📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀧𑀤𑀭𑀽𑀧𑀲𑀺𑀤𑁆𑀥𑀺

𑀕𑀦𑁆𑀣𑀸𑀭𑀫𑁆𑀪

[𑀓]

𑀯𑀺𑀲𑀼𑀤𑁆𑀥𑀲𑀤𑁆𑀥𑀫𑁆𑀫𑀲𑀳𑀲𑁆𑀲𑀤𑀻𑀥𑀺𑀢𑀺𑀁 ¶ ,

𑀲𑀼𑀩𑀼𑀤𑁆𑀥𑀲𑀫𑁆𑀩𑁄𑀥𑀺𑀬𑀼𑀕𑀦𑁆𑀥𑀭𑁄𑀤𑀺𑀢𑀁;

𑀢𑀺𑀩𑀼𑀤𑁆𑀥𑀔𑁂𑀢𑁆𑀢𑁂𑀓𑀤𑀺𑀯𑀸𑀓𑀭𑀁 𑀚𑀺𑀦𑀁,

𑀲𑀥𑀫𑁆𑀫𑀲𑀗𑁆𑀖𑀁 𑀲𑀺𑀭𑀲𑀸’𑀪𑀺𑀯𑀦𑁆𑀤𑀺𑀬.

[𑀔]

𑀓𑀘𑁆𑀘𑀸𑀬𑀦𑀜𑁆𑀘𑀸𑀘𑀭𑀺𑀬𑀁 𑀦𑀫𑀺𑀢𑁆𑀯𑀸,

𑀦𑀺𑀲𑁆𑀲𑀸𑀬 𑀓𑀘𑁆𑀘𑀸𑀬𑀦𑀯𑀡𑁆𑀡𑀦𑀸𑀤𑀺𑀁;

𑀩𑀸𑀮𑀧𑁆𑀧𑀩𑁄𑀥𑀢𑁆𑀣𑀫𑀼𑀚𑀼𑀁 𑀓𑀭𑀺𑀲𑁆𑀲𑀁,

𑀩𑁆𑀬𑀢𑁆𑀢𑀁 𑀲𑀼𑀓𑀡𑁆𑀟𑀁 𑀧𑀤𑀭𑀽𑀧𑀲𑀺𑀤𑁆𑀥𑀺𑀁.

𑁧. 𑀲𑀦𑁆𑀥𑀺𑀓𑀡𑁆𑀟

𑀢𑀢𑁆𑀣 𑀚𑀺𑀦𑀲𑀸𑀲𑀦𑀸𑀥𑀺𑀕𑀫𑀲𑁆𑀲 𑀅𑀓𑁆𑀔𑀭𑀓𑁄𑀲𑀮𑁆𑀮𑀫𑀽𑀮𑀓𑀢𑁆𑀢𑀸 𑀢𑀁 𑀲𑀫𑁆𑀧𑀸𑀤𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀅𑀪𑀺𑀥𑁂𑀬𑁆𑀬𑀧𑁆𑀧𑀬𑁄𑀚𑀦𑀯𑀸𑀓𑁆𑀬𑀫𑀺𑀤𑀫𑀼𑀘𑁆𑀘𑀢𑁂.

𑁧. 𑀅𑀢𑁆𑀣𑁄 𑀅𑀓𑁆𑀔𑀭𑀲𑀜𑁆𑀜𑀸𑀢𑁄.

𑀬𑁄 𑀓𑁄𑀘𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀤𑀺𑀪𑁂𑀤𑁄 𑀯𑀘𑀦𑀢𑁆𑀣𑁄, 𑀲𑁄 𑀲𑀩𑁆𑀩𑁄 𑀅𑀓𑁆𑀔𑀭𑁂𑀳𑁂𑀯 𑀲𑀜𑁆𑀜𑀸𑀬𑀢𑁂. 𑀲𑀺𑀣𑀺𑀮𑀥𑀦𑀺𑀢𑀸𑀤𑀺𑀅𑀓𑁆𑀔𑀭𑀯𑀺𑀧𑀢𑁆𑀢𑀺𑀬𑀜𑁆𑀳𑀺 𑀅𑀢𑁆𑀣𑀲𑁆𑀲 𑀤𑀼𑀦𑁆𑀦𑀬𑀢𑀸 𑀳𑁄𑀢𑀺, 𑀢𑀲𑁆𑀫𑀸 ¶ 𑀅𑀓𑁆𑀔𑀭𑀓𑁄𑀲𑀮𑁆𑀮𑀁 𑀩𑀳𑀽𑀧𑀓𑀸𑀭𑀁 𑀩𑀼𑀤𑁆𑀥𑀯𑀘𑀦𑁂𑀲𑀼, 𑀏𑀢𑁆𑀣 𑀧𑀤𑀸𑀦𑀺𑀧𑀺 𑀅𑀓𑁆𑀔𑀭𑀲𑀦𑁆𑀦𑀺𑀧𑀸𑀢𑀭𑀽𑀧𑀢𑁆𑀢𑀸 𑀅𑀓𑁆𑀔𑀭𑁂𑀲𑁆𑀯𑁂𑀯 𑀲𑀗𑁆𑀕𑀬𑁆𑀳𑀦𑁆𑀢𑀺.

𑀢𑀲𑁆𑀫𑀸 𑀅𑀓𑁆𑀔𑀭𑀓𑁄𑀲𑀮𑁆𑀮𑀁, 𑀲𑀫𑁆𑀧𑀸𑀤𑁂𑀬𑁆𑀬 𑀳𑀺𑀢𑀢𑁆𑀣𑀺𑀓𑁄;

𑀉𑀧𑀝𑁆𑀞𑀳𑀁 𑀕𑀭𑀼𑀁 𑀲𑀫𑁆𑀫𑀸, 𑀉𑀝𑁆𑀞𑀸𑀦𑀸𑀤𑀻𑀳𑀺 𑀧𑀜𑁆𑀘𑀳𑀺.

𑀲𑀜𑁆𑀜𑀸𑀯𑀺𑀥𑀸𑀦

𑀢𑀢𑁆𑀣𑀸𑀤𑁄 𑀢𑀸𑀯 𑀲𑀤𑁆𑀤𑀮𑀓𑁆𑀔𑀡𑁂 𑀯𑁄𑀳𑀸𑀭𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀲𑀜𑁆𑀜𑀸𑀯𑀺𑀥𑀸𑀦𑀫𑀸𑀭𑀪𑀻𑀬𑀢𑁂.

𑁨. 𑀅𑀓𑁆𑀔𑀭𑀸𑀧𑀸𑀤𑀬𑁄 𑀏𑀓𑀘𑀢𑁆𑀢𑀸𑀮𑀻𑀲𑀁.

𑀅𑀓𑁆𑀔𑀭𑀸 𑀅𑀧𑀺 𑀆𑀤𑀬𑁄 𑀏𑀓𑀘𑀢𑁆𑀢𑀸𑀮𑀻𑀲𑀁, 𑀢𑁂 𑀘 𑀔𑁄 𑀚𑀺𑀦𑀯𑀘𑀦𑀸𑀦𑀼𑀭𑀽𑀧𑀸 𑀅𑀓𑀸𑀭𑀸𑀤𑀬𑁄 𑀦𑀺𑀕𑁆𑀕𑀳𑀻𑀢𑀦𑁆𑀢𑀸 𑀏𑀓𑀘𑀢𑁆𑀢𑀸𑀮𑀻𑀲𑀫𑀢𑁆𑀢𑀸 𑀯𑀡𑁆𑀡𑀸 𑀧𑀘𑁆𑀘𑁂𑀓𑀁 𑀅𑀓𑁆𑀔𑀭𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑀁 𑀬𑀣𑀸 𑁋 𑀆 𑀇 𑀈 𑀉 𑀊 𑀏 𑀑, 𑀓 𑀔 𑀕 𑀖 𑀗, 𑀘 𑀙 𑀚 𑀛 𑀜, 𑀝 𑀞 𑀟 𑀠 𑀡, 𑀢 𑀣 𑀤 𑀥 𑀦, 𑀧 𑀨 𑀩 𑀪 𑀫, 𑀬 𑀭 𑀮𑀯 𑀲 𑀳 𑀴 𑀅𑀁-𑀇𑀢𑀺 𑀅𑀓𑁆𑀔𑀭𑀸.

𑀦𑀓𑁆𑀔𑀭𑀦𑁆𑀢𑀻𑀢𑀺 𑀅𑀓𑁆𑀔𑀭𑀸, 𑀅 𑀆𑀤𑀺 𑀬𑁂𑀲𑀁 𑀢𑁂 𑀆𑀤𑀬𑁄. 𑀅𑀓𑀸𑀭𑀸𑀤𑀻𑀦𑀫𑀦𑀼𑀓𑁆𑀓𑀫𑁄 𑀧𑀦𑁂𑀲 𑀞𑀸𑀦𑀸𑀤𑀺𑀓𑁆𑀓𑀫𑀲𑀦𑁆𑀦𑀺𑀲𑁆𑀲𑀺𑀢𑁄, 𑀢𑀣𑀸 𑀳𑀺 𑀞𑀸𑀦𑀓𑀭𑀡𑀧𑁆𑀧𑀬𑀢𑀦𑁂𑀳𑀺 𑀯𑀡𑁆𑀡𑀸 𑀚𑀸𑀬𑀦𑁆𑀢𑁂, 𑀢𑀢𑁆𑀣 𑀙 𑀞𑀸𑀦𑀸𑀦𑀺 𑀓𑀡𑁆𑀞𑀢𑀸𑀮𑀼𑀫𑀼𑀤𑁆𑀥𑀤𑀦𑁆𑀢𑀑𑀝𑁆𑀞𑀦𑀸𑀲𑀺𑀓𑀸𑀯𑀲𑁂𑀦.

𑀢𑀢𑁆𑀣 𑁋 𑀅𑀯𑀡𑁆𑀡 𑀓𑀯𑀕𑁆𑀕 𑀳𑀓𑀸𑀭𑀸 𑀓𑀡𑁆𑀞𑀚𑀸.

𑀇𑀯𑀡𑁆𑀡 𑀘𑀯𑀕𑁆𑀕 𑀬𑀓𑀸𑀭𑀸 𑀢𑀸𑀮𑀼𑀚𑀸. 𑀝𑀯𑀕𑁆𑀕 𑀭𑀓𑀸𑀭 𑀴𑀓𑀸𑀭𑀸 𑀫𑀼𑀤𑁆𑀥𑀚𑀸. 𑀢𑀯𑀕𑁆𑀕 𑀮𑀓𑀸𑀭 𑀲𑀓𑀸𑀭𑀸 𑀤𑀦𑁆𑀢𑀚𑀸. 𑀉𑀯𑀡𑁆𑀡 𑀧𑀯𑀕𑁆𑀕𑀸 𑀑𑀝𑁆𑀞𑀚𑀸. 𑀏𑀓𑀸𑀭𑁄 𑀓𑀡𑁆𑀞𑀢𑀸𑀮𑀼𑀚𑁄. 𑀑𑀓𑀸𑀭𑁄 𑀓𑀡𑁆𑀞𑁄𑀝𑁆𑀞𑀚𑁄.

𑀯𑀓𑀸𑀭𑁄 ¶ 𑀤𑀦𑁆𑀢𑁄𑀝𑁆𑀞𑀚𑁄.

𑀦𑀺𑀕𑁆𑀕𑀳𑀻𑀢𑀁 𑀦𑀸𑀲𑀺𑀓𑀝𑁆𑀞𑀸𑀦𑀚𑀁.

𑀗 𑀜 𑀡 𑀦 𑀫𑀸 𑀲𑀓𑀝𑁆𑀞𑀸𑀦𑀚𑀸, 𑀦𑀸𑀲𑀺𑀓𑀝𑁆𑀞𑀸𑀦𑀚𑀸 𑀘𑀸𑀢𑀺.

𑀳𑀓𑀸𑀭𑀁 𑀧𑀜𑁆𑀘𑀫𑁂𑀳𑁂𑀯, 𑀅𑀦𑁆𑀢𑀝𑁆𑀞𑀸𑀳𑀺 𑀘 𑀲𑀁𑀬𑀼𑀢𑀁;

𑀑𑀭𑀲𑀦𑁆𑀢𑀺 𑀯𑀤𑀦𑁆𑀢𑁂𑀢𑁆𑀣, 𑀓𑀡𑁆𑀞𑀚𑀁 𑀢𑀤𑀲𑀁𑀬𑀼𑀢𑀁.

𑀓𑀭𑀡𑀁 𑀚𑀺𑀯𑁆𑀳𑀸𑀫𑀚𑁆𑀛𑀁 𑀢𑀸𑀮𑀼𑀚𑀸𑀦𑀁, 𑀚𑀺𑀯𑁆𑀳𑁄𑀧𑀕𑁆𑀕𑀁 𑀫𑀼𑀤𑁆𑀥𑀚𑀸𑀦𑀁, 𑀚𑀺𑀯𑁆𑀳𑀸𑀕𑁆𑀕𑀁 𑀤𑀦𑁆𑀢𑀚𑀸𑀦𑀁, 𑀲𑁂𑀲𑀸 𑀲𑀓𑀝𑁆𑀞𑀸𑀦𑀓𑀭𑀡𑀸.

𑀧𑀬𑀢𑀦𑀁 𑀲𑀁𑀯𑀼𑀢𑀸𑀤𑀺𑀓𑀭𑀡𑀯𑀺𑀲𑁂𑀲𑁄. 𑀲𑀁𑀯𑀼𑀢𑀢𑁆𑀢𑀫𑀓𑀸𑀭𑀲𑁆𑀲, 𑀯𑀺𑀯𑀝𑀢𑁆𑀢𑀁 𑀲𑁂𑀲𑀲𑀭𑀸𑀦𑀁 𑀲𑀓𑀸𑀭𑀳𑀓𑀸𑀭𑀸𑀦𑀜𑁆𑀘, 𑀨𑀼𑀝𑁆𑀞𑀁 𑀯𑀕𑁆𑀕𑀸𑀦𑀁, 𑀈𑀲𑀁𑀨𑀼𑀝𑁆𑀞𑀁 𑀬𑀭𑀮𑀯𑀸𑀦𑀦𑁆𑀢𑀺.

𑀏𑀯𑀁 𑀞𑀸𑀦𑀓𑀭𑀡𑀧𑁆𑀧𑀬𑀢𑀦𑀲𑀼𑀢𑀺𑀓𑀸𑀮𑀪𑀺𑀦𑁆𑀦𑁂𑀲𑀼 𑀅𑀓𑁆𑀔𑀭𑁂𑀲𑀼 𑀲𑀭𑀸 𑀦𑀺𑀲𑁆𑀲𑀬𑀸, 𑀇𑀢𑀭𑁂 𑀦𑀺𑀲𑁆𑀲𑀺𑀢𑀸. 𑀢𑀢𑁆𑀣 𑁋

𑀦𑀺𑀲𑁆𑀲𑀬𑀸𑀤𑁄 𑀲𑀭𑀸 𑀯𑀼𑀢𑁆𑀢𑀸, 𑀩𑁆𑀬𑀜𑁆𑀚𑀦𑀸 𑀦𑀺𑀲𑁆𑀲𑀺𑀢𑀸 𑀢𑀢𑁄;

𑀯𑀕𑁆𑀕𑁂𑀓𑀚𑀸 𑀩𑀳𑀼𑀢𑁆𑀢𑀸𑀤𑁄, 𑀢𑀢𑁄 𑀞𑀸𑀦𑀮𑀳𑀼𑀓𑁆𑀓𑀫𑀸.

𑀯𑀼𑀢𑁆𑀢𑀜𑁆𑀘 𑁋

‘‘𑀧𑀜𑁆𑀘𑀦𑁆𑀦𑀁 𑀧𑀦 𑀞𑀸𑀦𑀸𑀦𑀁, 𑀧𑀝𑀺𑀧𑀸𑀝𑀺𑀯𑀲𑀸𑀧𑀺 𑀘;

𑀦𑀺𑀲𑁆𑀲𑀬𑀸𑀤𑀺𑀧𑁆𑀧𑀪𑁂𑀤𑁂𑀳𑀺, 𑀯𑀼𑀢𑁆𑀢𑁄 𑀢𑁂𑀲𑀫𑀦𑀼𑀓𑁆𑀓𑀫𑁄’’𑀢𑀺.

𑀏𑀓𑁂𑀦𑀸𑀥𑀺𑀓𑀸 𑀘𑀢𑁆𑀢𑀸𑀮𑀻𑀲𑀁 𑀏𑀓𑀘𑀢𑁆𑀢𑀸𑀮𑀻𑀲𑀁, 𑀏𑀢𑁂𑀦 𑀕𑀡𑀦𑀧𑀭𑀺𑀘𑁆𑀙𑁂𑀤𑁂𑀦 𑁋

𑀅𑀥𑀺𑀓𑀓𑁆𑀔𑀭𑀯𑀦𑁆𑀢𑀸𑀦𑀺, 𑀏𑀓𑀢𑀸𑀮𑀻𑀲𑀢𑁄 𑀇𑀢𑁄;

𑀦 𑀩𑀼𑀤𑁆𑀥𑀯𑀘𑀦𑀸𑀦𑀻𑀢𑀺, 𑀤𑀻𑀧𑁂𑀢𑀸𑀘𑀭𑀺𑀬𑀸𑀲𑀪𑁄.

𑀅𑀧𑀺𑀕𑁆𑀕𑀳𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀁 𑀅𑀧𑁂𑀓𑁆𑀔𑀸𑀓𑀭𑀡𑀢𑁆𑀣𑀁.

𑁩. 𑀢𑀢𑁆𑀣𑁄𑀤𑀦𑁆𑀢𑀸 ¶ 𑀲𑀭𑀸 𑀅𑀝𑁆𑀞.

𑀢𑀢𑁆𑀣 𑀢𑁂𑀲𑀼 𑀅𑀓𑁆𑀔𑀭𑁂𑀲𑀼 𑀅𑀓𑀸𑀭𑀸𑀤𑀻𑀲𑀼 𑀑𑀓𑀸𑀭𑀦𑁆𑀢𑀸 𑀅𑀝𑁆𑀞 𑀅𑀓𑁆𑀔𑀭𑀸 𑀲𑀭𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑀁 𑀬𑀣𑀸 𑁋 𑀅 𑀆 𑀇 𑀈 𑀉 𑀊 𑀏 𑀑-𑀇𑀢𑀺 𑀲𑀭𑀸.

𑀑 𑀅𑀦𑁆𑀢𑁄 𑀬𑁂𑀲𑀁 𑀢𑁂 𑀑𑀤𑀦𑁆𑀢𑀸, 𑀤𑀓𑀸𑀭𑁄 𑀲𑀦𑁆𑀥𑀺𑀚𑁄, 𑀲𑀭𑀦𑁆𑀢𑀺 𑀕𑀘𑁆𑀙𑀦𑁆𑀢𑀻𑀢𑀺 𑀲𑀭𑀸, 𑀩𑁆𑀬𑀜𑁆𑀚𑀦𑁂 𑀲𑀸𑀭𑁂𑀦𑁆𑀢𑀻𑀢𑀺𑀧𑀺 𑀲𑀭𑀸.

‘‘𑀢𑀢𑁆𑀣𑀸’’𑀢𑀺 𑀯𑀢𑁆𑀢𑀢𑁂.

𑁪. 𑀮𑀳𑀼𑀫𑀢𑁆𑀢𑀸 𑀢𑀬𑁄 𑀭𑀲𑁆𑀲𑀸.

𑀢𑀢𑁆𑀣 𑀅𑀝𑁆𑀞𑀲𑀼 𑀲𑀭𑁂𑀲𑀼 𑀮𑀳𑀼𑀫𑀢𑁆𑀢𑀸 𑀢𑀬𑁄 𑀲𑀭𑀸 𑀭𑀲𑁆𑀲𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑀁 𑀬𑀣𑀸 𑁋 𑀅 𑀇 𑀉-𑀇𑀢𑀺 𑀭𑀲𑁆𑀲𑀸.

𑀮𑀳𑀼𑀓𑀸 𑀫𑀢𑁆𑀢𑀸 𑀧𑀫𑀸𑀡𑀁 𑀬𑁂𑀲𑀁 𑀢𑁂 𑀮𑀳𑀼𑀫𑀢𑁆𑀢𑀸, 𑀫𑀢𑁆𑀢𑀸𑀲𑀤𑁆𑀤𑁄 𑀘𑁂𑀢𑁆𑀣 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀅𑀓𑁆𑀔𑀺𑀦𑀺𑀫𑀻𑀮𑀦𑀲𑀗𑁆𑀔𑀸𑀢𑀁 𑀓𑀸𑀮𑀁 𑀯𑀤𑀢𑀺, 𑀢𑀸𑀬 𑀫𑀢𑁆𑀢𑀸𑀬 𑀏𑀓𑀫𑀢𑁆𑀢𑀸 𑀭𑀲𑁆𑀲𑀸, 𑀤𑁆𑀯𑀺𑀫𑀢𑁆𑀢𑀸 𑀤𑀻𑀖𑀸, 𑀅𑀟𑁆𑀠𑀫𑀢𑁆𑀢𑀸 𑀩𑁆𑀬𑀜𑁆𑀚𑀦𑀸. 𑀮𑀳𑀼𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀙𑀦𑁆𑀤𑀲𑀺 𑀤𑀺𑀬𑀟𑁆𑀠𑀫𑀢𑁆𑀢𑀲𑁆𑀲𑀸𑀧𑀺 𑀕𑀳𑀡𑀢𑁆𑀣𑀁. 𑀭𑀲𑁆𑀲𑀓𑀸𑀮𑀬𑁄𑀕𑀢𑁄 𑀭𑀲𑁆𑀲𑀸, 𑀭𑀲𑁆𑀲𑀓𑀸𑀮𑀯𑀦𑁆𑀢𑁄 𑀯𑀸 𑀭𑀲𑁆𑀲𑀸.

𑀲𑀭𑀭𑀲𑁆𑀲𑀕𑁆𑀕𑀳𑀡𑀸𑀦𑀺 𑀘 𑀯𑀢𑁆𑀢𑀦𑁆𑀢𑁂.

𑁫. 𑀅𑀜𑁆𑀜𑁂 𑀤𑀻𑀖𑀸.

𑀢𑀢𑁆𑀣 𑀅𑀝𑁆𑀞𑀲𑀼 𑀲𑀭𑁂𑀲𑀼 𑀭𑀲𑁆𑀲𑁂𑀳𑀺 𑀅𑀜𑁆𑀜𑁂 𑀤𑁆𑀯𑀺𑀫𑀢𑁆𑀢𑀸 𑀧𑀜𑁆𑀘 𑀲𑀭𑀸 𑀤𑀻𑀖𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑀁 𑀬𑀣𑀸 𑁋 𑀆 𑀈 𑀊 𑀏 𑀑-𑀇𑀢𑀺 𑀤𑀻𑀖𑀸.

𑀅𑀜𑁆𑀜𑀕𑁆𑀕𑀳𑀡𑀁 𑀤𑀺𑀬𑀟𑁆𑀠𑀫𑀢𑁆𑀢𑀺𑀓𑀸𑀦𑀫𑁆𑀧𑀺 𑀲𑀗𑁆𑀕𑀳𑀡𑀢𑁆𑀣𑀁. 𑀤𑀻𑀖𑀓𑀸𑀮𑁂 𑀦𑀺𑀬𑀼𑀢𑁆𑀢𑀸, 𑀢𑀩𑁆𑀩𑀦𑁆𑀢𑁄 𑀯𑀸 𑀤𑀻𑀖𑀸. 𑀓𑁆𑀯𑀘𑀺 𑀲𑀁𑀬𑁄𑀕𑀧𑀼𑀩𑁆𑀩𑀸 𑀏𑀓𑀸𑀭𑁄𑀓𑀸𑀭𑀸 𑀭𑀲𑁆𑀲𑀸 𑀇𑀯 𑀯𑀼𑀘𑁆𑀘𑀦𑁆𑀢𑁂. 𑀬𑀣𑀸 𑁋 𑀏𑀢𑁆𑀣, 𑀲𑁂𑀬𑁆𑀬𑁄, 𑀑𑀝𑁆𑀞𑁄, 𑀲𑁄𑀢𑁆𑀣𑀺. 𑀓𑁆𑀯𑀘𑀻𑀢𑀺 𑀓𑀺𑀁? 𑀫𑀁 𑀘𑁂 𑀢𑁆𑀯𑀁 𑀦𑀺𑀔𑀡𑀁 𑀯𑀦𑁂. 𑀧𑀼𑀢𑁆𑀢𑁄 𑀢𑁆𑀬𑀸𑀳𑀁 𑀫𑀳𑀸𑀭𑀸𑀚.

𑁬. 𑀤𑀼𑀫𑁆𑀳𑀺 ¶ 𑀕𑀭𑀼.

𑀤𑁆𑀯𑀺𑀦𑁆𑀦𑀁 𑀲𑀫𑀽𑀳𑁄 𑀤𑀼, 𑀢𑀲𑁆𑀫𑀺𑀁 𑀤𑀼𑀫𑁆𑀳𑀺. 𑀲𑀁𑀬𑁄𑀕𑀪𑀽𑀢𑁂 𑀅𑀓𑁆𑀔𑀭𑁂 𑀧𑀭𑁂 𑀬𑁄 𑀧𑀼𑀩𑁆𑀩𑁄 𑀭𑀲𑁆𑀲𑀓𑁆𑀔𑀭𑁄, 𑀲𑁄 𑀕𑀭𑀼𑀲𑀜𑁆𑀜𑁄 𑀳𑁄𑀢𑀺. 𑀬𑀣𑀸 𑁋 𑀤𑀢𑁆𑀯𑀸, 𑀳𑀺𑀢𑁆𑀯𑀸, 𑀪𑀼𑀢𑁆𑀯𑀸.

‘‘𑀕𑀭𑀽’’𑀢𑀺 𑀯𑀢𑁆𑀢𑀢𑁂.

𑁭. 𑀤𑀻𑀖𑁄 𑀘.

𑀤𑀻𑀖𑁄 𑀘 𑀲𑀭𑁄 𑀕𑀭𑀼𑀲𑀜𑁆𑀜𑁄 𑀳𑁄𑀢𑀺. 𑀬𑀣𑀸 𑁋 𑀦𑀸𑀯𑀸, 𑀦𑀤𑀻, 𑀯𑀥𑀽, 𑀤𑁆𑀯𑁂, 𑀢𑀬𑁄. 𑀕𑀭𑀼𑀓𑀢𑁄 𑀅𑀜𑁆𑀜𑁄 ‘‘𑀮𑀳𑀼𑀓𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁮. 𑀲𑁂𑀲𑀸 𑀩𑁆𑀬𑀜𑁆𑀚𑀦𑀸.

𑀞𑀧𑁂𑀢𑁆𑀯𑀸 𑀅𑀝𑁆𑀞 𑀲𑀭𑁂 𑀲𑁂𑀲𑀸 𑀅𑀟𑁆𑀠𑀫𑀢𑁆𑀢𑀸 𑀅𑀓𑁆𑀔𑀭𑀸 𑀓𑀓𑀸𑀭𑀸𑀤𑀬𑁄 𑀦𑀺𑀕𑁆𑀕𑀳𑀻𑀢𑀦𑁆𑀢𑀸 𑀢𑁂𑀢𑁆𑀢𑀺𑀁𑀲 𑀩𑁆𑀬𑀜𑁆𑀚𑀦𑀸 𑀦𑀸𑀫 𑀳𑁄𑀦𑁆𑀢𑀺. 𑀯𑀼𑀢𑁆𑀢𑁂𑀳𑀺 𑀅𑀜𑁆𑀜𑁂 𑀲𑁂𑀲𑀸. 𑀩𑁆𑀬𑀜𑁆𑀚𑀻𑀬𑀢𑀺 𑀏𑀢𑁂𑀳𑀺 𑀅𑀢𑁆𑀣𑁄𑀢𑀺 𑀩𑁆𑀬𑀜𑁆𑀚𑀦𑀸. 𑀢𑀁 𑀬𑀣𑀸 𑁋 𑀓 𑀔 𑀕 𑀖 𑀗, 𑀘 𑀙 𑀚 𑀛 𑀜, 𑀝 𑀞 𑀟 𑀠 𑀡, 𑀢 𑀣 𑀤 𑀥 𑀦, 𑀧 𑀨 𑀩 𑀪 𑀫, 𑀬 𑀭 𑀮𑀯 𑀲 𑀳 𑀴 𑀅𑀁-𑀇𑀢𑀺 𑀩𑁆𑀬𑀜𑁆𑀚𑀦𑀸. 𑀓𑀓𑀸𑀭𑀸𑀤𑀻𑀲𑁆𑀯𑀓𑀸𑀭𑁄 𑀉𑀘𑁆𑀘𑀸𑀭𑀡𑀢𑁆𑀣𑁄.

‘‘𑀩𑁆𑀬𑀜𑁆𑀚𑀦𑀸’’𑀢𑀺 𑀯𑀢𑁆𑀢𑀢𑁂.

𑁯. 𑀯𑀕𑁆𑀕𑀸 𑀧𑀜𑁆𑀘𑀧𑀜𑁆𑀘𑀲𑁄 𑀫𑀦𑁆𑀢𑀸.

𑀢𑁂𑀲𑀁 𑀔𑁄 𑀩𑁆𑀬𑀜𑁆𑀚𑀦𑀸𑀦𑀁 𑀓𑀓𑀸𑀭𑀸𑀤𑀬𑁄 𑀫𑀓𑀸𑀭𑀦𑁆𑀢𑀸 𑀧𑀜𑁆𑀘𑀯𑀻𑀲𑀢𑀺 𑀩𑁆𑀬𑀜𑁆𑀚𑀦𑀸 𑀧𑀜𑁆𑀘𑀧𑀜𑁆𑀘𑀯𑀺𑀪𑀸𑀕𑁂𑀦 𑀯𑀕𑁆𑀕𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑀁 𑀬𑀣𑀸 𑁋 𑀓 𑀔 𑀕 𑀖 𑀗, 𑀘 𑀙 𑀚 𑀛 𑀜, 𑀝 𑀞 𑀟 𑀠 𑀡, 𑀢 𑀣 𑀤 𑀥 𑀦, 𑀧 𑀨 𑀩 𑀪 𑀫-𑀇𑀢𑀺 𑀯𑀕𑁆𑀕𑀸.

𑀢𑁂 𑀧𑀦 𑀧𑀞𑀫𑀓𑁆𑀔𑀭𑀯𑀲𑁂𑀦 𑀓𑀯𑀕𑁆𑀕𑀘𑀯𑀕𑁆𑀕𑀸𑀤𑀺𑀯𑁄𑀳𑀸𑀭𑀁 𑀕𑀢𑀸, 𑀯𑀕𑁆𑀕𑁄𑀢𑀺 𑀲𑀫𑀽𑀳𑁄, 𑀢𑀢𑁆𑀣 𑀧𑀜𑁆𑀘𑀧𑀜𑁆𑀘𑀯𑀺𑀪𑀸𑀕𑁂𑀦𑀸𑀢𑀺 𑀯𑀸 𑀧𑀜𑁆𑀘 𑀧𑀜𑁆𑀘 𑀏𑀢𑁂𑀲𑀫𑀢𑁆𑀣𑀻𑀢𑀺 ¶ 𑀯𑀸 𑀧𑀜𑁆𑀘𑀧𑀜𑁆𑀘𑀲𑁄, 𑀫𑁄 𑀅𑀦𑁆𑀢𑁄 𑀬𑁂𑀲𑀁 𑀢𑁂 𑀫𑀦𑁆𑀢𑀸.

𑁧𑁦. 𑀅𑀁𑀇𑀢𑀺 𑀦𑀺𑀕𑁆𑀕𑀳𑀻𑀢𑀁.

𑀅𑀓𑀸𑀭𑁄 𑀉𑀘𑁆𑀘𑀸𑀭𑀡𑀢𑁆𑀣𑁄, 𑀇𑀢𑀺𑀲𑀤𑁆𑀤𑁄 𑀧𑀦𑀸𑀦𑀦𑁆𑀢𑀭𑀯𑀼𑀢𑁆𑀢𑀦𑀺𑀤𑀲𑁆𑀲𑀦𑀢𑁆𑀣𑁄, 𑀅𑀁𑀇𑀢𑀺 𑀬𑀁 𑀅𑀓𑀸𑀭𑀢𑁄 𑀧𑀭𑀁 𑀯𑀼𑀢𑁆𑀢𑀁 𑀩𑀺𑀦𑁆𑀤𑀼, 𑀢𑀁 𑀦𑀺𑀕𑁆𑀕𑀳𑀻𑀢𑀁 𑀦𑀸𑀫 𑀳𑁄𑀢𑀺. 𑀭𑀲𑁆𑀲𑀲𑁆𑀲𑀭𑀁 𑀦𑀺𑀲𑁆𑀲𑀸𑀬 𑀕𑀬𑁆𑀳𑀢𑀺, 𑀓𑀭𑀡𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀕𑀬𑁆𑀳𑀢𑀻𑀢𑀺 𑀯𑀸 𑀦𑀺𑀕𑁆𑀕𑀳𑀻𑀢𑀁.

𑀓𑀭𑀡𑀁 𑀦𑀺𑀕𑁆𑀕𑀳𑁂𑀢𑁆𑀯𑀸𑀦, 𑀫𑀼𑀔𑁂𑀦𑀸𑀯𑀺𑀯𑀝𑁂𑀦 𑀬𑀁;

𑀯𑀼𑀘𑁆𑀘𑀢𑁂 𑀦𑀺𑀕𑁆𑀕𑀳𑀻𑀢𑀦𑁆𑀢𑀺, 𑀯𑀼𑀢𑁆𑀢𑀁 𑀩𑀺𑀦𑁆𑀤𑀼 𑀲𑀭𑀸𑀦𑀼𑀕𑀁.

𑀇𑀥 𑀅𑀯𑀼𑀢𑁆𑀢𑀸𑀦𑀁 𑀧𑀭𑀲𑀫𑀜𑁆𑀜𑀸𑀦𑀫𑁆𑀧𑀺 𑀧𑀬𑁄𑀚𑀦𑁂 𑀲𑀢𑀺 𑀕𑀳𑀡𑀢𑁆𑀣𑀁 𑀧𑀭𑀺𑀪𑀸𑀲𑀫𑀸𑀳.

𑁧𑁧. 𑀧𑀭𑀲𑀫𑀜𑁆𑀜𑀸 𑀧𑀬𑁄𑀕𑁂.

𑀬𑀸 𑀘 𑀧𑀦 𑀧𑀭𑀲𑁆𑀫𑀺𑀁 𑀲𑀓𑁆𑀓𑀢𑀕𑀦𑁆𑀣𑁂, 𑀧𑀭𑁂𑀲𑀁 𑀯𑀸 𑀯𑁂𑀬𑁆𑀬𑀸𑀓𑀭𑀡𑀸𑀦𑀁 𑀲𑀫𑀜𑁆𑀜𑀸 𑀖𑁄𑀲𑀸𑀖𑁄𑀲𑀮𑁄𑀧𑀲𑀯𑀡𑁆𑀡𑀲𑀁𑀬𑁄𑀕𑀮𑀺𑀗𑁆𑀕𑀸𑀤𑀺𑀓𑀸, 𑀢𑀸 𑀧𑀬𑁄𑀕𑁂 𑀲𑀢𑀺 𑀏𑀢𑁆𑀣𑀸𑀧𑀺 𑀬𑀼𑀚𑁆𑀚𑀦𑁆𑀢𑁂.

𑀧𑀭𑀲𑁆𑀫𑀺𑀁, 𑀧𑀭𑁂𑀲𑀁 𑀯𑀸 𑀲𑀫𑀜𑁆𑀜𑀸 𑀧𑀭𑀲𑀫𑀜𑁆𑀜𑀸, 𑀯𑁂𑀬𑁆𑀬𑀸𑀓𑀭𑀡𑁂, 𑀯𑁂𑀬𑁆𑀬𑀸𑀓𑀭𑀡𑀫𑀥𑀻𑀢𑀸𑀦𑀁 𑀯𑀸 𑀲𑀫𑀜𑁆𑀜𑀸𑀢𑁆𑀬𑀢𑁆𑀣𑁄. 𑀧𑀬𑀼𑀚𑁆𑀚𑀦𑀁 𑀧𑀬𑁄𑀕𑁄, 𑀯𑀺𑀦𑀺𑀬𑁄𑀕𑁄.

𑀢𑀢𑁆𑀣 𑀯𑀕𑁆𑀕𑀸𑀦𑀁 𑀧𑀞𑀫𑀤𑀼𑀢𑀺𑀬𑀸, 𑀲𑀓𑀸𑀭𑁄 𑀘 𑀅𑀖𑁄𑀲𑀸. 𑀯𑀕𑁆𑀕𑀸𑀦𑀁 𑀢𑀢𑀺𑀬𑀘𑀢𑀼𑀢𑁆𑀣𑀧𑀜𑁆𑀘𑀫𑀸, 𑀬 𑀭 𑀮𑀯 𑀳 𑀴𑀸 𑀘𑀸𑀢𑀺 𑀏𑀓𑀯𑀻𑀲𑀢𑀺 𑀖𑁄𑀲𑀸 𑀦𑀸𑀫.

𑀏𑀢𑁆𑀣 𑀘 𑀯𑀕𑁆𑀕𑀸𑀦𑀁 𑀤𑀼𑀢𑀺𑀬𑀘𑀢𑀼𑀢𑁆𑀣𑀸 𑀥𑀦𑀺𑀢𑀸𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺, 𑀇𑀢𑀭𑁂 𑀲𑀺𑀣𑀺𑀮𑀸𑀢𑀺. 𑀯𑀺𑀦𑀸𑀲𑁄 𑀮𑁄𑀧𑁄. 𑀭𑀲𑁆𑀲𑀲𑁆𑀲𑀭𑀸 𑀲𑀓𑀤𑀻𑀖𑁂𑀳𑀺 𑀅𑀜𑁆𑀜𑀫𑀜𑁆𑀜𑀁 𑀲𑀯𑀡𑁆𑀡𑀸 𑀦𑀸𑀫, 𑀬𑁂 𑀲𑀭𑀽𑀧𑀸𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀭𑀸𑀦𑀦𑁆𑀢𑀭𑀺𑀢𑀸𑀦𑀺 ¶ 𑀩𑁆𑀬𑀜𑁆𑀚𑀦𑀸𑀦𑀺 𑀲𑀁𑀬𑁄𑀕𑁄. 𑀥𑀸𑀢𑀼𑀧𑁆𑀧𑀘𑁆𑀘𑀬𑀯𑀺𑀪𑀢𑁆𑀢𑀺𑀯𑀚𑁆𑀚𑀺𑀢𑀫𑀢𑁆𑀣𑀯𑀁 𑀮𑀺𑀗𑁆𑀕𑀁. 𑀯𑀺𑀪𑀢𑁆𑀬𑀦𑁆𑀢𑀁 𑀧𑀤𑀁. 𑀇𑀘𑁆𑀘𑁂𑀯𑀫𑀸𑀤𑀺.

𑀇𑀢𑀺 𑀲𑀜𑁆𑀜𑀸𑀯𑀺𑀥𑀸𑀦𑀁.

𑀲𑀭𑀲𑀦𑁆𑀥𑀺𑀯𑀺𑀥𑀸𑀦

𑀅𑀣 𑀲𑀭𑀲𑀦𑁆𑀥𑀺 𑀯𑀼𑀘𑁆𑀘𑀢𑁂.

𑀮𑁄𑀓 𑀅𑀕𑁆𑀕𑀧𑀼𑀕𑁆𑀕𑀮𑁄, 𑀧𑀜𑁆𑀜𑀸 𑀇𑀦𑁆𑀤𑁆𑀭𑀺𑀬𑀁, 𑀢𑀻𑀡𑀺 𑀇𑀫𑀸𑀦𑀺, 𑀦𑁄 𑀳𑀺 𑀏𑀢𑀁, 𑀪𑀺𑀓𑁆𑀔𑀼𑀦𑀻 𑀑𑀯𑀸𑀤𑁄, 𑀫𑀸𑀢𑀼 𑀉𑀧𑀝𑁆𑀞𑀸𑀦𑀁, 𑀲𑀫𑁂𑀢𑀼 𑀆𑀬𑀲𑁆𑀫𑀸, 𑀅𑀪𑀺𑀪𑀽 𑀆𑀬𑀢𑀦𑀁, 𑀥𑀦𑀸 𑀫𑁂 𑀅𑀢𑁆𑀣𑀺, 𑀲𑀩𑁆𑀩𑁂 𑀏𑀯, 𑀢𑀬𑁄 𑀅𑀲𑁆𑀲𑀼 𑀥𑀫𑁆𑀫𑀸, 𑀅𑀲𑀦𑁆𑀢𑁄 𑀏𑀢𑁆𑀣 𑀦 𑀤𑀺𑀲𑁆𑀲𑀦𑁆𑀢𑀺 𑀇𑀢𑀻𑀥 𑀲𑀭𑀸𑀤𑀺𑀲𑀜𑁆𑀜𑀸𑀬𑀁 𑀲𑀩𑁆𑀩𑀲𑀦𑁆𑀥𑀺𑀓𑀭𑀡𑀝𑁆𑀞𑀸𑀦𑁂 𑀩𑁆𑀬𑀜𑁆𑀚𑀦𑀯𑀺𑀬𑁄𑀚𑀦𑀢𑁆𑀣𑀁 𑀧𑀭𑀺𑀪𑀸𑀲𑀫𑀸𑀳.

𑁧𑁨. 𑀧𑀼𑀩𑁆𑀩𑀫𑀥𑁄𑀞𑀺𑀢𑀫𑀲𑁆𑀲𑀭𑀁 𑀲𑀭𑁂𑀦 𑀯𑀺𑀬𑁄𑀚𑀬𑁂.

𑀲𑀭𑁂𑀦𑀸𑀢𑀺 𑀦𑀺𑀲𑁆𑀲𑀓𑁆𑀓𑁂 𑀓𑀭𑀡𑀯𑀘𑀦𑀁, 𑀲𑀳𑀬𑁄𑀕𑁂 𑀯𑀸, 𑀲𑀦𑁆𑀥𑀺𑀢𑀩𑁆𑀩𑁂 𑀲𑀭𑀲𑀳𑀺𑀢𑀁 𑀧𑀼𑀩𑁆𑀩𑀩𑁆𑀬𑀜𑁆𑀚𑀦𑀁 𑀅𑀦𑀢𑀺𑀓𑁆𑀓𑀫𑀦𑁆𑀢𑁄 𑀅𑀥𑁄𑀞𑀺𑀢𑀫𑀲𑁆𑀲𑀭𑀜𑁆𑀘 𑀓𑀢𑁆𑀯𑀸 𑀲𑀭𑀢𑁄 𑀯𑀺𑀬𑁄𑀚𑀬𑁂𑀢𑀺 𑀲𑀭𑀢𑁄 𑀩𑁆𑀬𑀜𑁆𑀚𑀦𑀁 𑀯𑀺𑀬𑁄𑀚𑁂𑀢𑀩𑁆𑀩𑀁. 𑀏𑀢𑁆𑀣 𑀘 𑀅𑀲𑁆𑀲𑀭𑀕𑁆𑀕𑀳𑀡𑀲𑀸𑀫𑀢𑁆𑀣𑀺𑀬𑁂𑀦 ‘‘𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀮𑀤𑁆𑀥𑀁.

𑁧𑁩. 𑀲𑀭𑀸 𑀲𑀭𑁂 𑀮𑁄𑀧𑀁.

𑀲𑀭𑀸 𑀔𑁄 𑀲𑀩𑁆𑀩𑁂𑀧𑀺 𑀲𑀭𑁂 𑀧𑀭𑁂 𑀞𑀺𑀢𑁂 𑀮𑁄𑀧𑀁 𑀧𑀧𑁆𑀧𑁄𑀦𑁆𑀢𑀺. 𑀮𑁄𑀧𑁄𑀢𑀺 𑀅𑀤𑀲𑁆𑀲𑀦𑀁 𑀅𑀦𑀼𑀘𑁆𑀘𑀸𑀭𑀡𑀁. 𑀏𑀢𑁆𑀣 𑀲𑀭𑀸𑀢𑀺 𑀓𑀸𑀭𑀺𑀬𑀻𑀦𑀺𑀤𑁆𑀤𑁂𑀲𑁄. 𑀩𑀳𑀼𑀯𑀘𑀦𑀁 𑀧𑀦𑁂𑀢𑁆𑀣 𑀏𑀓𑁂𑀓𑀲𑁆𑀫𑀺𑀁 𑀲𑀭𑁂 𑀧𑀭𑁂 𑀩𑀳𑀽𑀦𑀁 𑀮𑁄𑀧𑀜𑀸𑀧𑀦𑀢𑁆𑀣𑀁. 𑀲𑀭𑁂𑀢𑀺 𑀦𑀺𑀫𑀺𑀢𑁆𑀢𑀦𑀺𑀤𑁆𑀤𑁂𑀲𑁄, 𑀦𑀺𑀫𑀺𑀢𑁆𑀢𑀲𑀢𑁆𑀢𑀫𑀻 𑀘𑀸𑀬𑀁, 𑀦𑀺𑀫𑀺𑀢𑁆𑀢𑁄𑀧𑀸𑀤𑀸𑀦𑀲𑀸𑀫𑀢𑁆𑀣𑀺𑀬𑀢𑁄 𑀯𑀡𑁆𑀡𑀓𑀸𑀮𑀩𑁆𑀬𑀯𑀥𑀸𑀦𑁂 𑀲𑀦𑁆𑀥𑀺𑀓𑀸𑀭𑀺𑀬𑀁 𑀦 𑀳𑁄𑀢𑀺. 𑀮𑁄𑀧𑀦𑁆𑀢𑀺 𑀓𑀸𑀭𑀺𑀬𑀦𑀺𑀤𑁆𑀤𑁂𑀲𑁄, 𑀇𑀤𑀁 𑀧𑀦 𑀲𑀼𑀢𑁆𑀢𑀁 ¶ 𑀉𑀧𑀭𑀺 𑀧𑀭𑀮𑁄𑀧𑀯𑀺𑀥𑀸𑀦𑀢𑁄 𑀧𑀼𑀩𑁆𑀩𑀮𑁄𑀧𑀯𑀺𑀥𑀸𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀏𑀯𑀁 𑀲𑀩𑁆𑀩𑀢𑁆𑀣 𑀲𑀢𑁆𑀢𑀫𑀻𑀦𑀺𑀤𑁆𑀤𑁂𑀲𑁂 𑀧𑀼𑀩𑁆𑀩𑀲𑁆𑀲𑁂𑀯 𑀯𑀺𑀥𑀺, 𑀦 𑀧𑀭𑀲𑁆𑀲 𑀯𑀺𑀥𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

‘‘𑀅𑀲𑁆𑀲𑀭𑀁, 𑀅𑀥𑁄𑀞𑀺𑀢’’𑀦𑁆𑀢𑀺 𑀘 𑀯𑀢𑁆𑀢𑀢𑁂, 𑀲𑀺𑀮𑀺𑀝𑁆𑀞𑀓𑀣𑀦𑁂 𑀧𑀭𑀺𑀪𑀸𑀲𑀫𑀸𑀳.

𑁧𑁪. 𑀦𑀬𑁂 𑀧𑀭𑀁 𑀬𑀼𑀢𑁆𑀢𑁂.

𑀲𑀭𑀭𑀳𑀺𑀢𑀁 𑀔𑁄 𑀩𑁆𑀬𑀜𑁆𑀚𑀦𑀁 𑀅𑀥𑁄𑀞𑀺𑀢𑀁 𑀧𑀭𑀓𑁆𑀔𑀭𑀁 𑀦𑀬𑁂 𑀬𑀼𑀢𑁆𑀢𑁂 𑀞𑀸𑀦𑁂𑀢𑀺 𑀧𑀭𑀦𑀬𑀦𑀁 𑀓𑀸𑀢𑀩𑁆𑀩𑀁. 𑀏𑀢𑁆𑀣 𑀬𑀼𑀢𑁆𑀢𑀕𑁆𑀕𑀳𑀡𑀁 𑀦𑀺𑀕𑁆𑀕𑀳𑀻𑀢𑀦𑀺𑀲𑁂𑀥𑀦𑀢𑁆𑀣𑀁, 𑀢𑁂𑀦 ‘‘𑀅𑀓𑁆𑀓𑁄𑀘𑁆𑀙𑀺 𑀫𑀁 𑀅𑀯𑀥𑀺 𑀫’’𑀦𑁆𑀢𑀺𑀆𑀤𑀻𑀲𑀼 𑀧𑀭𑀦𑀬𑀦𑀲𑀦𑁆𑀤𑁂𑀳𑁄 𑀦 𑀳𑁄𑀢𑀺.

𑀮𑁄𑀓𑀕𑁆𑀕𑀧𑀼𑀕𑁆𑀕𑀮𑁄, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁, 𑀢𑀻𑀡𑀺𑀫𑀸𑀦𑀺, 𑀦𑁄𑀳𑁂𑀢𑀁, 𑀪𑀺𑀓𑁆𑀔𑀼𑀦𑁄𑀯𑀸𑀤𑁄, 𑀫𑀸𑀢𑀼𑀧𑀝𑁆𑀞𑀸𑀦𑀁, 𑀲𑀫𑁂𑀢𑀸𑀬𑀲𑁆𑀫𑀸, 𑀅𑀪𑀺𑀪𑀸𑀬𑀢𑀦𑀁, 𑀥𑀦𑀸 𑀫𑀢𑁆𑀣𑀺, 𑀲𑀩𑁆𑀩𑁂𑀯, 𑀢𑀬𑀲𑁆𑀲𑀼 𑀥𑀫𑁆𑀫𑀸, 𑀅𑀲𑀦𑁆𑀢𑁂𑀢𑁆𑀣 𑀦 𑀤𑀺𑀲𑁆𑀲𑀦𑁆𑀢𑀺.

𑀬𑀲𑁆𑀲 𑀇𑀤𑀸𑀦𑀺, 𑀲𑀜𑁆𑀜𑀸 𑀇𑀢𑀺, 𑀙𑀸𑀬𑀸 𑀇𑀯, 𑀓𑀣𑀸 𑀏𑀯 𑀓𑀸, 𑀇𑀢𑀺 𑀅𑀧𑀺, 𑀅𑀲𑁆𑀲𑀫𑀡𑀻 𑀅𑀲𑀺, 𑀘𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀁, 𑀅𑀓𑀢𑀜𑁆𑀜𑀽 𑀅𑀲𑀺, 𑀆𑀓𑀸𑀲𑁂 𑀇𑀯, 𑀢𑁂 𑀅𑀧𑀺, 𑀯𑀦𑁆𑀤𑁂 𑀅𑀳𑀁, 𑀲𑁄 𑀅𑀳𑀁, 𑀘𑀢𑁆𑀢𑀸𑀭𑁄 𑀇𑀫𑁂, 𑀯𑀲𑀮𑁄 𑀇𑀢𑀺, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀆𑀲𑀺 𑀩𑀻𑀚𑀓𑁄, 𑀧𑀸𑀢𑁄 𑀏𑀯𑀸𑀢𑀻𑀥 𑀧𑀼𑀩𑁆𑀩𑀮𑁄𑀧𑁂 𑀲𑀫𑁆𑀧𑀢𑁆𑀢𑁂 ‘‘𑀲𑀭𑁂’’𑀢𑀺 𑀅𑀥𑀺𑀓𑀸𑀭𑁄, 𑀇𑀥 𑀧𑀦 ‘‘𑀅𑀢𑁆𑀣𑀯𑀲𑀸 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁄’’𑀢𑀺 𑀓𑀢𑁆𑀯𑀸 ‘‘𑀲𑀭𑁄, 𑀲𑀭𑀫𑁆𑀳𑀸, 𑀮𑁄𑀧’’𑀦𑁆𑀢𑀺 𑀘 𑀯𑀢𑁆𑀢𑀫𑀸𑀦𑁂 𑁋

𑁧𑁫. 𑀯𑀸 𑀧𑀭𑁄 𑀅𑀲𑀭𑀽𑀧𑀸.

𑀅𑀲𑀫𑀸𑀦𑀭𑀽𑀧𑀫𑁆𑀳𑀸 𑀲𑀭𑀫𑁆𑀳𑀸 𑀧𑀭𑁄 𑀲𑀭𑁄 𑀮𑁄𑀧𑀁 𑀧𑀧𑁆𑀧𑁄𑀢𑀺 𑀯𑀸. 𑀲𑀫𑀸𑀦𑀁 𑀭𑀽𑀧𑀁 𑀅𑀲𑁆𑀲𑀸𑀢𑀺 𑀲𑀭𑀽𑀧𑁄, 𑀦 𑀲𑀭𑀽𑀧𑁄 𑀅𑀲𑀭𑀽𑀧𑁄, 𑀅𑀲𑀯𑀡𑁆𑀡𑁄 ¶ . 𑀬𑀲𑁆𑀫𑀸 𑀧𑀦 𑀫𑀭𑀺𑀬𑀸𑀤𑀸𑀬𑀁, 𑀅𑀪𑀺𑀯𑀺𑀥𑀺𑀫𑁆𑀳𑀺 𑀘 𑀯𑀢𑁆𑀢𑀫𑀸𑀦𑁄 𑀆𑀉𑀧𑀲𑀕𑁆𑀕𑁄 𑀯𑀺𑀬 𑀯𑀸𑀲𑀤𑁆𑀤𑁄 𑀤𑁆𑀯𑀺𑀥𑀸 𑀯𑀢𑁆𑀢𑀢𑁂, 𑀓𑀢𑁆𑀣𑀘𑀺 𑀯𑀺𑀓𑀧𑁆𑀧𑁂, 𑀓𑀢𑁆𑀣𑀘𑀺 𑀬𑀣𑀸𑀯𑀯𑀢𑁆𑀣𑀺𑀢𑀭𑀽𑀧𑀧𑀭𑀺𑀕𑁆𑀕𑀳𑁂, 𑀇𑀥 𑀧𑀦 𑀧𑀘𑁆𑀙𑀺𑀫𑁂, 𑀢𑀢𑁄 𑀦𑀺𑀘𑁆𑀘𑀫𑀦𑀺𑀘𑁆𑀘𑀫𑀲𑀦𑁆𑀢𑀜𑁆𑀘 𑀯𑀺𑀥𑀺𑀫𑁂𑀢𑁆𑀣 𑀯𑀸𑀲𑀤𑁆𑀤𑁄 𑀤𑀻𑀧𑁂𑀢𑀺. ‘‘𑀦𑀬𑁂 𑀧𑀭𑀁 𑀬𑀼𑀢𑁆𑀢𑁂’’𑀢𑀺 𑀧𑀭𑀁 𑀦𑁂𑀢𑀩𑁆𑀩𑀁.

𑀬𑀲𑁆𑀲𑀤𑀸𑀦𑀺 𑀬𑀲𑁆𑀲 𑀇𑀤𑀸𑀦𑀺, 𑀲𑀜𑁆𑀜𑀸𑀢𑀺 𑀲𑀜𑁆𑀜𑀸 𑀇𑀢𑀺, 𑀙𑀸𑀬𑀸𑀯 𑀙𑀸𑀬𑀸 𑀇𑀯, 𑀓𑀣𑀸𑀯 𑀓𑀸 𑀓𑀣𑀸 𑀏𑀯 𑀓𑀸, 𑀇𑀢𑀻𑀧𑀺 𑀇𑀢𑀺 𑀅𑀧𑀺, 𑀅𑀲𑁆𑀲𑀫𑀡𑀻𑀲𑀺 𑀅𑀲𑁆𑀲𑀫𑀡𑀻 𑀅𑀲𑀺. 𑀘𑀓𑁆𑀔𑀼𑀦𑁆𑀤𑁆𑀭𑀺𑀬 𑀫𑀺𑀢𑀺 𑀦𑀺𑀘𑁆𑀘𑀁. 𑀅𑀓𑀢𑀜𑁆𑀜𑀽𑀲𑀺 𑀅𑀓𑀢𑀜𑁆𑀜𑀽 𑀅𑀲𑀺, 𑀆𑀓𑀸𑀲𑁂𑀯 𑀆𑀓𑀸𑀲𑁂 𑀇𑀯, 𑀢𑁂𑀧𑀺 𑀢𑁂 𑀅𑀧𑀺, 𑀯𑀦𑁆𑀤𑁂𑀳𑀁 𑀯𑀦𑁆𑀤𑁂 𑀅𑀳𑀁, 𑀲𑁄𑀳𑀁 𑀲𑁄 𑀅𑀳𑀁, 𑀘𑀢𑁆𑀢𑀸𑀭𑁄𑀫𑁂 𑀘𑀢𑁆𑀢𑀸𑀭𑁄 𑀇𑀫𑁂, 𑀯𑀲𑀮𑁄𑀢𑀺 𑀯𑀲𑀮𑁄 𑀇𑀢𑀺, 𑀫𑁄𑀕𑁆𑀕𑀮𑁆𑀮𑀸𑀦𑁄𑀲𑀺 𑀩𑀻𑀚𑀓𑁄 𑀫𑁄𑀕𑁆𑀕𑀮𑁆𑀮𑀸𑀦𑁄 𑀆𑀲𑀺 𑀩𑀻𑀚𑀓𑁄, 𑀧𑀸𑀢𑁄𑀯 𑀧𑀸𑀢𑁄 𑀏𑀯.

𑀇𑀥 𑀦 𑀪𑀯𑀢𑀺 𑁋 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀲𑀢𑁆𑀢𑀼𑀢𑁆𑀢𑀫𑁄, 𑀏𑀓𑀽𑀦𑀯𑀻𑀲𑀢𑀺, 𑀬𑀲𑁆𑀲𑁂𑀢𑁂, 𑀲𑀼𑀕𑀢𑁄𑀯𑀸𑀤𑁄, 𑀤𑀺𑀝𑁆𑀞𑀸𑀲𑀯𑁄, 𑀤𑀺𑀝𑁆𑀞𑁄𑀖𑁄, 𑀘𑀓𑁆𑀔𑀸𑀬𑀢𑀦𑀁, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸 𑀇𑀘𑁆𑀘𑀸𑀤𑀺.

𑀪𑀯𑀢𑀺 𑀘 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀸𑀬.

𑀅𑀯𑀡𑁆𑀡𑀢𑁄 𑀲𑀭𑁄𑀤𑀸𑀦𑀻-𑀢𑀻𑀯𑁂𑀯𑀸𑀤𑀺𑀁 𑀯𑀺𑀦𑀸 𑀧𑀭𑁄;

𑀦 𑀮𑀼𑀧𑁆𑀧𑀢𑀜𑁆𑀜𑀢𑁄 𑀤𑀻𑀖𑁄, 𑀆𑀲𑁂𑀯𑀸𑀤𑀺𑀯𑀺𑀯𑀚𑁆𑀚𑀺𑀢𑁄.

𑀩𑀦𑁆𑀥𑀼𑀲𑁆𑀲 𑀇𑀯, 𑀉𑀧 𑀇𑀓𑁆𑀔𑀢𑀺, 𑀉𑀧 𑀇𑀢𑁄, 𑀅𑀯 𑀇𑀘𑁆𑀘, 𑀚𑀺𑀦 𑀈𑀭𑀺𑀢𑀁, 𑀦 𑀉𑀧𑁂𑀢𑀺, 𑀘𑀦𑁆𑀤 𑀉𑀤𑀬𑁄, 𑀬𑀣𑀸 𑀉𑀤𑀓𑁂 𑀇𑀢𑀻𑀥 𑀧𑀼𑀩𑁆𑀩𑀸𑀯𑀡𑁆𑀡𑀲𑁆𑀲𑀭𑀸𑀦𑀁 ¶ 𑀮𑁄𑀧𑁂 𑀓𑀢𑁂 ‘‘𑀧𑀭𑁄, 𑀅𑀲𑀭𑀽𑀧𑁂’’𑀢𑀺 𑀘 𑀯𑀢𑁆𑀢𑀢𑁂, 𑀢𑀣𑀸 ‘‘𑀇𑀯𑀡𑁆𑀡𑁄 𑀬𑀁 𑀦𑀯𑀸’’𑀢𑀺 𑀇𑀢𑁄 𑀇𑀯𑀡𑁆𑀡𑀕𑁆𑀕𑀳𑀡𑀜𑁆𑀘, ‘‘𑀯𑀫𑁄𑀤𑀼𑀤𑀦𑁆𑀢𑀸𑀦’’𑀦𑁆𑀢𑀺 𑀇𑀢𑁄 𑀉𑀕𑁆𑀕𑀳𑀡𑀜𑁆𑀘 𑀲𑀻𑀳𑀕𑀢𑀺𑀬𑀸 𑀇𑀥𑀸𑀦𑀼𑀯𑀢𑁆𑀢𑁂𑀢𑀩𑁆𑀩𑀁.

𑁧𑁬. 𑀓𑁆𑀯𑀘𑀸𑀲𑀯𑀡𑁆𑀡𑀁 𑀮𑀼𑀢𑁆𑀢𑁂.

𑀇𑀯𑀡𑁆𑀡𑀪𑀽𑀢𑁄, 𑀉𑀓𑀸𑀭𑀪𑀽𑀢𑁄 𑀘 𑀧𑀭𑁄 𑀲𑀭𑁄 𑀅𑀲𑀭𑀽𑀧𑁂 𑀧𑀼𑀩𑁆𑀩𑀲𑁆𑀲𑀭𑁂 𑀮𑀼𑀢𑁆𑀢𑁂 𑀓𑁆𑀯𑀘𑀺 𑀅𑀲𑀯𑀡𑁆𑀡𑀁 𑀧𑀧𑁆𑀧𑁄𑀢𑀺. 𑀦𑀢𑁆𑀣𑀺 𑀲𑀯𑀡𑁆𑀡𑀸 𑀏𑀢𑁂𑀲𑀦𑁆𑀢𑀺 𑀅𑀲𑀯𑀡𑁆𑀡𑀸, 𑀏𑀓𑀸𑀭𑁄𑀓𑀸𑀭𑀸, 𑀢𑀢𑁆𑀣 𑀞𑀸𑀦𑀸𑀲𑀦𑁆𑀦𑀯𑀲𑁂𑀦 𑀇𑀯𑀡𑁆𑀡𑀼𑀓𑀸𑀭𑀸𑀦𑀫𑁂𑀓𑀸𑀭𑁄𑀓𑀸𑀭𑀸 𑀳𑁄𑀦𑁆𑀢𑀺.

𑀩𑀦𑁆𑀥𑀼𑀲𑁆𑀲𑁂𑀯, 𑀉𑀧𑁂𑀓𑁆𑀔𑀢𑀺, 𑀉𑀧𑁂𑀢𑁄, 𑀅𑀯𑁂𑀘𑁆𑀘, 𑀚𑀺𑀦𑁂𑀭𑀺𑀢𑀁, 𑀦𑁄𑀧𑁂𑀢𑀺, 𑀘𑀦𑁆𑀤𑁄𑀤𑀬𑁄, 𑀬𑀣𑁄𑀤𑀓𑁂. 𑀓𑁆𑀯𑀘𑀻𑀢𑀺 𑀓𑀺𑀁? 𑀢𑀢𑁆𑀭𑀺𑀫𑁂, 𑀬𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺, 𑀫𑀳𑀺𑀤𑁆𑀥𑀺𑀓𑁄, 𑀲𑀩𑁆𑀩𑀻𑀢𑀺𑀬𑁄, 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀮𑁄𑀓𑀼𑀢𑁆𑀢𑀭𑁄. 𑀮𑀼𑀢𑁆𑀢𑁂𑀢𑀺 𑀓𑀺𑀁? 𑀙 𑀇𑀫𑁂 𑀥𑀫𑁆𑀫𑀸, 𑀬𑀣𑀸 𑀇𑀤𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸. 𑀅𑀲𑀭𑀽𑀧𑁂𑀢𑀺 𑀓𑀺𑀁? 𑀘𑀢𑁆𑀢𑀸𑀭𑀺𑀫𑀸𑀦𑀺, 𑀫𑀸𑀢𑀼𑀧𑀝𑁆𑀞𑀸𑀦𑀁.

𑀏𑀢𑁆𑀣 𑀘 𑀲𑀢𑀺𑀧𑀺 𑀳𑁂𑀝𑁆𑀞𑀸 𑀯𑀸𑀕𑁆𑀕𑀳𑀡𑁂 𑀓𑁆𑀯𑀘𑀺𑀓𑀭𑀡𑀢𑁄 𑀅𑀯𑀡𑁆𑀡𑁂 𑀏𑀯 𑀮𑀼𑀢𑁆𑀢𑁂 𑀇𑀥 𑀯𑀼𑀢𑁆𑀢𑀯𑀺𑀥𑀺 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁄 𑀇𑀥 𑀦 𑀪𑀯𑀢𑀺 𑁋 𑀤𑀺𑀝𑁆𑀞𑀼𑀧𑀸𑀤𑀸𑀦𑀁, 𑀧𑀜𑁆𑀘𑀳𑀼𑀧𑀸𑀮𑀺, 𑀫𑀼𑀤𑀺𑀦𑁆𑀤𑁆𑀭𑀺𑀬𑀁, 𑀬𑁄 𑀫𑀺𑀲𑁆𑀲𑀭𑁄𑀢𑀺.

𑀢𑀢𑁆𑀭 𑀅𑀬𑀁, 𑀩𑀼𑀤𑁆𑀥 𑀅𑀦𑀼𑀲𑁆𑀲𑀢𑀺, 𑀲 𑀅𑀢𑁆𑀣𑀺𑀓𑀸, 𑀧𑀜𑁆𑀜𑀯𑀸 𑀅𑀲𑁆𑀲, 𑀢𑀤𑀸 𑀅𑀳𑀁, 𑀬𑀸𑀦𑀺 𑀇𑀥 𑀪𑀽𑀢𑀸𑀦𑀺, 𑀕𑀘𑁆𑀙𑀸𑀫𑀺 𑀇𑀢𑀺, 𑀅𑀢𑀺 𑀇𑀢𑁄, 𑀓𑀺𑀓𑀻 𑀇𑀯, 𑀩𑀳𑀼 𑀉𑀧𑀓𑀸𑀭𑀁, 𑀫𑀥𑀼 𑀉𑀤𑀓𑀁, 𑀲𑀼 𑀉𑀧𑀥𑀸𑀭𑀺𑀢𑀁, 𑀬𑁄𑀧𑀺 𑀅𑀬𑀁 ¶ , 𑀇𑀤𑀸𑀦𑀺 𑀅𑀳𑀁, 𑀲𑀘𑁂 𑀅𑀬𑀁, 𑀅𑀧𑁆𑀧𑀲𑁆𑀲𑀼𑀢𑁄 𑀅𑀬𑀁, 𑀇𑀢𑀭 𑀇𑀢𑀭𑁂𑀦, 𑀲𑀤𑁆𑀥𑀸 𑀇𑀥 𑀯𑀺𑀢𑁆𑀢𑀁, 𑀓𑀫𑁆𑀫 𑀉𑀧𑀦𑀺𑀲𑁆𑀲𑀬𑁄, 𑀢𑀣𑀸 𑀉𑀧𑀫𑀁, 𑀭𑀢𑁆𑀢𑀺 𑀉𑀧𑀭𑀢𑁄, 𑀯𑀺 𑀉𑀧𑀲𑀫𑁄 𑀇𑀘𑁆𑀘𑀢𑁆𑀭 𑀧𑀼𑀩𑁆𑀩𑀲𑁆𑀲𑀭𑀸𑀦𑀁 𑀮𑁄𑀧𑁂 𑀓𑀢𑁂 𑁋

‘‘𑀓𑁆𑀯𑀘𑀻’’𑀢𑀺 𑀅𑀥𑀺𑀓𑀸𑀭𑁄, ‘‘𑀧𑀭𑁄, 𑀮𑀼𑀢𑁆𑀢𑁂’’𑀢𑀺 𑀘 𑀯𑀢𑁆𑀢𑀢𑁂.

𑁧𑁭. 𑀤𑀻𑀖𑀁.

𑀲𑀭𑁄 𑀔𑁄 𑀧𑀭𑁄 𑀧𑀼𑀩𑁆𑀩𑀲𑁆𑀲𑀭𑁂 𑀮𑀼𑀢𑁆𑀢𑁂 𑀓𑁆𑀯𑀘𑀺 𑀤𑀻𑀖𑀪𑀸𑀯𑀁 𑀧𑀧𑁆𑀧𑁄𑀢𑀻𑀢𑀺 𑀞𑀸𑀦𑀸𑀲𑀦𑁆𑀦𑀯𑀲𑁂𑀦 𑀭𑀲𑁆𑀲𑀲𑁆𑀲𑀭𑀸𑀦𑀁 𑀲𑀯𑀡𑁆𑀡𑀤𑀻𑀖𑁄.

𑀢𑀢𑁆𑀭𑀸𑀬𑀁, 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺, 𑀲𑀸𑀢𑁆𑀣𑀺𑀓𑀸, 𑀧𑀜𑁆𑀜𑀯𑀸𑀲𑁆𑀲, 𑀢𑀤𑀸𑀳𑀁, 𑀬𑀸𑀦𑀻𑀥 𑀪𑀽𑀢𑀸𑀦𑀺, 𑀕𑀘𑁆𑀙𑀸𑀫𑀻𑀢𑀺, 𑀅𑀢𑀻𑀢𑁄, 𑀓𑀺𑀓𑀻𑀯, 𑀩𑀳𑀽𑀧𑀓𑀸𑀭𑀁, 𑀫𑀥𑀽𑀤𑀓𑀁, 𑀲𑀽𑀧𑀥𑀸𑀭𑀺𑀢𑀁, 𑀬𑁄𑀧𑀸𑀬𑀁, 𑀇𑀤𑀸𑀦𑀸𑀳𑀁, 𑀲𑀘𑀸𑀬𑀁, 𑀅𑀧𑁆𑀧𑀲𑁆𑀲𑀼𑀢𑀸𑀬𑀁, 𑀇𑀢𑀭𑀻𑀢𑀭𑁂𑀦, 𑀲𑀤𑁆𑀥𑀻𑀥 𑀯𑀺𑀢𑁆𑀢𑀁, 𑀓𑀫𑁆𑀫𑀽𑀧𑀦𑀺𑀲𑁆𑀲𑀬𑁄, 𑀢𑀣𑀽𑀧𑀫𑀁, 𑀭𑀢𑁆𑀢𑀽𑀧𑀭𑀢𑁄, 𑀯𑀽𑀧𑀲𑀫𑁄.

𑀓𑁆𑀯𑀘𑀻𑀢𑀺 𑀓𑀺𑀁? 𑀅𑀘𑀺𑀭𑀁 𑀯𑀢’𑀬𑀁 𑀓𑀸𑀬𑁄, 𑀓𑀺𑀫𑁆𑀧𑀺𑀫𑀸𑀬, 𑀢𑀻𑀡𑀺𑀫𑀸𑀦𑀺, 𑀧𑀜𑁆𑀘𑀲𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼, 𑀢𑀲𑁆𑀲𑀢𑁆𑀣𑁄, 𑀧𑀜𑁆𑀘𑀗𑁆𑀕𑀺𑀓𑁄, 𑀫𑀼𑀦𑀺𑀦𑁆𑀤𑁄, 𑀲𑀢𑀺𑀦𑁆𑀤𑁆𑀭𑀺𑀬𑀁, 𑀮𑀳𑀼𑀝𑁆𑀞𑀸𑀦𑀁, 𑀕𑀘𑁆𑀙𑀸𑀫𑀳𑀁, 𑀢𑀢𑁆𑀭𑀺𑀤𑀁, 𑀧𑀜𑁆𑀘𑀳𑀼𑀧𑀸𑀮𑀺, 𑀦𑀢𑁆𑀣𑀜𑁆𑀜𑀁. 𑀮𑀼𑀢𑁆𑀢𑁂𑀢𑀺 𑀓𑀺𑀁? 𑀬𑀣𑀸 𑀅𑀬𑀁, 𑀦𑀺𑀫𑀺 𑀇𑀯 𑀭𑀸𑀚𑀸, 𑀓𑀺𑀓𑀻 𑀇𑀯, 𑀲𑀼 𑀉𑀧𑀥𑀸𑀭𑀺𑀢𑀁.

𑀮𑁄𑀓𑀲𑁆𑀲 ¶ 𑀇𑀢𑀺, 𑀤𑁂𑀯 𑀇𑀢𑀺, 𑀯𑀺 𑀅𑀢𑀺 𑀧𑀢𑀦𑁆𑀢𑀺, 𑀯𑀺 𑀅𑀢𑀺 𑀦𑀸𑀫𑁂𑀦𑁆𑀢𑀺, 𑀲𑀗𑁆𑀖𑀸𑀝𑀺 𑀅𑀧𑀺, 𑀚𑀻𑀯𑀺𑀢𑀳𑁂𑀢𑀼 𑀅𑀧𑀺, 𑀯𑀺𑀚𑁆𑀚𑀼 𑀇𑀯, 𑀓𑀺𑀁𑀲𑀼 𑀇𑀥 𑀯𑀺𑀢𑁆𑀢𑀁, 𑀲𑀸𑀥𑀼 𑀇𑀢𑀺 𑀇𑀢𑀻𑀥 𑀧𑀭𑀲𑁆𑀲𑀭𑀸𑀦𑀁 𑀮𑁄𑀧𑁂 𑀓𑀢𑁂 𑁋

‘‘𑀮𑀼𑀢𑁆𑀢𑁂, 𑀤𑀻𑀖’’𑀦𑁆𑀢𑀺 𑀘 𑀯𑀢𑁆𑀢𑀢𑁂.

𑁧𑁮. 𑀧𑀼𑀩𑁆𑀩𑁄 𑀘.

𑀧𑀼𑀩𑁆𑀩𑁄 𑀲𑀭𑁄 𑀧𑀭𑀲𑁆𑀲𑀭𑁂 𑀮𑀼𑀢𑁆𑀢𑁂 𑀓𑁆𑀯𑀘𑀺𑀤𑀻𑀖𑀁 𑀧𑀧𑁆𑀧𑁄𑀢𑀺. 𑀘𑀕𑁆𑀕𑀳𑀡𑀁 𑀮𑀼𑀢𑁆𑀢𑀤𑀻𑀖𑀕𑁆𑀕𑀳𑀡𑀸𑀦𑀼𑀓𑀟𑁆𑀠𑀦𑀢𑁆𑀣𑀁, 𑀢𑀁 ‘‘𑀘𑀸𑀦𑀼𑀓𑀟𑁆𑀠𑀺𑀢𑀫𑀼𑀢𑁆𑀢𑀭𑀢𑁆𑀭 𑀦𑀸𑀦𑀼𑀯𑀢𑁆𑀢𑀢𑁂’’𑀢𑀺 𑀜𑀸𑀧𑀦𑀢𑁆𑀣𑀁.

𑀮𑁄𑀓𑀲𑁆𑀲𑀸𑀢𑀺, 𑀤𑁂𑀯𑀸𑀢𑀺, 𑀯𑀻𑀢𑀺𑀧𑀢𑀦𑁆𑀢𑀺, 𑀯𑀻𑀢𑀺𑀦𑀸𑀫𑁂𑀦𑁆𑀢𑀺, 𑀲𑀗𑁆𑀖𑀸𑀝𑀻𑀧𑀺, 𑀚𑀻𑀯𑀺𑀢𑀳𑁂𑀢𑀽𑀧𑀺, 𑀯𑀺𑀚𑁆𑀚𑀽𑀯, 𑀓𑀺𑀁𑀲𑀽𑀥 𑀯𑀺𑀢𑁆𑀢𑀁, 𑀲𑀸𑀥𑀽𑀢𑀺.

𑀓𑁆𑀯𑀘𑀻𑀢𑀺 𑀓𑀺𑀁? 𑀬𑀲𑁆𑀲𑀤𑀸𑀦𑀺, 𑀇𑀢𑀺𑀲𑁆𑀲, 𑀇𑀤𑀸𑀦𑀺𑀧𑀺, 𑀢𑁂𑀲𑀼𑀧𑀺, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀓𑀺𑀦𑁆𑀦𑀼𑀫𑀸𑀯.

𑀅𑀥𑀺𑀕𑀢𑁄 𑀔𑁄 𑀫𑁂 𑀅𑀬𑀁 𑀥𑀫𑁆𑀫𑁄, 𑀧𑀼𑀢𑁆𑀢𑁄 𑀢𑁂 𑀅𑀳𑀁, 𑀢𑁂 𑀅𑀲𑁆𑀲 𑀧𑀳𑀻𑀦𑀸, 𑀧𑀩𑁆𑀩𑀢𑁂 𑀅𑀳𑀁, 𑀬𑁂 𑀅𑀲𑁆𑀲 𑀇𑀢𑀻𑀥 𑀧𑀼𑀩𑁆𑀩𑀮𑁄𑀧𑁂 𑀲𑀫𑁆𑀧𑀢𑁆𑀢𑁂 𑁋

𑁧𑁯. 𑀬𑀫𑁂𑀤𑀦𑁆𑀢𑀲𑁆𑀲𑀸𑀤𑁂𑀲𑁄.

𑀏𑀓𑀸𑀭𑀲𑁆𑀲 𑀧𑀤𑀦𑁆𑀢𑀪𑀽𑀢𑀲𑁆𑀲 𑀞𑀸𑀦𑁂 𑀲𑀭𑁂 𑀧𑀭𑁂 𑀓𑁆𑀯𑀘𑀺 𑀬𑀓𑀸𑀭𑀸𑀤𑁂𑀲𑁄 𑀳𑁄𑀢𑀺. 𑀅𑀓𑀸𑀭𑁂𑀫𑁂𑀢𑁂𑀬𑁂𑀲𑀤𑁆𑀤𑀸𑀤𑀺𑀲𑁆𑀲𑁂𑀯𑀸𑀬𑀁 𑀯𑀺𑀥𑀺, 𑀬𑀦𑁆𑀢𑀺 𑀬𑀁 𑀭𑀽𑀧𑀁, 𑀏 𑀏𑀯 𑀅𑀦𑁆𑀢𑁄 𑀏𑀤𑀦𑁆𑀢𑁄, 𑀆𑀤𑁂𑀲𑀺𑀝𑁆𑀞𑀸𑀦𑁂 𑀆𑀤𑀺𑀲𑁆𑀲𑀢𑀻𑀢𑀺 𑀆𑀤𑁂𑀲𑁄. ‘‘𑀩𑁆𑀬𑀜𑁆𑀚𑀦𑁂’’𑀢𑀺 𑀅𑀥𑀺𑀓𑀺𑀘𑁆𑀘 ‘‘𑀤𑀻𑀖’’𑀦𑁆𑀢𑀺 𑀤𑀻𑀖𑁄.

𑀅𑀥𑀺𑀕𑀢𑁄 ¶ 𑀔𑁄 𑀫𑁆𑀬𑀸𑀬𑀁 𑀥𑀫𑁆𑀫𑁄, 𑀧𑀼𑀢𑁆𑀢𑁄 𑀢𑁆𑀬𑀸𑀳𑀁, 𑀢𑁆𑀬𑀸𑀲𑁆𑀲 𑀧𑀳𑀻𑀦𑀸, 𑀧𑀩𑁆𑀩𑀢𑁆𑀬𑀸𑀳𑀁, 𑀬𑁆𑀬𑀸𑀲𑁆𑀲.

𑀓𑁆𑀯𑀘𑀻𑀢𑀺 𑀓𑀺𑀁? 𑀢𑁂 𑀦𑀸𑀕𑀢𑀸, 𑀧𑀼𑀢𑁆𑀢𑀸 𑀫𑀢𑁆𑀣𑀺. 𑀅𑀦𑁆𑀢𑀕𑁆𑀕𑀳𑀡𑀁 𑀓𑀺𑀁? 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀦𑁆𑀢𑁄, 𑀤𑀫𑁂𑀦𑁆𑀢𑁄 𑀘𑀺𑀢𑁆𑀢𑀁.

𑀬𑀸𑀯𑀢𑀓𑁄 𑀅𑀲𑁆𑀲 𑀓𑀸𑀬𑁄, 𑀢𑀸𑀯𑀢𑀓𑁄 𑀅𑀲𑁆𑀲 𑀩𑁆𑀬𑀸𑀫𑁄, 𑀓𑁄 𑀅𑀢𑁆𑀣𑁄, 𑀅𑀣 𑀔𑁄 𑀅𑀲𑁆𑀲, 𑀅𑀳𑀁 𑀔𑁄 𑀅𑀚𑁆𑀚, 𑀬𑁄 𑀅𑀬𑀁, 𑀲𑁄 𑀅𑀲𑁆𑀲, 𑀲𑁄 𑀏𑀯, 𑀬𑀢𑁄 𑀅𑀥𑀺𑀓𑀭𑀡𑀁, 𑀅𑀦𑀼 𑀅𑀤𑁆𑀥𑀫𑀸𑀲𑀁, 𑀅𑀦𑀼 𑀏𑀢𑀺, 𑀲𑀼 𑀆𑀕𑀢𑀁, 𑀲𑀼 𑀆𑀓𑀸𑀭𑁄, 𑀤𑀼 𑀆𑀓𑀸𑀭𑁄, 𑀘𑀓𑁆𑀔𑀼 𑀆𑀧𑀸𑀣𑀁, 𑀩𑀳𑀼 𑀆𑀩𑀸𑀥𑁄, 𑀧𑀸𑀢𑀼 𑀅𑀓𑀸𑀲𑀺, 𑀦 𑀢𑀼 𑀏𑀯𑀸𑀢𑀻𑀥 𑁋

𑁨𑁦. 𑀯𑀫𑁄𑀤𑀼𑀤𑀦𑁆𑀢𑀸𑀦𑀁.

𑀑𑀓𑀸𑀭𑀼𑀓𑀸𑀭𑀸𑀦𑀁 𑀅𑀦𑁆𑀢𑀪𑀽𑀢𑀸𑀦𑀁 𑀲𑀭𑁂 𑀧𑀭𑁂 𑀓𑁆𑀯𑀘𑀺 𑀯𑀓𑀸𑀭𑀸𑀤𑁂𑀲𑁄 𑀳𑁄𑀢𑀺. 𑀓 𑀔 𑀬 𑀢𑀲𑀤𑁆𑀤𑀸𑀤𑀺𑀑𑀓𑀸𑀭𑀲𑁆𑀲𑁂𑀤𑀁 𑀕𑀳𑀡𑀁.

𑀬𑀸𑀯𑀢𑀓𑁆𑀯𑀲𑁆𑀲 𑀓𑀸𑀬𑁄, 𑀢𑀸𑀯𑀢𑀓𑁆𑀯𑀲𑁆𑀲 𑀩𑁆𑀬𑀸𑀫𑁄, 𑀓𑁆𑀯𑀢𑁆𑀣𑁄, 𑀅𑀣 𑀔𑁆𑀯𑀲𑁆𑀲, 𑀅𑀳𑀁 𑀔𑁆𑀯𑀚𑁆𑀚, 𑀬𑁆𑀯𑀸𑀬𑀁, 𑀲𑁆𑀯𑀲𑁆𑀲, 𑀲𑁆𑀯𑁂𑀯, 𑀬𑀢𑁆𑀯𑀸𑀥𑀺𑀓𑀭𑀡𑀁, 𑀅𑀦𑁆𑀯𑀤𑁆𑀥𑀫𑀸𑀲𑀁, 𑀅𑀦𑁆𑀯𑁂𑀪𑀺, 𑀲𑁆𑀯𑀸𑀕𑀢𑀁, 𑀲𑁆𑀯𑀸𑀓𑀸𑀭𑁄, 𑀤𑁆𑀯𑀸𑀓𑀸𑀭𑁄, 𑀘𑀓𑁆𑀔𑁆𑀯𑀸𑀧𑀸𑀣𑀁, 𑀩𑀳𑁆𑀯𑀸𑀩𑀸𑀥𑁄, 𑀧𑀸𑀢𑁆𑀯𑀸𑀓𑀸𑀲𑀺, 𑀦 𑀢𑁆𑀯𑁂𑀯.

𑀓𑁆𑀯𑀘𑀻𑀢𑀺 𑀓𑀺𑀁? 𑀓𑁄 𑀅𑀢𑁆𑀣𑁄, 𑀅𑀣 𑀔𑁄 𑀅𑀜𑁆𑀜𑀢𑀭𑀸, 𑀬𑁄𑀳𑀁, 𑀲𑁄𑀳𑀁, 𑀘𑀢𑁆𑀢𑀸𑀭𑁄𑀫𑁂, 𑀲𑀸𑀕𑀢𑀁, 𑀲𑀸𑀥𑀸𑀯𑀼𑀲𑁄, 𑀳𑁄𑀢𑀽𑀢𑀺. 𑀅𑀦𑁆𑀢𑀕𑁆𑀕𑀳𑀡𑀁 𑀓𑀺𑀁? 𑀲𑀯𑀦𑀻𑀬𑀁, 𑀯𑀺𑀭𑀯𑀦𑁆𑀢𑀺.

𑀧𑀝𑀺𑀲𑀦𑁆𑀣𑀸𑀭𑀯𑀼𑀢𑁆𑀢𑀺 ¶ 𑀅𑀲𑁆𑀲, 𑀲𑀩𑁆𑀩𑀸 𑀯𑀺𑀢𑁆𑀢𑀺 𑀅𑀦𑀼𑀪𑀼𑀬𑁆𑀬𑀢𑁂, 𑀯𑀺 𑀅𑀜𑁆𑀚𑀦𑀁, 𑀯𑀺 𑀆𑀓𑀢𑁄, 𑀦𑀤𑀻 𑀆𑀲𑀦𑁆𑀦𑁄 𑀇𑀢𑀻𑀥 𑀫𑀡𑁆𑀟𑀽𑀓𑀕𑀢𑀺𑀬𑀸 ‘‘𑀅𑀲𑀭𑀽𑀧𑁂’’𑀢𑀺 𑀯𑀢𑁆𑀢𑀢𑁂.

𑁨𑁧. 𑀇𑀯𑀡𑁆𑀡𑁄 𑀬𑀁 𑀦𑀯𑀸.

𑀧𑀼𑀩𑁆𑀩𑁄 𑀇𑀯𑀡𑁆𑀡𑁄 𑀅𑀲𑀭𑀽𑀧𑁂 𑀲𑀭𑁂 𑀧𑀭𑁂 𑀬𑀓𑀸𑀭𑀁 𑀧𑀧𑁆𑀧𑁄𑀢𑀺 𑀦𑀯𑀸. 𑀇 𑀏𑀯 𑀯𑀡𑁆𑀡𑁄 𑀇𑀯𑀡𑁆𑀡𑁄, 𑀦𑀯𑀸𑀲𑀤𑁆𑀤𑁄 𑀓𑁆𑀯𑀘𑀺𑀲𑀤𑁆𑀤𑀧𑀭𑀺𑀬𑀸𑀬𑁄.

𑀧𑀝𑀺𑀲𑀦𑁆𑀣𑀸𑀭𑀯𑀼𑀢𑁆𑀬𑀲𑁆𑀲, 𑀲𑀩𑁆𑀩𑀸 𑀯𑀺𑀢𑁆𑀬𑀸𑀦𑀼𑀪𑀼𑀬𑁆𑀬𑀢𑁂, 𑀩𑁆𑀬𑀜𑁆𑀚𑀦𑀁, 𑀩𑁆𑀬𑀸𑀓𑀢𑁄, 𑀦𑀤𑁆𑀬𑀸𑀲𑀦𑁆𑀦𑁄.

𑀦𑀯𑀸𑀢𑀺 𑀓𑀺𑀁? 𑀧𑀜𑁆𑀘𑀳𑀗𑁆𑀕𑁂𑀳𑀺, 𑀢𑀸𑀦𑀺 𑀅𑀢𑁆𑀢𑀦𑀺, 𑀕𑀘𑁆𑀙𑀸𑀫𑀳𑀁, 𑀫𑀼𑀢𑁆𑀢𑀘𑀸𑀕𑀻 𑀅𑀦𑀼𑀤𑁆𑀥𑀢𑁄. 𑀅𑀲𑀭𑀽𑀧𑁂𑀢𑀺 𑀓𑀺𑀁? 𑀇𑀢𑀺𑀳𑀺𑀤𑀁, 𑀅𑀕𑁆𑀕𑀻𑀯, 𑀅𑀢𑁆𑀣𑀻𑀢𑀺.

𑀅𑀢𑀺 𑀅𑀦𑁆𑀢𑀁, 𑀅𑀢𑀺 𑀑𑀤𑀸𑀢𑀸, 𑀧𑀢𑀺 𑀅𑀬𑁄, 𑀧𑀢𑀺 𑀆𑀳𑀭𑀢𑀺, 𑀧𑀢𑀺 𑀏𑀢𑀺, 𑀇𑀢𑀺 𑀅𑀲𑁆𑀲, 𑀇𑀢𑀺 𑀏𑀢𑀁, 𑀇𑀢𑀺𑀆𑀤𑀺 𑀇𑀢𑀻𑀥 ‘‘𑀇𑀯𑀡𑁆𑀡𑁄 𑀬𑀁 𑀦𑀯𑀸’’𑀢𑀺 𑀬𑀓𑀸𑀭𑀸𑀤𑁂𑀲𑁂 𑀲𑀫𑁆𑀧𑀢𑁆𑀢𑁂 𑁋

𑁨𑁨. 𑀲𑀩𑁆𑀩𑁄 𑀘𑀦𑁆𑀢𑀺.

𑀅𑀢𑀺𑀧𑀢𑀺𑀇𑀢𑀻𑀦𑀁 𑀢𑀺𑀲𑀤𑁆𑀤𑀲𑁆𑀲𑁂𑀤𑀁 𑀕𑀳𑀡𑀁.

𑀲𑀩𑁆𑀩𑁄 𑀢𑀺𑀇𑀘𑁆𑀘𑁂𑀲𑁄 𑀲𑀤𑁆𑀤𑁄 𑀲𑀭𑁂 𑀧𑀭𑁂 𑀓𑁆𑀯𑀘𑀺 𑀘𑀓𑀸𑀭𑀁 𑀧𑀧𑁆𑀧𑁄𑀢𑀺. 𑀢𑀻𑀢𑀺 𑀦𑀺𑀤𑁆𑀤𑁂𑀲𑀢𑁄 𑀅𑀓𑀢𑀬𑀓𑀸𑀭𑀲𑁆𑀲𑁂𑀯𑀸𑀬𑀁 𑀯𑀺𑀥𑀺, 𑀇𑀢𑀭𑀣𑀸 𑀓𑁆𑀯𑀘𑀺𑀕𑁆𑀕𑀳𑀡𑀲𑁆𑀲 𑀘 ‘‘𑀅𑀢𑀺𑀲𑁆𑀲 𑀘𑀦𑁆𑀢𑀲𑁆𑀲𑀸’’𑀢𑀺𑀲𑀼𑀢𑁆𑀢𑀲𑁆𑀲 𑀘 𑀦𑀺𑀭𑀢𑁆𑀣𑀓𑀢𑀸 𑀲𑀺𑀬𑀸. ‘‘𑀧𑀭𑀤𑁆𑀯𑁂𑀪𑀸𑀯𑁄 𑀞𑀸𑀦𑁂’’𑀢𑀺 𑀤𑁆𑀯𑀺𑀢𑁆𑀢𑀁.

𑀅𑀘𑁆𑀘𑀦𑁆𑀢𑀁 ¶ , 𑀅𑀘𑁆𑀘𑁄𑀤𑀸𑀢𑀸, 𑀧𑀘𑁆𑀘𑀬𑁄, 𑀧𑀘𑁆𑀘𑀸𑀳𑀭𑀢𑀺, 𑀧𑀘𑁆𑀘𑁂𑀢𑀺, 𑀇𑀘𑁆𑀘𑀲𑁆𑀲, 𑀇𑀘𑁆𑀘𑁂𑀢𑀁, 𑀇𑀘𑁆𑀘𑀸𑀤𑀺.

𑀓𑁆𑀯𑀘𑀻𑀢𑀺 𑀓𑀺𑀁? 𑀇𑀢𑀺𑀲𑁆𑀲, 𑀇𑀢𑀺 𑀆𑀓𑀗𑁆𑀔𑀫𑀸𑀦𑁂𑀦.

‘‘𑀢𑁂 𑀦 𑀯𑀸𑀇𑀯𑀡𑁆𑀡𑁂’’𑀢𑀺 𑀇𑀢𑁄 ‘‘𑀦 𑀇𑀯𑀡𑁆𑀡𑁂’’𑀢𑀺 𑀘 𑀯𑀢𑁆𑀢𑀢𑁂.

𑁨𑁩. 𑀅𑀢𑀺𑀲𑁆𑀲 𑀘𑀦𑁆𑀢𑀲𑁆𑀲.

𑀅𑀢𑀺𑀇𑀘𑁆𑀘𑁂𑀢𑀲𑁆𑀲 𑀅𑀦𑁆𑀢𑀪𑀽𑀢𑀲𑁆𑀲 𑀢𑀺𑀲𑀤𑁆𑀤𑀲𑁆𑀲 𑀇𑀯𑀡𑁆𑀡𑁂 𑀧𑀭𑁂 ‘‘𑀲𑀩𑁆𑀩𑁄 𑀘𑀁 𑀢𑀻’’𑀢𑀺 𑀯𑀼𑀢𑁆𑀢𑀭𑀽𑀧𑀁 𑀦 𑀳𑁄𑀢𑀺. 𑀅𑀢𑀺𑀲𑁆𑀲𑀸𑀢𑀺 𑀅𑀢𑀺𑀉𑀧𑀲𑀕𑁆𑀕𑀸𑀦𑀼𑀓𑀭𑀡𑀫𑁂𑀢𑀁. 𑀢𑁂𑀦𑁂𑀯𑁂𑀢𑁆𑀣 𑀯𑀺𑀪𑀢𑁆𑀢𑀺𑀮𑁄𑀧𑀸𑀪𑀸𑀯𑁄. 𑀏𑀢𑁆𑀣 𑀘 𑀅𑀦𑁆𑀢𑀲𑀤𑁆𑀤𑁄 𑀲𑀤𑁆𑀤𑀯𑀺𑀥𑀺𑀦𑀺𑀲𑁂𑀥𑀧𑁆𑀧𑀓𑀭𑀡𑀢𑁄 𑀅𑀢𑀺𑀲𑀤𑁆𑀤𑀦𑁆𑀢𑀪𑀽𑀢𑀁 𑀢𑀺𑀲𑀤𑁆𑀤𑀫𑁂𑀯 𑀯𑀤𑀢𑀺, 𑀦 𑀇𑀯𑀡𑁆𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀇𑀢𑀭𑀣𑀸 𑀇𑀤𑀁 𑀲𑀼𑀢𑁆𑀢𑀫𑁂𑀯 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸.

‘‘𑀇𑀯𑀡𑁆𑀡𑁄 𑀬𑀁 𑀦𑀯𑀸’’𑀢𑀻𑀥, 𑀅𑀲𑀭𑀽𑀧𑀸𑀥𑀺𑀓𑀸𑀭𑀢𑁄;

𑀇𑀯𑀡𑁆𑀡𑀲𑁆𑀲 𑀲𑀭𑀽𑀧𑀲𑁆𑀫𑀺𑀁, 𑀬𑀸𑀤𑁂𑀲𑁄 𑀘 𑀦 𑀲𑀫𑁆𑀪𑀯𑁂.

𑀘𑀓𑀸𑀭𑁄 𑀅𑀦𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄, 𑀢𑁂𑀦 𑀇𑀢𑀺𑀧𑀢𑀻𑀦𑀫𑀦𑁆𑀢𑀲𑁆𑀲 𑀘 𑀦 𑀳𑁄𑀢𑀺. 𑀅𑀢𑀺 𑀇𑀲𑀺𑀕𑀡𑁄 𑀅𑀢𑀻𑀲𑀺𑀕𑀡𑁄, 𑀏𑀯𑀁 𑀅𑀢𑀻𑀢𑁄, 𑀅𑀢𑀻𑀭𑀺𑀢𑀁, 𑀇𑀢𑀻𑀢𑀺, 𑀇𑀢𑀻𑀤𑀁, 𑀧𑀢𑀻𑀢𑁄.

𑀅𑀪𑀺 𑀅𑀓𑁆𑀔𑀸𑀦𑀁, 𑀅𑀪𑀺 𑀉𑀕𑁆𑀕𑀢𑁄, 𑀅𑀪𑀺 𑀑𑀓𑀸𑀲𑁄 𑀇𑀢𑀻𑀥 𑀬𑀓𑀸𑀭𑁂 𑀲𑀫𑁆𑀧𑀢𑁆𑀢𑁂 𑁋

‘‘𑀲𑀭𑁂’’𑀢𑀺 𑀯𑀢𑁆𑀢𑀢𑁂.

𑁨𑁪. 𑀅𑀩𑁆𑀪𑁄 𑀅𑀪𑀺.

𑀅𑀪𑀺𑀇𑀘𑁆𑀘𑁂𑀢𑀲𑁆𑀲 𑀲𑀩𑁆𑀩𑀲𑁆𑀲 𑀲𑀭𑁂 𑀧𑀭𑁂 𑀅𑀩𑁆𑀪𑀸𑀤𑁂𑀲𑁄 𑀳𑁄𑀢𑀺.

‘‘𑀅𑀪𑀻’’𑀢𑀺 𑀧𑀞𑀫𑀦𑁆𑀢𑀲𑁆𑀲, 𑀯𑀼𑀢𑁆𑀢𑀺𑀬𑀁 𑀙𑀝𑁆𑀞𑀺𑀬𑁄𑀚𑀦𑀁;

𑀆𑀤𑁂𑀲𑀸𑀧𑁂𑀓𑁆𑀔𑀢𑁄 𑀯𑀼𑀢𑁆𑀢𑀁, ‘‘𑀅𑀁𑀫𑁄’’𑀢𑀺𑀆𑀤𑀺𑀓𑁂 𑀯𑀺𑀬.

𑀧𑀼𑀩𑁆𑀩𑀲𑁆𑀲𑀭𑀮𑁄𑀧𑁄 ¶ , 𑀅𑀩𑁆𑀪𑀓𑁆𑀔𑀸𑀦𑀁, 𑀅𑀩𑁆𑀪𑀼𑀕𑁆𑀕𑀢𑁄, 𑀅𑀩𑁆𑀪𑁄𑀓𑀸𑀲𑁄.

𑀅𑀥𑀺 𑀅𑀕𑀫𑀸, 𑀅𑀥𑀺 𑀉𑀧𑀕𑀢𑁄, 𑀅𑀥𑀺 𑀑𑀕𑀸𑀳𑁂𑀢𑁆𑀯𑀸 𑀇𑀢𑀻𑀥

𑁨𑁫. 𑀅𑀚𑁆𑀛𑁄 𑀅𑀥𑀺.

𑀅𑀥𑀺𑀇𑀘𑁆𑀘𑁂𑀢𑀲𑁆𑀲 𑀲𑀩𑁆𑀩𑀲𑁆𑀲 𑀲𑀭𑁂 𑀧𑀭𑁂 𑀅𑀚𑁆𑀛𑀸𑀤𑁂𑀲𑁄 𑀳𑁄𑀢𑀺. 𑀅𑀚𑁆𑀛𑀕𑀫𑀸, 𑀅𑀚𑁆𑀛𑀼𑀧𑀕𑀢𑁄, 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸.

𑀅𑀪𑀺 𑀇𑀘𑁆𑀙𑀺𑀢𑀁, 𑀅𑀥𑀺 𑀈𑀭𑀺𑀢𑀁 𑀇𑀢𑀻𑀥

‘‘𑀅𑀩𑁆𑀪𑁄 𑀅𑀪𑀺, 𑀅𑀚𑁆𑀛𑁄 𑀅𑀥𑀻’’𑀢𑀺 𑀘 𑀯𑀢𑁆𑀢𑀢𑁂.

𑁨𑁬. 𑀢𑁂 𑀦 𑀯𑀸 𑀇𑀯𑀡𑁆𑀡𑁂.

𑀢𑁂 𑀘 𑀔𑁄 𑀅𑀪𑀺𑀅𑀥𑀺𑀇𑀘𑁆𑀘𑁂𑀢𑁂 𑀉𑀧𑀲𑀕𑁆𑀕𑀸 𑀇𑀯𑀡𑁆𑀡𑁂 𑀧𑀭𑁂 𑀅𑀩𑁆𑀪𑁄 𑀅𑀚𑁆𑀛𑁄𑀇𑀢𑀺 𑀯𑀼𑀢𑁆𑀢𑀭𑀽𑀧𑀸 𑀦 𑀳𑁄𑀦𑁆𑀢𑀺 𑀯𑀸. 𑀲𑀭𑀮𑁄𑀧𑀧𑀭𑀦𑀬𑀦𑀸𑀦𑀺. 𑀅𑀪𑀺𑀘𑁆𑀙𑀺𑀢𑀁, 𑀅𑀥𑀻𑀭𑀺𑀢𑀁. 𑀯𑀸𑀢𑀺 𑀓𑀺𑀁? 𑀅𑀩𑁆𑀪𑀻𑀭𑀺𑀢𑀁, 𑀅𑀚𑁆𑀛𑀺𑀡𑀫𑀼𑀢𑁆𑀢𑁄, 𑀅𑀚𑁆𑀛𑀺𑀝𑁆𑀞𑁄.

𑀏𑀓𑀫𑀺𑀥 𑀅𑀳𑀦𑁆𑀢𑀻𑀥

𑁨𑁭. 𑀤𑁄 𑀥𑀲𑁆𑀲 𑀘.

𑀥𑀇𑀘𑁆𑀘𑁂𑀢𑀲𑁆𑀲 𑀲𑀭𑁂 𑀧𑀭𑁂 𑀓𑁆𑀯𑀘𑀺 𑀤𑀓𑀸𑀭𑁄 𑀳𑁄𑀢𑀺. 𑀏𑀓𑀲𑀤𑁆𑀤𑀢𑁄 𑀧𑀭𑀲𑁆𑀲 𑀇𑀥𑀲𑁆𑀲 𑀥𑀓𑀸𑀭𑀲𑁆𑀲𑁂𑀯𑀸𑀬𑀁, 𑀲𑀭𑀮𑁄𑀧𑀤𑀻𑀖𑀸. 𑀏𑀓𑀫𑀺𑀤𑀸𑀳𑀁. 𑀓𑁆𑀯𑀘𑀻𑀢𑀺 𑀓𑀺𑀁? 𑀇𑀥𑁂𑀯.

𑀘𑀲𑀤𑁆𑀤𑁂𑀦 𑀓𑁆𑀯𑀘𑀺 𑀲𑀸𑀥𑀼𑀲𑁆𑀲 𑀥𑀲𑁆𑀲 𑀳𑀓𑀸𑀭𑁄, 𑀬𑀣𑀸 𑁋 𑀲𑀸𑀳𑀼 𑀤𑀲𑁆𑀲𑀦𑀁.

𑀬𑀣𑀸 𑀏𑀯 𑀢𑀣𑀸 𑀏𑀯𑀸𑀢𑀻𑀥

‘‘𑀦𑀯𑀸’’𑀢𑀺 𑀯𑀢𑁆𑀢𑀢𑁂, ‘‘𑀲𑀭𑀫𑁆𑀳𑀸’’𑀢𑀺 𑀘.

𑁨𑁮. 𑀏𑀯𑀸𑀤𑀺𑀲𑁆𑀲 ¶ 𑀭𑀺 𑀧𑀼𑀩𑁆𑀩𑁄 𑀘 𑀭𑀲𑁆𑀲𑁄.

𑀬𑀣𑀸𑀢𑀣𑀸𑀤𑁆𑀯𑀬𑀧𑀭𑀲𑁆𑀲𑁂𑀤𑀁 𑀕𑀳𑀡𑀁. 𑀤𑀻𑀖𑀲𑀭𑀫𑁆𑀳𑀸 𑀧𑀭𑀲𑁆𑀲 𑀏𑀯𑀲𑀤𑁆𑀤𑀸𑀤𑀺𑀪𑀽𑀢𑀲𑁆𑀲 𑀏𑀓𑀸𑀭𑀲𑁆𑀲 𑀭𑀺𑀓𑀸𑀭𑁄 𑀳𑁄𑀢𑀺, 𑀧𑀼𑀩𑁆𑀩𑁄 𑀘 𑀲𑀭𑁄 𑀭𑀲𑁆𑀲𑁄 𑀳𑁄𑀢𑀺 𑀦𑀯𑀸. 𑀬𑀣𑀭𑀺𑀯, 𑀢𑀣𑀭𑀺𑀯. 𑀦𑀯𑀸𑀢𑀺 𑀓𑀺𑀁? 𑀬𑀣𑁂𑀯, 𑀢𑀣𑁂𑀯.

𑀢𑀺 𑀅𑀦𑁆𑀢𑀁,𑀢𑀺 𑀅𑀤𑁆𑀥𑀁, 𑀅𑀕𑁆𑀕𑀺 𑀅𑀕𑀸𑀭𑁂, 𑀲𑀢𑁆𑀢𑀫𑀻 𑀅𑀢𑁆𑀣𑁂, 𑀧𑀜𑁆𑀘𑀫𑀻 𑀅𑀦𑁆𑀢𑀁, 𑀤𑀼 𑀅𑀗𑁆𑀕𑀺𑀓𑀁, 𑀪𑀺𑀓𑁆𑀔𑀼 𑀆𑀲𑀦𑁂, 𑀧𑀼𑀣𑀼 𑀆𑀲𑀦𑁂, 𑀲𑀬𑀫𑁆𑀪𑀽 𑀆𑀲𑀦𑁂 𑀇𑀢𑀻𑀥 𑀬𑀯𑀸𑀤𑁂𑀲𑁂𑀲𑀼 𑀲𑀫𑁆𑀧𑀢𑁆𑀢𑁂𑀲𑀼 𑁋

‘‘𑀲𑀜𑁆𑀜𑀸’’𑀢𑀺 𑀯𑀢𑁆𑀢𑀢𑁂.

𑁨𑁯. 𑀇𑀯𑀡𑁆𑀡𑀼𑀯𑀡𑁆𑀡𑀸 𑀛𑀮𑀸.

𑀇𑀯𑀡𑁆𑀡𑀉𑀯𑀡𑁆𑀡𑀇𑀘𑁆𑀘𑁂𑀢𑁂 𑀬𑀣𑀸𑀓𑁆𑀓𑀫𑀁 𑀛𑀮𑀲𑀜𑁆𑀜𑀸 𑀳𑁄𑀦𑁆𑀢𑀺. 𑀯𑀡𑁆𑀡𑀕𑁆𑀕𑀳𑀡𑀁 𑀲𑀯𑀡𑁆𑀡𑀕𑁆𑀕𑀳𑀡𑀢𑁆𑀣𑀁.

𑀛𑀮𑀲𑀜𑁆𑀜𑀸 𑀧𑀲𑀜𑁆𑀜𑀸𑀯, 𑀦 𑀮𑀺𑀗𑁆𑀕𑀦𑁆𑀢𑀁𑀯 𑀦𑀺𑀲𑁆𑀲𑀺𑀢𑀸;

𑀆𑀔𑁆𑀬𑀸𑀢𑁂 𑀮𑀺𑀗𑁆𑀕𑀫𑀚𑁆𑀛𑁂 𑀘, 𑀤𑁆𑀯𑀺𑀮𑀺𑀗𑁆𑀕𑀦𑁆𑀢𑁂 𑀘 𑀤𑀲𑁆𑀲𑀦𑀸.

𑁩𑁦. 𑀛𑀮𑀸𑀦𑀫𑀺𑀬𑀼𑀯𑀸 𑀲𑀭𑁂 𑀯𑀸.

𑀛𑀮𑀇𑀘𑁆𑀘𑁂𑀢𑁂𑀲𑀁 𑀇𑀬𑀉𑀯𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺 𑀯𑀸 𑀲𑀭𑁂 𑀧𑀭𑁂, 𑀲𑀭𑀮𑁄𑀧𑁄.

𑀢𑀺𑀬𑀦𑁆𑀢𑀁, 𑀢𑀺𑀬𑀤𑁆𑀥𑀁, 𑀅𑀕𑁆𑀕𑀺𑀬𑀸𑀕𑀸𑀭𑁂, 𑀲𑀢𑁆𑀢𑀫𑀺𑀬𑀢𑁆𑀣𑁂, 𑀧𑀜𑁆𑀘𑀫𑀺𑀬𑀦𑁆𑀢𑀁, 𑀤𑀼𑀯𑀗𑁆𑀕𑀺𑀓𑀁, 𑀪𑀺𑀓𑁆𑀔𑀼𑀯𑀸𑀲𑀦𑁂, 𑀧𑀼𑀣𑀼𑀯𑀸𑀲𑀦𑁂, 𑀲𑀬𑀫𑁆𑀪𑀼𑀯𑀸𑀲𑀦𑁂. 𑀯𑀸𑀢𑀺 𑀓𑀺𑀁? 𑀅𑀕𑁆𑀬𑀸𑀕𑀸𑀭𑁂, 𑀲𑀢𑁆𑀢𑀫𑀻𑀅𑀢𑁆𑀣𑁂, 𑀪𑀺𑀓𑁆𑀔𑀼𑀆𑀲𑀦𑁂 𑀦𑀺𑀲𑀻𑀤𑀢𑀺.

𑀕𑁄 𑀅𑀚𑀺𑀦𑀁, 𑀕𑁄 𑀏𑀴𑀓𑀁 𑀇𑀢𑀻𑀥

‘‘𑀕𑁄, 𑀅𑀯𑁄, 𑀲𑀫𑀸𑀲𑁂’’𑀢𑀺 𑀘 𑀯𑀢𑁆𑀢𑀢𑁂.

𑁩𑁧. 𑀑 ¶ 𑀲𑀭𑁂 𑀘.

𑀕𑁄𑀇𑀘𑁆𑀘𑁂𑀢𑀲𑁆𑀲 𑀑𑀓𑀸𑀭𑀲𑁆𑀲 𑀲𑀭𑁂 𑀧𑀭𑁂 𑀅𑀯𑀸𑀤𑁂𑀲𑁄 𑀳𑁄𑀢𑀺 𑀲𑀫𑀸𑀲𑁂. 𑀕𑀯𑀸𑀚𑀺𑀦𑀁, 𑀕𑀯𑁂𑀴𑀓𑀁. 𑀘𑀲𑀤𑁆𑀤𑀕𑁆𑀕𑀳𑀡𑁂𑀦 𑀉𑀯𑀡𑁆𑀡𑀲𑁆𑀲 𑀉𑀯𑀅𑀯𑀸𑀤𑁂𑀲𑀸. 𑀬𑀣𑀸 𑁋 𑀪𑀼𑀯𑀺, 𑀧𑀲𑀯𑁄.

𑀧𑀼𑀣 𑀏𑀯𑀸𑀢𑀻𑀥

𑁩𑁨. 𑀕𑁄 𑀲𑀭𑁂 𑀧𑀼𑀣𑀲𑁆𑀲𑀸𑀕𑀫𑁄 𑀓𑁆𑀯𑀘𑀺.

𑀧𑀼𑀣𑀇𑀘𑁆𑀘𑁂𑀢𑀲𑁆𑀲 𑀦𑀺𑀧𑀸𑀢𑀲𑁆𑀲 𑀅𑀦𑁆𑀢𑁂 𑀓𑁆𑀯𑀘𑀺 𑀕𑀓𑀸𑀭𑀸𑀕𑀫𑁄 𑀳𑁄𑀢𑀺 𑀲𑀭𑁂 𑀧𑀭𑁂. 𑀆𑀕𑀘𑁆𑀙𑀢𑀻𑀢𑀺 𑀆𑀕𑀫𑁄, 𑀅𑀲𑀦𑁆𑀢𑀼𑀧𑁆𑀧𑀢𑁆𑀢𑀺 𑀆𑀕𑀫𑁄. 𑀏𑀢𑁆𑀣 𑀘 ‘‘𑀲𑀭𑁂’’𑀢𑀺 𑀦𑀺𑀫𑀺𑀢𑁆𑀢𑀸𑀲𑀦𑁆𑀦𑀯𑀲𑁂𑀦 𑀧𑀼𑀣𑀲𑁆𑀲 𑀅𑀦𑁆𑀢𑁂𑀢𑀺 𑀮𑀩𑁆𑀪𑀢𑀺. 𑀧𑀼𑀣𑀕𑁂𑀯, 𑀧𑀼𑀣 𑀏𑀯.

𑀧𑀸 𑀏𑀯𑀸𑀢𑀻𑀥

‘‘𑀲𑀭𑁂, 𑀕𑁄, 𑀆𑀕𑀫𑁄, 𑀓𑁆𑀯𑀘𑀻’’𑀢𑀺 𑀘 𑀯𑀢𑁆𑀢𑀢𑁂.

𑁩𑁩. 𑀧𑀸𑀲𑁆𑀲 𑀘𑀦𑁆𑀢𑁄 𑀭𑀲𑁆𑀲𑁄.

𑀧𑀸𑀇𑀘𑁆𑀘𑁂𑀢𑀲𑁆𑀲 𑀅𑀦𑁆𑀢𑁂 𑀲𑀭𑁂 𑀧𑀭𑁂 𑀓𑁆𑀯𑀘𑀺 𑀕𑀓𑀸𑀭𑀸𑀕𑀫𑁄 𑀳𑁄𑀢𑀺, 𑀧𑀸𑀲𑁆𑀲 𑀅𑀦𑁆𑀢𑁄 𑀘 𑀲𑀭𑁄 𑀭𑀲𑁆𑀲𑁄 𑀳𑁄𑀢𑀺. 𑀧𑀕𑁂𑀯 𑀯𑀼𑀢𑁆𑀬𑀲𑁆𑀲, 𑀧𑀸 𑀏𑀯.

‘‘𑀯𑀸, 𑀲𑀭𑁂’’𑀢𑀺 𑀘 𑀯𑀢𑁆𑀢𑀢𑁂.

𑁩𑁪. 𑀬𑀯 𑀫 𑀤 𑀦 𑀢 𑀭 𑀮𑀸 𑀘𑀸𑀕𑀫𑀸.

𑀲𑀭𑁂 𑀧𑀭𑁂 𑀬𑀓𑀸𑀭𑀸𑀤𑀬𑁄 𑀅𑀝𑁆𑀞 𑀆𑀕𑀫𑀸 𑀳𑁄𑀦𑁆𑀢𑀺 𑀯𑀸. 𑀘𑀲𑀤𑁆𑀤𑁂𑀦 𑀕𑀓𑀸𑀭𑀸𑀕𑀫𑁄 𑀘, 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄𑀬𑀁 𑀯𑀸𑀲𑀤𑁆𑀤𑁄.

𑀢𑀢𑁆𑀣 ¶ 𑀬𑀓𑀸𑀭𑀸𑀕𑀫𑁄 𑀬𑀣𑀸𑀤𑀺𑀪𑁄 𑀇𑀓𑀸𑀭𑁂𑀓𑀸𑀭𑀸𑀤𑀻𑀲𑀼. 𑀬𑀣𑀸 𑀇𑀤𑀁 𑀬𑀣𑀬𑀺𑀤𑀁, 𑀩𑁆𑀬𑀜𑁆𑀚𑀦𑁂𑀢𑀺 𑀅𑀥𑀺𑀓𑀺𑀘𑁆𑀘 ‘‘𑀭𑀲𑁆𑀲’’𑀦𑁆𑀢𑀺 𑀭𑀲𑁆𑀲𑀢𑁆𑀢𑀁, 𑀬𑀣𑀸 𑀇𑀤𑀁 𑀯𑀸, 𑀬𑀣𑀸 𑀏𑀯, 𑀬𑀣𑀸𑀬𑁂𑀯, 𑀬𑀣𑁂𑀯, 𑀏𑀯𑀁 𑀫𑀸𑀬𑀺𑀤𑀁, 𑀫𑀸𑀬𑁂𑀯𑀁, 𑀢𑀁𑀬𑀺𑀤𑀁, 𑀢𑀁𑀬𑁂𑀯, 𑀦𑀬𑀺𑀤𑀁, 𑀦𑀬𑀺𑀫𑀲𑁆𑀲, 𑀦𑀬𑀺𑀫𑀸𑀦𑀺, 𑀦𑀯𑀬𑀺𑀫𑁂 𑀥𑀫𑁆𑀫𑀸, 𑀩𑀼𑀤𑁆𑀥𑀸𑀦𑀁𑀬𑁂𑀯, 𑀲𑀦𑁆𑀢𑀺𑀬𑁂𑀯, 𑀩𑁄𑀥𑀺𑀬𑀸𑀬𑁂𑀯, 𑀲𑀢𑀺𑀬𑁂𑀯, 𑀧𑀣𑀯𑀻𑀬𑁂𑀯, 𑀥𑀸𑀢𑀼𑀬𑁂𑀯, 𑀢𑁂𑀲𑀼𑀬𑁂𑀯, 𑀲𑁄𑀬𑁂𑀯, 𑀧𑀸𑀝𑀺𑀬𑁂𑀓𑁆𑀓𑀁.

𑀢𑀣𑀸 𑀲𑀭𑁂 𑀯𑀺𑀧𑀭𑀺𑀬𑀸𑀤𑀺𑀢𑁄 𑀘. 𑀯𑀺 𑀅𑀜𑁆𑀚𑀦𑀸 𑀯𑀺𑀬𑀜𑁆𑀚𑀦𑀸, 𑀩𑁆𑀬𑀜𑁆𑀚𑀦𑀸 𑀯𑀸, 𑀏𑀯𑀁 𑀯𑀺𑀬𑀸𑀓𑀸𑀲𑀺, 𑀩𑁆𑀬𑀸𑀓𑀸𑀲𑀺. 𑀧𑀭𑀺𑀅𑀦𑁆𑀢𑀁 𑀧𑀭𑀺𑀬𑀦𑁆𑀢𑀁, 𑀏𑀯𑀁 𑀧𑀭𑀺𑀬𑀸𑀤𑀸𑀦𑀁, 𑀧𑀭𑀺𑀬𑀼𑀝𑁆𑀞𑀸𑀦𑀁, 𑀧𑀭𑀺𑀬𑁂𑀲𑀢𑀺, 𑀧𑀭𑀺𑀬𑁄𑀲𑀸𑀦𑀫𑀺𑀢𑀺 𑀦𑀺𑀘𑁆𑀘𑀁. 𑀦𑀺 𑀆𑀬𑁄𑀕𑁄 𑀦𑀺𑀬𑀸𑀬𑁄𑀕𑁄. 𑀇𑀥 𑀦 𑀪𑀯𑀢𑀺, 𑀧𑀭𑀺𑀓𑁆𑀔𑀢𑁄, 𑀉𑀧𑀧𑀭𑀺𑀓𑁆𑀔𑀢𑀺.

𑀯𑀓𑀸𑀭𑁄 𑀢𑀺𑀲𑀤𑁆𑀤𑀸𑀤𑀺𑀢𑁄 𑀅𑀯𑀡𑁆𑀡𑀼𑀓𑀸𑀭𑁂𑀲𑀼. 𑀢𑀺 𑀅𑀗𑁆𑀕𑀼𑀮𑀁 𑀢𑀺𑀯𑀗𑁆𑀕𑀼𑀮𑀁, 𑀏𑀯𑀁 𑀢𑀺𑀯𑀗𑁆𑀕𑀺𑀓𑀁, 𑀪𑀽𑀯𑀸𑀤𑀬𑁄, 𑀫𑀺𑀕𑀻 𑀪𑀦𑁆𑀢𑀸 𑀯𑀼𑀤𑀺𑀓𑁆𑀔𑀢𑀺, 𑀧𑀯𑀼𑀘𑁆𑀘𑀢𑀺, 𑀧𑀸𑀕𑀼𑀜𑁆𑀜𑀯𑀼𑀚𑀼𑀢𑀸.

𑀫𑀓𑀸𑀭𑁄 𑀮𑀳𑀼𑀧𑁆𑀧𑀪𑀼𑀢𑀺𑀢𑁄 𑀲𑀭𑁂 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀸𑀤𑀺𑀫𑁆𑀳𑀺. 𑀮𑀳𑀼 𑀏𑀲𑁆𑀲𑀢𑀺 𑀮𑀳𑀼𑀫𑁂𑀲𑁆𑀲𑀢𑀺, 𑀏𑀯𑀁 𑀕𑀭𑀼𑀫𑁂𑀲𑁆𑀲𑀢𑀺, 𑀇𑀥𑀫𑀸𑀳𑀼, 𑀓𑁂𑀦 𑀢𑁂 𑀇𑀥 𑀫𑀺𑀚𑁆𑀛𑀢𑀺, 𑀪𑀤𑁆𑀭𑁄 𑀓𑀲𑀸𑀫𑀺𑀯, 𑀆𑀓𑀸𑀲𑁂 𑀫𑀪𑀺𑀧𑀽𑀚𑀬𑀺, 𑀏𑀓𑀫𑁂𑀓𑀲𑁆𑀲, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁂, 𑀆𑀲𑀢𑀺𑀫𑁂𑀯.

𑀤𑀓𑀸𑀭𑁄 ¶ 𑀉𑀉𑀧𑀲𑀕𑁆𑀕 𑀲𑀓𑀺 𑀓𑁂𑀦𑀘𑀺 𑀓𑀺𑀜𑁆𑀘𑀺 𑀓𑀺𑀲𑁆𑀫𑀺𑀜𑁆𑀘𑀺 𑀓𑁄𑀘𑀺 𑀲𑀫𑁆𑀫𑀸 𑀬𑀸𑀯 𑀢𑀸𑀯 𑀧𑀼𑀦 𑀬 𑀢𑁂’𑀢𑀢𑁆𑀢𑀲𑀸𑀤𑀻𑀳𑀺. 𑀉𑀉𑀧𑀲𑀕𑁆𑀕𑀢𑁄 𑀦𑀺𑀘𑁆𑀘𑀁, 𑀉 𑀅𑀕𑁆𑀕𑁄 𑀉𑀤𑀕𑁆𑀕𑁄, 𑀏𑀯𑀁 𑀉𑀤𑀬𑁄, 𑀉𑀤𑀧𑀸𑀤𑀺, 𑀉𑀤𑀸𑀳𑀝𑀁, 𑀉𑀤𑀺𑀢𑁄, 𑀉𑀤𑀻𑀭𑀺𑀢𑀁, 𑀉𑀤𑁂𑀢𑀺.

𑀦𑀺𑀧𑀸𑀢𑀢𑁄 𑀘, 𑀲𑀓𑀺 𑀏𑀯 𑀲𑀓𑀺𑀤𑁂𑀯, 𑀏𑀯𑀁 𑀲𑀓𑀤𑀸𑀕𑀸𑀫𑀺, 𑀫𑀳𑀸𑀯𑀼𑀢𑁆𑀢𑀺𑀲𑀼𑀢𑁆𑀢𑁂𑀦 𑀇𑀓𑀸𑀭𑀲𑁆𑀲 𑀅𑀓𑀸𑀭𑁄. 𑀢𑀣𑀸 𑀓𑁂𑀦𑀘𑀺𑀤𑁂𑀯, 𑀓𑀺𑀜𑁆𑀘𑀺𑀤𑁂𑀯, 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯, 𑀓𑁄𑀘𑀺𑀤𑁂𑀯, 𑀲𑀫𑁆𑀫𑀸 𑀅𑀢𑁆𑀣𑁄 𑀲𑀫𑁆𑀫𑀤𑀢𑁆𑀣𑁄, 𑀭𑀲𑁆𑀲𑀢𑁆𑀢𑀁. 𑀏𑀯𑀁 𑀲𑀫𑁆𑀫𑀤𑀓𑁆𑀔𑀸𑀢𑁄, 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑀸𑀦𑀁, 𑀲𑀫𑁆𑀫𑀤𑁂𑀯, 𑀬𑀸𑀯𑀤𑀢𑁆𑀣𑀁, 𑀬𑀸𑀯𑀤𑁂𑀯, 𑀢𑀸𑀯𑀤𑁂𑀯, 𑀧𑀼𑀦𑀤𑁂𑀯.

𑀦𑀸𑀫𑀢𑁄, 𑀬𑀤𑀢𑁆𑀣𑀁, 𑀢𑀤𑀢𑁆𑀣𑀁, 𑀬𑀤𑀦𑁆𑀢𑀭𑀸, 𑀢𑀤𑀦𑁆𑀢𑀭𑀸, 𑀢𑀤𑀗𑁆𑀕𑀯𑀺𑀫𑀼𑀢𑁆𑀢𑀺, 𑀏𑀢𑀤𑀢𑁆𑀣𑀁, 𑀅𑀢𑁆𑀢𑀤𑀢𑁆𑀣𑀁, 𑀲𑀤𑀢𑁆𑀣𑀧𑀲𑀼𑀢𑁄 𑀲𑀺𑀬𑀸. 𑀬𑀢𑁂𑀢𑀢𑁆𑀢𑀲𑁂𑀳𑀺 𑀲𑀫𑀸𑀲𑁂𑀬𑁂𑀯.

𑀆𑀤𑀺𑀲𑀤𑁆𑀤𑁂𑀦 𑀅𑀜𑁆𑀜𑀤𑀢𑁆𑀣𑀁, 𑀫𑀦𑀲𑀸𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑀸𑀦𑀁, 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁, 𑀅𑀳𑀼𑀤𑁂𑀯 𑀪𑀬𑀁.

𑀯𑀸𑀢𑀺 𑀓𑀺𑀁? 𑀓𑁂𑀦𑀘𑀺 𑀅𑀢𑁆𑀣𑀓𑀸𑀫𑁂𑀦, 𑀲𑀫𑁆𑀫𑀸 𑀅𑀜𑁆𑀜𑀸𑀬, 𑀬𑀸𑀯𑀸𑀳𑀁, 𑀢𑀸𑀯𑀸𑀳𑀁, 𑀧𑀼𑀦𑀸𑀧𑀭𑀁, 𑀅𑀢𑁆𑀢𑀢𑁆𑀣𑀁.

𑀦𑀓𑀸𑀭𑁄 𑀆𑀬𑀢𑀸𑀤𑀺𑀫𑁆𑀳𑀺. 𑀇𑀢𑁄 𑀆𑀬𑀢𑀺 𑀇𑀢𑁄 𑀦𑀸𑀬𑀢𑀺, 𑀘𑀺𑀭𑀁 𑀦𑀸𑀬𑀢𑀺.

𑀢𑀓𑀸𑀭𑁄 𑀬𑀲𑁆𑀫𑀸 𑀢𑀲𑁆𑀫𑀸 𑀅𑀚𑁆𑀚𑀸𑀤𑀺𑀢𑁄 𑀇𑀳𑀕𑁆𑀕𑀸𑀤𑀺𑀫𑁆𑀳𑀺. 𑀬𑀲𑁆𑀫𑀸𑀢𑀺𑀳, 𑀢𑀲𑁆𑀫𑀸𑀢𑀺𑀳, 𑀅𑀚𑁆𑀚𑀢𑀕𑁆𑀕𑁂.

𑀭𑀓𑀸𑀭𑁄 ¶ 𑀦𑀺 𑀤𑀼𑀧𑀸𑀢𑀼 𑀧𑀼𑀦 𑀥𑀻 𑀧𑀸𑀢 𑀘𑀢𑀼𑀭𑀸𑀤𑀺𑀢𑁄. 𑀦𑀺 𑀅𑀦𑁆𑀢𑀭𑀁 𑀦𑀺𑀭𑀦𑁆𑀢𑀭𑀁, 𑀏𑀯𑀁 𑀦𑀺𑀭𑀸𑀮𑀬𑁄, 𑀦𑀺𑀭𑀺𑀦𑁆𑀥𑀦𑁄, 𑀦𑀺𑀭𑀻𑀳𑀓𑀁, 𑀦𑀺𑀭𑀼𑀢𑁆𑀢𑀭𑁄, 𑀦𑀺𑀭𑁄𑀚𑀁. 𑀤𑀼 𑀅𑀢𑀺𑀓𑁆𑀓𑀫𑁄 𑀤𑀼𑀭𑀢𑀺𑀓𑁆𑀓𑀫𑁄, 𑀤𑀼𑀭𑀸𑀕𑀢𑀁, 𑀤𑀼𑀭𑀼𑀢𑁆𑀢𑀁. 𑀧𑀸𑀢𑀼𑀭𑀳𑁄𑀲𑀺, 𑀧𑀸𑀢𑀼𑀭𑀳𑁂𑀲𑀼𑀁. 𑀧𑀼𑀦𑀭𑀸𑀕𑀘𑁆𑀙𑁂𑀬𑁆𑀬, 𑀧𑀼𑀦𑀭𑀼𑀢𑁆𑀢𑀁, 𑀧𑀼𑀦𑀭𑁂𑀯, 𑀧𑀼𑀦𑀭𑁂𑀢𑀺. 𑀥𑀺𑀭𑀢𑁆𑀣𑀼. 𑀧𑀸𑀢𑀭𑀸𑀲𑁄.

𑀘𑀢𑀼𑀲𑀤𑁆𑀤𑀸𑀤𑀺𑀢𑁄, 𑀘𑀢𑀼𑀭𑀗𑁆𑀕𑀺𑀓𑀁, 𑀘𑀢𑀼𑀭𑀸𑀭𑀓𑁆𑀔𑀸, 𑀘𑀢𑀼𑀭𑀺𑀤𑁆𑀥𑀺𑀧𑀸𑀤𑀧𑀝𑀺𑀮𑀸𑀪𑁄, 𑀘𑀢𑀼𑀭𑁄𑀖𑀦𑀺𑀢𑁆𑀣𑀭𑀡𑀢𑁆𑀣𑀁. 𑀪𑀢𑁆𑀢𑀼𑀭𑀢𑁆𑀣𑁂, 𑀯𑀼𑀢𑁆𑀢𑀺𑀭𑁂𑀲𑀸, 𑀧𑀣𑀯𑀻𑀥𑀸𑀢𑀼𑀭𑁂𑀯𑁂𑀲𑀸.

𑀢𑀣𑀸 𑀲𑀭𑀢𑁄 𑀇𑀯𑁂𑀯𑁂𑀲𑀼 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑁂. 𑀦𑀓𑁆𑀔𑀢𑁆𑀢𑀭𑀸𑀚𑀸𑀭𑀺𑀯 𑀢𑀸𑀭𑀓𑀸𑀦𑀁, 𑀯𑀺𑀚𑁆𑀚𑀼𑀭𑀺𑀯𑀩𑁆𑀪𑀓𑀽𑀝𑁂, 𑀆𑀭𑀕𑁆𑀕𑁂𑀭𑀺𑀯 𑀲𑀸𑀲𑀧𑁄, 𑀲𑀸𑀲𑀧𑁄𑀭𑀺𑀯 𑀆𑀭𑀕𑁆𑀕𑁂, 𑀉𑀲𑀪𑁄𑀭𑀺𑀯, 𑀲𑀩𑁆𑀪𑀺𑀭𑁂𑀯 𑀲𑀫𑀸𑀲𑁂𑀣.

𑀯𑀸𑀢𑀺 𑀓𑀺𑀁? 𑀤𑁆𑀯𑀸𑀥𑀺𑀝𑁆𑀞𑀺𑀢𑀁, 𑀧𑀸𑀢𑁆𑀯𑀸𑀓𑀸𑀲𑀺, 𑀧𑀼𑀦𑀧𑀺.

𑀮𑀓𑀸𑀭𑁄 𑀙𑀲𑀗𑁆𑀔𑁆𑀬𑀸𑀳𑀺. 𑀮𑀴𑀸𑀦𑀫𑀯𑀺𑀲𑁂𑀲𑁄. 𑀙 𑀅𑀪𑀺𑀜𑁆𑀜𑀸 𑀙𑀴𑀪𑀺𑀜𑁆𑀜𑀸, 𑀙𑀴𑀗𑁆𑀕𑀁, 𑀙𑀴𑀸𑀲𑀻𑀢𑀺, 𑀙𑀴𑀁𑀲𑀸, 𑀲𑀴𑀸𑀬𑀢𑀦𑀁.

𑀯𑀸𑀢𑀺 𑀓𑀺𑀁? 𑀙 𑀅𑀪𑀺𑀜𑁆𑀜𑀸.

𑀇𑀢𑀺 𑀲𑀭𑀲𑀦𑁆𑀥𑀺𑀯𑀺𑀥𑀸𑀦𑀁 𑀦𑀺𑀝𑁆𑀞𑀺𑀢𑀁.

𑀇𑀢𑁆𑀣𑀺𑀮𑀺𑀗𑁆𑀕

𑀅𑀣 ¶ 𑀇𑀢𑁆𑀣𑀺𑀮𑀺𑀗𑁆𑀕𑀸𑀦𑀺 𑀯𑀼𑀘𑁆𑀘𑀦𑁆𑀢𑁂.

𑀅𑀓𑀸𑀭𑀦𑁆𑀢𑁄 𑀇𑀢𑁆𑀣𑀺𑀮𑀺𑀗𑁆𑀕𑀲𑀤𑁆𑀤𑁄 𑀅𑀧𑁆𑀧𑀲𑀺𑀤𑁆𑀥𑁄.

𑀆𑀓𑀸𑀭𑀦𑁆𑀢𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 𑀓𑀜𑁆𑀜𑀸𑀲𑀤𑁆𑀤𑁄. ‘‘𑀓𑀜𑁆𑀜’’𑀇𑀢𑀺 𑀞𑀺𑀢𑁂 𑁋

𑁧𑁭𑁬. 𑀇𑀢𑁆𑀣𑀺𑀬𑀫𑀢𑁄 𑀆𑀧𑁆𑀧𑀘𑁆𑀘𑀬𑁄.

𑀇𑀢𑁆𑀣𑀺𑀬𑀁 𑀯𑀢𑁆𑀢𑀫𑀸𑀦𑀸 𑀅𑀓𑀸𑀭𑀦𑁆𑀢𑀢𑁄 𑀮𑀺𑀗𑁆𑀕𑀫𑁆𑀳𑀸 𑀧𑀭𑁄 𑀆𑀧𑁆𑀧𑀘𑁆𑀘𑀬𑁄 𑀳𑁄𑀢𑀺.

𑀧𑀓𑀢𑁆𑀬𑀢𑁆𑀣𑀚𑁄𑀢𑀓𑀸 𑀇𑀢𑁆𑀣𑀺-𑀧𑁆𑀧𑀘𑁆𑀘𑀬𑀸 𑀲𑁆𑀬𑀸𑀤𑀬𑁄 𑀯𑀺𑀬;

𑀡𑀸𑀤𑀬𑁄 𑀧𑀘𑁆𑀘𑀬𑀢𑁆𑀣𑀲𑁆𑀲, 𑀲𑀓𑀢𑁆𑀣𑀲𑁆𑀲𑀸𑀧𑀺 𑀯𑀸𑀘𑀓𑀸.

‘‘𑀲𑀭𑀮𑁄𑀧𑁄’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑀲𑁆𑀲𑀭𑁂 𑀮𑀼𑀢𑁆𑀢𑁂, 𑀧𑀭𑀦𑀬𑀦𑁂 𑀘 𑀓𑀢𑁂 ‘‘𑀥𑀸𑀢𑀼𑀧𑁆𑀧𑀘𑁆𑀘𑀬𑀯𑀺𑀪𑀢𑁆𑀢𑀺𑀯𑀚𑁆𑀚𑀺𑀢𑀫𑀢𑁆𑀣𑀯𑀁 𑀮𑀺𑀗𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸𑀯 𑀧𑀘𑁆𑀘𑀬𑀦𑁆𑀢𑀲𑁆𑀲𑀸𑀧𑀺 𑀅𑀮𑀺𑀗𑁆𑀕𑀢𑁆𑀢𑀸 𑀯𑀺𑀪𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀫𑀲𑀫𑁆𑀧𑀢𑁆𑀢𑀸𑀬𑀁 ‘‘𑀢𑀤𑁆𑀥𑀺𑀢𑀲𑀫𑀸𑀲𑀓𑀺𑀢𑀓𑀸 𑀦𑀸𑀫𑀁 𑀯𑀸’𑀢𑀯𑁂𑀢𑀼𑀦𑀸𑀤𑀻𑀲𑀼 𑀘𑀸’’𑀢𑀺 𑀏𑀢𑁆𑀣 𑀯𑀕𑁆𑀕𑀳𑀡𑁂𑀦 𑀇𑀢𑁆𑀣𑀺𑀧𑁆𑀧𑀘𑁆𑀘𑀬𑀦𑁆𑀢𑀲𑁆𑀲𑀸𑀧𑀺 𑀦𑀸𑀫𑀩𑁆𑀬𑀧𑀤𑁂𑀲𑁄. 𑀧𑀼𑀭𑁂 𑀯𑀺𑀬 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺, ‘‘𑀲𑁂𑀲𑀢𑁄 𑀮𑁄𑀧𑀁 𑀕𑀲𑀺𑀧𑀻’’𑀢𑀺 𑀲𑀺𑀮𑁄𑀧𑁄. 𑀲𑀸 𑀓𑀜𑁆𑀜𑀸.

𑀩𑀳𑀼𑀯𑀘𑀦𑁂 ‘‘𑀆𑀮𑀧𑀦𑁂 𑀲𑀺 𑀕𑀲𑀜𑁆𑀜𑁄’’𑀢𑀺 𑀇𑀢𑁄 ‘‘𑀲𑀜𑁆𑀜𑁄’’, ‘‘𑀢𑁂 𑀇𑀢𑁆𑀣𑀺𑀔𑁆𑀬𑀸 𑀧𑁄’’𑀢𑀺 𑀇𑀢𑁄 ‘‘𑀇𑀢𑁆𑀣𑀺𑀔𑁆𑀬𑀸’’𑀢𑀺 𑀘 𑀯𑀢𑁆𑀢𑀢𑁂.

𑁧𑁭𑁭. 𑀆 𑀖𑁄.

𑀮𑀺𑀗𑁆𑀕𑀲𑁆𑀲𑀦𑁆𑀢𑁄 𑀆𑀓𑀸𑀭𑁄 𑀬𑀤𑀸 𑀇𑀢𑁆𑀣𑀺𑀔𑁆𑀬𑁄, 𑀢𑀤𑀸 𑀖𑀲𑀜𑁆𑀜𑁄 𑀳𑁄𑀢𑀻𑀢𑀺 𑀖𑀲𑀜𑁆𑀜𑀸𑀬𑀁 ‘‘𑀖𑀧𑀢𑁄 𑀘 𑀬𑁄𑀦𑀁 𑀮𑁄𑀧𑁄’’𑀢𑀺 ¶ 𑀯𑀺𑀓𑀧𑁆𑀧𑁂𑀦 𑀬𑁄𑀮𑁄𑀧𑁄. 𑀢𑀸 𑀓𑀜𑁆𑀜𑀸 𑀓𑀜𑁆𑀜𑀸𑀬𑁄.

𑀆𑀮𑀧𑀦𑁂 ‘‘𑀲𑀔𑀢𑁄 𑀕𑀲𑁆𑀲𑁂 𑀯𑀸’’𑀢𑀺 𑀇𑀢𑁄 ‘‘𑀕𑀲𑁆𑀲𑀸’’𑀢𑀺 𑀯𑀢𑁆𑀢𑀢𑁂.

𑁧𑁭𑁮. 𑀖𑀢𑁂 𑀘.

𑀖𑀢𑁄 𑀧𑀭𑀲𑁆𑀲 𑀕𑀲𑁆𑀲 𑀏𑀓𑀸𑀭𑁄 𑀳𑁄𑀢𑀺, 𑀲𑀭𑀮𑁄𑀧𑀸𑀤𑀺. 𑀪𑁄𑀢𑀺 𑀓𑀜𑁆𑀜𑁂, 𑀪𑁄𑀢𑀺𑀬𑁄 𑀓𑀜𑁆𑀜𑀸 𑀓𑀜𑁆𑀜𑀸𑀬𑁄.

𑀅𑀁𑀫𑁆𑀳𑀺 𑀲𑀭𑀮𑁄𑀧𑀧𑀓𑀢𑀺𑀪𑀸𑀯𑀸 𑀓𑀜𑁆𑀜𑀁, 𑀓𑀜𑁆𑀜𑀸 𑀓𑀜𑁆𑀜𑀸𑀬𑁄.

𑀢𑀢𑀺𑀬𑀸𑀤𑀻𑀲𑀼 ‘‘𑀆𑀬 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀢𑀽’’𑀢𑀺 𑀇𑀢𑁄 ‘‘𑀆𑀬𑁄, 𑀏𑀓𑀯𑀘𑀦𑀸𑀦’’𑀦𑁆𑀢𑀺 𑀘 𑀯𑀢𑁆𑀢𑀢𑁂.

𑁧𑁭𑁯. 𑀖𑀢𑁄 𑀦𑀸𑀤𑀻𑀦𑀁.

𑀖𑀲𑀜𑁆𑀜𑀢𑁄 𑀮𑀺𑀗𑁆𑀕𑀲𑁆𑀲𑀸𑀓𑀸𑀭𑀸 𑀧𑀭𑁂𑀲𑀁 𑀦𑀸𑀤𑀻𑀦𑀁 𑀲𑁆𑀫𑀺𑀁𑀧𑀭𑀺𑀬𑀦𑁆𑀢𑀸𑀦𑀁 𑀏𑀓𑀯𑀘𑀦𑀸𑀦𑀁 𑀯𑀺𑀪𑀢𑁆𑀢𑀺𑀕𑀡𑀸𑀦𑀁 𑀆𑀬𑀸𑀤𑁂𑀲𑁄 𑀳𑁄𑀢𑀺. 𑀲𑀭𑀮𑁄𑀧𑀧𑀭𑀦𑀬𑀦𑀸𑀦𑀺. 𑀓𑀜𑁆𑀜𑀸𑀬, 𑀓𑀜𑁆𑀜𑀸𑀳𑀺 𑀓𑀜𑁆𑀜𑀸𑀪𑀺, 𑀓𑀜𑁆𑀜𑀸𑀬, 𑀓𑀜𑁆𑀜𑀸𑀦𑀁, 𑀓𑀜𑁆𑀜𑀸𑀬, 𑀓𑀜𑁆𑀜𑀸𑀳𑀺 𑀓𑀜𑁆𑀜𑀸𑀪𑀺, 𑀓𑀜𑁆𑀜𑀸𑀬, 𑀓𑀜𑁆𑀜𑀸𑀦𑀁.

𑀲𑁆𑀫𑀺𑀁𑀫𑁆𑀳𑀺 𑁋

𑁧𑁮𑁦. 𑀖𑀧𑀢𑁄 𑀲𑁆𑀫𑀺𑀁 𑀬𑀁 𑀯𑀸.

𑀖𑀧𑀢𑁄 𑀧𑀭𑀲𑁆𑀲 𑀲𑁆𑀫𑀺𑀁𑀯𑀘𑀦𑀲𑁆𑀲 𑀬𑀁 𑀳𑁄𑀢𑀺 𑀯𑀸, 𑀅𑀜𑁆𑀜𑀢𑁆𑀣𑀸𑀬𑀸𑀤𑁂𑀲𑁄. 𑀓𑀜𑁆𑀜𑀸𑀬𑀁 𑀓𑀜𑁆𑀜𑀸𑀬, 𑀓𑀜𑁆𑀜𑀸𑀲𑀼.

𑀏𑀯𑀫𑀜𑁆𑀜𑁂𑀧𑀺 𑁋

𑀲𑀤𑁆𑀥𑀸 𑀫𑁂𑀥𑀸 𑀧𑀜𑁆𑀜𑀸 𑀯𑀺𑀚𑁆𑀚𑀸, 𑀘𑀺𑀦𑁆𑀢𑀸 𑀫𑀦𑁆𑀢𑀸 𑀯𑀻𑀡𑀸 𑀢𑀡𑁆𑀳𑀸;

𑀇𑀘𑁆𑀙𑀸 𑀫𑀼𑀘𑁆𑀙𑀸 𑀏𑀚𑀸 𑀫𑀸𑀬𑀸, 𑀫𑁂𑀢𑁆𑀢𑀸 𑀫𑀢𑁆𑀢𑀸 𑀲𑀺𑀓𑁆𑀔𑀸 𑀪𑀺𑀓𑁆𑀔𑀸.

𑀚𑀗𑁆𑀖𑀸 ¶ 𑀕𑀻𑀯𑀸 𑀚𑀺𑀯𑁆𑀳𑀸 𑀯𑀸𑀘𑀸,

𑀙𑀸𑀬𑀸 𑀆𑀲𑀸 𑀕𑀗𑁆𑀕𑀸 𑀦𑀸𑀯𑀸;

𑀕𑀸𑀣𑀸 𑀲𑁂𑀦𑀸 𑀮𑁂𑀔𑀸 𑀲𑀸𑀮𑀸,

𑀫𑀸𑀮𑀸 𑀯𑁂𑀮𑀸 𑀧𑀽𑀚𑀸 𑀔𑀺𑀟𑁆𑀟𑀸.

𑀧𑀺𑀧𑀸𑀲𑀸 𑀯𑁂𑀤𑀦𑀸 𑀲𑀜𑁆𑀜𑀸, 𑀘𑁂𑀢𑀦𑀸 𑀢𑀲𑀺𑀡𑀸 𑀧𑀚𑀸;

𑀤𑁂𑀯𑀢𑀸 𑀯𑀝𑁆𑀝𑀓𑀸 𑀕𑁄𑀥𑀸, 𑀩𑀮𑀸𑀓𑀸 𑀧𑀭𑀺𑀲𑀸 𑀲𑀪𑀸.

𑀊𑀓𑀸𑀲𑁂𑀨𑀸𑀮𑀺𑀓𑀸 𑀮𑀗𑁆𑀓𑀸, 𑀲𑀮𑀸𑀓𑀸 𑀯𑀸𑀮𑀺𑀓𑀸 𑀲𑀺𑀔𑀸;

𑀯𑀺𑀲𑀸𑀔𑀸 𑀯𑀺𑀲𑀺𑀔𑀸 𑀲𑀸𑀔𑀸, 𑀯𑀘𑀸 𑀯𑀜𑁆𑀛𑀸 𑀚𑀝𑀸 𑀖𑀝𑀸.

𑀚𑁂𑀝𑁆𑀞𑀸 𑀲𑁄𑀡𑁆𑀟𑀸 𑀯𑀺𑀢𑀡𑁆𑀟𑀸 𑀘, 𑀓𑀭𑀼𑀡𑀸 𑀯𑀦𑀺𑀢𑀸 𑀮𑀢𑀸;

𑀓𑀣𑀸 𑀦𑀺𑀤𑁆𑀤𑀸 𑀲𑀼𑀥𑀸 𑀭𑀸𑀥𑀸, 𑀯𑀸𑀲𑀦𑀸 𑀲𑀺𑀁𑀲𑀧𑀸 𑀧𑀧𑀸.

𑀧𑀪𑀸 𑀲𑀻𑀫𑀸 𑀔𑀫𑀸 𑀚𑀸𑀬𑀸,

𑀔𑀢𑁆𑀢𑀺𑀬𑀸 𑀲𑀓𑁆𑀔𑀭𑀸 𑀲𑀼𑀭𑀸;

𑀤𑁄𑀮𑀸 𑀢𑀼𑀮𑀸 𑀲𑀺𑀮𑀸 𑀮𑀻𑀮𑀸,

𑀮𑀸𑀮𑁂’𑀮𑀸 𑀫𑁂𑀔𑀮𑀸 𑀓𑀮𑀸.

𑀯𑀴𑀯𑀸’𑀮𑀫𑁆𑀩𑀼𑀲𑀸 𑀫𑀽𑀲𑀸, 𑀫𑀜𑁆𑀚𑀽𑀲𑀸 𑀲𑀼𑀮𑀲𑀸 𑀤𑀺𑀲𑀸;

𑀦𑀸𑀲𑀸 𑀚𑀼𑀡𑁆𑀳𑀸 𑀕𑀼𑀳𑀸 𑀈𑀳𑀸, 𑀮𑀲𑀺𑀓𑀸 𑀯𑀲𑀼𑀥𑀸𑀤𑀬𑁄.

𑀅𑀫𑁆𑀫𑀸𑀤𑀻𑀦𑀁 𑀆𑀮𑀧𑀦𑁂𑀯 𑀭𑀽𑀧𑀪𑁂𑀤𑁄. 𑀅𑀫𑁆𑀫𑀸, 𑀅𑀫𑁆𑀫𑀸 𑀅𑀫𑁆𑀫𑀸𑀬𑁄.

𑀕𑀲𑁆𑀲 ‘‘𑀖𑀢𑁂 𑀘𑀸’’𑀢𑀺 𑀏𑀓𑀸𑀭𑁂 𑀲𑀫𑁆𑀧𑀢𑁆𑀢𑁂 𑁋

𑁧𑁮𑁧. 𑀦 𑀅𑀫𑁆𑀫𑀸𑀤𑀺𑀢𑁄.

𑀅𑀫𑁆𑀫𑀸 𑀅𑀦𑁆𑀦𑀸𑀇𑀘𑁆𑀘𑁂𑀯𑀫𑀸𑀤𑀺𑀢𑁄 𑀧𑀭𑀲𑁆𑀲 𑀕𑀲𑁆𑀲 𑀆𑀮𑀧𑀦𑁂𑀓𑀯𑀘𑀦𑀲𑁆𑀲 𑀦 𑀏𑀓𑀸𑀭𑀢𑁆𑀢𑀁 𑀳𑁄𑀢𑀺. ‘‘𑀆𑀓𑀸𑀭𑁄 𑀯𑀸’’𑀢𑀺 𑀭𑀲𑁆𑀲𑀢𑁆𑀢𑀁.

𑀪𑁄𑀢𑀺 𑀅𑀫𑁆𑀫 𑀪𑁄𑀢𑀺 𑀅𑀫𑁆𑀫𑀸, 𑀪𑁄𑀢𑀺𑀬𑁄 𑀅𑀫𑁆𑀫𑀸 𑀅𑀫𑁆𑀫𑀸𑀬𑁄. 𑀏𑀯𑀁 𑀅𑀦𑁆𑀦𑀸, 𑀅𑀦𑁆𑀦𑀸 𑀅𑀦𑁆𑀦𑀸𑀬𑁄, 𑀪𑁄𑀢𑀺 𑀅𑀦𑁆𑀦 𑀪𑁄𑀢𑀺 𑀅𑀦𑁆𑀦𑀸, 𑀪𑁄𑀢𑀺𑀬𑁄 𑀅𑀦𑁆𑀦𑀸 𑀅𑀦𑁆𑀦𑀸𑀬𑁄. 𑀅𑀫𑁆𑀩𑀸 ¶ , 𑀅𑀫𑁆𑀩𑀸 𑀅𑀫𑁆𑀩𑀸𑀬𑁄, 𑀪𑁄𑀢𑀺 𑀅𑀫𑁆𑀩 𑀪𑁄𑀢𑀺 𑀅𑀫𑁆𑀩𑀸, 𑀪𑁄𑀢𑀺𑀬𑁄 𑀅𑀫𑁆𑀩𑀸 𑀅𑀫𑁆𑀩𑀸𑀬𑁄 𑀇𑀘𑁆𑀘𑀸𑀤𑀺.

𑀆𑀓𑀸𑀭𑀦𑁆𑀢𑀁.

𑀇𑀓𑀸𑀭𑀦𑁆𑀢𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 𑀭𑀢𑁆𑀢𑀺𑀲𑀤𑁆𑀤𑁄;

𑀢𑀣𑁂𑀯 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺, 𑀲𑀺𑀮𑁄𑀧𑁄, 𑀭𑀢𑁆𑀢𑀺.

𑀩𑀳𑀼𑀯𑀘𑀦𑁂 ‘‘𑀲𑀜𑁆𑀜𑀸, 𑀇𑀯𑀡𑁆𑀡𑀼𑀯𑀡𑁆𑀡𑀸’’𑀢𑀺 𑀘 𑀯𑀢𑁆𑀢𑀢𑁂.

𑁧𑁮𑁨. 𑀢𑁂 𑀇𑀢𑁆𑀣𑀺𑀔𑁆𑀬𑀸 𑀧𑁄.

𑀇𑀢𑁆𑀣𑀺𑀬𑀸 𑀆𑀔𑁆𑀬𑀸 𑀲𑀜𑁆𑀜𑀸 𑀇𑀢𑁆𑀣𑀺𑀔𑁆𑀬𑀸, 𑀮𑀺𑀗𑁆𑀕𑀲𑁆𑀲𑀦𑁆𑀢𑀸 𑀢𑁂 𑀇𑀯𑀡𑁆𑀡𑀼𑀯𑀡𑁆𑀡𑀸 𑀬𑀤𑀸 𑀇𑀢𑁆𑀣𑀺𑀔𑁆𑀬𑀸, 𑀢𑀤𑀸 𑀧𑀲𑀜𑁆𑀜𑀸 𑀳𑁄𑀦𑁆𑀢𑀻𑀢𑀺 𑀧𑀲𑀜𑁆𑀜𑀸𑀬𑀁 ‘‘𑀖𑀧𑀢𑁄 𑀘𑀸’’𑀢𑀺𑀆𑀤𑀺𑀦𑀸 𑀬𑁄𑀮𑁄𑀧𑁄, ‘‘𑀬𑁄𑀲𑀼 𑀓𑀢’’𑀇𑀘𑁆𑀘𑀸𑀤𑀺𑀦𑀸 𑀤𑀻𑀖𑁄. 𑀭𑀢𑁆𑀢𑀻 𑀭𑀢𑁆𑀢𑀺𑀬𑁄 𑀭𑀢𑁆𑀬𑁄 𑀯𑀸, 𑀳𑁂 𑀭𑀢𑁆𑀢𑀺, 𑀳𑁂 𑀭𑀢𑁆𑀢𑀻 𑀳𑁂 𑀭𑀢𑁆𑀢𑀺𑀬𑁄.

‘‘𑀅𑀁𑀫𑁄’’𑀢𑀺𑀆𑀤𑀺𑀦𑀸 𑀦𑀺𑀕𑁆𑀕𑀳𑀻𑀢𑀁, 𑀭𑀢𑁆𑀢𑀺𑀁, 𑀭𑀢𑁆𑀢𑀻 𑀭𑀢𑁆𑀢𑀺𑀬𑁄;

𑀢𑀢𑀺𑀬𑀸𑀤𑀻𑀲𑀼 ‘‘𑀏𑀓𑀯𑀘𑀦𑀸𑀦𑀁, 𑀦𑀸𑀤𑀻𑀦’’𑀦𑁆𑀢𑀺 𑀘 𑀯𑀢𑁆𑀢𑀢𑁂.

𑁧𑁮𑁩. 𑀧𑀢𑁄 𑀬𑀸.

𑀧𑀲𑀜𑁆𑀜𑀢𑁄 𑀇𑀯𑀡𑁆𑀡𑀼𑀯𑀡𑁆𑀡𑁂𑀳𑀺 𑀧𑀭𑁂𑀲𑀁 𑀦𑀸𑀤𑀻𑀦𑀫𑁂𑀓𑀯𑀘𑀦𑀸𑀦𑀁 𑀯𑀺𑀪𑀢𑁆𑀢𑀺𑀕𑀡𑀸𑀦𑀁 𑀬𑀸𑀆𑀤𑁂𑀲𑁄 𑀳𑁄𑀢𑀺. 𑀭𑀢𑁆𑀢𑀺𑀬𑀸, 𑀭𑀢𑁆𑀢𑀻𑀳𑀺 𑀭𑀢𑁆𑀢𑀻𑀪𑀺 𑀭𑀢𑁆𑀢𑀺𑀳𑀺 𑀭𑀢𑁆𑀢𑀺𑀪𑀺, 𑀭𑀢𑁆𑀢𑀺𑀬𑀸, 𑀭𑀢𑁆𑀢𑀻𑀦𑀁 𑀭𑀢𑁆𑀢𑀺𑀦𑀁.

𑀧𑀜𑁆𑀘𑀫𑀺𑀬𑀁 𑁋

𑁧𑁮𑁪. 𑀅𑀫𑀸 𑀧𑀢𑁄 𑀲𑁆𑀫𑀺𑀁𑀲𑁆𑀫𑀸𑀦𑀁 𑀯𑀸.

𑀧𑀇𑀘𑁆𑀘𑁂𑀢𑀲𑁆𑀫𑀸 𑀧𑀭𑁂𑀲𑀁 𑀲𑁆𑀫𑀺𑀁 𑀲𑁆𑀫𑀸𑀇𑀘𑁆𑀘𑁂𑀢𑁂𑀲𑀁 𑀬𑀣𑀸𑀓𑁆𑀓𑀫𑀁 𑀅𑀁 𑀆𑀆𑀤𑁂𑀲𑀸 𑀳𑁄𑀦𑁆𑀢𑀺 𑀯𑀸. 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄𑀬𑀁 𑀯𑀸𑀲𑀤𑁆𑀤𑁄 ¶ , 𑀢𑁂𑀦 𑀉𑀯𑀡𑁆𑀡𑀦𑁆𑀢𑀢𑁄 𑀦 𑀳𑁄𑀦𑁆𑀢𑀺, 𑀇𑀯𑀡𑁆𑀡𑀦𑁆𑀢𑀢𑁄𑀧𑀺 𑀬𑀣𑀸𑀧𑀬𑁄𑀕𑀁.

‘‘𑀲𑀭𑁂, 𑀬𑀓𑀸𑀭𑁄’’𑀢𑀺 𑀘 𑀯𑀢𑁆𑀢𑀢𑁂, 𑀲𑀻𑀳𑀫𑀡𑁆𑀟𑀽𑀓𑀕𑀢𑀻𑀳𑀺 𑀬𑁄𑀯𑀘𑀦𑁂𑀓𑀯𑀘𑀦𑀕𑁆𑀕𑀳𑀡𑀜𑁆𑀘.

𑁧𑁮𑁫. 𑀧𑀲𑀜𑁆𑀜𑀲𑁆𑀲 𑀘.

𑀧𑀲𑀜𑁆𑀜𑀲𑁆𑀲 𑀇𑀯𑀡𑁆𑀡𑀲𑁆𑀲 𑀬𑁄𑀯𑀘𑀦𑁂𑀓𑀯𑀘𑀦𑀯𑀺𑀪𑀢𑁆𑀢𑀻𑀦𑀫𑀸𑀤𑁂𑀲𑁂 𑀲𑀭𑁂 𑀧𑀭𑁂 𑀬𑀓𑀸𑀭𑁄 𑀳𑁄𑀢𑀺. 𑀏𑀢𑁆𑀣 𑀘 𑀬𑀓𑀸𑀭𑀲𑁆𑀲𑁂𑀯𑀸𑀥𑀺𑀓𑀸𑀭𑀢𑁄 𑀧𑀲𑀜𑁆𑀜𑀕𑁆𑀕𑀳𑀡𑁂𑀦 𑀇𑀯𑀡𑁆𑀡𑁄𑀯 𑀕𑀬𑁆𑀳𑀢𑀺, 𑀘𑀕𑁆𑀕𑀳𑀡𑀁 ‘‘𑀭𑀢𑁆𑀢𑁄’’𑀢𑀺𑀆𑀤𑀻𑀲𑀼 𑀦𑀺𑀯𑀢𑁆𑀢𑀦𑀢𑁆𑀣𑀁. 𑀭𑀢𑁆𑀬𑀸 𑀭𑀢𑁆𑀢𑀺𑀬𑀸, 𑀭𑀢𑁆𑀢𑀻𑀳𑀺 𑀭𑀢𑁆𑀢𑀻𑀪𑀺 𑀭𑀢𑁆𑀢𑀺𑀳𑀺 𑀭𑀢𑁆𑀢𑀺𑀪𑀺, 𑀭𑀢𑁆𑀢𑀺𑀬𑀸, 𑀭𑀢𑁆𑀢𑀻𑀦𑀁 𑀭𑀢𑁆𑀢𑀺𑀦𑀁. 𑀲𑁆𑀫𑀺𑀁𑀯𑀘𑀦𑁂 𑀅𑀫𑀸𑀤𑁂𑀲𑀬𑀓𑀸𑀭𑀸𑀤𑁂𑀲𑀸, 𑀭𑀢𑁆𑀬𑀁. ‘‘𑀖𑀧𑀢𑁄 𑀲𑁆𑀫𑀺𑀁 𑀬𑀁 𑀯𑀸’’𑀢𑀺 𑀬𑀁𑀆𑀤𑁂𑀲𑁄, 𑀭𑀢𑁆𑀢𑀺𑀬𑀁.

𑀅𑀜𑁆𑀜𑀢𑁆𑀣 ‘‘𑀅𑀁, 𑀲𑁆𑀫𑀺𑀁, 𑀯𑀸’’𑀢𑀺 𑀘 𑀯𑀢𑁆𑀢𑀢𑁂.

𑁧𑁮𑁬. 𑀆𑀤𑀺𑀢𑁄 𑀑 𑀘.

𑀆𑀤𑀺𑀇𑀘𑁆𑀘𑁂𑀢𑀲𑁆𑀫𑀸 𑀲𑁆𑀫𑀺𑀁𑀯𑀘𑀦𑀲𑁆𑀲 𑀅𑀁 𑀑𑀆𑀤𑁂𑀲𑀸 𑀳𑁄𑀦𑁆𑀢𑀺 𑀯𑀸. 𑀘𑀲𑀤𑁆𑀤𑁂𑀦 𑀅𑀜𑁆𑀜𑀲𑁆𑀫𑀸𑀧𑀺 𑀆 𑀅𑀁 𑀑𑀆𑀤𑁂𑀲𑀸. 𑀭𑀢𑁆𑀬𑀸 𑀭𑀢𑁆𑀢𑀺𑀁 𑀭𑀢𑁆𑀢𑁄 𑀭𑀢𑁆𑀢𑀺𑀬𑀸, 𑀭𑀢𑁆𑀢𑀻𑀲𑀼 𑀭𑀢𑁆𑀢𑀺𑀲𑀼.

𑀏𑀯𑀫𑀜𑁆𑀜𑀸𑀦𑀺𑀧𑀺 𑁋

𑀧𑀢𑁆𑀢𑀺 𑀬𑀼𑀢𑁆𑀢𑀺 𑀯𑀼𑀢𑁆𑀢𑀺 𑀓𑀺𑀢𑁆𑀢𑀺, 𑀫𑀼𑀢𑁆𑀢𑀺 𑀢𑀺𑀢𑁆𑀢𑀺 𑀔𑀦𑁆𑀢𑀺 𑀓𑀦𑁆𑀢𑀺;

𑀲𑀦𑁆𑀢𑀺 𑀢𑀦𑁆𑀢𑀺 𑀲𑀺𑀤𑁆𑀥𑀺 𑀲𑀼𑀤𑁆𑀥𑀺, 𑀇𑀤𑁆𑀥𑀺 𑀯𑀼𑀤𑁆𑀥𑀺 𑀩𑀼𑀤𑁆𑀥𑀺 𑀩𑁄𑀥𑀺.

𑀪𑀽𑀫𑀺 𑀚𑀸𑀢𑀺 𑀧𑀻𑀢𑀺 𑀲𑀽𑀢𑀺, 𑀦𑀦𑁆𑀤𑀺 𑀲𑀦𑁆𑀥𑀺 𑀲𑀸𑀡𑀺 𑀓𑁄𑀝𑀺;

𑀤𑀺𑀝𑁆𑀞𑀺 𑀯𑀼𑀟𑁆𑀠𑀺 𑀢𑀼𑀝𑁆𑀞𑀺 𑀬𑀝𑁆𑀞𑀺, 𑀧𑀸𑀴𑀺 𑀆𑀴𑀺 𑀦𑀸𑀴𑀺 𑀓𑁂𑀴𑀺;

𑀲𑀢𑀺 𑀫𑀢𑀺 𑀕𑀢𑀺 𑀘𑀼𑀢𑀺, 𑀥𑀺𑀢𑀺 𑀬𑀼𑀯𑀢𑀺 𑀯𑀺𑀓𑀢𑀺.

𑀭𑀢𑀺 𑀭𑀼𑀘𑀺 𑀭𑀲𑁆𑀫𑀺 𑀅𑀲𑀦𑀺 𑀯𑀲𑀦𑀺 𑀑𑀲𑀥𑀺 𑀅𑀗𑁆𑀕𑀼𑀮𑀺 𑀥𑀽𑀮𑀺 𑀤𑀼𑀦𑁆𑀤𑀼𑀪𑀺 𑀤𑁄𑀡𑀺 𑀅𑀝𑀯𑀺 𑀙𑀯𑀺 𑀆𑀤𑀻𑀦𑀺 𑀇𑀓𑀸𑀭𑀦𑁆𑀢𑀦𑀸𑀫𑀸𑀦𑀺.

𑀇𑀓𑀸𑀭𑀦𑁆𑀢𑀁.

𑀈𑀓𑀸𑀭𑀦𑁆𑀢𑁄 ¶ 𑀇𑀢𑁆𑀣𑀺𑀮𑀺𑀗𑁆𑀕𑁄 𑀇𑀢𑁆𑀣𑀻𑀲𑀤𑁆𑀤𑁄;

‘‘𑀇𑀢𑁆𑀣’’𑀇𑀢𑀻𑀥 ‘‘𑀇𑀢𑁆𑀣𑀺𑀬𑀁, 𑀧𑀘𑁆𑀘𑀬𑁄’’𑀢𑀺 𑀘 𑀯𑀢𑁆𑀢𑀢𑁂.

𑁧𑁮𑁭. 𑀦𑀤𑀸𑀤𑀺𑀢𑁄 𑀯𑀸 𑀈.

𑀦𑀤𑀸𑀤𑀺𑀢𑁄 𑀯𑀸 𑀅𑀦𑀤𑀸𑀤𑀺𑀢𑁄 𑀯𑀸 𑀇𑀢𑁆𑀣𑀺𑀬𑀁 𑀯𑀢𑁆𑀢𑀫𑀸𑀦𑀸 𑀮𑀺𑀗𑁆𑀕𑀫𑁆𑀳𑀸 𑀈𑀧𑁆𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀸𑀕𑁆𑀕𑀳𑀡𑀫𑀦𑀤𑀸𑀤𑀺𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑀁, 𑀢𑁂𑀦 𑀧𑀼𑀣𑀼𑀕𑀯𑀸𑀤𑀺𑀢𑁄 𑀘 𑀈.

𑀲𑀭𑀮𑁄𑀧𑁂 ‘‘𑀓𑁆𑀯𑀘𑀸𑀲𑀯𑀡𑁆𑀡𑀁 𑀮𑀼𑀢𑁆𑀢𑁂’’𑀢𑀺 𑀅𑀲𑀯𑀡𑁆𑀡𑁂 𑀲𑀫𑁆𑀧𑀢𑁆𑀢𑁂 𑀧𑀓𑀢𑀺𑀪𑀸𑀯𑁄 𑀦𑀸𑀫𑀩𑁆𑀬𑀧𑀤𑁂𑀲𑁄, 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺. 𑀇𑀢𑁆𑀣𑀻, 𑀇𑀢𑁆𑀣𑀻 ‘‘𑀅𑀖𑁄 𑀭𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸 𑀭𑀲𑁆𑀲𑀢𑁆𑀢𑀁, 𑀇𑀢𑁆𑀣𑀺𑀬𑁄. 𑀲𑀫𑁆𑀩𑁄𑀥𑀦𑁂 ‘‘𑀛𑀮𑀧𑀸 𑀭𑀲𑁆𑀲’’𑀦𑁆𑀢𑀺 𑀭𑀲𑁆𑀲𑀢𑁆𑀢𑀁. 𑀪𑁄𑀢𑀺 𑀇𑀢𑁆𑀣𑀺, 𑀪𑁄𑀢𑀺𑀬𑁄 𑀇𑀢𑁆𑀣𑀻 𑀇𑀢𑁆𑀣𑀺𑀬𑁄.

𑀤𑀼𑀢𑀺𑀬𑁂𑀓𑀯𑀘𑀦𑁂 ‘‘𑀖𑀧𑀢𑁄 𑀲𑁆𑀫𑀺𑀁 𑀬𑀁 𑀯𑀸’’𑀢𑀺 𑀇𑀢𑁄 ‘‘𑀯𑀸’’𑀢𑀺 𑀯𑀢𑁆𑀢𑀢𑁂.

𑁧𑁮𑁮. 𑀅𑀁 𑀬𑀫𑀻𑀢𑁄 𑀧𑀲𑀜𑁆𑀜𑀢𑁄.

𑀧𑀲𑀜𑁆𑀜𑀢𑁄 𑀈𑀓𑀸𑀭𑀢𑁄 𑀧𑀭𑀲𑁆𑀲 𑀅𑀁𑀯𑀘𑀦𑀲𑁆𑀲 𑀬𑀁 𑀳𑁄𑀢𑀺 𑀯𑀸. 𑀇𑀢𑁆𑀣𑀺𑀬𑀁 𑀇𑀢𑁆𑀣𑀺𑀁, 𑀇𑀢𑁆𑀣𑀻 𑀇𑀢𑁆𑀣𑀺𑀬𑁄, 𑀇𑀢𑁆𑀣𑀺𑀬𑀸, 𑀇𑀢𑁆𑀣𑀻𑀳𑀺 𑀇𑀢𑁆𑀣𑀻𑀪𑀺, 𑀇𑀢𑁆𑀣𑀺𑀬𑀸, 𑀇𑀢𑁆𑀣𑀻𑀦𑀁, 𑀇𑀢𑁆𑀣𑀺𑀬𑀸, 𑀇𑀢𑁆𑀣𑀻𑀳𑀺 𑀇𑀢𑁆𑀣𑀻𑀪𑀺, 𑀇𑀢𑁆𑀣𑀺𑀬𑀸, 𑀇𑀢𑁆𑀣𑀻𑀦𑀁, 𑀇𑀢𑁆𑀣𑀺𑀬𑀁 𑀇𑀢𑁆𑀣𑀺𑀬𑀸, 𑀇𑀢𑁆𑀣𑀻𑀲𑀼.

𑀏𑀯𑀁 𑀦𑀤𑀻, 𑀦𑀤𑀻. 𑀬𑁄𑀮𑁄𑀧𑀸𑀪𑀸𑀯𑁂 ‘‘𑀢𑀢𑁄 𑀬𑁄𑀦𑀫𑁄 𑀢𑀽’’𑀢𑀺 𑀏𑀢𑁆𑀣 𑀢𑀼𑀲𑀤𑁆𑀤𑁂𑀦 𑀬𑁄𑀦𑀫𑁄𑀓𑀸𑀭𑁄 𑀘, ‘‘𑀧𑀲𑀜𑁆𑀜𑀲𑁆𑀲 𑀘𑀸’’𑀢𑀺 𑀈𑀓𑀸𑀭𑀲𑁆𑀲 𑀬𑀓𑀸𑀭𑁄, ‘‘𑀬𑀯𑀢𑀁 𑀢𑀮𑀦’’𑀇𑀘𑁆𑀘𑀸𑀤𑀺𑀦𑀸 𑀤𑁆𑀬𑀲𑁆𑀲 𑀚𑀓𑀸𑀭𑁄, 𑀤𑁆𑀯𑀺𑀢𑁆𑀢𑀁. 𑀦𑀚𑁆𑀚𑁄 𑀲𑀦𑁆𑀤𑀦𑁆𑀢𑀺, 𑀦𑀤𑀺𑀬𑁄.

𑀏𑀢𑁆𑀣 ¶ 𑀘𑁂𑀯𑀁 𑀲𑀺𑀚𑁆𑀛𑀦𑁆𑀢𑀸𑀦𑀁 𑀦𑀚𑁆𑀚𑁄𑀆𑀤𑀻𑀦𑀁 𑀯𑀼𑀢𑁆𑀢𑀺𑀬𑀁 𑀆𑀦𑀢𑁆𑀢𑀕𑁆𑀕𑀳𑀡𑀸𑀤𑀺𑀦𑀸 𑀦𑀺𑀧𑁆𑀨𑀸𑀤𑀦𑀁 𑀅𑀢𑁆𑀭𑀚 𑀲𑀼𑀕𑀢𑀸𑀤𑀻𑀦𑀁 𑀯𑀺𑀬 𑀦𑀺𑀧𑁆𑀨𑀸𑀤𑀦𑀽𑀧𑀸𑀬𑀦𑁆𑀢𑀭𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀳𑁂 𑀦𑀤𑀺, 𑀳𑁂 𑀦𑀤𑀻 𑀳𑁂 𑀦𑀚𑁆𑀚𑁄 𑀳𑁂 𑀦𑀤𑀺𑀬𑁄, 𑀦𑀤𑀺𑀬𑀁 𑀦𑀤𑀺𑀁, 𑀦𑀤𑀻 𑀦𑀚𑁆𑀚𑁄 𑀦𑀤𑀺𑀬𑁄.

𑀅𑀫𑀸𑀤𑀺𑀲𑀼𑀢𑁆𑀢𑁂 𑀆 𑀧𑀢𑁄𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀓𑁆𑀯𑀘𑀺 𑀦𑀸𑀲𑀸𑀦𑀜𑁆𑀘𑀸𑀢𑁆𑀢𑀁, 𑀢𑁂𑀦 𑀦 𑀚𑀘𑁆𑀘𑀸 𑀯𑀲𑀮𑁄 𑀳𑁄𑀢𑀺, 𑀧𑀣𑀩𑁆𑀬𑀸 𑀏𑀓𑀭𑀚𑁆𑀚𑁂𑀦𑀸𑀢𑀺 𑀆𑀤𑀺 𑀘 𑀲𑀺𑀚𑁆𑀛𑀢𑀺, 𑀧𑀼𑀭𑁂 𑀯𑀺𑀬 𑀬𑀓𑀸𑀭𑀚𑀓𑀸𑀭𑀸𑀤𑁂𑀲𑀤𑁆𑀯𑀺𑀢𑁆𑀢𑀸𑀦𑀺.

𑀦𑀚𑁆𑀚𑀸 𑀓𑀢𑀁 𑀦𑀤𑀺𑀬𑀸, 𑀦𑀤𑀻𑀳𑀺 𑀦𑀤𑀻𑀪𑀺, 𑀦𑀚𑁆𑀚𑀸 𑀦𑀤𑀺𑀬𑀸, 𑀦𑀤𑀻𑀦𑀁, 𑀦𑀚𑁆𑀚𑀸 𑀦𑀤𑀺𑀬𑀸, 𑀦𑀤𑀻𑀳𑀺 𑀦𑀤𑀻𑀪𑀺, 𑀦𑀚𑁆𑀚𑀸 𑀦𑀤𑀺𑀬𑀸, 𑀦𑀤𑀻𑀦𑀁, 𑀦𑀚𑁆𑀚𑀁 𑀦𑀤𑀺𑀬𑀁 𑀦𑀤𑀺𑀬𑀸, 𑀦𑀤𑀻𑀲𑀼.

𑀅𑀜𑁆𑀜𑁂𑀧𑀺 𑁋

𑀫𑀳𑀻 𑀯𑁂𑀢𑀭𑀡𑀻 𑀯𑀸𑀧𑀻, 𑀧𑀸𑀝𑀮𑀻 𑀓𑀤𑀮𑀻 𑀖𑀝𑀻;

𑀦𑀸𑀭𑀻 𑀓𑀼𑀫𑀸𑀭𑀻 𑀢𑀭𑀼𑀡𑀻, 𑀯𑀸𑀭𑀼𑀡𑀻 𑀩𑁆𑀭𑀸𑀳𑁆𑀫𑀡𑀻 𑀲𑀔𑀻.

𑀕𑀦𑁆𑀥𑀩𑁆𑀩𑀻 𑀓𑀺𑀦𑁆𑀦𑀭𑀻 𑀦𑀸𑀕𑀻, 𑀤𑁂𑀯𑀻 𑀬𑀓𑁆𑀔𑀻 𑀅𑀚𑀻 𑀫𑀺𑀕𑀻;

𑀯𑀸𑀦𑀭𑀻 𑀲𑀽𑀓𑀭𑀻 𑀲𑀻𑀳𑀻, 𑀳𑀁𑀲𑀻 𑀓𑀸𑀓𑀻 𑀘 𑀓𑀼𑀓𑁆𑀓𑀼𑀝𑀻 𑁋

𑀇𑀘𑁆𑀘𑀸𑀤𑀬𑁄 𑀇𑀢𑁆𑀣𑀻𑀲𑀤𑁆𑀤𑀲𑀫𑀸.

𑀢𑀣𑁂𑀯 𑀫𑀸𑀢𑀼𑀮𑀲𑀤𑁆𑀤𑀢𑁄 𑀈𑀧𑁆𑀧𑀘𑁆𑀘𑀬𑁂 𑀓𑀢𑁂 𑁋

𑁧𑁮𑁯. 𑀫𑀸𑀢𑀼𑀮𑀸𑀤𑀻𑀦𑀫𑀸𑀦𑀢𑁆𑀢𑀫𑀻𑀓𑀸𑀭𑁂.

𑀫𑀸𑀢𑀼𑀮 𑀅𑀬𑁆𑀬𑀓𑀯𑀭𑀼𑀡𑀇𑀘𑁆𑀘𑁂𑀯𑀫𑀸𑀤𑀻𑀦𑀫𑀦𑁆𑀢𑁄 𑀆𑀦𑀢𑁆𑀢𑀫𑀸𑀧𑀚𑁆𑀚𑀢𑁂 𑀈𑀓𑀸𑀭𑁂 𑀧𑀘𑁆𑀘𑀬𑁂 𑀧𑀭𑁂, 𑀅𑀦𑁆𑀢𑀸𑀧𑁂𑀓𑁆𑀔𑀸𑀬𑀁 𑀙𑀝𑁆𑀞𑀻, 𑀲𑀭𑀮𑁄𑀧𑀸𑀤𑀺. 𑀫𑀸𑀢𑀼𑀮𑀸𑀦𑀻, 𑀏𑀯𑀁 𑀅𑀬𑁆𑀬𑀓𑀸𑀦𑀻, 𑀯𑀭𑀼𑀡𑀸𑀦𑀻, 𑀲𑁂𑀲𑀁 𑀇𑀢𑁆𑀣𑀻𑀲𑀤𑁆𑀤𑀲𑀫𑀁.

𑀅𑀦𑀤𑀸𑀤𑀻𑀲𑀼 ¶ 𑀧𑀼𑀣𑀼𑀲𑀤𑁆𑀤𑀢𑁄 𑀈𑀧𑁆𑀧𑀘𑁆𑀘𑀬𑁄. ‘‘𑀑 𑀲𑀭𑁂 𑀘𑀸’’𑀢𑀺 𑀏𑀢𑁆𑀣 𑀘𑀲𑀤𑁆𑀤𑁂𑀦 𑀉𑀓𑀸𑀭𑀲𑁆𑀲 𑀅𑀯𑀸𑀤𑁂𑀲𑁄. 𑀧𑀼𑀣𑀯𑀻, 𑀧𑀼𑀣𑀯𑀺𑀬𑁄. 𑀲𑀲𑁆𑀫𑀸 𑀲𑁆𑀫𑀺𑀁𑀲𑀼 𑀧𑀼𑀣𑀩𑁆𑀬𑀸 𑀧𑀼𑀣𑀯𑀺𑀬𑀸, 𑀧𑀼𑀣𑀩𑁆𑀬𑀸 𑀧𑀼𑀣𑀯𑀺𑀬𑀸, 𑀧𑀼𑀣𑀩𑁆𑀬𑀁 𑀧𑀼𑀣𑀯𑀺𑀬𑀁 𑀧𑀼𑀣𑀯𑀺𑀬𑀸 𑀇𑀘𑁆𑀘𑀸𑀤𑀺.

𑀕𑁄𑀲𑀤𑁆𑀤𑀢𑁄 ‘‘𑀦𑀤𑀸𑀤𑀺𑀢𑁄 𑀯𑀸 𑀈’’𑀢𑀺 𑀈𑀧𑁆𑀧𑀘𑁆𑀘𑀬𑁄. 𑀫𑀳𑀸𑀯𑀼𑀢𑁆𑀢𑀺𑀦𑀸 𑀯𑀸 ‘‘𑀕𑀸𑀯 𑀲𑁂’’𑀢𑀺 𑀏𑀢𑁆𑀣 𑀕𑀸𑀯𑀇𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀯𑀸 𑀑𑀓𑀸𑀭𑀲𑁆𑀲 𑀆𑀯𑀸𑀤𑁂𑀲𑁄. 𑀕𑀸𑀯𑀻, 𑀕𑀸𑀯𑀻 𑀕𑀸𑀯𑀺𑀬𑁄 𑀇𑀘𑁆𑀘𑀸𑀤𑀺 𑀇𑀢𑁆𑀣𑀻𑀲𑀤𑁆𑀤𑀲𑀫𑀁.

‘‘𑀫𑀸𑀦𑀯’’𑀇𑀢𑀻𑀥 ‘‘𑀇𑀢𑁆𑀣𑀺𑀬𑀁, 𑀯𑀸, 𑀈’’𑀢𑀺 𑀘 𑀯𑀢𑁆𑀢𑀢𑁂.

𑁧𑁯𑁦. 𑀡𑀯 𑀡𑀺𑀓 𑀡𑁂𑀬𑁆𑀬 𑀡𑀦𑁆𑀢𑀼𑀳𑀺.

𑀡𑀯 𑀡𑀺𑀓 𑀡𑁂𑀬𑁆𑀬 𑀡𑀦𑁆𑀢𑀼𑀧𑁆𑀧𑀘𑁆𑀘𑀬𑀦𑁆𑀢𑁂𑀳𑀺 𑀇𑀢𑁆𑀣𑀺𑀬𑀁 𑀯𑀢𑁆𑀢𑀫𑀸𑀦𑁂𑀳𑀺 𑀮𑀺𑀗𑁆𑀕𑁂𑀳𑀺 𑀈𑀧𑁆𑀧𑀘𑁆𑀘𑀬𑁄 𑀳𑁄𑀢𑀺. 𑀯𑀸𑀥𑀺𑀓𑀸𑀭𑁄 𑀓𑀢𑁆𑀣𑀘𑀺 𑀦𑀺𑀯𑀢𑁆𑀢𑀦𑀢𑁆𑀣𑁄, 𑀲𑀭𑀮𑁄𑀧𑀸𑀤𑀺. 𑀫𑀸𑀦𑀯𑀻, 𑀏𑀯𑀁 𑀦𑀸𑀯𑀺𑀓𑀻, 𑀯𑁂𑀦𑀢𑁂𑀬𑁆𑀬𑀻, 𑀕𑁄𑀢𑀫𑀻.

‘‘𑀕𑀼𑀡𑀯𑀦𑁆𑀢𑀼 𑀈’’𑀇𑀢𑀻𑀥 ‘‘𑀯𑀸’’𑀢𑀺 𑀯𑀢𑁆𑀢𑀢𑁂.

𑁧𑁯𑁧. 𑀦𑁆𑀢𑀼𑀲𑁆𑀲 𑀢𑀫𑀻𑀓𑀸𑀭𑁂.

𑀲𑀩𑁆𑀩𑀲𑁆𑀲𑁂𑀯 𑀦𑁆𑀢𑀼𑀧𑁆𑀧𑀘𑁆𑀘𑀬𑀲𑁆𑀲 𑀢𑀓𑀸𑀭𑁄 𑀳𑁄𑀢𑀺 𑀯𑀸 𑀈𑀓𑀸𑀭𑀧𑁆𑀧𑀘𑁆𑀘𑀬𑁂 𑀧𑀭𑁂, 𑀅𑀜𑁆𑀜𑀢𑁆𑀣 𑀲𑀭𑀮𑁄𑀧𑀸𑀤𑀺. 𑀕𑀼𑀡𑀯𑀢𑀻, 𑀕𑀼𑀡𑀯𑀢𑀻 𑀕𑀼𑀡𑀯𑀢𑀺𑀬𑁄, 𑀕𑀼𑀡𑀯𑀦𑁆𑀢𑀻, 𑀕𑀼𑀡𑀯𑀦𑁆𑀢𑀻 𑀕𑀼𑀡𑀯𑀦𑁆𑀢𑀺𑀬𑁄 𑀇𑀘𑁆𑀘𑀸𑀤𑀺 𑀇𑀢𑁆𑀣𑀻𑀲𑀤𑁆𑀤𑀲𑀫𑀁.

𑀏𑀯𑀁 𑀓𑀼𑀮𑀯𑀢𑀻, 𑀲𑀻𑀮𑀯𑀢𑀻, 𑀬𑀲𑀯𑀢𑀻, 𑀭𑀽𑀧𑀯𑀢𑀻, 𑀲𑀢𑀺𑀫𑀢𑀻, 𑀕𑁄𑀢𑁆𑀢𑀫𑀢𑀻.

𑀫𑀳𑀦𑁆𑀢𑀲𑀤𑁆𑀤𑀢𑁄 ‘‘𑀦𑀤𑀸𑀤𑀺𑀢𑁄 𑀯𑀸 𑀈’’𑀢𑀺 𑀈𑀧𑁆𑀧𑀘𑁆𑀘𑀬𑁄, 𑀦𑁆𑀢𑀼𑀩𑁆𑀬𑀧𑀤𑁂𑀲𑁄 𑀯𑀺𑀓𑀧𑁆𑀧𑁂𑀦 𑀢𑀓𑀸𑀭𑀸𑀤𑁂𑀲𑁄. 𑀫𑀳𑀢𑀻 𑀫𑀳𑀦𑁆𑀢𑀻.

‘‘𑀪𑀯𑀦𑁆𑀢 𑀈’’𑀇𑀢𑀻𑀥 ‘‘𑀈𑀓𑀸𑀭𑁂’’𑀢𑀺 𑀯𑀢𑁆𑀢𑀢𑁂.

𑁧𑁯𑁨. 𑀪𑀯𑀢𑁄 ¶ 𑀪𑁄𑀢𑁄.

𑀲𑀩𑁆𑀩𑀲𑁆𑀲𑁂𑀯 𑀪𑀯𑀦𑁆𑀢𑀲𑀤𑁆𑀤𑀲𑁆𑀲 𑀪𑁄𑀢𑀸𑀤𑁂𑀲𑁄 𑀳𑁄𑀢𑀺 𑀈𑀓𑀸𑀭𑁂 𑀇𑀢𑁆𑀣𑀺𑀕𑀢𑁂 𑀧𑀭𑁂. 𑀲𑀸 𑀪𑁄𑀢𑀻, 𑀪𑁄𑀢𑀻 𑀪𑁄𑀢𑀺𑀬𑁄, 𑀳𑁂 𑀪𑁄𑀢𑀺, 𑀳𑁂 𑀪𑁄𑀢𑀻 𑀪𑁄𑀢𑀺𑀬𑁄 𑀇𑀘𑁆𑀘𑀸𑀤𑀺.

‘‘𑀪𑀺𑀓𑁆𑀔𑀼’’ 𑀇𑀢𑀻𑀥 ‘‘𑀇𑀢𑁆𑀣𑀺𑀬’’𑀦𑁆𑀢𑀺 𑀯𑀢𑁆𑀢𑀢𑁂 ‘‘𑀯𑀸’’𑀢𑀺 𑀘.

𑁧𑁯𑁩. 𑀧𑀢𑀺𑀪𑀺𑀓𑁆𑀔𑀼𑀭𑀸𑀚𑀻𑀓𑀸𑀭𑀦𑁆𑀢𑁂𑀳𑀺 𑀇𑀦𑀻.

𑀧𑀢𑀺 𑀪𑀺𑀓𑁆𑀔𑀼 𑀭𑀸𑀚 𑀇𑀘𑁆𑀘𑁂𑀢𑁂𑀳𑀺 𑀈𑀓𑀸𑀭𑀦𑁆𑀢𑁂𑀳𑀺 𑀘 𑀇𑀢𑁆𑀣𑀺𑀬𑀁 𑀯𑀢𑁆𑀢𑀫𑀸𑀦𑁂𑀳𑀺 𑀮𑀺𑀗𑁆𑀕𑁂𑀳𑀺 𑀇𑀦𑀻𑀧𑁆𑀧𑀘𑁆𑀘𑀬𑁄 𑀳𑁄𑀢𑀺.

‘‘𑀲𑀭𑀮𑁄𑀧𑁄’𑀫𑀸𑀤𑁂𑀲’’𑀇𑀘𑁆𑀘𑀸𑀤𑀺𑀲𑀼𑀢𑁆𑀢𑁂 𑀢𑀼𑀕𑁆𑀕𑀳𑀡𑁂𑀦 𑀓𑁆𑀯𑀘𑀺 𑀧𑀼𑀩𑁆𑀩𑀮𑁄𑀧𑀲𑁆𑀲 𑀦𑀺𑀲𑁂𑀥𑀦𑀢𑁄 ‘‘𑀯𑀸 𑀧𑀭𑁄 𑀅𑀲𑀭𑀽𑀧𑀸’’𑀢𑀺 𑀲𑀭𑀮𑁄𑀧𑁄. 𑀪𑀺𑀓𑁆𑀔𑀼𑀦𑀻, 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀦𑀺𑀬𑁄 𑀇𑀘𑁆𑀘𑀸𑀤𑀺.

𑀕𑀳𑀧𑀢𑀺𑀲𑀤𑁆𑀤𑀢𑁄 𑀇𑀦𑀻, ‘‘𑀅𑀢𑁆𑀢’’𑀫𑀺𑀢𑀺 𑀯𑀢𑁆𑀢𑀢𑁂.

𑁧𑁯𑁪. 𑀧𑀢𑀺𑀲𑁆𑀲𑀺𑀦𑀻𑀫𑁆𑀳𑀺.

𑀧𑀢𑀺𑀲𑀤𑁆𑀤𑀲𑁆𑀲 𑀅𑀦𑁆𑀢𑁄 𑀅𑀢𑁆𑀢𑀫𑀸𑀧𑀚𑁆𑀚𑀢𑁂 𑀇𑀦𑀻𑀧𑁆𑀧𑀘𑁆𑀘𑀬𑁂 𑀧𑀭𑁂. 𑀢𑀣𑁂𑀯 𑀧𑀭𑀲𑀭𑁂 𑀮𑀼𑀢𑁆𑀢𑁂 ‘‘𑀧𑀼𑀩𑁆𑀩𑁄 𑀘𑀸’’𑀢𑀺 𑀤𑀻𑀖𑁄, 𑀕𑀳𑀧𑀢𑀸𑀦𑀻.

𑀢𑀣𑁂𑀯 𑀭𑀸𑀚𑀲𑀤𑁆𑀤𑀢𑁄 𑀇𑀦𑀻, 𑀲𑀭𑀮𑁄𑀧𑀧𑀓𑀢𑀺𑀪𑀸𑀯𑀸, 𑀭𑀸𑀚𑀺𑀦𑀻. 𑀈𑀓𑀸𑀭𑀦𑁆𑀢𑁂𑀲𑀼 𑀤𑀡𑁆𑀟𑀻𑀲𑀤𑁆𑀤𑀢𑁄 𑀇𑀦𑀻, 𑀲𑀭𑀮𑁄𑀧𑀸𑀤𑀺, 𑀤𑀡𑁆𑀟𑀺𑀦𑀻, 𑀤𑀡𑁆𑀟𑀺𑀦𑀻 𑀤𑀡𑁆𑀟𑀺𑀦𑀺𑀬𑁄, 𑀏𑀯𑀁 𑀳𑀢𑁆𑀣𑀺𑀦𑀻, 𑀫𑁂𑀥𑀸𑀯𑀺𑀦𑀻, 𑀢𑀧𑀲𑁆𑀲𑀺𑀦𑀻, 𑀧𑀺𑀬𑀪𑀸𑀡𑀺𑀦𑀻 𑀇𑀘𑁆𑀘𑀸𑀤𑀺.

‘‘𑀧𑁄𑀓𑁆𑀔𑀭𑀺𑀦𑀻’’ 𑀇𑀢𑀻𑀥 ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀇𑀓𑀸𑀭𑀦𑀓𑀸𑀭𑀸𑀦𑀁 𑀅𑀓𑀸𑀭𑀡𑀓𑀸𑀭𑀸𑀤𑁂𑀲𑀸, 𑀧𑁄𑀓𑁆𑀔𑀭𑀡𑀻, 𑀧𑁄𑀓𑁆𑀔𑀭𑀡𑀻. ‘‘𑀢𑀢𑁄 𑀬𑁄𑀦𑀫𑁄 𑀢𑀽’’𑀢𑀺 𑀲𑀼𑀢𑁆𑀢𑁂 𑀢𑀼𑀕𑁆𑀕𑀳𑀡𑁂𑀦 𑀬𑁄𑀦𑀫𑁄𑀓𑀸𑀭𑁄 ¶ 𑀘, 𑀈𑀓𑀸𑀭𑀲𑁆𑀲 𑀬𑀓𑀸𑀭𑁄, ‘‘𑀬𑀯𑀢’’𑀫𑀺𑀘𑁆𑀘𑀸𑀤𑀺𑀲𑀼𑀢𑁆𑀢𑁂 𑀓𑀸𑀭𑀕𑁆𑀕𑀳𑀡𑁂𑀦 𑀡𑁆𑀬𑀲𑁆𑀲 𑀜𑀓𑀸𑀭𑁄, 𑀤𑁆𑀯𑀺𑀢𑁆𑀢𑀁. 𑀧𑁄𑀓𑁆𑀔𑀭𑀜𑁆𑀜𑁄 𑀧𑁄𑀓𑁆𑀔𑀭𑀡𑀺𑀬𑁄 𑀯𑀸 𑀇𑀘𑁆𑀘𑀸𑀤𑀺.

𑀯𑀸𑀥𑀺𑀓𑀸𑀭𑁄 𑀅𑀦𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄, 𑀢𑁂𑀦 𑀯𑀺𑀤𑀽 𑀬𑀓𑁆𑀔𑀸𑀤𑀺𑀢𑁄𑀧𑀺 𑀇𑀦𑀻, 𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑀻, 𑀲𑀭𑀮𑁄𑀧𑀭𑀲𑁆𑀲𑀢𑁆𑀢𑀸𑀦𑀺, 𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑀻 𑀧𑀭𑀘𑀺𑀢𑁆𑀢𑀯𑀺𑀤𑀼𑀦𑀺𑀬𑁄, 𑀬𑀓𑁆𑀔𑀺𑀦𑀻 𑀬𑀓𑁆𑀔𑀺𑀦𑀺𑀬𑁄, 𑀲𑀻𑀳𑀺𑀦𑀻 𑀲𑀻𑀳𑀺𑀦𑀺𑀬𑁄 𑀇𑀘𑁆𑀘𑀸𑀤𑀺.

𑀈𑀓𑀸𑀭𑀦𑁆𑀢𑀁.

𑀉𑀓𑀸𑀭𑀦𑁆𑀢𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 𑀬𑀸𑀕𑀼𑀲𑀤𑁆𑀤𑁄.

𑀢𑀲𑁆𑀲 𑀭𑀢𑁆𑀢𑀺𑀲𑀤𑁆𑀤𑀲𑁆𑀲𑁂𑀯 𑀭𑀽𑀧𑀦𑀬𑁄. 𑀅𑀫𑀸𑀤𑁂𑀲𑀸𑀤𑀺𑀅𑀪𑀸𑀯𑁄𑀯 𑀯𑀺𑀲𑁂𑀲𑁄.

𑀬𑀸𑀕𑀼, 𑀬𑀸𑀕𑀽 𑀬𑀸𑀕𑀼𑀬𑁄, 𑀳𑁂 𑀬𑀸𑀕𑀼, 𑀳𑁂 𑀬𑀸𑀕𑀽 𑀬𑀸𑀕𑀼𑀬𑁄, 𑀬𑀸𑀕𑀼𑀁, 𑀬𑀸𑀕𑀽 𑀬𑀸𑀕𑀼𑀬𑁄, 𑀬𑀸𑀕𑀼𑀬𑀸, 𑀬𑀸𑀕𑀽𑀳𑀺 𑀬𑀸𑀕𑀽𑀪𑀺 𑀬𑀸𑀕𑀼𑀳𑀺 𑀬𑀸𑀕𑀼𑀪𑀺, 𑀬𑀸𑀕𑀼𑀬𑀸, 𑀬𑀸𑀕𑀽𑀦𑀁 𑀬𑀸𑀕𑀼𑀦𑀁, 𑀬𑀸𑀕𑀼𑀬𑀸, 𑀬𑀸𑀕𑀽𑀳𑀺 𑀬𑀸𑀕𑀽𑀪𑀺 𑀬𑀸𑀕𑀼𑀳𑀺 𑀬𑀸𑀕𑀼𑀪𑀺, 𑀬𑀸𑀕𑀼𑀬𑀸, 𑀬𑀸𑀕𑀽𑀦𑀁 𑀬𑀸𑀕𑀼𑀦𑀁, 𑀬𑀸𑀕𑀼𑀬𑀁 𑀬𑀸𑀕𑀼𑀬𑀸, 𑀬𑀸𑀕𑀽𑀲𑀼 𑀬𑀸𑀕𑀼𑀲𑀼.

𑀏𑀯𑀁 𑀥𑀸𑀢𑀼 𑀥𑁂𑀦𑀼 𑀓𑀸𑀲𑀼 𑀤𑀤𑁆𑀤𑀼 𑀓𑀘𑁆𑀙𑀼 𑀓𑀡𑁆𑀟𑀼 𑀭𑀚𑁆𑀚𑀼 𑀓𑀭𑁂𑀡𑀼 𑀧𑀺𑀬𑀗𑁆𑀕𑀼 𑀲𑀲𑁆𑀲𑀼𑀆𑀤𑀻𑀦𑀺.

𑀫𑀸𑀢𑀼𑀲𑀤𑁆𑀤𑀲𑁆𑀲 𑀪𑁂𑀤𑁄. 𑀢𑀲𑁆𑀲 𑀧𑀺𑀢𑀼𑀲𑀤𑁆𑀤𑀲𑁆𑀲𑁂𑀯 𑀭𑀽𑀧𑀦𑀬𑁄. ‘‘𑀆𑀭𑀢𑁆𑀢’’𑀫𑀺𑀢𑀺 𑀪𑀸𑀯𑀦𑀺𑀤𑁆𑀤𑁂𑀲𑁂𑀦 𑀆𑀭𑀸𑀤𑁂𑀲𑀸𑀪𑀸𑀯𑁂 ‘‘𑀧𑀢𑁄 𑀬𑀸’’𑀢𑀺 𑀬𑀸𑀤𑁂𑀲𑁄𑀯 𑀯𑀺𑀲𑁂𑀲𑁄.

𑀫𑀸𑀢𑀸, 𑀫𑀸𑀢𑀭𑁄, 𑀪𑁄𑀢𑀺 𑀫𑀸𑀢, 𑀪𑁄𑀢𑀺 𑀫𑀸𑀢𑀸 𑀪𑁄𑀢𑀺𑀬𑁄 𑀫𑀸𑀢𑀭𑁄, 𑀫𑀸𑀢𑀭𑀁, 𑀫𑀸𑀢𑀭𑁂 𑀫𑀸𑀢𑀭𑁄, 𑀫𑀸𑀢𑀭𑀸 𑀫𑀸𑀢𑀼𑀬𑀸 𑀫𑀢𑁆𑀬𑀸, ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀉𑀓𑀸𑀭𑀮𑁄𑀧𑁄 ¶ , 𑀭𑀲𑁆𑀲𑀢𑁆𑀢𑀜𑁆𑀘. 𑀫𑀸𑀢𑀭𑁂𑀳𑀺 𑀫𑀸𑀢𑀭𑁂𑀪𑀺 𑀫𑀸𑀢𑀽𑀳𑀺 𑀫𑀸𑀢𑀽𑀪𑀺 𑀫𑀸𑀢𑀼𑀳𑀺 𑀫𑀸𑀢𑀼𑀪𑀺, 𑀫𑀸𑀢𑀼 𑀫𑀸𑀢𑀼𑀲𑁆𑀲 𑀫𑀸𑀢𑀼𑀬𑀸, 𑀫𑀸𑀢𑀭𑀸𑀦𑀁 𑀫𑀸𑀢𑀸𑀦𑀁 𑀫𑀸𑀢𑀽𑀦𑀁 𑀫𑀸𑀢𑀼𑀦𑀁, 𑀫𑀸𑀢𑀭𑀸 𑀫𑀸𑀢𑀼𑀬𑀸, 𑀫𑀸𑀢𑀭𑁂𑀳𑀺 𑀫𑀸𑀢𑀭𑁂𑀪𑀺 𑀫𑀸𑀢𑀽𑀳𑀺 𑀫𑀸𑀢𑀽𑀪𑀺, 𑀫𑀸𑀢𑀼 𑀫𑀸𑀢𑀼𑀲𑁆𑀲 𑀫𑀸𑀢𑀼𑀬𑀸, 𑀫𑀸𑀢𑀭𑀸𑀦𑀁 𑀫𑀸𑀢𑀸𑀦𑀁 𑀫𑀸𑀢𑀽𑀦𑀁 𑀫𑀸𑀢𑀼𑀦𑀁, 𑀫𑀸𑀢𑀭𑀺, 𑀫𑀸𑀢𑀭𑁂𑀲𑀼 𑀫𑀸𑀢𑀽𑀲𑀼 𑀫𑀸𑀢𑀼𑀲𑀼.

𑀏𑀯𑀁 𑀥𑀻𑀢𑀸, 𑀥𑀻𑀢𑀭𑁄, 𑀤𑀼𑀳𑀺𑀢𑀸, 𑀤𑀼𑀳𑀺𑀢𑀭𑁄 𑀇𑀘𑁆𑀘𑀸𑀤𑀺.

𑀉𑀓𑀸𑀭𑀦𑁆𑀢𑀁.

𑀊𑀓𑀸𑀭𑀦𑁆𑀢𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 𑀚𑀫𑁆𑀩𑀽𑀲𑀤𑁆𑀤𑁄.

𑀚𑀫𑁆𑀩𑀽, 𑀚𑀫𑁆𑀩𑀽 𑀚𑀫𑁆𑀩𑀼𑀬𑁄, 𑀳𑁂 𑀚𑀫𑁆𑀩𑀼, 𑀳𑁂 𑀚𑀫𑁆𑀩𑀽 𑀚𑀫𑁆𑀩𑀼𑀬𑁄, 𑀚𑀫𑁆𑀩𑀼𑀁, 𑀚𑀫𑁆𑀩𑀽 𑀚𑀫𑁆𑀩𑀼𑀬𑁄 𑀇𑀘𑁆𑀘𑀸𑀤𑀺 𑀇𑀢𑁆𑀣𑀻𑀲𑀤𑁆𑀤𑀲𑀫𑀁.

𑀏𑀯𑀁 𑀯𑀥𑀽 𑀘 𑀲𑀭𑀪𑀽, 𑀲𑀭𑀩𑀽 𑀲𑀼𑀢𑀦𑀽 𑀘𑀫𑀽;

𑀯𑀸𑀫𑀽𑀭𑀽 𑀦𑀸𑀕𑀦𑀸𑀲𑀽𑀭𑀽, 𑀲𑀫𑀸𑀦𑀺 𑀔𑀮𑀼 𑀚𑀫𑁆𑀩𑀼𑀬𑀸.

𑀊𑀓𑀸𑀭𑀦𑁆𑀢𑀁.

𑀑𑀓𑀸𑀭𑀦𑁆𑀢𑁄 𑀇𑀢𑁆𑀣𑀺𑀮𑀺𑀗𑁆𑀕𑁄 𑀕𑁄𑀲𑀤𑁆𑀤𑁄.

𑀢𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀕𑁄𑀲𑀤𑁆𑀤𑀲𑁆𑀲𑁂𑀯 𑀭𑀽𑀧𑀦𑀬𑁄.

𑀓𑀜𑁆𑀜𑀸 𑀭𑀢𑁆𑀢𑀺 𑀦𑀤𑀻 𑀇𑀢𑁆𑀣𑀻, 𑀫𑀸𑀢𑀼𑀮𑀸𑀦𑀻 𑀘 𑀪𑀺𑀓𑁆𑀔𑀼𑀦𑀻;

𑀤𑀡𑁆𑀟𑀺𑀦𑀻 𑀬𑀸𑀕𑀼 𑀫𑀸𑀢𑀸 𑀘, 𑀚𑀫𑁆𑀩𑀽 𑀕𑁄𑀢𑀺𑀢𑁆𑀣𑀺𑀲𑀗𑁆𑀕𑀳𑁄.

𑀇𑀢𑁆𑀣𑀺𑀮𑀺𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑀦𑀧𑀼𑀁𑀲𑀓𑀮𑀺𑀗𑁆𑀕

𑀅𑀣 ¶ 𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀺 𑀯𑀼𑀘𑁆𑀘𑀦𑁆𑀢𑁂.

𑀅𑀓𑀸𑀭𑀦𑁆𑀢𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀘𑀺𑀢𑁆𑀢𑀲𑀤𑁆𑀤𑁄.

𑀧𑀼𑀭𑁂 𑀯𑀺𑀬 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺, ‘‘𑀘𑀺𑀢𑁆𑀢 𑀲𑀺’’ 𑀇𑀢𑀻𑀥 𑁋

‘‘𑀦𑀧𑀼𑀁𑀲𑀓𑁂𑀳𑀺, 𑀅𑀢𑁄 𑀦𑀺𑀘𑁆𑀘’’𑀦𑁆𑀢𑀺 𑀘 𑀯𑀢𑁆𑀢𑀢𑁂.

𑁧𑁯𑁫. 𑀲𑀺𑀁.

𑀲𑀺, 𑀅𑀁𑀇𑀢𑀺 𑀤𑁆𑀯𑀺𑀧𑀤𑀫𑀺𑀤𑀁. 𑀅𑀓𑀸𑀭𑀦𑁆𑀢𑁂𑀳𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀳𑀺 𑀧𑀭𑀲𑁆𑀲 𑀲𑀺𑀯𑀘𑀦𑀲𑁆𑀲 𑀅𑀁 𑀳𑁄𑀢𑀺 𑀦𑀺𑀘𑁆𑀘𑀁. 𑀲𑀭𑀮𑁄𑀧𑀧𑀓𑀢𑀺𑀪𑀸𑀯𑀸𑀤𑀺, 𑀘𑀺𑀢𑁆𑀢𑀁.

𑀩𑀳𑀼𑀯𑀘𑀦𑁂 ‘‘𑀬𑁄𑀦𑀁 𑀦𑀺 𑀦𑀧𑀼𑀁𑀲𑀓𑁂𑀳𑀻’’𑀢𑀺 𑀯𑀢𑁆𑀢𑀢𑁂.

𑁧𑁯𑁬. 𑀅𑀢𑁄 𑀦𑀺𑀘𑁆𑀘𑀁.

𑀅𑀓𑀸𑀭𑀦𑁆𑀢𑁂𑀳𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀳𑀺 𑀬𑁄𑀦𑀁 𑀦𑀺𑀘𑁆𑀘𑀁 𑀦𑀺 𑀳𑁄𑀢𑀺. ‘‘𑀲𑀩𑁆𑀩𑀬𑁄𑀦𑀻𑀦𑀫𑀸𑀏’’𑀢𑀺 𑀦𑀺𑀲𑁆𑀲 𑀯𑀸 𑀆𑀓𑀸𑀭𑁄. 𑀅𑀜𑁆𑀜𑀢𑁆𑀣 ‘‘𑀬𑁄𑀲𑀼 𑀓𑀢’’𑀇𑀘𑁆𑀘𑀸𑀤𑀺𑀦𑀸 𑀤𑀻𑀖𑁄. 𑀘𑀺𑀢𑁆𑀢𑀸 𑀘𑀺𑀢𑁆𑀢𑀸𑀦𑀺.

𑀬𑁄𑀦𑀁 𑀦𑀺𑀪𑀸𑀯𑁂 𑀘𑀸𑀏𑀢𑁆𑀢𑁂, 𑀲𑀺𑀤𑁆𑀥𑁂𑀧𑀺 𑀅𑀯𑀺𑀲𑁂𑀲𑀢𑁄;

‘‘𑀅𑀢𑁄 𑀦𑀺𑀘𑁆𑀘’’𑀦𑁆𑀢𑀺 𑀆𑀭𑀫𑁆𑀪𑀸, 𑀆𑀏𑀢𑁆𑀢𑀁 𑀓𑁆𑀯𑀘𑀺𑀤𑁂𑀯𑀺𑀥.

𑀆𑀮𑀧𑀦𑁂 𑀕𑀮𑁄𑀧𑁄. 𑀳𑁂 𑀘𑀺𑀢𑁆𑀢, 𑀳𑁂 𑀘𑀺𑀢𑁆𑀢𑀸 𑀘𑀺𑀢𑁆𑀢𑀸𑀦𑀺, 𑀤𑀼𑀢𑀺𑀬𑀸𑀬𑀁 𑀦𑀺𑀲𑁆𑀲 𑀯𑀺𑀓𑀧𑁆𑀧𑁂𑀦𑁂𑀓𑀸𑀭𑁄. 𑀘𑀺𑀢𑁆𑀢𑀁, 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀺. 𑀲𑁂𑀲𑀁 𑀧𑀼𑀭𑀺𑀲𑀲𑀤𑁆𑀤𑁂𑀦 𑀲𑀫𑀁.

𑀏𑀯𑀫𑀜𑁆𑀜𑀸𑀦𑀺𑀧𑀺 𑁋

𑀧𑀼𑀜𑁆𑀜 𑀧𑀸𑀧 𑀨𑀮 𑀭𑀽𑀧 𑀲𑀸𑀥𑀦𑀁,

𑀲𑁄𑀢 𑀖𑀸𑀦 𑀲𑀼𑀔 𑀤𑀼𑀓𑁆𑀔 𑀓𑀸𑀭𑀡𑀁;

𑀤𑀸𑀦 𑀲𑀻𑀮 𑀥𑀦 𑀛𑀸𑀦 𑀮𑁄𑀘𑀦𑀁,

𑀫𑀽𑀮 𑀓𑀽𑀮 𑀩𑀮 𑀚𑀸𑀮𑀫𑀗𑁆𑀕𑀮𑀁.

𑀦𑀴𑀺𑀦 ¶ 𑀮𑀺𑀗𑁆𑀕 𑀫𑀼𑀔’𑀗𑁆𑀕 𑀚𑀮’𑀫𑁆𑀩𑀼𑀚𑀁,

𑀧𑀼𑀮𑀺𑀦 𑀥𑀜𑁆𑀜 𑀳𑀺𑀭𑀜𑁆𑀜 𑀧𑀤𑀸’𑀫𑀢𑀁;

𑀧𑀤𑀼𑀫 𑀯𑀡𑁆𑀡 𑀲𑀼𑀲𑀸𑀦 𑀯𑀦𑀸’𑀬𑀼𑀥𑀁,

𑀳𑀤𑀬 𑀘𑀻𑀯𑀭 𑀯𑀢𑁆𑀣 𑀓𑀼𑀮𑀺’𑀦𑁆𑀤𑁆𑀭𑀺𑀬𑀁.

𑀦𑀬𑀦 𑀯𑀤𑀦 𑀬𑀸𑀦𑁄’𑀤𑀸𑀦 𑀲𑁄𑀧𑀸𑀦 𑀧𑀸𑀦𑀁,

𑀪𑀯𑀦 𑀪𑀼𑀯𑀦 𑀮𑁄𑀳𑀸’𑀮𑀸𑀢 𑀢𑀼𑀡𑁆𑀟’𑀡𑁆𑀟 𑀧𑀻𑀞𑀁;

𑀓𑀭𑀡 𑀫𑀭𑀡 𑀜𑀸𑀡𑀸’𑀭𑀫𑁆𑀫𑀡𑀸’𑀭𑀜𑁆𑀜 𑀢𑀸𑀡𑀁,

𑀘𑀭𑀡 𑀦𑀕𑀭 𑀢𑀻𑀭𑀘𑁆𑀙𑀢𑁆𑀢 𑀙𑀺𑀤𑁆𑀤𑁄’𑀤𑀓𑀸𑀦𑀺 𑁋

𑀇𑀘𑁆𑀘𑀸𑀤𑀻𑀦𑀺.

𑀓𑀫𑁆𑀫𑀲𑀤𑁆𑀤𑀲𑁆𑀲 𑀢𑀢𑀺𑀬𑁂𑀓𑀯𑀘𑀦𑀸𑀤𑀻𑀲𑀼 𑀭𑀽𑀧𑀪𑁂𑀤𑁄.

𑀓𑀫𑁆𑀫𑀁, 𑀓𑀫𑁆𑀫𑀸 𑀓𑀫𑁆𑀫𑀸𑀦𑀺, 𑀳𑁂 𑀓𑀫𑁆𑀫, 𑀳𑁂 𑀓𑀫𑁆𑀫𑀸 𑀓𑀫𑁆𑀫𑀸𑀦𑀺, 𑀓𑀫𑁆𑀫𑀁, 𑀓𑀫𑁆𑀫𑁂 𑀓𑀫𑁆𑀫𑀸𑀦𑀺.

‘‘𑀯𑀸, 𑀉, 𑀦𑀸𑀫𑁆𑀳𑀺, 𑀘𑀸’’𑀢𑀺 𑀘 𑀯𑀢𑁆𑀢𑀢𑁂.

𑁧𑁯𑁭. 𑀅 𑀓𑀫𑁆𑀫𑀦𑁆𑀢𑀲𑁆𑀲 𑀘.

𑀓𑀫𑁆𑀫𑀲𑀤𑁆𑀤𑀦𑁆𑀢𑀲𑁆𑀲 𑀉𑀓𑀸𑀭 𑀅𑀓𑀸𑀭𑀸𑀤𑁂𑀲𑀸 𑀳𑁄𑀦𑁆𑀢𑀺 𑀯𑀸 𑀦𑀸𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀅𑀦𑁆𑀢𑀕𑁆𑀕𑀳𑀡𑁂𑀦 𑀣𑀸𑀫𑀤𑁆𑀥𑀸𑀤𑀻𑀦𑀫𑀦𑁆𑀢𑀲𑁆𑀲𑀧𑀺 𑀉𑀢𑁆𑀢𑀁. 𑀘𑀲𑀤𑁆𑀤𑀕𑁆𑀕𑀳𑀡𑁂𑀦 𑀬𑀼𑀯 𑀫𑀖𑀯𑀸𑀦𑀫𑀦𑁆𑀢𑀲𑁆𑀲 𑀆 𑀳𑁄𑀢𑀺 𑀓𑁆𑀯𑀘𑀺 𑀦𑀸 𑀲𑀼𑀇𑀘𑁆𑀘𑁂𑀢𑁂𑀲𑀼. 𑀓𑀫𑁆𑀫𑀼𑀦𑀸 𑀓𑀫𑁆𑀫𑀦𑀸 𑀓𑀫𑁆𑀫𑁂𑀦 𑀯𑀸, 𑀓𑀫𑁆𑀫𑁂𑀳𑀺 𑀓𑀫𑁆𑀫𑁂𑀪𑀺.

𑀲𑀲𑁆𑀫𑀸𑀲𑀼 ‘‘𑀉 𑀦𑀸𑀫𑁆𑀳𑀺 𑀘𑀸’’𑀢𑀺 𑀏𑀢𑁆𑀣 𑀘𑀲𑀤𑁆𑀤𑁂𑀦 𑀧𑀼𑀫 𑀓𑀫𑁆𑀫𑀣𑀸𑀫𑀦𑁆𑀢𑀲𑁆𑀲 𑀘𑀼𑀓𑀸𑀭𑁄 𑀯𑀸 𑀲𑀲𑁆𑀫𑀸𑀲𑀽𑀢𑀺 𑀉𑀢𑁆𑀢𑀁. 𑀓𑀫𑁆𑀫𑀼𑀦𑁄 𑀓𑀫𑁆𑀫𑀲𑁆𑀲, 𑀓𑀫𑁆𑀫𑀸𑀦𑀁, 𑀓𑀫𑁆𑀫𑀼𑀦𑀸 𑀓𑀫𑁆𑀫𑀸 𑀓𑀫𑁆𑀫𑀫𑁆𑀳𑀸 𑀓𑀫𑁆𑀫𑀲𑁆𑀫𑀸, 𑀓𑀫𑁆𑀫𑁂𑀳𑀺 𑀓𑀫𑁆𑀫𑁂𑀪𑀺, 𑀓𑀫𑁆𑀫𑀼𑀦𑁄 𑀓𑀫𑁆𑀫𑀲𑁆𑀲, 𑀓𑀫𑁆𑀫𑀸𑀦𑀁.

𑀲𑁆𑀫𑀺𑀁𑀯𑀘𑀦𑁂 ‘‘𑀩𑁆𑀭𑀳𑁆𑀫𑀢𑁄 𑀢𑀼 𑀲𑁆𑀫𑀺𑀁𑀦𑀻’’𑀢𑀺 𑀏𑀢𑁆𑀣 𑀢𑀼𑀲𑀤𑁆𑀤𑁂𑀦 𑀓𑁆𑀯𑀘𑀺 𑀦𑀺 𑀳𑁄𑀢𑀺. 𑀓𑀫𑁆𑀫𑀦𑀺 𑀓𑀫𑁆𑀫𑁂 𑀓𑀫𑁆𑀫𑀫𑁆𑀳𑀺 𑀓𑀫𑁆𑀫𑀲𑁆𑀫𑀺𑀁, 𑀓𑀫𑁆𑀫𑁂𑀲𑀼.

𑀏𑀯𑀁 ¶ 𑀣𑀸𑀫𑀼𑀦𑀸 𑀣𑀸𑀫𑁂𑀦 𑀣𑀸𑀫𑀲𑀸 𑀯𑀸, 𑀣𑀸𑀫𑀼𑀦𑁄 𑀣𑀸𑀫𑀲𑁆𑀲, 𑀣𑀸𑀫𑀼𑀦𑀸 𑀣𑀸𑀫𑀸. 𑀅𑀤𑁆𑀥𑀼𑀦𑀸, 𑀅𑀤𑁆𑀥𑀼𑀦𑁄 𑀇𑀘𑁆𑀘𑀸𑀤𑀺 𑀧𑀼𑀭𑀺𑀫𑀲𑀫𑀁.

𑀕𑀼𑀡𑀯𑀦𑁆𑀢𑀼 𑀲𑀺, ‘‘𑀲𑀯𑀺𑀪𑀢𑁆𑀢𑀺𑀲𑁆𑀲, 𑀦𑁆𑀢𑀼𑀲𑁆𑀲, 𑀲𑀺𑀫𑁆𑀳𑀻’’𑀢𑀺 𑀘 𑀯𑀢𑁆𑀢𑀢𑁂.

𑁧𑁯𑁮. 𑀅𑀁 𑀦𑀧𑀼𑀁𑀲𑀓𑁂.

𑀦𑀧𑀼𑀁𑀲𑀓𑁂 𑀯𑀢𑁆𑀢𑀫𑀸𑀦𑀲𑁆𑀲 𑀮𑀺𑀗𑁆𑀕𑀲𑁆𑀲 𑀲𑀫𑁆𑀩𑀦𑁆𑀥𑀺𑀦𑁄 𑀦𑁆𑀢𑀼𑀧𑁆𑀧𑀘𑁆𑀘𑀬𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀅𑀁 𑀳𑁄𑀢𑀺 𑀲𑀺𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀕𑀼𑀡𑀯𑀁 𑀘𑀺𑀢𑁆𑀢𑀁.

𑀬𑁄𑀫𑁆𑀳𑀺 ‘‘𑀦𑁆𑀢𑀼𑀲𑁆𑀲𑀦𑁆𑀢𑁄 𑀬𑁄𑀲𑀼 𑀘𑀸’’𑀢𑀺 𑀅𑀢𑁆𑀢𑀁, 𑀇𑀓𑀸𑀭𑁄 𑀘. 𑀕𑀼𑀡𑀯𑀦𑁆𑀢𑀺, 𑀕𑀼𑀡𑀯𑀦𑁆𑀢𑀸𑀦𑀺, 𑀲𑁂𑀲𑀁 𑀜𑁂𑀬𑁆𑀬𑀁.

𑀕𑀘𑁆𑀙𑀦𑁆𑀢 𑀲𑀺, ‘‘𑀲𑀺𑀫𑁆𑀳𑀺 𑀕𑀘𑁆𑀙𑀦𑁆𑀢𑀸𑀤𑀻𑀦𑀁 𑀦𑁆𑀢𑀲𑀤𑁆𑀤𑁄 𑀅’’𑀫𑀺𑀢𑀺 𑀅𑀁. 𑀕𑀘𑁆𑀙𑀁 𑀕𑀘𑁆𑀙𑀦𑁆𑀢𑀁, 𑀕𑀘𑁆𑀙𑀦𑁆𑀢𑀸 𑀕𑀘𑁆𑀙𑀦𑁆𑀢𑀸𑀦𑀺.

𑀅𑀓𑀸𑀭𑀦𑁆𑀢𑀁.

𑀆𑀓𑀸𑀭𑀦𑁆𑀢𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀅𑀲𑁆𑀲𑀤𑁆𑀥𑀸𑀲𑀤𑁆𑀤𑁄.

‘‘𑀅𑀲𑁆𑀲𑀤𑁆𑀥𑀸’’𑀇𑀢𑀺 𑀞𑀺𑀢𑁂 𑁋

‘‘𑀲𑀫𑀸𑀲𑀲𑁆𑀲𑀸’’𑀢𑀺 𑀅𑀥𑀺𑀓𑀺𑀘𑁆𑀘 ‘‘𑀲𑀭𑁄 𑀭𑀲𑁆𑀲𑁄 𑀦𑀧𑀼𑀁𑀲𑀓𑁂’’𑀢𑀺 𑀲𑀫𑀸𑀲𑀦𑁆𑀢𑀲𑁆𑀲 𑀭𑀲𑁆𑀲𑀢𑁆𑀢𑀁, 𑀲𑀫𑀸𑀲𑀢𑁆𑀢𑀸 𑀦𑀸𑀫𑀩𑁆𑀬𑀧𑀤𑁂𑀲𑁄, 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺. 𑀲𑁂𑀲𑀁 𑀘𑀺𑀢𑁆𑀢𑀲𑀫𑀁.

𑀅𑀲𑁆𑀲𑀤𑁆𑀥𑀁 𑀓𑀼𑀮𑀁, 𑀅𑀲𑁆𑀲𑀤𑁆𑀥𑀸 𑀅𑀲𑁆𑀲𑀤𑁆𑀥𑀸𑀦𑀺 𑀓𑀼𑀮𑀸𑀦𑀺 𑀇𑀘𑁆𑀘𑀸𑀤𑀺.

𑀢𑀣𑀸 𑀫𑀼𑀔𑀦𑀸𑀲𑀺𑀓𑀸𑀲𑀤𑁆𑀤𑁄. 𑀢𑀲𑁆𑀲 𑀤𑁆𑀯𑀦𑁆𑀤𑁂𑀓𑀢𑁆𑀢𑀸 𑀲𑀩𑁆𑀩𑀢𑁆𑀣𑁂𑀓𑀯𑀘𑀦𑀫𑁂𑀯. 𑀫𑀼𑀔𑀦𑀸𑀲𑀺𑀓𑀁, 𑀳𑁂 𑀫𑀼𑀔𑀦𑀸𑀲𑀺𑀓, 𑀫𑀼𑀔𑀦𑀸𑀲𑀺𑀓𑀁, 𑀫𑀼𑀔𑀦𑀸𑀲𑀺𑀓𑁂𑀦 𑀇𑀘𑁆𑀘𑀸𑀤𑀺.

𑀆𑀓𑀸𑀭𑀦𑁆𑀢𑀁.

𑀇𑀓𑀸𑀭𑀦𑁆𑀢𑁄 ¶ 𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀅𑀝𑁆𑀞𑀺𑀲𑀤𑁆𑀤𑁄.

𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺, 𑀲𑀺𑀮𑁄𑀧𑁄, 𑀅𑀝𑁆𑀞𑀺.

‘‘𑀯𑀸’’𑀢𑀺 𑀯𑀢𑁆𑀢𑀢𑁂.

𑁧𑁯𑁯. 𑀬𑁄𑀦𑀁 𑀦𑀺 𑀦𑀧𑀼𑀁𑀲𑀓𑁂𑀳𑀺.

𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀳𑀺 𑀧𑀭𑁂𑀲𑀁 𑀲𑀩𑁆𑀩𑁂𑀲𑀁 𑀬𑁄𑀦𑀁 𑀦𑀺 𑀳𑁄𑀢𑀺 𑀯𑀸.

𑀅𑀝𑁆𑀞𑀻𑀦𑀺, 𑀅𑀜𑁆𑀜𑀢𑁆𑀣 𑀦𑀺𑀘𑁆𑀘𑀁 𑀬𑁄𑀮𑁄𑀧𑁄, 𑀤𑀻𑀖𑁄 𑀘, 𑀅𑀝𑁆𑀞𑀻, 𑀢𑀣𑀸 𑀳𑁂 𑀅𑀝𑁆𑀞𑀺, 𑀳𑁂 𑀅𑀝𑁆𑀞𑀻 𑀅𑀝𑁆𑀞𑀻𑀦𑀺, 𑀅𑀝𑁆𑀞𑀺𑀁, 𑀅𑀝𑁆𑀞𑀻 𑀅𑀝𑁆𑀞𑀻𑀦𑀺, 𑀅𑀝𑁆𑀞𑀺𑀦𑀸 𑀇𑀘𑁆𑀘𑀸𑀤𑀺 𑀅𑀕𑁆𑀕𑀺𑀲𑀤𑁆𑀤𑀲𑀫𑀁.

𑀏𑀯𑀁 𑀲𑀢𑁆𑀣𑀺 𑀤𑀥𑀺 𑀯𑀸𑀭𑀺 𑀅𑀓𑁆𑀔𑀺 𑀅𑀘𑁆𑀙𑀺 𑀅𑀘𑁆𑀘𑀺 𑀇𑀘𑁆𑀘𑀸𑀤𑀻𑀦𑀺.

𑀇𑀓𑀸𑀭𑀦𑁆𑀢𑀁.

𑀈𑀓𑀸𑀭𑀦𑁆𑀢𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀲𑀼𑀔𑀓𑀸𑀭𑀻𑀲𑀤𑁆𑀤𑁄.

‘‘𑀲𑀼𑀔𑀪𑀸𑀭𑀻 𑀲𑀺’’ 𑀇𑀢𑀻𑀥 𑀅𑀦𑀧𑀼𑀁𑀲𑀓𑀢𑁆𑀢𑀸𑀪𑀸𑀯𑀸 𑀲𑀺𑀲𑁆𑀫𑀺𑀫𑁆𑀧𑀺 ‘‘𑀅𑀖𑁄 𑀭𑀲𑁆𑀲’’𑀫𑀺𑀘𑁆𑀘𑀸𑀤𑀺𑀦𑀸 𑀭𑀲𑁆𑀲𑀢𑁆𑀢𑀁, 𑀲𑀺𑀮𑁄𑀧𑁄. 𑀲𑀼𑀔𑀓𑀸𑀭𑀺 𑀤𑀸𑀦𑀁, 𑀲𑀼𑀔𑀓𑀸𑀭𑀻 𑀲𑀼𑀔𑀓𑀸𑀭𑀻𑀦𑀺, 𑀳𑁂 𑀲𑀼𑀔𑀓𑀸𑀭𑀺, 𑀳𑁂 𑀲𑀼𑀔𑀓𑀸𑀭𑀻 𑀳𑁂 𑀲𑀼𑀔𑀓𑀸𑀭𑀻𑀦𑀺, 𑀲𑀼𑀔𑀓𑀸𑀭𑀺𑀦𑀁 𑀲𑀼𑀔𑀓𑀸𑀭𑀺𑀁, 𑀲𑀼𑀔𑀓𑀸𑀭𑀻 𑀲𑀼𑀔𑀓𑀸𑀭𑀻𑀦𑀺.

𑀲𑁂𑀲𑀁 𑀤𑀡𑁆𑀟𑀻𑀲𑀤𑁆𑀤𑀲𑀫𑀁. 𑀏𑀯𑀁 𑀲𑀻𑀖𑀬𑀸𑀬𑀻𑀆𑀤𑀻𑀦𑀺.

𑀈𑀓𑀸𑀭𑀦𑁆𑀢𑀁.

𑀉𑀓𑀸𑀭𑀦𑁆𑀢𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀆𑀬𑀼𑀲𑀤𑁆𑀤𑁄. 𑀢𑀲𑁆𑀲 𑀅𑀝𑁆𑀞𑀺𑀲𑀤𑁆𑀤𑀲𑁆𑀲𑁂𑀯 𑀭𑀽𑀧𑀦𑀬𑁄.

𑀆𑀬𑀼, 𑀆𑀬𑀽 𑀆𑀬𑀽𑀦𑀺, 𑀳𑁂 𑀆𑀬𑀼, 𑀳𑁂 𑀆𑀬𑀽 𑀳𑁂 𑀆𑀬𑀽𑀦𑀺, 𑀆𑀬𑀼𑀁, 𑀆𑀬𑀽 𑀆𑀬𑀽𑀦𑀺, 𑀆𑀬𑀼𑀦𑀸 𑀆𑀬𑀼𑀲𑀸𑀢𑀺 ¶ 𑀫𑀦𑁄𑀕𑀡𑀸𑀤𑀺𑀢𑁆𑀢𑀸 𑀲𑀺𑀤𑁆𑀥𑀁. 𑀆𑀬𑀽𑀳𑀺 𑀆𑀬𑀽𑀪𑀺, 𑀆𑀬𑀼𑀦𑁄 𑀆𑀬𑀼𑀲𑁆𑀲, 𑀆𑀬𑀽𑀦𑀫𑀺𑀘𑁆𑀘𑀸𑀤𑀺.

𑀏𑀯𑀁 𑀘𑀓𑁆𑀔𑀼 𑀯𑀲𑀼 𑀥𑀦𑀼 𑀤𑀸𑀭𑀼 𑀢𑀺𑀧𑀼 𑀫𑀥𑀼 𑀳𑀺𑀗𑁆𑀕𑀼 𑀲𑀺𑀕𑁆𑀕𑀼 𑀯𑀢𑁆𑀣𑀼 𑀫𑀢𑁆𑀣𑀼 𑀚𑀢𑀼 𑀅𑀫𑁆𑀩𑀼 𑀅𑀲𑁆𑀲𑀼𑀆𑀤𑀻𑀦𑀺.

𑀉𑀓𑀸𑀭𑀦𑁆𑀢𑀁.

𑀊𑀓𑀸𑀭𑀦𑁆𑀢𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀕𑁄𑀢𑁆𑀭𑀪𑀽𑀲𑀤𑁆𑀤𑁄.

𑀕𑁄𑀢𑁆𑀭𑀪𑀽 𑀲𑀺, 𑀦𑀧𑀼𑀁𑀲𑀓𑀢𑁆𑀢𑀸 𑀭𑀲𑁆𑀲𑀢𑁆𑀢𑀁, 𑀲𑀺𑀮𑁄𑀧𑁄. 𑀕𑁄𑀢𑁆𑀭𑀪𑀼 𑀘𑀺𑀢𑁆𑀢𑀁, 𑀕𑁄𑀢𑁆𑀭𑀪𑀽 𑀕𑁄𑀢𑁆𑀭𑀪𑀽𑀦𑀺, 𑀳𑁂 𑀕𑁄𑀢𑁆𑀭𑀪𑀼, 𑀳𑁂 𑀕𑁄𑀢𑁆𑀭𑀪𑀽 𑀳𑁂 𑀕𑁄𑀢𑁆𑀭𑀪𑀽𑀦𑀺, 𑀕𑁄𑀢𑁆𑀭𑀪𑀼𑀁, 𑀕𑁄𑀢𑁆𑀭𑀪𑀽 𑀕𑁄𑀢𑁆𑀭𑀪𑀽𑀦𑀺, 𑀕𑁄𑀢𑁆𑀭𑀪𑀼𑀦𑀸 𑀇𑀘𑁆𑀘𑀸𑀤𑀺 𑀧𑀼𑀮𑁆𑀮𑀺𑀗𑁆𑀕𑁂 𑀅𑀪𑀺𑀪𑀽𑀲𑀤𑁆𑀤𑀲𑀫𑀁.

𑀏𑀯𑀁 𑀅𑀪𑀺𑀪𑀽 𑀲𑀬𑀫𑁆𑀪𑀽 𑀥𑀫𑁆𑀫𑀜𑁆𑀜𑀽𑀆𑀤𑀻𑀦𑀺.

𑀊𑀓𑀸𑀭𑀦𑁆𑀢𑀁.

𑀑𑀓𑀸𑀭𑀦𑁆𑀢𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄 𑀘𑀺𑀢𑁆𑀢𑀕𑁄𑀲𑀤𑁆𑀤𑁄.

‘‘𑀘𑀺𑀢𑁆𑀢𑀸 𑀕𑀸𑀯𑁄 𑀅𑀲𑁆𑀲 𑀓𑀼𑀮𑀲𑁆𑀲𑀸’’𑀢𑀺 𑀅𑀢𑁆𑀣𑁂 𑀩𑀳𑀼𑀩𑁆𑀩𑀻𑀳𑀺𑀲𑀫𑀸𑀲𑁂 𑀓𑀢𑁂 ‘‘𑀲𑀭𑁄 𑀭𑀲𑁆𑀲𑁄 𑀦𑀧𑀼𑀁𑀲𑀓𑁂’’𑀢𑀺 𑀑𑀓𑀸𑀭𑀲𑁆𑀲 𑀞𑀸𑀦𑀧𑁆𑀧𑀬𑀢𑀦𑀸𑀲𑀦𑁆𑀦𑀢𑁆𑀢𑀸 𑀭𑀲𑁆𑀲𑀢𑁆𑀢𑀫𑀼𑀓𑀸𑀭𑁄, 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺, 𑀲𑀺𑀮𑁄𑀧𑁄. 𑀘𑀺𑀢𑁆𑀢𑀕𑀼 𑀓𑀼𑀮𑀁, 𑀘𑀺𑀢𑁆𑀢𑀕𑀽 𑀘𑀺𑀢𑁆𑀢𑀕𑀽𑀦𑀺 𑀇𑀘𑁆𑀘𑀸𑀤𑀺 𑀆𑀬𑀼𑀲𑀤𑁆𑀤𑀲𑀫𑀁.

𑀑𑀓𑀸𑀭𑀦𑁆𑀢𑀁.

𑀘𑀺𑀢𑁆𑀢𑀁 𑀓𑀫𑁆𑀫𑀜𑁆𑀘 𑀅𑀲𑁆𑀲𑀤𑁆𑀥-𑀫𑀣𑀝𑁆𑀞𑀺 𑀲𑀼𑀔𑀓𑀸𑀭𑀺 𑀘;

𑀆𑀬𑀼 𑀕𑁄𑀢𑁆𑀭𑀪𑀽 𑀥𑀫𑁆𑀫𑀜𑁆𑀜𑀽, 𑀘𑀺𑀢𑁆𑀢𑀕𑀽𑀢𑀺 𑀦𑀧𑀼𑀁𑀲𑀓𑁂.

𑀦𑀧𑀼𑀁𑀲𑀓𑀮𑀺𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑀲𑀩𑁆𑀩𑀦𑀸𑀫

𑀅𑀣 ¶ 𑀲𑀩𑁆𑀩𑀦𑀸𑀫𑀸𑀦𑀺 𑀯𑀼𑀘𑁆𑀘𑀦𑁆𑀢𑁂.

𑀲𑀩𑁆𑀩, 𑀓𑀢𑀭, 𑀓𑀢𑀫, 𑀉𑀪𑀬, 𑀇𑀢𑀭, 𑀅𑀜𑁆𑀜, 𑀅𑀜𑁆𑀜𑀢𑀭, 𑀅𑀜𑁆𑀜𑀢𑀫, 𑀧𑀼𑀩𑁆𑀩, 𑀧𑀭, 𑀅𑀧𑀭, 𑀤𑀓𑁆𑀔𑀺𑀡, 𑀉𑀢𑁆𑀢𑀭, 𑀅𑀥𑀭, 𑀬, 𑀢, 𑀏𑀢, 𑀇𑀫, 𑀅𑀫𑀼, 𑀓𑀺𑀁, 𑀏𑀓, 𑀉𑀪, 𑀤𑁆𑀯𑀺, 𑀢𑀺, 𑀘𑀢𑀼, 𑀢𑀼𑀫𑁆𑀳, 𑀅𑀫𑁆𑀳 𑀇𑀢𑀺 𑀲𑀢𑁆𑀢𑀯𑀻𑀲𑀢𑀺 𑀲𑀩𑁆𑀩𑀦𑀸𑀫𑀸𑀦𑀺, 𑀢𑀸𑀦𑀺 𑀲𑀩𑁆𑀩𑀦𑀸𑀫𑀢𑁆𑀢𑀸 𑀢𑀺𑀮𑀺𑀗𑁆𑀕𑀸𑀦𑀺.

𑀢𑀢𑁆𑀣 𑀲𑀩𑁆𑀩𑀲𑀤𑁆𑀤𑁄 𑀦𑀺𑀭𑀯𑀲𑁂𑀲𑀢𑁆𑀣𑁄, 𑀲𑁄 𑀬𑀤𑀸 𑀧𑀼𑀮𑁆𑀮𑀺𑀗𑁆𑀕𑀯𑀺𑀲𑀺𑀝𑁆𑀞𑀢𑁆𑀣𑀸𑀪𑀺𑀥𑀸𑀬𑀻, 𑀢𑀤𑀸 𑀭𑀽𑀧𑀦𑀬𑁄. 𑀧𑀼𑀭𑁂 𑀯𑀺𑀬 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺, ‘‘𑀲𑁄’’𑀢𑀺 𑀲𑀺𑀲𑁆𑀲 𑀑𑀓𑀸𑀭𑁄, 𑀲𑀭𑀮𑁄𑀧𑀧𑀭𑀦𑀬𑀦𑀸𑀦𑀺. 𑀲𑀩𑁆𑀩𑁄 𑀚𑀦𑁄.

𑀩𑀳𑀼𑀯𑀘𑀦𑁂 ‘‘𑀲𑀩𑁆𑀩 𑀬𑁄’’ 𑀇𑀢𑀻𑀥 ‘‘𑀧𑀭𑀲𑀫𑀜𑁆𑀜𑀸 𑀧𑀬𑁄𑀕𑁂’’𑀢𑀺 𑀲𑀩𑁆𑀩𑀸𑀤𑀻𑀦𑀁 𑀲𑀩𑁆𑀩𑀦𑀸𑀫𑀲𑀜𑁆𑀜𑀸.

‘‘𑀬𑁄’’𑀢𑀺 𑀯𑀢𑁆𑀢𑀢𑁂.

𑁨𑁦𑁦. 𑀲𑀩𑁆𑀩𑀦𑀸𑀫𑀓𑀸𑀭𑀢𑁂 𑀧𑀞𑀫𑁄.

𑀲𑀩𑁆𑀩𑁂𑀲𑀁 𑀇𑀢𑁆𑀣𑀺𑀧𑀼𑀫𑀦𑀧𑀼𑀁𑀲𑀓𑀸𑀦𑀁 𑀦𑀸𑀫𑀸𑀦𑀺 𑀲𑀩𑁆𑀩𑀦𑀸𑀫𑀸𑀦𑀺, 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀲𑀩𑁆𑀩𑀦𑀸𑀫𑀲𑀜𑁆𑀜𑀸𑀦𑀁 𑀮𑀺𑀗𑁆𑀕𑀸𑀦𑀁 𑀅𑀓𑀸𑀭𑀢𑁄 𑀧𑀭𑁄 𑀧𑀞𑀫𑁄 𑀬𑁄 𑀏𑀢𑁆𑀢𑀫𑀸𑀧𑀚𑁆𑀚𑀢𑁂. 𑀲𑀩𑁆𑀩𑁂 𑀧𑀼𑀭𑀺𑀲𑀸.

𑀅𑀓𑀸𑀭𑀢𑁄𑀢𑀺 𑀓𑀺𑀁? 𑀲𑀩𑁆𑀩𑀸 𑀅𑀫𑀽.

𑀳𑁂 𑀲𑀩𑁆𑀩 𑀲𑀩𑁆𑀩𑀸, 𑀳𑁂 𑀲𑀩𑁆𑀩𑁂, 𑀲𑀩𑁆𑀩𑀁, 𑀲𑀩𑁆𑀩𑁂, 𑀲𑀩𑁆𑀩𑁂𑀦, 𑀲𑀩𑁆𑀩𑁂𑀳𑀺 𑀲𑀩𑁆𑀩𑁂𑀪𑀺.

𑀘𑀢𑀼𑀢𑁆𑀣𑁂𑀓𑀯𑀘𑀦𑁂 𑀆𑀬𑀸𑀤𑁂𑀲𑁂 𑀲𑀫𑁆𑀧𑀢𑁆𑀢𑁂 𑁋

‘‘𑀅𑀢𑁄, 𑀆 𑀏, 𑀲𑁆𑀫𑀸𑀲𑁆𑀫𑀺𑀁𑀦𑀁, 𑀆𑀬 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲𑀸’’𑀢𑀺 𑀘 𑀯𑀢𑁆𑀢𑀢𑁂.

𑁨𑁦𑁧. 𑀢𑀬𑁄 ¶ 𑀦𑁂𑀯 𑀘 𑀲𑀩𑁆𑀩𑀦𑀸𑀫𑁂𑀳𑀺.

𑀅𑀓𑀸𑀭𑀦𑁆𑀢𑁂𑀳𑀺 𑀲𑀩𑁆𑀩𑀦𑀸𑀫𑁂𑀳𑀺 𑀧𑀭𑁂𑀲𑀁 𑀲𑁆𑀫𑀸 𑀲𑁆𑀫𑀺𑀁 𑀇𑀘𑁆𑀘𑁂𑀢𑁂𑀲𑀁, 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀘 𑀆 𑀏 𑀆𑀬𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀦𑁂𑀯 𑀳𑁄𑀦𑁆𑀢𑀻𑀢𑀺 𑀆𑀬𑀸𑀤𑁂𑀲𑀸𑀪𑀸𑀯𑁄. 𑀘𑀕𑁆𑀕𑀳𑀡𑀁 𑀓𑀢𑁆𑀣𑀘𑀺 𑀧𑀝𑀺𑀲𑁂𑀥𑀦𑀺𑀯𑀢𑁆𑀢𑀦𑀢𑁆𑀣𑀁, 𑀢𑁂𑀦 𑀧𑀼𑀩𑁆𑀩𑀸𑀤𑀻𑀳𑀺 𑀲𑁆𑀫𑀸 𑀲𑁆𑀫𑀺𑀁𑀦𑀁 𑀆 𑀏 𑀘 𑀳𑁄𑀦𑁆𑀢𑀺. 𑀲𑀩𑁆𑀩𑀲𑁆𑀲.

‘‘𑀅𑀓𑀸𑀭𑁄, 𑀏’’𑀢𑀺 𑀘 𑀯𑀢𑁆𑀢𑀢𑁂.

𑁨𑁦𑁨. 𑀲𑀩𑁆𑀩𑀦𑀸𑀫𑀸𑀦𑀁 𑀦𑀁𑀫𑁆𑀳𑀺 𑀘.

𑀲𑀩𑁆𑀩𑁂𑀲𑀁 𑀲𑀩𑁆𑀩𑀦𑀸𑀫𑀸𑀦𑀁 𑀅𑀓𑀸𑀭𑁄 𑀏𑀢𑁆𑀢𑀫𑀸𑀧𑀚𑁆𑀚𑀢𑁂 𑀦𑀁𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺.

‘‘𑀲𑀩𑁆𑀩𑀦𑀸𑀫𑀢𑁄’’𑀢𑀺 𑀘 𑀯𑀢𑁆𑀢𑀢𑁂.

𑁨𑁦𑁩. 𑀲𑀩𑁆𑀩𑀢𑁄 𑀦𑀁 𑀲𑀁𑀲𑀸𑀦𑀁.

𑀲𑀩𑁆𑀩𑀢𑁄 𑀲𑀩𑁆𑀩𑀦𑀸𑀫𑀢𑁄 𑀧𑀭𑀲𑁆𑀲 𑀦𑀁𑀯𑀘𑀦𑀲𑁆𑀲 𑀲𑀁 𑀲𑀸𑀦𑀁𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺.

𑀲𑀩𑁆𑀩𑁂𑀲𑀁 𑀲𑀩𑁆𑀩𑁂𑀲𑀸𑀦𑀁, 𑀲𑀩𑁆𑀩𑀲𑁆𑀫𑀸 𑀲𑀩𑁆𑀩𑀫𑁆𑀳𑀸, 𑀲𑀩𑁆𑀩𑁂𑀳𑀺 𑀲𑀩𑁆𑀩𑁂𑀪𑀺, 𑀲𑀩𑁆𑀩𑀲𑁆𑀲, 𑀲𑀩𑁆𑀩𑁂𑀲𑀁 𑀲𑀩𑁆𑀩𑁂𑀲𑀸𑀦𑀁, 𑀲𑀩𑁆𑀩𑀲𑁆𑀫𑀺𑀁 𑀲𑀩𑁆𑀩𑀫𑁆𑀳𑀺, 𑀲𑀩𑁆𑀩𑁂𑀲𑀼.

𑀇𑀢𑁆𑀣𑀺𑀬𑀁 ‘‘𑀇𑀢𑁆𑀣𑀺𑀬𑀫𑀢𑁄 𑀆𑀧𑁆𑀧𑀘𑁆𑀘𑀬𑁄’’𑀢𑀺 𑀆𑀧𑁆𑀧𑀘𑁆𑀘𑀬𑁄. 𑀅𑀜𑁆𑀜𑀁 𑀓𑀜𑁆𑀜𑀸𑀲𑀤𑁆𑀤𑀲𑀫𑀁 𑀅𑀜𑁆𑀜𑀢𑁆𑀭 𑀲 𑀦𑀁 𑀲𑁆𑀫𑀺𑀁𑀯𑀘𑀦𑁂𑀳𑀺. 𑀲𑀩𑁆𑀩𑀸 𑀧𑀚𑀸, 𑀲𑀩𑁆𑀩𑀸 𑀲𑀩𑁆𑀩𑀸𑀬𑁄, 𑀳𑁂 𑀲𑀩𑁆𑀩𑁂, 𑀳𑁂 𑀲𑀩𑁆𑀩𑀸 𑀲𑀩𑁆𑀩𑀸𑀬𑁄, 𑀲𑀩𑁆𑀩𑀁, 𑀲𑀩𑁆𑀩𑀸 𑀲𑀩𑁆𑀩𑀸𑀬𑁄, 𑀲𑀩𑁆𑀩𑀸𑀬, 𑀲𑀩𑁆𑀩𑀸𑀳𑀺 𑀲𑀩𑁆𑀩𑀸𑀪𑀺.

𑀘𑀢𑀼𑀢𑁆𑀣𑁂𑀓𑀯𑀘𑀦𑁂 ‘‘𑀲𑀩𑁆𑀩𑀦𑀸𑀫𑀢𑁄 𑀯𑀸’’, 𑀲𑀩𑁆𑀩𑀢𑁄 𑀓𑁄𑀢𑀺 𑀇𑀢𑁄 ‘‘𑀲𑀩𑁆𑀩𑀢𑁄’’𑀢𑀺 𑀘 𑀯𑀢𑁆𑀢𑀢𑁂.

𑁨𑁦𑁪. 𑀖𑀧𑀢𑁄 ¶ 𑀲𑁆𑀫𑀺𑀁𑀲𑀸𑀦𑀁 𑀲𑀁𑀲𑀸.

𑀲𑀩𑁆𑀩𑀢𑁄 𑀲𑀩𑁆𑀩𑀦𑀸𑀫𑀢𑁄 𑀖𑀧𑀲𑀜𑁆𑀜𑀢𑁄 𑀲𑁆𑀫𑀺𑀁 𑀲𑀇𑀘𑁆𑀘𑁂𑀢𑁂𑀲𑀁 𑀬𑀣𑀸𑀓𑁆𑀓𑀫𑀁 𑀲𑀁𑀲𑀸𑀆𑀤𑁂𑀲𑀸 𑀳𑁄𑀦𑁆𑀢𑀺 𑀯𑀸.

‘‘𑀲𑀁𑀲𑀸𑀲𑁆𑀯𑁂𑀓𑀯𑀘𑀦𑁂𑀲𑀼 𑀘𑀸’’𑀢𑀺 𑀯𑀢𑁆𑀢𑀢𑁂.

𑁨𑁦𑁫. 𑀖𑁄 𑀭𑀲𑁆𑀲𑀁.

𑀖𑀲𑀜𑁆𑀜𑁄 𑀆𑀓𑀸𑀭𑁄 𑀭𑀲𑁆𑀲𑀫𑀸𑀧𑀚𑁆𑀚𑀢𑁂 𑀲𑀁𑀲𑀸𑀲𑁆𑀯𑁂𑀓𑀯𑀘𑀦𑁂𑀲𑀼 𑀯𑀺𑀪𑀢𑁆𑀢𑀸𑀤𑁂𑀲𑁂𑀲𑀼 𑀧𑀭𑁂𑀲𑀼.

‘‘𑀲𑀸𑀕𑀫𑁄’’𑀢𑀺 𑀯𑀢𑁆𑀢𑀢𑁂.

𑁨𑁦𑁬. 𑀲𑀁𑀲𑀸𑀲𑁆𑀯𑁂𑀓𑀯𑀘𑀦𑁂𑀲𑀼 𑀘.

𑀲𑀁 𑀲𑀸𑀇𑀘𑁆𑀘𑁂𑀢𑁂𑀲𑀼 𑀏𑀓𑀯𑀘𑀦𑀝𑁆𑀞𑀸𑀦𑀲𑀫𑁆𑀪𑀽𑀢𑁂𑀲𑀼 𑀯𑀺𑀪𑀢𑁆𑀢𑀸𑀤𑁂𑀲𑁂𑀲𑀼 𑀧𑀭𑁂𑀲𑀼 𑀮𑀺𑀗𑁆𑀕𑀫𑁆𑀳𑀸 𑀲𑀓𑀸𑀭𑀸𑀕𑀫𑁄 𑀳𑁄𑀢𑀺.

𑀲𑀩𑁆𑀩𑀲𑁆𑀲𑀸 𑀲𑀩𑁆𑀩𑀸𑀬, 𑀲𑀩𑁆𑀩𑀸𑀲𑀁 𑀲𑀩𑁆𑀩𑀸𑀲𑀸𑀦𑀁, 𑀲𑀩𑁆𑀩𑀸𑀬, 𑀲𑀩𑁆𑀩𑀸𑀳𑀺 𑀲𑀩𑁆𑀩𑀸𑀪𑀺, 𑀲𑀩𑁆𑀩𑀲𑁆𑀲𑀸 𑀲𑀩𑁆𑀩𑀸𑀬, 𑀲𑀩𑁆𑀩𑀸𑀲𑀁 𑀲𑀩𑁆𑀩𑀸𑀲𑀸𑀦𑀁.

𑀲𑁆𑀫𑀺𑀁𑀫𑁆𑀳𑀺 ‘‘𑀲𑀩𑁆𑀩𑀦𑀸𑀫𑀢𑁄, 𑀖𑀧𑀢𑁄’’𑀢𑀺 𑀘 𑀯𑀢𑁆𑀢𑀢𑁂.

𑁨𑁦𑁭. 𑀦𑁂𑀢𑀸𑀳𑀺 𑀲𑁆𑀫𑀺𑀫𑀸𑀬𑀬𑀸.

𑀏𑀢𑁂𑀳𑀺 𑀲𑀩𑁆𑀩𑀦𑀸𑀫𑁂𑀳𑀺 𑀖𑀧𑀲𑀜𑁆𑀜𑁂𑀳𑀺 𑀧𑀭𑀲𑁆𑀲 𑀲𑁆𑀫𑀺𑀁𑀯𑀘𑀦𑀲𑁆𑀲 𑀦𑁂𑀯 𑀆𑀬 𑀬𑀸𑀤𑁂𑀲𑀸 𑀳𑁄𑀦𑁆𑀢𑀻𑀢𑀺 𑀆𑀬𑀸𑀪𑀸𑀯𑁄. 𑀯𑀸𑀥𑀺𑀓𑀸𑀭𑀢𑁄 𑀓𑁆𑀯𑀘𑀺 𑀳𑁄𑀢𑀺 𑀤𑀓𑁆𑀔𑀺𑀡𑀸𑀬 𑀉𑀢𑁆𑀢𑀭𑀸𑀬𑀸𑀢𑀺 𑀆𑀤𑀺.

𑀲𑀁𑀬𑀫𑀸𑀤𑁂𑀲𑀸, 𑀲𑀩𑁆𑀩𑀲𑁆𑀲𑀁 𑀲𑀩𑁆𑀩𑀸𑀬𑀁, 𑀲𑀩𑁆𑀩𑀸𑀲𑀼.

𑀦𑀧𑀼𑀁𑀲𑀓𑁂 𑀲𑀩𑁆𑀩𑀁 𑀘𑀺𑀢𑁆𑀢𑀁, 𑀲𑀩𑁆𑀩𑀸𑀦𑀺, 𑀳𑁂 𑀲𑀩𑁆𑀩, 𑀳𑁂 𑀲𑀩𑁆𑀩𑀸𑀦𑀺, 𑀲𑀩𑁆𑀩𑀁, 𑀲𑀩𑁆𑀩𑀸𑀦𑀺. 𑀲𑁂𑀲𑀁 𑀧𑀼𑀮𑁆𑀮𑀺𑀗𑁆𑀕𑁂 𑀯𑀺𑀬 𑀜𑁂𑀬𑁆𑀬𑀁.

𑀏𑀯𑀁 ¶ 𑀓𑀢𑀭𑀸𑀤𑀻𑀦𑀁 𑀅𑀜𑁆𑀜𑀢𑀫𑀲𑀤𑁆𑀤𑀧𑀭𑀺𑀬𑀦𑁆𑀢𑀸𑀦𑀁 𑀢𑀻𑀲𑀼𑀧𑀺 𑀮𑀺𑀗𑁆𑀕𑁂𑀲𑀼 𑀭𑀽𑀧𑀦𑀬𑁄.

𑀢𑀢𑁆𑀣 𑀓𑀢𑀭𑀓𑀢𑀫𑀲𑀤𑁆𑀤𑀸 𑀧𑀼𑀘𑁆𑀙𑀦𑀢𑁆𑀣𑀸.

𑀉𑀪𑀬𑀲𑀤𑁆𑀤𑁄 𑀤𑁆𑀯𑀺𑀅𑀯𑀬𑀯𑀲𑀫𑀼𑀤𑀸𑀬𑀯𑀘𑀦𑁄.

𑀇𑀢𑀭𑀲𑀤𑁆𑀤𑁄 𑀯𑀼𑀢𑁆𑀢𑀧𑁆𑀧𑀝𑀺𑀬𑁄𑀕𑀯𑀘𑀦𑁄.

𑀅𑀜𑁆𑀜𑀲𑀤𑁆𑀤𑁄 𑀅𑀥𑀺𑀓𑀢𑀸𑀧𑀭𑀯𑀘𑀦𑁄.

𑀅𑀜𑁆𑀜𑀢𑀭 𑀅𑀜𑁆𑀜𑀢𑀫𑀲𑀤𑁆𑀤𑀸 𑀅𑀦𑀺𑀬𑀫𑀢𑁆𑀣𑀸.

‘‘𑀬𑁄, 𑀲𑀩𑁆𑀩𑀦𑀸𑀫𑀓𑀸𑀭𑀢𑁂 𑀧𑀞𑀫𑁄’’𑀢𑀺 𑀘 𑀯𑀢𑁆𑀢𑀢𑁂.

𑁨𑁦𑁮. 𑀤𑁆𑀯𑀦𑁆𑀤𑀝𑁆𑀞𑀸 𑀯𑀸.

𑀤𑁆𑀯𑀦𑁆𑀤𑀲𑀫𑀸𑀲𑀝𑁆𑀞𑀸 𑀲𑀩𑁆𑀩𑀦𑀸𑀫𑀓𑀸𑀭𑀢𑁄 𑀧𑀭𑁄 𑀧𑀞𑀫𑁄 𑀬𑁄 𑀏𑀢𑁆𑀢𑀫𑀸𑀧𑀚𑁆𑀚𑀢𑁂 𑀯𑀸. 𑀓𑀢𑀭𑁄 𑀘 𑀓𑀢𑀫𑁄 𑀘𑀸𑀢𑀺 𑀓𑀢𑀭𑀓𑀢𑀫𑁂, 𑀓𑀢𑀭𑀓𑀢𑀫𑀸 𑀯𑀸 𑀇𑀘𑁆𑀘𑀸𑀤𑀺.

𑀧𑀼𑀩𑁆𑀩𑀸𑀤𑀬𑁄 𑀤𑀺𑀲𑀸𑀤𑀺𑀯𑀯𑀢𑁆𑀣𑀸𑀦𑀯𑀘𑀦𑀸.

𑀧𑀼𑀩𑁆𑀩𑁄 𑀓𑀸𑀮𑁄. 𑀩𑀳𑀼𑀯𑀘𑀦𑁂 ‘‘𑀥𑀸𑀢𑀼𑀮𑀺𑀗𑁆𑀕𑁂𑀳𑀺 𑀧𑀭𑀸 𑀧𑀘𑁆𑀘𑀬𑀸’’𑀢𑀺 𑀏𑀢𑁆𑀣 𑀧𑀭𑀸𑀢𑀺 𑀦𑀺𑀤𑁆𑀤𑁂𑀲𑀢𑁄 𑀧𑀼𑀩𑁆𑀩𑀸𑀤𑀻𑀳𑀺 𑀬𑁄𑀯𑀘𑀦𑀲𑁆𑀲 𑀯𑀺𑀓𑀧𑁆𑀧𑁂𑀦𑁂𑀓𑀸𑀭𑁄.

𑀧𑀼𑀩𑁆𑀩𑁂 𑀧𑀼𑀩𑁆𑀩𑀸, 𑀳𑁂 𑀧𑀼𑀩𑁆𑀩, 𑀳𑁂 𑀧𑀼𑀩𑁆𑀩𑁂 𑀳𑁂 𑀧𑀼𑀩𑁆𑀩𑀸, 𑀧𑀼𑀩𑁆𑀩𑀁, 𑀧𑀼𑀩𑁆𑀩𑁂, 𑀧𑀼𑀩𑁆𑀩𑁂𑀦, 𑀧𑀼𑀩𑁆𑀩𑁂𑀳𑀺 𑀧𑀼𑀩𑁆𑀩𑁂𑀪𑀺, 𑀧𑀼𑀩𑁆𑀩𑀲𑁆𑀲, 𑀧𑀼𑀩𑁆𑀩𑁂𑀲𑀁 𑀧𑀼𑀩𑁆𑀩𑁂𑀲𑀸𑀦𑀁. ‘‘𑀲𑁆𑀫𑀸𑀲𑁆𑀫𑀺𑀁𑀦𑀁 𑀯𑀸’’𑀢𑀺 𑀯𑀺𑀓𑀧𑁆𑀧𑁂𑀦𑀸𑀓𑀸𑀭𑁂𑀓𑀸𑀭𑀸. 𑀧𑀼𑀩𑁆𑀩𑀸 𑀧𑀼𑀩𑁆𑀩𑀲𑁆𑀫𑀸 𑀧𑀼𑀩𑁆𑀩𑀫𑁆𑀳𑀸, 𑀧𑀼𑀩𑁆𑀩𑁂𑀳𑀺 𑀧𑀼𑀩𑁆𑀩𑁂𑀪𑀺, 𑀧𑀼𑀩𑁆𑀩𑀲𑁆𑀲, 𑀧𑀼𑀩𑁆𑀩𑁂𑀲𑀁 𑀧𑀼𑀩𑁆𑀩𑁂𑀲𑀸𑀦𑀁, 𑀧𑀼𑀩𑁆𑀩𑁂 𑀧𑀼𑀩𑁆𑀩𑀲𑁆𑀫𑀺𑀁 𑀧𑀼𑀩𑁆𑀩𑀫𑁆𑀳𑀺, 𑀧𑀼𑀩𑁆𑀩𑁂𑀲𑀼.

𑀇𑀢𑁆𑀣𑀺𑀬𑀁 𑀧𑀼𑀩𑁆𑀩𑀸 𑀤𑀺𑀲𑀸, 𑀧𑀼𑀩𑁆𑀩𑀸 𑀧𑀼𑀩𑁆𑀩𑀸𑀬𑁄 𑀇𑀘𑁆𑀘𑀸𑀤𑀺 𑀲𑀩𑁆𑀩𑀸𑀲𑀤𑁆𑀤𑀲𑀫𑀁.

𑀦𑀧𑀼𑀁𑀲𑀓𑁂 ¶ 𑀧𑀼𑀩𑁆𑀩𑀁 𑀞𑀸𑀦𑀁, 𑀧𑀼𑀩𑁆𑀩𑀸𑀦𑀺, 𑀳𑁂 𑀧𑀼𑀩𑁆𑀩, 𑀳𑁂 𑀧𑀼𑀩𑁆𑀩𑀸𑀦𑀺, 𑀧𑀼𑀩𑁆𑀩𑀁, 𑀧𑀼𑀩𑁆𑀩𑀸𑀦𑀺, 𑀲𑁂𑀲𑀁 𑀧𑀼𑀮𑁆𑀮𑀺𑀗𑁆𑀕𑀲𑀫𑀁. 𑀏𑀯𑀁 𑀧𑀭𑀸𑀧𑀭𑀤𑀓𑁆𑀔𑀺𑀡𑀼𑀢𑁆𑀢𑀭𑀸𑀥𑀭𑀲𑀤𑁆𑀤𑀸.

‘‘𑀲𑀩𑁆𑀩𑀦𑀸𑀫𑀢𑁄, 𑀤𑁆𑀯𑀦𑁆𑀤𑀝𑁆𑀞𑀸’’𑀢𑀺 𑀘 𑀯𑀢𑁆𑀢𑀢𑁂.

𑁨𑁦𑁯. 𑀦𑀸𑀜𑁆𑀜𑀁 𑀲𑀩𑁆𑀩𑀦𑀸𑀫𑀺𑀓𑀁.

𑀤𑁆𑀯𑀦𑁆𑀤𑀝𑁆𑀞𑀸 𑀲𑀩𑁆𑀩𑀦𑀸𑀫𑀢𑁄 𑀧𑀭𑀲𑁆𑀲 𑀬𑁄𑀯𑀘𑀦𑀲𑁆𑀲 𑀞𑀧𑁂𑀢𑁆𑀯𑀸 𑀏𑀢𑁆𑀢𑀁 𑀅𑀜𑁆𑀜𑀁 𑀲𑀩𑁆𑀩𑀦𑀸𑀫𑀺𑀓𑀁 𑀓𑀸𑀭𑀺𑀬𑀁 𑀦 𑀳𑁄𑀢𑀻𑀢𑀺 𑀲𑀁𑀲𑀸𑀦𑀫𑀸𑀤𑁂𑀲𑀸𑀪𑀸𑀯𑁄. 𑀧𑀼𑀩𑁆𑀩𑀸𑀧𑀭𑀸𑀦𑀁, 𑀧𑀼𑀩𑁆𑀩𑀼𑀢𑁆𑀢𑀭𑀸𑀦𑀁 𑀅𑀥𑀭𑀼𑀢𑁆𑀢𑀭𑀸𑀦𑀁, ‘‘𑀦𑀸𑀜𑁆𑀜𑀁 𑀲𑀩𑁆𑀩𑀦𑀸𑀫𑀺𑀓’’𑀦𑁆𑀢𑀺 𑀯𑀺𑀦𑀸𑀥𑀺𑀓𑀸𑀭𑁂𑀦 𑀬𑁄𑀕𑁂𑀦 𑀢𑀢𑀺𑀬𑀸𑀲𑀫𑀸𑀲𑁂𑀧𑀺. 𑀫𑀸𑀲𑀧𑀼𑀩𑁆𑀩𑀸𑀬, 𑀫𑀸𑀲𑀧𑀼𑀩𑁆𑀩𑀸𑀦𑀁.

‘‘𑀦𑀸𑀜𑁆𑀜𑀁 𑀲𑀩𑁆𑀩𑀦𑀸𑀫𑀺𑀓’’𑀦𑁆𑀢𑀺 𑀘 𑀯𑀢𑁆𑀢𑀢𑁂.

𑁨𑁧𑁦. 𑀩𑀳𑀼𑀩𑁆𑀩𑀻𑀳𑀺𑀫𑁆𑀳𑀺 𑀘.

𑀩𑀳𑀼𑀩𑁆𑀩𑀻𑀳𑀺𑀫𑁆𑀳𑀺 𑀘 𑀲𑀫𑀸𑀲𑁂 𑀲𑀩𑁆𑀩𑀦𑀸𑀫𑀺𑀓𑀯𑀺𑀥𑀸𑀦𑀁 𑀦𑀸𑀜𑁆𑀜𑀁 𑀳𑁄𑀢𑀺. 𑀧𑀺𑀬𑀧𑀼𑀩𑁆𑀩𑀸𑀬, 𑀧𑀺𑀬𑀧𑀼𑀩𑁆𑀩𑀸𑀦𑀁, 𑀧𑀺𑀬𑀧𑀼𑀩𑁆𑀩𑁂.

𑀘𑀲𑀤𑁆𑀤𑀕𑁆𑀕𑀳𑀡𑁂𑀦 𑀤𑀺𑀲𑀢𑁆𑀣𑀲𑀩𑁆𑀩𑀦𑀸𑀫𑀸𑀦𑀁 𑀩𑀳𑀼𑀩𑁆𑀩𑀻𑀳𑀺𑀫𑁆𑀳𑀺 𑀲𑀩𑁆𑀩𑀦𑀸𑀫𑀺𑀓𑀯𑀺𑀥𑀸𑀦𑀁𑀯 𑀳𑁄𑀢𑀺.

𑀤𑀓𑁆𑀔𑀺𑀡𑀲𑁆𑀲𑀸 𑀘 𑀧𑀼𑀩𑁆𑀩𑀲𑁆𑀲𑀸 𑀘 𑀬𑀤𑀦𑁆𑀢𑀭𑀸𑀴𑀦𑁆𑀢𑀺 𑀅𑀢𑁆𑀣𑁂 𑀩𑀳𑀼𑀩𑁆𑀩𑀻𑀳𑀺, 𑀤𑀓𑁆𑀔𑀺𑀡𑀧𑀼𑀩𑁆𑀩𑀲𑁆𑀲𑀁, 𑀤𑀓𑁆𑀔𑀺𑀡𑀧𑀼𑀩𑁆𑀩𑀲𑁆𑀲𑀸, 𑀏𑀯𑀁 𑀉𑀢𑁆𑀢𑀭𑀧𑀼𑀩𑁆𑀩𑀲𑁆𑀲𑀁, 𑀉𑀢𑁆𑀢𑀭𑀧𑀼𑀩𑁆𑀩𑀲𑁆𑀲𑀸 𑀇𑀘𑁆𑀘𑀸𑀤𑀺.

𑀬𑀢𑁂𑀢𑀲𑀤𑁆𑀤𑀸𑀤𑀻𑀦𑀫𑀸𑀮𑀧𑀦𑁂 𑀭𑀽𑀧𑀁 𑀦 𑀲𑀫𑁆𑀪𑀯𑀢𑀺. 𑀬𑀲𑀤𑁆𑀤𑁄 𑀅𑀦𑀺𑀬𑀫𑀢𑁆𑀣𑁄.

𑀬𑁄 𑀧𑀼𑀭𑀺𑀲𑁄, 𑀬𑁂 𑀧𑀼𑀭𑀺𑀲𑀸, 𑀬𑀁, 𑀬𑁂. 𑀬𑀸 𑀓𑀜𑁆𑀜𑀸, 𑀬𑀸 𑀬𑀸𑀬𑁄, 𑀬𑀁, 𑀬𑀸 𑀬𑀸𑀬𑁄. 𑀬𑀁 𑀘𑀺𑀢𑁆𑀢𑀁, 𑀬𑀸𑀦𑀺, 𑀬𑀁, 𑀬𑀸𑀦𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀲𑀩𑁆𑀩𑀲𑀤𑁆𑀤𑀲𑀫𑀁.

𑀢 ¶ 𑀏𑀢 𑀇𑀫 𑀅𑀫𑀼 𑀓𑀺𑀁𑀇𑀘𑁆𑀘𑁂𑀢𑁂 𑀧𑀭𑀫𑁆𑀫𑀼𑀔 𑀲𑀫𑀻𑀧 𑀅𑀘𑁆𑀘𑀦𑁆𑀢𑀲𑀫𑀻𑀧𑀤𑀽𑀭 𑀧𑀼𑀘𑁆𑀙𑀦𑀢𑁆𑀣𑀯𑀘𑀦𑀸.

𑀢𑀲𑀤𑁆𑀤𑀲𑁆𑀲 𑀪𑁂𑀤𑁄. ‘‘𑀢 𑀲𑀺’’ 𑀇𑀢𑀻𑀥 𑁋

‘‘𑀅𑀦𑀧𑀼𑀁𑀲𑀓𑀲𑁆𑀲𑀸𑀬𑀁 𑀲𑀺𑀫𑁆𑀳𑀻𑀢𑀺, 𑀲’’𑀫𑀺𑀢𑀺 𑀘 𑀯𑀢𑁆𑀢𑀢𑁂.

𑁨𑁧𑁧. 𑀏𑀢𑀢𑁂𑀲𑀁 𑀢𑁄.

𑀏𑀢 𑀢𑀇𑀘𑁆𑀘𑁂𑀢𑁂𑀲𑀁 𑀅𑀦𑀧𑀼𑀁𑀲𑀓𑀸𑀦𑀁 𑀢𑀓𑀸𑀭𑁄 𑀲𑀓𑀸𑀭𑀫𑀸𑀧𑀚𑁆𑀚𑀢𑁂 𑀲𑀺𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀲𑁄 𑀧𑀼𑀭𑀺𑀲𑁄.

𑀲𑀩𑁆𑀩𑀦𑀸𑀫𑀕𑁆𑀕𑀳𑀡𑀜𑁆𑀘, 𑀇𑀢𑁄 𑀢𑀕𑁆𑀕𑀳𑀡𑀜𑁆𑀘 𑀯𑀢𑁆𑀢𑀢𑁂.

𑁨𑁧𑁨. 𑀢𑀲𑁆𑀲 𑀯𑀸 𑀦𑀢𑁆𑀢𑀁 𑀲𑀩𑁆𑀩𑀢𑁆𑀣.

𑀢𑀇𑀘𑁆𑀘𑁂𑀢𑀲𑁆𑀲 𑀲𑀩𑁆𑀩𑀦𑀸𑀫𑀲𑁆𑀲 𑀢𑀓𑀸𑀭𑀲𑁆𑀲 𑀦𑀢𑁆𑀢𑀁 𑀳𑁄𑀢𑀺 𑀯𑀸 𑀲𑀩𑁆𑀩𑀢𑁆𑀣 𑀮𑀺𑀗𑁆𑀕𑁂𑀲𑀼. 𑀦𑁂 𑀢𑁂, 𑀦𑀁 𑀢𑀁, 𑀦𑁂 𑀢𑁂, 𑀦𑁂𑀦 𑀢𑁂𑀦, 𑀦𑁂𑀳𑀺 𑀦𑁂𑀪𑀺 𑀢𑁂𑀳𑀺 𑀢𑁂𑀪𑀺.

‘‘𑀲𑀩𑁆𑀩𑀲𑁆𑀲, 𑀢𑀲𑁆𑀲 𑀯𑀸 𑀲𑀩𑁆𑀩𑀢𑁆𑀣𑀸’’𑀢𑀺 𑀘 𑀯𑀢𑁆𑀢𑀢𑁂.

𑁨𑁧𑁩. 𑀲𑀲𑁆𑀫𑀸𑀲𑁆𑀫𑀺𑀁𑀲𑀁𑀲𑀸𑀲𑁆𑀯𑀢𑁆𑀢𑀁.

𑀢𑀇𑀘𑁆𑀘𑁂𑀢𑀲𑁆𑀲 𑀲𑀩𑁆𑀩𑀦𑀸𑀫𑀲𑁆𑀲 𑀲𑀩𑁆𑀩𑀲𑁆𑀲𑁂𑀯 𑀅𑀢𑁆𑀢𑀁 𑀳𑁄𑀢𑀺 𑀯𑀸 𑀲 𑀲𑁆𑀫𑀸 𑀲𑁆𑀫𑀺𑀁 𑀲𑀁 𑀲𑀸𑀇𑀘𑁆𑀘𑁂𑀢𑁂𑀲𑀼 𑀯𑀘𑀦𑁂𑀲𑀼 𑀲𑀩𑁆𑀩𑀢𑁆𑀣 𑀮𑀺𑀗𑁆𑀕𑁂𑀲𑀼. 𑀅𑀲𑁆𑀲 𑀦𑀲𑁆𑀲 𑀢𑀲𑁆𑀲, 𑀦𑁂𑀲𑀁 𑀢𑁂𑀲𑀁 𑀦𑁂𑀲𑀸𑀦𑀁 𑀢𑁂𑀲𑀸𑀦𑀁.

‘‘𑀲𑁆𑀫𑀸𑀳𑀺𑀲𑁆𑀫𑀺𑀁𑀦𑀁 𑀫𑁆𑀳𑀸𑀪𑀺𑀫𑁆𑀳𑀺 𑀯𑀸’’𑀢𑀺 𑀇𑀢𑁄 ‘‘𑀲𑁆𑀫𑀸𑀲𑁆𑀫𑀺𑀁𑀦𑀁, 𑀫𑁆𑀳𑀸𑀫𑁆𑀳𑀻’’𑀢𑀺 𑀘 𑀯𑀢𑁆𑀢𑀢𑁂.

𑁨𑁧𑁪. 𑀦 𑀢𑀺𑀫𑁂𑀳𑀺 𑀓𑀢𑀸𑀓𑀸𑀭𑁂𑀳𑀺.

𑀢 𑀇𑀫𑀇𑀘𑁆𑀘𑁂𑀢𑁂𑀳𑀺 𑀓𑀢𑀸𑀓𑀸𑀭𑁂𑀳𑀺 𑀧𑀭𑁂𑀲𑀁 𑀲𑁆𑀫𑀸𑀲𑁆𑀫𑀺𑀁𑀦𑀁 𑀫𑁆𑀳𑀸 𑀫𑁆𑀳𑀺𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀦 𑀳𑁄𑀦𑁆𑀢𑀺.

𑀧𑀓𑀢𑀺𑀲𑀦𑁆𑀥𑀺𑀯𑀺𑀥𑀸𑀦

𑀅𑀣 ¶ 𑀲𑀭𑀸𑀦𑀫𑁂𑀯 𑀲𑀦𑁆𑀥𑀺𑀓𑀸𑀭𑀺𑀬𑁂 𑀲𑀫𑁆𑀧𑀢𑁆𑀢𑁂 𑀧𑀓𑀢𑀺𑀪𑀸𑀯𑁄 𑀯𑀼𑀘𑁆𑀘𑀢𑁂.

‘‘𑀲𑀭𑀸, 𑀧𑀓𑀢𑀻’’𑀢𑀺 𑀘 𑀯𑀢𑁆𑀢𑀢𑁂.

𑁩𑁫. 𑀲𑀭𑁂 𑀓𑁆𑀯𑀘𑀺.

𑀲𑀭𑀸 𑀔𑁄 𑀲𑀭𑁂 𑀧𑀭𑁂 𑀓𑁆𑀯𑀘𑀺 𑀙𑀦𑁆𑀤𑀪𑁂𑀤𑀸𑀲𑀼𑀔𑀼𑀘𑁆𑀘𑀸𑀭𑀡𑀝𑁆𑀞𑀸𑀦𑁂, 𑀲𑀦𑁆𑀥𑀺𑀘𑁆𑀙𑀸𑀭𑀳𑀺𑀢𑀝𑁆𑀞𑀸𑀦𑁂 𑀘 𑀧𑀓𑀢𑀺𑀭𑀽𑀧𑀸𑀦𑀺 𑀳𑁄𑀦𑁆𑀢𑀺, 𑀦 𑀮𑁄𑀧𑀸𑀤𑁂𑀲𑀯𑀺𑀓𑀸𑀭𑀫𑀸𑀧𑀚𑁆𑀚𑀦𑁆𑀢𑁂𑀢𑀺 𑀅𑀢𑁆𑀣𑁄.

𑀢𑀢𑁆𑀣 𑀧𑀓𑀢𑀺𑀝𑁆𑀞𑀸𑀦𑀁 𑀦𑀸𑀫 𑀆𑀮𑀧𑀦𑀦𑁆𑀢𑀸 𑀅𑀦𑀺𑀢𑀺𑀲𑁆𑀫𑀺𑀁 𑀅𑀘𑁆𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑁂 𑀅𑀲𑀫𑀸𑀲𑁂 𑀧𑀤𑀦𑁆𑀢𑀤𑀻𑀖𑀸 𑀘 𑀇𑀓𑀸𑀭𑀼𑀓𑀸𑀭𑀸 𑀘 𑀦𑀸𑀫𑀧𑀤𑀦𑁆𑀢𑀸𑀢𑀻𑀢𑀓𑁆𑀭𑀺𑀬𑀸𑀤𑀺𑀫𑁆𑀳𑀻𑀢𑀺 𑀏𑀯𑀫𑀸𑀤𑀺.

𑀆𑀮𑀧𑀦𑀦𑁆𑀢𑁂𑀲𑀼 𑀢𑀸𑀯 𑁋 𑀓𑀢𑀫𑀸 𑀘𑀸𑀦𑀦𑁆𑀤 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀓𑀢𑀫𑀸 𑀘𑀸𑀦𑀦𑁆𑀤 𑀆𑀤𑀻𑀦𑀯𑀲𑀜𑁆𑀜𑀸, 𑀲𑀸𑀭𑀺𑀧𑀼𑀢𑁆𑀢 𑀇𑀥𑁂𑀓𑀘𑁆𑀘𑁄, 𑀏𑀳𑀺 𑀲𑀺𑀯𑀺𑀓 𑀉𑀝𑁆𑀞𑁂𑀳𑀺, 𑀉𑀧𑀸𑀲𑀓𑀸 𑀇𑀥𑁂𑀓𑀘𑁆𑀘𑁄, 𑀪𑁄𑀢𑀺 𑀅𑀬𑁆𑀬𑁂, 𑀪𑀺𑀓𑁆𑀔𑀼 𑀅𑀭𑁄𑀕𑀁 𑀢𑀯 𑀲𑀻𑀮𑀁, 𑀲𑀺𑀜𑁆𑀘 𑀪𑀺𑀓𑁆𑀔𑀼 𑀇𑀫𑀁 𑀦𑀸𑀯𑀁, 𑀪𑀺𑀓𑁆𑀔𑀯𑁂 𑀏𑀯𑀁 𑀯𑀤𑀸𑀫𑀺, 𑀧𑀜𑁆𑀘𑀺𑀫𑁂 𑀕𑀳𑀧𑀢𑀬𑁄 𑀆𑀦𑀺𑀲𑀁𑀲𑀸 𑀇𑀘𑁆𑀘𑁂𑀯𑀫𑀸𑀤𑀻𑀲𑀼 𑀧𑀓𑀢𑀺𑀪𑀸𑀯𑁄, 𑀧𑀼𑀩𑁆𑀩𑀲𑁆𑀲𑀭𑀮𑁄𑀧𑀬𑀯𑀸𑀤𑁂𑀲𑀸𑀤𑀬𑁄 𑀦 𑀳𑁄𑀦𑁆𑀢𑀺.

𑀓𑁆𑀯𑀘𑀺𑀕𑁆𑀕𑀳𑀡𑁂𑀦 𑀇𑀢𑀺𑀲𑁆𑀫𑀺𑀁 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑁂 𑀲𑀦𑁆𑀥𑀺 𑀳𑁄𑀢𑀺, 𑀬𑀣𑀸 𑁋 𑀲𑀓𑁆𑀓𑀸 𑀤𑁂𑀯𑀻𑀢𑀺, 𑀦𑀫𑁄 𑀢𑁂 𑀩𑀼𑀤𑁆𑀥 𑀯𑀻𑀭𑀢𑁆𑀣𑀼.

𑀲𑀭𑁂𑀢𑀺 𑀓𑀺𑀁? 𑀲𑀸𑀥𑀼 𑀫𑀳𑀸𑀭𑀸𑀚𑀸𑀢𑀺, 𑀏𑀯𑀁 𑀓𑀺𑀭 𑀪𑀺𑀓𑁆𑀔𑀽𑀢𑀺.

𑀅𑀲𑀫𑀸𑀲𑁂 𑀧𑀤𑀦𑁆𑀢𑀤𑀻𑀖𑁂𑀲𑀼 𑁋 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀕𑀸𑀣𑀸 𑀅𑀚𑁆𑀛𑀪𑀸𑀲𑀺, 𑀤𑁂𑀯𑀸 𑀆𑀪𑀲𑁆𑀲𑀭𑀸 𑀬𑀣𑀸, 𑀢𑁂𑀯𑀺𑀚𑁆𑀚𑀸 𑀇𑀤𑁆𑀥𑀺𑀧𑁆𑀧𑀢𑁆𑀢𑀸 ¶ 𑀘, 𑀪𑀕𑀯𑀸 𑀉𑀝𑁆𑀞𑀸𑀬𑀸𑀲𑀦𑀸, 𑀪𑀕𑀯𑀸 𑀏𑀢𑀤𑀯𑁄𑀘, 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺, 𑀕𑀦𑁆𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄, 𑀪𑀽𑀢𑀯𑀸𑀤𑀻 𑀅𑀢𑁆𑀣𑀯𑀸𑀤𑀻, 𑀬𑀁 𑀇𑀢𑁆𑀣𑀻 𑀅𑀭𑀳𑀸 𑀅𑀲𑁆𑀲, 𑀲𑀸𑀫𑀸𑀯𑀢𑀻 𑀆𑀳, 𑀧𑀸𑀧𑀓𑀸𑀭𑀻 𑀉𑀪𑀬𑀢𑁆𑀣 𑀢𑀧𑁆𑀧𑀢𑀺, 𑀦𑀤𑀻 𑀑𑀢𑁆𑀣𑀭𑀢𑀺, 𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸, 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺, 𑀪𑀺𑀓𑁆𑀔𑀽𑀉𑀚𑁆𑀛𑀸𑀬𑀺𑀁𑀲𑀼, 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼, 𑀇𑀫𑀲𑁆𑀫𑀺𑀁 𑀕𑀸𑀫𑁂 𑀆𑀭𑀓𑁆𑀔𑀓𑀸, 𑀲𑀩𑁆𑀩𑁂 𑀇𑀫𑁂, 𑀓𑀢𑀫𑁂 𑀏𑀓𑀸𑀤𑀲, 𑀕𑀫𑁆𑀪𑀻𑀭𑁂 𑀑𑀤𑀓𑀦𑁆𑀢𑀺𑀓𑁂, 𑀅𑀧𑁆𑀧𑀫𑀸𑀤𑁄 𑀅𑀫𑀢𑀧𑀤𑀁, 𑀲𑀗𑁆𑀖𑁄 𑀆𑀕𑀘𑁆𑀙𑀢𑀼, 𑀓𑁄 𑀇𑀫𑀁 𑀧𑀣𑀯𑀺𑀁 𑀯𑀺𑀘𑁆𑀘𑁂𑀲𑁆𑀲𑀢𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺, 𑀏𑀓𑁄 𑀏𑀓𑀸𑀬, 𑀘𑀢𑁆𑀢𑀸𑀭𑁄 𑀑𑀖𑀸.

𑀦𑀺𑀧𑀸𑀢𑁂𑀲𑀼𑀧𑀺 𑁋 𑀅𑀭𑁂 𑀅𑀳𑀫𑁆𑀧𑀺, 𑀲𑀘𑁂 𑀇𑀫𑀲𑁆𑀲 𑀓𑀸𑀬𑀲𑁆𑀲, 𑀦𑁄 𑀅𑀪𑀺𑀓𑁆𑀓𑀫𑁄, 𑀅𑀳𑁄 𑀅𑀘𑁆𑀙𑀭𑀺𑀬𑁄, 𑀅𑀣𑁄 𑀅𑀦𑁆𑀢𑁄 𑀘, 𑀅𑀣 𑀔𑁄 𑀆𑀬𑀲𑁆𑀫𑀸, 𑀅𑀣𑁄 𑀑𑀝𑁆𑀞𑀯𑀘𑀺𑀢𑁆𑀢𑀓𑀸, 𑀢𑀢𑁄 𑀆𑀫𑀦𑁆𑀢𑀬𑀻 𑀲𑀢𑁆𑀣𑀸.

𑀓𑁆𑀯𑀘𑀺𑀕𑁆𑀕𑀳𑀡𑁂𑀦 𑀅𑀓𑀸𑀭 𑀇𑀢𑀻𑀯𑁂𑀯𑁂𑀢𑁆𑀣𑀸𑀤𑀻𑀲𑀼 𑀲𑀦𑁆𑀥𑀺𑀧𑀺. 𑀬𑀣𑀸 𑁋 𑀆𑀕𑀢𑀢𑁆𑀣, 𑀆𑀕𑀢𑀫𑁆𑀳𑀸, 𑀓𑀢𑀫𑀸𑀲𑁆𑀲𑀼 𑀘𑀢𑁆𑀢𑀸𑀭𑁄, 𑀅𑀧𑁆𑀧𑀲𑁆𑀲𑀼𑀢𑀸𑀬𑀁 𑀧𑀼𑀭𑀺𑀲𑁄, 𑀇𑀢𑁆𑀣𑀻𑀢𑀺, 𑀘 𑀫𑀭𑀻𑀯, 𑀲𑀩𑁆𑀩𑁂𑀯, 𑀲𑁆𑀯𑁂𑀯, 𑀏𑀲𑁂𑀯 𑀦𑀬𑁄, 𑀧𑀭𑀺𑀲𑀼𑀤𑁆𑀥𑁂𑀢𑁆𑀣𑀸𑀬𑀲𑁆𑀫𑀦𑁆𑀢𑁄, 𑀦𑁂𑀢𑁆𑀣, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸, 𑀲𑀘𑁂𑀲 𑀩𑁆𑀭𑀸𑀳𑁆𑀫𑀡, 𑀢𑀣𑀽𑀧𑀫𑀁, 𑀬𑀣𑀸𑀳.

𑀅𑀲𑀫𑀸𑀲𑁂𑀢𑀺 𑀓𑀺𑀁? 𑀚𑀺𑀯𑁆𑀳𑀸𑀬𑀢𑀦𑀁, 𑀅𑀯𑀺𑀚𑁆𑀚𑁄𑀖𑁄, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀅𑀪𑀺𑀪𑀸𑀬𑀢𑀦𑀁, 𑀪𑀬𑀢𑀼𑀧𑀝𑁆𑀞𑀸𑀦𑀁. 𑀅𑀘𑁆𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑁂𑀢𑀺 ¶ 𑀓𑀺𑀁? 𑀲𑀤𑁆𑀥𑀻𑀥 𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞𑀁, 𑀬𑁄 𑀫𑀺𑀲𑁆𑀲𑀭𑁄.

𑀦𑀸𑀫𑀧𑀤𑀦𑁆𑀢𑀇𑀓𑀸𑀭𑀼𑀓𑀸𑀭𑁂𑀲𑀼 𑁋 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺, 𑀧𑀼𑀧𑁆𑀨𑀸𑀦𑀺 𑀆𑀳𑀭𑀺𑀁𑀲𑀼, 𑀲𑀢𑁆𑀣𑀼 𑀅𑀤𑀸𑀲𑀺.

𑀓𑁆𑀯𑀘𑀻𑀢𑀺 𑀓𑀺𑀁? 𑀫𑀦𑀲𑀸𑀓𑀸𑀲𑀺.

𑁩𑁬. 𑀲𑀭𑀸 𑀧𑀓𑀢𑀺 𑀩𑁆𑀬𑀜𑁆𑀚𑀦𑁂.

𑀲𑀭𑀸 𑀔𑁄 𑀩𑁆𑀬𑀜𑁆𑀚𑀦𑁂 𑀧𑀭𑁂 𑀧𑀓𑀢𑀺𑀭𑀽𑀧𑀸 𑀳𑁄𑀦𑁆𑀢𑀻𑀢𑀺 𑀬𑁂𑀪𑀼𑀬𑁆𑀬𑁂𑀦 𑀤𑀻𑀖𑀭𑀲𑁆𑀲𑀮𑁄𑀧𑁂𑀳𑀺 𑀯𑀺𑀓𑀸𑀭𑀸𑀪𑀸𑀯𑁄. 𑀬𑀣𑀸 𑁋 𑀅𑀘𑁆𑀘𑀬𑁄, 𑀧𑀘𑁆𑀘𑀬𑁄, 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸, 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀪𑀸𑀕𑁆𑀬𑀯𑀸, 𑀪𑀤𑁆𑀭𑁄 𑀓𑀲𑀸𑀫𑀺𑀯, 𑀤𑀻𑀬𑀢𑀺, 𑀢𑀼𑀡𑁆𑀳𑀻𑀪𑀽𑀢𑁄, 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺.

𑀇𑀢𑀺 𑀧𑀓𑀢𑀺𑀲𑀦𑁆𑀥𑀺𑀯𑀺𑀥𑀸𑀦𑀁 𑀦𑀺𑀝𑁆𑀞𑀺𑀢𑀁.

𑀩𑁆𑀬𑀜𑁆𑀚𑀦𑀲𑀦𑁆𑀥𑀺𑀯𑀺𑀥𑀸𑀦

𑀅𑀣 𑀩𑁆𑀬𑀜𑁆𑀚𑀦𑀲𑀦𑁆𑀥𑀺 𑀯𑀼𑀘𑁆𑀘𑀢𑁂.

‘‘𑀩𑁆𑀬𑀜𑁆𑀚𑀦𑁂’’𑀢𑀺 𑀅𑀥𑀺𑀓𑀸𑀭𑁄, ‘‘𑀲𑀭𑀸, 𑀓𑁆𑀯𑀘𑀻’’𑀢𑀺 𑀘 𑀯𑀢𑁆𑀢𑀢𑁂.

𑁩𑁭. 𑀤𑀻𑀖𑀁.

𑀲𑀭𑀸 𑀔𑁄 𑀩𑁆𑀬𑀜𑁆𑀚𑀦𑁂 𑀧𑀭𑁂 𑀓𑁆𑀯𑀘𑀺 𑀤𑀻𑀖𑀁 𑀧𑀧𑁆𑀧𑁄𑀦𑁆𑀢𑀻𑀢𑀺 𑀲𑀼𑀢𑁆𑀢𑀲𑀼𑀔𑀼𑀘𑁆𑀘𑀸𑀭𑀡𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀝𑁆𑀞𑀸𑀦𑁂𑀲𑀼 𑀤𑀻𑀖𑁄.

𑀢𑁆𑀬𑀲𑁆𑀲 𑀧𑀳𑀻𑀦𑀸 𑀢𑁆𑀬𑀸𑀲𑁆𑀲 𑀧𑀳𑀻𑀦𑀸, 𑀲𑁆𑀯𑀲𑁆𑀲 𑀲𑁆𑀯𑀸𑀲𑁆𑀲, 𑀫𑀥𑀼𑀯 𑀫𑀜𑁆𑀜𑀢𑀺 𑀩𑀸𑀮𑁄 𑀫𑀥𑀼𑀯𑀸 𑀫𑀜𑁆𑀜𑀢𑀻 𑀩𑀸𑀮𑁄, 𑀢𑀣𑀸 𑀏𑀯𑀁 𑀕𑀸𑀫𑁂 𑀫𑀼𑀦𑀻 ¶ 𑀘𑀭𑁂, 𑀔𑀦𑁆𑀢𑀻 𑀧𑀭𑀫𑀁 𑀢𑀧𑁄 𑀢𑀺𑀢𑀺𑀓𑁆𑀔𑀸, 𑀦 𑀫𑀗𑁆𑀓𑀽 𑀪𑀯𑀺𑀲𑁆𑀲𑀸𑀫𑀺, 𑀲𑁆𑀯𑀸𑀓𑁆𑀔𑀸𑀢𑁄, 𑀬𑁆𑀯𑀸𑀳𑀁, 𑀓𑀸𑀫𑀢𑁄 𑀚𑀸𑀬𑀢𑀻 𑀲𑁄𑀓𑁄, 𑀓𑀸𑀫𑀢𑁄 𑀚𑀸𑀬𑀢𑀻 𑀪𑀬𑀁, 𑀲𑀓𑁆𑀓𑁄 𑀉𑀚𑀽 𑀘 𑀲𑀼𑀳𑀼𑀚𑀽 𑀘, 𑀅𑀦𑀽𑀧𑀖𑀸𑀢𑁄, 𑀤𑀽𑀭𑀓𑁆𑀔𑀁, 𑀤𑀽𑀭𑀫𑀁, 𑀲𑀽𑀭𑀓𑁆𑀔𑀁, 𑀤𑀽𑀳𑀭𑀢𑀸.

𑀓𑁆𑀯𑀘𑀻𑀢𑀺 𑀓𑀺𑀁? 𑀢𑁆𑀬𑀚𑁆𑀚, 𑀲𑁆𑀯𑀲𑁆𑀲, 𑀧𑀢𑀺𑀮𑀺𑀬𑁆𑀬𑀢𑀺.

𑀬𑀺𑀝𑁆𑀞𑀁 𑀯𑀸 𑀳𑀼𑀢𑀁 𑀯𑀸 𑀮𑁄𑀓𑁂, 𑀬𑀤𑀺 𑀯𑀸 𑀲𑀸𑀯𑀓𑁂, 𑀧𑀼𑀕𑁆𑀕𑀮𑀸 𑀥𑀫𑁆𑀫𑀤𑀲𑀸 𑀢𑁂, 𑀪𑁄𑀯𑀸𑀤𑀻 𑀦𑀸𑀫 𑀲𑁄 𑀳𑁄𑀢𑀺, 𑀬𑀣𑀸𑀪𑀸𑀯𑀻 𑀕𑀼𑀡𑁂𑀦 𑀲𑁄 𑀇𑀢𑀻𑀥 𑁋

𑀧𑀼𑀩𑁆𑀩𑀲𑁆𑀫𑀺𑀁𑀬𑁂𑀯𑀸𑀥𑀺𑀓𑀸𑀭𑁂 𑁋

𑁩𑁮. 𑀭𑀲𑁆𑀲𑀁.

𑀲𑀭𑀸 𑀔𑁄 𑀩𑁆𑀬𑀜𑁆𑀚𑀦𑁂 𑀧𑀭𑁂 𑀓𑁆𑀯𑀘𑀺 𑀭𑀲𑁆𑀲𑀁 𑀧𑀧𑁆𑀧𑁄𑀦𑁆𑀢𑀻𑀢𑀺 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑁂, 𑀆𑀕𑀫𑁂, 𑀲𑀁𑀬𑁄𑀕𑁂 𑀘 𑀭𑀲𑁆𑀲𑀢𑁆𑀢𑀁.

𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑁂 𑀢𑀸𑀯 𑀬𑀺𑀝𑁆𑀞𑀁𑀯 𑀳𑀼𑀢𑀁𑀯 𑀮𑁄𑀓𑁂, 𑀬𑀤𑀺𑀯 𑀲𑀸𑀯𑀓𑁂, 𑀧𑀼𑀕𑁆𑀕𑀮 𑀥𑀫𑁆𑀫𑀤𑀲𑀸 𑀢𑁂, 𑀪𑁄𑀯𑀸𑀤𑀺 𑀦𑀸𑀫 𑀲𑁄 𑀳𑁄𑀢𑀺, 𑀬𑀣𑀸𑀪𑀸𑀯𑀺 𑀕𑀼𑀡𑁂𑀦 𑀲𑁄.

𑀆𑀕𑀫𑁂 𑀬𑀣𑀬𑀺𑀤𑀁, 𑀲𑀫𑁆𑀫𑀤𑀓𑁆𑀔𑀸𑀢𑁄.

𑀲𑀁𑀬𑁄𑀕𑁂 𑀧𑀭𑀸𑀓𑀫𑁄 𑀧𑀭𑀓𑁆𑀓𑀫𑁄, 𑀆𑀲𑀸𑀤𑁄 𑀅𑀲𑁆𑀲𑀸𑀤𑁄, 𑀏𑀯𑀁 𑀢𑀡𑁆𑀳𑀓𑁆𑀔𑀬𑁄, 𑀛𑀸𑀦𑀲𑁆𑀲 𑀮𑀸𑀪𑀺𑀫𑁆𑀳𑀺, 𑀯𑀲𑀺𑀫𑁆𑀳𑀺, 𑀣𑀼𑀮𑁆𑀮𑀘𑁆𑀘𑀬𑁄.

𑀓𑁆𑀯𑀘𑀻𑀢𑀺 𑀓𑀺𑀁? 𑀫𑀸𑀬𑀺𑀤𑀁, 𑀫𑀦𑀲𑀸 𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑀸𑀦𑀁, 𑀬𑀣𑀸𑀓𑁆𑀓𑀫𑀁, 𑀆𑀔𑁆𑀬𑀸𑀢𑀺𑀓𑀁, 𑀤𑀻𑀬𑁆𑀬𑀢𑀺, 𑀲𑀽𑀬𑁆𑀬𑀢𑀺.

𑀏𑀲𑁄 𑀔𑁄 𑀩𑁆𑀬𑀦𑁆𑀢𑀺𑀁 𑀓𑀸𑀳𑀺𑀢𑀺, 𑀲𑁄 𑀕𑀘𑁆𑀙𑀁 𑀦 𑀦𑀺𑀯𑀢𑁆𑀢𑀢𑀺 𑀇𑀘𑁆𑀘𑀢𑁆𑀭 𑁋

𑀢𑀲𑁆𑀫𑀺𑀁𑀬𑁂𑀯𑀸𑀥𑀺𑀓𑀸𑀭𑁂 𑁋

𑁩𑁯. 𑀮𑁄𑀧𑀜𑁆𑀘 ¶ 𑀢𑀢𑁆𑀭𑀸𑀓𑀸𑀭𑁄.

𑀲𑀭𑀸 𑀔𑁄 𑀩𑁆𑀬𑀜𑁆𑀚𑀦𑁂 𑀧𑀭𑁂 𑀓𑁆𑀯𑀘𑀺 𑀮𑁄𑀧𑀁 𑀧𑀧𑁆𑀧𑁄𑀦𑁆𑀢𑀺, 𑀢𑀢𑁆𑀭 𑀮𑀼𑀢𑁆𑀢𑁂 𑀞𑀸𑀦𑁂 𑀅𑀓𑀸𑀭𑀸𑀕𑀫𑁄 𑀘 𑀳𑁄𑀢𑀺. 𑀏𑀢𑀢𑀲𑀤𑁆𑀤𑀦𑁆𑀢𑁄𑀓𑀸𑀭𑀲𑁆𑀲𑁂𑀯𑀸𑀬𑀁 𑀮𑁄𑀧𑁄.

𑀏𑀲 𑀔𑁄 𑀩𑁆𑀬𑀦𑁆𑀢𑀺𑀁 𑀓𑀸𑀳𑀺𑀢𑀺, 𑀲 𑀕𑀘𑁆𑀙𑀁 𑀦 𑀦𑀺𑀯𑀢𑁆𑀢𑀢𑀺, 𑀏𑀯𑀁 𑀏𑀲 𑀥𑀫𑁆𑀫𑁄, 𑀏𑀲 𑀧𑀢𑁆𑀢𑁄𑀲𑀺, 𑀲 𑀫𑀼𑀦𑀺, 𑀲 𑀲𑀻𑀮𑀯𑀸.

𑀓𑁆𑀯𑀘𑀻𑀢𑀺 𑀓𑀺𑀁? 𑀏𑀲𑁄 𑀥𑀫𑁆𑀫𑁄, 𑀲𑁄 𑀫𑀼𑀦𑀺, 𑀲𑁄 𑀲𑀻𑀮𑀯𑀸.

𑀘𑀲𑀤𑁆𑀤𑁂𑀦 𑀏𑀢𑀲𑀤𑁆𑀤𑀦𑁆𑀢𑀲𑁆𑀲 𑀲𑀭𑁂𑀧𑀺 𑀓𑁆𑀯𑀘𑀺 𑀮𑁄𑀧𑁄. 𑀬𑀣𑀸 𑁋 𑀏𑀲 𑀅𑀢𑁆𑀣𑁄, 𑀏𑀲 𑀆𑀪𑁄𑀕𑁄, 𑀏𑀲 𑀇𑀤𑀸𑀦𑀺.

𑀯𑀺𑀧𑀭𑀺𑀡𑀸𑀫𑁂𑀦 ‘‘𑀲𑀭𑀫𑁆𑀳𑀸, 𑀩𑁆𑀬𑀜𑁆𑀚𑀦𑀲𑁆𑀲𑀸’’𑀢𑀺 𑀘 𑀯𑀢𑁆𑀢𑀢𑁂.

𑁪𑁦. 𑀧𑀭𑀤𑁆𑀯𑁂𑀪𑀸𑀯𑁄 𑀞𑀸𑀦𑁂.

𑀲𑀭𑀫𑁆𑀳𑀸 𑀧𑀭𑀲𑁆𑀲 𑀩𑁆𑀬𑀜𑁆𑀚𑀦𑀲𑁆𑀲 𑀤𑁆𑀯𑁂𑀪𑀸𑀯𑁄 𑀳𑁄𑀢𑀺 𑀞𑀸𑀦𑁂. 𑀤𑁆𑀯𑀺𑀦𑁆𑀦𑀁 𑀪𑀸𑀯𑁄 𑀤𑁆𑀯𑀺𑀪𑀸𑀯𑁄, 𑀲𑁄 𑀏𑀯 𑀤𑁆𑀯𑁂𑀪𑀸𑀯𑁄.

𑀏𑀢𑁆𑀣 𑀘 𑀞𑀸𑀦𑀁 𑀦𑀸𑀫 𑀭𑀲𑁆𑀲𑀸𑀓𑀸𑀭𑀢𑁄 𑀧𑀭𑀁 𑀧 𑀧𑀢𑀺 𑀧𑀝𑀺𑀓𑀫𑀼𑀓𑀼𑀲 𑀓𑀼𑀥 𑀓𑀻 𑀕𑀳 𑀚𑀼𑀢 𑀜𑀸𑀲𑀺 𑀲𑀼 𑀲𑀫𑁆𑀪𑀽 𑀲𑀭 𑀲𑀲𑀸𑀤𑀻𑀦𑀫𑀸𑀤𑀺𑀩𑁆𑀬𑀜𑁆𑀚𑀦𑀸𑀦𑀁 𑀤𑁆𑀯𑁂𑀪𑀸𑀯𑀁, 𑀢𑀺𑀓 𑀢𑀬 𑀢𑀺𑀁𑀲 𑀯𑀢𑀸𑀤𑀻𑀦𑀫𑀸𑀤𑀺 𑀘, 𑀯𑀢𑀼 𑀯𑀝𑀼𑀤𑀺𑀲𑀸𑀤𑀻𑀦𑀫𑀦𑁆𑀢𑀜𑁆𑀘, 𑀉 𑀤𑀼 𑀦𑀺-𑀉𑀧𑀲𑀕𑁆𑀕 𑀢 𑀘𑀢𑀼 𑀙 𑀲𑀦𑁆𑀢𑀲𑀤𑁆𑀤𑀸𑀤𑁂𑀲𑀸𑀤𑀺𑀧𑀭𑀜𑁆𑀘, 𑀅𑀧𑀤𑀦𑁆𑀢𑀸 𑀦𑀸𑀓𑀸𑀭𑀤𑀻𑀖𑀢𑁄 𑀬𑀓𑀸𑀭𑀸𑀤𑀺 𑀘,

𑀬𑀯𑀢𑀁 𑀢𑀮𑀦𑀸𑀤𑀻𑀦-𑀫𑀸𑀤𑁂𑀲𑁄 𑀘 𑀲𑀬𑀸𑀤𑀺𑀦𑀁;

𑀲𑀳 𑀥𑀸𑀢𑁆𑀯𑀦𑁆𑀢𑀲𑁆𑀲𑀸𑀤𑁂𑀲𑁄, 𑀲𑀻𑀲𑀓𑀸𑀭𑁄 𑀢𑀧𑀸𑀤𑀺𑀢𑁄.

𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑁂 𑀘 𑁋 𑀖𑀭 𑀛𑁂 𑀥𑀁𑀲𑀼 𑀪𑀫𑀸𑀤𑀻𑀦𑀫𑀸𑀤𑀺 𑀘, 𑀭𑀲𑁆𑀲𑀸𑀓𑀸𑀭𑀢𑁄 𑀯𑀕𑁆𑀕𑀸𑀦𑀁 𑀘𑀢𑀼𑀢𑁆𑀣𑀤𑀼𑀢𑀺𑀬𑀸 𑀘 𑀇𑀘𑁆𑀘𑁂𑀯𑀫𑀸𑀤𑀺.

𑀢𑀢𑁆𑀣 ¶ 𑀧 𑀧𑀢𑀺 𑀧𑀝𑀻𑀲𑀼 𑀢𑀸𑀯 𑁋 𑀇𑀥 𑀧𑀫𑀸𑀤𑁄 𑀇𑀥𑀧𑁆𑀧𑀫𑀸𑀤𑁄, 𑀏𑀯𑀁 𑀅𑀧𑁆𑀧𑀫𑀸𑀤𑁄, 𑀯𑀺𑀧𑁆𑀧𑀬𑀼𑀢𑁆𑀢𑁄, 𑀲𑀼𑀧𑁆𑀧𑀲𑀦𑁆𑀦𑁄, 𑀲𑀫𑁆𑀫𑀸 𑀧𑀥𑀸𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀁, 𑀭𑀲𑁆𑀲𑀢𑁆𑀢𑀁, 𑀅𑀧𑁆𑀧𑀢𑀺𑀯𑀢𑁆𑀢𑀺𑀬𑁄, 𑀅𑀥𑀺𑀧𑀢𑀺𑀧𑁆𑀧𑀘𑁆𑀘𑀬𑁄, 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄, 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄, 𑀯𑀺𑀧𑁆𑀧𑀝𑀺𑀲𑀸𑀭𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄, 𑀲𑀼𑀧𑁆𑀧𑀝𑀺𑀧𑀢𑁆𑀢𑀺.

𑀓𑀫𑀸𑀤𑀺𑀥𑀸𑀢𑀽𑀲𑀼 𑁋 𑀧𑀓𑁆𑀓𑀫𑁄, 𑀧𑀝𑀺𑀓𑁆𑀓𑀫𑁄, 𑀳𑁂𑀢𑀼𑀓𑁆𑀓𑀫𑁄, 𑀆𑀓𑀫𑀢𑀺 𑀅𑀓𑁆𑀓𑀫𑀢𑀺, 𑀏𑀯𑀁 𑀧𑀭𑀓𑁆𑀓𑀫𑀢𑀺, 𑀬𑀣𑀸𑀓𑁆𑀓𑀫𑀁.

𑀧𑀓𑁆𑀓𑁄𑀲𑀢𑀺, 𑀧𑀝𑀺𑀓𑁆𑀓𑁄𑀲𑀢𑀺, 𑀅𑀦𑀼𑀓𑁆𑀓𑁄𑀲𑀢𑀺, 𑀆𑀓𑁄𑀲𑀢𑀺, 𑀅𑀓𑁆𑀓𑁄𑀲𑀢𑀺.

𑀅𑀓𑁆𑀓𑀼𑀤𑁆𑀥𑁄, 𑀅𑀢𑀺𑀓𑁆𑀓𑁄𑀥𑁄.

𑀥𑀦𑀓𑁆𑀓𑀻𑀢𑁄, 𑀯𑀺𑀓𑁆𑀓𑀬𑁄, 𑀅𑀦𑀼𑀓𑁆𑀓𑀬𑁄.

𑀧𑀕𑁆𑀕𑀳𑁄, 𑀯𑀺𑀕𑁆𑀕𑀳𑁄, 𑀅𑀦𑀼𑀕𑁆𑀕𑀳𑁄, 𑀦𑀺𑀕𑁆𑀕𑀳𑁄, 𑀘𑀦𑁆𑀤𑀕𑁆𑀕𑀳𑁄, 𑀤𑀺𑀝𑁆𑀞𑀺𑀕𑁆𑀕𑀸𑀳𑁄.

𑀧𑀚𑁆𑀚𑁄𑀢𑁄, 𑀯𑀺𑀚𑁆𑀚𑁄𑀢𑀢𑀺, 𑀉𑀚𑁆𑀚𑁄𑀢𑁄.

𑀓𑀢𑀜𑁆𑀜𑀽, 𑀯𑀺𑀜𑁆𑀜𑀽, 𑀧𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀁, 𑀅𑀦𑀼𑀜𑁆𑀜𑀸, 𑀫𑀦𑀼𑀜𑁆𑀜𑀸, 𑀲𑀫𑀜𑁆𑀜𑀸.

𑀅𑀯𑀲𑁆𑀲𑀬𑁄, 𑀦𑀺𑀲𑁆𑀲𑀬𑁄, 𑀲𑀫𑀼𑀲𑁆𑀲𑀬𑁄.

𑀅𑀧𑁆𑀧𑀲𑁆𑀲𑀼𑀢𑁄, 𑀯𑀺𑀲𑁆𑀲𑀼𑀢𑁄, 𑀩𑀳𑀼𑀲𑁆𑀲𑀼𑀢𑁄, 𑀆𑀲𑀯𑀸 𑀅𑀲𑁆𑀲𑀯𑀸.

𑀧𑀲𑁆𑀲𑀫𑁆𑀪𑀦𑁆𑀢𑁄, 𑀯𑀺𑀲𑁆𑀲𑀫𑁆𑀪𑀢𑀺.

𑀅𑀝𑁆𑀝𑀲𑁆𑀲𑀭𑁄, 𑀯𑀺𑀲𑁆𑀲𑀭𑀢𑀺, 𑀅𑀦𑀼𑀲𑁆𑀲𑀭𑀢𑀺.

𑀧𑀲𑁆𑀲𑀲𑀦𑁆𑀢𑁄, 𑀯𑀺𑀲𑁆𑀲𑀲𑀦𑁆𑀢𑁄, 𑀫𑀳𑀼𑀲𑁆𑀲𑀲𑀦𑁆𑀢𑁄, 𑀆𑀲𑀸𑀲𑁄 𑀅𑀲𑁆𑀲𑀸𑀲𑁄.

𑀅𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄, 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄, 𑀧𑀭𑀺𑀘𑁆𑀘𑀚𑀦𑁆𑀢𑁄, 𑀉𑀧𑀤𑁆𑀤𑀯𑁄, 𑀉𑀧𑀓𑁆𑀓𑀺𑀮𑀺𑀝𑁆𑀞𑁄, 𑀫𑀺𑀢𑁆𑀢𑀤𑁆𑀤𑀼, 𑀆𑀬𑀩𑁆𑀩𑀬𑁄, 𑀉𑀤𑀩𑁆𑀩𑀳𑀺 𑀇𑀘𑁆𑀘𑀸𑀤𑀺.

𑀲𑀭𑀫𑁆𑀳𑀸𑀢𑀺 ¶ 𑀓𑀺𑀁? 𑀲𑀫𑁆𑀧𑀬𑀼𑀢𑁆𑀢𑁄, 𑀲𑀫𑁆𑀧𑀢𑀺𑀚𑀸𑀢𑁄, 𑀲𑀫𑁆𑀧𑀝𑀺𑀘𑁆𑀙𑀦𑁆𑀦𑀁, 𑀲𑀗𑁆𑀓𑀫𑀦𑁆𑀢𑁄, 𑀲𑀗𑁆𑀕𑀳𑁄.

𑀞𑀸𑀦𑁂𑀢𑀺 𑀓𑀺𑀁? 𑀫𑀸 𑀘 𑀧𑀫𑀸𑀤𑁄, 𑀧𑀢𑀺𑀕𑀬𑁆𑀳𑀢𑀺, 𑀯𑀘𑀻𑀧𑀓𑁄𑀧𑀁 𑀭𑀓𑁆𑀔𑁂𑀬𑁆𑀬, 𑀬𑁂 𑀧𑀫𑀢𑁆𑀢𑀸 𑀬𑀣𑀸 𑀫𑀢𑀸, 𑀫𑀦𑁄𑀧𑀓𑁄𑀧𑀁 𑀭𑀓𑁆𑀔𑁂𑀬𑁆𑀬, 𑀇𑀥 𑀫𑁄𑀤𑀢𑀺, 𑀧𑁂𑀘𑁆𑀘 𑀫𑁄𑀤𑀢𑀺.

𑀢𑀺𑀓𑀸𑀤𑀻𑀲𑀼 𑁋 𑀓𑀼𑀲𑀮𑀢𑁆𑀢𑀺𑀓𑀁, 𑀧𑀻𑀢𑀺𑀢𑁆𑀢𑀺𑀓𑀁, 𑀳𑁂𑀢𑀼𑀢𑁆𑀢𑀺𑀓𑀁, 𑀯𑁂𑀤𑀦𑀸𑀢𑁆𑀢𑀺𑀓𑀁, 𑀮𑁄𑀓𑀢𑁆𑀢𑀬𑀁, 𑀩𑁄𑀥𑀺𑀢𑁆𑀢𑀬𑀁, 𑀯𑀢𑁆𑀣𑀼𑀢𑁆𑀢𑀬𑀁. 𑀏𑀓𑀢𑁆𑀢𑀺𑀁𑀲, 𑀤𑁆𑀯𑀢𑁆𑀢𑀺𑀁𑀲, 𑀘𑀢𑀼𑀢𑁆𑀢𑀺𑀁𑀲. 𑀲𑀻𑀮𑀩𑁆𑀩𑀢𑀁, 𑀲𑀼𑀩𑁆𑀩𑀢𑁄, 𑀲𑀧𑁆𑀧𑀻𑀢𑀺𑀓𑁄, 𑀲𑀫𑀦𑁆𑀦𑀸𑀕𑀢𑁄, 𑀧𑀼𑀦𑀧𑁆𑀧𑀼𑀦𑀁 𑀇𑀘𑁆𑀘𑀸𑀤𑀺.

𑀯𑀢𑀼 𑀯𑀝𑀼 𑀤𑀺𑀲𑀸𑀤𑀻𑀦𑀫𑀦𑁆𑀢𑁂 𑀬𑀣𑀸 𑁋 𑀯𑀢𑁆𑀢𑀢𑀺, 𑀯𑀝𑁆𑀝𑀢𑀺, 𑀤𑀲𑁆𑀲𑀦𑀁, 𑀨𑀲𑁆𑀲𑁄 𑀇𑀘𑁆𑀘𑀸𑀤𑀺.

𑀉 𑀤𑀼 𑀦𑀺 𑀉𑀧𑀲𑀕𑁆𑀕𑀸𑀤𑀺𑀧𑀭𑁂𑀲𑀼 𑁋 𑀉𑀓𑀁𑀲𑁄 𑀉𑀓𑁆𑀓𑀁𑀲𑁄. 𑀤𑀼𑀓𑀭𑀁 𑀤𑀼𑀓𑁆𑀓𑀭𑀁, 𑀦𑀺𑀓𑀗𑁆𑀔𑁄 𑀦𑀺𑀓𑁆𑀓𑀗𑁆𑀔𑁂.

𑀏𑀯𑀁 𑀉𑀕𑁆𑀕𑀢𑀁, 𑀤𑀼𑀘𑁆𑀘𑀭𑀺𑀢𑀁, 𑀦𑀺𑀚𑁆𑀚𑀝𑀁, 𑀉𑀜𑁆𑀜𑀸𑀢𑀁, 𑀉𑀦𑁆𑀦𑀢𑀺, 𑀉𑀢𑁆𑀢𑀭𑁄, 𑀤𑀼𑀓𑁆𑀓𑀭𑁄, 𑀦𑀺𑀤𑁆𑀤𑀭𑁄, 𑀉𑀦𑁆𑀦𑀢𑁄, 𑀤𑀼𑀧𑁆𑀧𑀜𑁆𑀜𑁄, 𑀤𑀼𑀩𑁆𑀩𑀮𑁄, 𑀦𑀺𑀫𑁆𑀫𑀮𑁄, 𑀉𑀬𑁆𑀬𑀼𑀢𑁆𑀢𑁄, 𑀤𑀼𑀮𑁆𑀮𑀪𑁄, 𑀦𑀺𑀩𑁆𑀩𑀢𑁆𑀢𑁄, 𑀉𑀲𑁆𑀲𑀸𑀳𑁄, 𑀤𑀼𑀲𑁆𑀲𑀳𑁄, 𑀦𑀺𑀲𑁆𑀲𑀸𑀭𑁄.

𑀢𑀣𑀸 𑀢𑀓𑁆𑀓𑀭𑁄, 𑀢𑀚𑁆𑀚𑁄, 𑀢𑀦𑁆𑀦𑀺𑀦𑁆𑀦𑁄, 𑀢𑀧𑁆𑀧𑀪𑀯𑁄, 𑀢𑀫𑁆𑀫𑀬𑁄.

𑀘𑀢𑀼𑀓𑁆𑀓𑀁, 𑀘𑀢𑀼𑀤𑁆𑀤𑀺𑀲𑀁, 𑀘𑀢𑀼𑀧𑁆𑀧𑀸𑀤𑁄, 𑀘𑀢𑀼𑀩𑁆𑀩𑀺𑀥𑀁, 𑀘𑀢𑀼𑀲𑁆𑀲𑀸𑀮𑀁.

𑀙𑀓𑁆𑀓𑀁, 𑀙𑀦𑁆𑀦𑀯𑀼𑀢𑀺, 𑀙𑀧𑁆𑀧𑀤𑀺𑀓𑀸, 𑀙𑀩𑁆𑀩𑀲𑁆𑀲𑀸𑀦𑀺.

𑀲𑀓𑁆𑀓𑀸𑀭𑁄, 𑀲𑀓𑁆𑀓𑀢𑁄, 𑀲𑀤𑁆𑀤𑀺𑀝𑁆𑀞𑀺, 𑀲𑀧𑁆𑀧𑀼𑀭𑀺𑀲𑁄, 𑀫𑀳𑀩𑁆𑀩𑀮𑁄.

𑀞𑀸𑀦𑁂𑀢𑀺 𑀓𑀺𑀁? 𑀦𑀺𑀓𑀸𑀬𑁄, 𑀦𑀺𑀤𑀸𑀦𑀁, 𑀦𑀺𑀯𑀸𑀲𑁄, 𑀦𑀺𑀯𑀸𑀢𑁄, 𑀢𑀢𑁄, 𑀘𑀢𑀼𑀯𑀻𑀲𑀢𑀺, 𑀙𑀲𑀝𑁆𑀞𑀺.

𑀬𑀓𑀸𑀭𑀸𑀤𑀺𑀫𑁆𑀳𑀺 ¶ 𑁋 𑀦𑀻𑀬𑁆𑀬𑀢𑀺, 𑀲𑀽𑀬𑁆𑀬𑀢𑀺, 𑀅𑀪𑀺𑀪𑀽𑀬𑁆𑀬, 𑀯𑀺𑀘𑁂𑀬𑁆𑀬, 𑀯𑀺𑀦𑁂𑀬𑁆𑀬, 𑀥𑁂𑀬𑁆𑀬𑀁, 𑀦𑁂𑀬𑁆𑀬𑀁, 𑀲𑁂𑀬𑁆𑀬𑁄, 𑀚𑁂𑀬𑁆𑀬𑁄, 𑀯𑁂𑀬𑁆𑀬𑀸𑀓𑀭𑀡𑁄.

𑀆𑀤𑀺𑀲𑀤𑁆𑀤𑁂𑀦 𑀏𑀢𑁆𑀢𑁄, 𑀏𑀢𑁆𑀢𑀸𑀯𑀢𑀸.

𑀅𑀦𑀸𑀓𑀸𑀭𑀕𑁆𑀕𑀳𑀡𑀁 𑀓𑀺𑀁? 𑀫𑀸𑀮𑀸𑀬, 𑀤𑁄𑀮𑀸𑀬, 𑀲𑀫𑀸𑀤𑀸𑀬.

𑀞𑀸𑀦𑁂𑀢𑀺 𑀓𑀺𑀁? 𑀉𑀧𑀦𑀻𑀬𑀢𑀺, 𑀲𑀽𑀬𑀢𑀺, 𑀢𑁄𑀬𑀁.

𑀬𑀯𑀢𑀫𑀸𑀤𑁂𑀲𑁂 𑁋 𑀚𑀸𑀢𑀺 𑀅𑀦𑁆𑀥𑁄, 𑀯𑀺𑀧𑀮𑀺 𑀆𑀲𑁄, 𑀅𑀦𑀺 𑀆𑀬𑁄, 𑀬𑀤𑀺 𑀏𑀯𑀁, 𑀅𑀧𑀺 𑀏𑀓𑀘𑁆𑀘𑁂, 𑀅𑀧𑀺 𑀏𑀓𑀤𑀸 𑀇𑀘𑁆𑀘𑀢𑁆𑀭, 𑀇𑀓𑀸𑀭𑀲𑁆𑀲 ‘‘𑀇𑀯𑀡𑁆𑀡𑁄 𑀬𑀁 𑀦𑀯𑀸’’𑀢𑀺 𑀬𑀓𑀸𑀭𑁂 𑀓𑀢𑁂 𑁋

‘‘𑀲𑀩𑁆𑀩𑀲𑁆𑀲 𑀲𑁄 𑀤𑀸𑀫𑁆𑀳𑀺 𑀯𑀸’’𑀢𑀺 𑀇𑀢𑁄 𑀫𑀡𑁆𑀟𑀽𑀓𑀕𑀢𑀺𑀬𑀸 𑀯𑀸𑀢𑀺 𑀯𑀢𑁆𑀢𑀢𑁂.

𑁪𑁧. 𑀬𑀯𑀢𑀁 𑀢𑀮𑀦𑀤𑀓𑀸𑀭𑀸𑀦𑀁 𑀩𑁆𑀬𑀜𑁆𑀚𑀦𑀸𑀦𑀺 𑀘𑀮𑀜𑀚𑀓𑀸𑀭𑀢𑁆𑀢𑀁.

𑀬𑀓𑀸𑀭𑀯𑀦𑁆𑀢𑀸𑀦𑀁 𑀢𑀮𑀦𑀤𑀓𑀸𑀭𑀸𑀦𑀁 𑀲𑀁𑀬𑁄𑀕𑀩𑁆𑀬𑀜𑁆𑀚𑀦𑀸𑀦𑀺 𑀬𑀣𑀸𑀓𑁆𑀓𑀫𑀁 𑀘𑀮𑀜𑀚𑀓𑀸𑀭𑀢𑁆𑀢𑀫𑀸𑀧𑀚𑁆𑀚𑀦𑁆𑀢𑁂 𑀯𑀸.

𑀓𑀸𑀭𑀕𑁆𑀕𑀳𑀡𑀁 𑀬𑀯𑀢𑀁 𑀲𑀓𑀸𑀭 𑀓 𑀘 𑀝 𑀧𑀯𑀕𑁆𑀕𑀸𑀦𑀁 𑀲𑀓𑀸𑀭𑀓𑀘𑀝𑀧𑀯𑀕𑁆𑀕𑀸𑀤𑁂𑀲𑀢𑁆𑀣𑀁, 𑀢𑀣𑀸 𑀬𑀯𑀢𑀁 𑀢 𑀥 𑀡𑀓𑀸𑀭𑀸𑀦𑀁 𑀙 𑀛𑀜𑀓𑀸𑀭𑀸𑀤𑁂𑀲𑀢𑁆𑀣𑀜𑁆𑀘, 𑀢𑀢𑁄 𑀬𑀯𑀢𑀫𑀸𑀤𑁂𑀲𑀲𑁆𑀲 𑀅𑀦𑁂𑀦 𑀤𑁆𑀯𑀺𑀪𑀸𑀯𑁄.

𑀚𑀘𑁆𑀘𑀦𑁆𑀥𑁄, 𑀯𑀺𑀧𑀮𑁆𑀮𑀸𑀲𑁄, 𑀅𑀜𑁆𑀜𑀸𑀬𑁄, 𑀬𑀚𑁆𑀚𑁂𑀯𑀁, 𑀅𑀧𑁆𑀧𑁂𑀓𑀘𑁆𑀘𑁂 𑀅𑀧𑁆𑀧𑁂𑀓𑀤𑀸.

𑀯𑀸𑀢𑀺 𑀓𑀺𑀁? 𑀧𑀝𑀺𑀲𑀦𑁆𑀣𑀸𑀭𑀯𑀼𑀢𑁆𑀬𑀲𑁆𑀲, 𑀩𑀸𑀮𑁆𑀬𑀁, 𑀆𑀮𑀲𑁆𑀬𑀁.

𑀲𑀭𑀫𑁆𑀳𑀸𑀢𑀺 𑀓𑀺𑀁? 𑀅𑀜𑀸𑀬𑁄, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁.

𑀢𑀧𑀸𑀤𑀺𑀢𑁄 𑀲𑀺𑀫𑁆𑀳𑀺 𑁋 𑀢𑀧𑀲𑁆𑀲𑀻, 𑀬𑀲𑀲𑁆𑀲𑀻.

𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑁂 ¶ 𑁋 𑀦𑀧𑁆𑀧𑀚𑁆𑀚𑀳𑁂 𑀯𑀡𑁆𑀡𑀩𑀮𑀁 𑀧𑀼𑀭𑀸𑀡𑀁, 𑀉𑀚𑁆𑀚𑀼𑀕𑀢𑁂𑀲𑀼 𑀲𑁂𑀬𑁆𑀬𑁄, 𑀕𑀘𑁆𑀙𑀦𑁆𑀢𑀺 𑀲𑀼𑀕𑁆𑀕𑀢𑀺𑀦𑁆𑀢𑀺.

𑀯𑀕𑁆𑀕𑀘𑀢𑀼𑀢𑁆𑀣𑀤𑀼𑀢𑀺𑀬𑁂𑀲𑀼 𑀧𑀦 𑀢𑀲𑁆𑀫𑀺𑀁𑀬𑁂𑀯𑀸𑀥𑀺𑀓𑀸𑀭𑁂 ‘‘𑀧𑀭𑀤𑁆𑀯𑁂𑀪𑀸𑀯𑁄 𑀞𑀸𑀦𑁂’’𑀢𑀺 𑀘 𑀯𑀢𑁆𑀢𑀢𑁂.

𑀯𑀕𑁆𑀕𑀘𑀢𑀼𑀢𑁆𑀣𑀤𑀼𑀢𑀺𑀬𑀸𑀦𑀁 𑀲𑀤𑀺𑀲𑀯𑀲𑁂𑀦 𑀤𑁆𑀯𑀺𑀪𑀸𑀯𑁂 𑀲𑀫𑁆𑀧𑀢𑁆𑀢𑁂 𑀦𑀺𑀬𑀫𑀢𑁆𑀣𑀫𑀸𑀳.

𑁪𑁨. 𑀯𑀕𑁆𑀕𑁂 𑀖𑁄𑀲𑀸𑀖𑁄𑀲𑀸𑀦𑀁 𑀢𑀢𑀺𑀬𑀧𑀞𑀫𑀸.

𑀲𑀭𑀫𑁆𑀳𑀸 𑀧𑀭𑀪𑀽𑀢𑀸𑀦𑀁 𑀯𑀕𑁆𑀕𑁂 𑀖𑁄𑀲𑀸𑀖𑁄𑀲𑀸𑀦𑀁 𑀩𑁆𑀬𑀜𑁆𑀚𑀦𑀸𑀦𑀁 𑀬𑀣𑀸𑀓𑁆𑀓𑀫𑀁 𑀯𑀕𑁆𑀕𑀢𑀢𑀺𑀬 𑀧𑀞𑀫𑀓𑁆𑀔𑀭𑀸 𑀤𑁆𑀯𑀺𑀪𑀸𑀯𑀁 𑀕𑀘𑁆𑀙𑀦𑁆𑀢𑀺 𑀞𑀸𑀦𑁂𑀢𑀺 𑀞𑀸𑀦𑀸𑀲𑀦𑁆𑀦𑀯𑀲𑁂𑀦 𑀢𑀩𑁆𑀩𑀕𑁆𑀕𑁂 𑀢𑀢𑀺𑀬𑀧𑀞𑀫𑀸𑀯 𑀳𑁄𑀦𑁆𑀢𑀺.

𑀏𑀢𑁆𑀣 𑀘 𑀲𑀫𑁆𑀧𑀢𑁆𑀢𑁂 𑀦𑀺𑀬𑀫𑀢𑁆𑀢𑀸 𑀖𑁄𑀲𑀸𑀖𑁄𑀲𑀕𑁆𑀕𑀳𑀡𑁂𑀦 𑀘𑀢𑀼𑀢𑁆𑀣𑀤𑀼𑀢𑀺𑀬𑀸𑀯 𑀅𑀥𑀺𑀧𑁆𑀧𑁂𑀢𑀸, 𑀇𑀢𑀭𑀣𑀸 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑁄𑀲𑀺𑀬𑀸. 𑀢𑁂𑀦 ‘‘𑀓𑀢𑀜𑁆𑀜𑀽, 𑀢𑀦𑁆𑀦𑀬𑁄, 𑀢𑀫𑁆𑀫𑀬𑁄’’𑀢𑀺𑀆𑀤𑀻𑀲𑀼 𑀯𑀕𑁆𑀕𑀧𑀜𑁆𑀘𑀫𑀸𑀦𑀁 𑀲𑀢𑀺𑀧𑀺 𑀖𑁄𑀲𑀢𑁆𑀢𑁂 𑀢𑀢𑀺𑀬𑀧𑁆𑀧𑀲𑀗𑁆𑀕𑁄𑀦 𑀳𑁄𑀢𑀺, 𑀞𑀸𑀦𑀸𑀥𑀺𑀓𑀸𑀭𑀢𑁄 𑀯𑀸.

𑀖𑀭𑀸𑀤𑀻𑀲𑀼 𑀧 𑀉 𑀤𑀼 𑀦𑀺𑀆𑀤𑀺𑀧𑀭𑀘𑀢𑀼𑀢𑁆𑀣𑁂𑀲𑀼 𑀢𑀸𑀯 𑁋 𑀧𑀖𑀭𑀢𑀺 𑀧𑀕𑁆𑀖𑀭𑀢𑀺, 𑀏𑀯𑀁 𑀉𑀕𑁆𑀖𑀭𑀢𑀺, 𑀉𑀕𑁆𑀖𑀸𑀝𑁂𑀢𑀺, 𑀤𑀼𑀕𑁆𑀖𑁄𑀲𑁄, 𑀦𑀺𑀕𑁆𑀖𑁄𑀲𑁄, 𑀏𑀲𑁂𑀯 𑀘𑀚𑁆𑀛𑀸𑀦𑀨𑀮𑁄, 𑀧𑀞𑀫𑀚𑁆𑀛𑀸𑀦𑀁, 𑀅𑀪𑀺𑀚𑁆𑀛𑀸𑀬𑀢𑀺, 𑀉𑀚𑁆𑀛𑀸𑀬𑀢𑀺, 𑀯𑀺𑀤𑁆𑀥𑀁𑀲𑁂𑀢𑀺, 𑀉𑀤𑁆𑀥𑀁𑀲𑀺𑀢𑁄, 𑀉𑀤𑁆𑀥𑀸𑀭𑁄, 𑀦𑀺𑀤𑁆𑀥𑀸𑀭𑁄, 𑀦𑀺𑀤𑁆𑀥𑀦𑁄, 𑀦𑀺𑀤𑁆𑀥𑀼𑀢𑁄, 𑀯𑀺𑀩𑁆𑀪𑀦𑁆𑀢𑁄, 𑀉𑀩𑁆𑀪𑀢𑁄, 𑀤𑀼𑀩𑁆𑀪𑀺𑀓𑁆𑀔𑀁, 𑀦𑀺𑀩𑁆𑀪𑀬𑀁, 𑀢𑀩𑁆𑀪𑀸𑀯𑁄, 𑀘𑀢𑀼𑀤𑁆𑀥𑀸, 𑀘𑀪𑀼𑀩𑁆𑀪𑀺, 𑀙𑀤𑁆𑀥𑀸, 𑀲𑀤𑁆𑀥𑀫𑁆𑀫𑁄, 𑀲𑀩𑁆𑀪𑀽𑀢𑁄, 𑀫𑀳𑀤𑁆𑀥𑀦𑁄, 𑀫𑀳𑀩𑁆𑀪𑀬𑀁.

𑀬𑀯𑀢 𑀫𑀸𑀤𑁂𑀲𑀸𑀤𑀻𑀲𑀼 𑁋 𑀩𑁄𑀚𑁆𑀛𑀗𑁆𑀕𑀸, 𑀆𑀲𑀩𑁆𑀪𑀁, 𑀩𑀼𑀚𑁆𑀛𑀺𑀢𑀩𑁆𑀩𑀁, 𑀩𑀼𑀚𑁆𑀛𑀢𑀺.

𑀞𑀸𑀦𑁂𑀢𑀺 ¶ 𑀓𑀺𑀁? 𑀲𑀻𑀮𑀯𑀦𑁆𑀢𑀲𑁆𑀲 𑀛𑀸𑀬𑀺𑀦𑁄, 𑀬𑁂 𑀛𑀸𑀦𑀧𑁆𑀧𑀲𑀼𑀢𑀸 𑀥𑀻𑀭𑀸, 𑀦𑀺𑀥𑀸𑀦𑀁, 𑀫𑀳𑀸𑀥𑀦𑀁.

𑀭𑀲𑁆𑀲𑀸𑀓𑀸𑀭𑀢𑁄𑀧𑀭𑀁 𑀯𑀕𑁆𑀕𑀤𑀼𑀢𑀺𑀬𑁂𑀲𑀼 𑁋 𑀧𑀜𑁆𑀘 𑀔𑀦𑁆𑀥𑀸 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀏𑀯𑀁𑀭𑀽𑀧𑀓𑁆𑀔𑀦𑁆𑀥𑁄, 𑀅𑀓𑁆𑀔𑀫𑁄, 𑀅𑀪𑀺𑀓𑁆𑀔𑀡𑀁, 𑀅𑀯𑀺𑀓𑁆𑀔𑁂𑀧𑁄, 𑀚𑀸𑀢𑀺𑀓𑁆𑀔𑁂𑀢𑁆𑀢𑀁, 𑀥𑀸𑀢𑀼𑀓𑁆𑀔𑁄𑀪𑁄, 𑀆𑀬𑀼𑀓𑁆𑀔𑀬𑁄. 𑀲𑁂𑀢𑀙𑀢𑁆𑀢𑀁 𑀲𑁂𑀢𑀘𑁆𑀙𑀢𑁆𑀢𑀁, 𑀏𑀯𑀁 𑀲𑀩𑁆𑀩𑀘𑁆𑀙𑀦𑁆𑀦𑀁, 𑀯𑀺𑀘𑁆𑀙𑀺𑀦𑁆𑀦𑀁, 𑀩𑁄𑀥𑀺𑀘𑁆𑀙𑀸𑀬𑀸, 𑀚𑀫𑁆𑀩𑀼𑀘𑁆𑀙𑀸𑀬𑀸, 𑀲𑀫𑀼𑀘𑁆𑀙𑁂𑀤𑁄. 𑀢𑀢𑁆𑀭 𑀞𑀺𑀢𑁄 𑀢𑀢𑁆𑀭𑀝𑁆𑀞𑀺𑀢𑁄, 𑀏𑀯𑀁 𑀣𑀮𑀝𑁆𑀞𑀁, 𑀚𑀮𑀝𑁆𑀞𑀁, 𑀅𑀥𑀺𑀝𑁆𑀞𑀺𑀢𑀁, 𑀦𑀺𑀝𑁆𑀞𑀺𑀢𑀁, 𑀘𑀢𑁆𑀢𑀸𑀭𑀺𑀝𑁆𑀞𑀸𑀦𑀸𑀦𑀺, 𑀕𑀭𑀼𑀝𑁆𑀞𑀸𑀦𑀺𑀬𑁄, 𑀲𑀫𑀼𑀝𑁆𑀞𑀺𑀢𑁄, 𑀲𑀼𑀧𑁆𑀧𑀝𑁆𑀞𑀸𑀦𑁄. 𑀬𑀲𑀢𑁆𑀣𑁂𑀭𑁄, 𑀬𑀢𑁆𑀣, 𑀢𑀢𑁆𑀣, 𑀧𑀢𑁆𑀣𑀭𑀢𑀺, 𑀯𑀺𑀢𑁆𑀣𑀸𑀭𑁄, 𑀅𑀪𑀺𑀢𑁆𑀣𑀼𑀢𑁄, 𑀯𑀺𑀢𑁆𑀣𑀫𑁆𑀪𑀺𑀢𑁄, 𑀅𑀦𑀼𑀢𑁆𑀣𑀼𑀦𑀁, 𑀘𑀢𑀼𑀢𑁆𑀣𑁄, 𑀓𑀼𑀢𑁆𑀣. 𑀧𑀧𑁆𑀨𑁄𑀝𑁂𑀢𑀺, 𑀫𑀳𑀧𑁆𑀨𑀮𑀁, 𑀦𑀺𑀧𑁆𑀨𑀮𑀁, 𑀯𑀺𑀧𑁆𑀨𑀸𑀭𑁄, 𑀧𑀭𑀺𑀧𑁆𑀨𑀼𑀲𑁂𑀬𑁆𑀬, 𑀫𑀥𑀼𑀧𑁆𑀨𑀸𑀡𑀺𑀢𑀁.

𑀆𑀓𑀸𑀭𑀢𑁄 𑁋 𑀆𑀔𑀸𑀢𑁄 𑀆𑀓𑁆𑀔𑀸𑀢𑁄, 𑀏𑀯𑀁 𑀢𑀡𑁆𑀳𑀸𑀓𑁆𑀔𑀬𑁄, 𑀆𑀡𑀸𑀓𑁆𑀔𑁂𑀢𑁆𑀢𑀁, 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀆𑀙𑀸𑀤𑀬𑀢𑀺, 𑀆𑀘𑁆𑀙𑀸𑀤𑀬𑀢𑀺, 𑀏𑀯𑀁 𑀆𑀘𑁆𑀙𑀺𑀦𑁆𑀤𑀢𑀺, 𑀦𑀸𑀯𑀸𑀝𑁆𑀞𑀁, 𑀆𑀢𑁆𑀣𑀭𑀢𑀺, 𑀆𑀧𑁆𑀨𑁄𑀝𑁂𑀢𑀺.

𑀲𑀭𑀫𑁆𑀳𑀸𑀢𑀺 𑀓𑀺𑀁? 𑀲𑀗𑁆𑀔𑀸𑀭𑁄, 𑀢𑀗𑁆𑀔𑀡𑁂, 𑀲𑀜𑁆𑀙𑀦𑁆𑀦𑀁, 𑀢𑀡𑁆𑀞𑀸𑀦𑀁, 𑀲𑀦𑁆𑀣𑀼𑀢𑁄, 𑀢𑀫𑁆𑀨𑀮𑀁.

𑀞𑀸𑀦𑁂𑀢𑀺 𑀓𑀺𑀁? 𑀧𑀽𑀯𑀔𑀚𑁆𑀚𑀓𑀁, 𑀢𑀲𑁆𑀲 𑀙𑀯𑀺𑀬𑀸𑀤𑀻𑀦𑀺 𑀙𑀺𑀦𑁆𑀤𑀺𑀢𑁆𑀯𑀸, 𑀬𑀣𑀸 𑀞𑀺𑀢𑀁, 𑀓𑀣𑀁, 𑀓𑀫𑁆𑀫𑀨𑀮𑀁.

𑀦𑀺𑀓𑀫𑀢𑀺, 𑀦𑀺𑀧𑀢𑁆𑀢𑀺, 𑀦𑀺𑀘𑀬𑁄, 𑀦𑀺𑀘𑀭𑀢𑀺, 𑀦𑀺𑀢𑀭𑀡𑀁 𑀇𑀘𑁆𑀘𑀢𑁆𑀭 𑁋 ‘‘𑀤𑁄 𑀥𑀲𑁆𑀲 𑀘𑀸’’𑀢𑀺 𑀏𑀢𑁆𑀣 𑀘𑀕𑁆𑀕𑀳𑀡𑀲𑁆𑀲 𑀩𑀳𑀼𑀮𑀢𑁆𑀣𑀢𑁆𑀢𑀸 𑀢𑁂𑀦 𑀘𑀕𑁆𑀕𑀳𑀡𑁂𑀦 𑀬𑀣𑀸𑀧𑀬𑁄𑀕𑀁 𑀩𑀳𑀼𑀥𑀸 𑀆𑀤𑁂𑀲𑁄 𑀲𑀺𑀬𑀸.

𑀬𑀣𑀸 𑁋 𑀦𑀺 𑀉𑀧𑀲𑀕𑁆𑀕𑀢𑁄 𑀓𑀫𑀼 𑀧𑀤 𑀘𑀺 𑀘𑀭 𑀢𑀭𑀸𑀦𑀁 𑀧𑀞𑀫𑀲𑁆𑀲 𑀯𑀕𑁆𑀕𑀤𑀼𑀢𑀺𑀬𑁄 𑀇𑀫𑀺𑀦𑀸 𑀤𑁆𑀯𑀺𑀢𑁆𑀢𑀁, 𑀦𑀺𑀓𑁆𑀔𑀫𑀢𑀺, 𑀦𑀺𑀧𑁆𑀨𑀢𑁆𑀢𑀺, 𑀦𑀺𑀘𑁆𑀙𑀬𑁄, 𑀦𑀺𑀘𑁆𑀙𑀭𑀢𑀺, 𑀦𑀺𑀢𑁆𑀣𑀭𑀡𑀁.

𑀢𑀣𑀸 ¶ 𑀩𑁄 𑀯𑀲𑁆𑀲 𑀓𑀼𑀯 𑀤𑀺𑀯 𑀲𑀺𑀯 𑀯𑀚𑀸𑀤𑀻𑀦𑀁 𑀤𑁆𑀯𑀺𑀭𑀽𑀧𑀲𑁆𑀲𑀸𑀢𑀺 𑀯𑀓𑀸𑀭𑀤𑁆𑀯𑀬𑀲𑁆𑀲 𑀩𑀓𑀸𑀭𑀤𑁆𑀯𑀬𑀁, 𑀬𑀣𑀸 𑁋 𑀓𑀼𑀩𑁆𑀩𑀦𑁆𑀢𑁄, 𑀏𑀯𑀁 𑀓𑀼𑀩𑁆𑀩𑀸𑀦𑁄, 𑀓𑀼𑀩𑁆𑀩𑀦𑁆𑀢𑀺, 𑀲𑀥𑀸𑀢𑁆𑀯𑀦𑁆𑀢𑀬𑀸𑀤𑁂𑀲𑀲𑁆𑀲 𑀤𑁆𑀯𑀺𑀢𑁆𑀢𑀁. 𑀤𑀺𑀯𑀢𑀺 𑀤𑀺𑀩𑁆𑀩𑀢𑀺, 𑀏𑀯𑀁 𑀤𑀺𑀩𑁆𑀩𑀦𑁆𑀢𑁄, 𑀲𑀺𑀩𑁆𑀩𑀢𑀺, 𑀲𑀺𑀩𑁆𑀩𑀦𑁆𑀢𑁄, 𑀧𑀯𑀚𑀢𑀺 𑀧𑀩𑁆𑀩𑀚𑀢𑀺, 𑀧𑀩𑁆𑀩𑀚𑀦𑁆𑀢𑁄, 𑀦𑀺𑀯𑀸𑀦𑀁 𑀦𑀺𑀩𑁆𑀩𑀸𑀦𑀁, 𑀦𑀺𑀩𑁆𑀩𑀼𑀢𑁄, 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀉𑀤𑀩𑁆𑀩𑀬𑀁 𑀇𑀘𑁆𑀘𑀸𑀤𑀺.

𑀮𑁄 𑀭𑀲𑁆𑀲 𑀧𑀭𑀺 𑀢𑀭𑀼𑀡𑀸𑀤𑀻𑀦𑀁 𑀓𑁆𑀯𑀘𑀺. 𑀧𑀭𑀺𑀧𑀦𑁆𑀦𑁄 𑀧𑀮𑀺𑀧𑀦𑁆𑀦𑁄, 𑀏𑀯𑀁 𑀧𑀮𑀺𑀩𑁄𑀥𑁄, 𑀧𑀮𑁆𑀮𑀗𑁆𑀓𑀁, 𑀢𑀭𑀼𑀡𑁄 𑀢𑀮𑀼𑀦𑁄, 𑀫𑀳𑀸𑀲𑀸𑀮𑁄, 𑀫𑀸𑀮𑀼𑀢𑁄, 𑀲𑀼𑀔𑀼𑀫𑀸𑀮𑁄.

𑀝𑁄 𑀢𑀲𑁆𑀲 𑀤𑀼𑀓𑁆𑀓𑀢𑀸𑀤𑀻𑀦𑀁 𑀓𑁆𑀯𑀘𑀺. 𑀬𑀣𑀸 𑁋 𑀤𑀼𑀓𑁆𑀓𑀢𑀁 𑀤𑀼𑀓𑁆𑀓𑀝𑀁, 𑀏𑀯𑀁 𑀲𑀼𑀓𑀝𑀁, 𑀧𑀳𑀝𑁄, 𑀧𑀢𑁆𑀣𑀝𑁄, 𑀉𑀤𑁆𑀥𑀝𑁄, 𑀯𑀺𑀲𑀝𑁄 𑀇𑀘𑁆𑀘𑀸𑀤𑀺.

𑀓𑁄 𑀢𑀲𑁆𑀲 𑀦𑀺𑀬𑀢𑀸𑀤𑀻𑀦𑀁 𑀓𑁆𑀯𑀘𑀺. 𑀦𑀺𑀬𑀢𑁄 𑀦𑀺𑀬𑀓𑁄.

𑀬𑁄 𑀚𑀲𑁆𑀲 𑀦𑀺𑀚𑀸𑀤𑀺𑀲𑁆𑀲 𑀯𑀸, 𑀦𑀺𑀚𑀁𑀧𑀼𑀢𑁆𑀢𑀁 𑀦𑀺𑀬𑀁𑀧𑀼𑀢𑁆𑀢𑀁.

𑀓𑁄 𑀕𑀲𑁆𑀲 𑀓𑀼𑀮𑀽𑀧𑀕𑀸𑀤𑀻𑀦𑀁, 𑀓𑀼𑀮𑀽𑀧𑀕𑁄 𑀓𑀼𑀮𑀽𑀧𑀓𑁄.

𑀢𑀣𑀸 𑀡𑁄 𑀦𑀲𑁆𑀲 𑀧 𑀧𑀭𑀺𑀆𑀤𑀺𑀢𑁄. 𑀧𑀦𑀺𑀥𑀸𑀦𑀁 𑀧𑀡𑀺𑀥𑀸𑀦𑀁, 𑀏𑀯𑀁 𑀧𑀡𑀺𑀧𑀸𑀢𑁄, 𑀧𑀡𑀸𑀫𑁄, 𑀧𑀡𑀻𑀢𑀁, 𑀧𑀭𑀺𑀡𑀢𑁄, 𑀧𑀭𑀺𑀡𑀸𑀫𑁄, 𑀦𑀺𑀦𑁆𑀦𑀬𑁄 𑀦𑀺𑀡𑁆𑀡𑀬𑁄, 𑀏𑀯𑀁 𑀉𑀡𑁆𑀡𑀢𑁄, 𑀑𑀡𑀢𑁄 𑀇𑀘𑁆𑀘𑀸𑀤𑀺.

𑀧𑀢𑀺𑀅𑀕𑁆𑀕𑀺, 𑀧𑀢𑀺𑀳𑀜𑁆𑀜𑀢𑀺 𑀇𑀢𑀻𑀥 𑁋

𑁪𑁩. 𑀓𑁆𑀯𑀘𑀺 𑀧𑀝𑀺 𑀧𑀢𑀺𑀲𑁆𑀲.

𑀧𑀢𑀺𑀇𑀘𑁆𑀘𑁂𑀢𑀲𑁆𑀲 𑀉𑀧𑀲𑀕𑁆𑀕𑀲𑁆𑀲 𑀲𑀭𑁂 𑀯𑀸 𑀩𑁆𑀬𑀜𑁆𑀚𑀦𑁂 𑀯𑀸 𑀧𑀭𑁂 𑀓𑁆𑀯𑀘𑀺 𑀧𑀝𑀺𑀆𑀤𑁂𑀲𑁄 𑀳𑁄𑀢𑀺 𑀧𑀼𑀩𑁆𑀩𑀲𑁆𑀲𑀭𑀮𑁄𑀧𑁄. 𑀧𑀝𑀕𑁆𑀕𑀺, 𑀧𑀝𑀺𑀳𑀜𑁆𑀜𑀢𑀺.

𑀓𑁆𑀯𑀘𑀻𑀢𑀺 𑀓𑀺𑀁? 𑀧𑀘𑁆𑀘𑀢𑁆𑀢𑀁, 𑀧𑀢𑀺𑀮𑀻𑀬𑀢𑀺.

𑀧𑀼𑀣𑀚𑀦𑁄 𑀧𑀼𑀣𑀪𑀽𑀢𑀁 𑀇𑀢𑀻𑀥 ‘‘𑀅𑀦𑁆𑀢𑁄’’𑀢𑀺 𑀯𑀢𑁆𑀢𑀢𑁂.

𑁪𑁪. 𑀧𑀼𑀣𑀲𑁆𑀲𑀼 ¶ 𑀩𑁆𑀬𑀜𑁆𑀚𑀦𑁂.

𑀧𑀼𑀣𑀇𑀘𑁆𑀘𑁂𑀢𑀲𑁆𑀲 𑀅𑀦𑁆𑀢𑁄 𑀲𑀭𑁄 𑀉𑀓𑀸𑀭𑁄 𑀳𑁄𑀢𑀺 𑀩𑁆𑀬𑀜𑁆𑀚𑀦𑁂 𑀧𑀭𑁂, 𑀤𑁆𑀯𑀺𑀢𑁆𑀢𑀁. 𑀧𑀼𑀣𑀼𑀚𑁆𑀚𑀦𑁄, 𑀧𑀼𑀣𑀼𑀪𑀽𑀢𑀁.

𑀩𑁆𑀬𑀜𑁆𑀚𑀦𑁂𑀢𑀺 𑀓𑀺𑀁? 𑀧𑀼𑀣 𑀅𑀬𑀁. ‘‘𑀧𑀼𑀣𑀲𑁆𑀲 𑀅 𑀧𑀼𑀣’’𑀇𑀢𑀺 𑀲𑀫𑀸𑀲𑁂𑀦𑁂𑀯 𑀲𑀺𑀤𑁆𑀥𑁂 𑀧𑀼𑀦 𑀅𑀦𑁆𑀢𑀕𑁆𑀕𑀳𑀡𑀸𑀥𑀺𑀓𑀸𑀭𑁂𑀦 𑀓𑁆𑀯𑀘𑀺 𑀅𑀧𑀼𑀣𑀦𑁆𑀢𑀲𑁆𑀲𑀸𑀧𑀺 𑀉𑀢𑁆𑀢𑀁 𑀲𑀭𑁂.

𑀫𑀦𑁄 𑀅𑀜𑁆𑀜𑀁 𑀫𑀦𑀼𑀜𑁆𑀜𑀁, 𑀏𑀯𑀁 𑀇𑀫𑀁 𑀏𑀯𑀼𑀫𑀁, 𑀧𑀭𑀮𑁄𑀧𑁄, 𑀇𑀢𑀺 𑀏𑀯𑀁 𑀇𑀢𑁆𑀯𑁂𑀯𑀁, 𑀉𑀓𑀸𑀭𑀲𑁆𑀲 𑀯𑀓𑀸𑀭𑁄.

𑀅𑀯𑀓𑀸𑀲𑁄, 𑀅𑀯𑀦𑀤𑁆𑀥𑁄, 𑀅𑀯𑀯𑀤𑀢𑀺, 𑀅𑀯𑀲𑀸𑀦𑀫𑀺𑀢𑀻𑀥 𑁋

‘‘𑀓𑁆𑀯𑀘𑀺 𑀩𑁆𑀬𑀜𑁆𑀚𑀦𑁂’’𑀢𑀺 𑀘 𑀯𑀢𑁆𑀢𑀢𑁂.

𑁪𑁫. 𑀑 𑀅𑀯𑀲𑁆𑀲.

𑀅𑀯𑀇𑀘𑁆𑀘𑁂𑀢𑀲𑁆𑀲 𑀉𑀧𑀲𑀕𑁆𑀕𑀲𑁆𑀲 𑀑𑀓𑀸𑀭𑁄 𑀳𑁄𑀢𑀺 𑀓𑁆𑀯𑀘𑀺 𑀩𑁆𑀬𑀜𑁆𑀚𑀦𑁂 𑀧𑀭𑁂. 𑀑𑀓𑀸𑀲𑁄, 𑀑𑀦𑀤𑁆𑀥𑁄, 𑀑𑀯𑀤𑀢𑀺, 𑀑𑀲𑀸𑀦𑀁.

𑀓𑁆𑀯𑀘𑀻𑀢𑀺 𑀓𑀺𑀁? 𑀅𑀯𑀲𑀸𑀦𑀁, 𑀅𑀯𑀲𑀼𑀲𑁆𑀲𑀢𑀼.

𑀩𑁆𑀬𑀜𑁆𑀚𑀦𑁂𑀢𑀺 𑀓𑀺𑀁? 𑀅𑀯𑀬𑀸𑀕𑀫𑀦𑀁, 𑀅𑀯𑁂𑀓𑁆𑀔𑀢𑀺.

𑀅𑀯𑀕𑀢𑁂 𑀲𑀽𑀭𑀺𑀬𑁂, 𑀅𑀯𑀕𑀘𑁆𑀙𑀢𑀺, 𑀅𑀯𑀕𑀳𑁂𑀢𑁆𑀯𑀸 𑀇𑀢𑀻𑀥 𑁋

‘‘𑀅𑀯𑀲𑁆𑀲𑁂’’𑀢𑀺 𑀯𑀢𑁆𑀢𑀢𑁂 𑀑𑀕𑁆𑀕𑀳𑀡𑀜𑁆𑀘.

𑁪𑁬. 𑀢𑀩𑁆𑀩𑀺𑀧𑀭𑀻𑀢𑀽𑀧𑀧𑀤𑁂 𑀩𑁆𑀬𑀜𑁆𑀚𑀦𑁂 𑀘.

𑀅𑀯𑀲𑀤𑁆𑀤𑀲𑁆𑀲 𑀉𑀧𑀧𑀤𑁂 𑀢𑀺𑀝𑁆𑀞𑀫𑀸𑀦𑀲𑁆𑀲 𑀢𑀲𑁆𑀲𑁄𑀓𑀸𑀭𑀲𑁆𑀲 𑀯𑀺𑀧𑀭𑀻𑀢𑁄 𑀘 𑀳𑁄𑀢𑀺 𑀩𑁆𑀬𑀜𑁆𑀚𑀦𑁂 𑀧𑀭𑁂.

𑀢𑀲𑁆𑀲 𑀯𑀺𑀧𑀭𑀻𑀢𑁄 𑀢𑀩𑁆𑀩𑀺𑀧𑀭𑀻𑀢𑁄, 𑀉𑀧𑁄𑀘𑁆𑀘𑀸𑀭𑀺𑀢𑀁 𑀧𑀤𑀁 𑀉𑀧𑀧𑀤𑀁, 𑀑𑀓𑀸𑀭𑀯𑀺𑀧𑀭𑀻𑀢𑁄𑀢𑀺 𑀉𑀓𑀸𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀘𑀲𑀤𑁆𑀤𑁄 𑀓𑀢𑁆𑀣𑀘𑀺 ¶ 𑀦𑀺𑀯𑀢𑁆𑀢𑀦𑀢𑁆𑀣𑁄, 𑀤𑁆𑀯𑀺𑀢𑁆𑀢𑀁. 𑀉𑀕𑁆𑀕𑀢𑁂 𑀲𑀽𑀭𑀺𑀬𑁂, 𑀉𑀕𑁆𑀕𑀘𑁆𑀙𑀢𑀺, 𑀉𑀕𑁆𑀕𑀳𑁂𑀢𑁆𑀯𑀸.

𑀅𑀢𑀺𑀧𑁆𑀧𑀔𑁄 𑀢𑀸𑀯, 𑀧𑀭𑀲𑀢𑀁, 𑀧𑀭𑀲𑀳𑀲𑁆𑀲𑀁 𑀇𑀢𑀻𑀥 𑁋

‘‘𑀆𑀕𑀫𑁄’’𑀢𑀺 𑀯𑀢𑁆𑀢𑀢𑁂.

𑁪𑁭. 𑀓𑁆𑀯𑀘𑀺 𑀑 𑀩𑁆𑀬𑀜𑁆𑀚𑀦𑁂.

𑀩𑁆𑀬𑀜𑁆𑀚𑀦𑁂 𑀧𑀭𑁂 𑀓𑁆𑀯𑀘𑀺 𑀑𑀓𑀸𑀭𑀸𑀕𑀫𑁄 𑀳𑁄𑀢𑀻𑀢𑀺 𑀅𑀢𑀺𑀧𑁆𑀧 𑀧𑀭𑀲𑀤𑁆𑀤𑁂𑀳𑀺 𑀑𑀓𑀸𑀭𑀸𑀕𑀫𑁄 ‘‘𑀬𑀯𑀫𑀤’’𑀇𑀘𑁆𑀘𑀸𑀤𑀺𑀲𑀼𑀢𑁆𑀢𑁂 𑀘𑀲𑀤𑁆𑀤𑁂𑀦 𑀅𑀢𑀺𑀧𑁆𑀧𑀢𑁄 𑀕𑀓𑀸𑀭𑀸𑀕𑀫𑁄 𑀘.

𑀅𑀢𑀺𑀧𑁆𑀧𑀕𑁄 𑀔𑁄 𑀢𑀸𑀯, 𑀧𑀭𑁄𑀲𑀢𑀁, 𑀧𑀭𑁄𑀲𑀳𑀲𑁆𑀲𑀁, 𑀏𑀢𑁆𑀣 ‘‘𑀲𑀭𑀸 𑀲𑀭𑁂 𑀮𑁄𑀧’’𑀦𑁆𑀢𑀺 𑀧𑀼𑀩𑁆𑀩𑀲𑁆𑀲𑀭𑀮𑁄𑀧𑁄.

𑀫𑀦𑀫𑀬𑀁, 𑀅𑀬𑀫𑀬𑀁 𑀇𑀢𑀻𑀥 ‘‘𑀫𑀦𑁄𑀕𑀡𑀸𑀤𑀻𑀦’’𑀦𑁆𑀢𑀺 𑀯𑀢𑁆𑀢𑀢𑁂.

𑁪𑁮. 𑀏𑀢𑁂𑀲𑀫𑁄 𑀮𑁄𑀧𑁂.

𑀏𑀢𑁂𑀲𑀁 𑀫𑀦𑁄𑀕𑀡𑀸𑀤𑀻𑀦𑀫𑀦𑁆𑀢𑁄 𑀑𑀢𑁆𑀢𑀫𑀸𑀧𑀚𑁆𑀚𑀢𑁂 𑀯𑀺𑀪𑀢𑁆𑀢𑀺𑀮𑁄𑀧𑁂 𑀓𑀢𑁂.

𑀫𑀦𑁄𑀫𑀬𑀁, 𑀅𑀬𑁄𑀫𑀬𑀁, 𑀏𑀯𑀁 𑀫𑀦𑁄𑀲𑁂𑀝𑁆𑀞𑀸, 𑀅𑀬𑁄𑀧𑀢𑁆𑀢𑁄, 𑀢𑀧𑁄𑀥𑀦𑁄, 𑀢𑀫𑁄𑀦𑀼𑀤𑁄, 𑀲𑀺𑀭𑁄𑀭𑀼𑀳𑁄, 𑀢𑁂𑀚𑁄𑀓𑀲𑀺𑀡𑀁, 𑀭𑀚𑁄𑀚𑀮𑁆𑀮𑀁, 𑀅𑀳𑁄𑀭𑀢𑁆𑀢𑀁, 𑀭𑀳𑁄𑀕𑀢𑁄.

𑀆𑀤𑀺𑀲𑀤𑁆𑀤𑁂𑀦 𑀆𑀧𑁄𑀥𑀸𑀢𑀼, 𑀯𑀸𑀬𑁄𑀥𑀸𑀢𑀼.

𑀲𑀻𑀳𑀕𑀢𑀺𑀬𑀸 𑀯𑀸𑀥𑀺𑀓𑀸𑀭𑀢𑁄 𑀇𑀥 𑀦 𑀪𑀯𑀢𑀺, 𑀫𑀦𑀫𑀢𑁆𑀢𑁂𑀦 𑀫𑀦𑀘𑁆𑀙𑀝𑁆𑀞𑀸𑀦𑀁, 𑀅𑀬𑀓𑀧𑀮𑁆𑀮𑀁, 𑀢𑀫𑀯𑀺𑀦𑁄𑀤𑀦𑁄, 𑀫𑀦𑀆𑀬𑀢𑀦𑀁.

𑀇𑀢𑀺 𑀩𑁆𑀬𑀜𑁆𑀚𑀦𑀲𑀦𑁆𑀥𑀺𑀯𑀺𑀥𑀸𑀦𑀁 𑀦𑀺𑀝𑁆𑀞𑀺𑀢𑀁.

𑀦𑀺𑀕𑁆𑀕𑀳𑀻𑀢𑀲𑀦𑁆𑀥𑀺𑀯𑀺𑀥𑀸𑀦

𑀅𑀣 ¶ 𑀦𑀺𑀕𑁆𑀕𑀳𑀻𑀢𑀲𑀦𑁆𑀥𑀺 𑀯𑀼𑀘𑁆𑀘𑀢𑁂.

𑀢𑀡𑁆𑀳𑀁 𑀓𑀭𑁄, 𑀭𑀡𑀁 𑀚𑀳𑁄, 𑀲𑀁 𑀞𑀺𑀢𑁄, 𑀚𑀼𑀢𑀺𑀁 𑀥𑀭𑁄, 𑀲𑀁 𑀫𑀢𑁄 𑀇𑀢𑀻𑀥 ‘‘𑀦𑀺𑀕𑁆𑀕𑀳𑀻𑀢’’𑀦𑁆𑀢𑀺 𑀅𑀥𑀺𑀓𑀸𑀭𑁄, ‘‘𑀩𑁆𑀬𑀜𑁆𑀚𑀦𑁂’’𑀢𑀺 𑀯𑀢𑁆𑀢𑀢𑁂.

𑁪𑁯. 𑀯𑀕𑁆𑀕𑀦𑁆𑀢𑀁 𑀯𑀸 𑀯𑀕𑁆𑀕𑁂.

𑀯𑀕𑁆𑀕𑀪𑀽𑀢𑁂 𑀩𑁆𑀬𑀜𑁆𑀚𑀦𑁂 𑀧𑀭𑁂 𑀦𑀺𑀕𑁆𑀕𑀳𑀻𑀢𑀁 𑀔𑁄 𑀯𑀕𑁆𑀕𑀦𑁆𑀢𑀁 𑀯𑀸 𑀧𑀧𑁆𑀧𑁄𑀢𑀻𑀢𑀺 𑀦𑀺𑀫𑀺𑀢𑁆𑀢𑀸𑀦𑀼𑀲𑁆𑀯𑀭𑀸𑀦𑀁 𑀞𑀸𑀦𑀸𑀲𑀦𑁆𑀦𑀯𑀲𑁂𑀦 𑀢𑀩𑁆𑀩𑀕𑁆𑀕𑀧𑀜𑁆𑀘𑀫𑁄 𑀳𑁄𑀢𑀺. 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄𑀬𑀁 𑀯𑀸𑀲𑀤𑁆𑀤𑁄. 𑀢𑁂𑀦 ‘‘𑀢𑀡𑁆𑀳𑀗𑁆𑀓𑀭𑁄, 𑀭𑀡𑀜𑁆𑀚𑀳𑁄, 𑀲𑀡𑁆𑀞𑀺𑀢𑁄, 𑀚𑀼𑀢𑀺𑀦𑁆𑀥𑀭𑁄, 𑀲𑀫𑁆𑀫𑀢𑁄’’𑀢𑀺𑀆𑀤𑀻𑀲𑀼 𑀦𑀺𑀘𑁆𑀘𑀁.

𑀢𑀗𑁆𑀓𑀭𑁄𑀢𑀺 𑀢𑀁 𑀓𑀭𑁄𑀢𑀺, 𑀢𑀗𑁆𑀔𑀡𑀁 𑀢𑀁𑀔𑀡𑀁, 𑀲𑀗𑁆𑀕𑀳𑁄 𑀲𑀁𑀕𑀳𑁄, 𑀢𑀗𑁆𑀖𑀢𑀁 𑀢𑀁 𑀖𑀢𑀁. 𑀥𑀫𑁆𑀫𑀜𑁆𑀘𑀭𑁂 𑀥𑀫𑁆𑀫𑀁 𑀘𑀭𑁂, 𑀢𑀜𑁆𑀙𑀦𑁆𑀦𑀁 𑀢𑀁 𑀙𑀦𑁆𑀦𑀁, 𑀢𑀜𑁆𑀚𑀸𑀢𑀁 𑀢𑀁 𑀚𑀸𑀢𑀁, 𑀢𑀜𑁆𑀜𑀸𑀡𑀁 𑀢𑀁 𑀜𑀸𑀡𑀁. 𑀢𑀡𑁆𑀞𑀸𑀦𑀁 𑀢𑀁 𑀞𑀸𑀦𑀁, 𑀢𑀡𑁆𑀟𑀳𑀢𑀺 𑀪𑀁 𑀟𑀳𑀢𑀺. 𑀢𑀦𑁆𑀢𑀦𑁄𑀢𑀺 𑀢𑀁 𑀢𑀦𑁄𑀢𑀺, 𑀢𑀦𑁆𑀣𑀺𑀭𑀁 𑀢𑀁 𑀣𑀺𑀭𑀁, 𑀢𑀦𑁆𑀤𑀸𑀦𑀁 𑀢𑀁 𑀤𑀸𑀦𑀁, 𑀢𑀦𑁆𑀥𑀦𑀁 𑀢𑀁 𑀥𑀦𑀁, 𑀢𑀦𑁆𑀦𑀺𑀘𑁆𑀘𑀼𑀢𑀁 𑀢𑀁 𑀦𑀺𑀘𑁆𑀘𑀼𑀢𑀁. 𑀢𑀫𑁆𑀧𑀢𑁆𑀢𑁄 𑀢𑀁 𑀧𑀢𑁆𑀢𑁄, 𑀢𑀫𑁆𑀨𑀮𑀁 𑀢𑀁 𑀨𑀮𑀁, 𑀢𑁂𑀲𑀫𑁆𑀩𑁄𑀥𑁄 𑀢𑁂𑀲𑀁 𑀩𑁄𑀥𑁄, 𑀲𑀫𑁆𑀪𑀽𑀢𑁄 𑀲𑀁𑀪𑀽𑀢𑁄, 𑀢𑀫𑁆𑀫𑀺𑀢𑁆𑀢𑀁 𑀢𑀁 𑀫𑀺𑀢𑁆𑀢𑀁. 𑀓𑀺𑀗𑁆𑀓𑀢𑁄 𑀓𑀺𑀁 𑀓𑀢𑁄, 𑀤𑀸𑀢𑀼𑀗𑁆𑀕𑀢𑁄 𑀤𑀸𑀢𑀼𑀁 𑀕𑀢𑁄𑀢𑀺 𑀏𑀯𑀫𑀸𑀤𑀻𑀲𑀼 𑀯𑀺𑀓𑀧𑁆𑀧𑁂𑀦.

𑀇𑀥 𑀦 𑀪𑀯𑀢𑀺, 𑀦 𑀢𑀁 𑀓𑀫𑁆𑀫𑀁 𑀓𑀢𑀁 𑀲𑀸𑀥𑀼, 𑀲𑀭𑀡𑀁 𑀕𑀘𑁆𑀙𑀸𑀫𑀺.

𑀲𑀢𑀺 𑀘𑁄𑀧𑀭𑀺 𑀯𑀸𑀕𑁆𑀕𑀳𑀡𑁂 𑀯𑀺𑀚𑁆𑀛𑀦𑁆𑀢𑀭𑁂 𑀯𑀸 𑀇𑀥 𑀯𑀸𑀕𑁆𑀕𑀳𑀡𑀓𑀭𑀡𑀫𑀢𑁆𑀣𑀦𑁆𑀢𑀭𑀯𑀺𑀜𑁆𑀜𑀸𑀧𑀦𑀢𑁆𑀣𑀁, 𑀢𑁂𑀦 𑀦𑀺𑀕𑁆𑀕𑀳𑀻𑀢𑀲𑁆𑀲 𑀲𑀁𑀉𑀧𑀲𑀕𑁆𑀕𑀧𑀼𑀫𑀦𑁆𑀢𑀲𑁆𑀲 𑀮𑁂 𑀮𑀓𑀸𑀭𑁄. 𑀬𑀣𑀸 𑁋 𑀧𑀝𑀺𑀲𑀁𑀮𑀻𑀦𑁄 𑀧𑀝𑀺𑀲𑀮𑁆𑀮𑀻𑀦𑁄, 𑀏𑀯𑀁 𑀧𑀝𑀺𑀲𑀮𑁆𑀮𑀸𑀡𑁄, 𑀲𑀮𑁆𑀮𑀓𑁆𑀔𑀡𑀸, 𑀲𑀮𑁆𑀮𑁂𑀔𑁄, 𑀲𑀮𑁆𑀮𑀸𑀧𑁄, 𑀧𑀼𑀁𑀮𑀺𑀗𑁆𑀕𑀁 𑀧𑀼𑀮𑁆𑀮𑀺𑀗𑁆𑀕𑀁.

𑀧𑀘𑁆𑀘𑀢𑁆𑀢𑀁 𑀏𑀯, 𑀢𑀁 𑀏𑀯, 𑀢𑀜𑁆𑀳𑀺 𑀢𑀲𑁆𑀲, 𑀏𑀯𑀜𑁆𑀳𑀺 𑀯𑁄 𑀇𑀢𑀻𑀥 ‘‘𑀯𑀸’’𑀢𑀺 𑀅𑀥𑀺𑀓𑀸𑀭𑁄.

𑁫𑁦. 𑀏𑀳𑁂 ¶ 𑀜𑀁.

𑀏𑀓𑀸𑀭𑀳𑀓𑀸𑀭𑁂 𑀧𑀭𑁂 𑀦𑀺𑀕𑁆𑀕𑀳𑀻𑀢𑀁 𑀔𑁄 𑀜𑀓𑀸𑀭𑀁 𑀧𑀧𑁆𑀧𑁄𑀢𑀺 𑀯𑀸, 𑀏𑀓𑀸𑀭𑁂 𑀜𑀸𑀤𑁂𑀲𑀲𑁆𑀲 𑀤𑁆𑀯𑀺𑀪𑀸𑀯𑁄.

𑀧𑀘𑁆𑀘𑀢𑁆𑀢𑀜𑁆𑀜𑁂𑀯𑀧𑀘𑁆𑀘𑀢𑁆𑀢𑀁 𑀏𑀯, 𑀢𑀜𑁆𑀜𑁂𑀯 𑀢𑀁 𑀏𑀯, 𑀢𑀜𑁆𑀳𑀺 𑀢𑀲𑁆𑀲 𑀢𑀜𑁆𑀳𑀺 𑀢𑀲𑁆𑀲, 𑀏𑀯𑀜𑁆𑀳𑀺 𑀯𑁄 𑀏𑀯𑀜𑁆𑀳𑀺 𑀯𑁄.

𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀢𑀸 𑀯𑀸𑀲𑀤𑁆𑀤𑀲𑁆𑀲 𑀏𑀯𑀳𑀺𑀦𑀺𑀧𑀸𑀢𑀢𑁄 𑀅𑀜𑁆𑀜𑀢𑁆𑀣 𑀦 𑀳𑁄𑀢𑀺, 𑀬𑀣𑀸 𑁋 𑀏𑀯𑀫𑁂𑀢𑀁, 𑀏𑀯𑀁 𑀳𑁄𑀢𑀺.

𑀲𑀁𑀬𑁄𑀕𑁄, 𑀲𑀁𑀬𑁄𑀚𑀦𑀁, 𑀲𑀁𑀬𑀢𑁄, 𑀲𑀁𑀬𑀸𑀘𑀺𑀓𑀸𑀬, 𑀬𑀁 𑀬𑀤𑁂𑀯, 𑀆𑀦𑀦𑁆𑀢𑀭𑀺𑀓𑀁 𑀬𑀫𑀸𑀳𑀼 𑀇𑀢𑀻𑀥 ‘‘𑀜’’𑀫𑀺𑀢𑀺 𑀯𑀢𑁆𑀢𑀢𑁂.

𑁫𑁧. 𑀲 𑀬𑁂 𑀘.

𑀦𑀺𑀕𑁆𑀕𑀳𑀻𑀢𑀁 𑀔𑁄 𑀬𑀓𑀸𑀭𑁂 𑀧𑀭𑁂 𑀲𑀳 𑀬𑀓𑀸𑀭𑁂𑀦 𑀜𑀓𑀸𑀭𑀁 𑀧𑀧𑁆𑀧𑁄𑀢𑀺 𑀯𑀸, 𑀜𑀸𑀤𑁂𑀲𑀲𑁆𑀲 𑀤𑁆𑀯𑀺𑀢𑁆𑀢𑀁.

𑀲𑀜𑁆𑀜𑁄𑀕𑁄 𑀲𑀁𑀬𑁄𑀕𑁄, 𑀲𑀜𑁆𑀜𑁄𑀚𑀦𑀁 𑀲𑀁𑀬𑁄𑀚𑀦𑀁, 𑀲𑀜𑁆𑀜𑀢𑁄 𑀲𑀁𑀬𑀢𑁄, 𑀲𑀜𑁆𑀜𑀸𑀘𑀺𑀓𑀸𑀬 𑀲𑀁𑀬𑀸𑀘𑀺𑀓𑀸𑀬, 𑀬𑀜𑁆𑀜𑀤𑁂𑀯 𑀬𑀁 𑀬𑀤𑁂𑀯, 𑀆𑀦𑀦𑁆𑀢𑀭𑀺𑀓𑀜𑁆𑀜𑀫𑀸𑀳𑀼 𑀆𑀦𑀦𑁆𑀢𑀭𑀺𑀓𑀁 𑀬𑀫𑀸𑀳𑀼.

𑀯𑀸𑀲𑀤𑁆𑀤𑀲𑁆𑀲 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀢𑀸𑀯 𑀲𑀁𑀧𑀤𑀦𑁆𑀢𑀢𑁄 𑀘 𑀲𑀩𑁆𑀩𑀦𑀸𑀫𑀬𑀓𑀸𑀭𑀧𑀭𑀢𑁄 𑀘 𑀦𑀺𑀕𑁆𑀕𑀳𑀻𑀢𑀸 𑀅𑀜𑁆𑀜𑀢𑁆𑀣 𑀦 𑀳𑁄𑀢𑀺. 𑀬𑀣𑀸 𑁋 𑀏𑀢𑀁 𑀬𑁄𑀚𑀦𑀁, 𑀢𑀁 𑀬𑀸𑀦𑀁, 𑀲𑀭𑀡𑀁 𑀬𑀦𑁆𑀢𑀺.

𑀏𑀢𑁆𑀣 𑀘 ‘‘𑀲𑀳 𑀬𑁂 𑀘𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲 𑀬𑁂 𑀘𑀸’’𑀢𑀺 𑀯𑀘𑀦𑀢𑁄 𑀲𑀼𑀢𑁆𑀢𑀦𑁆𑀢𑁂𑀲𑀼 𑀲𑀼𑀔𑀼𑀘𑁆𑀘𑀸𑀭𑀡𑀢𑁆𑀣𑀫𑀓𑁆𑀔𑀭𑀮𑁄𑀧𑁄𑀧𑀻𑀢𑀺 𑀤𑀝𑁆𑀞𑀩𑁆𑀩𑀁, 𑀢𑁂𑀦 𑀧𑀝𑀺𑀲𑀗𑁆𑀔𑀸𑀬 𑀬𑁄𑀦𑀺𑀲𑁄 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄, 𑀲𑀬𑀁 𑀅𑀪𑀺𑀜𑁆𑀜𑀸𑀬 𑀲𑀘𑁆𑀙𑀺𑀓𑀢𑁆𑀯𑀸 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸, 𑀧𑀭𑀺𑀬𑁂𑀲𑀦𑀸𑀬 𑀧𑀭𑀺𑀬𑁂𑀲𑀦𑀸𑀢𑀺𑀆𑀤𑀺 𑀲𑀺𑀚𑁆𑀛𑀢𑀺.

𑀢𑀁 ¶ 𑀅𑀳𑀁 𑀩𑁆𑀭𑀽𑀫𑀺, 𑀬𑀁 𑀆𑀳𑀼, 𑀥𑀦𑀁 𑀏𑀯, 𑀓𑀺𑀁 𑀏𑀢𑀁, 𑀦𑀺𑀦𑁆𑀤𑀺𑀢𑀼𑀁 𑀅𑀭𑀳𑀢𑀺, 𑀬𑀁 𑀅𑀦𑀺𑀘𑁆𑀘𑀁, 𑀢𑀁 𑀅𑀦𑀢𑁆𑀢𑀸, 𑀏𑀢𑀁 𑀅𑀯𑁄𑀘, 𑀏𑀢𑀁 𑀏𑀯 𑀇𑀘𑁆𑀘𑀢𑁆𑀭 𑁋

𑁫𑁨. 𑀫𑀤𑀸 𑀲𑀭𑁂.

𑀦𑀺𑀕𑁆𑀕𑀳𑀻𑀢𑀲𑁆𑀲 𑀔𑁄 𑀲𑀭𑁂 𑀧𑀭𑁂 𑀫𑀓𑀸𑀭𑀤𑀓𑀸𑀭𑀸𑀤𑁂𑀲𑀸 𑀳𑁄𑀦𑁆𑀢𑀺 𑀯𑀸. 𑀏𑀢𑁆𑀣 𑀘 𑀯𑀸𑀲𑀤𑁆𑀤𑀸𑀥𑀺𑀓𑀸𑀭𑀲𑁆𑀲 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀢𑀸 𑀤𑀓𑀸𑀭𑁄 𑀬𑀢𑁂𑀢𑀲𑀤𑁆𑀤𑀢𑁄 𑀧𑀭𑀲𑁆𑀲𑁂𑀯.

𑀢𑀫𑀳𑀁 𑀩𑁆𑀭𑀽𑀫𑀺, 𑀬𑀫𑀸𑀳𑀼, 𑀥𑀦𑀫𑁂𑀯, 𑀓𑀺𑀫𑁂𑀢𑀁, 𑀦𑀺𑀦𑁆𑀤𑀺𑀢𑀼𑀫𑀭𑀳𑀢𑀺, 𑀬𑀤𑀦𑀺𑀘𑁆𑀘𑀁, 𑀢𑀤𑀦𑀢𑁆𑀢𑀸, 𑀏𑀢𑀤𑀯𑁄𑀘, 𑀏𑀢𑀤𑁂𑀯.

𑀯𑀸𑀢𑀺 𑀓𑀺𑀁? 𑀢𑀁 𑀅𑀳𑀁, 𑀏𑀢𑀁 𑀏𑀯, 𑀅𑀓𑁆𑀓𑁄𑀘𑁆𑀙𑀺 𑀫𑀁 𑀅𑀯𑀥𑀺 𑀫𑀁.

𑀏𑀢𑁆𑀣 𑀘 𑀫𑀤𑀸𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀩𑁆𑀬𑀜𑁆𑀚𑀦𑁂𑀧𑀺 𑀯𑀸 𑀫𑀓𑀸𑀭𑁄. 𑀢𑁂𑀦 ‘‘𑀩𑀼𑀤𑁆𑀥𑀫 𑀲𑀭𑀡𑀫 𑀕𑀘𑁆𑀙𑀸𑀫𑀻’’𑀢𑀺𑀆𑀤𑀺 𑀲𑀺𑀚𑁆𑀛𑀢𑀺.

𑀢𑀸𑀲𑀁 𑀅𑀳𑀁 𑀲𑀦𑁆𑀢𑀺𑀓𑁂, 𑀯𑀺𑀤𑀽𑀦𑀁 𑀅𑀕𑁆𑀕𑀁, 𑀢𑀲𑁆𑀲 𑀅𑀤𑀸𑀲𑀺𑀁 𑀅𑀳𑀁 𑀇𑀢𑀻𑀥 ‘‘𑀲𑀭𑁂’’𑀢𑀺 𑀯𑀢𑁆𑀢𑀢𑁂.

𑁫𑁩. 𑀓𑁆𑀯𑀘𑀺 𑀮𑁄𑀧𑀁.

𑀦𑀺𑀕𑁆𑀕𑀳𑀻𑀢𑀁 𑀔𑁄 𑀲𑀭𑁂 𑀧𑀭𑁂 𑀮𑁄𑀧𑀁 𑀧𑀧𑁆𑀧𑁄𑀢𑀺 𑀓𑁆𑀯𑀘𑀺 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑁂 𑀲𑀼𑀔𑀼𑀘𑁆𑀘𑀸𑀭𑀡𑀝𑁆𑀞𑀸𑀦𑁂. 𑀧𑀼𑀩𑁆𑀩𑀲𑁆𑀲𑀭𑀮𑁄𑀧𑁄, 𑀧𑀭𑀲𑁆𑀲 𑀅𑀲𑀁𑀬𑁄𑀕𑀦𑁆𑀢𑀲𑁆𑀲 𑀤𑀻𑀖𑁄.

𑀢𑀸𑀲𑀸𑀳𑀁 𑀲𑀦𑁆𑀢𑀺𑀓𑁂, 𑀯𑀺𑀤𑀽𑀦𑀕𑁆𑀕𑀁, 𑀢𑀲𑁆𑀲 𑀅𑀤𑀸𑀲𑀸𑀳𑀁, 𑀢𑀣𑀸𑀕𑀢𑀸𑀳𑀁, 𑀏𑀯𑀸𑀳𑀁, 𑀓𑁆𑀬𑀸𑀳𑀁.

𑀓𑁆𑀯𑀘𑀻𑀢𑀺 𑀓𑀺𑀁? 𑀏𑀯𑀫𑀲𑁆𑀲, 𑀓𑀺𑀫𑀳𑀁.

𑀅𑀭𑀺𑀬𑀲𑀘𑁆𑀘𑀸𑀦𑀁 𑀤𑀲𑁆𑀲𑀦𑀁, 𑀏𑀢𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁, 𑀲𑀁𑀭𑀢𑁆𑀢𑁄, 𑀲𑀁𑀭𑀸𑀕𑁄, 𑀲𑀁𑀭𑀫𑁆𑀪𑁄, 𑀅𑀯𑀺𑀲𑀁𑀳𑀸𑀭𑁄, 𑀘𑀺𑀭𑀁 𑀧𑀯𑀸𑀲𑀺𑀁, 𑀕𑀦𑁆𑀢𑀼𑀁 𑀓𑀸𑀫𑁄, 𑀕𑀦𑁆𑀢𑀼𑀁 𑀫𑀦𑁄 𑀇𑀢𑀻𑀥 ‘‘𑀓𑁆𑀯𑀘𑀺 𑀮𑁄𑀧’’𑀦𑁆𑀢𑀺 𑀯𑀢𑁆𑀢𑀢𑁂.

𑁫𑁪. 𑀩𑁆𑀬𑀜𑁆𑀚𑀦𑁂 ¶ 𑀘.

𑀦𑀺𑀕𑁆𑀕𑀳𑀻𑀢𑀁 𑀔𑁄 𑀩𑁆𑀬𑀜𑁆𑀚𑀦𑁂 𑀘 𑀧𑀭𑁂 𑀮𑁄𑀧𑀁 𑀧𑀧𑁆𑀧𑁄𑀢𑀺 𑀓𑁆𑀯𑀘𑀺 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀸𑀤𑀺𑀫𑁆𑀳𑀺. 𑀭𑀓𑀸𑀭𑀳𑀓𑀸𑀭𑁂𑀲𑀼 𑀉𑀧𑀲𑀕𑁆𑀕𑀦𑁆𑀢𑀲𑁆𑀲 𑀤𑀻𑀖𑁄.

𑀅𑀭𑀺𑀬𑀲𑀘𑁆𑀘𑀸𑀦 𑀤𑀲𑁆𑀲𑀦𑀁, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀁, 𑀲𑀸𑀭𑀢𑁆𑀢𑁄, 𑀲𑀸𑀭𑀸𑀕𑁄, 𑀲𑀸𑀭𑀫𑁆𑀪𑁄, 𑀅𑀯𑀺𑀲𑀸𑀳𑀸𑀭𑁄, 𑀘𑀺𑀭𑀧𑁆𑀧𑀯𑀸𑀲𑀺𑀁, 𑀤𑁆𑀯𑀺𑀢𑁆𑀢𑀁, 𑀕𑀦𑁆𑀢𑀼𑀓𑀸𑀫𑁄, 𑀕𑀦𑁆𑀢𑀼𑀫𑀦𑁄.

𑀓𑁆𑀯𑀘𑀻𑀢𑀺 𑀓𑀺𑀁? 𑀏𑀢𑀁 𑀫𑀗𑁆𑀕𑀮𑀫𑀼𑀢𑁆𑀢𑀫𑀁.

𑀓𑀢𑀁 𑀇𑀢𑀺, 𑀓𑀺𑀁 𑀇𑀢𑀺, 𑀅𑀪𑀺𑀦𑀦𑁆𑀤𑀼𑀁 𑀇𑀢𑀺, 𑀉𑀢𑁆𑀢𑀢𑁆𑀢𑀁 𑀇𑀯, 𑀘𑀓𑁆𑀓𑀁 𑀇𑀯, 𑀓𑀮𑀺𑀁 𑀇𑀤𑀸𑀦𑀺, 𑀓𑀺𑀁 𑀇𑀤𑀸𑀦𑀺, 𑀢𑁆𑀯𑀁 𑀅𑀲𑀺, 𑀇𑀤𑀁 𑀅𑀧𑀺, 𑀉𑀢𑁆𑀢𑀭𑀺𑀁 𑀅𑀧𑀺, 𑀤𑀸𑀢𑀼𑀁 𑀅𑀧𑀺, 𑀲𑀤𑀺𑀲𑀁 𑀏𑀯 𑀇𑀢𑀻𑀥 ‘‘𑀦𑀺𑀕𑁆𑀕𑀳𑀻𑀢𑀫𑁆𑀳𑀸, 𑀮𑁄𑀧’’𑀦𑁆𑀢𑀺 𑀘 𑀯𑀢𑁆𑀢𑀢𑁂.

𑁫𑁫. 𑀧𑀭𑁄 𑀯𑀸 𑀲𑀭𑁄.

𑀦𑀺𑀕𑁆𑀕𑀳𑀻𑀢𑀫𑁆𑀳𑀸 𑀧𑀭𑁄 𑀲𑀭𑁄 𑀮𑁄𑀧𑀁 𑀧𑀧𑁆𑀧𑁄𑀢𑀺 𑀯𑀸. 𑀦𑀺𑀕𑁆𑀕𑀳𑀻𑀢𑀲𑁆𑀲 𑀯𑀕𑁆𑀕𑀦𑁆𑀢𑀢𑁆𑀢𑀁.

𑀓𑀢𑀦𑁆𑀢𑀺, 𑀓𑀺𑀦𑁆𑀢𑀺, 𑀅𑀪𑀺𑀦𑀦𑁆𑀤𑀼𑀦𑁆𑀢𑀺, 𑀉𑀢𑁆𑀢𑀢𑁆𑀢𑀁𑀯, 𑀘𑀓𑁆𑀓𑀁𑀯, 𑀓𑀮𑀺𑀦𑁆𑀤𑀸𑀦𑀺, 𑀓𑀺𑀦𑁆𑀤𑀸𑀦𑀺, 𑀢𑁆𑀯𑀁𑀲𑀺, 𑀇𑀤𑀫𑁆𑀧𑀺, 𑀉𑀢𑁆𑀢𑀭𑀺𑀫𑁆𑀧𑀺, 𑀤𑀸𑀢𑀼𑀫𑁆𑀧𑀺, 𑀲𑀤𑀺𑀲𑀁𑀯.

𑀯𑀸𑀢𑀺 𑀓𑀺𑀁? 𑀓𑀢𑀁 𑀇𑀢𑀺, 𑀓𑀺𑀫𑀺𑀢𑀺, 𑀤𑀸𑀢𑀼𑀫𑀧𑀺, 𑀲𑀸𑀫𑀁 𑀏𑀯.

𑀅𑀬𑀫𑁆𑀧𑀺 𑀯𑀸𑀲𑀤𑁆𑀤𑀲𑁆𑀲 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀢𑀸 𑀇𑀢𑀻𑀯𑀻𑀤𑀸𑀦𑀺𑀲𑀻𑀧𑁂𑀯𑀸𑀤𑀺𑀢𑁄 𑀅𑀜𑁆𑀜𑀢𑁆𑀣 𑀦 𑀳𑁄𑀢𑀺. 𑀬𑀣𑀸 𑁋 𑀅𑀳𑀁 𑀏𑀢𑁆𑀣, 𑀏𑀢𑀁 𑀅𑀳𑁄𑀲𑀺.

𑀏𑀯𑀁 𑀅𑀲𑁆𑀲 𑀢𑁂 𑀆𑀲𑀯𑀸, 𑀧𑀼𑀧𑁆𑀨𑀁 𑀅𑀲𑁆𑀲𑀸 𑀉𑀧𑁆𑀧𑀚𑁆𑀚𑀢𑀺 𑀇𑀢𑀻𑀥 𑀲𑀭𑁂 𑀧𑀭𑁂 𑀮𑀼𑀢𑁆𑀢𑁂 𑀯𑀺𑀧𑀭𑀺𑀡𑀸𑀫𑁂𑀦 ‘‘𑀧𑀭𑀲𑁆𑀫𑀺𑀁, 𑀲𑀭𑁂, 𑀮𑀼𑀢𑁆𑀢𑁂’’𑀢𑀺 𑀘 𑀯𑀢𑁆𑀢𑀢𑁂.

𑁫𑁬. 𑀩𑁆𑀬𑀜𑁆𑀚𑀦𑁄 ¶ 𑀘 𑀯𑀺𑀲𑀜𑁆𑀜𑁄𑀕𑁄.

𑀦𑀺𑀕𑁆𑀕𑀳𑀻𑀢𑀫𑁆𑀳𑀸 𑀧𑀭𑀲𑁆𑀫𑀺𑀁 𑀲𑀭𑁂 𑀮𑀼𑀢𑁆𑀢𑁂 𑀩𑁆𑀬𑀜𑁆𑀚𑀦𑁄 𑀲𑀜𑁆𑀜𑁄𑀕𑁄 𑀘𑁂, 𑀯𑀺𑀲𑀜𑁆𑀜𑁄𑀕𑁄𑀯 𑀳𑁄𑀢𑀻𑀢𑀺 𑀲𑀁𑀬𑁄𑀕𑁂𑀓𑀤𑁂𑀲𑀲𑁆𑀲 𑀧𑀼𑀭𑀺𑀫𑀩𑁆𑀬𑀜𑁆𑀚𑀦𑀲𑁆𑀲 𑀮𑁄𑀧𑁄.

𑀤𑁆𑀯𑀺𑀦𑁆𑀦𑀁 𑀩𑁆𑀬𑀜𑁆𑀚𑀦𑀸𑀦𑀫𑁂𑀓𑀢𑁆𑀭 𑀞𑀺𑀢𑀺 𑀲𑀜𑁆𑀜𑁄𑀕𑁄, 𑀇𑀥 𑀧𑀦 𑀲𑀁𑀬𑀼𑀚𑁆𑀚𑀢𑀻𑀢𑀺 𑀲𑀜𑁆𑀜𑁄𑀕𑁄, 𑀧𑀼𑀭𑀺𑀫𑁄 𑀯𑀡𑁆𑀡𑁄, 𑀯𑀺𑀕𑀢𑁄 𑀲𑀜𑁆𑀜𑁄𑀕𑁄 𑀅𑀲𑁆𑀲𑀸𑀢𑀺 𑀯𑀺𑀲𑀜𑁆𑀜𑁄𑀕𑁄, 𑀧𑀭𑁄.

𑀏𑀯𑀁 𑀲 𑀢𑁂 𑀆𑀲𑀯𑀸, 𑀧𑀼𑀧𑁆𑀨𑀁𑀲𑀸 𑀉𑀧𑁆𑀧𑀚𑁆𑀚𑀢𑀺.

𑀮𑀼𑀢𑁆𑀢𑁂𑀢𑀺 𑀓𑀺𑀁? 𑀏𑀯𑀫𑀲𑁆𑀲.

𑀘𑀲𑀤𑁆𑀤𑁂𑀦 𑀢𑀺𑀡𑁆𑀡𑀁 𑀩𑁆𑀬𑀜𑁆𑀚𑀦𑀸𑀦𑀁 𑀲𑀭𑀽𑀧𑀲𑀁𑀬𑁄𑀕𑁄𑀧𑀺 𑀯𑀺𑀲𑀜𑁆𑀜𑁄𑀕𑁄 𑀳𑁄𑀢𑀺. 𑀬𑀣𑀸 𑁋 𑀅𑀕𑁆𑀬𑀸𑀕𑀸𑀭𑀁, 𑀯𑀼𑀢𑁆𑀬𑀲𑁆𑀲.

𑀘𑀓𑁆𑀔𑀼 𑀉𑀤𑀧𑀸𑀤𑀺, 𑀅𑀯 𑀲𑀺𑀭𑁄, 𑀬𑀸𑀯𑀘𑀺𑀥 𑀪𑀺𑀓𑁆𑀔𑀯𑁂, 𑀅𑀡𑀼𑀣𑀽𑀮𑀸𑀦𑀺, 𑀢 𑀲𑀫𑁆𑀧𑀬𑀼𑀢𑁆𑀢𑀸 𑀇𑀪𑀻𑀥 ‘‘𑀲𑀭𑁂, 𑀆𑀕𑀫𑁄, 𑀓𑁆𑀯𑀘𑀺, 𑀩𑁆𑀬𑀜𑁆𑀚𑀦𑁂’’𑀢𑀺 𑀘 𑀯𑀢𑁆𑀢𑀢𑁂.

𑁫𑁭. 𑀦𑀺𑀕𑁆𑀕𑀳𑀺𑀢𑀜𑁆𑀘.

𑀦𑀺𑀕𑁆𑀕𑀳𑀻𑀢𑀜𑁆𑀘 𑀆𑀕𑀫𑁄 𑀳𑁄𑀢𑀺 𑀲𑀭𑁂 𑀯𑀸 𑀩𑁆𑀬𑀜𑁆𑀚𑀦𑁂 𑀯𑀸 𑀓𑁆𑀯𑀘𑀺 𑀲𑀼𑀔𑀼𑀘𑁆𑀘𑀸𑀭𑀡𑀝𑁆𑀞𑀸𑀦𑁂. 𑀦𑀺𑀕𑁆𑀕𑀳𑀻𑀢𑀲𑁆𑀲 𑀭𑀲𑁆𑀲𑀸𑀦𑀼𑀕𑀢𑀢𑁆𑀢𑀸 𑀭𑀲𑁆𑀲𑀢𑁄𑀬𑁂𑀯𑀸𑀬𑀁.

𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀅𑀯𑀁𑀲𑀺𑀭𑁄, 𑀬𑀸𑀯𑀜𑁆𑀘𑀺𑀥 𑀪𑀺𑀓𑁆𑀔𑀯𑁂, 𑀅𑀡𑀼𑀁𑀣𑀽𑀮𑀸𑀦𑀺, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸, 𑀏𑀯𑀁 𑀢𑀗𑁆𑀔𑀡𑁂, 𑀢𑀁𑀲𑀪𑀸𑀯𑁄.

𑀓𑁆𑀯𑀘𑀻𑀢𑀺 𑀓𑀺𑀁? 𑀦 𑀳𑀺 𑀏𑀢𑁂𑀳𑀺, 𑀇𑀥 𑀘𑁂𑀯.

𑀏𑀯𑀁 𑀯𑀼𑀢𑁆𑀢𑁂, 𑀢𑀁 𑀲𑀸𑀥𑀼, 𑀏𑀓𑀁 𑀲𑀫𑀬𑀁 𑀪𑀕𑀯𑀸, 𑀅𑀕𑁆𑀕𑀺𑀁𑀯 𑀲𑀦𑀫𑀁 𑀇𑀢𑀻𑀥 𑀮𑁄𑀧𑀸𑀤𑁂𑀲𑀓𑀸𑀭𑀺𑀬𑁂 𑀲𑀫𑁆𑀧𑀢𑁆𑀢𑁂 𑀬𑁂𑀪𑀼𑀬𑁆𑀬𑁂𑀦 𑀢𑀤𑀧𑀯𑀸𑀤𑀢𑁆𑀣𑀫𑀸𑀳.

𑁫𑁮. 𑀅𑀁 ¶ 𑀩𑁆𑀬𑀜𑁆𑀚𑀦𑁂 𑀦𑀺𑀕𑁆𑀕𑀳𑀻𑀢𑀁.

𑀦𑀺𑀕𑁆𑀕𑀳𑀻𑀢𑀁 𑀔𑁄 𑀩𑁆𑀬𑀜𑁆𑀚𑀦𑁂 𑀧𑀭𑁂 𑀅𑀁𑀇𑀢𑀺 𑀳𑁄𑀢𑀺.

𑀅𑀓𑀸𑀭𑁄 𑀉𑀘𑁆𑀘𑀸𑀭𑀡𑀢𑁆𑀣𑁄, ‘‘𑀲𑀭𑀮𑁄𑀧𑁄’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑀲𑁆𑀲𑀭𑀮𑁄𑀧𑁄 𑀯𑀸.

𑀏𑀯𑀁 𑀯𑀼𑀢𑁆𑀢𑁂, 𑀢𑀁 𑀲𑀸𑀥𑀼, 𑀏𑀓𑀁 𑀲𑀫𑀬𑀁 𑀪𑀕𑀯𑀸, 𑀅𑀕𑁆𑀕𑀺𑀁𑀯 𑀲𑀦𑁆𑀥𑀫𑀁.

𑀇𑀥 𑀅𑀯𑀼𑀢𑁆𑀢𑀯𑀺𑀲𑁂𑀲𑀸𑀦𑀫𑁆𑀧𑀺 𑀯𑀼𑀢𑁆𑀢𑀦𑀬𑀸𑀢𑀺𑀤𑁂𑀲𑀢𑁆𑀣𑀫𑀢𑀺𑀤𑁂𑀲𑀫𑀸𑀳.

𑁫𑁯. 𑀅𑀦𑀼𑀧𑀤𑀺𑀝𑁆𑀞𑀸𑀦𑀁 𑀯𑀼𑀢𑁆𑀢𑀬𑁄𑀕𑀢𑁄.

𑀬𑁂 𑀇𑀥 𑀅𑀫𑁆𑀳𑁂𑀳𑀺 𑀯𑀺𑀲𑁂𑀲𑀢𑁄 𑀦 𑀉𑀧𑀤𑀺𑀝𑁆𑀞𑀸 𑀉𑀧𑀲𑀕𑁆𑀕𑀦𑀺𑀧𑀸𑀢𑀸𑀤𑀬𑁄, 𑀢𑁂𑀲𑀁 𑀯𑀼𑀢𑁆𑀢𑀬𑁄𑀕𑀢𑁄 𑀯𑀼𑀢𑁆𑀢𑀦𑀬𑁂𑀦 𑀲𑀭𑀲𑀦𑁆𑀥𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀭𑀽𑀧𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑀢𑁂𑀦 ‘‘𑀤𑁄 𑀥𑀲𑁆𑀲 𑀘𑀸’’𑀢𑀺 𑀲𑀼𑀢𑁆𑀢𑁂 𑀘𑀲𑀤𑁆𑀤𑁂𑀦 𑀧𑀭𑀺𑀬𑀸𑀤𑀻𑀦𑀁 𑀭𑀳𑀦𑀸𑀤𑀺𑀯𑀡𑁆𑀡𑀲𑁆𑀲 𑀯𑀺𑀧𑀭𑀺𑀬𑀬𑁄 𑀬𑀯𑀸𑀤𑀻𑀳𑀺, 𑀬𑀣𑀸 𑁋 𑀧𑀭𑀺𑀬𑀼𑀤𑀸𑀳𑀸𑀲𑀺 𑀧𑀬𑀺𑀭𑀼𑀤𑀸𑀳𑀸𑀲𑀺, 𑀅𑀭𑀺𑀬𑀲𑁆𑀲 𑀅𑀬𑀺𑀭𑀲𑁆𑀲, 𑀩𑀳𑁆𑀯𑀸𑀩𑀸𑀥𑁄 𑀩𑀯𑁆𑀳𑀸𑀩𑀸𑀥𑁄, 𑀦 𑀅𑀪𑀺𑀦𑁂𑀬𑁆𑀬 𑀅𑀦𑀪𑀺𑀦𑁂𑀬𑁆𑀬.

‘‘𑀢𑀁 𑀇𑀫𑀺𑀦𑀸𑀧𑀺 𑀚𑀸𑀦𑀸𑀣𑀸’’𑀢𑀺 𑀏𑀢𑁆𑀣 ‘‘𑀧𑀭𑁄 𑀯𑀸 𑀲𑀭𑁄’’𑀢𑀺 𑀲𑀭𑁂 𑀮𑀼𑀢𑁆𑀢𑁂 ‘‘𑀢𑀢𑁆𑀭𑀸𑀓𑀸𑀭𑁄’’𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀅𑀓𑀸𑀭𑁄 𑀦𑀺𑀕𑁆𑀕𑀳𑀻𑀢𑀲𑁆𑀲 𑀤𑀓𑀸𑀭𑁄, 𑀢𑀤𑀫𑀺𑀦𑀸𑀧𑀺 𑀚𑀸𑀦𑀸𑀣 𑀇𑀘𑁆𑀘𑀸𑀤𑀺.

𑀇𑀢𑀺 𑀦𑀺𑀕𑁆𑀕𑀳𑀻𑀢𑀲𑀦𑁆𑀥𑀺𑀯𑀺𑀥𑀸𑀦𑀁 𑀦𑀺𑀝𑁆𑀞𑀺𑀢𑀁.

𑀲𑀜𑁆𑀜𑀸𑀯𑀺𑀥𑀸𑀦𑀁 𑀲𑀭𑀲𑀦𑁆𑀥𑀺 𑀲𑀦𑁆𑀥𑀺,

𑀦𑀺𑀲𑁂𑀥𑀦𑀁 𑀩𑁆𑀬𑀜𑁆𑀚𑀦𑀲𑀦𑁆𑀥𑀺 𑀲𑀦𑁆𑀥𑀺;

𑀬𑁄 𑀦𑀺𑀕𑁆𑀕𑀳𑀻𑀢𑀲𑁆𑀲 𑀘 𑀲𑀦𑁆𑀥𑀺𑀓𑀧𑁆𑀧𑁂,

𑀲𑀼𑀦𑀺𑀘𑁆𑀙𑀬𑁄 𑀲𑁄𑀧𑀺 𑀫𑀬𑁂𑀢𑁆𑀣 𑀯𑀼𑀢𑁆𑀢𑁄.

𑀇𑀢𑀺 𑀭𑀽𑀧𑀲𑀺𑀤𑁆𑀥𑀺𑀬𑀁 𑀲𑀦𑁆𑀥𑀺𑀓𑀡𑁆𑀟𑁄

𑀧𑀞𑀫𑁄.

𑁨. 𑀦𑀸𑀫𑀓𑀡𑁆𑀟

𑀅𑀣 ¶ 𑀦𑀸𑀫𑀺𑀓𑀯𑀺𑀪𑀢𑁆𑀬𑀸𑀯𑀢𑀸𑀭𑁄 𑀯𑀼𑀘𑁆𑀘𑀢𑁂.

𑀅𑀢𑁆𑀣𑀸𑀪𑀺𑀫𑀼𑀔𑀁 𑀦𑀫𑀦𑀢𑁄, 𑀅𑀢𑁆𑀢𑀦𑀺 𑀘𑀢𑁆𑀣𑀲𑁆𑀲 𑀦𑀸𑀫𑀦𑀢𑁄 𑀦𑀸𑀫𑀁, 𑀤𑀩𑁆𑀩𑀸𑀪𑀺𑀥𑀸𑀦𑀁.

𑀢𑀁 𑀧𑀦 𑀤𑀼𑀯𑀺𑀥𑀁 𑀅𑀦𑁆𑀯𑀢𑁆𑀣𑀭𑀼𑀴𑁆𑀳𑀻𑀯𑀲𑁂𑀦, 𑀢𑀺𑀯𑀺𑀥𑀁 𑀧𑀼𑀫𑀺𑀢𑁆𑀣𑀺𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦. 𑀬𑀣𑀸 𑁋 𑀭𑀼𑀓𑁆𑀔𑁄, 𑀫𑀸𑀮𑀸, 𑀥𑀦𑀁.

𑀘𑀢𑀼𑀩𑁆𑀩𑀺𑀥𑀁 𑀲𑀸𑀫𑀜𑁆𑀜𑀕𑀼𑀡𑀓𑁆𑀭𑀺𑀬𑀸𑀬𑀤𑀺𑀘𑁆𑀙𑀸𑀯𑀲𑁂𑀦, 𑀬𑀣𑀸 𑁋 𑀭𑀼𑀓𑁆𑀔𑁄, 𑀦𑀻𑀮𑁄, 𑀧𑀸𑀘𑀓𑁄, 𑀲𑀺𑀭𑀺𑀯𑀟𑁆𑀠𑁄𑀢𑀺𑀆𑀤𑀺.

𑀅𑀝𑁆𑀞𑀯𑀺𑀥𑀁 𑀅𑀯𑀡𑁆𑀡𑀺𑀯𑀡𑁆𑀡𑀼𑀯𑀡𑁆𑀡𑁄𑀓𑀸𑀭𑀦𑀺𑀕𑁆𑀕𑀳𑀻𑀢𑀦𑁆𑀢𑀧𑀓𑀢𑀺𑀪𑁂𑀤𑁂𑀦.

𑀧𑀼𑀮𑁆𑀮𑀺𑀗𑁆𑀕

𑀢𑀢𑁆𑀣 𑀧𑀞𑀫𑀁 𑀅𑀓𑀸𑀭𑀦𑁆𑀢𑀫𑁆𑀳𑀸 𑀧𑀼𑀮𑁆𑀮𑀺𑀗𑁆𑀕𑀸 𑀚𑀸𑀢𑀺𑀦𑀺𑀫𑀺𑀢𑁆𑀢𑀸 𑀧𑀼𑀭𑀺𑀲𑀲𑀤𑁆𑀤𑀸 𑀲𑁆𑀬𑀸𑀤𑀺𑀯𑀺𑀪𑀢𑁆𑀢𑀺𑀬𑁄 𑀧𑀭𑀸 𑀬𑁄𑀚𑀻𑀬𑀦𑁆𑀢𑁂.

𑁬𑁦. 𑀚𑀺𑀦𑀯𑀘𑀦𑀬𑀼𑀢𑁆𑀢𑀜𑁆𑀳𑀺.

𑀅𑀥𑀺𑀓𑀸𑀭𑁄𑀬𑀁. 𑀢𑀢𑁆𑀣 𑀧𑀜𑁆𑀘 𑀫𑀸𑀭𑁂 𑀚𑀺𑀢𑀯𑀸𑀢𑀺 𑀚𑀺𑀦𑁄, 𑀩𑀼𑀤𑁆𑀥𑁄. 𑀚𑀺𑀦𑀲𑁆𑀲 𑀯𑀘𑀦𑀁 𑀚𑀺𑀦𑀯𑀘𑀦𑀁, 𑀢𑀲𑁆𑀲 𑀚𑀺𑀦𑀯𑀘𑀦𑀲𑁆𑀲 𑀬𑀼𑀢𑁆𑀢𑀁 𑀚𑀺𑀦𑀯𑀘𑀦𑀬𑀼𑀢𑁆𑀢𑀁, 𑀢𑁂𑀧𑀺𑀝𑀓𑀲𑁆𑀲 𑀩𑀼𑀤𑁆𑀥𑀯𑀘𑀦𑀲𑁆𑀲 𑀫𑀸𑀕𑀥𑀺𑀓𑀸𑀬 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀬𑀸 𑀬𑀼𑀢𑁆𑀢𑀁 𑀅𑀦𑀼𑀭𑀽𑀧𑀫𑁂𑀯𑀸𑀢𑀺 𑀇𑀤𑀁 𑀅𑀥𑀺𑀓𑀸𑀭𑀢𑁆𑀣𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀸 𑀫𑀸𑀕𑀥𑀻 𑀫𑀽𑀮𑀪𑀸𑀲𑀸, 𑀦𑀭𑀸 𑀬𑀸𑀬𑀸𑀤𑀺𑀓𑀧𑁆𑀧𑀺𑀓𑀸;

𑀩𑁆𑀭𑀳𑁆𑀫𑀸𑀦𑁄 𑀘’𑀲𑁆𑀲𑀼𑀢𑀸𑀮𑀸𑀧𑀸, 𑀲𑀫𑁆𑀩𑀼𑀤𑁆𑀥𑀸 𑀘𑀸𑀧𑀺 𑀪𑀸𑀲𑀭𑁂.

𑀅𑀥𑀺𑀓𑀸𑀭𑁄 𑀧𑀦 𑀢𑀺𑀯𑀺𑀥𑁄 𑀲𑀻𑀳𑀕𑀢𑀺𑀓𑀫𑀡𑁆𑀟𑀽𑀓𑀕𑀢𑀺𑀓𑀬𑀣𑀸𑀦𑀼𑀧𑀼𑀩𑁆𑀩𑀺𑀓𑀯𑀲𑁂𑀦, 𑀅𑀬𑀁 𑀧𑀦 𑀲𑀻𑀳𑀕𑀢𑀺𑀓𑁄 𑀧𑀼𑀩𑁆𑀩𑀸𑀧𑀭𑀯𑀺𑀮𑁄𑀓𑀦𑀢𑁄, 𑀬𑀣𑀸𑀦𑀼𑀧𑀼𑀩𑁆𑀩𑀺𑀓𑁄𑀬𑁂𑀯 𑀯𑀸.

𑀲𑀓𑁆𑀓𑀢𑀯𑀺𑀲𑀤𑀺𑀲𑀁 ¶ 𑀓𑀢𑁆𑀯𑀸 𑀚𑀺𑀦𑀯𑀘𑀦𑀸𑀦𑀼𑀭𑀽𑀧𑀯𑀲𑁂𑀦 𑀧𑀓𑀢𑀺𑀝𑁆𑀞𑀧𑀦𑀢𑁆𑀣𑀁 𑀧𑀭𑀺𑀪𑀸𑀲𑀫𑀸𑀳.

𑁬𑁧. 𑀮𑀺𑀗𑁆𑀕𑀜𑁆𑀘 𑀦𑀺𑀧𑀘𑁆𑀘𑀢𑁂.

𑀮𑀺𑀗𑁆𑀕𑀁𑀧𑀸𑀝𑀺𑀧𑀤𑀺𑀓𑀁, 𑀬𑀣𑀸 𑀬𑀣𑀸 𑀚𑀺𑀦𑀯𑀘𑀦𑀬𑀼𑀢𑁆𑀢𑀜𑁆𑀳𑀺 𑀮𑀺𑀗𑁆𑀕𑀁, 𑀢𑀣𑀸 𑀢𑀣𑀸 𑀇𑀥 𑀮𑀺𑀗𑁆𑀕𑀁 𑀦𑀺𑀧𑀘𑁆𑀘𑀢𑁂 𑀞𑀧𑀻𑀬𑀢𑀺. 𑀘𑀲𑀤𑁆𑀤𑁂𑀦 𑀥𑀸𑀢𑀯𑁄 𑀘𑀸𑀢𑀺 𑀚𑀺𑀦𑀯𑀘𑀦𑀸𑀦𑀼𑀭𑀽𑀧𑀢𑁄 ‘‘𑀧𑀼𑀭𑀺𑀲’’𑀇𑀢𑀺 𑀮𑀺𑀗𑁆𑀕𑁂 𑀞𑀧𑀺𑀢𑁂 𑀢𑀢𑁄 𑀢𑀲𑁆𑀲 𑀥𑀸𑀢𑀼𑀧𑁆𑀧𑀘𑁆𑀘𑀬𑀯𑀺𑀪𑀢𑁆𑀢𑀺𑀯𑀚𑁆𑀚𑀺𑀢𑀲𑁆𑀲 𑀅𑀢𑁆𑀣𑀯𑀢𑁄 𑀲𑀤𑁆𑀤𑀲𑁆𑀲 ‘‘𑀧𑀭𑀲𑀫𑀜𑁆𑀜𑀸 𑀧𑀬𑁄𑀕𑁂’’𑀢𑀺 𑀧𑀭𑀺𑀪𑀸𑀲𑀢𑁄 𑀮𑀺𑀗𑁆𑀕𑀲𑀜𑁆𑀜𑀸𑀬𑀁 𑁋

𑀇𑀢𑁄 𑀧𑀭𑀁 𑀯𑀺𑀪𑀢𑁆𑀢𑀺𑀧𑁆𑀧𑀘𑁆𑀘𑀬𑀸𑀤𑀺𑀯𑀺𑀥𑀸𑀦𑁂 𑀲𑀩𑁆𑀩𑀢𑁆𑀣 𑀮𑀺𑀗𑁆𑀕𑀕𑁆𑀕𑀳𑀡𑀫𑀦𑀼𑀯𑀢𑁆𑀢𑀢𑁂.

𑁬𑁨. 𑀢𑀢𑁄 𑀘 𑀯𑀺𑀪𑀢𑁆𑀢𑀺𑀬𑁄.

𑀢𑀢𑁄 𑀚𑀺𑀦𑀯𑀘𑀦𑀬𑀼𑀢𑁆𑀢𑁂𑀳𑀺 𑀮𑀺𑀗𑁆𑀕𑁂𑀳𑀺 𑀧𑀭𑀸 𑀯𑀺𑀪𑀢𑁆𑀢𑀺𑀬𑁄 𑀳𑁄𑀦𑁆𑀢𑀺. 𑀘𑀲𑀤𑁆𑀤𑀕𑁆𑀕𑀳𑀡𑁂𑀦 𑀢𑀯𑁂𑀢𑀼𑀦𑀸𑀤𑀺𑀧𑀘𑁆𑀘𑀬𑀦𑁆𑀢𑀦𑀺𑀧𑀸𑀢𑀢𑁄𑀧𑀺. 𑀓𑀫𑁆𑀫𑀸𑀤𑀺𑀯𑀲𑁂𑀦, 𑀏𑀓𑀢𑁆𑀢𑀸𑀤𑀺𑀯𑀲𑁂𑀦 𑀘 𑀮𑀺𑀗𑁆𑀕𑀢𑁆𑀣𑀁 𑀯𑀺𑀪𑀚𑀦𑁆𑀢𑀻𑀢𑀺 𑀯𑀺𑀪𑀢𑁆𑀢𑀺𑀬𑁄.

𑀓𑀸 𑀘 𑀧𑀦 𑀢𑀸 𑀯𑀺𑀪𑀢𑁆𑀢𑀺𑀬𑁄? ‘‘𑀯𑀺𑀪𑀢𑁆𑀢𑀺𑀬𑁄’’𑀢𑀺 𑀅𑀥𑀺𑀓𑀸𑀭𑁄.

𑁬𑁩. 𑀲𑀺𑀬𑁄, 𑀅𑀁𑀬𑁄, 𑀦𑀸𑀳𑀺, 𑀲𑀦𑀁, 𑀲𑁆𑀫𑀸𑀳𑀺, 𑀲𑀦𑀁, 𑀲𑁆𑀫𑀺𑀁𑀲𑀼.

𑀲𑁆𑀬𑀸𑀤𑀬𑁄 𑀤𑁆𑀯𑀺𑀲𑀢𑁆𑀢 𑀯𑀺𑀪𑀢𑁆𑀢𑀺𑀬𑁄 𑀦𑀸𑀫 𑀳𑁄𑀦𑁆𑀢𑀺. 𑀢𑀢𑁆𑀣 𑀲𑀺, 𑀬𑁄 𑀇𑀢𑀺 𑀧𑀞𑀫𑀸, 𑀅𑀁, 𑀬𑁄 𑀇𑀢𑀺 𑀤𑀼𑀢𑀺𑀬𑀸, 𑀦𑀸, 𑀳𑀺 𑀇𑀢𑀺 𑀢𑀢𑀺𑀬𑀸, 𑀲, 𑀦𑀁 𑀇𑀢𑀺 𑀘𑀢𑀼𑀢𑁆𑀣𑀻, 𑀲𑁆𑀫𑀸, 𑀳𑀺 𑀇𑀢𑀺 𑀧𑀜𑁆𑀘𑀫𑀻, 𑀲, 𑀦𑀁 𑀇𑀢𑀺 𑀙𑀝𑁆𑀞𑀻, 𑀲𑁆𑀫𑀺𑀁, 𑀲𑀼 𑀇𑀢𑀺 𑀲𑀢𑁆𑀢𑀫𑀻.

𑀇𑀤𑀁 ¶ 𑀧𑀦 𑀲𑀜𑁆𑀜𑀸𑀥𑀺𑀓𑀸𑀭𑀧𑀭𑀺𑀪𑀸𑀲𑀸𑀯𑀺𑀥𑀺𑀲𑀼𑀢𑁆𑀢𑁂𑀲𑀼 𑀲𑀜𑁆𑀜𑀸𑀲𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀯𑀼𑀢𑁆𑀢𑀜𑁆𑀳𑀺 𑀯𑀼𑀢𑁆𑀢𑀺𑀬𑀁 ‘‘𑀯𑀺𑀪𑀢𑁆𑀢𑀺𑀇𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄, 𑀅𑀫𑁆𑀳𑀲𑁆𑀲 𑀫𑀫𑀁 𑀲𑀯𑀺𑀪𑀢𑁆𑀢𑀺𑀲𑁆𑀲 𑀲𑁂’’𑀢𑀺, 𑀇𑀢𑀭𑀣𑀸 𑀧𑀼𑀭𑀺𑀫𑀲𑀼𑀢𑁆𑀢𑁂𑀦 𑀏𑀓𑀬𑁄𑀕𑁄 𑀓𑀢𑁆𑀢𑀩𑁆𑀩𑁄𑀢𑀺. 𑀏𑀢𑁆𑀣 𑀘 𑀧𑀞𑀫𑀸𑀤𑀺𑀯𑁄𑀳𑀸𑀭𑁄, 𑀏𑀓𑀯𑀘𑀦𑀸𑀤𑀺𑀯𑁄𑀳𑀸𑀭𑁄 𑀘 𑀅𑀦𑁆𑀯𑀢𑁆𑀣𑀯𑀲𑁂𑀦, 𑀧𑀭𑀲𑀫𑀜𑁆𑀜𑀸𑀯𑀲𑁂𑀦 𑀯𑀸 𑀲𑀺𑀤𑁆𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀓𑀲𑁆𑀲 𑀯𑀘𑀦𑀁 𑀏𑀓𑀯𑀘𑀦𑀁, 𑀩𑀳𑀽𑀦𑀁 𑀯𑀘𑀦𑀁 𑀩𑀳𑀼𑀯𑀘𑀦𑀁, 𑀤𑁆𑀯𑀺𑀦𑁆𑀦𑀁 𑀧𑀽𑀭𑀡𑀻 𑀤𑀼𑀢𑀺𑀬𑀸𑀢𑀺𑀆𑀤𑀺, 𑀇𑀢𑀭𑀣𑀸 𑀧𑀼𑀭𑀺𑀫𑀲𑀼𑀢𑁆𑀢𑁂 𑀘𑀲𑀤𑁆𑀤𑁂𑀦 𑀲𑀜𑁆𑀜𑀸𑀓𑀭𑀡𑁂 𑀅𑀧𑁆𑀧𑀓𑀢𑀦𑀺𑀭𑀢𑁆𑀣𑀓𑀯𑀺𑀥𑀺𑀧𑁆𑀧𑀲𑀗𑁆𑀕𑁄 𑀲𑀺𑀬𑀸.

‘‘𑀚𑀺𑀦𑀯𑀘𑀦𑀬𑀼𑀢𑁆𑀢𑀜𑁆𑀳𑀺, 𑀮𑀺𑀗𑁆𑀕𑀜𑁆𑀘 𑀦𑀺𑀧𑀘𑁆𑀘𑀢𑁂’’𑀢𑀺 𑀘 𑀯𑀢𑁆𑀢𑀢𑁂. 𑀇𑀥 𑀧𑀦 𑀧𑀤𑀦𑀺𑀧𑁆𑀨𑀸𑀤𑀦𑀫𑁆𑀧𑀺 𑀚𑀺𑀦𑀯𑀘𑀦𑀲𑁆𑀲𑀸𑀯𑀺𑀭𑁄𑀥𑁂𑀦𑀸𑀢𑀺 𑀜𑀸𑀧𑁂𑀢𑀼𑀁 𑀧𑀭𑀺𑀪𑀸𑀲𑀦𑁆𑀢𑀭𑀫𑀸𑀳.

𑁬𑁪. 𑀢𑀤𑀦𑀼𑀧𑀭𑁄𑀥𑁂𑀦.

𑀬𑀣𑀸 𑀬𑀣𑀸 𑀢𑁂𑀲𑀁 𑀚𑀺𑀦𑀯𑀘𑀦𑀸𑀦𑀁 𑀉𑀧𑀭𑁄𑀥𑁄 𑀦 𑀳𑁄𑀢𑀺, 𑀢𑀣𑀸 𑀢𑀣𑀸 𑀇𑀥 𑀮𑀺𑀗𑁆𑀕𑀁, 𑀘𑀲𑀤𑁆𑀤𑁂𑀦𑀸𑀔𑁆𑀬𑀸𑀢𑀜𑁆𑀘 𑀦𑀺𑀧𑀘𑁆𑀘𑀢𑁂, 𑀦𑀺𑀧𑁆𑀨𑀸𑀤𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 𑀇𑀥 𑀘 𑀆𑀔𑁆𑀬𑀸𑀢𑁂 𑀘 𑀤𑁆𑀯𑀺𑀯𑀘𑀦𑀸𑀕𑁆𑀕𑀳𑀡𑀁, 𑀲𑀓𑁆𑀓𑀢𑀯𑀺𑀲𑀤𑀺𑀲𑀢𑁄 𑀯𑀺𑀪𑀢𑁆𑀢𑀺𑀧𑁆𑀧𑀘𑁆𑀘𑀬𑀸𑀤𑀺𑀯𑀺𑀥𑀸𑀦𑀜𑁆𑀘 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀢𑁆𑀣 𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑀲𑁆𑀬𑀸𑀤𑀺𑀯𑀺𑀪𑀢𑁆𑀢𑀺𑀧𑁆𑀧𑀲𑀗𑁆𑀕𑁂 ‘‘𑀯𑀢𑁆𑀢𑀺𑀘𑁆𑀙𑀸𑀦𑀼𑀧𑀼𑀩𑁆𑀩𑀺𑀓𑀸 𑀲𑀤𑁆𑀤𑀧𑁆𑀧𑀯𑀢𑁆𑀢𑀻’’𑀢𑀺 𑀯𑀢𑁆𑀢𑀺𑀘𑁆𑀙𑀸𑀯𑀲𑀸 𑁋

𑁬𑁫. 𑀮𑀺𑀗𑁆𑀕𑀢𑁆𑀣𑁂 𑀧𑀞𑀫𑀸.

𑀮𑀺𑀗𑁆𑀕𑀢𑁆𑀣𑀸𑀪𑀺𑀥𑀸𑀦𑀫𑀢𑁆𑀢𑁂 𑀧𑀞𑀫𑀸𑀯𑀺𑀪𑀢𑁆𑀢𑀺 𑀳𑁄𑀢𑀻𑀢𑀺 𑀧𑀞𑀫𑀸. 𑀢𑀢𑁆𑀣𑀸𑀧𑀺 𑀅𑀦𑀺𑀬𑀫𑁂𑀦𑁂𑀓𑀯𑀘𑀦𑀩𑀳𑀼𑀯𑀘𑀦𑀧𑁆𑀧𑀲𑀗𑁆𑀕𑁂 ‘‘𑀏𑀓𑀫𑁆𑀳𑀻 𑀯𑀢𑁆𑀢𑀩𑁆𑀩𑁂 𑀏𑀓𑀯𑀘𑀦’’𑀦𑁆𑀢𑀺 𑀧𑀭𑀺𑀪𑀸𑀲𑀢𑁄 𑀮𑀺𑀗𑁆𑀕𑀢𑁆𑀣𑀲𑁆𑀲𑁂𑀓𑀢𑁆𑀢𑀯𑀘𑀦𑀺𑀘𑁆𑀙𑀸𑀬𑀁 𑀧𑀞𑀫𑁂𑀓𑀯𑀘𑀦𑀁 𑀲𑀺.

‘‘𑀅𑀢𑁄 𑀦𑁂𑀦𑀸’’𑀢𑀺 𑀇𑀢𑁄 ‘‘𑀅𑀢𑁄’’𑀢𑀺 𑀯𑀢𑁆𑀢𑀢𑁂, 𑀮𑀺𑀗𑁆𑀕𑀕𑁆𑀕𑀳𑀡𑀜𑁆𑀘.

𑁬𑁬. 𑀲𑁄 ¶ .

𑀲𑀺, 𑀑𑀇𑀢𑀺 𑀤𑁆𑀯𑀺𑀧𑀤𑀫𑀺𑀤𑀁. 𑀮𑀺𑀗𑁆𑀕𑀲𑁆𑀲 𑀅𑀓𑀸𑀭𑀢𑁄 𑀧𑀭𑀲𑁆𑀲 𑀲𑀺𑀯𑀘𑀦𑀲𑁆𑀲 𑀑𑀓𑀸𑀭𑁄 𑀳𑁄𑀢𑀺.

𑀲𑀼𑀢𑁆𑀢𑁂𑀲𑀼 𑀳𑀺 𑀧𑀞𑀫𑀸𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀓𑀸𑀭𑀺𑀬𑀺𑀦𑁄 𑀙𑀝𑁆𑀞𑀻𑀯𑀺𑀧𑀭𑀺𑀡𑀸𑀫𑁂𑀦 𑀯𑀺𑀯𑀭𑀡𑀁 𑀆𑀤𑁂𑀲𑀸𑀧𑁂𑀓𑁆𑀔𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀢𑁆𑀣 𑀘 𑀲𑀻𑀢𑀺 𑀯𑀺𑀪𑀢𑁆𑀢𑀺 𑀕𑀬𑁆𑀳𑀢𑁂 𑀯𑀺𑀪𑀢𑁆𑀢𑀺𑀓𑀸𑀭𑀺𑀬𑀯𑀺𑀥𑀺𑀧𑁆𑀧𑀓𑀭𑀡𑀢𑁄, ‘‘𑀢𑀢𑁄 𑀘 𑀯𑀺𑀪𑀢𑁆𑀢𑀺𑀬𑁄’’𑀢𑀺 𑀇𑀢𑁄 𑀯𑀺𑀪𑀢𑁆𑀢𑀺𑀕𑁆𑀕𑀳𑀡𑀸𑀦𑀼𑀯𑀢𑁆𑀢𑀦𑀢𑁄 𑀯𑀸, 𑀏𑀯𑀁 𑀲𑀩𑁆𑀩𑀢𑁆𑀣 𑀲𑁆𑀬𑀸𑀤𑀻𑀦𑀁 𑀓𑀸𑀭𑀺𑀬𑀯𑀺𑀥𑀸𑀦𑁂 𑀯𑀺𑀪𑀢𑁆𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

‘‘𑀯𑀸 𑀧𑀭𑁄 𑀅𑀲𑀭𑀽𑀧𑀸’’𑀢𑀺 𑀧𑀭𑀮𑁄𑀧𑁂 𑀲𑀫𑁆𑀧𑀢𑁆𑀢𑁂 𑀢𑀤𑀧𑀯𑀸𑀤𑁂𑀦 𑀧𑀼𑀩𑁆𑀩𑀮𑁄𑀧𑀫𑀸𑀳.

𑁬𑁭. 𑀲𑀭𑀮𑁄𑀧𑁄’𑀫𑀸𑀤𑁂𑀲𑀧𑁆𑀧𑀘𑁆𑀘𑀬𑀸𑀤𑀺𑀫𑁆𑀳𑀺 𑀲𑀭𑀮𑁄𑀧𑁂 𑀢𑀼 𑀧𑀓𑀢𑀺.

𑀧𑀼𑀩𑁆𑀩𑀲𑁆𑀲𑀭𑀲𑁆𑀲 𑀮𑁄𑀧𑁄 𑀳𑁄𑀢𑀺 𑀅𑀁𑀯𑀘𑀦𑁂, 𑀆𑀤𑁂𑀲𑀧𑁆𑀧𑀘𑁆𑀘𑀬𑀸𑀤𑀺𑀪𑀽𑀢𑁂 𑀘 𑀲𑀭𑁂 𑀧𑀭𑁂, 𑀲𑀭𑀮𑁄𑀧𑁂 𑀓𑀢𑁂 𑀢𑀼 𑀧𑀭𑀲𑀭𑀲𑁆𑀲 𑀧𑀓𑀢𑀺𑀪𑀸𑀯𑁄 𑀳𑁄𑀢𑀺. 𑀏𑀢𑁆𑀣 𑀘 ‘‘𑀲𑀭𑀮𑁄𑀧𑁂’’𑀢𑀺 𑀧𑀼𑀦𑀕𑁆𑀕𑀳𑀡𑀁 𑀇𑀫𑀺𑀦𑀸𑀯 𑀓𑀢𑀲𑀭𑀮𑁄𑀧𑀦𑀺𑀫𑀺𑀢𑁆𑀢𑁂𑀬𑁂𑀯 𑀧𑀭𑀲𑁆𑀲 𑀯𑀺𑀓𑀸𑀭𑁂 𑀲𑀫𑁆𑀧𑀢𑁆𑀢𑁂 𑀧𑀓𑀢𑀺𑀪𑀸𑀯𑀢𑁆𑀣𑀁. 𑀧𑀭𑀲𑀭𑀲𑁆𑀲 𑀧𑀓𑀢𑀺𑀪𑀸𑀯𑀯𑀺𑀥𑀸𑀦𑀲𑀸𑀫𑀢𑁆𑀣𑀺𑀬𑀢𑁄 𑀅𑀫𑀸𑀤𑁂𑀲𑀧𑁆𑀧𑀘𑁆𑀘𑀬𑀸𑀤𑀺𑀪𑀽𑀢𑁂 𑀲𑀭𑁂 𑀧𑀭𑁂𑀢𑀺𑀧𑀺 𑀲𑀺𑀤𑁆𑀥𑀁.

𑀢𑁆𑀬𑀸𑀤𑀺𑀯𑀺𑀪𑀢𑁆𑀢𑀺𑀬𑁄 𑀘𑁂𑀢𑁆𑀣, 𑀧𑀘𑁆𑀘𑀬𑀢𑁆𑀢𑁂𑀦 𑀕𑀬𑁆𑀳𑀭𑁂;

𑀆𑀤𑀺𑀕𑁆𑀕𑀳𑀡𑀫𑀸𑀔𑁆𑀬𑀸𑀢-𑀓𑀺𑀢𑀓𑁂𑀲𑁆𑀯𑀸𑀕𑀫𑀢𑁆𑀣𑀺𑀤𑀁.

𑀧𑀘𑁆𑀘𑀬𑀲𑀸𑀳𑀘𑀭𑀺𑀬𑀸, 𑀘𑀸𑀤𑁂𑀲𑁄 𑀧𑀓𑀢𑀻𑀧𑀭𑁄;

𑀧𑀤𑀦𑁆𑀢𑀲𑁆𑀲𑀭𑀮𑁄𑀧𑁄 𑀦, 𑀢𑁂𑀦’𑀩𑁆𑀪𑀸𑀳𑀸𑀤𑀺𑀓𑁂 𑀧𑀭𑁂.

𑀢𑀼𑀕𑁆𑀕𑀳𑀡𑀁 ¶ 𑀪𑀺𑀓𑁆𑀔𑀼𑀦𑀻𑀆𑀤𑀻𑀲𑀼 𑀲𑀭𑀮𑁄𑀧𑀦𑀺𑀯𑀢𑁆𑀢𑀦𑀢𑁆𑀣𑀁, ‘‘𑀦𑀬𑁂 𑀧𑀭𑀁 𑀬𑀼𑀢𑁆𑀢𑁂’’𑀢𑀺 𑀧𑀭𑀁 𑀦𑁂𑀢𑀩𑁆𑀩𑀁. 𑀧𑀼𑀭𑀺𑀲𑁄 𑀢𑀺𑀝𑁆𑀞𑀢𑀺.

𑀧𑀼𑀭𑀺𑀲𑁄 𑀘 𑀧𑀼𑀭𑀺𑀲𑁄 𑀘𑀸𑀢𑀺 𑀧𑀼𑀭𑀺𑀲 𑀧𑀼𑀭𑀺𑀲𑀇𑀢𑀺 𑀯𑀢𑁆𑀢𑀩𑁆𑀩𑁂 𑁋

𑁬𑁮. 𑀲𑀭𑀽𑀧𑀸𑀦𑀫𑁂𑀓𑀲𑁂𑀲𑁆𑀯𑀲𑀓𑀺𑀁.

𑀲𑀭𑀽𑀧𑀸𑀦𑀁 𑀲𑀫𑀸𑀦𑀭𑀽𑀧𑀸𑀦𑀁 𑀧𑀤𑀩𑁆𑀬𑀜𑁆𑀚𑀦𑀸𑀦𑀁 𑀫𑀚𑁆𑀛𑁂 𑀏𑀓𑁄𑀯 𑀲𑀺𑀲𑁆𑀲𑀢𑁂, 𑀅𑀜𑁆𑀜𑁂 𑀮𑁄𑀧𑀫𑀸𑀧𑀚𑁆𑀚𑀦𑁆𑀢𑁂 𑀅𑀲𑀓𑀺𑀦𑁆𑀢𑀺 𑀏𑀓𑀲𑁂𑀲𑁄. 𑀏𑀢𑁆𑀣 𑀘 ‘‘𑀲𑀭𑀽𑀧𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸𑀯 𑀲𑀺𑀤𑁆𑀥𑁂 𑀅𑀲𑀓𑀺𑀫𑁆𑀧𑀬𑁄𑀕𑁂 𑀧𑀼𑀦𑀸𑀲𑀓𑀺𑀁𑀕𑀳𑀡𑀁 𑀏𑀓𑀯𑀺𑀪𑀢𑁆𑀢𑀺𑀯𑀺𑀲𑀬𑀸𑀦𑀫𑁂𑀯𑀸𑀲𑀓𑀺𑀫𑁆𑀧𑀬𑁄𑀕𑁂 𑀏𑀯𑀸𑀬𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁, 𑀦 𑀘 𑀯𑀺𑀘𑁆𑀙𑀸𑀧𑀬𑁄𑀕𑁂’𑀢𑀺𑀧𑁆𑀧𑀲𑀗𑁆𑀕𑁄. ‘‘𑀯𑀕𑁆𑀕𑀸 𑀧𑀜𑁆𑀘𑀧𑀜𑁆𑀘𑀲𑁄 𑀫𑀦𑁆𑀢𑀸’’𑀢𑀺 𑀏𑀢𑁆𑀣 ‘‘𑀧𑀜𑁆𑀘𑀧𑀜𑁆𑀘𑀲𑁄’’𑀢𑀺 𑀦𑀺𑀤𑁆𑀤𑁂𑀲𑁂𑀦𑁂𑀯 𑀯𑀺𑀘𑁆𑀙𑀸𑀧𑀬𑁄𑀕𑀲𑀺𑀤𑁆𑀥𑀺𑀬𑀸 𑀜𑀸𑀧𑀺𑀢𑀢𑁆𑀢𑀸, 𑀅𑀣 𑀯𑀸 𑀲𑀳𑀯𑀘𑀦𑀺𑀘𑁆𑀙𑀸𑀬’𑀫𑀬’𑀫𑁂𑀓𑀲𑁂𑀲𑁄.

𑀬𑁄𑀕𑀯𑀺𑀪𑀸𑀕𑀢𑁄 𑀘𑁂𑀢𑁆𑀣, 𑀏𑀓𑀲𑁂𑀲𑁆𑀯𑀲𑀓𑀺𑀁 𑀇𑀢𑀺;

𑀯𑀺𑀭𑀽𑀧𑁂𑀓𑀲𑁂𑀲𑁄 𑀳𑁄𑀢𑀺, 𑀯𑀸 ‘‘𑀧𑀺𑀢𑀽𑀦’’𑀦𑁆𑀢𑀺𑀆𑀤𑀺𑀲𑀼.

𑀢𑀢𑁆𑀣𑁂𑀯 𑀮𑀺𑀗𑁆𑀕𑀢𑁆𑀣𑀲𑁆𑀲 𑀩𑀳𑀼𑀢𑁆𑀢𑀯𑀘𑀦𑀺𑀘𑁆𑀙𑀸𑀬𑀁 ‘‘𑀩𑀳𑀼𑀫𑁆𑀳𑀺 𑀯𑀢𑁆𑀢𑀩𑁆𑀩𑁂 𑀩𑀳𑀼𑀯𑀘𑀦’’𑀦𑁆𑀢𑀺 𑀧𑀞𑀫𑀸𑀩𑀳𑀼𑀯𑀘𑀦𑀁 𑀬𑁄, 𑀧𑀼𑀭𑀺𑀲 𑀬𑁄 𑀇𑀢𑀻𑀥 ‘‘𑀅𑀢𑁄, 𑀯𑀸’’𑀢𑀺 𑀘 𑀯𑀢𑁆𑀢𑀢𑁂.

𑁬𑁯. 𑀲𑀩𑁆𑀩𑀬𑁄𑀦𑀻𑀦𑀫𑀸𑀏.

𑀅𑀓𑀸𑀭𑀦𑁆𑀢𑀢𑁄 𑀮𑀺𑀗𑁆𑀕𑀫𑁆𑀳𑀸 𑀧𑀭𑁂𑀲𑀁 𑀲𑀩𑁆𑀩𑁂𑀲𑀁 𑀧𑀞𑀫𑀸𑀬𑁄𑀦𑀻𑀦𑀁, 𑀤𑀼𑀢𑀺𑀬𑀸𑀬𑁄𑀦𑀻𑀦𑀜𑁆𑀘 𑀬𑀬𑀸𑀓𑁆𑀓𑀫𑀁 𑀆𑀓𑀸𑀭𑁂𑀓𑀸𑀭𑀸𑀤𑁂𑀲𑀸 𑀳𑁄𑀦𑁆𑀢𑀺 𑀯𑀸𑀢𑀺 𑀆𑀓𑀸𑀭𑁄, 𑀲𑀩𑁆𑀩𑀕𑁆𑀕𑀳𑀡𑀁 𑀲𑀩𑁆𑀩𑀸𑀤𑁂𑀲𑀢𑁆𑀣𑀁, 𑀲𑀭𑀮𑁄𑀧𑀸𑀤𑀺 𑀧𑀼𑀭𑀺𑀫𑀲𑀤𑀺𑀲𑀫𑁂𑀯, 𑀧𑀼𑀭𑀺𑀲𑀸 𑀢𑀺𑀝𑁆𑀞𑀦𑁆𑀢𑀺.

𑀯𑀸 𑀇𑀘𑁆𑀘𑁂𑀯 𑀭𑀽𑀧𑀸 𑀭𑀽𑀧𑀸𑀦𑀺, 𑀅𑀕𑁆𑀕𑀬𑁄, 𑀫𑀼𑀦𑀬𑁄.

𑀯𑀸𑀲𑀤𑁆𑀤𑁄𑀬𑀁 𑀯𑀯𑀢𑁆𑀣𑀺𑀢𑀧𑀺𑀪𑀸𑀲𑀢𑁆𑀣𑁄, 𑀢𑁂𑀦 𑀘𑁂𑀢𑁆𑀣 𑁋

𑀦𑀺𑀘𑁆𑀘𑀫𑁂𑀯 ¶ 𑀘 𑀧𑀼𑀮𑁆𑀮𑀺𑀗𑁆𑀕𑁂, 𑀅𑀦𑀺𑀘𑁆𑀘𑀜𑁆𑀘 𑀦𑀧𑀼𑀁𑀲𑀓𑁂;

𑀅𑀲𑀦𑁆𑀢𑀁 𑀛𑁂 𑀓𑀢𑀢𑁆𑀢𑁂 𑀢𑀼, 𑀯𑀺𑀥𑀺𑀁 𑀤𑀻𑀧𑁂𑀢𑀺 𑀯𑀸𑀲𑀼𑀢𑀺.

𑀢𑀢𑁆𑀣𑁂𑀯𑀸𑀮𑀧𑀦𑀯𑀘𑀦𑀺𑀘𑁆𑀙𑀸𑀬𑀁 ‘‘𑀮𑀺𑀗𑁆𑀕𑀢𑁆𑀣𑁂 𑀧𑀞𑀫𑀸’’𑀢𑀺 𑀯𑀢𑁆𑀢𑀢𑁂.

𑁭𑁦. 𑀆𑀮𑀧𑀦𑁂 𑀘.

𑀅𑀪𑀺𑀫𑀼𑀔𑀁 𑀓𑀢𑁆𑀯𑀸 𑀮𑀧𑀦𑀁 𑀆𑀮𑀧𑀦𑀁, 𑀲𑀫𑁆𑀩𑁄𑀥𑀦𑀁. 𑀢𑀲𑁆𑀫𑀺𑀁 𑀆𑀮𑀧𑀦𑀢𑁆𑀣𑀸𑀥𑀺𑀓𑁂 𑀮𑀺𑀗𑁆𑀕𑀢𑁆𑀣𑀸𑀪𑀺𑀥𑀸𑀦𑀫𑀢𑁆𑀢𑁂 𑀘 𑀧𑀞𑀫𑀸𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀧𑀼𑀭𑁂 𑀯𑀺𑀬 𑀏𑀓𑀯𑀘𑀦𑀸𑀤𑀺.

𑀧𑀼𑀭𑀺𑀲 𑀲𑀺 𑀇𑀘𑁆𑀘𑀢𑁆𑀭 𑁋

𑁭𑁧. 𑀆𑀮𑀧𑀦𑁂 𑀲𑀺 𑀕𑀲𑀜𑁆𑀜𑁄.

𑀆𑀮𑀧𑀦𑀢𑁆𑀣𑁂 𑀯𑀺𑀳𑀺𑀢𑁄 𑀲𑀺 𑀕𑀲𑀜𑁆𑀜𑁄 𑀳𑁄𑀢𑀻𑀢𑀺 𑀕𑀲𑀜𑁆𑀜𑀸𑀬𑀁 ‘‘𑀪𑁄 𑀕𑁂 𑀢𑀽’’𑀢𑀺 𑀇𑀢𑁄 ‘‘𑀕𑁂’’𑀢𑀺 𑀯𑀢𑁆𑀢𑀢𑁂.

𑁭𑁨. 𑀅𑀓𑀸𑀭𑀧𑀺𑀢𑀸𑀤𑁆𑀬𑀦𑁆𑀢𑀸𑀦𑀫𑀸.

𑀮𑀺𑀗𑁆𑀕𑀲𑁆𑀲 𑀲𑀫𑁆𑀩𑀦𑁆𑀥𑀻 𑀅𑀓𑀸𑀭𑁄 𑀘 𑀧𑀺𑀢𑀼𑀲𑀢𑁆𑀣𑀼𑀇𑀘𑁆𑀘𑁂𑀯𑀫𑀸𑀤𑀻𑀦𑀫𑀦𑁆𑀢𑁄 𑀘 𑀆𑀓𑀸𑀭𑀢𑁆𑀢𑀫𑀸𑀧𑀚𑁆𑀚𑀢𑁂 𑀕𑁂 𑀧𑀭𑁂.

‘‘𑀕𑁂, 𑀭𑀲𑁆𑀲’’𑀫𑀺𑀢𑀺 𑀘 𑀯𑀢𑁆𑀢𑀢𑁂.

𑁭𑁩. 𑀆𑀓𑀸𑀭𑁄 𑀯𑀸.

𑀮𑀺𑀗𑁆𑀕𑀲𑁆𑀲 𑀲𑀫𑁆𑀩𑀦𑁆𑀥𑀻 𑀆𑀓𑀸𑀭𑁄 𑀭𑀲𑁆𑀲𑀫𑀸𑀧𑀚𑁆𑀚𑀢𑁂 𑀕𑁂 𑀧𑀭𑁂 𑀯𑀺𑀓𑀧𑁆𑀧𑁂𑀦, 𑀅𑀤𑀽𑀭𑀝𑁆𑀞𑀲𑁆𑀲𑀸𑀮𑀧𑀦𑁂𑀯𑀸𑀬𑀁.

𑁭𑁪. 𑀲𑁂𑀲𑀢𑁄 𑀮𑁄𑀧𑀁 𑀕𑀲𑀺𑀧𑀺.

‘‘𑀲𑀺𑀁, 𑀲𑁄, 𑀲𑁆𑀬𑀸 𑀘, 𑀲𑀔𑀢𑁄 𑀕𑀲𑁆𑀲𑁂 𑀯𑀸, 𑀖𑀢𑁂 𑀘𑀸’’𑀢𑀺 𑀏𑀯𑀫𑀸𑀤𑀻𑀳𑀺 𑀦𑀺𑀤𑁆𑀤𑀺𑀝𑁆𑀞𑁂𑀳𑀺 𑀅𑀜𑁆𑀜𑁄 𑀲𑁂𑀲𑁄 𑀦𑀸𑀫, 𑀢𑀢𑁄 𑀲𑁂𑀲𑀢𑁄 𑀮𑀺𑀗𑁆𑀕𑀫𑁆𑀳𑀸 𑀕𑀲𑀺𑀇𑀘𑁆𑀘𑁂𑀢𑁂 𑀮𑁄𑀧𑀫𑀸𑀧𑀚𑁆𑀚𑀦𑁆𑀢𑁂. 𑀅𑀧𑀺𑀕𑁆𑀕𑀳𑀡𑀁 ¶ 𑀤𑀼𑀢𑀺𑀬𑀢𑁆𑀣𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑀁, 𑀏𑀢𑁆𑀣 𑀘 𑀲𑀢𑀺𑀧𑀺 𑀲𑀺𑀕𑁆𑀕𑀳𑀡𑁂 𑀯𑀇𑀢𑀺 𑀯𑀘𑀦𑀫𑁂𑀯 𑀜𑀸𑀧𑀓𑀫𑀜𑁆𑀜𑀢𑁆𑀣𑀸𑀧𑀺 𑀲𑀺𑀕𑁆𑀕𑀳𑀡𑁂 𑀆𑀮𑀧𑀦𑀸𑀕𑁆𑀕𑀳𑀡𑀲𑁆𑀲. 𑀓𑁂𑀘𑀺 𑀆𑀮𑀧𑀦𑀸𑀪𑀺𑀩𑁆𑀬𑀢𑁆𑀢𑀺𑀬𑀸 𑀪𑀯𑀦𑁆𑀢𑀲𑀤𑁆𑀤𑀁 𑀯𑀸 𑀳𑁂𑀲𑀤𑁆𑀤𑀁 𑀯𑀸 𑀧𑀬𑀼𑀚𑁆𑀚𑀦𑁆𑀢𑁂. 𑀪𑁄 𑀧𑀼𑀭𑀺𑀲 𑀢𑀺𑀝𑁆𑀞, 𑀳𑁂 𑀧𑀼𑀭𑀺𑀲𑀸 𑀯𑀸.

𑀩𑀳𑀼𑀯𑀘𑀦𑁂 𑀦 𑀯𑀺𑀲𑁂𑀲𑁄, 𑀪𑀯𑀦𑁆𑀢𑁄 𑀧𑀼𑀭𑀺𑀲𑀸 𑀢𑀺𑀝𑁆𑀞𑀣.

𑀢𑀢𑁆𑀣𑁂𑀯 𑀓𑀫𑁆𑀫𑀢𑁆𑀣𑀯𑀘𑀦𑀺𑀘𑁆𑀙𑀸𑀬𑀁 ‘‘𑀯,’’𑀢𑀺 𑀯𑀢𑁆𑀢𑀢𑁂.

𑁭𑁫. 𑀬𑀁 𑀓𑀭𑁄𑀢𑀺 𑀢𑀁 𑀓𑀫𑁆𑀫𑀁.

𑀬𑀁 𑀯𑀸 𑀓𑀭𑁄𑀢𑀺, 𑀬𑀁 𑀯𑀸 𑀯𑀺𑀓𑀭𑁄𑀢𑀺, 𑀬𑀁 𑀯𑀸 𑀧𑀸𑀧𑀼𑀡𑀸𑀢𑀺, 𑀢𑀁 𑀓𑀸𑀭𑀓𑀁 𑀓𑁆𑀭𑀺𑀬𑀸𑀦𑀺𑀫𑀺𑀢𑁆𑀢𑀁 𑀓𑀫𑁆𑀫𑀲𑀜𑁆𑀜𑀁 𑀳𑁄𑀢𑀺.

𑁭𑁬. 𑀓𑀫𑁆𑀫𑀢𑁆𑀣𑁂 𑀤𑀼𑀢𑀺𑀬𑀸.

𑀓𑀫𑁆𑀫𑀢𑁆𑀣𑁂 𑀤𑀼𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀧𑀼𑀭𑁂 𑀯𑀺𑀬 𑀤𑀼𑀢𑀺𑀬𑁂𑀓𑀯𑀘𑀦𑀁 𑀅𑀁, ‘‘𑀲𑀭𑀮𑁄𑀧𑁄’’𑀢𑀺𑀆𑀤𑀺𑀦𑀸 𑀲𑀭𑁂 𑀮𑀼𑀢𑁆𑀢𑁂 ‘‘𑀤𑀻𑀖’’𑀦𑁆𑀢𑀺 𑀤𑀻𑀖𑁂 𑀲𑀫𑁆𑀧𑀢𑁆𑀢𑁂 𑀧𑀓𑀢𑀺𑀪𑀸𑀯𑁄 𑀘, 𑀧𑀼𑀭𑀺𑀲𑀁 𑀧𑀲𑁆𑀲.

𑀩𑀳𑀼𑀯𑀘𑀦𑁂 ‘‘𑀲𑀩𑁆𑀩𑀬𑁄𑀦𑀻𑀦𑀫𑀸𑀏’’𑀢𑀺 𑀬𑁄𑀯𑀘𑀦𑀲𑁆𑀲𑁂𑀓𑀸𑀭𑁄, 𑀧𑀼𑀭𑀺𑀲𑁂 𑀧𑀲𑁆𑀲.

𑀢𑀢𑁆𑀣𑁂𑀯 𑀓𑀢𑁆𑀢𑀼𑀯𑀘𑀦𑀺𑀘𑁆𑀙𑀸𑀬𑀁 𑁋

𑁭𑁭. 𑀬𑁄 𑀓𑀭𑁄𑀢𑀺 𑀲 𑀓𑀢𑁆𑀢𑀸.

𑀬𑁄 𑀅𑀢𑁆𑀢𑀧𑁆𑀧𑀥𑀸𑀦𑁄 𑀓𑁆𑀭𑀺𑀬𑀁 𑀓𑀭𑁄𑀢𑀺, 𑀲𑁄 𑀓𑀢𑁆𑀢𑀼𑀲𑀜𑁆𑀜𑁄 𑀳𑁄𑀢𑀺.

‘‘𑀢𑀢𑀺𑀬𑀸’’𑀢𑀺 𑀯𑀢𑁆𑀢𑀢𑁂.

𑁭𑁮. 𑀓𑀢𑁆𑀢𑀭𑀺 𑀘.

𑀓𑀢𑁆𑀢𑀭𑀺 𑀘 𑀓𑀸𑀭𑀓𑁂 𑀢𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀻𑀢𑀺 𑀢𑀢𑀺𑀬𑁂𑀓𑀯𑀘𑀦𑀁 𑀦𑀸.

𑁭𑁯. 𑀅𑀢𑁄 ¶ 𑀦𑁂𑀦.

𑀏𑀦𑀸𑀢𑀺 𑀅𑀯𑀺𑀪𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄. 𑀅𑀓𑀸𑀭𑀦𑁆𑀢𑀢𑁄 𑀮𑀺𑀗𑁆𑀕𑀫𑁆𑀳𑀸 𑀧𑀭𑀲𑁆𑀲 𑀦𑀸𑀯𑀘𑀦𑀲𑁆𑀲 𑀏𑀦𑀸𑀤𑁂𑀲𑁄 𑀳𑁄𑀢𑀺, 𑀲𑀭𑀮𑁄𑀧𑀸𑀤𑀺, 𑀧𑀼𑀭𑀺𑀲𑁂𑀦 𑀓𑀢𑀁.

𑀩𑀳𑀼𑀯𑀘𑀦𑀫𑁆𑀳𑀺 𑁋

𑁮𑁦. 𑀲𑀼𑀳𑀺𑀲𑁆𑀯𑀓𑀸𑀭𑁄 𑀏.

𑀲𑀼, 𑀳𑀺𑀇𑀘𑁆𑀘𑁂𑀢𑁂𑀲𑀼 𑀯𑀺𑀪𑀢𑁆𑀢𑀺𑀭𑀽𑀧𑁂𑀲𑀼 𑀧𑀭𑁂𑀲𑀼 𑀮𑀺𑀗𑁆𑀕𑀲𑁆𑀲 𑀲𑀫𑁆𑀩𑀦𑁆𑀥𑀻 𑀅𑀓𑀸𑀭𑁄 𑀏𑀢𑁆𑀢𑀫𑀸𑀧𑀚𑁆𑀚𑀢𑁂.

𑁮𑁧. 𑀲𑁆𑀫𑀸𑀳𑀺𑀲𑁆𑀫𑀺𑀁𑀦𑀁 𑀫𑁆𑀳𑀸𑀪𑀺𑀫𑁆𑀳𑀺 𑀯𑀸.

𑀲𑀩𑁆𑀩𑀢𑁄 𑀮𑀺𑀗𑁆𑀕𑀫𑁆𑀳𑀸 𑀲𑁆𑀫𑀸 𑀳𑀺 𑀲𑁆𑀫𑀺𑀁𑀇𑀘𑁆𑀘𑁂𑀢𑁂𑀲𑀁 𑀬𑀣𑀸𑀓𑁆𑀓𑀫𑀁 𑀫𑁆𑀳𑀸, 𑀪𑀺, 𑀫𑁆𑀳𑀺𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺 𑀯𑀸, 𑀧𑀼𑀭𑀺𑀲𑁂𑀳𑀺, 𑀧𑀼𑀭𑀺𑀲𑁂𑀪𑀺 𑀓𑀢𑀁.

𑀢𑀢𑁆𑀣𑁂𑀯 𑀓𑀭𑀡𑀯𑀘𑀦𑀺𑀘𑁆𑀙𑀸𑀬𑀁 𑁋

𑁮𑁨. 𑀬𑁂𑀦 𑀯𑀸 𑀓𑀬𑀺𑀭𑀢𑁂 𑀢𑀁 𑀓𑀭𑀡𑀁.

𑀬𑁂𑀦 𑀯𑀸 𑀓𑀬𑀺𑀭𑀢𑁂, 𑀬𑁂𑀦 𑀯𑀸 𑀧𑀲𑁆𑀲𑀢𑀺, 𑀬𑁂𑀦 𑀯𑀸 𑀲𑀼𑀡𑀸𑀢𑀺, 𑀢𑀁 𑀓𑀸𑀭𑀓𑀁 𑀓𑀭𑀡𑀲𑀜𑁆𑀜𑀁 𑀳𑁄𑀢𑀺.

𑁮𑁩. 𑀓𑀭𑀡𑁂 𑀢𑀢𑀺𑀬𑀸.

𑀓𑀭𑀡𑀓𑀸𑀭𑀓𑁂 𑀢𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺, 𑀲𑁂𑀲𑀁 𑀓𑀢𑁆𑀢𑀼𑀲𑀫𑀁, 𑀆𑀯𑀺𑀝𑁆𑀞𑁂𑀦 𑀧𑀼𑀭𑀺𑀲𑁂𑀦 𑀲𑁄 𑀧𑀼𑀜𑁆𑀜𑀁 𑀓𑀭𑁄𑀢𑀺, 𑀧𑀼𑀭𑀺𑀲𑁂𑀳𑀺, 𑀧𑀼𑀭𑀺𑀲𑁂𑀪𑀺.

𑀢𑀢𑁆𑀣𑁂𑀯 𑀲𑀫𑁆𑀧𑀤𑀸𑀦𑀯𑀘𑀦𑀺𑀘𑁆𑀙𑀸𑀬𑀁 𑁋

𑁮𑁪. 𑀬𑀲𑁆𑀲 ¶ 𑀤𑀸𑀢𑀼𑀓𑀸𑀫𑁄 𑀭𑁄𑀘𑀢𑁂 𑀥𑀸𑀭𑀬𑀢𑁂 𑀯𑀸 𑀢𑀁 𑀲𑀫𑁆𑀧𑀤𑀸𑀦𑀁.

𑀬𑀲𑁆𑀲 𑀯𑀸 𑀤𑀸𑀢𑀼𑀓𑀸𑀫𑁄, 𑀬𑀲𑁆𑀲 𑀯𑀸 𑀭𑁄𑀘𑀢𑁂, 𑀬𑀲𑁆𑀲 𑀯𑀸 𑀥𑀸𑀭𑀬𑀢𑁂, 𑀢𑀁 𑀓𑀸𑀭𑀓𑀁 𑀲𑀫𑁆𑀧𑀤𑀸𑀦𑀲𑀜𑁆𑀜𑀁 𑀳𑁄𑀢𑀺.

𑁮𑁫. 𑀲𑀫𑁆𑀧𑀤𑀸𑀦𑁂 𑀘𑀢𑀼𑀢𑁆𑀣𑀻.

𑀲𑀫𑁆𑀧𑀤𑀸𑀦𑀓𑀸𑀭𑀓𑁂 𑀘𑀢𑀼𑀢𑁆𑀣𑀻𑀯𑀺𑀪𑀢𑁆𑀢𑀺 𑀳𑁄𑀢𑀻𑀢𑀺 𑀘𑀢𑀼𑀢𑁆𑀣𑀺𑀬𑀸 𑀏𑀓𑀯𑀘𑀦𑀁 𑀲.

𑁮𑁬. 𑀲𑀸𑀕𑀫𑁄 𑀲𑁂.

𑀲𑀩𑁆𑀩𑀢𑁄 𑀮𑀺𑀗𑁆𑀕𑀫𑁆𑀳𑀸 𑀲𑀓𑀸𑀭𑀸𑀕𑀫𑁄 𑀳𑁄𑀢𑀺 𑀲𑁂 𑀯𑀺𑀪𑀢𑁆𑀢𑀺𑀫𑁆𑀳𑀺 𑀧𑀭𑁂. 𑀧𑀼𑀭𑀺𑀲𑀲𑁆𑀲 𑀥𑀦𑀁 𑀤𑀤𑀸𑀢𑀺.

𑀩𑀳𑀼𑀯𑀘𑀦𑀫𑁆𑀳𑀺 ‘‘𑀤𑀻𑀖’’𑀦𑁆𑀢𑀺 𑀯𑀢𑁆𑀢𑀢𑁂.

𑁮𑁭. 𑀲𑀼𑀦𑀁𑀳𑀺𑀲𑀼 𑀘.

𑀲𑀼 𑀦𑀁 𑀳𑀺𑀇𑀘𑁆𑀘𑁂𑀢𑁂𑀲𑀼 𑀧𑀭𑁂𑀲𑀼 𑀮𑀺𑀗𑁆𑀕𑀲𑁆𑀲 𑀅𑀦𑁆𑀢𑀪𑀽𑀢𑀸 𑀲𑀩𑁆𑀩𑁂 𑀭𑀲𑁆𑀲𑀲𑀭𑀸 𑀤𑀻𑀖𑀫𑀸𑀧𑀚𑁆𑀚𑀦𑁆𑀢𑁂, 𑀘𑀕𑁆𑀕𑀳𑀡𑀫𑀺𑀓𑀸𑀭𑀼𑀓𑀸𑀭𑀸𑀦𑀁 𑀓𑁆𑀯𑀘𑀺 𑀦𑀺𑀯𑀢𑁆𑀢𑀦𑀢𑁆𑀣𑀁. 𑀧𑀼𑀭𑀺𑀲𑀸𑀦𑀁.

𑀢𑀢𑁆𑀣𑁂𑀯𑀸𑀧𑀸𑀤𑀸𑀦𑀯𑀘𑀦𑀺𑀘𑁆𑀙𑀸𑀬𑀁 𑁋

𑁮𑁮. 𑀬𑀲𑁆𑀫𑀸 𑀤𑀧𑁂𑀢𑀺 𑀪𑀬𑀫𑀸𑀤𑀢𑁆𑀢𑁂 𑀯𑀸 𑀢𑀤𑀧𑀸𑀤𑀸𑀦𑀁.

𑀬𑀲𑁆𑀫𑀸 𑀯𑀸 𑀅𑀯𑀥𑀺𑀪𑀽𑀢𑀸 𑀅𑀧𑁂𑀢𑀺, 𑀬𑀲𑁆𑀫𑀸 𑀯𑀸 𑀪𑀬𑀁, 𑀬𑀲𑁆𑀫𑀸 𑀯𑀸 𑀆𑀤𑀢𑁆𑀢𑁂, 𑀢𑀁 𑀓𑀸𑀭𑀓𑀁 𑀅𑀧𑀸𑀤𑀸𑀦𑀲𑀜𑁆𑀜𑀁 𑀳𑁄𑀢𑀺.

𑁮𑁯. 𑀅𑀧𑀸𑀤𑀸𑀦𑁂 ¶ 𑀧𑀜𑁆𑀘𑀫𑀻.

𑀅𑀧𑀸𑀤𑀸𑀦𑀓𑀸𑀭𑀓𑁂 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀻𑀢𑀺 𑀧𑀜𑁆𑀘𑀫𑀺𑀬𑀸 𑀏𑀓𑀯𑀘𑀦𑀁 𑀲𑁆𑀫𑀸.

‘‘𑀅𑀢𑁄, 𑀲𑀩𑁆𑀩𑁂𑀲𑀁, 𑀆 𑀏’’𑀢𑀺 𑀘 𑀯𑀢𑁆𑀢𑀢𑁂.

𑁯𑁦. 𑀲𑁆𑀫𑀸𑀲𑁆𑀫𑀺𑀁𑀦 𑀯𑀸.

𑀅𑀓𑀸𑀭𑀦𑁆𑀢𑀢𑁄 𑀮𑀺𑀗𑁆𑀕𑀫𑁆𑀳𑀸 𑀲𑀩𑁆𑀩𑁂𑀲𑀁 𑀲𑁆𑀫𑀸 𑀲𑁆𑀫𑀺𑀁𑀇𑀘𑁆𑀘𑁂𑀢𑁂𑀲𑀁 𑀬𑀣𑀸𑀓𑁆𑀓𑀫𑀁 𑀆𑀓𑀸𑀭𑁂𑀓𑀸𑀭𑀸𑀤𑁂𑀲𑀸 𑀳𑁄𑀦𑁆𑀢𑀺 𑀯𑀸, 𑀅𑀜𑁆𑀜𑀢𑁆𑀣 𑀫𑁆𑀳𑀸𑀤𑁂𑀲𑁄. 𑀧𑀼𑀭𑀺𑀲𑀸 𑀅𑀧𑁂𑀢𑀺, 𑀧𑀼𑀭𑀺𑀲𑀫𑁆𑀳𑀸, 𑀧𑀼𑀭𑀺𑀲𑀲𑁆𑀫𑀸.

𑀩𑀳𑀼𑀯𑀘𑀦𑁂 𑀲𑀩𑁆𑀩𑀢𑁆𑀣 𑀢𑀢𑀺𑀬𑀸𑀲𑀫𑀁, 𑀳𑀺𑀲𑁆𑀲 𑀪𑀺𑀆𑀤𑁂𑀲𑁄 𑀳𑁄𑀢𑀺. 𑀧𑀼𑀭𑀺𑀲𑁂𑀳𑀺, 𑀧𑀼𑀭𑀺𑀲𑁂𑀪𑀺 𑀅𑀧𑁂𑀢𑀺.

𑀢𑀢𑁆𑀣𑁂𑀯 𑀲𑀸𑀫𑀺𑀯𑀘𑀦𑀺𑀘𑁆𑀙𑀸𑀬𑀁 𑁋

𑁯𑁧. 𑀬𑀲𑁆𑀲 𑀯𑀸 𑀧𑀭𑀺𑀕𑁆𑀕𑀳𑁄 𑀢𑀁 𑀲𑀸𑀫𑀺.

𑀬𑀲𑁆𑀲 𑀯𑀸 𑀧𑀭𑀺𑀕𑁆𑀕𑀳𑁄, 𑀢𑀁 𑀲𑀸𑀫𑀺𑀲𑀜𑁆𑀜𑀁 𑀳𑁄𑀢𑀺.

𑁯𑁨. 𑀲𑀸𑀫𑀺𑀲𑁆𑀫𑀺𑀁 𑀙𑀝𑁆𑀞𑀻.

𑀲𑀸𑀫𑀺𑀲𑁆𑀫𑀺𑀁 𑀙𑀝𑁆𑀞𑀻𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀞𑀧𑁂𑀢𑁆𑀯𑀸 𑀆𑀬𑀸𑀤𑁂𑀲𑀁 𑀲𑀩𑁆𑀩𑀢𑁆𑀣 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀦𑀁 𑀲𑀫𑀸𑀦𑀁 𑀭𑀽𑀧𑀁. 𑀧𑀼𑀭𑀺𑀲𑀲𑁆𑀲 𑀏𑀢𑀁 𑀥𑀦𑀁, 𑀧𑀼𑀭𑀺𑀲𑀸𑀦𑀁.

𑀢𑀢𑁆𑀣𑁂𑀯 𑀑𑀓𑀸𑀲𑀯𑀘𑀦𑀺𑀘𑁆𑀙𑀸𑀬𑀁 𑁋

𑁯𑁩. 𑀬𑁄𑀥𑀸𑀭𑁄 𑀢𑀫𑁄𑀓𑀸𑀲𑀁.

𑀬𑁄 𑀓𑀢𑁆𑀢𑀼𑀓𑀫𑁆𑀫𑀸𑀦𑀁 𑀓𑁆𑀭𑀺𑀬𑀸𑀬 𑀆𑀥𑀸𑀭𑁄, 𑀢𑀁 𑀓𑀸𑀭𑀓𑀁 𑀑𑀓𑀸𑀲𑀲𑀜𑁆𑀜𑀁 𑀳𑁄𑀢𑀺.

𑁯𑁪. 𑀑𑀓𑀸𑀲𑁂 ¶ 𑀲𑀢𑁆𑀢𑀫𑀻.

𑀑𑀓𑀸𑀲𑀓𑀸𑀭𑀓𑁂 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀻𑀢𑀺 𑀲𑀢𑁆𑀢𑀫𑀺𑀬𑀸 𑀏𑀓𑀯𑀘𑀦𑀁 𑀲𑁆𑀫𑀺𑀁, 𑀢𑀲𑁆𑀲 ‘‘𑀲𑁆𑀫𑀸𑀲𑁆𑀫𑀺𑀁𑀦𑀁 𑀯𑀸’’𑀢𑀺 𑀏𑀓𑀸𑀭𑁄, 𑀫𑁆𑀳𑀺𑀆𑀤𑁂𑀲𑁄 𑀘, 𑀧𑀼𑀭𑀺𑀲𑁂 𑀧𑀢𑀺𑀝𑁆𑀞𑀺𑀢𑀁, 𑀧𑀼𑀭𑀺𑀲𑀫𑁆𑀳𑀺, 𑀧𑀼𑀭𑀺𑀲𑀲𑁆𑀫𑀺𑀁.

𑀩𑀳𑀼𑀯𑀘𑀦𑁂 ‘‘𑀲𑀼𑀳𑀺𑀲𑁆𑀯𑀓𑀸𑀭𑁄 𑀏’’𑀢𑀺 𑀏𑀓𑀸𑀭𑁄, 𑀧𑀼𑀭𑀺𑀲𑁂𑀲𑀼.

𑀧𑀼𑀭𑀺𑀲𑁄, 𑀧𑀼𑀭𑀺𑀲𑀸, 𑀪𑁄 𑀧𑀼𑀭𑀺𑀲 𑀪𑁄 𑀧𑀼𑀭𑀺𑀲𑀸 𑀯𑀸, 𑀪𑀯𑀦𑁆𑀢𑁄 𑀧𑀼𑀭𑀺𑀲𑀸, 𑀧𑀼𑀭𑀺𑀲𑀁, 𑀧𑀼𑀭𑀺𑀲𑁂, 𑀧𑀼𑀭𑀺𑀲𑁂𑀦, 𑀧𑀼𑀭𑀺𑀲𑁂𑀳𑀺 𑀧𑀼𑀭𑀺𑀲𑁂𑀪𑀺, 𑀧𑀼𑀭𑀺𑀲𑀲𑁆𑀲, 𑀧𑀼𑀭𑀺𑀲𑀸𑀦𑀁, 𑀧𑀼𑀭𑀺𑀲𑀸 𑀧𑀼𑀭𑀺𑀲𑀲𑁆𑀫𑀸 𑀧𑀼𑀭𑀺𑀲𑀫𑁆𑀳𑀸, 𑀧𑀼𑀭𑀺𑀲𑁂𑀳𑀺 𑀧𑀼𑀭𑀺𑀲𑁂𑀪𑀺, 𑀧𑀼𑀭𑀺𑀲𑀲𑁆𑀲, 𑀧𑀼𑀭𑀺𑀲𑀸𑀦𑀁, 𑀧𑀼𑀭𑀺𑀲𑁂 𑀧𑀼𑀭𑀺𑀲𑀲𑁆𑀫𑀺𑀁 𑀧𑀼𑀭𑀺𑀲𑀫𑁆𑀳𑀺, 𑀧𑀼𑀭𑀺𑀲𑁂𑀲𑀼.

𑀢𑀣𑀸 𑀲𑀼𑀕𑀢𑁄, 𑀲𑀼𑀕𑀢𑀸, 𑀪𑁄 𑀲𑀼𑀕𑀢 𑀪𑁄 𑀲𑀼𑀕𑀢𑀸 𑀯𑀸, 𑀪𑀯𑀦𑁆𑀢𑁄 𑀲𑀼𑀕𑀢𑀸, 𑀲𑀼𑀕𑀢𑀁, 𑀲𑀼𑀕𑀢𑁂, 𑀲𑀼𑀕𑀢𑁂𑀦, 𑀲𑀼𑀕𑀢𑁂𑀳𑀺 𑀲𑀼𑀕𑀢𑁂𑀪𑀺, 𑀲𑀼𑀕𑀢𑀲𑁆𑀲, 𑀲𑀼𑀕𑀢𑀸𑀦𑀁, 𑀲𑀼𑀕𑀢𑀸 𑀲𑀼𑀕𑀢𑀲𑁆𑀫𑀸 𑀲𑀼𑀕𑀢𑀫𑁆𑀳𑀸, 𑀲𑀼𑀕𑀢𑁂𑀳𑀺 𑀲𑀼𑀕𑀢𑁂𑀪𑀺, 𑀲𑀼𑀕𑀢𑀲𑁆𑀲, 𑀲𑀼𑀕𑀢𑀸𑀦𑀁, 𑀲𑀼𑀕𑀢𑁂 𑀲𑀼𑀕𑀢𑀲𑁆𑀫𑀺𑀁 𑀲𑀼𑀕𑀢𑀫𑁆𑀳𑀺, 𑀲𑀼𑀕𑀢𑁂𑀲𑀼.

𑀏𑀯𑀁 𑀲𑀼𑀭𑀸’𑀲𑀼𑀭 𑀦𑀭𑁄’𑀭𑀕 𑀦𑀸𑀕 𑀬𑀓𑁆𑀔𑀸,

𑀕𑀦𑁆𑀥𑀩𑁆𑀩 𑀓𑀺𑀦𑁆𑀦𑀭 𑀫𑀦𑀼𑀲𑁆𑀲 𑀧𑀺𑀲𑀸𑀘 𑀧𑁂𑀢𑀸;

𑀫𑀸𑀢𑀗𑁆𑀕 𑀚𑀗𑁆𑀕𑀫 𑀢𑀼𑀭𑀗𑁆𑀕 𑀯𑀭𑀸𑀳 𑀲𑀻𑀳𑀸,

𑀩𑁆𑀬𑀕𑁆𑀖’𑀘𑁆𑀙 𑀓𑀘𑁆𑀙𑀧 𑀢𑀭𑀘𑁆𑀙 𑀫𑀺𑀕’𑀲𑁆𑀲 𑀲𑁄𑀡𑀸.

𑀆𑀮𑁄𑀓 𑀮𑁄𑀓 𑀦𑀺𑀮𑀬𑀸’𑀦𑀺𑀮 𑀘𑀸𑀕 𑀬𑁄𑀕𑀸, 𑀯𑀸𑀬𑀸𑀫 𑀕𑀸𑀫

𑀦𑀺𑀕𑀫𑀸’𑀕𑀫 𑀥𑀫𑁆𑀫 𑀓𑀸𑀫𑀸;

𑀲𑀗𑁆𑀖𑁄’𑀖 𑀖𑁄𑀲 𑀧𑀝𑀺𑀖𑀸’𑀲𑀯 𑀓𑁄𑀥 𑀮𑁄𑀪𑀸,

𑀲𑀸𑀭𑀫𑁆𑀪 𑀣𑀫𑁆𑀪 𑀫𑀤 𑀫𑀸𑀦 𑀧𑀫𑀸𑀤 𑀫𑀓𑁆𑀔𑀸.

𑀧𑀼𑀦𑁆𑀦𑀸𑀕 ¶ 𑀧𑀽𑀕 𑀧𑀦𑀲𑀸’𑀲𑀦 𑀘𑀫𑁆𑀧𑀓’𑀫𑁆𑀩𑀸,

𑀳𑀺𑀦𑁆𑀢𑀸𑀮 𑀢𑀸𑀮 𑀩𑀓𑀼𑀮’𑀚𑁆𑀚𑀼𑀦 𑀓𑀺𑀁𑀲𑀼𑀓𑀸 𑀘;

𑀫𑀦𑁆𑀤𑀸𑀭 𑀓𑀼𑀦𑁆𑀤 𑀧𑀼𑀘𑀺𑀫𑀦𑁆𑀤 𑀓𑀭𑀜𑁆𑀚 𑀭𑀼𑀓𑁆𑀔𑀸,

𑀜𑁂𑀬𑁆𑀬𑀸 𑀫𑀬𑀽𑀭 𑀲𑀓𑀼𑀦𑀡𑁆𑀟𑀚 𑀓𑁄𑀜𑁆𑀘 𑀳𑀁𑀲𑀸 𑁋

𑀇𑀘𑁆𑀘𑀸𑀤𑀬𑁄𑀧𑀺.

𑀫𑀦𑁄𑀕𑀡𑀸𑀤𑀺𑀲𑁆𑀲 𑀢𑀼 𑀦𑀸𑀲𑀲𑁆𑀫𑀸𑀲𑁆𑀫𑀺𑀁𑀲𑀼 𑀯𑀺𑀲𑁂𑀲𑁄. 𑀅𑀜𑁆𑀜𑀢𑁆𑀣 𑀧𑀼𑀭𑀺𑀲𑀲𑀫𑀁.

𑀫𑀦𑁄, 𑀫𑀦𑀸, 𑀳𑁂 𑀫𑀦 𑀳𑁂 𑀫𑀦𑀸 𑀯𑀸, 𑀪𑀯𑀦𑁆𑀢𑁄 𑀫𑀦𑀸, 𑀫𑀦𑀁, 𑀫𑀦𑁂.

‘‘𑀯𑀸’’𑀢𑀺 𑀯𑀢𑁆𑀢𑀢𑁂.

𑁯𑁫. 𑀫𑀦𑁄𑀕𑀡𑀸𑀤𑀺𑀢𑁄 𑀲𑁆𑀫𑀺𑀁𑀦𑀸𑀦𑀫𑀺𑀆.

𑀫𑀦𑁄𑀧𑀪𑀼𑀢𑀺 𑀕𑀡𑁄 𑀫𑀦𑁄𑀕𑀡𑁄, 𑀫𑀦𑁄𑀕𑀡𑀸𑀤𑀺𑀢𑁄 𑀲𑁆𑀫𑀺𑀁, 𑀦𑀸𑀇𑀘𑁆𑀘𑁂𑀢𑁂𑀲𑀁 𑀬𑀣𑀸𑀓𑁆𑀓𑀫𑀁 𑀇𑀓𑀸𑀭𑀸𑀓𑀸𑀭𑀸𑀤𑁂𑀲𑀸 𑀳𑁄𑀦𑁆𑀢𑀺 𑀯𑀸. 𑀆𑀤𑀺𑀕𑁆𑀕𑀳𑀡𑁂𑀦 𑀩𑀺𑀮𑀧𑀤𑀸𑀤𑀺𑀢𑁄𑀧𑀺.

‘‘𑀫𑀦𑁄𑀕𑀡𑀸𑀤𑀺𑀢𑁄’’𑀢𑀺 𑀯𑀢𑁆𑀢𑀢𑁂.

𑁯𑁬. 𑀲 𑀲𑀭𑁂 𑀯𑀸𑀕𑀫𑁄.

𑀏𑀢𑁂𑀳𑁂𑀯 𑀫𑀦𑁄𑀕𑀡𑀸𑀤𑀻𑀳𑀺 𑀲𑀭𑁂 𑀧𑀭𑁂 𑀲𑀸𑀕𑀫𑁄 𑀳𑁄𑀢𑀺 𑀯𑀸. 𑀫𑀦𑀲𑀸, 𑀫𑀦𑁂𑀦.

𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄𑀬𑀁 𑀯𑀸𑀲𑀤𑁆𑀤𑁄, 𑀢𑁂𑀦 ‘‘𑀫𑀦𑁄 𑀫𑀦𑀸 𑀫𑀦𑀁 𑀫𑀦𑁂 𑀫𑀦𑀆𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 𑀦 𑀳𑁄𑀢𑀺. ‘‘𑀫𑀸𑀦𑀲𑀺𑀓𑀁, 𑀘𑁂𑀢𑀲𑀺𑀓’’𑀦𑁆𑀢𑀺𑀆𑀤𑀻𑀲𑀼 𑀦𑀺𑀘𑁆𑀘𑀁. 𑀫𑀦𑁂𑀳𑀺, 𑀫𑀦𑁂𑀪𑀺.

‘‘𑀫𑀦𑁄𑀕𑀡𑀸𑀤𑀺𑀢𑁄, 𑀯𑀸’’𑀢𑀺 𑀘 𑀯𑀢𑁆𑀢𑀢𑁂.

𑁯𑁭. 𑀲𑀲𑁆𑀲 ¶ 𑀘𑁄.

𑀫𑀦𑁄𑀕𑀡𑀸𑀤𑀺𑀢𑁄 𑀧𑀭𑀲𑁆𑀲 𑀲𑀲𑁆𑀲 𑀯𑀺𑀪𑀢𑁆𑀢𑀺𑀲𑁆𑀲 𑀑𑀓𑀸𑀭𑁄 𑀳𑁄𑀢𑀺 𑀯𑀸. 𑀲𑀸𑀕𑀫𑁄.

𑀫𑀦𑀲𑁄 𑀫𑀦𑀲𑁆𑀲, 𑀫𑀦𑀸𑀦𑀁, 𑀫𑀦𑀸 𑀫𑀦𑀲𑁆𑀫𑀸 𑀫𑀦𑀫𑁆𑀳𑀸, 𑀫𑀦𑁂𑀳𑀺 𑀫𑀦𑁂𑀪𑀺, 𑀫𑀦𑀲𑁄 𑀫𑀦𑀲𑁆𑀲, 𑀫𑀦𑀸𑀦𑀁, 𑀫𑀦𑀲𑀺 𑀫𑀦𑁂 𑀫𑀦𑀲𑁆𑀫𑀺𑀁 𑀫𑀦𑀫𑁆𑀳𑀺, 𑀫𑀦𑁂𑀲𑀼.

𑀏𑀯𑀁 𑀯𑀘𑁄 𑀯𑀬𑁄 𑀢𑁂𑀚𑁄,

𑀢𑀧𑁄 𑀘𑁂𑀢𑁄 𑀢𑀫𑁄 𑀬𑀲𑁄;

𑀅𑀬𑁄 𑀧𑀬𑁄 𑀲𑀺𑀭𑁄 𑀙𑀦𑁆𑀤𑁄,

𑀲𑀭𑁄 𑀉𑀭𑁄 𑀭𑀳𑁄 𑀅𑀳𑁄 𑁋

𑀇𑀘𑁆𑀘𑀸𑀤𑀺 𑀫𑀦𑁄𑀕𑀡𑁄.

𑀕𑀼𑀡𑀯𑀦𑁆𑀢𑀼𑀲𑀤𑁆𑀤𑀲𑁆𑀲 𑀪𑁂𑀤𑁄. 𑀕𑀼𑀡𑀯𑀦𑁆𑀢𑀼 𑀲𑀺 𑀇𑀢𑀻𑀥 𑁋

‘‘𑀲𑀯𑀺𑀪𑀢𑁆𑀢𑀺𑀲𑁆𑀲, 𑀦𑁆𑀢𑀼𑀲𑁆𑀲𑀸’’𑀢𑀺 𑀘 𑀅𑀥𑀺𑀓𑀸𑀭𑁄.

𑁯𑁮. 𑀆 𑀲𑀺𑀫𑁆𑀳𑀺.

𑀲𑀩𑁆𑀩𑀲𑁆𑀲𑁂𑀯 𑀦𑁆𑀢𑀼𑀧𑀘𑁆𑀘𑀬𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀆𑀆𑀤𑁂𑀲𑁄 𑀳𑁄𑀢𑀺 𑀲𑀺𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀕𑀼𑀡𑀯𑀸.

‘‘𑀬𑁄𑀫𑁆𑀳𑀺, 𑀧𑀞𑀫𑁂’’𑀲𑀻𑀳𑀕𑀢𑀺𑀬𑀸 ‘‘𑀯𑀸’’𑀢𑀺 𑀘 𑀯𑀢𑁆𑀢𑀢𑁂.

𑁯𑁯. 𑀦𑁆𑀢𑀼𑀲𑁆𑀲 𑀦𑁆𑀢𑁄.

𑀲𑀩𑁆𑀩𑀲𑁆𑀲𑁂𑀯 𑀦𑁆𑀢𑀼𑀧𑀘𑁆𑀘𑀬𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀦𑁆𑀢𑁄𑀆𑀤𑁂𑀲𑁄 𑀳𑁄𑀢𑀺 𑀯𑀸 𑀬𑁄𑀫𑁆𑀳𑀺 𑀧𑀞𑀫𑁂, 𑀕𑀼𑀡𑀯𑀦𑁆𑀢𑁄 𑀢𑀺𑀝𑁆𑀞𑀦𑁆𑀢𑀺.

‘‘𑀲𑀼𑀦𑀁𑀳𑀺𑀲𑀼, 𑀅𑀢𑁆𑀢’’𑀦𑁆𑀢𑀺 𑀘 𑀯𑀢𑁆𑀢𑀢𑁂.

𑁧𑁦𑁦. 𑀦𑁆𑀢𑀼𑀲𑁆𑀲𑀦𑁆𑀢𑁄 ¶ 𑀬𑁄𑀲𑀼 𑀘.

𑀦𑁆𑀢𑀼𑀧𑀘𑁆𑀘𑀬𑀲𑁆𑀲 𑀅𑀦𑁆𑀢𑁄 𑀉𑀓𑀸𑀭𑁄 𑀅𑀢𑁆𑀢𑀫𑀸𑀧𑀚𑁆𑀚𑀢𑁂 𑀲𑀼𑀦𑀁𑀳𑀺 𑀬𑁄𑀇𑀘𑁆𑀘𑁂𑀢𑁂𑀲𑀼, 𑀘𑀕𑁆𑀕𑀳𑀡𑁂𑀦 𑀅𑀜𑁆𑀜𑁂𑀲𑀼 𑀅𑀁 𑀦𑀸 𑀲𑁆𑀫𑀸𑀲𑁆𑀫𑀺𑀁𑀲𑀼 𑀘. 𑀕𑀼𑀡𑀯𑀦𑁆𑀢𑀸, 𑀙𑀝𑁆𑀞𑀺𑀬𑀸 𑀲𑀺𑀤𑁆𑀥𑁂𑀧𑀺 𑀅𑀦𑁆𑀢𑀸𑀤𑁂𑀲𑁂 𑀧𑀼𑀦 𑀅𑀦𑁆𑀢𑀕𑁆𑀕𑀳𑀡𑀓𑀭𑀡𑀢𑁄 𑀬𑁄𑀦𑀁 𑀇𑀓𑀸𑀭𑁄 𑀘 𑀓𑁆𑀯𑀘𑀺. 𑀕𑀼𑀡𑀯𑀦𑁆𑀢𑀺.

‘‘𑀅’’𑀫𑀺𑀢𑀺 𑀯𑀢𑁆𑀢𑀢𑁂.

𑁧𑁦𑁧. 𑀅𑀯𑀡𑁆𑀡𑀸 𑀘 𑀕𑁂.

𑀲𑀩𑁆𑀩𑀲𑁆𑀲𑁂𑀯 𑀦𑁆𑀢𑀼𑀧𑀘𑁆𑀘𑀬𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀅𑀁 𑀅𑀯𑀡𑁆𑀡𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺 𑀕𑁂 𑀧𑀭𑁂.

𑀪𑁄 𑀕𑀼𑀡𑀯𑀁 𑀪𑁄 𑀕𑀼𑀡𑀯 𑀪𑁄 𑀕𑀼𑀡𑀯𑀸, 𑀪𑀯𑀦𑁆𑀢𑁄 𑀕𑀼𑀡𑀯𑀦𑁆𑀢𑁄 𑀕𑀼𑀡𑀯𑀦𑁆𑀢𑀸, 𑀕𑀼𑀡𑀯𑀦𑁆𑀢𑀁, 𑀕𑀼𑀡𑀯𑀦𑁆𑀢𑁂.

‘‘𑀯𑀸’’𑀢𑀺 𑀯𑀢𑁆𑀢𑀢𑁂.

𑁧𑁦𑁨. 𑀢𑁄𑀢𑀺𑀢𑀸 𑀲𑀲𑁆𑀫𑀺𑀁𑀦𑀸𑀲𑀼.

𑀲𑀩𑁆𑀩𑀲𑁆𑀲𑁂𑀯 𑀦𑁆𑀢𑀼𑀧𑀘𑁆𑀘𑀬𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀢𑁄𑀢𑀺 𑀢𑀸𑀆𑀤𑁂𑀲𑀸 𑀳𑁄𑀦𑁆𑀢𑀺 𑀯𑀸 𑀲𑀲𑁆𑀫𑀺𑀁𑀦𑀸𑀇𑀘𑁆𑀘𑁂𑀢𑁂𑀲𑀼 𑀬𑀣𑀸𑀲𑀗𑁆𑀔𑁆𑀬𑀁. 𑀕𑀼𑀡𑀯𑀢𑀸 𑀕𑀼𑀡𑀯𑀦𑁆𑀢𑁂𑀦, 𑀕𑀼𑀡𑀯𑀦𑁆𑀢𑁂𑀳𑀺 𑀕𑀼𑀡𑀯𑀦𑁆𑀢𑁂𑀪𑀺.

𑁧𑁦𑁩. 𑀦𑁆𑀢𑀲𑁆𑀲 𑀲𑁂 𑀯𑀸.

𑀲𑀩𑁆𑀩𑀲𑁆𑀲𑁂𑀯 𑀦𑁆𑀢𑀼𑀧𑀘𑁆𑀘𑀬𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀦𑁆𑀢𑀲𑁆𑀲𑀇𑀘𑁆𑀘𑀬𑀫𑀸𑀤𑁂𑀲𑁄 𑀳𑁄𑀢𑀺 𑀯𑀸 𑀲𑁂 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀕𑀼𑀡𑀯𑀦𑁆𑀢𑀲𑁆𑀲 𑀕𑀼𑀡𑀯𑀢𑁄.

𑁧𑁦𑁪. 𑀦𑀁𑀫𑁆𑀳𑀺 𑀢𑀁 𑀯𑀸.

𑀲𑀩𑁆𑀩𑀲𑁆𑀲𑁂𑀯 𑀦𑁆𑀢𑀼𑀧𑀘𑁆𑀘𑀬𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀢𑀁𑀆𑀤𑁂𑀲𑁄 𑀳𑁄𑀢𑀺 𑀯𑀸 𑀦𑀁𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀕𑀼𑀡𑀯𑀢𑀁 𑀕𑀼𑀡𑀯𑀦𑁆𑀢𑀸𑀦𑀁.

‘‘𑀅𑀫𑁆𑀳 ¶ 𑀢𑀼𑀫𑁆𑀳 𑀦𑁆𑀢𑀼’’𑀇𑀘𑁆𑀘𑀸𑀤𑀺𑀦𑀸 𑀲𑁆𑀫𑀸𑀯𑀘𑀦𑀲𑁆𑀲 𑀦𑀸𑀩𑁆𑀬𑀧𑀤𑁂𑀲𑁄.

𑀕𑀼𑀡𑀯𑀢𑀸 𑀕𑀼𑀡𑀯𑀦𑁆𑀢𑀸 𑀕𑀼𑀡𑀯𑀦𑁆𑀢𑀲𑁆𑀫𑀸 𑀕𑀼𑀡𑀯𑀦𑁆𑀢𑀫𑁆𑀳𑀸, 𑀕𑀼𑀡𑀯𑀦𑁆𑀢𑁂𑀳𑀺 𑀕𑀼𑀡𑀯𑀦𑁆𑀢𑁂𑀪𑀺, 𑀕𑀼𑀡𑀯𑀦𑁆𑀢𑀲𑁆𑀲 𑀕𑀼𑀡𑀯𑀢𑁄, 𑀕𑀼𑀡𑀯𑀢𑀁 𑀕𑀼𑀡𑀯𑀦𑁆𑀢𑀸𑀦𑀁, 𑀕𑀼𑀡𑀯𑀢𑀺 𑀕𑀼𑀡𑀯𑀦𑁆𑀢𑁂 𑀕𑀼𑀡𑀯𑀦𑁆𑀢𑀲𑁆𑀫𑀺𑀁 𑀕𑀼𑀡𑀯𑀦𑁆𑀢𑀫𑁆𑀳𑀻, 𑀕𑀼𑀡𑀯𑀦𑁆𑀢𑁂𑀲𑀼.

𑀏𑀯𑀁 𑀕𑀡𑀯𑀸 𑀓𑀼𑀮𑀯𑀸 𑀩𑀮𑀯𑀸 𑀬𑀲𑀯𑀸 𑀥𑀦𑀯𑀸 𑀲𑀼𑀢𑀯𑀸 𑀪𑀕𑀯𑀸 𑀳𑀺𑀫𑀯𑀸 𑀨𑀮𑀯𑀸 𑀲𑀻𑀮𑀯𑀸 𑀧𑀜𑁆𑀜𑀯𑀸 𑀇𑀘𑁆𑀘𑀸𑀤𑀬𑁄.

𑀳𑀺𑀫𑀯𑀦𑁆𑀢𑀼𑀲𑀤𑁆𑀤𑀢𑁄 𑀲𑀺𑀫𑁆𑀳𑀺 𑀓𑀢𑁂 𑁋

‘‘𑀅𑀢𑁆𑀢𑀁, 𑀦𑁆𑀢𑀼𑀲𑁆𑀲’𑀦𑁆𑀢𑁄’’𑀢𑀺 𑀘 𑀯𑀢𑁆𑀢𑀫𑀸𑀦𑁂 𑁋

𑁧𑁦𑁫. 𑀲𑀺𑀫𑁆𑀳𑀻 𑀯𑀸.

𑀦𑁆𑀢𑀼𑀧𑀘𑁆𑀘𑀬𑀲𑁆𑀲 𑀅𑀦𑁆𑀢𑁄 𑀅𑀢𑁆𑀢𑀁 𑀳𑁄𑀢𑀺 𑀯𑀸 𑀲𑀺𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀳𑀺𑀫𑀯𑀦𑁆𑀢𑁄, 𑀳𑀺𑀫𑀯𑀸, 𑀲𑁂𑀲𑀁 𑀲𑀫𑀁.

𑀧𑀼𑀦 𑀯𑀸𑀕𑁆𑀕𑀳𑀡𑀓𑀭𑀡𑀁 𑀳𑀺𑀫𑀯𑀦𑁆𑀢𑀼𑀲𑀤𑁆𑀤𑀢𑁄 𑀅𑀜𑁆𑀜𑀢𑁆𑀭 𑀅𑀢𑁆𑀢𑀦𑀺𑀲𑁂𑀥𑀦𑀢𑁆𑀣𑀁, 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄𑀬𑀁 𑀯𑀸𑀲𑀤𑁆𑀤𑁄. 𑀢𑁂𑀦 𑀕𑀼𑀡𑀯𑀦𑁆𑀢𑀸𑀤𑀻𑀲𑀼 𑀦𑀸𑀢𑀺𑀧𑁆𑀧𑀲𑀗𑁆𑀕𑁄.

𑀏𑀯𑀁 𑀲𑀢𑀺𑀫𑀸 𑀥𑀺𑀢𑀺𑀫𑀸 𑀕𑀢𑀺𑀫𑀸 𑀫𑀢𑀺𑀫𑀸 𑀫𑀼𑀢𑀺𑀫𑀸 𑀫𑀼𑀢𑁆𑀢𑀺𑀫𑀸 𑀚𑀼𑀢𑀺𑀫𑀸 𑀲𑀺𑀭𑀺𑀫𑀸 𑀳𑀺𑀭𑀺𑀫𑀸 𑀣𑀼𑀢𑀺𑀫𑀸 𑀭𑀢𑀺𑀫𑀸 𑀬𑀢𑀺𑀫𑀸 𑀲𑀼𑀘𑀺𑀫𑀸 𑀓𑀮𑀺𑀫𑀸 𑀩𑀮𑀺𑀫𑀸 𑀓𑀲𑀺𑀫𑀸 𑀭𑀼𑀘𑀺𑀫𑀸 𑀩𑀼𑀤𑁆𑀥𑀺𑀫𑀸 𑀘𑀓𑁆𑀔𑀼𑀫𑀸 𑀩𑀦𑁆𑀥𑀼𑀫𑀸 𑀳𑁂𑀢𑀼𑀫𑀸 𑀲𑁂𑀢𑀼𑀫𑀸 𑀓𑁂𑀢𑀼𑀫𑀸 𑀭𑀸𑀳𑀼𑀫𑀸 𑀪𑀸𑀡𑀼𑀫𑀸 𑀔𑀸𑀡𑀼𑀫𑀸 𑀯𑀺𑀚𑁆𑀚𑀼𑀫𑀸 𑀇𑀘𑁆𑀘𑀸𑀤𑀬𑁄.

𑀢𑀢𑁆𑀣 𑀲𑀢𑀺𑀫𑀦𑁆𑀢𑀼 𑀩𑀦𑁆𑀥𑀼𑀫𑀦𑁆𑀢𑀼𑀲𑀤𑁆𑀤𑀸𑀦𑀁 𑀅𑀁𑀲𑁂𑀲𑀼 𑀭𑀽𑀧𑀪𑁂𑀤𑁄. ‘‘𑀅𑀢𑁆𑀢𑀁, 𑀦𑁆𑀢𑀼𑀲𑁆𑀲𑀸’’𑀢𑀺 𑀘 𑀯𑀢𑁆𑀢𑀢𑁂.

𑁧𑁦𑁬. 𑀲𑀩𑁆𑀩𑀲𑁆𑀲 𑀯𑀸 𑀅𑀁𑀲𑁂𑀲𑀼.

𑀲𑀩𑁆𑀩𑀲𑁆𑀲𑁂𑀯 𑀦𑁆𑀢𑀼𑀧𑀘𑁆𑀘𑀬𑀲𑁆𑀲 𑀅𑀢𑁆𑀢𑀁 𑀳𑁄𑀢𑀺 𑀯𑀸 𑀅𑀁𑀲𑀇𑀘𑁆𑀘𑁂𑀢𑁂𑀲𑀼. 𑀇𑀥𑀸𑀧𑀺 𑀯𑀸𑀲𑀤𑁆𑀤𑀲𑁆𑀲 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀢𑀸 𑀦𑀸𑀢𑀺𑀧𑁆𑀧𑀲𑀗𑁆𑀕𑁄 ¶ . 𑀲𑀢𑀺𑀫𑀁 𑀲𑀢𑀺𑀫𑀦𑁆𑀢𑀁, 𑀩𑀦𑁆𑀥𑀼𑀫𑀁 𑀩𑀦𑁆𑀥𑀼𑀫𑀦𑁆𑀢𑀁, 𑀲𑀢𑀺𑀫𑀲𑁆𑀲 𑀲𑀢𑀺𑀫𑀢𑁄 𑀲𑀢𑀺𑀫𑀦𑁆𑀢𑀲𑁆𑀲, 𑀩𑀦𑁆𑀥𑀼𑀫𑀲𑁆𑀲 𑀩𑀦𑁆𑀥𑀼𑀫𑀢𑁄 𑀩𑀦𑁆𑀥𑀼𑀫𑀦𑁆𑀢𑀲𑁆𑀲, 𑀲𑁂𑀲𑀁 𑀲𑀫𑀁.

𑀕𑀘𑁆𑀙𑀦𑁆𑀢𑀲𑀤𑁆𑀤𑀲𑁆𑀲 𑀪𑁂𑀤𑁄, 𑀕𑀘𑁆𑀙𑀦𑁆𑀢 𑀲𑀺,

‘‘𑀯𑀸’’𑀢𑀺 𑀯𑀢𑁆𑀢𑀢𑁂.

𑁧𑁦𑁭. 𑀲𑀺𑀫𑁆𑀳𑀺 𑀕𑀘𑁆𑀙𑀦𑁆𑀢𑀸𑀤𑀻𑀦𑀁 𑀦𑁆𑀢𑀲𑀤𑁆𑀤𑁄 𑀅𑀁.

𑀕𑀘𑁆𑀙𑀦𑁆𑀢𑀺𑀘𑁆𑀘𑁂𑀯𑀫𑀸𑀤𑀻𑀦𑀁 𑀅𑀦𑁆𑀢𑀧𑁆𑀧𑀘𑁆𑀘𑀬𑀦𑁆𑀢𑀸𑀦𑀁 𑀦𑁆𑀢𑀲𑀤𑁆𑀤𑁄 𑀅𑀁𑀭𑀽𑀧𑀁 𑀆𑀧𑀚𑁆𑀚𑀢𑁂 𑀯𑀸 𑀲𑀺𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀲𑀭𑀮𑁄𑀧𑀲𑀺𑀮𑁄𑀧𑀸, 𑀲𑁄 𑀕𑀘𑁆𑀙𑀁, 𑀕𑀘𑁆𑀙𑀦𑁆𑀢𑁄 𑀯𑀸 𑀕𑀡𑁆𑀳𑀸𑀢𑀺.

‘‘𑀕𑀘𑁆𑀙𑀦𑁆𑀢𑀸𑀤𑀻𑀦𑀁, 𑀦𑁆𑀢𑀲𑀤𑁆𑀤𑁄’’𑀢𑀺 𑀘 𑀯𑀢𑁆𑀢𑀫𑀸𑀦𑁂 𑁋

𑁧𑁦𑁮. 𑀲𑁂𑀲𑁂𑀲𑀼 𑀦𑁆𑀢𑀼𑀯.

𑀕𑀘𑁆𑀙𑀦𑁆𑀢𑀸𑀤𑀻𑀦𑀁 𑀦𑁆𑀢𑀲𑀤𑁆𑀤𑁄 𑀦𑁆𑀢𑀼𑀧𑀘𑁆𑀘𑀬𑁄𑀯 𑀤𑀝𑁆𑀞𑀩𑁆𑀩𑁄 𑀲𑁂𑀲𑁂𑀲𑀼 𑀯𑀺𑀪𑀢𑁆𑀢𑀺𑀧𑁆𑀧𑀘𑁆𑀘𑀬𑁂𑀲𑀼, 𑀅𑀲𑁆𑀫𑀺𑀫𑁆𑀳𑀺 𑀓𑀸𑀭𑀺𑀬𑀸𑀢𑀺𑀤𑁂𑀲𑁄𑀬𑀁. 𑀲𑁂𑀲𑀁 𑀕𑀼𑀡𑀯𑀦𑁆𑀢𑀼𑀲𑀫𑀁.

𑀢𑁂 𑀕𑀘𑁆𑀙𑀦𑁆𑀢𑁄 𑀕𑀘𑁆𑀙𑀦𑁆𑀢𑀸, 𑀪𑁄 𑀕𑀘𑁆𑀙𑀁 𑀪𑁄 𑀕𑀘𑁆𑀙 𑀪𑁄 𑀕𑀘𑁆𑀙𑀸, 𑀪𑀯𑀦𑁆𑀢𑁄 𑀕𑀘𑁆𑀙𑀦𑁆𑀢𑁄 𑀕𑀘𑁆𑀙𑀦𑁆𑀢𑀸, [𑀕𑀘𑁆𑀙𑀁] 𑀕𑀘𑁆𑀙𑀦𑁆𑀢𑀁, 𑀕𑀘𑁆𑀙𑀦𑁆𑀢𑁂, 𑀕𑀘𑁆𑀙𑀢𑀸 𑀕𑀘𑁆𑀙𑀦𑁆𑀢𑁂𑀦, 𑀕𑀘𑁆𑀙𑀦𑁆𑀢𑁂𑀳𑀺 𑀕𑀘𑁆𑀙𑀦𑁆𑀢𑁂𑀪𑀺, 𑀕𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑀲𑁆𑀲, 𑀕𑀘𑁆𑀙𑀢𑀁 𑀕𑀘𑁆𑀙𑀦𑁆𑀢𑀸𑀦𑀁, 𑀕𑀘𑁆𑀙𑀢𑀸 𑀕𑀘𑁆𑀙𑀦𑁆𑀢𑀲𑁆𑀫𑀸 𑀕𑀘𑁆𑀙𑀦𑁆𑀢𑀫𑁆𑀳𑀸, 𑀕𑀘𑁆𑀙𑀦𑁆𑀢𑁂𑀳𑀺 𑀕𑀘𑁆𑀙𑀦𑁆𑀢𑁂𑀪𑀺, 𑀕𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑀲𑁆𑀲, 𑀕𑀘𑁆𑀙𑀢𑀁 𑀕𑀘𑁆𑀙𑀦𑁆𑀢𑀸𑀦𑀁, 𑀕𑀘𑁆𑀙𑀢𑀺 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑀲𑁆𑀫𑀺𑀁 𑀕𑀘𑁆𑀙𑀦𑁆𑀢𑀫𑁆𑀳𑀻, 𑀕𑀘𑁆𑀙𑀦𑁆𑀢𑁂𑀲𑀼.

𑀏𑀯𑀁 𑀫𑀳𑀁 𑀘𑀭𑀁 𑀢𑀺𑀝𑁆𑀞𑀁, 𑀤𑀤𑀁 𑀪𑀼𑀜𑁆𑀚𑀁 𑀲𑀼𑀡𑀁 𑀧𑀘𑀁;

𑀚𑀬𑀁 𑀚𑀻𑀭𑀁 𑀘𑀯𑀁 𑀫𑀻𑀬𑀁, 𑀲𑀭𑀁 𑀓𑀼𑀩𑁆𑀩𑀁 𑀚𑀧𑀁 𑀯𑀚𑀁 𑁋

𑀇𑀘𑁆𑀘𑀸𑀤𑀬𑁄.

𑀪𑀯𑀦𑁆𑀢𑀲𑀤𑁆𑀤𑀲𑁆𑀲 ¶ 𑀕 𑀬𑁄 𑀦𑀸 𑀲𑀯𑀘𑀦𑁂𑀲𑀼 𑀯𑀺𑀲𑁂𑀲𑁄. 𑀲𑁄 𑀪𑀯𑀁.

‘‘𑀪𑀯𑀢𑁄’’𑀢𑀺 𑀯𑀢𑁆𑀢𑀢𑁂.

𑁧𑁦𑁯. 𑀑𑀪𑀸𑀯𑁄 𑀓𑁆𑀯𑀘𑀺 𑀬𑁄𑀲𑀼 𑀯𑀓𑀸𑀭𑀲𑁆𑀲.

𑀪𑀯𑀦𑁆𑀢𑀇𑀘𑁆𑀘𑁂𑀢𑀲𑁆𑀲 𑀯𑀓𑀸𑀭𑀲𑁆𑀲 𑀑𑀪𑀸𑀯𑁄 𑀳𑁄𑀢𑀺 𑀓𑁆𑀯𑀘𑀺 𑀬𑁄𑀇𑀘𑁆𑀘𑁂𑀢𑁂𑀲𑀼. 𑀢𑁂 𑀪𑁄𑀦𑁆𑀢𑁄 𑀪𑀯𑀦𑁆𑀢𑁄 𑀪𑀯𑀦𑁆𑀢𑀸.

‘‘𑀪𑀯𑀢𑁄’’𑀢𑀺 𑀯𑀢𑁆𑀢𑀢𑁂.

𑁧𑁧𑁦. 𑀪𑁄 𑀕𑁂 𑀢𑀼.

𑀲𑀩𑁆𑀩𑀲𑁆𑀲𑁂𑀯 𑀪𑀯𑀦𑁆𑀢𑀲𑀤𑁆𑀤𑀲𑁆𑀲 𑀪𑁄 𑀳𑁄𑀢𑀺 𑀕𑁂 𑀧𑀭𑁂. 𑀢𑀼𑀲𑀤𑁆𑀤𑁂𑀦 𑀪𑀦𑁆𑀢𑁂, 𑀪𑁄𑀦𑁆𑀢𑀸𑀤𑀺 𑀘, 𑀕𑀮𑁄𑀧𑁄, 𑀪𑁄 𑀪𑀦𑁆𑀢𑁂 𑀪𑁄𑀦𑁆𑀢 𑀪𑁄𑀦𑁆𑀢𑀸, 𑀪𑁄𑀦𑁆𑀢𑁄 𑀪𑀯𑀦𑁆𑀢𑁄 𑀪𑀯𑀦𑁆𑀢𑀸, 𑀪𑀯𑀦𑁆𑀢𑀁, 𑀪𑁄𑀦𑁆𑀢𑁂 𑀪𑀯𑀦𑁆𑀢𑁂.

𑀦𑀸𑀲𑁂𑀲𑀼 ‘‘𑀑𑀪𑀸𑀯𑁄 𑀓𑁆𑀯𑀘𑀻’’𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀑𑀪𑀸𑀯𑁄.

𑀪𑁄𑀢𑀸 𑀪𑀯𑀢𑀸 𑀪𑀯𑀦𑁆𑀢𑁂𑀦, 𑀪𑁄𑀢𑁄 𑀪𑀯𑀢𑁄 𑀪𑀯𑀦𑁆𑀢𑀲𑁆𑀲 𑀇𑀘𑁆𑀘𑀸𑀤𑀺.

𑁧𑁧𑁧. 𑀪𑀤𑀦𑁆𑀢𑀲𑁆𑀲 𑀪𑀤𑁆𑀤𑀦𑁆𑀢 𑀪𑀦𑁆𑀢𑁂.

𑀲𑀩𑁆𑀩𑀲𑁆𑀲𑁂𑀯 𑀪𑀤𑀦𑁆𑀢𑀲𑀤𑁆𑀤𑀲𑁆𑀲 𑀪𑀤𑁆𑀤𑀦𑁆𑀢 𑀪𑀦𑁆𑀢𑁂𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺 𑀓𑁆𑀯𑀘𑀺 𑀕𑁂 𑀧𑀭𑁂 𑀬𑁄𑀲𑀼 𑀘. 𑀪𑁄 𑀪𑀤𑁆𑀤𑀦𑁆𑀢 𑀪𑀦𑁆𑀢𑁂, 𑀪𑀤𑀦𑁆𑀢 𑀪𑀤𑀦𑁆𑀢𑀸 𑀯𑀸 𑀇𑀘𑁆𑀘𑀸𑀤𑀺 𑀧𑀼𑀭𑀺𑀲𑀲𑀤𑁆𑀤𑀲𑀫𑀁.

𑁧𑁧𑁨. 𑀲𑀦𑁆𑀢𑀲𑀤𑁆𑀤𑀲𑁆𑀲 𑀲𑁄 𑀪𑁂 𑀩𑁄 𑀘𑀦𑁆𑀢𑁂.

𑀲𑀩𑁆𑀩𑀲𑁆𑀲𑁂𑀯 𑀲𑀦𑁆𑀢𑀲𑀤𑁆𑀤𑀲𑁆𑀲 𑀲𑀲𑀤𑁆𑀤𑀸𑀤𑁂𑀲𑁄 𑀳𑁄𑀢𑀺 𑀪𑀓𑀸𑀭𑁂 𑀧𑀭𑁂, 𑀅𑀦𑁆𑀢𑁂 𑀘 𑀩𑀓𑀸𑀭𑀸𑀕𑀫𑁄 𑀳𑁄𑀢𑀺.

𑀘𑀲𑀤𑁆𑀤𑀕𑁆𑀕𑀳𑀡𑁂𑀦 ¶ 𑀅𑀪𑀓𑀸𑀭𑁂𑀧𑀺 𑀲𑀫𑀸𑀲𑁂 𑀓𑁆𑀯𑀘𑀺 𑀲𑀓𑀸𑀭𑀸𑀤𑁂𑀲𑁄. 𑀲𑀩𑁆𑀪𑀺.

𑀪𑁂𑀢𑀺 𑀓𑀺𑀁? 𑀲𑀦𑁆𑀢𑁂𑀳𑀺, 𑀲𑁂𑀲𑀁 𑀕𑀘𑁆𑀙𑀦𑁆𑀢𑀲𑀤𑁆𑀤𑀲𑀫𑀁.

𑀅𑀢𑁆𑀣𑀺 𑀭𑀸𑀚 𑀩𑁆𑀭𑀳𑁆𑀫 𑀅𑀢𑁆𑀢 𑀲𑀔𑀲𑀤𑁆𑀤𑀸𑀤𑀻𑀦𑀁 𑀪𑁂𑀤𑁄, 𑀢𑀣𑁂𑀯 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺, ‘‘𑀭𑀸𑀚 𑀲𑀺’’𑀇𑀢𑀺 𑀞𑀺𑀢𑁂 𑁋

‘‘𑀩𑁆𑀭𑀳𑁆𑀫𑀢𑁆𑀢𑀲𑀔𑀭𑀸𑀚𑀸𑀤𑀺𑀢𑁄’’𑀢𑀺 𑀅𑀥𑀺𑀓𑀸𑀭𑁄.

𑁧𑁧𑁩. 𑀲𑁆𑀬𑀸 𑀘.

𑀩𑁆𑀭𑀳𑁆𑀫 𑀅𑀢𑁆𑀢 𑀲𑀔 𑀭𑀸𑀚𑀇𑀘𑁆𑀘𑁂𑀯𑀫𑀸𑀤𑀺𑀢𑁄 𑀲𑀺𑀯𑀘𑀦𑀲𑁆𑀲 𑀆𑀓𑀸𑀭𑁄 𑀳𑁄𑀢𑀺. 𑀆𑀤𑀺𑀲𑀤𑁆𑀤𑁂𑀦 𑀆𑀢𑀼𑀫𑀸𑀤𑀺𑀲𑀤𑁆𑀤𑀢𑁄 𑀘. 𑀲𑀭𑀮𑁄𑀧𑀸𑀤𑀺. 𑀭𑀸𑀚𑀸 𑀢𑀺𑀝𑁆𑀞𑀢𑀺.

𑁧𑁧𑁪. 𑀬𑁄𑀦𑀫𑀸𑀦𑁄.

𑀩𑁆𑀭𑀳𑁆𑀫𑀢𑁆𑀢𑀲𑀔𑀭𑀸𑀚𑀸𑀤𑀺𑀢𑁄 𑀬𑁄𑀦𑀁 𑀆𑀦𑁄𑀆𑀤𑁂𑀲𑁄 𑀳𑁄𑀢𑀺. 𑀭𑀸𑀚𑀸𑀦𑁄 𑀢𑀺𑀝𑁆𑀞𑀦𑁆𑀢𑀺, 𑀪𑁄 𑀭𑀸𑀚 𑀪𑁄 𑀭𑀸𑀚𑀸, 𑀪𑀯𑀦𑁆𑀢𑁄 𑀭𑀸𑀚𑀸𑀦𑁄.

‘‘𑀯𑀸’’𑀢𑀺 𑀯𑀢𑁆𑀢𑀢𑁂.

𑁧𑁧𑁫. 𑀩𑁆𑀭𑀳𑁆𑀫𑀢𑁆𑀢𑀲𑀔𑀭𑀸𑀚𑀸𑀤𑀺𑀢𑁄 𑀅𑀫𑀸𑀦𑀁.

𑀩𑁆𑀭𑀳𑁆𑀫𑀸𑀤𑀻𑀳𑀺 𑀧𑀭𑀲𑁆𑀲 𑀅𑀁𑀯𑀘𑀦𑀲𑁆𑀲 𑀆𑀦𑀁 𑀳𑁄𑀢𑀺 𑀯𑀸. 𑀭𑀸𑀚𑀸𑀦𑀁 𑀧𑀲𑁆𑀲 𑀭𑀸𑀚𑀁 𑀯𑀸, 𑀭𑀸𑀚𑀸𑀦𑁄.

‘‘𑀲𑀯𑀺𑀪𑀢𑁆𑀢𑀺𑀲𑁆𑀲, 𑀭𑀸𑀚𑀲𑁆𑀲𑀸’’𑀢𑀺 𑀘 𑀯𑀢𑁆𑀢𑀢𑁂.

𑁧𑁧𑁬. 𑀦𑀸𑀫𑁆𑀳𑀺 𑀭𑀜𑁆𑀜𑀸 𑀯𑀸.

𑀲𑀩𑁆𑀩𑀲𑁆𑀲𑁂𑀯 𑀭𑀸𑀚𑀲𑀤𑁆𑀤𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀭𑀜𑁆𑀜𑀸𑀆𑀤𑁂𑀲𑁄 𑀳𑁄𑀢𑀺 𑀯𑀸 𑀦𑀸𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀭𑀜𑁆𑀜𑀸 𑀓𑀢𑀁 𑀭𑀸𑀚𑁂𑀦 𑀯𑀸.

𑁧𑁧𑁭. 𑀭𑀸𑀚𑀲𑁆𑀲 ¶ 𑀭𑀸𑀚𑀼 𑀲𑀼𑀦𑀁𑀳𑀺𑀲𑀼 𑀘.

𑀲𑀩𑁆𑀩𑀲𑁆𑀲 𑀭𑀸𑀚𑀲𑀤𑁆𑀤𑀲𑁆𑀲 𑀭𑀸𑀚𑀼𑀆𑀤𑁂𑀲𑁄 𑀳𑁄𑀢𑀺 𑀲𑀼 𑀦𑀁 𑀳𑀺𑀇𑀘𑁆𑀘𑁂𑀢𑁂𑀲𑀼 𑀯𑀘𑀦𑁂𑀲𑀼. 𑀘𑀲𑀤𑁆𑀤𑁄 𑀯𑀺𑀓𑀧𑁆𑀧𑀦𑀢𑁆𑀣𑁄, ‘‘𑀲𑀼𑀦𑀁𑀳𑀺𑀲𑀼 𑀘𑀸’’𑀢𑀺 𑀤𑀻𑀖𑁄, 𑀭𑀸𑀚𑀽𑀳𑀺 𑀭𑀸𑀚𑀽𑀪𑀺, 𑀭𑀸𑀚𑁂𑀳𑀺 𑀭𑀸𑀚𑁂𑀪𑀺 𑀯𑀸.

‘‘𑀲𑀯𑀺𑀪𑀢𑁆𑀢𑀺𑀲𑁆𑀲𑀸’’𑀢𑀺 𑀅𑀥𑀺𑀓𑀸𑀭𑁄.

𑁧𑁧𑁮. 𑀭𑀸𑀚𑀲𑁆𑀲 𑀭𑀜𑁆𑀜𑁄𑀭𑀸𑀚𑀺𑀦𑁄 𑀲𑁂.

𑀲𑀩𑁆𑀩𑀲𑁆𑀲𑁂𑀯 𑀭𑀸𑀚𑀲𑀤𑁆𑀤𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀭𑀜𑁆𑀜𑁄 𑀭𑀸𑀚𑀺𑀦𑁄𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺 𑀲𑁂 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀭𑀜𑁆𑀜𑁄, 𑀭𑀸𑀚𑀺𑀦𑁄 𑀤𑁂𑀢𑀺.

‘‘𑀭𑀸𑀚𑀲𑁆𑀲𑀸’’𑀢𑀺 𑀯𑀢𑁆𑀢𑀢𑁂.

𑁧𑁧𑁯. 𑀭𑀜𑁆𑀜𑀁 𑀦𑀁 𑀫𑁆𑀳𑀻 𑀯𑀸.

𑀲𑀩𑁆𑀩𑀲𑁆𑀲𑁂𑀯 𑀭𑀸𑀚𑀲𑀤𑁆𑀤𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀭𑀜𑁆𑀜𑀁𑀆𑀤𑁂𑀲𑁄 𑀳𑁄𑀢𑀺 𑀯𑀸 𑀦𑀁𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀭𑀜𑁆𑀜𑀁 𑀭𑀸𑀚𑀽𑀦𑀁 𑀭𑀸𑀚𑀸𑀦𑀁.

𑀧𑀜𑁆𑀘𑀫𑀺𑀬𑀁 𑁋

𑁧𑁨𑁦. 𑀅𑀫𑁆𑀳𑀢𑀼𑀫𑁆𑀳𑀦𑁆𑀢𑀼𑀭𑀸𑀚𑀩𑁆𑀭𑀳𑁆𑀫𑀢𑁆𑀢𑀲𑀔𑀲𑀢𑁆𑀣𑀼𑀧𑀺𑀢𑀸𑀤𑀻𑀳𑀺 𑀲𑁆𑀫𑀸 𑀦𑀸𑀯.

𑀅𑀫𑁆𑀳𑀢𑀼𑀫𑁆𑀳𑀦𑁆𑀢𑀼𑀭𑀸𑀚𑀩𑁆𑀭𑀳𑁆𑀫𑀢𑁆𑀢𑀲𑀔𑀲𑀢𑁆𑀣𑀼𑀧𑀺𑀢𑀼𑀇𑀘𑁆𑀘𑁂𑀯𑀫𑀸𑀤𑀻𑀳𑀺 𑀲𑁆𑀫𑀸𑀯𑀘𑀦𑀁 𑀦𑀸𑀯 𑀤𑀝𑁆𑀞𑀩𑁆𑀩𑀦𑁆𑀢𑀺 𑀲𑁆𑀫𑀸𑀯𑀘𑀦𑀲𑁆𑀲 𑀦𑀸𑀪𑀸𑀯𑀸𑀢𑀺𑀤𑁂𑀲𑁄. 𑀅𑀢𑀺𑀤𑁂𑀲𑁄 𑀧𑀦 𑀙𑀩𑁆𑀩𑀺𑀥𑁄.

𑀯𑀼𑀢𑁆𑀢𑀜𑁆𑀘 𑁋

‘‘𑀩𑁆𑀬𑀧𑀤𑁂𑀲𑁄 𑀦𑀺𑀫𑀺𑀢𑁆𑀢𑀜𑁆𑀘, 𑀢𑀁𑀭𑀽𑀧𑀁 𑀢𑀁𑀲𑀪𑀸𑀯𑀢𑀸;

𑀲𑀼𑀢𑁆𑀢𑀜𑁆𑀘𑁂𑀯 𑀢𑀣𑀸 𑀓𑀸𑀭𑀺-𑀬𑀸𑀢𑀺𑀤𑁂𑀲𑁄𑀢𑀺 𑀙𑀩𑁆𑀩𑀺𑀥𑁄’’𑀢𑀺.

𑀢𑀢𑁆𑀭𑀸𑀬𑀁 ¶ 𑀩𑁆𑀭𑀳𑁆𑀫𑀢𑁆𑀢𑀲𑀔𑀸𑀤𑀻𑀲𑀼 𑀧𑀸𑀞𑀲𑀸𑀫𑀢𑁆𑀣𑀺𑀬𑀢𑁄 𑀭𑀽𑀧𑀸𑀢𑀺𑀤𑁂𑀲𑁄. 𑀲𑁂𑀲𑀁 𑀢𑀢𑀺𑀬𑀸𑀲𑀫𑀁.

𑀭𑀜𑁆𑀜𑀸 𑀅𑀧𑁂𑀢𑀺, 𑀭𑀸𑀚𑀽𑀳𑀺 𑀭𑀸𑀚𑀽𑀪𑀺, 𑀭𑀸𑀚𑁂𑀳𑀺 𑀭𑀸𑀚𑁂𑀪𑀺, 𑀭𑀜𑁆𑀜𑁄, 𑀭𑀸𑀚𑀺𑀦𑁄 𑀲𑀦𑁆𑀢𑀓𑀁, 𑀭𑀜𑁆𑀜𑀁 𑀭𑀸𑀚𑀽𑀦𑀁 𑀭𑀸𑀚𑀸𑀦𑀁.

‘‘𑀭𑀸𑀚𑀲𑁆𑀲𑀸’’𑀢𑀺 𑀯𑀢𑁆𑀢𑀢𑁂.

𑁧𑁨𑁧. 𑀲𑁆𑀫𑀺𑀁𑀫𑁆𑀳𑀺 𑀭𑀜𑁆𑀜𑁂 𑀭𑀸𑀚𑀺𑀦𑀺.

𑀲𑀩𑁆𑀩𑀲𑁆𑀲𑁂𑀯 𑀭𑀸𑀚𑀲𑀤𑁆𑀤𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀭𑀜𑁆𑀜𑁂𑀭𑀸𑀚𑀺𑀦𑀺𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺 𑀲𑁆𑀫𑀺𑀁𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀭𑀜𑁆𑀜𑁂, 𑀭𑀸𑀚𑀺𑀦𑀺 𑀧𑀢𑀺𑀝𑁆𑀞𑀺𑀢𑀁, 𑀭𑀸𑀚𑀽𑀲𑀼 𑀭𑀸𑀚𑁂𑀲𑀼.

𑀩𑁆𑀭𑀳𑁆𑀫𑀲𑀤𑁆𑀤𑀲𑁆𑀲 𑀘 𑀕 𑀦𑀸 𑀲 𑀲𑁆𑀫𑀺𑀁𑀲𑀼 𑀯𑀺𑀲𑁂𑀲𑁄. 𑀩𑁆𑀭𑀳𑁆𑀫𑀸, 𑀩𑁆𑀭𑀳𑁆𑀫𑀸𑀦𑁄.

𑀆𑀮𑀧𑀦𑁂 𑀘 ‘‘𑀏’’𑀢𑀺 𑀯𑀢𑁆𑀢𑀢𑁂.

𑁧𑁨𑁨. 𑀩𑁆𑀭𑀳𑁆𑀫𑀢𑁄 𑀕𑀲𑁆𑀲 𑀘.

𑀩𑁆𑀭𑀳𑁆𑀫𑀲𑀤𑁆𑀤𑀢𑁄 𑀕𑀲𑁆𑀲 𑀘 𑀏𑀓𑀸𑀭𑁄 𑀳𑁄𑀢𑀺, 𑀘𑀕𑁆𑀕𑀳𑀡𑀁 𑀏𑀕𑁆𑀕𑀳𑀡𑀸𑀦𑀼𑀓𑀟𑁆𑀠𑀦𑀢𑁆𑀣𑀁, 𑀪𑁄 𑀩𑁆𑀭𑀳𑁆𑀫𑁂, 𑀪𑀯𑀦𑁆𑀢𑁄 𑀩𑁆𑀭𑀳𑁆𑀫𑀸𑀦𑁄, 𑀩𑁆𑀭𑀳𑁆𑀫𑀸𑀦𑀁 𑀩𑁆𑀭𑀳𑁆𑀫𑀁, 𑀩𑁆𑀭𑀳𑁆𑀫𑀸𑀦𑁄.

𑀯𑀺𑀧𑀭𑀺𑀡𑀸𑀫𑁂𑀦 ‘‘𑀩𑁆𑀭𑀳𑁆𑀫𑀲𑁆𑀲, 𑀅𑀦𑁆𑀢𑁄’’𑀢𑀺 𑀘 𑀯𑀢𑁆𑀢𑀢𑁂.

𑁧𑁨𑁩. 𑀉𑀢𑁆𑀢𑀁 𑀲𑀦𑀸𑀲𑀼.

𑀩𑁆𑀭𑀳𑁆𑀫𑀲𑀤𑁆𑀤𑀲𑁆𑀲 𑀅𑀦𑁆𑀢𑁄 𑀉𑀢𑁆𑀢𑀫𑀸𑀧𑀚𑁆𑀚𑀢𑁂 𑀲 𑀦𑀸𑀇𑀘𑁆𑀘𑁂𑀢𑁂𑀲𑀼 𑀯𑀘𑀦𑁂𑀲𑀼. 𑀉𑀢𑁆𑀢𑀫𑀺𑀢𑀺 𑀪𑀸𑀯𑀦𑀺𑀤𑁆𑀤𑁂𑀲𑁄 𑀓𑀢𑁆𑀣𑀘𑀺 𑀅𑀪𑀸𑀯𑀤𑀲𑁆𑀲𑀦𑀢𑁆𑀣𑁄. 𑀩𑁆𑀭𑀳𑁆𑀫𑀼𑀦𑀸, 𑀩𑁆𑀭𑀳𑁆𑀫𑁂𑀳𑀺 𑀩𑁆𑀭𑀳𑁆𑀫𑁂𑀪𑀺.

𑀲𑀲𑁆𑀫𑀺𑀁 𑀉𑀢𑁆𑀢𑁂 𑀓𑀢𑁂 ‘‘𑀇𑀯𑀡𑁆𑀡𑀼𑀯𑀡𑁆𑀡𑀸 𑀛𑀮𑀸’’𑀢𑀺 𑀮𑀲𑀜𑁆𑀜𑀸𑀬𑀁 𑁋

𑁧𑁨𑁪. 𑀛𑀮𑀢𑁄 ¶ 𑀲𑀲𑁆𑀲 𑀦𑁄 𑀯𑀸.

𑀛𑀮𑀲𑀜𑁆𑀜𑁂𑀳𑀺 𑀇𑀯𑀡𑁆𑀡𑀼𑀯𑀡𑁆𑀡𑁂𑀳𑀺 𑀧𑀭𑀲𑁆𑀲 𑀲𑀇𑀘𑁆𑀘𑁂𑀢𑀲𑁆𑀲 𑀯𑀘𑀦𑀲𑁆𑀲 𑀦𑁄𑀇𑀘𑁆𑀘𑀸𑀤𑁂𑀲𑁄 𑀳𑁄𑀢𑀺 𑀯𑀸. 𑀩𑁆𑀭𑀳𑁆𑀫𑀼𑀦𑁄 𑀩𑁆𑀭𑀳𑁆𑀫𑀲𑁆𑀲, 𑀩𑁆𑀭𑀳𑁆𑀫𑀸𑀦𑀁 𑀩𑁆𑀭𑀳𑁆𑀫𑀽𑀦𑀁 𑀯𑀸, 𑀉𑀢𑁆𑀢𑀫𑀺𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀅𑀜𑁆𑀜𑀢𑁆𑀣𑀸𑀧𑀺 𑀉𑀢𑁆𑀢𑀁.

𑀧𑀜𑁆𑀘𑀫𑀺𑀬𑀁 𑀦𑀸𑀪𑀸𑀯𑀸𑀢𑀺𑀤𑁂𑀲𑁄. 𑀩𑁆𑀭𑀳𑁆𑀫𑀼𑀦𑀸, 𑀩𑁆𑀭𑀳𑁆𑀫𑁂𑀳𑀺 𑀩𑁆𑀭𑀳𑁆𑀫𑁂𑀪𑀺, 𑀩𑁆𑀭𑀳𑁆𑀫𑀼𑀦𑁄 𑀩𑁆𑀭𑀳𑁆𑀫𑀲𑁆𑀲, 𑀩𑁆𑀭𑀳𑁆𑀫𑀸𑀦𑀁 𑀩𑁆𑀭𑀳𑁆𑀫𑀽𑀦𑀁 𑀯𑀸.

𑁧𑁨𑁫. 𑀩𑁆𑀭𑀳𑁆𑀫𑀢𑁄 𑀢𑀼 𑀲𑁆𑀫𑀺𑀁 𑀦𑀺.

𑀩𑁆𑀭𑀳𑁆𑀫𑀲𑀤𑁆𑀤𑀢𑁄 𑀲𑁆𑀫𑀺𑀁𑀯𑀘𑀦𑀲𑁆𑀲 𑀦𑀺 𑀳𑁄𑀢𑀺. 𑀢𑀼𑀲𑀤𑁆𑀤𑁂𑀦 𑀓𑀫𑁆𑀫𑀘𑀫𑁆𑀫𑀫𑀼𑀤𑁆𑀥𑀸𑀤𑀺𑀢𑁄 𑀘 𑀓𑁆𑀯𑀘𑀺. 𑀩𑁆𑀭𑀳𑁆𑀫𑀦𑀺, 𑀩𑁆𑀭𑀳𑁆𑀫𑁂𑀲𑀼.

𑀅𑀢𑁆𑀢𑀲𑀤𑁆𑀤𑀲𑁆𑀲 𑀢𑀢𑀺𑀬𑀸𑀤𑀻𑀲𑁆𑀯𑁂𑀯 𑀯𑀺𑀲𑁂𑀲𑁄.

𑀅𑀢𑁆𑀢𑀸, 𑀅𑀢𑁆𑀢𑀸𑀦𑁄, 𑀪𑁄 𑀅𑀢𑁆𑀢 𑀪𑁄 𑀅𑀢𑁆𑀢𑀸, 𑀪𑀯𑀦𑁆𑀢𑁄 𑀅𑀢𑁆𑀢𑀸𑀦𑁄, 𑀅𑀢𑁆𑀢𑀸𑀦𑀁 𑀅𑀢𑁆𑀢𑀁, 𑀅𑀢𑁆𑀢𑀸𑀦𑁄.

𑀦𑀸𑀫𑁆𑀳𑀺 ‘‘𑀅𑀓𑀫𑁆𑀫𑀦𑁆𑀢𑀲𑁆𑀲 𑀘𑀸’’𑀢𑀺 𑀏𑀢𑁆𑀣 𑀘𑀲𑀤𑁆𑀤𑁂𑀦 𑀅𑀢𑁆𑀢𑀦𑁆𑀢𑀲𑁆𑀲 𑀅𑀢𑁆𑀢𑀁 𑀯𑀸. 𑀅𑀢𑁆𑀢𑀦𑀸 𑀅𑀢𑁆𑀢𑁂𑀦 𑀯𑀸.

𑁧𑁨𑁬. 𑀅𑀢𑁆𑀢𑀦𑁆𑀢𑁄 𑀳𑀺𑀲𑁆𑀫𑀺𑀫𑀦𑀢𑁆𑀢𑀁.

𑀅𑀢𑁆𑀢𑀲𑀤𑁆𑀤𑀲𑁆𑀲 𑀅𑀦𑁆𑀢𑁄 𑀅𑀦𑀢𑁆𑀢𑀫𑀸𑀧𑀚𑁆𑀚𑀢𑁂 𑀳𑀺𑀲𑁆𑀫𑀺𑀁 𑀧𑀭𑁂. 𑀅𑀢𑁆𑀢𑀦𑁂𑀳𑀺 𑀅𑀢𑁆𑀢𑀦𑁂𑀪𑀺.

‘‘𑀢𑀢𑁄, 𑀅𑀢𑁆𑀢𑀢𑁄’’𑀢𑀺 𑀘 𑀯𑀢𑁆𑀢𑀢𑁂.

𑁧𑁨𑁭. 𑀲𑀲𑁆𑀲 𑀦𑁄.

𑀢𑀢𑁄 𑀅𑀢𑁆𑀢𑀲𑀤𑁆𑀤𑀢𑁄 𑀲𑀲𑁆𑀲 𑀯𑀺𑀪𑀢𑁆𑀢𑀺𑀲𑁆𑀲 𑀦𑁄 𑀳𑁄𑀢𑀺. 𑀅𑀢𑁆𑀢𑀦𑁄, 𑀅𑀢𑁆𑀢𑀸𑀦𑀁.

𑁧𑁨𑁮. 𑀲𑁆𑀫𑀸 ¶ 𑀦𑀸.

𑀢𑀢𑁄 𑀅𑀢𑁆𑀢𑀲𑀤𑁆𑀤𑀢𑁄 𑀲𑁆𑀫𑀸𑀯𑀘𑀦𑀲𑁆𑀲 𑀦𑀸 𑀳𑁄𑀢𑀺. 𑀅𑀢𑁆𑀢𑀦𑀸 𑀅𑀧𑁂𑀢𑀺.

𑀦𑀸𑀪𑀸𑀯𑀸𑀢𑀺𑀤𑁂𑀲𑁂𑀦𑁂𑀯 𑀲𑀺𑀤𑁆𑀥𑁂𑀧𑀺 𑀉𑀢𑁆𑀢𑀭𑀲𑀼𑀢𑁆𑀢𑁂𑀦 𑀏𑀓𑀬𑁄𑀕𑀫𑀓𑀢𑁆𑀯𑀸 𑀪𑀺𑀦𑁆𑀦𑀬𑁄𑀕𑀓𑀭𑀡𑀁 𑀅𑀢𑁆𑀣𑀦𑁆𑀢𑀭𑀯𑀺𑀜𑁆𑀜𑀸𑀧𑀦𑀢𑁆𑀣𑀁, 𑀢𑁂𑀦 𑀅𑀢𑁆𑀢𑀦𑁆𑀢𑀢𑀓𑀸𑀭𑀲𑁆𑀲 𑀭𑀓𑀸𑀭𑁄 𑀚𑀓𑀸𑀭𑁂 𑀓𑁆𑀯𑀘𑀺. 𑀅𑀢𑁆𑀭𑀚𑁄 𑀅𑀢𑁆𑀢𑀚𑁄 𑀯𑀸. 𑀅𑀢𑁆𑀢𑀦𑁂𑀳𑀺 𑀅𑀢𑁆𑀢𑀦𑁂𑀪𑀺, 𑀅𑀢𑁆𑀢𑀦𑁄, 𑀅𑀢𑁆𑀢𑀸𑀦𑀁.

‘‘𑀅𑀢𑁆𑀢𑀢𑁄’’𑀢𑀺 𑀯𑀢𑁆𑀢𑀢𑁂.

𑁧𑁨𑁯. 𑀢𑀢𑁄 𑀲𑁆𑀫𑀺𑀁 𑀦𑀺.

𑀢𑀢𑁄 𑀅𑀢𑁆𑀢𑀲𑀤𑁆𑀤𑀢𑁄 𑀲𑁆𑀫𑀺𑀁𑀯𑀘𑀦𑀲𑁆𑀲 𑀦𑀺 𑀳𑁄𑀢𑀺. 𑀅𑀢𑁆𑀢𑀦𑀺, 𑀅𑀢𑁆𑀢𑁂𑀲𑀼.

𑀲𑀔𑀲𑀤𑁆𑀤𑀲𑁆𑀲 𑀪𑁂𑀤𑁄. 𑀲𑀔𑀸, 𑀲𑀔𑀸𑀦𑁄.

‘‘𑀬𑁄𑀦’’𑀫𑀺𑀢𑀺 𑀯𑀢𑁆𑀢𑀢𑁂.

𑁧𑁩𑁦. 𑀲𑀔𑀢𑁄 𑀘𑀸𑀬𑁄𑀦𑁄.

𑀲𑀔𑀲𑀤𑁆𑀤𑀢𑁄 𑀬𑁄𑀦𑀁 𑀆𑀬𑁄 𑀦𑁄𑀆𑀤𑁂𑀲𑀸 𑀘 𑀳𑁄𑀦𑁆𑀢𑀺. 𑀲𑀔𑀸𑀬𑁄.

𑁧𑁩𑁧. 𑀲𑀔𑀦𑁆𑀢𑀲𑁆𑀲𑀺 𑀦𑁄𑀦𑀸𑀦𑀁𑀲𑁂𑀲𑀼.

𑀲𑀔𑀲𑀤𑁆𑀤𑀦𑁆𑀢𑀲𑁆𑀲 𑀇𑀓𑀸𑀭𑀸𑀤𑁂𑀲𑁄 𑀳𑁄𑀢𑀺 𑀦𑁄𑀦𑀸𑀦𑀁𑀲𑀇𑀘𑁆𑀘𑁂𑀢𑁂𑀲𑀼 𑀧𑀭𑁂𑀲𑀼. 𑀲𑀔𑀺𑀦𑁄 𑀢𑀺𑀝𑁆𑀞𑀦𑁆𑀢𑀺.

𑀆𑀮𑀧𑀦𑁂 𑀕𑀲𑀜𑁆𑀜𑀸𑀬𑀁 𑁋

𑁧𑁩𑁨. 𑀲𑀔𑀢𑁄 ¶ 𑀕𑀲𑁆𑀲𑁂 𑀯𑀸.

𑀲𑀔𑀢𑁄 𑀕𑀲𑁆𑀲 𑀅𑀓𑀸𑀭 𑀆𑀓𑀸𑀭 𑀇𑀓𑀸𑀭 𑀈𑀓𑀸𑀭𑀏𑀓𑀸𑀭𑀸𑀤𑁂𑀲𑀸 𑀳𑁄𑀦𑁆𑀢𑀺. 𑀯𑀸𑀲𑀤𑁆𑀤𑁂𑀦 𑀅𑀜𑁆𑀜𑀲𑁆𑀫𑀸𑀧𑀺 𑀓𑁆𑀯𑀘𑀺 𑀏𑀓𑀸𑀭𑁄. 𑀬𑀣𑀸 𑁋 𑀪𑀤𑁆𑀤𑀦𑁆𑀢𑁂 𑀇𑀲𑁂 𑀇𑀢𑀺.

𑀅 𑀘 𑀆 𑀘 𑀇 𑀘 𑀈 𑀘 𑀏 𑀘𑀸𑀢𑀺𑀧𑀺 𑀏, 𑀧𑀼𑀩𑁆𑀩𑀲𑁆𑀲𑀭𑀸𑀦𑀁 𑀓𑀫𑁂𑀦 𑀮𑁄𑀧𑁄.

𑀪𑁄 𑀲𑀔 𑀪𑁄 𑀲𑀔𑀸 𑀪𑁄 𑀲𑀔𑀺 𑀪𑁄 𑀲𑀔𑀻 𑀪𑁄 𑀲𑀔𑁂, 𑀪𑀯𑀦𑁆𑀢𑁄 𑀲𑀔𑀸𑀦𑁄 𑀲𑀔𑀸𑀬𑁄 𑀲𑀔𑀺𑀦𑁄.

‘‘𑀲𑀔𑀦𑁆𑀢𑀲𑁆𑀲, 𑀆𑀭𑁄 𑀘𑀸’’𑀢𑀺 𑀘 𑀯𑀢𑁆𑀢𑀢𑁂.

𑁧𑁩𑁩. 𑀲𑀼𑀦𑀫𑀁𑀲𑀼 𑀯𑀸.

𑀲𑀔𑀦𑁆𑀢𑀲𑁆𑀲 𑀆𑀭𑁄 𑀪𑁄𑀢𑀺 𑀯𑀸 𑀲𑀼𑀦𑀁 𑀅𑀁𑀇𑀘𑁆𑀘𑁂𑀢𑁂𑀲𑀼 𑀧𑀭𑁂𑀲𑀼. 𑀲𑀔𑀸𑀭𑀁 𑀲𑀔𑀸𑀦𑀁 𑀲𑀔𑀁, 𑀲𑀔𑀸𑀦𑁄 𑀲𑀔𑀸𑀬𑁄 𑀲𑀔𑀺𑀦𑁄, 𑀲𑀔𑀺𑀦𑀸.

‘‘𑀲𑀔𑀦𑁆𑀢𑀲𑁆𑀲𑀸’’𑀢𑀺 𑀯𑀢𑁆𑀢𑀢𑁂.

𑁧𑁩𑁪. 𑀆𑀭𑁄 𑀳𑀺𑀫𑁆𑀳𑀺 𑀯𑀸.

𑀲𑀔𑀦𑁆𑀢𑀲𑁆𑀲 𑀆𑀭𑁄 𑀳𑁄𑀢𑀺 𑀯𑀸 𑀳𑀺𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀲𑀔𑀸𑀭𑁂𑀳𑀺 𑀲𑀔𑀸𑀭𑁂𑀪𑀺, 𑀲𑀔𑁂𑀳𑀺 𑀲𑀔𑁂𑀪𑀺.

𑀇𑀓𑀸𑀭𑀸𑀤𑁂𑀲𑁂 ‘‘𑀛𑀮𑀢𑁄 𑀲𑀲𑁆𑀲 𑀦𑁄 𑀯𑀸’’𑀢𑀺 𑀦𑁄. 𑀲𑀔𑀺𑀦𑁄 𑀲𑀔𑀺𑀲𑁆𑀲, 𑀲𑀔𑀸𑀭𑀸𑀦𑀁 𑀲𑀔𑀻𑀦𑀁.

𑀲𑁆𑀫𑀸𑀯𑀘𑀦𑀲𑁆𑀲 𑀦𑀸𑀪𑀸𑀯𑁄. 𑀲𑀔𑀺𑀦𑀸, 𑀲𑀔𑀸𑀭𑁂𑀳𑀺 𑀲𑀔𑀸𑀭𑁂𑀪𑀺 𑀲𑀔𑁂𑀳𑀺 𑀲𑀔𑁂𑀪𑀺, 𑀲𑀔𑀺𑀦𑁄 𑀲𑀔𑀺𑀲𑁆𑀲, 𑀲𑀔𑀸𑀭𑀸𑀦𑀁 𑀲𑀔𑀻𑀦𑀁.

‘‘𑀲𑀔𑀢𑁄’’𑀢𑀺 𑀘 𑀯𑀢𑁆𑀢𑀢𑁂.

𑁧𑁩𑁫. 𑀲𑁆𑀫𑀺𑀫𑁂 ¶ .

𑀲𑀔𑀢𑁄 𑀲𑁆𑀫𑀺𑀁𑀯𑀘𑀦𑀲𑁆𑀲 𑀏𑀓𑀸𑀭𑁄 𑀳𑁄𑀢𑀺. 𑀦𑀺𑀘𑁆𑀘𑀢𑁆𑀣𑁄𑀬𑀫𑀸𑀭𑀫𑁆𑀪𑁄. 𑀲𑀔𑁂, 𑀲𑀔𑀸𑀭𑁂𑀲𑀼 𑀲𑀔𑁂𑀲𑀼.

𑀆𑀢𑀼𑀫𑀲𑀤𑁆𑀤𑀲𑁆𑀲 𑀧𑀞𑀫𑀸𑀤𑀼𑀢𑀺𑀬𑀸𑀲𑀼 𑀅𑀢𑁆𑀢𑀲𑀤𑁆𑀤𑀲𑁆𑀲𑁂𑀯 𑀭𑀽𑀧𑀦𑀬𑁄. 𑀆𑀢𑀼𑀫𑀸, 𑀆𑀢𑀼𑀫𑀸𑀦𑁄, 𑀪𑁄 𑀆𑀢𑀼𑀫 𑀪𑁄 𑀆𑀢𑀼𑀫𑀸, 𑀪𑀯𑀦𑁆𑀢𑁄 𑀆𑀢𑀼𑀫𑀸𑀦𑁄, 𑀆𑀢𑀼𑀫𑀸𑀦𑀁 𑀆𑀢𑀼𑀫𑀁, 𑀆𑀢𑀼𑀫𑀸𑀦𑁄, 𑀆𑀢𑀼𑀫𑁂𑀦 𑀇𑀘𑁆𑀘𑀸𑀤𑀺 𑀧𑀼𑀭𑀺𑀲𑀲𑀫𑀁.

𑀧𑀼𑀫𑀲𑀤𑁆𑀤𑀲𑁆𑀲 𑀪𑁂𑀤𑁄. 𑀧𑀼𑀫 𑀲𑀺,

‘‘𑀲𑀯𑀺𑀪𑀢𑁆𑀢𑀺𑀲𑁆𑀲𑀸’’𑀢𑀺 𑀅𑀥𑀺𑀓𑀸𑀭𑁄.

𑁧𑁩𑁬. 𑀧𑀼𑀫𑀦𑁆𑀢𑀲𑁆𑀲𑀸 𑀲𑀺𑀫𑁆𑀳𑀺.

𑀧𑀼𑀫𑀲𑀤𑁆𑀤𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀆𑀓𑀸𑀭𑀸𑀤𑁂𑀲𑁄 𑀳𑁄𑀢𑀺 𑀲𑀺𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀅𑀦𑁆𑀢𑀕𑁆𑀕𑀳𑀡𑁂𑀦 𑀫𑀖𑀯𑀬𑀼𑀯𑀸𑀤𑀻𑀦𑀫𑀦𑁆𑀢𑀲𑁆𑀲 𑀘. 𑀧𑀼𑀫𑀸.

‘‘𑀧𑀼𑀫𑀦𑁆𑀢𑀲𑁆𑀲𑀸’’𑀢𑀺 𑀅𑀥𑀺𑀓𑀸𑀭𑁄.

𑁧𑁩𑁭. 𑀬𑁄𑀲𑁆𑀯𑀸𑀦𑁄.

𑀧𑀼𑀫𑀦𑁆𑀢𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀆𑀦𑁄𑀆𑀤𑁂𑀲𑁄 𑀳𑁄𑀢𑀺 𑀬𑁄𑀲𑀼 𑀯𑀺𑀪𑀢𑁆𑀢𑀻𑀲𑀼. 𑀧𑀼𑀫𑀸𑀦𑁄.

𑁧𑁩𑁮. 𑀅𑀫𑀸𑀮𑀧𑀦𑁂𑀓𑀯𑀘𑀦𑁂.

𑀧𑀼𑀫𑀦𑁆𑀢𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀅𑀁 𑀳𑁄𑀢𑀺 𑀆𑀮𑀧𑀦𑁂𑀓𑀯𑀘𑀦𑁂 𑀧𑀭𑁂. 𑀳𑁂 𑀧𑀼𑀫𑀁, 𑀳𑁂 𑀧𑀼𑀫𑀸𑀦𑁄, 𑀧𑀼𑀫𑀁, 𑀧𑀼𑀫𑀸𑀦𑁄.

‘‘𑀆, 𑀯𑀸’’𑀢𑀺 𑀘 𑀯𑀢𑁆𑀢𑀢𑁂.

𑁧𑁩𑁯. 𑀉 ¶ 𑀦𑀸𑀫𑁆𑀳𑀺 𑀘.

𑀧𑀼𑀫𑀦𑁆𑀢𑀲𑁆𑀲 𑀆𑀉𑀆𑀤𑁂𑀲𑀸 𑀳𑁄𑀦𑁆𑀢𑀺 𑀯𑀸 𑀦𑀸𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀘𑀲𑀤𑁆𑀤𑁂𑀦 𑀧𑀼𑀫𑀓𑀫𑁆𑀫𑀣𑀸𑀫𑀦𑁆𑀢𑀲𑁆𑀲 𑀘𑀼’𑀓𑀸𑀭𑁄 𑀯𑀸 𑀲𑀲𑁆𑀫𑀸𑀲𑀼. 𑀧𑀼𑀫𑀸𑀦𑀸 𑀧𑀼𑀫𑀼𑀦𑀸 𑀧𑀼𑀫𑁂𑀦 𑀯𑀸.

‘‘𑀆𑀦𑁂’’𑀢𑀺 𑀯𑀢𑁆𑀢𑀢𑁂.

𑁧𑁪𑁦. 𑀳𑀺𑀯𑀺𑀪𑀢𑁆𑀢𑀺𑀫𑁆𑀳𑀺 𑀘.

𑀧𑀼𑀫𑀦𑁆𑀢𑀲𑁆𑀲 𑀳𑀺𑀯𑀺𑀪𑀢𑁆𑀢𑀺𑀫𑁆𑀳𑀻 𑀘 𑀆𑀦𑁂𑀆𑀤𑁂𑀲𑁄 𑀳𑁄𑀢𑀺. 𑀯𑀺𑀪𑀢𑁆𑀢𑀺𑀕𑁆𑀕𑀳𑀡𑀁 𑀲𑀯𑀺𑀪𑀢𑁆𑀢𑀺𑀕𑁆𑀕𑀳𑀡𑀦𑀺𑀯𑀢𑁆𑀢𑀦𑀢𑁆𑀣𑀁. 𑀧𑀼𑀫𑀸𑀦𑁂𑀳𑀺 𑀧𑀼𑀫𑀸𑀦𑁂𑀪𑀺.

𑀘𑀲𑀤𑁆𑀤𑁂𑀦 𑀬𑀼𑀯𑀫𑀖𑀯𑀸𑀤𑀻𑀦𑀫𑀦𑁆𑀢𑀲𑁆𑀲 𑀯𑀸 𑀆𑀦𑀸𑀤𑁂𑀲𑁄 𑀳𑁄𑀢𑀺 𑀲𑀩𑁆𑀩𑀯𑀺𑀪𑀢𑁆𑀢𑀻𑀲𑀼. ‘‘𑀉 𑀦𑀸𑀫𑁆𑀳𑀺 𑀘𑀸’’𑀢𑀺 𑀏𑀢𑁆𑀣 𑀘𑀲𑀤𑁆𑀤𑁂𑀦 𑀧𑀼𑀫𑀦𑁆𑀢𑀲𑁆𑀲𑀼𑀓𑀸𑀭𑁄 𑀯𑀸 𑀲𑀲𑁆𑀫𑀸𑀲𑀼 𑀯𑀺𑀪𑀢𑁆𑀢𑀻𑀲𑀼. ‘‘𑀛𑀮𑀢𑁄 𑀲𑀲𑁆𑀲 𑀦𑁄 𑀯𑀸’’𑀢𑀺 𑀦𑁄. 𑀧𑀼𑀫𑀼𑀦𑁄 𑀧𑀼𑀫𑀲𑁆𑀲, 𑀧𑀼𑀫𑀸𑀦𑀁.

‘‘𑀲𑁆𑀫𑀸, 𑀦𑀸’’𑀢𑀺 𑀯𑀢𑁆𑀢𑀢𑁂.

𑁧𑁪𑁧. 𑀛𑀮𑀢𑁄 𑀘.

𑀛𑀮𑀇𑀘𑁆𑀘𑁂𑀢𑁂𑀳𑀺 𑀲𑁆𑀫𑀸𑀯𑀘𑀦𑀲𑁆𑀲 𑀦𑀸 𑀳𑁄𑀢𑀺. 𑀘𑀕𑁆𑀕𑀳𑀡𑀁 𑀓𑁆𑀯𑀘𑀺 𑀦𑀺𑀯𑀢𑁆𑀢𑀦𑀢𑁆𑀣𑀁. 𑀧𑀼𑀫𑀸𑀦𑀸 𑀧𑀼𑀫𑀼𑀦𑀸 𑀧𑀼𑀫𑀸 𑀧𑀼𑀫𑀲𑁆𑀫𑀸 𑀧𑀼𑀫𑀫𑁆𑀳𑀸, 𑀧𑀼𑀫𑀸𑀦𑁂𑀳𑀺 𑀧𑀼𑀫𑀸𑀦𑁂𑀪𑀺 𑀧𑀼𑀫𑁂𑀳𑀺 𑀧𑀼𑀫𑁂𑀪𑀺, 𑀧𑀼𑀫𑀼𑀦𑁄 𑀧𑀼𑀫𑀲𑁆𑀲, 𑀧𑀼𑀫𑀸𑀦𑀁.

𑁧𑁪𑁨. 𑀆𑀦𑁂 𑀲𑁆𑀫𑀺𑀁𑀫𑁆𑀳𑀺 𑀯𑀸.

𑀧𑀼𑀫𑀦𑁆𑀢𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀆𑀦𑁂𑀆𑀤𑁂𑀲𑁄 𑀳𑁄𑀢𑀺 𑀯𑀸 𑀲𑁆𑀫𑀺𑀁𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀧𑀼𑀫𑀸𑀦𑁂 𑀧𑀼𑀫𑁂 𑀧𑀼𑀫𑀲𑁆𑀫𑀺𑀁 𑀧𑀼𑀫𑀫𑁆𑀳𑀺.

𑁧𑁪𑁩. 𑀲𑀼𑀲𑁆𑀫𑀺𑀫𑀸 ¶ 𑀯𑀸.

𑀧𑀼𑀫𑀦𑁆𑀢𑀲𑁆𑀲 𑀲𑀼𑀇𑀘𑁆𑀘𑁂𑀢𑀲𑁆𑀫𑀺𑀁 𑀧𑀭𑁂 𑀆𑀆𑀤𑁂𑀲𑁄 𑀳𑁄𑀢𑀺 𑀯𑀸. 𑀧𑀼𑀫𑀸𑀲𑀼 𑀧𑀼𑀫𑁂𑀲𑀼.

𑀬𑀼𑀯𑀸𑀤𑀻𑀲𑀼 ‘‘𑀬𑀼𑀯 𑀲𑀺’’ 𑀇𑀢𑀻𑀥 𑁋

‘‘𑀧𑀼𑀫𑀦𑁆𑀢𑀲𑁆𑀲𑀸 𑀲𑀺𑀫𑁆𑀳𑀻’’𑀢𑀺 𑀏𑀢𑁆𑀣 𑀅𑀦𑁆𑀢𑀕𑁆𑀕𑀳𑀡𑁂𑀦 𑀆𑀓𑀸𑀭𑁄, ‘‘𑀳𑀺𑀯𑀺𑀪𑀢𑁆𑀢𑀺𑀫𑁆𑀳𑀺 𑀘𑀸’’𑀢𑀺 𑀲𑀼𑀢𑁆𑀢𑁂 𑀘𑀲𑀤𑁆𑀤𑁂𑀦 𑀆𑀦𑀸𑀤𑁂𑀲𑁄 𑀘.

𑀬𑀼𑀯𑀸 𑀬𑀼𑀯𑀸𑀦𑁄, 𑀬𑀼𑀯𑀸𑀦𑀸 𑀬𑀼𑀯𑀸, 𑀳𑁂 𑀬𑀼𑀯 𑀳𑁂 𑀬𑀼𑀯𑀸 𑀳𑁂 𑀬𑀼𑀯𑀸𑀦 𑀳𑁂 𑀬𑀼𑀯𑀸𑀦𑀸, 𑀪𑀯𑀦𑁆𑀢𑁄 𑀬𑀼𑀯𑀸𑀦𑀸, 𑀬𑀼𑀯𑀸𑀦𑀁 𑀬𑀼𑀯𑀁, 𑀬𑀼𑀯𑀸𑀦𑁂 𑀬𑀼𑀯𑁂.

‘‘𑀅𑀓𑀫𑁆𑀫𑀦𑁆𑀢𑀲𑁆𑀲 𑀘𑀸’’𑀢𑀺 𑀏𑀢𑁆𑀣 𑀘𑀲𑀤𑁆𑀤𑁂𑀦 𑀬𑀼𑀯𑀫𑀖𑀯𑀸𑀤𑀻𑀦𑀫𑀦𑁆𑀢𑀲𑁆𑀲 𑀆 𑀳𑁄𑀢𑀺 𑀯𑀸 𑀦𑀸𑀲𑀼𑀇𑀘𑁆𑀘𑁂𑀢𑁂𑀲𑀽𑀢𑀺 𑀆𑀢𑁆𑀢𑀁.

𑀬𑀼𑀯𑀸𑀦𑀸 𑀬𑀼𑀯𑁂𑀦 𑀬𑀼𑀯𑀸𑀦𑁂𑀦 𑀯𑀸, 𑀬𑀼𑀯𑀸𑀦𑁂𑀳𑀺 𑀬𑀼𑀯𑀸𑀦𑁂𑀪𑀺 𑀬𑀼𑀯𑁂𑀳𑀺 𑀬𑀼𑀯𑁂𑀪𑀺, 𑀬𑀼𑀯𑀸𑀦𑀲𑁆𑀲 𑀬𑀼𑀯𑀲𑁆𑀲, 𑀬𑀼𑀯𑀸𑀦𑀸𑀦𑀁 𑀬𑀼𑀯𑀸𑀦𑀁, 𑀬𑀼𑀯𑀸𑀦𑀸 𑀬𑀼𑀯𑀸𑀦𑀲𑁆𑀫𑀸 𑀬𑀼𑀯𑀸𑀦𑀫𑁆𑀳𑀸, 𑀬𑀼𑀯𑀸𑀦𑁂𑀳𑀺 𑀬𑀼𑀯𑀸𑀦𑁂𑀪𑀺 𑀬𑀼𑀯𑁂𑀳𑀺 𑀬𑀼𑀯𑁂𑀪𑀺, 𑀬𑀼𑀯𑀸𑀦𑀲𑁆𑀲 𑀬𑀼𑀯𑀲𑁆𑀲, 𑀬𑀼𑀯𑀸𑀦𑀸𑀦𑀁 𑀬𑀼𑀯𑀸𑀦𑀁, 𑀬𑀼𑀯𑀸𑀦𑁂 𑀬𑀼𑀯𑀸𑀦𑀲𑁆𑀫𑀺𑀁 𑀬𑀼𑀯𑀸𑀦𑀫𑁆𑀳𑀺 𑀬𑀼𑀯𑁂 𑀬𑀼𑀯𑀫𑁆𑀳𑀺 𑀬𑀼𑀯𑀲𑁆𑀫𑀺𑀁, 𑀬𑀼𑀯𑀸𑀦𑁂𑀲𑀼 𑀬𑀼𑀯𑀸𑀲𑀼 𑀬𑀼𑀯𑁂𑀲𑀼.

𑀏𑀯𑀁 𑀫𑀖𑀯𑀸 𑀫𑀖𑀯𑀸𑀦𑁄, 𑀫𑀖𑀯𑀸𑀦𑀸 𑀇𑀘𑁆𑀘𑀸𑀤𑀺 𑀬𑀼𑀯𑀲𑀤𑁆𑀤𑀲𑀫𑀁.

𑀅𑀓𑀸𑀭𑀦𑁆𑀢𑀁.

𑀆𑀓𑀸𑀭𑀦𑁆𑀢𑁄 𑀧𑀼𑀮𑁆𑀮𑀺𑀗𑁆𑀕𑁄 𑀲𑀸𑀲𑀤𑁆𑀤𑁄.

𑀲𑀸 𑀲𑀺, 𑀲𑀺𑀮𑁄𑀧𑁄, 𑀲𑀸 𑀲𑀼𑀦𑀔𑁄.

𑀩𑀳𑀼𑀯𑀘𑀦𑁂 𑁋

𑁧𑁪𑁪. 𑀅𑀖𑁄 ¶ 𑀭𑀲𑁆𑀲𑀫𑁂𑀓𑀯𑀘𑀦𑀬𑁄𑀲𑁆𑀯𑀧𑀺 𑀘.

𑀖𑀲𑀜𑁆𑀜𑀓𑀆𑀓𑀸𑀭𑀯𑀚𑁆𑀚𑀺𑀢𑁄 𑀮𑀺𑀗𑁆𑀕𑀲𑁆𑀲𑀦𑁆𑀢𑁄 𑀲𑀭𑁄 𑀭𑀲𑁆𑀲𑀫𑀸𑀧𑀚𑁆𑀚𑀢𑁂 𑀏𑀓𑀯𑀘𑀦𑁂𑀲𑀼 𑀬𑁄𑀲𑀼 𑀘 𑀧𑀭𑁂𑀲𑀽𑀢𑀺 𑀭𑀲𑁆𑀲𑀢𑁆𑀢𑀁. 𑀅𑀧𑀺𑀕𑁆𑀕𑀳𑀡𑀁 𑀲𑀺𑀫𑁆𑀳𑀺 𑀦𑀺𑀯𑀢𑁆𑀢𑀦𑀢𑁆𑀣𑀁. 𑀲𑁂𑀲𑀁 𑀦𑁂𑀬𑁆𑀬𑀁.

𑀲𑀸 𑀢𑀺𑀝𑁆𑀞𑀦𑁆𑀢𑀺, 𑀳𑁂 𑀲 𑀳𑁂 𑀲𑀸, 𑀳𑁂 𑀲𑀸, 𑀲𑀁, 𑀲𑁂, 𑀲𑁂𑀦, 𑀲𑀸𑀳𑀺 𑀲𑀸𑀪𑀺, 𑀲𑀲𑁆𑀲 𑀲𑀸𑀬, 𑀲𑀸𑀦𑀁, 𑀲𑀸 𑀲𑀲𑁆𑀫𑀸 𑀲𑀫𑁆𑀳𑀸, 𑀲𑀸𑀳𑀺 𑀲𑀸𑀪𑀺, 𑀲𑀲𑁆𑀲, 𑀲𑀸𑀦𑀁, 𑀲𑁂 𑀲𑀲𑁆𑀫𑀺𑀁 𑀲𑀫𑁆𑀳𑀺, 𑀲𑀸𑀲𑀼.

𑀏𑀯𑀁 𑀧𑀘𑁆𑀘𑀓𑁆𑀔𑀥𑀫𑁆𑀫𑀸 𑀕𑀸𑀡𑁆𑀟𑀻𑀯𑀥𑀦𑁆𑀯𑀸𑀧𑀪𑀼𑀢𑀬𑁄.

𑀆𑀓𑀸𑀭𑀦𑁆𑀢𑀁.

𑀇𑀓𑀸𑀭𑀦𑁆𑀢𑁄 𑀧𑀼𑀮𑁆𑀮𑀺𑀗𑁆𑀕𑁄 𑀅𑀕𑁆𑀕𑀺𑀲𑀤𑁆𑀤𑁄. 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺, 𑀅𑀕𑁆𑀕𑀺 𑀲𑀺,

‘‘𑀅𑀦𑁆𑀢𑁄, 𑀲𑀺𑀫𑁆𑀳𑀺, 𑀯𑀸’’𑀢𑀺 𑀘 𑀯𑀢𑁆𑀢𑀢𑁂.

𑁧𑁪𑁫. 𑀅𑀕𑁆𑀕𑀺𑀲𑁆𑀲𑀺𑀦𑀺.

𑀅𑀕𑁆𑀕𑀺𑀲𑁆𑀲 𑀅𑀦𑁆𑀢𑁄 𑀇𑀦𑀺 𑀳𑁄𑀢𑀺 𑀯𑀸 𑀲𑀺𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. ‘‘𑀲𑁂𑀲𑀢𑁄 𑀮𑁄𑀧𑀁 𑀕𑀲𑀺𑀧𑀻’’𑀢𑀺 𑀲𑀺𑀮𑁄𑀧𑁄. 𑀅𑀕𑁆𑀕𑀺𑀦𑀺 𑀅𑀕𑁆𑀕𑀺.

𑀩𑀳𑀼𑀯𑀘𑀦𑁂 ‘‘𑀇𑀯𑀡𑁆𑀡𑀼𑀯𑀡𑁆𑀡𑀸 𑀛𑀮𑀸’’𑀢𑀺 𑀛𑀮𑀲𑀜𑁆𑀜𑀸𑀬𑀁 𑁋

‘‘𑀛𑀮𑀢𑁄, 𑀯𑀸’’𑀢𑀺 𑀘 𑀯𑀢𑁆𑀢𑀢𑁂.

𑁧𑁪𑁬. 𑀖𑀧𑀢𑁄 𑀘 𑀬𑁄𑀦𑀁 𑀮𑁄𑀧𑁄.

𑀖𑀧𑀲𑀜𑁆𑀜𑁂𑀳𑀺 𑀇𑀢𑁆𑀣𑀺𑀯𑀸𑀘𑀓𑁂𑀳𑀺 𑀆𑀓𑀸𑀭𑀺𑀯𑀡𑁆𑀡𑀼𑀯𑀡𑁆𑀡𑁂𑀳𑀺, 𑀛𑀮𑀲𑀜𑁆𑀜𑁂𑀳𑀺 𑀘 𑀧𑀭𑁂𑀲𑀁 𑀬𑁄𑀯𑀘𑀦𑀸𑀦𑀁 𑀮𑁄𑀧𑁄 𑀳𑁄𑀢𑀺 𑀯𑀸. 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀸𑀬𑀁.

𑁧𑁪𑁭. 𑀬𑁄𑀲𑀼 ¶ 𑀓𑀢𑀦𑀺𑀓𑀸𑀭𑀮𑁄𑀧𑁂𑀲𑀼 𑀤𑀻𑀖𑀁.

𑀮𑀺𑀗𑁆𑀕𑀲𑁆𑀲𑀦𑁆𑀢𑀪𑀽𑀢𑀸 𑀲𑀩𑁆𑀩𑁂 𑀭𑀲𑁆𑀲𑀲𑀭𑀸 𑀬𑁄𑀲𑀼 𑀓𑀢𑀦𑀺𑀓𑀸𑀭𑀮𑁄𑀧𑁂𑀲𑀼 𑀤𑀻𑀖𑀫𑀸𑀧𑀚𑁆𑀚𑀦𑁆𑀢𑁂. 𑀓𑀢𑀸 𑀦𑀺𑀓𑀸𑀭𑀮𑁄𑀧𑀸 𑀬𑁂𑀲𑀁 𑀢𑁂 𑀓𑀢𑀦𑀺𑀓𑀸𑀭𑀮𑁄𑀧𑀸. 𑀅𑀕𑁆𑀕𑀻.

‘‘𑀧𑀜𑁆𑀘𑀸𑀤𑀻𑀦𑀫𑀢𑁆𑀢’’𑀦𑁆𑀢𑀺 𑀇𑀢𑁄 ‘‘𑀅𑀢𑁆𑀢’’𑀫𑀺𑀢𑀺 𑀯𑀢𑁆𑀢𑀢𑁂.

𑁧𑁪𑁮. 𑀬𑁄𑀲𑁆𑀯𑀓𑀢𑀭𑀲𑁆𑀲𑁄 𑀛𑁄.

𑀬𑁄𑀲𑀼 𑀧𑀭𑁂𑀲𑀼 𑀅𑀓𑀢𑀭𑀲𑁆𑀲𑁄 𑀛𑁄 𑀅𑀢𑁆𑀢𑀫𑀸𑀧𑀚𑁆𑀚𑀢𑁂. 𑀅𑀕𑁆𑀕𑀬𑁄.

𑀛𑁄𑀢𑀺 𑀓𑀺𑀁? 𑀭𑀢𑁆𑀢𑀺𑀬𑁄.

𑀆𑀮𑀧𑀦𑁂𑀧𑁂𑀯𑀁. 𑀳𑁂 𑀅𑀕𑁆𑀕𑀺, 𑀳𑁂 𑀅𑀕𑁆𑀕𑀻 𑀳𑁂 𑀅𑀕𑁆𑀕𑀬𑁄.

𑀤𑀼𑀢𑀺𑀬𑁂𑀓𑀯𑀘𑀦𑁂 𑀧𑀼𑀩𑁆𑀩𑀲𑁆𑀲𑀭𑀮𑁄𑀧𑁂 𑀲𑀫𑁆𑀧𑀢𑁆𑀢𑁂 𑁋

𑁧𑁪𑁯. 𑀅𑀁 𑀫𑁄 𑀦𑀺𑀕𑁆𑀕𑀳𑀻𑀢𑀁 𑀛𑀮𑀧𑁂𑀳𑀺.

𑀛𑀮𑀧𑀇𑀘𑁆𑀘𑁂𑀢𑁂𑀳𑀺 𑀧𑀭𑀲𑁆𑀲 𑀅𑀁𑀯𑀘𑀦𑀲𑁆𑀲, 𑀫𑀓𑀸𑀭𑀲𑁆𑀲 𑀘 𑀦𑀺𑀕𑁆𑀕𑀳𑀻𑀢𑀁 𑀆𑀤𑁂𑀲𑁄 𑀳𑁄𑀢𑀺. 𑀅𑀕𑁆𑀕𑀺𑀁.

𑀅𑀕𑁆𑀕𑀻 𑀅𑀕𑁆𑀕𑀬𑁄, 𑀅𑀕𑁆𑀕𑀺𑀦𑀸, 𑀅𑀕𑁆𑀕𑀻𑀳𑀺 𑀅𑀕𑁆𑀕𑀻𑀪𑀺, ‘‘𑀲𑀼𑀦𑀁𑀳𑀺𑀲𑀼 𑀘𑀸’’𑀢𑀺 𑀏𑀢𑁆𑀣 𑀘𑀕𑁆𑀕𑀳𑀡𑁂𑀦 𑀓𑀢𑁆𑀣𑀘𑀺 𑀤𑀻𑀖𑀸𑀪𑀸𑀯𑁄. 𑀅𑀕𑁆𑀕𑀺𑀳𑀺 𑀅𑀕𑁆𑀕𑀺𑀪𑀺.

‘‘𑀛𑀮𑀢𑁄 𑀲𑀲𑁆𑀲 𑀦𑁄 𑀯𑀸’’𑀢𑀺 𑀦𑁄. 𑀅𑀕𑁆𑀕𑀺𑀦𑁄 𑀅𑀕𑁆𑀕𑀺𑀲𑁆𑀲, 𑀅𑀕𑁆𑀕𑀻𑀦𑀁.

‘‘𑀲𑁆𑀫𑀸 𑀦𑀸’’𑀢𑀺 𑀯𑀢𑁆𑀢𑀫𑀸𑀦𑁂 ‘‘𑀛𑀮𑀢𑁄 𑀘𑀸’’𑀢𑀺 𑀯𑀺𑀓𑀧𑁆𑀧𑁂𑀦 𑀦𑀸. 𑀅𑀕𑁆𑀕𑀺𑀦𑀸 𑀅𑀕𑁆𑀕𑀺𑀲𑁆𑀫𑀸 𑀅𑀕𑁆𑀕𑀺𑀫𑁆𑀳𑀸, 𑀅𑀕𑁆𑀕𑀻𑀳𑀺 𑀅𑀕𑁆𑀕𑀻𑀪𑀺 𑀅𑀕𑁆𑀕𑀺𑀳𑀺 𑀅𑀕𑁆𑀕𑀺𑀪𑀺, 𑀅𑀕𑁆𑀕𑀺𑀦𑁄 𑀅𑀕𑁆𑀕𑀺𑀲𑁆𑀲, 𑀅𑀕𑁆𑀕𑀻𑀦𑀁 𑀅𑀕𑁆𑀕𑀺𑀦𑀁, 𑀅𑀕𑁆𑀕𑀺𑀫𑁆𑀳𑀺 𑀅𑀕𑁆𑀕𑀺𑀲𑁆𑀫𑀺𑀁, 𑀅𑀕𑁆𑀕𑀻𑀲𑀼 𑀅𑀕𑁆𑀕𑀺𑀲𑀼.

𑀏𑀯𑀫𑀜𑁆𑀜𑁂𑀧𑀺 𑁋

𑀚𑁄𑀢𑀺 𑀧𑀸𑀡𑀺 𑀕𑀡𑁆𑀞𑀺 𑀫𑀼𑀝𑁆𑀞𑀺, 𑀓𑀼𑀘𑁆𑀙𑀺 𑀯𑀢𑁆𑀣𑀺 𑀲𑀸𑀮𑀺 𑀯𑀻𑀳𑀺;

𑀩𑁆𑀬𑀸𑀥𑀺 𑀑𑀥𑀺 𑀩𑁄𑀥𑀺 𑀲𑀦𑁆𑀥𑀺, 𑀭𑀸𑀲𑀺 𑀓𑁂𑀲𑀺 𑀲𑀸𑀢𑀺 𑀤𑀻𑀧𑀺.

𑀇𑀲𑀺 ¶ 𑀫𑀼𑀦𑀺 𑀫𑀡𑀺 𑀥𑀦𑀺 𑀬𑀢𑀺 𑀕𑀺𑀭𑀺 𑀭𑀯𑀺 𑀓𑀯𑀺,

𑀓𑀧𑀺 𑀅𑀲𑀺 𑀫𑀲𑀺 𑀦𑀺𑀥𑀺 𑀯𑀺𑀥𑀺 𑀅𑀳𑀺 𑀓𑀺𑀫𑀺 𑀧𑀢𑀺;

𑀳𑀭𑀺 𑀅𑀭𑀺 𑀢𑀺𑀫𑀺 𑀓𑀮𑀺 𑀩𑀮𑀺 𑀚𑀮𑀥𑀺 𑀕𑀳𑀧𑀢𑀺,

𑀉𑀭𑀼𑀥𑀺𑀢𑀺 𑀯𑀭𑀫𑀢𑀺 𑀦𑀺𑀭𑀼𑀧𑀥𑀺 𑀅𑀥𑀺𑀧𑀢𑀺.

𑀅𑀜𑁆𑀚𑀮𑀺 𑀲𑀸𑀭𑀣𑀺 𑀅𑀢𑀺𑀣𑀺 𑀲𑀫𑀸𑀥𑀺 𑀉𑀤𑀥𑀺𑀧𑁆𑀧𑀪𑀼𑀢𑀬𑁄.

𑀇𑀓𑀸𑀭𑀦𑁆𑀢𑀁.

𑀈𑀓𑀸𑀭𑀦𑁆𑀢𑁄 𑀧𑀼𑀮𑁆𑀮𑀺𑀗𑁆𑀕𑁄 𑀤𑀡𑁆𑀟𑀻𑀲𑀤𑁆𑀤𑁄.

‘‘𑀤𑀡𑁆𑀟𑀻 𑀲𑀺’’ 𑀇𑀢𑀻𑀥 𑁋

‘‘𑀅𑀖𑁄 𑀭𑀲𑁆𑀲𑀫𑁂𑀓𑀯𑀘𑀦𑀬𑁄𑀲𑁆𑀯𑀧𑀺 𑀘𑀸’’𑀢𑀺 𑀭𑀲𑁆𑀲𑀢𑁆𑀢𑁂 𑀲𑀫𑁆𑀧𑀢𑁆𑀢𑁂 𑀏𑀢𑁆𑀣𑁂𑀯𑀸𑀧𑀺𑀕𑁆𑀕𑀳𑀡𑁂𑀦 𑀲𑀺𑀲𑁆𑀫𑀺𑀁 𑀢𑀤𑀪𑀸𑀯𑁂 𑀲𑀺𑀤𑁆𑀥𑁂 𑀦𑀺𑀬𑀫𑀢𑁆𑀣𑀫𑀸𑀳.

‘‘𑀭𑀲𑁆𑀲’’𑀦𑁆𑀢𑀺 𑀯𑀢𑁆𑀢𑀫𑀸𑀦𑁂 𑁋

𑁧𑁫𑁦. 𑀦 𑀲𑀺𑀲𑁆𑀫𑀺𑀫𑀦𑀧𑀼𑀁𑀲𑀓𑀸𑀦𑀺.

𑀲𑀺𑀲𑁆𑀫𑀺𑀁 𑀦𑀧𑀼𑀁𑀲𑀓𑀯𑀚𑁆𑀚𑀺𑀢𑀸𑀦𑀺 𑀮𑀺𑀗𑁆𑀕𑀸𑀦𑀺 𑀦 𑀭𑀲𑁆𑀲𑀫𑀸𑀧𑀚𑁆𑀚𑀦𑁆𑀢𑁂𑀢𑀺 𑀭𑀲𑁆𑀲𑀢𑁆𑀢𑀸𑀪𑀸𑀯𑁄, 𑀲𑀺𑀮𑁄𑀧𑁄. 𑀤𑀡𑁆𑀟𑀻 𑀢𑀺𑀝𑁆𑀞𑀢𑀺.

𑀅𑀦𑀧𑀼𑀁𑀲𑀓𑀸𑀦𑀻𑀢𑀺 𑀓𑀺𑀁? 𑀲𑀼𑀔𑀓𑀸𑀭𑀺 𑀤𑀸𑀦𑀁.

𑀏𑀢𑁆𑀣 𑀘 𑁋

𑀯𑀺𑀲𑀤𑀸𑀯𑀺𑀲𑀤𑀸𑀓𑀸𑀭-𑀯𑁄𑀳𑀸𑀭𑁄𑀪𑀬𑀫𑀼𑀢𑁆𑀢𑀓𑀸;

𑀧𑀼𑀫𑀸𑀤𑀺𑀚𑀸𑀦𑀦𑁂 𑀳𑁂𑀢𑀼-𑀪𑀸𑀯𑀢𑁄 𑀮𑀺𑀗𑁆𑀕𑀫𑀻𑀭𑀺𑀢𑀸.

𑀬𑁄𑀮𑁄𑀧𑁂 𑀤𑀡𑁆𑀟𑀻 𑀢𑀺𑀝𑁆𑀞𑀦𑁆𑀢𑀺.

𑀇𑀢𑀭𑀢𑁆𑀭 ‘‘𑀅𑀖𑁄 𑀭𑀲𑁆𑀲’’𑀫𑀺𑀘𑁆𑀘𑀸𑀤𑀺𑀦𑀸 𑀭𑀲𑁆𑀲𑀢𑁆𑀢𑁂 𑀓𑀢𑁂 𑁋

‘‘𑀛𑀢𑁄, 𑀓𑀢𑀭𑀲𑁆𑀲𑀸’’𑀢𑀺 𑀘 𑀯𑀢𑁆𑀢𑀢𑁂.

𑁧𑁫𑁧. 𑀬𑁄𑀦𑀁 ¶ 𑀦𑁄.

𑀲𑀩𑁆𑀩𑁂𑀲𑀁 𑀬𑁄𑀦𑀁 𑀲𑀸𑀮𑀧𑀦𑀸𑀦𑀁 𑀛𑀢𑁄 𑀓𑀢𑀭𑀲𑁆𑀲𑀸 𑀧𑀭𑁂𑀲𑀁 𑀦𑁄𑀇𑀘𑁆𑀘𑀸𑀤𑁂𑀲𑁄 𑀳𑁄𑀢𑀺. 𑀤𑀡𑁆𑀟𑀺𑀦𑁄 𑀢𑀺𑀝𑁆𑀞𑀦𑁆𑀢𑀺.

𑀓𑀢𑀭𑀲𑁆𑀲𑀸𑀢𑀺 𑀓𑀺𑀁? 𑀅𑀕𑁆𑀕𑀬𑁄.

𑀅𑀥𑀺𑀓𑀸𑀭𑀁 𑀯𑀺𑀦𑀸 ‘‘𑀬𑁄𑀦𑀁,

𑀦𑁄’’𑀢𑀺 𑀬𑁄𑀕𑀯𑀺𑀪𑀸𑀕𑀢𑁄;

𑀓𑁆𑀯𑀘𑀺 𑀅𑀓𑀢𑀭𑀲𑁆𑀲𑀸𑀧𑀺,

𑀦𑁄 𑀲𑀸𑀭𑀫𑀢𑀺𑀦𑁄 𑀬𑀣𑀸.

𑀆𑀮𑀧𑀦𑁂 ‘‘𑀕𑁂’’𑀢𑀺 𑀯𑀢𑁆𑀢𑀢𑁂.

𑁧𑁫𑁨. 𑀛𑀮𑀧𑀸 𑀭𑀲𑁆𑀲𑀁.

𑀛𑀮𑀧𑀇𑀘𑁆𑀘𑁂𑀢𑁂 𑀭𑀲𑁆𑀲𑀫𑀸𑀧𑀚𑁆𑀚𑀦𑁆𑀢𑁂 𑀕𑁂 𑀧𑀭𑁂. 𑀪𑁄 𑀤𑀡𑁆𑀟𑀺.

‘‘𑀅𑀖𑁄 𑀭𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸𑀯 𑀲𑀺𑀤𑁆𑀥𑁂𑀧𑀺 𑀭𑀲𑁆𑀲𑀢𑁆𑀢𑁂 𑀧𑀼𑀦𑀸𑀭𑀫𑁆𑀪𑁄 𑀦𑀺𑀬𑀫𑀢𑁆𑀣𑁄, 𑀢𑁂𑀦 ‘‘𑀪𑁄 𑀕𑁄’’𑀢𑀺𑀆𑀤𑀻𑀲𑀼 𑀦 𑀪𑀯𑀢𑀺. 𑀤𑀡𑁆𑀟𑀻 𑀤𑀡𑁆𑀟𑀺𑀦𑁄.

𑀤𑀼𑀢𑀺𑀬𑀸𑀬𑀁 𑀭𑀲𑁆𑀲𑀢𑁆𑀢𑁂 𑀓𑀢𑁂 ‘‘𑀅’’𑀫𑀺𑀢𑀺 𑀯𑀢𑁆𑀢𑀢𑁂, ‘‘𑀖𑀧𑀢𑁄 𑀲𑁆𑀫𑀺𑀁 𑀬𑀁 𑀯𑀸’’𑀢𑀺 𑀇𑀢𑁄 𑀫𑀡𑁆𑀟𑀽𑀓𑀕𑀢𑀺𑀬𑀸 ‘‘𑀯𑀸’’𑀢𑀺 𑀯𑀢𑁆𑀢𑀢𑁂.

𑁧𑁫𑁩. 𑀦𑀁 𑀛𑀢𑁄 𑀓𑀢𑀭𑀲𑁆𑀲𑀸.

𑀛𑀢𑁄 𑀓𑀢𑀭𑀲𑁆𑀲𑀸 𑀧𑀭𑀲𑁆𑀲 𑀅𑀁𑀯𑀘𑀦𑀲𑁆𑀲 𑀦𑀁 𑀳𑁄𑀢𑀺 𑀯𑀸. 𑀤𑀡𑁆𑀟𑀺𑀦𑀁 𑀤𑀡𑁆𑀟𑀺𑀁, 𑀤𑀡𑁆𑀟𑀻 𑀤𑀡𑁆𑀟𑀺𑀦𑁄, 𑀤𑀡𑁆𑀟𑀺𑀦𑀸, 𑀤𑀡𑁆𑀟𑀻𑀳𑀺 𑀤𑀡𑁆𑀟𑀻𑀪𑀺, 𑀤𑀡𑁆𑀟𑀺𑀦𑁄 𑀤𑀡𑁆𑀟𑀺𑀲𑁆𑀲, 𑀤𑀡𑁆𑀟𑀻𑀦𑀁.

‘‘𑀛𑀮𑀢𑁄 𑀘𑀸’’𑀢𑀺 𑀦𑀸. 𑀤𑀡𑁆𑀟𑀺𑀦𑀸 𑀤𑀡𑁆𑀟𑀺𑀲𑁆𑀫𑀸 𑀤𑀡𑁆𑀟𑀺𑀫𑁆𑀳𑀸, 𑀤𑀡𑁆𑀟𑀻𑀳𑀺 𑀤𑀡𑁆𑀟𑀻𑀪𑀺, 𑀤𑀡𑁆𑀟𑀺𑀦𑁄 𑀤𑀡𑁆𑀟𑀺𑀲𑁆𑀲, 𑀤𑀡𑁆𑀟𑀻𑀦𑀁.

‘‘𑀛𑀢𑁄, 𑀓𑀢𑀭𑀲𑁆𑀲𑀸’’𑀢𑀺 𑀘 𑀯𑀢𑁆𑀢𑀢𑁂, 𑀧𑀼𑀭𑁂 𑀯𑀺𑀬 ‘‘𑀯𑀸’’𑀢𑀺 𑀘.

𑁧𑁫𑁪. 𑀲𑁆𑀫𑀺𑀁 ¶ 𑀦𑀺.

𑀛𑀢𑁄 𑀓𑀢𑀭𑀲𑁆𑀲𑀸 𑀧𑀭𑀲𑁆𑀲 𑀲𑁆𑀫𑀺𑀁𑀯𑀘𑀦𑀲𑁆𑀲 𑀦𑀺𑀇𑀘𑁆𑀘𑀸𑀤𑁂𑀲𑁄 𑀳𑁄𑀢𑀺 𑀯𑀸. 𑀤𑀡𑁆𑀟𑀺𑀦𑀺 𑀤𑀡𑁆𑀟𑀺𑀲𑁆𑀫𑀺𑀁 𑀤𑀡𑁆𑀟𑀺𑀫𑁆𑀳𑀺, 𑀤𑀡𑁆𑀟𑀻𑀲𑀼.

𑀏𑀯𑀫𑀜𑁆𑀜𑀸𑀦𑀺𑀧𑀺 𑁋

𑀥𑀫𑁆𑀫𑀻 𑀲𑀗𑁆𑀖𑀻 𑀜𑀸𑀡𑀻 𑀳𑀢𑁆𑀣𑀻, 𑀘𑀓𑁆𑀓𑀻 𑀧𑀓𑁆𑀔𑀻 𑀤𑀸𑀞𑀻 𑀭𑀝𑁆𑀞𑀻;

𑀙𑀢𑁆𑀢𑀻 𑀫𑀸𑀮𑀻 𑀯𑀫𑁆𑀫𑀻 𑀬𑁄𑀕𑀻, 𑀪𑀸𑀕𑀻 𑀪𑁄𑀕𑀻 𑀓𑀸𑀫𑀻 𑀲𑀸𑀫𑀻.

𑀥𑀚𑀻 𑀕𑀡𑀻 𑀲𑀲𑀻 𑀓𑀼𑀝𑁆𑀞𑀻, 𑀚𑀝𑀻 𑀬𑀸𑀦𑀻 𑀲𑀼𑀔𑀻 𑀲𑀺𑀔𑀻;

𑀤𑀦𑁆𑀢𑀻 𑀫𑀦𑁆𑀢𑀻 𑀓𑀭𑀻 𑀘𑀸𑀕𑀻, 𑀓𑀼𑀲𑀮𑀻 𑀫𑀼𑀲𑀮𑀻 𑀩𑀮𑀻.

𑀧𑀸𑀧𑀓𑀸𑀭𑀻 𑀲𑀢𑁆𑀢𑀼𑀖𑀸𑀢𑀻, 𑀫𑀸𑀮𑁆𑀬𑀓𑀸𑀭𑀻 𑀤𑀻𑀖𑀚𑀻𑀯𑀻;

𑀥𑀫𑁆𑀫𑀘𑀸𑀭𑀻 𑀲𑀻𑀖𑀬𑀸𑀬𑀻, 𑀲𑀻𑀳𑀦𑀸𑀤𑀻 𑀪𑀽𑀫𑀺𑀲𑀸𑀬𑀻 𑁋

𑀇𑀘𑁆𑀘𑀸𑀤𑀻𑀦𑀺 𑀈𑀓𑀸𑀭𑀦𑁆𑀢𑀦𑀸𑀫𑀸𑀦𑀺.

𑀕𑀸𑀫𑀡𑀻𑀲𑀤𑁆𑀤𑀲𑁆𑀲 𑀢𑀼 𑀲𑀢𑁆𑀢𑀫𑀺𑀬𑀁 𑀪𑁂𑀤𑁄.

𑀕𑀸𑀫𑀡𑀻, 𑀕𑀸𑀫𑀡𑀻 𑀕𑀸𑀫𑀡𑀺𑀦𑁄, 𑀪𑁄 𑀕𑀸𑀫𑀡𑀺, 𑀪𑁄𑀦𑁆𑀢𑁄 𑀕𑀸𑀫𑀡𑀻 𑀪𑁄𑀦𑁆𑀢𑁄 𑀕𑀸𑀫𑀡𑀺𑀦𑁄, 𑀕𑀸𑀫𑀡𑀺𑀦𑀁 𑀕𑀸𑀫𑀡𑀺𑀁, 𑀕𑀸𑀫𑀡𑀻 𑀕𑀸𑀫𑀡𑀺𑀦𑁄.

𑀲𑁂𑀲𑀁 𑀤𑀡𑁆𑀟𑀻𑀲𑀫𑀁. 𑀦𑀺𑀆𑀤𑁂𑀲𑀸𑀪𑀸𑀯𑁄𑀯 𑀯𑀺𑀲𑁂𑀲𑁄. 𑀏𑀯𑀁 𑀲𑁂𑀦𑀸𑀦𑀻 𑀲𑀼𑀥𑀻𑀧𑁆𑀧𑀪𑀼𑀢𑀬𑁄.

𑀈𑀓𑀸𑀭𑀦𑁆𑀢𑀁.

𑀉𑀓𑀸𑀭𑀦𑁆𑀢𑁄 𑀧𑀼𑀮𑁆𑀮𑀺𑀗𑁆𑀕𑁄 𑀪𑀺𑀓𑁆𑀔𑀼𑀲𑀤𑁆𑀤𑁄.

𑀢𑀣𑁂𑀯 𑀪𑀺𑀓𑁆𑀔𑀼𑀲𑀤𑁆𑀤𑀢𑁄 𑀲𑀺, 𑀲𑀺𑀮𑁄𑀧𑁄. 𑀲𑁄 𑀪𑀺𑀓𑁆𑀔𑀼.

𑀩𑀳𑀼𑀯𑀘𑀦𑁂 ‘‘𑀖𑀧𑀢𑁄 𑀘 𑀬𑁄𑀦𑀁 𑀮𑁄𑀧𑁄’’𑀢𑀺 𑀬𑁄𑀮𑁄𑀧𑁄, ‘‘𑀬𑁄𑀲𑀼 𑀓𑀢’’𑀇𑀘𑁆𑀘𑀸𑀤𑀺𑀦𑀸 𑀤𑀻𑀖𑁄. 𑀢𑁂 𑀪𑀺𑀓𑁆𑀔𑀽.

𑀮𑁄𑀧𑀸𑀪𑀸𑀯𑁂 ‘‘𑀯𑀸, 𑀬𑁄𑀦’’𑀦𑁆𑀢𑀺 𑀘 𑀯𑀢𑁆𑀢𑀢𑁂.

𑁧𑁫𑁫. 𑀮𑀢𑁄 ¶ 𑀯𑁄𑀓𑀸𑀭𑁄 𑀘.

𑀮𑀲𑀜𑁆𑀜𑀢𑁄 𑀧𑀭𑁂𑀲𑀁 𑀬𑁄𑀯𑀘𑀦𑀸𑀦𑀁 𑀯𑁄𑀓𑀸𑀭𑀸𑀤𑁂𑀲𑁄 𑀳𑁄𑀢𑀺 𑀯𑀸. 𑀓𑀸𑀭𑀕𑁆𑀕𑀳𑀡𑁂𑀦 𑀬𑁄𑀦𑀁 𑀦𑁄 𑀘 𑀳𑁄𑀢𑀺. 𑀘𑀲𑀤𑁆𑀤𑀕𑁆𑀕𑀳𑀡𑀁 𑀓𑀢𑁆𑀣𑀘𑀺 𑀦𑀺𑀯𑀢𑁆𑀢𑀦𑀢𑁆𑀣𑀁. 𑀅𑀣 𑀯𑀸 𑀘𑀕𑁆𑀕𑀳𑀡𑀁 𑀦𑁄𑀕𑁆𑀕𑀳𑀡𑀸𑀦𑀼𑀯𑀢𑁆𑀢𑀦𑀢𑁆𑀣𑀁, 𑀢𑁂𑀦 𑀚𑀦𑁆𑀢𑀼𑀲𑀩𑁆𑀩𑀜𑁆𑀜𑀽𑀆𑀤𑀺𑀢𑁄 𑀬𑁄𑀦𑀁 𑀦𑁄 𑀘 𑀳𑁄𑀢𑀺. 𑀯𑀸𑀲𑀤𑁆𑀤𑁄 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄. 𑀢𑁂𑀦 𑁋

𑀪𑀺𑀓𑁆𑀔𑀼𑀧𑁆𑀧𑀪𑀼𑀢𑀺𑀢𑁄 𑀦𑀺𑀘𑁆𑀘𑀁, 𑀯𑁄 𑀬𑁄𑀦𑀁 𑀳𑁂𑀢𑀼𑀆𑀤𑀺𑀢𑁄;

𑀯𑀺𑀪𑀸𑀲𑀸 𑀦 𑀘 𑀯𑁄 𑀦𑁄 𑀘, 𑀅𑀫𑀼𑀧𑁆𑀧𑀪𑀼𑀢𑀺𑀢𑁄 𑀪𑀯𑁂.

‘‘𑀅𑀢𑁆𑀢𑀁, 𑀅𑀓𑀢𑀭𑀲𑁆𑀲𑁄’’𑀢𑀺 𑀘 𑀯𑀢𑁆𑀢𑀢𑁂.

𑁧𑁫𑁬. 𑀯𑁂𑀯𑁄𑀲𑀼 𑀮𑁄 𑀘.

𑀯𑁂 𑀯𑁄𑀇𑀘𑁆𑀘𑁂𑀢𑁂𑀲𑀼 𑀘 𑀧𑀭𑁂𑀲𑀼 𑀅𑀓𑀢𑀭𑀲𑁆𑀲𑁄 𑀮𑁄 𑀅𑀢𑁆𑀢𑀫𑀸𑀧𑀚𑁆𑀚𑀢𑁂. 𑀪𑀺𑀓𑁆𑀔𑀯𑁄, 𑀪𑁄 𑀪𑀺𑀓𑁆𑀔𑀼, 𑀪𑀯𑀦𑁆𑀢𑁄 𑀪𑀺𑀓𑁆𑀔𑀽.

𑀮𑁄𑀧𑀸𑀪𑀸𑀯𑁂 𑁋

𑁧𑁫𑁭. 𑀅𑀓𑀢𑀭𑀲𑁆𑀲𑀸 𑀮𑀢𑁄 𑀬𑁆𑀯𑀸𑀮𑀧𑀦𑀲𑁆𑀲 𑀯𑁂𑀯𑁄.

𑀅𑀓𑀢𑀭𑀲𑁆𑀲𑀸 𑀮𑀢𑁄 𑀧𑀭𑀲𑁆𑀲 𑀆𑀮𑀧𑀦𑁂 𑀯𑀺𑀳𑀺𑀢𑀲𑁆𑀲 𑀬𑁄𑀇𑀘𑁆𑀘𑁂𑀢𑀲𑁆𑀲 𑀯𑁂 𑀯𑁄𑀆𑀤𑁂𑀲𑀸 𑀳𑁄𑀦𑁆𑀢𑀺. 𑀅𑀢𑁆𑀢𑀁. 𑀪𑀯𑀦𑁆𑀢𑁄 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀯𑁄. ‘‘𑀅𑀁 𑀫𑁄 𑀦𑀺𑀕𑁆𑀕𑀳𑀻𑀢𑀁 𑀛𑀮𑀧𑁂𑀳𑀻’’𑀢𑀺 𑀦𑀺𑀕𑁆𑀕𑀳𑀻𑀢𑀁.

𑀪𑀺𑀓𑁆𑀔𑀼𑀁, 𑀪𑀺𑀓𑁆𑀔𑀽 𑀪𑀺𑀓𑁆𑀔𑀯𑁄, 𑀪𑀺𑀓𑁆𑀔𑀼𑀦𑀸, 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀽𑀪𑀺 𑀪𑀺𑀓𑁆𑀔𑀼𑀳𑀺 𑀪𑀺𑀓𑁆𑀔𑀼𑀪𑀺, 𑀪𑀺𑀓𑁆𑀔𑀼𑀦𑁄 𑀪𑀺𑀓𑁆𑀔𑀼𑀲𑁆𑀲, 𑀪𑀺𑀓𑁆𑀔𑀽𑀦𑀁 ¶ 𑀪𑀺𑀓𑁆𑀔𑀼𑀦𑀁, 𑀪𑀺𑀓𑁆𑀔𑀼𑀦𑀸 𑀪𑀺𑀓𑁆𑀔𑀼𑀲𑁆𑀫𑀸 𑀪𑀺𑀓𑁆𑀔𑀼𑀫𑁆𑀳𑀸, 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀽𑀪𑀺 𑀪𑀺𑀓𑁆𑀔𑀼𑀳𑀺 𑀪𑀺𑀓𑁆𑀔𑀼𑀪𑀺, 𑀪𑀺𑀓𑁆𑀔𑀼𑀦𑁄 𑀪𑀺𑀓𑁆𑀔𑀼𑀲𑁆𑀲, 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀁, 𑀪𑀺𑀓𑁆𑀔𑀼𑀫𑁆𑀳𑀺 𑀪𑀺𑀓𑁆𑀔𑀼𑀲𑁆𑀫𑀺𑀁, 𑀪𑀺𑀓𑁆𑀔𑀽𑀲𑀼 𑀪𑀺𑀓𑁆𑀔𑀼𑀲𑀼.

𑀏𑀯𑀁 𑀲𑁂𑀢𑀼 𑀓𑁂𑀢𑀼 𑀭𑀸𑀳𑀼 𑀪𑀸𑀦𑀼 𑀧𑀗𑁆𑀕𑀼 𑀉𑀘𑁆𑀙𑀼 𑀯𑁂𑀴𑀼 𑀫𑀘𑁆𑀘𑀼 𑀲𑀺𑀦𑁆𑀥𑀼 𑀩𑀦𑁆𑀥𑀼 𑀦𑁂𑀭𑀼 𑀫𑁂𑀭𑀼 𑀲𑀢𑁆𑀢𑀼 𑀓𑀸𑀭𑀼 𑀳𑁂𑀢𑀼 𑀚𑀦𑁆𑀢𑀼 𑀭𑀼𑀭𑀼 𑀧𑀝𑀼 𑀇𑀘𑁆𑀘𑀸𑀤𑀬𑁄.

𑀳𑁂𑀢𑀼𑀚𑀦𑁆𑀢𑀼𑀲𑀤𑁆𑀤𑀸𑀦𑀁 𑀧𑀞𑀫𑀸𑀤𑀼𑀢𑀺𑀬𑀸𑀲𑀼 𑀯𑀺𑀲𑁂𑀲𑁄.

𑀳𑁂𑀢𑀼, 𑀳𑁂𑀢𑀽 𑀳𑁂𑀢𑀯𑁄 𑀳𑁂𑀢𑀼𑀬𑁄, 𑀪𑁄 𑀳𑁂𑀢𑀼, 𑀪𑁄𑀦𑁆𑀢𑁄 𑀳𑁂𑀢𑀽 𑀳𑁂𑀢𑀯𑁂 𑀳𑁂𑀢𑀯𑁄, 𑀳𑁂𑀢𑀼𑀁, 𑀳𑁂𑀢𑀽 𑀳𑁂𑀢𑀯𑁄 𑀳𑁂𑀢𑀼𑀬𑁄. 𑀲𑁂𑀲𑀁 𑀪𑀺𑀓𑁆𑀔𑀼𑀲𑀫𑀁.

𑀚𑀦𑁆𑀢𑀼, 𑀚𑀦𑁆𑀢𑀽 𑀚𑀦𑁆𑀢𑀯𑁄. 𑀓𑀸𑀭𑀕𑁆𑀕𑀳𑀡𑁂𑀦 𑀬𑁄𑀦𑀁 𑀦𑁄 𑀘 𑀳𑁄𑀢𑀺. 𑀚𑀦𑁆𑀢𑀼𑀦𑁄 𑀚𑀦𑁆𑀢𑀼𑀬𑁄, 𑀪𑁄 𑀚𑀦𑁆𑀢𑀼, 𑀚𑀦𑁆𑀢𑀽 𑀚𑀦𑁆𑀢𑀯𑁂 𑀚𑀦𑁆𑀢𑀯𑁄, 𑀚𑀦𑁆𑀢𑀼𑀁, 𑀚𑀦𑁆𑀢𑀽 𑀚𑀦𑁆𑀢𑀯𑁄 𑀚𑀦𑁆𑀢𑀼𑀦𑁄 𑀚𑀦𑁆𑀢𑀼𑀬𑁄 𑀇𑀘𑁆𑀘𑀸𑀤𑀺.

𑀲𑀢𑁆𑀣𑀼𑀲𑀤𑁆𑀤𑀲𑁆𑀲 𑀪𑁂𑀤𑁄. ‘‘𑀲𑀢𑁆𑀣𑀼 𑀲𑀺’’𑀇𑀢𑀻𑀥 𑁋

‘‘𑀅𑀦𑁆𑀢𑁄’’𑀢𑀺 𑀯𑀢𑁆𑀢𑀢𑁂.

𑁧𑁫𑁮. 𑀲𑀢𑁆𑀣𑀼𑀧𑀺𑀢𑀸𑀤𑀻𑀦𑀫𑀸 𑀲𑀺𑀲𑁆𑀫𑀺𑀁 𑀲𑀺𑀮𑁄𑀧𑁄 𑀘.

𑀲𑀢𑁆𑀣𑀼 𑀧𑀺𑀢𑀼 𑀫𑀸𑀢𑀼 𑀪𑀸𑀢𑀼 𑀥𑀻𑀢𑀼 𑀓𑀢𑁆𑀢𑀼𑀇𑀘𑁆𑀘𑁂𑀯𑀫𑀸𑀤𑀻𑀦𑀫𑀦𑁆𑀢𑁄 𑀆𑀢𑁆𑀢𑀫𑀸𑀧𑀚𑁆𑀚𑀢𑁂 𑀲𑀺𑀲𑁆𑀫𑀺𑀁, 𑀲𑀺𑀮𑁄𑀧𑁄 𑀘 𑀳𑁄𑀢𑀺. 𑀲𑀢𑁆𑀣𑀸.

‘‘𑀲𑀢𑁆𑀣𑀼 𑀧𑀺𑀢𑀸𑀤𑀻𑀦’’𑀦𑁆𑀢𑀺 𑀅𑀥𑀺𑀓𑀸𑀭𑁄.

𑁧𑁫𑁯. 𑀅𑀜𑁆𑀜𑁂𑀲𑁆𑀯𑀸𑀭𑀢𑁆𑀢𑀁 ¶ .

𑀲𑀢𑁆𑀣𑀼 𑀧𑀺𑀢𑀸𑀤𑀻𑀦𑀫𑀦𑁆𑀢𑁄 𑀲𑀺𑀯𑀘𑀦𑀢𑁄 𑀅𑀜𑁆𑀜𑁂𑀲𑀼 𑀯𑀘𑀦𑁂𑀲𑀼 𑀆𑀭𑀢𑁆𑀢𑀫𑀸𑀧𑀚𑁆𑀚𑀢𑁂. 𑀆𑀭𑀢𑁆𑀢𑀫𑀺𑀢𑀺𑀪𑀸𑀯𑀦𑀺𑀤𑁆𑀤𑁂𑀲𑁂𑀦 𑀓𑀢𑁆𑀣𑀘𑀺 𑀅𑀦𑀺𑀬𑀫𑀁 𑀤𑀲𑁆𑀲𑁂𑀢𑀺.

𑀆𑀭𑀕𑁆𑀕𑀳𑀡𑀫𑀦𑀼𑀯𑀢𑁆𑀢𑀢𑁂.

𑁧𑁬𑁦. 𑀢𑀢𑁄 𑀬𑁄𑀦𑀫𑁄 𑀢𑀼.

𑀢𑀢𑁄 𑀆𑀭𑀸𑀤𑁂𑀲𑀢𑁄 𑀲𑀩𑁆𑀩𑁂𑀲𑀁 𑀬𑁄𑀦𑀁 𑀑𑀓𑀸𑀭𑀸𑀤𑁂𑀲𑁄 𑀳𑁄𑀢𑀺.

𑀢𑀼𑀕𑁆𑀕𑀳𑀡𑁂𑀦 𑀅𑀜𑁆𑀜𑁂𑀳𑀺𑀧𑀺 𑀘𑀢𑀼𑀉𑀪𑀦𑀤𑀻𑀕𑀯𑀸𑀤𑀻𑀳𑀺 𑀬𑁄𑀦𑀫𑁄𑀓𑀸𑀭𑁄 𑀳𑁄𑀢𑀺, 𑀲𑀭𑀮𑁄𑀧𑀸𑀤𑀺. 𑀲𑀢𑁆𑀣𑀸𑀭𑁄.

𑀆𑀮𑀧𑀦𑁂 ‘‘𑀅𑀓𑀸𑀭𑀧𑀺𑀢𑀸𑀤𑁆𑀬𑀦𑁆𑀢𑀸𑀦𑀫𑀸’’𑀢𑀺 𑀆𑀢𑁆𑀢𑀁. ‘‘𑀕𑁂 𑀭𑀲𑁆𑀲’’𑀦𑁆𑀢𑀺 𑀅𑀥𑀺𑀓𑀺𑀘𑁆𑀘 ‘‘𑀆𑀓𑀸𑀭𑁄 𑀯𑀸’’𑀢𑀺 𑀯𑀺𑀓𑀧𑁆𑀧𑁂𑀦 𑀭𑀲𑁆𑀲𑀢𑁆𑀢𑀁, 𑀯𑀮𑁄𑀧𑁄. 𑀪𑁄 𑀲𑀢𑁆𑀣 𑀪𑁄 𑀲𑀢𑁆𑀣𑀸, 𑀪𑀯𑀦𑁆𑀢𑁄 𑀲𑀢𑁆𑀣𑀸𑀭𑁄, 𑀲𑀢𑁆𑀣𑀸𑀭𑀁, 𑀲𑀢𑁆𑀣𑀸𑀭𑁂 𑀲𑀢𑁆𑀣𑀸𑀭𑁄.

‘‘𑀢𑀢𑁄’’𑀢𑀺 𑀘 𑀯𑀢𑁆𑀢𑀢𑁂.

𑁧𑁬𑁧. 𑀦𑀸 𑀆.

𑀢𑀢𑁄 𑀆𑀭𑀸𑀤𑁂𑀲𑀢𑁄 𑀦𑀸𑀯𑀘𑀦𑀲𑁆𑀲 𑀆𑀓𑀸𑀭𑀸𑀤𑁂𑀲𑁄 𑀳𑁄𑀢𑀺. 𑀲𑀢𑁆𑀣𑀸𑀭𑀸, 𑀲𑀢𑁆𑀣𑀼𑀦𑀸𑀢𑀺 𑀆𑀭𑀢𑁆𑀢𑀫𑀺𑀢𑀺𑀪𑀸𑀯𑀦𑀺𑀤𑁆𑀤𑁂𑀲𑁂𑀦 𑀲𑀺𑀤𑁆𑀥𑀁. 𑀲𑀢𑁆𑀣𑀸𑀭𑁂𑀳𑀺 𑀲𑀢𑁆𑀣𑀸𑀭𑁂𑀪𑀺.

‘‘𑀯𑀸 𑀦𑀁𑀫𑁆𑀳𑀻’’𑀢𑀺 𑀇𑀢𑁄 ‘‘𑀯𑀸’’𑀢𑀺 𑀯𑀢𑁆𑀢𑀢𑁂.

𑁧𑁬𑁨. 𑀉 ¶ 𑀲𑀲𑁆𑀫𑀺𑀁 𑀲𑀮𑁄𑀧𑁄 𑀘.

𑀲𑀢𑁆𑀣𑀼 𑀧𑀺𑀢𑀼𑀇𑀘𑁆𑀘𑁂𑀯𑀫𑀸𑀤𑀻𑀦𑀫𑀦𑁆𑀢𑀲𑁆𑀲 𑀉𑀢𑁆𑀢𑀁 𑀳𑁄𑀢𑀺 𑀯𑀸 𑀲𑀲𑁆𑀫𑀺𑀁, 𑀲𑀮𑁄𑀧𑁄 𑀘 𑀳𑁄𑀢𑀺. 𑀆𑀭𑀸𑀤𑁂𑀲𑀸𑀧𑀯𑀸𑀤𑁄𑀬𑀁. 𑀲𑀢𑁆𑀣𑀼, 𑀅𑀜𑁆𑀜𑀢𑁆𑀣 𑀪𑀸𑀯𑀦𑀺𑀤𑁆𑀤𑁂𑀲𑁂𑀦𑀸𑀭𑀸𑀪𑀸𑀯𑁄. 𑀲𑀢𑁆𑀣𑀼𑀲𑁆𑀲 𑀲𑀢𑁆𑀣𑀼𑀦𑁄.

‘‘𑀆𑀭𑀢𑁆𑀢’’𑀦𑁆𑀢𑀺 𑀯𑀢𑁆𑀢𑀢𑁂.

𑁧𑁬𑁩. 𑀯𑀸 𑀦𑀁𑀫𑁆𑀳𑀺.

𑀲𑀢𑁆𑀣𑀼 𑀧𑀺𑀢𑀼𑀆𑀤𑀻𑀦𑀫𑀦𑁆𑀢𑁄 𑀆𑀭𑀢𑁆𑀢𑀫𑀸𑀧𑀚𑁆𑀚𑀢𑁂 𑀯𑀸 𑀦𑀁𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀲𑀢𑁆𑀣𑀸𑀭𑀸𑀦𑀁.

𑀆𑀭𑀸𑀪𑀸𑀯𑁂 ‘‘𑀯𑀸 𑀦𑀁𑀫𑁆𑀳𑀻’’𑀢𑀺 𑀯𑀢𑁆𑀢𑀢𑁂.

𑁧𑁬𑁪. 𑀲𑀢𑁆𑀣𑀼𑀦𑀢𑁆𑀢𑀜𑁆𑀘.

𑀲𑀢𑁆𑀣𑀼𑀲𑀤𑁆𑀤𑀦𑁆𑀢𑀲𑁆𑀲, 𑀧𑀺𑀢𑀸𑀤𑀻𑀦𑀫𑀦𑁆𑀢𑀲𑁆𑀲 𑀘 𑀅𑀢𑁆𑀢𑀁 𑀳𑁄𑀢𑀺 𑀯𑀸 𑀦𑀁𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺, 𑀧𑀼𑀦 𑀲𑀢𑁆𑀣𑀼𑀕𑁆𑀕𑀳𑀡𑀁 𑀲𑀢𑁆𑀣𑀼𑀦𑁄 𑀦𑀺𑀘𑁆𑀘𑀯𑀺𑀥𑀸𑀦𑀢𑁆𑀣𑀁. 𑀲𑀢𑁆𑀣𑀸𑀦𑀁.

‘‘𑀅𑀫𑁆𑀳𑀢𑀼𑀫𑁆𑀳𑀦𑁆𑀢𑀼𑀭𑀸𑀚𑀩𑁆𑀭𑀳𑁆𑀫𑀢𑁆𑀢𑀲𑀔𑀲𑀢𑁆𑀣𑀼𑀧𑀺𑀢𑀸𑀤𑀻𑀳𑀺 𑀲𑁆𑀫𑀸 𑀦𑀸𑀯𑀸’’𑀢𑀺 𑀲𑁆𑀫𑀸𑀯𑀘𑀦𑀲𑁆𑀲𑀦𑀸𑀪𑀸𑀯𑁄. 𑀲𑀢𑁆𑀣𑀸𑀭𑀸, 𑀲𑀢𑁆𑀣𑀸𑀭𑁂𑀳𑀺 𑀲𑀢𑁆𑀣𑀸𑀭𑁂𑀪𑀺, 𑀲𑀢𑁆𑀣𑀼 𑀲𑀢𑁆𑀣𑀼𑀦𑁄 𑀲𑀢𑁆𑀣𑀼𑀲𑁆𑀲, 𑀲𑀢𑁆𑀣𑀸𑀭𑀸𑀦𑀁 𑀲𑀢𑁆𑀣𑀸𑀦𑀁.

‘‘𑀆𑀭𑀢𑁄’’𑀢𑀺 𑀯𑀢𑁆𑀢𑀢𑁂.

𑁧𑁬𑁫. 𑀢𑀢𑁄 𑀲𑁆𑀫𑀺𑀫𑀺.

𑀢𑀢𑁄 𑀆𑀭𑀸𑀤𑁂𑀲𑀢𑁄 𑀲𑁆𑀫𑀺𑀁𑀯𑀘𑀦𑀲𑁆𑀲 𑀇𑀓𑀸𑀭𑀸𑀤𑁂𑀲𑁄 𑀳𑁄𑀢𑀺. 𑀧𑀼𑀦 𑀢𑀢𑁄𑀕𑁆𑀕𑀳𑀡𑁂𑀦 𑀅𑀜𑁆𑀜𑀲𑁆𑀫𑀸𑀧𑀺 𑀲𑁆𑀫𑀺𑀁𑀯𑀘𑀦𑀲𑁆𑀲 𑀇𑀓𑀸𑀭𑁄. 𑀬𑀣𑀸 𑁋 𑀪𑀼𑀯𑀺, 𑀤𑀺𑀯𑀺.

𑁧𑁬𑁬. 𑀆𑀭𑁄 ¶ 𑀭𑀲𑁆𑀲𑀫𑀺𑀓𑀸𑀭𑁂.

𑀆𑀭𑀸𑀤𑁂𑀲𑁄 𑀭𑀲𑁆𑀲𑀫𑀸𑀧𑀚𑁆𑀚𑀢𑁂 𑀇𑀓𑀸𑀭𑁂 𑀧𑀭𑁂, 𑀲𑀢𑁆𑀣𑀭𑀺, 𑀲𑀢𑁆𑀣𑀸𑀭𑁂𑀲𑀼.

𑀏𑀯𑀁 𑀓𑀢𑁆𑀢𑀸, 𑀓𑀢𑁆𑀢𑀸𑀭𑁄, 𑀪𑁄 𑀓𑀢𑁆𑀢 𑀪𑁄 𑀓𑀢𑁆𑀢𑀸, 𑀪𑀯𑀦𑁆𑀢𑁄 𑀓𑀢𑁆𑀢𑀸𑀭𑁄, 𑀓𑀢𑁆𑀢𑀸𑀭𑀁, 𑀓𑀢𑁆𑀢𑀸𑀭𑁂 𑀓𑀢𑁆𑀢𑀸𑀭𑁄, 𑀓𑀢𑁆𑀢𑀸𑀭𑀸, 𑀓𑀢𑁆𑀢𑀸𑀭𑁂𑀳𑀺 𑀓𑀢𑁆𑀢𑀸𑀭𑁂𑀪𑀺. ‘‘𑀉 𑀲𑀲𑁆𑀫𑀺𑀁 𑀲𑀮𑁄𑀧𑁄 𑀘𑀸’’𑀢𑀺 𑀉𑀢𑁆𑀢𑀁, 𑀲𑀮𑁄𑀧𑁄 𑀘. 𑀓𑀢𑁆𑀢𑀼 𑀓𑀢𑁆𑀢𑀼𑀦𑁄 𑀓𑀢𑁆𑀢𑀼𑀲𑁆𑀲, 𑀓𑀢𑁆𑀢𑀸𑀭𑀸𑀦𑀁 𑀓𑀢𑁆𑀢𑀸𑀦𑀁 𑀓𑀢𑁆𑀢𑀽𑀦𑀁 𑀓𑀢𑁆𑀢𑀼𑀦𑀁, 𑀓𑀢𑁆𑀢𑀸𑀭𑀸, 𑀓𑀢𑁆𑀢𑀸𑀭𑁂𑀳𑀺 𑀓𑀢𑁆𑀢𑀸𑀭𑁂𑀪𑀺, 𑀓𑀢𑁆𑀢𑀼 𑀓𑀢𑁆𑀢𑀼𑀦𑁄 𑀓𑀢𑁆𑀢𑀼𑀲𑁆𑀲, 𑀓𑀢𑁆𑀢𑀸𑀭𑀸𑀦𑀁 𑀓𑀢𑁆𑀢𑀸𑀦𑀁 𑀓𑀢𑁆𑀢𑀽𑀦𑀁 𑀓𑀢𑁆𑀢𑀼𑀦𑀁, 𑀓𑀢𑁆𑀢𑀭𑀺, 𑀓𑀢𑁆𑀢𑀸𑀭𑁂𑀲𑀼, 𑀆𑀭𑀸𑀪𑀸𑀯𑁂 𑀓𑀢𑁆𑀢𑀽𑀲𑀼 𑀓𑀢𑁆𑀢𑀼𑀲𑀼.

𑀏𑀯𑀁 𑁋

𑀪𑀢𑁆𑀢𑀼 𑀯𑀢𑁆𑀢𑀼 𑀦𑁂𑀢𑀼 𑀲𑁄𑀢𑀼, 𑀜𑀸𑀢𑀼 𑀚𑁂𑀢𑀼 𑀙𑁂𑀢𑁆𑀢𑀼 𑀪𑁂𑀢𑁆𑀢𑀼. 𑀤𑀸𑀢𑀼 𑀥𑀸𑀢𑀼 𑀦𑀢𑁆𑀢𑀼 𑀩𑁄𑀤𑁆𑀥𑀼, 𑀯𑀺𑀜𑁆𑀜𑀸𑀧𑁂𑀢𑀼 𑀆𑀤𑀬𑁄𑀧𑀺.

‘‘𑀉 𑀲𑀲𑁆𑀫𑀺𑀁 𑀲𑀮𑁄𑀧𑁄 𑀘𑀸’’𑀢𑀺 𑀯𑀢𑁆𑀢𑀢𑁂.

𑁧𑁬𑁭. 𑀲𑀓𑀫𑀦𑁆𑀥𑀸𑀢𑀸𑀤𑀻𑀦𑀜𑁆𑀘.

𑀲𑀓𑀫𑀦𑁆𑀥𑀸𑀢𑀼𑀇𑀘𑁆𑀘𑁂𑀯𑀫𑀸𑀤𑀻𑀦𑀫𑀦𑁆𑀢𑁄 𑀘 𑀉𑀢𑁆𑀢𑀫𑀸𑀧𑀚𑁆𑀚𑀢𑁂 𑀲𑀲𑁆𑀫𑀺𑀁, 𑀲𑀮𑁄𑀧𑁄 𑀘, 𑀦𑀺𑀘𑁆𑀘𑀁 𑀧𑀼𑀦𑀩𑁆𑀩𑀺𑀥𑀸𑀦𑀸. 𑀲𑀓𑀫𑀦𑁆𑀥𑀸𑀢𑀼 𑀯𑀺𑀬 𑀅𑀲𑁆𑀲 𑀭𑀸𑀚𑀺𑀦𑁄 𑀯𑀺𑀪𑀯𑁄, 𑀲𑁂𑀲𑀁 𑀲𑀫𑀁. 𑀏𑀯𑀁 𑀫𑀳𑀸𑀫𑀦𑁆𑀥𑀸𑀢𑀼𑀧𑁆𑀧𑀪𑀼𑀢𑀬𑁄.

𑀧𑀺𑀢𑀼𑀲𑀤𑁆𑀤𑀲𑁆𑀲 𑀪𑁂𑀤𑁄. 𑀲𑀺𑀫𑁆𑀳𑀺 𑀆𑀢𑁆𑀢𑀁, 𑀲𑀺𑀮𑁄𑀧𑁄, 𑀧𑀺𑀢𑀸.

𑀬𑁄𑀫𑁆𑀳𑀺 ‘‘𑀆𑀭𑁄, 𑀭𑀲𑁆𑀲’’𑀦𑁆𑀢𑀺 𑀘 𑀯𑀢𑁆𑀢𑀢𑁂.

𑁧𑁬𑁮. 𑀧𑀺𑀢𑀸𑀤𑀻𑀦𑀫𑀲𑀺𑀫𑁆𑀳𑀺 ¶ .

𑀧𑀺𑀢𑀸𑀤𑀻𑀦𑀫𑀸𑀭𑀸𑀤𑁂𑀲𑁄 𑀭𑀲𑁆𑀲𑀫𑀸𑀧𑀚𑁆𑀚𑀢𑁂 𑀅𑀲𑀺𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀲𑀺𑀲𑁆𑀫𑀺𑀁 𑀆𑀭𑀸𑀤𑁂𑀲𑀸𑀪𑀸𑀯𑁂𑀧𑀺 𑀅𑀲𑀺𑀫𑁆𑀳𑀻𑀢𑀺 𑀅𑀥𑀺𑀓𑀯𑀘𑀦𑀫𑀢𑁆𑀣𑀦𑁆𑀢𑀭𑀯𑀺𑀜𑁆𑀜𑀸𑀧𑀦𑀢𑁆𑀣𑀁, 𑀢𑁂𑀦 𑀢𑁄𑀆𑀤𑀺𑀫𑁆𑀳𑀺 𑀧𑀺𑀢𑀸𑀤𑀻𑀦𑀫𑀺𑀓𑀸𑀭𑁄 𑀘. 𑀬𑀣𑀸 𑁋 𑀧𑀺𑀢𑀺𑀢𑁄, 𑀫𑀸𑀢𑀺𑀢𑁄, 𑀪𑀸𑀢𑀺𑀢𑁄, 𑀥𑀻𑀢𑀺𑀢𑁄, 𑀧𑀺𑀢𑀺𑀧𑀓𑁆𑀔𑁄, 𑀫𑀸𑀢𑀺𑀧𑀓𑁆𑀔𑁄𑀢𑀺.

𑀧𑀺𑀢𑀭𑁄, 𑀲𑁂𑀲𑀁 𑀓𑀢𑁆𑀢𑀼𑀲𑀫𑀁. 𑀪𑁄 𑀧𑀺𑀢 𑀪𑁄 𑀧𑀺𑀢𑀸, 𑀪𑀯𑀦𑁆𑀢𑁄 𑀧𑀺𑀢𑀭𑁄, 𑀧𑀺𑀢𑀭𑀁, 𑀧𑀺𑀢𑀭𑁂 𑀧𑀺𑀢𑀭𑁄, 𑀧𑀺𑀢𑀭𑀸 𑀧𑀺𑀢𑀼𑀦𑀸, 𑀧𑀺𑀢𑀭𑁂𑀳𑀺 𑀧𑀺𑀢𑀭𑁂𑀪𑀺. 𑀪𑀸𑀯𑀦𑀺𑀤𑁆𑀤𑁂𑀲𑁂𑀦 𑀆𑀭𑀸𑀤𑁂𑀲𑀸𑀪𑀸𑀯𑁂 𑀧𑀺𑀢𑀽𑀳𑀺 𑀧𑀺𑀢𑀽𑀪𑀺 𑀧𑀺𑀢𑀼𑀳𑀺 𑀧𑀺𑀢𑀼𑀪𑀺, 𑀧𑀺𑀢𑀼 𑀧𑀺𑀢𑀼𑀦𑁄 𑀧𑀺𑀢𑀼𑀲𑁆𑀲, 𑀧𑀺𑀢𑀭𑀸𑀦𑀁 𑀧𑀺𑀢𑀸𑀦𑀁 𑀧𑀺𑀢𑀽𑀦𑀁, 𑀤𑀻𑀖𑀸𑀪𑀸𑀯𑁂 𑀧𑀺𑀢𑀼𑀦𑀁 𑀯𑀸, 𑀧𑀺𑀢𑀭𑀸, 𑀧𑀺𑀢𑀭𑁂𑀳𑀺 𑀧𑀺𑀢𑀭𑁂𑀪𑀺 𑀧𑀺𑀢𑀽𑀳𑀺 𑀧𑀺𑀢𑀽𑀪𑀺 𑀧𑀺𑀢𑀼𑀳𑀺 𑀧𑀺𑀢𑀼𑀪𑀺, 𑀧𑀺𑀢𑀼 𑀧𑀺𑀢𑀼𑀦𑁄 𑀧𑀺𑀢𑀼𑀲𑁆𑀲, 𑀧𑀺𑀢𑀭𑀸𑀦𑀁 𑀧𑀺𑀢𑀸𑀦𑀁 𑀧𑀺𑀢𑀽𑀦𑀁 𑀧𑀺𑀢𑀼𑀦𑀁, 𑀧𑀺𑀢𑀭𑀺, 𑀧𑀺𑀢𑀭𑁂𑀲𑀼 𑀧𑀺𑀢𑀽𑀲𑀼 𑀧𑀺𑀢𑀼𑀲𑀼.

𑀏𑀯𑀁 𑀪𑀸𑀢𑀸, 𑀪𑀸𑀢𑀭𑁄 𑀇𑀘𑁆𑀘𑀸𑀤𑀺.

𑀉𑀓𑀸𑀭𑀦𑁆𑀢𑀁.

𑀊𑀓𑀸𑀭𑀦𑁆𑀢𑁄 𑀧𑀼𑀮𑁆𑀮𑀺𑀗𑁆𑀕𑁄 𑀅𑀪𑀺𑀪𑀽𑀲𑀤𑁆𑀤𑁄.

𑀢𑀣𑁂𑀯 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺, 𑀲𑀺𑀮𑁄𑀧𑁄. 𑀲𑁄 𑀅𑀪𑀺𑀪𑀽, 𑀬𑁄𑀮𑁄𑀧𑁂 𑀓𑀢𑁂 𑀢𑁂 𑀅𑀪𑀺𑀪𑀽.

‘‘𑀅𑀖𑁄 𑀭𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸 𑀭𑀲𑁆𑀲𑀢𑁆𑀢𑀁, 𑀯𑁄𑀓𑀸𑀭𑁄. 𑀓𑀢𑀭𑀲𑁆𑀲𑀢𑁆𑀢𑀸 𑀅𑀢𑁆𑀢𑀸𑀪𑀸𑀯𑁄. 𑀅𑀪𑀺𑀪𑀼𑀯𑁄, 𑀪𑁄 𑀅𑀪𑀺𑀪𑀼, 𑀪𑀯𑀦𑁆𑀢𑁄 𑀅𑀪𑀺𑀪𑀽 𑀅𑀪𑀺𑀪𑀼𑀯𑁄.

𑀓𑀢𑀭𑀲𑁆𑀲𑀢𑁆𑀢𑀸 𑀯𑁂𑀆𑀤𑁂𑀲𑁄 𑀦 𑀳𑁄𑀢𑀺. 𑀲𑁂𑀲𑀁 𑀪𑀺𑀓𑁆𑀔𑀼𑀲𑀤𑁆𑀤𑀲𑀫𑀁, 𑀭𑀲𑁆𑀲𑀢𑁆𑀢𑀫𑁂𑀯 𑀯𑀺𑀲𑁂𑀲𑁄. 𑀅𑀪𑀺𑀪𑀼𑀁, 𑀅𑀪𑀺𑀪𑀽 𑀅𑀪𑀺𑀪𑀼𑀯𑁄 ¶ , 𑀅𑀪𑀺𑀪𑀼𑀦𑀸, 𑀅𑀪𑀺𑀪𑀽𑀳𑀺 𑀅𑀪𑀺𑀪𑀽𑀪𑀺, 𑀅𑀪𑀺𑀪𑀼𑀦𑁄 𑀅𑀪𑀺𑀪𑀼𑀲𑁆𑀲, 𑀅𑀪𑀺𑀪𑀽𑀦𑀁 𑀇𑀘𑁆𑀘𑀸𑀤𑀺.

𑀏𑀯𑀁 𑀲𑀬𑀫𑁆𑀪𑀽, 𑀯𑁂𑀲𑁆𑀲𑀪𑀽, 𑀧𑀭𑀸𑀪𑀺𑀪𑀽, 𑀲𑀳𑀪𑀽𑀆𑀤𑀬𑁄. 𑀲𑀳𑀪𑀽𑀲𑀤𑁆𑀤𑀲𑁆𑀲 𑀬𑁄𑀦𑀁 𑀦𑁄𑀆𑀤𑁂𑀲𑁄𑀯 𑀯𑀺𑀲𑁂𑀲𑁄. 𑀲𑀳𑀪𑀽, 𑀲𑀳𑀪𑀽 𑀲𑀳𑀪𑀼𑀯𑁄 𑀲𑀳𑀪𑀼𑀦𑁄 𑀇𑀘𑁆𑀘𑀸𑀤𑀺.

𑀢𑀣𑀸 𑀲𑀩𑁆𑀩𑀜𑁆𑀜𑀽𑀲𑀤𑁆𑀤𑀲𑁆𑀲 𑀬𑁄𑀲𑁆𑀯𑁂𑀯 𑀯𑀺𑀲𑁂𑀲𑁄. 𑀲𑁄 𑀲𑀩𑁆𑀩𑀜𑁆𑀜𑀽 𑀢𑁂 𑀲𑀩𑁆𑀩𑀜𑁆𑀜𑀽, 𑀬𑁄𑀮𑁄𑀧𑀸𑀪𑀸𑀯𑁂 𑀭𑀲𑁆𑀲𑀢𑁆𑀢𑀁, ‘‘𑀮𑀢𑁄 𑀯𑁄𑀓𑀸𑀭𑁄 𑀘𑀸’’𑀢𑀺 𑀏𑀢𑁆𑀣 𑀓𑀸𑀭𑀕𑁆𑀕𑀳𑀡𑁂𑀦 𑀬𑁄𑀦𑀁 𑀦𑁄𑀆𑀤𑁂𑀲𑁄. 𑀯𑀸𑀥𑀺𑀓𑀸𑀭𑀲𑁆𑀲 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀢𑀸 𑀦 𑀘 𑀯𑁄𑀓𑀸𑀭𑁄. 𑀲𑀩𑁆𑀩𑀜𑁆𑀜𑀼𑀦𑁄, 𑀪𑁄 𑀲𑀩𑁆𑀩𑀜𑁆𑀜𑀼, 𑀪𑁄𑀦𑁆𑀢𑁄 𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀜𑁆𑀜𑀼𑀦𑁄, 𑀲𑀩𑁆𑀩𑀜𑁆𑀜𑀼𑀁, 𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀜𑁆𑀜𑀼𑀦𑁄 𑀇𑀘𑁆𑀘𑀸𑀤𑀺.

𑀏𑀯𑀁 𑀫𑀕𑁆𑀕𑀜𑁆𑀜𑀽 𑀥𑀫𑁆𑀫𑀜𑁆𑀜𑀽 𑀅𑀢𑁆𑀣𑀜𑁆𑀜𑀽 𑀓𑀸𑀮𑀜𑁆𑀜𑀽 𑀭𑀢𑁆𑀢𑀜𑁆𑀜𑀽 𑀫𑀢𑁆𑀢𑀜𑁆𑀜𑀽 𑀓𑀢𑀜𑁆𑀜𑀽 𑀢𑀣𑀜𑁆𑀜𑀽 𑀯𑀺𑀜𑁆𑀜𑀽 𑀯𑀺𑀤𑀽 𑀯𑁂𑀤𑀕𑀽 𑀧𑀸𑀭𑀕𑀽 𑀇𑀘𑁆𑀘𑀸𑀤𑀬𑁄.

𑀊𑀓𑀸𑀭𑀦𑁆𑀢𑀁.

𑀏𑀓𑀸𑀭𑀦𑁆𑀢𑁄 𑀅𑀧𑁆𑀧𑀲𑀺𑀤𑁆𑀥𑁄.

𑀑𑀓𑀸𑀭𑀦𑁆𑀢𑁄 𑀧𑀼𑀮𑁆𑀮𑀺𑀗𑁆𑀕𑁄 𑀕𑁄𑀲𑀤𑁆𑀤𑁄.

𑀢𑀢𑁄 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺, 𑀲𑀺𑀮𑁄𑀧𑁄, 𑀕𑁄 𑀕𑀘𑁆𑀙𑀢𑀺.

‘‘𑀕𑀸𑀯 𑀲𑁂’’𑀢𑀺 𑀇𑀢𑁄 ‘‘𑀕𑁄’’𑀢𑀺 𑀅𑀥𑀺𑀓𑀸𑀭𑁄, ‘‘𑀆𑀯𑀸’’𑀢𑀺 𑀘 𑀯𑀢𑁆𑀢𑀢𑁂.

𑁧𑁬𑁯. 𑀬𑁄𑀲𑀼 𑀘.

𑀕𑁄𑀇𑀘𑁆𑀘𑁂𑀢𑀲𑁆𑀲 𑀑𑀓𑀸𑀭𑀲𑁆𑀲 𑀆𑀯𑀸𑀤𑁂𑀲𑁄 𑀳𑁄𑀢𑀺 𑀬𑁄𑀲𑀼. 𑀘𑀲𑀤𑁆𑀤𑁂𑀦 𑀦𑀸 𑀲𑁆𑀫𑀸 𑀲𑁆𑀫𑀺𑀁𑀲𑀼𑀇𑀘𑁆𑀘𑁂𑀢𑁂𑀲𑀼 𑀘. ‘‘𑀢𑀢𑁄 𑀬𑁄𑀦𑀫𑁄 𑀢𑀽’’𑀢𑀺 𑀏𑀢𑁆𑀣 𑀢𑀼𑀕𑁆𑀕𑀳𑀡𑁂𑀦 𑀬𑁄𑀦𑀫𑁄𑀓𑀸𑀭𑁄, 𑀲𑀭𑀮𑁄𑀧𑀸𑀤𑀺. 𑀕𑀸𑀯𑁄 𑀢𑀺𑀝𑁆𑀞𑀦𑁆𑀢𑀺.

𑁧𑁭𑁦. 𑀅𑀯𑀁𑀫𑁆𑀳𑀺 ¶ 𑀘.

𑀕𑁄𑀇𑀘𑁆𑀘𑁂𑀢𑀲𑁆𑀲 𑀑𑀓𑀸𑀭𑀲𑁆𑀲 𑀆𑀯 𑀅𑀯𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺 𑀅𑀁𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀲𑁂𑀤𑁆𑀤𑁂𑀦 𑀬𑁄 𑀦𑀸 𑀲 𑀲𑁆𑀫𑀸𑀲𑁆𑀫𑀺𑀁𑀲𑀼𑀇𑀘𑁆𑀘𑁂𑀢𑁂𑀲𑀼 𑀘 𑀅𑀯𑀸𑀤𑁂𑀲𑁄 𑀳𑁄𑀢𑀺. 𑀕𑀯𑁄 𑀕𑀘𑁆𑀙𑀦𑁆𑀢𑀺, 𑀳𑁂 𑀕𑁄, 𑀳𑁂 𑀕𑀸𑀯𑁄 𑀳𑁂 𑀕𑀯𑁄.

𑀤𑀼𑀢𑀺𑀬𑀸𑀬𑀁 ‘‘𑀅𑀁𑀫𑁆𑀳𑀻’’𑀢𑀺 𑀯𑀢𑁆𑀢𑀢𑁂.

𑁧𑁭𑁧. 𑀆𑀯𑀲𑁆𑀲𑀼 𑀯𑀸.

𑀆𑀯𑀇𑀘𑁆𑀘𑁂𑀢𑀲𑁆𑀲 𑀕𑀸𑀯𑀸𑀤𑁂𑀲𑀲𑁆𑀲 𑀅𑀦𑁆𑀢𑀲𑀭𑀲𑁆𑀲 𑀉𑀓𑀸𑀭𑀸𑀤𑁂𑀲𑁄 𑀳𑁄𑀢𑀺 𑀯𑀸 𑀅𑀁𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀆𑀯𑀲𑁆𑀲 𑀅 𑀆𑀯, 𑀢𑀲𑁆𑀲 𑀆𑀯𑀲𑀤𑁆𑀤𑀦𑁆𑀢𑀲𑁆𑀲. ‘‘𑀅𑀁𑀫𑁄’’𑀢𑀺𑀆𑀤𑀺𑀦𑀸 𑀦𑀺𑀕𑁆𑀕𑀳𑀻𑀢𑀁. 𑀕𑀸𑀯𑀼𑀁 𑀕𑀸𑀯𑀁 𑀕𑀯𑀁, 𑀕𑀸𑀯𑁄 𑀕𑀯𑁄.

‘‘𑀕𑁄𑀡, 𑀯𑀸’’𑀢𑀺 𑀯𑀢𑁆𑀢𑀢𑁂.

𑁧𑁭𑁨. 𑀲𑀼𑀳𑀺𑀦𑀸𑀲𑀼 𑀘.

𑀲𑀼 𑀳𑀺 𑀦𑀸𑀇𑀘𑁆𑀘𑁂𑀢𑁂𑀲𑀼 𑀲𑀩𑁆𑀩𑀲𑁆𑀲 𑀕𑁄𑀲𑀤𑁆𑀤𑀲𑁆𑀲 𑀕𑁄𑀡𑀸𑀤𑁂𑀲𑁄 𑀳𑁄𑀢𑀺 𑀯𑀸. 𑀘𑀲𑀤𑁆𑀤𑁂𑀦 𑀲𑁂𑀲𑁂𑀲𑀼 𑀘. 𑀕𑁄𑀡𑁄, 𑀕𑁄𑀡𑀸, 𑀳𑁂 𑀕𑁄𑀡 𑀳𑁂 𑀕𑁄𑀡𑀸, 𑀕𑁄𑀡𑀁, 𑀕𑁄𑀡𑁂, 𑀕𑁄𑀡𑁂𑀦, 𑀕𑁄𑀡𑁂𑀳𑀺 𑀕𑁄𑀡𑁂𑀪𑀺, 𑀕𑁄𑀡𑀲𑁆𑀲.

𑁧𑁭𑁩. 𑀕𑁄𑀡 𑀦𑀁𑀫𑁆𑀳𑀺 𑀯𑀸.

𑀲𑀩𑁆𑀩𑀲𑁆𑀲 𑀕𑁄𑀲𑀤𑁆𑀤𑀲𑁆𑀲 𑀕𑁄𑀡𑀸𑀤𑁂𑀲𑁄 𑀳𑁄𑀢𑀺 𑀯𑀸 𑀦𑀁𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀕𑁄𑀡𑀸𑀦𑀁, 𑀕𑁄𑀡𑀸 𑀕𑁄𑀡𑀲𑁆𑀫𑀸 𑀕𑁄𑀡𑀫𑁆𑀳𑀸, 𑀕𑁄𑀡𑁂𑀳𑀺 𑀕𑁄𑀡𑁂𑀪𑀺, 𑀕𑁄𑀡𑀲𑁆𑀲, 𑀕𑁄𑀡𑀸𑀦𑀁, 𑀕𑁄𑀡𑁂 𑀕𑁄𑀡𑀲𑁆𑀫𑀺𑀁 𑀕𑁄𑀡𑀫𑁆𑀳𑀺, 𑀕𑁄𑀡𑁂𑀲𑀼.

𑀕𑁄𑀡𑀸𑀤𑁂𑀲𑀸𑀪𑀸𑀯𑁂 𑀕𑀸𑀯𑁂𑀦 𑀕𑀯𑁂𑀦, 𑀕𑁄𑀳𑀺 𑀕𑁄𑀪𑀺.

𑁧𑁭𑁪. 𑀕𑀸𑀯 ¶ 𑀲𑁂.

‘‘𑀕𑁄 𑀆𑀯 𑀲𑁂’’𑀇𑀢𑀺 𑀢𑀺𑀧𑀤𑀫𑀺𑀤𑀁. 𑀕𑁄𑀲𑁆𑀲 𑀑 𑀕𑁄, 𑀕𑁄𑀲𑀤𑁆𑀤𑁄𑀓𑀸𑀭𑀲𑁆𑀲 𑀆𑀯𑀸𑀤𑁂𑀲𑁄 𑀳𑁄𑀢𑀺 𑀲𑁂 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀕𑀸𑀯𑀲𑁆𑀲 𑀕𑀯𑀲𑁆𑀲.

𑀦𑀁𑀫𑁆𑀳𑀺 ‘‘𑀕𑁄, 𑀅𑀯𑀸’’𑀢𑀺 𑀘 𑀯𑀢𑁆𑀢𑀢𑁂.

𑁧𑁭𑁫. 𑀢𑀢𑁄 𑀦𑀫𑀁 𑀧𑀢𑀺𑀫𑁆𑀳𑀸𑀮𑀼𑀢𑁆𑀢𑁂 𑀘 𑀲𑀫𑀸𑀲𑁂.

𑀢𑀢𑁄 𑀕𑁄𑀲𑀤𑁆𑀤𑀢𑁄 𑀧𑀭𑀲𑁆𑀲 𑀦𑀁𑀯𑀘𑀦𑀲𑁆𑀲 𑀅𑀁𑀆𑀤𑁂𑀲𑁄 𑀳𑁄𑀢𑀺, 𑀕𑁄𑀲𑀤𑁆𑀤𑁄𑀓𑀸𑀭𑀲𑁆𑀲 𑀅𑀯𑀸𑀤𑁂𑀲𑁄 𑀘 𑀧𑀢𑀺𑀫𑁆𑀳𑀺 𑀧𑀭𑁂 𑀅𑀮𑀼𑀢𑁆𑀢𑁂 𑀘 𑀲𑀫𑀸𑀲𑁂. 𑀘𑀲𑀤𑁆𑀤𑁂𑀦 𑀅𑀲𑀫𑀸𑀲𑁂𑀧𑀺 𑀅𑀁 𑀅𑀯𑀸𑀤𑁂𑀲𑀸. 𑀕𑀯𑀁𑀧𑀢𑀺𑀲𑁆𑀲 𑀣𑁂𑀭𑀲𑁆𑀲, 𑀕𑀯𑀁.

‘‘𑀲𑀼𑀳𑀺𑀦𑀸𑀲𑀼 𑀘𑀸’’𑀢𑀺 𑀏𑀢𑁆𑀣 𑀘𑀲𑀤𑁆𑀤𑁂𑀦 𑀦𑀁𑀫𑁆𑀳𑀺 𑀕𑀼𑀆𑀤𑁂𑀲𑁄. ‘‘𑀦𑁄 𑀘 𑀤𑁆𑀯𑀸𑀤𑀺𑀢𑁄 𑀦𑀁𑀫𑁆𑀳𑀻’’𑀢𑀺 𑀲𑀼𑀢𑁆𑀢𑁂 𑀘𑀲𑀤𑁆𑀤𑁂𑀦 𑀦𑀓𑀸𑀭𑀸𑀕𑀫𑁄 𑀘. 𑀕𑀼𑀦𑁆𑀦𑀁𑀕𑁄𑀦𑀁 𑀯𑀸.

𑀕𑀸𑀯𑀸 𑀕𑀸𑀯𑀫𑁆𑀳𑀸 𑀕𑀸𑀯𑀲𑁆𑀫𑀸 𑀕𑀯𑀸 𑀕𑀯𑀫𑁆𑀳𑀸 𑀕𑀯𑀲𑁆𑀫𑀸, 𑀕𑁄𑀳𑀺 𑀕𑁄𑀪𑀺, 𑀕𑀸𑀯𑀲𑁆𑀲 𑀕𑀯𑀲𑁆𑀲, 𑀕𑀯𑀁 𑀕𑀼𑀦𑁆𑀦𑀁 𑀕𑁄𑀦𑀁, 𑀕𑀸𑀯𑁂 𑀕𑀸𑀯𑀫𑁆𑀳𑀺 𑀕𑀸𑀯𑀲𑁆𑀫𑀺𑀁 𑀕𑀯𑁂 𑀕𑀯𑀫𑁆𑀳𑀺 𑀕𑀯𑀲𑁆𑀫𑀺𑀁, 𑀕𑀸𑀯𑁂𑀲𑀼 𑀕𑀯𑁂𑀲𑀼 𑀕𑁄𑀲𑀼.

𑀑𑀓𑀸𑀭𑀦𑁆𑀢𑀁.

𑀧𑀼𑀭𑀺𑀲𑁄 𑀕𑀼𑀡𑀯𑀸 𑀭𑀸𑀚𑀸, 𑀲𑀸’𑀕𑁆𑀕𑀺 𑀤𑀡𑁆𑀟𑀻 𑀘 𑀪𑀺𑀓𑁆𑀔𑀼 𑀘;

𑀲𑀢𑁆𑀣𑀸’𑀪𑀺𑀪𑀽 𑀘 𑀲𑀩𑁆𑀩𑀜𑁆𑀜𑀽, 𑀕𑁄𑀢𑀺 𑀧𑀼𑀮𑁆𑀮𑀺𑀗𑁆𑀕𑀲𑀗𑁆𑀕𑀳𑁄.

𑀧𑀼𑀮𑁆𑀮𑀺𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑀅𑀲𑁆𑀫𑀸 ¶ 𑀦𑀲𑁆𑀫𑀸 𑀢𑀲𑁆𑀫𑀸 𑀦𑀫𑁆𑀳𑀸 𑀢𑀫𑁆𑀳𑀸, 𑀦𑁂𑀳𑀺 𑀦𑁂𑀪𑀺 𑀢𑁂𑀳𑀺 𑀢𑁂𑀪𑀺, 𑀅𑀲𑁆𑀲 𑀦𑀲𑁆𑀲 𑀢𑀲𑁆𑀲, 𑀦𑁂𑀲𑀁 𑀢𑁂𑀲𑀁 𑀦𑁂𑀲𑀸𑀦𑀁 𑀢𑁂𑀲𑀸𑀦𑀁, 𑀅𑀲𑁆𑀫𑀺𑀁 𑀦𑀲𑁆𑀫𑀺𑀁 𑀢𑀲𑁆𑀫𑀺𑀁 𑀦𑀫𑁆𑀳𑀺 𑀢𑀫𑁆𑀳𑀺, 𑀦𑁂𑀲𑀼 𑀢𑁂𑀲𑀼.

𑀇𑀢𑁆𑀣𑀺𑀬𑀁 ‘‘𑀢𑀸 𑀲𑀺’’ 𑀇𑀢𑀻𑀥 𑀲𑀸𑀤𑁂𑀲𑀲𑀺𑀮𑁄𑀧𑀸. 𑀲𑀸 𑀓𑀜𑁆𑀜𑀸, 𑀦𑀢𑁆𑀢𑀁. 𑀦𑀸 𑀢𑀸 𑀦𑀸𑀬𑁄 𑀢𑀸𑀬𑁄, 𑀦𑀁 𑀢𑀁, 𑀦𑀸 𑀢𑀸 𑀦𑀸𑀬𑁄 𑀢𑀸𑀬𑁄, 𑀦𑀸𑀬 𑀢𑀸𑀬, 𑀦𑀸𑀳𑀺 𑀢𑀸𑀳𑀺 𑀦𑀸𑀪𑀺 𑀢𑀸𑀪𑀺.

‘‘𑀏𑀢𑀺𑀫𑀸𑀲𑀫𑀻’’𑀢𑀺 𑀇𑀢𑁄 𑀏𑀢𑀺𑀫𑀸𑀕𑁆𑀕𑀳𑀡𑀜𑁆𑀘 ‘‘𑀢𑀲𑁆𑀲𑀸 𑀯𑀸’’𑀢𑀺 𑀇𑀢𑁄 𑀢𑀕𑁆𑀕𑀳𑀡𑀜𑁆𑀘 𑀧𑀜𑁆𑀘𑀫𑀺𑀬𑀦𑁆𑀢𑀯𑀲𑁂𑀦 𑀯𑀢𑁆𑀢𑀢𑁂 ‘‘𑀯𑀸’’𑀢𑀺 𑀘.

𑁨𑁧𑁫. 𑀢𑀢𑁄 𑀲𑀲𑁆𑀲 𑀲𑁆𑀲𑀸𑀬.

𑀢𑀢𑁄 𑀢𑀸 𑀏𑀢𑀸 𑀇𑀫𑀸𑀢𑁄 𑀧𑀭𑀲𑁆𑀲 𑀲𑀲𑁆𑀲 𑀯𑀺𑀪𑀢𑁆𑀢𑀺𑀲𑁆𑀲 𑀲𑁆𑀲𑀸𑀬𑀸𑀤𑁂𑀲𑁄 𑀳𑁄𑀢𑀺 𑀯𑀸.

‘‘𑀲𑀁𑀲𑀸𑀲𑁆𑀯𑁂𑀓𑀯𑀘𑀦𑁂𑀲𑀼 𑀘, 𑀇’’𑀇𑀢𑀺 𑀘 𑀯𑀢𑁆𑀢𑀢𑁂.

𑁨𑁧𑁬. 𑀢𑀲𑁆𑀲𑀸 𑀯𑀸.

𑀢𑀸𑀇𑀘𑁆𑀘𑁂𑀢𑀲𑁆𑀲 𑀇𑀢𑁆𑀣𑀺𑀬𑀁 𑀯𑀢𑁆𑀢𑀫𑀸𑀦𑀲𑁆𑀲 𑀅𑀦𑁆𑀢𑀲𑁆𑀲 𑀇𑀓𑀸𑀭𑁄 𑀳𑁄𑀢𑀺 𑀯𑀸 𑀲𑀁 𑀲𑀸𑀲𑁆𑀯𑁂𑀓𑀯𑀘𑀦𑁂𑀲𑀼 𑀯𑀺𑀪𑀢𑁆𑀢𑀸𑀤𑁂𑀲𑁂𑀲𑀼. 𑀢𑀺𑀲𑁆𑀲𑀸𑀬 𑀢𑀲𑁆𑀲𑀸𑀬 𑀅𑀲𑁆𑀲𑀸𑀬 𑀦𑀲𑁆𑀲𑀸𑀬 𑀅𑀲𑁆𑀲𑀸 𑀦𑀲𑁆𑀲𑀸 𑀢𑀺𑀲𑁆𑀲𑀸 𑀢𑀲𑁆𑀲𑀸 𑀦𑀸𑀬 𑀢𑀸𑀬, 𑀦𑀸𑀲𑀁 𑀢𑀸𑀲𑀁.

𑀧𑀜𑁆𑀘𑀫𑀻𑀙𑀝𑁆𑀞𑀻𑀲𑀼 𑀢𑀢𑀺𑀬𑀸𑀘𑀢𑀼𑀢𑁆𑀣𑀻𑀲𑀫𑀁. 𑀲𑀢𑁆𑀢𑀫𑀺𑀬𑀁 𑀅𑀲𑁆𑀲𑀁 𑀦𑀲𑁆𑀲𑀁 𑀢𑀺𑀲𑁆𑀲𑀁 𑀢𑀲𑁆𑀲𑀁 𑀦𑀸𑀬𑀁 𑀢𑀸𑀬𑀁, 𑀦𑀸𑀲𑀼 𑀢𑀸𑀲𑀼.

𑀦𑀧𑀼𑀁𑀲𑀓𑁂 𑀲𑀺𑀫𑁆𑀳𑀺𑀲𑀸𑀤𑁂𑀲𑀸𑀪𑀸𑀯𑀸 𑀦𑀢𑁆𑀢𑀁. 𑀦𑀁 𑀢𑀁, 𑀦𑀸𑀦𑀺 𑀢𑀸𑀦𑀺, 𑀦𑀁 𑀢𑀁, 𑀦𑀸𑀦𑀺 𑀢𑀸𑀦𑀺, 𑀦𑁂𑀦 𑀢𑁂𑀦 𑀇𑀘𑁆𑀘𑀸𑀤𑀺 𑀧𑀼𑀮𑁆𑀮𑀺𑀗𑁆𑀕𑀲𑀫𑀁.

𑀏𑀢 𑀲𑀺, ‘‘𑀏𑀢𑀢𑁂𑀲𑀁 𑀢𑁄’’𑀢𑀺 𑀲𑀓𑀸𑀭𑀸𑀤𑁂𑀲𑁄. 𑀏𑀲𑁄 𑀧𑀼𑀭𑀺𑀲𑁄, 𑀏𑀢𑁂, 𑀏𑀢𑀁, 𑀏𑀢𑁂 𑀇𑀘𑁆𑀘𑀸𑀤𑀺 𑀲𑀩𑁆𑀩𑀲𑀤𑁆𑀤𑀲𑀫𑀁.

𑀇𑀢𑁆𑀣𑀺𑀬𑀁 ¶ 𑀏𑀢𑀸 𑀲𑀺, 𑀲𑀸𑀤𑁂𑀲𑁄. 𑀏𑀲𑀸 𑀓𑀜𑁆𑀜𑀸, 𑀏𑀢𑀸 𑀏𑀢𑀸𑀬𑁄, 𑀏𑀢𑀁, 𑀏𑀢𑀸 𑀏𑀢𑀸𑀬𑁄, 𑀏𑀢𑀸𑀬, 𑀏𑀢𑀸𑀳𑀺 𑀏𑀢𑀸𑀪𑀺.

𑀲 𑀲𑁆𑀫𑀺𑀁𑀲𑀼 𑀧𑀦 ‘‘𑀲𑀁𑀲𑀸𑀲𑁆𑀯𑁂𑀓𑀯𑀘𑀦𑁂𑀲𑀼 𑀘𑀸’’𑀢𑀺 𑀯𑀢𑁆𑀢𑀢𑁂.

𑁨𑁧𑁭. 𑀏𑀢𑀺𑀫𑀸𑀲𑀫𑀺.

𑀅𑀦𑁆𑀢𑀸𑀧𑁂𑀓𑁆𑀔𑀸𑀬𑀁 𑀙𑀝𑁆𑀞𑀻, 𑀏𑀢𑀸 𑀇𑀫𑀸𑀇𑀘𑁆𑀘𑁂𑀢𑁂𑀲𑀫𑀦𑁆𑀢𑁄 𑀲𑀭𑁄 𑀇𑀓𑀸𑀭𑁄 𑀳𑁄𑀢𑀺 𑀲𑀁𑀲𑀸𑀲𑁆𑀯𑁂𑀓𑀯𑀘𑀦𑁂𑀲𑀼 𑀯𑀺𑀪𑀢𑁆𑀢𑀸𑀤𑁂𑀲𑁂𑀲𑀼. 𑀲𑀸𑀤𑁂𑀲𑀕𑀢𑀺𑀓𑀢𑁆𑀢𑀸 𑀲𑁆𑀲𑀸𑀬𑀸𑀤𑁂𑀲𑁂𑀧𑀺. 𑀘𑀲𑀤𑁆𑀤𑀸𑀥𑀺𑀓𑀸𑀭𑀢𑁄 𑀅𑀜𑁆𑀜𑁂𑀓𑀸𑀲𑀤𑁆𑀤𑀸𑀤𑀻𑀦𑀫𑀦𑁆𑀢𑀲𑁆𑀲 𑀘.

𑀏𑀢𑀺𑀲𑁆𑀲𑀸𑀬 𑀏𑀢𑀺𑀲𑁆𑀲𑀸 𑀏𑀢𑀸𑀬, 𑀏𑀢𑀸𑀲𑀁 𑀏𑀢𑀸𑀲𑀸𑀦𑀁, 𑀏𑀢𑀸𑀬, 𑀏𑀢𑀸𑀳𑀺 𑀏𑀢𑀸𑀪𑀺, 𑀏𑀢𑀺𑀲𑁆𑀲𑀸𑀬 𑀏𑀢𑀺𑀲𑁆𑀲𑀸 𑀏𑀢𑀸𑀬, 𑀏𑀢𑀸𑀲𑀁 𑀏𑀢𑀸𑀲𑀸𑀦𑀁, 𑀏𑀢𑀺𑀲𑁆𑀲𑀁 𑀏𑀢𑀸𑀬𑀁, 𑀏𑀢𑀸𑀲𑀼.

𑀘𑀲𑀤𑁆𑀤𑀢𑁄 𑀅𑀜𑁆𑀜𑀺𑀲𑁆𑀲𑀸 𑀅𑀜𑁆𑀜𑀸𑀬, 𑀅𑀜𑁆𑀜𑀺𑀲𑁆𑀲𑀁 𑀅𑀜𑁆𑀜𑀸𑀬𑀁. 𑀏𑀓𑀺𑀲𑁆𑀲𑀸 𑀏𑀓𑀸𑀬, 𑀏𑀓𑀺𑀲𑁆𑀲𑀁 𑀏𑀓𑀸𑀬𑀁. 𑀇𑀢𑀭𑀺𑀲𑁆𑀲𑀸 𑀇𑀢𑀭𑀸𑀬, 𑀇𑀢𑀭𑀺𑀲𑁆𑀲𑀁 𑀇𑀢𑀭𑀸𑀬𑀁 𑀇𑀘𑁆𑀘𑀸𑀤𑀺.

𑀦𑀧𑀼𑀁𑀲𑀓𑁂 𑀏𑀢𑀁, 𑀏𑀢𑀸𑀦𑀺, 𑀏𑀢𑀁, 𑀏𑀢𑀸𑀦𑀺, 𑀲𑁂𑀲𑀁 𑀜𑁂𑀬𑁆𑀬𑀁.

𑀇𑀫𑀲𑀤𑁆𑀤𑀲𑁆𑀲 𑀪𑁂𑀤𑁄. 𑀇𑀫 𑀲𑀺 𑁋

‘‘𑀲𑀩𑁆𑀩𑀲𑁆𑀲𑀺𑀫𑀲𑁆𑀲𑀸’’𑀢𑀺 𑀯𑀢𑁆𑀢𑀢𑁂.

𑁨𑁧𑁮. 𑀅𑀦𑀧𑀼𑀁𑀲𑀓𑀲𑁆𑀲𑀸𑀬𑀁 𑀲𑀺𑀫𑁆𑀳𑀺.

𑀇𑀫𑀲𑀤𑁆𑀤𑀲𑁆𑀲 𑀲𑀩𑁆𑀩𑀲𑁆𑀲𑁂𑀯 𑀅𑀦𑀧𑀼𑀁𑀲𑀓𑀲𑁆𑀲 𑀅𑀬𑀁𑀆𑀤𑁂𑀲𑁄 𑀳𑁄𑀢𑀺 𑀲𑀺𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺, 𑀲𑀺𑀮𑁄𑀧𑁄. 𑀅𑀬𑀁 𑀧𑀼𑀭𑀺𑀲𑁄, 𑀇𑀫𑁂, 𑀇𑀫𑀁, 𑀇𑀫𑁂.

𑁨𑁧𑁯. 𑀅𑀦𑀺𑀫𑀺 ¶ 𑀦𑀸𑀫𑁆𑀳𑀺 𑀘.

𑀇𑀫𑀲𑀤𑁆𑀤𑀲𑁆𑀲 𑀲𑀩𑁆𑀩𑀲𑁆𑀲𑁂𑀯 𑀅𑀦 𑀇𑀫𑀺𑀆𑀤𑁂𑀲𑀸 𑀳𑁄𑀦𑁆𑀢𑀺 𑀦𑀸𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀅𑀦𑀺𑀢𑁆𑀣𑀺𑀮𑀺𑀗𑁆𑀕𑀲𑁆𑀲𑁂𑀯𑁂𑀢𑀁 𑀕𑀳𑀡𑀁. 𑀅𑀦𑁂𑀦 𑀇𑀫𑀺𑀦𑀸.

‘‘𑀲𑀼𑀦𑀁𑀳𑀺𑀲𑀽’’𑀢𑀺 𑀯𑀢𑁆𑀢𑀢𑁂.

𑁨𑁨𑁦. 𑀲𑀩𑁆𑀩𑀲𑁆𑀲𑀺𑀫𑀲𑁆𑀲𑁂 𑀯𑀸.

𑀲𑀩𑁆𑀩𑀲𑁆𑀲 𑀇𑀫𑀲𑀤𑁆𑀤𑀲𑁆𑀲 𑀏𑀓𑀸𑀭𑁄 𑀳𑁄𑀢𑀺 𑀯𑀸 𑀲𑀼 𑀦𑀁 𑀳𑀺𑀇𑀘𑁆𑀘𑁂𑀢𑁂𑀲𑀼 𑀯𑀘𑀦𑁂𑀲𑀼.

𑀆𑀧𑁆𑀧𑀘𑁆𑀘𑀬𑀦𑁆𑀢𑀸𑀦𑀺𑀤𑁆𑀤𑁂𑀲𑀸, 𑀲𑀩𑁆𑀩𑀢𑁆𑀣𑀸𑀢𑀺 𑀅𑀯𑀼𑀢𑁆𑀢𑀢𑁄;

𑀅𑀦𑀺𑀢𑁆𑀣𑀺𑀮𑀺𑀗𑁆𑀕𑀲𑁆𑀲𑁂𑀯𑁂𑀢𑁆𑀣, 𑀕𑀳𑀡𑀜𑁆𑀳𑀺 𑀇𑀫𑀲𑁆𑀲𑀺𑀢𑀺.

𑀏𑀳𑀺 𑀏𑀪𑀺 𑀇𑀫𑁂𑀳𑀺 𑀇𑀫𑁂𑀪𑀺.

‘‘𑀲𑀩𑁆𑀩𑀲𑁆𑀲, 𑀯𑀸, 𑀲𑀩𑁆𑀩𑀢𑁆𑀣, 𑀲𑀲𑁆𑀫𑀸𑀲𑁆𑀫𑀺𑀁𑀲𑀁𑀲𑀸𑀲𑁆𑀯𑀢𑁆𑀢’’𑀦𑁆𑀢𑀺 𑀘 𑀯𑀢𑁆𑀢𑀢𑁂.

𑁨𑁨𑁧. 𑀇𑀫𑀲𑀤𑁆𑀤𑀲𑁆𑀲 𑀘.

𑀇𑀫𑀲𑀤𑁆𑀤𑀲𑁆𑀲 𑀘 𑀲𑀩𑁆𑀩𑀲𑁆𑀲𑁂𑀯 𑀅𑀢𑁆𑀢𑀁 𑀳𑁄𑀢𑀺 𑀯𑀸 𑀲 𑀲𑁆𑀫𑀸 𑀲𑁆𑀫𑀺𑀁𑀲𑀁 𑀲𑀸𑀇𑀘𑁆𑀘𑁂𑀢𑁂𑀲𑀼 𑀯𑀘𑀦𑁂𑀲𑀼 𑀲𑀩𑁆𑀩𑀢𑁆𑀣 𑀮𑀺𑀗𑁆𑀕𑁂𑀲𑀼.

𑀅𑀲𑁆𑀲 𑀇𑀫𑀲𑁆𑀲, 𑀏𑀲𑀁 𑀏𑀲𑀸𑀦𑀁 𑀇𑀫𑁂𑀲𑀁 𑀇𑀫𑁂𑀲𑀸𑀦𑀁, 𑀅𑀲𑁆𑀫𑀸 𑀇𑀫𑀲𑁆𑀫𑀸 𑀇𑀫𑀫𑁆𑀳𑀸, 𑀏𑀳𑀺 𑀏𑀪𑀺 𑀇𑀫𑁂𑀳𑀺 𑀇𑀫𑁂𑀪𑀺, 𑀅𑀲𑁆𑀲 𑀇𑀫𑀲𑁆𑀲, 𑀏𑀲𑀁 𑀏𑀲𑀸𑀦𑀁 𑀇𑀫𑁂𑀲𑀁 𑀇𑀫𑁂𑀲𑀸𑀦𑀁, 𑀅𑀲𑁆𑀫𑀺𑀁 𑀇𑀫𑀲𑁆𑀫𑀺𑀁 𑀇𑀫𑀫𑁆𑀳𑀺, 𑀏𑀲𑀼 𑀇𑀫𑁂𑀲𑀼.

𑀇𑀢𑁆𑀣𑀺𑀬𑀁 𑀇𑀫𑀸 𑀲𑀺, 𑀅𑀬𑀫𑀸𑀤𑁂𑀲𑀲𑀺𑀮𑁄𑀧𑀸.

𑀅𑀬𑀁 𑀓𑀜𑁆𑀜𑀸, 𑀇𑀫𑀸 𑀇𑀫𑀸𑀬𑁄, 𑀇𑀫𑀁, 𑀇𑀫𑀸 𑀇𑀫𑀸𑀬𑁄, 𑀇𑀫𑀸𑀬, 𑀇𑀫𑀸𑀳𑀺 𑀇𑀫𑀸𑀪𑀺. 𑀘𑀢𑀼𑀢𑁆𑀣𑀺𑀬𑀁 𑀅𑀢𑁆𑀢𑀁, 𑀇𑀓𑀸𑀭- 𑀲𑁆𑀲𑀸𑀬𑀸𑀤𑁂𑀲𑀸 ¶ 𑀘, 𑀅𑀲𑁆𑀲𑀸𑀬 𑀇𑀫𑀺𑀲𑁆𑀲𑀸𑀬 𑀅𑀲𑁆𑀲𑀸 𑀇𑀫𑀺𑀲𑁆𑀲𑀸 𑀇𑀫𑀸𑀬, 𑀇𑀫𑀸𑀲𑀁 𑀇𑀫𑀸𑀲𑀸𑀦𑀁. 𑀲𑀢𑁆𑀢𑀫𑀺𑀬𑀁 𑀅𑀲𑁆𑀲𑀁 𑀇𑀫𑀺𑀲𑁆𑀲𑀁 𑀇𑀫𑀺𑀲𑁆𑀲𑀸 𑀯𑀸, ‘‘𑀢𑁂𑀲𑀼 𑀯𑀼𑀤𑁆𑀥𑀺𑀮𑁄𑀧𑀸’’𑀤𑀺𑀦𑀸 𑀲𑁆𑀫𑀺𑀁𑀯𑀘𑀦𑀲𑁆𑀲 𑀯𑀸 𑀲𑀸𑀤𑁂𑀲𑁄. 𑀇𑀫𑀸𑀬𑀁, 𑀇𑀫𑀸𑀲𑀼. 𑀲𑁂𑀲𑀁 𑀜𑁂𑀬𑁆𑀬𑀁.

𑀦𑀧𑀼𑀁𑀲𑀓𑁂 𑀇𑀫 𑀲𑀺, ‘‘𑀲𑀯𑀺𑀪𑀢𑁆𑀢𑀺𑀲𑁆𑀲, 𑀯𑀸’’𑀢𑀺 𑀘 𑀯𑀢𑁆𑀢𑀢𑁂.

𑁨𑁨𑁨. 𑀇𑀫𑀲𑁆𑀲𑀺𑀤𑀫𑀁𑀲𑀺𑀲𑀼 𑀦 𑀧𑀼𑀁𑀲𑀓𑁂.

𑀦𑀧𑀼𑀁𑀲𑀓𑁂 𑀯𑀢𑁆𑀢𑀫𑀸𑀦𑀲𑁆𑀲 𑀲𑀩𑁆𑀩𑀲𑁆𑀲𑁂𑀯 𑀇𑀫𑀲𑀤𑁆𑀤𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀇𑀤𑀁 𑀳𑁄𑀢𑀺 𑀯𑀸 𑀅𑀁 𑀲𑀺𑀲𑀼 𑀧𑀭𑁂𑀲𑀼.

𑀇𑀤𑀁 𑀘𑀺𑀢𑁆𑀢𑀁 𑀯𑀺𑀭𑁄𑀘𑀢𑀺, 𑀇𑀫𑀁, 𑀇𑀫𑀸𑀦𑀺, 𑀇𑀤𑀁 𑀧𑀼𑀧𑁆𑀨𑀁 𑀧𑀲𑁆𑀲𑀲𑀺, 𑀇𑀫𑀁, 𑀇𑀫𑀸𑀦𑀺, 𑀅𑀦𑁂𑀦 𑀇𑀫𑀺𑀦𑀸, 𑀏𑀳𑀺 𑀏𑀪𑀺 𑀇𑀫𑁂𑀳𑀺 𑀇𑀫𑁂𑀪𑀺 𑀇𑀘𑁆𑀘𑀸𑀤𑀺 𑀧𑀼𑀮𑁆𑀮𑀺𑀗𑁆𑀕𑁂 𑀯𑀺𑀬 𑀜𑁂𑀬𑁆𑀬𑀁.

𑀅𑀫𑀼𑀲𑀤𑁆𑀤𑀲𑁆𑀲 𑀪𑁂𑀤𑁄. 𑀅𑀫𑀼 𑀲𑀺 𑁋

‘‘𑀯𑀸, 𑀅𑀦𑀧𑀼𑀁𑀲𑀓𑀲𑁆𑀲, 𑀲𑀺𑀫𑁆𑀳𑀻’’𑀢𑀺 𑀘 𑀯𑀢𑁆𑀢𑀢𑁂.

𑁨𑁨𑁩. 𑀅𑀫𑀼𑀲𑁆𑀲 𑀫𑁄 𑀲𑀁.

𑀅𑀦𑀧𑀼𑀁𑀲𑀓𑀲𑁆𑀲 𑀅𑀫𑀼𑀲𑀤𑁆𑀤𑀲𑁆𑀲 𑀫𑀓𑀸𑀭𑁄 𑀲𑀓𑀸𑀭𑀫𑀸𑀧𑀚𑁆𑀚𑀢𑁂 𑀯𑀸 𑀲𑀺𑀫𑁆𑀳𑀺 𑀧𑀭𑁂. 𑀅𑀲𑀼 𑀭𑀸𑀚𑀸.

‘‘𑀲𑀩𑁆𑀩𑀦𑀸𑀫𑀢𑁄, 𑀯𑀸’’𑀢𑀺 𑀘 𑀯𑀢𑁆𑀢𑀢𑁂.

𑁨𑁨𑁪. 𑀲𑀩𑁆𑀩𑀢𑁄 𑀓𑁄.

𑀲𑀩𑁆𑀩𑀢𑁄 𑀲𑀩𑁆𑀩𑀦𑀸𑀫𑀢𑁄 𑀧𑀭𑁄 𑀓𑀇𑀘𑁆𑀘𑀬𑀫𑀸𑀕𑀫𑁄 𑀳𑁄𑀢𑀺 𑀯𑀸. 𑀧𑀼𑀦 𑀲𑀩𑁆𑀩𑀢𑁄𑀕𑁆𑀕𑀳𑀡𑁂𑀦 𑀳𑀻𑀦𑀸𑀤𑀺𑀢𑁄𑀧𑀺 𑀓𑁄. ‘‘𑀅𑀫𑀼𑀲𑁆𑀲 𑀫𑁄 𑀲’’𑀦𑁆𑀢𑀺 𑀯𑀺𑀦𑀸𑀥𑀺𑀓𑀸𑀭𑁂𑀦 𑀬𑁄𑀕𑁂𑀦 𑀓𑀓𑀸𑀭𑁂𑀧𑀺 𑀲𑀸𑀤𑁂𑀲𑁄.

𑀅𑀲𑀼𑀓𑁄 ¶ , 𑀅𑀲𑀼𑀓𑀸, 𑀅𑀲𑀼𑀓𑀁. 𑀲𑀸𑀤𑁂𑀲𑀸𑀪𑀸𑀯𑁂 𑀅𑀫𑀼𑀓𑁄, 𑀅𑀫𑀼𑀓𑀸, 𑀅𑀫𑀼𑀓𑀁 𑀇𑀘𑁆𑀘𑀸𑀤𑀺.

𑀩𑀳𑀼𑀯𑀘𑀦𑁂 ‘‘𑀮𑀢𑁄 𑀯𑁄𑀓𑀸𑀭𑁄 𑀘𑀸’’𑀢𑀺 𑀲𑀼𑀢𑁆𑀢𑁂 𑀅𑀦𑀼𑀯𑀢𑁆𑀢𑀫𑀸𑀦𑀯𑀸𑀕𑁆𑀕𑀳𑀡𑁂𑀦 𑀯𑁄𑀓𑀸𑀭𑁄 𑀦 𑀳𑁄𑀢𑀺, 𑀦𑀺𑀘𑁆𑀘𑀁 𑀬𑁄𑀮𑁄𑀧𑁄, 𑀤𑀻𑀖𑁄 𑀘.

𑀅𑀫𑀽 𑀧𑀼𑀭𑀺𑀲𑀸, 𑀅𑀫𑀼𑀁, 𑀅𑀫𑀽, 𑀅𑀫𑀼𑀦𑀸, 𑀅𑀫𑀽𑀳𑀺 𑀅𑀫𑀽𑀪𑀺 𑀅𑀫𑀼𑀳𑀺 𑀅𑀫𑀼𑀪𑀺, 𑀅𑀫𑀼𑀲𑁆𑀲. ‘‘𑀅𑀫𑀼𑀲𑁆𑀲𑀸𑀤𑀼’’𑀦𑁆𑀢𑀺 𑀯𑀺𑀦𑀸𑀥𑀺𑀓𑀸𑀭𑁂𑀦 𑀬𑁄𑀕𑁂𑀦 𑀅𑀤𑀼𑀁𑀆𑀤𑁂𑀲𑁄, 𑀅𑀤𑀼𑀲𑁆𑀲, 𑀅𑀫𑀽𑀲𑀁 𑀅𑀫𑀽𑀲𑀸𑀦𑀁 𑀅𑀫𑀼𑀲𑀁 𑀅𑀫𑀼𑀲𑀸𑀦𑀁, 𑀅𑀫𑀼𑀲𑁆𑀫𑀸 𑀅𑀫𑀼𑀫𑁆𑀳𑀸, 𑀅𑀫𑀽𑀳𑀺 𑀅𑀫𑀽𑀪𑀺 𑀅𑀫𑀼𑀳𑀺 𑀅𑀫𑀼𑀪𑀺, 𑀅𑀫𑀼𑀲𑁆𑀲 𑀅𑀤𑀼𑀲𑁆𑀲, 𑀅𑀫𑀽𑀲𑀁 𑀅𑀫𑀽𑀲𑀸𑀦𑀁 𑀅𑀫𑀼𑀲𑀁 𑀅𑀫𑀼𑀲𑀸𑀦𑀁, 𑀅𑀫𑀼𑀲𑁆𑀫𑀺𑀁 𑀅𑀫𑀼𑀫𑁆𑀳𑀺, 𑀅𑀫𑀽𑀲𑀼 𑀅𑀫𑀼𑀲𑀼.

𑀇𑀢𑁆𑀣𑀺𑀬𑀁 𑀲𑀺𑀫𑁆𑀳𑀺 𑀲𑀸𑀤𑁂𑀲𑀸𑀤𑀺.

𑀅𑀲𑀼 𑀓𑀜𑁆𑀜𑀸 𑀅𑀲𑀼𑀓𑀸 𑀅𑀫𑀼𑀓𑀸 𑀯𑀸, 𑀅𑀫𑀽 𑀅𑀫𑀼𑀬𑁄, 𑀅𑀫𑀼𑀁, 𑀅𑀫𑀽 𑀅𑀫𑀼𑀬𑁄, 𑀅𑀫𑀼𑀬𑀸, 𑀅𑀫𑀽𑀳𑀺 𑀅𑀫𑀽𑀪𑀺, 𑀅𑀫𑀼𑀲𑁆𑀲𑀸 𑀅𑀫𑀼𑀬𑀸, 𑀅𑀫𑀽𑀲𑀁 𑀅𑀫𑀽𑀲𑀸𑀦𑀁, 𑀅𑀫𑀼𑀬𑀸, 𑀅𑀫𑀽𑀳𑀺 𑀅𑀫𑀽𑀪𑀺, 𑀅𑀫𑀼𑀲𑁆𑀲𑀸 𑀅𑀫𑀼𑀬𑀸, 𑀅𑀫𑀽𑀲𑀁 𑀅𑀫𑀽𑀲𑀸𑀦𑀁, 𑀅𑀫𑀼𑀲𑁆𑀲𑀁 𑀅𑀫𑀼𑀬𑀁 𑀅𑀫𑀼𑀬𑀸, 𑀅𑀫𑀽𑀲𑀼.

𑀦𑀧𑀼𑀁𑀲𑀓𑁂 𑀅𑀫𑀼𑀲𑀺. ‘‘𑀲𑀯𑀺𑀪𑀢𑁆𑀢𑀺𑀲𑁆𑀲’’, 𑀇𑀫𑀲𑁆𑀲𑀺𑀤𑀫𑀺𑀘𑁆𑀘𑀸𑀤𑀺𑀢𑁄 ‘‘𑀅𑀁𑀲𑀺𑀲𑀼 𑀦𑀧𑀼𑀁𑀲𑀓𑁂’’𑀢𑀺 𑀘 𑀯𑀢𑁆𑀢𑀢𑁂.

𑁨𑁨𑁫. 𑀅𑀫𑀼𑀲𑁆𑀲𑀸𑀤𑀼𑀁.

𑀦𑀧𑀼𑀁𑀲𑀓𑁂 𑀯𑀢𑁆𑀢𑀫𑀸𑀦𑀲𑁆𑀲 𑀲𑀩𑁆𑀩𑀲𑁆𑀲𑁂𑀯 𑀅𑀫𑀼𑀲𑀤𑁆𑀤𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀅𑀤𑀼𑀁 𑀳𑁄𑀢𑀺 𑀅𑀁𑀲𑀺𑀲𑀼 𑀧𑀭𑁂𑀲𑀼. 𑀅𑀤𑀼𑀁 𑀧𑀼𑀧𑁆𑀨𑀁, 𑀅𑀫𑀽 𑀅𑀫𑀽𑀦𑀺, 𑀅𑀤𑀼𑀁, 𑀅𑀫𑀽 𑀅𑀫𑀽𑀦𑀺, 𑀅𑀫𑀼𑀦𑀸 𑀇𑀘𑁆𑀘𑀸𑀤𑀺 𑀧𑀼𑀮𑁆𑀮𑀺𑀗𑁆𑀕𑀲𑀫𑀁.

𑀓𑀺𑀁𑀲𑀤𑁆𑀤𑀲𑁆𑀲 𑀪𑁂𑀤𑁄. ‘‘𑀓𑀺𑀁 𑀲𑀺’’ 𑀇𑀢𑀻𑀥 𑁋

‘‘𑀓𑀺𑀲𑁆𑀲 ¶ 𑀓 𑀯𑁂 𑀘𑀸’’𑀢𑀺 𑀇𑀢𑁄 ‘‘𑀓𑀺𑀲𑁆𑀲, 𑀓’’𑀇𑀢𑀺 𑀘 𑀯𑀢𑁆𑀢𑀢𑁂.

𑁨𑁨𑁬. 𑀲𑁂𑀲𑁂𑀲𑀼 𑀘.

𑀓𑀺𑀫𑀺𑀘𑁆𑀘𑁂𑀢𑀲𑁆𑀲 𑀓𑀲𑀤𑁆𑀤𑁄 𑀆𑀤𑁂𑀲𑁄 𑀳𑁄𑀢𑀺 𑀯𑀧𑁆𑀧𑀘𑁆𑀘𑀬𑀢𑁄 𑀲𑁂𑀲𑁂𑀲𑀼 𑀯𑀺𑀪𑀢𑁆𑀢𑀺𑀪𑁂𑀤𑁂𑀲𑀼. 𑀏𑀢𑁆𑀣 𑀘 ‘‘𑀓𑀺𑀲𑁆𑀲 𑀓 𑀯𑁂 𑀘𑀸’’𑀢𑀺 𑀲𑀼𑀢𑁆𑀢𑁂 𑀘𑀲𑀤𑁆𑀤𑁂𑀦 𑀯𑀧𑁆𑀧𑀘𑁆𑀘𑀬𑀸𑀯𑀲𑀺𑀝𑁆𑀞 𑀣𑀫𑀸𑀤𑀺𑀧𑁆𑀧𑀘𑁆𑀘𑀬𑀸𑀦𑀁 𑀕𑀳𑀺𑀢𑀢𑁆𑀢𑀸 𑀲𑁂𑀲𑀕𑁆𑀕𑀳𑀡𑁂𑀦 𑀯𑀺𑀪𑀢𑁆𑀢𑀺𑀬𑁄𑀯 𑀕𑀬𑁆𑀳𑀦𑁆𑀢𑁂. 𑀘𑀕𑁆𑀕𑀳𑀡𑀁 𑀓𑀢𑁆𑀣𑀘𑀺 𑀦𑀺𑀯𑀢𑁆𑀢𑀦𑀢𑁆𑀣𑀁, 𑀢𑁂𑀦 ‘‘𑀓𑀺𑀲𑁆𑀲, 𑀓𑀺𑀲𑁆𑀫𑀺’’𑀦𑁆𑀢𑀺𑀆𑀤𑀺 𑀘 𑀲𑀺𑀚𑁆𑀛𑀢𑀺. ‘‘𑀲𑁄’’𑀢𑀺 𑀲𑀺𑀲𑁆𑀲 𑀑, 𑀲𑀭𑀮𑁄𑀧𑀸𑀤𑀺.

𑀓𑁄 𑀏𑀲𑁄, 𑀓𑁂, 𑀓𑀁, 𑀓𑁂, 𑀓𑁂𑀦, 𑀓𑁂𑀳𑀺 𑀓𑁂𑀪𑀺, 𑀓𑀲𑁆𑀲 𑀓𑀺𑀲𑁆𑀲, 𑀦𑀺𑀕𑁆𑀕𑀳𑀻𑀢𑀮𑁄𑀧𑀸𑀤𑀺, 𑀓𑁂𑀲𑀁 𑀓𑁂𑀲𑀸𑀦𑀁, 𑀓𑀲𑁆𑀫𑀸 𑀓𑀫𑁆𑀳𑀸, 𑀓𑁂𑀳𑀺 𑀓𑁂𑀪𑀺, 𑀓𑀲𑁆𑀲 𑀓𑀺𑀲𑁆𑀲, 𑀓𑁂𑀲𑀁 𑀓𑁂𑀲𑀸𑀦𑀁, 𑀓𑀲𑁆𑀫𑀺𑀁 𑀓𑀺𑀲𑁆𑀫𑀺𑀁 𑀓𑀫𑁆𑀳𑀺 𑀓𑀺𑀫𑁆𑀳𑀺, 𑀓𑁂𑀲𑀼.

𑀇𑀢𑁆𑀣𑀺𑀬𑀁 ‘‘𑀓𑀺𑀁 𑀲𑀺’’𑀇𑀢𑀻𑀥 ‘‘𑀲𑁂𑀲𑁂𑀲𑀼 𑀘𑀸’’𑀢𑀺 𑀯𑀺𑀪𑀢𑁆𑀢𑀺𑀬𑀁 𑀧𑀭𑀸𑀬𑀁 𑀓𑀸𑀤𑁂𑀲𑁂 𑀓𑀢𑁂 ‘‘𑀇𑀢𑁆𑀣𑀺𑀬𑀫𑀢𑁄 𑀆𑀧𑁆𑀧𑀘𑁆𑀘𑀬𑁄’’𑀢𑀺 𑀫𑀚𑁆𑀛𑁂 𑀆𑀧𑁆𑀧𑀘𑁆𑀘𑀬𑁄, 𑀲𑀺𑀮𑁄𑀧𑁄.

𑀓𑀸 𑀏𑀲𑀸 𑀓𑀜𑁆𑀜𑀸, 𑀓𑀸 𑀓𑀸𑀬𑁄, 𑀓𑀁, 𑀓𑀸 𑀓𑀸𑀬𑁄 𑀇𑀘𑁆𑀘𑀸𑀤𑀺 𑀲𑀩𑁆𑀩𑀸𑀲𑀤𑁆𑀤𑀲𑀫𑀁.

𑀦𑀧𑀼𑀁𑀲𑀓𑁂 𑀓𑀺𑀁 𑀲𑀺, 𑀮𑁄𑀧𑀯𑀺𑀥𑀺𑀲𑁆𑀲 𑀩𑀮𑀯𑀢𑀭𑀢𑁆𑀢𑀸 𑀧𑀞𑀫𑀁 𑀲𑀺𑀮𑁄𑀧𑁂 𑀓𑀢𑁂 𑀧𑀼𑀦 𑀯𑀺𑀪𑀢𑁆𑀢𑀺𑀧𑀭𑀢𑁆𑀢𑀸𑀪𑀸𑀯𑀸, ‘‘𑀢𑀤𑀦𑀼𑀧𑀭𑁄𑀥𑁂𑀦𑀸’’𑀢𑀺 𑀧𑀭𑀺𑀪𑀸𑀲𑀢𑁄 𑀯𑀸 𑀓𑀸𑀤𑁂𑀲𑀸𑀪𑀸𑀯𑁄. 𑀓𑀺𑀁 𑀏𑀢𑀁, 𑀓𑀸𑀦𑀺.

𑀤𑀼𑀢𑀺𑀬𑁂𑀓𑀯𑀘𑀦𑁂 ‘‘𑀓𑁆𑀯𑀘𑀺 𑀮𑁄𑀧’’𑀦𑁆𑀢𑀺 𑀦𑀺𑀕𑁆𑀕𑀳𑀻𑀢𑀮𑁄𑀧𑁂 𑀓𑀢𑁂 ‘‘𑀅𑀁𑀫𑁄 𑀦𑀺𑀕𑁆𑀕𑀳𑀻𑀢𑀁 𑀛𑀮𑀧𑁂𑀳𑀻’’𑀢𑀺 𑀦𑀺𑀕𑁆𑀕𑀳𑀻𑀢𑀁. 𑀓𑀺𑀁, 𑀓𑀸𑀦𑀺 𑀇𑀘𑁆𑀘𑀸𑀤𑀺 𑀧𑀼𑀮𑁆𑀮𑀺𑀗𑁆𑀕𑀲𑀫𑀁.

𑀏𑀓𑀲𑀤𑁆𑀤𑁄 ¶ 𑀲𑀗𑁆𑀔𑁆𑀬𑀸𑀢𑀼𑀮𑁆𑀬𑀸𑀲𑀳𑀸𑀬𑀜𑁆𑀜𑀯𑀘𑀦𑁄. 𑀬𑀤𑀸 𑀲𑀗𑁆𑀔𑁆𑀬𑀸𑀯𑀘𑀦𑁄, 𑀢𑀤𑀸 𑀲𑀩𑁆𑀩𑀢𑁆𑀣𑁂𑀓𑀯𑀘𑀦𑀦𑁆𑀢𑁄𑀯, 𑀅𑀜𑁆𑀜𑀢𑁆𑀣 𑀩𑀳𑀼𑀯𑀘𑀦𑀦𑁆𑀢𑁄𑀧𑀺. 𑀏𑀓𑁄, 𑀏𑀓𑀸, 𑀏𑀓𑀁 𑀇𑀘𑁆𑀘𑀸𑀤𑀺 𑀲𑀩𑁆𑀩𑀢𑁆𑀣 𑀲𑀩𑁆𑀩𑀲𑀤𑁆𑀤𑀲𑀫𑀁. 𑀲𑀁𑀲𑀸𑀲𑁆𑀯𑁂𑀯 𑀯𑀺𑀲𑁂𑀲𑁄.

𑀉𑀪𑀲𑀤𑁆𑀤𑁄 𑀤𑁆𑀯𑀺𑀲𑀤𑁆𑀤𑀧𑀭𑀺𑀬𑀸𑀬𑁄, 𑀲𑀤𑀸 𑀩𑀳𑀼𑀯𑀘𑀦𑀦𑁆𑀢𑁄𑀯.

‘‘𑀉𑀪 𑀬𑁄’’ 𑀇𑀢𑀻𑀥 ‘‘𑀢𑀢𑁄 𑀬𑁄𑀦𑀫𑁄 𑀢𑀽’’𑀢𑀺 𑀏𑀢𑁆𑀣 𑀢𑀼𑀕𑁆𑀕𑀳𑀡𑁂𑀦 𑀓𑁆𑀯𑀘𑀺 𑀬𑁄𑀦𑀫𑁄𑀓𑀸𑀭𑁄. 𑀉𑀪𑁄 𑀧𑀼𑀭𑀺𑀲𑀸𑀉𑀪𑁂 𑀯𑀸, 𑀉𑀪𑁄 𑀧𑀼𑀭𑀺𑀲𑁂 𑀉𑀪𑁂. 𑀲𑀼 𑀳𑀺𑀲𑀼 ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀓𑁆𑀯𑀘𑀺 𑀏𑀓𑀸𑀭𑀲𑁆𑀲𑁄𑀓𑀸𑀭𑁄. 𑀉𑀪𑁄𑀳𑀺 𑀉𑀪𑁄𑀪𑀺 𑀉𑀪𑁂𑀳𑀺 𑀉𑀪𑁂𑀪𑀺.

𑁨𑁨𑁭. 𑀉𑀪𑀸𑀤𑀺𑀢𑁄 𑀦𑀫𑀺𑀦𑁆𑀦𑀁.

𑀉𑀪𑀇𑀘𑁆𑀘𑁂𑀯𑀫𑀸𑀤𑀺𑀢𑁄 𑀦𑀁𑀯𑀘𑀦𑀲𑁆𑀲 𑀇𑀦𑁆𑀦𑀁 𑀳𑁄𑀢𑀺.

𑀉𑀪𑀺𑀦𑁆𑀦𑀁, 𑀉𑀪𑁄𑀳𑀺 𑀉𑀪𑁄𑀪𑀺 𑀉𑀪𑁂𑀳𑀺 𑀉𑀪𑁂𑀪𑀺, 𑀉𑀪𑀺𑀦𑁆𑀦𑀁, 𑀉𑀪𑁄𑀲𑀼 𑀉𑀪𑁂𑀲𑀼.

𑀤𑁆𑀯𑀺𑀆𑀤𑀬𑁄 𑀲𑀗𑁆𑀔𑁆𑀬𑀸𑀲𑀗𑁆𑀔𑁆𑀬𑁂𑀬𑁆𑀬𑀯𑀘𑀦𑀸, 𑀩𑀳𑀽𑀦𑀁 𑀯𑀸𑀘𑀺𑀢𑀢𑁆𑀢𑀸 𑀲𑀤𑀸 𑀩𑀳𑀼𑀯𑀘𑀦𑀦𑁆𑀢𑀸𑀯.

‘‘𑀤𑁆𑀯𑀺 𑀬𑁄’’𑀇𑀢𑀻𑀥 ‘‘𑀲𑀯𑀺𑀪𑀢𑁆𑀢𑀺𑀲𑁆𑀲, 𑀇𑀢𑁆𑀣𑀺𑀧𑀼𑀫𑀦𑀧𑀼𑀁𑀲𑀓𑀲𑀗𑁆𑀔𑁆𑀬’’𑀦𑁆𑀢𑀺 𑀘 𑀅𑀥𑀺𑀓𑀸𑀭𑁄.

𑁨𑁨𑁮. 𑀬𑁄𑀲𑀼 𑀤𑁆𑀯𑀺𑀦𑁆𑀦𑀁 𑀤𑁆𑀯𑁂 𑀘.

𑀤𑁆𑀯𑀺𑀇𑀘𑁆𑀘𑁂𑀢𑀲𑁆𑀲 𑀲𑀗𑁆𑀔𑁆𑀬𑀸𑀲𑀤𑁆𑀤𑀲𑁆𑀲 𑀇𑀢𑁆𑀣𑀺𑀧𑀼𑀫𑀦𑀧𑀼𑀁𑀲𑀓𑁂 𑀯𑀢𑁆𑀢𑀫𑀸𑀦𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀤𑁆𑀯𑁂𑀇𑀘𑁆𑀘𑀸𑀤𑁂𑀲𑁄 𑀳𑁄𑀢𑀺 𑀬𑁄𑀲𑀼 𑀧𑀭𑁂𑀲𑀼. 𑀘𑀲𑀤𑁆𑀤𑁂𑀦 𑀤𑀼𑀯𑁂 𑀘, 𑀓𑁆𑀯𑀘𑀺 𑀤𑀼𑀯𑀺 𑀘 𑀦𑀁𑀫𑁆𑀳𑀺. 𑀩𑀳𑀼𑀯𑀘𑀦𑀼𑀘𑁆𑀘𑀸𑀭𑀡𑀁 𑀤𑁆𑀯𑀺𑀲𑀤𑁆𑀤𑀢𑁄 ¶ 𑀩𑀳𑀼𑀯𑀘𑀦𑀫𑁂𑀯 𑀳𑁄𑀢𑀻𑀢𑀺 𑀜𑀸𑀧𑀦𑀢𑁆𑀣𑀁. 𑀤𑁆𑀯𑁂 𑀥𑀫𑁆𑀫𑀸, 𑀤𑁆𑀯𑁂 𑀇𑀢𑁆𑀣𑀺𑀬𑁄, 𑀤𑁆𑀯𑁂 𑀭𑀽𑀧𑀸𑀦𑀺, 𑀤𑀼𑀯𑁂 𑀯𑀸, 𑀏𑀯𑀁 𑀤𑀼𑀢𑀺𑀬𑀸𑀬𑀫𑁆𑀧𑀺, 𑀤𑁆𑀯𑀻𑀳𑀺 𑀤𑁆𑀯𑀻𑀪𑀺.

𑀦𑀁𑀫𑁆𑀳𑀺 𑀤𑀻𑀖𑁂 𑀲𑀫𑁆𑀧𑀢𑁆𑀢𑁂 𑁋

𑁨𑁨𑁯. 𑀦𑁄 𑀘 𑀤𑁆𑀯𑀸𑀤𑀺𑀢𑁄 𑀦𑀁𑀫𑁆𑀳𑀺.

𑀤𑁆𑀯𑀺𑀇𑀘𑁆𑀘𑁂𑀯𑀫𑀸𑀤𑀺𑀢𑁄 𑀲𑀗𑁆𑀔𑁆𑀬𑀸𑀢𑁄 𑀦𑀓𑀸𑀭𑀸𑀕𑀫𑁄 𑀳𑁄𑀢𑀺 𑀦𑀁𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀘𑀲𑀤𑁆𑀤𑀕𑁆𑀕𑀳𑀡𑁂𑀦 𑀇𑀢𑁆𑀣𑀺𑀬𑀁 𑀢𑀺 𑀘 𑀢𑀼𑀲𑀤𑁆𑀤𑀢𑁄 𑀲𑁆𑀲𑀜𑁆𑀘𑀸𑀕𑀫𑁄 𑀦𑀁𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀤𑁆𑀯𑀺𑀦𑁆𑀦𑀁 𑀤𑀼𑀯𑀺𑀦𑁆𑀦𑀁 𑀯𑀸, 𑀤𑁆𑀯𑀻𑀳𑀺 𑀤𑁆𑀯𑀻𑀪𑀺, 𑀤𑁆𑀯𑀺𑀦𑁆𑀦𑀁 𑀤𑀼𑀯𑀺𑀦𑁆𑀦𑀁, 𑀤𑁆𑀯𑀻𑀲𑀼.

𑀢𑀺𑀲𑀤𑁆𑀤𑀲𑁆𑀲 𑀪𑁂𑀤𑁄. ‘‘𑀢𑀺 𑀬𑁄’’𑀇𑀢𑀻𑀥

𑀬𑁄𑀮𑁄𑀧𑁂 𑀲𑀫𑁆𑀧𑀢𑁆𑀢𑁂

‘‘𑀬𑁄𑀲𑀽’’𑀢𑀺 𑀯𑀢𑁆𑀢𑀢𑁂.

𑁨𑁩𑁦. 𑀢𑀺 𑀘𑀢𑀼𑀦𑁆𑀦𑀁 𑀢𑀺𑀲𑁆𑀲𑁄 𑀘𑀢𑀲𑁆𑀲𑁄 𑀢𑀬𑁄𑀘𑀢𑁆𑀢𑀸𑀭𑁄𑀢𑀻𑀡𑀺 𑀘𑀢𑁆𑀢𑀸𑀭𑀺.

𑀢𑀺 𑀘𑀢𑀼𑀦𑁆𑀦𑀁 𑀲𑀗𑁆𑀔𑁆𑀬𑀸𑀦𑀁 𑀇𑀢𑁆𑀣𑀺𑀧𑀼𑀫𑀦𑀧𑀼𑀁𑀲𑀓𑁂 𑀯𑀢𑁆𑀢𑀫𑀸𑀦𑀸𑀦𑀁 𑀲𑀯𑀺𑀪𑀢𑁆𑀢𑀻𑀦𑀁 𑀬𑀣𑀸𑀓𑁆𑀓𑀫𑀁 𑀢𑀺𑀲𑁆𑀲𑁄 𑀘𑀢𑀲𑁆𑀲𑁄 𑀢𑀬𑁄 𑀘𑀢𑁆𑀢𑀸𑀭𑁄𑀢𑀻𑀡𑀺 𑀘𑀢𑁆𑀢𑀸𑀭𑀺𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺 𑀬𑁄𑀲𑀼 𑀧𑀭𑁂𑀲𑀼. 𑀢𑀬𑁄 𑀧𑀼𑀭𑀺𑀲𑀸, 𑀢𑀬𑁄 𑀧𑀼𑀭𑀺𑀲𑁂 𑀧𑀲𑁆𑀲, 𑀢𑀻𑀳𑀺 𑀢𑀻𑀪𑀺.

‘‘𑀦’’𑀫𑀺𑀢𑀺 𑀯𑀢𑁆𑀢𑀢𑁂.

𑁨𑁩𑁧. 𑀇𑀡𑁆𑀡𑀫𑀺𑀡𑁆𑀡𑀦𑁆𑀦𑀁 𑀢𑀻𑀳𑀺 𑀲𑀗𑁆𑀔𑁆𑀬𑀸𑀳𑀺.

𑀢𑀺𑀇𑀘𑁆𑀘𑁂𑀢𑀲𑁆𑀫𑀸 𑀲𑀗𑁆𑀔𑁆𑀬𑀸𑀲𑀤𑁆𑀤𑀸 𑀧𑀭𑀲𑁆𑀲 𑀦𑀁𑀯𑀘𑀦𑀲𑁆𑀲 𑀇𑀡𑁆𑀡𑀁 𑀇𑀡𑁆𑀡𑀦𑁆𑀦𑀁𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺, 𑀲𑀭𑀮𑁄𑀧𑀸𑀤𑀺. 𑀢𑀺𑀡𑁆𑀡𑀁 𑀢𑀺𑀡𑁆𑀡𑀦𑁆𑀦𑀁, 𑀢𑀻𑀳𑀺 𑀢𑀻𑀪𑀺, 𑀢𑀺𑀡𑁆𑀡𑀁 𑀢𑀺𑀡𑁆𑀡𑀦𑁆𑀦𑀁, 𑀢𑀻𑀲𑀼.

𑀇𑀢𑁆𑀣𑀺𑀬𑀁 ¶ 𑀢𑀺𑀲𑁆𑀲𑁄 𑀇𑀢𑁆𑀣𑀺𑀬𑁄, 𑀢𑀺𑀲𑁆𑀲𑁄, 𑀢𑀻𑀳𑀺 𑀢𑀻𑀪𑀺, 𑀦𑀁𑀫𑁆𑀳𑀺 𑀲𑁆𑀲𑀜𑁆𑀘𑀸𑀕𑀫𑁄, 𑀢𑀺𑀲𑁆𑀲𑀦𑁆𑀦𑀁, 𑀲𑁆𑀲𑀁𑀩𑁆𑀬𑀯𑀥𑀸𑀦𑀢𑁄 𑀇𑀡𑁆𑀡𑀸𑀪𑀸𑀯𑁄, 𑀲𑁂𑀲𑀁 𑀲𑀫𑀁.

𑀦𑀧𑀼𑀁𑀲𑀓𑁂 𑀢𑀻𑀡𑀺, 𑀢𑀻𑀡𑀺. 𑀲𑁂𑀲𑀁 𑀧𑀼𑀮𑁆𑀮𑀺𑀗𑁆𑀕𑀲𑀫𑀁.

𑀢𑀣𑀸 𑀘𑀢𑀼𑀲𑀤𑁆𑀤𑀲𑁆𑀲𑀧𑀺 𑀬𑁄𑀲𑀼 ‘‘𑀢𑀺𑀘𑀢𑀼𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀸𑀤𑁂𑀲𑁄, ‘‘𑀢𑀢𑁄 𑀬𑁄𑀦𑀫𑁄 𑀢𑀽’’𑀢𑀺 𑀏𑀢𑁆𑀣 𑀢𑀼𑀲𑀤𑁆𑀤𑁂𑀦 𑀓𑁆𑀯𑀘𑀺 𑀑𑀓𑀸𑀭𑁄 𑀘. 𑀘𑀢𑁆𑀢𑀸𑀭𑁄 𑀘𑀢𑀼𑀭𑁄 𑀯𑀸, 𑀘𑀢𑁆𑀢𑀸𑀭𑁄 𑀘𑀢𑀼𑀭𑁄, 𑀘𑀢𑀽𑀳𑀺 𑀘𑀢𑀽𑀪𑀺 𑀘𑀢𑀼𑀩𑁆𑀪𑀺, 𑀘𑀢𑀼𑀦𑁆𑀦𑀁, 𑀦𑀓𑀸𑀭𑀸𑀕𑀫𑁄. 𑀘𑀢𑀽𑀳𑀺 𑀘𑀢𑀽𑀪𑀺 𑀘𑀢𑀼𑀩𑁆𑀪𑀺, 𑀘𑀢𑀼𑀦𑁆𑀦𑀁, 𑀘𑀢𑀽𑀲𑀼.

𑀇𑀢𑁆𑀣𑀺𑀬𑀁 𑀘𑀢𑀲𑁆𑀲𑁄, 𑀘𑀢𑀲𑁆𑀲𑁄, 𑀦𑀁𑀫𑁆𑀳𑀺 𑀲𑁆𑀲𑀜𑁆𑀘𑀸𑀕𑀫𑁄, ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀘𑀢𑀼𑀭𑀼𑀓𑀸𑀭𑀲𑁆𑀲 𑀅𑀓𑀸𑀭𑁄. 𑀘𑀢𑀲𑁆𑀲𑀦𑁆𑀦𑀁. 𑀲𑁂𑀲𑀁 𑀲𑀫𑀁.

𑀦𑀧𑀼𑀁𑀲𑀓𑁂 𑀘𑀢𑁆𑀢𑀸𑀭𑀺, 𑀘𑀢𑁆𑀢𑀸𑀭𑀺. 𑀲𑁂𑀲𑀁 𑀧𑀼𑀮𑁆𑀮𑀺𑀗𑁆𑀕𑀲𑀫𑀁.

𑀢𑀣𑀸 𑁋

𑀦𑀻𑀮𑀸𑀤𑀺𑀕𑀼𑀡𑀦𑀸𑀫𑀜𑁆𑀘, 𑀩𑀳𑀼𑀩𑁆𑀩𑀻𑀳𑀺 𑀘 𑀢𑀤𑁆𑀥𑀺𑀢𑀁;

𑀲𑀸𑀫𑀜𑁆𑀜𑀯𑀼𑀢𑁆𑀬𑀢𑀻𑀢𑀸𑀤𑀺-𑀓𑀺𑀢𑀦𑁆𑀢𑀁 𑀯𑀸𑀘𑁆𑀘𑀮𑀺𑀗𑁆𑀕𑀺𑀓𑀁.

𑀏𑀢𑁆𑀣𑁂𑀤𑀁 𑀯𑀼𑀘𑁆𑀘𑀢𑁂 𑁋

𑀏𑀲𑁂’𑀲𑁄 𑀏𑀢𑀫𑀺𑀢𑀺 𑀘,

𑀧𑀲𑀺𑀤𑁆𑀥𑀺 𑀅𑀢𑁆𑀣𑁂𑀲𑀼 𑀬𑁂𑀲𑀼 𑀮𑁄𑀓𑀲𑁆𑀲;

𑀣𑀻𑀧𑀼𑀦𑁆𑀦𑀧𑀼𑀁𑀲𑀓𑀸𑀦𑀺𑀢𑀺,

𑀯𑀼𑀘𑁆𑀘𑀦𑁆𑀢𑁂 𑀢𑀸𑀦𑀺 𑀦𑀸𑀫𑀸𑀦𑀺.

𑀢𑀺𑀮𑀺𑀗𑁆𑀕𑀁 𑀦𑀺𑀝𑁆𑀞𑀺𑀢𑀁.

𑀅𑀮𑀺𑀗𑁆𑀕𑀦𑀸𑀫

𑀅𑀣𑀸𑀮𑀺𑀗𑁆𑀕𑁂𑀲𑀼 ¶ 𑀦𑀸𑀫𑁂𑀲𑀼 𑀢𑀼𑀫𑁆𑀳𑀫𑁆𑀳𑀲𑀤𑁆𑀤𑀸 𑀯𑀼𑀘𑁆𑀘𑀦𑁆𑀢𑁂.

𑀢𑁂𑀲𑀁 𑀧𑀦𑀸𑀮𑀺𑀗𑁆𑀕𑀢𑁆𑀢𑀸 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼 𑀲𑀫𑀸𑀦𑀭𑀽𑀧𑀁. ‘‘𑀢𑀼𑀫𑁆𑀳𑀫𑁆𑀳’’𑀇𑀢𑀺 𑀞𑀺𑀢𑁂 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺.

‘‘𑀲𑀯𑀺𑀪𑀢𑁆𑀢𑀻𑀦𑀁, 𑀢𑀼𑀫𑁆𑀳𑀫𑁆𑀳𑀸𑀓’’𑀦𑁆𑀢𑀺 𑀅𑀥𑀺𑀓𑀸𑀭𑁄.

𑁨𑁩𑁨. 𑀢𑁆𑀯𑀫𑀳𑀁 𑀲𑀺𑀫𑁆𑀳𑀺 𑀘.

𑀲𑀩𑁆𑀩𑁂𑀲𑀁 𑀢𑀼𑀫𑁆𑀳𑀅𑀫𑁆𑀳𑀲𑀤𑁆𑀤𑀸𑀦𑀁 𑀲𑀯𑀺𑀪𑀢𑁆𑀢𑀻𑀦𑀁 𑀬𑀣𑀸𑀓𑁆𑀓𑀫𑀁 𑀢𑁆𑀯𑀁𑀅𑀳𑀁𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺 𑀲𑀺𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀘𑀲𑀤𑁆𑀤𑁂𑀦 𑀢𑀼𑀫𑁆𑀳𑀲𑁆𑀲 𑀢𑀼𑀯𑀜𑁆𑀘 𑀳𑁄𑀢𑀺. 𑀢𑁆𑀯𑀁 𑀧𑀼𑀫𑀸, 𑀢𑁆𑀯𑀁 𑀇𑀢𑁆𑀣𑀻, 𑀢𑁆𑀯𑀁 𑀦𑀧𑀼𑀁𑀲𑀓𑀁, 𑀢𑀼𑀯𑀁 𑀲𑀢𑁆𑀣𑀸 𑀯𑀸. 𑀅𑀳𑀁 𑀧𑀼𑀫𑀸, 𑀅𑀳𑀁 𑀇𑀢𑁆𑀣𑀻, 𑀅𑀳𑀁 𑀦𑀧𑀼𑀁𑀲𑀓𑀁.

𑀩𑀳𑀼𑀯𑀘𑀦𑁂 ‘‘𑀲𑀩𑁆𑀩𑀦𑀸𑀫𑀓𑀸𑀭𑀢𑁂 𑀧𑀞𑀫𑁄’’𑀢𑀺 𑀏𑀓𑀸𑀭𑁄. 𑀢𑀼𑀫𑁆𑀳𑁂 𑀢𑀺𑀝𑁆𑀞𑀣, 𑀪𑀺𑀬𑁆𑀬𑁄 𑀅𑀫𑁆𑀳𑁂 𑀫𑀳𑁂𑀫𑀲𑁂.

‘‘𑀅𑀫𑁆𑀳𑀲𑁆𑀲𑀸’’𑀢𑀺 𑀯𑀢𑁆𑀢𑀢𑁂.

𑁨𑁩𑁩. 𑀫𑀬𑀁 𑀬𑁄𑀫𑁆𑀳𑀺 𑀧𑀞𑀫𑁂.

𑀲𑀩𑁆𑀩𑀲𑁆𑀲 𑀅𑀫𑁆𑀳𑀲𑀤𑁆𑀤𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀫𑀬𑀁𑀆𑀤𑁂𑀲𑁄 𑀳𑁄𑀢𑀺 𑀬𑁄𑀫𑁆𑀳𑀺 𑀧𑀞𑀫𑁂. 𑀫𑀬𑀁 𑀕𑀘𑁆𑀙𑀸𑀫.

𑀏𑀢𑁆𑀣 𑀘 𑀏𑀓𑀲𑁆𑀫𑀺𑀫𑁆𑀧𑀺 𑀕𑀸𑀭𑀯𑀩𑀳𑀼𑀫𑀸𑀦𑁂𑀦 𑀩𑀳𑀼𑀢𑁆𑀢𑀲𑀫𑀸𑀭𑁄𑀧𑀸 𑀩𑀳𑀼𑀯𑀘𑀦𑀁 𑀳𑁄𑀢𑀺.

‘‘𑀅𑀁𑀫𑁆𑀳𑀻’’𑀢𑀺 𑀯𑀢𑁆𑀢𑀢𑁂.

𑁨𑁩𑁪. 𑀢𑀯𑀁 𑀫𑀫𑀜𑁆𑀘 𑀦𑀯𑀸.

𑀲𑀩𑁆𑀩𑁂𑀲𑀁 𑀢𑀼𑀫𑁆𑀳 𑀅𑀫𑁆𑀳𑀲𑀤𑁆𑀤𑀸𑀦𑀁 𑀲𑀯𑀺𑀪𑀢𑁆𑀢𑀻𑀦𑀁 𑀢𑀯𑀁 𑀫𑀫𑀁𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺 𑀦𑀯𑀸 𑀬𑀣𑀸𑀓𑁆𑀓𑀫𑀁 𑀅𑀁𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀢𑀯𑀁, 𑀫𑀫𑀁 𑀧𑀲𑁆𑀲.

𑁨𑁩𑁫. 𑀢𑀁 ¶ 𑀫𑀫𑀁𑀫𑁆𑀳𑀺.

𑀲𑀩𑁆𑀩𑁂𑀲𑀁 𑀢𑀼𑀫𑁆𑀳 𑀅𑀫𑁆𑀳𑀲𑀤𑁆𑀤𑀸𑀦𑀁 𑀲𑀯𑀺𑀪𑀢𑁆𑀢𑀻𑀦𑀁 𑀢𑀁 𑀫𑀁𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁 𑀅𑀁𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀢𑀁, 𑀫𑀁.

𑁨𑁩𑁬. 𑀢𑀼𑀫𑁆𑀳𑀲𑁆𑀲 𑀢𑀼𑀯𑀁 𑀢𑁆𑀯𑀫𑀁𑀫𑁆𑀳𑀺.

𑀲𑀩𑁆𑀩𑀲𑁆𑀲 𑀢𑀼𑀫𑁆𑀳𑀲𑀤𑁆𑀤𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀢𑀼𑀯𑀁𑀢𑁆𑀯𑀁𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺 𑀅𑀁𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀢𑀼𑀯𑀁 𑀢𑁆𑀯𑀁.

𑀩𑀳𑀼𑀯𑀘𑀦𑁂 ‘‘𑀢𑀼𑀫𑁆𑀳𑀫𑁆𑀳𑁂𑀳𑀺, 𑀆𑀓’’𑀦𑁆𑀢𑀺 𑀘 𑀯𑀢𑁆𑀢𑀢𑁂.

𑁨𑁩𑁭. 𑀯𑀸 𑀬𑁆𑀯𑀧𑁆𑀧𑀞𑀫𑁄.

𑀢𑀼𑀫𑁆𑀳𑀫𑁆𑀳𑁂𑀳𑀺 𑀧𑀭𑁄 𑀅𑀧𑁆𑀧𑀞𑀫𑁄 𑀬𑁄 𑀆𑀓𑀁 𑀳𑁄𑀢𑀺 𑀯𑀸. 𑀢𑀼𑀫𑁆𑀳𑀸𑀓𑀁 𑀧𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀧𑀲𑁆𑀲𑀸𑀫𑀺, 𑀅𑀫𑁆𑀳𑀸𑀓𑀁 𑀧𑀲𑁆𑀲𑀲𑀺, 𑀅𑀫𑁆𑀳𑁂 𑀧𑀲𑁆𑀲𑀲𑀺.

𑁨𑁩𑁮. 𑀦𑀸𑀫𑁆𑀳𑀺 𑀢𑀬𑀸 𑀫𑀬𑀸.

𑀲𑀩𑁆𑀩𑁂𑀲𑀁 𑀢𑀼𑀫𑁆𑀳 𑀅𑀫𑁆𑀳𑀲𑀤𑁆𑀤𑀸𑀦𑀁 𑀲𑀯𑀺𑀪𑀢𑁆𑀢𑀻𑀦𑀁 𑀢𑀬𑀸 𑀫𑀬𑀸𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁 𑀦𑀸𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺.

𑁨𑁩𑁯. 𑀢𑀬𑀸𑀢𑀬𑀻𑀦𑀁 𑀢𑀓𑀸𑀭𑁄 𑀢𑁆𑀯𑀢𑁆𑀢𑀁 𑀯𑀸.

𑀢𑀬𑀸 𑀢𑀬𑀺𑀇𑀘𑁆𑀘𑁂𑀢𑁂𑀲𑀁 𑀢𑀓𑀸𑀭𑁄 𑀢𑁆𑀯𑀢𑁆𑀢𑀫𑀸𑀧𑀚𑁆𑀚𑀢𑁂 𑀯𑀸. 𑀢𑁆𑀯𑀬𑀸 𑀢𑀬𑀸, 𑀫𑀬𑀸, 𑀢𑀼𑀫𑁆𑀳𑁂𑀳𑀺 𑀢𑀼𑀫𑁆𑀳𑁂𑀪𑀺, 𑀅𑀫𑁆𑀳𑁂𑀳𑀺 𑀅𑀫𑁆𑀳𑁂𑀪𑀺.

‘‘𑀲𑀲𑁆𑀫𑀺𑀁, 𑀯𑀸’’𑀢𑀺 𑀯𑀢𑁆𑀢𑀢𑁂.

𑁨𑁪𑁦. 𑀲𑀲𑁆𑀲𑀁.

𑀢𑀼𑀫𑁆𑀳𑀫𑁆𑀳𑁂𑀳𑀺 𑀲𑀲𑁆𑀲 𑀯𑀺𑀪𑀢𑁆𑀢𑀺𑀲𑁆𑀲 𑀅𑀫𑀸𑀤𑁂𑀲𑁄 𑀳𑁄𑀢𑀺 𑀯𑀸. 𑀢𑀼𑀫𑁆𑀳𑀁, 𑀅𑀫𑁆𑀳𑀁 𑀤𑀻𑀬𑀢𑁂.

𑁨𑁪𑁧. 𑀢𑀯 ¶ 𑀫𑀫 𑀲𑁂.

𑀲𑀩𑁆𑀩𑁂𑀲𑀁 𑀢𑀼𑀫𑁆𑀳 𑀅𑀫𑁆𑀳𑀲𑀤𑁆𑀤𑀸𑀦𑀁 𑀲𑀯𑀺𑀪𑀢𑁆𑀢𑀻𑀦𑀁 𑀬𑀣𑀸𑀓𑁆𑀓𑀫𑀁 𑀢𑀯𑀫𑀫𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺 𑀲𑁂 𑀯𑀺𑀪𑀢𑁆𑀢𑀺𑀫𑁆𑀳𑀺, 𑀯𑀺𑀓𑀧𑁆𑀧𑁂𑀦𑀸𑀬𑀁 𑀯𑀺𑀚𑁆𑀛𑀦𑁆𑀢𑀭𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸.

‘‘𑀲𑁂’’𑀢𑀺 𑀯𑀢𑁆𑀢𑀢𑁂.

𑁨𑁪𑁨. 𑀢𑀼𑀬𑁆𑀳𑀁 𑀫𑀬𑁆𑀳𑀜𑁆𑀘.

𑀲𑀩𑁆𑀩𑁂𑀲𑀁 𑀢𑀼𑀫𑁆𑀳 𑀅𑀫𑁆𑀳𑀲𑀤𑁆𑀤𑀸𑀦𑀁 𑀲𑀯𑀺𑀪𑀢𑁆𑀢𑀻𑀦𑀁 𑀬𑀣𑀸𑀓𑁆𑀓𑀫𑀁 𑀢𑀼𑀬𑁆𑀳𑀁𑀫𑀬𑁆𑀳𑀁𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀘 𑀳𑁄𑀦𑁆𑀢𑀺 𑀲𑁂 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀢𑀯, 𑀫𑀫 𑀢𑀼𑀬𑁆𑀳𑀁, 𑀫𑀬𑁆𑀳𑀁 𑀯𑀸 𑀤𑀻𑀬𑀢𑁂.

𑁨𑁪𑁩. 𑀅𑀫𑁆𑀳𑀲𑁆𑀲 𑀫𑀫𑀁 𑀲𑀯𑀺𑀪𑀢𑁆𑀢𑀺𑀲𑁆𑀲 𑀲𑁂.

𑀲𑀩𑁆𑀩𑀲𑁆𑀲𑁂𑀯 𑀅𑀫𑁆𑀳𑀲𑀤𑁆𑀤𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀫𑀫𑀁𑀆𑀤𑁂𑀲𑁄 𑀳𑁄𑀢𑀺 𑀲𑁂 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀫𑀫𑀁 𑀤𑀻𑀬𑀢𑁂.

‘‘𑀲𑀲𑁆𑀲’’𑀦𑁆𑀢𑀺 𑀇𑀢𑁄 𑀲𑀻𑀳𑀕𑀢𑀺𑀬𑀸 ‘‘𑀅’’𑀫𑀺𑀢𑀺 𑀯𑀢𑁆𑀢𑀢𑁂.

𑁨𑁪𑁪. 𑀢𑀼𑀫𑁆𑀳𑀫𑁆𑀳𑁂𑀳𑀺 𑀦𑀫𑀸𑀓𑀁.

𑀢𑀼𑀫𑁆𑀳𑀫𑁆𑀳𑁂𑀳𑀺 𑀧𑀭𑀲𑁆𑀲 𑀦𑀁𑀯𑀘𑀦𑀲𑁆𑀲 𑀆𑀓𑀫𑀺𑀘𑁆𑀘𑀸𑀤𑁂𑀲𑁄 𑀳𑁄𑀢𑀺, 𑀅𑀜𑁆𑀘. ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀅𑀫𑁆𑀳𑀲𑁆𑀲 𑀓𑁆𑀯𑀘𑀺 𑀅𑀲𑁆𑀫𑀸𑀤𑁂𑀲𑁄. 𑀢𑀼𑀫𑁆𑀳𑀁 𑀢𑀼𑀫𑁆𑀳𑀸𑀓𑀁, 𑀅𑀫𑁆𑀳𑀁 𑀅𑀫𑁆𑀳𑀸𑀓𑀁 𑀅𑀲𑁆𑀫𑀸𑀓𑀁 𑀯𑀸.

𑀧𑀜𑁆𑀘𑀫𑀺𑀬𑀁 ‘‘𑀅𑀫𑁆𑀳𑀢𑀼𑀫𑁆𑀳𑀦𑁆𑀢𑀼𑀭𑀸𑀚’’𑀇𑀘𑁆𑀘𑀸𑀤𑀺𑀦𑀸 𑀲𑁆𑀫𑀸𑀯𑀘𑀦𑀲𑁆𑀲 𑀦𑀸𑀪𑀸𑀯𑀸𑀢𑀺𑀤𑁂𑀲𑁄. 𑀢𑀬𑀸, 𑀫𑀬𑀸 𑀅𑀧𑁂𑀢𑀺, 𑀢𑀼𑀫𑁆𑀳𑁂𑀳𑀺, 𑀅𑀫𑁆𑀳𑁂𑀳𑀺 𑀢𑀼𑀫𑁆𑀳𑁂𑀪𑀺 𑀅𑀫𑁆𑀳𑁂𑀪𑀺, 𑀢𑀼𑀫𑁆𑀳𑀁 𑀅𑀫𑁆𑀳𑀁 𑀢𑀯 𑀫𑀫, 𑀢𑀼𑀬𑁆𑀳𑀁, 𑀫𑀬𑁆𑀳𑀁 𑀫𑀫𑀁 𑀧𑀭𑀺𑀕𑁆𑀕𑀳𑁄, 𑀢𑀼𑀫𑁆𑀳𑀁 𑀢𑀼𑀫𑁆𑀳𑀸𑀓𑀁, 𑀅𑀫𑁆𑀳𑀁 𑀅𑀫𑁆𑀳𑀸𑀓𑀁 𑀅𑀲𑁆𑀫𑀸𑀓𑀁 𑀥𑀫𑁆𑀫𑀢𑀸.

‘‘𑀲𑁆𑀫𑀺𑀁𑀫𑁆𑀳𑀻’’𑀢𑀺 𑀯𑀢𑁆𑀢𑀢𑁂.

𑁨𑁪𑁫. 𑀢𑀼𑀫𑁆𑀳𑀫𑁆𑀳𑀸𑀓𑀁 ¶ 𑀢𑀬𑀺 𑀫𑀬𑀺.

𑀲𑀩𑁆𑀩𑁂𑀲𑀁 𑀢𑀼𑀫𑁆𑀳 𑀅𑀫𑁆𑀳𑀲𑀤𑁆𑀤𑀸𑀦𑀁 𑀲𑀯𑀺𑀪𑀢𑁆𑀢𑀻𑀦𑀁 𑀢𑀬𑀺 𑀫𑀬𑀺𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁 𑀲𑁆𑀫𑀺𑀁𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀢𑀓𑀸𑀭𑀲𑁆𑀲 𑀢𑁆𑀯𑀢𑁆𑀢𑀁. 𑀢𑁆𑀯𑀬𑀺 𑀢𑀬𑀺 𑀫𑀬𑀺, 𑀢𑀼𑀫𑁆𑀳𑁂𑀲𑀼 𑀅𑀫𑁆𑀳𑁂𑀲𑀼.

𑀢𑁂𑀲𑀁 𑀏𑀯 𑀢𑀼𑀫𑁆𑀳 𑀅𑀫𑁆𑀳𑀲𑀤𑁆𑀤𑀸𑀦𑀁 𑀧𑀤𑀢𑁄 𑀧𑀭𑁂𑀲𑀁 𑀓𑁆𑀯𑀘𑀺 𑀆𑀤𑁂𑀲𑀦𑁆𑀢𑀭𑀯𑀺𑀥𑀸𑀦𑁂 𑀭𑀽𑀧𑀪𑁂𑀤𑁄.

‘‘𑀦𑀯𑀸’’𑀢𑀺 𑀅𑀥𑀺𑀓𑀸𑀭𑁄.

𑁨𑁪𑁬. 𑀧𑀤𑀢𑁄 𑀤𑀼𑀢𑀺𑀬𑀸𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀲𑀼 𑀯𑁄 𑀦𑁄.

𑀲𑀩𑁆𑀩𑁂𑀲𑀁 𑀢𑀼𑀫𑁆𑀳 𑀅𑀫𑁆𑀳𑀲𑀤𑁆𑀤𑀸𑀦𑀁 𑀲𑀯𑀺𑀪𑀢𑁆𑀢𑀻𑀦𑀁 𑀧𑀤𑀲𑁆𑀫𑀸 𑀧𑀭𑁂𑀲𑀁 𑀯𑁄 𑀦𑁄𑀆𑀤𑁂𑀲𑀸 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁 𑀤𑀼𑀢𑀺𑀬𑀸𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀲𑀼 𑀩𑀳𑀼𑀯𑀘𑀦𑁂𑀲𑀼 𑀦𑀯𑀸. 𑀏𑀢𑁆𑀣 𑀘 ‘‘𑀏𑀓𑀯𑀘𑀦𑁂𑀲𑀽’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 ‘‘𑀩𑀳𑀼𑀯𑀘𑀦𑁂𑀲𑀽’’𑀢𑀺 𑀮𑀤𑁆𑀥𑀁. 𑀧𑀳𑀸𑀬 𑀯𑁄 𑀕𑀫𑀺𑀲𑁆𑀲𑀸𑀫𑀺, 𑀫𑀸 𑀦𑁄 𑀅𑀚𑁆𑀚 𑀯𑀺𑀓𑀦𑁆𑀢𑀺𑀁𑀲𑀼, 𑀥𑀫𑁆𑀫𑀁 𑀯𑁄 𑀪𑀺𑀓𑁆𑀔𑀯𑁂 𑀤𑁂𑀲𑀺𑀲𑁆𑀲𑀸𑀫𑀺, 𑀲𑀁𑀯𑀺𑀪𑀚𑁂𑀣 𑀦𑁄 𑀭𑀚𑁆𑀚𑁂𑀦, 𑀢𑀼𑀝𑁆𑀞𑁄𑀲𑁆𑀫𑀺 𑀯𑁄 𑀧𑀓𑀢𑀺𑀬𑀸, 𑀲𑀢𑁆𑀣𑀸 𑀦𑁄 𑀪𑀕𑀯𑀸 𑀅𑀦𑀼𑀧𑁆𑀧𑀢𑁆𑀢𑁄.

𑀦𑀯𑀸𑀢𑀺 𑀓𑀺𑀁? 𑀪𑀬𑀁 𑀢𑀼𑀫𑁆𑀳𑀸𑀓 𑀦𑁄 𑀲𑀺𑀬𑀸, 𑀏𑀲𑁄 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸.

‘‘𑀧𑀤𑀢𑁄, 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀲𑀽’’𑀢𑀺 𑀯𑀢𑁆𑀢𑀢𑁂.

𑁨𑁪𑁭. 𑀢𑁂𑀫𑁂𑀓𑀯𑀘𑀦𑁂𑀲𑀼 𑀘.

𑀲𑀩𑁆𑀩𑁂𑀲𑀁 𑀢𑀼𑀫𑁆𑀳 𑀅𑀫𑁆𑀳𑀲𑀤𑁆𑀤𑀸𑀦𑀁 𑀲𑀯𑀺𑀪𑀢𑁆𑀢𑀻𑀦𑀁 𑀧𑀤𑀲𑁆𑀫𑀸 𑀧𑀭𑁂𑀲𑀁 𑀢𑁂 𑀫𑁂𑀆𑀤𑁂𑀲𑀸 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀲𑀼 𑀏𑀓𑀯𑀘𑀦𑁂𑀲𑀼 ¶ 𑀦𑀯𑀸. 𑀤𑀤𑀸𑀫𑀺 𑀢𑁂 𑀕𑀸𑀫𑀯𑀭𑀸𑀦𑀺 𑀧𑀜𑁆𑀘, 𑀤𑀤𑀸𑀳𑀺 𑀫𑁂 𑀕𑀸𑀫𑀯𑀭𑀁, 𑀇𑀤𑀁 𑀢𑁂 𑀭𑀝𑁆𑀞𑀁, 𑀅𑀬𑀁 𑀫𑁂 𑀧𑀼𑀢𑁆𑀢𑁄.

𑀦𑀯𑀸𑀢𑀺 𑀓𑀺𑀁? 𑀇𑀤𑀁 𑀘𑀻𑀯𑀭𑀁 𑀢𑀼𑀬𑁆𑀳𑀁 𑀯𑀺𑀓𑀧𑁆𑀧𑀦𑀢𑁆𑀣𑀸𑀬 𑀤𑀫𑁆𑀫𑀺, 𑀲𑀼𑀡𑀸𑀣 𑀯𑀘𑀦𑀁 𑀫𑀫.

𑀦𑀯𑀸𑀥𑀺𑀓𑀸𑀭𑀢𑁄 𑀘𑁂𑀢𑁆𑀣,

𑀯𑁄 𑀦𑁄 𑀢𑁂 𑀫𑁂𑀢𑀺 𑀬𑁂 𑀇𑀫𑁂;

𑀧𑀸𑀤𑀸𑀤𑁄 𑀘 𑀘 𑀯𑀸 𑀏𑀯𑀸-

𑀤𑀺𑀬𑁄𑀕𑁂 𑀘 𑀦 𑀳𑁄𑀦𑁆𑀢𑀺 𑀢𑁂.

𑀬𑀣𑀸 𑁋

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀢𑀯 𑀲𑀼𑀢𑁆𑀯𑀸𑀦 𑀫𑀸𑀡𑀯;

𑀢𑀼𑀬𑁆𑀳𑀜𑁆𑀘𑀸𑀧𑀺 𑀫𑀳𑀸𑀭𑀸𑀚, 𑀫𑀬𑁆𑀳𑀜𑁆𑀘 𑀭𑀝𑁆𑀞𑀯𑀟𑁆𑀠𑀦.

𑀏𑀯𑀫𑀺𑀤𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀁 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘𑀸𑀢𑀺.

𑀧𑀤𑀢𑁄𑀢𑀺 𑀓𑀺𑀁? 𑀢𑀯 𑀜𑀸𑀢𑀺, 𑀫𑀫 𑀜𑀸𑀢𑀺.

‘‘𑀢𑁂 𑀫𑁂’’𑀢𑀺 𑀯𑀢𑁆𑀢𑀢𑁂.

𑁨𑁪𑁮. 𑀦 𑀅𑀁𑀫𑁆𑀳𑀺.

𑀲𑀩𑁆𑀩𑁂𑀲𑀁 𑀢𑀼𑀫𑁆𑀳 𑀅𑀫𑁆𑀳𑀲𑀤𑁆𑀤𑀸𑀦𑀁 𑀲𑀯𑀺𑀪𑀢𑁆𑀢𑀻𑀦𑀁 𑀧𑀤𑀲𑁆𑀫𑀸 𑀧𑀭𑁂𑀲𑀁 𑀢𑁂 𑀫𑁂𑀆𑀤𑁂𑀲𑀸 𑀦 𑀳𑁄𑀦𑁆𑀢𑀺 𑀅𑀁𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀧𑀲𑁆𑀲𑁂𑀬𑁆𑀬 𑀢𑀁 𑀯𑀲𑁆𑀲𑀲𑀢𑀁 𑀆𑀭𑁄𑀕𑁆𑀬𑀁. 𑀲𑁄 𑀫𑀫𑀩𑁆𑀭𑀯𑀻𑀢𑀺.

‘‘𑀢𑁂𑀫𑁂𑀓𑀯𑀘𑀦𑁂’’𑀢𑀺 𑀯𑀢𑁆𑀢𑀢𑁂.

𑁨𑁪𑁯. 𑀯𑀸 𑀢𑀢𑀺𑀬𑁂 𑀘.

𑀲𑀩𑁆𑀩𑁂𑀲𑀁 𑀢𑀼𑀫𑁆𑀳 𑀅𑀫𑁆𑀳𑀲𑀤𑁆𑀤𑀸𑀦𑀁 𑀲𑀯𑀺𑀪𑀢𑁆𑀢𑀻𑀦𑀁 𑀧𑀤𑀲𑁆𑀫𑀸 𑀧𑀭𑁂𑀲𑀁 𑀢𑁂 𑀫𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺 𑀯𑀸 𑀬𑀣𑀸𑀓𑁆𑀓𑀫𑀁 𑀢𑀢𑀺𑀬𑁂𑀓𑀯𑀘𑀦𑁂 𑀧𑀭𑁂 ¶ . 𑀓𑀢𑀁 𑀢𑁂 𑀧𑀸𑀧𑀁, 𑀓𑀢𑀁 𑀢𑀬𑀸 𑀧𑀸𑀧𑀁, 𑀓𑀢𑀁 𑀫𑁂 𑀧𑀼𑀜𑁆𑀜𑀁, 𑀓𑀢𑀁 𑀫𑀬𑀸 𑀧𑀼𑀜𑁆𑀜𑀁.

‘‘𑀯𑀸, 𑀢𑀢𑀺𑀬𑁂’’𑀢𑀺 𑀘 𑀯𑀢𑁆𑀢𑀢𑁂.

𑁨𑁫𑁦. 𑀩𑀳𑀼𑀯𑀘𑀦𑁂𑀲𑀼 𑀯𑁄 𑀦𑁄.

𑀲𑀩𑁆𑀩𑁂𑀲𑀁 𑀢𑀼𑀫𑁆𑀳 𑀅𑀫𑁆𑀳𑀲𑀤𑁆𑀤𑀸𑀦𑀁 𑀲𑀯𑀺𑀪𑀢𑁆𑀢𑀻𑀦𑀁 𑀧𑀤𑀲𑁆𑀫𑀸 𑀧𑀭𑁂𑀲𑀁 𑀯𑁄 𑀦𑁄𑀆𑀤𑁂𑀲𑀸 𑀳𑁄𑀦𑁆𑀢𑀺 𑀯𑀸 𑀬𑀣𑀸𑀓𑁆𑀓𑀫𑀁 𑀢𑀢𑀺𑀬𑀸𑀩𑀳𑀼𑀯𑀘𑀦𑁂 𑀧𑀭𑁂. 𑀓𑀢𑀁 𑀯𑁄 𑀓𑀫𑁆𑀫𑀁, 𑀓𑀢𑀁 𑀦𑁄 𑀓𑀫𑁆𑀫𑀁.

𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁂𑀦 𑀓𑁆𑀯𑀘𑀺 𑀬𑁄𑀫𑁆𑀳𑀺 𑀧𑀞𑀫𑁂 𑀘 𑀯𑁄 𑀦𑁄 𑀳𑁄𑀦𑁆𑀢𑀺. 𑀕𑀸𑀫𑀁 𑀯𑁄 𑀕𑀘𑁆𑀙𑁂𑀬𑁆𑀬𑀸𑀣, 𑀕𑀸𑀫𑀁 𑀦𑁄 𑀕𑀘𑁆𑀙𑁂𑀬𑁆𑀬𑀸𑀫.

𑀢𑀣𑀸 𑀧𑀜𑁆𑀘𑀸𑀤𑀻𑀦𑀫𑀝𑁆𑀞𑀸𑀭𑀲𑀦𑁆𑀢𑀸𑀦𑀁, 𑀓𑀢𑀺𑀲𑀤𑁆𑀤𑀲𑁆𑀲 𑀘𑀸𑀮𑀺𑀗𑁆𑀕𑀢𑁆𑀢𑀸 𑀢𑀺𑀮𑀺𑀗𑁆𑀕𑁂𑀧𑀺 𑀲𑀫𑀸𑀦𑀭𑀽𑀧𑀁, 𑀅𑀮𑀺𑀗𑁆𑀕𑀢𑁆𑀢𑀸 𑀏𑀯 𑀧𑀜𑁆𑀘𑀸𑀤𑀺𑀢𑁄 𑀇𑀢𑁆𑀣𑀺𑀧𑁆𑀧𑀘𑁆𑀘𑀬𑀸𑀪𑀸𑀯𑁄.

‘‘𑀧𑀜𑁆𑀘 𑀬𑁄’’𑀇𑀢𑀻𑀥 𑁋

‘‘𑀬𑁄𑀲𑀼 𑀤𑁆𑀯𑀺𑀦𑁆𑀦𑀁 𑀤𑁆𑀯𑁂 𑀘𑀸’’𑀢𑀺 𑀇𑀢𑁄 ‘‘𑀬𑁄𑀲𑀽’’𑀢𑀺 𑀯𑀢𑁆𑀢𑀢𑁂, ‘‘𑀇𑀢𑁆𑀣𑀺𑀧𑀼𑀫𑀦𑀧𑀼𑀁𑀲𑀓𑀲𑀗𑁆𑀔𑁆𑀬’’𑀦𑁆𑀢𑀺 𑀘.

𑁨𑁫𑁧. 𑀧𑀜𑁆𑀘𑀸𑀤𑀻𑀦𑀫𑀓𑀸𑀭𑁄.

𑀅𑀦𑁆𑀢𑀸𑀧𑁂𑀓𑁆𑀔𑀸𑀬𑀁 𑀙𑀝𑁆𑀞𑀻, 𑀧𑀜𑁆𑀘𑀸𑀤𑀻𑀦𑀁 𑀅𑀝𑁆𑀞𑀸𑀭𑀲𑀦𑁆𑀢𑀸𑀦𑀁 𑀲𑀗𑁆𑀔𑁆𑀬𑀸𑀦𑀁 𑀇𑀢𑁆𑀣𑀺𑀧𑀼𑀫𑀦𑀧𑀼𑀁𑀲𑀓𑁂 𑀯𑀢𑁆𑀢𑀫𑀸𑀦𑀸𑀦𑀫𑀦𑁆𑀢𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀅𑀓𑀸𑀭𑁄 𑀳𑁄𑀢𑀺 𑀬𑁄𑀲𑀼 𑀧𑀭𑁂𑀲𑀼. 𑀆 𑀏𑀆𑀤𑁂𑀲𑀸𑀧𑀯𑀸𑀤𑁄𑀬𑀁, 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀧𑀜𑁆𑀘 𑀕𑀢𑀺𑀬𑁄, 𑀧𑀜𑁆𑀘 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀏𑀯𑀁 𑀤𑀼𑀢𑀺𑀬𑀸𑀬𑀜𑁆𑀘.

‘‘𑀲𑀼𑀦𑀁𑀳𑀺𑀲𑀽’’𑀢𑀺 𑀯𑀢𑁆𑀢𑀢𑁂.

𑁨𑁫𑁨. 𑀧𑀜𑁆𑀘𑀸𑀤𑀻𑀦𑀫𑀢𑁆𑀢𑀁.

𑀧𑀜𑁆𑀘𑀸𑀤𑀻𑀦𑀫𑀝𑁆𑀞𑀸𑀭𑀲𑀦𑁆𑀢𑀸𑀦𑀁 𑀲𑀗𑁆𑀔𑁆𑀬𑀸𑀦𑀫𑀦𑁆𑀢𑁄 𑀅𑀢𑁆𑀢𑀫𑀸𑀧𑀚𑁆𑀚𑀢𑁂 𑀲𑀼 𑀦𑀁 𑀳𑀺𑀇𑀘𑁆𑀘𑁂𑀢𑁂𑀲𑀼 𑀧𑀭𑁂𑀲𑀼. 𑀏𑀢𑁆𑀢𑀤𑀻𑀖𑀸𑀧𑀯𑀸𑀤𑁄𑀬𑀁. 𑀧𑀜𑁆𑀘𑀳𑀺 𑀧𑀜𑁆𑀘𑀪𑀺 ¶ , 𑀧𑀜𑁆𑀘𑀦𑁆𑀦𑀁, 𑀧𑀜𑁆𑀘𑀳𑀺 𑀧𑀜𑁆𑀘𑀪𑀺, 𑀧𑀜𑁆𑀘𑀦𑁆𑀦𑀁, 𑀧𑀜𑁆𑀘𑀲𑀼. 𑀏𑀯𑀁 𑀙 𑀲 𑀢𑁆𑀢 𑀅𑀝𑁆𑀞𑀦𑀯 𑀤𑀲𑀲𑀤𑁆𑀤𑀸.

‘‘𑀏𑀓𑀜𑁆𑀘 𑀤𑀲 𑀘𑀸’’𑀢𑀺 𑀅𑀢𑁆𑀣𑁂 𑀤𑁆𑀯𑀦𑁆𑀤𑀲𑀫𑀸𑀲𑁂, ‘‘𑀏𑀓𑁂𑀦 𑀅𑀥𑀺𑀓𑀸 𑀤𑀲𑀸’’𑀢𑀺 𑀅𑀢𑁆𑀣𑁂 𑀢𑀧𑁆𑀧𑀼𑀭𑀺𑀲𑁂 𑀯𑀸 𑀓𑀢𑁂

‘‘𑀲𑀗𑁆𑀔𑁆𑀬𑀸𑀦𑁂’’𑀢𑀺 𑀯𑀢𑁆𑀢𑀢𑁂.

𑁨𑁫𑁩. 𑀤𑁆𑀯𑁂𑀓𑀝𑁆𑀞𑀸𑀦𑀫𑀸𑀓𑀸𑀭𑁄 𑀯𑀸.

𑀤𑁆𑀯𑀺𑀏𑀓𑀅𑀝𑁆𑀞𑀇𑀘𑁆𑀘𑁂𑀢𑁂𑀲𑀫𑀦𑁆𑀢𑁄 𑀆𑀓𑀸𑀭𑁄 𑀳𑁄𑀢𑀺 𑀯𑀸 𑀲𑀗𑁆𑀔𑁆𑀬𑀸𑀦𑁂 𑀉𑀢𑁆𑀢𑀭𑀧𑀤𑁂 𑀧𑀭𑁂. 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀸𑀬𑀁. 𑀏𑀓𑀸𑀤𑀲, 𑀤𑁆𑀯𑀸𑀤𑀲, 𑀅𑀝𑁆𑀞𑀸𑀭𑀲.

𑀲𑀗𑁆𑀔𑁆𑀬𑀸𑀦𑁂𑀢𑀺 𑀓𑀺𑀫𑀢𑁆𑀣𑀁? 𑀏𑀓𑀤𑀦𑁆𑀢𑁄, 𑀤𑁆𑀯𑀺𑀤𑀦𑁆𑀢𑁄, 𑀅𑀝𑁆𑀞𑀢𑁆𑀣𑀫𑁆𑀪𑁄.

‘‘𑀯𑀸’’𑀢𑀺 𑀯𑀢𑁆𑀢𑀢𑁂.

𑁨𑁫𑁪. 𑀏𑀓𑀸𑀤𑀺𑀢𑁄 𑀤𑀲𑁆𑀲 𑀭 𑀲𑀗𑁆𑀔𑁆𑀬𑀸𑀦𑁂.

𑀏𑀓𑀸𑀤𑀺𑀢𑁄 𑀲𑀗𑁆𑀔𑁆𑀬𑀸𑀢𑁄 𑀧𑀭𑀲𑁆𑀲 𑀤𑀲𑀲𑁆𑀲 𑀆𑀤𑀺𑀲𑁆𑀲 𑀤𑀲𑁆𑀲 𑀭𑀓𑀸𑀭𑁄 𑀳𑁄𑀢𑀺 𑀯𑀸 𑀲𑀗𑁆𑀔𑁆𑀬𑀸𑀦𑁂. 𑀲𑁂𑀲𑀁 𑀲𑀫𑀁. 𑀏𑀓𑀸𑀭𑀲, 𑀏𑀓𑀸𑀤𑀲.

𑀤𑁆𑀯𑁂 𑀘 𑀤𑀲 𑀘, 𑀤𑁆𑀯𑀻𑀳𑀺 𑀯𑀸 𑀅𑀥𑀺𑀓𑀸 𑀤𑀲𑀸𑀢𑀺 𑀤𑁆𑀯𑀺𑀤𑀲 𑀇𑀢𑀻𑀥 𑁋

‘‘𑀯𑀸’’𑀢𑀺 𑀯𑀢𑁆𑀢𑀢𑁂.

𑁨𑁫𑁫. 𑀯𑀻𑀲𑀢𑀺𑀤𑀲𑁂𑀲𑀼 𑀩𑀸 𑀤𑁆𑀯𑀺𑀲𑁆𑀲 𑀢𑀼.

𑀯𑀻𑀲𑀢𑀺 𑀤𑀲𑀇𑀘𑁆𑀘𑁂𑀢𑁂𑀲𑀼 𑀧𑀭𑁂𑀲𑀼 𑀤𑁆𑀯𑀺𑀲𑀤𑁆𑀤𑀲𑁆𑀲 𑀩𑀸 𑀳𑁄𑀢𑀺 𑀯𑀸. 𑀢𑀼𑀲𑀤𑁆𑀤𑁂𑀦 𑀢𑀺𑀁𑀲𑀸𑀬𑀫𑁆𑀧𑀺. 𑀭𑀓𑀸𑀭𑁄, 𑀆𑀢𑁆𑀢𑀜𑁆𑀘. 𑀩𑀸𑀭𑀲, 𑀤𑁆𑀯𑀸𑀤𑀲.

𑀢𑀬𑁄 𑀘 𑀤𑀲 𑀘, 𑀢𑀻𑀳𑀺 𑀯𑀸 𑀅𑀥𑀺𑀓𑀸 𑀤𑀲𑀸𑀢𑀺 𑀢𑁂𑀭𑀲. 𑀏𑀢𑁆𑀣 ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀢𑀺𑀲𑀤𑁆𑀤𑀲𑁆𑀲 𑀢𑁂𑀆𑀤𑁂𑀲𑁄 𑀆𑀦𑀯𑀼𑀢𑀺𑀬𑀸.

𑀘𑀢𑁆𑀢𑀸𑀭𑁄 ¶ 𑀘 𑀤𑀲 𑀘, 𑀘𑀢𑀽𑀳𑀺 𑀯𑀸 𑀅𑀥𑀺𑀓𑀸 𑀤𑀲𑀸𑀢𑀺 𑀘𑀢𑀼𑀤𑁆𑀤𑀲 𑀇𑀘𑁆𑀘𑀢𑁆𑀭 𑁋

‘‘𑀕𑀡𑀦𑁂, 𑀤𑀲𑀲𑁆𑀲𑀸’’𑀢𑀺 𑀘 𑀯𑀢𑁆𑀢𑀢𑁂.

𑁨𑁫𑁬. 𑀘𑀢𑀽𑀧𑀧𑀤𑀲𑁆𑀲 𑀮𑁄𑀧𑁄 𑀢𑀼𑀢𑁆𑀢𑀭𑀧𑀤𑀸𑀤𑀺 𑀘𑀲𑁆𑀲 𑀘𑀼 𑀘𑁄𑀧𑀺 𑀦𑀯𑀸.

𑀕𑀡𑀦𑁂 𑀤𑀲𑀲𑁆𑀲𑀸𑀤𑀺𑀫𑁆𑀳𑀺 𑀞𑀺𑀢𑀲𑁆𑀲 𑀘𑀢𑀼𑀇𑀘𑁆𑀘𑁂𑀢𑀲𑁆𑀲 𑀉𑀧𑀧𑀤𑀲𑁆𑀲 𑀢𑀼𑀲𑀤𑁆𑀤𑁄 𑀮𑁄𑀧𑁄 𑀳𑁄𑀢𑀺, 𑀉𑀢𑁆𑀢𑀭𑀧𑀤𑀸𑀤𑀺𑀫𑁆𑀳𑀺 𑀞𑀺𑀢𑀲𑁆𑀲 𑀘𑀢𑀽𑀧𑀧𑀤𑀲𑁆𑀲 𑀘𑀓𑀸𑀭𑀲𑁆𑀲 𑀘𑀼 𑀘𑁄𑀆𑀤𑁂𑀲𑀸 𑀳𑁄𑀦𑁆𑀢𑀺 𑀦𑀯𑀸. 𑀘𑀼𑀤𑁆𑀤𑀲, 𑀘𑁄𑀤𑁆𑀤𑀲, 𑀘𑀢𑀼𑀤𑁆𑀤𑀲.

𑀅𑀧𑀺𑀕𑁆𑀕𑀳𑀡𑁂𑀦 𑀅𑀦𑀼𑀧𑀧𑀤𑀲𑁆𑀲𑀸𑀧𑀺 𑀕𑀡𑀦𑁂 𑀧𑀤𑀸𑀤𑀺𑀘𑀓𑀸𑀭𑀲𑁆𑀲 𑀮𑁄𑀧𑁄, 𑀘𑀼 𑀘𑁄 𑀳𑁄𑀦𑁆𑀢𑀺 𑀦𑀯𑀸. 𑀬𑀣𑀸 𑁋 𑀢𑀸𑀮𑀻𑀲𑀁, 𑀘𑀼𑀢𑁆𑀢𑀸𑀮𑀻𑀲𑀁, 𑀘𑁄𑀢𑁆𑀢𑀸𑀮𑀻𑀲𑀁, 𑀘𑀢𑁆𑀢𑀸𑀮𑀻𑀲𑀁.

𑀧𑀜𑁆𑀘 𑀘 𑀤𑀲 𑀘, 𑀧𑀜𑁆𑀘𑀳𑀺 𑀯𑀸 𑀅𑀥𑀺𑀓𑀸 𑀤𑀲𑀸𑀢𑀺 𑀅𑀢𑁆𑀣𑁂 𑀧𑀜𑁆𑀘𑀤𑀲. ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀧𑀜𑁆𑀘𑀲𑀤𑁆𑀤𑀲𑁆𑀲 𑀤𑀲 𑀯𑀻𑀲𑀢𑀻𑀲𑀼 𑀓𑁆𑀯𑀘𑀺 𑀧𑀦𑁆𑀦𑀧𑀡𑁆𑀡𑀆𑀤𑁂𑀲𑀸. 𑀧𑀦𑁆𑀦𑀭𑀲, 𑀧𑀡𑁆𑀡𑀭𑀲.

𑀙 𑀘 𑀤𑀲 𑀘, 𑀙𑀳𑀺 𑀯𑀸 𑀅𑀥𑀺𑀓𑀸 𑀤𑀲𑀸𑀢𑀺 𑀅𑀢𑁆𑀣𑁂 𑀙𑀤𑀲 𑀇𑀢𑀻𑀥 𑁋

‘‘𑀙𑀲𑁆𑀲𑀸’’𑀢𑀺 𑀯𑀢𑁆𑀢𑀢𑁂.

𑁨𑁫𑁭. 𑀤𑀲𑁂 𑀲𑁄 𑀦𑀺𑀘𑁆𑀘𑀜𑁆𑀘.

𑀙𑀇𑀘𑁆𑀘𑁂𑀢𑀲𑁆𑀲 𑀲𑀗𑁆𑀔𑁆𑀬𑀸𑀲𑀤𑁆𑀤𑀲𑁆𑀲 𑀦𑀺𑀘𑁆𑀘𑀁 𑀲𑁄 𑀳𑁄𑀢𑀺 𑀤𑀲𑁂 𑀧𑀭𑁂.

‘‘𑀲𑀗𑁆𑀔𑁆𑀬𑀸𑀦𑀁, 𑀯𑀸’’𑀢𑀺 𑀘 𑀯𑀢𑁆𑀢𑀢𑁂.

𑁨𑁫𑁮. 𑀮 𑀤𑀭𑀸𑀦𑀁.

𑀲𑀗𑁆𑀔𑁆𑀬𑀸𑀦𑀁 𑀤𑀓𑀸𑀭𑀭𑀓𑀸𑀭𑀸𑀦𑀁 𑀮𑀓𑀸𑀭𑀸𑀤𑁂𑀲𑁄 𑀳𑁄𑀢𑀺 𑀯𑀸.

𑀮𑀴𑀸𑀦𑀫𑀯𑀺𑀲𑁂𑀲𑁄 ¶ . 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄𑀬𑀁 𑀯𑀸𑀲𑀤𑁆𑀤𑁄, 𑀢𑁂𑀦 ‘‘𑀲𑁄𑀴𑀲’’ 𑀇𑀢𑀺 𑀦𑀺𑀘𑁆𑀘𑀁, ‘‘𑀢𑁂𑀴𑀲, 𑀢𑁂𑀭𑀲, 𑀘𑀢𑁆𑀢𑀸𑀮𑀻𑀲𑀁, 𑀘𑀢𑁆𑀢𑀸𑀭𑀻𑀲’’𑀫𑀺𑀢𑀺 𑀯𑀺𑀪𑀸𑀲𑀸, 𑀤𑀲 𑀧𑀦𑁆𑀦𑀭𑀲𑀸𑀤𑀻𑀲𑀼 𑀦 𑀘 𑀳𑁄𑀢𑀺.

𑀲𑀢𑁆𑀢 𑀘 𑀤𑀲 𑀘, 𑀲𑀢𑁆𑀢𑀳𑀺 𑀯𑀸 𑀅𑀥𑀺𑀓𑀸 𑀤𑀲𑀸𑀢𑀺 𑀅𑀢𑁆𑀣𑁂 𑀲𑀢𑁆𑀢𑀭𑀲, 𑀲𑀢𑁆𑀢𑀤𑀲.

𑀅𑀝𑁆𑀞 𑀘 𑀤𑀲 𑀘, 𑀅𑀝𑁆𑀞𑀳𑀺 𑀯𑀸 𑀅𑀥𑀺𑀓𑀸 𑀤𑀲𑀸𑀢𑀺 𑀅𑀢𑁆𑀣𑁂 𑀅𑀝𑁆𑀞𑀤𑀲 𑀇𑀢𑀻𑀥 𑀆𑀢𑁆𑀢𑁂 𑀓𑀢𑁂 𑁋

‘‘𑀯𑀸, 𑀤𑀲𑁆𑀲, 𑀭, 𑀲𑀗𑁆𑀔𑁆𑀬𑀸𑀦𑁂’’𑀢𑀺 𑀘 𑀯𑀢𑁆𑀢𑀢𑁂.

𑁨𑁫𑁯. 𑀅𑀝𑁆𑀞𑀸𑀤𑀺𑀢𑁄 𑀘.

𑀅𑀝𑁆𑀞𑀸𑀤𑀺𑀢𑁄 𑀘 𑀤𑀲𑀲𑀤𑁆𑀤𑀲𑁆𑀲 𑀤𑀓𑀸𑀭𑀲𑁆𑀲 𑀭𑀓𑀸𑀭𑁄 𑀳𑁄𑀢𑀺 𑀯𑀸 𑀲𑀗𑁆𑀔𑁆𑀬𑀸𑀦𑁂. 𑀅𑀝𑁆𑀞𑀸𑀭𑀲, 𑀅𑀝𑁆𑀞𑀸𑀤𑀲.

𑀅𑀝𑁆𑀞𑀸𑀤𑀺𑀢𑁄𑀢𑀺 𑀓𑀺𑀁? 𑀘𑀢𑀼𑀤𑁆𑀤𑀲.

𑀓𑀢𑀺𑀲𑀤𑁆𑀤𑁄 𑀩𑀳𑀼𑀯𑀘𑀦𑀦𑁆𑀢𑁄𑀯, ‘‘𑀓𑀢𑀺 𑀬𑁄’’ 𑀇𑀢𑀻𑀥

𑀦𑀺𑀘𑁆𑀘𑀁 𑀬𑁄𑀮𑁄𑀧𑀸𑀤𑀺, 𑀭𑀲𑁆𑀲𑀢𑁆𑀢𑀁, 𑀓𑀢𑀺 𑀢𑀺𑀝𑁆𑀞𑀦𑁆𑀢𑀺, 𑀓𑀢𑀺 𑀧𑀲𑁆𑀲𑀲𑀺, 𑀓𑀢𑀺𑀳𑀺 𑀓𑀢𑀺𑀪𑀺, 𑀓𑀢𑀺𑀦𑀁, 𑀓𑀢𑀺𑀳𑀺 𑀓𑀢𑀺𑀪𑀺, 𑀓𑀢𑀺𑀦𑀁, 𑀓𑀢𑀺𑀲𑀼.

𑀅𑀮𑀺𑀗𑁆𑀕𑀦𑀸𑀫𑀁 𑀦𑀺𑀝𑁆𑀞𑀺𑀢𑀁.

𑀯𑀺𑀪𑀢𑁆𑀢𑀺𑀧𑁆𑀧𑀘𑁆𑀘𑀬𑀯𑀺𑀥𑀸𑀦

𑀅𑀣 𑀯𑀺𑀪𑀢𑁆𑀢𑀺𑀧𑁆𑀧𑀘𑁆𑀘𑀬𑀦𑁆𑀢𑀸 𑀯𑀼𑀘𑁆𑀘𑀦𑁆𑀢𑁂.

𑀢𑁂𑀲𑀁 𑀧𑀦𑀸𑀮𑀺𑀗𑁆𑀕𑀢𑁆𑀢𑀸, 𑀦𑀺𑀧𑀸𑀢𑀢𑁆𑀢𑀸 𑀘 𑀢𑀺𑀮𑀺𑀗𑁆𑀕𑁂, 𑀯𑀘𑀦𑀤𑁆𑀯𑀬𑁂 𑀘 𑀲𑀫𑀸𑀦𑀁 𑀭𑀽𑀧𑀁.

𑀧𑀼𑀭𑀺𑀲𑀲𑁆𑀫𑀸, 𑀧𑀼𑀭𑀺𑀲𑁂𑀳𑀺 𑀯𑀸𑀢𑀺 𑀅𑀢𑁆𑀣𑁂 𑁋

𑁨𑁬𑁦. 𑀓𑁆𑀯𑀘𑀺 ¶ 𑀢𑁄 𑀧𑀜𑁆𑀘𑀫𑁆𑀬𑀢𑁆𑀣𑁂.

𑀲𑀩𑁆𑀩𑀲𑁆𑀫𑀸 𑀲𑀼𑀤𑁆𑀥𑀦𑀸𑀫𑀢𑁄, 𑀲𑀩𑁆𑀩𑀦𑀸𑀫𑀢𑁄 𑀘 𑀮𑀺𑀗𑁆𑀕𑀫𑁆𑀳𑀸 𑀓𑁆𑀯𑀘𑀺 𑀢𑁄𑀧𑀘𑁆𑀘𑀬𑁄 𑀳𑁄𑀢𑀺 𑀧𑀜𑁆𑀘𑀫𑁆𑀬𑀢𑁆𑀣𑁂.

𑁨𑁬𑁧. 𑀢𑁆𑀯𑀸𑀤𑀬𑁄 𑀯𑀺𑀪𑀢𑁆𑀢𑀺𑀲𑀜𑁆𑀜𑀸.

𑀢𑁄𑀆𑀤𑀺 𑀬𑁂𑀲𑀁 𑀤𑀸𑀦𑀺𑀧𑀭𑀺𑀬𑀦𑁆𑀢𑀸𑀦𑀁 𑀧𑀘𑁆𑀘𑀬𑀸𑀦𑀁 𑀢𑁂 𑀳𑁄𑀦𑁆𑀢𑀺 𑀧𑀘𑁆𑀘𑀬𑀸 𑀢𑁆𑀯𑀸𑀤𑀬𑁄, 𑀢𑁂 𑀧𑀘𑁆𑀘𑀬𑀸 𑀯𑀺𑀪𑀢𑁆𑀢𑀺𑀲𑀜𑁆𑀜𑀸 𑀳𑁄𑀦𑁆𑀢𑀺. 𑀢𑁂𑀦 𑀢𑀤𑀦𑁆𑀢𑀸𑀦𑀫𑁆𑀧𑀺 𑀯𑀺𑀪𑀢𑁆𑀬𑀦𑁆𑀢𑀧𑀤𑀢𑁆𑀢𑀁 𑀲𑀺𑀤𑁆𑀥𑀁 𑀳𑁄𑀢𑀺.

𑀧𑀼𑀭𑀺𑀲𑀢𑁄, 𑀏𑀯𑀁 𑀭𑀸𑀚𑀢𑁄 𑀯𑀸, 𑀘𑁄𑀭𑀢𑁄 𑀯𑀸, 𑀅𑀕𑁆𑀕𑀺𑀢𑁄 𑀯𑀸, 𑀕𑀳𑀧𑀢𑀺𑀢𑁄 𑀯𑀸, 𑀳𑀢𑁆𑀣𑀺𑀢𑁄, 𑀳𑁂𑀢𑀼𑀢𑁄, 𑀲𑀩𑁆𑀩𑀜𑁆𑀜𑀼𑀢𑁄, 𑀓𑀜𑁆𑀜𑀢𑁄, 𑀬𑀼𑀢𑁆𑀢𑀺𑀢𑁄, 𑀇𑀢𑁆𑀣𑀺𑀢𑁄, 𑀪𑀺𑀓𑁆𑀔𑀼𑀦𑀺𑀢𑁄, 𑀏𑀢𑁆𑀣 𑀘 ‘‘𑀓𑁆𑀯𑀘𑀸𑀤𑀺𑀫𑀚𑁆𑀛𑀼𑀢𑁆𑀢𑀭𑀸𑀦𑀁 𑀤𑀻𑀖𑀭𑀲𑁆𑀲𑀸𑀧𑀘𑁆𑀘𑀬𑁂𑀲𑀼 𑀘𑀸’’𑀢𑀺 𑀢𑁄𑀧𑀘𑁆𑀘𑀬𑁂 𑀭𑀲𑁆𑀲𑀢𑁆𑀢𑀁. 𑀬𑀸𑀕𑀼𑀢𑁄, 𑀚𑀫𑁆𑀩𑀼𑀢𑁄, 𑀘𑀺𑀢𑁆𑀢𑀢𑁄, 𑀆𑀬𑀼𑀢𑁄 𑀇𑀘𑁆𑀘𑀸𑀤𑀺.

𑀲𑀩𑁆𑀩𑀦𑀸𑀫𑀢𑁄 𑀲𑀩𑁆𑀩𑀲𑁆𑀫𑀸, 𑀲𑀩𑁆𑀩𑁂𑀳𑀻𑀢𑀺 𑀯𑀸 𑀅𑀢𑁆𑀣𑁂 𑀲𑀩𑁆𑀩𑀢𑁄, 𑀏𑀯𑀁 𑀬𑀢𑁄, 𑀢𑀢𑁄, 𑀓𑀢𑀭𑀢𑁄, 𑀓𑀢𑀫𑀢𑁄, 𑀇𑀢𑀭𑀢𑁄, 𑀅𑀜𑁆𑀜𑀢𑁄, 𑀏𑀓𑀢𑁄, 𑀉𑀪𑀬𑀢𑁄, 𑀧𑀼𑀩𑁆𑀩𑀢𑁄, 𑀧𑀭𑀢𑁄, 𑀅𑀧𑀭𑀢𑁄, 𑀤𑀓𑁆𑀔𑀺𑀡𑀢𑁄, 𑀉𑀢𑁆𑀢𑀭𑀢𑁄, 𑀅𑀫𑀼𑀢𑁄.

‘‘𑀓𑀺𑀲𑁆𑀲, 𑀓𑀼’’𑀇𑀢𑀺 𑀘 𑀯𑀢𑁆𑀢𑀢𑁂.

𑁨𑁬𑁨. 𑀢𑁆𑀭𑀢𑁄𑀣𑁂𑀲𑀼 𑀘.

𑀓𑀺𑀫𑀺𑀘𑁆𑀘𑁂𑀢𑀲𑁆𑀲 𑀓𑀼 𑀳𑁄𑀢𑀺 𑀢𑁆𑀭𑀢𑁄 𑀣𑀇𑀘𑁆𑀘𑁂𑀢𑁂𑀲𑀼 𑀘 𑀧𑀭𑁂𑀲𑀼. 𑀓𑀲𑁆𑀫𑀸, 𑀓𑁂𑀳𑀻𑀢𑀺 𑀯𑀸 𑀓𑀼𑀢𑁄.

‘‘𑀢𑁄𑀣𑁂𑀲𑀽’’𑀢𑀺 𑀯𑀢𑁆𑀢𑀢𑁂.

𑁨𑁬𑁩. 𑀲𑀩𑁆𑀩𑀲𑁆𑀲𑁂𑀢𑀲𑁆𑀲𑀸𑀓𑀸𑀭𑁄 ¶ 𑀯𑀸.

𑀲𑀩𑁆𑀩𑀲𑁆𑀲 𑀏𑀢𑀲𑀤𑁆𑀤𑀲𑁆𑀲 𑀅𑀓𑀸𑀭𑁄 𑀳𑁄𑀢𑀺 𑀯𑀸 𑀢𑁄𑀣𑀇𑀘𑁆𑀘𑁂𑀢𑁂𑀲𑀼. 𑀏𑀢𑀲𑁆𑀫𑀸, 𑀏𑀢𑁂𑀳𑀻𑀢𑀺 𑀯𑀸 𑀅𑀢𑁄.

‘‘𑀲𑀩𑁆𑀩𑀲𑁆𑀲𑁂𑀢𑀲𑁆𑀲𑀸’’𑀢𑀺 𑀘 𑀯𑀢𑁆𑀢𑀢𑁂.

𑁨𑁬𑁪. 𑀏 𑀢𑁄𑀣𑁂𑀲𑀼 𑀘.

𑀲𑀩𑁆𑀩𑀲𑁆𑀲 𑀏𑀢𑀲𑀤𑁆𑀤𑀲𑁆𑀲 𑀏𑀓𑀸𑀭𑁄 𑀳𑁄𑀢𑀺 𑀯𑀸 𑀢𑁄𑀣𑀇𑀘𑁆𑀘𑁂𑀢𑁂𑀲𑀼. 𑀤𑁆𑀯𑀺𑀢𑁆𑀢𑀁, 𑀏𑀢𑁆𑀢𑁄.

‘‘𑀲𑀩𑁆𑀩𑀲𑁆𑀲𑀸’’𑀢𑀺 𑀯𑀢𑁆𑀢𑀢𑁂.

𑁨𑁬𑁫. 𑀇𑀫𑀲𑁆𑀲𑀺 𑀣𑀁𑀤𑀸𑀦𑀺𑀳𑀢𑁄𑀥𑁂𑀲𑀼 𑀘.

𑀇𑀫𑀲𑀤𑁆𑀤𑀲𑁆𑀲 𑀲𑀩𑁆𑀩𑀲𑁆𑀲𑁂𑀯 𑀇𑀓𑀸𑀭𑁄 𑀳𑁄𑀢𑀺 𑀣𑀁𑀤𑀸𑀦𑀺𑀳𑀢𑁄𑀥𑀇𑀘𑁆𑀘𑁂𑀢𑁂𑀲𑀼 𑀘. 𑀇𑀫𑀲𑁆𑀫𑀸𑀢𑀺 𑀇𑀢𑁄.

‘‘𑀓𑁆𑀯𑀘𑀺 𑀢𑁄’’𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀆𑀤𑀺𑀧𑁆𑀧𑀪𑀼𑀢𑀻𑀳𑀺 𑀢𑁄 𑀲𑀢𑁆𑀢𑀫𑀺𑀬𑀢𑁆𑀣𑁂. 𑀅𑀦𑀺𑀘𑁆𑀘𑀸𑀤𑀻𑀳𑀺 𑀢𑀢𑀺𑀬𑀢𑁆𑀣𑁂 𑀘. 𑀬𑀣𑀸 𑁋 𑀆𑀤𑀺𑀫𑁆𑀳𑀻𑀪𑀺 𑀅𑀢𑁆𑀣𑁂 𑀆𑀤𑀺𑀢𑁄. 𑀏𑀯𑀁 𑀫𑀚𑁆𑀛𑀢𑁄, 𑀏𑀓𑀢𑁄, 𑀧𑀼𑀭𑀢𑁄, 𑀧𑀘𑁆𑀙𑀢𑁄, 𑀧𑀲𑁆𑀲𑀢𑁄, 𑀧𑀺𑀝𑁆𑀞𑀺𑀢𑁄, 𑀧𑀸𑀤𑀢𑁄, 𑀲𑀻𑀲𑀢𑁄, 𑀅𑀕𑁆𑀕𑀢𑁄, 𑀫𑀽𑀮𑀢𑁄, 𑀧𑀭𑀢𑁄 𑀇𑀘𑁆𑀘𑀸𑀤𑀬𑁄.

𑀢𑀢𑀺𑀬𑀢𑁆𑀣𑁂 𑀅𑀦𑀺𑀘𑁆𑀘𑁂𑀦𑀸𑀢𑀺 𑀅𑀦𑀺𑀘𑁆𑀘𑀢𑁄, 𑀅𑀦𑀺𑀘𑁆𑀘𑀢𑁄 𑀲𑀫𑁆𑀫𑀲𑀢𑀺. 𑀏𑀯𑀁 𑀤𑀼𑀓𑁆𑀔𑀢𑁄, 𑀭𑁄𑀕𑀢𑁄, 𑀕𑀡𑁆𑀟𑀢𑁄 𑀇𑀘𑁆𑀘𑀸𑀤𑀬𑁄.

‘‘𑀅𑀢𑁆𑀣𑁂, 𑀓𑁆𑀯𑀘𑀻’’𑀢𑀺 𑀘 𑀯𑀢𑁆𑀢𑀢𑁂.

𑁨𑁬𑁬. 𑀢𑁆𑀭𑀣 𑀲𑀢𑁆𑀢𑀫𑀺𑀬𑀸 𑀲𑀩𑁆𑀩𑀦𑀸𑀫𑁂𑀳𑀺.

𑀲𑀩𑁆𑀩𑀦𑀸𑀫𑁂𑀳𑀺 𑀧𑀭𑀸 𑀢𑁆𑀭 𑀣𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀓𑁆𑀯𑀘𑀺 𑀲𑀢𑁆𑀢𑀫𑁆𑀬𑀢𑁆𑀣𑁂. 𑀲𑀩𑁆𑀩𑀲𑁆𑀫𑀺𑀁, 𑀲𑀩𑁆𑀩𑁂𑀲𑀼 𑀘𑀸𑀢𑀺 𑀲𑀩𑁆𑀩𑀢𑁆𑀭 𑀲𑀩𑁆𑀩𑀢𑁆𑀣. 𑀏𑀯𑀁 ¶ 𑀬𑀢𑁆𑀭 𑀬𑀢𑁆𑀣, 𑀢𑀢𑁆𑀭 𑀢𑀢𑁆𑀣, 𑀇𑀢𑀭𑀢𑁆𑀭 𑀇𑀢𑀭𑀢𑁆𑀣, 𑀅𑀜𑁆𑀜𑀢𑁆𑀭 𑀅𑀜𑁆𑀜𑀢𑁆𑀣, 𑀉𑀪𑀬𑀢𑁆𑀭 𑀉𑀪𑀬𑀢𑁆𑀣, 𑀧𑀭𑀢𑁆𑀭 𑀧𑀭𑀢𑁆𑀣, 𑀓𑀼𑀢𑁆𑀭 𑀓𑀼𑀢𑁆𑀣, ‘‘𑀢𑁆𑀭𑀢𑁄𑀣𑁂𑀲𑀼 𑀘𑀸’’𑀢𑀺 𑀓𑀼𑀢𑁆𑀢𑀁. ‘‘𑀓𑀺𑀲𑁆𑀲 𑀓 𑀯𑁂 𑀘𑀸’’𑀢𑀺 𑀲𑀼𑀢𑁆𑀢𑁂 𑀘𑀲𑀤𑁆𑀤𑁂𑀦 𑀓𑀸𑀤𑁂𑀲𑁄. 𑀓𑀢𑁆𑀣, 𑀅𑀫𑀼𑀢𑁆𑀭 𑀅𑀫𑀼𑀢𑁆𑀣.

‘‘𑀲𑀩𑁆𑀩𑀲𑁆𑀲𑁂𑀢𑀲𑁆𑀲𑀸𑀓𑀸𑀭𑁄’’𑀢𑀺 𑀯𑀢𑁆𑀢𑀢𑁂.

𑁨𑁬𑁭. 𑀢𑁆𑀭𑁂 𑀦𑀺𑀘𑁆𑀘𑀁.

𑀲𑀩𑁆𑀩𑀲𑁆𑀲𑁂𑀯 𑀏𑀢𑀲𑀤𑁆𑀤𑀲𑁆𑀲 𑀅𑀓𑀸𑀭𑁄 𑀳𑁄𑀢𑀺 𑀦𑀺𑀘𑁆𑀘𑀁 𑀢𑁆𑀭𑁂 𑀧𑀭𑁂. 𑀅𑀢𑁆𑀭. ‘‘𑀲𑀩𑁆𑀩𑀲𑁆𑀲𑁂𑀢𑀲𑁆𑀲𑀸𑀓𑀸𑀭𑁄 𑀯𑀸’’𑀢𑀺 𑀅𑀢𑁆𑀢𑀁, ‘‘𑀏 𑀢𑁄𑀣𑁂𑀲𑀼 𑀘𑀸’’𑀢𑀺 𑀏𑀓𑀸𑀭𑁄, 𑀅𑀢𑁆𑀣, 𑀏𑀢𑁆𑀣.

‘‘𑀓𑁆𑀯𑀘𑀺, 𑀅𑀢𑁆𑀣𑁂, 𑀲𑀢𑁆𑀢𑀫𑀺𑀬𑀸’’𑀢𑀺 𑀘 𑀅𑀥𑀺𑀓𑀸𑀭𑁄, 𑀲𑀩𑁆𑀩𑀲𑁆𑀫𑀺𑀦𑁆𑀢𑀺 𑀅𑀢𑁆𑀣𑁂 𑁋

𑁨𑁬𑁮. 𑀲𑀩𑁆𑀩𑀢𑁄 𑀥𑀺.

𑀲𑀩𑁆𑀩𑀇𑀘𑁆𑀘𑁂𑀢𑀲𑁆𑀫𑀸 𑀥𑀺𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 𑀓𑁆𑀯𑀘𑀺 𑀲𑀢𑁆𑀢𑀫𑁆𑀬𑀢𑁆𑀣𑁂. 𑀲𑀩𑁆𑀩𑀥𑀺.

𑁨𑁬𑁯. 𑀓𑀺𑀲𑁆𑀫𑀸 𑀯𑁄.

𑀓𑀺𑀫𑀺𑀘𑁆𑀘𑁂𑀢𑀲𑁆𑀫𑀸 𑀯𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 𑀓𑁆𑀯𑀘𑀺 𑀲𑀢𑁆𑀢𑀫𑁆𑀬𑀢𑁆𑀣𑁂.

𑁨𑁭𑁦. 𑀓𑀺𑀲𑁆𑀲 𑀓 𑀯𑁂 𑀘.

𑀓𑀺𑀫𑀺𑀘𑁆𑀘𑁂𑀢𑀲𑁆𑀲 𑀓𑀲𑀤𑁆𑀤𑁄 𑀆𑀤𑁂𑀲𑁄 𑀳𑁄𑀢𑀺 𑀯𑀧𑁆𑀧𑀘𑁆𑀘𑀬𑁂𑀧𑀭𑁂. 𑀘𑀕𑁆𑀕𑀳𑀡𑁂𑀦 𑀣𑀳𑀫𑀸𑀤𑀺𑀅𑀯𑀧𑁆𑀧𑀘𑁆𑀘𑀬𑁂𑀧𑀺. ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀓𑀓𑀸𑀭𑁂 𑀅𑀓𑀸𑀭𑀲𑁆𑀲 𑀮𑁄𑀧𑁄 𑀘 𑀯𑀫𑁆𑀳𑀺. 𑀓𑁆𑀯 𑀕𑀢𑁄𑀲𑀺 𑀢𑁆𑀯𑀁.

‘‘𑀓𑀺𑀲𑁆𑀫𑀸’’𑀢𑀺 𑀯𑀢𑁆𑀢𑀢𑁂.

𑁨𑁭𑁧. 𑀳𑀺𑀁𑀳𑀁𑀳𑀺𑀜𑁆𑀘𑀦𑀁 ¶ .

𑀓𑀺𑀫𑀺𑀘𑁆𑀘𑁂𑀢𑀲𑁆𑀫𑀸 𑀳𑀺𑀁 𑀳𑀁 𑀳𑀺𑀜𑁆𑀘𑀦𑀁𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀓𑁆𑀯𑀘𑀺 𑀲𑀢𑁆𑀢𑀫𑁆𑀬𑀢𑁆𑀣𑁂.

‘‘𑀓𑀺𑀲𑁆𑀲𑀸’’𑀢𑀺 𑀯𑀢𑁆𑀢𑀢𑁂.

𑁨𑁭𑁨. 𑀓𑀼 𑀳𑀺𑀁𑀳𑀁𑀲𑀼 𑀘.

𑀓𑀺𑀫𑀺𑀘𑁆𑀘𑁂𑀢𑀲𑁆𑀲 𑀓𑀼 𑀳𑁄𑀢𑀺 𑀳𑀺𑀁 𑀳𑀁 𑀇𑀘𑁆𑀘𑁂𑀢𑁂𑀲𑀼. 𑀘𑀕𑁆𑀕𑀳𑀡𑁂𑀦 𑀳𑀺𑀜𑁆𑀘𑀦𑀁𑀤𑀸𑀘𑀦𑀫𑀺𑀘𑁆𑀘𑀸𑀤𑀻𑀲𑀼𑀧𑀺. 𑀓𑀺𑀲𑁆𑀫𑀺𑀦𑁆𑀢𑀺 𑀓𑀼𑀳𑀺𑀁, 𑀓𑀼𑀳𑀁, 𑀓𑀼𑀳𑀺𑀜𑁆𑀘𑀦𑀁, 𑀓𑀳𑀁 𑀓𑀸𑀤𑁂𑀲𑁄.

‘‘𑀳𑀺𑀁 𑀳’’𑀦𑁆𑀢𑀺 𑀯𑀢𑁆𑀢𑀢𑁂.

𑁨𑁭𑁩. 𑀢𑀫𑁆𑀳𑀸 𑀘.

𑀢𑀇𑀘𑁆𑀘𑁂𑀢𑀲𑁆𑀫𑀸 𑀘 𑀲𑀩𑁆𑀩𑀦𑀸𑀫𑀢𑁄 𑀳𑀺𑀁𑀳𑀁𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀓𑁆𑀯𑀘𑀺 𑀲𑀢𑁆𑀢𑀫𑁆𑀬𑀢𑁆𑀣𑁂. 𑀢𑀲𑁆𑀫𑀺𑀦𑁆𑀢𑀺 𑀢𑀳𑀺𑀁, 𑀢𑀳𑀁.

𑁨𑁭𑁪. 𑀇𑀫𑀲𑁆𑀫𑀸 𑀳𑀥𑀸 𑀘.

𑀇𑀫𑀲𑀤𑁆𑀤𑀢𑁄 𑀳𑀥𑀧𑁆𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀓𑁆𑀯𑀘𑀺 𑀲𑀢𑁆𑀢𑀫𑁆𑀬𑀢𑁆𑀣𑁂. ‘‘𑀇𑀫𑀲𑁆𑀲𑀺 𑀣’’𑀦𑁆𑀢𑀺𑀆𑀤𑀺𑀦𑀸 𑀇𑀓𑀸𑀭𑁄. 𑀇𑀫𑀲𑁆𑀫𑀺𑀦𑁆𑀢𑀺 𑀇𑀳, 𑀇𑀥.

𑁨𑁭𑁫. 𑀬𑀢𑁄 𑀳𑀺𑀁.

𑀬𑀇𑀘𑁆𑀘𑁂𑀢𑀲𑁆𑀫𑀸 𑀲𑀩𑁆𑀩𑀦𑀸𑀫𑀢𑁄 𑀳𑀺𑀁𑀧𑀘𑁆𑀘𑀬𑁄 𑀳𑁄𑀢𑀺 𑀓𑁆𑀯𑀘𑀺 𑀲𑀢𑁆𑀢𑀫𑁆𑀬𑀢𑁆𑀣𑁂. 𑀬𑀲𑁆𑀫𑀺𑀦𑁆𑀢𑀺 𑀬𑀳𑀺𑀁.

‘‘𑀓𑀸𑀮𑁂’’𑀢𑀺 𑀅𑀥𑀺𑀓𑀸𑀭𑁄𑀬𑀁.

𑀓𑀲𑁆𑀫𑀺𑀁 𑀓𑀸𑀮𑁂𑀢𑀺 𑀅𑀢𑁆𑀣𑁂

𑁨𑁭𑁬. 𑀓𑀺𑀁𑀲𑀩𑁆𑀩𑀜𑁆𑀜𑁂𑀓𑀬𑀓𑀼𑀳𑀺 ¶ 𑀤𑀸 𑀤𑀸𑀘𑀦𑀁.

𑀓𑀺𑀁 𑀲𑀩𑁆𑀩𑀅𑀜𑁆𑀜𑀏𑀓𑀬𑀇𑀘𑁆𑀘𑁂𑀢𑁂𑀳𑀺 𑀲𑀩𑁆𑀩𑀦𑀸𑀫𑁂𑀳𑀺 𑀤𑀸𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀼𑀇𑀘𑁆𑀘𑁂𑀢𑀲𑁆𑀫𑀸 𑀤𑀸𑀘𑀦𑀜𑁆𑀘 𑀓𑀸𑀮𑁂 𑀓𑁆𑀯𑀘𑀺 𑀲𑀢𑁆𑀢𑀫𑁆𑀬𑀢𑁆𑀣𑁂.

‘‘𑀓𑀺𑀲𑁆𑀲 𑀓 𑀯𑁂 𑀘𑀸’’𑀢𑀺 𑀲𑀼𑀢𑁆𑀢𑁂 𑀘𑀲𑀤𑁆𑀤𑁂𑀦 𑀓𑀸𑀤𑁂𑀲𑁄, 𑀓𑀤𑀸.

𑁨𑁭𑁭. 𑀲𑀩𑁆𑀩𑀲𑁆𑀲 𑀲𑁄 𑀤𑀸𑀫𑁆𑀳𑀺 𑀯𑀸.

𑀲𑀩𑁆𑀩𑀇𑀘𑁆𑀘𑁂𑀢𑀲𑁆𑀲 𑀲𑀤𑁆𑀤𑀲𑁆𑀲 𑀲𑀲𑀤𑁆𑀤𑀸𑀤𑁂𑀲𑁄 𑀳𑁄𑀢𑀺 𑀯𑀸 𑀤𑀸𑀧𑀘𑁆𑀘𑀬𑁂 𑀧𑀭𑁂. 𑀲𑀩𑁆𑀩𑀲𑁆𑀫𑀺𑀁 𑀓𑀸𑀮𑁂𑀢𑀺 𑀲𑀤𑀸, 𑀲𑀩𑁆𑀩𑀤𑀸.

𑀏𑀯𑀁 𑀅𑀜𑁆𑀜𑀤𑀸, 𑀏𑀓𑀤𑀸, 𑀬𑀤𑀸, 𑀓𑀲𑁆𑀫𑀺𑀁 𑀓𑀸𑀮𑁂𑀢𑀺 𑀓𑀼𑀤𑀸𑀘𑀦𑀁, ‘‘𑀓𑀼 𑀳𑀺𑀁𑀳𑀁𑀲𑀼 𑀘𑀸’’𑀢𑀺 𑀲𑀼𑀢𑁆𑀢𑁂 𑀘𑀲𑀤𑁆𑀤𑁂𑀦 𑀓𑀼𑀢𑁆𑀢𑀁, ‘‘𑀓𑀼’’𑀇𑀢𑀺 𑀦𑀺𑀧𑀸𑀢𑀦𑁂𑀦 𑀯𑀸.

‘‘𑀤𑀸’’𑀢𑀺 𑀯𑀢𑁆𑀢𑀢𑁂.

𑁨𑁭𑁮. 𑀢𑀫𑁆𑀳𑀸 𑀤𑀸𑀦𑀺 𑀘.

𑀢𑀇𑀘𑁆𑀘𑁂𑀢𑀲𑁆𑀫𑀸 𑀲𑀩𑁆𑀩𑀦𑀸𑀫𑀢𑁄 𑀤𑀸𑀦𑀺𑀤𑀸𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀓𑀸𑀮𑁂 𑀓𑁆𑀯𑀘𑀺 𑀲𑀢𑁆𑀢𑀫𑁆𑀬𑀢𑁆𑀣𑁂. 𑀢𑀲𑁆𑀫𑀺𑀁 𑀓𑀸𑀮𑁂𑀢𑀺 𑀢𑀤𑀸𑀦𑀺, 𑀢𑀤𑀸.

𑁨𑁭𑁯. 𑀇𑀫𑀲𑁆𑀫𑀸 𑀭𑀳𑀺𑀥𑀼𑀦𑀸𑀤𑀸𑀦𑀺 𑀘.

𑀇𑀫𑀲𑀤𑁆𑀤𑀢𑁄 𑀭𑀳𑀺 𑀥𑀼𑀦𑀸 𑀤𑀸𑀦𑀺𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀓𑀸𑀮𑁂 𑀓𑁆𑀯𑀘𑀺 𑀲𑀢𑁆𑀢𑀫𑁆𑀬𑀢𑁆𑀣𑁂.

‘‘𑀲𑀩𑁆𑀩𑀲𑁆𑀲, 𑀇𑀫𑀲𑁆𑀲𑀸’’𑀢𑀺 𑀘 𑀯𑀢𑁆𑀢𑀢𑁂.

𑁨𑁮𑁦. 𑀏𑀢 ¶ 𑀭𑀳𑀺𑀫𑁆𑀳𑀺.

𑀲𑀩𑁆𑀩𑀲𑁆𑀲 𑀇𑀫𑀲𑀤𑁆𑀤𑀲𑁆𑀲 𑀏𑀢𑀸𑀤𑁂𑀲𑁄 𑀳𑁄𑀢𑀺 𑀭𑀳𑀺𑀫𑁆𑀳𑀺 𑀧𑀘𑁆𑀘𑀬𑁂 𑀧𑀭𑁂. 𑀇𑀫𑀲𑁆𑀫𑀺𑀁 𑀓𑀸𑀮𑁂𑀢𑀺 𑀏𑀢𑀭𑀳𑀺.

𑁨𑁮𑁧. 𑀅 𑀥𑀼𑀦𑀸𑀫𑁆𑀳𑀺 𑀘.

𑀲𑀩𑁆𑀩𑀲𑁆𑀲𑁂𑀯 𑀇𑀫𑀲𑀤𑁆𑀤𑀲𑁆𑀲 𑀅𑀓𑀸𑀭𑁄 𑀳𑁄𑀢𑀺 𑀥𑀼𑀦𑀸𑀧𑀘𑁆𑀘𑀬𑁂 𑀧𑀭𑁂. 𑀅𑀥𑀼𑀦𑀸, 𑀇𑀫𑀲𑀤𑁆𑀤𑀲𑁆𑀲 𑀇𑀓𑀸𑀭𑁄. 𑀇𑀫𑀲𑁆𑀫𑀺𑀁 𑀓𑀸𑀮𑁂𑀢𑀺 𑀇𑀤𑀸𑀦𑀺.

𑀯𑀺𑀪𑀢𑁆𑀢𑀺𑀧𑁆𑀧𑀘𑁆𑀘𑀬𑀯𑀺𑀥𑀸𑀦𑀁 𑀦𑀺𑀝𑁆𑀞𑀺𑀢𑀁.

𑀑𑀧𑀲𑀕𑁆𑀕𑀺𑀓𑀧𑀤

𑀅𑀣𑀸𑀮𑀺𑀗𑁆𑀕𑀲𑀗𑁆𑀔𑁆𑀬𑀸𑀯𑀺𑀪𑀢𑁆𑀢𑀺𑀪𑁂𑀤𑀸 𑀉𑀧𑀲𑀕𑁆𑀕𑀦𑀺𑀧𑀸𑀢𑀸 𑀯𑀼𑀘𑁆𑀘𑀦𑁆𑀢𑁂.

𑀧 𑀧𑀭𑀸 𑀦𑀺 𑀦𑀻 𑀉 𑀤𑀼 𑀲𑀁 𑀯𑀺 𑀅𑀯 𑀅𑀦𑀼 𑀧𑀭𑀺 𑀅𑀥𑀺 𑀅𑀪𑀺 𑀧𑀢𑀺 𑀲𑀼 𑀆 𑀅𑀢𑀺 𑀅𑀧𑀺 𑀅𑀧 𑀉𑀧 𑀇𑀢𑀺 𑀧𑀻𑀲𑀢𑀺 𑀉𑀧𑀲𑀕𑁆𑀕𑀸.

𑀢𑀢𑁆𑀣 𑀧𑀲𑀤𑁆𑀤𑁄 𑀧𑀓𑀸𑀭𑀸’𑀤𑀺𑀓𑀫𑁆𑀫 𑀧𑀥𑀸𑀦𑀺’𑀲𑁆𑀲𑀭𑀺𑀬’𑀦𑁆𑀢𑁄𑀪𑀸𑀯𑀯𑀺𑀬𑁄𑀕 𑀢𑀧𑁆𑀧𑀭 𑀪𑀼𑀲𑀢𑁆𑀣 𑀲𑀫𑁆𑀪𑀯𑀢𑀺𑀢𑁆𑀢𑀺 𑀅𑀦𑀸𑀯𑀺𑀮 𑀧𑀢𑁆𑀣𑀦𑀸𑀤𑀻𑀲𑀼. 𑀧𑀇𑀢𑀺 𑀅𑀬𑀫𑀼𑀧𑀲𑀕𑁆𑀕𑁄 𑀏𑀢𑁂𑀲𑀼 𑀧𑀓𑀸𑀭𑀸𑀤𑀻𑀲𑀼 𑀅𑀢𑁆𑀣𑁂𑀲𑀼 𑀯𑀢𑁆𑀢𑀢𑀺, 𑀬𑀣𑀸 𑁋 𑀧𑀓𑀸𑀭𑁂 𑀧𑀜𑁆𑀜𑀸, 𑀆𑀤𑀺𑀓𑀫𑁆𑀫𑁂 𑀯𑀺𑀧𑁆𑀧𑀓𑀢𑀁, 𑀧𑀥𑀸𑀦𑁂 𑀧𑀡𑀻𑀢𑀁, 𑀧𑀥𑀸𑀦𑀁 𑀧𑀥𑀸𑀦𑀢𑁆𑀢𑀁, 𑀇𑀲𑁆𑀲𑀭𑀺𑀬𑁂 𑀧𑀪𑀽 𑀅𑀬𑀁 𑀤𑁂𑀲𑀲𑁆𑀲, 𑀅𑀦𑁆𑀢𑁄𑀪𑀸𑀯𑁂 𑀧𑀓𑁆𑀔𑀺𑀢𑁆𑀢𑀁, 𑀯𑀺𑀬𑁄𑀕𑁂 𑀧𑀯𑀸𑀲𑀻, 𑀢𑀧𑁆𑀧𑀭𑁂 𑀧𑀸𑀘𑀭𑀺𑀬𑁄, 𑀪𑀼𑀲𑀢𑁆𑀣𑁂 𑀧𑀯𑀼𑀤𑁆𑀥𑀓𑀸𑀬𑁄, 𑀲𑀫𑁆𑀪𑀯𑁂 𑀳𑀺𑀫𑀯𑀢𑀸 𑀕𑀗𑁆𑀕𑀸 𑀧𑀪𑀯𑀢𑀺, 𑀢𑀺𑀢𑁆𑀢𑀺𑀬𑀁 𑀧𑀳𑀽𑀢𑀫𑀦𑁆𑀦𑀁, 𑀅𑀦𑀸𑀯𑀺𑀮𑁂 𑀧𑀲𑀦𑁆𑀦𑀫𑀼𑀤𑀓𑀁, 𑀧𑀢𑁆𑀣𑀦𑁂 𑀧𑀡𑀺𑀳𑀺𑀢𑀁.

𑀧𑀭𑀸𑀇𑀢𑀺 ¶ 𑀧𑀭𑀺𑀳𑀸𑀦𑀺 𑀧𑀭𑀸𑀚𑀬 𑀕𑀢𑀺𑀯𑀺𑀓𑁆𑀓𑀫𑀸’𑀫𑀲𑀦𑀸𑀤𑀻𑀲𑀼. 𑀬𑀣𑀸 𑁋 𑀧𑀭𑀺𑀳𑀸𑀦𑀺𑀬𑀁 𑀧𑀭𑀸𑀪𑀯𑁄, 𑀧𑀭𑀸𑀚𑀬𑁂 𑀧𑀭𑀸𑀚𑀺𑀢𑁄, 𑀕𑀢𑀺𑀬𑀁 𑀧𑀭𑀸𑀬𑀦𑀁. 𑀯𑀺𑀓𑁆𑀓𑀫𑁂 𑀧𑀭𑀓𑁆𑀓𑀫𑀢𑀺, 𑀆𑀫𑀲𑀦𑁂 𑀅𑀗𑁆𑀕𑀲𑁆𑀲 𑀧𑀭𑀸𑀫𑀲𑀦𑀁.

𑀦𑀺𑀇𑀢𑀺 𑀦𑀺𑀲𑁆𑀲𑁂𑀲 𑀦𑀺𑀕𑁆𑀕𑀢 𑀦𑀻𑀳𑀭𑀡’𑀦𑁆𑀢𑁄𑀧𑀯𑁂𑀲𑀦𑀸’𑀪𑀸𑀯𑀦𑀺𑀲𑁂𑀥 𑀦𑀺𑀓𑁆𑀔𑀦𑁆𑀢 𑀧𑀸𑀢𑀼𑀪𑀸𑀯𑀸’𑀯𑀥𑀸𑀭𑀡 𑀯𑀺𑀪𑀚𑀦 𑀉𑀧𑀫𑀽’𑀧𑀥𑀸𑀭𑀡𑀸’𑀯𑀲𑀸𑀦𑀙𑁂𑀓𑀸𑀤𑀻𑀲𑀼. 𑀦𑀺𑀲𑁆𑀲𑁂𑀲𑁂 𑀦𑀺𑀭𑀼𑀢𑁆𑀢𑀺, 𑀦𑀺𑀭𑀯𑀲𑁂𑀲𑀁 𑀤𑁂𑀢𑀺, 𑀦𑀺𑀕𑁆𑀕𑀢𑁂 𑀦𑀺𑀓𑁆𑀓𑀺𑀮𑁂𑀲𑁄, 𑀦𑀺𑀬𑁆𑀬𑀸𑀢𑀺, 𑀦𑀻𑀳𑀭𑀡𑁂 𑀦𑀺𑀤𑁆𑀥𑀸𑀭𑀡𑀁, 𑀅𑀦𑁆𑀢𑁄𑀧𑀯𑁂𑀲𑀦𑁂 𑀦𑀺𑀔𑀸𑀢𑁄, 𑀅𑀪𑀸𑀯𑁂 𑀦𑀺𑀫𑁆𑀫𑀓𑁆𑀔𑀺𑀓𑀁, 𑀦𑀺𑀲𑁂𑀥𑁂 𑀦𑀺𑀯𑀸𑀭𑁂𑀢𑀺, 𑀦𑀺𑀓𑁆𑀔𑀦𑁆𑀢𑁂 𑀦𑀺𑀩𑁆𑀩𑀸𑀦𑁄, 𑀦𑀺𑀩𑁆𑀩𑀸𑀦𑀁, 𑀧𑀸𑀢𑀼𑀪𑀸𑀯𑁂 𑀦𑀺𑀫𑁆𑀫𑀺𑀢𑀁, 𑀅𑀯𑀥𑀸𑀭𑀡𑁂 𑀦𑀺𑀘𑁆𑀙𑀬𑁄, 𑀯𑀺𑀪𑀚𑀦𑁂 𑀦𑀺𑀤𑁆𑀤𑁂𑀲𑁄, 𑀉𑀧𑀫𑀸𑀬𑀁 𑀦𑀺𑀤𑀲𑁆𑀲𑀦𑀁, 𑀉𑀧𑀥𑀸𑀭𑀡𑁂 𑀦𑀺𑀲𑀸𑀫𑀦𑀁, 𑀅𑀯𑀲𑀸𑀦𑁂 𑀦𑀺𑀝𑁆𑀞𑀺𑀢𑀁, 𑀙𑁂𑀓𑁂 𑀦𑀺𑀧𑀼𑀡𑁄.

𑀦𑀻𑀇𑀢𑀺 𑀦𑀻𑀳𑀭𑀡𑀸’𑀯𑀭𑀡𑀸𑀤𑀻𑀲𑀼. 𑀦𑀻𑀳𑀭𑀡𑁂 𑀦𑀻𑀳𑀭𑀢𑀺, 𑀆𑀯𑀭𑀡𑁂 𑀦𑀻𑀯𑀭𑀡𑀁.

𑀉𑀇𑀢𑀺 𑀉𑀕𑁆𑀕𑀢𑀼’𑀤𑁆𑀥𑀓𑀫𑁆𑀫 𑀧𑀥𑀸𑀦 𑀯𑀺𑀬𑁄𑀕 𑀲𑀫𑁆𑀪𑀯 𑀅𑀢𑁆𑀣𑀮𑀸𑀪𑀲𑀢𑁆𑀢𑀺 𑀲𑀭𑀽𑀧𑀓𑀣𑀦𑀸𑀤𑀻𑀲𑀼. 𑀉𑀕𑁆𑀕𑀢𑁂 𑀉𑀕𑁆𑀕𑀘𑁆𑀙𑀢𑀺, 𑀉𑀤𑁆𑀥𑀓𑀫𑁆𑀫𑁂 𑀆𑀲𑀦𑀸 𑀉𑀝𑁆𑀞𑀺𑀢𑁄, 𑀉𑀓𑁆𑀔𑁂𑀧𑁄, 𑀧𑀥𑀸𑀦𑁂 𑀉𑀢𑁆𑀢𑀫𑁄, 𑀮𑁄𑀓𑀼𑀢𑁆𑀢𑀭𑁄, 𑀯𑀺𑀬𑁄𑀕𑁂 𑀉𑀩𑁆𑀩𑀸𑀲𑀺𑀢𑁄, 𑀲𑀫𑁆𑀪𑀯𑁂 𑀉𑀩𑁆𑀪𑀽𑀢𑁄, 𑀅𑀢𑁆𑀣𑀮𑀸𑀪𑁂 𑀉𑀧𑁆𑀧𑀦𑁆𑀦𑀁 𑀜𑀸𑀡𑀁, 𑀲𑀢𑁆𑀢𑀺𑀬𑀁 𑀉𑀲𑁆𑀲𑀳𑀢𑀺 𑀕𑀦𑁆𑀢𑀼𑀁, 𑀲𑀭𑀽𑀧𑀓𑀣𑀦𑁂 𑀉𑀤𑁆𑀤𑀺𑀲𑀢𑀺 𑀲𑀼𑀢𑁆𑀢𑀁.

𑀤𑀼𑀇𑀢𑀺 𑀅𑀲𑁄𑀪𑀦𑀸’𑀪𑀸𑀯𑀓𑀼𑀘𑁆𑀙𑀺𑀢𑀸’𑀲𑀫𑀺𑀤𑁆𑀥𑀺 𑀓𑀺𑀘𑁆𑀙 𑀯𑀺𑀭𑀽𑀧𑀢𑀸𑀤𑀻𑀲𑀼. 𑀅𑀲𑁄𑀪𑀦𑁂 𑀤𑀼𑀕𑁆𑀕𑀦𑁆𑀥𑁄, 𑀅𑀪𑀸𑀯𑁂 𑀤𑀼𑀩𑁆𑀪𑀺𑀓𑁆𑀔𑀁, 𑀓𑀼𑀘𑁆𑀙𑀺𑀢𑁂 𑀤𑀼𑀓𑁆𑀓𑀝𑀁, 𑀅𑀲𑀫𑀺𑀤𑁆𑀥𑀺𑀬𑀁 𑀤𑀼𑀲𑁆𑀲𑀲𑁆𑀲𑀁, 𑀓𑀺𑀘𑁆𑀙𑁂 𑀤𑀼𑀓𑁆𑀓𑀭𑀁, 𑀯𑀺𑀭𑀽𑀧𑀢𑀸𑀬𑀁 𑀤𑀼𑀩𑁆𑀩𑀡𑁆𑀡𑁄, 𑀤𑀼𑀫𑁆𑀫𑀼𑀔𑁄.

𑀲𑀁𑀇𑀢𑀺 𑀲𑀫𑁄𑀥𑀸𑀦 𑀲𑀫𑁆𑀫𑀸𑀲𑀫 𑀲𑀫𑀦𑁆𑀢𑀪𑀸𑀯𑀲𑀗𑁆𑀕𑀢 𑀲𑀗𑁆𑀔𑁂𑀧𑀪𑀼𑀲𑀢𑁆𑀣 𑀲𑀳𑀢𑁆𑀣 𑀅𑀧𑁆𑀧𑀢𑁆𑀣 𑀧𑀪𑀯𑀸’𑀪𑀺𑀫𑀼𑀔𑀪𑀸𑀯 𑀲𑀗𑁆𑀕𑀳 𑀧𑀺𑀥𑀸𑀦 𑀧𑀼𑀦𑀧𑁆𑀧𑀼𑀦𑀓𑀭𑀡 𑀲𑀫𑀺𑀤𑁆𑀥𑀸𑀤𑀻𑀲𑀼. 𑀲𑀫𑁄𑀥𑀸𑀦𑁂 𑀲𑀦𑁆𑀥𑀺, 𑀲𑀫𑁆𑀫𑀸𑀲𑀫𑁂𑀲𑀼 𑀲𑀫𑀸𑀥𑀺 ¶ , 𑀲𑀫𑁆𑀧𑀬𑀼𑀢𑁆𑀢𑁄, 𑀲𑀫𑀦𑁆𑀢𑀪𑀸𑀯𑁂 𑀲𑀁𑀓𑀺𑀡𑁆𑀡𑀸 𑀲𑀫𑀼𑀮𑁆𑀮𑀧𑀦𑀸, 𑀲𑀗𑁆𑀕𑀢𑁂 𑀲𑀗𑁆𑀕𑀫𑁄, 𑀲𑀗𑁆𑀔𑁂𑀧𑁂 𑀲𑀫𑀸𑀲𑁄, 𑀪𑀼𑀲𑀢𑁆𑀣𑁂 𑀲𑀸𑀭𑀢𑁆𑀢𑁄, 𑀲𑀳𑀢𑁆𑀣𑁂 𑀲𑀁𑀯𑀸𑀲𑁄, 𑀅𑀧𑁆𑀧𑀢𑁆𑀣𑁂 𑀲𑀫𑀕𑁆𑀖𑁄. 𑀧𑀪𑀯𑁂 𑀲𑀫𑁆𑀪𑀯𑁄, 𑀅𑀪𑀺𑀫𑀼𑀔𑀪𑀸𑀯𑁂 𑀲𑀫𑁆𑀫𑀼𑀔𑀁, 𑀲𑀗𑁆𑀕𑀳𑁂 𑀲𑀗𑁆𑀕𑀡𑁆𑀳𑀸𑀢𑀺, 𑀧𑀺𑀥𑀸𑀦𑁂 𑀲𑀁𑀯𑀼𑀢𑀁, 𑀧𑀼𑀦𑀧𑁆𑀧𑀼𑀦𑀓𑀭𑀡𑁂 𑀲𑀦𑁆𑀥𑀸𑀯𑀢𑀺, 𑀲𑀫𑀺𑀤𑁆𑀥𑀺𑀬𑀁 𑀲𑀫𑁆𑀧𑀦𑁆𑀦𑁄.

𑀯𑀺𑀇𑀢𑀺 𑀯𑀺𑀲𑁂𑀲 𑀯𑀺𑀯𑀺𑀥 𑀯𑀺𑀭𑀼𑀤𑁆𑀥 𑀯𑀺𑀕𑀢 𑀯𑀺𑀬𑁄𑀕 𑀯𑀺𑀭𑀽𑀧𑀢𑀸𑀤𑀻𑀲𑀼. 𑀯𑀺𑀲𑁂𑀲𑁂 𑀯𑀺𑀫𑀼𑀢𑁆𑀢𑀺 𑀯𑀺𑀲𑀺𑀝𑁆𑀞𑁄, 𑀯𑀺𑀯𑀺𑀥𑁂 𑀯𑀺𑀫𑀢𑀺 𑀯𑀺𑀘𑀺𑀢𑁆𑀭𑀁, 𑀯𑀺𑀭𑀼𑀤𑁆𑀥𑁂 𑀯𑀺𑀯𑀸𑀤𑁄, 𑀯𑀺𑀕𑀢𑁂 𑀯𑀺𑀫𑀮𑀁, 𑀯𑀺𑀬𑁄𑀕𑁂 𑀯𑀺𑀧𑁆𑀧𑀬𑀼𑀢𑁆𑀢𑁄, 𑀯𑀺𑀭𑀽𑀧𑀢𑀸𑀬𑀁 𑀯𑀺𑀭𑀽𑀧𑁄.

𑀅𑀯𑀇𑀢𑀺 𑀅𑀥𑁄𑀪𑀸𑀕 𑀯𑀺𑀬𑁄𑀕 𑀧𑀭𑀺𑀪𑀯 𑀚𑀸𑀦𑀦 𑀲𑀼𑀤𑁆𑀥𑀺 𑀦𑀺𑀘𑁆𑀙𑀬𑀤𑁂𑀲 𑀣𑁂𑀬𑁆𑀬𑀸𑀤𑀻𑀲𑀼. 𑀅𑀥𑁄𑀪𑀸𑀕𑁂 𑀅𑀯𑀓𑁆𑀔𑀺𑀢𑁆𑀢𑀘𑀓𑁆𑀔𑀼, 𑀯𑀺𑀬𑁄𑀕𑁂 𑀑𑀫𑀼𑀓𑁆𑀓𑀉𑀧𑀸𑀳𑀦𑁄 𑀅𑀯𑀓𑁄𑀓𑀺𑀮𑀁 𑀯𑀦𑀁, 𑀧𑀭𑀺𑀪𑀯𑁂 𑀅𑀯𑀚𑀸𑀦𑀦𑀁 𑀅𑀯𑀫𑀜𑁆𑀜𑀢𑀺, 𑀚𑀸𑀦𑀦𑁂 𑀅𑀯𑀕𑀘𑁆𑀙𑀢𑀺, 𑀲𑀼𑀤𑁆𑀥𑀺𑀬𑀁 𑀯𑁄𑀤𑀸𑀦𑀁, 𑀦𑀺𑀘𑁆𑀙𑀬𑁂 𑀅𑀯𑀥𑀸𑀭𑀡𑀁, 𑀤𑁂𑀲𑁂 𑀅𑀯𑀓𑀸𑀲𑁄, 𑀣𑁂𑀬𑁆𑀬𑁂 𑀅𑀯𑀳𑀸𑀭𑁄.

𑀅𑀦𑀼𑀇𑀢𑀺 𑀅𑀦𑀼𑀕𑀢𑀸’𑀦𑀼𑀧𑀘𑁆𑀙𑀺𑀦𑁆𑀦 𑀧𑀘𑁆𑀙𑀢𑁆𑀣 𑀪𑀼𑀲𑀢𑁆𑀣 𑀲𑀸𑀤𑀺𑀲𑁆𑀲 𑀳𑀻𑀦𑀢𑀢𑀺𑀬𑀢𑁆𑀣 𑀮𑀓𑁆𑀔𑀡𑀺’𑀢𑁆𑀣𑀫𑁆𑀪𑀽𑀢𑀓𑁆𑀔𑀸𑀦 𑀪𑀸𑀕 𑀯𑀺𑀘𑁆𑀙𑀸𑀤𑀻𑀲𑀼. 𑀅𑀦𑀼𑀕𑀢𑁂 𑀅𑀦𑁆𑀯𑁂𑀢𑀺, 𑀅𑀦𑀼𑀧𑀘𑁆𑀙𑀺𑀦𑁆𑀦𑁂 𑀅𑀦𑀼𑀲𑀬𑁄, 𑀧𑀘𑁆𑀙𑀸𑀲𑀤𑁆𑀤𑀢𑁆𑀣𑁂 𑀅𑀦𑀼𑀭𑀣𑀁, 𑀪𑀼𑀲𑀢𑁆𑀣𑁂 𑀅𑀦𑀼𑀭𑀢𑁆𑀢𑁄, 𑀲𑀸𑀤𑀺𑀲𑁆𑀲𑁂 𑀅𑀦𑀼𑀭𑀽𑀧𑀁. 𑀳𑀻𑀦𑁂 𑀅𑀦𑀼𑀲𑀸𑀭𑀺𑀧𑀼𑀢𑁆𑀢𑀁 𑀧𑀜𑁆𑀜𑀯𑀦𑁆𑀢𑁄, 𑀢𑀢𑀺𑀬𑀢𑁆𑀣𑁂 𑀦𑀤𑀺𑀫𑀦𑁆𑀯𑀯𑀲𑀺𑀢𑀸 𑀲𑁂𑀦𑀸, 𑀮𑀓𑁆𑀔𑀡𑁂 𑀭𑀼𑀓𑁆𑀔𑀁 𑀅𑀦𑀼 𑀯𑀺𑀚𑁆𑀚𑁄𑀢𑀢𑁂 𑀯𑀺𑀚𑁆𑀚𑀼, 𑀇𑀢𑁆𑀣𑀫𑁆𑀪𑀽𑀢𑀓𑁆𑀔𑀸𑀦𑁂 𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀁 𑀅𑀦𑀼, 𑀪𑀸𑀕𑁂 𑀬𑀤𑁂𑀢𑁆𑀣 𑀫𑀁 𑀅𑀦𑀼𑀲𑀺𑀬𑀸 𑀢𑀁 𑀤𑀻𑀬𑀢𑀼, 𑀯𑀺𑀘𑁆𑀙𑀸𑀬𑀁 𑀭𑀼𑀓𑁆𑀔𑀁 𑀭𑀼𑀓𑁆𑀔𑀁 𑀅𑀦𑀼 𑀯𑀺𑀚𑁆𑀚𑁄𑀢𑀢𑁂 𑀘𑀦𑁆𑀤𑁄.

𑀧𑀭𑀺𑀇𑀢𑀺 𑀲𑀫𑀦𑁆𑀢𑀢𑁄𑀪𑀸𑀯 𑀧𑀭𑀺𑀘𑁆𑀙𑁂𑀤 𑀯𑀚𑁆𑀚𑀦𑀸’𑀮𑀺𑀗𑁆𑀕𑀦 𑀦𑀺𑀯𑀸𑀲𑀦𑀧𑀽𑀚𑀸𑀪𑁄𑀚𑀦𑀸’𑀯𑀚𑀸𑀦𑀦 𑀤𑁄𑀲𑀓𑁆𑀔𑀸𑀦 𑀮𑀓𑁆𑀔𑀡𑀸𑀤𑀻𑀲𑀼. 𑀲𑀫𑀦𑁆𑀢𑀢𑁄𑀪𑀸𑀯𑁂 𑀧𑀭𑀺𑀯𑀼𑀢𑁄, 𑀧𑀭𑀺𑀘𑁆𑀙𑁂𑀤𑁂 𑀧𑀭𑀺𑀜𑁆𑀜𑁂𑀬𑁆𑀬𑀁, 𑀯𑀚𑁆𑀚𑀦𑁂 𑀧𑀭𑀺𑀳𑀭𑀢𑀺 ¶ , 𑀆𑀮𑀺𑀗𑁆𑀕𑀦𑁂 𑀧𑀭𑀺𑀲𑁆𑀲𑀚𑀢𑀺, 𑀦𑀺𑀯𑀸𑀲𑀦𑁂 𑀯𑀢𑁆𑀣𑀁 𑀧𑀭𑀺𑀥𑀲𑁆𑀲𑀢𑀺, 𑀧𑀽𑀚𑀸𑀬𑀁 𑀧𑀸𑀭𑀺𑀘𑀭𑀺𑀬𑀸, 𑀪𑁄𑀚𑀦𑁂 𑀪𑀺𑀓𑁆𑀔𑀼𑀁 𑀧𑀭𑀺𑀯𑀺𑀲𑀢𑀺. 𑀅𑀯𑀚𑀸𑀦𑀦𑁂 𑀧𑀭𑀺𑀪𑀯𑀢𑀺, 𑀤𑁄𑀲𑀓𑁆𑀔𑀸𑀦𑁂 𑀧𑀭𑀺𑀪𑀸𑀲𑀢𑀺, 𑀮𑀓𑁆𑀔𑀡𑀸𑀤𑀻𑀲𑀼 𑀭𑀼𑀓𑁆𑀔𑀁 𑀧𑀭𑀺 𑀯𑀺𑀚𑁆𑀚𑁄𑀢𑀢𑁂 𑀯𑀺𑀚𑁆𑀚𑀼𑀇𑀘𑁆𑀘𑀸𑀤𑀺.

𑀅𑀥𑀺𑀇𑀢𑀺 𑀅𑀥𑀺𑀓𑀺’𑀲𑁆𑀲’𑀭𑀽𑀧𑀭𑀺𑀪𑀸𑀯𑀸’𑀥𑀺𑀪𑀯𑀦𑀚𑁆𑀛𑀸𑀬𑀦𑀸’𑀥𑀺𑀝𑁆𑀞𑀸𑀦𑀦𑀺𑀘𑁆𑀙𑀬𑀧𑀸𑀧𑀼𑀡𑀦𑀸𑀤𑀻𑀲𑀼. 𑀅𑀥𑀺𑀓𑁂 𑀅𑀥𑀺𑀲𑀻𑀮𑀁, 𑀇𑀲𑁆𑀲𑀭𑁂 𑀅𑀥𑀺𑀧𑀢𑀺, 𑀅𑀥𑀺 𑀩𑁆𑀭𑀳𑁆𑀫𑀤𑀢𑁆𑀢𑁂 𑀧𑀜𑁆𑀘𑀸𑀮𑀸, 𑀉𑀧𑀭𑀺𑀪𑀸𑀯𑁂 𑀅𑀥𑀺𑀭𑁄𑀳𑀢𑀺, 𑀧𑀣𑀯𑀺𑀁 𑀅𑀥𑀺𑀲𑁂𑀲𑁆𑀲𑀢𑀺, 𑀅𑀥𑀺𑀪𑀯𑀦𑁂 𑀅𑀥𑀺𑀪𑀯𑀢𑀺, 𑀅𑀚𑁆𑀛𑀸𑀬𑀦𑁂 𑀩𑁆𑀬𑀸𑀓𑀭𑀡𑀫𑀥𑀻𑀢𑁂, 𑀅𑀥𑀺𑀝𑁆𑀞𑀸𑀦𑁂 𑀪𑀽𑀫𑀺𑀓𑀫𑁆𑀧𑀸𑀤𑀺𑀁 𑀅𑀥𑀺𑀝𑁆𑀞𑀸𑀢𑀺, 𑀦𑀺𑀘𑁆𑀙𑀬𑁂 𑀅𑀥𑀺𑀫𑁄𑀓𑁆𑀔𑁄, 𑀧𑀸𑀧𑀼𑀡𑀦𑁂 𑀪𑁄𑀕𑀓𑁆𑀔𑀦𑁆𑀥𑀁 𑀅𑀥𑀺𑀕𑀘𑁆𑀙𑀢𑀺.

𑀅𑀪𑀺𑀇𑀢𑀺 𑀅𑀪𑀺𑀫𑀼𑀔𑀪𑀸𑀯 𑀯𑀺𑀲𑀺𑀝𑁆𑀞𑀸’𑀥𑀺 𑀓𑀼’𑀤𑁆𑀥𑀓𑀫𑁆𑀫 𑀓𑀼𑀮 𑀲𑀸𑀭𑀼𑀧𑁆𑀧𑀯𑀦𑁆𑀤𑀦 𑀮𑀓𑁆𑀔𑀡𑀺’𑀢𑁆𑀣𑀫𑁆𑀪𑀽𑀢𑀓𑁆𑀔𑀸𑀦 𑀯𑀺𑀘𑁆𑀙𑀸𑀤𑀻𑀲𑀼. 𑀅𑀪𑀺𑀫𑀼𑀔𑀪𑀸𑀯𑁂 𑀅𑀪𑀺𑀫𑀼𑀔𑁄 𑀅𑀪𑀺𑀓𑁆𑀓𑀫𑀢𑀺, 𑀯𑀺𑀲𑀺𑀝𑁆𑀞𑁂 𑀅𑀪𑀺𑀥𑀫𑁆𑀫𑁄, 𑀅𑀥𑀺𑀓𑁂 𑀅𑀪𑀺𑀯𑀲𑁆𑀲𑀢𑀺, 𑀉𑀤𑁆𑀥𑀓𑀫𑁆𑀫𑁂 𑀅𑀪𑀺𑀭𑀼𑀳𑀢𑀺, 𑀓𑀼𑀮𑁂 𑀅𑀪𑀺𑀚𑀸𑀢𑁄, 𑀲𑀸𑀭𑀼𑀧𑁆𑀧𑁂 𑀅𑀪𑀺𑀭𑀽𑀧𑁄, 𑀯𑀦𑁆𑀤𑀦𑁂 𑀅𑀪𑀺𑀯𑀸𑀤𑁂𑀢𑀺, 𑀮𑀓𑁆𑀔𑀡𑀸𑀤𑀻𑀲𑀼 𑀧𑀼𑀭𑀺𑀫𑀲𑀫𑀁.

𑀧𑀢𑀺𑀇𑀢𑀺 𑀧𑀢𑀺𑀕𑀢 𑀧𑀝𑀺𑀮𑁄𑀫𑀧𑀢𑀺𑀦𑀺𑀥𑀺 𑀧𑀢𑀺𑀤𑀸𑀦 𑀦𑀺𑀲𑁂𑀥𑀦𑀺𑀯𑀢𑁆𑀢𑀦 𑀲𑀸𑀤𑀺𑀲𑁆𑀲 𑀧𑀢𑀺𑀓𑀭𑀡𑀸’𑀤𑀸𑀦 𑀧𑀢𑀺𑀩𑁄𑀥 𑀧𑀝𑀺𑀘𑁆𑀘 𑀮𑀓𑁆𑀔𑀡𑀺’𑀢𑁆𑀣𑀫𑁆𑀪𑀽𑀢𑀓𑁆𑀔𑀸𑀦 𑀪𑀸𑀕𑀯𑀺𑀘𑁆𑀙𑀸𑀤𑀻𑀲𑀼. 𑀧𑀢𑀺𑀕𑀢𑁂 𑀧𑀘𑁆𑀘𑀓𑁆𑀔𑀁, 𑀧𑀝𑀺𑀮𑁄𑀫𑁂 𑀧𑀢𑀺𑀲𑁄𑀢𑀁, 𑀧𑀢𑀺𑀦𑀺𑀥𑀺𑀫𑁆𑀳𑀺 𑀆𑀘𑀭𑀺𑀬𑀢𑁄 𑀧𑀢𑀺 𑀲𑀺𑀲𑁆𑀲𑁄, 𑀧𑀢𑀺𑀤𑀸𑀦𑁂 𑀢𑁂𑀮𑀢𑁆𑀣𑀺𑀓𑀲𑁆𑀲 𑀖𑀢𑀁 𑀧𑀢𑀺 𑀤𑀤𑀸𑀢𑀺, 𑀦𑀺𑀲𑁂𑀥𑁂 𑀧𑀝𑀺𑀲𑁂𑀥𑀦𑀁, 𑀦𑀺𑀯𑀢𑁆𑀢𑀦𑁂 𑀧𑀝𑀺𑀓𑁆𑀓𑀫𑀢𑀺, 𑀲𑀸𑀤𑀺𑀲𑁆𑀲𑁂 𑀧𑀢𑀺𑀭𑀽𑀧𑀓𑀁, 𑀧𑀢𑀺𑀓𑀭𑀡𑁂 𑀧𑀢𑀺𑀓𑀸𑀭𑁄, 𑀆𑀤𑀸𑀦𑁂 𑀧𑀢𑀺𑀕𑁆𑀕𑀡𑁆𑀳𑀸𑀢𑀺, 𑀧𑀢𑀺𑀩𑁄𑀥𑁂 𑀧𑀝𑀺𑀯𑁂𑀥𑁄, 𑀧𑀝𑀺𑀘𑁆𑀘𑁂 𑀧𑀘𑁆𑀘𑀬𑁄, 𑀮𑀓𑁆𑀔𑀡𑀸𑀤𑀻𑀲𑀼 𑀧𑀼𑀭𑀺𑀫𑀲𑀫𑀁.

𑀲𑀼𑀇𑀢𑀺 𑀲𑁄𑀪𑀦 𑀲𑀼𑀝𑁆𑀞𑀼𑀲𑀫𑁆𑀫𑀸 𑀲𑀫𑀺𑀤𑁆𑀥𑀺 𑀲𑀼𑀔𑀢𑁆𑀣𑀸𑀤𑀻𑀲𑀼. 𑀲𑁄𑀪𑀦𑁂 𑀲𑀼𑀕𑀦𑁆𑀥𑁄, 𑀲𑀼𑀝𑁆𑀞𑀼𑀲𑀫𑁆𑀫𑀸𑀤𑀢𑁆𑀣𑁂𑀲𑀼 𑀲𑀼𑀝𑁆𑀞𑀼 𑀕𑀢𑁄 𑀲𑀼𑀕𑀢𑁄, 𑀲𑀫𑁆𑀫𑀸 𑀕𑀢𑁄𑀢𑀺𑀧𑀺 𑀲𑀼𑀕𑀢𑁄, 𑀲𑀫𑀺𑀤𑁆𑀥𑀺𑀬𑀁 𑀲𑀼𑀪𑀺𑀓𑁆𑀔𑀁, 𑀲𑀼𑀔𑀢𑁆𑀣𑁂 𑀲𑀼𑀓𑀭𑁄.

𑀆𑀇𑀢𑀺 ¶ 𑀅𑀪𑀺𑀫𑀼𑀔𑀪𑀸𑀯𑀼’𑀤𑁆𑀥𑀓𑀫𑁆𑀫 𑀫𑀭𑀺𑀬𑀸𑀤𑀸’𑀪𑀺𑀯𑀺𑀥𑀺 𑀧𑀢𑁆𑀢𑀺’𑀘𑁆𑀙𑀸𑀧𑀭𑀺𑀲𑁆𑀲𑀚𑀦 𑀆𑀤𑀺𑀓𑀫𑁆𑀫𑀕𑁆𑀕𑀳𑀡 𑀦𑀺𑀯𑀸𑀲 𑀲𑀫𑀻𑀧’𑀯𑁆𑀳𑀸𑀦𑀸𑀤𑀻𑀲𑀼. 𑀅𑀪𑀺𑀫𑀼𑀔𑀪𑀸𑀯𑁂 𑀆𑀕𑀘𑁆𑀙𑀢𑀺, 𑀉𑀤𑁆𑀥𑀓𑀫𑁆𑀫𑁂 𑀆𑀭𑁄𑀳𑀢𑀺, 𑀫𑀭𑀺𑀬𑀸𑀤𑀸𑀬𑀁 𑀆𑀧𑀩𑁆𑀩𑀢𑀸 𑀔𑁂𑀢𑁆𑀢𑀁, 𑀅𑀪𑀺𑀯𑀺𑀥𑀺𑀫𑁆𑀳𑀺 𑀆𑀓𑀼𑀫𑀸𑀭𑀁 𑀬𑀲𑁄 𑀓𑀘𑁆𑀘𑀸𑀬𑀦𑀲𑁆𑀲, 𑀧𑀢𑁆𑀢𑀺𑀬𑀁 𑀆𑀧𑀢𑁆𑀢𑀺𑀫𑀸𑀧𑀦𑁆𑀦𑁄, 𑀇𑀘𑁆𑀙𑀸𑀬𑀁 𑀆𑀓𑀗𑁆𑀔𑀸, 𑀧𑀭𑀺𑀲𑁆𑀲𑀚𑀦𑁂 𑀆𑀮𑀺𑀗𑁆𑀕𑀦𑀁, 𑀆𑀤𑀺𑀓𑀫𑁆𑀫𑁂 𑀆𑀭𑀫𑁆𑀪𑁄, 𑀕𑀳𑀡𑁂 𑀆𑀤𑀻𑀬𑀢𑀺 𑀆𑀮𑀫𑁆𑀩𑀢𑀺, 𑀦𑀺𑀯𑀸𑀲𑁂 𑀆𑀯𑀲𑀣𑁄, 𑀲𑀫𑀻𑀧𑁂 𑀆𑀲𑀦𑁆𑀦𑀁, 𑀅𑀯𑁆𑀳𑀸𑀦𑁂 𑀆𑀫𑀦𑁆𑀢𑁂𑀲𑀺.

𑀅𑀢𑀺𑀇𑀢𑀺 𑀅𑀪𑀺𑀓𑁆𑀓𑀫𑀦𑀸’𑀢𑀺𑀓𑁆𑀓𑀦𑁆𑀢𑀸’𑀢𑀺𑀲𑀬 𑀪𑀼𑀲𑀢𑁆𑀣𑀸𑀤𑀻𑀲𑀼. 𑀅𑀢𑀺𑀓𑁆𑀓𑀫𑀦𑁂 𑀅𑀢𑀺𑀭𑁄𑀘𑀢𑀺 𑀅𑀫𑁆𑀳𑁂𑀳𑀺, 𑀅𑀢𑀻𑀢𑁄, 𑀅𑀢𑀺𑀓𑁆𑀓𑀦𑁆𑀢𑁂 𑀅𑀘𑁆𑀘𑀦𑁆𑀢𑀁, 𑀅𑀢𑀺𑀲𑀬𑁂 𑀅𑀢𑀺𑀓𑀼𑀲𑀮𑁄, 𑀪𑀼𑀲𑀢𑁆𑀣𑁂 𑀅𑀢𑀺𑀓𑁆𑀓𑁄𑀥𑁄 𑀅𑀢𑀺𑀯𑀼𑀤𑁆𑀥𑀺.

𑀅𑀧𑀺𑀇𑀢𑀺 𑀲𑀫𑁆𑀪𑀸𑀯𑀦𑀸’𑀧𑁂𑀓𑁆𑀔𑀸 𑀲𑀫𑀼𑀘𑁆𑀘𑀬 𑀕𑀭𑀳 𑀧𑀜𑁆𑀳𑀸𑀤𑀻𑀲𑀼. 𑀲𑀫𑁆𑀪𑀸𑀯𑀦𑀸𑀬𑀁 𑀅𑀧𑀺 𑀤𑀺𑀩𑁆𑀩𑁂𑀲𑀼 𑀓𑀸𑀫𑁂𑀲𑀼, 𑀫𑁂𑀭𑀼𑀫𑁆𑀧𑀺 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀘𑁆𑀙𑁂𑀬𑁆𑀬, 𑀅𑀧𑁂𑀓𑁆𑀔𑀸𑀬𑀁 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀅𑀦𑀺𑀬𑀢𑁄, 𑀲𑀫𑀼𑀘𑁆𑀘𑀬𑁂 𑀇𑀢𑀺𑀧𑀺 𑀅𑀭𑀳𑀁, 𑀅𑀦𑁆𑀢𑀫𑁆𑀧𑀺 𑀅𑀦𑁆𑀢𑀕𑀼𑀡𑀫𑁆𑀧𑀺 𑀆𑀤𑀸𑀬, 𑀕𑀭𑀳𑁂 𑀅𑀧𑀺 𑀅𑀫𑁆𑀳𑀸𑀓𑀁 𑀧𑀡𑁆𑀟𑀺𑀢𑀓, 𑀧𑀜𑁆𑀳𑁂 𑀅𑀧𑀺 𑀪𑀦𑁆𑀢𑁂 𑀪𑀺𑀓𑁆𑀔𑀁 𑀮𑀪𑀺𑀢𑁆𑀣.

𑀅𑀧𑀇𑀢𑀺 𑀅𑀧𑀕𑀢 𑀕𑀭𑀳 𑀯𑀚𑁆𑀚𑀦 𑀧𑀽𑀚𑀸 𑀧𑀤𑀼𑀲𑁆𑀲𑀦𑀸𑀤𑀻𑀲𑀼. 𑀅𑀧𑀕𑀢𑁂 𑀅𑀧𑀫𑀸𑀦𑁄 𑀅𑀧𑁂𑀢𑁄, 𑀕𑀭𑀳𑁂 𑀅𑀧𑀕𑀩𑁆𑀪𑁄, 𑀯𑀚𑁆𑀚𑀦𑁂 𑀅𑀧𑀲𑀸𑀮𑀸𑀬 𑀆𑀬𑀦𑁆𑀢𑀺 𑀯𑀸𑀡𑀺𑀚𑀸, 𑀧𑀽𑀚𑀸𑀬𑀁 𑀯𑀼𑀤𑁆𑀥𑀸𑀧𑀘𑀸𑀬𑀻, 𑀧𑀤𑀼𑀲𑁆𑀲𑀦𑁂 𑀅𑀧𑀭𑀚𑁆𑀛𑀢𑀺.

𑀉𑀧𑀇𑀢𑀺 𑀉𑀧𑀕𑀫𑀦 𑀲𑀫𑀻𑀧𑀽’𑀧𑀧𑀢𑁆𑀢𑀺 𑀲𑀸𑀤𑀺𑀲𑁆𑀲𑀸’𑀥𑀺𑀓𑀽’𑀧𑀭𑀺𑀪𑀸𑀯𑀸’𑀦𑀲𑀦 𑀤𑁄𑀲𑀓𑁆𑀔𑀸𑀦 𑀲𑀜𑁆𑀜𑀸 𑀧𑀼𑀩𑁆𑀩𑀓𑀫𑁆𑀫 𑀧𑀽𑀚𑀸 𑀕𑀬𑁆𑀳𑀸𑀓𑀸𑀭 𑀪𑀼𑀲𑀢𑁆𑀣𑀸𑀤𑀻𑀲𑀼. 𑀉𑀧𑀕𑀫𑀦𑁂 𑀦𑀺𑀲𑀺𑀦𑁆𑀦𑀁 𑀯𑀸 𑀉𑀧𑀦𑀺𑀲𑀻𑀤𑁂𑀬𑁆𑀬, 𑀲𑀫𑀻𑀧𑁂 𑀉𑀧𑀦𑀕𑀭𑀁, 𑀉𑀧𑀧𑀢𑁆𑀢𑀺𑀬𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺, 𑀅𑀣 𑀯𑀸 𑀉𑀧𑀧𑀢𑁆𑀢𑀺 𑀬𑀼𑀢𑁆𑀢𑀺, 𑀬𑀣𑀸 ¶ 𑁋 𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀢𑀻𑀢𑀺 𑀉𑀧𑁂𑀓𑁆𑀔𑀸, 𑀲𑀸𑀤𑀺𑀲𑁆𑀲𑁂 𑀉𑀧𑀫𑀸𑀦𑀁 𑀉𑀧𑀫𑀸, 𑀅𑀥𑀺𑀓𑁂 𑀉𑀧 𑀔𑀸𑀭𑀺𑀬𑀁 𑀤𑁄𑀡𑁄, 𑀉𑀧𑀭𑀺𑀪𑀸𑀯𑁂 𑀉𑀧𑀲𑀫𑁆𑀧𑀦𑁆𑀦𑁄, 𑀅𑀦𑀲𑀦𑁂 𑀉𑀧𑀯𑀸𑀲𑁄, 𑀤𑁄𑀲𑀓𑁆𑀔𑀸𑀦𑁂 𑀧𑀭𑀁 𑀉𑀧𑀧𑀤𑀢𑀺, 𑀲𑀜𑁆𑀜𑀸𑀬𑀁 𑀉𑀧𑀥𑀸 𑀉𑀧𑀲𑀕𑁆𑀕𑁄, 𑀧𑀼𑀩𑁆𑀩𑀓𑀫𑁆𑀫𑁂 𑀉𑀧𑀓𑁆𑀓𑀫𑁄 𑀉𑀧𑀓𑀸𑀭𑁄, 𑀧𑀽𑀚𑀸𑀬𑀁 𑀩𑀼𑀤𑁆𑀥𑀼𑀧𑀝𑁆𑀞𑀸𑀓𑁄, 𑀫𑀸𑀢𑀼𑀧𑀝𑁆𑀞𑀸𑀦𑀁, 𑀕𑀬𑁆𑀳𑀸𑀓𑀸𑀭𑁂 𑀲𑁄𑀘𑁂𑀬𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀪𑀼𑀲𑀢𑁆𑀣𑁂 𑀉𑀧𑀸𑀤𑀸𑀦𑀁, 𑀉𑀧𑀸𑀬𑀸𑀲𑁄, 𑀉𑀧𑀦𑀺𑀲𑁆𑀲𑀬𑁄𑀢𑀺. 𑀇𑀢𑀺 𑀅𑀦𑁂𑀓𑀢𑁆𑀣𑀸 𑀳𑀺 𑀉𑀧𑀲𑀕𑁆𑀕𑀸.

𑀯𑀼𑀢𑁆𑀢𑀜𑁆𑀘 𑁋

‘‘𑀉𑀧𑀲𑀕𑁆𑀕 𑀦𑀺𑀧𑀸𑀢𑀸 𑀘, 𑀧𑀘𑁆𑀘𑀬𑀸 𑀘 𑀇𑀫𑁂 𑀢𑀬𑁄;

𑀦𑁂𑀓𑁂𑀦𑁂𑀓𑀢𑁆𑀣𑀯𑀺𑀲𑀬𑀸, 𑀇𑀢𑀺 𑀦𑁂𑀭𑀼𑀢𑁆𑀢𑀺𑀓𑀸𑀩𑁆𑀭𑀯𑀼’’𑀦𑁆𑀢𑀺.

𑀢𑀢𑁆𑀣 𑀉𑀧𑀲𑀕𑁆𑀕𑀸𑀦𑀁 𑀦𑀸𑀫𑀸𑀔𑁆𑀬𑀸𑀢𑀯𑀺𑀲𑁂𑀲𑀓𑀢𑁆𑀢𑀸 𑀮𑀺𑀗𑁆𑀕𑀲𑀜𑁆𑀜𑀸𑀬𑀁 𑀅𑀦𑀺𑀬𑀫𑁂𑀦 𑀲𑁆𑀬𑀸𑀤𑀺𑀫𑁆𑀳𑀺 𑀲𑀫𑁆𑀧𑀢𑁆𑀢𑁂 𑀢𑁂𑀲𑀁 𑀲𑀗𑁆𑀔𑁆𑀬𑀸𑀓𑀫𑁆𑀫𑀸𑀤𑀺𑀪𑁂𑀤𑀸𑀪𑀸𑀯𑀸 𑀢𑁂𑀳𑀺 𑀧𑀞𑀫𑁂𑀓𑀯𑀘𑀦𑀫𑁂𑀯 𑀪𑀯𑀢𑀺.

‘‘𑀮𑁄𑀧’’𑀦𑁆𑀢𑀺 𑀯𑀢𑁆𑀢𑀫𑀸𑀦𑁂

𑁨𑁮𑁨. 𑀲𑀩𑁆𑀩𑀸𑀲𑀫𑀸𑀯𑀼𑀲𑁄𑀧𑀲𑀕𑁆𑀕𑀦𑀺𑀧𑀸𑀢𑀸𑀤𑀻𑀳𑀺 𑀘.

𑀆𑀯𑀼𑀲𑁄𑀲𑀤𑁆𑀤𑀢𑁄, 𑀉𑀧𑀲𑀕𑁆𑀕𑀦𑀺𑀧𑀸𑀢𑁂𑀳𑀺 𑀘 𑀲𑀩𑁆𑀩𑀸𑀲𑀁 𑀧𑀭𑀸𑀲𑀁 𑀯𑀺𑀪𑀢𑁆𑀢𑀻𑀦𑀁 𑀮𑁄𑀧𑁄 𑀳𑁄𑀢𑀺. 𑀆𑀤𑀺𑀲𑀤𑁆𑀤𑁂𑀦 𑀓𑁆𑀯𑀘𑀺 𑀲𑀼𑀢𑁆𑀢𑀧𑀤𑀸𑀤𑀻𑀳𑀺 𑀘. 𑀏𑀢𑁆𑀣 𑀘 𑀆𑀯𑀼𑀲𑁄𑀢𑀺𑀫𑀲𑁆𑀲 𑀯𑀺𑀲𑀼𑀁 𑀕𑀳𑀡𑀁 𑀲𑀲𑀗𑁆𑀔𑁆𑀬𑀢𑁆𑀢𑀤𑀻𑀧𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀉𑀧𑁂𑀘𑁆𑀘𑀢𑁆𑀣𑀁 𑀲𑀚𑁆𑀚𑀦𑁆𑀢𑀻𑀢𑀺, 𑀉𑀧𑀲𑀕𑁆𑀕𑀸 𑀳𑀺 𑀧𑀸𑀤𑀬𑁄;

𑀘𑀸𑀤𑀻 𑀧𑀤𑀸𑀤𑀺𑀫𑀚𑁆𑀛𑀦𑁆𑀢𑁂, 𑀦𑀺𑀧𑀸𑀢𑀸 𑀦𑀺𑀧𑀢𑀦𑁆𑀢𑀺𑀢𑀺.

𑀧𑀳𑀭𑀡𑀁 𑀧𑀳𑀸𑀭𑁄, 𑀏𑀯𑀁 𑀧𑀭𑀸𑀪𑀯𑁄, 𑀦𑀺𑀯𑀸𑀲𑁄, 𑀦𑀻𑀳𑀸𑀭𑁄, 𑀉𑀳𑀸𑀭𑁄, 𑀤𑀼𑀳𑀸𑀭𑁄, 𑀲𑀁𑀳𑀸𑀭𑁄, 𑀯𑀺𑀳𑀸𑀭𑁄, 𑀅𑀯𑀳𑀸𑀭𑁄, 𑀅𑀦𑀼𑀳𑀸𑀭𑁄, 𑀧𑀭𑀺𑀳𑀸𑀭𑁄, 𑀅𑀥𑀺𑀳𑀸𑀭𑁄, 𑀅𑀪𑀺𑀳𑀸𑀭𑁄, 𑀧𑀢𑀺𑀳𑀸𑀭𑁄, 𑀲𑀼𑀳𑀸𑀭𑁄, 𑀆𑀳𑀸𑀭𑁄, 𑀅𑀢𑀺𑀳𑀸𑀭𑁄, 𑀅𑀧𑀺𑀳𑀸𑀭𑁄, 𑀅𑀧𑀳𑀸𑀭𑁄 ¶ , 𑀉𑀧𑀳𑀸𑀭𑁄. 𑀧𑀳𑀭𑀢𑀺, 𑀧𑀭𑀸𑀪𑀯𑀢𑀺, 𑀦𑀺𑀯𑀲𑀢𑀺, 𑀦𑀻𑀳𑀭𑀢𑀺, 𑀉𑀤𑁆𑀥𑀭𑀢𑀺 𑀇𑀘𑁆𑀘𑀸𑀤𑀺 𑀬𑁄𑀚𑁂𑀢𑀩𑁆𑀩𑀁.

𑀥𑀸𑀢𑁆𑀯𑀢𑁆𑀣𑀁 𑀩𑀸𑀥𑀢𑁂 𑀓𑁄𑀘𑀺, 𑀓𑁄𑀘𑀺 𑀢𑀫𑀦𑀼𑀯𑀢𑁆𑀢𑀢𑁂;

𑀢𑀫𑁂𑀯𑀜𑁆𑀜𑁄 𑀯𑀺𑀲𑁂𑀲𑁂𑀢𑀺, 𑀉𑀧𑀲𑀕𑁆𑀕𑀕𑀢𑀻 𑀢𑀺𑀥𑀸.

𑀑𑀧𑀲𑀕𑁆𑀕𑀺𑀓𑀧𑀤𑀁 𑀦𑀺𑀝𑁆𑀞𑀺𑀢𑀁.

𑀦𑁂𑀧𑀸𑀢𑀺𑀓𑀧𑀤

𑀲𑀫𑀼𑀘𑁆𑀘𑀬𑀯𑀺𑀓𑀧𑁆𑀧𑀦𑀧𑀝𑀺𑀲𑁂𑀥𑀧𑀽𑀭𑀡𑀸𑀤𑀺𑀅𑀢𑁆𑀣𑀁 𑀅𑀲𑀢𑁆𑀯𑀯𑀸𑀘𑀓𑀁 𑀦𑁂𑀧𑀸𑀢𑀺𑀓𑀁 𑀧𑀤𑀁.

𑀢𑀢𑁆𑀭 𑀘𑀇𑀢𑀺 𑀲𑀫𑀼𑀘𑁆𑀘𑀬𑀸’𑀦𑁆𑀯𑀸𑀘𑀬𑁂’𑀢𑀭𑀻𑀢𑀭𑀬𑁄𑀕𑀲𑀫𑀸𑀳𑀸𑀭𑀸’𑀯𑀥𑀸𑀭𑀡𑀸𑀤𑀻𑀲𑀼.

𑀯𑀸𑀇𑀢𑀺 𑀯𑀺𑀓𑀧𑁆𑀧𑀦𑀽’𑀧𑀫𑀸𑀦 𑀲𑀫𑀼𑀘𑁆𑀘𑀬 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀸𑀲𑀼.

𑀦 𑀦𑁄 𑀫𑀸 𑀅 𑀅𑀮𑀁 𑀳𑀮𑀁 𑀇𑀘𑁆𑀘𑁂𑀢𑁂 𑀧𑀝𑀺𑀲𑁂𑀥𑀦𑀢𑁆𑀣𑁂.

𑀅𑀮𑀁 𑀧𑀭𑀺𑀬𑀢𑁆𑀢𑀺 𑀪𑀽𑀲𑀦𑁂𑀲𑀼 𑀘.

𑀧𑀽𑀭𑀡𑀢𑁆𑀣𑀁 𑀤𑀼𑀯𑀺𑀥𑀁 𑀅𑀢𑁆𑀣𑀧𑀽𑀭𑀡𑀁 𑀧𑀤𑀧𑀽𑀭𑀡𑀜𑁆𑀘.

𑀢𑀢𑁆𑀣 𑀅𑀣 𑀔𑀮𑀼 𑀯𑀢 𑀯𑀣 𑀅𑀣𑁄 𑀅𑀲𑁆𑀲𑀼 𑀬𑀕𑁆𑀖𑁂 𑀳𑀺 𑀘𑀭𑀳𑀺 𑀦𑀁 𑀢𑀁 𑀯𑀸 𑀘 𑀢𑀼𑀯 𑀯𑁄 𑀧𑀦 𑀳𑀯𑁂 𑀓𑀻𑀯 𑀳 𑀢𑀢𑁄 𑀬𑀣𑀸 𑀲𑀼𑀤𑀁 𑀔𑁄 𑀯𑁂 𑀳𑀁 𑀏𑀦𑀁 𑀲𑁂𑀬𑁆𑀬𑀣𑀺𑀤𑀁 𑀇𑀘𑁆𑀘𑁂𑀯𑀫𑀸𑀤𑀻𑀦𑀺 𑀧𑀤𑀧𑀽𑀭𑀡𑀸𑀦𑀺.

𑀢𑀢𑁆𑀣 𑁋 𑀅𑀣𑀇𑀢𑀺 𑀧𑀜𑁆𑀳𑀸’𑀦𑀦𑁆𑀢𑀭𑀺𑀬𑀸’𑀥𑀺𑀓𑀸𑀭𑀸𑀤𑀻𑀲𑀼 𑀘.

𑀔𑀮𑀼𑀇𑀢𑀺 𑀧𑀝𑀺𑀲𑁂𑀥𑀸’𑀯𑀥𑀸𑀭𑀡 𑀧𑀲𑀺𑀤𑁆𑀥𑀻𑀲𑀼 𑀘.

𑀯𑀢𑀇𑀢𑀺 𑀏𑀓𑀁𑀲 𑀔𑁂𑀤𑀸’𑀦𑀼𑀓𑀫𑁆𑀧𑀲𑀗𑁆𑀓𑀧𑁆𑀧𑁂𑀲𑀼 𑀘.

𑀅𑀣𑁄𑀇𑀢𑀺 𑀅𑀦𑁆𑀯𑀸𑀤𑁂𑀲𑁂 𑀘.

𑀳𑀺𑀇𑀢𑀺 ¶ 𑀳𑁂𑀢𑀼 𑀅𑀯𑀥𑀸𑀭𑀡𑁂𑀲𑀼 𑀘.

𑀢𑀼𑀇𑀢𑀺 𑀯𑀺𑀲𑁂𑀲 𑀳𑁂𑀢𑀼 𑀦𑀺𑀯𑀢𑁆𑀢𑀦𑀸𑀤𑀻𑀲𑀼 𑀘.

𑀧𑀦𑀇𑀢𑀺 𑀯𑀺𑀲𑁂𑀲𑁂𑀧𑀺.

𑀳𑀯𑁂, 𑀯𑁂𑀇𑀘𑁆𑀘𑁂𑀢𑁂 𑀏𑀓𑀁𑀲𑀢𑁆𑀣𑁂𑀧𑀺.

𑀳𑀁𑀇𑀢𑀺 𑀯𑀺𑀲𑀸𑀤 𑀲𑀫𑁆𑀪𑀫𑁂𑀲𑀼𑀧𑀺.

𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀢𑀁 𑀓𑀢𑀫𑀦𑁆𑀢𑀺 𑀅𑀢𑁆𑀣𑁂𑀧𑀺.

𑀅𑀢𑁆𑀣𑀧𑀽𑀭𑀡𑀁 𑀤𑀼𑀯𑀺𑀥𑀁 𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀁, 𑀅𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀜𑁆𑀘.

𑀅𑀢𑁆𑀣𑀺 𑀲𑀓𑁆𑀓𑀸 𑀮𑀩𑁆𑀪𑀸 𑀇𑀘𑁆𑀘𑁂𑀢𑁂 𑀧𑀞𑀫𑀸𑀬𑀁.

𑀆𑀯𑀼𑀲𑁄 𑀅𑀫𑁆𑀪𑁄 𑀳𑀫𑁆𑀪𑁄 𑀭𑁂 𑀅𑀭𑁂 𑀳𑀭𑁂 𑀚𑁂𑀇𑀘𑁆𑀘𑁂𑀢𑁂 𑀆𑀫𑀦𑁆𑀢𑀦𑁂.

𑀤𑀺𑀯𑀸 𑀪𑀺𑀬𑁆𑀬𑁄 𑀦𑀫𑁄 𑀇𑀘𑁆𑀘𑁂𑀢𑁂 𑀧𑀞𑀫𑀸𑀬𑀁, 𑀤𑀼𑀢𑀺𑀬𑀸𑀬𑀜𑁆𑀘.

𑀲𑀬𑀁 𑀲𑀸𑀫𑀁 𑀲𑀁 𑀲𑀫𑁆𑀫𑀸 𑀓𑀺𑀦𑁆𑀢𑀺 𑀇𑀘𑁆𑀘𑁂𑀢𑁂 𑀢𑀢𑀺𑀬𑀢𑁆𑀣𑁂, 𑀲𑁄𑀢𑁄 𑀥𑀸𑀧𑀘𑁆𑀘𑀬𑀦𑁆𑀢𑀸 𑀘. 𑀲𑀼𑀢𑁆𑀢𑀲𑁄 𑀧𑀤𑀲𑁄 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀏𑀓𑀥𑀸 𑀤𑁆𑀯𑀺𑀥𑀸 𑀇𑀘𑁆𑀘𑀸𑀤𑀺.

𑀢𑀯𑁂 𑀢𑀼𑀁𑀧𑀘𑁆𑀘𑀬𑀦𑁆𑀢𑀸 𑀘𑀢𑀼𑀢𑁆𑀣𑀺𑀬𑀸, 𑀓𑀸𑀢𑀯𑁂 𑀤𑀸𑀢𑀯𑁂 𑀓𑀸𑀢𑀼𑀁 𑀓𑀸𑀭𑁂𑀢𑀼𑀁 𑀤𑀸𑀢𑀼𑀁 𑀤𑀸𑀧𑁂𑀢𑀼𑀁 𑀇𑀘𑁆𑀘𑀸𑀤𑀺.

𑀲𑁄 𑀢𑁄𑀧𑀘𑁆𑀘𑀬𑀦𑁆𑀢𑀸 𑀧𑀜𑁆𑀘𑀫𑀺𑀬𑀢𑁆𑀣𑁂, 𑀤𑀻𑀖𑀲𑁄 𑀑𑀭𑀲𑁄 𑀭𑀸𑀚𑀢𑁄 𑀯𑀸 𑀘𑁄𑀭𑀢𑁄 𑀯𑀸 𑀇𑀘𑁆𑀘𑀸𑀤𑀺.

𑀢𑁄 𑀲𑀢𑁆𑀢𑀫𑁆𑀬𑀢𑁆𑀣𑁂𑀧𑀺, 𑀢𑁆𑀭𑀣𑀸𑀤𑀺𑀧𑀘𑁆𑀘𑀬𑀦𑁆𑀢𑀸 𑀘. 𑀏𑀓𑀢𑁄 𑀧𑀼𑀭𑀢𑁄 𑀧𑀘𑁆𑀙𑀢𑁄 𑀧𑀲𑁆𑀲𑀢𑁄 𑀧𑀺𑀝𑁆𑀞𑀺𑀢𑁄 𑀧𑀸𑀤𑀢𑁄 𑀲𑀻𑀲𑀢𑁄 𑀅𑀕𑁆𑀕𑀢𑁄 𑀫𑀽𑀮𑀢𑁄 𑀬𑀢𑁆𑀭 𑀬𑀢𑁆𑀣 𑀬𑀳𑀺𑀁 𑀢𑀢𑁆𑀭 𑀢𑀢𑁆𑀣 𑀢𑀳𑀺𑀁 𑀢𑀳𑀁 𑀇𑀘𑁆𑀘𑀸𑀤𑀺.

𑀲𑀫𑀦𑁆𑀢𑀸 𑀲𑀸𑀫𑀦𑁆𑀢𑀸 𑀧𑀭𑀺𑀢𑁄 𑀅𑀪𑀺𑀢𑁄 𑀲𑀫𑀦𑁆𑀢𑀢𑁄 𑀏𑀓𑀚𑁆𑀛𑀁 𑀏𑀓𑀫𑀦𑁆𑀢𑀁 𑀳𑁂𑀝𑁆𑀞𑀸 𑀉𑀧𑀭𑀺 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀁 𑀲𑀫𑁆𑀫𑀼𑀔𑀸 ¶ 𑀧𑀭𑀫𑁆𑀫𑀼𑀔𑀸 𑀆𑀯𑀺 𑀭𑀳𑁄 𑀢𑀺𑀭𑁄 𑀉𑀘𑁆𑀘𑀁 𑀦𑀻𑀘𑀁 𑀅𑀦𑁆𑀢𑁄 𑀅𑀦𑁆𑀢𑀭𑀸 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀩𑀸𑀳𑀺𑀭𑀸 𑀩𑀸𑀳𑀺𑀭𑀁 𑀩𑀳𑀺 𑀑𑀭𑀁 𑀧𑀸𑀭𑀁 𑀆𑀭𑀸 𑀆𑀭𑀓𑀸 𑀧𑀘𑁆𑀙𑀸 𑀧𑀼𑀭𑁂 𑀳𑀼𑀭𑀁 𑀧𑁂𑀘𑁆𑀘 𑀇𑀘𑁆𑀘𑁂𑀢𑁂 𑀲𑀢𑁆𑀢𑀫𑀺𑀬𑀸.

𑀲𑀫𑁆𑀧𑀢𑀺 𑀆𑀬𑀢𑀺 𑀅𑀚𑁆𑀚 𑀅𑀧𑀭𑀚𑁆𑀚𑀼 𑀧𑀭𑀚𑁆𑀚 𑀲𑀼𑀯𑁂 𑀲𑁆𑀯𑁂 𑀧𑀭𑀲𑀼𑀯𑁂 𑀳𑀺𑀬𑁆𑀬𑁄 𑀧𑀭𑁂 𑀲𑀚𑁆𑀚𑀼 𑀲𑀸𑀬𑀁 𑀧𑀸𑀢𑁄 𑀓𑀸𑀮𑀁 𑀓𑀮𑁆𑀮𑀁 𑀤𑀺𑀯𑀸 𑀦𑀢𑁆𑀢𑀁 𑀦𑀺𑀘𑁆𑀘𑀁 𑀲𑀢𑀢𑀁 𑀅𑀪𑀺𑀡𑁆𑀳𑀁 𑀅𑀪𑀺𑀓𑁆𑀔𑀡𑀁 𑀫𑀼𑀳𑀼𑀁 𑀫𑀼𑀳𑀼𑀢𑁆𑀢𑀁 𑀪𑀽𑀢𑀧𑀼𑀩𑁆𑀩𑀁 𑀧𑀼𑀭𑀸 𑀬𑀤𑀸 𑀢𑀤𑀸 𑀓𑀤𑀸 𑀇𑀘𑁆𑀘𑀸𑀤𑀬𑁄 𑀓𑀸𑀮𑀲𑀢𑁆𑀢𑀫𑀺𑀬𑀸. 𑀇𑀢𑀺 𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀸𑀦𑀺.

𑀅𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑁂𑀲𑀼 𑀘 𑀅𑀧𑁆𑀧𑁂𑀯 𑀅𑀧𑁆𑀧𑁂𑀯𑀦𑀸𑀫 𑀦𑀼 𑀇𑀘𑁆𑀘𑁂𑀢𑁂 𑀲𑀁𑀲𑀬𑀢𑁆𑀣𑁂.

𑀅𑀤𑁆𑀥𑀸 𑀅𑀜𑁆𑀜𑀤𑀢𑁆𑀣𑀼 𑀢𑀕𑁆𑀖 𑀚𑀸𑀢𑀼 𑀓𑀸𑀫𑀁 𑀲𑀲𑀓𑁆𑀓𑀁𑀇𑀘𑁆𑀘𑁂𑀢𑁂 𑀏𑀓𑀁𑀲𑀢𑁆𑀣𑁂.

𑀏𑀯𑀇𑀢𑀺 𑀅𑀯𑀥𑀸𑀭𑀡𑁂.

𑀓𑀘𑁆𑀘𑀺𑀦𑀼’𑀓𑀺𑀦𑁆𑀦𑀼𑀦𑀦𑀼𑀓𑀣𑀁 𑀓𑀺𑀁𑀲𑀼 𑀓𑀺𑀁𑀇𑀘𑁆𑀘𑁂𑀢𑁂 𑀧𑀼𑀘𑁆𑀙𑀦𑀢𑁆𑀣𑁂.

𑀏𑀯𑀁 𑀇𑀢𑀺 𑀇𑀢𑁆𑀣𑀁 𑀇𑀘𑁆𑀘𑁂𑀢𑁂 𑀦𑀺𑀤𑀲𑁆𑀲𑀦𑁂.

𑀇𑀢𑀺 𑀳𑁂𑀢𑀼 𑀯𑀸𑀓𑁆𑀬𑀧𑀭𑀺𑀲𑀫𑀢𑁆𑀢𑀻𑀲𑀼 𑀘.

𑀬𑀸𑀯 𑀢𑀸𑀯 𑀬𑀸𑀯𑀢𑀸 𑀢𑀸𑀯𑀢𑀸 𑀓𑀺𑀢𑁆𑀢𑀸𑀯𑀢𑀸 𑀏𑀢𑁆𑀢𑀸𑀯𑀢𑀸 𑀓𑀻𑀯 𑀇𑀘𑁆𑀘𑁂𑀢𑁂 𑀧𑀭𑀺𑀘𑁆𑀙𑁂𑀤𑀦𑀢𑁆𑀣𑁂.

𑀏𑀯𑀁 𑀲𑀸𑀳𑀼 𑀮𑀳𑀼 𑀑𑀧𑀸𑀬𑀺𑀓𑀁 𑀧𑀢𑀺𑀭𑀽𑀧𑀁 𑀆𑀫 𑀲𑀸𑀥𑀼 𑀇𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑁂.

𑀬𑀣𑀸 𑀢𑀣𑀸 𑀬𑀣𑁂𑀯 𑀢𑀣𑁂𑀯 𑀏𑀯𑀁 𑀏𑀯𑀫𑁂𑀯 𑀏𑀯𑀫𑁂𑀯𑀁 𑀏𑀯𑀫𑁆𑀧𑀺 𑀬𑀣𑀸𑀧𑀺 𑀲𑁂𑀬𑁆𑀬𑀣𑀸𑀧𑀺 𑀲𑁂𑀬𑁆𑀬𑀣𑀸𑀧𑀺𑀦𑀸𑀫 𑀯𑀺𑀬 𑀇𑀯 𑀬𑀣𑀭𑀺𑀯 𑀢𑀣𑀭𑀺𑀯 𑀬𑀣𑀸𑀦𑀸𑀫 𑀢𑀣𑀸𑀦𑀸𑀫 𑀬𑀣𑀸𑀳𑀺 𑀢𑀣𑀸𑀳𑀺 𑀬𑀣𑀸𑀘𑀢𑀣𑀸𑀘 𑀇𑀘𑁆𑀘𑁂𑀢𑁂 𑀧𑀝𑀺𑀪𑀸𑀕𑀢𑁆𑀣𑁂.

𑀬𑀣𑀸𑀇𑀢𑀺 ¶ 𑀬𑁄𑀕𑁆𑀕𑀢𑀸 𑀯𑀺𑀘𑁆𑀙𑀸 𑀧𑀤𑀢𑁆𑀣𑀸𑀦𑀢𑀺𑀯𑀢𑁆𑀢𑀦𑀺𑀤𑀲𑁆𑀲𑀦𑁂𑀲𑀼 𑀘.

𑀏𑀯𑀁𑀇𑀢𑀺 𑀉𑀧𑀤𑁂𑀲 𑀧𑀜𑁆𑀳𑀸𑀤𑀻𑀲𑀼 𑀘.

𑀓𑀺𑀜𑁆𑀘𑀸𑀧𑀺𑀇𑀢𑀺 𑀅𑀦𑀼𑀕𑁆𑀕𑀳𑀢𑁆𑀣𑁂.

𑀅𑀳𑁄𑀇𑀢𑀺 𑀕𑀭𑀳 𑀧𑀲𑀁𑀲𑀦 𑀧𑀢𑁆𑀣𑀦𑁂𑀲𑀼 𑀘.

𑀦𑀸𑀫𑀇𑀢𑀺 𑀕𑀭𑀳 𑀧𑀲𑀁𑀲𑀦 𑀲𑀜𑁆𑀜𑀸 𑀧𑀜𑁆𑀳𑁂𑀲𑀼 𑀘.

𑀲𑀸𑀥𑀼𑀇𑀢𑀺 𑀧𑀲𑀁𑀲𑀦 𑀬𑀸𑀘𑀦𑁂𑀲𑀼 𑀘.

𑀇𑀗𑁆𑀖 𑀳𑀦𑁆𑀤 𑀇𑀘𑁆𑀘𑁂𑀢𑁂 𑀘𑁄𑀤𑀦𑀢𑁆𑀣𑁂.

𑀲𑀸𑀥𑀼 𑀲𑀼𑀝𑁆𑀞𑀼 𑀏𑀯𑀫𑁂𑀢𑀦𑁆𑀢𑀺 𑀅𑀦𑀼𑀫𑁄𑀤𑀦𑁂.

𑀓𑀺𑀭𑀇𑀢𑀺 𑀅𑀦𑀼𑀲𑁆𑀲𑀯𑀡 𑀅𑀲𑁆𑀲𑀤𑁆𑀥𑁂𑀬𑁆𑀬𑁂𑀲𑀼.

𑀦𑀽𑀦𑀇𑀢𑀺 𑀅𑀦𑀼𑀫𑀸𑀦𑀸’𑀦𑀼𑀲𑁆𑀲𑀭𑀡 𑀧𑀭𑀺𑀯𑀺𑀢𑀓𑁆𑀓𑀦𑁂𑀲𑀼.

𑀓𑀲𑁆𑀫𑀸𑀇𑀢𑀺 𑀓𑀸𑀭𑀡𑀧𑀼𑀘𑁆𑀙𑀦𑁂.

𑀬𑀲𑁆𑀫𑀸 𑀢𑀲𑁆𑀫𑀸 𑀢𑀣𑀸𑀳𑀺 𑀢𑁂𑀦 𑀇𑀘𑁆𑀘𑁂𑀢𑁂 𑀓𑀸𑀭𑀡𑀘𑁆𑀙𑁂𑀤𑀦𑀢𑁆𑀣𑁂.

𑀲𑀳 𑀲𑀤𑁆𑀥𑀺𑀁 𑀲𑀫𑀁 𑀅𑀫𑀸𑀇𑀢𑀺 𑀲𑀫𑀓𑁆𑀭𑀺𑀬𑀸𑀬𑀁.

𑀯𑀺𑀦𑀸 𑀭𑀺𑀢𑁂𑀇𑀢𑀺 𑀯𑀺𑀧𑁆𑀧𑀬𑁄𑀕𑁂.

𑀦𑀸𑀦𑀸 𑀧𑀼𑀣𑀼 𑀩𑀳𑀼𑀧𑁆𑀧𑀓𑀸𑀭𑁂.

𑀧𑀼𑀣𑀼 𑀯𑀺𑀲𑀼𑀁 𑀅𑀲𑀗𑁆𑀖𑀸𑀢𑁂 𑀘.

𑀤𑀼𑀝𑁆𑀞𑀼 𑀓𑀼 𑀚𑀺𑀕𑀼𑀘𑁆𑀙𑀸𑀬𑀁.

𑀧𑀼𑀦 𑀅𑀧𑁆𑀧𑀞𑀫𑁂.

𑀓𑀣𑀜𑁆𑀘𑀺 𑀓𑀺𑀘𑁆𑀙𑀢𑁆𑀣𑁂 𑀘.

𑀥𑀸 𑀓𑁆𑀔𑀢𑁆𑀢𑀼𑀁 𑀲𑀓𑀺𑀜𑁆𑀘 𑀲𑀗𑁆𑀔𑁆𑀬𑀸𑀯𑀺𑀪𑀸𑀕𑁂.

𑀈𑀲𑀓𑀁 ¶ 𑀅𑀧𑁆𑀧𑀢𑁆𑀣𑁂.

𑀲𑀡𑀺𑀓𑀁 𑀫𑀦𑁆𑀤𑀢𑁆𑀣𑁂.

𑀔𑀺𑀧𑁆𑀧𑀁 𑀅𑀭𑀁 𑀮𑀳𑀼 𑀆𑀲𑀼𑀁 𑀢𑀼𑀡𑁆𑀡𑀁 𑀅𑀘𑀺𑀭𑀁 𑀲𑀻𑀖𑀢𑁆𑀣𑁂.

𑀘𑀺𑀭𑀁 𑀘𑀺𑀭𑀲𑁆𑀲𑀁 𑀤𑀻𑀖𑀓𑀸𑀮𑁂.

𑀘𑁂 𑀬𑀤𑀺 𑀲𑀗𑁆𑀓𑀸𑀯𑀝𑁆𑀞𑀸𑀦𑁂.

𑀥𑀼𑀯𑀁 𑀣𑀺𑀭𑀸𑀯𑀥𑀸𑀭𑀡𑁂𑀲𑀼.

𑀳𑀸 𑀯𑀺𑀲𑀸𑀤𑁂.

𑀢𑀼𑀡𑁆𑀳𑀻 𑀅𑀪𑀸𑀲𑀦𑁂.

𑀲𑀘𑁆𑀙𑀺 𑀧𑀘𑁆𑀘𑀓𑁆𑀔𑁂.

𑀫𑀼𑀲𑀸 𑀫𑀺𑀘𑁆𑀙𑀸 𑀅𑀮𑀺𑀓𑀁 𑀅𑀲𑀘𑁆𑀘𑁂.

𑀲𑀼𑀯𑀢𑁆𑀣𑀺 𑀆𑀲𑀻𑀲𑀢𑁆𑀣𑁂 𑀇𑀘𑁆𑀘𑀸𑀤𑀺.

𑀢𑀼𑀦 𑀢𑁆𑀯𑀸𑀦 𑀢𑁆𑀯𑀸𑀧𑀘𑁆𑀘𑀬𑀦𑁆𑀢𑀸 𑀉𑀲𑁆𑀲𑀼𑀓𑁆𑀓𑀦𑀢𑁆𑀣𑁂 𑀪𑀯𑀦𑁆𑀢𑀺.

𑀬𑀣𑀸 𑁋 𑀧𑀲𑁆𑀲𑀺𑀢𑀼𑀦 𑀧𑀲𑁆𑀲𑀺𑀬 𑀧𑀲𑁆𑀲𑀺𑀢𑁆𑀯𑀸𑀦 𑀧𑀲𑁆𑀲𑀺𑀢𑁆𑀯𑀸 𑀤𑀺𑀲𑁆𑀯𑀸 𑀤𑀺𑀲𑁆𑀯𑀸𑀦𑀤𑀲𑁆𑀲𑁂𑀢𑁆𑀯𑀸 𑀤𑀸𑀢𑀼𑀦 𑀤𑀢𑁆𑀯𑀸𑀦 𑀤𑀢𑁆𑀯𑀸 𑀉𑀧𑀸𑀤𑀸𑀬 𑀤𑀸𑀧𑁂𑀢𑁆𑀯𑀸 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀯𑀺𑀘𑁂𑀬𑁆𑀬 𑀯𑀺𑀦𑁂𑀬𑁆𑀬 𑀦𑀺𑀳𑀘𑁆𑀘 𑀲𑀫𑁂𑀘𑁆𑀘 𑀅𑀧𑁂𑀘𑁆𑀘 𑀉𑀧𑁂𑀘𑁆𑀘 𑀆𑀭𑀩𑁆𑀪 𑀆𑀕𑀫𑁆𑀫 𑀇𑀘𑁆𑀘𑀸𑀤𑀺.

𑀏𑀯𑀁 𑀦𑀸𑀫𑀸𑀔𑁆𑀬𑀸𑀢𑁄𑀧𑀲𑀕𑁆𑀕𑀯𑀺𑀦𑀺𑀫𑀼𑀢𑁆𑀢𑀁 𑀬𑀤𑀩𑁆𑀬𑀬𑀮𑀓𑁆𑀔𑀡𑀁, 𑀢𑀁 𑀲𑀩𑁆𑀩𑀁 𑀦𑀺𑀧𑀸𑀢𑀧𑀤𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀼𑀢𑁆𑀢𑀜𑁆𑀘 𑁋

‘‘𑀫𑀼𑀢𑁆𑀢𑀁 𑀧𑀤𑀢𑁆𑀢𑀬𑀸 𑀬𑀲𑁆𑀫𑀸, 𑀢𑀲𑁆𑀫𑀸 𑀦𑀺𑀧𑀢𑀢𑁆𑀬𑀦𑁆𑀢𑀭𑀸;

𑀦𑁂𑀧𑀸𑀢𑀺𑀓𑀦𑁆𑀢𑀺 𑀢𑀁 𑀯𑀼𑀢𑁆𑀢𑀁, 𑀬𑀁 𑀅𑀩𑁆𑀬𑀬 𑀲𑀮𑀓𑁆𑀔𑀡’’𑀦𑁆𑀢𑀺.

𑀦𑁂𑀧𑀸𑀢𑀺𑀓𑀧𑀤𑀁 𑀦𑀺𑀝𑁆𑀞𑀺𑀢𑀁.

𑀧𑀼𑀮𑁆𑀮𑀺𑀗𑁆𑀕𑀁 𑀇𑀢𑁆𑀣𑀺𑀮𑀺𑀗𑁆𑀕𑀜𑁆𑀘, 𑀦𑀧𑀼𑀁𑀲𑀓𑀫𑀣𑀸𑀧𑀭𑀁;

𑀢𑀺𑀮𑀺𑀗𑁆𑀕𑀜𑁆𑀘 𑀅𑀮𑀺𑀗𑁆𑀕𑀜𑁆𑀘, 𑀦𑀸𑀫𑀺𑀓𑀁 𑀧𑀜𑁆𑀘𑀥𑀸 𑀞𑀺𑀢𑀁.

𑀇𑀢𑀺 𑀧𑀤𑀭𑀽𑀧𑀲𑀺𑀤𑁆𑀥𑀺𑀬𑀁 𑀦𑀸𑀫𑀓𑀡𑁆𑀟𑁄 𑀤𑀼𑀢𑀺𑀬𑁄.

𑁩. 𑀓𑀸𑀭𑀓𑀓𑀡𑁆𑀟

𑀅𑀣 ¶ 𑀯𑀺𑀪𑀢𑁆𑀢𑀻𑀦𑀫𑀢𑁆𑀣𑀪𑁂𑀤𑀸 𑀯𑀼𑀘𑁆𑀘𑀦𑁆𑀢𑁂.

𑀢𑀢𑁆𑀣 𑀏𑀓𑀫𑁆𑀧𑀺 𑀅𑀢𑁆𑀣𑀁 𑀓𑀫𑁆𑀫𑀸𑀤𑀺𑀯𑀲𑁂𑀦, 𑀏𑀓𑀢𑁆𑀢𑀸𑀤𑀺𑀯𑀲𑁂𑀦 𑀘 𑀯𑀺𑀪𑀚𑀦𑁆𑀢𑀻𑀢𑀺 𑀯𑀺𑀪𑀢𑁆𑀢𑀺𑀬𑁄, 𑀲𑁆𑀬𑀸𑀤𑀬𑁄. 𑀢𑀸 𑀧𑀦 𑀧𑀞𑀫𑀸𑀤𑀺𑀪𑁂𑀤𑁂𑀦 𑀲𑀢𑁆𑀢𑀯𑀺𑀥𑀸.

𑀢𑀢𑁆𑀣 𑀓𑀲𑁆𑀫𑀺𑀁 𑀅𑀢𑁆𑀣𑁂 𑀧𑀞𑀫𑀸?

𑁨𑁮𑁩. 𑀮𑀺𑀗𑁆𑀕𑀢𑁆𑀣𑁂 𑀧𑀞𑀫𑀸.

𑀮𑀺𑀗𑁆𑀕𑀢𑁆𑀣𑀸𑀪𑀺𑀥𑀸𑀦𑀫𑀢𑁆𑀢𑁂 𑀧𑀞𑀫𑀸𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀮𑀺𑀗𑁆𑀕𑀲𑁆𑀲 𑀅𑀢𑁆𑀣𑁄 𑀮𑀺𑀗𑁆𑀕𑀢𑁆𑀣𑁄. 𑀏𑀢𑁆𑀣 𑀘 𑀮𑀻𑀦𑀁 𑀅𑀗𑁆𑀕𑀦𑁆𑀢𑀺 𑀮𑀺𑀗𑁆𑀕𑀁, 𑀅𑀧𑀸𑀓𑀝𑁄 𑀅𑀯𑀬𑀯𑁄, 𑀧𑀼𑀭𑀺𑀲𑁄𑀢𑀺𑀆𑀤𑀻𑀦𑀜𑁆𑀳𑀺 𑀧𑀓𑀢𑀺𑀧𑁆𑀧𑀘𑁆𑀘𑀬𑀸𑀤𑀺𑀯𑀺𑀪𑀸𑀕𑀓𑀧𑁆𑀧𑀦𑀸𑀬 𑀦𑀺𑀧𑁆𑀨𑀸𑀤𑀺𑀢𑀸𑀦𑀁 𑀲𑀤𑁆𑀤𑀧𑁆𑀧𑀢𑀺𑀭𑀽𑀧𑀓𑀸𑀦𑀁 𑀦𑀸𑀫𑀺𑀓𑀧𑀤𑀸𑀦𑀁 𑀧𑀞𑀫𑀁 𑀞𑀧𑁂𑀢𑀩𑁆𑀩𑀁 𑀧𑀓𑀢𑀺𑀭𑀽𑀧𑀁 𑀅𑀧𑀸𑀓𑀝𑀢𑁆𑀢𑀸, 𑀅𑀯𑀬𑀯𑀢𑁆𑀢𑀸 𑀘 𑀮𑀺𑀗𑁆𑀕𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀯𑀺𑀲𑀤𑀸𑀯𑀺𑀲𑀤𑁄𑀪𑀬𑀭𑀳𑀺𑀢𑀸𑀓𑀸𑀭𑀯𑁄𑀳𑀸𑀭𑀲𑀗𑁆𑀔𑀸𑀢𑁂𑀦 𑀢𑀺𑀯𑀺𑀥𑀮𑀺𑀗𑁆𑀕𑁂𑀦 𑀲𑀳𑀺𑀢𑀢𑁆𑀣𑀲𑁆𑀲, 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲𑀼𑀧𑀲𑀕𑁆𑀕𑀸𑀤𑀻𑀦𑀫𑀢𑁆𑀣𑀲𑁆𑀲 𑀘 𑀮𑀻𑀦𑀲𑁆𑀲 𑀕𑀫𑀦𑀢𑁄, 𑀮𑀺𑀗𑁆𑀕𑀦𑀢𑁄 𑀯𑀸 𑀮𑀺𑀗𑁆𑀕𑀦𑁆𑀢𑀺 𑀅𑀦𑁆𑀯𑀢𑁆𑀣𑀦𑀸𑀫𑀯𑀲𑁂𑀦 𑀯𑀸 ‘‘𑀥𑀸𑀢𑀼𑀧𑁆𑀧𑀘𑁆𑀘𑀬𑀯𑀺𑀪𑀢𑁆𑀢𑀺𑀯𑀚𑁆𑀚𑀺𑀢𑀫𑀢𑁆𑀣𑀯𑀁 𑀮𑀺𑀗𑁆𑀕’’𑀦𑁆𑀢𑀺 𑀯𑀘𑀦𑀢𑁄 𑀧𑀭𑀲𑀫𑀜𑁆𑀜𑀸𑀯𑀲𑁂𑀦 𑀯𑀸 𑀮𑀺𑀗𑁆𑀕𑀦𑁆𑀢𑀺 𑀇𑀥 𑀧𑀸𑀝𑀺𑀧𑀤𑀺𑀓𑀸𑀧𑀭𑀦𑀸𑀫𑀥𑁂𑀬𑁆𑀬𑀁 𑀲𑁆𑀬𑀸𑀤𑀺𑀯𑀺𑀪𑀢𑁆𑀬𑀦𑁆𑀢𑀧𑀤𑀧𑀓𑀢𑀺𑀭𑀽𑀧𑀫𑁂𑀯 𑀯𑀼𑀘𑁆𑀘𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀮𑀺𑀗𑁆𑀕𑀲𑁆𑀲𑀢𑁆𑀣𑁄 𑀦𑀸𑀫 𑀧𑀩𑀦𑁆𑀥𑀯𑀺𑀲𑁂𑀲𑀸𑀓𑀸𑀭𑁂𑀦 𑀧𑀯𑀢𑁆𑀢𑀫𑀸𑀦𑁂 𑀭𑀽𑀧𑀸𑀤𑀬𑁄 𑀉𑀧𑀸𑀤𑀸𑀬 𑀧𑀜𑁆𑀜𑀸𑀧𑀻𑀬𑀫𑀸𑀦𑁄 𑀢𑀤𑀜𑁆𑀜𑀸𑀦𑀜𑁆𑀜𑀪𑀸𑀯𑁂𑀦 𑀅𑀦𑀺𑀩𑁆𑀩𑀘𑀦𑀻𑀬𑁄 𑀲𑀫𑀽𑀳𑀲𑀦𑁆𑀢𑀸𑀦𑀸𑀤𑀺𑀪𑁂𑀤𑁄 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑁄 𑀖𑀝𑀧𑀝𑀸𑀤𑀺𑀯𑁄𑀳𑀸𑀭𑀢𑁆𑀣𑁄 𑀘 𑀧𑀣𑀯𑀻𑀥𑀸𑀢𑀼𑀨𑀲𑁆𑀲𑀸𑀤𑀻𑀦𑀁 𑀲𑀪𑀸𑀯𑀥𑀫𑁆𑀫𑀸𑀦𑀁 ¶ 𑀓𑀸𑀮𑀤𑁂𑀲𑀸𑀤𑀺𑀪𑁂𑀤𑀪𑀺𑀦𑁆𑀦𑀸𑀦𑀁 𑀯𑀺𑀚𑀸𑀢𑀺𑀬𑀯𑀺𑀦𑀺𑀯𑀢𑁆𑀢𑁄 𑀲𑀚𑀸𑀢𑀺𑀬𑀲𑀸𑀥𑀸𑀭𑀡𑁄 𑀬𑀣𑀸𑀲𑀗𑁆𑀓𑁂𑀢𑀫𑀸𑀭𑁄𑀧𑀲𑀺𑀤𑁆𑀥𑁄 𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑁄 𑀓𑀓𑁆𑀔𑀴𑀢𑁆𑀢𑀨𑀼𑀲𑀦𑀸𑀤𑀺𑀲𑀸𑀫𑀜𑁆𑀜𑀸𑀓𑀸𑀭𑁄 𑀘.

𑀲𑁄 𑀧𑀦 𑀓𑀫𑁆𑀫𑀸𑀤𑀺𑀲𑀁𑀲𑀝𑁆𑀞𑁄, 𑀲𑀼𑀤𑁆𑀥𑁄 𑀘𑀸𑀢𑀺 𑀤𑀼𑀯𑀺𑀥𑁄. 𑀢𑀢𑁆𑀣 𑀓𑀫𑁆𑀫𑀸𑀤𑀻𑀲𑀼 𑀤𑀼𑀢𑀺𑀬𑀸𑀤𑀻𑀦𑀁 𑀯𑀺𑀥𑀻𑀬𑀫𑀸𑀦𑀢𑁆𑀢𑀸 𑀓𑀫𑁆𑀫𑀸𑀤𑀺𑀲𑀁𑀲𑀕𑁆𑀕𑀭𑀳𑀺𑀢𑁄 𑀮𑀺𑀗𑁆𑀕𑀲𑀗𑁆𑀔𑁆𑀬𑀸𑀧𑀭𑀺𑀫𑀸𑀡𑀬𑀼𑀢𑁆𑀢𑁄, 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀼𑀧𑀲𑀕𑁆𑀕𑀸𑀤𑀺𑀧𑀤𑀢𑁆𑀣𑀪𑀽𑀢𑁄 𑀘 𑀲𑀼𑀤𑁆𑀥𑁄 𑀲𑀤𑁆𑀤𑀢𑁆𑀣𑁄 𑀇𑀥 𑀮𑀺𑀗𑁆𑀕𑀢𑁆𑀣𑁄 𑀦𑀸𑀫.

𑀬𑁄 𑀧𑀦 𑀆𑀔𑁆𑀬𑀸𑀢𑀓𑀺𑀢𑀓𑀢𑀤𑁆𑀥𑀺𑀢𑀲𑀫𑀸𑀲𑁂𑀳𑀺 𑀯𑀼𑀢𑁆𑀢𑁄 𑀓𑀫𑁆𑀫𑀸𑀤𑀺𑀲𑀁𑀲𑀝𑁆𑀞𑁄 𑀅𑀢𑁆𑀣𑁄, 𑀲𑁄𑀧𑀺 𑀤𑀼𑀢𑀺𑀬𑀸𑀤𑀻𑀦𑀁 𑀧𑀼𑀦 𑀅𑀢𑁆𑀢𑀦𑀸 𑀯𑀢𑁆𑀢𑀩𑁆𑀩𑀲𑁆𑀲 𑀅𑀢𑁆𑀣𑀯𑀺𑀲𑁂𑀲𑀲𑁆𑀲𑀸𑀪𑀸𑀯𑁂𑀦 𑀅𑀯𑀺𑀲𑀬𑀢𑁆𑀢𑀸, 𑀮𑀺𑀗𑁆𑀕𑀢𑁆𑀣𑀫𑀢𑁆𑀢𑀲𑁆𑀲 𑀲𑀫𑁆𑀪𑀯𑀢𑁄 𑀘 𑀧𑀞𑀫𑀸𑀬𑁂𑀯 𑀯𑀺𑀲𑀬𑁄.

𑀳𑁄𑀢𑀺 𑀘𑁂𑀢𑁆𑀣 𑁋

𑀧𑀞𑀫𑀸𑀯𑀼𑀧𑀲𑀕𑁆𑀕𑀢𑁆𑀣𑁂, 𑀓𑁂𑀲𑀜𑁆𑀘𑀢𑁆𑀣𑁂 𑀦𑀺𑀧𑀸𑀢𑀲𑀤𑁆𑀤𑀸𑀦𑀁;

𑀮𑀺𑀗𑁆𑀕𑀸𑀤𑀺𑀓𑁂 𑀘 𑀲𑀼𑀤𑁆𑀥𑁂-𑀪𑀺𑀳𑀺𑀢𑁂 𑀓𑀫𑁆𑀫𑀸𑀤𑀺𑀅𑀢𑁆𑀣𑁂𑀧𑀺.

𑀲𑀮𑀺𑀗𑁆𑀕𑁂 𑀢𑀸𑀯 𑁋 𑀏𑀲𑁄 𑀧𑀼𑀭𑀺𑀲𑁄, 𑀏𑀢𑁂 𑀧𑀼𑀭𑀺𑀲𑀸, 𑀏𑀲𑀸 𑀓𑀜𑁆𑀜𑀸, 𑀏𑀢𑀸 𑀓𑀜𑁆𑀜𑀸𑀬𑁄, 𑀏𑀢𑀁 𑀘𑀺𑀢𑁆𑀢𑀁, 𑀏𑀢𑀸𑀦𑀺 𑀘𑀺𑀢𑁆𑀢𑀸𑀦𑀺.

𑀲𑀲𑀗𑁆𑀔𑁆𑀬𑁂 𑁋 𑀏𑀓𑁄 𑀤𑁆𑀯𑁂.

𑀲𑀧𑀭𑀺𑀫𑀸𑀡𑁂 𑁋 𑀤𑁄𑀡𑁄 𑀔𑀸𑀭𑀻 𑀆𑀴𑁆𑀳𑀓𑀁.

𑀮𑀺𑀗𑁆𑀕𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑁂 𑀲𑀢𑁆𑀢𑀸𑀫𑀢𑁆𑀢𑁂 𑁋 𑀘 𑀯𑀸 𑀳 𑀅𑀳𑀁 𑀅𑀢𑁆𑀣𑀺 𑀲𑀓𑁆𑀓𑀸𑀮𑀩𑁆𑀪𑀸 𑀇𑀘𑁆𑀘𑀸𑀤𑀺.

‘‘𑀮𑀺𑀗𑁆𑀕𑀢𑁆𑀣𑁂 𑀧𑀞𑀫𑀸’’𑀢𑀺 𑀅𑀥𑀺𑀓𑀺𑀘𑁆𑀘 ‘‘𑀆𑀮𑀧𑀦𑁂 𑀘𑀸’’𑀢𑀺 𑀆𑀮𑀧𑀦𑀢𑁆𑀣𑁂 𑀘 𑀧𑀞𑀫𑀸, 𑀅𑀪𑀺𑀫𑀼𑀔𑀁 𑀓𑀢𑁆𑀯𑀸 𑀮𑀧𑀦𑀁 𑀆𑀮𑀧𑀦𑀁, 𑀆𑀫𑀦𑁆𑀢𑀦𑀁 𑀅𑀯𑁆𑀳𑀸𑀦𑀦𑁆𑀢𑀺 𑀅𑀢𑁆𑀣𑁄.

𑀏𑀢𑁆𑀣 𑀘 𑀆𑀫𑀦𑁆𑀢𑀦𑀁 𑀦𑀸𑀫 𑀧𑀕𑁂𑀯 𑀮𑀤𑁆𑀥𑀲𑀭𑀽𑀧𑀲𑁆𑀲 𑀲𑀤𑁆𑀤𑁂𑀦 𑀅𑀪𑀺𑀫𑀼𑀔𑀻𑀓𑀭𑀡𑀁, 𑀓𑀢𑀸𑀪𑀺𑀫𑀼𑀔𑁄 𑀧𑀦 ‘‘𑀕𑀘𑁆𑀙𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑁆𑀭𑀺𑀬𑀸𑀬 ¶ 𑀬𑁄𑀚𑀻𑀬𑀢𑀺, 𑀢𑀲𑁆𑀫𑀸 𑀆𑀫𑀦𑁆𑀢𑀦𑀲𑀫𑀬𑁂 𑀓𑁆𑀭𑀺𑀬𑀸𑀬𑁄𑀕𑀸𑀪𑀸𑀯𑀢𑁄 𑀇𑀤𑀁 𑀓𑀸𑀭𑀓𑀯𑁄𑀳𑀸𑀭𑀁 𑀦 𑀮𑀪𑀢𑀺.

𑀯𑀼𑀢𑁆𑀢𑀜𑁆𑀘

‘‘𑀲𑀤𑁆𑀤𑁂𑀦𑀸𑀪𑀺𑀫𑀼𑀔𑀻𑀓𑀸𑀭𑁄, 𑀯𑀺𑀚𑁆𑀚𑀫𑀸𑀦𑀲𑁆𑀲 𑀯𑀢𑁆𑀣𑀼𑀦𑁄;

𑀆𑀫𑀦𑁆𑀢𑀦𑀁 𑀯𑀺𑀥𑀸𑀢𑀩𑁆𑀩𑁂, 𑀦𑀢𑁆𑀣𑀺 ‘𑀭𑀸𑀚𑀸 𑀪𑀯𑁂’𑀢𑀺𑀤’’𑀦𑁆𑀢𑀺.

𑀪𑁄 𑀧𑀼𑀭𑀺𑀲 𑀏𑀳𑀺, 𑀪𑁄 𑀧𑀼𑀭𑀺𑀲𑀸 𑀯𑀸, 𑀪𑀯𑀦𑁆𑀢𑁄 𑀧𑀼𑀭𑀺𑀲𑀸 𑀏𑀣.

𑀓𑀲𑁆𑀫𑀺𑀁 𑀅𑀢𑁆𑀣𑁂 𑀤𑀼𑀢𑀺𑀬𑀸?

𑁨𑁮𑁪. 𑀓𑀫𑁆𑀫𑀢𑁆𑀣𑁂 𑀤𑀼𑀢𑀺𑀬𑀸.

𑀓𑀫𑁆𑀫𑀢𑁆𑀣𑁂 𑀮𑀺𑀗𑁆𑀕𑀫𑁆𑀳𑀸 𑀤𑀼𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀅𑀦𑀪𑀺𑀳𑀺𑀢𑁂 𑀏𑀯𑀸𑀬𑀁, ‘‘𑀓𑀫𑁆𑀫𑀦𑀺 𑀤𑀼𑀢𑀺𑀬𑀸𑀬𑀁 𑀢𑁆𑀢𑁄’’𑀢𑀺 𑀯𑀘𑀦𑀜𑁆𑀘𑁂𑀢𑁆𑀣 𑀜𑀸𑀧𑀓𑀁.

𑀓𑀺𑀁 𑀓𑀫𑁆𑀫𑀁?

‘‘𑀬𑁂𑀦 𑀯𑀸 𑀓𑀬𑀺𑀭𑀢𑁂 𑀢𑀁 𑀓𑀭𑀡’’𑀦𑁆𑀢𑀺 𑀇𑀢𑁄 ‘‘𑀯𑀸’’𑀢𑀺 𑀯𑀢𑁆𑀢𑀢𑁂.

𑁨𑁮𑁫. 𑀬𑀁 𑀓𑀭𑁄𑀢𑀺 𑀢𑀁 𑀓𑀫𑁆𑀫𑀁.

𑀬𑀁 𑀯𑀸 𑀓𑀭𑁄𑀢𑀺, 𑀬𑀁 𑀯𑀸 𑀯𑀺𑀓𑀭𑁄𑀢𑀺, 𑀬𑀁 𑀯𑀸 𑀧𑀸𑀧𑀼𑀡𑀸𑀢𑀺, 𑀢𑀁 𑀓𑀸𑀭𑀓𑀁 𑀓𑀫𑁆𑀫𑀲𑀜𑁆𑀜𑀁 𑀳𑁄𑀢𑀺.

𑀇𑀥 𑀮𑀺𑀗𑁆𑀕𑀓𑀸𑀮𑀯𑀘𑀦𑀫𑀢𑀦𑁆𑀢𑀁. 𑀓𑀭𑀻𑀬𑀢𑀻𑀢𑀺 𑀓𑀫𑁆𑀫𑀁. 𑀢𑀢𑁆𑀣 𑀓𑀸𑀭𑀓𑀁, 𑀲𑀸𑀥𑀓𑀁 𑀓𑁆𑀭𑀺𑀬𑀸𑀦𑀺𑀧𑁆𑀨𑀢𑁆𑀢𑀺𑀬𑀸 𑀓𑀸𑀭𑀡𑀫𑀼𑀘𑁆𑀘𑀢𑁂, 𑀢𑀁 𑀧𑀦 𑀓𑀸𑀭𑀓𑀁 𑀙𑀩𑁆𑀩𑀺𑀥𑀁 𑀓𑀫𑁆𑀫𑀁 𑀓𑀢𑁆𑀢𑀸 𑀓𑀭𑀡𑀁 𑀲𑀫𑁆𑀧𑀤𑀸𑀦𑀫𑀧𑀸𑀤𑀸𑀦𑀫𑁄𑀓𑀸𑀲𑁄 𑀘𑀸𑀢𑀺. 𑀢𑀢𑁆𑀣 𑀲𑀪𑀸𑀯𑀢𑁄, 𑀧𑀭𑀺𑀓𑀧𑁆𑀧𑀢𑁄 𑀯𑀸 𑀓𑀫𑁆𑀫𑀸𑀤𑀺𑀫𑁆𑀳𑀺 𑀲𑀢𑀺𑀬𑁂𑀯 𑀓𑁆𑀭𑀺𑀬𑀸𑀪𑀸𑀯𑀢𑁄 𑀓𑀫𑁆𑀫𑀸𑀤𑀻𑀦𑀁 𑀙𑀦𑁆𑀦𑀫𑁆𑀧𑀺 𑀓𑀸𑀭𑀓𑀯𑁄𑀳𑀸𑀭𑁄 𑀲𑀺𑀤𑁆𑀥𑁄𑀯 𑀳𑁄𑀢𑀺.

𑀢𑀁 ¶ 𑀧𑀦 𑀓𑀫𑁆𑀫𑀁 𑀢𑀺𑀯𑀺𑀥𑀁 𑀦𑀺𑀩𑁆𑀩𑀢𑁆𑀢𑀦𑀻𑀬𑀁 𑀯𑀺𑀓𑀭𑀡𑀻𑀬𑀁 𑀧𑀸𑀧𑀡𑀻𑀬𑀜𑁆𑀘𑀸𑀢𑀺. 𑀬𑀣𑀸 𑁋 𑀫𑀸𑀢𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀢𑀺, 𑀆𑀳𑀸𑀭𑁄 𑀲𑀼𑀔𑀁 𑀚𑀦𑀬𑀢𑀺. 𑀖𑀝𑀁 𑀓𑀭𑁄𑀢𑀺 𑀤𑁂𑀯𑀤𑀢𑁆𑀢𑁄, 𑀓𑀝𑁆𑀞𑀫𑀗𑁆𑀕𑀸𑀭𑀁 𑀓𑀭𑁄𑀢𑀺, 𑀲𑀼𑀯𑀡𑁆𑀡𑀁 𑀓𑁂𑀬𑀽𑀭𑀁, 𑀓𑀝𑀓𑀁 𑀯𑀸 𑀓𑀭𑁄𑀢𑀺, 𑀯𑀻𑀳𑀬𑁄 𑀮𑀼𑀦𑀸𑀢𑀺. 𑀤𑁂𑀯𑀤𑀢𑁆𑀢𑁄 𑀦𑀺𑀯𑁂𑀲𑀦𑀁 𑀧𑀯𑀺𑀲𑀢𑀺, 𑀆𑀤𑀺𑀘𑁆𑀘𑀁 𑀧𑀲𑁆𑀲𑀢𑀺, 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀧𑀡𑁆𑀟𑀺𑀢𑁂 𑀧𑀬𑀺𑀭𑀼𑀧𑀸𑀲𑀢𑀺.

𑀯𑀼𑀢𑁆𑀢𑀜𑁆𑀘

‘‘𑀦𑀺𑀩𑁆𑀩𑀢𑁆𑀢𑀺𑀯𑀺𑀓𑀢𑀺𑀧𑁆𑀧𑀢𑁆𑀢𑀺-𑀪𑁂𑀤𑁂𑀦 𑀢𑀺𑀯𑀺𑀥𑀁 𑀫𑀢𑀁;

𑀓𑀢𑁆𑀢𑀼 𑀓𑁆𑀭𑀺𑀬𑀸𑀪𑀺𑀕𑀫𑁆𑀫𑀁 𑀢𑀁, 𑀲𑀼𑀔𑀗𑁆𑀕𑀸𑀭𑀁 𑀦𑀺𑀯𑁂𑀲𑀦’’𑀦𑁆𑀢𑀺.

𑀏𑀢𑁆𑀣 𑀘 𑀇𑀘𑁆𑀙𑀺𑀢𑀸𑀦𑀺𑀘𑁆𑀙𑀺𑀢𑀓𑀣𑀺𑀢𑀸𑀓𑀣𑀺𑀢𑀸𑀤𑀺𑀪𑁂𑀤𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 ‘‘𑀬𑀁 𑀓𑀭𑁄𑀢𑀺 𑀢𑀁 𑀓𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀅𑀢𑁆𑀣𑀦𑁆𑀢𑀭𑀯𑀺𑀓𑀧𑁆𑀧𑀦𑀯𑀸𑀥𑀺𑀓𑀸𑀭𑀢𑁄 𑀘 𑀲𑀩𑁆𑀩𑀢𑁆𑀣 𑀇𑀫𑀺𑀦𑀸𑀯 𑀓𑀫𑁆𑀫𑀲𑀜𑁆𑀜𑀸 𑀳𑁄𑀢𑀺.

𑀢𑀢𑁆𑀣 𑀅𑀦𑀺𑀘𑁆𑀙𑀺𑀢𑀓𑀫𑁆𑀫𑀁 𑀬𑀣𑀸 𑁋 𑀓𑀡𑁆𑀝𑀓𑀁 𑀫𑀤𑁆𑀤𑀢𑀺, 𑀯𑀺𑀲𑀁 𑀕𑀺𑀮𑀢𑀺, 𑀕𑀸𑀫𑀁 𑀕𑀘𑁆𑀙𑀦𑁆𑀢𑁄 𑀭𑀼𑀓𑁆𑀔𑀫𑀽𑀮𑀁 𑀉𑀧𑀕𑀘𑁆𑀙𑀢𑀺.

𑀅𑀓𑀣𑀺𑀢𑀓𑀫𑁆𑀫𑀁 𑀬𑀣𑀸 𑁋 𑀬𑀜𑁆𑀜𑀤𑀢𑁆𑀢𑀁 𑀓𑀫𑁆𑀩𑀮𑀁 𑀬𑀸𑀘𑀢𑁂 𑀩𑁆𑀭𑀸𑀳𑁆𑀫𑀡𑁄. 𑀏𑀢𑁆𑀣 𑀳𑀺 ‘‘𑀓𑀫𑁆𑀩𑀮’’𑀫𑀺𑀢𑀺 𑀓𑀣𑀺𑀢𑀓𑀫𑁆𑀫𑀁 𑀤𑁆𑀯𑀺𑀓𑀫𑁆𑀫𑀺𑀓𑀸𑀬 𑀬𑀸𑀘𑀦𑀓𑁆𑀭𑀺𑀬𑀸𑀬 𑀧𑀢𑁆𑀢𑀼𑀫𑀺𑀘𑁆𑀙𑀺𑀢𑀢𑀭𑀢𑁆𑀢𑀸. ‘‘𑀬𑀜𑁆𑀜𑀤𑀢𑁆𑀢’’𑀫𑀺𑀢𑀺 𑀅𑀧𑁆𑀧𑀥𑀸𑀦𑀢𑁆𑀢𑀸 𑀅𑀓𑀣𑀺𑀢𑀓𑀫𑁆𑀫𑀁. 𑀢𑀣𑀸 𑀲𑀫𑀺𑀤𑁆𑀥𑀁 𑀥𑀦𑀁 𑀪𑀺𑀓𑁆𑀔𑀢𑁂, 𑀅𑀚𑀁 𑀕𑀸𑀫𑀁 𑀦𑀬𑀢𑀺, 𑀧𑀭𑀸𑀪𑀯𑀦𑁆𑀢𑀁 𑀧𑀼𑀭𑀺𑀲𑀁, 𑀫𑀬𑀁 𑀧𑀼𑀘𑁆𑀙𑀸𑀫 𑀕𑁄𑀢𑀫𑀁, 𑀪𑀕𑀯𑀸 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑀇𑀘𑁆𑀘𑀸𑀤𑀺.

𑀅𑀪𑀺𑀳𑀺𑀢𑀓𑀫𑁆𑀫𑁂 𑀧𑀦 𑀦 𑀳𑁄𑀢𑀺, 𑀬𑀣𑀸 𑁋 𑀓𑀝𑁄 𑀓𑀭𑀻𑀬𑀢𑁂 𑀤𑁂𑀯𑀤𑀢𑁆𑀢𑁂𑀦, 𑀲𑀼𑀕𑀢𑁂𑀦 𑀤𑁂𑀲𑀺𑀢𑁄 𑀥𑀫𑁆𑀫𑁄, 𑀬𑀜𑁆𑀜𑀤𑀢𑁆𑀢𑁄 𑀓𑀫𑁆𑀩𑀮𑀁 𑀬𑀸𑀘𑀻𑀬𑀢𑁂 𑀩𑁆𑀭𑀸𑀳𑁆𑀫𑀡𑁂𑀦 𑀇𑀘𑁆𑀘𑀸𑀤𑀺.

‘‘𑀤𑀼𑀢𑀺𑀬𑀸’’𑀢𑀺 𑀅𑀥𑀺𑀓𑀸𑀭𑁄.

𑁨𑁮𑁬. 𑀕𑀢𑀺 ¶ 𑀩𑀼𑀤𑁆𑀥𑀺 𑀪𑀼𑀚 𑀧𑀞 𑀳𑀭 𑀓𑀭 𑀲𑀬𑀸𑀤𑀻𑀦𑀁 𑀓𑀸𑀭𑀺𑀢𑁂 𑀯𑀸.

𑀕𑀫𑀼 𑀲𑀧𑁆𑀧 𑀕𑀢𑀺𑀫𑁆𑀳𑀺, 𑀩𑀼𑀥 𑀩𑁄𑀥𑀦𑁂, 𑀩𑀼𑀥 𑀅𑀯𑀕𑀫𑀦𑁂 𑀯𑀸, 𑀪𑀼𑀚 𑀧𑀸𑀮𑀦𑀩𑁆𑀬𑀯𑀳𑀭𑀡𑁂𑀲𑀼, 𑀧𑀞 𑀩𑁆𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁, 𑀳𑀭 𑀳𑀭𑀡𑁂, 𑀓𑀭 𑀓𑀭𑀡𑁂, 𑀲𑀺 𑀲𑀬𑁂 𑀇𑀘𑁆𑀘𑁂𑀯𑀫𑀸𑀤𑀻𑀦𑀁 𑀥𑀸𑀢𑀽𑀦𑀁 𑀧𑀬𑁄𑀕𑁂 𑀓𑀸𑀭𑀺𑀢𑁂 𑀲𑀢𑀺 𑀧𑀬𑁄𑀚𑁆𑀚𑀓𑀓𑀢𑁆𑀢𑀼𑀪𑀽𑀢𑁂 𑀓𑀫𑁆𑀫𑀦𑀺 𑀮𑀺𑀗𑁆𑀕𑀫𑁆𑀳𑀸 𑀤𑀼𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺 𑀯𑀸. 𑀦𑀺𑀘𑁆𑀘𑀲𑀫𑁆𑀧𑀢𑁆𑀢𑁂 𑀯𑀺𑀓𑀧𑁆𑀧𑀢𑁆𑀣𑁄𑀬𑀁, 𑀢𑁂𑀦 𑀢𑀲𑁆𑀲 𑀧𑀓𑁆𑀔𑁂 𑀢𑀢𑀺𑀬𑀸 𑀳𑁄𑀢𑀺.

𑀬𑁄 𑀓𑁄𑀘𑀺 𑀧𑀼𑀭𑀺𑀲𑁄 𑀕𑀸𑀫𑀁 𑀕𑀘𑁆𑀙𑀢𑀺, 𑀢𑀫𑀜𑁆𑀜𑁄 𑀧𑀬𑁄𑀚𑀬𑀢𑀺. 𑀧𑀼𑀭𑀺𑀲𑁄 𑀧𑀼𑀭𑀺𑀲𑀁 𑀕𑀸𑀫𑀁 𑀕𑀫𑀬𑀢𑀺, 𑀧𑀼𑀭𑀺𑀲𑁂𑀦 𑀯𑀸 𑀕𑀸𑀫𑀁 𑀕𑀫𑀬𑀢𑀺. 𑀏𑀯𑀁 𑀲𑀺𑀲𑁆𑀲𑀁 𑀥𑀫𑁆𑀫𑀁 𑀩𑁄𑀥𑁂𑀢𑀺 𑀆𑀘𑀭𑀺𑀬𑁄, 𑀫𑀸𑀢𑀸 𑀧𑀼𑀢𑁆𑀢𑀁 𑀪𑁄𑀚𑀦𑀁 𑀪𑁄𑀚𑀬𑀢𑀺, 𑀲𑀺𑀲𑁆𑀲𑀁 𑀥𑀫𑁆𑀫𑀁 𑀧𑀸𑀞𑁂𑀢𑀺 𑀆𑀘𑀭𑀺𑀬𑁄, 𑀧𑀼𑀭𑀺𑀲𑁄 𑀧𑀼𑀭𑀺𑀲𑀁 𑀪𑀸𑀭𑀁 𑀳𑀸𑀭𑁂𑀢𑀺, 𑀢𑀣𑀸 𑀧𑀼𑀭𑀺𑀲𑁄 𑀧𑀼𑀭𑀺𑀲𑀁 𑀓𑀫𑁆𑀫𑀁 𑀓𑀸𑀭𑀬𑀢𑀺, 𑀧𑀼𑀭𑀺𑀲𑁂𑀦 𑀯𑀸 𑀓𑀫𑁆𑀫𑀁 𑀓𑀸𑀭𑀸𑀧𑀬𑀢𑀺, 𑀧𑀼𑀭𑀺𑀲𑁄 𑀧𑀼𑀭𑀺𑀲𑀁 𑀲𑀬𑀸𑀧𑀬𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣 𑀓𑀸𑀭𑀺𑀢𑁂 𑀓𑀢𑁆𑀢𑀼𑀓𑀫𑁆𑀫𑀦𑀺 𑀤𑀼𑀢𑀺𑀬𑀸.

𑀓𑀸𑀭𑀺𑀢𑁂𑀢𑀺 𑀓𑀺𑀁? 𑀧𑀼𑀭𑀺𑀲𑁄 𑀕𑀸𑀫𑀁 𑀕𑀘𑁆𑀙𑀢𑀺.

𑀅𑀪𑀺𑀳𑀺𑀢𑁂 𑀦 𑀪𑀯𑀢𑀺, 𑀧𑀼𑀭𑀺𑀲𑁂𑀦 𑀧𑀼𑀭𑀺𑀲𑁄 𑀕𑀸𑀫𑀁 𑀕𑀫𑀻𑀬𑀢𑁂, 𑀲𑀺𑀲𑁆𑀲𑁄 𑀥𑀫𑁆𑀫𑀁 𑀩𑁄𑀥𑀻𑀬𑀢𑁂 𑀇𑀘𑁆𑀘𑀸𑀤𑀺.

𑁨𑁮𑁭. 𑀓𑀸𑀮𑀤𑁆𑀥𑀸𑀦𑀫𑀘𑁆𑀘𑀦𑁆𑀢𑀲𑀁𑀬𑁄𑀕𑁂.

𑀅𑀘𑁆𑀘𑀦𑁆𑀢𑀁 𑀦𑀺𑀭𑀦𑁆𑀢𑀭𑀁 𑀲𑀁𑀬𑁄𑀕𑁄𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁄. 𑀓𑀸𑀮𑀤𑁆𑀥𑀸𑀦𑀁 𑀤𑀩𑁆𑀩𑀕𑀼𑀡𑀓𑁆𑀭𑀺𑀬𑀸𑀳𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀢𑁂𑀳𑀺 𑀓𑀸𑀮𑀤𑁆𑀥𑀸𑀦𑀯𑀸𑀘𑀻𑀳𑀺 𑀮𑀺𑀗𑁆𑀕𑁂𑀳𑀺 𑀤𑀼𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀓𑀸𑀮𑁂 𑀢𑀸𑀯 𑁋 𑀲𑀢𑁆𑀢𑀸𑀳𑀁 𑀕𑀯𑀧𑀸𑀦𑀁, 𑀫𑀸𑀲𑀁 𑀫𑀁𑀲𑁄𑀤𑀦𑀁, 𑀲𑀭𑀤𑀁 𑀭𑀫𑀡𑀻𑀬𑀸 𑀦𑀤𑀻, 𑀲𑀩𑁆𑀩𑀓𑀸𑀮𑀁 𑀭𑀫𑀡𑀻𑀬𑀁 𑀦𑀦𑁆𑀤𑀦𑀁, 𑀫𑀸𑀲𑀁 𑀲𑀚𑁆𑀛𑀸𑀬𑀢𑀺, 𑀢𑀬𑁄 𑀫𑀸𑀲𑁂 𑀅𑀪𑀺𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀅𑀤𑁆𑀥𑀸𑀦𑁂 ¶ 𑁋 𑀬𑁄𑀚𑀦𑀁 𑀯𑀦𑀭𑀸𑀚𑀺, 𑀬𑁄𑀚𑀦𑀁 𑀤𑀻𑀖𑁄 𑀧𑀩𑁆𑀩𑀢𑁄, 𑀓𑁄𑀲𑀁 𑀲𑀚𑁆𑀛𑀸𑀬𑀢𑀺.

𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂𑀢𑀺 𑀓𑀺𑀁? 𑀫𑀸𑀲𑁂 𑀫𑀸𑀲𑁂 𑀪𑀼𑀜𑁆𑀚𑀢𑀺, 𑀬𑁄𑀚𑀦𑁂 𑀬𑁄𑀚𑀦𑁂 𑀯𑀺𑀳𑀸𑀭𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑁨𑁮𑁮. 𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑀬𑀼𑀢𑁆𑀢𑁂.

𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑁂𑀳𑀺 𑀦𑀺𑀧𑀸𑀢𑁄𑀧𑀲𑀕𑁆𑀕𑁂𑀳𑀺 𑀬𑀼𑀢𑁆𑀢𑁂 𑀬𑁄𑀕𑁂 𑀲𑀢𑀺 𑀮𑀺𑀗𑁆𑀕𑀫𑁆𑀳𑀸 𑀤𑀼𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀓𑀫𑁆𑀫𑀁 𑀧𑀯𑀘𑀦𑀻𑀬𑀁 𑀬𑁂𑀲𑀁 𑀢𑁂 𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑀸, 𑀧𑀭𑀲𑀫𑀜𑁆𑀜𑀸𑀯𑀲𑁂𑀦 𑀯𑀸 𑀅𑀦𑁆𑀯𑀸𑀤𑀬𑁄 𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑀸.

𑀢𑀢𑁆𑀣 𑀅𑀦𑀼𑀲𑀤𑁆𑀤𑀲𑁆𑀲 𑀮𑀓𑁆𑀔𑀡𑁂, 𑀲𑀳𑀢𑁆𑀣𑁂, 𑀳𑀻𑀦𑁂 𑀘 𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑀲𑀜𑁆𑀜𑀸 𑀯𑀼𑀢𑁆𑀢𑀸. 𑀬𑀣𑀸 𑁋 𑀧𑀩𑁆𑀩𑀚𑀺𑀢𑀫𑀦𑀼 𑀧𑀩𑁆𑀩𑀚𑀺𑀁𑀲𑀼, 𑀦𑀤𑀺𑀫𑀦𑁆𑀯𑀯𑀲𑀺𑀢𑀸 𑀩𑀸𑀭𑀸𑀡𑀲𑀻, 𑀦𑀤𑀺𑀬𑀸 𑀲𑀳 𑀅𑀯𑀩𑀤𑁆𑀥𑀸𑀢𑀺 𑀅𑀢𑁆𑀣𑁄, 𑀅𑀦𑀼 𑀲𑀸𑀭𑀺𑀧𑀼𑀢𑁆𑀢𑀁 𑀧𑀜𑁆𑀜𑀯𑀸.

𑀮𑀓𑁆𑀔𑀡𑀸𑀤𑀻𑀲𑀼 ‘‘𑀮𑀓𑁆𑀔𑀡𑀺’𑀢𑁆𑀣𑀫𑁆𑀪𑀽𑀢𑀓𑁆𑀔𑀸𑀦𑀪𑀸𑀕 𑀯𑀺𑀘𑁆𑀙𑀸𑀲𑀼 𑀧𑀢𑀺 𑀧𑀭𑀺 𑀅𑀦𑀯𑁄’’𑀢𑀺 𑀧𑀢𑀺 𑀧𑀭𑀺 𑀅𑀦𑀽𑀦𑀁 𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑀲𑀜𑁆𑀜𑀸 𑀯𑀼𑀢𑁆𑀢𑀸.

𑀮𑀓𑁆𑀔𑀡𑁂 𑀲𑀽𑀭𑀺𑀬𑀼𑀕𑁆𑀕𑀫𑀦𑀁 𑀧𑀢𑀺 𑀤𑀺𑀩𑁆𑀩𑀸 𑀪𑀓𑁆𑀔𑀸 𑀧𑀸𑀢𑀼𑀪𑀯𑁂𑀬𑁆𑀬𑀼𑀁, 𑀭𑀼𑀓𑁆𑀔𑀁 𑀧𑀢𑀺 𑀯𑀺𑀚𑁆𑀚𑁄𑀢𑀢𑁂 𑀘𑀦𑁆𑀤𑁄, 𑀭𑀼𑀓𑁆𑀔𑀁 𑀧𑀭𑀺, 𑀭𑀼𑀓𑁆𑀔𑀁 𑀅𑀦𑀼.

𑀇𑀢𑁆𑀣𑀫𑁆𑀪𑀽𑀢𑀓𑁆𑀔𑀸𑀦𑁂 𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀁 𑀧𑀢𑀺, 𑀫𑀸𑀢𑀭𑀁 𑀧𑀭𑀺, 𑀫𑀸𑀢𑀭𑀁 𑀅𑀦𑀼.

𑀪𑀸𑀕𑁂 𑀬𑀤𑁂𑀢𑁆𑀣 𑀫𑀁 𑀧𑀢𑀺 𑀲𑀺𑀬𑀸, 𑀫𑀁 𑀧𑀭𑀺, 𑀫𑀁 𑀅𑀦𑀼, 𑀢𑀁 𑀤𑀻𑀬𑀢𑀼.

𑀯𑀺𑀘𑁆𑀙𑀸𑀬𑁄𑀕𑁂 ¶ 𑀅𑀢𑁆𑀣𑀫𑀢𑁆𑀣𑀁 𑀧𑀢𑀺 𑀲𑀤𑁆𑀤𑁄 𑀦𑀺𑀯𑀺𑀲𑀢𑀺, 𑀭𑀼𑀓𑁆𑀔𑀁 𑀭𑀼𑀓𑁆𑀔𑀁 𑀧𑀢𑀺 𑀯𑀺𑀚𑁆𑀚𑁄𑀢𑀢𑁂 𑀘𑀦𑁆𑀤𑁄, 𑀭𑀼𑀓𑁆𑀔𑀁 𑀭𑀼𑀓𑁆𑀔𑀁 𑀧𑀭𑀺, 𑀭𑀼𑀓𑁆𑀔𑀁 𑀭𑀼𑀓𑁆𑀔𑀁 𑀅𑀦𑀼.

‘‘𑀅𑀪𑀺𑀭𑀪𑀸𑀕𑁂’’𑀢𑀺 𑀅𑀪𑀺𑀲𑁆𑀲 𑀪𑀸𑀕𑀯𑀚𑁆𑀚𑀺𑀢𑁂𑀲𑀼 𑀮𑀓𑁆𑀔𑀡𑀸𑀤𑀻𑀲𑀼 𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑀲𑀜𑁆𑀜𑀸 𑀯𑀼𑀢𑁆𑀢𑀸. 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄, 𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀁 𑀅𑀪𑀺.

𑀦𑀺𑀧𑀸𑀢𑁂 𑀥𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀳𑀦𑁆𑀢𑀸𑀭 𑀫𑀺𑀘𑁆𑀘𑁂𑀯𑀫𑀸𑀤𑀺.

𑁨𑁮𑁯. 𑀓𑁆𑀯𑀘𑀺 𑀤𑀼𑀢𑀺𑀬𑀸 𑀙𑀝𑁆𑀞𑀻𑀦𑀫𑀢𑁆𑀣𑁂.

𑀙𑀝𑁆𑀞𑀻𑀦𑀁 𑀅𑀢𑁆𑀣𑁂 𑀓𑁆𑀯𑀘𑀺 𑀤𑀼𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀅𑀦𑁆𑀢𑀭𑀸𑀅𑀪𑀺𑀢𑁄 𑀧𑀭𑀺𑀢𑁄 𑀧𑀢𑀺 𑀧𑀝𑀺𑀪𑀸𑀢𑀺𑀬𑁄𑀕𑁂 𑀅𑀬𑀁. 𑀅𑀦𑁆𑀢𑀭𑀸 𑀘 𑀭𑀸𑀚𑀕𑀳𑀁 𑀅𑀦𑁆𑀢𑀭𑀸 𑀘 𑀦𑀸𑀴𑀦𑁆𑀤𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄, 𑀭𑀸𑀚𑀕𑀳𑀲𑁆𑀲 𑀘 𑀦𑀸𑀴𑀦𑁆𑀤𑀸𑀬 𑀘 𑀫𑀚𑁆𑀛𑁂𑀢𑀺 𑀅𑀢𑁆𑀣𑁄. 𑀅𑀪𑀺𑀢𑁄 𑀕𑀸𑀫𑀁 𑀯𑀲𑀢𑀺, 𑀧𑀭𑀺𑀢𑁄 𑀕𑀸𑀫𑀁 𑀯𑀲𑀢𑀺, 𑀦𑀤𑀺𑀁 𑀦𑁂𑀭𑀜𑁆𑀚𑀭𑀁 𑀧𑀢𑀺, 𑀦𑁂𑀭𑀜𑁆𑀚𑀭𑀸𑀬 𑀦𑀤𑀺𑀬𑀸 𑀲𑀫𑀻𑀧𑁂𑀢𑀺 𑀅𑀢𑁆𑀣𑁄. 𑀧𑀝𑀺𑀪𑀦𑁆𑀢𑀼 𑀢𑀁 𑀘𑀼𑀦𑁆𑀤 𑀩𑁄𑀚𑁆𑀛𑀗𑁆𑀕𑀸, 𑀉𑀧𑀫𑀸 𑀫𑀁 𑀧𑀝𑀺𑀪𑀸𑀢𑀺, 𑀉𑀧𑀫𑀸 𑀫𑀬𑁆𑀳𑀁 𑀉𑀧𑀝𑁆𑀞𑀳𑀢𑀻𑀢𑀺 𑀅𑀢𑁆𑀣𑁄.

‘‘𑀓𑁆𑀯𑀘𑀺 𑀤𑀼𑀢𑀺𑀬𑀸, 𑀅𑀢𑁆𑀣𑁂’’𑀢𑀺 𑀘 𑀯𑀢𑁆𑀢𑀢𑁂.

𑁨𑁯𑁦. 𑀢𑀢𑀺𑀬𑀸𑀲𑀢𑁆𑀢𑀫𑀻𑀦𑀜𑁆𑀘.

𑀢𑀢𑀺𑀬𑀸𑀲𑀢𑁆𑀢𑀫𑀻𑀦𑀫𑀢𑁆𑀣𑁂 𑀘 𑀓𑁆𑀯𑀘𑀺 𑀮𑀺𑀗𑁆𑀕𑀫𑁆𑀳𑀸 𑀤𑀼𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀢𑀢𑀺𑀬𑀢𑁆𑀣𑁂 𑀲𑀘𑁂 𑀫𑀁 𑀦𑀸𑀮𑀧𑀺𑀲𑁆𑀲𑀢𑀺, 𑀢𑁆𑀯𑀜𑁆𑀘 𑀫𑀁 𑀦𑀸𑀪𑀺𑀪𑀸𑀲𑀲𑀺, 𑀯𑀺𑀦𑀸 𑀲𑀤𑁆𑀥𑀫𑁆𑀫𑀁 𑀓𑀼𑀢𑁄 𑀲𑀼𑀔𑀁, 𑀉𑀧𑀸𑀬𑀫𑀦𑁆𑀢𑀭𑁂𑀦 𑀦 𑀅𑀢𑁆𑀣𑀲𑀺𑀤𑁆𑀥𑀺.

𑀲𑀢𑁆𑀢𑀫𑀺𑀬𑀢𑁆𑀣𑁂 ¶ 𑁋 𑀓𑀸𑀮𑁂, 𑀉𑀧𑀸𑀦𑁆𑀯𑀚𑁆𑀛𑀸𑀯𑀲𑀲𑁆𑀲 𑀧𑀬𑁄𑀕𑁂, 𑀅𑀥𑀺𑀲𑀺𑀝𑁆𑀞𑀸𑀯𑀲𑀸𑀦𑀁 𑀧𑀬𑁄𑀕𑁂, 𑀢𑀧𑁆𑀧𑀸𑀦𑀘𑀸𑀭𑁂 𑀘 𑀤𑀼𑀢𑀺𑀬𑀸.

𑀓𑀸𑀮𑁂 𑀢𑀸𑀯 𑁋 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸, 𑀏𑀓𑀁 𑀲𑀫𑀬𑀁 𑀪𑀕𑀯𑀸. 𑀇𑀫𑀁 𑀭𑀢𑁆𑀢𑀺𑀁 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄.

𑀉𑀧𑀸𑀤𑀺𑀧𑀼𑀩𑁆𑀩𑀲𑁆𑀲 𑀯𑀲𑀥𑀸𑀢𑀼𑀲𑁆𑀲 𑀧𑀬𑁄𑀕𑁂 𑁋 𑀕𑀸𑀫𑀁 𑀉𑀧𑀯𑀲𑀢𑀺, 𑀕𑀸𑀫𑀁 𑀅𑀦𑀼𑀯𑀲𑀢𑀺, 𑀯𑀺𑀳𑀸𑀭𑀁 𑀅𑀥𑀺𑀯𑀲𑀢𑀺, 𑀕𑀸𑀫𑀁 𑀆𑀯𑀲𑀢𑀺, 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺. 𑀢𑀣𑀸 𑀧𑀣𑀯𑀺𑀁 𑀅𑀥𑀺𑀲𑁂𑀲𑁆𑀲𑀢𑀺, 𑀕𑀸𑀫𑀁 𑀅𑀥𑀺𑀢𑀺𑀝𑁆𑀞𑀢𑀺, 𑀕𑀸𑀫𑀁 𑀅𑀚𑁆𑀛𑀸𑀯𑀲𑀢𑀺.

𑀢𑀧𑁆𑀧𑀸𑀦𑀘𑀸𑀭𑁂𑀲𑀼 𑁋 𑀦𑀤𑀺𑀁 𑀧𑀺𑀯𑀢𑀺, 𑀕𑀸𑀫𑀁 𑀘𑀭𑀢𑀺 𑀇𑀘𑁆𑀘𑀸𑀤𑀺.

𑀓𑀲𑁆𑀫𑀺𑀁 𑀅𑀢𑁆𑀣𑁂 𑀢𑀢𑀺𑀬𑀸?

𑁨𑁯𑁧. 𑀓𑀭𑀡𑁂 𑀢𑀢𑀺𑀬𑀸.

𑀓𑀭𑀡𑀓𑀸𑀭𑀓𑁂 𑀢𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀓𑀺𑀁 𑀓𑀭𑀡𑀁?

𑁨𑁯𑁨. 𑀬𑁂𑀦 𑀯𑀸 𑀓𑀬𑀺𑀭𑀢𑁂 𑀢𑀁 𑀓𑀭𑀡𑀁.

𑀬𑁂𑀦 𑀯𑀸 𑀓𑀢𑁆𑀢𑀸 𑀉𑀧𑀓𑀭𑀡𑀪𑀽𑀢𑁂𑀦 𑀯𑀢𑁆𑀣𑀼𑀦𑀸 𑀓𑁆𑀭𑀺𑀬𑀁 𑀅𑀩𑁆𑀬𑀯𑀥𑀸𑀦𑁂𑀦 𑀓𑀭𑁄𑀢𑀺, 𑀬𑁂𑀦 𑀯𑀸 𑀯𑀺𑀓𑀭𑁄𑀢𑀺, 𑀬𑁂𑀦 𑀯𑀸 𑀧𑀸𑀧𑀼𑀡𑀸𑀢𑀺, 𑀢𑀁 𑀓𑀸𑀭𑀓𑀁 𑀓𑀭𑀡𑀲𑀜𑁆𑀜𑀁 𑀳𑁄𑀢𑀺.

𑀓𑀭𑀻𑀬𑀢𑁂 𑀅𑀦𑁂𑀦𑀸𑀢𑀺 𑀓𑀭𑀡𑀁, 𑀏𑀢𑁆𑀣 𑀘 𑀲𑀢𑀺𑀧𑀺 𑀲𑀩𑁆𑀩𑀓𑀸𑀭𑀓𑀸𑀦𑀁 𑀓𑁆𑀭𑀺𑀬𑀸𑀲𑀸𑀥𑀓𑀢𑁆𑀢𑁂 ‘‘𑀬𑁂𑀦 𑀯𑀸 𑀓𑀬𑀺𑀭𑀢𑁂’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀘𑀦𑀁 𑀓𑀢𑁆𑀢𑀽𑀧𑀓𑀭𑀡𑀪𑀽𑀢𑁂𑀲𑀼 𑀓𑀸𑀭𑀓𑁂𑀲𑀼 𑀲𑀸𑀥𑀓𑀢𑀫𑀲𑁆𑀲𑁂𑀯 𑀕𑀳𑀡𑀢𑁆𑀣𑀁.

𑀯𑀼𑀢𑁆𑀢𑀜𑁆𑀘 ¶

‘‘𑀬𑀲𑁆𑀲 𑀲𑀩𑁆𑀩𑀯𑀺𑀲𑁂𑀲𑁂𑀦, 𑀓𑁆𑀭𑀺𑀬𑀸𑀲𑀁𑀲𑀺𑀤𑁆𑀥𑀺𑀳𑁂𑀢𑀼𑀢𑀸;

𑀲𑀫𑁆𑀪𑀸𑀯𑀻𑀬𑀢𑀺 𑀢𑀁 𑀯𑀼𑀢𑁆𑀢𑀁, 𑀓𑀭𑀡𑀁 𑀦𑀸𑀫 𑀓𑀸𑀭𑀓’’𑀦𑁆𑀢𑀺.

𑀢𑀁 𑀧𑀦 𑀤𑀼𑀯𑀺𑀥𑀁 𑀅𑀚𑁆𑀛𑀢𑁆𑀢𑀺𑀓 𑀩𑀸𑀳𑀺𑀭𑀯𑀲𑁂𑀦.

𑀬𑀣𑀸 𑁋 𑀳𑀢𑁆𑀣𑁂𑀦 𑀓𑀫𑁆𑀫𑀁 𑀓𑀭𑁄𑀢𑀺, 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺, 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬. 𑀤𑀢𑁆𑀢𑁂𑀦 𑀯𑀻𑀳𑀬𑁄 𑀮𑀼𑀦𑀸𑀢𑀺, 𑀅𑀕𑁆𑀕𑀺𑀦𑀸 𑀓𑀼𑀝𑀺𑀁 𑀛𑀸𑀧𑁂𑀢𑀺.

‘‘𑀢𑀢𑀺𑀬𑀸’’𑀢𑀺 𑀅𑀥𑀺𑀓𑀸𑀭𑁄.

𑁨𑁯𑁩. 𑀓𑀢𑁆𑀢𑀭𑀺 𑀘.

𑀓𑀢𑁆𑀢𑀭𑀺 𑀘 𑀓𑀸𑀭𑀓𑁂 𑀮𑀺𑀗𑁆𑀕𑀫𑁆𑀳𑀸 𑀢𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀘𑀕𑁆𑀕𑀳𑀡𑁂𑀦 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂, 𑀓𑁆𑀭𑀺𑀬𑀸𑀧𑀯𑀕𑁆𑀕𑁂, 𑀧𑀼𑀩𑁆𑀩𑀲𑀤𑀺𑀲𑀲𑀫𑀽𑀦𑀢𑁆𑀣 𑀓𑀮𑀳 𑀦𑀺𑀧𑀼𑀡 𑀫𑀺𑀲𑁆𑀲𑀓 𑀲𑀔𑀺𑀮𑀢𑁆𑀣𑀸𑀤𑀺𑀬𑁄𑀕𑁂, 𑀓𑀸𑀮𑀤𑁆𑀥𑀸𑀦𑁂𑀲𑀼, 𑀧𑀘𑁆𑀘𑀢𑁆𑀢𑀓𑀫𑁆𑀫𑀢𑁆𑀣𑀧𑀜𑁆𑀘𑀫𑀺𑀬𑀢𑁆𑀣𑀸𑀤𑀻𑀲𑀼 𑀘 𑀢𑀢𑀺𑀬𑀸.

𑀓𑁄 𑀘 𑀓𑀢𑁆𑀢𑀸?

𑁨𑁯𑁪. 𑀬𑁄 𑀓𑀭𑁄𑀢𑀺 𑀲 𑀓𑀢𑁆𑀢𑀸.

𑀬𑁄 𑀓𑁆𑀭𑀺𑀬𑀁 𑀅𑀢𑁆𑀢𑀧𑁆𑀧𑀥𑀸𑀦𑁄 𑀳𑀼𑀢𑁆𑀯𑀸 𑀓𑀭𑁄𑀢𑀺, 𑀲𑁄 𑀓𑀢𑁆𑀢𑀼𑀲𑀜𑁆𑀜𑁄 𑀳𑁄𑀢𑀺.

𑀲𑁄 𑀢𑀺𑀯𑀺𑀥𑁄 𑀲𑀼𑀤𑁆𑀥𑀓𑀢𑁆𑀢𑀸 𑀳𑁂𑀢𑀼𑀓𑀢𑁆𑀢𑀸 𑀓𑀫𑁆𑀫𑀓𑀢𑁆𑀢𑀸𑀢𑀺. 𑀢𑀢𑁆𑀣 𑀬𑁄 𑀲𑀬𑀫𑁂𑀯 𑀓𑁆𑀭𑀺𑀬𑀁 𑀓𑀭𑁄𑀢𑀺, 𑀲𑁄 𑀲𑀼𑀤𑁆𑀥𑀓𑀢𑁆𑀢𑀸. 𑀬𑁄 𑀅𑀜𑁆𑀜𑀁 𑀓𑀸𑀢𑀼𑀁 𑀲𑀫𑀢𑁆𑀣𑀁 𑀅𑀓𑀭𑁄𑀦𑁆𑀢𑀁 𑀓𑀫𑁆𑀫𑀁 𑀦𑀺𑀬𑁄𑀚𑁂𑀢𑀺, 𑀲𑁄 𑀳𑁂𑀢𑀼𑀓𑀢𑁆𑀢𑀸, 𑀬𑀣𑀸 𑁋 𑀕𑀦𑁆𑀢𑀼𑀁 𑀲𑀫𑀢𑁆𑀣𑁄 𑀤𑁂𑀯𑀤𑀢𑁆𑀢𑁄, 𑀢𑀫𑀜𑁆𑀜𑁄 𑀧𑀬𑁄𑀚𑁂𑀢𑀺 ‘‘𑀕𑀫𑀬𑀢𑀺 𑀤𑁂𑀯𑀤𑀢𑁆𑀢’’𑀦𑁆𑀢𑀺.

𑀬𑀁 𑀧𑀦 𑀢𑀢𑁆𑀣 𑀢𑀢𑁆𑀣 𑀕𑀘𑁆𑀙𑀢𑀺 𑀤𑁂𑀯𑀤𑀢𑁆𑀢𑁄, 𑀢𑀫𑀜𑁆𑀜𑁄 𑀧𑀬𑁄𑀚𑀬𑀢𑀺 ‘‘𑀕𑀫𑀬𑀢𑀺 𑀤𑁂𑀯𑀤𑀢𑁆𑀢’’𑀦𑁆𑀢𑀺 𑀳𑁂𑀢𑁆𑀯𑀢𑁆𑀣𑀦𑀺𑀤𑀲𑁆𑀲𑀦𑀁, 𑀢𑀫𑁆𑀧𑀺 𑀲𑀸𑀫𑀢𑁆𑀣𑀺𑀬𑀤𑀲𑁆𑀲𑀦𑀯𑀲𑁂𑀦 ¶ 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀬𑀤𑀺 𑀲𑀬𑀫𑁂𑀯 𑀕𑀘𑁆𑀙𑀢𑀺, 𑀓𑀺𑀁 𑀢𑀢𑁆𑀣 𑀧𑀬𑁄𑀚𑀓𑀩𑁆𑀬𑀸𑀧𑀸𑀭𑁂𑀦 𑀅𑀓𑀭𑁄𑀦𑁆𑀢𑀁 𑀩𑀮𑁂𑀦 𑀓𑀸𑀭𑀬𑀢𑀺, 𑀧𑀸𑀲𑀸𑀡𑀁 𑀉𑀝𑁆𑀞𑀸𑀧𑀬𑀢𑀻𑀢𑀺𑀆𑀤𑀺𑀓𑀜𑁆𑀘 𑀦 𑀲𑀺𑀚𑁆𑀛𑁂𑀬𑁆𑀬.

𑀏𑀢𑁆𑀣 𑀧𑀦

‘‘𑀓𑀢𑁆𑀢𑀸’’𑀢𑀺 𑀯𑀢𑁆𑀢𑀢𑁂.

𑁨𑁯𑁩. 𑀬𑁄 𑀓𑀸𑀭𑁂𑀢𑀺 𑀲 𑀳𑁂𑀢𑀼.

𑀬𑁄 𑀓𑀢𑁆𑀢𑀸𑀭𑀁 𑀓𑀸𑀭𑁂𑀢𑀺, 𑀲𑁄 𑀳𑁂𑀢𑀼𑀲𑀜𑁆𑀜𑁄 𑀳𑁄𑀢𑀺, 𑀓𑀢𑁆𑀢𑀸 𑀘𑀸𑀢𑀺 𑀳𑁂𑀢𑀼𑀓𑀢𑁆𑀢𑀼𑀲𑀜𑁆𑀜𑀸.

𑀬𑁄 𑀧𑀦 𑀧𑀭𑀲𑁆𑀲 𑀓𑁆𑀭𑀺𑀬𑀁 𑀧𑀝𑀺𑀘𑁆𑀘 𑀓𑀫𑁆𑀫𑀪𑀽𑀢𑁄𑀧𑀺 𑀲𑀼𑀓𑀭𑀢𑁆𑀢𑀸 𑀲𑀬𑀫𑁂𑀯 𑀲𑀺𑀚𑁆𑀛𑀦𑁆𑀢𑁄 𑀯𑀺𑀬 𑀳𑁄𑀢𑀺, 𑀲𑁄 𑀓𑀫𑁆𑀫𑀓𑀢𑁆𑀢𑀸 𑀦𑀸𑀫, 𑀬𑀣𑀸 𑁋 𑀲𑀬𑀁 𑀓𑀭𑀻𑀬𑀢𑁂 𑀓𑀝𑁄, 𑀲𑀬𑀫𑁂𑀯 𑀧𑀘𑁆𑀘𑀢𑁂 𑀑𑀤𑀦𑁄𑀢𑀺.

𑀯𑀼𑀢𑁆𑀢𑀜𑁆𑀘

‘‘𑀅𑀢𑁆𑀢𑀧𑁆𑀧𑀥𑀸𑀦𑁄 𑀓𑀺𑀭𑀺𑀬𑀁, 𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑀺 𑀓𑀸𑀭𑀓𑁄;

𑀅𑀧𑁆𑀧𑀬𑀼𑀢𑁆𑀢𑁄 𑀧𑀬𑀼𑀢𑁆𑀢𑁄 𑀯𑀸, 𑀲 𑀓𑀢𑁆𑀢𑀸𑀢𑀺 𑀧𑀯𑀼𑀘𑁆𑀘𑀢𑀺.

𑀳𑁂𑀢𑀼𑀓𑀢𑁆𑀢𑀸𑀢𑀺 𑀓𑀣𑀺𑀢𑁄,

𑀓𑀢𑁆𑀢𑀼𑀦𑁄 𑀬𑁄 𑀧𑀬𑁄𑀚𑀓𑁄;

𑀓𑀫𑁆𑀫𑀓𑀢𑁆𑀢𑀸𑀢𑀺 𑀲𑀼𑀓𑀭𑁄,

𑀓𑀫𑁆𑀫𑀪𑀽𑀢𑁄 𑀓𑀣𑀻𑀬𑀢𑁂’’𑀢𑀺.

𑀦𑀦𑀼 𑀘 ‘‘𑀲𑀁𑀬𑁄𑀕𑁄 𑀚𑀸𑀬𑀢𑁂’’𑀢𑀺𑀆𑀤𑀻𑀲𑀼 𑀓𑀣𑀁 𑀧𑀼𑀭𑁂 𑀅𑀲𑀢𑁄 𑀚𑀦𑀦𑀓𑁆𑀭𑀺𑀬𑀸𑀬 𑀓𑀢𑁆𑀢𑀼𑀪𑀸𑀯𑁄𑀲𑀺𑀬𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀮𑁄𑀓𑀲𑀗𑁆𑀓𑁂𑀢𑀲𑀺𑀤𑁆𑀥𑁄 𑀳𑀺 𑀲𑀤𑁆𑀤𑀧𑁆𑀧𑀬𑁄𑀕𑁄, 𑀅𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀳𑀺 𑀮𑁄𑀓𑁄 𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀢𑀸𑀬 𑀯𑀺𑀚𑁆𑀚𑀫𑀸𑀦𑀁 𑀯𑀺𑀬 𑀕𑀳𑁂𑀢𑁆𑀯𑀸 𑀯𑁄𑀳𑀭𑀢𑀺 ¶ , 𑀯𑀺𑀓𑀧𑁆𑀧𑀩𑀼𑀤𑁆𑀥𑀺𑀕𑀳𑀺𑀢𑀸𑀓𑀸𑀭𑁄𑀬𑁂𑀯 𑀳𑀺 𑀲𑀤𑁆𑀤𑁂𑀦𑀸𑀪𑀺𑀥𑀻𑀬𑀢𑁂, 𑀦 𑀢𑀼 𑀯𑀢𑁆𑀣𑀼𑀲𑀪𑀸𑀯𑁄, 𑀅𑀜𑁆𑀜𑀣𑀸 𑀲𑀼𑀢𑀫𑀬𑀜𑀸𑀡𑁂𑀦𑀧𑀺 𑀧𑀘𑁆𑀘𑀓𑁆𑀔𑁂𑀦 𑀯𑀺𑀬 𑀯𑀢𑁆𑀣𑀼𑀲𑀪𑀸𑀯𑀲𑀘𑁆𑀙𑀺𑀓𑀭𑀡𑀧𑁆𑀧𑀲𑀗𑁆𑀕𑁄 𑀘 𑀫𑀼𑀲𑀸𑀯𑀸𑀤 𑀓𑀼𑀤𑀺𑀝𑁆𑀞𑀺𑀯𑀸𑀤𑀸𑀤𑀻𑀦𑀫𑀪𑀸𑀯𑀧𑁆𑀧𑀲𑀗𑁆𑀕𑁄 𑀘 𑀲𑀺𑀬𑀸, 𑀢𑀲𑁆𑀫𑀸 𑀩𑀼𑀤𑁆𑀥𑀺𑀧𑀭𑀺𑀓𑀧𑁆𑀧𑀺𑀢𑀧𑀜𑁆𑀜𑀢𑁆𑀢𑀺𑀯𑀲𑁂𑀦𑀧𑀺 𑀲𑀤𑁆𑀤𑀧𑁆𑀧𑀯𑀢𑁆𑀢𑀺 𑀳𑁄𑀢𑀻𑀢𑀺 𑀅𑀲𑀢𑁄 𑀲𑀁𑀬𑁄𑀕𑀸𑀤𑀺𑀲𑁆𑀲𑀧𑀺 𑀳𑁄𑀢𑁂𑀯 𑀚𑀦𑀦𑀓𑁆𑀭𑀺𑀬𑀸𑀬 𑀓𑀢𑁆𑀢𑀼𑀓𑀸𑀭𑀓𑀢𑀸𑀢𑀺.

𑀬𑀣𑀸𑀳

‘‘𑀯𑁄𑀳𑀸𑀭𑀯𑀺𑀲𑀬𑁄 𑀲𑀤𑁆𑀤𑁄, 𑀦𑁂𑀓𑀦𑁆𑀢𑀧𑀭𑀫𑀢𑁆𑀣𑀺𑀓𑁄;

𑀩𑀼𑀤𑁆𑀥𑀺𑀲𑀗𑁆𑀓𑀧𑁆𑀧𑀺𑀢𑁄 𑀅𑀢𑁆𑀣𑁄, 𑀢𑀲𑁆𑀲𑀢𑁆𑀣𑁄𑀢𑀺 𑀧𑀯𑀼𑀘𑁆𑀘𑀢𑀺.

𑀩𑀼𑀤𑁆𑀥𑀺𑀬𑀸 𑀕𑀳𑀺𑀢𑀢𑁆𑀢𑀸 𑀳𑀺, 𑀲𑀁𑀬𑁄𑀕𑁄 𑀚𑀸𑀬𑀢𑁂 𑀇𑀢𑀺;

𑀲𑀁𑀬𑁄𑀕𑁄 𑀯𑀺𑀚𑁆𑀚𑀫𑀸𑀦𑁄𑀯, 𑀓𑀢𑁆𑀢𑀸 𑀪𑀯𑀢𑀺 𑀚𑀸𑀢𑀺𑀬𑀸’’𑀢𑀺.

𑀢𑀢𑁆𑀭 𑀢𑀢𑀺𑀬𑀸 𑀚𑀺𑀦𑁂𑀦 𑀤𑁂𑀲𑀺𑀢𑁄 𑀥𑀫𑁆𑀫𑁄, 𑀩𑀼𑀤𑁆𑀥𑁂𑀦 𑀚𑀺𑀢𑁄 𑀫𑀸𑀭𑁄, 𑀅𑀳𑀺𑀦𑀸 𑀤𑀝𑁆𑀞𑁄 𑀦𑀭𑁄, 𑀩𑀼𑀤𑁆𑀥𑁂𑀦 𑀩𑁄𑀥𑀺𑀢𑁄 𑀮𑁄𑀓𑁄, 𑀲𑀤𑁆𑀥𑁂𑀳𑀺 𑀓𑀸𑀭𑀺𑀢𑁄 𑀯𑀺𑀳𑀸𑀭𑁄.

𑀅𑀪𑀺𑀳𑀺𑀢𑁂 𑀦 𑀪𑀯𑀢𑀺. 𑀓𑀝𑀁 𑀓𑀭𑁄𑀢𑀺 𑀤𑁂𑀯𑀤𑀢𑁆𑀢𑁄, 𑀓𑀸𑀭𑁂𑀢𑀺 𑀯𑀸.

𑀇𑀢𑁆𑀣𑀫𑁆𑀪𑀽𑀢𑀲𑁆𑀲 𑀮𑀓𑁆𑀔𑀡𑁂 𑁋 𑀲𑀸 𑀪𑀺𑀦𑁆𑀦𑁂𑀦 𑀲𑀻𑀲𑁂𑀦 𑀧𑀕𑁆𑀖𑀭𑀦𑁆𑀢𑁂𑀦 𑀮𑁄𑀳𑀺𑀢𑁂𑀦 𑀧𑀝𑀺𑀯𑀺𑀲𑁆𑀲𑀓𑀸𑀦𑀁 𑀉𑀚𑁆𑀛𑀸𑀧𑁂𑀲𑀺, 𑀊𑀦𑀧𑀜𑁆𑀘𑀩𑀦𑁆𑀥𑀦𑁂𑀦 𑀧𑀢𑁆𑀢𑁂𑀦 𑀅𑀜𑁆𑀜𑀁 𑀦𑀯𑀁 𑀧𑀢𑁆𑀢𑀁 𑀘𑁂𑀢𑀸𑀧𑁂𑀬𑁆𑀬, 𑀢𑀺𑀤𑀡𑁆𑀟𑀓𑁂𑀦 𑀧𑀭𑀺𑀩𑁆𑀩𑀸𑀚𑀓𑀫𑀤𑁆𑀤𑀓𑁆𑀔𑀺.

𑀅𑀧𑀯𑀕𑁆𑀕𑁂 𑁋 𑀏𑀓𑀸𑀳𑁂𑀦𑁂𑀯 𑀩𑀸𑀭𑀸𑀡𑀲𑀺𑀁 𑀧𑀸𑀬𑀸𑀲𑀺, 𑀦𑀯𑀳𑀺 𑀫𑀸𑀲𑁂𑀳𑀺 𑀯𑀺𑀳𑀸𑀭𑀁 𑀦𑀺𑀝𑁆𑀞𑀸𑀧𑁂𑀲𑀺, 𑀬𑁄𑀚𑀦𑁂𑀦 𑀅𑀥𑀻𑀢𑀁 𑀩𑁆𑀬𑀸𑀓𑀭𑀡𑀁, 𑀓𑁆𑀭𑀺𑀬𑀸𑀧𑀯𑀕𑁆𑀕𑁄𑀢𑀺 𑀓𑁆𑀭𑀺𑀬𑀸𑀬 𑀆𑀲𑀼𑀁 𑀧𑀭𑀺𑀦𑀺𑀝𑁆𑀞𑀸𑀧𑀦𑀁.

𑀧𑀼𑀩𑁆𑀩𑀸𑀤𑀺𑀬𑁄𑀕𑁂 ¶ 𑁋 𑀫𑀸𑀲𑁂𑀦 𑀧𑀼𑀩𑁆𑀩𑁄, 𑀧𑀺𑀢𑀭𑀸 𑀲𑀤𑀺𑀲𑁄, 𑀫𑀸𑀢𑀭𑀸 𑀲𑀫𑁄, 𑀓𑀳𑀸𑀧𑀡𑁂𑀦 𑀊𑀦𑁄, 𑀥𑀦𑁂𑀦 𑀯𑀺𑀓𑀮𑁄, 𑀅𑀲𑀺𑀦𑀸 𑀓𑀮𑀳𑁄, 𑀆𑀘𑀸𑀭𑁂𑀦 𑀦𑀺𑀧𑀼𑀡𑁄, 𑀯𑀸𑀘𑀸𑀬 𑀦𑀺𑀧𑀼𑀡𑁄, 𑀕𑀼𑀴𑁂𑀦 𑀫𑀺𑀲𑁆𑀲𑀓𑀁, 𑀢𑀺𑀮𑁂𑀦 𑀫𑀺𑀲𑁆𑀲𑀓𑀁, 𑀯𑀸𑀘𑀸𑀬 𑀲𑀔𑀺𑀮𑁄, 𑀫𑀡𑀺𑀦𑀸 𑀅𑀢𑁆𑀣𑁄, 𑀥𑀦𑁂𑀦 𑀅𑀢𑁆𑀣𑁄, 𑀧𑀺𑀢𑀭𑀸 𑀢𑀼𑀮𑁆𑀬𑁄.

𑀓𑀸𑀮𑀤𑁆𑀥𑀸𑀦𑁂𑀲𑀼 𑁋 𑀫𑀸𑀲𑁂𑀦 𑀪𑀼𑀜𑁆𑀚𑀢𑀺, 𑀬𑁄𑀚𑀦𑁂𑀦 𑀕𑀘𑁆𑀙𑀢𑀺.

𑀧𑀘𑁆𑀘𑀢𑁆𑀢𑁂 𑁋 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑁆𑀦𑀢𑀺.

𑀓𑀫𑁆𑀫𑀢𑁆𑀣𑁂 𑁋 𑀢𑀺𑀮𑁂𑀳𑀺 𑀔𑁂𑀢𑁆𑀢𑁂 𑀯𑀧𑀢𑀺.

𑀧𑀜𑁆𑀘𑀫𑀺𑀬𑀢𑁆𑀣𑁂 𑁋 𑀲𑀼𑀫𑀼𑀢𑁆𑀢𑀸 𑀫𑀬𑀁 𑀢𑁂𑀦 𑀫𑀳𑀸𑀲𑀫𑀡𑁂𑀦.

𑁨𑁯𑁬. 𑀲𑀳𑀸𑀤𑀺𑀬𑁄𑀕𑁂 𑀘.

𑀲𑀳 𑀲𑀤𑁆𑀥𑀺𑀁 𑀲𑀫𑀁 𑀦𑀸𑀦𑀸 𑀯𑀺𑀦𑀸 𑀅𑀮𑀁 𑀓𑀺𑀫𑀺𑀘𑁆𑀘𑁂𑀯𑀫𑀸𑀤𑀻𑀳𑀺 𑀬𑁄𑀕𑁂 𑀮𑀺𑀗𑁆𑀕𑀫𑁆𑀳𑀸 𑀢𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺, 𑀘𑀲𑀤𑁆𑀤𑁂𑀦 𑀲𑀳𑀢𑁆𑀣𑁂𑀧𑀺.

𑀢𑀢𑁆𑀣 𑀲𑀳𑀲𑀤𑁆𑀤𑁂𑀦 𑀬𑁄𑀕𑁄 𑀓𑁆𑀭𑀺𑀬𑀸 𑀕𑀼𑀡 𑀤𑀩𑁆𑀩 𑀲𑀫𑀯𑀸𑀬𑁂 𑀲𑀫𑁆𑀪𑀯𑀢𑀺. 𑀬𑀣𑀸 𑁋 𑀯𑀺𑀢𑀓𑁆𑀓𑁂𑀦 𑀲𑀳 𑀯𑀢𑁆𑀢𑀢𑀺, 𑀧𑀼𑀢𑁆𑀢𑁂𑀦 𑀲𑀳 𑀣𑀽𑀮𑁄, 𑀅𑀦𑁆𑀢𑁂𑀯𑀸𑀲𑀺𑀓𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁂𑀳𑀺 𑀲𑀳 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀮𑀸𑀪𑁄, 𑀦𑀺𑀲𑀻𑀤𑀺 𑀪𑀕𑀯𑀸 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦, 𑀲𑀳𑀲𑁆𑀲𑁂𑀦 𑀲𑀫𑀁 𑀫𑀺𑀢𑀸, 𑀲𑀩𑁆𑀩𑁂𑀳𑀺 𑀫𑁂 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄, 𑀲𑀗𑁆𑀖𑁄 𑀯𑀺𑀦𑀸𑀧𑀺 𑀕𑀕𑁆𑀕𑁂𑀦 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬, 𑀅𑀮𑀁 𑀢𑁂 𑀇𑀥 𑀯𑀸𑀲𑁂𑀦, 𑀓𑀺𑀁 𑀫𑁂 𑀏𑀓𑁂𑀦 𑀢𑀺𑀡𑁆𑀡𑁂𑀦, 𑀧𑀼𑀭𑀺𑀲𑁂𑀦 𑀣𑀸𑀫𑀤𑀲𑁆𑀲𑀺𑀦𑀸, 𑀓𑀺𑀁 𑀢𑁂 𑀚𑀝𑀸𑀳𑀺 𑀤𑀼𑀫𑁆𑀫𑁂𑀥, 𑀓𑀺𑀁 𑀢𑁂 𑀅𑀚𑀺𑀦𑀲𑀸𑀝𑀺𑀬𑀸.

𑀲𑀳𑀢𑁆𑀣𑁂 ¶ 𑁋 𑀤𑁂𑀯𑀤𑀢𑁆𑀢𑁄 𑀭𑀸𑀚𑀕𑀳𑀁 𑀧𑀸𑀯𑀺𑀲𑀺 𑀓𑁄𑀓𑀸𑀮𑀺𑀓𑁂𑀦 𑀧𑀘𑁆𑀙𑀸𑀲𑀫𑀡𑁂𑀦, 𑀤𑀼𑀓𑁆𑀔𑁄 𑀩𑀸𑀮𑁂𑀳𑀺 𑀲𑀁𑀯𑀸𑀲𑁄.

𑁨𑁯𑁭. 𑀳𑁂𑀢𑁆𑀯𑀢𑁆𑀣𑁂 𑀘.

𑀬𑁄𑀕𑀕𑁆𑀕𑀳𑀡𑀫𑀺𑀳𑀸𑀦𑀼𑀯𑀢𑁆𑀢𑀢𑁂, 𑀳𑁂𑀢𑁆𑀯𑀢𑁆𑀣𑁂, 𑀳𑁂𑀢𑁆𑀯𑀢𑁆𑀣𑀧𑁆𑀧𑀬𑁄𑀕𑁂 𑀘 𑀮𑀺𑀗𑁆𑀕𑀫𑁆𑀳𑀸 𑀢𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀓𑀺𑀲𑁆𑀫𑀺𑀜𑁆𑀘𑀺 𑀨𑀮𑁂 𑀤𑀺𑀝𑁆𑀞𑀲𑀸𑀫𑀢𑁆𑀣𑀺𑀬𑀁 𑀓𑀸𑀭𑀡𑀁 𑀳𑁂𑀢𑀼, 𑀲𑁄𑀬𑁂𑀯 𑀅𑀢𑁆𑀣𑁄, 𑀢𑀲𑁆𑀫𑀺𑀁 𑀳𑁂𑀢𑁆𑀯𑀢𑁆𑀣𑁂, 𑀅𑀦𑁆𑀦𑁂𑀦 𑀯𑀲𑀢𑀺, 𑀥𑀫𑁆𑀫𑁂𑀦 𑀯𑀲𑀢𑀺, 𑀯𑀺𑀚𑁆𑀚𑀸𑀬 𑀯𑀲𑀢𑀺.

𑀦 𑀚𑀘𑁆𑀘𑀸𑀯𑀲𑀮𑁄 𑀳𑁄𑀢𑀺,

𑀦 𑀚𑀘𑁆𑀘𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄;

𑀓𑀫𑁆𑀫𑀼𑀦𑀸 𑀯𑀲𑀮𑁄 𑀳𑁄𑀢𑀺,

𑀓𑀫𑁆𑀫𑀼𑀦𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄.

𑀤𑀸𑀦𑁂𑀦 𑀪𑁄𑀕𑀯𑀸, 𑀆𑀘𑀸𑀭𑁂𑀦 𑀓𑀼𑀮𑀻.

𑀓𑁂𑀦 𑀧𑀸𑀡𑀺 𑀓𑀸𑀫𑀤𑀤𑁄, 𑀓𑁂𑀦 𑀧𑀸𑀡𑀺 𑀫𑀥𑀼𑀲𑁆𑀲𑀯𑁄;

𑀓𑁂𑀦 𑀢𑁂 𑀩𑁆𑀭𑀳𑁆𑀫𑀘𑀭𑀺𑀬𑁂𑀦, 𑀧𑀼𑀜𑁆𑀜𑀁 𑀧𑀸𑀡𑀺𑀫𑁆𑀳𑀺 𑀇𑀚𑁆𑀛𑀢𑀺.

𑀳𑁂𑀢𑁆𑀯𑀢𑁆𑀣𑀧𑁆𑀧𑀬𑁄𑀕𑁂 𑁋 𑀓𑁂𑀦 𑀦𑀺𑀫𑀺𑀢𑁆𑀢𑁂𑀦, 𑀓𑁂𑀦 𑀧𑀬𑁄𑀚𑀦𑁂𑀦, 𑀓𑁂𑀦𑀝𑁆𑀞𑁂𑀦, 𑀓𑁂𑀦 𑀳𑁂𑀢𑀼𑀦𑀸 𑀯𑀲𑀢𑀺.

𑁨𑁯𑁮. 𑀲𑀢𑁆𑀢𑀫𑁆𑀬𑀢𑁆𑀣𑁂 𑀘.

𑀲𑀢𑁆𑀢𑀫𑁆𑀬𑀢𑁆𑀣𑁂 𑀘 𑀮𑀺𑀗𑁆𑀕𑀫𑁆𑀳𑀸 𑀢𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀓𑀸𑀮𑀤𑁆𑀥𑀸𑀦𑀤𑀺𑀲𑀸𑀤𑁂𑀲𑀸𑀤𑀻𑀲𑀼 𑀘𑀸𑀬𑀁. 𑀢𑁂𑀦 𑀲𑀫𑀬𑁂𑀦, 𑀢𑁂𑀦 𑀓𑀸𑀮𑁂𑀦, 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀡𑀁, 𑀲𑁄 𑀯𑁄 𑀫𑀫𑀘𑁆𑀘𑀬𑁂𑀦 𑀲𑀢𑁆𑀣𑀸, 𑀫𑀸𑀲𑁂𑀦 𑀪𑀼𑀜𑁆𑀚𑀢𑀺, 𑀬𑁄𑀚𑀦𑁂𑀦 𑀥𑀸𑀯𑀢𑀺. 𑀧𑀼𑀭𑀢𑁆𑀣𑀺𑀫𑁂𑀦 𑀥𑀢𑀭𑀝𑁆𑀞𑁄, 𑀤𑀓𑁆𑀔𑀺𑀡𑁂𑀦 𑀯𑀺𑀭𑀽𑀴𑁆𑀳𑀓𑁄, 𑀧𑀘𑁆𑀙𑀺𑀫𑁂𑀦 𑀯𑀺𑀭𑀽𑀧𑀓𑁆𑀔𑁄, 𑀉𑀢𑁆𑀢𑀭𑁂𑀦 ¶ 𑀓𑀲𑀺𑀯𑀦𑁆𑀢𑁄 𑀚𑀦𑁄𑀖𑀫𑀧𑀭𑁂𑀦 𑀘, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺 𑀇𑀘𑁆𑀘𑀸𑀤𑀺.

𑁨𑁯𑁯. 𑀬𑁂𑀦𑀗𑁆𑀕𑀯𑀺𑀓𑀸𑀭𑁄.

𑀬𑁂𑀦 𑀩𑁆𑀬𑀸𑀥𑀺𑀫𑀢𑀸 𑀅𑀗𑁆𑀕𑁂𑀦 𑀅𑀗𑁆𑀕𑀺𑀦𑁄 𑀯𑀺𑀓𑀸𑀭𑁄 𑀮𑀓𑁆𑀔𑀻𑀬𑀢𑁂, 𑀢𑀢𑁆𑀣 𑀢𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀏𑀢𑁆𑀣 𑀘 𑀅𑀗𑁆𑀕𑀫𑀲𑁆𑀲 𑀅𑀢𑁆𑀣𑀻𑀢𑀺 𑀅𑀗𑁆𑀕𑀁, 𑀲𑀭𑀻𑀭𑀁. 𑀅𑀓𑁆𑀔𑀺𑀦𑀸 𑀓𑀸𑀡𑁄, 𑀳𑀢𑁆𑀣𑁂𑀦 𑀓𑀼𑀡𑀻, 𑀧𑀸𑀤𑁂𑀦 𑀔𑀜𑁆𑀚𑁄, 𑀧𑀺𑀝𑁆𑀞𑀺𑀬𑀸 𑀔𑀼𑀚𑁆𑀚𑁄.

𑁩𑁦𑁦. 𑀯𑀺𑀲𑁂𑀲𑀦𑁂 𑀘.

𑀯𑀺𑀲𑁂𑀲𑀻𑀬𑀢𑀺 𑀯𑀺𑀲𑁂𑀲𑀺𑀢𑀩𑁆𑀩𑀁 𑀅𑀦𑁂𑀦𑀸𑀢𑀺 𑀯𑀺𑀲𑁂𑀲𑀦𑀁, 𑀕𑁄𑀢𑁆𑀢𑀸𑀤𑀺. 𑀢𑀲𑁆𑀫𑀺𑀁 𑀕𑁄𑀢𑁆𑀢𑀦𑀸𑀫𑀚𑀸𑀢𑀺𑀲𑀺𑀧𑁆𑀧𑀯𑀬𑁄𑀕𑀼𑀡𑀲𑀗𑁆𑀔𑀸𑀢𑁂 𑀯𑀺𑀲𑁂𑀲𑀦𑀢𑁆𑀣𑁂 𑀢𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺, 𑀘𑀲𑀤𑁆𑀤𑁂𑀦 𑀧𑀓𑀢𑀺𑀆𑀤𑀻𑀳𑀺 𑀘. 𑀕𑁄𑀢𑁆𑀢𑁂𑀦 𑀕𑁄𑀢𑀫𑁄 𑀦𑀸𑀣𑁄.

𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀦𑀸𑀫𑁂𑀦, 𑀯𑀺𑀲𑁆𑀲𑀼𑀢𑁄 𑀧𑀜𑁆𑀜𑀯𑀸 𑀘 𑀲𑁄;

𑀚𑀸𑀢𑀺𑀬𑀸 𑀔𑀢𑁆𑀢𑀺𑀬𑁄 𑀩𑀼𑀤𑁆𑀥𑁄, 𑀮𑁄𑀓𑁂 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄.

𑀢𑀤𑀳𑀼 𑀧𑀩𑁆𑀩𑀚𑀺𑀢𑁄 𑀲𑀦𑁆𑀢𑁄, 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑀺𑀓𑁄;

𑀲𑁄𑀧𑀺 𑀫𑀁 𑀅𑀦𑀼𑀲𑀸𑀲𑁂𑀬𑁆𑀬, 𑀲𑀫𑁆𑀧𑀝𑀺𑀘𑁆𑀙𑀸𑀫𑀺 𑀫𑀢𑁆𑀣𑀓𑁂.

𑀲𑀺𑀧𑁆𑀧𑁂𑀦 𑀦𑀴𑀓𑀸𑀭𑁄 𑀲𑁄, 𑀏𑀓𑀽𑀦𑀢𑀺𑀁𑀲𑁄 𑀯𑀬𑀲𑀸, 𑀯𑀺𑀚𑁆𑀚𑀸𑀬 𑀲𑀸𑀥𑀼, 𑀧𑀜𑁆𑀜𑀸𑀬 𑀲𑀸𑀥𑀼, 𑀢𑀧𑀲𑀸 𑀉𑀢𑁆𑀢𑀫𑁄, 𑀲𑀼𑀯𑀡𑁆𑀡𑁂𑀦 𑀅𑀪𑀺𑀭𑀽𑀧𑁄.

𑀧𑀓𑀢𑀺𑀆𑀤𑀻𑀲𑀼 𑁋 𑀧𑀓𑀢𑀺𑀬𑀸 𑀅𑀪𑀺𑀭𑀽𑀧𑁄, 𑀬𑁂𑀪𑀼𑀬𑁆𑀬𑁂𑀦 𑀫𑀢𑁆𑀢𑀺𑀓𑀸, 𑀲𑀫𑁂𑀦 𑀥𑀸𑀯𑀢𑀺, 𑀯𑀺𑀲𑀫𑁂𑀦 𑀥𑀸𑀯𑀢𑀺, 𑀤𑁆𑀯𑀺𑀤𑁄𑀡𑁂𑀦 𑀥𑀜𑁆𑀜𑀁 𑀓𑀺𑀡𑀸𑀢𑀺, 𑀲𑀳𑀲𑁆𑀲𑁂𑀦 𑀅𑀲𑁆𑀲𑀓𑁂 𑀓𑀺𑀡𑀸𑀢𑀺 𑀇𑀘𑁆𑀘𑀸𑀤𑀺.

𑀓𑀲𑁆𑀫𑀺𑀁 𑀅𑀢𑁆𑀣𑁂 𑀘𑀢𑀼𑀢𑁆𑀣𑀻?

𑁩𑁦𑁧. 𑀲𑀫𑁆𑀧𑀤𑀸𑀦𑁂 ¶ 𑀘𑀢𑀼𑀢𑁆𑀣𑀻.

𑀲𑀫𑁆𑀧𑀤𑀸𑀦𑀓𑀸𑀭𑀓𑁂 𑀮𑀺𑀗𑁆𑀕𑀫𑁆𑀳𑀸 𑀘𑀢𑀼𑀢𑁆𑀣𑀻𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀓𑀺𑀜𑁆𑀘 𑀲𑀫𑁆𑀧𑀤𑀸𑀦𑀁?

𑁩𑁦𑁨. 𑀬𑀲𑁆𑀲 𑀤𑀸𑀢𑀼𑀓𑀸𑀫𑁄 𑀭𑁄𑀘𑀢𑁂 𑀥𑀸𑀭𑀬𑀢𑁂 𑀯𑀸 𑀢𑀁 𑀲𑀫𑁆𑀧𑀤𑀸𑀦𑀁.

𑀬𑀲𑁆𑀲 𑀯𑀸 𑀤𑀸𑀢𑀼𑀓𑀸𑀫𑁄, 𑀬𑀲𑁆𑀲 𑀯𑀸 𑀭𑁄𑀘𑀢𑁂, 𑀬𑀲𑁆𑀲 𑀯𑀸 𑀥𑀸𑀭𑀬𑀢𑁂, 𑀢𑀁 𑀓𑀸𑀭𑀓𑀁 𑀲𑀫𑁆𑀧𑀤𑀸𑀦𑀲𑀜𑁆𑀜𑀁 𑀳𑁄𑀢𑀺. 𑀲𑀫𑁆𑀫𑀸 𑀧𑀤𑀻𑀬𑀢𑁂 𑀅𑀲𑁆𑀲𑀸𑀢𑀺 𑀲𑀫𑁆𑀧𑀤𑀸𑀦𑀁, 𑀧𑀝𑀺𑀕𑁆𑀕𑀸𑀳𑀓𑁄.

𑀢𑀁 𑀧𑀦 𑀢𑀺𑀯𑀺𑀥𑀁 𑀤𑀺𑀬𑁆𑀬𑀫𑀸𑀦𑀲𑁆𑀲𑀸𑀦𑀺𑀯𑀸𑀭𑀡𑀚𑁆𑀛𑁂𑀲𑀦𑀸𑀦𑀼𑀫𑀢𑀺𑀯𑀲𑁂𑀦. 𑀬𑀣𑀸 𑁋 𑀩𑀼𑀤𑁆𑀥𑀲𑁆𑀲 𑀧𑀼𑀧𑁆𑀨𑀁 𑀬𑀚𑀢𑀺, 𑀩𑁄𑀥𑀺𑀭𑀼𑀓𑁆𑀔𑀲𑁆𑀲 𑀚𑀮𑀁 𑀤𑀤𑀸𑀢𑀺. 𑀅𑀚𑁆𑀛𑁂𑀲𑀦𑁂 𑁋 𑀬𑀸𑀘𑀓𑀸𑀦𑀁 𑀥𑀦𑀁 𑀤𑀤𑀸𑀢𑀺. 𑀅𑀦𑀼𑀫𑀢𑀺𑀬𑀁 𑁋 𑀪𑀺𑀓𑁆𑀔𑀽𑀦𑀁 𑀤𑀸𑀦𑀁 𑀤𑁂𑀢𑀺.

𑀬𑀣𑀸𑀳

‘‘𑀅𑀦𑀺𑀭𑀸𑀓𑀭𑀡𑀸𑀭𑀸𑀥-𑀦𑀸𑀩𑁆𑀪𑀦𑀼𑀜𑁆𑀜𑀯𑀲𑁂𑀦 𑀳𑀺;

𑀲𑀫𑁆𑀧𑀤𑀸𑀦𑀁 𑀢𑀺𑀥𑀸 𑀯𑀼𑀢𑁆𑀢𑀁, 𑀭𑀼𑀓𑁆𑀔 𑀬𑀸𑀘𑀓 𑀪𑀺𑀓𑁆𑀔𑀯𑁄’’𑀢𑀺.

𑀤𑀸𑀢𑀼𑀓𑀸𑀫𑁄𑀢𑀺 𑀓𑀺𑀁? 𑀭𑀜𑁆𑀜𑁄 𑀤𑀡𑁆𑀟𑀁 𑀤𑀤𑀸𑀢𑀺.

𑀭𑁄𑀘𑀦𑀸𑀤𑀻𑀲𑀼 𑀧𑀦 𑁋 𑀲𑀫𑀡𑀲𑁆𑀲 𑀭𑁄𑀘𑀢𑁂 𑀲𑀘𑁆𑀘𑀁, 𑀫𑀸𑀬𑀲𑁆𑀫𑀦𑁆𑀢𑀸𑀦𑀫𑁆𑀧𑀺 𑀲𑀗𑁆𑀖𑀪𑁂𑀤𑁄 𑀭𑀼𑀘𑁆𑀘𑀺𑀢𑁆𑀣, 𑀬𑀲𑁆𑀲𑀸𑀬𑀲𑁆𑀫𑀢𑁄 𑀔𑀫𑀢𑀺, 𑀤𑁂𑀯𑀤𑀢𑁆𑀢𑀲𑁆𑀲 𑀲𑀼𑀯𑀡𑁆𑀡𑀘𑁆𑀙𑀢𑁆𑀢𑀁 𑀥𑀸𑀭𑀬𑀢𑁂 𑀬𑀜𑁆𑀜𑀤𑀢𑁆𑀢𑁄.

‘‘𑀲𑀫𑁆𑀧𑀤𑀸𑀦𑀁, 𑀯𑀸’’𑀢𑀺 𑀘 𑀯𑀢𑁆𑀢𑀢𑁂.

𑁩𑁦𑁩. 𑀲𑀺𑀮𑀸𑀖 𑀳𑀦𑀼 𑀞𑀸 𑀲𑀧 𑀥𑀸𑀭 𑀧𑀺𑀳 𑀓𑀼𑀥 𑀤𑀼𑀳𑀺 𑀲𑁆𑀲𑀸𑀲𑀽𑀬 𑀭𑀸𑀥𑀺𑀓𑁆𑀔 𑀧𑀘𑁆𑀘𑀸𑀲𑀼𑀡 𑀅𑀦𑀼𑀧𑀢𑀺𑀕𑀺𑀡𑀧𑀼𑀩𑁆𑀩𑀓𑀢𑁆𑀢𑀸𑀭𑁄𑀘𑀦𑀢𑁆𑀣𑀢𑀤𑀢𑁆𑀣 𑀢𑀼𑀫𑀢𑁆𑀣𑀸𑀮𑀫𑀢𑁆𑀣 𑀫𑀜𑁆𑀜𑀸𑀦𑀸𑀤𑀭𑀧𑁆𑀧𑀸𑀡𑀺𑀦𑀺 𑀕𑀢𑁆𑀬𑀢𑁆𑀣𑀓𑀫𑁆𑀫𑀦𑀺 𑀆𑀲𑀺𑀲𑀢𑁆𑀣 𑀲𑀫𑁆𑀫𑀼𑀢𑀺 𑀪𑀺𑀬𑁆𑀬𑀲𑀢𑁆𑀢𑀫𑁆𑀬𑀢𑁆𑀣𑁂𑀲𑀼 𑀘.

𑀘𑀢𑀼𑀧𑁆𑀧𑀤𑀫𑀺𑀤𑀁 ¶ . 𑀲𑀺𑀮𑀸𑀖 𑀓𑀢𑁆𑀣𑀦𑁂, 𑀳𑀦𑀼 𑀅𑀧𑀦𑀬𑀦𑁂, 𑀞𑀸 𑀕𑀢𑀺𑀦𑀺𑀯𑀢𑁆𑀢𑀺𑀫𑁆𑀳𑀺, 𑀲𑀧 𑀅𑀓𑁆𑀓𑁄𑀲𑁂, 𑀥𑀭 𑀥𑀸𑀭𑀡𑁂, 𑀧𑀺𑀳 𑀇𑀘𑁆𑀙𑀸𑀬𑀁 𑀇𑀘𑁆𑀘𑁂𑀢𑁂𑀲𑀁 𑀥𑀸𑀢𑀽𑀦𑀁 𑀧𑀬𑁄𑀕𑁂, 𑀓𑀼𑀥 𑀓𑁄𑀧𑁂, 𑀤𑀼𑀳 𑀚𑀺𑀖𑀁𑀲𑀸𑀬𑀁, 𑀇𑀲𑁆𑀲 𑀇𑀲𑁆𑀲𑀸𑀬𑀁, 𑀉𑀲𑀽𑀬 𑀤𑁄𑀲𑀸𑀯𑀺𑀓𑀭𑀡𑁂 𑀇𑀘𑁆𑀘𑁂𑀢𑁂𑀲𑀁 𑀢𑀤𑀢𑁆𑀣𑀯𑀸𑀘𑀻𑀦𑀜𑁆𑀘 𑀥𑀸𑀢𑀽𑀦𑀁 𑀧𑀬𑁄𑀕𑁂 𑀘 𑀭𑀸𑀥 𑀳𑀺𑀁𑀲𑀸𑀲𑀁𑀭𑀸𑀥𑁂𑀲𑀼, 𑀇𑀓𑁆𑀔 𑀤𑀲𑁆𑀲𑀦𑀗𑁆𑀓𑁂𑀲𑀽𑀢𑀺 𑀇𑀫𑁂𑀲𑀁 𑀧𑀬𑁄𑀕𑁂 𑀘 𑀧𑀢𑀺 𑀆𑀧𑀼𑀩𑁆𑀩𑀲𑁆𑀲 𑀲𑀼 𑀲𑀯𑀡𑁂𑀢𑀺 𑀇𑀫𑀲𑁆𑀲 𑀘 𑀅𑀦𑀼𑀧𑀢𑀺𑀧𑀼𑀩𑁆𑀩𑀲𑁆𑀲 𑀕𑁂𑀲𑀤𑁆𑀤𑁂𑀢𑀺 𑀇𑀫𑀲𑁆𑀲 𑀘 𑀧𑀼𑀩𑁆𑀩𑀓𑀢𑁆𑀢𑀸 𑀘 𑀆𑀭𑁄𑀘𑀦𑀢𑁆𑀣𑀧𑁆𑀧𑀬𑁄𑀕𑁂, 𑀢𑀤𑀢𑁆𑀣𑁂, 𑀢𑀼𑀫𑀢𑁆𑀣𑁂, 𑀅𑀮𑀫𑀢𑁆𑀣𑀧𑁆𑀧𑀬𑁄𑀕𑁂 𑀘 𑀫𑀜𑁆𑀜𑀢𑀺𑀧𑁆𑀧𑀬𑁄𑀕𑁂 𑀅𑀦𑀸𑀤𑀭𑁂 𑀅𑀧𑁆𑀧𑀸𑀡𑀺𑀦𑀺 𑀘 𑀕𑀢𑁆𑀬𑀢𑁆𑀣𑀸𑀦𑀁 𑀓𑀫𑁆𑀫𑀦𑀺 𑀘 𑀆𑀲𑀺𑀲𑀢𑁆𑀣𑀧𑁆𑀧𑀬𑁄𑀕𑁂 𑀘 𑀲𑀫𑁆𑀫𑀼𑀢𑀺 𑀪𑀺𑀬𑁆𑀬𑀧𑁆𑀧𑀬𑁄𑀕𑁂𑀲𑀼 𑀘 𑀲𑀢𑁆𑀢𑀫𑁆𑀬𑀢𑁆𑀣𑁂 𑀘𑀸𑀢𑀺 𑀢𑀁 𑀓𑀫𑁆𑀫𑀸𑀤𑀺𑀓𑀸𑀭𑀓𑀁 𑀲𑀫𑁆𑀧𑀤𑀸𑀦𑀲𑀜𑁆𑀜𑀁 𑀳𑁄𑀢𑀺, 𑀘𑀲𑀤𑁆𑀤𑀕𑁆𑀕𑀳𑀡𑁂𑀦 𑀧𑀳𑀺𑀡𑀢𑀺𑀓𑀧𑁆𑀧𑀢𑀺 𑀧𑀳𑁄𑀢𑀺 𑀉𑀧𑀫𑀸𑀜𑁆𑀚𑀮𑀺𑀓𑀭𑀡 𑀨𑀸𑀲𑀼 𑀅𑀢𑁆𑀣𑀲𑁂𑀬𑁆𑀬𑀧𑁆𑀧𑀪𑀼𑀢𑀺𑀬𑁄𑀕𑁂 𑀘 𑀧𑀼𑀭𑁂 𑀯𑀺𑀬 𑀘𑀢𑀼𑀢𑁆𑀣𑀻.

𑀲𑀺𑀮𑀸𑀖𑀸𑀤𑀺𑀧𑁆𑀧𑀬𑁄𑀕𑁂 𑀢𑀸𑀯 𑁋 𑀩𑀼𑀤𑁆𑀥𑀲𑁆𑀲 𑀲𑀺𑀮𑀸𑀖𑀢𑁂. 𑀉𑀧𑀚𑁆𑀛𑀸𑀬𑀲𑁆𑀲 𑀲𑀺𑀮𑀸𑀖𑀢𑁂, 𑀣𑁄𑀫𑁂𑀢𑀻𑀢𑀺 𑀅𑀢𑁆𑀣𑁄.

𑀳𑀦𑀼𑀢𑁂 𑀫𑀬𑁆𑀳𑀫𑁂𑀯, 𑀳𑀦𑀼𑀢𑁂 𑀢𑀼𑀬𑁆𑀳𑀫𑁂𑀯, 𑀅𑀧𑀮𑀧𑀢𑀻𑀢𑀺 𑀅𑀢𑁆𑀣𑁄.

𑀉𑀧𑀢𑀺𑀝𑁆𑀞𑁂𑀬𑁆𑀬 𑀲𑀓𑁆𑀬𑀧𑀼𑀢𑁆𑀢𑀸𑀦𑀁 𑀯𑀟𑁆𑀠𑀓𑀻, 𑀏𑀢𑁆𑀣 𑀘 𑀉𑀧𑀝𑁆𑀞𑀸𑀦𑀁 𑀦𑀸𑀫 𑀉𑀧𑀕𑀫𑀦𑀁. 𑀪𑀺𑀓𑁆𑀔𑀼𑀲𑁆𑀲 𑀪𑀼𑀜𑁆𑀚𑀫𑀸𑀦𑀲𑁆𑀲 𑀧𑀸𑀦𑀻𑀬𑁂𑀦 𑀯𑀸 𑀯𑀺𑀥𑀽𑀧𑀦𑁂𑀦 𑀯𑀸 𑀉𑀧𑀢𑀺𑀝𑁆𑀞𑁂𑀬𑁆𑀬.

𑀢𑀼𑀬𑁆𑀳𑀁 𑀲𑀧𑀢𑁂, 𑀫𑀬𑁆𑀳𑀁 𑀲𑀧𑀢𑁂, 𑀏𑀢𑁆𑀣 𑀘 𑀲𑀧𑀦𑀁 𑀦𑀸𑀫 𑀲𑀘𑁆𑀘𑀓𑀭𑀡𑀁.

𑀥𑀸𑀭𑀬𑀢𑀺𑀧𑁆𑀧𑀬𑁄𑀕𑁂 𑀥𑀦𑀺𑀓𑁄𑀬𑁂𑀯 𑀲𑀫𑁆𑀧𑀤𑀸𑀦𑀁, 𑀲𑀼𑀯𑀡𑁆𑀡𑀁 𑀢𑁂 𑀥𑀸𑀭𑀬𑀢𑁂, 𑀇𑀡𑀁 𑀥𑀸𑀭𑀬𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀭𑀜𑁆𑀜𑁄 𑀫𑀬𑀁 𑀦𑀸𑀕𑀁 𑀥𑀸𑀭𑀬𑀸𑀫.

𑀧𑀺𑀳𑀧𑁆𑀧𑀬𑁄𑀕𑁂 ¶ 𑀇𑀘𑁆𑀙𑀺𑀢𑁄𑀬𑁂𑀯, 𑀤𑁂𑀯𑀸𑀧𑀺 𑀢𑀲𑁆𑀲 𑀧𑀺𑀳𑀬𑀦𑁆𑀢𑀺 𑀢𑀸𑀤𑀺𑀦𑁄, 𑀤𑁂𑀯𑀸𑀧𑀺 𑀢𑁂𑀲𑀁 𑀧𑀺𑀳𑀬𑀦𑁆𑀢𑀺, 𑀲𑀫𑁆𑀩𑀼𑀤𑁆𑀥𑀸𑀦𑀁 𑀲𑀢𑀻𑀫𑀢𑀁, 𑀧𑀢𑁆𑀣𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀓𑁄𑀥𑀸𑀤𑀺𑀅𑀢𑁆𑀣𑀸𑀦𑀁 𑀧𑀬𑁄𑀕𑁂 𑀬𑀁 𑀧𑀢𑀺 𑀓𑁄𑀧𑁄, 𑀢𑀲𑁆𑀲 𑀓𑀼𑀚𑁆𑀛 𑀫𑀳𑀸𑀯𑀻𑀭, 𑀬𑀤𑀺𑀳𑀁 𑀢𑀲𑁆𑀲 𑀓𑀼𑀧𑁆𑀧𑁂𑀬𑁆𑀬𑀁.

𑀤𑀼𑀳𑀬𑀢𑀺 𑀤𑀺𑀲𑀸𑀦𑀁 𑀫𑁂𑀖𑁄, 𑀬𑁄 𑀫𑀺𑀢𑁆𑀢𑀸𑀦𑀁 𑀦 𑀤𑀼𑀩𑁆𑀪𑀢𑀺.

𑀢𑀺𑀢𑁆𑀣𑀺𑀬𑀸 𑀇𑀲𑁆𑀲𑀦𑁆𑀢𑀺 𑀲𑀫𑀡𑀸𑀦𑀁.

𑀤𑀼𑀚𑁆𑀚𑀦𑀸 𑀕𑀼𑀡𑀯𑀦𑁆𑀢𑀸𑀦𑀁 𑀉𑀲𑀽𑀬𑀦𑁆𑀢𑀺, 𑀓𑀸 𑀉𑀲𑀽𑀬𑀸 𑀯𑀺𑀚𑀸𑀦𑀢𑀁.

𑀭𑀸𑀥𑀺𑀓𑁆𑀔𑀧𑁆𑀧𑀬𑁄𑀕𑁂 𑀬𑀲𑁆𑀲 𑀯𑀺𑀧𑀼𑀘𑁆𑀙𑀦𑀁 𑀓𑀫𑁆𑀫𑀯𑀺𑀔𑁆𑀬𑀸𑀧𑀦𑀢𑁆𑀣𑀁, 𑀯𑀸𑀥𑀺𑀓𑀸𑀭𑀢𑁄 𑀤𑀼𑀢𑀺𑀬𑀸 𑀘. 𑀆𑀭𑀸𑀥𑁄 𑀫𑁂 𑀭𑀜𑁆𑀜𑁄, 𑀭𑀜𑁆𑀜𑁄 𑀅𑀧𑀭𑀚𑁆𑀛𑀢𑀺, 𑀭𑀸𑀚𑀸𑀦𑀁 𑀯𑀸 𑀅𑀧𑀭𑀚𑁆𑀛𑀢𑀺, 𑀓𑁆𑀬𑀸𑀳𑀁 𑀅𑀬𑁆𑀬𑀸𑀦𑀁 𑀅𑀧𑀭𑀚𑁆𑀛𑀸𑀫𑀺, 𑀓𑁆𑀬𑀸𑀳𑀁 𑀅𑀬𑁆𑀬𑁂 𑀅𑀧𑀭𑀚𑁆𑀛𑀸𑀫𑀺 𑀯𑀸.

𑀆𑀬𑀲𑁆𑀫𑀢𑁄 𑀉𑀧𑀸𑀮𑀺𑀢𑁆𑀣𑁂𑀭𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄 𑀉𑀧𑀢𑀺𑀲𑁆𑀲𑁄, 𑀆𑀬𑀲𑁆𑀫𑀦𑁆𑀢𑀁 𑀯𑀸.

𑀧𑀘𑁆𑀘𑀸𑀲𑀼𑀡 𑀅𑀦𑀼𑀧𑀢𑀺𑀕𑀺𑀡𑀸𑀦𑀁 𑀧𑀼𑀩𑁆𑀩𑀓𑀢𑁆𑀢𑀸 𑀘 𑀲𑀼𑀡𑁄𑀢𑀺𑀲𑁆𑀲 𑀥𑀸𑀢𑀼𑀲𑁆𑀲 𑀧𑀘𑁆𑀘𑀸𑀬𑁄𑀕𑁂, 𑀕𑀺𑀡𑀲𑁆𑀲 𑀘 𑀅𑀦𑀼𑀧𑀢𑀺𑀬𑁄𑀕𑁂 𑀧𑀼𑀩𑁆𑀩𑀲𑁆𑀲 𑀓𑀫𑁆𑀫𑀼𑀦𑁄 𑀬𑁄 𑀓𑀢𑁆𑀢𑀸, 𑀲𑁄 𑀲𑀫𑁆𑀧𑀤𑀸𑀦𑀲𑀜𑁆𑀜𑁄 𑀳𑁄𑀢𑀺. 𑀬𑀣𑀸 𑁋 𑀪𑀕𑀯𑀸 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘, 𑀏𑀢𑁆𑀣 ‘‘𑀪𑀺𑀓𑁆𑀔𑀽’’𑀢𑀺 𑀅𑀓𑀣𑀺𑀢𑀓𑀫𑁆𑀫𑀁, ‘‘𑀏𑀢’’𑀦𑁆𑀢𑀺 𑀓𑀣𑀺𑀢𑀓𑀫𑁆𑀫𑀁, 𑀧𑀼𑀩𑁆𑀩𑀲𑁆𑀲 𑀯𑀘𑀦𑀓𑀫𑁆𑀫𑀲𑁆𑀲 𑀓𑀢𑁆𑀢𑀸 𑀪𑀕𑀯𑀸. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁, 𑀆𑀲𑀼𑀡𑀦𑁆𑀢𑀺 𑀩𑀼𑀤𑁆𑀥𑀲𑁆𑀲 𑀪𑀺𑀓𑁆𑀔𑀽, 𑀢𑀣𑀸 𑀪𑀺𑀓𑁆𑀔𑀼 𑀚𑀦𑀁 𑀥𑀫𑁆𑀫𑀁 𑀲𑀸𑀯𑁂𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀚𑀦𑁄 𑀅𑀦𑀼𑀕𑀺𑀡𑀸𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀚𑀦𑁄 𑀧𑀢𑀺𑀕𑀺𑀡𑀸𑀢𑀺, 𑀲𑀸𑀥𑀼𑀓𑀸𑀭𑀤𑀸𑀦𑀸𑀤𑀺𑀦𑀸 𑀢𑀁 𑀉𑀲𑁆𑀲𑀸𑀳𑀬𑀢𑀻𑀢𑀺 𑀅𑀢𑁆𑀣𑁄.

𑀬𑁄 𑀯𑀤𑁂𑀢𑀺 𑀲 𑀓𑀢𑁆𑀢𑀸𑀢𑀺, 𑀯𑀼𑀢𑁆𑀢𑀁 𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀬𑁄 𑀧𑀝𑀺𑀕𑁆𑀕𑀸𑀳𑀓𑁄 𑀢𑀲𑁆𑀲, 𑀲𑀫𑁆𑀧𑀤𑀸𑀦𑀁 𑀯𑀺𑀚𑀸𑀦𑀺𑀬𑀸𑀢𑀺.

𑀆𑀭𑁄𑀘𑀦𑀢𑁆𑀣𑀧𑁆𑀧𑀬𑁄𑀕𑁂 ¶ 𑀬𑀲𑁆𑀲 𑀆𑀭𑁄𑀘𑁂𑀢𑀺, 𑀢𑀁 𑀲𑀫𑁆𑀧𑀤𑀸𑀦𑀁. 𑀆𑀭𑁄𑀘𑀬𑀸𑀫𑀺 𑀯𑁄 𑀪𑀺𑀓𑁆𑀔𑀯𑁂, 𑀧𑀝𑀺𑀯𑁂𑀤𑀬𑀸𑀫𑀺 𑀯𑁄 𑀪𑀺𑀓𑁆𑀔𑀯𑁂, 𑀆𑀫𑀦𑁆𑀢𑀬𑀸𑀫𑀺 𑀢𑁂 𑀫𑀳𑀸𑀭𑀸𑀚, 𑀆𑀫𑀦𑁆𑀢 𑀔𑁄 𑀢𑀁 𑀕𑀘𑁆𑀙𑀸𑀫𑀸𑀢𑀺 𑀯𑀸. 𑀏𑀢𑁆𑀣 𑀘 𑀆𑀭𑁄𑀘𑀦𑀲𑀤𑁆𑀤𑀲𑁆𑀲 𑀓𑀣𑀦𑀧𑁆𑀧𑀓𑀸𑀭𑀢𑁆𑀣𑀢𑁆𑀢𑀸 𑀤𑁂𑀲𑀦𑀢𑁆𑀣𑀸𑀤𑀺𑀧𑁆𑀧𑀬𑁄𑀕𑁂𑀧𑀺 𑀘𑀢𑀼𑀢𑁆𑀣𑀻. 𑀥𑀫𑁆𑀫𑀁 𑀯𑁄 𑀤𑁂𑀲𑁂𑀲𑁆𑀲𑀸𑀫𑀺, 𑀤𑁂𑀲𑁂𑀢𑀼 𑀪𑀦𑁆𑀢𑁂 𑀪𑀕𑀯𑀸 𑀥𑀫𑁆𑀫𑀁 𑀪𑀺𑀓𑁆𑀔𑀽𑀦𑀁, 𑀬𑀣𑀸 𑀦𑁄 𑀪𑀕𑀯𑀸 𑀩𑁆𑀬𑀸𑀓𑀭𑁂𑀬𑁆𑀬, 𑀦𑀺𑀭𑀼𑀢𑁆𑀢𑀺𑀁 𑀢𑁂 𑀧𑀯𑀓𑁆𑀔𑀸𑀫𑀺 𑀇𑀘𑁆𑀘𑀸𑀤𑀺.

𑀢𑀤𑀢𑁆𑀣𑁂 𑀲𑀫𑁆𑀧𑀤𑀸𑀦𑀲𑀜𑁆𑀜𑀸, 𑀘𑀢𑀼𑀢𑁆𑀣𑀻 𑀘.

‘‘𑀅𑀢𑁄, 𑀯𑀸’’𑀢𑀺 𑀘 𑀯𑀢𑁆𑀢𑀢𑁂.

𑁩𑁦𑁪. 𑀆𑀬 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀢𑀼.

𑀅𑀓𑀸𑀭𑀦𑁆𑀢𑀢𑁄 𑀮𑀺𑀗𑁆𑀕𑀫𑁆𑀳𑀸 𑀧𑀭𑀲𑁆𑀲 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀆𑀬𑀸𑀤𑁂𑀲𑁄 𑀳𑁄𑀢𑀺 𑀯𑀸, 𑀲𑀭𑀮𑁄𑀧𑀸𑀤𑀺.

𑀩𑀼𑀤𑁆𑀥𑀲𑁆𑀲𑀢𑁆𑀣𑀸𑀬 𑀥𑀫𑁆𑀫𑀲𑁆𑀲𑀢𑁆𑀣𑀸𑀬 𑀲𑀗𑁆𑀖𑀲𑁆𑀲𑀢𑁆𑀣𑀸𑀬 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀸𑀫𑀺, 𑀧𑀺𑀡𑁆𑀟𑀧𑀸𑀢𑀁 𑀧𑀝𑀺𑀲𑁂𑀯𑀸𑀫𑀺 𑀦𑁂𑀯 𑀤𑀯𑀸𑀬 𑀦 𑀫𑀤𑀸𑀬 𑀦 𑀫𑀡𑁆𑀟𑀦𑀸𑀬 𑀦 𑀯𑀺𑀪𑀽𑀲𑀦𑀸𑀬, 𑀊𑀦𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸, 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀢𑀺.

𑀢𑀼𑀫𑀢𑁆𑀣𑁂 𑁋 𑀮𑁄𑀓𑀸𑀦𑀼𑀓𑀫𑁆𑀧𑀸𑀬, 𑀮𑁄𑀓𑀫𑀦𑀼𑀓𑀫𑁆𑀧𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀢𑀣𑀸 𑀨𑀸𑀲𑀼𑀯𑀺𑀳𑀸𑀭𑀸𑀬.

𑀅𑀮𑀁𑀲𑀤𑁆𑀤𑀲𑁆𑀲 𑀅𑀢𑁆𑀣𑀸 𑀅𑀭𑀳𑀧𑀝𑀺𑀓𑁆𑀔𑁂𑀧𑀸. 𑀅𑀭𑀳𑀢𑁆𑀣𑁂 𑁋 𑀅𑀮𑀁 𑀫𑁂 𑀭𑀚𑁆𑀚𑀁, 𑀅𑀮𑀁 𑀪𑀺𑀓𑁆𑀔𑀼 𑀧𑀢𑁆𑀢𑀲𑁆𑀲, 𑀅𑀓𑁆𑀔𑀥𑀼𑀢𑁆𑀢𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀦𑀸𑀮𑀁 𑀤𑀸𑀭𑀪𑀭𑀡𑀸𑀬, 𑀅𑀮𑀁 𑀫𑀮𑁆𑀮𑁄 𑀫𑀮𑁆𑀮𑀲𑁆𑀲, 𑀅𑀭𑀳𑀢𑀺 𑀫𑀮𑁆𑀮𑁄 𑀫𑀮𑁆𑀮𑀲𑁆𑀲.

𑀧𑀝𑀺𑀓𑁆𑀔𑁂𑀧𑁂 ¶ 𑁋 𑀅𑀮𑀁 𑀢𑁂 𑀇𑀥 𑀯𑀸𑀲𑁂𑀦, 𑀅𑀮𑀁 𑀫𑁂 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑁂𑀦, 𑀓𑀺𑀁 𑀫𑁂 𑀏𑀓𑁂𑀦 𑀢𑀺𑀡𑁆𑀡𑁂𑀦, 𑀓𑀺𑀁 𑀢𑁂 𑀚𑀝𑀸𑀳𑀺 𑀤𑀼𑀫𑁆𑀫𑁂𑀥, 𑀓𑀺𑀁 𑀢𑁂𑀢𑁆𑀣 𑀘𑀢𑀼𑀫𑀝𑁆𑀞𑀲𑁆𑀲.

𑀫𑀜𑁆𑀜𑀢𑀺𑀧𑁆𑀧𑀬𑁄𑀕𑁂 𑀅𑀦𑀸𑀤𑀭𑁂 𑀅𑀧𑁆𑀧𑀸𑀡𑀺𑀦𑀺 𑀓𑀫𑁆𑀫𑀦𑀺𑀬𑁂𑀯 𑁋 𑀓𑀝𑁆𑀞𑀲𑁆𑀲 𑀢𑀼𑀯𑀁 𑀫𑀜𑁆𑀜𑁂, 𑀓𑀴𑀺𑀗𑁆𑀕𑀭𑀲𑁆𑀲 𑀢𑀼𑀯𑀁 𑀫𑀜𑁆𑀜𑁂, 𑀚𑀻𑀯𑀺𑀢𑀁 𑀢𑀺𑀡𑀸𑀬𑀧𑀺 𑀦 𑀫𑀜𑁆𑀜𑀫𑀸𑀦𑁄.

𑀅𑀦𑀸𑀤𑀭𑁂𑀢𑀺 𑀓𑀺𑀁? 𑀲𑀼𑀯𑀡𑁆𑀡𑀁 𑀢𑀁 𑀫𑀜𑁆𑀜𑁂. 𑀅𑀧𑁆𑀧𑀸𑀡𑀺𑀦𑀻𑀢𑀺 𑀓𑀺𑀁? 𑀕𑀤𑁆𑀭𑀪𑀁 𑀢𑀼𑀯𑀁 𑀫𑀜𑁆𑀜𑁂.

𑀕𑀢𑁆𑀬𑀢𑁆𑀣𑀓𑀫𑁆𑀫𑀦𑀺 𑀯𑀸𑀥𑀺𑀓𑀸𑀭𑀢𑁄 𑀤𑀼𑀢𑀺𑀬𑀸 𑀘. 𑀅𑀧𑁆𑀧𑁄 𑀲𑀕𑁆𑀕𑀸𑀬 𑀕𑀘𑁆𑀙𑀢𑀺, 𑀅𑀧𑁆𑀧𑁄 𑀲𑀕𑁆𑀕𑀁 𑀕𑀘𑁆𑀙𑀢𑀺, 𑀦𑀺𑀩𑁆𑀩𑀸𑀦𑀸𑀬 𑀯𑀚𑀦𑁆𑀢𑀺𑀬𑀸, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬, 𑀫𑀽𑀮𑀁 𑀧𑀝𑀺𑀓𑀲𑁆𑀲𑁂𑀬𑁆𑀬.

𑀆𑀲𑀻𑀲𑀦𑀢𑁆𑀣𑁂 𑀆𑀬𑀼𑀪𑀤𑁆𑀤𑀓𑀼𑀲𑀮𑀸𑀤𑀺𑀬𑁄𑀕𑁂𑀬𑁂𑀯, 𑀆𑀬𑀲𑁆𑀫𑀢𑁄 𑀤𑀻𑀖𑀸𑀬𑀼 𑀳𑁄𑀢𑀼, ‘‘𑀢𑁄𑀢𑀺𑀢𑀸 𑀲𑀲𑁆𑀫𑀺𑀁𑀦𑀸𑀲𑀽’’𑀢𑀺 𑀦𑁆𑀢𑀼𑀲𑁆𑀲 𑀲𑀯𑀺𑀪𑀢𑁆𑀢𑀺𑀲𑁆𑀲 𑀢𑁄 𑀆𑀤𑁂𑀲𑁄. 𑀪𑀤𑁆𑀤𑀁 𑀪𑀯𑀢𑁄 𑀳𑁄𑀢𑀼, 𑀓𑀼𑀲𑀮𑀁 𑀪𑀯𑀢𑁄 𑀳𑁄𑀢𑀼, 𑀅𑀦𑀸𑀫𑀬𑀁 𑀪𑀯𑀢𑁄 𑀳𑁄𑀢𑀼, 𑀲𑀼𑀔𑀁 𑀪𑀯𑀢𑁄 𑀳𑁄𑀢𑀼, 𑀅𑀢𑁆𑀣𑀁 𑀪𑀯𑀢𑁄 𑀳𑁄𑀢𑀼, 𑀳𑀺𑀢𑀁 𑀪𑀯𑀢𑁄 𑀳𑁄𑀢𑀼, 𑀲𑁆𑀯𑀸𑀕𑀢𑀁 𑀪𑀯𑀢𑁄 𑀳𑁄𑀢𑀼, 𑀲𑁄𑀢𑁆𑀣𑀺 𑀳𑁄𑀢𑀼 𑀲𑀩𑁆𑀩𑀲𑀢𑁆𑀢𑀸𑀦𑀁.

𑀲𑀫𑁆𑀫𑀼𑀢𑀺𑀧𑁆𑀧𑀬𑁄𑀕𑁂 𑁋 𑀲𑀸𑀥𑀼 𑀲𑀫𑁆𑀫𑀼𑀢𑀺 𑀫𑁂 𑀢𑀲𑁆𑀲 𑀪𑀕𑀯𑀢𑁄 𑀤𑀲𑁆𑀲𑀦𑀸𑀬.

𑀪𑀺𑀬𑁆𑀬𑀧𑁆𑀧𑀬𑁄𑀕𑁂 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬.

𑀲𑀢𑁆𑀢𑀫𑀺𑀬𑀢𑁆𑀣𑁂 𑀆𑀯𑀺𑀓𑀭𑀡 𑀧𑀸𑀢𑀼𑀪𑀯𑀦𑀸𑀤𑀺𑀬𑁄𑀕𑁂 𑁋 𑀢𑀼𑀬𑁆𑀳𑀜𑁆𑀘𑀲𑁆𑀲 𑀆𑀯𑀺𑀓𑀭𑁄𑀫𑀺, 𑀢𑀲𑁆𑀲 𑀫𑁂 𑀲𑀓𑁆𑀓𑁄 𑀧𑀸𑀢𑀼𑀭𑀳𑁄𑀲𑀺.

𑀘𑀲𑀤𑁆𑀤𑀕𑁆𑀕𑀳𑀡𑁂𑀦 ¶ 𑀧𑀳𑀺𑀡𑀸𑀤𑀺𑀓𑁆𑀭𑀺𑀬𑀸𑀬𑁄𑀕𑁂, 𑀨𑀸𑀲𑀼𑀆𑀤𑀺𑀦𑀸𑀫𑀧𑀬𑁄𑀕𑁂 𑀘 𑁋 𑀢𑀲𑁆𑀲 𑀧𑀳𑀺𑀡𑁂𑀬𑁆𑀬, 𑀪𑀺𑀓𑁆𑀔𑀽𑀦𑀁 𑀤𑀽𑀢𑀁 𑀧𑀸𑀳𑁂𑀲𑀺, 𑀓𑀧𑁆𑀧𑀢𑀺 𑀲𑀫𑀡𑀸𑀦𑀁 𑀆𑀬𑁄𑀕𑁄, 𑀏𑀓𑀲𑁆𑀲 𑀤𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀧𑀳𑁄𑀢𑀺, 𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺, 𑀅𑀜𑁆𑀚𑀮𑀺𑀁 𑀢𑁂 𑀧𑀕𑁆𑀕𑀡𑁆𑀳𑀸𑀫𑀺. 𑀢𑀣𑀸 𑀢𑀲𑁆𑀲 𑀨𑀸𑀲𑀼 𑀳𑁄𑀢𑀺, 𑀮𑁄𑀓𑀲𑁆𑀲𑀢𑁆𑀣𑁄, 𑀫𑀡𑀺𑀦𑀸 𑀫𑁂 𑀅𑀢𑁆𑀣𑁄, 𑀲𑁂𑀬𑁆𑀬𑁄 𑀫𑁂 𑀅𑀢𑁆𑀣𑁄 𑀇𑀘𑁆𑀘𑀸𑀤𑀺.

‘‘𑀘𑀢𑀼𑀢𑁆𑀣𑀻’’𑀢𑀺 𑀯𑀢𑁆𑀢𑀢𑁂.

𑁩𑁦𑁫. 𑀦𑀫𑁄𑀬𑁄𑀕𑀸𑀤𑀻𑀲𑁆𑀯𑀧𑀺 𑀘.

𑀦𑀫𑁄𑀲𑀤𑁆𑀤𑀬𑁄𑀕𑁂, 𑀲𑁄𑀢𑁆𑀣𑀺𑀲𑁆𑀯𑀸𑀕𑀢𑀸𑀤𑀻𑀳𑀺 𑀘 𑀬𑁄𑀕𑁂 𑀮𑀺𑀗𑁆𑀕𑀫𑁆𑀳𑀸 𑀘𑀢𑀼𑀢𑁆𑀣𑀻𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀦𑀫𑁄 𑀢𑁂 𑀩𑀼𑀤𑁆𑀥 𑀯𑀻𑀭𑀢𑁆𑀣𑀼, 𑀦𑀫𑁄 𑀓𑀭𑁄𑀳𑀺 𑀦𑀸𑀕𑀲𑁆𑀲, 𑀦𑀫𑀢𑁆𑀣𑀼 𑀩𑀼𑀤𑁆𑀥𑀸𑀦𑀁, 𑀦𑀫𑀢𑁆𑀣𑀼 𑀩𑁄𑀥𑀺𑀬𑀸, 𑀲𑁄𑀢𑁆𑀣𑀺 𑀧𑀚𑀸𑀦𑀁, 𑀲𑁆𑀯𑀸𑀕𑀢𑀁 𑀢𑁂 𑀫𑀳𑀸𑀭𑀸𑀚, 𑀅𑀣𑁄 𑀢𑁂 𑀅𑀤𑀼𑀭𑀸𑀕𑀢𑀁.

‘‘𑀓𑀸𑀮𑁂, 𑀪𑀯𑀺𑀲𑁆𑀲𑀢𑀻’’𑀢𑀺 𑀘 𑀯𑀢𑁆𑀢𑀢𑁂.

𑁩𑁦𑁬. 𑀪𑀸𑀯𑀯𑀸𑀘𑀺𑀫𑁆𑀳𑀺 𑀘𑀢𑀼𑀢𑁆𑀣𑀻.

𑀪𑀸𑀯𑀯𑀸𑀘𑀺𑀫𑁆𑀳𑀺 𑀘𑀢𑀼𑀢𑁆𑀣𑀻𑀯𑀺𑀪𑀢𑁆𑀢𑀺 𑀳𑁄𑀢𑀺 𑀪𑀯𑀺𑀲𑁆𑀲𑀢𑀺𑀓𑀸𑀮𑁂. 𑀪𑀯𑀦𑀁 𑀪𑀸𑀯𑁄. 𑀧𑀘𑁆𑀘𑀺𑀲𑁆𑀲𑀢𑁂, 𑀧𑀘𑀦𑀁 𑀯𑀸 𑀧𑀸𑀓𑁄, 𑀧𑀸𑀓𑀸𑀬 𑀯𑀚𑀢𑀺, 𑀧𑀘𑀺𑀢𑀼𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀪𑁄𑀕𑀸𑀬 𑀯𑀚𑀢𑀺 𑀇𑀘𑁆𑀘𑀸𑀤𑀺.

𑀓𑀲𑁆𑀫𑀺𑀁 𑀅𑀢𑁆𑀣𑁂 𑀧𑀜𑁆𑀘𑀫𑀻?

𑁩𑁦𑁭. 𑀅𑀧𑀸𑀤𑀸𑀦𑁂 𑀧𑀜𑁆𑀘𑀫𑀻.

𑀓𑀺𑀫𑀧𑀸𑀤𑀸𑀦𑀁?

𑁩𑁦𑁮. 𑀬𑀲𑁆𑀫𑀸𑀤𑀧𑁂𑀢𑀺 ¶ 𑀪𑀬𑀫𑀸𑀤𑀢𑁆𑀢𑁂 𑀯𑀸 𑀢𑀤𑀧𑀸𑀤𑀸𑀦𑀁.

𑀬𑀲𑁆𑀫𑀸 𑀯𑀸 𑀅𑀯𑀥𑀺𑀢𑁄 𑀅𑀧𑁂𑀢𑀺, 𑀬𑀲𑁆𑀫𑀸 𑀯𑀸 𑀪𑀬𑀳𑁂𑀢𑀼𑀢𑁄 𑀪𑀬𑀁 𑀪𑀯𑀢𑀺, 𑀬𑀲𑁆𑀫𑀸 𑀯𑀸 𑀅𑀓𑁆𑀔𑀸𑀢𑀸𑀭𑀸 𑀯𑀺𑀚𑁆𑀚𑀁 𑀆𑀤𑀤𑀸𑀢𑀺, 𑀢𑀁 𑀓𑀸𑀭𑀓𑀁 𑀅𑀧𑀸𑀤𑀸𑀦𑀲𑀜𑁆𑀜𑀁 𑀳𑁄𑀢𑀺. 𑀅𑀧𑀦𑁂𑀢𑁆𑀯𑀸 𑀇𑀢𑁄 𑀆𑀤𑀤𑀸𑀢𑀻𑀢𑀺 𑀅𑀧𑀸𑀤𑀸𑀦𑀁.

𑀢𑀁 𑀧𑀦 𑀢𑀺𑀯𑀺𑀥𑀁 𑀯𑀺𑀲𑀬𑀪𑁂𑀤𑁂𑀦 𑀦𑀺𑀤𑁆𑀤𑀺𑀝𑁆𑀞𑀯𑀺𑀲𑀬𑀁, 𑀉𑀧𑀸𑀢𑁆𑀢𑀯𑀺𑀲𑀬𑀁, 𑀅𑀦𑀼𑀫𑁂𑀬𑁆𑀬𑀯𑀺𑀲𑀬𑀜𑁆𑀘𑀸𑀢𑀺.

𑀅𑀧𑀸𑀤𑀸𑀦𑀲𑀜𑁆𑀜𑀸𑀯𑀺𑀲𑀬𑀲𑁆𑀲 𑀓𑁆𑀭𑀺𑀬𑀸𑀯𑀺𑀲𑁂𑀲𑀲𑁆𑀲 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀦𑀺𑀤𑁆𑀤𑀺𑀝𑁆𑀞𑀯𑀺𑀲𑀬𑀁. 𑀬𑀣𑀸 𑁋 𑀕𑀸𑀫𑀸 𑀅𑀧𑁂𑀦𑁆𑀢𑀺 𑀫𑀼𑀦𑀬𑁄, 𑀦𑀕𑀭𑀸 𑀦𑀺𑀕𑁆𑀕𑀢𑁄 𑀭𑀸𑀚𑀸.

𑀏𑀢𑁆𑀣 𑀘 ‘‘𑀧𑀸𑀧𑀸 𑀘𑀺𑀢𑁆𑀢𑀁 𑀦𑀺𑀯𑀸𑀭𑀬𑁂, 𑀧𑀸𑀧𑀸 𑀦𑀺𑀯𑀸𑀭𑁂𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀬𑀤𑀺𑀧𑀺 𑀓𑀸𑀬𑀲𑀁𑀬𑁄𑀕𑀧𑀼𑀩𑁆𑀩𑀓𑀸𑀧𑀕𑀫𑀦𑀁 𑀦𑀢𑁆𑀣𑀺, 𑀢𑀣𑀸𑀧𑀺 𑀘𑀺𑀢𑁆𑀢𑀲𑀁𑀬𑁄𑀕𑀧𑀼𑀩𑁆𑀩𑀓𑀲𑁆𑀲 𑀅𑀧𑀕𑀫𑀦𑀲𑁆𑀲 𑀲𑀫𑁆𑀪𑀯𑀢𑁄 𑀇𑀫𑀺𑀦𑀸 𑀘 𑀅𑀧𑀸𑀤𑀸𑀦𑀲𑀜𑁆𑀜𑀸.

𑀬𑀢𑁆𑀣 𑀧𑀦 𑀅𑀧𑀕𑀫𑀦𑀓𑁆𑀭𑀺𑀬𑀁 𑀉𑀧𑀸𑀢𑁆𑀢𑀁 𑀅𑀚𑁆𑀛𑀸𑀳𑀝𑀁 𑀯𑀺𑀲𑀬𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀢𑀁 𑀉𑀧𑀸𑀢𑁆𑀢𑀯𑀺𑀲𑀬𑀁. 𑀬𑀣𑀸 𑁋 𑀯𑀮𑀸𑀳𑀓𑀸 𑀯𑀺𑀚𑁆𑀚𑁄𑀢𑀢𑁂 𑀯𑀺𑀚𑁆𑀚𑀼, 𑀓𑀼𑀲𑀽𑀮𑀢𑁄 𑀧𑀘𑀢𑀻𑀢𑀺. 𑀏𑀢𑁆𑀣 𑀘 ‘‘𑀯𑀮𑀸𑀳𑀓𑀸 𑀦𑀺𑀓𑁆𑀔𑀫𑁆𑀫, 𑀓𑀼𑀲𑀽𑀮𑀢𑁄 𑀅𑀧𑀦𑁂𑀢𑁆𑀯𑀸’’𑀢𑀺 𑀘 𑀧𑀼𑀩𑁆𑀩𑀓𑁆𑀭𑀺𑀬𑀸 𑀅𑀚𑁆𑀛𑀸𑀳𑀭𑀻𑀬𑀢𑀺.

𑀅𑀦𑀼𑀫𑁂𑀬𑁆𑀬𑀯𑀺𑀲𑀬𑀁 𑀬𑀣𑀸 𑁋 𑀫𑀸𑀣𑀼𑀭𑀸 𑀧𑀸𑀝𑀮𑀺𑀧𑀼𑀢𑁆𑀢𑀓𑁂𑀳𑀺 𑀅𑀪𑀺𑀭𑀽𑀧𑀸. 𑀏𑀢𑁆𑀣 𑀳𑀺 𑀓𑁂𑀦𑀘𑀺 𑀕𑀼𑀡𑁂𑀦 𑀉𑀓𑁆𑀓𑀁𑀲𑀻𑀬𑀦𑁆𑀢𑀻𑀢𑀺 𑀅𑀦𑀼𑀫𑁂𑀬𑁆𑀬𑁄𑀯 𑀓𑁆𑀭𑀺𑀬𑀸𑀯𑀺𑀲𑁂𑀲𑁄. 𑀇𑀥 𑀧𑀦 𑀤𑀽𑀭𑀦𑁆𑀢𑀺𑀓𑀸𑀤𑀺𑀲𑀼𑀢𑁆𑀢𑁂 𑀯𑀺𑀪𑀢𑁆𑀢𑀕𑁆𑀕𑀳𑀡𑁂𑀦 𑀅𑀧𑀸𑀤𑀸𑀦𑀲𑀜𑁆𑀜𑀸.

𑀯𑀼𑀢𑁆𑀢𑀜𑁆𑀘

‘‘𑀦𑀺𑀤𑁆𑀤𑀺𑀝𑁆𑀞𑀯𑀺𑀲𑀬𑀁 𑀓𑀺𑀜𑁆𑀘𑀺, 𑀉𑀧𑀸𑀢𑁆𑀢𑀯𑀺𑀲𑀬𑀁 𑀢𑀣𑀸;

𑀅𑀦𑀼𑀫𑁂𑀬𑁆𑀬𑀯𑀺𑀲𑀬𑀜𑁆𑀘𑀸𑀢𑀺, 𑀅𑀧𑀸𑀤𑀸𑀦𑀁 𑀢𑀺𑀥𑀸 𑀫𑀢’’𑀦𑁆𑀢𑀺.

𑀢𑀤𑁂𑀯 ¶ 𑀘𑀮𑀸𑀘𑀮𑀯𑀲𑁂𑀦 𑀤𑀼𑀯𑀺𑀥𑀫𑁆𑀧𑀺 𑀳𑁄𑀢𑀺.

𑀘𑀮𑀁 𑀬𑀣𑀸 𑁋 𑀥𑀸𑀯𑀢𑀸 𑀳𑀢𑁆𑀣𑀺𑀫𑁆𑀳𑀸 𑀧𑀢𑀺𑀢𑁄 𑀅𑀗𑁆𑀓𑀼𑀲𑀥𑀸𑀭𑀻.

𑀅𑀘𑀮𑀁 𑀬𑀣𑀸 𑁋 𑀧𑀩𑁆𑀩𑀢𑀸 𑀑𑀢𑀭𑀦𑁆𑀢𑀺 𑀯𑀦𑀘𑀭𑀸.

𑀪𑀬𑀳𑁂𑀢𑀼𑀫𑁆𑀳𑀺 𑁋 𑀘𑁄𑀭𑀸 𑀪𑀬𑀁 𑀚𑀸𑀬𑀢𑀺, 𑀢𑀡𑁆𑀳𑀸𑀬 𑀚𑀸𑀬𑀢𑀻 𑀪𑀬𑀁, 𑀧𑀸𑀧𑀢𑁄 𑀉𑀢𑁆𑀢𑀲𑀢𑀺, 𑀅𑀓𑁆𑀔𑀸𑀢𑀭𑀺 𑁋 𑀉𑀧𑀚𑁆𑀛𑀸𑀬𑀸 𑀲𑀺𑀓𑁆𑀔𑀁 𑀕𑀡𑁆𑀳𑀸𑀢𑀺, 𑀆𑀘𑀭𑀺𑀬𑀫𑁆𑀳𑀸 𑀅𑀥𑀻𑀢𑁂, 𑀆𑀘𑀭𑀺𑀬𑀢𑁄 𑀲𑀼𑀡𑀸𑀢𑀺.

‘‘𑀅𑀧𑀸𑀤𑀸𑀦’’𑀦𑁆𑀢𑀺 𑀅𑀥𑀺𑀓𑀸𑀭𑁄.

𑁩𑁦𑁯. 𑀥𑀸𑀢𑀼𑀦𑀸𑀫𑀸𑀦𑀫𑀼𑀧𑀲𑀕𑁆𑀕𑀬𑁄𑀕𑀸𑀤𑀻𑀲𑁆𑀯𑀧𑀺 𑀘.

𑀥𑀸𑀢𑀯𑁄 𑀘 𑀦𑀸𑀫𑀸𑀦𑀺 𑀘 𑀥𑀸𑀢𑀼𑀦𑀸𑀫𑀸𑀦𑀺, 𑀢𑁂𑀲𑀁 𑀅𑀯𑀺𑀳𑀺𑀢𑀮𑀓𑁆𑀔𑀡𑀸𑀦𑀁 𑀥𑀸𑀢𑀼𑀦𑀸𑀫𑀸𑀦𑀁 𑀧𑀬𑁄𑀕𑁂, 𑀉𑀧𑀲𑀕𑁆𑀕𑀬𑁄𑀕𑁂 𑀘 𑀆𑀤𑀺𑀲𑀤𑁆𑀤𑁂𑀦 𑀦𑀺𑀧𑀸𑀢𑀬𑁄𑀕𑁂 𑀘 𑀢𑀁𑀬𑀼𑀢𑁆𑀢𑀁 𑀓𑀸𑀭𑀓𑀁 𑀅𑀧𑀸𑀤𑀸𑀦𑀲𑀜𑁆𑀜𑀁 𑀳𑁄𑀢𑀺.

𑀥𑀸𑀢𑀼𑀧𑁆𑀧𑀬𑁄𑀕𑁂 𑀢𑀸𑀯 𑁋 𑀧𑀭𑀸𑀚𑀺𑀬𑁄𑀕𑁂 𑀬𑁄 𑀅𑀲𑀬𑁆𑀳𑁄, 𑀧𑀪𑀽𑀬𑁄𑀕𑁂 𑀧𑀪𑀯𑁄, 𑀚𑀦𑀺𑀬𑁄𑀕𑁂 𑀚𑀸𑀬𑀫𑀸𑀦𑀲𑁆𑀲 𑀧𑀓𑀢𑀺 𑀘. 𑀬𑀣𑀸 𑁋 𑀩𑀼𑀤𑁆𑀥𑀲𑁆𑀫𑀸 𑀧𑀭𑀸𑀚𑁂𑀦𑁆𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸. 𑀳𑀺𑀫𑀯𑀢𑀸 𑀧𑀪𑀯𑀦𑁆𑀢𑀺 𑀧𑀜𑁆𑀘 𑀫𑀳𑀸𑀦𑀤𑀺𑀬𑁄, 𑀅𑀦𑀯𑀢𑀢𑁆𑀢𑀫𑁆𑀳𑀸 𑀫𑀳𑀸𑀲𑀭𑀸 𑀧𑀪𑀯𑀦𑁆𑀢𑀺, 𑀅𑀘𑀺𑀭𑀯𑀢𑀺𑀬𑀸 𑀧𑀪𑀯𑀦𑁆𑀢𑀺 𑀓𑀼𑀦𑁆𑀦𑀤𑀺𑀬𑁄. 𑀓𑀸𑀫𑀢𑁄 𑀚𑀸𑀬𑀢𑀻 𑀲𑁄𑀓𑁄, 𑀬𑀲𑁆𑀫𑀸 𑀲𑁄 𑀚𑀸𑀬𑀢𑁂 𑀕𑀺𑀦𑀺, 𑀉𑀭𑀲𑁆𑀫𑀸 𑀚𑀸𑀢𑁄 𑀧𑀼𑀢𑁆𑀢𑁄, 𑀓𑀫𑁆𑀫𑀢𑁄 𑀚𑀸𑀢𑀁 𑀇𑀦𑁆𑀤𑁆𑀭𑀺𑀬𑀁.

𑀦𑀸𑀫𑀧𑁆𑀧𑀬𑁄𑀕𑁂 𑀅𑀜𑁆𑀜𑀢𑁆𑀣𑀺𑀢𑀭𑀸𑀤𑀻𑀳𑀺 𑀬𑀼𑀢𑁆𑀢𑁂 𑁋 𑀦𑀸𑀜𑁆𑀜𑀢𑁆𑀭 𑀤𑀼𑀓𑁆𑀔𑀸 𑀲𑀫𑁆𑀪𑁄𑀢𑀺, 𑀦𑀸𑀜𑁆𑀜𑀁 𑀤𑀼𑀓𑁆𑀔𑀸 𑀦𑀺𑀭𑀼𑀚𑁆𑀛𑀢𑀺, 𑀢𑀢𑁄 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦, 𑀢𑀢𑁄 𑀇𑀢𑀭𑀁, 𑀉𑀪𑀢𑁄 𑀲𑀼𑀚𑀸𑀢𑁄 𑀧𑀼𑀢𑁆𑀢𑁄 𑀇𑀘𑁆𑀘𑀸𑀤𑀺.

𑀉𑀧𑀲𑀕𑁆𑀕𑀬𑀼𑀢𑁆𑀢𑁂𑀲𑀼 ¶ 𑀅𑀧𑀧𑀭𑀻𑀳𑀺 𑀯𑀚𑁆𑀚𑀦𑀢𑁆𑀣𑁂𑀳𑀺 𑀬𑁄𑀕𑁂, 𑀫𑀭𑀺𑀬𑀸𑀤𑀸𑀪𑀺𑀯𑀺𑀥𑀺𑀅𑀢𑁆𑀣𑁂 𑀆𑀬𑁄𑀕𑁂 𑀧𑀢𑀺𑀦𑀸 𑀧𑀢𑀺𑀦𑀺𑀥𑀺𑀧𑀢𑀺𑀤𑀸𑀦𑀢𑁆𑀣𑁂𑀦 𑀬𑁄𑀕𑁂 𑀘. 𑀬𑀣𑀸 𑁋 𑀅𑀧𑀲𑀸𑀮𑀸𑀬 𑀆𑀬𑀦𑁆𑀢𑀺 𑀯𑀸𑀡𑀺𑀚𑀸, 𑀲𑀸𑀮𑀁 𑀯𑀚𑁆𑀚𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀧𑀭𑀺𑀧𑀩𑁆𑀩𑀢𑀸 𑀤𑁂𑀯𑁄 𑀯𑀲𑁆𑀲𑀢𑀺, 𑀧𑀩𑁆𑀩𑀢𑀁 𑀯𑀚𑁆𑀚𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀫𑀭𑀺𑀬𑀸𑀤𑀸𑀬𑀁 𑁋 𑀆𑀧𑀩𑁆𑀩𑀢𑀸 𑀔𑁂𑀢𑁆𑀢𑀁. 𑀅𑀪𑀺𑀯𑀺𑀥𑀺𑀫𑁆𑀳𑀺 𑁋 𑀆𑀩𑁆𑀭𑀳𑁆𑀫𑀮𑁄𑀓𑀸 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺, 𑀩𑁆𑀭𑀳𑁆𑀫𑀮𑁄𑀓𑀁 𑀅𑀪𑀺𑀩𑁆𑀬𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀢𑀺𑀦𑀺𑀥𑀺𑀫𑁆𑀳𑀺 𑁋 𑀩𑀼𑀤𑁆𑀥𑀲𑁆𑀫𑀸 𑀧𑀢𑀺 𑀲𑀸𑀭𑀺𑀧𑀼𑀢𑁆𑀢𑁄 𑀥𑀫𑁆𑀫𑀤𑁂𑀲𑀦𑀸𑀬 𑀆𑀮𑀧𑀢𑀺 𑀢𑁂𑀫𑀸𑀲𑀁. 𑀧𑀢𑀺𑀤𑀸𑀦𑁂 𑁋 𑀖𑀢𑀫𑀲𑁆𑀲 𑀢𑁂𑀮𑀲𑁆𑀫𑀸 𑀧𑀢𑀺 𑀤𑀤𑀸𑀢𑀺, 𑀓𑀦𑀓𑀫𑀲𑁆𑀲 𑀳𑀺𑀭𑀜𑁆𑀜𑀲𑁆𑀫𑀸 𑀧𑀢𑀺 𑀤𑀤𑀸𑀢𑀺.

𑀦𑀺𑀧𑀸𑀢𑀬𑀼𑀢𑁆𑀢𑁂𑀲𑀼 𑀭𑀺𑀢𑁂 𑀦𑀸𑀦𑀸 𑀯𑀺𑀦𑀸𑀤𑀻𑀳𑀺 𑀬𑁄𑀕𑁂 𑁋 𑀭𑀺𑀢𑁂 𑀲𑀤𑁆𑀥𑀫𑁆𑀫𑀸 𑀓𑀼𑀢𑁄 𑀲𑀼𑀔𑀁 𑀮𑀪𑀢𑀺. 𑀢𑁂 𑀪𑀺𑀓𑁆𑀔𑀽 𑀦𑀸𑀦𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑀸. 𑀯𑀺𑀦𑀸 𑀲𑀤𑁆𑀥𑀫𑁆𑀫𑀸 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀦𑀸𑀣𑁄 𑀮𑁄𑀓𑁂 𑀯𑀺𑀚𑁆𑀚𑀢𑀺. 𑀅𑀭𑀺𑀬𑁂𑀳𑀺 𑀧𑀼𑀣𑀕𑁂𑀯𑀸𑀬𑀁 𑀚𑀦𑁄, 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺.

𑀅𑀧𑀺𑀕𑁆𑀕𑀳𑀡𑁂𑀦 𑀓𑀫𑁆𑀫𑀸𑀧𑀸𑀤𑀸𑀦𑀓𑀸𑀭𑀓𑀫𑀚𑁆𑀛𑁂𑀧𑀺 𑀧𑀜𑁆𑀘𑀫𑀻 𑀓𑀸𑀮𑀤𑁆𑀥𑀸𑀦𑁂𑀳𑀺, 𑀧𑀓𑁆𑀔𑀲𑁆𑀫𑀸 𑀯𑀺𑀚𑁆𑀛𑀢𑀺 𑀫𑀺𑀕𑀁 𑀮𑀼𑀤𑁆𑀤𑀓𑁄, 𑀇𑀢𑁄 𑀧𑀓𑁆𑀔𑀲𑁆𑀫𑀸 𑀫𑀺𑀕𑀁 𑀯𑀺𑀚𑁆𑀛𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀫𑀸𑀲𑀲𑁆𑀫𑀸 𑀪𑀼𑀜𑁆𑀚𑀢𑀺 𑀪𑁄𑀚𑀦𑀁, 𑀓𑁄𑀲𑀸 𑀯𑀺𑀚𑁆𑀛𑀢𑀺 𑀓𑀼𑀜𑁆𑀚𑀭𑀁.

𑀘𑀲𑀤𑁆𑀤𑀕𑁆𑀕𑀳𑀡𑁂𑀦 𑀧𑀪𑀼𑀢𑁆𑀬𑀸𑀤𑀺𑀅𑀢𑁆𑀣𑁂, 𑀢𑀤𑀢𑁆𑀣𑀧𑁆𑀧𑀬𑁄𑀕𑁂 𑀘 𑁋 𑀬𑀢𑁄𑀳𑀁 𑀪𑀕𑀺𑀦𑀺 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑁄, 𑀬𑀢𑁄 𑀲𑀭𑀸𑀫𑀺 𑀅𑀢𑁆𑀢𑀸𑀦𑀁, 𑀬𑀢𑁄 𑀧𑀢𑁆𑀢𑁄𑀲𑁆𑀫𑀺 𑀯𑀺𑀜𑁆𑀜𑀼𑀢𑀁, 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁, 𑀬𑀢𑁄 𑀧𑀪𑀼𑀢𑀺, 𑀬𑀢𑁄 𑀧𑀝𑁆𑀞𑀸𑀬, 𑀢𑀢𑁄 𑀧𑀝𑁆𑀞𑀸𑀬 𑀇𑀘𑁆𑀘𑀸𑀤𑀺.

𑁩𑁧𑁦. 𑀭𑀓𑁆𑀔𑀡𑀢𑁆𑀣𑀸𑀦𑀫𑀺𑀘𑁆𑀙𑀺𑀢𑀁 ¶ .

𑀭𑀓𑁆𑀔𑀡𑀢𑁆𑀣𑀸𑀦𑀁 𑀥𑀸𑀢𑀽𑀦𑀁 𑀧𑀬𑁄𑀕𑁂 𑀬𑀁 𑀇𑀘𑁆𑀙𑀺𑀢𑀁, 𑀢𑀁 𑀓𑀸𑀭𑀓𑀁 𑀅𑀧𑀸𑀤𑀸𑀦𑀲𑀜𑁆𑀜𑀁 𑀳𑁄𑀢𑀺, 𑀘𑀓𑀸𑀭𑀸𑀥𑀺𑀓𑀸𑀭𑀢𑁄 𑀅𑀦𑀺𑀘𑁆𑀙𑀺𑀢𑀜𑁆𑀘. 𑀭𑀓𑁆𑀔𑀡𑀜𑁆𑀘𑁂𑀢𑁆𑀣 𑀦𑀺𑀯𑀸𑀭𑀡𑀁, 𑀢𑀸𑀬𑀦𑀜𑁆𑀘. 𑀓𑀸𑀓𑁂 𑀭𑀓𑁆𑀔𑀦𑁆𑀢𑀺 𑀢𑀡𑁆𑀟𑀼𑀮𑀸, 𑀬𑀯𑀸 𑀧𑀝𑀺𑀲𑁂𑀥𑁂𑀦𑁆𑀢𑀺 𑀕𑀸𑀯𑁄.

𑀅𑀦𑀺𑀘𑁆𑀙𑀺𑀢𑀁 𑀬𑀣𑀸 𑁋 𑀧𑀸𑀧𑀸 𑀘𑀺𑀢𑁆𑀢𑀁 𑀦𑀺𑀯𑀸𑀭𑀬𑁂, 𑀧𑀸𑀧𑀸𑀦𑀺𑀯𑀸𑀭𑁂𑀦𑁆𑀢𑀺, 𑀭𑀸𑀚𑀢𑁄 𑀯𑀸 𑀘𑁄𑀭𑀢𑁄 𑀯𑀸 𑀅𑀕𑁆𑀕𑀺𑀢𑁄 𑀯𑀸 𑀉𑀤𑀓𑀢𑁄 𑀯𑀸 𑀦𑀸𑀦𑀸𑀪𑀬𑀢𑁄 𑀯𑀸 𑀦𑀸𑀦𑀸𑀭𑁄𑀕𑀢𑁄 𑀯𑀸 𑀦𑀸𑀦𑀸𑀉𑀧𑀤𑁆𑀤𑀯𑀢𑁄 𑀯𑀸 𑀆𑀭𑀓𑁆𑀔𑀁 𑀕𑀡𑁆𑀳𑀦𑁆𑀢𑀼.

‘‘𑀇𑀘𑁆𑀙𑀺𑀢’’𑀫𑀺𑀢𑀺 𑀯𑀢𑁆𑀢𑀢𑁂.

𑁩𑁧𑁧. 𑀬𑁂𑀦 𑀯𑀸’𑀤𑀲𑁆𑀲𑀦𑀁.

𑀬𑁂𑀦 𑀅𑀤𑀲𑁆𑀲𑀦𑀫𑀺𑀘𑁆𑀙𑀺𑀢𑀁 𑀅𑀦𑁆𑀢𑀭𑀥𑀸𑀬𑀦𑁆𑀢𑁂𑀦, 𑀢𑀁 𑀓𑀸𑀭𑀓𑀁 𑀅𑀧𑀸𑀤𑀸𑀦𑀲𑀜𑁆𑀜𑀁 𑀳𑁄𑀢𑀺 𑀯𑀸, 𑀅𑀦𑁆𑀢𑀭𑀥𑀸𑀦𑁂𑀯𑀸𑀬𑀁. 𑀉𑀧𑀚𑁆𑀛𑀸𑀬𑀸 𑀅𑀦𑁆𑀢𑀭𑀥𑀸𑀬𑀢𑀺 𑀲𑀺𑀲𑁆𑀲𑁄, 𑀦𑀺𑀮𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀫𑀸𑀢𑀸𑀧𑀺𑀢𑀽𑀳𑀺 𑀅𑀦𑁆𑀢𑀭𑀥𑀸𑀬𑀢𑀺 𑀧𑀼𑀢𑁆𑀢𑁄.

𑀯𑀸𑀢𑀺 𑀓𑀺𑀁? 𑀚𑁂𑀢𑀯𑀦𑁂 𑀅𑀦𑁆𑀢𑀭𑀳𑀺𑀢𑁄. 𑀬𑁂𑀦𑀸𑀢𑀺 𑀓𑀺𑀁? 𑀬𑀓𑁆𑀔𑁄 𑀢𑀢𑁆𑀣𑁂𑀯 𑀅𑀦𑁆𑀢𑀭𑀥𑀸𑀬𑀢𑀺.

𑁩𑁧𑁨. 𑀤𑀽𑀭𑀦𑁆𑀢𑀺𑀓𑀤𑁆𑀥𑀓𑀸𑀮𑀦𑀺𑀫𑁆𑀫𑀸𑀦𑀢𑁆𑀯𑀸𑀮𑁄𑀧𑀤𑀺𑀲𑀸𑀬𑁄𑀕𑀯𑀺𑀪𑀢𑁆𑀢𑀸𑀭𑀧𑁆𑀧𑀬𑁄𑀕 𑀲𑀼𑀤𑁆𑀥𑀧𑁆𑀧𑀫𑁄𑀘𑀦 𑀳𑁂𑀢𑀼 𑀯𑀺𑀯𑀺𑀢𑁆𑀢𑀧𑁆𑀧𑀫𑀸𑀡 𑀧𑀼𑀩𑁆𑀩𑀬𑁄𑀕 𑀩𑀦𑁆𑀥𑀦 𑀕𑀼𑀡𑀯𑀘𑀦 𑀧𑀜𑁆𑀳 𑀓𑀣𑀦𑀣𑁄𑀓𑀸𑀓𑀢𑁆𑀢𑀽𑀲𑀼 𑀘.

𑀤𑀽𑀭𑀢𑁆𑀣𑁂, 𑀅𑀦𑁆𑀢𑀺𑀓𑀢𑁆𑀣𑁂, 𑀅𑀤𑁆𑀥𑀦𑀺𑀫𑁆𑀫𑀸𑀦𑁂, 𑀓𑀸𑀮𑀦𑀺𑀫𑁆𑀫𑀸𑀦𑁂, 𑀢𑁆𑀯𑀸𑀮𑁄𑀧𑁂, 𑀤𑀺𑀲𑀸𑀬𑁄𑀕𑁂, 𑀯𑀺𑀪𑀢𑁆𑀢𑁂, 𑀆𑀭𑀢𑀺𑀧𑁆𑀧𑀬𑁄𑀕𑁂, 𑀲𑀼𑀤𑁆𑀥𑀢𑁆𑀣𑀧𑁆𑀧𑀬𑁄𑀕𑁂, 𑀧𑀫𑁄𑀘𑀦𑀢𑁆𑀣𑀧𑁆𑀧𑀬𑁄𑀕𑁂, 𑀳𑁂𑀢𑁆𑀯𑀢𑁆𑀣𑁂, 𑀯𑀺𑀯𑀺𑀢𑁆𑀢𑀢𑁆𑀣𑀧𑁆𑀧𑀬𑁄𑀕𑁂, 𑀧𑀫𑀸𑀡𑀢𑁆𑀣𑁂, 𑀧𑀼𑀩𑁆𑀩𑀬𑁄𑀕𑁂, 𑀩𑀦𑁆𑀥𑀦𑀢𑁆𑀣𑀧𑁆𑀧𑀬𑁄𑀕𑁂, 𑀕𑀼𑀡𑀯𑀘𑀦𑁂 ¶ , 𑀧𑀜𑁆𑀳𑁂, 𑀓𑀣𑀦𑁂, 𑀣𑁄𑀓𑀢𑁆𑀣𑁂, 𑀅𑀓𑀢𑁆𑀢𑀭𑀺 𑀘 𑀬𑀤𑀯𑀥𑀺𑀪𑀽𑀢𑀁, 𑀳𑁂𑀢𑀼𑀓𑀫𑁆𑀫𑀸𑀤𑀺𑀪𑀽𑀢𑀜𑁆𑀘, 𑀢𑀁 𑀓𑀸𑀭𑀓𑀁 𑀅𑀧𑀸𑀤𑀸𑀦𑀲𑀜𑁆𑀜𑀁 𑀳𑁄𑀢𑀺, 𑀘𑀲𑀤𑁆𑀤𑁂𑀦 𑀬𑀣𑀸𑀬𑁄𑀕𑀁 𑀤𑀼𑀢𑀺𑀬𑀸, 𑀢𑀢𑀺𑀬𑀸, 𑀙𑀝𑁆𑀞𑀻 𑀘.

𑀏𑀢𑁆𑀣 𑀘 𑀤𑀽𑀭𑀦𑁆𑀢𑀺𑀓𑀜𑁆𑀘 𑀤𑀽𑀭𑀦𑁆𑀢𑀺𑀓𑀢𑁆𑀣𑀜𑁆𑀘𑀸𑀢𑀺 𑀤𑀽𑀭𑀦𑁆𑀢𑀺𑀓𑀦𑁆𑀢𑀺 𑀲𑀭𑀽𑀧𑁂𑀓𑀲𑁂𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀢𑁂𑀦 𑀤𑀽𑀭𑀦𑁆𑀢𑀺𑀓𑀢𑁆𑀣𑀧𑁆𑀧𑀬𑁄𑀕𑁂, 𑀢𑀤𑀢𑁆𑀣𑁂 𑀘 𑀅𑀧𑀸𑀤𑀸𑀦𑀲𑀜𑁆𑀜𑁄 𑀳𑁄𑀢𑀺.

𑀤𑀽𑀭𑀢𑁆𑀣𑀧𑁆𑀧𑀬𑁄𑀕𑁂 𑀢𑀸𑀯 𑁋 𑀓𑀻𑀯𑀤𑀽𑀭𑁄 𑀇𑀢𑁄 𑀦𑀴𑀓𑀸𑀭𑀕𑀸𑀫𑁄, 𑀢𑀢𑁄 𑀳𑀯𑁂 𑀤𑀽𑀭𑀢𑀭𑀁 𑀯𑀤𑀦𑁆𑀢𑀺, 𑀕𑀸𑀫𑀢𑁄 𑀦𑀸𑀢𑀺𑀤𑀽𑀭𑁂. 𑀆𑀭𑀓𑀸 𑀢𑁂 𑀫𑁄𑀖𑀧𑀼𑀭𑀺𑀲𑀸 𑀇𑀫𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸, 𑀆𑀭𑀓𑀸 𑀢𑁂𑀳𑀺 𑀪𑀕𑀯𑀸. 𑀤𑀽𑀭𑀢𑁆𑀣𑁂 𑁋 𑀤𑀽𑀭𑀢𑁄𑀯 𑀦𑀫𑀲𑁆𑀲𑀦𑁆𑀢𑀺, 𑀅𑀤𑁆𑀤𑀲 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁.

𑀅𑀦𑁆𑀢𑀺𑀓𑀢𑁆𑀣𑀧𑁆𑀧𑀬𑁄𑀕𑁂 𑁋 𑀅𑀦𑁆𑀢𑀺𑀓𑀁 𑀕𑀸𑀫𑀸, 𑀆𑀲𑀦𑁆𑀦𑀁 𑀕𑀸𑀫𑀸, 𑀲𑀫𑀻𑀧𑀁 𑀕𑀸𑀫𑀸, 𑀕𑀸𑀫𑀲𑁆𑀲 𑀲𑀫𑀻𑀧𑀦𑁆𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀸, 𑀢𑀢𑀺𑀬𑀸 𑀘, 𑀤𑀽𑀭𑀁 𑀕𑀸𑀫𑀁 𑀆𑀕𑀢𑁄, 𑀤𑀽𑀭𑁂𑀦 𑀕𑀸𑀫𑁂𑀦 𑀆𑀕𑀢𑁄, 𑀤𑀽𑀭𑀢𑁄 𑀕𑀸𑀫𑀸 𑀆𑀕𑀢𑁄𑀢𑀺 𑀅𑀢𑁆𑀣𑁄. 𑀤𑀽𑀭𑀁 𑀕𑀸𑀫𑁂𑀦 𑀯𑀸. 𑀅𑀦𑁆𑀢𑀺𑀓𑀁 𑀕𑀸𑀫𑀁 𑀆𑀕𑀢𑁄, 𑀅𑀦𑁆𑀢𑀺𑀓𑀁 𑀕𑀸𑀫𑁂𑀦 𑀯𑀸, 𑀆𑀲𑀦𑁆𑀦𑀁 𑀕𑀸𑀫𑀁, 𑀆𑀲𑀦𑁆𑀦𑀁 𑀕𑀸𑀫𑁂𑀦 𑀯𑀸 𑀇𑀘𑁆𑀘𑀸𑀤𑀺.

𑀅𑀤𑁆𑀥𑀓𑀸𑀮𑀦𑀺𑀫𑁆𑀫𑀸𑀦𑁂 𑀦𑀺𑀫𑁆𑀫𑀸𑀦𑀁 𑀦𑀸𑀫 𑀧𑀭𑀺𑀫𑀸𑀡𑀁, 𑀢𑀲𑁆𑀫𑀺𑀁 𑀕𑀫𑁆𑀬𑀫𑀸𑀦𑁂 𑁋 𑀇𑀢𑁄 𑀫𑀣𑀼𑀭𑀸𑀬 𑀘𑀢𑀽𑀲𑀼 𑀬𑁄𑀚𑀦𑁂𑀲𑀼 𑀲𑀗𑁆𑀓𑀲𑁆𑀲𑀁, 𑀭𑀸𑀚𑀕𑀳𑀢𑁄 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀫𑀢𑁆𑀣𑀓𑁂 𑀲𑀸𑀯𑀢𑁆𑀣𑀺.

𑀓𑀸𑀮𑀦𑀺𑀫𑁆𑀫𑀸𑀦𑁂 𑁋 𑀇𑀢𑁄 𑀏𑀓𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀮𑁄𑀓𑁂 𑀉𑀤𑀧𑀸𑀤𑀺, 𑀇𑀢𑁄 𑀯𑀲𑁆𑀲𑀲𑀳𑀲𑁆𑀲𑀘𑁆𑀘𑀬𑁂𑀦 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺.

𑀢𑁆𑀯𑀸𑀧𑀘𑁆𑀘𑀬𑀦𑁆𑀢𑀲𑁆𑀲 𑀮𑁄𑀧𑁄 𑀦𑀸𑀫 𑀢𑀤𑀢𑁆𑀣𑀲𑀫𑁆𑀪𑀯𑁂𑀧𑀺 𑀅𑀯𑀺𑀚𑁆𑀚𑀫𑀸𑀦𑀢𑀸, 𑀢𑀲𑁆𑀫𑀺𑀁 𑀢𑁆𑀯𑀸𑀮𑁄𑀧𑁂 𑀓𑀫𑁆𑀫𑀸𑀥𑀺𑀓𑀭𑀡𑁂𑀲𑀼 𑁋 𑀧𑀸𑀲𑀸𑀤𑀸 𑀲𑀗𑁆𑀓𑀫𑁂𑀬𑁆𑀬, 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀗𑁆𑀓𑀫𑁂𑀬𑁆𑀬𑀸𑀢𑀺 𑀅𑀢𑁆𑀣𑁄 ¶ . 𑀢𑀣𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀸 𑀲𑀗𑁆𑀓𑀫𑁂𑀬𑁆𑀬, 𑀅𑀪𑀺𑀥𑀫𑁆𑀫𑀸 𑀧𑀼𑀘𑁆𑀙𑀦𑁆𑀢𑀺, 𑀅𑀪𑀺𑀥𑀫𑁆𑀫𑀁 𑀲𑀼𑀢𑁆𑀯𑀸 𑀯𑀸, 𑀅𑀪𑀺𑀥𑀫𑁆𑀫𑀸 𑀓𑀣𑀬𑀦𑁆𑀢𑀺, 𑀅𑀪𑀺𑀥𑀫𑁆𑀫𑀁 𑀧𑀞𑀺𑀢𑁆𑀯𑀸 𑀯𑀸, 𑀆𑀲𑀦𑀸 𑀯𑀼𑀝𑁆𑀞𑀳𑁂𑀬𑁆𑀬, 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀯𑀸.

𑀤𑀺𑀲𑀢𑁆𑀣𑀯𑀸𑀘𑀻𑀳𑀺 𑀬𑁄𑀕𑁂, 𑀤𑀺𑀲𑀢𑁆𑀣𑁂 𑀘 𑁋 𑀇𑀢𑁄 𑀲𑀸 𑀧𑀼𑀭𑀺𑀫𑀸 𑀤𑀺𑀲𑀸, 𑀇𑀢𑁄 𑀲𑀸 𑀤𑀓𑁆𑀔𑀺𑀡𑀸 𑀤𑀺𑀲𑀸, 𑀇𑀢𑁄 𑀲𑀸 𑀧𑀘𑁆𑀙𑀺𑀫𑀸 𑀤𑀺𑀲𑀸, 𑀇𑀢𑁄 𑀲𑀸 𑀉𑀢𑁆𑀢𑀭𑀸 𑀤𑀺𑀲𑀸, 𑀅𑀯𑀻𑀘𑀺𑀢𑁄 𑀉𑀧𑀭𑀺𑀪𑀯𑀕𑁆𑀕𑀸, 𑀉𑀤𑁆𑀥𑀁 𑀧𑀸𑀤𑀢𑀮𑀸, 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸 𑀇𑀘𑁆𑀘𑀸𑀤𑀺. 𑀤𑀺𑀲𑀢𑁆𑀣𑁂 𑁋 𑀧𑀼𑀭𑀢𑁆𑀣𑀺𑀫𑀢𑁄 𑀤𑀓𑁆𑀔𑀺𑀡𑀢𑁄𑀢𑀺𑀆𑀤𑀺. 𑀏𑀢𑁆𑀣 𑀧𑀦 𑀲𑀢𑁆𑀢𑀫𑀺𑀬𑀢𑁆𑀣𑁂 𑀢𑁄𑀧𑀘𑁆𑀘𑀬𑁄𑀧𑀺 𑀪𑀯𑀺𑀲𑁆𑀲𑀢𑀺.

𑀯𑀺𑀪𑀢𑁆𑀢𑀁 𑀦𑀸𑀫 𑀲𑀬𑀁 𑀯𑀺𑀪𑀢𑁆𑀢𑀲𑁆𑀲𑁂𑀯 𑀢𑀤𑀜𑁆𑀜𑀢𑁄 𑀕𑀼𑀡𑁂𑀦 𑀯𑀺𑀪𑀚𑀦𑀁, 𑀢𑀲𑁆𑀫𑀺𑀁 𑀯𑀺𑀪𑀢𑁆𑀢𑁂 𑁋 𑀬𑀢𑁄 𑀧𑀡𑀻𑀢𑀢𑀭𑁄 𑀯𑀸 𑀯𑀺𑀲𑀺𑀝𑁆𑀞𑀢𑀭𑁄 𑀯𑀸 𑀦𑀢𑁆𑀣𑀺, 𑀅𑀢𑁆𑀢𑀤𑀦𑁆𑀢𑁄 𑀢𑀢𑁄 𑀯𑀭𑀁. 𑀓𑀺𑀜𑁆𑀘𑀸𑀧𑀺 𑀤𑀸𑀦𑀢𑁄 𑀲𑀻𑀮𑀫𑁂𑀯 𑀯𑀭𑀁, 𑀢𑀢𑁄 𑀫𑀬𑀸 𑀲𑀼𑀢𑀸 𑀅𑀲𑁆𑀲𑀼𑀢𑀫𑁂𑀯 𑀩𑀳𑀼𑀢𑀭𑀁, 𑀲𑀻𑀮𑀫𑁂𑀯 𑀲𑀼𑀢𑀸 𑀲𑁂𑀬𑁆𑀬𑁄. 𑀙𑀝𑁆𑀞𑀻 𑀘, 𑀙𑀦𑁆𑀦𑀯𑀼𑀢𑀻𑀦𑀁 𑀧𑀸𑀲𑀡𑁆𑀟𑀸𑀦𑀁 𑀧𑀯𑀭𑀁 𑀬𑀤𑀺𑀤𑀁 𑀲𑀼𑀕𑀢𑀯𑀺𑀦𑀬𑁄.

𑀆𑀭𑀢𑀺𑀧𑁆𑀧𑀬𑁄𑀕𑁄 𑀦𑀸𑀫 𑀯𑀺𑀭𑀫𑀡𑀢𑁆𑀣𑀲𑀤𑁆𑀤𑀧𑁆𑀧𑀬𑁄𑀕𑁄. 𑀢𑀢𑁆𑀣 𑁋 𑀅𑀲𑀤𑁆𑀥𑀫𑁆𑀫𑀸 𑀆𑀭𑀢𑀺, 𑀯𑀺𑀭𑀢𑀺 𑀧𑀸𑀧𑀸, 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄, 𑀅𑀧𑁆𑀧𑀝𑀺𑀯𑀺𑀭𑀢𑁄 𑀫𑀼𑀲𑀸𑀯𑀸𑀤𑀸.

𑀲𑀼𑀤𑁆𑀥𑀢𑁆𑀣𑀧𑁆𑀧𑀬𑁄𑀕𑁂 𑁋 𑀮𑁄𑀪𑀦𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀲𑀼𑀤𑁆𑀥𑁄 𑀅𑀲𑀁𑀲𑀝𑁆𑀞𑁄, 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀲𑀼𑀤𑁆𑀥𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀅𑀕𑀭𑀳𑀺𑀢𑁄.

𑀧𑀫𑁄𑀘𑀦𑀢𑁆𑀣𑀧𑁆𑀧𑀬𑁄𑀕𑁂 ¶ 𑁋 𑀧𑀭𑀺𑀫𑀼𑀢𑁆𑀢𑁄 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺, 𑀫𑀼𑀢𑁆𑀢𑁄 𑀫𑀸𑀭𑀩𑀦𑁆𑀥𑀦𑀸, 𑀦 𑀢𑁂 𑀫𑀼𑀘𑁆𑀘𑀦𑁆𑀢𑀺 𑀫𑀘𑁆𑀘𑀼𑀦𑀸, 𑀫𑀼𑀢𑁆𑀢𑁄𑀳𑀁 𑀲𑀩𑁆𑀩𑀧𑀸𑀲𑁂𑀳𑀺.

𑀳𑁂𑀢𑁆𑀯𑀢𑁆𑀣𑁂, 𑀲𑀭𑀽𑀧𑁂𑀓𑀲𑁂𑀲𑀲𑁆𑀲 𑀕𑀳𑀺𑀢𑀢𑁆𑀢𑀸 𑀳𑁂𑀢𑁆𑀯𑀢𑁆𑀣𑀧𑁆𑀧𑀬𑁄𑀕𑁂 𑀘 𑀲𑀩𑁆𑀩𑀦𑀸𑀫𑀢𑁄 𑁋 𑀓𑀲𑁆𑀫𑀸 𑀦𑀼 𑀢𑀼𑀫𑁆𑀳𑀁 𑀤𑀳𑀭𑀸 𑀦 𑀫𑀻𑀬𑀭𑁂, 𑀓𑀲𑁆𑀫𑀸 𑀇𑀥𑁂𑀯 𑀫𑀭𑀡𑀁 𑀪𑀯𑀺𑀲𑁆𑀲𑀢𑀺, 𑀓𑀲𑁆𑀫𑀸 𑀳𑁂𑀢𑀼𑀦𑀸, 𑀬𑀲𑁆𑀫𑀸 𑀘 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺, 𑀬𑀲𑁆𑀫𑀸 𑀢𑀺𑀳 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 𑀢𑀺𑀳 𑀪𑀺𑀓𑁆𑀔𑀯𑁂 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀩𑀼𑀤𑁆𑀥𑁄𑀲𑁆𑀫𑀺 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀫𑀸 𑀓𑀸𑀭𑀡𑀸, 𑀢𑀲𑁆𑀫𑀸 𑀓𑀸𑀭𑀡𑀸, 𑀓𑀺𑀁 𑀓𑀸𑀭𑀡𑀸. 𑀤𑀼𑀢𑀺𑀬𑀸, 𑀙𑀝𑁆𑀞𑀻 𑀘, 𑀓𑀺𑀁 𑀓𑀸𑀭𑀡𑀁, 𑀢𑀁 𑀓𑀺𑀲𑁆𑀲 𑀳𑁂𑀢𑀼, 𑀓𑀺𑀲𑁆𑀲 𑀢𑀼𑀫𑁆𑀳𑁂 𑀓𑀺𑀮𑀫𑀣.

𑀓𑁂𑀦 𑀳𑁂𑀢𑀼𑀦𑀸, 𑀓𑁂𑀦 𑀓𑀸𑀭𑀡𑁂𑀦, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸, 𑀢𑁂𑀦 𑀦𑀺𑀫𑀺𑀢𑁆𑀢𑁂𑀦, 𑀢𑁂𑀦 𑀯𑀼𑀢𑁆𑀢𑀫𑀺𑀘𑁆𑀘𑀸𑀤𑀻𑀲𑀼 ‘‘𑀳𑁂𑀢𑁆𑀯𑀢𑁆𑀣𑁂 𑀘𑀸’’𑀢𑀺 𑀢𑀢𑀺𑀬𑀸.

𑀯𑀺𑀯𑀺𑀢𑁆𑀢𑀁 𑀦𑀸𑀫 𑀯𑀺𑀯𑁂𑀘𑀦𑀁, 𑀢𑀤𑀢𑁆𑀣𑀧𑁆𑀧𑀬𑁄𑀕𑁂 𑁋 𑀯𑀺𑀯𑀺𑀢𑁆𑀢𑁄 𑀧𑀸𑀧𑀓𑀸 𑀥𑀫𑁆𑀫𑀸, 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺, 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺.

𑀧𑀫𑀸𑀡𑀢𑁆𑀣𑁂 𑀢𑀢𑀺𑀬𑀸 𑀘, 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀬𑁄𑀚𑀦𑀁, 𑀕𑀫𑁆𑀪𑀻𑀭𑀢𑁄 𑀘 𑀧𑀼𑀣𑀼𑀮𑀢𑁄 𑀘 𑀬𑁄𑀚𑀦𑀁 𑀘𑀦𑁆𑀤𑀪𑀸𑀕𑀸𑀬 𑀧𑀭𑀺𑀫𑀸𑀡𑀁, 𑀧𑀭𑀺𑀓𑁆𑀔𑁂𑀧𑀢𑁄 𑀦𑀯𑀬𑁄𑀚𑀦𑀲𑀢𑀧𑀭𑀺𑀫𑀸𑀡𑁄 𑀫𑀚𑁆𑀛𑀺𑀫𑀧𑀤𑁂𑀲𑁄.

𑀤𑀻𑀖𑀲𑁄 𑀦𑀯 𑀯𑀺𑀤𑀢𑁆𑀣𑀺𑀬𑁄 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸 𑀧𑀫𑀸𑀡𑀺𑀓𑀸 𑀓𑀸𑀭𑁂𑀢𑀩𑁆𑀩𑀸.

𑀏𑀢𑁆𑀣 𑀘 ‘‘𑀲𑁆𑀫𑀸𑀳𑀺𑀲𑁆𑀫𑀺𑀁𑀦’’𑀫𑀺𑀘𑁆𑀘𑀸𑀤𑀺𑀢𑁄 ‘‘𑀲𑁆𑀫𑀸’’𑀢𑀺 𑀘 ‘‘𑀲𑁄, 𑀯𑀸’’𑀢𑀺 𑀘 𑀯𑀢𑁆𑀢𑀫𑀸𑀦𑁂

𑁩𑁧𑁩. 𑀤𑀻𑀖𑁄𑀭𑁂𑀳𑀺 ¶ .

𑀤𑀻𑀖 𑀑𑀭𑀇𑀘𑁆𑀘𑁂𑀢𑁂𑀢𑀺 𑀲𑁆𑀫𑀸𑀯𑀘𑀦𑀲𑁆𑀲 𑀲𑁄𑀆𑀤𑁂𑀲𑁄 𑀳𑁄𑀢𑀺 𑀯𑀸.

𑀤𑀻𑀖𑀲𑁄, 𑀤𑀻𑀖𑀫𑁆𑀳𑀸 𑀯𑀸, [𑀑𑀭𑀲𑁄, 𑀑𑀭𑀫𑁆𑀳𑀸 𑀯𑀸] 𑀢𑀢𑀺𑀬𑀸 𑀘, 𑀬𑁄𑀚𑀦𑀁 𑀆𑀬𑀸𑀫𑁂𑀦, 𑀬𑁄𑀚𑀦𑀁 𑀯𑀺𑀢𑁆𑀣𑀸𑀭𑁂𑀦, 𑀬𑁄𑀚𑀦𑀁 𑀉𑀩𑁆𑀩𑁂𑀥𑁂𑀦 𑀲𑀸𑀲𑀧𑀭𑀸𑀲𑀺.

𑀧𑀞𑀫𑀢𑁆𑀣𑀯𑀸𑀘𑀓𑁂𑀦 𑀧𑀼𑀩𑁆𑀩𑀲𑀤𑁆𑀤𑁂𑀦 𑀬𑁄𑀕𑁄 𑀧𑀼𑀩𑁆𑀩𑀬𑁄𑀕𑁄, 𑀏𑀢𑁆𑀣 𑀘 𑀧𑀼𑀩𑁆𑀩𑀕𑁆𑀕𑀳𑀡𑀁 𑀅𑀤𑀺𑀲𑀢𑁆𑀣𑀯𑀼𑀢𑁆𑀢𑀺𑀦𑁄 𑀧𑀼𑀩𑁆𑀩𑀸𑀤𑀺𑀕𑁆𑀕𑀳𑀡𑀲𑁆𑀲𑀼𑀧𑀮𑀓𑁆𑀔𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀢𑁂𑀦 𑀧𑀭𑀸𑀤𑀺𑀬𑁄𑀕𑁂𑀧𑀺. 𑀬𑀣𑀸 𑁋 𑀧𑀼𑀩𑁆𑀩𑁂𑀯 𑀫𑁂 𑀪𑀺𑀓𑁆𑀔𑀯𑁂 𑀲𑀫𑁆𑀩𑁄𑀥𑀸, 𑀇𑀢𑁄 𑀧𑀼𑀩𑁆𑀩𑁂𑀦𑀸𑀳𑁄𑀲𑀺, 𑀢𑀢𑁄 𑀧𑀭𑀁 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀥𑀸𑀢𑀼𑀮𑀺𑀗𑁆𑀕𑁂𑀳𑀺 𑀧𑀭𑀸 𑀧𑀘𑁆𑀘𑀬𑀸, 𑀢𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦, 𑀢𑀢𑁄 𑀉𑀢𑁆𑀢𑀭𑀺𑀫𑁆𑀧𑀺 𑀇𑀘𑁆𑀘𑀸𑀤𑀺.

𑀩𑀦𑁆𑀥𑀦𑀢𑁆𑀣𑀧𑁆𑀧𑀬𑁄𑀕𑁂 𑀩𑀦𑁆𑀥𑀦𑀳𑁂𑀢𑀼𑀫𑁆𑀳𑀺 𑀇𑀡𑁂 𑀧𑀜𑁆𑀘𑀫𑀻, 𑀢𑀢𑀺𑀬𑀸 𑀘 𑀳𑁄𑀢𑀺, 𑀲𑀢𑀲𑁆𑀫𑀸 𑀩𑀤𑁆𑀥𑁄 𑀦𑀭𑁄 𑀭𑀜𑁆𑀜𑀸, 𑀲𑀢𑁂𑀦 𑀯𑀸 𑀩𑀤𑁆𑀥𑁄 𑀦𑀭𑁄.

𑀨𑀮𑀲𑀸𑀥𑀦𑀳𑁂𑀢𑀼𑀪𑀽𑀢𑀲𑁆𑀲 𑀕𑀼𑀡𑀲𑁆𑀲 𑀯𑀘𑀦𑀁 𑀕𑀼𑀡𑀯𑀘𑀦𑀁, 𑀢𑀲𑁆𑀫𑀺𑀁 𑀕𑀼𑀡𑀯𑀘𑀦𑁂 𑀧𑀜𑁆𑀘𑀫𑀻, 𑀢𑀢𑀺𑀬𑀸 𑀘, 𑀇𑀲𑁆𑀲𑀭𑀺𑀬𑀸 𑀚𑀦𑀁 𑀭𑀓𑁆𑀔𑀢𑀺 𑀭𑀸𑀚𑀸, 𑀇𑀲𑁆𑀲𑀭𑀺𑀬𑁂𑀦 𑀯𑀸, 𑀲𑀻𑀮𑀢𑁄 𑀦𑀁 𑀧𑀲𑀁𑀲𑀦𑁆𑀢𑀺, 𑀲𑀻𑀮𑁂𑀦 𑀯𑀸, 𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑀺𑀫𑀦𑁄 𑀇𑀘𑁆𑀘𑀸𑀤𑀺.

𑀧𑀜𑁆𑀳𑀓𑀣𑀦𑁂𑀲𑀼 𑁋 𑀓𑀼𑀢𑁄𑀲𑀺 𑀢𑁆𑀯𑀁, 𑀓𑀼𑀢𑁄 𑀪𑀯𑀁, 𑀧𑀸𑀝𑀮𑀺𑀧𑀼𑀢𑁆𑀢𑀢𑁄. 𑀏𑀢𑁆𑀣 𑀘 𑀓𑀣𑀦𑀁 𑀦𑀸𑀫 𑀯𑀺𑀲𑁆𑀲𑀚𑁆𑀚𑀦𑀁.

𑀣𑁄𑀓𑀢𑁆𑀣𑁂 𑀅𑀲𑀢𑁆𑀯𑀯𑀘𑀦𑁂 𑀓𑀭𑀡𑁂 𑀢𑀢𑀺𑀬𑀸 𑀘, 𑀣𑁄𑀓𑀸 𑀫𑀼𑀘𑁆𑀘𑀢𑀺, 𑀣𑁄𑀓𑁂𑀦 𑀫𑀼𑀘𑁆𑀘𑀢𑀺 𑀯𑀸, 𑀅𑀧𑁆𑀧𑀫𑀢𑁆𑀢𑀓𑀸 𑀫𑀼𑀘𑁆𑀘𑀢𑀺, 𑀅𑀧𑁆𑀧𑀫𑀢𑁆𑀢𑀓𑁂𑀦 𑀯𑀸, 𑀓𑀺𑀘𑁆𑀙𑀸 𑀫𑀼𑀘𑁆𑀘𑀢𑀺, 𑀓𑀺𑀘𑁆𑀙𑁂𑀦 𑀯𑀸.

𑀅𑀓𑀢𑁆𑀢𑀭𑀺 ¶ 𑀅𑀓𑀸𑀭𑀓𑁂 𑀜𑀸𑀧𑀓𑀳𑁂𑀢𑀼𑀫𑁆𑀳𑀺 𑁋 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀉𑀲𑁆𑀲𑀦𑁆𑀦𑀢𑁆𑀢𑀸 𑀯𑀺𑀧𑀼𑀮𑀢𑁆𑀢𑀸 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡, 𑀦 𑀢𑀸𑀯𑀺𑀤𑀁 𑀦𑀸𑀫𑀭𑀽𑀧𑀁 𑀅𑀳𑁂𑀢𑀼𑀓𑀁 𑀲𑀩𑁆𑀩𑀢𑁆𑀣 𑀲𑀩𑁆𑀩𑀤𑀸 𑀲𑀩𑁆𑀩𑁂𑀲𑀜𑁆𑀘 𑀏𑀓𑀲𑀤𑀺𑀲𑀪𑀸𑀯𑀸𑀧𑀢𑁆𑀢𑀺𑀢𑁄.

𑀳𑀼𑀢𑁆𑀯𑀸 𑀅𑀪𑀸𑀯𑀢𑁄 𑀦𑀺𑀘𑁆𑀘𑀸, 𑀉𑀤𑀬𑀩𑁆𑀩𑀬𑀧𑀻𑀴𑀦𑀸;

𑀤𑀼𑀓𑁆𑀔𑀸 𑀅𑀯𑀲𑀯𑀢𑁆𑀢𑀺𑀢𑁆𑀢𑀸, 𑀅𑀦𑀢𑁆𑀢𑀸𑀢𑀺 𑀢𑀺𑀮𑀓𑁆𑀔𑀡𑀁.

‘‘𑀧𑀜𑁆𑀘𑀫𑀻’’𑀢𑀺 𑀯𑀢𑁆𑀢𑀢𑁂.

𑁩𑁧𑁪. 𑀓𑀸𑀭𑀡𑀢𑁆𑀣𑁂 𑀘.

𑀓𑀭𑁄𑀢𑀺 𑀅𑀢𑁆𑀢𑀦𑁄 𑀨𑀮𑀦𑁆𑀢𑀺 𑀓𑀸𑀭𑀡𑀁, 𑀓𑀸𑀭𑀓𑀳𑁂𑀢𑀼 [𑀚𑀦𑀓𑀳𑁂𑀢𑀼], 𑀢𑀲𑁆𑀫𑀺𑀁 𑀓𑀸𑀭𑀡𑀢𑁆𑀣𑁂 𑀘 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀺, 𑀯𑀺𑀓𑀧𑁆𑀧𑁂𑀦𑀸𑀬𑀁, 𑀳𑁂𑀢𑁆𑀯𑀢𑁆𑀣𑁂 𑀢𑀢𑀺𑀬𑀸𑀬 𑀘 𑀯𑀺𑀳𑀺𑀢𑀢𑁆𑀢𑀸, 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀬𑀣𑀸𑀪𑀽𑀢𑀁 𑀅𑀤𑀲𑁆𑀲𑀦𑀸 𑀏𑀯𑀫𑀺𑀤𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀁, 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄, 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀇𑀘𑁆𑀘𑀸𑀤𑀺.

𑀓𑀲𑁆𑀫𑀺𑀁 𑀅𑀢𑁆𑀣𑁂 𑀙𑀝𑁆𑀞𑀻?

𑁩𑁧𑁫. 𑀲𑀸𑀫𑀺𑀲𑁆𑀫𑀺𑀁 𑀙𑀝𑁆𑀞𑀻.

𑀓𑁄 𑀘 𑀲𑀸𑀫𑀻?

𑁩𑁧𑁬. 𑀬𑀲𑁆𑀲 𑀯𑀸 𑀧𑀭𑀺𑀕𑁆𑀕𑀳𑁄 𑀢𑀁 𑀲𑀸𑀫𑀻.

𑀧𑀭𑀺𑀕𑁆𑀕𑀬𑁆𑀳𑀢𑀻𑀢𑀺 𑀧𑀭𑀺𑀕𑁆𑀕𑀳𑁄, 𑀬𑁄 𑀬𑀲𑁆𑀲 𑀧𑀭𑀺𑀕𑁆𑀕𑀳𑁄 𑀆𑀬𑀢𑁆𑀢𑁄 𑀲𑀫𑁆𑀩𑀦𑁆𑀥𑀻, 𑀢𑀁 𑀧𑀢𑀺 𑀲𑁄 𑀅𑀢𑁆𑀣𑁄 𑀲𑀸𑀫𑀺𑀲𑀜𑁆𑀜𑁄 𑀳𑁄𑀢𑀺. 𑀯𑀸𑀕𑁆𑀕𑀳𑀡𑁂𑀦 𑀲𑀸𑀫𑀺𑀢𑀩𑁆𑀩 𑀭𑀼𑀚𑀸𑀤𑀺𑀬𑁄𑀕𑁂𑀧𑀺.

𑀏𑀢𑁆𑀣 ¶ 𑀘 𑀓𑁆𑀭𑀺𑀬𑀸𑀪𑀺𑀲𑀫𑁆𑀩𑀦𑁆𑀥𑀸𑀪𑀸𑀯𑀸 𑀦 𑀓𑀸𑀭𑀓𑀢𑀸 𑀲𑀫𑁆𑀪𑀯𑀢𑀺. 𑀲𑀸𑀫𑀺𑀪𑀸𑀯𑁄 𑀳𑀺 𑀓𑁆𑀭𑀺𑀬𑀸𑀓𑀸𑀭𑀓𑀪𑀸𑀯𑀲𑁆𑀲 𑀨𑀮𑀪𑀸𑀯𑁂𑀦 𑀕𑀳𑀺𑀢𑁄, 𑀢𑀣𑀸 𑀳𑀺 ‘‘𑀭𑀜𑁆𑀜𑁄 𑀧𑀼𑀭𑀺𑀲𑁄’’𑀢𑀺 𑀯𑀼𑀢𑁆𑀢𑁂 𑀬𑀲𑁆𑀫𑀸 𑀭𑀸𑀚𑀸 𑀤𑀤𑀸𑀢𑀺, 𑀧𑀼𑀭𑀺𑀲𑁄 𑀘 𑀧𑀢𑀺𑀕𑁆𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 ‘‘𑀭𑀸𑀚𑀧𑀼𑀭𑀺𑀲𑁄’’𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀏𑀯𑀁 𑀬𑁄 𑀬𑀲𑁆𑀲 𑀆𑀬𑀢𑁆𑀢𑁄 𑀲𑁂𑀯𑀓𑀸𑀤𑀺𑀪𑀸𑀯𑁂𑀦 𑀯𑀸 𑀪𑀡𑁆𑀟𑀪𑀸𑀯𑁂𑀦 𑀯𑀸 𑀲𑀫𑀻𑀧 𑀲𑀫𑀽𑀳𑀸𑀯𑀬𑀯𑀯𑀺𑀓𑀸𑀭 𑀓𑀸𑀭𑀺𑀬𑀅𑀯𑀢𑁆𑀣𑀸 𑀚𑀸𑀢𑀺 𑀕𑀼𑀡 𑀓𑁆𑀭𑀺𑀬𑀸𑀤𑀺𑀯𑀲𑁂𑀦 𑀯𑀸, 𑀢𑀲𑁆𑀲 𑀲𑀩𑁆𑀩𑀲𑁆𑀲𑀸𑀧𑀺 𑀲𑁄 𑀲𑀫𑁆𑀩𑀦𑁆𑀥𑀸𑀥𑀸𑀭𑀪𑀽𑀢𑁄 𑀯𑀺𑀲𑁂𑀲𑀦𑀝𑁆𑀞𑀸𑀦𑀻 𑀆𑀕𑀫𑀻𑀯𑀲𑁂𑀦 𑀢𑀺𑀯𑀺𑀥𑁄𑀧𑀺 𑀅𑀢𑁆𑀣𑁄 𑀲𑀸𑀫𑀻 𑀦𑀸𑀫𑀸𑀢𑀺 𑀕𑀳𑁂𑀢𑀩𑁆𑀩𑁄.

𑀯𑀼𑀢𑁆𑀢𑀜𑁆𑀘

‘‘𑀓𑁆𑀭𑀺𑀬𑀸𑀓𑀸𑀭𑀓𑀲𑀜𑁆𑀚𑀸𑀢𑁄,

𑀅𑀲𑁆𑀲𑁂𑀤𑀁 𑀪𑀸𑀯𑀳𑁂𑀢𑀼𑀓𑁄;

𑀲𑀫𑁆𑀩𑀦𑁆𑀥𑁄 𑀦𑀸𑀫 𑀲𑁄 𑀅𑀢𑁆𑀣𑁄,

𑀢𑀢𑁆𑀣 𑀙𑀝𑁆𑀞𑀻 𑀯𑀺𑀥𑀻𑀬𑀢𑁂.

𑀧𑀸𑀭𑀢𑀦𑁆𑀢𑁆𑀬𑀜𑁆𑀳𑀺 𑀲𑀫𑁆𑀩𑀦𑁆𑀥𑁄,

𑀢𑀢𑁆𑀣 𑀙𑀝𑁆𑀞𑀻 𑀪𑀯𑁂𑀢𑀺𑀢𑁄;

𑀉𑀧𑀸𑀥𑀺𑀝𑁆𑀞𑀸𑀦𑀸 𑀕𑀫𑀺𑀢𑁄,

𑀦 𑀯𑀺𑀲𑁂𑀲𑁆𑀬𑀸𑀤𑀺𑀢𑁄 𑀢𑀺𑀢𑁄’’𑀢𑀺.

𑀯𑀺𑀲𑁂𑀲𑀦𑀢𑁄 𑀢𑀸𑀯 𑁋 𑀭𑀜𑁆𑀜𑁄 𑀧𑀼𑀭𑀺𑀲𑁄𑀢𑀺, 𑀏𑀢𑁆𑀣 𑀘 𑀭𑀸𑀚𑀸 𑀧𑀼𑀭𑀺𑀲𑀁 𑀅𑀜𑁆𑀜𑀲𑀸𑀫𑀺𑀢𑁄 𑀯𑀺𑀲𑁂𑀲𑁂𑀢𑀺 𑀦𑀺𑀯𑀢𑁆𑀢𑁂𑀢𑀻𑀢𑀺 𑀯𑀺𑀲𑁂𑀲𑀦𑀁, 𑀧𑀼𑀭𑀺𑀲𑁄 𑀢𑁂𑀦 𑀯𑀺𑀲𑁂𑀲𑀻𑀬𑀢𑀻𑀢𑀺 𑀯𑀺𑀲𑁂𑀲𑀺𑀢𑀩𑁆𑀩𑁄, 𑀏𑀯𑀁 𑀲𑀩𑁆𑀩𑀢𑁆𑀣 𑀯𑀺𑀲𑁂𑀲𑀺𑀢𑀩𑁆𑀩𑀬𑁄𑀕𑁂 𑀯𑀺𑀲𑁂𑀲𑀦𑀢𑁄𑀯 𑀙𑀝𑁆𑀞𑀻.

𑀪𑀡𑁆𑀟𑁂𑀦 𑀲𑀫𑁆𑀩𑀦𑁆𑀥𑁂 𑁋 𑀧𑀳𑀽𑀢𑀁 𑀫𑁂 𑀥𑀦𑀁 𑀲𑀓𑁆𑀓, 𑀏𑀢𑀲𑁆𑀲 𑀧𑀝𑀺𑀯𑀻𑀲𑁄, 𑀪𑀺𑀓𑁆𑀔𑀼𑀲𑁆𑀲 𑀧𑀢𑁆𑀢𑀘𑀻𑀯𑀭𑀁.

𑀲𑀫𑀻𑀧𑀲𑀫𑁆𑀩𑀦𑁆𑀥𑁂 𑁋 𑀅𑀫𑁆𑀩𑀯𑀦𑀲𑁆𑀲 𑀅𑀯𑀺𑀤𑀽𑀭𑁂, 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀲𑀦𑁆𑀢𑀺𑀓𑁂.

𑀲𑀫𑀽𑀳𑀲𑀫𑁆𑀩𑀦𑁆𑀥𑁂 ¶ 𑁋 𑀲𑀼𑀯𑀡𑁆𑀡𑀲𑁆𑀲 𑀭𑀸𑀲𑀺, 𑀪𑀺𑀓𑁆𑀔𑀽𑀦𑀁 𑀲𑀫𑀽𑀳𑁄.

𑀅𑀯𑀬𑀯𑀲𑀫𑁆𑀩𑀦𑁆𑀥𑁂 𑁋 𑀫𑀦𑀼𑀲𑁆𑀲𑀲𑁆𑀲𑁂𑀯 𑀢𑁂 𑀲𑀻𑀲𑀁, 𑀭𑀼𑀓𑁆𑀔𑀲𑁆𑀲 𑀲𑀸𑀔𑀸.

𑀯𑀺𑀓𑀸𑀭𑀲𑀫𑁆𑀩𑀦𑁆𑀥𑁂 𑁋 𑀲𑀼𑀯𑀡𑁆𑀡𑀲𑁆𑀲 𑀯𑀺𑀓𑀢𑀺, 𑀪𑀝𑁆𑀞𑀥𑀜𑁆𑀜𑀸𑀦𑀁 𑀲𑀢𑁆𑀢𑀼.

𑀓𑀸𑀭𑀺𑀬𑀲𑀫𑁆𑀩𑀦𑁆𑀥𑁂 𑁋 𑀬𑀯𑀲𑁆𑀲 𑀅𑀗𑁆𑀓𑀼𑀭𑁄, 𑀫𑁂𑀖𑀲𑁆𑀲 𑀲𑀤𑁆𑀤𑁄, 𑀧𑀼𑀢𑁆𑀢𑀸𑀧𑀺 𑀢𑀲𑁆𑀲 𑀩𑀳𑀯𑁄, 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄.

𑀅𑀯𑀢𑁆𑀣𑀸𑀲𑀫𑁆𑀩𑀦𑁆𑀥𑁂 𑁋 𑀔𑀦𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑁄, 𑀔𑀦𑁆𑀥𑀸𑀦𑀁 𑀚𑀭𑀸, 𑀔𑀦𑁆𑀥𑀸𑀦𑀁 𑀪𑁂𑀤𑁄.

𑀚𑀸𑀢𑀺𑀲𑀫𑁆𑀩𑀦𑁆𑀥𑁂 𑁋 𑀫𑀦𑀼𑀲𑁆𑀲𑀲𑁆𑀲 𑀪𑀸𑀯𑁄, 𑀫𑀦𑀼𑀲𑁆𑀲𑀸𑀦𑀁 𑀚𑀸𑀢𑀺.

𑀕𑀼𑀡𑀲𑀫𑁆𑀩𑀦𑁆𑀥𑁂 𑁋 𑀲𑀼𑀯𑀡𑁆𑀡𑀲𑁆𑀲 𑀯𑀡𑁆𑀡𑁄, 𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲, 𑀩𑀼𑀤𑁆𑀥𑀲𑁆𑀲 𑀕𑀼𑀡𑀖𑁄𑀲𑁄, 𑀧𑀼𑀧𑁆𑀨𑀸𑀦𑀁 𑀕𑀦𑁆𑀥𑁄, 𑀨𑀮𑀸𑀦𑀁 𑀭𑀲𑁄, 𑀘𑀺𑀢𑁆𑀢𑀲𑁆𑀲 𑀨𑀼𑀲𑀦𑀸, 𑀲𑀺𑀧𑁆𑀧𑀺𑀓𑀸𑀦𑀁 𑀲𑀢𑀁 𑀦𑀢𑁆𑀣𑀺, 𑀢𑀺𑀮𑀸𑀦𑀁 𑀫𑀼𑀝𑁆𑀞𑀺, 𑀢𑁂𑀲𑀁 𑀲𑀫𑀸𑀬𑁄𑀕𑁄, 𑀲𑀦𑁆𑀥𑀺𑀦𑁄 𑀯𑀺𑀫𑁄𑀓𑁆𑀔𑁄, 𑀢𑀣𑀸𑀕𑀢𑀲𑁆𑀲 𑀧𑀜𑁆𑀜𑀸𑀧𑀸𑀭𑀫𑀺𑀁 𑀆𑀭𑀩𑁆𑀪, 𑀧𑀼𑀩𑁆𑀩𑀘𑀭𑀺𑀬𑀁 𑀯𑀸, 𑀲𑀼𑀔𑀁 𑀢𑁂, 𑀤𑀼𑀓𑁆𑀔𑀁 𑀢𑁂, 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺, 𑀧𑀜𑁆𑀜𑀸𑀬 𑀧𑀝𑀼𑀪𑀸𑀯𑁄, 𑀭𑀽𑀧𑀲𑁆𑀲 𑀮𑀳𑀼𑀢𑀸, 𑀭𑀽𑀧𑀲𑁆𑀲 𑀫𑀼𑀤𑀼𑀢𑀸, 𑀭𑀽𑀧𑀲𑁆𑀲 𑀉𑀧𑀘𑀬𑁄.

𑀓𑁆𑀭𑀺𑀬𑀸𑀲𑀫𑁆𑀩𑀦𑁆𑀥𑁂 𑁋 𑀧𑀸𑀤𑀲𑁆𑀲 𑀉𑀓𑁆𑀔𑀺𑀧𑀦𑀁, 𑀧𑀸𑀤𑀲𑁆𑀲 𑀅𑀯𑀓𑁆𑀔𑁂𑀧𑀦𑀁 𑀯𑀸, 𑀳𑀢𑁆𑀣𑀲𑁆𑀲 𑀲𑀫𑀺𑀜𑁆𑀚𑀦𑀁, 𑀧𑀸𑀤𑀸𑀦𑀁 𑀧𑀲𑀸𑀭𑀡𑀁, 𑀥𑀸𑀢𑀽𑀦𑀁 𑀕𑀫𑀦𑀁, 𑀥𑀸𑀢𑀽𑀦𑀁𑀬𑁂𑀯 𑀞𑀸𑀦𑀁, 𑀦𑀺𑀲𑀚𑁆𑀚𑀸, 𑀲𑀬𑀦𑀁 𑀯𑀸. 𑀢𑀣𑀸 𑀢𑀲𑁆𑀲 𑀦𑀸𑀫𑀕𑁄𑀢𑁆𑀢𑀸𑀤𑀺, 𑀢𑀲𑁆𑀲 𑀓𑀸𑀭𑀡𑀁, 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄, 𑀢𑀲𑁆𑀲 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺, 𑀢𑀲𑁆𑀲 𑀧𑀘𑁆𑀙𑀢𑁄, 𑀦𑀕𑀭𑀲𑁆𑀲 𑀤𑀓𑁆𑀔𑀺𑀡𑀢𑁄, 𑀯𑀲𑁆𑀲𑀸𑀦𑀁 𑀢𑀢𑀺𑀬𑁂 𑀫𑀸𑀲𑁂, 𑀦 𑀢𑀲𑁆𑀲 𑀉𑀧𑀫𑀸, 𑀓𑀼𑀯𑁂𑀭𑀲𑁆𑀲 𑀩𑀮𑀺 𑀇𑀘𑁆𑀘𑀸𑀤𑀺.

𑀞𑀸𑀦𑀺𑀢𑁄 ¶ 𑁋 𑀬𑀫𑁂𑀤𑀦𑁆𑀢𑀲𑁆𑀲𑀸𑀤𑁂𑀲𑁄, 𑀑 𑀅𑀯𑀲𑁆𑀲.

𑀆𑀕𑀫𑀺𑀢𑁄 𑁋 𑀧𑀼𑀣𑀲𑁆𑀲𑀸𑀕𑀫𑁄 𑀇𑀘𑁆𑀘𑀸𑀤𑀺.

𑀲𑀸𑀫𑀺𑀬𑁄𑀕𑁂 𑁋 𑀤𑁂𑀯𑀸𑀦𑀫𑀺𑀦𑁆𑀤𑁄, 𑀫𑀺𑀕𑀸𑀦𑀁 𑀭𑀸𑀚𑀸.

𑀢𑀩𑁆𑀩 𑀭𑀼𑀚𑀸𑀤𑀺𑀬𑁄𑀕𑁂 𑁋 𑀫𑀳𑀸𑀲𑁂𑀦𑀸𑀧𑀢𑀻𑀦𑀁 𑀉𑀚𑁆𑀛𑀸𑀧𑁂𑀢𑀩𑁆𑀩𑀁 𑀯𑀺𑀓𑀦𑁆𑀤𑀺𑀢𑀩𑁆𑀩𑀁 𑀯𑀺𑀭𑀯𑀺𑀢𑀩𑁆𑀩𑀁, 𑀤𑁂𑀯𑀤𑀢𑁆𑀢𑀲𑁆𑀲 𑀭𑀼𑀚𑀢𑀺, 𑀢𑀲𑁆𑀲 𑀭𑁄𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀭𑀚𑀓𑀲𑁆𑀲 𑀯𑀢𑁆𑀣𑀁 𑀤𑀤𑀸𑀢𑀺, 𑀫𑀼𑀲𑀸𑀯𑀸𑀤𑀲𑁆𑀲 𑀑𑀢𑁆𑀢𑀧𑁆𑀧𑀁 𑀇𑀘𑁆𑀘𑀸𑀤𑀺.

‘‘𑀓𑁆𑀯𑀘𑀺, 𑀢𑀢𑀺𑀬𑀸𑀲𑀢𑁆𑀢𑀫𑀻𑀦’’𑀦𑁆𑀢𑀺 𑀘 𑀯𑀢𑁆𑀢𑀢𑁂.

𑁩𑁧𑁭. 𑀙𑀝𑁆𑀞𑀻 𑀘.

𑀢𑀢𑀺𑀬𑀸𑀲𑀢𑁆𑀢𑀫𑀻𑀦𑀫𑀢𑁆𑀣𑁂 𑀓𑁆𑀯𑀘𑀺 𑀙𑀝𑁆𑀞𑀻𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀬𑀚𑀲𑁆𑀲 𑀓𑀭𑀡𑁂 𑁋 𑀧𑀼𑀧𑁆𑀨𑀲𑁆𑀲 𑀩𑀼𑀤𑁆𑀥𑀁 𑀬𑀚𑀢𑀺, 𑀧𑀼𑀧𑁆𑀨𑁂𑀦 𑀯𑀸, 𑀖𑀢𑀲𑁆𑀲 𑀅𑀕𑁆𑀕𑀺𑀁 𑀚𑀼𑀳𑁄𑀢𑀺.

𑀲𑀼𑀳𑀺𑀢𑀢𑁆𑀣𑀬𑁄𑀕𑁂 𑁋 𑀧𑀢𑁆𑀢𑀁 𑀑𑀤𑀦𑀲𑁆𑀲 𑀧𑀽𑀭𑁂𑀢𑁆𑀯𑀸, 𑀑𑀤𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀫𑀫𑁂𑀯 𑀓𑀸𑀬𑀁 𑀧𑀽𑀭𑀁 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀅𑀲𑀼𑀘𑀺𑀦𑁄 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀧𑀽𑀭𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀲𑁆𑀲, 𑀧𑀽𑀭𑀢𑀺 𑀩𑀸𑀮𑁄 𑀧𑀸𑀧𑀲𑁆𑀲.

𑀢𑀼𑀮𑁆𑀬𑀢𑁆𑀣𑀓𑀺𑀫𑀮𑀫𑀸𑀤𑀺𑀬𑁄𑀕𑁂 𑁋 𑀧𑀺𑀢𑀼𑀲𑁆𑀲 𑀢𑀼𑀮𑁆𑀬𑁄, 𑀧𑀺𑀢𑀭𑀸 𑀯𑀸 𑀢𑀼𑀮𑁆𑀬𑁄, 𑀫𑀸𑀢𑀼 𑀲𑀤𑀺𑀲𑁄, 𑀫𑀸𑀢𑀭𑀸 𑀲𑀤𑀺𑀲𑁄 𑀯𑀸, 𑀓𑀺𑀁 𑀢𑀲𑁆𑀲 𑀘 𑀢𑀼𑀝𑁆𑀞𑀲𑁆𑀲, 𑀓𑀺𑀁 𑀢𑁂𑀦 𑀢𑀼𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀮𑀁 𑀢𑀲𑁆𑀲 𑀘 𑀢𑀼𑀝𑁆𑀞𑀲𑁆𑀲.

𑀓𑀢𑁆𑀢𑀭𑀺 𑀓𑀺𑀢𑀧𑁆𑀧𑀘𑁆𑀘𑀬𑀬𑁄𑀕𑁂 𑁋 𑀲𑁄𑀪𑀦𑀸 𑀓𑀘𑁆𑀘𑀸𑀬𑀦𑀲𑁆𑀲 𑀓𑀢𑀺, 𑀓𑀘𑁆𑀘𑀸𑀬𑀦𑁂𑀦 𑀯𑀸, 𑀭𑀜𑁆𑀜𑁄 𑀲𑀫𑁆𑀫𑀢𑁄, 𑀭𑀜𑁆𑀜𑀸 𑀯𑀸, 𑀏𑀯𑀁 𑀭𑀜𑁆𑀜𑁄 ¶ 𑀧𑀽𑀚𑀺𑀢𑁄, 𑀭𑀜𑁆𑀜𑁄 𑀲𑀓𑁆𑀓𑀢𑁄, 𑀭𑀜𑁆𑀜𑁄 𑀅𑀧𑀘𑀺𑀢𑁄, 𑀭𑀜𑁆𑀜𑁄 𑀫𑀸𑀦𑀺𑀢𑁄, 𑀅𑀫𑀢𑀁 𑀢𑁂𑀲𑀁 𑀪𑀺𑀓𑁆𑀔𑀯𑁂 𑀅𑀧𑀭𑀺𑀪𑀼𑀢𑁆𑀢𑀁, 𑀬𑁂𑀲𑀁 𑀓𑀸𑀬𑀕𑀢𑀸𑀲𑀢𑀺 𑀅𑀧𑀭𑀺𑀪𑀼𑀢𑁆𑀢𑀸 𑀇𑀘𑁆𑀘𑀸𑀤𑀺.

𑀲𑀢𑁆𑀢𑀫𑀺𑀬𑀢𑁆𑀣𑁂 𑀓𑀼𑀲𑀮𑀸𑀤𑀺𑀬𑁄𑀕𑁂 𑁋 𑀓𑀼𑀲𑀮𑀸 𑀦𑀘𑁆𑀘𑀕𑀻𑀢𑀲𑁆𑀲 𑀲𑀺𑀓𑁆𑀔𑀺𑀢𑀸 𑀘𑀸𑀢𑀼𑀭𑀺𑀢𑁆𑀣𑀺𑀬𑁄, 𑀓𑀼𑀲𑀮𑁄 𑀢𑁆𑀯𑀁 𑀭𑀣𑀲𑁆𑀲 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁, 𑀓𑀼𑀲𑀮𑁄 𑀫𑀕𑁆𑀕𑀲𑁆𑀲, 𑀓𑀼𑀲𑀮𑁄 𑀅𑀫𑀕𑁆𑀕𑀲𑁆𑀲, 𑀲𑀦𑁆𑀢𑀺 𑀳𑀺 𑀪𑀦𑁆𑀢𑁂 𑀉𑀴𑀸𑀭𑀸 𑀬𑀓𑁆𑀔𑀸 𑀪𑀕𑀯𑀢𑁄 𑀧𑀲𑀦𑁆𑀦𑀸, 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁, 𑀤𑀺𑀯𑀲𑁂 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸, 𑀫𑀸𑀲𑀲𑁆𑀲 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀇𑀘𑁆𑀘𑀸𑀤𑀺.

‘‘𑀓𑁆𑀯𑀘𑀺, 𑀙𑀝𑁆𑀞𑀻’’𑀢𑀺 𑀘 𑀯𑀢𑁆𑀢𑀢𑁂.

𑁩𑁧𑁮. 𑀤𑀼𑀢𑀺𑀬𑀸𑀧𑀜𑁆𑀘𑀫𑀻𑀦𑀜𑁆𑀘.

𑀤𑀼𑀢𑀺𑀬𑀸𑀧𑀜𑁆𑀘𑀫𑀻𑀦𑀫𑀢𑁆𑀣𑁂 𑀘 𑀓𑁆𑀯𑀘𑀺 𑀙𑀝𑁆𑀞𑀻𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀤𑀼𑀢𑀺𑀬𑀢𑁆𑀣𑁂 𑀓𑀫𑁆𑀫𑀦𑀺 𑀓𑀺𑀢𑀓𑀬𑁄𑀕𑁂 𑁋 𑀢𑀲𑁆𑀲 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄, 𑀲𑀳𑀲𑀸 𑀓𑀫𑁆𑀫𑀲𑁆𑀲 𑀓𑀢𑁆𑀢𑀸𑀭𑁄, 𑀅𑀫𑀢𑀲𑁆𑀲 𑀤𑀸𑀢𑀸, 𑀪𑀺𑀦𑁆𑀦𑀸𑀦𑀁 𑀲𑀦𑁆𑀥𑀸𑀢𑀸, 𑀲𑀳𑀺𑀢𑀸𑀦𑀁 𑀅𑀦𑀼𑀧𑁆𑀧𑀤𑀸𑀢𑀸, 𑀩𑁄𑀥𑁂𑀢𑀸 𑀧𑀚𑀸𑀬, 𑀓𑀫𑁆𑀫𑀲𑁆𑀲 𑀓𑀸𑀭𑀓𑁄 𑀦𑀢𑁆𑀣𑀺, 𑀯𑀺𑀧𑀸𑀓𑀲𑁆𑀲 𑀘 𑀯𑁂𑀤𑀓𑁄, 𑀅𑀯𑀺𑀲𑀁𑀯𑀸𑀤𑀓𑁄 𑀮𑁄𑀓𑀲𑁆𑀲, 𑀧𑀸𑀧𑀸𑀦𑀁 𑀅𑀓𑀭𑀡𑀁 𑀲𑀼𑀔𑀁, 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀸𑀤𑁄, 𑀅𑀘𑁆𑀙𑀭𑀺𑀬𑁄 𑀅𑀭𑀚𑀓𑁂𑀦 𑀯𑀢𑁆𑀣𑀸𑀦𑀁 𑀭𑀸𑀕𑁄, 𑀅𑀘𑁆𑀙𑀭𑀺𑀬𑁄 𑀅𑀕𑁄𑀧𑀸𑀮𑀓𑁂𑀦 𑀕𑀸𑀯𑀻𑀦𑀁 𑀤𑁄𑀳𑁄.

𑀢𑀣𑀸 𑀲𑀭𑀺𑀘𑁆𑀙𑀸𑀤𑀻𑀦𑀁 𑀓𑀫𑁆𑀫𑀦𑀺 𑁋 𑀫𑀸𑀢𑀼 𑀲𑀭𑀢𑀺, 𑀫𑀸𑀢𑀭𑀁 𑀲𑀭𑀢𑀺, 𑀦 𑀢𑁂𑀲𑀁 𑀓𑁄𑀘𑀺 𑀲𑀭𑀢𑀺, 𑀲𑀢𑁆𑀢𑀸𑀦𑀁 𑀓𑀫𑁆𑀫𑀧𑁆𑀧𑀘𑁆𑀘𑀬𑀸, 𑀧𑀼𑀢𑁆𑀢𑀲𑁆𑀲 𑀇𑀘𑁆𑀙𑀢𑀺, 𑀧𑀼𑀢𑁆𑀢𑀫𑀺𑀘𑁆𑀙𑀢𑀺.

𑀓𑀭𑁄𑀢𑀺𑀲𑁆𑀲 ¶ 𑀧𑀢𑀺𑀬𑀢𑀦𑁂 𑀘 𑁋 𑀧𑀢𑀺𑀬𑀢𑀦𑀁 𑀅𑀪𑀺𑀲𑀗𑁆𑀔𑀸𑀭𑁄, 𑀉𑀤𑀓𑀲𑁆𑀲 𑀧𑀢𑀺𑀓𑀼𑀭𑀼𑀢𑁂, 𑀉𑀤𑀓𑀁 𑀧𑀢𑀺𑀓𑀼𑀭𑀼𑀢𑁂, 𑀓𑀡𑁆𑀟𑀲𑁆𑀲 𑀧𑀢𑀺𑀓𑀼𑀭𑀼𑀢𑁂, 𑀓𑀡𑁆𑀟𑀁 𑀧𑀢𑀺𑀓𑀼𑀭𑀼𑀢𑁂.

𑀧𑀜𑁆𑀘𑀫𑀺𑀬𑀢𑁆𑀣𑁂 𑀧𑀭𑀺𑀳𑀸𑀦𑀺𑀪𑀬𑀢𑁆𑀣𑀬𑁄𑀕𑁂 𑁋 𑀅𑀲𑁆𑀲𑀯𑀦𑀢𑀸 𑀥𑀫𑁆𑀫𑀲𑁆𑀲 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀺𑀁 𑀦𑀼 𑀔𑁄 𑀅𑀳𑀁 𑀢𑀲𑁆𑀲 𑀲𑀼𑀔𑀲𑁆𑀲 𑀪𑀸𑀬𑀸𑀫𑀺, 𑀲𑀩𑁆𑀩𑁂 𑀢𑀲𑀦𑁆𑀢𑀺 𑀤𑀡𑁆𑀟𑀲𑁆𑀲, 𑀲𑀩𑁆𑀩𑁂 𑀪𑀸𑀬𑀦𑁆𑀢𑀺 𑀫𑀘𑁆𑀘𑀼𑀦𑁄, 𑀪𑀻𑀢𑁄 𑀘𑀢𑀼𑀦𑁆𑀦𑀁 𑀆𑀲𑀺𑀯𑀺𑀲𑀸𑀦𑀁 𑀇𑀘𑁆𑀘𑀸𑀤𑀺.

𑀓𑁆𑀯𑀘𑀻𑀢𑀺 𑀓𑀺𑀁? 𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸, 𑀓𑀸𑀮𑁂𑀦 𑀥𑀫𑁆𑀫𑀺𑀁 𑀓𑀣𑀁 𑀪𑀸𑀲𑀺𑀢𑀸 𑀳𑁄𑀢𑀺, 𑀧𑀭𑁂𑀲𑀁 𑀧𑀼𑀜𑁆𑀜𑀸𑀦𑀺 𑀅𑀦𑀼𑀫𑁄𑀤𑀺𑀢𑀸, 𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀺, 𑀓𑀝𑀁 𑀓𑀸𑀭𑀓𑁄, 𑀧𑀲𑀯𑁄 𑀖𑀸𑀢𑀓𑁄.

𑀢𑀣𑀸 𑀦 𑀦𑀺𑀝𑁆𑀞𑀸𑀤𑀻𑀲𑀼 𑀘 𑁋 𑀲𑀼𑀔𑀓𑀸𑀫𑀻 𑀯𑀺𑀳𑀸𑀭𑀁 𑀓𑀢𑁄, 𑀭𑀣𑀁 𑀓𑀢𑀯𑀦𑁆𑀢𑁄, 𑀭𑀣𑀁 𑀓𑀢𑀸𑀯𑀻, 𑀓𑀝𑀁 𑀓𑀢𑁆𑀯𑀸, 𑀓𑀝𑀁 𑀓𑀭𑁄𑀦𑁆𑀢𑁄, 𑀓𑀝𑀁 𑀓𑀭𑀸𑀦𑁄, 𑀓𑀝𑀁 𑀓𑀼𑀭𑀼𑀫𑀸𑀦𑁄 𑀇𑀘𑁆𑀘𑀸𑀤𑀺.

𑀓𑀲𑁆𑀫𑀺𑀁 𑀅𑀢𑁆𑀣𑁂 𑀲𑀢𑁆𑀢𑀫𑀻?

𑁩𑁧𑁯. 𑀑𑀓𑀸𑀲𑁂 𑀲𑀢𑁆𑀢𑀫𑀻.

𑀑𑀓𑀸𑀲𑀓𑀸𑀭𑀓𑁂 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀓𑁄 𑀘 𑀑𑀓𑀸𑀲𑁄?

𑁩𑁨𑁦. 𑀬𑁄𑀥𑀸𑀭𑁄 𑀢𑀫𑁄𑀓𑀸𑀲𑀁.

𑀆𑀥𑀸𑀭𑀻𑀬𑀢𑀺 𑀅𑀲𑁆𑀫𑀺𑀦𑁆𑀢𑀺 𑀆𑀥𑀸𑀭𑁄, 𑀅𑀥𑀺𑀓𑀭𑀡𑀁. 𑀓𑀢𑁆𑀢𑀼𑀓𑀫𑁆𑀫𑀲𑀫𑀯𑁂𑀢𑀸𑀦𑀁 𑀦𑀺𑀲𑀚𑁆𑀚𑀧𑀘𑀦𑀸𑀤𑀺𑀓𑁆𑀭𑀺𑀬𑀸𑀦𑀁 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀬𑁄 𑀆𑀥𑀸𑀭𑁄, 𑀢𑀁 𑀓𑀸𑀭𑀓𑀁 𑀑𑀓𑀸𑀲𑀲𑀜𑁆𑀜𑀁 𑀳𑁄𑀢𑀺.

𑀓𑀝𑁂 ¶ 𑀦𑀺𑀲𑀻𑀤𑀢𑀺 𑀤𑁂𑀯𑀤𑀢𑁆𑀢𑁄, 𑀣𑀸𑀮𑀺𑀬𑀁 𑀑𑀤𑀦𑀁 𑀧𑀘𑀢𑀺. 𑀏𑀢𑁆𑀣 𑀳𑀺 𑀤𑁂𑀯𑀤𑀢𑁆𑀢𑀢𑀡𑁆𑀟𑀼𑀮𑀸𑀦𑀁 𑀓𑀢𑁆𑀢𑀼𑀓𑀫𑁆𑀫𑀸𑀦𑀁 𑀥𑀸𑀭𑀡𑀢𑁄 𑀢𑀁𑀲𑀫𑀯𑁂𑀢𑀁 𑀆𑀲𑀦𑀧𑀘𑀦𑀲𑀗𑁆𑀔𑀸𑀢𑀁 𑀓𑁆𑀭𑀺𑀬𑀁 𑀥𑀸𑀭𑁂𑀢𑀺 𑀦𑀸𑀫.

𑀲𑁄 𑀧𑀦𑀸𑀬𑀫𑁄𑀓𑀸𑀲𑁄 𑀘𑀢𑀼𑀩𑁆𑀩𑀺𑀥𑁄 𑀩𑁆𑀬𑀸𑀧𑀺𑀓𑁄 𑀑𑀧𑀲𑀺𑀮𑁂𑀲𑀺𑀓𑁄 𑀲𑀸𑀫𑀻𑀧𑀺𑀓𑁄 𑀯𑁂𑀲𑀬𑀺𑀓𑁄𑀢𑀺.

𑀢𑀢𑁆𑀣 𑀩𑁆𑀬𑀸𑀧𑀺𑀓𑁄 𑀦𑀸𑀫 𑀬𑀢𑁆𑀣 𑀲𑀓𑀮𑁄𑀧𑀺 𑀆𑀥𑀸𑀭𑀪𑀽𑀢𑁄 𑀅𑀢𑁆𑀣𑁄 𑀆𑀥𑁂𑀬𑁆𑀬𑁂𑀦 𑀧𑀢𑁆𑀣𑀝𑁄 𑀳𑁄𑀢𑀺, 𑀬𑀲𑁆𑀫𑀺𑀜𑁆𑀘 𑀆𑀥𑁂𑀬𑁆𑀬𑀪𑀽𑀢𑀁 𑀓𑀺𑀜𑁆𑀘𑀺 𑀩𑁆𑀬𑀸𑀧𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀁 𑀬𑀣𑀸 𑁋 𑀢𑀺𑀮𑁂𑀲𑀼 𑀢𑁂𑀮𑀁 𑀅𑀢𑁆𑀣𑀺, 𑀔𑀻𑀮𑁂𑀲𑀼 𑀚𑀮𑀁, 𑀤𑀥𑀺𑀫𑁆𑀳𑀺 𑀲𑀧𑁆𑀧𑀻𑀢𑀺.

𑀑𑀧𑀲𑀺𑀮𑁂𑀲𑀺𑀓𑁄 𑀦𑀸𑀫 𑀧𑀘𑁆𑀘𑁂𑀓𑀲𑀺𑀤𑁆𑀥𑀸𑀦𑀁 𑀪𑀸𑀯𑀸𑀦𑀁 𑀬𑀢𑁆𑀣 𑀉𑀧𑀲𑀺𑀮𑁂𑀲𑁂𑀦 𑀉𑀧𑀕𑀫𑁄 𑀳𑁄𑀢𑀺, 𑀬𑀲𑁆𑀫𑀺𑀜𑁆𑀘 𑀆𑀥𑁂𑀬𑁆𑀬𑁄 𑀉𑀧𑀲𑀺𑀮𑀺𑀲𑁆𑀲𑀢𑀺 𑀅𑀮𑁆𑀮𑀻𑀬𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀁 𑀬𑀣𑀸 𑁋 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄 𑀲𑀗𑁆𑀖𑁄, 𑀣𑀸𑀮𑀺𑀬𑀁 𑀑𑀤𑀦𑀁 𑀧𑀘𑀢𑀺, 𑀖𑀝𑁂𑀲𑀼 𑀉𑀤𑀓𑀁 𑀅𑀢𑁆𑀣𑀺, 𑀤𑀽𑀭𑁂 𑀞𑀺𑀢𑁄, 𑀲𑀫𑀻𑀧𑁂 𑀞𑀺𑀢𑁄𑀢𑀺.

𑀲𑀸𑀫𑀻𑀧𑀺𑀓𑁄 𑀦𑀸𑀫 𑀬𑀢𑁆𑀣 𑀲𑀫𑀻𑀧𑁂 𑀲𑀫𑀻𑀧𑀺𑀯𑁄𑀳𑀸𑀭𑀁 𑀓𑀢𑁆𑀯𑀸 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀤𑀻𑀧𑀦𑀢𑁆𑀣𑀁 𑀆𑀥𑀸𑀭𑀪𑀸𑀯𑁄 𑀯𑀺𑀓𑀧𑁆𑀧𑀻𑀬𑀢𑀺, 𑀢𑀁 𑀬𑀣𑀸 𑁋 𑀕𑀗𑁆𑀕𑀸𑀬𑀁 𑀖𑁄𑀲𑁄 𑀯𑀲𑀢𑀺, 𑀕𑀗𑁆𑀕𑀸𑀬 𑀲𑀫𑀻𑀧𑁂 𑀯𑀚𑁄 𑀯𑀲𑀢𑀻𑀢𑀺 𑀅𑀢𑁆𑀣𑁄. 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂, 𑀲𑀸𑀯𑀢𑁆𑀣𑀺𑀬𑀸 𑀲𑀫𑀻𑀧𑁂𑀢𑀺 𑀅𑀢𑁆𑀣𑁄.

𑀯𑁂𑀲𑀬𑀺𑀓𑁄 𑀦𑀸𑀫 𑀬𑀢𑁆𑀣 𑀅𑀜𑁆𑀜𑀢𑁆𑀣𑀸𑀪𑀸𑀯𑀯𑀲𑁂𑀦, 𑀤𑁂𑀲𑀦𑁆𑀢𑀭𑀸𑀯𑀘𑁆𑀙𑁂𑀤𑀯𑀲𑁂𑀦 𑀯𑀸 𑀆𑀥𑀸𑀭𑀪𑀸𑀯𑁄 𑀧𑀭𑀺𑀓𑀧𑁆𑀧𑁄, 𑀢𑀁 𑀬𑀣𑀸 𑁋 𑀆𑀓𑀸𑀲𑁂 𑀲𑀓𑀼𑀡𑀸 𑀧𑀓𑁆𑀔𑀦𑁆𑀢𑀺, 𑀪𑀽𑀫𑀻𑀲𑀼 𑀫𑀦𑀼𑀲𑁆𑀲𑀸 𑀘𑀭𑀦𑁆𑀢𑀺, 𑀚𑀮𑁂𑀲𑀼 𑀫𑀘𑁆𑀙𑀸, 𑀧𑀸𑀤𑁂𑀲𑀼 𑀧𑀢𑀺𑀢𑁄, 𑀧𑀸𑀧𑀲𑁆𑀫𑀺𑀁 𑀭𑀫𑀢𑀻 𑀫𑀦𑁄, 𑀧𑀲𑀦𑁆𑀦𑁄 𑀩𑀼𑀤𑁆𑀥𑀲𑀸𑀲𑀦𑁂, 𑀧𑀜𑁆𑀜𑀸𑀬 𑀲𑀸𑀥𑀼, 𑀯𑀺𑀦𑀬𑁂 𑀦𑀺𑀧𑀼𑀡𑁄, 𑀫𑀸𑀢𑀭𑀺 𑀲𑀸𑀥𑀼, 𑀧𑀺𑀢𑀭𑀺 𑀦𑀺𑀧𑀼𑀡𑁄 𑀇𑀘𑁆𑀘𑀸𑀤𑀺.

𑀲𑀩𑁆𑀩𑁄𑀧𑀺 ¶ 𑀘𑀸𑀬𑀫𑀸𑀥𑀸𑀭𑁄 𑀧𑀥𑀸𑀦𑀯𑀲𑁂𑀦 𑀯𑀸 𑀧𑀭𑀺𑀓𑀧𑁆𑀧𑀺𑀢𑀯𑀲𑁂𑀦 𑀯𑀸 𑀓𑁆𑀭𑀺𑀬𑀸𑀬 𑀧𑀢𑀺𑀝𑁆𑀞𑀸 𑀪𑀯𑀢𑀻𑀢𑀺 𑀑𑀓𑀸𑀲𑁄𑀢𑁆𑀯𑁂𑀯 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀯𑀼𑀢𑁆𑀢𑀜𑁆𑀘𑁂𑀢𑀁

‘‘𑀓𑀺𑀭𑀺𑀬𑀸 𑀓𑀢𑁆𑀢𑀼𑀓𑀫𑁆𑀫𑀸𑀦𑀁,

𑀬𑀢𑁆𑀣 𑀳𑁄𑀢𑀺 𑀧𑀢𑀺𑀝𑁆𑀞𑀺𑀢𑀸;

‘𑀑𑀓𑀸𑀲𑁄’𑀢𑀺 𑀧𑀯𑀼𑀢𑁆𑀢𑁄 𑀲𑁄,

𑀘𑀢𑀼𑀥𑀸 𑀩𑁆𑀬𑀸𑀧𑀺𑀓𑀸𑀤𑀺𑀢𑁄.

𑀩𑁆𑀬𑀸𑀧𑀺𑀓𑁄 𑀢𑀺𑀮𑀔𑀻𑀭𑀸𑀤𑀺,

𑀓𑀝𑁄 𑀑𑀧𑀲𑀺𑀮𑁂𑀲𑀺𑀓𑁄;

𑀲𑀸𑀫𑀻𑀧𑀺𑀓𑁄 𑀢𑀼 𑀕𑀗𑁆𑀕𑀸𑀤𑀺,

𑀆𑀓𑀸𑀲𑁄 𑀯𑀺𑀲𑀬𑁄 𑀫𑀢𑁄’’𑀢𑀺.

‘‘𑀙𑀝𑁆𑀞𑀻, 𑀲𑀢𑁆𑀢𑀫𑀻’’𑀢𑀺 𑀘 𑀅𑀥𑀺𑀓𑀸𑀭𑁄.

𑁩𑁨𑁧. 𑀲𑀸𑀫𑀺𑀲𑁆𑀲𑀭𑀸𑀥𑀺𑀧𑀢𑀺𑀤𑀸𑀬𑀸𑀤𑀲𑀓𑁆𑀔𑀻𑀧𑀢𑀺𑀪𑀽𑀧𑀲𑀽𑀢𑀓𑀼𑀲𑀮𑁂𑀳𑀺 𑀘.

𑀲𑀸𑀫𑀻 𑀇𑀲𑁆𑀲𑀭 𑀅𑀥𑀺𑀧𑀢𑀺 𑀤𑀸𑀬𑀸𑀤 𑀲𑀓𑁆𑀔𑀺𑀧𑀢𑀺𑀪𑀽 𑀧𑀲𑀽𑀢 𑀓𑀼𑀲𑀮𑀇𑀘𑁆𑀘𑁂𑀢𑁂𑀳𑀺 𑀬𑁄𑀕𑁂 𑀙𑀝𑁆𑀞𑀻𑀯𑀺𑀪𑀢𑁆𑀢𑀺 𑀳𑁄𑀢𑀺, 𑀲𑀢𑁆𑀢𑀫𑀻 𑀘. 𑀉𑀪𑀬𑀢𑁆𑀣𑀁 𑀯𑀘𑀦𑀁.

𑀕𑀯𑀁 𑀲𑀸𑀫𑀺, 𑀕𑁄𑀲𑀼 𑀲𑀸𑀫𑀺, 𑀕𑀯𑀁 𑀇𑀲𑁆𑀲𑀭𑁄, 𑀕𑁄𑀲𑀼 𑀇𑀲𑁆𑀲𑀭𑁄, 𑀕𑀯𑀁 𑀅𑀥𑀺𑀧𑀢𑀺, 𑀕𑁄𑀲𑀼 𑀅𑀥𑀺𑀧𑀢𑀺, 𑀕𑀯𑀁 𑀤𑀸𑀬𑀸𑀤𑁄, 𑀕𑁄𑀲𑀼 𑀤𑀸𑀬𑀸𑀤𑁄, 𑀕𑀯𑀁 𑀲𑀓𑁆𑀔𑀺, 𑀕𑁄𑀲𑀼 𑀲𑀓𑁆𑀔𑀺, 𑀕𑀯𑀁 𑀧𑀢𑀺𑀪𑀽, 𑀕𑁄𑀲𑀼 𑀧𑀢𑀺𑀪𑀽, 𑀕𑀯𑀁 𑀧𑀲𑀽𑀢𑁄, 𑀕𑁄𑀲𑀼 𑀧𑀲𑀽𑀢𑁄, 𑀕𑀯𑀁 𑀓𑀼𑀲𑀮𑁄, 𑀕𑁄𑀲𑀼 𑀓𑀼𑀲𑀮𑁄.

𑁩𑁨𑁨. 𑀦𑀺𑀤𑁆𑀥𑀸𑀭𑀡𑁂 𑀘.

𑀦𑀻𑀳𑀭𑀺𑀢𑁆𑀯𑀸 𑀥𑀸𑀭𑀡𑀁 𑀦𑀺𑀤𑁆𑀥𑀸𑀭𑀡𑀁, 𑀚𑀸𑀢𑀺 𑀕𑀼𑀡 𑀓𑁆𑀭𑀺𑀬𑀸 𑀦𑀸𑀫𑁂𑀳𑀺 𑀲𑀫𑀼𑀤𑀸𑀬𑀢𑁄 𑀏𑀓𑀤𑁂𑀲𑀲𑁆𑀲 𑀧𑀼𑀣𑀓𑁆𑀓𑀭𑀡𑀁, 𑀢𑀲𑁆𑀫𑀺𑀁 𑀦𑀺𑀤𑁆𑀥𑀸𑀭𑀡𑀢𑁆𑀣𑁂 𑀕𑀫𑁆𑀬𑀫𑀸𑀦𑁂 ¶ 𑀢𑀢𑁄 𑀲𑀫𑀼𑀤𑀸𑀬𑀯𑀸𑀘𑀺𑀮𑀺𑀗𑁆𑀕𑀫𑁆𑀳𑀸 𑀙𑀝𑁆𑀞𑀻𑀯𑀺𑀪𑀢𑁆𑀢𑀺 𑀳𑁄𑀢𑀺, 𑀲𑀢𑁆𑀢𑀫𑀻 𑀘.

𑀫𑀦𑀼𑀲𑁆𑀲𑀸𑀦𑀁 𑀔𑀢𑁆𑀢𑀺𑀬𑁄 𑀲𑀽𑀭𑀢𑀫𑁄, 𑀫𑀦𑀼𑀲𑁆𑀲𑁂𑀲𑀼 𑀔𑀢𑁆𑀢𑀺𑀬𑁄 𑀲𑀽𑀭𑀢𑀫𑁄, 𑀓𑀡𑁆𑀳𑀸 𑀕𑀸𑀯𑀻𑀦𑀁 𑀲𑀫𑁆𑀧𑀦𑁆𑀦𑀔𑀻𑀭𑀢𑀫𑀸, 𑀓𑀡𑁆𑀳𑀸 𑀕𑀸𑀯𑀻𑀲𑀼 𑀲𑀫𑁆𑀧𑀦𑁆𑀦𑀔𑀻𑀭𑀢𑀫𑀸, 𑀅𑀤𑁆𑀥𑀺𑀓𑀸𑀦𑀁 𑀥𑀸𑀯𑀦𑁆𑀢𑁄 𑀲𑀻𑀖𑀢𑀫𑁄, 𑀅𑀤𑁆𑀥𑀺𑀓𑁂𑀲𑀼 𑀥𑀸𑀯𑀦𑁆𑀢𑁄 𑀲𑀻𑀖𑀢𑀫𑁄, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀭𑀳𑀢𑀁 𑀅𑀜𑁆𑀜𑀢𑀭𑁄 𑀅𑀳𑁄𑀲𑀺, 𑀅𑀭𑀳𑀦𑁆𑀢𑁂𑀲𑀼 𑀯𑀸 𑀇𑀘𑁆𑀘𑀸𑀤𑀺.

𑁩𑁨𑁩. 𑀅𑀦𑀸𑀤𑀭𑁂 𑀘.

𑀅𑀦𑀸𑀤𑀭𑁂 𑀕𑀫𑁆𑀬𑀫𑀸𑀦𑁂 𑀪𑀸𑀯𑀯𑀢𑀸 𑀮𑀺𑀗𑁆𑀕𑀫𑁆𑀳𑀸 𑀙𑀝𑁆𑀞𑀻𑀯𑀺𑀪𑀢𑁆𑀢𑀺 𑀳𑁄𑀢𑀺, 𑀲𑀢𑁆𑀢𑀫𑀻 𑀘. 𑀅𑀓𑀸𑀫𑀓𑀸𑀦𑀁 𑀫𑀸𑀢𑀸𑀧𑀺𑀢𑀽𑀦𑀁 𑀭𑀼𑀤𑀦𑁆𑀢𑀸𑀦𑀁 𑀧𑀩𑁆𑀩𑀚𑀺, 𑀫𑀸𑀢𑀸𑀧𑀺𑀢𑀽𑀲𑀼 𑀭𑀼𑀤𑀦𑁆𑀢𑁂𑀲𑀼 𑀧𑀩𑁆𑀩𑀚𑀺.

𑀆𑀓𑁄𑀝𑀬𑀦𑁆𑀢𑁄 𑀲𑁄 𑀦𑁂𑀢𑀺,

𑀲𑀺𑀯𑀺𑀭𑀸𑀚𑀲𑁆𑀲 𑀧𑁂𑀓𑁆𑀔𑀢𑁄;

𑀫𑀘𑁆𑀘𑀼 𑀕𑀘𑁆𑀙𑀢𑀺 𑀆𑀤𑀸𑀬,

𑀧𑁂𑀓𑁆𑀔𑀫𑀸𑀦𑁂 𑀫𑀳𑀸𑀚𑀦𑁂.

𑁩𑁨𑁪. 𑀓𑀫𑁆𑀫𑀓𑀭𑀡𑀦𑀺𑀫𑀺𑀢𑁆𑀢𑀢𑁆𑀣𑁂𑀲𑀼 𑀲𑀢𑁆𑀢𑀫𑀻.

𑀓𑀫𑁆𑀫𑀓𑀭𑀡𑀦𑀺𑀫𑀺𑀢𑁆𑀢𑀇𑀘𑁆𑀘𑁂𑀢𑁂𑀲𑁆𑀯𑀢𑁆𑀣𑁂𑀲𑀼 𑀮𑀺𑀗𑁆𑀕𑀫𑁆𑀳𑀸 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀓𑀫𑁆𑀫𑀢𑁆𑀣𑁂 𑁋 𑀪𑀺𑀓𑁆𑀔𑀽𑀲𑀼 𑀅𑀪𑀺𑀯𑀸𑀤𑁂𑀦𑁆𑀢𑀺, 𑀫𑀼𑀤𑁆𑀥𑀦𑀺 𑀘𑀼𑀫𑁆𑀩𑀺𑀢𑁆𑀯𑀸, 𑀧𑀼𑀭𑀺𑀲𑀲𑁆𑀲 𑀩𑀸𑀳𑀸𑀲𑀼 𑀕𑀳𑁂𑀢𑁆𑀯𑀸.

𑀓𑀭𑀡𑀢𑁆𑀣𑁂 𑁋 𑀳𑀢𑁆𑀣𑁂𑀲𑀼 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺, 𑀧𑀢𑁆𑀢𑁂𑀲𑀼 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺, 𑀧𑀣𑁂𑀲𑀼 𑀕𑀘𑁆𑀙𑀦𑁆𑀢𑀺, 𑀲𑁄𑀧𑀺 𑀫𑀁 𑀅𑀦𑀼𑀲𑀸𑀲𑁂𑀬𑁆𑀬, 𑀲𑀫𑁆𑀧𑀝𑀺𑀘𑁆𑀙𑀸𑀫𑀺 𑀫𑀢𑁆𑀣𑀓𑁂.

𑀦𑀺𑀫𑀺𑀢𑁆𑀢𑀢𑁆𑀣𑁂 ¶ 𑁋 𑀤𑀻𑀧𑀺 𑀘𑀫𑁆𑀫𑁂𑀲𑀼 𑀳𑀜𑁆𑀜𑀢𑁂, 𑀓𑀼𑀜𑁆𑀚𑀭𑁄 𑀤𑀦𑁆𑀢𑁂𑀲𑀼 𑀳𑀜𑁆𑀜𑀢𑁂, 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀫𑀼𑀲𑀸𑀯𑀸𑀤𑀦𑀺𑀫𑀺𑀢𑁆𑀢𑀁 𑀫𑀼𑀲𑀸𑀯𑀸𑀤𑀧𑁆𑀧𑀘𑁆𑀘𑀬𑀸𑀢𑀺 𑀅𑀢𑁆𑀣𑁄.

‘‘𑀲𑀢𑁆𑀢𑀫𑀻’’𑀢𑀺 𑀅𑀥𑀺𑀓𑀸𑀭𑁄.

𑁩𑁨𑁫. 𑀲𑀫𑁆𑀧𑀤𑀸𑀦𑁂 𑀘.

𑀲𑀫𑁆𑀧𑀤𑀸𑀦𑀢𑁆𑀣𑁂 𑀘 𑀮𑀺𑀗𑁆𑀕𑀫𑁆𑀳𑀸 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀲𑀗𑁆𑀖𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁, 𑀲𑀗𑁆𑀖𑁂 𑀕𑁄𑀢𑀫𑀺 𑀤𑁂𑀳𑀺, 𑀲𑀗𑁆𑀖𑁂 𑀢𑁂 𑀤𑀺𑀦𑁆𑀦𑁂 𑀅𑀳𑀜𑁆𑀘𑁂𑀯 𑀧𑀽𑀚𑀺𑀢𑁄 𑀪𑀯𑀺𑀲𑁆𑀲𑀸𑀫𑀺.

𑀬𑀸 𑀧𑀮𑀸𑀮𑀫𑀬𑀁 𑀫𑀸𑀮𑀁, 𑀦𑀸𑀭𑀻 𑀤𑀢𑁆𑀯𑀸𑀦 𑀘𑁂𑀢𑀺𑀬𑁂;

𑀅𑀮𑀢𑁆𑀣 𑀓𑀜𑁆𑀘𑀦𑀫𑀬𑀁, 𑀫𑀸𑀮𑀁 𑀩𑁄𑀚𑁆𑀛𑀗𑁆𑀕𑀺𑀓𑀜𑁆𑀘 𑀲𑀸.

𑁩𑁨𑁬. 𑀧𑀜𑁆𑀘𑀫𑁆𑀬𑀢𑁆𑀣𑁂 𑀘.

𑀧𑀜𑁆𑀘𑀫𑁆𑀬𑀢𑁆𑀣𑁂 𑀘 𑀮𑀺𑀗𑁆𑀕𑀫𑁆𑀳𑀸 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀓𑀤𑀮𑀻𑀲𑀼 𑀕𑀚𑁂 𑀭𑀓𑁆𑀔𑀦𑁆𑀢𑀺.

𑁩𑁨𑁭. 𑀓𑀸𑀮𑀪𑀸𑀯𑁂𑀲𑀼 𑀘.

𑀓𑀸𑀮𑁄 𑀦𑀸𑀫 𑀦𑀺𑀫𑁂𑀲 𑀔𑀡 𑀮𑀬 𑀫𑀼𑀳𑀼𑀢𑁆𑀢 𑀧𑀼𑀩𑁆𑀩𑀡𑁆𑀳𑀸𑀤𑀺𑀓𑁄, 𑀪𑀸𑀯𑁄 𑀦𑀸𑀫 𑀓𑁆𑀭𑀺𑀬𑀸, 𑀲𑀸 𑀘𑁂𑀢𑁆𑀣 𑀓𑁆𑀭𑀺𑀬𑀦𑁆𑀢𑀭𑀽𑀧𑀮𑀓𑁆𑀔𑀡𑀸𑀯 𑀅𑀥𑀺𑀧𑁆𑀧𑁂𑀢𑀸, 𑀢𑀲𑁆𑀫𑀺𑀁 𑀓𑀸𑀮𑀢𑁆𑀣𑁂 𑀘 𑀪𑀸𑀯𑀮𑀓𑁆𑀔𑀡𑁂 𑀪𑀸𑀯𑀢𑁆𑀣𑁂 𑀘 𑀮𑀺𑀗𑁆𑀕𑀫𑁆𑀳𑀸 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀓𑀸𑀮𑁂 𑁋 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀕𑀢𑁄, 𑀲𑀸𑀬𑀦𑁆𑀳𑀲𑀫𑀬𑁂 𑀆𑀕𑀢𑁄, 𑀅𑀓𑀸𑀮𑁂 𑀯𑀲𑁆𑀲𑀢𑀺 𑀢𑀲𑁆𑀲, 𑀓𑀸𑀮𑁂 𑀢𑀲𑁆𑀲 𑀦 𑀯𑀲𑁆𑀲𑀢𑀺, 𑀨𑀼𑀲𑁆𑀲𑀫𑀸𑀲𑀫𑁆𑀳𑀸 𑀢𑀻𑀲𑀼 𑀫𑀸𑀲𑁂𑀲𑀼 𑀯𑁂𑀲𑀸𑀔𑀫𑀸𑀲𑁄, 𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀘𑀓𑁆𑀔𑀼𑀫𑀸.

𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑁂 ¶ 𑁋 𑀪𑀺𑀓𑁆𑀔𑀼𑀲𑀗𑁆𑀖𑁂𑀲𑀼 𑀪𑁄𑀚𑀻𑀬𑀫𑀸𑀦𑁂𑀲𑀼 𑀕𑀢𑁄, 𑀪𑀼𑀢𑁆𑀢𑁂𑀲𑀼 𑀆𑀕𑀢𑁄, 𑀕𑁄𑀲𑀼 𑀤𑀼𑀬𑁆𑀳𑀫𑀸𑀦𑀸𑀲𑀼 𑀕𑀢𑁄, 𑀤𑀼𑀤𑁆𑀥𑀸𑀲𑀼 𑀆𑀕𑀢𑁄, 𑀚𑀸𑀬𑀫𑀸𑀦𑁂 𑀔𑁄 𑀲𑀸𑀭𑀺𑀧𑀼𑀢𑁆𑀢 𑀩𑁄𑀥𑀺𑀲𑀢𑁆𑀢𑁂 𑀅𑀬𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀲𑀁𑀓𑀫𑁆𑀧𑀺 𑀲𑀫𑁆𑀧𑀓𑀫𑁆𑀧𑀺 𑀲𑀫𑁆𑀧𑀯𑁂𑀥𑀺.

𑀧𑀸𑀲𑀸𑀡𑀸 𑀲𑀓𑁆𑀔𑀭𑀸 𑀘𑁂𑀯, 𑀓𑀞𑀮𑀸 𑀔𑀸𑀡𑀼𑀓𑀡𑁆𑀝𑀓𑀸;

𑀲𑀩𑁆𑀩𑁂 𑀫𑀕𑁆𑀕𑀸 𑀯𑀺𑀯𑀚𑁆𑀚𑁂𑀦𑁆𑀢𑀺, 𑀕𑀘𑁆𑀙𑀦𑁆𑀢𑁂 𑀮𑁄𑀓𑀦𑀸𑀬𑀓𑁂.

𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺 𑀇𑀘𑁆𑀘𑀸𑀤𑀺.

𑁩𑁨𑁮. 𑀉𑀧𑀸𑀛𑀸𑀥𑀺𑀓𑀺𑀲𑁆𑀲𑀭𑀯𑀘𑀦𑁂.

𑀤𑁆𑀯𑀺𑀧𑀤𑀫𑀺𑀤𑀁. 𑀅𑀥𑀺𑀓𑀢𑁆𑀣𑁂, 𑀇𑀲𑁆𑀲𑀭𑀢𑁆𑀣𑁂 𑀘 𑀯𑀢𑁆𑀢𑀫𑀸𑀦𑁂𑀳𑀺 𑀉𑀧𑀅𑀥𑀺𑀇𑀘𑁆𑀘𑁂𑀢𑁂𑀳𑀺 𑀬𑁄𑀕𑁂 𑀅𑀥𑀺𑀓𑀺𑀲𑁆𑀲𑀭𑀯𑀘𑀦𑁂 𑀕𑀫𑁆𑀬𑀫𑀸𑀦𑁂 𑀮𑀺𑀗𑁆𑀕𑀫𑁆𑀳𑀸 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀅𑀥𑀺𑀓𑀯𑀘𑀦𑁂 𑁋 𑀉𑀧 𑀔𑀸𑀭𑀺𑀬𑀁 𑀤𑁄𑀡𑁄, 𑀔𑀸𑀭𑀺𑀬𑀸 𑀤𑁄𑀡𑁄 𑀅𑀥𑀺𑀓𑁄𑀢𑀺 𑀅𑀢𑁆𑀣𑁄. 𑀢𑀣𑀸 𑀉𑀧 𑀦𑀺𑀓𑁆𑀔𑁂 𑀓𑀳𑀸𑀧𑀡𑀁, 𑀅𑀥𑀺 𑀤𑁂𑀯𑁂𑀲𑀼 𑀩𑀼𑀤𑁆𑀥𑁄, 𑀲𑀫𑁆𑀫𑀼𑀢𑀺𑀉𑀧𑀧𑀢𑁆𑀢𑀺𑀯𑀺𑀲𑀼𑀤𑁆𑀥𑀺𑀤𑁂𑀯𑀲𑀗𑁆𑀔𑀸𑀢𑁂𑀳𑀺 𑀢𑀺𑀯𑀺𑀥𑁂𑀳𑀺𑀧𑀺 𑀤𑁂𑀯𑁂𑀳𑀺 𑀲𑀩𑁆𑀩𑀜𑁆𑀜𑀽 𑀩𑀼𑀤𑁆𑀥𑁄𑀯 𑀅𑀥𑀺𑀓𑁄𑀢𑀺 𑀅𑀢𑁆𑀣𑁄.

𑀇𑀲𑁆𑀲𑀭𑀯𑀘𑀦𑁂 𑁋 𑀅𑀥𑀺 𑀩𑁆𑀭𑀳𑁆𑀫𑀤𑀢𑁆𑀢𑁂 𑀧𑀜𑁆𑀘𑀸𑀮𑀸, 𑀩𑁆𑀭𑀳𑁆𑀫𑀤𑀢𑁆𑀢𑀺𑀲𑁆𑀲𑀭𑀸 𑀧𑀜𑁆𑀘𑀸𑀮𑀸𑀢𑀺 𑀅𑀢𑁆𑀣𑁄.

𑁩𑁨𑁯. 𑀫𑀡𑁆𑀟𑀺𑀢𑀼𑀲𑁆𑀲𑀼𑀓𑁆𑀓𑁂𑀲𑀼 𑀢𑀢𑀺𑀬𑀸 𑀘.

𑀫𑀡𑁆𑀟𑀺𑀢𑀉𑀲𑁆𑀲𑀼𑀓𑁆𑀓𑀇𑀘𑁆𑀘𑁂𑀢𑁂𑀲𑁆𑀯𑀢𑁆𑀣𑁂𑀲𑀼 𑀕𑀫𑁆𑀬𑀫𑀸𑀦𑁂𑀲𑀼 𑀮𑀺𑀗𑁆𑀕𑀫𑁆𑀳𑀸 𑀢𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺, 𑀲𑀢𑁆𑀢𑀫𑀻 𑀘. 𑀫𑀡𑁆𑀟𑀺𑀢𑀲𑀤𑁆𑀤𑁄 𑀧𑀦𑁂𑀢𑁆𑀣 𑀧𑀲𑀦𑁆𑀦𑀢𑁆𑀣𑀯𑀸𑀘𑀓𑁄, 𑀉𑀲𑁆𑀲𑀼𑀓𑁆𑀓𑀲𑀤𑁆𑀤𑁄 𑀲𑀈𑀳𑀢𑁆𑀣𑁄. 𑀜𑀸𑀡𑁂𑀦 𑀧𑀲𑀦𑁆𑀦𑁄, 𑀜𑀸𑀡𑀲𑁆𑀫𑀺𑀁 𑀧𑀲𑀦𑁆𑀦𑁄, 𑀜𑀸𑀡𑁂𑀦 𑀉𑀲𑁆𑀲𑀼𑀓𑁆𑀓𑁄, 𑀜𑀸𑀡𑀲𑁆𑀫𑀺𑀁 𑀉𑀲𑁆𑀲𑀼𑀓𑁆𑀓𑁄 𑀲𑀧𑁆𑀧𑀼𑀭𑀺𑀲𑁄.

𑀓𑀸𑀭𑀓𑀁 ¶ 𑀙𑀩𑁆𑀩𑀺𑀥𑀁 𑀲𑀜𑁆𑀜𑀸-𑀯𑀲𑀸 𑀙𑀩𑁆𑀩𑀻𑀲𑀢𑀻𑀯𑀺𑀥𑀁;

𑀧𑀪𑁂𑀤𑀸 𑀲𑀢𑁆𑀢𑀥𑀸 𑀓𑀫𑁆𑀫𑀁, 𑀓𑀢𑁆𑀢𑀸 𑀧𑀜𑁆𑀘𑀯𑀺𑀥𑁄 𑀪𑀯𑁂.

𑀓𑀭𑀡𑀁 𑀤𑀼𑀯𑀺𑀥𑀁 𑀳𑁄𑀢𑀺, 𑀲𑀫𑁆𑀧𑀤𑀸𑀦𑀁 𑀢𑀺𑀥𑀸 𑀫𑀢𑀁;

𑀅𑀧𑀸𑀤𑀸𑀦𑀁 𑀧𑀜𑁆𑀘𑀯𑀺𑀥𑀁, 𑀆𑀥𑀸𑀭𑁄 𑀢𑀼 𑀘𑀢𑀼𑀩𑁆𑀩𑀺𑀥𑁄.

𑀯𑀺𑀪𑀢𑁆𑀢𑀺𑀬𑁄 𑀧𑀦 𑀧𑀘𑁆𑀘𑀢𑁆𑀢𑀯𑀘𑀦𑀸𑀤𑀺𑀯𑀲𑁂𑀦 𑀅𑀝𑁆𑀞𑀯𑀺𑀥𑀸 𑀪𑀯𑀦𑁆𑀢𑀺. 𑀬𑀣𑀸𑀳

‘‘𑀧𑀘𑁆𑀘𑀢𑁆𑀢𑀫𑀼𑀧𑀬𑁄𑀕𑀜𑁆𑀘, 𑀓𑀭𑀡𑀁 𑀲𑀫𑁆𑀧𑀤𑀸𑀦𑀺𑀬𑀁;

𑀦𑀺𑀲𑁆𑀲𑀓𑁆𑀓𑀁 𑀲𑀸𑀫𑀺𑀯𑀘𑀦𑀁, 𑀪𑀼𑀫𑁆𑀫𑀸𑀮𑀧𑀦𑀫𑀝𑁆𑀞𑀫’’𑀦𑁆𑀢𑀺.

𑀇𑀢𑀺 𑀧𑀤𑀭𑀽𑀧𑀲𑀺𑀤𑁆𑀥𑀺𑀬𑀁 𑀓𑀸𑀭𑀓𑀓𑀡𑁆𑀟𑁄

𑀢𑀢𑀺𑀬𑁄.

𑁪. 𑀲𑀫𑀸𑀲𑀓𑀡𑁆𑀟

𑀅𑀣 𑀦𑀸𑀫𑀫𑁂𑀯 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀻𑀦𑀁 𑀲𑀫𑀸𑀲𑁄𑀢𑀺 𑀦𑀸𑀫𑀦𑀺𑀲𑁆𑀲𑀺𑀢𑀢𑁆𑀢𑀸, 𑀲𑀬𑀜𑁆𑀘 𑀦𑀸𑀫𑀺𑀓𑀢𑁆𑀢𑀸 𑀦𑀸𑀫𑀸𑀦𑀦𑁆𑀢𑀭𑀁 𑀲𑀫𑀸𑀲𑁄 𑀯𑀼𑀘𑁆𑀘𑀢𑁂.

𑀲𑁄 𑀘 𑀲𑀜𑁆𑀜𑀸𑀯𑀲𑁂𑀦 𑀙𑀩𑁆𑀩𑀺𑀥𑁄 𑀅𑀩𑁆𑀬𑀬𑀻𑀪𑀸𑀯𑁄 𑀓𑀫𑁆𑀫𑀥𑀸𑀭𑀬𑁄 𑀤𑀺𑀕𑀼 𑀢𑀧𑁆𑀧𑀼𑀭𑀺𑀲𑁄 𑀩𑀳𑀼𑀩𑁆𑀩𑀻𑀳𑀺 𑀤𑁆𑀯𑀦𑁆𑀤𑁄 𑀘𑀸𑀢𑀺.

𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲

𑀢𑀢𑁆𑀭 𑀧𑀞𑀫𑀁 𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲𑁄 𑀯𑀼𑀘𑁆𑀘𑀢𑁂;

𑀲𑁄 𑀘 𑀦𑀺𑀘𑁆𑀘𑀲𑀫𑀸𑀲𑁄𑀢𑀺 𑀅𑀲𑁆𑀲𑀧𑀤𑀯𑀺𑀕𑁆𑀕𑀳𑁄.

‘‘𑀉𑀧𑀦𑀕𑀭𑀁’’𑀇𑀢𑀻𑀥 𑁋 𑀉𑀧𑀲𑀤𑁆𑀤𑀢𑁄 𑀧𑀞𑀫𑁂𑀓𑀯𑀘𑀦𑀁 𑀲𑀺, 𑀢𑀲𑁆𑀲 𑀉𑀧𑀲𑀕𑁆𑀕𑀧𑀭𑀢𑁆𑀢𑀸 ‘‘𑀲𑀩𑁆𑀩𑀸𑀲𑀫𑀸𑀯𑀼𑀲𑁄𑀧𑀲𑀕𑁆𑀕𑀦𑀺𑀧𑀸𑀢𑀸𑀤𑀻𑀳𑀺 𑀘𑀸’’𑀢𑀺 𑀮𑁄𑀧𑁄, 𑀦𑀕𑀭𑀲𑀤𑁆𑀤𑀢𑁄 𑀙𑀝𑁆𑀞𑁂𑀓𑀯𑀘𑀦𑀁 𑀲, 𑀦𑀕𑀭𑀲𑁆𑀲 𑀲𑀫𑀻𑀧𑀦𑁆𑀢𑀺 𑀅𑀜𑁆𑀜𑀧𑀤𑁂𑀦 𑀯𑀺𑀕𑁆𑀕𑀳𑁂 𑁋

‘‘𑀦𑀸𑀫𑀸𑀦𑀁 𑀲𑀫𑀸𑀲𑁄 𑀬𑀼𑀢𑁆𑀢𑀢𑁆𑀣𑁄’’𑀢𑀺 𑀲𑀫𑀸𑀲𑀯𑀺𑀥𑀸𑀦𑁂 𑀲𑀩𑁆𑀩𑀢𑁆𑀣 𑀯𑀢𑁆𑀢𑀢𑁂.

𑁩𑁩𑁦. 𑀉𑀧𑀲𑀕𑁆𑀕𑀦𑀺𑀧𑀸𑀢𑀧𑀼𑀩𑁆𑀩𑀓𑁄 𑀅𑀩𑁆𑀬𑀬𑀻𑀪𑀸𑀯𑁄.

𑀉𑀧𑀲𑀕𑁆𑀕𑀧𑀼𑀩𑁆𑀩𑀓𑁄, 𑀦𑀺𑀧𑀸𑀢𑀧𑀼𑀩𑁆𑀩𑀓𑁄 𑀘 𑀦𑀸𑀫𑀺𑀓𑁄 𑀬𑀼𑀢𑁆𑀢𑀢𑁆𑀣𑁄 𑀢𑁂𑀳𑁂𑀯 𑀅𑀢𑁆𑀢𑀧𑀼𑀩𑁆𑀩𑀓𑁂𑀳𑀺 𑀉𑀧𑀲𑀕𑁆𑀕𑀦𑀺𑀧𑀸𑀢𑁂𑀳𑀺 𑀲𑀳 𑀦𑀺𑀘𑁆𑀘𑀁 𑀲𑀫𑀲𑀻𑀬𑀢𑁂, 𑀲𑁄 𑀘 𑀲𑀫𑀸𑀲𑁄 𑀅𑀩𑁆𑀬𑀬𑀻𑀪𑀸𑀯𑀲𑀜𑁆𑀜𑁄 𑀳𑁄𑀢𑀺. 𑀇𑀥 𑀅𑀩𑁆𑀬𑀬𑀻𑀪𑀸𑀯𑀸𑀤𑀺𑀲𑀜𑁆𑀜𑀸𑀯𑀺𑀥𑀸𑀬𑀓𑀲𑀼𑀢𑁆𑀢𑀸𑀦𑁂𑀯 𑀯𑀸 𑀲𑀜𑁆𑀜𑀸𑀯𑀺𑀥𑀸𑀦𑀫𑀼𑀔𑁂𑀦 𑀲𑀫𑀸𑀲𑀯𑀺𑀥𑀸𑀬𑀓𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺.

𑀢𑀢𑁆𑀣 𑀅𑀩𑁆𑀬𑀬𑀫𑀺𑀢𑀺 𑀉𑀧𑀲𑀕𑁆𑀕𑀦𑀺𑀧𑀸𑀢𑀸𑀦𑀁 𑀲𑀜𑁆𑀜𑀸, 𑀮𑀺𑀗𑁆𑀕𑀯𑀘𑀦𑀪𑁂𑀤𑁂𑀧𑀺 𑀩𑁆𑀬𑀬𑀭𑀳𑀺𑀢𑀢𑁆𑀢𑀸, 𑀅𑀩𑁆𑀬𑀬𑀸𑀦𑀁 𑀅𑀢𑁆𑀣𑀁 𑀯𑀺𑀪𑀸𑀯𑀬𑀢𑀻𑀢𑀺 𑀅𑀩𑁆𑀬𑀬𑀻𑀪𑀸𑀯𑁄 𑀅𑀩𑁆𑀬𑀬𑀢𑁆𑀣𑀧𑀼𑀩𑁆𑀩𑀗𑁆𑀕𑀫𑀢𑁆𑀢𑀸, 𑀅𑀦𑀩𑁆𑀬𑀬𑀁 𑀅𑀩𑁆𑀬𑀬𑀁 𑀪𑀯𑀢𑀻𑀢𑀺 𑀯𑀸 ¶ 𑀅𑀩𑁆𑀬𑀬𑀻𑀪𑀸𑀯𑁄. 𑀧𑀼𑀩𑁆𑀩𑀧𑀤𑀢𑁆𑀣𑀧𑁆𑀧𑀥𑀸𑀦𑁄 𑀳𑀺 𑀅𑀩𑁆𑀬𑀬𑀻𑀪𑀸𑀯𑁄, 𑀏𑀢𑁆𑀣 𑀘 ‘‘𑀉𑀧𑀲𑀕𑁆𑀕𑀦𑀺𑀧𑀸𑀢𑀧𑀼𑀩𑁆𑀩𑀓𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀉𑀧𑀲𑀕𑁆𑀕𑀦𑀺𑀧𑀸𑀢𑀸𑀦𑀫𑁂𑀯 𑀧𑀼𑀩𑁆𑀩𑀦𑀺𑀧𑀸𑀢𑁄.

𑁩𑁩𑁧. 𑀦𑀸𑀫𑀸𑀦𑀁 𑀲𑀫𑀸𑀲𑁄 𑀬𑀼𑀢𑁆𑀢𑀢𑁆𑀣𑁄.

𑀢𑁂𑀲𑀁 𑀦𑀸𑀫𑀸𑀦𑀁 𑀧𑀬𑀼𑀚𑁆𑀚𑀫𑀸𑀦𑀧𑀤𑀢𑁆𑀣𑀸𑀦𑀁 𑀬𑁄 𑀬𑀼𑀢𑁆𑀢𑀢𑁆𑀣𑁄, 𑀲𑁄 𑀲𑀫𑀸𑀲𑀲𑀜𑁆𑀜𑁄 𑀳𑁄𑀢𑀺, 𑀢𑀤𑀜𑁆𑀜𑀁 𑀯𑀸𑀓𑁆𑀬𑀫𑀺𑀢𑀺 𑀭𑀼𑀴𑁆𑀳𑀁.

𑀦𑀸𑀫𑀸𑀦𑀺 𑀲𑁆𑀬𑀸𑀤𑀺𑀯𑀺𑀪𑀢𑁆𑀬𑀦𑁆𑀢𑀸𑀦𑀺, 𑀲𑀫𑀲𑁆𑀲𑀢𑁂𑀢𑀺 𑀲𑀫𑀸𑀲𑁄, 𑀲𑀗𑁆𑀔𑀺𑀧𑀺𑀬𑀢𑀻𑀢𑀺 𑀅𑀢𑁆𑀣𑁄.

𑀯𑀼𑀢𑁆𑀢𑀜𑁆𑀳𑀺

‘‘𑀲𑀫𑀸𑀲𑁄 𑀧𑀤𑀲𑀗𑁆𑀔𑁂𑀧𑁄, 𑀧𑀤𑀧𑁆𑀧𑀘𑁆𑀘𑀬𑀲𑀁𑀳𑀺𑀢𑀁;

𑀢𑀤𑁆𑀥𑀺𑀢𑀁 𑀦𑀸𑀫 𑀳𑁄𑀢𑁂𑀯𑀁, 𑀯𑀺𑀜𑁆𑀜𑁂𑀬𑁆𑀬𑀁 𑀢𑁂𑀲𑀫𑀦𑁆𑀢𑀭’’𑀦𑁆𑀢𑀺.

𑀤𑀼𑀯𑀺𑀥𑀜𑁆𑀘𑀲𑁆𑀲 𑀲𑀫𑀲𑀦𑀁 𑀲𑀤𑁆𑀤𑀲𑀫𑀲𑀦𑀫𑀢𑁆𑀣𑀲𑀫𑀲𑀦𑀜𑁆𑀘, 𑀢𑀤𑀼𑀪𑀬𑀫𑁆𑀧𑀺 𑀮𑀼𑀢𑁆𑀢𑀲𑀫𑀸𑀲𑁂 𑀧𑀭𑀺𑀧𑀼𑀡𑁆𑀡𑀫𑁂𑀯 𑀮𑀩𑁆𑀪𑀢𑀺. 𑀅𑀮𑀼𑀢𑁆𑀢𑀲𑀫𑀸𑀲𑁂 𑀧𑀦 𑀅𑀢𑁆𑀣𑀲𑀫𑀲𑀦𑀫𑁂𑀯 𑀯𑀺𑀪𑀢𑁆𑀢𑀺𑀮𑁄𑀧𑀸𑀪𑀸𑀯𑀢𑁄, 𑀢𑀢𑁆𑀣𑀸𑀧𑀺 𑀯𑀸 𑀏𑀓𑀧𑀤𑀢𑁆𑀢𑀽𑀧𑀕𑀫𑀦𑀢𑁄 𑀤𑀼𑀯𑀺𑀥𑀫𑁆𑀧𑀺 𑀮𑀩𑁆𑀪𑀢𑁂𑀯. 𑀤𑁆𑀯𑁂 𑀳𑀺 𑀲𑀫𑀸𑀲𑀲𑁆𑀲 𑀧𑀬𑁄𑀚𑀦𑀸𑀦𑀺 𑀏𑀓𑀧𑀤𑀢𑁆𑀢𑀫𑁂𑀓𑀯𑀺𑀪𑀢𑁆𑀢𑀺𑀢𑁆𑀢𑀜𑁆𑀘𑀸𑀢𑀺.

𑀬𑀼𑀢𑁆𑀢𑁄 𑀅𑀢𑁆𑀣𑁄 𑀬𑀼𑀢𑁆𑀢𑀢𑁆𑀢𑁄, 𑀅𑀣 𑀯𑀸 𑀬𑀼𑀢𑁆𑀢𑁄 𑀲𑀗𑁆𑀕𑀢𑁄, 𑀲𑀫𑁆𑀩𑀦𑁆𑀥𑁄 𑀯𑀸 𑀅𑀢𑁆𑀣𑁄 𑀬𑀲𑁆𑀲 𑀲𑁄𑀬𑀁 𑀬𑀼𑀢𑁆𑀢𑀢𑁆𑀣𑁄, 𑀏𑀢𑁂𑀦 𑀲𑀗𑁆𑀕𑀢𑀢𑁆𑀣𑁂𑀦 𑀬𑀼𑀢𑁆𑀢𑀢𑁆𑀣𑀯𑀘𑀦𑁂𑀦 𑀪𑀺𑀦𑁆𑀦𑀢𑁆𑀣𑀸𑀦𑀁 𑀏𑀓𑀢𑁆𑀣𑀻𑀪𑀸𑀯𑁄 𑀲𑀫𑀸𑀲𑀮𑀓𑁆𑀔𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 𑀘 ‘‘𑀦𑀸𑀫𑀸𑀦’’𑀦𑁆𑀢𑀺 𑀯𑀘𑀦𑁂𑀦 ‘‘𑀤𑁂𑀯𑀤𑀢𑁆𑀢𑁄 𑀧𑀘𑀢𑀻’’𑀢𑀺𑀆𑀤𑀻𑀲𑀼 𑀆𑀔𑁆𑀬𑀸𑀢𑁂𑀦 𑀲𑀫𑀸𑀲𑁄 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀫𑁆𑀩𑀦𑁆𑀥𑀢𑁆𑀣𑁂𑀦 𑀧𑀦 𑀬𑀼𑀢𑁆𑀢𑀢𑁆𑀣𑀕𑁆𑀕𑀳𑀡𑁂𑀦 ‘‘𑀪𑀝𑁄 𑀭𑀜𑁆𑀜𑁄 𑀧𑀼𑀢𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀅𑀜𑁆𑀜𑀫𑀜𑁆𑀜𑀸𑀦𑀧𑁂𑀓𑁆𑀔𑁂𑀲𑀼, ‘‘𑀤𑁂𑀯𑀤𑀢𑁆𑀢𑀲𑁆𑀲 𑀓𑀡𑁆𑀳𑀸 𑀤𑀦𑁆𑀢𑀸’’𑀢𑀺𑀆𑀤𑀻𑀲𑀼 𑀘 𑀅𑀜𑁆𑀜𑀲𑀸𑀧𑁂𑀓𑁆𑀔𑁂𑀲𑀼 ¶ 𑀅𑀬𑀼𑀢𑁆𑀢𑀢𑁆𑀣𑀢𑀸𑀬 𑀲𑀫𑀸𑀲𑁄 𑀦 𑀳𑁄𑀢𑀻𑀢𑀺 𑀤𑀻𑀧𑁂𑀢𑀺.

‘‘𑀅𑀢𑁆𑀣𑀯𑀲𑀸 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁄’’𑀢𑀺 𑀯𑀺𑀧𑀭𑀺𑀡𑀸𑀫𑁂𑀦 ‘‘𑀬𑀼𑀢𑁆𑀢𑀢𑁆𑀣𑀸𑀦’’𑀦𑁆𑀢𑀺 𑀯𑀢𑁆𑀢𑀢𑁂.

𑁩𑁩𑁨. 𑀢𑁂𑀲𑀁 𑀯𑀺𑀪𑀢𑁆𑀢𑀺𑀬𑁄 𑀮𑁄𑀧𑀸 𑀘.

𑀇𑀥 𑀧𑀤𑀦𑁆𑀢𑀭𑁂𑀦 𑀯𑀸 𑀢𑀤𑁆𑀥𑀺𑀢𑀧𑁆𑀧𑀘𑁆𑀘𑀬𑁂𑀳𑀺 𑀯𑀸 𑀆𑀬𑀸𑀤𑀺𑀧𑁆𑀧𑀘𑁆𑀘𑀬𑁂𑀳𑀺 𑀯𑀸 𑀏𑀓𑀢𑁆𑀣𑀻𑀪𑀽𑀢𑀸 𑀬𑀼𑀢𑁆𑀢𑀢𑁆𑀣𑀸 𑀦𑀸𑀫, 𑀢𑁂𑀦 ‘‘𑀢𑁂𑀲𑀁 𑀬𑀼𑀢𑁆𑀢𑀢𑁆𑀣𑀸𑀦𑀁 𑀲𑀫𑀸𑀲𑀸𑀦𑀁, 𑀢𑀤𑁆𑀥𑀺𑀢𑀸𑀬𑀸𑀤𑀺𑀧𑁆𑀧𑀘𑁆𑀘𑀬𑀦𑁆𑀢𑀸𑀦𑀜𑁆𑀘 𑀯𑀺𑀪𑀢𑁆𑀢𑀺𑀬𑁄 𑀮𑁄𑀧𑀦𑀻𑀬𑀸 𑀳𑁄𑀦𑁆𑀢𑀻’’𑀢𑀺 𑀅𑀢𑁆𑀣𑁄. 𑀲𑀫𑀸𑀲𑀕𑁆𑀕𑀳𑀡𑀸𑀥𑀺𑀓𑀸𑀭𑁂 𑀧𑀦 𑀲𑀢𑀺 𑀢𑁂𑀲𑀁𑀕𑀳𑀡𑁂𑀦 𑀯𑀸 𑀢𑀤𑁆𑀥𑀺𑀢𑀸𑀬𑀸𑀤𑀺𑀧𑁆𑀧𑀘𑁆𑀘𑀬𑀦𑁆𑀢 𑀯𑀺𑀪𑀢𑁆𑀢𑀺𑀮𑁄𑀧𑁄. 𑀘𑀕𑁆𑀕𑀳𑀡𑀁 ‘‘𑀧𑀪𑀗𑁆𑀓𑀭𑁄’’𑀢𑀺𑀆𑀤𑀻𑀲𑀼 𑀮𑁄𑀧𑀦𑀺𑀯𑀢𑁆𑀢𑀦𑀢𑁆𑀣𑀁.

𑀯𑀺𑀧𑀭𑀺𑀡𑀸𑀫𑁂𑀦 ‘‘𑀮𑀼𑀢𑁆𑀢𑀸𑀲𑀼, 𑀯𑀺𑀪𑀢𑁆𑀢𑀻𑀲𑀽’’𑀢𑀺 𑀯𑀢𑁆𑀢𑀢𑁂, 𑀬𑀼𑀢𑁆𑀢𑀢𑁆𑀣𑀕𑁆𑀕𑀳𑀡𑀜𑁆𑀘.

𑁩𑁩𑁩. 𑀧𑀓𑀢𑀺 𑀘𑀲𑁆𑀲 𑀲𑀭𑀦𑁆𑀢𑀲𑁆𑀲.

𑀮𑀼𑀢𑁆𑀢𑀸𑀲𑀼 𑀯𑀺𑀪𑀢𑁆𑀢𑀻𑀲𑀼 𑀲𑀭𑀦𑁆𑀢𑀲𑁆𑀲 𑀅𑀲𑁆𑀲 𑀬𑀼𑀢𑁆𑀢𑀢𑁆𑀣𑀪𑀽𑀢𑀲𑁆𑀲 𑀢𑀺𑀯𑀺𑀥𑀲𑁆𑀲𑀧𑀺 𑀮𑀺𑀗𑁆𑀕𑀲𑁆𑀲 𑀧𑀓𑀢𑀺𑀪𑀸𑀯𑁄 𑀳𑁄𑀢𑀺. 𑀘𑀲𑀤𑁆𑀤𑁂𑀦 𑀓𑀺𑀁𑀲𑀫𑀼𑀤𑀬 𑀇𑀤𑀧𑁆𑀧𑀘𑁆𑀘𑀬𑀢𑀸𑀤𑀻𑀲𑀼 𑀦𑀺𑀕𑁆𑀕𑀳𑀻𑀢𑀦𑁆𑀢𑀲𑁆𑀲𑀧𑀺. 𑀦𑀺𑀫𑀺𑀢𑁆𑀢𑀸𑀪𑀸𑀯𑁂 𑀦𑁂𑀫𑀺𑀢𑁆𑀢𑀓𑀸𑀪𑀸𑀯𑀲𑁆𑀲 𑀇𑀥 𑀅𑀦𑀺𑀘𑁆𑀙𑀺𑀢𑀢𑁆𑀢𑀸 𑀅𑀬𑀫𑀢𑀺𑀤𑁂𑀲𑁄.

𑀲𑀓𑀢𑁆𑀣𑀯𑀺𑀭𑀳𑁂𑀦𑀺𑀥 𑀲𑀫𑀸𑀲𑀲𑁆𑀲 𑀘 𑀮𑀺𑀗𑁆𑀕𑀪𑀸𑀯𑀸𑀪𑀸𑀯𑀸 𑀯𑀺𑀪𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀫𑀲𑀫𑁆𑀧𑀢𑁆𑀢𑀸𑀬𑀁 𑀦𑀸𑀫𑀩𑁆𑀬𑀧𑀤𑁂𑀲𑀸𑀢𑀺𑀤𑁂𑀲𑀫𑀸𑀳.

𑁩𑁩𑁪. 𑀢𑀤𑁆𑀥𑀺𑀢𑀲𑀫𑀸𑀲𑀓𑀺𑀢𑀓𑀸 𑀦𑀸𑀫𑀁𑀯𑀸’𑀢𑀯𑁂𑀢𑀼𑀦𑀸𑀤𑀻𑀲𑀼 𑀘.

𑀢𑀤𑁆𑀥𑀺𑀢𑀦𑁆𑀢𑀸 ¶ , 𑀓𑀺𑀢𑀦𑁆𑀢𑀸, 𑀲𑀫𑀸𑀲𑀸 𑀘 𑀦𑀸𑀫𑀫𑀺𑀯 𑀤𑀝𑁆𑀞𑀩𑁆𑀩𑀸 𑀢𑀯𑁂𑀢𑀼𑀦 𑀢𑁆𑀯𑀸𑀦 𑀢𑁆𑀯𑀸𑀤𑀺𑀧𑁆𑀧𑀘𑁆𑀘𑀬𑀦𑁆𑀢𑁂 𑀯𑀚𑁆𑀚𑁂𑀢𑁆𑀯𑀸. 𑀘𑀕𑁆𑀕𑀳𑀡𑀁 𑀓𑀺𑀘𑁆𑀘𑀧𑁆𑀧𑀘𑁆𑀘𑀬𑀆𑀈𑀇𑀦𑀻𑀇𑀢𑁆𑀣𑀺𑀧𑁆𑀧𑀘𑁆𑀘𑀬𑀦𑁆𑀢𑀸𑀤𑀺𑀲𑁆𑀲𑀧𑀺 𑀦𑀸𑀫𑀩𑁆𑀬𑀧𑀤𑁂𑀲𑀢𑁆𑀣𑀁. 𑀇𑀥 𑀲𑀫𑀸𑀲𑀕𑁆𑀕𑀳𑀡𑀁 𑀅𑀢𑁆𑀣𑀯𑀢𑀁 𑀲𑀫𑀼𑀤𑀸𑀬𑀸𑀦𑀁 𑀦𑀸𑀫𑀩𑁆𑀬𑀧𑀤𑁂𑀲𑁄 𑀲𑀫𑀸𑀲𑀲𑁆𑀲𑁂𑀯𑀸𑀢𑀺 𑀦𑀺𑀬𑀫𑀢𑁆𑀣𑀦𑁆𑀢𑀺 𑀅𑀧𑀭𑁂.

‘‘𑀅𑀩𑁆𑀬𑀬𑀻𑀪𑀸𑀯𑁄’’𑀢𑀺 𑀯𑀢𑁆𑀢𑀢𑁂.

𑁩𑁩𑁫. 𑀲𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄.

𑀲𑁄 𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄𑀯 𑀤𑀝𑁆𑀞𑀩𑁆𑀩𑁄𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀁. 𑀏𑀢𑁆𑀣 𑀳𑀺 𑀲𑀢𑀺𑀧𑀺 𑀮𑀺𑀗𑁆𑀕𑀸𑀢𑀺𑀤𑁂𑀲𑁂 ‘‘𑀅𑀥𑀺𑀧𑀜𑁆𑀜’’𑀦𑁆𑀢𑀺𑀆𑀤𑀻𑀲𑀼 ‘‘𑀅𑀥𑀺𑀜𑀸𑀡𑀁’’𑀦𑁆𑀢𑀺𑀆𑀤𑀺 𑀭𑀽𑀧𑀧𑁆𑀧𑀲𑀗𑁆𑀕𑁄 𑀦 𑀳𑁄𑀢𑀺 𑀲𑀤𑁆𑀤𑀦𑁆𑀢𑀭𑀢𑁆𑀢𑀸, ‘‘𑀢𑀺𑀧𑀜𑁆𑀜’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁, 𑀦 𑀘𑀸𑀬𑀁 𑀅𑀢𑀺𑀤𑁂𑀲𑁄, 𑀲𑀼𑀢𑁆𑀢𑁂 𑀅𑀢𑀺𑀤𑁂𑀲𑀮𑀺𑀗𑁆𑀕𑀲𑁆𑀲 𑀇𑀯𑀲𑀤𑁆𑀤𑀲𑁆𑀲 𑀅𑀤𑀲𑁆𑀲𑀦𑀢𑁄. 𑀧𑀼𑀭𑁂 𑀯𑀺𑀬 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺.

‘‘𑀓𑁆𑀯𑀘𑀻’’𑀢𑀺 𑀯𑀢𑁆𑀢𑀢𑁂.

𑁩𑁩𑁬. 𑀅𑀁 𑀯𑀺𑀪𑀢𑁆𑀢𑀻𑀦𑀫𑀓𑀸𑀭𑀦𑁆𑀢𑀸 𑀅𑀩𑁆𑀬𑀬𑀻𑀪𑀸𑀯𑀸.

𑀢𑀲𑁆𑀫𑀸 𑀅𑀓𑀸𑀭𑀦𑁆𑀢𑀸 𑀅𑀩𑁆𑀬𑀬𑀻𑀪𑀸𑀯𑀸 𑀧𑀭𑀸𑀲𑀁 𑀯𑀺𑀪𑀢𑁆𑀢𑀻𑀦𑀁 𑀓𑁆𑀯𑀘𑀺 𑀅𑀁 𑀳𑁄𑀢𑀺, 𑀲𑁂𑀲𑀁 𑀦𑁂𑀬𑁆𑀬𑀁.

𑀢𑀁 𑀉𑀧𑀦𑀕𑀭𑀁, 𑀦𑀕𑀭𑀲𑁆𑀲 𑀲𑀫𑀻𑀧𑀁 𑀢𑀺𑀝𑁆𑀞𑀢𑀻𑀢𑀺 𑀅𑀢𑁆𑀣𑁄. 𑀢𑀸𑀦𑀺 𑀉𑀧𑀦𑀕𑀭𑀁, 𑀆𑀮𑀧𑀦𑁂𑀧𑁂𑀯𑀁, 𑀢𑀁 𑀉𑀧𑀦𑀕𑀭𑀁 𑀧𑀲𑁆𑀲, 𑀢𑀸𑀦𑀺 𑀉𑀧𑀦𑀕𑀭𑀁.

𑀦 𑀧𑀜𑁆𑀘𑀫𑁆𑀬𑀸𑀬𑀫𑀫𑁆𑀪𑀸𑀯𑁄, 𑀓𑁆𑀯𑀘𑀻𑀢𑀺 𑀅𑀥𑀺𑀓𑀸𑀭𑀢𑁄;

𑀢𑀢𑀺𑀬𑀸𑀲𑀢𑁆𑀢𑀫𑀻𑀙𑀝𑁆𑀞𑀻-𑀦𑀦𑁆𑀢𑀼 𑀳𑁄𑀢𑀺 𑀯𑀺𑀓𑀧𑁆𑀧𑀢𑁄.

𑀢𑁂𑀦 𑀉𑀧𑀦𑀕𑀭𑀁 𑀓𑀢𑀁, 𑀉𑀧𑀦𑀕𑀭𑁂𑀦 𑀯𑀸, 𑀢𑁂𑀳𑀺 𑀉𑀧𑀦𑀕𑀭𑀁, 𑀉𑀧𑀦𑀕𑀭𑁂𑀳𑀺 𑀯𑀸, 𑀢𑀲𑁆𑀲 𑀉𑀧𑀦𑀕𑀭𑀁 𑀤𑁂𑀳𑀺, 𑀢𑁂𑀲𑀁 𑀉𑀧𑀦𑀕𑀭𑀁, 𑀉𑀧𑀦𑀕𑀭𑀸 𑀆𑀦𑀬, 𑀉𑀧𑀦𑀕𑀭𑀫𑁆𑀳𑀸 𑀉𑀧𑀦𑀕𑀭𑀲𑁆𑀫𑀸, 𑀉𑀧𑀦𑀕𑀭𑁂𑀳𑀺, 𑀉𑀧𑀦𑀕𑀭𑀁 𑀲𑀦𑁆𑀢𑀓𑀁, 𑀉𑀧𑀦𑀕𑀭𑀲𑁆𑀲 𑀯𑀸, 𑀢𑁂𑀲𑀁 𑀉𑀧𑀦𑀕𑀭𑀁, 𑀉𑀧𑀦𑀕𑀭𑀸𑀦𑀁 𑀯𑀸 ¶ , 𑀉𑀧𑀦𑀕𑀭𑀁 𑀦𑀺𑀥𑁂𑀳𑀺, 𑀉𑀧𑀦𑀕𑀭𑀫𑁆𑀳𑀺 𑀉𑀧𑀦𑀕𑀭𑀲𑁆𑀫𑀺𑀁, 𑀉𑀧𑀦𑀕𑀭𑀁 𑀉𑀧𑀦𑀕𑀭𑁂𑀲𑀼 𑀯𑀸. 𑀏𑀯𑀁 𑀉𑀧𑀓𑀼𑀫𑁆𑀪𑀁.

𑀅𑀪𑀸𑀯𑁂 𑁋 𑀤𑀭𑀣𑀸𑀦𑀁 𑀅𑀪𑀸𑀯𑁄 𑀦𑀺𑀤𑁆𑀤𑀭𑀣𑀁, 𑀦𑀺𑀫𑁆𑀫𑀲𑀓𑀁.

𑀧𑀘𑁆𑀙𑀸𑀅𑀢𑁆𑀣𑁂 𑁋 𑀭𑀣𑀲𑁆𑀲 𑀧𑀘𑁆𑀙𑀸 𑀅𑀦𑀼𑀭𑀣𑀁, 𑀅𑀦𑀼𑀯𑀸𑀢𑀁.

𑀬𑁄𑀕𑁆𑀕𑀢𑀸𑀬𑀁 𑁋 𑀬𑀣𑀸𑀲𑀭𑀽𑀧𑀁, 𑀅𑀦𑀼𑀭𑀽𑀧𑀁, 𑀭𑀽𑀧𑀬𑁄𑀕𑁆𑀕𑀦𑁆𑀢𑀺 𑀅𑀢𑁆𑀣𑁄.

𑀯𑀺𑀘𑁆𑀙𑀸𑀬𑀁 𑁋 𑀅𑀢𑁆𑀢𑀸𑀦𑀫𑀢𑁆𑀢𑀸𑀦𑀁 𑀧𑀢𑀺 𑀧𑀘𑁆𑀘𑀢𑁆𑀢𑀁, 𑀅𑀤𑁆𑀥𑀫𑀸𑀲𑀁 𑀅𑀤𑁆𑀥𑀫𑀸𑀲𑀁 𑀅𑀦𑀼 𑀅𑀦𑁆𑀯𑀤𑁆𑀥𑀫𑀸𑀲𑀁.

𑀅𑀦𑀼𑀧𑀼𑀩𑁆𑀩𑀺𑀬𑀁 𑁋 𑀚𑁂𑀝𑁆𑀞𑀸𑀦𑀁 𑀅𑀦𑀼𑀧𑀼𑀩𑁆𑀩𑁄 𑀅𑀦𑀼𑀚𑁂𑀝𑁆𑀞𑀁.

𑀧𑀝𑀺𑀮𑁄𑀫𑁂 𑁋 𑀲𑁄𑀢𑀲𑁆𑀲 𑀧𑀝𑀺𑀮𑁄𑀫𑀁 𑀧𑀝𑀺𑀲𑁄𑀢𑀁, 𑀧𑀝𑀺𑀧𑀣𑀁, 𑀧𑀢𑀺𑀯𑀸𑀢𑀁, 𑀅𑀢𑁆𑀢𑀸𑀦𑀁 𑀅𑀥𑀺𑀓𑀺𑀘𑁆𑀘 𑀧𑀯𑀢𑁆𑀢𑀸 𑀅𑀚𑁆𑀛𑀢𑁆𑀢𑀁.

𑀧𑀭𑀺𑀬𑀸𑀤𑀸𑀪𑀺𑀯𑀺𑀥𑀻𑀲𑀼 𑀆𑀧𑀸𑀡𑀓𑁄𑀝𑀺𑀬𑀸 𑀆𑀧𑀸𑀡𑀓𑁄𑀝𑀺𑀓𑀁, ‘‘𑀓𑁆𑀯𑀘𑀺 𑀲𑀫𑀸𑀲𑀦𑁆𑀢𑀕𑀢𑀸𑀦𑀫𑀓𑀸𑀭𑀦𑁆𑀢𑁄’’𑀢𑀺 𑀓𑀧𑁆𑀧𑀘𑁆𑀘𑀬𑁄, 𑀆𑀓𑀼𑀫𑀸𑀭𑁂𑀳𑀺 𑀬𑀲𑁄 𑀓𑀘𑁆𑀘𑀸𑀬𑀦𑀲𑁆𑀲 𑀆𑀓𑀼𑀫𑀸𑀭𑀁.

𑀲𑀫𑀺𑀤𑁆𑀥𑀺𑀬𑀁 𑁋 𑀪𑀺𑀓𑁆𑀔𑀸𑀬 𑀲𑀫𑀺𑀤𑁆𑀥𑀻𑀢𑀺 𑀅𑀢𑁆𑀣𑁂 𑀲𑀫𑀸𑀲𑁂𑀯 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑁂 𑀘 𑀓𑀢𑁂 𑁋

‘‘𑀲𑀫𑀸𑀲𑀲𑁆𑀲, 𑀅𑀦𑁆𑀢𑁄’’𑀢𑀺 𑀘 𑀯𑀢𑁆𑀢𑀢𑁂.

𑁩𑁩𑁭. 𑀲𑀭𑁄 𑀭𑀲𑁆𑀲𑁄 𑀦𑀧𑀼𑀁𑀲𑀓𑁂.

𑀦𑀧𑀼𑀁𑀲𑀓𑁂 𑀯𑀢𑁆𑀢𑀫𑀸𑀦𑀲𑁆𑀲 𑀲𑀫𑀸𑀲𑀲𑁆𑀲 𑀅𑀦𑁆𑀢𑁄 𑀲𑀭𑁄 𑀭𑀲𑁆𑀲𑁄 𑀳𑁄𑀢𑀺. 𑀏𑀢𑁆𑀣 𑀘 𑀅𑀩𑁆𑀬𑀬𑀻𑀪𑀸𑀯𑀕𑁆𑀕𑀳𑀡𑀁 𑀦𑀸𑀦𑀼𑀯𑀢𑁆𑀢𑁂𑀢𑀩𑁆𑀩𑀁, 𑀢𑁂𑀦 𑀤𑀺𑀕𑀼𑀤𑁆𑀯𑀦𑁆𑀤𑀩𑀳𑀼𑀩𑁆𑀩𑀻𑀳𑀻𑀲𑀼𑀧𑀺 𑀦𑀧𑀼𑀁𑀲𑀓𑁂 𑀯𑀢𑁆𑀢𑀫𑀸𑀦𑀲𑁆𑀲 𑀲𑀫𑀸𑀲𑀦𑁆𑀢𑀲𑁆𑀲𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀲𑀺𑀤𑁆𑀥𑀁 𑀳𑁄𑀢𑀺. ‘‘𑀅𑀁 𑀯𑀺𑀪𑀢𑁆𑀢𑀻𑀦’’𑀫𑀺𑀘𑁆𑀘𑀸𑀤𑀺𑀦𑀸 𑀅𑀫𑀸𑀤𑁂𑀲𑁄, 𑀲𑀼𑀪𑀺𑀓𑁆𑀔𑀁. 𑀕𑀗𑁆𑀕𑀸𑀬 𑀲𑀫𑀻𑀧𑁂 𑀯𑀢𑁆𑀢𑀢𑀻𑀢𑀺 𑀉𑀧𑀕𑀗𑁆𑀕𑀁, 𑀫𑀡𑀺𑀓𑀸𑀬 𑀲𑀫𑀻𑀧𑀁 𑀉𑀧𑀫𑀡𑀺𑀓𑀁.

𑀇𑀢𑁆𑀣𑀻𑀲𑀼 ¶ 𑀅𑀫𑀺𑀓𑀺𑀘𑁆𑀘𑀸𑀢𑀺 𑀅𑀢𑁆𑀣𑁂 𑀲𑀫𑀸𑀲𑀦𑀧𑀼𑀁𑀲𑀓𑀭𑀲𑁆𑀲𑀢𑁆𑀢𑀸𑀤𑀻𑀲𑀼 𑀓𑀢𑁂𑀲𑀼 𑁋

‘‘𑀅𑀩𑁆𑀬𑀬𑀻𑀪𑀸𑀯𑀸, 𑀯𑀺𑀪𑀢𑁆𑀢𑀻𑀦’’𑀦𑁆𑀢𑀺 𑀘 𑀯𑀢𑁆𑀢𑀢𑁂.

𑁩𑁩𑁮. 𑀅𑀜𑁆𑀜𑀲𑁆𑀫𑀸 𑀮𑁄𑀧𑁄 𑀘.

𑀅𑀓𑀸𑀭𑀦𑁆𑀢𑀢𑁄 𑀅𑀜𑁆𑀜𑀲𑁆𑀫𑀸 𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲𑀸 𑀧𑀭𑀸𑀲𑀁 𑀯𑀺𑀪𑀢𑁆𑀢𑀻𑀦𑀁 𑀮𑁄𑀧𑁄 𑀘 𑀳𑁄𑀢𑀺. 𑀅𑀥𑀺𑀢𑁆𑀢𑀺, 𑀇𑀢𑁆𑀣𑀻𑀲𑀼 𑀅𑀥𑀺𑀓𑀺𑀘𑁆𑀘 𑀓𑀣𑀸 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀅𑀥𑀺𑀢𑁆𑀣𑀺 𑀧𑀲𑁆𑀲, 𑀅𑀥𑀺𑀢𑁆𑀣𑀺 𑀓𑀢𑀁 𑀇𑀘𑁆𑀘𑀸𑀤𑀺, 𑀏𑀯𑀁 𑀅𑀥𑀺𑀓𑀼𑀫𑀸𑀭𑀺, 𑀯𑀥𑀼𑀬𑀸 𑀲𑀫𑀻𑀧𑀁 𑀉𑀧𑀯𑀥𑀼, 𑀕𑀼𑀦𑁆𑀦𑀁 𑀲𑀫𑀻𑀧𑀁 𑀉𑀧𑀕𑀼, 𑀑𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀉𑀓𑀸𑀭𑁄. 𑀏𑀯𑀁 𑀉𑀧𑀲𑀕𑁆𑀕𑀧𑀼𑀩𑁆𑀩𑀓𑁄.

𑀦𑀺𑀧𑀸𑀢𑀧𑀼𑀩𑁆𑀩𑀓𑁄 𑀬𑀣𑀸 𑁋 𑀯𑀼𑀟𑁆𑀠𑀸𑀦𑀁 𑀧𑀝𑀺𑀧𑀸𑀝𑀺, 𑀬𑁂 𑀬𑁂 𑀯𑀼𑀟𑁆𑀠𑀸 𑀯𑀸 𑀬𑀣𑀸𑀯𑀼𑀟𑁆𑀠𑀁, 𑀧𑀤𑀢𑁆𑀣𑀸𑀦𑀢𑀺𑀓𑁆𑀓𑀫𑁂 𑁋 𑀬𑀣𑀸𑀓𑁆𑀓𑀫𑀁, 𑀬𑀣𑀸𑀲𑀢𑁆𑀢𑀺, 𑀬𑀣𑀸𑀩𑀮𑀁 𑀓𑀭𑁄𑀢𑀺, 𑀩𑀮𑀫𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀚𑀻𑀯𑀲𑁆𑀲 𑀬𑀢𑁆𑀢𑀓𑁄 𑀧𑀭𑀺𑀘𑁆𑀙𑁂𑀤𑁄 𑀬𑀸𑀯𑀚𑀻𑀯𑀁, 𑀬𑀸𑀯𑀢𑀸𑀬𑀼𑀓𑀁, 𑀓𑀧𑁆𑀧𑀘𑁆𑀘𑀬𑁄. 𑀬𑀢𑁆𑀢𑀓𑁂𑀦 𑀅𑀢𑁆𑀣𑁄 𑀬𑀸𑀯𑀤𑀢𑁆𑀣𑀁, 𑀧𑀩𑁆𑀩𑀢𑀲𑁆𑀲 𑀧𑀭𑀪𑀸𑀕𑁄 𑀢𑀺𑀭𑁄𑀧𑀩𑁆𑀩𑀢𑀁, 𑀢𑀺𑀭𑁄𑀧𑀸𑀓𑀸𑀭𑀁, 𑀢𑀺𑀭𑁄𑀓𑀼𑀝𑁆𑀝𑀁, 𑀧𑀸𑀲𑀸𑀤𑀲𑁆𑀲 𑀅𑀦𑁆𑀢𑁄 𑀅𑀦𑁆𑀢𑁄𑀧𑀸𑀲𑀸𑀤𑀁, 𑀅𑀦𑁆𑀢𑁄𑀦𑀕𑀭𑀁, 𑀅𑀦𑁆𑀢𑁄𑀯𑀲𑁆𑀲𑀁, 𑀦𑀕𑀭𑀲𑁆𑀲 𑀩𑀳𑀺 𑀩𑀳𑀺𑀦𑀕𑀭𑀁, 𑀧𑀸𑀲𑀸𑀤𑀲𑁆𑀲 𑀉𑀧𑀭𑀺 𑀉𑀧𑀭𑀺𑀧𑀸𑀲𑀸𑀤𑀁, 𑀉𑀧𑀭𑀺𑀫𑀜𑁆𑀘𑀁, 𑀫𑀜𑁆𑀘𑀲𑁆𑀲 𑀳𑁂𑀝𑁆𑀞𑀸 𑀳𑁂𑀝𑁆𑀞𑀸𑀫𑀜𑁆𑀘𑀁, 𑀳𑁂𑀝𑁆𑀞𑀸𑀧𑀸𑀲𑀸𑀤𑀁, 𑀪𑀢𑁆𑀢𑀲𑁆𑀲 𑀧𑀼𑀭𑁂 𑀧𑀼𑀭𑁂𑀪𑀢𑁆𑀢𑀁, 𑀏𑀯𑀁 𑀧𑀘𑁆𑀙𑀸𑀪𑀢𑁆𑀢𑀁.

𑀲𑀸𑀓𑀮𑁆𑀮𑀢𑁆𑀣𑁂 𑁋 𑀲𑀳 𑀫𑀓𑁆𑀔𑀺𑀓𑀸𑀬 𑀲𑀫𑀓𑁆𑀔𑀺𑀓𑀁 𑀪𑀼𑀜𑁆𑀚𑀢𑀺, 𑀦 𑀓𑀺𑀜𑁆𑀘𑀺 𑀧𑀭𑀺𑀯𑀚𑁆𑀚𑁂𑀢𑀻𑀢𑀺 𑀅𑀢𑁆𑀣𑁄. ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀲𑀳𑀲𑀤𑁆𑀤𑀲𑁆𑀲 𑀲𑀸𑀤𑁂𑀲𑁄. 𑀕𑀗𑁆𑀕𑀸𑀬 𑀑𑀭𑀁 𑀑𑀭𑀕𑀗𑁆𑀕𑀫𑀺𑀘𑁆𑀘𑀸𑀤𑀺.

𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲𑁄 𑀦𑀺𑀝𑁆𑀞𑀺𑀢𑁄.

𑀓𑀫𑁆𑀫𑀥𑀸𑀭𑀬𑀲𑀫𑀸𑀲

𑀅𑀣 ¶ 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄 𑀯𑀼𑀘𑁆𑀘𑀢𑁂.

𑀲𑁄 𑀘 𑀦𑀯𑀯𑀺𑀥𑁄 𑀯𑀺𑀲𑁂𑀲𑀦𑀧𑀼𑀩𑁆𑀩𑀧𑀤𑁄 𑀯𑀺𑀲𑁂𑀲𑀦𑀼𑀢𑁆𑀢𑀭𑀧𑀤𑁄 𑀯𑀺𑀲𑁂𑀲𑀦𑁄𑀪𑀬𑀧𑀤𑁄 𑀉𑀧𑀫𑀸𑀦𑀼𑀢𑁆𑀢𑀭𑀧𑀤𑁄 𑀲𑀫𑁆𑀪𑀸𑀯𑀦𑀸𑀧𑀼𑀩𑁆𑀩𑀧𑀤𑁄 𑀅𑀯𑀥𑀸𑀭𑀡𑀧𑀼𑀩𑁆𑀩𑀧𑀤𑁄 𑀦𑀦𑀺𑀧𑀸𑀢𑀧𑀼𑀩𑁆𑀩𑀧𑀤𑁄 𑀓𑀼𑀧𑀼𑀩𑁆𑀩𑀧𑀤𑁄 𑀧𑀸𑀤𑀺𑀧𑀼𑀩𑁆𑀩𑀧𑀤𑁄 𑀘𑀸𑀢𑀺.

𑀢𑀢𑁆𑀣 𑀯𑀺𑀲𑁂𑀲𑀦𑀧𑀼𑀩𑁆𑀩𑀧𑀤𑁄 𑀢𑀸𑀯 𑁋 ‘‘𑀫𑀳𑀦𑁆𑀢 𑀧𑀼𑀭𑀺𑀲’’𑀇𑀢𑀻𑀥 𑀉𑀪𑀬𑀢𑁆𑀣 𑀧𑀞𑀫𑁂𑀓𑀯𑀘𑀦𑀁 𑀲𑀺, 𑀢𑀼𑀮𑁆𑀬𑀸𑀥𑀺𑀓𑀭𑀡𑀪𑀸𑀯𑀧𑁆𑀧𑀲𑀺𑀤𑁆𑀥𑀢𑁆𑀣𑀁 𑀘𑀲𑀤𑁆𑀤 𑀢𑀲𑀤𑁆𑀤𑀧𑁆𑀧𑀬𑁄𑀕𑁄, 𑀫𑀳𑀦𑁆𑀢𑁄 𑀘 𑀲𑁄 𑀧𑀼𑀭𑀺𑀲𑁄 𑀘𑀸𑀢𑀺 𑀯𑀺𑀕𑁆𑀕𑀳𑁂 𑁋

𑀇𑀢𑁄 𑀧𑀭𑀁 ‘‘𑀯𑀺𑀪𑀸𑀲𑀸 𑀭𑀼𑀓𑁆𑀔𑀢𑀺𑀡’’𑀇𑀘𑁆𑀘𑀸𑀤𑀺𑀢𑁄 ‘‘𑀯𑀺𑀪𑀸𑀲𑀸’’𑀢𑀺 𑀲𑀫𑀸𑀲𑀯𑀺𑀥𑀸𑀦𑁂 𑀲𑀩𑁆𑀩𑀢𑁆𑀣 𑀯𑀢𑁆𑀢𑀢𑁂.

𑁩𑁩𑁯. 𑀤𑁆𑀯𑀺𑀧𑀤𑁂 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀓𑀫𑁆𑀫𑀥𑀸𑀭𑀬𑁄.

𑀤𑁆𑀯𑁂 𑀧𑀤𑀸𑀦𑀺 𑀦𑀸𑀫𑀺𑀓𑀸𑀦𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑀸𑀦𑀺 𑀅𑀜𑁆𑀜𑀫𑀜𑁆𑀜𑁂𑀦 𑀲𑀳 𑀯𑀺𑀪𑀸𑀲𑀸 𑀲𑀫𑀲𑁆𑀬𑀦𑁆𑀢𑁂, 𑀢𑀲𑁆𑀫𑀺𑀁 𑀤𑁆𑀯𑀺𑀧𑀤𑁂 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀲𑀢𑀺 𑀲𑁄 𑀲𑀫𑀸𑀲𑁄 𑀓𑀫𑁆𑀫𑀥𑀸𑀭𑀬𑀲𑀜𑁆𑀜𑁄 𑀘 𑀳𑁄𑀢𑀺.

𑀤𑁆𑀯𑁂 𑀧𑀤𑀸𑀦𑀺 𑀤𑁆𑀯𑀺𑀧𑀤𑀁, 𑀢𑀼𑀮𑁆𑀬𑀁 𑀲𑀫𑀸𑀦𑀁 𑀅𑀥𑀺𑀓𑀭𑀡𑀁 𑀅𑀢𑁆𑀣𑁄 𑀬𑀲𑁆𑀲 𑀧𑀤𑀤𑁆𑀯𑀬𑀲𑁆𑀲 𑀢𑀁 𑀢𑀼𑀮𑁆𑀬𑀸𑀥𑀺𑀓𑀭𑀡𑀁, 𑀢𑀲𑁆𑀫𑀺𑀁 𑀤𑁆𑀯𑀺𑀧𑀤𑁂 𑀢𑀼𑀮𑁆𑀬𑀸𑀥𑀺𑀓𑀭𑀡𑁂. 𑀪𑀺𑀦𑁆𑀦𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂𑀦 𑀏𑀓𑀲𑁆𑀫𑀺𑀁 𑀅𑀢𑁆𑀣𑁂 𑀧𑀯𑀢𑁆𑀢𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑀸. 𑀓𑀫𑁆𑀫𑀫𑀺𑀯 𑀤𑁆𑀯𑀬𑀁 𑀥𑀸𑀭𑀬𑀢𑀻𑀢𑀺 𑀓𑀫𑁆𑀫𑀥𑀸𑀭𑀬𑁄. 𑀬𑀣𑀸 𑀳𑀺 𑀓𑀫𑁆𑀫𑀁 𑀓𑁆𑀭𑀺𑀬𑀜𑁆𑀘 𑀧𑀬𑁄𑀚𑀦𑀜𑁆𑀘 𑀤𑁆𑀯𑀬𑀁 𑀥𑀸𑀭𑀬𑀢𑀺, 𑀓𑀫𑁆𑀫𑁂 𑀲𑀢𑀺 𑀓𑁆𑀭𑀺𑀬𑀸𑀬, 𑀧𑀬𑁄𑀚𑀦𑀲𑁆𑀲 𑀘 𑀲𑀫𑁆𑀪𑀯𑀢𑁄, 𑀢𑀣𑀸 𑀅𑀬𑀁 𑀲𑀫𑀸𑀲𑁄 𑀏𑀓𑀲𑁆𑀲 𑀅𑀢𑁆𑀣𑀲𑁆𑀲 𑀤𑁆𑀯𑁂 𑀦𑀸𑀫𑀸𑀦𑀺 𑀥𑀸𑀭𑀬𑀢𑀺, 𑀢𑀲𑁆𑀫𑀺𑀁 𑀲𑀫𑀸𑀲𑁂 𑀲𑀢𑀺 𑀏𑀓𑀢𑁆𑀣𑀚𑁄𑀢𑀓𑀲𑁆𑀲 𑀦𑀸𑀫𑀤𑁆𑀯𑀬𑀲𑁆𑀲 𑀲𑀫𑁆𑀪𑀯𑀢𑁄.

𑀧𑀼𑀭𑁂 ¶ 𑀯𑀺𑀬 𑀲𑀫𑀸𑀲𑀲𑀜𑁆𑀜𑀸𑀯𑀺𑀪𑀢𑁆𑀢𑀺𑀮𑁄𑀧𑀧𑀓𑀢𑀺𑀪𑀸𑀯𑀸, 𑀲𑀫𑀸𑀲𑁂𑀦𑁂𑀯 𑀢𑀼𑀮𑁆𑀬𑀸𑀥𑀺𑀓𑀭𑀡𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 ‘‘𑀯𑀼𑀢𑁆𑀢𑀢𑁆𑀣𑀸𑀦𑀫𑀧𑁆𑀧𑀬𑁄𑀕𑁄’’𑀢𑀺 𑀘𑀲𑀤𑁆𑀤 𑀢𑀲𑀤𑁆𑀤𑀸𑀦𑀫𑀧𑁆𑀧𑀬𑁄𑀕𑁄.

𑁩𑁪𑁦. 𑀫𑀳𑀢𑀁 𑀫𑀳𑀸 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀧𑀤𑁂.

𑀫𑀳𑀦𑁆𑀢 𑀲𑀤𑁆𑀤𑀲𑁆𑀲 𑀫𑀳𑀸 𑀳𑁄𑀢𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀉𑀢𑁆𑀢𑀭𑀧𑀤𑁂 𑀧𑀭𑁂. 𑀫𑀳𑀢𑀦𑁆𑀢𑀺 𑀩𑀳𑀼𑀯𑀘𑀦𑀕𑁆𑀕𑀳𑀡𑁂𑀦 𑀓𑁆𑀯𑀘𑀺 𑀫𑀳𑀆𑀤𑁂𑀲𑁄 𑀘, 𑀏𑀢𑁆𑀣 𑀘 𑀯𑀺𑀲𑁂𑀲𑀦𑀲𑁆𑀲 𑀧𑀼𑀩𑁆𑀩𑀦𑀺𑀧𑀸𑀢𑁄 𑀯𑀺𑀲𑁂𑀲𑀦𑀪𑀽𑀢𑀲𑁆𑀲 𑀧𑀼𑀩𑁆𑀩𑀧𑀤𑀲𑁆𑀲 𑀫𑀳𑀸𑀤𑁂𑀲𑀯𑀺𑀥𑀸𑀦𑀢𑁄𑀯 𑀯𑀺𑀜𑁆𑀜𑀸𑀬𑀢𑀺.

‘‘𑀓𑀫𑁆𑀫𑀥𑀸𑀭𑀬𑁄, 𑀤𑀺𑀕𑀽’’𑀢𑀺 𑀘 𑀯𑀢𑁆𑀢𑀢𑁂.

𑁩𑁪𑁧. 𑀉𑀪𑁂 𑀢𑀧𑁆𑀧𑀼𑀭𑀺𑀲𑀸.

𑀉𑀪𑁂 𑀓𑀫𑁆𑀫𑀥𑀸𑀭𑀬𑀤𑀺𑀕𑀼𑀲𑀫𑀸𑀲𑀸 𑀢𑀧𑁆𑀧𑀼𑀭𑀺𑀲𑀲𑀜𑁆𑀜𑀸 𑀳𑁄𑀦𑁆𑀢𑀺.

𑀢𑀲𑁆𑀲 𑀧𑀼𑀭𑀺𑀲𑁄 𑀢𑀧𑁆𑀧𑀼𑀭𑀺𑀲𑁄, 𑀢𑀧𑁆𑀧𑀼𑀭𑀺𑀲𑀲𑀤𑀺𑀲𑀢𑁆𑀢𑀸 𑀅𑀬𑀫𑁆𑀧𑀺 𑀲𑀫𑀸𑀲𑁄 𑀅𑀦𑁆𑀯𑀢𑁆𑀣𑀲𑀜𑁆𑀜𑀸𑀬 𑀢𑀧𑁆𑀧𑀼𑀭𑀺𑀲𑁄𑀢𑀺 𑀯𑀼𑀢𑁆𑀢𑁄. 𑀬𑀣𑀸 𑀳𑀺 𑀢𑀧𑁆𑀧𑀼𑀭𑀺𑀲𑀲𑀤𑁆𑀤𑁄 𑀕𑀼𑀡𑀫𑀢𑀺𑀯𑀢𑁆𑀢𑁄, 𑀢𑀣𑀸 𑀅𑀬𑀁 𑀲𑀫𑀸𑀲𑁄𑀧𑀺. 𑀉𑀢𑁆𑀢𑀭𑀧𑀤𑀢𑁆𑀣𑀧𑁆𑀧𑀥𑀸𑀦𑁄 𑀳𑀺 𑀢𑀧𑁆𑀧𑀼𑀭𑀺𑀲𑁄𑀢𑀺. 𑀢𑀢𑁄 𑀦𑀸𑀫𑀩𑁆𑀬𑀧𑀤𑁂𑀲𑁄 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺. 𑀅𑀬𑀁 𑀧𑀦 𑀢𑀧𑁆𑀧𑀼𑀭𑀺𑀲𑁄 𑀅𑀪𑀺𑀥𑁂𑀬𑁆𑀬𑀯𑀘𑀦𑁄, 𑀧𑀭𑀮𑀺𑀗𑁆𑀕𑁄 𑀘.

𑀫𑀳𑀸𑀧𑀼𑀭𑀺𑀲𑁄, 𑀫𑀳𑀸𑀧𑀼𑀭𑀺𑀲𑀸 𑀇𑀘𑁆𑀘𑀸𑀤𑀺 𑀧𑀼𑀭𑀺𑀲𑀲𑀤𑁆𑀤𑀲𑀫𑀁, 𑀏𑀯𑀁 𑀫𑀳𑀸𑀯𑀻𑀭𑁄, 𑀫𑀳𑀸𑀫𑀼𑀦𑀺, 𑀫𑀳𑀦𑁆𑀢𑀜𑁆𑀘 𑀢𑀁 𑀩𑀮𑀜𑁆𑀘𑀸𑀢𑀺 𑀫𑀳𑀸𑀩𑀮𑀁, 𑀫𑀳𑀩𑁆𑀪𑀬𑀁, 𑀫𑀳𑀆𑀤𑁂𑀲𑁄. 𑀲𑀦𑁆𑀢𑁄 𑀘 𑀲𑁄 𑀧𑀼𑀭𑀺𑀲𑁄 𑀘𑀸𑀢𑀺 𑀲𑀧𑁆𑀧𑀼𑀭𑀺𑀲𑁄, ‘‘𑀲𑀦𑁆𑀢𑀲𑀤𑁆𑀤𑀲𑁆𑀲 𑀲𑁄 𑀪𑁂 𑀩𑁄 𑀘𑀦𑁆𑀢𑁂’’𑀢𑀺 𑀏𑀢𑁆𑀣 𑀘𑀲𑀤𑁆𑀤𑁂𑀦 𑀲𑀦𑁆𑀢𑀲𑀤𑁆𑀤𑀲𑁆𑀲 𑀲𑀫𑀸𑀲𑁂 𑀅𑀪𑀓𑀸𑀭𑁂𑀧𑀺 𑀲𑀸𑀤𑁂𑀲𑁄, 𑀢𑀣𑀸 𑀧𑀼𑀩𑁆𑀩𑀧𑀼𑀭𑀺𑀲𑁄, 𑀧𑀭𑀧𑀼𑀭𑀺𑀲𑁄, 𑀧𑀞𑀫𑀧𑀼𑀭𑀺𑀲𑁄, 𑀫𑀚𑁆𑀛𑀺𑀫𑀧𑀼𑀭𑀺𑀲𑁄, 𑀉𑀢𑁆𑀢𑀫𑀧𑀼𑀭𑀺𑀲𑁄, 𑀤𑀦𑁆𑀢𑀧𑀼𑀭𑀺𑀲𑁄, 𑀧𑀭𑀫𑀧𑀼𑀭𑀺𑀲𑁄, 𑀯𑀻𑀭𑀧𑀼𑀭𑀺𑀲𑁄, 𑀲𑁂𑀢𑀳𑀢𑁆𑀣𑀻, 𑀓𑀡𑁆𑀳𑀲𑀧𑁆𑀧𑁄, 𑀦𑀻𑀮𑀼𑀧𑁆𑀧𑀮𑀁, 𑀮𑁄𑀳𑀺𑀢𑀘𑀦𑁆𑀤𑀦𑀁.

𑀓𑁆𑀯𑀘𑀺 ¶ 𑀯𑀺𑀪𑀸𑀲𑀸𑀥𑀺𑀓𑀸𑀭𑀢𑁄 𑀦 𑀪𑀯𑀢𑀺, 𑀬𑀣𑀸 𑁋 𑀧𑀼𑀡𑁆𑀡𑁄 𑀫𑀦𑁆𑀢𑀸𑀦𑀺𑀧𑀼𑀢𑁆𑀢𑁄, 𑀘𑀺𑀢𑁆𑀢𑁄 𑀕𑀳𑀧𑀢𑀺, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸𑀢𑀺.

𑀧𑀼𑀫𑀸 𑀘 𑀲𑁄 𑀓𑁄𑀓𑀺𑀮𑁄 𑀘𑀸𑀢𑀺 𑀅𑀢𑁆𑀣𑁂 𑀲𑀫𑀸𑀲𑁂 𑀓𑀢𑁂 𑁋

‘‘𑀮𑁄𑀧’’𑀦𑁆𑀢𑀺 𑀯𑀢𑁆𑀢𑀢𑁂.

𑁩𑁪𑁨. 𑀧𑀼𑀫𑀲𑁆𑀲 𑀮𑀺𑀗𑁆𑀕𑀸𑀤𑀻𑀲𑀼 𑀲𑀫𑀸𑀲𑁂𑀲𑀼.

𑀧𑀼𑀫𑀇𑀘𑁆𑀘𑁂𑀢𑀲𑁆𑀲 𑀅𑀦𑁆𑀢𑁄 𑀅𑀓𑀸𑀭𑁄 𑀮𑁄𑀧𑀫𑀸𑀧𑀚𑁆𑀚𑀢𑁂 𑀮𑀺𑀗𑁆𑀕𑀸𑀤𑀻𑀲𑀼 𑀧𑀭𑀧𑀤𑁂𑀲𑀼 𑀲𑀫𑀸𑀲𑁂𑀲𑀼, ‘‘𑀅𑀁𑀫𑁄 𑀦𑀺𑀕𑁆𑀕𑀳𑀻𑀢𑀁 𑀛𑀮𑀧𑁂𑀳𑀻’’𑀢𑀺 𑀫𑀓𑀸𑀭𑀲𑁆𑀲 𑀦𑀺𑀕𑁆𑀕𑀳𑀻𑀢𑀁. 𑀧𑀼𑀗𑁆𑀓𑁄𑀓𑀺𑀮𑁄. 𑀏𑀯𑀁 𑀧𑀼𑀦𑁆𑀦𑀸𑀕𑁄.

𑀔𑀢𑁆𑀢𑀺𑀬𑀸 𑀘 𑀲𑀸 𑀓𑀜𑁆𑀜𑀸 𑀘𑀸𑀢𑀺 𑀯𑀺𑀕𑁆𑀕𑀬𑁆𑀳 𑀲𑀫𑀸𑀲𑁂 𑀓𑀢𑁂 𑁋

‘‘𑀢𑀼𑀮𑁆𑀬𑀸𑀥𑀺𑀓𑀭𑀡𑁂, 𑀧𑀤𑁂, 𑀇𑀢𑁆𑀣𑀺𑀬𑀁 𑀪𑀸𑀲𑀺𑀢𑀧𑀼𑀫𑀺𑀢𑁆𑀣𑀻 𑀧𑀼𑀫𑀸𑀯 𑀘𑁂’’𑀢𑀺 𑀘 𑀯𑀢𑁆𑀢𑀢𑁂.

𑁩𑁪𑁩. 𑀓𑀫𑁆𑀫𑀥𑀸𑀭𑀬𑀲𑀜𑁆𑀜𑁂 𑀘.

𑀓𑀫𑁆𑀫𑀥𑀸𑀭𑀬𑀲𑀜𑁆𑀜𑁂 𑀘 𑀲𑀫𑀸𑀲𑁂 𑀇𑀢𑁆𑀣𑀺𑀬𑀁 𑀯𑀢𑁆𑀢𑀫𑀸𑀦𑁂 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀉𑀢𑁆𑀢𑀭𑀧𑀤𑁂 𑀧𑀭𑁂 𑀧𑀼𑀩𑁆𑀩𑀪𑀽𑀢𑁄 𑀇𑀢𑁆𑀣𑀺𑀯𑀸𑀘𑀓𑁄 𑀲𑀤𑁆𑀤𑁄 𑀧𑀼𑀩𑁆𑀩𑁂 𑀪𑀸𑀲𑀺𑀢𑀧𑀼𑀫𑀸 𑀘𑁂, 𑀲𑁄 𑀧𑀼𑀫𑀸 𑀇𑀯 𑀤𑀝𑁆𑀞𑀩𑁆𑀩𑁄𑀢𑀺 𑀧𑀼𑀩𑁆𑀩𑀧𑀤𑁂 𑀇𑀢𑁆𑀣𑀺𑀧𑁆𑀧𑀘𑁆𑀘𑀬𑀲𑁆𑀲 𑀦𑀺𑀯𑀢𑁆𑀢𑀺 𑀳𑁄𑀢𑀺.

𑀔𑀢𑁆𑀢𑀺𑀬𑀓𑀜𑁆𑀜𑀸, 𑀔𑀢𑁆𑀢𑀺𑀬𑀓𑀜𑁆𑀜𑀸𑀬𑁄 𑀇𑀘𑁆𑀘𑀸𑀤𑀺. 𑀏𑀯𑀁 𑀭𑀢𑁆𑀢𑀮𑀢𑀸, 𑀤𑀼𑀢𑀺𑀬𑀪𑀺𑀓𑁆𑀔𑀸, 𑀩𑁆𑀭𑀸𑀳𑁆𑀫𑀡𑀻 𑀘 𑀲𑀸 𑀤𑀸𑀭𑀺𑀓𑀸 𑀘𑀸𑀢𑀺 𑀩𑁆𑀭𑀸𑀳𑁆𑀫𑀡𑀤𑀸𑀭𑀺𑀓𑀸, 𑀦𑀸𑀕𑀫𑀸𑀡𑀯𑀺𑀓𑀸.

𑀧𑀼𑀩𑁆𑀩𑀧𑀤𑀲𑁆𑀲𑁂𑀯𑀸𑀬𑀁 𑀧𑀼𑀫𑁆𑀪𑀸𑀯𑀸𑀢𑀺𑀤𑁂𑀲𑁄, 𑀢𑁂𑀦 ‘‘𑀔𑀢𑁆𑀢𑀺𑀬𑀓𑀼𑀫𑀸𑀭𑀻 𑀓𑀼𑀫𑀸𑀭𑀲𑀫𑀡𑀻 𑀢𑀭𑀼𑀡𑀩𑁆𑀭𑀸𑀳𑁆𑀫𑀡𑀻’’𑀢𑀺𑀆𑀤𑀻𑀲𑀼 𑀉𑀢𑁆𑀢𑀭𑀧𑀤𑁂𑀲𑀼 𑀇𑀢𑁆𑀣𑀺𑀧𑁆𑀧𑀘𑁆𑀘𑀬𑀲𑁆𑀲 𑀦 𑀦𑀺𑀯𑀢𑁆𑀢𑀺 𑀳𑁄𑀢𑀺.

𑀇𑀢𑁆𑀣𑀺𑀬𑀫𑀺𑀘𑁆𑀘𑁂𑀯 ¶ 𑀓𑀺𑀁? 𑀓𑀼𑀫𑀸𑀭𑀻𑀭𑀢𑀦𑀁, 𑀲𑀫𑀡𑀻𑀧𑀤𑀼𑀫𑀁.

𑀪𑀸𑀲𑀺𑀢𑀧𑀼𑀫𑀸𑀢𑀺 𑀓𑀺𑀁? 𑀕𑀗𑁆𑀕𑀸𑀦𑀤𑀻, 𑀢𑀡𑁆𑀳𑀸𑀦𑀤𑀻, 𑀧𑀣𑀯𑀻𑀥𑀸𑀢𑀼. ‘‘𑀦𑀦𑁆𑀤𑀸𑀧𑁄𑀓𑁆𑀔𑀭𑀡𑀻, 𑀦𑀦𑁆𑀤𑀸𑀤𑁂𑀯𑀻’’𑀢𑀺𑀆𑀤𑀻𑀲𑀼 𑀧𑀦 𑀲𑀜𑁆𑀜𑀸𑀲𑀤𑁆𑀤𑀢𑁆𑀢𑀸 𑀦 𑀳𑁄𑀢𑀺.

𑀢𑀣𑀸 𑀧𑀼𑀭𑀢𑁆𑀣𑀺𑀫𑁄 𑀘 𑀲𑁄 𑀓𑀸𑀬𑁄 𑀘𑀸𑀢𑀺 𑀧𑀼𑀭𑀢𑁆𑀣𑀺𑀫𑀓𑀸𑀬𑁄, 𑀏𑀢𑁆𑀣 𑀘 𑀓𑀸𑀬𑁂𑀓𑀤𑁂𑀲𑁄 𑀓𑀸𑀬𑀲𑀤𑁆𑀤𑁄. 𑀏𑀯𑀁 𑀧𑀘𑁆𑀙𑀺𑀫𑀓𑀸𑀬𑁄, 𑀳𑁂𑀝𑁆𑀞𑀺𑀫𑀓𑀸𑀬𑁄, 𑀉𑀧𑀭𑀺𑀫𑀓𑀸𑀬𑁄, 𑀲𑀩𑁆𑀩𑀓𑀸𑀬𑁄, 𑀧𑀼𑀭𑀸𑀡𑀯𑀺𑀳𑀸𑀭𑁄, 𑀦𑀯𑀸𑀯𑀸𑀲𑁄, 𑀓𑀢𑀭𑀦𑀺𑀓𑀸𑀬𑁄, 𑀓𑀢𑀫𑀦𑀺𑀓𑀸𑀬𑁄, 𑀳𑁂𑀢𑀼𑀧𑁆𑀧𑀘𑁆𑀘𑀬𑁄, 𑀅𑀩𑀳𑀼𑀮𑀁 𑀩𑀳𑀼𑀮𑀁 𑀓𑀢𑀦𑁆𑀢𑀺 𑀩𑀳𑀼𑀮𑀻𑀓𑀢𑀁, 𑀚𑀻𑀯𑀺𑀢𑀧𑁆𑀧𑀥𑀸𑀦𑀁 𑀦𑀯𑀓𑀁 𑀚𑀻𑀯𑀺𑀢𑀦𑀯𑀓𑀁 𑀇𑀘𑁆𑀘𑀸𑀤𑀺.

𑀯𑀺𑀲𑁂𑀲𑀦𑀼𑀢𑁆𑀢𑀭𑀧𑀤𑁂 𑀚𑀺𑀦𑀯𑀘𑀦𑀸𑀦𑀼𑀧𑀭𑁄𑀥𑀢𑁄 𑀣𑁂𑀭𑀸𑀘𑀭𑀺𑀬𑀧𑀡𑁆𑀟𑀺𑀢𑀸𑀤𑀺 𑀯𑀺𑀲𑁂𑀲𑀦𑀁 𑀧𑀭𑀜𑁆𑀘 𑀪𑀯𑀢𑀺. 𑀬𑀣𑀸 𑁋 𑀲𑀸𑀭𑀺𑀧𑀼𑀢𑁆𑀢𑁄 𑀘 𑀲𑁄 𑀣𑁂𑀭𑁄 𑀘𑀸𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄. 𑀏𑀯𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄, 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄, 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁄, 𑀥𑀫𑁆𑀫𑀧𑀸𑀮𑀸𑀘𑀭𑀺𑀬𑁄, 𑀆𑀘𑀭𑀺𑀬𑀕𑀼𑀢𑁆𑀢𑀺𑀮𑁄𑀢𑀺 𑀯𑀸, 𑀫𑀳𑁄𑀲𑀥𑁄 𑀘 𑀲𑁄 𑀧𑀡𑁆𑀟𑀺𑀢𑁄 𑀘𑀸𑀢𑀺 𑀫𑀳𑁄𑀲𑀥𑀧𑀡𑁆𑀟𑀺𑀢𑁄. 𑀏𑀯𑀁 𑀯𑀺𑀥𑀼𑀭𑀧𑀡𑁆𑀟𑀺𑀢𑁄, 𑀯𑀢𑁆𑀣𑀼𑀯𑀺𑀲𑁂𑀲𑁄.

𑀯𑀺𑀲𑁂𑀲𑀦𑁄𑀪𑀬𑀧𑀤𑁄 𑀬𑀣𑀸 𑁋 𑀲𑀻𑀢𑀜𑁆𑀘 𑀢𑀁 𑀉𑀡𑁆𑀳𑀜𑁆𑀘𑀸𑀢𑀺 𑀲𑀻𑀢𑀼𑀡𑁆𑀳𑀁, 𑀲𑀺𑀦𑀺𑀤𑁆𑀥𑁄 𑀘 𑀲𑁄 𑀉𑀡𑁆𑀳𑁄 𑀘𑀸𑀢𑀺 𑀲𑀺𑀦𑀺𑀤𑁆𑀥𑀼𑀡𑁆𑀳𑁄, 𑀫𑀸𑀲𑁄. 𑀔𑀜𑁆𑀚𑁄 𑀘 𑀲𑁄 𑀔𑀼𑀚𑁆𑀚𑁄 𑀘𑀸𑀢𑀺 𑀔𑀜𑁆𑀚𑀔𑀼𑀚𑁆𑀚𑁄. 𑀏𑀯𑀁 𑀅𑀦𑁆𑀥𑀩𑀥𑀺𑀭𑁄, 𑀓𑀢𑀸𑀓𑀢𑀁, 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁, 𑀉𑀘𑁆𑀘𑀸𑀯𑀘𑀁, 𑀙𑀺𑀦𑁆𑀦𑀪𑀺𑀦𑁆𑀦𑀁, 𑀲𑀺𑀢𑁆𑀢𑀲𑀫𑁆𑀫𑀝𑁆𑀞𑀁, 𑀕𑀢𑀧𑀘𑁆𑀘𑀸𑀕𑀢𑀁.

𑀉𑀧𑀫𑀸𑀦𑀼𑀢𑁆𑀢𑀭𑀧𑀤𑁂 𑀅𑀪𑀺𑀥𑀸𑀦𑀸𑀦𑀼𑀭𑁄𑀥𑀢𑁄 𑀉𑀧𑀫𑀸𑀦𑀪𑀽𑀢𑀁 𑀯𑀺𑀲𑁂𑀲𑀦𑀁 𑀧𑀭𑀁 𑀪𑀯𑀢𑀺. 𑀬𑀣𑀸 𑁋 𑀲𑀻𑀳𑁄 𑀯𑀺𑀬 𑀲𑀻𑀳𑁄, 𑀫𑀼𑀦𑀺 𑀘 𑀲𑁄 𑀲𑀻𑀳𑁄 𑀘𑀸𑀢𑀺 𑀫𑀼𑀦𑀺𑀲𑀻𑀳𑁄. 𑀏𑀯𑀁 𑀫𑀼𑀦𑀺𑀯𑀲𑀪𑁄, 𑀫𑀼𑀦𑀺𑀧𑀼𑀗𑁆𑀕𑀯𑁄, 𑀩𑀼𑀤𑁆𑀥𑀦𑀸𑀕𑁄, 𑀩𑀼𑀤𑁆𑀥𑀸𑀤𑀺𑀘𑁆𑀘𑁄, 𑀭𑀁𑀲𑀺 𑀯𑀺𑀬 𑀭𑀁𑀲𑀺, 𑀲𑀤𑁆𑀥𑀫𑁆𑀫𑁄 𑀘 ¶ 𑀲𑁄 𑀭𑀁𑀲𑀺 𑀘𑀸𑀢𑀺 𑀲𑀤𑁆𑀥𑀫𑁆𑀫𑀭𑀁𑀲𑀺. 𑀏𑀯𑀁 𑀯𑀺𑀦𑀬𑀲𑀸𑀕𑀭𑁄, 𑀧𑀼𑀡𑁆𑀟𑀭𑀻𑀓𑀫𑀺𑀯 𑀧𑀼𑀡𑁆𑀟𑀭𑀻𑀓𑁄, 𑀲𑀫𑀡𑁄 𑀘 𑀲𑁄 𑀧𑀼𑀡𑁆𑀟𑀭𑀻𑀓𑁄 𑀘𑀸𑀢𑀺 𑀲𑀫𑀡𑀧𑀼𑀡𑁆𑀟𑀭𑀻𑀓𑁄, 𑀲𑀫𑀡𑀧𑀤𑀼𑀫𑁄. 𑀘𑀦𑁆𑀤𑁄 𑀯𑀺𑀬 𑀘𑀦𑁆𑀤𑁄, 𑀫𑀼𑀔𑀜𑁆𑀘 𑀢𑀁 𑀘𑀦𑁆𑀤𑁄 𑀘𑀸𑀢𑀺 𑀫𑀼𑀔𑀘𑀦𑁆𑀤𑁄. 𑀏𑀯𑀁 𑀫𑀼𑀔𑀧𑀤𑀼𑀫𑀁 𑀇𑀘𑁆𑀘𑀸𑀤𑀺.

𑀲𑀫𑁆𑀪𑀸𑀯𑀦𑀸𑀧𑀼𑀩𑁆𑀩𑀧𑀤𑁄 𑀬𑀣𑀸 𑁋 𑀥𑀫𑁆𑀫𑁄 𑀇𑀢𑀺 𑀩𑀼𑀤𑁆𑀥𑀺 𑀥𑀫𑁆𑀫𑀩𑀼𑀤𑁆𑀥𑀺. 𑀏𑀯𑀁 𑀥𑀫𑁆𑀫𑀲𑀜𑁆𑀜𑀸, 𑀥𑀫𑁆𑀫𑀲𑀗𑁆𑀔𑀸𑀢𑁄, 𑀥𑀫𑁆𑀫𑀲𑀫𑁆𑀫𑀢𑁄, 𑀧𑀸𑀡𑀲𑀜𑁆𑀜𑀺𑀢𑀸, 𑀅𑀲𑀼𑀪𑀲𑀜𑁆𑀜𑀸, 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀅𑀦𑀢𑁆𑀢𑀲𑀜𑁆𑀜𑀸, 𑀥𑀸𑀢𑀼𑀲𑀜𑁆𑀜𑀸, 𑀥𑀻𑀢𑀼𑀲𑀜𑁆𑀜𑀸, 𑀅𑀢𑁆𑀢𑀲𑀜𑁆𑀜𑀸, 𑀅𑀢𑁆𑀣𑀺𑀲𑀜𑁆𑀜𑀸, 𑀅𑀢𑁆𑀢𑀤𑀺𑀝𑁆𑀞𑀺 𑀇𑀘𑁆𑀘𑀸𑀤𑀺.

𑀅𑀯𑀥𑀸𑀭𑀡𑀧𑀼𑀩𑁆𑀩𑀧𑀤𑁄 𑀬𑀣𑀸 𑁋 𑀕𑀼𑀡𑁄 𑀏𑀯 𑀥𑀦𑀁 𑀕𑀼𑀡𑀥𑀦𑀁. 𑀏𑀯𑀁 𑀲𑀤𑁆𑀥𑀸𑀥𑀦𑀁, 𑀲𑀻𑀮𑀥𑀦𑀁, 𑀧𑀜𑁆𑀜𑀸𑀥𑀦𑀁, 𑀘𑀓𑁆𑀔𑀼 𑀏𑀯 𑀇𑀦𑁆𑀤𑁆𑀭𑀺𑀬𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁. 𑀏𑀯𑀁 𑀘𑀓𑁆𑀔𑀸𑀬𑀢𑀦𑀁, 𑀘𑀓𑁆𑀔𑀼𑀥𑀸𑀢𑀼, 𑀘𑀓𑁆𑀔𑀼𑀤𑁆𑀯𑀸𑀭𑀁, 𑀭𑀽𑀧𑀸𑀭𑀫𑁆𑀫𑀡𑀫𑀺𑀘𑁆𑀘𑀸𑀤𑀺.

𑀦𑀦𑀺𑀧𑀸𑀢𑀧𑀼𑀩𑁆𑀩𑀧𑀤𑁄 𑀬𑀣𑀸 𑁋 𑀦 𑀩𑁆𑀭𑀸𑀳𑁆𑀫𑀡𑁄𑀢𑀺 𑀅𑀢𑁆𑀣𑁂 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁂, 𑀯𑀺𑀪𑀢𑁆𑀢𑀺𑀮𑁄𑀧𑀸𑀤𑀺𑀫𑁆𑀳𑀺 𑀘 𑀓𑀢𑁂 𑁋

‘‘𑀉𑀪𑁂 𑀢𑀧𑁆𑀧𑀼𑀭𑀺𑀲𑀸’’𑀢𑀺 𑀢𑀧𑁆𑀧𑀼𑀭𑀺𑀲𑀲𑀜𑁆𑀜𑀸.

𑁩𑁪𑁪. 𑀅𑀢𑁆𑀢𑀁 𑀦𑀲𑁆𑀲 𑀢𑀧𑁆𑀧𑀼𑀭𑀺𑀲𑁂.

𑀦𑀲𑁆𑀲 𑀦𑀺𑀧𑀸𑀢𑀧𑀤𑀲𑁆𑀲 𑀢𑀧𑁆𑀧𑀼𑀭𑀺𑀲𑁂 𑀉𑀢𑁆𑀢𑀭𑀧𑀤𑁂 𑀧𑀭𑁂 𑀲𑀩𑁆𑀩𑀲𑁆𑀲𑁂𑀯 𑀅𑀢𑁆𑀢𑀁 𑀳𑁄𑀢𑀺. 𑀢𑀧𑁆𑀧𑀼𑀭𑀺𑀲𑁂𑀓𑀤𑁂𑀲𑀢𑁆𑀢𑀸 𑀢𑀧𑁆𑀧𑀼𑀭𑀺𑀲𑁄, 𑀅𑀩𑁆𑀭𑀸𑀳𑁆𑀫𑀡𑁄.

𑀦 𑀦𑀺𑀲𑁂𑀥𑁄 𑀲𑀢𑁄 𑀬𑀼𑀢𑁆𑀢𑁄,

𑀤𑁂𑀲𑀸𑀤𑀺𑀦𑀺𑀬𑀫𑀁 𑀯𑀺𑀦𑀸;

𑀅𑀲𑀢𑁄 𑀘𑀸𑀨𑀮𑁄 𑀢𑀲𑁆𑀫𑀸,

𑀓𑀣𑀫𑀩𑁆𑀭𑀸𑀳𑁆𑀫𑀡𑁄𑀢𑀺 𑀘𑁂?

𑀦𑀺𑀲𑁂𑀥𑀢𑁆𑀣𑀸𑀦𑀼𑀯𑀸𑀤𑁂𑀦, 𑀧𑀝𑀺𑀲𑁂𑀥𑀯𑀺𑀥𑀺 𑀓𑁆𑀯𑀘𑀺;

𑀧𑀭𑀲𑁆𑀲 𑀫𑀺𑀘𑁆𑀙𑀸𑀜𑀸𑀡𑀢𑁆𑀢𑀸-𑀔𑁆𑀬𑀸𑀧𑀦𑀸𑀬𑁄𑀧𑀧𑀚𑁆𑀚𑀢𑁂.

𑀤𑀼𑀯𑀺𑀥𑁄 𑀘𑀲𑁆𑀲𑀢𑁆𑀣𑁄 𑀧𑀲𑀚𑁆𑀚𑀧𑁆𑀧𑀝𑀺𑀲𑁂𑀥𑀧𑀭𑀺𑀬𑀼𑀤𑀸𑀲𑀯𑀲𑁂𑀦.

𑀢𑀢𑁆𑀣 ¶ 𑀬𑁄 ‘‘𑀅𑀲𑀽𑀭𑀺𑀬𑀧𑀲𑁆𑀲𑀸 𑀭𑀸𑀚𑀤𑀸𑀭𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀉𑀢𑁆𑀢𑀭𑀧𑀤𑀢𑁆𑀣𑀲𑁆𑀲 𑀲𑀩𑁆𑀩𑀣𑀸 𑀅𑀪𑀸𑀯𑀁 𑀤𑀻𑀧𑁂𑀢𑀺, 𑀲𑁄 𑀧𑀲𑀚𑁆𑀚𑀧𑁆𑀧𑀝𑀺𑀲𑁂𑀥𑀯𑀸𑀘𑀻 𑀦𑀸𑀫. 𑀬𑁄 𑀧𑀦 ‘‘𑀅𑀩𑁆𑀭𑀸𑀳𑁆𑀫𑀡 𑀅𑀫𑀦𑀼𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀉𑀢𑁆𑀢𑀭𑀧𑀤𑀢𑁆𑀣𑀁 𑀧𑀭𑀺𑀬𑀼𑀤𑀸𑀲𑀺𑀢𑁆𑀯𑀸 𑀢𑀁𑀲𑀤𑀺𑀲𑁂 𑀯𑀢𑁆𑀣𑀼𑀫𑁆𑀳𑀺 𑀓𑀸𑀭𑀺𑀬𑀁 𑀧𑀝𑀺𑀧𑀸𑀤𑀬𑀢𑀺, 𑀲𑁄 𑀧𑀭𑀺𑀬𑀼𑀤𑀸𑀲𑀯𑀸𑀘𑀻 𑀦𑀸𑀫.

𑀯𑀼𑀢𑁆𑀢𑀜𑁆𑀘

‘‘𑀧𑀲𑀚𑁆𑀚𑀧𑁆𑀧𑀝𑀺𑀲𑁂𑀥𑀲𑁆𑀲, 𑀮𑀓𑁆𑀔𑀡𑀁 𑀯𑀢𑁆𑀣𑀼𑀦𑀢𑁆𑀣𑀺𑀢𑀸;

𑀯𑀢𑁆𑀣𑀼𑀢𑁄 𑀅𑀜𑁆𑀜𑀢𑁆𑀭 𑀯𑀼𑀢𑁆𑀢𑀺, 𑀧𑀭𑀺𑀬𑀼𑀤𑀸𑀲𑀮𑀓𑁆𑀔𑀡’’𑀦𑁆𑀢𑀺.

𑀦𑀦𑁆𑀯𑁂𑀯𑀁 𑀲𑀦𑁆𑀢𑁂𑀧𑀺 ‘‘𑀅𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀻𑀲𑀼 𑀓𑀣𑀫𑀼𑀢𑁆𑀢𑀭𑀧𑀤𑀢𑁆𑀣𑀧𑁆𑀧𑀥𑀸𑀦𑀢𑀸 𑀲𑀺𑀬𑀸𑀢𑀺?

𑀯𑀼𑀘𑁆𑀘𑀢𑁂 𑁋 𑀩𑁆𑀭𑀸𑀳𑁆𑀫𑀡𑀸𑀤𑀺𑀲𑀤𑁆𑀤𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀤𑀺𑀅𑀢𑁆𑀣𑀲𑁆𑀲𑁂𑀯 𑀢𑀁𑀲𑀤𑀺𑀲𑀸𑀤𑀺𑀅𑀢𑁆𑀣𑀲𑁆𑀲𑀸𑀧𑀺 𑀯𑀸𑀘𑀓𑀢𑁆𑀢𑀸, 𑀩𑁆𑀭𑀸𑀳𑁆𑀫𑀡𑀸𑀤𑀺𑀲𑀤𑁆𑀤𑀸 𑀳𑀺 𑀓𑁂𑀯𑀮𑀸𑀩𑁆𑀭𑀸𑀳𑁆𑀫𑀡𑀸𑀤𑀺𑀅𑀢𑁆𑀣𑁂𑀲𑁆𑀯𑁂𑀯 𑀧𑀸𑀓𑀝𑀸, 𑀪𑀽𑀲𑀤𑁆𑀤𑁄 𑀯𑀺𑀬𑀲𑀢𑁆𑀢𑀸𑀬𑀁, 𑀬𑀤𑀸 𑀢𑁂 𑀧𑀦 𑀅𑀜𑁆𑀜𑁂𑀦 𑀲𑀤𑀺𑀲𑀸𑀤𑀺𑀯𑀸𑀘𑀓𑁂𑀦 𑀦𑀇𑀢𑀺 𑀦𑀺𑀧𑀸𑀢𑁂𑀦 𑀬𑀼𑀚𑁆𑀚𑀦𑁆𑀢𑀺, 𑀢𑀤𑀸 𑀢𑀁𑀲𑀤𑀺𑀲𑀢𑀤𑀜𑁆𑀜𑀢𑀩𑁆𑀩𑀺𑀭𑀼𑀤𑁆𑀥𑀢𑀤𑀪𑀸𑀯𑁂𑀲𑀼𑀧𑀺 𑀯𑀢𑁆𑀢𑀦𑁆𑀢𑀺, 𑀪𑀽𑀲𑀤𑁆𑀤𑁄 𑀯𑀺𑀬 𑀅𑀦𑁆𑀯𑀪𑀺𑀬𑀸𑀤𑀺𑀬𑁄𑀕𑁂 𑀅𑀦𑀼𑀪𑀯𑀦𑀅𑀪𑀺𑀪𑀯𑀦𑀸𑀤𑀻𑀲𑀼, 𑀢𑀲𑁆𑀫𑀸 𑀉𑀢𑁆𑀢𑀭𑀧𑀤𑀢𑁆𑀣𑀚𑁄𑀢𑀓𑁄𑀬𑁂𑀯𑁂𑀢𑁆𑀣 𑀦𑀇𑀢𑀺 𑀦𑀺𑀧𑀸𑀢𑁄𑀢𑀺 𑀦 𑀤𑁄𑀲𑁄, 𑀢𑁂𑀦 𑀅𑀩𑁆𑀭𑀸𑀳𑁆𑀫𑀡𑁄𑀢𑀺 𑀩𑁆𑀭𑀸𑀳𑁆𑀫𑀡𑀲𑀤𑀺𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀅𑀫𑀦𑀼𑀲𑁆𑀲𑁄, 𑀅𑀲𑁆𑀲𑀫𑀡𑁄.

𑀅𑀜𑁆𑀜𑀢𑁆𑀣𑁂 𑁋 𑀦 𑀩𑁆𑀬𑀸𑀓𑀢𑀸 𑀅𑀩𑁆𑀬𑀸𑀓𑀢𑀸, 𑀅𑀲𑀁𑀓𑀺𑀮𑀺𑀝𑁆𑀞𑀸, 𑀅𑀧𑀭𑀺𑀬𑀸𑀧𑀦𑁆𑀦𑀸.

𑀯𑀺𑀭𑀼𑀤𑁆𑀥𑀢𑁆𑀣𑁂 𑁋 𑀦 𑀓𑀼𑀲𑀮𑀸 𑀅𑀓𑀼𑀲𑀮𑀸, 𑀓𑀼𑀲𑀮𑀧𑀝𑀺𑀧𑀓𑁆𑀔𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀅𑀮𑁄𑀪𑁄, 𑀅𑀫𑀺𑀢𑁆𑀢𑁄.

𑀧𑀲𑀚𑁆𑀚𑀧𑁆𑀧𑀝𑀺𑀲𑁂𑀥𑁂 𑁋 𑀦 𑀓𑀢𑁆𑀯𑀸 𑀅𑀓𑀢𑁆𑀯𑀸, 𑀅𑀓𑀸𑀢𑀼𑀦 𑀧𑀼𑀜𑁆𑀜𑀁 𑀅𑀓𑀭𑁄𑀦𑁆𑀢𑁄.

‘‘𑀦𑀲𑁆𑀲, 𑀢𑀧𑁆𑀧𑀼𑀭𑀺𑀲𑁂’’𑀢𑀺 𑀘 𑀯𑀢𑁆𑀢𑀢𑁂.

𑁩𑁪𑁫. 𑀲𑀭𑁂 ¶ 𑀅𑀦.

𑀦𑀇𑀘𑁆𑀘𑁂𑀢𑀲𑁆𑀲 𑀧𑀤𑀲𑁆𑀲 𑀢𑀧𑁆𑀧𑀼𑀭𑀺𑀲𑁂 𑀉𑀢𑁆𑀢𑀭𑀧𑀤𑁂 𑀅𑀦 𑀳𑁄𑀢𑀺 𑀲𑀭𑁂 𑀧𑀭𑁂.

𑀦 𑀅𑀲𑁆𑀲𑁄 𑀅𑀦𑀲𑁆𑀲𑁄, 𑀦 𑀅𑀭𑀺𑀬𑁄 𑀅𑀦𑀭𑀺𑀬𑁄. 𑀏𑀯𑀁 𑀅𑀦𑀺𑀲𑁆𑀲𑀭𑁄, 𑀅𑀦𑀺𑀝𑁆𑀞𑁄, 𑀅𑀦𑀼𑀧𑀯𑀸𑀤𑁄, 𑀦 𑀆𑀤𑀸𑀬 𑀅𑀦𑀸𑀤𑀸𑀬, 𑀅𑀦𑁄𑀮𑁄𑀓𑁂𑀢𑁆𑀯𑀸 𑀇𑀘𑁆𑀘𑀸𑀤𑀺.

𑀓𑀼𑀧𑀼𑀩𑁆𑀩𑀧𑀤𑁄 𑀬𑀣𑀸 𑁋 𑀓𑀼𑀘𑁆𑀙𑀺𑀢𑀫𑀦𑁆𑀦𑀦𑁆𑀢𑀺 𑀦𑀺𑀘𑁆𑀘𑀲𑀫𑀸𑀲𑀢𑁆𑀢𑀸 𑀅𑀜𑁆𑀜𑀧𑀤𑁂𑀦 𑀯𑀺𑀕𑁆𑀕𑀳𑁄, 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁂 𑀓𑀢𑁂 𑁋

‘‘𑀢𑀧𑁆𑀧𑀼𑀭𑀺𑀲𑁂, 𑀲𑀭𑁂’’𑀢𑀺 𑀘 𑀯𑀢𑁆𑀢𑀢𑁂.

𑁩𑁪𑁬. 𑀓𑀤𑀤 𑀓𑀼𑀲𑁆𑀲.

𑀓𑀼𑀇𑀘𑁆𑀘𑁂𑀢𑀲𑁆𑀲 𑀦𑀺𑀧𑀸𑀢𑀲𑁆𑀲 𑀢𑀧𑁆𑀧𑀼𑀭𑀺𑀲𑁂 𑀉𑀢𑁆𑀢𑀭𑀧𑀤𑁂 𑀓𑀤 𑀳𑁄𑀢𑀺 𑀲𑀭𑁂 𑀧𑀭𑁂. 𑀓𑀤𑀦𑁆𑀦𑀁. 𑀏𑀯𑀁 𑀓𑀤𑀲𑀦𑀁.

𑀲𑀭𑁂𑀢𑀺 𑀓𑀺𑀁? 𑀓𑀼𑀤𑀸𑀭𑀸, 𑀓𑀼𑀧𑀼𑀢𑁆𑀢𑀸, 𑀓𑀼𑀤𑀸𑀲𑀸, 𑀓𑀼𑀤𑀺𑀝𑁆𑀞𑀺.

‘‘𑀓𑀼𑀲𑁆𑀲𑀸’’𑀢𑀺 𑀯𑀢𑁆𑀢𑀢𑁂.

𑁩𑁪𑁭. 𑀓𑀸𑀧𑁆𑀧𑀢𑁆𑀣𑁂𑀲𑀼 𑀘.

𑀓𑀼𑀇𑀘𑁆𑀘𑁂𑀢𑀲𑁆𑀲 𑀅𑀧𑁆𑀧𑀢𑁆𑀣𑁂 𑀯𑀢𑁆𑀢𑀫𑀸𑀦𑀲𑁆𑀲 𑀓𑀸 𑀳𑁄𑀢𑀺 𑀢𑀧𑁆𑀧𑀼𑀭𑀺𑀲𑁂 𑀉𑀢𑁆𑀢𑀭𑀧𑀤𑁂 𑀧𑀭𑁂. 𑀩𑀳𑀼𑀯𑀘𑀦𑀼𑀘𑁆𑀘𑀸𑀭𑀡𑀢𑁄 𑀓𑀼𑀘𑁆𑀙𑀺𑀢𑀢𑁆𑀣𑁂 𑀘 𑀓𑁆𑀯𑀘𑀺 𑀢𑀧𑁆𑀧𑀼𑀭𑀺𑀲𑁂. 𑀅𑀧𑁆𑀧𑀓𑀁 𑀮𑀯𑀡𑀁 𑀓𑀸𑀮𑀯𑀡𑀁. 𑀏𑀯𑀁 𑀓𑀸𑀧𑀼𑀧𑁆𑀨𑀁, 𑀓𑀼𑀘𑁆𑀙𑀺𑀢𑁄 𑀧𑀼𑀭𑀺𑀲𑁄 𑀓𑀸𑀧𑀼𑀭𑀺𑀲𑁄, 𑀓𑀼𑀧𑀼𑀭𑀺𑀲𑁄 𑀯𑀸.

𑀧𑀸𑀤𑀺𑀧𑀼𑀩𑁆𑀩𑀧𑀤𑁄 𑀘 𑀦𑀺𑀘𑁆𑀘𑀲𑀫𑀸𑀲𑁄𑀯, 𑀧𑀥𑀸𑀦𑀁 𑀯𑀘𑀦𑀁 𑀧𑀸𑀯𑀘𑀦𑀁, 𑀪𑀼𑀲𑀁 𑀯𑀤𑁆𑀥𑀁 𑀧𑀯𑀤𑁆𑀥𑀁, 𑀲𑀭𑀻𑀭𑀁, 𑀲𑀫𑀁, 𑀲𑀫𑁆𑀫𑀸 𑀯𑀸 𑀆𑀥𑀸𑀦𑀁 𑀲𑀫𑀸𑀥𑀸𑀦𑀁, 𑀯𑀺𑀯𑀺𑀥𑀸 𑀫𑀢𑀺 𑀯𑀺𑀫𑀢𑀺, 𑀯𑀺𑀯𑀺𑀥𑁄 𑀓𑀧𑁆𑀧𑁄 𑀯𑀺𑀓𑀧𑁆𑀧𑁄, 𑀯𑀺𑀲𑀺𑀝𑁆𑀞𑁄 𑀯𑀸 𑀓𑀧𑁆𑀧𑁄 ¶ 𑀯𑀺𑀓𑀧𑁆𑀧𑁄, 𑀅𑀥𑀺𑀓𑁄 𑀤𑁂𑀯𑁄 𑀅𑀢𑀺𑀤𑁂𑀯𑁄. 𑀏𑀯𑀁 𑀅𑀥𑀺𑀤𑁂𑀯𑁄, 𑀅𑀥𑀺𑀲𑀻𑀮𑀁, 𑀲𑀼𑀦𑁆𑀤𑀭𑁄 𑀕𑀦𑁆𑀥𑁄 𑀲𑀼𑀕𑀦𑁆𑀥𑁄, 𑀓𑀼𑀘𑁆𑀙𑀺𑀢𑁄 𑀕𑀦𑁆𑀥𑁄 𑀤𑀼𑀕𑁆𑀕𑀦𑁆𑀥𑁄, 𑀲𑁄𑀪𑀦𑀁 𑀓𑀢𑀁 𑀲𑀼𑀓𑀢𑀁, 𑀅𑀲𑁄𑀪𑀦𑀁 𑀓𑀢𑀁 𑀤𑀼𑀓𑁆𑀓𑀝𑀁 𑀇𑀘𑁆𑀘𑀸𑀤𑀺.

𑀬𑁂 𑀇𑀥 𑀅𑀯𑀺𑀳𑀺𑀢𑀮𑀓𑁆𑀔𑀡𑀸 𑀦𑀸𑀫𑀦𑀺𑀧𑀸𑀢𑁄𑀧𑀲𑀕𑁆𑀕𑀸, 𑀢𑁂𑀲𑀁 ‘‘𑀦𑀸𑀫𑀸𑀦𑀁 𑀲𑀫𑀸𑀲𑁄’’𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀲𑀫𑀸𑀲𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑁋 𑀅𑀧𑀼𑀦𑀕𑁂𑀬𑁆𑀬𑀸 𑀕𑀸𑀣𑀸, 𑀅𑀘𑀦𑁆𑀤𑀫𑀼𑀮𑁆𑀮𑁄𑀓𑀺𑀓𑀸𑀦𑀺 𑀫𑀼𑀔𑀸𑀦𑀺, 𑀅𑀲𑁆𑀲𑀤𑁆𑀥𑀪𑁄𑀚𑀻, 𑀅𑀮𑀯𑀡𑀪𑁄𑀚𑀻𑀢𑀺𑀆𑀤𑀻𑀲𑀼 𑀅𑀬𑀼𑀢𑁆𑀢𑀢𑁆𑀣𑀢𑁆𑀢𑀸 𑀦𑀸𑀜𑁆𑀜𑁂𑀦 𑀲𑀫𑀸𑀲𑁄.

𑀢𑀣𑀸 𑀤𑀺𑀝𑁆𑀞𑁄 𑀧𑀼𑀩𑁆𑀩𑀦𑁆𑀢𑀺 𑀤𑀺𑀝𑁆𑀞𑀧𑀼𑀩𑁆𑀩𑁄 𑀢𑀣𑀸𑀕𑀢𑀁. 𑀏𑀯𑀁 𑀲𑀼𑀢𑀧𑀼𑀩𑁆𑀩𑁄 𑀥𑀫𑁆𑀫𑀁, 𑀕𑀢𑀧𑀼𑀩𑁆𑀩𑁄 𑀫𑀕𑁆𑀕𑀁, 𑀓𑀫𑁆𑀫𑀦𑀺 𑀤𑀺𑀝𑁆𑀞𑀸 𑀧𑀼𑀩𑁆𑀩𑀦𑁆𑀢𑀺 𑀤𑀺𑀝𑁆𑀞𑀧𑀼𑀩𑁆𑀩𑀸 𑀤𑁂𑀯𑀸 𑀢𑁂𑀦. 𑀏𑀯𑀁 𑀲𑀼𑀢𑀧𑀼𑀩𑁆𑀩𑀸 𑀥𑀫𑁆𑀫𑀸, 𑀕𑀢𑀧𑀼𑀩𑁆𑀩𑀸 𑀤𑀺𑀲𑀸, 𑀧𑀳𑀸𑀭𑁄, 𑀧𑀭𑀸𑀪𑀯𑁄, 𑀯𑀺𑀳𑀸𑀭𑁄, 𑀆𑀳𑀸𑀭𑁄, 𑀉𑀧𑀳𑀸𑀭𑁄 𑀇𑀘𑁆𑀘𑀸𑀤𑀺.

𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄.

𑀤𑀺𑀕𑀼𑀲𑀫𑀸𑀲

𑀅𑀣 𑀤𑀺𑀕𑀼𑀲𑀫𑀸𑀲𑁄 𑀯𑀼𑀘𑁆𑀘𑀢𑁂.

𑀢𑀬𑁄 𑀮𑁄𑀓𑀸 𑀲𑀫𑀸𑀳𑀝𑀸 𑀘𑀺𑀢𑁆𑀢𑁂𑀦 𑀲𑀫𑁆𑀧𑀺𑀡𑁆𑀟𑀺𑀢𑀸, 𑀢𑀺𑀡𑁆𑀡𑀁 𑀮𑁄𑀓𑀸𑀦𑀁 𑀲𑀫𑀸𑀳𑀸𑀭𑁄𑀢𑀺 𑀯𑀸 𑀅𑀢𑁆𑀣𑁂 𑁋

‘‘𑀦𑀸𑀫𑀸𑀦𑀁 𑀲𑀫𑀸𑀲𑁄 𑀬𑀼𑀢𑁆𑀢𑀢𑁆𑀣𑁄’’𑀢𑀺 𑀯𑀢𑁆𑀢𑀫𑀸𑀦𑁂 ‘‘𑀤𑁆𑀯𑀺𑀧𑀤𑁂’’𑀢𑀺𑀆𑀤𑀺𑀦𑀸 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄, 𑀢𑀢𑁄 𑀲𑀫𑀸𑀲𑀲𑀜𑁆𑀜𑀸𑀬𑀁, 𑀯𑀺𑀪𑀢𑁆𑀢𑀺𑀮𑁄𑀧𑁂, 𑀧𑀓𑀢𑀺𑀪𑀸𑀯𑁂 𑀘 𑀓𑀢𑁂 𑁋

‘‘𑀓𑀫𑁆𑀫𑀥𑀸𑀭𑀬𑁄’’𑀢𑀺 𑀯𑀢𑁆𑀢𑀢𑁂.

𑁩𑁪𑁮. 𑀲𑀗𑁆𑀔𑁆𑀬𑀸𑀧𑀼𑀩𑁆𑀩𑁄 ¶ 𑀤𑀺𑀕𑀼.

𑀲𑀗𑁆𑀔𑁆𑀬𑀸𑀧𑀼𑀩𑁆𑀩𑁄 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄 𑀤𑀺𑀕𑀼𑀲𑀜𑁆𑀜𑁄 𑀳𑁄𑀢𑀺.

𑀤𑁆𑀯𑁂 𑀕𑀸𑀯𑁄 𑀤𑀺𑀕𑀼, 𑀤𑀺𑀕𑀼𑀲𑀤𑀺𑀲𑀢𑁆𑀢𑀸 𑀅𑀬𑀫𑁆𑀧𑀺 𑀲𑀫𑀸𑀲𑁄 𑀤𑀺𑀕𑀽𑀢𑀺 𑀯𑀼𑀢𑁆𑀢𑁄. 𑀅𑀣 𑀯𑀸 𑀲𑀗𑁆𑀔𑁆𑀬𑀸𑀧𑀼𑀩𑁆𑀩𑀢𑁆𑀢𑀦𑀧𑀼𑀁𑀲𑀓𑁂𑀓𑀢𑁆𑀢𑀲𑀗𑁆𑀔𑀸𑀢𑁂𑀳𑀺 𑀤𑁆𑀯𑀻𑀳𑀺 𑀮𑀓𑁆𑀔𑀡𑁂𑀳𑀺 𑀕𑀢𑁄 𑀅𑀯𑀕𑀢𑁄𑀢𑀺 𑀤𑀺𑀕𑀽𑀢𑀺 𑀯𑀼𑀘𑁆𑀘𑀢𑀺, 𑀤𑁆𑀯𑀻𑀳𑀺 𑀯𑀸 𑀮𑀓𑁆𑀔𑀡𑁂𑀳𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀤𑀺𑀕𑀼. 𑀏𑀢𑁆𑀣 𑀘 ‘‘𑀲𑀗𑁆𑀔𑁆𑀬𑀸𑀧𑀼𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀗𑁆𑀔𑁆𑀬𑀸𑀲𑀤𑁆𑀤𑀲𑁆𑀲𑁂𑀯 𑀧𑀼𑀩𑁆𑀩𑀦𑀺𑀧𑀸𑀢𑁄, ‘‘𑀉𑀪𑁂 𑀢𑀧𑁆𑀧𑀼𑀭𑀺𑀲𑀸’’𑀢𑀺 𑀢𑀧𑁆𑀧𑀼𑀭𑀺𑀲𑀲𑀜𑁆𑀜𑀸.

‘‘𑀦𑀧𑀼𑀁𑀲𑀓𑀮𑀺𑀗𑁆𑀕𑁄’’𑀢𑀺 𑀯𑀢𑁆𑀢𑀢𑁂.

𑁩𑁪𑁯. 𑀤𑀺𑀕𑀼𑀲𑁆𑀲𑁂𑀓𑀢𑁆𑀢𑀁.

𑀤𑀺𑀕𑀼𑀲𑁆𑀲 𑀲𑀫𑀸𑀲𑀲𑁆𑀲 𑀏𑀓𑀢𑁆𑀢𑀁 𑀳𑁄𑀢𑀺, 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀜𑁆𑀘.

𑀲𑀫𑀸𑀳𑀸𑀭𑀤𑀺𑀕𑀼𑀲𑁆𑀲𑁂𑀢𑀁 𑀕𑀳𑀡𑀁, 𑀢𑀢𑁆𑀣 𑀲𑀩𑁆𑀩𑀢𑁆𑀣𑁂𑀓𑀯𑀘𑀦𑀫𑁂𑀯 𑀳𑁄𑀢𑀺, 𑀅𑀜𑁆𑀜𑀢𑁆𑀭 𑀧𑀦 𑀩𑀳𑀼𑀯𑀘𑀦𑀫𑁆𑀧𑀺, 𑀦𑀸𑀫𑀩𑁆𑀬𑀧𑀤𑁂𑀲𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺 𑀅𑀫𑀸𑀤𑁂𑀲𑀸𑀤𑀺.

𑀢𑀺𑀮𑁄𑀓𑀁, 𑀳𑁂 𑀢𑀺𑀮𑁄𑀓, 𑀢𑀺𑀮𑁄𑀓𑀁, 𑀢𑀺𑀮𑁄𑀓𑁂𑀦, 𑀢𑀺𑀮𑁄𑀓𑀲𑁆𑀲, 𑀢𑀺𑀮𑁄𑀓𑀸 𑀢𑀺𑀮𑁄𑀓𑀲𑁆𑀫𑀸 𑀢𑀺𑀮𑁄𑀓𑀫𑁆𑀳𑀸, 𑀢𑀺𑀮𑁄𑀓𑀲𑁆𑀲, 𑀢𑀺𑀮𑁄𑀓𑁂 𑀢𑀺𑀮𑁄𑀓𑀫𑁆𑀳𑀺 𑀢𑀺𑀮𑁄𑀓𑀲𑁆𑀫𑀺𑀁.

𑀏𑀯𑀁 𑀢𑀬𑁄 𑀤𑀡𑁆𑀟𑀸 𑀢𑀺𑀤𑀡𑁆𑀟𑀁, 𑀢𑀻𑀡𑀺 𑀫𑀮𑀸𑀦𑀺 𑀲𑀫𑀸𑀳𑀝𑀸𑀦𑀺, 𑀢𑀺𑀡𑁆𑀡𑀁 𑀫𑀮𑀸𑀦𑀁 𑀲𑀫𑀸𑀳𑀸𑀭𑁄𑀢𑀺 𑀯𑀸 𑀢𑀺𑀫𑀮𑀁, 𑀢𑀺𑀮𑀓𑁆𑀔𑀡𑀁, 𑀘𑀢𑀼𑀲𑁆𑀲𑀘𑁆𑀘𑀁, 𑀘𑀢𑀲𑁆𑀲𑁄 𑀤𑀺𑀲𑀸 𑀘𑀢𑀼𑀤𑁆𑀤𑀺𑀲𑀁, ‘‘𑀲𑀭𑁄 𑀭𑀲𑁆𑀲𑁄 𑀦𑀧𑀼𑀁𑀲𑀓𑁂’’𑀢𑀺 𑀭𑀲𑁆𑀲𑀢𑁆𑀢𑀁, 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀁, 𑀲𑀴𑀸𑀬𑀢𑀦𑀁, 𑀲𑀢𑁆𑀢𑀸𑀳𑀁, 𑀅𑀝𑁆𑀞𑀲𑀻𑀮𑀁, 𑀦𑀯𑀮𑁄𑀓𑀼𑀢𑁆𑀢𑀭𑀁, 𑀤𑀲𑀲𑀻𑀮𑀁, 𑀲𑀢𑀬𑁄𑀚𑀦𑀁.

𑀢𑀣𑀸 𑁋 𑀤𑁆𑀯𑁂 𑀭𑀢𑁆𑀢𑀺𑀬𑁄 𑀤𑁆𑀯𑀺𑀭𑀢𑁆𑀢𑀁, 𑀢𑀺𑀲𑁆𑀲𑁄 𑀭𑀢𑁆𑀢𑀺𑀬𑁄 𑀢𑀺𑀭𑀢𑁆𑀢𑀁, 𑀤𑁆𑀯𑁂 𑀅𑀗𑁆𑀕𑀼𑀮𑀺𑀬𑁄 𑀤𑁆𑀯𑀗𑁆𑀕𑀼𑀮𑀁, 𑀲𑀢𑁆𑀢 𑀕𑁄𑀤𑀸𑀯𑀭𑀺𑀬𑁄, 𑀢𑀸𑀲𑀁 𑀲𑀫𑀸𑀳𑀸𑀭𑁄𑀢𑀺 𑀯𑀸 𑀲𑀢𑁆𑀢𑀕𑁄𑀤𑀸𑀯𑀭𑀁.

𑀏𑀢𑁆𑀣 𑀘 𑀭𑀢𑁆𑀢𑀺 𑀅𑀗𑁆𑀕𑀼𑀮𑀺 𑀕𑁄𑀤𑀸𑀯𑀭𑀻𑀦𑀫𑀦𑁆𑀢𑀲𑁆𑀲 𑁋

𑁩𑁫𑁦. 𑀓𑁆𑀯𑀘𑀺 𑀲𑀫𑀸𑀲𑀦𑁆𑀢𑀕𑀢𑀸𑀦𑀫𑀓𑀸𑀭𑀦𑁆𑀢𑁄.

𑀭𑀸𑀚𑀸𑀤𑀺𑀕𑀡𑀲𑁆𑀲𑁂𑀢𑀁 𑀕𑀳𑀡𑀁, 𑀢𑁂𑀦 𑀲𑀫𑀸𑀲𑀦𑁆𑀢𑀕𑀢𑀸𑀦𑀁 𑀭𑀸𑀚𑀸𑀤𑀻𑀦𑀁 𑀦𑀸𑀫𑀸𑀦𑀁 𑀅𑀦𑁆𑀢𑁄 𑀓𑁆𑀯𑀘𑀺 𑀅𑀓𑀸𑀭𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀭𑀕𑁆𑀕𑀳𑀡𑁂𑀦 𑀩𑀳𑀼𑀩𑁆𑀩𑀻𑀳𑀸𑀤𑀺𑀫𑁆𑀳𑀺 𑀲𑀫𑀸𑀲𑀦𑁆𑀢𑁂 𑀓𑁆𑀯𑀘𑀺 𑀓𑀧𑁆𑀧𑀘𑁆𑀘𑀬𑁄 𑀳𑁄𑀢𑀺, 𑀲𑀼𑀭𑀪𑀺 𑀲𑀼 𑀤𑀼 𑀧𑀽𑀢𑀻𑀳𑀺 𑀕𑀦𑁆𑀥𑀦𑁆𑀢𑀲𑁆𑀲𑀺𑀓𑀸𑀭𑁄 𑀘.

𑀅𑀣 𑀯𑀸 𑀅 𑀘 𑀓𑁄 𑀘 𑀅𑀓𑀸, 𑀭𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀢𑁂𑀦 𑀓𑁆𑀯𑀘𑀺 𑀲𑀫𑀸𑀲𑀦𑁆𑀢𑀕𑀢𑀸𑀦𑀫𑀦𑁆𑀢𑁄 𑀳𑀼𑀢𑁆𑀯𑀸 𑀅 𑀓 𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦 𑀧𑀜𑁆𑀘 𑀕𑀸𑀯𑁄 𑀲𑀫𑀸𑀳𑀝𑀸𑀢𑀺 𑀅𑀢𑁆𑀣𑁂 𑀲𑀫𑀸𑀲𑀸𑀤𑀺𑀁 𑀓𑀢𑁆𑀯𑀸 𑀲𑀫𑀸𑀲𑀦𑁆𑀢𑁂 𑀅𑀧𑁆𑀧𑀘𑁆𑀘𑀬𑁂, ‘‘𑀑 𑀲𑀭𑁂 𑀘𑀸’’𑀢𑀺 𑀅𑀯𑀸𑀤𑁂𑀲𑁂 𑀘 𑀓𑀢𑁂 ‘‘𑀧𑀜𑁆𑀘𑀕𑀯’’𑀦𑁆𑀢𑀺𑀆𑀤𑀺 𑀘 𑀲𑀺𑀚𑁆𑀛𑀢𑀺. ‘‘𑀤𑁆𑀯𑀺𑀭𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 𑀧𑀦 𑀅𑀧𑁆𑀧𑀘𑁆𑀘𑀬𑁂 𑀓𑀢𑁂 𑀧𑀼𑀩𑁆𑀩𑀲𑀭𑀲𑁆𑀲 ‘‘𑀲𑀭𑀮𑁄𑀧𑁄’’𑀢𑀺𑀆𑀤𑀺𑀦𑀸 𑀮𑁄𑀧𑁄.

𑀅𑀲𑀫𑀸𑀳𑀸𑀭𑀤𑀺𑀕𑀼 𑀬𑀣𑀸 𑁋 𑀏𑀓𑁄 𑀘 𑀲𑁄 𑀧𑀼𑀕𑁆𑀕𑀮𑁄 𑀘𑀸𑀢𑀺 𑀏𑀓𑀧𑀼𑀕𑁆𑀕𑀮𑁄. 𑀏𑀯𑀁 𑀏𑀓𑀥𑀫𑁆𑀫𑁄, 𑀏𑀓𑀧𑀼𑀢𑁆𑀢𑁄, 𑀢𑀬𑁄 𑀪𑀯𑀸 𑀢𑀺𑀪𑀯𑀸, 𑀘𑀢𑀲𑁆𑀲𑁄 𑀤𑀺𑀲𑀸 𑀘𑀢𑀼𑀤𑁆𑀤𑀺𑀲𑀸, 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀸𑀦𑀺 𑀇𑀘𑁆𑀘𑀸𑀤𑀺.

𑀤𑀺𑀕𑀼𑀲𑀫𑀸𑀲𑁄.

𑀢𑀧𑁆𑀧𑀼𑀭𑀺𑀲𑀲𑀫𑀸𑀲

𑀅𑀣 𑀢𑀧𑁆𑀧𑀼𑀭𑀺𑀲𑀲𑀫𑀸𑀲𑁄 𑀯𑀼𑀘𑁆𑀘𑀢𑁂.

𑀲𑁄 𑀧𑀦 𑀤𑀼𑀢𑀺𑀬𑀸𑀤𑀻𑀲𑀼 𑀙𑀲𑀼 𑀯𑀺𑀪𑀢𑁆𑀢𑀻𑀲𑀼 𑀪𑀸𑀯𑀢𑁄 𑀙𑀩𑁆𑀩𑀺𑀥𑁄. 𑀢𑀢𑁆𑀣 𑀤𑀼𑀢𑀺𑀬𑀸𑀢𑀧𑁆𑀧𑀼𑀭𑀺𑀲𑁄 𑀕𑀢𑀦𑀺𑀲𑁆𑀲𑀺𑀢𑀸𑀢𑀻𑀢𑀸𑀢𑀺𑀓𑁆𑀓𑀦𑁆𑀢𑀧𑁆𑀧𑀢𑁆𑀢𑀸𑀧𑀦𑁆𑀦𑀸𑀤𑀻𑀳𑀺 𑀪𑀯𑀢𑀺.

𑀲𑀭𑀡𑀁 𑀕𑀢𑁄𑀢𑀺 𑀯𑀺𑀕𑁆𑀕𑀳𑁂 𑁋

‘‘𑀢𑀧𑁆𑀧𑀼𑀭𑀺𑀲𑁄’’𑀢𑀺 𑀯𑀢𑁆𑀢𑀢𑁂.

𑁩𑁫𑁧. 𑀅𑀫𑀸𑀤𑀬𑁄 ¶ 𑀧𑀭𑀧𑀤𑁂𑀪𑀺.

𑀅𑀫𑀸𑀤𑀺𑀯𑀺𑀪𑀢𑁆𑀬𑀦𑁆𑀢𑀸𑀦𑀺 𑀬𑀼𑀢𑁆𑀢𑀢𑁆𑀣𑀸𑀦𑀺 𑀧𑀼𑀩𑁆𑀩𑀧𑀤𑀸𑀦𑀺 𑀦𑀸𑀫𑁂𑀳𑀺 𑀧𑀭𑀧𑀤𑁂𑀪𑀺 𑀲𑀳 𑀯𑀺𑀪𑀸𑀲𑀸 𑀲𑀫𑀲𑁆𑀬𑀦𑁆𑀢𑁂, 𑀲𑁄 𑀲𑀫𑀸𑀲𑁄 𑀢𑀧𑁆𑀧𑀼𑀭𑀺𑀲𑀲𑀜𑁆𑀜𑁄 𑀳𑁄𑀢𑀺. 𑀅𑀬𑀜𑁆𑀘 𑀢𑀧𑁆𑀧𑀼𑀭𑀺𑀲𑁄 𑀅𑀪𑀺𑀥𑁂𑀬𑁆𑀬𑀯𑀘𑀦𑀮𑀺𑀗𑁆𑀕𑁄.

𑀕𑀢𑀸𑀤𑀺𑀲𑀤𑁆𑀤𑀸 𑀓𑀺𑀢𑀦𑁆𑀢𑀢𑁆𑀢𑀸 𑀢𑀺𑀮𑀺𑀗𑁆𑀕𑀸, 𑀯𑀺𑀪𑀢𑁆𑀢𑀺𑀮𑁄𑀧𑀸𑀤𑀺 𑀲𑀩𑁆𑀩𑀁 𑀧𑀼𑀩𑁆𑀩𑀲𑀫𑀁. 𑀲𑁄 𑀲𑀭𑀡𑀕𑀢𑁄, 𑀢𑁂 𑀲𑀭𑀡𑀕𑀢𑀸. 𑀲𑀸 𑀲𑀭𑀡𑀕𑀢𑀸, 𑀢𑀸 𑀲𑀭𑀡𑀕𑀢𑀸𑀬𑁄. 𑀢𑀁 𑀓𑀼𑀮𑀁 𑀲𑀭𑀡𑀕𑀢𑀁, 𑀢𑀸𑀦𑀺 𑀓𑀼𑀮𑀸𑀦𑀺 𑀲𑀭𑀡𑀕𑀢𑀸𑀦𑀺 𑀇𑀘𑁆𑀘𑀸𑀤𑀺.

𑀏𑀯𑀁 𑀅𑀭𑀜𑁆𑀜𑀕𑀢𑁄, 𑀪𑀽𑀫𑀺𑀕𑀢𑁄, 𑀥𑀫𑁆𑀫𑀁 𑀦𑀺𑀲𑁆𑀲𑀺𑀢𑁄 𑀥𑀫𑁆𑀫𑀦𑀺𑀲𑁆𑀲𑀺𑀢𑁄, 𑀅𑀢𑁆𑀣𑀦𑀺𑀲𑁆𑀲𑀺𑀢𑁄, 𑀪𑀯𑀁 𑀅𑀢𑀻𑀢𑁄 𑀪𑀯𑀸𑀢𑀻𑀢𑁄, 𑀓𑀸𑀮𑀸𑀢𑀻𑀢𑁄, 𑀧𑀫𑀸𑀡𑀁 𑀅𑀢𑀺𑀓𑁆𑀓𑀦𑁆𑀢𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁. 𑀮𑁄𑀓𑀸𑀢𑀺𑀓𑁆𑀓𑀦𑁆𑀢𑀁, 𑀲𑀼𑀔𑀁 𑀧𑀢𑁆𑀢𑁄 𑀲𑀼𑀔𑀧𑁆𑀧𑀢𑁆𑀢𑁄, 𑀤𑀼𑀓𑁆𑀔𑀧𑁆𑀧𑀢𑁆𑀢𑁄, 𑀲𑁄𑀢𑀁 𑀆𑀧𑀦𑁆𑀦𑁄 𑀲𑁄𑀢𑀸𑀧𑀦𑁆𑀦𑁄, 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁄, 𑀭𑀣𑀁 𑀆𑀭𑀼𑀴𑁆𑀳𑁄 𑀭𑀣𑀸𑀭𑀼𑀴𑁆𑀳𑁄, 𑀲𑀩𑁆𑀩𑀭𑀢𑁆𑀢𑀺𑀁 𑀲𑁄𑀪𑀦𑁄 𑀲𑀩𑁆𑀩𑀭𑀢𑁆𑀢𑀺𑀲𑁄𑀪𑀦𑁄, 𑀫𑀼𑀳𑀼𑀢𑁆𑀢𑀲𑀼𑀔𑀁.

𑀉𑀧𑀧𑀤𑀲𑀫𑀸𑀲𑁂 𑀧𑀦 𑀯𑀼𑀢𑁆𑀢𑀺𑀬𑁂𑀯 𑀢𑀲𑁆𑀲 𑀦𑀺𑀘𑁆𑀘𑀢𑁆𑀢𑀸. 𑀬𑀣𑀸 𑁋 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀓𑀫𑁆𑀫𑀓𑀸𑀭𑁄, 𑀓𑀼𑀫𑁆𑀪𑀓𑀸𑀭𑁄, 𑀅𑀢𑁆𑀣𑀁 𑀓𑀸𑀫𑁂𑀢𑀻𑀢𑀺 𑀅𑀢𑁆𑀣𑀓𑀸𑀫𑁄, 𑀥𑀫𑁆𑀫𑀓𑀸𑀫𑁄, 𑀥𑀫𑁆𑀫𑀁 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑀥𑀭𑁄, 𑀯𑀺𑀦𑀬𑀥𑀭𑁄, 𑀲𑀘𑁆𑀘𑀁 𑀯𑀤𑀺𑀢𑀼𑀁 𑀲𑀻𑀮𑀫𑀲𑁆𑀲𑀸𑀢𑀺 𑀲𑀘𑁆𑀘𑀯𑀸𑀤𑀻 𑀇𑀘𑁆𑀘𑀸𑀤𑀺.

𑀢𑀯𑀦𑁆𑀢𑀼𑀫𑀸𑀦𑀦𑁆𑀢𑀸𑀤𑀺𑀓𑀺𑀢𑀦𑁆𑀢𑁂𑀳𑀺 𑀯𑀸𑀓𑁆𑀬𑀫𑁂𑀯 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀸𑀥𑀺𑀓𑀸𑀭𑀢𑁄. 𑀬𑀣𑀸 𑁋 𑀑𑀤𑀦𑀁 𑀪𑀼𑀢𑁆𑀢𑀯𑀸, 𑀥𑀫𑁆𑀫𑀁 𑀲𑀼𑀡𑀫𑀸𑀦𑁄, 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄, 𑀓𑀝𑀁 𑀓𑀭𑀸𑀦𑁄, 𑀅𑀦𑀪𑀺𑀥𑀸𑀦𑀢𑁄 𑀯𑀸, 𑀅𑀪𑀺𑀥𑀸𑀦𑀮𑀓𑁆𑀔𑀡𑀸 𑀳𑀺 𑀢𑀤𑁆𑀥𑀺𑀢𑀲𑀫𑀸𑀲𑀓𑀺𑀢𑀓𑀸𑀢𑀺.

𑀤𑀼𑀢𑀺𑀬𑀸𑀢𑀧𑁆𑀧𑀼𑀭𑀺𑀲𑁄.

𑀢𑀢𑀺𑀬𑀸 ¶ 𑀓𑀺𑀢𑀓 𑀧𑀼𑀩𑁆𑀩 𑀲𑀤𑀺𑀲 𑀲𑀫𑀽𑀦𑀢𑁆𑀣 𑀓𑀮𑀳 𑀦𑀺𑀧𑀼𑀡 𑀫𑀺𑀲𑁆𑀲𑀲𑀔𑀺𑀮𑀸𑀤𑀻𑀳𑀺.

𑀩𑀼𑀤𑁆𑀥𑁂𑀦 𑀪𑀸𑀲𑀺𑀢𑁄 𑀩𑀼𑀤𑁆𑀥𑀪𑀸𑀲𑀺𑀢𑁄, 𑀥𑀫𑁆𑀫𑁄. 𑀏𑀯𑀁 𑀚𑀺𑀦𑀤𑁂𑀲𑀺𑀢𑁄, 𑀲𑀢𑁆𑀣𑀸𑀭𑀸 𑀯𑀡𑁆𑀡𑀺𑀢𑁄 𑀲𑀢𑁆𑀣𑀼𑀯𑀡𑁆𑀡𑀺𑀢𑁄, 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀢𑁄 𑀯𑀺𑀜𑁆𑀜𑀼𑀕𑀭𑀳𑀺𑀢𑁄, 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑁄, 𑀇𑀲𑁆𑀲𑀭𑀓𑀢𑀁, 𑀲𑀬𑀁𑀓𑀢𑀁, 𑀲𑀼𑀓𑁂𑀳𑀺 𑀆𑀳𑀝𑀁 𑀲𑀼𑀓𑀸𑀳𑀢𑀁, 𑀭𑀜𑁆𑀜𑀸 𑀳𑀢𑁄 𑀭𑀸𑀚𑀳𑀢𑁄, 𑀭𑁄𑀕𑀧𑀻𑀴𑀺𑀢𑁄, 𑀅𑀕𑁆𑀕𑀺𑀤𑀟𑁆𑀠𑁄, 𑀲𑀧𑁆𑀧𑀤𑀝𑁆𑀞𑁄, 𑀲𑀮𑁆𑀮𑁂𑀦 𑀯𑀺𑀤𑁆𑀥𑁄 𑀲𑀮𑁆𑀮𑀯𑀺𑀤𑁆𑀥𑁄, 𑀇𑀘𑁆𑀙𑀸𑀬 𑀅𑀧𑀓𑀢𑁄 𑀇𑀘𑁆𑀙𑀸𑀧𑀓𑀢𑁄, 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑁄 𑀲𑀻𑀮𑀲𑀫𑁆𑀧𑀦𑁆𑀦𑁄. 𑀏𑀯𑀁 𑀲𑀼𑀔𑀲𑀳𑀕𑀢𑀁, 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁, 𑀫𑀺𑀢𑁆𑀢𑀲𑀁𑀲𑀕𑁆𑀕𑁄, 𑀧𑀺𑀬𑀯𑀺𑀧𑁆𑀧𑀬𑁄𑀕𑁄, 𑀚𑀸𑀢𑀺𑀢𑁆𑀣𑀤𑁆𑀥𑁄, 𑀕𑀼𑀡𑀳𑀻𑀦𑁄, 𑀕𑀼𑀡𑀯𑀼𑀟𑁆𑀠𑁄, 𑀘𑀢𑀼𑀯𑀕𑁆𑀕𑀓𑀭𑀡𑀻𑀬𑀁, 𑀘𑀢𑀼𑀯𑀕𑁆𑀕𑀸𑀤𑀺𑀓𑀢𑁆𑀢𑀩𑁆𑀩𑀁, 𑀓𑀸𑀓𑁂𑀳𑀺 𑀧𑁂𑀬𑁆𑀬𑀸 𑀓𑀸𑀓𑀧𑁂𑀬𑁆𑀬𑀸, 𑀦𑀤𑀻.

𑀓𑁆𑀯𑀘𑀺 𑀯𑀼𑀢𑁆𑀢𑀺𑀬𑁂𑀯, 𑀉𑀭𑁂𑀦 𑀕𑀘𑁆𑀙𑀢𑀻𑀢𑀺 𑀉𑀭𑀕𑁄, 𑀧𑀸𑀤𑁂𑀦 𑀧𑀺𑀯𑀢𑀻𑀢𑀺 𑀧𑀸𑀤𑀧𑁄. 𑀓𑁆𑀯𑀘𑀺 𑀯𑀸𑀓𑁆𑀬𑀫𑁂𑀯, 𑀧𑀭𑀲𑀼𑀦𑀸 𑀙𑀺𑀦𑁆𑀦𑀯𑀸, 𑀓𑀸𑀓𑁂𑀳𑀺 𑀧𑀸𑀢𑀩𑁆𑀩𑀸, 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸.

𑀧𑀼𑀩𑁆𑀩𑀸𑀤𑀺𑀬𑁄𑀕𑁂 𑁋 𑀫𑀸𑀲𑁂𑀦 𑀧𑀼𑀩𑁆𑀩𑁄 𑀫𑀸𑀲𑀧𑀼𑀩𑁆𑀩𑁄. 𑀏𑀯𑀁 𑀫𑀸𑀢𑀼𑀲𑀤𑀺𑀲𑁄, 𑀧𑀺𑀢𑀼𑀲𑀫𑁄, 𑀏𑀓𑀽𑀦𑀯𑀻𑀲𑀢𑀺, 𑀲𑀻𑀮𑀯𑀺𑀓𑀮𑁄, 𑀅𑀲𑀺𑀓𑀮𑀳𑁄, 𑀯𑀸𑀘𑀸𑀦𑀺𑀧𑀼𑀡𑁄, 𑀬𑀸𑀯𑀓𑀸𑀮𑀺𑀓𑀲𑀁𑀫𑀺𑀲𑁆𑀲𑀁, 𑀯𑀸𑀘𑀸𑀲𑀔𑀺𑀮𑁄, 𑀲𑀢𑁆𑀣𑀸𑀭𑀸 𑀲𑀤𑀺𑀲𑁄 𑀲𑀢𑁆𑀣𑀼𑀓𑀧𑁆𑀧𑁄, 𑀧𑀼𑀜𑁆𑀜𑁂𑀦 𑀅𑀢𑁆𑀣𑀺𑀓𑁄 𑀧𑀼𑀜𑁆𑀜𑀢𑁆𑀣𑀺𑀓𑁄, 𑀕𑀼𑀡𑀸𑀥𑀺𑀓𑁄, 𑀕𑀼𑀴𑁂𑀦 𑀲𑀁𑀲𑀝𑁆𑀞𑁄 𑀑𑀤𑀦𑁄 𑀕𑀼𑀴𑁄𑀤𑀦𑁄, 𑀔𑀻𑀭𑁄𑀤𑀦𑁄, 𑀅𑀲𑁆𑀲𑁂𑀦 𑀬𑀼𑀢𑁆𑀢𑁄 𑀭𑀣𑁄 𑀅𑀲𑁆𑀲𑀭𑀣𑁄, 𑀫𑀕𑁆𑀕𑀘𑀺𑀢𑁆𑀢𑀁, 𑀚𑀫𑁆𑀩𑀼𑀬𑀸 𑀧𑀜𑁆𑀜𑀸𑀢𑁄 𑀮𑀓𑁆𑀔𑀺𑀢𑁄 𑀤𑀻𑀧𑁄 𑀚𑀫𑁆𑀩𑀼𑀤𑀻𑀧𑁄, 𑀏𑀓𑁂𑀦 𑀅𑀥𑀺𑀓𑀸 𑀤𑀲 𑀏𑀓𑀸𑀤𑀲, 𑀚𑀸𑀢𑀺𑀬𑀸 𑀅𑀦𑁆𑀥𑁄 𑀚𑀘𑁆𑀘𑀦𑁆𑀥𑁄, 𑀧𑀓𑀢𑀺𑀬𑀸 𑀫𑁂𑀥𑀸𑀯𑀻 𑀧𑀓𑀢𑀺𑀫𑁂𑀥𑀸𑀯𑀻 𑀇𑀘𑁆𑀘𑀸𑀤𑀺.

𑀢𑀢𑀺𑀬𑀸𑀢𑀧𑁆𑀧𑀼𑀭𑀺𑀲𑁄.

𑀘𑀢𑀼𑀢𑁆𑀣𑀻 ¶ 𑀢𑀤𑀢𑁆𑀣𑀅𑀢𑁆𑀣𑀳𑀺𑀢𑀤𑁂𑀬𑁆𑀬𑀸𑀤𑀻𑀳𑀺.

𑀢𑀤𑀢𑁆𑀣𑁂 𑁋 𑀓𑀣𑀺𑀦𑀲𑁆𑀲 𑀤𑀼𑀲𑁆𑀲𑀁 𑀓𑀣𑀺𑀦𑀤𑀼𑀲𑁆𑀲𑀁, 𑀓𑀣𑀺𑀦𑀘𑀻𑀯𑀭𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀘𑀻𑀯𑀭𑀤𑀼𑀲𑁆𑀲𑀁, 𑀘𑀻𑀯𑀭𑀫𑀽𑀮𑁆𑀬𑀁, 𑀬𑀸𑀕𑀼𑀬𑀸 𑀅𑀢𑁆𑀣𑀸𑀬 𑀢𑀡𑁆𑀟𑀼𑀮𑀸 𑀬𑀸𑀕𑀼𑀢𑀡𑁆𑀟𑀼𑀮𑀸, 𑀪𑀢𑁆𑀢𑀢𑀡𑁆𑀟𑀼𑀮𑀸, 𑀲𑀗𑁆𑀖𑀲𑁆𑀲𑀢𑁆𑀣𑀸𑀬 𑀪𑀢𑁆𑀢𑀁 𑀲𑀗𑁆𑀖𑀪𑀢𑁆𑀢𑀁, 𑀆𑀕𑀦𑁆𑀢𑀼𑀓𑀸𑀦𑀫𑀢𑁆𑀣𑀸𑀬 𑀪𑀢𑁆𑀢𑀁 𑀆𑀕𑀦𑁆𑀢𑀼𑀓𑀪𑀢𑁆𑀢𑀁. 𑀏𑀯𑀁 𑀕𑀫𑀺𑀓𑀪𑀢𑁆𑀢𑀁, 𑀧𑀸𑀲𑀸𑀤𑀸𑀬 𑀤𑀩𑁆𑀩𑀁 𑀧𑀸𑀲𑀸𑀤𑀤𑀩𑁆𑀩𑀁.

𑀅𑀢𑁆𑀣𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀢𑁆𑀣𑀸𑀬 𑀯𑀺𑀳𑀸𑀭𑁄 𑀪𑀺𑀓𑁆𑀔𑀼𑀲𑀗𑁆𑀖𑀢𑁆𑀣𑁄 𑀯𑀺𑀳𑀸𑀭𑁄, 𑀪𑀺𑀓𑁆𑀔𑀼𑀲𑀗𑁆𑀖𑀢𑁆𑀣𑀸 𑀬𑀸𑀕𑀼, 𑀪𑀺𑀓𑁆𑀔𑀼𑀲𑀗𑁆𑀖𑀢𑁆𑀣𑀁 𑀘𑀻𑀯𑀭𑀁. 𑀬𑀲𑁆𑀲𑀢𑁆𑀣𑀸𑀬 𑀬𑀤𑀢𑁆𑀣𑁄, 𑀬𑀤𑀢𑁆𑀣𑀸, 𑀬𑀤𑀢𑁆𑀣𑀁. 𑀏𑀯𑀁 𑀢𑀤𑀢𑁆𑀣𑁄, 𑀢𑀤𑀢𑁆𑀣𑀸. 𑀢𑀤𑀢𑁆𑀣𑀁. 𑀏𑀢𑀤𑀢𑁆𑀣𑁄 𑀯𑀸𑀬𑀸𑀫𑁄, 𑀏𑀢𑀤𑀢𑁆𑀣𑀸 𑀓𑀣𑀸, 𑀏𑀢𑀤𑀢𑁆𑀣𑀁 𑀲𑁄𑀢𑀸𑀯𑀥𑀸𑀦𑀁. 𑀓𑀺𑀫𑀢𑁆𑀣𑀁, 𑀅𑀢𑁆𑀢𑀢𑁆𑀣𑀁, 𑀧𑀭𑀢𑁆𑀣𑀁, 𑀯𑀺𑀦𑀬𑁄 𑀲𑀁𑀯𑀭𑀢𑁆𑀣𑀸𑀬, 𑀲𑀼𑀔𑀁 𑀲𑀫𑀸𑀥𑀢𑁆𑀣𑀸𑀬, 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀢𑁆𑀣𑀸𑀬, 𑀯𑀺𑀭𑀸𑀕𑁄 𑀯𑀺𑀫𑀼𑀢𑁆𑀢𑀢𑁆𑀣𑀸𑀬. 𑀢𑀣𑀸 𑀮𑁄𑀓𑀲𑁆𑀲 𑀳𑀺𑀢𑁄 𑀮𑁄𑀓𑀳𑀺𑀢𑁄, 𑀩𑀼𑀤𑁆𑀥𑀲𑁆𑀲 𑀤𑁂𑀬𑁆𑀬𑀁 𑀩𑀼𑀤𑁆𑀥𑀤𑁂𑀬𑁆𑀬𑀁, 𑀧𑀼𑀧𑁆𑀨𑀁. 𑀲𑀗𑁆𑀖𑀤𑁂𑀬𑁆𑀬𑀁, 𑀘𑀻𑀯𑀭𑀁. 𑀇𑀥 𑀦 𑀪𑀯𑀢𑀺, 𑀲𑀗𑁆𑀖𑀲𑁆𑀲 𑀤𑀸𑀢𑀩𑁆𑀩𑀁, 𑀲𑀗𑁆𑀖𑀲𑁆𑀲 𑀤𑀸𑀢𑀼𑀁 𑀇𑀘𑁆𑀘𑀸𑀤𑀺.

𑀘𑀢𑀼𑀢𑁆𑀣𑀻𑀢𑀧𑁆𑀧𑀼𑀭𑀺𑀲𑁄.

𑀧𑀜𑁆𑀘𑀫𑀻 𑀅𑀧𑀕𑀫𑀦 𑀪𑀬 𑀯𑀺𑀭𑀢𑀺 𑀫𑁄𑀘𑀦𑀢𑁆𑀣𑀸𑀤𑀻𑀳𑀺.

𑀫𑁂𑀣𑀼𑀦𑀲𑁆𑀫𑀸 𑀅𑀧𑁂𑀢𑁄 𑀫𑁂𑀣𑀼𑀦𑀸𑀧𑁂𑀢𑁄. 𑀏𑀯𑀁 𑀧𑀮𑀸𑀧𑀸𑀧𑀕𑀢𑁄, 𑀦𑀕𑀭𑀦𑀺𑀕𑁆𑀕𑀢𑁄, 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄. 𑀕𑀸𑀫𑀢𑁄 𑀦𑀺𑀓𑁆𑀔𑀦𑁆𑀢𑀁 𑀕𑀸𑀫𑀦𑀺𑀓𑁆𑀔𑀦𑁆𑀢𑀁, 𑀭𑀼𑀓𑁆𑀔𑀕𑁆𑀕𑀸 𑀧𑀢𑀺𑀢𑁄 𑀭𑀼𑀓𑁆𑀔𑀕𑁆𑀕𑀧𑀢𑀺𑀢𑁄, 𑀲𑀸𑀲𑀦𑀘𑀼𑀢𑁄, 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀁, 𑀥𑀭𑀡𑀺𑀢𑀮𑀼𑀕𑁆𑀕𑀢𑁄, 𑀲𑀩𑁆𑀩𑀪𑀯𑁂𑀳𑀺 𑀦𑀺𑀲𑁆𑀲𑀝𑁄 𑀲𑀩𑁆𑀩𑀪𑀯𑀦𑀺𑀲𑁆𑀲𑀝𑁄.

𑀪𑀬𑀢𑁆𑀣𑀸𑀤𑀺𑀬𑁄𑀕𑁂 𑀬𑀣𑀸 𑁋 𑀭𑀸𑀚𑀢𑁄 𑀪𑀬𑀁 𑀭𑀸𑀚𑀪𑀬𑀁, 𑀘𑁄𑀭𑁂𑀳𑀺 𑀪𑀬𑀁 𑀘𑁄𑀭𑀪𑀬𑀁, 𑀅𑀫𑀦𑀼𑀲𑁆𑀲𑁂𑀳𑀺 𑀪𑀬𑀁 𑀅𑀫𑀦𑀼𑀲𑁆𑀲𑀪𑀬𑀁, 𑀅𑀕𑁆𑀕𑀺𑀢𑁄 𑀪𑀬𑀁 𑀅𑀕𑁆𑀕𑀺𑀪𑀬𑀁. 𑀧𑀸𑀧𑀢𑁄 𑀪𑀻𑀢𑁄 𑀧𑀸𑀧𑀪𑀻𑀢𑁄 ¶ , 𑀧𑀸𑀧𑀪𑀻𑀭𑀼𑀓𑁄, 𑀅𑀓𑀢𑁆𑀢𑀩𑁆𑀩𑀢𑁄 𑀯𑀺𑀭𑀢𑀺 𑀅𑀓𑀢𑁆𑀢𑀩𑁆𑀩𑀯𑀺𑀭𑀢𑀺. 𑀏𑀯𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺, 𑀯𑀘𑀻𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺, 𑀩𑀦𑁆𑀥𑀦𑀸 𑀫𑀼𑀢𑁆𑀢𑁄 𑀩𑀦𑁆𑀥𑀦𑀫𑀼𑀢𑁆𑀢𑁄, 𑀯𑀦𑀫𑀼𑀢𑁆𑀢𑁄, 𑀩𑀦𑁆𑀥𑀦𑀫𑁄𑀓𑁆𑀔𑁄, 𑀓𑀫𑁆𑀫𑀢𑁄 𑀲𑀫𑀼𑀝𑁆𑀞𑀺𑀢𑀁 𑀓𑀫𑁆𑀫𑀲𑀫𑀼𑀝𑁆𑀞𑀺𑀢𑀁, 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑀁, 𑀑𑀫𑀓𑁄𑀫𑀓𑀁.

𑀓𑁆𑀯𑀘𑀺 𑀯𑀼𑀢𑁆𑀢𑀺𑀬𑁂𑀯, 𑀓𑀫𑁆𑀫𑀢𑁄 𑀚𑀸𑀢𑀁 𑀓𑀫𑁆𑀫𑀚𑀁. 𑀏𑀯𑀁 𑀘𑀺𑀢𑁆𑀢𑀚𑀁, 𑀉𑀢𑀼𑀚𑀁, 𑀆𑀳𑀸𑀭𑀚𑀁. 𑀇𑀥 𑀦 𑀪𑀯𑀢𑀺, 𑀧𑀸𑀲𑀸𑀤𑀸 𑀧𑀢𑀺𑀢𑁄.

𑀧𑀜𑁆𑀘𑀫𑀻𑀢𑀧𑁆𑀧𑀼𑀭𑀺𑀲𑁄.

𑀙𑀝𑁆𑀞𑀻 𑀭𑀜𑁆𑀜𑁄 𑀧𑀼𑀢𑁆𑀢𑁄 𑀭𑀸𑀚𑀧𑀼𑀢𑁆𑀢𑁄. 𑀏𑀯𑀁 𑀭𑀸𑀚𑀧𑀼𑀭𑀺𑀲𑁄, 𑀆𑀘𑀭𑀺𑀬𑀧𑀽𑀚𑀓𑁄, 𑀩𑀼𑀤𑁆𑀥𑀲𑀸𑀯𑀓𑁄, 𑀩𑀼𑀤𑁆𑀥𑀭𑀽𑀧𑀁, 𑀚𑀺𑀦𑀯𑀘𑀦𑀁, 𑀲𑀫𑀼𑀤𑁆𑀤𑀖𑁄𑀲𑁄, 𑀥𑀜𑁆𑀜𑀸𑀦𑀁 𑀭𑀸𑀲𑀺 𑀥𑀜𑁆𑀜𑀭𑀸𑀲𑀺, 𑀧𑀼𑀧𑁆𑀨𑀕𑀦𑁆𑀥𑁄, 𑀨𑀮𑀭𑀲𑁄, 𑀓𑀸𑀬𑀲𑁆𑀲 𑀮𑀳𑀼𑀢𑀸 𑀓𑀸𑀬𑀮𑀳𑀼𑀢𑀸, 𑀫𑀭𑀡𑀲𑁆𑀲𑀢𑀺, 𑀭𑀼𑀓𑁆𑀔𑀫𑀽𑀮𑀁, 𑀅𑀬𑀲𑁆𑀲 𑀧𑀢𑁆𑀢𑁄 𑀅𑀬𑁄𑀧𑀢𑁆𑀢𑁄, 𑀏𑀯𑀁 𑀲𑀼𑀯𑀡𑁆𑀡𑀓𑀝𑀸𑀳𑀁, 𑀧𑀸𑀦𑀻𑀬𑀣𑀸𑀮𑀓𑀁, 𑀲𑀧𑁆𑀧𑀺𑀓𑀼𑀫𑁆𑀪𑁄.

‘‘𑀤𑁂𑀯𑀸𑀦𑀁 𑀭𑀸𑀚𑀸’’𑀢𑀺 𑀅𑀢𑁆𑀣𑁂 𑀲𑀫𑀸𑀲𑀸𑀤𑀺𑀫𑁆𑀳𑀺 𑀓𑀢𑁂 ‘‘𑀓𑁆𑀯𑀘𑀺 𑀲𑀫𑀸𑀲𑀦𑁆𑀢𑀕𑀢𑀸𑀦𑀫𑀓𑀸𑀭𑀦𑁆𑀢𑁄’’𑀢𑀺 𑀅𑀓𑀸𑀭𑁄, 𑀢𑀢𑁄 ‘‘𑀲𑁆𑀬𑀸 𑀘𑀸’’𑀢𑀺 𑀆𑀢𑁆𑀢𑀁 𑀦 𑀪𑀯𑀢𑀺. 𑀤𑁂𑀯𑀭𑀸𑀚𑁄, 𑀤𑁂𑀯𑀭𑀸𑀚𑀸, 𑀤𑁂𑀯𑀭𑀸𑀚𑀁, 𑀤𑁂𑀯𑀭𑀸𑀚𑁂 𑀇𑀘𑁆𑀘𑀸𑀤𑀺 𑀧𑀼𑀭𑀺𑀲𑀲𑀤𑁆𑀤𑀲𑀫𑀁. 𑀅𑀢𑁆𑀢𑀸𑀪𑀸𑀯𑁂 𑀲𑁄 𑀤𑁂𑀯𑀭𑀸𑀚𑀸, 𑀢𑁂 𑀤𑁂𑀯𑀭𑀸𑀚𑀸𑀦𑁄 𑀇𑀘𑁆𑀘𑀸𑀤𑀺 𑀭𑀸𑀚𑀲𑀤𑁆𑀤𑀲𑀫𑀁. 𑀢𑀣𑀸 𑀤𑁂𑀯𑀸𑀦𑀁 𑀲𑀔𑀸 𑀤𑁂𑀯𑀲𑀔𑁄, 𑀤𑁂𑀯𑀲𑀔𑀸, 𑀲𑁄 𑀤𑁂𑀯𑀲𑀔𑀸, 𑀢𑁂 𑀤𑁂𑀯𑀲𑀔𑀸𑀦𑁄 𑀇𑀘𑁆𑀘𑀸𑀤𑀺.

𑀧𑀼𑀫𑀲𑁆𑀲 𑀮𑀺𑀗𑁆𑀕𑀁 𑀧𑀼𑀮𑁆𑀮𑀺𑀗𑁆𑀕𑀁. 𑀏𑀯𑀁 𑀧𑀼𑀫𑁆𑀪𑀸𑀯𑁄, 𑀧𑀼𑀫𑀦𑁆𑀢𑀮𑁄𑀧𑀸𑀤𑀺.

𑀳𑀢𑁆𑀣𑀺𑀧𑀤𑀁, 𑀇𑀢𑁆𑀣𑀺𑀭𑀽𑀧𑀁, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄, 𑀚𑀫𑁆𑀩𑀼𑀲𑀸𑀔𑀸, 𑀏𑀢𑁆𑀣 𑀘 ‘‘𑀓𑁆𑀯𑀘𑀸𑀤𑀺𑀫𑀚𑁆𑀛𑀼𑀢𑁆𑀢𑀭𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀫𑀚𑁆𑀛𑁂 𑀈𑀓𑀸𑀭𑀽𑀓𑀸𑀭𑀸𑀦𑀁 𑀭𑀲𑁆𑀲𑀢𑁆𑀢𑀁.

𑀯𑀺𑀪𑀸𑀲𑀸𑀥𑀺𑀓𑀸𑀭𑀢𑁄 ¶ 𑀓𑁆𑀯𑀘𑀺 𑀯𑀸𑀓𑁆𑀬𑀫𑁂𑀯, 𑀲𑀳𑀲𑀸 𑀓𑀫𑁆𑀫𑀲𑁆𑀲 𑀓𑀢𑁆𑀢𑀸𑀭𑁄, 𑀪𑀺𑀦𑁆𑀦𑀸𑀦𑀁 𑀲𑀦𑁆𑀥𑀸𑀢𑀸, 𑀓𑀧𑁆𑀧𑀲𑁆𑀲 𑀢𑀢𑀺𑀬𑁄 𑀪𑀸𑀕𑁄, 𑀬𑀸 𑀘 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻, 𑀫𑀦𑀼𑀲𑁆𑀲𑀸𑀦𑀁 𑀔𑀢𑁆𑀢𑀺𑀬𑁄 𑀲𑀽𑀭𑀢𑀫𑁄.

𑀬𑀼𑀢𑁆𑀢𑀢𑁆𑀣𑁄 𑀇𑀘𑁆𑀘𑁂𑀯? ‘‘𑀪𑀝𑁄 𑀭𑀜𑁆𑀜𑁄 𑀧𑀼𑀭𑀺𑀲𑁄 𑀤𑁂𑀯𑀤𑀢𑁆𑀢𑀲𑁆𑀲𑀸’’𑀢𑀺 𑀏𑀢𑁆𑀣 ‘‘𑀪𑀝𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀻’’𑀢𑀺 𑀅𑀜𑁆𑀜𑀫𑀜𑁆𑀜𑀸𑀦𑀧𑁂𑀓𑁆𑀔𑀢𑀸𑀬 𑀅𑀬𑀼𑀢𑁆𑀢𑀢𑁆𑀣𑀪𑀸𑀯𑀢𑁄 𑀲𑀫𑀸𑀲𑁄 𑀦 𑀪𑀯𑀢𑀺, ‘‘𑀓𑁄𑀲𑀮𑀲𑁆𑀲 𑀭𑀜𑁆𑀜𑁄 𑀧𑀼𑀢𑁆𑀢𑁄’’𑀢𑀺𑀆𑀤𑀻𑀲𑀼 𑀧𑀦 𑀲𑀸𑀧𑁂𑀓𑁆𑀔𑀢𑀸𑀬 𑀅𑀲𑀫𑀢𑁆𑀣𑀢𑁆𑀢𑀸 𑀦 𑀪𑀯𑀢𑀺, 𑀲𑀫𑁆𑀩𑀦𑁆𑀥𑀻𑀲𑀤𑁆𑀤𑀸𑀦𑀁 𑀧𑀦 𑀦𑀺𑀘𑁆𑀘𑀁 𑀲𑀸𑀧𑁂𑀓𑁆𑀔𑀢𑁆𑀢𑁂𑀧𑀺 𑀕𑀫𑀓𑀢𑁆𑀢𑀸 𑀲𑀫𑀸𑀲𑁄, 𑀬𑀣𑀸 𑁋 𑀤𑁂𑀯𑀤𑀢𑁆𑀢𑀲𑁆𑀲 𑀕𑀼𑀭𑀼𑀓𑀼𑀮𑀁, 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄𑀢𑀺𑀆𑀤𑀺.

𑀙𑀝𑁆𑀞𑀻𑀢𑀧𑁆𑀧𑀼𑀭𑀺𑀲𑁄.

𑀲𑀢𑁆𑀢𑀫𑀻 𑀭𑀽𑀧𑁂 𑀲𑀜𑁆𑀜𑀸 𑀭𑀽𑀧𑀲𑀜𑁆𑀜𑀸, 𑀏𑀯𑀁 𑀭𑀽𑀧𑀲𑀜𑁆𑀘𑁂𑀢𑀦𑀸, 𑀲𑀁𑀲𑀸𑀭𑀤𑀼𑀓𑁆𑀔𑀁, 𑀘𑀓𑁆𑀔𑀼𑀫𑁆𑀳𑀺 𑀲𑀦𑁆𑀦𑀺𑀲𑁆𑀲𑀺𑀢𑀁 𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀥𑀫𑁆𑀫𑁂 𑀭𑀢𑁄 𑀥𑀫𑁆𑀫𑀭𑀢𑁄, 𑀥𑀫𑁆𑀫𑀸𑀪𑀺𑀭𑀢𑀺, 𑀥𑀫𑁆𑀫𑀭𑀼𑀘𑀺, 𑀥𑀫𑁆𑀫𑀕𑀸𑀭𑀯𑁄, 𑀥𑀫𑁆𑀫𑁂𑀲𑀼 𑀦𑀺𑀭𑀼𑀢𑁆𑀢𑀺 𑀥𑀫𑁆𑀫𑀦𑀺𑀭𑀼𑀢𑁆𑀢𑀺, 𑀤𑀸𑀦𑀸𑀥𑀺𑀫𑀼𑀢𑁆𑀢𑀺, 𑀪𑀯𑀦𑁆𑀢𑀭𑀓𑀢𑀁, 𑀤𑀲𑁆𑀲𑀦𑁂 𑀅𑀲𑁆𑀲𑀸𑀤𑁄 𑀤𑀲𑁆𑀲𑀦𑀲𑁆𑀲𑀸𑀤𑁄, 𑀅𑀭𑀜𑁆𑀜𑁂 𑀯𑀸𑀲𑁄 𑀅𑀭𑀜𑁆𑀜𑀯𑀸𑀲𑁄, 𑀯𑀺𑀓𑀸𑀮𑁂 𑀪𑁄𑀚𑀦𑀁 𑀯𑀺𑀓𑀸𑀮𑀪𑁄𑀚𑀦𑀁, 𑀓𑀸𑀮𑁂 𑀯𑀲𑁆𑀲𑀁 𑀓𑀸𑀮𑀯𑀲𑁆𑀲𑀁, 𑀯𑀦𑁂 𑀧𑀼𑀧𑁆𑀨𑀁 𑀯𑀦𑀧𑀼𑀧𑁆𑀨𑀁. 𑀏𑀯𑀁 𑀯𑀦𑀫𑀳𑀺𑀲𑁄, 𑀕𑀸𑀫𑀲𑀽𑀓𑀭𑁄, 𑀲𑀫𑀼𑀤𑁆𑀤𑀫𑀘𑁆𑀙𑁄, 𑀆𑀯𑀸𑀝𑀓𑀘𑁆𑀙𑀧𑁄, 𑀆𑀯𑀸𑀝𑀫𑀡𑁆𑀟𑀽𑀓𑁄, 𑀓𑀽𑀧𑀫𑀡𑁆𑀟𑀽𑀓𑁄, 𑀢𑀺𑀢𑁆𑀣𑀦𑀸𑀯𑀸, 𑀇𑀢𑁆𑀣𑀻𑀲𑀼 𑀥𑀼𑀢𑁆𑀢𑁄 𑀇𑀢𑁆𑀣𑀺𑀥𑀼𑀢𑁆𑀢𑁄 𑀙𑀸𑀬𑀸𑀬 𑀲𑀼𑀓𑁆𑀔𑁄 𑀙𑀸𑀬𑀸𑀲𑀼𑀓𑁆𑀔𑁄, 𑀅𑀗𑁆𑀕𑀸𑀭𑀧𑀓𑁆𑀓𑀁, 𑀘𑀸𑀭𑀓𑀩𑀤𑁆𑀥𑁄.

𑀇𑀥 𑀯𑀼𑀢𑁆𑀢𑀺𑀬𑁂𑀯, 𑀬𑀣𑀸 𑁋 𑀯𑀦𑁂 𑀘𑀭𑀢𑀻𑀢𑀺 𑀯𑀦𑀘𑀭𑁄, 𑀓𑀼𑀘𑁆𑀙𑀺𑀫𑁆𑀳𑀺 𑀲𑀬𑀢𑀻𑀢𑀺 𑀓𑀼𑀘𑁆𑀙𑀺𑀲𑀬𑁄, 𑀣𑀮𑁂 𑀢𑀺𑀝𑁆𑀞𑀢𑀻𑀢𑀺 𑀣𑀮𑀝𑁆𑀞𑁄. 𑀏𑀯𑀁 𑀚𑀮𑀝𑁆𑀞𑁄, 𑀧𑀩𑁆𑀩𑀢𑀝𑁆𑀞𑁄, 𑀫𑀕𑁆𑀕𑀝𑁆𑀞𑁄, 𑀧𑀗𑁆𑀓𑁂 𑀚𑀸𑀢𑀁 𑀧𑀗𑁆𑀓𑀚𑀁, 𑀲𑀺𑀭𑁂 𑀭𑀼𑀳𑀢𑀻𑀢𑀺 𑀲𑀺𑀭𑁄𑀭𑀼𑀳𑀁 𑀇𑀘𑁆𑀘𑀸𑀤𑀺.

𑀇𑀥 ¶ 𑀦 𑀪𑀯𑀢𑀺, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄, 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁.

𑀲𑀢𑁆𑀢𑀫𑀻𑀢𑀧𑁆𑀧𑀼𑀭𑀺𑀲𑁄.

‘‘𑀢𑀤𑀦𑀼𑀧𑀭𑁄𑀥𑁂𑀦𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀬𑀣𑀸𑀪𑀺𑀥𑀸𑀦𑀁 𑀢𑀧𑁆𑀧𑀼𑀭𑀺𑀲𑁂 𑀓𑁆𑀯𑀘𑀺 𑀅𑀘𑁆𑀘𑀦𑁆𑀢𑀸𑀤𑀻𑀲𑀼 𑀅𑀫𑀸𑀤𑀺𑀯𑀺𑀪𑀢𑁆𑀬𑀦𑁆𑀢𑀁 𑀧𑀼𑀩𑁆𑀩𑀧𑀤𑀁 𑀧𑀭𑀁 𑀲𑀫𑁆𑀪𑀯𑀢𑀺.

𑀬𑀣𑀸 𑁋 𑀅𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀁 𑀅𑀘𑁆𑀘𑀦𑁆𑀢𑀁, 𑀅𑀘𑁆𑀘𑀦𑁆𑀢𑀸𑀦𑀺, 𑀯𑁂𑀮𑀁 𑀅𑀢𑀺𑀓𑁆𑀓𑀦𑁆𑀢𑁄 𑀅𑀢𑀺𑀯𑁂𑀮𑁄, 𑀭𑀲𑁆𑀲𑀢𑁆𑀢𑀁. 𑀏𑀯𑀁 𑀫𑀸𑀮𑀁 𑀅𑀢𑀻𑀢𑁄 𑀅𑀢𑀺𑀫𑀸𑀮𑁄, 𑀧𑀢𑁆𑀢𑀚𑀻𑀯𑀺𑀓𑁄, 𑀆𑀧𑀦𑁆𑀦𑀚𑀻𑀯𑀺𑀓𑁄, 𑀅𑀓𑁆𑀔𑀁 𑀧𑀢𑀺𑀕𑀢𑀁 𑀦𑀺𑀲𑁆𑀲𑀺𑀢𑀦𑁆𑀢𑀺 𑀧𑀘𑁆𑀘𑀓𑁆𑀔𑀁 𑀤𑀲𑁆𑀲𑀦𑀁, 𑀧𑀘𑁆𑀘𑀓𑁆𑀔𑁄 𑀅𑀢𑁆𑀢𑀪𑀸𑀯𑁄, 𑀧𑀘𑁆𑀘𑀓𑁆𑀔𑀸 𑀩𑀼𑀤𑁆𑀥𑀺, 𑀅𑀢𑁆𑀣𑀁 𑀅𑀦𑀼𑀕𑀢𑀁 𑀅𑀦𑁆𑀯𑀢𑁆𑀣𑀁, 𑀓𑁄𑀓𑀺𑀮𑀸𑀬 𑀅𑀯𑀓𑀼𑀝𑁆𑀞𑀁 𑀅𑀯𑀓𑁄𑀓𑀺𑀮𑀁 𑀯𑀦𑀁, 𑀧𑀭𑀺𑀘𑁆𑀘𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀯𑀫𑀬𑀽𑀭𑀁, 𑀅𑀚𑁆𑀛𑀬𑀦𑀸𑀬 𑀧𑀭𑀺𑀕𑀺𑀮𑀸𑀦𑁄 𑀧𑀭𑀺𑀬𑀚𑁆𑀛𑀬𑀦𑁄, 𑀓𑀫𑁆𑀫𑀲𑁆𑀲 𑀅𑀮𑀁 𑀲𑀫𑀢𑁆𑀣𑁄𑀢𑀺 𑀅𑀮𑀁𑀓𑀫𑁆𑀫𑁄, 𑀯𑀘𑀦𑀸𑀬 𑀅𑀮𑀦𑁆𑀢𑀺 𑀅𑀮𑀁𑀯𑀘𑀦𑁄, 𑀯𑀸𑀦𑀢𑁄 𑀦𑀺𑀓𑁆𑀔𑀦𑁆𑀢𑀁 𑀦𑀺𑀩𑁆𑀩𑀸𑀦𑀁, 𑀓𑀺𑀮𑁂𑀲𑁂𑀳𑀺 𑀦𑀺𑀓𑁆𑀔𑀦𑁆𑀢𑁄 𑀦𑀺𑀓𑁆𑀓𑀺𑀮𑁂𑀲𑁄, 𑀦𑀺𑀭𑀗𑁆𑀕𑀡𑁄, 𑀓𑁄𑀲𑀫𑁆𑀩𑀺𑀬𑀸 𑀦𑀺𑀓𑁆𑀔𑀦𑁆𑀢𑁄 𑀦𑀺𑀓𑁆𑀓𑁄𑀲𑀫𑁆𑀩𑀻, 𑀯𑀦𑀢𑁄 𑀦𑀺𑀬𑁆𑀬𑀸𑀢𑁄 𑀦𑀺𑀩𑁆𑀩𑀦𑁄, 𑀆𑀘𑀭𑀺𑀬𑀢𑁄 𑀧𑀭𑁄 𑀧𑀸𑀘𑀭𑀺𑀬𑁄. 𑀏𑀯𑀁 𑀧𑀬𑁆𑀬𑀓𑁄, 𑀧𑀭𑀳𑀺𑀬𑁆𑀬𑁄, 𑀕𑀗𑁆𑀕𑀸𑀬 𑀉𑀧𑀭𑀺 𑀉𑀧𑀭𑀺𑀕𑀗𑁆𑀕𑀁. 𑀏𑀯𑀁 𑀳𑁂𑀝𑁆𑀞𑀸𑀦𑀤𑀻, 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺, 𑀳𑀁𑀲𑀸𑀦𑀁 𑀭𑀸𑀚𑀸 𑀭𑀸𑀚𑀳𑀁𑀲𑁄, 𑀳𑀁𑀲𑀭𑀸𑀚𑀸 𑀯𑀸, 𑀫𑀸𑀲𑀲𑁆𑀲 𑀅𑀤𑁆𑀥𑀁 𑀅𑀤𑁆𑀥𑀫𑀸𑀲𑀁, 𑀫𑀸𑀲𑀤𑁆𑀥𑀁 𑀯𑀸, 𑀆𑀫𑀮𑀓𑀲𑁆𑀲 𑀅𑀤𑁆𑀥𑀁 𑀅𑀤𑁆𑀥𑀸𑀫𑀮𑀓𑀁, 𑀆𑀫𑀮𑀓𑀤𑁆𑀥𑀁 𑀯𑀸, 𑀓𑀳𑀸𑀧𑀡𑀲𑁆𑀲 𑀅𑀟𑁆𑀠𑀁 𑀅𑀟𑁆𑀠𑀓𑀳𑀸𑀧𑀡𑀁, 𑀅𑀟𑁆𑀠𑀫𑀸𑀲𑀓𑀁, 𑀭𑀢𑁆𑀢𑀺𑀬𑀸 𑀅𑀟𑁆𑀠𑀁 𑀅𑀟𑁆𑀠𑀭𑀢𑁆𑀢𑀁, 𑀭𑀢𑁆𑀢𑀺𑀬𑀸 𑀧𑀼𑀩𑁆𑀩𑀁 𑀧𑀼𑀩𑁆𑀩𑀭𑀢𑁆𑀢𑀁, 𑀭𑀢𑁆𑀢𑀺𑀬𑀸 𑀧𑀘𑁆𑀙𑀸 𑀧𑀘𑁆𑀙𑀸𑀭𑀢𑁆𑀢𑀁. 𑀏𑀢𑁆𑀣 𑀘 ‘‘𑀓𑁆𑀯𑀘𑀺 𑀲𑀫𑀸𑀲𑀦𑁆𑀢𑀕𑀢𑀸𑀦𑀫𑀓𑀸𑀭𑀦𑁆𑀢𑁄’’𑀢𑀺 𑀭𑀢𑁆𑀢𑀺𑀲𑀤𑁆𑀤𑀦𑁆𑀢𑀲𑁆𑀲 𑀅𑀢𑁆𑀢𑀁, 𑀅𑀳𑀲𑁆𑀲 𑀧𑀼𑀩𑁆𑀩𑀁 𑀧𑀼𑀩𑁆𑀩𑀦𑁆𑀳𑀁. 𑀏𑀯𑀁 𑀲𑀸𑀬𑀦𑁆𑀳𑀁, ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀅𑀳𑀲𑁆𑀲 𑀅𑀦𑁆𑀳𑀸𑀤𑁂𑀲𑁄.

𑀅𑀫𑀸𑀤𑀺𑀧𑀭𑀢𑀧𑁆𑀧𑀼𑀭𑀺𑀲𑁄.

𑀓𑁆𑀯𑀘𑀺 ¶ 𑀢𑀧𑁆𑀧𑀼𑀭𑀺𑀲𑁂 ‘‘𑀧𑀪𑀗𑁆𑀓𑀭𑀸’’𑀤𑀻𑀲𑀼 𑀯𑀺𑀪𑀢𑁆𑀢𑀺𑀮𑁄𑀧𑁄 𑀦 𑀪𑀯𑀢𑀺.

𑀬𑀣𑀸 𑁋 𑀧𑀪𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁂 ‘‘𑀅𑀫𑀸𑀤𑀬𑁄 𑀧𑀭𑀧𑀤𑁂𑀪𑀻’’𑀢𑀺 𑀲𑀫𑀸𑀲𑁄, ‘‘𑀦𑀸𑀫𑀸𑀦𑀁 𑀲𑀫𑀸𑀲𑁄 𑀬𑀼𑀢𑁆𑀢𑀢𑁆𑀣𑁄’’𑀢𑀺 𑀲𑀫𑀸𑀲𑀲𑀜𑁆𑀜𑀸, 𑀢𑀢𑁄 ‘‘𑀢𑁂𑀲𑀁 𑀯𑀺𑀪𑀢𑁆𑀢𑀺𑀬𑁄 𑀮𑁄𑀧𑀸 𑀘𑀸’’𑀢𑀺 𑀯𑀺𑀪𑀢𑁆𑀢𑀺𑀮𑁄𑀧𑁂 𑀲𑀫𑁆𑀧𑀢𑁆𑀢𑁂 𑀢𑀢𑁆𑀣𑁂𑀯 𑀘𑀕𑁆𑀕𑀳𑀡𑁂𑀦 𑀧𑀼𑀩𑁆𑀩𑀧𑀤𑁂 𑀯𑀺𑀪𑀢𑁆𑀢𑀺𑀮𑁄𑀧𑀸𑀪𑀸𑀯𑁄. 𑀲𑁂𑀲𑀁 𑀲𑀫𑀁. 𑀧𑀪𑀗𑁆𑀓𑀭𑁄, 𑀅𑀫𑀢𑀁 𑀤𑀤𑀸𑀢𑀻𑀢𑀺 𑀅𑀫𑀢𑀦𑁆𑀤𑀤𑁄, 𑀭𑀡𑀁 𑀚𑀳𑀸𑀢𑀻𑀢𑀺 𑀭𑀡𑀜𑁆𑀚𑀳𑁄, 𑀚𑀼𑀢𑀺𑀁 𑀥𑀸𑀭𑁂𑀢𑀻𑀢𑀺 𑀚𑀼𑀢𑀺𑀦𑁆𑀥𑀭𑁄, 𑀢𑀣𑀸 𑀲𑀳𑀲𑀸𑀓𑀢𑀁, 𑀧𑀭𑀲𑁆𑀲𑀧𑀤𑀁. 𑀅𑀢𑁆𑀢𑀦𑁄𑀧𑀤𑀁, 𑀪𑀬𑀢𑁄 𑀉𑀧𑀝𑁆𑀞𑀸𑀦𑀁 𑀪𑀬𑀢𑀽𑀧𑀝𑁆𑀞𑀸𑀦𑀁, 𑀧𑀭𑀢𑁄𑀖𑁄𑀲𑁄, 𑀕𑀯𑀁𑀧𑀢𑀺𑀢𑁆𑀣𑁂𑀭𑁄, 𑀫𑀦𑀲𑀺𑀓𑀸𑀭𑁄, 𑀧𑀼𑀩𑁆𑀩𑁂𑀦𑀺𑀯𑀸𑀲𑁄, 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺, 𑀫𑀚𑁆𑀛𑁂𑀓𑀮𑁆𑀬𑀸𑀡𑀁, 𑀅𑀦𑁆𑀢𑁂𑀯𑀸𑀲𑀻, 𑀅𑀦𑁆𑀢𑁂𑀯𑀸𑀲𑀺𑀓𑁄, 𑀚𑀦𑁂𑀲𑀼𑀢𑁄, 𑀉𑀭𑀲𑀺𑀮𑁄𑀫𑁄, 𑀓𑀡𑁆𑀞𑁂𑀓𑀸𑀴𑁄, 𑀲𑀭𑀲𑀺𑀚𑀫𑀺𑀘𑁆𑀘𑀸𑀤𑀺.

𑀅𑀮𑁄𑀧𑀢𑀧𑁆𑀧𑀼𑀭𑀺𑀲𑁄.

𑀢𑀧𑁆𑀧𑀼𑀭𑀺𑀲𑀲𑀫𑀸𑀲𑁄 𑀦𑀺𑀝𑁆𑀞𑀺𑀢𑁄.

𑀩𑀳𑀼𑀩𑁆𑀩𑀻𑀳𑀺𑀲𑀫𑀸𑀲

𑀅𑀣 𑀩𑀳𑀼𑀩𑁆𑀩𑀻𑀳𑀺𑀲𑀫𑀸𑀲𑁄 𑀯𑀼𑀘𑁆𑀘𑀢𑁂.

𑀲𑁄 𑀘 𑀦𑀯𑀯𑀺𑀥𑁄 𑀤𑁆𑀯𑀺𑀧𑀤𑁄 𑀢𑀼𑀮𑁆𑀬𑀸𑀥𑀺𑀓𑀭𑀡𑁄, 𑀤𑁆𑀯𑀺𑀧𑀤𑁄 𑀪𑀺𑀦𑁆𑀦𑀸𑀥𑀺𑀓𑀭𑀡𑁄, 𑀢𑀺𑀧𑀤𑁄 𑀦𑀦𑀺𑀧𑀸𑀢𑀧𑀼𑀩𑁆𑀩𑀧𑀤𑁄, 𑀲𑀳𑀧𑀼𑀩𑁆𑀩𑀧𑀤𑁄 𑀉𑀧𑀫𑀸𑀦𑀧𑀼𑀩𑁆𑀩𑀧𑀤𑁄 𑀲𑀗𑁆𑀔𑁆𑀬𑁄𑀪𑀬𑀧𑀤𑁄 𑀤𑀺𑀲𑀦𑁆𑀢𑀭𑀸𑀴𑀢𑁆𑀣𑁄 𑀩𑁆𑀬𑀢𑀺𑀳𑀸𑀭𑀮𑀓𑁆𑀔𑀡𑁄 𑀘𑀸𑀢𑀺.

𑀢𑀢𑁆𑀣 𑀤𑁆𑀯𑀺𑀧𑀤𑁄 𑀢𑀼𑀮𑁆𑀬𑀸𑀥𑀺𑀓𑀭𑀡𑁄 𑀩𑀳𑀼𑀩𑁆𑀩𑀻𑀳𑀺 𑀓𑀫𑁆𑀫𑀸𑀤𑀻𑀲𑀼 𑀙𑀲𑀼 𑀯𑀺𑀪𑀢𑁆𑀬𑀢𑁆𑀣𑁂𑀲𑀼 𑀪𑀯𑀢𑀺.

𑀢𑀢𑁆𑀣 ¶ 𑀤𑀼𑀢𑀺𑀬𑀢𑁆𑀣𑁂 𑀢𑀸𑀯 𑁋 ‘‘𑀆𑀕𑀢𑀸 𑀲𑀫𑀡𑀸 𑀇𑀫𑀁 𑀲𑀗𑁆𑀖𑀸𑀭𑀸𑀫’’𑀦𑁆𑀢𑀺 𑀯𑀺𑀕𑁆𑀕𑀳𑁂 𑁋

𑁩𑁫𑁨. 𑀅𑀜𑁆𑀜𑀧𑀤𑀢𑁆𑀣𑁂𑀲𑀼 𑀩𑀳𑀼𑀩𑁆𑀩𑀻𑀳𑀺.

𑀲𑀫𑀲𑁆𑀬𑀫𑀸𑀦𑀧𑀤𑀢𑁄 𑀅𑀜𑁆𑀜𑁂𑀲𑀁 𑀧𑀞𑀫𑀤𑀼𑀢𑀺𑀬𑀸𑀤𑀺𑀯𑀺𑀪𑀢𑁆𑀬𑀦𑁆𑀢𑀸𑀦𑀁 𑀧𑀤𑀸𑀦𑀫𑀢𑁆𑀣𑁂𑀲𑀼 𑀬𑀼𑀢𑁆𑀢𑀢𑁆𑀣𑀸𑀦𑀺 𑀦𑀸𑀫𑀸𑀦𑀺 𑀯𑀺𑀪𑀸𑀲𑀸 𑀲𑀫𑀲𑁆𑀬𑀦𑁆𑀢𑁂, 𑀲𑁄 𑀲𑀫𑀸𑀲𑁄 𑀩𑀳𑀼𑀩𑁆𑀩𑀻𑀳𑀺𑀲𑀜𑁆𑀜𑁄 𑀘 𑀳𑁄𑀢𑀺.

𑀩𑀳𑀯𑁄 𑀯𑀻𑀳𑀬𑁄 𑀬𑀲𑁆𑀲 𑀲𑁄 𑀩𑀳𑀼𑀩𑁆𑀩𑀻𑀳𑀺, 𑀩𑀳𑀼𑀩𑁆𑀩𑀻𑀳𑀺𑀲𑀤𑀺𑀲𑀢𑁆𑀢𑀸 𑀅𑀬𑀫𑁆𑀧𑀺𑀲𑀫𑀸𑀲𑁄 𑀅𑀦𑁆𑀯𑀢𑁆𑀣𑀲𑀜𑁆𑀜𑀸𑀯𑀲𑁂𑀦 𑀩𑀳𑀼𑀩𑁆𑀩𑀻𑀳𑀻𑀢𑀺 𑀯𑀼𑀢𑁆𑀢𑁄, 𑀅𑀜𑁆𑀜𑀧𑀤𑀢𑁆𑀣𑀧𑁆𑀧𑀥𑀸𑀦𑁄 𑀳𑀺 𑀩𑀳𑀼𑀩𑁆𑀩𑀻𑀳𑀺.

𑀤𑀼𑀯𑀺𑀥𑁄 𑀘𑀸𑀬𑀁 𑀩𑀳𑀼𑀩𑁆𑀩𑀻𑀳𑀺 𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑀸𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑀯𑀲𑁂𑀦, 𑀢𑁂𑀲𑀼 𑀬𑀢𑁆𑀣 𑀯𑀺𑀲𑁂𑀲𑀦𑀪𑀽𑀢𑁄 𑀅𑀢𑁆𑀣𑁄 𑀅𑀜𑁆𑀜𑀧𑀤𑀢𑁆𑀣𑀕𑁆𑀕𑀳𑀡𑁂𑀦 𑀕𑀬𑁆𑀳𑀢𑀺, 𑀲𑁄 𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑁄, 𑀬𑀣𑀸 𑁋 𑀮𑀫𑁆𑀩𑀓𑀡𑁆𑀡𑀫𑀸𑀦𑀬𑀸𑀢𑀺.

𑀬𑀢𑁆𑀣 𑀧𑀦 𑀦 𑀕𑀬𑁆𑀳𑀢𑀺, 𑀲𑁄 𑀅𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑁄, 𑀬𑀣𑀸 𑁋 𑀩𑀳𑀼𑀥𑀦𑀫𑀸𑀦𑀬𑀸𑀢𑀺.

𑀇𑀥 𑀩𑀳𑀼𑀩𑁆𑀩𑀻𑀳𑀺𑀲𑀤𑁆𑀤𑁂 𑀯𑀺𑀬 𑀯𑀺𑀲𑁂𑀲𑀦𑀲𑁆𑀲 𑀧𑀼𑀩𑁆𑀩𑀦𑀺𑀧𑀸𑀢𑁄, 𑀲𑁂𑀲𑀁 𑀧𑀼𑀩𑁆𑀩𑀲𑀫𑀁.

𑀆𑀕𑀢𑀲𑀫𑀡𑁄 𑀲𑀗𑁆𑀖𑀸𑀭𑀸𑀫𑁄. 𑀏𑀢𑁆𑀣 𑀘 𑀆𑀕𑀢𑀲𑀤𑁆𑀤𑁄, 𑀲𑀫𑀡𑀲𑀤𑁆𑀤𑁄 𑀘 𑀅𑀢𑁆𑀢𑀦𑁄 𑀅𑀢𑁆𑀣𑁂 𑀅𑀝𑁆𑀞𑀢𑁆𑀯𑀸 𑀤𑀼𑀢𑀺𑀬𑀸𑀯𑀺𑀪𑀢𑁆𑀬𑀢𑁆𑀣𑀪𑀽𑀢𑁂 𑀲𑀗𑁆𑀖𑀸𑀭𑀸𑀫𑀲𑀗𑁆𑀔𑀸𑀢𑁂 𑀅𑀜𑁆𑀜𑀧𑀤𑀢𑁆𑀣𑁂 𑀯𑀢𑁆𑀢𑀦𑁆𑀢𑀺, 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀫𑁂𑀯 𑀢𑀤𑀦𑀦𑁆𑀢𑀭𑀁 ‘‘𑀲𑀗𑁆𑀖𑀸𑀭𑀸𑀫𑁄’’𑀢𑀺 𑀧𑀤𑀦𑁆𑀢𑀭𑀁 𑀧𑀬𑀼𑀚𑁆𑀚𑀢𑀺, 𑀢𑀢𑁄 𑀲𑀫𑀸𑀲𑁂𑀦𑁂𑀯 𑀓𑀫𑁆𑀫𑀢𑁆𑀣𑀲𑁆𑀲 𑀅𑀪𑀺𑀳𑀺𑀢𑀢𑁆𑀢𑀸 𑀧𑀼𑀦 𑀤𑀼𑀢𑀺𑀬𑀸 𑀦 𑀳𑁄𑀢𑀺. 𑀇𑀤𑀁𑀲𑀤𑁆𑀤𑀲𑁆𑀲 𑀘 𑀅𑀧𑁆𑀧𑀬𑁄𑀕𑁄, 𑀏𑀯𑀁 𑀲𑀩𑁆𑀩𑀢𑁆𑀣. 𑀩𑀳𑀼𑀩𑁆𑀩𑀻𑀳𑀺 𑀘𑀸𑀬𑀁 𑀅𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀯𑀘𑀦𑁄.

𑀢𑀣𑀸 𑀆𑀕𑀢𑀲𑀫𑀡𑀸 𑀲𑀸𑀯𑀢𑁆𑀣𑀺, 𑀆𑀕𑀢𑀲𑀫𑀡𑀁 𑀚𑁂𑀢𑀯𑀦𑀁, 𑀧𑀝𑀺𑀧𑀦𑁆𑀦𑀸 𑀅𑀤𑁆𑀥𑀺𑀓𑀸 𑀬𑀁 𑀧𑀣𑀁 𑀲𑁄𑀬𑀁 𑀧𑀝𑀺𑀧𑀦𑁆𑀦𑀤𑁆𑀥𑀺𑀓𑁄 𑀧𑀣𑁄 ¶ , 𑀅𑀪𑀺𑀭𑀼𑀴𑁆𑀳𑀸 𑀯𑀸𑀡𑀺𑀚𑀸 𑀬𑀁 𑀦𑀸𑀯𑀁 𑀲𑀸 𑀅𑀪𑀺𑀭𑀼𑀴𑁆𑀳𑀯𑀸𑀡𑀺𑀚𑀸 𑀦𑀸𑀯𑀸. 𑀏𑀯𑀁 𑀓𑀫𑁆𑀫𑀢𑁆𑀣𑁂 𑀩𑀳𑀼𑀩𑁆𑀩𑀻𑀳𑀺.

𑀢𑀢𑀺𑀬𑀢𑁆𑀣𑁂 𑀩𑀳𑀼𑀩𑁆𑀩𑀻𑀳𑀺 𑀬𑀣𑀸 𑁋 𑀚𑀺𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀬𑁂𑀦 𑀲𑀫𑀡𑁂𑀦 𑀲𑁄𑀬𑀁 𑀚𑀺𑀢𑀺𑀦𑁆𑀤𑁆𑀭𑀺𑀬𑁄 𑀲𑀫𑀡𑁄. 𑀏𑀯𑀁 𑀤𑀺𑀝𑁆𑀞𑀥𑀫𑁆𑀫𑁄, 𑀧𑀢𑁆𑀢𑀥𑀫𑁆𑀫𑁄, 𑀓𑀢𑀓𑀺𑀘𑁆𑀘𑁄, 𑀚𑀺𑀢𑀸 𑀫𑀸𑀭𑀸 𑀅𑀦𑁂𑀦𑀸𑀢𑀺 𑀚𑀺𑀢𑀫𑀸𑀭𑁄 𑀪𑀕𑀯𑀸, 𑀧𑀝𑀺𑀯𑀺𑀤𑁆𑀥𑀲𑀩𑁆𑀩𑀥𑀫𑁆𑀫𑁄.

𑀘𑀢𑀼𑀢𑁆𑀣𑀺𑀬𑀢𑁆𑀣𑁂 𑀩𑀳𑀼𑀩𑁆𑀩𑀻𑀳𑀺 𑀬𑀣𑀸 𑁋 𑀤𑀺𑀦𑁆𑀦𑁄 𑀲𑀼𑀗𑁆𑀓𑁄 𑀬𑀲𑁆𑀲 𑀭𑀜𑁆𑀜𑁄 𑀲𑁄𑀬𑀁 𑀤𑀺𑀦𑁆𑀦𑀲𑀼𑀗𑁆𑀓𑁄 𑀭𑀸𑀚𑀸, 𑀉𑀧𑀦𑀻𑀢𑀁 𑀪𑁄𑀚𑀦𑀁 𑀅𑀲𑁆𑀲 𑀲𑀫𑀡𑀲𑁆𑀲𑀸𑀢𑀺 𑀉𑀧𑀦𑀻𑀢𑀪𑁄𑀚𑀦𑁄 𑀲𑀫𑀡𑁄, 𑀉𑀧𑀳𑀝𑁄 𑀩𑀮𑀺 𑀅𑀲𑁆𑀲𑀸𑀢𑀺 𑀉𑀧𑀳𑀝𑀩𑀮𑀺 𑀬𑀓𑁆𑀔𑁄.

𑀧𑀜𑁆𑀘𑀫𑀺𑀬𑀢𑁆𑀣𑁂 𑀩𑀳𑀼𑀩𑁆𑀩𑀻𑀳𑀺 𑀬𑀣𑀸 𑁋 𑀦𑀺𑀕𑁆𑀕𑀢𑀸 𑀚𑀦𑀸 𑀅𑀲𑁆𑀫𑀸 𑀕𑀸𑀫𑀸 𑀲𑁄𑀬𑀁 𑀦𑀺𑀕𑁆𑀕𑀢𑀚𑀦𑁄 𑀕𑀸𑀫𑁄, 𑀦𑀺𑀕𑁆𑀕𑀢𑁄 𑀅𑀬𑁄 𑀅𑀲𑁆𑀫𑀸𑀢𑀺 𑀦𑀺𑀭𑀬𑁄, 𑀦𑀺𑀕𑁆𑀕𑀢𑀸 𑀓𑀺𑀮𑁂𑀲𑀸 𑀏𑀢𑀲𑁆𑀫𑀸𑀢𑀺 𑀦𑀺𑀓𑁆𑀓𑀺𑀮𑁂𑀲𑁄, 𑀅𑀧𑁂𑀢𑀁 𑀯𑀺𑀜𑁆𑀜𑀸𑀡𑀁 𑀅𑀲𑁆𑀫𑀸𑀢𑀺 𑀅𑀧𑁂𑀢𑀯𑀺𑀜𑁆𑀜𑀸𑀡𑁄 𑀫𑀢𑀓𑀸𑀬𑁄, 𑀅𑀧𑀕𑀢𑀁 𑀪𑀬𑀪𑁂𑀭𑀯𑀁 𑀅𑀲𑁆𑀫𑀸𑀢𑀺 𑀅𑀧𑀕𑀢𑀪𑀬𑀪𑁂𑀭𑀯𑁄 𑀅𑀭𑀳𑀸.

𑀙𑀝𑁆𑀞𑀺𑀬𑀢𑁆𑀣𑁂 𑀩𑀳𑀼𑀩𑁆𑀩𑀻𑀳𑀺 𑀬𑀣𑀸 𑁋 𑀙𑀺𑀦𑁆𑀦𑀸 𑀳𑀢𑁆𑀣𑀸 𑀬𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑁄𑀬𑀁 𑀙𑀺𑀦𑁆𑀦𑀳𑀢𑁆𑀣𑁄 𑀧𑀼𑀭𑀺𑀲𑁄. 𑀏𑀯𑀁 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄, 𑀔𑀻𑀡𑀸𑀲𑀯𑁄, 𑀯𑀻𑀢𑁄 𑀭𑀸𑀕𑁄 𑀅𑀲𑁆𑀲𑀸𑀢𑀺 𑀯𑀻𑀢𑀭𑀸𑀕𑁄, 𑀤𑁆𑀯𑁂 𑀧𑀤𑀸𑀦𑀺 𑀅𑀲𑁆𑀲𑀸𑀢𑀺 𑀤𑁆𑀯𑀺𑀧𑀤𑁄, 𑀤𑁆𑀯𑀺𑀳𑀢𑁆𑀣𑁄 𑀧𑀝𑁄, 𑀢𑁂𑀯𑀺𑀚𑁆𑀚𑁄, 𑀘𑀢𑀼𑀧𑁆𑀧𑀤𑁄, 𑀧𑀜𑁆𑀘 𑀘𑀓𑁆𑀔𑀽𑀦𑀺 𑀅𑀲𑁆𑀲𑀸𑀢𑀺 𑀧𑀜𑁆𑀘𑀘𑀓𑁆𑀔𑀼 𑀪𑀕𑀯𑀸, 𑀙𑀴𑀪𑀺𑀜𑁆𑀜𑁄, 𑀭𑀲𑁆𑀲𑀢𑁆𑀢𑀁, 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀤𑀲𑀩𑀮𑁄, 𑀅𑀦𑀦𑁆𑀢𑀜𑀸𑀡𑁄, 𑀢𑀻𑀡𑀺 𑀤𑀲 𑀧𑀭𑀺𑀫𑀸𑀡𑀫𑁂𑀢𑁂𑀲𑀦𑁆𑀢𑀺 𑀢𑀺𑀤𑀲𑀸 𑀤𑁂𑀯𑀸, 𑀲𑀫𑀸𑀲𑀦𑁆𑀢𑀲𑁆𑀲 𑀅𑀢𑁆𑀢𑀁, 𑀇𑀥 𑀧𑀭𑀺𑀫𑀸𑀡𑀲𑀤𑁆𑀤𑀲𑁆𑀲 𑀲𑀦𑁆𑀦𑀺𑀥𑀸𑀦𑀢𑁄 ¶ 𑀤𑀲𑀲𑀤𑁆𑀤𑁄 𑀲𑀗𑁆𑀔𑁆𑀬𑀸𑀦𑁂 𑀯𑀢𑁆𑀢𑀢𑁂, 𑀅𑀬𑀁 𑀧𑀘𑁆𑀘𑀬𑁄 𑀏𑀢𑁂𑀲𑀦𑁆𑀢𑀺 𑀇𑀤𑀧𑁆𑀧𑀘𑁆𑀘𑀬𑀸, 𑀓𑁄 𑀧𑀪𑀯𑁄 𑀅𑀲𑁆𑀲𑀸𑀢𑀺 𑀓𑀺𑀁𑀧𑀪𑀯𑁄 𑀅𑀬𑀁 𑀓𑀸𑀬𑁄, 𑀯𑀺𑀕𑀢𑀁 𑀫𑀮𑀫𑀲𑁆𑀲𑀸𑀢𑀺 𑀯𑀺𑀫𑀮𑁄, 𑀲𑀼𑀦𑁆𑀤𑀭𑁄 𑀕𑀦𑁆𑀥𑁄 𑀅𑀲𑁆𑀲𑀸𑀢𑀺 𑀲𑀼𑀕𑀦𑁆𑀥𑀁 𑀘𑀦𑁆𑀤𑀦𑀁. 𑀏𑀯𑀁 𑀲𑀼𑀲𑀻𑀮𑁄, 𑀲𑀼𑀫𑀼𑀔𑁄, 𑀓𑀼𑀘𑁆𑀙𑀺𑀢𑁄 𑀕𑀦𑁆𑀥𑁄 𑀅𑀲𑁆𑀲𑀸𑀢𑀺 𑀤𑀼𑀕𑁆𑀕𑀦𑁆𑀥𑀁 𑀓𑀼𑀡𑀧𑀁, 𑀤𑀼𑀝𑁆𑀞𑀼 𑀫𑀦𑁄 𑀅𑀲𑁆𑀲𑀸𑀢𑀺 𑀤𑀼𑀫𑁆𑀫𑀦𑁄. 𑀏𑀯𑀁 𑀤𑀼𑀲𑁆𑀲𑀻𑀮𑁄, 𑀤𑀼𑀫𑁆𑀫𑀼𑀔𑁄, 𑀢𑀧𑁄 𑀏𑀯 𑀥𑀦𑀁 𑀅𑀲𑁆𑀲𑀸𑀢𑀺 𑀢𑀧𑁄𑀥𑀦𑁄, 𑀔𑀦𑁆𑀢𑀺𑀲𑀗𑁆𑀔𑀸𑀢𑀁 𑀩𑀮𑀁 𑀅𑀲𑁆𑀲𑀸𑀢𑀺 𑀔𑀦𑁆𑀢𑀺𑀩𑀮𑁄, 𑀇𑀦𑁆𑀤𑁄𑀢𑀺 𑀦𑀸𑀫𑀁 𑀏𑀢𑀲𑁆𑀲𑀸𑀢𑀺 𑀇𑀦𑁆𑀤𑀦𑀸𑀫𑁄.

𑀙𑀦𑁆𑀤𑀚𑀸𑀢𑀸𑀤𑀻𑀲𑀼 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀸𑀦𑀁 𑀬𑀣𑀺𑀘𑁆𑀙𑀺𑀢𑀢𑁆𑀢𑀸 𑀉𑀪𑀬𑀁 𑀧𑀼𑀩𑁆𑀩𑀁 𑀦𑀺𑀧𑀢𑀢𑀺, 𑀬𑀣𑀸 𑁋 𑀙𑀦𑁆𑀤𑁄 𑀚𑀸𑀢𑁄 𑀅𑀲𑁆𑀲𑀸𑀢𑀺 𑀙𑀦𑁆𑀤𑀚𑀸𑀢𑁄, 𑀚𑀸𑀢𑁄 𑀙𑀦𑁆𑀤𑁄 𑀅𑀲𑁆𑀲𑀸𑀢𑀺𑀧𑀺 𑀚𑀸𑀢𑀙𑀦𑁆𑀤𑁄. 𑀏𑀯𑀁 𑀲𑀜𑁆𑀚𑀸𑀢𑀧𑀻𑀢𑀺𑀲𑁄𑀫𑀦𑀲𑁆𑀲𑁄, 𑀧𑀻𑀢𑀺𑀲𑁄𑀫𑀦𑀲𑁆𑀲𑀲𑀜𑁆𑀚𑀸𑀢𑁄, 𑀫𑀸𑀲𑀚𑀸𑀢𑁄, 𑀚𑀸𑀢𑀫𑀸𑀲𑁄, 𑀙𑀺𑀦𑁆𑀦𑀳𑀢𑁆𑀣𑁄, 𑀳𑀢𑁆𑀣𑀘𑁆𑀙𑀺𑀦𑁆𑀦𑁄.

‘‘𑀤𑀻𑀖𑀸 𑀚𑀗𑁆𑀖𑀸𑀬𑀲𑁆𑀲𑀸’’𑀢𑀺 𑀯𑀺𑀕𑁆𑀕𑀬𑁆𑀳 𑀲𑀫𑀸𑀲𑀸𑀤𑀺𑀫𑁆𑀳𑀺 𑀓𑀢𑁂 𑁋

‘‘𑀢𑀼𑀮𑁆𑀬𑀸𑀥𑀺𑀓𑀭𑀡𑁂, 𑀧𑀤𑁂’’𑀢𑀺 𑀘 𑀯𑀢𑁆𑀢𑀢𑁂.

𑁩𑁫𑁩. 𑀇𑀢𑁆𑀣𑀺𑀬𑀁 𑀪𑀸𑀲𑀺𑀢𑀧𑀼𑀫𑀺𑀢𑁆𑀣𑀻 𑀧𑀼𑀫𑀸𑀯 𑀘𑁂.

𑀇𑀢𑁆𑀣𑀺𑀬𑀁 𑀯𑀢𑁆𑀢𑀫𑀸𑀦𑁂 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀧𑀤𑁂 𑀧𑀭𑁂 𑀧𑀼𑀩𑁆𑀩𑁂 𑀪𑀸𑀲𑀺𑀢𑀧𑀼𑀫𑀸 𑀇𑀢𑁆𑀣𑀺𑀯𑀸𑀘𑀓𑁄 𑀲𑀤𑁆𑀤𑁄 𑀅𑀢𑁆𑀣𑀺 𑀘𑁂, 𑀲𑁄 𑀧𑀼𑀫𑀸 𑀇𑀯 𑀤𑀝𑁆𑀞𑀩𑁆𑀩𑁄𑀢𑀺 𑀧𑀼𑀩𑁆𑀩𑀧𑀤𑁂 𑀇𑀢𑁆𑀣𑀺𑀧𑁆𑀧𑀘𑁆𑀘𑀬𑀸𑀪𑀸𑀯𑁄, 𑀩𑀳𑀼𑀩𑁆𑀩𑀻𑀳𑀺𑀯𑀺𑀲𑀬𑁄𑀬𑀁, 𑀉𑀧𑀭𑀺 ‘‘𑀓𑀫𑁆𑀫𑀥𑀸𑀭𑀬𑀲𑀜𑁆𑀜𑁂 𑀘𑀸’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸.

𑁩𑁫𑁪. 𑀓𑁆𑀯𑀘𑀸𑀤𑀺𑀫𑀚𑁆𑀛𑀼𑀢𑁆𑀢𑀭𑀸𑀦𑀁 𑀤𑀻𑀖𑀭𑀲𑁆𑀲𑀸𑀧𑀘𑁆𑀘𑀬𑁂𑀲𑀼 𑀘.

𑀓𑁆𑀯𑀘𑀺 𑀢𑀤𑁆𑀥𑀺𑀢𑀲𑀫𑀸𑀲𑀦𑀸𑀫𑁄𑀧𑀲𑀕𑁆𑀕𑀸𑀤𑀻𑀲𑀼 𑀧𑀤𑁂𑀲𑀼 𑀆𑀤𑀺𑀫𑀚𑁆𑀛𑀼𑀢𑁆𑀢𑀭𑀪𑀽𑀢𑀸𑀦𑀁 𑀲𑀭𑀸𑀦𑀁 𑀚𑀺𑀦𑀯𑀘𑀦𑀸𑀦𑀼𑀧𑀭𑁄𑀥𑁂𑀦 𑀤𑀻𑀖𑀭𑀲𑁆𑀲𑀸 𑀳𑁄𑀦𑁆𑀢𑀺 𑀧𑀘𑁆𑀘𑀬𑁂𑀲𑀼, 𑀅𑀧𑀘𑁆𑀘𑀬𑁂𑀲𑀼 𑀧𑀭𑁂𑀲𑀼, 𑀅𑀧𑀭𑀪𑀽𑀢𑁂𑀲𑀼 𑀘.

𑀢𑀢𑁆𑀣 ¶

𑀤𑀻𑀖𑀢𑁆𑀢𑀁 𑀧𑀸𑀓𑀝𑀸𑀦𑀽𑀧- 𑀖𑀸𑀢𑀸𑀤𑁄 𑀫𑀥𑀼𑀯𑀸𑀤𑀺𑀲𑀼;

𑀭𑀲𑁆𑀲𑀢𑁆𑀢𑀁 𑀅𑀚𑁆𑀚𑀯𑁂 𑀇𑀢𑁆𑀣𑀺- 𑀭𑀽𑀧𑀸𑀤𑁄 𑀘 𑀓, 𑀢𑀸𑀤𑀺𑀲𑀽𑀢𑀺.

𑀩𑀳𑀼𑀩𑁆𑀩𑀻𑀳𑀺𑀲𑀫𑀸𑀲𑁂 𑀲𑀢𑀺 𑀧𑀼𑀮𑁆𑀮𑀺𑀗𑁆𑀕𑁂 𑀉𑀢𑁆𑀢𑀭𑀧𑀤𑀦𑁆𑀢𑀲𑁆𑀲 𑀭𑀲𑁆𑀲𑀢𑁆𑀢𑀁. 𑀤𑀻𑀖𑀚𑀗𑁆𑀖𑁄 𑀧𑀼𑀭𑀺𑀲𑁄, 𑀢𑀣𑀸 𑀧𑀳𑀽𑀢𑀸 𑀚𑀺𑀯𑁆𑀳𑀸 𑀅𑀲𑁆𑀲𑀸𑀢𑀺 𑀧𑀳𑀽𑀢𑀚𑀺𑀯𑁆𑀳𑁄 𑀪𑀕𑀯𑀸. 𑀫𑀳𑀢𑀻 𑀧𑀜𑁆𑀜𑀸 𑀅𑀲𑁆𑀲𑀸𑀢𑀺 𑀫𑀳𑀸𑀧𑀜𑁆𑀜𑁄. ‘‘𑀫𑀳𑀢𑀁 𑀫𑀳𑀸 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀧𑀤𑁂’’𑀢𑀺 𑀫𑀳𑀸𑀤𑁂𑀲𑁄.

𑀇𑀢𑁆𑀣𑀺𑀬𑀫𑀺𑀢𑀺 𑀓𑀺𑀁? 𑀔𑀫𑀸𑀥𑀦𑁄. 𑀪𑀸𑀲𑀺𑀢𑀧𑀼𑀫𑀸𑀢𑀺 𑀓𑀺𑀁? 𑀲𑀤𑁆𑀥𑀸𑀥𑀼𑀭𑁄, 𑀲𑀤𑁆𑀥𑀸𑀧𑀓𑀢𑀺𑀓𑁄, 𑀧𑀜𑁆𑀜𑀸𑀧𑀓𑀢𑀺𑀓𑁄, 𑀧𑀜𑁆𑀜𑀸𑀯𑀺𑀲𑀼𑀤𑁆𑀥𑀺𑀓𑁄, 𑀏𑀢𑁆𑀣 𑀘 ‘‘𑀓𑁆𑀯𑀘𑀺 𑀲𑀫𑀸𑀲𑀦𑁆𑀢𑀕𑀢𑀸𑀦𑀫𑀓𑀸𑀭𑀦𑁆𑀢𑁄’’𑀢𑀺 𑀓𑀧𑁆𑀧𑀘𑁆𑀘𑀬𑁄. 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀇𑀘𑁆𑀘𑁂𑀯? 𑀲𑀫𑀡𑀺𑀪𑀢𑁆𑀢𑀺𑀓𑁄, 𑀓𑀼𑀫𑀸𑀭𑀺𑀪𑀢𑁆𑀢𑀺𑀓𑁄, 𑀓𑀼𑀫𑀸𑀭𑀺𑀪𑀢𑁆𑀢𑀺.

𑀧𑀼𑀩𑁆𑀩𑀧𑀤𑀲𑁆𑀲𑁂𑀯𑀸𑀬𑀁 𑀧𑀼𑀫𑁆𑀪𑀸𑀯𑀸𑀢𑀺𑀤𑁂𑀲𑁄, 𑀢𑁂𑀦 𑀇𑀥 𑀦 𑀪𑀯𑀢𑀺. 𑀩𑀳𑀼𑀤𑀸𑀲𑀺𑀓𑁄 𑀧𑀼𑀭𑀺𑀲𑁄. 𑀩𑀳𑀼𑀓𑀼𑀫𑀸𑀭𑀺𑀓𑀁 𑀓𑀼𑀮𑀁.

‘‘𑀕𑀸𑀡𑁆𑀞𑀺𑀯𑁄 𑀥𑀦𑀼 𑀅𑀲𑁆𑀲𑀸’’𑀢𑀺 𑀯𑀺𑀕𑁆𑀕𑀬𑁆𑀳 𑀲𑀫𑀸𑀲𑀸𑀤𑀺𑀫𑁆𑀳𑀺 𑀓𑀢𑁂 𑁋

𑁩𑁫𑁫. 𑀥𑀦𑀼𑀫𑁆𑀳𑀸 𑀘.

𑀢𑀺𑀧𑀤𑀫𑀺𑀤𑀁. 𑀓𑁆𑀯𑀘𑀺𑀲𑀫𑀸𑀲𑀦𑁆𑀢𑀕𑀢𑀸 𑀥𑀦𑀼𑀲𑀤𑁆𑀤𑀸 𑀆𑀧𑀘𑁆𑀘𑀬𑁄 𑀳𑁄𑀢𑀺, 𑀘𑀲𑀤𑁆𑀤𑁂𑀦 𑀥𑀫𑁆𑀫𑀸𑀤𑀺𑀢𑁄 𑀘, ‘‘𑀯𑀫𑁄𑀤𑀼𑀤𑀦𑁆𑀢𑀸𑀦’’𑀦𑁆𑀢𑀺 𑀯𑀓𑀸𑀭𑁄, 𑀕𑀸𑀡𑁆𑀞𑀺𑀯𑀥𑀦𑁆𑀯𑀸. 𑀏𑀯𑀁 𑀧𑀘𑁆𑀘𑀓𑁆𑀔𑀥𑀫𑁆𑀫𑀸.

𑀓𑁆𑀯𑀘𑀻𑀢𑀺 𑀓𑀺𑀁? 𑀲𑀳𑀲𑁆𑀲𑀣𑀸𑀫𑀥𑀦𑀼, 𑀧𑀘𑁆𑀘𑀓𑁆𑀔𑀥𑀫𑁆𑀫𑁄, 𑀯𑀺𑀤𑀺𑀢𑀥𑀫𑁆𑀫𑁄.

𑀦𑀸𑀦𑀸𑀤𑀼𑀫𑀧𑀢𑀺𑀢𑀧𑀼𑀧𑁆𑀨𑀯𑀸𑀲𑀺𑀢𑀲𑀸𑀦𑀼 𑀇𑀘𑁆𑀘𑀢𑁆𑀭 𑁋 𑀦𑀸𑀦𑀧𑁆𑀧𑀓𑀸𑀭𑀸 𑀤𑀼𑀫𑀸 𑀦𑀸𑀦𑀸𑀤𑀼𑀫𑀸, 𑀦𑀸𑀦𑀸𑀤𑀼𑀫𑁂𑀳𑀺 𑀧𑀢𑀺𑀢𑀸𑀦𑀺 𑀦𑀸𑀦𑀸𑀤𑀼𑀫𑀧𑀢𑀺𑀢𑀸𑀦𑀺, 𑀦𑀸𑀦𑀸𑀤𑀼𑀫𑀧𑀢𑀺𑀢𑀸𑀦𑀺 𑀘 𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀘𑀸𑀢𑀺 𑀦𑀸𑀦𑀸𑀤𑀼𑀫𑀧𑀢𑀺𑀢𑀧𑀼𑀧𑁆𑀨𑀸𑀦𑀺, 𑀢𑁂𑀳𑀺 𑀯𑀸𑀲𑀺𑀢𑀸 𑀦𑀸𑀦𑀸𑀤𑀼𑀫𑀧𑀢𑀺𑀢𑀧𑀼𑀧𑁆𑀨𑀯𑀸𑀲𑀺𑀢𑀸, 𑀦𑀸𑀦𑀸𑀤𑀼𑀫𑀧𑀢𑀺𑀢𑀧𑀼𑀧𑁆𑀨𑀯𑀸𑀲𑀺𑀢𑀸 𑀲𑀸𑀦𑀽 𑀬𑀲𑁆𑀲 𑀧𑀩𑁆𑀩𑀢𑀲𑁆𑀲 𑀲𑁄𑀬𑀁 𑀦𑀸𑀦𑀸𑀤𑀼𑀫𑀧𑀢𑀺𑀢𑀧𑀼𑀧𑁆𑀨𑀯𑀸𑀲𑀺𑀢𑀲𑀸𑀦𑀼 ¶ 𑀧𑀩𑁆𑀩𑀢𑁄. 𑀅𑀬𑀁 𑀧𑀦 𑀓𑀫𑁆𑀫𑀥𑀸𑀭𑀬𑀢𑀧𑁆𑀧𑀼𑀭𑀺𑀲𑀕𑀩𑁆𑀪𑁄 𑀢𑀼𑀮𑁆𑀬𑀸𑀥𑀺𑀓𑀭𑀡𑀩𑀳𑀼𑀩𑁆𑀩𑀻𑀳𑀺.

𑀢𑀣𑀸 𑀩𑁆𑀬𑀸𑀮𑀫𑁆𑀩𑁄 𑀅𑀫𑁆𑀩𑀼𑀥𑀭𑁄 𑀩𑁆𑀬𑀸𑀮𑀫𑁆𑀩𑀫𑁆𑀩𑀼𑀥𑀭𑁄, 𑀢𑀲𑁆𑀲 𑀩𑀺𑀦𑁆𑀤𑀽𑀦𑀺 𑀩𑁆𑀬𑀸𑀮𑀫𑁆𑀩𑀫𑁆𑀩𑀼𑀥𑀭𑀩𑀺𑀦𑁆𑀤𑀽𑀦𑀺, 𑀢𑁂𑀳𑀺 𑀘𑀼𑀫𑁆𑀩𑀺𑀢𑁄 𑀩𑁆𑀬𑀸𑀮𑀫𑁆𑀩𑀫𑁆𑀩𑀼𑀥𑀭𑀩𑀺𑀦𑁆𑀤𑀼𑀘𑀼𑀫𑁆𑀩𑀺𑀢𑁄, 𑀢𑀸𑀤𑀺𑀲𑁄 𑀓𑀽𑀝𑁄 𑀬𑀲𑁆𑀲 𑀲𑁄𑀬𑀁 𑀩𑁆𑀬𑀸𑀮𑀫𑁆𑀩𑀫𑁆𑀩𑀼𑀥𑀭𑀩𑀺𑀦𑁆𑀤𑀼𑀘𑀼𑀫𑁆𑀩𑀺𑀢𑀓𑀽𑀝𑁄 𑀇𑀘𑁆𑀘𑀸𑀤𑀺.

𑀲𑀢𑁆𑀢𑀫𑀺𑀬𑀢𑁆𑀣𑁂 𑀩𑀳𑀼𑀩𑁆𑀩𑀻𑀳𑀺 𑀬𑀣𑀸 𑁋 𑀲𑀫𑁆𑀧𑀦𑁆𑀦𑀸𑀦𑀺 𑀲𑀲𑁆𑀲𑀸𑀦𑀺 𑀬𑀲𑁆𑀫𑀺𑀁 𑀚𑀦𑀧𑀤𑁂 𑀲𑁄𑀬𑀁 𑀲𑀫𑁆𑀧𑀦𑁆𑀦𑀲𑀲𑁆𑀲𑁄 𑀚𑀦𑀧𑀤𑁄, 𑀲𑀼𑀮𑀪𑁄 𑀧𑀺𑀡𑁆𑀟𑁄 𑀇𑀫𑀲𑁆𑀫𑀺𑀦𑁆𑀢𑀺 𑀲𑀼𑀮𑀪𑀧𑀺𑀡𑁆𑀟𑁄 𑀤𑁂𑀲𑁄. 𑀆𑀓𑀺𑀡𑁆𑀡𑀸 𑀫𑀦𑀼𑀲𑁆𑀲𑀸 𑀬𑀲𑁆𑀲𑀁 𑀭𑀸𑀚𑀥𑀸𑀦𑀺𑀬𑀁 𑀲𑀸 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀸 𑀭𑀸𑀚𑀥𑀸𑀦𑀻, 𑀩𑀳𑀯𑁄 𑀢𑀸𑀧𑀲𑀸 𑀏𑀢𑀲𑁆𑀫𑀺𑀦𑁆𑀢𑀺 𑀩𑀳𑀼𑀢𑀸𑀧𑀲𑁄 𑀅𑀲𑁆𑀲𑀫𑁄, 𑀉𑀧𑀘𑀺𑀢𑀁 𑀫𑀁𑀲𑀮𑁄𑀳𑀺𑀢𑀁 𑀅𑀲𑁆𑀫𑀺𑀦𑁆𑀢𑀺 𑀉𑀧𑀘𑀺𑀢𑀫𑀁𑀲𑀮𑁄𑀳𑀺𑀢𑀁 𑀲𑀭𑀻𑀭𑀁, 𑀩𑀳𑀯𑁄 𑀲𑀸𑀫𑀺𑀦𑁄 𑀅𑀲𑁆𑀫𑀺𑀦𑁆𑀢𑀺 𑀩𑀳𑀼𑀲𑁆𑀲𑀸𑀫𑀺𑀓𑀁 𑀦𑀕𑀭𑀁.

‘‘𑀩𑀳𑀽 𑀦𑀤𑀺𑀬𑁄 𑀅𑀲𑁆𑀫𑀺’’𑀦𑁆𑀢𑀺 𑀅𑀢𑁆𑀣𑁂 𑀲𑀫𑀸𑀲𑀸𑀤𑀺𑀫𑁆𑀳𑀺 𑀓𑀢𑁂 𑁋

𑀲𑀫𑀸𑀲𑀦𑁆𑀢𑀕𑁆𑀕𑀳𑀡𑀁, 𑀓𑀧𑁆𑀧𑀘𑁆𑀘𑀬𑁄 𑀘 𑀯𑀢𑁆𑀢𑀢𑁂.

𑁩𑁫𑁬. 𑀦𑀤𑀺𑀫𑁆𑀳𑀸 𑀘.

𑀲𑀫𑀸𑀲𑀦𑁆𑀢𑀕𑀢𑀸 𑀦𑀤𑀺𑀫𑁆𑀳𑀸 𑀓𑀧𑁆𑀧𑀘𑁆𑀘𑀬𑁄 𑀳𑁄𑀢𑀺, 𑀘𑀲𑀤𑁆𑀤𑁂𑀦 𑀢𑀼𑀅𑀦𑁆𑀢𑀸 𑀘. 𑀦𑀺𑀘𑁆𑀘𑀢𑁆𑀣𑀁 𑀯𑀘𑀦𑀁. 𑀦𑀤𑀻𑀢𑀺 𑀘𑁂𑀢𑁆𑀣 𑀇𑀢𑁆𑀣𑀺𑀯𑀸𑀘𑀓𑀸𑀦𑀁 𑀈𑀓𑀸𑀭𑀽𑀓𑀸𑀭𑀸𑀦𑀁 𑀧𑀭𑀲𑀫𑀜𑁆𑀜𑀸, 𑀢𑀢𑁄 ‘‘𑀓𑁆𑀯𑀘𑀸𑀤𑀺𑀫𑀚𑁆𑀛𑀼𑀢𑁆𑀢𑀭𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀤𑀺𑀲𑀜𑁆𑀜𑀲𑁆𑀲 𑀓𑀧𑁆𑀧𑀘𑁆𑀘𑀬𑁂 𑀭𑀲𑁆𑀲𑀢𑁆𑀢𑀁, 𑀩𑀳𑀼𑀦𑀤𑀺𑀓𑁄 𑀚𑀦𑀧𑀤𑁄. 𑀏𑀯𑀁 𑀩𑀳𑀼𑀚𑀫𑁆𑀩𑀼𑀓𑀁 𑀯𑀦𑀁. 𑀩𑀳𑀼𑀦𑀸𑀭𑀺𑀓𑁄𑀢𑀺 𑀙𑀝𑁆𑀞𑀻𑀩𑀳𑀼𑀩𑁆𑀩𑀻𑀳𑀺𑀦𑀸 𑀲𑀺𑀤𑁆𑀥𑀁. 𑀩𑀳𑀯𑁄 𑀓𑀢𑁆𑀢𑀸𑀭𑁄 𑀅𑀲𑁆𑀫𑀺𑀁, 𑀅𑀲𑁆𑀲𑀸𑀢𑀺 𑀯𑀸 𑀩𑀳𑀼𑀓𑀢𑁆𑀢𑀼𑀓𑁄 𑀤𑁂𑀲𑁄. 𑀏𑀯𑀁 𑀩𑀳𑀼𑀪𑀢𑁆𑀢𑀼𑀓𑁄.

𑀪𑀺𑀦𑁆𑀦𑀸𑀥𑀺𑀓𑀭𑀡𑁄 𑀬𑀣𑀸 𑁋 𑀏𑀓𑀭𑀢𑁆𑀢𑀺𑀁 𑀯𑀸𑀲𑁄 𑀅𑀲𑁆𑀲𑀸𑀢𑀺 𑀏𑀓𑀭𑀢𑁆𑀢𑀺𑀯𑀸𑀲𑁄, 𑀲𑀫𑀸𑀦𑁂𑀦 𑀚𑀦𑁂𑀦 𑀲𑀤𑁆𑀥𑀺𑀁 𑀯𑀸𑀲𑁄 𑀅𑀲𑁆𑀲𑀸𑀢𑀺 𑀲𑀫𑀸𑀦𑀯𑀸𑀲𑁄 ¶ 𑀧𑀼𑀭𑀺𑀲𑁄. 𑀉𑀪𑀢𑁄 𑀩𑁆𑀬𑀜𑁆𑀚𑀦𑀫𑀲𑁆𑀲 𑀅𑀢𑁆𑀣𑀻𑀢𑀺 𑀉𑀪𑀪𑁄𑀩𑁆𑀬𑀜𑁆𑀚𑀦𑀓𑁄, 𑀙𑀢𑁆𑀢𑀁 𑀧𑀸𑀡𑀺𑀫𑁆𑀳𑀺 𑀅𑀲𑁆𑀲𑀸𑀢𑀺 𑀙𑀢𑁆𑀢𑀧𑀸𑀡𑀺 𑀧𑀼𑀭𑀺𑀲𑁄. 𑀏𑀯𑀁 𑀤𑀡𑁆𑀟𑀧𑀸𑀡𑀺, 𑀲𑀢𑁆𑀣𑀧𑀸𑀡𑀺, 𑀯𑀚𑀺𑀭𑀧𑀸𑀡𑀺, 𑀔𑀕𑁆𑀕𑀳𑀢𑁆𑀣𑁄, 𑀲𑀢𑁆𑀣𑀳𑀢𑁆𑀣𑁄, 𑀤𑀸𑀦𑁂 𑀅𑀚𑁆𑀛𑀸𑀲𑀬𑁄 𑀅𑀲𑁆𑀲𑀸𑀢𑀺 𑀤𑀸𑀦𑀚𑁆𑀛𑀸𑀲𑀬𑁄, 𑀤𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑁄, 𑀩𑀼𑀤𑁆𑀥𑀪𑀢𑁆𑀢𑀺𑀓𑁄, 𑀲𑀤𑁆𑀥𑀫𑁆𑀫𑀕𑀸𑀭𑀯𑁄 𑀇𑀘𑁆𑀘𑀸𑀤𑀺.

𑀢𑀺𑀧𑀤𑁄 𑀬𑀣𑀸 𑁋 𑀧𑀭𑀓𑁆𑀓𑀫𑁂𑀦𑀸𑀥𑀺𑀕𑀢𑀸 𑀲𑀫𑁆𑀧𑀤𑀸 𑀬𑁂𑀳𑀺 𑀢𑁂 𑀪𑀯𑀦𑁆𑀢𑀺 𑀧𑀭𑀓𑁆𑀓𑀫𑀸𑀥𑀺𑀕𑀢𑀲𑀫𑁆𑀧𑀤𑀸 𑀫𑀳𑀸𑀧𑀼𑀭𑀺𑀲𑀸. 𑀏𑀯𑀁 𑀥𑀫𑁆𑀫𑀸𑀥𑀺𑀕𑀢𑀪𑁄𑀕𑀸, 𑀑𑀡𑀻𑀢𑁄 𑀧𑀢𑁆𑀢𑀢𑁄 𑀧𑀸𑀡𑀺 𑀬𑁂𑀦 𑀲𑁄𑀬𑀁 𑀑𑀡𑀻𑀢𑀧𑀢𑁆𑀢𑀧𑀸𑀡𑀺, 𑀲𑀻𑀳𑀲𑁆𑀲 𑀧𑀼𑀩𑁆𑀩𑀤𑁆𑀥𑀁 𑀯𑀺𑀬 𑀓𑀸𑀬𑁄 𑀅𑀲𑁆𑀲𑀸𑀢𑀺 𑀲𑀻𑀳𑀧𑀼𑀩𑁆𑀩𑀤𑁆𑀥𑀓𑀸𑀬𑁄, 𑀫𑀢𑁆𑀢𑀸 𑀩𑀳𑀯𑁄 𑀫𑀸𑀢𑀗𑁆𑀕𑀸 𑀅𑀲𑁆𑀫𑀺𑀦𑁆𑀢𑀺 𑀫𑀢𑁆𑀢𑀩𑀳𑀼𑀫𑀸𑀢𑀗𑁆𑀕𑀁 𑀯𑀦𑀁 𑀇𑀘𑁆𑀘𑀸𑀤𑀺.

𑀦𑀦𑀺𑀧𑀸𑀢𑀧𑀼𑀩𑁆𑀩𑀧𑀤𑁄 𑀬𑀣𑀸 𑁋 𑀦𑀢𑁆𑀣𑀺 𑀏𑀢𑀲𑁆𑀲 𑀲𑀫𑁄𑀢𑀺 𑀅𑀲𑀫𑁄 𑀪𑀕𑀯𑀸. 𑀇𑀥 ‘‘𑀅𑀢𑁆𑀢𑀁 𑀦𑀲𑁆𑀲 𑀢𑀧𑁆𑀧𑀼𑀭𑀺𑀲𑁂’’𑀢𑀺 𑀲𑀼𑀢𑁆𑀢𑁂 ‘‘𑀅𑀢𑁆𑀢𑀁 𑀦𑀲𑁆𑀲𑀸’’𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀦𑀲𑁆𑀲 𑀅𑀢𑁆𑀢𑀁. 𑀏𑀯𑀁 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄, 𑀅𑀧𑀼𑀢𑁆𑀢𑀓𑁄, 𑀅𑀳𑁂𑀢𑀼𑀓𑁄, ‘‘𑀓𑁆𑀯𑀘𑀺 𑀲𑀫𑀸𑀲𑀦𑁆𑀢’’𑀇𑀘𑁆𑀘𑀸𑀤𑀺𑀦𑀸 𑀓𑀧𑁆𑀧𑀘𑁆𑀘𑀬𑁄, 𑀦𑀢𑁆𑀣𑀺 𑀲𑀁𑀯𑀸𑀲𑁄 𑀏𑀢𑁂𑀲𑀦𑁆𑀢𑀺 𑀅𑀲𑀁𑀯𑀸𑀲𑀸, 𑀦 𑀯𑀺𑀚𑁆𑀚𑀢𑁂 𑀯𑀼𑀝𑁆𑀞𑀺 𑀏𑀢𑁆𑀣𑀸𑀢𑀺 𑀅𑀯𑀼𑀝𑁆𑀞𑀺𑀓𑁄 𑀚𑀦𑀧𑀤𑁄, 𑀅𑀪𑀺𑀓𑁆𑀔𑀼𑀓𑁄 𑀯𑀺𑀳𑀸𑀭𑁄, 𑀦𑀢𑁆𑀣𑀺 𑀏𑀢𑀲𑁆𑀲 𑀉𑀢𑁆𑀢𑀭𑁄𑀢𑀺 𑀅𑀦𑀼𑀢𑁆𑀢𑀭𑁄, ‘‘𑀲𑀭𑁂 𑀅𑀦’’𑀢𑀺 𑀅𑀦, 𑀢𑀧𑁆𑀧𑀼𑀭𑀺𑀲𑀕𑁆𑀕𑀳𑀡𑀫𑀼𑀧𑀮𑀓𑁆𑀔𑀡𑀁, 𑀅𑀣𑀯𑀸 ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀦𑀲𑁆𑀲 𑀅𑀦. 𑀏𑀯𑀁 𑀦𑀢𑁆𑀣𑀺 𑀅𑀦𑁆𑀢𑁄 𑀅𑀲𑁆𑀲𑀸𑀢𑀺 𑀅𑀦𑀦𑁆𑀢𑀁, 𑀦 𑀯𑀺𑀚𑁆𑀚𑀦𑁆𑀢𑀺 𑀆𑀲𑀯𑀸 𑀏𑀢𑁂𑀲𑀦𑁆𑀢𑀺 𑀅𑀦𑀸𑀲𑀯𑀸 𑀇𑀘𑁆𑀘𑀸𑀤𑀺.

𑀧𑀞𑀫𑀸𑀬𑀢𑁆𑀣𑁂 𑀲𑀳𑀧𑀼𑀩𑁆𑀩𑀧𑀤𑁄 𑀬𑀣𑀸 𑁋 𑀲𑀳 𑀳𑁂𑀢𑀼𑀦𑀸 𑀬𑁄 𑀯𑀢𑁆𑀢𑀢𑁂𑀢𑀺 𑀲𑀳𑁂𑀢𑀼𑀓𑁄, 𑀲𑀳𑁂𑀢𑀼 𑀯𑀸, ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 ¶ 𑀲𑀳𑀲𑀤𑁆𑀤𑀲𑁆𑀲 𑀲𑀸𑀤𑁂𑀲𑁄, ‘‘𑀓𑁆𑀯𑀘𑀺 𑀲𑀫𑀸𑀲𑀦𑁆𑀢’’𑀇𑀘𑁆𑀘𑀸𑀤𑀺𑀦𑀸 𑀓𑀧𑁆𑀧𑀘𑁆𑀘𑀬𑁄 𑀘, 𑀲𑀳 𑀧𑀻𑀢𑀺𑀬𑀸 𑀇𑀫𑁂 𑀯𑀢𑁆𑀢𑀦𑁆𑀢𑀻𑀢𑀺 𑀲𑀧𑁆𑀧𑀻𑀢𑀺𑀓𑀸. 𑀏𑀯𑀁 𑀲𑀳 𑀧𑀘𑁆𑀘𑀬𑁂𑀳𑀺 𑀯𑀢𑁆𑀢𑀦𑁆𑀢𑀻𑀢𑀺 𑀲𑀧𑁆𑀧𑀘𑁆𑀘𑀬𑀸, 𑀲𑀓𑀺𑀮𑁂𑀲𑁄, 𑀲𑀉𑀧𑀸𑀤𑀸𑀦𑁄, 𑀲𑀧𑀭𑀺𑀯𑀸𑀭𑁄, 𑀲𑀳 𑀫𑀽𑀮𑁂𑀦 𑀉𑀤𑁆𑀥𑀢𑁄 𑀲𑀫𑀽𑀮𑀼𑀤𑁆𑀥𑀢𑁄 𑀭𑀼𑀓𑁆𑀔𑁄.

𑀉𑀧𑀫𑀸𑀦𑀧𑀼𑀩𑁆𑀩𑀧𑀤𑁄 𑀧𑀞𑀫𑀸𑀬𑀢𑁆𑀣𑁂 𑀢𑀸𑀯 𑁋 𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀪𑀸𑀯𑀧𑁆𑀧𑀲𑀺𑀤𑁆𑀥𑀢𑁆𑀣𑀁 𑀇𑀯𑀲𑀤𑁆𑀤𑀧𑁆𑀧𑀬𑁄𑀕𑁄, 𑀓𑀸𑀬𑀩𑁆𑀬𑀸𑀫𑀸𑀦𑀁 𑀲𑀫𑀧𑁆𑀧𑀫𑀸𑀡𑀢𑀸𑀬 𑀦𑀺𑀕𑁆𑀭𑁄𑀥𑁄 𑀇𑀯 𑀧𑀭𑀺𑀫𑀡𑁆𑀟𑀮𑁄 𑀬𑁄 𑀭𑀸𑀚𑀓𑀼𑀫𑀸𑀭𑁄 𑀲𑁄𑀬𑀁𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄 𑀭𑀸𑀚𑀓𑀼𑀫𑀸𑀭𑁄. ‘‘𑀯𑀼𑀢𑁆𑀢𑀢𑁆𑀣𑀸𑀦𑀫𑀧𑁆𑀧𑀬𑁄𑀕𑁄’’𑀢𑀺 𑀇𑀯𑀲𑀤𑁆𑀤𑀲𑁆𑀲 𑀅𑀧𑁆𑀧𑀬𑁄𑀕𑁄, 𑀲𑀗𑁆𑀔𑁄 𑀯𑀺𑀬 𑀧𑀡𑁆𑀟𑀭𑁄 𑀅𑀬𑀦𑁆𑀢𑀺 𑀲𑀗𑁆𑀔𑀧𑀡𑁆𑀟𑀭𑁄, 𑀓𑀸𑀓𑁄 𑀯𑀺𑀬 𑀲𑀽𑀭𑁄 𑀅𑀬𑀦𑁆𑀢𑀺 𑀓𑀸𑀓𑀲𑀽𑀭𑁄, 𑀘𑀓𑁆𑀔𑀼 𑀇𑀯 𑀪𑀽𑀢𑁄 𑀅𑀬𑀁 𑀧𑀭𑀫𑀢𑁆𑀣𑀤𑀲𑁆𑀲𑀦𑀢𑁄𑀢𑀺 𑀘𑀓𑁆𑀔𑀼𑀪𑀽𑀢𑁄 𑀪𑀕𑀯𑀸. 𑀏𑀯𑀁 𑀅𑀢𑁆𑀣𑀪𑀽𑀢𑁄. 𑀥𑀫𑁆𑀫𑀪𑀽𑀢𑁄, 𑀩𑁆𑀭𑀳𑁆𑀫𑀪𑀽𑀢𑁄, 𑀅𑀦𑁆𑀥𑁄 𑀯𑀺𑀬 𑀪𑀽𑀢𑁄 𑀅𑀬𑀦𑁆𑀢𑀺 𑀅𑀦𑁆𑀥𑀪𑀽𑀢𑁄 𑀩𑀸𑀮𑁄. 𑀫𑀼𑀜𑁆𑀚𑀧𑀩𑁆𑀩𑀚𑀫𑀺𑀯 𑀪𑀽𑀢𑀸 𑀅𑀬𑀦𑁆𑀢𑀺 𑀫𑀼𑀜𑁆𑀚𑀧𑀩𑁆𑀩𑀚𑀪𑀽𑀢𑀸 𑀓𑀼𑀤𑀺𑀝𑁆𑀞𑀺. 𑀢𑀦𑁆𑀢𑀸𑀓𑀼𑀮𑀓𑀫𑀺𑀯 𑀚𑀸𑀢𑀸 𑀅𑀬𑀦𑁆𑀢𑀺 𑀢𑀦𑁆𑀢𑀸𑀓𑀼𑀮𑀓𑀚𑀸𑀢𑀸.

𑀙𑀝𑁆𑀞𑀺𑀬𑀢𑁆𑀣𑁂 𑁋 𑀲𑀼𑀯𑀡𑁆𑀡𑀯𑀡𑁆𑀡𑁄 𑀯𑀺𑀬 𑀯𑀡𑁆𑀡𑁄 𑀬𑀲𑁆𑀲 𑀲𑁄𑀬𑀁 𑀲𑀼𑀯𑀡𑁆𑀡𑀯𑀡𑁆𑀡𑁄 𑀪𑀕𑀯𑀸. 𑀉𑀢𑁆𑀢𑀭𑀧𑀤𑀮𑁄𑀧𑁄, 𑀦𑀸𑀕𑀲𑁆𑀲 𑀯𑀺𑀬 𑀅𑀲𑁆𑀲 𑀕𑀢𑀻𑀢𑀺 𑀦𑀸𑀕𑀕𑀢𑀺. 𑀏𑀯𑀁 𑀲𑀻𑀳𑀕𑀢𑀺, 𑀦𑀸𑀕𑀯𑀺𑀓𑁆𑀓𑀫𑁄, 𑀲𑀻𑀳𑀯𑀺𑀓𑁆𑀓𑀫𑁄, 𑀲𑀻𑀳𑀳𑀦𑀼, 𑀏𑀡𑀺𑀲𑁆𑀲 𑀯𑀺𑀬 𑀅𑀲𑁆𑀲 𑀚𑀗𑁆𑀖𑀸𑀢𑀺 𑀏𑀡𑀺𑀚𑀗𑁆𑀖𑁄, 𑀲𑀻𑀳𑀲𑁆𑀲 𑀧𑀼𑀩𑁆𑀩𑀤𑁆𑀥𑀁 𑀯𑀺𑀬 𑀅𑀲𑁆𑀲 𑀓𑀸𑀬𑁄𑀢𑀺 𑀲𑀻𑀳𑀧𑀼𑀩𑁆𑀩𑀤𑁆𑀥𑀓𑀸𑀬𑁄, 𑀩𑁆𑀭𑀳𑁆𑀫𑀼𑀦𑁄 𑀯𑀺𑀬 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀲𑀭𑁄 𑀅𑀲𑁆𑀲𑀸𑀢𑀺 𑀩𑁆𑀭𑀳𑁆𑀫𑀲𑁆𑀲𑀭𑁄.

𑀯𑀸𑀲𑀤𑁆𑀤𑀢𑁆𑀣𑁂 ¶ 𑀲𑀗𑁆𑀔𑁆𑀬𑁄𑀪𑀬𑀧𑀤𑁄 𑀬𑀣𑀸 𑁋 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀧𑀢𑁆𑀢𑀸 𑀤𑁆𑀯𑀢𑁆𑀢𑀺𑀧𑀢𑁆𑀢𑀸, ‘‘𑀤𑁆𑀯𑁂𑀓𑀝𑁆𑀞𑀸𑀦𑀫𑀸𑀓𑀸𑀭𑁄 𑀯𑀸’’𑀢𑀺 𑀤𑁆𑀯𑀺𑀲𑀤𑁆𑀤𑀦𑁆𑀢𑀲𑁆𑀲 𑀆𑀢𑁆𑀢𑀁, 𑀭𑀲𑁆𑀲𑀢𑁆𑀢𑀁, 𑀤𑁆𑀯𑀻𑀳𑀁 𑀯𑀸 𑀢𑀻𑀳𑀁 𑀯𑀸 𑀤𑁆𑀯𑀻𑀳𑀢𑀻𑀳𑀁, 𑀙 𑀯𑀸 𑀧𑀜𑁆𑀘 𑀯𑀸 𑀯𑀸𑀘𑀸 𑀙𑀧𑁆𑀧𑀜𑁆𑀘𑀯𑀸𑀘𑀸. 𑀏𑀯𑀁 𑀲𑀢𑁆𑀢𑀝𑁆𑀞𑀫𑀸𑀲𑀸, 𑀏𑀓𑀬𑁄𑀚𑀦𑀤𑁆𑀯𑀺𑀬𑁄𑀚𑀦𑀸𑀦𑀺.

𑀤𑀺𑀲𑀦𑁆𑀢𑀭𑀸𑀴𑀢𑁆𑀣𑁄 𑀬𑀣𑀸 𑁋 𑀧𑀼𑀩𑁆𑀩𑀲𑁆𑀲𑀸 𑀘 𑀤𑀓𑁆𑀔𑀺𑀡𑀲𑁆𑀲𑀸 𑀘 𑀤𑀺𑀲𑀸𑀬 𑀬𑀤𑀦𑁆𑀢𑀭𑀸𑀴𑀁 𑀲𑀸𑀬𑀁 𑀧𑀼𑀩𑁆𑀩𑀤𑀓𑁆𑀔𑀺𑀡𑀸 𑀯𑀺𑀤𑀺𑀲𑀸. 𑀏𑀢𑁆𑀣 𑀢𑀼𑀮𑁆𑀬𑀸𑀥𑀺𑀓𑀭𑀡𑀧𑀤𑀧𑀭𑀢𑁆𑀢𑀸𑀪𑀸𑀯𑀸 𑀦 𑀧𑀼𑀫𑁆𑀪𑀸𑀯𑀸𑀢𑀺𑀤𑁂𑀲𑁄, ‘‘𑀓𑁆𑀯𑀘𑀸𑀤𑀺𑀫𑀚𑁆𑀛𑀼𑀢𑁆𑀢𑀭𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀤𑀺𑀲𑀦𑁆𑀢𑀭𑀸𑀴𑀢𑁆𑀣𑁂 𑀧𑀼𑀩𑁆𑀩𑀧𑀤𑀲𑁆𑀲 𑀭𑀲𑁆𑀲𑀢𑁆𑀢𑀁. 𑀏𑀯𑀁 𑀧𑀼𑀩𑁆𑀩𑀼𑀢𑁆𑀢𑀭𑀸, 𑀅𑀧𑀭𑀤𑀓𑁆𑀔𑀺𑀡𑀸, 𑀧𑀘𑁆𑀙𑀺𑀫𑀼𑀢𑁆𑀢𑀭𑀸. 𑀬𑀤𑀸 𑀧𑀦 𑀤𑀓𑁆𑀔𑀺𑀡𑀸 𑀘 𑀲𑀸 𑀧𑀼𑀩𑁆𑀩𑀸 𑀘𑀸𑀢𑀺 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄 𑀳𑁄𑀢𑀺, 𑀢𑀤𑀸 𑀧𑀼𑀫𑁆𑀪𑀸𑀯𑀸𑀢𑀺𑀤𑁂𑀲𑁄 𑀉𑀢𑁆𑀢𑀭𑀧𑀤𑀢𑁆𑀣𑀧𑁆𑀧𑀥𑀸𑀦𑀢𑁆𑀢𑀸, 𑀲𑀩𑁆𑀩𑀦𑀸𑀫𑀺𑀓𑀯𑀺𑀥𑀸𑀦𑀫𑁆𑀧𑀺 𑀦𑀺𑀘𑁆𑀘𑀁 𑀪𑀯𑀢𑀺𑀬𑁂𑀯, 𑀬𑀣𑀸 𑁋 𑀤𑀓𑁆𑀔𑀺𑀡𑀧𑀼𑀩𑁆𑀩𑀲𑁆𑀲𑀸, 𑀤𑀓𑁆𑀔𑀺𑀡𑀧𑀼𑀩𑁆𑀩𑀲𑁆𑀲𑀫𑀺𑀢𑀺.

𑀩𑁆𑀬𑀢𑀺𑀳𑀸𑀭𑀮𑀓𑁆𑀔𑀡𑁄 𑀬𑀣𑀸 𑁋 𑀓𑁂𑀲𑁂𑀲𑀼 𑀘 𑀓𑁂𑀲𑁂𑀲𑀼 𑀘 𑀕𑀳𑁂𑀢𑁆𑀯𑀸 𑀇𑀤𑀁 𑀬𑀼𑀤𑁆𑀥𑀁 𑀧𑀯𑀢𑁆𑀢𑀢𑀻𑀢𑀺 𑀓𑁂𑀲𑀸𑀓𑁂𑀲𑀺, 𑀤𑀡𑁆𑀟𑁂𑀳𑀺 𑀘 𑀤𑀡𑁆𑀟𑁂𑀳𑀺 𑀘 𑀧𑀳𑀭𑀺𑀢𑁆𑀯𑀸 𑀇𑀤𑀁 𑀬𑀼𑀤𑁆𑀥𑀁 𑀧𑀯𑀢𑁆𑀢𑀢𑀻𑀢𑀺 𑀤𑀡𑁆𑀟𑀸𑀤𑀡𑁆𑀟𑀺, ‘‘𑀓𑁆𑀯𑀘𑀸𑀤𑀺𑀫𑀚𑁆𑀛𑀼𑀢𑁆𑀢𑀭𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀫𑀚𑁆𑀛𑁂𑀤𑀻𑀖𑁄, ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀅𑀦𑁆𑀢𑀲𑁆𑀲𑀺𑀓𑀸𑀭𑁄.

𑀧𑀞𑀫𑀸𑀯𑀺𑀪𑀢𑁆𑀬𑀢𑁆𑀣𑀩𑀳𑀼𑀩𑁆𑀩𑀻𑀳𑀺.

𑀩𑀳𑀼𑀩𑁆𑀩𑀻𑀳𑀺𑀲𑀫𑀸𑀲𑁄 𑀦𑀺𑀝𑁆𑀞𑀺𑀢𑁄.

𑀤𑁆𑀯𑀦𑁆𑀤𑀲𑀫𑀸𑀲

𑀅𑀣 𑀤𑁆𑀯𑀦𑁆𑀤𑀲𑀫𑀸𑀲𑁄 𑀯𑀼𑀘𑁆𑀘𑀢𑁂.

𑀲𑁄 𑀘 𑀤𑀼𑀯𑀺𑀥𑁄 𑀇𑀢𑀭𑀻𑀢𑀭𑀬𑁄𑀕 𑀲𑀫𑀸𑀳𑀸𑀭𑀢𑁆𑀣𑀪𑁂𑀤𑁂𑀦.

𑀢𑀢𑁆𑀣 ¶ 𑀇𑀢𑀭𑀻𑀢𑀭𑀬𑁄𑀕𑁂 𑀢𑀸𑀯 𑁋 ‘‘𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦’’𑀇𑀢𑀻𑀥 𑀉𑀪𑀬𑀢𑁆𑀣𑀸𑀧𑀺 𑀧𑀞𑀫𑁂𑀓𑀯𑀘𑀦𑀁, 𑀲𑀫𑀼𑀘𑁆𑀘𑀬𑀚𑁄𑀢𑀦𑀢𑁆𑀣𑀁 𑀘𑀲𑀤𑁆𑀤𑀧𑁆𑀧𑀬𑁄𑀕𑁄 𑀘.

‘‘𑀲𑀸𑀭𑀺𑀧𑀼𑀢𑁆𑀢𑁄 𑀘 𑀫𑁄𑀕𑁆𑀕𑀮𑁆𑀮𑀸𑀦𑁄 𑀘𑀸’’𑀢𑀺 𑀯𑀺𑀕𑁆𑀕𑀳𑁂 𑁋

𑁩𑁫𑁭. 𑀦𑀸𑀫𑀸𑀦𑀁 𑀲𑀫𑀼𑀘𑁆𑀘𑀬𑁄 𑀤𑁆𑀯𑀦𑁆𑀤𑁄.

𑀦𑀸𑀦𑀸𑀦𑀸𑀫𑀸𑀦𑀫𑁂𑀯 𑀏𑀓𑀯𑀺𑀪𑀢𑁆𑀢𑀺𑀓𑀸𑀦𑀁 𑀬𑀼𑀢𑁆𑀢𑀢𑁆𑀣𑀸𑀦𑀁 𑀬𑁄 𑀲𑀫𑀼𑀘𑁆𑀘𑀬𑁄, 𑀲𑁄 𑀯𑀺𑀪𑀸𑀲𑀸 𑀲𑀫𑀸𑀲𑁄 𑀪𑀯𑀢𑀺, 𑀤𑁆𑀯𑀦𑁆𑀤𑀲𑀜𑁆𑀜𑁄 𑀘.

𑀏𑀢𑁆𑀣 𑀘 𑀲𑀫𑀼𑀘𑁆𑀘𑀬𑁄 𑀦𑀸𑀫 𑀲𑀫𑁆𑀧𑀺𑀡𑁆𑀟𑀦𑀁, 𑀲𑁄 𑀧𑀦 𑀅𑀢𑁆𑀣𑀯𑀲𑁂𑀦 𑀓𑁂𑀯𑀮𑀲𑀫𑀼𑀘𑁆𑀘𑀬𑁄 𑀅𑀦𑁆𑀯𑀸𑀘𑀬𑁄 𑀇𑀢𑀭𑀻𑀢𑀭𑀬𑁄𑀕𑁄 𑀲𑀫𑀸𑀳𑀸𑀭𑁄 𑀘𑀸𑀢𑀺 𑀘𑀢𑀼𑀩𑁆𑀩𑀺𑀥𑁄.

𑀢𑀢𑁆𑀣 𑀓𑁂𑀯𑀮𑀲𑀫𑀼𑀘𑁆𑀘𑀬𑁂, 𑀅𑀦𑁆𑀯𑀸𑀘𑀬𑁂 𑀘 𑀲𑀫𑀸𑀲𑁄 𑀦 𑀪𑀯𑀢𑀺, 𑀓𑁆𑀭𑀺𑀬𑀸𑀲𑀸𑀧𑁂𑀓𑁆𑀔𑀢𑀸𑀬 𑀦𑀸𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀬𑀼𑀢𑁆𑀢𑀢𑁆𑀣𑀪𑀸𑀯𑀢𑁄, 𑀬𑀣𑀸 𑁋 𑀘𑀻𑀯𑀭𑀁 𑀧𑀺𑀡𑁆𑀟𑀧𑀸𑀢𑀜𑁆𑀘 𑀧𑀘𑁆𑀘𑀬𑀁 𑀲𑀬𑀦𑀸𑀲𑀦𑀁 𑀅𑀤𑀸𑀲𑀺, 𑀤𑀸𑀦𑀜𑁆𑀘 𑀤𑁂𑀳𑀺, 𑀲𑀻𑀮𑀜𑁆𑀘 𑀭𑀓𑁆𑀔𑀸𑀳𑀺. 𑀇𑀢𑀭𑀻𑀢𑀭𑀬𑁄𑀕𑁂, 𑀲𑀫𑀸𑀳𑀸𑀭𑁂 𑀘 𑀲𑀫𑀸𑀲𑁄 𑀪𑀯𑀢𑀺, 𑀢𑀢𑁆𑀣 𑀦𑀸𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀬𑀼𑀢𑁆𑀢𑀢𑁆𑀣𑀪𑀸𑀯𑀢𑁄.

𑀤𑁆𑀯𑁂 𑀤𑁆𑀯𑁂 𑀧𑀤𑀸𑀦𑀺 𑀤𑁆𑀯𑀦𑁆𑀤𑀸, 𑀤𑁆𑀯𑀦𑁆𑀤𑀝𑁆𑀞𑀸 𑀯𑀸 𑀤𑁆𑀯𑀦𑁆𑀤𑀸, 𑀤𑁆𑀯𑀦𑁆𑀤𑀲𑀤𑀺𑀲𑀢𑁆𑀢𑀸 𑀅𑀬𑀁 𑀲𑀫𑀸𑀲𑁄𑀧𑀺 𑀅𑀦𑁆𑀯𑀢𑁆𑀣𑀲𑀜𑁆𑀜𑀸𑀬 𑀤𑁆𑀯𑀦𑁆𑀤𑁄𑀢𑀺 𑀯𑀼𑀘𑁆𑀘𑀢𑀺, 𑀉𑀪𑀬𑀧𑀤𑀢𑁆𑀣𑀧𑁆𑀧𑀥𑀸𑀦𑁄 𑀳𑀺 𑀤𑁆𑀯𑀦𑁆𑀤𑁄.

𑀦𑀦𑀼 𑀘 𑀉𑀪𑀬𑀧𑀤𑀢𑁆𑀣𑀧𑁆𑀧𑀥𑀸𑀦𑀢𑁆𑀢𑁂 𑀲𑀢𑀺 𑀤𑁆𑀯𑀦𑁆𑀤𑁂 𑀓𑀣𑀫𑁂𑀓𑀢𑁆𑀣𑀻𑀪𑀸𑀯𑁄 𑀲𑀺𑀬𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑀤𑀺𑀲𑀸𑀤𑀺𑀅𑀢𑁆𑀣𑁂𑀧𑀺 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀲𑀫𑁆𑀪𑀯𑁂𑀦𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀏𑀓𑀓𑁆𑀔𑀡𑁂𑀬𑁂𑀯 𑀅𑀢𑁆𑀣𑀤𑁆𑀯𑀬𑀤𑀻𑀧𑀓𑀢𑁆𑀢𑀸 𑀦 𑀯𑀺𑀭𑁄𑀥𑁄, 𑀢𑀜𑁆𑀘 𑀤𑁆𑀯𑀦𑁆𑀤𑀯𑀺𑀲𑀬𑀫𑁂𑀯, 𑀢𑁂𑀲𑀫𑀢𑁆𑀣𑀤𑁆𑀯𑀬𑀤𑀻𑀧𑀓𑀢𑁆𑀢𑀸. 𑀬𑀣𑀸 𑀳𑀺 𑀪𑀽𑀲𑀤𑁆𑀤𑁄 𑀅𑀦𑀼𑀪𑀯𑀅𑀪𑀺𑀪𑀯𑀸𑀤𑀺𑀓𑁂 𑀅𑀢𑁆𑀣𑁂 𑀅𑀦𑁆𑀯𑀪𑀺𑀆𑀤𑀺𑀉𑀧𑀲𑀕𑁆𑀕𑀲𑀳𑀺𑀢𑁄𑀯 𑀤𑀻𑀧𑁂𑀢𑀺, 𑀦 𑀓𑁂𑀯𑀮𑁄, 𑀏𑀯𑀁 ‘‘𑀕𑀯𑀲𑁆𑀲𑀓’’𑀦𑁆𑀢𑀺𑀆𑀤𑀻𑀲𑀼 ¶ 𑀕𑀯𑀸𑀤𑀻𑀦𑀁 𑀅𑀲𑁆𑀲𑀸𑀤𑀺𑀲𑀤𑁆𑀤𑀦𑁆𑀢𑀭𑀲𑀳𑀺𑀢𑀸𑀦𑀫𑁂𑀯 𑀅𑀢𑁆𑀣𑀤𑁆𑀯𑀬𑀤𑀻𑀧𑀦𑀁, 𑀦 𑀓𑁂𑀯𑀮𑀸𑀦𑀦𑁆𑀢𑀺 𑀢𑀜𑁆𑀘 𑀤𑁆𑀯𑀦𑁆𑀤𑀯𑀺𑀲𑀬𑀫𑁂𑀯, 𑀦 𑀲𑀩𑁆𑀩𑀢𑁆𑀣𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀬𑀣𑀸𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀤𑀻𑀧𑀓𑀢𑁆𑀢𑀸 𑀅𑀢𑁆𑀣𑀺 𑀤𑁆𑀯𑀦𑁆𑀤𑁂𑀧𑁂𑀓𑀢𑁆𑀣𑀺𑀢𑀸𑀢𑀺 𑀦 𑀓𑁄𑀘𑀺 𑀯𑀺𑀭𑁄𑀥𑁄, 𑀢𑀢𑁄 𑀲𑀫𑀸𑀲𑀲𑀜𑁆𑀜𑀸𑀯𑀺𑀪𑀢𑁆𑀢𑀺𑀮𑁄𑀧𑀸𑀤𑀺 𑀯𑀼𑀢𑁆𑀢𑀦𑀬𑀫𑁂𑀯, 𑀲𑀫𑀸𑀲𑁂𑀦𑁂𑀯 𑀘𑀢𑁆𑀣𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 ‘‘𑀯𑀼𑀢𑁆𑀢𑀢𑁆𑀣𑀸𑀦𑀫𑀧𑁆𑀧𑀬𑁄𑀕𑁄’’𑀢𑀺 𑀘𑀲𑀤𑁆𑀤𑀲𑁆𑀲 𑀅𑀧𑁆𑀧𑀬𑁄𑀕𑁄.

𑀇𑀥 𑀤𑁆𑀯𑀦𑁆𑀤𑁂 𑀅𑀘𑁆𑀘𑀺𑀢𑀢𑀭𑀁 𑀧𑀼𑀩𑁆𑀩𑀁 𑀦𑀺𑀧𑀢𑀢𑀺, 𑀧𑀭𑀲𑁆𑀲𑁂𑀯 𑀮𑀺𑀗𑁆𑀕𑀜𑁆𑀘. 𑀇𑀢𑀭𑀻𑀢𑀭𑀬𑁄𑀕𑀲𑁆𑀲 𑀅𑀯𑀬𑀯𑀧𑁆𑀧𑀥𑀸𑀦𑀢𑁆𑀢𑀸 𑀲𑀩𑁆𑀩𑀢𑁆𑀣 𑀩𑀳𑀼𑀯𑀘𑀦𑀫𑁂𑀯.

𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀳𑀺 𑀇𑀘𑁆𑀘𑀸𑀤𑀺, 𑀲𑀫𑀡𑁄 𑀘 𑀩𑁆𑀭𑀸𑀳𑁆𑀫𑀡𑁄 𑀘 𑀲𑀫𑀡𑀩𑁆𑀭𑀸𑀳𑁆𑀫𑀡𑀸. 𑀏𑀯𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸, 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸, 𑀤𑁂𑀯𑀫𑀦𑀼𑀲𑁆𑀲𑀸, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸, 𑀫𑀸𑀢𑀸 𑀘 𑀧𑀺𑀢𑀸 𑀘 𑀫𑀸𑀢𑀸𑀧𑀺𑀢𑀭𑁄, ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀤𑁆𑀯𑀦𑁆𑀤𑁂 𑀫𑀸𑀢𑀼𑀆𑀤𑀺𑀧𑀼𑀩𑁆𑀩𑀧𑀤𑀼𑀓𑀸𑀭𑀲𑁆𑀲 𑀆𑀓𑀸𑀭𑁄. 𑀏𑀯𑀁 𑀧𑀺𑀢𑀸𑀧𑀼𑀢𑁆𑀢𑀸.

‘‘𑀚𑀸𑀬𑀸 𑀘 𑀧𑀢𑀺 𑀘𑀸𑀢𑀺 𑀚𑀸𑀬𑀸𑀧𑀢𑀺’’𑀇𑀢𑀻𑀥 𑁋

‘‘𑀓𑁆𑀯𑀘𑀻’’𑀢𑀺 𑀯𑀢𑁆𑀢𑀢𑁂.

𑁩𑁫𑁮. 𑀚𑀸𑀬𑀸𑀬 𑀢𑀼𑀤𑀁 𑀚𑀸𑀦𑀺 𑀧𑀢𑀺𑀫𑁆𑀳𑀺.

𑀚𑀸𑀬𑀸𑀲𑀤𑁆𑀤𑀲𑁆𑀲 𑀢𑀼𑀤𑀁 𑀚𑀸𑀦𑀺𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺 𑀧𑀢𑀺𑀲𑀤𑁆𑀤𑁂 𑀧𑀭𑁂 𑀓𑁆𑀯𑀘𑀺. 𑀢𑀼𑀤𑀁𑀧𑀢𑀺, 𑀚𑀸𑀦𑀺𑀧𑀢𑀺, 𑀚𑀬𑀫𑁆𑀧𑀢𑀺𑀓𑀸. 𑀏𑀢𑁆𑀣 𑀦𑀺𑀕𑁆𑀕𑀳𑀻𑀢𑀸𑀕𑀫𑁄, ‘‘𑀓𑁆𑀯𑀘𑀸’’𑀤𑀺𑀦𑀸 𑀭𑀲𑁆𑀲𑀢𑁆𑀢𑀜𑁆𑀘.

𑀓𑁆𑀯𑀘𑀺 𑀅𑀧𑁆𑀧𑀲𑀭𑀁 𑀧𑀼𑀩𑁆𑀩𑀁 𑀦𑀺𑀧𑀢𑀢𑀺, 𑀬𑀣𑀸 𑁋 𑀘𑀦𑁆𑀤𑁄 𑀘 𑀲𑀽𑀭𑀺𑀬𑁄 𑀘 𑀘𑀦𑁆𑀤𑀲𑀽𑀭𑀺𑀬𑀸, 𑀦𑀺𑀕𑀫𑀸 𑀘 𑀚𑀦𑀧𑀤𑀸 𑀘 𑀦𑀺𑀕𑀫𑀚𑀦𑀧𑀤𑀸, 𑀲𑀼𑀭𑀸 𑀘 𑀅𑀲𑀼𑀭𑀸 ¶ 𑀘 𑀕𑀭𑀼𑀴𑀸 𑀘 𑀫𑀦𑀼𑀚𑀸 𑀘 𑀪𑀼𑀚𑀕𑀸 𑀘 𑀕𑀦𑁆𑀥𑀩𑁆𑀩𑀸 𑀘 𑀲𑀼𑀭𑀸𑀲𑀼𑀭𑀕𑀭𑀼𑀴𑀫𑀦𑀼𑀚𑀪𑀼𑀚𑀕𑀕𑀦𑁆𑀥𑀩𑁆𑀩𑀸.

𑀓𑁆𑀯𑀘𑀺 𑀇𑀯𑀡𑁆𑀡𑀼𑀯𑀡𑁆𑀡𑀦𑁆𑀢𑀸𑀦𑀁 𑀧𑀼𑀩𑁆𑀩𑀦𑀺𑀧𑀸𑀢𑁄, 𑀬𑀣𑀸 𑁋 𑀅𑀕𑁆𑀕𑀺 𑀘 𑀥𑀽𑀫𑁄 𑀘 𑀅𑀕𑁆𑀕𑀺𑀥𑀽𑀫𑀸. 𑀏𑀯𑀁 𑀕𑀢𑀺𑀩𑀼𑀤𑁆𑀥𑀺𑀪𑀼𑀚𑀧𑀞𑀳𑀭𑀓𑀭𑀲𑀬𑀸, 𑀥𑀸𑀢𑀯𑁄 𑀘 𑀮𑀺𑀗𑁆𑀕𑀸𑀦𑀺 𑀘 𑀥𑀸𑀢𑀼𑀮𑀺𑀗𑁆𑀕𑀸𑀦𑀺.

𑀓𑁆𑀯𑀘𑀺 𑀲𑀭𑀸𑀤𑀺𑀅𑀓𑀸𑀭𑀦𑁆𑀢𑀸𑀦𑀁 𑀧𑀼𑀩𑁆𑀩𑀦𑀺𑀧𑀸𑀢𑁄, 𑀬𑀣𑀸 𑁋 𑀅𑀢𑁆𑀣𑁄 𑀘 𑀥𑀫𑁆𑀫𑁄 𑀘 𑀅𑀢𑁆𑀣𑀥𑀫𑁆𑀫𑀸. 𑀏𑀯𑀁 𑀅𑀢𑁆𑀣𑀲𑀤𑁆𑀤𑀸, 𑀲𑀤𑁆𑀤𑀢𑁆𑀣𑀸 𑀯𑀸.

𑀲𑀫𑀸𑀳𑀸𑀭𑁂 𑀧𑀦 𑁋 ‘‘𑀘𑀓𑁆𑀔𑀼 𑀘 𑀲𑁄𑀢𑀜𑁆𑀘𑀸’’𑀢𑀺 𑀅𑀢𑁆𑀣𑁂 ‘‘𑀦𑀸𑀫𑀸𑀦𑀁 𑀲𑀫𑀼𑀘𑁆𑀘𑀬𑁄 𑀤𑁆𑀯𑀦𑁆𑀤𑁄’’𑀢𑀺 𑀤𑁆𑀯𑀦𑁆𑀤𑀲𑀫𑀸𑀲𑀁 𑀓𑀢𑁆𑀯𑀸 𑀯𑀺𑀪𑀢𑁆𑀢𑀺𑀮𑁄𑀧𑀸𑀤𑀺𑀫𑁆𑀳𑀺 𑀓𑀢𑁂 𑁋

‘‘𑀦𑀧𑀼𑀁𑀲𑀓𑀮𑀺𑀗𑁆𑀕𑀁, 𑀏𑀓𑀢𑁆𑀢𑀜𑁆𑀘𑀸’’𑀢𑀺 𑀯𑀢𑁆𑀢𑀢𑁂.

𑁩𑁫𑁯. 𑀢𑀣𑀸 𑀤𑁆𑀯𑀦𑁆𑀤𑁂 𑀧𑀸𑀡𑀺 𑀢𑀽𑀭𑀺𑀬 𑀬𑁄𑀕𑁆𑀕 𑀲𑁂𑀦𑀗𑁆𑀕 𑀔𑀼𑀤𑁆𑀤𑀚𑀦𑁆𑀢𑀼𑀓 𑀯𑀺𑀯𑀺𑀥 𑀯𑀺𑀭𑀼𑀤𑁆𑀥 𑀯𑀺𑀲𑀪𑀸𑀕𑀢𑁆𑀣𑀸𑀤𑀻𑀦𑀜𑁆𑀘.

𑀬𑀣𑀸 𑀤𑀺𑀕𑀼𑀲𑀫𑀸𑀲𑁂, 𑀢𑀣𑀸 𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑀲𑀫𑀸𑀲𑁂𑀧𑀺 𑀧𑀸𑀡𑀺 𑀢𑀽𑀭𑀺𑀬 𑀬𑁄𑀕𑁆𑀕 𑀲𑁂𑀦𑀗𑁆𑀕𑀢𑁆𑀣𑀸𑀦𑀁, 𑀔𑀼𑀤𑁆𑀤𑀚𑀦𑁆𑀢𑀼𑀓𑀯𑀺𑀯𑀺𑀥 𑀯𑀺𑀭𑀼𑀤𑁆𑀥𑀯𑀺𑀲𑀪𑀸𑀕𑀢𑁆𑀣𑀇𑀘𑁆𑀘𑁂𑀯𑀫𑀸𑀤𑀻𑀦𑀜𑁆𑀘 𑀏𑀓𑀢𑁆𑀢𑀁 𑀳𑁄𑀢𑀺, 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀜𑁆𑀘.

𑀧𑀸𑀡𑀺𑀦𑁄 𑀘 𑀢𑀽𑀭𑀺𑀬𑀸𑀦𑀺 𑀘 𑀬𑁄𑀕𑁆𑀕𑀸𑀦𑀺 𑀘 𑀲𑁂𑀦𑀸 𑀘𑀸𑀢𑀺 𑀧𑀸𑀡𑀺𑀢𑀽𑀭𑀺𑀬 𑀬𑁄𑀕𑁆𑀕𑀲𑁂𑀦𑀸, 𑀢𑀸𑀲𑀫𑀗𑁆𑀕𑀸𑀦𑀺 𑀧𑀸𑀡𑀺𑀢𑀽𑀭𑀺𑀬𑀬𑁄𑀕𑁆𑀕𑀲𑁂𑀦𑀗𑁆𑀕𑀸𑀦𑀺, 𑀤𑁆𑀯𑀦𑁆𑀤𑀢𑁄 𑀧𑀭𑀢𑁆𑀢𑀸 𑀅𑀗𑁆𑀕𑀲𑀤𑁆𑀤𑁄 𑀧𑀘𑁆𑀘𑁂𑀓𑀫𑀪𑀺𑀲𑀫𑁆𑀩𑀚𑁆𑀛𑀢𑁂. 𑀔𑀼𑀤𑁆𑀤𑀸 𑀘 𑀢𑁂 𑀚𑀦𑁆𑀢𑀼𑀓𑀸 𑀘𑁂𑀢𑀺 𑀔𑀼𑀤𑁆𑀤𑀚𑀦𑁆𑀢𑀼𑀓𑀸, 𑀯𑀺𑀯𑀺𑀥𑁂𑀦𑀸𑀓𑀸𑀭𑁂𑀦 𑀯𑀺𑀭𑀼𑀤𑁆𑀥𑀸 𑀯𑀺𑀯𑀺𑀥𑀯𑀺𑀭𑀼𑀤𑁆𑀥𑀸, 𑀦𑀺𑀘𑁆𑀘𑀯𑀺𑀭𑁄𑀥𑀺𑀦𑁄. 𑀲𑀫𑀸𑀦𑁄 𑀪𑀸𑀕𑁄 𑀬𑁂𑀲𑀁 𑀢𑁂 𑀲𑀪𑀸𑀕𑀸, ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀲𑀫𑀸𑀦𑀲𑁆𑀲 𑀲𑀆𑀤𑁂𑀲𑁄, 𑀯𑀺𑀯𑀺𑀥𑀸 𑀘 𑀢𑁂 𑀮𑀓𑁆𑀔𑀡𑀢𑁄 𑀲𑀪𑀸𑀕𑀸 𑀘 𑀓𑀺𑀘𑁆𑀘𑀢𑁄𑀢𑀺 𑀯𑀺𑀲𑀪𑀸𑀕𑀸. 𑀧𑀸𑀡𑀺𑀢𑀽𑀭𑀺𑀬𑀬𑁄𑀕𑁆𑀕𑀲𑁂𑀦𑀗𑁆𑀕𑀸𑀦𑀺 𑀘 𑀔𑀼𑀤𑁆𑀤𑀚𑀦𑁆𑀢𑀼𑀓𑀸 𑀘 𑀯𑀺𑀯𑀺𑀥𑀯𑀺𑀭𑀼𑀤𑁆𑀥𑀸 𑀘 𑀯𑀺𑀲𑀪𑀸𑀕𑀸 𑀘𑀸𑀢𑀺 𑀤𑁆𑀯𑀦𑁆𑀤𑁄, 𑀇𑀥 𑀩𑀳𑀼𑀢𑁆𑀢𑀸 𑀧𑀼𑀩𑁆𑀩𑀦𑀺𑀧𑀸𑀢𑀲𑁆𑀲 𑀅𑀦𑀺𑀬𑀫𑁄, 𑀢𑁂 𑀅𑀢𑁆𑀣𑀸 𑀬𑁂𑀲𑀁 ¶ 𑀢𑁂 𑀧𑀸𑀡𑀺𑀢𑀽𑀭𑀺𑀬𑀬𑁄𑀕𑁆𑀕𑀲𑁂𑀦𑀗𑁆𑀕𑀔𑀼𑀤𑁆𑀤𑀚𑀦𑁆𑀢𑀼𑀓𑀯𑀺𑀯𑀺𑀥𑀯𑀺𑀭𑀼𑀤𑁆𑀥𑀯𑀺𑀲𑀪𑀸𑀕𑀢𑁆𑀣𑀸, 𑀢𑁂 𑀆𑀤𑀬𑁄 𑀬𑁂𑀲𑀁 𑀢𑁂 𑀢𑀤𑀸𑀤𑀬𑁄.

𑀆𑀤𑀺𑀕𑁆𑀕𑀳𑀡𑁂𑀦 𑀅𑀜𑁆𑀜𑁄𑀜𑁆𑀜𑀮𑀺𑀗𑁆𑀕𑀯𑀺𑀲𑁂𑀲𑀺𑀢 𑀲𑀗𑁆𑀔𑁆𑀬𑀸𑀧𑀭𑀺𑀫𑀸𑀡𑀢𑁆𑀣 𑀧𑀘𑀦𑀘𑀡𑁆𑀟𑀸𑀮𑀢𑁆𑀣 𑀤𑀺𑀲𑀢𑁆𑀣𑀸𑀤𑀻𑀦𑀜𑁆𑀘 𑀤𑁆𑀯𑀦𑁆𑀤𑁂 𑀏𑀓𑀢𑁆𑀢𑀁, 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀜𑁆𑀘, 𑀇𑀢𑀺 𑀧𑀸𑀡𑁆𑀬𑀗𑁆𑀕𑀢𑁆𑀣𑀪𑀸𑀯𑀢𑁄 𑀘𑀓𑁆𑀔𑀼𑀲𑁄𑀢𑀲𑀤𑁆𑀤𑀸𑀦𑀁 𑀇𑀫𑀺𑀦𑀸 𑀏𑀓𑀢𑁆𑀢𑀁, 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀜𑁆𑀘 𑀓𑀢𑁆𑀯𑀸 𑀲𑀫𑀸𑀲𑀢𑁆𑀢𑀸 𑀦𑀸𑀫𑀩𑁆𑀬𑀧𑀤𑁂𑀲𑁂 𑀓𑀢𑁂 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺 𑀅𑀫𑀸𑀤𑁂𑀲𑀸𑀤𑀺.

𑀘𑀓𑁆𑀔𑀼𑀲𑁄𑀢𑀁, 𑀳𑁂 𑀘𑀓𑁆𑀔𑀼𑀲𑁄𑀢, 𑀘𑀓𑁆𑀔𑀼𑀲𑁄𑀢𑀁, 𑀘𑀓𑁆𑀔𑀼𑀲𑁄𑀢𑁂𑀦. 𑀏𑀯𑀁 𑀲𑀩𑁆𑀩𑀢𑁆𑀣𑁂𑀓𑀯𑀘𑀦𑀫𑁂𑀯. 𑀫𑀼𑀔𑀜𑁆𑀘 𑀦𑀸𑀲𑀺𑀓𑀸 𑀘 𑀫𑀼𑀔𑀦𑀸𑀲𑀺𑀓𑀁, ‘‘𑀲𑀭𑁄 𑀭𑀲𑁆𑀲𑁄 𑀦𑀧𑀼𑀁𑀲𑀓𑁂’’𑀢𑀺 𑀅𑀦𑁆𑀢𑀲𑁆𑀲 𑀭𑀲𑁆𑀲𑀢𑁆𑀢𑀁, 𑀳𑀦𑀼 𑀘 𑀕𑀻𑀯𑀸 𑀘 𑀳𑀦𑀼𑀕𑀻𑀯𑀁. 𑀏𑀯𑀁 𑀓𑀡𑁆𑀡𑀦𑀸𑀲𑀁, 𑀧𑀸𑀡𑀺𑀧𑀸𑀤𑀁, 𑀙𑀯𑀺𑀫𑀁𑀲𑀮𑁄𑀳𑀺𑀢𑀁. 𑀳𑀢𑁆𑀣𑀧𑀸𑀤𑀸 𑀫𑀁𑀲𑀮𑁄𑀳𑀺𑀢𑀸𑀦𑀻𑀢𑀺𑀆𑀤𑀻𑀦𑀁 𑀧𑀦 𑀇𑀢𑀭𑀻𑀢𑀭𑀬𑁄𑀕𑁂𑀦 𑀲𑀺𑀤𑁆𑀥𑀁. 𑀏𑀯𑀁 𑀧𑀸𑀡𑁆𑀬𑀗𑁆𑀕𑀢𑁆𑀣𑁂.

𑀢𑀽𑀭𑀺𑀬𑀗𑁆𑀕𑀢𑁆𑀣𑁂 𑀕𑀻𑀢𑀜𑁆𑀘 𑀯𑀸𑀤𑀺𑀢𑀜𑁆𑀘 𑀕𑀻𑀢𑀯𑀸𑀤𑀺𑀢𑀁, 𑀲𑀫𑁆𑀫𑀜𑁆𑀘 𑀢𑀸𑀴𑀜𑁆𑀘 𑀲𑀫𑁆𑀫𑀢𑀸𑀴𑀁, 𑀲𑀫𑁆𑀫𑀦𑁆𑀢𑀺 𑀓𑀁𑀲𑀢𑀸𑀴𑀁. 𑀢𑀸𑀴𑀦𑁆𑀢𑀺 𑀳𑀢𑁆𑀣𑀢𑀸𑀴𑀁. 𑀲𑀗𑁆𑀔𑁂 𑀘 𑀧𑀡𑀯𑁄 𑀘 𑀟𑀺𑀡𑁆𑀟𑀺𑀫𑁄 𑀘, 𑀲𑀗𑁆𑀔𑀸 𑀘 𑀧𑀡𑀯𑀸 𑀘 𑀟𑀁𑀡𑁆𑀟𑀺𑀫𑀸 𑀘𑀸𑀢𑀺 𑀯𑀸 𑀲𑀗𑁆𑀔𑀧𑀡𑀯𑀟𑀺𑀡𑁆𑀟𑀺𑀫𑀁, 𑀧𑀡𑀯𑀸𑀤𑀬𑁄 𑀤𑁆𑀯𑁂𑀧𑀺 𑀪𑁂𑀭𑀺𑀯𑀺𑀲𑁂𑀲𑁄.

𑀬𑁄𑀕𑁆𑀕𑀗𑁆𑀕𑀢𑁆𑀣𑁂 𑀬𑀣𑀸 𑁋 𑀨𑀸𑀮𑁄 𑀘 𑀧𑀸𑀘𑀦𑀜𑁆𑀘 𑀨𑀸𑀮𑀧𑀸𑀘𑀦𑀁, 𑀬𑀼𑀕𑀜𑁆𑀘 𑀦𑀗𑁆𑀕𑀮𑀜𑁆𑀘 𑀬𑀼𑀕𑀦𑀗𑁆𑀕𑀮𑀁.

𑀲𑁂𑀦𑀗𑁆𑀕𑀢𑁆𑀣𑁂 𑀳𑀢𑁆𑀣𑀺𑀦𑁄 𑀘 𑀅𑀲𑁆𑀲𑀸 𑀘 𑀳𑀢𑁆𑀣𑀺𑀅𑀲𑁆𑀲𑀁, 𑀭𑀣𑀸 𑀘 𑀧𑀢𑁆𑀢𑀺𑀓𑀸 𑀘 𑀭𑀣𑀧𑀢𑁆𑀢𑀺𑀓𑀁, 𑀅𑀲𑀺 𑀘 𑀘𑀫𑁆𑀫𑀜𑁆𑀘 𑀅𑀲𑀺𑀘𑀫𑁆𑀫𑀁, 𑀘𑀫𑁆𑀫𑀦𑁆𑀢𑀺 𑀲𑀭𑀯𑀸𑀭𑀡𑀨𑀮𑀓𑀁. 𑀥𑀦𑀼 𑀘 𑀓𑀮𑀸𑀧𑁄 𑀘 𑀥𑀦𑀼𑀓𑀮𑀸𑀧𑀁, 𑀓𑀮𑀸𑀧𑁄𑀢𑀺 𑀢𑀽𑀡𑀻𑀭𑀁.

𑀔𑀼𑀤𑁆𑀤𑀚𑀦𑁆𑀢𑀼𑀓𑀢𑁆𑀣𑁂 𑀟𑀁𑀲𑀸 𑀘 𑀫𑀓𑀲𑀸 𑀘 𑀟𑀁𑀲𑀫𑀓𑀲𑀁. 𑀏𑀯𑀁 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀁, 𑀓𑀻𑀝𑀧𑀝𑀗𑁆𑀕𑀁, 𑀓𑀻𑀝𑀲𑀭𑀻𑀲𑀧𑀁. 𑀢𑀢𑁆𑀣 𑀓𑀼𑀦𑁆𑀣𑀸 𑀲𑀼𑀔𑀼𑀫𑀓𑀺𑀧𑀺𑀮𑁆𑀮𑀺𑀓𑀸, 𑀓𑀻𑀝𑀸 𑀓𑀧𑀸𑀮𑀧𑀺𑀝𑁆𑀞𑀺𑀓𑀧𑀸𑀡𑀸.

𑀯𑀺𑀯𑀺𑀥𑀯𑀺𑀭𑀼𑀤𑁆𑀥𑀢𑁆𑀣𑁂 ¶ 𑀅𑀳𑀺 𑀘 𑀦𑀓𑀼𑀮𑁄 𑀘, 𑀅𑀳𑀻 𑀘 𑀦𑀓𑀼𑀮𑀸 𑀘𑀸𑀢𑀺 𑀯𑀸 𑀅𑀳𑀺𑀦𑀓𑀼𑀮𑀁. 𑀏𑀯𑀁 𑀩𑀺𑀴𑀸𑀭𑀫𑀽𑀲𑀺𑀓𑀁, 𑀅𑀦𑁆𑀢𑀲𑁆𑀲 𑀭𑀲𑁆𑀲𑀢𑁆𑀢𑀁, 𑀓𑀸𑀓𑁄𑀮𑀽𑀓𑀁, 𑀲𑀧𑁆𑀧𑀫𑀡𑁆𑀟𑀽𑀓𑀁, 𑀕𑀭𑀼𑀴𑀲𑀧𑁆𑀧𑀁.

𑀯𑀺𑀲𑀪𑀸𑀕𑀢𑁆𑀣𑁂 𑀲𑀻𑀮𑀜𑁆𑀘 𑀧𑀜𑁆𑀜𑀸𑀡𑀜𑁆𑀘 𑀲𑀻𑀮𑀧𑀜𑁆𑀜𑀸𑀡𑀁, 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘 𑀲𑀫𑀣𑀯𑀺𑀧𑀲𑁆𑀲𑀦𑀁. 𑀏𑀯𑀁 𑀦𑀸𑀫𑀭𑀽𑀧𑀁, 𑀳𑀺𑀭𑁄𑀢𑁆𑀢𑀧𑁆𑀧𑀁. 𑀲𑀢𑀺𑀲𑀫𑁆𑀧𑀚𑀜𑁆𑀜𑀁, 𑀮𑁄𑀪𑀫𑁄𑀳𑀁, 𑀤𑁄𑀲𑀫𑁄𑀳𑀁, 𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀁, 𑀣𑀺𑀦𑀫𑀺𑀤𑁆𑀥𑀁, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀫𑀺𑀘𑁆𑀘𑀸𑀤𑀺. ‘‘𑀅𑀁𑀫𑁄 𑀦𑀺𑀕𑁆𑀕𑀳𑀻𑀢𑀁 𑀛𑀮𑀧𑁂𑀳𑀻’’𑀢𑀺 𑀏𑀢𑁆𑀣 ‘‘𑀅𑀁𑀫𑁄’’𑀢𑀺 𑀦𑀺𑀤𑁆𑀤𑁂𑀲𑀤𑀲𑁆𑀲𑀦𑀢𑁄 𑀓𑀢𑁆𑀣𑀘𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀁 𑀦 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁, 𑀢𑁂𑀦 𑀆𑀥𑀺𑀧𑀘𑁆𑀘𑀧𑀭𑀺𑀯𑀸𑀭𑁄 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺 𑀧𑀝𑀺𑀲𑀦𑁆𑀥𑀺𑀧𑁆𑀧𑀯𑀢𑁆𑀢𑀺𑀬𑀦𑁆𑀢𑀺𑀆𑀤𑀺 𑀲𑀺𑀚𑁆𑀛𑀢𑀺.

𑀅𑀜𑁆𑀜𑁄𑀜𑁆𑀜𑀮𑀺𑀗𑁆𑀕𑀯𑀺𑀲𑁂𑀲𑀺𑀢𑀸𑀦𑀁 𑀤𑁆𑀯𑀦𑁆𑀤𑁂 𑀤𑀸𑀲𑀻 𑀘 𑀤𑀸𑀲𑁄 𑀘 𑀤𑀸𑀲𑀺𑀤𑀸𑀲𑀁, ‘‘𑀓𑁆𑀯𑀘𑀸𑀤𑀻’’𑀢𑀺𑀆𑀤𑀺𑀦𑀸 𑀫𑀚𑁆𑀛𑁂 𑀭𑀲𑁆𑀲𑀢𑁆𑀢𑀁. 𑀏𑀯𑀁 𑀇𑀢𑁆𑀣𑀺𑀧𑀼𑀫𑀁, 𑀧𑀢𑁆𑀢𑀘𑀻𑀯𑀭𑀁, 𑀲𑀸𑀔𑀸𑀧𑀮𑀸𑀲𑀫𑀺𑀘𑁆𑀘𑀸𑀤𑀺.

𑀲𑀗𑁆𑀔𑁆𑀬𑀸𑀧𑀭𑀺𑀫𑀸𑀡𑀢𑁆𑀣𑀸𑀦𑀁 𑀤𑁆𑀯𑀦𑁆𑀤𑁂 𑀏𑀓𑀓𑀜𑁆𑀘 𑀤𑀼𑀓𑀜𑁆𑀘 𑀏𑀓𑀓𑀤𑀼𑀓𑀁, 𑀲𑀗𑁆𑀔𑁆𑀬𑀸𑀤𑁆𑀯𑀦𑁆𑀤𑁂 𑀅𑀧𑁆𑀧𑀲𑀗𑁆𑀔𑁆𑀬𑀸 𑀧𑀼𑀩𑁆𑀩𑀁 𑀦𑀺𑀧𑀢𑀢𑀺. 𑀏𑀯𑀁 𑀤𑀼𑀓𑀢𑀺𑀓𑀁, 𑀢𑀺𑀓𑀘𑀢𑀼𑀓𑁆𑀓𑀁, 𑀘𑀢𑀼𑀓𑁆𑀓𑀧𑀜𑁆𑀘𑀓𑀁, 𑀤𑀻𑀖𑁄 𑀘 𑀫𑀚𑁆𑀛𑀺𑀫𑁄 𑀘 𑀤𑀻𑀖𑀫𑀚𑁆𑀛𑀺𑀫𑀁.

𑀧𑀘𑀦𑀘𑀡𑁆𑀟𑀸𑀮𑀢𑁆𑀣𑀸𑀦𑀁 𑀤𑁆𑀯𑀦𑁆𑀤𑁂 𑀑𑀭𑀩𑁆𑀪𑀺𑀓𑀸 𑀘 𑀲𑀽𑀓𑀭𑀺𑀓𑀸 𑀘 𑀑𑀭𑀩𑁆𑀪𑀺𑀓𑀲𑀽𑀓𑀭𑀺𑀓𑀁. 𑀏𑀯𑀁 𑀲𑀸𑀓𑀼𑀡𑀺𑀓𑀫𑀸𑀕𑀯𑀺𑀓𑀁, 𑀲𑀧𑀸𑀓𑁄 𑀘 𑀘𑀡𑁆𑀟𑀸𑀮𑁄 𑀘 𑀲𑀧𑀸𑀓𑀘𑀡𑁆𑀟𑀸𑀮𑀁, 𑀧𑀼𑀓𑁆𑀓𑀼𑀲𑀙𑀯𑀟𑀸𑀳𑀓𑀁, 𑀯𑁂𑀦𑀭𑀣𑀓𑀸𑀭𑀁. 𑀢𑀢𑁆𑀣 𑀯𑁂𑀦𑀸 𑀢𑀘𑁆𑀙𑀓𑀸, 𑀭𑀣𑀓𑀸𑀭𑀸 𑀘𑀫𑁆𑀫𑀓𑀸𑀭𑀸.

𑀤𑀺𑀲𑀢𑁆𑀣𑀸𑀦𑀁 𑀤𑁆𑀯𑀦𑁆𑀤𑁂 𑀧𑀼𑀩𑁆𑀩𑀸 𑀘 𑀅𑀧𑀭𑀸 𑀘𑀸𑀢𑀺 𑀅𑀢𑁆𑀣𑁂 𑀤𑁆𑀯𑀦𑁆𑀤𑀲𑀫𑀸𑀲𑀁, 𑀯𑀺𑀪𑀢𑁆𑀢𑀺𑀮𑁄𑀧𑀜𑁆𑀘 𑀓𑀢𑁆𑀯𑀸 𑀇𑀥𑀸𑀤𑀺𑀕𑁆𑀕𑀳𑀡𑁂𑀦 𑀏𑀓𑀢𑁆𑀢𑁂, 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑁂 𑀘 𑀓𑀢𑁂 ‘‘𑀲𑀭𑁄 𑀭𑀲𑁆𑀲𑁄 𑀦𑀧𑀼𑀁𑀲𑀓𑁂’’𑀢𑀺 𑀭𑀲𑁆𑀲𑀢𑁆𑀢𑀁, 𑀧𑀼𑀩𑁆𑀩𑀸𑀧𑀭𑀁 ¶ , 𑀳𑁂 𑀧𑀼𑀩𑁆𑀩𑀸𑀧𑀭, 𑀧𑀼𑀩𑁆𑀩𑀸𑀧𑀭𑀁, 𑀧𑀼𑀩𑁆𑀩𑀸𑀧𑀭𑁂𑀦, 𑀧𑀼𑀩𑁆𑀩𑀸𑀧𑀭𑀲𑁆𑀲 𑀇𑀘𑁆𑀘𑀸𑀤𑀺. 𑀏𑀯𑀁 𑀧𑀼𑀭𑀢𑁆𑀣𑀺𑀫𑀧𑀘𑁆𑀙𑀺𑀫𑀁, 𑀤𑀓𑁆𑀔𑀺𑀡𑀼𑀢𑁆𑀢𑀭𑀁, 𑀅𑀥𑀭𑀼𑀢𑁆𑀢𑀭𑀁.

‘‘𑀦𑀧𑀼𑀁𑀲𑀓𑀮𑀺𑀗𑁆𑀕𑀁, 𑀏𑀓𑀢𑁆𑀢𑀁, 𑀤𑁆𑀯𑀦𑁆𑀤𑁂’’𑀢𑀺 𑀘 𑀯𑀢𑁆𑀢𑀢𑁂.

𑁩𑁬𑁦. 𑀯𑀺𑀪𑀸𑀲𑀸 𑀭𑀼𑀓𑁆𑀔 𑀢𑀺𑀡 𑀧𑀲𑀼 𑀥𑀦 𑀥𑀜𑁆𑀜 𑀚𑀦𑀧𑀤𑀸𑀤𑀻𑀦𑀜𑁆𑀘.

𑀭𑀼𑀓𑁆𑀔 𑀢𑀺𑀡 𑀧𑀲𑀼 𑀥𑀦 𑀥𑀜𑁆𑀜 𑀚𑀦𑀧𑀤𑀸𑀤𑀻𑀦𑀫𑁂𑀓𑀢𑁆𑀢𑀁, 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀜𑁆𑀘 𑀯𑀺𑀪𑀸𑀲𑀸 𑀳𑁄𑀢𑀺 𑀤𑁆𑀯𑀦𑁆𑀤𑁂 𑀲𑀫𑀸𑀲𑁂. 𑀏𑀓𑀢𑁆𑀢𑀸𑀪𑀸𑀯𑁂 𑀩𑀳𑀼𑀯𑀘𑀦𑀁, 𑀧𑀭𑀲𑁆𑀲𑁂𑀯 𑀮𑀺𑀗𑁆𑀕𑀜𑁆𑀘.

𑀢𑀢𑁆𑀣 𑀭𑀼𑀓𑁆𑀔𑀸𑀦𑀁 𑀤𑁆𑀯𑀦𑁆𑀤𑁂 𑀅𑀲𑁆𑀲𑀢𑁆𑀣𑀸 𑀘 𑀓𑀧𑀺𑀢𑁆𑀣𑀸 𑀘𑀸𑀢𑀺 𑀅𑀢𑁆𑀣𑁂 𑀲𑀫𑀸𑀳𑀸𑀭𑁂 𑀤𑁆𑀯𑀦𑁆𑀤𑀲𑀫𑀸𑀲𑀸𑀤𑀺𑀫𑁆𑀳𑀺 𑀓𑀢𑁂 𑀇𑀫𑀺𑀦𑀸 𑀯𑀺𑀓𑀧𑁆𑀧𑁂𑀦𑁂𑀓𑀢𑁆𑀢𑀁, 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀜𑁆𑀘. 𑀅𑀲𑁆𑀲𑀢𑁆𑀣𑀓𑀧𑀺𑀢𑁆𑀣𑀁, 𑀅𑀲𑁆𑀲𑀢𑁆𑀣𑀓𑀧𑀺𑀢𑁆𑀣𑀸 𑀯𑀸. 𑀏𑀯𑀁 𑀅𑀫𑁆𑀩𑀧𑀦𑀲𑀁, 𑀅𑀫𑁆𑀩𑀧𑀦𑀲𑀸 𑀯𑀸, 𑀔𑀤𑀺𑀭𑀧𑀮𑀸𑀲𑀁, 𑀔𑀤𑀺𑀭𑀧𑀮𑀸𑀲𑀸 𑀯𑀸, 𑀥𑀯𑀲𑁆𑀲𑀓𑀡𑁆𑀡𑀓𑀁, 𑀥𑀯𑀲𑁆𑀲𑀓𑀡𑁆𑀡𑀓𑀸 𑀯𑀸.

𑀢𑀺𑀡𑀸𑀦𑀁 𑀤𑁆𑀯𑀦𑁆𑀤𑁂 𑀉𑀲𑀻𑀭𑀸𑀦𑀺 𑀘 𑀩𑀻𑀭𑀡𑀸𑀦𑀺 𑀘 𑀉𑀲𑀻𑀭𑀩𑀻𑀭𑀡𑀁, 𑀉𑀲𑀻𑀭𑀩𑀻𑀭𑀡𑀸𑀦𑀺 𑀯𑀸. 𑀏𑀯𑀁 𑀫𑀼𑀜𑁆𑀚𑀧𑀩𑁆𑀩𑀚𑀁, 𑀫𑀼𑀜𑁆𑀚𑀧𑀩𑁆𑀩𑀚𑀸 𑀯𑀸, 𑀓𑀸𑀲𑀓𑀼𑀲𑀁, 𑀓𑀸𑀲𑀓𑀼𑀲𑀸 𑀯𑀸.

𑀧𑀲𑀽𑀦𑀁 𑀤𑁆𑀯𑀦𑁆𑀤𑁂 𑀅𑀚𑀸 𑀘 𑀏𑀴𑀓𑀸 𑀘 𑀅𑀚𑁂𑀴𑀓𑀁, 𑀅𑀚𑁂𑀴𑀓𑀸 𑀯𑀸, 𑀳𑀢𑁆𑀣𑀻 𑀘 𑀕𑀸𑀯𑁄 𑀘 𑀅𑀲𑁆𑀲𑀸 𑀘 𑀯𑀴𑀯𑀸 𑀘 𑀳𑀢𑁆𑀣𑀺𑀕𑀯𑀲𑁆𑀲𑀯𑀴𑀯𑀁, 𑀳𑀢𑁆𑀣𑀺𑀕𑀯𑀲𑁆𑀲𑀯𑀴𑀯𑀸 𑀯𑀸, ‘‘𑀓𑁆𑀯𑀘𑀸’’𑀢𑀺𑀆𑀤𑀺𑀦𑀸 𑀭𑀲𑁆𑀲𑀢𑁆𑀢𑀁, ‘‘𑀑𑀲𑀭𑁂 𑀘𑀸’’𑀢𑀺 𑀅𑀯𑀸𑀤𑁂𑀲𑁄 𑀘, 𑀕𑁄𑀫𑀳𑀺𑀁𑀲𑀁, 𑀕𑁄𑀫𑀳𑀺𑀁𑀲𑀸 𑀯𑀸, 𑀏𑀡𑁂𑀬𑁆𑀬𑀯𑀭𑀸𑀳𑀁, 𑀏𑀡𑁂𑀬𑁆𑀬𑀯𑀭𑀸𑀳𑀸 𑀯𑀸, 𑀲𑀻𑀳𑀩𑁆𑀬𑀕𑁆𑀖𑀢𑀭𑀘𑁆𑀙𑀁, 𑀲𑀻𑀳𑀩𑁆𑀬𑀕𑁆𑀖𑀢𑀭𑀘𑁆𑀙𑀸 𑀯𑀸.

𑀥𑀦𑀸𑀦𑀁 𑀤𑁆𑀯𑀦𑁆𑀤𑁂 𑀳𑀺𑀭𑀜𑁆𑀜𑀜𑁆𑀘 𑀲𑀼𑀯𑀡𑁆𑀡𑀜𑁆𑀘 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁, 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀦𑀺 𑀯𑀸. 𑀏𑀯𑀁 𑀚𑀸𑀢𑀭𑀽𑀧𑀭𑀚𑀢𑀁, 𑀚𑀸𑀢𑀭𑀽𑀧𑀭𑀚𑀢𑀸𑀦𑀺 𑀯𑀸, 𑀫𑀡𑀺𑀫𑀼𑀢𑁆𑀢𑀲𑀗𑁆𑀔𑀯𑁂𑀴𑀼𑀭𑀺𑀬𑀁, 𑀫𑀡𑀺𑀫𑀼𑀢𑁆𑀢𑀲𑀗𑁆𑀔𑀯𑁂𑀴𑀼𑀭𑀺𑀬𑀸 𑀯𑀸.

𑀥𑀜𑁆𑀜𑀸𑀦𑀁 ¶ 𑀤𑁆𑀯𑀦𑁆𑀤𑁂 𑀲𑀸𑀮𑀻 𑀘 𑀬𑀯𑀸 𑀘 𑀲𑀸𑀮𑀺𑀬𑀯𑀁, 𑀲𑀸𑀮𑀺𑀬𑀯𑀸 𑀯𑀸. 𑀏𑀯𑀁 𑀢𑀺𑀮𑀫𑀼𑀕𑁆𑀕𑀫𑀸𑀲𑀁, 𑀢𑀺𑀮𑀫𑀼𑀕𑁆𑀕𑀫𑀸𑀲𑀸 𑀯𑀸.

𑀚𑀦𑀧𑀤𑀸𑀦𑀁 𑀤𑁆𑀯𑀦𑁆𑀤𑁂 𑀓𑀸𑀲𑀻 𑀘 𑀓𑁄𑀲𑀮𑀸 𑀘 𑀓𑀸𑀲𑀺𑀓𑁄𑀲𑀮𑀁, 𑀓𑀸𑀲𑀺𑀓𑁄𑀲𑀮𑀸 𑀯𑀸, 𑀯𑀚𑁆𑀚𑀻 𑀘 𑀫𑀮𑁆𑀮𑀸 𑀘 𑀯𑀚𑁆𑀚𑀺𑀫𑀮𑁆𑀮𑀁, 𑀯𑀚𑁆𑀚𑀺𑀫𑀮𑁆𑀮𑀸 𑀯𑀸, 𑀅𑀗𑁆𑀕𑀸 𑀘 𑀫𑀕𑀥𑀸 𑀘 𑀅𑀗𑁆𑀕𑀫𑀕𑀥𑀁, 𑀅𑀗𑁆𑀕𑀫𑀕𑀥𑀸 𑀯𑀸.

𑀆𑀤𑀺𑀕𑁆𑀕𑀳𑀡𑁂𑀦 𑀅𑀜𑁆𑀜𑁄𑀜𑁆𑀜𑀧𑁆𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁, 𑀲𑀓𑀼𑀡𑀢𑁆𑀣𑀸𑀦𑀜𑁆𑀘 𑀤𑁆𑀯𑀦𑁆𑀤𑁂 𑀯𑀺𑀪𑀸𑀲𑀸 𑀏𑀓𑀢𑁆𑀢𑀁 𑀳𑁄𑀢𑀺, 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀜𑁆𑀘. 𑀓𑀼𑀲𑀮𑀜𑁆𑀘 𑀅𑀓𑀼𑀲𑀮𑀜𑁆𑀘 𑀓𑀼𑀲𑀮𑀸𑀓𑀼𑀲𑀮𑀁, 𑀓𑀼𑀲𑀮𑀸𑀓𑀼𑀲𑀮𑀸 𑀯𑀸, 𑀏𑀯𑀁 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁, 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀸 𑀯𑀸, 𑀳𑀻𑀦𑀧𑁆𑀧𑀡𑀻𑀢𑀁, 𑀳𑀻𑀦𑀧𑁆𑀧𑀡𑀻𑀢𑀸 𑀯𑀸, 𑀓𑀡𑁆𑀳𑀲𑀼𑀓𑁆𑀓𑀁, 𑀓𑀡𑁆𑀳𑀲𑀼𑀓𑁆𑀓𑀸 𑀯𑀸, 𑀲𑀼𑀔𑀤𑀼𑀓𑁆𑀔𑀁, 𑀲𑀼𑀔𑀤𑀼𑀓𑁆𑀔𑀸𑀦𑀺 𑀯𑀸, 𑀧𑀝𑀺𑀖𑀸𑀦𑀼𑀦𑀬𑀁, 𑀧𑀝𑀺𑀖𑀸𑀦𑀼𑀦𑀬𑀸 𑀯𑀸, 𑀙𑀸𑀬𑀸𑀢𑀧𑀁, 𑀙𑀸𑀬𑀸𑀢𑀧𑀸 𑀯𑀸, 𑀆𑀮𑁄𑀓𑀦𑁆𑀥𑀓𑀸𑀭𑀁, 𑀆𑀮𑁄𑀓𑀦𑁆𑀥𑀓𑀸𑀭𑀸 𑀯𑀸, 𑀭𑀢𑁆𑀢𑀺 𑀘 𑀤𑀺𑀯𑀸 𑀘 𑀭𑀢𑁆𑀢𑀺𑀦𑁆𑀤𑀺𑀯𑀁, 𑀭𑀢𑁆𑀢𑀺𑀦𑁆𑀤𑀺𑀯𑀸 𑀯𑀸, 𑀅𑀳𑀜𑁆𑀘 𑀭𑀢𑁆𑀢𑀺 𑀘 𑀅𑀳𑁄𑀭𑀢𑁆𑀢𑀁, 𑀅𑀳𑁄𑀭𑀢𑁆𑀢𑀸 𑀯𑀸, ‘‘𑀓𑁆𑀯𑀘𑀺 𑀲𑀫𑀸𑀲𑀦𑁆𑀢’’𑀇𑀘𑁆𑀘𑀸𑀤𑀺𑀦𑀸 𑀆𑀓𑀸𑀭𑀺𑀓𑀸𑀭𑀸𑀦𑀫𑀢𑁆𑀢𑀁.

𑀲𑀓𑀼𑀡𑀸𑀦𑀁 𑀤𑁆𑀯𑀦𑁆𑀤𑁂 𑀳𑀁𑀲𑀸 𑀘 𑀩𑀓𑀸 𑀘 𑀳𑀁𑀲𑀩𑀓𑀁, 𑀳𑀁𑀲𑀩𑀓𑀸 𑀯𑀸. 𑀏𑀯𑀁 𑀓𑀸𑀭𑀡𑁆𑀟𑀯𑀘𑀓𑁆𑀓𑀯𑀸𑀓𑀁, 𑀓𑀸𑀭𑀡𑁆𑀟𑀯𑀘𑀓𑁆𑀓𑀯𑀸𑀓𑀸 𑀯𑀸, 𑀫𑀬𑀽𑀭𑀓𑁄𑀜𑁆𑀘𑀁, 𑀫𑀬𑀽𑀭𑀓𑁄𑀜𑁆𑀘𑀸 𑀯𑀸, 𑀲𑀼𑀓𑀲𑀸𑀮𑀺𑀓𑀁, 𑀲𑀼𑀓𑀲𑀸𑀮𑀺𑀓𑀸 𑀯𑀸.

𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑁄.

𑀬𑁂𑀪𑀼𑀬𑁆𑀬𑁂𑀦 𑀘𑁂𑀢𑁆𑀣 𑁋

𑀅𑀘𑁆𑀘𑀺𑀢𑀧𑁆𑀧𑀲𑀭𑀁 𑀧𑀼𑀩𑁆𑀩𑀁, 𑀇𑀯𑀡𑁆𑀡𑀼𑀯𑀡𑁆𑀡𑀓𑀁 𑀓𑁆𑀯𑀘𑀺;

𑀤𑁆𑀯𑀦𑁆𑀤𑁂 𑀲𑀭𑀸𑀤𑁆𑀬𑀓𑀸𑀭𑀦𑁆𑀢𑀁, 𑀩𑀳𑀽𑀲𑁆𑀯𑀦𑀺𑀬𑀫𑁄 𑀪𑀯𑁂.

𑀤𑁆𑀯𑀦𑁆𑀤𑀲𑀫𑀸𑀲𑁄 𑀦𑀺𑀝𑁆𑀞𑀺𑀢𑁄.

𑀧𑀼𑀩𑁆𑀩𑀼𑀢𑁆𑀢𑀭𑀼𑀪𑀬𑀜𑁆𑀜𑀢𑁆𑀣-𑀧𑁆𑀧𑀥𑀸𑀦𑀢𑁆𑀢𑀸 ¶ 𑀘𑀢𑀼𑀩𑁆𑀩𑀺𑀥𑁄;

𑀲𑀫𑀸𑀲𑁄𑀬𑀁 𑀤𑀺𑀕𑀼 𑀓𑀫𑁆𑀫-𑀥𑀸𑀭𑀬𑁂𑀳𑀺 𑀘 𑀙𑀩𑁆𑀩𑀺𑀥𑁄.

𑀤𑀼𑀯𑀺𑀥𑁄 𑀅𑀩𑁆𑀬𑀬𑀻𑀪𑀸𑀯𑁄, 𑀦𑀯𑀥𑀸 𑀓𑀫𑁆𑀫𑀥𑀸𑀭𑀬𑁄;

𑀤𑀺𑀕𑀼 𑀤𑀼𑀥𑀸 𑀢𑀧𑁆𑀧𑀼𑀭𑀺𑀲𑁄, 𑀅𑀝𑁆𑀞𑀥𑀸 𑀦𑀯𑀥𑀸 𑀪𑀯𑁂;

𑀩𑀳𑀼𑀩𑁆𑀩𑀻𑀳𑀺 𑀤𑁆𑀯𑀺𑀥𑀸 𑀤𑁆𑀯𑀦𑁆𑀤𑁄, 𑀲𑀫𑀸𑀲𑁄 𑀘𑀢𑀼𑀭𑀝𑁆𑀞𑀥𑀸𑀢𑀺.

𑀇𑀢𑀺 𑀧𑀤𑀭𑀽𑀧𑀲𑀺𑀤𑁆𑀥𑀺𑀬𑀁 𑀲𑀫𑀸𑀲𑀓𑀡𑁆𑀟𑁄

𑀘𑀢𑀼𑀢𑁆𑀣𑁄.

𑁫. 𑀢𑀤𑁆𑀥𑀺𑀢𑀓𑀡𑁆𑀟

𑀅𑀧𑀘𑁆𑀘𑀢𑀤𑁆𑀥𑀺𑀢

𑀅𑀣 ¶ 𑀦𑀸𑀫𑀢𑁄 𑀏𑀯 𑀯𑀺𑀪𑀢𑁆𑀬𑀦𑁆𑀢𑀸 𑀅𑀧𑀘𑁆𑀘𑀸𑀤𑀺𑀅𑀢𑁆𑀣𑀯𑀺𑀲𑁂𑀲𑁂 𑀢𑀤𑁆𑀥𑀺𑀢𑀼𑀧𑁆𑀧𑀢𑁆𑀢𑀻𑀢𑀺 𑀦𑀸𑀫𑀢𑁄 𑀧𑀭𑀁 𑀢𑀤𑁆𑀥𑀺𑀢𑀯𑀺𑀥𑀸𑀦𑀫𑀸𑀭𑀪𑀻𑀬𑀢𑁂.

𑀢𑀢𑁆𑀣 𑀢𑀲𑁆𑀫𑀸 𑀢𑀺𑀯𑀺𑀥𑀮𑀺𑀗𑁆𑀕𑀢𑁄 𑀧𑀭𑀁 𑀳𑀼𑀢𑁆𑀯𑀸 𑀳𑀺𑀢𑀸 𑀲𑀳𑀺𑀢𑀸𑀢𑀺 𑀢𑀤𑁆𑀥𑀺𑀢𑀸, 𑀡𑀸𑀤𑀺𑀧𑀘𑁆𑀘𑀬𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁, 𑀢𑁂𑀲𑀁 𑀯𑀸 𑀦𑀸𑀫𑀺𑀓𑀸𑀦𑀁 𑀳𑀺𑀢𑀸 𑀉𑀧𑀓𑀸𑀭𑀸 𑀢𑀤𑁆𑀥𑀺𑀢𑀸𑀢𑀺 𑀅𑀦𑁆𑀯𑀢𑁆𑀣𑀪𑀽𑀢𑀧𑀭𑀲𑀫𑀜𑁆𑀜𑀸𑀯𑀲𑁂𑀦𑀸𑀧𑀺 𑀡𑀸𑀤𑀺𑀧𑁆𑀧𑀘𑁆𑀘𑀬𑀸𑀯 𑀢𑀤𑁆𑀥𑀺𑀢𑀸 𑀦𑀸𑀫.

‘‘𑀯𑀲𑀺𑀝𑁆𑀞𑀲𑁆𑀲 𑀅𑀧𑀘𑁆𑀘’’𑀦𑁆𑀢𑀺 𑀯𑀺𑀕𑁆𑀕𑀳𑁂 𑁋

‘‘𑀮𑀺𑀗𑁆𑀕𑀜𑁆𑀘 𑀦𑀺𑀧𑀘𑁆𑀘𑀢𑁂’’𑀢𑀺 𑀇𑀢𑁄 𑀮𑀺𑀗𑁆𑀕𑀕𑁆𑀕𑀳𑀡𑀫𑀦𑀼𑀯𑀢𑁆𑀢𑀢𑁂.

𑁩𑁬𑁧. 𑀯𑀸 𑀡’𑀧𑀘𑁆𑀘𑁂.

𑀙𑀝𑁆𑀞𑀺𑀬𑀦𑁆𑀢𑀢𑁄 𑀮𑀺𑀗𑁆𑀕𑀫𑁆𑀳𑀸 𑀡𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 𑀯𑀺𑀓𑀧𑁆𑀧𑁂𑀦 ‘‘𑀢𑀲𑁆𑀲 𑀅𑀧𑀘𑁆𑀘’’𑀫𑀺𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂.

𑀲𑁄 𑀘 𑁋

𑁩𑁬𑁨. 𑀥𑀸𑀢𑀼𑀮𑀺𑀗𑁆𑀕𑁂𑀳𑀺 𑀧𑀭𑀸 𑀧𑀘𑁆𑀘𑀬𑀸.

𑀥𑀸𑀢𑀽𑀳𑀺, 𑀮𑀺𑀗𑁆𑀕𑁂𑀳𑀺 𑀘 𑀧𑀘𑁆𑀘𑀬𑀸 𑀧𑀭𑀸𑀯 𑀳𑁄𑀦𑁆𑀢𑀻𑀢𑀺 𑀧𑀭𑀺𑀪𑀸𑀲𑀢𑁄 𑀅𑀧𑀘𑁆𑀘𑀢𑁆𑀣𑀲𑀫𑁆𑀩𑀦𑁆𑀥𑀺𑀮𑀺𑀗𑁆𑀕𑀢𑁄 𑀙𑀝𑁆𑀞𑀺𑀬𑀦𑁆𑀢𑀸𑀬𑁂𑀯 𑀧𑀭𑁄 𑀳𑁄𑀢𑀺. 𑀧𑀝𑀺𑀘𑁆𑀘 𑀏𑀢𑀲𑁆𑀫𑀸 𑀅𑀢𑁆𑀣𑁄 𑀏𑀢𑀻𑀢𑀺 𑀧𑀘𑁆𑀘𑀬𑁄, 𑀧𑀢𑀻𑀬𑀦𑁆𑀢𑀺 𑀅𑀦𑁂𑀦 𑀅𑀢𑁆𑀣𑀸𑀢𑀺 𑀯𑀸 𑀧𑀘𑁆𑀘𑀬𑁄, ‘‘𑀯𑀼𑀢𑁆𑀢𑀢𑁆𑀣𑀸𑀦𑀫𑀧𑁆𑀧𑀬𑁄𑀕𑁄’’𑀢𑀺 𑀅𑀧𑀘𑁆𑀘𑀲𑀤𑁆𑀤𑀲𑁆𑀲 𑀅𑀧𑁆𑀧𑀬𑁄𑀕𑁄, ‘‘𑀢𑁂𑀲𑀁 𑀯𑀺𑀪𑀢𑁆𑀢𑀺𑀬𑁄 𑀮𑁄𑀧𑀸 𑀘𑁂’’𑀢𑀺 𑀯𑀺𑀪𑀢𑁆𑀢𑀺𑀮𑁄𑀧𑁄 𑀘.

𑁩𑁬𑁩. 𑀢𑁂𑀲𑀁 ¶ 𑀡𑁄 𑀮𑁄𑀧𑀁.

𑀢𑁂𑀲𑀁 𑀢𑀤𑁆𑀥𑀺𑀢𑀧𑁆𑀧𑀘𑁆𑀘𑀬𑀸𑀦𑀁 𑀡𑀸𑀦𑀼𑀩𑀦𑁆𑀥𑀸𑀦𑀁 𑀡𑀓𑀸𑀭𑁄 𑀮𑁄𑀧𑀫𑀸𑀧𑀚𑁆𑀚𑀢𑁂.

𑁩𑁬𑁪. 𑀯𑀼𑀤𑁆𑀥𑀸𑀤𑀺𑀲𑀭𑀲𑁆𑀲 𑀯𑀸𑀲𑀁𑀬𑁄𑀕𑀦𑁆𑀢𑀲𑁆𑀲 𑀲𑀡𑁂 𑀘.

𑀆𑀤𑀺𑀲𑀭𑀲𑁆𑀲 𑀯𑀸 𑀆𑀤𑀺𑀩𑁆𑀬𑀜𑁆𑀚𑀦𑀲𑁆𑀲 𑀯𑀸 𑀅𑀲𑀁𑀬𑁄𑀕𑀦𑁆𑀢𑀲𑁆𑀲 𑀯𑀼𑀤𑁆𑀥𑀺 𑀳𑁄𑀢𑀺 𑀲𑀡𑀓𑀸𑀭𑀧𑁆𑀧𑀘𑁆𑀘𑀬𑁂 𑀧𑀭𑁂. 𑀲𑀁𑀬𑁄𑀕𑁄 𑀅𑀦𑁆𑀢𑁄 𑀅𑀲𑁆𑀲𑀸𑀢𑀺 𑀲𑀁𑀬𑁄𑀕𑀦𑁆𑀢𑁄, 𑀢𑀤𑀜𑁆𑀜𑁄 𑀅𑀲𑀁𑀬𑁄𑀕𑀦𑁆𑀢𑁄. 𑀅𑀣 𑀯𑀸 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄𑀬𑀁 𑀯𑀸𑀲𑀤𑁆𑀤𑁄, 𑀢𑀤𑀸 𑀘 𑀧𑀓𑀢𑀺𑀪𑀽𑀢𑁂 𑀮𑀺𑀗𑁆𑀕𑁂 𑀲𑀭𑀸𑀦𑀫𑀸𑀤𑀺𑀲𑀭𑀲𑁆𑀲 𑀅𑀲𑀁𑀬𑁄𑀕𑀦𑁆𑀢𑀲𑁆𑀲 𑀯𑀼𑀤𑁆𑀥𑀺 𑀳𑁄𑀢𑀺 𑀲𑀡𑀓𑀸𑀭𑁂 𑀢𑀤𑁆𑀥𑀺𑀢𑀧𑁆𑀧𑀘𑁆𑀘𑀬𑁂 𑀧𑀭𑁂𑀢𑀺 𑀅𑀢𑁆𑀣𑁄.

𑀢𑁂𑀦 𑁋

𑀯𑀸𑀲𑀺𑀝𑁆𑀞𑀸𑀤𑀻𑀲𑀼 𑀦𑀺𑀘𑁆𑀘𑀸𑀬𑀁, 𑀅𑀦𑀺𑀘𑁆𑀘𑁄𑀴𑀼𑀫𑁆𑀧𑀺𑀓𑀸𑀤𑀺𑀲𑀼;

𑀦 𑀯𑀼𑀤𑁆𑀥𑀺 𑀦𑀻𑀮𑀧𑀻𑀢𑀸𑀤𑁄, 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁄.

𑀘𑀲𑀤𑁆𑀤𑀕𑁆𑀕𑀳𑀡𑀫𑀯𑀥𑀸𑀭𑀡𑀢𑁆𑀣𑀁.

𑀢𑀲𑁆𑀲𑀸 𑀯𑀼𑀤𑁆𑀥𑀺𑀬𑀸 𑀅𑀦𑀺𑀬𑀫𑀧𑁆𑀧𑀲𑀗𑁆𑀕𑁂 𑀦𑀺𑀬𑀫𑀢𑁆𑀣𑀁 𑀧𑀭𑀺𑀪𑀸𑀲𑀫𑀸𑀳.

𑁩𑁬𑁫. 𑀅𑀬𑀼𑀯𑀡𑁆𑀡𑀸𑀦𑀜𑁆𑀘𑀸𑀬𑁄 𑀯𑀼𑀤𑁆𑀥𑀻.

𑀢𑁂𑀲𑀁 𑀅𑀓𑀸𑀭𑀇𑀯𑀡𑁆𑀡𑀼𑀯𑀡𑁆𑀡𑀸𑀦𑀫𑁂𑀯 𑀬𑀣𑀸𑀓𑁆𑀓𑀫𑀁 𑀆 𑀏𑀑𑀇𑀘𑁆𑀘𑁂𑀢𑁂 𑀯𑀼𑀤𑁆𑀥𑀺𑀬𑁄 𑀳𑁄𑀦𑁆𑀢𑀺. 𑀘𑀲𑀤𑁆𑀤𑀕𑁆𑀕𑀳𑀡𑀫𑀯𑀼𑀤𑁆𑀥𑀺𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑀁, 𑀅𑀯𑀥𑀸𑀭𑀡𑀢𑁆𑀣𑀁 𑀯𑀸. 𑀇 𑀘 𑀉 𑀘 𑀬𑀼, 𑀬𑀼 𑀏𑀯 𑀯𑀡𑁆𑀡𑀸 𑀬𑀼𑀯𑀡𑁆𑀡𑀸, 𑀅 𑀘 𑀬𑀼𑀯𑀡𑁆𑀡𑀸 𑀘 𑀅𑀬𑀼𑀯𑀡𑁆𑀡𑀸. 𑀆 𑀘 𑀏 𑀘 𑀑 𑀘 𑀆𑀬𑁄. 𑀧𑀼𑀦 𑀯𑀼𑀤𑁆𑀥𑀺𑀕𑁆𑀕𑀳𑀡𑀁 ‘‘𑀦𑁂𑀕𑀫𑀚𑀸𑀦𑀧𑀤𑀸’’𑀢𑀺𑀆𑀤𑀻𑀲𑀼 𑀉𑀢𑁆𑀢𑀭𑀧𑀤𑀯𑀼𑀤𑁆𑀥𑀺𑀪𑀸𑀯𑀢𑁆𑀣𑀁, 𑀏𑀢𑁆𑀣 𑀘 ‘‘𑀅𑀬𑀼𑀯𑀡𑁆𑀡𑀸𑀦’’𑀦𑁆𑀢𑀺 𑀞𑀸𑀦𑀦𑀺𑀬𑀫𑀯𑀘𑀦𑀁 𑀆𑀬𑁄𑀦𑀁 𑀯𑀼𑀤𑁆𑀥𑀺𑀪𑀸𑀯𑀧𑁆𑀧𑀲𑀗𑁆𑀕𑀦𑀺𑀯𑀢𑁆𑀢𑀦𑀢𑁆𑀣𑀁.

𑀬𑀣𑀸 ¶ 𑀳𑀺 𑀓𑀢𑀯𑀼𑀤𑁆𑀥𑀻𑀦𑀁, 𑀧𑀼𑀦 𑀯𑀼𑀤𑁆𑀥𑀺 𑀦 𑀳𑁄𑀢𑀺𑀳;

𑀢𑀣𑀸 𑀲𑀪𑀸𑀯𑀯𑀼𑀤𑁆𑀥𑀻𑀦𑀁, 𑀆𑀬𑁄𑀦𑀁 𑀧𑀼𑀦 𑀯𑀼𑀤𑁆𑀥𑀺 𑀦.

𑀢𑀢𑁄 𑀅𑀓𑀸𑀭𑀲𑁆𑀲 𑀆𑀓𑀸𑀭𑁄 𑀯𑀼𑀤𑁆𑀥𑀺, ‘‘𑀲𑀭𑀮𑁄𑀧𑁄𑀫𑀸𑀤𑁂𑀲𑀧𑁆𑀧𑀘𑁆𑀘𑀬𑀸𑀤𑀺𑀫𑁆𑀳𑀺 𑀲𑀭𑀮𑁄𑀧𑁂 𑀢𑀼 𑀧𑀓𑀢𑀻’’𑀢𑀺 𑀲𑀭𑀮𑁄𑀧𑀧𑀓𑀢𑀺𑀪𑀸𑀯𑀸, ‘‘𑀦𑀬𑁂 𑀧𑀭𑀁 𑀬𑀼𑀢𑁆𑀢𑁂’’𑀢𑀺 𑀧𑀭𑀦𑀬𑀦𑀁 𑀓𑀢𑁆𑀯𑀸 𑀢𑀤𑁆𑀥𑀺𑀢𑀢𑁆𑀢𑀸 ‘‘𑀢𑀤𑁆𑀥𑀺𑀢𑀲𑀫𑀸𑀲’’𑀇𑀘𑁆𑀘𑀸𑀤𑀺𑀦𑀸 𑀦𑀸𑀫𑀩𑁆𑀬𑀧𑀤𑁂𑀲𑁂 𑀓𑀢𑁂 𑀧𑀼𑀭𑁂 𑀯𑀺𑀬 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺.

𑀯𑀸𑀲𑀺𑀝𑁆𑀞𑁄, 𑀯𑀲𑀺𑀝𑁆𑀞𑀲𑁆𑀲 𑀧𑀼𑀢𑁆𑀢𑁄 𑀯𑀸, 𑀯𑀸𑀲𑀺𑀝𑁆𑀞𑀸 𑀇𑀘𑁆𑀘𑀸𑀤𑀺 𑀧𑀼𑀭𑀺𑀲𑀲𑀤𑁆𑀤𑀲𑀫𑀁. 𑀢𑀲𑁆𑀲 𑀦𑀢𑁆𑀢𑀼𑀧𑀦𑀢𑁆𑀢𑀸𑀤𑀬𑁄𑀧𑀺 𑀢𑀤𑀼𑀧𑀘𑀸𑀭𑀢𑁄 𑀯𑀸𑀲𑀺𑀝𑁆𑀞𑀸𑀬𑁂𑀯. 𑀏𑀯𑀁 𑀲𑀩𑁆𑀩𑀢𑁆𑀣 𑀕𑁄𑀢𑁆𑀢𑀢𑀤𑁆𑀥𑀺𑀢𑁂 𑀧𑀞𑀫𑀧𑁆𑀧𑀓𑀢𑀺𑀢𑁄𑀬𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺.

𑀇𑀢𑁆𑀣𑀺𑀬𑀁 𑀡𑀧𑁆𑀧𑀘𑁆𑀘𑀬𑀦𑁆𑀢𑀢𑁆𑀢𑀸 ‘‘𑀡𑀯 𑀡𑀺𑀓 𑀡𑁂𑀬𑁆𑀬 𑀡 𑀦𑁆𑀢𑀽𑀳𑀻’’𑀢𑀺 𑀯𑀸𑀲𑀺𑀝𑁆𑀞𑀲𑀤𑁆𑀤𑀢𑁄 𑀈𑀧𑀘𑁆𑀘𑀬𑁄. 𑀲𑀭𑀮𑁄𑀧𑀸𑀤𑀺𑀁 𑀓𑀢𑁆𑀯𑀸 𑀇𑀢𑁆𑀣𑀺𑀧𑁆𑀧𑀘𑁆𑀘𑀬𑀦𑁆𑀢𑀢𑁆𑀢𑀸 ‘‘𑀢𑀤𑁆𑀥𑀺𑀢𑀲𑀫𑀸𑀲’’𑀇𑀘𑁆𑀘𑀸𑀤𑀺𑀲𑀼𑀢𑁆𑀢𑁂 𑀘𑀕𑁆𑀕𑀳𑀡𑁂𑀦 𑀦𑀸𑀫𑀩𑁆𑀬𑀧𑀤𑁂𑀲𑁂 𑀓𑀢𑁂 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺, 𑀯𑀸𑀲𑀺𑀝𑁆𑀞𑀻 𑀓𑀜𑁆𑀜𑀸, 𑀯𑀸𑀲𑀺𑀝𑁆𑀞𑀻, 𑀯𑀸𑀲𑀺𑀝𑁆𑀞𑀺𑀬𑁄 𑀇𑀘𑁆𑀘𑀸𑀤𑀺 𑀇𑀢𑁆𑀣𑀺𑀲𑀤𑁆𑀤𑀲𑀫𑀁.

𑀦𑀧𑀼𑀁𑀲𑀓𑁂 𑀯𑀸𑀲𑀺𑀝𑁆𑀞𑀁 𑀅𑀧𑀘𑁆𑀘𑀁, 𑀯𑀸𑀲𑀺𑀝𑁆𑀞𑀸𑀦𑀺 𑀅𑀧𑀘𑁆𑀘𑀸𑀦𑀺 𑀇𑀘𑁆𑀘𑀸𑀤𑀺 𑀘𑀺𑀢𑁆𑀢𑀲𑀤𑁆𑀤𑀲𑀫𑀁. 𑀏𑀯𑀁 𑀉𑀧𑀭𑀺𑀧𑀺 𑀢𑀤𑁆𑀥𑀺𑀢𑀦𑁆𑀢𑀲𑁆𑀲 𑀢𑀺𑀮𑀺𑀗𑁆𑀕𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀪𑀸𑀭𑀤𑁆𑀯𑀸𑀚𑀲𑁆𑀲 𑀧𑀼𑀢𑁆𑀢𑁄 𑀪𑀸𑀭𑀤𑁆𑀯𑀸𑀚𑁄, 𑀯𑁂𑀲𑀸𑀫𑀺𑀢𑁆𑀢𑀲𑁆𑀲 𑀧𑀼𑀢𑁆𑀢𑁄 𑀯𑁂𑀲𑀸𑀫𑀺𑀢𑁆𑀢𑁄, 𑀕𑁄𑀢𑀫𑀲𑁆𑀲 𑀧𑀼𑀢𑁆𑀢𑁄 𑀕𑁄𑀢𑀫𑁄. 𑀏𑀢𑁆𑀣 𑀘 𑀅𑀬𑀼𑀯𑀡𑁆𑀡𑀢𑁆𑀢𑀸𑀪𑀸𑀯𑀸 𑀆𑀓𑀸𑀭𑀸𑀤𑀻𑀦𑀁 𑀦 𑀯𑀼𑀤𑁆𑀥𑀺 𑀳𑁄𑀢𑀺. 𑀯𑀲𑀼𑀤𑁂𑀯𑀲𑁆𑀲 𑀅𑀧𑀘𑁆𑀘𑀁 𑀯𑀸𑀲𑀼𑀤𑁂𑀯𑁄, 𑀩𑀮𑀤𑁂𑀯𑁄. ‘‘𑀘𑀺𑀢𑁆𑀢𑀓𑁄’’𑀢𑀺𑀆𑀤𑀻𑀲𑀼 𑀧𑀦 𑀲𑀁𑀬𑁄𑀕𑀦𑁆𑀢𑀢𑁆𑀢𑀸 𑀯𑀼𑀤𑁆𑀥𑀺 𑀦 𑀪𑀯𑀢𑀺.

‘‘𑀯𑀘𑁆𑀙𑀲𑁆𑀲 𑀅𑀧𑀘𑁆𑀘’’𑀦𑁆𑀢𑀺 𑀯𑀺𑀕𑁆𑀕𑀳𑁂 𑀡𑀫𑁆𑀳𑀺 𑀲𑀫𑁆𑀧𑀢𑁆𑀢𑁂 ‘‘𑀯𑀸 𑀡’𑀧𑀘𑁆𑀘𑁂’’𑀢𑀺 𑀇𑀢𑁄 𑀯𑀸𑀢𑀺 𑀢𑀤𑁆𑀥𑀺𑀢𑀯𑀺𑀥𑀸𑀦𑁂 𑀲𑀩𑁆𑀩𑀢𑁆𑀣 𑀯𑀢𑁆𑀢𑀢𑁂, 𑀢𑁂𑀦 𑀲𑀩𑁆𑀩𑀢𑁆𑀣 𑀯𑀸𑀓𑁆𑀬𑀯𑀼𑀢𑁆𑀢𑀺𑀬𑁄 𑀪𑀯𑀦𑁆𑀢𑀺. ‘‘𑀅𑀧𑀘𑁆𑀘𑁂’’𑀢𑀺 𑀧𑀤𑀁 𑀬𑀸𑀯 𑀲𑀁𑀲𑀝𑁆𑀞𑀕𑁆𑀕𑀳𑀡𑀸𑀯 𑀯𑀢𑁆𑀢𑀢𑁂.

𑁩𑁬𑁬. 𑀡𑀸𑀬𑀦 ¶ 𑀡𑀸𑀦 𑀯𑀘𑁆𑀙𑀸𑀤𑀺𑀢𑁄.

𑀯𑀘𑁆𑀙 𑀓𑀘𑁆𑀘𑀇𑀘𑁆𑀘𑁂𑀯𑀫𑀸𑀤𑀺𑀢𑁄 𑀙𑀝𑁆𑀞𑀺𑀬𑀦𑁆𑀢𑀢𑁄 𑀕𑁄𑀢𑁆𑀢𑀕𑀡𑀢𑁄 𑀡𑀸𑀬𑀦 𑀡𑀸𑀦𑀇𑀘𑁆𑀘𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀯𑀸 ‘‘𑀢𑀲𑁆𑀲𑀸𑀧𑀘𑁆𑀘’’𑀫𑀺𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂. 𑀲𑀩𑁆𑀩𑀢𑁆𑀣 𑀡𑀓𑀸𑀭𑀸𑀦𑀼𑀩𑀦𑁆𑀥𑁄 𑀯𑀼𑀤𑁆𑀥𑀢𑁆𑀣𑁄, 𑀲𑁂𑀲𑀁 𑀧𑀼𑀩𑁆𑀩𑀲𑀫𑀁, 𑀲𑀁𑀬𑁄𑀕𑀦𑁆𑀢𑀢𑁆𑀢𑀸 𑀯𑀼𑀤𑁆𑀥𑀺𑀅𑀪𑀸𑀯𑁄𑀯 𑀯𑀺𑀲𑁂𑀲𑁄.

𑀯𑀘𑁆𑀙𑀸𑀬𑀦𑁄 𑀯𑀘𑁆𑀙𑀸𑀦𑁄 𑀯𑀘𑁆𑀙𑀲𑁆𑀲 𑀧𑀼𑀢𑁆𑀢𑁄 𑀯𑀸. 𑀏𑀯𑀁 𑀓𑀘𑁆𑀘𑀲𑁆𑀲 𑀧𑀼𑀢𑁆𑀢𑁄 𑀓𑀘𑁆𑀘𑀸𑀬𑀦𑁄 𑀓𑀘𑁆𑀘𑀸𑀦𑁄, 𑀫𑁄𑀕𑁆𑀕𑀮𑁆𑀮𑀲𑁆𑀲 𑀧𑀼𑀢𑁆𑀢𑁄 𑀫𑁄𑀕𑁆𑀕𑀮𑁆𑀮𑀸𑀬𑀦𑁄 𑀫𑁄𑀕𑁆𑀕𑀮𑁆𑀮𑀸𑀦𑁄. 𑀏𑀯𑀁 𑀅𑀕𑁆𑀕𑀺𑀯𑁂𑀲𑁆𑀲𑀸𑀬𑀦𑁄 𑀅𑀕𑁆𑀕𑀺𑀯𑁂𑀲𑁆𑀲𑀸𑀦𑁄, 𑀓𑀡𑁆𑀳𑀸𑀬𑀦𑁄 𑀓𑀡𑁆𑀳𑀸𑀦𑁄, 𑀲𑀸𑀓𑀝𑀸𑀬𑀦𑁄 𑀲𑀸𑀓𑀝𑀸𑀦𑁄, 𑀫𑀼𑀜𑁆𑀘𑀸𑀬𑀦𑁄 𑀫𑀼𑀜𑁆𑀘𑀸𑀦𑁄, 𑀓𑀼𑀜𑁆𑀚𑀸𑀬𑀦𑁄 𑀓𑀼𑀜𑁆𑀚𑀸𑀦𑁄 𑀇𑀘𑁆𑀘𑀸𑀤𑀺. 𑀆𑀓𑀢𑀺𑀕𑀡𑁄’𑀬𑀁.

‘‘𑀓𑀢𑁆𑀢𑀺𑀓𑀸𑀬 𑀅𑀧𑀘𑁆𑀘’’𑀦𑁆𑀢𑀺 𑀯𑀺𑀕𑁆𑀕𑀳𑁂 𑁋

𑁩𑁬𑁭. 𑀡𑁂𑀬𑁆𑀬𑁄 𑀓𑀢𑁆𑀢𑀺𑀓𑀸𑀤𑀻𑀳𑀺.

𑀆𑀤𑀺𑀲𑀤𑁆𑀤𑁄𑀬𑀁 𑀧𑀓𑀸𑀭𑁂 𑀯𑀢𑁆𑀢𑀢𑁂. 𑀓𑀢𑁆𑀢𑀺𑀓𑀸 𑀯𑀺𑀦𑀢𑀸𑀭𑁄𑀳𑀺𑀡𑀻𑀇𑀘𑁆𑀘𑁂𑀯𑀫𑀸𑀤𑀻𑀳𑀺 𑀇𑀢𑁆𑀣𑀺𑀬𑀁 𑀯𑀢𑁆𑀢𑀫𑀸𑀦𑁂𑀳𑀺 𑀮𑀺𑀗𑁆𑀕𑁂𑀳𑀺 𑀡𑁂𑀬𑁆𑀬𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 𑀯𑀸 ‘‘𑀢𑀲𑁆𑀲𑀸𑀧𑀘𑁆𑀘’’𑀫𑀺𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂.

𑀯𑀺𑀪𑀢𑁆𑀢𑀺𑀮𑁄𑀧𑁂 ‘‘𑀧𑀓𑀢𑀺 𑀘𑀲𑁆𑀲 𑀲𑀭𑀦𑁆𑀢𑀲𑁆𑀲𑀸’’𑀢𑀺 𑀧𑀓𑀢𑀺𑀪𑀸𑀯𑁄. 𑀓𑀢𑁆𑀢𑀺𑀓𑁂𑀬𑁆𑀬𑁄, 𑀓𑀢𑁆𑀢𑀺𑀓𑀸𑀬 𑀧𑀼𑀢𑁆𑀢𑁄 𑀯𑀸. 𑀏𑀯𑀁 𑀯𑀺𑀦𑀢𑀸𑀬 𑀅𑀧𑀘𑁆𑀘𑀁 𑀯𑁂𑀦𑀢𑁂𑀬𑁆𑀬𑁄, 𑀇𑀓𑀸𑀭𑀲𑁆𑀲𑁂𑀓𑀸𑀭𑁄 𑀯𑀼𑀤𑁆𑀥𑀺, 𑀭𑁄𑀳𑀺𑀡𑀺𑀬𑀸 𑀧𑀼𑀢𑁆𑀢𑁄 𑀭𑁄𑀳𑀺𑀡𑁂𑀬𑁆𑀬𑁄, 𑀕𑀗𑁆𑀕𑀸𑀬 𑀅𑀧𑀘𑁆𑀘𑀁 𑀕𑀗𑁆𑀕𑁂𑀬𑁆𑀬𑁄, 𑀪𑀕𑀺𑀦𑀺𑀬𑀸 𑀧𑀼𑀢𑁆𑀢𑁄 𑀪𑀸𑀕𑀺𑀦𑁂𑀬𑁆𑀬𑁄, 𑀦𑀤𑀺𑀬𑀸𑀧𑀼𑀢𑁆𑀢𑁄 𑀦𑀸𑀤𑁂𑀬𑁆𑀬𑁄. 𑀏𑀯𑀁 𑀅𑀦𑁆𑀢𑁂𑀬𑁆𑀬𑁄, 𑀆𑀳𑁂𑀬𑁆𑀬𑁄, 𑀓𑀸𑀫𑁂𑀬𑁆𑀬𑁄. 𑀲𑀼𑀘𑀺𑀬𑀸 ¶ 𑀅𑀧𑀘𑁆𑀘𑀁 𑀲𑁄𑀘𑁂𑀬𑁆𑀬𑁄, 𑀏𑀢𑁆𑀣 𑀉𑀓𑀸𑀭𑀲𑁆𑀲𑁄𑀓𑀸𑀭𑁄 𑀯𑀼𑀤𑁆𑀥𑀺, 𑀩𑀸𑀮𑀸𑀬 𑀅𑀧𑀘𑁆𑀘𑀁 𑀩𑀸𑀮𑁂𑀬𑁆𑀬𑁄 𑀇𑀘𑁆𑀘𑀸𑀤𑀺.

‘‘𑀤𑀓𑁆𑀔𑀲𑁆𑀲𑀸𑀧𑀘𑁆𑀘’’𑀦𑁆𑀢𑀺 𑀯𑀺𑀕𑁆𑀕𑀳𑁂 𑀡𑀫𑁆𑀳𑀺 𑀲𑀫𑁆𑀧𑀢𑁆𑀢𑁂 𑁋

𑁩𑁬𑁮. 𑀅𑀢𑁄 𑀡𑀺 𑀯𑀸.

𑀅𑀓𑀸𑀭𑀦𑁆𑀢𑀢𑁄 𑀮𑀺𑀗𑁆𑀕𑀫𑁆𑀳𑀸 𑀡𑀺𑀧𑀘𑁆𑀘𑀬𑁄 𑀳𑁄𑀢𑀺 𑀯𑀸 ‘‘𑀢𑀲𑁆𑀲𑀸𑀧𑀘𑁆𑀘’’𑀫𑀺𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂. 𑀤𑀓𑁆𑀔𑀺, 𑀤𑀓𑁆𑀔𑀻, 𑀤𑀓𑁆𑀔𑀬𑁄, 𑀤𑁄𑀡𑀲𑁆𑀲 𑀅𑀧𑀘𑁆𑀘𑀁 𑀤𑁄𑀡𑀺. 𑀏𑀯𑀁 𑀯𑀸𑀲𑀯𑀺, 𑀲𑀓𑁆𑀬𑀧𑀼𑀢𑁆𑀢𑀺, 𑀦𑀸𑀝𑀧𑀼𑀢𑁆𑀢𑀺, 𑀤𑀸𑀲𑀧𑀼𑀢𑁆𑀢𑀺, 𑀤𑀸𑀲𑀭𑀣𑀺. 𑀯𑀸𑀭𑀼𑀡𑀺, 𑀓𑀡𑁆𑀟𑀺, 𑀩𑀸𑀮𑀤𑁂𑀯𑀺, 𑀧𑀸𑀯𑀓𑀺, 𑀚𑀺𑀦𑀤𑀢𑁆𑀢𑀲𑁆𑀲 𑀅𑀧𑀘𑁆𑀘𑀁 𑀚𑁂𑀦𑀤𑀢𑁆𑀢𑀺, 𑀲𑀼𑀤𑁆𑀥𑁄𑀤𑀦𑀺, 𑀅𑀦𑀼𑀭𑀼𑀤𑁆𑀥𑀺 𑀇𑀘𑁆𑀘𑀸𑀤𑀺.

𑀧𑀼𑀦 𑀯𑀸𑀕𑁆𑀕𑀳𑀡𑁂𑀦 𑀅𑀧𑀘𑁆𑀘𑀢𑁆𑀣𑁂 𑀡𑀺𑀓𑀧𑁆𑀧𑀘𑁆𑀘𑀬𑁄, 𑀅𑀤𑀺𑀢𑀺𑀆𑀤𑀺𑀢𑁄 𑀡𑁆𑀬𑀧𑁆𑀧𑀘𑁆𑀘𑀬𑁄 𑀘. 𑀬𑀣𑀸 𑁋 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀧𑀼𑀢𑁆𑀢𑁄 𑀲𑀓𑁆𑀬𑀧𑀼𑀢𑁆𑀢𑀺𑀓𑁄, ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀓𑀓𑀸𑀭𑀲𑁆𑀲 𑀬𑀓𑀸𑀭𑁄, 𑀲𑀓𑁆𑀬𑀧𑀼𑀢𑁆𑀢𑀺𑀬𑁄. 𑀏𑀯𑀁 𑀦𑀸𑀝𑀧𑀼𑀢𑁆𑀢𑀺𑀓𑁄, 𑀚𑁂𑀦𑀤𑀢𑁆𑀢𑀺𑀓𑁄, 𑀯𑀺𑀫𑀸𑀢𑀼𑀬𑀸 𑀧𑀼𑀢𑁆𑀢𑁄 𑀯𑁂𑀫𑀸𑀢𑀺𑀓𑁄.

‘‘𑀅𑀤𑀺𑀢𑀺𑀬𑀸 𑀧𑀼𑀢𑁆𑀢𑁄’’𑀢𑀺 𑀅𑀢𑁆𑀣𑁂 𑀡𑁆𑀬𑀧𑁆𑀧𑀘𑁆𑀘𑀬𑁄, 𑀯𑀼𑀤𑁆𑀥𑀺 𑀘.

𑁩𑁬𑁯. 𑀅𑀯𑀡𑁆𑀡𑁄 𑀬𑁂 𑀮𑁄𑀧𑀜𑁆𑀘.

𑀅𑀯𑀡𑁆𑀡𑁄 𑀢𑀤𑁆𑀥𑀺𑀢𑀪𑀽𑀢𑁂 𑀬𑀧𑁆𑀧𑀘𑁆𑀘𑀬𑁂 𑀧𑀭𑁂 𑀮𑁄𑀧𑀫𑀸𑀧𑀚𑁆𑀚𑀢𑁂. 𑀘𑀲𑀤𑁆𑀤𑁂𑀦 𑀇𑀯𑀡𑁆𑀡𑁄𑀧𑀻𑀢𑀺 𑀇𑀓𑀸𑀭𑀮𑁄𑀧𑁄, ‘‘𑀬𑀯𑀢𑀁 𑀢𑀮𑀦𑀤𑀓𑀸𑀭𑀸𑀦𑀁 𑀩𑁆𑀬𑀜𑁆𑀚𑀦𑀸𑀦𑀺 𑀘 𑀮 𑀜 𑀚𑀓𑀸𑀭𑀢𑁆𑀢’’𑀦𑁆𑀢𑀺 𑀢𑁆𑀬𑀓𑀸𑀭𑀲𑀁𑀬𑁄𑀕𑀲𑁆𑀲 𑀘𑀓𑀸𑀭𑁄, ‘‘𑀧𑀭𑀤𑁆𑀯𑁂𑀪𑀸𑀯𑁄 𑀞𑀸𑀦𑁂’’𑀢𑀺 𑀤𑁆𑀯𑀺𑀢𑁆𑀢𑀁, 𑀆𑀤𑀺𑀘𑁆𑀘𑁄. 𑀏𑀯𑀁 𑀤𑀺𑀢𑀺𑀬𑀸 𑀧𑀼𑀢𑁆𑀢𑁄 𑀤𑁂𑀘𑁆𑀘𑁄.

‘‘𑀓𑀼𑀡𑁆𑀟𑀦𑀺𑀬𑀸 𑀧𑀼𑀢𑁆𑀢𑁄’’𑀢𑀺 𑀅𑀢𑁆𑀣𑁂 𑀡𑁆𑀬𑀧𑁆𑀧𑀘𑁆𑀘𑀬𑁂 𑀓𑀢𑁂 𑁋

‘‘𑀓𑁆𑀯𑀘𑀸𑀤𑀺𑀫𑀚𑁆𑀛𑀼𑀢𑁆𑀢𑀭𑁂𑀲𑀽’’𑀢𑀺 𑀯𑀢𑁆𑀢𑀢𑁂.

𑁩𑁭𑁦. 𑀢𑁂𑀲𑀼 ¶ 𑀯𑀼𑀤𑁆𑀥𑀺𑀮𑁄𑀧𑀸𑀕𑀫𑀯𑀺𑀓𑀸𑀭𑀯𑀺𑀧𑀭𑀻𑀢𑀸𑀤𑁂𑀲𑀸 𑀘.

𑀢𑁂𑀲𑀼 𑀆𑀤𑀺𑀫𑀚𑁆𑀛𑀼𑀢𑁆𑀢𑀭𑁂𑀲𑀼 𑀅𑀯𑀺𑀳𑀺𑀢𑀮𑀓𑁆𑀔𑀡𑁂𑀲𑀼 𑀚𑀺𑀦𑀯𑀘𑀦𑀸𑀦𑀼𑀧𑀭𑁄𑀥𑁂𑀦 𑀓𑁆𑀯𑀘𑀺 𑀯𑀼𑀤𑁆𑀥𑀺 𑀮𑁄𑀧 𑀆𑀕𑀫 𑀯𑀺𑀓𑀸𑀭 𑀯𑀺𑀧𑀭𑀻𑀢𑀆𑀤𑁂𑀲𑀸 𑀳𑁄𑀦𑁆𑀢𑀻𑀢𑀺 𑀲𑀁𑀬𑁄𑀕𑀦𑁆𑀢𑀢𑁆𑀢𑁂𑀧𑀺 𑀆𑀤𑀺𑀯𑀼𑀤𑁆𑀥𑀺, 𑀇𑀓𑀸𑀭𑀮𑁄𑀧𑁂 𑀦𑁆𑀬𑀲𑁆𑀲𑀜𑀸𑀤𑁂𑀲𑁄, 𑀓𑁄𑀡𑁆𑀟𑀜𑁆𑀜𑁄, 𑀓𑀼𑀭𑀼𑀦𑁄 𑀧𑀼𑀢𑁆𑀢𑁄 𑀓𑁄𑀭𑀩𑁆𑀬𑁄, 𑀏𑀢𑁆𑀣𑀸𑀧𑀺 𑀢𑁂𑀦𑁂𑀯 𑀉𑀓𑀸𑀭𑀲𑁆𑀲 𑀅𑀯𑀸𑀤𑁂𑀲𑁄, 𑀪𑀸𑀢𑀼𑀦𑁄 𑀧𑀼𑀢𑁆𑀢𑁄 𑀪𑀸𑀢𑀩𑁆𑀬𑁄.

‘‘𑀉𑀧𑀕𑀼𑀲𑁆𑀲 𑀅𑀧𑀘𑁆𑀘’’𑀦𑁆𑀢𑀺 𑀯𑀺𑀕𑁆𑀕𑀳𑁂 𑁋

𑁩𑁭𑁧. 𑀡𑀯𑁄𑀧𑀕𑁆𑀯𑀸𑀤𑀻𑀳𑀺.

𑀉𑀧𑀕𑀼 𑀫𑀦𑀼𑀇𑀘𑁆𑀘𑁂𑀯𑀫𑀸𑀤𑀻𑀳𑀺 𑀉𑀓𑀸𑀭𑀦𑁆𑀢𑁂𑀳𑀺 𑀕𑁄𑀢𑁆𑀢𑀕𑀡𑁂𑀳𑀺 𑀡𑀯𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 𑀯𑀸 ‘‘𑀢𑀲𑁆𑀲𑀸𑀧𑀘𑁆𑀘’’𑀫𑀺𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂. 𑀆𑀤𑀺𑀲𑀤𑁆𑀤𑀲𑁆𑀲 𑀘𑁂𑀢𑁆𑀣 𑀧𑀓𑀸𑀭𑀯𑀸𑀘𑀓𑀢𑁆𑀢𑀸 𑀉𑀓𑀸𑀭𑀦𑁆𑀢𑀢𑁄𑀬𑁂𑀯𑀸𑀬𑀁. 𑀑𑀧𑀕𑀯𑁄, 𑀑𑀧𑀕𑀯𑀻, 𑀑𑀧𑀕𑀯𑀁, 𑀫𑀦𑀼𑀦𑁄 𑀅𑀧𑀘𑁆𑀘𑀁 𑀫𑀸𑀦𑀯𑁄, ‘‘𑀫𑀸𑀦𑀼𑀲𑁄’’𑀢𑀺 𑀡𑀧𑁆𑀧𑀘𑁆𑀘𑀬𑁂, 𑀲𑀸𑀕𑀫𑁂 𑀘 𑀓𑀢𑁂 𑀭𑀽𑀧𑀁, 𑀪𑀕𑁆𑀕𑀼𑀦𑁄 𑀅𑀧𑀘𑁆𑀘𑀁 𑀪𑀕𑁆𑀕𑀯𑁄, 𑀧𑀡𑁆𑀟𑀼𑀦𑁄 𑀅𑀧𑀘𑁆𑀘𑀁 𑀧𑀡𑁆𑀟𑀯𑁄, 𑀉𑀧𑀯𑀺𑀦𑁆𑀤𑀼𑀲𑁆𑀲 𑀅𑀧𑀘𑁆𑀘𑀁 𑀑𑀧𑀯𑀺𑀦𑁆𑀤𑀯𑁄 𑀇𑀘𑁆𑀘𑀸𑀤𑀺.

‘‘𑀯𑀺𑀥𑀯𑀸𑀬 𑀅𑀧𑀘𑁆𑀘’’𑀦𑁆𑀢𑀺 𑀅𑀢𑁆𑀣𑁂 𑁋

𑁩𑁭𑁨. 𑀡𑁂𑀭 𑀯𑀺𑀥𑀯𑀸𑀤𑀺𑀢𑁄.

𑀯𑀺𑀥𑀯𑀸𑀤𑀺𑀢𑁄 𑀡𑁂𑀭𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 𑀯𑀸 𑀅𑀧𑀘𑁆𑀘𑀢𑁆𑀣𑁂. 𑀯𑀺𑀕𑀢𑁄 𑀥𑀯𑁄 𑀧𑀢𑀺 𑀏𑀢𑀺𑀲𑁆𑀲𑀸𑀢𑀺 𑀯𑀺𑀥𑀯𑀸, 𑀯𑁂𑀥𑀯𑁂𑀭𑁄, 𑀩𑀦𑁆𑀥𑀼𑀓𑀺𑀬𑀸 𑀅𑀪𑀺𑀲𑀸𑀭𑀺𑀡𑀺𑀬𑀸 𑀧𑀼𑀢𑁆𑀢𑁄 𑀩𑀦𑁆𑀥𑀼𑀓𑁂𑀭𑁄, 𑀲𑀫𑀡𑀲𑁆𑀲 𑀉𑀧𑀚𑁆𑀛𑀸𑀬𑀲𑁆𑀲 𑀧𑀼𑀢𑁆𑀢𑁄 𑀧𑀼𑀢𑁆𑀢𑀝𑁆𑀞𑀸𑀦𑀺𑀬𑀢𑁆𑀢𑀸𑀢𑀺 𑀲𑀸𑀫𑀡𑁂𑀭𑁄, 𑀦𑀸𑀴𑀺𑀓𑁂𑀭𑁄 𑀇𑀘𑁆𑀘𑀸𑀤𑀺.

𑀅𑀧𑀘𑁆𑀘𑀢𑀤𑁆𑀥𑀺𑀢𑀁.

𑀲𑀁𑀲𑀝𑁆𑀞𑀸𑀤𑀺𑀅𑀦𑁂𑀓𑀢𑁆𑀣𑀢𑀤𑁆𑀥𑀺𑀢

‘‘𑀢𑀺𑀮𑁂𑀦 ¶ 𑀲𑀁𑀲𑀝𑁆𑀞’’𑀦𑁆𑀢𑀺 𑀯𑀺𑀕𑁆𑀕𑀳𑁂 𑁋

𑁩𑁭𑁩. 𑀬𑁂𑀦 𑀯𑀸 𑀲𑀁𑀲𑀝𑁆𑀞𑀁 𑀢𑀭𑀢𑀺 𑀘𑀭𑀢𑀺 𑀯𑀳𑀢𑀺 𑀡𑀺𑀓𑁄.

𑀬𑁂𑀦 𑀯𑀸 𑀲𑀁𑀲𑀝𑁆𑀞𑀁, 𑀬𑁂𑀦 𑀯𑀸 𑀢𑀭𑀢𑀺, 𑀬𑁂𑀦 𑀯𑀸 𑀘𑀭𑀢𑀺, 𑀬𑁂𑀦 𑀯𑀸 𑀯𑀳𑀢𑀺, 𑀢𑀢𑁄 𑀢𑀢𑀺𑀬𑀦𑁆𑀢𑀢𑁄 𑀮𑀺𑀗𑁆𑀕𑀫𑁆𑀳𑀸 𑀢𑁂𑀲𑀼 𑀲𑀁𑀲𑀝𑁆𑀞𑀸𑀤𑀻𑀲𑁆𑀯𑀢𑁆𑀣𑁂𑀲𑀼 𑀡𑀺𑀓𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 𑀯𑀸. 𑀢𑁂𑀮𑀺𑀓𑀁 𑀪𑁄𑀚𑀦𑀁, 𑀢𑀺𑀮𑁂𑀦 𑀅𑀪𑀺𑀲𑀗𑁆𑀔𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀮𑀺𑀓𑀻 𑀬𑀸𑀕𑀼. 𑀕𑀼𑀴𑁂𑀦 𑀲𑀁𑀲𑀝𑁆𑀞𑀁 𑀏𑀕𑀸𑀴𑀺𑀓𑀁. 𑀏𑀯𑀁 𑀖𑀸𑀢𑀺𑀓𑀁, 𑀤𑀸𑀥𑀺𑀓𑀁, 𑀫𑀸𑀭𑀺𑀘𑀺𑀓𑀁, 𑀮𑁄𑀡𑀺𑀓𑀁.

𑀦𑀸𑀯𑀸𑀬 𑀢𑀭𑀢𑀻𑀢𑀺 𑀦𑀸𑀯𑀺𑀓𑁄, 𑀉𑀴𑀼𑀫𑁆𑀧𑁂𑀦 𑀢𑀭𑀢𑀻𑀢𑀺 𑀑𑀴𑀼𑀫𑁆𑀧𑀺𑀓𑁄, 𑀯𑀼𑀤𑁆𑀥𑀺𑀅𑀪𑀸𑀯𑀧𑀓𑁆𑀔𑁂 𑀉𑀴𑀼𑀫𑁆𑀧𑀺𑀓𑁄. 𑀏𑀯𑀁 𑀓𑀼𑀮𑁆𑀮𑀺𑀓𑁄, 𑀕𑁄𑀧𑀼𑀘𑁆𑀙𑀺𑀓𑁄. 𑀲𑀓𑀝𑁂𑀦 𑀘𑀭𑀢𑀻𑀢𑀺 𑀲𑀸𑀓𑀝𑀺𑀓𑁄. 𑀏𑀯𑀁 𑀧𑀸𑀤𑀺𑀓𑁄, 𑀤𑀡𑁆𑀟𑀺𑀓𑁄, 𑀥𑀫𑁆𑀫𑁂𑀦 𑀘𑀭𑀢𑀺 𑀧𑀯𑀢𑁆𑀢𑀢𑀻𑀢𑀺 𑀥𑀫𑁆𑀫𑀺𑀓𑁄. 𑀲𑀻𑀲𑁂𑀦 𑀯𑀳𑀢𑀻𑀢𑀺 𑀲𑀻𑀲𑀺𑀓𑁄, 𑀯𑀸𑀕𑁆𑀕𑀳𑀡𑁂𑀦 𑀈𑀓𑀸𑀭𑀲𑁆𑀲 𑀯𑀼𑀤𑁆𑀥𑀺 𑀦 𑀳𑁄𑀢𑀺. 𑀏𑀯𑀁 𑀅𑀁𑀲𑀺𑀓𑁄, 𑀔𑀦𑁆𑀥𑀺𑀓𑁄, 𑀳𑀢𑁆𑀣𑀺𑀓𑁄, 𑀅𑀗𑁆𑀕𑀼𑀮𑀺𑀓𑁄.

𑀧𑀼𑀦 𑀯𑀸𑀕𑁆𑀕𑀳𑀡𑁂𑀦 𑀅𑀜𑁆𑀜𑀢𑁆𑀣𑁂𑀲𑀼𑀧𑀺 𑀡𑀺𑀓𑀧𑁆𑀧𑀘𑁆𑀘𑀬𑁄, 𑀧𑀭𑀤𑀸𑀭𑀁 𑀕𑀘𑁆𑀙𑀢𑀻𑀢𑀺 𑀧𑀸𑀭𑀤𑀸𑀭𑀺𑀓𑁄, 𑀧𑀣𑀁 𑀕𑀘𑁆𑀙𑀢𑀻𑀢𑀺 𑀧𑀣𑀺𑀓𑁄.

‘‘𑀯𑀺𑀦𑀬𑀫𑀥𑀻𑀢𑁂, 𑀅𑀯𑁂𑀘𑁆𑀘𑀸𑀥𑀻𑀢𑁂’’𑀢𑀺 𑀯𑀸 𑀯𑀺𑀕𑁆𑀕𑀳𑁂 𑁋

‘‘𑀡𑀺𑀓𑁄’’𑀢𑀺 𑀯𑀢𑁆𑀢𑀢𑁂.

𑁩𑁭𑁪. 𑀢𑀫𑀥𑀻𑀢𑁂 𑀢𑁂𑀦𑀓𑀢𑀸𑀤𑀺𑀲𑀦𑁆𑀦𑀺𑀥𑀸𑀦𑀦𑀺𑀬𑁄𑀕𑀲𑀺𑀧𑁆𑀧𑀪𑀡𑁆𑀟𑀚𑀻𑀯𑀺𑀓𑀢𑁆𑀣𑁂𑀲𑀼 𑀘.

𑀘𑀢𑀼𑀧𑁆𑀧𑀤𑀫𑀺𑀤𑀁. 𑀢𑀫𑀥𑀻𑀢𑁂𑀢𑀺 𑀅𑀢𑁆𑀣𑁂, 𑀢𑁂𑀦 𑀓𑀢𑀸𑀤𑀻𑀲𑁆𑀯𑀢𑁆𑀣𑁂𑀲𑀼 𑀘 𑀢𑀫𑁆𑀳𑀺 𑀲𑀦𑁆𑀦𑀺𑀥𑀸𑀦𑁄, 𑀢𑀢𑁆𑀣 𑀦𑀺𑀬𑀼𑀢𑁆𑀢𑁄, 𑀢𑀫𑀲𑁆𑀲 𑀲𑀺𑀧𑁆𑀧𑀁, 𑀢𑀫𑀲𑁆𑀲 𑀪𑀡𑁆𑀟𑀁 ¶ , 𑀢𑀫𑀲𑁆𑀲 𑀚𑀻𑀯𑀺𑀓𑀸 𑀇𑀘𑁆𑀘𑁂𑀢𑁂𑀲𑁆𑀯𑀢𑁆𑀣𑁂𑀲𑀼 𑀘 𑀤𑀼𑀢𑀺𑀬𑀸𑀤𑀺𑀯𑀺𑀪𑀢𑁆𑀬𑀦𑁆𑀢𑁂𑀳𑀺 𑀮𑀺𑀗𑁆𑀕𑁂𑀳𑀺 𑀡𑀺𑀓𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 𑀯𑀸. 𑀯𑁂𑀦𑀬𑀺𑀓𑁄. 𑀏𑀯𑀁 𑀲𑀼𑀢𑁆𑀢𑀦𑁆𑀢𑀺𑀓𑁄, 𑀆𑀪𑀺𑀥𑀫𑁆𑀫𑀺𑀓𑁄.

‘‘𑀩𑁆𑀬𑀸𑀓𑀭𑀡𑀫𑀥𑀻𑀢𑁂’’𑀢𑀺 𑀅𑀢𑁆𑀣𑁂 𑀡𑀺𑀓𑀧𑁆𑀧𑀘𑁆𑀘𑀬𑀸𑀤𑀺𑀫𑁆𑀳𑀺 𑀓𑀢𑁂 𑁋

‘‘𑀯𑀼𑀤𑁆𑀥𑀸𑀤𑀺𑀲𑀭𑀲𑁆𑀲 𑀯𑀸𑀲𑀁𑀬𑁄𑀕𑀦𑁆𑀢𑀲𑁆𑀲 𑀲𑀡𑁂 𑀘𑀸’’𑀢𑀺 𑀯𑀢𑁆𑀢𑀫𑀸𑀦𑁂 𑁋

𑁩𑁭𑁫. 𑀫𑀸𑀬𑀽𑀦𑀫𑀸𑀕𑀫𑁄 𑀞𑀸𑀦𑁂.

𑀇 𑀉𑀇𑀘𑁆𑀘𑁂𑀪𑁂𑀲𑀁 𑀆𑀤𑀺𑀲𑀭𑀸𑀦𑀁 𑀅𑀲𑀁𑀬𑁄𑀕𑀦𑁆𑀢𑀸𑀦𑀁 𑀫𑀸 𑀯𑀼𑀤𑁆𑀥𑀺 𑀳𑁄𑀢𑀺 𑀲𑀡𑁂, 𑀢𑀢𑁆𑀭𑁂𑀯 𑀯𑀼𑀤𑁆𑀥𑀺 𑀆𑀕𑀫𑁄 𑀳𑁄𑀢𑀺 𑀘 𑀞𑀸𑀦𑁂𑀢𑀺 𑀏𑀓𑀸𑀭𑀯𑀼𑀤𑁆𑀥𑀸𑀕𑀫𑁄.

‘‘𑀞𑀸𑀦𑁂’’𑀢𑀺 𑀯𑀘𑀦𑀸 𑀘𑁂𑀢𑁆𑀣, 𑀬𑀽𑀦𑀫𑀸𑀤𑁂𑀲𑀪𑀽𑀢𑀢𑁄;

𑀬𑀯𑁂𑀳𑀺 𑀧𑀼𑀩𑁆𑀩𑁂𑀯 𑀏𑀑-𑀯𑀼𑀤𑁆𑀥𑀺𑀬𑁄 𑀳𑁄𑀦𑁆𑀢𑀺 𑀆𑀕𑀫𑀸.

𑀬𑀓𑀸𑀭𑀲𑁆𑀲 𑀤𑁆𑀯𑀺𑀪𑀸𑀯𑁄.

𑀯𑁂𑀬𑁆𑀬𑀸𑀓𑀭𑀡𑀺𑀓𑁄, 𑀦𑁆𑀬𑀸𑀬𑀫𑀥𑀻𑀢𑁂𑀢𑀺 𑀦𑁂𑀬𑁆𑀬𑀸𑀬𑀺𑀓𑁄. 𑀏𑀯𑀁 𑀢𑀓𑁆𑀓𑀺𑀓𑁄, 𑀯𑁂𑀤𑀺𑀓𑁄, 𑀦𑁂𑀫𑀺𑀢𑁆𑀢𑀺𑀓𑁄, 𑀓𑀸𑀬𑁂𑀦 𑀓𑀢𑁄 𑀧𑀬𑁄𑀕𑁄 𑀓𑀸𑀬𑀺𑀓𑁄, 𑀓𑀸𑀬𑁂𑀦 𑀓𑀢𑀁 𑀓𑀫𑁆𑀫𑀁 𑀓𑀸𑀬𑀺𑀓𑀁, 𑀯𑀘𑀲𑀸 𑀓𑀢𑀁 𑀓𑀫𑁆𑀫𑀁 𑀯𑀸𑀘𑀲𑀺𑀓𑀁. 𑀏𑀯𑀁 𑀫𑀸𑀦𑀲𑀺𑀓𑀁, 𑀏𑀢𑁆𑀣 𑀘 ‘‘𑀲𑀲𑀭𑁂 𑀯𑀸𑀕𑀫𑁄’’𑀢𑀺 𑀲𑀼𑀢𑁆𑀢𑁂 𑀯𑀯𑀢𑁆𑀣𑀺𑀢𑀯𑀸𑀲𑀤𑁆𑀤𑁂𑀦 𑀧𑀘𑁆𑀘𑀬𑁂 𑀧𑀭𑁂𑀧𑀺 𑀲𑀸𑀕𑀫𑁄, 𑀣𑁂𑀭𑁂𑀳𑀺 𑀓𑀢𑀸 𑀲𑀗𑁆𑀕𑀻𑀢𑀺 𑀣𑁂𑀭𑀺𑀓𑀸. 𑀏𑀯𑀁 𑀧𑀜𑁆𑀘𑀲𑀢𑀺𑀓𑀸, 𑀲𑀢𑁆𑀢𑀲𑀢𑀺𑀓𑀸, 𑀏𑀢𑁆𑀣 ‘‘𑀡𑀯𑀡𑀺𑀓𑀸’’𑀤𑀺𑀲𑀼𑀢𑁆𑀢𑁂 𑀅𑀦𑀼𑀯𑀢𑁆𑀢𑀺𑀢𑀯𑀸𑀕𑁆𑀕𑀳𑀡𑁂𑀦 𑀈𑀧𑀘𑁆𑀘𑀬𑁄 𑀦 𑀳𑁄𑀢𑀺.

𑀲𑀦𑁆𑀦𑀺𑀥𑀸𑀦𑀢𑁆𑀣𑁂 𑀲𑀭𑀻𑀭𑁂 𑀲𑀦𑁆𑀦𑀺𑀥𑀸𑀦𑀸 𑀯𑁂𑀤𑀦𑀸 𑀲𑀸𑀭𑀻𑀭𑀺𑀓𑀸, 𑀲𑀸𑀭𑀻𑀭𑀺𑀓𑀁 𑀤𑀼𑀓𑁆𑀔𑀁. 𑀏𑀯𑀁 𑀫𑀸𑀦𑀲𑀺𑀓𑀸, 𑀫𑀸𑀦𑀲𑀺𑀓𑀁.

𑀦𑀺𑀬𑀼𑀢𑁆𑀢𑀢𑁆𑀣𑁂 ¶ 𑀤𑁆𑀯𑀸𑀭𑁂 𑀦𑀺𑀬𑀼𑀢𑁆𑀢𑁄 𑀤𑁄𑀯𑀸𑀭𑀺𑀓𑁄, 𑀏𑀢𑁆𑀣 ‘‘𑀫𑀸𑀬𑀽𑀦𑀫𑀸𑀕𑀫𑁄 𑀞𑀸𑀦𑁂’’𑀢𑀺 𑀯𑀓𑀸𑀭𑀢𑁄 𑀧𑀼𑀩𑁆𑀩𑁂𑀑𑀓𑀸𑀭𑀸𑀕𑀫𑁄. 𑀏𑀯𑀁 𑀪𑀡𑁆𑀟𑀸𑀕𑀸𑀭𑀺𑀓𑁄, 𑀦𑀸𑀕𑀭𑀺𑀓𑁄, 𑀦𑀯𑀓𑀫𑁆𑀫𑀺𑀓𑁄, 𑀯𑀦𑀓𑀫𑁆𑀫𑀺𑀓𑁄, 𑀆𑀤𑀺𑀓𑀫𑁆𑀫𑀺𑀓𑁄, 𑀑𑀤𑀭𑀺𑀓𑁄, 𑀭𑀣𑀺𑀓𑁄, 𑀧𑀣𑀺𑀓𑁄, 𑀉𑀧𑀸𑀬𑁂 𑀦𑀺𑀬𑀼𑀢𑁆𑀢𑁄 𑀑𑀧𑀸𑀬𑀺𑀓𑁄, 𑀘𑁂𑀢𑀲𑀺 𑀦𑀺𑀬𑀼𑀢𑁆𑀢𑀸 𑀘𑁂𑀢𑀲𑀺𑀓𑀸.

𑀲𑀺𑀧𑁆𑀧𑀢𑁆𑀣𑁂 𑀯𑀻𑀡𑀸𑀯𑀸𑀤𑀦𑀁 𑀯𑀻𑀡𑀸, 𑀯𑀻𑀡𑀸 𑀅𑀲𑁆𑀲 𑀲𑀺𑀧𑁆𑀧𑀁 𑀯𑁂𑀡𑀺𑀓𑁄. 𑀏𑀯𑀁 𑀧𑀸𑀡𑀯𑀺𑀓𑁄, 𑀫𑁄𑀤𑀺𑀗𑁆𑀕𑀺𑀓𑁄, 𑀯𑀁𑀲𑀺𑀓𑁄.

𑀪𑀡𑁆𑀟𑀢𑁆𑀣𑁂 𑀕𑀦𑁆𑀥𑁄 𑀅𑀲𑁆𑀲 𑀪𑀡𑁆𑀟𑀦𑁆𑀢𑀺 𑀕𑀦𑁆𑀥𑀺𑀓𑁄. 𑀏𑀯𑀁 𑀢𑁂𑀮𑀺𑀓𑁄, 𑀕𑁄𑀴𑀺𑀓𑁄, 𑀧𑀽𑀯𑀺𑀓𑁄, 𑀧𑀡𑁆𑀡𑀺𑀓𑁄, 𑀢𑀫𑁆𑀩𑀽𑀮𑀺𑀓𑁄, 𑀮𑁄𑀡𑀺𑀓𑁄.

𑀚𑀻𑀯𑀺𑀓𑀢𑁆𑀣𑁂 𑀉𑀭𑀩𑁆𑀪𑀁 𑀳𑀦𑁆𑀢𑁆𑀯𑀸 𑀚𑀻𑀯𑀢𑀺, 𑀉𑀭𑀩𑁆𑀪𑀫𑀲𑁆𑀲 𑀚𑀻𑀯𑀺𑀓𑀸𑀢𑀺 𑀯𑀸 𑀑𑀭𑀩𑁆𑀪𑀺𑀓𑁄. 𑀏𑀯𑀁 𑀫𑀸𑀕𑀯𑀺𑀓𑁄, 𑀏𑀢𑁆𑀣 𑀯𑀓𑀸𑀭𑀸𑀕𑀫𑁄. 𑀲𑀽𑀓𑀭𑀺𑀓𑁄, 𑀲𑀸𑀓𑀼𑀡𑀺𑀓𑁄, 𑀫𑀘𑁆𑀙𑀺𑀓𑁄 𑀇𑀘𑁆𑀘𑀸𑀤𑀺.

‘‘𑀢𑁂𑀦 𑀓𑀢𑀸𑀤𑀻’’𑀢𑀺 𑀏𑀢𑁆𑀣 𑀆𑀤𑀺𑀕𑁆𑀕𑀳𑀡𑁂𑀦 𑀢𑁂𑀦 𑀳𑀢𑀁, 𑀢𑁂𑀦 𑀩𑀤𑁆𑀥𑀁, 𑀢𑁂𑀦 𑀓𑀻𑀢𑀁, 𑀢𑁂𑀦 𑀤𑀺𑀩𑁆𑀩𑀢𑀺, 𑀲𑁄 𑀅𑀲𑁆𑀲 𑀆𑀯𑀼𑀥𑁄, 𑀲𑁄 𑀅𑀲𑁆𑀲 𑀆𑀩𑀸𑀥𑁄, 𑀢𑀢𑁆𑀣 𑀧𑀲𑀦𑁆𑀦𑁄, 𑀢𑀲𑁆𑀲 𑀲𑀦𑁆𑀢𑀓𑀁, 𑀢𑀫𑀲𑁆𑀲 𑀧𑀭𑀺𑀫𑀸𑀡𑀁, 𑀢𑀲𑁆𑀲 𑀭𑀸𑀲𑀺, 𑀢𑀁 𑀅𑀭𑀳𑀢𑀺, 𑀢𑀫𑀲𑁆𑀲 𑀲𑀻𑀮𑀁, 𑀢𑀢𑁆𑀣 𑀚𑀸𑀢𑁄, 𑀢𑀢𑁆𑀣 𑀯𑀲𑀢𑀺, 𑀢𑀢𑁆𑀭 𑀯𑀺𑀤𑀺𑀢𑁄, 𑀢𑀤𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀢𑁄 𑀆𑀕𑀢𑁄, 𑀢𑀢𑁄 𑀲𑀫𑁆𑀪𑀽𑀢𑁄, 𑀢𑀤𑀲𑁆𑀲 𑀧𑀬𑁄𑀚𑀦𑀦𑁆𑀢𑀺 𑀏𑀯𑀫𑀸𑀤𑀺𑀅𑀢𑁆𑀣𑁂 𑀘 𑀡𑀺𑀓𑀧𑁆𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀣𑀸 𑁋 𑀚𑀸𑀮𑁂𑀦 𑀳𑀢𑁄, 𑀳𑀦𑀢𑀻𑀢𑀺 𑀯𑀸 𑀚𑀸𑀮𑀺𑀓𑁄. 𑀏𑀯𑀁 𑀩𑀸𑀴𑀺𑀲𑀺𑀓𑁄, 𑀯𑀸𑀓𑀭𑀺𑀓𑁄, 𑀲𑀼𑀢𑁆𑀢𑁂𑀦 𑀩𑀤𑁆𑀥𑁄 𑀲𑀼𑀢𑁆𑀢𑀺𑀓𑁄, 𑀯𑀭𑀢𑁆𑀢𑀸𑀬 𑀩𑀤𑁆𑀥𑁄 𑀯𑀸𑀭𑀢𑁆𑀢𑀺𑀓𑁄 𑀦𑀸𑀕𑁄.

𑀯𑀢𑁆𑀣𑁂𑀦 ¶ 𑀓𑀻𑀢𑀁 𑀪𑀡𑁆𑀟𑀁 𑀯𑀢𑁆𑀣𑀺𑀓𑀁. 𑀏𑀯𑀁 𑀓𑀼𑀫𑁆𑀪𑀺𑀓𑀁, 𑀨𑀸𑀮𑀺𑀓𑀁, 𑀲𑁄𑀯𑀡𑁆𑀡𑀺𑀓𑀁, 𑀲𑀸𑀢𑀺𑀓𑀁. 𑀅𑀓𑁆𑀔𑁂𑀦 𑀤𑀺𑀩𑁆𑀩𑀢𑀻𑀢𑀺 𑀅𑀓𑁆𑀔𑀺𑀓𑁄. 𑀏𑀯𑀁 𑀲𑀸𑀮𑀸𑀓𑀺𑀓𑁄, 𑀢𑀺𑀦𑁆𑀤𑀼𑀓𑀺𑀓𑁄, 𑀅𑀫𑁆𑀩𑀨𑀮𑀺𑀓𑁄. 𑀘𑀸𑀧𑁄 𑀅𑀲𑁆𑀲 𑀆𑀯𑀼𑀥𑁄𑀢𑀺 𑀘𑀸𑀧𑀺𑀓𑁄. 𑀏𑀯𑀁 𑀢𑁄𑀫𑀭𑀺𑀓𑁄, 𑀫𑀼𑀕𑁆𑀕𑀭𑀺𑀓𑁄, 𑀫𑁄𑀲𑀮𑀺𑀓𑁄.

𑀯𑀸𑀢𑁄 𑀅𑀲𑁆𑀲 𑀆𑀩𑀸𑀥𑁄𑀢𑀺 𑀯𑀸𑀢𑀺𑀓𑁄. 𑀏𑀯𑀁 𑀲𑁂𑀫𑁆𑀳𑀺𑀓𑁄, 𑀧𑀺𑀢𑁆𑀢𑀺𑀓𑁄.

𑀩𑀼𑀤𑁆𑀥𑁂 𑀧𑀲𑀦𑁆𑀦𑁄 𑀩𑀼𑀤𑁆𑀥𑀺𑀓𑁄. 𑀏𑀯𑀁 𑀥𑀫𑁆𑀫𑀺𑀓𑁄, 𑀲𑀗𑁆𑀖𑀺𑀓𑁄. 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀓𑁄 𑀩𑀼𑀤𑁆𑀥𑀺𑀓𑁄. 𑀏𑀯𑀁 𑀥𑀫𑁆𑀫𑀺𑀓𑁄, 𑀲𑀗𑁆𑀖𑀺𑀓𑁄 𑀯𑀺𑀳𑀸𑀭𑁄, 𑀲𑀗𑁆𑀖𑀺𑀓𑀸 𑀪𑀽𑀫𑀺, 𑀲𑀗𑁆𑀖𑀺𑀓𑀁 𑀘𑀻𑀯𑀭𑀁, 𑀧𑀼𑀕𑁆𑀕𑀮𑀺𑀓𑀁.

𑀓𑀼𑀫𑁆𑀪𑁄 𑀅𑀲𑁆𑀲 𑀧𑀭𑀺𑀫𑀸𑀡𑀦𑁆𑀢𑀺 𑀓𑀼𑀫𑁆𑀪𑀺𑀓𑀁. 𑀏𑀯𑀁 𑀔𑀸𑀭𑀺𑀓𑀁, 𑀤𑁄𑀡𑀺𑀓𑀁. 𑀓𑀼𑀫𑁆𑀪𑀲𑁆𑀲 𑀭𑀸𑀲𑀺 𑀓𑀼𑀫𑁆𑀪𑀺𑀓𑁄. 𑀓𑀼𑀫𑁆𑀪𑀁 𑀅𑀭𑀳𑀢𑀻𑀢𑀺 𑀓𑀼𑀫𑁆𑀪𑀺𑀓𑁄. 𑀏𑀯𑀁 𑀤𑁄𑀡𑀺𑀓𑁄, 𑀅𑀝𑁆𑀞𑀫𑀸𑀲𑀺𑀓𑁄, 𑀓𑀳𑀸𑀧𑀡𑀺𑀓𑁄, 𑀆𑀲𑀻𑀢𑀺𑀓𑀸 𑀕𑀸𑀣𑀸, 𑀦𑀸𑀯𑀼𑀢𑀺𑀓𑀸, 𑀲𑀸𑀢𑀺𑀓𑀁, 𑀲𑀸𑀳𑀲𑁆𑀲𑀺𑀓𑀁. 𑀲𑀦𑁆𑀤𑀺𑀝𑁆𑀞𑀫𑀭𑀳𑀢𑀻𑀢𑀺 𑀲𑀦𑁆𑀤𑀺𑀝𑁆𑀞𑀺𑀓𑁄, ‘‘𑀏𑀳𑀺 𑀧𑀲𑁆𑀲𑀸’’𑀢𑀺 𑀇𑀫𑀁 𑀯𑀺𑀥𑀺𑀁 𑀅𑀭𑀳𑀢𑀻𑀢𑀺 𑀏𑀳𑀺𑀧𑀲𑁆𑀲𑀺𑀓𑁄.

𑀲𑀻𑀮𑀢𑁆𑀣𑁂 𑀧𑀁𑀲𑀼𑀓𑀽𑀮𑀥𑀸𑀭𑀡𑀁 𑀧𑀁𑀲𑀼𑀓𑀽𑀮𑀁, 𑀢𑀁 𑀲𑀻𑀮𑀫𑀲𑁆𑀲𑀸𑀢𑀺 𑀧𑀁𑀲𑀼𑀓𑀽𑀮𑀺𑀓𑁄. 𑀏𑀯𑀁 𑀢𑁂𑀘𑀻𑀯𑀭𑀺𑀓𑁄, 𑀏𑀓𑀸𑀲𑀦𑁂 𑀪𑁄𑀚𑀦𑀲𑀻𑀮𑁄 𑀏𑀓𑀸𑀲𑀦𑀺𑀓𑁄, 𑀭𑀼𑀓𑁆𑀔𑀫𑀽𑀮𑁂 𑀯𑀲𑀦𑀲𑀻𑀮𑁄 𑀭𑀼𑀓𑁆𑀔𑀫𑀽𑀮𑀺𑀓𑁄, 𑀢𑀣𑀸 𑀆𑀭𑀜𑁆𑀜𑀺𑀓𑁄, 𑀲𑁄𑀲𑀸𑀦𑀺𑀓𑁄.

𑀚𑀸𑀢𑀢𑁆𑀣𑁂 𑀅𑀧𑀸𑀬𑁂 𑀚𑀸𑀢𑁄 𑀆𑀧𑀸𑀬𑀺𑀓𑁄. 𑀏𑀯𑀁 𑀦𑁂𑀭𑀬𑀺𑀓𑁄, 𑀲𑀸𑀫𑀼𑀤𑁆𑀤𑀺𑀓𑁄 𑀫𑀘𑁆𑀙𑁄, 𑀯𑀲𑁆𑀲𑁂𑀲𑀼 𑀚𑀸𑀢𑁄 𑀯𑀲𑁆𑀲𑀺𑀓𑁄, 𑀯𑀲𑁆𑀲𑀺𑀓𑀸, 𑀯𑀲𑁆𑀲𑀺𑀓𑀁 𑀧𑀼𑀧𑁆𑀨𑀁, 𑀲𑀸𑀭𑀤𑀺𑀓𑁄, 𑀳𑁂𑀫𑀦𑁆𑀢𑀺𑀓𑁄, 𑀯𑀸𑀲𑀦𑁆𑀢𑀺𑀓𑁄, 𑀘𑀸𑀢𑀼𑀤𑁆𑀤𑀲𑀺𑀓𑁄, 𑀭𑀸𑀚𑀕𑀳𑁂 𑀚𑀸𑀢𑁄, 𑀭𑀸𑀚𑀕𑀳𑁂 ¶ 𑀯𑀲𑀢𑀻𑀢𑀺 𑀯𑀸 𑀭𑀸𑀚𑀕𑀳𑀺𑀓𑁄 𑀚𑀦𑁄, 𑀫𑀕𑀥𑁂𑀲𑀼 𑀚𑀸𑀢𑁄, 𑀯𑀲𑀢𑀻𑀢𑀺 𑀯𑀸 𑀫𑀸𑀕𑀥𑀺𑀓𑁄, 𑀫𑀸𑀕𑀥𑀺𑀓𑀸, 𑀫𑀸𑀕𑀥𑀺𑀓𑀁, 𑀲𑀸𑀯𑀢𑁆𑀣𑀺𑀬𑀁 𑀚𑀸𑀢𑁄, 𑀯𑀲𑀢𑀻𑀢𑀺 𑀯𑀸 𑀲𑀸𑀯𑀢𑁆𑀣𑀺𑀓𑁄, 𑀓𑀸𑀧𑀺𑀮𑀯𑀢𑁆𑀣𑀺𑀓𑁄, 𑀯𑁂𑀲𑀸𑀮𑀺𑀓𑁄.

𑀮𑁄𑀓𑁂 𑀯𑀺𑀤𑀺𑀢𑁄 𑀮𑁄𑀓𑀺𑀓𑁄, 𑀮𑁄𑀓𑀸𑀬 𑀲𑀁𑀯𑀢𑁆𑀢𑀢𑀻𑀢𑀺𑀧𑀺 𑀮𑁄𑀓𑀺𑀓𑁄. 𑀢𑀣𑀸 𑀫𑀸𑀢𑀺𑀢𑁄 𑀆𑀕𑀢𑀁 𑀫𑀸𑀢𑀺𑀓𑀁, 𑀧𑀺𑀢𑀺𑀢𑁄 𑀆𑀕𑀢𑀁 𑀧𑁂𑀢𑁆𑀢𑀺𑀓𑀁 𑀦𑀸𑀫𑀁.

𑀲𑀫𑁆𑀪𑀽𑀢𑀢𑁆𑀣𑁂 𑀫𑀸𑀢𑀺𑀢𑁄 𑀲𑀫𑁆𑀪𑀽𑀢𑀁 𑀫𑀢𑁆𑀢𑀺𑀓𑀁. 𑀏𑀯𑀁 𑀧𑁂𑀢𑁆𑀢𑀺𑀓𑀁. 𑀉𑀧𑀥𑀺𑀢𑀲𑁆𑀲 𑀧𑀬𑁄𑀚𑀦𑀁 𑀑𑀧𑀥𑀺𑀓𑀁.

𑀲𑀓𑀢𑁆𑀣𑁂𑀧𑀺 𑀅𑀲𑀗𑁆𑀔𑀸𑀭𑁄𑀬𑁂𑀯 𑀅𑀲𑀗𑁆𑀔𑀸𑀭𑀺𑀓𑀁. 𑀏𑀯𑀁 𑀲𑀲𑀗𑁆𑀔𑀸𑀭𑀺𑀓𑀁, 𑀦𑀸𑀫𑀫𑁂𑀯 𑀦𑀸𑀫𑀺𑀓𑀁. 𑀏𑀯𑀁 𑀆𑀔𑁆𑀬𑀸𑀢𑀺𑀓𑀁, 𑀑𑀧𑀲𑀕𑁆𑀕𑀺𑀓𑀁, 𑀦𑁂𑀧𑀸𑀢𑀺𑀓𑀁, 𑀘𑀢𑀼𑀫𑀳𑀸𑀭𑀸𑀚𑁂 𑀪𑀢𑁆𑀢𑀺 𑀏𑀢𑁂𑀲𑀦𑁆𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸. 𑀏𑀯𑀁 𑀅𑀜𑁆𑀜𑀢𑁆𑀣𑁂𑀧𑀺 𑀬𑁄𑀚𑁂𑀢𑀩𑁆𑀩𑀁.

‘‘𑀓𑀲𑀸𑀯𑁂𑀦 𑀭𑀢𑁆𑀢’’𑀦𑁆𑀢𑀺 𑀯𑀺𑀕𑁆𑀕𑀳𑁂 𑁋

𑁩𑁭𑁬. 𑀡 𑀭𑀸𑀕𑀸 𑀢𑁂𑀦𑀭𑀢𑁆𑀢𑀁 𑀢𑀲𑁆𑀲𑁂𑀤𑀫𑀜𑁆𑀜𑀢𑁆𑀣𑁂𑀲𑀼 𑀘.

𑀭𑀸𑀕𑀢𑁆𑀣𑀯𑀸𑀘𑀓𑀸 𑀮𑀺𑀗𑁆𑀕𑀫𑁆𑀳𑀸 ‘‘𑀢𑁂𑀦 𑀭𑀢𑁆𑀢’’𑀫𑀺𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂, ‘‘𑀢𑀲𑁆𑀲𑁂’’𑀢𑀺 𑀙𑀝𑁆𑀞𑀺𑀬𑀦𑁆𑀢𑀢𑁄 ‘‘𑀇𑀤’’𑀫𑀺𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂 𑀘 𑀅𑀜𑁆𑀜𑀢𑁆𑀣𑁂𑀲𑀼 𑀘 𑀡𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 𑀯𑀸.

𑀓𑀸𑀲𑀸𑀯𑀁 𑀯𑀢𑁆𑀣𑀁. 𑀏𑀯𑀁 𑀓𑀸𑀲𑀸𑀬𑀁, 𑀓𑀼𑀲𑀼𑀫𑁆𑀪𑁂𑀦 𑀭𑀢𑁆𑀢𑀁 𑀓𑁄𑀲𑀼𑀫𑁆𑀪𑀁, 𑀳𑀮𑀺𑀤𑁆𑀤𑀺𑀬𑀸 𑀭𑀢𑁆𑀢𑀁 𑀳𑀸𑀮𑀺𑀤𑁆𑀤𑀁, 𑀧𑀢𑁆𑀢𑀗𑁆𑀕𑀁, 𑀫𑀜𑁆𑀚𑀺𑀝𑁆𑀞𑀁, 𑀓𑀼𑀗𑁆𑀓𑀼𑀫𑀁, 𑀦𑀻𑀮𑁂𑀦 𑀭𑀢𑁆𑀢𑀁 𑀦𑀻𑀮𑀁. 𑀏𑀯𑀁 𑀧𑀻𑀢𑀁.

𑀇𑀤𑀫𑀢𑁆𑀣𑁂 ¶ 𑀫𑀳𑀺𑀁𑀲𑀲𑁆𑀲 𑀇𑀤𑀁 𑀫𑀸𑀳𑀺𑀁𑀲𑀁 𑀫𑀁𑀲𑀁, 𑀤𑀥𑀺 𑀲𑀧𑁆𑀧𑀺 𑀘𑀫𑁆𑀫𑀸𑀤𑀺𑀓𑀁 𑀯𑀸, 𑀲𑀽𑀓𑀭𑀲𑁆𑀲 𑀇𑀤𑀁 𑀲𑀽𑀓𑀭𑀁, 𑀓𑀘𑁆𑀘𑀸𑀬𑀦𑀲𑁆𑀲 𑀇𑀤𑀁 𑀓𑀘𑁆𑀘𑀸𑀬𑀦𑀁 𑀩𑁆𑀬𑀸𑀓𑀭𑀡𑀁. 𑀏𑀯𑀁 𑀲𑁄𑀕𑀢𑀁 𑀲𑀸𑀲𑀦𑀁.

‘‘𑀇𑀲𑀺𑀲𑁆𑀲 𑀇𑀤’’𑀦𑁆𑀢𑀺 𑀅𑀢𑁆𑀣𑁂 𑀡𑀧𑁆𑀧𑀘𑁆𑀘𑀬𑁂 𑀓𑀢𑁂 𑀯𑀼𑀤𑁆𑀥𑀺𑀫𑁆𑀳𑀺 𑀲𑀫𑁆𑀧𑀢𑁆𑀢𑁂 𑁋

‘‘𑀲𑀡𑁂, 𑀬𑀽𑀦𑀫𑀸𑀕𑀫𑁄 𑀞𑀸𑀦𑁂’’𑀢𑀺 𑀘 𑀯𑀢𑁆𑀢𑀢𑁂.

𑁩𑁭𑁭. 𑀆𑀢𑁆𑀢𑀜𑁆𑀘.

𑀇 𑀉𑀇𑀘𑁆𑀘𑁂𑀢𑁂𑀲𑀁 𑀆𑀤𑀺𑀲𑀭𑀸𑀦𑀁 𑀆𑀢𑁆𑀢𑀜𑁆𑀘 𑀳𑁄𑀢𑀺 𑀲𑀡𑀓𑀸𑀭𑀧𑁆𑀧𑀘𑁆𑀘𑀬𑁂 𑀧𑀭𑁂, 𑀘𑀲𑀤𑁆𑀤𑁂𑀦 𑀭𑀺𑀓𑀸𑀭𑀸𑀕𑀫𑁄 𑀘 𑀞𑀸𑀦𑁂𑀢𑀺 𑀇𑀓𑀸𑀭𑀲𑁆𑀲 𑀆𑀢𑁆𑀢𑀁.

𑀞𑀸𑀦𑀸𑀥𑀺𑀓𑀸𑀭𑀢𑁄 𑀆𑀢𑁆𑀢𑀁, 𑀇𑀲𑀽𑀲𑀪𑀉𑀚𑀸𑀤𑀺𑀦𑀁;

𑀇𑀲𑀺𑀲𑁆𑀲 𑀢𑀼 𑀭𑀺𑀓𑀸𑀭𑀸𑀕-𑀫𑁄 𑀘𑀸𑀢𑁆𑀢𑀸𑀦𑀦𑁆𑀢𑀭𑁂 𑀪𑀯𑁂.

𑀆𑀭𑀺𑀲𑁆𑀬𑀁, 𑀉𑀲𑀪𑀲𑁆𑀲 𑀇𑀤𑀁 𑀆𑀲𑀪𑀁 𑀞𑀸𑀦𑀁, 𑀆𑀲𑀪𑀻 𑀯𑀸𑀘𑀸.

𑀅𑀜𑁆𑀜𑀢𑁆𑀣𑀕𑁆𑀕𑀳𑀡𑁂𑀦 𑀧𑀦 𑀅𑀯𑀺𑀤𑀽𑀭𑀪𑀯𑁄, 𑀢𑀢𑁆𑀭 𑀪𑀯𑁄, 𑀢𑀢𑁆𑀭 𑀚𑀸𑀢𑁄, 𑀢𑀢𑁄 𑀆𑀕𑀢𑁄, 𑀲𑁄 𑀅𑀲𑁆𑀲 𑀦𑀺𑀯𑀸𑀲𑁄, 𑀢𑀲𑁆𑀲 𑀇𑀲𑁆𑀲𑀭𑁄, 𑀓𑀢𑁆𑀢𑀺𑀓𑀸𑀤𑀻𑀳𑀺 𑀦𑀺𑀬𑀼𑀢𑁆𑀢𑁄 𑀫𑀸𑀲𑁄, 𑀲𑀸𑀲𑁆𑀲 𑀤𑁂𑀯𑀢𑀸, 𑀢𑀫𑀯𑁂𑀘𑁆𑀘𑀸𑀥𑀻𑀢𑁂, 𑀢𑀲𑁆𑀲 𑀯𑀺𑀲𑀬𑁄 𑀤𑁂𑀲𑁄, 𑀢𑀲𑁆𑀫𑀺𑀁 𑀤𑁂𑀲𑁂 𑀅𑀢𑁆𑀣𑀺, 𑀢𑁂𑀦 𑀦𑀺𑀩𑁆𑀩𑀢𑁆𑀢𑀁, 𑀢𑀁 𑀅𑀭𑀳𑀢𑀺, 𑀢𑀲𑁆𑀲 𑀯𑀺𑀓𑀸𑀭𑁄, 𑀢𑀫𑀲𑁆𑀲 𑀧𑀭𑀺𑀫𑀸𑀡𑀦𑁆𑀢𑀺 𑀇𑀘𑁆𑀘𑁂𑀯𑀫𑀸𑀤𑀻𑀲𑁆𑀯𑀢𑁆𑀣𑁂𑀲𑀼 𑀘 𑀡𑀧𑁆𑀧𑀘𑁆𑀘𑀬𑁄. 𑀬𑀣𑀸 𑁋 𑀯𑀺𑀤𑀺𑀲𑀸𑀬 𑀅𑀯𑀺𑀤𑀽𑀭𑁂 𑀪𑀯𑁄 𑀯𑁂𑀤𑀺𑀲𑁄 𑀕𑀸𑀫𑁄, 𑀉𑀤𑀼𑀫𑁆𑀩𑀭𑀲𑁆𑀲 𑀅𑀯𑀺𑀤𑀽𑀭𑁂 𑀪𑀯𑀁 𑀑𑀤𑀼𑀫𑁆𑀩𑀭𑀁 𑀯𑀺𑀫𑀸𑀦𑀁.

𑀪𑀯𑀢𑁆𑀣𑁂 𑀫𑀦𑀲𑀺 𑀪𑀯𑀁 𑀫𑀸𑀦𑀲𑀁 𑀲𑀼𑀔𑀁, 𑀲𑀸𑀕𑀫𑁄. 𑀲𑀭𑁂 𑀪𑀯𑁄 𑀲𑀸𑀭𑀲𑁄 𑀲𑀓𑀼𑀡𑁄, 𑀲𑀸𑀭𑀲𑀸 𑀲𑀓𑀼𑀡𑀻, 𑀲𑀸𑀭𑀲𑀁 𑀧𑀼𑀧𑁆𑀨𑀁 ¶ , 𑀉𑀭𑀲𑀺 𑀪𑀯𑁄 𑀑𑀭𑀲𑁄 𑀧𑀼𑀢𑁆𑀢𑁄, 𑀉𑀭𑀲𑀺 𑀲𑀁𑀯𑀟𑁆𑀠𑀺𑀢𑀢𑁆𑀢𑀸, 𑀫𑀺𑀢𑁆𑀢𑁂 𑀪𑀯𑀸 𑀫𑁂𑀢𑁆𑀢𑀸, 𑀫𑁂𑀢𑁆𑀢𑀻 𑀯𑀸, 𑀧𑀼𑀭𑁂 𑀪𑀯𑀸 𑀧𑁄𑀭𑀻 𑀯𑀸𑀘𑀸.

𑀚𑀸𑀢𑀸𑀤𑀻𑀲𑀼 𑀧𑀸𑀯𑀼𑀲𑁂 𑀚𑀸𑀢𑁄 𑀧𑀸𑀯𑀼𑀲𑁄 𑀫𑁂𑀖𑁄, 𑀧𑀸𑀯𑀼𑀲𑀸 𑀭𑀢𑁆𑀢𑀺, 𑀧𑀸𑀯𑀼𑀲𑀁 𑀅𑀩𑁆𑀪𑀁, 𑀲𑀭𑀤𑁂 𑀚𑀸𑀢𑁄 𑀲𑀸𑀭𑀤𑁄 𑀫𑀸𑀲𑁄, 𑀲𑀸𑀭𑀤𑀸 𑀭𑀢𑁆𑀢𑀺, 𑀲𑀸𑀭𑀤𑀁 𑀧𑀼𑀧𑁆𑀨𑀁. 𑀏𑀯𑀁 𑀲𑀺𑀲𑀺𑀭𑁄, 𑀳𑁂𑀫𑀦𑁆𑀢𑁄, 𑀯𑀲𑀦𑁆𑀢𑁄, 𑀯𑀺𑀫𑁆𑀳𑁄, 𑀫𑀣𑀼𑀭𑀸𑀬𑀁 𑀚𑀸𑀢𑁄 𑀫𑀸𑀣𑀼𑀭𑁄 𑀚𑀦𑁄, 𑀫𑀸𑀣𑀼𑀭𑀸 𑀕𑀡𑀺𑀓𑀸, 𑀫𑀸𑀣𑀼𑀭𑀁 𑀯𑀢𑁆𑀣𑀁. 𑀫𑀣𑀼𑀭𑀸𑀬 𑀆𑀕𑀢𑁄 𑀫𑀸𑀣𑀼𑀭𑁄, 𑀫𑀣𑀼𑀭𑀸 𑀅𑀲𑁆𑀲 𑀦𑀺𑀯𑀸𑀲𑁄𑀢𑀺 𑀫𑀸𑀣𑀼𑀭𑁄, 𑀫𑀣𑀼𑀭𑀸𑀬 𑀇𑀲𑁆𑀲𑀭𑁄 𑀫𑀸𑀣𑀼𑀭𑁄 𑀭𑀸𑀚𑀸. ‘‘𑀲𑀩𑁆𑀩𑀢𑁄 𑀓𑁄’’𑀢𑀺 𑀏𑀢𑁆𑀣 𑀧𑀼𑀦 𑀲𑀩𑁆𑀩𑀢𑁄𑀕𑁆𑀕𑀳𑀡𑁂𑀦 𑀢𑀤𑁆𑀥𑀺𑀢𑀢𑁄𑀧𑀺 𑀓𑁆𑀯𑀘𑀺 𑀲𑀲𑀭𑀓𑀓𑀸𑀭𑀸𑀕𑀫𑁄, 𑀫𑀸𑀣𑀼𑀭𑀓𑁄 𑀯𑀸, 𑀭𑀸𑀚𑀕𑀳𑁂 𑀚𑀸𑀢𑁄, 𑀭𑀸𑀚𑀕𑀳𑀸 𑀆𑀕𑀢𑁄, 𑀭𑀸𑀚𑀕𑀳𑁄 𑀅𑀲𑁆𑀲 𑀦𑀺𑀯𑀸𑀲𑁄𑀢𑀺 𑀯𑀸, 𑀭𑀸𑀚𑀕𑀳𑀲𑁆𑀲 𑀇𑀲𑁆𑀲𑀭𑁄𑀢𑀺 𑀯𑀸 𑀭𑀸𑀚𑀕𑀳𑁄, 𑀭𑀸𑀚𑀕𑀳𑀓𑁄 𑀯𑀸. 𑀏𑀯𑀁 𑀲𑀸𑀕𑀮𑁄, 𑀲𑀸𑀕𑀮𑀓𑁄 𑀯𑀸, 𑀧𑀸𑀝𑀮𑀺𑀧𑀼𑀢𑁆𑀢𑁄, 𑀧𑀸𑀝𑀮𑀺𑀧𑀼𑀢𑁆𑀢𑀓𑁄 𑀯𑀸, 𑀯𑁂𑀲𑀸𑀮𑀺𑀬𑀁 𑀚𑀸𑀢𑁄𑀢𑀺𑀆𑀤𑀺𑀅𑀢𑁆𑀣𑁂 𑀯𑁂𑀲𑀸𑀮𑁄, 𑀯𑁂𑀲𑀸𑀮𑀓𑁄 𑀯𑀸, 𑀓𑀼𑀲𑀺𑀦𑀸𑀭𑁂 𑀚𑀸𑀢𑁄 𑀓𑁄𑀲𑀺𑀦𑀸𑀭𑁄, 𑀓𑁄𑀲𑀺𑀦𑀸𑀭𑀓𑁄 𑀯𑀸. 𑀏𑀯𑀁 𑀲𑀸𑀓𑁂𑀢𑁄, 𑀲𑀸𑀓𑁂𑀢𑀓𑁄 𑀯𑀸, 𑀓𑁄𑀲𑀫𑁆𑀩𑁄, 𑀓𑁄𑀲𑀫𑁆𑀩𑀓𑁄 𑀯𑀸, 𑀇𑀦𑁆𑀤𑀧𑀢𑁆𑀢𑁄, 𑀇𑀦𑁆𑀤𑀧𑀢𑁆𑀢𑀓𑁄 𑀯𑀸, 𑀓𑀧𑀺𑀮𑁆𑀮𑁄, 𑀓𑀧𑀺𑀮𑁆𑀮𑀓𑁄 𑀯𑀸, 𑀪𑀸𑀭𑀼𑀓𑀘𑁆𑀙𑁄, 𑀪𑀸𑀭𑀼𑀓𑀘𑁆𑀙𑀓𑁄 𑀯𑀸, 𑀦𑀕𑀭𑁂 𑀚𑀸𑀢𑁄, 𑀦𑀕𑀭𑀸 𑀆𑀕𑀢𑁄, 𑀦𑀕𑀭𑁂 𑀯𑀲𑀢𑀻𑀢𑀺 𑀯𑀸 𑀦𑀸𑀕𑀭𑁄, 𑀦𑀸𑀕𑀭𑀓𑁄 𑀯𑀸. 𑀏𑀯𑀁 𑀚𑀸𑀦𑀧𑀤𑁄.

𑀚𑀦𑀧𑀤𑀦𑀸𑀫𑁂𑀲𑀼 𑀧𑀦 𑀲𑀩𑁆𑀩𑀢𑁆𑀣 𑀩𑀳𑀼𑀯𑀘𑀦𑀫𑁂𑀯 𑀪𑀯𑀢𑀺. 𑀬𑀣𑀸 𑁋 𑀅𑀗𑁆𑀕𑁂𑀲𑀼 𑀚𑀸𑀢𑁄, 𑀅𑀗𑁆𑀕𑁂𑀳𑀺 𑀆𑀕𑀢𑁄, 𑀅𑀗𑁆𑀕𑀸 𑀅𑀲𑁆𑀲 𑀦𑀺𑀯𑀸𑀲𑁄, 𑀅𑀗𑁆𑀕𑀸𑀦𑀁 𑀇𑀲𑁆𑀲𑀭𑁄 𑀯𑀸 𑀅𑀗𑁆𑀕𑁄, 𑀅𑀗𑁆𑀕𑀓𑁄 𑀯𑀸, 𑀫𑀸𑀕𑀥𑁄, 𑀫𑀸𑀕𑀥𑀓𑁄 𑀯𑀸, 𑀓𑁄𑀲𑀮𑁄, 𑀓𑁄𑀲𑀮𑀓𑁄 𑀯𑀸 ¶ , 𑀯𑁂𑀤𑁂𑀳𑁄, 𑀯𑁂𑀤𑁂𑀳𑀓𑁄 𑀯𑀸, 𑀓𑀫𑁆𑀩𑁄𑀚𑁄, 𑀓𑀫𑁆𑀩𑁄𑀚𑀓𑁄 𑀯𑀸, 𑀕𑀦𑁆𑀥𑀸𑀭𑁄, 𑀕𑀦𑁆𑀥𑀸𑀭𑀓𑁄 𑀯𑀸, 𑀲𑁄𑀯𑀻𑀭𑁄, 𑀲𑁄𑀯𑀻𑀭𑀓𑁄 𑀯𑀸, 𑀲𑀺𑀦𑁆𑀥𑀯𑁄, 𑀲𑀺𑀦𑁆𑀥𑀯𑀓𑁄 𑀯𑀸, 𑀅𑀲𑁆𑀲𑀓𑁄, 𑀓𑀸𑀮𑀺𑀗𑁆𑀕𑁄, 𑀧𑀜𑁆𑀘𑀸𑀮𑁄, 𑀲𑀓𑁆𑀓𑁄, 𑀢𑀣𑀸 𑀲𑀼𑀭𑀝𑁆𑀞𑁂 𑀚𑀸𑀢𑁄, 𑀲𑀼𑀭𑀝𑁆𑀞𑀲𑁆𑀲 𑀇𑀲𑁆𑀲𑀭𑁄 𑀯𑀸 𑀲𑁄𑀭𑀝𑁆𑀞𑁄, 𑀲𑁄𑀭𑀝𑁆𑀞𑀓𑁄 𑀯𑀸. 𑀏𑀯𑀁 𑀫𑀳𑀸𑀭𑀝𑁆𑀞𑁄, 𑀫𑀳𑀸𑀭𑀝𑁆𑀞𑀓𑁄 𑀯𑀸 𑀇𑀘𑁆𑀘𑀸𑀤𑀺.

𑀦𑀓𑁆𑀔𑀢𑁆𑀢𑀬𑁄𑀕𑁂 𑀓𑀢𑁆𑀢𑀺𑀓𑀸𑀬 𑀧𑀼𑀡𑁆𑀡𑀘𑀦𑁆𑀤𑀬𑀼𑀢𑁆𑀢𑀸𑀬 𑀬𑀼𑀢𑁆𑀢𑁄 𑀫𑀸𑀲𑁄 𑀓𑀢𑁆𑀢𑀺𑀓𑁄, 𑀫𑀕𑀲𑀺𑀭𑁂𑀦 𑀘𑀦𑁆𑀤𑀬𑀼𑀢𑁆𑀢𑁂𑀦 𑀦𑀓𑁆𑀔𑀢𑁆𑀢𑁂𑀦 𑀬𑀼𑀢𑁆𑀢𑁄 𑀫𑀸𑀲𑁄 𑀫𑀸𑀕𑀲𑀺𑀭𑁄. 𑀏𑀯𑀁 𑀨𑀼𑀲𑁆𑀲𑁂𑀦 𑀬𑀼𑀢𑁆𑀢𑁄 𑀫𑀸𑀲𑁄 𑀨𑀼𑀲𑁆𑀲𑁄, 𑀫𑀖𑀸𑀬 𑀬𑀼𑀢𑁆𑀢𑁄 𑀫𑀸𑀲𑁄 𑀫𑀸𑀖𑁄, 𑀨𑀕𑁆𑀕𑀼𑀦𑀺𑀬𑀸 𑀬𑀼𑀢𑁆𑀢𑁄 𑀫𑀸𑀲𑁄 𑀨𑀕𑁆𑀕𑀼𑀦𑁄, 𑀘𑀺𑀢𑁆𑀢𑀸𑀬 𑀬𑀼𑀢𑁆𑀢𑁄 𑀫𑀸𑀲𑁄 𑀘𑀺𑀢𑁆𑀢𑁄, 𑀯𑀺𑀲𑀸𑀔𑀸𑀬 𑀬𑀼𑀢𑁆𑀢𑁄 𑀫𑀸𑀲𑁄 𑀯𑁂𑀲𑀸𑀔𑁄, 𑀚𑁂𑀝𑁆𑀞𑀸𑀬 𑀬𑀼𑀢𑁆𑀢𑁄 𑀫𑀸𑀲𑁄 𑀚𑁂𑀝𑁆𑀞𑁄, 𑀉𑀢𑁆𑀢𑀭𑀸𑀲𑀸𑀴𑁆𑀳𑀸𑀬 𑀬𑀼𑀢𑁆𑀢𑁄 𑀫𑀸𑀲𑁄 𑀆𑀲𑀸𑀴𑁆𑀳𑁄, 𑀆𑀲𑀸𑀴𑁆𑀳𑀻 𑀯𑀸, 𑀲𑀯𑀡𑁂𑀦 𑀬𑀼𑀢𑁆𑀢𑁄 𑀫𑀸𑀲𑁄 𑀲𑀸𑀯𑀡𑁄, 𑀲𑀸𑀯𑀡𑀻. 𑀪𑀤𑁆𑀤𑁂𑀦 𑀬𑀼𑀢𑁆𑀢𑁄 𑀫𑀸𑀲𑁄 𑀪𑀤𑁆𑀤𑁄, 𑀅𑀲𑁆𑀲𑀬𑀼𑀚𑁂𑀦 𑀬𑀼𑀢𑁆𑀢𑁄 𑀫𑀸𑀲𑁄 𑀅𑀲𑁆𑀲𑀬𑀼𑀚𑁄, 𑀩𑀼𑀤𑁆𑀥𑁄 𑀅𑀲𑁆𑀲 𑀤𑁂𑀯𑀢𑀸𑀢𑀺 𑀩𑀼𑀤𑁆𑀥𑁄. 𑀏𑀯𑀁 𑀲𑁄𑀕𑀢𑁄, 𑀫𑀸𑀳𑀺𑀦𑁆𑀤𑁄, 𑀬𑀸𑀫𑁄, 𑀲𑁄𑀫𑁄.

𑀩𑁆𑀬𑀸𑀓𑀭𑀡𑀁 𑀅𑀯𑁂𑀘𑁆𑀘𑀸𑀥𑀻𑀢𑁂 𑀯𑁂𑀬𑁆𑀬𑀸𑀓𑀭𑀡𑁄. 𑀏𑀯𑀁 𑀫𑁄𑀳𑀼𑀢𑁆𑀢𑁄, 𑀦𑁂𑀫𑀺𑀢𑁆𑀢𑁄, 𑀅𑀗𑁆𑀕𑀯𑀺𑀚𑁆𑀚𑁄, 𑀯𑀢𑁆𑀣𑀼𑀯𑀺𑀚𑁆𑀚𑁄. 𑀯𑀲𑀸𑀢𑀻𑀦𑀁 𑀯𑀺𑀲𑀬𑁄 𑀤𑁂𑀲𑁄 𑀯𑀸𑀲𑀸𑀢𑁄, 𑀉𑀤𑀼𑀫𑁆𑀩𑀭𑀸 𑀅𑀲𑁆𑀫𑀺𑀁 𑀧𑀤𑁂𑀲𑁂 𑀲𑀦𑁆𑀢𑀻𑀢𑀺 𑀑𑀤𑀼𑀫𑁆𑀩𑀭𑁄 𑀤𑁂𑀲𑁄.

𑀲𑀳𑀲𑁆𑀲𑁂𑀦 𑀦𑀺𑀩𑁆𑀩𑀢𑁆𑀢𑀸 𑀲𑀸𑀳𑀲𑁆𑀲𑀻 𑀧𑀭𑀺𑀔𑀸, 𑀧𑀬𑀲𑀸 𑀦𑀺𑀩𑁆𑀩𑀢𑁆𑀢𑀁 𑀧𑀸𑀬𑀸𑀲𑀁, 𑀲𑀳𑀲𑁆𑀲𑀁 𑀅𑀭𑀳𑀢𑀻𑀢𑀺 𑀲𑀸𑀳𑀲𑁆𑀲𑀻 𑀕𑀸𑀣𑀸, 𑀅𑀬𑀲𑁄 ¶ 𑀯𑀺𑀓𑀸𑀭𑁄 𑀆𑀬𑀲𑁄. 𑀏𑀯𑀁 𑀲𑁄𑀯𑀡𑁆𑀡𑁄, 𑀧𑀼𑀭𑀺𑀲𑁄 𑀧𑀭𑀺𑀫𑀸𑀡𑀫𑀲𑁆𑀲𑀸𑀢𑀺 𑀧𑁄𑀭𑀺𑀲𑀁 𑀉𑀤𑀓𑀁.

𑀘𑀕𑁆𑀕𑀳𑀡𑁂𑀦 𑀢𑀢𑁆𑀣 𑀚𑀸𑀢𑁄, 𑀢𑀢𑁆𑀣 𑀯𑀲𑀢𑀺, 𑀢𑀲𑁆𑀲 𑀳𑀺𑀢𑀁, 𑀢𑀁 𑀅𑀭𑀳𑀢𑀻𑀢𑀺𑀆𑀤𑀻𑀲𑀼 𑀡𑁂𑀬𑁆𑀬𑀧𑁆𑀧𑀘𑁆𑀘𑀬𑁄. 𑀩𑀸𑀭𑀸𑀡𑀲𑀺𑀬𑀁 𑀚𑀸𑀢𑁄, 𑀯𑀲𑀢𑀻𑀢𑀺 𑀯𑀸 𑀩𑀸𑀭𑀸𑀡𑀲𑁂𑀬𑁆𑀬𑀓𑁄, 𑀧𑀼𑀭𑁂 𑀯𑀺𑀬 𑀓𑀓𑀸𑀭𑀸𑀕𑀫𑁄. 𑀏𑀯𑀁 𑀘𑀫𑁆𑀧𑁂𑀬𑁆𑀬𑀓𑁄, 𑀲𑀸𑀕𑀮𑁂𑀬𑁆𑀬𑀓𑁄, 𑀫𑀺𑀣𑀺𑀮𑁂𑀬𑁆𑀬𑀓𑁄 𑀚𑀦𑁄, 𑀕𑀗𑁆𑀕𑁂𑀬𑁆𑀬𑁄 𑀫𑀘𑁆𑀙𑁄, 𑀲𑀺𑀮𑀸𑀬 𑀚𑀸𑀢𑀁 𑀲𑁂𑀮𑁂𑀬𑁆𑀬𑀓𑀁, 𑀓𑀼𑀮𑁂 𑀚𑀸𑀢𑁄 𑀓𑁄𑀮𑁂𑀬𑁆𑀬𑀓𑁄 𑀲𑀼𑀦𑀔𑁄, 𑀯𑀦𑁂 𑀚𑀸𑀢𑀁 𑀯𑀸𑀦𑁂𑀬𑁆𑀬𑀁 𑀧𑀼𑀧𑁆𑀨𑀁. 𑀏𑀯𑀁 𑀧𑀩𑁆𑀩𑀢𑁂𑀬𑁆𑀬𑁄 𑀫𑀸𑀦𑀼𑀲𑁄, 𑀧𑀩𑁆𑀩𑀢𑁂𑀬𑁆𑀬𑀸 𑀦𑀤𑀻, 𑀧𑀩𑁆𑀩𑀢𑁂𑀬𑁆𑀬𑀁 𑀑𑀲𑀥𑀁, 𑀧𑀣𑀲𑁆𑀲 𑀳𑀺𑀢𑀁 𑀧𑀸𑀣𑁂𑀬𑁆𑀬𑀁, 𑀲𑀧𑀢𑀺𑀲𑁆𑀲 𑀳𑀺𑀢𑀁 𑀲𑀸𑀧𑀢𑁂𑀬𑁆𑀬𑀁 𑀥𑀦𑀁, 𑀧𑀤𑀻𑀧𑁂𑀬𑁆𑀬𑀁 𑀢𑁂𑀮𑀁, 𑀫𑀸𑀢𑀼 𑀳𑀺𑀢𑀁 𑀫𑀢𑁆𑀢𑁂𑀬𑁆𑀬𑀁. 𑀏𑀯𑀁 𑀧𑁂𑀢𑁆𑀢𑁂𑀬𑁆𑀬𑀁. 𑀤𑀓𑁆𑀔𑀺𑀡𑀫𑀭𑀳𑀢𑀻𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑁄 𑀇𑀘𑁆𑀘𑀸𑀤𑀺.

𑁩𑁭𑁮. 𑀚𑀸𑀢𑀸𑀤𑀻𑀦𑀫𑀺𑀫𑀺𑀬𑀸 𑀘.

𑀚𑀸𑀢𑀇𑀘𑁆𑀘𑁂𑀯𑀫𑀸𑀤𑀻𑀦𑀁 𑀲𑀤𑁆𑀤𑀸𑀦𑀁 𑀅𑀢𑁆𑀣𑁂 𑀇𑀫 𑀇𑀬𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀯𑀸.

𑀧𑀘𑁆𑀙𑀸 𑀚𑀸𑀢𑁄 𑀧𑀘𑁆𑀙𑀺𑀫𑁄, 𑀧𑀘𑁆𑀙𑀺𑀫𑀸 𑀚𑀦𑀢𑀸, 𑀧𑀘𑁆𑀙𑀺𑀫𑀁 𑀘𑀺𑀢𑁆𑀢𑀁, 𑀅𑀦𑁆𑀢𑁂 𑀚𑀸𑀢𑁄 𑀅𑀦𑁆𑀢𑀺𑀫𑁄, 𑀅𑀦𑁆𑀢𑀺𑀫𑀸, 𑀅𑀦𑁆𑀢𑀺𑀫𑀁. 𑀏𑀯𑀁 𑀫𑀚𑁆𑀛𑀺𑀫𑁄, 𑀧𑀼𑀭𑀺𑀫𑁄, 𑀉𑀧𑀭𑀺𑀫𑁄, 𑀳𑁂𑀝𑁆𑀞𑀺𑀫𑁄, 𑀧𑀘𑁆𑀘𑀦𑁆𑀢𑀺𑀫𑁄, 𑀕𑁄𑀧𑁆𑀨𑀺𑀫𑁄, 𑀕𑀦𑁆𑀣𑀺𑀫𑁄.

𑀢𑀣𑀸 ¶ 𑀇𑀬𑀧𑁆𑀧𑀘𑁆𑀘𑀬𑁂 𑀫𑀦𑀼𑀲𑁆𑀲𑀚𑀸𑀢𑀺𑀬𑀸 𑀚𑀸𑀢𑁄 𑀫𑀦𑀼𑀲𑁆𑀲𑀚𑀸𑀢𑀺𑀬𑁄, 𑀫𑀦𑀼𑀲𑁆𑀲𑀚𑀸𑀢𑀺𑀬𑀸, 𑀫𑀦𑀼𑀲𑁆𑀲𑀚𑀸𑀢𑀺𑀬𑀁. 𑀏𑀯𑀁 𑀅𑀲𑁆𑀲𑀚𑀸𑀢𑀺𑀬𑁄, 𑀳𑀢𑁆𑀣𑀺𑀚𑀸𑀢𑀺𑀬𑁄, 𑀩𑁄𑀥𑀺𑀲𑀢𑁆𑀢𑀚𑀸𑀢𑀺𑀬𑁄, 𑀤𑀩𑁆𑀩𑀚𑀸𑀢𑀺𑀬𑁄, 𑀲𑀫𑀸𑀦𑀚𑀸𑀢𑀺𑀬𑁄, 𑀮𑁄𑀓𑀺𑀬𑁄 𑀇𑀘𑁆𑀘𑀸𑀤𑀺.

𑀆𑀤𑀺𑀕𑁆𑀕𑀳𑀡𑁂𑀦 𑀢𑀢𑁆𑀣 𑀦𑀺𑀬𑀼𑀢𑁆𑀢𑁄, 𑀢𑀤𑀲𑁆𑀲 𑀅𑀢𑁆𑀣𑀺, 𑀢𑀢𑁆𑀣 𑀪𑀯𑁄𑀢𑀺𑀆𑀤𑀻𑀲𑁆𑀯𑀧𑀺 𑀇𑀫 𑀇𑀬𑀧𑁆𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀘𑀲𑀤𑁆𑀤𑁂𑀦 𑀇𑀓𑀧𑁆𑀧𑀘𑁆𑀘𑀬𑁄 𑀘. 𑀅𑀦𑁆𑀢𑁂 𑀦𑀺𑀬𑀼𑀢𑁆𑀢𑁄 𑀅𑀦𑁆𑀢𑀺𑀫𑁄, 𑀅𑀦𑁆𑀢𑀺𑀬𑁄, 𑀅𑀦𑁆𑀢𑀺𑀓𑁄, 𑀧𑀼𑀢𑁆𑀢𑁄 𑀅𑀲𑁆𑀲 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀯𑀸 𑀯𑀺𑀚𑁆𑀚𑀢𑀻𑀢𑀺 𑀧𑀼𑀢𑁆𑀢𑀺𑀫𑁄, 𑀧𑀼𑀢𑁆𑀢𑀺𑀬𑁄, 𑀯𑀼𑀢𑁆𑀢𑀺𑀓𑁄, 𑀓𑀧𑁆𑀧𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀓𑀧𑁆𑀧𑀺𑀬𑁄, 𑀚𑀝𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀚𑀝𑀺𑀬𑁄, 𑀳𑀸𑀦𑀪𑀸𑀕𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀳𑀸𑀦𑀪𑀸𑀕𑀺𑀬𑁄. 𑀏𑀯𑀁 𑀞𑀺𑀢𑀺𑀪𑀸𑀕𑀺𑀬𑁄, 𑀩𑁄𑀥𑀺𑀲𑁆𑀲 𑀧𑀓𑁆𑀔𑁂 𑀪𑀯𑀸 𑀩𑁄𑀥𑀺𑀧𑀓𑁆𑀔𑀺𑀬𑀸, 𑀧𑀜𑁆𑀘𑀯𑀕𑁆𑀕𑁂 𑀪𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑀸. 𑀏𑀯𑀁 𑀙𑀩𑁆𑀩𑀕𑁆𑀕𑀺𑀬𑀸, 𑀉𑀤𑀭𑀺𑀬𑀁, 𑀅𑀢𑁆𑀢𑀦𑁄 𑀇𑀤𑀦𑁆𑀢𑀺 𑀅𑀢𑁆𑀢𑀦𑀺𑀬𑀁, 𑀦𑀓𑀸𑀭𑀸𑀕𑀫𑁄.

𑀘𑀲𑀤𑁆𑀤𑀕𑁆𑀕𑀳𑀡𑁂𑀦 𑀓𑀺𑀬 𑀬𑀡𑁆𑀬𑀧𑁆𑀧𑀘𑁆𑀘𑀬𑀸 𑀘. 𑀚𑀸𑀢𑀺𑀬𑀸 𑀦𑀺𑀬𑀼𑀢𑁆𑀢𑁄 𑀚𑀸𑀢𑀺𑀓𑀺𑀬𑁄. 𑀏𑀯𑀁 𑀅𑀦𑁆𑀥𑀓𑀺𑀬𑁄, 𑀚𑀘𑁆𑀘𑀦𑁆𑀥𑁂 𑀦𑀺𑀬𑀼𑀢𑁆𑀢𑁄 𑀚𑀘𑁆𑀘𑀦𑁆𑀥𑀓𑀺𑀬𑁄. 𑀲𑀲𑁆𑀲 𑀅𑀬𑀦𑁆𑀢𑀺 𑀲𑀓𑀺𑀬𑁄. 𑀏𑀯𑀁 𑀧𑀭𑀓𑀺𑀬𑁄.

𑀬𑀧𑁆𑀧𑀘𑁆𑀘𑀬𑁄 𑀲𑀸𑀥𑀼𑀳𑀺𑀢𑀪𑀯𑀚𑀸𑀢𑀸𑀤𑀺𑀅𑀢𑁆𑀣𑁂𑀲𑀼. 𑀬𑀣𑀸 𑁋 𑀓𑀫𑁆𑀫𑀦𑀺 𑀲𑀸𑀥𑀼 𑀓𑀫𑁆𑀫𑀜𑁆𑀜𑀁. 𑀲𑀪𑀸𑀬𑀁 𑀲𑀸𑀥𑀼 𑀲𑀩𑁆𑀪𑀁, ‘‘𑀬𑀯𑀢𑀁 𑀢𑀮𑀦𑀸’’𑀤𑀺𑀦𑀸 𑀉𑀓𑀸𑀭𑀸𑀤𑀺. 𑀏𑀯𑀁 𑀫𑁂𑀥𑀸𑀬 𑀳𑀺𑀢𑀁 𑀫𑁂𑀚𑁆𑀛𑀁 𑀖𑀝𑀁. 𑀧𑀸𑀤𑀸𑀦𑀁 𑀳𑀺𑀢𑀁 𑀧𑀚𑁆𑀚𑀁 𑀢𑁂𑀮𑀁, 𑀭𑀣𑀲𑁆𑀲 𑀳𑀺𑀢𑀸 𑀭𑀘𑁆𑀙𑀸, 𑀕𑀸𑀫𑁂 𑀪𑀯𑁄 𑀕𑀫𑁆𑀫𑁄 ¶ , 𑀕𑀯𑁂 𑀪𑀯𑀁 𑀕𑀩𑁆𑀬𑀁, ‘‘𑀑𑀲𑀭𑁂 𑀘𑀸’’𑀢𑀺 𑀲𑀼𑀢𑁆𑀢𑁂 𑀘𑀲𑀤𑁆𑀤𑁂𑀦 𑀬𑀧𑁆𑀧𑀘𑁆𑀘𑀬𑁂 𑀧𑀭𑁂𑀧𑀺 𑀅𑀯𑀸𑀤𑁂𑀲𑁄. 𑀓𑀯𑀺𑀫𑁆𑀳𑀺 𑀪𑀯𑀁 𑀓𑀩𑁆𑀬𑀁, 𑀤𑀺𑀯𑀺 𑀪𑀯𑀸 𑀤𑀺𑀩𑁆𑀬𑀸, 𑀣𑀦𑀢𑁄 𑀚𑀸𑀢𑀁 𑀣𑀜𑁆𑀜𑀁, 𑀥𑀦𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀥𑀜𑁆𑀜𑀁.

𑀡𑁆𑀬𑀧𑁆𑀧𑀘𑁆𑀘𑀬𑁄 𑀧𑀭𑀺𑀲𑀸𑀬𑀁 𑀲𑀸𑀥𑀼 𑀧𑀸𑀭𑀺𑀲𑀚𑁆𑀚𑁄, 𑀤𑀓𑀸𑀭𑀸𑀕𑀫𑁄, 𑀲𑀫𑀡𑀸𑀦𑀁 𑀳𑀺𑀢𑀸 𑀲𑀸𑀫𑀜𑁆𑀜𑀸 𑀚𑀦𑀸, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀳𑀺𑀢𑀸 𑀩𑁆𑀭𑀸𑀳𑁆𑀫𑀜𑁆𑀜𑀸, 𑀅𑀭𑀽𑀧𑁂 𑀪𑀯𑀸 𑀆𑀭𑀼𑀧𑁆𑀧𑀸 𑀇𑀘𑁆𑀘𑀸𑀤𑀺.

‘‘𑀭𑀸𑀚𑀧𑀼𑀢𑁆𑀢𑀸𑀦𑀁 𑀲𑀫𑀽𑀳𑁄’’𑀢𑀺 𑀯𑀺𑀕𑁆𑀕𑀳𑁂 𑁋

𑁩𑁭𑁯. 𑀲𑀫𑀽𑀳𑀢𑁆𑀣𑁂 𑀓𑀡𑀡𑀸.

𑀙𑀝𑁆𑀞𑀺𑀬𑀦𑁆𑀢𑀢𑁄 ‘‘𑀢𑁂𑀲𑀁 𑀲𑀫𑀽𑀳𑁄’’𑀢𑀺 𑀅𑀢𑁆𑀣𑁂 𑀓𑀡𑀡𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀭𑀸𑀚𑀧𑀼𑀢𑁆𑀢𑀓𑁄, 𑀭𑀸𑀚𑀧𑀼𑀢𑁆𑀢𑀓𑀁 𑀯𑀸, 𑀭𑀸𑀚𑀧𑀼𑀢𑁆𑀢𑁄. 𑀏𑀯𑀁 𑀫𑀸𑀦𑀼𑀲𑁆𑀲𑀓𑁄, 𑀫𑀸𑀦𑀼𑀲𑁆𑀲𑁄, 𑀫𑀸𑀣𑀼𑀭𑀓𑁄, 𑀫𑀸𑀣𑀼𑀭𑁄, 𑀧𑁄𑀭𑀺𑀲𑀓𑁄, 𑀧𑁄𑀭𑀺𑀲𑁄, 𑀯𑀼𑀤𑁆𑀥𑀸𑀦𑀁 𑀲𑀫𑀽𑀳𑁄 𑀯𑀼𑀤𑁆𑀥𑀓𑁄, 𑀯𑀼𑀤𑁆𑀥𑁄. 𑀏𑀯𑀁 𑀫𑀸𑀬𑀽𑀭𑀓𑁄, 𑀫𑀸𑀬𑀽𑀭𑁄, 𑀓𑀸𑀧𑁄𑀢𑁄, 𑀓𑁄𑀓𑀺𑀮𑁄, 𑀫𑀸𑀳𑀺𑀁𑀲𑀓𑁄, 𑀫𑀸𑀳𑀺𑀁𑀲𑁄, 𑀑𑀝𑁆𑀞𑀓𑁄, 𑀑𑀭𑀩𑁆𑀪𑀓𑁄, 𑀅𑀝𑁆𑀞𑀦𑁆𑀦𑀁 𑀲𑀫𑀽𑀳𑁄 𑀅𑀝𑁆𑀞𑀓𑁄, 𑀭𑀸𑀚𑀸𑀦𑀁 𑀲𑀫𑀽𑀳𑁄 𑀭𑀸𑀚𑀓𑁄, 𑀪𑀺𑀓𑁆𑀔𑀸𑀦𑀁 𑀲𑀫𑀽𑀳𑁄 𑀪𑀺𑀓𑁆𑀔𑁄, 𑀲𑀺𑀓𑁆𑀔𑀸𑀦𑀁 𑀲𑀫𑀽𑀳𑁄 𑀲𑀺𑀓𑁆𑀔𑁄, 𑀤𑁆𑀯𑀺𑀦𑁆𑀦𑀁 𑀲𑀫𑀽𑀳𑁄 𑀤𑁆𑀯𑀬𑀁, ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀇𑀓𑀸𑀭𑀲𑁆𑀲 𑀅𑀬𑀸𑀤𑁂𑀲𑁄. 𑀏𑀯𑀁 𑀢𑀺𑀡𑁆𑀡𑀁 𑀲𑀫𑀽𑀳𑁄 𑀢𑀬𑀁 𑀇𑀘𑁆𑀘𑀸𑀤𑀺.

‘‘𑀲𑀫𑀽𑀳𑀢𑁆𑀣𑁂’’𑀢𑀺 𑀯𑀢𑁆𑀢𑀢𑁂.

𑁩𑁮𑁦. 𑀕𑀸𑀫𑀚𑀦𑀩𑀦𑁆𑀥𑀼𑀲𑀳𑀸𑀬𑀸𑀤𑀻𑀳𑀺 𑀢𑀸.

𑀕𑀸𑀫𑀚𑀦𑀩𑀦𑁆𑀥𑀼𑀲𑀳𑀸𑀬𑀇𑀘𑁆𑀘𑁂𑀯𑀫𑀸𑀤𑀻𑀳𑀺 𑀢𑀸𑀧𑀘𑁆𑀘𑀬𑁄 𑀳𑁄𑀢𑀺 𑀲𑀫𑀽𑀳𑀢𑁆𑀣𑁂. 𑀕𑀸𑀫𑀸𑀦𑀁 𑀲𑀫𑀽𑀳𑁄 𑀕𑀸𑀫𑀢𑀸. 𑀏𑀯𑀁 𑀚𑀦𑀢𑀸, 𑀩𑀦𑁆𑀥𑀼𑀢𑀸, 𑀲𑀳𑀸𑀬𑀢𑀸, 𑀦𑀸𑀕𑀭𑀢𑀸. ‘‘𑀢𑀸’’𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀲𑀓𑀢𑁆𑀣𑁂𑀧𑀺 𑀤𑁂𑀯𑁄𑀬𑁂𑀯 𑀤𑁂𑀯𑀢𑀸, 𑀢𑀸𑀧𑀘𑁆𑀘𑀬𑀦𑁆𑀢𑀲𑁆𑀲 𑀦𑀺𑀘𑁆𑀘𑀫𑀺𑀢𑁆𑀣𑀺𑀮𑀺𑀗𑁆𑀕𑀢𑀸.

𑁩𑁮𑁧. 𑀢𑀤𑀲𑁆𑀲 𑀞𑀸𑀦𑀫𑀺𑀬𑁄 𑀘.

‘‘𑀢𑀤𑀲𑁆𑀲 𑀞𑀸𑀦’’𑀫𑀺𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂 𑀙𑀝𑁆𑀞𑀺𑀬𑀦𑁆𑀢𑀢𑁄 𑀇𑀬𑀧𑁆𑀧𑀘𑁆𑀘𑀬𑁄 𑀳𑁄𑀢𑀺. 𑀫𑀤𑀦𑀲𑁆𑀲 𑀞𑀸𑀦𑀁 𑀫𑀤𑀦𑀺𑀬𑁄, 𑀫𑀤𑀦𑀺𑀬𑀸, 𑀫𑀤𑀦𑀺𑀬𑀁, 𑀩𑀦𑁆𑀥𑀦𑀲𑁆𑀲 𑀞𑀸𑀦𑀁 𑀩𑀦𑁆𑀥𑀦𑀺𑀬𑀁. 𑀏𑀯𑀁 𑀫𑀼𑀘𑁆𑀙𑀦𑀺𑀬𑀁. 𑀭𑀚𑀦𑀺𑀬𑀁, 𑀕𑀫𑀦𑀺𑀬𑀁, 𑀤𑀲𑁆𑀲𑀦𑀺𑀬𑀁, 𑀉𑀧𑀸𑀤𑀸𑀦𑀺𑀬𑀁, 𑀧𑀲𑀸𑀤𑀦𑀺𑀬𑀁. 𑀘𑀲𑀤𑁆𑀤𑁂𑀦 𑀳𑀺𑀢𑀸𑀤𑀺𑀅𑀢𑁆𑀣𑁂𑀧𑀺 𑀉𑀧𑀸𑀤𑀸𑀦𑀸𑀦𑀁 𑀳𑀺𑀢𑀸 𑀉𑀧𑀸𑀤𑀸𑀦𑀺𑀬𑀸 𑀇𑀘𑁆𑀘𑀸𑀤𑀺.

𑁩𑁮𑁨. 𑀉𑀧𑀫𑀢𑁆𑀣𑀸𑀬𑀺𑀢𑀢𑁆𑀢𑀁.

𑀉𑀧𑀫𑀢𑁆𑀣𑁂 𑀉𑀧𑀫𑀸𑀯𑀸𑀘𑀺𑀮𑀺𑀗𑁆𑀕𑀢𑁄 𑀆𑀬𑀺𑀢𑀢𑁆𑀢𑀧𑁆𑀧𑀘𑁆𑀘𑀬𑁄 𑀳𑁄𑀢𑀺. 𑀥𑀽𑀫𑁄 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺 𑀥𑀽𑀫𑀸𑀬𑀺𑀢𑀢𑁆𑀢𑀁. 𑀏𑀯𑀁 𑀢𑀺𑀫𑀺𑀭𑀸𑀬𑀺𑀢𑀢𑁆𑀢𑀁.

‘‘𑀢𑀤𑀲𑁆𑀲 𑀞𑀸𑀦’’𑀦𑁆𑀢𑀺 𑀯𑀢𑁆𑀢𑀢𑁂.

𑁩𑁮𑁩. 𑀢𑀦𑁆𑀦𑀺𑀲𑁆𑀲𑀺𑀢𑀢𑁆𑀣𑁂 𑀮𑁄.

‘‘𑀢𑀦𑁆𑀦𑀺𑀲𑁆𑀲𑀺𑀢’’𑀦𑁆𑀢𑀺 𑀅𑀢𑁆𑀣𑁂, ‘‘𑀢𑀤𑀲𑁆𑀲𑀞𑀸𑀦’’𑀦𑁆𑀢𑀺 𑀅𑀢𑁆𑀣𑁂 𑀘 𑀮𑀧𑁆𑀧𑀘𑁆𑀘𑀬𑁄 𑀳𑁄𑀢𑀺. 𑀤𑀼𑀝𑁆𑀞𑀼 𑀦𑀺𑀲𑁆𑀲𑀺𑀢𑀁, 𑀤𑀼𑀝𑁆𑀞𑀼 𑀞𑀸𑀦𑀁 𑀯𑀸 𑀤𑀼𑀝𑁆𑀞𑀼𑀮𑁆𑀮𑀁, 𑀤𑀼𑀝𑁆𑀞𑀼𑀮𑁆𑀮𑀸 𑀯𑀸𑀘𑀸, 𑀮𑀲𑁆𑀲 𑀤𑁆𑀯𑀺𑀪𑀸𑀯𑁄. 𑀏𑀯𑀁 𑀯𑁂𑀤𑀮𑁆𑀮𑀁.

‘‘𑀅𑀪𑀺𑀚𑁆𑀛𑀸 ¶ 𑀅𑀲𑁆𑀲 𑀧𑀓𑀢𑀺, 𑀅𑀪𑀺𑀚𑁆𑀛𑀸 𑀅𑀲𑁆𑀲 𑀩𑀳𑀼𑀮𑀸’’𑀢𑀺 𑀯𑀸 𑀯𑀺𑀕𑁆𑀕𑀳𑁂 𑁋

𑁩𑁮𑁪. 𑀆𑀮𑀼 𑀢𑀩𑁆𑀩𑀳𑀼𑀮𑁂.

𑀧𑀞𑀫𑀸𑀯𑀺𑀪𑀢𑁆𑀬𑀦𑁆𑀢𑀢𑁄 𑀆𑀮𑀼𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 ‘‘𑀢𑀤𑀲𑁆𑀲 𑀩𑀳𑀼𑀮’’𑀫𑀺𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂. 𑀅𑀪𑀺𑀚𑁆𑀛𑀸𑀮𑀼, 𑀅𑀪𑀺𑀚𑁆𑀛𑀸𑀮𑀽, 𑀅𑀪𑀺𑀚𑁆𑀛𑀸𑀮𑀯𑁄. 𑀏𑀯𑀁 𑀲𑀻𑀢𑀸𑀮𑀼, 𑀥𑀚𑀸𑀮𑀼, 𑀤𑀬𑀸𑀮𑀼. ‘‘𑀲𑀩𑁆𑀩𑀢𑁄 𑀓𑁄’’𑀢𑀺 𑀏𑀢𑁆𑀣 𑀧𑀼𑀦 𑀲𑀩𑁆𑀩𑀢𑁄𑀕𑁆𑀕𑀳𑀡𑁂𑀦 𑀓𑀓𑀸𑀭𑀸𑀕𑀫𑁄, 𑀅𑀪𑀺𑀚𑁆𑀛𑀸𑀮𑀼𑀓𑁄, 𑀅𑀪𑀺𑀚𑁆𑀛𑀸𑀮𑀼𑀓𑀸, 𑀅𑀪𑀺𑀚𑁆𑀛𑀸𑀮𑀼𑀓𑀁. 𑀏𑀯𑀁 𑀲𑀻𑀢𑀸𑀮𑀼𑀓𑁄, 𑀤𑀬𑀸𑀮𑀼𑀓𑁄, 𑀢𑀣𑀸 𑀳𑀻𑀦𑁄𑀯 𑀳𑀻𑀦𑀓𑁄. 𑀏𑀯𑀁 𑀧𑁄𑀢𑀓𑁄, 𑀓𑀼𑀫𑀸𑀭𑀓𑁄, 𑀫𑀸𑀡𑀯𑀓𑁄, 𑀫𑀼𑀤𑀼𑀓𑁄, 𑀉𑀚𑀼𑀓𑁄, 𑀅𑀧𑁆𑀧𑀫𑀢𑁆𑀢𑀓𑀁, 𑀑𑀭𑀫𑀢𑁆𑀢𑀓𑀁, 𑀲𑀻𑀮𑀫𑀢𑁆𑀢𑀓𑀁 𑀇𑀘𑁆𑀘𑀸𑀤𑀺.

‘‘𑀬𑀤𑀦𑀼𑀧𑀧𑀦𑁆𑀦𑀸 𑀦𑀺𑀧𑀸𑀢𑀦𑀸 𑀲𑀺𑀚𑁆𑀛𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀧𑀝𑀺𑀪𑀸𑀕𑀓𑀼𑀘𑁆𑀙𑀺𑀢𑀲𑀜𑁆𑀜𑀸𑀦𑀼𑀓𑀫𑁆𑀧𑀸𑀤𑀺𑀅𑀢𑁆𑀣𑁂𑀲𑀼 𑀓𑀧𑁆𑀧𑀘𑁆𑀘𑀬𑁄. 𑀧𑀝𑀺𑀪𑀸𑀕𑀢𑁆𑀣𑁂 𑀳𑀢𑁆𑀣𑀺𑀦𑁄 𑀇𑀯 𑀳𑀢𑁆𑀣𑀺𑀓𑀸. 𑀏𑀯𑀁 𑀅𑀲𑁆𑀲𑀓𑀸. 𑀓𑀼𑀘𑁆𑀙𑀺𑀢𑀢𑁆𑀣𑁂 𑀓𑀼𑀘𑁆𑀙𑀺𑀢𑁄 𑀲𑀫𑀡𑁄 𑀲𑀫𑀡𑀓𑁄. 𑀏𑀯𑀁 𑀩𑁆𑀭𑀸𑀳𑁆𑀫𑀡𑀓𑁄, 𑀫𑀼𑀡𑁆𑀟𑀓𑁄, 𑀧𑀡𑁆𑀟𑀺𑀢𑀓𑁄, 𑀯𑁂𑀬𑁆𑀬𑀸𑀓𑀭𑀡𑀓𑁄. 𑀲𑀜𑁆𑀜𑀸𑀬𑀁 𑀓𑀢𑀓𑁄, 𑀪𑀝𑀓𑁄. 𑀅𑀦𑀼𑀓𑀫𑁆𑀧𑀸𑀬𑀁 𑀧𑀼𑀢𑁆𑀢𑀓𑁄.

𑀢𑀣𑀸 𑀓𑀺𑀁𑀬𑀢𑁂𑀢𑀢𑁄 𑀧𑀭𑀺𑀫𑀸𑀡𑀢𑁆𑀣𑁂 𑀢𑁆𑀢𑀓𑀯𑀦𑁆𑀢𑀼𑀧𑁆𑀧𑀘𑁆𑀘𑀬𑀸. 𑀓𑀺𑀁 𑀧𑀭𑀺𑀫𑀸𑀡𑀫𑀲𑁆𑀲𑀸𑀢𑀺 𑀓𑀺𑀢𑁆𑀢𑀓𑀁. 𑀏𑀯𑀁 𑀬𑀢𑁆𑀢𑀓𑀁, 𑀢𑀢𑁆𑀢𑀓𑀁, 𑀏𑀢𑁆𑀢𑀓𑀁. 𑀯𑀦𑁆𑀢𑀼𑀫𑁆𑀳𑀺 𑀆𑀢𑁆𑀢𑀜𑁆𑀘, 𑀬𑀁 𑀧𑀭𑀺𑀫𑀸𑀡𑀫𑀲𑁆𑀲𑀸𑀢𑀺 𑀬𑀸𑀯𑀸, 𑀬𑀸𑀯𑀦𑁆𑀢𑁄 ¶ , 𑀕𑀼𑀡𑀯𑀦𑁆𑀢𑀼𑀲𑀫𑀁. 𑀏𑀯𑀁 𑀢𑀸𑀯𑀸, 𑀢𑀸𑀯𑀦𑁆𑀢𑁄. 𑀏𑀢𑀸𑀯𑀸, 𑀏𑀢𑀸𑀯𑀦𑁆𑀢𑁄 𑀇𑀘𑁆𑀘𑀸𑀤𑀺.

‘‘𑀲𑀼𑀯𑀡𑁆𑀡𑁂𑀦 𑀧𑀓𑀢’’𑀦𑁆𑀢𑀺 𑀯𑀺𑀕𑁆𑀕𑀳𑁂 𑁋

𑁩𑁮𑁫. 𑀢𑀧𑁆𑀧𑀓𑀢𑀺𑀯𑀘𑀦𑁂 𑀫𑀬𑁄.

𑀢𑀧𑁆𑀧𑀓𑀢𑀺𑀯𑀘𑀦𑀢𑁆𑀣𑁂 𑀫𑀬𑀧𑁆𑀧𑀘𑁆𑀘𑀬𑁄 𑀳𑁄𑀢𑀺, 𑀧𑀓𑀭𑀻𑀬𑀢𑀻𑀢𑀺 𑀧𑀓𑀢𑀺, 𑀢𑁂𑀦 𑀧𑀓𑀢𑀺 𑀢𑀧𑁆𑀧𑀓𑀢𑀺, 𑀢𑀧𑁆𑀧𑀓𑀢𑀺𑀬𑀸 𑀯𑀘𑀦𑀁 𑀓𑀣𑀦𑀁 𑀢𑀧𑁆𑀧𑀓𑀢𑀺𑀯𑀘𑀦𑀁. 𑀲𑀼𑀯𑀡𑁆𑀡𑀫𑀬𑁄 𑀭𑀣𑁄, 𑀲𑁄𑀯𑀡𑁆𑀡𑀫𑀬𑁄 𑀯𑀸, 𑀲𑀼𑀯𑀡𑁆𑀡𑀫𑀬𑀸 𑀪𑀸𑀚𑀦𑀯𑀺𑀓𑀢𑀺, 𑀲𑀼𑀯𑀡𑁆𑀡𑀫𑀬𑀁 𑀪𑀸𑀚𑀦𑀁. 𑀏𑀯𑀁 𑀭𑀽𑀧𑀺𑀬𑀫𑀬𑀁, 𑀭𑀚𑀢𑀫𑀬𑀁, 𑀚𑀢𑀼𑀫𑀬𑀁, 𑀤𑀸𑀭𑀼𑀫𑀬𑀁, 𑀫𑀢𑁆𑀢𑀺𑀓𑀸𑀫𑀬𑀁, 𑀇𑀤𑁆𑀥𑀺𑀬𑀸 𑀦𑀺𑀩𑁆𑀩𑀢𑁆𑀢𑀁 𑀇𑀤𑁆𑀥𑀺𑀫𑀬𑀁.

𑀫𑀦𑀢𑁄 𑀦𑀺𑀧𑁆𑀨𑀦𑁆𑀦𑀸 𑀫𑀦𑁄𑀫𑀬𑀸, 𑀅𑀬𑀲𑀸𑀧𑀓𑀢𑀁 𑀅𑀬𑁄𑀫𑀬𑀁. 𑀏𑀢𑁆𑀣 𑀘 ‘‘𑀫𑀦𑁄𑀕𑀡𑀸𑀤𑀻𑀦’’𑀦𑁆𑀢𑀺 𑀯𑀢𑁆𑀢𑀫𑀸𑀦𑁂 𑁋

𑁩𑁮𑁬. 𑀏𑀢𑁂𑀲𑀫𑁄 𑀮𑁄𑀧𑁂.

𑀏𑀢𑁂𑀲𑀁 𑀫𑀦𑁄𑀕𑀡𑀸𑀤𑀻𑀦𑀁 𑀅𑀦𑁆𑀢𑁄 𑀑𑀢𑁆𑀢𑀫𑀸𑀧𑀚𑁆𑀚𑀢𑁂 𑀯𑀺𑀪𑀢𑁆𑀢𑀺𑀮𑁄𑀧𑁂 𑀓𑀢𑁂𑀢𑀺 𑀑𑀓𑀸𑀭𑁄.

𑀕𑀯𑁂𑀦 𑀧𑀓𑀢𑀁 𑀓𑀭𑀻𑀲𑀁, 𑀕𑁄𑀢𑁄 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀯𑀸 𑀕𑁄𑀫𑀬𑀁. ‘‘𑀫𑀬𑁄’’𑀢𑀺𑀬𑁄𑀕𑀯𑀺𑀪𑀸𑀕𑁂𑀦 𑀲𑀓𑀢𑁆𑀣𑁂𑀧𑀺 𑀤𑀸𑀦𑀫𑁂𑀯 𑀤𑀸𑀦𑀫𑀬𑀁, 𑀲𑀻𑀮𑀫𑀬𑀁 𑀇𑀘𑁆𑀘𑀸𑀤𑀺.

𑀲𑀁𑀲𑀝𑁆𑀞𑀸𑀤𑀺𑀅𑀦𑁂𑀓𑀢𑁆𑀣𑀢𑀤𑁆𑀥𑀺𑀢𑀁.

𑀪𑀸𑀯𑀢𑀤𑁆𑀥𑀺𑀢

‘‘𑀅𑀮𑀲𑀲𑁆𑀲 ¶ 𑀪𑀸𑀯𑁄’’𑀢𑀺 𑀯𑀺𑀕𑁆𑀕𑀳𑁂 𑁋

𑁩𑁮𑁭. 𑀡𑁆𑀬𑀢𑁆𑀢𑀢𑀸 𑀪𑀸𑀯𑁂 𑀢𑀼.

𑀙𑀝𑁆𑀞𑀺𑀬𑀦𑁆𑀢𑀢𑁄 𑀡𑁆𑀬𑀢𑁆𑀢𑀢𑀸𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 ‘‘𑀢𑀲𑁆𑀲 𑀪𑀸𑀯𑁄’’ 𑀇𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂, 𑀢𑀼𑀲𑀤𑁆𑀤𑀕𑁆𑀕𑀳𑀡𑁂𑀦 𑀢𑁆𑀢𑀦𑀡𑁂𑀬𑁆𑀬𑀸𑀤𑀺𑀧𑁆𑀧𑀘𑁆𑀘𑀬𑀸 𑀘. 𑀪𑀯𑀦𑁆𑀢𑀺 𑀏𑀢𑀲𑁆𑀫𑀸 𑀩𑀼𑀤𑁆𑀥𑀺𑀲𑀤𑁆𑀤𑀸 𑀇𑀢𑀺 𑀪𑀸𑀯𑁄, 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀯𑀼𑀘𑁆𑀘𑀢𑀺, 𑀯𑀼𑀢𑁆𑀢𑀜𑁆𑀘 𑁋 ‘‘𑀬𑀲𑁆𑀲 𑀕𑀼𑀡𑀲𑁆𑀲 𑀳𑀺 𑀪𑀸𑀯𑀸 𑀤𑀩𑁆𑀩𑁂 𑀲𑀤𑁆𑀤𑀦𑀺𑀯𑁂𑀲𑁄 𑀢𑀤𑀪𑀺𑀥𑀸𑀦𑁂𑀡𑁆𑀬𑀢𑁆𑀢𑀢𑀸𑀤𑀬𑁄’’𑀢𑀺. 𑀡𑁆𑀬𑀢𑁆𑀢𑀢𑁆𑀢𑀦𑀦𑁆𑀢𑀸𑀦𑀁 𑀦𑀺𑀘𑁆𑀘𑀁 𑀦𑀧𑀼𑀁𑀲𑀓𑀢𑁆𑀢𑀁, 𑀢𑀸𑀧𑀘𑁆𑀘𑀬𑀦𑁆𑀢𑀲𑁆𑀲 𑀲𑀪𑀸𑀯𑀢𑁄 𑀦𑀺𑀘𑁆𑀘𑀫𑀺𑀢𑁆𑀣𑀺𑀮𑀺𑀗𑁆𑀕𑀢𑀸. 𑀡𑁆𑀬𑀧𑁆𑀧𑀘𑁆𑀘𑀬𑁄𑀬𑀁 𑀕𑀼𑀡𑀯𑀘𑀦𑁂 𑀩𑁆𑀭𑀸𑀳𑁆𑀫𑀡𑀸𑀤𑀻𑀳𑀺, 𑀢𑀢𑁆𑀣 ‘‘𑀅𑀯𑀡𑁆𑀡𑁄 𑀬𑁂 𑀮𑁄𑀧𑀜𑁆𑀘𑀸’’𑀢𑀺 𑀅𑀯𑀡𑁆𑀡𑀮𑁄𑀧𑁄, 𑀆𑀤𑀺𑀯𑀼𑀤𑁆𑀥𑀺.

𑀆𑀮𑀲𑁆𑀬𑀁. 𑀏𑀯𑀁 𑀆𑀭𑁄𑀕𑁆𑀬𑀁, 𑀉𑀤𑀕𑁆𑀕𑀲𑁆𑀲 𑀪𑀸𑀯𑁄 𑀑𑀤𑀕𑁆𑀬𑀁, 𑀲𑀔𑀺𑀦𑁄 𑀪𑀸𑀯𑁄 𑀲𑀔𑁆𑀬𑀁, 𑀅𑀡𑀡𑀲𑁆𑀲 𑀪𑀸𑀯𑁄 𑀆𑀡𑀡𑁆𑀬𑀁, 𑀯𑀺𑀥𑀯𑀸𑀬 𑀪𑀸𑀯𑁄 𑀯𑁂𑀥𑀩𑁆𑀬𑀁, 𑀤𑀼𑀩𑁆𑀩𑀮𑀲𑁆𑀲 𑀪𑀸𑀯𑁄 𑀤𑀼𑀩𑁆𑀩𑀮𑁆𑀬𑀁, 𑀘𑀧𑀮𑀲𑁆𑀲 𑀪𑀸𑀯𑁄 𑀘𑀸𑀧𑀮𑁆𑀬𑀁.

𑀯𑀺𑀬𑀢𑁆𑀢𑀲𑁆𑀲 𑀪𑀸𑀯𑁄 𑀯𑁂𑀬𑁆𑀬𑀢𑁆𑀢𑀺𑀬𑀁, 𑀫𑀘𑁆𑀙𑀭𑀲𑁆𑀲 𑀪𑀸𑀯𑁄 𑀫𑀘𑁆𑀙𑀭𑀺𑀬𑀁. 𑀏𑀯𑀁 𑀇𑀲𑁆𑀲𑀭𑀺𑀬𑀁, 𑀆𑀮𑀲𑀺𑀬𑀁, 𑀫𑀼𑀡𑁆𑀟𑀺𑀬𑀁, 𑀫𑀽𑀴𑁆𑀳𑀺𑀬𑀁. 𑀏𑀢𑁆𑀣 ‘‘𑀯𑁂𑀬𑁆𑀬𑀢𑁆𑀢𑀺𑀬’’𑀦𑁆𑀢𑀺𑀆𑀤𑀻𑀲𑀼 ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀬𑀫𑁆𑀳𑀺 𑀇𑀓𑀸𑀭𑀸𑀕𑀫𑁄.

‘‘𑀧𑀡𑁆𑀟𑀺𑀢𑀲𑁆𑀲 𑀪𑀸𑀯𑁄 𑀧𑀡𑁆𑀟𑀺𑀢𑁆𑀬’’𑀦𑁆𑀢𑀺𑀆𑀤𑀻𑀲𑀼 ‘‘𑀬𑀯𑀢𑀁 𑀢𑀮𑀦𑀤𑀓𑀸𑀭𑀸𑀦𑀁 𑀩𑁆𑀬𑀜𑁆𑀚𑀦𑀸𑀦𑀺 𑀘𑀮𑀜𑀚𑀓𑀸𑀭𑀢𑁆𑀢’’𑀦𑁆𑀢𑀺 𑀢𑁆𑀬𑀓𑀸𑀭𑀲𑀁𑀬𑁄𑀕𑀸𑀤𑀻𑀦𑀁 𑀘𑀮𑀜𑀚𑀓𑀸𑀭𑀸𑀤𑁂𑀲𑀸 ¶ , 𑀤𑁆𑀯𑀺𑀢𑁆𑀢𑀁. 𑀧𑀡𑁆𑀟𑀺𑀘𑁆𑀘𑀁, 𑀩𑀳𑀼𑀲𑁆𑀲𑀼𑀢𑀲𑁆𑀲 𑀪𑀸𑀯𑁄 𑀩𑀸𑀳𑀼𑀲𑁆𑀲𑀘𑁆𑀘𑀁, ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀉𑀓𑀸𑀭𑀲𑁆𑀲 𑀅𑀓𑀸𑀭𑁄, 𑀏𑀯𑀁 𑀧𑁄𑀭𑁄𑀳𑀺𑀘𑁆𑀘𑀁, 𑀅𑀥𑀺𑀧𑀢𑀺𑀲𑁆𑀲 𑀪𑀸𑀯𑁄 𑀆𑀥𑀺𑀧𑀘𑁆𑀘𑀁, 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲 𑀪𑀸𑀯𑁄 𑀫𑀼𑀝𑁆𑀞𑀲𑁆𑀲𑀘𑁆𑀘𑀁, 𑀇𑀯𑀡𑁆𑀡𑀮𑁄𑀧𑁄. 𑀓𑀼𑀲𑀮𑀲𑁆𑀲 𑀪𑀸𑀯𑁄 𑀓𑁄𑀲𑀮𑁆𑀮𑀁. 𑀏𑀯𑀁 𑀯𑁂𑀧𑀼𑀮𑁆𑀮𑀁, 𑀲𑀫𑀸𑀦𑀸𑀦𑀁 𑀪𑀸𑀯𑁄 𑀲𑀸𑀫𑀜𑁆𑀜𑀁, 𑀕𑀺𑀮𑀸𑀦𑀲𑁆𑀲 𑀪𑀸𑀯𑁄 𑀕𑁂𑀮𑀜𑁆𑀜𑀁, ‘‘𑀓𑁆𑀯𑀘𑀸𑀤𑀺𑀫𑀚𑁆𑀛𑀼𑀢𑁆𑀢𑀭𑀸’’𑀤𑀺𑀲𑀼𑀢𑁆𑀢𑁂𑀦 𑀲𑀁𑀬𑁄𑀕𑁂 𑀧𑀭𑁂 𑀭𑀲𑁆𑀲𑀢𑁆𑀢𑀁.

𑀲𑀼𑀳𑀤𑀲𑁆𑀲 𑀪𑀸𑀯𑁄𑀲𑁄𑀳𑀚𑁆𑀚𑀁. 𑀏𑀯𑀁 𑀯𑁂𑀲𑀸𑀭𑀚𑁆𑀚𑀁, 𑀓𑀼𑀲𑀻𑀤𑀲𑁆𑀲𑀪𑀸𑀯𑁄𑀓𑁄𑀲𑀚𑁆𑀚𑀁, ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀈𑀓𑀸𑀭𑀲𑁆𑀲 𑀅𑀓𑀸𑀭𑁄. 𑀢𑀣𑀸 ‘‘𑀧𑀼𑀭𑀺𑀲𑀲𑁆𑀲 𑀪𑀸𑀯𑁄 𑀧𑁄𑀭𑀺𑀲’’𑀦𑁆𑀢𑀺𑀆𑀤𑀻𑀲𑀼 ‘‘𑀬𑀯𑀢𑀁 𑀢𑀮𑀦𑀸’’𑀤𑀺𑀲𑀼𑀢𑁆𑀢𑁂 𑀓𑀸𑀭𑀕𑁆𑀕𑀳𑀡𑁂𑀦 𑀬𑀯𑀢𑀁 𑀲𑀓𑀸𑀭𑀓𑀘𑀝𑀧𑀯𑀕𑁆𑀕𑀸𑀦𑀁 𑀲𑀓𑀸𑀭𑀓𑀘𑀝𑀧𑀯𑀕𑁆𑀕𑀸𑀤𑁂𑀲𑀸. 𑀲𑀼𑀫𑀦𑀲𑁆𑀲 𑀪𑀸𑀯𑁄 𑀲𑁄𑀫𑀦𑀲𑁆𑀲𑀁. 𑀏𑀯𑀁 𑀤𑁄𑀫𑀦𑀲𑁆𑀲𑀁, 𑀲𑁄𑀯𑀘𑀲𑁆𑀲𑀁, 𑀤𑁄𑀯𑀘𑀲𑁆𑀲𑀁, 𑀏𑀢𑁆𑀣 𑀲𑀓𑀸𑀭𑀸𑀕𑀫𑁄. 𑀢𑀣𑀸 𑀦𑀺𑀧𑀓𑀲𑁆𑀲 𑀪𑀸𑀯𑁄 𑀦𑁂𑀧𑀓𑁆𑀓𑀁, 𑀤𑁆𑀯𑀺𑀢𑁆𑀢𑀁. 𑀏𑀯𑀁 𑀆𑀥𑀺𑀓𑁆𑀓𑀁, 𑀤𑀼𑀪𑀕𑀲𑁆𑀲 𑀪𑀸𑀯𑁄 𑀤𑁄𑀪𑀕𑁆𑀕𑀁, 𑀯𑀸𑀡𑀺𑀚𑀲𑁆𑀲 𑀪𑀸𑀯𑁄 𑀯𑀸𑀡𑀺𑀚𑁆𑀚𑀁, 𑀭𑀸𑀚𑀺𑀦𑁄 𑀪𑀸𑀯𑁄 𑀭𑀚𑁆𑀚𑀁, ‘‘𑀓𑁆𑀯𑀘𑀸’’𑀤𑀺𑀦𑀸 𑀭𑀲𑁆𑀲𑀢𑁆𑀢𑀁. 𑀲𑀭𑀽𑀧𑀲𑁆𑀲 𑀪𑀸𑀯𑁄 𑀲𑀸𑀭𑀼𑀧𑁆𑀧𑀁. 𑀏𑀯𑀁 𑀑𑀧𑀫𑁆𑀫𑀁, 𑀲𑁄𑀔𑀼𑀫𑁆𑀫𑀁.

𑀢𑀣𑀲𑁆𑀲 𑀪𑀸𑀯𑁄 𑀢𑀘𑁆𑀙𑀁, 𑀤𑀼𑀫𑁆𑀫𑁂𑀥𑀲𑁆𑀲 𑀪𑀸𑀯𑁄 𑀤𑀼𑀫𑁆𑀫𑁂𑀚𑁆𑀛𑀁, 𑀲𑀫𑀡𑀲𑁆𑀲 𑀪𑀸𑀯𑁄 𑀲𑀸𑀫𑀜𑁆𑀜𑀁. 𑀏𑀯𑀁 𑀩𑁆𑀭𑀸𑀳𑁆𑀫𑀜𑁆𑀜𑀁, 𑀦𑀺𑀧𑀼𑀡𑀲𑁆𑀲 𑀪𑀸𑀯𑁄 𑀦𑁂𑀧𑀼𑀜𑁆𑀜𑀁. ‘‘𑀢𑀘𑁆𑀙’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀓𑀸𑀭𑀕𑁆𑀕𑀳𑀡𑁂𑀦𑁂𑀯 𑀬𑀯𑀢𑀁 𑀣𑀥𑀡𑀓𑀸𑀭𑀸𑀦𑀁 𑀙𑀛𑀜𑀓𑀸𑀭𑀸𑀤𑁂𑀲𑀸.

𑀢𑁆𑀢𑀢𑀸𑀧𑀘𑁆𑀘𑀬𑁂𑀲𑀼 ¶ 𑁋 𑀧𑀁𑀲𑀼𑀓𑀽𑀮𑀺𑀓𑀲𑁆𑀲 𑀪𑀸𑀯𑁄 𑀧𑀁𑀲𑀼𑀓𑀽𑀮𑀺𑀓𑀢𑁆𑀢𑀁, 𑀧𑀁𑀲𑀼𑀓𑀽𑀮𑀺𑀓𑀢𑀸. 𑀏𑀯𑀁 𑀢𑁂𑀘𑀻𑀯𑀭𑀺𑀓𑀢𑁆𑀢𑀁, 𑀢𑁂𑀘𑀻𑀯𑀭𑀺𑀓𑀢𑀸, 𑀑𑀤𑀭𑀺𑀓𑀢𑁆𑀢𑀁, 𑀑𑀤𑀭𑀺𑀓𑀢𑀸, 𑀫𑀦𑀼𑀲𑁆𑀲𑀢𑁆𑀢𑀁, 𑀫𑀦𑀼𑀲𑁆𑀲𑀢𑀸 𑀚𑀸𑀢𑀺, 𑀦𑀻𑀮𑀢𑁆𑀢𑀁, 𑀦𑀻𑀮𑀢𑀸 𑀕𑀼𑀡𑁄, 𑀬𑀸𑀘𑀓𑀢𑁆𑀢𑀁, 𑀬𑀸𑀘𑀓𑀢𑀸 𑀓𑁆𑀭𑀺𑀬𑀸, 𑀤𑀡𑁆𑀟𑀺𑀢𑁆𑀢𑀁, 𑀤𑀡𑁆𑀟𑀺𑀢𑀸 𑀤𑀩𑁆𑀩𑀁, 𑀲𑀘𑁆𑀘𑀯𑀸𑀤𑀺𑀢𑀸, 𑀧𑀸𑀭𑀫𑀺𑀢𑀸, 𑀓𑀢𑀜𑁆𑀜𑀼𑀢𑀸, 𑀲𑀩𑁆𑀩𑀜𑁆𑀜𑀼𑀢𑀸, ‘‘𑀓𑁆𑀯𑀘𑀸’’𑀤𑀺𑀦𑀸 𑀢𑀸𑀧𑀘𑁆𑀘𑀬𑁂 𑀭𑀲𑁆𑀲𑀢𑁆𑀢𑀁, 𑀅𑀧𑁆𑀧𑀺𑀘𑁆𑀙𑀢𑀸, 𑀅𑀲𑀁𑀲𑀕𑁆𑀕𑀢𑀸, 𑀪𑀲𑁆𑀲𑀸𑀭𑀸𑀫𑀢𑀸, 𑀦𑀺𑀤𑁆𑀤𑀸𑀭𑀸𑀫𑀢𑀸, 𑀮𑀳𑀼𑀢𑀸 𑀇𑀘𑁆𑀘𑀸𑀤𑀺.

𑀢𑁆𑀢𑀦𑀧𑀘𑁆𑀘𑀬𑁂 𑁋 𑀧𑀼𑀣𑀼𑀚𑁆𑀚𑀦𑀲𑁆𑀲 𑀪𑀸𑀯𑁄 𑀧𑀼𑀣𑀼𑀚𑁆𑀚𑀦𑀢𑁆𑀢𑀦𑀁, 𑀯𑁂𑀤𑀦𑀢𑁆𑀢𑀦𑀁, 𑀚𑀸𑀬𑀢𑁆𑀢𑀦𑀁.

𑀡𑁂𑀬𑁆𑀬𑁂 𑁋 𑀲𑀼𑀘𑀺𑀲𑁆𑀲 𑀪𑀸𑀯𑁄 𑀲𑁄𑀘𑁂𑀬𑁆𑀬𑀁. 𑀏𑀯𑀁 𑀆𑀥𑀺𑀧𑀪𑁂𑀬𑁆𑀬𑀁, 𑀓𑀯𑀺𑀲𑁆𑀲 𑀪𑀸𑀯𑁄𑀓𑀸𑀯𑁂𑀬𑁆𑀬𑀁, 𑀣𑁂𑀦𑀲𑁆𑀲 𑀪𑀸𑀯𑁄 𑀣𑁂𑀬𑁆𑀬𑀁, 𑀫𑀳𑀸𑀯𑀼𑀢𑁆𑀢𑀺𑀦𑀸 𑀦𑀓𑀸𑀭𑀲𑁆𑀲 𑀮𑁄𑀧𑁄.

‘‘𑀡𑁆𑀬𑀢𑁆𑀢𑀢𑀸’’𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀓𑀫𑁆𑀫𑀦𑀺, 𑀲𑀓𑀢𑁆𑀣𑁂 𑀘 𑀡𑁆𑀬𑀸𑀤𑀬𑁄, 𑀯𑀻𑀭𑀸𑀦𑀁 𑀪𑀸𑀯𑁄, 𑀓𑀫𑁆𑀫𑀁 𑀯𑀸 𑀯𑀻𑀭𑀺𑀬𑀁, 𑀧𑀭𑀺𑀪𑀝𑀲𑁆𑀲 𑀓𑀫𑁆𑀫𑀁 𑀧𑀸𑀭𑀺𑀪𑀝𑁆𑀬𑀁, 𑀧𑀸𑀭𑀺𑀪𑀝𑁆𑀬𑀲𑁆𑀲 𑀪𑀸𑀯𑁄 𑀧𑀸𑀭𑀺𑀪𑀝𑁆𑀬𑀢𑀸. 𑀏𑀯𑀁 𑀲𑁄𑀯𑀘𑀲𑁆𑀲𑀢𑀸, 𑀪𑀺𑀲𑀕𑁆𑀕𑀲𑁆𑀲 𑀓𑀫𑁆𑀫𑀁 𑀪𑁂𑀲𑀚𑁆𑀚𑀁, 𑀩𑁆𑀬𑀸𑀯𑀝𑀲𑁆𑀲 𑀓𑀫𑁆𑀫𑀁 𑀯𑁂𑀬𑁆𑀬𑀸𑀯𑀘𑁆𑀘𑀁, 𑀲𑀞𑀲𑁆𑀲 𑀪𑀸𑀯𑁄, 𑀓𑀫𑁆𑀫𑀁 𑀯𑀸 𑀲𑀸𑀞𑁂𑀬𑁆𑀬𑀁.

𑀲𑀓𑀢𑁆𑀣𑁂 𑀧𑀦 𑁋 𑀬𑀣𑀸𑀪𑀽𑀢𑀫𑁂𑀯 𑀬𑀣𑀸𑀪𑀼𑀘𑁆𑀘𑀁, 𑀓𑀭𑀼𑀡𑀸𑀬𑁂𑀯 𑀓𑀸𑀭𑀼𑀜𑁆𑀜𑀁, 𑀧𑀢𑁆𑀢𑀓𑀸𑀮𑀫𑁂𑀯 𑀧𑀢𑁆𑀢𑀓𑀮𑁆𑀮𑀁, 𑀆𑀓𑀸𑀲𑀸𑀦𑀦𑁆𑀢𑀫𑁂𑀯 ¶ 𑀆𑀓𑀸𑀲𑀸𑀦𑀜𑁆𑀘𑀁, 𑀓𑀸𑀬𑀧𑀸𑀕𑀼𑀜𑁆𑀜𑀫𑁂𑀯 𑀓𑀸𑀬𑀧𑀸𑀕𑀼𑀜𑁆𑀜𑀢𑀸 𑀇𑀘𑁆𑀘𑀸𑀤𑀺.

‘‘𑀯𑀺𑀲𑀫𑀲𑁆𑀲 𑀪𑀸𑀯𑁄’’𑀢𑀺 𑀯𑀺𑀕𑁆𑀕𑀳𑁂 𑁋

‘‘𑀢𑁆𑀢𑀢𑀸, 𑀪𑀸𑀯𑁂’’𑀢𑀺 𑀘 𑀯𑀢𑁆𑀢𑀢𑁂.

𑁩𑁮𑁮. 𑀡 𑀯𑀺𑀲𑀫𑀸𑀤𑀻𑀳𑀺.

𑀯𑀺𑀲𑀫𑀇𑀘𑁆𑀘𑁂𑀯𑀫𑀸𑀤𑀻𑀳𑀺 𑀙𑀝𑁆𑀞𑀺𑀬𑀦𑁆𑀢𑁂𑀳𑀺 𑀡𑀧𑁆𑀧𑀘𑁆𑀘𑀬𑁄 𑀳𑁄𑀢𑀺, 𑀢𑁆𑀢 𑀢𑀸 𑀘 ‘‘𑀢𑀲𑁆𑀲 𑀪𑀸𑀯𑁄’’ 𑀇𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂. 𑀆𑀓𑀢𑀺𑀕𑀡𑁄𑀬𑀁. 𑀯𑁂𑀲𑀫𑀁, 𑀯𑀺𑀲𑀫𑀢𑁆𑀢𑀁, 𑀯𑀺𑀲𑀫𑀢𑀸. 𑀲𑀼𑀘𑀺𑀲𑁆𑀲 𑀪𑀸𑀯𑁄 𑀲𑁄𑀘𑀁, 𑀲𑀼𑀘𑀺𑀢𑁆𑀢𑀁, 𑀲𑀼𑀘𑀺𑀢𑀸, 𑀕𑀭𑀼𑀦𑁄 𑀪𑀸𑀯𑁄 𑀕𑀸𑀭𑀯𑁄, 𑀆𑀤𑀺𑀯𑀼𑀤𑁆𑀥𑀺, ‘‘𑀑 𑀲𑀭𑁂 𑀘𑀸’’𑀢𑀺 𑀲𑀼𑀢𑁆𑀢𑁂 𑀘𑀲𑀤𑁆𑀤𑀕𑁆𑀕𑀳𑀡𑁂𑀦 𑀉𑀓𑀸𑀭𑀲𑁆𑀲 𑀘 𑀅𑀯𑀸𑀤𑁂𑀲𑁄. 𑀧𑀝𑀼𑀦𑁄 𑀪𑀸𑀯𑁄 𑀧𑀸𑀝𑀯𑀁, 𑀧𑀝𑀼𑀢𑁆𑀢𑀁, 𑀧𑀝𑀼𑀢𑀸.

𑀉𑀚𑀼𑀦𑁄 𑀪𑀸𑀯𑁄 𑀅𑀚𑁆𑀚𑀯𑀁, 𑀫𑀼𑀤𑀼𑀦𑁄 𑀪𑀸𑀯𑁄 𑀫𑀤𑁆𑀤𑀯𑀁 𑀇𑀘𑁆𑀘𑀢𑁆𑀭 ‘‘𑀆𑀢𑁆𑀢𑀜𑁆𑀘𑀸’’𑀢𑀺 𑀡𑀫𑁆𑀳𑀺 𑀇𑀓𑀸𑀭𑀼𑀓𑀸𑀭𑀸𑀦𑀁 𑀆𑀢𑁆𑀢𑀁, 𑀤𑁆𑀯𑀺𑀪𑀸𑀯𑁄, 𑀲𑀁𑀬𑁄𑀕𑁂 𑀆𑀤𑀺𑀭𑀲𑁆𑀲𑀢𑁆𑀢𑀜𑁆𑀘. 𑀉𑀚𑀼𑀢𑀸, 𑀫𑀼𑀤𑀼𑀢𑀸. 𑀏𑀯𑀁 𑀇𑀲𑀺𑀲𑁆𑀲 𑀪𑀸𑀯𑁄 𑀆𑀭𑀺𑀲𑁆𑀬𑀁, 𑀆𑀲𑀪𑀁, 𑀓𑀼𑀫𑀸𑀭𑀲𑁆𑀲 𑀪𑀸𑀯𑁄𑀓𑁄𑀫𑀸𑀭𑀁, 𑀬𑀼𑀯𑀲𑁆𑀲 𑀪𑀸𑀯𑁄 𑀬𑁄𑀩𑁆𑀩𑀦𑀁, 𑀫𑀳𑀸𑀯𑀼𑀢𑁆𑀢𑀺𑀦𑀸 𑀦𑀓𑀸𑀭𑀸𑀕𑀫𑁄, 𑀧𑀭𑀫𑀸𑀦𑀁 𑀪𑀸𑀯𑁄, 𑀓𑀫𑁆𑀫𑀁 𑀯𑀸 𑀧𑀸𑀭𑀫𑀻 𑀤𑀸𑀦𑀸𑀤𑀺𑀓𑁆𑀭𑀺𑀬𑀸, ‘‘𑀡𑀯𑀡𑀺𑀓𑀸’’𑀤𑀺𑀲𑀼𑀢𑁆𑀢𑁂𑀦 𑀈𑀧𑀘𑁆𑀘𑀬𑁄, 𑀲𑀫𑀕𑁆𑀕𑀸𑀦𑀁 𑀪𑀸𑀯𑁄 𑀲𑀸𑀫𑀕𑁆𑀕𑀻.

𑁩𑁮𑁯. 𑀭𑀫𑀡𑀻𑀬𑀸𑀤𑀺𑀢𑁄 𑀓𑀡.

𑀭𑀫𑀡𑀻𑀬𑀇𑀘𑁆𑀘𑁂𑀯𑀫𑀸𑀤𑀺𑀢𑁄 𑀓𑀡𑀧𑀘𑁆𑀘𑀬𑁄 𑀳𑁄𑀢𑀺, 𑀢𑁆𑀢 𑀢𑀸 𑀘 𑀪𑀸𑀯𑀢𑁆𑀣𑁂. 𑀭𑀫𑀡𑀻𑀬𑀲𑁆𑀲 𑀪𑀸𑀯𑁄 𑀭𑀸𑀫𑀡𑀻𑀬𑀓𑀁, 𑀭𑀫𑀡𑀻𑀬𑀢𑁆𑀢𑀁, 𑀭𑀫𑀡𑀻𑀬𑀢𑀸 ¶ . 𑀏𑀯𑀁 𑀫𑀸𑀦𑀼𑀜𑁆𑀜𑀓𑀁, 𑀫𑀦𑀼𑀜𑁆𑀜𑀢𑁆𑀢𑀁, 𑀫𑀦𑀼𑀜𑁆𑀜𑀢𑀸, 𑀧𑀺𑀬𑀭𑀽𑀧𑀓𑀁, 𑀧𑀺𑀬𑀭𑀽𑀧𑀢𑁆𑀢𑀁, 𑀧𑀺𑀬𑀭𑀽𑀧𑀢𑀸, 𑀓𑀮𑁆𑀬𑀸𑀡𑀓𑀁, 𑀓𑀮𑁆𑀬𑀸𑀡𑀢𑁆𑀢𑀁, 𑀓𑀮𑁆𑀬𑀸𑀡𑀢𑀸, 𑀘𑁄𑀭𑀓𑀁, 𑀘𑁄𑀭𑀺𑀓𑀸 𑀯𑀸, 𑀘𑁄𑀭𑀢𑁆𑀢𑀁, 𑀘𑁄𑀭𑀢𑀸, 𑀅𑀟𑁆𑀠𑀓𑀁, 𑀅𑀟𑁆𑀠𑀢𑁆𑀢𑀁, 𑀅𑀟𑁆𑀠𑀢𑀸 𑀇𑀘𑁆𑀘𑀸𑀤𑀺.

𑀪𑀸𑀯𑀢𑀤𑁆𑀥𑀺𑀢𑀁.

𑀯𑀺𑀲𑁂𑀲𑀢𑀤𑁆𑀥𑀺𑀢

‘‘𑀲𑀩𑁆𑀩𑁂 𑀇𑀫𑁂 𑀧𑀸𑀧𑀸 𑀅𑀬𑀫𑀺𑀫𑁂𑀲𑀁 𑀯𑀺𑀲𑁂𑀲𑁂𑀦 𑀧𑀸𑀧𑁄’’𑀢𑀺 𑀯𑀺𑀕𑁆𑀕𑀳𑁂 𑁋

𑁩𑁯𑁦. 𑀯𑀺𑀲𑁂𑀲𑁂 𑀢𑀭𑀢𑀫𑀺𑀲𑀺𑀓𑀺𑀬𑀺𑀝𑁆𑀞𑀸.

𑀯𑀺𑀲𑁂𑀲𑀢𑁆𑀣𑁂 𑀢𑀭 𑀢𑀫 𑀇𑀲𑀺𑀓 𑀇𑀬 𑀇𑀝𑁆𑀞𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀧𑀸𑀧𑀢𑀭𑁄, 𑀧𑀸𑀧𑀢𑀭𑀸, 𑀧𑀸𑀧𑀢𑀭𑀁. 𑀢𑀢𑁄𑀧𑀺 𑀅𑀥𑀺𑀓𑁄 𑀧𑀸𑀧𑀢𑀫𑁄, 𑀧𑀸𑀧𑀢𑀫𑀸, 𑀧𑀸𑀧𑀢𑀫𑀁. 𑀧𑀸𑀧𑀺𑀲𑀺𑀓𑁄, 𑀧𑀸𑀧𑀺𑀲𑀺𑀓𑀸, 𑀧𑀸𑀧𑀺𑀲𑀺𑀓𑀁. 𑀧𑀸𑀧𑀺𑀬𑁄, 𑀧𑀸𑀧𑀺𑀬𑀸, 𑀧𑀸𑀧𑀺𑀬𑀁. 𑀧𑀸𑀧𑀺𑀝𑁆𑀞𑁄, 𑀧𑀸𑀧𑀺𑀝𑁆𑀞𑀸, 𑀧𑀸𑀧𑀺𑀝𑁆𑀞𑀁. 𑀅𑀢𑀺𑀲𑀬𑁂𑀦 𑀧𑀸𑀧𑀺𑀝𑁆𑀞𑁄, 𑀧𑀸𑀧𑀺𑀝𑁆𑀞𑀢𑀭𑁄. 𑀏𑀯𑀁 𑀧𑀝𑀼𑀢𑀭𑁄, 𑀧𑀝𑀼𑀢𑀫𑁄, 𑀧𑀝𑀺𑀲𑀺𑀓𑁄, 𑀧𑀝𑀺𑀬𑁄, 𑀧𑀝𑀺𑀝𑁆𑀞𑁄. 𑀲𑀩𑁆𑀩𑁂𑀲𑀁 𑀅𑀢𑀺𑀲𑀬𑁂𑀦 𑀯𑀭𑁄 𑀯𑀭𑀢𑀭𑁄, 𑀯𑀭𑀢𑀫𑁄, 𑀯𑀭𑀺𑀲𑀺𑀓𑁄, 𑀯𑀭𑀺𑀬𑁄, 𑀯𑀭𑀺𑀝𑁆𑀞𑁄. 𑀏𑀯𑀁 𑀧𑀡𑀻𑀢𑀢𑀭𑁄, 𑀧𑀡𑀻𑀢𑀢𑀫𑁄.

‘‘𑀲𑀩𑁆𑀩𑁂 𑀇𑀫𑁂 𑀯𑀼𑀟𑁆𑀠𑀸 𑀅𑀬𑀫𑀺𑀫𑁂𑀲𑀁 𑀯𑀺𑀲𑁂𑀲𑁂𑀦 𑀯𑀼𑀟𑁆𑀠𑁄’’𑀢𑀺 𑀅𑀢𑁆𑀣𑁂 𑀇𑀬𑀇𑀝𑁆𑀞𑀧𑁆𑀧𑀘𑁆𑀘𑀬𑀸 𑀳𑁄𑀦𑁆𑀢𑀺.

𑁩𑁯𑁧. 𑀯𑀼𑀟𑁆𑀠𑀲𑁆𑀲 ¶ 𑀚𑁄 𑀇𑀬𑀺𑀝𑁆𑀞𑁂𑀲𑀼.

𑀲𑀩𑁆𑀩𑀲𑁆𑀲𑁂𑀯 𑀯𑀼𑀟𑁆𑀠𑀲𑀤𑁆𑀤𑀲𑁆𑀲 𑀚𑁄 𑀳𑁄𑀢𑀺 𑀇𑀬 𑀇𑀝𑁆𑀞𑀇𑀘𑁆𑀘𑁂𑀢𑁂𑀲𑀼 𑀧𑀘𑁆𑀘𑀬𑁂𑀲𑀼. 𑀚𑁂𑀬𑁆𑀬𑁄, 𑀚𑁂𑀝𑁆𑀞𑁄, 𑀏𑀢𑁆𑀣 𑀘 ‘‘𑀲𑀭𑀮𑁄𑀧𑀸𑀤𑀺’’𑀲𑀼𑀢𑁆𑀢𑁂 𑀢𑀼𑀕𑁆𑀕𑀳𑀡𑁂𑀦 𑀮𑁄𑀧𑀫𑀓𑀢𑁆𑀯𑀸 ‘‘𑀲𑀭𑀸 𑀲𑀭𑁂 𑀮𑁄𑀧’’𑀦𑁆𑀢𑀺 𑀧𑀼𑀩𑁆𑀩𑀲𑀭𑁂 𑀮𑀼𑀢𑁆𑀢𑁂 ‘‘𑀓𑁆𑀯𑀘𑀸𑀲𑀯𑀡𑁆𑀡𑀁 𑀮𑀼𑀢𑁆𑀢𑁂’’𑀢𑀺 𑀏𑀓𑀸𑀭𑁄.

‘‘𑀇𑀬𑀺𑀝𑁆𑀞𑁂𑀲𑀽’’𑀢𑀺 𑀅𑀥𑀺𑀓𑀸𑀭𑁄, ‘‘𑀚𑁄’’𑀢𑀺 𑀘 𑀯𑀢𑁆𑀢𑀢𑁂.

𑁩𑁯𑁨. 𑀧𑀲𑀢𑁆𑀣𑀲𑁆𑀲 𑀲𑁄 𑀘.

𑀲𑀩𑁆𑀩𑀲𑁆𑀲𑁂𑀯 𑀧𑀲𑀢𑁆𑀣𑀲𑀤𑁆𑀤𑀲𑁆𑀲 𑀲𑀸𑀤𑁂𑀲𑁄 𑀳𑁄𑀢𑀺, 𑀚𑁄 𑀘 𑀇𑀬𑀺𑀝𑁆𑀞𑁂𑀲𑀼. 𑀅𑀬𑀜𑁆𑀘 𑀧𑀲𑀢𑁆𑀣𑁄 𑀅𑀬𑀜𑁆𑀘 𑀧𑀲𑀢𑁆𑀣𑁄 𑀲𑀩𑁆𑀩𑁂 𑀇𑀫𑁂 𑀧𑀲𑀢𑁆𑀣𑀸 𑀅𑀬𑀫𑀺𑀫𑁂𑀲𑀁 𑀯𑀺𑀲𑁂𑀲𑁂𑀦 𑀧𑀲𑀢𑁆𑀣𑁄𑀢𑀺 𑀲𑁂𑀬𑁆𑀬𑁄, 𑀲𑁂𑀝𑁆𑀞𑁄, 𑀚𑁂𑀬𑁆𑀬𑁄, 𑀚𑁂𑀝𑁆𑀞𑁄.

𑁩𑁯𑁩. 𑀅𑀦𑁆𑀢𑀺𑀓𑀲𑁆𑀲 𑀦𑁂𑀤𑁄.

𑀲𑀩𑁆𑀩𑀲𑁆𑀲𑁂𑀯 𑀅𑀦𑁆𑀢𑀺𑀓𑀲𑀤𑁆𑀤𑀲𑁆𑀲 𑀦𑁂𑀤𑀸𑀤𑁂𑀲𑁄 𑀳𑁄𑀢𑀺 𑀇𑀬𑀺𑀝𑁆𑀞𑁂𑀲𑀼. 𑀯𑀺𑀲𑁂𑀲𑁂𑀦 𑀅𑀦𑁆𑀢𑀺𑀓𑁄𑀢𑀺 𑀦𑁂𑀤𑀺𑀬𑁄, 𑀦𑁂𑀤𑀺𑀝𑁆𑀞𑁄.

𑁩𑁯𑁪. 𑀩𑀸𑀴𑁆𑀳𑀲𑁆𑀲 𑀲𑀸𑀥𑁄.

𑀲𑀩𑁆𑀩𑀲𑁆𑀲𑁂𑀯 𑀩𑀸𑀴𑁆𑀳𑀲𑀤𑁆𑀤𑀲𑁆𑀲 𑀲𑀸𑀥𑀸𑀤𑁂𑀲𑁄 𑀳𑁄𑀢𑀺 𑀇𑀬𑀺𑀝𑁆𑀞𑁂𑀲𑀼. 𑀯𑀺𑀲𑁂𑀲𑁂𑀦 𑀩𑀸𑀴𑁆𑀳𑁄𑀢𑀺 𑀲𑀸𑀥𑀺𑀬𑁄, 𑀲𑀸𑀥𑀺𑀝𑁆𑀞𑁄.

𑁩𑁯𑁫. 𑀅𑀧𑁆𑀧𑀲𑁆𑀲 𑀓𑀡.

𑀲𑀩𑁆𑀩𑀲𑁆𑀲 𑀅𑀧𑁆𑀧𑀲𑀤𑁆𑀤𑀲𑁆𑀲 𑀓𑀡 𑀳𑁄𑀢𑀺 𑀇𑀬𑀺𑀝𑁆𑀞𑁂𑀲𑀼. 𑀯𑀺𑀲𑁂𑀲𑁂𑀦 𑀅𑀧𑁆𑀧𑁄𑀢𑀺 𑀓𑀡𑀺𑀬𑁄, 𑀓𑀡𑀺𑀝𑁆𑀞𑁄.

‘‘𑀯𑀺𑀲𑁂𑀲𑁂𑀦 𑀬𑀼𑀯𑀸’’𑀢𑀺 𑀅𑀢𑁆𑀣𑁂 ‘‘𑀓𑀡’’𑀇𑀢𑀺 𑀯𑀢𑁆𑀢𑀢𑁂.

𑁩𑁯𑁬. 𑀬𑀼𑀯𑀸𑀦𑀜𑁆𑀘 ¶ .

𑀲𑀩𑁆𑀩𑀲𑁆𑀲 𑀬𑀼𑀯𑀲𑀤𑁆𑀤𑀲𑁆𑀲 𑀓𑀡 𑀳𑁄𑀢𑀺 𑀇𑀬𑀺𑀝𑁆𑀞𑁂𑀲𑀼. ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀡𑀓𑀸𑀭𑀲𑁆𑀲 𑀦𑀓𑀸𑀭𑁄. 𑀓𑀦𑀺𑀬𑁄, 𑀓𑀦𑀺𑀝𑁆𑀞𑁄.

𑁩𑁯𑁭. 𑀯𑀦𑁆𑀢𑀼 𑀫𑀦𑁆𑀢𑀼 𑀯𑀻𑀦𑀜𑁆𑀘 𑀮𑁄𑀧𑁄.

𑀯𑀦𑁆𑀢𑀼𑀫𑀦𑁆𑀢𑀼𑀯𑀻 𑀇𑀘𑁆𑀘𑁂𑀢𑁂𑀲𑀁 𑀧𑀘𑁆𑀘𑀬𑀸𑀦𑀁 𑀮𑁄𑀧𑁄 𑀳𑁄𑀢𑀺 𑀇𑀬𑀺𑀝𑁆𑀞𑁂𑀲𑀼. 𑀲𑀩𑁆𑀩𑁂 𑀇𑀫𑁂 𑀕𑀼𑀡𑀯𑀦𑁆𑀢𑁄 𑀅𑀬𑀫𑀺𑀫𑁂𑀲𑀁 𑀯𑀺𑀲𑁂𑀲𑁂𑀦 𑀕𑀼𑀡𑀯𑀸𑀢𑀺 𑀕𑀼𑀡𑀺𑀬𑁄, 𑀕𑀼𑀡𑀺𑀝𑁆𑀞𑁄, 𑀯𑀺𑀲𑁂𑀲𑁂𑀦 𑀲𑀢𑀺𑀫𑀸𑀢𑀺 𑀲𑀢𑀺𑀬𑁄, 𑀲𑀢𑀺𑀝𑁆𑀞𑁄, 𑀯𑀺𑀲𑁂𑀲𑁂𑀦 𑀫𑁂𑀥𑀸𑀯𑀻𑀢𑀺 𑀫𑁂𑀥𑀺𑀬𑁄, 𑀫𑁂𑀥𑀺𑀝𑁆𑀞𑁄 𑀇𑀘𑁆𑀘𑀸𑀤𑀺.

𑀯𑀺𑀲𑁂𑀲𑀢𑀤𑁆𑀥𑀺𑀢𑀁.

𑀅𑀲𑁆𑀲𑀢𑁆𑀣𑀺𑀢𑀤𑁆𑀥𑀺𑀢

‘‘𑀫𑁂𑀥𑀸 𑀬𑀲𑁆𑀲 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀯𑀸 𑀯𑀺𑀚𑁆𑀚𑀢𑀻’’𑀢𑀺 𑀯𑀺𑀕𑁆𑀕𑀳𑁂 𑁋

𑁩𑁯𑁮. 𑀢𑀤𑀲𑁆𑀲𑀢𑁆𑀣𑀻𑀢𑀺 𑀯𑀻 𑀘.

𑀧𑀞𑀫𑀸𑀯𑀺𑀪𑀢𑁆𑀬𑀦𑁆𑀢𑀸 ‘‘𑀢𑀤𑀲𑁆𑀲 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀯𑀸 𑀯𑀺𑀚𑁆𑀚𑀢𑀺’’ 𑀇𑀘𑁆𑀘𑁂𑀢𑁂𑀲𑁆𑀯𑀢𑁆𑀣𑁂𑀲𑀼 𑀯𑀻𑀧𑀘𑁆𑀘𑀬𑁄 𑀳𑁄𑀢𑀺. 𑀫𑁂𑀥𑀸𑀫𑀸𑀬𑀸 𑀲𑀤𑁆𑀤𑁂𑀳𑀺 𑀘𑀸𑀬𑀁. 𑀫𑁂𑀥𑀸𑀯𑀻, 𑀫𑁂𑀥𑀸𑀯𑀺𑀦𑁄. 𑀇𑀢𑁆𑀣𑀺𑀬𑀁 𑀈𑀓𑀸𑀭𑀦𑁆𑀢𑀢𑁆𑀢𑀸 ‘‘𑀧𑀢𑀺𑀪𑀺𑀓𑁆𑀔𑀼𑀭𑀸𑀚𑀻𑀓𑀸𑀭𑀦𑁆𑀢𑁂𑀳𑀺 𑀇𑀦𑀻’’𑀢𑀺 𑀇𑀦𑀻, 𑀫𑁂𑀥𑀸𑀯𑀺𑀦𑀻, 𑀫𑁂𑀥𑀸𑀯𑀺𑀦𑀺𑀬𑁄. 𑀦𑀧𑀼𑀁𑀲𑀓𑁂 𑀫𑁂𑀥𑀸𑀯𑀺 𑀓𑀼𑀮𑀁. 𑀏𑀯𑀁 𑀫𑀸𑀬𑀸𑀯𑀻, 𑀫𑀸𑀬𑀸𑀯𑀺𑀦𑀻, 𑀫𑀸𑀬𑀸𑀯𑀺 𑀘𑀺𑀢𑁆𑀢𑀁.

𑀘𑀕𑁆𑀕𑀳𑀡𑁂𑀦 𑀲𑁄 𑀇 𑀮𑀯 𑀆𑀮𑀸𑀤𑀺𑀧𑁆𑀧𑀘𑁆𑀘𑀬𑀸 𑀘. 𑀬𑀣𑀸 𑁋 𑀲𑀼𑀫𑁂𑀥𑀸 𑀬𑀲𑁆𑀲 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀯𑀸 𑀯𑀺𑀚𑁆𑀚𑀢𑀻𑀢𑀺 𑀲𑀼𑀫𑁂𑀥𑀲𑁄, 𑀭𑀲𑁆𑀲𑀢𑁆𑀢𑀁. 𑀏𑀯𑀁 𑀮𑁄𑀫𑀲𑁄. 𑀧𑀺𑀘𑁆𑀙𑀁 𑀅𑀲𑁆𑀲 𑀅𑀢𑁆𑀣𑀺, 𑀢𑀲𑁆𑀫𑀺𑀁 ¶ 𑀯𑀸 𑀯𑀺𑀚𑁆𑀚𑀢𑀻𑀢𑀺 𑀧𑀺𑀘𑁆𑀙𑀺𑀮𑁄. 𑀏𑀯𑀁 𑀨𑁂𑀦𑀺𑀮𑁄, 𑀢𑀼𑀡𑁆𑀟𑀺𑀮𑁄, 𑀚𑀝𑀺𑀮𑁄. 𑀓𑁂𑀲𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀓𑁂𑀲𑀯𑁄, 𑀯𑀸𑀘𑀸𑀮𑁄 𑀇𑀘𑁆𑀘𑀸𑀤𑀺.

‘‘𑀢𑀧𑁄 𑀅𑀲𑁆𑀲 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀯𑀸 𑀯𑀺𑀚𑁆𑀚𑀢𑀻’’𑀢𑀺 𑀯𑀺𑀕𑁆𑀕𑀳𑁂 𑁋

‘‘𑀢𑀤𑀲𑁆𑀲𑀢𑁆𑀣𑀻’’𑀢𑀺 𑀅𑀥𑀺𑀓𑀸𑀭𑁄.

𑁩𑁯𑁯. 𑀢𑀧𑀸𑀤𑀺𑀢𑁄 𑀲𑀻.

𑀢𑀧𑀇𑀘𑁆𑀘𑁂𑀯𑀫𑀸𑀤𑀺𑀢𑁄 𑀲𑀻𑀧𑀘𑁆𑀘𑀬𑁄 𑀳𑁄𑀢𑀺 ‘‘𑀢𑀤𑀲𑁆𑀲𑀢𑁆𑀣𑀺’’ 𑀇𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂. 𑀲𑀲𑁆𑀲 𑀤𑁆𑀯𑀺𑀪𑀸𑀯𑁄. 𑀢𑀧𑀲𑁆𑀲𑀻, 𑀢𑀧𑀲𑁆𑀲𑀺𑀦𑁄, 𑀢𑀧𑀲𑁆𑀲𑀺𑀦𑀻, 𑀢𑀧𑀲𑁆𑀲𑀺. 𑀏𑀯𑀁 𑀢𑁂𑀚𑀲𑁆𑀲𑀻, 𑀬𑀲𑀲𑁆𑀲𑀻, 𑀫𑀦𑀲𑁆𑀲𑀻, 𑀧𑀬𑀲𑁆𑀲𑀻.

‘‘𑀤𑀡𑁆𑀟𑁄 𑀅𑀲𑁆𑀲 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀯𑀸 𑀯𑀺𑀚𑁆𑀚𑀢𑀻’’𑀢𑀺 𑀯𑀺𑀕𑁆𑀕𑀳𑁂 𑁋

𑁪𑁦𑁦. 𑀤𑀡𑁆𑀟𑀸𑀤𑀺𑀢𑁄 𑀇𑀓𑀈.

𑀆𑀤𑀺𑀲𑀤𑁆𑀤𑁄𑀬𑀁 𑀧𑀓𑀸𑀭𑀢𑁆𑀣𑁄, 𑀤𑀡𑁆𑀟𑀇𑀘𑁆𑀘𑁂𑀯𑀫𑀸𑀤𑀺𑀢𑁄 𑀅𑀯𑀡𑁆𑀡𑀦𑁆𑀢𑀸 𑀇𑀓 𑀈 𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 ‘‘𑀢𑀤𑀲𑁆𑀲𑀢𑁆𑀣𑀺’’ 𑀇𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂. 𑀤𑀡𑁆𑀟𑀺𑀓𑁄, 𑀤𑀡𑁆𑀟𑀻, 𑀤𑀡𑁆𑀟𑀺𑀦𑁄, 𑀤𑀡𑁆𑀟𑀺𑀦𑀻. 𑀏𑀯𑀁 𑀫𑀸𑀮𑀺𑀓𑁄, 𑀫𑀸𑀮𑀻, 𑀫𑀸𑀮𑀺𑀦𑀻, 𑀙𑀢𑁆𑀢𑀺𑀓𑁄, 𑀙𑀢𑁆𑀢𑀻, 𑀭𑀽𑀧𑀺𑀓𑁄, 𑀭𑀽𑀧𑀻, 𑀓𑁂𑀲𑀺𑀓𑁄, 𑀓𑁂𑀲𑀻, 𑀲𑀗𑁆𑀖𑀻, 𑀜𑀸𑀡𑀻, 𑀳𑀢𑁆𑀣𑀻 𑀇𑀘𑁆𑀘𑀸𑀤𑀺.

𑁪𑁦𑁧. 𑀫𑀥𑁆𑀯𑀸𑀤𑀺𑀢𑁄 𑀭𑁄.

𑀫𑀥𑀼𑀆𑀤𑀺𑀢𑁄 𑀭𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 ‘‘𑀢𑀤𑀲𑁆𑀲𑀢𑁆𑀣𑀻’’𑀢𑀺 𑀅𑀢𑁆𑀣𑁂. 𑀫𑀥𑀼 𑀅𑀲𑁆𑀲 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀯𑀸 𑀯𑀺𑀚𑁆𑀚𑀢𑀻𑀢𑀺 𑀫𑀥𑀼𑀭𑁄 𑀕𑀼𑀴𑁄, 𑀫𑀥𑀼𑀭𑀸 𑀲𑀓𑁆𑀔𑀭𑀸, 𑀫𑀥𑀼𑀭𑀁 𑀔𑀻𑀭𑀁, 𑀓𑀼𑀜𑁆𑀚𑀸 𑀳𑀦𑀽 𑀏𑀢𑀲𑁆𑀲 𑀲𑀦𑁆𑀢𑀻𑀢𑀺 𑀓𑀼𑀜𑁆𑀚𑀭𑁄, 𑀲𑀩𑁆𑀩𑀲𑁆𑀫𑀺𑀁 ¶ 𑀯𑀢𑁆𑀢𑀩𑁆𑀩𑁂 𑀫𑀼𑀔𑀫𑀲𑁆𑀲 𑀅𑀢𑁆𑀣𑀻𑀢𑀺 𑀫𑀼𑀔𑀭𑁄, 𑀲𑀼𑀲𑀺 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀼𑀲𑀺𑀭𑁄. 𑀏𑀯𑀁 𑀭𑀼𑀘𑀺𑀭𑁄, 𑀦𑀕𑀭𑁄.

‘‘𑀕𑀼𑀡𑁄 𑀅𑀲𑁆𑀲 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀯𑀸 𑀯𑀺𑀚𑁆𑀚𑀢𑀻’’𑀢𑀺 𑀯𑀺𑀕𑁆𑀕𑀳𑁂 𑁋

𑁪𑁦𑁨. 𑀕𑀼𑀡𑀸𑀤𑀺𑀢𑁄𑀯𑀦𑁆𑀢𑀼.

𑀕𑀼𑀡𑀇𑀘𑁆𑀘𑁂𑀯𑀫𑀸𑀤𑀺𑀢𑁄 𑀯𑀦𑁆𑀢𑀼𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 ‘‘𑀢𑀤𑀲𑁆𑀲 𑀅𑀢𑁆𑀣𑀻’’𑀢𑀺 𑀅𑀢𑁆𑀣𑁂. 𑀯𑀺𑀪𑀢𑁆𑀢𑀺𑀮𑁄𑀧𑁂, 𑀦𑀸𑀫𑀩𑁆𑀬𑀧𑀤𑁂𑀲𑁂 𑀘 𑀓𑀢𑁂 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺. 𑀕𑀼𑀡𑀯𑀦𑁆𑀢𑀼 𑀲𑀺, ‘‘𑀲𑀯𑀺𑀪𑀢𑁆𑀢𑀺𑀲𑁆𑀲, 𑀦𑁆𑀢𑀼𑀲𑁆𑀲𑀸’’𑀢𑀺 𑀅𑀥𑀺𑀓𑀺𑀘𑁆𑀘 ‘‘𑀆 𑀲𑀺𑀫𑁆𑀳𑀻’’𑀢𑀺 𑀆𑀢𑁆𑀢𑀁, 𑀕𑀼𑀡𑀯𑀸 𑀧𑀼𑀭𑀺𑀲𑁄, 𑀲𑁂𑀲𑀁 𑀜𑁂𑀬𑁆𑀬𑀁. 𑀏𑀯𑀁 𑀕𑀡𑀯𑀸, 𑀓𑀼𑀮𑀯𑀸 𑀇𑀘𑁆𑀘𑀸𑀤𑀬𑁄. 𑀇𑀢𑁆𑀣𑀺𑀬𑀁 ‘‘𑀡𑀯 𑀡𑀺𑀓 𑀡𑁂𑀬𑁆𑀬𑀡𑀦𑁆𑀢𑀽𑀳𑀻’’𑀢𑀺 𑀈𑀧𑀘𑁆𑀘𑀬𑁄, ‘‘𑀯𑀸’’𑀢𑀺 𑀯𑀢𑁆𑀢𑀫𑀸𑀦𑁂 ‘‘𑀦𑁆𑀢𑀼𑀲𑁆𑀲 𑀢𑀫𑀻𑀓𑀸𑀭𑁂’’𑀢𑀺 𑀢𑀓𑀸𑀭𑁄, 𑀕𑀼𑀡𑀯𑀢𑀻, 𑀕𑀼𑀡𑀯𑀦𑁆𑀢𑀻 𑀇𑀘𑁆𑀘𑀸𑀤𑀺. 𑀦𑀧𑀼𑀁𑀲𑀓𑁂 ‘‘𑀅𑀁 𑀦𑀧𑀼𑀁𑀲𑀓𑁂’’𑀢𑀺 𑀲𑀯𑀺𑀪𑀢𑁆𑀢𑀺𑀲𑁆𑀲 𑀦𑁆𑀢𑀼𑀲𑁆𑀲 𑀅𑀫𑀸𑀤𑁂𑀲𑁄, 𑀕𑀼𑀡𑀯𑀁 𑀇𑀘𑁆𑀘𑀸𑀤𑀺.

‘‘𑀲𑀢𑀺 𑀅𑀲𑁆𑀲 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀯𑀸 𑀯𑀺𑀚𑁆𑀚𑀢𑀻’’𑀢𑀺 𑀯𑀺𑀕𑁆𑀕𑀳𑁂 𑁋

‘‘𑀢𑀤𑀲𑁆𑀲𑀢𑁆𑀣𑀻’’𑀢𑀺 𑀯𑀢𑁆𑀢𑀢𑁂.

𑁪𑁯𑁩. 𑀲𑀢𑁆𑀬𑀸𑀤𑀻𑀳𑀺 𑀫𑀦𑁆𑀢𑀼.

𑀲𑀢𑀺𑀇𑀘𑁆𑀘𑁂𑀯𑀫𑀸𑀤𑀻𑀳𑀺 𑀅𑀯𑀡𑁆𑀡𑀦𑁆𑀢𑀭𑀳𑀺𑀢𑁂𑀳𑀺 𑀧𑀞𑀫𑀸𑀯𑀺𑀪𑀢𑁆𑀬𑀦𑁆𑀢𑁂𑀳𑀺 𑀮𑀺𑀗𑁆𑀕𑁂𑀳𑀺 𑀫𑀦𑁆𑀢𑀼𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 ‘‘𑀢𑀤𑀲𑁆𑀲𑀢𑁆𑀣𑀻’’𑀢𑀺 𑀅𑀢𑁆𑀣𑁂. 𑀲𑁂𑀲𑀁 𑀕𑀼𑀡𑀯𑀦𑁆𑀢𑀼𑀲𑀫𑀁. 𑀲𑀢𑀺𑀫𑀸, 𑀲𑀢𑀺𑀫𑀢𑀻, 𑀲𑀢𑀺𑀫𑀦𑁆𑀢𑀻, 𑀲𑀢𑀺𑀫𑀁. 𑀏𑀯𑀁 𑀥𑀺𑀢𑀺𑀫𑀸, 𑀕𑀢𑀺𑀫𑀸 𑀇𑀘𑁆𑀘𑀸𑀤𑀬𑁄.

𑀢𑀣𑀸 ‘‘𑀆𑀬𑀼 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀆𑀬𑀼 𑀫𑀦𑁆𑀢𑀼’’𑀇𑀘𑁆𑀘𑀢𑁆𑀭 𑁋

𑁪𑁦𑁪. 𑀆𑀬𑀼𑀲𑁆𑀲𑀼𑀓𑀸𑀭𑀸𑀲𑀫𑀦𑁆𑀢𑀼𑀫𑁆𑀳𑀺 ¶ .

𑀆𑀬𑀼𑀲𑁆𑀲 𑀉𑀓𑀸𑀭𑁄 𑀅𑀲 𑀳𑁄𑀢𑀺 𑀫𑀦𑁆𑀢𑀼𑀫𑁆𑀳𑀻𑀢𑀺 𑀅𑀲𑀸𑀤𑁂𑀲𑁄. 𑀆𑀬𑀲𑁆𑀫𑀸, 𑀲𑁂𑀲𑀁 𑀲𑀫𑀁. 𑀕𑀸𑀯𑁄 𑀅𑀲𑁆𑀲 𑀲𑀦𑁆𑀢𑀻𑀢𑀺 𑀕𑁄𑀫𑀸, 𑀕𑁄𑀫𑀦𑁆𑀢𑁄, 𑀕𑁄𑀫𑀢𑀻, 𑀕𑁄𑀫𑀦𑁆𑀢𑀻, 𑀕𑁄𑀫𑀁 𑀓𑀼𑀮𑀁 𑀇𑀘𑁆𑀘𑀸𑀤𑀺.

‘‘𑀲𑀤𑁆𑀥𑀸 𑀅𑀲𑁆𑀲 𑀅𑀢𑁆𑀣𑀻’’𑀢𑀺 𑀯𑀺𑀕𑁆𑀕𑀳𑁂 𑁋

𑁪𑁦𑁫. 𑀲𑀤𑁆𑀥𑀸𑀤𑀺𑀢𑁄 𑀡.

𑀲𑀤𑁆𑀥𑀸 𑀧𑀜𑁆𑀜𑀸𑀇𑀘𑁆𑀘𑁂𑀯𑀫𑀸𑀤𑀺𑀢𑁄 𑀡𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 ‘‘𑀢𑀤𑀲𑁆𑀲𑀢𑁆𑀣𑀺’’𑀇𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂. 𑀲𑀤𑁆𑀥𑁄 𑀧𑀼𑀭𑀺𑀲𑁄, 𑀲𑀤𑁆𑀥𑀸 𑀓𑀜𑁆𑀜𑀸, 𑀲𑀤𑁆𑀥𑀁 𑀓𑀼𑀮𑀁. 𑀏𑀯𑀁 𑀧𑀜𑁆𑀜𑁄, 𑀅𑀫𑀘𑁆𑀙𑀭𑁄, 𑀢𑀣𑀸 𑀩𑀼𑀤𑁆𑀥𑀁, 𑀩𑀼𑀤𑁆𑀥𑀺 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀩𑀼𑀤𑁆𑀥𑁄 𑀇𑀘𑁆𑀘𑀸𑀤𑀺.

𑀅𑀲𑁆𑀲𑀢𑁆𑀣𑀺𑀢𑀤𑁆𑀥𑀺𑀢𑀁.

𑀲𑀗𑁆𑀔𑁆𑀬𑀸𑀢𑀤𑁆𑀥𑀺𑀢

‘‘𑀧𑀜𑁆𑀘𑀦𑁆𑀦𑀁 𑀧𑀽𑀭𑀡𑁄’’𑀢𑀺 𑀯𑀺𑀕𑁆𑀕𑀳𑁂 𑁋

𑁪𑁦𑁬. 𑀲𑀗𑁆𑀔𑁆𑀬𑀸𑀧𑀽𑀭𑀡𑁂 𑀫𑁄.

𑀧𑀽𑀭𑀬𑀢𑀺 𑀲𑀗𑁆𑀔𑁆𑀬𑀸 𑀅𑀦𑁂𑀦𑀸𑀢𑀺 𑀧𑀽𑀭𑀡𑁄, 𑀲𑀗𑁆𑀔𑁆𑀬𑀸𑀬 𑀧𑀽𑀭𑀡𑁄 𑀲𑀗𑁆𑀔𑁆𑀬𑀸𑀧𑀽𑀭𑀡𑁄, 𑀢𑀲𑁆𑀫𑀺𑀁 𑀲𑀗𑁆𑀔𑁆𑀬𑀸𑀧𑀽𑀭𑀡𑀢𑁆𑀣𑁂 𑀙𑀝𑁆𑀞𑀺𑀬𑀦𑁆𑀢𑀢𑁄 𑀫𑀧𑁆𑀧𑀘𑁆𑀘𑀬𑁄 𑀳𑁄𑀢𑀺. 𑀧𑀜𑁆𑀘𑀫𑁄, 𑀧𑀜𑁆𑀘𑀦𑁆𑀦𑀁 𑀧𑀽𑀭𑀡𑀻 𑀧𑀜𑁆𑀘𑀫𑀻, ‘‘𑀦𑀤𑀸𑀤𑀺𑀢𑁄 𑀯𑀸 𑀈’’𑀢𑀺 𑀈𑀧𑀘𑁆𑀘𑀬𑁄. ‘‘𑀇𑀢𑁆𑀣𑀺𑀬𑀫𑀢𑁄 𑀆𑀧𑀘𑁆𑀘𑀬𑁄’’𑀢𑀺 𑀆𑀧𑀘𑁆𑀘𑀬𑁄, 𑀧𑀜𑁆𑀘𑀫𑀸 𑀯𑀻𑀭𑀺𑀬𑀧𑀸𑀭𑀫𑀻, 𑀧𑀜𑁆𑀘𑀫𑀁 𑀛𑀸𑀦𑀁. 𑀏𑀯𑀁 𑀲𑀢𑁆𑀢𑀫𑁄, 𑀲𑀢𑁆𑀢𑀫𑀻, 𑀲𑀢𑁆𑀢𑀫𑀸, 𑀲𑀢𑁆𑀢𑀫𑀁, 𑀅𑀝𑁆𑀞𑀫𑁄, 𑀅𑀝𑁆𑀞𑀫𑀻, 𑀅𑀝𑁆𑀞𑀫𑀸, 𑀅𑀝𑁆𑀞𑀫𑀁, 𑀦𑀯𑀫𑁄 ¶ , 𑀦𑀯𑀫𑀻, 𑀦𑀯𑀫𑀸, 𑀦𑀯𑀫𑀁, 𑀤𑀲𑀫𑁄, 𑀤𑀲𑀫𑀻, 𑀤𑀲𑀫𑀸, 𑀤𑀲𑀫𑀁 𑀇𑀘𑁆𑀘𑀸𑀤𑀺.

‘‘𑀲𑀗𑁆𑀔𑁆𑀬𑀸𑀧𑀽𑀭𑀡𑁂’’𑀢𑀺 𑀅𑀥𑀺𑀓𑀸𑀭𑁄.

𑁪𑁦𑁭. 𑀘𑀢𑀼𑀘𑁆𑀙𑁂𑀳𑀺 𑀣𑀞𑀸.

𑀘𑀢𑀼𑀙𑀇𑀘𑁆𑀘𑁂𑀢𑁂𑀳𑀺 𑀣𑀞𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀲𑀗𑁆𑀔𑁆𑀬𑀸𑀧𑀽𑀭𑀡𑀢𑁆𑀣𑁂. 𑀘𑀢𑀼𑀦𑁆𑀦𑀁 𑀧𑀽𑀭𑀡𑁄 𑀘𑀢𑀼𑀢𑁆𑀣𑁄, 𑀤𑁆𑀯𑀺𑀢𑁆𑀢𑀁, 𑀘𑀢𑀼𑀢𑁆𑀣𑀻, 𑀘𑀢𑀼𑀢𑁆𑀣𑀸, 𑀘𑀢𑀼𑀢𑁆𑀣𑀁, 𑀙𑀦𑁆𑀦𑀁 𑀧𑀽𑀭𑀡𑁄 𑀙𑀝𑁆𑀞𑁄, 𑀙𑀝𑁆𑀞𑀻, 𑀙𑀝𑁆𑀞𑀸, 𑀙𑀝𑁆𑀞𑀁, 𑀙𑀝𑁆𑀞𑁄 𑀏𑀯 𑀙𑀝𑁆𑀞𑀫𑁄.

𑀙𑀸𑀳𑀁, 𑀙𑀴𑀸𑀬𑀢𑀦𑀁 𑀇𑀘𑁆𑀘𑀢𑁆𑀭 𑁋

𑁪𑁦𑁮. 𑀲 𑀙𑀲𑁆𑀲 𑀯𑀸.

𑀙𑀲𑁆𑀲 𑀲𑀓𑀸𑀭𑀸𑀤𑁂𑀲𑁄 𑀳𑁄𑀢𑀺 𑀯𑀸 𑀲𑀗𑁆𑀔𑁆𑀬𑀸𑀦𑁂. 𑀙𑀸𑀳𑀫𑀲𑁆𑀲 𑀚𑀻𑀯𑀺𑀢𑀁 𑀲𑀸𑀳𑀁, 𑀙𑀸𑀳𑀁 𑀯𑀸, 𑀲𑀴𑀸𑀬𑀢𑀦𑀁.

‘‘𑀤𑁆𑀯𑀺𑀦𑁆𑀦𑀁 𑀧𑀽𑀭𑀡𑁄’’𑀢𑀺 𑀯𑀺𑀕𑁆𑀕𑀳𑁂 𑁋

𑁪𑁦𑁯. 𑀤𑁆𑀯𑀺𑀢𑀻𑀳𑀺 𑀢𑀺𑀬𑁄.

𑀤𑁆𑀯𑀺𑀢𑀺𑀇𑀘𑁆𑀘𑁂𑀢𑁂𑀳𑀺 𑀢𑀺𑀬𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 𑀲𑀗𑁆𑀔𑁆𑀬𑀸𑀧𑀽𑀭𑀡𑀢𑁆𑀣𑁂. 𑀯𑀺𑀧𑀭𑀺𑀡𑀸𑀫𑁂𑀦 ‘‘𑀤𑁆𑀯𑀺 𑀢𑀺𑀡𑁆𑀡’’𑀦𑁆𑀢𑀺 𑀯𑀢𑁆𑀢𑀫𑀸𑀦𑁂 𑁋

𑁪𑁧𑁦. 𑀢𑀺𑀬𑁂 𑀤𑀼𑀢𑀸𑀧𑀺 𑀘.

𑀤𑁆𑀯𑀺𑀢𑀺𑀇𑀘𑁆𑀘𑁂𑀢𑁂𑀲𑀁 𑀤𑀼𑀢𑀇𑀘𑁆𑀘𑀸𑀤𑁂𑀲𑀸 𑀳𑁄𑀦𑁆𑀢𑀺 𑀢𑀺𑀬𑀧𑁆𑀧𑀘𑁆𑀘𑀬𑁂 𑀧𑀭𑁂. 𑀤𑀼𑀢𑀺𑀬𑁄 𑀧𑀼𑀭𑀺𑀲𑁄, 𑀤𑀼𑀢𑀺𑀬𑀸, 𑀤𑀼𑀢𑀺𑀬𑀁. 𑀏𑀯𑀁 𑀢𑀺𑀡𑁆𑀡𑀁 𑀧𑀽𑀭𑀡𑁄 𑀢𑀢𑀺𑀬𑁄, 𑀢𑀢𑀺𑀬𑀸, 𑀢𑀢𑀺𑀬𑀁. 𑀅𑀧𑀺𑀕𑁆𑀕𑀳𑀡𑁂𑀦 𑀅𑀜𑁆𑀜𑀢𑁆𑀣𑀸𑀧𑀺 𑀤𑁆𑀯𑀺𑀲𑀤𑁆𑀤𑀲𑁆𑀲 𑀤𑀼𑀆𑀤𑁂𑀲𑁄 𑀳𑁄𑀢𑀺, 𑀘𑀲𑀤𑁆𑀤𑁂𑀦 𑀤𑀺 𑀘. 𑀤𑁆𑀯𑁂 𑀭𑀢𑁆𑀢𑀺𑀬𑁄 𑀤𑀼𑀭𑀢𑁆𑀢𑀁, 𑀤𑀼𑀯𑀺𑀥𑀁, 𑀤𑀼𑀯𑀗𑁆𑀕𑀁, 𑀤𑀺𑀭𑀢𑁆𑀢𑀁, 𑀤𑀺𑀕𑀼𑀡𑀁, 𑀤𑀺𑀕𑀼.

𑁪𑁧𑁧. 𑀢𑁂𑀲𑀫𑀟𑁆𑀠𑀽𑀧𑀧𑀤𑁂𑀦 𑀅𑀟𑁆𑀠𑀼𑀟𑁆𑀠𑀤𑀺𑀯𑀟𑁆𑀠𑀤𑀺𑀬𑀟𑁆𑀠𑀟𑁆𑀠𑀢𑀺𑀬𑀸.

𑀢𑁂𑀲𑀁 𑀘𑀢𑀼𑀢𑁆𑀣𑀤𑀼𑀢𑀺𑀬𑀢𑀢𑀺𑀬𑀸𑀦𑀁 𑀅𑀟𑁆𑀠𑀽𑀧𑀧𑀤𑀸𑀦𑀁 𑀅𑀟𑁆𑀠𑀽𑀧𑀧𑀤𑁂𑀦 𑀲𑀳 𑀅𑀟𑁆𑀠𑀼𑀟𑁆𑀠𑀤𑀺𑀯𑀟𑁆𑀠𑀤𑀺𑀬𑀟𑁆𑀠𑀅𑀟𑁆𑀠𑀢𑀺𑀬𑀸𑀤𑁂𑀲𑀸 𑀳𑁄𑀦𑁆𑀢𑀺.

𑀏𑀢𑁆𑀣 𑀘 𑁋

𑀅𑀟𑁆𑀠𑀽𑀧𑀧𑀤𑀧𑀸𑀤𑀸𑀦-𑀲𑀸𑀫𑀢𑁆𑀣𑀸 𑀅𑀟𑁆𑀠𑀧𑀼𑀩𑁆𑀩𑀓𑀸;

𑀢𑁂𑀲𑀁𑀲𑀤𑁆𑀤𑁂𑀦 𑀕𑀬𑁆𑀳𑀦𑁆𑀢𑁂, 𑀘𑀢𑀼𑀢𑁆𑀣𑀤𑀼𑀢𑀺𑀬𑀸𑀤𑀬𑁄.

𑀅𑀟𑁆𑀠𑁂𑀦 𑀘𑀢𑀼𑀢𑁆𑀣𑁄 𑀅𑀟𑁆𑀠𑀼𑀟𑁆𑀠𑁄, 𑀅𑀟𑁆𑀠𑁂𑀦 𑀤𑀼𑀢𑀺𑀬𑁄 𑀤𑀺𑀯𑀟𑁆𑀠𑁄, 𑀤𑀺𑀬𑀟𑁆𑀠𑁄, 𑀅𑀟𑁆𑀠𑁂𑀦 𑀢𑀢𑀺𑀬𑁄 𑀅𑀟𑁆𑀠𑀢𑀺𑀬𑁄.

‘‘𑀏𑀓𑀜𑁆𑀘 𑀤𑀲 𑀘𑀸’’𑀢𑀺 𑀅𑀢𑁆𑀣𑁂 𑀤𑁆𑀯𑀦𑁆𑀤𑀲𑀫𑀸𑀲𑁂, ‘‘𑀏𑀓𑁂𑀦 𑀅𑀥𑀺𑀓𑀸 𑀤𑀲𑀸’’𑀢𑀺 𑀅𑀢𑁆𑀣𑁂 𑀢𑀧𑁆𑀧𑀼𑀭𑀺𑀲𑀲𑀫𑀸𑀲𑁂 𑀯𑀸 𑀓𑀢𑁂 ‘‘𑀲𑀗𑁆𑀔𑁆𑀬𑀸𑀦𑁂’’𑀢𑀺 𑀯𑀢𑁆𑀢𑀫𑀸𑀦𑁂 ‘‘𑀤𑁆𑀯𑁂𑀓𑀝𑁆𑀞𑀸𑀦𑀫𑀸𑀓𑀸𑀭𑁄 𑀯𑀸’’𑀢𑀺 𑀆𑀢𑁆𑀢𑀁. 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄𑀬𑀁 𑀯𑀸𑀲𑀤𑁆𑀤𑁄.

𑀢𑁂𑀦 𑀘𑁂𑀢𑁆𑀣 𑁋

𑀤𑁆𑀯𑁂𑀓𑀝𑁆𑀞𑀸𑀦𑀁 𑀤𑀲𑁂 𑀦𑀺𑀘𑁆𑀘𑀁, 𑀤𑁆𑀯𑀺𑀲𑁆𑀲𑀸’𑀦𑀯𑀼𑀢𑀺𑀬𑀸 𑀦𑀯𑀸;

𑀇𑀢𑀭𑁂𑀲’𑀫𑀲𑀦𑁆𑀢𑀜𑁆𑀘, 𑀆𑀢𑁆𑀢𑀁 𑀤𑀻𑀧𑁂𑀢𑀺 𑀯𑀸𑀲𑀼𑀢𑀺.

‘‘𑀏𑀓𑀸𑀤𑀺𑀢𑁄 𑀤𑀲𑀭 𑀲𑀗𑁆𑀔𑁆𑀬𑀸𑀦𑁂’’𑀢𑀺 𑀭𑀢𑁆𑀢𑀁.

𑀭𑀸𑀤𑁂𑀲𑁄 𑀯𑀡𑁆𑀡𑀫𑀢𑁆𑀢𑀢𑁆𑀢𑀸, 𑀯𑀡𑁆𑀡𑀫𑀢𑁆𑀢𑀧𑁆𑀧𑀲𑀗𑁆𑀕𑀺𑀧𑀺;

𑀲𑀺𑀬𑀸 𑀤𑀲𑀲𑁆𑀲 𑀤𑀲𑁆𑀲𑁂𑀯, 𑀦𑀺𑀫𑀺𑀢𑁆𑀢𑀸𑀲𑀦𑁆𑀦𑀪𑀸𑀯𑀢𑁄.

𑀢𑀢𑁄 𑀩𑀳𑀼𑀯𑀘𑀦𑀁 𑀬𑁄, ‘‘𑀧𑀜𑁆𑀘𑀸𑀤𑀻𑀦𑀫𑀓𑀸𑀭𑁄’’𑀢𑀺 𑀲𑀯𑀺𑀪𑀢𑁆𑀢𑀺𑀲𑁆𑀲 𑀅𑀦𑁆𑀢𑀲𑁆𑀲 𑀅𑀢𑁆𑀢𑀁. 𑀏𑀓𑀸𑀭𑀲, 𑀏𑀓𑀸𑀤𑀲, 𑀮𑀺𑀗𑁆𑀕𑀢𑁆𑀢𑀬𑁂𑀧𑀺 𑀲𑀫𑀸𑀦𑀁.

‘‘𑀯𑀸’’𑀢𑀺 𑀯𑀢𑁆𑀢𑀢𑁂.

𑁪𑁧𑁨. 𑀏𑀓𑀸𑀤𑀺𑀢𑁄 ¶ 𑀤𑀲𑀲𑁆𑀲𑀻.

𑀏𑀓𑀸𑀤𑀺𑀢𑁄 𑀧𑀭𑀲𑁆𑀲 𑀤𑀲𑀲𑁆𑀲 𑀅𑀦𑁆𑀢𑁂 𑀈𑀧𑀘𑁆𑀘𑀬𑁄 𑀳𑁄𑀢𑀺 𑀯𑀸 𑀧𑀽𑀭𑀡𑀢𑁆𑀣𑁂.

𑀤𑀲𑀲𑁆𑀲 𑀧𑀘𑁆𑀘𑀬𑀸𑀬𑁄𑀕𑀸, 𑀮𑀤𑁆𑀥𑀫𑀦𑁆𑀢𑁂𑀢𑀺 𑀅𑀢𑁆𑀣𑀢𑁄;

𑀢𑀤𑀦𑁆𑀢𑀲𑁆𑀲 𑀲𑀪𑀸𑀯𑁂𑀦, 𑀇𑀢𑁆𑀣𑀺𑀬𑀁𑀬𑁂𑀯 𑀲𑀫𑁆𑀪𑀯𑁄.

𑀏𑀓𑀸𑀤𑀲𑀦𑁆𑀦𑀁 𑀧𑀽𑀭𑀡𑀻 𑀏𑀓𑀸𑀤𑀲𑀻, 𑀅𑀜𑁆𑀜𑀢𑁆𑀭 𑀏𑀓𑀸𑀤𑀲𑀫𑁄, 𑀏𑀓𑀸𑀤𑀲𑀫𑀁.

𑀤𑁆𑀯𑁂 𑀘 𑀤𑀲 𑀘, 𑀤𑁆𑀯𑀻𑀳𑀺 𑀯𑀸 𑀅𑀥𑀺𑀓𑀸 𑀤𑀲𑀸𑀢𑀺 ‘‘𑀤𑁆𑀯𑀺 𑀤𑀲’’𑀇𑀘𑁆𑀘𑀢𑁆𑀭 ‘‘𑀯𑀸’’𑀢𑀺 𑀯𑀢𑁆𑀢𑀢𑁂.

‘‘𑀯𑀻𑀲𑀢𑀺 𑀤𑀲𑁂𑀲𑀼 𑀩𑀸 𑀤𑁆𑀯𑀺𑀲𑁆𑀲 𑀢𑀽’’𑀢𑀺 𑀩𑀸𑀤𑁂𑀲𑁄, 𑀤𑀲𑁆𑀲 𑀭𑀸𑀤𑁂𑀲𑁄. 𑀩𑀸𑀭𑀲, 𑀅𑀜𑁆𑀜𑀢𑁆𑀭 𑀆𑀢𑁆𑀢𑀁, 𑀤𑁆𑀯𑀸𑀤𑀲. 𑀤𑁆𑀯𑀸𑀤𑀲𑀦𑁆𑀦𑀁 𑀧𑀽𑀭𑀡𑁄 𑀩𑀸𑀭𑀲𑀫𑁄, 𑀤𑁆𑀯𑀸𑀤𑀲𑀫𑁄, 𑀤𑁆𑀯𑀸𑀤𑀲𑀻.

𑀢𑀬𑁄 𑀘 𑀤𑀲 𑀘, 𑀢𑀻𑀳𑀺 𑀯𑀸 𑀅𑀥𑀺𑀓𑀸 𑀤𑀲𑀸𑀢𑀺 𑀢𑁂𑀭𑀲, ‘‘𑀢𑁂𑀲𑀼 𑀯𑀼𑀤𑁆𑀥𑀺 𑀮𑁄𑀧𑀸’’𑀤𑀺𑀦𑀸 𑀢𑀺𑀲𑁆𑀲 𑀢𑁂𑀆𑀤𑀲𑁄 𑀆𑀦𑀯𑀼𑀢𑀺𑀬𑀸, 𑀢𑁂𑀭𑀲𑀫𑁄, 𑀢𑁂𑀭𑀲𑀻.

𑀘𑀢𑁆𑀢𑀸𑀭𑁄 𑀘 𑀤𑀲 𑀘, 𑀘𑀢𑀽𑀳𑀺 𑀯𑀸 𑀅𑀥𑀺𑀓𑀸 𑀤𑀲𑀸𑀢𑀺 𑀘𑀢𑀼𑀤𑁆𑀤𑀲 𑀇𑀘𑁆𑀘𑀢𑁆𑀭 ‘‘𑀕𑀡𑀦𑁂 𑀤𑀲𑀲𑁆𑀲𑀸’’𑀢𑀺 𑀘 𑀯𑀢𑁆𑀢𑀫𑀸𑀦𑁂 ‘‘𑀘𑀢𑀽𑀧𑀧𑀤𑀲𑁆𑀲 𑀮𑁄𑀧𑁄 𑀢𑀼𑀢𑁆𑀢𑀭𑀧𑀤𑀸𑀤𑀺 𑀘𑀲𑁆𑀲 𑀘𑀼𑀘𑁄𑀧𑀺 𑀦𑀯𑀸’’𑀢𑀺 𑀢𑀼𑀮𑁄𑀧𑁄, 𑀘𑀼𑀘𑁄 𑀘. 𑀘𑀼𑀤𑁆𑀤𑀲, 𑀘𑁄𑀤𑁆𑀤𑀲, 𑀘𑀢𑀼𑀤𑁆𑀤𑀲. 𑀘𑀼𑀤𑁆𑀤𑀲𑀫𑁄, 𑀘𑀢𑀼𑀤𑁆𑀤𑀲𑀫𑁄, 𑀘𑀓𑀼𑀤𑁆𑀤𑀲𑀻, 𑀘𑀸𑀢𑀼𑀤𑁆𑀤𑀲𑀻 𑀯𑀸.

𑀧𑀜𑁆𑀘 𑀘 𑀤𑀲 𑀘, 𑀧𑀜𑁆𑀘𑀳𑀺 𑀯𑀸 𑀅𑀥𑀺𑀓𑀸 𑀤𑀲𑀸𑀢𑀺 𑀧𑀜𑁆𑀘𑀤𑀲, ‘‘𑀢𑁂𑀲𑀼 𑀯𑀼𑀤𑁆𑀥𑀺 𑀮𑁄𑀧𑀸’’𑀤𑀺𑀦𑀸 𑀧𑀜𑁆𑀘𑀲𑀤𑁆𑀤𑀲𑁆𑀲 𑀤𑀲 𑀯𑀻𑀲𑁂𑀲𑀼 𑀧𑀦𑁆𑀦𑀧𑀡𑁆𑀡𑀆𑀤𑁂𑀲𑀸𑀧𑀺, ‘‘𑀅𑀝𑁆𑀞𑀸𑀤𑀺𑀢𑁄 𑀘𑀸’’𑀢𑀺 𑀭𑀢𑁆𑀢𑀁. 𑀧𑀦𑁆𑀦𑀭𑀲, 𑀧𑀜𑁆𑀘𑀤𑀲. 𑀧𑀦𑁆𑀦𑀭𑀲𑀫𑁄, 𑀧𑀜𑁆𑀘𑀤𑀲𑀫𑁄, 𑀧𑀦𑁆𑀦𑀭𑀲𑀻, 𑀧𑀜𑁆𑀘𑀤𑀲𑀻.

‘‘𑀙 ¶ 𑀘 𑀤𑀲 𑀘, 𑀙𑀳𑀺 𑀯𑀸 𑀅𑀥𑀺𑀓𑀸 𑀤𑀲𑀸’’𑀢𑀺 𑀲𑀫𑀸𑀲𑁂 𑀓𑀢𑁂 ‘‘𑀙𑀲𑁆𑀲𑀸’’𑀢𑀺 𑀯𑀢𑁆𑀢𑀫𑀸𑀦𑁂 ‘‘𑀤𑀲𑁂 𑀲𑁄 𑀦𑀺𑀘𑁆𑀘𑀜𑁆𑀘𑀸’’𑀢𑀺 𑀲𑁄, ‘‘𑀲𑀗𑁆𑀔𑁆𑀬𑀸𑀦𑀁, 𑀯𑀸’’𑀢𑀺 𑀘 𑀯𑀢𑁆𑀢𑀢𑁂, ‘‘𑀮 𑀤𑀭𑀸𑀦’’𑀦𑁆𑀢𑀺 𑀮𑀢𑁆𑀢𑀁, 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄𑀬𑀁 𑀯𑀸𑀲𑀤𑁆𑀤𑁄.

𑀴𑁄 𑀦𑀺𑀘𑁆𑀘𑀁 𑀲𑁄𑀴𑀲𑁂 𑀤𑀲𑁆𑀲, 𑀘𑀢𑁆𑀢𑀸𑀮𑀻𑀲𑁂 𑀘 𑀢𑁂𑀭𑀲𑁂;

𑀅𑀜𑁆𑀜𑀢𑁆𑀭 𑀦 𑀘 𑀳𑁄𑀢𑀸𑀬𑀁, 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁄.

𑀮𑀴𑀸𑀦𑀫𑀯𑀺𑀲𑁂𑀲𑁄 𑀓𑁆𑀯𑀘𑀺, 𑀲𑁄𑀴𑀲. 𑀢𑁂𑀴𑀲, 𑀘𑀢𑁆𑀢𑀸𑀮𑀻𑀲𑀁, 𑀘𑀢𑁆𑀢𑀸𑀭𑀻𑀲𑀁. 𑀲𑁄𑀴𑀲𑀫𑁄, 𑀲𑁄𑀴𑀲𑀻.

‘‘𑀯𑀸, 𑀤𑀲𑀭 𑀲𑀗𑁆𑀔𑁆𑀬𑀸𑀦𑁂’’𑀢𑀺 𑀅𑀥𑀺𑀓𑀺𑀘𑁆𑀘 ‘‘𑀅𑀝𑁆𑀞𑀸𑀤𑀺𑀢𑁄 𑀘𑀸’’𑀢𑀺 𑀭𑀢𑁆𑀢𑀁. 𑀅𑀝𑁆𑀞𑀸𑀭𑀲, 𑀅𑀝𑁆𑀞𑀸𑀤𑀲, 𑀆𑀢𑁆𑀢𑀁. 𑀅𑀝𑁆𑀞𑀸𑀭𑀲𑀦𑁆𑀦𑀁 𑀧𑀽𑀭𑀡𑁄 𑀅𑀝𑁆𑀞𑀸𑀭𑀲𑀫𑁄, 𑀅𑀝𑁆𑀞𑀸𑀤𑀲𑀫𑁄. 𑀏𑀯𑀁 𑀲𑀢𑁆𑀢𑀭𑀲, 𑀲𑀢𑁆𑀢𑀤𑀲. 𑀲𑀢𑁆𑀢𑀭𑀲𑀫𑁄, 𑀲𑀢𑁆𑀢𑀤𑀲𑀫𑁄.

𑀅𑀝𑁆𑀞𑀸𑀤𑀺𑀢𑁄𑀢𑀺 𑀓𑀺𑀫𑀢𑁆𑀣𑀁? 𑀘𑀢𑀼𑀤𑁆𑀤𑀲.

𑀏𑀓𑁂𑀦 𑀊𑀦𑀸 𑀯𑀻𑀲𑀢𑀻𑀢𑀺 𑀢𑀧𑁆𑀧𑀼𑀭𑀺𑀲𑁄, 𑀏𑀓𑀽𑀦𑀯𑀻𑀲𑀢𑀺. 𑀏𑀓𑀽𑀦𑀯𑀻𑀲𑀢𑀸𑀤𑀬𑁄 𑀆𑀦𑀯𑀼𑀢𑀺𑀬𑀸 𑀏𑀓𑀯𑀘𑀦𑀦𑁆𑀢𑀸, 𑀇𑀢𑁆𑀣𑀺𑀮𑀺𑀗𑁆𑀕𑀸 𑀘 𑀤𑀝𑁆𑀞𑀩𑁆𑀩𑀸, 𑀢𑁂 𑀘 𑀲𑀗𑁆𑀔𑁆𑀬𑀸𑀦𑁂, 𑀲𑀗𑁆𑀔𑁆𑀬𑁂𑀬𑁆𑀬𑁂 𑀘 𑀯𑀢𑁆𑀢𑀦𑁆𑀢𑁂, 𑀬𑀤𑀸 𑀲𑀗𑁆𑀔𑁆𑀬𑀸𑀦𑁂 𑀯𑀢𑁆𑀢𑀦𑁆𑀢𑁂, 𑀢𑀤𑀸 𑀪𑀺𑀓𑁆𑀔𑀽𑀦𑀫𑁂𑀓𑀽𑀦𑀯𑀻𑀲𑀢𑀺 𑀢𑀺𑀝𑁆𑀞𑀢𑀺, 𑀪𑁄𑀢𑀺 𑀪𑀺𑀓𑁆𑀔𑀽𑀦𑀫𑁂𑀓𑀽𑀦𑀯𑀻𑀲𑀢𑀺 𑀢𑀺𑀝𑁆𑀞𑀢𑀼, 𑀪𑀺𑀓𑁆𑀔𑀽𑀦𑀫𑁂𑀓𑀽𑀦𑀯𑀻𑀲𑀢𑀺𑀁 𑀧𑀲𑁆𑀲, 𑀪𑀺𑀓𑁆𑀔𑀽𑀦𑀫𑁂𑀓𑀽𑀦𑀯𑀻𑀲𑀢𑀺𑀬𑀸 𑀓𑀢𑀁 𑀇𑀘𑁆𑀘𑀸𑀤𑀺.

𑀲𑀗𑁆𑀔𑁆𑀬𑁂𑀬𑁆𑀬𑁂 𑀧𑀦 𑀏𑀓𑀽𑀦𑀯𑀻𑀲𑀢𑀺 𑀪𑀺𑀓𑁆𑀔𑀯𑁄 𑀢𑀺𑀝𑁆𑀞𑀦𑁆𑀢𑀺, 𑀪𑁄𑀦𑁆𑀢𑁄 𑀏𑀓𑀽𑀦𑀯𑀻𑀲𑀢𑀺 𑀪𑀺𑀓𑁆𑀔𑀯𑁄 𑀢𑀺𑀝𑁆𑀞𑀣, 𑀏𑀓𑀽𑀦𑀯𑀻𑀲𑀢𑀺𑀁 𑀪𑀺𑀓𑁆𑀔𑀽 𑀧𑀲𑁆𑀲, 𑀏𑀓𑀽𑀦𑀯𑀻𑀲𑀢𑀺𑀬𑀸 𑀪𑀺𑀓𑁆𑀔𑀽𑀳𑀺 𑀓𑀢𑀁 𑀇𑀘𑁆𑀘𑀸𑀤𑀺. 𑀏𑀯𑀁 𑀯𑀻𑀲𑀢𑀸𑀤𑀻𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑀁, 𑀏𑀓𑀽𑀦𑀯𑀻𑀲𑀢𑀺𑀬𑀸 𑀧𑀽𑀭𑀡𑁄 𑀏𑀓𑀽𑀦𑀯𑀻𑀲𑀢𑀺𑀫𑁄.

𑀤𑀲 𑀘 𑀤𑀲 𑀘𑀸𑀢𑀺 𑀅𑀢𑁆𑀣𑁂 𑀤𑁆𑀯𑀦𑁆𑀤𑀲𑀫𑀸𑀲𑀁 𑀓𑀢𑁆𑀯𑀸 ‘‘𑀤𑀲𑀤𑀲𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀭𑀽𑀧𑀸𑀦𑀫𑁂𑀓𑀲𑁂𑀲𑁆𑀯𑀲𑀓𑀺’’𑀦𑁆𑀢𑀺 𑀏𑀓𑀲𑁂𑀲𑁂 𑀓𑀢𑁂 ¶ 𑀤𑀲𑀲𑀤𑁆𑀤𑀢𑁄 𑀧𑀞𑀫𑀸𑀩𑀳𑀼𑀯𑀘𑀦𑀁 𑀬𑁄. ‘‘𑀤𑀲 𑀬𑁄’’𑀇𑀢𑀻𑀥 𑁋

𑁪𑁧𑁩. 𑀕𑀡𑀦𑁂 𑀤𑀲𑀲𑁆𑀲 𑀤𑁆𑀯𑀺𑀢𑀺 𑀘𑀢𑀼 𑀧𑀜𑁆𑀘 𑀙 𑀲𑀢𑁆𑀢 𑀅𑀝𑁆𑀞𑀦𑀯𑀓𑀸𑀦𑀁 𑀯𑀻𑀢𑀺 𑀘𑀢𑁆𑀢𑀸𑀭 𑀧𑀜𑁆𑀜𑀸 𑀙 𑀲𑀢𑁆𑀢𑀸𑀲 𑀦𑀯𑀸 𑀬𑁄𑀲𑀼 𑀬𑁄𑀦𑀜𑁆𑀘𑀻 𑀲𑀫𑀸𑀲𑀁 𑀞𑀺𑀭𑀺 𑀢𑀻𑀢𑀼𑀢𑀺.

𑀕𑀡𑀦𑁂 𑀤𑀲𑀲𑁆𑀲 𑀲𑀫𑁆𑀩𑀦𑁆𑀥𑀻𑀦𑀁 𑀤𑁆𑀯𑀺𑀓 𑀢𑀺𑀓 𑀘𑀢𑀼𑀓𑁆𑀓 𑀧𑀜𑁆𑀘𑀓 𑀙𑀓𑁆𑀓𑀲𑀢𑁆𑀢𑀓 𑀅𑀝𑁆𑀞𑀓 𑀦𑀯𑀓𑀸𑀦𑀁 𑀓𑀢𑁂𑀓𑀲𑁂𑀲𑀸𑀦𑀁 𑀬𑀣𑀸𑀓𑁆𑀓𑀫𑀁 𑀯𑀻𑀢𑀺 𑀘𑀢𑁆𑀢𑀸𑀭 𑀧𑀜𑁆𑀜𑀸 𑀙 𑀲𑀢𑁆𑀢 𑀅𑀲 𑀦𑀯 𑀇𑀘𑁆𑀘𑀸𑀤𑁂𑀲𑀸 𑀳𑁄𑀦𑁆𑀢𑀺 𑀬𑁄𑀲𑀼 𑀧𑀭𑁂𑀲𑀼, 𑀬𑁄𑀦𑀜𑁆𑀘 𑀈𑀲𑀁 𑀆𑀲𑀁 𑀞𑀺 𑀭𑀺𑀢𑀺 𑀈𑀢𑀺 𑀉𑀢𑀺𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀻𑀢𑀺 𑀤𑁆𑀯𑀺𑀤𑀲𑀢𑁆𑀣𑀯𑀸𑀘𑀓𑀲𑁆𑀲 𑀤𑀲𑀲𑁆𑀲 𑀯𑀻𑀆𑀤𑁂𑀲𑁄 𑀳𑁄𑀢𑀺, 𑀬𑁄𑀯𑀘𑀦𑀲𑁆𑀲 𑀈𑀲𑀜𑁆𑀘, 𑀲𑀭𑀮𑁄𑀧𑀸𑀤𑀺.

‘‘𑀲𑀗𑁆𑀔𑁆𑀬𑀸𑀦𑀁, 𑀯𑀸, 𑀅𑀦𑁆𑀢𑁂’’𑀢𑀺 𑀘 𑀯𑀢𑁆𑀢𑀢𑁂.

𑁪𑁧𑁪. 𑀢𑀺 𑀘.

𑀢𑀸𑀲𑀁 𑀲𑀗𑁆𑀔𑁆𑀬𑀸𑀦𑀫𑀦𑁆𑀢𑁂 𑀢𑀺𑀓𑀸𑀭𑀸𑀕𑀫𑁄 𑀳𑁄𑀢𑀺 𑀯𑀸. 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄𑀬𑀁 𑀯𑀸𑀲𑀤𑁆𑀤𑁄.

𑀯𑀺𑀪𑀸𑀲𑀸 𑀯𑀻𑀲 𑀢𑀺𑀁𑀲𑀸𑀦-𑀫𑀦𑁆𑀢𑁂 𑀳𑁄𑀢𑀺 𑀢𑀺𑀆𑀕𑀫𑁄;

𑀅𑀜𑁆𑀜𑀢𑁆𑀣 𑀦 𑀘 𑀳𑁄𑀢𑁂𑀯, 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁄.

‘‘𑀩𑁆𑀬𑀜𑁆𑀚𑀦𑁂 𑀘𑀸’’𑀢𑀺 𑀦𑀺𑀕𑁆𑀕𑀳𑀻𑀢𑀮𑁄𑀧𑁄, 𑀧𑀼𑀦 𑀢𑀤𑁆𑀥𑀺𑀢𑀢𑁆𑀢𑀸 𑀦𑀸𑀫𑀩𑁆𑀬𑀧𑀤𑁂𑀲𑁂 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺. 𑀪𑀺𑀓𑁆𑀔𑀽𑀦𑀁 𑀯𑀻𑀲𑀢𑀺, 𑀯𑀻𑀲𑀁 𑀯𑀸, 𑀯𑀻𑀲𑀢𑀺 𑀪𑀺𑀓𑁆𑀔𑀽, 𑀯𑀻𑀲𑀁 𑀯𑀸 𑀇𑀘𑁆𑀘𑀸𑀤𑀺. 𑀯𑀻𑀲𑀢𑀺𑀫𑁄. 𑀢𑀣𑀸 𑀏𑀓𑀯𑀻𑀲𑀢𑀺 𑀓𑀼𑀲𑀮𑀘𑀺𑀢𑁆𑀢𑀸𑀦𑀺, 𑀏𑀓𑀯𑀻𑀲𑀁 𑀯𑀸. 𑀏𑀓𑀯𑀻𑀲𑀢𑀺𑀫𑁄. 𑀩𑀸𑀯𑀻𑀲𑀢𑀺, 𑀩𑀸𑀯𑀻𑀲𑀁 𑀯𑀸. 𑀩𑀸𑀯𑀻𑀲𑀢𑀺𑀫𑁄. 𑀤𑁆𑀯𑀸𑀯𑀻𑀲𑀢𑀺, 𑀤𑁆𑀯𑀸𑀯𑀻𑀲𑀁 𑀯𑀸. 𑀤𑁆𑀯𑀸𑀯𑀻𑀲𑀢𑀺𑀫𑁄. 𑀢𑁂𑀯𑀻𑀲𑀢𑀺, 𑀢𑁂𑀯𑀻𑀲𑀁 𑀯𑀸. 𑀢𑁂𑀯𑀻𑀲𑀢𑀺𑀫𑁄. 𑀘𑀢𑀼𑀯𑀻𑀲𑀢𑀺, 𑀘𑀢𑀼𑀯𑀻𑀲𑀁 𑀯𑀸. 𑀘𑀢𑀼𑀯𑀻𑀲𑀢𑀺𑀫𑁄. 𑀧𑀡𑁆𑀡𑀯𑀻𑀲𑀢𑀺, 𑀧𑀡𑁆𑀡𑀯𑀻𑀲𑀁 𑀯𑀸. 𑀧𑀡𑁆𑀡𑀯𑀻𑀲𑀢𑀺𑀫𑁄. 𑀧𑀜𑁆𑀘𑀯𑀻𑀲𑀢𑀺, 𑀧𑀜𑁆𑀘𑀯𑀻𑀲𑀁 𑀯𑀸. 𑀧𑀜𑁆𑀘𑀯𑀻𑀲𑀢𑀺𑀫𑁄. 𑀙𑀩𑁆𑀩𑀻𑀲𑀢𑀺 ¶ , 𑀙𑀩𑁆𑀩𑀻𑀲𑀁 𑀯𑀸. 𑀙𑀩𑁆𑀩𑀻𑀲𑀢𑀺𑀫𑁄. 𑀲𑀢𑁆𑀢𑀯𑀻𑀲𑀢𑀺, 𑀲𑀢𑁆𑀢𑀯𑀻𑀲𑀁 𑀯𑀸. 𑀲𑀢𑁆𑀢𑀯𑀻𑀲𑀢𑀺𑀫𑁄. 𑀅𑀝𑁆𑀞𑀯𑀻𑀲𑀢𑀺, 𑀅𑀝𑁆𑀞𑀯𑀻𑀲𑀁 𑀯𑀸. 𑀅𑀝𑁆𑀞𑀯𑀻𑀲𑀢𑀺𑀫𑁄. 𑀏𑀓𑀽𑀦𑀢𑀺𑀁𑀲𑀢𑀺, 𑀏𑀓𑀽𑀦𑀢𑀺𑀁𑀲𑀁𑀯𑀸. 𑀏𑀓𑀽𑀦𑀢𑀺𑀁𑀲𑀢𑀺𑀫𑁄.

𑀤𑀲 𑀘 𑀤𑀲 𑀘 𑀤𑀲 𑀘𑀸𑀢𑀺 ‘‘𑀤𑀲 𑀤𑀲 𑀤𑀲𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀏𑀓𑀲𑁂𑀲𑁂 𑀓𑀢𑁂 ‘‘𑀕𑀡𑀦𑁂 𑀤𑀲𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀢𑀺𑀈𑀲𑀫𑀸𑀤𑁂𑀲𑀸, ‘‘𑀓𑁆𑀯𑀘𑀸’’𑀤𑀺𑀦𑀸 𑀭𑀲𑁆𑀲𑀢𑁆𑀢𑀁, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄 𑀘, 𑀲𑁂𑀲𑀁 𑀯𑀻𑀲𑀢𑀺𑀲𑀫𑀁. 𑀢𑀺𑀁𑀲𑀢𑀺, 𑀢𑀺𑀁𑀲𑀁, 𑀢𑀺𑀁𑀲 𑀯𑀲𑁆𑀲𑀸𑀦𑀺, 𑀦𑀺𑀕𑁆𑀕𑀳𑀻𑀢𑀮𑁄𑀧𑁄, 𑀢𑀺𑀁𑀲𑀁, 𑀢𑀺𑀁𑀲𑀸𑀬 𑀇𑀘𑁆𑀘𑀸𑀤𑀺. 𑀏𑀓𑀢𑀺𑀁𑀲𑀢𑀺, 𑀏𑀓𑀢𑀺𑀁𑀲𑀁 𑀯𑀸, 𑀩𑀸𑀢𑁆𑀢𑀺𑀁𑀲𑀁, 𑀤𑁆𑀯𑀢𑁆𑀢𑀺𑀁𑀲𑀁, 𑀢𑁂𑀢𑁆𑀢𑀺𑀁𑀲𑀁 𑀇𑀘𑁆𑀘𑀸𑀤𑀺.

𑀘𑀢𑀼𑀤𑀲𑀢𑁆𑀣𑀯𑀸𑀘𑀓𑀲𑁆𑀲 𑀓𑀢𑁂𑀓𑀲𑁂𑀲𑀲𑁆𑀲 𑀤𑀲𑀲𑁆𑀲 𑀘𑀢𑁆𑀢𑀸𑀭, 𑀬𑁄𑀯𑀘𑀦𑀲𑁆𑀲 𑀈𑀲𑀁, 𑀘𑀢𑁆𑀢𑀸𑀮𑀻𑀲𑀁, ‘‘𑀮 𑀤𑀭𑀸𑀦’’𑀦𑁆𑀢𑀺 𑀭𑀲𑁆𑀲 𑀮𑀢𑁆𑀢𑀁, 𑀢𑀸𑀮𑀻𑀲𑀁 𑀯𑀸. 𑀘𑀢𑁆𑀢𑀸𑀮𑀻𑀲𑀢𑀺𑀫𑁄. 𑀏𑀓𑀘𑀢𑁆𑀢𑀸𑀮𑀻𑀲𑀁, 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀁, 𑀤𑁆𑀯𑀺𑀘𑀢𑁆𑀢𑀸𑀮𑀻𑀲𑀁, 𑀢𑁂𑀘𑀢𑁆𑀢𑀸𑀮𑀻𑀲𑀁, 𑀢𑀺𑀘𑀢𑁆𑀢𑀸𑀮𑀻𑀲𑀁 𑀇𑀘𑁆𑀘𑀸𑀤𑀺.

𑀧𑀜𑁆𑀘𑀤𑀲𑀢𑁆𑀣𑀯𑀸𑀘𑀓𑀲𑁆𑀲 𑀤𑀲𑀲𑁆𑀲 𑀧𑀜𑁆𑀜𑀸, 𑀬𑁄𑀯𑀘𑀦𑀲𑁆𑀲 𑀆𑀲𑀜𑁆𑀘. 𑀧𑀜𑁆𑀜𑀸𑀲𑀁, ‘‘𑀢𑁂𑀲𑀼 𑀯𑀼𑀤𑁆𑀥𑀺 𑀮𑁄𑀧𑀸’’𑀤𑀺𑀦𑀸 𑀧𑀡𑁆𑀡𑀸𑀤𑁂𑀲𑁄, 𑀧𑀡𑁆𑀡𑀸𑀲𑀁 𑀯𑀸. 𑀏𑀓𑀧𑀜𑁆𑀜𑀸𑀲𑀁, 𑀤𑁆𑀯𑁂𑀧𑀜𑁆𑀜𑀸𑀲𑀁, 𑀤𑁆𑀯𑀺𑀧𑀜𑁆𑀜𑀸𑀲𑀁.

𑀙𑀤𑀲𑀢𑁆𑀣𑀯𑀸𑀘𑀓𑀲𑁆𑀲 𑀤𑀲𑀲𑁆𑀲 𑀙, 𑀬𑁄𑀯𑀘𑀦𑀲𑁆𑀲 𑀞𑀺𑀆𑀤𑁂𑀲𑁄, ‘‘𑀲 𑀙𑀲𑁆𑀲 𑀯𑀸’’𑀢𑀺 𑀲𑀓𑀸𑀭𑀸𑀤𑁂𑀲𑁄, 𑀲𑀝𑁆𑀞𑀺, 𑀤𑁆𑀯𑀸𑀲𑀝𑁆𑀞𑀺, 𑀤𑁆𑀯𑁂𑀲𑀝𑁆𑀞𑀺, 𑀤𑁆𑀯𑀺𑀲𑀝𑁆𑀞𑀺, 𑀢𑁂𑀲𑀝𑁆𑀞𑀺, 𑀢𑀺𑀲𑀝𑁆𑀞𑀺.

𑀲𑀢𑁆𑀢𑀤𑀲𑀢𑁆𑀣𑀯𑀸𑀘𑀓𑀲𑁆𑀲 𑀤𑀲𑀲𑁆𑀲 𑀲𑀢𑁆𑀢, 𑀬𑁄𑀯𑀘𑀦𑀲𑁆𑀲 𑀭𑀺, 𑀢𑀺 𑀘. 𑀲𑀢𑁆𑀢𑀭𑀺, 𑀲𑀢𑁆𑀢𑀢𑀺, 𑀤𑁆𑀯𑀸𑀲𑀢𑁆𑀢𑀭𑀺, 𑀤𑁆𑀯𑀸𑀲𑀢𑁆𑀢𑀢𑀺, 𑀤𑁆𑀯𑀺𑀲𑀢𑁆𑀢𑀭𑀺, 𑀤𑀺𑀲𑀢𑁆𑀢𑀢𑀺, 𑀢𑁂𑀲𑀢𑁆𑀢𑀢𑀺, 𑀢𑀺𑀲𑀢𑁆𑀢𑀢𑀺 𑀇𑀘𑁆𑀘𑀸𑀤𑀺.

𑀅𑀝𑁆𑀞𑀤𑀲𑀢𑁆𑀣𑀯𑀸𑀘𑀓𑀲𑁆𑀲 𑀤𑀲𑀲𑁆𑀲 𑀅𑀲, 𑀬𑁄𑀯𑀘𑀦𑀲𑁆𑀲 𑀈𑀢𑀺𑀆𑀤𑁂𑀲𑁄 𑀘. 𑀅𑀲𑀻𑀢𑀺, 𑀏𑀓𑀸𑀲𑀻𑀢𑀺, 𑀤𑁆𑀯𑁂𑀅𑀲𑀻𑀢𑀺, 𑀢𑁂𑀅𑀲𑀻𑀢𑀺, 𑀘𑀢𑀼𑀭𑀸𑀲𑀻𑀢𑀺, ‘‘𑀓𑁆𑀯𑀘𑀸’’𑀤𑀺𑀦𑀸 𑀤𑀻𑀖𑁄.

𑀦𑀯𑀤𑀲𑀢𑁆𑀣𑀯𑀸𑀘𑀓𑀲𑁆𑀲 ¶ 𑀤𑀲𑀲𑁆𑀲 𑀦𑀯, 𑀬𑁄𑀯𑀘𑀦𑀲𑁆𑀲 𑀉𑀢𑀺 𑀘, 𑀦𑀯𑀼𑀢𑀺, 𑀤𑁆𑀯𑀸𑀦𑀯𑀼𑀢𑀺, 𑀤𑁆𑀯𑁂𑀦𑀯𑀼𑀢𑀺, 𑀤𑁆𑀯𑀺𑀦𑀯𑀼𑀢𑀺, 𑀢𑁂𑀦𑀯𑀼𑀢𑀺, 𑀢𑀺𑀦𑀯𑀼𑀢𑀺, 𑀘𑀢𑀼𑀦𑀯𑀼𑀢𑀺, 𑀙𑀦𑁆𑀦𑀯𑀼𑀢𑀺𑀬𑀸, 𑀙𑀦𑁆𑀦𑀯𑀼𑀢𑀻𑀦𑀁 𑀧𑀸𑀲𑀡𑁆𑀟𑀸𑀦𑀁.

‘‘𑀕𑀡𑀦𑁂, 𑀤𑀲𑀲𑁆𑀲𑀸’’𑀢𑀺 𑀘 𑀯𑀢𑁆𑀢𑀢𑁂.

𑁪𑁧𑁫. 𑀤𑀲𑀤𑀲𑀓𑀁 𑀲𑀢𑀁 𑀤𑀲𑀓𑀸𑀦𑀁 𑀲𑀢𑀁 𑀲𑀳𑀲𑁆𑀲𑀜𑁆𑀘 𑀬𑁄𑀫𑁆𑀳𑀺.

𑀕𑀡𑀦𑁂 𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀤𑀲𑀤𑀲𑀓𑀢𑁆𑀣𑀯𑀸𑀘𑀓𑀲𑁆𑀲 𑀤𑀲𑀲𑀤𑁆𑀤𑀲𑁆𑀲 𑀲𑀢𑀁 𑀳𑁄𑀢𑀺, 𑀲𑀢𑀤𑀲𑀓𑀢𑁆𑀣𑀯𑀸𑀘𑀓𑀲𑁆𑀲 𑀤𑀲𑀲𑁆𑀲 𑀲𑀳𑀲𑁆𑀲𑀁 𑀳𑁄𑀢𑀺 𑀬𑁄𑀫𑁆𑀳𑀺. 𑀇𑀫𑀺𑀦𑀸 𑀦𑀺𑀧𑀸𑀢𑀦𑁂𑀦 𑀬𑁄𑀮𑁄𑀧𑁄, 𑀢𑀤𑁆𑀥𑀺𑀢𑀢𑁆𑀢𑀸 𑀧𑀼𑀦 𑀦𑀸𑀫𑀩𑁆𑀬𑀧𑀤𑁂𑀲𑁂 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺, 𑀦𑀺𑀕𑁆𑀕𑀳𑀻𑀢𑀲𑁆𑀲 𑀮𑁄𑀧𑁄, ‘‘𑀲𑀺’’𑀦𑁆𑀢𑀺 𑀅𑀫𑀸𑀤𑁂𑀲𑁄, 𑀬𑁄𑀚𑀦𑀸𑀦𑀁 𑀲𑀢𑀁, 𑀲𑀳𑀲𑁆𑀲𑀁. 𑀲𑀢𑀁 𑀦𑀧𑀼𑀁𑀲𑀓𑀫𑁂𑀓𑀯𑀘𑀦𑀦𑁆𑀢𑀜𑁆𑀘, 𑀢𑀣𑀸 𑀲𑀳𑀲𑁆𑀲𑀁, 𑀯𑀕𑁆𑀕𑀪𑁂𑀤𑁂 𑀲𑀩𑁆𑀩𑀢𑁆𑀣 𑀩𑀳𑀼𑀯𑀘𑀦𑀫𑁆𑀧𑀺 𑀪𑀯𑀢𑀺. 𑀤𑁆𑀯𑁂 𑀯𑀻𑀲𑀢𑀺𑀬𑁄. 𑀏𑀯𑀁 𑀢𑀺𑀁𑀲𑀸𑀤𑀻𑀲𑀼𑀧𑀺, 𑀤𑁆𑀯𑁂 𑀲𑀢𑀸𑀦𑀺, 𑀩𑀳𑀽𑀦𑀺 𑀲𑀢𑀸𑀦𑀺, 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺, 𑀩𑀳𑀽𑀦𑀺 𑀲𑀳𑀲𑁆𑀲𑀸𑀦𑀺.

𑀲𑀢𑀲𑁆𑀲 𑀤𑁆𑀯𑀺𑀓𑀦𑁆𑀢𑀺 𑀅𑀢𑁆𑀣𑁂 𑀙𑀝𑁆𑀞𑀻𑀢𑀧𑁆𑀧𑀼𑀭𑀺𑀲𑀁 𑀓𑀢𑁆𑀯𑀸 ‘‘𑀲𑀢𑀁 𑀤𑁆𑀯𑀺𑀓’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀤𑁆𑀯𑀺𑀓𑀸𑀤𑀻𑀦𑀁 𑀢𑀤𑀼𑀢𑁆𑀢𑀭𑀧𑀤𑀸𑀦𑀜𑁆𑀘 𑀦𑀺𑀧𑀘𑁆𑀘𑀦𑁆𑀢𑁂’’𑀢𑀺 𑀯𑀼𑀢𑁆𑀢𑀺𑀬𑀁 𑀯𑀘𑀦𑀢𑁄 𑀇𑀫𑀺𑀦𑀸 𑀦𑀺𑀧𑀸𑀢𑀦𑁂𑀦 𑀉𑀢𑁆𑀢𑀭𑀧𑀤𑀲𑁆𑀲 𑀧𑀼𑀩𑁆𑀩𑀦𑀺𑀧𑀸𑀢𑁄, 𑀓𑀓𑀸𑀭𑀮𑁄𑀧𑁄 𑀘 𑀳𑁄𑀢𑀺. 𑀤𑁆𑀯𑀺𑀲𑀢𑀁. 𑀏𑀯𑀁 𑀲𑀢𑀲𑁆𑀲 𑀢𑀺𑀓𑀁 𑀢𑀺𑀲𑀢𑀁, 𑀢𑀣𑀸 𑀘𑀢𑀼𑀲𑀢𑀁, 𑀧𑀜𑁆𑀘𑀲𑀢𑀁, 𑀙𑀲𑀢𑀁, 𑀲𑀢𑁆𑀢𑀲𑀢𑀁, 𑀅𑀝𑁆𑀞𑀲𑀢𑀁, 𑀦𑀯𑀲𑀢𑀁, 𑀤𑀲𑀲𑀢𑀁 𑀲𑀳𑀲𑁆𑀲𑀁 𑀳𑁄𑀢𑀺. 𑀅𑀣 𑀯𑀸 𑀤𑁆𑀯𑁂 𑀲𑀢𑀸𑀦𑀺 𑀤𑁆𑀯𑀺𑀲𑀢𑀦𑁆𑀢𑀺 𑀤𑀺𑀕𑀼𑀲𑀫𑀸𑀲𑁄. 𑀏𑀯𑀁 𑀢𑀺𑀲𑀢𑀁, 𑀘𑀢𑀼𑀲𑀢𑀁 𑀇𑀘𑁆𑀘𑀸𑀤𑀺.

𑁪𑁧𑁬. 𑀬𑀸𑀯 𑀢𑀤𑀼𑀢𑁆𑀢𑀭𑀺 𑀤𑀲𑀕𑀼𑀡𑀺𑀢𑀜𑁆𑀘.

𑀬𑀸𑀯 𑀢𑀸𑀲𑀁 𑀲𑀗𑁆𑀔𑁆𑀬𑀸𑀦𑀫𑀼𑀢𑁆𑀢𑀭𑀺, 𑀢𑀸𑀯 𑀤𑀲𑀕𑀼𑀡𑀺𑀢𑀜𑁆𑀘 𑀓𑀸𑀢𑀩𑁆𑀩𑀁, 𑀏𑀢𑁆𑀣 𑀤𑀓𑀸𑀭𑁄 𑀲𑀦𑁆𑀥𑀺𑀚𑁄. 𑀬𑀣𑀸 𑁋 𑀤𑀲𑀲𑁆𑀲 𑀕𑀡𑀦𑀲𑁆𑀲 𑀤𑀲𑀕𑀼𑀡𑀺𑀢𑀁 ¶ 𑀲𑀢𑀁 𑀳𑁄𑀢𑀺, 𑀲𑀢𑀲𑁆𑀲 𑀤𑀲𑀕𑀼𑀡𑀺𑀢𑀁 𑀲𑀳𑀲𑁆𑀲𑀁, 𑀲𑀳𑀲𑁆𑀲𑀲𑁆𑀲 𑀤𑀲𑀕𑀼𑀡𑀺𑀢𑀁 𑀤𑀲𑀲𑀳𑀲𑁆𑀲𑀁, 𑀇𑀤𑀁 𑀦𑀳𑀼𑀢𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀤𑀲𑀲𑀳𑀲𑁆𑀲𑀲𑁆𑀲 𑀤𑀲𑀕𑀼𑀡𑀺𑀢𑀁 𑀲𑀢𑀲𑀳𑀲𑁆𑀲𑀁, 𑀢𑀁 𑀮𑀓𑁆𑀔𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀲𑀢𑀲𑀳𑀲𑁆𑀲𑀲𑁆𑀲 𑀤𑀲𑀕𑀼𑀡𑀺𑀢𑀁 𑀤𑀲𑀲𑀢𑀲𑀳𑀲𑁆𑀲𑀁.

‘‘𑀬𑀤𑀦𑀼𑀧𑀧𑀦𑁆𑀦𑀸 𑀦𑀺𑀧𑀸𑀢𑀦𑀸 𑀲𑀺𑀚𑁆𑀛𑀦𑁆𑀢𑀻’’𑀢𑀺 𑀯𑀢𑁆𑀢𑀢𑁂.

𑁪𑁧𑁭. 𑀲𑀓𑀦𑀸𑀫𑁂𑀳𑀺.

𑀬𑀸𑀲𑀁 𑀧𑀦 𑀲𑀗𑁆𑀔𑁆𑀬𑀸𑀦𑀁 𑀅𑀦𑀺𑀤𑁆𑀤𑀺𑀝𑁆𑀞𑀦𑀸𑀫𑀥𑁂𑀬𑁆𑀬𑀸𑀦𑀁 𑀬𑀸𑀦𑀺 𑀭𑀽𑀧𑀸𑀦𑀺, 𑀢𑀸𑀦𑀺 𑀲𑀓𑁂𑀳𑀺 𑀦𑀸𑀫𑁂𑀳𑀺 𑀦𑀺𑀧𑀘𑁆𑀘𑀦𑁆𑀢𑁂. 𑀲𑀢𑀲𑀳𑀲𑁆𑀲𑀸𑀦𑀁 𑀲𑀢𑀁 𑀓𑁄𑀝𑀺, 𑀇𑀢𑁆𑀣𑀺𑀮𑀺𑀗𑁆𑀕𑀸, 𑀏𑀓𑀯𑀘𑀦𑀦𑁆𑀢𑀸 𑀘, 𑀯𑀕𑁆𑀕𑀪𑁂𑀤𑁂 𑀩𑀳𑀼𑀯𑀘𑀦𑀜𑁆𑀘 𑀪𑀯𑀢𑀺, 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀲𑀢𑀁 𑀧𑀓𑁄𑀝𑀺, 𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀁 𑀲𑀢𑀁 𑀓𑁄𑀝𑀺𑀧𑁆𑀧𑀓𑁄𑀝𑀺. 𑀏𑀯𑀁 𑀦𑀳𑀼𑀢𑀁, 𑀦𑀺𑀦𑁆𑀦𑀳𑀼𑀢𑀁, 𑀅𑀓𑁆𑀔𑁄𑀪𑀺𑀦𑀻, 𑀩𑀺𑀦𑁆𑀤𑀼, 𑀅𑀩𑁆𑀩𑀼𑀤𑀁, 𑀦𑀺𑀭𑀩𑁆𑀩𑀼𑀤𑀁, 𑀅𑀳𑀳𑀁, 𑀅𑀩𑀩𑀁, 𑀅𑀝𑀝𑀁, 𑀲𑁄𑀕𑀦𑁆𑀥𑀺𑀓𑀁, 𑀉𑀧𑁆𑀧𑀮𑀁, 𑀓𑀼𑀫𑀼𑀤𑀁, 𑀧𑀼𑀡𑁆𑀟𑀭𑀻𑀓𑀁, 𑀧𑀤𑀼𑀫𑀁, 𑀓𑀣𑀸𑀦𑀁, 𑀫𑀳𑀸𑀓𑀣𑀸𑀦𑀁, 𑀅𑀲𑀗𑁆𑀔𑁆𑀬𑁂𑀬𑁆𑀬𑀦𑁆𑀢𑀺.

𑀇𑀘𑁆𑀘𑁂𑀯𑀁 𑀞𑀸𑀦𑀢𑁄 𑀞𑀸𑀦𑀁, 𑀲𑀢𑀮𑀓𑁆𑀔𑀕𑀼𑀡𑀁 𑀫𑀢𑀁;

𑀓𑁄𑀝𑀺𑀧𑁆𑀧𑀪𑀼𑀢𑀺𑀦𑀁 𑀯𑀻𑀲-𑀲𑀗𑁆𑀔𑁆𑀬𑀸𑀦𑀜𑁆𑀘 𑀬𑀣𑀸𑀓𑁆𑀓𑀫𑀁.

‘‘𑀤𑁆𑀯𑁂 𑀧𑀭𑀺𑀫𑀸𑀡𑀸𑀦𑀺 𑀏𑀢𑀲𑁆𑀲𑀸’’𑀢𑀺 𑀯𑀺𑀕𑁆𑀕𑀳𑁂 𑁋

𑁪𑁧𑁮. 𑀤𑁆𑀯𑀸𑀤𑀺𑀢𑁄 𑀓𑁄𑀦𑁂𑀓𑀢𑁆𑀣𑁂 𑀘.

𑀤𑁆𑀯𑀺𑀇𑀘𑁆𑀘𑁂𑀯𑀫𑀸𑀤𑀺𑀢𑁄 𑀕𑀡𑀦𑀢𑁄 𑀓𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 𑀅𑀦𑁂𑀓𑀢𑁆𑀣𑁂. 𑀤𑁆𑀯𑀺𑀓𑁄 𑀭𑀸𑀲𑀺 𑀤𑁆𑀯𑀺𑀓𑀁. 𑀏𑀯𑀁 𑀢𑀺𑀓𑀁, 𑀘𑀢𑀼𑀓𑁆𑀓𑀁, 𑀧𑀜𑁆𑀘𑀓𑀁, 𑀙𑀓𑁆𑀓𑀁, 𑀲𑀢𑁆𑀢𑀓𑀁, 𑀅𑀝𑁆𑀞𑀓𑀁, 𑀦𑀯𑀓𑀁, 𑀤𑀲𑀓𑀁, 𑀧𑀡𑁆𑀡𑀸𑀲𑀓𑀁, 𑀲𑀢𑀓𑀁, 𑀲𑀳𑀲𑁆𑀲𑀓𑀁 𑀇𑀘𑁆𑀘𑀸𑀤𑀺.

𑀲𑀗𑁆𑀔𑁆𑀬𑀸𑀢𑀤𑁆𑀥𑀺𑀢𑀁.

𑀅𑀩𑁆𑀬𑀬𑀢𑀤𑁆𑀥𑀺𑀢

‘‘𑀏𑀓𑀲𑁆𑀫𑀺𑀁 ¶ 𑀯𑀸𑀭𑁂 𑀪𑀼𑀜𑁆𑀚𑀢𑀺, 𑀤𑁆𑀯𑀺𑀯𑀸𑀭𑁂 𑀪𑀼𑀜𑁆𑀚𑀢𑀻’’𑀢𑀺 𑀯𑀺𑀕𑁆𑀕𑀳𑁂 𑁋

𑁪𑁧𑁯. 𑀏𑀓𑀸𑀤𑀺𑀢𑁄 𑀲𑀓𑀺𑀲𑁆𑀲 𑀓𑁆𑀔𑀢𑁆𑀢𑀼𑀁.

𑀏𑀓𑀤𑁆𑀯𑀺𑀢𑀺𑀇𑀘𑁆𑀘𑁂𑀯𑀫𑀸𑀤𑀺𑀢𑁄 𑀕𑀡𑀦𑀢𑁄 𑀲𑀓𑀺𑀲𑁆𑀲 𑀞𑀸𑀦𑁂 𑀯𑀸𑀭𑀢𑁆𑀣𑁂 𑀓𑁆𑀔𑀢𑁆𑀢𑀼𑀁𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀓𑀓𑁆𑀔𑀢𑁆𑀢𑀼𑀁, 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀪𑀼𑀜𑁆𑀚𑀢𑀺, ‘‘𑀲𑀩𑁆𑀩𑀸𑀲𑀫𑀸𑀯𑀼𑀲𑁄’’𑀢𑀺𑀆𑀤𑀺𑀦𑀸 𑀲𑀺𑀮𑁄𑀧𑁄. 𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀁, 𑀘𑀢𑀼𑀓𑁆𑀔𑀢𑁆𑀢𑀼𑀁, 𑀧𑀜𑁆𑀘𑀓𑁆𑀔𑀢𑁆𑀢𑀼𑀁, 𑀙𑀓𑁆𑀔𑀢𑁆𑀢𑀼𑀁, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁, 𑀅𑀝𑁆𑀞𑀓𑁆𑀔𑀢𑁆𑀢𑀼𑀁, 𑀦𑀯𑀓𑁆𑀔𑀢𑁆𑀢𑀼𑀁, 𑀤𑀲𑀓𑁆𑀔𑀢𑁆𑀢𑀼𑀁, 𑀲𑀢𑀓𑁆𑀔𑀢𑁆𑀢𑀼𑀁, 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁, 𑀩𑀳𑀼𑀓𑁆𑀔𑀢𑁆𑀢𑀼𑀁, 𑀓𑀢𑀺𑀓𑁆𑀔𑀢𑁆𑀢𑀼𑀁.

‘‘𑀏𑀓𑁂𑀦 𑀯𑀺𑀪𑀸𑀕𑁂𑀦𑀸’’𑀢𑀺 𑀯𑀺𑀕𑁆𑀕𑀳𑁂 𑁋

𑀫𑀡𑁆𑀟𑀽𑀓𑀕𑀢𑀺𑀬𑀸 𑀲𑀗𑁆𑀔𑁆𑀬𑀸𑀕𑁆𑀕𑀳𑀡𑀫𑀦𑀼𑀯𑀢𑁆𑀢𑀢𑁂.

𑁪𑁨𑁦. 𑀯𑀺𑀪𑀸𑀕𑁂 𑀥𑀸 𑀘.

𑀯𑀺𑀪𑀸𑀕𑀢𑁆𑀣𑁂 𑀏𑀓𑀸𑀤𑀺𑀲𑀗𑁆𑀔𑁆𑀬𑀸𑀢𑁄 𑀥𑀸𑀧𑀘𑁆𑀘𑀬𑁄 𑀳𑁄𑀢𑀺. 𑀘𑀲𑀤𑁆𑀤𑁂𑀦 𑀏𑀓𑀤𑁆𑀯𑀺𑀢𑁄 𑀚𑁆𑀛 𑀘, 𑀲𑀼𑀢𑁆𑀢𑀸𑀤𑀺𑀢𑁄 𑀲𑁄 𑀘. 𑀏𑀓𑀥𑀸. 𑀤𑁆𑀯𑀻𑀳𑀺 𑀯𑀺𑀪𑀸𑀕𑁂𑀳𑀺 𑀤𑁆𑀯𑀺𑀥𑀸, 𑀤𑀼𑀥𑀸 𑀯𑀸, 𑀤𑁆𑀯𑁂𑀥𑀸. 𑀢𑀻𑀳𑀺 𑀯𑀺𑀪𑀸𑀕𑁂𑀳𑀺 𑀢𑀺𑀥𑀸, 𑀢𑁂𑀥𑀸 𑀯𑀸, ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀇𑀓𑀸𑀭𑀲𑁆𑀲𑁂𑀓𑀸𑀭𑁄. 𑀏𑀯𑀁 𑀘𑀢𑀼𑀥𑀸, 𑀧𑀜𑁆𑀘𑀥𑀸, 𑀙𑀥𑀸, 𑀲𑀢𑁆𑀢𑀥𑀸, 𑀅𑀝𑁆𑀞𑀥𑀸, 𑀦𑀯𑀥𑀸, 𑀤𑀲𑀥𑀸, 𑀲𑀢𑀥𑀸, 𑀲𑀳𑀲𑁆𑀲𑀥𑀸, 𑀓𑀢𑀺𑀥𑀸, 𑀩𑀳𑀼𑀥𑀸.

𑀚𑁆𑀛𑀧𑁆𑀧𑀘𑁆𑀘𑀬𑁂 𑀏𑀓𑀥𑀸 𑀓𑀭𑁄𑀢𑀻𑀢𑀺 𑀏𑀓𑀚𑁆𑀛𑀁. 𑀏𑀯𑀁 𑀤𑁆𑀯𑁂𑀚𑁆𑀛𑀁.

𑀲𑁄𑀧𑀘𑁆𑀘𑀬𑁂 𑀲𑀼𑀢𑁆𑀢𑁂𑀦 𑀯𑀺𑀪𑀸𑀕𑁂𑀦 𑀲𑀼𑀢𑁆𑀢𑀲𑁄. 𑀏𑀯𑀁 𑀩𑁆𑀬𑀜𑁆𑀚𑀦𑀲𑁄, 𑀧𑀤𑀲𑁄, 𑀅𑀢𑁆𑀣𑀲𑁄, 𑀩𑀳𑀼𑀲𑁄, 𑀲𑀩𑁆𑀩𑀸𑀓𑀸𑀭𑁂𑀦 𑀲𑀩𑁆𑀩𑀲𑁄 ¶ , 𑀉𑀧𑀸𑀬𑀲𑁄, 𑀳𑁂𑀢𑀼𑀲𑁄, 𑀞𑀸𑀦𑀲𑁄, 𑀬𑁄𑀦𑀺𑀲𑁄.

𑁪𑁨𑁧. 𑀲𑀩𑁆𑀩𑀦𑀸𑀫𑁂𑀳𑀺 𑀧𑀓𑀸𑀭𑀯𑀘𑀦𑁂 𑀢𑀼 𑀣𑀸.

𑀲𑀩𑁆𑀩𑀦𑀸𑀫𑁂𑀳𑀺 𑀧𑀓𑀸𑀭𑀯𑀘𑀦𑀢𑁆𑀣𑁂 𑀣𑀸𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀼𑀲𑀤𑁆𑀤𑁂𑀦 𑀣𑀢𑁆𑀢𑀸𑀧𑀘𑁆𑀘𑀬𑁄 𑀘. 𑀲𑀸𑀫𑀜𑁆𑀜𑀲𑁆𑀲 𑀪𑁂𑀤𑀓𑁄 𑀯𑀺𑀲𑁂𑀲𑁄 𑀧𑀓𑀸𑀭𑁄, 𑀢𑀲𑁆𑀲𑀸𑀪𑀺𑀥𑀸𑀦𑁂𑀢𑀺 𑀅𑀢𑁆𑀣𑁄, 𑀲𑁄 𑀧𑀓𑀸𑀭𑁄 𑀢𑀣𑀸, 𑀢𑀁 𑀧𑀓𑀸𑀭𑀁 𑀢𑀣𑀸, 𑀢𑁂𑀦 𑀧𑀓𑀸𑀭𑁂𑀦 𑀢𑀣𑀸, 𑀬𑁂𑀦 𑀧𑀓𑀸𑀭𑁂𑀦 𑀬𑀣𑀸. 𑀏𑀯𑀁 𑀲𑀩𑁆𑀩𑀣𑀸, 𑀅𑀜𑁆𑀜𑀣𑀸, 𑀇𑀢𑀭𑀣𑀸, 𑀉𑀪𑀬𑀣𑀸, 𑀣𑀢𑁆𑀢𑀸𑀧𑀘𑁆𑀘𑀬𑁂 𑀢𑁂𑀦 𑀧𑀓𑀸𑀭𑁂𑀦 𑀢𑀣𑀢𑁆𑀢𑀸. 𑀏𑀯𑀁 𑀬𑀣𑀢𑁆𑀢𑀸, 𑀅𑀜𑁆𑀜𑀣𑀢𑁆𑀢𑀸.

𑀓𑁄 𑀧𑀓𑀸𑀭𑁄𑀢𑀺 𑀅𑀢𑁆𑀣𑁂 𑁋

𑁪𑁨𑁨. 𑀓𑀺𑀫𑀺𑀫𑁂𑀳𑀺 𑀣𑀁.

𑀓𑀺𑀁𑀇𑀫𑀇𑀘𑁆𑀘𑁂𑀢𑁂𑀳𑀺 𑀣𑀁𑀧𑀘𑁆𑀘𑀬𑁄 𑀳𑁄𑀢𑀺 𑀧𑀓𑀸𑀭𑀯𑀘𑀦𑀢𑁆𑀣𑁂. ‘‘𑀓𑀺𑀲𑁆𑀲 𑀓 𑀯𑁂 𑀘𑀸’’𑀢𑀺 𑀏𑀢𑁆𑀣 𑀘𑀲𑀤𑁆𑀤𑁂𑀦 𑀓𑀺𑀲𑁆𑀲 𑀓𑀸𑀤𑁂𑀲𑁄. 𑀓𑀣𑀁, 𑀓𑀁 𑀧𑀓𑀸𑀭𑀁 𑀓𑀣𑀁, 𑀓𑁂𑀦 𑀧𑀓𑀸𑀭𑁂𑀦 𑀓𑀣𑀁, 𑀅𑀬𑀁 𑀧𑀓𑀸𑀭𑁄 𑀇𑀢𑁆𑀣𑀁, 𑀇𑀫𑀁 𑀧𑀓𑀸𑀭𑀁 𑀇𑀢𑁆𑀣𑀁. 𑀅𑀦𑁂𑀦 𑀧𑀓𑀸𑀭𑁂𑀦 𑀇𑀢𑁆𑀣𑀁, ‘‘𑀇𑀫𑀲𑁆𑀲𑀺 𑀣𑀁 𑀤𑀸𑀦𑀺𑀳 𑀢𑁄 𑀥𑁂𑀲𑀼 𑀘𑀸’’𑀢𑀺 𑀇𑀫𑀲𑀤𑁆𑀤𑀲𑁆𑀲 𑀇𑀓𑀸𑀭𑁄, 𑀤𑁆𑀯𑀺𑀢𑁆𑀢𑀁. 𑀏𑀢𑁆𑀣 𑀳𑀺 𑀓𑁆𑀔𑀢𑁆𑀢𑀼𑀁 𑀆𑀤𑀺𑀣𑀁𑀧𑀭𑀺𑀬𑁄𑀲𑀸𑀦𑀧𑁆𑀧𑀘𑁆𑀘𑀬𑀦𑁆𑀢𑀸𑀦𑀁 𑀅𑀩𑁆𑀬𑀬𑀢𑀤𑁆𑀥𑀺𑀢𑀢𑁆𑀢𑀸 𑀦𑀸𑀫𑀩𑁆𑀬𑀧𑀤𑁂𑀲𑀁 𑀓𑀢𑁆𑀯𑀸 𑀯𑀺𑀪𑀢𑁆𑀢𑀺𑀫𑁆𑀳𑀺 𑀓𑀢𑁂 ‘‘𑀲𑀩𑁆𑀩𑀸𑀲𑀫𑀸𑀯𑀼𑀲𑁄’’𑀢𑀺𑀆𑀤𑀺𑀦𑀸 𑀯𑀺𑀪𑀢𑁆𑀢𑀺𑀮𑁄𑀧𑁄, ‘‘𑀓𑁆𑀯𑀘𑀺 𑀢𑁄 𑀧𑀜𑁆𑀘𑀫𑁆𑀬𑀢𑁆𑀣𑁂’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀢𑁄𑀆𑀤𑀺𑀧𑁆𑀧𑀘𑁆𑀘𑀬𑀦𑁆𑀢𑀸 𑀘 𑀇𑀥𑁂𑀯 𑀅𑀩𑁆𑀬𑀬𑀢𑀤𑁆𑀥𑀺𑀢𑁂 𑀲𑀗𑁆𑀕𑀬𑁆𑀳𑀦𑁆𑀢𑀺.

𑁪𑁨𑁩. 𑀬𑀤𑀦𑀼𑀧𑀧𑀦𑁆𑀦𑀸 ¶ 𑀦𑀺𑀧𑀸𑀢𑀦𑀸 𑀲𑀺𑀚𑁆𑀛𑀦𑁆𑀢𑀺.

𑀬𑁂 𑀲𑀤𑁆𑀤𑀸 𑀮𑀓𑁆𑀔𑀡𑁂𑀦 𑀅𑀦𑀼𑀧𑀧𑀦𑁆𑀦𑀸 𑀅𑀦𑀺𑀤𑁆𑀤𑀺𑀝𑁆𑀞𑀮𑀓𑁆𑀔𑀡𑀸 𑀅𑀓𑁆𑀔𑀭𑀸𑀤𑀺𑀢𑁄, 𑀦𑀸𑀫𑁄𑀧𑀲𑀕𑁆𑀕𑀦𑀺𑀧𑀸𑀢𑀢𑁄 𑀯𑀸 𑀲𑀫𑀸𑀲𑀢𑀤𑁆𑀥𑀺𑀢𑀸𑀤𑀺𑀢𑁄 𑀯𑀸, 𑀢𑁂 𑀦𑀺𑀧𑀸𑀢𑀦𑀸 𑀲𑀺𑀚𑁆𑀛𑀦𑁆𑀢𑀺.

𑀢𑀤𑁆𑀥𑀺𑀢𑀢𑁄 𑀢𑀸𑀯 𑁋

𑀇𑀫𑀲𑁆𑀫𑀸 𑀚𑁆𑀚 𑀲𑀺𑀬𑀸 𑀓𑀸𑀮𑁂, 𑀲𑀫𑀸𑀦𑀸𑀧𑀭𑀢𑁄 𑀚𑁆𑀚𑀼 𑀘;

𑀇𑀫𑀲𑀤𑁆𑀤𑀲𑁆𑀲’𑀓𑀸𑀭𑁄 𑀘, 𑀲𑀫𑀸𑀦𑀲𑁆𑀲 𑀘 𑀲𑁄 𑀲𑀺𑀬𑀸.

𑀇𑀫𑀲𑁆𑀫𑀺𑀁 𑀓𑀸𑀮𑁂, 𑀇𑀫𑀲𑁆𑀫𑀺𑀁 𑀤𑀺𑀯𑀲𑁂 𑀯𑀸 𑀅𑀚𑁆𑀚, 𑀲𑀫𑀸𑀦𑁂 𑀓𑀸𑀮𑁂 𑀲𑀚𑁆𑀚𑀼, 𑀅𑀧𑀭𑀲𑁆𑀫𑀺𑀁𑀤𑀺𑀯𑀲𑁂 𑀅𑀧𑀭𑀚𑁆𑀚𑀼. 𑀦𑀺𑀧𑀸𑀢𑁂𑀳𑀺 𑀪𑀯𑀢𑁆𑀣𑁂 𑀢𑀦𑀧𑁆𑀧𑀘𑁆𑀘𑀬𑁄. 𑀅𑀚𑁆𑀚 𑀪𑀯𑀁 𑀅𑀚𑁆𑀚𑀢𑀦𑀁, 𑀅𑀚𑁆𑀚 𑀪𑀯𑀸 𑀅𑀚𑁆𑀚𑀢𑀦𑀻, 𑀲𑁆𑀯𑁂 𑀪𑀯𑀁 𑀲𑁆𑀯𑀸𑀢𑀦𑀁. 𑀏𑀯𑀁 𑀧𑀼𑀭𑀸𑀢𑀦𑀁, 𑀳𑀺𑀬𑁆𑀬𑁄 𑀪𑀯𑀁 𑀳𑀺𑀬𑁆𑀬𑀢𑁆𑀢𑀦𑀁, 𑀳𑀺𑀬𑁆𑀬𑁄 𑀪𑀯𑀸 𑀳𑀺𑀬𑁆𑀬𑀢𑁆𑀢𑀦𑀻 𑀇𑀘𑁆𑀘𑀸𑀤𑀺.

𑀅𑀩𑁆𑀬𑀬𑀢𑀤𑁆𑀥𑀺𑀢𑀁.

𑀲𑀸𑀫𑀜𑁆𑀜𑀯𑀼𑀢𑁆𑀢𑀺𑀪𑀸𑀯𑀢𑁆𑀣𑀸-𑀩𑁆𑀬𑀬𑀢𑁄 𑀢𑀤𑁆𑀥𑀺𑀢𑀁 𑀢𑀺𑀥𑀸;

𑀢𑀢𑁆𑀭𑀸𑀤𑀺 𑀘𑀢𑀼𑀥𑀸𑀧𑀘𑁆𑀘𑀸-𑀦𑁂𑀓𑀢𑁆𑀣𑀲𑁆𑀲𑀢𑁆𑀣𑀺𑀲𑀗𑁆𑀔𑁆𑀬𑀸𑀢𑁄.

𑀇𑀢𑀺 𑀧𑀤𑀭𑀽𑀧𑀲𑀺𑀤𑁆𑀥𑀺𑀬𑀁 𑀢𑀤𑁆𑀥𑀺𑀢𑀓𑀡𑁆𑀟𑁄

𑀧𑀜𑁆𑀘𑀫𑁄.

𑁬. 𑀆𑀔𑁆𑀬𑀸𑀢𑀓𑀡𑁆𑀟

𑀪𑀽𑀯𑀸𑀤𑀺𑀕𑀡

𑀯𑀺𑀪𑀢𑁆𑀢𑀺𑀯𑀺𑀥𑀸𑀦

𑀅𑀣 ¶ 𑀆𑀔𑁆𑀬𑀸𑀢𑀯𑀺𑀪𑀢𑁆𑀢𑀺𑀬𑁄 𑀓𑁆𑀭𑀺𑀬𑀸𑀯𑀸𑀘𑀻𑀳𑀺 𑀥𑀸𑀢𑀽𑀳𑀺 𑀧𑀭𑀸 𑀯𑀼𑀘𑁆𑀘𑀦𑁆𑀢𑁂.

𑀢𑀢𑁆𑀣 𑀓𑁆𑀭𑀺𑀬𑀁 𑀆𑀘𑀺𑀓𑁆𑀔𑀢𑀻𑀢𑀺 𑀆𑀔𑁆𑀬𑀸𑀢𑀁, 𑀓𑁆𑀭𑀺𑀬𑀸𑀧𑀤𑀁. 𑀯𑀼𑀢𑁆𑀢𑀜𑁆𑀳𑀺 ‘‘𑀓𑀸𑀮𑀓𑀸𑀭𑀓𑀧𑀼𑀭𑀺𑀲𑀧𑀭𑀺𑀤𑀻𑀧𑀓𑀁 𑀓𑁆𑀭𑀺𑀬𑀸𑀮𑀓𑁆𑀔𑀡𑀫𑀸𑀔𑁆𑀬𑀸𑀢𑀺𑀓’’𑀦𑁆𑀢𑀺. 𑀢𑀢𑁆𑀣 𑀓𑀸𑀮𑁄𑀢𑀺 𑀅𑀢𑀻𑀢𑀸𑀤𑀬𑁄, 𑀓𑀸𑀭𑀓𑀫𑀺𑀢𑀺 𑀓𑀫𑁆𑀫𑀓𑀢𑁆𑀢𑀼𑀪𑀸𑀯𑀸, 𑀧𑀼𑀭𑀺𑀲𑀸𑀢𑀺 𑀧𑀞𑀫𑀫𑀚𑁆𑀛𑀺𑀫𑀼𑀢𑁆𑀢𑀫𑀸, 𑀓𑁆𑀭𑀺𑀬𑀸𑀢𑀺 𑀕𑀫𑀦𑀧𑀘𑀦𑀸𑀤𑀺𑀓𑁄 𑀥𑀸𑀢𑁆𑀯𑀢𑁆𑀣𑁄, 𑀓𑁆𑀭𑀺𑀬𑀸𑀮𑀓𑁆𑀔𑀡𑀁 𑀲𑀜𑁆𑀜𑀸𑀡𑀁 𑀏𑀢𑀲𑁆𑀲𑀸𑀢𑀺 𑀓𑁆𑀭𑀺𑀬𑀸𑀮𑀓𑁆𑀔𑀡𑀁, 𑀅𑀢𑀺𑀮𑀺𑀗𑁆𑀕𑀜𑁆𑀘.

𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀬𑀁 𑀢𑀺𑀓𑀸𑀮𑀁 𑀢𑀺𑀧𑀼𑀭𑀺𑀲𑀁, 𑀓𑁆𑀭𑀺𑀬𑀸𑀯𑀸𑀘𑀺 𑀢𑀺𑀓𑀸𑀭𑀓𑀁;

𑀅𑀢𑀺𑀮𑀺𑀗𑁆𑀕𑀁 𑀤𑁆𑀯𑀺𑀯𑀘𑀦𑀁, 𑀢𑀤𑀸𑀔𑁆𑀬𑀸𑀢𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀓𑀸𑀮𑀸𑀤𑀺𑀯𑀲𑁂𑀦 𑀥𑀸𑀢𑁆𑀯𑀢𑁆𑀣𑀁 𑀯𑀺𑀪𑀚𑀦𑁆𑀢𑀻𑀢𑀺 𑀯𑀺𑀪𑀢𑁆𑀢𑀺𑀬𑁄, 𑀢𑁆𑀬𑀸𑀤𑀬𑁄, 𑀢𑀸 𑀧𑀦 𑀯𑀢𑁆𑀢𑀫𑀸𑀦𑀸 𑀧𑀜𑁆𑀘𑀫𑀻 𑀲𑀢𑁆𑀢𑀫𑀻 𑀧𑀭𑁄𑀓𑁆𑀔𑀸𑀳𑀺𑀬𑁆𑀬𑀢𑁆𑀢𑀦𑀻 𑀅𑀚𑁆𑀚𑀢𑀦𑀻 𑀪𑀯𑀺𑀲𑁆𑀲𑀦𑁆𑀢𑀻 𑀓𑀸𑀮𑀸𑀢𑀺𑀧𑀢𑁆𑀢𑀺 𑀘𑀸𑀢𑀺 𑀅𑀝𑁆𑀞𑀯𑀺𑀥𑀸 𑀪𑀯𑀦𑁆𑀢𑀺.

𑀓𑁆𑀭𑀺𑀬𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀸𑀢𑀯𑁄, 𑀪𑀽𑀯𑀸𑀤𑀬𑁄, 𑀔𑀸𑀤𑀺𑀥𑀸𑀢𑀼𑀧𑁆𑀧𑀘𑁆𑀘𑀬𑀦𑁆𑀢𑀸 𑀘, 𑀢𑁂 𑀧𑀦 𑀅𑀢𑁆𑀣𑀯𑀲𑀸 𑀤𑁆𑀯𑀺𑀥𑀸 𑀪𑀯𑀦𑁆𑀢𑀺 𑀲𑀓𑀫𑁆𑀫𑀓𑀸, 𑀅𑀓𑀫𑁆𑀫𑀓𑀸 𑀘𑀸𑀢𑀺. 𑀢𑀢𑁆𑀭 𑀲𑀓𑀫𑁆𑀫𑀓𑀸 𑀬𑁂 𑀥𑀸𑀢𑀯𑁄𑀓𑀫𑁆𑀫𑀸𑀧𑁂𑀓𑁆𑀔𑀁 𑀓𑁆𑀭𑀺𑀬𑀁 𑀯𑀤𑀦𑁆𑀢𑀺, 𑀬𑀣𑀸 𑁋 𑀓𑀝𑀁 𑀓𑀭𑁄𑀢𑀺, 𑀕𑀸𑀫𑀁 𑀕𑀘𑁆𑀙𑀢𑀺, 𑀑𑀤𑀦𑀁 𑀧𑀘𑀢𑀻𑀢𑀺𑀆𑀤𑀬𑁄, 𑀅𑀓𑀫𑁆𑀫𑀓𑀸 𑀬𑁂 𑀓𑀫𑁆𑀫𑀦𑀺𑀭𑀧𑁂𑀓𑁆𑀔𑀁 𑀓𑁆𑀭𑀺𑀬𑀁 𑀯𑀤𑀦𑁆𑀢𑀺, 𑀬𑀣𑀸 𑁋 𑀅𑀘𑁆𑀙𑀢𑀺, 𑀲𑁂𑀢𑀺, 𑀢𑀺𑀝𑁆𑀞𑀢𑀻𑀢𑀺𑀆𑀤𑀬𑁄.

𑀢𑁂 ¶ 𑀧𑀦 𑀲𑀢𑁆𑀢𑀯𑀺𑀥𑀸 𑀪𑀯𑀦𑁆𑀢𑀺 𑀯𑀺𑀓𑀭𑀡𑀧𑁆𑀧𑀘𑁆𑀘𑀬𑀪𑁂𑀤𑁂𑀦, 𑀓𑀣𑀁? 𑀅𑀯𑀺𑀓𑀭𑀡𑀸 𑀪𑀽𑀯𑀸𑀤𑀬𑁄. 𑀦𑀺𑀕𑁆𑀕𑀳𑀻𑀢𑀧𑀼𑀩𑁆𑀩𑀓𑀅𑀯𑀺𑀓𑀭𑀡𑀸 𑀭𑀼𑀥𑀸𑀤𑀬𑁄, 𑀬𑀯𑀺𑀓𑀭𑀡𑀸 𑀤𑀺𑀯𑀸𑀤𑀬𑁄, 𑀡𑀼𑀡𑀸 𑀉𑀡𑀸𑀯𑀺𑀓𑀭𑀡𑀸 𑀲𑁆𑀯𑀸𑀤𑀬𑁄, 𑀦𑀸𑀧𑁆𑀧𑀡𑁆𑀳𑀸𑀯𑀺𑀓𑀭𑀡𑀸 𑀓𑀺𑀬𑀸𑀤𑀬𑁄, 𑀑𑀬𑀺𑀭𑀯𑀺𑀓𑀭𑀡𑀸 𑀢𑀦𑀸𑀤𑀬𑁄, 𑀲𑀓𑀢𑁆𑀣𑁂 𑀡𑁂 𑀡𑀬𑀦𑁆𑀢𑀸 𑀘𑀼𑀭𑀸𑀤𑀬𑁄𑀢𑀺.

𑀢𑀢𑁆𑀣 𑀧𑀞𑀫𑀁 𑀅𑀯𑀺𑀓𑀭𑀡𑁂𑀲𑀼 𑀪𑀽𑀯𑀸𑀤𑀻𑀲𑀼 𑀥𑀸𑀢𑀽𑀲𑀼 𑀧𑀞𑀫𑀪𑀽𑀢𑀸 𑀅𑀓𑀫𑁆𑀫𑀓𑀸 𑀪𑀽𑀇𑀘𑁆𑀘𑁂𑀢𑀲𑁆𑀫𑀸 𑀥𑀸𑀢𑀼𑀢𑁄 𑀢𑁆𑀬𑀸𑀤𑀬𑁄 𑀧𑀭𑀸 𑀬𑁄𑀚𑀻𑀬𑀦𑁆𑀢𑁂.

𑀪𑀽𑀲𑀢𑁆𑀢𑀸𑀬𑀁, ‘‘𑀪𑀽’’𑀇𑀘𑁆𑀘𑀬𑀁 𑀥𑀸𑀢𑀼 𑀲𑀢𑁆𑀢𑀸𑀬𑀫𑀢𑁆𑀣𑁂 𑀯𑀢𑁆𑀢𑀢𑁂, 𑀓𑁆𑀭𑀺𑀬𑀸𑀲𑀸𑀫𑀜𑁆𑀜𑀪𑀽𑀢𑁂 𑀪𑀯𑀦𑁂 𑀯𑀢𑁆𑀢𑀢𑁂𑀢𑀺 𑀅𑀢𑁆𑀣𑁄.

‘‘𑀪𑀽’’𑀇𑀢𑀺 𑀞𑀺𑀢𑁂 𑁋

𑁪𑁨𑁪. 𑀪𑀽𑀯𑀸𑀤𑀬𑁄 𑀥𑀸𑀢𑀯𑁄.

𑀪𑀽𑀇𑀘𑁆𑀘𑁂𑀯𑀫𑀸𑀤𑀬𑁄 𑀬𑁂 𑀓𑁆𑀭𑀺𑀬𑀸𑀯𑀸𑀘𑀺𑀦𑁄 𑀲𑀤𑁆𑀤𑀕𑀡𑀸, 𑀢𑁂 𑀥𑀸𑀢𑀼𑀲𑀜𑁆𑀜𑀸 𑀳𑁄𑀦𑁆𑀢𑀺. 𑀪𑀽 𑀆𑀤𑀺 𑀬𑁂𑀲𑀁 𑀢𑁂 𑀪𑀽𑀯𑀸𑀤𑀬𑁄, 𑀅𑀣 𑀯𑀸 𑀪𑀽𑀯𑀸 𑀆𑀤𑀻 𑀧𑀓𑀸𑀭𑀸 𑀬𑁂𑀲𑀁 𑀢𑁂 𑀪𑀽𑀯𑀸𑀤𑀬𑁄.

𑀪𑀽𑀯𑀸𑀤𑀻𑀲𑀼 𑀯𑀓𑀸𑀭𑁄𑀬𑀁, 𑀜𑁂𑀬𑁆𑀬𑁄 𑀆𑀕𑀫𑀲𑀦𑁆𑀥𑀺𑀚𑁄;

𑀪𑀽𑀯𑀸𑀧𑁆𑀧𑀓𑀸𑀭𑀸 𑀯𑀸 𑀥𑀸𑀢𑀽, 𑀲𑀓𑀫𑁆𑀫𑀸𑀓𑀫𑁆𑀫𑀓𑀢𑁆𑀣𑀢𑁄.

‘‘𑀓𑁆𑀯𑀘𑀺 𑀥𑀸𑀢𑀽’’𑀢𑀺𑀆𑀤𑀺𑀢𑁄 ‘‘𑀓𑁆𑀯𑀘𑀻’’𑀢𑀺 𑀯𑀢𑁆𑀢𑀢𑁂.

𑁪𑁨𑁫. 𑀥𑀸𑀢𑀼𑀲𑁆𑀲𑀦𑁆𑀢𑁄 𑀮𑁄𑀧𑁄𑀦𑁂𑀓𑀲𑁆𑀲𑀭𑀲𑁆𑀲.

𑀅𑀦𑁂𑀓𑀲𑁆𑀲𑀭𑀲𑁆𑀲 𑀥𑀸𑀢𑀼𑀲𑁆𑀲 𑀅𑀦𑁆𑀢𑁄 𑀓𑁆𑀯𑀘𑀺 𑀮𑁄𑀧𑁄 𑀳𑁄𑀢𑀺.

𑀓𑁆𑀯𑀘𑀺𑀕𑁆𑀕𑀳𑀡𑀁 ‘‘𑀫𑀳𑀻𑀬𑀢𑀺 𑀲𑀫𑀣𑁄’’𑀢𑀺𑀆𑀤𑀻𑀲𑀼 𑀦𑀺𑀯𑀢𑁆𑀢𑀦𑀢𑁆𑀣𑀁, 𑀇𑀢𑀺 𑀅𑀦𑁂𑀓𑀲𑁆𑀲𑀭𑀢𑁆𑀢𑀸𑀪𑀸𑀯𑀸 𑀇𑀥 𑀥𑀸𑀢𑁆𑀯𑀦𑁆𑀢𑀮𑁄𑀧𑁄 𑀦 𑀳𑁄𑀢𑀺.

𑀢𑀢𑁄 ¶ 𑀥𑀸𑀢𑁆𑀯𑀸𑀥𑀺𑀓𑀸𑀭𑀯𑀺𑀳𑀺𑀢𑀸𑀦𑁂𑀓𑀧𑁆𑀧𑀘𑁆𑀘𑀬𑀧𑁆𑀧𑀲𑀗𑁆𑀕𑁂 ‘‘𑀯𑀢𑁆𑀢𑀺𑀘𑁆𑀙𑀸𑀦𑀼𑀧𑀼𑀩𑁆𑀩𑀺𑀓𑀸 𑀲𑀤𑁆𑀤𑀧𑁆𑀧𑀝𑀺𑀧𑀢𑁆𑀢𑀻’’𑀢𑀺 𑀓𑀢𑁆𑀯𑀸 𑀯𑀢𑁆𑀢𑀫𑀸𑀦𑀯𑀘𑀦𑀺𑀘𑁆𑀙𑀸𑀬𑀁 𑁋

𑁪𑁨𑁬. 𑀯𑀢𑁆𑀢𑀫𑀸𑀦𑀸 𑀢𑀺𑀅𑀦𑁆𑀢𑀺, 𑀲𑀺𑀣, 𑀫𑀺𑀫, 𑀢𑁂𑀅𑀦𑁆𑀢𑁂, 𑀲𑁂𑀯𑁆𑀳𑁂, 𑀏𑀫𑁆𑀳𑁂.

𑀢𑁆𑀬𑀸𑀤𑀬𑁄 𑀤𑁆𑀯𑀸𑀤𑀲 𑀯𑀢𑁆𑀢𑀫𑀸𑀦𑀸𑀲𑀜𑁆𑀜𑀸 𑀳𑁄𑀦𑁆𑀢𑀻𑀢𑀺 𑀢𑁆𑀬𑀸𑀤𑀻𑀦𑀁 𑀯𑀢𑁆𑀢𑀫𑀸𑀦𑀢𑁆𑀣𑀯𑀺𑀲𑀬𑀢𑁆𑀢𑀸 𑀯𑀢𑁆𑀢𑀫𑀸𑀦𑀸𑀲𑀜𑁆𑀜𑀸.

𑁪𑁨𑁭. 𑀓𑀸𑀮𑁂.

𑀅𑀬𑀫𑀥𑀺𑀓𑀸𑀭𑁄.

𑀇𑀢𑁄 𑀧𑀭𑀁 𑀢𑁆𑀬𑀸𑀤𑀺𑀯𑀺𑀪𑀢𑁆𑀢𑀺𑀯𑀺𑀥𑀸𑀦𑁂 𑀲𑀩𑁆𑀩𑀢𑁆𑀣 𑀯𑀢𑁆𑀢𑀢𑁂.

𑁪𑁨𑁮. 𑀯𑀢𑁆𑀢𑀫𑀸𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂.

𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀸𑀮𑁂 𑀕𑀫𑁆𑀬𑀫𑀸𑀦𑁂 𑀯𑀢𑁆𑀢𑀫𑀸𑀦𑀸𑀯𑀺𑀪𑀢𑁆𑀢𑀺 𑀳𑁄𑀢𑀺, 𑀓𑀸𑀮𑁄𑀢𑀺 𑀘𑁂𑀢𑁆𑀣 𑀓𑁆𑀭𑀺𑀬𑀸, 𑀓𑀭𑀡𑀁 𑀓𑀸𑀭𑁄, 𑀭𑀓𑀸𑀭𑀲𑁆𑀲 𑀮𑀓𑀸𑀭𑁄, 𑀓𑀸𑀮𑁄.

𑀢𑀲𑁆𑀫𑀸 𑁋

𑀓𑁆𑀭𑀺𑀬𑀸𑀬 𑀕𑀫𑁆𑀬𑀫𑀸𑀦𑀸𑀬, 𑀯𑀺𑀪𑀢𑁆𑀢𑀻𑀦𑀁 𑀯𑀺𑀥𑀸𑀦𑀢𑁄;

𑀥𑀸𑀢𑀽𑀳𑁂𑀯 𑀪𑀯𑀦𑁆𑀢𑀻𑀢𑀺, 𑀲𑀺𑀤𑁆𑀥𑀁 𑀢𑁆𑀬𑀸𑀤𑀺𑀯𑀺𑀪𑀢𑁆𑀢𑀺𑀬𑁄.

𑀇𑀥 𑀧𑀦 𑀓𑀸𑀮𑀲𑁆𑀲 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀡𑀢𑁆𑀢𑀺𑀧𑀭𑀺𑀓𑀧𑁆𑀧𑀓𑀸𑀮𑀸𑀪𑀺𑀧𑀢𑁆𑀢𑀺𑀯𑀲𑁂𑀦 𑀙𑀥𑀸 𑀪𑀺𑀦𑁆𑀦𑀢𑁆𑀢𑀸 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑁂’’𑀢𑀺 𑀯𑀺𑀲𑁂𑀲𑁂𑀢𑀺. 𑀢𑀁 𑀢𑀁 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄, 𑀧𑀝𑀺𑀮𑀤𑁆𑀥𑀲𑀪𑀸𑀯𑁄, 𑀦 𑀢𑀸𑀯 𑀅𑀢𑀻𑀢𑁄𑀢𑀺 𑀅𑀢𑁆𑀣𑁄.

𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀫𑀻𑀧𑁂𑀧𑀺, 𑀢𑀩𑁆𑀩𑁄𑀳𑀸𑀭𑀽𑀧𑀘𑀸𑀭𑀢𑁄;

𑀯𑀢𑁆𑀢𑀫𑀸𑀦𑀸 𑀅𑀢𑀻𑀢𑁂𑀧𑀺, 𑀢𑀁𑀓𑀸𑀮𑀯𑀘𑀦𑀺𑀘𑁆𑀙𑀬𑀸𑀢𑀺.

𑀢𑀲𑁆𑀫𑀺𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀯𑀢𑁆𑀢𑀫𑀸𑀦𑀸𑀯𑀺𑀪𑀢𑁆𑀢𑀺𑀁 𑀓𑀢𑁆𑀯𑀸, 𑀢𑀲𑁆𑀲𑀸 𑀞𑀸𑀦𑀸𑀦𑀺𑀬𑀫𑁂 ‘‘𑀥𑀸𑀢𑀼𑀮𑀺𑀗𑁆𑀕𑁂𑀳𑀺 𑀧𑀭𑀸 𑀧𑀘𑁆𑀘𑀬𑀸’’𑀢𑀺 𑀧𑀭𑀺𑀪𑀸𑀲𑀢𑁄 𑀥𑀸𑀢𑀼𑀢𑁄 ¶ 𑀧𑀭𑀁 𑀯𑀢𑁆𑀢𑀫𑀸𑀦𑀧𑁆𑀧𑀘𑁆𑀘𑀬𑁂 𑀓𑀢𑁆𑀯𑀸, 𑀢𑁂𑀲𑀫𑀦𑀺𑀬𑀫𑀧𑁆𑀧𑀲𑀗𑁆𑀕𑁂𑀲𑀢𑀺 ‘‘𑀯𑀢𑁆𑀢𑀺𑀘𑁆𑀙𑀸𑀦𑀼𑀧𑀼𑀩𑁆𑀩𑀺𑀓𑀸 𑀲𑀤𑁆𑀤𑀧𑁆𑀧𑀝𑀺𑀧𑀢𑁆𑀢𑀻’’𑀢𑀺 𑀧𑀭𑀲𑁆𑀲𑀧𑀤𑀯𑀘𑀦𑀺𑀘𑁆𑀙𑀸𑀬𑀁 𑁋

𑁪𑁨𑁯. 𑀅𑀣 𑀧𑀼𑀩𑁆𑀩𑀸𑀦𑀺 𑀯𑀺𑀪𑀢𑁆𑀢𑀻𑀦𑀁 𑀙 𑀧𑀭𑀲𑁆𑀲𑀧𑀤𑀸𑀦𑀺.

𑀅𑀣 𑀢𑀤𑁆𑀥𑀺𑀢𑀸𑀦𑀦𑁆𑀢𑀭𑀁 𑀯𑀼𑀘𑁆𑀘𑀫𑀸𑀦𑀸𑀦𑀁 𑀲𑀩𑁆𑀩𑀸𑀲𑀁 𑀯𑀢𑁆𑀢𑀫𑀸𑀦𑀸𑀤𑀻𑀦𑀁 𑀅𑀝𑁆𑀞𑀯𑀺𑀥𑀸𑀦𑀁 𑀯𑀺𑀪𑀢𑁆𑀢𑀻𑀦𑀁 𑀬𑀸𑀦𑀺 𑀬𑀸𑀦𑀺 𑀧𑀼𑀩𑁆𑀩𑀓𑀸𑀦𑀺 𑀙 𑀧𑀤𑀸𑀦𑀺, 𑀢𑀸𑀦𑀺 𑀢𑀸𑀦𑀺 𑀅𑀢𑁆𑀣𑀢𑁄 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀫𑀢𑁆𑀢𑀸𑀦𑀺 𑀧𑀭𑀲𑁆𑀲𑀧𑀤𑀲𑀜𑁆𑀜𑀸𑀦𑀺 𑀳𑁄𑀦𑁆𑀢𑀻𑀢𑀺𑀆𑀤𑀺𑀫𑁆𑀳𑀺 𑀙𑀦𑁆𑀦𑀁 𑀧𑀭𑀲𑁆𑀲𑀧𑀤𑀲𑀜𑁆𑀜𑀸, 𑀧𑀭𑀲𑁆𑀲𑀢𑁆𑀣𑀸𑀦𑀺 𑀧𑀤𑀸𑀦𑀺 𑀧𑀭𑀲𑁆𑀲𑀧𑀤𑀸𑀦𑀺, 𑀢𑀩𑁆𑀩𑀸𑀳𑀼𑀮𑁆𑀮𑀢𑁄 𑀢𑀩𑁆𑀩𑁄𑀳𑀸𑀭𑁄.

‘‘𑀥𑀸𑀢𑀽𑀳𑀺 𑀡𑁂 𑀡𑀬’’𑀇𑀘𑁆𑀘𑀸𑀤𑀺𑀢𑁄 ‘‘𑀥𑀸𑀢𑀽𑀳𑀻’’𑀢𑀺 𑀯𑀢𑁆𑀢𑀫𑀸𑀦𑁂 𑁋

𑁪𑁩𑁦. 𑀓𑀢𑁆𑀢𑀭𑀺 𑀧𑀭𑀲𑁆𑀲𑀧𑀤𑀁.

𑀓𑀢𑁆𑀢𑀭𑀺𑀓𑀸𑀭𑀓𑁂 𑀅𑀪𑀺𑀥𑁂𑀬𑁆𑀬𑁂 𑀲𑀩𑁆𑀩𑀥𑀸𑀢𑀽𑀳𑀺 𑀧𑀭𑀲𑁆𑀲𑀧𑀤𑀁 𑀳𑁄𑀢𑀻𑀢𑀺 𑀧𑀭𑀲𑁆𑀲𑀧𑀤𑀁 𑀓𑀢𑁆𑀯𑀸, 𑀢𑀲𑁆𑀲𑀸𑀧𑁆𑀬𑀦𑀺𑀬𑀫𑀧𑁆𑀧𑀲𑀗𑁆𑀕𑁂 𑀯𑀢𑁆𑀢𑀺𑀘𑁆𑀙𑀸𑀯𑀲𑀸 𑁋

𑀯𑀺𑀧𑀭𑀺𑀡𑀸𑀫𑁂𑀦 ‘‘𑀧𑀭𑀲𑁆𑀲𑀧𑀤𑀸𑀦𑀁, 𑀅𑀢𑁆𑀢𑀦𑁄𑀧𑀤𑀸𑀦’’𑀦𑁆𑀢𑀺 𑀘 𑀯𑀢𑁆𑀢𑀢𑁂.

𑁪𑁩𑁧. 𑀤𑁆𑀯𑁂 𑀤𑁆𑀯𑁂 𑀧𑀞𑀫𑀫𑀚𑁆𑀛𑀺𑀫𑀼𑀢𑁆𑀢𑀫𑀧𑀼𑀭𑀺𑀲𑀸.

𑀢𑀸𑀲𑀁 𑀯𑀺𑀪𑀢𑁆𑀢𑀻𑀦𑀁 𑀧𑀭𑀲𑁆𑀲𑀧𑀤𑀸𑀦’𑀫𑀢𑁆𑀢𑀦𑁄𑀧𑀤𑀸𑀦𑀜𑁆𑀘 𑀤𑁆𑀯𑁂 𑀤𑁆𑀯𑁂 𑀯𑀘𑀦𑀸𑀦𑀺 𑀬𑀣𑀸𑀓𑁆𑀓𑀫𑀁 𑀧𑀞𑀫𑀫𑀚𑁆𑀛𑀺𑀫𑀼𑀢𑁆𑀢𑀫𑀧𑀼𑀭𑀺𑀲𑀲𑀜𑁆𑀜𑀸𑀦𑀺 𑀳𑁄𑀦𑁆𑀢𑀺. 𑀢𑀁 𑀬𑀣𑀸? 𑀢𑀺 𑀅𑀦𑁆𑀢𑀺𑀇𑀢𑀺 𑀧𑀞𑀫𑀧𑀼𑀭𑀺𑀲𑀸, 𑀲𑀺 𑀣𑀇𑀢𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑀸, 𑀫𑀺 𑀫𑀇𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑀸. 𑀅𑀢𑁆𑀢𑀦𑁄𑀧𑀤𑁂𑀲𑀼𑀧𑀺 𑀢𑁂 𑀅𑀦𑁆𑀢𑁂𑀇𑀢𑀺 𑀧𑀞𑀫𑀧𑀼𑀭𑀺𑀲𑀸, 𑀲𑁂 𑀯𑁆𑀳𑁂𑀇𑀢𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑀸, 𑀏 𑀫𑁆𑀳𑁂𑀇𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑀸. 𑀏𑀯𑀁 𑀲𑁂𑀲𑀸𑀲𑀼 𑀲𑀢𑁆𑀢𑀲𑀼 𑀯𑀺𑀪𑀢𑁆𑀢𑀻𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 ¶ . 𑀏𑀯𑀁 𑀅𑀝𑁆𑀞𑀯𑀺𑀪𑀢𑁆𑀢𑀺𑀯𑀲𑁂𑀦 𑀙𑀦𑁆𑀦𑀯𑀼𑀢𑀺𑀯𑀺𑀥𑁂 𑀆𑀔𑁆𑀬𑀸𑀢𑀧𑀤𑁂 𑀤𑁆𑀯𑀢𑁆𑀢𑀺𑀁𑀲 𑀤𑁆𑀯𑀢𑁆𑀢𑀺𑀁𑀲 𑀧𑀞𑀫𑀫𑀚𑁆𑀛𑀺𑀫𑀉𑀢𑁆𑀢𑀫𑀧𑀼𑀭𑀺𑀲𑀸 𑀳𑁄𑀦𑁆𑀢𑀻𑀢𑀺 𑀯𑀢𑁆𑀢𑀫𑀸𑀦𑀧𑀭𑀲𑁆𑀲𑀧𑀤𑀸𑀤𑀺𑀫𑁆𑀳𑀺 𑀤𑁆𑀯𑀺𑀦𑁆𑀦𑀁 𑀧𑀞𑀫𑀧𑀼𑀭𑀺𑀲𑀲𑀜𑁆𑀜𑀸.

𑁪𑁩𑁨. 𑀦𑀸𑀫𑀫𑁆𑀳𑀺 𑀧𑀬𑀼𑀚𑁆𑀚𑀫𑀸𑀦𑁂𑀧𑀺𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀧𑀞𑀫𑁄.

𑀢𑀼𑀫𑁆𑀳𑀸𑀫𑁆𑀳𑀲𑀤𑁆𑀤𑀯𑀚𑁆𑀚𑀺𑀢𑁂 𑀢𑀼𑀮𑁆𑀬𑀸𑀥𑀺𑀓𑀭𑀡𑀪𑀽𑀢𑁂 𑀲𑀸𑀥𑀓𑀯𑀸𑀘𑀓𑁂 𑀦𑀸𑀫𑀫𑁆𑀳𑀺 𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀅𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀥𑀸𑀢𑀽𑀳𑀺 𑀧𑀞𑀫𑀧𑀼𑀭𑀺𑀲𑁄 𑀳𑁄𑀢𑀻𑀢𑀺 𑀧𑀞𑀫𑀧𑀼𑀭𑀺𑀲𑀁 𑀓𑀢𑁆𑀯𑀸, 𑀢𑀲𑁆𑀲𑀸𑀧𑁆𑀬𑀦𑀺𑀬𑀫𑀧𑁆𑀧𑀲𑀗𑁆𑀕𑁂 𑀓𑁆𑀭𑀺𑀬𑀸𑀲𑀸𑀥𑀓𑀲𑁆𑀲 𑀓𑀢𑁆𑀢𑀼𑀦𑁄 𑀏𑀓𑀢𑁆𑀢𑁂 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑁂 ‘‘𑀏𑀓𑀫𑁆𑀳𑀺 𑀯𑀢𑁆𑀢𑀩𑁆𑀩𑁂 𑀏𑀓𑀯𑀘𑀦’’𑀦𑁆𑀢𑀺 𑀯𑀢𑁆𑀢𑀫𑀸𑀦𑀧𑀭𑀲𑁆𑀲𑀧𑀤𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀢𑀺.

‘‘𑀧𑀭𑁄, 𑀧𑀘𑁆𑀘𑀬𑁄, 𑀥𑀸𑀢𑀽’’𑀢𑀺 𑀘 𑀅𑀥𑀺𑀓𑀸𑀭𑁄, ‘‘𑀬𑀣𑀸 𑀓𑀢𑁆𑀢𑀭𑀺 𑀘𑀸’’𑀢𑀺 𑀇𑀢𑁄 ‘‘𑀓𑀢𑁆𑀢𑀭𑀻’’𑀢𑀺 𑀯𑀺𑀓𑀭𑀡𑀧𑁆𑀧𑀘𑁆𑀘𑀬𑀯𑀺𑀥𑀸𑀦𑁂 𑀲𑀩𑁆𑀩𑀢𑁆𑀣 𑀯𑀢𑁆𑀢𑀢𑁂.

𑁪𑁩𑁩. 𑀪𑀽𑀯𑀸𑀤𑀺𑀢𑁄 𑀅.

𑀪𑀽𑀇𑀘𑁆𑀘𑁂𑀯𑀫𑀸𑀤𑀺𑀢𑁄 𑀥𑀸𑀢𑀼𑀕𑀡𑀢𑁄 𑀧𑀭𑁄 𑀅𑀧𑀘𑁆𑀘𑀬𑁄 𑀳𑁄𑀢𑀺 𑀓𑀢𑁆𑀢𑀭𑀺 𑀯𑀺𑀳𑀺𑀢𑁂𑀲𑀼 𑀯𑀺𑀪𑀢𑁆𑀢𑀺𑀧𑁆𑀧𑀘𑁆𑀘𑀬𑁂𑀲𑀼 𑀧𑀭𑁂𑀲𑀼. 𑀲𑀩𑁆𑀩𑀥𑀸𑀢𑀼𑀓𑀫𑁆𑀳𑀺𑀬𑁂𑀯𑀸𑀬𑀫𑀺𑀲𑁆𑀲𑀢𑁂.

‘‘𑀅𑀲𑀁𑀬𑁄𑀕𑀦𑁆𑀢𑀲𑁆𑀲, 𑀯𑀼𑀤𑁆𑀥𑀻’’𑀢𑀺 𑀘 𑀯𑀢𑁆𑀢𑀢𑁂.

𑁪𑁩𑁪. 𑀅𑀜𑁆𑀜𑁂𑀲𑀼 𑀘.

𑀓𑀸𑀭𑀺𑀢𑀢𑁄 𑀅𑀜𑁆𑀜𑁂𑀲𑀼 𑀧𑀘𑁆𑀘𑀬𑁂𑀲𑀼 𑀅𑀲𑀁𑀬𑁄𑀕𑀦𑁆𑀢𑀸𑀦𑀁 𑀥𑀸𑀢𑀽𑀦𑀁 𑀯𑀼𑀤𑁆𑀥𑀺 𑀳𑁄𑀢𑀺. 𑀘𑀕𑁆𑀕𑀳𑀡𑁂𑀦 𑀡𑀼𑀧𑁆𑀧𑀘𑁆𑀘𑀬𑀲𑁆𑀲𑀸𑀧𑀺 𑀯𑀼𑀤𑁆𑀥𑀺 𑀳𑁄𑀢𑀺. 𑀏𑀢𑁆𑀣 𑀘 ‘‘𑀖𑀝𑀸𑀤𑀻𑀦𑀁 𑀯𑀸’’𑀢𑀺 𑀇𑀢𑁄 𑀯𑀸𑀲𑀤𑁆𑀤𑁄 𑀅𑀦𑀼𑀯𑀢𑁆𑀢𑁂𑀢𑀩𑁆𑀩𑁄, 𑀲𑁄 𑀘 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄. 𑀢𑁂𑀦 𑁋

𑀇𑀯𑀡𑁆𑀡𑀼𑀯𑀡𑁆𑀡𑀦𑁆𑀢𑀸𑀦𑀜𑁆𑀘, 𑀮𑀳𑀽𑀧𑀦𑁆𑀢𑀸𑀦 𑀥𑀸𑀢𑀼𑀦𑀁;

𑀇𑀯𑀡𑁆𑀡𑀼𑀯𑀡𑁆𑀡𑀸𑀦𑀫𑁂𑀯, 𑀯𑀼𑀤𑁆𑀥𑀺 𑀳𑁄𑀢𑀺 𑀧𑀭𑀲𑁆𑀲 𑀦.

𑀬𑀼𑀯𑀡𑁆𑀡𑀸𑀦𑀫𑁆𑀧𑀺 ¶ 𑀬 𑀡𑀼 𑀡𑀸-𑀦𑀸𑀦𑀺𑀝𑁆𑀞𑀸𑀤𑀻𑀲𑀼 𑀯𑀼𑀤𑁆𑀥𑀺 𑀦;

𑀢𑀼𑀤𑀸𑀤𑀺𑀲𑁆𑀲𑀸𑀯𑀺𑀓𑀭𑀡𑁂, 𑀦 𑀙𑁂𑀢𑁆𑀯𑀸𑀤𑀻𑀲𑀼 𑀯𑀸 𑀲𑀺𑀬𑀸.

𑀢𑀲𑁆𑀲𑀸𑀧𑁆𑀬𑀦𑀺𑀬𑀫𑀧𑁆𑀧𑀲𑀗𑁆𑀕𑁂 𑁋 ‘‘𑀅𑀬𑀼𑀯𑀡𑁆𑀡𑀸𑀦𑀜𑁆𑀘𑀸𑀬𑁄 𑀯𑀼𑀤𑁆𑀥𑀻’’𑀢𑀺 𑀧𑀭𑀺𑀪𑀸𑀲𑀢𑁄 𑀊𑀓𑀸𑀭𑀲𑁆𑀲𑁄𑀓𑀸𑀭𑁄 𑀯𑀼𑀤𑁆𑀥𑀺.

𑀯𑀺𑀧𑀭𑀺𑀡𑀸𑀫𑁂𑀦 ‘‘𑀥𑀸𑀢𑀽𑀦’’𑀦𑁆𑀢𑀺 𑀯𑀢𑁆𑀢𑀢𑁂.

𑁪𑁩𑁫. 𑀑 𑀅𑀯 𑀲𑀭𑁂.

𑀑𑀓𑀸𑀭𑀲𑁆𑀲 𑀥𑀸𑀢𑁆𑀯𑀦𑁆𑀢𑀲𑁆𑀲 𑀲𑀭𑁂 𑀧𑀭𑁂 𑀅𑀯𑀸𑀤𑁂𑀲𑁄 𑀳𑁄𑀢𑀺. ‘‘𑀲𑀭𑀮𑁄𑀧𑁄 𑀫𑀸𑀤𑁂𑀲’’𑀇𑀘𑁆𑀘𑀸𑀤𑀺𑀦𑀸 𑀲𑀭𑀮𑁄𑀧𑀸𑀤𑀺𑀫𑁆𑀳𑀺 𑀓𑀢𑁂 ‘‘𑀦𑀬𑁂 𑀧𑀭𑀁 𑀬𑀼𑀢𑁆𑀢𑁂’’𑀢𑀺 𑀧𑀭𑀦𑀬𑀦𑀁 𑀓𑀸𑀢𑀩𑁆𑀩𑀁.

𑀲𑁄 𑀧𑀼𑀭𑀺𑀲𑁄 𑀲𑀸𑀥𑀼 𑀪𑀯𑀢𑀺, 𑀲𑀸 𑀓𑀜𑁆𑀜𑀸 𑀲𑀸𑀥𑀼 𑀪𑀯𑀢𑀺, 𑀢𑀁 𑀘𑀺𑀢𑁆𑀢𑀁 𑀲𑀸𑀥𑀼 𑀪𑀯𑀢𑀺.

𑀏𑀢𑁆𑀣 𑀳𑀺 𑁋

𑀓𑀢𑁆𑀢𑀼𑀦𑁄𑀪𑀺𑀳𑀺𑀢𑀢𑁆𑀢𑀸𑀯, 𑀆𑀔𑁆𑀬𑀸𑀢𑁂𑀦 𑀦 𑀓𑀢𑁆𑀢𑀭𑀺;

𑀢𑀢𑀺𑀬𑀸 𑀧𑀞𑀫𑀸 𑀳𑁄𑀢𑀺, 𑀮𑀺𑀗𑁆𑀕𑀢𑁆𑀣𑀁 𑀧𑀦𑀧𑁂𑀓𑁆𑀔𑀺𑀬.

𑀲𑀢𑀺𑀧𑀺 𑀓𑁆𑀭𑀺𑀬𑀸𑀬𑁂𑀓𑀢𑁆𑀢𑁂 𑀓𑀢𑁆𑀢𑀽𑀦𑀁 𑀩𑀳𑀼𑀢𑁆𑀢𑀸 ‘‘𑀩𑀳𑀼𑀫𑁆𑀳𑀺 𑀯𑀢𑁆𑀢𑀩𑁆𑀩𑁂 𑀩𑀳𑀼𑀯𑀘𑀦’’𑀦𑁆𑀢𑀺 𑀯𑀢𑁆𑀢𑀫𑀸𑀦𑀧𑀭𑀲𑁆𑀲𑀧𑀤𑀧𑀞𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑀁 𑀅𑀦𑁆𑀢𑀺, 𑀧𑀼𑀭𑁂 𑀯𑀺𑀬 𑀅𑀧𑁆𑀧𑀘𑁆𑀘𑀬𑀯𑀼𑀤𑁆𑀥𑀺𑀅𑀯𑀸𑀤𑁂𑀲𑀸, 𑀲𑀭𑀮𑁄𑀧𑀸𑀤𑀺. 𑀢𑁂 𑀧𑀼𑀭𑀺𑀲𑀸 𑀪𑀯𑀦𑁆𑀢𑀺, 𑀅𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀪𑀯𑀢𑀺, 𑀪𑀯𑀦𑁆𑀢𑀺.

‘‘𑀧𑀬𑀼𑀚𑁆𑀚𑀫𑀸𑀦𑁂𑀧𑀺, 𑀢𑀼𑀮𑁆𑀬𑀸𑀥𑀺𑀓𑀭𑀡𑁂’’𑀢𑀺 𑀘 𑀯𑀢𑁆𑀢𑀢𑁂.

𑁪𑁩𑁬. 𑀢𑀼𑀫𑁆𑀳𑁂 𑀫𑀚𑁆𑀛𑀺𑀫𑁄.

𑀢𑀼𑀮𑁆𑀬𑀸𑀥𑀺𑀓𑀭𑀡𑀪𑀽𑀢𑁂 𑀢𑀼𑀫𑁆𑀳𑀲𑀤𑁆𑀤𑁂 𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀅𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀥𑀸𑀢𑀽𑀳𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑁄 𑀳𑁄𑀢𑀻𑀢𑀺 𑀯𑀢𑁆𑀢𑀫𑀸𑀦𑀧𑀭𑀲𑁆𑀲𑀧𑀤𑀫𑀚𑁆𑀛𑀺𑀫𑀧𑀼𑀭𑀺𑀲𑁂𑀓𑀯𑀘𑀦𑀁𑀲𑀺, 𑀲𑁂𑀲𑀁 𑀧𑀼𑀭𑀺𑀫𑀲𑀫𑀁. 𑀢𑁆𑀯𑀁 𑀪𑀯𑀲𑀺, 𑀢𑀼𑀫𑁆𑀳𑁂 𑀪𑀯𑀣, 𑀅𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀪𑀯𑀲𑀺, 𑀪𑀯𑀣.

𑀢𑀼𑀮𑁆𑀬𑀸𑀥𑀺𑀓𑀭𑀡𑁂𑀢𑀺 ¶ 𑀓𑀺𑀫𑀢𑁆𑀣𑀁? 𑀢𑀬𑀸 𑀧𑀘𑁆𑀘𑀢𑁂 𑀑𑀤𑀦𑁄.

𑀢𑀲𑁆𑀫𑀺𑀁𑀬𑁂𑀯𑀸𑀥𑀺𑀓𑀸𑀭𑁂 𑁋

𑁪𑁩𑁭. 𑀅𑀫𑁆𑀳𑁂 𑀉𑀢𑁆𑀢𑀫𑁄.

𑀢𑀼𑀮𑁆𑀬𑀸𑀥𑀺𑀓𑀭𑀡𑀪𑀽𑀢𑁂 𑀅𑀫𑁆𑀳𑀲𑀤𑁆𑀤𑁂 𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀅𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀥𑀸𑀢𑀽𑀳𑀺 𑀉𑀢𑁆𑀢𑀫𑀧𑀼𑀭𑀺𑀲𑁄 𑀳𑁄𑀢𑀻𑀢𑀺 𑀯𑀢𑁆𑀢𑀫𑀸𑀦𑀧𑀭𑀲𑁆𑀲𑀧𑀤𑀉𑀢𑁆𑀢𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀫𑀺, 𑀅𑀧𑁆𑀧𑀘𑁆𑀘𑀬𑀯𑀼𑀤𑁆𑀥𑀺𑀅𑀯𑀸𑀤𑁂𑀲𑀸.

𑁪𑁩𑁮. 𑀅𑀓𑀸𑀭𑁄 𑀤𑀻𑀖𑀁 𑀳𑀺𑀫𑀺𑀫𑁂𑀲𑀼.

𑀅𑀓𑀸𑀭𑁄 𑀤𑀻𑀖𑀫𑀸𑀧𑀚𑁆𑀚𑀢𑁂 𑀳𑀺𑀫𑀺𑀫𑀇𑀘𑁆𑀘𑁂𑀢𑀸𑀲𑀼 𑀯𑀺𑀪𑀢𑁆𑀢𑀻𑀲𑀼. 𑀅𑀳𑀁 𑀪𑀯𑀸𑀫𑀺, 𑀫𑀬𑀁 𑀪𑀯𑀸𑀫. 𑀪𑀯𑀸𑀫𑀺, 𑀪𑀯𑀸𑀫.

‘‘𑀯𑀺𑀪𑀢𑁆𑀢𑀻𑀦𑀁, 𑀙𑀸’’𑀢𑀺 𑀘 𑀯𑀢𑁆𑀢𑀢𑁂.

𑁪𑁩𑁯. 𑀧𑀭𑀸𑀡𑁆𑀬𑀢𑁆𑀢𑀦𑁄𑀧𑀤𑀸𑀦𑀺.

𑀲𑀩𑁆𑀩𑀸𑀲𑀁 𑀯𑀢𑁆𑀢𑀫𑀸𑀦𑀸𑀦𑀁 𑀅𑀝𑁆𑀞𑀯𑀺𑀥𑀸𑀦𑀁 𑀯𑀺𑀪𑀢𑁆𑀢𑀻𑀦𑀁 𑀬𑀸𑀦𑀺 𑀬𑀸𑀦𑀺 𑀧𑀭𑀸𑀦𑀺 𑀙 𑀧𑀤𑀸𑀦𑀺, 𑀢𑀸𑀦𑀺 𑀢𑀸𑀦𑀺 𑀅𑀢𑁆𑀢𑀦𑁄𑀧𑀤𑀲𑀜𑁆𑀜𑀸𑀦𑀺 𑀳𑁄𑀦𑁆𑀢𑀻𑀢𑀺 𑀢𑁂𑀆𑀤𑀻𑀦𑀁 𑀅𑀢𑁆𑀢𑀦𑁄𑀧𑀤𑀲𑀜𑁆𑀜𑀸.

‘‘𑀥𑀸𑀢𑀽𑀳𑀺, 𑀅𑀢𑁆𑀢𑀦𑁄𑀧𑀤𑀸𑀦𑀻’’𑀢𑀺 𑀘 𑀯𑀢𑁆𑀢𑀢𑁂.

𑁪𑁪𑁦. 𑀓𑀢𑁆𑀢𑀭𑀺 𑀘.

𑀓𑀢𑁆𑀢𑀭𑀺 𑀘 𑀓𑀸𑀭𑀓𑁂 𑀅𑀪𑀺𑀥𑁂𑀬𑁆𑀬𑁂 𑀥𑀸𑀢𑀽𑀳𑀺 𑀅𑀢𑁆𑀢𑀦𑁄𑀧𑀤𑀸𑀦𑀺 𑀳𑁄𑀦𑁆𑀢𑀺. 𑀘𑀕𑁆𑀕𑀳𑀡𑀁 𑀓𑀢𑁆𑀣𑀘𑀺 𑀦𑀺𑀯𑀢𑁆𑀢𑀦𑀢𑁆𑀣𑀁, 𑀲𑁂𑀲𑀁 𑀧𑀭𑀲𑁆𑀲𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀪𑀯𑀢𑁂, 𑀪𑀯𑀦𑁆𑀢𑁂, 𑀪𑀯𑀲𑁂, 𑀪𑀯𑀯𑁆𑀳𑁂, 𑀪𑀯𑁂, 𑀪𑀯𑀸𑀫𑁆𑀳𑁂.

𑀧𑀘 𑀧𑀸𑀓𑁂, 𑀥𑀸𑀢𑀼𑀲𑀜𑁆𑀜𑀸𑀬𑀁 𑀥𑀸𑀢𑁆𑀯𑀦𑁆𑀢𑀮𑁄𑀧𑁄, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺, 𑀇𑀯𑀡𑁆𑀡𑀼𑀯𑀡𑁆𑀡𑀸𑀦𑀫𑀪𑀸𑀯𑀸 𑀯𑀼𑀤𑁆𑀥𑀺𑀅𑀪𑀸𑀯𑁄𑀯𑁂𑀢𑁆𑀣 𑀯𑀺𑀲𑁂𑀲𑁄. 𑀲𑁄 𑀤𑁂𑀯𑀤𑀢𑁆𑀢𑁄 𑀑𑀤𑀦𑀁 𑀧𑀘𑀢𑀺, 𑀧𑀘𑀦𑁆𑀢𑀺, 𑀧𑀘𑀲𑀺 ¶ , 𑀧𑀘𑀣, 𑀧𑀘𑀸𑀫𑀺, 𑀧𑀘𑀸𑀫, 𑀲𑁄 𑀑𑀤𑀦𑀁 𑀧𑀘𑀢𑁂, 𑀢𑁂 𑀧𑀘𑀦𑁆𑀢𑁂, 𑀢𑁆𑀯𑀁 𑀧𑀘𑀲𑁂, 𑀢𑀼𑀫𑁆𑀳𑁂 𑀧𑀘𑀯𑁆𑀳𑁂, 𑀅𑀳𑀁 𑀧𑀘𑁂, 𑀫𑀬𑀁 𑀧𑀘𑀸𑀫𑁆𑀳𑁂.

𑀧𑀞𑀫𑀧𑀼𑀭𑀺𑀲𑀸𑀤𑀻𑀦𑀫𑁂𑀓𑀚𑁆𑀛𑀧𑁆𑀧𑀯𑀢𑁆𑀢𑀺𑀧𑁆𑀧𑀲𑀗𑁆𑀕𑁂 𑀧𑀭𑀺𑀪𑀸𑀲𑀫𑀸𑀳 𑁋

𑁪𑁪𑁧. 𑀲𑀩𑁆𑀩𑁂𑀲𑀫𑁂𑀓𑀸𑀪𑀺𑀥𑀸𑀦𑁂 𑀧𑀭𑁄 𑀧𑀼𑀭𑀺𑀲𑁄.

𑀲𑀩𑁆𑀩𑁂𑀲𑀁 𑀧𑀞𑀫𑀫𑀚𑁆𑀛𑀺𑀫𑀸𑀦𑀁, 𑀧𑀞𑀫𑀼𑀢𑁆𑀢𑀫𑀸𑀦𑀁, 𑀫𑀚𑁆𑀛𑀺𑀫𑀼𑀢𑁆𑀢𑀫𑀸𑀦𑀁 𑀢𑀺𑀡𑁆𑀡𑀁 𑀯𑀸 𑀧𑀼𑀭𑀺𑀲𑀸𑀦𑀁 𑀏𑀓𑀢𑁄𑀪𑀺𑀥𑀸𑀦𑁂 𑀓𑀸𑀢𑀩𑁆𑀩𑁂 𑀧𑀭𑁄 𑀧𑀼𑀭𑀺𑀲𑁄 𑀬𑁄𑀚𑁂𑀢𑀩𑁆𑀩𑁄. 𑀏𑀓𑀓𑀸𑀮𑀸𑀦𑀫𑁂𑀯𑀸𑀪𑀺𑀥𑀸𑀦𑁂 𑀘𑀸𑀬𑀁. 𑀲𑁄 𑀘 𑀧𑀘𑀢𑀺, 𑀢𑁆𑀯𑀜𑁆𑀘 𑀧𑀘𑀲𑀻𑀢𑀺 𑀧𑀭𑀺𑀬𑀸𑀬𑀧𑁆𑀧𑀲𑀗𑁆𑀕𑁂 𑀢𑀼𑀫𑁆𑀳𑁂 𑀧𑀘𑀣𑀸𑀢𑀺 𑀪𑀯𑀢𑀺. 𑀏𑀯𑀁 𑀲𑁄 𑀘 𑀧𑀘𑀢𑀺, 𑀅𑀳𑀜𑁆𑀘 𑀧𑀘𑀸𑀫𑀻𑀢𑀺 𑀫𑀬𑀁 𑀧𑀘𑀸𑀫, 𑀢𑀣𑀸 𑀢𑁆𑀯𑀜𑁆𑀘 𑀧𑀘𑀲𑀺, 𑀅𑀳𑀜𑁆𑀘 𑀧𑀘𑀸𑀫𑀺, 𑀫𑀬𑀁 𑀧𑀘𑀸𑀫, 𑀲𑁄 𑀘 𑀧𑀘𑀢𑀺, 𑀢𑁆𑀯𑀜𑁆𑀘 𑀧𑀘𑀲𑀺, 𑀅𑀳𑀜𑁆𑀘 𑀧𑀘𑀸𑀫𑀺, 𑀫𑀬𑀁 𑀧𑀘𑀸𑀫. 𑀏𑀯𑀁 𑀲𑀩𑁆𑀩𑀢𑁆𑀣 𑀬𑁄𑀚𑁂𑀢𑀩𑁆𑀩𑀁.

𑀏𑀓𑀸𑀪𑀺𑀥𑀸𑀦𑁂𑀢𑀺 𑀓𑀺𑀫𑀢𑁆𑀣𑀁? ‘‘𑀲𑁄 𑀘 𑀧𑀘𑀢𑀺, 𑀢𑁆𑀯𑀜𑁆𑀘 𑀧𑀘𑀺𑀲𑁆𑀲𑀲𑀺, 𑀅𑀳𑀁 𑀧𑀘𑀺𑀁’’ 𑀏𑀢𑁆𑀣 𑀪𑀺𑀦𑁆𑀦𑀓𑀸𑀮𑀢𑁆𑀢𑀸 ‘‘𑀫𑀬𑀁 𑀧𑀘𑀺𑀫𑁆𑀳𑀸’’𑀢𑀺 𑀦 𑀪𑀯𑀢𑀺.

𑀕𑀫𑀼 𑀲𑀧𑁆𑀧 𑀕𑀢𑀺𑀫𑁆𑀳𑀺, 𑀧𑀼𑀭𑁂 𑀯𑀺𑀬 𑀥𑀸𑀢𑀼𑀲𑀜𑁆𑀜𑀸𑀬𑀁 𑀥𑀸𑀢𑁆𑀯𑀦𑁆𑀢𑀮𑁄𑀧𑁄.

𑀓𑀢𑁆𑀢𑀭𑀺 𑀢𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺.

𑁪𑁪𑁨. 𑀕𑀫𑀺𑀲𑁆𑀲𑀦𑁆𑀢𑁄 𑀘𑁆𑀙𑁄 𑀯𑀸 𑀲𑀩𑁆𑀩𑀸𑀲𑀼.

𑀕𑀫𑀼𑀇𑀘𑁆𑀘𑁂𑀢𑀲𑁆𑀲 𑀥𑀸𑀢𑀼𑀲𑁆𑀲𑀦𑁆𑀢𑁄 𑀫𑀓𑀸𑀭𑁄 𑀘𑁆𑀙𑁄 𑀳𑁄𑀢𑀺 𑀯𑀸 𑀲𑀩𑁆𑀩𑀸𑀲𑀼 𑀯𑀺𑀪𑀢𑁆𑀢𑀻𑀲𑀼, 𑀲𑀩𑁆𑀩𑀕𑁆𑀕𑀳𑀡𑁂𑀦 𑀫𑀸𑀦𑀦𑁆𑀢 𑀬 𑀓𑀸𑀭𑀺𑀢𑀧𑁆𑀧𑀘𑁆𑀘𑀬𑁂𑀲𑀼 𑀘. 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄𑀬𑀁 𑀯𑀸𑀲𑀤𑁆𑀤𑁄. 𑀢𑁂𑀦𑀸𑀬𑀁 𑁋

𑀯𑀺𑀥𑀺𑀁 𑀦𑀺𑀘𑁆𑀘𑀜𑁆𑀘 𑀯𑀸𑀲𑀤𑁆𑀤𑁄, 𑀫𑀸𑀦’𑀦𑁆𑀢𑁂𑀲𑀼 𑀢𑀼 𑀓𑀢𑁆𑀢𑀭𑀺;

𑀤𑀻𑀧𑁂𑀢𑀸𑀦𑀺𑀘𑁆𑀘𑀫𑀜𑁆𑀜𑀢𑁆𑀣, 𑀧𑀭𑁄𑀓𑁆𑀔𑀸𑀬𑀫𑀲𑀦𑁆𑀢𑀓𑀁.

𑀅𑀧𑁆𑀧𑀘𑁆𑀘𑀬𑀧𑀭𑀦𑀬𑀦𑀸𑀦𑀺 ¶ , 𑀲𑁄 𑀧𑀼𑀭𑀺𑀲𑁄 𑀕𑀸𑀫𑀁 𑀕𑀘𑁆𑀙𑀢𑀺, 𑀢𑁂 𑀕𑀘𑁆𑀙𑀦𑁆𑀢𑀺, ‘‘𑀓𑁆𑀯𑀘𑀺 𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀕𑀭𑀼𑀧𑀼𑀩𑁆𑀩𑀭𑀲𑁆𑀲𑀢𑁄 𑀧𑀭𑀲𑁆𑀲 𑀧𑀞𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑀲𑁆𑀲 𑀭𑁂 𑀯𑀸 𑀳𑁄𑀢𑀺, 𑀕𑀘𑁆𑀙𑀭𑁂. 𑀢𑁆𑀯𑀁 𑀕𑀘𑁆𑀙𑀲𑀺, 𑀢𑀼𑀫𑁆𑀳𑁂 𑀕𑀘𑁆𑀙𑀣. 𑀅𑀳𑀁 𑀕𑀘𑁆𑀙𑀸𑀫𑀺, 𑀫𑀬𑀁 𑀕𑀘𑁆𑀙𑀸𑀫.

𑀘𑁆𑀙𑀸𑀤𑁂𑀲𑀸𑀪𑀸𑀯𑁂 ‘‘𑀮𑁄𑀧𑀜𑁆𑀘𑁂𑀢𑁆𑀢𑀫𑀓𑀸𑀭𑁄’’𑀢𑀺 𑀅𑀧𑁆𑀧𑀘𑁆𑀘𑀬𑀲𑁆𑀲 𑀏𑀓𑀸𑀭𑁄. 𑀕𑀫𑁂𑀢𑀺, 𑀕𑀫𑁂𑀦𑁆𑀢𑀺, 𑀲𑀭𑀮𑁄𑀧𑁄. 𑀕𑀫𑁂𑀲𑀺, 𑀕𑀫𑁂𑀣. 𑀕𑀫𑁂𑀫𑀺, 𑀕𑀫𑁂𑀫.

𑀅𑀢𑁆𑀢𑀦𑁄𑀧𑀤𑁂𑀧𑀺 𑀲𑁄 𑀕𑀸𑀫𑀁 𑀕𑀘𑁆𑀙𑀢𑁂, 𑀕𑀘𑁆𑀙𑀦𑁆𑀢𑁂, 𑀕𑀘𑁆𑀙𑀭𑁂. 𑀕𑀘𑁆𑀙𑀲𑁂, 𑀕𑀘𑁆𑀙𑀯𑁆𑀳𑁂. 𑀕𑀘𑁆𑀙𑁂, 𑀕𑀘𑁆𑀙𑀸𑀫𑁆𑀳𑁂.

‘‘𑀓𑀼𑀢𑁄 𑀦𑀼 𑀢𑁆𑀯𑀁 𑀆𑀕𑀘𑁆𑀙𑀲𑀺, 𑀭𑀸𑀚𑀕𑀳𑀢𑁄 𑀆𑀕𑀘𑁆𑀙𑀸𑀫𑀻’’𑀢𑀺𑀆𑀤𑀻𑀲𑀼 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀫𑀻𑀧𑁂 𑀯𑀢𑁆𑀢𑀫𑀸𑀦𑀯𑀘𑀦𑀁.

‘‘𑀯𑀸’’𑀢𑀺 𑀯𑀢𑁆𑀢𑀢𑁂.

𑁪𑁪𑁩. 𑀕𑀫𑀺𑀲𑁆𑀲 𑀖𑀫𑁆𑀫𑀁.

𑀕𑀫𑀼𑀇𑀘𑁆𑀘𑁂𑀢𑀲𑁆𑀲 𑀥𑀸𑀢𑀼𑀲𑁆𑀲 𑀲𑀩𑁆𑀩𑀲𑁆𑀲 𑀖𑀫𑁆𑀫𑀸𑀤𑁂𑀲𑁄 𑀳𑁄𑀢𑀺 𑀯𑀸. 𑀖𑀫𑁆𑀫𑀢𑀺, 𑀖𑀫𑁆𑀫𑀦𑁆𑀢𑀺 𑀇𑀘𑁆𑀘𑀸𑀤𑀺.

𑀪𑀸𑀯𑀓𑀫𑁆𑀫𑁂𑀲𑀼 𑀧𑀦 𑁋

𑁪𑁪𑁪. 𑀅𑀢𑁆𑀢𑀦𑁄𑀧𑀤𑀸𑀦𑀺 𑀪𑀸𑀯𑁂 𑀘 𑀓𑀫𑁆𑀫𑀦𑀺.

𑀪𑀸𑀯𑁂 𑀘 𑀓𑀫𑁆𑀫𑀦𑀺 𑀘 𑀓𑀸𑀭𑀓𑁂 𑀅𑀪𑀺𑀥𑁂𑀬𑁆𑀬𑁂 𑀅𑀢𑁆𑀢𑀦𑁄𑀧𑀤𑀸𑀦𑀺 𑀳𑁄𑀦𑁆𑀢𑀺, 𑀘𑀲𑀤𑁆𑀤𑁂𑀦 𑀓𑀫𑁆𑀫𑀓𑀢𑁆𑀢𑀭𑀺𑀧𑀺. 𑀪𑀯𑀦𑀁 𑀪𑀸𑀯𑁄, 𑀲𑁄 𑀘 𑀓𑀸𑀭𑀓𑀦𑁆𑀢𑀭𑁂𑀦 𑀅𑀲𑀁𑀲𑀝𑁆𑀞𑁄 𑀓𑁂𑀯𑀮𑁄 𑀪𑀯𑀦𑀮𑀯𑀦𑀸𑀤𑀺𑀓𑁄 𑀥𑀸𑀢𑁆𑀯𑀢𑁆𑀣𑁄. 𑀓𑀭𑀻𑀬𑀢𑀻𑀢𑀺 𑀓𑀫𑁆𑀫𑀁. 𑀅𑀓𑀫𑁆𑀫𑀓𑀸𑀧𑀺 𑀥𑀸𑀢𑀯𑁄 𑀲𑁄𑀧𑀲𑀕𑁆𑀕𑀸 𑀲𑀓𑀫𑁆𑀫𑀓𑀸𑀧𑀺 𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀓𑀫𑁆𑀫𑀦𑀺 𑀅𑀦𑀼𑀧𑀼𑀩𑁆𑀩𑀸 𑀪𑀽𑀥𑀸𑀢𑀼𑀢𑁄 𑀯𑀢𑁆𑀢𑀫𑀸𑀦𑀢𑁆𑀢𑀦𑁄𑀧𑀤𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀢𑁂.

‘‘𑀥𑀸𑀢𑀽𑀳𑀺 ¶ 𑀡𑁂 𑀡𑀬’’𑀇𑀘𑁆𑀘𑀸𑀤𑀺𑀢𑁄 ‘‘𑀥𑀸𑀢𑀽𑀳𑀻’’𑀢𑀺 𑀯𑀢𑁆𑀢𑀫𑀸𑀦𑁂 𑁋

𑁪𑁪𑁫. 𑀪𑀸𑀯𑀓𑀫𑁆𑀫𑁂𑀲𑀼 𑀬𑁄.

𑀲𑀩𑁆𑀩𑀥𑀸𑀢𑀽𑀳𑀺 𑀧𑀭𑁄 𑀪𑀸𑀯𑀓𑀫𑁆𑀫𑁂𑀲𑀼 𑀬𑀧𑁆𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀢𑁆𑀢𑀦𑁄𑀧𑀤𑀯𑀺𑀲𑀬𑁂𑀯𑀸𑀬𑀫𑀺𑀲𑁆𑀲𑀢𑁂, ‘‘𑀅𑀜𑁆𑀜𑁂𑀲𑀼 𑀘𑀸’’𑀢𑀺 𑀲𑀼𑀢𑁆𑀢𑁂 𑀅𑀦𑀼𑀯𑀢𑁆𑀢𑀺𑀢𑀯𑀸𑀕𑁆𑀕𑀳𑀡𑁂𑀦 𑀬𑀧𑁆𑀧𑀘𑁆𑀘𑀬𑁂 𑀯𑀼𑀤𑁆𑀥𑀺 𑀦 𑀪𑀯𑀢𑀺, 𑀅𑀦𑀼𑀪𑀽𑀬𑀢𑁂 𑀲𑀼𑀔𑀁 𑀤𑁂𑀯𑀤𑀢𑁆𑀢𑁂𑀦.

𑀆𑀔𑁆𑀬𑀸𑀢𑁂𑀦 𑀅𑀯𑀼𑀢𑁆𑀢𑀢𑁆𑀢𑀸, 𑀢𑀢𑀺𑀬𑀸 𑀳𑁄𑀢𑀺 𑀓𑀢𑁆𑀢𑀭𑀺;

𑀓𑀫𑁆𑀫𑀲𑁆𑀲𑀸𑀪𑀺𑀳𑀺𑀢𑀢𑁆𑀢𑀸 𑀦, 𑀤𑀼𑀢𑀺𑀬𑀸 𑀧𑀞𑀫𑀸𑀯𑀺𑀥.

𑀅𑀦𑀼𑀪𑀽𑀬𑀦𑁆𑀢𑁂 𑀲𑀫𑁆𑀧𑀢𑁆𑀢𑀺𑀬𑁄 𑀢𑀬𑀸. 𑀅𑀦𑀼𑀪𑀽𑀬𑀲𑁂 𑀢𑁆𑀯𑀁 𑀤𑁂𑀯𑀤𑀢𑁆𑀢𑁂𑀦, 𑀅𑀦𑀼𑀪𑀽𑀬𑀯𑁆𑀳𑁂 𑀢𑀼𑀫𑁆𑀳𑁂. 𑀅𑀳𑀁 𑀅𑀦𑀼𑀪𑀽𑀬𑁂 𑀢𑀬𑀸, 𑀫𑀬𑀁 𑀅𑀦𑀼𑀪𑀽𑀬𑀸𑀫𑁆𑀳𑁂.

‘‘𑀓𑁆𑀯𑀘𑀺 𑀥𑀸𑀢𑀼’’𑀇𑀘𑁆𑀘𑀸𑀤𑀺𑀢𑁄 ‘‘𑀓𑁆𑀯𑀘𑀻’’𑀢𑀺 𑀯𑀢𑁆𑀢𑀫𑀸𑀦𑁂 𑁋

𑁪𑁪𑁬. 𑀅𑀢𑁆𑀢𑀦𑁄𑀧𑀤𑀸𑀦𑀺 𑀧𑀭𑀲𑁆𑀲𑀧𑀤𑀢𑁆𑀢𑀁.

𑀅𑀢𑁆𑀢𑀦𑁄𑀧𑀤𑀸𑀦𑀺 𑀓𑁆𑀯𑀘𑀺 𑀧𑀭𑀲𑁆𑀲𑀧𑀤𑀢𑁆𑀢𑀫𑀸𑀧𑀚𑁆𑀚𑀦𑁆𑀢𑁂, 𑀅𑀓𑀢𑁆𑀢𑀭𑀺𑀬𑁂𑀯𑁂𑀢𑀁. 𑀬𑀓𑀸𑀭𑀲𑁆𑀲 𑀤𑁆𑀯𑀺𑀢𑁆𑀢𑀁, 𑀅𑀦𑀼𑀪𑀽𑀬𑁆𑀬𑀢𑀺 𑀫𑀬𑀸 𑀲𑀼𑀔𑀁, 𑀅𑀦𑀼𑀪𑀽𑀬𑁆𑀬𑀢𑁂 𑀯𑀸, 𑀅𑀦𑀼𑀪𑀽𑀬𑁆𑀬𑀦𑁆𑀢𑀺. 𑀅𑀦𑀼𑀪𑀽𑀬𑁆𑀬𑀲𑀺, 𑀅𑀦𑀼𑀪𑀽𑀬𑁆𑀬𑀣. 𑀅𑀦𑀼𑀪𑀽𑀬𑁆𑀬𑀸𑀫𑀺, 𑀅𑀦𑀼𑀪𑀽𑀬𑁆𑀬𑀸𑀫. 𑀤𑁆𑀯𑀺𑀢𑁆𑀢𑀸𑀪𑀸𑀯𑁂 𑁋 𑀅𑀦𑀼𑀪𑀽𑀬𑀢𑀺, 𑀅𑀦𑀼𑀪𑀽𑀬𑀦𑁆𑀢𑀺.

𑀓𑁆𑀯𑀘𑀻𑀢𑀺 𑀓𑀺𑀁? 𑀅𑀦𑀼𑀪𑀽𑀬𑀢𑁂.

𑀪𑀸𑀯𑁂 𑀅𑀤𑀩𑁆𑀩𑀯𑀼𑀢𑁆𑀢𑀺𑀦𑁄 𑀪𑀸𑀯𑀲𑁆𑀲𑁂𑀓𑀢𑁆𑀢𑀸 𑀏𑀓𑀯𑀘𑀦𑀫𑁂𑀯, 𑀢𑀜𑁆𑀘 𑀧𑀞𑀫𑀧𑀼𑀭𑀺𑀲𑀲𑁆𑀲𑁂𑀯, 𑀪𑀽𑀬𑀢𑁂 𑀤𑁂𑀯𑀤𑀢𑁆𑀢𑁂𑀦, 𑀤𑁂𑀯𑀤𑀢𑁆𑀢𑁂𑀦 𑀲𑀫𑁆𑀧𑀢𑀺 𑀪𑀯𑀦𑀦𑁆𑀢𑀺 𑀅𑀢𑁆𑀣𑁄.

𑀧𑀘𑀥𑀸𑀢𑀼𑀢𑁄 ¶ 𑀓𑀫𑁆𑀫𑀦𑀺 𑀅𑀢𑁆𑀢𑀦𑁄𑀧𑀤𑁂 𑀬𑀧𑁆𑀧𑀘𑁆𑀘𑀬𑁂 𑀘 𑀓𑀢𑁂 𑁋

𑀯𑀺𑀧𑀭𑀺𑀡𑀸𑀫𑁂𑀦 ‘‘𑀬𑀲𑁆𑀲𑀸’’𑀢𑀺 𑀯𑀢𑁆𑀢𑀫𑀸𑀦𑁂 𑁋

𑁪𑁪𑁭. 𑀢𑀲𑁆𑀲 𑀘𑀯𑀕𑁆𑀕𑀬𑀓𑀸𑀭𑀯𑀓𑀸𑀭𑀢𑁆𑀢𑀁 𑀲𑀥𑀸𑀢𑁆𑀯𑀦𑁆𑀢𑀲𑁆𑀲.

𑀢𑀲𑁆𑀲 𑀪𑀸𑀯𑀓𑀫𑁆𑀫𑀯𑀺𑀲𑀬𑀲𑁆𑀲 𑀬𑀧𑁆𑀧𑀘𑁆𑀘𑀬𑀲𑁆𑀲 𑀘𑀯𑀕𑁆𑀕𑀬𑀓𑀸𑀭𑀯𑀓𑀸𑀭𑀢𑁆𑀢𑀁 𑀳𑁄𑀢𑀺 𑀥𑀸𑀢𑁆𑀯𑀦𑁆𑀢𑁂𑀦 𑀲𑀳 𑀬𑀣𑀸𑀲𑀫𑁆𑀪𑀯𑀁. 𑀏𑀢𑁆𑀣 𑀘 ‘‘𑀇𑀯𑀡𑁆𑀡𑀸𑀕𑀫𑁄 𑀯𑀸’’𑀢𑀺 𑀇𑀢𑁄 𑀲𑀻𑀳𑀕𑀢𑀺𑀬𑀸 𑀯𑀸𑀲𑀤𑁆𑀤𑁄 𑀅𑀦𑀼𑀯𑀢𑁆𑀢𑁂𑀢𑀩𑁆𑀩𑁄, 𑀲𑁄 𑀘 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄. 𑀢𑁂𑀦 𑁋

𑀘𑀯𑀕𑁆𑀕𑁄 𑀘 𑀢 𑀯𑀕𑁆𑀕𑀸𑀦𑀁, 𑀥𑀸𑀢𑁆𑀯𑀦𑁆𑀢𑀸𑀦𑀁 𑀬𑀯𑀢𑁆𑀢𑀦𑀁;

𑀭𑀯𑀸𑀦𑀜𑁆𑀘 𑀲𑀬𑀧𑁆𑀧𑀘𑁆𑀘-𑀬𑀸𑀦𑀁 𑀳𑁄𑀢𑀺 𑀬𑀣𑀸𑀓𑁆𑀓𑀫𑀦𑁆𑀢𑀺.

𑀥𑀸𑀢𑁆𑀯𑀦𑁆𑀢𑀲𑁆𑀲 𑀘𑀯𑀕𑁆𑀕𑀸𑀤𑀺𑀢𑁆𑀢𑀸 𑀘𑀓𑀸𑀭𑁂 𑀓𑀢𑁂 ‘‘𑀧𑀭𑀤𑁆𑀯𑁂𑀪𑀸𑀯𑁄 𑀞𑀸𑀦𑁂’’𑀢𑀺 𑀘𑀓𑀸𑀭𑀲𑁆𑀲 𑀤𑁆𑀯𑀺𑀢𑁆𑀢𑀁. 𑀧𑀘𑁆𑀘𑀢𑁂 𑀑𑀤𑀦𑁄 𑀤𑁂𑀯𑀤𑀢𑁆𑀢𑁂𑀦, ‘‘𑀓𑁆𑀯𑀘𑀺 𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀕𑀭𑀼𑀧𑀼𑀩𑁆𑀩𑀭𑀲𑁆𑀲𑀢𑁄 𑀧𑀭𑀲𑁆𑀲 𑀧𑀞𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑀲𑁆𑀲 𑀓𑁆𑀯𑀘𑀺 𑀭𑁂 𑀳𑁄𑀢𑀺. 𑀧𑀘𑁆𑀘𑀭𑁂, 𑀧𑀘𑁆𑀘𑀦𑁆𑀢𑁂. 𑀧𑀘𑁆𑀘𑀲𑁂, 𑀧𑀘𑁆𑀘𑀯𑁆𑀳𑁂. 𑀧𑀘𑁆𑀘𑁂, 𑀧𑀘𑁆𑀘𑀸𑀫𑁆𑀳𑁂.

𑀧𑀭𑀲𑁆𑀲𑀧𑀤𑀸𑀤𑁂𑀲𑁂 𑀧𑀘𑁆𑀘𑀢𑀺, 𑀧𑀘𑁆𑀘𑀦𑁆𑀢𑀺. 𑀧𑀘𑁆𑀘𑀲𑀺, 𑀧𑀘𑁆𑀘𑀣. 𑀧𑀘𑁆𑀘𑀸𑀫𑀺, 𑀧𑀘𑁆𑀘𑀸𑀫. 𑀢𑀣𑀸 𑀓𑀫𑁆𑀫𑀓𑀢𑁆𑀢𑀭𑀺 𑀧𑀘𑁆𑀘𑀢𑁂 𑀑𑀤𑀦𑁄 𑀲𑀬𑀫𑁂𑀯, 𑀧𑀘𑁆𑀘𑀦𑁆𑀢𑁂. 𑀧𑀘𑁆𑀘𑀢𑀺, 𑀧𑀘𑁆𑀘𑀦𑁆𑀢𑀺 𑀯𑀸 𑀇𑀘𑁆𑀘𑀸𑀤𑀺.

𑀕𑀫𑀺𑀢𑁄 𑀓𑀫𑁆𑀫𑀦𑀺 𑀅𑀢𑁆𑀢𑀦𑁄𑀧𑀤𑁂, 𑀬𑀧𑁆𑀧𑀘𑁆𑀘𑀬𑁂 𑀘 𑀓𑀢𑁂 𑁋

‘‘𑀥𑀸𑀢𑀽𑀳𑀺, 𑀢𑀲𑁆𑀫𑀺𑀁, 𑀬𑁂’’𑀢𑀺 𑀘 𑀯𑀢𑁆𑀢𑀢𑁂.

𑁪𑁪𑁮. 𑀇𑀯𑀡𑁆𑀡𑀸𑀕𑀫𑁄 𑀯𑀸.

𑀲𑀩𑁆𑀩𑁂𑀳𑀺 𑀥𑀸𑀢𑀽𑀳𑀺 𑀢𑀲𑁆𑀫𑀺𑀁 𑀪𑀸𑀯𑀓𑀫𑁆𑀫𑀯𑀺𑀲𑀬𑁂 𑀬𑀧𑁆𑀧𑀘𑁆𑀘𑀬𑁂 𑀧𑀭𑁂 𑀇𑀯𑀡𑁆𑀡𑀸𑀕𑀫𑁄 𑀳𑁄𑀢𑀺 𑀯𑀸𑀢𑀺 𑀈𑀓𑀸𑀭𑀸𑀕𑀫𑁄. 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄𑀬𑀁 𑀯𑀸𑀲𑀤𑁆𑀤𑁄. 𑀘𑁆𑀙𑀸𑀤𑁂𑀲𑁄, 𑀕𑀘𑁆𑀙𑀻𑀬𑀢𑁂 𑀕𑀸𑀫𑁄 𑀤𑁂𑀯𑀤𑀢𑁆𑀢𑁂𑀦 ¶ , 𑀕𑀘𑁆𑀙𑀻𑀬𑀦𑁆𑀢𑁂. 𑀕𑀘𑁆𑀙𑀻𑀬𑀲𑁂, 𑀕𑀘𑁆𑀙𑀻𑀬𑀯𑁆𑀳𑁂. 𑀕𑀘𑁆𑀙𑀻𑀬𑁂, 𑀕𑀘𑁆𑀙𑀻𑀬𑀸𑀫𑁆𑀳𑁂.

𑀘𑁆𑀙𑀸𑀤𑁂𑀲𑀸𑀪𑀸𑀯𑁂 𑁋

‘‘𑀥𑀸𑀢𑀽𑀳𑀺, 𑀬𑁄, 𑀯𑀸’’𑀢𑀺 𑀘 𑀯𑀢𑁆𑀢𑀢𑁂.

𑁪𑁪𑁯. 𑀧𑀼𑀩𑁆𑀩𑀭𑀽𑀧𑀜𑁆𑀘.

𑀳𑁂𑀝𑁆𑀞𑀸𑀦𑀼𑀢𑁆𑀢𑁂𑀳𑀺 𑀧𑀭𑀲𑁆𑀲𑁂𑀯𑁂𑀤𑀁, 𑀢𑁂𑀦 𑀓𑀝𑀧𑀯𑀕𑁆𑀕𑀬𑀓𑀸𑀭𑀮𑀲𑀦𑁆𑀢𑁂𑀳𑁂𑀯 𑀥𑀸𑀢𑀽𑀳𑀺 𑀧𑀭𑁄 𑀬𑀧𑁆𑀧𑀘𑁆𑀘𑀬𑁄 𑀧𑀼𑀩𑁆𑀩𑀭𑀽𑀧𑀫𑀸𑀧𑀚𑁆𑀚𑀢𑁂 𑀯𑀸𑀢𑀺 𑀫𑀓𑀸𑀭𑀸 𑀧𑀭𑀲𑁆𑀲 𑀬𑀓𑀸𑀭𑀲𑁆𑀲 𑀫𑀓𑀸𑀭𑁄. 𑀕𑀫𑁆𑀫𑀢𑁂, 𑀕𑀫𑀻𑀬𑀢𑁂, 𑀕𑀫𑁆𑀫𑀦𑁆𑀢𑁂, 𑀕𑀫𑀻𑀬𑀦𑁆𑀢𑁂. 𑀕𑀫𑁆𑀫𑀲𑁂, 𑀕𑀫𑀻𑀬𑀲𑁂, 𑀕𑀫𑁆𑀫𑀯𑁆𑀳𑁂, 𑀕𑀫𑀻𑀬𑀯𑁆𑀳𑁂. 𑀕𑀫𑁆𑀫𑁂, 𑀕𑀫𑀻𑀬𑁂, 𑀕𑀫𑁆𑀫𑀸𑀫𑁆𑀳𑁂, 𑀕𑀫𑀻𑀬𑀸𑀫𑁆𑀳𑁂.

𑀧𑀭𑀲𑁆𑀲𑀧𑀤𑀢𑁆𑀢𑁂 𑁋 𑀕𑀘𑁆𑀙𑀻𑀬𑁆𑀬𑀢𑀺, 𑀕𑀘𑁆𑀙𑀻𑀬𑁆𑀬𑀦𑁆𑀢𑀺. 𑀕𑀘𑁆𑀙𑀻𑀬𑀢𑀺, 𑀕𑀘𑁆𑀙𑀻𑀬𑀦𑁆𑀢𑀺 𑀯𑀸. 𑀕𑀫𑁆𑀫𑀢𑀺, 𑀕𑀫𑁆𑀫𑀦𑁆𑀢𑀺. 𑀕𑀫𑀻𑀬𑀢𑀺, 𑀕𑀫𑀻𑀬𑀦𑁆𑀢𑀺. 𑀇𑀓𑀸𑀭𑀸𑀕𑀫𑁂 𑀕𑀫𑀺𑀬𑁆𑀬𑀢𑀺, 𑀕𑀫𑀺𑀬𑁆𑀬𑀦𑁆𑀢𑀺. 𑀢𑀣𑀸 𑀖𑀫𑁆𑀫𑀻𑀬𑀢𑀺, 𑀖𑀫𑁆𑀫𑀻𑀬𑀦𑁆𑀢𑀺 𑀇𑀘𑁆𑀘𑀸𑀤𑀺.

𑀯𑀢𑁆𑀢𑀫𑀸𑀦𑀸𑀯𑀺𑀪𑀢𑁆𑀢𑀺.

𑁪𑁫𑁦. 𑀧𑀜𑁆𑀘𑀫𑀻 𑀢𑀼 𑀅𑀦𑁆𑀢𑀼, 𑀳𑀺 𑀣, 𑀫𑀺 𑀫, 𑀢𑀁 𑀅𑀦𑁆𑀢𑀁, 𑀲𑁆𑀲𑀼𑀯𑁆𑀳𑁄, 𑀏 𑀆𑀫𑀲𑁂.

𑀢𑁆𑀯𑀸𑀤𑀬𑁄 𑀤𑁆𑀯𑀸𑀤𑀲 𑀧𑀜𑁆𑀘𑀫𑀻𑀲𑀜𑁆𑀜𑀸 𑀳𑁄𑀦𑁆𑀢𑀺.

𑁪𑁫𑁧. 𑀆𑀡𑀢𑁆𑀬𑀸𑀲𑀺𑀝𑁆𑀞𑁂𑀦𑀼𑀢𑁆𑀢𑀓𑀸𑀮𑁂 𑀧𑀜𑁆𑀘𑀫𑀻.

𑀆𑀡𑀢𑁆𑀬𑀢𑁆𑀣𑁂 𑀘 𑀆𑀲𑀻𑀲𑀢𑁆𑀣𑁂 𑀅𑀦𑀼𑀢𑁆𑀢𑀓𑀸𑀮𑁂 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀲𑀢𑀺𑀧𑀺 𑀓𑀸𑀮𑀸𑀥𑀺𑀓𑀸𑀭𑁂 𑀧𑀼𑀦 𑀓𑀸𑀮𑀕𑁆𑀕𑀳𑀡𑁂𑀦 𑀯𑀺𑀥𑀺𑀦𑀺𑀫𑀦𑁆𑀢𑀦𑀸𑀚𑁆𑀛𑁂𑀲𑀦𑀸𑀦𑀼𑀫𑀢𑀺𑀧𑀢𑁆𑀣𑀦𑀸𑀧𑀢𑁆𑀢𑀓𑀸𑀮𑀸𑀤𑀻𑀲𑀼 𑀘 𑀧𑀜𑁆𑀘𑀫𑀻. 𑀆𑀡𑀸𑀧𑀦𑀫𑀸𑀡𑀢𑁆𑀢𑀺, 𑀆𑀲𑀻𑀲𑀦𑀫𑀸𑀲𑀺𑀝𑁆𑀞𑁄, 𑀲𑁄 𑀘 𑀇𑀝𑁆𑀞𑀲𑁆𑀲 𑀅𑀲𑀫𑁆𑀧𑀢𑁆𑀢𑀲𑁆𑀲 ¶ 𑀅𑀢𑁆𑀣𑀲𑁆𑀲 𑀧𑀢𑁆𑀣𑀦𑀁, 𑀢𑀲𑁆𑀫𑀺𑀁 𑀆𑀡𑀢𑁆𑀬𑀸𑀲𑀺𑀝𑁆𑀞𑁂. 𑀅𑀦𑀼 𑀲𑀫𑀻𑀧𑁂 𑀉𑀢𑁆𑀢𑀓𑀸𑀮𑁄 𑀅𑀦𑀼𑀢𑁆𑀢𑀓𑀸𑀮𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁄𑀢𑀺 𑀅𑀢𑁆𑀣𑁄, 𑀦 𑀉𑀢𑁆𑀢𑀓𑀸𑀮𑁄𑀢𑀺 𑀯𑀸 𑀅𑀦𑀼𑀢𑁆𑀢𑀓𑀸𑀮𑁄, 𑀢𑀲𑁆𑀫𑀺𑀁 𑀅𑀦𑀼𑀢𑁆𑀢𑀓𑀸𑀮𑁂, 𑀓𑀸𑀮𑀫𑀦𑀸𑀫𑀲𑀺𑀢𑁆𑀯𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀢𑀢𑁆𑀣 𑀆𑀲𑀻𑀲𑀦𑀢𑁆𑀣𑁂 𑀪𑀽𑀥𑀸𑀢𑀼𑀢𑁄 𑀧𑀜𑁆𑀘𑀫𑀻𑀧𑀭𑀲𑁆𑀲𑀧𑀤𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀢𑀼, 𑀅𑀧𑁆𑀧𑀘𑁆𑀘𑀬𑀯𑀼𑀤𑁆𑀥𑀺𑀅𑀯𑀸𑀤𑁂𑀲𑀸. 𑀲𑁄 𑀲𑀼𑀔𑀻 𑀪𑀯𑀢𑀼, 𑀢𑁂 𑀲𑀼𑀔𑀺𑀢𑀸 𑀪𑀯𑀦𑁆𑀢𑀼.

𑀯𑀺𑀧𑀭𑀺𑀡𑀸𑀫𑁂𑀦 ‘‘𑀅𑀓𑀸𑀭𑀢𑁄’’𑀢𑀺 𑀯𑀢𑁆𑀢𑀢𑁂.

𑁪𑁫𑁨. 𑀳𑀺𑀮𑁄𑀧𑀁 𑀯𑀸.

𑀅𑀓𑀸𑀭𑀢𑁄 𑀧𑀭𑁄 𑀳𑀺𑀯𑀺𑀪𑀢𑁆𑀢𑀺 𑀮𑁄𑀧𑀫𑀸𑀧𑀚𑁆𑀚𑀢𑁂 𑀯𑀸. 𑀢𑁆𑀯𑀁 𑀲𑀼𑀔𑀻 𑀪𑀯, 𑀪𑀯𑀸𑀳𑀺 𑀯𑀸, 𑀳𑀺𑀫𑁆𑀳𑀺 𑀤𑀻𑀖𑁄. 𑀢𑀼𑀫𑁆𑀳𑁂 𑀲𑀼𑀔𑀺𑀢𑀸 𑀪𑀯𑀣. 𑀅𑀳𑀁 𑀲𑀼𑀔𑀻 𑀪𑀯𑀸𑀫𑀺, 𑀫𑀬𑀁 𑀲𑀼𑀔𑀺𑀦𑁄 𑀪𑀯𑀸𑀫.

𑀅𑀢𑁆𑀢𑀦𑁄𑀧𑀤𑁂 𑀲𑁄 𑀲𑀼𑀔𑀻 𑀪𑀯𑀢𑀁, 𑀢𑁂 𑀲𑀼𑀔𑀺𑀢𑀸 𑀪𑀯𑀦𑁆𑀢𑀁. 𑀢𑁆𑀯𑀁 𑀲𑀼𑀔𑀻 𑀪𑀯𑀲𑁆𑀲𑀼, 𑀢𑀼𑀫𑁆𑀳𑁂 𑀲𑀼𑀔𑀺𑀢𑀸 𑀪𑀯𑀯𑁆𑀳𑁄. 𑀅𑀳𑀁 𑀲𑀼𑀔𑀻 𑀪𑀯𑁂, 𑀫𑀬𑀁 𑀲𑀼𑀔𑀺𑀢𑀸 𑀪𑀯𑀸𑀫𑀲𑁂.

𑀓𑀫𑁆𑀫𑀦𑀺 𑀅𑀦𑀼𑀪𑀽𑀬𑀢𑀁 𑀢𑀬𑀸, 𑀅𑀦𑀼𑀪𑀽𑀬𑀦𑁆𑀢𑀁. 𑀅𑀦𑀼𑀪𑀽𑀬𑀲𑁆𑀲𑀼, 𑀅𑀦𑀼𑀪𑀽𑀬𑀯𑁆𑀳𑁄. 𑀅𑀦𑀼𑀪𑀽𑀬𑁂, 𑀅𑀦𑀼𑀪𑀽𑀬𑀸𑀫𑀲𑁂. 𑀧𑀭𑀲𑁆𑀲𑀧𑀤𑀢𑁆𑀢𑁂 𑀅𑀦𑀼𑀪𑀽𑀬𑁆𑀬𑀢𑀼, 𑀅𑀦𑀼𑀪𑀽𑀬𑁆𑀬𑀦𑁆𑀢𑀼. 𑀅𑀦𑀼𑀪𑀽𑀬𑀢𑀼, 𑀅𑀦𑀼𑀪𑀽𑀬𑀦𑁆𑀢𑀼 𑀯𑀸, 𑀅𑀦𑀼𑀪𑀽𑀬𑁆𑀬𑀸𑀳𑀺 𑀇𑀘𑁆𑀘𑀸𑀤𑀺. 𑀪𑀸𑀯𑁂 𑀪𑀽𑀬𑀢𑀁.

𑀆𑀡𑀢𑁆𑀢𑀺𑀬𑀁 𑀓𑀢𑁆𑀢𑀭𑀺 𑀤𑁂𑀯𑀤𑀢𑁆𑀢𑁄 𑀤𑀸𑀦𑀺 𑀑𑀤𑀦𑀁 𑀧𑀘𑀢𑀼, 𑀧𑀘𑀦𑁆𑀢𑀼. 𑀧𑀘, 𑀧𑀘𑀸𑀳𑀺, 𑀧𑀘𑀣. 𑀧𑀘𑀸𑀫𑀺, 𑀧𑀘𑀸𑀫. 𑀧𑀘𑀢𑀁, 𑀧𑀘𑀦𑁆𑀢𑀁. 𑀧𑀘𑀲𑁆𑀲𑀼, 𑀧𑀘𑀯𑁆𑀳𑁄. 𑀧𑀘𑁂, 𑀧𑀘𑀸𑀫𑀲𑁂.

𑀓𑀫𑁆𑀫𑀦𑀺 𑀬𑀧𑁆𑀧𑀘𑁆𑀘𑀬𑀘𑀯𑀕𑁆𑀕𑀸𑀤𑀺, 𑀧𑀘𑁆𑀘𑀢𑀁 𑀑𑀤𑀦𑁄 𑀤𑁂𑀯𑀤𑀢𑁆𑀢𑁂𑀦, 𑀧𑀘𑁆𑀘𑀦𑁆𑀢𑀁. 𑀧𑀘𑁆𑀘𑀲𑁆𑀲𑀼, 𑀧𑀘𑁆𑀘𑀯𑁆𑀳𑁄. 𑀧𑀘𑁆𑀘𑁂, 𑀧𑀘𑁆𑀘𑀸𑀫𑀲𑁂. 𑀧𑀭𑀲𑁆𑀲𑀧𑀤𑀢𑁆𑀢𑁂 𑀧𑀘𑁆𑀘𑀢𑀼, 𑀧𑀘𑁆𑀘𑀦𑁆𑀢𑀼. 𑀧𑀘𑁆𑀘, 𑀧𑀘𑁆𑀘𑀸𑀳𑀺, 𑀧𑀘𑁆𑀘𑀣. 𑀧𑀘𑁆𑀘𑀸𑀫𑀺, 𑀧𑀘𑁆𑀘𑀸𑀫.

𑀢𑀣𑀸 ¶ 𑀲𑁄 𑀕𑀸𑀫𑀁 𑀕𑀘𑁆𑀙𑀢𑀼, 𑀕𑀘𑁆𑀙𑀦𑁆𑀢𑀼. 𑀕𑀘𑁆𑀙, 𑀕𑀘𑁆𑀙𑀸𑀳𑀺, 𑀕𑀘𑁆𑀙𑀣. 𑀕𑀘𑁆𑀙𑀸𑀫𑀺, 𑀕𑀘𑁆𑀙𑀸𑀫. 𑀕𑀫𑁂𑀢𑀼, 𑀕𑀫𑁂𑀦𑁆𑀢𑀼. 𑀕𑀫, 𑀕𑀫𑀸𑀳𑀺, 𑀕𑀫𑁂𑀣. 𑀕𑀫𑁂𑀫𑀺, 𑀕𑀫𑁂𑀫. 𑀕𑀘𑁆𑀙𑀢𑀁, 𑀕𑀘𑁆𑀙𑀦𑁆𑀢𑀁. 𑀕𑀘𑁆𑀙𑀲𑁆𑀲𑀼, 𑀕𑀘𑁆𑀙𑀯𑁆𑀳𑁄. 𑀕𑀘𑁆𑀙𑁂, 𑀕𑀘𑁆𑀙𑀸𑀫𑀲𑁂. 𑀖𑀫𑁆𑀫𑀸𑀤𑁂𑀲𑁂 𑀖𑀫𑁆𑀫𑀢𑀼, 𑀖𑀫𑁆𑀫𑀦𑁆𑀢𑀼 𑀇𑀘𑁆𑀘𑀸𑀤𑀺.

𑀓𑀫𑁆𑀫𑀦𑀺 𑀕𑀘𑁆𑀙𑀻𑀬𑀢𑀁, 𑀕𑀘𑁆𑀙𑀻𑀬𑀢𑀼, 𑀕𑀫𑀻𑀬𑀢𑀁, 𑀕𑀫𑀻𑀬𑀢𑀼, 𑀕𑀫𑁆𑀫𑀢𑀁, 𑀕𑀫𑁆𑀫𑀢𑀼 𑀇𑀘𑁆𑀘𑀸𑀤𑀺.

𑀯𑀺𑀥𑀺𑀫𑁆𑀳𑀺 𑀇𑀥 𑀧𑀩𑁆𑀩𑀢𑁄 𑀳𑁄𑀢𑀼, 𑀅𑀬𑀁 𑀧𑀸𑀲𑀸𑀤𑁄 𑀲𑀼𑀯𑀡𑁆𑀡𑀫𑀬𑁄 𑀳𑁄𑀢𑀽𑀢𑀺𑀆𑀤𑀺.

𑀦𑀺𑀫𑀦𑁆𑀢𑀦𑁂 𑀅𑀥𑀺𑀯𑀸𑀲𑁂𑀢𑀼 𑀫𑁂 𑀪𑀦𑁆𑀢𑁂 𑀪𑀕𑀯𑀸 𑀪𑁄𑀚𑀦𑀁, 𑀇𑀥 𑀦𑀺𑀲𑀻𑀤𑀢𑀼 𑀪𑀯𑀁.

𑀅𑀚𑁆𑀛𑁂𑀲𑀦𑁂 𑀤𑁂𑀲𑁂𑀢𑀼 𑀪𑀦𑁆𑀢𑁂 𑀪𑀕𑀯𑀸 𑀥𑀫𑁆𑀫𑀁.

𑀅𑀦𑀼𑀫𑀢𑀺𑀬𑀁 𑀧𑀼𑀘𑁆𑀙𑀢𑀼 𑀪𑀯𑀁 𑀧𑀜𑁆𑀳𑀁, 𑀧𑀯𑀺𑀲𑀢𑀼 𑀪𑀯𑀁, 𑀏𑀢𑁆𑀣 𑀦𑀺𑀲𑀻𑀤𑀢𑀼.

𑀧𑀢𑁆𑀣𑀦𑀸 𑀬𑀸𑀘𑀦𑀸, 𑀤𑀤𑀸𑀳𑀺 𑀫𑁂 𑀕𑀸𑀫𑀯𑀭𑀸𑀦𑀺 𑀧𑀜𑁆𑀘, 𑀏𑀓𑀁 𑀫𑁂 𑀦𑀬𑀦𑀁 𑀤𑁂𑀳𑀺.

𑀧𑀢𑁆𑀢𑀓𑀸𑀮𑁂 𑀲𑀫𑁆𑀧𑀢𑁆𑀢𑁄 𑀢𑁂 𑀓𑀸𑀮𑁄 𑀓𑀝𑀓𑀭𑀡𑁂, 𑀓𑀝𑀁 𑀓𑀭𑁄𑀢𑀼 𑀪𑀯𑀁 𑀇𑀘𑁆𑀘𑀸𑀤𑀺.

𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺.

𑁪𑁫𑁩. 𑀲𑀢𑁆𑀢𑀫𑀻 𑀏𑀬𑁆𑀬 𑀏𑀬𑁆𑀬𑀼𑀁, 𑀏𑀬𑁆𑀬𑀸𑀲𑀺 𑀏𑀬𑁆𑀬𑀸𑀣, 𑀏𑀬𑁆𑀬𑀸𑀫𑀺𑀏𑀬𑁆𑀬𑀸𑀫, 𑀏𑀣 𑀏𑀭𑀁, 𑀏𑀣𑁄 𑀏𑀬𑁆𑀬𑀸𑀯𑁆𑀳𑁄, 𑀏𑀬𑁆𑀬𑀁𑀏𑀬𑁆𑀬𑀸𑀫𑁆𑀳𑁂.

𑀏𑀬𑁆𑀬𑀸𑀤𑀬𑁄 𑀤𑁆𑀯𑀸𑀤𑀲 𑀲𑀢𑁆𑀢𑀫𑀻𑀲𑀜𑁆𑀜𑀸 𑀳𑁄𑀦𑁆𑀢𑀺.

‘‘𑀅𑀦𑀼𑀢𑁆𑀢𑀓𑀸𑀮𑁂’’𑀢𑀺 𑀯𑀢𑁆𑀢𑀢𑁂.

𑁪𑁫𑁪. 𑀅𑀦𑀼𑀫𑀢𑀺𑀧𑀭𑀺𑀓𑀧𑁆𑀧𑀢𑁆𑀣𑁂𑀲𑀼 ¶ 𑀲𑀢𑁆𑀢𑀫𑀻.

𑀅𑀦𑀼𑀫𑀢𑁆𑀬𑀢𑁆𑀣𑁂 𑀘 𑀧𑀭𑀺𑀓𑀧𑁆𑀧𑀢𑁆𑀣𑁂 𑀘 𑀅𑀦𑀼𑀢𑁆𑀢𑀓𑀸𑀮𑁂 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀅𑀢𑁆𑀣𑀕𑁆𑀕𑀳𑀡𑁂𑀦 𑀯𑀺𑀥𑀺𑀦𑀺𑀫𑀦𑁆𑀢𑀦𑀸𑀤𑀻𑀲𑀼 𑀘 𑀲𑀢𑁆𑀢𑀫𑀻. 𑀓𑀢𑁆𑀢𑀼𑀫𑀺𑀘𑁆𑀙𑀢𑁄 𑀧𑀭𑀲𑁆𑀲 𑀅𑀦𑀼𑀚𑀸𑀦𑀦𑀁 𑀅𑀦𑀼𑀫𑀢𑀺, 𑀧𑀭𑀺𑀓𑀧𑁆𑀧𑀦𑀁 𑀧𑀭𑀺𑀓𑀧𑁆𑀧𑁄, ‘‘𑀬𑀤𑀺 𑀦𑀸𑀫 𑀪𑀯𑁂𑀬𑁆𑀬𑀸’’𑀢𑀺 𑀲𑀮𑁆𑀮𑀓𑁆𑀔𑀡𑀁 𑀦𑀺𑀭𑀽𑀧𑀦𑀁, 𑀳𑁂𑀢𑀼𑀓𑁆𑀭𑀺𑀬𑀸𑀬 𑀲𑀫𑁆𑀪𑀯𑁂 𑀨𑀮𑀓𑁆𑀭𑀺𑀬𑀸𑀬 𑀲𑀫𑁆𑀪𑀯𑀧𑀭𑀺𑀓𑀧𑁆𑀧𑁄 𑀘.

𑀢𑀢𑁆𑀣 𑀧𑀭𑀺𑀓𑀧𑁆𑀧𑁂 𑀲𑀢𑁆𑀢𑀫𑀻𑀧𑀭𑀲𑁆𑀲𑀧𑀤𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀏𑀬𑁆𑀬, 𑀅𑀧𑁆𑀧𑀘𑁆𑀘𑀬𑀯𑀼𑀤𑁆𑀥𑀸𑀤𑀺 𑀧𑀼𑀭𑀺𑀫𑀲𑀫𑀁, ‘‘𑀓𑁆𑀯𑀘𑀺 𑀥𑀸𑀢𑀼 𑀯𑀺𑀪𑀢𑁆𑀢𑀻’’𑀢𑀺𑀆𑀤𑀺𑀦𑀸 𑀏𑀬𑁆𑀬 𑀏𑀬𑁆𑀬𑀸𑀲𑀺 𑀏𑀬𑁆𑀬𑀸𑀫𑀺 𑀏𑀬𑁆𑀬𑀁𑀇𑀘𑁆𑀘𑁂𑀢𑁂𑀲𑀁 𑀯𑀺𑀓𑀧𑁆𑀧𑁂𑀦 𑀏𑀓𑀸𑀭𑀸𑀤𑁂𑀲𑁄. 𑀲𑁄 𑀤𑀸𑀦𑀺 𑀓𑀺𑀁 𑀦𑀼 𑀔𑁄 𑀪𑀯𑁂, 𑀬𑀤𑀺 𑀲𑁄 𑀧𑀞𑀫𑀯𑀬𑁂 𑀧𑀩𑁆𑀩𑀚𑁂𑀬𑁆𑀬, 𑀅𑀭𑀳𑀸 𑀪𑀯𑁂𑀬𑁆𑀬, 𑀲𑀘𑁂 𑀲𑀗𑁆𑀔𑀸𑀭𑀸 𑀦𑀺𑀘𑁆𑀘𑀸 𑀪𑀯𑁂𑀬𑁆𑀬𑀼𑀁, 𑀦 𑀦𑀺𑀭𑀼𑀚𑁆𑀛𑁂𑀬𑁆𑀬𑀼𑀁. 𑀬𑀤𑀺 𑀢𑁆𑀯𑀁 𑀪𑀯𑁂𑀬𑁆𑀬𑀸𑀲𑀺, 𑀢𑀼𑀫𑁆𑀳𑁂 𑀪𑀯𑁂𑀬𑁆𑀬𑀸𑀣. 𑀓𑀣𑀫𑀳𑀁 𑀤𑁂𑀯𑁄 𑀪𑀯𑁂𑀬𑁆𑀬𑀸𑀫𑀺, 𑀓𑀺𑀁 𑀦𑀼 𑀔𑁄 𑀫𑀬𑀁 𑀪𑀯𑁂𑀬𑁆𑀬𑀸𑀫. 𑀢𑀣𑀸 𑀪𑀯𑁂𑀣, 𑀪𑀯𑁂𑀭𑀁. 𑀪𑀯𑁂𑀣𑁄, 𑀪𑀯𑁂𑀬𑁆𑀬𑀸𑀯𑁆𑀳𑁄.

𑀧𑀢𑁆𑀣𑀦𑁂 𑀢𑀼 𑀅𑀳𑀁 𑀲𑀼𑀔𑀻 𑀪𑀯𑁂, 𑀩𑀼𑀤𑁆𑀥𑁄 𑀪𑀯𑁂𑀬𑁆𑀬𑀁, 𑀪𑀯𑁂𑀬𑁆𑀬𑀸𑀫𑁆𑀳𑁂.

𑀓𑀫𑁆𑀫𑀦𑀺 𑀲𑀼𑀔𑀁 𑀢𑀬𑀸 𑀅𑀦𑀼𑀪𑀽𑀬𑁂𑀣, 𑀅𑀦𑀼𑀪𑀽𑀬𑁂𑀭𑀁. 𑀅𑀦𑀼𑀪𑀽𑀬𑁂𑀣𑁄, 𑀅𑀦𑀼𑀪𑀽𑀬𑁂𑀬𑁆𑀬𑀸𑀯𑁆𑀳𑁄. 𑀅𑀦𑀼𑀪𑀽𑀬𑁂, 𑀅𑀦𑀼𑀪𑀽𑀬𑁂𑀬𑁆𑀬𑀁, 𑀅𑀦𑀼𑀪𑀽𑀬𑁂𑀬𑁆𑀬𑀸𑀫𑁆𑀳𑁂. 𑀧𑀭𑀲𑁆𑀲𑀧𑀤𑀢𑁆𑀢𑁂 𑀅𑀦𑀼𑀪𑀽𑀬𑁂𑀬𑁆𑀬, 𑀅𑀦𑀼𑀪𑀽𑀬𑁂𑀬𑁆𑀬𑀼𑀁. 𑀅𑀦𑀼𑀪𑀽𑀬𑁂𑀬𑁆𑀬𑀸𑀲𑀺 𑀇𑀘𑁆𑀘𑀸𑀤𑀺. 𑀪𑀸𑀯𑁂 𑀪𑀽𑀬𑁂𑀣.

𑀯𑀺𑀥𑀺𑀫𑁆𑀳𑀺 𑀲𑁄 𑀑𑀤𑀦𑀁 𑀧𑀘𑁂, 𑀧𑀘𑁂𑀬𑁆𑀬, 𑀧𑀘𑁂𑀬𑁆𑀬𑀼𑀁. 𑀢𑁆𑀯𑀁 𑀧𑀘𑁂, 𑀧𑀘𑁂𑀬𑁆𑀬𑀸𑀲𑀺, 𑀢𑀼𑀫𑁆𑀳𑁂 𑀧𑀘𑁂𑀬𑁆𑀬𑀸𑀣. 𑀅𑀳𑀁 𑀧𑀘𑁂, 𑀧𑀘𑁂𑀬𑁆𑀬𑀸𑀫𑀺, 𑀫𑀬𑀁 𑀧𑀘𑁂𑀬𑁆𑀬𑀸𑀫. 𑀧𑀘𑁂𑀣, 𑀧𑀘𑁂𑀭𑀁. 𑀧𑀘𑁂𑀣𑁄, 𑀧𑀘𑁂𑀬𑁆𑀬𑀸𑀯𑁆𑀳𑁄. 𑀧𑀘𑁂, 𑀧𑀘𑁂𑀬𑁆𑀬𑀁, 𑀧𑀘𑁂𑀬𑁆𑀬𑀸𑀫𑁆𑀳𑁂.

𑀓𑀫𑁆𑀫𑀦𑀺 ¶ 𑀧𑀘𑁆𑀘𑁂𑀣, 𑀧𑀘𑁆𑀘𑁂𑀭𑀁. 𑀧𑀘𑁆𑀘𑁂𑀣𑁄, 𑀧𑀘𑁆𑀘𑁂𑀬𑁆𑀬𑀸𑀯𑁆𑀳𑁄. 𑀧𑀘𑁆𑀘𑁂, 𑀧𑀘𑁆𑀘𑁂𑀬𑁆𑀬𑀁, 𑀧𑀘𑁆𑀘𑁂𑀬𑁆𑀬𑀸𑀫𑁆𑀳𑁂. 𑀧𑀭𑀲𑁆𑀲𑀧𑀤𑀢𑁆𑀢𑁂 𑀧𑀘𑁆𑀘𑁂, 𑀧𑀘𑁆𑀘𑁂𑀬𑁆𑀬, 𑀧𑀘𑁆𑀘𑁂𑀬𑁆𑀬𑀼𑀁. 𑀧𑀘𑁆𑀘𑁂𑀬𑁆𑀬𑀸𑀲𑀺 𑀇𑀘𑁆𑀘𑀸𑀤𑀺.

𑀅𑀦𑀼𑀫𑀢𑀺𑀬𑀁 𑀲𑁄 𑀕𑀸𑀫𑀁 𑀕𑀘𑁆𑀙𑁂, 𑀕𑀘𑁆𑀙𑁂𑀬𑁆𑀬, ‘‘𑀓𑁆𑀯𑀘𑀺 𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀏𑀬𑁆𑀬𑀼𑀲𑁆𑀲 𑀉𑀁 𑀯𑀸, 𑀕𑀘𑁆𑀙𑀼𑀁, 𑀕𑀘𑁆𑀙𑁂𑀬𑁆𑀬𑀼𑀁. 𑀢𑁆𑀯𑀁 𑀕𑀘𑁆𑀙𑁂, 𑀕𑀘𑁆𑀙𑁂𑀬𑁆𑀬𑀸𑀲𑀺, 𑀕𑀘𑁆𑀙𑁂𑀬𑁆𑀬𑀸𑀣. 𑀕𑀘𑁆𑀙𑁂, 𑀕𑀘𑁆𑀙𑁂𑀬𑁆𑀬𑀸𑀫𑀺, 𑀕𑀘𑁆𑀙𑁂𑀬𑁆𑀬𑀸𑀫. 𑀕𑀫𑁂, 𑀕𑀫𑁂𑀬𑁆𑀬, 𑀕𑀫𑀼𑀁, 𑀕𑀫𑁂𑀬𑁆𑀬𑀼𑀁. 𑀕𑀫𑁂, 𑀕𑀫𑁂𑀬𑁆𑀬𑀸𑀲𑀺, 𑀕𑀫𑁂𑀬𑁆𑀬𑀸𑀣. 𑀕𑀫𑁂, 𑀕𑀫𑁂𑀬𑁆𑀬𑀸𑀫𑀺, 𑀕𑀫𑁂𑀬𑁆𑀬𑀸𑀫. 𑀕𑀘𑁆𑀙𑁂𑀣, 𑀕𑀘𑁆𑀙𑁂𑀭𑀁. 𑀕𑀘𑁆𑀙𑁂𑀣𑁄, 𑀕𑀘𑁆𑀙𑁂𑀬𑁆𑀬𑀸𑀯𑁆𑀳𑁄. 𑀕𑀘𑁆𑀙𑁂, 𑀕𑀘𑁆𑀙𑁂𑀬𑁆𑀬𑀁, 𑀕𑀘𑁆𑀙𑁂𑀬𑁆𑀬𑀸𑀫𑁆𑀳𑁂. 𑀕𑀫𑁂𑀣, 𑀕𑀫𑁂𑀭𑀁 𑀇𑀘𑁆𑀘𑀸𑀤𑀺.

𑀓𑀫𑁆𑀫𑀦𑀺 𑀕𑀘𑁆𑀙𑀻𑀬𑁂𑀣, 𑀕𑀫𑀻𑀬𑁂𑀣, 𑀕𑀘𑁆𑀙𑀻𑀬𑁂𑀭𑀁, 𑀕𑀫𑀻𑀬𑁂𑀭𑀁 𑀇𑀘𑁆𑀘𑀸𑀤𑀺. 𑀧𑀭𑀲𑁆𑀲𑀧𑀤𑀢𑁆𑀢𑁂 𑀕𑀘𑁆𑀙𑀻𑀬𑁂𑀬𑁆𑀬, 𑀕𑀫𑀻𑀬𑁂𑀬𑁆𑀬, 𑀕𑀫𑁆𑀫𑁂𑀬𑁆𑀬, 𑀕𑀫𑁆𑀫𑁂𑀬𑁆𑀬𑀼𑀁 𑀇𑀘𑁆𑀘𑀸𑀤𑀺. 𑀢𑀣𑀸 𑀖𑀫𑁆𑀫𑁂, 𑀖𑀫𑁆𑀫𑁂𑀬𑁆𑀬, 𑀖𑀫𑁆𑀫𑁂𑀬𑁆𑀬𑀼𑀁 𑀇𑀘𑁆𑀘𑀸𑀤𑀺.

𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺.

𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀡𑀢𑁆𑀢𑀺𑀧𑀭𑀺𑀓𑀧𑁆𑀧𑀓𑀸𑀮𑀺𑀓𑀯𑀺𑀪𑀢𑁆𑀢𑀺𑀦𑀬𑁄.

𑁪𑁫𑁫. 𑀳𑀺𑀬𑁆𑀬𑀢𑁆𑀢𑀦𑀻 𑀆𑀊, 𑀑𑀢𑁆𑀣, 𑀅𑀁𑀫𑁆𑀳𑀸, 𑀢𑁆𑀣𑀢𑁆𑀣𑀼𑀁, 𑀲𑁂𑀯𑁆𑀳𑀁, 𑀇𑀁𑀫𑁆𑀳𑀲𑁂.

𑀆𑀆𑀤𑀬𑁄 𑀤𑁆𑀯𑀸𑀤𑀲 𑀳𑀺𑀬𑁆𑀬𑀢𑁆𑀢𑀦𑀻𑀲𑀜𑁆𑀜𑀸 𑀳𑁄𑀦𑁆𑀢𑀺.

‘‘𑀅𑀧𑁆𑀧𑀘𑁆𑀘𑀓𑁆𑀔𑁂, 𑀅𑀢𑀻𑀢𑁂’’𑀢𑀺 𑀘 𑀯𑀢𑁆𑀢𑀢𑁂.

𑁪𑁫𑁬. 𑀳𑀺𑀬𑁆𑀬𑁄𑀧𑀪𑀼𑀢𑀺 𑀧𑀘𑁆𑀘𑀓𑁆𑀔𑁂 𑀳𑀺𑀬𑁆𑀬𑀢𑁆𑀢𑀦𑀻.

𑀳𑀺𑀬𑁆𑀬𑁄𑀧𑀪𑀼𑀢𑀺 𑀅𑀢𑀻𑀢𑁂 𑀓𑀸𑀮𑁂 𑀧𑀘𑁆𑀘𑀓𑁆𑀔𑁂 𑀯𑀸 𑀅𑀧𑁆𑀧𑀘𑁆𑀘𑀓𑁆𑀔𑁂 𑀯𑀸 𑀳𑀺𑀬𑁆𑀬𑀢𑁆𑀢𑀦𑀻𑀯𑀺𑀪𑀢𑁆𑀢𑀺 𑀳𑁄𑀢𑀻𑀢𑀺 𑀳𑀺𑀬𑁆𑀬𑀢𑁆𑀢𑀦𑀻𑀧𑀭𑀲𑁆𑀲𑀧𑀤𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀆.

‘‘𑀓𑁆𑀯𑀘𑀺 𑀥𑀸𑀢𑀼’’𑀇𑀘𑁆𑀘𑀸𑀤𑀺𑀢𑁄 ‘‘𑀓𑁆𑀯𑀘𑀺, 𑀥𑀸𑀢𑀽𑀦’’𑀦𑁆𑀢𑀺 𑀘 𑀯𑀢𑁆𑀢𑀢𑁂.

𑁪𑁫𑁭. 𑀅𑀓𑀸𑀭𑀸𑀕𑀫𑁄 ¶ 𑀳𑀺𑀬𑁆𑀬𑀢𑁆𑀢𑀦𑀻 𑀅𑀚𑁆𑀚𑀢𑀦𑀻𑀓𑀸𑀮𑀸𑀢𑀺𑀧𑀢𑁆𑀢𑀻𑀲𑀼.

𑀓𑁆𑀯𑀘𑀺 𑀥𑀸𑀢𑀽𑀦𑀫𑀸𑀤𑀺𑀫𑁆𑀳𑀺 𑀅𑀓𑀸𑀭𑀸𑀕𑀫𑁄 𑀳𑁄𑀢𑀺 𑀳𑀺𑀬𑁆𑀬𑀢𑁆𑀢𑀦𑀻𑀅𑀚𑁆𑀚𑀢𑀦𑀻𑀓𑀸𑀮𑀸𑀢𑀺𑀧𑀢𑁆𑀢𑀺𑀇𑀘𑁆𑀘𑁂𑀢𑀸𑀲𑀼 𑀢𑀻𑀲𑀼 𑀯𑀺𑀪𑀢𑁆𑀢𑀻𑀲𑀼. 𑀓𑀣𑀫𑀬𑀫𑀓𑀸𑀭𑀸𑀕𑀫𑁄 𑀥𑀸𑀢𑁆𑀯𑀸𑀤𑀺𑀫𑁆𑀳𑀻𑀢𑀺 𑀘𑁂?

𑀲𑀢𑀺𑀲𑁆𑀲𑀭𑁂𑀧𑀺 𑀥𑀸𑀢𑁆𑀯𑀦𑁆𑀢𑁂, 𑀧𑀼𑀦𑀓𑀸𑀭𑀸𑀕𑀫𑀲𑁆𑀲𑀺𑀥;

𑀦𑀺𑀭𑀢𑁆𑀣𑀢𑁆𑀢𑀸 𑀧𑀬𑁄𑀕𑀸𑀦𑀼 𑀭𑁄𑀥𑀸 𑀥𑀸𑀢𑁆𑀯𑀸𑀤𑀺𑀢𑁄 𑀅𑀬𑀁.

𑀅𑀧𑁆𑀧𑀘𑁆𑀘𑀬𑀯𑀼𑀤𑁆𑀥𑀺𑀅𑀯𑀸𑀤𑁂𑀲𑀲𑀭𑀮𑁄𑀧𑀸𑀤𑀺 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀪𑀯𑀸, 𑀅𑀪𑀯𑀽. 𑀅𑀪𑀯𑁄, ‘‘𑀓𑁆𑀯𑀘𑀺 𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀑𑀓𑀸𑀭𑀲𑁆𑀲 𑀅𑀆𑀤𑁂𑀲𑁄 𑀯𑀸, 𑀅𑀪𑀯, 𑀅𑀪𑀯𑀢𑁆𑀣. 𑀅𑀪𑀯𑀁, 𑀅𑀪𑀯𑀫𑁆𑀳𑀸. 𑀅𑀪𑀯𑀢𑁆𑀣, 𑀅𑀪𑀯𑀢𑁆𑀣𑀼𑀁. 𑀅𑀪𑀯𑀲𑁂, 𑀅𑀪𑀯𑀯𑁆𑀳𑀁. 𑀅𑀪𑀯𑀺𑀁, 𑀅𑀪𑀯𑀫𑁆𑀳𑀲𑁂.

𑀓𑀫𑁆𑀫𑀦𑀺 𑀬𑀧𑁆𑀧𑀘𑁆𑀘𑀬𑁄, 𑀢𑀬𑀸 𑀲𑀼𑀔𑀫𑀦𑁆𑀯𑀪𑀽𑀬𑀢𑁆𑀣, 𑀅𑀓𑀸𑀭𑀸𑀕𑀫𑀸𑀪𑀸𑀯𑁂 𑀅𑀦𑀼𑀪𑀽𑀬𑀢𑁆𑀣, ‘‘𑀓𑁆𑀯𑀘𑀺 𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀢𑁆𑀣𑀲𑁆𑀲 𑀣𑀸𑀤𑁂𑀲𑁄, 𑀅𑀦𑁆𑀯𑀪𑀽𑀬𑀣, 𑀅𑀦𑀼𑀪𑀽𑀬𑀣, 𑀅𑀦𑁆𑀯𑀪𑀽𑀬𑀢𑁆𑀣𑀼𑀁, 𑀅𑀦𑀼𑀪𑀽𑀬𑀢𑁆𑀣𑀼𑀁. 𑀅𑀦𑁆𑀯𑀪𑀽𑀬𑀲𑁂, 𑀅𑀦𑀼𑀪𑀽𑀬𑀲𑁂, 𑀅𑀦𑁆𑀯𑀪𑀽𑀬𑀯𑁆𑀳𑀁, 𑀅𑀦𑀼𑀪𑀽𑀬𑀯𑁆𑀳𑀁. 𑀅𑀦𑁆𑀯𑀪𑀽𑀬𑀺𑀁, 𑀅𑀦𑀼𑀪𑀽𑀬𑀺𑀁, 𑀅𑀦𑁆𑀯𑀪𑀽𑀬𑀫𑁆𑀳𑀲𑁂, 𑀅𑀦𑀼𑀪𑀽𑀬𑀫𑁆𑀳𑀲𑁂. 𑀧𑀭𑀲𑁆𑀲𑀧𑀤𑀢𑁆𑀢𑁂 𑀅𑀦𑁆𑀯𑀪𑀽𑀬𑀸, 𑀅𑀦𑀼𑀪𑀽𑀬𑀸 𑀇𑀘𑁆𑀘𑀸𑀤𑀺. 𑀪𑀸𑀯𑁂 𑀅𑀦𑁆𑀯𑀪𑀽𑀬𑀢𑁆𑀣.

𑀢𑀣𑀸 𑀲𑁄 𑀑𑀤𑀦𑀁 𑀅𑀧𑀘𑀸, 𑀧𑀘𑀸, 𑀅𑀧𑀘𑀽, 𑀧𑀘𑀽. 𑀅𑀧𑀘𑁄, 𑀧𑀘𑁄, 𑀅𑀧𑀘𑀢𑁆𑀣, 𑀧𑀘𑀢𑁆𑀣. 𑀅𑀧𑀘𑀁, 𑀧𑀘𑀁, 𑀅𑀧𑀘𑀫𑁆𑀳𑀸, 𑀧𑀘𑀫𑁆𑀳𑀸. 𑀅𑀧𑀘𑀢𑁆𑀣, 𑀧𑀘𑀢𑁆𑀣, 𑀅𑀧𑀘𑀢𑁆𑀣𑀼, 𑀧𑀘𑀢𑁆𑀣𑀼𑀁. 𑀅𑀧𑀘𑀲𑁂, 𑀧𑀘𑀲𑁂, 𑀅𑀧𑀘𑀯𑁆𑀳𑀁, 𑀧𑀘𑀯𑁆𑀳𑀁. 𑀅𑀧𑀘𑀺𑀁, 𑀧𑀘𑀺𑀁, 𑀅𑀧𑀘𑀫𑁆𑀳𑀲𑁂, 𑀧𑀘𑀫𑁆𑀳𑀲𑁂.

𑀓𑀫𑁆𑀫𑀦𑀺 ¶ 𑀅𑀧𑀘𑁆𑀘𑀣, 𑀅𑀧𑀘𑁆𑀘𑀢𑁆𑀣, 𑀅𑀧𑀘𑁆𑀘𑀢𑁆𑀣𑀼𑀁. 𑀅𑀧𑀘𑁆𑀘𑀲𑁂, 𑀅𑀧𑀘𑁆𑀘𑀯𑁆𑀳𑀁. 𑀅𑀧𑀘𑁆𑀘𑀺𑀁, 𑀅𑀧𑀘𑁆𑀘𑀫𑁆𑀳𑀲𑁂. 𑀅𑀧𑀘𑁆𑀘𑀸, 𑀅𑀧𑀘𑁆𑀘𑀽 𑀇𑀘𑁆𑀘𑀸𑀤𑀺.

𑀢𑀣𑀸 𑀅𑀕𑀘𑁆𑀙𑀸, 𑀅𑀕𑀘𑁆𑀙𑀽. 𑀅𑀕𑀘𑁆𑀙𑁄, 𑀅𑀕𑀘𑁆𑀙, 𑀅𑀕𑀘𑁆𑀙𑀢𑁆𑀣. 𑀅𑀕𑀘𑁆𑀙𑀁, 𑀅𑀕𑀘𑁆𑀙𑀫𑁆𑀳𑀸. 𑀅𑀕𑀘𑁆𑀙𑀢𑁆𑀣, 𑀅𑀕𑀘𑁆𑀙𑀢𑁆𑀣𑀼𑀁. 𑀅𑀕𑀘𑁆𑀙𑀲𑁂, 𑀅𑀕𑀘𑁆𑀙𑀯𑁆𑀳𑀁. 𑀅𑀕𑀘𑁆𑀙𑀺𑀁, 𑀅𑀕𑀘𑁆𑀙𑀫𑁆𑀳𑀲𑁂. 𑀅𑀕𑀫𑀸, 𑀅𑀕𑀫𑀽. 𑀅𑀕𑀫𑁄, 𑀅𑀕𑀫, 𑀅𑀕𑀫𑀢𑁆𑀣. 𑀅𑀕𑀫𑀁, 𑀅𑀕𑀫𑀫𑁆𑀳𑀸. 𑀅𑀕𑀫𑀢𑁆𑀣, 𑀅𑀕𑀫𑀢𑁆𑀣𑀼𑀁. 𑀅𑀕𑀫𑀲𑁂, 𑀅𑀕𑀫𑀯𑁆𑀳𑀁. 𑀅𑀕𑀫𑀺𑀁, 𑀅𑀕𑀫𑀫𑁆𑀳𑀲𑁂.

𑀓𑀫𑁆𑀫𑀦𑀺 𑀅𑀕𑀘𑁆𑀙𑀻𑀬𑀢𑁆𑀣, 𑀕𑀘𑁆𑀙𑀻𑀬𑀢𑁆𑀣, 𑀅𑀕𑀫𑀻𑀬𑀢𑁆𑀣, 𑀕𑀫𑀻𑀬𑀢𑁆𑀣, 𑀅𑀕𑀘𑁆𑀙𑀻𑀬𑀢𑁆𑀣𑀼𑀁, 𑀕𑀘𑁆𑀙𑀻𑀬𑀢𑁆𑀣𑀼𑀁, 𑀅𑀕𑀫𑀻𑀬𑀢𑁆𑀣𑀼𑀁, 𑀕𑀫𑀻𑀬𑀢𑁆𑀣𑀼𑀁 𑀇𑀘𑁆𑀘𑀸𑀤𑀺. 𑀢𑀣𑀸 𑀅𑀖𑀫𑁆𑀫𑀸, 𑀅𑀖𑀫𑁆𑀫𑀽 𑀇𑀘𑁆𑀘𑀸𑀤𑀺.

𑀳𑀺𑀬𑁆𑀬𑀢𑁆𑀢𑀦𑀻𑀯𑀺𑀪𑀢𑁆𑀢𑀺.

𑁪𑁫𑁮. 𑀳𑀺𑀬𑁆𑀬𑀢𑁆𑀢𑀦𑀻 𑀲𑀢𑁆𑀢𑀫𑀻 𑀧𑀜𑁆𑀘𑀫𑀻 𑀯𑀢𑁆𑀢𑀫𑀸𑀦𑀸 𑀲𑀩𑁆𑀩𑀥𑀸𑀢𑀼𑀓𑀁.

𑀳𑀺𑀬𑁆𑀬𑀢𑁆𑀢𑀦𑀸𑀤𑀬𑁄 𑀘𑀢𑀲𑁆𑀲𑁄 𑀯𑀺𑀪𑀢𑁆𑀢𑀺𑀬𑁄 𑀲𑀩𑁆𑀩𑀥𑀸𑀢𑀼𑀓𑀲𑀜𑁆𑀜𑀸 𑀳𑁄𑀦𑁆𑀢𑀻𑀢𑀺 𑀳𑀺𑀬𑁆𑀬𑀢𑁆𑀢𑀦𑀸𑀤𑀻𑀦𑀁 𑀲𑀩𑁆𑀩𑀥𑀸𑀢𑀼𑀓𑀲𑀜𑁆𑀜𑀢𑁆𑀢𑀸 ‘‘𑀇𑀓𑀸𑀭𑀸𑀕𑀫𑁄 𑀅𑀲𑀩𑁆𑀩𑀥𑀸𑀢𑀼𑀓𑀫𑁆𑀳𑀻’’𑀢𑀺 𑀯𑀼𑀢𑁆𑀢𑁄 𑀇𑀓𑀸𑀭𑀸𑀕𑀫𑁄 𑀦 𑀪𑀯𑀢𑀺.

𑀲𑀩𑁆𑀩𑀥𑀸𑀢𑀼𑀓𑀁.

𑁪𑁫𑁯. 𑀧𑀭𑁄𑀓𑁆𑀔𑀸 𑀅 𑀉, 𑀏 𑀢𑁆𑀣, 𑀅𑀁 𑀫𑁆𑀳, 𑀢𑁆𑀣 𑀭𑁂, 𑀣𑁄 𑀯𑁆𑀳𑁄, 𑀇𑀁𑀫𑁆𑀳𑁂.

𑀅𑀆𑀤𑀬𑁄 𑀤𑁆𑀯𑀸𑀤𑀲 𑀧𑀭𑁄𑀓𑁆𑀔𑀸𑀲𑀜𑁆𑀜𑀸 𑀳𑁄𑀦𑁆𑀢𑀺. 𑀅𑀓𑁆𑀔𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀁 𑀧𑀭𑁄𑀓𑁆𑀔𑀸, 𑀢𑀤𑁆𑀤𑀻𑀧𑀓𑀢𑁆𑀢𑀸 𑀅𑀬𑀁 𑀯𑀺𑀪𑀢𑁆𑀢𑀺 𑀧𑀭𑁄𑀓𑁆𑀔𑀸𑀢𑀺 𑀯𑀼𑀘𑁆𑀘𑀢𑀺.

𑁪𑁬𑁦. 𑀅𑀧𑀘𑁆𑀘𑀓𑁆𑀔𑁂 ¶ 𑀧𑀭𑁄𑀓𑁆𑀔𑀸𑀢𑀻𑀢𑁂.

𑀅𑀧𑀘𑁆𑀘𑀓𑁆𑀔𑁂 𑀯𑀢𑁆𑀢𑀼𑀦𑁄 𑀇𑀦𑁆𑀤𑁆𑀭𑀺𑀬𑀸𑀯𑀺𑀲𑀬𑀪𑀽𑀢𑁂 𑀅𑀢𑀻𑀢𑁂 𑀓𑀸𑀮𑁂 𑀧𑀭𑁄𑀓𑁆𑀔𑀸𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀅𑀢𑀺𑀓𑁆𑀓𑀫𑁆𑀫 𑀇𑀢𑁄𑀢𑀺 𑀅𑀢𑀻𑀢𑁄, 𑀳𑀼𑀢𑁆𑀯𑀸 𑀅𑀢𑀺𑀓𑁆𑀓𑀦𑁆𑀢𑁄𑀢𑀺 𑀅𑀢𑁆𑀣𑁄.

𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀧𑀭𑁄𑀓𑁆𑀔𑀸𑀧𑀭𑀲𑁆𑀲𑀧𑀤𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀅. ‘‘𑀪𑀽 𑀅’’𑀇𑀢𑀻𑀥 𑁋

𑀯𑀺𑀧𑀭𑀺𑀡𑀸𑀫𑁂𑀦 ‘‘𑀥𑀸𑀢𑀽𑀦’’𑀦𑁆𑀢𑀺 𑀯𑀢𑁆𑀢𑀢𑁂.

𑁪𑁬𑁧. 𑀓𑁆𑀯𑀘𑀸𑀤𑀺𑀯𑀡𑁆𑀡𑀸𑀦𑀫𑁂𑀓𑀲𑁆𑀲𑀭𑀸𑀦𑀁 𑀤𑁆𑀯𑁂𑀪𑀸𑀯𑁄.

𑀥𑀸𑀢𑀽𑀦𑀫𑀸𑀤𑀺𑀪𑀽𑀢𑀸𑀦𑀁 𑀯𑀡𑁆𑀡𑀸𑀦𑀫𑁂𑀓𑀲𑁆𑀲𑀭𑀸𑀦𑀁 𑀓𑁆𑀯𑀘𑀺 𑀤𑁆𑀯𑁂𑀪𑀸𑀯𑁄 𑀳𑁄𑀢𑀺. 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄𑀬𑀁 𑀓𑁆𑀯𑀘𑀺𑀲𑀤𑁆𑀤𑁄, 𑀢𑁂𑀦 𑁋

𑀔 𑀙 𑀲𑁂𑀲𑀼 𑀧𑀭𑁄𑀓𑁆𑀔𑀸𑀬𑀁, 𑀤𑁆𑀯𑁂𑀪𑀸𑀯𑁄 𑀲𑀩𑁆𑀩𑀥𑀸𑀢𑀼𑀦𑀁;

𑀅𑀧𑁆𑀧𑀘𑁆𑀘𑀬𑁂 𑀚𑀼𑀳𑁄𑀢𑁆𑀬𑀸𑀤𑀺-𑀲𑁆𑀲𑀧𑀺 𑀓𑀺𑀘𑁆𑀘𑀸𑀤𑀺𑀓𑁂 𑀓𑁆𑀯𑀘𑀺.

‘‘𑀪𑀽 𑀪𑀽 𑀅’’𑀇𑀢𑀻𑀥 𑁋

𑁪𑁬𑁨. 𑀧𑀼𑀩𑁆𑀩𑁄𑀩𑁆𑀪𑀸𑀲𑁄.

𑀤𑁆𑀯𑁂𑀪𑀽𑀢𑀲𑁆𑀲 𑀥𑀸𑀢𑀼𑀲𑁆𑀲 𑀬𑁄 𑀧𑀼𑀩𑁆𑀩𑁄 𑀅𑀯𑀬𑀯𑁄, 𑀲𑁄 𑀅𑀩𑁆𑀪𑀸𑀲𑀲𑀜𑁆𑀜𑁄 𑀳𑁄𑀢𑀻𑀢𑀺 𑀅𑀩𑁆𑀪𑀸𑀲𑀲𑀜𑁆𑀜𑀸.

𑀅𑀩𑁆𑀪𑀸𑀲𑀕𑁆𑀕𑀳𑀡𑀫𑀦𑀼𑀯𑀢𑁆𑀢𑀢𑁂.

𑁪𑁬𑁩. 𑀅𑀦𑁆𑀢𑀲𑁆𑀲𑀺𑀯𑀡𑁆𑀡𑀸𑀓𑀸𑀭𑁄 𑀯𑀸.

𑀅𑀩𑁆𑀪𑀸𑀲𑀲𑁆𑀲 𑀅𑀦𑁆𑀢𑀲𑁆𑀲 𑀇𑀯𑀡𑁆𑀡𑁄 𑀳𑁄𑀢𑀺 𑀯𑀸, 𑀅𑀓𑀸𑀭𑁄 𑀘. 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄𑀬𑀁 𑀯𑀸𑀲𑀤𑁆𑀤𑁄. 𑀢𑁂𑀦 𑁋

𑀔 ¶ 𑀙 𑀲𑁂𑀲𑀼 𑀅𑀯𑀡𑁆𑀡𑀲𑁆𑀲,

𑀇𑀓𑀸𑀭𑁄 𑀲𑀕𑀼𑀧𑀼𑀲𑁆𑀲 𑀈;

𑀯𑀸𑀲𑁆𑀲 𑀪𑀽𑀲𑁆𑀲 𑀧𑀭𑁄𑀓𑁆𑀔𑀸𑀬𑀁,

𑀅𑀓𑀸𑀭𑁄 𑀦𑀸𑀧𑀭𑀲𑁆𑀲𑀺𑀫𑁂𑀢𑀺.

𑀊𑀓𑀸𑀭𑀲𑁆𑀲 𑀅𑀓𑀸𑀭𑁄.

𑁪𑁬𑁪. 𑀤𑀼𑀢𑀺𑀬𑀘𑀢𑀼𑀢𑁆𑀣𑀸𑀦𑀁 𑀧𑀞𑀫𑀢𑀢𑀺𑀬𑀸.

𑀅𑀩𑁆𑀪𑀸𑀲𑀕𑀢𑀸𑀦𑀁 𑀤𑀼𑀢𑀺𑀬𑀘𑀢𑀼𑀢𑁆𑀣𑀸𑀦𑀁 𑀯𑀕𑁆𑀕𑀩𑁆𑀬𑀜𑁆𑀚𑀦𑀸𑀦𑀁 𑀬𑀣𑀸𑀓𑁆𑀓𑀫𑀁 𑀧𑀞𑀫𑀢𑀢𑀺𑀬𑀸 𑀳𑁄𑀦𑁆𑀢𑀻𑀢𑀺 𑀪𑀓𑀸𑀭𑀲𑁆𑀲 𑀩𑀓𑀸𑀭𑁄.

𑁪𑁬𑁫. 𑀩𑁆𑀭𑀽𑀪𑀽𑀦𑀫𑀸𑀳𑀪𑀽𑀯𑀸 𑀧𑀭𑁄𑀓𑁆𑀔𑀸𑀬𑀁.

𑀩𑁆𑀭𑀽𑀪𑀽𑀇𑀘𑁆𑀘𑁂𑀢𑁂𑀲𑀁 𑀥𑀸𑀢𑀽𑀦𑀁 𑀆𑀳𑀪𑀽𑀯𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺 𑀧𑀭𑁄𑀓𑁆𑀔𑀸𑀯𑀺𑀪𑀢𑁆𑀢𑀺𑀬𑀦𑁆𑀢𑀺 𑀪𑀽𑀲𑀤𑁆𑀤𑀲𑁆𑀲 𑀪𑀽𑀯𑀆𑀤𑁂𑀲𑁄, ‘‘𑀲𑀭𑀮𑁄𑀧𑁄 𑀫𑀸𑀤𑁂𑀲𑀧𑁆𑀧𑀘𑁆𑀘𑀬𑀸𑀤𑀺𑀫𑁆𑀳𑀻’’𑀢𑀺𑀆𑀤𑀺𑀦𑀸 𑀲𑀭𑀮𑁄𑀧𑀸𑀤𑀺, 𑀲𑁄 𑀓𑀺𑀭 𑀭𑀸𑀚𑀸 𑀩𑀪𑀽𑀯, 𑀢𑁂 𑀓𑀺𑀭 𑀩𑀪𑀽𑀯𑀼. 𑀢𑁆𑀯𑀁 𑀓𑀺𑀭 𑀩𑀪𑀽𑀯𑁂.

‘‘𑀥𑀸𑀢𑀽𑀳𑀻’’𑀢𑀺 𑀯𑀢𑁆𑀢𑀢𑁂, 𑀲𑀻𑀳𑀕𑀢𑀺𑀬𑀸 𑀓𑁆𑀯𑀘𑀺𑀕𑁆𑀕𑀳𑀡𑀜𑁆𑀘.

𑁪𑁬𑁬. 𑀇𑀓𑀸𑀭𑀸𑀕𑀫𑁄 𑀅𑀲𑀩𑁆𑀩𑀥𑀸𑀢𑀼𑀓𑀫𑁆𑀳𑀺.

𑀲𑀩𑁆𑀩𑀲𑁆𑀫𑀺𑀁 𑀅𑀲𑀩𑁆𑀩𑀥𑀸𑀢𑀼𑀓𑀫𑁆𑀳𑀺 𑀧𑀭𑁂 𑀓𑁆𑀯𑀘𑀺 𑀥𑀸𑀢𑀽𑀳𑀺 𑀧𑀭𑁄 𑀇𑀓𑀸𑀭𑀸𑀕𑀫𑁄 𑀳𑁄𑀢𑀺.

𑀅𑀲𑀩𑁆𑀩𑀥𑀸𑀢𑀼𑀓𑁂 𑀩𑁆𑀬𑀜𑁆𑀚-𑀦𑀸𑀤𑀺𑀫𑁆𑀳𑁂 𑀯𑀸𑀬𑀫𑀸𑀕𑀫𑁄;

𑀓𑁆𑀯𑀘𑀸𑀥𑀺𑀓𑀸𑀭𑀢𑁄 𑀩𑁆𑀬𑀜𑁆𑀚-𑀦𑀸𑀤𑁄𑀧𑀺 𑀓𑁆𑀯𑀘𑀺 𑀦𑁄 𑀲𑀺𑀬𑀸.

𑀏𑀢𑁆𑀣 𑀘 ‘‘𑀦 𑀲𑀩𑁆𑀩𑀥𑀸𑀢𑀼𑀓𑀁 𑀅𑀲𑀩𑁆𑀩𑀥𑀸𑀢𑀼𑀓’’𑀫𑀺𑀢𑀺 𑀓𑀢𑁆𑀯𑀸 ‘‘𑀳𑀺𑀬𑁆𑀬𑀢𑁆𑀢𑀦𑀻 𑀲𑀢𑁆𑀢𑀫𑀻 𑀧𑀜𑁆𑀘𑀫𑀻 𑀯𑀢𑁆𑀢𑀫𑀸𑀦𑀸 𑀲𑀩𑁆𑀩𑀥𑀸𑀢𑀼𑀓’’𑀦𑁆𑀢𑀺 𑀳𑀺𑀬𑁆𑀬𑀢𑁆𑀢𑀦𑀻𑀆𑀤𑀻𑀦𑀁 𑀲𑀩𑁆𑀩𑀥𑀸𑀢𑀼𑀓𑀲𑀜𑁆𑀜𑀸𑀬 𑀯𑀼𑀢𑁆𑀢𑀢𑁆𑀢𑀸 𑀢𑀤𑀜𑁆𑀜𑀸 𑀘𑀢𑀲𑁆𑀲𑁄 𑀯𑀺𑀪𑀢𑁆𑀢𑀺𑀬𑁄 𑀅𑀲𑀩𑁆𑀩𑀥𑀸𑀢𑀼𑀓𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑀼𑀫𑁆𑀳𑁂 ¶ 𑀓𑀺𑀭 𑀩𑀪𑀽𑀯𑀺𑀢𑁆𑀣. 𑀅𑀳𑀁 𑀓𑀺𑀭 𑀩𑀪𑀽𑀯𑀁, 𑀫𑀬𑀁 𑀓𑀺𑀭 𑀩𑀪𑀽𑀯𑀺𑀫𑁆𑀳. 𑀅𑀢𑁆𑀢𑀦𑁄𑀧𑀤𑁂 𑀲𑁄 𑀩𑀪𑀽𑀯𑀺𑀢𑁆𑀣, 𑀩𑀪𑀽𑀯𑀺𑀭𑁂. 𑀩𑀪𑀽𑀯𑀺𑀢𑁆𑀣𑁄, 𑀩𑀪𑀽𑀯𑀺𑀯𑁆𑀳𑁄. 𑀩𑀪𑀽𑀯𑀺𑀁, 𑀩𑀪𑀽𑀯𑀺𑀫𑁆𑀳𑁂.

𑀓𑀫𑁆𑀫𑀦𑀺 𑀅𑀢𑁆𑀢𑀦𑁄𑀧𑀤𑁂 𑀈𑀓𑀸𑀭𑀸𑀕𑀫𑀬𑀧𑁆𑀧𑀘𑁆𑀘𑀬𑀺𑀓𑀸𑀭𑀸𑀕𑀫𑀸, 𑀅𑀦𑀼𑀩𑀪𑀽𑀯𑀻𑀬𑀺𑀢𑁆𑀣, 𑀬𑀧𑁆𑀧𑀘𑁆𑀘𑀬𑀲𑁆𑀲 𑀅𑀲𑀩𑁆𑀩𑀥𑀸𑀢𑀼𑀓𑀫𑁆𑀳𑀺 ‘‘𑀓𑁆𑀯𑀘𑀺 𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀮𑁄𑀧𑁂 𑀓𑀢𑁂 𑀇𑀯𑀡𑁆𑀡𑀸𑀕𑀫𑁄 𑀦 𑀪𑀯𑀢𑀺, 𑀢𑀬𑀸 𑀓𑀺𑀭 𑀅𑀦𑀼𑀩𑀪𑀽𑀯𑀺𑀢𑁆𑀣, 𑀅𑀦𑀼𑀩𑀪𑀽𑀯𑀺𑀭𑁂 𑀇𑀘𑁆𑀘𑀸𑀤𑀺. 𑀪𑀸𑀯𑁂 𑀩𑀪𑀽𑀯𑀻𑀬𑀺𑀢𑁆𑀣, 𑀩𑀪𑀽𑀯𑀺𑀢𑁆𑀣 𑀯𑀸.

𑀢𑀣𑀸 𑀧𑀧𑀘, 𑀧𑀧𑀘𑀽. 𑀧𑀧𑀘𑁂, 𑀧𑀧𑀘𑀺𑀢𑁆𑀣. 𑀧𑀧𑀘𑀁, 𑀧𑀧𑀘𑀺𑀫𑁆𑀳. 𑀧𑀧𑀘𑀺𑀢𑁆𑀣, 𑀧𑀧𑀘𑀺𑀭𑁂. 𑀧𑀧𑀘𑀺𑀢𑁆𑀣𑁄, 𑀧𑀧𑀘𑀺𑀯𑁆𑀳𑁄. 𑀧𑀧𑀘𑀺𑀁, 𑀧𑀧𑀘𑀺𑀫𑁆𑀳𑁂.

𑀓𑀫𑁆𑀫𑀦𑀺 𑀧𑀧𑀘𑁆𑀘𑀺𑀢𑁆𑀣, 𑀧𑀧𑀘𑁆𑀘𑀺𑀭𑁂 𑀇𑀘𑁆𑀘𑀸𑀤𑀺. 𑀢𑀣𑀸 𑀅𑀧𑀘𑁆𑀘, 𑀅𑀧𑀘𑁆𑀘𑀽 𑀇𑀘𑁆𑀘𑀸𑀤𑀺.

𑀕𑀫𑀺𑀫𑁆𑀳𑀺 ‘‘𑀓𑁆𑀯𑀘𑀸𑀤𑀺𑀯𑀡𑁆𑀡𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀤𑁆𑀯𑁂𑀪𑀸𑀯𑁄, ‘‘𑀧𑀼𑀩𑁆𑀩𑁄𑀩𑁆𑀪𑀸𑀲𑁄’’𑀢𑀺 𑀅𑀩𑁆𑀪𑀸𑀲𑀲𑀜𑁆𑀜𑀸.

‘‘𑀅𑀩𑁆𑀪𑀸𑀲𑁂’’𑀢𑀺 𑀯𑀢𑁆𑀢𑀢𑁂.

𑁪𑁬𑁭. 𑀓𑀯𑀕𑁆𑀕𑀲𑁆𑀲 𑀘𑀯𑀕𑁆𑀕𑁄.

𑀅𑀩𑁆𑀪𑀸𑀲𑁂 𑀯𑀢𑁆𑀢𑀫𑀸𑀦𑀲𑁆𑀲 𑀓𑀯𑀕𑁆𑀕𑀲𑁆𑀲 𑀘𑀯𑀕𑁆𑀕𑁄 𑀳𑁄𑀢𑀻𑀢𑀺 𑀯𑀓𑀸𑀭𑀲𑁆𑀲 𑀚𑀓𑀸𑀭𑁄, ‘‘𑀓𑁆𑀯𑀘𑀺 𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀅𑀦𑀩𑁆𑀪𑀸𑀲𑀲𑁆𑀲 𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑀫𑁆𑀳𑀺 𑀤𑀻𑀖𑁄. 𑀲𑁄 𑀕𑀸𑀫𑀁 𑀚𑀕𑀸𑀫 𑀓𑀺𑀭, 𑀚𑀕𑀫 𑀯𑀸, 𑀚𑀕𑀫𑀼. 𑀚𑀕𑀫𑁂, 𑀚𑀕𑀫𑀺𑀢𑁆𑀣. 𑀚𑀕𑀫𑀁, 𑀚𑀕𑀫𑀺𑀫𑁆𑀳. 𑀚𑀕𑀫𑀺𑀢𑁆𑀣, 𑀚𑀕𑀫𑀺𑀭𑁂. 𑀚𑀕𑀫𑀺𑀢𑁆𑀣𑁄, 𑀚𑀕𑀫𑀺𑀯𑁆𑀳𑁄. 𑀚𑀕𑀫𑀺𑀁, 𑀚𑀕𑀫𑀺𑀫𑁆𑀳𑁂.

𑀓𑀫𑁆𑀫𑀦𑀺 𑀚𑀕𑀫𑀻𑀬𑀺𑀢𑁆𑀣, 𑀚𑀕𑀫𑀺𑀢𑁆𑀣 𑀯𑀸 𑀇𑀘𑁆𑀘𑀸𑀤𑀺.

𑀧𑀭𑁄𑀓𑁆𑀔𑀸𑀯𑀺𑀪𑀢𑁆𑀢𑀺.

𑁪𑁬𑁮. 𑀅𑀚𑁆𑀚𑀢𑀦𑀻 ¶ 𑀈 𑀉𑀁, 𑀑 𑀢𑁆𑀣, 𑀇𑀁 𑀫𑁆𑀳𑀸, 𑀆 𑀊, 𑀲𑁂 𑀯𑁆𑀳𑀁, 𑀅𑀫𑁆𑀳𑁂.

𑀈𑀆𑀤𑀬𑁄 𑀤𑁆𑀯𑀸𑀤𑀲 𑀅𑀚𑁆𑀚𑀢𑀦𑀻𑀲𑀜𑁆𑀜𑀸 𑀳𑁄𑀦𑁆𑀢𑀺. 𑀅𑀚𑁆𑀚 𑀪𑀯𑁄 𑀅𑀚𑁆𑀚𑀢𑀦𑁄, 𑀢𑀤𑁆𑀤𑀻𑀧𑀓𑀢𑁆𑀢𑀸 𑀅𑀬𑀁 𑀯𑀺𑀪𑀢𑁆𑀢𑀺 𑀅𑀚𑁆𑀚𑀢𑀦𑀻𑀢𑀺 𑀯𑀼𑀘𑁆𑀘𑀢𑀺.

‘‘𑀅𑀧𑀘𑁆𑀘𑀓𑁆𑀔𑁂, 𑀅𑀢𑀻𑀢𑁂, 𑀧𑀘𑁆𑀘𑀓𑁆𑀔𑁂’’𑀢𑀺 𑀘 𑀯𑀢𑁆𑀢𑀢𑁂.

𑁪𑁬𑁯. 𑀲𑀫𑀻𑀧𑁂𑀚𑁆𑀚𑀢𑀦𑀻.

𑀲𑀫𑀻𑀧𑁂 𑀲𑀫𑀻𑀧𑀢𑁄 𑀧𑀝𑁆𑀞𑀸𑀬 𑀅𑀚𑁆𑀚𑀧𑁆𑀧𑀪𑀼𑀢𑀺 𑀅𑀢𑀻𑀢𑁂 𑀓𑀸𑀮𑁂 𑀧𑀘𑁆𑀘𑀓𑁆𑀔𑁂 𑀘 𑀅𑀧𑀘𑁆𑀘𑀓𑁆𑀔𑁂 𑀘 𑀅𑀚𑁆𑀚𑀢𑀦𑀻𑀯𑀺𑀪𑀢𑁆𑀢𑀺 𑀳𑁄𑀢𑀻𑀢𑀺 𑀅𑀚𑁆𑀚𑀢𑀦𑀻𑀧𑀭𑀲𑁆𑀲𑀧𑀤𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀈.

𑀧𑀼𑀭𑁂 𑀯𑀺𑀬 𑀅𑀓𑀸𑀭𑀸𑀕𑀫𑁄, 𑀯𑀼𑀤𑁆𑀥𑀸𑀤𑀺 𑀘, ‘‘𑀓𑁆𑀯𑀘𑀺 𑀥𑀸𑀢𑀼𑀯𑀺𑀪𑀢𑁆𑀢𑀻’’𑀢𑀺𑀆𑀤𑀺𑀦𑀸 𑀈𑀫𑁆𑀳𑀸𑀤𑀺𑀯𑀺𑀪𑀢𑁆𑀢𑀻𑀦𑀁 𑀓𑁆𑀯𑀘𑀺 𑀭𑀲𑁆𑀲𑀢𑁆𑀢𑀁, 𑀑𑀆𑀅𑀯𑀘𑀦𑀸𑀦𑀁 𑀇𑀢𑁆𑀣𑀅𑀫𑀸𑀤𑁂𑀲𑀸 𑀘, 𑀲𑀭𑀮𑁄𑀧𑀸𑀤𑀺, 𑀲𑁄 𑀅𑀪𑀯𑀺, 𑀅𑀪𑀯𑀻 𑀯𑀸, 𑀅𑀓𑀸𑀭𑀸𑀕𑀫𑀸𑀪𑀸𑀯𑁂 𑀪𑀯𑀺.

𑀫𑀡𑁆𑀟𑀽𑀓𑀕𑀢𑀺𑀬𑀸 ‘‘𑀯𑀸’’𑀢𑀺 𑀯𑀢𑁆𑀢𑀢𑁂.

𑁪𑁭𑁦. 𑀲𑀩𑁆𑀩𑀢𑁄 𑀉𑀁 𑀇𑀁 𑀲𑀼.

𑀲𑀩𑁆𑀩𑁂𑀳𑀺 𑀥𑀸𑀢𑀽𑀳𑀺 𑀉𑀁𑀯𑀺𑀪𑀢𑁆𑀢𑀺𑀲𑁆𑀲 𑀇𑀁𑀲𑁆𑀯𑀸𑀤𑁂𑀲𑁄 𑀳𑁄𑀢𑀺 𑀯𑀸.

𑀢𑁂 𑀅𑀪𑀯𑀺𑀁𑀲𑀼, 𑀪𑀯𑀺𑀁𑀲𑀼 𑀯𑀸, 𑀅𑀪𑀯𑀼𑀁, 𑀪𑀯𑀼𑀁 𑀯𑀸. 𑀢𑁆𑀯𑀁 𑀅𑀪𑀯𑀺, 𑀪𑀯𑀺 𑀯𑀸, 𑀅𑀪𑀯𑁄, 𑀪𑀯𑁄 𑀯𑀸, 𑀢𑀼𑀫𑁆𑀳𑁂 𑀅𑀪𑀯𑀺𑀢𑁆𑀣, 𑀪𑀯𑀺𑀢𑁆𑀣 𑀯𑀸, 𑀇𑀓𑀸𑀭𑀸𑀕𑀫𑁄. 𑀅𑀳𑀁 𑀅𑀪𑀯𑀺𑀁, 𑀪𑀯𑀺𑀁 𑀯𑀸, 𑀫𑀬𑀁 𑀅𑀪𑀯𑀺𑀫𑁆𑀳, 𑀪𑀯𑀺𑀫𑁆𑀳 𑀯𑀸, 𑀅𑀪𑀯𑀺𑀫𑁆𑀳𑀸, 𑀪𑀯𑀺𑀫𑁆𑀳𑀸 𑀯𑀸. 𑀲𑁄 𑀅𑀪𑀯𑀺𑀢𑁆𑀣, 𑀪𑀯𑀺𑀢𑁆𑀣 𑀯𑀸, 𑀅𑀪𑀯𑀸, 𑀪𑀯𑀸 𑀯𑀸, 𑀅𑀪𑀯𑀽, 𑀪𑀯𑀽 𑀯𑀸. 𑀅𑀪𑀯𑀺𑀲𑁂, 𑀪𑀯𑀺𑀲𑁂 𑀯𑀸, 𑀅𑀪𑀯𑀺𑀯𑁆𑀳𑀁, 𑀪𑀯𑀺𑀯𑁆𑀳𑀁 𑀯𑀸. 𑀅𑀪𑀯𑀁 ¶ , 𑀪𑀯𑀁 𑀯𑀸, 𑀅𑀪𑀯, 𑀪𑀯 𑀯𑀸, 𑀅𑀪𑀯𑀺𑀫𑁆𑀳𑁂, 𑀪𑀯𑀺𑀫𑁆𑀳𑁂 𑀯𑀸.

𑀓𑀫𑁆𑀫𑀦𑀺 𑀬𑀧𑁆𑀧𑀘𑁆𑀘𑀬𑀮𑁄𑀧𑁂 𑀯𑀼𑀤𑁆𑀥𑀺𑀅𑀯𑀸𑀤𑁂𑀲𑀸𑀤𑀺, 𑀲𑀼𑀔𑀁 𑀢𑀬𑀸 𑀅𑀦𑀼𑀪𑀯𑀺𑀢𑁆𑀣, 𑀅𑀦𑁆𑀯𑀪𑀽𑀬𑀺𑀢𑁆𑀣, 𑀅𑀦𑀼𑀪𑀽𑀬𑀺𑀢𑁆𑀣 𑀯𑀸 𑀇𑀘𑁆𑀘𑀸𑀤𑀺. 𑀧𑀭𑀲𑁆𑀲𑀧𑀤𑀢𑁆𑀢𑁂 𑀢𑀬𑀸 𑀅𑀦𑁆𑀯𑀪𑀽𑀬𑀺, 𑀅𑀦𑀼𑀪𑀽𑀬𑀺, 𑀅𑀦𑁆𑀯𑀪𑀽𑀬𑀻, 𑀅𑀦𑀼𑀪𑀽𑀬𑀻 𑀯𑀸, 𑀅𑀦𑁆𑀯𑀪𑀽𑀬𑀺𑀁𑀲𑀼, 𑀅𑀦𑀼𑀪𑀽𑀬𑀺𑀁𑀲𑀼, 𑀅𑀦𑁆𑀯𑀪𑀽𑀬𑀼𑀁, 𑀅𑀦𑀼𑀪𑀽𑀬𑀼𑀁. 𑀢𑁆𑀯𑀁 𑀅𑀦𑁆𑀯𑀪𑀽𑀬𑀺, 𑀅𑀦𑀼𑀪𑀽𑀬𑀺, 𑀢𑀼𑀫𑁆𑀳𑁂 𑀅𑀦𑁆𑀯𑀪𑀽𑀬𑀺𑀢𑁆𑀣, 𑀅𑀦𑀼𑀪𑀽𑀬𑀺𑀢𑁆𑀣. 𑀅𑀳𑀁 𑀅𑀦𑁆𑀯𑀪𑀽𑀬𑀺𑀁, 𑀅𑀦𑀼𑀪𑀽𑀬𑀺𑀁, 𑀫𑀬𑀁 𑀅𑀦𑁆𑀯𑀪𑀽𑀬𑀺𑀫𑁆𑀳, 𑀅𑀦𑀼𑀪𑀽𑀬𑀺𑀫𑁆𑀳, 𑀅𑀦𑁆𑀯𑀪𑀽𑀬𑀺𑀫𑁆𑀳𑀸, 𑀅𑀦𑀼𑀪𑀽𑀬𑀺𑀫𑁆𑀳𑀸 𑀯𑀸. 𑀪𑀸𑀯𑁂 𑀅𑀪𑀯𑀺𑀢𑁆𑀣, 𑀅𑀪𑀽𑀬𑀺𑀢𑁆𑀣 𑀢𑀬𑀸.

𑀲𑁄 𑀅𑀧𑀘𑀺, 𑀧𑀘𑀺, 𑀅𑀧𑀘𑀻, 𑀧𑀘𑀻 𑀯𑀸, 𑀢𑁂 𑀅𑀧𑀘𑀺𑀁𑀲𑀼, 𑀧𑀘𑀺𑀁𑀲𑀼, 𑀅𑀧𑀘𑀼𑀁, 𑀧𑀘𑀼𑀁. 𑀢𑁆𑀯𑀁 𑀅𑀧𑀘𑀺, 𑀧𑀘𑀺, 𑀅𑀧𑀘𑁄, 𑀧𑀘𑁄 𑀯𑀸, 𑀢𑀼𑀫𑁆𑀳𑁂 𑀅𑀧𑀘𑀺𑀢𑁆𑀣, 𑀧𑀘𑀺𑀢𑁆𑀣. 𑀅𑀳𑀁 𑀅𑀧𑀘𑀺𑀁, 𑀧𑀘𑀺𑀁, 𑀫𑀬𑀁 𑀅𑀧𑀘𑀺𑀫𑁆𑀳, 𑀧𑀘𑀺𑀫𑁆𑀳, 𑀅𑀧𑀘𑀺𑀫𑁆𑀳𑀸, 𑀧𑀘𑀺𑀫𑁆𑀳𑀸 𑀯𑀸. 𑀲𑁄 𑀅𑀧𑀘𑀺𑀢𑁆𑀣, 𑀧𑀘𑀺𑀢𑁆𑀣, 𑀅𑀧𑀘𑀸, 𑀧𑀘𑀸 𑀯𑀸, 𑀅𑀧𑀘𑀽, 𑀧𑀘𑀽. 𑀅𑀧𑀘𑀺𑀲𑁂, 𑀅𑀧𑀘𑀺𑀯𑁆𑀳𑀁. 𑀅𑀧𑀘𑀁, 𑀧𑀘𑀁, 𑀅𑀧𑀘, 𑀧𑀘 𑀯𑀸, 𑀅𑀧𑀘𑀺𑀫𑁆𑀳𑁂, 𑀧𑀘𑀺𑀫𑁆𑀳𑁂.

𑀓𑀫𑁆𑀫𑀦𑀺 𑀅𑀧𑀘𑁆𑀘𑀺𑀢𑁆𑀣, 𑀧𑀘𑁆𑀘𑀺𑀢𑁆𑀣 𑀇𑀘𑁆𑀘𑀸𑀤𑀺. 𑀧𑀭𑀲𑁆𑀲𑀧𑀤𑀢𑁆𑀢𑁂 𑀅𑀧𑀘𑁆𑀘𑀺, 𑀧𑀘𑁆𑀘𑀺, 𑀅𑀧𑀘𑁆𑀘𑀻, 𑀧𑀘𑁆𑀘𑀻 𑀯𑀸, 𑀅𑀧𑀘𑁆𑀘𑀺𑀁𑀲𑀼, 𑀧𑀘𑁆𑀘𑀺𑀁𑀲𑀼, 𑀅𑀧𑀘𑁆𑀘𑀼𑀁, 𑀧𑀘𑁆𑀘𑀼𑀁. 𑀅𑀧𑀘𑁆𑀘𑀺, 𑀧𑀘𑁆𑀘𑀺, 𑀅𑀧𑀘𑁆𑀘𑁄, 𑀧𑀘𑁆𑀘𑁄 𑀯𑀸, 𑀅𑀧𑀘𑁆𑀘𑀺𑀢𑁆𑀣, 𑀧𑀘𑁆𑀘𑀺𑀢𑁆𑀣. 𑀅𑀧𑀘𑁆𑀘𑀺𑀁, 𑀧𑀘𑁆𑀘𑀺𑀁, 𑀅𑀧𑀘𑁆𑀘𑀺𑀫𑁆𑀳, 𑀧𑀘𑁆𑀘𑀺𑀫𑁆𑀳, 𑀅𑀧𑀘𑁆𑀘𑀺𑀫𑁆𑀳𑀸, 𑀧𑀘𑁆𑀘𑀺𑀫𑁆𑀳𑀸 𑀯𑀸.

𑀲𑁄 𑀕𑀸𑀫𑀁 𑀅𑀕𑀘𑁆𑀙𑀻, 𑀕𑀘𑁆𑀙𑀻, 𑀅𑀕𑀘𑁆𑀙𑀺, 𑀕𑀘𑁆𑀙𑀺 𑀯𑀸, 𑀢𑁂 𑀅𑀕𑀘𑁆𑀙𑀺𑀁𑀲𑀼, 𑀕𑀘𑁆𑀙𑀺𑀁𑀲𑀼, 𑀅𑀕𑀘𑁆𑀙𑀼𑀁, 𑀕𑀘𑁆𑀙𑀼𑀁. 𑀢𑁆𑀯𑀁 𑀅𑀕𑀘𑁆𑀙𑀺, 𑀕𑀘𑁆𑀙𑀺, 𑀅𑀕𑀘𑁆𑀙𑁄, 𑀕𑀘𑁆𑀙𑁄 𑀯𑀸, 𑀢𑀼𑀫𑁆𑀳𑁂 𑀅𑀕𑀘𑁆𑀙𑀺𑀢𑁆𑀣, 𑀕𑀘𑁆𑀙𑀺𑀢𑁆𑀣. 𑀅𑀳𑀁 𑀅𑀕𑀘𑁆𑀙𑀺𑀁, 𑀕𑀘𑁆𑀙𑀺𑀁, 𑀫𑀬𑀁 𑀅𑀕𑀘𑁆𑀙𑀺𑀫𑁆𑀳, 𑀕𑀘𑁆𑀙𑀺𑀫𑁆𑀳, 𑀅𑀕𑀘𑁆𑀙𑀺𑀫𑁆𑀳𑀸, 𑀕𑀘𑁆𑀙𑀺𑀫𑁆𑀳𑀸 𑀯𑀸.

‘‘𑀓𑁆𑀯𑀘𑀺 𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀅𑀚𑁆𑀚𑀢𑀦𑀺𑀫𑁆𑀳𑀺 𑀕𑀫𑀺𑀲𑁆𑀲 𑀘𑁆𑀙𑀲𑁆𑀲 𑀓𑁆𑀯𑀘𑀺 𑀜𑁆𑀙𑀸𑀤𑁂𑀲𑁄, 𑀅𑀕𑀜𑁆𑀙𑀺, 𑀕𑀜𑁆𑀙𑀺, 𑀅𑀕𑀜𑁆𑀙𑀻, 𑀕𑀜𑁆𑀙𑀻 𑀯𑀸, 𑀢𑁂 𑀅𑀕𑀜𑁆𑀙𑀺𑀁𑀲𑀼 ¶ , 𑀕𑀜𑁆𑀙𑀺𑀁𑀲𑀼, 𑀅𑀕𑀜𑁆𑀙𑀼𑀁, 𑀕𑀜𑁆𑀙𑀼𑀁. 𑀢𑁆𑀯𑀁 𑀅𑀕𑀜𑁆𑀙𑀺, 𑀕𑀜𑁆𑀙𑀺, 𑀅𑀕𑀜𑁆𑀙𑁄, 𑀕𑀜𑁆𑀙𑁄 𑀯𑀸, 𑀢𑀼𑀫𑁆𑀳𑁂 𑀅𑀕𑀜𑁆𑀙𑀺𑀢𑁆𑀣, 𑀕𑀜𑁆𑀙𑀺𑀢𑁆𑀣. 𑀅𑀳𑀁 𑀅𑀕𑀜𑁆𑀙𑀺𑀁, 𑀕𑀜𑁆𑀙𑀺𑀁, 𑀫𑀬𑀁 𑀅𑀕𑀜𑁆𑀙𑀺𑀫𑁆𑀳, 𑀕𑀜𑁆𑀙𑀺𑀫𑁆𑀳, 𑀅𑀕𑀜𑁆𑀙𑀺𑀫𑁆𑀳𑀸, 𑀕𑀜𑁆𑀙𑀺𑀫𑁆𑀳𑀸 𑀯𑀸.

𑀘𑁆𑀙𑀸𑀤𑁂𑀲𑀸𑀪𑀸𑀯𑁂 𑀲𑁄 𑀅𑀕𑀫𑀺, 𑀕𑀫𑀺, 𑀅𑀕𑀫𑀻, 𑀕𑀫𑀻 𑀯𑀸, ‘‘𑀓𑀭𑀲𑁆𑀲 𑀓𑀸𑀲𑀢𑁆𑀢𑀫𑀚𑁆𑀚𑀢𑀦𑀺𑀫𑁆𑀳𑀻’’𑀢𑀺 𑀏𑀢𑁆𑀣 𑀪𑀸𑀯𑀦𑀺𑀤𑁆𑀤𑁂𑀲𑁂𑀦, ‘‘𑀲𑀢𑁆𑀢𑀫𑀚𑁆𑀚𑀢𑀦𑀺𑀫𑁆𑀳𑀻’’𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀯𑀸 𑀲𑀸𑀕𑀫𑁂 ‘‘𑀓𑁆𑀯𑀘𑀺 𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀩𑁆𑀬𑀜𑁆𑀚𑀦𑀢𑁄 𑀆𑀓𑀸𑀭𑀸𑀕𑀫𑁄, 𑀅𑀕𑀫𑀸𑀲𑀺, 𑀉𑀁𑀯𑀘𑀦𑀲𑁆𑀲 𑀓𑁆𑀯𑀘𑀺 𑀅𑀁𑀲𑁆𑀯𑀸𑀤𑁂𑀲𑁄, 𑀉𑀘𑀸𑀕𑀫𑁄 𑀢𑁆𑀣𑀫𑁆𑀳𑁂𑀲𑀼 𑀓𑁆𑀯𑀘𑀺, 𑀅𑀕𑀫𑀺𑀁𑀲𑀼, 𑀕𑀫𑀺𑀁𑀲𑀼, 𑀅𑀕𑀫𑀁𑀲𑀼, 𑀕𑀫𑀁𑀲𑀼, 𑀅𑀕𑀫𑀼𑀁, 𑀕𑀫𑀼𑀁, 𑀢𑁆𑀯𑀁 𑀅𑀕𑀫𑀺, 𑀕𑀫𑀺, 𑀅𑀕𑀫𑁄, 𑀕𑀫𑁄 𑀯𑀸, 𑀅𑀕𑀫𑀺𑀢𑁆𑀣, 𑀕𑀫𑀺𑀢𑁆𑀣, 𑀅𑀕𑀫𑀼𑀢𑁆𑀣, 𑀕𑀫𑀼𑀢𑁆𑀣. 𑀅𑀳𑀁 𑀅𑀕𑀫𑀺𑀁, 𑀕𑀫𑀺𑀁, 𑀅𑀕𑀫𑀺𑀫𑁆𑀳, 𑀕𑀫𑀺𑀫𑁆𑀳, 𑀅𑀕𑀫𑀼𑀫𑁆𑀳, 𑀕𑀫𑀼𑀫𑁆𑀳, 𑀅𑀕𑀫𑀺𑀫𑁆𑀳𑀸, 𑀕𑀫𑀺𑀫𑁆𑀳𑀸 𑀯𑀸.

‘‘𑀓𑁆𑀯𑀘𑀺 𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀕𑀫𑀺𑀲𑁆𑀲 𑀅𑀚𑁆𑀚𑀢𑀦𑀺𑀫𑁆𑀳𑀺 𑀕𑀸𑀤𑁂𑀲𑁄 𑀘, 𑀲𑁄 𑀅𑀚𑁆𑀛𑀕𑀸, 𑀧𑀭𑀮𑁄𑀧𑁄, 𑀢𑁂 𑀅𑀚𑁆𑀛𑀕𑀼𑀁. 𑀢𑁆𑀯𑀁 𑀅𑀚𑁆𑀛𑀕𑁄, 𑀢𑀼𑀫𑁆𑀳𑁂 𑀅𑀚𑁆𑀛𑀕𑀼𑀢𑁆𑀣. 𑀅𑀳𑀁 𑀅𑀚𑁆𑀛𑀕𑀺𑀁, 𑀫𑀬𑀁 𑀅𑀚𑁆𑀛𑀕𑀼𑀫𑁆𑀳.

𑀅𑀢𑁆𑀢𑀦𑁄𑀧𑀤𑁂 𑀲𑁄 𑀅𑀕𑀘𑁆𑀙𑀺𑀢𑁆𑀣, 𑀕𑀘𑁆𑀙𑀺𑀢𑁆𑀣, 𑀅𑀕𑀜𑁆𑀙𑀺𑀢𑁆𑀣, 𑀕𑀜𑁆𑀙𑀺𑀢𑁆𑀣 𑀇𑀘𑁆𑀘𑀸𑀤𑀺. 𑀘𑁆𑀙𑀸𑀤𑁂𑀲𑀸𑀪𑀸𑀯𑁂 𑀲𑁄 𑀅𑀕𑀫𑀺𑀢𑁆𑀣, 𑀕𑀫𑀺𑀢𑁆𑀣, 𑀅𑀕𑀫𑀸, 𑀕𑀫𑀸, 𑀢𑁂 𑀅𑀕𑀫𑀽, 𑀕𑀫𑀽, 𑀅𑀚𑁆𑀛𑀕𑀽, 𑀅𑀕𑀽. 𑀢𑁆𑀯𑀁 𑀅𑀕𑀫𑀺𑀲𑁂, 𑀕𑀫𑀺𑀲𑁂, 𑀅𑀕𑀫𑀺𑀯𑁆𑀳𑀁, 𑀕𑀫𑀺𑀯𑁆𑀳𑀁. 𑀅𑀳𑀁 𑀅𑀕𑀫𑀁, 𑀕𑀫𑀁, 𑀅𑀕𑀫, 𑀕𑀫, 𑀅𑀚𑁆𑀛𑀕𑀁 𑀯𑀸, 𑀅𑀕𑀫𑀺𑀫𑁆𑀳𑁂, 𑀕𑀫𑀺𑀫𑁆𑀳𑁂.

𑀓𑀫𑁆𑀫𑁂 𑀕𑀸𑀫𑁄 𑀅𑀕𑀘𑁆𑀙𑀻𑀬𑀺𑀢𑁆𑀣 𑀢𑁂𑀦, 𑀕𑀘𑁆𑀙𑀻𑀬𑀺𑀢𑁆𑀣, 𑀅𑀕𑀜𑁆𑀙𑀺𑀬𑀺𑀢𑁆𑀣, 𑀕𑀜𑁆𑀙𑀺𑀬𑀺𑀢𑁆𑀣, 𑀅𑀕𑀫𑀻𑀬𑀺𑀢𑁆𑀣, 𑀕𑀫𑀻𑀬𑀺𑀢𑁆𑀣, 𑀅𑀕𑀫𑀺𑀢𑁆𑀣, 𑀕𑀫𑀺𑀢𑁆𑀣 𑀇𑀘𑁆𑀘𑀸𑀤𑀺. 𑀧𑀭𑀲𑁆𑀲𑀧𑀤𑀢𑁆𑀢𑁂 𑀅𑀕𑀘𑁆𑀙𑀻𑀬𑀺, 𑀕𑀘𑁆𑀙𑀻𑀬𑀺 𑀯𑀸, 𑀅𑀕𑀫𑀻𑀬𑀺, 𑀕𑀫𑀻𑀬𑀺 ¶ 𑀯𑀸, 𑀅𑀕𑀘𑁆𑀙𑀻𑀬𑀼𑀁, 𑀅𑀕𑀫𑀻𑀬𑀼𑀁 𑀯𑀸. 𑀢𑀣𑀸 𑀅𑀖𑀫𑁆𑀫𑀻𑀬𑀺, 𑀅𑀖𑀫𑁆𑀫𑀻𑀬𑀺𑀁𑀲𑀼 𑀇𑀘𑁆𑀘𑀸𑀤𑀺.

‘‘𑀳𑀺𑀬𑁆𑀬𑀢𑁆𑀢𑀦𑀻, 𑀅𑀚𑁆𑀚𑀢𑀦𑀻’’𑀢𑀺 𑀘 𑀯𑀢𑁆𑀢𑀢𑁂.

𑁪𑁭𑁧. 𑀫𑀸𑀬𑁄𑀕𑁂 𑀲𑀩𑁆𑀩𑀓𑀸𑀮𑁂 𑀘.

𑀬𑀤𑀸𑀫𑀸𑀬𑁄𑀕𑁄, 𑀢𑀤𑀸 𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀯𑀺𑀪𑀢𑁆𑀢𑀺𑀬𑁄 𑀲𑀩𑁆𑀩𑀓𑀸𑀮𑁂𑀧𑀺 𑀳𑁄𑀦𑁆𑀢𑀺, 𑀘𑀲𑀤𑁆𑀤𑁂𑀦 𑀧𑀜𑁆𑀘𑀫𑀻 𑀘. 𑀫𑀸 𑀪𑀯𑀢𑀺, 𑀫𑀸 𑀪𑀯𑀸, 𑀫𑀸 𑀪𑀯𑀺𑀲𑁆𑀲𑀢𑀻𑀢𑀺 𑀯𑀸 𑀅𑀢𑁆𑀣𑁂 𑀳𑀺𑀬𑁆𑀬𑀢𑁆𑀢𑀦𑀚𑁆𑀚𑀢𑀦𑀻𑀧𑀜𑁆𑀘𑀫𑀻 𑀯𑀺𑀪𑀢𑁆𑀢𑀺𑀬𑁄, 𑀲𑁂𑀲𑀁 𑀦𑁂𑀬𑁆𑀬𑀁, 𑀲𑁄 𑀫𑀸 𑀪𑀯𑀸, 𑀫𑀸 𑀪𑀯𑀻, 𑀫𑀸 𑀢𑁂 𑀪𑀯𑀦𑁆𑀢𑁆𑀯𑀦𑁆𑀢𑀭𑀸𑀬𑀸. 𑀫𑀸 𑀧𑀘𑀸, 𑀫𑀸 𑀧𑀘𑀻, 𑀫𑀸 𑀧𑀘𑀢𑀼. 𑀫𑀸 𑀕𑀘𑁆𑀙𑀸, 𑀫𑀸 𑀕𑀘𑁆𑀙𑀻, 𑀫𑀸 𑀕𑀘𑁆𑀙𑀢𑀼. 𑀫𑀸 𑀓𑀜𑁆𑀘𑀺 𑀧𑀸𑀧𑀫𑀸𑀕𑀫𑀸, 𑀫𑀸 𑀅𑀕𑀫𑀺, 𑀫𑀸 𑀕𑀫𑀸, 𑀫𑀸 𑀕𑀫𑀻, 𑀫𑀸 𑀕𑀫𑁂𑀢𑀼. 𑀢𑁆𑀯𑀁 𑀫𑀸 𑀕𑀘𑁆𑀙𑁄, 𑀫𑀸 𑀕𑀘𑁆𑀙𑀺, 𑀫𑀸 𑀕𑀘𑁆𑀙𑀸𑀳𑀺 𑀇𑀘𑁆𑀘𑀸𑀤𑀺.

𑀅𑀢𑀻𑀢𑀓𑀸𑀮𑀺𑀓𑀯𑀺𑀪𑀢𑁆𑀢𑀺.

𑁪𑁭𑁨. 𑀪𑀯𑀺𑀲𑁆𑀲𑀦𑁆𑀢𑀻 𑀲𑁆𑀲𑀢𑀺 𑀲𑁆𑀲𑀦𑁆𑀢𑀺, 𑀲𑁆𑀲𑀲𑀺 𑀲𑁆𑀲𑀣, 𑀲𑁆𑀲𑀸𑀫𑀺𑀲𑁆𑀲𑀸𑀫, 𑀲𑁆𑀲𑀢𑁂 𑀲𑁆𑀲𑀦𑁆𑀢𑁂, 𑀲𑁆𑀲𑀲𑁂 𑀲𑁆𑀲𑀯𑁆𑀳𑁂, 𑀲𑁆𑀲𑀁𑀲𑁆𑀲𑀸𑀫𑁆𑀳𑁂.

𑀲𑁆𑀲𑀢𑁆𑀬𑀸𑀤𑀻𑀦𑀁 𑀤𑁆𑀯𑀸𑀤𑀲𑀦𑁆𑀦𑀁 𑀯𑀘𑀦𑀸𑀦𑀁 𑀪𑀯𑀺𑀲𑁆𑀲𑀦𑁆𑀢𑀻𑀲𑀜𑁆𑀜𑀸 𑀳𑁄𑀢𑀺. 𑀪𑀯𑀺𑀲𑁆𑀲𑀢𑀻𑀢𑀺 𑀪𑀯𑀺𑀲𑁆𑀲𑀦𑁆𑀢𑁄, 𑀢𑀁𑀓𑀸𑀮𑀤𑀻𑀧𑀓𑀢𑁆𑀢𑀸 𑀅𑀬𑀁 𑀯𑀺𑀪𑀢𑁆𑀢𑀺 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀯𑀼𑀘𑁆𑀘𑀢𑀺.

𑁪𑁭𑁩. 𑀅𑀦𑀸𑀕𑀢𑁂 𑀪𑀯𑀺𑀲𑁆𑀲𑀦𑁆𑀢𑀻.

𑀅𑀦𑀸𑀕𑀢𑁂 𑀓𑀸𑀮𑁂 𑀪𑀯𑀺𑀲𑁆𑀲𑀦𑁆𑀢𑀻𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀅𑀢𑀻𑀢𑁂𑀧𑀺 𑀪𑀯𑀺𑀲𑁆𑀲𑀦𑁆𑀢𑀻, 𑀢𑀁𑀓𑀸𑀮𑀯𑀘𑀦𑀺𑀘𑁆𑀙𑀬𑀸;

‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁, 𑀲𑀦𑁆𑀥𑀸𑀯𑀺𑀲𑁆𑀲’’𑀦𑁆𑀢𑀺𑀆𑀤𑀺𑀲𑀼.

𑀦 ¶ 𑀆𑀕𑀢𑁄 𑀅𑀦𑀸𑀕𑀢𑁄, 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀁 𑀲𑀢𑀺 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀦𑀸𑀭𑀳𑁄𑀢𑀺 𑀅𑀢𑁆𑀣𑁄, 𑀇𑀓𑀸𑀭𑀸𑀕𑀫𑁄, 𑀯𑀼𑀤𑁆𑀥𑀺𑀅𑀯𑀸𑀤𑁂𑀲𑀸, 𑀲𑀭𑀮𑁄𑀧𑀸𑀤𑀺 𑀘.

𑀪𑀯𑀺𑀲𑁆𑀲𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺. 𑀪𑀯𑀺𑀲𑁆𑀲𑀲𑀺, 𑀪𑀯𑀺𑀲𑁆𑀲𑀣. 𑀪𑀯𑀺𑀲𑁆𑀲𑀸𑀫𑀺, 𑀪𑀯𑀺𑀲𑁆𑀲𑀸𑀫. 𑀪𑀯𑀺𑀲𑁆𑀲𑀢𑁂, 𑀪𑀯𑀺𑀲𑁆𑀲𑀦𑁆𑀢𑁂. 𑀪𑀯𑀺𑀲𑁆𑀲𑀲𑁂, 𑀪𑀯𑀺𑀲𑁆𑀲𑀯𑁆𑀳𑁂. 𑀪𑀯𑀺𑀲𑁆𑀲𑀁, 𑀪𑀯𑀺𑀲𑁆𑀲𑀸𑀫𑁆𑀳𑁂.

𑀓𑀫𑁆𑀫𑁂 𑀬𑀧𑁆𑀧𑀘𑁆𑀘𑀬𑀮𑁄𑀧𑁄, 𑀲𑀼𑀔𑀁 𑀢𑀬𑀸 𑀅𑀦𑀼𑀪𑀯𑀺𑀲𑁆𑀲𑀢𑁂, 𑀅𑀦𑀼𑀪𑀯𑀺𑀲𑁆𑀲𑀦𑁆𑀢𑁂. 𑀅𑀦𑀼𑀪𑀯𑀺𑀲𑁆𑀲𑀲𑁂, 𑀅𑀦𑀼𑀪𑀯𑀺𑀲𑁆𑀲𑀯𑁆𑀳𑁂. 𑀅𑀦𑀼𑀪𑀯𑀺𑀲𑁆𑀲𑀁, 𑀅𑀦𑀼𑀪𑀯𑀺𑀲𑁆𑀲𑀸𑀫𑁆𑀳𑁂. 𑀧𑀭𑀲𑁆𑀲𑀧𑀤𑀢𑁆𑀢𑁂 𑀅𑀦𑀼𑀪𑀯𑀺𑀲𑁆𑀲𑀢𑀺 𑀤𑁂𑀯𑀤𑀢𑁆𑀢𑁂𑀦, 𑀅𑀦𑀼𑀪𑀯𑀺𑀲𑁆𑀲𑀦𑁆𑀢𑀺 𑀇𑀘𑁆𑀘𑀸𑀤𑀺. 𑀪𑀸𑀯𑁂 𑀪𑀯𑀺𑀲𑁆𑀲𑀢𑁂 𑀢𑁂𑀦, 𑀬𑀧𑁆𑀧𑀘𑁆𑀘𑀬𑀮𑁄𑀧𑀸𑀪𑀸𑀯𑁂 𑀅𑀦𑀼𑀪𑀽𑀬𑀺𑀲𑁆𑀲𑀢𑁂, 𑀅𑀦𑀼𑀪𑀽𑀬𑀺𑀲𑁆𑀲𑀦𑁆𑀢𑁂 𑀇𑀘𑁆𑀘𑀸𑀤𑀺. 𑀪𑀸𑀯𑁂 𑀪𑀽𑀬𑀺𑀲𑁆𑀲𑀢𑁂.

𑀢𑀣𑀸 𑀧𑀘𑀺𑀲𑁆𑀲𑀢𑀺, 𑀧𑀘𑀺𑀲𑁆𑀲𑀦𑁆𑀢𑀺. 𑀧𑀘𑀺𑀲𑁆𑀲𑀲𑀺, 𑀧𑀘𑀺𑀲𑁆𑀲𑀣. 𑀧𑀘𑀺𑀲𑁆𑀲𑀸𑀫𑀺, 𑀧𑀘𑀺𑀲𑁆𑀲𑀸𑀫. 𑀧𑀘𑀺𑀲𑁆𑀲𑀢𑁂, 𑀧𑀘𑀺𑀲𑁆𑀲𑀦𑁆𑀢𑁂. 𑀧𑀘𑀺𑀲𑁆𑀲𑀲𑁂, 𑀧𑀘𑀺𑀲𑁆𑀲𑀯𑁆𑀳𑁂. 𑀧𑀘𑀺𑀲𑁆𑀲𑀁, 𑀧𑀘𑀺𑀲𑁆𑀲𑀸𑀫𑁆𑀳𑁂.

𑀓𑀫𑁆𑀫𑁂 𑀧𑀘𑁆𑀘𑀺𑀲𑁆𑀲𑀢𑁂 𑀑𑀤𑀦𑁄 𑀤𑁂𑀯𑀤𑀢𑁆𑀢𑁂𑀦, 𑀧𑀘𑁆𑀘𑀺𑀲𑁆𑀲𑀦𑁆𑀢𑁂 𑀇𑀘𑁆𑀘𑀸𑀤𑀺. 𑀧𑀭𑀲𑁆𑀲𑀧𑀤𑀢𑁆𑀢𑁂 𑀧𑀘𑁆𑀘𑀺𑀲𑁆𑀲𑀢𑀺, 𑀧𑀘𑁆𑀘𑀺𑀲𑁆𑀲𑀦𑁆𑀢𑀺. 𑀧𑀘𑁆𑀘𑀺𑀲𑁆𑀲𑀲𑀺, 𑀧𑀘𑁆𑀘𑀺𑀲𑁆𑀲𑀣. 𑀧𑀘𑁆𑀘𑀺𑀲𑁆𑀲𑀸𑀫𑀺, 𑀧𑀘𑁆𑀘𑀺𑀲𑁆𑀲𑀸𑀫.

𑀕𑀘𑁆𑀙𑀺𑀲𑁆𑀲𑀢𑀺, 𑀕𑀘𑁆𑀙𑀺𑀲𑁆𑀲𑀦𑁆𑀢𑀺. 𑀕𑀘𑁆𑀙𑀺𑀲𑁆𑀲𑀲𑀺, 𑀕𑀘𑁆𑀙𑀺𑀲𑁆𑀲𑀣. 𑀕𑀘𑁆𑀙𑀺𑀲𑁆𑀲𑀸𑀫𑀺, 𑀕𑀘𑁆𑀙𑀺𑀲𑁆𑀲𑀸𑀫. 𑀕𑀘𑁆𑀙𑀺𑀲𑁆𑀲𑀢𑁂, 𑀕𑀘𑁆𑀙𑀺𑀲𑁆𑀲𑀦𑁆𑀢𑁂. 𑀕𑀘𑁆𑀙𑀺𑀲𑁆𑀲𑀲𑁂, 𑀕𑀘𑁆𑀙𑀺𑀲𑁆𑀲𑀯𑁆𑀳𑁂. 𑀕𑀘𑁆𑀙𑀺𑀲𑁆𑀲𑀁, 𑀕𑀘𑁆𑀙𑀺𑀲𑁆𑀲𑀸𑀫𑁆𑀳𑁂. 𑀲𑁄 𑀲𑀕𑁆𑀕𑀁 𑀕𑀫𑀺𑀲𑁆𑀲𑀢𑀺, 𑀕𑀫𑀺𑀲𑁆𑀲𑀦𑁆𑀢𑀺. 𑀕𑀫𑀺𑀲𑁆𑀲𑀲𑀺, 𑀕𑀫𑀺𑀲𑁆𑀲𑀣. 𑀕𑀫𑀺𑀲𑁆𑀲𑀸𑀫𑀺, 𑀕𑀫𑀺𑀲𑁆𑀲𑀸𑀫 𑀇𑀘𑁆𑀘𑀸𑀤𑀺.

𑀓𑀫𑁆𑀫𑁂 𑀕𑀘𑁆𑀙𑀻𑀬𑀺𑀲𑁆𑀲𑀢𑁂, 𑀕𑀘𑁆𑀙𑀻𑀬𑀺𑀲𑁆𑀲𑀦𑁆𑀢𑁂. 𑀕𑀘𑁆𑀙𑀻𑀬𑀺𑀲𑁆𑀲𑀢𑀺, 𑀕𑀘𑁆𑀙𑀻𑀬𑀺𑀲𑁆𑀲𑀦𑁆𑀢𑀺 𑀯𑀸, 𑀕𑀫𑀻𑀬𑀺𑀲𑁆𑀲𑀢𑁂, 𑀕𑀫𑀻𑀬𑀺𑀲𑁆𑀲𑀦𑁆𑀢𑁂. 𑀕𑀫𑀻𑀬𑀺𑀲𑁆𑀲𑀢𑀺, 𑀕𑀫𑀻𑀬𑀺𑀲𑁆𑀲𑀦𑁆𑀢𑀺 𑀯𑀸 𑀇𑀘𑁆𑀘𑀸𑀤𑀺. 𑀬𑀧𑁆𑀧𑀘𑁆𑀘𑀬𑀮𑁄𑀧𑁂 𑀕𑀫𑀺𑀲𑁆𑀲𑀢𑁂 ¶ , 𑀕𑀫𑀺𑀲𑁆𑀲𑀦𑁆𑀢𑁂. 𑀕𑀫𑀺𑀲𑁆𑀲𑀢𑀺, 𑀕𑀫𑀺𑀲𑁆𑀲𑀦𑁆𑀢𑀺 𑀯𑀸. 𑀢𑀣𑀸 𑀖𑀫𑁆𑀫𑀺𑀲𑁆𑀲𑀢𑀺, 𑀖𑀫𑁆𑀫𑀺𑀲𑁆𑀲𑀦𑁆𑀢𑀺 𑀇𑀘𑁆𑀘𑀸𑀤𑀺.

𑀪𑀯𑀺𑀲𑁆𑀲𑀦𑁆𑀢𑀻𑀯𑀺𑀪𑀢𑁆𑀢𑀺.

𑁪𑁮𑁪. 𑀓𑀸𑀮𑀸𑀢𑀺𑀧𑀢𑁆𑀢𑀺 𑀲𑁆𑀲𑀸 𑀲𑁆𑀲𑀁𑀲𑀼, 𑀲𑁆𑀲𑁂 𑀲𑁆𑀲𑀣, 𑀲𑁆𑀲𑀁𑀲𑁆𑀲𑀸𑀫𑁆𑀳𑀸, 𑀲𑁆𑀲𑀣 𑀲𑁆𑀲𑀺𑀲𑀼, 𑀲𑁆𑀲𑀲𑁂 𑀲𑁆𑀲𑀯𑁆𑀳𑁂, 𑀲𑁆𑀲𑀺𑀁𑀲𑁆𑀲𑀸𑀫𑁆𑀳𑀲𑁂.

𑀲𑁆𑀲𑀸𑀤𑀻𑀦𑀁 𑀤𑁆𑀯𑀸𑀤𑀲𑀦𑁆𑀦𑀁 𑀓𑀸𑀮𑀸𑀢𑀺𑀧𑀢𑁆𑀢𑀺𑀲𑀜𑁆𑀜𑀸 𑀳𑁄𑀢𑀺. 𑀓𑀸𑀮𑀲𑁆𑀲 𑀅𑀢𑀺𑀧𑀢𑀦𑀁 𑀓𑀸𑀮𑀸𑀢𑀺𑀧𑀢𑁆𑀢𑀺, 𑀲𑀸 𑀧𑀦 𑀯𑀺𑀭𑀼𑀤𑁆𑀥𑀧𑀘𑁆𑀘𑀬𑀽𑀧𑀦𑀺𑀧𑀸𑀢𑀢𑁄, 𑀓𑀸𑀭𑀡𑀯𑁂𑀓𑀮𑁆𑀮𑀢𑁄 𑀯𑀸 𑀓𑁆𑀭𑀺𑀬𑀸𑀬 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑀺, 𑀢𑀤𑁆𑀤𑀻𑀧𑀓𑀢𑁆𑀢𑀸 𑀅𑀬𑀁 𑀯𑀺𑀪𑀢𑁆𑀢𑀺 𑀓𑀸𑀮𑀸𑀢𑀺𑀧𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀺.

𑁪𑁭𑁫. 𑀓𑁆𑀭𑀺𑀬𑀸𑀢𑀺𑀧𑀦𑁆𑀦𑁂𑀢𑀻𑀢𑁂 𑀓𑀸𑀮𑀸𑀢𑀺𑀧𑀢𑁆𑀢𑀺.

𑀓𑁆𑀭𑀺𑀬𑀸𑀢𑀺𑀧𑀦𑁆𑀦𑀫𑀢𑁆𑀢𑁂 𑀅𑀢𑀻𑀢𑁂 𑀓𑀸𑀮𑁂 𑀓𑀸𑀮𑀸𑀢𑀺𑀧𑀢𑁆𑀢𑀺𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀓𑁆𑀭𑀺𑀬𑀸𑀬 𑀅𑀢𑀺𑀧𑀢𑀦𑀁 𑀓𑁆𑀭𑀺𑀬𑀸𑀢𑀺𑀧𑀦𑁆𑀦𑀁, 𑀢𑀁 𑀧𑀦 𑀲𑀸𑀥𑀓𑀲𑀢𑁆𑀢𑀺𑀯𑀺𑀭𑀳𑁂𑀦 𑀓𑁆𑀭𑀺𑀬𑀸𑀬 𑀅𑀘𑁆𑀘𑀦𑁆𑀢𑀸𑀦𑀼𑀧𑁆𑀧𑀢𑁆𑀢𑀺. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀦 𑀓𑁆𑀭𑀺𑀬𑀸 𑀅𑀢𑀻𑀢𑀲𑀤𑁆𑀤𑁂𑀦 𑀯𑁄𑀳𑀭𑀺𑀢𑀩𑁆𑀩𑀸, 𑀢𑀣𑀸𑀧𑀺 𑀢𑀓𑁆𑀓𑀺𑀭𑀺𑀬𑀼𑀧𑁆𑀧𑀢𑁆𑀢𑀺𑀧𑁆𑀧𑀝𑀺𑀩𑀦𑁆𑀥𑀓𑀭𑀓𑁆𑀭𑀺𑀬𑀸𑀬 𑀓𑀸𑀮𑀪𑁂𑀤𑁂𑀦 𑀅𑀢𑀻𑀢𑀯𑁄𑀳𑀸𑀭𑁄 𑀮𑀩𑁆𑀪𑀢𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀓𑀸𑀮𑀸𑀢𑀺𑀧𑀢𑁆𑀢𑀺𑀧𑀭𑀲𑁆𑀲𑀧𑀤𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀲𑁆𑀲𑀸, 𑀅𑀓𑀸𑀭𑀺𑀓𑀸𑀭𑀸𑀕𑀫𑀸, 𑀯𑀼𑀤𑁆𑀥𑀺𑀅𑀯𑀸𑀤𑁂𑀲𑀸 𑀘, ‘‘𑀓𑁆𑀯𑀘𑀺 𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀲𑁆𑀲𑀸 𑀲𑁆𑀲𑀸𑀫𑁆𑀳𑀸𑀯𑀺𑀪𑀢𑁆𑀢𑀻𑀦𑀁 𑀓𑁆𑀯𑀘𑀺 𑀭𑀲𑁆𑀲𑀢𑁆𑀢𑀁, 𑀲𑁆𑀲𑁂𑀯𑀘𑀦𑀲𑁆𑀲 𑀘 𑀅𑀢𑁆𑀢𑀁.

𑀲𑁄 𑀘𑁂 𑀧𑀞𑀫𑀯𑀬𑁂 𑀧𑀩𑁆𑀩𑀚𑁆𑀚𑀁 𑀅𑀮𑀪𑀺𑀲𑁆𑀲, 𑀅𑀭𑀳𑀸 𑀅𑀪𑀯𑀺𑀲𑁆𑀲, 𑀪𑀯𑀺𑀲𑁆𑀲, 𑀅𑀪𑀯𑀺𑀲𑁆𑀲𑀸, 𑀪𑀯𑀺𑀲𑁆𑀲𑀸𑀯𑀸, 𑀢𑁂 𑀘𑁂 𑀢𑀁 𑀅𑀮𑀪𑀺𑀲𑁆𑀲𑀁𑀲𑀼, 𑀅𑀭𑀳𑀦𑁆𑀢𑁄 𑀅𑀪𑀯𑀺𑀲𑁆𑀲𑀁𑀲𑀼, 𑀪𑀯𑀺𑀲𑁆𑀲𑀁𑀲𑀼. 𑀏𑀯𑀁 𑀢𑁆𑀯𑀁 𑀅𑀪𑀯𑀺𑀲𑁆𑀲, 𑀪𑀯𑀺𑀲𑁆𑀲, 𑀅𑀪𑀯𑀺𑀲𑁆𑀲𑁂 𑀯𑀸, 𑀢𑀼𑀫𑁆𑀳𑁂 𑀅𑀪𑀯𑀺𑀲𑁆𑀲𑀣, 𑀪𑀯𑀺𑀲𑁆𑀲𑀣. 𑀅𑀳𑀁 𑀅𑀪𑀯𑀺𑀲𑁆𑀲𑀁, 𑀪𑀯𑀺𑀲𑁆𑀲𑀁, 𑀫𑀬𑀁 ¶ 𑀅𑀪𑀯𑀺𑀲𑁆𑀲𑀫𑁆𑀳, 𑀪𑀯𑀺𑀲𑁆𑀲𑀫𑁆𑀳, 𑀅𑀪𑀯𑀺𑀲𑁆𑀲𑀸𑀫𑁆𑀳𑀸, 𑀪𑀯𑀺𑀲𑁆𑀲𑀸𑀫𑁆𑀳𑀸 𑀯𑀸. 𑀲𑁄 𑀅𑀪𑀯𑀺𑀲𑁆𑀲𑀣, 𑀅𑀪𑀯𑀺𑀲𑁆𑀲𑀺𑀲𑀼. 𑀅𑀪𑀯𑀺𑀲𑁆𑀲𑀲𑁂, 𑀅𑀪𑀯𑀺𑀲𑁆𑀲𑀯𑁆𑀳𑁂. 𑀅𑀪𑀯𑀺𑀲𑁆𑀲𑀺𑀁, 𑀅𑀪𑀯𑀺𑀲𑁆𑀲𑀸𑀫𑁆𑀳𑀲𑁂.

𑀓𑀫𑁆𑀫𑁂 𑀅𑀦𑁆𑀯𑀪𑀯𑀺𑀲𑁆𑀲𑀣, 𑀅𑀦𑁆𑀯𑀪𑀯𑀺𑀲𑁆𑀲𑀺𑀲𑀼. 𑀅𑀦𑁆𑀯𑀪𑀽𑀬𑀺𑀲𑁆𑀲𑀣 𑀯𑀸 𑀇𑀘𑁆𑀘𑀸𑀤𑀺. 𑀧𑀭𑀲𑁆𑀲𑀧𑀤𑀢𑁆𑀢𑁂 𑀅𑀦𑁆𑀯𑀪𑀯𑀺𑀲𑁆𑀲, 𑀅𑀦𑁆𑀯𑀪𑀯𑀺𑀲𑁆𑀲𑀁𑀲𑀼. 𑀅𑀦𑁆𑀯𑀪𑀽𑀬𑀺𑀲𑁆𑀲 𑀯𑀸 𑀇𑀘𑁆𑀘𑀸𑀤𑀺. 𑀪𑀸𑀯𑁂 𑀅𑀪𑀯𑀺𑀲𑁆𑀲𑀣 𑀤𑁂𑀯𑀤𑀢𑁆𑀢𑁂𑀦, 𑀅𑀪𑀽𑀬𑀺𑀲𑁆𑀲𑀣.

𑀢𑀣𑀸 𑀲𑁄 𑀘𑁂 𑀢𑀁 𑀥𑀦𑀁 𑀅𑀮𑀪𑀺𑀲𑁆𑀲, 𑀑𑀤𑀦𑀁 𑀅𑀧𑀘𑀺𑀲𑁆𑀲, 𑀧𑀘𑀺𑀲𑁆𑀲, 𑀅𑀧𑀘𑀺𑀲𑁆𑀲𑀸, 𑀧𑀘𑀺𑀲𑁆𑀲𑀸 𑀯𑀸, 𑀅𑀧𑀘𑀺𑀲𑁆𑀲𑀁𑀲𑀼, 𑀧𑀘𑀺𑀲𑁆𑀲𑀁𑀲𑀼. 𑀅𑀧𑀘𑀺𑀲𑁆𑀲, 𑀧𑀘𑀺𑀲𑁆𑀲, 𑀅𑀧𑀘𑀺𑀲𑁆𑀲𑁂, 𑀧𑀘𑀺𑀲𑁆𑀲𑁂 𑀯𑀸, 𑀅𑀧𑀘𑀺𑀲𑁆𑀲𑀣, 𑀧𑀘𑀺𑀲𑁆𑀲𑀣. 𑀅𑀧𑀘𑀺𑀲𑁆𑀲𑀁, 𑀧𑀘𑀺𑀲𑁆𑀲𑀁, 𑀅𑀧𑀘𑀺𑀲𑁆𑀲𑀫𑁆𑀳, 𑀧𑀘𑀺𑀲𑁆𑀲𑀫𑁆𑀳, 𑀅𑀧𑀘𑀺𑀲𑁆𑀲𑀸𑀫𑁆𑀳𑀸, 𑀧𑀘𑀺𑀲𑁆𑀲𑀸𑀫𑁆𑀳𑀸 𑀯𑀸. 𑀅𑀧𑀘𑀺𑀲𑁆𑀲𑀣, 𑀧𑀘𑀺𑀲𑁆𑀲𑀣, 𑀅𑀧𑀘𑀺𑀲𑁆𑀲𑀺𑀲𑀼, 𑀧𑀘𑀺𑀲𑁆𑀲𑀺𑀲𑀼. 𑀅𑀧𑀘𑀺𑀲𑁆𑀲𑀲𑁂, 𑀧𑀘𑀺𑀲𑁆𑀲𑀲𑁂, 𑀅𑀧𑀘𑀺𑀲𑁆𑀲𑀯𑁆𑀳𑁂, 𑀧𑀘𑀺𑀲𑁆𑀲𑀯𑁆𑀳𑁂. 𑀅𑀧𑀘𑀺𑀲𑁆𑀲𑀺𑀁, 𑀧𑀘𑀺𑀲𑁆𑀲𑀺𑀁, 𑀅𑀧𑀘𑀺𑀲𑁆𑀲𑀸𑀫𑁆𑀳𑀲𑁂, 𑀧𑀘𑀺𑀲𑁆𑀲𑀸𑀫𑁆𑀳𑀲𑁂.

𑀓𑀫𑁆𑀫𑁂 𑀅𑀧𑀘𑀺𑀲𑁆𑀲𑀣 𑀑𑀤𑀦𑁄 𑀤𑁂𑀯𑀤𑀢𑁆𑀢𑁂𑀦, 𑀅𑀧𑀘𑀺𑀲𑁆𑀲𑀺𑀲𑀼. 𑀬𑀧𑁆𑀧𑀘𑁆𑀘𑀬𑀮𑁄𑀧𑀸𑀪𑀸𑀯𑁂 𑀅𑀧𑀘𑀻𑀬𑀺𑀲𑁆𑀲𑀣 𑀇𑀘𑁆𑀘𑀸𑀤𑀺. 𑀧𑀭𑀲𑁆𑀲𑀧𑀤𑀢𑁆𑀢𑁂 𑀅𑀧𑀘𑁆𑀘𑀺𑀲𑁆𑀲 𑀢𑁂𑀦, 𑀧𑀘𑁆𑀘𑀺𑀲𑁆𑀲, 𑀅𑀧𑀘𑁆𑀘𑀺𑀲𑁆𑀲𑀸, 𑀧𑀘𑁆𑀘𑀺𑀲𑁆𑀲𑀸 𑀯𑀸, 𑀅𑀧𑀘𑁆𑀘𑀺𑀲𑁆𑀲𑀁𑀲𑀼, 𑀧𑀘𑁆𑀘𑀺𑀲𑁆𑀲𑀁𑀲𑀼 𑀇𑀘𑁆𑀘𑀸𑀤𑀺.

𑀲𑁄 𑀅𑀕𑀘𑁆𑀙𑀺𑀲𑁆𑀲, 𑀕𑀘𑁆𑀙𑀺𑀲𑁆𑀲, 𑀅𑀕𑀘𑁆𑀙𑀺𑀲𑁆𑀲𑀸, 𑀕𑀘𑁆𑀙𑀺𑀲𑁆𑀲𑀸𑀯𑀸, 𑀅𑀕𑀘𑁆𑀙𑀺𑀲𑁆𑀲𑀁𑀲𑀼, 𑀕𑀘𑁆𑀙𑀺𑀲𑁆𑀲𑀁𑀲𑀼. 𑀢𑁆𑀯𑀁 𑀅𑀕𑀘𑁆𑀙𑀺𑀲𑁆𑀲, 𑀕𑀘𑁆𑀙𑀺𑀲𑁆𑀲, 𑀅𑀕𑀘𑁆𑀙𑀺𑀲𑁆𑀲𑁂, 𑀕𑀘𑁆𑀙𑀺𑀲𑁆𑀲𑁂 𑀯𑀸, 𑀅𑀕𑀘𑁆𑀙𑀺𑀲𑁆𑀲𑀣, 𑀕𑀘𑁆𑀙𑀺𑀲𑁆𑀲𑀣. 𑀅𑀕𑀘𑁆𑀙𑀺𑀲𑁆𑀲𑀁, 𑀕𑀘𑁆𑀙𑀺𑀲𑁆𑀲𑀁, 𑀅𑀕𑀘𑁆𑀙𑀺𑀲𑁆𑀲𑀫𑁆𑀳, 𑀕𑀘𑁆𑀙𑀺𑀲𑁆𑀲𑀫𑁆𑀳, 𑀅𑀕𑀘𑁆𑀙𑀺𑀲𑁆𑀲𑀸𑀫𑁆𑀳𑀸, 𑀕𑀘𑁆𑀙𑀺𑀲𑁆𑀲𑀸𑀫𑁆𑀳𑀸 𑀯𑀸. 𑀅𑀕𑀫𑀺𑀲𑁆𑀲, 𑀕𑀫𑀺𑀲𑁆𑀲, 𑀅𑀕𑀫𑀺𑀲𑁆𑀲𑀸, 𑀕𑀫𑀺𑀲𑁆𑀲𑀸 𑀯𑀸, 𑀅𑀕𑀫𑀺𑀲𑁆𑀲𑀁𑀲𑀼, 𑀕𑀫𑀺𑀲𑁆𑀲𑀁𑀲𑀼. 𑀅𑀕𑀫𑀺𑀲𑁆𑀲, 𑀕𑀫𑀺𑀲𑁆𑀲, 𑀅𑀕𑀫𑀺𑀲𑁆𑀲𑁂 𑀯𑀸, 𑀅𑀕𑀫𑀺𑀲𑁆𑀲𑀣, 𑀕𑀫𑀺𑀲𑁆𑀲𑀣. 𑀅𑀕𑀫𑀺𑀲𑁆𑀲𑀁 ¶ , 𑀕𑀫𑀺𑀲𑁆𑀲𑀁, 𑀅𑀕𑀫𑀺𑀲𑁆𑀲𑀫𑁆𑀳, 𑀕𑀫𑀺𑀲𑁆𑀲𑀫𑁆𑀳, 𑀅𑀕𑀫𑀺𑀲𑁆𑀲𑀸𑀫𑁆𑀳𑀸, 𑀕𑀫𑀺𑀲𑁆𑀲𑀸𑀫𑁆𑀳𑀸 𑀯𑀸. 𑀅𑀕𑀘𑁆𑀙𑀺𑀲𑁆𑀲𑀣, 𑀕𑀘𑁆𑀙𑀺𑀲𑁆𑀲𑀣 𑀯𑀸 𑀇𑀘𑁆𑀘𑀸𑀤𑀺.

𑀓𑀫𑁆𑀫𑁂 𑀅𑀕𑀘𑁆𑀙𑀻𑀬𑀺𑀲𑁆𑀲𑀣, 𑀅𑀕𑀫𑀻𑀬𑀺𑀲𑁆𑀲𑀣, 𑀅𑀕𑀘𑁆𑀙𑀻𑀬𑀺𑀲𑁆𑀲, 𑀅𑀕𑀫𑀻𑀬𑀺𑀲𑁆𑀲𑀇𑀘𑁆𑀘𑀸𑀤𑀺. 𑀢𑀣𑀸 𑀅𑀖𑀫𑁆𑀫𑀺𑀲𑁆𑀲𑀸, 𑀅𑀖𑀫𑁆𑀫𑀺𑀲𑁆𑀲𑀁𑀲𑀼 𑀇𑀘𑁆𑀘𑀸𑀤𑀺.

𑀓𑀸𑀮𑀸𑀢𑀺𑀧𑀢𑁆𑀢𑀺𑀯𑀺𑀪𑀢𑁆𑀢𑀺.

𑀧𑀜𑁆𑀘𑀫𑀻 𑀲𑀢𑁆𑀢𑀫𑀻 𑀯𑀢𑁆𑀢-𑀫𑀸𑀦𑀸 𑀲𑀫𑁆𑀧𑀢𑀺𑀦𑀸𑀕𑀢𑁂;

𑀪𑀯𑀺𑀲𑁆𑀲𑀦𑁆𑀢𑀻 𑀧𑀭𑁄𑀓𑁆𑀔𑀸𑀤𑀻, 𑀘𑀢𑀲𑁆𑀲𑁄𑀢𑀻𑀢𑀓𑀸𑀮𑀺𑀓𑀸.

𑀙𑀓𑀸𑀮𑀺𑀓𑀯𑀺𑀪𑀢𑁆𑀢𑀺𑀯𑀺𑀥𑀸𑀦𑀁.

𑀯𑀺𑀓𑀭𑀡𑀯𑀺𑀥𑀸𑀦

𑀇𑀲𑀼 𑀇𑀘𑁆𑀙𑀸𑀓𑀦𑁆𑀢𑀻𑀲𑀼, 𑀧𑀼𑀭𑁂 𑀯𑀺𑀬 𑀥𑀸𑀢𑁆𑀯𑀦𑁆𑀢𑀮𑁄𑀧𑁄, 𑀢𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺, 𑀅𑀧𑁆𑀧𑀘𑁆𑀘𑀬𑁄 𑀘.

‘‘𑀥𑀸𑀢𑀽𑀦’’𑀦𑁆𑀢𑀺 𑀯𑀢𑁆𑀢𑀫𑀸𑀦𑁂 𑁋

𑁪𑁭𑁬. 𑀇𑀲𑀼𑀬𑀫𑀽𑀦𑀫𑀦𑁆𑀢𑁄 𑀘𑁆𑀙𑁄 𑀯𑀸.

𑀇𑀲𑀼𑀬𑀫𑀼𑀇𑀘𑁆𑀘𑁂𑀢𑁂𑀲𑀁 𑀥𑀸𑀢𑀽𑀦𑀁 𑀅𑀦𑁆𑀢𑁄 𑀘𑁆𑀙𑁄 𑀳𑁄𑀢𑀺 𑀯𑀸. 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄𑀬𑀁 𑀯𑀸𑀲𑀤𑁆𑀤𑁄, ‘‘𑀅𑀦𑁆𑀢𑁄 𑀘𑁆𑀙𑁄 𑀯𑀸’’𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀆𑀲𑀲𑁆𑀲𑀧𑀺. 𑀲𑁄 𑀲𑀕𑁆𑀕𑀁 𑀇𑀘𑁆𑀙𑀢𑀺, 𑀇𑀘𑁆𑀙𑀦𑁆𑀢𑀺. 𑀇𑀘𑁆𑀙𑀲𑀺, 𑀇𑀘𑁆𑀙𑀣. 𑀇𑀘𑁆𑀙𑀸𑀫𑀺, 𑀇𑀘𑁆𑀙𑀸𑀫. 𑀘𑁆𑀙𑀸𑀤𑁂𑀲𑀸𑀪𑀸𑀯𑁂 𑀅𑀲𑀁𑀬𑁄𑀕𑀦𑁆𑀢𑀢𑁆𑀢𑀸 ‘‘𑀅𑀜𑁆𑀜𑁂𑀲𑀼 𑀘𑀸’’𑀢𑀺 𑀯𑀼𑀤𑁆𑀥𑀺, 𑀏𑀲𑀢𑀺, 𑀏𑀲𑀦𑁆𑀢𑀺 𑀇𑀘𑁆𑀘𑀸𑀤𑀺.

𑀓𑀫𑁆𑀫𑁂 𑀅𑀢𑁆𑀢𑀦𑁄𑀧𑀤𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀧𑀭𑀲𑁆𑀲𑀧𑀤𑀢𑁆𑀢𑀫𑁂𑀯 𑀧𑀬𑁄𑀚𑀻𑀬𑀢𑀺, 𑀢𑁂𑀦 𑀘𑁂𑀢𑁆𑀣 𑀅𑀢𑁆𑀢𑀦𑁄𑀧𑀤𑁂 𑀭𑀽𑀧𑀸𑀦𑀺 𑀲𑀗𑁆𑀔𑀺𑀧𑀺𑀲𑁆𑀲𑀸𑀫. 𑀲𑁄 𑀇𑀘𑁆𑀙𑀻𑀬𑀢𑀺, 𑀏𑀲𑀻𑀬𑀢𑀺, 𑀇𑀲𑁆𑀲𑀢𑁂, 𑀇𑀲𑁆𑀲𑀢𑀺, 𑀬𑀓𑀸𑀭𑀲𑁆𑀲 ¶ 𑀧𑀼𑀩𑁆𑀩𑀭𑀽𑀧𑀢𑁆𑀢𑀁. 𑀢𑀣𑀸 𑀇𑀘𑁆𑀙𑀢𑀼, 𑀏𑀲𑀢𑀼. 𑀇𑀘𑁆𑀙𑁂𑀬𑁆𑀬, 𑀏𑀲𑁂𑀬𑁆𑀬. 𑀧𑀭𑁄𑀓𑁆𑀔𑀸𑀳𑀺𑀬𑁆𑀬𑀢𑁆𑀢𑀦𑀻𑀲𑀼 𑀧𑀦 𑀭𑀽𑀧𑀸𑀦𑀺 𑀲𑀩𑁆𑀩𑀢𑁆𑀣 𑀧𑀬𑁄𑀕𑀫𑀦𑀼𑀕𑀫𑁆𑀫 𑀧𑀬𑁄𑀚𑁂𑀢𑀩𑁆𑀩𑀸𑀦𑀺, 𑀇𑀘𑁆𑀙𑀺, 𑀏𑀲𑀺. 𑀇𑀘𑁆𑀙𑀺𑀲𑁆𑀲𑀢𑀺, 𑀏𑀲𑀺𑀲𑁆𑀲𑀢𑀺. 𑀇𑀘𑁆𑀙𑀺𑀲𑁆𑀲𑀸, 𑀏𑀲𑀺𑀲𑁆𑀲𑀸 𑀇𑀘𑁆𑀙𑀸𑀤𑀺.

𑀬𑀫𑀼 𑀉𑀧𑀭𑀫𑁂, 𑀦𑀺𑀧𑀼𑀩𑁆𑀩𑁄, 𑀘𑁆𑀙𑀸𑀤𑁂𑀲𑁄 𑀘. 𑀦𑀺𑀬𑀘𑁆𑀙𑀢𑀺, 𑀦𑀺𑀬𑀘𑁆𑀙𑀦𑁆𑀢𑀺. 𑀦𑀺𑀬𑀫𑀢𑀺, 𑀦𑀺𑀬𑀫𑀦𑁆𑀢𑀺. 𑀲𑀁𑀧𑀼𑀩𑁆𑀩𑁄 ‘‘𑀲𑀬𑁂 𑀘𑀸’’𑀢𑀺 𑀜𑀢𑁆𑀢𑀁, 𑀤𑁆𑀯𑀺𑀢𑁆𑀢𑀜𑁆𑀘. 𑀲𑀜𑁆𑀜𑀫𑀢𑀺, 𑀲𑀜𑁆𑀜𑀫𑀦𑁆𑀢𑀺.

𑀓𑀫𑁆𑀫𑁂 𑀦𑀺𑀬𑀘𑁆𑀙𑀻𑀬𑀢𑀺, 𑀦𑀺𑀬𑀫𑀻𑀬𑀢𑀺, 𑀦𑀺𑀬𑀫𑁆𑀫𑀢𑀺, 𑀲𑀜𑁆𑀜𑀫𑀻𑀬𑀢𑀺 𑀯𑀸. 𑀢𑀣𑀸 𑀦𑀺𑀬𑀘𑁆𑀙𑀢𑀼, 𑀲𑀜𑁆𑀜𑀫𑀢𑀼. 𑀦𑀺𑀬𑀘𑁆𑀙𑁂𑀬𑁆𑀬, 𑀲𑀜𑁆𑀜𑀫𑁂𑀬𑁆𑀬. 𑀦𑀺𑀬𑀘𑁆𑀙𑀻, 𑀲𑀜𑁆𑀜𑀫𑀻. 𑀦𑀺𑀬𑀘𑁆𑀙𑀺𑀲𑁆𑀲𑀢𑀺, 𑀲𑀜𑁆𑀜𑀫𑀺𑀲𑁆𑀲𑀢𑀺. 𑀦𑀺𑀬𑀘𑁆𑀙𑀺𑀲𑁆𑀲, 𑀲𑀜𑁆𑀜𑀫𑀺𑀲𑁆𑀲 𑀇𑀘𑁆𑀘𑀸𑀤𑀺.

𑀆𑀲 𑀉𑀧𑀯𑁂𑀲𑀦𑁂, 𑀬𑁄𑀕𑀯𑀺𑀪𑀸𑀕𑁂𑀦 𑀘𑁆𑀙𑀸𑀤𑁂𑀲𑁄, 𑀭𑀲𑁆𑀲𑀢𑁆𑀢𑀁. 𑀅𑀘𑁆𑀙𑀢𑀺, 𑀅𑀘𑁆𑀙𑀦𑁆𑀢𑀺. 𑀅𑀘𑁆𑀙𑀲𑀺, 𑀅𑀘𑁆𑀙𑀣. 𑀅𑀘𑁆𑀙𑀸𑀫𑀺, 𑀅𑀘𑁆𑀙𑀸𑀫. 𑀅𑀜𑁆𑀜𑀢𑁆𑀭 𑀉𑀧𑀧𑀼𑀩𑁆𑀩𑁄 𑀉𑀧𑀸𑀲𑀢𑀺, 𑀉𑀧𑀸𑀲𑀦𑁆𑀢𑀺. 𑀅𑀘𑁆𑀙𑀻𑀬𑀢𑀺, 𑀉𑀧𑀸𑀲𑀻𑀬𑀢𑀺. 𑀅𑀘𑁆𑀙𑀢𑀼, 𑀉𑀧𑀸𑀲𑀢𑀼. 𑀅𑀘𑁆𑀙𑁂𑀬𑁆𑀬, 𑀉𑀧𑀸𑀲𑁂𑀬𑁆𑀬. 𑀅𑀘𑁆𑀙𑀻, 𑀉𑀧𑀸𑀲𑀻. 𑀅𑀘𑁆𑀙𑀺𑀲𑁆𑀲𑀢𑀺, 𑀉𑀧𑀸𑀲𑀺𑀲𑁆𑀲𑀢𑀺. 𑀅𑀘𑁆𑀙𑀺𑀲𑁆𑀲, 𑀉𑀧𑀸𑀲𑀺𑀲𑁆𑀲 𑀇𑀘𑁆𑀘𑀸𑀤𑀺.

𑀮𑀪 𑀮𑀸𑀪𑁂, 𑀮𑀪𑀢𑀺, 𑀮𑀪𑀦𑁆𑀢𑀺. 𑀮𑀪𑀲𑀺, 𑀮𑀪𑀣. 𑀮𑀪𑀸𑀫𑀺, 𑀮𑀪𑀸𑀫. 𑀮𑀪𑀢𑁂, 𑀮𑀪𑀦𑁆𑀢𑁂. 𑀮𑀪𑀲𑁂, 𑀮𑀪𑀯𑁆𑀳𑁂. 𑀮𑀪𑁂, 𑀮𑀪𑀸𑀫𑁆𑀳𑁂.

𑀓𑀫𑁆𑀫𑁂 𑀬𑀓𑀸𑀭𑀲𑁆𑀲 𑀧𑀼𑀩𑁆𑀩𑀭𑀽𑀧𑀢𑁆𑀢𑁂 𑀓𑀢𑁂 ‘‘𑀓𑁆𑀯𑀘𑀺 𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀧𑀼𑀭𑀺𑀫𑀪𑀓𑀸𑀭𑀲𑁆𑀲 𑀩𑀓𑀸𑀭𑁄, 𑀮𑀩𑁆𑀪𑀢𑁂, 𑀮𑀩𑁆𑀪𑀦𑁆𑀢𑁂. 𑀮𑀩𑁆𑀪𑀢𑀺, 𑀮𑀩𑁆𑀪𑀦𑁆𑀢𑀺. 𑀮𑀩𑁆𑀪𑀢𑀁, 𑀮𑀩𑁆𑀪𑀢𑀼. 𑀮𑀩𑁆𑀪𑁂, 𑀮𑀩𑁆𑀪𑁂𑀬𑁆𑀬.

𑀅𑀚𑁆𑀚𑀢𑀦𑀺𑀫𑁆𑀳𑀺 ‘‘𑀯𑀸, 𑀅𑀦𑁆𑀢𑀮𑁄𑀧𑁄’’𑀢𑀺 𑀘 𑀯𑀢𑁆𑀢𑀫𑀸𑀦𑁂 𑁋

𑁪𑁭𑁭. 𑀮𑀪𑀲𑁆𑀫𑀸 𑀈 𑀇𑀁𑀦𑀁 𑀢𑁆𑀣𑀢𑁆𑀣𑀁.

𑀮𑀪𑀇𑀘𑁆𑀘𑁂𑀢𑀲𑁆𑀫𑀸 𑀥𑀸𑀢𑀼𑀢𑁄 𑀧𑀭𑁂𑀲𑀁 𑀈𑀇𑀁𑀦𑀁 𑀯𑀺𑀪𑀢𑁆𑀢𑀻𑀦𑀁 𑀢𑁆𑀣 𑀢𑁆𑀣𑀁𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺 𑀯𑀸, 𑀥𑀸𑀢𑁆𑀯𑀦𑁆𑀢𑀲𑁆𑀲 𑀮𑁄𑀧𑁄 ¶ 𑀘. 𑀅𑀮𑀢𑁆𑀣, 𑀅𑀮𑀪𑀺, 𑀮𑀪𑀺, 𑀅𑀮𑀪𑀺𑀁𑀲𑀼, 𑀮𑀪𑀺𑀁𑀲𑀼. 𑀅𑀮𑀪𑁄, 𑀮𑀪𑁄, 𑀅𑀮𑀪𑀺, 𑀮𑀪𑀺, 𑀅𑀮𑀪𑀺𑀢𑁆𑀣, 𑀮𑀪𑀺𑀢𑁆𑀣. 𑀅𑀮𑀢𑁆𑀣𑀁, 𑀅𑀮𑀪𑀺𑀁, 𑀮𑀪𑀺𑀁, 𑀅𑀮𑀪𑀺𑀫𑁆𑀳, 𑀮𑀪𑀺𑀫𑁆𑀳 𑀇𑀘𑁆𑀘𑀸𑀤𑀺.

𑀪𑀯𑀺𑀲𑁆𑀲𑀦𑁆𑀢𑀺𑀫𑁆𑀳𑀺 ‘‘𑀓𑀭𑀲𑁆𑀲 𑀲𑀧𑁆𑀧𑀘𑁆𑀘𑀬𑀲𑁆𑀲 𑀓𑀸𑀳𑁄’’𑀢𑀺 𑀏𑀢𑁆𑀣 𑀲𑀧𑁆𑀧𑀘𑁆𑀘𑀬𑀕𑁆𑀕𑀳𑀡𑁂𑀦 𑀯𑀘 𑀫𑀼𑀘 𑀪𑀼𑀚𑀸𑀤𑀺𑀢𑁄 𑀲𑁆𑀲𑀲𑁆𑀲𑀔𑀸𑀤𑁂𑀲𑁄, 𑀯𑀲 𑀙𑀺𑀤 𑀮𑀪𑀸𑀤𑀺𑀢𑁄 𑀙𑀸𑀤𑁂𑀲𑁄 𑀘 𑀯𑀸 𑀳𑁄𑀢𑀻𑀢𑀺 𑀲𑁆𑀲𑀲𑁆𑀲 𑀙𑀸𑀤𑁂𑀲𑁄, ‘‘𑀩𑁆𑀬𑀜𑁆𑀚𑀦𑀦𑁆𑀢𑀲𑁆𑀲 𑀘𑁄 𑀙𑀧𑁆𑀧𑀘𑁆𑀘𑀬𑁂𑀲𑀼 𑀘𑀸’’𑀢𑀺 𑀥𑀸𑀢𑁆𑀯𑀦𑁆𑀢𑀲𑁆𑀲 𑀘𑀓𑀸𑀭𑁄, 𑀮𑀘𑁆𑀙𑀢𑀺, 𑀮𑀘𑁆𑀙𑀦𑁆𑀢𑀺. 𑀮𑀘𑁆𑀙𑀲𑀺, 𑀮𑀘𑁆𑀙𑀣. 𑀮𑀘𑁆𑀙𑀸𑀫𑀺, 𑀮𑀘𑁆𑀙𑀸𑀫. 𑀙𑀸𑀤𑁂𑀲𑀸𑀪𑀸𑀯𑁂 𑀮𑀪𑀺𑀲𑁆𑀲𑀢𑀺, 𑀮𑀪𑀺𑀲𑁆𑀲𑀦𑁆𑀢𑀺. 𑀮𑀪𑀺𑀲𑁆𑀲𑀲𑀺, 𑀮𑀪𑀺𑀲𑁆𑀲𑀣. 𑀮𑀪𑀺𑀲𑁆𑀲𑀸𑀫𑀺, 𑀮𑀪𑀺𑀲𑁆𑀲𑀸𑀫 𑀇𑀘𑁆𑀘𑀸𑀤𑀺. 𑀅𑀮𑀪𑀺𑀲𑁆𑀲, 𑀅𑀮𑀪𑀺𑀲𑁆𑀲𑀁𑀲𑀼 𑀇𑀘𑁆𑀘𑀸𑀤𑀺.

𑀯𑀘 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁, 𑀯𑀘𑀢𑀺, 𑀯𑀘𑀦𑁆𑀢𑀺. 𑀯𑀘𑀲𑀺, 𑀯𑀘𑀣. 𑀯𑀘𑀸𑀫𑀺, 𑀯𑀘𑀸𑀫.

𑀓𑀫𑁆𑀫𑁂 𑀅𑀢𑁆𑀢𑀦𑁄𑀧𑀤𑁂, 𑀬𑀧𑁆𑀧𑀘𑁆𑀘𑀬𑁂 𑀘 𑀓𑀢𑁂 𑁋

𑁪𑁭𑁮. 𑀯𑀘 𑀯𑀲 𑀯𑀳𑀸𑀤𑀻𑀦𑀫𑀼𑀓𑀸𑀭𑁄 𑀯𑀲𑁆𑀲 𑀬𑁂.

𑀯𑀘 𑀯𑀲 𑀯𑀳𑀇𑀘𑁆𑀘𑁂𑀯𑀫𑀸𑀤𑀻𑀦𑀁 𑀥𑀸𑀢𑀽𑀦𑀁 𑀯𑀓𑀸𑀭𑀲𑁆𑀲 𑀉𑀓𑀸𑀭𑁄 𑀳𑁄𑀢𑀺 𑀬𑀧𑁆𑀧𑀘𑁆𑀘𑀬𑁂 𑀧𑀭𑁂, 𑀆𑀤𑀺𑀲𑀤𑁆𑀤𑁂𑀦 𑀯𑀟𑁆𑀠𑀲𑁆𑀲 𑀘. ‘‘𑀯𑀲𑁆𑀲 𑀅 𑀯’’𑀇𑀢𑀺 𑀲𑀫𑀸𑀲𑁂𑀦 𑀤𑀼𑀢𑀺𑀬𑀜𑁆𑀘𑁂𑀢𑁆𑀣 𑀯𑀕𑁆𑀕𑀳𑀡𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀢𑁂𑀦 𑀅𑀓𑀸𑀭𑀲𑁆𑀲𑀧𑀺 𑀉𑀓𑀸𑀭𑁄 𑀳𑁄𑀢𑀺, 𑀧𑀼𑀭𑀺𑀫𑀧𑀓𑁆𑀔𑁂 𑀧𑀭𑀮𑁄𑀧𑁄. ‘‘𑀢𑀲𑁆𑀲 𑀘𑀯𑀕𑁆𑀕’’𑀇𑀘𑁆𑀘𑀸𑀤𑀺𑀦𑀸 𑀲𑀥𑀸𑀢𑁆𑀯𑀦𑁆𑀢𑀲𑁆𑀲 𑀬𑀓𑀸𑀭𑀲𑁆𑀲 𑀘𑀓𑀸𑀭𑁄, 𑀤𑁆𑀯𑀺𑀢𑁆𑀢𑀁. 𑀉𑀘𑁆𑀘𑀢𑁂, 𑀉𑀘𑁆𑀘𑀦𑁆𑀢𑁂. 𑀯𑀼𑀘𑁆𑀘𑀢𑁂, 𑀯𑀼𑀘𑁆𑀘𑀦𑁆𑀢𑁂. 𑀯𑀼𑀘𑁆𑀘𑀢𑀺, 𑀯𑀼𑀘𑁆𑀘𑀦𑁆𑀢𑀺 𑀯𑀸 𑀇𑀘𑁆𑀘𑀸𑀤𑀺. 𑀢𑀣𑀸 𑀯𑀘𑀢𑀼, 𑀯𑀼𑀘𑁆𑀘𑀢𑀼. 𑀯𑀘𑁂𑀬𑁆𑀬, 𑀯𑀼𑀘𑁆𑀘𑁂𑀬𑁆𑀬. 𑀅𑀯𑀘𑀸, 𑀅𑀯𑀘𑁆𑀘𑀸, 𑀅𑀯𑀘𑀽, 𑀅𑀯𑀘𑁆𑀘𑀽. 𑀅𑀯𑀘, 𑀅𑀯𑀘𑁄, 𑀅𑀯𑀘𑀼𑀢𑁆𑀣. 𑀅𑀯𑀘, 𑀅𑀯𑀘𑀁, 𑀅𑀯𑀘𑀫𑁆𑀳𑀸. 𑀅𑀯𑀘𑀼𑀢𑁆𑀣 𑀇𑀘𑁆𑀘𑀸𑀤𑀺.

𑁪𑁭𑁯. 𑀯𑀘𑀲𑁆𑀲𑀚𑁆𑀚𑀢𑀦𑀺𑀫𑁆𑀳𑀺 ¶ 𑀫𑀓𑀸𑀭𑁄 𑀑.

𑀯𑀘𑀇𑀘𑁆𑀘𑁂𑀢𑀲𑁆𑀲 𑀥𑀸𑀢𑀼𑀲𑁆𑀲 𑀅𑀓𑀸𑀭𑁄 𑀑𑀢𑁆𑀢𑀫𑀸𑀧𑀚𑁆𑀚𑀢𑁂 𑀅𑀚𑁆𑀚𑀢𑀦𑀺𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺. 𑀅𑀯𑁄𑀘𑀺, 𑀅𑀯𑁄𑀘𑀼𑀁. 𑀅𑀯𑁄𑀘𑁄, 𑀅𑀯𑁄𑀘𑀼𑀢𑁆𑀣. 𑀅𑀯𑁄𑀘𑀺𑀁, 𑀅𑀯𑁄𑀘𑀼𑀫𑁆𑀳, 𑀉𑀓𑀸𑀭𑀸𑀕𑀫𑁄. 𑀅𑀯𑁄𑀘, 𑀭𑀲𑁆𑀲𑀢𑁆𑀢𑀁, 𑀅𑀯𑁄𑀘𑀼 𑀇𑀘𑁆𑀘𑀸𑀤𑀺. 𑀅𑀯𑀼𑀘𑁆𑀘𑀺𑀢𑁆𑀣.

𑀪𑀯𑀺𑀲𑁆𑀲𑀦𑁆𑀢𑀺𑀫𑁆𑀳𑀺 𑀲𑀧𑁆𑀧𑀘𑁆𑀘𑀬𑀕𑁆𑀕𑀳𑀡𑁂𑀦 𑀲𑁆𑀲𑀲𑁆𑀲 𑀔𑀸𑀤𑁂𑀲𑁄, ‘‘𑀩𑁆𑀬𑀜𑁆𑀚𑀦𑀦𑁆𑀢𑀲𑁆𑀲𑀸’’𑀢𑀺 𑀯𑀢𑁆𑀢𑀫𑀸𑀦𑁂 ‘‘𑀓𑁄 𑀔𑁂 𑀘𑀸’’𑀢𑀺 𑀥𑀸𑀢𑁆𑀯𑀦𑁆𑀢𑀲𑁆𑀲 𑀓𑀸𑀤𑁂𑀲𑁄, 𑀯𑀓𑁆𑀔𑀢𑀺, 𑀯𑀓𑁆𑀔𑀦𑁆𑀢𑀺. 𑀯𑀓𑁆𑀔𑀲𑀺, 𑀯𑀓𑁆𑀔𑀣. 𑀯𑀓𑁆𑀔𑀸𑀫𑀺, 𑀯𑀓𑁆𑀔𑀸𑀫 𑀇𑀘𑁆𑀘𑀸𑀤𑀺.

𑀯𑀲 𑀦𑀺𑀯𑀸𑀲𑁂, 𑀯𑀲𑀢𑀺, 𑀯𑀲𑀦𑁆𑀢𑀺.

𑀓𑀫𑁆𑀫𑁂 𑀉𑀢𑁆𑀢𑀁, 𑀧𑀼𑀩𑁆𑀩𑀭𑀽𑀧𑀢𑁆𑀢𑀜𑁆𑀘 𑀯𑀼𑀲𑁆𑀲𑀢𑀺, 𑀯𑀼𑀲𑁆𑀲𑀦𑁆𑀢𑀺 𑀇𑀘𑁆𑀘𑀸𑀤𑀺. 𑀯𑀲𑀢𑀼. 𑀯𑀲𑁂𑀬𑁆𑀬. 𑀅𑀯𑀲𑀺, 𑀯𑀲𑀺.

𑀪𑀯𑀺𑀲𑁆𑀲𑀦𑁆𑀢𑀺𑀬𑀁 𑀲𑁆𑀲𑀲𑁆𑀲 𑀙𑀸𑀤𑁂𑀲𑁄, 𑀥𑀸𑀢𑁆𑀯𑀦𑁆𑀢𑀲𑁆𑀲 𑀘𑀓𑀸𑀭𑁄 𑀘, 𑀯𑀘𑁆𑀙𑀢𑀺, 𑀯𑀘𑁆𑀙𑀦𑁆𑀢𑀺. 𑀯𑀘𑁆𑀙𑀲𑀺, 𑀯𑀘𑁆𑀙𑀣. 𑀯𑀘𑁆𑀙𑀸𑀫𑀺, 𑀯𑀘𑁆𑀙𑀸𑀫. 𑀯𑀲𑀺𑀲𑁆𑀲𑀢𑀺, 𑀯𑀲𑀺𑀲𑁆𑀲𑀦𑁆𑀢𑀺. 𑀅𑀯𑀲𑀺𑀲𑁆𑀲, 𑀅𑀯𑀲𑀺𑀲𑁆𑀲𑀁𑀲𑀼.

𑀢𑀣𑀸 𑀭𑀼𑀤 𑀅𑀲𑁆𑀲𑀼𑀯𑀺𑀫𑁄𑀘𑀦𑁂, 𑀭𑁄𑀤𑀢𑀺, 𑀭𑀼𑀘𑁆𑀙𑀢𑀺. 𑀭𑁄𑀤𑀺𑀲𑁆𑀲𑀢𑀺 𑀇𑀘𑁆𑀘𑀸𑀤𑀺.

𑀓𑀼𑀲 𑀅𑀓𑁆𑀓𑁄𑀲𑁂, 𑀆𑀧𑀼𑀩𑁆𑀩𑁄 𑀤𑁆𑀯𑀺𑀢𑁆𑀢𑀭𑀲𑁆𑀲𑀢𑁆𑀢𑀸𑀦𑀺, 𑀅𑀧𑁆𑀧𑀘𑁆𑀘𑀬𑀯𑀼𑀤𑁆𑀥𑀺𑀬𑁄 𑀘. 𑀅𑀓𑁆𑀓𑁄𑀲𑀢𑀺. 𑀅𑀓𑁆𑀓𑁄𑀲𑀢𑀼. 𑀅𑀓𑁆𑀓𑁄𑀲𑁂𑀬𑁆𑀬.

‘‘𑀅𑀦𑁆𑀢𑀮𑁄𑀧𑁄’’𑀢𑀺 𑀯𑀢𑁆𑀢𑀢𑁂, 𑀫𑀡𑁆𑀟𑀽𑀓𑀕𑀢𑀺𑀬𑀸 ‘‘𑀯𑀸’’𑀢𑀺 𑀘.

𑁪𑁮𑁦. 𑀓𑀼𑀲𑀲𑁆𑀫𑀸 𑀤𑀻 𑀘𑁆𑀙𑀺.

𑀓𑀼𑀲 𑀇𑀘𑁆𑀘𑁂𑀢𑀲𑁆𑀫𑀸 𑀥𑀸𑀢𑀼𑀢𑁄 𑀈𑀯𑀺𑀪𑀢𑁆𑀢𑀺𑀲𑁆𑀲 𑀘𑁆𑀙𑀺𑀆𑀤𑁂𑀲𑁄 𑀳𑁄𑀢𑀺, 𑀥𑀸𑀢𑁆𑀯𑀦𑁆𑀢𑀲𑁆𑀲 𑀮𑁄𑀧𑁄 𑀘. 𑀅𑀓𑁆𑀓𑁄𑀘𑁆𑀙𑀺 𑀫𑀁, 𑀅𑀓𑁆𑀓𑁄𑀲𑀺 𑀯𑀸. 𑀅𑀓𑁆𑀓𑁄𑀲𑀺𑀲𑁆𑀲𑀢𑀺. 𑀅𑀓𑁆𑀓𑁄𑀲𑀺𑀲𑁆𑀲 𑀇𑀘𑁆𑀘𑀸𑀤𑀺.

𑀯𑀳 ¶ 𑀧𑀸𑀧𑀼𑀡𑀦𑁂, 𑀯𑀳𑀢𑀺, 𑀯𑀳𑀦𑁆𑀢𑀺.

𑀓𑀫𑁆𑀫𑁂 𑀅𑀢𑁆𑀢𑀦𑁄𑀧𑀤𑁂, 𑀬𑀧𑁆𑀧𑀘𑁆𑀘𑀬𑁂 𑀘 𑀓𑀢𑁂 𑁋

‘‘𑀬𑁂’’𑀢𑀺 𑀯𑀢𑁆𑀢𑀢𑁂.

𑁪𑁮𑁧. 𑀳 𑀯𑀺𑀧𑀭𑀺𑀬𑀬𑁄 𑀮𑁄 𑀯𑀸.

𑀳𑀓𑀸𑀭𑀲𑁆𑀲 𑀯𑀺𑀧𑀭𑀺𑀬𑀬𑁄 𑀳𑁄𑀢𑀺 𑀬𑀧𑁆𑀧𑀘𑁆𑀘𑀬𑁂 𑀧𑀭𑁂, 𑀬𑀧𑁆𑀧𑀘𑁆𑀘𑀬𑀲𑁆𑀲 𑀘 𑀮𑀓𑀸𑀭𑁄 𑀳𑁄𑀢𑀺 𑀯𑀸. 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄𑀬𑀁 𑀯𑀸𑀲𑀤𑁆𑀤𑁄, 𑀢𑁂𑀦 ‘‘𑀕𑀬𑁆𑀳𑀢𑀻’’𑀢𑀺𑀆𑀤𑀻𑀲𑀼 𑀮𑀢𑁆𑀢𑀁 𑀦 𑀳𑁄𑀢𑀺, 𑀦𑀺𑀫𑀺𑀢𑁆𑀢𑀪𑀽𑀢𑀲𑁆𑀲 𑀬𑀓𑀸𑀭𑀲𑁆𑀲𑁂𑀯𑁂𑀢𑀁 𑀮𑀢𑁆𑀢𑀁, ‘‘𑀯𑀘𑀯𑀲’’𑀇𑀘𑁆𑀘𑀸𑀤𑀺𑀦𑀸 𑀉𑀢𑁆𑀢𑀁. 𑀯𑀼𑀬𑁆𑀳𑀢𑀺, 𑀯𑀼𑀮𑁆𑀳𑀢𑀺, 𑀯𑀼𑀬𑁆𑀳𑀦𑁆𑀢𑀺. 𑀯𑀳𑀢𑀼, 𑀯𑀼𑀬𑁆𑀳𑀢𑀼. 𑀯𑀳𑁂𑀬𑁆𑀬, 𑀯𑀼𑀬𑁆𑀳𑁂𑀬𑁆𑀬. 𑀅𑀯𑀳𑀻, 𑀅𑀯𑀼𑀬𑁆𑀳𑀺𑀢𑁆𑀣, 𑀅𑀯𑀳𑀺𑀢𑁆𑀣. 𑀅𑀯𑀳𑀺𑀲𑁆𑀲𑀢𑀺, 𑀯𑀼𑀬𑁆𑀳𑀺𑀲𑁆𑀲𑀢𑀺. 𑀅𑀯𑀳𑀺𑀲𑁆𑀲, 𑀅𑀯𑀼𑀬𑁆𑀳𑀺𑀲𑁆𑀲 𑀇𑀘𑁆𑀘𑀸𑀤𑀺.