𑀳𑁂𑀦 𑀬𑀸𑀧𑁂𑀢𑀼’’𑀦𑁆𑀢𑀺 𑀏𑀢𑁆𑀣 𑀧𑀕𑁆𑀕𑀳𑀲𑀤𑁆𑀤𑀲𑁆𑀲 𑀧𑀢𑁆𑀢𑀓𑀣𑀦𑀁 𑀯𑀺𑀬. 𑀲𑀼𑀝𑁆𑀞𑀼 𑀯𑀺𑀘𑀸𑀭𑁂𑀢𑀩𑁆𑀩𑀁.

𑀲𑀼𑀢𑁆𑀢 𑀅𑀯𑀫𑁄𑀘𑀦𑁂. 𑀲𑀼𑀢𑁆𑀢𑁂𑀢𑀺, 𑀲𑀼𑀢𑁆𑀢𑀬𑀢𑀺.

𑀫𑀼𑀢𑁆𑀢 𑀧𑀲𑀯𑀦𑁂. 𑀫𑀼𑀢𑁆𑀢𑁂𑀢𑀺, 𑀫𑀼𑀢𑁆𑀢𑀬𑀢𑀺. 𑀑𑀫𑀼𑀢𑁆𑀢𑁂𑀢𑀺, 𑀑𑀫𑀼𑀢𑁆𑀢𑀬𑀢𑀺. 𑀫𑀼𑀢𑁆𑀢𑀁. 𑀅𑀢𑁆𑀭𑀸𑀬𑀁 𑀧𑀸𑀴𑀺 ‘‘𑀫𑀼𑀢𑁆𑀢𑁂𑀢𑀺 𑀑𑀳𑀤𑁂𑀢𑀺 𑀘𑀸’’𑀢𑀺. 𑀢𑀢𑁆𑀣 𑀫𑀼𑀢𑁆𑀢𑁂𑀢𑀻𑀢𑀺 𑀧𑀲𑁆𑀲𑀸𑀯𑀁 𑀓𑀭𑁄𑀢𑀺. 𑀑𑀳𑀤𑁂𑀢𑀻𑀢𑀺 𑀓𑀭𑀻𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀓𑀸𑀭𑀺𑀢𑁂 ‘‘𑀫𑀼𑀢𑁆𑀢𑀸𑀧𑁂𑀢𑀺, 𑀫𑀼𑀢𑁆𑀢𑀸𑀧𑀬𑀢𑀻’’𑀢𑀺 𑀭𑀽𑀧𑀸𑀦𑀺.

𑀓𑀢𑁆𑀢𑀭 ¶ 𑀲𑁂𑀣𑀺𑀮𑁆𑀮𑁂. 𑀓𑀢𑁆𑀢𑀭𑁂𑀢𑀺, 𑀓𑀢𑁆𑀢𑀭𑀬𑀢𑀺. 𑀓𑀢𑁆𑀢𑀭𑁄. 𑀓𑀢𑁆𑀢𑀭𑀤𑀡𑁆𑀟𑁄, 𑀓𑀢𑁆𑀢𑀭𑀲𑀼𑀧𑁆𑀧𑀁.

𑀢𑀢𑁆𑀣 𑀓𑀢𑁆𑀢𑀭𑁄𑀢𑀺 𑀚𑀺𑀡𑁆𑀡𑁄. 𑀫𑀳𑀮𑁆𑀮𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑁂𑀦𑀝𑁆𑀞𑁂𑀦? 𑀓𑀢𑁆𑀢𑀭𑀬𑀢𑀺 𑀅𑀗𑁆𑀕𑀸𑀦𑀁 𑀲𑀺𑀣𑀺𑀮𑀪𑀸𑀯𑁂𑀦 𑀲𑀺𑀣𑀺𑀮𑁄 𑀪𑀯𑀢𑀻𑀢𑀺 𑀅𑀢𑁆𑀣𑁂𑀦. 𑀓𑀢𑁆𑀢𑀭𑀤𑀡𑁆𑀟𑁄𑀢𑀺 𑀓𑀢𑁆𑀢𑀭𑁂𑀳𑀺 𑀚𑀺𑀡𑁆𑀡𑀫𑀦𑀼𑀲𑁆𑀲𑁂𑀳𑀺 𑀏𑀓𑀦𑁆𑀢𑀢𑁄 𑀕𑀳𑁂𑀢𑀩𑁆𑀩𑀢𑀸𑀬 𑀓𑀢𑁆𑀢𑀭𑀸𑀦𑀁 𑀤𑀡𑁆𑀟𑁄 𑀓𑀢𑁆𑀢𑀭𑀤𑀡𑁆𑀟𑁄. 𑀢𑁂𑀦𑀸𑀳𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 ‘‘𑀓𑀢𑁆𑀢𑀭𑀤𑀡𑁆𑀟𑁄𑀢𑀺 𑀚𑀺𑀡𑁆𑀡𑀓𑀸𑀮𑁂 𑀕𑀳𑁂𑀢𑀩𑁆𑀩𑀤𑀡𑁆𑀟𑁄’’𑀢𑀺. 𑀓𑀢𑁆𑀢𑀭𑀲𑀼𑀧𑁆𑀧𑀦𑁆𑀢𑀺 𑀚𑀺𑀡𑁆𑀡𑀲𑀼𑀧𑁆𑀧𑀁. 𑀓𑀢𑁆𑀢𑀭𑀜𑁆𑀘 𑀢𑀁 𑀲𑀼𑀧𑁆𑀧𑀜𑁆𑀘𑀸𑀢𑀺 𑀓𑀢𑁆𑀢𑀭𑀲𑀼𑀧𑁆𑀧𑀦𑁆𑀢𑀺 𑀲𑀫𑀸𑀲𑁄.

𑀘𑀺𑀢𑁆𑀢 𑀘𑀺𑀢𑁆𑀢𑀓𑀭𑀡𑁂, 𑀓𑀤𑀸𑀘𑀺 𑀤𑀲𑁆𑀲𑀦𑁂𑀧𑀺. 𑀘𑀺𑀢𑁆𑀢𑀓𑀭𑀡𑀁 𑀯𑀺𑀘𑀺𑀢𑁆𑀢𑀪𑀸𑀯𑀓𑀭𑀡𑀁. 𑀘𑀺𑀢𑁆𑀢𑁂𑀢𑀺, 𑀘𑀺𑀢𑁆𑀢𑀬𑀢𑀺. 𑀘𑀺𑀢𑁆𑀢𑀁.

𑀢𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀣𑀓𑀸𑀭𑀦𑁆𑀢𑀥𑀸𑀢𑀼

𑀓𑀣 𑀓𑀣𑀦𑁂. 𑀓𑀣𑁂𑀢𑀺, 𑀓𑀣𑀬𑀢𑀺. 𑀥𑀫𑁆𑀫𑀁 𑀲𑀸𑀓𑀘𑁆𑀙𑀢𑀺. 𑀲𑀸𑀓𑀘𑁆𑀙𑀸, 𑀓𑀣𑀸, 𑀧𑀭𑀺𑀓𑀣𑀸, 𑀅𑀝𑁆𑀞𑀓𑀣𑀸.

𑀢𑀢𑁆𑀣 𑀲𑀸𑀓𑀘𑁆𑀙𑀢𑀻𑀢𑀺 𑀲𑀳 𑀓𑀣𑀬𑀢𑀺. 𑀅𑀢𑁆𑀣𑁄 𑀓𑀣𑀺𑀬𑀢𑀺 𑀏𑀢𑀸𑀬𑀸𑀢𑀺 𑀅𑀝𑁆𑀞𑀓𑀣𑀸, 𑀢𑁆𑀣𑀓𑀸𑀭𑀲𑁆𑀲 𑀝𑁆𑀞𑀓𑀸𑀭𑀢𑁆𑀢𑀁.

𑀬𑀸𑀬’𑀢𑁆𑀣𑀫𑀪𑀺𑀯𑀡𑁆𑀡𑁂𑀦𑁆𑀢𑀺, 𑀩𑁆𑀬𑀜𑁆𑀚𑀦𑀢𑁆𑀣𑀧𑀤𑀸𑀦𑀼𑀕𑀁;

𑀦𑀺𑀤𑀸𑀦𑀯𑀢𑁆𑀣𑀼𑀲𑀫𑁆𑀩𑀦𑁆𑀥𑀁, 𑀏𑀲𑀸 𑀅𑀝𑁆𑀞𑀓𑀣𑀸 𑀫𑀢𑀸.

‘‘𑀅𑀝𑁆𑀞𑀓𑀣𑀸’’𑀢𑀺 𑀘 ‘‘𑀅𑀢𑁆𑀣𑀲𑀁𑀯𑀡𑁆𑀡𑀦𑀸’’𑀢𑀺 𑀘 𑀦𑀺𑀦𑁆𑀦𑀸𑀦𑀸𑀓𑀭𑀡𑀁.

𑀧𑀣𑀺 𑀕𑀢𑀺𑀬𑀁. 𑀧𑀦𑁆𑀣𑁂𑀦𑁆𑀢𑀺, 𑀧𑀦𑁆𑀣𑀬𑀦𑁆𑀢𑀺. 𑀧𑀦𑁆𑀣𑁄. 𑀪𑀽𑀯𑀸𑀤𑀺𑀕𑀡𑁂 ‘‘𑀧𑀣 𑀕𑀢𑀺𑀬’’𑀦𑁆𑀢𑀺 𑀅𑀓𑀸𑀭𑀦𑁆𑀢𑀯𑀲𑁂𑀦 𑀓𑀣𑀺𑀢𑀲𑁆𑀲 ‘‘𑀧𑀣𑀢𑀺, 𑀧𑀣𑁄’’𑀢𑀺 ¶ 𑀦𑀺𑀕𑁆𑀕𑀳𑀻𑀢𑀸𑀕𑀫𑀯𑀚𑁆𑀚𑀺𑀢𑀸𑀦𑀺 𑀭𑀽𑀧𑀸𑀦𑀺 𑀪𑀯𑀦𑁆𑀢𑀺, 𑀇𑀥 𑀧𑀦 𑀇𑀓𑀸𑀭𑀦𑁆𑀢𑀯𑀲𑁂𑀦 𑀓𑀣𑀺𑀢𑀲𑁆𑀲 𑀲𑀦𑀺𑀕𑁆𑀕𑀳𑀻𑀢𑀸𑀕𑀫𑀸𑀦𑀺 𑀭𑀽𑀧𑀸𑀦𑀺 𑀦𑀺𑀘𑁆𑀘𑀁 𑀪𑀯𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀼𑀢𑁆𑀣 𑀆𑀤𑀭𑀸𑀦𑀸𑀤𑀭𑁂𑀲𑀼. 𑀧𑀼𑀢𑁆𑀣𑁂𑀢𑀺, 𑀧𑀼𑀢𑁆𑀣𑀬𑀢𑀺.

𑀫𑀼𑀢𑁆𑀣 𑀲𑀗𑁆𑀖𑀸𑀢𑁂. 𑀫𑀼𑀢𑁆𑀣𑁂𑀢𑀺, 𑀫𑀼𑀢𑁆𑀣𑀬𑀢𑀺.

𑀯𑀢𑁆𑀣 𑀅𑀤𑁆𑀤𑀦𑁂. 𑀯𑀢𑁆𑀣𑁂𑀢𑀺, 𑀯𑀢𑁆𑀣𑀬𑀢𑀺.

𑀧𑀼𑀣 𑀪𑀸𑀲𑀸𑀬𑀁. 𑀧𑁄𑀣𑁂𑀢𑀺, 𑀧𑁄𑀣𑀬𑀢𑀺. 𑀓𑀣𑁂𑀢𑀻𑀢𑀺 𑀅𑀢𑁆𑀣𑁄.

𑀧𑀼𑀣 𑀧𑀳𑀸𑀭𑁂. 𑀧𑁄𑀣𑁂𑀢𑀺, 𑀧𑁄𑀣𑀬𑀢𑀺. 𑀓𑀼𑀫𑀸𑀭𑁂 𑀧𑁄𑀣𑁂𑀢𑁆𑀯𑀸 𑀅𑀕𑀫𑀸𑀲𑀺.

𑀓𑀣 𑀯𑀸𑀓𑁆𑀬𑀧𑀩𑀦𑁆𑀥𑁂. 𑀓𑀣𑁂𑀢𑀺, 𑀓𑀣𑀬𑀢𑀺. 𑀓𑀣𑀸.

𑀲𑀣 𑀤𑀼𑀩𑁆𑀩𑀮𑁆𑀬𑁂. 𑀲𑀣𑁂𑀢𑀺, 𑀲𑀣𑀬𑀢𑀺.

𑀅𑀢𑁆𑀣 𑀧𑀢𑁆𑀣 𑀬𑀸𑀘𑀦𑀸𑀬𑀁. 𑀅𑀢𑁆𑀣𑁂𑀢𑀺, 𑀅𑀢𑁆𑀣𑀬𑀢𑀺. 𑀅𑀢𑁆𑀣𑁄. 𑀧𑀢𑁆𑀣𑁂𑀢𑀺, 𑀧𑀢𑁆𑀣𑀬𑀢𑀺. 𑀧𑀢𑁆𑀣𑀦𑀸. 𑀧𑀝𑀺𑀧𑀓𑁆𑀔𑀁 𑀅𑀢𑁆𑀣𑀬𑀦𑁆𑀢𑀺 𑀇𑀘𑁆𑀙𑀦𑁆𑀢𑀻𑀢𑀺 𑀧𑀘𑁆𑀘𑀢𑁆𑀣𑀺𑀓𑀸.

𑀣𑁄𑀫 𑀲𑀺𑀮𑀸𑀖𑀸𑀬𑀁. 𑀣𑁄𑀫𑁂𑀢𑀺, 𑀣𑁄𑀫𑀬𑀢𑀺. 𑀣𑁄𑀫𑀦𑀸.

𑀓𑀸𑀣 𑀳𑀺𑀁𑀲𑀸𑀬𑀁. 𑀓𑀸𑀣𑁂𑀢𑀺, 𑀓𑀸𑀣𑀬𑀢𑀺.

𑀲𑀣 𑀩𑀦𑁆𑀥𑀦𑁂. 𑀲𑀣𑁂𑀢𑀺, 𑀲𑀣𑀬𑀢𑀺.

𑀲𑀦𑁆𑀣 𑀕𑀦𑁆𑀣 𑀲𑀦𑁆𑀣𑀫𑁆𑀪𑁂. 𑀲𑀦𑁆𑀣𑁂𑀢𑀺, 𑀲𑀦𑁆𑀣𑀬𑀢𑀺. 𑀕𑀦𑁆𑀣𑁂𑀢𑀺, 𑀕𑀦𑁆𑀣𑀬𑀢𑀺. 𑀕𑀦𑁆𑀣𑁄.

𑀣𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀤𑀓𑀸𑀭𑀦𑁆𑀢𑀥𑀸𑀢𑀼

𑀳𑀤 ¶ 𑀓𑀭𑀻𑀲𑀼𑀲𑁆𑀲𑀕𑁆𑀕𑁂. 𑀓𑀭𑀻𑀲𑀼𑀲𑁆𑀲𑀕𑁆𑀕𑁄 𑀓𑀭𑀻𑀲𑀲𑁆𑀲 𑀉𑀲𑁆𑀲𑀕𑁆𑀕𑁄 𑀯𑀺𑀲𑁆𑀲𑀚𑁆𑀚𑀦𑀁. 𑀳𑀤𑁂𑀢𑀺, 𑀳𑀤𑀬𑀢𑀺. 𑀑𑀳𑀤𑁂𑀢𑀺, 𑀑𑀳𑀤𑀬𑀢𑀺.

𑀯𑀺𑀤 𑀮𑀸𑀪𑁂. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀮𑀸𑀪𑁄 𑀦𑀸𑀫 𑀅𑀦𑀼𑀪𑀯𑀦𑀁, 𑀢𑀲𑁆𑀫𑀸 𑀯𑀺𑀤𑀥𑀸𑀢𑀼 𑀅𑀦𑀼𑀪𑀯𑀦𑁂 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺. 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺. 𑀯𑁂𑀤𑀬𑀢𑀺. 𑀯𑁂𑀤𑀦𑀸, 𑀯𑀺𑀢𑁆𑀢𑀺. 𑀯𑁂𑀤𑀬𑀺𑀢𑀁. 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄.

𑀓𑀼𑀤𑀺 𑀅𑀦𑀢𑀪𑀸𑀲𑀦𑁂. 𑀓𑀼𑀦𑁆𑀤𑁂𑀢𑀺, 𑀓𑀼𑀦𑁆𑀤𑀬𑀢𑀺.

𑀫𑀺𑀤 𑀲𑀺𑀦𑁂𑀳𑀦𑁂. 𑀅𑀢𑁆𑀭 𑀲𑀺𑀦𑁂𑀳𑁄 𑀦𑀸𑀫 𑀧𑀻𑀢𑀺. 𑀫𑁂𑀤𑁂𑀢𑀺, 𑀫𑁂𑀤𑀬𑀢𑀺.

𑀙𑀤 𑀲𑀁𑀯𑀭𑀡𑁂. 𑀕𑁂𑀳𑀁 𑀙𑀸𑀤𑁂𑀢𑀺, 𑀙𑀸𑀤𑀬𑀢𑀺. 𑀤𑁄𑀲𑀁 𑀙𑀸𑀤𑁂𑀢𑀺, 𑀙𑀸𑀤𑀬𑀢𑀺. 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀧𑀝𑀺𑀘𑁆𑀙𑀸𑀤𑀬𑀢𑀺. 𑀙𑀢𑁆𑀢𑀁. 𑀙𑀦𑁆𑀦𑀸 𑀓𑀼𑀝𑀺.

𑀢𑀢𑁆𑀭 𑀙𑀢𑁆𑀢𑀦𑁆𑀢𑀺 𑀆𑀢𑀧𑀢𑁆𑀢𑀁. 𑀆𑀢𑀧𑀁 𑀙𑀸𑀤𑁂𑀢𑀻𑀢𑀺 𑀙𑀢𑁆𑀢𑀁. 𑀧𑀝𑀺𑀘𑁆𑀙𑀸𑀤𑀺𑀬𑀢𑁂𑀢𑀺 𑀙𑀦𑁆𑀦𑀸.

𑀘𑀼𑀤 𑀲𑀜𑁆𑀘𑁄𑀤𑀦𑁂 𑀆𑀡𑀢𑁆𑀢𑀺𑀬𑀜𑁆𑀘. 𑀘𑁄𑀤𑁂𑀢𑀺, 𑀘𑁄𑀤𑀬𑀢𑀺. 𑀘𑁄𑀤𑀓𑁄, 𑀘𑀼𑀤𑀺𑀢𑀓𑁄, 𑀘𑁄𑀤𑀦𑀸. 𑀆𑀦𑀦𑁆𑀤𑁄 𑀩𑀼𑀤𑁆𑀥𑀘𑁄𑀤𑀺𑀢𑁄.

𑀢𑀢𑁆𑀭 𑀘𑁄𑀤𑀦𑀸𑀢𑀺 𑀘𑀸𑀮𑀦𑀸. 𑀘𑀸𑀮𑀦𑀸𑀢𑀺 𑀤𑁄𑀲𑀸𑀭𑁄𑀧𑀦𑀸𑀢𑀺 𑀅𑀢𑁆𑀣𑁄.

𑀙𑀤𑁆𑀤 𑀯𑀫𑀦𑁂. 𑀙𑀤𑁆𑀤𑁂𑀢𑀺, 𑀙𑀤𑁆𑀤𑀬𑀢𑀺.

𑀫𑀤 𑀯𑀺𑀢𑁆𑀢𑀺𑀬𑁄𑀕𑁂. 𑀫𑀤𑁂𑀢𑀺, 𑀫𑀤𑀬𑀢𑀺.

𑀯𑀺𑀤 𑀘𑁂𑀳𑀦𑀸𑀔𑁆𑀬𑀸𑀦𑀦𑀺𑀯𑀸𑀲𑁂𑀲𑀼. 𑀘𑁂𑀳𑀦𑀸 𑀲𑀜𑁆𑀜𑀸𑀡𑀁. 𑀆𑀔𑁆𑀬𑀸𑀦𑀁 𑀓𑀣𑀦𑀁. 𑀦𑀺𑀯𑀸𑀲𑁄 𑀦𑀺𑀯𑀲𑀦𑀁. 𑀯𑁂𑀤𑁂𑀢𑀺, 𑀯𑁂𑀤𑀬𑀢𑀺. 𑀧𑀝𑀺𑀯𑁂𑀤𑁂𑀢𑀺, 𑀧𑀝𑀺𑀯𑁂𑀤𑀬𑀢𑀺. 𑀧𑀝𑀺𑀯𑁂𑀤𑀬𑀸𑀫𑀺 𑀢𑁂 𑀫𑀳𑀸𑀭𑀸𑀚.

𑀲𑀤𑁆𑀤 ¶ 𑀲𑀤𑁆𑀤𑀦𑁂. 𑀲𑀤𑁆𑀤𑁂𑀢𑀺, 𑀲𑀤𑁆𑀤𑀬𑀢𑀺. 𑀯𑀺𑀲𑀤𑁆𑀤𑁂𑀢𑀺, 𑀯𑀺𑀲𑀤𑁆𑀤𑀬𑀢𑀺. 𑀲𑀤𑁆𑀤𑁄, 𑀲𑀤𑁆𑀤𑀺𑀢𑁄. 𑀤𑀻𑀖𑀢𑁆𑀢𑁂 ‘‘𑀲𑀤𑁆𑀤𑀸𑀬𑀢𑀻’’𑀢𑀺 𑀭𑀽𑀧𑀁.

𑀏𑀢𑁆𑀣 𑀘 ‘‘𑀫𑀁 𑀲𑀤𑁆𑀤𑀸𑀬𑀢𑀻𑀢𑀺 𑀲𑀜𑁆𑀜𑀸𑀬 𑀯𑁂𑀕𑁂𑀦 𑀉𑀤𑀓𑁂 𑀧𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀧𑀸𑀞𑁄 𑀦𑀺𑀤𑀲𑁆𑀲𑀦𑀁, 𑀇𑀤𑀁 ‘‘𑀧𑀩𑁆𑀩𑀢𑀸𑀬𑀢𑀻’’𑀢𑀺 𑀭𑀽𑀧𑀁 𑀯𑀺𑀬 𑀥𑀸𑀢𑀼𑀯𑀲𑁂𑀦 𑀦𑀺𑀧𑁆𑀨𑀦𑁆𑀦𑀁 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀥𑀸𑀢𑀼𑀯𑀲𑁂𑀦 𑀦𑀺𑀧𑁆𑀨𑀦𑁆𑀦𑀁𑀬𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀲𑀤𑁆𑀤𑁄𑀢𑀺 𑀲𑀤𑁆𑀤𑀺𑀬𑀢𑀻𑀢𑀺 𑀲𑀤𑁆𑀤𑁄, 𑀬𑀣𑀸𑀯𑀼𑀘𑁆𑀘𑀢𑀻𑀢𑀺 𑀯𑀘𑀦𑀁. 𑀅𑀣 𑀯𑀸 𑀲𑀤𑁆𑀤𑀺𑀬𑀢𑀺 𑀅𑀢𑁆𑀣𑁄 𑀅𑀦𑁂𑀦𑀸𑀢𑀺 𑀲𑀤𑁆𑀤𑁄. 𑀕𑀭𑀯𑁄 𑀧𑀦 ‘‘𑀲𑀧𑁆𑀧𑀢𑀻𑀢𑀺 𑀲𑀤𑁆𑀤𑁄. 𑀉𑀤𑀻𑀭𑀺𑀬𑀢𑀺 𑀅𑀪𑀺𑀮𑀧𑀺𑀬𑀢𑀻𑀢𑀺 𑀅𑀢𑁆𑀣𑁄’’𑀢𑀺 𑀯𑀤𑀦𑁆𑀢𑀺.

𑀲𑀽𑀤 𑀆𑀲𑁂𑀘𑀦𑁂. 𑀲𑀽𑀤𑁂𑀢𑀺, 𑀲𑀽𑀤𑀬𑀢𑀺. 𑀲𑀽𑀤𑁄.

𑀲𑀽𑀤𑁄𑀢𑀺 𑀪𑀢𑁆𑀢𑀓𑀸𑀭𑀓𑁄, 𑀬𑁄 ‘‘𑀭𑀲𑀓𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺.

𑀓𑀦𑁆𑀤 𑀲𑀸𑀢𑀘𑁆𑀘𑁂. 𑀲𑀸𑀢𑀘𑁆𑀘𑀁 𑀲𑀢𑀢𑀪𑀸𑀯𑁄 𑀦𑀺𑀭𑀦𑁆𑀢𑀭𑀪𑀸𑀯𑁄. 𑀓𑀦𑁆𑀤𑁂𑀢𑀺, 𑀓𑀦𑁆𑀤𑀬𑀢𑀺.

𑀫𑀼𑀤 𑀲𑀁𑀲𑀕𑁆𑀕𑁂. 𑀏𑀓𑀢𑁄𑀓𑀭𑀡𑀁 𑀲𑀁𑀲𑀕𑁆𑀕𑁄. 𑀫𑁄𑀤𑁂𑀢𑀺, 𑀫𑁄𑀤𑀬𑀢𑀺 𑀲𑀢𑁆𑀢𑀽𑀦𑀺 𑀲𑀧𑁆𑀧𑀺𑀦𑀸.

𑀦𑀤 𑀪𑀸𑀲𑀸𑀬𑀁. 𑀦𑀸𑀤𑁂𑀢𑀺, 𑀦𑀸𑀤𑀬𑀢𑀺. 𑀳𑁂𑀢𑀼𑀓𑀢𑁆𑀢𑀼𑀭𑀽𑀧𑀸𑀦𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸𑀦𑀺 𑀧𑀸𑀴𑀺𑀤𑀲𑁆𑀲𑀦𑀢𑁄 ‘‘𑀲𑀻𑀳𑁄 𑀘 𑀲𑀻𑀳𑀦𑀸𑀤𑁂𑀦, 𑀤𑀤𑁆𑀤𑀭𑀁 𑀅𑀪𑀺𑀦𑀸𑀤𑀬𑀻’’𑀢𑀺. 𑀅𑀜𑁆𑀜𑀢𑁆𑀭𑀸𑀧𑀺 𑀲𑀁𑀲𑀬𑁄 𑀦 𑀓𑀸𑀢𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀘𑀼𑀭𑀸𑀤𑀺𑀕𑀡𑁂 𑀳𑁂𑀢𑀼𑀓𑀢𑁆𑀢𑀼𑀭𑀽𑀧𑀲𑀤𑀺𑀲𑀸𑀦𑀫𑁆𑀧𑀺 𑀲𑀼𑀤𑁆𑀥𑀓𑀢𑁆𑀢𑀼𑀭𑀽𑀧𑀸𑀦𑀁 𑀲𑀦𑁆𑀤𑀺𑀲𑁆𑀲𑀦𑀢𑁄.

𑀲𑀤 𑀅𑀲𑁆𑀲𑀸𑀤𑀦𑁂. 𑀲𑀸𑀤𑁂𑀢𑀺, 𑀲𑀸𑀤𑀬𑀢𑀺. 𑀅𑀲𑁆𑀲𑀸𑀤𑁂𑀢𑀺, 𑀅𑀲𑁆𑀲𑀸𑀤𑀬𑀢𑀺. 𑀏𑀢𑁆𑀣 𑀆𑀉𑀧𑀲𑀕𑁆𑀕𑁄 𑀭𑀲𑁆𑀲𑀯𑀲𑁂𑀦 𑀞𑀺𑀢𑁄.

𑀕𑀤 𑀤𑁂𑀯𑀲𑀤𑁆𑀤𑁂. 𑀤𑁂𑀯𑀲𑀤𑁆𑀤𑁄 𑀯𑀼𑀘𑁆𑀘𑀢𑀺 𑀫𑁂𑀖𑀲𑀤𑁆𑀤𑁄. 𑀕𑀤𑁂𑀢𑀺, 𑀕𑀤𑀬𑀢𑀺.

𑀧𑀤 ¶ 𑀕𑀢𑀺𑀬𑀁. 𑀧𑀤𑁂𑀢𑀺, 𑀧𑀤𑀬𑀢𑀺. 𑀧𑀤𑀁. 𑀇𑀫𑀺𑀲𑁆𑀲𑀸 𑀤𑀺𑀯𑀸𑀤𑀺𑀕𑀡𑁂 ‘‘𑀧𑀚𑁆𑀚𑀢𑀻’’𑀢𑀺 𑀭𑀽𑀧𑀁 𑀪𑀯𑀢𑀺, 𑀇𑀥 𑀧𑀦 𑀈𑀤𑀺𑀲𑀸𑀦𑀺.

𑀙𑀺𑀤𑁆𑀤 𑀓𑀡𑁆𑀡𑀪𑁂𑀤𑁂. 𑀙𑀺𑀤𑁆𑀤𑁂𑀢𑀺, 𑀙𑀺𑀤𑁆𑀤𑀬𑀢𑀺. 𑀙𑀺𑀤𑁆𑀤𑀁.

𑀙𑀺𑀤 𑀤𑁆𑀯𑁂𑀥𑀸𑀓𑀭𑀡𑁂. 𑀦𑀦𑀼 𑀪𑁄 𑀬𑁄 𑀘𑀢𑀼𑀥𑀸 𑀯𑀸 𑀧𑀜𑁆𑀘𑀥𑀸 𑀯𑀸 𑀅𑀦𑁂𑀓𑀲𑀢𑀥𑀸 𑀯𑀸 𑀙𑀺𑀦𑁆𑀤𑀢𑀺, 𑀢𑀲𑁆𑀲 𑀢𑀁 𑀙𑁂𑀤𑀦𑀁 𑀤𑁆𑀯𑁂𑀥𑀸𑀓𑀭𑀡𑀁 𑀦𑀸𑀫 𑀦 𑀳𑁄𑀢𑀺, 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 𑀲𑀸𑀫𑀜𑁆𑀜𑁂𑀦 𑀅𑀯𑀢𑁆𑀯𑀸 ‘‘𑀤𑁆𑀯𑁂𑀥𑀸𑀓𑀭𑀡𑁂’’𑀢𑀺 𑀤𑁆𑀯𑀺𑀥𑀸 𑀕𑀳𑀡𑀁 𑀓𑀢𑀦𑁆𑀢𑀺? 𑀤𑁆𑀯𑀺𑀥𑀸𑀓𑀭𑀡𑀁 𑀦𑀸𑀫 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀅𑀦𑁂𑀓𑀲𑀢𑀥𑀸 𑀙𑁂𑀤𑀦𑀫𑁆𑀧𑀺 𑀤𑁆𑀯𑀺𑀥𑀸𑀓𑀭𑀡𑀁𑀬𑁂𑀯. 𑀅𑀧𑀭𑀲𑁆𑀲 𑀳𑀺 𑀅𑀧𑀭𑀲𑁆𑀲 𑀙𑀺𑀦𑁆𑀦𑀓𑁄𑀝𑁆𑀞𑀸𑀲𑀲𑁆𑀲 𑀧𑀼𑀩𑁆𑀩𑁂𑀦 𑀏𑀓𑁂𑀦 𑀓𑁄𑀝𑁆𑀞𑀸𑀲𑁂𑀦 𑀲𑀤𑁆𑀥𑀺𑀁 𑀅𑀧𑁂𑀓𑁆𑀔𑀦𑀯𑀲𑁂𑀦 𑀤𑁆𑀯𑀺𑀥𑀸𑀓𑀭𑀡𑀁 𑀳𑁄𑀢𑀺𑀬𑁂𑀯. 𑀙𑁂𑀤𑁂𑀢𑀺, 𑀙𑁂𑀤𑀬𑀢𑀺.

𑀬𑁄 𑀢𑁂 𑀳𑀢𑁆𑀣𑁂 𑀘 𑀧𑀸𑀤𑁂 𑀘, 𑀓𑀡𑁆𑀡𑀦𑀸𑀲𑀜𑁆𑀘 𑀙𑁂𑀤𑀬𑀺;

𑀢𑀲𑁆𑀲 𑀓𑀼𑀚𑁆𑀛 𑀫𑀳𑀸𑀯𑀻𑀭, 𑀫𑀸 𑀭𑀝𑁆𑀞𑀁 𑀯𑀺𑀦𑀲𑁆𑀲 𑀇𑀤𑀁;

𑀬𑁄 𑀫𑁂 𑀳𑀢𑁆𑀣𑁂 𑀘 𑀧𑀸𑀤𑁂 𑀘, 𑀓𑀡𑁆𑀡𑀦𑀸𑀲𑀜𑁆𑀘 𑀙𑁂𑀤𑀬𑀺;

𑀘𑀺𑀭𑀁 𑀚𑀻𑀯𑀢𑀼 𑀲𑁄 𑀭𑀸𑀚𑀸, 𑀦 𑀳𑀺 𑀓𑀼𑀚𑁆𑀛𑀦𑁆𑀢𑀺 𑀫𑀸𑀤𑀺𑀲𑀸𑀢𑀺.

𑀙𑀤 𑀅𑀧𑀯𑀸𑀭𑀡𑁂. 𑀙𑀸𑀤𑁂𑀢𑀺, 𑀙𑀸𑀤𑀬𑀢𑀺. 𑀙𑀢𑁆𑀢𑀁. 𑀧𑀼𑀭𑀺𑀲𑀲𑁆𑀲 𑀪𑀢𑁆𑀢𑀁 𑀙𑀸𑀤𑀬𑀢𑀺.

𑀈𑀤𑀻 𑀲𑀦𑁆𑀤𑀻𑀧𑀦𑁂. 𑀈𑀤𑁂𑀢𑀺, 𑀈𑀤𑀬𑀢𑀺. 𑀈𑀓𑀸𑀭𑀦𑁆𑀢𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀲𑀦𑀺𑀕𑁆𑀕𑀳𑀻𑀢𑀸𑀕𑀫𑀸𑀦𑀺 𑀭𑀽𑀧𑀸𑀦𑀺 𑀦 𑀪𑀯𑀦𑁆𑀢𑀺.

𑀅𑀤𑁆𑀤 𑀳𑀺𑀁𑀲𑀸𑀬𑀁. 𑀅𑀤𑁆𑀤𑁂𑀢𑀺, 𑀅𑀤𑁆𑀤𑀬𑀢𑀺.

𑀯𑀤 𑀪𑀸𑀲𑀸𑀬𑀁. 𑀯𑀸𑀤𑁂𑀢𑀺, 𑀯𑀸𑀤𑀬𑀢𑀺. 𑀯𑀸𑀤𑁄.

𑀢𑀢𑁆𑀣 ‘‘𑀯𑀸𑀤𑁂𑀢𑀺, 𑀯𑀸𑀤𑀬𑀢𑀻’’𑀢𑀺 𑀇𑀫𑁂𑀲𑀁 ‘‘𑀯𑀤𑀢𑀻’’𑀢𑀺 𑀲𑀼𑀤𑁆𑀥𑀓𑀢𑁆𑀢𑀼𑀯𑀲𑁂𑀦𑁂𑀯 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀦 𑀳𑁂𑀢𑀼𑀓𑀢𑁆𑀢𑀼𑀯𑀲𑁂𑀦. 𑀢𑀣𑀸 𑀳𑀺 ‘‘𑀲𑀗𑁆𑀓𑁂𑀢𑀁 𑀓𑀢𑁆𑀯𑀸 𑀯𑀺𑀲𑀁𑀯𑀸𑀤𑁂𑀢𑀺. 𑀑𑀯𑀤𑁂𑀬𑁆𑀬𑀸𑀦𑀼𑀲𑀸𑀲𑁂𑀬𑁆𑀬. 𑀇𑀤𑀫𑁂𑀯 𑀲𑀘𑁆𑀘𑀦𑁆𑀢𑀺 𑀘 𑀯𑀸𑀤𑀬𑀦𑁆𑀢𑀺. 𑀅𑀯𑀺𑀲𑀁𑀯𑀸𑀤𑀓𑁄 𑀮𑁄𑀓𑀲𑁆𑀲𑀸’’𑀢𑀺 𑀲𑀼𑀤𑁆𑀥𑀓𑀢𑁆𑀢𑀼𑀤𑀻𑀧𑀓𑀧𑀸𑀴𑀺𑀦𑀬𑀸 𑀤𑀺𑀲𑁆𑀲𑀦𑁆𑀢𑀺 ¶ , 𑀲𑀤𑁆𑀤𑀲𑀢𑁆𑀣𑁂 𑀘 ‘‘𑀯𑀸𑀤𑀬𑀢𑀻’’𑀢𑀺 𑀲𑀼𑀤𑁆𑀥𑀓𑀢𑁆𑀢𑀼𑀧𑀤𑀁 𑀤𑀺𑀲𑁆𑀲𑀢𑀺. 𑀢𑀢𑁆𑀣 𑀯𑀺𑀲𑀁𑀯𑀸𑀤𑁂𑀢𑀻𑀢𑀺 𑀫𑀼𑀲𑀸 𑀯𑀤𑁂𑀢𑀺, 𑀅𑀣 𑀯𑀸 𑀯𑀺𑀧𑁆𑀧𑀮𑀫𑁆𑀪𑁂𑀢𑀺, 𑀯𑀸𑀤𑁄𑀢𑀺 𑀯𑀘𑀦𑀁. ‘‘𑀯𑀸𑀤𑁄 𑀚𑀧𑁆𑀧𑁄 𑀯𑀺𑀢𑀡𑁆𑀟𑀸’’𑀢𑀺 𑀏𑀯𑀁𑀯𑀺𑀥𑀸𑀲𑀼 𑀢𑀻𑀲𑀼 𑀓𑀣𑀸𑀲𑀼 𑀯𑀸𑀤𑀲𑀗𑁆𑀔𑀸𑀢𑀸 𑀓𑀣𑀸. ‘‘𑀯𑀸𑀤𑀸𑀧𑁂𑀢𑀺, 𑀯𑀸𑀤𑀸𑀧𑀬𑀢𑀻’’𑀢𑀺 𑀤𑁆𑀯𑁂𑀬𑁂𑀯 𑀳𑁂𑀢𑀼𑀓𑀢𑁆𑀢𑀼𑀧𑀤𑀸𑀦𑀺 𑀪𑀯𑀦𑁆𑀢𑀺.

𑀙𑀤𑀻 𑀇𑀘𑁆𑀙𑀸𑀬𑀁. 𑀈𑀓𑀸𑀭𑀦𑁆𑀢𑁄𑀬𑀁 𑀥𑀸𑀢𑀼, 𑀢𑀲𑁆𑀫𑀸 𑀲𑀦𑀺𑀕𑁆𑀕𑀳𑀻𑀢𑀸𑀕𑀫𑀸𑀦𑀺𑀲𑁆𑀲 𑀭𑀽𑀧𑀸𑀦𑀺 𑀦 𑀪𑀯𑀦𑁆𑀢𑀺. 𑀧𑀼𑀭𑀺𑀲𑀲𑁆𑀲 𑀪𑀢𑁆𑀢𑀁 𑀙𑀸𑀤𑁂𑀢𑀺, 𑀙𑀸𑀤𑀬𑀢𑀺, 𑀭𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀲𑀲𑁆𑀲 𑀪𑀢𑁆𑀢𑀁 𑀙𑀸𑀤𑀬𑀫𑀸𑀦𑀁 𑀢𑀺𑀝𑁆𑀞𑀢𑀺 𑀙𑀸𑀤𑁂𑀦𑁆𑀢𑀁 𑀯𑀸.

𑀯𑀤𑀻 𑀅𑀪𑀺𑀯𑀸𑀤𑀦𑀣𑀼𑀢𑀻𑀲𑀼. 𑀅𑀬𑀫𑁆𑀧𑀺 𑀈𑀓𑀸𑀭𑀦𑁆𑀢𑁄 𑀥𑀸𑀢𑀼, 𑀢𑀲𑁆𑀫𑀸 𑀇𑀫𑀲𑁆𑀲𑀧𑀺 𑀲𑀦𑀺𑀕𑁆𑀕𑀳𑀻𑀢𑀸𑀕𑀫𑀸𑀦𑀺 𑀭𑀽𑀧𑀸𑀦𑀺 𑀦 𑀪𑀯𑀦𑁆𑀢𑀺. 𑀯𑀸𑀤𑁂𑀢𑀺, 𑀯𑀸𑀤𑀬𑀢𑀺, 𑀯𑀦𑁆𑀤𑀢𑀺, 𑀣𑁄𑀫𑁂𑀢𑀺 𑀯𑀸𑀢𑀺 𑀅𑀢𑁆𑀣𑁄. 𑀇𑀫𑀸𑀦𑀺 𑀅𑀦𑀼𑀧𑀲𑀕𑁆𑀕𑀸𑀦𑀺 𑀭𑀽𑀧𑀸𑀦𑀺. 𑀲𑀤𑁆𑀤𑀲𑀢𑁆𑀣𑁂𑀧𑀺 𑀘 ‘‘𑀯𑀸𑀤𑀬𑀢𑀻’’𑀢𑀺 𑀅𑀦𑀼𑀧𑀲𑀕𑁆𑀕𑀯𑀦𑁆𑀤𑀦𑀣𑀼𑀢𑀺𑀅𑀢𑁆𑀣𑀁 𑀧𑀤𑀁 𑀯𑀼𑀢𑁆𑀢𑀁, 𑀲𑀸𑀲𑀦𑁂 𑀧𑀦 ‘‘𑀅𑀪𑀺𑀯𑀸𑀤𑁂𑀢𑀺, 𑀅𑀪𑀺𑀯𑀸𑀤𑀬𑀢𑀺, 𑀅𑀪𑀺𑀯𑀸𑀤𑀦𑀁, 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸’’𑀢𑀺𑀆𑀤𑀻𑀦𑀺 𑀲𑁄𑀧𑀲𑀕𑁆𑀕𑀸𑀦𑀺 𑀭𑀽𑀧𑀸𑀦𑀺 𑀤𑀺𑀲𑁆𑀲𑀦𑁆𑀢𑀺.

𑀢𑀢𑁆𑀣 𑀅𑀪𑀺𑀯𑀸𑀤𑁂𑀢𑁆𑀯𑀸𑀢𑀺 𑀯𑀦𑁆𑀤𑀺𑀢𑁆𑀯𑀸, 𑀣𑁄𑀫𑁂𑀢𑁆𑀯𑀸 𑀯𑀸, 𑀅𑀬𑀫𑀲𑁆𑀫𑀸𑀓𑀁 𑀭𑀼𑀘𑀺. 𑀆𑀕𑀫𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀅𑀪𑀺𑀯𑀸𑀤𑁂𑀢𑁆𑀯𑀸𑀢𑀺 ‘𑀲𑀼𑀔𑀻 𑀅𑀭𑁄𑀕𑁄 𑀳𑁄𑀢𑀽’𑀢𑀺 𑀯𑀤𑀸𑀧𑁂𑀢𑁆𑀯𑀸, 𑀯𑀦𑁆𑀤𑀦𑁆𑀢𑁄 𑀳𑀺 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀸𑀧𑁂𑀢𑀺 𑀦𑀸𑀫𑀸’’𑀢𑀺 𑀳𑁂𑀢𑀼𑀓𑀢𑁆𑀢𑀼𑀯𑀲𑁂𑀦 𑀅𑀪𑀺𑀯𑀸𑀤𑀦𑀲𑀤𑁆𑀤𑀢𑁆𑀣𑁄 𑀯𑀼𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀧𑀦 𑀯𑀦𑁆𑀤𑀦𑀲𑀤𑁆𑀤𑀁 𑀲𑀤𑁆𑀤𑀲𑀢𑁆𑀣𑀦𑀬𑀫𑀕𑁆𑀕𑀳𑁂𑀢𑁆𑀯𑀸 𑀲𑀼𑀤𑁆𑀥𑀓𑀢𑁆𑀢𑀼𑀯𑀲𑁂𑀦 𑀅𑀢𑁆𑀣𑁄 𑀓𑀣𑀺𑀢𑁄. 𑀅𑀪𑀺𑀯𑀸𑀤𑀦𑀜𑁆𑀳𑀺 𑀯𑀦𑁆𑀤𑀦𑀁𑀬𑁂𑀯, 𑀦 𑀯𑀤𑀸𑀧𑀦𑀁 𑀅𑀪𑀺𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑀢𑁆𑀢𑀸 ‘‘𑀅𑀪𑀺𑀯𑀸𑀤𑀦𑀲𑀻𑀮𑀺𑀲𑁆𑀲𑀸’’𑀢𑀺 𑀏𑀢𑁆𑀣 𑀯𑀺𑀬. 𑀇𑀤𑀜𑁆𑀳𑀺 ‘‘𑀅𑀪𑀺𑀯𑀸𑀤𑀸𑀧𑀦𑀲𑀻𑀮𑀺𑀲𑁆𑀲𑀸’’𑀢𑀺 𑀦 𑀯𑀼𑀢𑁆𑀢𑀁. 𑀬𑀤𑀺 𑀘 𑀲𑀤𑁆𑀤𑀲𑀢𑁆𑀣𑁂 𑀯𑀤𑀸𑀧𑀦𑀫𑀥𑀺𑀧𑁆𑀧𑁂𑀢𑀁 𑀲𑀺𑀬𑀸, ‘‘𑀯𑀤𑀻 𑀯𑀤𑀸𑀧𑀦𑀣𑀼𑀢𑀻𑀲𑀽’’𑀢𑀺 𑀦𑀺𑀲𑁆𑀲𑀦𑁆𑀤𑁂𑀳𑀯𑀘𑀦𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 ¶ , 𑀏𑀯𑀜𑁆𑀘 𑀦 𑀯𑀼𑀢𑁆𑀢𑀁, 𑀏𑀯𑀁 𑀧𑀦 𑀯𑀼𑀢𑁆𑀢𑀁 ‘‘𑀯𑀤𑀻 𑀅𑀪𑀺𑀯𑀸𑀤𑀦𑀣𑀼𑀢𑀻𑀲𑀽’’𑀢𑀺, 𑀢𑁂𑀦 𑀯𑀤𑀸𑀧𑀦𑀫𑀦𑀥𑀺𑀧𑁆𑀧𑁂𑀢𑀦𑁆𑀢𑀺 𑀜𑀸𑀬𑀢𑀺.

𑀅𑀣𑀸𑀧𑀺 𑀲𑀺𑀬𑀸 ‘‘𑀓𑀲𑁆𑀲𑀘𑀺 𑀯𑀼𑀤𑁆𑀥𑁂𑀦 𑀯𑀺𑀲𑀺𑀝𑁆𑀞𑀁 𑀯𑀤𑀸𑀧𑀦𑀁 𑀅𑀪𑀺𑀯𑀸𑀤𑀦’’𑀦𑁆𑀢𑀺, 𑀏𑀯𑀫𑁆𑀧𑀺 𑀦𑀼𑀧𑀧𑀚𑁆𑀚𑀢𑀺 𑀓𑀸𑀭𑀺𑀢𑀯𑀲𑁂𑀦 𑀥𑀸𑀢𑀼𑀅𑀢𑁆𑀣𑀲𑁆𑀲 𑀅𑀓𑀣𑁂𑀢𑀩𑁆𑀩𑀢𑁄. 𑀢𑀣𑀸 𑀳𑀺 ‘‘𑀧𑀘 𑀧𑀸𑀓𑁂, 𑀙𑀺𑀤𑀺 𑀤𑁆𑀯𑀺𑀥𑀸𑀓𑀭𑀡𑁂’’𑀢𑀺𑀆𑀤𑀺𑀦𑀸 𑀪𑀸𑀯𑀯𑀲𑁂𑀦 𑀅𑀢𑁆𑀣𑀧𑁆𑀧𑀓𑀸𑀲𑀦𑀫𑀢𑁆𑀢𑁂𑀬𑁂𑀯 ‘‘𑀧𑀘𑀢𑀺, 𑀧𑀘𑁆𑀘𑀢𑀺, 𑀧𑀸𑀘𑁂𑀢𑀺. 𑀙𑀺𑀦𑁆𑀤𑀢𑀺, 𑀙𑀺𑀚𑁆𑀚𑀢𑀺, 𑀙𑁂𑀤𑀸𑀧𑁂𑀢𑀻’’𑀢𑀺𑀆𑀤𑀻𑀦𑀺 𑀲𑀓𑀫𑁆𑀫𑀓𑀸𑀦𑀺 𑀘𑁂𑀯 𑀅𑀓𑀫𑁆𑀫𑀓𑀸𑀦𑀺 𑀘 𑀲𑀓𑀸𑀭𑀺𑀢𑀸𑀦𑀺 𑀘 𑀭𑀽𑀧𑀸𑀦𑀺 𑀦𑀺𑀧𑁆𑀨𑀚𑁆𑀚𑀦𑁆𑀢𑀺, 𑀦 𑀘 𑀢𑀤𑀢𑁆𑀣𑀸𑀬 𑀯𑀺𑀲𑀼𑀁 𑀯𑀺𑀲𑀼𑀁 𑀥𑀸𑀢𑀼𑀦𑀺𑀤𑁆𑀤𑁂𑀲𑁄 𑀓𑀭𑀺𑀬𑀢𑀺. 𑀢𑀲𑁆𑀫𑀸 ‘‘𑀯𑀤𑀻 𑀅𑀪𑀺𑀯𑀸𑀤𑀦𑀣𑀼𑀢𑀻𑀲𑀽’’𑀢𑀺 𑀏𑀢𑁆𑀣 𑀓𑀸𑀭𑀺𑀢𑀯𑀲𑁂𑀦 𑀥𑀸𑀢𑀼𑀅𑀢𑁆𑀣𑁄 𑀓𑀣𑀺𑀢𑁄𑀢𑀺𑀧𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸 𑀓𑁆𑀭𑀺𑀬𑀸𑀲𑀪𑀸𑀯𑀢𑁆𑀢𑀸 𑀥𑀸𑀢𑀽𑀦𑀁. 𑀬𑀣𑀸 𑀧𑀦 ‘‘𑀢𑀓𑁆𑀓𑁂𑀢𑀺, 𑀯𑀺𑀢𑀓𑁆𑀓𑁂𑀢𑀺. 𑀢𑀓𑁆𑀓𑁄, 𑀯𑀺𑀢𑀓𑁆𑀓𑁄’’𑀢𑀺𑀆𑀤𑀻𑀦𑀺 𑀲𑀫𑀸𑀦𑀢𑁆𑀣𑀸𑀦𑀺, 𑀢𑀣𑀸 ‘‘𑀯𑀸𑀤𑁂𑀢𑀺, 𑀅𑀪𑀺𑀯𑀸𑀤𑁂𑀢𑀻’’𑀢𑀺𑀆𑀤𑀻𑀦𑀺 𑀲𑀫𑀸𑀦𑀢𑁆𑀣𑀸𑀦𑀺. 𑀅𑀢𑁄 𑀲𑀤𑁆𑀤𑀲𑀢𑁆𑀣𑁂𑀧𑀺 𑀲𑀤𑁆𑀤𑀲𑀢𑁆𑀣𑀯𑀺𑀤𑀽𑀳𑀺 ‘‘𑀢𑀓𑁆𑀓 𑀯𑀺𑀢𑀓𑁆𑀓𑁂, 𑀯𑀤𑀻 𑀅𑀪𑀺𑀯𑀸𑀤𑀦𑀣𑀼𑀢𑀻𑀲𑀽’’𑀢𑀺𑀆𑀤𑀻𑀦𑀁 𑀥𑀸𑀢𑀽𑀦𑀁 ‘‘𑀢𑀓𑁆𑀓𑀬𑀢𑀺, 𑀯𑀸𑀤𑀬𑀢𑀻’’𑀢𑀺𑀆𑀤𑀻𑀦𑀺 𑀅𑀦𑀼𑀧𑀲𑀕𑁆𑀕𑀸𑀦𑀺𑀬𑁂𑀯 𑀭𑀽𑀧𑀸𑀦𑀺 𑀤𑀲𑁆𑀲𑀺𑀢𑀸𑀦𑀺, 𑀢𑀸𑀦𑀺 𑀘 𑀔𑁄 𑀲𑀼𑀤𑁆𑀥𑀓𑀢𑁆𑀢𑀼𑀧𑀤𑀸𑀦𑀺𑀬𑁂𑀯, 𑀦 𑀳𑁂𑀢𑀼𑀓𑀢𑁆𑀢𑀼𑀧𑀤𑀸𑀦𑀺, 𑀢𑀲𑁆𑀫𑀸 ‘‘𑀅𑀪𑀺𑀯𑀸𑀤𑀦𑀣𑀼𑀢𑀻𑀲𑀽’’𑀢𑀺 𑀏𑀢𑀲𑁆𑀲 ‘‘𑀯𑀤𑀸𑀧𑀦𑀣𑀼𑀢𑀻𑀲𑀽’’𑀢𑀺 𑀅𑀢𑁆𑀣𑁄 𑀦𑀼𑀧𑀧𑀚𑁆𑀚𑀢𑀺.

𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 ‘‘𑀅𑀪𑀺𑀯𑀸𑀤𑁂𑀢𑀺, 𑀅𑀪𑀺𑀯𑀸𑀤𑀬𑀢𑀺. 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀅𑀪𑀺𑀯𑀸𑀤𑀬𑀺𑀢𑁆𑀯𑀸’’𑀢𑀺𑀆𑀤𑀻𑀦𑀺 𑀲𑀫𑀸𑀦𑀢𑁆𑀣𑀸𑀦𑀺, 𑀡𑁂𑀡𑀬𑀫𑀢𑁆𑀢𑁂𑀦 𑀳𑀺 𑀲𑀯𑀺𑀲𑁂𑀲𑀸𑀦𑀺. 𑀬𑀤𑀺 ‘‘𑀅𑀪𑀺𑀯𑀸𑀤𑁂𑀢𑁆𑀯𑀸’’𑀢𑀺 𑀇𑀫𑀲𑁆𑀲 𑀧𑀤𑀲𑁆𑀲 ‘‘𑀲𑀼𑀔𑀻 𑀅𑀭𑁄𑀕𑁄 𑀳𑁄𑀢𑀽’𑀢𑀺 𑀯𑀤𑀸𑀧𑁂𑀢𑁆𑀯𑀸’’𑀢𑀺 𑀅𑀢𑁆𑀣𑁄 𑀲𑀺𑀬𑀸, ‘‘𑀲𑀺𑀭𑀲𑀸 𑀅𑀪𑀺𑀯𑀸𑀤𑀬𑀺’’𑀦𑁆𑀢𑀺 𑀏𑀢𑁆𑀣 ‘‘𑀲𑀺𑀭𑀲𑀸’’𑀢𑀺 𑀧𑀤𑀁 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 𑀯𑀤𑀸𑀧𑀦𑁂𑀦 𑀅𑀲𑀫𑁆𑀩𑀦𑁆𑀥𑀢𑁆𑀢𑀸. 𑀬𑀲𑁆𑀫𑀸 𑀯𑀼𑀢𑁆𑀢𑀁 𑀢𑀁 𑀧𑀤𑀁, 𑀢𑁂𑀦 𑀜𑀸𑀬𑀢𑀺 ‘‘𑀅𑀪𑀺𑀯𑀸𑀤𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀯𑀤𑀸𑀧𑀦𑀢𑁆𑀣𑁄 𑀦 𑀇𑀘𑁆𑀙𑀺𑀢𑀩𑁆𑀩𑁄, 𑀯𑀦𑁆𑀤𑀦𑀢𑁆𑀣𑁄 𑀇𑀘𑁆𑀙𑀺𑀢𑀩𑁆𑀩𑁄 𑀣𑁄𑀫𑀦𑀢𑁆𑀣𑁄 𑀘. 𑀬𑀲𑁆𑀫𑀸 𑀪𑀽𑀯𑀸𑀤𑀺𑀕𑀡𑁂 ‘‘𑀯𑀦𑁆𑀤 𑀅𑀪𑀺𑀯𑀸𑀤𑀸𑀦𑀣𑀼𑀢𑀻𑀲𑀽’’𑀢𑀺 𑀇𑀫𑀲𑁆𑀲 𑀥𑀸𑀢𑀼𑀲𑁆𑀲 ‘‘𑀯𑀦𑁆𑀤𑀢𑀻’’𑀢𑀺 ¶ 𑀧𑀤𑀭𑀽𑀧𑀲𑁆𑀲 ‘‘𑀅𑀪𑀺𑀯𑀦𑁆𑀤𑀢𑀺, 𑀣𑁄𑀫𑁂𑀢𑀺 𑀘𑀸’’𑀢𑀺 𑀅𑀢𑁆𑀣𑁄𑀬𑁂𑀯 𑀇𑀘𑁆𑀙𑀺𑀢𑀩𑁆𑀩𑁄, 𑀦 𑀯𑀤𑀸𑀧𑀦𑀢𑁆𑀣𑁄. 𑀢𑀣𑀸 𑀳𑀺 ‘‘𑀯𑀦𑁆𑀤𑁂 𑀲𑀼𑀕𑀢𑀁 𑀕𑀢𑀺𑀯𑀺𑀫𑀼𑀢𑁆𑀢’’𑀦𑁆𑀢𑀺 𑀧𑀤𑀸𑀦𑀫𑀢𑁆𑀣𑀁 𑀯𑀤𑀦𑁆𑀢𑁂𑀦 𑀝𑀻𑀓𑀸𑀘𑀭𑀺𑀬𑁂𑀦𑀧𑀺 ‘‘𑀯𑀦𑁆𑀤𑁂𑀢𑀺 𑀯𑀦𑁆𑀤𑀸𑀫𑀺, 𑀣𑁄𑀫𑁂𑀫𑀺 𑀘𑀸’’𑀢𑀺 𑀯𑀦𑁆𑀤𑀦𑀣𑁄𑀫𑀦𑀢𑁆𑀣𑁄𑀬𑁂𑀯 𑀤𑀲𑁆𑀲𑀺𑀢𑁄, 𑀦 𑀅𑀪𑀺𑀯𑀸𑀤𑀦𑀲𑀤𑁆𑀤𑀢𑁆𑀣𑀁 𑀧𑀝𑀺𑀘𑁆𑀘 𑀯𑀤𑀸𑀧𑀦𑀢𑁆𑀣𑁄, 𑀢𑀲𑁆𑀫𑀸 ‘‘𑀅𑀪𑀺𑀯𑀸𑀤𑁂𑀢𑁆𑀯𑀸’’𑀢𑀺 𑀏𑀢𑁆𑀣𑀸𑀧𑀺 𑀯𑀦𑁆𑀤𑀦𑀣𑁄𑀫𑀦𑀢𑁆𑀣𑀸𑀬𑁂𑀯 𑀇𑀘𑁆𑀙𑀺𑀢𑀩𑁆𑀩𑀸, 𑀦 𑀯𑀤𑀸𑀧𑀦𑀢𑁆𑀣𑁄.

𑀅𑀣𑀸𑀧𑀺 𑀲𑀺𑀬𑀸 ‘‘𑀯𑀦𑁆𑀤𑁂’𑀢𑀺 𑀧𑀤𑁂 𑀓𑀸𑀭𑀺𑀢𑀧𑀘𑁆𑀘𑀬𑁄 𑀦𑀢𑁆𑀣𑀺, ‘𑀅𑀪𑀺𑀯𑀸𑀤𑁂𑀢𑁆𑀯𑀸’𑀢𑀺 𑀇𑀫𑀲𑁆𑀫𑀺𑀁 𑀧𑀦 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑀢𑁆𑀣 𑀯𑀤𑀸𑀧𑀦𑀢𑁆𑀣𑁄 𑀦 𑀮𑀩𑁆𑀪𑀢𑀺, 𑀇𑀥 𑀧𑀦 𑀮𑀩𑁆𑀪𑀢𑀻’’𑀢𑀺. 𑀢𑀦𑁆𑀦, ‘‘𑀓𑀭𑁄𑀢𑀻’’𑀢𑀺𑀲𑀼𑀤𑁆𑀥𑀓𑀢𑁆𑀢𑀼𑀧𑀤𑀲𑁆𑀲𑀧𑀺 ‘‘𑀦𑀺𑀧𑁆𑀨𑀸𑀤𑁂𑀢𑀻’’𑀢𑀺 𑀳𑁂𑀢𑀼𑀓𑀢𑁆𑀢𑀼𑀧𑀤𑀯𑀲𑁂𑀦 𑀯𑀺𑀯𑀭𑀡𑀲𑁆𑀲 𑀯𑀺𑀬 ‘‘𑀯𑀦𑁆𑀤𑁂’’𑀢𑀺 𑀧𑀤𑀲𑁆𑀲𑀧𑀺 ‘‘𑀲𑀼𑀔𑀻 𑀅𑀭𑁄𑀕𑁄 𑀳𑁄𑀢𑀽’𑀢𑀺 𑀯𑀤𑀸𑀧𑁂𑀢𑁆𑀯𑀸’’𑀢𑀺 𑀯𑀺𑀯𑀭𑀡𑀲𑁆𑀲 𑀯𑀢𑁆𑀢𑀩𑁆𑀩𑀢𑁆𑀢𑀸. ‘‘𑀅𑀪𑀺𑀯𑀸𑀤𑁂𑀢𑁆𑀯𑀸’’𑀢𑀺 𑀇𑀤𑀜𑁆𑀘 ‘‘𑀯𑀦𑁆𑀤𑁂’’𑀢𑀺 𑀧𑀤𑀫𑀺𑀯 𑀓𑀸𑀭𑀺𑀢𑀧𑀘𑁆𑀘𑀬𑀦𑁆𑀢𑀁 𑀦 𑀳𑁄𑀢𑀺. 𑀓𑀲𑁆𑀫𑀸𑀢𑀺 𑀘𑁂? 𑀬𑀲𑁆𑀫𑀸 ‘‘𑀘𑀺𑀦𑁆𑀢𑁂𑀢𑀺, 𑀘𑀺𑀦𑁆𑀢𑀬𑀢𑀺. 𑀫𑀦𑁆𑀢𑁂𑀢𑀺, 𑀫𑀦𑁆𑀢𑀬𑀢𑀻’’𑀢𑀺𑀆𑀤𑀻𑀦𑀁 𑀘𑀼𑀭𑀸𑀤𑀺𑀕𑀡𑀺𑀓𑀸𑀦𑀁 𑀲𑀼𑀤𑁆𑀥𑀓𑀢𑁆𑀢𑀼𑀧𑀤𑀸𑀦𑀁 ‘‘𑀘𑀺𑀦𑁆𑀢𑀸𑀧𑁂𑀢𑀺, 𑀘𑀺𑀦𑁆𑀢𑀸𑀧𑀬𑀢𑀻’’𑀢𑀺𑀆𑀤𑀻𑀦𑀺𑀬𑁂𑀯 𑀳𑁂𑀢𑀼𑀓𑀢𑁆𑀢𑀼𑀧𑀤𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀬𑀤𑀺 𑀳𑁂𑀢𑀼𑀓𑀢𑁆𑀢𑀼𑀧𑀤𑀁 𑀅𑀥𑀺𑀧𑁆𑀧𑁂𑀢𑀁 𑀲𑀺𑀬𑀸, ‘‘𑀅𑀪𑀺𑀯𑀸𑀤𑀸𑀧𑁂𑀢𑁆𑀯𑀸’’𑀢𑀺 𑀯𑀸 ‘‘𑀅𑀪𑀺𑀯𑀸𑀤𑀸𑀧𑀬𑀺𑀢𑁆𑀯𑀸’’𑀢𑀺 𑀯𑀸 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀬𑀲𑁆𑀫𑀸 𑀧𑀦𑁂𑀯𑀁 𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀁 𑀓𑀸𑀭𑀺𑀢𑀧𑀘𑁆𑀘𑀬𑀦𑁆𑀢𑀁 𑀦 𑀳𑁄𑀢𑀻𑀢𑀺 𑀲𑀺𑀤𑁆𑀥𑀁.

𑀇𑀫𑀲𑁆𑀲𑀢𑁆𑀣𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀸𑀝𑁆𑀞𑀓𑀣𑀁 𑀯𑀺𑀥𑀼𑀭𑀚𑀸𑀢𑀓𑀧𑁆𑀧𑀤𑁂𑀲𑀁 𑀯𑀤𑀸𑀫.

‘‘𑀓𑀣𑀁 𑀦𑁄 𑀅𑀪𑀺𑀯𑀸𑀤𑁂𑀬𑁆𑀬, 𑀅𑀪𑀺𑀯𑀸𑀤𑀸𑀧𑀬𑁂𑀣 𑀯𑁂;

𑀬𑀁 𑀦𑀭𑁄 𑀳𑀦𑁆𑀢𑀼𑀫𑀺𑀘𑁆𑀙𑁂𑀬𑁆𑀬, 𑀢𑀁 𑀓𑀫𑁆𑀫𑀁 𑀦𑀼𑀧𑀧𑀚𑁆𑀚𑀢𑀻’’𑀢𑀺

𑀅𑀬𑀁 𑀢𑀸𑀯 𑀚𑀸𑀢𑀓𑀧𑀸𑀴𑀺. 𑀅𑀬𑀁 𑀧𑀦 𑀅𑀝𑁆𑀞𑀓𑀣𑀸𑀧𑀸𑀞𑁄 ‘‘𑀬𑀜𑁆𑀳𑀺 𑀦𑀭𑁄 𑀳𑀦𑁆𑀢𑀼𑀫𑀺𑀘𑁆𑀙𑁂𑀬𑁆𑀬, 𑀲𑁄 𑀢𑀁 𑀓𑀣𑀁 𑀦𑀼 𑀅𑀪𑀺𑀯𑀸𑀤𑁂𑀬𑁆𑀬, 𑀓𑀣𑀁 𑀯𑀸 ¶ 𑀢𑁂𑀦 𑀅𑀢𑁆𑀢𑀸𑀦𑀁 𑀅𑀪𑀺𑀯𑀸𑀤𑀸𑀧𑀬𑁂𑀣 𑀯𑁂. 𑀢𑀲𑁆𑀲 𑀳𑀺 𑀢𑀁 𑀓𑀫𑁆𑀫𑀁 𑀦 𑀉𑀧𑀧𑀚𑁆𑀚𑀢𑀻’’𑀢𑀺. 𑀢𑀢𑁆𑀣 𑀧𑀸𑀴𑀺𑀬𑀁 𑀅𑀪𑀺𑀯𑀸𑀤𑁂𑀬𑁆𑀬𑀸𑀢𑀺 𑀲𑀼𑀤𑁆𑀥𑀓𑀢𑁆𑀢𑀼𑀧𑀤𑀁 𑀢𑀩𑁆𑀩𑀸𑀘𑀓𑀢𑁆𑀢𑀸. 𑀅𑀪𑀺𑀯𑀸𑀤𑀸𑀧𑀬𑁂𑀣 𑀯𑁂𑀢𑀺 𑀳𑁂𑀢𑀼𑀓𑀢𑁆𑀢𑀼𑀧𑀤𑀁 𑀢𑀩𑁆𑀩𑀸𑀘𑀓𑀢𑁆𑀢𑀸. 𑀏𑀯𑀁 𑀯𑀺𑀪𑀸𑀕𑀁 𑀧𑀦 𑀜𑀢𑁆𑀯𑀸 𑀧𑀸𑀴𑀺𑀬𑀸 𑀅𑀝𑁆𑀝𑀓𑀣𑀸𑀬 𑀘 𑀅𑀥𑀺𑀧𑁆𑀧𑀸𑀬𑁄 𑀕𑀳𑁂𑀢𑀩𑁆𑀩𑁄 ‘‘𑀦𑀭𑁄 𑀬𑀁 𑀧𑀼𑀕𑁆𑀕𑀮𑀁 𑀳𑀦𑁆𑀢𑀼𑀁 𑀇𑀘𑁆𑀙𑁂𑀬𑁆𑀬, 𑀲𑁄 𑀳𑀦𑁆𑀢𑀸 𑀢𑀁 𑀯𑀚𑁆𑀛𑀁 𑀧𑀼𑀕𑁆𑀕𑀮𑀁 𑀓𑀣𑀁 𑀦𑀼 𑀅𑀪𑀺𑀯𑀸𑀤𑁂𑀬𑁆𑀬, 𑀲𑁄 𑀯𑀸 𑀳𑀦𑁆𑀢𑀸, 𑀢𑁂𑀦 𑀯𑀚𑁆𑀛𑁂𑀦 𑀫𑀁 𑀯𑀦𑁆𑀤𑀸𑀳𑀻𑀢𑀺 𑀅𑀢𑁆𑀢𑀸𑀦𑀁 𑀓𑀣𑀁 𑀯𑀦𑁆𑀤𑀸𑀧𑁂𑀬𑁆𑀬𑀸’’𑀢𑀺. 𑀏𑀢𑁆𑀣 𑀧𑀦 ‘‘𑀭𑀸𑀚𑀸𑀦𑁄 𑀘𑁄𑀭𑀁 𑀲𑀼𑀦𑀔𑁂𑀳𑀺𑀧𑀺 𑀔𑀸𑀤𑀸𑀧𑁂𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀓𑀭𑀡𑀯𑀲𑁂𑀦 ‘‘𑀢𑁂𑀦 𑀯𑀚𑁆𑀛𑁂𑀦𑀸’’𑀢𑀺 𑀧𑀤𑀁 𑀬𑁄𑀚𑀺𑀢𑀁, 𑀅𑀢𑁆𑀣𑁄 𑀧𑀦 ‘‘𑀢𑀁 𑀯𑀚𑁆𑀛’’𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀯𑀲𑁂𑀦 𑀤𑀝𑁆𑀞𑀩𑁆𑀩𑁄 𑀤𑁆𑀯𑀺𑀓𑀫𑁆𑀫𑀓𑀢𑁆𑀢𑀸 𑀲𑀓𑀸𑀭𑀺𑀢𑀧𑀘𑁆𑀘𑀬𑀲𑁆𑀲 𑀲𑀓𑀫𑁆𑀫𑀓𑀥𑀸𑀢𑀼𑀬𑀸𑀢𑀺. 𑀦𑀦𑀼 𑀏𑀯𑀁 𑀲𑀦𑁆𑀢𑁂 ‘‘𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀧𑀲𑁆𑀲𑀺𑀢𑀩𑁆𑀩𑀁 𑀦 𑀧𑀲𑁆𑀲𑀦𑁆𑀢𑀺, 𑀅𑀢𑀺𑀢𑁆𑀣𑁂 𑀧𑀓𑁆𑀔𑀦𑁆𑀤𑀦𑁆𑀢𑀻’’𑀢𑀺 𑀢𑁂𑀲𑀁 𑀤𑁄𑀲𑁄 𑀳𑁄𑀢𑀻𑀢𑀺? 𑀦 𑀳𑁄𑀢𑀺, 𑀲𑀼𑀡𑀸𑀣 𑀅𑀲𑁆𑀫𑀸𑀓𑀁 𑀲𑁄𑀥𑀦𑀁, 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 ‘‘𑀅𑀪𑀺𑀯𑀸𑀤𑁂𑀢𑁆𑀯𑀸’’𑀢𑀺 𑀏𑀢𑁆𑀣 ‘‘𑀯𑀤𑀻 𑀅𑀪𑀺𑀯𑀸𑀤𑀦𑀣𑀼𑀢𑀻𑀲𑀽’’𑀢𑀺 𑀥𑀸𑀢𑀼𑀬𑀸 𑀅𑀢𑁆𑀣𑀫𑀕𑁆𑀕𑀳𑁂𑀢𑁆𑀯𑀸 𑀯𑁄𑀳𑀸𑀭𑀯𑀺𑀲𑀬𑁂 𑀓𑁄𑀲𑀮𑁆𑀮𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀡𑁆𑀳𑀲𑀼𑀔𑀼𑀫𑀫𑀢𑁆𑀣𑀁 𑀲𑁄𑀢𑀽𑀦𑀁 𑀩𑁄𑀥𑁂𑀢𑀼𑀁 ‘‘𑀯𑀤 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬’’𑀦𑁆𑀢𑀺 𑀥𑀸𑀢𑀼𑀬𑁂𑀯𑀢𑁆𑀣𑀁 𑀕𑀳𑁂𑀢𑁆𑀯𑀸 𑀓𑀸𑀭𑀺𑀢𑀧𑀘𑁆𑀘𑀬𑀧𑀭𑀺𑀓𑀧𑁆𑀧𑀦𑁂𑀦 𑀓𑀸𑀭𑀺𑀢𑀢𑁆𑀣𑀫𑀸𑀤𑀸𑀬 ‘‘𑀅𑀪𑀺𑀯𑀸𑀤𑁂𑀢𑁆𑀯𑀸𑀢𑀺 ‘𑀲𑀼𑀔𑀻 𑀅𑀭𑁄𑀕𑁄 𑀳𑁄𑀢𑀽’𑀢𑀺 𑀯𑀤𑀸𑀧𑁂𑀢𑁆𑀯𑀸, 𑀯𑀦𑁆𑀤𑀦𑁆𑀢𑁄 𑀳𑀺 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀸𑀧𑁂𑀢𑀺 𑀦𑀸𑀫𑀸’’𑀢𑀺 𑀳𑁂𑀢𑀼𑀓𑀢𑁆𑀢𑀼𑀯𑀲𑁂𑀦 𑀅𑀪𑀺𑀯𑀸𑀤𑀦𑀲𑀤𑁆𑀤𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀦 𑀓𑁄𑀘𑀺 𑀢𑁂𑀲𑀁 𑀤𑁄𑀲𑁄. 𑀧𑀽𑀚𑀸𑀭𑀳𑀸 𑀳𑀺 𑀢𑁂 𑀆𑀬𑀲𑁆𑀫𑀦𑁆𑀢𑁄, 𑀦𑀫𑁄𑀬𑁂𑀯 𑀢𑁂𑀲𑀁 𑀓𑀭𑁄𑀫, 𑀇𑀤𑀫𑁆𑀧𑀺 𑀞𑀸𑀦𑀁 𑀲𑀼𑀔𑀼𑀫𑀁 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀓𑀭𑁄𑀢𑁄 𑀧𑀜𑁆𑀜𑀸 𑀯𑀟𑁆𑀠𑀢𑀻𑀢𑀺.

𑀤𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀥𑀓𑀸𑀭𑀦𑁆𑀢𑀥𑀸𑀢𑀼

𑀭𑀦𑁆𑀥 ¶ 𑀧𑀸𑀓𑁂. 𑀲𑀽𑀤𑁄 𑀪𑀢𑁆𑀢𑀁 𑀭𑀦𑁆𑀥𑁂𑀢𑀺, 𑀭𑀦𑁆𑀥𑀬𑀢𑀺. 𑀓𑀸𑀓𑀁 𑀲𑁄𑀓𑀸𑀬 𑀭𑀦𑁆𑀥𑁂𑀳𑀺. 𑀭𑀦𑁆𑀥𑀓𑁄. 𑀲𑀽𑀤𑁂𑀦 𑀑𑀤𑀦𑁄 𑀭𑀦𑁆𑀥𑀺𑀬𑀢𑀺. 𑀭𑀦𑁆𑀥𑀺𑀢𑁄. 𑀭𑀦𑁆𑀥𑀦𑀁. 𑀧𑀼𑀭𑀺𑀲𑁄 𑀲𑀽𑀤𑀁 𑀲𑀽𑀤𑁂𑀦 𑀯𑀸 𑀑𑀤𑀦𑀁 𑀭𑀦𑁆𑀥𑀸𑀧𑁂𑀢𑀺, 𑀭𑀦𑁆𑀥𑀸𑀧𑀬𑀢𑀺. 𑀭𑀦𑁆𑀥𑁂𑀢𑀼𑀁, 𑀭𑀦𑁆𑀥𑀬𑀺𑀢𑀼𑀁. 𑀭𑀦𑁆𑀥𑀺𑀢𑁆𑀯𑀸, 𑀭𑀦𑁆𑀥𑀬𑀺𑀢𑁆𑀯𑀸, 𑀭𑀦𑁆𑀥𑀺𑀬 𑀇𑀘𑁆𑀘𑀸𑀤𑀻𑀦𑀺.

𑀥𑀽 𑀓𑀫𑁆𑀧𑀦𑁂. 𑀥𑀸𑀯𑁂𑀢𑀺, 𑀥𑀸𑀯𑀬𑀢𑀺.

𑀕𑀦𑁆𑀥 𑀲𑀽𑀘𑀦𑁂 𑀅𑀤𑁆𑀤𑀦𑁂 𑀘. 𑀲𑀽𑀘𑀦𑀁. 𑀧𑀓𑀸𑀲𑀦𑀁. 𑀅𑀤𑁆𑀤𑀦𑀁 𑀧𑀭𑀺𑀧𑁆𑀮𑀼𑀢𑀸. 𑀕𑀦𑁆𑀥𑁂𑀢𑀺, 𑀕𑀦𑁆𑀥𑀬𑀢𑀺, 𑀕𑀦𑁆𑀥𑁄.

𑀏𑀢𑁆𑀣 𑀕𑀦𑁆𑀥𑁄𑀢𑀺 𑀕𑀦𑁆𑀥𑁂𑀢𑀺 𑀅𑀢𑁆𑀢𑀦𑁄 𑀯𑀢𑁆𑀣𑀼𑀁 𑀲𑀽𑀘𑀬𑀢𑀺 𑀧𑀓𑀸𑀲𑁂𑀢𑀻𑀢𑀺 𑀕𑀦𑁆𑀥𑁄. 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀧𑀼𑀧𑁆𑀨𑀨𑀮𑀸𑀤𑀺𑀁 ‘‘𑀇𑀤𑀫𑁂𑀢𑁆𑀣 𑀅𑀢𑁆𑀣𑀻’’𑀢𑀺 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀦𑁆𑀢𑁄 𑀯𑀺𑀬 𑀧𑀓𑀸𑀲𑁂𑀢𑀻𑀢𑀺 𑀕𑀦𑁆𑀥𑁄. 𑀕𑀫𑀼𑀥𑀭𑀥𑀸𑀢𑀼𑀤𑁆𑀯𑀬𑀯𑀲𑁂𑀦𑀧𑀺 𑀕𑀦𑁆𑀥𑀲𑀤𑁆𑀤𑀢𑁆𑀣𑁄 𑀯𑀢𑁆𑀢𑀩𑁆𑀩𑁄 ‘‘𑀕𑀘𑁆𑀙𑀦𑁆𑀢𑁄 𑀥𑀭𑀺𑀬𑀢𑀻𑀢𑀺 𑀕𑀦𑁆𑀥𑁄’’ 𑀇𑀢𑀺, 𑀆𑀳 𑀘 ‘‘𑀕𑀘𑁆𑀙𑀦𑁆𑀢𑁄 𑀥𑀭𑀺𑀬𑀢𑀻𑀢𑀺 𑀕𑀦𑁆𑀥𑁄, 𑀲𑀽𑀘𑀦𑀢𑁄𑀧𑀺 𑀯𑀸’’𑀢𑀺. 𑀕𑀦𑁆𑀥𑀲𑀤𑁆𑀤𑁄 𑀘 ‘‘𑀉𑀧𑁆𑀧𑀮𑀕𑀦𑁆𑀥𑀣𑁂𑀦𑁄’’𑀢𑀺 𑀏𑀢𑁆𑀣 𑀙𑁂𑀤𑀦𑁂 𑀯𑀢𑁆𑀢𑀢𑀻𑀢𑀺 𑀤𑀝𑁆𑀞𑀩𑁆𑀩𑁄.

𑀯𑀥 𑀲𑀁𑀬𑀫𑁂. 𑀯𑀥𑁂𑀢𑀺, 𑀯𑀥𑀬𑀢𑀺.

𑀩𑀼𑀥𑀺 𑀳𑀺𑀁𑀲𑀸𑀬𑀁. 𑀩𑀼𑀦𑁆𑀥𑁂𑀢𑀺, 𑀩𑀼𑀦𑁆𑀥𑀬𑀢𑀺. 𑀧𑀮𑀺𑀩𑀼𑀦𑁆𑀥𑁂𑀢𑀺, 𑀧𑀮𑀺𑀩𑀼𑀦𑁆𑀥𑀬𑀢𑀺. 𑀧𑀮𑀺𑀩𑁄𑀥𑁄, 𑀧𑀭𑀺𑀲𑀤𑁆𑀤𑁄 𑀉𑀧𑀲𑀕𑁆𑀕𑁄, 𑀲𑁄 𑀯𑀺𑀓𑀸𑀭𑀯𑀲𑁂𑀦 𑀅𑀜𑁆𑀜𑀣𑀸 𑀚𑀸𑀢𑁄. 𑀢𑀢𑁆𑀣 𑀧𑀮𑀺𑀩𑁄𑀥𑁄𑀢𑀺 𑀆𑀯𑀸𑀲𑀧𑀮𑀺𑀩𑁄𑀥𑀸𑀤𑀺. 𑀅𑀧𑀺𑀘 𑀧𑀮𑀺𑀩𑁄𑀥𑁄𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀢𑁆𑀢𑀬𑀜𑁆𑀘.

𑀯𑀤𑁆𑀥 𑀙𑁂𑀤𑀦𑀧𑀽𑀭𑀡𑁂𑀲𑀼. 𑀯𑀤𑁆𑀥𑁂𑀢𑀺, 𑀯𑀤𑁆𑀥𑀬𑀢𑀺. 𑀯𑀤𑁆𑀥𑀓𑀻. 𑀯𑀤𑁆𑀥𑀓𑀻𑀢𑀺 𑀕𑀳𑀓𑀸𑀭𑀓𑁄.

𑀕𑀤𑁆𑀥 𑀅𑀪𑀺𑀓𑀗𑁆𑀔𑀸𑀬𑀁. 𑀕𑀤𑁆𑀥𑁂𑀢𑀺, 𑀕𑀤𑁆𑀥𑀬𑀢𑀺. 𑀕𑀤𑁆𑀥𑁄. 𑀕𑀤𑁆𑀥𑁄𑀢𑀺 𑀕𑀺𑀚𑁆𑀛𑁄. ‘‘𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄’’𑀢𑀺 𑀇𑀤𑀫𑁂𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀲𑀥𑀼 ¶ 𑀧𑀳𑀁𑀲𑀦𑁂. 𑀲𑀥𑁂𑀢𑀺, 𑀲𑀥𑀬𑀢𑀺.

𑀯𑀤𑁆𑀥 𑀪𑀸𑀲𑀸𑀬𑀁. 𑀯𑀤𑁆𑀥𑁂𑀢𑀺, 𑀯𑀤𑁆𑀥𑀬𑀢𑀺.

𑀅𑀦𑁆𑀥 𑀤𑀺𑀝𑁆𑀞𑀽𑀧𑀲𑀁𑀳𑀸𑀭𑁂. 𑀤𑀺𑀝𑁆𑀞𑀽𑀧𑀲𑀁𑀳𑀸𑀭𑁄 𑀦𑀸𑀫 𑀘𑀓𑁆𑀔𑀼𑀲𑀜𑁆𑀜𑀺𑀢𑀸𑀬 𑀤𑀺𑀝𑁆𑀞𑀺𑀬𑀸 𑀉𑀧𑀲𑀁𑀳𑀸𑀭𑁄 𑀅𑀧𑀦𑀬𑀦𑀁 𑀯𑀺𑀦𑀸𑀲𑁄 𑀯𑀸. 𑀘𑀓𑁆𑀔𑀼 𑀳𑀺 𑀧𑀲𑁆𑀲𑀦𑁆𑀢𑀺 𑀏𑀢𑀸𑀬𑀸𑀢𑀺 𑀤𑀺𑀝𑁆𑀞𑀻𑀢𑀺 𑀯𑀼𑀘𑁆𑀘𑀢𑀺. 𑀬𑀁 𑀲𑀦𑁆𑀥𑀸𑀬 𑀅𑀝𑁆𑀞𑀓𑀣𑀸𑀲𑀼 ‘‘𑀲𑀲𑀫𑁆𑀪𑀸𑀭𑀘𑀓𑁆𑀔𑀼𑀦𑁄 𑀲𑁂𑀢𑀫𑀡𑁆𑀟𑀮𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀓𑀡𑁆𑀳𑀫𑀡𑁆𑀟𑀮𑀲𑁆𑀲 𑀫𑀚𑁆𑀛𑁂 𑀅𑀪𑀺𑀫𑀼𑀔𑀁 𑀞𑀺𑀢𑀸𑀦𑀁 𑀲𑀭𑀻𑀭𑀲𑀡𑁆𑀞𑀸𑀦𑀼𑀧𑁆𑀧𑀢𑁆𑀢𑀺𑀤𑁂𑀲𑀪𑀽𑀢𑁂 𑀤𑀺𑀝𑁆𑀞𑀺𑀫𑀡𑁆𑀟𑀮𑁂’’𑀢𑀺 𑀯𑀼𑀢𑁆𑀢𑀁. 𑀝𑀻𑀓𑀸𑀬𑀫𑁆𑀧𑀺 𑀘 ‘‘𑀤𑀺𑀝𑁆𑀞𑀺𑀫𑀡𑁆𑀟𑀮𑁂𑀢𑀺 𑀅𑀪𑀺𑀫𑀼𑀔𑀝𑁆𑀞𑀺𑀢𑀸𑀦𑀁 𑀲𑀭𑀻𑀭𑀲𑀡𑁆𑀞𑀸𑀦𑀼𑀧𑁆𑀧𑀢𑁆𑀢𑀺𑀤𑁂𑀲𑀪𑀽𑀢𑁂 𑀘𑀓𑁆𑀔𑀼𑀲𑀜𑁆𑀜𑀺𑀢𑀸𑀬 𑀤𑀺𑀝𑁆𑀞𑀺𑀬𑀸 𑀫𑀡𑁆𑀟𑀮𑁂’’𑀢𑀺 𑀯𑀼𑀢𑁆𑀢𑀁. 𑀏𑀯𑀁𑀪𑀽𑀢𑀸𑀬 𑀤𑀺𑀝𑁆𑀞𑀺𑀬𑀸 𑀉𑀧𑀲𑀁𑀳𑀸𑀭𑁂 𑀅𑀦𑁆𑀥𑀥𑀸𑀢𑀼 𑀯𑀢𑁆𑀢𑀢𑀺. 𑀅𑀦𑁆𑀥𑁂𑀢𑀺, 𑀅𑀦𑁆𑀥𑀬𑀢𑀺. 𑀘𑀓𑁆𑀔𑀽𑀦𑀺 𑀅𑀦𑁆𑀥𑀬𑀺𑀁𑀲𑀼, 𑀅𑀦𑁆𑀥𑁄. 𑀅𑀦𑁆𑀥𑁄𑀢𑀺 𑀅𑀦𑁆𑀥𑁂𑀢𑀻𑀢𑀺 𑀅𑀦𑁆𑀥𑁄. 𑀤𑁆𑀯𑀺𑀦𑁆𑀦𑀁 𑀘𑀓𑁆𑀔𑀽𑀦𑀁 𑀏𑀓𑀲𑁆𑀲 𑀯𑀸 𑀯𑀲𑁂𑀦 𑀦𑀝𑁆𑀞𑀦𑀬𑀦𑁄, 𑀏𑀯𑀫𑀺𑀥 𑀅𑀦𑁆𑀥𑀥𑀸𑀢𑀼 𑀯𑀼𑀢𑁆𑀢𑁄. 𑀓𑀘𑁆𑀘𑀸𑀬𑀦𑁂 𑀧𑀦 ‘‘𑀔𑀸𑀤𑀸𑀫𑀕𑀫𑀸𑀦𑀁 𑀔𑀦𑁆𑀥𑀦𑁆𑀥𑀕𑀦𑁆𑀥𑀸’’𑀢𑀺 𑀯𑀘𑀦𑁂𑀦 𑀅𑀫𑀥𑀸𑀢𑀼𑀲𑁆𑀲 𑀅𑀦𑁆𑀥𑀸𑀤𑁂𑀲𑀓𑀭𑀡𑀯𑀲𑁂𑀦 𑀭𑀽𑀧𑀦𑀺𑀧𑁆𑀨𑀢𑁆𑀢𑀺 𑀤𑀲𑁆𑀲𑀺𑀢𑀸.

𑀩𑀥 𑀩𑀦𑁆𑀥𑀦𑁂. 𑀫𑀺𑀕𑀁 𑀩𑀸𑀥𑁂𑀢𑀺, 𑀩𑀸𑀥𑀬𑀢𑀺. 𑀩𑀤𑁆𑀥𑁄 𑀫𑀺𑀕𑁄, 𑀩𑀤𑁆𑀥𑁄𑀲𑀺 𑀫𑀸𑀭𑀧𑀸𑀲𑁂𑀦.

𑀢𑀢𑁆𑀣 𑀩𑀸𑀥𑁂𑀢𑀻𑀢𑀺 𑀩𑀦𑁆𑀥𑀢𑀻𑀢𑀺 𑀲𑀼𑀤𑁆𑀥𑀓𑀢𑁆𑀢𑀼𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀏𑀯𑀁 𑀩𑀸𑀥𑀬𑀢𑀻𑀢𑀺 𑀏𑀢𑁆𑀣𑀸𑀧𑀺. 𑀢𑀣𑀸 𑀳𑀺 ‘‘𑀯𑀸𑀢𑀁 𑀚𑀸𑀮𑁂𑀦 𑀩𑀸𑀥𑁂𑀲𑀺, 𑀬𑁄 𑀅𑀦𑀺𑀘𑁆𑀙𑀦𑁆𑀢𑀺𑀫𑀺𑀘𑁆𑀙𑀲𑀻’’𑀢𑀺 𑀏𑀢𑁆𑀣 𑀩𑀸𑀥𑁂𑀲𑀻𑀢𑀺 𑀩𑀦𑁆𑀥𑀲𑀻𑀢𑀺 𑀲𑀼𑀤𑁆𑀥𑀓𑀢𑁆𑀢𑀼𑀯𑀲𑁂𑀦 𑀅𑀢𑁆𑀣𑁄. 𑀪𑀽𑀯𑀸𑀤𑀺𑀕𑀡𑁂 𑀧𑀦 ‘‘𑀩𑀸𑀥 𑀩𑀤𑁆𑀥𑀸𑀬’’𑀦𑁆𑀢𑀺 𑀩𑀸𑀥𑀥𑀸𑀢𑀼𑀲𑁆𑀲 𑀯𑀲𑁂𑀦 ‘‘𑀩𑀸𑀥𑀢𑀻’’𑀢𑀺 𑀓𑀢𑁆𑀢𑀼𑀧𑀤𑀁 ‘‘𑀩𑀸𑀥𑁂𑀢𑀺, 𑀩𑀸𑀥𑀬𑀢𑀻’’𑀢𑀺 𑀳𑁂𑀢𑀼𑀓𑀢𑁆𑀢𑀼𑀧𑀤𑀁 𑀪𑀯𑀢𑀺. 𑀩𑀤𑁆𑀥𑁄𑀢𑀺 𑀩𑀸𑀥𑀺𑀬𑀢𑁂 𑀩𑀦𑁆𑀥𑀺𑀬𑀢𑁂 𑀲𑁄𑀢𑀺 𑀩𑀤𑁆𑀥𑁄.

𑀥𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀦𑀓𑀸𑀭𑀦𑁆𑀢𑀥𑀸𑀢𑀼

𑀫𑀸𑀦 ¶ 𑀧𑀽𑀚𑀸𑀬𑀁 𑀧𑁂𑀫𑀦𑁂 𑀯𑀻𑀫𑀁𑀲𑀸𑀬𑀁. 𑀫𑀸𑀦𑁂𑀢𑀺, 𑀫𑀸𑀦𑀬𑀢𑀺. 𑀫𑀸𑀢𑀸. 𑀯𑀺𑀫𑀸𑀦𑁂𑀢𑀺, 𑀯𑀺𑀫𑀸𑀦𑀬𑀢𑀺, 𑀧𑀝𑀺𑀫𑀸𑀦𑁂𑀢𑀺, 𑀧𑀝𑀺𑀫𑀸𑀦𑀬𑀢𑀺. 𑀫𑀸𑀦𑀦𑀸, 𑀲𑀫𑁆𑀫𑀸𑀦𑀦𑀸, 𑀯𑀺𑀫𑀸𑀦𑀦𑀸, 𑀯𑀺𑀫𑀸𑀦𑀁, 𑀯𑀺𑀫𑀸𑀦𑀦𑀁, 𑀫𑀸𑀦𑀺𑀢𑁄.

𑀅𑀫𑀸𑀦𑀦𑀸 𑀬𑀢𑁆𑀣 𑀲𑀦𑁆𑀢𑁄, 𑀲𑀦𑁆𑀢𑀸𑀦𑀁 𑀯𑀸 𑀯𑀺𑀫𑀸𑀦𑀦𑀸;

𑀳𑀻𑀦𑀲𑀫𑁆𑀫𑀸𑀦𑀦𑀸 𑀯𑀸𑀧𑀺, 𑀦 𑀢𑀢𑁆𑀣 𑀯𑀲𑀢𑀺𑀁 𑀯𑀲𑁂.

𑀯𑀻𑀫𑀁𑀲𑀢𑀺, 𑀯𑀻𑀫𑀁𑀲𑀸, 𑀯𑀻𑀫𑀁𑀲𑀺𑀬𑀢𑀻𑀢𑀺 𑀯𑀻𑀫𑀁𑀲𑀺𑀬𑀫𑀸𑀦𑁄. 𑀯𑀻𑀫𑀁𑀲𑀦𑁆𑀢𑁄.

𑀢𑀢𑁆𑀣 𑀫𑀸𑀦𑁂𑀢𑀻𑀢𑀺 𑀧𑀽𑀚𑁂𑀢𑀺, 𑀅𑀝𑁆𑀞𑀓𑀣𑀸𑀲𑀼 𑀧𑀦 ‘‘𑀫𑀸𑀦𑁂𑀦𑁆𑀢𑀻’’𑀢𑀺 𑀏𑀢𑀲𑁆𑀫𑀺𑀁 𑀞𑀸𑀦𑁂 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄 ‘‘𑀫𑀸𑀦𑁂𑀦𑁆𑀢𑀻𑀢𑀺 𑀫𑀦𑁂𑀦 𑀧𑀺𑀬𑀸𑀬𑀦𑁆𑀢𑀺. 𑀧𑀽𑀚𑁂𑀦𑁆𑀢𑀻𑀢𑀺 𑀧𑀘𑁆𑀘𑀬𑁂𑀳𑀺 𑀧𑀽𑀚𑁂𑀦𑁆𑀢𑀻’’𑀢𑀺. 𑀲𑁄 𑀯𑁂𑀯𑀘𑀦𑀢𑁆𑀣𑀧𑁆𑀧𑀓𑀸𑀲𑀦𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀕𑀳𑁂𑀢𑀩𑁆𑀩𑁄. 𑀫𑀸𑀦𑀦𑀧𑀽𑀚𑀦𑀲𑀤𑁆𑀤𑀸 𑀳𑀺 𑀧𑀭𑀺𑀬𑀸𑀬𑀲𑀤𑁆𑀤𑀢𑁆𑀢𑀸 𑀯𑁂𑀯𑀘𑀦𑀲𑀤𑁆𑀤𑀸 𑀏𑀯. 𑀯𑀺𑀫𑀸𑀦𑁂𑀢𑀻𑀢𑀺 𑀅𑀯𑀫𑀜𑁆𑀜𑀢𑀺. 𑀯𑀺𑀫𑀸𑀦𑀦𑁆𑀢𑀺 𑀲𑁄𑀪𑀸𑀯𑀺𑀲𑁂𑀲𑀬𑁄𑀕𑀢𑁄 𑀯𑀺𑀲𑀺𑀝𑁆𑀞𑀫𑀸𑀦𑀺𑀬𑀢𑀸𑀬 𑀯𑀺𑀫𑀸𑀦𑀁, 𑀯𑀺𑀲𑁂𑀲𑀢𑁄 𑀫𑀸𑀦𑁂𑀢𑀩𑁆𑀩𑀦𑁆𑀢𑀺 𑀳𑀺 𑀯𑀺𑀫𑀸𑀦𑀁, 𑀤𑁂𑀯𑀸𑀦𑀁 𑀯𑀲𑀦𑀝𑁆𑀞𑀸𑀦𑀪𑀽𑀢𑀁 𑀩𑁆𑀬𑀫𑁆𑀳𑀁.

𑀫𑀦 𑀣𑀫𑁆𑀪𑁂. 𑀣𑀫𑁆𑀪𑁄 𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀢𑀸. 𑀫𑀸𑀦𑁂𑀢𑀺, 𑀫𑀸𑀦𑀬𑀢𑀺. 𑀫𑀸𑀦𑁄.

𑀣𑀦 𑀤𑁂𑀯𑀲𑀤𑁆𑀤𑁂. 𑀤𑁂𑀯𑀲𑀤𑁆𑀤𑁄 𑀫𑁂𑀖𑀲𑀤𑁆𑀤𑁄, 𑀣𑀦𑁂𑀢𑀺, 𑀣𑀦𑀬𑀢𑀺.

𑀬𑀣𑀸𑀧𑀺 𑀫𑁂𑀖𑁄 𑀣𑀦𑀬𑀁, 𑀯𑀺𑀚𑁆𑀚𑀼𑀫𑀸𑀮𑀻 𑀲𑀢𑀓𑁆𑀓𑀓𑀼.

𑀣𑀮𑀁 𑀦𑀺𑀦𑁆𑀦𑀜𑁆𑀘 𑀧𑀽𑀭𑁂𑀢𑀺, 𑀅𑀪𑀺𑀯𑀲𑁆𑀲𑀁 𑀯𑀲𑀼𑀦𑁆𑀥𑀭𑀁.

𑀬𑀣𑀸 𑀧𑀸𑀯𑀼𑀲𑀓𑁄 𑀫𑁂𑀖𑁄, 𑀣𑀦𑀬𑀦𑁆𑀢𑁄 𑀲𑀯𑀺𑀚𑁆𑀚𑀼𑀓𑁄.

𑀊𑀦 𑀧𑀭𑀺𑀳𑀸𑀦𑀺𑀬𑀁. 𑀊𑀦𑁂𑀢𑀺, 𑀊𑀦𑀬𑀢𑀺. 𑀊𑀦𑁄 𑀮𑁄𑀓𑁄.

𑀥𑀦 𑀲𑀤𑁆𑀤𑁂. 𑀥𑀦𑁂𑀢𑀺, 𑀥𑀦𑀬𑀢𑀺, 𑀥𑀦𑀺𑀬𑁆𑀬𑀢𑀺. 𑀥𑀦𑀺, 𑀥𑀦𑀁.

𑀢𑀢𑁆𑀣 ¶ 𑀥𑀦𑀻𑀢𑀺 𑀲𑀤𑁆𑀤𑁄. 𑀥𑀦𑀦𑁆𑀢𑀺 𑀲𑀦𑁆𑀢𑀓𑀁, 𑀢𑀜𑁆𑀳𑀺 𑀫𑀫 𑀇𑀤𑀦𑁆𑀢𑀺 𑀥𑀦𑀸𑀬𑀺𑀢𑀩𑁆𑀩𑀁 𑀲𑀤𑁆𑀤𑀸𑀬𑀺𑀢𑀩𑁆𑀩𑀦𑁆𑀢𑀺 𑀥𑀦𑀦𑁆𑀢𑀺. 𑀅𑀬𑀁 𑀧𑀦 𑀥𑀸𑀢𑀼 𑀇𑀘𑁆𑀙𑀸𑀬𑀫𑁆𑀧𑀺 𑀯𑀢𑁆𑀢𑀢𑀺. ‘‘𑀫𑀸𑀢𑀸 𑀳𑀺 𑀢𑀯 𑀇𑀭𑀦𑁆𑀥𑀢𑀺, 𑀯𑀺𑀥𑀽𑀭𑀲𑁆𑀲 𑀳𑀤𑀬𑀁 𑀥𑀦𑀺𑀬𑁆𑀬𑀢𑀻’’𑀢𑀺 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. 𑀢𑀢𑁆𑀣 𑀥𑀦𑀺𑀬𑁆𑀬𑀢𑀻𑀢𑀺 𑀧𑀢𑁆𑀣𑁂𑀢𑀺 𑀇𑀘𑁆𑀙𑀢𑀺.

𑀣𑁂𑀦 𑀘𑁄𑀭𑀺𑀬𑁂. 𑀘𑁄𑀭𑀲𑁆𑀲 𑀪𑀸𑀯𑁄 𑀘𑁄𑀭𑀺𑀬𑀁. 𑀬𑀣𑀸 𑀲𑀽𑀭𑀺𑀬𑀁, 𑀬𑀣𑀸 𑀘 𑀤𑀓𑁆𑀔𑀺𑀬𑀁. 𑀣𑁂𑀦𑁂𑀢𑀺, 𑀣𑁂𑀦𑀬𑀢𑀺. 𑀣𑁂𑀦𑁄, 𑀣𑁂𑀦𑁂𑀢𑁆𑀯𑀸.

𑀢𑀦𑀼 𑀲𑀤𑁆𑀤𑁄𑀧𑀢𑀸𑀧𑁂𑀲𑀼. 𑀢𑀸𑀦𑁂𑀢𑀺, 𑀢𑀸𑀦𑀬𑀢𑀺. 𑀇𑀥𑀸𑀬𑀁 𑀲𑀯𑀼𑀤𑁆𑀥𑀺𑀓𑀸. 𑀢𑀦𑀸𑀤𑀺𑀕𑀡𑁂 𑀯𑀺𑀢𑁆𑀣𑀸𑀭𑀢𑁆𑀣𑀯𑀲𑁂𑀦 ‘‘𑀢𑀦𑁄𑀢𑀺, 𑀢𑀦𑀼𑀢𑁂’’𑀢𑀺 𑀅𑀯𑀼𑀤𑁆𑀥𑀺𑀓𑀸.

𑀢𑀯𑀕𑁆𑀕𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀧𑀓𑀸𑀭𑀦𑁆𑀢𑀥𑀸𑀢𑀼

𑀜𑀧 𑀢𑁄𑀲𑀦𑀦𑀺𑀲𑀸𑀦𑁂𑀲𑀼. 𑀜𑀸𑀧𑁂𑀢𑀺, 𑀜𑀸𑀧𑀬𑀢𑀺, 𑀧𑀜𑁆𑀜𑀸𑀧𑁂𑀢𑀺, 𑀧𑀜𑁆𑀜𑀸𑀧𑀬𑀢𑀺, 𑀧𑀜𑁆𑀜𑀢𑁆𑀢𑀺.

𑀏𑀢𑁆𑀣 𑀘 𑀦𑀺𑀤𑁆𑀤𑁂𑀲𑁂 ‘‘𑀧𑀜𑁆𑀜𑀸𑀧𑁂𑀢𑀻’’𑀢𑀺 𑀧𑀤𑀁 𑀦𑀺𑀤𑀲𑁆𑀲𑀦𑀁. 𑀢𑀢𑁆𑀣 𑀧𑀜𑁆𑀜𑀸𑀧𑁂𑀢𑀻𑀢𑀺 𑀓𑀢𑀦𑀺𑀩𑁆𑀩𑀘𑀦𑁂𑀳𑀺 𑀯𑀸𑀓𑁆𑀬𑀸𑀯𑀬𑀯𑁂𑀳𑀺 𑀯𑀺𑀢𑁆𑀣𑀸𑀭𑀯𑀲𑁂𑀦 𑀦𑀺𑀭𑀯𑀲𑁂𑀲𑀢𑁄 𑀤𑁂𑀲𑀺𑀢𑁂𑀳𑀺 𑀯𑁂𑀦𑁂𑀬𑁆𑀬𑀸𑀦𑀁 𑀘𑀺𑀢𑁆𑀢𑀧𑀭𑀺𑀢𑁄𑀲𑀦𑀁 𑀩𑀼𑀤𑁆𑀥𑀺𑀦𑀺𑀲𑀸𑀦𑀜𑁆𑀘 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀧𑀧𑀼𑀩𑁆𑀩𑁄 𑀦𑀺𑀓𑁆𑀔𑀺𑀧𑀦𑁂. 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑀺, 𑀧𑀜𑁆𑀜𑀸𑀧𑀬𑀢𑀺. ‘‘𑀆𑀲𑀦𑀁 𑀧𑀜𑁆𑀜𑀧𑁂𑀢𑀻’’𑀢𑀺 𑀭𑀲𑁆𑀲𑀢𑁆𑀢𑀫𑁆𑀧𑀺 𑀤𑀺𑀲𑁆𑀲𑀢𑀺. 𑀅𑀫𑀢𑀲𑁆𑀲 𑀤𑁆𑀯𑀸𑀭𑀁 𑀧𑀜𑁆𑀜𑀧𑁂𑀢𑀺, 𑀧𑀜𑁆𑀜𑀸. 𑀓𑀸𑀭𑀺𑀢𑁂 ‘‘𑀧𑀼𑀭𑀺𑀲𑁄 𑀧𑀼𑀭𑀺𑀲𑁂𑀦 𑀆𑀲𑀦𑀁 𑀧𑀜𑁆𑀜𑀧𑀸𑀧𑁂𑀢𑀻’’𑀢𑀺 𑀏𑀓𑀫𑁂𑀯 𑀧𑀤𑀁. 𑀢𑀸𑀦𑀺 ‘‘𑀧𑀜𑁆𑀜𑀸𑀧𑁂𑀢𑀺, 𑀧𑀜𑁆𑀜𑀸𑀧𑀬𑀢𑀻’’𑀢𑀺 𑀭𑀽𑀧𑀸𑀦𑀺 𑀬𑀤𑀸 ‘‘𑀜𑀸 𑀅𑀯𑀩𑁄𑀥𑀦𑁂’’𑀢𑀺 𑀇𑀫𑀺𑀲𑁆𑀲𑀸 𑀭𑀽𑀧𑀸𑀦𑀺 𑀲𑀺𑀬𑀼𑀁, 𑀢𑀤𑀸 ¶ 𑀳𑁂𑀢𑀼𑀓𑀢𑁆𑀢𑀼𑀭𑀽𑀧𑀸𑀦𑀺 𑀪𑀯𑀦𑁆𑀢𑀺. 𑀏𑀢𑁆𑀣 𑀧𑀦 𑀲𑀼𑀤𑁆𑀥𑀓𑀢𑁆𑀢𑀼𑀭𑀽𑀧𑀸𑀦𑀺 𑀢𑀩𑁆𑀩𑀸𑀘𑀓𑀢𑁆𑀢𑀸.

𑀮𑀧 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁. 𑀮𑀧𑁂𑀢𑀺, 𑀮𑀧𑀬𑀢𑀺. 𑀮𑀸𑀧𑁄, 𑀮𑀧𑀦𑀁, 𑀆𑀮𑀸𑀧𑁄, 𑀲𑀮𑁆𑀮𑀸𑀧𑁄, 𑀓𑀣𑀸𑀲𑀮𑁆𑀮𑀸𑀧𑁄, 𑀮𑀧𑀺𑀢𑀁.

𑀩𑁆𑀬𑀧 𑀤𑀸𑀳𑁂. 𑀛𑀸𑀧𑁂𑀢𑀺, 𑀛𑀸𑀧𑀬𑀢𑀺. 𑀛𑀢𑁆𑀢𑁄, 𑀛𑀸𑀦𑀁.

𑀢𑀢𑁆𑀣 𑀛𑀢𑁆𑀢𑁄𑀢𑀺 𑀔𑀼𑀤𑁆𑀤𑀸𑀧𑀭𑁂𑀢𑁄 𑀧𑀸𑀘𑀦𑀕𑁆𑀕𑀺𑀦𑀸 𑀛𑀸𑀧𑀺𑀢𑁄𑀢𑀺 𑀛𑀢𑁆𑀢𑁄, ‘‘𑀛𑀢𑁆𑀢𑀸 𑀅𑀲𑁆𑀲𑀼 𑀓𑀺𑀮𑀦𑁆𑀢𑀸’’𑀢𑀺 𑀘 𑀧𑀸𑀴𑀺. 𑀛𑀸𑀦𑀦𑁆𑀢𑀺 𑀦𑀻𑀯𑀭𑀡𑀥𑀫𑁆𑀫𑁂 𑀛𑀸𑀧𑁂𑀢𑀻𑀢𑀺 𑀛𑀸𑀦𑀁, 𑀲𑀯𑀼𑀤𑁆𑀥𑀺𑀓𑀁. 𑀓𑀸𑀭𑀺𑀢𑁂 𑀧𑀦 𑁋 𑀛𑀸𑀧𑀸𑀧𑁂𑀢𑀺, 𑀛𑀸𑀧𑀸𑀧𑀬𑀢𑀺.

𑀭𑀽𑀧 𑀭𑀽𑀧𑀓𑁆𑀭𑀺𑀬𑀸𑀬𑀁. 𑀭𑀽𑀧𑀓𑁆𑀭𑀺𑀬𑀸 𑀦𑀸𑀫 𑀧𑀓𑀸𑀲𑀦𑀓𑁆𑀭𑀺𑀬𑀸. 𑀭𑀽𑀧𑁂𑀢𑀺, 𑀭𑀽𑀧𑀬𑀢𑀺. 𑀭𑀽𑀧𑀁.

𑀢𑀢𑁆𑀣 𑀭𑀽𑀧𑀦𑁆𑀢𑀺 𑀭𑀽𑀧𑀬𑀢𑀻𑀢𑀺 𑀭𑀽𑀧𑀁. 𑀯𑀡𑁆𑀡𑀯𑀺𑀓𑀸𑀭𑀁 𑀆𑀧𑀚𑁆𑀚𑀫𑀸𑀦𑀁 𑀳𑀤𑀬𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀤𑀺𑀯𑀸𑀤𑀺𑀕𑀡𑁂 𑀧𑀦𑀸𑀬𑀁 ‘‘𑀭𑀽𑀧𑀁 𑀭𑀼𑀧𑁆𑀧𑀦𑁂’’𑀢𑀺 𑀪𑀺𑀚𑁆𑀚𑀦𑀸𑀤𑀺𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀞𑀺𑀢𑀸.

𑀓𑀧𑁆𑀧 𑀯𑀺𑀥𑀺𑀫𑁆𑀳𑀺. 𑀯𑀺𑀥𑀺 𑀓𑁆𑀭𑀺𑀬𑀸. 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀓𑀧𑁆𑀧𑀬𑀢𑀺. 𑀫𑁄𑀭𑁄 𑀯𑀸𑀲𑀫𑀓𑀧𑁆𑀧𑀬𑀺. 𑀲𑀻𑀳𑀲𑁂𑀬𑁆𑀬𑀁 𑀧𑀓𑀧𑁆𑀧𑁂𑀦𑁆𑀢𑀁, 𑀩𑀼𑀤𑁆𑀥𑀁 𑀯𑀦𑁆𑀤𑀸𑀫𑀺 𑀕𑁄𑀢𑀫𑀁.

𑀓𑀧𑁆𑀧 𑀯𑀺𑀢𑀓𑁆𑀓𑁂 𑀯𑀺𑀥𑀺𑀫𑁆𑀳𑀺 𑀙𑁂𑀤𑀦𑁂 𑀘. 𑀓𑀧𑁆𑀧𑁂𑀢𑀺, 𑀓𑀧𑁆𑀧𑀬𑀢𑀺, 𑀫𑁄𑀭𑁄 𑀯𑀸𑀲𑀫𑀓𑀧𑁆𑀧𑀬𑀺. 𑀓𑀧𑁆𑀧𑀺𑀢𑀫𑀲𑁆𑀲𑀼. 𑀧𑀓𑀧𑁆𑀧𑁂𑀢𑀺, 𑀧𑀓𑀧𑁆𑀧𑀬𑀢𑀺. 𑀲𑀗𑁆𑀓𑀧𑁆𑀧𑁂𑀢𑀺, 𑀲𑀗𑁆𑀓𑀧𑁆𑀧𑀬𑀢𑀺. 𑀓𑀧𑁆𑀧𑁄, 𑀲𑀗𑁆𑀓𑀧𑁆𑀧𑁄, 𑀯𑀺𑀓𑀧𑁆𑀧𑁄. 𑀓𑀧𑁆𑀧𑀲𑀫𑀡𑁄 𑀇𑀘𑁆𑀘𑀸𑀤𑀻𑀦𑀺.

𑀢𑀢𑁆𑀣 𑀓𑀧𑁆𑀧𑁄𑀢𑀺 𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀓𑀧𑁆𑀧𑀺𑀬𑀢𑀻𑀢𑀺 𑀓𑀧𑁆𑀧𑁄. 𑀲𑀗𑁆𑀓𑀧𑁆𑀧𑁄𑀢𑀺 𑀲𑀗𑁆𑀓𑀧𑁆𑀧𑀦𑀁. 𑀯𑀺𑀓𑀧𑁆𑀧𑁄𑀢𑀺 𑀯𑀺𑀯𑀺𑀥𑀸 𑀓𑀧𑁆𑀧𑀦𑀁, 𑀅𑀢𑁆𑀣𑀲𑁆𑀲 𑀅𑀦𑁂𑀓𑀦𑁆𑀢𑀺𑀓𑀪𑀸𑀯𑁄. 𑀇𑀥 𑀓𑀧𑁆𑀧𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄 𑀪𑀯𑀢𑀺.

𑀓𑀧𑁆𑀧𑀲𑀤𑁆𑀤𑁄 ¶ 𑀅𑀪𑀺𑀲𑀤𑁆𑀤𑀳𑀦𑀯𑁄𑀳𑀸𑀭𑀓𑀸𑀮𑀧𑀜𑁆𑀜𑀢𑁆𑀢𑀺𑀙𑁂𑀤𑀦𑀯𑀺𑀓𑀧𑁆𑀧𑀮𑁂𑀲𑀲𑀫𑀦𑁆𑀢𑀪𑀸𑀯𑀸𑀤𑀺𑀅𑀦𑁂𑀓𑀢𑁆𑀣𑁄. 𑀢𑀣𑀸 𑀳𑀺𑀲𑁆𑀲 ‘‘𑀑𑀓𑀧𑁆𑀧𑀦𑀻𑀬𑀫𑁂𑀢𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲, 𑀬𑀣𑀸 𑀢𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺 𑀏𑀯𑀫𑀸𑀤𑀻𑀲𑀼 𑀅𑀪𑀺𑀲𑀤𑁆𑀤𑀳𑀦𑀫𑀢𑁆𑀣𑁄. ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀺 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑀯𑁄𑀳𑀸𑀭𑁄. ‘‘𑀬𑁂𑀦 𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’𑀢𑀺 𑀏𑀯𑀫𑀸𑀤𑀻𑀲𑀼 𑀓𑀸𑀮𑁄. ‘‘𑀇𑀘𑁆𑀘𑀸𑀬𑀲𑁆𑀫𑀸 𑀓𑀧𑁆𑀧𑁄’’𑀢𑀺 𑀏𑀯𑀫𑀸𑀤𑀻𑀲𑀼 𑀧𑀜𑁆𑀜𑀢𑁆𑀢𑀺. ‘‘𑀅𑀮𑀗𑁆𑀓𑀢𑁄 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽’’𑀢𑀺 𑀏𑀯𑀫𑀸𑀤𑀻𑀲𑀼 𑀙𑁂𑀤𑀦𑀁. ‘‘𑀓𑀧𑁆𑀧𑀢𑀺 𑀤𑁆𑀯𑀗𑁆𑀕𑀼𑀮𑀓𑀧𑁆𑀧𑁄’’𑀢𑀺 𑀏𑀯𑀫𑀸𑀤𑀻𑀲𑀼 𑀯𑀺𑀓𑀧𑁆𑀧𑁄. ‘‘𑀅𑀢𑁆𑀣𑀺 𑀓𑀧𑁆𑀧𑁄 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑀮𑁂𑀲𑁄. ‘‘𑀓𑁂𑀯𑀮𑀓𑀧𑁆𑀧𑀁 𑀯𑁂𑀴𑀼𑀯𑀦𑀁 𑀑𑀪𑀸𑀲𑁂𑀢𑁆𑀯𑀸’’𑀢𑀺 𑀏𑀯𑀫𑀸𑀤𑀻𑀲𑀼 𑀲𑀫𑀦𑁆𑀢𑀪𑀸𑀯𑁄.

𑀅𑀣 𑀯𑀸 𑀓𑀧𑁆𑀧𑀲𑀤𑁆𑀤𑁄 𑀲𑀉𑀧𑀲𑀕𑁆𑀕𑁄 𑀅𑀦𑀼𑀧𑀲𑀕𑁆𑀕𑁄 𑀘 𑀯𑀺𑀢𑀓𑁆𑀓𑀯𑀺𑀥𑀸𑀦𑀧𑀝𑀺𑀪𑀸𑀕𑀧𑀜𑁆𑀜𑀢𑁆𑀢𑀺𑀓𑀸𑀮𑀧𑀭𑀫𑀸𑀬𑀼𑀯𑁄𑀳𑀸𑀭𑀲𑀫𑀦𑁆𑀢𑀪𑀸𑀯𑀸𑀪𑀺𑀲𑀤𑁆𑀤𑀳𑀦 𑀙𑁂𑀤𑀦 𑀯𑀺𑀦𑀺𑀬𑁄𑀕 𑀯𑀺𑀦𑀬 𑀓𑁆𑀭𑀺𑀬𑀸 𑀮𑁂𑀲𑀦𑁆𑀢𑀭 𑀓𑀧𑁆𑀧𑀢𑀡𑁆𑀳𑀸𑀤𑀺𑀝𑁆𑀞𑀺𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀫𑀳𑀸𑀓𑀧𑁆𑀧𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑁂𑀲 ‘‘𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑁄 𑀅𑀩𑁆𑀬𑀸𑀧𑀸𑀤𑀲𑀗𑁆𑀓𑀧𑁆𑀧𑁄’’𑀢𑀺𑀆𑀤𑀻𑀲𑀼 𑀯𑀺𑀢𑀓𑁆𑀓𑁂 𑀆𑀕𑀢𑁄. ‘‘𑀘𑀻𑀯𑀭𑁂 𑀯𑀺𑀓𑀧𑁆𑀧𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 𑀯𑀺𑀥𑀸𑀦𑁂, 𑀅𑀥𑀺𑀓𑀯𑀺𑀥𑀸𑀦𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀳𑀺 𑀅𑀢𑁆𑀣𑁄. ‘‘𑀲𑀢𑁆𑀣𑀼𑀓𑀧𑁆𑀧𑁂𑀦 𑀯𑀢 𑀪𑁄 𑀲𑀸𑀯𑀓𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑀬𑀫𑀸𑀦𑀸 𑀦 𑀚𑀸𑀦𑀺𑀫𑁆𑀳𑀸’’𑀢𑀺𑀆𑀤𑀻𑀲𑀼 𑀧𑀝𑀺𑀪𑀸𑀕𑁂, 𑀲𑀢𑁆𑀣𑀼𑀲𑀤𑀺𑀲𑁂𑀦𑀸𑀢𑀺 𑀅𑀬𑀜𑁆𑀳𑀺 𑀢𑀢𑁆𑀣 𑀅𑀢𑁆𑀣𑁄. ‘‘𑀇𑀘𑁆𑀘𑀸𑀬𑀲𑁆𑀫𑀸 𑀓𑀧𑁆𑀧𑁄’’𑀢𑀺𑀆𑀤𑀻𑀲𑀼 𑀧𑀜𑁆𑀜𑀢𑁆𑀢𑀺𑀬𑀁. ‘‘𑀬𑁂𑀦 ¶ 𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’𑀢𑀺𑀆𑀤𑀻𑀲𑀼 𑀓𑀸𑀮𑁂. ‘‘𑀆𑀓𑀗𑁆𑀔𑀫𑀸𑀦𑁄 𑀆𑀦𑀦𑁆𑀤 𑀢𑀣𑀸𑀕𑀢𑁄 𑀓𑀧𑁆𑀧𑀁 𑀯𑀸𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸’’𑀢𑀺𑀆𑀤𑀻𑀲𑀼 𑀧𑀭𑀫𑀸𑀬𑀼𑀫𑁆𑀳𑀺. 𑀆𑀬𑀼𑀓𑀧𑁆𑀧𑁄 𑀳𑀺 𑀇𑀥 ‘‘𑀓𑀧𑁆𑀧𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀺 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺𑀆𑀤𑀻𑀲𑀼 𑀲𑀫𑀡𑀯𑁄𑀳𑀸𑀭𑁂. ‘‘𑀓𑁂𑀯𑀮𑀓𑀧𑁆𑀧𑀁 𑀯𑁂𑀴𑀼𑀯𑀦𑀁 𑀑𑀪𑀸𑀲𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀲𑀫𑀦𑁆𑀢𑀪𑀸𑀯𑁂. ‘‘𑀲𑀤𑁆𑀥𑀸𑀲𑀤𑁆𑀤𑀳𑀦𑀸 𑀑𑀓𑀧𑁆𑀧𑀦𑀸 𑀅𑀪𑀺𑀧𑁆𑀧𑀲𑀸𑀤𑁄’’𑀢𑀺𑀆𑀤𑀻𑀲𑀼 𑀅𑀪𑀺𑀲𑀤𑁆𑀤𑀳𑀦𑁂, 𑀲𑀤𑁆𑀥𑀸𑀬𑀦𑁆𑀢𑀺 𑀅𑀢𑁆𑀣𑁄. ‘‘𑀅𑀮𑀗𑁆𑀓𑀢𑁄 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽’’𑀢𑀺𑀆𑀤𑀻𑀲𑀼 𑀙𑁂𑀤𑀦𑁂. ‘‘𑀏𑀯𑀫𑁂𑀯 𑀇𑀢𑁄 𑀤𑀺𑀦𑁆𑀦𑀁, 𑀧𑁂𑀢𑀸𑀦𑀁 𑀉𑀧𑀓𑀧𑁆𑀧𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀦𑀺𑀬𑁄𑀕𑁂. ‘‘𑀓𑀧𑁆𑀧𑀓𑀢𑁂𑀦 𑀅𑀓𑀧𑁆𑀧𑀓𑀢𑀁 𑀲𑀁𑀲𑀺𑀩𑁆𑀩𑀺𑀢𑀁 𑀳𑁄𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀦𑀬𑀓𑁆𑀭𑀺𑀬𑀸𑀬𑀁. ‘‘𑀅𑀢𑁆𑀣𑀺 𑀓𑀧𑁆𑀧𑁄 𑀦𑀺𑀧𑀚𑁆𑀚𑀺𑀢𑀼𑀁, 𑀳𑀦𑁆𑀤𑀸𑀳𑀁 𑀦𑀺𑀧𑀚𑁆𑀚𑀸𑀫𑀻’’𑀢𑀺𑀆𑀤𑀻𑀲𑀼 𑀮𑁂𑀲𑁂. ‘‘𑀆𑀧𑀸𑀬𑀺𑀓𑁄 𑀦𑁂𑀭𑀬𑀺𑀓𑁄, 𑀓𑀧𑁆𑀧𑀝𑁆𑀞𑁄 𑀲𑀗𑁆𑀖𑀪𑁂𑀤𑀓𑁄, 𑀓𑀧𑁆𑀧𑀁 𑀦𑀺𑀭𑀬𑀫𑁆𑀳𑀺 𑀧𑀘𑁆𑀘𑀢𑀻’’𑀢𑀺 𑀘 𑀆𑀤𑀻𑀲𑀼 𑀅𑀦𑁆𑀢𑀭𑀓𑀧𑁆𑀧𑁂.

‘‘𑀦 𑀓𑀧𑁆𑀧𑀬𑀦𑁆𑀢𑀺 𑀦 𑀧𑀼𑀭𑀓𑁆𑀔𑀭𑁄𑀦𑁆𑀢𑀺,

𑀥𑀫𑁆𑀫𑀸𑀧𑀺 𑀢𑁂𑀲𑀁 𑀦 𑀧𑀝𑀺𑀘𑁆𑀙𑀺𑀢𑀸𑀲𑁂;

𑀦 𑀩𑁆𑀭𑀸𑀳𑁆𑀫𑀡𑁄 𑀲𑀻𑀮𑀯𑀢𑁂𑀦 𑀦𑁂𑀬𑁆𑀬𑁄,

𑀧𑀸𑀭𑀗𑁆𑀕𑀢𑁄 𑀦 𑀘 𑀧𑀘𑁆𑀘𑁂𑀢𑀺 𑀢𑀸𑀤𑀻’’𑀢𑀺

𑀆𑀤𑀻𑀲𑀼 𑀢𑀡𑁆𑀳𑀸𑀤𑀺𑀝𑁆𑀞𑀻𑀲𑀼. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀦𑀺𑀤𑁆𑀤𑁂𑀲𑁂 ‘‘𑀓𑀧𑁆𑀧𑁄𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀧𑁆𑀧𑀸 𑀢𑀡𑁆𑀳𑀸𑀓𑀧𑁆𑀧𑁄 𑀤𑀺𑀝𑁆𑀞𑀺𑀓𑀧𑁆𑀧𑁄’’𑀢𑀺. ‘‘𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂’’𑀢𑀺𑀆𑀤𑀻𑀲𑀼 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁂 ¶ . ‘‘𑀘𑀢𑁆𑀢𑀸𑀭𑀺𑀫𑀸𑀦𑀺 𑀪𑀺𑀓𑁆𑀔𑀯𑁂 𑀓𑀧𑁆𑀧𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀻’’𑀢𑀺𑀆𑀤𑀻𑀲𑀼 𑀫𑀳𑀸𑀓𑀧𑁆𑀧𑁂. 𑀇𑀘𑁆𑀘𑁂𑀯𑀁 𑁋

𑀯𑀺𑀢𑀓𑁆𑀓𑁂 𑀘 𑀯𑀺𑀥𑀸𑀦𑁂 𑀘, 𑀧𑀝𑀺𑀪𑀸𑀕𑁂 𑀢𑀣𑁂𑀯 𑀘;

𑀧𑀜𑁆𑀜𑀢𑁆𑀢𑀺𑀬𑀁 𑀢𑀣𑀸 𑀓𑀸𑀮𑁂, 𑀧𑀭𑀫𑀸𑀬𑀼𑀫𑁆𑀳𑀺 𑀘 𑀙𑁂𑀤𑀦𑁂.

𑀲𑀫𑀦𑁆𑀢𑀪𑀸𑀯𑁂 𑀯𑁄𑀳𑀸𑀭𑁂, 𑀅𑀪𑀺𑀲𑀤𑁆𑀤𑀳𑀦𑁂𑀧𑀺 𑀘;

𑀯𑀺𑀦𑀺𑀬𑁄𑀕𑁂 𑀘 𑀯𑀺𑀦𑀬-𑀓𑁆𑀭𑀺𑀬𑀸𑀬𑀁 𑀮𑁂𑀲𑀓𑁂𑀧𑀺 𑀘.

𑀯𑀺𑀓𑀧𑁆𑀧𑀦𑁆𑀢𑀭𑀓𑀧𑁆𑀧𑁂𑀲𑀼, 𑀢𑀡𑁆𑀳𑀸𑀤𑀺𑀝𑁆𑀞𑀺𑀲𑁆𑀯𑀲𑀗𑁆𑀔𑀬𑁂;

𑀓𑀧𑁆𑀧𑁂 𑀘 𑀏𑀯𑀫𑀸𑀤𑀻𑀲𑀼, 𑀓𑀧𑁆𑀧𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑀓𑀧𑀺 𑀕𑀢𑀺𑀬𑀁. 𑀓𑀫𑁆𑀧𑁂𑀢𑀺, 𑀓𑀫𑁆𑀧𑀬𑀢𑀺, 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀸𑀦𑀺 𑀘𑀮𑀦𑀢𑁆𑀣𑁂 𑀧𑀯𑀢𑁆𑀢𑀳𑁂𑀢𑀼𑀓𑀢𑁆𑀢𑀼𑀭𑀽𑀧𑀲𑀤𑀺𑀲𑀸𑀦𑀺 𑀪𑀯𑀦𑁆𑀢𑀺. 𑀘𑀮𑀦𑀢𑁆𑀣𑁂 𑀳𑀺 ‘‘𑀓𑀫𑁆𑀧 𑀓𑀫𑁆𑀧𑀦𑁂’’𑀢𑀺 𑀥𑀸𑀢𑀼𑀬𑀸 ‘‘𑀓𑀫𑁆𑀧𑀢𑀻’’𑀢𑀺 𑀅𑀓𑀫𑁆𑀫𑀓𑀲𑀼𑀤𑁆𑀥𑀓𑀢𑁆𑀢𑀼𑀭𑀽𑀧𑀁. ‘‘𑀓𑀫𑁆𑀧𑁂𑀢𑀻’’𑀢𑀺𑀆𑀤𑀻𑀦𑀺 𑀲𑀓𑀫𑁆𑀫𑀓𑀸𑀦𑀺 𑀳𑁂𑀢𑀼𑀓𑀢𑁆𑀢𑀼𑀭𑀽𑀧𑀸𑀦𑀺 ‘‘𑀇𑀤𑀫𑁆𑀧𑀺 𑀤𑀼𑀢𑀺𑀬𑀁 𑀲𑀮𑁆𑀮𑀁, 𑀓𑀫𑁆𑀧𑁂𑀢𑀺 𑀳𑀤𑀬𑀁 𑀫𑀫𑀸’’𑀢𑀺 𑀅𑀓𑀫𑁆𑀫𑀓𑀸𑀬 𑀥𑀸𑀢𑀼𑀬𑀸 𑀲𑀓𑀫𑁆𑀫𑀓𑀭𑀽𑀧𑀤𑀲𑁆𑀲𑀦𑀢𑁄.

𑀔𑀧𑀺 𑀔𑀦𑁆𑀢𑀺𑀬𑀁. 𑀔𑀫𑁆𑀧𑁂𑀢𑀺, 𑀔𑀫𑁆𑀧𑀬𑀢𑀺.

𑀣𑀽𑀧 𑀲𑀫𑀼𑀲𑁆𑀲𑀬𑁂. 𑀲𑀫𑀼𑀲𑁆𑀲𑀬𑁄 𑀆𑀭𑁄𑀳𑁄 𑀉𑀩𑁆𑀩𑁂𑀥𑁄. 𑀣𑀽𑀧𑁂𑀢𑀺, 𑀣𑀽𑀧𑀬𑀢𑀺. 𑀣𑀽𑀧𑁄, 𑀣𑀽𑀧𑀺𑀓𑀸.

𑀢𑀧 𑀔𑀬𑁂. 𑀢𑀧𑁂𑀢𑀺, 𑀢𑀧𑀬𑀢𑀺.

𑀉𑀧 𑀧𑀚𑁆𑀚𑀦𑁂. 𑀉𑀧𑁂𑀢𑀺, 𑀉𑀧𑀬𑀢𑀺.

𑀘𑀧 𑀓𑀓𑁆𑀓𑀦𑁂. 𑀘𑀧𑁂𑀢𑀺, 𑀘𑀧𑀬𑀢𑀺.

𑀲𑀼𑀧𑁆𑀧 𑀫𑀸𑀦𑁂. 𑀲𑀼𑀧𑁆𑀧𑁂𑀢𑀺, 𑀲𑀼𑀧𑁆𑀧𑀬𑀢𑀺.

𑀟𑀧 𑀟𑀺𑀧 𑀲𑀗𑁆𑀖𑀸𑀢𑁂. 𑀟𑀸𑀧𑁂𑀢𑀺. 𑀟𑀸𑀧𑀬𑀢𑀺. 𑀟𑁂𑀧𑁂𑀢𑀺, 𑀟𑁂𑀧𑀬𑀢𑀺.

𑀓𑀧 ¶ 𑀅𑀯𑀓𑀫𑁆𑀧𑀦𑁂. 𑀓𑀧𑁂𑀢𑀺, 𑀓𑀧𑀬𑀢𑀺. 𑀓𑀧𑀡𑁄. 𑀓𑀧𑀡𑁄𑀢𑀺 𑀓𑀭𑀼𑀡𑀸𑀬𑀺𑀢𑀩𑁆𑀩𑁄. 𑀅𑀜𑁆𑀜𑀢𑁆𑀣 𑀧𑀦 ‘‘𑀓𑀧𑁆𑀧𑀢𑀻’’𑀢𑀺 𑀭𑀽𑀧𑀁 𑀯𑀤𑀦𑁆𑀢𑀺.

𑀕𑀼𑀧 𑀓𑀼𑀧 𑀥𑀽𑀧 𑀪𑀸𑀲𑀸𑀬𑀁. 𑀕𑁄𑀧𑁂𑀢𑀺, 𑀕𑁄𑀧𑀬𑀢𑀺. 𑀓𑁄𑀧𑁂𑀢𑀺, 𑀓𑁄𑀧𑀬𑀢𑀺. 𑀥𑀽𑀧𑁂𑀢𑀺, 𑀥𑀽𑀧𑀬𑀢𑀺.

𑀓𑀺𑀧 𑀤𑀼𑀩𑁆𑀩𑀮𑁆𑀮𑁂. 𑀓𑀺𑀧𑁂𑀢𑀺, 𑀓𑀺𑀧𑀬𑀢𑀺.

𑀔𑁂𑀧 𑀧𑁂𑀭𑀡𑁂. 𑀧𑁂𑀭𑀡𑀁 𑀘𑀼𑀡𑁆𑀡𑀺𑀓𑀭𑀡𑀁, 𑀔𑁂𑀧𑁂𑀢𑀺, 𑀔𑁂𑀧𑀬𑀢𑀺.

𑀢𑀧 𑀧𑀻𑀡𑀦𑁂. 𑀢𑀧𑁂𑀢𑀺, 𑀢𑀧𑀬𑀢𑀺.

𑀆𑀧𑀼 𑀮𑀫𑁆𑀩𑀦𑁂. 𑀆𑀧𑁂𑀢𑀺, 𑀆𑀧𑀬𑀢𑀺. 𑀆𑀧𑁄.

𑀢𑀧 𑀤𑀸𑀳𑁂. 𑀢𑀧𑁂𑀢𑀺, 𑀢𑀧𑀬𑀢𑀺. 𑀢𑀧𑁄, 𑀢𑀸𑀧𑁄. 𑀆𑀢𑀸𑀧𑁄, 𑀲𑀦𑁆𑀢𑀸𑀧𑁄. 𑀓𑀸𑀭𑀺𑀢𑁂 𑁋 𑀢𑀸𑀧𑁂𑀢𑀺, 𑀢𑀸𑀧𑀬𑀢𑀺. 𑀢𑀢𑁆𑀣 𑀢𑀧𑁄𑀢𑀺 𑀅𑀓𑀼𑀲𑀮𑀸𑀦𑀁 𑀢𑀸𑀧𑀦𑀝𑁆𑀞𑁂𑀦 𑀢𑀧𑁄, 𑀲𑀻𑀮𑀁.

𑀑𑀧𑀣𑀧 𑀣𑀧𑀦𑁂. 𑀑𑀧𑁂𑀢𑀺, 𑀑𑀧𑀬𑀢𑀺. 𑀦 𑀢𑁂𑀲𑀁 𑀓𑁄𑀝𑁆𑀞𑁂 𑀑𑀧𑁂𑀦𑁆𑀢𑀺. 𑀣𑀧𑁂𑀢𑀺, 𑀣𑀧𑀬𑀢𑀺. 𑀣𑀧𑀺𑀢𑁄. 𑀣𑀧𑀬𑀺𑀢𑁆𑀯𑀸 𑀧𑀝𑀺𑀘𑁆𑀙𑀤𑀁 𑀯𑀯𑀝𑁆𑀞𑀧𑁂𑀢𑀺. 𑀯𑁄𑀝𑁆𑀞𑀩𑁆𑀩𑀦𑀁.

𑀏𑀢𑁆𑀣 𑀘 ‘‘𑀯𑀺 𑀅𑀯 𑀣𑀧𑁂𑀢𑀺, 𑀯𑀺 𑀅𑀯 𑀣𑀧𑀦’’𑀦𑁆𑀢𑀺 𑀙𑁂𑀤𑁄. 𑀏𑀢𑁆𑀣 𑀧𑀼𑀭𑀺𑀫𑁂 𑀲𑀭𑀮𑁄𑀧𑁄 𑀣𑀲𑁆𑀲 𑀞𑀢𑁆𑀢𑀁 𑀯𑀺𑀲𑀤𑀺𑀲𑀪𑀸𑀯𑁂𑀦 𑀤𑁆𑀯𑀺𑀢𑁆𑀢𑀜𑁆𑀘. 𑀧𑀘𑁆𑀙𑀺𑀫𑁂 𑀧𑀦 𑀲𑀭𑀮𑁄𑀧𑁄, 𑀅𑀯𑀲𑁆𑀲 𑀑𑀓𑀸𑀭𑀢𑁆𑀢𑀁, 𑀣𑀲𑁆𑀲 𑀞𑀢𑁆𑀢𑀁, 𑀧𑀲𑁆𑀲 𑀯𑀢𑁆𑀢𑀁, 𑀯𑀲𑁆𑀲 𑀤𑁆𑀯𑀺𑀢𑁆𑀢𑀁, 𑀯𑀓𑀸𑀭𑀤𑁆𑀯𑀬𑀲𑁆𑀲 𑀘 𑀩𑀓𑀸𑀭𑀤𑁆𑀯𑀬𑀁 𑀪𑀯𑀢𑀺. 𑀯𑁄𑀝𑁆𑀞𑀩𑁆𑀩𑀦𑀦𑁆𑀢𑀺 𑀘 𑀩𑁆𑀬𑀯𑀢𑁆𑀣𑀸𑀧𑀓𑀘𑀺𑀢𑁆𑀢𑀲𑁆𑀲 𑀦𑀸𑀫𑀁. 𑀦𑀓𑀸𑀭𑀮𑁄𑀧𑁂 ‘‘𑀯𑁄𑀝𑁆𑀞𑀩𑁆𑀩’’𑀦𑁆𑀢𑀺 𑀅𑀧𑀭𑀫𑁆𑀧𑀺 𑀭𑀽𑀧𑀁 𑀪𑀯𑀢𑀺.

𑀫𑀸𑀧 𑀫𑀸𑀧𑀦𑁂. 𑀧𑀡𑁆𑀡𑀲𑀸𑀮𑀁 𑀫𑀸𑀧𑁂𑀢𑀺, 𑀫𑀸𑀧𑀬𑀢𑀺. 𑀬𑁄 𑀧𑀸𑀡𑀫𑀢𑀺𑀫𑀸𑀧𑁂𑀢𑀺, 𑀧𑀡𑁆𑀡𑀲𑀸𑀮𑀸 𑀲𑀼𑀫𑀸𑀧𑀺𑀢𑀸.

𑀬𑀧 𑀬𑀸𑀧𑀦𑁂. 𑀬𑀸𑀧𑀦𑀁 𑀧𑀯𑀢𑁆𑀢𑀦𑀁. 𑀢𑁂𑀦 𑀲𑁄 𑀢𑀢𑁆𑀣 𑀬𑀸𑀧𑁂𑀢𑀺. 𑀬𑀸𑀧𑀬𑀢𑀺. 𑀬𑀸𑀧𑀦𑀸.

𑀢𑀢𑁆𑀣 ¶ 𑀬𑀸𑀧𑁂𑀢𑀻𑀢𑀺 𑀇𑀤𑀁 𑀬𑀸𑀥𑀸𑀢𑀼𑀲𑁆𑀲 𑀧𑀬𑁄𑀕𑀢𑁆𑀢𑁂 𑀲𑀢𑀺 𑀓𑀸𑀭𑀺𑀢𑀧𑀤𑀁 𑀪𑀯𑀢𑀺. 𑀢𑀣𑀸 𑀳𑀺 ‘‘𑀉𑀬𑁆𑀬𑀸𑀧𑁂𑀦𑁆𑀢𑀺 𑀦𑀸𑀫𑀸’’𑀢𑀺 𑀧𑀸𑀴𑀺 𑀤𑀺𑀲𑁆𑀲𑀢𑀺.

𑀧𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀨𑀓𑀸𑀭𑀦𑁆𑀢𑀸𑀥𑀸𑀢𑀼𑀭𑀽𑀧𑀸𑀦𑀺 𑀅𑀧𑁆𑀧𑀲𑀺𑀤𑁆𑀥𑀸𑀦𑀺.

𑀩𑀓𑀸𑀭𑀦𑁆𑀢𑀥𑀸𑀢𑀼

𑀲𑀫𑁆𑀩 𑀲𑀫𑁆𑀩𑀦𑁆𑀥𑁂. 𑀲𑀫𑁆𑀩𑀦𑁆𑀥𑁄 𑀤𑀴𑁆𑀳𑀩𑀦𑁆𑀥𑀦𑀁. 𑀲𑀫𑁆𑀩𑁂𑀢𑀺, 𑀲𑀫𑁆𑀩𑀬𑀢𑀺. 𑀲𑀫𑁆𑀩𑀮𑀁.

𑀲𑀩𑀺 𑀫𑀡𑁆𑀟𑀮𑁂. 𑀫𑀡𑁆𑀟𑀮𑀁 𑀧𑀭𑀺𑀫𑀡𑁆𑀟𑀮𑀢𑀸. 𑀭𑀽𑀧𑀁 𑀢𑀸𑀤𑀺𑀲𑀫𑁂𑀯.

𑀓𑀼𑀩𑀺 𑀅𑀘𑁆𑀙𑀸𑀤𑀦𑁂. 𑀓𑀼𑀫𑁆𑀩𑁂𑀢𑀺, 𑀓𑀼𑀫𑁆𑀩𑀬𑀢𑀺.

𑀮𑀼𑀩𑀺 𑀤𑀼𑀩𑀺 𑀅𑀤𑁆𑀤𑀦𑁂. 𑀅𑀤𑁆𑀤𑀦𑀁 𑀳𑀺𑀁𑀲𑀸. 𑀮𑀼𑀫𑁆𑀩𑁂𑀢𑀺, 𑀮𑀼𑀫𑁆𑀩𑀬𑀢𑀺. 𑀤𑀼𑀫𑁆𑀩𑁂𑀢𑀺, 𑀤𑀼𑀫𑁆𑀩𑀬𑀢𑀺.

𑀧𑀼𑀩𑁆𑀩 𑀦𑀺𑀓𑁂𑀢𑀦𑁂. 𑀦𑀺𑀓𑁂𑀢𑀦𑀁 𑀦𑀺𑀯𑀸𑀲𑁄. 𑀧𑀼𑀩𑁆𑀩𑁂𑀢𑀺, 𑀧𑀼𑀩𑁆𑀩𑀬𑀢𑀺.

𑀕𑀩𑁆𑀩 𑀫𑀸𑀦𑁂. 𑀫𑀸𑀦𑁄 𑀅𑀳𑀁𑀓𑀸𑀭𑁄. 𑀕𑀩𑁆𑀩𑁂𑀢𑀺, 𑀕𑀩𑁆𑀩𑀬𑀢𑀺. 𑀕𑀩𑁆𑀩𑀦𑀁, 𑀕𑀩𑁆𑀩𑀺𑀢𑁄. 𑀢𑀢𑁆𑀣 𑀕𑀩𑁆𑀩𑀢𑀻𑀢𑀺 𑀦 𑀲𑀗𑁆𑀓𑀼𑀘𑀢𑀺.

𑀩𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀪𑀓𑀸𑀭𑀦𑁆𑀢𑀥𑀸𑀢𑀼

𑀪𑀽 𑀧𑀢𑁆𑀢𑀺𑀬𑀁. 𑀧𑀢𑁆𑀢𑀺 𑀧𑀸𑀧𑀦𑀁. 𑀲𑀓𑀫𑁆𑀫𑀺𑀓𑀸 𑀥𑀸𑀢𑀼. 𑀪𑀸𑀯𑁂𑀢𑀺, 𑀪𑀸𑀯𑀬𑀢𑀺. 𑀧𑀪𑀸𑀯𑁂𑀢𑀺, 𑀧𑀪𑀸𑀯𑀬𑀢𑀺. 𑀇𑀢𑁆𑀣𑀫𑁆𑀪𑀽𑀢𑁄. 𑀘𑀓𑁆𑀔𑀼𑀪𑀽𑀢𑁄, 𑀜𑀸𑀡𑀪𑀽𑀢𑁄, 𑀥𑀫𑁆𑀫𑀪𑀽𑀢𑁄, 𑀩𑁆𑀭𑀳𑁆𑀫𑀪𑀽𑀢𑁄.

𑀢𑀢𑁆𑀣 ¶ 𑀪𑀸𑀯𑁂𑀢𑀻𑀢𑀺 𑀧𑀼𑀭𑀺𑀲𑁄 𑀕𑀘𑁆𑀙𑀦𑁆𑀢𑀁 𑀧𑀼𑀭𑀺𑀲𑀫𑀦𑀼𑀕𑀘𑁆𑀙𑀦𑁆𑀢𑁄 𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑁂𑀲𑀓𑁆𑀭𑀺𑀬𑀸𑀧𑀤𑁂𑀲𑀼𑀧𑀺. 𑀏𑀢𑁆𑀣 𑀘 ‘‘𑀪𑀸𑀯𑁂𑀢𑀻’’𑀢𑀺𑀆𑀤𑀻𑀦𑀺 𑀬𑀢𑁆𑀣 𑀲𑀘𑁂 ‘‘𑀪𑀽 𑀲𑀢𑁆𑀢𑀸𑀬’’𑀦𑁆𑀢𑀺 𑀥𑀸𑀢𑀼𑀬𑀸 𑀭𑀽𑀧𑀸𑀦𑀺 𑀳𑁄𑀦𑁆𑀢𑀺, 𑀢𑀢𑁆𑀣 𑀳𑁂𑀢𑀼𑀓𑀢𑁆𑀢𑀼𑀭𑀽𑀧𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. ‘‘𑀪𑀸𑀯𑁂𑀢𑀺 𑀓𑀼𑀲𑀮𑀁 𑀥𑀫𑁆𑀫’’𑀦𑁆𑀢𑀺𑀆𑀤𑀻𑀦𑁂𑀢𑁆𑀣 𑀦𑀺𑀤𑀲𑁆𑀲𑀦𑀧𑀤𑀸𑀦𑀺. 𑀪𑀸𑀯𑁂𑀢𑀻𑀢𑀺 𑀳𑀺 𑀯𑀟𑁆𑀠𑁂𑀢𑀻𑀢𑀺 𑀅𑀢𑁆𑀣𑁄. 𑀇𑀥 𑀧𑀦 𑀲𑀼𑀤𑁆𑀥𑀓𑀢𑁆𑀢𑀼𑀭𑀽𑀧𑀢𑁆𑀢𑀸 𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄. 𑀇𑀢𑁆𑀣𑀫𑁆𑀪𑀽𑀢𑁄𑀢𑀺 𑀇𑀫𑀁 𑀧𑀓𑀸𑀭𑀁 𑀪𑀽𑀢𑁄 𑀧𑀢𑁆𑀢𑁄. ‘‘𑀘𑀓𑁆𑀔𑀼𑀪𑀽𑀢𑁄’’𑀢𑀺𑀆𑀤𑀻𑀦𑀺 𑀧𑀦 ‘‘𑀪𑀽 𑀲𑀢𑁆𑀢𑀸𑀬𑀁, 𑀪𑀽 𑀧𑀢𑁆𑀢𑀺𑀬’’𑀦𑁆𑀢𑀺 𑀤𑁆𑀯𑀺𑀕𑀡𑀺𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀥𑀸𑀢𑀽𑀦𑀁 𑀯𑀲𑁂𑀦 𑀅𑀝𑁆𑀞𑀓𑀣𑀸𑀝𑀻𑀓𑀸𑀦𑀬𑀦𑀺𑀲𑁆𑀲𑀺𑀢𑀁 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫 𑀆𑀕𑀫𑀺𑀓𑀸𑀦𑀁 𑀓𑁄𑀲𑀮𑁆𑀮𑀢𑁆𑀣𑀸𑀬. 𑀢𑀢𑁆𑀣 𑀘𑀓𑁆𑀔𑀼𑀪𑀽𑀢𑁄𑀢𑀺 𑀬𑀣𑀸 𑀘𑀓𑁆𑀔𑀼 𑀲𑀢𑁆𑀢𑀸𑀦𑀁 𑀤𑀲𑁆𑀲𑀦𑀢𑁆𑀣𑀁 𑀧𑀭𑀺𑀡𑁂𑀢𑀺, 𑀏𑀯𑀁 𑀮𑁄𑀓𑀲𑁆𑀲 𑀬𑀸𑀣𑀸𑀯𑀤𑀲𑁆𑀲𑀦𑀲𑀸𑀥𑀦𑀢𑁄 𑀤𑀲𑁆𑀲𑀦𑀓𑀺𑀘𑁆𑀘𑀧𑀭𑀺𑀡𑀸𑀬𑀓𑀝𑁆𑀞𑁂𑀦 𑀘𑀓𑁆𑀔𑀼𑀪𑀽𑀢𑁄. 𑀅𑀣 𑀯𑀸 𑀘𑀓𑁆𑀔𑀼 𑀯𑀺𑀬 𑀪𑀽𑀢𑁄𑀢𑀺𑀧𑀺 𑀘𑀓𑁆𑀔𑀼𑀪𑀽𑀢𑁄. 𑀧𑀜𑁆𑀜𑀸𑀘𑀓𑁆𑀔𑀼𑀫𑀬𑀢𑁆𑀢𑀸 𑀯𑀸 𑀲𑀬𑀫𑁆𑀪𑀽𑀜𑀸𑀡𑁂𑀦 𑀧𑀜𑁆𑀜𑀸𑀘𑀓𑁆𑀔𑀼𑀁 𑀪𑀽𑀢𑁄 𑀧𑀢𑁆𑀢𑁄𑀢𑀺 𑀘𑀓𑁆𑀔𑀼𑀪𑀽𑀢𑁄. 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦 𑀜𑀸𑀡𑀪𑀽𑀢𑁄, 𑀅𑀲𑀸𑀥𑀸𑀭𑀡𑀁 𑀯𑀸 𑀜𑀸𑀡𑀁 𑀪𑀽𑀢𑁄 𑀧𑀢𑁆𑀢𑁄𑀢𑀺 𑀜𑀸𑀡𑀪𑀽𑀢𑁄, 𑀅𑀯𑀺𑀧𑀭𑀻𑀢𑀲𑀪𑀸𑀯𑀝𑁆𑀞𑁂𑀦, 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀧𑁆𑀧𑀯𑀢𑁆𑀢𑀦𑀢𑁄 𑀯𑀸 𑀳𑀤𑀬𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 𑀯𑀸𑀘𑀸𑀬 𑀦𑀺𑀘𑁆𑀙𑀸𑀭𑀺𑀢𑀥𑀫𑁆𑀫𑀫𑀬𑁄𑀢𑀺 𑀥𑀫𑁆𑀫𑀪𑀽𑀢𑁄. 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂𑀳𑀺 𑀯𑀸 𑀉𑀧𑁆𑀧𑀦𑁆𑀦𑀢𑁆𑀢𑀸 𑀮𑁄𑀓𑀲𑁆𑀲 𑀘 𑀢𑀤𑀼𑀧𑁆𑀧𑀸𑀤𑀦𑀢𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀯𑀸 𑀥𑀫𑁆𑀫𑀁 𑀪𑀽𑀢𑁄 𑀧𑀢𑁆𑀢𑁄𑀢𑀺 𑀥𑀫𑁆𑀫𑀪𑀽𑀢𑁄. 𑀲𑁂𑀝𑁆𑀞𑀝𑁆𑀞𑁂𑀦 𑀩𑁆𑀭𑀳𑁆𑀫𑀪𑀽𑀢𑁄. 𑀅𑀣 𑀯𑀸 𑀩𑁆𑀭𑀳𑁆𑀫𑀁 𑀯𑀼𑀘𑁆𑀘𑀢𑀺 𑀫𑀕𑁆𑀕𑁄 𑀢𑁂𑀦 𑀉𑀧𑁆𑀧𑀦𑁆𑀦𑀢𑁆𑀢𑀸 𑀮𑁄𑀓𑀲𑁆𑀲 𑀘 𑀢𑀤𑀼𑀧𑁆𑀧𑀸𑀤𑀦𑀢𑁆𑀢𑀸, 𑀢𑀜𑁆𑀘 𑀲𑀬𑀫𑁆𑀪𑀽𑀜𑀸𑀡𑁂𑀦 𑀪𑀽𑀢𑁄 𑀧𑀢𑁆𑀢𑁄𑀢𑀺 𑀩𑁆𑀭𑀳𑁆𑀫𑀪𑀽𑀢𑁄. 𑀏𑀯𑀁 𑀤𑁆𑀯𑀺𑀦𑁆𑀦𑀁 𑀥𑀸𑀢𑀽𑀦𑀁 𑀯𑀲𑁂𑀦 𑀯𑀼𑀢𑁆𑀢𑁄 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀭𑀸𑀦𑀺 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀧𑀤𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. ‘‘𑀢𑀸𑀢𑀸 𑀫𑀬𑀁 𑀫𑀳𑀮𑁆𑀮𑀓𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀧𑀼𑀢𑁆𑀢𑀁 𑀩𑀼𑀤𑁆𑀥𑀪𑀽𑀢𑀁 𑀲𑀫𑁆𑀪𑀸𑀯𑁂𑀬𑁆𑀬𑀸𑀫 𑀯𑀸 𑀦𑁄 𑀯𑀸, 𑀢𑀼𑀫𑁆𑀳𑁂 𑀢𑀲𑁆𑀲 𑀲𑀸𑀲𑀦𑁂 𑀧𑀩𑁆𑀩𑀚𑁂𑀬𑁆𑀬𑀸𑀣𑀸’’𑀢𑀺 𑀘 ‘‘𑀅𑀣 ¶ 𑀔𑁄 𑀣𑁂𑀭𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀭𑁂𑀯𑀢𑀁 𑀲𑀳𑀚𑀸𑀢𑀺𑀬𑀁 𑀲𑀫𑁆𑀪𑀸𑀯𑀺𑀁𑀲𑀽’’𑀢𑀺 𑀘𑀸𑀢𑀺. 𑀅𑀜𑁆𑀜𑀸𑀦𑀺𑀧𑀺 𑀧𑀦𑁂𑀢𑁆𑀣 ‘‘𑀫𑀦𑀼𑀲𑁆𑀲𑀪𑀽𑀢𑁄, 𑀤𑁂𑀯𑀪𑀽𑀢𑁄’’𑀢𑀺𑀆𑀤𑀻𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀢𑀣𑀸 𑀳𑀺 𑀲𑀁𑀲𑀸𑀭𑀫𑁄𑀘𑀓𑀧𑁂𑀢𑀯𑀢𑁆𑀣𑀼 𑀅𑀝𑁆𑀞𑀓𑀣𑀸𑀬𑀁 ‘‘𑀫𑀦𑀼𑀲𑁆𑀲𑀪𑀽𑀢𑀸𑀢𑀺𑀫𑀦𑀼𑀲𑁆𑀲𑁂𑀲𑀼 𑀚𑀸𑀢𑀸, 𑀫𑀦𑀼𑀲𑁆𑀲𑀪𑀸𑀯𑀁 𑀯𑀸 𑀧𑀢𑁆𑀢𑀸’’𑀢𑀺 𑀅𑀢𑁆𑀣𑁄 𑀲𑀁𑀯𑀡𑁆𑀡𑀺𑀢𑁄.

𑀪𑀽 𑀅𑀯𑀓𑀫𑁆𑀧𑀦𑁂. 𑀅𑀬𑀫𑁆𑀧𑀺 𑀲𑀓𑀫𑁆𑀫𑀓𑁄. 𑀪𑀸𑀯𑁂𑀢𑀺, 𑀪𑀸𑀯𑀬𑀢𑀺. 𑀫𑀦𑁄𑀪𑀸𑀯𑀦𑀻𑀬𑀸 𑀪𑀺𑀓𑁆𑀔𑀽.

𑀏𑀢𑁆𑀣 𑀘 𑀪𑀸𑀯𑁂𑀢𑀻𑀢𑀺 𑀅𑀦𑀼𑀓𑀫𑁆𑀧𑀢𑀺 𑀧𑀼𑀢𑁆𑀢𑀁 𑀯𑀸 𑀪𑀸𑀢𑀭𑀁 𑀯𑀸 𑀬𑀁𑀓𑀺𑀜𑁆𑀘𑀺. 𑀫𑀦𑁄𑀪𑀸𑀯𑀦𑀻𑀬𑀸𑀢𑀺 ‘‘𑀤𑀻𑀖𑀸𑀬𑀼𑀓𑀸 𑀳𑁄𑀦𑁆𑀢𑀼 𑀪𑀤𑀦𑁆𑀢𑀸 𑀅𑀭𑁄𑀕𑀸 𑀅𑀩𑁆𑀬𑀸𑀧𑀚𑁆𑀚𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀸𑀯𑁂𑀢𑀩𑁆𑀩𑀸 𑀅𑀦𑀼𑀓𑀫𑁆𑀧𑀺𑀢𑀩𑁆𑀩𑀸𑀢𑀺 𑀫𑀦𑁄𑀪𑀸𑀯𑀦𑀻𑀬𑀸. 𑀅𑀜𑁆𑀜𑀢𑁆𑀣 𑀧𑀦 𑀫𑀦𑁄𑀪𑀸𑀯𑀦𑀻𑀬𑀸𑀢𑀺 𑀫𑀦𑁄𑀯𑀟𑁆𑀠𑀦𑀓𑀸𑀢𑀺 𑀅𑀢𑁆𑀣𑁄. 𑀬𑁂𑀲𑀼 𑀳𑀺 𑀤𑀺𑀝𑁆𑀞𑁂𑀲𑀼 𑀫𑀦𑁄 𑀯𑀟𑁆𑀠𑀢𑀺, ‘‘𑀢𑁂 𑀫𑀦𑁄𑀪𑀸𑀯𑀦𑀻𑀬𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀮𑀪 𑀆𑀪𑀡𑁆𑀟𑀦𑁂. 𑀮𑀪𑁂𑀢𑀺, 𑀮𑀪𑀬𑀢𑀺.

𑀚𑀪𑀺 𑀦𑀸𑀲𑀦𑁂. 𑀚𑀫𑁆𑀪𑁂𑀢𑀺, 𑀚𑀫𑁆𑀪𑀬𑀢𑀺.

𑀮𑀸𑀪 𑀧𑁂𑀲𑀦𑁂. 𑀮𑀸𑀪𑁂𑀢𑀺, 𑀮𑀸𑀪𑀬𑀢𑀺. ‘‘𑀮𑀪 𑀮𑀸𑀪𑁂𑀢𑀺 𑀥𑀸𑀢𑀼𑀲𑁆𑀲 𑀭𑀽𑀧𑀸𑀦𑀺 𑀘𑁂, 𑀓𑀸𑀭𑀺𑀢𑀭𑀽𑀧𑀸𑀦𑀺 𑀪𑀯𑀦𑁆𑀢𑀺.

𑀤𑀪𑀻 𑀪𑀬𑁂. 𑀈𑀓𑀸𑀭𑀦𑁆𑀢𑀸𑀬𑀁 𑀥𑀸𑀢𑀼, 𑀢𑁂𑀦 𑀲𑀦𑀺𑀕𑁆𑀕𑀳𑀻𑀢𑀸𑀕𑀫𑀸𑀦𑀺 𑀭𑀽𑀧𑀸𑀦𑀺 𑀦 𑀪𑀯𑀦𑁆𑀢𑀺. 𑀤𑀪𑁂𑀢𑀺, 𑀤𑀪𑀬𑀢𑀺.

𑀤𑀽𑀪 𑀲𑀦𑁆𑀣𑀫𑁆𑀪𑁂. 𑀤𑀽𑀪𑁂𑀢𑀺, 𑀤𑀽𑀪𑀬𑀢𑀺.

𑀯𑀫𑁆𑀪 𑀯𑀺𑀤𑁆𑀥𑀁𑀲𑀦𑁂. 𑀯𑀫𑁆𑀪𑁂𑀢𑀺, 𑀯𑀫𑁆𑀪𑀬𑀢𑀺. 𑀯𑀫𑁆𑀪𑀦𑀸. 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀁 𑀯𑀫𑁆𑀪𑁂𑀦𑁆𑀢𑀺.

𑀪𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀫𑀓𑀸𑀭𑀦𑁆𑀢𑀥𑀸𑀢𑀼

𑀆𑀢𑁂𑀦 ¶ 𑀘𑀫𑀼 𑀥𑁄𑀯𑀦𑁂. 𑀆𑀧𑀼𑀩𑁆𑀩𑁄 𑀘𑀫𑀼𑀥𑀸𑀢𑀼 𑀥𑁄𑀯𑀦𑁂 𑀯𑀢𑁆𑀢𑀢𑀺. 𑀆𑀘𑀫𑁂𑀢𑀺, 𑀆𑀘𑀫𑀬𑀢𑀺. 𑀆𑀘𑀫𑀦𑀓𑀼𑀫𑁆𑀪𑀻.

𑀏𑀢𑁆𑀣 𑀧𑀦 ‘‘𑀢𑀢𑁄 𑀳𑀺 𑀲𑁄 𑀆𑀘𑀫𑀬𑀺𑀢𑁆𑀯𑀸 𑀮𑀺𑀘𑁆𑀙𑀯𑀻, 𑀣𑁂𑀭𑀲𑁆𑀲 𑀤𑀢𑁆𑀯𑀸 𑀬𑀼𑀕𑀸𑀦𑀺 𑀅𑀝𑁆𑀞𑀸’’𑀢𑀺 𑀅𑀧𑁆𑀧𑀲𑀓𑁆𑀓𑀸𑀭𑀧𑁂𑀢𑀯𑀢𑁆𑀣𑀼𑀧𑀸𑀴𑀺𑀧𑁆𑀧𑀤𑁂𑀲𑁄 𑀦𑀺𑀤𑀲𑁆𑀲𑀦𑀁. 𑀢𑀢𑁆𑀣 𑀆𑀘𑀫𑀬𑀺𑀢𑁆𑀯𑀸𑀢𑀺 𑀳𑀢𑁆𑀣𑀧𑀸𑀤𑀥𑁄𑀯𑀦𑀧𑀼𑀩𑁆𑀩𑀓𑀁 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸. 𑀅𑀬𑀁 𑀧𑀦 𑀥𑀸𑀢𑀼 𑀪𑀽𑀯𑀸𑀤𑀺𑀕𑀡𑀺𑀓𑀢𑁆𑀢𑁂 ‘‘𑀘𑀫𑀢𑀻’’𑀢𑀺 𑀪𑀓𑁆𑀔𑀦𑀢𑁆𑀣𑀁 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀢𑀺.

𑀓𑀫𑀼 𑀇𑀘𑁆𑀙𑀸𑀓𑀦𑁆𑀢𑀻𑀲𑀼. 𑀓𑀸𑀫𑁂𑀢𑀺, 𑀓𑀸𑀫𑀬𑀢𑀺. 𑀓𑀸𑀫𑁄, 𑀓𑀦𑁆𑀢𑀺, 𑀦𑀺𑀓𑀦𑁆𑀢𑀺, 𑀓𑀸𑀫𑀦𑀸, 𑀓𑀸𑀫𑀬𑀫𑀸𑀦𑁄,𑀓𑀸𑀫𑁂𑀦𑁆𑀢𑁄, 𑀅𑀪𑀺𑀓𑁆𑀓𑀦𑁆𑀢𑀁. 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸.

𑀏𑀢𑁆𑀣 𑀘 𑀓𑀸𑀫𑁄𑀢𑀺 𑀭𑀽𑀧𑀸𑀤𑀺𑀯𑀺𑀲𑀬𑀁 𑀓𑀸𑀫𑁂𑀢𑀻𑀢𑀺 𑀓𑀸𑀫𑁄. 𑀓𑀸𑀫𑀺𑀬𑀢𑀻𑀢𑀺 𑀯𑀸 𑀓𑀸𑀫𑁄, 𑀓𑀺𑀮𑁂𑀲𑀓𑀸𑀫𑀯𑀢𑁆𑀣𑀼𑀓𑀸𑀫𑀯𑀲𑁂𑀦𑁂𑀢𑀁 𑀤𑀝𑁆𑀞𑀩𑁆𑀩𑀁. 𑀓𑀺𑀮𑁂𑀲𑁄 𑀳𑀺 𑀢𑁂𑀪𑀽𑀫𑀓𑀯𑀝𑁆𑀝𑀲𑀗𑁆𑀔𑀸𑀢𑀜𑁆𑀘 𑀯𑀢𑁆𑀣𑀼 ‘‘𑀓𑀸𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀫𑀸𑀭𑁄𑀧𑀺 𑀯𑀸 𑀤𑁂𑀯𑀧𑀼𑀢𑁆𑀢𑁄 ‘‘𑀓𑀸𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀳𑀺 𑀅𑀘𑁆𑀘𑀦𑁆𑀢𑀓𑀡𑁆𑀳𑀥𑀫𑁆𑀫𑀲𑀫𑀗𑁆𑀕𑀺𑀢𑀸𑀬 𑀧𑀧𑀜𑁆𑀘𑀲𑀫𑀢𑀺𑀓𑁆𑀓𑀦𑁆𑀢𑁂𑀧𑀺 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑁂 𑀅𑀢𑁆𑀢𑀦𑁄 𑀯𑀲𑁂 𑀞𑀧𑁂𑀢𑀼𑀁 𑀓𑀸𑀫𑁂𑀢𑀻𑀢𑀺 ‘‘𑀓𑀸𑀫𑁄’’𑀢𑀺 𑀯𑀼𑀘𑁆𑀘𑀢𑀺.

𑀯𑀼𑀢𑁆𑀢𑀜𑁆𑀘𑁂𑀢𑀁 𑀧𑁄𑀭𑀸𑀡𑀓𑀯𑀺𑀭𑀘𑀦𑀸𑀬𑀁 𑁋

‘‘𑀯𑀦𑁆𑀤𑁂 𑀯𑀦𑁆𑀤𑁂𑀳𑀫𑀲𑁆𑀲𑀢𑁆𑀣𑀁, 𑀬𑀢𑁆𑀣 𑀲𑀦𑁆𑀢𑀚𑁆𑀚𑀺𑀢𑁄 𑀚𑀺𑀢𑁄;

𑀓𑀸𑀫𑁄 𑀓𑀸𑀫𑁄𑀖𑀢𑀺𑀡𑁆𑀡𑁂𑀦, 𑀩𑀼𑀤𑁆𑀥𑁂𑀦 𑀯𑀲𑀢𑀸 𑀲𑀢𑀸’’𑀢𑀺;

𑀇𑀫𑀸𑀦𑀺 𑀧𑀦𑀲𑁆𑀲 𑀦𑀸𑀫𑀸𑀦𑀺 𑁋

𑀓𑀸𑀫𑁄 𑀦𑀫𑀼𑀘𑀺 𑀓𑀡𑁆𑀳𑁄 𑀘, 𑀯𑀲𑀯𑀢𑁆𑀢𑀻 𑀧𑀚𑀸𑀧𑀢𑀺;

𑀧𑀫𑀢𑁆𑀢𑀩𑀦𑁆𑀥𑀼 𑀫𑀤𑀦𑁄, 𑀧𑀸𑀧𑀺𑀫𑀸 𑀤𑀫𑁆𑀫𑀓𑁄𑀧𑀺 𑀘;

𑀓𑀦𑁆𑀤𑀧𑁆𑀧𑁄 𑀘 𑀭𑀢𑀺𑀧𑀢𑀺, 𑀫𑀸𑀭𑁄 𑀘 𑀓𑀼𑀲𑀼𑀫𑀸𑀬𑀼𑀥𑁄;

𑀅𑀜𑁆𑀜𑁂 ¶ 𑀅𑀜𑁆𑀜𑀸𑀦𑀺𑀧𑀺 𑀯𑀤𑀦𑁆𑀢𑀺. 𑀢𑀸𑀦𑀺 𑀲𑀸𑀲𑀦𑀸𑀦𑀼𑀮𑁄𑀫𑀸𑀦𑀺 𑀦 𑀳𑁄𑀦𑁆𑀢𑀻𑀢𑀺 𑀇𑀥 𑀦 𑀤𑀲𑁆𑀲𑀺𑀢𑀸𑀦𑀺. 𑀅𑀝𑁆𑀞𑀓𑀣𑀸𑀲𑀼 𑀧𑀦 ‘‘𑀫𑀸𑀭𑁄, 𑀦𑀫𑀼𑀘𑀺, 𑀓𑀡𑁆𑀳𑁄, 𑀧𑀫𑀢𑁆𑀢𑀩𑀦𑁆𑀥𑀽’’𑀢𑀺 𑀘𑀢𑁆𑀢𑀸𑀭𑀺𑀬𑁂𑀯 𑀦𑀸𑀫𑀸𑀦𑀺 𑀆𑀕𑀢𑀸𑀦𑀺.

𑀇𑀤𑀸𑀦𑀺 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑀲𑁆𑀲 𑀪𑀽𑀯𑀸𑀤𑀺𑀕𑀡𑁂 ‘‘𑀓𑀫𑀼 𑀧𑀤𑀯𑀺𑀓𑁆𑀔𑁂𑀧𑁂’’𑀢𑀺 𑀯𑁄𑀳𑀸𑀭𑀲𑀻𑀲𑁂𑀦 𑀯𑀼𑀢𑁆𑀢𑀲𑁆𑀲 𑀓𑀫𑀼𑀥𑀸𑀢𑀼𑀲𑁆𑀲 𑀯𑀲𑁂𑀦 𑀇𑀥 𑀘 ‘‘𑀓𑀫𑀼 𑀇𑀘𑁆𑀙𑀸𑀓𑀦𑁆𑀢𑀻𑀲𑀽’’𑀢𑀺 𑀯𑀼𑀢𑁆𑀢𑀲𑁆𑀲 𑀓𑀫𑀼𑀥𑀸𑀢𑀼𑀲𑁆𑀲 𑀯𑀲𑁂𑀦 𑀅𑀢𑁆𑀣𑀼𑀤𑁆𑀥𑀸𑀭𑀁 𑀓𑀣𑀬𑀸𑀫. 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁄 𑀔𑀬𑀲𑀼𑀦𑁆𑀤𑀭𑀸𑀪𑀺𑀭𑀽𑀧𑀅𑀩𑁆𑀪𑀦𑀼𑀫𑁄𑀤𑀦𑁂𑀲𑀼 𑀤𑀺𑀲𑁆𑀲𑀢𑀺. ‘‘𑀅𑀪𑀺𑀓𑁆𑀓𑀦𑁆𑀢𑀸 𑀪𑀦𑁆𑀢𑁂 𑀭𑀢𑁆𑀢𑀺, 𑀦𑀺𑀓𑁆𑀔𑀦𑁆𑀢𑁄 𑀧𑀞𑀫𑁄 𑀬𑀸𑀫𑁄, 𑀘𑀺𑀭𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺𑀆𑀤𑀻𑀲𑀼 𑀔𑀬𑁂 𑀤𑀺𑀲𑁆𑀲𑀢𑀺. ‘‘𑀅𑀬𑀁 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘𑀸’’𑀢𑀺𑀆𑀤𑀻𑀲𑀼 𑀲𑀼𑀦𑁆𑀤𑀭𑁂.

‘‘𑀓𑁄 𑀫𑁂 𑀯𑀦𑁆𑀤𑀢𑀺 𑀧𑀸𑀤𑀸𑀦𑀺, 𑀇𑀤𑁆𑀥𑀺𑀬𑀸 𑀬𑀲𑀲𑀸 𑀚𑀮𑀁;

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸’’𑀢𑀺

𑀆𑀤𑀻𑀲𑀼 𑀅𑀪𑀺𑀭𑀽𑀧𑁂. ‘‘𑀅𑀪𑀺𑀓𑁆𑀓𑀦𑁆𑀢𑀁 𑀪𑀦𑁆𑀢𑁂’’𑀢𑀺𑀆𑀤𑀻𑀲𑀼 𑀅𑀩𑁆𑀪𑀦𑀼𑀫𑁄𑀤𑀦𑁂. 𑀇𑀘𑁆𑀘𑁂𑀯𑀁 𑁋

𑀔𑀬𑀲𑁆𑀫𑀺𑀁 𑀲𑀼𑀦𑁆𑀤𑀭𑁂 𑀘𑁂𑀯, 𑀅𑀣𑁄 𑀅𑀩𑁆𑀪𑀦𑀼𑀫𑁄𑀤𑀦𑁂;

𑀅𑀪𑀺𑀭𑀽𑀧𑁂 𑀅𑀪𑀺𑀓𑁆𑀓𑀦𑁆𑀢-𑀲𑀤𑁆𑀤𑁄 𑀤𑀺𑀲𑁆𑀲𑀢𑀺 𑀲𑀸𑀲𑀦𑁂.

𑀣𑁄𑀫 𑀲𑀺𑀮𑀸𑀖𑀸𑀬𑀁. 𑀲𑀺𑀮𑀸𑀖𑀸 𑀧𑀲𑀁𑀲𑀸. 𑀣𑁄𑀫𑁂𑀢𑀺, 𑀣𑁄𑀫𑀬𑀢𑀺. 𑀣𑁄𑀫𑀺𑀢𑁄, 𑀣𑁄𑀫𑀦𑀸.

𑀬𑀫 𑀅𑀧𑀭𑀺𑀯𑁂𑀲𑀦𑁂. 𑀬𑀫𑁂𑀢𑀺, 𑀬𑀫𑀬𑀢𑀺. 𑀬𑀫𑁄.

𑀲𑀫 ¶ 𑀯𑀺𑀢𑀓𑁆𑀓𑁂. 𑀲𑀸𑀫𑁂𑀢𑀺, 𑀲𑀸𑀫𑀬𑀢𑀺. 𑀲𑀫𑀸. 𑀦𑀺𑀲𑀸𑀫𑁂𑀢𑀺, 𑀦𑀺𑀲𑀸𑀫𑀬𑀢𑀺. 𑀦𑀺𑀲𑀸𑀫𑀦𑀁. 𑀧𑀝𑀺𑀲𑀸𑀫𑁂𑀢𑀺, 𑀧𑀝𑀺𑀲𑀸𑀫𑀬𑀢𑀺. 𑀧𑀝𑀺𑀲𑀸𑀫𑀦𑀁.

𑀢𑀢𑁆𑀣 𑀲𑀫𑀸𑀢𑀺 𑀲𑀁𑀯𑀘𑁆𑀙𑀭𑁄, 𑀲𑁄 ‘‘𑀲𑀫𑀸’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀯𑀼𑀘𑁆𑀘𑀢𑀺. ‘‘𑀬𑁄 𑀬𑀚𑁂𑀣 𑀲𑀢𑀁 𑀲𑀫’’𑀦𑁆𑀢𑀺 𑀏𑀢𑁆𑀣 𑀳𑀺 𑀲𑀫𑀸𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑁄, 𑀉𑀧𑀬𑁄𑀕𑀯𑀲𑁂𑀦 𑀧𑀦 ‘‘𑀲𑀫’’𑀦𑁆𑀢𑀺 𑀯𑀼𑀢𑁆𑀢𑁄.

𑀇𑀫𑀸𑀦𑀺 𑀲𑀁𑀯𑀘𑁆𑀙𑀭𑀲𑁆𑀲 𑀦𑀸𑀫𑀸𑀦𑀺 ‘‘𑀲𑀁𑀯𑀘𑁆𑀙𑀭𑁄, 𑀯𑀘𑁆𑀙𑀭𑁄, 𑀲𑀫𑀸, 𑀳𑀸𑀬𑀦𑁄, 𑀲𑀭𑀤𑁄, 𑀯𑀲𑁆𑀲𑁄’’𑀢𑀺𑀆𑀤𑀻𑀦𑀺 𑀪𑀯𑀦𑁆𑀢𑀺. 𑀦𑀺𑀲𑀸𑀫𑁂𑀢𑀻𑀢𑀺 𑀯𑀺𑀢𑀓𑁆𑀓𑁂𑀢𑀺 𑀉𑀧𑀥𑀸𑀭𑁂𑀢𑀺. 𑀏𑀢𑁆𑀣 𑀳𑀺 ‘‘𑀇𑀗𑁆𑀖 𑀫𑀤𑁆𑀤𑀺 𑀦𑀺𑀲𑀸𑀫𑁂𑀳𑀺, 𑀦𑀺𑀕𑁆𑀖𑁄𑀲𑁄 𑀬𑀸𑀤𑀺𑀲𑁄 𑀯𑀦𑁂’’𑀢𑀺 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. 𑀢𑀢𑁆𑀣 𑀦𑀺𑀲𑀸𑀫𑁂𑀳𑀻𑀢𑀺 𑀯𑀺𑀢𑀓𑁆𑀓𑁂𑀳𑀺 𑀉𑀧𑀥𑀸𑀭𑁂𑀳𑀻𑀢𑀺 𑀅𑀢𑁆𑀣𑁄. 𑀧𑀝𑀺𑀲𑀸𑀫𑁂𑀢𑀻𑀢𑀺 𑀪𑀡𑁆𑀟𑀁 𑀕𑀼𑀢𑁆𑀢𑀝𑁆𑀞𑀸𑀦𑁂 𑀦𑀺𑀓𑁆𑀔𑀺𑀧𑀢𑀺.

𑀲𑀫 𑀆𑀮𑁄𑀘𑀦𑁂. 𑀆𑀮𑁄𑀘𑀦𑀁 𑀧𑁂𑀓𑁆𑀔𑀦𑀁. 𑀲𑀸𑀫𑁂𑀢𑀺, 𑀲𑀸𑀫𑀬𑀢𑀺. 𑀦𑀺𑀲𑀸𑀫𑀦𑀁.

𑀏𑀢𑁆𑀣 𑀧𑀦 𑀦𑀺𑀲𑀸𑀫𑁂𑀢𑀻𑀢𑀺 𑀧𑁂𑀓𑁆𑀔𑀢𑀺 𑀑𑀮𑁄𑀓𑁂𑀢𑀺. 𑀢𑀣𑀸 𑀳𑀺 ‘‘𑀇𑀗𑁆𑀖 𑀫𑀤𑁆𑀤𑀺 𑀦𑀺𑀲𑀸𑀫𑁂𑀳𑀺, 𑀘𑀺𑀢𑁆𑀢𑀁 𑀭𑀽𑀧𑀁𑀯 𑀤𑀺𑀲𑁆𑀲𑀢𑀻’’𑀢𑀺 𑀧𑀸𑀴𑀺 𑀤𑀺𑀲𑁆𑀲𑀢𑀺. 𑀢𑀢𑁆𑀣 𑀳𑀺 𑀦𑀺𑀲𑀸𑀫𑁂𑀳𑀻𑀢𑀺 𑀑𑀮𑁄𑀓𑁂𑀳𑀻𑀢𑀺 𑀅𑀢𑁆𑀣𑁄. 𑀥𑀸𑀢𑀽𑀦𑀫𑀢𑁆𑀣𑀸𑀢𑀺𑀲𑀬𑁂𑀦 𑀬𑁄𑀕𑁄𑀢𑀺 𑀯𑀘𑀦𑀢𑁄 𑀧𑀦 𑀉𑀧𑀲𑀕𑁆𑀕𑀬𑁄𑀕𑀢𑁄 𑀯𑀸 𑀲𑀯𑀦𑁂𑀧𑀺 𑀅𑀬𑀁 𑀯𑀢𑁆𑀢𑀢𑀺. 𑀢𑀣𑀸 𑀳𑀺 ‘‘𑀢𑀢𑁄 𑀓𑀡𑁆𑀳𑀸𑀚𑀺𑀦𑀸𑀬𑀸𑀧𑀺, 𑀦𑀺𑀲𑀸𑀫𑁂𑀳𑀺 𑀭𑀣𑁂𑀲𑀪𑀸’’𑀢𑀺𑀆𑀤𑀺𑀓𑀸 𑀧𑀸𑀴𑀺𑀬𑁄 𑀤𑀺𑀲𑁆𑀲𑀦𑁆𑀢𑀺. 𑀢𑀢𑁆𑀣 𑀦𑀺𑀲𑀸𑀫𑁂𑀳𑀻𑀢𑀺 𑀲𑀼𑀡𑁄𑀳𑀻𑀢𑀺 𑀅𑀢𑁆𑀣𑁄.

𑀅𑀫 𑀭𑁄𑀕𑁂. 𑀅𑀫𑁂𑀢𑀺, 𑀅𑀫𑀬𑀢𑀺. 𑀅𑀦𑁆𑀥𑁄. 𑀩𑀺𑀮𑀗𑁆𑀓𑀧𑀸𑀤𑁄 𑀅𑀦𑁆𑀥𑀦𑀔𑁄.

𑀢𑀢𑁆𑀣 𑀅𑀦𑁆𑀥𑁄𑀢𑀺 𑀦𑀝𑁆𑀞𑀦𑀬𑀦𑁄 𑀯𑀼𑀘𑁆𑀘𑀢𑀺. 𑀅𑀦𑁆𑀥𑀦𑀔𑁄𑀢𑀺 𑀧𑀽𑀢𑀺𑀦𑀔𑁄. 𑀉𑀪𑀬𑀣𑀸𑀧𑀺 𑀲𑀭𑁄𑀕𑀢𑁆𑀢𑀁 𑀲𑀽𑀘𑀺𑀢𑀁.

𑀪𑀸𑀫 ¶ 𑀓𑁄𑀥𑁂. 𑀪𑀸𑀫𑁂𑀢𑀺, 𑀪𑀸𑀫𑀬𑀢𑀺.

𑀕𑁄𑀫 𑀉𑀧𑀮𑁂𑀧𑀦𑁂. 𑀕𑁄𑀫𑁂𑀢𑀺, 𑀕𑁄𑀫𑀬𑀢𑀺.

𑀲𑀸𑀫 𑀲𑁆𑀯𑀸𑀦𑁆𑀢𑀦𑁂 𑀆𑀫𑀦𑁆𑀢𑀦𑁂. 𑀲𑁆𑀯𑀸𑀦𑁆𑀢𑀦𑀁 𑀲𑀸𑀫𑀧𑁆𑀧𑀬𑁄𑀕𑁄. 𑀆𑀫𑀦𑁆𑀢𑀦𑀁 𑀅𑀯𑁆𑀳𑀸𑀬𑀦𑀁 𑀧𑀓𑁆𑀓𑁄𑀲𑀦𑀁. 𑀲𑀸𑀫𑁂𑀢𑀺, 𑀲𑀸𑀫𑀬𑀢𑀺.

𑀲𑀗𑁆𑀕𑀸𑀫 𑀬𑀼𑀤𑁆𑀥𑁂. 𑀲𑀗𑁆𑀕𑀸𑀫𑁂𑀢𑀺, 𑀲𑀗𑁆𑀕𑀸𑀫𑀬𑀢𑀺. 𑀤𑁆𑀯𑁂 𑀭𑀸𑀚𑀸𑀦𑁄 𑀲𑀗𑁆𑀕𑀸𑀫𑁂𑀲𑀼𑀁. 𑀲𑀗𑁆𑀕𑀸𑀫𑁄. 𑀆𑀢𑁄 𑀕𑀫𑀼 𑀈𑀲𑀫𑀥𑀺𑀯𑀸𑀲𑀦𑁂. 𑀆𑀕𑀫𑁂𑀢𑀺, 𑀆𑀕𑀫𑀬𑀢𑀺, 𑀓𑀸𑀫𑀸𑀯𑀘𑀭𑀥𑀫𑁆𑀫𑁂 𑀦𑀺𑀲𑁆𑀲𑀸𑀬 𑀭𑀽𑀧𑀸𑀭𑀽𑀧𑀥𑀫𑁆𑀫𑁄 𑀲𑀫𑀼𑀤𑀸𑀕𑀫𑁂𑀢𑀺, 𑀲𑀫𑀼𑀤𑀸𑀕𑀫𑀬𑀢𑀺. 𑀉𑀧𑀸𑀲𑀓𑁄 𑀥𑀫𑁆𑀫𑀲𑀯𑀦𑀦𑁆𑀢𑀭𑀸𑀬𑀁 𑀅𑀦𑀺𑀘𑁆𑀙𑀦𑁆𑀢𑁄 ‘‘𑀆𑀕𑀫𑁂𑀣 𑀆𑀕𑀫𑁂𑀣𑀸’’𑀢𑀺 𑀆𑀳. 𑀲𑀫𑀼𑀤𑀸𑀕𑀫𑀦𑀁, 𑀆𑀕𑀫𑀦𑀁. 𑀆𑀕𑀫𑁂𑀦𑁆𑀢𑁄, 𑀆𑀕𑀫𑀬𑀫𑀸𑀦𑁄.

𑀢𑀢𑁆𑀭 𑀆𑀕𑀫𑁂𑀢𑀻𑀢𑀺 𑀈𑀲𑀓𑀁 𑀅𑀥𑀺𑀯𑀸𑀲𑁂𑀢𑀺. 𑀲𑀫𑀼𑀤𑀸𑀕𑀫𑁂𑀢𑀻𑀢𑀺 𑀲𑀫𑁆𑀧𑀯𑀢𑁆𑀢𑀢𑀺. 𑀪𑀽𑀯𑀸𑀤𑀺𑀕𑀡𑁂 ‘‘𑀕𑀫𑀬𑀢𑀻’’𑀢𑀺 𑀳𑁂𑀢𑀼𑀓𑀢𑁆𑀢𑀼𑀯𑀲𑁂𑀦 𑀯𑀼𑀢𑁆𑀢𑀁, 𑀇𑀥 𑀧𑀦 𑀉𑀧𑀲𑀕𑁆𑀕𑀦𑀺𑀧𑀸𑀢𑀧𑀼𑀩𑁆𑀩𑀓𑀸𑀦𑀺 𑀓𑀢𑁆𑀯𑀸 ‘‘𑀆𑀕𑀫𑁂𑀢𑀻’’𑀢𑀺𑀆𑀤𑀻𑀦𑀺 𑀲𑀼𑀤𑁆𑀥𑀓𑀢𑁆𑀢𑀼𑀯𑀲𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀫𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀇𑀢𑀺 𑀘𑀼 𑀭𑀸𑀤𑀺𑀕𑀡𑁂 𑀧𑀯𑀕𑁆𑀕𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺

𑀲𑀫𑀢𑁆𑀢𑀸𑀦𑀺.

𑀬𑀓𑀸𑀭𑀦𑁆𑀢𑀥𑀸𑀢𑀼

𑀬𑀼 𑀚𑀺𑀕𑀼𑀘𑁆𑀙𑀸𑀬𑀁. 𑀬𑀸𑀯𑁂𑀢𑀺, 𑀬𑀸𑀯𑀬𑀢𑀺. 𑀬𑀯𑁄.

𑀩𑁆𑀬𑀬 𑀔𑀬𑁂. 𑀩𑁆𑀬𑀬𑁂𑀢𑀺, 𑀩𑁆𑀬𑀬𑀬𑀢𑀺. 𑀅𑀩𑁆𑀬𑀬𑀻𑀪𑀸𑀯𑁄.

𑀩𑁆𑀬𑀬 𑀘𑀺𑀢𑁆𑀢𑀲𑀫𑀼𑀲𑁆𑀲𑀕𑁆𑀕𑁂. 𑀢𑀸𑀤𑀺𑀲𑀁𑀬𑁂𑀯 𑀭𑀽𑀧𑀁.

𑀬𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀭𑀓𑀸𑀭𑀦𑁆𑀢𑀥𑀸𑀢𑀼

𑀧𑀭 𑀕𑀢𑀺𑀬𑀁. 𑀧𑀭𑁂𑀢𑀺, 𑀧𑀭𑀬𑀢𑀺. 𑀏𑀢𑁆𑀣 𑀘 ‘‘𑀇𑀢𑀺 𑀔𑁄 𑀆𑀦𑀦𑁆𑀤 𑀓𑀼𑀲𑀮𑀸𑀦𑀺 𑀲𑀻𑀮𑀸𑀦𑀺 𑀅𑀦𑀼𑀧𑀼𑀩𑁆𑀩𑁂𑀦 𑀅𑀕𑁆𑀕𑀸𑀬 𑀧𑀭𑁂𑀦𑁆𑀢𑀻’’𑀢𑀺 𑀧𑀸𑀴𑀺 𑀦𑀺𑀤𑀲𑁆𑀲𑀦𑀁. 𑀢𑀢𑁆𑀣 𑀅𑀕𑁆𑀕𑀸𑀬 𑀧𑀭𑁂𑀦𑁆𑀢𑀻𑀢𑀺 𑀅𑀭𑀳𑀢𑁆𑀢𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀺.

𑀕𑀭 𑀉𑀕𑁆𑀕𑀫𑁂. 𑀕𑀭𑁂𑀢𑀺, 𑀕𑀭𑀬𑀢𑀺. 𑀕𑀭𑀼.

𑀘𑀭 𑀅𑀲𑀁𑀲𑀬𑁂. 𑀘𑀭𑁂𑀢𑀺, 𑀘𑀭𑀬𑀢𑀺.

𑀧𑀽𑀭𑀺 𑀅𑀧𑁆𑀧𑀸𑀬𑀦𑁂. 𑀧𑀽𑀭𑁂𑀢𑀺, 𑀧𑀽𑀭𑀬𑀢𑀺.

𑀯𑀭 𑀇𑀘𑁆𑀙𑀸𑀬𑀁. 𑀯𑀭𑁂𑀢𑀺, 𑀯𑀭𑀬𑀢𑀺. 𑀯𑀭𑁄, 𑀯𑀭𑀁, 𑀯𑀭𑀦𑁆𑀢𑁄. 𑀏𑀢𑁂 𑀯𑀭𑀸𑀦𑀁 𑀘𑀢𑀼𑀭𑁄 𑀯𑀭𑁂𑀫𑀺. 𑀏𑀢𑀁 𑀲𑀓𑁆𑀓 𑀯𑀭𑀁 𑀯𑀭𑁂.

𑀢𑀢𑁆𑀣 𑀯𑀭𑁄𑀢𑀺 𑀯𑀭𑀺𑀬𑀢𑁂 𑀯𑀭𑀺𑀢𑀩𑁆𑀩𑁄𑀢𑀺 𑀯𑀭𑁄. 𑀯𑀭𑀦𑁆𑀢𑀺 𑀯𑀭𑁂𑀢𑀻𑀢𑀺 𑀯𑀭𑀁, 𑀇𑀘𑁆𑀙𑀦𑁆𑀢𑁄 𑀧𑀢𑁆𑀣𑁂𑀦𑁆𑀢𑁄𑀢𑀺 𑀅𑀢𑁆𑀣𑁄.

‘‘𑀫𑀳𑀸𑀫𑀳𑀸𑀭𑀳𑀁 𑀲𑀓𑁆𑀬-𑀫𑀼𑀦𑀺 𑀦𑀻𑀯𑀭𑀡𑀸 𑀭𑀡𑀸;

𑀫𑀼𑀢𑁆𑀢𑀁 𑀫𑀼𑀢𑁆𑀢𑀁 𑀲𑀼𑀤𑀲𑁆𑀲𑀦𑀁, 𑀯𑀦𑁆𑀤𑁂 𑀩𑁄𑀥𑀺𑀯𑀭𑀁 𑀯𑀭’’𑀦𑁆𑀢𑀺

𑀧𑀼𑀭𑀸𑀡𑀓𑀯𑀺𑀭𑀘𑀦𑀸𑀬𑀁 ‘‘𑀯𑀭’’𑀦𑁆𑀢𑀺 𑀧𑀤𑀲𑁆𑀲 𑀯𑀺𑀬. 𑀏𑀯𑀁 𑀯𑀭𑁂𑀢𑀻𑀢𑀺 𑀯𑀭𑀦𑁆𑀢𑁄. 𑀯𑀭𑁂𑀢𑀺 𑀯𑀭𑁂𑀫𑀺 𑀇𑀘𑁆𑀙𑀸𑀫𑀺 𑀬𑀸𑀘𑀸𑀫𑀺. 𑀓𑀸𑀭𑀺𑀢𑁂 ‘‘𑀧𑀯𑀸𑀭𑁂𑀢𑀻’’𑀢𑀺 𑀭𑀽𑀧𑀁, 𑀇𑀘𑁆𑀙𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀲𑁂𑀥𑀦𑀢𑁆𑀣𑁂 𑀧𑀦𑀺𑀤𑀁 𑀓𑀸𑀭𑀺𑀢𑀁 𑀦 𑀳𑁄𑀢𑀺.

𑀲𑀭 𑀅𑀓𑁆𑀔𑁂𑀧𑁂. 𑀲𑀭𑁂𑀢𑀺, 𑀲𑀭𑀬𑀢𑀺. 𑀲𑀭𑁄. 𑀲𑀭𑁄𑀢𑀺 𑀲𑀤𑁆𑀤𑁄.

𑀲𑀸𑀭 𑀤𑀼𑀩𑁆𑀩𑀮𑁆𑀬𑁂. 𑀲𑀸𑀭𑁂𑀢𑀺, 𑀲𑀸𑀭𑀬𑀢𑀺. 𑀤𑀼𑀩𑁆𑀩𑀮𑁄 𑀪𑀯𑀢𑀻𑀢𑀺 𑀅𑀢𑁆𑀣𑁄.

𑀓𑀼𑀫𑀸𑀭 𑀓𑀻𑀴𑀸𑀬𑀁. 𑀓𑀼𑀫𑀸𑀭𑁂𑀢𑀺, 𑀓𑀼𑀫𑀸𑀭𑀬𑀢𑀺. 𑀓𑀼𑀫𑀸𑀭𑁄, 𑀓𑀼𑀫𑀸𑀭𑀓𑁄. 𑀓𑀼𑀫𑀸𑀭𑀻, 𑀓𑀼𑀫𑀸𑀭𑀺𑀓𑀸.

𑀏𑀢𑁆𑀣 ¶ 𑀓𑀼𑀫𑀸𑀭𑀬𑀢𑀺 𑀢𑀢𑁆𑀣 𑀢𑀢𑁆𑀣 𑀓𑀻𑀴𑀢𑀻𑀢𑀺 𑀓𑀼𑀫𑀸𑀭𑁄. 𑀲𑁄 𑀏𑀯 𑀅𑀢𑀺𑀤𑀳𑀭𑀢𑁆𑀢𑀸 𑀓𑀼𑀫𑀸𑀭𑀓𑁄. 𑀏𑀲 𑀦𑀬𑁄 𑀇𑀢𑀭𑀢𑁆𑀭𑀸𑀧𑀺.

𑀲𑀽𑀭 𑀯𑀻𑀭 𑀯𑀺𑀓𑁆𑀓𑀦𑁆𑀢𑀺𑀬𑀁. 𑀯𑀺𑀓𑁆𑀓𑀦𑁆𑀢𑀺 𑀯𑀺𑀓𑁆𑀓𑀫𑀦𑀁. 𑀲𑀽𑀭𑁂𑀢𑀺, 𑀲𑀽𑀭𑀬𑀢𑀺. 𑀯𑀻𑀭𑁂𑀢𑀺, 𑀯𑀻𑀭𑀬𑀢𑀺. 𑀲𑀽𑀭𑁄, 𑀯𑀻𑀭𑁄. 𑀲𑀸𑀲𑀦𑀺𑀓𑁂𑀳𑀺 𑀧𑀦 𑀲𑀤𑁆𑀥𑀫𑁆𑀫𑀯𑀺𑀤𑀽𑀳𑀺 𑀏𑀯𑀁 𑀥𑀸𑀢𑀼𑀲𑀪𑀸𑀯𑀸𑀦𑀫𑁆𑀧𑀺 𑀲𑀽𑀭𑀯𑀻𑀭𑀲𑀤𑁆𑀤𑀸𑀦𑀁 𑀦𑀺𑀩𑁆𑀩𑀘𑀦𑀁 𑀦 𑀤𑀲𑁆𑀲𑀺𑀢𑀁, 𑀓𑁂𑀯𑀮𑀁 𑀧𑀦 𑀢𑀢𑁆𑀣 𑀢𑀢𑁆𑀣 ‘‘𑀲𑀽𑀭𑁄𑀢𑀺 𑀯𑀺𑀲𑀺𑀝𑁆𑀞𑀉𑀭𑁄’’𑀢𑀺 𑀘 ‘‘𑀫𑀳𑀸𑀯𑀻𑀭𑁄𑀢𑀺 𑀫𑀳𑀸𑀯𑀺𑀓𑁆𑀓𑀦𑁆𑀢𑁄’’𑀢𑀺 𑀘 ‘‘𑀯𑀻𑀭𑁄𑀢𑀺 𑀯𑀻𑀭𑀺𑀬𑀯𑀸’’𑀢𑀺 𑀘 𑀅𑀢𑁆𑀣𑀯𑀺𑀯𑀭𑀡𑀫𑀢𑁆𑀢𑀫𑁂𑀯 𑀤𑀲𑁆𑀲𑀺𑀢𑀁.

𑀧𑀸𑀭 𑀢𑀻𑀭 𑀓𑀫𑁆𑀫𑀲𑀫𑁆𑀧𑀢𑁆𑀢𑀺𑀬𑀁. 𑀓𑀫𑁆𑀫𑀲𑀫𑁆𑀧𑀢𑁆𑀢𑀺 𑀦𑀸𑀫 𑀓𑀫𑁆𑀫𑀲𑁆𑀲 𑀧𑀭𑀺𑀲𑀫𑀸𑀧𑀦𑀁 𑀦𑀺𑀝𑁆𑀞𑀸𑀧𑀦𑀁. 𑀧𑀸𑀭𑁂𑀢𑀺, 𑀧𑀸𑀭𑀬𑀢𑀺. 𑀢𑀻𑀭𑁂𑀢𑀺, 𑀢𑀻𑀭𑀬𑀢𑀺. 𑀧𑀸𑀭𑀁. 𑀢𑀻𑀭𑀁. 𑀯𑀺𑀓𑁆𑀓𑀫𑀸𑀫𑀺 𑀦 𑀧𑀸𑀭𑁂𑀫𑀺, 𑀪𑀽𑀫𑀺𑀁 𑀲𑀼𑀫𑁆𑀪𑀸𑀫𑀺 𑀯𑁂𑀕𑀲𑀸. 𑀢𑀁 𑀓𑀺𑀘𑁆𑀘𑀁 𑀢𑀻𑀭𑁂𑀢𑁆𑀯𑀸 𑀕𑀢𑁄. 𑀲𑀦𑁆𑀢𑀻𑀭𑀡𑀁, 𑀢𑀻𑀭𑀡𑀧𑀭𑀺𑀜𑁆𑀜𑀸𑀢𑀺 𑀘 𑀆𑀤𑀻𑀦𑀺 𑀏𑀢𑁆𑀣 𑀤𑀲𑁆𑀲𑁂𑀢𑀩𑁆𑀩𑀸𑀦𑀺.

𑀢𑀢𑁆𑀣 𑀦 𑀧𑀸𑀭𑁂𑀫𑀻𑀢𑀺 𑀙𑀺𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑁄𑀫𑀻𑀢𑀺 𑀅𑀢𑁆𑀣𑁄.

𑀈𑀭 𑀔𑁂𑀧𑀦𑁂. 𑀈𑀭𑁂𑀢𑀺, 𑀈𑀭𑀬𑀢𑀺.

𑀚𑀭 𑀯𑀬𑁄𑀳𑀸𑀦𑀺𑀫𑁆𑀳𑀺. 𑀚𑀭𑁂𑀢𑀺, 𑀚𑀭𑀬𑀢𑀺. 𑀚𑀭𑀸. 𑀧𑀸𑀴𑀺𑀬𑀁 𑀧𑀦 ‘‘𑀚𑀻𑀭𑀢𑀻’’𑀢𑀺 𑀧𑀸𑀞𑁄.

𑀯𑀭 𑀆𑀯𑀭𑀡𑁂. 𑀯𑀸𑀭𑁂𑀢𑀺, 𑀯𑀸𑀭𑀬𑀢𑀺. 𑀦𑀺𑀯𑀸𑀭𑁂𑀢𑀺, 𑀦𑀺𑀯𑀸𑀭𑀬𑀢𑀺. 𑀦𑀺𑀯𑀸𑀭𑁂𑀢𑀸. 𑀧𑀭𑀺𑀯𑀸𑀭𑁂𑀢𑀺, 𑀧𑀭𑀺𑀯𑀸𑀭𑀬𑀢𑀺. 𑀧𑀭𑀺𑀯𑀸𑀭𑁄. 𑀧𑀯𑀸𑀭𑁂𑀢𑀺, 𑀧𑀯𑀸𑀭𑀬𑀢𑀺. 𑀧𑀯𑀸𑀭𑀡𑀁. 𑀧𑀯𑀸𑀭𑀡𑀦𑁆𑀢𑀺 𑀦𑀺𑀲𑁂𑀥𑀦𑀁 𑀯𑀸 𑀓𑀸𑀫𑁆𑀬𑀤𑀸𑀦𑀁 𑀯𑀸.

𑀥𑀭 𑀥𑀸𑀭𑀡𑁂. 𑀥𑀸𑀭𑁂𑀢𑀺, 𑀥𑀸𑀭𑀬𑀢𑀺. 𑀆𑀥𑀸𑀭𑁄, 𑀆𑀥𑀸𑀭𑀓𑁄, 𑀥𑀫𑁆𑀫𑁄 𑀇𑀘𑁆𑀘𑀸𑀤𑀻𑀦𑀺.

𑀢𑀢𑁆𑀣 𑀥𑀫𑁆𑀫𑁄𑀢𑀺 𑀅𑀦𑁂𑀓𑀯𑀺𑀥𑁂𑀲𑀼 𑀥𑀫𑁆𑀫𑁂𑀲𑀼 𑀮𑁄𑀓𑀼𑀢𑁆𑀢𑀭𑁄 𑀉𑀧𑁆𑀧𑀸𑀤𑀺𑀢𑁄 𑀲𑀘𑁆𑀙𑀺𑀓𑀢𑁄 𑀘 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀲𑀁𑀲𑀸𑀭𑁂 𑀯𑀸 ¶ 𑀲𑀢𑁆𑀢𑁂 𑀅𑀧𑀢𑀫𑀸𑀦𑁂 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄. 𑀅𑀣 𑀯𑀸 𑀲𑁄𑀢𑀸𑀧𑀦𑁆𑀦𑀸𑀤𑀻𑀳𑀺 𑀅𑀭𑀺𑀬𑁂𑀳𑀺 𑀥𑀸𑀭𑀺𑀬𑀢𑀺, 𑀦𑀼 𑀧𑀼𑀣𑀼𑀚𑁆𑀚𑀦𑁂𑀳𑀻𑀢𑀺𑀧𑀺 𑀥𑀫𑁆𑀫𑁄. 𑀘𑀢𑀼𑀪𑀽𑀫𑀺𑀓𑁄 𑀧𑀦 𑀲𑀓𑀮𑀓𑁆𑀔𑀡𑀁 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄. 𑀓𑀓𑁆𑀔𑀴𑀢𑁆𑀢𑀸𑀤𑀺𑀦𑀸 𑀨𑀼𑀲𑀦𑀸𑀤𑀺𑀦𑀸 𑀲𑀦𑁆𑀢𑀺𑀆𑀤𑀺𑀦𑀸 𑀲𑀓𑀲𑀓𑀪𑀸𑀯𑁂𑀦 𑀧𑀡𑁆𑀟𑀺𑀢𑁂𑀳𑀺 𑀥𑀸𑀭𑀺𑀬𑀢𑀺 𑀲𑀮𑁆𑀮𑀓𑁆𑀔𑀺𑀬𑀢𑀻𑀢𑀺𑀧𑀺 𑀥𑀫𑁆𑀫𑁄. 𑀢𑁂𑀧𑀺𑀝𑀓𑁄 𑀧𑀦 𑀧𑀸𑀴𑀺𑀥𑀫𑁆𑀫𑁄 𑀲𑀓𑀢𑁆𑀣𑀧𑀭𑀢𑁆𑀣𑀸𑀤𑀺𑀪𑁂𑀏 𑀅𑀢𑁆𑀣𑁂 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄. 𑀓𑁂𑀘𑀺 𑀢𑀼 𑀯𑀺𑀤𑀽 ‘‘𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀥𑀼𑀦𑀸𑀢𑀺 𑀓𑀫𑁆𑀧𑁂𑀢𑀺 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀥𑀫𑁆𑀫𑁄’’𑀢𑀺 𑀥𑀽𑀥𑀸𑀢𑀼𑀯𑀲𑁂𑀦𑀧𑀺 𑀦𑀺𑀩𑁆𑀩𑀘𑀦𑀁 𑀯𑀤𑀦𑁆𑀢𑀺, 𑀢𑀁 𑀫𑀕𑁆𑀕𑀥𑀫𑁆𑀫𑁂 𑀅𑀢𑀻𑀯 𑀬𑀼𑀚𑁆𑀚𑀢𑀺, 𑀨𑀮𑀦𑀺𑀩𑁆𑀩𑀸𑀦𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁂𑀲𑀼 𑀧𑀦 𑀧𑀭𑀺𑀬𑀸𑀬𑁂𑀦 𑀬𑀼𑀚𑁆𑀚𑀢𑀺.

𑀥𑀫𑁆𑀫𑀲𑀤𑁆𑀤𑁄 𑀧𑀭𑀺𑀬𑀢𑁆𑀢𑀺𑀳𑁂𑀢𑀼𑀕𑀼𑀡𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀢𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀅𑀬𑀜𑁆𑀳𑀺 ‘‘𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬’’𑀦𑁆𑀢𑀺𑀆𑀤𑀻𑀲𑀼 𑀧𑀭𑀺𑀬𑀢𑁆𑀢𑀺𑀬𑀁 𑀤𑀺𑀲𑁆𑀲𑀢𑀺. ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 𑀳𑁂𑀢𑀼𑀫𑁆𑀳𑀺.

‘‘𑀦 𑀳𑀺 𑀥𑀫𑁆𑀫𑁄 𑀅𑀥𑀫𑁆𑀫𑁄 𑀘, 𑀉𑀪𑁄 𑀲𑀫𑀯𑀺𑀧𑀸𑀓𑀺𑀦𑁄;

𑀅𑀥𑀫𑁆𑀫𑁄 𑀦𑀺𑀭𑀬𑀁 𑀦𑁂𑀢𑀺, 𑀥𑀫𑁆𑀫𑁄 𑀧𑀸𑀧𑁂𑀢𑀺 𑀲𑀼𑀕𑁆𑀕𑀢𑀺’’𑀦𑁆𑀢𑀺

𑀆𑀤𑀻𑀲𑀼 𑀕𑀼𑀡𑁂. ‘‘𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀢𑀸𑀬𑀁.

𑀅𑀣 𑀯𑀸 𑀥𑀫𑁆𑀫𑀲𑀤𑁆𑀤𑁄 𑀲𑀪𑀸𑀯𑀧𑀜𑁆𑀜𑀸𑀧𑀼𑀜𑁆𑀜𑀧𑀜𑁆𑀜𑀢𑁆𑀢𑀺𑀆𑀧𑀢𑁆𑀢𑀺𑀧𑀭𑀺𑀬𑀢𑁆𑀢𑀺𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀢𑀸𑀯𑀺𑀓𑀸𑀭𑀕𑀼𑀡𑀧𑀘𑁆𑀘- 𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀅𑀬𑀜𑁆𑀳𑀺 ‘‘𑀓𑀼𑀲𑀮𑀸 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀲𑀪𑀸𑀯𑁂 𑀤𑀺𑀲𑁆𑀲𑀢𑀺.

𑀬𑀲𑁆𑀲𑁂𑀢𑁂 ¶ 𑀘𑀢𑀼𑀭𑁄 𑀥𑀫𑁆𑀫𑀸, 𑀲𑀤𑁆𑀥𑀲𑁆𑀲 𑀖𑀭𑀫𑁂𑀲𑀺𑀦𑁄;

𑀲𑀘𑁆𑀘𑀁 𑀥𑀫𑁆𑀫𑁄 𑀥𑀺𑀢𑀺 𑀘𑀸𑀕𑁄, 𑀲 𑀯𑁂 𑀧𑁂𑀘𑁆𑀘 𑀦 𑀲𑁄𑀘𑀢𑀻’’𑀢𑀺

𑀆𑀤𑀻𑀲𑀼 𑀧𑀜𑁆𑀜𑀸𑀬𑀁.

‘‘𑀦 𑀳𑀺 𑀥𑀫𑁆𑀫𑁄 𑀅𑀥𑀫𑁆𑀫𑁄 𑀘, 𑀉𑀪𑁄 𑀲𑀫𑀯𑀺𑀧𑀸𑀓𑀺𑀦𑁄;

𑀅𑀥𑀫𑁆𑀫𑁄 𑀦𑀺𑀭𑀬𑀁 𑀦𑁂𑀢𑀺, 𑀥𑀫𑁆𑀫𑁄 𑀧𑀸𑀧𑁂𑀢𑀺 𑀲𑀼𑀕𑁆𑀕𑀢𑀺’’𑀦𑁆𑀢𑀺𑀆𑀤𑀻𑀲𑀼

𑀧𑀼𑀜𑁆𑀜𑁂. ‘‘𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑀸, 𑀦𑀺𑀭𑀼𑀢𑁆𑀢𑀺𑀥𑀫𑁆𑀫𑀸, 𑀅𑀥𑀺𑀯𑀘𑀦𑀸𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀧𑀜𑁆𑀜𑀢𑁆𑀢𑀺𑀬𑀁. ‘‘𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸, 𑀲𑀗𑁆𑀖𑀸𑀤𑀺𑀲𑁂𑀲𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀆𑀧𑀢𑁆𑀢𑀺𑀬𑀁. ‘‘𑀇𑀥 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀚𑀸𑀦𑀸𑀢𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡’’𑀦𑁆𑀢𑀺𑀆𑀤𑀻𑀲𑀼 𑀧𑀭𑀺𑀬𑀢𑁆𑀢𑀺𑀬𑀁. ‘‘𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀢𑀸𑀬𑀁. ‘‘𑀚𑀸𑀢𑀺𑀥𑀫𑁆𑀫𑀸 𑀚𑀭𑀸𑀥𑀫𑁆𑀫𑀸 𑀫𑀭𑀡𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀯𑀺𑀓𑀸𑀭𑁂. ‘‘𑀙𑀦𑁆𑀦𑀁 𑀩𑀼𑀤𑁆𑀥𑀥𑀫𑁆𑀫𑀸𑀦’’𑀦𑁆𑀢𑀺𑀆𑀤𑀻𑀲𑀼 𑀕𑀼𑀡𑁂. ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 𑀧𑀘𑁆𑀘𑀬𑁂. ‘‘𑀞𑀺𑀢𑀸𑀯𑀲𑀸 𑀥𑀸𑀢𑀼 𑀥𑀫𑁆𑀫𑀝𑁆𑀞𑀺𑀢𑀢𑀸 𑀥𑀫𑁆𑀫𑀦𑀺𑀬𑀸𑀫𑀢𑀸’’𑀢𑀺𑀆𑀤𑀻𑀲𑀼 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂.

𑀅𑀣 𑀯𑀸 𑀥𑀫𑁆𑀫𑀲𑀤𑁆𑀤𑁄 𑀧𑀭𑀺𑀬𑀢𑁆𑀢𑀺𑀲𑀘𑁆𑀘𑀲𑀫𑀸𑀥𑀺𑀧𑀜𑁆𑀜𑀸𑀧𑀓𑀢𑀺𑀧𑀼𑀜𑁆𑀜𑀸𑀧𑀢𑁆𑀢𑀺𑀜𑁂𑀬𑁆𑀬𑀸𑀤𑀻𑀲𑀼 𑀩𑀳𑀽𑀲𑀼 𑀅𑀢𑁆𑀣𑁂𑀲𑀼 𑀤𑀺𑀝𑁆𑀞𑀧𑁆𑀧𑀬𑁄𑀕𑁄. 𑀢𑀣𑀸 𑀳𑀺 ‘‘𑀇𑀥 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀸𑀢𑀻’’𑀢𑀺𑀆𑀤𑀻𑀲𑀼 𑀧𑀭𑀺𑀬𑀢𑁆𑀢𑀺𑀬𑀁 𑀤𑀺𑀲𑁆𑀲𑀢𑀺. ‘‘𑀤𑀺𑀝𑁆𑀞𑀥𑀫𑁆𑀫𑁄 𑀧𑀢𑁆𑀢𑀥𑀫𑁆𑀫𑁄’’𑀢𑀺𑀆𑀤𑀻𑀲𑀼 𑀲𑀘𑁆𑀘𑁂. ‘‘𑀏𑀯𑀁𑀥𑀫𑁆𑀫𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼’’𑀦𑁆𑀢𑀺𑀆𑀤𑀻𑀲𑀼 𑀲𑀫𑀸𑀥𑀺𑀫𑁆𑀳𑀺. ‘‘𑀲𑀘𑁆𑀘𑀁 𑀥𑀫𑁆𑀫𑁄 𑀥𑀺𑀢𑀺 𑀘𑀸𑀕𑁄’’𑀢𑀺 𑀏𑀯𑀫𑀸𑀤𑀻𑀲𑀼 𑀧𑀜𑁆𑀜𑀸𑀬𑀁. ‘‘𑀚𑀸𑀢𑀺𑀥𑀫𑁆𑀫𑀸𑀦𑀁 𑀪𑀺𑀓𑁆𑀔𑀯𑁂 𑀲𑀢𑁆𑀢𑀸𑀦’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑀧𑀓𑀢𑀺𑀬𑀁. ‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑀧𑀼𑀜𑁆𑀜𑁂. ‘‘𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 ¶ 𑀆𑀧𑀢𑁆𑀢𑀺𑀬𑀁. ‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀜𑁂𑀬𑁆𑀬𑁂. 𑀏𑀯𑀁 𑀥𑀫𑁆𑀫𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀯𑀺𑀲𑀬𑀸 𑀯𑀺𑀯𑀺𑀥𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀤𑀲𑁆𑀲𑀺𑀢𑀸, 𑀢𑀢𑁆𑀣 𑀢𑀢𑁆𑀣 𑀧𑀦 𑀆𑀤𑀺𑀲𑀤𑁆𑀤𑁂𑀦 𑀬𑀼𑀢𑁆𑀢𑀺𑀯𑀺𑀲𑀬𑀸𑀤𑀬𑁄 𑀘 𑀅𑀢𑁆𑀣𑀸 𑀕𑀳𑁂𑀢𑀩𑁆𑀩𑀸. 𑀢𑀣𑀸 𑀳𑀺 𑀥𑀫𑁆𑀫𑀲𑀤𑁆𑀤𑁄 𑁋

‘‘𑀦𑁂𑀲 𑀥𑀫𑁆𑀫𑁄 𑀫𑀳𑀸𑀭𑀸𑀚, 𑀬𑀁 𑀢𑁆𑀯𑀁 𑀕𑀘𑁆𑀙𑁂𑀬𑁆𑀬 𑀏𑀓𑀓𑁄;

𑀅𑀳𑀫𑁆𑀧𑀺 𑀢𑁂𑀦 𑀕𑀘𑁆𑀙𑀸𑀫𑀺, 𑀬𑁂𑀦 𑀕𑀘𑁆𑀙𑀲𑀺 𑀔𑀢𑁆𑀢𑀺𑀬𑀸’’𑀢𑀺

𑀆𑀤𑀻𑀲𑀼 𑀬𑀼𑀢𑁆𑀢𑀺𑀬𑀁 𑀯𑀢𑁆𑀢𑀢𑀺. ‘‘𑀫𑀦𑀜𑁆𑀘 𑀧𑀝𑀺𑀘𑁆𑀘 𑀥𑀫𑁆𑀫𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀲𑀬𑁂. ‘‘𑀲𑀢𑀜𑁆𑀘 𑀥𑀫𑁆𑀫𑁄 𑀦 𑀚𑀭𑀁 𑀉𑀧𑁂𑀢𑀻’’𑀢𑀺 𑀏𑀢𑁆𑀣 𑀦𑀺𑀩𑁆𑀩𑀸𑀦𑁂 𑀯𑀢𑁆𑀢𑀢𑀺. 𑀢𑀢𑁆𑀭 𑀬𑀸 𑀦𑀺𑀲𑁆𑀲𑀢𑁆𑀢𑀢𑀸, 𑀲𑀸 𑀏𑀯 𑀦𑀺𑀚𑁆𑀚𑀻𑀯𑀢𑀸. 𑀬𑁄 𑀘 𑀳𑁂𑀢𑀼, 𑀲𑁄 𑀏𑀯 𑀧𑀘𑁆𑀘𑀬𑁄.

𑀇𑀘𑁆𑀘𑁂𑀯𑀁 𑁋

𑀧𑀭𑀺𑀬𑀢𑁆𑀢𑀺𑀧𑀘𑁆𑀘𑀬𑁂𑀲𑀼, 𑀕𑀼𑀡𑁂 𑀦𑀺𑀲𑁆𑀲𑀢𑁆𑀢𑀢𑀸𑀬 𑀘;

𑀲𑀪𑀸𑀯𑁂 𑀘𑁂𑀯 𑀧𑀜𑁆𑀜𑀸𑀬𑀁, 𑀧𑀼𑀜𑁆𑀜𑁂 𑀧𑀜𑁆𑀜𑀢𑁆𑀢𑀺𑀬𑀫𑁆𑀧𑀺 𑀘.

𑀆𑀧𑀢𑁆𑀢𑀺𑀬𑀁 𑀯𑀺𑀓𑀸𑀭𑁂 𑀘, 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀓𑁂𑀧𑀺 𑀘;

𑀲𑀘𑁆𑀘𑀲𑀫𑀸𑀥𑀺𑀧𑀓𑀢𑀺-𑀜𑁂𑀬𑁆𑀬𑁂𑀲𑀼 𑀬𑀼𑀢𑁆𑀢𑀺𑀬𑀫𑁆𑀧𑀺 𑀘;

𑀯𑀺𑀲𑀬𑁂 𑀘𑁂𑀯 𑀦𑀺𑀩𑁆𑀩𑀸𑀦𑁂, 𑀥𑀫𑁆𑀫𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑀓𑁂𑀘𑀺 𑀧𑀦 𑀥𑀫𑁆𑀫𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺𑀯𑀺𑀲𑀬𑀸𑀦𑀁 𑀤𑀲𑀥𑀸𑀯 𑀧𑀭𑀺𑀘𑁆𑀙𑁂𑀤𑀁 𑀯𑀤𑀦𑁆𑀢𑀺.

𑀜𑁂𑀬𑁆𑀬𑀫𑀕𑁆𑀕𑁂 𑀘 𑀦𑀺𑀩𑁆𑀩𑀸𑀦𑁂, 𑀲𑀪𑀸𑀯𑁂 𑀅𑀣 𑀚𑀸𑀢𑀺𑀬𑀁;

𑀫𑀦𑁂 𑀯𑀺𑀲𑀬𑀧𑀼𑀜𑁆𑀜𑁂𑀲𑀼, 𑀪𑀸𑀯𑁂 𑀧𑀸𑀯𑀘𑀦𑁂𑀧𑀺 𑀘;

𑀇𑀫𑁂𑀲𑀼 𑀤𑀲𑀲𑁆𑀯𑀢𑁆𑀣𑁂𑀲𑀼, 𑀥𑀫𑁆𑀫𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑀢𑀢𑁆𑀭 𑀅𑀢𑁆𑀣𑀼𑀤𑁆𑀥𑀸𑀭𑁄𑀢𑀺 𑀲𑀫𑀸𑀦𑀲𑀤𑁆𑀤𑀯𑀘𑀦𑀻𑀬𑀸𑀦𑀁 𑀅𑀢𑁆𑀣𑀸𑀦𑀁 𑀉𑀤𑁆𑀥𑀭𑀡𑀁 𑀅𑀢𑁆𑀣𑀼𑀤𑁆𑀥𑀸𑀭𑁄.

𑀭𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀮𑀓𑀸𑀭𑀦𑁆𑀢𑀥𑀸𑀢𑀼

𑀧𑀸𑀮 ¶ 𑀭𑀓𑁆𑀔𑀡𑁂. ‘‘𑀭𑀓𑁆𑀔𑀡𑀁, 𑀢𑀸𑀡𑀁, 𑀕𑁄𑀧𑀦𑀁, 𑀅𑀯𑀦𑀁, 𑀧𑀸𑀮𑀦𑀁, 𑀭𑀓𑁆𑀔𑀸, 𑀭𑀓𑁆𑀔𑀡𑀸, 𑀕𑀼𑀢𑁆𑀢𑀺’’ 𑀇𑀘𑁆𑀘𑁂𑀢𑁂 𑀧𑀭𑀺𑀬𑀸𑀬𑀸. 𑀧𑀸𑀮𑁂𑀢𑀺, 𑀧𑀸𑀮𑀬𑀢𑀺. 𑀧𑀸𑀮𑀓𑁄, 𑀩𑀼𑀤𑁆𑀥𑀧𑀸𑀮𑁄. 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸. 𑀲𑀫𑁄 𑀪𑀯𑀢𑀼 𑀧𑀸𑀮𑀺𑀦𑀸. 𑀧𑀸𑀮𑀺𑀢𑁄, 𑀧𑀸𑀮𑀦𑀁, 𑀧𑀸𑀴𑀺.

𑀏𑀢𑁆𑀣 𑀧𑀸𑀴𑀻𑀢𑀺 𑀅𑀢𑁆𑀣𑀁 𑀧𑀸𑀮𑁂𑀢𑀻𑀢𑀺 𑀧𑀸𑀴𑀺, 𑀮𑀲𑁆𑀲 𑀴𑀢𑁆𑀢𑀁. 𑀅𑀣 𑀯𑀸 𑀅𑀦𑁆𑀢𑁄𑀤𑀓𑀁 𑀭𑀓𑁆𑀔𑀡𑀝𑁆𑀞𑁂𑀦 𑀫𑀳𑀢𑁄 𑀢𑀴𑀸𑀓𑀲𑁆𑀲 𑀣𑀺𑀭𑀸 𑀫𑀳𑀢𑀻𑀢𑀺 𑀧𑀸𑀴𑀺 𑀯𑀺𑀬𑀸𑀢𑀺 𑀧𑀸𑀴𑀺, 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄. 𑀅𑀧𑀭𑁄 𑀦𑀬𑁄 𑀧𑀓𑀝𑁆𑀞𑀸𑀦𑀁 𑀉𑀓𑁆𑀓𑀝𑁆𑀞𑀸𑀦𑀁 𑀲𑀻𑀮𑀸𑀤𑀺𑀅𑀢𑁆𑀣𑀸𑀦𑀁 𑀩𑁄𑀥𑀦𑀢𑁄 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀸𑀯𑀢𑁄 𑀩𑀼𑀤𑁆𑀥𑀸𑀤𑀻𑀳𑀺 𑀪𑀸𑀲𑀺𑀢𑀢𑁆𑀢𑀸 𑀘 𑀧𑀓𑀝𑁆𑀞𑀸𑀦𑀁 𑀯𑀘𑀦𑀧𑁆𑀧𑀩𑀦𑁆𑀥𑀸𑀦𑀁 𑀆𑀴𑀻𑀢𑀺 𑀧𑀸𑀴𑀺.

𑀧𑀸𑀴𑀺𑀲𑀤𑁆𑀤𑁄 𑀧𑀸𑀴𑀺𑀥𑀫𑁆𑀫𑁂, 𑀢𑀴𑀸𑀓𑀧𑀸𑀴𑀺𑀬𑀫𑁆𑀧𑀺 𑀘;

𑀤𑀺𑀲𑁆𑀲𑀢𑁂 𑀧𑀦𑁆𑀢𑀺𑀬𑀜𑁆𑀘𑁂𑀯, 𑀇𑀢𑀺 𑀜𑁂𑀬𑁆𑀬𑀁 𑀯𑀺𑀚𑀸𑀦𑀢𑀸.

𑀅𑀬𑀜𑁆𑀳𑀺 ‘‘𑀧𑀸𑀴𑀺𑀬𑀸 𑀅𑀢𑁆𑀣𑀫𑀼𑀧𑀧𑀭𑀺𑀓𑁆𑀔𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑀗𑁆𑀔𑀸𑀢𑁂 𑀧𑀸𑀴𑀺𑀥𑀫𑁆𑀫𑁂 𑀤𑀺𑀲𑁆𑀲𑀢𑀺. ‘‘𑀫𑀳𑀢𑁄 𑀢𑀴𑀸𑀓𑀲𑁆𑀲 𑀧𑀸𑀴𑀻’’𑀢𑀺𑀆𑀤𑀻𑀲𑀼 𑀢𑀴𑀸𑀓𑀧𑀸𑀴𑀺𑀬𑀁. ‘‘𑀧𑀸𑀴𑀺𑀬𑀸 𑀦𑀺𑀲𑀻𑀤𑀺𑀁𑀲𑀽’’𑀢𑀺𑀆𑀤𑀻𑀲𑀼 𑀧𑀦𑁆𑀢𑀺𑀬𑀁, 𑀧𑀝𑀺𑀧𑀸𑀝𑀺𑀬𑀸 𑀦𑀺𑀲𑀻𑀤𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀥𑀸𑀢𑀼𑀬𑀸 𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀧𑀸𑀝𑀺𑀧𑀤𑀺𑀓𑁄 𑀳𑀺 𑀧𑀦𑁆𑀢𑀺𑀯𑀸𑀘𑀓𑁄 𑀧𑀸𑀴𑀺𑀲𑀤𑁆𑀤𑁄.

𑀢𑀺𑀮 𑀲𑀺𑀦𑁂𑀳𑀦𑁂. 𑀢𑁂𑀮𑁂𑀢𑀺, 𑀢𑁂𑀮𑀬𑀢𑀺. 𑀢𑁂𑀮𑀁, 𑀢𑀺𑀮𑁄, 𑀢𑀺𑀮𑀁.

𑀢𑀢𑁆𑀣 𑀢𑀺𑀮𑁄𑀢𑀺 𑀢𑀺𑀮𑀕𑀘𑁆𑀙𑁄. 𑀢𑀺𑀮𑀦𑁆𑀢𑀺 𑀢𑀧𑁆𑀨𑀮𑀁. 𑀢𑀢𑁄 𑀧𑀦 𑀦𑀺𑀓𑁆𑀔𑀦𑁆𑀢𑁄 𑀲𑀺𑀦𑁂𑀳𑁄 𑀢𑁂𑀮𑀁. 𑀲𑁄 𑀳𑀺 ‘‘𑀢𑀺𑀮𑀸𑀦𑀁 𑀇𑀤𑀦𑁆𑀢𑀺 𑀢𑁂𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀤𑀺 𑀏𑀯𑀁 ‘‘𑀲𑀸𑀲𑀧𑀢𑁂𑀮’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀦 𑀬𑀼𑀚𑁆𑀚𑁂𑀬𑁆𑀬𑀸𑀢𑀺? 𑀦𑁄 𑀦 𑀬𑀼𑀚𑁆𑀚𑀢𑀺, ‘‘𑀢𑀺𑀮𑀲𑀺𑀦𑁂𑀳𑀦𑁂’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀬 𑀢𑀺𑀮𑀥𑀸𑀢𑀼𑀬𑀸 𑀲𑀸𑀫𑀜𑁆𑀜𑀢𑁄 𑀬𑀲𑁆𑀲 ¶ 𑀓𑀲𑁆𑀲𑀘𑀺 𑀲𑀺𑀦𑁂𑀳𑀲𑁆𑀲 𑀯𑀘𑀦𑀢𑁄. 𑀢𑁂𑀦 ‘‘𑀲𑀸𑀲𑀧𑀢𑁂𑀮𑀁, 𑀫𑀥𑀼𑀓𑀢𑁂𑀮’’𑀦𑁆𑀢𑀺𑀆𑀤𑀬𑁄 𑀲𑀸𑀲𑀦𑁂 𑀧𑀬𑁄𑀕𑀸 𑀤𑀺𑀲𑁆𑀲𑀦𑁆𑀢𑀺. 𑀫𑀬𑀁 𑀧𑀦 𑀢𑀺𑀮𑀥𑀸𑀢𑀼𑀯𑀲𑁂𑀦 𑀦𑀺𑀧𑁆𑀨𑀦𑁆𑀦𑀸𑀦𑀁 𑀢𑀺𑀮𑀕𑀘𑁆𑀙𑀢𑀧𑁆𑀨𑀮𑀯𑀸𑀘𑀓𑀸𑀦𑀁 ‘‘𑀢𑀺𑀮𑁄, 𑀢𑀺𑀮’’𑀦𑁆𑀢𑀺 𑀲𑀤𑁆𑀤𑀭𑀽𑀧𑀸𑀦𑀁 𑀧𑀓𑀸𑀲𑀦𑀫𑀼𑀔𑁂𑀦 ‘‘𑀢𑀺𑀮𑀸𑀦𑀁 𑀇𑀤𑀦𑁆𑀢𑀺 𑀢𑁂𑀮’’𑀦𑁆𑀢𑀺 𑀯𑀤𑀸𑀫, 𑀦 𑀧𑀦 𑀢𑁂𑀦 𑀯𑀘𑀦𑁂𑀦 𑀲𑀸𑀲𑀧𑀸𑀤𑀻𑀦𑀁 𑀲𑀺𑀦𑁂𑀳𑀲𑁆𑀲 𑀅𑀢𑁂𑀮𑀢𑁆𑀢𑀁 𑀯𑀤𑀸𑀫. 𑀅𑀣 𑀓𑀺𑀜𑁆𑀘𑀭𑀳𑀻𑀢𑀺 𑀘𑁂? 𑀢𑀤𑁆𑀥𑀺𑀢𑀯𑀺𑀥𑀸𑀦𑁂 𑀯𑀺𑀜𑁆𑀜𑀼𑀦𑀁 𑀓𑁄𑀲𑀮𑁆𑀮𑀢𑁆𑀣𑀁 𑀢𑀺𑀮𑀲𑀤𑁆𑀤𑀁 𑀧𑀝𑀺𑀘𑁆𑀘 ‘‘𑀢𑀺𑀮𑀸𑀦𑀁 𑀇𑀤𑀦𑁆𑀢𑀺 𑀢𑁂𑀮’’𑀦𑁆𑀢𑀺 𑀯𑀤𑀸𑀫. 𑀲𑀺𑀦𑁂𑀳𑀲𑀗𑁆𑀔𑀸𑀢𑀲𑁆𑀲 𑀲𑀸𑀲𑀧𑀸𑀤𑀻𑀦𑀁 𑀢𑁂𑀮𑀲𑁆𑀲 𑀯𑀘𑀦𑀁 𑀦 𑀚𑀳𑀸𑀫, 𑀢𑀲𑁆𑀫𑀸 𑀉𑀤𑀸𑀳𑀭𑀡𑀧𑁆𑀧𑀓𑀸𑀲𑀦𑁂 ‘‘𑀢𑀺𑀮𑁄, 𑀢𑀺𑀮𑀁, 𑀢𑁂𑀮’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀢𑁂𑀮𑀁, 𑀢𑀺𑀮𑁄, 𑀢𑀺𑀮’’𑀦𑁆𑀢𑀺 𑀅𑀫𑁆𑀳𑁂𑀳𑀺 𑀯𑀼𑀢𑁆𑀢𑀁. 𑀇𑀤𑀜𑁆𑀳𑀺 𑀯𑀘𑀦𑀁 𑀢𑁂𑀮𑀲𑁆𑀲 𑀲𑀸𑀫𑀜𑁆𑀜𑀢𑁄 𑀲𑀺𑀦𑁂𑀳𑁂 𑀧𑀯𑀢𑁆𑀢𑀺𑀁 𑀤𑀻𑀧𑁂𑀢𑀺. 𑀢𑁂𑀦𑁂𑀯 𑀘 𑀲𑀸𑀲𑀦𑁂 ‘‘𑀢𑀺𑀮𑀢𑁂𑀮𑀁, 𑀲𑀸𑀲𑀧𑀢𑁂𑀮’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀲𑁂𑀲𑀯𑀘𑀦𑀫𑁆𑀧𑀺 𑀤𑀺𑀲𑁆𑀲𑀢𑀻𑀢𑀺 𑀦𑀺𑀝𑁆𑀞𑀫𑁂𑀢𑁆𑀣𑀸𑀯𑀕𑀦𑁆𑀢𑀩𑁆𑀩𑀁. 𑀅𑀧𑀺𑀘 𑀢𑁂𑀮𑀲𑀤𑁆𑀤𑁄 𑀬𑁂𑀪𑀼𑀬𑁆𑀬𑁂𑀦 𑀢𑀺𑀮𑀢𑁂𑀮𑁂 𑀯𑀢𑁆𑀢𑀢𑀺, 𑀬𑀣𑀸 𑀫𑀺𑀕𑀲𑀤𑁆𑀤𑁄 𑀳𑀭𑀺𑀡𑀫𑀺𑀕𑁂𑀢𑀺𑀧𑀺 𑀤𑀝𑁆𑀞𑀩𑁆𑀩𑀁.

𑀚𑀮 𑀅𑀧𑀯𑀸𑀭𑀡𑁂. 𑀚𑀸𑀮𑁂𑀢𑀺, 𑀚𑀸𑀮𑀬𑀢𑀺. 𑀚𑀸𑀮𑀁, 𑀚𑀸𑀮𑀸. 𑀚𑀸𑀮𑀦𑁆𑀢𑀺 𑀫𑀘𑁆𑀙𑀚𑀸𑀮𑀁. 𑀚𑀸𑀮𑀸𑀢𑀺 𑀅𑀕𑁆𑀕𑀺𑀚𑀸𑀮𑀸.

𑀔𑀮 𑀲𑁄𑀘𑁂𑀬𑁆𑀬𑁂. 𑀲𑁄𑀘𑁂𑀬𑁆𑀬𑀁 𑀲𑀼𑀘𑀺𑀪𑀸𑀯𑁄. 𑀔𑀸𑀮𑁂𑀢𑀺, 𑀔𑀸𑀮𑀬𑀢𑀺. 𑀧𑀓𑁆𑀔𑀸𑀮𑁂𑀢𑀺, 𑀧𑀓𑁆𑀔𑀸𑀮𑀬𑀢𑀺.

𑀢𑀮 𑀧𑀢𑀺𑀝𑁆𑀞𑀸𑀬𑀁. 𑀢𑀸𑀮𑁂𑀢𑀺, 𑀢𑀸𑀮𑀬𑀢𑀺. 𑀢𑀸𑀮𑁄, 𑀢𑀮𑀁.

𑀏𑀢𑁆𑀣 𑀢𑀸𑀮𑁄𑀢𑀺 𑀢𑀺𑀡𑀭𑀸𑀚𑀭𑀼𑀓𑁆𑀔𑁄. 𑀢𑀮𑀦𑁆𑀢𑀺 𑀧𑀸𑀡𑀺𑀢𑀮𑀪𑀽𑀫𑀺𑀢𑀮𑀸𑀤𑀺. 𑀢𑀜𑁆𑀳𑀺 𑀢𑀸𑀮𑀬𑀢𑀺 𑀧𑀢𑀺𑀝𑁆𑀞𑀸𑀢𑀺 𑀏𑀢𑁆𑀣 𑀯𑀢𑁆𑀣𑀼𑀚𑀸𑀢𑀦𑁆𑀢𑀺 𑀢𑀮𑀁.

𑀢𑀼𑀮 𑀉𑀫𑁆𑀫𑀸𑀦𑁂. 𑀢𑁄𑀮𑁂𑀢𑀺, 𑀢𑁄𑀮𑀬𑀢𑀺.

𑀤𑀼𑀮 ¶ 𑀉𑀓𑁆𑀔𑁂𑀧𑁂. 𑀉𑀓𑁆𑀔𑁂𑀧𑁄 𑀉𑀤𑁆𑀥𑀁 𑀔𑀺𑀧𑀦𑀁. 𑀤𑁄𑀮𑁂𑀢𑀺, 𑀤𑁄𑀮𑀬𑀢𑀺. 𑀤𑁄𑀮𑀸.

𑀏𑀢𑁆𑀣 𑀘 𑀤𑁄𑀮𑀺𑀬𑀢𑀺 𑀉𑀓𑁆𑀔𑀺𑀧𑀺𑀬𑀢𑀺 𑀬𑀢𑁆𑀣 𑀦𑀺𑀧𑀦𑁆𑀦𑁄 𑀤𑀸𑀭𑀓𑁄, 𑀬𑀣𑀸𑀦𑀺𑀧𑀦𑁆𑀦𑀓𑁄 𑀯𑀸𑀢𑀺 𑀤𑁄𑀮𑀸.

𑀯𑀼𑀮 𑀦𑀺𑀫𑁆𑀫𑀚𑁆𑀚𑀦𑁂. 𑀯𑁄𑀮𑁂𑀢𑀺, 𑀯𑁄𑀬𑀮𑀢𑀺.

𑀫𑀻𑀮 𑀦𑀺𑀫𑀻𑀮𑀦𑁂. 𑀫𑀻𑀮𑁂𑀢𑀺, 𑀫𑀻𑀮𑀬𑀢𑀺. 𑀫𑀻𑀮𑀦𑀁, 𑀉𑀫𑁆𑀫𑀻𑀮𑀦𑀁, 𑀦𑀺𑀫𑀻𑀮𑀦𑀁.

𑀫𑀽𑀮 𑀭𑁄𑀳𑀦𑁂. 𑀫𑀽𑀮𑁂𑀢𑀺, 𑀫𑀽𑀮𑀬𑀢𑀺. 𑀫𑀽𑀮𑀁. 𑀏𑀲𑀸 𑀳𑀺 𑀬𑀤𑀸 𑀧𑀢𑀺𑀝𑁆𑀞𑀸𑀬𑀁 𑀯𑀢𑁆𑀢𑀢𑀺, 𑀢𑀤𑀸 𑀪𑀽𑀯𑀸𑀤𑀺𑀕𑀡𑀺𑀓𑀸, ‘‘𑀫𑀽𑀮𑀢𑀻’’𑀢𑀺 𑀘𑀲𑁆𑀲𑀸 𑀭𑀽𑀧𑀁.

𑀢𑀢𑁆𑀣 𑀫𑀽𑀮𑀦𑁆𑀢𑀺 𑀫𑀽𑀮𑀬𑀢𑀺 𑀭𑀽𑀳𑀢𑀺 𑀭𑀼𑀓𑁆𑀔𑀸𑀤𑀺 𑀏𑀢𑁂𑀦𑀸𑀢𑀺 𑀫𑀽𑀮𑀁. 𑀅𑀣 𑀯𑀸 𑀫𑀽𑀮𑀬𑀢𑀺 𑀙𑀺𑀦𑁆𑀦𑁄𑀧𑀺 𑀓𑁄𑀘𑀺 𑀏𑀢𑁂𑀦 𑀅𑀘𑁆𑀙𑀺𑀦𑁆𑀦𑁂𑀦 𑀧𑀼𑀦𑀤𑁂𑀯 𑀭𑀽𑀳𑀢𑀻𑀢𑀺 𑀫𑀽𑀮𑀁. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀬𑀣𑀸𑀧𑀺 𑀫𑀽𑀮𑁂 𑀅𑀦𑀼𑀧𑀤𑁆𑀤𑀯𑁂 𑀤𑀴𑁆𑀳𑁂,

𑀙𑀺𑀦𑁆𑀦𑁄𑀧𑀺 𑀭𑀼𑀓𑁆𑀔𑁄 𑀧𑀼𑀦𑀤𑁂𑀯 𑀭𑀽𑀳𑀢𑀺;

𑀏𑀯𑀫𑁆𑀧𑀺 𑀢𑀡𑁆𑀳𑀸𑀦𑀼𑀲𑀬𑁂 𑀅𑀦𑀽𑀳𑀢𑁂,

𑀦𑀺𑀩𑁆𑀩𑀢𑁆𑀢𑀢𑀺 𑀤𑀼𑀓𑁆𑀔𑀫𑀺𑀤𑀁 𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺;

𑀫𑀽𑀮𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄 𑀳𑁂𑀝𑁆𑀞𑀸 𑀪𑀽𑀯𑀸𑀤𑀺𑀕𑀡𑁂 𑀯𑀼𑀢𑁆𑀢𑁄.

𑀓𑀮 𑀧𑀺𑀮 𑀔𑁂𑀧𑁂. 𑀓𑀸𑀮𑁂𑀢𑀺, 𑀓𑀸𑀮𑀬𑀢𑀺. 𑀓𑀸𑀮𑁄. 𑀧𑀺𑀮𑁂𑀢𑀺, 𑀧𑀺𑀮𑀬𑀢𑀺.

𑀏𑀢𑁆𑀣 𑀓𑀸𑀮𑁄𑀢𑀺 𑀲𑀫𑀬𑁄𑀧𑀺 𑀫𑀘𑁆𑀘𑀼𑀧𑀺. 𑀢𑀢𑁆𑀭 𑀲𑀫𑀬𑁄 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀆𑀬𑀼𑀁 𑀓𑀸𑀮𑀬𑀢𑀺 𑀔𑁂𑀧𑁂𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀅𑀧𑁆𑀧𑀁 𑀅𑀧𑁆𑀧𑀁 𑀓𑀭𑁄𑀢𑀻𑀢𑀺 𑀓𑀸𑀮𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀓𑀸𑀮𑁄 𑀖𑀲𑀢𑀺 𑀪𑀽𑀢𑀸𑀦𑀺, 𑀲𑀩𑁆𑀩𑀸𑀦𑁂𑀯 𑀲𑀳𑀢𑁆𑀢𑀦𑀸;

𑀬𑁄 𑀘 𑀓𑀸𑀮𑀖𑀲𑁄 𑀪𑀽𑀢𑁄, 𑀲𑀪𑀽𑀢𑀧𑀘𑀦𑀺𑀁𑀧𑀘𑀻’’𑀢𑀺.

𑀫𑀘𑁆𑀘𑀼 ¶ 𑀧𑀦 𑀓𑀸𑀮𑀬𑀢𑀺 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀁 𑀔𑁂𑀧𑁂𑀢𑀺 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀦𑀸𑀲𑁂𑀢𑀻𑀢𑀺 𑀓𑀸𑀮𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 ‘‘𑀓𑀸𑀮𑁄𑀢𑀺 𑀫𑀘𑁆𑀘𑀼. 𑀓𑀸𑀮𑀬𑀢𑀺 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀁 𑀦𑀸𑀲𑁂𑀢𑀻𑀢𑀺 𑀓𑀸𑀮𑁄. 𑀓𑀸𑀮𑁂𑀦 𑀫𑀘𑁆𑀘𑀼𑀦𑀸 𑀓𑀢𑁄 𑀦𑀸𑀲𑀺𑀢𑁄𑀢𑀺 𑀓𑀸𑀮𑀓𑀢𑁄’’𑀢𑀺. ‘‘𑀫𑀭𑀡𑀁 𑀳𑀺𑀦𑁆𑀤𑀁 𑀫𑀘𑁆𑀘𑀼 𑀫𑀝𑁆𑀝𑀼 𑀘𑀼𑀢𑀺 𑀓𑀸𑀮𑁄 𑀅𑀦𑁆𑀢𑀓𑁄 𑀦𑀺𑀓𑁆𑀔𑁂𑀧𑁄’’𑀢𑀺 𑀫𑀭𑀡𑀲𑁆𑀲𑀸𑀪𑀺𑀥𑀸𑀦𑀸𑀦𑀺.

𑀲𑀼𑀮𑁆𑀮 𑀲𑀚𑁆𑀚𑀦𑁂. 𑀲𑀼𑀮𑁆𑀮𑁂𑀢𑀺, 𑀲𑀼𑀮𑁆𑀮𑀬𑀢𑀺.

𑀇𑀮 𑀧𑁂𑀭𑀡𑁂. 𑀇𑀮𑁂𑀢𑀺, 𑀇𑀮𑀬𑀢𑀺.

𑀯𑀮 𑀪𑀭𑀡𑁂. 𑀯𑀸𑀮𑁂𑀢𑀺, 𑀯𑀸𑀮𑀬𑀢𑀺. 𑀯𑀸𑀮𑁄.

𑀮𑀮 𑀇𑀘𑁆𑀙𑀸𑀬𑀁. 𑀮𑀮𑁂𑀢𑀺, 𑀮𑀮𑀬𑀢𑀺.

𑀤𑀮 𑀯𑀺𑀤𑀸𑀭𑀡𑁂. 𑀤𑀸𑀮𑁂𑀢𑀺, 𑀤𑀸𑀮𑀬𑀢𑀺, 𑀧𑀤𑀸𑀮𑁂𑀢𑀺, 𑀧𑀤𑀸𑀮𑀬𑀢𑀺. 𑀓𑀼𑀤𑀸𑀮𑁄.

𑀓𑀮 𑀕𑀢𑀺𑀲𑀗𑁆𑀔𑁆𑀬𑀸𑀦𑁂𑀲𑀼. 𑀓𑀸𑀮𑁂𑀢𑀺, 𑀓𑀸𑀮𑀬𑀢𑀺. 𑀓𑀸𑀮𑁄, 𑀓𑀮𑀸. 𑀓𑀮𑀸𑀢𑀺 𑀅𑀯𑀬𑀯𑁄. 𑀲𑀸 𑀳𑀺 𑀓𑀸𑀮𑀬𑀺𑀢𑀩𑁆𑀩𑀸 𑀲𑀗𑁆𑀔𑀸𑀬𑀺𑀢𑀩𑁆𑀩𑀸𑀢𑀺 𑀓𑀮𑀸.

𑀲𑀻𑀮 𑀉𑀧𑀥𑀸𑀭𑀡𑁂. 𑀉𑀧𑀥𑀸𑀭𑀡𑀁 𑀪𑀼𑀲𑁄 𑀥𑀸𑀭𑀡𑀁, 𑀧𑀢𑀺𑀝𑁆𑀞𑀸𑀯𑀲𑁂𑀦 𑀆𑀥𑀸𑀭𑀪𑀸𑀯𑁄. 𑀲𑀻𑀮𑁂𑀢𑀺, 𑀲𑀻𑀮𑀬𑀢𑀺. 𑀲𑀻𑀮𑀁, 𑀲𑀻𑀮𑀦𑀁.

𑀏𑀢𑁆𑀣 𑀲𑀻𑀮𑀦𑁆𑀢𑀺 𑀲𑀻𑀮𑁂𑀢𑀺 𑀉𑀧𑀥𑀸𑀭𑁂𑀢𑀺 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀁 𑀅𑀧𑀸𑀬𑁂𑀲𑀼 𑀉𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑀯𑀲𑁂𑀦 𑀪𑀼𑀲𑁄 𑀥𑀸𑀭𑁂𑀢𑀻𑀢𑀺 𑀲𑀻𑀮𑀁. 𑀅𑀣 𑀯𑀸𑀲𑀻𑀮𑀺𑀬𑀢𑀺 𑀉𑀧𑀘𑀸𑀭𑀺𑀬𑀢𑀺 𑀲𑀧𑁆𑀧𑀼𑀭𑀺𑀲𑁂𑀳𑀺 𑀳𑀤𑀬𑀫𑀁𑀲𑀦𑁆𑀢𑀭𑀁 𑀉𑀧𑀦𑁂𑀢𑁆𑀯𑀸 𑀥𑀸𑀭𑀺𑀬𑀢𑀻𑀢𑀺 𑀲𑀻𑀮𑀁. 𑀲𑀻𑀮𑀦𑀦𑁆𑀢𑀺 𑀪𑀽𑀯𑀸𑀤𑀺𑀕𑀡𑁂 𑀅𑀯𑀺𑀧𑁆𑀧𑀓𑀺𑀡𑁆𑀡𑀢𑀸𑀲𑀗𑁆𑀔𑀸𑀢𑀁 𑀲𑀫𑀸𑀥𑀸𑀦𑀁 𑀯𑀼𑀘𑁆𑀘𑀢𑀺. 𑀢𑀢𑁆𑀣 ‘‘𑀲𑀻𑀮𑀢𑀻’’𑀢𑀺 𑀭𑀽𑀧𑀁, 𑀇𑀥 𑀧𑀦 𑀆𑀥𑀸𑀭𑀪𑀸𑀯𑀲𑀗𑁆𑀔𑀸𑀢𑀁 𑀉𑀧𑀥𑀸𑀭𑀡𑀁 𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀘 ‘‘𑀲𑀻𑀮𑁂𑀢𑀺, 𑀲𑀻𑀮𑀬𑀢𑀻’’𑀢𑀺 𑀭𑀽𑀧𑀸𑀦𑀺. 𑀅𑀝𑁆𑀞𑀓𑀣𑀸𑀲𑀼 𑀳𑀺 ‘‘𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 ¶ 𑀧𑀢𑀺𑀝𑁆𑀞𑀸𑀯𑀲𑁂𑀦 𑀆𑀥𑀸𑀭𑀪𑀸𑀯𑁄 𑀉𑀧𑀥𑀸𑀭𑀡’’𑀦𑁆𑀢𑀺 𑀯𑀼𑀢𑁆𑀢𑁄.

𑀯𑁂𑀮 𑀓𑀸𑀮𑁄𑀧𑀤𑁂𑀲𑁂. 𑀯𑁂𑀮𑁂𑀢𑀺, 𑀯𑁂𑀮𑀬𑀢𑀺. 𑀯𑁂𑀮𑀸. 𑀓𑁂𑀘𑀺 ‘‘𑀯𑁂𑀮 𑀇𑀢𑀺 𑀥𑀸𑀢𑀼𑀲𑀤𑁆𑀤𑁄 𑀦 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁, 𑀧𑁄𑀭𑀸𑀡𑁂𑀳𑀺 𑀲𑀤𑁆𑀤𑀲𑀢𑁆𑀣𑀯𑀺𑀤𑀽𑀳𑀺 ‘‘𑀯𑁂𑀮𑀬𑀢𑀻’’𑀢𑀺 𑀭𑀽𑀧𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸.

𑀧𑀮 𑀫𑀽𑀮 𑀮𑀯𑀦𑀧𑀯𑀦𑁂𑀲𑀼. 𑀮𑀯𑀦𑀁 𑀙𑁂𑀤𑀦𑀁, 𑀧𑀯𑀦𑀁 𑀲𑁄𑀥𑀦𑀁. 𑀧𑀸𑀮𑁂𑀢𑀺, 𑀧𑀸𑀮𑀬𑀢𑀺. 𑀧𑀮𑀁. 𑀧𑀮𑀁 𑀦𑀸𑀫 𑀫𑀸𑀦𑀯𑀺𑀲𑁂𑀲𑁄. 𑀮𑁄𑀓𑀲𑁆𑀲 𑀯𑀺𑀫𑀢𑀺𑀁 𑀧𑀸𑀮𑁂𑀢𑀺 𑀮𑀼𑀦𑀸𑀢𑀺 𑀲𑁄𑀥𑁂𑀢𑀺 𑀘𑀸𑀢𑀺 𑀧𑀮𑀁. 𑀫𑀽𑀮𑁂𑀢𑀺, 𑀫𑀽𑀮𑀬𑀢𑀺. 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀧𑀦 ‘‘𑀫𑀽𑀮𑀬𑀢𑀺 𑀓𑁂𑀤𑀸𑀭𑀁, 𑀫𑀽𑀮𑀬𑀢𑀺 𑀥𑀜𑁆𑀜’’𑀦𑁆𑀢𑀺 𑀧𑀬𑁄𑀕𑀁 𑀯𑀤𑀦𑁆𑀢𑀺.

𑀣𑀽𑀮 𑀧𑀭𑀺𑀩𑁆𑀭𑀽𑀳𑀦𑁂. 𑀧𑀭𑀺𑀩𑁆𑀭𑀽𑀳𑀦𑀁 𑀯𑀟𑁆𑀠𑀦𑀁. 𑀣𑀽𑀮𑁂𑀢𑀺, 𑀣𑀽𑀮𑀬𑀢𑀺. 𑀣𑀽𑀮𑁄 𑀧𑀼𑀭𑀺𑀲𑁄. 𑀣𑀽𑀮𑀸 𑀚𑀯𑁂𑀦 𑀳𑀸𑀬𑀦𑁆𑀢𑀺.

𑀧𑀮 𑀕𑀢𑀺𑀬𑀁. 𑀧𑀮𑁂𑀢𑀺, 𑀧𑀮𑀬𑀢𑀺. 𑀅𑀢𑁆𑀣𑀁 𑀧𑀮𑁂𑀢𑀺 𑀦 𑀉𑀧𑁂𑀢𑀺 𑀲𑀗𑁆𑀔𑀁. 𑀧𑀮𑁂𑀢𑀺 𑀭𑀲𑀫𑀸𑀤𑀸𑀬. 𑀬𑀣𑀸 𑀲𑀼𑀢𑁆𑀢𑀕𑀼𑀴𑀁 𑀬𑀢𑁆𑀢𑀓𑁂𑀳𑀺 𑀲𑀼𑀢𑁆𑀢𑁂𑀳𑀺 𑀯𑁂𑀞𑀺𑀢𑀁, 𑀢𑀢𑁆𑀢𑀓𑁂𑀳𑀺 𑀏𑀯 𑀧𑀮𑀬𑀢𑀺.

𑀘𑀺𑀗𑁆𑀕𑀼𑀮 𑀧𑀭𑀺𑀩𑁆𑀪𑀫𑀦𑁂. 𑀘𑀺𑀗𑁆𑀕𑀼𑀮𑁂𑀢𑀺, 𑀘𑀺𑀗𑁆𑀕𑀼𑀮𑀬𑀢𑀺. 𑀘𑀺𑀗𑁆𑀕𑀼𑀮𑀬𑀺𑀢𑁆𑀯𑀸. 𑀅𑀢𑁆𑀭𑀸𑀬𑀁 𑀧𑀸𑀴𑀺 ‘‘𑀬𑀸𑀯𑀢𑀺𑀓𑀸 𑀅𑀪𑀺𑀲𑀗𑁆𑀔𑀸𑀭𑀲𑁆𑀲 𑀕𑀢𑀺, 𑀢𑀸𑀯𑀢𑀺𑀓𑀁 𑀕𑀦𑁆𑀢𑁆𑀯𑀸 𑀘𑀺𑀗𑁆𑀕𑀼𑀮𑀬𑀺𑀢𑁆𑀯𑀸 𑀪𑀽𑀫𑀺𑀬𑀁 𑀧𑀧𑀢𑀻’’𑀢𑀺. 𑀢𑀢𑁆𑀣 𑀘𑀺𑀗𑁆𑀕𑀼𑀮𑀬𑀺𑀢𑁆𑀯𑀸𑀢𑀺 𑀧𑀭𑀺𑀩𑁆𑀪𑀫𑀺𑀢𑁆𑀯𑀸.

𑀮𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀯𑀓𑀸𑀭𑀦𑁆𑀢𑀥𑀸𑀢𑀼

𑀤𑀺𑀯𑀼 𑀧𑀭𑀺𑀓𑀽𑀚𑀦𑁂. 𑀧𑀭𑀺𑀓𑀽𑀚𑀦𑀁 𑀕𑀚𑁆𑀚𑀦𑀁. 𑀤𑁂𑀯𑁂𑀢𑀺, 𑀤𑁂𑀯𑀬𑀢𑀺. 𑀤𑁂𑀯𑁄 𑀘 𑀧𑀭𑀺𑀤𑁂𑀯𑀺𑀢𑁆𑀯𑀸. 𑀤𑁂𑀯𑁄𑀢𑀺 𑀫𑁂𑀖𑁄.

𑀤𑀺𑀯𑀼 ¶ 𑀅𑀤𑁆𑀤𑀦𑁂. 𑀅𑀤𑁆𑀤𑀦𑀁 𑀕𑀦𑁆𑀥𑀧𑀺𑀲𑀦𑀦𑁆𑀢𑀺 𑀯𑀤𑀦𑁆𑀢𑀺. 𑀤𑁂𑀯𑁂𑀢𑀺, 𑀤𑁂𑀯𑀬𑀢𑀺.

𑀘𑀺𑀯 𑀪𑀸𑀲𑀸𑀬𑀁. 𑀘𑀺𑀯𑁂𑀢𑀺, 𑀘𑀺𑀯𑀬𑀢𑀺.

𑀯𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀲𑀓𑀸𑀭𑀦𑁆𑀢𑀥𑀸𑀢𑀼

𑀧𑀼𑀲 𑀧𑁄𑀲𑀦𑁂. 𑀧𑁄𑀲𑁂𑀢𑀺, 𑀧𑁄𑀲𑀬𑀢𑀺. 𑀇𑀫𑀸𑀦𑀺 𑀭𑀽𑀧𑀸𑀦𑀺 𑀓𑀺𑀜𑁆𑀘𑀸𑀧𑀺 𑀪𑀽𑀯𑀸𑀤𑀺𑀕𑀡𑀺𑀓𑀁 ‘‘𑀧𑁄𑀲𑁂𑀢𑀻’’𑀢𑀺 𑀭𑀽𑀧𑀁 𑀧𑀝𑀺𑀘𑁆𑀘 𑀳𑁂𑀢𑀼𑀓𑀢𑁆𑀢𑀼𑀭𑀽𑀧𑀸𑀦𑀺 𑀯𑀺𑀬 𑀤𑀺𑀲𑁆𑀲𑀦𑁆𑀢𑀺, 𑀢𑀣𑀸𑀧𑀺 ‘‘𑀅𑀜𑁆𑀜𑁂𑀧𑀺 𑀤𑁂𑀯𑁄 𑀧𑁄𑀲𑁂𑀢𑀻’’𑀢𑀺𑀆𑀤𑀺𑀓𑀲𑁆𑀲 𑀘𑀼𑀭𑀸𑀤𑀺𑀕𑀡𑀺𑀓𑀭𑀽𑀧𑀲𑁆𑀲 𑀤𑀲𑁆𑀲𑀦𑀢𑁄 𑀲𑀼𑀤𑁆𑀥𑀓𑀢𑁆𑀢𑀼𑀯𑀲𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀪𑀺𑀦𑁆𑀦𑀁 𑀧𑀦 𑀓𑀸𑀭𑀺𑀢𑀝𑁆𑀞𑀸𑀦𑁂 ‘‘𑀧𑁄𑀲𑀸𑀧𑁂𑀢𑀺, 𑀧𑁄𑀲𑀸𑀧𑀬𑀢𑀻’’𑀢𑀺 𑀳𑁂𑀢𑀼𑀓𑀢𑁆𑀢𑀼𑀭𑀽𑀧𑀸𑀦𑀺 𑀇𑀘𑁆𑀙𑀺𑀢𑀩𑁆𑀩𑀸𑀦𑀺.

𑀧𑁂𑀲 𑀧𑀝𑀺𑀳𑀭𑀡𑁂. 𑀧𑁂𑀲𑁂𑀢𑀺, 𑀧𑁂𑀲𑀬𑀢𑀺.

𑀧𑀺𑀲 𑀩𑀮𑀧𑀸𑀡𑀦𑁂𑀲𑀼. 𑀧𑀺𑀲𑁂𑀢𑀺, 𑀧𑀺𑀲𑀬𑀢𑀺.

𑀧𑀲𑀺 𑀦𑀸𑀲𑀦𑁂. 𑀧𑀁𑀲𑁂𑀢𑀺, 𑀧𑀁𑀲𑀬𑀢𑀺.

𑀚𑀲𑀺 𑀭𑀓𑁆𑀔𑀡𑁂. 𑀚𑀁𑀲𑁂𑀢𑀺, 𑀚𑀁𑀲𑀬𑀢𑀺.

𑀲𑀺𑀮𑁂𑀲 𑀲𑀺𑀮𑁂𑀲𑀦𑁂. 𑀲𑀺𑀮𑁂𑀲𑁂𑀢𑀺, 𑀲𑀺𑀮𑁂𑀲𑀬𑀢𑀺. 𑀲𑀺𑀮𑁂𑀲𑁄.

𑀮𑀽𑀲 𑀳𑀺𑀁𑀲𑀸𑀬𑀁. 𑀮𑀽𑀲𑁂𑀢𑀺, 𑀮𑀽𑀲𑀬𑀢𑀺.

𑀧𑀼𑀦𑁆𑀲 𑀅𑀪𑀺𑀫𑀤𑁆𑀤𑀦𑁂. 𑀦𑀓𑀸𑀭𑁄 𑀦𑀺𑀕𑁆𑀕𑀳𑀻𑀢𑀢𑁆𑀣𑀁. 𑀧𑀼𑀁𑀲𑁂𑀢𑀺, 𑀧𑀼𑀁𑀲𑀬𑀢𑀺. 𑀦𑀧𑀼𑀁𑀲𑀓𑁄. 𑀥𑀸𑀢𑀼𑀦𑀓𑀸𑀭𑀲𑁆𑀲 𑀮𑁄𑀧𑁂 ‘‘𑀧𑁄𑀲𑁄’’ 𑀇𑀘𑁆𑀘𑀧𑀺 𑀭𑀽𑀧𑀁.

𑀢𑀢𑁆𑀣 𑀦 𑀧𑀼𑀁𑀲𑀓𑁄𑀢𑀺 𑀇𑀢𑁆𑀣𑀺𑀪𑀸𑀯𑀧𑀼𑀫𑁆𑀪𑀸𑀯𑀭𑀳𑀺𑀢𑁄 𑀧𑀼𑀕𑁆𑀕𑀮𑁄. 𑀲𑁄 𑀳𑀺 𑀧𑀼𑀭𑀺𑀲𑁄 𑀯𑀺𑀬 𑀲𑀸𑀢𑀺𑀲𑀬𑀁 𑀧𑀘𑁆𑀘𑀸𑀫𑀺𑀢𑁆𑀢𑁂 𑀦 𑀧𑀼𑀁𑀲𑁂𑀢𑀺 𑀅𑀪𑀺𑀫𑀤𑁆𑀤𑀦𑀁 ¶ 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀦𑀧𑀼𑀁𑀲𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀘𑀺 𑀧𑀦 ‘‘𑀦 𑀧𑀼𑀫𑀸, 𑀦 𑀇𑀢𑁆𑀣𑀻’’𑀢𑀺 𑀦𑀧𑀼𑀁𑀲𑀓𑁄𑀢𑀺 𑀯𑀘𑀦𑀢𑁆𑀣𑀁 𑀯𑀤𑀦𑁆𑀢𑀺. 𑀢𑀣𑀸 𑀳𑀺 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀢𑀁 𑀧𑀼𑀕𑁆𑀕𑀮𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀦𑀧𑀼𑀁𑀲𑀓𑀦𑁆𑀢𑀺 𑀯𑀤𑀦𑁆𑀢𑀺.

𑀥𑀽𑀲 𑀓𑀦𑁆𑀢𑀺𑀓𑀭𑀡𑁂. 𑀥𑀽𑀲𑁂𑀢𑀺, 𑀥𑀽𑀲𑀬𑀢𑀺.

𑀭𑀼𑀲 𑀭𑁄𑀲𑀦𑁂. 𑀭𑁄𑀲𑀦𑀁 𑀓𑁄𑀧𑀓𑀭𑀡𑀁. 𑀭𑁄𑀲𑁂𑀢𑀺, 𑀭𑁄𑀲𑀬𑀢𑀺. 𑀭𑁄𑀲𑁄. 𑀭𑁄𑀲𑁄𑀢𑀺 𑀓𑁄𑀥𑁄.

𑀩𑁆𑀬𑀼𑀲 𑀉𑀲𑁆𑀲𑀕𑁆𑀕𑁂. 𑀩𑁆𑀬𑁄𑀲𑁂𑀢𑀺, 𑀩𑁆𑀬𑁄𑀲𑀬𑀢𑀺.

𑀚𑀲 𑀳𑀺𑀁𑀲𑀸𑀬𑀁. 𑀚𑀸𑀲𑁂𑀢𑀺, 𑀚𑀸𑀲𑀬𑀢𑀺.

𑀤𑀁𑀲 𑀤𑀁𑀲𑀦𑁂. 𑀤𑀁𑀲𑁂𑀢𑀺, 𑀤𑀁𑀲𑀬𑀢𑀺. 𑀤𑀁𑀲𑀦𑁄. 𑀤𑀁𑀲𑀦𑁄𑀢𑀺 𑀤𑀦𑁆𑀢𑁄. 𑀤𑀁𑀲𑀦𑁆𑀢𑀺 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀏𑀢𑁂𑀦𑀸𑀢𑀺 𑀤𑀁𑀲𑀦𑁄.

𑀤𑀲𑀺 𑀤𑀲𑁆𑀲𑀦𑁂 𑀘. 𑀘𑀓𑀸𑀭𑁄 𑀤𑀁𑀲𑀦𑀁 𑀅𑀧𑁂𑀓𑁆𑀔𑀢𑀺. 𑀤𑀁𑀲𑁂𑀢𑀺, 𑀤𑀁𑀲𑀬𑀢𑀺. 𑀯𑀺𑀤𑀁𑀲𑁂𑀢𑀺, 𑀯𑀺𑀤𑀁𑀲𑀬𑀢𑀺 𑀲𑀽𑀭𑀺𑀬𑁄 𑀆𑀮𑁄𑀓𑀁.

𑀢𑀲𑁆𑀲 𑀲𑀦𑁆𑀢𑀚𑁆𑀚𑀦𑁂. 𑀢𑀲𑁆𑀲𑁂𑀢𑀺, 𑀢𑀲𑁆𑀲𑀬𑀢𑀺 𑀧𑀼𑀭𑀺𑀲𑁄 𑀘𑁄𑀭𑁂.

𑀯𑀲𑁆𑀲𑀼 𑀲𑀢𑁆𑀢𑀺𑀩𑀦𑁆𑀥𑀦𑁂. 𑀲𑀢𑁆𑀢𑀺𑀩𑀦𑁆𑀥𑀦𑀁 𑀲𑀫𑀢𑁆𑀣𑀢𑀸𑀓𑀭𑀡𑀁. 𑀯𑀲𑁆𑀲𑁂𑀢𑀺, 𑀯𑀲𑁆𑀲𑀬𑀢𑀺.

𑀚𑀲 𑀢𑀸𑀴𑀦𑁂. 𑀢𑀸𑀴𑀦𑀁 𑀧𑀳𑀭𑀡𑀁. 𑀚𑀸𑀲𑁂𑀢𑀺, 𑀚𑀸𑀲𑀬𑀢𑀺.

𑀧𑀲 𑀩𑀦𑁆𑀥𑀦𑁂. 𑀧𑀸𑀲𑁂𑀢𑀺, 𑀧𑀸𑀲𑀬𑀢𑀺. 𑀧𑀸𑀲𑁄. 𑀧𑀸𑀲𑀦𑁆𑀢𑀺 𑀩𑀦𑁆𑀥𑀦𑁆𑀢𑀺 𑀲𑀢𑁆𑀢𑁂 𑀏𑀢𑁂𑀦𑀸𑀢𑀺 𑀧𑀸𑀲𑁄, 𑀲𑀓𑀼𑀡𑀧𑀸𑀲𑀸𑀤𑀺.

𑀖𑀼𑀲𑀺 𑀯𑀺𑀲𑀤𑁆𑀤𑀦𑁂. 𑀯𑀺𑀲𑀤𑁆𑀤𑀦𑀁 𑀉𑀕𑁆𑀖𑁄𑀲𑀦𑀁. 𑀖𑁄𑀲𑁂𑀢𑀺, 𑀖𑁄𑀲𑀬𑀢𑀺. 𑀖𑁄𑀲𑁄.

𑀮𑀲 𑀲𑀺𑀮𑁆𑀬𑀬𑁄𑀕𑁂. 𑀲𑀺𑀮𑁆𑀬𑀬𑁄𑀕𑁄 𑀮𑀸𑀲𑀺𑀬𑀁 𑀦𑀸𑀝𑀓𑀦𑀸𑀝𑀦𑀁 𑀭𑁂𑀘𑀓𑀤𑀸𑀦𑀁. 𑀮𑀸𑀲𑁂𑀢𑀺, 𑀮𑀸𑀲𑀬𑀢𑀺. 𑀮𑀸𑀲𑁂𑀦𑁆𑀢𑁄, 𑀮𑀸𑀲𑁂𑀦𑁆𑀢𑀻 ¶ . 𑀅𑀢𑁆𑀭𑀸𑀬𑀁 𑀧𑀸𑀴𑀺 ‘‘𑀯𑀸𑀤𑁂𑀦𑁆𑀢𑀺𑀬𑀸𑀧𑀺 𑀮𑀸𑀲𑁂𑀦𑁆𑀢𑀺, 𑀦𑀘𑁆𑀘𑀦𑁆𑀢𑀺𑀬𑀸𑀧𑀺 𑀮𑀸𑀲𑁂𑀦𑁆𑀢𑀺, 𑀮𑀸𑀲𑁂𑀦𑁆𑀢𑀺𑀬𑀸𑀧𑀺 𑀦𑀘𑁆𑀘𑀦𑁆𑀢𑀻’’𑀢𑀺. 𑀢𑀢𑁆𑀣 𑀮𑀸𑀲𑁂𑀦𑁆𑀢𑀻𑀢𑀺 𑀬𑀸 𑀉𑀧𑁆𑀮𑀯𑀫𑀸𑀦𑀸 𑀯𑀺𑀬 𑀉𑀝𑁆𑀞𑀳𑀺𑀢𑁆𑀯𑀸 𑀮𑀸𑀲𑀺𑀬𑀦𑀸𑀝𑀓𑀁 𑀦𑀸𑀝𑁂𑀦𑁆𑀢𑀺, 𑀭𑁂𑀘𑀓𑀁 𑀤𑁂𑀦𑁆𑀢𑀺.

𑀪𑀽𑀲 𑀅𑀮𑀗𑁆𑀓𑀸𑀭𑁂. 𑀪𑀽𑀲𑁂𑀢𑀺, 𑀪𑀽𑀲𑀬𑀢𑀺. 𑀯𑀺𑀪𑀽𑀲𑁂𑀢𑀺, 𑀯𑀺𑀪𑀽𑀲𑀬𑀢𑀺. 𑀪𑀽𑀲𑀦𑀁, 𑀯𑀺𑀪𑀽𑀲𑀦𑀁.

𑀯𑀲 𑀲𑀺𑀦𑁂𑀳𑀦𑀙𑁂𑀤𑀸𑀯𑀳𑀭𑀡𑁂𑀲𑀼. 𑀅𑀯𑀳𑀭𑀡𑀁 𑀘𑁄𑀭𑀺𑀓𑀸𑀬 𑀕𑀳𑀡𑀁. 𑀯𑀸𑀲𑁂𑀢𑀺, 𑀯𑀸𑀲𑀬𑀢𑀺. 𑀯𑀲𑀸.

𑀢𑀸𑀲 𑀯𑀸𑀭𑀡𑁂. 𑀯𑀸𑀭𑀡𑀁 𑀦𑀺𑀯𑀸𑀭𑀡𑀁. 𑀢𑀸𑀲𑁂𑀢𑀺, 𑀢𑀸𑀲𑀬𑀢𑀺.

𑀥𑀲 𑀉𑀜𑁆𑀙𑁂. 𑀥𑀸𑀲𑁂𑀢𑀺, 𑀥𑀸𑀲𑀬𑀢𑀺.

𑀪𑀲 𑀕𑀳𑀡𑁂. 𑀪𑀸𑀲𑁂𑀢𑀺, 𑀪𑀸𑀲𑀬𑀢𑀺.

𑀧𑀼𑀲 𑀥𑀸𑀭𑀡𑁂. 𑀧𑁄𑀲𑁂𑀢𑀺, 𑀧𑁄𑀲𑀬𑀢𑀺, 𑀆𑀪𑀭𑀡𑀁 𑀥𑀸𑀭𑁂𑀢𑀻𑀢𑀺 𑀅𑀢𑁆𑀣𑁄.

𑀢𑀼𑀲𑀺 𑀧𑀺𑀲𑀺 𑀓𑀼𑀲𑀺 𑀤𑀲𑀺 𑀪𑀸𑀲𑀸𑀬𑀁. 𑀢𑀼𑀁𑀲𑁂𑀢𑀺, 𑀢𑀼𑀁𑀲𑀬𑀢𑀺. 𑀧𑀺𑀁𑀲𑁂𑀢𑀺, 𑀧𑀺𑀁𑀲𑀬𑀢𑀺. 𑀓𑀼𑀁𑀲𑁂𑀢𑀺, 𑀓𑀼𑀁𑀲𑀬𑀢𑀺. 𑀤𑀁𑀲𑁂𑀢𑀺, 𑀤𑀁𑀲𑀬𑀢𑀺.

𑀔𑀼𑀲𑀺 𑀅𑀓𑁆𑀓𑁄𑀲𑀦𑁂. 𑀔𑀼𑀁𑀲𑁂𑀢𑀺, 𑀔𑀼𑀁𑀲𑀬𑀢𑀺. 𑀔𑀼𑀁𑀲𑀦𑀸.

𑀕𑀯𑁂𑀲 𑀫𑀕𑁆𑀕𑀦𑁂. 𑀕𑀯𑁂𑀲𑁂𑀢𑀺, 𑀕𑀯𑁂𑀲𑀬𑀢𑀺. 𑀕𑀯𑁂𑀲𑀓𑁄, 𑀕𑀯𑁂𑀲𑀺𑀢𑁄, 𑀕𑀯𑁂𑀲𑀦𑀸, 𑀕𑀯𑁂𑀝𑁆𑀞𑀺.

𑀯𑀸𑀲 𑀉𑀧𑀲𑁂𑀯𑀸𑀬𑀁. 𑀯𑀸𑀲𑁂𑀢𑀺, 𑀯𑀸𑀲𑀬𑀢𑀺. 𑀯𑀸𑀲𑁄, 𑀆𑀯𑀸𑀲𑁄.

𑀳𑀺𑀲𑀺 𑀳𑀺𑀁𑀲𑀸𑀬𑀁. 𑀳𑀺𑀁𑀲𑁂𑀢𑀺, 𑀳𑀺𑀁𑀲𑀬𑀢𑀺.

𑀦𑀺𑀯𑀸𑀲 𑀅𑀘𑁆𑀙𑀸𑀤𑀦𑁂. 𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑀺, 𑀦𑀺𑀯𑀸𑀲𑀬𑀢𑀺. 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸.

𑀅𑀁𑀲 ¶ 𑀲𑀗𑁆𑀖𑀸𑀢𑁂. 𑀅𑀁𑀲𑁂𑀢𑀺, 𑀅𑀁𑀲𑀬𑀢𑀺. 𑀅𑀁𑀲𑁄, 𑀅𑀁𑀲𑀸.

𑀏𑀢𑁆𑀣 𑀘 𑀅𑀁𑀲𑁄𑀢𑀺 𑀓𑁄𑀝𑁆𑀞𑀸𑀲𑁄𑀧𑀺 𑀔𑀦𑁆𑀥𑁄𑀧𑀺 𑀯𑀼𑀘𑁆𑀘𑀢𑀺. 𑀅𑀁𑀲𑀸𑀢𑀺 𑀅𑀭𑀺𑀲𑀭𑁄𑀕𑁄.

𑀫𑀺𑀲 𑀲𑀚𑁆𑀚𑀦𑁂. 𑀫𑁂𑀲𑁂𑀢𑀺, 𑀫𑁂𑀲𑀬𑀢𑀺.

𑀭𑀲 𑀅𑀲𑁆𑀲𑀸𑀤𑀦𑁂. 𑀭𑀲𑁂𑀢𑀺, 𑀭𑀲𑀬𑀢𑀺. 𑀭𑀲𑁄. 𑀭𑀲𑀺𑀬𑀢𑁂 𑀅𑀲𑁆𑀲𑀸𑀤𑀺𑀬𑀢𑁂 𑀚𑀦𑁂𑀳𑀻𑀢𑀺 𑀭𑀲𑁄.

𑀭𑀲 𑀲𑀺𑀦𑁂𑀳𑀦𑁂. 𑀭𑀲𑁂𑀢𑀺, 𑀭𑀲𑀬𑀢𑀺. 𑀭𑀲𑁄.

𑀢𑀢𑁆𑀣 𑀭𑀲𑁂𑀢𑀻𑀢𑀺 𑀲𑀺𑀦𑁂𑀳𑀢𑀺. 𑀭𑀲𑁄𑀢𑀺 𑀲𑀺𑀦𑁂𑀳𑁄, 𑀲𑀺𑀦𑁂𑀳𑀲𑀫𑁆𑀩𑀦𑁆𑀥𑁄 𑀲𑀸𑀫𑀕𑁆𑀕𑀺𑀭𑀲𑁄𑀢𑀺 𑀯𑀼𑀘𑁆𑀘𑀢𑀺, 𑀬𑀁 𑀲𑀦𑁆𑀥𑀸𑀬 𑀩𑁆𑀭𑀸𑀳𑁆𑀫𑀡𑀸 𑀪𑀕𑀯𑀦𑁆𑀢𑀁 ‘‘𑀅𑀭𑀲𑀭𑀽𑀧𑁄 𑀲𑀫𑀡𑁄 𑀕𑁄𑀢𑀫𑁄’’𑀢𑀺 𑀅𑀯𑁄𑀘𑀼𑀁.

𑀲𑀺𑀬 𑀅𑀲𑀩𑁆𑀩𑀧𑁆𑀧𑀬𑁄𑀕𑁂. 𑀲𑁂𑀲𑁂𑀢𑀺, 𑀲𑁂𑀲𑀬𑀢𑀺. 𑀲𑁂𑀲𑁄. 𑀯𑀺𑀧𑀼𑀩𑁆𑀩𑁄 𑀅𑀢𑀺𑀲𑀬𑁂, 𑀯𑀺𑀧𑀼𑀩𑁆𑀩𑁄 𑀅𑀢𑀺𑀲𑀬𑁂, 𑀯𑀺𑀧𑀼𑀩𑁆𑀩𑁄 𑀲𑀺𑀲𑀥𑀸𑀢𑀼 𑀅𑀢𑀺𑀲𑀬𑁂 𑀯𑀢𑁆𑀢𑀢𑀺, 𑀯𑀺𑀲𑁂𑀲𑁂𑀢𑀺, 𑀯𑀺𑀲𑁂𑀲𑀬𑀢𑀺. 𑀯𑀺𑀲𑁂𑀲𑁄, 𑀯𑀺𑀲𑀺𑀝𑁆𑀞𑁄, 𑀯𑀺𑀲𑁂𑀲𑀦𑀁.

𑀫𑀺𑀲𑁆𑀲 𑀲𑀫𑁆𑀫𑀺𑀲𑁆𑀲𑁂. 𑀫𑀺𑀲𑁆𑀲𑁂𑀢𑀺, 𑀫𑀺𑀲𑁆𑀲𑀬𑀢𑀺. 𑀲𑀫𑁆𑀫𑀺𑀲𑁆𑀲𑁂𑀢𑀺, 𑀲𑀫𑁆𑀫𑀺𑀲𑁆𑀲𑀬𑀢𑀺. 𑀫𑀺𑀲𑁆𑀲𑁄, 𑀫𑀺𑀲𑁆𑀲𑁄, 𑀫𑀺𑀲𑁆𑀲𑀺𑀢𑁄, 𑀲𑀫𑁆𑀫𑀺𑀲𑁆𑀲𑀺𑀢𑁄, 𑀲𑀫𑁆𑀫𑀺𑀲𑁆𑀲𑁄 𑀇𑀘𑁆𑀘𑀸𑀤𑀻𑀦𑀺. 𑀅𑀮𑀫𑁆𑀩𑀼𑀲𑀸𑀚𑀸𑀢𑀓𑁂 𑀫𑀺𑀲𑁆𑀲𑀸𑀢𑀺 𑀇𑀢𑁆𑀣𑀻𑀦𑀁 𑀯𑀢𑁆𑀢𑀩𑁆𑀩𑀦𑀸𑀫𑀁, 𑀧𑀼𑀭𑀺𑀲𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑀺𑀲𑁆𑀲𑀦𑀢𑀸𑀬.

𑀚𑀼𑀲 𑀧𑀭𑀺𑀢𑀓𑁆𑀓𑀦𑁂. 𑀚𑁄𑀲𑁂𑀢𑀺, 𑀚𑁄𑀲𑀬𑀢𑀺.

𑀫𑀲 𑀧𑀳𑀸𑀲𑀦𑁂. 𑀫𑀲𑁂𑀢𑀺, 𑀫𑀲𑀬𑀢𑀺.

𑀫𑀭𑀺𑀲 𑀢𑀺𑀢𑀺𑀓𑁆𑀔𑀸𑀬𑀁. 𑀫𑀭𑀺𑀲𑁂𑀢𑀺. 𑀫𑀭𑀺𑀲𑀬𑀢𑀺.

𑀧𑀺𑀲 𑀧𑁂𑀲𑀦𑁂. 𑀧𑁂𑀲𑁂𑀢𑀺, 𑀧𑁂𑀲𑀬𑀢𑀺. 𑀧𑁂𑀲𑀓𑁄, 𑀧𑁂𑀲𑀺𑀢𑁄.

𑀖𑀼𑀲 ¶ 𑀲𑀤𑁆𑀤𑁂. 𑀖𑁄𑀲𑁂𑀢𑀺, 𑀖𑁄𑀲𑀬𑀢𑀺. 𑀉𑀕𑁆𑀖𑁄𑀲𑀬𑀼𑀁 𑀩𑁄𑀥𑀺𑀫𑀡𑁆𑀟𑁂 𑀧𑀫𑁄𑀤𑀺𑀢𑀸. 𑀖𑁄𑀲𑁄.

𑀤𑀺𑀲𑀻 𑀉𑀘𑁆𑀘𑀸𑀭𑀡𑁂. 𑀤𑁂𑀲𑁂𑀢𑀺, 𑀤𑁂𑀲𑀬𑀢𑀺. 𑀤𑁂𑀲𑀓𑁄, 𑀤𑁂𑀲𑁂𑀢𑀸, 𑀤𑁂𑀲𑀺𑀢𑁄, 𑀤𑁂𑀲𑀦𑀸.

𑀯𑀲 𑀅𑀘𑁆𑀙𑀸𑀤𑀦𑁂. 𑀯𑀸𑀲𑁂𑀢𑀺, 𑀯𑀸𑀲𑀬𑀢𑀺. 𑀦𑀺𑀯𑀸𑀲𑁂𑀢𑀺, 𑀦𑀺𑀯𑀸𑀲𑀬𑀢𑀺. 𑀯𑀢𑁆𑀣𑀁.

𑀲𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀳𑀓𑀸𑀭𑀦𑁆𑀢𑀥𑀸𑀢𑀼

𑀅𑀭𑀳 𑀧𑀽𑀚𑀸𑀬𑀁. 𑀅𑀭𑀳𑁂𑀢𑀺, 𑀅𑀭𑀳𑀬𑀢𑀺. 𑀅𑀭𑀳𑀸, 𑀅𑀭𑀳𑀁. ‘‘𑀅𑀭𑀳𑀸, 𑀔𑀻𑀡𑀸𑀲𑀯𑁄, 𑀅𑀲𑁂𑀓𑁆𑀔𑁄’’𑀢𑀺 𑀅𑀭𑀳𑀢𑁄 𑀦𑀸𑀫𑀸𑀦𑀺.

𑀲𑀺𑀦𑁂𑀳 𑀲𑀺𑀦𑁂𑀳𑀦𑁂. 𑀲𑀺𑀦𑁂𑀳𑁂𑀢𑀺, 𑀲𑀺𑀦𑁂𑀳𑀬𑀢𑀺.

𑀯𑀭𑀳 𑀳𑀺𑀁𑀲𑀸𑀬𑀁. 𑀯𑀭𑀳𑁂𑀢𑀺, 𑀯𑀭𑀳𑀬𑀢𑀺. 𑀯𑀭𑀸𑀳𑁄.

𑀯𑀭𑀸𑀳𑁄𑀢𑀺 𑀲𑀽𑀓𑀭𑁄𑀧𑀺 𑀳𑀢𑁆𑀣𑀻𑀧𑀺 𑀯𑀼𑀘𑁆𑀘𑀢𑀺. ‘‘𑀏𑀡𑁂𑀬𑁆𑀬𑀸 𑀘 𑀯𑀭𑀸𑀳𑀸 𑀘𑀸’’𑀢𑀺 𑀏𑀢𑁆𑀣 𑀳𑀺 𑀲𑀽𑀓𑀭𑁄 ‘‘𑀯𑀭𑀸𑀳𑁄’’𑀢𑀺 𑀯𑀼𑀢𑁆𑀢𑁄, ‘‘𑀫𑀳𑀸𑀯𑀭𑀸𑀳𑀲𑁆𑀲…𑀧𑁂… 𑀦𑀤𑀻𑀲𑀼 𑀚𑀕𑁆𑀕𑀢𑁄’’𑀢𑀺 𑀏𑀢𑁆𑀣 𑀧𑀦 𑀳𑀢𑁆𑀣𑀻 ‘‘𑀯𑀭𑀸𑀳𑁄’’𑀢𑀺.

𑀭𑀳 𑀘𑀸𑀕𑁂. 𑀭𑀳𑁂𑀢𑀺, 𑀭𑀳𑀬𑀢𑀺.

𑀘𑀳 𑀧𑀭𑀺𑀓𑀢𑁆𑀣𑀦𑁂. 𑀘𑀳𑁂𑀢𑀺, 𑀘𑀳𑀬𑀢𑀺.

𑀫𑀳 𑀧𑀽𑀚𑀸𑀬𑀁. 𑀫𑀳𑁂𑀢𑀺, 𑀫𑀳𑀬𑀢𑀺. 𑀫𑀳𑀺𑀢𑁄 𑀭𑀸𑀚𑀸 𑀫𑀳𑀸𑀭𑀸𑀚𑀸. 𑀯𑀺𑀳𑀸𑀭𑀫𑀳𑁄, 𑀘𑁂𑀢𑀺𑀬𑀫𑀳𑁄.

𑀧𑀺𑀳 𑀇𑀘𑁆𑀙𑀸𑀬𑀁. 𑀧𑀺𑀳𑁂𑀢𑀺, 𑀧𑀺𑀳𑀬𑀢𑀺. 𑀧𑀺𑀳𑀸, 𑀧𑀺𑀳𑀸𑀮𑀼, 𑀅𑀧𑀺𑀳𑁄, 𑀧𑀺𑀳𑀦𑀻𑀬𑀸 𑀯𑀺𑀪𑀽𑀢𑀺𑀬𑁄.

𑀓𑀼𑀳 ¶ 𑀯𑀺𑀫𑁆𑀳𑀸𑀧𑀦𑁂. 𑀓𑀼𑀳𑁂𑀢𑀺, 𑀓𑀼𑀳𑀬𑀢𑀺. 𑀓𑀼𑀳𑀓𑁄. 𑀓𑀼𑀳𑀬𑀢𑀺 𑀮𑁄𑀓𑀯𑀺𑀫𑁆𑀳𑀸𑀧𑀦𑀁 𑀓𑀭𑁄𑀢𑀻𑀢𑀺 𑀓𑀼𑀳𑀓𑁄. 𑀓𑀼𑀳𑀦𑀸.

𑀲𑀳 𑀧𑀭𑀺𑀲𑀳𑀦𑁂. 𑀧𑀭𑀺𑀲𑀳𑀦𑀁 𑀔𑀦𑁆𑀢𑀺. 𑀲𑀳𑁂𑀢𑀺, 𑀲𑀳𑀬𑀢𑀺. 𑀲𑀳𑀦𑀁. 𑀪𑀽𑀯𑀸𑀤𑀺𑀕𑀡𑀺𑀓𑀲𑁆𑀲 𑀧𑀦𑀲𑁆𑀲 ‘‘𑀲𑀳𑀢𑀻’’𑀢𑀺 𑀭𑀽𑀧𑀁.

𑀕𑀭𑀳 𑀯𑀺𑀦𑀺𑀦𑁆𑀤𑀦𑁂. 𑀕𑀭𑀳𑁂𑀢𑀺, 𑀕𑀭𑀳𑀬𑀢𑀺. 𑀕𑀭𑀳𑀸. 𑀪𑀽𑀯𑀸𑀤𑀺𑀕𑀡𑀺𑀓𑀲𑁆𑀲 𑀧𑀦𑀲𑁆𑀲 ‘‘𑀕𑀭𑀳𑀢𑀻’’𑀢𑀺 𑀭𑀽𑀧𑀁.

𑀳𑀓𑀸𑀭𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀴𑀓𑀸𑀭𑀦𑁆𑀢𑀥𑀸𑀢𑀼

𑀢𑀴 𑀢𑀸𑀴𑀦𑁂. 𑀢𑀸𑀴𑁂𑀢𑀺, 𑀢𑀸𑀴𑀬𑀢𑀺. 𑀧𑀢𑀸𑀴𑁂𑀢𑀺, 𑀧𑀢𑀸𑀴𑀬𑀢𑀺. 𑀢𑀸𑀴𑀁. 𑀢𑀸𑀴𑀦𑁆𑀢𑀺 𑀓𑀁𑀲𑀢𑀸𑀴𑀸𑀤𑀺.

𑀢𑀴 𑀆𑀖𑀸𑀢𑁂. 𑀧𑀼𑀩𑁆𑀩𑁂 𑀯𑀺𑀬 𑀭𑀽𑀧𑀸𑀦𑀺.

𑀔𑀴 𑀪𑁂𑀤𑁂. 𑀔𑀴𑁂𑀢𑀺, 𑀔𑀴𑀬𑀢𑀺.

𑀇𑀴 𑀣𑀯𑀦𑁂. 𑀇𑀴𑁂𑀢𑀺, 𑀇𑀴𑀬𑀢𑀺.

𑀚𑀼𑀴 𑀧𑁂𑀭𑀡𑁂. 𑀚𑁄𑀴𑁂𑀢𑀺, 𑀚𑁄𑀴𑀬𑀢𑀺.

𑀧𑀻𑀴 𑀅𑀯𑀕𑀸𑀳𑀦𑁂. 𑀧𑀻𑀴𑁂𑀢𑀺, 𑀧𑀻𑀴𑀬𑀢𑀺. 𑀦𑀺𑀧𑁆𑀧𑀻𑀴𑁂𑀢𑀺, 𑀦𑀺𑀧𑁆𑀧𑀻𑀴𑀬𑀢𑀺. 𑀧𑀻𑀴𑀦𑀓𑁄, 𑀧𑀻𑀴𑀺𑀢𑁄, 𑀧𑀻𑀴𑀸, 𑀧𑀻𑀴𑀦𑀁, 𑀦𑀺𑀧𑁆𑀧𑀻𑀴𑀦𑀓𑁄.

𑀮𑀴 𑀉𑀧𑀲𑁂𑀯𑀸𑀬𑀁. 𑀮𑀸𑀴𑁂𑀢𑀺, 𑀮𑀸𑀴𑀬𑀢𑀺. 𑀉𑀧𑀮𑀸𑀴𑁂𑀢𑀺, 𑀉𑀧𑀮𑀸𑀴𑀬𑀢𑀺. 𑀪𑀽𑀯𑀸𑀤𑀺𑀕𑀡𑀝𑁆𑀞𑀸𑀬 𑀧𑀦 𑀯𑀺𑀮𑀸𑀲𑀦𑀢𑁆𑀣𑁂 𑀯𑀢𑁆𑀢𑀫𑀸𑀦𑀸𑀬 𑀏𑀢𑀺𑀲𑁆𑀲𑀸 ‘‘𑀮𑀴𑀢𑀻’’𑀢𑀺 𑀭𑀽𑀧𑀁.

𑀲𑀺𑀴 𑀲𑁂𑀴𑀦𑁂. 𑀲𑁂𑀴𑁂𑀢𑀺, 𑀲𑁂𑀴𑀬𑀢𑀺. 𑀲𑁂𑀴𑁂𑀦𑁆𑀢𑁄. 𑀏𑀢𑁆𑀣 𑀲𑁂𑀴𑁂𑀢𑀻𑀢𑀺 𑀲𑁂𑀴𑀺𑀢𑀲𑀤𑁆𑀤𑀁 𑀓𑀭𑁄𑀢𑀺.

𑀅𑀯𑀕𑁆𑀕𑀦𑁆𑀢𑀥𑀸𑀢𑀼𑀭𑀽𑀧𑀸𑀦𑀺.

𑀘𑀼𑀭𑀸𑀤𑀻 ¶ 𑀏𑀢𑁆𑀢𑀓𑀸 𑀤𑀺𑀝𑁆𑀞𑀸, 𑀥𑀸𑀢𑀯𑁄 𑀫𑁂 𑀬𑀣𑀸𑀩𑀮𑀁;

𑀲𑀼𑀢𑁆𑀢𑁂𑀲𑁆𑀯𑀜𑁆𑀜𑁂𑀧𑀺 𑀧𑁂𑀓𑁆𑀔𑀺𑀢𑁆𑀯𑀸, 𑀕𑀡𑁆𑀳𑀯𑁆𑀳𑁄 𑀅𑀢𑁆𑀣𑀬𑀼𑀢𑁆𑀢𑀺𑀢𑁄.

𑀘𑀼𑀭𑀧𑀫𑀼𑀔𑀕𑀡𑁄 𑀫𑁂 𑀲𑀸𑀲𑀦𑀢𑁆𑀣𑀁 𑀧𑀯𑀼𑀢𑁆𑀢𑁄,

𑀲𑀼𑀧𑀘𑀼𑀭𑀳𑀺𑀢𑀓𑀸𑀫𑁄 𑀢𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬 𑀥𑀻𑀭𑁄;

𑀲𑀼𑀧𑀘𑀼𑀭𑀦𑀬𑀧𑀸𑀞𑁂 𑀲𑀢𑁆𑀣𑀼𑀦𑁄 𑀢𑀜𑁆𑀳𑀺 𑀲𑀺𑀓𑁆𑀔𑀁,

𑀧𑀺𑀬𑀼𑀲𑀫𑀺𑀯 𑀫𑀦𑀼𑀜𑁆𑀜𑀁 𑀅𑀢𑁆𑀣𑀲𑀸𑀭𑀁 𑀮𑀪𑁂𑀣.

𑀇𑀢𑀺 𑀦𑀯𑀗𑁆𑀕𑁂 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀩𑁆𑀬𑀧𑁆𑀧𑀣𑀕𑀢𑀻𑀲𑀼 𑀯𑀺𑀜𑁆𑀜𑀽𑀦𑀁

𑀓𑁄𑀲𑀮𑁆𑀮𑀢𑁆𑀣𑀸𑀬 𑀓𑀢𑁂 𑀲𑀤𑁆𑀤𑀦𑀻𑀢𑀺𑀧𑁆𑀧𑀓𑀭𑀡𑁂

𑀘𑀼𑀭𑀸𑀤𑀺𑀕𑀡𑀧𑀭𑀺𑀤𑀻𑀧𑀦𑁄 𑀅𑀝𑁆𑀞𑀸𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁯. 𑀲𑀩𑁆𑀩𑀕𑀡𑀯𑀺𑀦𑀺𑀘𑁆𑀙𑀬

𑀇𑀢𑁄 𑀧𑀭𑀁 𑀧𑀯𑀓𑁆𑀔𑀸𑀫𑀺, 𑀲𑀩𑁆𑀩𑀕𑀡𑀯𑀺𑀦𑀺𑀘𑁆𑀙𑀬𑀁;

𑀲𑁄𑀢𑀽𑀦𑀁 𑀧𑀝𑀼𑀪𑀸𑀯𑀢𑁆𑀣𑀁, 𑀧𑀭𑀫𑁂 𑀧𑀺𑀝𑀓𑀢𑁆𑀢𑀬𑁂.

𑀧𑀘𑁆𑀘𑀬𑀸𑀤𑀺𑀯𑀺𑀪𑀸𑀕𑁂𑀳𑀺, 𑀦𑀬𑁂𑀳𑀺 𑀯𑀺𑀯𑀺𑀥𑁂𑀳𑀺 𑀢𑀁;

𑀲𑀼𑀔𑀕𑁆𑀕𑀸𑀳𑀸𑀬 𑀲𑁄𑀢𑀽𑀦𑀁, 𑀲𑀼𑀡𑀸𑀣 𑀫𑀫 𑀪𑀸𑀲𑀢𑁄.

𑀢𑀢𑁆𑀣 𑀧𑀞𑀫𑁄 𑀪𑀽𑀯𑀸𑀤𑀺𑀕𑀡𑁄, 𑀤𑀼𑀢𑀺𑀬𑁄 𑀭𑀼𑀥𑀸𑀤𑀺𑀕𑀡𑁄, 𑀢𑀢𑀺𑀬𑁄 𑀤𑀺𑀯𑀸𑀤𑀺𑀕𑀡𑁄, 𑀘𑀢𑀼𑀢𑁆𑀣𑁄 𑀲𑁆𑀯𑀸𑀤𑀺𑀕𑀼𑀡𑁄, 𑀧𑀜𑁆𑀘𑀫𑁄 𑀓𑀺𑀬𑀸𑀤𑀺𑀕𑀡𑁄, 𑀙𑀝𑁆𑀞𑁄 𑀕𑀳𑀸𑀤𑀺𑀕𑀡𑁄, 𑀲𑀢𑁆𑀢𑀫𑁄 𑀢𑀦𑀸𑀤𑀺𑀕𑀡𑁄, 𑀅𑀝𑁆𑀞𑀫𑁄 𑀘𑀼𑀭𑀸𑀤𑀺𑀕𑀡𑁄, 𑀇𑀫𑀲𑁆𑀫𑀺𑀁 𑀪𑀕𑀯𑀢𑁄 𑀧𑀸𑀯𑀘𑀦𑁂 𑀅𑀝𑁆𑀞𑀯𑀺𑀥𑀸 𑀥𑀸𑀢𑀼𑀕𑀡𑀸 𑀪𑀯𑀦𑁆𑀢𑀺. 𑀏𑀢𑁂𑀲𑀼 𑀯𑀺𑀓𑀭𑀡𑀧𑀘𑁆𑀘𑀬𑀯𑀲𑁂𑀦 𑁋

𑀪𑀽𑀯𑀸𑀤𑀺𑀢𑁄 𑀅𑀓𑀸𑀭𑁄 𑀘, 𑀲𑀸𑀦𑀼𑀲𑀸𑀭𑁄 𑀭𑀼𑀥𑀸𑀤𑀺𑀢𑁄;

𑀅𑀓𑀸𑀭𑁄 𑀘𑁂𑀯𑀺𑀯𑀡𑁆𑀡𑁄 𑀘, 𑀏𑀓𑀸𑀭𑁄𑀓𑀸𑀭𑀫𑁂𑀯 𑀘.

𑀬𑀧𑀘𑁆𑀘𑀬𑁄 𑀤𑀺𑀯𑀸𑀤𑀺𑀫𑁆𑀳𑀸, 𑀡𑀼 𑀡𑀸 𑀉𑀡𑀸 𑀲𑀼𑀯𑀸𑀤𑀺𑀢𑁄;

𑀓𑁆𑀬𑀸𑀤𑀺𑀢𑁄 𑀧𑀦 𑀦𑀸𑀬𑁂𑀯, 𑀧𑁆𑀧𑀡𑁆𑀳𑀸 𑀧𑀦 𑀕𑀳𑀸𑀤𑀺𑀢𑁄.

𑀑𑀬𑀺𑀭𑀸 ¶ 𑀢𑀼 𑀢𑀦𑀸𑀤𑀺𑀫𑁆𑀳𑀸, 𑀡𑁂 𑀡𑀬𑀸 𑀘 𑀘𑀼𑀭𑀸𑀤𑀺𑀢𑁄;

𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦, 𑀧𑀘𑁆𑀘𑀬𑀸 𑀤𑀲 𑀧𑀜𑁆𑀘 𑀘.

𑀳𑀺𑀬𑁆𑀬𑀢𑁆𑀢𑀦𑀻 𑀲𑀢𑁆𑀢𑀫𑀻 𑀘, 𑀯𑀢𑁆𑀢𑀫𑀸𑀦𑀸 𑀘 𑀧𑀜𑁆𑀘𑀫𑀻;

𑀘𑀢𑀲𑁆𑀲𑁂𑀢𑀸 𑀧𑀯𑀼𑀘𑁆𑀘𑀦𑁆𑀢𑀺, 𑀲𑀩𑁆𑀩𑀥𑀸𑀢𑀼𑀓𑀦𑀸𑀫𑀺𑀓𑀸.

𑀏𑀢𑁂𑀲𑀼 𑀯𑀺𑀲𑀬𑁂𑀲𑁆𑀯𑁂𑀯, 𑀅𑀓𑀸𑀭𑁄 𑀲𑀼𑀤𑁆𑀥𑀓𑀢𑁆𑀢𑀭𑀺;

𑀅𑀜𑁆𑀜𑀢𑁆𑀭 𑀔 𑀙 𑀲𑀸𑀤𑀻𑀳𑀺, 𑀲𑀳𑀸𑀧𑀺 𑀘𑀼𑀧𑀮𑀩𑁆𑀪𑀢𑀺.

‘‘𑀪𑀯𑀢𑀺 𑀳𑁄𑀢𑀺 𑀲𑀫𑁆𑀪𑁄𑀢𑀺, 𑀚𑁂𑀢𑀺 𑀚𑀬𑀢𑀺 𑀓𑀻𑀬𑀢𑀺;

𑀟𑁂𑀢𑀺 𑀬𑀸𑀢𑀺 𑀇𑀢𑀺 𑀏𑀢𑀺, 𑀅𑀯𑀢𑀺 𑀓𑁄𑀢𑀺 𑀲𑀗𑁆𑀓𑀢𑀺.

𑀪𑀺𑀓𑁆𑀔𑀢𑀺 𑀧𑀺𑀯𑀢𑀺 𑀧𑀸𑀢𑀺, 𑀯𑀤𑁂𑀢𑀺 𑀯𑀤𑀢𑀺’’ 𑀇𑀢𑀺;

𑀪𑀽𑀯𑀸𑀤𑀺𑀥𑀸𑀢𑀼𑀭𑀽𑀧𑀸𑀦𑀺, 𑀪𑀯𑀦𑁆𑀢𑀻𑀢𑀺 𑀧𑀓𑀸𑀲𑀬𑁂.

𑀭𑀽𑀧𑀁 ‘‘𑀭𑀼𑀦𑁆𑀥𑀢𑀺 𑀭𑀼𑀦𑁆𑀥𑀻𑀢𑀺, 𑀭𑀼𑀦𑁆𑀥𑁂𑀢𑀺 𑀧𑀼𑀦 𑀭𑀼𑀦𑁆𑀥𑀺𑀢𑀺;

𑀲𑀼𑀫𑁆𑀪𑁄𑀢𑀺’’𑀘𑁆𑀘𑀸𑀤𑀻𑀭𑀽𑀧𑀸𑀦𑀺, 𑀭𑀼𑀥𑀸𑀤𑀻𑀦𑁆𑀢𑀺 𑀤𑀻𑀧𑀬𑁂.

‘‘𑀤𑀺𑀩𑁆𑀩𑀢𑀺 𑀲𑀺𑀩𑁆𑀩𑀢𑀺 𑀘𑁂𑀯, 𑀬𑀼𑀚𑁆𑀚𑀢𑀺 𑀯𑀺𑀚𑁆𑀚𑀢𑀺 𑀢𑀣𑀸;

𑀖𑀸𑀬𑀢𑀺 𑀳𑀸𑀬𑀢𑀺’’𑀘𑁆𑀘𑀸𑀤𑀺, 𑀭𑀽𑀧𑀫𑀸𑀳𑀼 𑀤𑀺𑀯𑀸𑀤𑀺𑀦𑀁.

‘‘𑀲𑀼𑀡𑁄𑀢𑀺 𑀘 𑀲𑀼𑀡𑀸𑀢𑀺 𑀘, 𑀯𑀼𑀡𑁄𑀢𑀺 𑀘 𑀯𑀼𑀡𑀸𑀢𑀺 𑀘;

𑀧𑀸𑀧𑀼𑀡𑀸𑀢𑀺 𑀳𑀺𑀦𑁄𑀢𑀻’’𑀢𑀺, 𑀆𑀤𑀺𑀭𑀽𑀧𑀁 𑀲𑀼𑀯𑀸𑀤𑀺𑀦𑀁.

‘‘𑀓𑀺𑀦𑀸𑀢𑀺 𑀘 𑀚𑀺𑀦𑀸𑀢𑀺 𑀘, 𑀥𑀼𑀦𑀸𑀢𑀺 𑀘 𑀫𑀼𑀦𑀸𑀢𑀺 𑀘;

𑀅𑀲𑁆𑀦𑀸𑀢𑀺’’𑀘𑁆𑀘𑀸𑀤𑀺𑀭𑀽𑀧𑀜𑁆𑀘, 𑀓𑁆𑀬𑀸𑀤𑀻𑀦𑀦𑁆𑀢𑀺 𑀯𑀺𑀪𑀸𑀯𑀬𑁂.

‘‘𑀖𑁂𑀧𑁆𑀧𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀲𑀡𑁆𑀳𑀜𑁆𑀘 𑀲𑀡𑁆𑀳𑀓𑁄𑀢𑀺 𑀘;

𑀓𑀡𑁆𑀳𑀁 𑀢𑀡𑁆𑀳𑀸 𑀘 𑀢𑀺𑀡𑁆𑀳𑀼𑀡𑁆𑀳’’-𑀫𑀺𑀘𑁆𑀘𑀸𑀤𑀺 𑀘 𑀕𑀳𑀸𑀤𑀺𑀦𑀁.

‘‘𑀢𑀦𑁄𑀢𑀺 𑀘 𑀓𑀭𑁄𑀢𑀺 𑀘, 𑀓𑀬𑀺𑀭𑀢𑀺 𑀲𑀦𑁄𑀢𑀺 𑀘;

𑀲𑀓𑁆𑀓𑁄𑀢’𑀧𑁆𑀧𑁄𑀢𑀺 𑀧𑀧𑁆𑀧𑁄𑀢𑀺’’-𑀘𑁆𑀘𑀸𑀤𑀺𑀭𑀽𑀧𑀁 𑀢𑀦𑀸𑀤𑀺𑀦𑀁.

‘‘𑀘𑁄𑀭𑁂𑀢𑀺 𑀘𑁄𑀭𑀬𑀦𑁆𑀢𑁂 𑀘, 𑀘𑀺𑀦𑁆𑀢𑁂𑀢𑀺 𑀘𑀺𑀦𑁆𑀢𑀬𑀦𑁆𑀢𑀺 𑀘;

𑀫𑀦𑁆𑀢𑁂𑀢𑀺’’𑀘𑁆𑀘𑀸𑀤𑀺𑀓𑀜𑁆𑀘𑀸𑀧𑀺, 𑀭𑀽𑀧𑀫𑀸𑀳𑀼 𑀘𑀼𑀭𑀸𑀤𑀺𑀦𑀁.

𑀯𑀺𑀓𑀭𑀡𑀯𑀲𑁂𑀦𑁂𑀯𑀁, 𑀭𑀽𑀧𑀪𑁂𑀤𑁄 𑀧𑀓𑀸𑀲𑀺𑀢𑁄;

𑀥𑀸𑀢𑀽𑀦𑀁 𑀥𑀸𑀢𑀼𑀪𑁂𑀤𑀸𑀤𑀺-𑀓𑀼𑀲𑀮𑀲𑁆𑀲 𑀫𑀢𑀸𑀦𑀼𑀕𑁄.

𑀓𑀺𑀭𑀺𑀬𑀸𑀬 ¶ 𑀥𑀸𑀭𑀡𑀢𑁄, 𑀥𑀸𑀢𑀯𑁄 𑀏𑀓𑀥𑀸 𑀫𑀢𑀸;

𑀤𑁆𑀯𑀺𑀥𑀸𑀧𑀺 𑀘 𑀧𑀯𑀼𑀘𑁆𑀘𑀦𑁆𑀢𑀺, 𑀲𑀓𑀫𑁆𑀫𑀸𑀓𑀫𑁆𑀫𑀢𑁄 𑀧𑀦.

𑀢𑀢𑁆𑀣 𑀲𑀓𑀫𑁆𑀫𑀓𑀸 𑀦𑀸𑀫, 𑀕𑀫𑀺𑀪𑀓𑁆𑀔𑀸𑀤𑀬𑀸 𑀲𑀺𑀬𑀼𑀁;

𑀞𑀸𑀲𑀸𑀤𑀬𑁄 𑀅𑀓𑀫𑁆𑀫𑀸 𑀘, 𑀉𑀧𑀲𑀕𑁆𑀕𑀁 𑀯𑀺𑀦𑀸 𑀯𑀤𑁂;

𑀲𑀓𑀫𑁆𑀫𑀓𑀓𑀫𑁆𑀫𑀪𑀽𑀢𑁄, 𑀤𑀺𑀯𑀼 𑀇𑀘𑁆𑀘𑀸𑀤𑀬𑁄 𑀧𑀼𑀦;

𑀕𑀳𑁂𑀢𑁆𑀯𑀸𑀦 𑀢𑀺𑀥𑀸 𑀳𑁄𑀦𑁆𑀢𑀺, 𑀏𑀯𑀜𑁆𑀘𑀸𑀧𑀺 𑀯𑀺𑀪𑀸𑀯𑀬𑁂.

𑀲𑀓𑀫𑁆𑀫𑀓𑁂 𑀤𑁆𑀯𑀺𑀥𑀸 𑀪𑀺𑀢𑁆𑀯𑀸, 𑀏𑀓𑀓𑀫𑁆𑀫𑀤𑁆𑀯𑀺𑀓𑀫𑁆𑀫𑀢𑁄;

𑀅𑀓𑀫𑁆𑀫𑀓𑁂𑀳𑀺 𑀲𑀤𑁆𑀥𑀺𑀁 𑀢𑁂, 𑀢𑀺𑀯𑀺𑀥𑀸𑀧𑀺 𑀪𑀯𑀦𑁆𑀢𑀺 𑀳𑀺.

𑀅𑀓𑀫𑁆𑀫𑀓𑀸 𑀭𑀼𑀢𑀸𑀬𑁂𑀯, 𑀏𑀓𑀓𑀫𑁆𑀫𑀸 𑀕𑀫𑀸𑀤𑀬𑁄;

𑀳𑁄𑀦𑁆𑀢𑀺 𑀤𑁆𑀯𑀺𑀓𑀫𑁆𑀫𑀓𑀸 𑀦𑀸𑀫, 𑀤𑀼𑀳𑀺𑀓𑀭𑀯𑀳𑀸𑀤𑀬𑁄.

𑀲𑀓𑀫𑁆𑀫𑀸𑀓𑀫𑁆𑀫𑀓𑀢𑁆𑀢𑀫𑁆𑀳𑀺, 𑀥𑀸𑀢𑀽𑀦𑀫𑀼𑀧𑀲𑀕𑁆𑀕𑀢𑁄;

𑀦𑀺𑀬𑀫𑁄 𑀦𑀢𑁆𑀣𑀺 𑀲𑁄 𑀢𑀲𑁆𑀫𑀸, 𑀦 𑀫𑀬𑀸 𑀏𑀢𑁆𑀣 𑀯𑀼𑀘𑁆𑀘𑀢𑀺.

𑀏𑀓𑀝𑁆𑀞𑀸𑀦𑀸 𑀕𑀫𑀺𑀘𑁆𑀘𑀸𑀤𑀻, 𑀤𑁆𑀯𑀺𑀝𑁆𑀞𑀸𑀦𑀸 𑀪𑀽𑀧𑀘𑀸𑀤𑀬𑁄;

𑀢𑀺𑀝𑁆𑀞𑀸𑀦𑀸 𑀲𑁆𑀯𑀸𑀤𑀬𑁄 𑀏𑀯𑀁, 𑀞𑀸𑀦𑀢𑁄𑀧𑀺 𑀢𑀺𑀥𑀸 𑀫𑀢𑀸.

𑀕𑀼𑀧𑀸𑀤𑀬𑁄 𑀦𑀺𑀬𑁄𑀕𑁂𑀦, 𑀆𑀔𑁆𑀬𑀸𑀢𑀢𑁆𑀢𑁂 𑀲𑀯𑀼𑀤𑁆𑀥𑀺𑀓𑀸;

𑀯𑀘 𑀢𑀼𑀭𑀸𑀤𑀬𑁄 𑀦 𑀳𑀺, 𑀯𑀼𑀤𑁆𑀥𑀺𑀓𑀸 𑀓𑀸𑀭𑀺𑀢𑀁 𑀯𑀺𑀦𑀸;

𑀔𑀺 𑀚𑀺 𑀇𑀘𑁆𑀘𑀸𑀤𑀬𑁄 𑀥𑀸𑀢𑀽, 𑀲𑀯𑀼𑀤𑁆𑀥𑀸𑀯𑀼𑀤𑁆𑀥𑀺𑀓𑀸 𑀫𑀢𑀸;

𑀇𑀢𑀺 𑀯𑀼𑀤𑁆𑀥𑀺𑀯𑀲𑁂𑀦𑀸𑀧𑀺, 𑀢𑀺𑀯𑀺𑀥𑁄 𑀥𑀸𑀢𑀼𑀲𑀗𑁆𑀕𑀳𑁄.

𑀅𑀮𑀼𑀢𑁆𑀢𑀯𑀺𑀓𑀭𑀡𑀸 𑀘, 𑀮𑀼𑀢𑁆𑀢𑀯𑀺𑀓𑀭𑀡𑀸 𑀢𑀣𑀸;

𑀮𑀼𑀢𑁆𑀢𑀸𑀮𑀼𑀢𑁆𑀢𑀯𑀺𑀓𑀭𑀡𑀸, 𑀏𑀯𑀫𑁆𑀧𑀺 𑀢𑀺𑀯𑀺𑀥𑀸 𑀲𑀺𑀬𑀼𑀁.

𑀢𑀢𑁆𑀭𑀸𑀮𑀼𑀢𑁆𑀢𑀯𑀺𑀓𑀭𑀡𑀸, 𑀕𑀫𑀺 𑀭𑀼𑀥𑀺 𑀤𑀺𑀯𑀸𑀤𑀬𑁄;

𑀧𑀸 𑀪𑀸𑀤𑀬𑁄 𑀚𑀺𑀦𑀺𑀘𑁆𑀘𑀸𑀤𑀻, 𑀓𑀫𑀢𑁄 𑀇𑀢𑀭𑁂 𑀲𑀺𑀬𑀼𑀁.

𑀲𑀼𑀤𑁆𑀥𑀲𑁆𑀲𑀭𑀸 𑀏𑀓𑀲𑁆𑀲𑀭𑀸, 𑀢𑀣𑀸𑀦𑁂𑀓𑀲𑁆𑀲𑀭𑀸𑀢𑀺 𑀘;

𑀢𑀺𑀥𑀸 𑀪𑀯𑀦𑁆𑀢𑀺 𑀬𑀼𑀬𑀸𑀢𑀸-𑀧𑀸𑀪𑀸𑀮𑀸𑀤𑀻 𑀓𑀭𑀸𑀤𑀬𑁄.

𑀘𑀢𑀼𑀥𑀸𑀤𑀺𑀦𑀬𑁄 𑀘𑀸𑀧𑀺, 𑀮𑀩𑁆𑀪𑀫𑀸𑀦𑀯𑀲𑁂𑀦 𑀘;

𑀕𑀳𑁂𑀢𑀩𑁆𑀩𑁄 𑀦𑀬𑀜𑁆𑀜𑀽𑀳𑀺, 𑀬𑀣𑀸𑀯𑀼𑀢𑁆𑀢𑀸𑀦𑀼𑀲𑀸𑀭𑀢𑁄.

𑀧𑀼𑀦 ¶ 𑀲𑀼𑀤𑁆𑀥𑀲𑁆𑀲𑀭𑀸 𑀥𑀸𑀢𑀽, 𑀏𑀓𑀲𑁆𑀲𑀭𑀸 𑀘 𑀲𑀢𑁆𑀢𑀥𑀸;

𑀆𑀇𑀯𑀡𑁆𑀡𑀉𑀯𑀡𑁆𑀡𑀦𑁆𑀢-𑀏𑀑𑀦𑁆𑀢𑀯𑀲𑀸 𑀫𑀢𑀸.

𑀅𑀯𑀡𑁆𑀡𑀺𑀯𑀡𑁆𑀡𑀼𑀯𑀡𑁆𑀡𑀦𑁆𑀢𑁂-𑀓𑀸𑀭𑀦𑁆𑀢𑀸𑀦𑀁 𑀯𑀲𑁂𑀦 𑀯𑁂;

𑀅𑀦𑁂𑀓𑀲𑁆𑀲𑀭𑀥𑀸𑀢𑀽 𑀘, 𑀲𑀢𑁆𑀢𑀥𑀸𑀯 𑀧𑀓𑀺𑀢𑁆𑀢𑀺𑀢𑀸.

𑀏𑀯𑀁 𑀧𑀦𑁆𑀦𑀭𑀲𑀥𑀸𑀧𑀺, 𑀥𑀸𑀢𑀽𑀦𑀫𑀺𑀥 𑀲𑀗𑁆𑀕𑀳𑁄;

𑀢𑀧𑁆𑀧𑀪𑁂𑀤𑀁 𑀧𑀓𑀸𑀲𑁂𑀬𑁆𑀬𑀼𑀁, 𑀇𑀉𑀇𑀘𑁆𑀘𑀸𑀤𑀺𑀦𑀸 𑀯𑀺𑀤𑀽.

𑀢𑀢𑁆𑀭 ‘‘𑀇𑀕𑀢𑀺𑀬𑀁, 𑀇 𑀅𑀚𑁆𑀛𑀬𑀦𑁂, 𑀉 𑀲𑀤𑁆𑀤𑁂’’ 𑀇𑀘𑁆𑀘𑁂𑀢𑁂 𑀲𑀼𑀤𑁆𑀥𑀲𑁆𑀲𑀭𑀸 𑀥𑀸𑀢𑀯𑁄. 𑀬𑀸 𑀭𑀸 𑀮𑀸 𑀇𑀘𑁆𑀘𑀸𑀤𑀬𑁄 𑀏𑀓𑀲𑁆𑀲𑀭𑀸 𑀆𑀓𑀸𑀭𑀦𑁆𑀢𑀸. 𑀔𑀺𑀚𑀺𑀦𑀺𑀇𑀘𑁆𑀘𑀸𑀤𑀬𑁄 𑀏𑀓𑀲𑁆𑀲𑀭𑀸 𑀇𑀓𑀸𑀭𑀦𑁆𑀢𑀸. 𑀧𑀻𑀇𑀘𑁆𑀘𑀸𑀤𑀬𑁄 𑀏𑀓𑀲𑁆𑀲𑀭𑀸 𑀈𑀓𑀸𑀭𑀦𑁆𑀢𑀸. 𑀔𑀼 𑀤𑀼 𑀓𑀼 𑀇𑀘𑁆𑀘𑀸𑀤𑀬𑁄 𑀏𑀓𑀲𑁆𑀲𑀭𑀸 𑀉𑀓𑀸𑀭𑀦𑁆𑀢𑀸, 𑀪𑀽 𑀳𑀽 𑀇𑀘𑁆𑀘𑀸𑀤𑀬𑁄 𑀏𑀓𑀲𑁆𑀲𑀭𑀸 𑀊𑀓𑀸𑀭𑀦𑁆𑀢𑀸. 𑀔𑁂 𑀚𑁂 𑀲𑁂 𑀇𑀘𑁆𑀘𑀸𑀤𑀬𑁄 𑀏𑀓𑀲𑁆𑀲𑀭𑀸 𑀏𑀓𑀸𑀭𑀦𑁆𑀢𑀸. 𑀲𑁄 𑀇𑀘𑁆𑀘𑀸𑀤𑀬𑁄 𑀏𑀓𑀲𑁆𑀲𑀭𑀸 𑀑𑀓𑀸𑀭𑀦𑁆𑀢𑀸.

𑀓𑀭 𑀧𑀘 𑀲𑀗𑁆𑀕𑀸𑀫 𑀇𑀘𑁆𑀘𑀸𑀤𑀬𑁄 𑀅𑀦𑁂𑀓𑀲𑁆𑀲𑀭𑀸 𑀅𑀓𑀸𑀭𑀦𑁆𑀢𑀸, 𑀑𑀫𑀸𑀇𑀘𑁆𑀘𑀸𑀤𑀬𑁄 𑀅𑀦𑁂𑀓𑀲𑁆𑀲𑀭𑀸 𑀆𑀓𑀸𑀭𑀦𑁆𑀢𑀸, 𑀲𑀓𑀺 𑀇𑀘𑁆𑀘𑀸𑀤𑀬𑁄 𑀅𑀦𑁂𑀓𑀲𑁆𑀲𑀭𑀸 𑀇𑀓𑀸𑀭𑀦𑁆𑀢𑀸. 𑀘𑀓𑁆𑀔𑀻 𑀇𑀘𑁆𑀘𑀸𑀤𑀬𑁄 𑀅𑀦𑁂𑀓𑀲𑁆𑀲𑀭𑀸 𑀈𑀓𑀸𑀭𑀦𑁆𑀢𑀸. 𑀅𑀦𑁆𑀥𑀼𑀇𑀘𑁆𑀘𑀸𑀤𑀬𑁄 𑀅𑀦𑁂𑀓𑀲𑁆𑀲𑀭𑀸 𑀉𑀓𑀸𑀭𑀦𑁆𑀢𑀸. 𑀓𑀓𑁆𑀔𑀽 𑀇𑀘𑁆𑀘𑀸𑀤𑀬𑁄 𑀅𑀦𑁂𑀓𑀲𑁆𑀲𑀭𑀸 𑀊𑀓𑀸𑀭𑀦𑁆𑀢𑀸. 𑀕𑀺𑀮𑁂 𑀫𑀺𑀮𑁂 𑀇𑀘𑁆𑀘𑀸𑀤𑀬𑁄 𑀅𑀦𑁂𑀓𑀲𑁆𑀲𑀭𑀸 𑀏𑀓𑀸𑀭𑀦𑁆𑀢𑀸𑀢𑀺 𑀏𑀯𑀁 𑀧𑀦𑁆𑀦𑀭𑀲𑀯𑀺𑀥𑁂𑀦 𑀥𑀸𑀢𑀼𑀲𑀗𑁆𑀕𑀳𑁄.

𑀅𑀣 𑀢𑁂𑀢𑁆𑀢𑀺𑀁𑀲𑀯𑀺𑀥𑁂𑀦𑀧𑀺 𑀥𑀸𑀢𑀼𑀲𑀗𑁆𑀕𑀳𑁄 𑀪𑀯𑀢𑀺. 𑀓𑀣𑀁?

𑀥𑀸𑀢𑀽 𑀲𑀼𑀤𑁆𑀥𑀲𑁆𑀲𑀭𑀸 𑀘𑁂𑀯, 𑀧𑀼𑀦 𑀘𑁂𑀓𑀲𑁆𑀲𑀭𑀸𑀧𑀺 𑀘;

𑀓𑀓𑀸𑀭𑀦𑁆𑀢𑀸 𑀔𑀓𑀸𑀭𑀦𑁆𑀢𑀸, 𑀕𑀦𑁆𑀢𑀸 𑀖𑀦𑁆𑀢𑀸 𑀘 𑀥𑀸𑀢𑀯𑁄.

𑀘𑀓𑀸𑀭𑀦𑁆𑀢𑀸 𑀙𑀓𑀸𑀭𑀦𑁆𑀢𑀸, 𑀚𑀦𑁆𑀢𑀸 𑀛𑀦𑁆𑀢𑀸 𑀘 𑀜𑀦𑁆𑀢𑀓𑀸;

𑀝𑀓𑀸𑀭𑀦𑁆𑀢𑀸 𑀞𑀓𑀸𑀭𑀦𑁆𑀢𑀸, 𑀟𑀦𑁆𑀢𑀸 𑀠𑀦𑁆𑀢𑀸 𑀘 𑀡𑀦𑁆𑀢𑀓𑀸.

𑀢𑀦𑁆𑀢𑀸 𑀘𑁂𑀯 𑀢𑀣𑀸 𑀣𑀦𑁆𑀢𑀸, 𑀤𑀦𑁆𑀢𑀸 𑀥𑀦𑁆𑀢𑀸 𑀘 𑀦𑀦𑁆𑀢𑀓𑀸;

𑀧𑀦𑁆𑀢𑀸 𑀨𑀦𑁆𑀢𑀸 𑀩𑀓𑀸𑀭𑀦𑁆𑀢𑀸, 𑀪𑀦𑁆𑀢𑀸 𑀫𑀦𑁆𑀢𑀸 𑀘 𑀬𑀦𑁆𑀢𑀓𑀸.

𑀭𑀦𑁆𑀢𑀸 ¶ 𑀮𑀦𑁆𑀢𑀸 𑀯𑀓𑀸𑀭𑀦𑁆𑀢𑀸, 𑀲𑀦𑁆𑀢𑀸 𑀳𑀦𑁆𑀢𑀸 𑀘 𑀴𑀦𑁆𑀢𑀓𑀸;

𑀇𑀢𑀺 𑀢𑁂𑀢𑁆𑀢𑀺𑀁𑀲𑀥𑀸 𑀜𑁂𑀬𑁆𑀬𑁄, 𑀥𑀸𑀢𑀽𑀦𑀫𑀺𑀥 𑀲𑀗𑁆𑀕𑀳𑁄.

𑀫𑀢𑁂 𑀲𑀢𑁆𑀣𑀼𑀲𑁆𑀲 𑀠𑀡𑀴𑀸, 𑀧𑀤𑀸𑀤𑀺𑀫𑁆𑀳𑀺 𑀦 𑀤𑀺𑀲𑁆𑀲𑀭𑁂;

𑀢𑁂𑀦𑁂𑀓𑀲𑁆𑀲𑀭𑀥𑀸𑀢𑀽𑀲𑀼, 𑀠𑀡𑀴𑀸 𑀦 𑀓𑀣𑀻𑀬𑀭𑁂.

𑀇𑀓𑀸𑀭𑀦𑁆𑀢𑀢𑀺𑀓𑀸𑀭𑀦𑁆𑀢-𑀯𑀲𑁂𑀦 𑀢𑀼 𑀬𑀣𑀸𑀭𑀳𑀁;

𑀦𑀸𑀫𑀁 𑀲𑀫𑁆𑀪𑁄𑀢𑀺 𑀥𑀸𑀢𑀽𑀦𑀁, 𑀇𑀢𑀺𑀧𑁆𑀧𑀘𑁆𑀘𑀬𑀬𑁄𑀕𑀢𑁄.

𑀧𑀘𑀺𑀪𑀺𑀓𑁆𑀔𑀺𑀙𑀺𑀤𑀺𑀔𑀸𑀤𑀺, 𑀓𑀭𑁄𑀢𑀺 𑀪𑀯𑀢𑀺 𑀕𑀫𑀺;

𑀕𑀢𑀺𑀕𑀘𑁆𑀙𑀢𑀺𑀳𑁄𑀢𑀻𑀢𑀺, 𑀆𑀤𑀺𑀯𑁄𑀳𑀸𑀭𑀫𑀼𑀤𑁆𑀥𑀭𑁂.

𑀏𑀯𑀁 𑀢𑁂𑀢𑁆𑀢𑀺𑀁𑀲𑀪𑁂𑀤𑁂𑀳𑀺 𑀕𑀳𑀺𑀢𑁂𑀲𑀼 𑀦𑀺𑀔𑀺𑀮𑁂𑀲𑀼 𑀥𑀸𑀢𑀽𑀲𑀼 𑁋

𑀲𑀳𑀳𑀺𑀁𑀲𑀈𑀳𑀯𑀲𑀸, 𑀲𑀻𑀳𑀲𑀤𑁆𑀤𑀕𑀢𑀺𑀁 𑀯𑀤𑁂;

𑀲𑀳𑀦𑀢𑁄 𑀳𑀦𑀦𑀢𑁄, 𑀲𑀻𑀳𑁄𑀢𑀺 𑀳𑀺 𑀕𑀭𑀽 𑀯𑀤𑀼𑀁.

𑀢𑀣𑀸 𑀳𑀺 𑀲𑀻𑀳𑁄 𑀯𑀸𑀢𑀸𑀢𑀧𑀸𑀤𑀺𑀧𑀭𑀺𑀲𑁆𑀲𑀬𑀫𑁆𑀧𑀺 𑀲𑀳𑀢𑀺, ‘‘𑀓𑀺𑀁 𑀫𑁂 𑀩𑀳𑀽𑀳𑀺 𑀖𑀸𑀝𑀺𑀢𑁂𑀳𑀻’’𑀢𑀺 𑀅𑀢𑁆𑀢𑀦𑁄 𑀕𑁄𑀘𑀭𑀢𑁆𑀣𑀸𑀬 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀅𑀕𑀡𑁆𑀳𑀦𑁆𑀢𑁄, ‘‘𑀫𑀸𑀳𑀁 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀯𑀺𑀲𑀫𑀕𑀢𑁂 𑀲𑀗𑁆𑀖𑀸𑀢𑀁 𑀆𑀧𑀸𑀤𑁂𑀲𑀻’’𑀢𑀺 𑀅𑀦𑀼𑀤𑁆𑀤𑀬𑀯𑀲𑁂𑀦 𑀲𑀳𑀺𑀢𑀩𑁆𑀩𑁂 𑀔𑀼𑀤𑁆𑀤𑀓𑀲𑀢𑁆𑀢𑁂𑀧𑀺 𑀲𑀳𑀢𑀺. 𑀳𑀺𑀁𑀲𑀺𑀢𑀩𑁆𑀩𑁂 𑀧𑀦 𑀓𑀸𑀬𑀽𑀧𑀧𑀦𑁆𑀦𑁂 𑀲𑀽𑀓𑀭𑀫𑀳𑀺𑀁𑀲𑀸𑀤𑀬𑁄 𑀲𑀢𑁆𑀢𑁂 𑀳𑀺𑀁𑀲𑀢𑀺, 𑀢𑀲𑁆𑀫𑀸𑀧𑀺 ‘‘𑀲𑀻𑀳𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀧𑀦 𑀓𑀦𑁆𑀢𑀦𑀝𑁆𑀞𑁂𑀦 𑀆𑀤𑀺𑀅𑀦𑁆𑀢𑀯𑀺𑀧𑀮𑁆𑀮𑀸𑀲𑀢𑁄 𑀢𑀓𑁆𑀓𑀁 𑀯𑀼𑀘𑁆𑀘𑀢𑀺, 𑀏𑀯𑀁 𑀳𑀺𑀁𑀲𑀦𑀝𑁆𑀞𑁂𑀦𑀧𑀺 𑀲𑀻𑀳𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀤𑀴𑁆𑀳𑀯𑀻𑀭𑀺𑀬𑀢𑁆𑀢𑀸 𑀲𑀼𑀝𑁆𑀞𑀼 𑀈𑀳𑀢𑀻𑀢𑀺 𑀲𑀻𑀳𑁄. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀬𑀣𑀸 𑀲𑀻𑀳𑁄 𑀫𑀺𑀕𑀭𑀸𑀚𑀸, 𑀦𑀺𑀲𑀚𑁆𑀚𑀝𑁆𑀞𑀸𑀦𑀘𑀗𑁆𑀓𑀫𑁂;

𑀅𑀮𑀻𑀦𑀯𑀻𑀭𑀺𑀬𑁄 𑀳𑁄𑀢𑀺, 𑀧𑀕𑁆𑀕𑀳𑀺𑀢𑀫𑀦𑁄 𑀲𑀤𑀸’’𑀢𑀺.

𑀅𑀧𑀭𑁄 𑀦𑀬𑁄 𑁋