𑀅𑀜𑁆𑀜 > 𑀩𑁆𑀬𑀸𑀓𑀭𑀡 𑀕𑀦𑁆𑀣-𑀲𑀗𑁆𑀕𑀳𑁄 > 𑀫𑁄𑀕𑀮𑁆𑀮𑀸𑀦𑀧𑀜𑁆𑀘𑀺𑀓𑀸

𑀇𑀘𑁆𑀘𑁂𑀯 𑀫𑀦𑀯𑀲𑁂𑀲 𑀫𑀢𑁆𑀢𑀦𑁄 𑀪𑀬𑀸𑀤𑁆𑀬𑀽𑀧𑀤𑁆𑀤𑀯𑁄𑀧𑀖𑀸𑀪𑀓𑀭𑀲𑀸𑀫𑀢𑁆𑀣𑀺𑀬 𑀬𑁄𑀕𑁂𑀦 𑀲𑀓𑀮𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀬𑀦𑁆𑀢𑀭𑀸𑀬 𑀦𑀺𑀯𑀸𑀭𑀡 𑀫𑀥𑀺𑀧𑁆𑀧𑁂𑀢𑀲𑀺𑀤𑁆𑀥𑀺 𑀯𑀺𑀲𑁂𑀲 𑀫𑀪𑀺𑀓𑀗𑁆𑀔𑀺𑀬 𑀭𑀢𑀦𑀢𑁆𑀢𑀬 𑀯𑀺𑀲𑀬𑀪𑀽𑀢𑀁 𑀢𑀁𑀲𑀸𑀥𑀦𑁂 𑀓𑀦𑁆𑀢𑀦𑀺𑀤𑀸𑀦 𑀪𑀽𑀢𑀲𑁆𑀲 ¶ 𑀆𑀮𑁄𑀓𑀺𑀬𑀬𑀸𑀢𑀺𑀲𑀬𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑀲𑁆𑀲 𑀫𑀳𑀢𑁄 𑀧𑁆𑀬𑀢𑀺𑀫𑀳𑀦𑀻𑀬𑀲𑁆𑀲 𑀭𑀢𑀦𑀢𑁆𑀢𑀬𑀲𑁆𑀲 𑀲𑀧𑁆𑀧𑀲𑀸𑀤𑀸𑀦𑀼𑀭𑀽𑀧𑀁 𑀧𑀽𑀚𑀸𑀯𑀺𑀲𑀬𑀁 𑀢𑀤𑀦𑀼𑀲𑁆𑀲(𑀭𑀡𑀁 𑀓𑀢𑁆𑀯𑀸) 𑀕𑀼𑀭𑀼𑀲𑀦𑁆𑀦𑀺𑀬𑁄𑀕𑀫𑀦𑀼𑀝𑁆𑀞𑀸𑀢𑀼𑀁𑁋

𑀓𑀺𑀦𑁆𑀢𑁂𑀳𑀺 𑀧𑀸𑀤𑀲𑀼𑀲𑁆𑀲𑀽𑀲𑀸, 𑀬𑁂𑀲𑀁 𑀦𑀢𑁆𑀣𑀺 𑀕𑀼𑀭𑀽𑀦𑀺𑀳;

𑀬𑁂 𑀢𑀧𑁆𑀧𑀸𑀤𑀭𑀚𑁄𑀓𑀺𑀡𑁆𑀡𑀸, 𑀢𑁂𑀯 𑀲𑀸𑀥𑀽 𑀯𑀺𑀯𑁂𑀓𑀺𑀦𑁄𑀢𑀺.

𑀯𑀘𑀦𑀢𑁄 𑀅𑀢𑁆𑀢𑀦𑁄 𑀕𑀼𑀭𑀼𑀧𑀽𑀚𑀸 𑀧𑀼𑀭𑀲𑁆𑀲𑀭𑀁 𑀧𑀜𑁆𑀘𑀺𑀓𑀸𑀯𑀺𑀯𑀭𑀡𑀁 𑀧𑀣𑀺’𑀬𑀸 𑀧𑀜𑁆𑀘𑀺𑀓𑀸’𑀢𑀺𑀆𑀤𑀺𑀦𑀸 𑀓𑀢𑀧𑀝𑀺𑀜𑁆𑀜𑀢𑁆𑀢𑀸 𑀲𑀫𑁆𑀧𑀢𑀺 𑀫𑀳𑀸𑀤𑀬𑁄𑀢𑀺𑀆𑀤𑀺𑀦𑁄 𑀕𑀦𑁆𑀣𑀲𑁆𑀲 𑀲𑀸𑀥𑀼𑀚𑀦𑀯𑀡𑁆𑀡𑀦𑀁 𑀯𑀡𑁆𑀡𑀦𑀫𑀸𑀭𑀪𑀺𑀲𑁆𑀲𑀸𑀫.

𑀦𑀦𑀼 𑀘 𑀯𑀼𑀢𑁆𑀢𑀺𑀕𑀦𑁆𑀣𑀲𑁆𑀲 𑀯𑀡𑁆𑀡𑀦𑀸𑀬𑀁 𑀓𑀢𑀸𑀪𑀺𑀦𑀺𑀯𑁂𑀲𑁄-𑀬𑀫𑀸𑀘𑀭𑀺𑀬𑁄𑀢𑀺 𑀓𑀣𑀫𑀺𑀳𑀸𑀦𑀥𑀺𑀓𑀢𑁂 𑀫𑀳𑀸𑀤𑀬𑁄𑀢𑀺𑀆𑀤𑀺𑀓𑁂 𑀧𑀝𑀺𑀧𑀦𑁆𑀦𑁄𑀢𑀺 𑀭𑀢𑀦𑀢𑁆𑀢𑀧𑁆𑀧𑀡𑀸𑀫𑀕𑀦𑁆𑀣𑀓𑀢𑁆𑀢𑀼𑀕𑀦𑁆𑀣𑀦𑀺𑀲𑁆𑀲𑀬𑀕𑀦𑁆𑀣𑀸𑀭𑀫𑁆𑀪𑀨𑀮𑀅𑀪𑀺𑀥𑁂𑀬𑁆𑀬𑀲𑀗𑁆𑀔𑀸𑀢- 𑀧𑀬𑁄𑀚𑀦𑀲𑁄𑀢𑀼𑀚𑀦𑀲𑀫𑀼𑀲𑁆𑀲𑀸𑀳𑀦𑀸𑀦𑀁 𑀲𑀦𑁆𑀤𑀲𑁆𑀲𑀦𑀢𑁆𑀣𑀁. 𑀢𑀢𑁆𑀣 𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫 𑀓𑀭𑀡𑀁 𑀅𑀦𑁆𑀢𑀭𑀸𑀬𑀓𑀭𑀸𑀧𑀼𑀜𑁆𑀜𑀯𑀺𑀖𑀸𑀢𑀓𑀭𑀧𑀼𑀜𑁆𑀜𑀯𑀺𑀲𑁂𑀲𑀼𑀧𑁆𑀧𑀸𑀤𑀦𑁂𑀦 𑀓𑀢𑁆𑀢𑀼 𑀫𑀺𑀘𑁆𑀙𑀺𑀢𑀲𑁆𑀲 𑀕𑀦𑁆𑀣𑀲𑁆𑀲 𑀅𑀦𑀦𑁆𑀢𑀭𑀸𑀬𑁂𑀦𑀁 𑀧𑀭𑀺𑀲𑀫𑀸𑀧𑀦𑀢𑁆𑀣𑀁. 𑀯𑀘𑀻𑀧𑀡𑀸𑀫𑁄 𑀧𑀦𑁂𑀢𑁆𑀣 𑀲𑁄𑀢𑀽𑀦𑀫𑁆𑀧𑀺 𑀬𑀣𑀸𑀯𑀼𑀢𑁆𑀢𑀢𑁆𑀣𑀦𑀺𑀧𑁆𑀨𑀸𑀤𑀦𑀓𑁄 𑀆𑀘𑀭𑀺𑀬𑁂𑀦𑀸𑀧𑁆𑀬𑀬 𑀫𑀢𑁆𑀣𑁄 𑀤𑀲𑁆𑀲𑀺𑀢𑁄𑀬𑁂𑀯’𑀢𑀢𑁆𑀣 𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑀲𑀦𑁆𑀤𑀲𑁆𑀲𑀦’𑀦𑁆𑀢𑀺𑀆𑀤𑀺𑀦𑀸, 𑀯𑀸𑀘𑀲𑀺𑀓𑀲𑀢𑁆𑀣𑀸𑀥𑀺𑀓𑀸𑀭𑀢𑁄𑀧𑀺 𑀯𑀘𑀻𑀧𑀡𑀸𑀫𑁄𑀢𑀺 𑀓𑀸𑀬𑀧𑁆𑀧𑀡𑀸𑀫𑁄 𑀫𑀦𑁄𑀧𑀡𑀸𑀫𑁄 𑀘. 𑀦 𑀓𑀢𑁄, 𑀕𑀦𑁆𑀣𑀓𑀢𑁆𑀢𑀼𑀲𑀦𑁆𑀤𑀲𑁆𑀲𑀦𑀁 𑀕𑀦𑁆𑀣𑀲𑁆𑀲 𑀧𑀫𑀸𑀡 𑀪𑀸𑀯𑀯𑀺𑀪𑀸𑀯𑀦𑀢𑁆𑀣𑀁, 𑀕𑀦𑁆𑀣𑀦𑀺𑀲𑁆𑀲𑀬𑀲𑀦𑁆𑀤𑀲𑁆𑀲𑀦𑀁 𑀅𑀢𑁆𑀢𑀦𑀺𑀬𑀪𑀸𑀯𑀲𑀦𑁆𑀥𑀲𑁆𑀲𑀦𑁂𑀦 𑀢𑀩𑁆𑀩𑀺𑀲𑀼𑀤𑁆𑀥𑀺𑀤𑀲𑁆𑀲𑀦𑀢𑁆𑀣𑀁, 𑀕𑀦𑁆𑀣𑀸𑀭𑀫𑁆𑀪𑀨𑀮𑀤𑀲𑁆𑀲𑀦𑀁 𑀢𑀧𑁆𑀧𑀝𑀺𑀓𑁆𑀔𑁂𑀧𑀓𑀚𑀦𑀦𑀺𑀲𑁂𑀥𑀸𑀬, 𑀅𑀪𑀺𑀥𑁂𑀬𑁆𑀬𑀲𑀗𑁆𑀔𑀸𑀢𑀬𑀬𑁄𑀚𑀦𑀲𑀦𑁆𑀤𑀲𑁆𑀲𑀦𑀁 𑀯𑀻𑀫𑀁𑀲𑀸𑀧𑀼𑀩𑁆𑀩𑀓𑀸𑀭𑀻𑀦𑀁 𑀧𑀬𑁄𑀚𑀦𑁄 𑀧𑀸𑀮𑀫𑁆𑀪𑀧𑀼𑀩𑁆𑀩𑀺𑀓𑀸 𑀲𑀢𑁆𑀣𑁂 𑀧𑀯𑀢𑁆𑀢𑀢𑀻𑀢𑀺 𑀲𑁄𑀢𑀼𑀚𑀦𑀲𑀫𑀼𑀲𑁆𑀲𑀸𑀳𑀦𑀁 (𑀓𑀢𑁆𑀯𑀸) 𑀆𑀤𑀭𑁂𑀦 𑀕𑀦𑁆𑀣𑁂 𑀧𑀯𑀢𑁆𑀢𑀦𑀢𑁆𑀣𑀁, 𑀬𑀤𑀸𑀳𑀼 𑁋

𑀲𑀩𑁆𑀩𑀲𑁆𑀲𑁂𑀯 𑀳𑀺 𑀲𑀢𑁆𑀣𑀲𑁆𑀲, 𑀓𑀫𑁆𑀫𑀲𑁆𑀲𑀸𑀧𑀺 𑀘 𑀓𑀲𑁆𑀲𑀘𑀺;

𑀓𑁂𑀦𑁂𑀢𑀁 𑀕𑀬𑁆𑀳𑀢𑁂 𑀢𑀸𑀯, 𑀬𑀸𑀯-𑀯𑀼𑀢𑁆𑀢𑀫𑁆𑀧𑀬𑁄𑀚𑀦𑀁𑀢𑀺.

𑀦𑀦𑀼 ¶ 𑀲𑀢𑁆𑀣𑀧𑁆𑀧𑀬𑁄𑀚𑀦𑀸𑀦𑀁 𑀲𑀫𑁆𑀩𑀦𑁆𑀥𑁄𑀧𑀺 𑀯𑀢𑁆𑀢𑀩𑁆𑀩𑁄 𑀇𑀤𑀫𑀲𑁆𑀲 𑀧𑀬𑁄𑀚𑀦𑀦𑁆𑀢𑀺 𑀬𑀢𑁄𑁋

𑀲𑀺𑀤𑁆𑀥𑀧𑁆𑀧𑀬𑁄𑀚𑀦𑀁 𑀲𑀺𑀤𑁆𑀥,𑀲𑀫𑁆𑀩𑀦𑁆𑀥𑀁 𑀲𑁄𑀢𑀼𑀫𑀺𑀘𑁆𑀙𑀢𑀺;

𑀲𑁄𑀢𑀸𑀤𑁄 𑀢𑁂𑀦 𑀯𑀢𑁆𑀢𑀩𑁆𑀩𑁄, 𑀲𑀫𑁆𑀩𑀦𑁆𑀥𑁄 𑀲𑀧𑁆𑀧𑀬𑁄𑀚𑀦𑁄𑀢𑀺.

𑀲𑀢𑁆𑀢𑀁 𑀧𑀬𑁄𑀚𑀦𑀜𑁆𑀘𑁂𑀯, 𑀉𑀪𑁄 𑀲𑀫𑁆𑀩𑀦𑁆𑀥𑀦𑀺𑀲𑁆𑀲𑀬𑀸;

𑀢𑀁 𑀯𑀼𑀢𑁆𑀢𑀦𑁆𑀢𑁄𑀕𑀥𑀢𑁆𑀢𑀸 𑀦, 𑀪𑀺𑀦𑁆𑀦𑁄 𑀯𑀼𑀢𑁆𑀢𑁄 𑀧𑀬𑁄𑀚𑀦𑀸𑀢𑀺.

𑀧𑀬𑁄𑀚𑀦𑀧𑁆𑀧𑀬𑁄𑀚𑀦𑀫𑁆𑀧𑀦 𑀲𑀸𑀫𑀢𑁆𑀣𑀺𑀬𑀮𑀤𑁆𑀥𑀩𑁆𑀩𑀁 𑀲𑀬𑀫𑀸𑀘𑀭𑀺𑀬𑁂𑀦 ‘‘𑀓𑁄 𑀧𑀦 𑀲𑀤𑁆𑀤𑀮𑀓𑁆𑀔𑀡𑀲𑁆𑀲 𑀅𑀚𑀸𑀦𑀦𑁂 𑀤𑁄𑀲𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦 𑀯𑀺𑀜𑁆𑀜𑀸𑀢𑀩𑁆𑀩𑀁.

𑀢𑀢𑁆𑀣‘𑀫𑀳𑀸𑀤𑀬𑁄’𑀢𑁆𑀬𑀸𑀤𑀺𑀦𑀸 𑀕𑀸𑀣𑀸𑀤𑁆𑀯𑀬𑁂𑀦 𑀭𑀢𑀦𑀢𑁆𑀢𑀬𑀧𑀡𑀸𑀫𑁄 𑀤𑀲𑁆𑀲𑀺𑀢𑁄, ‘𑀬𑁄 𑀇𑀤𑁆𑀥𑀺𑀫𑀦𑁆𑀢𑁂𑀲𑀽’𑀢𑀺𑀆𑀤𑀺𑀦𑀸 𑀕𑀦𑁆𑀣𑀓𑀢𑁆𑀢𑀸, ‘𑀲𑀤𑁆𑀤𑀲𑀢𑁆𑀣’𑀦𑁆𑀢𑀺𑀆𑀤𑀺𑀦𑀸 𑀕𑀦𑁆𑀣𑀦𑀺𑀲𑁆𑀲𑀬𑁄, ‘𑀲𑀗𑁆𑀔𑁂𑀧𑀦𑀬𑁂𑀦𑀸’𑀢𑀺𑀘 ‘𑀲𑀸𑀭𑀪𑀽𑀢𑀁 𑀯𑀺𑀧𑀼𑀮𑀢𑁆𑀣𑀕𑀸 𑀳𑀺𑀁 𑀅𑀦𑀸𑀓𑀼𑀮’𑀦𑁆𑀢𑀺 𑀘 𑀇𑀫𑁂𑀳𑀺 𑀕𑀦𑁆𑀣𑀸𑀭𑀫𑁆𑀪𑀨𑀮𑀁 𑀲𑁄𑀢𑀼𑀚𑀦𑀲𑀫𑀼𑀲𑁆𑀲𑀸𑀳𑀦𑀜𑁆𑀘, 𑀅𑀪𑀺𑀥𑁂𑀬𑁆𑀬𑀲𑀗𑁆𑀔𑀸𑀢𑀧𑁆𑀧𑀬𑁄𑀚𑀦𑀫𑁆𑀧𑀦‘𑀲𑀁𑀯𑀡𑁆𑀡𑀦’𑀦𑁆𑀢𑀺 𑀇𑀫𑀺𑀦𑀸 𑀤𑀲𑁆𑀲𑀺𑀢𑀁 𑀅𑀦𑁆𑀯𑀢𑁆𑀣 𑀩𑁆𑀬𑀧𑀤𑁂𑀲𑁂𑀦 𑀲𑀁𑀯𑀡𑁆𑀡𑀻𑀬𑀢𑀺 𑀯𑀺𑀯𑀭𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑀻𑀬𑀢𑀺 𑀅𑀢𑁆𑀣𑁄 𑀏𑀢𑀸𑀬𑀸𑀢𑀺 𑀲𑀁𑀯𑀡𑁆𑀡𑀦𑀸𑀪𑀺 𑀓𑀢𑁆𑀯𑀸, 𑀢𑀫𑁆𑀧𑀦 𑀯𑀺𑀯𑀭𑀺𑀢𑁆𑀯𑀸 𑀓𑀣𑀦𑀁 𑀲𑀤𑁆𑀤𑀸𑀦𑀼𑀲𑀸𑀲𑀦𑀲𑀢𑁆𑀣𑀲𑀦𑁆𑀦𑀺𑀲𑁆𑀲𑀬𑀢𑁆𑀢𑀸 𑀅𑀪𑀺𑀥𑁂𑀬𑁆𑀬𑁄 𑀦𑀸𑀫 𑀲𑀫𑀼𑀤𑀺𑀢𑁂𑀦 𑀲𑀢𑁆𑀣𑁂𑀦 𑀯𑀘𑀦𑀻𑀬𑀢𑁆𑀣𑁄 𑀢𑀁 [𑀯𑀘𑀦𑀻𑀬𑀢𑁆𑀣𑁄𑀢𑀺 (𑀧𑁄𑀢𑁆𑀣𑀓𑁂)] 𑀯𑀼𑀢𑁆𑀢𑀲𑀤𑁆𑀤𑀸𑀦𑀼𑀲𑀺𑀝𑁆𑀞𑀺𑀲𑀗𑁆𑀔𑀸𑀢𑀧𑀬𑁄𑀚𑀦𑀫𑁂𑀯𑀸𑀢𑀺 𑀅𑀬𑀫𑁂𑀢𑁆𑀣 𑀲𑀫𑀼𑀤𑀸𑀬𑀢𑁆𑀣𑁄.

𑀅𑀬𑀫𑁆𑀧𑀦𑁂𑀢𑁆𑀣 𑀅𑀯𑀬𑀯𑀢𑁆𑀣𑁄-𑀬𑁄𑀢𑀺 𑀅𑀦𑀺𑀬𑀫𑀯𑀘𑀦𑀁 𑀥𑀫𑁆𑀫𑀭𑀸𑀚𑀲𑀤𑁆𑀤𑀸 𑀧𑁂𑀓𑁆𑀔𑀸𑀬 𑀘𑁂𑀢𑁆𑀣 𑀧𑀼𑀮𑁆𑀮𑀺𑀗𑁆𑀕𑀢𑀸, 𑀢𑁂𑀦𑁂𑀢𑁆𑀣 𑀯𑀼𑀘𑁆𑀘𑀫𑀸𑀦𑀕𑀼𑀡𑀯𑀺𑀲𑁂𑀲𑀸 𑀥𑀸𑀭𑀧𑀼𑀕𑁆𑀕𑀮𑀯𑀺𑀲𑁂𑀲𑀦𑀺𑀤𑀲𑁆𑀲𑀦𑀁, 𑀤𑀬𑀢𑀺 𑀤𑀼𑀓𑁆𑀔𑀁 𑀅𑀧𑀦𑁂𑀢𑁆𑀯𑀸 𑀧𑀭𑁂𑀲𑀁 𑀲𑀼𑀔𑀁 𑀤𑀤𑀸𑀢𑀺, 𑀤𑀬𑀻𑀬𑀢𑀺 𑀯𑀸 𑀲𑀧𑁆𑀧𑀼𑀭𑀺𑀲𑁂𑀳𑀺 𑀕𑀫𑀺𑀬(𑀢𑀺 𑀲) 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀻𑀬𑀢𑀺, 𑀤𑀬𑀢𑀺 𑀯𑀸 𑀧𑀭𑀤𑀼𑀓𑁆𑀔𑀁 𑀳𑀺𑀁𑀲𑀢𑀺, 𑀤𑀬𑀢𑀺 𑀯𑀸 𑀧𑀭𑀤𑀼𑀓𑁆𑀔𑀁 𑀕𑀡𑁆𑀳𑀸𑀢𑀺 𑀢𑀁𑀯𑀲𑁂𑀦 𑀅𑀢𑁆𑀢𑀦𑁄 𑀳𑀤𑀬𑀔𑁂𑀤𑀁 𑀓𑀭𑁄𑀢𑀻𑀢𑀺 𑀤𑀬𑀸, ‘‘𑀤𑀬=𑀤𑀸𑀦𑀕𑀢𑀺 𑀳𑀺𑀁𑀲𑀸𑀤𑀸𑀦𑁂𑀲𑀼’’ 𑀇𑀘𑁆𑀘𑀲𑁆𑀫𑀸 ‘‘𑀇𑀢𑁆𑀣𑀺𑀬𑀫𑀡𑀢𑁆𑀢𑀺𑀓𑀬𑀓𑁆𑀬𑀸𑀘𑁂’’𑀢𑀺 (𑁫-𑁪𑁯) 𑀅𑀧𑁆𑀧𑀘𑁆𑀘𑀬𑁄, 𑀯𑀺𑀲𑀬𑀫𑀳𑀦𑁆𑀢𑀢𑀸𑀬 ¶ 𑀫𑀳𑀢𑀻 𑀧𑀲𑀢𑁆𑀣𑀸 𑀯𑀸 𑀤𑀬𑀸 𑀅𑀲𑁆𑀲𑀸𑀢𑀺 𑀫𑀳𑀸𑀤𑀬𑁄, 𑀯𑀺𑀲𑁂𑀲𑀦 𑀲𑀫𑀸𑀲𑁂 ‘‘𑀲𑀤𑁆𑀥𑀸𑀤𑀺𑀢𑁆𑀯’’ (𑁪-𑁮𑁪) 𑀯𑀓𑁆𑀔𑀫𑀸𑀦𑀧𑀸𑀭𑀫𑀺𑀢𑀸𑀲𑀫𑁆𑀪𑀭𑀡𑀤𑀼𑀓𑁆𑀔𑀸𑀦𑀼𑀪𑀯 𑀦𑀸𑀦𑀫𑀺𑀤𑀁 𑀳𑁂𑀢𑀼𑀯𑀘𑀦𑀁, 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀚𑀦𑀺𑀢𑀸𑀢𑀺 𑀚𑀦𑀸 𑀲𑀢𑁆𑀢𑀮𑁄𑀓𑁄, 𑀇𑀫𑀺𑀦𑀸 𑀔𑀻𑀡𑀸𑀲𑀯𑀸𑀧𑀺 𑀲𑀗𑁆𑀕𑀬𑁆𑀳𑀦𑁆𑀢𑀺 𑀢𑁂𑀲𑀫𑁆𑀧𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀼𑀔𑀯𑀺𑀳𑀸𑀭𑀲𑀗𑁆𑀔𑀸𑀢 𑀳𑀺𑀢𑀲𑁆𑀲 𑀤𑀸𑀦𑀢𑁄, 𑀚𑀦𑀸𑀦𑀁 𑀲𑀫𑀽𑀳𑁄 𑀚𑀦𑀢𑀸 𑀢𑀲𑁆𑀲𑀸 𑀳𑀺𑀢𑀸𑀬 𑀅𑀪𑀺𑀯𑀟𑁆𑀠𑀺𑀬𑀸 𑀲𑀓𑀮𑀯𑀝𑁆𑀝 𑀤𑀼𑀓𑁆𑀔𑀦𑀺𑀲𑁆𑀲𑀝𑀦𑀺𑀩𑁆𑀩𑀸𑀦𑀲𑀼𑀔𑀪𑀸𑀕𑀺𑀬𑀓𑀭𑀡𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀅𑀲𑁆𑀲𑀘’𑀲𑀫𑁆𑀧𑀽𑀭𑀬’𑀦𑁆𑀢𑀺 𑀇𑀫𑀺𑀦𑀸’𑀤𑀼𑀓𑁆𑀔𑀫𑀦𑀼𑀪𑀯𑀻’𑀢𑀺 𑀇𑀫𑀺𑀦𑀸 𑀘 𑀲𑀫𑁆𑀩𑀦𑁆𑀥𑁄, 𑀲𑀫𑁆𑀩𑁄𑀥𑀻𑀢𑀺 𑀏𑀢𑁆𑀣 𑀲𑀁𑀲𑀤𑁆𑀤𑁄 𑀲𑀸𑀫𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀲𑀁𑀲𑀬𑀫𑁂𑀯 𑀅𑀦𑀜𑁆𑀜𑀩𑁄𑀥𑀺𑀢𑁄 𑀳𑀼𑀢𑁆𑀯𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀢𑀺 𑀧𑀝𑀺𑀯𑀺𑀚𑁆𑀛𑀢𑀺 𑀏𑀢𑀸𑀬𑀸𑀢𑀺 𑀲𑀫𑁆𑀩𑁄𑀥𑀺, 𑀲𑀁𑀧𑀼𑀩𑁆𑀩𑀸 𑀩𑀼𑀥𑀥𑀸𑀢𑀼𑀢𑁄 ‘‘𑀇’’𑀇𑀢𑀺 𑀡𑁆𑀯𑀸𑀤𑀺 (𑀓𑁄) 𑀇𑀧𑁆𑀧𑀘𑁆𑀘𑀬𑁄, 𑀲𑀯𑀸𑀲𑀦𑀲𑀓𑀮𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀬𑀓𑀁 𑀪𑀕𑀯𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑀜𑁆𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀦𑁆𑀢𑀺𑀧𑀺 𑀯𑀤𑀦𑁆𑀢𑀺, 𑀲𑀫𑁆𑀧𑀸𑀧𑀬𑀢𑀻𑀢𑀺 𑀲𑀫𑁆𑀧𑀸𑀧𑀓𑀁, 𑀲𑀫𑁆𑀩𑁄𑀥𑀺𑀬𑀸 𑀲𑀫𑁆𑀧𑀸𑀧𑀓𑀦𑁆𑀢𑀺 𑀙𑀝𑁆𑀞𑀻𑀲𑀫𑀸𑀲𑁄, 𑀓𑀺𑀦𑁆𑀢𑀺 𑀥𑀫𑁆𑀫𑀚𑀸𑀢𑀁 𑀥𑀫𑁆𑀫𑀲𑀤𑁆𑀤𑁂𑀦𑁂𑀢𑁆𑀣 𑀧𑀸𑀭𑀫𑀺𑀥𑀫𑁆𑀫𑀸 𑀧𑀜𑁆𑀘𑀫𑀳𑀸𑀧𑀭𑀺𑀘𑁆𑀘𑀸𑀕𑀸𑀤𑀬𑁄 𑀘 𑀅𑀥𑀺𑀧𑁆𑀧𑁂𑀢𑀸, 𑀢𑁂𑀧𑀺 𑀳𑀺 𑀅𑀢𑁆𑀢𑀸𑀦𑀁 𑀥𑀸𑀭𑁂𑀦𑁆𑀢𑀁 𑀥𑀸𑀭𑁂𑀦𑁆𑀢𑀺 𑀲𑀫𑁆𑀩𑁄𑀥𑀺 𑀲𑀫𑁆𑀧𑀸𑀧𑀦𑀲𑀸𑀫𑀢𑁆𑀣𑀺𑀬𑀬𑁄𑀕𑁂𑀦 𑀧𑀭𑁂𑀧𑀺 𑀥𑀸𑀭𑁂𑀦𑁆𑀢𑀺 𑀦𑀸𑀫𑀸𑀢𑀺 𑀥𑀫𑁆𑀫𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, ‘𑀥𑀭=𑀥𑀸𑀭𑀡𑁂’𑀇𑀘𑁆𑀘𑀲𑁆𑀫𑀸 𑀔𑀻𑀲𑀼, 𑀯𑀺𑀬𑀸𑀤𑀺𑀲𑀼𑀢𑁆𑀢𑁂𑀦 𑀡𑁆𑀯𑀸𑀤𑀺(𑀓𑁄) 𑀫𑀧𑁆𑀧𑀘𑁆𑀘𑀬𑁄, 𑀥𑀫𑁆𑀫𑀸𑀦𑀁𑀚𑀸𑀢𑀁, 𑀥𑀫𑁆𑀫𑀸𑀏𑀯𑀯𑀸 𑀚𑀸𑀢𑀁, 𑀲𑀫𑁆𑀩𑁄𑀥𑀺𑀲𑀫𑁆𑀧𑀸𑀧𑀓𑀜𑁆𑀘 𑀢𑀁 𑀥𑀫𑁆𑀫𑀚𑀸𑀢𑀁 𑀘𑁂𑀢𑀺 𑀯𑀺𑀲𑁂𑀲𑀦𑀲𑀫𑀸𑀲𑁄, ‘𑀲𑀫𑁆𑀧𑀽𑀭𑀬’𑀦𑁆𑀢𑀺 𑀫𑀲𑁆𑀲𑁂𑀢𑀁 𑀓𑀫𑁆𑀫𑀁, 𑀲𑀫𑁆𑀧𑀽𑀭𑀬𑀦𑁆𑀢𑀺 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑁄𑀕𑀸 𑀤𑀻𑀧𑀗𑁆𑀓𑀭 (𑀧𑀸𑀤)𑀫𑀽𑀮𑁂 𑀳𑀢𑁆𑀣𑁄𑀧𑀕𑀢𑀫𑁆𑀧𑀺 𑀦𑀺𑀩𑁆𑀩𑀸𑀦𑀫𑁆𑀧𑀳𑀸𑀬 𑀬𑀣𑀸𑀯𑀼𑀢𑁆𑀢𑀓𑀭𑀼𑀡𑀸𑀕𑀼𑀡𑀬𑁄𑀕𑀲𑀻𑀢𑀮𑀻𑀪𑀽𑀢𑀳𑀤𑀬𑀢𑀸𑀬 ‘‘𑀓𑀣𑀦𑁆𑀦𑀸𑀫𑁂𑀢𑁂 𑀅𑀘𑁆𑀘𑀦𑁆𑀢 𑀤𑀼𑀲𑁆𑀲𑀳𑀯𑀝𑁆𑀝𑀤𑀼𑀓𑁆𑀔𑁄𑀧𑀕𑀢𑁂 𑀲𑀢𑁆𑀢𑁂 𑀢𑀁𑀫𑀳𑀸𑀤𑀼𑀓𑁆𑀔𑀸 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀯𑀝𑁆𑀝𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑁂𑀓𑀳𑁂𑀢𑀼𑀢𑀸𑀬 𑀲𑀫𑁆𑀫𑀸 𑀧𑀽𑀭𑁂𑀦𑁆𑀢𑁄 𑀯𑀟𑁆𑀠𑁂𑀦𑁆𑀢𑁄 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀁 𑀯𑁂𑀧𑀼𑀮𑁆𑀮𑀁 𑀕𑀫𑁂𑀦𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀳𑁂𑀢𑀼𑀬𑁂𑀯𑁂𑀤𑀫𑀧𑀺 𑀤𑀼𑀓𑁆𑀔𑀸𑀦𑀼𑀪𑀯𑀦𑀲𑁆𑀲, 𑀫𑀳𑀸𑀤𑀬𑀢𑀸 𑀧𑀦𑀲𑁆𑀲 𑀧𑀭𑀫𑁆𑀧𑀭𑀳𑁂𑀢𑀼, 𑀤𑀼𑀝𑁆𑀞𑀼 𑀔𑀦𑀢𑀺 𑀓𑀸𑀬𑀺𑀓𑀁 𑀅𑀲𑁆𑀲𑀸𑀤𑀦𑁆𑀢𑀺’𑀤𑀼𑀧𑀼𑀩𑁆𑀩𑀸 𑀔𑀦𑀺𑀲𑁆𑀫𑀸’ ‘‘𑀓𑁆𑀯𑀻’’𑀢𑀺 (𑁫-𑁪) 𑀓𑁆𑀯𑀺, 𑀤𑀼𑀓𑁆𑀔𑀁 𑀓𑀸𑀬𑀺𑀓𑀤𑀼𑀓𑁆𑀔 𑀯𑁂𑀤𑀦𑀸, 𑀓𑀻𑀤𑀺𑀲𑀦𑁆𑀢𑀺 𑀆𑀳-’𑀅𑀦𑀦𑁆𑀢𑀭𑀽𑀧’𑀦𑁆𑀢𑀺, 𑀲𑀪𑀸𑀯𑀯𑀘𑀦𑁄 𑀬𑀁 𑀭𑀽𑀧𑀲𑀤𑁆𑀤𑁄 ‘‘𑀧𑀺𑀬𑀭𑀽𑀧’’𑀦𑁆𑀢𑀺𑀆𑀤𑀻𑀲𑀼𑀯𑀺𑀬, 𑀢𑁂 𑀘 𑀤𑀼𑀓𑁆𑀔𑀲𑀪𑀸𑀯𑀸 (𑀅𑀦𑀦𑁆𑀢𑀸) 𑀅𑀦𑀦𑁆𑀢𑀓𑀸𑀭𑀡𑀸𑀦𑀁 𑀯𑀲𑁂𑀦, 𑀢𑀲𑁆𑀫𑀸 𑀅𑀦𑀦𑁆𑀢𑀁 𑀭𑀽𑀧𑀁 𑀲𑀪𑀸𑀯𑁄 𑀅𑀲𑁆𑀲𑀸𑀢𑀺 𑀅𑀦𑀦𑁆𑀢𑀭𑀽𑀧𑀁, 𑀢𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀻 𑀯𑀺𑀦𑁆𑀤𑀻, 𑀓𑀺𑀫𑀺𑀯𑀸𑀢𑀺 𑀆𑀳-‘𑀲𑀼𑀔𑀁 𑀯𑀸’𑀢𑀺, 𑀲𑀼𑀝𑁆𑀞𑀼 𑀔𑀦𑀢𑀺 𑀓𑀸𑀬𑀺𑀓𑀁 𑀆𑀩𑀸𑀥𑀦𑁆𑀢𑀺 ¶ 𑀲𑀼𑀔𑀁, 𑀇𑀯𑀲𑀤𑁆𑀤𑁄 𑀲𑀥𑀫𑁆𑀫𑀢𑁆𑀢𑀲𑀗𑁆𑀔𑀸𑀢𑁄𑀧𑀫𑀸𑀚𑁄𑀢𑀓𑁄, 𑀲𑀥𑀫𑁆𑀫𑀢𑁆𑀢𑀜𑁆𑀳𑀺 𑀉𑀧𑀫𑀸, 𑀯𑀼𑀢𑁆𑀢𑀜𑁆𑀳𑀺 ‘‘𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀸𑀦𑀁, 𑀲𑀥𑀫𑁆𑀫𑀢𑁆𑀢𑀁 𑀲𑀺𑀬𑁄 𑀧𑀫𑀸’’𑀢𑀺, 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀅𑀦𑀺𑀝𑁆𑀞𑀸𑀦𑀼𑀪𑀯𑀦𑀲𑀪𑀸𑀯𑀸𑀬𑀸𑀧𑀺 𑀤𑀼𑀓𑁆𑀔𑀯𑁂𑀤𑀦𑀸𑀬 𑀅𑀦𑀼𑀪𑀯𑀦𑀲𑀪𑀸𑀯𑀲𑀸𑀫𑀜𑁆𑀜𑁂𑀦 𑀅𑀚𑁆𑀛𑀸𑀲𑀬𑀲𑀫𑁆𑀧𑀢𑁆𑀢𑀺𑀯𑀺𑀲𑁂𑀲𑀬𑁄𑀕𑀸 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀲𑀼𑀔𑁂𑀦 𑀲𑀤𑀺𑀲𑀢𑀸𑀧𑀢𑁆𑀢𑀺𑀳𑁄𑀢𑀻𑀢𑀺 𑀤𑀼𑀓𑁆𑀔𑀫𑁆𑀧𑀺 𑀲𑀫𑀸𑀦𑀁 𑀢𑀁 𑀲𑀼𑀔𑀫𑀺𑀯 𑀯𑀺𑀦𑁆𑀤𑀻’’𑀢𑀺. 𑀓𑀣𑀫𑀜𑁆𑀜𑀣𑀸 𑀯𑀝𑁆𑀝𑀤𑀼𑀓𑁆𑀔𑀢𑁄 𑀲𑀓𑀮𑀮𑁄𑀓𑀲𑁆𑀲 𑀲𑀫𑀼𑀤𑁆𑀥𑀭𑀡𑀁 𑀲𑀺𑀬𑀸𑀢𑀺, 𑀅𑀣𑀯𑀸 𑀲𑀼𑀔𑀫𑀺𑀯 𑀲𑀼𑀔𑀁 𑀯𑀺𑀦𑁆𑀤𑀦𑁆𑀢𑁄 𑀯𑀺𑀬 𑀅𑀦𑀜𑁆𑀜𑀯𑀺𑀦𑁆𑀤𑀺𑀬𑀫𑀧𑀺 𑀢𑀸𑀤𑀺𑀲𑀁 𑀤𑀼𑀓𑁆𑀔𑀁 𑀲𑀓𑀮𑀮𑁄𑀓𑀳𑀺𑀢𑀸𑀯 𑀳𑀺𑀢𑀫𑀦𑀢𑀸𑀬 𑀯𑀺𑀦𑁆𑀤𑀻𑀢𑀺 𑀅𑀢𑁆𑀣𑁄, 𑀢𑁂𑀦𑀸𑀳 ‘𑀅𑀔𑀺𑀦𑁆𑀦𑀭𑀽𑀧𑁄’𑀢𑀺, 𑀅𑀔𑀺𑀦𑁆𑀦𑀁 𑀧𑀭𑀺𑀲𑁆𑀲𑀫𑀫𑀧𑁆𑀧𑀢𑁆𑀢𑀁 𑀭𑀽𑀧𑀁 𑀲𑀪𑀸𑀯𑁄 𑀅𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄.

𑀢𑀁 𑀥𑀫𑁆𑀫𑀭𑀸𑀚𑀦𑁆𑀢𑀺 𑀬𑁄𑀢𑀺 𑀅𑀦𑀺𑀬𑀫𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀯𑀼𑀢𑁆𑀢𑀕𑀼𑀡𑀯𑀺𑀲𑁂𑀲𑀸𑀥𑀸𑀭 𑀧𑀼𑀕𑁆𑀕𑀮𑀲𑁆𑀲𑀦𑀺𑀬𑀫𑀦𑀯𑀘𑀦𑀁, 𑀥𑀫𑁆𑀫𑁂𑀦 𑀭𑀸𑀚𑀢𑀺 𑀦𑁄 𑀅𑀥𑀫𑁆𑀫𑁂𑀦𑀸𑀢𑀺 𑀯𑀸, 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀲𑁆𑀲 𑀲𑀸𑀫𑀺𑀪𑀸𑀯𑁂𑀦 𑀥𑀫𑁆𑀫𑀲𑁆𑀲 𑀭𑀸𑀚𑀸 𑀲𑀸𑀫𑀻𑀢𑀺 𑀯𑀸, 𑀅𑀢𑁆𑀢𑀦𑀸 𑀧𑀝𑀺𑀯𑀺𑀚𑁆𑀛𑀺𑀬𑀫𑀸𑀦𑁂 𑀥𑀫𑁆𑀫𑁂 𑀧𑀝𑀺𑀯𑀺𑀚𑁆𑀛𑀦𑁆𑀢𑁄𑀯 𑀢𑀢𑁆𑀣 𑀭𑀸𑀚𑀢𑀺 𑀤𑀺𑀧𑁆𑀧𑀢𑀻𑀢𑀺 𑀯𑀸, 𑀧𑀭𑀽𑀧𑀓𑀸𑀭𑀯𑀲𑁂𑀦 𑀢𑀤𑀢𑁆𑀣𑀸𑀬𑁂𑀯 𑀧𑀝𑀺𑀧𑀦𑁆𑀦𑀢𑁆𑀢𑀸 𑀧𑀭𑁂𑀲𑀁 𑀥𑀫𑁆𑀫𑀁 𑀭𑀸𑀚𑁂𑀢𑀺 𑀧𑀓𑀸𑀲𑁂𑀢𑀻𑀢𑀺 𑀯𑀸 𑀥𑀫𑁆𑀫𑀭𑀸𑀚𑀸, 𑀢𑀁 𑀥𑀫𑁆𑀫𑀭𑀸𑀚𑀁 𑀦𑀫𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀦𑀫𑀲𑁆𑀲𑀺𑀢𑁆𑀯𑀸𑀢𑀺 𑀅𑀢𑁆𑀣𑁄, 𑀓𑀻𑀤𑀺𑀲𑀦𑁆𑀢𑀺 𑀆𑀳-‘𑀚𑀺𑀢𑀫𑀸𑀭𑀯𑀻𑀭𑀁 𑀲𑀼𑀥𑀦𑁆𑀢 𑀲𑁄𑀯𑀡𑁆𑀡𑀦𑀺𑀪’𑀦𑁆𑀢𑀺. 𑀢𑀢𑁆𑀣 𑀫𑀸𑀭𑁄 𑀘 𑀲𑁄 𑀯𑀻𑀭𑁄𑀘𑀸𑀢𑀺 𑀫𑀸𑀭𑀯𑀻𑀭𑁄 𑀚𑀺𑀢𑁄 𑀯𑀺𑀤𑁆𑀢𑁂𑀥𑀲𑁆𑀢𑀩𑀮𑁄 𑀫𑀸𑀭𑀯𑀻𑀭𑁄 𑀦𑀸𑀢𑀺 𑀚𑀺𑀢𑀫𑀸𑀭𑀯𑀻𑀭𑁄, 𑀢𑀁, 𑀓𑀺𑀜𑁆𑀘𑀸𑀧𑀺 𑀤𑁂𑀯𑀧𑀼𑀢𑁆𑀢𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀫𑀘𑁆𑀘𑀼𑀓𑁆𑀔𑀦𑁆𑀥 𑀫𑀸𑀭𑀸-𑀦𑁂𑀦 𑀚𑀺𑀢𑀸 𑀏𑀯, 𑀢𑀣𑀸𑀧𑀺 𑀯𑀻𑀭𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂𑀦 𑀤𑁂𑀯𑀧𑀼𑀢𑁆𑀢𑀫𑀸𑀭𑁂 𑀕𑀳𑀺𑀢𑁂 𑀢𑀁𑀯𑀺𑀚𑀬𑀸 𑀅𑀜𑁆𑀜𑁂𑀧𑀺 𑀚𑀺𑀢𑀸 𑀏𑀯 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀯𑀺𑀜𑁆𑀜𑁂𑀬𑁆𑀬𑀁, 𑀲𑀼𑀝𑁆𑀞𑀼 𑀥𑀦𑁆𑀢𑀁 𑀥𑀫𑀺𑀢𑀁 𑀉𑀤𑁆𑀥𑀭𑀺𑀢𑀁 𑀲𑀼𑀥𑀦𑁆𑀢𑀁, 𑀲𑀼𑀯𑀡𑁆𑀡𑀫𑁂𑀯 𑀲𑁄𑀯𑀡𑁆𑀡𑀁, 𑀲𑀼𑀥𑀦𑁆𑀢 𑀘 𑀢𑀁 𑀲𑁄𑀯𑀡𑁆𑀡𑀜𑁆𑀘, 𑀢𑀲𑁆𑀲𑁂𑀯 𑀦𑀺𑀪𑀸 𑀲𑁄𑀪𑀸 𑀅𑀲𑁆𑀲𑁂𑀢𑀺 𑀲𑀫𑀸𑀲𑁄, 𑀅𑀣𑀯𑀸 𑀲𑀼𑀥𑀦𑁆𑀢𑀜𑁆𑀘 𑀢𑀁 𑀲𑀼𑀯𑀡𑁆𑀡𑀁 𑀘𑁂𑀢𑀺 𑀲𑀫𑀸𑀲𑁂 𑀢𑀲𑁆𑀲𑀺𑀤𑀦𑁆𑀢𑀺 ‘‘𑀡𑁄’’𑀢𑀺 (𑁪-𑁩𑁪) 𑀡𑀧𑁆𑀧𑀘𑁆𑀘𑀬𑁂 ‘‘𑀫𑀚𑁆𑀛𑁂’’𑀢𑀺 (𑁪-𑁧𑁨𑁬) 𑀫𑀚𑁆𑀛𑀯𑀼𑀤𑁆𑀥𑀺𑀬𑀁 𑀲𑀼𑀥𑀦𑁆𑀢𑀲𑁄𑀯𑀡𑁆𑀡𑀁 𑀧𑀝𑀺𑀫𑀸𑀭𑀽𑀧𑀁, 𑀢𑁂𑀦 𑀦𑀺𑀪𑁄 𑀲𑀤𑀺𑀲𑁄, 𑀢𑀁.

𑀳𑁂𑀢𑀼 𑀨𑀮𑀁 𑀧𑀭𑀢𑁆𑀣𑁄 𑀘, 𑀲𑀩𑁆𑀩𑁄𑀧𑀺 𑀣𑀼𑀢𑀺𑀲𑀗𑁆𑀕𑀳𑁄;

𑀳𑁂𑀢𑀼 𑀲𑀫𑁆𑀩𑁄𑀥𑀺𑀢𑁄, 𑀧𑀼𑀩𑁆𑀩𑁂𑀯, 𑀬𑀫𑀜𑁆𑀜𑀁 𑀢𑀢𑁄𑀧𑀭𑀻𑀢𑀺.

𑀯𑀼𑀢𑁆𑀢𑀳𑁂𑀢𑀼𑀨𑀮𑀲𑀢𑁆𑀢𑁄𑀧𑀓𑀸𑀭𑀯𑀲𑁂𑀦 ¶ 𑀩𑀼𑀤𑁆𑀥𑀭𑀢𑀦𑀲𑁆𑀲 𑀣𑀼𑀢𑀺𑀧𑀼𑀩𑁆𑀩𑀓𑀫𑁆𑀧𑀡𑀸𑀫𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀥𑀫𑁆𑀫𑀭𑀸𑀚𑁂𑀦 𑀢𑁂𑀦𑀸𑀧𑀺 𑀧𑀽𑀚𑀦𑀻𑀬𑀲𑁆𑀲 𑀥𑀫𑁆𑀫𑀭𑀢𑀦𑀲𑁆𑀲 𑀦𑀺𑀧𑀘𑁆𑀘𑀓𑀸𑀭𑀁 𑀤𑀲𑁆𑀲𑁂𑀢𑀼𑀁‘𑀥𑀫𑁆𑀫𑀜𑁆𑀘 𑀫𑁄𑀳𑀦𑁆𑀥𑀢𑀫𑀧𑁆𑀧𑀥𑀁𑀲𑀺’𑀦𑁆𑀢𑀺 𑀆𑀳, 𑀢𑀢𑁆𑀣 𑀘 𑀲𑀤𑁆𑀤𑁄 ‘𑀥𑀫𑁆𑀫𑀜𑁆𑀘 𑀦𑀫𑀺𑀢𑁆𑀯𑀸’𑀢𑀺 [𑀦𑀫𑀲𑁆𑀲𑀺𑀢𑁆𑀯𑀸 (𑀧𑁄𑀢𑁆𑀣𑀓𑁂)] 𑀦𑀫𑀲𑁆𑀲𑀦𑀓𑁆𑀭𑀺𑀬𑀸𑀬 𑀥𑀫𑁆𑀫𑀁 𑀲𑀫𑁆𑀧𑀺𑀡𑁆𑀟𑁂𑀢𑀺, 𑀓𑀺𑀫𑁆𑀪𑀽𑀢𑀦𑁆𑀢𑀺 𑀆𑀳, ‘𑀫𑁄𑀳𑀦𑁆𑀥𑀢𑀫𑀧𑁆𑀧𑀥𑀁𑀲𑀺’𑀦𑁆𑀢𑀺, 𑀫𑀼𑀬𑁆𑀳𑀢𑀻𑀢𑀺 𑀫𑁄𑀳𑁄=𑀅𑀜𑁆𑀜𑀸𑀡𑀁, 𑀅𑀦𑁆𑀥𑀬𑀢𑀺 𑀲𑀫𑀢𑁆𑀣𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀧𑀭𑀺𑀳𑀸𑀦𑁂𑀦𑀸𑀢𑀺 𑀅𑀦𑁆𑀥𑀁, 𑀅𑀦𑁆𑀥𑀜𑁆𑀘 𑀢𑀁 𑀢𑀫𑀜𑁆𑀘𑁂𑀢𑀺 𑀅𑀦𑁆𑀥𑀢𑀫𑀁=𑀩𑀸𑀴𑁆𑀳𑀢𑀺𑀫𑀺𑀭𑀁, 𑀫𑁄𑀳𑁄𑀬𑁂𑀯 𑀢𑀁𑀲𑀤𑀺𑀲𑀢𑀸𑀬 𑀅𑀦𑁆𑀥𑀢𑀫𑀦𑁆𑀢𑀺 𑀫𑁄 𑀳𑀦𑁆𑀥𑀢𑀫𑀁, 𑀢𑀁 𑀧𑀥𑀁𑀲𑁂𑀢𑀺 𑀧𑀓𑀸𑀭𑁂𑀦 𑀦𑀸𑀲𑁂𑀢𑀺 𑀲𑀻𑀮𑁂𑀦𑀸𑀢𑀺 𑀫𑁄𑀳𑀦𑁆𑀥𑀢𑀫𑀧𑁆𑀧𑀥𑀁𑀲𑀻, 𑀧𑀲𑀤𑁆𑀤𑀲𑁆𑀲𑀧𑀓𑀸𑀲𑀦𑀢𑁆𑀣𑀁 𑀳𑀺𑀢𑁆𑀯𑀸 𑀧𑀓𑀸𑀭𑀢𑁆𑀣𑀲𑁆𑀲𑁂𑀯 𑀕𑀳𑀡𑀢𑁄 𑀧𑀭𑀺𑀬𑀢𑁆𑀢𑀺𑀬𑀸 𑀲𑀳𑁋

𑀲𑁄𑀢𑀸𑀧𑀢𑁆𑀢𑀸𑀤𑀬𑁄 𑀫𑀕𑁆𑀕𑀸,𑀘𑀢𑁆𑀢𑀸𑀭𑁄 𑀢𑀧𑁆𑀨𑀮𑀸𑀦𑀺𑀘;

𑀘𑀢𑁆𑀢𑀸𑀭𑀺 𑀅𑀣 𑀦𑀺𑀩𑁆𑀩𑀸𑀦𑀁, 𑀥𑀫𑁆𑀫𑀸 𑀮𑁄𑀓𑀼𑀢𑁆𑀢𑀭𑀸 𑀦𑀯𑀸𑀢𑀺.

𑀯𑀼𑀢𑁆𑀢𑀦𑀯𑀮𑁄𑀓𑀼𑀢𑁆𑀢𑀭𑀫𑁆𑀫𑁄 𑀕𑀳𑀺𑀢𑀸𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀅𑀭𑀳𑀢𑁆𑀢𑀫𑀕𑁆𑀕𑁄𑀯 𑀕𑀬𑁆𑀳𑁂𑀬𑁆𑀬, 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀫𑁄𑀳𑀲𑁆𑀲𑁂𑀯 𑀧𑀳𑀸𑀦𑀁 𑀯𑀼𑀢𑁆𑀢𑀁, 𑀦𑁂𑀢𑀭𑁂𑀲𑀦𑁆𑀢𑀺 𑀢𑀫𑁆𑀫𑀽𑀮𑀓𑀢𑁆𑀢𑀸 𑀲𑀩𑁆𑀩𑀓𑀺𑀮𑁂𑀲𑀸𑀦𑀁, 𑀢𑀧𑁆𑀧𑀳𑀸𑀦𑀲𑁆𑀫𑀺𑀜𑁆𑀳𑀺 𑀯𑀼𑀘𑁆𑀘𑀫𑀸𑀦𑁂 𑀢𑀫𑁆𑀫𑀼𑀔𑁂𑀦𑁂𑀢𑀭𑁂𑀲𑀫𑁆𑀧𑀺 𑀧𑀳𑀸𑀦𑀁 𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺.

𑀏𑀯𑀁 𑀥𑀫𑁆𑀫𑀭𑀢𑀦𑀲𑁆𑀲 𑀦𑀫𑀓𑁆𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀤𑀸𑀥𑀸𑀭𑀪𑀽𑀢𑀲𑀗𑁆𑀖𑀭𑀢𑀦𑀁 𑀦𑀫𑀲𑁆𑀲𑀺𑀢𑀼𑀁 ‘𑀲𑀗𑁆𑀖𑀁 𑀢𑀣𑀸 𑀲𑀗𑁆𑀖𑀝𑀺𑀢𑀁 𑀕𑀼𑀡𑁂𑀳𑀻’𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀢𑀣𑀸𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑁂 𑀯𑀸, 𑀯𑀘𑁄𑀬𑀼𑀢𑁆𑀢𑀺𑀬𑀁 𑀯𑀸, 𑀯𑀘𑁄𑀬𑀼𑀢𑁆𑀢𑀺𑀧𑀓𑁆𑀔𑁂 𑀘 𑀲𑀤𑁆𑀤𑁄 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄, 𑀓𑀺𑀮𑁂𑀲𑀸𑀤𑀬𑁄 𑀲𑀁𑀳𑀦𑀢𑀺 𑀳𑀺𑀁𑀲𑀢𑀻𑀢𑀺 𑀲𑀗𑁆𑀖𑁄, 𑀲𑀁𑀧𑀼𑀩𑁆𑀩𑀢𑁄 𑀳𑀦𑀢𑀺𑀲𑁆𑀫𑀸 𑀓𑁆𑀯𑀺𑀫𑁆𑀳𑀺 ‘‘𑀓𑁆𑀯𑀺𑀫𑁆𑀳𑀺 𑀖𑁄𑀧𑀭𑀺𑀧𑀘𑁆𑀘𑀲𑀫𑁄 𑀳𑀻’’𑀢𑀺 (𑁫.𑁧𑁦𑁦) 𑀳𑀦𑀲𑁆𑀲 𑀖𑁄, 𑀓𑀺𑀮𑁂𑀲𑀳𑀺𑀁𑀲𑀦𑀜𑁆𑀘𑁂𑀢𑁆𑀣 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀕𑀳𑀺𑀢𑀁, 𑀕𑀼𑀡𑁂𑀳𑀻𑀢𑀺 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑀢𑁄 𑀲𑀫𑁆𑀫𑀼𑀢𑀺𑀲𑀗𑁆𑀖𑁂𑀦 𑀲𑀤𑁆𑀥𑀺𑀁

𑀘𑀢𑁆𑀢𑀸𑀭𑁄 𑀘 𑀧𑀝𑀺𑀧𑀦𑁆𑀦𑀸, 𑀘𑀢𑁆𑀢𑀸𑀭𑁄 𑀘 𑀨𑀮𑁂𑀞𑀺𑀢𑀸;

𑀏𑀲 𑀲𑀗𑁆𑀖𑁄 𑀉𑀚𑀼𑀪𑀽𑀢𑁄, 𑀧𑀜𑁆𑀜𑀸𑀲𑀻𑀮𑀲𑀫𑀸𑀳𑀺𑀢𑁄𑀢𑀺.

𑀯𑀼𑀢𑁆𑀢𑀅𑀝𑁆𑀞𑀅𑀭𑀺𑀬𑀧𑀼𑀕𑁆𑀕𑀮𑀸 ¶ 𑀕𑀬𑁆𑀳𑀦𑁆𑀢𑀺, 𑀕𑀼𑀡𑁂𑀳𑀻𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂𑀳𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺, 𑀲𑀗𑁆𑀖𑀝𑀺𑀢𑀦𑁆𑀢𑀺 𑀲𑀁𑀳𑀢𑀁.

𑀏𑀯𑀫𑀦𑀦𑁆𑀢𑀭𑀸𑀬𑁂𑀦 𑀕𑀦𑁆𑀣𑀧𑀭𑀺𑀲𑀫𑀸𑀧𑀦𑀢𑁆𑀣𑀫𑀦𑀦𑁆𑀢 𑀕𑀼𑀡𑀯𑀺𑀲𑀺𑀝𑁆𑀞𑀮𑁄𑀓𑀢𑁆𑀢𑀬𑀕𑁆𑀕𑀲𑀻𑀔𑀸𑀫𑀡𑀺𑀪𑀽𑀢𑀲𑁆𑀲 𑀭𑀢𑀦𑀢𑁆𑀢𑀬𑀲𑁆𑀲 𑀧𑀡𑀸𑀫𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀕𑀦𑁆𑀣 𑀓𑀢𑁆𑀢𑀸𑀤𑀺𑀬𑀣𑀸𑀯𑀼𑀢𑁆𑀢𑀢𑁆𑀣𑁄𑀧𑀤𑀲𑁆𑀲𑀦 𑀧𑀼𑀩𑁆𑀩𑀗𑁆𑀕𑀫𑀫𑀢𑁆𑀢𑀦𑀸 𑀲𑀫𑀸𑀭𑀪𑀺𑀢𑀩𑁆𑀩𑀁 𑀕𑀦𑁆𑀣 𑀓𑀭𑀡𑀁 𑀧𑀝𑀺𑀜𑁆𑀜𑀸𑀢𑀼𑀓𑀸𑀫𑁄’𑀬𑁄 𑀇𑀤𑁆𑀥𑀺𑀫𑀦𑁆𑀢𑁂𑀲𑀽’𑀢𑀺𑀆𑀤𑀺𑀫𑀸𑀳, 𑀢𑀢𑁆𑀣 ‘𑀬𑁄’𑀢𑀺 𑀇𑀫𑀲𑁆𑀲 ‘𑀢𑀦𑁆𑀦𑀸𑀫𑀥𑁂𑀬𑁆𑀬𑁂𑀦𑀸’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄, 𑀏𑀢𑀸𑀬 𑀲𑀢𑁆𑀢𑀸 𑀇𑀚𑁆𑀛𑀦𑁆𑀢𑀺 𑀇𑀤𑁆𑀥𑀸 𑀯𑀼𑀤𑁆𑀥𑀸 𑀉𑀓𑁆𑀓𑀁𑀲𑀕𑀢𑀸 𑀳𑁄𑀦𑁆𑀢𑀻𑀢𑀺 𑀇𑀤𑁆𑀥𑀺=𑀇𑀤𑁆𑀥𑀺𑀯𑀺𑀥𑀸𑀤𑀬𑁄 𑀮𑁄𑀓𑀺𑀬𑀸 𑀮𑁄𑀓𑀼𑀢𑁆𑀢𑀭𑀸 𑀘 𑀲𑀸 𑀏𑀢𑁂𑀲𑀫𑀢𑁆𑀣𑀻𑀢𑀺 𑀇𑀤𑁆𑀥𑀺𑀫𑀦𑁆𑀢𑁄, 𑀢𑁂𑀲𑀼 𑀇𑀤𑁆𑀥𑀺𑀫𑀦𑁆𑀢𑁂𑀲𑀼, 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀫𑀳𑀸𑀲𑀸𑀯𑀓𑀸𑀦𑀁 𑀫𑀚𑁆𑀛𑁂𑀢𑀺 𑀅𑀢𑁆𑀣𑁄, 𑀫𑀳𑀢𑁆𑀢𑀧𑁆𑀧𑀢𑁆𑀢𑁄𑀢𑀺 𑀫𑀳𑀢𑁆𑀢𑀁 𑀫𑀳𑀦𑁆𑀢𑀪𑀸𑀯𑀁 𑀕𑀢𑁄, 𑀢𑀦𑁆𑀦𑀸𑀫𑀥𑁂𑀬𑁆𑀬𑁂𑀦𑀸𑀢𑀺 𑀢𑀲𑁆𑀲𑁂𑀯 𑀦𑀸𑀫𑀥𑁂𑀬𑁆𑀬𑀫𑀲𑁆𑀲𑀸𑀢𑀺 𑀢𑀦𑁆𑀦𑀸𑀫𑀥𑁂𑀬𑁆𑀬𑁄, 𑀢𑁂𑀦, 𑀢𑀧𑁄𑀥𑀦𑁂𑀦𑀸𑀢𑀺 𑀫𑀼𑀦𑀺𑀦𑀸, 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺- ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀬𑀤𑀺𑀤𑀁 𑀫𑁄𑀕𑁆𑀕𑀮𑁆𑀮𑀸𑀦𑁄’’𑀢𑀺 𑀪𑀕𑀯𑀢𑀸 𑀇𑀤𑁆𑀥𑀺𑀫𑀦𑁆𑀢𑁂𑀲𑀼 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀦𑀸𑀫 𑀬𑁄 𑀤𑀼𑀢𑀺𑀬𑁄 𑀅𑀕𑁆𑀕𑀲𑀸𑀯𑀓𑁄… (𑀢𑁂𑀦 𑀲𑀫𑀸𑀦𑀦𑀸𑀫𑀥𑁂𑀬𑁆𑀬𑁂𑀦𑀸𑀢𑀺) 𑀢𑀫𑀧𑀤𑀺𑀲𑀦𑁆𑀢𑁄-𑀬𑀫𑀸𑀘𑀭𑀺𑀬𑁄 𑀅𑀦𑀼𑀤𑁆𑀥𑀢𑀪𑀸𑀯𑁂𑀦 𑀉𑀚𑀼𑀦𑀸𑀓𑁆𑀓𑀫𑁂𑀦 𑀦𑀸𑀫𑀸𑀤𑀺𑀓𑀫𑀯𑀢𑁆𑀯𑀸 𑀯𑀗𑁆𑀓𑀯𑀼𑀢𑁆𑀢𑀺𑀬𑀸 𑀅𑀢𑁆𑀢𑀦𑁄 𑀫𑁄𑀕𑁆𑀕𑀮𑁆𑀮𑀸𑀦𑁄𑀢𑀺 𑀦𑀸𑀫𑀁 𑀫𑀳𑀸𑀲𑀸𑀫𑀺𑀝𑁆𑀞𑀸𑀦𑀦𑁆𑀢𑀭𑀧𑁆𑀧𑀢𑁆𑀢𑀺𑀁 𑀓𑀸𑀮𑁄𑀘𑀺𑀢𑀧𑀜𑁆𑀜𑀸 𑀯𑁂𑀬𑁆𑀬𑀢𑁆𑀢𑀺𑀬𑀁 𑀩𑀼𑀤𑁆𑀥𑀲𑀸𑀲𑀦𑁄𑀧𑀓𑀸𑀭𑀺𑀢𑀸𑀤𑀺𑀜𑁆𑀘 𑀯𑀺𑀪𑀸𑀯𑁂𑀢𑀺. ‘𑀬𑀁 𑀭𑀘𑀺𑀢’𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀭𑀘𑀺𑀢𑀦𑁆𑀢𑀺 𑀓𑀢𑀁, 𑀓𑀺𑀦𑁆𑀢𑀺 𑀆𑀳 𑀲𑀤𑁆𑀤𑀲𑀢𑁆𑀣’𑀦𑁆𑀢𑀺, 𑀲𑀤𑁆𑀤𑀲𑀢𑁆𑀣𑀁 𑀦𑀸𑀫 𑀲𑀼𑀢𑁆𑀢, 𑀲𑀤𑁆𑀤𑀮𑀓𑁆𑀔𑀡𑀩𑁆𑀬𑀸𑀓𑀭𑀡𑀸𑀤𑁆𑀬𑀧𑀭𑀦𑀸𑀫𑀥𑁂𑀬𑁆𑀬𑀁, 𑀲𑀼𑀢𑁆𑀢𑀁(𑀳𑀺) ‘𑀲𑀤𑁆𑀤𑀸 (𑀮𑀓𑁆𑀔𑀻𑀬𑀦𑁆𑀢𑀺) 𑀲𑀸𑀲𑀻𑀬𑀦𑁆𑀢𑀺 𑀅𑀦𑀼𑀲𑀸𑀲𑀻𑀬𑀦𑁆𑀢𑀺 𑀧𑀓𑀢𑀺𑀧𑁆𑀧𑀘𑁆𑀘𑀬𑀸𑀤𑀺𑀯𑀺𑀪𑀸𑀕𑀓𑀧𑁆𑀧𑀦𑀸𑀬 𑀏𑀢𑁂𑀦𑀸’𑀢𑀺 𑀲𑀤𑁆𑀤𑀮𑀓𑁆𑀔𑀡𑀦𑁆𑀢𑀺 𑀘 ‘𑀩𑁆𑀬𑀸𑀓𑀭𑀻𑀬𑀦𑁆𑀢𑀺 𑀲𑀤𑁆𑀤𑀦𑀺𑀧𑁆𑀨𑀸𑀤𑀦𑀯𑀲𑁂𑀦 𑀓𑀣𑀻𑀬𑀦𑁆𑀢𑀺 𑀏𑀢𑁂𑀦𑀸’𑀢𑀺 𑀩𑁆𑀬𑀸𑀓𑀭𑀡𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺, 𑀅𑀧𑀭𑀫𑁆𑀧𑀦 𑀯𑀼𑀢𑁆𑀬𑀸𑀤𑀺 𑀢𑀤𑀼𑀧𑀓𑀭𑀡𑀪𑀸𑀯𑁂𑀦 𑀲𑀤𑁆𑀤𑀲𑀢𑁆𑀣𑀁 𑀲𑀤𑁆𑀤𑀮𑀓𑁆𑀔𑀡𑀁 𑀩𑁆𑀬𑀸𑀓𑀭𑀡𑀦𑁆𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺 𑀤𑀝𑁆𑀞𑀩𑁆𑀩𑀁, 𑀅𑀦𑀼𑀦𑀦𑁆𑀢𑀺 𑀢𑀩𑁆𑀩𑀺𑀲𑁂𑀲𑀦𑀁, 𑀅𑀲𑁂𑀲𑀮𑀓𑁆𑀔𑀺𑀬𑁄𑀧𑀲𑀗𑁆𑀕𑀸𑀳𑀓𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀲𑁆𑀲𑀸𑀧𑀭𑀲𑁆𑀲𑀸𑀪𑀸𑀯𑀸 𑀲𑀫𑁆𑀧𑀼𑀡𑁆𑀡𑀦𑁆𑀢𑀺 𑀅𑀢𑁆𑀣𑁄, 𑀅𑀣𑀸𑀢𑀺 𑀅𑀦𑀦𑁆𑀢𑀭𑀢𑁆𑀣𑁂 𑀦𑀺𑀧𑀸𑀢𑁄, 𑀲𑀤𑁆𑀤𑀲𑀢𑁆𑀣𑀭𑀘𑀦𑀸𑀦𑀦𑁆𑀢𑀭𑀦𑁆𑀢𑀺 𑀅𑀢𑁆𑀣𑁄, 𑀢𑀲𑁆𑀲𑁂𑀢𑀺 𑀲𑀤𑁆𑀤𑀲𑀢𑁆𑀣𑀲𑁆𑀲, 𑀯𑀼𑀢𑁆𑀢𑀺 𑀘 ¶ 𑀲𑀫𑀸𑀲𑀸 𑀓𑀢𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀲𑀼𑀢𑁆𑀢𑀁 𑀯𑀺𑀯𑀭𑀻𑀬𑀢𑀺 𑀏𑀢𑀸𑀬𑀸𑀢𑀺 𑀯𑀼𑀢𑁆𑀢𑀺, 𑀲𑀫𑀲𑁆𑀲𑀢𑁂 𑀲𑀗𑁆𑀔𑀺𑀧𑀻𑀬𑀢𑀻𑀢𑀺 𑀲𑀫𑀸𑀲𑀸.

𑀢𑀲𑁆𑀲𑀸𑀧𑀻𑀢𑀺 𑀯𑀼𑀢𑁆𑀢𑀺𑀬𑀸𑀧𑀺, 𑀲𑀗𑁆𑀕𑀳𑁂𑀢𑁆𑀯𑀸 𑀲𑀤𑁆𑀤𑀯𑀲𑁂𑀦 𑀲𑀗𑁆𑀓𑀼𑀘𑀺𑀢𑀁 𑀯𑀺𑀬 𑀓𑀢𑁆𑀯𑀸 𑀔𑀺𑀧𑀦𑀁 𑀲𑀗𑁆𑀔𑁂𑀧𑁄, 𑀢𑀲𑁆𑀲 𑀦𑀬𑁄 𑀓𑀫𑁄 𑀲𑀗𑁆𑀔𑁂𑀧𑀦𑀬𑁄, 𑀢𑁂𑀦, 𑀪𑁄𑀯𑀸𑀢𑀺 𑀬𑁄 𑀲𑀤𑁆𑀤𑀲𑀢𑁆𑀣𑀲𑁆𑀲 𑀯𑀼𑀢𑁆𑀢𑀺𑀬𑀸 𑀘 𑀓𑀢𑁆𑀢𑀸 𑀲𑁄 𑀏𑀯, 𑀇𑀤𑀸𑀦𑀺 𑀲𑀼𑀢𑁆𑀢𑀯𑀼𑀢𑁆𑀢𑀺𑀭𑀘𑀦𑀸𑀦𑀦𑁆𑀢𑀭𑀫𑀯𑀲𑀭𑀧𑁆𑀧𑀢𑁆𑀢𑁂 𑀇𑀫𑀲𑁆𑀫𑀺𑀁 𑀓𑀸𑀮𑁂, 𑀲𑀫𑀸𑀭𑀪𑁂𑀬𑁆𑀬 𑀲𑀫𑁆𑀫𑀸 𑀆𑀭𑀫𑁆𑀪𑀁 𑀓𑀭𑁂𑀬𑁆𑀬 𑀩𑀳𑀼𑀦𑁆𑀦𑀁 𑀓𑁆𑀭𑀺𑀬𑀸𑀓𑁆𑀔𑀡𑀸𑀦𑀫𑀸𑀤𑀺𑀪𑀽𑀢𑀁 𑀓𑁆𑀭𑀺𑀬𑀸𑀓𑁆𑀔𑀡𑀫𑀦𑀼𑀢𑀺𑀝𑁆𑀞𑁂𑀬𑁆𑀬, 𑀓𑀺𑀦𑁆𑀢𑀺 𑀲𑀁𑀯𑀡𑁆𑀡𑀦𑀁, 𑀲𑀁𑀯𑀡𑁆𑀡𑀻𑀬𑀢𑀺 𑀅𑀢𑁆𑀣𑁄 𑀏𑀢𑀸𑀬𑀸𑀢𑀺 𑀲𑀁𑀯𑀡𑁆𑀡𑀦𑀸, 𑀧𑀜𑁆𑀘𑀻𑀬𑀢𑀺 𑀯𑀺𑀧𑀜𑁆𑀘𑀻𑀬𑀢𑀺 𑀩𑁆𑀬𑀢𑁆𑀢𑀻 𑀓𑀭𑀻𑀬𑀢𑀺 𑀯𑀼𑀢𑁆𑀢𑀺 𑀅𑀢𑁆𑀣𑁄 𑀏𑀢𑀸𑀬𑀸𑀢𑀺 𑀯𑀸, 𑀢𑀁 𑀧𑀜𑁆𑀘𑀬𑀢𑀻𑀢𑀺 𑀯𑀸 𑀮𑀤𑁆𑀥𑀦𑀸𑀫𑀧𑀜𑁆𑀘𑀺𑀓𑀸, 𑀢𑀁.

𑀏𑀯𑀫𑀢𑁆𑀢𑀦𑀸 𑀓𑀭𑀡𑀻𑀬𑀲𑀢𑁆𑀣𑀫𑁆𑀧𑀝𑀺𑀚𑀸𑀦𑀺𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 ‘‘𑀤𑁆𑀯𑁂 𑀫𑁂 𑀪𑀺𑀓𑁆𑀔𑀯𑁂 𑀧𑀘𑁆𑀘𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀉𑀧𑁆𑀧𑀸𑀤𑀸𑀬 (𑀓𑀢𑀫𑁂 𑀤𑁆𑀯𑁂) 𑀧𑀭𑀢𑁄 𑀘 𑀖𑁄𑀲𑁄 (𑀅𑀚𑁆𑀛𑀢𑁆𑀢𑀜𑁆𑀘) 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄’’𑀢𑀺 𑀯𑀘𑀦𑀢𑁄 𑀲𑀫𑁆𑀫𑀸𑀲𑀯𑀦𑀧𑀝𑀺𑀩𑀤𑁆𑀥𑀸 𑀲𑀩𑁆𑀩𑀸𑀧𑀺 𑀲𑀸𑀲𑀦 (𑀧𑁆𑀧𑀝𑀺) 𑀲𑀫𑁆𑀧𑀢𑁆𑀢𑀻𑀢𑀺 𑀲𑀸𑀲𑀦𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀩𑁆𑀬𑀸𑀓𑀭𑀡𑀲𑁆𑀲 𑀫𑀽𑀮𑀓𑀸𑀭𑀡𑀢𑁆𑀢𑀸 𑀢𑀁 𑀲𑀯𑀦𑁂 𑀲𑀸𑀥𑀼𑀚𑀦𑁂 𑀦𑀺𑀬𑁄𑀚𑁂𑀦𑁆𑀢𑁄 ‘𑀢𑀁 𑀲𑀸𑀭𑀪𑀽𑀢’𑀦𑁆𑀢𑀺𑀆𑀤𑀺𑀫𑀸𑀳, 𑀢𑀢𑁆𑀣 𑀢𑀦𑁆𑀢𑀺 𑀬𑀲𑀤𑁆𑀤𑀯𑀺𑀭𑀳𑁂𑀧𑀺 𑀅𑀥𑀺𑀓𑀢𑀢𑁆𑀢𑀸 𑀲𑀁𑀯𑀡𑁆𑀡𑀦𑀁 𑀧𑀭𑀸𑀫𑀲𑀢𑀺, 𑀢𑀁 𑀲𑀼𑀡𑀦𑁆𑀢𑀽’𑀢𑀺 𑀲𑀫𑁆𑀩𑀦𑁆𑀥𑁄, 𑀲𑀸𑀥𑀽𑀢𑀺 𑀲𑀯𑀦𑀓𑁆𑀭𑀺𑀬𑀸𑀯𑀺𑀲𑁂𑀲𑀦𑀁, 𑀅𑀢𑁆𑀣𑀸𑀦𑀼𑀭𑀽𑀧𑀁 𑀩𑁆𑀬𑀜𑁆𑀚𑀦𑀁, 𑀩𑁆𑀬𑀜𑁆𑀚𑀦𑀸𑀦𑀼𑀭𑀽𑀧𑀜𑁆𑀘 𑀅𑀢𑁆𑀣𑀁𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀦𑀜𑁆𑀜𑀫𑀦𑀸 𑀳𑀼𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀲𑀼𑀡𑀦𑁆𑀢𑀽𑀢𑀺 𑀅𑀢𑁆𑀣𑁄 𑀲𑀼𑀯𑀡𑁆𑀡𑀪𑀸𑀚𑀦𑁂 𑀦𑀺𑀓𑁆𑀔𑀺𑀢𑁆𑀢𑀲𑀻𑀳𑀯𑀲𑀸𑀯𑀺𑀬 𑀅𑀯𑀺𑀦𑀲𑁆𑀲𑀫𑀸𑀦𑀁 𑀓𑀢𑁆𑀯𑀸 𑀳𑀤𑀬𑁂 𑀞𑀧𑀦𑀯𑀲𑁂𑀦, 𑀲𑀓𑁆𑀓𑀘𑁆𑀘𑀲𑀯𑀦𑀫𑁂𑀯 𑀳𑀺 𑀲𑁄𑀢𑀽𑀦𑀫𑀢𑁆𑀣𑀸𑀯𑀳𑀁 𑀳𑁄𑀢𑀻𑀢𑀺, 𑀲𑀦𑁆𑀢𑁄𑀢𑀺 𑀲𑀯𑀦𑀓𑁆𑀭𑀺𑀬𑀸𑀬 𑀓𑀢𑁆𑀢𑀸𑀭𑁄 𑀤𑀲𑁆𑀲𑁂𑀢𑀺, 𑀢𑀣𑀸 𑀲𑀸𑀢𑀺𑀲𑀬𑀩𑁆𑀬𑀸𑀓𑀭𑀡𑀁… 𑀢𑀣𑀸𑀯𑀺𑀥𑀸 𑀏𑀯 𑀲𑀧𑁆𑀧𑀼𑀭𑀺𑀲𑀸 𑀲𑀸𑀥𑀼𑀓𑀁 𑀲𑁄𑀢𑀼𑀓𑀸𑀫𑀸 𑀳𑁄𑀦𑁆𑀢𑀻𑀢𑀺, 𑀓𑀺𑀫𑁆𑀪𑀽𑀢𑀦𑁆𑀢𑀺 𑀆𑀳 ‘𑀲𑀸𑀭𑀪𑀽𑀢’𑀦𑁆𑀢𑀺𑀆𑀤𑀺, 𑀪𑀽𑀢𑀲𑀤𑁆𑀤𑁄 𑀏𑀢𑁆𑀣 ‘‘𑀪𑀽𑀢𑀲𑁆𑀫𑀺𑀁 𑀧𑀸𑀘𑀺𑀢𑁆𑀢𑀺𑀬’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀯𑀺𑀚𑁆𑀚𑀫𑀸𑀦𑀢𑁆𑀣𑁄, 𑀨𑁂𑀕𑁆𑀕𑀼𑀢𑁆𑀢𑀸𑀪𑀸𑀯𑁂𑀦 𑀅𑀧𑀭𑀺𑀘𑁆𑀘𑀚𑀦𑀻𑀬𑀢𑀸𑀬 𑀲𑀸𑀭𑁄 𑀣𑀺𑀭𑀁 𑀲𑁄 𑀅𑀢𑁆𑀣𑁄 𑀩𑁆𑀬𑀜𑁆𑀚𑀦𑀜𑁆𑀘 𑀅𑀲𑁆𑀲𑀸 𑀅𑀢𑁆𑀣𑀻𑀢𑀺 𑀲𑀸𑀭𑀸 𑀘 𑀲𑀸 𑀪𑀽𑀢𑀸𑀘, 𑀅𑀣 𑀯𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀸𑀢𑀺𑀲𑀬𑀲𑀸𑀥𑀦𑁂𑀓𑀲𑀸𑀥𑀦𑀪𑀸𑀯𑀢𑁄 𑀲𑁂𑀝𑁆𑀞𑀝𑁆𑀞𑁂𑀦 𑀲𑀸𑀭𑀜𑁆𑀘 𑀲𑀸 𑀪𑀽𑀢𑀸𑀘𑀸𑀢𑀺 𑀲𑀸𑀭𑀪𑀽𑀢𑀸, 𑀢𑀁 𑀕𑀦𑁆𑀣𑁄 𑀬𑁂𑀯𑁂𑀢𑁆𑀣 𑀲𑀗𑁆𑀔𑁂𑀧𑀺𑀢𑁄, 𑀅𑀢𑁆𑀣𑁄 𑀧𑀦 𑀦𑀬𑀕𑁆𑀕𑀸𑀳𑀺𑀢𑀢𑀸𑀬𑀧𑀺 𑀲𑀩𑁆𑀩𑀣𑀸 𑀤𑀲𑁆𑀲𑀺𑀢𑁄𑀬𑁂𑀯𑀸𑀢𑀺 ¶ 𑀯𑀺𑀧𑀼𑀮𑀁 𑀅𑀢𑁆𑀣𑀁 𑀕𑀡𑁆𑀳𑀸𑀢𑀻𑀢𑀺 𑀯𑀺𑀧𑀼𑀮𑀢𑁆𑀣𑀕𑀸𑀳𑀻, 𑀢𑀁, 𑀯𑀺𑀥𑀻𑀬𑀫𑀸𑀦𑀯𑀡𑁆𑀡𑀦𑀸𑀓𑁆𑀓𑀫𑀯𑀺𑀲𑁂𑀲𑁂𑀦 𑀩𑁆𑀬𑀸𑀓𑀼𑀮𑀲𑁆𑀲 𑀯𑀡𑁆𑀡𑀦𑀸𑀓𑁆𑀓𑀫𑀲𑁆𑀲 𑀦𑀺𑀭𑀲𑀦𑀢𑁄 𑀦𑀢𑁆𑀣𑀺 𑀆𑀓𑀼𑀮𑀁 𑀓𑀺𑀜𑁆𑀘𑀺 𑀅𑀲𑁆𑀲𑀸𑀢𑀺 𑀅𑀦𑀸𑀓𑀼𑀮𑀁, 𑀢𑀁, 𑀇𑀫𑀺𑀦𑀸 𑀘 𑀓𑀘𑁆𑀘𑀸𑀬𑀦𑀯𑀼𑀢𑁆𑀢𑀺𑀯𑀡𑁆𑀡𑀦𑀸𑀲𑀼 𑀦 𑀢𑀣𑀸𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀢𑀤𑁂𑀯𑀫𑀥𑀺𑀓𑀢𑀢𑁆𑀢𑀸𑀬𑁂𑀯𑀸𑀬𑀫𑀸𑀘𑀭𑀺𑀬𑁄 𑀕𑀦𑁆𑀣𑀸𑀭𑀫𑁆𑀪𑁂’𑀫𑀳𑀸𑀤𑀬𑁄 𑀬𑁄’𑀢𑀺𑀆𑀤𑀺𑀓𑁂 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀤𑀸𑀦𑀺 𑀅𑀢𑁆𑀢𑀦𑀸 𑀯𑀡𑁆𑀡𑀦𑀻𑀬𑀲𑁆𑀲 𑀕𑀦𑁆𑀣𑀲𑁆𑀲𑀸𑀤𑀺 𑀪𑀽𑀢𑀁 𑀯𑀸𑀓𑁆𑀬𑀫𑀦𑀥𑀺𑀓𑀢𑀧𑀭𑀺𑀳𑀸𑀭𑀫𑀼𑀔𑁂𑀦𑁂𑀯𑁄𑀧𑀦𑁆𑀬𑀲𑁆𑀬 𑀩𑁆𑀬𑀸𑀔𑁆𑀬𑀸𑀢𑀼𑀫𑀸𑀳- ‘𑀇𑀥𑀸’𑀢𑀺𑀆𑀤𑀺, 𑀢𑀢𑁆𑀣 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀫𑀸𑀕𑀥𑀺𑀓𑀲𑀤𑁆𑀤𑀮𑀓𑁆𑀔𑀡𑀯𑀺𑀭𑀘𑀦𑀸𑀥𑀺𑀓𑀸𑀭𑁂, 𑀫𑀸𑀕𑀥𑀸𑀦𑀁 𑀲𑀤𑁆𑀤𑀸𑀦𑀁 𑀇𑀤𑀦𑁆𑀢𑀺 𑀫𑀸𑀕𑀥𑀺𑀓𑀁, 𑀫𑀸𑀕𑀥𑀺𑀓𑀁 𑀲𑀤𑁆𑀤𑀮𑀓𑁆𑀔𑀡𑀦𑁆𑀢𑀺 𑀯𑀺𑀲𑁂𑀲𑀦 𑀲𑀫𑀸𑀲𑁄, 𑀯𑀺𑀭𑀘𑀬𑀺𑀢𑀼𑀓𑀸𑀫𑁄𑀢𑀺 𑀓𑀢𑁆𑀢𑀼𑀓𑀸𑀫𑁄, 𑀭𑀢𑀺𑀁𑀚𑀦𑁂𑀢𑀻𑀢𑀺 𑀭𑀢𑀦𑀁, 𑀭𑀫𑀬𑀢𑀻 [𑀭 𑀢𑀬𑀢𑀻 (𑀧𑁄𑀢𑁆𑀣𑀓𑁂)] 𑀢𑀺 (𑀯𑀸) 𑀭𑀢𑀦𑀁 𑀅𑀦𑀧𑁆𑀧𑀘𑁆𑀘𑀬𑁂𑀦, 𑀅𑀣𑀯𑀸 𑀬𑀁 𑀮𑁄𑀓𑁂 𑀘𑀺𑀢𑁆𑀢𑀻𑀓𑀢𑀸𑀤𑀺𑀓𑀁 𑀭𑀢𑀦𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀇𑀤𑀫𑁆𑀧𑀺 𑀢𑀁 𑀲𑀤𑀺𑀲𑀢𑀸𑀬 𑀭𑀢𑀦𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸𑀘𑀸𑀳𑀼𑁋

𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀁 𑀢𑁂𑀦 𑀯𑀼𑀘𑁆𑀘𑀢𑀻𑀢𑀺.

𑀩𑀼𑀤𑁆𑀥𑀸𑀤𑀻𑀦𑀫𑁂𑀢𑀫𑀥𑀺𑀯𑀘𑀦𑀁, 𑀢𑀬𑁄 𑀅𑀯𑀬𑀯𑀸 𑀅𑀲𑁆𑀲𑀸𑀢𑀺 𑀢𑀬𑀁, 𑀲𑀫𑀼𑀤𑀸𑀬𑁄, 𑀭𑀢𑀦𑀸𑀦𑀁 𑀢𑀬𑀁 𑀭𑀢𑀦𑀢𑁆𑀢𑀬𑀁, 𑀅𑀯𑀬𑀯𑀯𑀺𑀦𑀺𑀫𑁆𑀫𑀼𑀢𑁆𑀢𑀲𑁆𑀲 𑀧𑀦 𑀲𑀫𑀼𑀤𑀸𑀬𑀲𑁆𑀲 𑀅𑀪𑀸𑀯𑀢𑁄 𑀢𑀻𑀡𑀺 𑀏𑀯 𑀭𑀢𑀦𑀸𑀦𑀺 𑀯𑀼𑀘𑁆𑀘𑀦𑁆𑀢𑀺, 𑀧𑀡𑀫𑀦𑀁 𑀧𑀡𑀸𑀫𑁄, 𑀭𑀢𑀦𑀢𑁆𑀢𑀬𑀕𑀼𑀡𑀦𑀺𑀦𑁆𑀦𑀢𑀸, 𑀧𑀡𑀫𑀦𑁆𑀢𑀺 𑀏𑀢𑀸𑀬𑀸𑀢𑀺 𑀯𑀸 𑀧𑀡𑀸𑀫𑁄, 𑀧𑀡𑀸𑀫𑀓𑁆𑀭𑀺𑀬𑀸𑀦𑀺𑀧𑁆𑀨𑀸𑀤𑀺𑀓𑀸 𑀓𑀼𑀲𑀮𑀘𑁂𑀢𑀦𑀸, 𑀭𑀢𑀦𑀢𑁆𑀢𑀬𑀲𑁆𑀲 𑀧𑀡𑀸𑀫𑁄𑀢𑀺 𑀙𑀝𑁆𑀞𑀻𑀲𑀫𑀸𑀲𑁄, 𑀅𑀪𑀺𑀥𑀻𑀬𑀢𑀺 𑀧𑀝𑀺𑀧𑀸𑀤𑀻𑀬𑀢𑀻𑀢𑁆𑀬𑀪𑀺𑀥𑁂𑀬𑁆𑀬𑁄 𑀲𑀫𑀼𑀤𑀺𑀢𑁂𑀦 𑀲𑀢𑁆𑀣𑁂𑀦 𑀯𑀘𑀦𑀻𑀬𑀢𑁆𑀣𑁄, 𑀬𑁂𑀦 𑀘 𑀬𑁄 𑀧𑀝𑀺𑀧𑀸𑀤𑀻𑀬𑀢𑀺 𑀲𑁄 𑀢𑀲𑁆𑀲 𑀅𑀢𑁆𑀣𑁄 𑀳𑁄𑀢𑀻𑀢𑀺, 𑀲𑁄 𑀘 𑀧𑀓𑀢𑀺𑀧𑁆𑀧𑀘𑁆𑀘𑀬𑀸𑀤𑀺𑀯𑀺𑀪𑀸𑀕𑀓𑀧𑁆𑀧𑀦𑀸𑀬 𑀲𑀤𑁆𑀤𑀸𑀦𑀁 𑀲𑀗𑁆𑀔𑀭𑀡𑀁, 𑀲𑀤𑁆𑀤𑀲𑀢𑁆𑀣𑁂𑀦 𑀳𑀺 𑀲𑀤𑁆𑀤𑀲𑀗𑁆𑀔𑀭𑀡𑀫𑁂𑀯 𑀧𑀝𑀺𑀧𑀸𑀤𑀻𑀬𑀢𑀺, (𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑁄 𑀘 𑀅𑀪𑀺𑀥𑁂𑀬𑁆𑀬𑁄 𑀘) 𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑀸𑀪𑀺𑀥𑁂𑀬𑁆𑀬𑀦𑁆𑀢𑀺 𑀘𑀢𑁆𑀣𑀲𑀫𑀸𑀲𑁄, 𑀢𑀲𑁆𑀲 𑀲𑀦𑁆𑀤𑀲𑁆𑀲𑀦𑀁 𑀅𑀢𑁆𑀣𑁄 𑀬𑀲𑁆𑀲𑀸𑀢𑀺 𑀅𑀜𑁆𑀜𑀧𑀤𑀢𑁆𑀣𑁄, 𑀓𑀺𑀦𑁆𑀢𑀁 𑀯𑀸𑀓𑁆𑀬𑀁, 𑀢𑀸 𑀯𑀸𑀢𑀺 𑀯𑀸𑀓𑁆𑀬𑀸𑀮𑀗𑁆𑀓𑀸𑀭𑁂, 𑀦𑀦𑀼𑀘𑁂𑀯𑀫𑀥𑀺𑀓𑀢𑀢𑁆𑀢𑁂𑀧𑀺 𑀅𑀪𑀺𑀥𑁂𑀬𑁆𑀬𑀫𑀢𑁆𑀢𑀫𑁂𑀯𑀤𑀲𑁆𑀲𑁂𑀢𑀩𑁆𑀩𑀁 ¶ 𑀲𑀺𑀬𑀸 𑀓𑀺𑀁 𑀯𑀸𑀘𑀸𑀧𑀡𑀸𑀫𑁂𑀦, 𑀓𑀸𑀬𑀫𑀦𑁄𑀫𑀬𑁂𑀦𑀸𑀧𑀺 𑀧𑀼𑀜𑁆𑀜𑀸𑀢𑀺 𑀲𑀬𑀧𑁆𑀧𑀢𑁆𑀢𑀺𑀬𑀸 𑀅𑀪𑀺𑀲𑀫𑀻𑀳𑀺𑀢𑀢𑁆𑀣𑀲𑀺𑀤𑁆𑀥𑀺 𑀳𑁄𑀢𑁂𑀯𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀦𑀺𑀥𑀸𑀬 𑀯𑀘𑀻𑀧𑀡𑀸𑀫𑀲𑁆𑀲 𑀧𑀭𑀢𑁆𑀣𑀲𑀦𑁆𑀦𑀺𑀲𑁆𑀲𑀬𑀢𑀜𑁆𑀘 𑀢𑀲𑁆𑀲𑁂𑀯 𑀯𑀺𑀪𑀸𑀕𑁂𑀦 𑀧𑀬𑁄𑀚𑀦𑀜𑁆𑀘 𑀤𑀲𑁆𑀲𑁂𑀢𑀼𑀫𑀸𑀳- ‘𑀢𑀢𑁆𑀣’𑀇𑀘𑁆𑀘𑀸𑀤𑀺, 𑀕𑀼𑀡𑀲𑀤𑁆𑀤𑁄 𑀏𑀢𑁆𑀣 ‘‘𑀲𑀢𑀕𑀼𑀡𑀸 𑀤𑀓𑁆𑀔𑀺𑀡𑀸 𑀧𑀸𑀝𑀺𑀓𑀗𑁆𑀔𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀆𑀦𑀺𑀲𑀁𑀲𑀝𑁆𑀞𑁄, 𑀕𑀼𑀡𑀸𑀦𑀫𑀸𑀦𑀺𑀲𑀁𑀲𑀸𑀦𑀁 𑀅𑀦𑀼𑀓𑀽𑀮𑀁 𑀅𑀦𑀼𑀕𑀼𑀡𑀁, 𑀳𑁂𑀢𑀼𑀫𑀦𑁆𑀢𑀯𑀺𑀲𑁂𑀲𑀦𑀫𑁂𑀢𑀁, 𑀧𑀥𑀸𑀦𑀪𑀸𑀯𑀁 𑀦𑀻𑀢𑀁 𑀧𑀡𑀻𑀢𑀁 𑀅𑀢𑀺𑀉𑀢𑁆𑀢𑀫𑀦𑁆𑀢𑀺 𑀅𑀢𑁆𑀣𑁄, 𑀅𑀢𑀻𑀲𑀬𑁂𑀦 𑀧𑀡𑀻𑀢𑀁 𑀧𑀡𑀻𑀢𑀢𑀭𑀁, 𑀘𑀺𑀢𑁆𑀢𑀲𑁆𑀲𑀲𑀦𑁆𑀢𑀸𑀦𑀁 𑀧𑀩𑀦𑁆𑀥𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑀁, 𑀧𑀡𑀻𑀢𑀢𑀭𑀜𑁆𑀘 𑀢𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀜𑁆𑀘, 𑀅𑀦𑀼𑀕𑀼𑀡𑀜𑁆𑀘 𑀢𑀁 𑀧𑀡𑀻𑀢𑀢𑀭𑀘𑀺𑀢𑁆𑀢𑀲𑀦𑁆𑀢𑀸𑀦𑀜𑁆𑀘𑀸𑀢𑀺 𑀯𑀺𑀲𑁂𑀲𑀦𑀲𑀫𑀸𑀲𑁄, 𑀢𑀧𑁆𑀧𑀡𑀸𑀫𑀓𑀭𑀡𑁂𑀦 𑀅𑀦𑀼𑀕𑀼𑀡…𑀧𑁂… 𑀲𑀦𑁆𑀢𑀸𑀦𑀁 𑀬𑁂𑀲𑀦𑁆𑀢𑀺 𑀅𑀜𑁆𑀜𑀧𑀤𑀢𑁆𑀣𑁄, 𑀢𑁂𑀲𑀁, 𑀬𑀣𑀸 𑀢𑁂 𑀲𑁄𑀢𑀸𑀭𑁄 𑀭𑀢𑀦𑀢𑁆𑀢𑀬𑀲𑁆𑀲 𑀧𑀡𑀸𑀫𑀓𑀭𑀡𑁂𑀦 𑀧𑀼𑀜𑁆𑀜𑀸𑀢𑀺𑀲𑀬𑀧𑁆𑀧𑀝𑀺𑀮𑀸𑀪𑀸 𑀅𑀦𑁂𑀓𑀸𑀦𑀺𑀲𑀁𑀲𑀸𑀢𑀺𑀲𑀬𑀧𑁆𑀧𑀝𑀺𑀮𑀸𑀪𑀸𑀦𑀼𑀓𑀽𑀮 𑀘𑀺𑀢𑁆𑀢𑀲𑀦𑁆𑀢𑀸𑀦𑀢𑀸𑀬 𑀧𑀥𑀸𑀦𑀢𑀭𑀘𑀺𑀢𑁆𑀢𑀲𑀦𑁆𑀢𑀸𑀦𑀸 𑀳𑁄𑀦𑁆𑀢𑀺, 𑀢𑀣𑀸 𑀧𑀯𑀢𑁆𑀢𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀇𑀤𑀫𑁆𑀧𑀺 𑀅𑀥𑀺𑀕𑀢𑀸…𑀧𑁂… 𑀦𑁆𑀢𑀭𑀸𑀥𑀸𑀦𑀦𑁆𑀢𑀻𑀫𑁂𑀲𑀁 𑀳𑁂𑀢𑀼𑀪𑀸𑀯𑁂𑀦 𑀢𑀺𑀝𑁆𑀞𑀢𑀺, 𑀅𑀥𑀺𑀕𑀢𑀸 𑀧𑀢𑁆𑀢𑀸 𑀅𑀦𑁂𑀓𑁂 𑀩𑀳𑀽 𑀆𑀦𑀺𑀲𑀁𑀲𑀯𑀺𑀲𑁂𑀲𑀸 𑀆𑀬𑀼 𑀯𑀡𑁆𑀡𑀲𑀼𑀔𑀩𑀮𑀧𑀝𑀺𑀪𑀸𑀦𑀸𑀤𑀬𑁄 𑀬𑁂𑀲𑀦𑁆𑀢𑀺 𑀯𑀺𑀕𑁆𑀕𑀳𑁄, 𑀯𑀺𑀲𑁄𑀲𑀺𑀢𑀸 𑀲𑀼𑀓𑁆𑀔𑀸𑀧𑀺𑀢𑀸 𑀅𑀦𑁆𑀢𑀭𑀸𑀬𑀸 𑀪𑀬𑀸𑀤𑀬𑁄 𑀅𑀚𑁆𑀛𑀢𑁆𑀢𑀺𑀓𑀸 𑀩𑀸𑀳𑀺𑀬𑀸 𑀯𑀸 𑀬𑁂𑀲𑀁 𑀢𑀣𑀸𑀯𑀺𑀥𑀸𑀦𑀁 𑀲𑁄𑀢𑀽𑀦𑀁, 𑀏𑀢𑁂𑀧𑀺 𑀅𑀪𑀺,𑀧𑁂,𑀤𑁆𑀥𑀢𑁆𑀣𑀦𑁆𑀢𑀺 𑀇𑀘𑁆𑀘𑀲𑁆𑀲 𑀳𑁂𑀢𑀽, 𑀅𑀪𑀺𑀲𑀫𑀻𑀳𑀺𑀢𑀲𑁆𑀲 𑀅𑀦𑀼𑀝𑁆𑀞𑀺𑀢𑀲𑁆𑀲 𑀓𑀢𑀦𑀺𑀝𑁆𑀞𑀺𑀢𑀲𑁆𑀲 𑀕𑀦𑁆𑀣𑀲𑁆𑀲 𑀅𑀯𑀩𑁄𑀥𑁄𑀬𑁂𑀯 𑀨𑀮𑀁, 𑀢𑀲𑁆𑀲 𑀲𑀺𑀚𑁆𑀛𑀦𑀢𑁆𑀣𑀁, 𑀓𑀺𑀦𑁆𑀢𑀁 𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑀲𑀦𑁆𑀤𑀲𑁆𑀲𑀦𑀁.

𑀲𑀘𑁆𑀘𑀁 𑀧𑀼𑀦𑀧𑀺 𑀲𑀘𑁆𑀘𑀦𑁆𑀢𑀺, 𑀪𑀼𑀚𑀫𑀼𑀓𑁆𑀔𑀺𑀧𑁆𑀧 𑀯𑀼𑀘𑁆𑀘𑀢𑁂;

𑀲𑀓𑀢𑁆𑀣𑁄 𑀦𑀢𑁆𑀣𑀻 𑀦𑀢𑁆𑀣𑁂𑀯,𑀧𑀭𑀲𑁆𑀲𑀢𑁆𑀣𑀫𑀓𑀼𑀩𑁆𑀩𑀢𑁄𑀢𑀺.

𑀯𑀘𑀦𑀢𑁄 𑀧𑀭𑀢𑁆𑀣𑁄𑀯 𑀲𑀧𑁆𑀧𑀼𑀭𑀺𑀲𑁂𑀳𑀺 𑀓𑀢𑁆𑀢𑀩𑁆𑀩𑁄, 𑀧𑀭𑀢𑁆𑀣𑁂 𑀲𑀫𑁆𑀧𑀸𑀤𑀺𑀢𑁂 𑀧𑀦 𑀲𑀓𑀢𑁆𑀣𑁄 𑀲𑀫𑁆𑀧𑀦𑁆𑀦𑁄𑀯 𑀦𑀸𑀫 𑀲𑀺𑀬𑀸𑀢𑀺 𑀫𑀦𑀲𑀺 𑀓𑀢𑁆𑀯𑀸 𑀆𑀳- ‘𑀏𑀢𑀤𑁂𑀯𑀸’𑀢𑀺𑀆𑀤𑀺. 𑀓𑀸𑀬𑀫𑀦𑁄𑀲𑀫𑀸𑀘𑀭𑀡𑁂𑀦 𑀲𑀫𑁆𑀧𑀚𑁆𑀚𑀫𑀸𑀦𑀜𑁆𑀘 𑀯𑀘𑀻𑀲𑀫𑀸𑀘𑀭𑀡𑁂𑀦 𑀲𑀫𑁆𑀧𑀚𑁆𑀚𑀢𑁂𑀯𑀸𑀢𑀺 𑀅𑀦𑁂𑀦𑁂𑀯 𑀯𑀸𑀓𑁆𑀬𑁂𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 𑀅𑀯𑀕𑀦𑁆𑀢𑀩𑁆𑀩𑀁, 𑀩𑀼𑀤𑁆𑀥𑀺 𑀧𑀼𑀩𑁆𑀩𑀸 𑀬𑀲𑁆𑀫𑀺𑀁 𑀓𑀭𑀡𑁂 𑀢𑀁 𑀩𑀼𑀤𑁆𑀥𑀺 𑀧𑀼𑀩𑁆𑀩𑀁, 𑀢𑀁 𑀲𑀻𑀮𑁂𑀦 𑀓𑀭𑁄𑀦𑁆𑀢𑀸 𑀩𑀼𑀤𑁆𑀥𑀺𑀧𑀼𑀩𑁆𑀩𑀓𑀸𑀭𑀺𑀦𑁄, 𑀅𑀪𑀺𑀥𑁂𑀬𑁆𑀬𑀲𑁆𑀲 𑀅𑀥𑀺𑀕𑀫𑁄 𑀚𑀸𑀦𑀦𑀁 𑀧𑀼𑀩𑁆𑀩𑁄 𑀬𑀲𑁆𑀲 𑀲𑁄 𑀅𑀪𑀺𑀥𑁂𑀬𑁆𑀬𑀸𑀥𑀺𑀕𑀫𑀧𑀼𑀩𑁆𑀩𑀓𑁄 ¶ , 𑀅𑀯𑀢𑀸𑀭𑁄 𑀧𑀯𑀢𑁆𑀢𑀺, 𑀏𑀓𑀤𑁂𑀲𑀤𑀲𑁆𑀲𑀦𑁂 ‘‘𑀲𑀫𑀼𑀤𑁆𑀤𑁄 𑀤𑀺𑀝𑁆𑀞𑁄’’𑀢𑀺 𑀯𑀺𑀬 𑀏𑀓𑀤𑁂𑀲𑁂𑀧𑀺 𑀲𑀫𑀼𑀤𑀸𑀬𑀯𑁄𑀳𑀸𑀭𑀤𑀲𑁆𑀲𑀦𑀢𑁄 𑀧𑀘𑁆𑀙𑀺𑀫 𑀧𑀸𑀤𑁂𑀦𑀸𑀢𑀺 𑀯𑀼𑀢𑁆𑀢𑀁, 𑀧𑀘𑁆𑀙𑀺𑀫𑀧𑀸𑀤𑀲𑁆𑀲𑁂𑀓𑀤𑁂𑀲𑀪𑀽𑀢𑁂𑀦 ‘𑀲𑀤𑁆𑀤𑀮𑀓𑁆𑀔𑀡’𑀫𑀺𑀘𑁆𑀘𑀦𑁂𑀦𑀸𑀢𑀺 𑀅𑀢𑁆𑀣𑁄, 𑀲𑀸𑀥𑀺𑀬𑀁 𑀲𑀤𑁆𑀤𑀸𑀦𑀁 𑀲𑀗𑁆𑀔𑀭𑀡𑀁, 𑀲𑀸𑀥𑀦𑀁 𑀩𑁆𑀬𑀸𑀓𑀭𑀡𑀁, 𑀢𑀁 𑀮𑀓𑁆𑀔𑀡𑀁 𑀲𑀪𑀸𑀯𑁄 𑀅𑀲𑁆𑀲𑀸𑀢𑀺 𑀲𑀸𑀥𑀺𑀬𑀲𑀸𑀥𑀦𑀮𑀓𑁆𑀔𑀡𑁄, 𑀲𑀸𑀥𑀺𑀬𑀲𑁆𑀲𑁂𑀤𑀁 𑀲𑀸𑀥𑀦𑀁, 𑀲𑀸𑀥𑀦𑀲𑁆𑀲 𑀘𑁂𑀤𑀁 𑀲𑀸𑀥𑀺𑀬𑀦𑁆𑀢𑀺 𑀏𑀯𑀫𑀲𑁆𑀲𑁂𑀤𑀫𑁆𑀪𑀸𑀯𑀳𑁂𑀢𑀼𑀲𑀪𑀸𑀯𑁄 𑀲𑀫𑁆𑀩𑀦𑁆𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀧𑀬𑁄𑀚𑀦𑀁 𑀅𑀪𑀺𑀥𑁂𑀬𑁆𑀬𑀲𑀤𑁆𑀤𑁄𑀧𑀤𑀲𑁆𑀲𑀺𑀢𑀁 𑀲𑀤𑁆𑀤𑀲𑀗𑁆𑀔𑀭𑀡𑀁, 𑀢𑀢𑁆𑀣 𑀲𑀫𑁆𑀩𑀦𑁆𑀥𑀲𑁆𑀲𑀦𑁆𑀢𑁄𑀕𑀥𑀢𑁆𑀢𑀁… 𑀲𑀸𑀥𑀺𑀬𑁄𑀧𑀤𑀲𑁆𑀲𑀦𑀫𑀼𑀔𑁂𑀦 𑀲𑀸𑀥𑀦𑀲𑁆𑀲𑀸𑀧𑀺 𑀤𑀲𑁆𑀲𑀺𑀢𑀢𑁆𑀢𑀸 𑀦𑀺𑀲𑁆𑀲𑀬𑁄𑀧𑀤𑀲𑁆𑀲𑀦𑀢𑁄, 𑀉𑀲𑁆𑀲𑀼𑀓𑁆𑀓𑀁 𑀲𑀫𑁆𑀫𑀸𑀯𑀸𑀬𑀸𑀫𑀁, 𑀩𑀼𑀤𑁆𑀥𑀢𑁆𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀧𑀽𑀭𑁂𑀢𑁆𑀯𑀸𑀢𑀺𑁋

𑀫𑀦𑀼𑀲𑁆𑀲𑀢𑁆𑀢𑀁 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀺, 𑀳𑁂𑀢𑀼 𑀲𑀢𑁆𑀣𑀸𑀭𑀤𑀲𑁆𑀲𑀦𑀁;

𑀧𑀩𑁆𑀩𑀚𑁆𑀚𑀸 𑀕𑀼𑀡𑀲𑀫𑁆𑀧𑀢𑁆𑀢𑀺, 𑀅𑀥𑀺𑀓𑀸𑀭𑁄 𑀘 𑀙𑀦𑁆𑀤𑀢𑀸;

𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑀸, 𑀅𑀪𑀺𑀦𑀻𑀳𑀸𑀭𑁄 𑀲𑀫𑀺𑀚𑁆𑀛𑀢𑀻𑀢𑀺.

𑀯𑀼𑀢𑁆𑀢𑀅𑀝𑁆𑀞𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁂𑀦 𑀅𑀪𑀺𑀦𑀻𑀳𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑀸 𑀳𑀼𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑁂 𑀧𑀸𑀭𑀫𑀺𑀢𑀸𑀤𑀬𑁄 𑀥𑀫𑁆𑀫𑁂 𑀧𑀽𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄, 𑀆𑀕𑀢𑀸𑀢𑀺 𑀲𑀢𑁆𑀢𑀢𑁆𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀼𑀩𑁆𑀭𑀽𑀳𑀦𑁂𑀦 𑀆𑀕𑀢𑀸, 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂, 𑀆𑀕𑀢𑀸𑀢𑀺 𑀧𑀢𑁆𑀢𑀸 𑀉𑀧𑁆𑀧𑀦𑁆𑀦𑀸, 𑀢𑀣𑀸𑀕𑀢𑁄𑀢𑀺 𑀬𑀣𑀸 𑀲𑀫𑁆𑀧𑀢𑀺 𑀚𑀸𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀢𑀸, 𑀢𑀣𑀸 𑀅𑀬𑀫𑁆𑀧𑀺 𑀉𑀢𑁆𑀢𑀭𑀸𑀪𑀺𑀫𑀼𑀔𑀁 𑀕𑀢𑁄𑀢𑀺 𑀅𑀢𑁆𑀣𑁄, 𑀫𑀼𑀳𑀼𑀢𑁆𑀢𑀚𑀸𑀢𑁄𑀯𑀸𑀢𑀺 𑀲𑀫𑁆𑀧𑀢𑀺𑀚𑀸𑀢𑁄 𑀏𑀯, 𑀚𑀸𑀢𑀲𑀫𑀦𑀦𑁆𑀢𑀭𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀯𑀺𑀓𑁆𑀓𑀫𑀻𑀢𑀺 𑀅𑀕𑀫𑀸𑀲𑀺, 𑀲𑀢𑁆𑀢 𑀧𑀤𑀸𑀦𑀺 𑀕𑀦𑁆𑀢𑁆𑀯𑀸𑀦 𑀤𑀺𑀲𑀸 𑀯𑀺𑀮𑁄𑀓𑁂𑀲𑀻𑀢𑀺 𑀇𑀤𑀁 ‘‘𑀥𑀫𑁆𑀫𑀢𑀸 𑀏𑀲𑀸 𑀪𑀺𑀓𑁆𑀔𑀯𑁂 𑀲𑀫𑁆𑀧𑀢𑀺 𑀚𑀸𑀢𑁄 𑀩𑁄𑀥𑀺𑀲𑀢𑁆𑀢𑀸 𑀲𑀫𑁂𑀳𑀺 𑀧𑀸𑀤𑁂𑀳𑀺 𑀧𑀢𑀺𑀝𑁆𑀞𑀳𑀺𑀢𑁆𑀯𑀸’’𑀢𑀺 𑀏𑀯 𑀫𑀸𑀤𑀺𑀓𑀸𑀬 𑀧𑀸𑀴𑀺𑀬𑀸 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑀽𑀧𑀭𑀺𑀞𑀺𑀢𑀲𑁆𑀲 𑀲𑀩𑁆𑀩𑀤𑀺𑀲𑀸𑀦𑀼𑀯𑀺𑀮𑁄𑀓𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀤𑀺𑀲𑀸 𑀯𑀺𑀮𑁄𑀓𑁂𑀲𑀺 𑀲𑀫𑀦𑁆𑀢𑀢𑁄𑀢𑀺 𑀇𑀤𑀫𑁆𑀧𑀦 ‘𑀲𑀫𑁂𑀳𑀺 𑀧𑀸𑀤𑁂𑀳𑀺 𑀨𑀼𑀲𑀻 𑀯𑀲𑀼𑀦𑁆𑀥𑀭’𑀦𑁆𑀢𑀺 𑀏𑀢𑀲𑁆𑀲 𑀅𑀦𑀦𑁆𑀢𑀭𑀁 𑀤𑀝𑁆𑀞𑀩𑁆𑀩𑀁… 𑀧𑀸𑀤𑁂𑀳𑀺 𑀯𑀲𑀼𑀦𑁆𑀥𑀭𑀸𑀨𑀼𑀲𑀦𑀸𑀦𑀦𑁆𑀢𑀭𑀫𑁂𑀯 𑀤𑀲𑀤𑀺𑀲𑀸𑀯𑀮𑁄𑀓𑀺𑀢𑀢𑁆𑀢𑀸, 𑀅𑀝𑁆𑀞𑀗𑁆𑀕𑀸𑀦𑀺 𑀦𑀸𑀫𑁋

𑀯𑀺𑀲𑀝𑁆𑀞𑀁 𑀫𑀜𑁆𑀚𑀼 𑀯𑀺𑀜𑁆𑀜𑁂𑀬𑁆𑀬𑀁, 𑀲𑀯𑀦𑀻𑀬𑀸-𑀯𑀺𑀲𑀸𑀭𑀺𑀦𑁄;

𑀩𑀺𑀦𑁆𑀤𑀼 𑀕𑀫𑁆𑀪𑀻𑀭𑀦𑀺𑀦𑁆𑀦𑀸𑀤𑀺,𑀘𑁆𑀘𑁂𑀯𑀫𑀝𑁆𑀞𑀗𑁆𑀕𑀺𑀓𑁄 𑀲𑀭𑁄𑀢𑀺.

𑀯𑀼𑀢𑁆𑀢𑀸𑀦𑀺 ¶ 𑀅𑀝𑁆𑀞𑀗𑁆𑀕𑀸𑀦𑀺, 𑀢𑀣𑀸𑀕𑀢𑁄𑀢𑀺 𑀇𑀫𑀲𑁆𑀲𑁂𑀯 𑀯𑀺𑀲𑀼𑀁 𑀅𑀢𑁆𑀣𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀢𑀼𑀁 ‘𑀅𑀣𑀯𑀸’𑀢𑀺𑀆𑀤𑀺𑀫𑀸𑀳, 𑀅𑀭𑀺𑀬𑁂𑀦 𑀲𑁂𑀢𑀼𑀦𑀸𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑁂𑀦 𑀉𑀢𑁆𑀢𑀫𑁂𑀦 𑀫𑀕𑁆𑀕𑁂𑀦, 𑀏𑀯𑀫𑀸𑀤𑀺𑀦𑀸𑀢𑀺𑀆𑀤𑀺𑀲𑀤𑁆𑀤𑁂𑀦 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀪𑀸𑀯𑀲𑀭𑀲𑀮𑀓𑁆𑀔𑀡𑀁 𑀢𑀣𑀁 𑀆𑀕𑀢𑁄 𑀬𑀣𑀸𑀯𑀢𑁄 𑀅𑀥𑀺𑀕𑀢𑁄’𑀬𑁂𑀕𑀢𑁆𑀬𑀢𑁆𑀣𑀸 𑀢𑁂 𑀩𑀼𑀤𑁆𑀥𑁆𑀬𑀢𑁆𑀣𑀸, 𑀬𑁂 𑀩𑀼𑀤𑁆𑀥𑁆𑀬𑀸 𑀢𑁂 𑀕𑀢𑁆𑀬𑀢𑁆𑀣𑀸’𑀢𑀺𑀢𑀣𑀸𑀕𑀢𑁄𑀢𑀺 𑀏𑀯𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀢𑀢𑁆𑀣𑀢𑀢𑁆𑀣𑀸𑀢𑀺 𑀢𑁂𑀲𑀼 𑀢𑁂𑀲𑀼 𑀤𑀻𑀖𑀸𑀕𑀫𑀸𑀤𑀻𑀲𑀼, 𑀢𑀣𑀸𑀕𑀢𑀪𑀸𑀯𑁄𑀢𑀺 𑀢𑀣𑀸𑀕𑀢𑁄𑀢𑀺 𑀪𑀯𑀦𑀁 𑀦𑀺𑀧𑁆𑀨𑀢𑁆𑀢𑀺 𑀦𑀫𑀲𑁆𑀲𑀦𑀓𑀺𑀭𑀺𑀬𑀸𑀪𑀺𑀲𑀫𑁆𑀩𑀦𑁆𑀥𑀸𑀢𑀺’𑀦𑀫𑀲𑁆𑀲𑀺𑀢𑁆𑀯𑀸’𑀢𑀺 𑀏𑀢𑁆𑀣 𑀦𑀫𑀲𑁆𑀲𑀦𑀓𑀺𑀭𑀺𑀬𑀸𑀬 𑀅𑀪𑀺𑀲𑀫𑁆𑀩𑀦𑁆𑀥𑀸 𑀇𑀫𑀺𑀦𑀸 𑀢𑀣𑀸𑀕𑀢𑀸𑀤𑀻𑀦𑀁 𑀓𑀫𑁆𑀫𑀢𑁆𑀢𑀁 𑀯𑀺𑀪𑀸𑀯𑁂𑀢𑀺, 𑀦𑀫𑀲𑁆𑀲𑀦𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀢𑁆𑀢𑀸𑀢𑀺 ‘𑀦𑀫𑀲𑁆𑀲𑀺𑀢𑁆𑀯𑀸’𑀢𑀺 𑀦𑀫𑀲𑁆𑀲𑀦𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀦𑀸𑀫 𑀲𑀺𑀬𑀸𑀢𑀺 𑀦𑀫𑀲𑁆𑀲𑀦𑀦𑁆𑀢𑀺 𑀯𑀼𑀢𑁆𑀢𑀦𑀫𑀲𑁆𑀲𑀦𑀓𑀺𑀭𑀺𑀬𑀸𑀬 𑀯𑀺𑀲𑁂𑀲𑀦𑀢𑁆𑀢𑀸, 𑀩𑁄𑀥𑀺𑀬𑀸𑀢𑀺 𑀩𑁄𑀥𑀺𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁, 𑀢𑀁 𑀪𑀕𑀯𑀸 𑀏𑀢𑁆𑀣 𑀧𑀢𑁆𑀢𑁄𑀢𑀺 (𑀩𑁄𑀥𑀺, 𑀢𑀲𑁆𑀲𑀸) 𑀩𑁄𑀥𑀺𑀭𑀼𑀓𑁆𑀔𑀲𑁆𑀲𑀸𑀢𑀺 𑀅𑀢𑁆𑀣𑁄, 𑀫𑀽𑀮𑁂𑀢𑀺 𑀫𑀽𑀮𑀲𑀫𑀻𑀧𑁂 ‘‘𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂 𑀙𑀸𑀬𑀸 𑀨𑀭𑀢𑀺 𑀦𑀺𑀯𑀸𑀢𑁂 𑀧𑀡𑁆𑀡𑀸𑀦𑀺 𑀧𑀢𑀦𑁆𑀢𑀺 𑀏𑀢𑀸𑀯𑀢𑀸 𑀭𑀼𑀓𑁆𑀔𑀫𑀽𑀮𑀁’’𑀢𑀺𑀆𑀤𑀻𑀲𑀼 𑀯𑀺𑀬, 𑀦𑀦𑀼 𑀅𑀜𑁆𑀜𑁂𑀧𑀺 𑀔𑀻𑀡𑀸𑀲𑀯𑀸 ‘𑀅𑀕𑁆𑀕𑀫𑀕𑁆𑀕𑁂𑀦𑁂’𑀘𑁆𑀘𑀸𑀤𑀺𑀦𑀸 𑀯𑀓𑁆𑀔𑀫𑀸𑀦 𑀦𑀬𑁂𑀦 𑀦𑀺𑀧𑁆𑀨𑀦𑁆𑀦𑀸 𑀏𑀯𑀸𑀢𑀺 𑀅𑀦𑀼𑀬𑁄𑀕𑀁 𑀫𑀦𑀲𑀺𑀓𑀢𑁆𑀯𑀸 𑀯𑀼𑀢𑁆𑀢𑀁 ‘𑀲𑀳𑁂𑀯 𑀯𑀸𑀲𑀦𑀸𑀬𑀸’𑀢𑀺, 𑀦 𑀳𑀺 𑀪𑀕𑀯𑀦𑁆𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂 𑀲𑀳 𑀯𑀸𑀲𑀦𑀸𑀬 𑀓𑀺𑀮𑁂𑀲𑁂 𑀧𑀳𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀏𑀢𑁂𑀦 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 𑀪𑀕𑀯𑀢𑁄 𑀅𑀭𑀳𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺, 𑀢𑁂𑀦𑁂𑀯 𑀇𑀤𑁆𑀥𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄’𑀢𑁂𑀧𑀺 𑀳𑀺’𑀘𑁆𑀘𑀸𑀤𑀺𑀓𑀁 𑀯𑀓𑁆𑀔𑀢𑀺, 𑀓𑀸𑀧𑀦𑀸𑀬𑀁 𑀯𑀸𑀲𑀦𑀸 𑀦𑀸𑀫 𑀧𑀳𑀻𑀦𑀓𑀺𑀮𑁂𑀲𑀲𑁆𑀲𑀸𑀧𑀺 𑀅𑀧𑁆𑀧𑀳𑀻𑀦𑀓𑀺𑀮𑁂𑀲𑀲𑁆𑀲 𑀧𑀬𑁄𑀕𑀲𑀤𑀺𑀲𑀧𑀬𑁄𑀕𑀳𑁂𑀢𑀼𑀪𑀽𑀢𑁄 𑀓𑀺𑀮𑁂𑀲𑀦𑀺𑀳𑀺𑀢𑁄 𑀲𑀸𑀫𑀢𑁆𑀣𑀺𑀬𑀯𑀺𑀲𑁂𑀲𑁄’𑀆𑀬𑀲𑁆𑀫𑀢𑁄 𑀧𑀺𑀮𑀺𑀦𑁆𑀤𑀯𑀘𑁆𑀙𑀲𑁆𑀲 𑀯𑀲𑀮𑀲𑀫𑀼𑀤𑀸𑀘𑀸𑀭𑀦𑀺𑀫𑀺𑀢𑁆𑀢𑀁 𑀯𑀺𑀬’, 𑀅𑀕𑁆𑀕𑀫𑀕𑁆𑀕𑁂𑀦𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦, 𑀲𑀩𑁆𑀩𑀓𑀺𑀮𑁂𑀲𑁂 𑀭𑀸𑀕𑀸𑀤𑀺𑀓𑁂, 𑀅𑀭𑀳𑀢𑁆𑀢𑀁 𑀅𑀕𑁆𑀕𑀨𑀮𑀁, 𑀲𑀫𑁆𑀫𑀼𑀢𑀺 𑀉𑀧𑀧𑀢𑁆𑀢𑀺𑀤𑁂𑀯𑀪𑀸𑀯𑀢𑁄 𑀅𑀜𑁆𑀜𑁂𑀦 𑀯𑀺𑀲𑀼𑀤𑁆𑀥𑀺 𑀤𑁂𑀯𑀪𑀸𑀯𑁂𑀦𑀸𑀢𑀺𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀆𑀳-‘𑀯𑀺𑀲𑀼𑀤𑁆𑀥𑀺𑀤𑁂𑀯𑀪𑀸𑀯𑁂𑀦𑀸’𑀢𑀺, 𑀲𑀓𑀮𑀓𑀺𑀮𑁂𑀲𑀓𑀸𑀮𑀼𑀲𑁆𑀲𑀺𑀬𑀸𑀧𑀕𑀫𑁂𑀦 𑀯𑀺𑀲𑀼𑀤𑁆𑀥𑀺𑀧𑁆𑀧𑀢𑁆𑀢𑀺𑀬𑀸 𑀲𑀩𑁆𑀩𑀜𑁆𑀜𑀼𑀕𑀼𑀡𑀸 𑀮𑀗𑁆𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀤𑁂𑀯𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄.

‘𑀇𑀥=𑀲𑀁𑀲𑀺𑀤𑁆𑀥𑀺𑀬𑀁’ 𑀇𑀤𑁆𑀥𑀯𑀦𑁆𑀢𑁄 𑀇𑀤𑁆𑀥𑀸𑀢𑁆𑀢𑀧𑁆𑀧𑀘𑁆𑀘𑀬𑁂𑀦, ‘𑀕𑀼𑀡=𑀆𑀫𑀦𑁆𑀢𑀡𑁂’ 𑀪𑀽𑀯𑀸𑀤𑀺𑀲𑁂𑀲𑁄, 𑀕𑀼𑀡𑀻𑀬𑀦𑁆𑀢𑀺 𑀧𑀭𑀺𑀘𑀻𑀬𑀦𑁆𑀢𑀺 𑀲𑁂𑀬𑁆𑀬𑀢𑁆𑀢𑀺𑀓𑁂𑀳𑀻𑀢𑀺 𑀕𑀼𑀡𑀸 𑀓𑀧𑁆𑀧𑀘𑁆𑀘𑀬𑁂𑀦, 𑀢𑁂𑀧𑀻𑀢𑀺 𑀲𑀸𑀯𑀓𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀧𑀺, 𑀳𑀺 𑀲𑀤𑁆𑀤𑁄 𑀳𑁂𑀢𑀼𑀫𑁆𑀳𑀺, 𑀬𑀲𑁆𑀫𑀸 𑀅𑀕𑁆𑀕𑀁…𑀧𑁂… 𑀅𑀦𑀽𑀦𑀕𑀼𑀡𑀸 ¶ , 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄, 𑀲𑀩𑁆𑀩𑀜𑁆𑀜𑀼𑀢𑀸𑀤𑀻𑀦𑀦𑁆𑀢𑀺𑀆𑀤𑀺𑀓𑀁 𑀢𑁂𑀲𑀁 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁂𑀳𑀺 𑀊𑀦𑀕𑀼𑀡𑀢𑀸𑀬 𑀳𑁂𑀢𑀼𑀯𑀘𑀦𑀁, 𑀓𑁂𑀘𑀺 ‘𑀲𑀺𑀤𑁆𑀥𑁄 𑀫𑀺𑀤𑁆𑀥𑀕𑀼𑀡𑁄 𑀅𑀲𑁆𑀲𑀸𑀢𑀺 𑀲𑀺𑀤𑁆𑀥𑀫𑀺𑀤𑁆𑀥𑀕𑀼𑀡𑀦𑁆𑀢𑀺 𑀤𑀼𑀝𑁆𑀞𑀫𑀢𑁆𑀣𑀁 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀯𑀸𑀓𑁆𑀬𑀫𑀺𑀤𑀁 𑀤𑀽𑀲𑁂𑀦𑁆𑀢𑀺, 𑀢𑁂 𑀧𑀦 ‘𑀫𑀺𑀤𑁆𑀥𑁄 𑀦𑀸𑀫 𑀓𑁄𑀘𑀺 𑀕𑀼𑀡𑁄 𑀦𑀢𑁆𑀣𑀻’𑀢𑀺 𑀘, ‘𑀢𑀣𑀸𑀕𑀢𑁄 𑀦𑀸𑀫 𑀫𑀺𑀤𑁆𑀥 𑀕𑀼𑀡𑁄 𑀦 𑀳𑁄𑀢𑀻’𑀢𑀺 𑀘, ‘𑀢𑀸𑀤𑀺𑀲𑁄 𑀘𑁂 𑀲𑀺𑀬𑀸 𑀦 𑀜𑀸𑀡𑀦𑀺𑀲𑁆𑀲𑀺𑀢𑀧𑀽𑀚𑀸 𑀧𑀓𑀢𑁄𑀧𑀬𑁄𑀕𑀺𑀦𑀻 𑀪𑀯𑀢𑀻’𑀢𑀺 𑀘 𑀅𑀚𑀸𑀦𑀺𑀢𑁆𑀯𑀸 𑀯𑀤𑀣 𑀢𑀼𑀫𑁆𑀳𑁂𑀳𑀺 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀢𑀩𑁆𑀩𑀸, 𑀫𑀗𑁆𑀕𑀮𑀢𑁆𑀣𑀜𑁆𑀘𑁂𑀢𑁆𑀣𑀸𑀤𑁄 𑀲𑀺𑀤𑁆𑀥𑀲𑀤𑁆𑀤𑁄𑀧𑀸𑀤𑀸𑀦𑀁, 𑀫𑀗𑁆𑀕𑀮𑀸𑀤𑀻𑀦𑀺 𑀳𑀺 𑀲𑀢𑁆𑀣𑀸𑀦𑁆𑀬𑀩𑁆𑀬𑀸𑀳𑀢𑀧𑁆𑀧𑀲𑀭𑀸𑀦𑀺 𑀳𑁄𑀦𑁆𑀢𑁆𑀬𑀸𑀬𑀲𑁆𑀫𑀦𑁆𑀢𑀩𑁆𑀬𑀸𑀔𑁆𑀬𑀸𑀢𑀼𑀲𑁄𑀢𑀼𑀓𑀸𑀦𑀺 𑀘, 𑀥𑀫𑁆𑀫𑀲𑀗𑁆𑀖𑀸𑀦𑀫𑁆𑀧𑀻𑀢𑀺 𑀇𑀫𑀺𑀦𑀸 𑀅𑀯𑀬𑀯𑁂𑀦 𑀯𑀺𑀕𑁆𑀕𑀳𑁂𑀧𑀺 𑀲𑀫𑀼𑀤𑀸𑀬𑀲𑁆𑀲 𑀲𑀫𑀸𑀲𑀢𑁆𑀣𑀢𑁆𑀢𑀸 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁄𑀬𑀁 𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑁄𑀢𑀺 𑀤𑀻𑀧𑁂𑀢𑀺, 𑀢𑁂𑀦𑀸𑀳- ‘𑀅𑀜𑁆𑀜𑀧𑀤𑀢𑁆𑀣𑁂’𑀘𑁆𑀘𑀸𑀤𑀺, 𑀕𑀼𑀡𑀻𑀪𑀽𑀢𑀸𑀦𑀫𑁆𑀧𑀻𑀢𑀺 𑀅𑀧𑁆𑀧𑀥𑀸𑀦𑀪𑀽𑀢𑀸𑀦𑀫𑁆𑀧𑀺 𑀯𑀺𑀲𑁂𑀲𑀦𑀪𑀽𑀢𑀸𑀦𑀫𑁆𑀧𑀺 𑀅𑀜𑁆𑀜𑀧𑀤𑀢𑁆𑀣𑀲𑁆𑀲 𑀧𑀥𑀸𑀦𑀢𑁆𑀢𑀸, 𑀓𑀺𑀭𑀺𑀬𑀸𑀢𑀺𑀲𑀫𑁆𑀩𑀦𑁆𑀥𑁄 𑀯𑀕𑀫𑁆𑀬𑀢𑁂 𑀥𑀫𑁆𑀫𑀲𑀗𑁆𑀖𑀸𑀦𑀁 𑀕𑀼𑀡𑀻𑀪𑀽𑀢𑀸𑀦𑀫𑁆𑀧𑀺 𑀢𑀤𑀯𑀺𑀦𑀸𑀪𑀸𑀯𑀺𑀢𑁆𑀢𑁂𑀦 𑀦𑀫𑀲𑁆𑀲𑀦𑀸𑀢𑀺𑀲𑀫𑁆𑀩𑀦𑁆𑀥𑀸, 𑀢𑀤𑁂𑀯 𑀲𑀫𑀢𑁆𑀣𑁂𑀢𑀺 ‘𑀢𑀣𑀸𑀳’𑀘𑁆𑀘𑀸𑀤𑀺𑀦𑀸, 𑀧𑀼𑀢𑁆𑀢𑁂𑀦 𑀲𑀳 𑀯𑀢𑁆𑀢𑀫𑀸𑀦𑁄𑀢𑀺 𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑀢𑁆𑀢𑀸 𑀢𑀼𑀮𑁆𑀬𑀫𑀼𑀪𑀺𑀦𑁆𑀦𑀫𑁆𑀧𑀺 𑀆𑀕𑀫𑀦𑀦𑁆𑀢𑀺 𑀧𑀼𑀢𑁆𑀢𑁄𑀧𑀺 𑀆𑀕𑀢𑁄𑀢𑀺 𑀧𑀢𑀻𑀬𑀢𑁂, 𑀢𑀢𑁆𑀣𑀸𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀢𑁆𑀢𑀥𑀻, 𑀅𑀢𑁆𑀢𑀸𑀦𑀦𑁆𑀢𑀺 𑀥𑀫𑁆𑀫𑀁 𑀤𑀲𑁆𑀲𑁂𑀢𑀺, 𑀥𑀸𑀭𑁂𑀦𑁆𑀢𑁂𑀢𑀺 𑀅𑀢𑁆𑀢𑀦𑀺 𑀞𑀧𑁂𑀦𑁆𑀢𑁂 𑀧𑀯𑀢𑁆𑀢𑁂𑀦𑁆𑀢𑁂 𑀉𑀧𑁆𑀧𑀸𑀤𑁂𑀦𑁆𑀢𑁂, 𑀘𑀢𑁆𑀢𑀸𑀭𑁄𑀧𑀺 𑀅𑀧𑀸𑀬𑀸 𑀲𑀸𑀫𑀜𑁆𑀜𑀯𑀲𑁂𑀦’𑀅𑀧𑀸𑀬𑁂’𑀢𑀺 𑀯𑀼𑀢𑁆𑀢𑀸, 𑀓𑀺𑀮𑁂𑀲𑀯𑀝𑁆𑀝 𑀓𑀫𑁆𑀫𑀯𑀝𑁆𑀝 𑀯𑀺𑀧𑀸𑀓𑀯𑀝𑁆𑀝𑀯𑀲𑁂𑀦 𑀢𑀬𑁄 𑀯𑀝𑁆𑀝𑀸, 𑀢𑁂𑀲𑀼 𑀤𑀼𑀓𑁆𑀔𑀁, 𑀢𑀲𑁆𑀫𑀺𑀁, 𑀥𑀸𑀭𑁂𑀢𑀻𑀢𑀺 𑀯𑀼𑀢𑁆𑀢𑀥𑀸𑀭𑀡𑀁 𑀦𑀸𑀫 𑀅𑀢𑁆𑀣𑀢𑁄 𑀅𑀧𑀸𑀬𑀸𑀤𑀺𑀦𑀺𑀩𑁆𑀩𑀢𑁆𑀢𑀓𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀁, 𑀢𑀜𑁆𑀘 𑀬𑀣𑀸𑀭𑀽𑀧𑀁 𑀓𑀺𑀮𑁂𑀲𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀆𑀮𑀫𑁆𑀩𑀦𑀪𑀸𑀯𑁂𑀦 𑀳𑁄𑀢𑀻𑀢𑀺 𑀆𑀳- ‘𑀲𑁄…𑀧𑁂… 𑀯𑀲𑁂𑀦𑀸’𑀢𑀺, 𑀦𑀯𑀦𑁆𑀦𑀫𑁆𑀧𑀺, 𑀢𑁂 𑀲𑀫𑀥𑀺𑀕𑀫𑀳𑁂𑀢𑀼𑀢𑀸𑀬 𑀥𑀫𑁆𑀫𑁄𑀬𑁂𑀯 𑀦𑀸𑀫𑀸𑀢𑀺 ‘𑀤𑀲𑀸’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀓𑀸𑀭𑀡𑀫𑀸𑀳- ‘𑀢𑀫𑁆𑀫𑀽𑀮𑀓𑀢𑁆𑀢𑀸’𑀢𑀺𑀆𑀤𑀺, 𑀢𑀫𑁆𑀫𑀽𑀮𑀓𑀢𑁆𑀢𑀸𑀢𑀺 𑀢𑀁 𑀓𑀸𑀭𑀡𑀢𑁆𑀢𑀸, 𑀲𑀻𑀮𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑁂𑀦𑀸𑀢𑀺 𑀅𑀭𑀺𑀬𑁂𑀦 𑀲𑀻𑀮𑁂𑀦 𑀅𑀭𑀺𑀬𑀸𑀬 𑀘 𑀤𑀺𑀝𑁆𑀞𑀺𑀬𑀸 𑀲𑀫𑀸𑀦𑀪𑀸𑀯𑁂𑀦, 𑀅𑀭𑀺𑀬𑀸𑀦𑀜𑁆𑀳𑀺 𑀲𑀻𑀮𑀤𑀺𑀝𑁆𑀞𑀺𑀬𑁄 𑀫𑀕𑁆𑀕𑁂𑀦𑀸𑀕𑀢𑀢𑁆𑀢𑀸 𑀲𑀩𑁆𑀩𑀣𑀸 𑀲𑀫𑀸𑀦𑀸𑀯, 𑀢𑁂𑀦 𑀢𑁂 𑀬𑀢𑁆𑀣𑀓𑀢𑁆𑀣𑀘𑀺 𑀞𑀺𑀢𑀸𑀧𑀺 𑀲𑀳𑀕𑀢𑀸𑀯𑀸𑀢𑀺 𑀲𑀁𑀳𑀢𑁄𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀲𑀗𑁆𑀖𑁄𑀢𑀺 𑀧𑀤𑀲𑀺𑀤𑁆𑀥𑀺 𑀤𑀝𑁆𑀞𑀩𑁆𑀩𑀸, 𑀅𑀥𑀺𑀧𑁆𑀧𑁂𑀢𑀯𑀲𑁂𑀦 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀮𑁄𑀓𑀺𑀬𑀲𑀻𑀮𑀤𑀺𑀝𑁆𑀞𑀺𑀬𑀸 𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀢𑁆𑀢𑀸 𑀲𑀫𑁆𑀫𑀼𑀢𑀺𑀲𑀗𑁆𑀖𑁄𑀧𑀺 𑀧𑀡𑀸𑀫𑀸𑀭𑀳𑁄𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀣 ¶ 𑀓𑁂𑀢𑁂 𑀲𑀤𑁆𑀤𑀸, 𑀬𑁂𑀲𑀫𑀺𑀤𑀁 𑀮𑀓𑁆𑀔𑀡𑀁 𑀪𑀸𑀲𑀺𑀲𑁆𑀲𑀦𑁆𑀢𑀺 𑀧𑀝𑀺𑀜𑁆𑀜𑀸𑀢𑀦𑁆𑀢𑀺 𑀆𑀳-‘𑀲𑀤𑁆𑀤𑀸 𑀖𑀝𑀧𑀝𑀸𑀤𑀬𑁄’𑀢𑀺, 𑀆𑀤𑀺𑀲𑀤𑁆𑀤𑁂𑀦 𑀭𑀼𑀓𑁆𑀔𑀸𑀤𑀬𑁄, 𑀦𑀦𑀼 𑀲𑀦𑁆𑀢𑀺 𑀫𑁂𑀖𑀲𑀤𑁆𑀤𑀲𑀫𑀼𑀤𑁆𑀤𑀲𑀤𑁆𑀤𑀸𑀤𑀬𑁄𑀧𑀻𑀢𑀺 𑀦 𑀦𑀺𑀭𑀢𑁆𑀣𑀓𑀸𑀦𑀫𑀺𑀥𑀸𑀦𑀼𑀧𑀬𑁄𑀕𑀺𑀢𑁆𑀢𑀸, 𑀬𑁂 𑀮𑁄𑀓𑀲𑀗𑁆𑀓𑁂𑀢𑀸𑀦𑀼𑀭𑁄𑀥𑁂𑀦𑀸𑀢𑁆𑀣𑀧𑁆𑀧𑀓𑀸𑀲𑀓𑀸 𑀢𑁂𑀲𑀁 𑀲𑀸𑀢𑁆𑀣𑀓𑀸𑀦𑀫𑁂 𑀯𑀺𑀤𑀁 𑀮𑀓𑁆𑀔𑀡𑀦𑁆𑀢𑀺, 𑀅𑀧𑀺𑀘 ‘𑀲𑀤𑁆𑀤𑀸 𑀖𑀝𑀧𑀝𑀸𑀤𑀬𑁄’𑀢𑀺 𑀯𑀤𑀦𑁆𑀢𑁄 𑀯𑁂𑀤𑀺𑀓𑀸𑀦𑀁 𑀯𑀺𑀬 𑀉𑀦𑁆𑀢𑀺 [𑀜𑀢𑁆𑀣𑀺 (𑀧𑁄𑀢𑁆𑀣𑀓𑁂)] 𑀆𑀤𑀻𑀦𑀁 𑀅𑀦𑀼𑀧𑀼𑀩𑁆𑀩𑀻𑀦𑀺𑀬𑀫𑀸𑀯𑀢𑁆𑀣𑀸𑀦𑀫𑀲𑀫𑁆𑀪𑀯𑀸 𑀢𑀤𑀦𑀼𑀓𑁆𑀓𑀫𑁂𑀦 𑀦𑀺𑀧𑁆𑀨𑀸𑀤𑀺𑀬𑀫𑀸𑀦𑀦𑀫𑁆𑀧𑀺 𑀲𑀤𑁆𑀤𑀸𑀦𑀁 𑀮𑁄𑀓𑀺𑀬𑀢𑁆𑀢𑀸𑀦𑀪𑀺𑀯𑀢𑁆𑀢𑀦𑀜𑁆𑀘 𑀩𑁄𑀥𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁, 𑀦𑀼 𑀢𑀢𑁆𑀣 𑀧𑀓𑀸𑀲𑀓𑀢𑁆𑀣𑀁 𑀲𑀤𑁆𑀤𑀲𑁆𑀲 𑀲𑀫𑀼𑀤𑀸𑀬𑀯𑀲𑁂𑀦 𑀯𑀸 𑀲𑀺𑀬𑀸 𑀧𑀘𑁆𑀘𑁂𑀓𑀯𑀡𑁆𑀡𑀯𑀲𑁂𑀦 𑀯𑀸, 𑀢𑀢𑁆𑀣 𑀬𑀤𑀺 𑀧𑀘𑁆𑀘𑁂𑀓𑀯𑀡𑁆𑀡𑀸 𑀧𑀓𑀸𑀲𑀬𑁂𑀬𑁆𑀬𑀼𑀁, 𑀖𑀝𑀲𑀤𑁆𑀤𑁂 𑀖𑀓𑀸𑀭𑁄𑀬𑁂𑀯 𑀖𑀝𑀢𑁆𑀣𑀁, 𑀧𑀓𑀸𑀲𑀬𑁂𑀬𑁆𑀬, 𑀢𑀣𑀸 𑀘𑀸𑀜𑁆𑀜𑁂𑀲𑀫𑀓𑀸𑀭𑀸𑀤𑀻𑀦𑀫𑀦𑀢𑁆𑀣 𑀓𑀢𑀸 𑀲𑀺𑀬𑀸, 𑀅𑀣 𑀲𑀫𑀼𑀤𑀺𑀢𑀸 𑀧𑀓𑀸𑀲𑀬𑁂𑀬𑁆𑀬𑀼𑀁, 𑀢𑀤𑀸 𑀯𑀡𑁆𑀡𑀸𑀦𑀫𑀼𑀘𑁆𑀘𑀸𑀭𑀡𑀸𑀦𑀦𑁆𑀢𑀭𑀯𑀺𑀦𑀸𑀲𑀺𑀢𑁆𑀢𑀸 𑀲𑀫𑀼𑀤𑀸𑀬𑁄𑀬𑁂𑀯 𑀦 𑀲𑀺𑀬𑀸, 𑀢𑀣𑀸 𑀲𑀢𑀺 𑀓𑀣 𑀫𑀢𑁆𑀣𑀁 𑀲𑀤𑁆𑀤𑁄 𑀧𑀓𑀸𑀲𑀬𑀢𑀻𑀢𑀺 𑀘𑁂 𑀓𑀫𑁂𑀦 𑀲𑁄𑀢𑀘𑀺𑀢𑁆𑀢𑀸𑀤𑀺𑀕𑀳𑀺𑀢𑀓𑁆𑀔𑀭 𑀧𑀸𑀴𑀺𑀬𑀸 𑀘 𑀬𑁄 𑀲𑀤𑁆𑀤𑁄𑀢𑀺 𑀯𑀺𑀜𑁆𑀜𑁂𑀬𑁆𑀬𑁄 𑀲𑀸𑀢𑁆𑀣𑀓𑁄 𑀘𑀺𑀢𑁆𑀢𑀕𑁄𑀘𑀭𑁄, 𑀘𑀺𑀢𑁆𑀢𑀕𑁄𑀘𑀭𑀲𑁆𑀲𑀸𑀧𑀺 𑀲𑀤𑁆𑀤𑀲𑁆𑀲 𑀧𑀦 𑀩𑀸𑀮𑀚𑀦𑀧𑁆𑀧𑀩𑁄𑀥𑀸𑀬 𑀓𑀧𑁆𑀧𑀦𑀸𑀫𑀢𑁆𑀢𑁂𑀦 𑀧𑀓𑀢𑁆𑀬𑀸𑀤𑀺𑀯𑀺𑀪𑀸𑀕𑀢𑁄, 𑀦 𑀲𑀪𑀸𑀯𑁂𑀦𑀸𑀦𑁆𑀯𑀸𑀔𑁆𑀬𑀸𑀦𑀁, 𑀢𑁂𑀦𑀸𑀳-‘𑀧𑀓𑀢𑁆𑀬𑀸’𑀤𑀺 𑀆𑀤𑀺, 𑀦𑀦𑀼 𑀕𑁄𑀇𑀘𑁆𑀘𑀸𑀤𑀺𑀲𑀸𑀥𑀼𑀲𑀤𑁆𑀤𑀦𑀺𑀬𑀫𑁂 𑀲𑀢𑀺 𑀕𑁄𑀢𑀸𑀤𑀬𑁄 𑀅𑀲𑀸𑀥𑀼 𑀲𑀤𑁆𑀤𑀸𑀢𑀺 𑀯𑀺𑀜𑁆𑀜𑀸𑀬𑀦𑁆𑀢𑀺 𑀕𑀦𑁆𑀢𑀩𑁆𑀩𑀫𑀕𑁆𑀕𑀦𑀺𑀬𑀫𑁂 𑀅𑀕𑀦𑁆𑀢𑀩𑁆𑀩𑀫𑀕𑁆𑀕𑁄 𑀯𑀺𑀬, 𑀕𑁄𑀢𑀸𑀤𑀺 𑀅𑀲𑀸𑀥𑀼𑀲𑀤𑁆𑀤𑀦𑀺𑀬𑀫𑁂 𑀯𑀸 𑀕𑁄𑀇𑀘𑁆𑀘𑀸𑀤𑀬𑁄 𑀲𑀤𑁆𑀤𑀸 𑀲𑀸𑀥𑀯𑁄𑀢𑀺 𑀅𑀕𑀦𑁆𑀢𑀩𑁆𑀩𑀫𑀕𑁆𑀕𑀦𑀺𑀬𑀫𑁂 𑀕𑀦𑁆𑀢𑀩𑁆𑀩𑀫𑀕𑁆𑀕𑁄 𑀯𑀺𑀬, 𑀓𑀺𑀁 𑀲𑀤𑁆𑀤𑀸𑀦𑀫𑀦𑁆𑀯𑀸𑀔𑁆𑀬𑀸𑀦𑁂𑀦𑀸 𑀢𑀺𑀤𑀫𑀸𑀲𑀗𑁆𑀓𑀺𑀬 𑀧𑀬𑁄𑀚𑀦𑀫𑀸𑀳- ‘𑀮𑀓𑁆𑀔𑀡𑀸𑀪𑀺𑀥𑀸𑀦𑀁𑀘𑁂’𑀘𑁆𑀘𑀸𑀤𑀺, 𑀲𑀤𑁆𑀤𑀸𑀦𑀫𑁆𑀧𑀝𑀺𑀧𑀢𑁆𑀢𑀺𑀬𑀁 𑀧𑀝𑀺𑀧𑀤𑀧𑀸𑀞𑀲𑁆𑀲𑀸𑀦𑀽𑀧𑀸𑀬𑀢𑁆𑀢𑀁 𑀤𑀲𑁆𑀲𑁂𑀢𑀼𑀫𑀸𑀳- ‘𑀅𑀜𑁆𑀜𑀣𑁂’𑀘𑁆𑀘𑀸𑀤𑀺, 𑀅𑀜𑁆𑀜𑀣𑀸𑀢𑀺 𑀅𑀲𑀢𑀺 𑀮𑀓𑁆𑀔𑀡𑀸𑀪𑀺𑀥𑀸𑀦𑁂, 𑀲𑀓𑁆𑀓𑀢𑀸𑀤𑀻𑀢𑀺𑀆𑀤𑀺𑀲𑀤𑁆𑀤𑁂𑀦 𑀧𑀸𑀓𑀢𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀩𑀳𑀼𑀯𑀺𑀥𑀢𑁆𑀢𑀁 𑀲𑀓𑁆𑀓𑀢𑀧𑀸𑀓𑀢𑀧𑁂𑀲𑀸𑀘𑀺𑀓𑀅𑀧𑀩𑁆𑀪𑀁𑀲𑀯𑀲𑁂𑀦, 𑀫𑀕𑀥𑁂𑀲𑀼 𑀯𑀺𑀤𑀺𑀢𑀸𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀅𑀜𑁆𑀜𑀲𑁆𑀫𑀺’’𑀦𑁆𑀢𑀺 (𑁪-𑁧𑁨𑁧) 𑀫𑀸𑀕𑀥𑀸𑀦𑀁 𑀇𑀤𑀦𑁆𑀢𑀺 𑀅𑀢𑁆𑀣𑁂 ‘‘𑀡𑁄’’𑀢𑀺 (𑁪-𑁩𑁪) 𑀡𑀧𑁆𑀧𑀘𑁆𑀘𑀬𑁂 𑀫𑀸𑀕𑀥𑀸 𑀫𑀸𑀕𑀥𑀦𑁆𑀢𑀺 𑀘 𑀧𑀤𑀦𑀺𑀧𑁆𑀨𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀫𑀕𑀥𑁂𑀲𑁆𑀫𑀺’𑀘𑁆𑀘𑀸𑀤𑀺, 𑀫𑀕𑀥𑁂𑀲𑀼 𑀯𑀺𑀤𑀺𑀢𑀸𑀢𑀺𑀆𑀤𑀺𑀦𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀺𑀢𑀼𑀫𑀸𑀳- ‘𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀻’𑀢𑀺𑀆𑀤𑀺, 𑀢𑀢𑁆𑀣 𑀇𑀤𑀦𑁆𑀢𑀺 𑀇𑀤𑀸𑀦𑀺 𑀯𑀓𑁆𑀔𑀫𑀸𑀦𑀁 𑀫𑀸𑀕𑀥𑀁…𑀧𑁂… 𑀳𑁄𑀢𑀻𑀢𑀺 𑀏𑀢𑀁 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀫𑀕𑀥𑁂𑀲𑀼…𑀧𑁂… 𑀮𑀓𑁆𑀔𑀡𑀁 𑀫𑀸𑀕𑀥𑀦𑁆𑀢𑀺 ¶ 𑀯𑀤𑀢𑀸 𑀧𑀓𑀸𑀲𑀺𑀢𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄, 𑀳𑀺𑀲𑀤𑁆𑀤𑁄’𑀫𑀕𑀥𑁂𑀲𑁆𑀯𑀺’𑀘𑁆𑀘𑀸𑀤𑀺𑀦𑀸 𑀯𑀼𑀢𑁆𑀢𑀁 𑀲𑀫𑀢𑁆𑀣𑀬𑀢𑀺, 𑀮𑀓𑁆𑀔𑀡𑀁 𑀯𑀺𑀲𑁂𑀲𑀬𑀢𑀸𑀢𑀺 𑀲𑀤𑁆𑀤𑀮𑀓𑁆𑀔𑀡 𑀲𑀤𑁆𑀤𑀲𑁆𑀲 𑀉𑀢𑁆𑀢𑀭𑀧𑀤𑀢𑁆𑀣𑀧𑁆𑀧𑀥𑀸𑀦𑀢𑁆𑀢𑀸 𑀫𑀸𑀕𑀥𑀦𑁆𑀢𑀺 𑀇𑀫𑀺𑀦𑀸 𑀮𑀓𑁆𑀔𑀡𑀁 𑀯𑀺𑀲𑁂𑀲𑀬𑀢𑀸 𑀩𑁆𑀬𑀯𑀘𑁆𑀙𑁂𑀤𑀬𑀢𑀸 𑀯𑀼𑀢𑁆𑀢𑀺𑀓𑀸𑀭𑁂𑀦, 𑀅𑀢𑁆𑀣𑀢𑁄𑀢𑀺 𑀲𑀸𑀫𑀢𑁆𑀣𑀺𑀬𑀢𑁄, 𑀲𑀤𑁆𑀤𑁂 𑀘 𑀯𑀺𑀲𑁂𑀲𑀺𑀢𑁄 𑀳𑁄𑀢𑀻𑀢𑀺 𑀲𑀤𑁆𑀤𑀮𑀓𑁆𑀔𑀡𑀲𑀤𑁆𑀤𑁄 𑀫𑀸𑀕𑀥𑁂 𑀏𑀯 [𑀲𑀤𑁆𑀤𑁂𑀏𑀯 (𑀧𑁄𑀢𑁆𑀣𑀓𑁂)] 𑀩𑁆𑀬𑀯𑀘𑁆𑀙𑁂𑀤𑀺𑀢𑁄 𑀳𑁄𑀢𑀺, 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 ‘𑀫𑀕𑀥𑁂𑀲𑀼 𑀯𑀺𑀤𑀺𑀢𑀸 𑀫𑀸𑀕𑀥𑀸𑀢𑀺 𑀲𑀤𑁆𑀤𑁂 𑀕𑀳𑁂𑀢𑁆𑀯𑀸 𑀢𑁂𑀲𑀫𑀺𑀤𑀁 𑀫𑀸𑀕𑀥𑀦𑁆𑀢𑀺 𑀫𑀸𑀕𑀥𑀲𑀤𑁆𑀤𑁂𑀦 𑀬𑀲𑁆𑀫𑀸 𑀲𑀤𑁆𑀤𑀮𑀓𑁆𑀔𑀡𑀲𑀤𑁆𑀤𑁂 𑀮𑀓𑁆𑀔𑀡𑀁 𑀯𑀺𑀲𑁂𑀲𑀺𑀢𑀁, 𑀢𑀲𑁆𑀫𑀸 𑀲𑀤𑁆𑀤𑀮𑀓𑁆𑀔𑀡𑀲𑀤𑁆𑀤𑁂 𑀲𑀤𑁆𑀤𑁄 𑀬𑀤𑀺 𑀅𑀫𑀸𑀕𑀥𑁄 𑀓𑀣𑀁 𑀮𑀓𑁆𑀔𑀡𑀁 𑀫𑀸𑀕𑀥𑀁 𑀲𑀺𑀬𑀸𑀢𑀺 𑀲𑀸𑀫𑀢𑁆𑀣𑀺𑀬𑀸 𑀲𑀤𑁆𑀤𑁄𑀧𑀺 𑀯𑀺𑀲𑁂𑀲𑀺𑀢𑁄 𑀳𑁄𑀢𑀻’𑀢𑀺, 𑀦𑀦𑀼 𑀫𑀸𑀕𑀥𑀦𑁆𑀢𑀺 𑀮𑀓𑁆𑀔𑀡𑀲𑁆𑀲 𑀫𑀸𑀕𑀥 𑀲𑀤𑁆𑀤𑀲𑀫𑁆𑀩𑀦𑁆𑀥𑀺𑀢𑁆𑀢𑀛𑀸𑀧𑀦𑀢𑁄 𑀲𑀤𑁆𑀤𑀮𑀓𑁆𑀔𑀡𑀦𑁆𑀢𑀺 𑀏𑀢𑁆𑀣 𑀲𑀤𑁆𑀤𑀲𑀤𑁆𑀤𑀲𑁆𑀲 𑀦𑀺𑀭𑀢𑁆𑀣𑀓 𑀢𑀸𑀧𑀢𑁆𑀢𑀺 𑀳𑁄𑀢𑀻𑀢𑀺, 𑀦 𑀳𑁄𑀢𑀺 𑀕𑀫𑁆𑀫𑀫𑀸𑀦𑀢𑁆𑀣𑀲𑁆𑀲 𑀲𑀤𑁆𑀤𑀲𑁆𑀲 𑀧𑀬𑁄𑀕𑀫𑁆𑀧𑀢𑀺 𑀓𑀸𑀫𑀘𑀸𑀭𑀢𑁆𑀢𑀸 𑀲𑀤𑁆𑀤𑀮𑀓𑁆𑀔𑀡𑀲𑀤𑁆𑀤𑀲𑁆𑀲 𑀯𑀸 𑀲𑀫𑀸𑀲𑀢𑁆𑀣𑁂 𑀦𑀺𑀭𑀼𑀴𑁆𑀳𑀢𑁆𑀢𑀸 ‘‘𑀢𑀢𑁆𑀭𑀺𑀤𑀁 𑀲𑀼𑀕𑀢𑀲𑁆𑀲 𑀲𑀼𑀕𑀢𑀘𑀻𑀯𑀭𑀧𑁆𑀧𑀫𑀸𑀡’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬, 𑀓𑁄𑀧𑀦𑀸𑀢𑀺𑀆𑀤𑀺𑀲𑀤𑁆𑀤𑀮𑀓𑁆𑀔𑀡𑀦𑁆𑀢𑀺 𑀇𑀫𑀺𑀦𑀸 𑀅𑀪𑀺𑀥𑁂𑀬𑁆𑀬𑀲𑀗𑁆𑀔𑀸𑀢𑀧𑀬𑁄𑀚𑀦𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 𑀢𑀧𑁆𑀧𑀬𑁄𑀚𑀦𑀧𑀼𑀘𑁆𑀙𑀦𑀧𑀭𑀸 𑀘𑁄𑀤𑀦𑀸, 𑀯𑀼𑀘𑁆𑀘𑀢𑁂𑀘𑁆𑀘𑀸𑀤𑀺 𑀧𑀭𑀺𑀳𑀸𑀭𑁄, 𑀬𑀣𑀸 𑀲𑀩𑁆𑀩𑀣𑀸𑀢𑁆𑀢𑀧𑀭𑀳𑀺𑀢𑀓𑀸𑀫𑁂𑀦.

𑀧𑀺𑀬𑁄 𑀘 𑀕𑀭𑀼 𑀪𑀸𑀯𑀦𑀻𑀬𑁄, 𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄;

𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸,𑀦𑁄𑀘𑀸 𑀞𑀸𑀦𑁂 𑀦𑀺𑀬𑁄𑀚𑀓𑁄𑀢𑀺.

𑀯𑀼𑀢𑁆𑀢𑁂𑀳𑀺 𑀢𑀢𑁄 𑀧𑀭𑁂𑀳𑀺 𑀘 𑀧𑀲𑀢𑁆𑀣𑀢𑀭𑁂𑀳𑀺 𑀕𑀼𑀡𑀯𑀺𑀲𑁂𑀲𑁂𑀳𑀺 𑀲𑀫𑀼𑀧𑁂𑀢𑀁 𑀕𑀼𑀭𑀼𑀁.

𑀢𑀲𑁆𑀫𑀸 𑀅𑀓𑁆𑀔𑀭𑀓𑁄𑀲𑀮𑁆𑀮𑀁, 𑀲𑀫𑁆𑀧𑀸𑀤𑁂𑀬𑁆𑀬 𑀳𑀺𑀢𑀢𑁆𑀣𑀺𑀓𑁄;

𑀉𑀧𑀝𑁆𑀞𑀳𑀁 𑀕𑀼𑀭𑀼𑀁 𑀲𑀫𑁆𑀫𑀸, 𑀉𑀝𑁆𑀞𑀸𑀦𑀸𑀤𑀻𑀳𑀺 𑀧𑀜𑁆𑀘𑀳𑀻𑀢𑀺.

𑀯𑀘𑀦𑀢𑁄 𑀉𑀝𑁆𑀞𑀸𑀦-𑀉𑀧𑀝𑁆𑀞𑀸𑀦-𑀧𑀭𑀺𑀘𑀭𑀺𑀬𑀸-𑀲𑀼𑀲𑁆𑀲𑀽𑀲𑀸 𑀲𑀓𑁆𑀓𑀘𑁆𑀘𑀲𑀺𑀧𑁆𑀧𑀧𑀝𑀺𑀕𑁆𑀕𑀳𑀡𑁂𑀳𑀺 𑀲𑀫𑁆𑀫𑀸 𑀉𑀧𑀝𑁆𑀞𑀳𑀦𑁆𑀢𑁂𑀦 𑀲𑀯𑀦,𑀉𑀕𑁆𑀕𑀳𑀦-𑀥𑀸𑀭𑀡-𑀧𑀭𑀺𑀧𑀼𑀘𑁆𑀙𑀸-𑀪𑀸𑀯𑀦𑀸 𑀳𑀺 𑀓𑀗𑁆𑀔𑀸𑀯𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀯𑀺𑀜𑁆𑀜𑀸𑀢𑀩𑁆𑀩𑀁 𑀲𑀤𑁆𑀤𑀮𑀓𑁆𑀔𑀡𑀁, 𑀢𑀣𑀸 𑀅𑀯𑀺𑀜𑁆𑀜𑀸𑀢𑀁 𑀲𑀤𑁆𑀤𑀮𑀓𑁆𑀔𑀡𑀫𑀦𑁂𑀦𑀸𑀢𑀺 ¶ 𑀅𑀯𑀺𑀜𑁆𑀜𑀸𑀢𑀲𑀤𑁆𑀤𑀮𑀓𑁆𑀔𑀡𑁄 𑀧𑀼𑀕𑁆𑀕𑀮𑁄, 𑀳𑀺𑀲𑀤𑁆𑀤𑁄 𑀅𑀯𑀥𑀸𑀭𑀡𑁂, 𑀲𑁄 ‘𑀥𑀫𑁆𑀫𑀯𑀺𑀦𑀬𑁂𑀲𑀼 𑀓𑀼𑀲𑀮𑁄 𑀦 𑀳𑁄𑀢𑀻’𑀢𑀺 𑀏𑀢𑁆𑀣 𑀤𑀝𑁆𑀞𑀩𑁆𑀩𑁄, 𑀓𑀼𑀲𑀮𑁄 𑀤𑀓𑁆𑀔𑁄 𑀦 𑀳𑁄𑀢𑀺, 𑀢𑀢𑁆𑀣 𑀥𑀫𑁆𑀫𑀯𑀺𑀦𑀬𑁂𑀲𑀼 𑀲𑀼𑀢𑁆𑀢𑀦𑁆𑀢𑀸𑀢𑀸𑀪𑀺𑀥𑀫𑁆𑀫𑀲𑀗𑁆𑀔𑀸𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑁂𑀯 𑀯𑀺𑀦𑀬𑁂 𑀘, 𑀓𑀲𑁆𑀫𑀸𑁋

𑀬𑁄 𑀦𑀺𑀭𑀼𑀢𑁆𑀢𑀺𑀁 𑀦 𑀲𑀺𑀓𑁆𑀔𑁂𑀬𑁆𑀬, 𑀲𑀺𑀓𑁆𑀔𑀦𑁆𑀢𑁄 𑀧𑀺𑀝𑀓𑀢𑁆𑀢𑀬𑀁;

𑀧𑀤𑁂𑀧𑀤𑁂 𑀯𑀺𑀓𑀗𑁆𑀔𑁂𑀬𑁆𑀬, 𑀯𑀦𑁂 𑀅𑀦𑁆𑀥𑀕𑀚𑁄 𑀬𑀣𑀸𑀢𑀺.

𑀯𑀘𑀦𑀢𑁄, 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 ‘‘𑀬𑀣𑀸 𑀯𑀼𑀢𑁆𑀢𑀦𑀬𑁂𑀦 𑀲𑀫𑁆𑀪𑀽𑀢𑀧𑀤 𑀩𑁆𑀬𑀸𑀫𑁄𑀳𑀯𑀲𑁂𑀦 𑀧𑀤𑀢𑁆𑀣𑁂𑀧𑀺 𑀩𑁆𑀬𑀸𑀫𑁄𑀳𑀲𑀫𑁆𑀪𑀯𑀢𑁄 𑀲𑀼𑀢𑁆𑀢𑀦𑁆𑀢𑁄𑀧𑀤𑀲𑁆𑀲𑀺𑀢𑀸𑀬 𑀤𑀺𑀝𑁆𑀞𑀺𑀯𑀺𑀦𑀺𑀯𑁂𑀝𑁆𑀞𑀦𑀸𑀬 𑀘 𑀅𑀪𑀺𑀥𑀫𑁆𑀫𑀸𑀕𑀢𑁂 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂 𑀘 𑀯𑀺𑀦𑀬 𑀦𑀺𑀤𑁆𑀤𑀺𑀝𑁆𑀞𑁂 𑀲𑀁𑀯𑀭𑀸𑀲𑀁𑀯𑀭𑁂 𑀘 𑀅𑀓𑁄𑀲𑀮𑁆𑀮𑀁 𑀲𑀺𑀬𑀸’’𑀢𑀺, 𑀬𑀣𑀸𑀥𑀫𑁆𑀫𑀦𑁆𑀢𑀺 𑀥𑀫𑁆𑀫𑀯𑀺𑀦𑀬 𑀲𑀤𑁆𑀤𑀲𑁆𑀲 𑀬𑁄-𑀢𑁆𑀣𑁄 𑀯𑀺𑀦𑀬𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀲𑀗𑁆𑀔𑀸𑀢𑁄, 𑀢𑀲𑁆𑀲 𑀲𑁄-𑀢𑁆𑀣𑁄, 𑀢𑀤𑀦𑀢𑀺𑀓𑁆𑀓𑀫𑁂𑀦, 𑀧𑀝𑀺𑀧𑀚𑁆𑀚𑀺𑀢𑀼𑀫𑀲𑀓𑁆𑀓𑁄𑀦𑁆𑀢𑁄𑀢𑀺 𑀢𑀢𑁆𑀣𑀢𑀢𑁆𑀣𑁂𑀯 𑀯𑀼𑀢𑁆𑀢𑀸𑀲𑀼 𑀅𑀥𑀺𑀲𑀻𑀮 𑀅𑀥𑀺𑀘𑀺𑀢𑁆𑀢 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀲𑀼 𑀧𑀯𑀢𑁆𑀢𑀺𑀢𑀼𑀁 𑀅𑀲𑀫𑀢𑁆𑀣𑁄, 𑀓𑀼𑀲𑀮𑁄 𑀧𑀦 𑀲𑀫𑀢𑁆𑀣𑁄 𑀧𑀜𑁆𑀜𑀸𑀯𑀺𑀲𑁂𑀲𑀸𑀮𑁄𑀓𑀧𑀝𑀺𑀮𑀸𑀪𑀢𑁄, 𑀯𑀼𑀢𑁆𑀢𑀁 𑀳𑀺𑁋

𑀬𑀸𑀯 𑀢𑀺𑀝𑁆𑀞𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑀸, 𑀯𑀺𑀦𑀬𑁄 𑀬𑀸𑀯 𑀤𑀺𑀧𑁆𑀧𑀢𑀺;

𑀢𑀸𑀯 𑀤𑀓𑁆𑀔𑀦𑁆𑀢𑀺 𑀆𑀮𑁄𑀓𑀁, 𑀲𑀽𑀭𑀺𑀬𑁂 𑀅𑀩𑁆𑀪𑀼𑀕𑁆𑀕𑀢𑁂 𑀬𑀣𑀸𑀢𑀺.

𑀧𑀝𑀺𑀧𑀢𑁆𑀢𑀺𑀦𑁆𑀢𑀺 𑀧𑀝𑀺𑀧𑀚𑁆𑀚𑀻𑀬𑀢𑀻𑀢𑀺 𑀧𑀝𑀺𑀧𑀢𑁆𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀁 𑀢𑀺𑀯𑀺𑀥𑀫𑁆𑀧𑀺 𑀧𑀝𑀺𑀧𑀢𑁆𑀢𑀺𑀁, 𑀯𑀺𑀭𑀸𑀥𑁂𑀢𑁆𑀯𑀸𑀢𑀺 𑀦𑀸𑀲𑁂𑀢𑁆𑀯𑀸, 𑀦𑀲𑁆𑀲𑀢𑀺 𑀳𑀺 𑀧𑀝𑀺𑀧𑀢𑁆𑀢𑀺 𑀢𑁂𑀲𑀼𑀬𑁂𑀯𑀸 𑀓𑁄 𑀲𑀮𑁆𑀮𑀢𑀫𑀕𑀢𑀢𑁆𑀢𑀸, 𑀢𑀣𑀸 𑀘𑀸𑀳𑀼𑁋

𑀲𑀼𑀢𑁆𑀢𑀦𑁆𑀢𑁂𑀲𑀼 𑀅𑀲𑀦𑁆𑀢𑁂𑀲𑀼, 𑀧𑀫𑀼𑀝𑁆𑀞𑁂 𑀯𑀺𑀦𑀬𑀫𑁆𑀳𑀺 𑀘;

𑀢𑀫𑁄 𑀪𑀯𑀺𑀲𑁆𑀲𑀢𑀺 𑀮𑁄𑀓𑁂, 𑀲𑀽𑀭𑀺𑀬𑁂 𑀅𑀢𑁆𑀣𑀗𑁆𑀕𑀢𑁂 𑀬𑀣𑀸𑀢𑀺.

𑀲𑀁𑀲𑀸𑀭𑀤𑀼𑀓𑁆𑀔𑀲𑁆𑀲𑁂𑀯 𑀪𑀸𑀕𑀻 𑀳𑁄𑀢𑀺… 𑀬𑀣𑀸𑀯𑀼𑀢𑁆𑀢𑀸-𑀦𑀼𑀓𑁆𑀓𑀫𑀧𑀭𑀺𑀘𑁆𑀘𑀸𑀕𑁂𑀦 𑀅𑀦𑀼𑀭𑀽𑀧𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑀺𑀮𑀪𑀺𑀢𑀩𑁆𑀩𑀢𑁆𑀢𑀸 𑀅𑀥𑀺𑀕𑀫𑀯𑀺𑀲𑀬𑀲𑁆𑀲 [𑀯𑀺𑀲𑀣𑀢𑁆𑀢𑀸 (𑀧𑁄𑀢𑁆𑀣𑀓𑁂)] 𑀬𑁄 𑀕𑀓𑁆𑀔𑁂𑀫𑀲𑁆𑀲, 𑀯𑀼𑀢𑁆𑀢𑀜𑁆𑀳𑀺 𑀢𑀲𑁆𑀲𑀸𑀦𑀼𑀮𑁄𑀫𑀧𑀝𑀺𑀧𑀢𑁆𑀢𑀺𑀫𑀽𑀮𑀓𑀢𑁆𑀢𑀁𑁋

𑀲𑀼𑀢𑁆𑀢𑀦𑁆𑀢𑁂 𑀭𑀓𑁆𑀔𑀺𑀢𑁂 𑀲𑀦𑁆𑀢𑁂, 𑀧𑀝𑀺𑀧𑀢𑁆𑀢𑀺 𑀳𑁄𑀢𑀺 𑀭𑀓𑁆𑀔𑀺𑀢𑀸;

𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑁄 𑀥𑀻𑀭𑁄, 𑀬𑁄𑀕𑀓𑁆𑀔𑁂𑀫𑀸 𑀦 𑀥𑀁𑀲𑀢𑀻𑀢𑀺.

𑀏𑀢𑀸𑀯𑀢𑀸 ¶ 𑀅𑀯𑀺𑀜𑁆𑀜𑀸𑀢𑀲𑀤𑁆𑀤𑀮𑀓𑁆𑀔𑀡𑀲𑁆𑀲 𑀲𑀓𑀢𑁆𑀣𑀧𑀭𑀺𑀳𑀸𑀦𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀓𑀢𑁆𑀣𑀲𑀫𑁆𑀧𑀢𑁆𑀢𑀺𑀫𑀽𑀮𑀺𑀓𑀸 𑀧𑀭𑀢𑁆𑀣𑀲𑀫𑁆𑀧𑀢𑁆𑀢𑀻𑀢𑀺 𑀢𑀤𑀪𑀸𑀯𑀸 𑀢𑀸𑀤𑀺𑀲𑁄 𑀧𑀼𑀕𑁆𑀕𑀮𑁄 𑀧𑀭𑁂𑀲𑀫𑁆𑀧𑀺 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘𑀦𑀘𑀸’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀧𑀢𑀺𑀝𑁆𑀞𑀸𑀢𑀺 𑀥𑀸𑀭𑀡𑀁, 𑀢𑀜𑁆𑀘𑁂𑀢𑁆𑀣 𑀢𑁂𑀲𑀁 𑀢𑁂𑀲𑀁 𑀓𑀼𑀮 𑀧𑀼𑀢𑁆𑀢𑀸𑀦𑀁 𑀥𑀫𑁆𑀫𑀯𑀺𑀦𑀬𑀲𑀺𑀓𑁆𑀔𑀸𑀧𑀦𑀁 𑀢𑀁𑀢𑀁 𑀓𑀫𑁆𑀫𑀢𑁄 𑀦𑀺𑀢𑁆𑀣𑀭𑀡𑀸𑀤𑀺 𑀘, 𑀢𑀤𑀼𑀪𑀬 𑀫𑁂𑀯𑀸-𑀦𑁆𑀳𑀲𑀗𑁆𑀕𑀺𑀓𑀁 𑀧𑀢𑀺𑀝𑁆𑀞𑀁, 𑀫𑀼𑀔𑁆𑀬𑀪𑀽𑀢𑀫𑁆𑀧𑀦 𑀢𑀫𑁆𑀫𑀽𑀮𑀓𑁂 𑀲𑀼𑀧𑀭𑀺𑀲𑀼𑀤𑁆𑀥𑀲𑀻𑀮𑁂 𑀧𑀢𑀺𑀝𑁆𑀞𑀸𑀧𑀦𑀫𑁂𑀯, 𑀢𑀤𑀼𑀧𑀓𑀭𑀡𑀢𑁆𑀣𑁄 𑀲𑀺𑀓𑁆𑀔𑀸𑀧𑀦𑀸𑀤𑀺, 𑀇𑀥 𑀧𑀦 𑀢𑀁 𑀲𑀸𑀥𑀦𑀪𑀽𑀢𑁄 𑀧𑀼𑀕𑁆𑀕𑀮𑁄 𑀉𑀧𑀘𑀸𑀭𑀢𑁄 𑀧𑀢𑀺𑀝𑁆𑀞𑀸𑀢𑀺 𑀕𑀳𑁂𑀢𑀩𑁆𑀩𑁄, 𑀳𑀺𑀲𑀤𑁆𑀤𑁄 𑀬𑀣𑀸𑀯𑀼𑀢𑁆𑀢 𑀲𑀫𑀢𑁆𑀣𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀲𑀤𑁆𑀤𑀮𑀓𑁆𑀔𑀡𑀜𑁆𑀜𑀽𑀬𑁂𑀯𑀸𑀢𑀺 𑀅𑀯𑀥𑀸𑀭𑀡𑀫𑁆𑀧𑀦 𑀢𑁂𑀲𑀼 𑀢𑀩𑁆𑀩𑀺𑀤𑀽𑀬𑁂𑀯 𑀲𑀫𑀢𑁆𑀣𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀧𑀓𑀭𑀡𑀯𑀲𑁂𑀦 𑀯𑀼𑀢𑁆𑀢𑀁, 𑀅𑀢𑁆𑀢𑀦𑁄 𑀧𑀦 𑀲𑀼𑀕𑀼𑀢𑁆𑀢𑀲𑀻𑀮𑀓𑁆𑀔𑀦𑁆𑀥𑀯𑀺𑀭𑀳𑁂𑀦 𑀓𑀤𑀸𑀘𑀺 𑀓𑁄𑀘𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀧𑀢𑀺𑀝𑁆𑀞𑀸𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺… 𑀢𑀫𑁆𑀫𑀽𑀮𑀓𑀢𑁆𑀢𑀸 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸 𑀲𑀧𑀭𑀧𑀢𑀺𑀝𑁆𑀞𑀸 𑀪𑀸𑀯𑀲𑁆𑀲 𑀘, 𑀢𑁂𑀦𑁂𑀯 𑀯𑀺𑀦𑀬𑀥𑀭𑁂 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀦𑁆𑀢𑁂𑀦 𑀪𑀕𑀯𑀢𑀸 𑀢𑀧𑁆𑀧𑀥𑀸𑀦𑀁 𑀢𑀧𑁆𑀧𑀫𑀼𑀔𑀁𑀯 𑀓𑀢𑁆𑀯𑀸 ‘‘𑀧𑀜𑁆𑀘𑀺𑀫𑁂 𑀪𑀺𑀓𑁆𑀔𑀯𑁂 𑀆𑀦𑀺𑀲𑀁𑀲𑀸 𑀯𑀺𑀦𑀬𑀥𑀭 𑀧𑀼𑀕𑁆𑀕𑀮𑁂, 𑀓𑀢𑀫𑁂 𑀧𑀜𑁆𑀘 𑀅𑀢𑁆𑀢𑀦𑁄 𑀲𑀻𑀮𑀓𑁆𑀔𑀦𑁆𑀥𑁄 𑀲𑀼𑀕𑀼𑀢𑁆𑀢𑁄 𑀳𑁄𑀢𑀺 𑀲𑀼 𑀭𑀓𑁆𑀔𑀺𑀢𑁄, 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑀸𑀦𑀁 𑀧𑀝𑀺𑀲𑀭𑀡𑀁 𑀳𑁄𑀢𑀺, 𑀯𑀺𑀲𑀸𑀭𑀤𑁄 𑀲𑀗𑁆𑀖 𑀫𑀚𑁆𑀛𑁂 𑀯𑀺𑀳𑀭𑀢𑀺, 𑀧𑀘𑁆𑀘𑀢𑁆𑀢𑁆𑀣𑀺𑀓𑁂 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀡𑁆𑀳𑀸𑀢𑀺, 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸 𑀧𑀝𑀺𑀧𑀦𑁆𑀦𑁄 𑀘 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀅𑀢𑁆𑀣𑀸𑀦𑀼𑀭𑀽𑀧𑀦𑁆𑀢𑀺 𑀅𑀢𑁆𑀢𑀦𑁄 𑀯𑀘𑀦𑀻𑀬𑀲𑁆𑀲𑀢𑁆𑀣𑀲𑁆𑀲 𑀯𑀸𑀘𑀓𑀢𑁆𑀢𑁂𑀦 𑀬𑁄𑀕𑁆𑀬𑀁, 𑀩𑁆𑀬𑀜𑁆𑀚𑀦𑀸𑀦𑀼𑀭𑀽𑀧𑀦𑁆𑀢𑀺 𑀅𑀢𑁆𑀢𑀦𑁄 𑀯𑀸𑀘𑀓𑀲𑁆𑀲 𑀯𑀘𑀦𑀻𑀬𑀢𑁆𑀢𑁂𑀦 𑀬𑁄𑀕𑁆𑀬𑀁, 𑀧𑀭𑀺𑀯𑀸𑀲𑀸𑀤𑀻𑀲𑀽𑀢𑀺𑀆𑀤𑀺𑀲𑀤𑁆𑀤𑁂𑀦 𑀅𑀩𑁆𑀪𑀸𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀢𑀁𑀢𑀁𑀓𑀫𑁆𑀫𑀦𑁆𑀢𑀺 𑀧𑀭𑀺𑀯𑀸𑀲𑀸𑀤𑀺𑀓𑀁 𑀢𑀁𑀢𑀁𑀓𑀫𑁆𑀫𑀁, 𑀅𑀜𑁆𑀜𑁄𑀢𑀺 𑀅𑀲𑀤𑁆𑀤𑀮𑀓𑁆𑀔𑀡𑀜𑁆𑀜𑀽, 𑀦 𑀓𑁂𑀯𑀮𑀫𑀦𑁂𑀦 𑀲𑀓𑀢𑁆𑀣𑀧𑀭𑀢𑁆𑀣𑀸𑀯 𑀦𑀸𑀲𑀺𑀢𑀸, 𑀅𑀣 𑀔𑁄𑀢𑀺 𑀯𑀺𑀥𑁄 𑀲𑀤𑁆𑀥𑀫𑁆𑀫𑁄𑀧𑀺 𑀦𑀸𑀲𑀺𑀢𑁄𑀬𑁂𑀯𑀸𑀢𑀺 𑀯𑀢𑁆𑀣𑀼𑀫𑀸𑀳 ‘𑀅𑀚𑀸𑀦𑀦𑁆𑀢𑁄 𑀧𑀦𑀸’𑀢𑀺𑀆𑀤𑀺, 𑀅𑀬𑀣𑀸𑀧𑀝𑀺𑀧𑀚𑁆𑀚𑀫𑀸𑀦𑁄𑀢𑀺 𑀲𑀤𑁆𑀤𑀮𑀓𑁆𑀔𑀡𑀜𑁆𑀜𑀼𑀦𑀸 𑀬𑀣𑀸 𑀬𑁂𑀦 𑀧𑀓𑀸𑀭𑁂𑀦 𑀅𑀢𑁆𑀣𑀸𑀦𑀼𑀭𑀽𑀧𑀁 𑀩𑁆𑀬𑀜𑁆𑀚𑀦𑁂 𑀩𑁆𑀬𑀜𑁆𑀚𑀦𑀸𑀦𑀼𑀭𑀽𑀧𑀜𑁆𑀘 𑀅𑀢𑁆𑀣𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁, 𑀢𑀣𑀸 𑀅𑀧𑁆𑀧𑀝𑀺𑀧𑀚𑁆𑀚𑀫𑀸𑀦𑁄, 𑀢𑀣𑀸 𑀘 𑀯𑀓𑁆𑀔𑀢𑀺𑁋 𑀢𑀣𑀸 𑀳𑀺 𑀲𑁄 𑀲𑀤𑁆𑀤𑀮𑀓𑁆𑀔𑀡 𑀫𑀚𑀸𑀦𑀦𑁆𑀢𑁄’𑀢𑀺𑀆𑀤𑀺. 𑀢𑀺𑀯𑀺𑀥𑀫𑁆𑀧𑀺 𑀲𑀤𑁆𑀥𑀫𑁆𑀫𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀧𑀝𑀺𑀧𑀢𑁆𑀢𑀺𑀅𑀥𑀺𑀕𑀫𑀯𑀲𑁂𑀦𑀢𑀺 𑀯𑀺𑀥𑀫𑁂𑀯 𑀲𑀤𑁆𑀥𑀫𑁆𑀫𑀁, 𑀢𑀢𑁆𑀣 𑀢𑀺𑀧𑀺𑀝𑀓𑀩𑀼𑀤𑁆𑀥𑀯𑀘𑀦𑀁 𑀧𑀭𑀺𑀬𑀢𑁆𑀢𑀺𑀲𑀤𑁆𑀥𑀫𑁆𑀫𑁄 𑀦𑀸𑀫, 𑀢𑁂𑀭𑀲 𑀥𑀼𑀢𑀕𑀼𑀡𑀸 𑀘𑀼𑀤𑁆𑀤𑀲 𑀔𑀦𑁆𑀥𑀓𑀯𑀢𑁆𑀢𑀸𑀦𑀺 𑀤𑁆𑀯𑁂 𑀅𑀲𑀻𑀢𑀺 𑀫𑀳𑀸𑀯𑀢𑁆𑀢𑀸𑀦𑀻𑀢𑀺 𑀅𑀬𑀁 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑁄 𑀦𑀸𑀫, 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀘𑀢𑁆𑀢𑀸𑀭𑀺 𑀘 𑀨𑀮𑀸𑀦𑀺 𑀅𑀬𑀁 𑀅𑀥𑀺𑀕𑀫𑀲𑀤𑁆𑀥𑀫𑁆𑀫𑁄 ¶ 𑀦𑀸𑀫, 𑀢𑀣𑀸𑀳𑀺𑀘𑁆𑀘𑀸𑀤𑀺𑀦𑀸 𑀯𑀼𑀢𑁆𑀢𑀫𑀢𑁆𑀣𑀁 𑀲𑀫𑀢𑁆𑀣𑁂𑀢𑀺, 𑀢𑀫𑁆𑀧𑀺 𑀧𑀸𑀴𑀺𑀬𑀸 𑀣𑀺𑀭𑀻𑀓𑀸𑀢𑀼𑀁 ‘𑀯𑀼𑀢𑁆𑀢𑀁 𑀳𑁂𑀢’𑀦𑁆𑀢𑀺𑀆𑀤𑀺𑀫𑀸𑀳, 𑀢𑀢𑁆𑀣 𑀥𑀫𑁆𑀫𑀸𑀢𑀺 𑀳𑁂𑀢𑀽, 𑀲𑀤𑁆𑀥𑀫𑁆𑀫𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀢𑀺𑀯𑀺𑀥𑀲𑁆𑀲 𑀲𑀤𑁆𑀥𑀫𑁆𑀫𑀲𑁆𑀲, 𑀧𑀤𑀩𑁆𑀬𑀜𑁆𑀚𑀦𑀦𑁆𑀢𑀺 𑀧𑀤𑀜𑁆𑀘 𑀩𑁆𑀬𑀜𑁆𑀚𑀦𑀜𑁆𑀘 𑀢𑀁, 𑀢𑀢𑁆𑀣 𑀧𑀤𑀁 𑀦𑀸𑀫 𑀲𑁆𑀬𑀸𑀤𑁆𑀬𑀦𑁆𑀢𑀁 𑀢𑁆𑀬𑀸𑀤𑁆𑀬𑀦𑁆𑀢𑀜𑁆𑀘, 𑀩𑁆𑀬𑀜𑁆𑀚𑀻𑀬𑀢𑀺 𑀅𑀢𑁆𑀣𑁄 𑀏𑀢𑁂𑀦𑀸𑀢𑀺 𑀩𑁆𑀬𑀜𑁆𑀚𑀦𑀁-𑀯𑀸𑀓𑁆𑀬𑀁 𑀅𑀣𑀯𑀸 𑀧𑀚𑁆𑀚𑀢𑁂 𑀕𑀫𑁆𑀬𑀢𑁂 𑀅𑀢𑁆𑀣𑁄 𑀏𑀢𑁂𑀦𑀸𑀢𑀺 𑀧𑀤𑀁-𑀲𑁆𑀬𑀸𑀤𑁆𑀬𑀦𑁆𑀢𑀸𑀤𑀺, 𑀯𑀸𑀓𑁆𑀬𑀁𑀯 𑀩𑁆𑀬𑀜𑁆𑀚𑀦𑀁, 𑀲𑀺𑀣𑀺𑀮𑀥𑀦𑀺𑀢𑀸𑀤𑀺𑀧𑀤𑀫𑁂𑀯𑀯𑀸 𑀯𑀼𑀢𑁆𑀢𑀦𑀬𑁂𑀦 𑀩𑁆𑀬𑀜𑁆𑀚𑀦𑀦𑁆𑀢𑀺 𑀧𑀤𑀩𑁆𑀬𑀜𑁆𑀚𑀦𑀁, 𑀢𑀁, 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀁 𑀤𑀼𑀝𑁆𑀞𑀼 𑀦𑀺𑀓𑁆𑀔𑀺𑀢𑁆𑀢𑀁 𑀞𑀧𑀺𑀢𑀁 𑀯𑀺𑀭𑀸𑀥𑁂𑀢𑁆𑀯𑀸 𑀓𑀣𑀺𑀢𑀁, 𑀅𑀢𑁆𑀣𑁄 𑀘 𑀤𑀼𑀦𑁆𑀦𑀻𑀢𑁄𑀢𑀺 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀢𑁆𑀢𑀸𑀬𑁂𑀯 𑀧𑀤𑀩𑁆𑀬𑀜𑁆𑀚𑀦𑀲𑁆𑀲 𑀢𑀩𑁆𑀩𑀘𑀦𑀻𑀬𑁄𑀧𑀺 𑀤𑀼𑀝𑁆𑀞𑀼𑀯𑀺𑀜𑁆𑀜𑀸𑀢𑁄 𑀳𑁄𑀢𑀺, 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀢𑁄𑀢𑀺 ‘𑀅𑀯𑀺𑀜𑁆𑀜𑀸𑀢𑀲𑀤𑁆𑀤𑀮𑀓𑁆𑀔𑀡𑁄𑀳𑀺’𑀘𑁆𑀘𑀸𑀤𑀺𑀦𑀸 𑀯𑀼𑀢𑁆𑀢𑀲𑁆𑀲 𑀯𑀺𑀜𑁆𑀜𑀸𑀢𑀲𑀤𑁆𑀤𑀮𑀓𑁆𑀔𑀡𑀢𑁆𑀢𑀸𑀤𑀺𑀦𑀸 𑀧𑀝𑀺𑀧𑀓𑁆𑀔𑀪𑀸𑀯𑀢𑁄, 𑀪𑀸𑀯𑀧𑁆𑀧𑀥𑀸𑀦𑁄 𑀳𑀺 𑀅𑀬𑀁 𑀦𑀺𑀤𑁆𑀤𑁂𑀲𑁄,𑀢𑁆𑀢𑀧𑁆𑀧𑀘𑁆𑀘𑀬𑀮𑁄𑀧𑁄 𑀯𑀸, 𑀦 𑀳𑀺 𑀅𑀢𑁆𑀢𑀸𑀯 𑀅𑀢𑁆𑀢𑀦𑀸 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑀼𑀢𑁆𑀢𑀦𑁆𑀢𑀺.

𑀢𑀤𑁂𑀯𑀦𑁆𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀁 𑀦𑀺𑀕𑀫𑁂𑀢𑁆𑀯𑀸 𑀲𑀜𑁆𑀜𑀸𑀯𑀺𑀥𑀸𑀦𑁂 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀺, 𑀢𑀦𑁆𑀢𑀺 𑀳𑁂𑀢𑁆𑀯𑀢𑁆𑀣𑁂 𑀦𑀺𑀧𑀸𑀢𑁄, 𑀬𑀲𑁆𑀫𑀸 𑀲𑀤𑁆𑀤𑀮𑀓𑁆𑀔𑀡𑀲𑁆𑀲 𑀚𑀸𑀦𑀦𑀁𑀲𑀸𑀦𑀺 𑀲𑀁𑀲𑀁 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄, 𑀏𑀯𑀦𑁆𑀢𑀺 𑀦𑀺𑀤𑀲𑁆𑀲𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀏𑀯𑀁 𑀲𑀧𑁆𑀧𑀬𑁄𑀚𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀢𑀤𑁂𑀯𑀦𑁆𑀢𑀺 𑀯𑀸 𑀦𑀺𑀧𑀸𑀢𑀲𑀫𑀼𑀤𑀸𑀬𑁄 𑀬𑀁, 𑀯𑀼𑀢𑁆𑀢𑁂𑀦 𑀧𑀓𑀸𑀭𑁂𑀦𑁂𑀢𑁆𑀬𑀲𑁆𑀫𑀺𑀁 𑀅𑀢𑁆𑀣𑁂 𑀯𑀢𑁆𑀢𑀢𑁂. 𑀦𑀦𑀼𑀘 𑀲𑀜𑁆𑀜𑀻𑀦𑀁 𑀲𑀜𑁆𑀜𑀸𑀦𑀁 𑀯𑀢𑁆𑀢𑀩𑁆𑀩𑀢𑁆𑀢𑁂 ‘‘𑀅𑀆𑀤𑀬𑁄 𑀢𑀺𑀢𑀸𑀮𑀻𑀲𑀯𑀡𑁆𑀡𑀸’’𑀢𑀺𑀆𑀤𑀻𑀦𑀁 𑀯𑀸𑀓𑁆𑀬𑀸𑀦𑀁 𑀯𑀺𑀲𑀼𑀁𑀯𑀺𑀲𑀼𑀁 𑀫𑀳𑀦𑁆𑀢𑀢𑁆𑀢𑀸 𑀓𑀼𑀢𑁄 𑀮𑀸𑀖𑀯𑀁 𑀲𑀢𑁆𑀣𑀲𑁆𑀲𑀸𑀢𑀺 𑀫𑀜𑁆𑀜𑀫𑀸𑀦𑁄 ‘𑀢𑀣𑀸𑀳𑀺’𑀘𑁆𑀘𑀸𑀤𑀺𑀦𑀸 𑀲𑀜𑁆𑀜𑀸𑀯𑀺𑀥𑀸𑀦𑁂 𑀮𑀸𑀖𑀯𑀲𑀩𑁆𑀪𑀸𑀯𑀁 𑀲𑀫𑀢𑁆𑀣𑁂𑀢𑀺, 𑀳𑁄𑀢𑁂𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀓𑀢𑁆𑀣𑀘𑀺 𑀧𑀭𑀲𑀢𑁆𑀣𑁂 𑀯𑀺𑀬 𑀦𑁄 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀧𑀝𑀺𑀧𑀢𑁆𑀢𑀺𑀮𑀸𑀖𑀯𑀫𑁆𑀧𑀺 𑀘𑁂𑀢𑁆𑀣 𑀳𑁄𑀢𑁂𑀯, 𑀢𑀣𑀸𑀳𑀺 ‘‘𑀯𑀡𑁆𑀡𑀧𑀭𑁂𑀦 𑀲𑀯𑀡𑁆𑀡𑁄𑀧𑀺’’𑀘𑁆𑀘𑀸𑀤𑁄 (𑁧-𑁨𑁪) 𑀯𑀡𑁆𑀡𑀸𑀤𑀺𑀲𑀜𑁆𑀜𑀸𑀲𑀫𑀼𑀤𑁆𑀥𑀭𑀺𑀢𑀸 𑀦𑀸𑀢𑁆𑀢𑀸𑀦𑀫𑀢𑁆𑀢𑀸𑀯𑀕𑀫𑁂𑀢𑀼𑀫𑀮𑀦𑁆𑀢𑀺 𑀧𑀭𑁂 𑀧𑀼𑀘𑁆𑀙𑀺𑀢𑁆𑀯𑀸 𑀚𑀸𑀦𑀺𑀢𑀩𑁆𑀩𑀸 𑀅𑀲𑁆𑀲, 𑀢𑀢𑁄 𑀲𑀜𑁆𑀜𑀸-𑀯𑀲𑁂𑀬𑀸, 𑀢𑀢𑁄𑀲𑁆𑀲 𑀲𑀜𑁆𑀜𑀸𑀢𑀺 𑀲𑀜𑁆𑀜𑀸𑀲𑀜𑁆𑀜𑀻𑀯𑀺𑀯𑁂𑀘𑀦𑀁 𑀢𑀤𑀦𑀼𑀝𑁆𑀞𑀸𑀦𑀦𑁆𑀢𑀺 𑀧𑀭𑀫𑁆𑀧𑀭𑀸𑀧𑁂𑀓𑁆𑀔𑀸𑀬 𑀪𑀯𑀺𑀢𑀩𑁆𑀩𑀁 𑀧𑀝𑀺𑀧𑀢𑁆𑀢𑀺 𑀕𑀸𑀭𑀯𑀸𑀪𑀸𑀯𑀸. 𑀇𑀤𑀸𑀦𑀺 𑀲𑀗𑁆𑀔𑁂𑀧𑀢𑁄 𑀲𑀢𑁆𑀣𑀓𑁆𑀓𑀫𑀁 𑀤𑀲𑁆𑀲𑁂𑀢𑀼𑀫𑀸𑀳-𑀏𑀯𑀁 𑀢𑀸𑀯𑀺’𑀘𑁆𑀘𑀸𑀤𑀺, 𑀢𑀸𑀯𑀸𑀢𑀺 𑀧𑀞𑀫𑀁, 𑀉𑀧𑀬𑀼𑀚𑁆𑀚𑀫𑀸𑀦𑀢𑁆𑀢𑀸𑀢𑀺 𑀩𑁆𑀬𑀸𑀧𑀸𑀭𑀺𑀬𑀫𑀸𑀦𑀢𑁆𑀢𑀸, 𑀯𑀺𑀲𑀬𑁄 𑀕𑁄𑀘𑀭𑁄 𑀬𑀢𑁆𑀣𑁂𑀢𑁂 𑀲𑁆𑀬𑀸𑀤𑀬𑁄 𑀯𑀺𑀥𑀻 𑀬𑀦𑁆𑀢𑁂, 𑀲𑀳 𑀯𑀺𑀲𑀬𑁂𑀦𑀸𑀢𑀺 𑀲𑀯𑀺𑀲𑀬𑀸, 𑀧𑀞𑀫𑀁 𑀓𑀭𑀻𑀬𑀢𑀻𑀢𑀺 𑀧𑀓𑀢𑀺 𑀬𑀢𑁄 𑀲𑁆𑀬𑀸𑀤𑀬𑁄 𑀯𑀺𑀥𑀻𑀬𑀦𑁆𑀢𑁂, 𑀲𑀳 𑀧𑀓𑀢𑀺𑀬𑀸𑀢𑀺 𑀲𑀧𑁆𑀧𑀓𑀢𑀺𑀓𑀸, 𑀮𑀺𑀗𑁆𑀕𑀸𑀤𑀺𑀓𑀦𑁆𑀢𑀺 ¶ 𑀆𑀤𑀺𑀲𑀤𑁆𑀤𑁂𑀦‘𑀲𑀮𑀪𑀘𑁆𑀙𑀸𑀬’𑀫𑀺𑀘𑁆𑀘𑀸𑀤𑁄 𑀏𑀓𑀢𑁆𑀢𑀸𑀤𑀺, 𑀮𑀺𑀗𑁆𑀕𑁂𑀪𑀯𑀸 𑀮𑀺𑀗𑁆𑀕𑀺𑀓𑀸-𑀇𑀢𑁆𑀣𑀺𑀯𑀺𑀥𑀬𑁄, 𑀏𑀓𑀢𑁆𑀣𑀻𑀪𑀸𑀯𑁄 𑀲𑀫𑀸𑀲𑁄, 𑀢𑁂𑀦, 𑀲𑀸𑀫𑀜𑁆𑀜𑀢𑁄 𑀲𑀫𑀸𑀦𑀢𑁆𑀢𑀸, 𑀲𑀫𑀸𑀦𑀢𑁆𑀢𑀦𑁆𑀢𑀼𑀡𑀸𑀤𑀺𑀯𑀼𑀢𑁆𑀢𑀺𑀬𑀸 ‘‘𑀭𑀸𑀚𑀸𑀤𑀺𑀯𑀺𑀲𑀺𑀝𑁆𑀞𑁂 𑀧𑀼𑀭𑀺𑀲𑀸 𑀤𑁄𑀯𑀺𑀬’𑀯𑀲𑀺𑀝𑁆𑀞𑀸𑀤𑀺𑀯𑀺𑀲𑀺𑀝𑁆𑀞𑁂 𑀅𑀧𑀘𑁆𑀘𑀸𑀤𑀺𑀫𑁆𑀳𑀺 𑀅𑀢𑁆𑀣𑁂 𑀧𑀯𑀢𑁆𑀢𑀦𑀢𑁄.

𑀇𑀢𑀺 𑀫𑁄𑀕𑁆𑀕𑀮𑁆𑀮𑀸𑀦𑀧𑀜𑁆𑀘𑀺𑀓𑀸𑀝𑀻𑀓𑀸𑀬𑀁 𑀲𑀸𑀭𑀢𑁆𑀣𑀯𑀺𑀮𑀸𑀲𑀺𑀦𑀺𑀬𑀁

𑀭𑀢𑀦𑀢𑁆𑀢𑀬𑀧𑀡𑀸𑀫𑀸𑀤𑀺𑀓𑀣𑀸 𑀲𑀫𑀢𑁆𑀢𑀸.

𑀲𑀩𑁆𑀩𑀯𑀘𑀦𑀸𑀦𑀁 𑀲𑀸𑀢𑁆𑀣𑀓𑀦𑀺𑀭𑀢𑁆𑀣𑀓𑀢𑁆𑀢𑀩𑁆𑀬𑀪𑀺𑀘𑀸𑀭𑀺𑀢𑁆𑀢𑀸 ‘𑀇𑀤’𑀦𑁆𑀢𑀺𑀆𑀤𑀺𑀦𑀸 𑀲𑀤𑀺𑀝𑁆𑀞𑀦𑁆𑀢𑁂𑀦 𑀲𑀁𑀲𑀬𑀫𑀼𑀧𑀤𑀲𑁆𑀲𑀺𑀬 𑀲𑀸𑀢𑁆𑀣𑀓𑀢𑁆𑀢𑀫𑀲𑁆𑀲 𑀤𑀲𑁆𑀲𑁂𑀢𑀼𑀜𑁆𑀘 ‘𑀦 𑀢𑀸𑀯…𑀧𑁂… 𑀲𑀸𑀢𑁆𑀣𑀓𑀢𑁆𑀢𑀸’𑀢𑀺 𑀯𑀼𑀢𑁆𑀢𑀁, 𑀉𑀫𑁆𑀫𑀢𑁆𑀢𑀓𑀸𑀤𑀺𑀯𑀸𑀓𑁆𑀬𑀫𑀺𑀢𑀺 ‘𑀤𑀲 𑀤𑀸𑀴𑀺𑀫𑀸, 𑀙 𑀅𑀧𑀽𑀧𑀸, 𑀓𑀼𑀡𑁆𑀟𑀫𑀚𑀸𑀚𑀺𑀦𑀁, 𑀧𑀮𑀸𑀮𑀧𑀺𑀡𑁆𑀟𑁄’𑀇𑀘𑁆𑀘𑀸𑀤𑀺𑀓𑀁, 𑀅𑀯𑀬𑀯𑀢𑁆𑀣𑀸𑀦 𑀫𑀜𑁆𑀜𑀫𑀜𑁆𑀜𑀦𑀸𑀢𑀺 𑀲𑀫𑁆𑀩𑀦𑁆𑀥𑀸 𑀲𑀫𑀼𑀤𑀸𑀬𑀢𑁆𑀣𑀸𑀪𑀸𑀯𑀢𑁄 𑀅𑀦𑀢𑁆𑀣𑀓𑀢𑁆𑀢𑀁, 𑀆𑀤𑀺𑀯𑀸𑀓𑁆𑀬𑀦𑁆𑀢𑀺 ‘‘𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸’’𑀢𑀺𑀆𑀤𑀺𑀯𑀸𑀓𑁆𑀬𑀁, 𑀲𑀸𑀢𑁆𑀣𑀓𑀢𑁆𑀢𑀁 𑀧𑀦𑀲𑁆𑀲 𑀧𑀤𑀢𑁆𑀣𑀸𑀦 𑀫𑀜𑁆𑀜𑀫𑀜𑁆𑀜𑀸𑀪𑀺𑀲𑀫𑁆𑀩𑀦𑁆𑀥𑀲𑁆𑀲 𑀧𑀢𑀻𑀢𑀺𑀢𑁄.

𑀅𑀣 𑀅𑀆𑀤𑁆𑀬𑀸𑀤𑀺𑀲𑀤𑁆𑀤𑀸𑀦𑀁 𑀲𑀸𑀥𑀼𑀢𑁆𑀢𑀸𑀦𑁆𑀯𑀸𑀔𑁆𑀬𑀸𑀦𑀸𑀬 𑀇𑀤𑀁 𑀯𑀘𑀦𑀫𑀺𑀘𑁆𑀘𑀸𑀤𑀺𑀯𑀺𑀓𑀧𑁆𑀧𑀦𑁆𑀢𑀭𑀲𑀫𑁆𑀪𑀯𑁂 𑀓𑀣𑀁 𑀦𑀺𑀬𑀫𑁄 𑀯𑀼𑀢𑁆𑀢𑀺𑀬𑀁 𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀲𑀸𑀢𑁆𑀣𑀓𑀢𑁆𑀢𑀫𑀺𑀘𑁆𑀘𑀸𑀲𑀗𑁆𑀓𑀺𑀬 𑀢𑁂𑀲𑀫𑀺𑀳𑀸𑀦𑀼𑀧𑀬𑁄𑀕𑀺𑀢𑁆𑀢𑀁 𑀓𑀫𑁂𑀦 𑀧𑀝𑀺𑀧𑀸𑀤𑀬𑀺𑀢𑀼𑀫𑀸𑀳 ‘𑀯𑀓𑁆𑀔𑀫𑀸𑀦𑀢𑁆𑀣𑀫𑁂𑀯𑀺𑀤’𑀫𑀺𑀘𑁆𑀘𑀸𑀤𑀺,’ 𑀆𑀓𑀸𑀭𑀸𑀤𑀬𑁄 𑀦𑀺𑀕𑁆𑀕𑀳𑀻𑀢𑀦𑁆𑀢𑀸’𑀇𑀘𑁆𑀘𑀸𑀤𑀺𑀦𑀸 𑀯𑀼𑀢𑁆𑀢𑀺𑀬𑀁 𑀯𑀓𑁆𑀔𑀫𑀸𑀦𑁄 𑀅𑀢𑁆𑀣𑁄 𑀬𑀲𑁆𑀲 𑀢𑀁 𑀢𑀣𑀸 𑀯𑀼𑀢𑁆𑀢𑀁, 𑀲𑀸𑀥𑀽𑀦𑀁 𑀲𑀸𑀥𑀼𑀲𑀤𑁆𑀤𑀸𑀦𑀁 𑀅𑀦𑀼𑀲𑀸𑀲𑀦𑀁 𑀆𑀔𑁆𑀬𑀸𑀦𑀁 𑀅𑀢𑁆𑀣𑁄 𑀧𑀬𑁄𑀚𑀦𑀁 𑀬𑀲𑁆𑀲 𑀢𑀦𑁆𑀢𑀺 𑀯𑀺𑀕𑁆𑀕𑀳𑁄.

𑀲𑀸𑀥𑀼𑀲𑀤𑁆𑀤𑀸𑀦𑀼𑀲𑀸𑀲𑀦𑀲𑀗𑁆𑀓𑀸𑀧𑁂𑀢𑁆𑀣 ‘‘𑀓𑀢𑁆𑀣𑁂𑀢𑁆𑀣 𑀓𑀼𑀢𑁆𑀭𑀸𑀢𑁆𑀭𑀓𑁆𑀯𑁂𑀳𑀺𑀥𑀸’’𑀢𑀺 (𑁪-𑁧𑁦𑁦) 𑀆𑀤𑀺𑀦𑀸 𑀓𑀢𑁆𑀣𑀸𑀤𑀺𑀲𑀤𑁆𑀤𑀸𑀦𑀁 𑀲𑀸𑀥𑀼𑀢𑁆𑀢𑀸𑀦𑀼𑀲𑀸𑀲𑀦𑀲𑁆𑀲 𑀤𑀲𑁆𑀲𑀦𑀢𑁄, 𑀮𑀓𑁆𑀔𑀡𑀦𑁆𑀢𑀭𑁂𑀦 𑀲𑀸𑀥𑀼𑀪𑀸𑀯𑀲𑁆𑀲 𑀅𑀦𑁆𑀯𑀸𑀔𑁆𑀬𑀸𑀢𑀢𑁆𑀢𑀸𑀢𑀺 𑀆𑀧𑀼𑀩𑁆𑀩𑀸𑀤𑀸𑀇𑀘𑁆𑀘𑀲𑁆𑀫𑀸 ‘‘𑀤𑀸𑀥𑀸𑀢𑁆𑀯𑀻’’𑀢𑀺 (𑁫-𑁪𑁫) 𑀇𑀧𑁆𑀧𑀘𑁆𑀘𑀬𑁂 𑀆𑀓𑀸𑀭𑀮𑁄𑀧𑁂 𑀘 𑀆𑀤𑀻𑀢𑀺 ¶ 𑀅𑀆𑀤𑀺𑀬𑁂𑀲𑀦𑁆𑀢𑀺 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁂 𑀬𑁄𑀫𑁆𑀳𑀺 ‘‘𑀬𑁄𑀲𑀼 𑀛𑀺𑀲𑁆𑀲 𑀧𑀼𑀫𑁂’’𑀢𑀺 (𑁨-𑁯𑁩) ‘𑀝𑁂 𑀅𑀆𑀤𑀬𑁄’𑀢𑀺, 𑀢𑀬𑁄 𑀘 𑀘𑀢𑁆𑀢𑀸𑀮𑀻𑀲𑀸 𑀘𑀸𑀢𑀺 𑀘𑀢𑁆𑀣 𑀲𑀫𑀸𑀲𑁂 ‘‘𑀢𑀤𑀫𑀺𑀦𑀸𑀤𑀻𑀦𑀺’’𑀢𑀺 𑀘𑀢 𑀮𑁄𑀧𑁂𑀘 𑀭𑀲𑁆𑀲𑁂 𑀘 𑀢𑀺𑀢𑀸𑀮𑀻𑀲𑀸𑀢𑀺, ‘𑀯𑀡𑁆𑀡-𑀯𑀡𑁆𑀡𑀦𑁂’𑀇𑀘𑁆𑀘𑀲𑁆𑀫𑀸 ‘‘𑀪𑀸𑀯𑀓𑀸𑀭𑀓𑁂𑀲𑁆𑀯 𑀖𑀡 𑀖𑀓𑀸’’𑀢𑀺 (𑁫-𑁪𑁪) 𑀅𑀧𑁆𑀧𑀘𑁆𑀘𑀬𑁂𑀬𑁄𑀫𑁆𑀳𑀺 𑀝𑀸𑀤𑁂𑀲𑁂 𑀯𑀡𑁆𑀡𑀸𑀇𑀢𑀺 𑀘 𑀲𑀺𑀚𑁆𑀛𑀦𑀢𑁄, 𑀧𑀬𑁄𑀕𑀦𑀺𑀬𑀫𑀢𑁆𑀣𑀦𑁆𑀢𑀺 𑀢𑀺𑀢𑀸𑀮𑀻𑀲𑀯𑀡𑁆𑀡𑀲𑀤𑁆𑀤𑁂𑀲𑀼 𑀧𑀭𑁂𑀲𑀼 𑀏𑀯 𑀅𑀆𑀤𑀺𑀲𑀤𑁆𑀤𑁄 𑀧𑀬𑀼𑀚𑁆𑀚𑀻𑀬𑀢𑀻𑀢𑀺 𑀏𑀯𑀁 𑀧𑀬𑁄𑀕𑀦𑀺𑀬𑀫𑀢𑁆𑀣𑀁, 𑀅𑀬𑀫𑁆𑀧𑀺 𑀯𑀺𑀓𑀧𑁆𑀧𑀦𑁆𑀢𑀭 𑀲𑀫𑁆𑀪𑀸𑀯𑀦𑀸 ‘‘𑀅𑀪𑀽𑀢𑀢𑀩𑁆𑀪𑀸𑀯𑁂 𑀓𑀭𑀸𑀲𑀪𑀽𑀬𑁄𑀕𑁂 𑀯𑀺𑀓𑀸𑀭𑀸 𑀘𑀻’’𑀢𑀺 (𑁪-𑁧𑁧𑁯) 𑀧𑀬𑁄𑀕𑀦𑀺𑀬𑀫𑀲𑁆𑀲𑀸 𑀛𑀸𑀬𑀫𑀸𑀦𑀲𑁆𑀲 𑀤𑀺𑀝𑁆𑀞𑀢𑁆𑀢𑀸, 𑀞𑀸𑀦𑁆𑀬𑀸𑀤𑁂𑀲𑀢𑁆𑀣𑀦𑁆𑀢𑀺 𑀅𑀆𑀤𑀺𑀲𑀤𑁆𑀤𑀲𑁆𑀲 𑀞𑀸𑀦𑁂 𑀢𑀺𑀢𑀸𑀮𑀻𑀲𑀯𑀡𑁆𑀡𑀲𑀤𑁆𑀤𑀸 𑀆𑀤𑁂𑀲𑀸 𑀳𑁄𑀦𑁆𑀢𑀺 𑀢𑁂𑀲𑀁 𑀯𑀸 𑀲𑁄 𑀇𑀢𑀺, 𑀢𑀤𑀦𑀼𑀭𑀽𑀧𑀸𑀬𑀸𑀢𑀺 𑀞𑀸𑀦𑁆𑀬𑀸𑀤𑁂𑀲𑀸𑀦𑀼𑀭𑀽𑀧𑀸𑀬 𑀙𑀝𑁆𑀞𑀻 𑀯𑀺𑀪𑀢𑁆𑀢𑀺𑀬𑀸, 𑀅𑀢𑁄𑀬𑁂𑀯𑀸𑀢𑀺 𑀅𑀕𑀫𑀸𑀕𑀫𑀺𑀅𑀦𑀼𑀭𑀽𑀧𑀸𑀬 𑀙𑀝𑁆𑀞𑀺𑀬𑀸 𑀅𑀪𑀸𑀯𑀢𑁄 𑀬𑁂𑀯, 𑀅𑀕𑀫𑀸𑀕𑀫𑀺 𑀪𑀸𑀯𑀢𑁆𑀣𑀦𑁆𑀢𑀺 𑀅𑀆𑀤𑀺𑀲𑀤𑁆𑀤𑀲𑁆𑀲 𑀢𑀺𑀢𑀸𑀮𑀻𑀲 𑀯𑀡𑁆𑀡𑀲𑀤𑁆𑀤𑀸 𑀆𑀕𑀫𑀸 𑀳𑁄𑀦𑁆𑀢𑀺 𑀢𑁂𑀲𑀁 𑀯𑀸 𑀲𑁄 𑀇𑀢𑀺, 𑀏𑀢𑁂𑀲𑀼𑀧𑀺 𑀲𑀗𑁆𑀓𑀸, ‘‘𑀬𑀯𑀸𑀲𑀭𑁂’’ (𑁧-𑁩𑁦) ‘‘𑀲𑀼𑀜 𑀲𑀲𑁆𑀲’’𑀇𑀢𑀺 (𑁨-𑁫𑁩) 𑀆𑀤𑁂𑀲𑀸𑀕𑀫𑀸𑀦𑀁 𑀤𑀲𑁆𑀲𑀦𑁂𑀦, 𑀆𑀕𑀫 𑀮𑀺𑀗𑁆𑀕𑀸𑀪𑀸𑀯𑀢𑁄𑀢𑀺 𑀉𑀓𑀸𑀭 𑀓𑀓𑀸𑀭 𑀫𑀓𑀸𑀭𑀸𑀦𑀁 𑀅𑀪𑀸𑀯𑀢𑁄, 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀲 𑀪𑀸𑀯𑀢𑁆𑀣𑀦𑁆𑀢𑀺 𑀢𑀺𑀢𑀸𑀮𑀻𑀲𑀯𑀡𑁆𑀡𑀲𑀤𑁆𑀤𑀸𑀦𑀁 𑀅𑀆𑀤𑀺𑀲𑀤𑁆𑀤𑁄 𑀯𑀺𑀲𑁂𑀲𑀦𑀁, 𑀢𑁂 𑀯𑀸 𑀢𑀲𑁆𑀲𑁂-𑀢𑀺, 𑀏𑀢𑁆𑀣𑀸𑀧𑀺 𑀲𑀗𑁆𑀓𑀸 ‘𑀦𑀻𑀮𑀼𑀧𑁆𑀧𑀮’𑀫𑀺𑀘𑁆𑀘𑀸𑀤𑀻𑀦𑀫𑀜𑁆𑀜𑀢𑁆𑀣 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀲 𑀪𑀸𑀯𑀤𑀲𑁆𑀲𑀦𑀸, 𑀲𑀤𑁆𑀤𑀮𑀓𑁆𑀔𑀡𑀸 𑀦𑀼𑀧𑀬𑁄𑀕𑀢𑁄𑀢𑀺 𑀲𑀤𑁆𑀤𑀮𑀓𑁆𑀔𑀡𑁂𑀦 𑀲𑀤𑁆𑀤𑀲𑀗𑁆𑀔𑀭𑀡𑀲𑁆𑀲 𑀧𑀓𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀢𑀢𑁆𑀣 𑀓𑀸𑀭𑀡𑀫𑀸𑀳- ‘𑀭𑀽𑀧𑀯𑀺𑀲𑁂𑀲𑀽𑀧 𑀮𑀓𑁆𑀔𑀡𑀸𑀪𑀸𑀯𑀸’𑀢𑀺, 𑀭𑀽𑀧𑀯𑀺𑀲𑁂𑀲𑀲𑁆𑀲 𑀉𑀧𑀮𑀓𑁆𑀔𑀡 𑀦𑀺𑀫𑀺𑀢𑁆𑀢𑀁 𑀢𑀲𑁆𑀲𑀅𑀪𑀸𑀯𑀸𑀢𑀺 𑀅𑀢𑁆𑀣𑁄, 𑀦 𑀳𑀺 𑀯𑀺𑀲𑁂𑀲𑀦 𑀯𑀺𑀲𑁂𑀲𑁆𑀲𑀪𑀸𑀯𑁂 𑀧𑀝𑀺𑀧𑀸𑀤𑀺𑀢𑁂 𑀅𑀆𑀤𑁆𑀬𑀸𑀤𑀺𑀲𑀤𑁆𑀤𑀸𑀦𑀁 𑀭𑀽𑀧𑀯𑀺𑀲𑁂𑀲𑀲𑁆𑀲 𑀲𑀗𑁆𑀔𑀭𑀡𑀁 𑀓𑀢𑀁 𑀲𑀺𑀬𑀸𑀢𑀺, 𑀬𑀤𑀺 𑀏𑀲𑁄𑀯 𑀲𑀤𑁆𑀤𑀲𑀗𑁆𑀔𑀭𑀡𑀦𑁆𑀢𑀺 𑀕𑀬𑁆𑀳𑁂𑀬𑁆𑀬, 𑀢𑀣𑀸 𑀲𑀢𑀺 ‘𑀦𑀻𑀮𑀼𑀧𑁆𑀧𑀮’𑀫𑀺𑀘𑁆𑀘𑀸𑀤𑀻𑀦𑀫𑁆𑀧𑀺 𑀯𑀢𑁆𑀢𑀩𑁆𑀩𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀦𑀸𑀲𑁆𑀲 𑀢𑀤𑀢𑁆𑀣 𑀢𑀸𑀧𑀺 𑀲𑀫𑁆𑀪𑀸𑀯𑀻𑀬𑀢𑁂, 𑀮𑁄𑀓𑁂 𑀲𑀻𑀳𑀕𑀼𑀡𑀲𑁆𑀲 𑀫𑀸𑀦𑀯𑀓𑁂 𑀤𑀲𑁆𑀲𑀦𑀢𑁄 𑀉𑀧𑀘𑀸𑀭𑁂𑀦 ‘𑀲𑀻𑀳𑁄-𑀬𑀁 𑀫𑀸𑀦𑀯𑀓𑁄’𑀢𑀺 𑀢𑀕𑁆𑀕𑀼𑀡𑀚𑁆𑀛𑀸𑀭𑁄𑀧𑁄𑀧𑀺 𑀤𑀺𑀲𑁆𑀲𑀢𑀺, 𑀢𑀤𑀢𑁆𑀣𑀫𑁆𑀧𑁂𑀢𑀁 𑀦 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘𑀢𑀕𑁆𑀕𑀼𑀡𑀚𑁆𑀛𑀸𑀭𑁄𑀧𑀦𑀢𑁆𑀣𑀫𑁆𑀧𑁂𑀢𑀁 𑀦 𑀳𑁄𑀢𑀻’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀲 𑀅𑀆𑀤𑀺𑀲𑀤𑁆𑀤𑀲𑁆𑀲, 𑀢𑁂𑀲𑀁 𑀢𑀺𑀢𑀸𑀮𑀻𑀲𑀯𑀡𑁆𑀡𑀲𑀤𑁆𑀤𑀸𑀦𑀁 𑀯𑀸 𑀕𑀼𑀡𑁄 𑀅𑀆𑀤𑀺𑀢𑁆𑀢𑀸𑀤𑀺, 𑀢𑀲𑁆𑀲 𑀅𑀚𑁆𑀛𑀸𑀭𑁄𑀧𑀦𑀁-𑀢𑀺𑀢𑀸𑀮𑀻𑀲𑀯𑀡𑁆𑀡𑀲𑀤𑁆𑀤𑁂𑀲𑀼 ¶ 𑀯𑀸 𑀅𑀆𑀤𑀺𑀲𑀤𑁆𑀤𑁂𑀬𑁂𑀯 𑀯𑀸 𑀆𑀭𑁄𑀧𑀦𑀁, 𑀢𑀤𑀢𑁆𑀣𑀫𑁆𑀧𑁂𑀢𑀁 𑀲𑀼𑀢𑁆𑀢𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄, 𑀢𑀢𑁆𑀣 𑀓𑀸𑀭𑀡𑀫𑀸𑀳- ‘𑀅𑀢𑁄𑀬𑁂𑀯𑀸’𑀢𑀺𑀆𑀤𑀺, 𑀅𑀢𑁄𑀬𑁂𑀯 𑀭𑀽𑀧𑀯𑀺𑀲𑁂𑀲𑀽𑀧𑀮𑀓𑁆𑀔𑀡𑀸 𑀪𑀸𑀯𑀢𑁄𑀬𑁄, 𑀧𑀓𑀢𑀁 𑀲𑀤𑁆𑀤𑀲𑀗𑁆𑀔𑀭𑀡𑀁, 𑀬𑀣𑀸𑀯𑀼𑀢𑁆𑀢 𑀯𑀺𑀓𑀧𑁆𑀧𑀦𑁆𑀢𑀭𑀸𑀪𑀸𑀯𑁂 𑀉𑀪𑀬𑀢𑁆𑀣𑀫𑀺𑀤𑀁 𑀲𑀺𑀬𑀸, 𑀢𑀢𑁆𑀣 𑀧𑀭𑀺𑀪𑀸𑀲𑀢𑁆𑀣𑀁 𑀦 𑀳𑁄𑀢𑀺… 𑀢𑀮𑁆𑀮𑀓𑁆𑀔𑀡𑀢𑁆𑀢𑀸𑀪𑀸𑀯𑀸 𑀉𑀧𑀭𑀺𑀯𑀓𑁆𑀔𑀫𑀸𑀦𑀢𑁆𑀢𑀸 𑀘𑀸𑀢𑀺 𑀧𑀸𑀭𑀺𑀲𑁂𑀲𑀫𑀸𑀮𑀫𑁆𑀩𑀺𑀬𑀸𑀳 ‘𑀲𑀜𑁆𑀜𑀸𑀲𑀜𑁆𑀜𑀺’𑀘𑁆𑀘𑀸𑀤𑀺.

𑀫𑀭𑀺𑀬𑀸𑀤𑀸𑀬𑀫𑁆𑀧𑀓𑀸𑀭𑁂𑀘, 𑀲𑀫𑀻𑀧𑁂 𑀯𑀬𑀯𑁂 𑀢𑀣𑀸;

𑀘𑀢𑀼𑀩𑁆𑀩𑀺𑀥𑀧𑁆𑀧𑀓𑀸𑀭𑁄𑀬𑀁, 𑀆𑀤𑀺𑀲𑀤𑁆𑀤𑀲𑁆𑀲 𑀤𑀺𑀲𑁆𑀲𑀢𑁂𑀢𑀺.

𑀫𑀭𑀺𑀬𑀸𑀤𑀢𑁆𑀣𑁄 𑀏𑀢𑁆𑀣 𑀆𑀤𑀺𑀲𑀤𑁆𑀤𑁄𑀢𑀺 𑀆𑀳-‘𑀆𑀤𑀺𑀫𑀭𑀺𑀬𑀸𑀤𑀸 𑀪𑀽𑀢𑁄’𑀢𑀺, 𑀉𑀧𑀮𑀓𑁆𑀔𑀡𑀢𑁆𑀢𑀸𑀢𑀺 𑀉𑀧𑀮𑀓𑁆𑀔𑀺𑀬𑀫𑀸𑀦𑀸𑀦𑀫𑀸𑀓𑀸𑀭𑀸𑀤𑀻𑀦𑀁 𑀕𑀳𑀡𑁂 𑀓𑀸𑀭𑀡𑀪𑀸𑀯𑁂𑀦 𑀅𑀧𑁆𑀧𑀥𑀸𑀦𑀢𑁆𑀢𑀸, 𑀢𑁂𑀦𑀸𑀳-‘𑀉𑀧𑀮𑀓𑁆𑀔𑀡𑀲𑁆𑀲𑀼𑀧𑀲𑀚𑁆𑀚𑀦𑀻𑀬𑀪𑀽𑀢𑀲𑁆𑀲𑀸’𑀢𑀺, 𑀓𑀸𑀭𑀺𑀬𑁂𑀦𑀸𑀢𑀺 𑀯𑀡𑁆𑀡𑀲𑀜𑁆𑀜𑀸𑀪𑀯𑀦𑀸𑀤𑀺𑀦𑀸, 𑀦 𑀕𑀼𑀦𑁆𑀦𑀫𑁆𑀧𑀺 𑀆𑀦𑀬𑀦𑀁 𑀪𑀯𑀢𑀺..𑀕𑀼𑀦𑁆𑀦𑀫𑀼𑀧𑀲𑀚𑁆𑀚𑀦𑀻𑀬 𑀪𑀽𑀢𑀢𑁆𑀢𑀸 𑀅𑀜𑁆𑀜𑀧𑀤𑀢𑁆𑀣𑀲𑁆𑀲𑁂𑀯 𑀧𑀥𑀸𑀦𑀢𑁆𑀢𑀸, 𑀲𑀜𑁆𑀜𑀸𑀬𑀸 𑀪𑀸𑀯𑁂𑀢𑀺 𑀅𑀓𑀸𑀭𑀲𑁆𑀲 𑀯𑀡𑁆𑀡𑀲𑀜𑁆𑀜𑀸𑀬 𑀅𑀪𑀸𑀯𑁂, 𑀭𑀽𑀧𑀦𑁆𑀢𑀺𑀢𑀺 𑀢𑀸𑀮𑀻𑀲𑀸𑀭𑀽𑀧𑀁, 𑀢𑀺𑀢𑀸𑀮𑀻𑀲𑀸+𑀯𑀡𑁆𑀡𑀸𑀢𑀺𑀧𑀤𑀘𑁆𑀙𑁂𑀤𑁄, 𑀢𑀺𑀢𑀸𑀮𑀻𑀲+𑀯𑀡𑁆𑀡𑀸𑀢𑀺𑀯𑀸, 𑀲𑀼𑀢𑁆𑀢𑀸𑀯𑀬𑀯𑀲𑁆𑀲𑀸𑀧𑀺 𑀲𑀼𑀢𑁆𑀢𑀲𑀫𑁆𑀩𑀦𑁆𑀥𑀺𑀢𑁆𑀢𑀸 ‘‘𑀩𑁆𑀬𑀜𑁆𑀚𑀦𑁂 𑀤𑀻𑀖𑀭𑀲𑁆𑀲𑀸’’𑀢𑀺 (𑁧-𑁩𑁩) 𑀧𑀦 𑀯𑀼𑀢𑁆𑀢𑀁, 𑀭𑀲𑁆𑀲𑀢𑁆𑀢𑀦𑁆𑀢𑀼 ‘‘𑀤𑀻𑀖𑀭𑀲𑁆𑀲𑀸’’𑀢𑀺 𑀬𑁄𑀕𑀯𑀺𑀪𑀸𑀕𑁂𑀦, 𑀇𑀢𑀭𑀣𑀸 𑀩𑁆𑀬𑀜𑁆𑀚𑀦𑀧𑀭𑀲𑁆𑀲𑁂𑀯 𑀭𑀲𑁆𑀲𑀢𑁆𑀢𑁂 𑀤𑀲𑁆𑀲𑀺𑀢𑁂 𑀢𑀺𑀢𑀸𑀮𑀻𑀲𑀇𑀢𑀺 𑀅𑀩𑁆𑀬𑀜𑁆𑀚𑀦𑁂 𑀧𑀤𑀁 𑀦 𑀲𑀫𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀇𑀢𑀭𑀻𑀢𑀭𑀬𑁄𑀕𑀘𑀢𑁆𑀣𑁂 𑀩𑀳𑀼𑀯𑀘𑀦𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀆𑀳-‘𑀏𑀓𑀯𑀘𑀦𑀫𑁆𑀧𑀦𑀸’𑀢𑀺𑀆𑀤𑀺, 𑀯𑀺𑀧𑁆𑀧𑀝𑀺𑀧𑀢𑁆𑀢𑀺 𑀅𑀜𑁆𑀜𑀣𑀸𑀪𑀸𑀯𑁄, 𑀭𑀲𑁆𑀲 𑀏 𑀑𑀓𑀸𑀭𑁂𑀳𑀺 𑀢𑁂𑀘𑀢𑁆𑀢𑀸𑀮𑀻𑀲𑀓𑁆𑀔𑀭𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀏 𑀑𑀓𑀸𑀭𑁂 𑀳𑀻𑀢𑀺 𑀲𑀳𑀢𑁆𑀣𑁂 𑀢𑀢𑀺𑀬𑀸, 𑀲𑀓𑁆𑀓𑀢𑀸𑀦𑀼𑀲𑀸𑀭𑁂𑀦𑀸𑀢𑀺 𑀲𑀓𑁆𑀓𑀢𑁂 ‘‘𑀲𑀦𑁆𑀥𑀺 𑀬𑀓𑁆𑀔𑀭𑀸𑀦𑀁 𑀭𑀲𑁆𑀲𑀸 𑀦 𑀲𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀲𑁆𑀲 𑀅𑀦𑀼𑀲𑀸𑀭𑁂𑀦, 𑀓𑁄𑀘𑀻𑀢𑀺 𑀲𑀸 𑀲𑀦𑀧𑁆𑀧𑀲𑀸𑀤𑀓𑀘𑁄𑀴𑀺𑀬𑀩𑀼𑀤𑁆𑀥𑀧𑁆𑀧𑀺𑀬𑀸𑀘𑀭𑀺𑀬𑀁 𑀤𑀲𑁆𑀲𑁂𑀢𑀺, 𑀦 𑀳𑀺𑀘𑁆𑀘𑀸𑀤𑀺𑀁 𑀯𑀤𑀢𑁄-𑀬𑀫𑀥𑀺𑀧𑁆𑀧𑀸𑀬𑁄 ‘𑀭𑀲𑁆𑀲𑀸𑀇𑀯𑀸𑀢𑀺 𑀇𑀯𑀲𑀤𑁆𑀤𑁄 𑀲𑀸𑀥𑀫𑁆𑀫𑁄𑀧𑀫𑀸𑀚𑁄𑀢𑀓𑁄 𑀯𑀸 𑀲𑀺𑀬𑀸 𑀯𑁂𑀥𑀫𑁆𑀫𑁄𑀧𑀫𑀸𑀚𑁄𑀢𑀓𑁄 𑀯𑀸, 𑀬𑀤𑀺 𑀢𑀸𑀯 𑀯𑁂𑀥𑀫𑁆𑀫𑁄𑀧𑀫𑀸𑀚𑁄𑀢𑀓𑁄, 𑀭𑀲𑁆𑀲𑀥𑀫𑁆𑀫𑀲𑁆𑀲 𑀏 𑀑𑀓𑀸𑀭𑁂𑀲𑁆𑀯 𑀲𑀫𑁆𑀪𑀯𑀸 𑀢𑁂𑀲𑀁 𑀤𑀻𑀖𑀓𑀸𑀮𑀧𑁆𑀧𑀯𑀢𑁆𑀢𑀺𑀢𑁄 𑀢𑁂 𑀤𑀻𑀖𑀸𑀬𑁂𑀯 𑀲𑀺𑀬𑀼𑀁, 𑀬𑀤𑀺 𑀧𑀦 𑀲𑀸𑀥𑀫𑁆𑀫𑁄𑀧𑀫𑀸𑀚𑁄𑀢𑀓𑁄 ¶ , 𑀢𑁂𑀲𑀼 𑀭𑀲𑁆𑀲𑀥𑀫𑁆𑀫𑀲𑁆𑀲𑀲𑀫𑁆𑀪𑀯𑀸 𑀭𑀲𑁆𑀲𑀓𑀸𑀮𑀧𑁆𑀧𑀯𑀢𑁆𑀢𑀺𑀢𑁄 𑀭𑀲𑁆𑀲𑀸𑀏𑀯 𑀢𑁂 𑀲𑀺𑀬𑀼𑀦𑁆𑀢𑀺 ‘𑀏𑀢𑁆𑀣𑀸𑀢𑀺𑀆𑀤𑀻𑀲𑀼 𑀏 𑀑𑀓𑀸𑀭𑀸𑀦𑀁 𑀉𑀘𑁆𑀘𑀸𑀭𑀡𑀓𑀸𑀮𑀓𑀢𑀁 𑀭𑀲𑁆𑀲𑀢𑁆𑀢𑀫𑁂𑀯 𑀳𑁄𑀢𑀻’𑀢𑀺, 𑀭𑀲𑁆𑀲𑀓𑀸𑀮𑀯𑀦𑁆𑀢𑁄𑀬𑁂𑀯𑀸𑀢𑀺 𑀏𑀯𑀲𑀤𑁆𑀤𑁄 𑀲𑁄𑀕𑀢𑁂 𑀯𑀡𑁆𑀡𑀯𑀺𑀦𑀺𑀫𑁆𑀫𑀼𑀢𑁆𑀢𑀲𑁆𑀲 𑀓𑀸𑀮𑀲𑁆𑀲𑁂𑀯𑀸𑀪𑀸𑀯𑀸 𑀯𑀡𑁆𑀡𑀸𑀦𑀜𑁆𑀘 𑀧𑀘𑁆𑀘𑀓𑁆𑀔 𑀲𑀺𑀤𑁆𑀥𑀢𑁆𑀢𑀸 𑀧𑀫𑀸𑀡𑀲𑀺𑀤𑁆𑀥𑀁 𑀧𑀸𑀭𑀫𑀢𑁆𑀣𑀺𑀓 𑀫𑁂 𑀑𑀓𑀸𑀭𑀸𑀦𑀁 𑀭𑀲𑁆𑀲𑀓𑀸𑀮𑀯𑀦𑁆𑀢𑀢𑀁 𑀤𑀻𑀧𑁂𑀢𑀺, 𑀅𑀢𑁆𑀣𑀸𑀢𑀺 𑀯𑀤𑀢𑁄 𑀧𑀦𑀸𑀬𑀫𑀥𑀺𑀧𑁆𑀧𑀸𑀬𑁄 ‘𑀏𑀢𑁆𑀣𑀸𑀢𑀺𑀆𑀤𑀻𑀲𑀼 𑀬𑀤𑀺 𑀏𑀓𑀸𑀭𑀸𑀤𑀬𑁄 𑀤𑀻𑀖𑀸𑀏𑀯 𑀲𑀁𑀬𑁄𑀕𑀧𑀼𑀩𑁆𑀩𑀢𑁆𑀢𑀸 𑀭𑀲𑁆𑀲𑀸𑀯 𑀲𑀺𑀬𑀼𑀁𑀢𑀣𑀸 𑀲𑀢𑀺 𑀅𑀢𑁆𑀣𑀸𑀢𑀺 𑀏𑀢𑁆𑀣𑀸𑀧𑀺 𑀤𑀻𑀖𑁄𑀯 𑀆𑀓𑀸𑀭𑁄 𑀲𑀁𑀬𑁄𑀕𑀧𑀼𑀩𑁆𑀩𑀢𑁆𑀢𑀸𑀭𑀲𑁆𑀲𑁄 𑀇𑀯 𑀉𑀘𑁆𑀘𑀢𑀻𑀢𑀺 𑀆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀫𑀸 𑀉𑀘𑁆𑀘𑀸𑀭𑀡𑀓𑀸𑀮𑀓𑀢𑁄𑀯 𑀭𑀲𑁆𑀲𑀤𑀻𑀖𑀪𑀸𑀯𑁄 𑀕𑀳𑁂𑀢𑀩𑁆𑀩𑁄’𑀢𑀺, 𑀓𑀘𑁆𑀘𑀸𑀬𑀦𑀯𑀼𑀢𑁆𑀢𑀺𑀯𑀡𑁆𑀡𑀦𑀸 𑀜𑀸𑀲𑁄, 𑀢𑀜𑁆𑀜𑀸𑀧𑀦𑁂𑀢𑀺 𑀩𑀳𑀺𑀤𑁆𑀥𑀸 𑀅𑀜𑁆𑀜𑁂𑀲𑀫𑀓𑁆𑀔𑀭𑀸𑀦𑀁 𑀜𑀸𑀧𑀦𑁂, 𑀧𑀬𑁄𑀚𑀦𑀸𑀪𑀸𑀯𑀸𑀢𑀺 𑀢𑁂𑀦 𑀲𑀸𑀥𑁂𑀢𑀩𑁆𑀩𑀲𑁆𑀲 𑀓𑀲𑁆𑀲𑀘𑀺 𑀇𑀝𑁆𑀞𑀲𑁆𑀲 𑀅𑀪𑀸𑀯𑀫𑀸𑀳, 𑀓𑀺𑀫𑁂𑀢𑁆𑀣 𑀲𑀫𑀼𑀤𑀸𑀬𑁂 𑀯𑀸𑀓𑁆𑀬𑀧𑀭𑀺𑀲𑀫𑀢𑁆𑀢𑀺, 𑀉𑀤𑀸𑀳𑀼 𑀅𑀯𑀬𑀯𑁂𑀢𑀺 𑀆𑀳- ‘𑀧𑀘𑁆𑀘𑁂𑀓’𑀦𑁆𑀢𑀺, 𑀅𑀜𑁆𑀜𑀣𑀸 ‘𑀭𑀼𑀓𑁆𑀔𑀸 𑀯𑀦’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀲𑀫𑀼𑀤𑀸𑀬𑁂 𑀯𑀸𑀓𑁆𑀬𑀧𑀭𑀺𑀲𑀫𑀢𑁆𑀢𑀺𑀬𑀁 ‘‘𑀇𑀬𑀼𑀯𑀡𑁆𑀡𑀸 𑀛𑀮𑀸 𑀦𑀫𑀲𑁆𑀲𑀦𑁆𑀢𑁂’’ (𑁧-𑁯) 𑀇𑀘𑁆𑀘𑀸𑀤𑀺𑀓𑀁 𑀦 𑀲𑀺𑀚𑁆𑀛𑀢𑀻𑀢𑀺, 𑀧𑀘𑁆𑀘𑁂𑀓𑀁 𑀯𑀡𑁆𑀡𑀸 𑀦𑀸𑀫𑀳𑁄𑀦𑁆𑀢𑀻𑀢𑀺 𑀅𑀓𑀸𑀭𑁄 𑀯𑀡𑁆𑀡𑁄 𑀦𑀸𑀫 𑀳𑁄𑀢𑀺 𑀆𑀓𑀸𑀭𑁄 𑀯𑀡𑁆𑀡𑁄 𑀦𑀸𑀫 𑀳𑁄𑀢𑀻𑀢𑀺𑀆𑀤𑀺𑀦𑀸, 𑀅𑀯𑀬𑀯𑁂𑀘𑁆𑀘𑀸𑀤𑀺𑀦𑀸 𑀯𑀼𑀢𑁆𑀢𑀺𑀬𑀁 𑀅𑀯𑀼𑀢𑁆𑀢𑁂𑀧𑀺 ‘𑀧𑀘𑁆𑀘𑁂𑀓’𑀦𑁆𑀢𑀺 𑀯𑀘𑀦𑁂 𑀲𑀤𑀺𑀝𑁆𑀞𑀦𑁆𑀢𑀁 𑀓𑀸𑀭𑀡𑀫𑀸𑀳, 𑀤𑀺𑀝𑁆𑀞𑀦𑁆𑀢𑁄𑀧𑀦𑀻𑀢𑁄 𑀢𑁆𑀬𑀢𑁆𑀣𑁄 𑀲𑀼𑀔𑁂𑀦 𑀧𑀝𑀺𑀧𑀢𑁆𑀢𑀼𑀁 𑀲𑀓𑁆𑀓𑀸𑀢𑀺, 𑀏𑀢𑁆𑀣 𑀳𑀺 𑀧𑀘𑁆𑀘𑁂𑀓𑀦𑁆𑀢𑀺 𑀅𑀯𑀼𑀢𑁆𑀢𑁂𑀧𑀺 𑀤𑁂𑀯𑀤𑀢𑁆𑀢𑁄 𑀪𑁄𑀚𑀻𑀬𑀢𑀽𑀢𑀺𑀆𑀤𑀺𑀦𑀸 𑀧𑀘𑁆𑀘𑁂𑀓𑀁 𑀪𑀼𑀜𑁆𑀚𑀺𑀓𑀺𑀭𑀺𑀬𑀸 𑀧𑀭𑀺𑀲𑀫𑀸𑀧𑀻𑀬𑀢𑁂, 𑀢𑁂𑀦𑀸𑀳-‘𑀦 𑀘𑁄𑀘𑁆𑀘𑀢𑁂’ 𑀇𑀘𑁆𑀘𑀸𑀤𑀺, 𑀅𑀣𑀯𑀸 𑀲𑀫𑀼𑀤𑀸𑀬𑁂𑀧𑀺 𑀯𑀸𑀓𑁆𑀬𑀧𑀭𑀺𑀲𑀫𑀸 𑀧𑀢𑁆𑀢𑀺𑀬𑀁 𑀲𑀢𑀺 𑀲𑀫𑀼𑀤𑀸𑀬𑁂 𑀧𑀯𑀢𑁆𑀢𑀸 𑀲𑀤𑁆𑀤𑀸 𑀅𑀯𑀬𑀯𑁂𑀲𑀼𑀧𑀺 𑀯𑀢𑁆𑀢𑀦𑁆𑀢𑀻𑀢𑀺 ‘𑀲𑀫𑀼𑀤𑁆𑀤𑁂𑀓𑀤𑁂𑀲𑀤𑀲𑁆𑀲𑀦𑁂𑀧𑀺 𑀲𑀫𑀼𑀤𑁆𑀤𑁄 𑀤𑀺𑀝𑁆𑀞𑁄, 𑀔𑀦𑁆𑀥𑁂𑀓𑀤𑁂𑀲 𑀪𑀽𑀢𑀸𑀬𑀧𑀺 𑀧𑀜𑁆𑀜𑀸𑀬 𑀧𑀜𑁆𑀜𑀸𑀓𑁆𑀔𑀦𑁆𑀥𑁄𑀢𑀺𑀆𑀤𑀻𑀲𑀼 𑀯𑀺𑀬 𑀦 𑀤𑁄𑀲𑁄, 𑀢𑁂𑀦𑁂𑀯 𑀯𑀼𑀢𑁆𑀢𑀺𑀬𑀁 ‘𑀧𑀘𑁆𑀘𑁂𑀓’𑀦𑁆𑀢𑀺 𑀦 𑀯𑀼𑀢𑁆𑀢𑀁, 𑀯𑀡𑁆𑀡𑀲𑀤𑁆𑀤𑀲𑁆𑀲 𑀕𑀼𑀡𑀸𑀤𑁆𑀬𑀦𑁂𑀓𑀢𑁆𑀣𑀢𑁆𑀢𑁂𑀧𑀺 𑀧𑀓𑀭𑀡𑀢𑁄 𑀅𑀓𑀸𑀭𑀸𑀤𑀬𑁄𑀯𑁂𑀢𑁆𑀣 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀳-‘𑀯𑀡𑁆𑀡𑀻𑀬𑀢𑀺’𑀘𑁆𑀘𑀸𑀤𑀺, 𑀧𑀓𑀭𑀡𑀢𑁄𑀧𑀺 𑀅𑀢𑁆𑀣𑁄 𑀯𑀺𑀪𑀚𑁆𑀚𑀢𑁂, 𑀯𑀼𑀢𑁆𑀢𑀁 𑀳𑀺𑁋

𑀅𑀢𑁆𑀣𑀸 𑀧𑀓𑀭𑀡𑀸 𑀮𑀺𑀗𑁆𑀕𑀸, 𑀑𑀘𑀺𑀢𑁆𑀬𑀸 𑀤𑁂𑀲𑀓𑀸𑀮𑀢𑁄;

𑀲𑀤𑁆𑀤𑀢𑁆𑀣𑀸 𑀯𑀺𑀪𑀚𑀻𑀬𑀦𑁆𑀢𑁂, 𑀦 𑀲𑀤𑁆𑀤𑀸𑀬𑁂𑀯 𑀓𑁂𑀯𑀮𑀸𑀢𑀺.

𑀦𑀦𑀼 ¶ 𑀛𑀮𑀸𑀤𑀺𑀲𑀜𑁆𑀜𑀸 𑀯𑀺𑀬 𑀮𑀳𑀼𑀲𑀜𑁆𑀜𑀁 𑀅𑀓𑀢𑁆𑀯𑀸 𑀓𑀲𑁆𑀫𑀸 𑀕𑀼𑀭𑀼𑀲𑀜𑁆𑀜𑀸 𑀓𑀢𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀦𑀺𑀥𑀸𑀬 𑀭𑀼𑀴𑁆𑀳𑀺 𑀅𑀦𑁆𑀯𑀢𑁆𑀣𑀯𑀲𑁂𑀦 𑀤𑁆𑀯𑀺𑀧𑁆𑀧𑀓𑀸𑀭𑀸𑀲𑀼 𑀲𑀜𑁆𑀜𑀸𑀲𑀼 𑀛𑀸𑀮𑀸𑀢𑀺 𑀭𑀼𑀴𑁆𑀳𑀺 𑀲𑀜𑁆𑀜𑀸𑀢𑁆𑀣𑀸𑀪𑀸𑀯𑁂𑀦 𑀯𑁄𑀳𑀸𑀭𑀲𑀼𑀔𑀫𑀢𑁆𑀢𑀧𑀬𑁄𑀚𑀦𑀸, 𑀅𑀦𑁆𑀯𑀢𑁆𑀣𑀲𑀜𑁆𑀜𑀸 𑀧𑀦 𑀢𑀧𑁆𑀧𑀬𑁄𑀚𑀦𑀸𑀧𑀺 𑀳𑁄𑀢𑀺 𑀢𑀤𑀜𑁆𑀜𑀧𑁆𑀧𑀬𑁄𑀚𑀦𑀸 𑀧𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀏𑀯’𑀫𑀺𑀘𑁆𑀘𑀸𑀤𑀺, 𑀯𑀡𑁆𑀡𑀻𑀬𑀢𑀻 𑀅𑀢𑁆𑀣𑁄 𑀏𑀢𑁂𑀳𑀻𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀅𑀦𑀼𑀕𑀢𑀸 𑀅𑀦𑀼𑀕𑀢𑀢𑁆𑀣𑀸 𑀯𑀡𑁆𑀡𑀲𑀜𑁆𑀜𑀸 𑀢𑀁, 𑀲𑀤𑁆𑀤𑀸𑀥𑀺𑀕𑀫𑀦𑀻𑀬𑀲𑁆𑀲𑀸𑀢𑀺 𑀲𑀤𑁆𑀤𑁂𑀦 𑀯𑀺𑀜𑁆𑀜𑀸𑀢𑀩𑁆𑀩𑀲𑁆𑀲, 𑀯𑀡𑁆𑀡𑀁 𑀫𑀽𑀮𑀫𑀲𑁆𑀲𑀸𑀢𑀺 𑀯𑀡𑁆𑀡𑀫𑀽𑀮𑀓𑁄-𑀅𑀢𑁆𑀣𑁄, 𑀢𑀲𑁆𑀲 𑀪𑀸𑀯𑁄 𑀯𑀡𑁆𑀡𑀫𑀽𑀮𑀓𑀢𑀸, 𑀅𑀢𑁆𑀣𑀲𑁆𑀲 𑀯𑀡𑁆𑀡𑀫𑀽𑀮𑀓𑀢𑀁 𑀲𑀸𑀥𑁂𑀢𑀺 ‘𑀲𑀸𑀧𑀺’𑀘𑁆𑀘𑀸𑀤𑀺𑀦𑀸, 𑀯𑀡𑁆𑀡𑀁 𑀭𑀽𑀧𑀁 𑀲𑀪𑀸𑀯𑁄 𑀏𑀢𑁂𑀲𑀦𑁆𑀢𑀺 𑀯𑀡𑁆𑀡𑀭𑀽𑀧𑀸𑀦𑀺-𑀧𑀤𑀸𑀦𑀺, 𑀲𑀫𑀼𑀤𑀸𑀬𑁄 𑀧𑀸𑀤𑀸𑀦𑀁 𑀭𑀽𑀧𑀫𑀲𑁆𑀲𑀸𑀢𑀺 𑀲𑀫𑀼𑀤𑀸𑀬𑀭𑀽𑀧𑀁 𑀯𑀸𑀓𑁆𑀬𑀁, 𑀯𑀺𑀪𑀢𑁆𑀬𑀦𑁆𑀢𑀫𑀢𑁆𑀣𑀚𑁄𑀢𑀓𑀁 𑀧𑀤𑀁, 𑀧𑀤𑀲𑀫𑀼𑀤𑀸𑀬𑁄 𑀯𑀸𑀓𑁆𑀬𑀁, 𑀲𑀩𑁆𑀩𑀜𑁆𑀘𑁂𑀢𑀫𑀼𑀧𑀘𑀸𑀭𑁂𑀦 𑀯𑀡𑁆𑀡𑀲𑀤𑁆𑀤𑀯𑀘𑀦𑀻𑀬𑀢𑁆𑀢𑀁 𑀕𑀘𑁆𑀙𑀢𑀺 𑀯𑀡𑁆𑀡𑀫𑀬𑀢𑁆𑀢𑀸𑀢𑀺 𑀲𑀩𑁆𑀩𑁄𑀧𑀺 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀪𑁂𑀤𑀪𑀺𑀦𑁆𑀦𑁄 𑀅𑀢𑁆𑀣𑁄 𑀯𑀸𑀓𑁆𑀬𑀸𑀥𑀺𑀕𑀫𑀦𑀻𑀬𑁄 𑀯𑀡𑁆𑀡𑁂𑀦𑁂𑀯 𑀯𑀺𑀜𑁆𑀜𑀸𑀬𑀢𑀺 𑀦𑀸𑀫 𑀢𑀲𑁆𑀫𑀸 𑀬𑀣𑀸 𑀯𑀼𑀢𑁆𑀢𑀫𑀢𑁆𑀣 𑀯𑀺𑀲𑁂𑀲𑀤𑀲𑁆𑀲𑀦𑀁𑀮𑀳𑀼𑀲𑀜𑁆𑀜𑀸𑀬 𑀦 𑀲𑀓𑁆𑀓𑀸𑀢𑀺 𑀢𑀤𑀢𑁆𑀣𑀫𑀓𑀸𑀭𑀸𑀤𑀻𑀦𑀁 𑀕𑀼𑀭𑀼𑀪𑀽𑀢𑀸 𑀯𑀡𑁆𑀡𑀲𑀜𑁆𑀜𑀸 𑀓𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀲𑀫𑁆𑀫𑀼𑀢𑀺 𑀲𑀗𑁆𑀓𑁂𑀢𑀯𑀲𑁂𑀦 𑀧𑀯𑀢𑁆𑀢𑁄 𑀯𑁄𑀳𑀸𑀭𑁄, 𑀧𑀭𑀫𑀢𑁆𑀣𑁄 𑀲𑀦𑀺𑀩𑁆𑀩𑀸𑀦𑁄 𑀧𑀜𑁆𑀘𑀓𑁆𑀔𑀦𑁆𑀥𑁄. 𑀉𑀪𑁄𑀳𑀺 𑀧𑀦𑁂𑀢𑁂𑀳𑀺 𑀪𑀺𑀦𑁆𑀦𑁄 𑀢𑀢𑀺𑀬𑁄 𑀓𑁄𑀝𑁆𑀞𑀸𑀲𑁄 𑀦𑀸𑀫 𑀦𑀢𑁆𑀣𑀺, 𑀢𑀣𑀸𑀘 𑀯𑀼𑀢𑁆𑀢𑀁𑁋

𑀤𑀼𑀯𑁂 𑀲𑀘𑁆𑀘𑀸𑀦𑀺 𑀅𑀓𑁆𑀔𑀸𑀲𑀺, 𑀲𑀫𑁆𑀩𑀼𑀤𑁆𑀥𑁄 𑀯𑀤𑀢𑀁 𑀯𑀭𑁄,

𑀲𑀫𑁆𑀫𑀼𑀢𑀺𑀁 𑀧𑀭𑀫𑀢𑁆𑀣𑀜𑁆𑀘, 𑀢𑀢𑀺𑀬𑀁 𑀦𑀼𑀧𑀮𑀩𑁆𑀪𑀢𑀻𑀢𑀺.

𑀅𑀧𑁆𑀧𑀓𑁆𑀔𑀭𑀫𑀲𑀦𑁆𑀤𑀺𑀤𑁆𑀥𑀁, 𑀲𑀲𑀸𑀭𑀁 𑀕𑀽𑀴𑁆𑀳𑀦𑀺𑀡𑁆𑀡𑀬𑀁;

𑀧𑀲𑀦𑁆𑀦𑀢𑁆𑀣𑀜𑁆𑀘 𑀲𑀼𑀢𑁆𑀢𑀦𑁆𑀢𑀺, 𑀆𑀳𑀼 𑀢𑀮𑁆𑀮𑀓𑁆𑀔𑀡𑀜𑁆𑀜𑀼𑀦𑁄𑀢𑀺.

‘‘𑀆𑀤𑀬𑁄 𑀢𑀺𑀢𑀸𑀮𑀻𑀲 𑀯𑀡𑁆𑀡𑀸’’ ‘‘𑀢𑀺𑀢𑀸𑀮𑀻𑀲𑀸𑀤𑀬𑁄 𑀯𑀡𑁆𑀡𑀸’’𑀢𑀺 𑀯𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀦 𑀢𑀣𑀸 𑀲𑀢𑀺 𑀲𑀦𑁆𑀤𑀺𑀤𑁆𑀥𑀁 𑀲𑀼𑀢𑁆𑀢𑀁 𑀲𑀺𑀬𑀸𑀢𑀺, 𑀦𑀦𑀼 𑀲𑀢𑁆𑀣𑀸𑀤𑁄 𑀫𑀗𑁆𑀕𑀮𑀯𑀘𑀦𑁂𑀦 𑀪𑀯𑀺𑀢𑀩𑁆𑀩𑀁, 𑀅𑀓𑀸𑀭𑁄 𑀧𑀝𑀺𑀲𑁂𑀥𑀢𑁆𑀣𑁄𑀧𑀺 𑀳𑁄𑀢𑀻𑀢𑀺 (𑀦) 𑀲𑀢𑁆𑀣𑀸𑀤𑁄 𑀲𑀺𑀤𑁆𑀥𑀲𑀤𑁆𑀤𑀲𑁆𑀲𑁄𑀧𑀳𑀺𑀢𑀢𑁆𑀢𑀸, 𑀅𑀣 𑀳𑁄𑀢𑁆𑀯 𑀧𑀼𑀩𑁆𑀩𑀸 𑀛𑀸𑀮𑀸𑀤𑀺 𑀲𑀜𑁆𑀜𑀸, 𑀲𑀤𑁆𑀤𑀲𑀸𑀥𑀦𑀫𑀢𑁆𑀢𑀧𑁆𑀧𑀬𑁄𑀚𑀦𑀢𑁆𑀢𑀸 𑀧𑀦 𑀲𑀩𑁆𑀩𑀯𑀺𑀥𑀸𑀦𑀲𑁆𑀲 𑀧𑀼𑀩𑁆𑀩𑀸𑀘𑀭𑀺𑀬 𑀲𑀜𑁆𑀜𑀸𑀯𑀸𑀮𑀫𑁂𑀢𑁆𑀣𑀸𑀢𑀺 𑀓𑀺𑀁 𑀧𑀼𑀦𑀸𑀧𑀺 𑀯𑀡𑁆𑀡𑀸𑀤𑀺𑀲𑀜𑁆𑀜𑀸𑀯𑀺𑀥𑀸𑀦𑁂𑀦 𑀕𑀦𑁆𑀣𑀕𑀸𑀭𑀯 𑀓𑀭𑀡𑁂𑀦𑀸𑀢𑀺 𑀲𑀘𑁆𑀘𑀫𑁂𑀢𑀁, 𑀧𑀼𑀩𑁆𑀩𑀸𑀘𑀭𑀺𑀬𑁂𑀲𑀼 𑀧𑀦 𑀕𑀸𑀭𑀯𑀁 𑀢𑀤𑀦𑀼𑀕𑀫𑀦𑀜𑁆𑀘 𑀤𑀻𑀧𑁂𑀢𑀼𑀁 𑀓𑀸𑀘𑀺 ¶ 𑀲𑀜𑁆𑀜𑀸𑀬𑁄𑀧𑁆𑀬𑀦𑁆𑀯𑀸𑀔𑁆𑀬𑀸𑀬𑀦𑁆𑀢𑁂, 𑀬𑀚𑁆𑀚𑁂𑀯𑀁 𑀲𑀁𑀬𑁄𑀕𑀲𑀩𑁆𑀩𑀦𑀸𑀫𑀮𑁄𑀧𑀸𑀤𑀬𑁄𑀧𑀺 𑀲𑀜𑁆𑀜𑀸 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀯𑀼𑀢𑁆𑀢𑀸 𑀯𑀢𑁆𑀢𑀩𑁆𑀩𑀸𑀢𑀺 𑀦𑀦𑀼 𑀪𑁄 𑀯𑀼𑀢𑁆𑀢𑀫𑁂𑀯𑀸𑀫𑁆𑀳𑁂𑀳𑀺’𑀓𑀸𑀘𑀺 𑀲𑀜𑁆𑀜𑀸𑀬𑁄 𑀆𑀔𑁆𑀬𑀸𑀬𑀦𑁆𑀢𑁂’𑀢𑀺, 𑀓𑀺𑀦𑁆𑀢𑀤𑀸𑀔𑁆𑀬𑀸𑀦𑀤𑁆𑀯𑀸𑀭𑁂𑀦 𑀪𑀯𑀢𑀸 𑀢𑀸𑀧𑀺 𑀯𑀺𑀜𑁆𑀜𑀸𑀢𑀼𑀁 𑀦 𑀲𑀓𑁆𑀓𑀸𑀢𑀺, 𑀓𑁂𑀲𑀜𑁆𑀘𑀺 𑀲𑀸𑀢𑁆𑀣𑀓𑀢𑁆𑀢𑁄𑀧𑀺 𑀧𑀢𑀺𑀯𑀡𑁆𑀡𑀫𑀢𑁆𑀣𑀸𑀦𑀼𑀧𑀮𑀤𑁆𑀥𑀺𑀢𑁄 𑀯𑀡𑁆𑀡𑀸𑀦𑀫𑀤𑀺𑀝𑁆𑀞𑀸𑀦𑀫𑀓𑀸𑀭𑀸𑀤𑀻𑀦𑀫𑀦𑀼𑀓𑀢𑀺𑀬𑁄 𑀇𑀳𑁄𑀧𑀤𑀺𑀝𑁆𑀞𑀸𑀇𑀢𑁆𑀬𑀦𑀼𑀓𑀸𑀭𑀺𑀬𑁂𑀦𑀸𑀢𑁆𑀣𑁂𑀦𑀸𑀢𑁆𑀣𑀯𑀦𑁆𑀢𑀢𑀸𑀬 𑀳𑁄𑀢𑁂𑀯𑀸𑀓𑀸𑀭𑀸𑀤𑀺𑀢𑁄 𑀯𑀺𑀪𑀢𑁆𑀢𑀺, 𑀮𑁄𑀧𑁂𑀦 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀧𑀦𑀲𑁆𑀲𑀸 𑀅𑀲𑁆𑀲𑀯𑀦𑀁 𑀲𑀦𑁆𑀦𑀺𑀓𑀁𑀲𑀯𑀘𑀦𑀺𑀘𑁆𑀙𑀸𑀪𑀸𑀯𑀸 𑀲𑀁𑀳𑀺𑀢𑀸𑀬𑀸𑀦𑀺𑀤𑁆𑀤𑁂𑀲𑁄, 𑀅𑀦𑀼𑀓𑁆𑀓𑀫𑁄𑀢𑀺 𑀆𑀤𑁄𑀦𑀺𑀲𑁆𑀲𑀬𑀸 𑀲𑀭𑀸𑀯𑀼𑀢𑁆𑀢𑀸, 𑀢𑀢𑁄 𑀦𑀺𑀲𑁆𑀲𑀺𑀢𑀸 𑀩𑁆𑀬𑀜𑁆𑀚𑀦𑀸, 𑀲𑀭𑁂𑀲𑀼𑀧𑀺 𑀏𑀓𑀝𑁆𑀞𑀸𑀦𑀺𑀬𑀸 𑀅𑀓𑀸𑀭𑀸𑀤𑀬𑁄 𑀩𑀳𑀼𑀢𑁆𑀢𑀸 𑀧𑀞𑀫𑀁 𑀯𑀼𑀢𑁆𑀢𑀸 𑀞𑀸𑀦𑀸𑀦𑀼𑀓𑁆𑀓𑀫𑁂𑀦, 𑀢𑀢𑁄 𑀤𑁆𑀯𑀺𑀚𑀸 𑀞𑀸𑀦𑀸𑀦𑀼𑀓𑁆𑀓𑀫𑁂𑀦, 𑀢𑁂𑀲𑀼𑀧𑀺 𑀭𑀲𑁆𑀲𑀸𑀯 𑀮𑀳𑀼𑀢𑁆𑀢𑀸 𑀧𑀞𑀫𑀁 𑀯𑀼𑀢𑁆𑀢𑀸, 𑀢𑀢𑁄 𑀤𑀻𑀖𑀸, 𑀩𑁆𑀬𑀜𑁆𑀚𑀦𑁂𑀲𑀼𑀧𑀺 𑀯𑀕𑁆𑀕𑀸 𑀩𑀳𑀼𑀢𑁆𑀢𑀸 𑀞𑀸𑀦𑀧𑁆𑀧𑀝𑀺𑀧𑀸𑀝𑀺𑀬𑀸 𑀧𑀞𑀫𑀁 𑀯𑀼𑀢𑁆𑀢𑀸, 𑀢𑀢𑁄 𑀬𑀓𑀸𑀭𑀸𑀤𑀬𑁄, 𑀯𑀕𑁆𑀕𑁂𑀲𑀼 𑀘 𑀅𑀖𑁄𑀲𑀸 𑀧𑀞𑀫𑀁 𑀯𑀼𑀢𑁆𑀢𑀸, 𑀢𑀢𑁄 𑀖𑁄𑀲𑀸, 𑀢𑁂𑀲𑀼 𑀘 𑀲𑀺𑀣𑀺𑀮𑀸 𑀧𑀞𑀫𑀁 𑀯𑀼𑀢𑁆𑀢𑀸, 𑀢𑀢𑁄 𑀥𑀦𑀺𑀢𑀸, 𑀢𑀢𑁆𑀣𑀸𑀧𑀺 𑀅𑀧𑁆𑀧𑀓𑀢𑁆𑀢𑀸 𑀤𑁆𑀯𑀺𑀚𑀸 𑀧𑀜𑁆𑀘𑀫𑀸 𑀯𑀼𑀢𑁆𑀢𑀸, 𑀢𑀢𑁄 𑀬𑀭𑀮𑀯𑀸 𑀖𑁄𑀲𑀪𑀽𑀢𑀸 𑀞𑀸𑀦𑀸𑀦𑀼𑀓𑁆𑀓𑀫𑁂𑀦, 𑀢𑀢𑁄 𑀥𑀦𑀺𑀢𑀸 𑀲𑀓𑀸𑀭𑀳 𑀓𑀸𑀭𑀸, 𑀢𑁂𑀲𑀼𑀧𑀺𑀳𑀓𑀸𑀭𑁄 𑀓𑁂𑀲𑀜𑁆𑀘𑀺 𑀑𑀭𑀲𑁄𑀧𑀺 𑀳𑁄𑀢𑀻𑀢𑀺 𑀤𑁆𑀯𑀺𑀚𑀢𑁆𑀢𑀸 𑀧𑀘𑁆𑀙𑀸 𑀯𑀼𑀢𑁆𑀢𑁄, 𑀓𑁂𑀳𑀺𑀘𑀺 ‘‘𑀮𑀴𑀸𑀦𑀫𑀯𑀺𑀲𑁂𑀲𑁄’’𑀢𑀺 𑀤𑁆𑀯𑀺𑀦𑁆𑀦𑀫𑀯𑀺𑀲𑁂𑀲𑁂 𑀯𑀼𑀘𑁆𑀘𑀫𑀸𑀦𑁂𑀧𑀺 𑀮𑀺𑀧𑀺𑀪𑁂𑀤𑁂𑀦 𑀞𑀸𑀦𑀪𑁂𑀤𑁂𑀦 𑀘 𑀪𑀺𑀦𑁆𑀦𑀢𑁆𑀢𑀸 𑀴𑀓𑀸𑀭𑁄 𑀯𑀺𑀲𑀼𑀁 𑀅𑀓𑁆𑀔𑀭𑀪𑀸𑀯𑁂𑀦 𑀕𑀳𑀺𑀢𑁄, 𑀲𑁄𑀧𑀺 𑀖𑁄𑀲𑀪𑀸𑀯𑁂𑀦 𑀞𑀸𑀦𑀸𑀦𑀼𑀓𑁆𑀓𑀫𑁂𑀦𑀘 𑀳𑀓𑀸𑀭𑀢𑁄 𑀧𑀭𑀁 𑀯𑀼𑀢𑁆𑀢𑁄 𑀦𑀺𑀕𑁆𑀕𑀳𑀻𑀢𑀁 𑀧𑀦 𑀲𑀭𑀢𑁆𑀢𑀸𑀤𑀺𑀲𑀩𑁆𑀩𑀯𑀺𑀦𑀺𑀫𑁆𑀫𑀼𑀢𑁆𑀢𑀢𑁆𑀢𑀸 𑀲𑀩𑁆𑀩𑀧𑀘𑁆𑀙𑀸 𑀯𑀼𑀢𑁆𑀢𑀦𑁆𑀢𑀺 𑀅𑀓𑀸𑀭𑀸𑀤𑀻𑀦𑀫𑀬𑀫𑀦𑀼𑀓𑁆𑀓𑀫𑁄, 𑀇𑀫𑀲𑁆𑀲𑁂𑀯𑀸𑀦𑀼𑀓𑁆𑀓𑀫𑀲𑁆𑀲 𑀫𑀦𑀲𑀺 𑀯𑀺𑀧𑀲𑁆𑀲 𑀯𑀢𑁆𑀢𑀫𑀸𑀦𑀢𑁆𑀢𑀸 𑀢𑀺𑀢𑀸𑀮𑀻𑀲𑀸𑀢𑀺 𑀕𑀡𑀦𑀸𑀧𑀭𑀺𑀘𑁆𑀙𑁂𑀤𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 𑀘 ‘𑀦𑀺𑀕𑁆𑀕𑀳𑀻𑀢𑀦𑁆𑀢𑀸’𑀢𑀺 𑀯𑀼𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀧𑀓𑀢𑀁 𑀲𑀸𑀥𑀼𑀲𑀤𑁆𑀤𑀸𑀦𑁆𑀯𑀸𑀔𑁆𑀬𑀸𑀦𑀁, 𑀦 𑀯𑀡𑁆𑀡𑀻𑀬𑀢𑁂, 𑀢𑀺 𑀲𑀤𑁆𑀤𑀲𑀗𑁆𑀔𑀭𑀡 𑀲𑀗𑁆𑀔𑀸𑀢 𑀫𑀼𑀔𑁆𑀬𑀧𑁆𑀧𑀬𑁄𑀚𑀦𑀸𑀪𑀸𑀯𑀸, 𑀓𑀺𑀜𑁆𑀘𑀸𑀧𑀺 𑀦 𑀯𑀡𑁆𑀡𑀻𑀬𑀢𑁂, 𑀅𑀫𑁆𑀳𑁂𑀳𑀺 𑀧𑀦 𑀓𑀣𑀫𑀓𑀸𑀭𑀸𑀤𑀻𑀦𑀫𑀬𑀫𑀦𑀼𑀓𑁆𑀓𑀫𑁄 𑀉𑀧𑁆𑀧𑀦𑁆𑀦𑁄𑀢𑀺 𑀲𑀺𑀲𑁆𑀲𑀸𑀦𑀁 𑀓𑀗𑁆𑀔𑀸 𑀯𑀺𑀘𑁆𑀙𑁂𑀤𑀧𑁆𑀧𑀬𑁄𑀚𑀦𑀫𑁆𑀧𑀢𑀺 𑀅𑀦𑀼𑀓𑁆𑀓𑀫𑀲𑀤𑁆𑀤𑀲𑁆𑀲 𑀅𑀢𑁆𑀣𑀓𑀣𑀦𑀩𑁆𑀬𑀸𑀚𑁂𑀦 𑀯𑀡𑁆𑀡𑀺𑀢𑁄 𑀬𑁂𑀯𑀸𑀢𑀺, 𑀓𑀭𑀻𑀬𑀦𑁆𑀢𑁂 𑀉𑀘𑁆𑀘𑀸𑀭𑀻𑀬𑀦𑁆𑀢𑁂 𑀏𑀢𑁂𑀦𑀸𑀢𑀺 𑀓𑀭𑀡𑀁, 𑀢𑀢𑁆𑀣 𑀚𑀺𑀯𑁆𑀳𑀸𑀫𑀚𑁆𑀛𑀁 𑀢𑀸𑀮𑀼𑀚𑀸𑀦𑀁, 𑀚𑀺𑀯𑁆𑀳𑁄𑀧𑀕𑁆𑀕𑀁 𑀫𑀼𑀤𑁆𑀥𑀚𑀸𑀦𑀁, 𑀚𑀺𑀯𑁆𑀳𑀕𑁆𑀕𑀁, 𑀤𑀦𑁆𑀢𑀚𑀸𑀦𑀁 𑀲𑁂𑀲𑀸𑀦𑀁 𑀲𑀓𑀝𑁆𑀞𑀸𑀦𑀁 𑀓𑀭𑀡𑀁, 𑀧𑀬𑀢𑁆𑀢𑀺 𑀧𑀬𑀢𑀦𑀁, 𑀢𑀫𑁆𑀧𑀦 𑀯𑀡𑁆𑀡𑀼𑀘𑁆𑀘𑀸𑀭𑀡𑀢𑁄 𑀅𑀩𑁆𑀪𑀦𑁆𑀢𑀭𑁄 𑀩𑀸𑀳𑀺𑀬𑁄 𑀘 𑀉𑀲𑁆𑀲𑀸𑀳𑁄, 𑀢𑀢𑁆𑀣 𑀅𑀩𑁆𑀪𑀦𑁆𑀢𑀭𑀧𑀬𑀢𑀦𑀁-𑀲𑀁𑀯𑀼𑀢𑀢𑁆𑀢𑀫𑀓𑀸𑀭𑀲𑁆𑀲, 𑀯𑀺𑀯𑀝𑀢𑁆𑀢𑀁 𑀲𑀭𑀸𑀦𑀁 ¶ 𑀲𑀓𑀸𑀭𑀳𑀓𑀸𑀭𑀸𑀦𑀜𑁆𑀘 𑀨𑀼𑀝𑁆𑀞𑀢𑁆𑀢𑀁 𑀯𑀕𑁆𑀕𑀸𑀦𑀁, 𑀈𑀲𑀁𑀨𑀼𑀝𑁆𑀞𑀢𑁆𑀢𑀁 𑀬𑀭𑀮𑀯𑀸𑀦𑀁, 𑀩𑀸𑀳𑀺𑀬𑀧𑀬𑀢𑀦𑀦𑁆𑀢𑀼 𑀲𑀁𑀯𑀼𑀢𑀓𑀡𑁆𑀞𑀢𑀸𑀤𑀺, 𑀞𑀸𑀦𑀢𑁄 𑀧𑀘𑁆𑀘𑀸𑀲𑀢𑁆𑀢𑀺𑀬𑀸 𑀯𑀺𑀥𑀻𑀬𑀫𑀸𑀦𑀓𑀸𑀭𑀺𑀬𑀲𑀫𑁆𑀪𑀯𑁂𑀦 𑀧𑀬𑁄𑀚𑀦𑀲𑀫𑁆𑀪𑀯𑀸 𑀆𑀳-‘𑀞𑀸𑀦𑀫𑁆𑀧𑀦𑀸’𑀢𑀺𑀆𑀤𑀺, 𑀢𑀺𑀝𑁆𑀞𑀦𑁆𑀢𑀺 𑀏𑀢𑁆𑀣 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀯𑀡𑁆𑀡𑀸𑀢𑀺 𑀞𑀸𑀦𑀁, ‘‘𑀏 𑀑𑀦𑀫 𑀯𑀡𑁆𑀡𑁂’’𑀢𑀺 (𑁧-𑁩𑁭) 𑀲𑀼𑀢𑁆𑀢𑁂 𑀯𑀡𑁆𑀡𑁂𑀢𑀺 𑀓𑀣𑀦𑀫𑁂𑀯 𑀯𑀡𑁆𑀡𑀲𑀜𑁆𑀜𑀸𑀓𑀭𑀡𑁂 𑀧𑀬𑁄𑀚𑀦𑀁, 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀫𑀜𑁆𑀜𑀢𑁆𑀭 𑀩𑁆𑀬𑀸𑀧𑀤𑀺𑀲𑀢𑀺’ 𑀏𑀯’𑀫𑀺𑀘𑁆𑀘𑀸𑀤𑀺𑀦𑀸, 𑀢𑀲𑁆𑀫𑀸 ‘‘𑀤𑀲𑀸𑀤𑁄 𑀲𑀭𑀸’’𑀇𑀘𑁆𑀘𑀸𑀤𑁄 ‘𑀢𑁂𑀦𑀸’𑀢𑀺𑀆𑀤𑀻𑀲𑀼 ‘𑀢𑁂𑀦 𑀲𑀭𑀇𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄 𑀓𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀬𑁄𑀚𑀦𑀁 𑀢𑀁 𑀤𑀲𑁆𑀲𑁂𑀢𑀺 ‘‘𑀲𑀭𑁄𑀮𑁄𑀧𑁄 𑀲𑀭𑁂’’𑀘𑁆𑀘𑀸𑀤𑀻’𑀢𑀺 𑀏𑀯𑀫𑀸𑀤𑀺𑀦𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀜𑀸𑀧𑁂𑀢𑀺 𑀯𑀡𑁆𑀡𑀮𑁄𑀧𑀦𑁆𑀢𑀺 𑀜𑀸𑀧𑀓𑀁, 𑀓𑀲𑁆𑀫𑀸 𑀧𑀦’𑀲𑁄 𑀘𑁂𑀫𑀺𑀦𑀸𑀯 𑀜𑀸𑀧𑀓𑁂𑀦 𑀲𑀺𑀤𑁆𑀥𑁄’𑀢𑀺 𑀯𑀼𑀘𑁆𑀘𑀢𑀺 𑀦𑀦𑀼 ‘𑀢𑀤𑀫𑀺𑀦𑀸𑀤𑀻𑀦𑀺’’𑀢𑀺 (𑁧-𑁪𑁭) 𑀲𑀼𑀢𑁆𑀢𑀁 𑀤𑀺𑀲𑁆𑀲𑀢𑀻𑀢𑀺, (𑀲𑀘𑁆𑀘𑀁) 𑀢𑀣𑀸𑀧𑀺 𑀧𑀓𑀸𑀭𑀦𑁆𑀢𑀭𑁄𑀬𑀫𑁆𑀧𑀺 𑀯𑀡𑁆𑀡𑀮𑁄𑀧𑁂 𑀤𑀲𑁆𑀲𑀺𑀢𑁄𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀁, 𑀏𑀯𑀲𑀤𑁆𑀤𑁄 𑀧𑀦 ‘𑀬𑀤𑀺 𑀜𑀸𑀧𑀓𑁂𑀦 𑀯𑀡𑁆𑀡𑀮𑁄𑀧𑁄 𑀲𑀺𑀬𑀸 𑀲𑁄 𑀇𑀫𑀺𑀦𑀸𑀯 𑀜𑀸𑀧𑀓𑁂𑀦 𑀲𑀺𑀤𑁆𑀥𑁄, 𑀦𑀸𑀜𑁆𑀜𑁂𑀦𑀸’𑀢𑀺 𑀅𑀯𑀥𑀸𑀭𑁂𑀢𑀺.

𑀦𑀦𑀼 𑀅𑀆𑀤𑀬𑁄𑀢𑀺 𑀧𑀞𑀫𑀦𑁆𑀢𑁂𑀦𑀼𑀯𑀢𑁆𑀢𑀦𑁆𑀢𑁂 𑀓𑀣𑀫𑁂𑀢𑁆𑀣’𑀢𑀢𑁆𑀣𑀸’𑀢𑀺 𑀲𑀢𑁆𑀢𑀫𑀻𑀦𑀺𑀤𑁆𑀤𑀺𑀝𑁆𑀞𑀢𑀸𑀢𑀺 𑀆𑀳-‘𑀢𑀜𑁆𑀘𑀸’𑀢𑀺𑀆𑀤𑀺, 𑀅𑀢𑁆𑀣𑀯𑀲𑀸𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁂𑀦𑀸𑀢𑀺 𑀅𑀆𑀤𑀬𑁄𑀢𑀺 𑀧𑀞𑀫𑀦𑁆𑀢𑀲𑁆𑀲‘𑀆𑀤𑁄 𑀤𑀲𑀸’𑀢𑁆𑀬𑀦𑁂𑀦 𑀲𑀫𑁆𑀩𑀦𑁆𑀥𑀸 𑀲𑀫𑁆𑀩𑀚𑁆𑀛𑀫𑀸𑀦𑁂 𑀘𑀸𑀥𑀸𑀭𑀢𑁆𑀣𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀆𑀥𑀸𑀭𑀢𑁆𑀣𑀯𑀲𑁂𑀦 𑀲𑀢𑁆𑀢𑀫𑀻 𑀯𑀺𑀪𑀢𑁆𑀢𑀺𑀬𑀸 𑀧𑀭𑀺𑀯𑀢𑁆𑀢𑀦𑁂𑀦𑀸𑀢𑀺 𑀅𑀢𑁆𑀣𑁄, 𑀅𑀢𑁆𑀣𑀯𑀲𑀸 𑀲𑀢𑁆𑀢𑀫𑀺𑀬𑀸 𑀯𑀺𑀧𑀭𑀺𑀡𑀸𑀫𑀲𑀫𑁆𑀪𑀯𑀸𑀬𑁂𑀯𑀲𑀼𑀢𑁆𑀢𑁂 𑀅𑀯𑀺𑀚𑁆𑀚𑀫𑀸𑀦𑁂𑀧𑀺‘𑀢𑀢𑁆𑀣𑀸’𑀢𑀺 𑀯𑀼𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀆𑀤𑁄𑀤𑀲𑀦𑁆𑀦𑀫𑀦𑀜𑁆𑀜𑀢𑁆𑀣𑀧𑀯𑀢𑁆𑀢𑀺𑀲𑀫𑁆𑀪𑀯𑀢𑁄 𑀢𑁂𑀲𑀁 𑀅𑀆𑀤𑀬𑁄 𑀯𑀺𑀲𑀬𑀪𑀸𑀯𑁂𑀦𑀧𑀺 𑀲𑀓𑁆𑀓𑀸 𑀧𑀭𑀺𑀓𑀧𑁆𑀧𑁂𑀢𑀼𑀦𑁆𑀢𑀺 𑀯𑀼𑀢𑁆𑀢𑀁-‘𑀢𑁂𑀲𑀼 𑀯𑀺𑀲𑀬𑀪𑀽𑀢𑁂𑀲𑀽’𑀢𑀺, 𑀦𑀺𑀤𑁆𑀥𑀸𑀭𑀡𑀢𑁆𑀣𑁄𑀧𑀺 𑀬𑀼𑀚𑁆𑀚𑀢𑁂𑀯… 𑀯𑀡𑁆𑀡𑀲𑀫𑀼𑀤𑀸𑀬𑀢𑁄 𑀢𑀤𑁂𑀓𑀤𑁂𑀲𑀪𑀽𑀢𑀸𑀦 𑀫𑀸𑀤𑁄 𑀯𑀡𑁆𑀡𑀸𑀦𑀁 𑀤𑀲𑀲𑀗𑁆𑀔𑁆𑀬𑀸𑀕𑀼𑀡𑁂𑀦 𑀦𑀺𑀤𑁆𑀥𑀸𑀭𑀺𑀬𑀫𑀸𑀦𑀢𑁆𑀢𑀸, 𑀆𑀤𑀺𑀫𑁆𑀳𑀺 𑀤𑀲 𑀯𑀡𑁆𑀡𑀸𑀢𑀺 𑀯𑀼𑀢𑁆𑀢𑁂 𑀅𑀯𑀼𑀢𑁆𑀢𑀸𑀦𑀫𑁆𑀧𑀺 𑀅𑀯𑀲𑁆𑀲𑀁 𑀯𑀢𑁆𑀢𑀩𑁆𑀩𑀸𑀦𑀁 𑀊𑀦𑀧𑀽𑀭𑀡𑀢𑁆𑀣𑀫𑀚𑁆𑀛𑀸𑀳𑀸𑀭𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁- 𑀅𑀯𑀝𑁆𑀞𑀺𑀢𑀸 𑀦𑀺𑀤𑁆𑀤𑀺𑀝𑁆𑀞𑀸 𑀯𑀸’𑀢𑀺, 𑀏𑀓𑀸𑀤𑀻𑀦 𑀫𑀝𑁆𑀞𑀸𑀭𑀲𑀦𑁆𑀢𑀸𑀦𑀁 𑀲𑀗𑁆𑀔𑁆𑀬𑀸𑀦𑀁 𑀲𑀗𑁆𑀔𑁆𑀬𑁂𑀬𑁆𑀬𑁂 𑀯𑀢𑁆𑀢𑀦𑀢𑁄 𑀆𑀳-‘𑀤𑀲𑀲𑀗𑁆𑀔𑁆𑀬𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸’𑀢𑀺, 𑀕𑀬𑁆𑀳𑀼𑀧𑀕𑀸𑀦𑀁 𑀭𑀲𑁆𑀲𑀏 𑀑𑀯𑀡𑁆𑀡𑀸𑀦𑀫𑁆𑀧𑀺 𑀓𑀘𑁆𑀘𑀸𑀬𑀦𑁂 𑀯𑀺𑀬 𑀅𑀧𑀭𑀺𑀘𑁆𑀘𑀸𑀕𑀸 𑀅𑀦𑀽𑀦𑀸, 𑀅𑀕𑀬𑁆𑀳𑀼𑀧𑀕𑀸𑀦𑀁 𑀢𑀤𑀜𑁆𑀜𑁂𑀲𑀁 𑀓𑁂𑀲𑀜𑁆𑀘𑀺 𑀲𑀭𑀸𑀦𑀁 𑀧𑀭𑀺𑀘𑁆𑀘𑀕𑀸 𑀅𑀦𑀥𑀺𑀓𑀸, 𑀤𑀲𑀲𑀤𑁆𑀤𑀲𑁆𑀲 𑀲𑀗𑁆𑀔𑁆𑀬𑁂𑀬𑁆𑀬 𑀯𑀼𑀢𑁆𑀢𑀺𑀢𑁆𑀢𑀸 ¶ 𑀤𑀲𑀦𑁆𑀦𑀫𑁆𑀧𑀺 𑀅𑀥𑀺𑀓𑀢𑀯𑀡𑁆𑀡𑀸𑀦𑀜𑁆𑀜𑀢𑁆𑀢𑀸 𑀯𑀼𑀢𑁆𑀢𑀁-‘𑀤𑀲𑀦𑁆𑀦𑀫𑁆𑀧𑀻’𑀢𑀺𑀆𑀤𑀺, 𑀲𑀬𑀁 𑀧𑀼𑀩𑁆𑀩𑀸’𑀭𑀸𑀚=𑀘𑀺𑀢𑁆𑀢𑀺𑀬𑀁’𑀢𑀻𑀲𑁆𑀫𑀸 𑀓𑁆𑀯𑀺𑀫𑁆𑀳𑀺 𑀅𑀦𑁆𑀢𑀮𑁄𑀧𑁂 𑀲𑀫𑀸𑀲𑁂 𑀘 𑀢𑀤𑀫𑀺𑀦𑀸𑀤𑀺𑀢𑁆𑀢𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀯𑀸 𑀲𑀭𑀲𑀤𑁆𑀤𑁄 𑀦𑀺𑀧𑁆𑀨𑀚𑁆𑀚𑀢𑀻𑀢𑀺, ‘𑀲𑀭-𑀕𑀢𑀺𑀳𑀺𑀁 𑀲𑀸𑀘𑀺𑀦𑁆𑀢𑀸𑀲𑀼’ 𑀇𑀘𑁆𑀘𑀲𑁆𑀫𑀸 𑀅𑀧𑁆𑀧𑀘𑁆𑀘𑀬𑁂𑀦 𑀯𑀸 𑀦𑀺𑀧𑁆𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳=‘𑀲𑀬𑀁 𑀭𑀸𑀚𑀦𑁆𑀢𑀻’𑀢𑀺𑀆𑀤𑀺.

𑀢𑁂𑀢𑀺’𑀆𑀤𑁄’𑀢𑀺 𑀲𑀢𑁆𑀢𑀫𑁆𑀬𑀦𑁆𑀢𑀢𑁆𑀢𑀸 𑀅𑀧𑀭𑁂 𑀤𑁆𑀯𑁂 𑀧𑀭𑀸𑀫𑀲𑀢𑀺, 𑀳𑁂𑀝𑁆𑀞𑀸 𑀯𑀺𑀬𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀅𑀢𑁆𑀣𑀯𑀲𑀸 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑀁 𑀉𑀧𑀫𑁂𑀢𑀺, 𑀅𑀢𑁄𑀯 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀣𑀯𑀲𑁂𑀦 𑀢𑁂𑀲𑀼’𑀢𑀺 𑀯𑀼𑀢𑁆𑀢𑀁, 𑀢𑁂𑀲𑀼𑀢𑀺 𑀧𑀦 𑀦𑀺𑀤𑁆𑀥𑀸𑀭𑀡𑀢𑁆𑀢𑀯𑀺𑀯𑀘𑁆𑀙𑀸𑀬𑀁 𑀢𑀫𑁆𑀧𑀺 𑀲𑀫𑁆𑀪𑀯𑀢𑀻𑀢𑀺 𑀢𑁂𑀲𑀁 𑀯𑀡𑁆𑀡𑀸𑀦𑀁 𑀫𑀚𑁆𑀛𑁂 𑀤𑁆𑀯𑁂𑀤𑁆𑀯𑁂𑀢𑀺 𑀤𑁆𑀯𑀺𑀲𑀗𑁆𑀔𑁆𑀬𑀸𑀬 𑀦𑀺𑀤𑁆𑀥𑀸𑀭𑀡𑀢𑁆𑀣𑁄𑀧𑀺 𑀯𑁂𑀤𑀺𑀢𑀩𑁆𑀩𑁄, 𑀯𑀺𑀘𑁆𑀙𑀸𑀬𑀁 𑀯𑀼𑀢𑁆𑀢𑀺 𑀬𑀲𑁆𑀲 𑀲𑁄 𑀯𑀺𑀘𑁆𑀙𑀸𑀯𑀼𑀢𑁆𑀢𑀺-𑀤𑁆𑀯𑀺𑀲𑀤𑁆𑀤𑁄, 𑀯𑀺𑀘𑁆𑀙𑀸𑀯𑀼𑀢𑁆𑀢𑀺𑀢𑀸 𑀘𑀸𑀲𑁆𑀲 𑀲𑀯𑀡𑁆𑀡𑀢𑁆𑀢𑀕𑀼𑀡𑁂𑀦 𑀤𑁆𑀯𑀺𑀦𑁆𑀦𑀁 (‘𑀩𑁆𑀬𑀸𑀧𑀺𑀢𑀼) 𑀫𑀺𑀝𑁆𑀞𑀢𑁆𑀢𑀸, 𑀓𑀫𑁂𑀦𑀸𑀯𑀝𑁆𑀞𑀺𑀢𑁂𑀢𑀺 𑀇𑀫𑀺𑀦𑀸 𑀅𑀓𑀸𑀭𑀸𑀤𑀺𑀯𑀡𑁆𑀡𑀧𑁆𑀧𑀩𑀦𑁆𑀥𑀲𑁆𑀲 𑀅𑀦𑀸𑀤𑀺𑀓𑀸𑀮𑀲𑀺𑀤𑁆𑀥𑀁 𑀓𑀫𑀲𑀺𑀤𑁆𑀥𑀢𑁆𑀢𑀫𑀸𑀳. 𑀦𑀦𑀼 𑀲𑀫𑀸𑀦𑀸 𑀯𑀡𑁆𑀡𑀸 𑀲𑀯𑀡𑁆𑀡𑀸𑀢𑁆𑀬𑀦𑁆𑀯𑀢𑁆𑀣𑁂 𑀲𑀯𑀡𑁆𑀡𑀲𑀤𑁆𑀤𑁂 𑀲𑀢𑀺 𑀓𑀢𑀁 𑀭𑀲𑁆𑀲𑀤𑀻𑀖𑀸𑀦𑀁 𑀲𑀯𑀡𑁆𑀡𑀲𑀜𑁆𑀜𑀸 𑀲𑀺𑀬𑀸… 𑀅𑀲𑀫𑀸𑀦𑀢𑁆𑀢𑀸 𑀏𑀢𑁂𑀲𑀦𑁆𑀢𑀺, 𑀦𑁂𑀢𑀤𑀢𑁆𑀣𑀺𑀯𑀡𑁆𑀡𑀧𑁆𑀧𑀩𑀦𑁆𑀥𑀲𑁆𑀲 𑀓𑀫𑀲𑀺𑀤𑁆𑀥𑀢𑁆𑀢𑀸 𑀯𑀘𑀦𑀩𑀮𑁂𑀦𑁂𑀯𑀸𑀲𑀫𑀸𑀦𑀸𑀦𑀫𑁆𑀧𑀺 𑀳𑁄𑀢𑁂𑀯𑀸𑀢𑀺, 𑀦𑁂𑀯𑀫𑁆𑀧𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁‘‘𑀤𑁆𑀯𑁂𑀤𑁆𑀯𑁂 𑀲𑀯𑀡𑁆𑀡𑀸’’𑀢𑀺 𑀲𑀼𑀢𑁆𑀢𑀲𑁆𑀲 𑀢𑀸𑀤𑀺𑀲𑀲𑀸𑀫𑀢𑁆𑀣𑀺𑀬𑀲𑀩𑁆𑀪𑀸𑀯𑁂 [𑀲𑀩𑁆𑀪𑀸𑀯𑁂𑀦 (𑀧𑁄𑀢𑁆𑀣𑀓𑁂)] 𑀯𑀺𑀲𑁂𑀲𑀓𑀸𑀭𑀡𑀸𑀪𑀸𑀯𑀸𑀢𑀺 𑀆𑀳‘𑀲𑀫𑀸𑀦𑀢𑁆𑀢𑀫𑁆𑀧𑀦𑀸’𑀢𑀺𑀆𑀤𑀺. 𑀢𑀺𑀝𑁆𑀞𑀦𑁆𑀢𑀺 𑀏𑀢𑁆𑀣 𑀯𑀡𑁆𑀡𑀸 𑀘𑀺𑀢𑁆𑀢𑀚𑀢𑁆𑀢𑁂𑀧𑀺 𑀅𑀪𑀺𑀩𑁆𑀬𑀢𑁆𑀢𑀺 𑀯𑀲𑁂𑀦𑀸𑀢𑀺 𑀞𑀸𑀦𑀁 𑀓𑀡𑁆𑀞𑀸𑀤𑀺, 𑀢𑁂𑀦 𑀓𑀢𑀦𑁆𑀢𑀺 𑀲𑀫𑀸𑀲𑁄, 𑀓𑀡𑁆𑀞𑀢𑀸𑀢𑀼 𑀇𑀢𑀺 𑀘𑀢𑁆𑀢𑁂 𑀧𑀸𑀡𑁆𑀬𑀗𑁆𑀕𑀢𑁆𑀢𑀸 𑀦𑀧𑀼𑀁𑀲𑀓𑀢𑁆𑀢𑀁. 𑀧𑀜𑁆𑀘𑀫𑁂𑀳𑀺 𑀯𑀕𑁆𑀕𑀧𑀜𑁆𑀘𑀫𑁂𑀳𑀺. 𑀅𑀦𑁆𑀢𑀝𑁆𑀞𑀸𑀓𑀻𑀢𑀺 𑀯𑀕𑁆𑀕𑀸𑀦𑀫𑀦𑁆𑀢𑁂 𑀢𑀺𑀝𑁆𑀞𑀦𑁆𑀢𑀻𑀢𑀺 𑀅𑀦𑁆𑀢𑀝𑁆𑀞𑀸, 𑀢𑀸𑀳𑀺, 𑀬𑀼𑀢𑁆𑀢𑀲𑁆𑀲𑀸𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀸, 𑀕𑀼𑀬𑁆𑀳’𑀦𑁆𑀢𑀺𑀆𑀤𑀻𑀲𑀼 𑀬𑀼𑀢𑁆𑀢𑀲𑁆𑀲. 𑀓𑁂𑀘𑀻𑀢𑀺 𑀅𑀦𑀺𑀬𑀫𑁂𑀦 𑀯𑀼𑀢𑁆𑀢𑀁, 𑀢𑁂 𑀧𑀦𑁋

‘‘𑀳𑀓𑀸𑀭𑁄 𑀧𑀜𑁆𑀘𑀫𑁂𑀳𑁂𑀯, 𑀅𑀦𑁆𑀢𑀝𑁆𑀞𑀸𑀳𑀺 𑀘 𑀲𑀁𑀬𑀼𑀢𑁄;

𑀑𑀭𑀲𑁄 𑀇𑀢𑀺 𑀯𑀺𑀜𑁆𑀜𑁂𑀬𑁆𑀬𑁄, 𑀓𑀡𑁆𑀞𑀚𑁄 𑀢𑀤𑀲𑀁𑀬𑀼𑀢𑁄’’𑀢𑀺 𑀯𑀤𑀦𑁆𑀢𑀺.

𑀯𑀢𑁆𑀢𑀢𑁂𑀢𑀺 𑀅𑀢𑁆𑀣𑀯𑀲𑀸 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁂𑀦 𑀯𑀢𑁆𑀢𑀢𑁂, 𑀦𑀦𑀼 𑀘𑁂𑀢𑁆𑀬𑀸𑀤𑀺𑀘𑁄𑀤𑀦𑀸, 𑀦𑁂𑀲𑀤𑁄𑀲𑁄𑀘𑁆𑀘𑀸𑀤𑀺 𑀧𑀭𑀺𑀳𑀸𑀭𑁄, 𑀤𑁄𑀲𑀸𑀪𑀸𑀯𑁂 𑀓𑀸𑀭𑀡 𑀫𑀸𑀳-‘𑀬𑁄𑀬𑁄…𑀧𑁂… ¶ 𑀧𑀢𑀻𑀬𑀢𑁂’𑀢𑀺, 𑀯𑀼𑀢𑁆𑀢𑀁 𑀲𑀫𑀢𑁆𑀢𑁂𑀢𑀺-‘𑀦𑀳𑀺’𑀘𑁆𑀘𑀸𑀤𑀺𑀦𑀸, 𑀦𑀦𑀼 𑀘 𑀧𑀼𑀩𑁆𑀩𑀲𑀤𑁆𑀤𑁄 𑀬𑀫𑁂𑀓𑀢𑁆𑀢𑀸 𑀏𑀓𑀁 𑀧𑀼𑀩𑁆𑀩𑀫𑀸𑀘𑀺𑀓𑁆𑀔𑀢𑀺 𑀦 𑀲𑀓𑀮𑀦𑁆𑀢𑀺 𑀓𑀣𑀁 ‘‘𑀧𑀼𑀩𑁆𑀩𑁄’𑀢𑀺 𑀯𑀼𑀢𑁆𑀢𑁂 𑀬𑁄𑀬𑁄𑀢𑀺 𑀜𑀸𑀬𑀢𑀺 ‘𑀬𑁄𑀬𑁄 𑀧𑀼𑀩𑁆𑀩𑁄’𑀢𑀺 𑀘 𑀯𑀼𑀢𑁆𑀢𑁂 ‘𑀢𑁂𑀲𑀼 𑀤𑁆𑀯𑀻𑀲𑀼’𑀢𑀺 𑀏𑀢𑁆𑀣’𑀤𑁆𑀯𑀻𑀲𑀼 𑀤𑁆𑀯𑀻𑀲𑀼’𑀢𑀺 𑀇𑀤𑀁 𑀓𑀣𑀁 𑀲𑀼𑀔𑁂𑀦𑁂𑀯 𑀧𑀢𑀻𑀬𑀢𑁂 𑀢𑀤𑀺𑀤𑀫𑀲𑀺𑀤𑁆𑀥𑁂𑀦𑀸𑀲𑀺𑀤𑁆𑀥𑀲𑀸𑀥𑀦𑀦𑁆𑀢𑀺 𑀆𑀲𑀗𑁆𑀓𑀺𑀬 𑀢𑀤𑀪𑀸𑀯𑀫𑀼𑀩𑁆𑀪𑀸𑀯𑀻𑀬 𑀧𑀼𑀩𑁆𑀩 𑀲𑀤𑁆𑀤𑀲𑁆𑀲 𑀯𑀺𑀘𑁆𑀙𑀸𑀕𑀫𑀓𑀢𑁆𑀢𑀫𑀯𑀕𑀫𑀬𑀺𑀢𑀼𑀫𑀸𑀳-‘𑀦𑀘𑁂𑀤’𑀫𑀺𑀘𑁆𑀘𑀸𑀤𑀺. 𑀢𑀁𑀬𑁄𑀕𑀸𑀢𑀺 𑀉𑀧𑀘𑀸𑀭𑀯𑀲𑁂𑀦𑀸𑀳, 𑀢𑀩𑁆𑀩𑀦𑁆𑀢𑀢𑀸𑀬𑀯𑀸𑀢𑀺 𑀅𑀢𑁆𑀣𑀺𑀬𑀢𑁆𑀣𑁂 𑀅𑀧𑁆𑀧𑀘𑁆𑀘𑀬𑀯𑀲𑁂𑀦, 𑀏𑀯𑀫𑀼𑀧𑀭𑀺𑀧𑀺.

𑀲𑁂𑀲𑀫𑀺𑀘𑁆𑀘𑀸𑀤𑀺𑀦𑀸‘𑀢𑁂𑀲𑀼 𑀤𑁆𑀯𑀻𑀲𑀽𑀢𑀺 𑀲𑀯𑀡𑁆𑀡𑀲𑀜𑁆𑀜𑀓𑁂𑀲𑀼 𑀤𑁆𑀯𑀻𑀲𑀼’ 𑀇𑀘𑁆𑀘𑀸𑀤𑀺 𑀓𑀫𑀢𑀺𑀤𑀺𑀲𑁆𑀲𑀢𑀺. 𑀮𑀳𑀼𑀲𑀜𑁆𑀜𑀸 𑀭𑀲𑁆𑀲𑀲𑁆𑀲, 𑀲𑀁𑀬𑁄𑀕𑀧𑀼𑀩𑁆𑀩𑀲𑁆𑀲 𑀭𑀲𑁆𑀲𑀲𑁆𑀲 𑀤𑀻𑀖𑀲𑁆𑀲 𑀘 𑀕𑀼𑀭𑀼𑀲𑀜𑁆𑀜𑀸 𑀦 𑀯𑀢𑁆𑀢𑀩𑁆𑀩𑀸… 𑀉𑀘𑁆𑀘𑀸𑀭𑀡𑀯𑀲𑁂𑀦𑁂𑀯𑀸𑀦𑁆𑀯𑀢𑁆𑀣𑀲𑀜𑁆𑀜𑀸𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀧𑀼𑀩𑁆𑀩𑀸𑀘𑀭𑀺𑀬𑀯𑀲𑁂𑀦 𑀯𑀸 𑀇𑀳𑀸𑀯𑀼𑀢𑁆𑀢𑀸𑀯𑀲𑁂𑀲𑀲𑀜𑁆𑀜𑀸𑀯𑀺𑀬.

𑀓𑁂𑀯𑀮 𑀩𑁆𑀬𑀜𑁆𑀚𑀦𑀸𑀦𑀫𑀢𑁆𑀣𑀧𑁆𑀧𑀓𑀸𑀲𑀢𑁆𑀢𑀸𑀪𑀸𑀯𑀸 𑀲𑀭𑀸𑀦𑀫𑀢𑁆𑀣𑀧𑁆𑀧𑀓𑀸𑀲𑀦𑁂 𑀅𑀘𑁆𑀘𑀦𑁆𑀢𑁄𑀧𑀓𑀸𑀭𑀸 𑀩𑁆𑀬𑀜𑁆𑀚𑀦𑀸𑀢𑀺 ‘𑀏𑀢𑁂𑀳𑀻’𑀢𑀺 𑀓𑀭𑀡𑀢𑁆𑀢𑁂𑀦 𑀯𑀼𑀢𑁆𑀢𑀁, 𑀢𑁂𑀦𑀸𑀳 ‘𑀲𑀭𑀸𑀦’𑀫𑀺𑀘𑁆𑀘𑀸𑀤𑀺. 𑀯𑀺𑀧𑀼𑀩𑁆𑀩𑀸 ‘𑀅𑀜𑁆𑀚-𑀩𑁆𑀬𑀢𑁆𑀢𑀺𑀬𑀁’𑀢𑀻𑀫𑀲𑁆𑀫𑀸 𑀓𑀭𑀡𑁂 𑀅𑀦𑀧𑁆𑀧𑀘𑁆𑀘𑀬𑁂 𑀭𑀽𑀧𑀁, 𑀦𑀧𑀼𑀁𑀲𑀓𑀢𑁆𑀢𑀫𑁆𑀧𑀺𑀲𑁆𑀲𑀸𑀯𑀕𑀫𑀬𑀺𑀢𑀼𑀁 ‘𑀉𑀧𑀓𑀸𑀭𑀓𑀸𑀦𑀻’𑀢𑀺 𑀯𑀼𑀢𑁆𑀢𑀁, 𑀩𑁆𑀬𑀜𑁆𑀚𑀦𑀢𑁆𑀢𑀁 𑀤𑀺𑀝𑁆𑀞𑀦𑁆𑀢𑁂𑀦 𑀨𑀼𑀝𑀬𑀢𑀺 ‘𑀬𑀣𑀸’𑀇𑀘𑁆𑀘𑀸𑀤𑀺𑀦𑀸, 𑀬𑀣𑀸 𑀑𑀤𑀦𑀲𑁆𑀲𑀼𑀧𑀓𑀸𑀭𑀓𑀸𑀦𑀺 𑀲𑀽𑀧𑀸𑀤𑀻𑀦𑀺 𑀩𑁆𑀬𑀜𑁆𑀚𑀦𑀸𑀦𑀺, 𑀢𑀣𑀸 𑀲𑀭𑀸𑀦𑀫𑀼𑀧𑀓𑀸𑀭𑀓𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀩𑁆𑀬𑀜𑁆𑀚𑀦𑀫𑁆𑀧𑀦 𑀅𑀤𑁆𑀥𑀫𑀢𑁆𑀢𑀺𑀓𑀁, 𑀯𑀼𑀢𑁆𑀢𑀁 𑀳𑀺𑁋

𑀏𑀓𑀫𑀢𑁆𑀢𑁄 𑀪𑀯𑁂 𑀭𑀲𑁆𑀲𑁄, 𑀤𑀻𑀖𑁄 𑀫𑀢𑁆𑀢𑀤𑁆𑀯𑀬𑀸𑀬𑀼𑀢𑁄;

𑀧𑁆𑀮𑀼𑀢𑁄 𑀢𑀺𑀫𑀢𑁆𑀢𑁄 𑀯𑀺𑀜𑁆𑀜𑁂𑀬𑁆𑀬𑁄, 𑀩𑁆𑀬𑀜𑁆𑀚𑀦𑀁 𑀢𑁆𑀯𑀤𑁆𑀥𑀫𑀢𑁆𑀢𑀺𑀓𑀁𑀢𑀺.

𑀅𑀦𑁆𑀯𑀢𑁆𑀣𑀸𑀢𑀺 𑀅𑀦𑁆𑀯𑀢𑁆𑀣𑀢𑁄, ‘𑀅𑀦𑁆𑀯𑀢𑁆𑀣𑀸 𑀩𑁆𑀬𑀜𑁆𑀚𑀦𑀸’𑀢𑀺 𑀲𑀫𑁆𑀩𑀦𑁆𑀥𑁄.

𑀲𑀚𑀸𑀢𑁆𑀬𑀧𑁂𑀓𑁆𑀔𑀸𑀬 𑀲𑀫𑀼𑀤𑀸𑀬𑀯𑀸𑀘𑀺𑀢𑁆𑀢𑁂𑀧𑀺 𑀓𑀸𑀤𑀬𑁄𑀢𑀻 𑀅𑀦𑀼𑀯𑀢𑁆𑀢𑀦𑀢𑁄 𑀯𑀕𑁆𑀕𑀲𑀤𑁆𑀤𑁂𑀦 𑀓𑀔𑀕𑀖𑀜𑀸𑀤𑀬𑁄𑀯 𑀕𑀬𑁆𑀳𑀦𑁆𑀢𑀺, 𑀧𑀜𑁆𑀘 𑀧𑀭𑀺𑀫𑀸𑀡𑀫𑀲𑁆𑀲 𑀧𑀜𑁆𑀘𑀓𑁄𑀯𑀕𑁆𑀕𑁄, ‘‘𑀢𑀫𑀲𑁆𑀲 𑀧𑀭𑀺𑀫𑀸𑀡𑀁 𑀡𑀺𑀓𑁄 𑀘𑀸’’𑀢𑀺 (𑁪-𑁪𑁧) 𑀓𑁄, 𑀲𑀼𑀢𑁆𑀢𑁂 𑀆𑀤𑀺𑀪𑀽𑀢𑁄 ¶ 𑀧𑀜𑁆𑀘𑀲𑀤𑁆𑀤𑁄 𑀧𑀜𑁆𑀘𑀲𑀗𑁆𑀔𑁆𑀬𑀸𑀧𑀭𑀺𑀘𑁆𑀙𑁂𑀤𑀁 𑀓𑀼𑀭𑀼𑀫𑀸𑀦𑁄 𑀫𑀸𑀯𑀲𑀸𑀦𑀸𑀦𑀁 𑀯𑀕𑁆𑀕𑀸𑀦𑀁 𑀩𑀳𑀼𑀢𑁆𑀢𑀁 𑀕𑀫𑁂𑀢𑀻𑀢𑀺 ‘𑀧𑀜𑁆𑀘𑀓𑀸’𑀢𑀺 𑀯𑀼𑀢𑁆𑀢𑀁, 𑀯𑀕𑁆𑀕𑀸𑀢𑀺 𑀩𑀳𑀼𑀯𑀘𑀦𑀢𑁄 𑀧𑀘𑁆𑀘𑁂𑀓𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀯𑀚𑁆𑀚𑁂𑀦𑁆𑀢𑀺 𑀬𑀓𑀸𑀭𑀸𑀤𑀬𑁄𑀪𑀺 𑀯𑀕𑁆𑀕𑀸, 𑀧𑀞𑀫𑀓𑁆𑀔𑀭𑀯𑀲𑁂𑀦 𑀧𑀦 𑀓𑀯𑀕𑁆𑀕𑀸𑀤𑀺𑀯𑁄𑀳𑀸𑀭𑁄.

𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦 𑀫𑀼𑀘𑁆𑀘𑀸𑀭𑀡𑀢𑁆𑀣𑁄𑀧𑁂𑀢𑁆𑀣 𑀕𑀡𑁆𑀳𑀸𑀢𑀻𑀢𑀺 𑀦𑀺𑀧𑀼𑀩𑁆𑀩𑀸 𑀢𑀢𑁄 𑀓𑀫𑁆𑀫𑀦𑁆𑀢𑀺 𑀢𑁆𑀢𑀧𑁆𑀧𑀘𑁆𑀘𑀬𑁂 𑀜𑁆𑀜𑀺𑀫𑁆𑀳𑀺 𑀧𑀸𑀤𑀺𑀲𑀫𑀸𑀲𑁂 𑀤𑀻𑀖𑁂𑀘 𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 ‘𑀭𑀲𑁆𑀲𑀸’𑀢𑀺𑀆𑀤𑀻𑀫𑀸𑀳, 𑀧𑀻𑀴𑀦𑀢𑁆𑀣𑀢𑁄 𑀦𑀺𑀕𑁆𑀕𑀳𑀦𑀁 𑀦𑀺𑀕𑁆𑀕𑀳𑁄, ‘𑀇-𑀅𑀚𑁆𑀛𑁂𑀦 𑀕𑀢𑀻𑀲𑀼’𑀇𑀘𑁆𑀘𑀲𑁆𑀫𑀸 𑀓𑀢𑁆𑀢𑀭𑀺 [𑀓𑀫𑁆𑀫𑀦𑀺-𑀇𑀢𑀺 𑀯𑀢𑁆𑀢𑀩𑁆𑀩𑀁, 𑀇𑀢𑀁 𑀉𑀘𑁆𑀘𑀸𑀭𑀺𑀢𑀦𑁆𑀢𑀺 𑀅𑀢𑁆𑀣𑁄] 𑀢𑁆𑀢𑀧𑁆𑀧𑀘𑁆𑀘𑀬𑁂 𑀇𑀢𑀁, 𑀦𑀺𑀕𑁆𑀕𑀳𑁂𑀦 𑀇𑀢𑀦𑁆𑀢𑀺 𑀅𑀫𑀸𑀤𑀺𑀲 𑀫𑀸𑀲𑁂 𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 ‘𑀓𑀭𑀡𑀁 𑀦𑀺𑀕𑁆𑀕𑀳𑁂𑀦 𑀯𑀸’𑀢𑀺𑀆𑀤𑀺𑀫𑀸𑀳, 𑀧𑀘𑁆𑀙𑀺𑀫𑀧𑀓𑁆𑀔𑀁 𑀲𑀸𑀥𑁂𑀢𑀼𑀫𑀸𑀳-‘𑀯𑀼𑀢𑁆𑀢𑀁 𑀳𑀻’𑀢𑀺.

𑀘𑀢𑁆𑀣𑀲𑀫𑀸𑀲𑁄𑀢𑀺 𑀇𑀢𑀭𑀻𑀢𑀭𑀬𑁄𑀕𑀤𑁆𑀯𑀦𑁆𑀤𑀲𑀫𑀸𑀲𑁄. 𑀅𑀢𑁆𑀢𑁂𑀢𑀺 𑀫𑀼𑀦𑀺 𑀲𑀤𑁆𑀤𑀸𑀤𑀺𑀯𑀘𑀦𑀻𑀬𑁂 𑀅𑀢𑁆𑀣𑁂, 𑀦𑀫𑀢𑀻𑀢𑀻𑀫𑀲𑁆𑀲𑁂𑀢𑀁 𑀓𑀫𑁆𑀫𑀁,

𑀬𑀁 𑀲𑀩𑁆𑀩𑀯𑀘𑀦𑀁 𑀲𑀩𑁆𑀩, 𑀮𑀺𑀗𑁆𑀕𑀁 𑀲𑀩𑁆𑀩𑀯𑀺𑀪𑀢𑁆𑀢𑀺𑀓𑀁;

𑀢𑀁 𑀲𑀩𑁆𑀩𑀢𑁆𑀣𑁂 𑀦𑀫𑀦𑀢𑁄, 𑀯𑀺𑀤𑀼𑀁 𑀦𑀸𑀫𑀦𑁆𑀢𑀺 𑀢𑀩𑁆𑀩𑀺𑀤𑀽.

𑀇𑀥 𑀦𑀸𑀫𑀲𑀜𑁆𑀜𑀸𑀬𑀸𑀪𑀸𑀯𑁂𑀧𑀺 𑀅𑀦𑁆𑀯𑀢𑁆𑀣𑀩𑀮𑀸𑀬𑁂𑀯 𑀦𑀸𑀫𑀲𑀜𑁆𑀜𑀸 𑀲𑀺𑀤𑁆𑀥𑀸𑀢𑀺 (𑀆𑀳) ‘𑀅𑀦𑁆𑀯𑀢𑁆𑀣𑀩𑁆𑀬𑀧𑀤𑁂𑀲𑁂𑀦𑀸’𑀢𑀺, 𑀲𑁆𑀬𑀸𑀤𑁆𑀬𑀦𑁆𑀢𑀧𑀓𑀢𑀺𑀭𑀽𑀧𑀦𑁆𑀢𑀺 𑀧𑀘𑁆𑀘𑀬𑀸 𑀧𑀞𑀫𑀁 𑀓𑀭𑀻𑀬𑀢𑀻𑀢𑀺 𑀧𑀓𑀢𑀺, 𑀲𑀸 𑀏𑀯 𑀭𑀽𑀧𑀦𑁆𑀢𑀺 𑀧𑀓𑀢𑀺𑀭𑀽𑀧𑀁, 𑀲𑁆𑀬𑀸𑀤𑁆𑀬𑀦𑁆𑀢𑀲𑁆𑀲 𑀧𑀓𑀢𑀺 𑀭𑀽𑀧𑀁 𑀫𑀼𑀦𑀺𑀲𑀤𑁆𑀤𑀸𑀤𑀺 𑀲𑁆𑀬𑀸𑀤𑁆𑀬𑀦𑁆𑀢𑀧𑀓𑀢𑀺𑀭𑀽𑀧𑀁, 𑀅𑀢𑁆𑀣𑀯𑀦𑁆𑀢𑀫𑀥𑀸𑀢𑀼𑀓𑀫𑀧𑁆𑀧𑀘𑁆𑀘𑀬𑀫𑁆𑀧𑀸𑀝𑀺𑀧𑀤𑀺𑀓𑀁, 𑀧𑀤𑀁 𑀧𑀤𑀁 𑀧𑀢𑀺 𑀧𑀝𑀺𑀧𑀤𑁂, 𑀧𑀝𑀺𑀧𑀤𑀁 𑀦𑀺𑀬𑀼𑀢𑁆𑀢𑀁 𑀧𑀸𑀝𑀺𑀧𑀤𑀺𑀓𑀁. 𑀯𑀺𑀲𑁂𑀲𑀦𑁂𑀦𑀸𑀢𑀺 𑀲𑀼𑀢𑁆𑀢𑁂 ‘𑀦𑀫𑀲𑁆𑀲𑀦𑁆𑀢𑁂’𑀢𑀺 𑀯𑀼𑀢𑁆𑀢𑁂𑀦 𑀇𑀯𑀡𑁆𑀡𑀼𑀯𑀡𑁆𑀡𑀸𑀦𑀁 𑀯𑀺𑀲𑁂𑀲𑀦𑁂𑀦. 𑀆𑀔𑁆𑀬𑀸𑀢𑀲𑁆𑀲𑀸𑀢𑀺 𑀧𑀘𑀢𑀺𑀆𑀤𑀺𑀦𑁄. 𑀆𑀤𑀺𑀫𑀚𑁆𑀛𑀯𑀢𑁆𑀢𑀺𑀦𑁄𑀢𑀺 𑀇𑀦𑁆𑀤 𑀉𑀤𑀓𑀲𑀤𑁆𑀤𑀸𑀤𑀻𑀦𑀁 𑀆𑀤𑁄, 𑀧𑀔𑀼𑀫𑀸𑀤𑀻𑀦𑀁 𑀫𑀚𑁆𑀛𑁂𑀘 𑀯𑀢𑁆𑀢𑀺𑀦𑁄. 𑀧𑀤𑁂𑀲𑁂𑀲𑀽𑀢𑀺 ‘‘𑀛𑀮𑀸 𑀲𑀲𑁆𑀲 𑀦𑁄’’𑀢𑀺 (𑁨-𑁮𑁩) 𑀆𑀤𑀺𑀓𑁂𑀲𑀼 𑀲𑀼𑀢𑁆𑀢𑀧𑁆𑀧𑀤𑁂𑀲𑁂𑀲𑀼, 𑀅𑀦𑀺𑀝𑁆𑀞𑀧𑀲𑀗𑁆𑀕 (𑀲𑀗𑁆𑀓𑀁) 𑀦𑀺𑀯𑀢𑁆𑀢𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑁄𑀦𑀸𑀫 [𑀦𑀸𑀫𑀸𑀢𑀺 (𑀧𑁄𑀢𑁆𑀣𑀓𑁂)] 𑀧𑀘𑀢𑀺-𑀇𑀦𑁆𑀤 (𑀉𑀤𑀓 𑀧𑀔𑀼𑀫) 𑀲𑀤𑁆𑀤𑀸𑀤𑀻𑀦 𑀫𑀦𑁆𑀢 𑀆𑀤𑀺𑀫𑀚𑁆𑀛𑀪𑀽𑀢𑀇𑀯𑀡𑁆𑀡𑀸𑀤𑀻𑀦𑀁 ¶ 𑀛𑀮𑀲𑀜𑁆𑀜𑀸 𑀯𑀺𑀥𑀸𑀬 𑀢𑀢𑁄 𑀧𑀭𑀸𑀲𑀁 𑀲𑀸𑀤𑀺 𑀯𑀺𑀪𑀢𑁆𑀢𑀻𑀦𑀁 ‘‘𑀛𑀮𑀸 𑀲𑀲𑁆𑀲 𑀦𑁄’’𑀢𑀺 (𑁨-𑁮𑁧) 𑀆𑀤𑀻𑀳𑀺 ‘𑀦𑁄’ 𑀆𑀤𑁂𑀲𑀸𑀤𑀺𑀫𑁆𑀳𑀺 𑀓𑀢𑁂 ‘𑀧𑀘𑀢𑀺𑀦𑁄, 𑀇𑀦𑁆𑀤𑀦𑁄, 𑀉𑀤𑀓𑀦𑁄, 𑀧𑀔𑀼𑀫𑀦𑁄’𑀢𑀺𑀆𑀤𑀺 𑀭𑀽𑀧𑀧𑁆𑀧𑀲𑀗𑁆𑀕𑁄, 𑀦𑀦𑀼𑀘𑀸𑀤𑀺𑀆𑀤𑀺 𑀘𑁄𑀤𑀦𑀸. 𑀯𑀢𑁆𑀢𑀩𑁆𑀩𑀦𑁆𑀢𑀺 𑀲𑀼𑀢𑁆𑀢𑁂 𑀯𑀢𑁆𑀢𑀩𑁆𑀩𑀁. 𑀩𑁆𑀬𑀸𑀲𑀦𑀺𑀤𑁆𑀤𑁂𑀲𑁂𑀦𑀸𑀢𑀺 𑀅𑀲𑀫𑀸𑀲𑀦𑀺𑀤𑁆𑀤𑁂𑀲𑁂𑀦. 𑀢𑀤𑀬𑀼𑀢𑁆𑀢𑀦𑁆𑀢𑀺𑀆𑀤𑀺 𑀧𑀭𑀺𑀳𑀸𑀭𑁄, 𑀢𑀦𑁆𑀢𑀺 𑀢𑀁 𑀘𑁄𑀤𑁆𑀬𑀁, 𑀲𑀢𑀺𑀳𑀻𑀢𑀺𑀆𑀤𑀺𑀦𑀸 𑀅𑀬𑀼𑀢𑁆𑀢𑀢𑁆𑀢𑀁 𑀲𑀫𑀢𑁆𑀣𑁂𑀢𑀺, 𑀤𑁆𑀯𑀻𑀲𑀼𑀢𑁆𑀢𑀭𑁂𑀲𑀼 𑀬𑁄𑀕𑁂𑀲𑀽𑀢𑀺 𑀉𑀧𑀭𑀺𑀫𑁂𑀲𑀼 ‘‘𑀧𑀺𑀢𑁆𑀣𑀺𑀬𑀁’’ ‘‘𑀖𑀸’’𑀢𑀺 𑀤𑁆𑀯𑀻𑀲𑀼 𑀲𑀼𑀢𑁆𑀢𑁂𑀲𑀼. 𑀇𑀢𑁆𑀣𑀺𑀬𑀦𑁆𑀢𑀺 𑀇𑀤𑀦𑁆𑀢𑀺 ‘‘𑀧𑀺𑀢𑁆𑀣𑀺𑀬’’𑀦𑁆𑀢𑀺 𑀲𑀼𑀢𑁆𑀢𑁂 𑀇𑀢𑁆𑀣𑀺𑀬𑀦𑁆𑀢𑀺 𑀇𑀤𑀁 𑀧𑀤𑀁. 𑀯𑀡𑁆𑀡𑀯𑀺𑀲𑁂𑀲𑀦𑀁 𑀲𑀺𑀬𑀸𑀢𑀺 ‘‘𑀧𑀺𑀢𑁆𑀣𑀺𑀬’’𑀦𑁆𑀢𑀺 𑀲𑀼𑀢𑁆𑀢𑁂 ‘𑀇𑀬𑀼𑀯𑀡𑁆𑀡𑀸’𑀢𑀺 𑀅𑀦𑀼𑀯𑀢𑁆𑀢𑀦𑀢𑁄 ‘𑀇𑀢𑁆𑀣𑀺𑀬𑀁 𑀇𑀯𑀡𑁆𑀡𑀼𑀯𑀡𑁆𑀡𑀸’𑀢𑀺 𑀏𑀯𑀁 𑀇𑀯𑀡𑁆𑀡𑀼 𑀯𑀡𑁆𑀡𑀸 ‘‘𑀖𑁄’’𑀢𑀺 𑀲𑀼𑀢𑁆𑀢𑁂 ‘𑀇𑀢𑁆𑀣𑀺𑀬𑀁 𑀆’𑀢𑀺𑀏𑀯𑀁 𑀅𑀯𑀡𑁆𑀡𑀲𑁆𑀲 𑀘 𑀯𑀺𑀲𑁂𑀲𑀦𑀁 𑀪𑀯𑁂𑀬𑁆𑀬. 𑀯𑀡𑁆𑀡𑀯𑀺𑀲𑁂𑀲𑀦𑁂 𑀯𑀺𑀭𑁄𑀥𑀫𑀸𑀳 ‘𑀏𑀯𑀜𑁆𑀘𑁂’𑀘𑁆𑀘𑀸𑀤𑀺, 𑀦𑀸𑀫𑀲𑁆𑀲𑀦𑁆𑀢𑁂𑀢𑀺 𑀅𑀲𑀫𑀸𑀲𑀦𑀺𑀤𑁆𑀤𑁂𑀲𑁂 𑀢𑁆𑀯𑀯𑀺𑀭𑁄𑀥𑀫𑀸𑀳- ‘𑀩𑁆𑀬𑀸𑀲𑁂’𑀘𑁆𑀘𑀸𑀤𑀺. 𑀲𑀓𑁆𑀓𑀸𑀦𑀸𑀫𑀯𑀺𑀲𑁂𑀲𑀦𑀁 𑀓𑀸𑀢𑀼𑀦𑁆𑀢𑀺 𑀤𑁆𑀯𑀻𑀲𑀼 𑀲𑀼𑀢𑁆𑀢𑁂𑀲𑀼 𑀇𑀢𑁆𑀣𑀺𑀬𑀦𑁆𑀢𑀺𑀆𑀤𑀺𑀦𑀸 𑀯𑀓𑁆𑀔𑀫𑀸𑀦𑀓𑁆𑀓𑀫𑁂𑀦. 𑀦𑀸𑀫𑀲𑁆𑀲 𑀅𑀦𑁆𑀢𑁄 𑀦𑀸𑀫𑀦𑁆𑀢𑁄𑀢𑀺 𑀲𑀫𑀸𑀲𑀲𑁆𑀲 𑀉𑀢𑁆𑀢𑀭𑀧𑀤𑀢𑁆𑀣𑀧𑁆𑀧𑀥𑀸𑀦𑀢𑁆𑀢𑀸 𑀲𑀫𑀸𑀲𑁂 𑀕𑀼𑀡𑀻𑀪𑀽𑀢𑀲𑁆𑀲 𑀦𑀸𑀫𑀲𑁆𑀲 𑀇𑀢𑁆𑀣𑀺𑀬𑀦𑁆𑀢𑀺 𑀇𑀤𑀁 𑀯𑀺𑀲𑁂𑀲𑀦𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀯𑀘𑀦𑀫𑀦𑁆𑀢𑀭𑁂𑀦𑀸𑀢𑀺 𑀧𑀸𑀡𑀺𑀦𑀺𑀬𑀸𑀦𑀫𑀺𑀯 ‘‘𑀬𑀣𑀸𑀲𑀗𑁆𑀔𑁆𑀬𑀫𑀦𑀼𑀤𑁂𑀲𑁄 𑀲𑀫𑀸𑀦𑀁’’𑀢𑀺 (𑁧-𑁩-𑁧𑁦) 𑀲𑀼𑀢𑁆𑀢𑀁 𑀯𑀺𑀦𑀸, 𑀲𑀫𑀸𑀲𑀗𑁆𑀔𑁆𑀬 𑀏𑀢𑁂𑀲𑀦𑁆𑀢𑀺 𑀲𑀫𑀲𑀗𑁆𑀔𑁆𑀬𑀓𑀸, 𑀇𑀢𑀺𑀲𑀤𑁆𑀤𑁄 𑀆𑀤𑁆𑀬𑀢𑁆𑀣𑁄, 𑀢𑁂𑀦𑁋

‘‘𑀆𑀮𑀸𑀧𑀳𑀸𑀲𑀮𑀻𑀮𑀸𑀳𑀺, 𑀫𑀼𑀦𑀺𑀦𑁆𑀤 𑀯𑀺𑀚𑀬𑀸 𑀢𑀯;

𑀓𑁄𑀓𑀺𑀮𑀸 𑀓𑀼𑀫𑀼𑀤𑀸𑀦𑀻 𑀯𑁄, 𑀧𑀲𑁂𑀯𑀦𑁆𑀢𑁂 𑀯𑀦𑀁 𑀚𑀮𑀁’’ (𑁨𑁬𑁦).

𑀇𑀢𑁆𑀣𑀺𑀬𑀁 𑀦𑀸𑀫𑀲𑁆𑀲𑀸𑀢𑀺 𑀘, 𑀅𑀦𑁆𑀢𑁂 𑀇𑀯𑀡𑁆𑀡𑀼𑀯𑀡𑁆𑀡𑀸𑀢𑀺 𑀘 𑀯𑀼𑀢𑁆𑀢𑁂 𑀢𑁂𑀲𑀫𑀸 𑀥𑀸𑀭𑀸𑀥𑁂𑀬𑁆𑀬𑀲𑀫𑁆𑀩𑀦𑁆𑀥𑁄 𑀆𑀥𑁂𑀬𑁆𑀬𑀲𑁆𑀲𑀸𑀥𑀸𑀭𑁂 𑀧𑀯𑀢𑁆𑀢𑀺𑀁 𑀯𑀺𑀦𑀸 𑀦 𑀲𑀫𑁆𑀪𑀯𑀢𑀻𑀢𑀺 𑀅𑀚𑁆𑀛𑀸𑀳𑀸𑀭𑀯𑀲𑁂𑀦 ‘𑀯𑀢𑁆𑀢𑀫𑀸𑀦𑀸’𑀢𑀺 𑀯𑀼𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. 𑀇𑀯𑀡𑁆𑀡𑀼 𑀯𑀡𑁆𑀡𑀸𑀢𑀺 𑀅𑀧𑁂𑀓𑁆𑀔𑀺𑀬‘𑀯𑀺𑀲𑁂𑀲𑀻𑀬𑀦𑁆𑀢𑀻’𑀢𑀺 𑀩𑀳𑀼𑀯𑀘𑀦𑀫𑁂𑀢𑀁 𑀲𑀫𑁆𑀩𑀦𑁆𑀥𑀲𑁆𑀲 𑀧𑀼𑀭𑀺𑀲𑀸𑀥𑀻𑀦𑀢𑀸𑀬 𑀦𑀸𑀫𑀦𑁆𑀢𑀻𑀫𑀺𑀦𑀸 𑀲𑀫𑁆𑀩𑀦𑁆𑀥𑁂 𑀲𑀢𑀺‘𑀯𑀺𑀲𑁂𑀲𑀻𑀬𑀢𑀻’𑀢𑁂𑀓𑀢𑁆𑀢𑁂𑀦 𑀧𑀭𑀺𑀡𑀫𑀢𑀺.

𑀇𑀢𑁆𑀣𑀺𑀬𑀁 ¶ 𑀦𑀸𑀫𑀲𑁆𑀲𑀦𑁆𑀢𑁂𑀢𑀺 𑀘 𑀯𑀢𑁆𑀢𑀢𑁂. 𑀳𑁂𑀝𑁆𑀞𑀸 𑀲𑀩𑁆𑀩𑀢𑁆𑀣 𑀲𑀜𑁆𑀜𑀺𑀦𑁄 𑀦𑀺𑀤𑁆𑀤𑀺𑀲𑀺𑀬 𑀲𑀜𑁆𑀜𑀸𑀬 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀢𑀢𑁆𑀣 𑀯𑀺𑀬 𑀯𑀺𑀲𑀼𑀁 𑀲𑀜𑁆𑀜𑀺𑀦𑁄 𑀧𑀞𑀫𑀫𑀦𑀺𑀤𑁆𑀤𑁂𑀲𑁂 𑀅𑀲𑀦𑁆𑀢𑁄 𑀯𑀺𑀬𑀸𑀢𑀺 𑀤𑁄𑀲𑀮𑁂𑀲𑀫𑀸𑀮𑀫𑁆𑀩𑀺𑀬 𑀘𑁄𑀤𑀬𑀢𑀺 𑀦𑀦𑁆𑀳𑀘𑁂’𑀢𑁆𑀬𑀸𑀤𑀺𑀦𑀸. 𑀢𑀢𑁆𑀣 𑀲𑁂𑀢𑁄𑀢𑀺 𑀯𑀺𑀚𑁆𑀚𑀫𑀸𑀦𑀲𑁆𑀲 𑀲𑀜𑁆𑀜𑀺𑀦𑁄. 𑀓𑀸𑀭𑀺𑀬𑁂𑀦𑀸𑀢𑀺 𑀲𑀜𑁆𑀜𑀸𑀓𑀸𑀭𑀺𑀬𑁂𑀦. 𑀧𑀭𑀺𑀳𑀭𑀢𑀺 ‘𑀦𑀸𑀬𑀁 𑀤𑁄𑀲𑁄’𑀢𑀺𑀆𑀤𑀺𑀦𑀸. 𑀧𑀘𑁆𑀙𑀸𑀯𑀼𑀢𑁆𑀢𑀫𑀢𑁆𑀢𑁂𑀦𑀸𑀢𑀺 ‘‘𑀖𑀸’’𑀢𑀺 𑀲𑀼𑀢𑁆𑀢𑁂 𑀓𑀸𑀭𑀺𑀬𑀺𑀦𑁄 𑀆𑀓𑀸𑀭𑀲𑁆𑀲 𑀧𑀘𑁆𑀙𑀸 𑀯𑀼𑀢𑁆𑀢𑀫𑀢𑁆𑀢𑁂𑀦. 𑀦𑀘𑀸𑀢𑀺 𑀏𑀢𑁆𑀣 𑀘𑀲𑀤𑁆𑀤𑁄 𑀯𑀢𑁆𑀢𑀩𑁆𑀩𑀦𑁆𑀢𑀭𑀲𑀫𑀼𑀘𑁆𑀘𑀬𑁂, 𑀅𑀧𑀭𑀫𑁆𑀧𑀺 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀫𑀦𑀺𑀬𑀫𑀭𑀽𑀧𑀫𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀅𑀦𑀺𑀬𑀫𑀭𑀽𑀧𑀫𑀸𑀘𑀭𑀺𑀬𑀧𑁆𑀧𑀯𑀢𑁆𑀢𑀺𑀢𑁄 𑀲𑀸𑀥𑁂𑀢𑀼𑀫𑀸𑀳 ‘𑀉𑀪𑀬𑀣𑀸𑀧𑀺’𑀘𑁆𑀘𑀸𑀤𑀺.

𑀆𑀲𑀤𑁆𑀤𑁄 𑀆𑀪𑀺𑀫𑀼𑀔𑁆𑀬𑁂, 𑀅𑀦𑀪𑀺𑀫𑀼𑀔𑀫𑀪𑀺𑀫𑀼𑀔𑀁 𑀓𑀢𑁆𑀯𑀸 𑀮𑀧𑀦𑀁 𑀓𑀣𑀦𑀫𑀸𑀮 𑀧𑀦𑀁, 𑀢𑀲𑁆𑀫𑀺𑀁 𑀆𑀮𑀧𑀦𑁂, 𑀆𑀮𑀧𑀦𑀢𑁆𑀣𑁂 𑀯𑀺𑀳𑀺𑀢𑁄 𑀲𑀻𑀢𑀺 𑀅𑀢𑁆𑀣𑁄.

𑀇𑀢𑀺 𑀫𑁄𑀕𑁆𑀕𑀮𑁆𑀮𑀸𑀦𑀧𑀜𑁆𑀘𑀺𑀓𑀸𑀝𑀻𑀓𑀸𑀬𑀁 𑀲𑀸𑀭𑀢𑁆𑀣𑀯𑀺𑀮𑀸𑀲𑀺𑀦𑀺𑀬𑀁

𑀯𑀘𑀦𑀸𑀭𑀫𑁆𑀪𑀬𑁄𑀚𑀦𑀫𑀸𑀳𑁋‘𑀬𑀁 𑀯𑀺𑀲𑁂𑀲𑀦𑀪𑀸𑀯𑁂𑀦𑁂’𑀘𑁆𑀘𑀸𑀤𑀺, 𑀬𑀦𑁆𑀢𑀺 𑀅𑀦𑀺𑀬𑀫𑁂𑀦 ‘‘𑀅𑀢𑁄 𑀬𑁄𑀦𑀁 𑀝𑀸𑀝𑁂’’𑀢𑀺 (𑁨-𑁪𑁩) 𑀆𑀤𑀻𑀲𑀼 𑀅𑀢𑁄𑀢𑀺𑀆𑀤𑀺𑀓𑀁 𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀁 𑀧𑀭𑀸𑀫𑀲𑀢𑀺, 𑀢𑁂𑀦𑀸𑀢𑀺 𑀯𑀺𑀲𑁂 𑀲𑀦𑀢𑁆𑀢𑁂𑀦𑀼-𑀧𑀸𑀤𑀺𑀬𑀫𑀸𑀦𑁂𑀦 𑀬𑀁 𑀲𑀤𑁆𑀤𑀦𑀺𑀤𑁆𑀤𑀺𑀝𑁆𑀞𑁂𑀦 𑀅𑀢𑁄𑀢𑀺𑀆𑀤𑀺𑀓𑁂𑀦 𑀓𑀭𑀡𑀪𑀽𑀢𑁂𑀦, 𑀬𑀣𑀸𑀓𑀣𑀜𑁆𑀘𑀺𑀢𑀩𑁆𑀩𑀢𑁄𑀢𑀺 𑀆𑀤𑁄 𑀫𑀚𑁆𑀛𑁂-𑀦𑁆𑀢𑁂 𑀯𑀸 𑀲𑀩𑁆𑀪𑀸𑀯𑀢𑁄 𑀬𑁂𑀦𑀓𑁂𑀦𑀘𑀺 𑀆𑀓𑀸𑀭𑁂𑀦 𑀅𑀪𑁂𑀤𑁄𑀧𑀘𑀸𑀭𑁂𑀦 𑀅𑀓𑀸𑀭𑀸𑀤𑀺𑀯𑀺𑀲𑁂𑀲𑀦𑀯𑀢𑁄 𑀦𑀸𑀫𑀸𑀤𑀺𑀦𑁄, 𑀢𑀤𑀦𑁆𑀢𑀢𑁆𑀣𑀦𑁆𑀢𑀺 𑀢𑀁 𑀅𑀢𑁄𑀢𑁆𑀬𑀸𑀤𑀺 𑀯𑀺𑀲𑁂𑀲𑀦𑀫𑀦𑁆𑀢𑁂, 𑀦𑀸𑀤𑁄 𑀦 𑀫𑀚𑁆𑀛𑁂 𑀬𑀲𑁆𑀲 𑀢𑀁 𑀢𑀤𑀦𑁆𑀢𑀁, 𑀢𑀁 𑀅𑀢𑁆𑀣𑁄 𑀧𑀬𑁄𑀚𑀦𑀁 𑀬𑀲𑁆𑀲𑀸𑀢𑀺 𑀅𑀜𑁆𑀜𑀧𑀤𑀢𑁆𑀣𑁄, 𑀯𑀢𑁆𑀢𑀸𑀬𑀢𑁆𑀢𑀸𑀢𑀺 𑀯𑀢𑁆𑀢𑀼𑀦𑁄 𑀆𑀬𑀢𑁆𑀢𑀸… 𑀅𑀢𑁆𑀢𑀸𑀯𑀸𑀢𑁆𑀢𑀦𑁄 𑀯𑀘𑀦𑁂 𑀧𑀥𑀸𑀦𑀦𑁆𑀢𑀺, 𑀢𑀲𑁆𑀲𑀸𑀢𑀺 𑀯𑀢𑁆𑀢𑀼𑀦𑁄, 𑀲𑀸𑀢𑀺 𑀯𑀘𑀦𑀺𑀘𑁆𑀙𑀸, 𑀧𑀬𑁄𑀕𑀸𑀦𑀼𑀲𑀸 𑀭𑁂𑀦𑀸𑀢𑀺 ¶ 𑀚𑀺𑀦𑀯𑀘𑀦𑀸𑀦𑀼𑀲𑀸𑀭𑁂𑀦, 𑀇𑀢𑀻𑀢𑀺 𑀓𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄, 𑀇𑀫𑀺𑀦𑀸 𑀓𑀸𑀭𑀡𑁂𑀦𑀸𑀢𑀺 𑀅𑀢𑁆𑀣𑁄, 𑀦 𑀲𑀩𑁆𑀩𑀢𑁆𑀣𑀧𑁆𑀧𑀲𑀗𑁆𑀕𑁄𑀢𑀺 𑀲𑀁𑀳𑀺𑀢𑀸𑀤𑀺𑀯𑀺𑀥𑀺𑀫𑁆𑀳𑀺 𑀲𑀩𑁆𑀩𑀢𑁆𑀣 𑀢𑀤𑀦𑁆𑀢 𑀯𑀺𑀥𑀺𑀧𑁆𑀧𑀲𑀗𑁆𑀕𑁄 𑀦 𑀳𑁄𑀢𑀺, 𑀢𑀣𑀸𑀳𑀺 ‘‘𑀲𑀭𑁄 𑀮𑁄𑀧𑁄 𑀲𑀭𑁂’’𑀢𑀺 (𑁧-𑁨𑁬) 𑀏𑀢𑁆𑀣 𑀲𑀭𑁄𑀢𑀺 𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀘𑀦𑀺𑀘𑁆𑀙𑀸𑀬 𑀲𑀩𑁆𑀪𑀸𑀯𑁂 𑀲𑀭𑁄𑀢𑀺 𑀢𑀢𑁆𑀭𑀸’𑀤𑀻𑀦𑀁 𑀯𑀺𑀲𑁂𑀲𑀦𑀦𑁆𑀢𑀺 𑀬𑀣𑀸𑀓𑀣𑀜𑁆𑀘𑀺𑀲𑀭𑀸𑀤𑀺𑀲𑀭𑀫𑀚𑁆𑀛𑀲𑀭𑀦𑁆𑀢𑀸𑀦𑀁 𑀢𑀢𑁆𑀭𑀸𑀤𑀻𑀦𑀁 𑀮𑁄𑀧𑀧𑁆𑀧𑀲𑀗𑁆𑀕𑁂 ‘‘𑀯𑀺𑀥𑀺𑀩𑁆𑀩𑀺𑀲𑁂𑀲𑀦𑀦𑁆𑀢𑀲𑁆𑀲𑀸’’𑀢𑀺 (𑁧-𑁧𑁩) 𑀲𑀭𑀦𑁆𑀢𑀲𑁆𑀲𑀧𑀲𑀗𑁆𑀕𑁄 𑀲𑀺𑀬𑀸, 𑀦 ‘‘𑀙𑀝𑁆𑀞𑀺𑀬𑀦𑁆𑀢𑀲𑁆𑀲𑀸’’𑀢𑀺 (𑁧-𑁧𑁩) 𑀅𑀦𑁆𑀢𑀲𑁆𑀲… 𑀙𑀝𑁆𑀞𑀻𑀦𑀺𑀤𑁆𑀤𑁂𑀲𑀸𑀪𑀸𑀯𑀸, 𑀢𑀣𑀸 𑀲𑀢𑀺 ‘𑀢𑀢𑁆𑀭𑀺𑀫𑁂’𑀢𑀺𑀆𑀤𑀺𑀫𑁆𑀳𑀺 ‘𑀇𑀫𑁂’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀧𑀬𑁄𑀕𑀁 𑀦𑀸𑀦𑀼𑀲𑀝𑀸 𑀦𑀸𑀫𑀲𑀺𑀬𑀼𑀦𑁆𑀢𑀺 𑀦 𑀲𑀩𑁆𑀩𑀢𑁆𑀣 𑀢𑀤𑀦𑁆𑀢 𑀯𑀺𑀥𑀺𑀧𑁆𑀧𑀲𑀗𑁆𑀕𑁄, 𑀢𑀣𑀸 ‘‘𑀕𑀢𑀺𑀩𑁄𑀥𑀸’’ (𑁨-𑁪) 𑀤𑀺𑀲𑀼𑀢𑁆𑀢𑀸𑀤𑀺𑀫𑁆𑀳𑀺𑀧𑀺 ‘𑀕𑀫𑀬𑀢𑀺 𑀫𑀸𑀡𑀯𑀓𑀁𑀕𑀸𑀫𑀁 𑀢𑁆𑀬𑀸𑀤𑀺𑀧𑁆𑀧𑀲𑀗𑁆𑀕𑁄𑀢𑀺𑀆𑀤𑀺 𑀘 𑀬𑀣𑀸𑀬𑁄𑀕𑀫𑀯𑀕𑀦𑁆𑀢𑀩𑁆𑀩𑀁, 𑀯𑀼𑀢𑁆𑀢𑀺𑀬𑀁 ‘‘𑀅𑀢𑁄 𑀬𑁄𑀦𑀁 𑀝𑀸𑀝𑁂’’𑀢𑀺 𑀲𑀼𑀢𑁆𑀢𑁄𑀤𑀸𑀳𑀭𑀡𑀁 𑀤𑀲𑁆𑀲𑀺𑀢𑀁, ‘‘𑀦𑀭𑀸 𑀦𑀭𑁂’’𑀢𑀺 𑀮𑀓𑁆𑀔𑀺𑀬𑁄𑀤𑀸𑀳𑀭𑀡𑀁.

𑀯𑀘𑀦𑀨𑀮𑀫𑀼𑀧𑀤𑀲𑁆𑀲𑁂𑀢𑀺‘𑀬𑀢𑁆𑀣𑁂’𑀘𑁆𑀘𑀸𑀤𑀺𑀦𑀸, 𑀬𑀢𑁆𑀣 𑀬𑀲𑁆𑀫𑀺𑀁 ‘‘𑀲𑀭𑁄 𑀮𑁄𑀧𑁄 𑀲𑀭𑁂’’𑀢𑁆𑀬𑀸𑀤𑀺𑀓𑁂 𑀲𑀼𑀢𑁆𑀢𑁂, 𑀲𑀢𑁆𑀢𑀫𑀺𑀬𑀸𑀢𑀺 ‘𑀲𑀭𑁂’𑀢𑀺𑀆𑀤𑀺𑀦𑀸 𑀲𑀢𑁆𑀢𑀫𑀺𑀬𑀸, 𑀬𑀲𑁆𑀲𑀸𑀢𑀺 𑀲𑀭𑁄𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀲𑁆𑀲, 𑀓𑀸𑀭𑀺𑀬𑀁 𑀮𑁄𑀧𑀸𑀤𑀺, 𑀲𑀫𑁆𑀩𑀦𑁆𑀥𑀸 𑀯𑀺𑀲𑁂𑀲𑀸𑀢𑀺 𑀲𑀭𑁂𑀢𑁆𑀬𑀸𑀤𑁄 𑀑𑀧𑀲𑀺𑀮𑁂𑀲𑀺𑀓𑀫𑀥𑀺𑀓𑀭𑀡𑀁, 𑀢𑀜𑁆𑀘𑁄𑀧𑀲𑀺𑀮𑁂𑀲𑁂 𑀪𑀯𑀫𑀥𑀺𑀓𑀭𑀡𑀁 𑀧𑀼𑀩𑁆𑀩𑀲𑁆𑀲 𑀯𑀸 𑀧𑀭𑀁 𑀲𑀺𑀬𑀸 𑀧𑀭𑀲𑁆𑀲 𑀯𑀸 𑀧𑀼𑀩𑁆𑀩𑀦𑁆𑀢𑀺 𑀧𑀼𑀩𑁆𑀩𑀧𑀭𑁄𑀧𑀲𑀺 𑀮𑁂𑀲𑀲𑁆𑀲𑀸𑀯𑀺𑀲𑀺𑀝𑁆𑀞𑀢𑁆𑀢𑀸 𑀧𑀼𑀩𑁆𑀩𑀧𑀭𑀸𑀦𑀁 𑀲𑀫𑁆𑀩𑀦𑁆𑀥𑀲𑁆𑀲 𑀅𑀯𑀺𑀲𑁂𑀲𑀸, 𑀧𑀭𑀲𑁆𑀲𑀸𑀧𑀻𑀢𑀺 𑀦 𑀓𑁂𑀯𑀮𑀁 𑀧𑀼𑀩𑁆𑀩𑀲𑁆𑀲𑁂𑀯, 𑀲𑀢𑀻𑀢𑁆𑀬𑀲𑁆𑀫𑀺𑀁 𑀅𑀢𑁆𑀣𑁂 𑀚𑁄𑀢𑀦𑀻𑀬𑁂 𑀲𑀢𑁆𑀢𑀫𑀻 𑀲𑀁𑀲𑀢𑁆𑀢𑀫𑀻 𑀲𑀦𑁆𑀢𑀲𑀤𑁆𑀤𑀲𑁆𑀲 𑀲𑀫𑀸𑀤𑁂𑀲𑁂𑀦, 𑀲𑀢𑁆𑀢𑀜𑁆𑀘𑁂𑀢𑁆𑀬𑀸𑀤𑀺𑀯𑀘𑀦𑀫𑁂𑀯𑀁 𑀲𑀢𑀺 𑀖𑀝𑀢𑁂, 𑀲𑀦𑁆𑀢𑀺 𑀯𑀸 𑀲𑀦𑁆𑀢𑀲𑀤𑁆𑀤𑀢𑁆𑀣𑁂 𑀧𑀸𑀤𑀺, 𑀲𑀼𑀢𑁆𑀢𑁂 𑀅𑀯𑀼𑀢𑁆𑀢𑁂𑀧𑀺 𑀯𑀼𑀢𑁆𑀢𑀺𑀬𑀁 ‘𑀦𑀺𑀤𑁆𑀤𑁂𑀲𑁂’𑀢𑀺 𑀯𑀘𑀦𑁂 𑀓𑀸𑀭𑀡𑀫𑀸𑀳-𑀲𑀢𑁆𑀢𑀜𑁆𑀘𑀸’𑀢𑀺𑀆𑀤𑀺, 𑀦𑀺𑀤𑁆𑀤𑁂𑀲𑀫𑀦𑁆𑀢𑀭𑁂𑀦 𑀲𑀢𑁆𑀢𑀁 𑀦 𑀲𑀫𑁆𑀪𑀯𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀲𑀢𑁆𑀢𑀫𑀺𑀬𑀸 𑀦𑀺𑀤𑁆𑀤𑁂𑀲𑁂 𑀲𑀢𑀺𑀬𑁂𑀯 𑀢𑀁 𑀲𑀫𑁆𑀩𑀦𑁆𑀥𑀸𑀬 𑀲𑀢𑁆𑀢𑀸𑀬 𑀲𑀫𑁆𑀪𑀯𑁄, 𑀅𑀜𑁆𑀜𑀣𑀸 𑀓𑀺𑀫𑀜𑁆𑀜𑀦𑁆𑀢𑀲𑁆𑀲𑀸 𑀧𑀢𑀺𑀝𑁆𑀞𑀸𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀧𑀼𑀩𑁆𑀩𑀲𑀤𑁆𑀤𑀲𑁆𑀲 𑀲𑀫𑁆𑀩𑀦𑁆𑀥𑀺𑀲𑀤𑁆𑀤𑀢𑁆𑀢𑀸 𑀓𑀺𑀦𑁆𑀦𑀺𑀲𑁆𑀲𑀸𑀬 𑀧𑀼𑀩𑁆𑀩𑀢𑁆𑀢𑀫𑀺𑀘𑁆𑀘𑀸𑀳-‘𑀲𑀢𑁆𑀢𑀫𑀺’𑀘𑁆𑀘𑀸𑀤𑀺, 𑀢𑀦𑁆𑀢𑀺 ‘‘𑀲𑀭𑁄 𑀮𑁄𑀧𑁄 𑀲𑀭𑁂’’𑀢𑀺 𑀲𑀼𑀢𑁆𑀢𑀁, 𑀉𑀓𑀸𑀭𑀲𑁆𑀲𑀸𑀢𑀺 ‘𑀯𑁂𑀴𑀼’𑀇𑀘𑁆𑀘𑀢𑁆𑀭 𑀉𑀓𑀸𑀭𑀲𑁆𑀲, 𑀧𑀼𑀩𑁆𑀩𑀲𑁆𑀲…𑀧𑁂… 𑀓𑀭𑀺𑀢𑁆𑀯𑀸 𑀢𑀁𑀫𑀦𑀲𑀺𑀓𑀢𑀜𑁆𑀘𑁄𑀤𑀦𑀁 𑀤𑀲𑁆𑀲𑁂𑀢𑀼𑀫𑀸𑀳-‘𑀢𑀫𑀳’𑀦𑁆𑀢𑀺 ¶ 𑀘𑁆𑀘𑀸𑀤𑀺𑀢𑀺 𑀏𑀯𑀫𑁂𑀢𑁆𑀣 𑀲𑀸𑀚𑁆𑀛𑀸𑀳𑀸𑀭𑁄 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀩𑁆𑀩𑀲𑁆𑀲𑀸𑀢𑀺 𑀲𑀢𑁆𑀢𑀫𑀻 𑀦𑀺𑀤𑁆𑀤𑀺𑀝𑁆𑀞𑀢𑁄 𑀧𑀼𑀩𑁆𑀩𑀲𑁆𑀲, 𑀅𑀦𑀦𑁆𑀢𑀭𑀲𑁆𑀲𑀸𑀢𑀺 𑀅𑀩𑁆𑀬𑀯𑀳𑀺𑀢𑀲𑁆𑀲, 𑀯𑀼𑀢𑁆𑀢𑀁 𑀓𑀺𑀜𑁆𑀘𑀺 𑀦𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀅𑀬𑀫𑀥𑀺𑀧𑁆𑀧𑀸𑀬𑁄 ‘‘𑀢𑀲𑁆𑀫𑀺𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑁂 𑀧𑀼𑀩𑁆𑀩𑀲𑁆𑀲𑀸’’𑀢𑀺 (𑁧-𑁧-𑁬𑁬) 𑀧𑀸𑀡𑀺𑀦𑀺𑀬𑀯𑀘𑀦𑁂 ‘‘𑀤𑀺𑀲𑀺𑀭𑀬𑀫𑀼𑀘𑁆𑀘𑀸𑀭𑀡𑀓𑁆𑀭𑀺𑀬𑁄 𑀦𑀺𑀲𑀤𑁆𑀤𑁄𑀧𑁆𑀬𑀬 𑀫𑀺𑀳 𑀦𑁂𑀭𑀦𑁆𑀢𑀭𑀺𑀬𑀁 𑀚𑁄𑀢𑁂𑀢𑀺, 𑀢𑀢𑁆𑀣‘𑀦𑀺𑀭𑀦𑁆𑀢𑀭𑀁 𑀤𑀺𑀝𑁆𑀞𑁄’𑀢𑀺 𑀧𑀸𑀤𑀺𑀲𑀫𑀸𑀲𑁂 𑀓𑀢𑁂 𑀨𑀼𑀝𑀫𑁂𑀯𑀸𑀦𑀦𑁆𑀢𑀭𑀫𑀼𑀘𑁆𑀘𑀸𑀭𑀺𑀢𑁂𑀢𑁆𑀬𑀫𑀢𑁆𑀣𑁄-𑀯𑀕𑀫𑁆𑀬𑀢𑁂𑀢𑀺 ‘‘𑀧𑀼𑀩𑁆𑀩𑀲𑀤𑁆𑀤𑀲𑁆𑀲 𑀩𑁆𑀬𑀯𑀳𑀺𑀢𑁂𑀧𑀺 𑀧𑀬𑁄𑀕𑀤𑀲𑁆𑀲𑀦𑁂 𑀩𑁆𑀬𑀯𑀳𑀺𑀢𑁂𑀧𑀺 𑀓𑀸𑀭𑀺𑀬𑀁 𑀧𑀧𑁆𑀧𑁄𑀢𑀻’’𑀢𑀺 𑀪𑀲𑁆𑀲𑀓𑀸𑀭𑀸𑀤𑀬𑁄 𑀯𑀡𑁆𑀡𑁂𑀦𑁆𑀢𑀺, 𑀇𑀳 𑀢𑀸𑀤𑀺𑀲𑀯𑀘𑀦𑀸𑀪𑀸𑀯𑁂𑀦 𑀯𑀡𑁆𑀡𑀸𑀤𑀺 𑀩𑁆𑀬𑀯𑀥𑀸𑀦𑁂𑀧𑀺 𑀲𑀺𑀬𑀸’’𑀢𑀺, 𑀲𑀭𑁂𑀘𑁆𑀘𑀸𑀤𑀺𑀧𑀭𑀺𑀳𑀸𑀭𑀯𑀘𑀦𑁂-𑀥𑀺𑀧𑁆𑀧𑀸𑀬 𑀫𑀼𑀩𑁆𑀪𑀸𑀯𑀬𑀢𑀺 ‘𑀬𑀤𑀺𑀧𑀺’𑀘𑁆𑀘𑀸𑀤𑀺𑀦𑀸, 𑀫𑀣𑀼𑀭𑀸𑀬 𑀧𑀸𑀝𑀮𑀺𑀧𑀼𑀢𑁆𑀢𑀓𑀲𑁆𑀲 𑀘𑀸𑀦𑁆𑀢𑀭𑀸𑀴𑁂 𑀕𑀸𑀫𑀸𑀤𑀻𑀦𑀁 𑀲𑀩𑁆𑀪𑀸𑀯𑀸 𑀩𑁆𑀬𑀯𑀥𑀸𑀦𑁂𑀧𑀺 𑀧𑀼𑀩𑁆𑀩𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺𑀬𑀸 𑀤𑀺𑀝𑁆𑀞𑀦𑁆𑀢𑀫𑀸𑀳-‘𑀫𑀣𑀼𑀭𑀸’ 𑀇𑀘𑁆𑀘𑀸𑀤𑀺, 𑀬𑀲𑁆𑀫𑀸 𑀲𑀭𑁂𑀢𑀺 𑀑𑀧𑀲𑀺𑀮𑁂𑀲𑀺𑀓𑀸𑀥𑀸𑀭𑁂 𑀲𑀢𑁆𑀢𑀫𑁆𑀬𑀦𑁆𑀢𑀁 𑀧𑀤𑀁, 𑀢𑀲𑁆𑀫𑀸 𑀩𑁆𑀬𑀯𑀥𑀸𑀦𑁂 𑀲𑀭𑀮𑁄𑀧𑁄 𑀦 𑀳𑁄𑀢𑀻𑀢𑀺 𑀏𑀯𑀁 𑀲𑀗𑁆𑀔𑁂𑀧𑀩𑁆𑀬𑀸𑀔𑁆𑀬𑀸𑀦𑁂𑀦 𑀯𑀼𑀢𑁆𑀢𑀺𑀬 𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀓𑁂𑀯𑀮𑀁 𑀲𑀭𑁂𑀢𑀺 𑀏𑀢𑁆𑀣𑁂𑀯𑀸𑀢𑀺 𑀆𑀳- ‘𑀓𑀸𑀭𑀺𑀬𑁂’𑀘𑁆𑀘𑀸𑀤𑀺, 𑀑𑀧𑀲𑀺𑀮𑁂𑀲𑀺𑀓𑁂𑀬𑁂𑀯𑀸𑀥𑀸𑀭𑁂 𑀪𑀯𑀢𑀻𑀢𑀺 𑀲𑁂𑀲𑁄, 𑀓𑀸𑀭𑀡𑀫𑀸𑀳-‘𑀯𑀢𑁆𑀢𑀺𑀘𑁆𑀙𑀸𑀦𑁆𑀳𑀯𑀺𑀥𑀸𑀦𑀢𑁄 𑀲𑀤𑁆𑀤𑀲𑁆𑀲𑀸’𑀢𑀺, 𑀯𑀢𑁆𑀢𑀼𑀦𑁄 𑀬𑀸 𑀇𑀘𑁆𑀙𑀸 𑀯𑀘𑀦𑀺𑀘𑁆𑀙𑀸 𑀢𑀲𑁆𑀲𑀸 𑀅𑀦𑀼𑀢𑀽𑀮𑁂𑀦 𑀯𑀺𑀥𑀸𑀦𑀢𑁄 𑀅𑀢𑁆𑀣𑀲𑁆𑀲 𑀓𑀣𑀦𑀢𑁄𑀢𑀺 𑀅𑀢𑁆𑀣𑁄,𑀬𑁂𑀦 𑀳𑀺 𑀬𑀫𑀢𑁆𑀣𑀁 𑀯𑀢𑁆𑀢𑀸𑀢𑀺𑀥𑀸𑀢𑀼𑀫𑀺𑀘𑁆𑀙𑀢𑀺 𑀲𑀢𑀻𑀧𑁆𑀬𑀪𑀺𑀥𑀸𑀦𑀲𑀸 𑀫𑀢𑁆𑀣𑀺𑀬𑁂 𑀦 𑀢𑀢𑁄-𑀜𑁆𑀜𑀫𑀢𑁆𑀣𑀁 𑀲𑀤𑁆𑀤𑁄𑀪𑀺𑀤𑀥𑀸𑀢𑀻𑀢𑁆𑀬𑀥𑀺𑀧𑁆𑀧𑀸𑀬𑁄, 𑀯𑀢𑁆𑀢𑀺𑀘𑁆𑀙𑀸 𑀯𑀲𑀸𑀬𑁂 𑀓𑀸𑀭𑀡𑀫𑀸𑀳’𑀯𑀢𑁆𑀢𑀺𑀘𑁆𑀙𑀸𑀧𑀺’𑀘𑁆𑀘𑀸𑀤𑀺, 𑀯𑀢𑁆𑀢𑀼𑀦𑁄 𑀲𑀼𑀢𑁆𑀢𑀓𑀸𑀭𑀲𑁆𑀲 𑀇𑀘𑁆𑀙𑀸 𑀯𑀢𑁆𑀢𑀺𑀘𑁆𑀙𑀸, 𑀓𑀣𑀫𑀼𑀧𑀤𑁂𑀲𑀢𑁄 𑀯𑀢𑁆𑀢𑀺𑀘𑁆𑀙𑀸-𑀯𑀲𑀻𑀬𑀢𑁂’ 𑀓𑀣𑀜𑁆𑀘 𑀲𑀸𑀫𑀢𑁆𑀣𑀺𑀬𑀢𑁄𑀢𑀺 𑀆𑀲𑀗𑁆𑀓𑀺𑀬 𑀢𑀫𑀼𑀧𑀤𑀲𑁆𑀲𑁂𑀢𑀼𑀫𑀸𑀳-‘𑀅𑀢𑁄𑀘𑁂𑀢𑁆𑀬𑀸𑀤𑀺, 𑀅𑀢𑁄 𑀯𑀓𑁆𑀔𑀫𑀸𑀦𑀓𑀸𑀭𑀡𑀸 𑀉𑀧𑀤𑁂𑀲𑀢𑁄 𑀯𑀲𑀻𑀬𑀢𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀓𑀺𑀦𑁆𑀢𑀁 𑀓𑀸𑀭𑀡 𑀫𑀺𑀘𑁆𑀘𑀸𑀳-‘𑀬𑀲𑁆𑀫𑀸’𑀇𑀘𑁆𑀘𑀸𑀤𑀺, 𑀅𑀦𑁆𑀯𑀬𑀲𑀤𑁆𑀤𑁂𑀦𑁂𑀢𑁆𑀣 𑀕𑀼𑀭𑀼𑀧𑀸𑀭𑀫𑁆𑀧𑀭𑀺𑀬𑁄-𑀧𑀤𑁂𑀲𑁄 𑀯𑀺𑀯𑀘𑁆𑀙𑀺𑀢𑁄, 𑀬𑀲𑁆𑀫𑀸 𑀓𑀸𑀭𑀡𑀸 𑀅𑀦𑁆𑀯𑀬𑁄 𑀕𑀼𑀭𑀼𑀧𑀸𑀭𑀫𑁆𑀧𑀭𑀺𑀬𑁄 𑀧𑀤𑁂𑀲𑁄 𑀕𑀼𑀭𑀼𑀓𑀼𑀮𑀫𑀼𑀧𑀕𑀫𑁆𑀫 𑀧𑀜𑁆𑀳𑀓𑀭𑀡𑀸𑀤𑀺𑀦𑀸 𑀅𑀦𑁆𑀯𑀺𑀘𑁆𑀙𑀻𑀬𑀢𑁂 𑀕𑀯𑁂𑀲𑀻𑀬𑀢𑀺, 𑀅𑀢𑁄 𑀓𑀸𑀭𑀡𑀸 𑀕𑀼𑀭𑀼𑀧𑀭𑀫𑁆𑀧𑀭𑀸 𑀕𑀢𑀉𑀧𑀤𑁂𑀲𑀢𑁄 𑀯𑀲𑀻𑀬𑀢𑁄𑀢𑀺 𑀅𑀢𑁆𑀣𑁄, 𑀲𑀸𑀫𑀢𑁆𑀣𑀺𑀬𑀢𑁄-𑀯𑀲𑀸𑀬𑀧𑁆𑀧𑀝𑀺𑀧𑀸𑀤𑀬𑀺𑀢𑀼𑀫𑀸𑀳- ‘𑀲𑀸𑀫𑀢𑁆𑀣𑀺𑀬𑀫𑁆𑀧𑀺’𑀘𑁆𑀘𑀸𑀤𑀺, 𑀲𑀸𑀫𑀢𑁆𑀣𑀺𑀬𑀫𑁆𑀧𑀺 𑀯𑀼𑀘𑁆𑀘𑀢𑁂𑀢𑀺𑀲𑁂𑀲𑁄, 𑀮𑀖𑀼𑀦𑁄𑀧𑀸𑀬𑁂𑀦 𑀲𑀤𑁆𑀤𑀸𑀦𑀫𑀼𑀧𑀮𑀓𑁆𑀔𑀡𑁂 𑀧𑀯𑀢𑁆𑀢𑀻𑀢𑀺 𑀩𑁆𑀬𑀯𑀳𑀺𑀢𑀦𑀺𑀯𑀢𑁆𑀢𑀺𑀬𑀸 𑀯𑀘𑀦𑀦𑁆𑀢𑀭𑀓-𑀭𑀡𑀫𑀦𑀼𑀧𑀦𑁆𑀦𑀁 ¶ , 𑀉𑀧𑀧𑀦𑁆𑀦𑀁 𑀯𑀘𑀦𑀦𑁆𑀢𑀭𑀓𑀭𑀡𑀁, 𑀢𑀲𑁆𑀲 𑀘 𑀑𑀧𑀲𑀺𑀮𑁂𑀲𑀺𑀓𑀸𑀥𑀸𑀭 𑀫𑀦𑁆𑀢𑀭𑁂𑀦 𑀅𑀜𑁆𑀜𑀣𑀸𑀦𑀼𑀧𑀧𑀢𑁆𑀢𑀺𑀬𑀸 𑀆𑀥𑀸𑀭𑀯𑀺𑀲𑁂𑀲𑀧𑁆𑀧𑀝𑀺𑀧𑁆𑀧𑀢𑁆𑀢𑀻𑀢𑀺 𑀇𑀤𑀫𑁂𑀢𑁆𑀣 𑀲𑀸𑀫𑀢𑁆𑀣𑀺𑀬𑀁, 𑀆𑀥𑀸𑀭𑀦𑁆𑀢𑀭𑁂𑀘𑁆𑀘𑀸𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀁 𑀲𑀸𑀫𑀢𑁆𑀣𑀺𑀬𑀁 𑀯𑀺𑀪𑀸𑀯𑁂𑀢𑀺, 𑀆𑀥𑀸𑀭𑀦𑁆𑀢𑀭𑁂𑀧𑀻𑀢𑀺 𑀲𑀩𑁆𑀩𑀢𑁆𑀣 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀧𑀲𑀗𑁆𑀕𑀸𑀪𑀸𑀯𑀢𑁄 𑀅𑀢𑁆𑀣𑀦𑁆𑀢-𑀭𑁂𑀦𑀸𑀧𑀺 𑀆𑀥𑀸𑀭𑀦𑁆𑀢𑀭𑁂𑀧𑀺 𑀑𑀧𑀲𑀺𑀮𑁂𑀲𑀺𑀓𑀸𑀥𑀸𑀭𑁂𑀧𑀺 𑀯𑀘𑀦𑀦𑁆𑀢𑀭𑀧𑁆𑀧𑀲𑀗𑁆𑀕𑁄 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑀲𑀫𑁆𑀪𑀯𑀸 𑀑𑀧𑀲𑀺𑀮𑁂𑀲𑀺𑀓𑀸𑀥𑀸𑀭𑀦𑀺𑀲𑁆𑀲𑀬𑀦𑁂𑀧𑀺 𑀆𑀦𑀺𑀲𑀁𑀲𑁄 𑀦 𑀤𑀺𑀲𑁆𑀲𑀢𑀻𑀢𑀺 𑀲𑀫𑀼𑀘𑁆𑀘𑀬𑀢𑁆𑀣𑁂𑀦𑀸𑀧𑀺 𑀦𑀢𑁆𑀣𑀺 𑀧𑀬𑁄𑀚𑀦𑀦𑁆𑀢𑀺 𑀯𑀚𑁆𑀚𑁂𑀢𑀩𑁆𑀩𑁄 𑀬𑀫𑁆𑀧𑀺 𑀲𑀤𑁆𑀤𑁄𑀢𑀺, 𑀦𑀦𑀼 𑀓𑀺𑀫𑁂𑀯𑀁 𑀯𑀡𑁆𑀡𑀻𑀬𑀢𑁂 𑀧𑀼𑀩𑁆𑀩𑀲𑁆𑀲𑁂𑀯𑁂𑀢𑀺 𑀯𑀘𑀦 𑀫𑁂𑀯𑁄𑀧𑀲𑀺𑀮𑁂𑀲𑀺𑀓𑀫𑀥𑀺𑀓𑀭𑀡𑀁 𑀯𑀺𑀜𑁆𑀜𑀸𑀧𑀬𑀢𑀺… 𑀢𑀢𑁆𑀣𑁂𑀯 𑀧𑀼𑀩𑁆𑀩𑀧𑀭𑀢𑁆𑀢 𑀲𑀫𑁆𑀪𑀯𑀸𑀢𑀺 𑀬𑁄𑀫𑀜𑁆𑀜𑀢𑁂, 𑀢𑀲𑁆𑀲𑁂𑀲𑀸 𑀓𑀧𑁆𑀧𑀦𑀸 𑀦 𑀲𑀗𑁆𑀕𑀢𑀸𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘𑀧𑀼𑀩𑁆𑀩𑀲𑁆𑀲𑀸𑀢𑀺’𑀘𑁆𑀘𑀸𑀤𑀺, 𑀅𑀬𑀼𑀢𑁆𑀢𑀢𑁆𑀢𑁂 𑀓𑀸𑀭𑀡𑀫𑀸𑀳-‘𑀲𑀸𑀫𑀻𑀧𑀺𑀓𑁂𑀧𑀺 𑀢𑀲𑁆𑀲 𑀲𑀫𑁆𑀪𑀯𑀸’𑀢𑀺, ‘𑀕𑀗𑁆𑀕𑀸𑀬𑀁 𑀖𑁄𑀲𑁄’𑀢𑀺 𑀯𑀼𑀢𑁆𑀢𑁂 𑀖𑁄𑀲𑁄 𑀕𑀗𑁆𑀕𑀸𑀬𑀁 𑀧𑀼𑀩𑁆𑀩𑁄 𑀯𑀸 𑀧𑀭𑁄 𑀯𑁂𑀢𑀺 𑀕𑀫𑁆𑀫𑀫𑀸𑀦𑀢𑁆𑀢𑀸 𑀲𑀸𑀫𑀻𑀧𑀺𑀓𑁂𑀧𑁆𑀬𑀥𑀺𑀓𑀭𑀡𑁂 𑀧𑀼𑀩𑁆𑀩𑀧𑀭𑀢𑁆𑀢𑀲𑁆𑀲 𑀲𑀫𑁆𑀪𑀯𑀸𑀢𑀺 𑀅𑀢𑁆𑀣𑁄, 𑀏𑀢𑀸𑀯𑀯𑀼𑀘𑁆𑀘𑀢𑁂𑀢𑀺 𑀧𑀼𑀩𑁆𑀩𑀲𑁆𑀲𑁂𑀯 𑀳𑁄𑀢𑀺 𑀦 𑀧𑀭𑀲𑁆𑀲𑀸𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀘𑁆𑀘𑀢𑁂, 𑀢𑀣𑀸𑀘 𑀯𑀓𑁆𑀔𑀢𑀺-‘𑀓𑀺𑀦𑁆𑀢’𑀦𑁆𑀢𑀺𑀆𑀤𑀺, 𑀅𑀥𑀺𑀓𑀁 𑀩𑁆𑀬𑀯𑀳𑀺𑀢𑀦𑀺𑀯𑀼𑀢𑁆𑀬𑀸𑀤𑀺 𑀦 𑀯𑀼𑀘𑁆𑀘𑀢𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀆𑀤𑀺𑀲𑀤𑁆𑀤𑁂𑀦𑁂𑀢𑁆𑀣 𑀙𑀝𑁆𑀞𑀻𑀧𑀓𑀧𑁆𑀧𑀦𑀸 𑀕𑀳𑀺𑀢𑀸, 𑀙𑀝𑁆𑀞𑀻𑀧𑀓𑀧𑁆𑀧𑀦𑀸𑀧𑀺 𑀲𑀸𑀫𑀢𑁆𑀢𑀺𑀬𑀸 𑀓𑀢𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀧𑀓𑀧𑁆𑀧𑀦𑀁 𑀧𑀓𑀧𑁆𑀧𑀦𑀸𑀯𑀺𑀥𑀸𑀦𑀁, 𑀏𑀯𑀁 𑀫𑀜𑁆𑀜𑀢𑁂 ‘𑀧𑀸𑀡𑀺𑀦𑀺𑀬𑀸 ‘‘𑀙𑀝𑁆𑀞𑀻𑀝𑁆𑀞𑀸𑀦𑁂𑀬𑁄𑀕𑀸’’𑀢𑁆𑀬𑀢𑁄 (𑁧-𑁧-𑁪𑁯) ‘‘𑀢𑀲𑁆𑀫𑀺𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑁂 𑀧𑀼𑀩𑁆𑀩𑀲𑁆𑀲’’ (𑁧-𑁧-𑁬𑁬) ‘‘𑀢𑀲𑁆𑀫𑀸 𑀢𑁆𑀬𑀼𑀢𑁆𑀢𑀭𑀲𑁆𑀲’’ 𑀇𑀢𑀺 (𑁧-𑁧-𑁬𑁭) 𑀧𑀭𑀺𑀪𑀸𑀲𑀸𑀲𑀼𑀢𑁆𑀢𑀤𑁆𑀯𑀬𑁂 𑀙𑀝𑁆𑀞𑀻𑀕𑀳𑀡𑀫𑀦𑀼𑀯𑀢𑁆𑀢𑀺𑀬 ‘𑀢𑀲𑁆𑀫𑀺𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑁂 𑀧𑀼𑀩𑁆𑀩𑀲𑁆𑀲 𑀙𑀝𑁆𑀞𑀻’ ‘𑀢𑀲𑁆𑀫𑀸𑀢𑁆𑀬𑀼𑀢𑁆𑀢𑀭𑀲𑁆𑀲 𑀙𑀝𑁆𑀞𑀻 [𑀦𑀺𑀤𑁆𑀤𑀺𑀝𑁆𑀞𑁂 𑀧𑀼𑀩𑁆𑀩𑀲𑁆𑀲 𑀙𑀝𑁆𑀞𑀻𑀢𑀺 𑀧𑀼𑀩𑁆𑀩𑀲𑁆𑀲 𑀓𑀸𑀭𑀺𑀬𑀺𑀢𑁆𑀢𑀧𑀝𑀺𑀧𑀸𑀤𑀦𑀬𑁄𑀕𑁆𑀕𑁄 𑀙𑀝𑁆𑀞𑀻 𑀢𑀩𑁆𑀩𑁄𑀥𑀓𑀧𑀤𑁂 𑀪𑀯𑀢𑀺𑀢𑁆𑀬𑀢𑁆𑀣𑁄, 𑀏𑀯 𑀥𑀼𑀢𑁆𑀢𑀭𑀲𑁆𑀲𑁂𑀢𑀼 𑀯𑀺. 𑀉𑀚𑁆𑀚𑁄𑀢𑀝𑀻𑀓𑀸] 𑀢𑀺 𑀙𑀝𑁆𑀞𑀻𑀧𑀓𑀧𑁆𑀧𑀦𑀁 𑀧𑀝𑀺𑀧𑀸𑀤𑁂𑀦𑁆𑀢𑀺 ‘𑀬𑀲𑁆𑀫𑀺𑀁 𑀲𑀼𑀢𑁆𑀢𑁂 𑀙𑀝𑁆𑀞𑀻𑀦𑀺𑀤𑁆𑀤𑁂𑀲𑁄 𑀦𑀢𑁆𑀣𑀺, 𑀢𑀢𑁆𑀣 𑀙𑀝𑁆𑀞𑀻𑀧𑀓𑀧𑁆𑀧𑀦𑀸𑀬𑀣𑀸 𑀲𑀺𑀬𑀸’𑀢𑀺, 𑀇𑀥 𑀧𑀦 𑀯𑀘𑀦𑀦𑁆𑀢𑀭𑀸𑀪𑀸𑀯𑁂𑀧𑀺 𑀬𑀢𑁆𑀣 𑀙𑀝𑁆𑀞𑀻𑀦𑀺𑀤𑁆𑀤𑁂𑀲𑁄 𑀦𑀢𑁆𑀣𑀺, 𑀢𑀢𑁆𑀣 𑀲𑀸𑀫𑀢𑁆𑀣𑀺𑀬𑁂𑀦𑁂𑀯 𑀙𑀝𑁆𑀞𑀻𑀧𑀓𑀧𑁆𑀧𑀦𑀸 𑀲𑀺𑀤𑁆𑀥𑀸’𑀢𑀺, 𑀲𑀸𑀫𑀢𑁆𑀣𑀺𑀬𑀫𑀼𑀧𑀤𑀲𑁆𑀲𑁂𑀢𑀺 ‘𑀲𑀢𑁆𑀢𑀫𑀻𑀦𑀺𑀤𑁆𑀤𑁂𑀲𑁂’𑀘𑁆𑀘𑀸𑀤𑀺𑀦𑀸, 𑀅𑀜𑁆𑀜𑀯𑀺𑀪𑀢𑁆𑀢𑀺𑀦𑀺𑀤𑁆𑀤𑀺𑀝𑁆𑀞𑁄𑀧𑀺 𑀧𑀝𑀺𑀧𑀚𑁆𑀚𑀢𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀓𑀸𑀭𑀺𑀬𑀬𑁄 𑀕𑀦𑁆𑀢𑀺 𑀓𑀸𑀭𑀺𑀬𑀲𑀫𑁆𑀩𑀦𑁆𑀥𑀁, 𑀬𑀣𑀸 ‘‘𑀯𑀕𑁆𑀕𑁂 𑀯𑀕𑁆𑀕𑀦𑁆𑀢𑁄’’𑀢𑀺 𑀏𑀢𑁆𑀣𑀸𑀦𑀼𑀯𑀢𑁆𑀢𑀫𑀸𑀦𑀁 𑀦𑀺𑀕𑁆𑀕𑀳𑀻𑀢’𑀦𑁆𑀢𑀺𑀤𑀁 𑀙𑀝𑁆𑀞𑀻𑀬𑀦𑁆𑀢𑀁 𑀯𑀺𑀜𑁆𑀜𑀸𑀬𑀢𑁂, 𑀓𑀣𑀁 𑀯𑀕𑁆𑀕𑁂𑀢𑁂𑀲𑀸 𑀲𑀢𑁆𑀢𑀫𑁆𑀬𑀓𑀢𑀢𑁆𑀣𑀸 ‘‘𑀦𑀺𑀕𑁆𑀕𑀳𑀻𑀢’’𑀦𑁆𑀢𑀺 (𑁧-𑁩𑁮) 𑀧𑀼𑀩𑁆𑀩𑀲𑀼𑀢𑁆𑀢𑁂 𑀓𑀢𑀢𑁆𑀣𑀢𑀸𑀬 𑀧𑀞𑀫𑀸 𑀯𑀺𑀪𑀢𑁆𑀢𑀺𑀬𑀸 ¶ 𑀙𑀝𑁆𑀞𑀻𑀯𑀺𑀪𑀢𑁆𑀢𑀺𑀫𑁆𑀧𑀓𑀧𑁆𑀧𑁂𑀢𑀺 𑀲𑀢𑁆𑀢𑀫𑀺𑀬𑀁 𑀧𑀼𑀩𑁆𑀩𑀲𑁆𑀲𑁂’𑀢𑀺 𑀢𑀣𑁂𑀢𑁆𑀬𑀯𑀕𑀦𑁆𑀢𑀩𑁆𑀩𑀁. 𑀏𑀢𑀸𑀯 𑀯𑀼𑀘𑁆𑀘𑀢𑁂𑀢𑀺 𑀯𑀼𑀢𑁆𑀢𑁂 𑀇𑀤𑀦𑁆𑀢𑀺 𑀦 𑀯𑀺𑀜𑁆𑀜𑀸𑀬𑀢𑁂𑀢𑀺 𑀆𑀳 ‘𑀓𑀺𑀦𑁆𑀢’𑀦𑁆𑀢𑀺𑀆𑀤𑀺, 𑀬𑀤𑀸𑀳𑀺𑀘𑁆𑀘𑀸𑀤𑀺𑀦𑀸 𑀧𑀭𑀺𑀬𑀸𑀬𑀧𑀲𑀗𑁆𑀕𑀓𑁆𑀓𑀫𑀁 𑀤𑀲𑁆𑀲𑁂𑀢𑀺. 𑀓𑀺𑀫𑀺𑀤𑀫𑀼𑀘𑁆𑀘𑀢𑁂 𑀧𑀭𑀺𑀬𑀸𑀬𑀧𑁆𑀧𑀲𑀗𑁆𑀕𑁂 𑀦𑀺𑀬𑀫𑀢𑁆𑀣𑀁 𑀯𑀘𑀦𑀦𑁆𑀢𑀺 𑀦𑀦𑀼 𑀧𑀼𑀩𑁆𑀩𑀧𑀭𑀸𑀦𑀁 𑀬𑀼𑀕𑀧𑀤𑀼𑀧𑁆𑀧𑀢𑁆𑀢𑀺𑀬 𑀫𑀸𑀘𑀭𑀺𑀬𑀯𑀘𑀦𑀧𑁆𑀧𑀫𑀸𑀡𑁂𑀦𑀸𑀧𑁆𑀧𑀝𑀺𑀧𑀢𑁆𑀢𑀺𑀬𑀁 𑀯𑀺𑀚𑁆𑀛𑀦𑀢𑁆𑀣𑀁 𑀯𑀘𑀦𑀦𑁆𑀢𑀺 𑀓𑀲𑁆𑀫𑀸 𑀦𑁄𑀘𑁆𑀘 𑀢𑁂𑀘𑁆𑀘𑀸𑀳- ‘𑀬𑀼𑀕𑀧𑀤𑀼𑀧𑀲𑀺𑀮𑀺𑀝𑁆𑀞𑀸𑀦’𑀦𑁆𑀢𑁆𑀬𑀸𑀤𑀺, 𑀬𑀼𑀕𑀧𑀤𑀼𑀧𑀲𑀺𑀮𑀺𑀝𑁆𑀞𑀸𑀦𑀫𑀲𑀫𑁆𑀪𑀯𑁄𑀢𑀺 𑀲𑀫𑁆𑀩𑀦𑁆𑀥𑁄, 𑀓𑀼𑀢𑁄𑀘𑁆𑀘𑀸𑀳-‘𑀅𑀧𑀭𑀲𑁆𑀲𑀽𑀧𑀲𑀺𑀮𑁂𑀲𑀺𑀓𑀲𑁆𑀲𑀸𑀪𑀸𑀯𑀢𑁄’𑀢𑀺, 𑀅𑀢𑁄𑀢𑀺 𑀬𑀼𑀕𑀧𑀤𑀼𑀪𑀺𑀦𑁆𑀦𑀫𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄, 𑀯𑀘𑀦𑀁 ‘‘𑀲𑀭𑁄 𑀮𑁄𑀧𑀸𑀲𑀭𑁂’’𑀘𑁆𑀘𑀸𑀤𑀺𑀓𑀁 (𑁧-𑁨𑁬) 𑀲𑀼𑀢𑁆𑀢𑀁.

𑀅𑀯𑀥𑀺𑀪𑀸𑀯𑁂𑀦𑀸𑀢𑀺 ‘𑀅𑀢𑁄’𑀘𑁆𑀘𑀸𑀤𑀺𑀦𑀸 𑀅𑀯𑀥𑀺𑀢𑁆𑀢𑁂𑀦, 𑀬𑀲𑁆𑀲𑀸𑀢𑀺 𑀬𑁄 𑀆𑀤𑀺𑀦𑁄, 𑀓𑀸𑀭𑀺𑀬𑀦𑁆𑀢𑀺 ‘𑀝𑀸𑀝𑁂’𑀆𑀤𑀺𑀓𑀁, 𑀧𑀼𑀩𑁆𑀩𑀧𑀭𑀸𑀧𑁂𑀓𑁆𑀔𑀢𑁆𑀢𑁂𑀦𑀸𑀯𑀺𑀲𑁂𑀲𑀸𑀢𑀺 𑀬𑀣𑀸- ‘𑀕𑀸𑀫𑀸 𑀤𑁂𑀯𑀤𑀢𑁆𑀢𑁄’𑀢𑀺 𑀯𑀼𑀢𑁆𑀢𑁂 𑀲𑁄 𑀢𑀢𑁄 𑀧𑀼𑀩𑁆𑀩𑁄 𑀧𑀭𑁄𑀕𑁂𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑁆𑀬𑀯𑀥𑀺𑀪𑀸𑀯𑀲𑁆𑀲 𑀧𑀼𑀩𑁆𑀩𑀧𑀭𑀸𑀧𑁂𑀓𑁆𑀔𑀢𑁆𑀢𑁂𑀦𑀸𑀯𑀺𑀲𑁂𑀲𑁄, 𑀢𑀣𑁂𑀳𑀸𑀧𑀺 ‘‘𑀅𑀢𑁄 𑀬𑁄𑀦𑀁 𑀝𑀸𑀝𑁂’’𑀢𑀺 (𑁨-𑁪𑁧) 𑀯𑀼𑀘𑁆𑀘𑀫𑀸𑀦𑁂 𑀅𑀢𑁄 𑀧𑀼𑀩𑁆𑀩𑁂𑀲𑀁 𑀬𑁄𑀦𑀁 𑀅𑀣𑀯𑀸 𑀧𑀭𑁂𑀲𑀦𑁆𑀢𑀺 𑀧𑀼𑀩𑁆𑀩𑀧𑀭𑀸𑀧𑁂𑀓𑁆𑀔𑀢𑁆𑀢𑁂𑀦𑀸𑀯𑀥𑀺𑀪𑀸𑀯𑀲𑁆𑀲𑀸𑀯𑀺𑀲𑁂𑀲𑀸𑀢𑀺 𑀫𑀜𑁆𑀜𑀢𑁂, 𑀧𑀼𑀭𑁂 𑀯𑀺𑀬𑀸𑀢𑁆𑀬𑀦𑁂𑀦 𑀲𑀢𑁆𑀢𑀫𑀺𑀬𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀦𑀺𑀤𑁆𑀤𑁂𑀲𑀯𑀘𑀦𑁂 𑀓𑀸𑀭𑀡𑀫𑀢𑀺𑀤𑀺𑀲𑀢𑀺, 𑀯𑀼𑀢𑁆𑀢𑀺𑀬𑀁 ‘𑀦𑀭𑀸𑀦𑀫𑁂𑀭𑁂’𑀢𑀺 𑀏𑀢𑁆𑀣 𑀅𑀧𑀯𑀸𑀤𑀯𑀺𑀧𑁆𑀧𑀝𑀺𑀲𑁂𑀥𑁂 𑀲𑀢𑀺𑀧𑀭𑀢𑁆𑀢𑀸 𑀝𑀸𑀝𑁂𑀆𑀤𑁂𑀲𑀸𑀦𑀁 𑀧𑀯𑀢𑁆𑀢𑀺𑀁 ‘‘𑀆𑀤𑀺𑀲𑁆𑀲𑀸’’𑀢𑀺 𑀏𑀢𑁆𑀣 𑀯𑀡𑁆𑀡𑀬𑀺𑀲𑁆𑀲𑀸𑀫, 𑀅𑀣 𑀓𑀺𑀫𑀺𑀫𑀺𑀦𑀸 𑀯𑀘𑀦𑁂𑀦 𑀦𑀦𑀼 𑀬𑀢𑁄 𑀬𑀢𑁆𑀣 𑀧𑀜𑁆𑀘𑀫𑀻 𑀦𑀺𑀤𑁆𑀤𑁂𑀲𑁄 𑀢𑀢𑁆𑀣 𑀲𑀩𑁆𑀩𑀢𑁆𑀣 ‘‘𑀫𑀸𑀦𑀼𑀩𑀦𑁆𑀥𑁄 𑀲𑀭𑀸𑀦𑀫𑀦𑁆𑀢𑀸 𑀧𑀭𑁄’’ (𑁧-𑁨𑁧) 𑀢𑁆𑀬𑀢𑁄 ‘𑀧𑀭𑁄’𑀢𑁆𑀬𑀦𑀼𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑀸𑀢𑀺 𑀢𑀲𑁆𑀲𑀸𑀦𑀼𑀯𑀢𑁆𑀢𑀺𑀢𑀲𑁆𑀲 𑀬𑁄𑀦𑀫𑀺𑀘𑁆𑀘𑀦𑁂𑀦 𑀲𑀸𑀫𑀸𑀦𑀸𑀥𑀺𑀓𑀭𑀡𑁆𑀬𑀸‘𑀧𑀭𑁂𑀲𑀁 𑀬𑁄𑀦𑀁’𑀢𑁆𑀬𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑁂, 𑀢𑀢𑁄 𑀧𑀼𑀩𑁆𑀩𑁂𑀲𑀁 𑀧𑀲𑀗𑁆𑀕𑁄𑀬𑁂𑀯 𑀦𑀢𑁆𑀣𑀻𑀢𑀺, 𑀦𑁂𑀢𑀤𑀢𑁆𑀣𑀺, 𑀧𑀭𑁄𑀢𑀺 𑀢𑁆𑀬𑀦𑀼𑀯𑀢𑁆𑀢𑀫𑀸𑀦𑀁 ‘𑀅𑀢𑁄’𑀢𑀺 𑀧𑀜𑁆𑀘𑀫𑁆𑀬𑀦𑁆𑀢𑁂𑀦 𑀲𑀫𑁆𑀩𑀚𑁆𑀛𑀫𑀸𑀦𑀁 𑀦 𑀓𑁄𑀘𑀺 𑀯𑀸𑀭𑁂𑀢𑀸 𑀅𑀢𑁆𑀣𑀻𑀢𑀺 𑀧𑀭𑀢𑁄-𑀓𑀸𑀭𑀢𑁄 𑀧𑀼𑀩𑁆𑀩𑁂𑀲𑀫𑁆𑀧𑀺 𑀬𑁄𑀦𑀁 𑀝𑀸𑀝𑁂𑀆𑀤𑁂𑀲𑀸 𑀧𑀧𑁆𑀧𑁄𑀦𑁆𑀢𑀻𑀢𑀺 𑀯𑀘𑀦𑁂𑀦𑁂𑀫𑀺𑀦𑀸 𑀪𑀯𑀺𑀢𑀩𑁆𑀩𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘𑀯𑀘𑀦𑁂’𑀘𑁆𑀘𑀸𑀤𑀺, 𑀏𑀯𑀜𑁆𑀘𑀭𑀳𑀺 𑀢𑀤𑁂𑀯𑁄𑀤𑀸𑀳𑀭𑀺𑀢𑀩𑁆𑀩𑀁, 𑀓𑀺𑀁 ‘𑀦𑀭𑀸𑀦𑀭𑁂’ 𑀢𑁆𑀬𑀼𑀤𑀸𑀳𑀝𑀦𑁆𑀢𑀺 𑀘𑁂, 𑀦𑁂𑀲𑀤𑁄𑀲𑁄, 𑀅𑀜𑁆𑀜𑀤𑀢𑁆𑀣𑀁 𑀓𑀸𑀭𑀻𑀬𑀫𑀸𑀦𑀫𑀺𑀳𑀸-𑀧𑁆𑀬𑀢𑁆𑀣𑀯𑀦𑁆𑀢𑀁 𑀳𑁄𑀢𑀻𑀢𑀺, 𑀧𑀼𑀩𑁆𑀩𑀓𑁄 𑀧𑀭𑀺𑀳𑀸𑀭𑁄𑀢𑀺 𑀩𑁆𑀬𑀯 𑀳𑀺𑀢𑀦𑀺𑀯𑀢𑁆𑀢𑀺𑀬𑀸 ¶ 𑀧𑀼𑀩𑁆𑀩𑀲𑀼𑀢𑁆𑀢𑁂 𑀯𑀼𑀢𑁆𑀢𑁄 ‘‘𑀲𑀭𑁂𑀢𑁄𑀧𑀲𑀺𑀮𑁂𑀲𑀺𑀓𑀸𑀥𑀸𑀭𑁄’’𑀢𑀺 𑀧𑀭𑀺𑀳𑀸𑀭𑁄, 𑀦 𑀲𑀫𑁆𑀪𑀯𑀢𑀻𑀢𑀺 𑀇𑀳 𑀲𑀢𑁆𑀢𑀫𑀺𑀬𑀸 𑀅𑀪𑀸𑀯𑀸 𑀦 𑀲𑀫𑁆𑀪𑀯𑀢𑀺, 𑀯𑀘𑀦𑀸𑀦𑀦𑁆𑀢𑀭𑀦𑁆𑀢𑀺 𑀧𑀸𑀡𑀺𑀦𑀺𑀬𑀸𑀦𑀁 𑀦𑀺𑀤𑁆𑀤𑀺𑀝𑁆𑀞𑀕𑁆𑀕𑀳𑀡𑀫𑀺𑀯 𑀩𑁆𑀬𑀯𑀳𑀺𑀢𑀦𑀺𑀯𑀢𑁆𑀢𑀺𑀬𑀸 𑀲𑀼𑀢𑁆𑀢𑀦𑁆𑀢𑀭𑀁, 𑀢𑁂 𑀳𑀺 ‘‘𑀢𑀲𑁆𑀫𑀸𑀢𑁆𑀬𑀼𑀢𑁆𑀢𑀭𑀲𑁆𑀲𑀸’’𑀢𑁆𑀬𑁂𑀢𑁆𑀣 (𑁧-𑁧-𑁬𑁭) 𑀦𑀺𑀤𑁆𑀤𑀺𑀝𑁆𑀞𑀕𑁆𑀕𑀳𑀡𑀫𑀦𑀼𑀯𑀢𑁆𑀢𑀺𑀬 𑀢𑁂𑀦 𑀧𑀼𑀩𑁆𑀩𑁂 𑀯𑀺𑀬 𑀩𑁆𑀬𑀯𑀳𑀺𑀢𑀦𑀺𑀯𑀢𑁆𑀢𑀺𑀫𑁆𑀧𑀝𑀺𑀧𑀸𑀤𑁂𑀦𑁆𑀢𑀺. 𑀅𑀦𑀦𑁆𑀢𑀭𑁂𑀢𑀺𑀯𑀘𑀦𑀸 𑀧𑀘𑁆𑀘𑀸𑀲𑀢𑁆𑀢𑀺𑀬𑀸 𑀦𑀺𑀲𑁆𑀲𑀬𑀦𑀁 𑀯𑀺𑀜𑁆𑀜𑀸𑀬𑀢𑁂, 𑀓𑀢𑀢𑁆𑀣𑀢𑀸𑀬𑀸𑀢𑀺 𑀯𑀘𑀦𑀸 𑀚𑀸𑀢𑀺𑀬𑀸𑀢𑁆𑀬𑀸𑀳- ‘𑀧𑀘𑁆𑀘𑀸𑀲𑀢𑁆𑀬𑀸 𑀚𑀸𑀢𑀺𑀁 𑀲𑀦𑁆𑀦𑀺𑀲𑁆𑀲𑀸𑀬𑀸’𑀢𑀺 𑀚𑀸𑀢𑀺𑀁 𑀲𑀦𑁆𑀦𑀺𑀲𑁆𑀲𑀸𑀬 𑀧𑀘𑁆𑀘𑀸𑀲𑀢𑁆𑀬𑀸 𑀓𑀭𑀡𑀪𑀽𑀢𑀸𑀬 𑀦𑀺𑀯𑀢𑁆𑀢𑀺𑀫𑀸𑀳𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀇𑀫𑀺𑀦𑀸 𑀧𑀘𑁆𑀘𑀸𑀲𑀢𑁆𑀢𑀺 𑀜𑀸𑀬𑀩𑁆𑀬𑀸𑀧𑀦𑀜𑀸𑀬𑀚𑀸𑀢𑀺𑀧𑀤𑀢𑁆𑀣𑀩𑁆𑀬𑀢𑁆𑀢𑀺𑀧𑀤𑀢𑁆𑀣𑁂𑀲𑀼 𑀧𑀘𑁆𑀘𑀸𑀲𑀢𑁆𑀢𑀺𑀜𑀸𑀬𑁄 𑀚𑀸𑀢𑀺𑀧𑀤𑀢𑁆𑀣𑁄𑀘𑁂𑀳 𑀦𑀺𑀲𑁆𑀲𑀻𑀬𑀢𑁂𑀢𑀺 𑀤𑀲𑁆𑀲𑁂𑀢𑀺, 𑀦 𑀳𑀺 𑀓𑁂𑀯𑀮𑀁 𑀚𑀸𑀢𑀺𑀁 𑀦𑀺𑀲𑁆𑀲𑀸𑀬 𑀩𑁆𑀬𑀯𑀳𑀺𑀢𑀦𑀺𑀯𑀢𑁆𑀢𑀺 𑀯𑀢𑁆𑀢𑀼𑀁 𑀲𑀓𑁆𑀓𑀸, 𑀢𑀣𑀸𑀳𑀺 𑀬𑀤𑁂𑀢𑁆𑀣 𑀧𑀘𑁆𑀘𑀸𑀲𑀢𑁆𑀢𑀺𑀜𑀸𑀬𑁄 𑀦 𑀦𑀺𑀲𑁆𑀲𑀺𑀢𑁄, 𑀢𑀤𑀸 𑀩𑁆𑀬𑀸𑀧𑀦𑀜𑀸𑀬𑁂𑀦 𑀩𑁆𑀬𑀯𑀳𑀺𑀢𑁂 𑀘𑀸𑀩𑁆𑀬𑀯𑀳𑀺𑀢𑁂 𑀘𑀸𑀲𑀚𑁆𑀚𑀢𑀻𑀢𑀺 𑀚𑀸𑀢𑀺𑀬𑀸 𑀦𑀺𑀲𑁆𑀲𑀬𑀦𑁂 𑀲𑀢𑁆𑀬𑀧𑀺 𑀩𑁆𑀬𑀯𑀳𑀺𑀢𑁂𑀧𑀺 𑀩𑁆𑀬𑀸𑀧𑁆𑀬𑀫𑀸𑀦𑀸 𑀚𑀸𑀢𑀺 𑀓𑁂𑀦 𑀦𑀺𑀯𑀸𑀭𑀻𑀬𑀢𑁂 𑀦𑀸𑀧𑀺 𑀓𑁂𑀯𑀮𑀁 𑀧𑀘𑁆𑀘𑀸𑀲𑀢𑁆𑀢𑀺𑀦𑁆𑀦𑀺𑀲𑁆𑀲𑀸𑀬 𑀩𑁆𑀬𑀯𑀳𑀺𑀢𑀦𑀺𑀯𑀢𑁆𑀢𑀺 𑀯𑀢𑁆𑀢𑀼𑀁 𑀲𑀓𑁆𑀓𑀸, 𑀢𑀣𑀸𑀳𑁆𑀬𑀲𑀢𑀺 𑀚𑀸𑀢𑀺𑀲𑀦𑁆𑀦𑀺𑀲𑁆𑀲𑀬𑁂𑀦 𑀩𑁆𑀬𑀢𑁆𑀢𑀺𑀦𑀺𑀲𑁆𑀲𑀻𑀬𑀢𑁂, 𑀩𑁆𑀬𑀢𑁆𑀢𑀺𑀬𑀜𑁆𑀘 𑀧𑀤𑀢𑁆𑀣𑁂 𑀧𑀝𑀺𑀮𑀓𑁆𑀔𑀺𑀬𑀁 𑀮𑀓𑁆𑀔𑀡𑀁 𑀧𑀯𑀢𑁆𑀢𑀢𑀻𑀢𑀺 𑀧𑀘𑁆𑀘𑀸𑀲𑀢𑁆𑀢𑀺 𑀜𑀸𑀬𑀦𑀺𑀲𑁆𑀲𑀬𑀦𑁂𑀧𑁆𑀬𑀩𑁆𑀬𑀯𑀳𑀺𑀢𑀫𑁆𑀧𑀢𑀺 𑀬𑀁 𑀮𑀓𑁆𑀔𑀡𑀁 𑀪𑀺𑀦𑁆𑀦𑀁 𑀢𑀤𑀩𑁆𑀬𑀯𑀳𑀺𑀢𑁂 𑀧𑀯𑀢𑁆𑀢𑀁, 𑀬𑀫𑁆𑀧𑀦 𑀩𑁆𑀬𑀯𑀳𑀺𑀢𑀫𑁆𑀧𑀢𑀺 𑀪𑀺𑀦𑁆𑀦𑀁 𑀮𑀓𑁆𑀔𑀡𑀁, 𑀢𑀜𑁆𑀘 𑀯𑀘𑀦𑀧𑁆𑀧𑀫𑀸𑀡𑀢𑁄 𑀫𑀸𑀪𑀯𑀢𑁆𑀯𑀲𑁆𑀲 𑀩𑁆𑀬𑀢𑁆𑀣𑀢𑀸𑀢𑀺 𑀩𑁆𑀬𑀯𑀳𑀺𑀢𑁂𑀧𑀺 𑀧𑀯𑀢𑁆𑀢𑀢𑁂, 𑀢𑀲𑁆𑀫𑀸 𑀉𑀪𑁄𑀧𑀺 𑀦𑀺𑀲𑁆𑀲𑀸𑀬 𑀦𑀻𑀬𑀸𑀢𑀺. 𑀯𑀺𑀲𑀬𑀤𑀲𑁆𑀲𑀦𑀧𑁆𑀧𑀲𑀗𑁆𑀕𑁂 𑀯𑀺𑀲𑀬𑀺𑀤𑀲𑁆𑀲𑀦𑀫𑀢𑁆𑀣𑀩𑁆𑀬𑀢𑁆𑀢𑀺𑀓𑀸𑀭𑀡𑀦𑁆𑀢𑀺 𑀯𑀸𑀓𑁆𑀬𑀦𑁆𑀢𑁄𑀕𑀥𑀧𑀤𑀸𑀦𑀫𑀢𑁆𑀣𑀫𑁆𑀧𑀞𑀫𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀲𑀫𑀸𑀲𑀸𑀤𑀺𑀓𑀁 𑀤𑀲𑁆𑀲𑁂𑀢𑀼𑀁 ‘𑀓𑀢𑁄’𑀢𑁆𑀬𑀸𑀤𑀺𑀓𑀫𑀸𑀭𑀤𑁆𑀥𑀁, 𑀚𑀸𑀢𑀺𑀮𑀓𑁆𑀔𑀡𑁄𑀢𑀺 𑀅𑀩𑁆𑀬𑀯𑀳𑀺𑀢𑀢𑁆𑀢𑀚𑀸𑀢𑀺𑀲𑀪𑀸𑀯𑁄, ‘𑀑𑀲𑀥𑁆𑀬𑁄’𑀢𑀺 𑀏𑀢𑁆𑀣 𑀲𑀓𑀸𑀭𑁂 𑀅𑀓𑀸𑀭𑀸 𑀧𑀭𑀲𑁆𑀲 𑀥𑀓𑀸𑀭𑁂𑀦 𑀩𑁆𑀬𑀯𑀳𑀺𑀢𑀲𑁆𑀲 𑀬𑁄𑀲𑁆𑀲 𑀯𑀺𑀬𑀸𑀯𑀲𑁂𑀲𑀸𑀦𑀫𑁆𑀧𑀺 𑀲𑀩𑁆𑀪𑀸𑀯𑀢𑁄 𑀯𑀼𑀢𑁆𑀢𑀁-‘𑀬𑁄𑀧𑁆𑀧𑀪𑀼𑀢𑀻𑀦’𑀦𑁆𑀢𑀺, 𑀚𑀸𑀢𑀺 𑀲𑀸𑀫𑀜𑁆𑀜𑀁, 𑀬𑀸𑀯𑀢𑀺 𑀯𑀺𑀲𑀬𑁂𑀢𑀺 𑀕𑀯𑀸𑀤𑀺𑀓𑁂 𑀬𑀢𑁆𑀢𑀓𑁂 𑀯𑀺𑀲𑀬𑁂, 𑀓𑀸𑀫𑀘𑀸𑀭𑀢𑁄 𑀯𑀺𑀲𑀬 𑀧𑀭𑀺𑀲𑀫𑀢𑁆𑀢𑀺𑀬𑀸 𑀤𑀺𑀝𑁆𑀞𑀦𑁆𑀢𑀫𑀸𑀳-‘𑀢𑀁 𑀬𑀣𑁂’𑀢𑀺, 𑀪𑁄𑀚𑀬𑁂𑀢𑀻𑀢𑀺 𑀏𑀢𑁆𑀣 𑀪𑁄𑀚𑀬𑁂𑀇𑀢𑀻𑀢𑀺 𑀧𑀤𑀘𑁆𑀙𑁂𑀤𑁄, 𑀓𑀢𑁄𑀳𑀺 𑀚𑀸𑀢𑁆𑀬𑀢𑁆𑀣𑁄 𑀓𑀲𑀺𑀡𑁄𑀢𑀺 𑀬𑀲𑁆𑀫𑀸 𑀲𑀓𑀮𑁄 𑀩𑁆𑀭𑀸𑀳𑁆𑀫𑀡 𑀚𑀸𑀢𑀺𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀧𑀭𑀺𑀲𑀫𑀢𑁆𑀢𑁄, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄, 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺- ¶ ‘𑀬𑀸𑀯 𑀤𑀺𑀝𑁆𑀞𑀫𑁆𑀪𑁄𑀚𑀬𑁂’𑀢𑀺 𑀯𑀼𑀢𑁆𑀢𑁂 [𑀯𑀼𑀢𑁆𑀢𑁂𑀦 (𑀧𑁄𑀢𑁆𑀣𑀓𑁂)] 𑀲𑀦𑁆𑀢𑀸𑀬 𑀲𑀸𑀫𑀜𑁆𑀜𑀯𑀼𑀢𑁆𑀢𑀺 𑀩𑁆𑀭𑀸𑀳𑁆𑀫𑀡𑀲𑀤𑁆𑀤𑀧𑁆𑀧𑀬𑁄𑀕𑀲𑀸𑀫𑀢𑁆𑀣𑀺𑀬𑀸 𑀧𑀘𑁆𑀘𑁂𑀓𑀫𑁆𑀪𑁄𑀚𑀦𑀓𑀺𑀭𑀺𑀬𑀸 𑀓𑀢𑀸 𑀦𑀸𑀫 𑀳𑁄𑀢𑀺, 𑀬𑀢𑁄 𑀓𑀲𑀺𑀡𑁄𑀧𑀺 𑀚𑀸𑀢𑁆𑀬𑀢𑁆𑀣𑁄 𑀧𑀭𑀺𑀲𑀫𑀢𑁆𑀢𑁄 𑀦𑀸𑀫𑀸𑀢𑀺. ‘‘𑀩𑁆𑀬𑀜𑁆𑀚𑀦𑁂 𑀤𑀻𑀖𑀭𑀲𑁆𑀲𑀸’’𑀢𑀺 (𑁧-𑁩𑁩) 𑀲𑀼𑀢𑁆𑀢𑁂 𑀩𑁆𑀬𑀜𑁆𑀚𑀦𑁂𑀢𑀺 𑀲𑀢𑁆𑀢𑀫𑀻 𑀧𑀼𑀩𑁆𑀩𑀲𑁆𑀲 𑀤𑀻𑀖𑀸𑀤𑀺𑀯𑀺𑀥𑀺𑀫𑁆𑀳𑀺 𑀘𑀭𑀺𑀢𑀢𑁆𑀢𑀸 ‘‘𑀲𑀭𑀫𑁆𑀳𑀸 𑀤𑁆𑀯𑁂’’𑀢𑀺 (𑁧-𑁩𑁪) 𑀏𑀢𑁆𑀣 𑀲𑀭𑀫𑁆𑀳𑀸𑀢𑀺 𑀧𑀜𑁆𑀘𑀫𑁆𑀬𑀓 𑀢𑀢𑁆𑀣𑀸, 𑀢𑀢𑁄 𑀧𑀜𑁆𑀘𑀫𑀻𑀦𑀺𑀤𑁆𑀤𑁂𑀲𑀲𑁆𑀲 𑀩𑀮𑀻𑀬𑀢𑁆𑀢𑀁, 𑀢𑀢𑁄 ‘‘𑀲𑀢𑁆𑀢𑀫𑀺𑀬𑀁 𑀧𑀼𑀩𑁆𑀩𑀲𑁆𑀲’’ ‘‘𑀧𑀜𑁆𑀘𑀫𑀺𑀬𑀁 𑀧𑀭𑀲𑁆𑀲𑀸’’𑀢𑀺 𑀤𑁆𑀯𑀺𑀦𑁆𑀦𑀁 𑀧𑀭𑀲𑁆𑀲 𑀲𑀫𑀼𑀝𑁆𑀞𑀸𑀧𑀦𑁂 ‘𑀩𑁆𑀬𑀜𑁆𑀚𑀦𑁂’𑀢𑀺 𑀲𑀢𑁆𑀢𑀫𑀻 𑀧𑀭𑀲𑁆𑀲 𑀓𑀸𑀭𑀺𑀬 𑀬𑁄𑀕𑀺𑀢𑀸𑀬 𑀅𑀢𑁆𑀣𑀢𑁄 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁂𑀦 𑀙𑀝𑁆𑀞𑀻𑀪𑀸𑀯𑁂𑀦 𑀧𑀭𑀺𑀡𑀫𑀢𑀻… 𑀤𑁆𑀯𑀺𑀦𑁆𑀦𑀁 𑀲𑀼𑀢𑁆𑀢𑀸𑀦𑀁 𑀯𑀺𑀧𑁆𑀧𑀝𑀺𑀲𑁂𑀥𑁂 𑀧𑀭𑀲𑁆𑀲 𑀩𑀮𑀻 𑀬𑀢𑁆𑀢𑀸𑀯𑀸𑀢𑀺 𑀏𑀢𑀸𑀤𑀺𑀲𑀲𑀸𑀫𑀢𑁆𑀣𑀺𑀬𑀲𑀩𑁆𑀪𑀸𑀯𑀢𑁄 𑀯𑀼𑀢𑁆𑀢𑀁-‘𑀙𑀝𑁆𑀞𑀻𑀧𑀓𑀧𑁆𑀧𑀦𑀸𑀧𑀺 𑀧𑀼𑀭𑁂𑀯𑀺𑀬 𑀲𑀸𑀫𑀢𑁆𑀣𑀺𑀬𑀸’𑀢𑀺.

𑀓𑀺𑀜𑁆𑀘𑀺 𑀅𑀦𑁆𑀢𑀲𑁆𑀲 𑀲𑀫𑁆𑀧𑀢𑁆𑀢𑀦𑁆𑀢𑀺 𑀬𑀁 𑀝𑀸𑀦𑀼𑀩𑀦𑁆𑀥𑀫𑀦𑁂𑀓𑀯𑀡𑁆𑀡𑀁 𑀦 𑀳𑁄𑀢𑀺, 𑀢𑀁 ‘‘𑀙𑀝𑁆𑀞𑀺𑀬𑀦𑁆𑀢𑀲𑁆𑀲𑁂’’ (𑁧-𑁧𑁭) 𑀢𑁆𑀬𑀦𑁆𑀢𑀲𑁆𑀲 𑀧𑀢𑁆𑀢𑀁, 𑀓𑀺𑀜𑁆𑀘𑀺 𑀲𑀩𑁆𑀩𑀲𑁆𑀲𑁂𑀢𑀺 ‘‘𑀝𑀸𑀦𑀼𑀩𑀦𑁆𑀥𑀸𑀦𑁂𑀓𑀯𑀡𑁆𑀡𑀸 𑀲𑀩𑁆𑀩𑀲𑁆𑀲𑁂𑀢𑀺’’ (𑁧-𑁧𑁯) 𑀝𑀸𑀦𑀼𑀩𑀦𑁆𑀥𑀫𑀦𑁂𑀓𑀯𑀡𑁆𑀡𑀜𑁆𑀘 𑀓𑀸𑀭𑀺𑀬𑀁 𑀲𑀩𑁆𑀩𑀲𑁆𑀲 𑀧𑀢𑁆𑀢𑀁. 𑀬𑀤𑀦𑁆𑀢𑀪𑀸𑀯𑀺𑀓𑀸𑀭𑀺𑀬𑀁𑀢𑁆𑀬𑀸𑀤𑀺𑀦𑀸 𑀯𑀘𑀦𑀨𑀮𑀫𑀼𑀧𑀤𑀲𑁆𑀲𑁂𑀦𑁆𑀢𑁄 ‘𑀙𑀝𑁆𑀞𑀻𑀬𑀦𑁆𑀢𑀲𑁆𑀲𑁂’𑀢𑀻𑀫𑀲𑁆𑀲𑀸𑀧𑀯𑀸𑀤𑁄 𑀬𑀁 𑀬𑁄𑀕𑁄𑀢𑀺 𑀤𑀲𑁆𑀲𑁂𑀢𑀺, 𑀢𑀲𑁆𑀲𑀸𑀬𑀫 𑀧𑀯𑀸𑀤𑁄 𑀳𑁄𑀢𑀼 𑀝𑀸𑀦𑀼𑀩𑀦𑁆𑀥𑀸𑀤𑀺𑀓𑀸𑀭𑀺𑀬𑀁 𑀓𑀣𑀦𑁆𑀢𑀺 𑀆𑀳-‘𑀝𑀸𑀦𑀼𑀩𑀦𑁆𑀥𑁂’𑀘𑁆𑀘𑀸𑀤𑀺, 𑀯𑀺𑀧𑁆𑀧𑀝𑀺𑀲𑁂𑀥𑀸𑀢𑀺 𑀅𑀧𑀯𑀸𑀤𑀯𑀺𑀧𑁆𑀧𑀝𑀺𑀲𑁂𑀥𑀸, ‘‘𑀙𑀝𑁆𑀞𑀺𑀬𑀦𑁆𑀢𑀲𑁆𑀲𑁂’𑀢𑀺 𑀳𑀺 𑀉𑀲𑁆𑀲𑀕𑁆𑀕𑁄, 𑀢𑀲𑁆𑀲𑀸𑀧𑀯𑀸𑀤𑀸 ‘‘𑀆𑀤𑀺𑀲𑁆𑀲’’ ‘‘𑀝𑀸𑀦𑀼𑀩𑀦𑁆𑀥𑀸𑀦𑁂𑀓𑀯𑀡𑁆𑀡𑀸 𑀲𑀩𑁆𑀩𑀲𑁆𑀲𑁂’’𑀢𑁆𑀬𑁂𑀢𑁂, ‘‘𑀆𑀤𑀺𑀲𑁆𑀲𑀸’’𑀢𑀻𑀫𑀲𑁆𑀲𑀸𑀯𑀓𑀸𑀲𑁄 ‘𑀢𑁂𑀭𑀲𑀸’𑀢𑀺, ‘‘𑀝𑀸𑀦𑀼𑀩𑀦𑁆𑀥𑀸𑀦𑁂𑀓𑀯𑀡𑁆𑀡𑀸 𑀲𑀩𑁆𑀩𑀲𑁆𑀲𑀸’’𑀢𑀻𑀫𑀲𑁆𑀲𑀸𑀯𑀓𑀸𑀲𑁄 ‘𑀏𑀲𑀼, 𑀅𑀦𑁂𑀦𑀸’𑀢𑀺, 𑀇𑀳𑁄𑀪𑀬𑀫𑁆𑀧𑀧𑁆𑀧𑁄𑀢𑀺 ‘‘𑀅𑀢𑁄 𑀬𑁄𑀦𑀁 𑀝𑀸𑀝𑁂’’ (𑁨-𑁪𑁧) ‘‘𑀦𑀭𑀸𑀦𑀭𑁂’’ ‘‘𑀅𑀢𑁂𑀦’’ (𑁨-𑁧𑁦𑁮) ‘‘𑀚𑀦𑁂𑀦𑀸’’𑀢𑀺 (𑀢𑀢𑁆𑀣) ‘‘𑀝𑀸𑀦𑀼𑀩𑀦𑁆𑀥𑀸𑀦𑁂𑀓𑀯𑀡𑁆𑀡𑀸 𑀲𑀩𑁆𑀩𑀲𑁆𑀲𑁂’’𑀢𑀻𑀤𑀫𑁆𑀧𑀯𑀢𑁆𑀢𑀢𑀻𑀢𑀺 𑀢𑁂𑀲𑀫𑀧𑀯𑀸𑀤𑀸𑀦𑀁 𑀯𑀺𑀧𑁆𑀧𑀝𑀺𑀲𑁂𑀥𑀸 𑀲𑀩𑁆𑀩𑀸𑀤𑁂𑀲𑁄 𑀪𑀯𑀢𑀺. ‘‘𑀙𑀝𑁆𑀞𑀺𑀬𑀦𑁆𑀢𑀲𑁆𑀲𑀸’’𑀢𑀺 𑀤𑀲𑀲𑀤𑁆𑀤𑁂-𑀦𑁆𑀢𑀲𑁆𑀲 𑀧𑀢𑁆𑀢𑁄𑀧𑀺 𑀢𑀤𑀧𑀯𑀸𑀤𑀢𑁆𑀢𑀸 ‘‘𑀆𑀤𑀺𑀲𑁆𑀲𑀸’’𑀢𑀺𑀆𑀤𑀺𑀪𑀽𑀢𑀲𑁆𑀲 𑀤𑀓𑀸𑀭𑀲𑁆𑀲 𑀳𑁄𑀢𑀻𑀢𑀺 𑀆𑀳 ‘𑀤𑀓𑀸𑀭𑀲𑁆𑀲𑀭𑁄’𑀢𑀺.

𑀓𑁄𑀢𑁆𑀣𑁄𑀦𑁆𑀢 ¶ 𑀲𑀤𑁆𑀤𑀲𑁆𑀲𑁂𑀘𑁆𑀘𑀸𑀳-‘𑀅𑀦𑁆𑀢𑁄𑀯𑀲𑀸𑀦’𑀫𑀺𑀘𑁆𑀘𑀸𑀤𑀺, ‘‘𑀯𑀡𑁆𑀡𑀲𑁆𑀲𑀦𑁆𑀢𑀲𑁆𑀲’’𑀢𑀺 (𑁧-𑁧-𑁫𑁨) 𑀲𑀼𑀢𑁆𑀢𑁂 𑀯𑀡𑁆𑀡𑀕𑁆𑀕𑀳𑀡𑀫𑀦𑁆𑀢𑀯𑀺𑀲𑁂𑀲𑀦𑀸𑀬𑁄𑀧𑀤𑀺𑀝𑁆𑀞𑀁 𑀧𑀸𑀡𑀺𑀦𑀺𑀦𑀸-𑀅𑀦𑁆𑀢𑀲𑁆𑀲 𑀧𑀤𑀲𑁆𑀲 𑀯𑀸𑀓𑁆𑀬𑀲𑁆𑀲 𑀯𑀸 𑀫𑀸𑀪𑀯𑀻’𑀢𑀺, 𑀇𑀳 𑀢𑁆𑀯𑀦𑀢𑁆𑀣𑀓𑀁 𑀯𑀡𑁆𑀡𑀕𑁆𑀕𑀳𑀡𑀁 𑀩𑁆𑀬𑀯𑀘𑁆𑀙𑁂𑀚𑁆𑀚𑀸𑀪𑀸𑀯𑀸𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘𑀲𑁄 𑀘𑁂’ 𑀢𑁆𑀬𑀸𑀤𑀺, 𑀦𑀦𑀼 𑀩𑁆𑀭𑀳𑁆𑀫𑀲𑁆𑀲𑀸𑀢𑀺 𑀯𑀺𑀲𑁂𑀲𑀦𑀢𑁆𑀣𑁂𑀦 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑁄 𑀫𑀳𑀸𑀩𑁆𑀭𑀳𑁆𑀫𑀲𑀤𑁆𑀤𑁄 𑀙𑀝𑁆𑀞𑀻𑀦𑀺𑀤𑁆𑀤𑀺𑀝𑁆𑀞𑁄 𑀦𑀸𑀫𑀸𑀢𑀺 ‘‘𑀩𑁆𑀭𑀳𑁆𑀫𑀲𑁆𑀲𑀼 𑀯𑀸’’𑀢𑀺 (𑁨-𑁧𑁯𑁪) 𑀉𑀆𑀤𑁂𑀲𑁄 ‘‘𑀙𑀝𑁆𑀞𑀺𑀬𑀦𑁆𑀢𑀲𑁆𑀲𑀸’’𑀢𑀺 𑀅𑀦𑁆𑀢𑀩𑁆𑀭𑀳𑁆𑀫𑀲𑀤𑁆𑀤𑀲𑁆𑀲 𑀧𑀧𑁆𑀧𑁄𑀢𑀺, 𑀢𑀣𑀸 𑀲𑀢𑀺 ‘𑀦 𑀳𑀺 𑀙𑀝𑁆𑀞𑀻 𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀅𑀦𑁆𑀢𑀁 𑀧𑀤𑀁 𑀯𑀸𑀓𑁆𑀬𑀁 𑀯𑀸 𑀲𑀫𑁆𑀪𑀯𑀢𑀻’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺, 𑀯𑀼𑀘𑁆𑀘𑀢𑁂- 𑀦 𑀯𑀺𑀲𑁂𑀲𑀦𑀢𑁆𑀣𑁂𑀦𑀸𑀓𑁆𑀔𑁂𑀧𑀫𑀢𑁆𑀢𑁂𑀦 𑀫𑀳𑀸𑀩𑁆𑀭𑀳𑁆𑀫𑀲𑀤𑁆𑀤𑁄 𑀙𑀝𑁆𑀞𑀻 𑀦𑀺𑀤𑁆𑀤𑀺𑀝𑁆𑀞𑁄 𑀦𑀸𑀫 𑀪𑀯𑀢𑀻𑀢𑀺 𑀦 𑀩𑁆𑀭𑀳𑁆𑀫𑀲𑀤𑁆𑀤𑀲𑁆𑀲 𑀲𑀩𑁆𑀩𑀲𑁆𑀲𑀸𑀤𑁂𑀲𑀧𑁆𑀧𑀲𑀗𑁆𑀕𑁄, 𑀫𑀳𑀸𑀩𑁆𑀭𑀳𑁆𑀫𑀲𑀤𑁆𑀤𑁂 𑀯𑀸 𑀩𑁆𑀭𑀳𑁆𑀫𑀲𑀤𑁆𑀤𑁄 𑀅𑀢𑁆𑀣𑀻𑀢𑀺 𑀢𑀲𑁆𑀲𑀸𑀦𑁆𑀢𑀲𑁆𑀲 𑀉𑀢𑁆𑀢𑀁 𑀯𑀺𑀥𑀻𑀬𑀢𑁂.

‘‘𑀙𑀝𑁆𑀞𑀺𑀬𑀦𑁆𑀢𑀲𑁆𑀲𑁂’’𑀢𑁆𑀬𑀦𑁂𑀦𑁂𑀯𑀸𑀯𑀺𑀲𑁂𑀲𑁂𑀦 𑀯𑀸𑀦𑀼𑀩𑀦𑁆𑀥𑀓𑀸𑀭𑀺𑀬𑁂𑀧𑁆𑀬𑀦𑁆𑀢𑀲𑁆𑀲 𑀲𑀺𑀤𑁆𑀥𑁂 𑀓𑀺𑀫𑀢𑁆𑀣𑁄𑀬𑀫𑀸𑀭𑀫𑁆𑀪𑁄𑀢𑁆𑀬𑀸𑀲𑀗𑁆𑀓𑀺𑀬 𑀝𑀸𑀦𑀼𑀩𑀦𑁆𑀥𑀸𑀢𑁆𑀬𑀸𑀤𑀺𑀦𑀸 𑀯𑀘𑀦𑀨𑀮𑀫𑀼𑀧𑀤𑀲𑁆𑀲𑁂𑀦𑁆𑀢𑁄 ‘𑀩𑀸𑀥𑀓𑀩𑀸𑀥𑀦𑀢𑁆𑀣𑁄-𑀬𑀫𑀸𑀭𑀫𑁆𑀪𑁄’𑀢𑀺-𑀯𑀤𑀢𑀺, 𑀢𑀣𑀸𑀳𑀺 ‘‘𑀙𑀝𑁆𑀞𑀺𑀬𑀦𑁆𑀢𑀲𑁆𑀲𑁂’’𑀢𑁆𑀬𑀲𑁆𑀲 𑀩𑀸𑀥𑀓𑁄 ‘‘𑀝𑀸𑀦𑀼𑀩𑀦𑁆𑀥𑀸𑀦𑁂𑀓𑀯𑀡𑁆𑀡𑀸 𑀲𑀩𑁆𑀩𑀲𑁆𑀲𑁂’’𑀢𑀺, 𑀢𑀲𑁆𑀲 𑀘 ‘‘𑀯𑀸𑀦𑀼𑀩𑀦𑁆𑀥𑁄’’𑀢𑁆𑀬𑀬𑀁 𑀬𑁄𑀕𑁄 𑀩𑀸𑀥𑀓𑁄𑀢𑀺 𑀩𑀸𑀥𑀓𑀩𑀸𑀥𑀦𑀢𑁆𑀣𑁄 𑀲𑀫𑁆𑀧𑀚𑁆𑀚𑀢𑁂, 𑀅𑀧𑀇𑀘𑁆𑀘𑀬𑀫𑀼𑀧𑀲𑀕𑁆𑀕𑁄 𑀯𑀚𑁆𑀚𑀦𑁂 𑀦𑀻𑀯𑀸𑀭𑀡𑁂, 𑀧𑀦𑀬𑀦𑁂 𑀯𑀸 𑀯𑀢𑁆𑀢𑀢𑁂𑀢𑀺 𑀅𑀧𑁄𑀤𑁆𑀬𑀦𑁆𑀢𑁂 𑀉𑀲𑁆𑀲𑀕𑁆𑀕𑀮𑀓𑁆𑀔𑀡𑀸𑀦𑀺 𑀯𑀚𑁆𑀚𑀻𑀬𑀦𑁆𑀢𑁂 𑀦𑀻𑀯𑀸𑀭𑀻𑀬𑀦𑁆𑀢𑁂 𑀅𑀧𑀦𑀻𑀬𑀦𑁆𑀢𑁂 𑀦𑁂𑀦𑁂𑀢𑁆𑀬𑀧𑀯𑀸𑀤𑁄, 𑀲𑀼𑀢𑁆𑀢𑁂𑀓𑀤𑁂𑀲𑁂𑀦 𑀲𑀼𑀢𑁆𑀢𑀫𑁂𑀯𑁄𑀧𑀮𑀓𑁆𑀔𑀺𑀢𑀦𑁆𑀢𑀺 𑀅𑀦𑁆𑀢𑀲𑁆𑀲‘𑀙𑀝𑁆𑀞𑀺𑀬𑀦𑁆𑀢𑀲𑁆𑀲𑀸’𑀢𑀺 𑀲𑀼𑀢𑁆𑀢𑀲𑁆𑀲 𑀅𑀧𑀯𑀸𑀤𑁄 𑀅𑀦𑁆𑀢𑀸𑀧𑀯𑀸𑀤𑁄, 𑀉𑀲𑁆𑀲𑀚𑁆𑀚𑀢𑁂 𑀦𑀺𑀯𑀢𑁆𑀢𑀻𑀬𑀢𑁆𑀬𑀧𑀯𑀸𑀤𑁂𑀦𑁂𑀢𑁆𑀬𑀼𑀲𑁆𑀲𑀕𑁆𑀕𑁄, 𑀉𑀲𑁆𑀲𑀕𑁆𑀕𑀸𑀧𑀯𑀸𑀤𑀓𑁆𑀓𑀫𑁄 𑀧𑀦𑁂𑀢𑁆𑀣 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 ‘‘𑀙𑀝𑁆𑀞𑀺𑀬𑀦𑁆𑀢𑀲𑁆𑀲𑁂’’𑀢𑁆𑀬𑀼𑀲𑁆𑀲𑀕𑁆𑀕𑁄, 𑀢𑀤𑀧𑀯𑀸𑀤𑀸 ‘‘𑀝𑀸𑀦𑀼𑀩𑀦𑁆𑀥𑀸𑀦𑁂𑀓𑀯𑀡𑁆𑀡𑀸 𑀲𑀩𑁆𑀩𑀲𑁆𑀲’’ ‘‘𑀉𑀓𑀸𑀦𑀼𑀩𑀦𑁆𑀥𑀸𑀤𑁆𑀬𑀦𑁆𑀢𑀸’’ ‘‘𑀫𑀸𑀦𑀼𑀩𑀦𑁆𑀥𑁄 𑀲𑀭𑀸 𑀦𑀫𑀦𑁆𑀢𑀸 𑀧𑀭𑁄’’𑀢𑀺, ‘‘𑀝𑀸𑀦𑀼𑀩𑀦𑁆𑀥𑀸𑀦𑁂𑀓𑀯𑀡𑁆𑀡𑀸 𑀲𑀩𑁆𑀩𑀲𑁆𑀲𑁂’’𑀢𑁆𑀬𑀼𑀲𑁆𑀲𑀕𑁆𑀕𑁄, 𑀢𑀤 𑀧𑀯𑀸𑀤𑀸 ‘‘𑀯𑀸𑀦𑀼𑀩𑀦𑁆𑀥𑁄’’ ‘‘𑀫𑀸𑀦𑀼𑀩𑀦𑁆𑀥𑁄 𑀲𑀭𑀸𑀦𑀫𑀦𑁆𑀢𑀸 𑀧𑀭𑁄’’𑀢𑀺.

𑀙𑀝𑁆𑀞𑀻𑀦𑀺𑀤𑁆𑀤𑀺𑀝𑁆𑀞𑀲𑁆𑀲𑁂𑀘𑁆𑀘𑀸𑀤𑀺𑀦𑀸 ¶ 𑀯𑀘𑀦𑀸𑀭𑀫𑁆𑀪𑀧𑁆𑀧𑀬𑁄𑀚𑀦𑀸𑀔𑁆𑀬𑀸𑀦𑁂𑀦𑀸𑀦𑁆𑀢𑀸𑀤𑁂𑀲𑀸𑀧𑀯𑀸𑀤𑁄 𑀬𑀁 𑀬𑁄𑀕𑁄𑀢𑀺 𑀩𑁆𑀭𑀯𑀻𑀢𑀺, 𑀧𑀘𑁆𑀘𑁂𑀓𑀫𑀪𑀺𑀲𑀫𑁆𑀩𑀦𑁆𑀥𑁄𑀢𑀺 𑀲𑁄 𑀝𑀓𑀸𑀭𑀸𑀦𑀼𑀩𑀦𑁆𑀥𑁄 𑀘𑀸𑀤𑁂𑀲𑁄𑀢𑀺𑀆𑀤𑀺𑀦𑀸, 𑀓𑀲𑁆𑀲 𑀲𑀩𑁆𑀩𑀲𑁆𑀲 𑀪𑀯𑀢𑀺𑀘𑁆𑀘𑀸𑀳-‘𑀙𑀝𑁆𑀞𑀻 𑀦𑀺𑀤𑁆𑀤𑀺𑀝𑁆𑀞𑀲𑁆𑀲𑁂’𑀘𑁆𑀘𑀸𑀤𑀺, 𑀦𑀦𑀼 𑀘 𑀝𑁂𑀆𑀤𑁂𑀲𑁄𑀧𑁆𑀬𑀦𑁂𑀓𑀯𑀡𑁆𑀡𑁄𑀏𑀯 𑀤𑁆𑀯𑀺𑀯𑀡𑁆𑀡𑀲𑀫𑀼𑀤𑀸𑀬𑀢𑁆𑀢𑀸𑀢𑁆𑀬𑀸𑀲𑀗𑁆𑀓𑀺𑀬𑀸𑀳-‘𑀉𑀧𑀮𑀓𑁆𑀔𑀺𑀬𑁂’𑀘𑁆𑀘𑀸𑀤𑀺, 𑀅𑀦𑀼𑀩𑀥𑁆𑀬𑀢𑁂 𑀧𑀬𑁄𑀕𑁂 𑀅𑀲𑀼𑀬𑁆𑀬𑀫𑀸𑀦𑁂𑀧𑀺 𑀧𑀬𑁄𑀚𑀦𑀯𑀲𑁂𑀦𑀸𑀦𑀼𑀲𑀭𑀻𑀬𑀢𑀻𑀢𑁆𑀬𑀦𑀼𑀩𑀦𑁆𑀥𑁄, 𑀉𑀧𑀤𑁂𑀲𑁂 𑀬𑁂𑀯𑁄𑀧𑀮𑀓𑁆𑀔𑀺𑀬 𑀦𑀺𑀯𑀢𑁆𑀢𑀢𑁂𑀢𑁆𑀬𑀦𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 ‘𑀉𑀘𑁆𑀘𑀸𑀭𑀺𑀢𑀯𑀺𑀦𑀸𑀲𑀺𑀦𑁄𑀦𑀼𑀩𑀦𑁆𑀥𑀸’𑀢𑀺, 𑀉𑀧𑀤𑁂𑀲𑁂 𑀧𑀞𑀫𑀼𑀘𑁆𑀘𑀸𑀭𑀡𑁂.

𑀆𑀤𑁆𑀬𑀦𑁆𑀢𑀸𑀢𑀺 𑀯𑀼𑀢𑁆𑀢𑁂 𑀓𑀣𑀫𑀯𑀬𑀯𑀸𑀢𑁆𑀬𑀬𑀫𑀢𑁆𑀣𑁄 𑀮𑀩𑁆𑀪𑀢𑀻 𑀢𑁆𑀬𑀸𑀳-‘𑀆𑀤𑁆𑀬𑀦𑁆𑀢𑀲𑀤𑁆𑀤𑀸𑀦𑀫𑀺’𑀘𑁆𑀘𑀸𑀤𑀺, 𑀆𑀤𑁆𑀬𑀦𑁆𑀢𑀲𑀤𑁆𑀤𑀸𑀦𑀁 𑀦𑀺𑀬𑀢𑀯𑀬𑀯𑀯𑀸𑀘𑀺𑀢𑁆𑀢𑀸 𑀅𑀯𑀬𑀯𑀲𑁆𑀲 𑀘𑀸𑀯𑀬𑀯𑀺𑀦𑀸𑀫𑀦𑁆𑀢𑀭𑁂𑀦𑀸 𑀲𑀫𑁆𑀪𑀯𑀢𑁄 𑀲𑀸𑀫𑀢𑁆𑀣𑀺𑀬𑀸𑀯𑀬𑀯𑀻 𑀮𑀓𑁆𑀔𑀻𑀬𑀢𑀺, 𑀙𑀝𑁆𑀞𑀺𑀬𑀸𑀢𑁆𑀬𑀦𑀼𑀯𑀼𑀢𑁆𑀢𑀺𑀢𑁄 𑀯𑀸𑀯𑀬𑀯𑀸𑀯𑀬𑀯𑀺𑀲𑀫𑁆𑀩𑀦𑁆𑀥𑁂𑀲𑀸 𑀙𑀝𑁆𑀞𑀻, 𑀢𑀸𑀬 𑀦𑀺𑀤𑁆𑀤𑀺𑀝𑁆𑀞𑀲𑁆𑀲𑀸𑀢𑁆𑀬𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑁂𑀢𑀺 𑀯𑀼𑀢𑁆𑀢𑀺𑀬𑀁-‘𑀙𑀝𑁆𑀞𑀻𑀦𑀺𑀤𑁆𑀤𑀺𑀝𑁆𑀞𑀲𑁆𑀲𑀸’𑀢𑀺 (𑀯𑀼𑀢𑁆𑀢𑀁), 𑀢𑁂𑀦𑁂𑀯 𑀧𑀘𑁆𑀘𑀬𑀯𑀺𑀥𑀺𑀫𑁆𑀳𑀺 𑀓𑀽𑀧𑁆𑀧𑀘𑁆𑀘𑀬𑀸𑀤𑀬𑁄 𑀦 𑀤𑁄𑀲𑀸 𑀪𑀯𑀦𑁆𑀢𑀻𑀢𑀺, 𑀅𑀢𑁄𑀬𑁂𑀯𑀸𑀢𑀺 𑀢𑀤𑀯𑀬𑀯𑀸𑀘𑀺𑀢𑁆𑀢𑀢𑁄𑀬𑁂𑀯, 𑀢𑀕𑁆𑀕𑀳𑀡𑁂𑀦𑁂𑀢𑀺 𑀅𑀯𑀬𑀯𑀕𑁆𑀕𑀳𑀡𑁂𑀦, 𑀓𑀢𑀸𑀓𑀢𑀧𑁆𑀧𑀲𑀗𑁆𑀕𑀺𑀢𑁆𑀢𑀸𑀢𑀺 𑀑𑀢𑁆𑀢𑁂 𑀓𑀢𑁂𑀧𑀺 𑀅𑀓𑀢𑁂𑀧𑀺 𑀯𑀼𑀓𑀸𑀕𑀫𑀲𑁆𑀲 𑀧𑀲𑀗𑁆𑀕𑀢𑁄, 𑀪𑀽𑀬𑀢𑁆𑀢𑀢𑁆𑀢𑀸 𑀳𑀺 𑀑𑀢𑁆𑀢𑀲𑁆𑀲 𑀪𑀽𑀕𑁆𑀕𑀳𑀡𑁂 𑀲𑀢𑀺 𑀓𑀢𑁂𑀧𑀺 𑀑𑀢𑁆𑀢𑁂 𑀯𑀼𑀓𑀸𑀕𑀫𑁂𑀦 𑀪𑀯𑀺𑀢𑀩𑁆𑀩𑀫𑀓𑀢𑁂𑀧𑀺 𑀢𑀢𑁄𑀯 ‘‘𑀓𑀢𑀸𑀓𑀢𑀧𑁆𑀧 𑀲𑀗𑁆𑀕𑀻 𑀬𑁄 𑀯𑀺𑀥𑀺 𑀲𑀦𑀺𑀘𑁆𑀘𑁄’’𑀢𑀺 𑀦𑀺𑀘𑁆𑀘𑀢𑁆𑀢𑀸 𑀑𑀢𑁆𑀢𑀁 𑀩𑀸𑀥𑀺𑀢𑁆𑀯𑀸 𑀯𑀼𑀓𑀸𑀕𑀫𑁄 𑀳𑁄𑀢𑀺, 𑀅𑀣 𑀯𑀼𑀓𑀸𑀕𑀫𑁂 𑀧𑀘𑁆𑀙𑀸 𑀢𑁂𑀦 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀆𑀳-‘𑀅𑀦𑁆𑀢𑀸𑀯𑀬𑀯𑁂’𑀘𑁆𑀘𑀸𑀤𑀺.

𑀬𑀤𑀺𑀦𑀺𑀤𑁆𑀥𑀸𑀭𑀡𑁂 𑀙𑀝𑁆𑀞𑀻 𑀅𑀦𑁆𑀢𑀲𑁆𑀲𑀸𑀯𑀺𑀲𑁂𑀲𑀺𑀢𑀢𑁆𑀢𑀸 𑀅𑀯𑀺𑀲𑁂𑀲𑁂𑀦 𑀬𑀢𑁄 𑀓𑀼𑀢𑁄𑀘𑀺 𑀅𑀦𑁆𑀢𑀢𑁄 𑀩𑀸𑀦𑀼𑀩𑀦𑁆𑀥𑁄 𑀧𑀭𑁄 𑀲𑀺𑀬𑀸, 𑀦 𑀳𑀺 𑀤𑀼𑀢𑀺𑀬𑀁 𑀲𑀭𑀕𑁆𑀕𑀳𑀡𑀫𑀢𑁆𑀣𑀺, 𑀬𑁂𑀦𑀸𑀦𑁆𑀢𑁄 𑀯𑀺𑀲𑁂𑀲𑀻𑀬𑀢𑁂𑀘𑁆𑀘𑀸𑀳-‘𑀦𑀺𑀤𑁆𑀥𑀸𑀭𑀡’𑀫𑀺𑀘𑁆𑀘𑀸𑀤𑀺, 𑀓𑀸𑀭𑀡𑀫𑀸𑀳-‘𑀲𑀼𑀢𑀢𑁆𑀢𑀸’𑀢𑀺, ‘𑀲𑀭𑀸𑀦’𑀦𑁆𑀢𑀺 𑀲𑀼𑀢𑀢𑁆𑀢𑀸𑀢𑀺 𑀅𑀢𑁆𑀣𑁄, 𑀢𑁂𑀦 ‘‘𑀲𑀼𑀢𑀸𑀦𑀼𑀫𑀺𑀢𑁂𑀲𑀼𑀲𑀼𑀢𑀲𑀫𑁆𑀩𑀦𑁆𑀥𑁄𑀩𑀮𑀯𑀸’’𑀢𑀺 𑀭𑀼𑀦𑁆𑀥𑀢𑀻𑀢𑁂𑀢𑁆𑀣𑀥𑀓𑀸𑀭𑀲𑁆𑀲𑀸 𑀦𑀼𑀫𑀺𑀢𑀲𑁆𑀲 ¶ 𑀫𑀁 𑀦 𑀳𑁄𑀢𑀻𑀢𑀺 𑀤𑀻𑀧𑁂𑀢𑀺, 𑀲𑀫𑀸𑀦 𑀚𑀸𑀢𑀺𑀬𑀲𑁆𑀲𑁂𑀯 𑀮𑁄𑀓𑁂 𑀦𑀺𑀤𑁆𑀥𑀸𑀭𑀡𑀧𑁆𑀧𑀢𑀻𑀢𑀺 𑀳𑁄𑀢𑀺𑀘𑁆𑀘𑀸𑀳-‘𑀢𑀣𑀸 𑀳𑀺’𑀘𑁆𑀘𑀸𑀤𑀺, 𑀬𑀣𑀸’𑀓𑀡𑁆𑀳𑀸 𑀕𑀸𑀯𑀻𑀦𑀁 𑀲𑀫𑁆𑀧𑀦𑁆𑀦𑀔𑀻𑀭𑀢𑀫𑀸’𑀢𑀺 𑀯𑀼𑀢𑁆𑀢𑁂 𑀅𑀯𑀺𑀲𑁂𑀲𑀺𑀢𑀢𑁆𑀢𑁂𑀧𑀺 𑀓𑀡𑁆𑀳𑀸𑀬 𑀓𑀡𑁆𑀳𑀸𑀕𑀸𑀯𑀻𑀬𑁂𑀯 𑀧𑀢𑀻𑀬𑀢𑁂, 𑀢𑀣𑁂𑀳𑀸𑀧𑀺 𑀲𑀭𑀸𑀦𑀁 𑀫𑀚𑁆𑀛𑁂 𑀅𑀦𑁆𑀢𑀸𑀢𑁆𑀬𑀦𑁆𑀢𑀢𑁆𑀢𑁂𑀦 𑀦𑀺𑀤𑁆𑀥𑀸𑀭𑀺𑀬𑀫𑀸𑀦𑁄 𑀲𑀫𑀸𑀦𑀚𑀸𑀢𑀺𑀬𑁄 𑀲𑀭𑁄𑀬𑁂𑀯 𑀧𑀢𑀻𑀬𑀢𑁂, 𑀢𑁂𑀦 𑀲𑀭𑀸𑀦𑀁 𑀬𑁂𑀯𑀸𑀦𑁆𑀢𑀸𑀧𑀭𑁄 𑀪𑀯𑀺𑀲𑁆𑀲𑀢𑀻𑀢𑀺 𑀪𑀸𑀯𑁄, 𑀯𑀺𑀲𑁂𑀲𑀦𑀢𑁆𑀢𑁄𑀢𑀺 ‘‘𑀜𑀺𑀮𑀢𑀲𑁆𑀲𑁂’’𑀢𑀺 (𑁫-𑁧𑁬𑁩) 𑀲𑀼𑀢𑁆𑀢𑁂 𑀅𑀲𑁆𑀲𑀸𑀢𑀺 𑀯𑀼𑀢𑁆𑀢𑁂 𑀅𑀬𑀫𑁂𑀯𑁂𑀢𑀺 𑀦𑀺𑀬𑀫𑀸𑀪𑀸𑀯𑀸 𑀬𑀲𑁆𑀲𑀓𑀲𑁆𑀲𑀘𑀺 𑀅𑀓𑀸𑀭𑀲𑁆𑀲 𑀜𑀺𑀧𑁆𑀧𑀢𑁆𑀢𑀺, 𑀢𑁂𑀦𑀸𑀦𑀺𑀝𑁆𑀞𑀧𑁆𑀧𑀢𑁆𑀢𑀻𑀢𑀺 𑀮𑀸𑀦𑀼𑀲𑀗𑁆𑀕𑀺𑀲𑁆𑀲𑁂𑀯 𑀅𑀲𑁆𑀲𑀸𑀢𑀺 𑀮𑀲𑁆𑀲 𑀬𑀁 𑀯𑀺𑀲𑁂𑀲𑀦𑀢𑁆𑀢𑀁 𑀢𑀁 𑀅𑀢𑁆𑀣𑁄 𑀧𑀬𑁄𑀚𑀦𑀫𑀲𑁆𑀲 ‘‘𑀓𑀢𑁆𑀢𑀭𑀺𑀮𑁄’’𑀢𑀺 (𑁫-𑁧𑁮) 𑀮𑀓𑀸𑀭𑀲𑁆𑀲𑀸𑀢𑀺 𑀯𑀺𑀲𑁂𑀲𑀦𑀢𑁆𑀣𑁄 𑀮𑀓𑀸𑀭𑁄, 𑀇𑀥𑁂𑀯𑀸𑀢𑀺 𑀇𑀫𑀲𑁆𑀫𑀺𑀁 ‘‘𑀫𑀸𑀦𑀼𑀩𑀦𑁆𑀥𑁄’’𑀢𑀺𑀆𑀤𑀺𑀲𑀼𑀢𑁆𑀢𑁂𑀬𑁂𑀯.

𑀧𑀭𑁄𑀢𑀺 𑀯𑀢𑁆𑀢𑀢𑁂, 𑀲𑁄 𑀘𑀸𑀜𑁆𑀜𑀸𑀥𑀺𑀓𑁆𑀬𑀇𑀝𑁆𑀞𑀸𑀤𑁆𑀬𑀦𑁂𑀓𑀢𑁆𑀣𑁄𑀧𑀺 𑀇𑀥 𑀇𑀝𑁆𑀞 𑀯𑀸𑀘𑀻 𑀤𑀝𑁆𑀞𑀩𑁆𑀩𑁄, 𑀓𑀫𑁆𑀫𑀩𑁆𑀬𑀢𑀺𑀳𑀸𑀭𑁂𑀖𑀡𑀺𑀢𑀺 𑀓𑀫𑁆𑀫𑀩𑁆𑀬𑀢𑀺𑀳𑀸𑀭𑁄 𑀓𑀺𑀭𑀺𑀬𑀸𑀧𑀭𑀺𑀯𑀢𑁆𑀢𑀦𑀁 𑀪𑀸𑀯𑀯𑀺𑀲𑁂𑀲𑁄 𑀢𑀲𑁆𑀫𑀺𑀁 ‘𑀪𑀸𑀯𑀓𑀸𑀭𑀓𑁂𑀲𑁆𑀯𑀖𑀡𑁆𑀖𑀓𑀸’’𑀢𑀺 (𑁫-𑁪𑁪) 𑀲𑀸𑀫𑀜𑁆𑀜𑁂𑀦 𑀯𑀺𑀳𑀺𑀢𑀢𑁆𑀢𑀸 𑀯𑀺𑀧𑁆𑀧𑀝𑀺𑀲𑁂𑀥𑀦𑀦𑁆𑀢𑀺 𑀅𑀢𑁆𑀣𑁂 𑀖𑀡𑀺 𑀯𑀺𑀧𑁆𑀧𑀝𑀻 𑀲𑁂𑀥𑁄, 𑀢𑁂𑀦𑀸𑀳-‘𑀲𑀸𑀫𑀜𑁆𑀜𑁂’𑀘𑁆𑀘𑀸𑀤𑀺, 𑀯𑀺𑀧𑁆𑀧𑀝𑀺𑀲𑁂𑀥𑀲𑀤𑁆𑀤𑀲𑁆𑀲 𑀅𑀢𑁆𑀣𑀫𑀸𑀳-‘𑀅𑀜𑁆𑀜𑀫𑀜𑁆𑀜𑀧𑀝𑀺𑀲𑁂𑀥𑁄’𑀢𑀺, 𑀲𑀁𑀲𑀺𑀤𑁆𑀥𑀺𑀬𑀁 𑀯𑀢𑁆𑀢𑀫𑀸𑀦𑁄𑀧𑀺 𑀲𑀺𑀥𑀺 𑀉𑀧𑀲𑀕𑁆𑀕𑀲𑀫𑁆𑀩𑀦𑁆𑀥𑁂 𑀦𑀸𑀢𑁆𑀣𑀦𑁆𑀢𑀭𑁂𑀧𑀺 𑀳𑁄𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑁄𑀢𑁆𑀬𑀢𑁆𑀣𑁄, 𑀯𑀺𑀧𑁆𑀧𑀝𑀺𑀲𑁂𑀥𑀲𑀤𑁆𑀤𑀲𑁆𑀲 𑀮𑁄𑀓𑁂 𑀯𑀺𑀭𑁄𑀥𑀯𑀸𑀘𑀺𑀢𑁆𑀢𑁂𑀦 𑀧𑀲𑀺𑀤𑁆𑀥𑀢𑁆𑀢𑀫𑀸𑀳 ‘𑀢𑀣𑀸 𑀳𑀺’𑀘𑁆𑀘𑀸𑀤𑀺𑀦𑀸, 𑀓𑀣𑀫𑁆𑀧𑀦 𑀧𑀫𑀸𑀡𑀪𑀽𑀢𑀲𑁆𑀲𑀸𑀘𑀭𑀺𑀬𑀲𑁆𑀲 𑀯𑀘𑀦𑁂𑀲𑀼 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑁄 𑀲𑀫𑁆𑀪𑀯𑀢𑀻𑀘𑁆𑀘𑀸𑀲𑀗𑁆𑀓𑀺𑀬 𑀉𑀪𑀺𑀦𑁆𑀦𑀁 𑀲𑀸𑀯𑀓𑀸𑀲𑀢𑁆𑀢𑁂 𑀲𑀢𑀺 𑀲𑀫𑁆𑀪𑀯𑀢𑀺 𑀦𑀸𑀜𑁆𑀜𑀣𑀸𑀢𑀺 ‘𑀤𑁆𑀯𑀺𑀦𑁆𑀦’𑀫𑀺𑀘𑁆𑀘𑀸𑀤𑀺 𑀯𑀼𑀢𑁆𑀢𑀺𑀕𑀦𑁆𑀣𑁄 𑀧𑀯𑀢𑁆𑀢𑁄𑀢𑀺 𑀯𑀢𑁆𑀢𑀼𑀁 ‘𑀲𑁄𑀘𑀸’𑀢𑀺𑀆𑀤𑀺𑀫𑀸𑀳 𑀅𑀜𑁆𑀜𑀫𑀜𑁆𑀜𑀸𑀦𑀚𑁆𑀛𑀸𑀲𑀺𑀢𑁂𑀢𑀺 𑀅𑀜𑁆𑀜𑀫𑀜𑁆𑀜𑁂𑀦𑀸𑀦𑀓𑁆𑀓𑀦𑁆𑀢𑁂 𑀅𑀧𑀭𑀺𑀕𑁆𑀕𑀳𑀺𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀅𑀦𑀼𑀪𑀬𑀢𑀸𑀕𑀺𑀦𑀻𑀢𑀺 𑀬𑁄 𑀯𑀺𑀲𑀬𑁂𑀓𑀤𑁂𑀲𑁄 𑀉𑀪𑀬𑀦𑁆𑀦 𑀪𑀚𑀢𑁂 𑀢𑀲𑁆𑀫𑀺𑀁 𑀅𑀦𑀼𑀪𑀬𑀪𑀸𑀕𑀺𑀦𑀺 𑀯𑀺𑀲𑀬𑁂𑀓𑀤𑁂𑀲𑁂, 𑀲𑀸𑀫𑀜𑁆𑀜𑀯𑀺𑀲𑀬𑁄 𑀤𑁆𑀯𑀺𑀦𑁆𑀦𑀁 𑀯𑀺𑀥𑀻𑀦𑀁 𑀲𑀸𑀥𑀸𑀭𑀡𑁄 𑀯𑀺𑀲𑀬𑁄, 𑀢𑀢𑁆𑀣 𑀧𑀯𑀢𑁆𑀢𑀺𑀧𑁆𑀧𑀲𑀗𑁆𑀕𑁂 𑀲𑀢𑀺 𑀲𑁄𑀘 𑀯𑀺𑀧𑁆𑀧𑀝𑀺𑀲𑁂𑀥𑁄 𑀚𑀸𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀇𑀫𑀺𑀦𑀸 𑀯𑀺𑀧𑁆𑀧𑀝𑀺𑀲𑁂𑀥𑀲𑁆𑀲 𑀯𑀺𑀲𑀬𑁄 𑀧𑀯𑀢𑁆𑀢𑀺𑀧𑁆𑀧𑀲𑀗𑁆𑀕𑁄 𑀯𑀺𑀲𑀬𑀯𑀺𑀲𑀬𑀻𑀦𑀫𑀪𑁂𑀤𑁂𑀦 𑀲𑀼𑀢𑁆𑀢𑁂 ‘𑀯𑀺𑀧𑁆𑀧𑀝𑀺𑀲𑁂𑀥𑁄’𑀢𑀺𑀯𑀼𑀢𑁆𑀢𑁄𑀢𑀺 ¶ ‘𑀤𑁆𑀯𑀺𑀦𑁆𑀦’𑀫𑀺𑀘𑁆𑀘𑀸𑀤𑀺𑀦𑀸 𑀯𑀼𑀢𑁆𑀢𑀺𑀕𑀦𑁆𑀣𑁄 𑀭𑀘𑀺𑀢𑁄𑀢𑀺 𑀤𑀻𑀧𑁂𑀢𑀺, 𑀧𑀭𑁄 𑀳𑁄𑀢𑀻 𑀢𑀺𑀯𑀺𑀥𑀺𑀤𑀲𑁆𑀲𑀺𑀢𑁄𑀢𑀺 𑀇𑀫𑀺𑀦𑀸 𑀬𑀤𑀺 𑀦𑀺𑀬𑀫𑁄-𑀩𑁆𑀪𑀽𑀧𑀕𑀢𑁄 𑀲𑀺𑀬𑀸, 𑀢𑀤𑀸 ‘𑀧𑀭𑁄𑀯𑀳𑁄𑀢𑀻’𑀢𑀺 𑀯𑀤𑁂𑀬𑁆𑀬𑀸𑀢𑀺 𑀤𑀲𑁆𑀲𑁂𑀢𑀺, 𑀧𑀸𑀡𑀺𑀦𑀺𑀬𑀸 𑀳𑀺 𑀚𑀸𑀢𑀺𑀬𑀁 𑀧𑀤𑀢𑁆𑀣𑁂 𑀲𑀓𑀺𑀫𑁂𑀯 𑀮𑀓𑁆𑀔𑀡𑀁 𑀧𑀯𑀢𑁆𑀢𑀢𑀻𑀢𑀺 𑀘𑀭𑀺𑀢𑀢𑁆𑀣𑀢𑁆𑀢𑀸 𑀯𑀺𑀲𑀬𑀦𑁆𑀢𑀭𑁂 𑀤𑁆𑀯𑀺𑀦𑁆𑀦𑀫𑁆𑀧𑀺 𑀮𑀓𑁆𑀔𑀡𑀸𑀦𑀫𑀧𑁆𑀧𑀯𑀢𑁆𑀢𑀺𑀬𑀁 𑀧𑀭𑀁 𑀧𑀘𑁆𑀙𑀺𑀫𑀁 𑀓𑀸𑀭𑀺𑀬𑀦𑁆𑀢𑀺 𑀯𑀺𑀥𑁆𑀬𑀢𑁆𑀣𑀫𑀺𑀤𑀁 𑀯𑀘𑀦𑀁, 𑀩𑁆𑀬𑀢𑁆𑀢𑀺𑀬𑀦𑁆𑀢𑀼 𑀧𑀤𑀢𑁆𑀣𑁂 𑀮𑀢𑁆𑀯𑀸𑀤𑀻𑀦𑀫𑀺𑀯 𑀧𑀭𑀺𑀬𑀸𑀬𑀧𑁆𑀧𑀲𑀗𑁆𑀕𑁂 𑀦𑀺𑀬𑀫𑀢𑁆𑀣𑀦𑁆𑀢𑀺 𑀧𑀝𑀺𑀧𑀦𑁆𑀦𑀸, 𑀇𑀥 𑀧𑀦 𑀚𑀸𑀢𑀺𑀬𑀁 𑀩𑁆𑀬𑀢𑁆𑀢𑀺𑀬𑀜𑁆𑀘 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀼𑀢𑁆𑀢𑀸𑀦𑀫𑀧𑁆𑀧𑀯𑀢𑁆𑀢𑀺𑀬𑀫𑁂𑀯 𑀯𑀺𑀥𑁆𑀬𑀢𑁆𑀣𑀫𑁂𑀯𑀺𑀤𑀁 𑀯𑀘𑀦𑀁, 𑀦 𑀦𑀺𑀬𑀫𑀢𑁆𑀣𑀫𑁆𑀧𑀻𑀢𑀺 𑀧𑀝𑀺𑀧𑀸𑀤𑁂𑀢𑀼𑀫𑀸𑀳-‘𑀢𑀣𑀸𑀳𑀺’𑀘𑁆𑀘𑀸𑀤𑀺, 𑀓𑀸𑀫𑀘𑀸𑀭𑀢𑁄 𑀧𑀭𑀺𑀲𑀫𑀸𑀧𑀻𑀬𑀢𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀓𑀸𑀫𑀢𑁄 𑀧𑀭𑀺𑀲𑀫𑀸𑀧𑀦𑀜𑁆𑀘𑁂𑀢𑀺𑀲𑁆𑀲𑀸 𑀲𑀩𑁆𑀩𑀲𑁆𑀫𑀺𑀁 𑀅𑀢𑁆𑀢𑀦𑁄 𑀕𑁄𑀘𑀭𑁂 𑀅𑀯𑀺𑀘𑁆𑀙𑁂𑀤𑀩𑁆𑀬𑀸𑀧𑀦𑁂𑀦 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄. 𑀓𑀣𑀫𑁆𑀧𑀦𑁂𑀓𑀲𑁆𑀲𑀸𑀧𑀺 𑀧𑀯𑀢𑁆𑀢𑀺 𑀦 𑀪𑀯𑁂𑀬𑁆𑀬𑀸𑀢𑁆𑀬𑀸𑀲𑀗𑁆𑀓𑀺𑀬 𑀓𑀸𑀭𑀡𑀫𑀸𑀳‘𑀉𑀪𑀬𑀫𑁆𑀧𑀺’𑀘𑁆𑀘𑀸𑀤𑀺, 𑀳𑀺𑀲𑀤𑁆𑀤𑁄 𑀬𑀲𑁆𑀫𑀸𑀢𑁆𑀣𑁂, 𑀬𑀲𑁆𑀫𑀸 𑀉𑀪𑀬𑀫𑁆𑀧𑀺𑀤𑀫𑀸𑀘𑀭𑀺𑀬𑀯𑀘𑀦𑀁, 𑀢𑀢𑁄𑀬𑁂𑀯 𑀧𑀫𑀸𑀡𑀁, 𑀅𑀪𑀺𑀫𑀢𑀓𑀸𑀭𑀺𑀬𑀯𑀺𑀥𑀸𑀦𑁂 𑀮𑀺𑀗𑁆𑀕𑀪𑀸𑀯𑁂𑀦 𑀲𑀤𑁆𑀤𑀺𑀓𑀸𑀦𑀼𑀫𑀢𑀢𑁆𑀢𑀸(𑀢𑁂𑀲𑀁) 𑀯𑀺𑀥𑀻𑀦𑀁 𑀯𑀺𑀥𑀸𑀬𑀓𑀜𑁆𑀘 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀧𑀫𑀸𑀡𑀢𑁆𑀢𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀧𑁆𑀧𑀢𑁆𑀢𑀺𑀬𑀁 𑀓𑀸𑀭𑀡𑀫𑀸𑀳-‘𑀅𑀦𑀼𑀪𑀬𑀪𑀸𑀕𑀺𑀫𑁆𑀳𑀺’𑀘𑁆𑀘𑀸𑀤𑀺, 𑀬𑀢𑁄 𑀮𑀤𑁆𑀥𑀸𑀯𑀓𑀸𑀲𑀸 𑀢𑀢𑁄 𑀲𑀫𑀸𑀦𑀩𑀮𑀸𑀢𑀺, 𑀇𑀢𑀺𑀲𑀤𑁆𑀤𑁄 𑀳𑁂𑀢𑀼𑀫𑁆𑀳𑀺, 𑀯𑀺𑀭𑀼𑀤𑁆𑀥𑀸𑀘𑀸𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑀁 𑀤𑀢𑁆𑀯𑀸 ‘𑀅𑀦𑀼𑀪𑀬𑀪𑀸𑀕𑀺𑀫𑁆𑀳𑀺…𑀧𑁂… 𑀯𑀺𑀭𑀼𑀤𑁆𑀥𑀸𑀘𑀸𑀢𑀺 𑀤𑁆𑀯𑀺𑀦𑁆𑀦𑀁 𑀯𑀘𑀦𑀸𑀦𑀁 𑀧𑀫𑀸𑀡𑀢𑁆𑀢𑀸 𑀉𑀪𑀺𑀦𑁆𑀦𑀫𑁆𑀧𑀺 𑀅𑀧𑁆𑀧𑀯𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀫𑀸𑀦𑀩𑀮𑀸𑀦𑀁 𑀤𑁆𑀯𑀺𑀦𑁆𑀦𑀁 𑀮𑁄𑀓𑁂𑀧𑀺 𑀯𑀺𑀭𑁄𑀥𑀺𑀢𑁆𑀢𑀁 𑀏𑀓𑀓𑁆𑀔𑀡𑁂𑀬𑁂𑀯 𑀉𑀪𑀺𑀦𑁆𑀦𑀫𑁆𑀧𑀺 𑀓𑀸𑀭𑀺𑀬𑁂 𑀅𑀧𑁆𑀧𑀯𑀢𑁆𑀢𑀺 𑀘 𑀤𑀺𑀲𑁆𑀲𑀢𑀻𑀢𑀺 𑀤𑀺𑀝𑁆𑀞𑀦𑁆𑀢𑀫𑀸𑀳 ‘𑀮𑁄𑀓𑁂𑀘𑁂’𑀢𑁆𑀬𑀸𑀤𑀺, 𑀏𑀢𑁆𑀣 𑀘 𑀧𑁂𑀲𑁆𑀲𑀲𑁆𑀲 (𑀅)𑀯𑀺𑀭𑁄𑀥𑀢𑁆𑀣𑀺𑀦𑁄 𑀓𑀸𑀭𑀺𑀬𑁂 𑀅𑀧𑁆𑀧𑀯𑀢𑁆𑀢𑀺𑀭𑀺𑀯 [𑀅𑀧𑁆𑀧𑀯𑀢𑁆𑀢𑀺𑀬𑁂𑀯 (𑀧𑁄𑀢𑁆𑀣𑀓𑁂)] 𑀲𑀫𑀸𑀦𑀩𑀮𑀸𑀦 𑀫𑀼𑀪𑀺𑀦𑁆𑀦𑀁 𑀯𑀘𑀦𑀸𑀦𑀁 𑀓𑀸𑀭𑀺𑀬𑁂 𑀅𑀧𑁆𑀧𑀯𑀢𑁆𑀢𑀻𑀢𑀺 𑀲𑀼𑀔𑁂𑀦𑁄 𑀧𑀫𑀸𑀲𑀁𑀲𑀦𑁆𑀤𑀦𑀁 𑀯𑀺𑀜𑁆𑀜𑀸𑀢𑀩𑁆𑀩𑀁.

𑀚𑀸𑀢𑀺𑀧𑀓𑁆𑀔𑁂𑀬𑁂𑀯 𑀪𑀲𑁆𑀲𑀓𑀸𑀭𑁂𑀦 𑀤𑁆𑀯𑀺𑀦𑁆𑀦𑀁 𑀬𑀼𑀕𑀧𑀤𑀺𑀧𑁆𑀧𑀢𑁆𑀢𑀺𑀬𑀁 ‘𑀮𑀢𑁆𑀯𑀸𑀤𑀻𑀦𑀫𑀺𑀯’ 𑀧𑀭𑀺𑀬𑀸𑀬𑀧𑁆𑀧𑀲𑀗𑁆𑀕𑁄 𑀯𑀡𑁆𑀡𑀺𑀢𑁄, 𑀢𑀲𑁆𑀲𑀸𑀬𑀼𑀢𑁆𑀢𑀢𑁆𑀢𑀫𑀼𑀧𑀤𑀲𑁆𑀲𑁂𑀦𑁆𑀢𑁄 𑀆𑀳 ‘𑀦𑀘𑀸𑀧𑀺’𑀘𑁆𑀘𑀸𑀤𑀺, 𑀪𑀺𑀦𑁆𑀦𑀯𑀺𑀲𑀬𑀢𑁆𑀢𑀸𑀢𑀺 𑀤𑁆𑀯𑀺𑀦𑁆𑀦𑀁 𑀯𑀺𑀥𑀻𑀦𑀁 𑀪𑀺𑀦𑁆𑀦𑀯𑀺𑀲𑀬𑀢𑁆𑀢𑀸. 𑀅𑀪𑀺𑀦𑁆𑀦𑀯𑀺𑀲𑀬𑀢𑁆𑀢𑁂 𑀳𑀺 𑀧𑀭𑀺𑀬𑀸𑀬𑀓𑀧𑁆𑀧𑀦𑀸 𑀬𑀼𑀢𑁆𑀢𑀺𑀫𑀢𑀻, 𑀅𑀢𑁄𑀘 𑀮𑀢𑁆𑀯𑀸𑀤𑀻𑀦𑀫𑀪𑀺𑀦𑁆𑀦𑀯𑀺𑀲𑀬𑀢𑁆𑀢𑀫𑁆𑀧𑀝𑀺𑀧𑀸𑀤𑀬𑀺𑀢𑀼𑀫𑀸𑀳- ‘𑀮𑀢𑁆𑀯𑀸𑀤𑀬𑁄 𑀳𑀺’𑀘𑁆𑀘𑀸𑀤𑀺, 𑀅𑀦𑀯𑀬𑀯𑁂𑀦𑁂𑀢𑀺 𑀥𑀸𑀢𑀼 𑀫𑀢𑁆𑀢𑀢𑁄 𑀯𑀺𑀥𑀸𑀦𑁂𑀦𑀸𑀯𑀬𑀯𑀩𑁆𑀬𑀢𑀺𑀭𑁂𑀓𑀲𑀩𑁆𑀪𑀸𑀯𑀢𑁄 𑀲𑀩𑁆𑀩𑀥𑀸𑀢𑀼𑀧𑀭𑀺𑀕𑁆𑀕𑀳𑁂𑀦, 𑀬𑀢𑁆𑀣 𑀬𑀲𑁆𑀫𑀺𑀁 𑀥𑀸𑀢𑁆𑀯𑀢𑁆𑀣𑁂𑀓𑀤𑁂𑀲𑁂 𑀧𑀯𑀢𑁆𑀢𑀸 𑀲𑀫𑀸𑀦𑀸 𑀧𑀯𑀢𑁆𑀢𑀸 𑀲𑀦𑁆𑀢𑁄 𑀮𑀤𑁆𑀥𑀸𑀯𑀓𑀸𑀲𑀸 ¶ 𑀲𑀺𑀬𑀼𑀁 𑀢𑀲𑁆𑀲𑁂𑀓𑀤𑁂𑀲𑀲𑁆𑀲 𑀧𑀭𑀺𑀳𑀸𑀭𑁂𑀦𑀸𑀧𑀺 𑀧𑀭𑀺𑀘𑁆𑀘𑀸𑀕𑁂𑀦𑀸𑀧𑀺 𑀦 𑀯𑀺𑀥𑀻𑀬𑀦𑁆𑀢𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀮𑀢𑁆𑀯𑀸𑀤𑀻𑀦 𑀫𑁂𑀓𑀓𑁆𑀔𑀡𑁂 𑀅𑀲𑀫𑁆𑀪𑀯𑀸 𑀏𑀓𑀲𑁆𑀫𑀺𑀁 𑀓𑀢𑁂 𑀲𑀢𑀻𑀢𑀭𑀯𑀘𑀦𑀸𑀦 𑀫𑀸𑀦𑀢𑁆𑀣𑀓𑁆𑀬𑀧𑁆𑀧𑀲𑀗𑁆𑀕𑀸𑀘 𑀧𑀭𑀺𑀬𑀸𑀬𑁂𑀦 𑀪𑀯𑀦𑁆𑀢𑀻𑀢𑀺 𑀬𑀦𑁆𑀢𑀁 𑀬𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀳𑀸𑀢𑀺 𑀇𑀫𑀲𑁆𑀫𑀺𑀁 𑀬𑀼𑀕𑀧𑀤𑀺𑀧𑁆𑀧𑀢𑁆𑀢𑀺𑀬𑀁, 𑀇𑀳 𑀢𑀣𑀸𑀪𑀸𑀯𑀲𑁆𑀲 𑀓𑀸𑀭𑀡𑀫𑀸𑀳-‘𑀲𑀸𑀯𑀓𑀸…𑀧𑁂… 𑀯𑀘𑀦’𑀦𑁆𑀢𑀺, 𑀢𑀢𑁆𑀣𑀸𑀢𑀺 𑀬𑀼𑀕𑀧𑀤𑀺𑀧𑁆𑀧𑀢𑁆𑀢𑀺𑀬𑀁. 𑀚𑀸𑀢𑀺𑀬𑀫𑁆𑀧𑀤𑀢𑁆𑀣𑁂 ‘‘𑀧𑀼𑀦𑀧𑁆𑀧𑀲𑀗𑁆𑀕𑀯𑀺𑀚𑀸𑀦𑀦𑀸 𑀲𑀺𑀤𑁆𑀥𑀁, 𑀯𑀺𑀧𑁆𑀧𑀝𑀺𑀲𑁂𑀥𑁂 𑀬𑀁 𑀩𑀸𑀥𑀺𑀢𑀁 𑀢𑀫𑁆𑀩𑀸𑀥𑀺𑀢𑀫𑁂𑀯𑀸’’𑀢𑀻𑀫𑀸𑀲𑀫𑀼𑀪𑀺𑀦𑁆𑀦𑀁 𑀧𑀭𑀺𑀪𑀸𑀲𑀦𑀫𑁆𑀧𑀯𑀢𑁆𑀢𑀺𑀁 𑀧𑀝𑀺𑀧𑀸𑀤𑁂𑀦𑁆𑀢𑁄 𑀆𑀳- ‘𑀧𑀭𑀲𑁆𑀫𑀺𑀁 𑀘𑁂’𑀢𑁆𑀬𑀸𑀤𑀺, 𑀧𑀭𑀲𑁆𑀫𑀺𑀦𑁆𑀢𑀺 𑀇𑀝𑁆𑀞𑁂, 𑀧𑀭𑀺𑀪𑀸𑀲𑀦𑀫𑁆𑀧𑀦 𑀅𑀬𑀫𑀢𑁆𑀣𑁄 ‘𑀧𑀼𑀦𑀧𑁆𑀧𑀲𑀗𑁆𑀕𑀯𑀺𑀚𑀸𑀦𑀦𑀸𑀢𑀺 𑀤𑁆𑀯𑀺𑀦𑁆𑀦𑀁 𑀲𑀼𑀢𑁆𑀢𑀸𑀦𑀫𑁂𑀓𑀢𑁆𑀣𑀧𑁆𑀧 𑀲𑀗𑁆𑀕𑀲𑀗𑁆𑀔𑀸𑀢𑁂 𑀯𑀺𑀧𑁆𑀧𑀝𑀺𑀲𑁂𑀥𑁂 𑀲𑀢𑀺𑀧𑀭𑀫𑀺𑀝𑁆𑀞𑀁 𑀧𑀞𑀫𑀁 𑀳𑁄𑀢𑀺, 𑀳𑁄𑀦𑁆𑀢𑁂𑀦 𑀢𑁂𑀦 𑀬𑀤𑀻𑀢𑀭𑀲𑁆𑀲 𑀦𑀺𑀫𑀺𑀢𑁆𑀢𑁄𑀧𑀖𑀸𑀢𑁄 𑀦 𑀓𑀢𑁄 𑀢𑀤𑀸 𑀢𑀲𑁆𑀲𑀸𑀧𑀺 𑀧𑀼𑀦𑀧𑁆𑀧𑀲𑀗𑁆𑀕𑁄 𑀢𑀲𑁆𑀲 𑀯𑀺𑀚𑀸𑀦𑀦𑀸 𑀲𑀺𑀤𑁆𑀥𑀦𑁆𑀢𑀺, 𑀯𑀺𑀧𑁆𑀧𑀝𑀺𑀲𑁂𑀥𑁂 𑀬𑀣𑀸𑀯𑀼𑀢𑁆𑀢𑁂 𑀲𑀢𑀺 𑀧𑀞𑀫𑀁 𑀳𑁄𑀦𑁆𑀢𑁂𑀦 𑀬𑀁 𑀲𑀼𑀢𑁆𑀢𑀁 𑀩𑀸𑀥𑀺𑀢𑀁 𑀢𑀲𑁆𑀲 𑀧𑀼𑀦𑀧𑁆𑀧𑀯𑀢𑁆𑀢𑀺𑀬𑀸 𑀬𑀤𑀺 𑀦𑀺𑀫𑀺𑀢𑁆𑀢𑀁 𑀦𑀢𑁆𑀣𑀺 𑀢𑀁 𑀩𑀸𑀥𑀺𑀢𑀫𑁂𑀯𑁂’𑀢𑀺. 𑀩𑁆𑀬𑀢𑁆𑀢𑀺𑀬𑀫𑁆𑀧𑀺 𑀯𑀺𑀥𑁆𑀬𑀢𑁆𑀣𑀫𑁂𑀯𑀺𑀤𑀁 𑀯𑀘𑀦𑀁, 𑀦 𑀦𑀺𑀬𑀫𑀢𑁆𑀣𑀦𑁆𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘𑀩𑁆𑀬𑀢𑁆𑀢𑀺𑀬’𑀫𑀺𑀘𑁆𑀘𑀸𑀤𑀺, 𑀏𑀯𑀁 𑀫𑀜𑁆𑀜𑀢𑁂 ‘𑀩𑁆𑀬𑀢𑁆𑀢𑀺𑀬𑀁 𑀧𑀝𑀺𑀮𑀓𑁆𑀔𑀺𑀬𑀁𑀮𑀓𑁆𑀔𑀡𑀧𑁆𑀧𑀯𑀢𑁆𑀢𑀺𑀬𑀁 𑀤𑁆𑀯𑀺𑀦𑁆𑀦𑀁 𑀲𑀸𑀥𑀸𑀭𑀡𑀁 𑀞𑀸𑀦𑀫𑁆𑀧𑀢𑀺 𑀬𑀸𑀦𑀺 𑀯𑀘𑀦𑀸𑀦𑀺 𑀪𑀺𑀦𑁆𑀦𑀸𑀦𑀺 𑀢𑁂𑀲𑀫𑁆𑀧𑀺 𑀦𑀺𑀭𑀯𑀓𑀸𑀲𑀢𑁆𑀢𑁂𑀦 𑀢𑀼𑀮𑁆𑀬𑀩𑀮𑀢𑁆𑀢𑀸 𑀤𑁆𑀯𑀺𑀦𑁆𑀦𑀫𑁆𑀧𑀝𑀺𑀧𑀢𑁆𑀢𑀺𑀬𑁂𑀯𑀲𑀺𑀬𑀸, 𑀦𑀢𑀼 𑀧𑀭𑀺𑀬𑀸𑀬𑀧𑁆𑀧𑀲𑀗𑁆𑀕𑁄’𑀢𑀺. 𑀩𑁆𑀬𑀢𑁆𑀢𑀺𑀬𑀫𑁆𑀧𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀧𑀭𑀺𑀪𑀸𑀲𑀸𑀦𑀁 𑀧𑀯𑀢𑁆𑀢𑀺 𑀯𑀼𑀢𑁆𑀢𑀯𑀺𑀥𑀺𑀦𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘𑀧𑀭𑀺𑀪𑀸𑀲𑀸𑀦𑀫𑁆𑀧𑀺’𑀘𑁆𑀘𑀸𑀤𑀺𑀫𑀸𑀳.

𑀚𑀸𑀢𑀺𑀬𑀫𑁆𑀧𑀤𑀢𑁆𑀣𑁂 ‘‘𑀯𑀢𑁆𑀢𑀫𑀸𑀦𑁂𑀢𑀺 𑀅𑀦𑁆𑀢𑀺, 𑀲𑀺 𑀣, 𑀫𑀺 𑀫, 𑀢𑁂 𑀅𑀦𑁆𑀢𑁂, 𑀲𑁂 𑀯𑁆𑀳𑁂, 𑀏 𑀫𑁆𑀳𑁂’’𑀘𑁆𑀘𑀸𑀤𑀻𑀦𑀁 𑀮𑀓𑁆𑀔𑀡𑀸𑀦𑀫𑁂𑀓𑀫𑁂𑀓𑀢𑁆𑀣𑁂𑀧𑀺 𑀯𑀢𑁆𑀢𑀫𑀸𑀦𑁂𑀢𑀺 𑀅𑀦𑁆𑀢𑀺, 𑀯𑀢𑁆𑀢𑀫𑀸𑀦𑁂 𑀲𑀺 𑀣 𑀇𑀘𑁆𑀘𑀸𑀤𑀻𑀦𑀁 𑀯𑀸𑀓𑁆𑀬𑁂𑀓𑀤𑁂𑀲𑀸𑀦𑀁 𑀕𑀘𑁆𑀙𑀢𑀺𑀘𑁆𑀘𑀸𑀤𑁄 𑀕𑀘𑁆𑀙 𑀲𑀺𑀘𑁆𑀘𑀸𑀤𑁄 𑀘 𑀮𑀓𑁆𑀔𑀺𑀬𑁂 𑀲𑀓𑀺𑀫𑁆𑀧𑀯𑀢𑁆𑀢𑀺𑀬𑀸 𑀲𑀩𑁆𑀩𑀲𑁆𑀫𑀺𑀁 𑀲𑀓𑁂 𑀯𑀺𑀲𑀬𑁂 𑀧𑀞𑀫 𑀫𑀚𑁆𑀛𑀺𑀫𑀧𑀼𑀭𑀺𑀲𑁂𑀓𑀯𑀘𑀦𑀚𑀸𑀢𑀺 𑀧𑀭𑀺𑀲𑀫𑀢𑁆𑀢𑀸𑀢𑀺 𑀘𑀭𑀺𑀢𑀢𑁆𑀣𑀢𑁆𑀢𑀸 𑀢𑀼𑀫𑁆𑀳𑁂 𑀕𑀘𑁆𑀙𑀣𑀸𑀢𑀺 𑀏𑀢𑁆𑀣 𑀤𑁆𑀯𑀻𑀳𑀺 𑀤𑁆𑀯𑀺𑀦𑁆𑀦𑀁 𑀧𑀼𑀭𑀺𑀲𑀸𑀦 𑀫𑁂𑀓𑀓𑁆𑀔𑀡𑁂 𑀧𑀯𑀢𑁆𑀢𑀺𑀬𑀁 𑀦 𑀓𑀲𑁆𑀲𑀘𑀺, 𑀩𑁆𑀬𑀢𑁆𑀢𑀺𑀬𑀫𑁆𑀧𑀺 𑀧𑀝𑀺𑀮𑀓𑁆𑀔𑀺𑀬𑀁 𑀮𑀓𑁆𑀔𑀡𑀸𑀦𑀺 𑀪𑀺𑀚𑁆𑀚𑀦𑁆𑀢𑀻𑀢𑀺 𑀲𑀸𑀥𑀸𑀭𑀡𑀁 𑀞𑀸𑀦𑀁 𑀧𑀢𑀺𑀪𑀺𑀦𑁆𑀦𑁂𑀳𑀺 𑀮𑀓𑁆𑀔𑀡𑁂𑀳𑀺 𑀤𑁆𑀯𑀺𑀦𑁆𑀦𑀫𑁆𑀧𑁂𑀓𑀢𑁆𑀣𑁂-𑀓𑀓𑁆𑀔𑀡𑁂 𑀧𑀯𑀢𑁆𑀢𑀺𑀬𑀁 𑀦 𑀓𑀲𑁆𑀲𑀘𑀺, 𑀢𑀣𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀺𑀡𑁆𑀡𑀁 𑀧𑀼𑀭𑀺𑀲𑀸𑀦𑀫𑁂𑀓𑀓𑁆𑀔𑀡𑁂 𑀧𑀯𑀢𑁆𑀢𑀺𑀬𑀦𑁆𑀢𑀺 𑀲𑀩𑁆𑀩𑀣𑀸 𑀅𑀧𑁆𑀧𑀯𑀢𑁆𑀢𑀺𑀬𑀁 𑀲𑀫𑁆𑀧𑀢𑁆𑀢𑀸𑀬𑀁 𑀯𑀘𑀦𑀫𑀺𑀤𑀁, 𑀧𑀭𑁄 𑀳𑁄𑀢𑀻𑀢𑀺 𑀫𑀚𑁆𑀛𑀺𑀫𑀼𑀢𑁆𑀢𑀫𑀁 𑀪𑀯𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘𑀬𑀣𑁂’𑀘𑁆𑀘𑀸𑀤𑀺𑀦𑀸 𑀯𑀼𑀢𑁆𑀢𑀁 𑀯𑀼𑀢𑁆𑀢𑀺𑀕𑀦𑁆𑀣𑀫𑁆𑀧𑀜𑁆𑀳𑀫𑀼𑀔𑁂𑀦𑀸 𑀳𑀭𑀺𑀢𑁆𑀯𑀸 ¶ 𑀤𑀲𑁆𑀲𑁂𑀢𑀼𑀁 ‘𑀓𑁆𑀯𑀧𑀦𑀸’𑀢𑀺𑀆𑀤𑀺𑀫𑀸𑀳, 𑀦𑁂𑀤𑀫𑀼𑀤𑀸𑀳𑀭𑀡𑀫𑀫𑁆𑀳𑀁 𑀫𑀦𑀁 𑀪𑁄𑀲𑁂𑀢𑀺-𑀬𑀢𑁄 𑀯𑀺𑀧𑁆𑀧𑀝𑀺𑀲𑁂𑀥𑀯𑀺𑀲𑀬𑀫𑁂𑀯𑁂𑀤𑀁 𑀦 𑀳𑁄𑀢𑀺, 𑀓𑀼𑀢𑁄 𑀬𑀢𑁄 ‘‘𑀯𑀢𑁆𑀢𑀫𑀸𑀦𑁂𑀢𑀺 𑀅𑀦𑁆𑀢𑀺’’𑀘𑁆𑀘𑀸𑀤𑀺𑀧𑁆𑀧𑀪𑀼𑀢𑀻𑀦𑀁 𑀯𑀢𑁆𑀢𑀫𑀸𑀦𑁂𑀢𑀺 𑀅𑀦𑁆𑀢𑀺𑀘𑁆𑀘𑀸𑀤𑀻𑀳𑀺 𑀯𑀸𑀓𑁆𑀬𑁂𑀓𑀤𑁂𑀲𑁂𑀳𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀫𑁂𑀯 𑀧𑀼𑀩𑁆𑀩𑀧𑀭𑀘𑁆𑀙𑀓𑁆𑀓𑀸𑀦𑀁 𑀧𑀼𑀭𑀺𑀲𑀯𑀘𑀦𑀯𑀺𑀲𑁂𑀲𑀯𑀺𑀥𑀸𑀬𑀓𑁂𑀦 ‘‘𑀧𑀼𑀩𑁆𑀩𑀧𑀭𑀘𑁆𑀙𑀓𑁆𑀓𑀸𑀦 𑀫𑁂𑀓𑀸𑀦𑁂𑀓𑁂𑀲𑀼 𑀢𑀼𑀫𑁆𑀳𑀸𑀫𑁆𑀳 𑀲𑁂𑀲𑁂𑀲𑀼 𑀤𑁆𑀯𑁂𑀤𑁆𑀯𑁂 𑀫𑀚𑁆𑀛𑀺𑀫𑀼𑀢𑁆𑀢𑀫𑀧𑀞𑀫𑀸’’ (𑁬-𑁧𑁪) 𑀢𑀻𑀫𑀺𑀦𑀸 𑀯𑀸𑀓𑁆𑀬𑀸𑀯𑀬𑀯𑁂𑀦 𑀢𑀼𑀫𑁆𑀳𑀸𑀫𑁆𑀳𑀲𑁂𑀲𑁂𑀲𑀼 𑀧𑀬𑀼𑀚𑁆𑀚𑀫𑀸𑀦𑁂𑀲𑀼 𑀅𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀲𑀼 𑀯𑀸 𑀬𑀣𑀸𑀓𑁆𑀓𑀫𑀁 𑀧𑀼𑀩𑁆𑀩𑀘𑁆𑀙𑀓𑁆𑀓𑀸𑀦𑀁 𑀧𑀭𑀘𑁆𑀙𑀓𑁆𑀓𑀸𑀦𑀜𑁆𑀘 𑀫𑀚𑁆𑀛𑀺𑀫𑀼𑀢𑁆𑀢𑀫𑀧𑀞𑀫𑀸𑀦𑀁 𑀧𑀘𑁆𑀘𑁂𑀓𑀁 𑀤𑁆𑀯𑁂𑀤𑁆𑀯𑁂 𑀯𑀘𑀦𑀸𑀦𑀺 𑀬𑀣𑀸𑀓𑁆𑀓𑀫𑀁 𑀪𑀯𑀦𑁆𑀢𑀻𑀢𑀺 ‘𑀕𑀘𑁆𑀙𑀣 𑀕𑀘𑁆𑀙𑀸𑀫𑀸’𑀢𑀺 𑀏𑀢𑁆𑀣 𑀏𑀓𑀓𑁆𑀔𑀡𑁂 𑀧𑀯𑀢𑁆𑀢𑀺𑀬𑁂𑀯 𑀦𑀢𑁆𑀣𑀺, 𑀤𑁆𑀯𑀺𑀦𑁆𑀦𑀫𑁆𑀧𑀦 𑀲𑀸𑀯𑀓𑀸𑀲𑀸𑀦 𑀫𑁂𑀓𑀓𑁆𑀔𑀡𑁂 𑀧𑀯𑀢𑁆𑀢𑀺𑀬𑁂𑀯 𑀳𑀺 𑀯𑀺𑀧𑁆𑀧𑀝𑀺𑀲𑁂𑀥𑁄𑀢𑀺, 𑀢𑀣𑀸𑀧𑀺 𑀯𑀼𑀢𑁆𑀢𑀦𑀬𑁂𑀦 𑀯𑀺𑀧𑁆𑀧𑀝𑀺𑀲𑁂𑀥𑀧𑁆𑀧𑀓𑀧𑁆𑀧𑀦𑀸𑀧𑀺 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀻𑀤𑀫𑀼𑀤𑀸𑀳𑀝𑀁 𑀲𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁, 𑀇𑀫𑀺𑀲𑁆𑀲𑀸 𑀧𑀦 𑀧𑀭𑀺𑀪𑀸𑀲𑀸𑀬 𑀦𑀺𑀭𑀸𑀓𑀼𑀮𑀧𑁆𑀧𑀯𑀢𑁆𑀢𑀺 ‘‘𑀆𑀤𑀺𑀲𑁆𑀲𑀸’’ 𑀢𑀻𑀫𑀺𑀲𑁆𑀲𑀸 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀓𑀢𑀸𑀓𑀢𑀧𑁆𑀧𑀲𑀗𑁆𑀕𑀻 𑀬𑁄 𑀯𑀺𑀥𑀺, 𑀲𑁄 𑀦𑀺𑀘𑁆𑀘𑁄, 𑀬𑁄𑀢𑁆𑀯𑀓𑀢𑁂𑀬𑁂𑀯𑀸𑀬𑀫𑀦𑀺𑀘𑁆𑀘𑁄𑀢𑀺 𑀯𑀼𑀢𑁆𑀢𑀦𑀺𑀘𑁆𑀘𑀸𑀦𑀺𑀘𑁆𑀘𑁂𑀲𑀼 𑀅𑀦𑁆𑀢𑀭𑀗𑁆𑀕𑀩𑀳𑀺𑀭𑀗𑁆𑀕𑁂𑀲𑀼 𑀘𑀸𑀢𑀼𑀮𑁆𑀬𑀩𑀮𑀢𑁆𑀢𑀸 𑀦𑀸𑀲𑁆𑀲 𑀬𑁄𑀕𑀲𑁆𑀲 𑀩𑁆𑀬𑀸𑀧𑀸𑀭𑁄, 𑀢𑀣𑀸𑀳𑀺 𑀦𑀺𑀘𑁆𑀘𑀸𑀦𑀺𑀘𑁆𑀘𑁂𑀲𑀼 𑀦𑀺𑀘𑁆𑀘𑀫𑁂𑀯 𑀩𑀮𑀯𑀦𑁆𑀢𑀺 𑀦𑀺𑀘𑁆𑀘𑀸𑀦𑀺𑀘𑁆𑀘𑀸𑀦𑀫𑀢𑀼𑀮𑁆𑀬𑀩𑀮𑀢𑀸, 𑀅𑀦𑁆𑀢𑀭𑀗𑁆𑀕𑀩𑀳𑀺𑀭𑀗𑁆𑀕𑀧𑁆𑀧𑀓𑀸𑀭(𑀫𑁆𑀧𑀦) 𑀉𑀧𑀭𑀺 ‘‘𑀮𑁄𑀧𑁄’’𑀢𑀺 (𑁧-𑁩𑁯) 𑀲𑀼𑀢𑁆𑀢𑁂 𑀧𑀓𑀸𑀲𑀺𑀲𑁆𑀲𑀸𑀫.

𑀯𑀘𑀦𑀸𑀭𑀫𑁆𑀪𑀲𑁆𑀲 𑀨𑀮𑀫𑀸𑀳-‘𑀅𑀦𑀼𑀩𑀦𑁆𑀥𑁄𑀢𑀺 𑀬𑀁 𑀯𑀼𑀢𑁆𑀢𑀁’𑀢𑁆𑀬𑀸𑀤𑀺, 𑀯𑀼𑀢𑁆𑀢𑀺𑀬𑀁 ‘‘𑀬𑁄𑀦𑀯𑀬𑀯𑀪𑀽𑀢𑁄 𑀲𑀗𑁆𑀓𑁂𑀢𑁄’’𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑁂𑀧𑀺 ‘‘𑀪𑀸𑀲𑀺𑀲𑁆𑀲𑀁 𑀫𑀸𑀕𑀥𑀁 𑀲𑀤𑁆𑀤𑀮𑀓𑁆𑀔𑀡’’𑀦𑁆𑀢𑀺 𑀲𑀤𑁆𑀤𑀮𑀓𑁆𑀔𑀡𑀸 𑀪𑀺𑀥𑀸𑀦𑀧𑁆𑀧𑀓𑀭𑀡𑀢𑁄 𑀲𑀤𑁆𑀤𑀲𑁆𑀲𑀸𑀦𑀯𑀬𑀯𑀪𑀽𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑁂𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘𑀓𑀲𑁆𑀲’𑀢𑁆𑀬𑀸𑀤𑀺𑀮𑁆𑀢𑀼𑀧𑁆𑀧𑀘𑁆𑀘𑀬𑁂 𑀮𑀓𑀸𑀭𑁄 𑀉𑀤𑀸𑀳𑀭𑀡𑀁, 𑀧𑀓𑀢𑀺𑀬𑀸𑀤𑀺 𑀲𑀫𑀼𑀤𑀸𑀬𑀲𑁆𑀲𑀸𑀢𑀺𑀆𑀤𑀺𑀯𑀸𑀓𑁆𑀬𑀲𑁆𑀲 𑀲𑀸𑀧𑁆𑀧𑀸𑀬𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘𑀏𑀯𑀫𑀜𑁆𑀜𑀢𑁂’𑀘𑁆𑀘𑀸𑀤𑀺 𑀯𑀼𑀢𑁆𑀢𑀁, 𑀓𑁂𑀘𑀺 𑀲𑀤𑁆𑀤𑀲𑀢𑁆𑀣𑀓𑀸𑀭𑀸𑀢𑀺 𑀧𑀸𑀡𑀺𑀦𑀺𑀁 𑀲𑀦𑁆𑀥𑀸𑀬𑀸𑀳, 𑀯𑀘𑀦𑀦𑁆𑀢𑀺 ‘‘𑀢𑀲𑁆𑀲 𑀮𑁄𑀧𑁄’’𑀢𑀺 (𑁧-𑁩-𑁯) 𑀯𑀘𑀦𑀁, 𑀧𑀬𑁄𑀕𑀸𑀲𑀫𑀯𑀸𑀬𑀺𑀢𑀸𑀢𑀺 𑀓𑀢𑁆𑀢𑀸𑀇𑀘𑁆𑀘𑀸𑀤𑀺𑀧𑁆𑀧𑀬𑁄𑀕𑁂 𑀅𑀲𑀫𑀯𑀸𑀬𑀺𑀢𑀸 𑀅𑀧𑁆𑀧𑀬𑁄𑀕𑀺𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀏𑀯𑀫𑁆𑀧𑀺𑀲𑁆𑀲 𑀮𑁄𑀧𑁄 𑀯𑀲𑁂𑀬𑁄… 𑀅𑀦𑀼𑀧𑀼𑀩𑁆𑀩𑁄 𑀩𑀦𑁆𑀥𑀺𑀯𑀺𑀦𑀸𑀲𑀢𑁆𑀣𑁄𑀢𑀺 𑀆𑀳𑀼 𑀉𑀘𑁆𑀘𑀸𑀭𑀺𑀢𑀧𑀥𑀁𑀲𑀺𑀢𑁆𑀢𑀸 ¶ 𑀅𑀦𑀼𑀩𑀦𑁆𑀥𑁆𑀬𑀢𑁂 𑀯𑀺𑀦𑀲𑁆𑀲𑀢𑁂𑀢𑁆𑀬𑀦𑀼𑀩𑀦𑁆𑀥𑁄𑀢𑀺 𑀇𑀫𑀸𑀬 𑀲𑀤𑁆𑀤 𑀩𑁆𑀬𑀼𑀧𑁆𑀧𑀢𑁆𑀢𑀺𑀬𑀸𑀯𑀲𑁂𑀦.

‘𑀅𑀢𑁂𑀦𑀸’𑀢𑀺 (𑁨-𑁧𑁦𑁮) 𑀏𑀢𑁆𑀣 𑀅𑀢𑁄𑀢𑀺 𑀭𑀲𑁆𑀲𑀩𑁆𑀬𑀢𑁆𑀢𑀺𑀦𑀺𑀤𑁆𑀤𑁂𑀲𑁄 𑀯𑀸 𑀲𑀺𑀬𑀸 𑀭𑀲𑁆𑀲𑀚𑀸𑀢𑀺𑀦𑀺𑀤𑁆𑀤𑁂𑀲𑁄 𑀯𑀸 𑀲𑀓𑀮𑀦𑀺𑀲𑁆𑀲𑀬𑀩𑁆𑀬𑀸𑀧𑀻 𑀅𑀢𑁆𑀣𑀚𑀸𑀢𑀺 𑀦𑀺𑀤𑁆𑀤𑁂𑀲𑁄𑀯𑀸, 𑀢𑀢𑁆𑀣 𑀭𑀲𑁆𑀲𑀩𑁆𑀬𑀢𑁆𑀢𑀺𑀦𑀺𑀤𑁆𑀤𑁂𑀲𑁂 𑀲𑀢𑀺 𑀩𑀼𑀤𑁆𑀥𑀲𑀺𑀤𑁆𑀥𑀸𑀤𑀻𑀲𑀼 𑀬𑀢𑁆𑀣𑀓𑀢𑁆𑀣𑀘𑀺 𑀅𑀓𑀸𑀭𑁄 𑀕𑀬𑁆𑀳𑀢𑁂𑀢𑀺 𑀦𑁂𑀝𑁆𑀞𑀧𑁆𑀧𑀲𑀺𑀤𑁆𑀥𑀺… 𑀓𑁂𑀲𑀜𑁆𑀘𑀺 𑀅𑀲𑀺𑀚𑁆𑀛𑀦𑀢𑁄, 𑀭𑀲𑁆𑀲 𑀚𑀸𑀢𑀺𑀦𑀺𑀤𑁆𑀤𑁂𑀲𑁂 𑀧𑀦 𑀩𑀼𑀤𑁆𑀥𑀲𑀺𑀤𑁆𑀥𑀸𑀤𑀺𑀲𑀩𑁆𑀩𑀸𑀓𑀸𑀭𑀦𑁆𑀢𑀸𑀦𑀁 𑀮𑀓𑁆𑀔𑀡𑀺𑀓𑀕𑀯𑀸𑀤𑁆𑀬𑀓𑀸 𑀭𑀦𑁆𑀢𑀸𑀦𑀜𑁆𑀘𑀸𑀓𑀸𑀭𑁄 𑀕𑀬𑁆𑀳𑀢𑀻𑀢𑀺 𑀲𑀩𑁆𑀩𑀣𑀸 𑀇𑀝𑁆𑀞𑀧𑁆𑀧𑀲𑀺𑀤𑁆𑀥𑀺, 𑀦𑀸𑀜𑁆𑀜𑁄 𑀤𑀻𑀖𑁄 𑀩𑁆𑀬𑀢𑁆𑀢𑀦𑁆𑀢𑀭𑀢𑁆𑀢𑀸𑀢𑀺 𑀦𑀸𑀦𑀺𑀝𑁆𑀞𑀧𑁆𑀧𑀢𑁆𑀢𑀺 𑀆𑀓𑀸𑀭𑀢𑁄 𑀦𑀸𑀲𑁆𑀲𑁂𑀦𑀸𑀪𑀸𑀯𑀸, 𑀢𑀲𑁆𑀫𑀸 𑀅𑀢𑁄𑀢𑀺 𑀭𑀲𑁆𑀲𑀚𑀸𑀢𑀺𑀦𑀺𑀤𑁆𑀤𑁂𑀲𑁂 𑀦𑀺𑀲𑁆𑀲𑀺𑀢𑁂 𑀲𑀩𑁆𑀩𑀫𑀺𑀤𑀫𑀺𑀝𑁆𑀞𑀁 𑀦𑀺𑀧𑁆𑀨𑀚𑁆𑀚𑀢𑀻𑀢𑀺 𑀦𑀸𑀢𑁆𑀣𑀚𑀸𑀢𑀺 𑀦𑀺𑀲𑁆𑀲𑀻𑀬𑀢𑁂, 𑀦 𑀭𑀲𑁆𑀲𑀩𑁆𑀬𑀢𑁆𑀢𑀺𑀘, ‘‘𑀬𑀼𑀯𑀡𑁆𑀡𑀸𑀦𑀫𑁂 𑀑𑀮𑀼𑀢𑁆𑀢𑀸’’𑀢𑀺 (𑁧-𑁨𑁯) 𑀆𑀤𑀻𑀲𑀼 𑀧𑀦 𑀭𑀲𑁆𑀲𑀩𑁆𑀬𑀢𑁆𑀢𑀺𑀬𑀸 𑀭𑀲𑁆𑀲𑀚𑀸𑀢𑀺𑀬𑀸 𑀯𑀸 𑀦𑀺𑀤𑁆𑀤𑁂𑀲𑁂 ‘𑀢𑀲𑁆𑀲𑁂𑀤𑀁 𑀦𑁄𑀧𑁂𑀢𑀺’𑀘𑁆𑀘𑀸𑀤𑀻𑀲𑀼 𑀏𑀑𑀆𑀤𑀺𑀓𑀫𑀺𑀝𑁆𑀞𑀁 𑀓𑀢𑁆𑀣𑀘𑀺 𑀪𑀯𑁂𑀬𑁆𑀬, 𑀦 𑀲𑀩𑁆𑀩𑀢𑁆𑀣, 𑀲𑀩𑁆𑀩𑀢𑁆𑀣 𑀯𑀸 𑀪𑀯𑁂𑀬𑁆𑀬 ‘𑀯𑀸𑀢𑁂𑀭𑀺𑀢𑀁 𑀲𑀫𑁄𑀦𑀸’𑀢𑀺𑀆𑀤𑀻𑀲𑀼 𑀩𑁆𑀬𑀢𑁆𑀢𑀦𑁆𑀢 𑀭𑀢𑁆𑀢𑀸, 𑀢𑀲𑁆𑀫𑀸 𑀲𑀩𑁆𑀩𑀣𑀸 𑀇𑀝𑁆𑀞𑀧𑁆𑀧𑀲𑀺𑀤𑁆𑀥𑀺𑀬𑀸 𑀇𑀢𑁆𑀢𑀚𑀸𑀢𑁆𑀬𑀸𑀤𑀺 𑀦𑀺𑀲𑁆𑀲𑀻𑀬𑀢𑁂, 𑀅𑀣𑀯𑀸 𑀯𑀡𑁆𑀡𑀼𑀘𑁆𑀘𑀸𑀭𑀡𑀫𑁆𑀧𑀢𑀺 𑀓𑁂𑀲𑀜𑁆𑀘𑀺 𑀯𑀡𑁆𑀡𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀸𑀦𑀁 𑀉𑀘𑁆𑀘𑀦𑀻𑀘𑀢𑀤𑀼𑀪𑀬 𑀲𑀁𑀳𑀸𑀭𑀯𑀲𑁂𑀦 𑀯𑀡𑁆𑀡𑀯𑀺𑀲𑁂𑀲𑀼𑀧𑁆𑀧𑀢𑁆𑀢𑀺 𑀤𑀲𑁆𑀲𑀦𑀢𑁄 𑀢𑁂𑀲𑀁 𑀯𑀲𑁂𑀦 𑀭𑀲𑁆𑀲 𑀩𑁆𑀬𑀢𑁆𑀢𑀺𑀦𑀺𑀤𑁆𑀤𑁂𑀲𑁂 𑀭𑀲𑁆𑀲𑀚𑀸𑀢𑀺𑀦𑀺𑀤𑁆𑀤𑁂𑀲𑁂 𑀯𑀸 𑀯𑀼𑀢𑁆𑀢𑀦𑀬𑁂𑀦 𑀇𑀝𑁆𑀞𑀸𑀦𑀺𑀝𑁆𑀞𑀧𑁆𑀧𑀢𑁆𑀢𑀺𑀬𑀁 𑀲𑀩𑁆𑀩𑀣𑀸 𑀲𑀩𑁆𑀩𑀣𑀸 𑀇𑀝𑁆𑀞𑀧𑁆𑀧𑀲𑀺𑀤𑁆𑀥𑀺𑀬𑀸 𑀇𑀢𑁆𑀢𑀚𑀸𑀢𑁆𑀬𑀸𑀤𑀺 𑀦𑀺𑀲𑁆𑀲𑀻𑀬𑀢𑁂, 𑀢𑀢𑁆𑀣 𑀯𑀡𑁆𑀡 𑀧𑀭𑁂𑀦 𑀲𑀯𑀡𑁆𑀡𑀕𑁆𑀕𑀳𑀡𑀁 𑀦𑀺𑀬𑀫𑀺𑀢𑀼𑀁 𑀯𑀘𑀦𑀫𑀺𑀤𑀫𑀸𑀭𑀤𑁆𑀥𑀦𑁆𑀢𑀺 ‘𑀲𑀩𑁆𑀩𑀢𑁆𑀣𑁂𑀯𑀸’𑀢𑀺𑀆𑀤𑀺𑀦𑀸 𑀯𑀘𑀦𑀸𑀭𑀫𑁆𑀪𑀨𑀮𑀫𑀸𑀳, 𑀲𑀩𑁆𑀩𑀢𑁆𑀣𑁂𑀯𑀸𑀢𑀺 𑀲𑀩𑁆𑀩𑀲𑁆𑀫𑀺𑀁𑀬𑁂𑀯 𑀲𑀼𑀢𑁆𑀢𑀧𑁆𑀧𑀤𑁂𑀲𑁂. 𑀦𑀦𑀼 𑀲𑀬𑀜𑁆𑀘𑀸𑀢𑀺 𑀯𑀼𑀢𑁆𑀢𑁂𑀧𑀺 𑀧𑀭𑀺𑀬𑀢𑁆𑀢𑀁, 𑀦 𑀳𑁆𑀬𑀜𑁆𑀜𑀁 𑀭𑀽𑀧𑀸 𑀲𑀬𑀫𑀢𑁆𑀣𑀺, 𑀅𑀜𑁆𑀜𑀁 𑀯𑀸 (𑀲𑀬)𑀢𑁄 𑀭𑀽𑀧𑀦𑁆𑀢𑀺 𑀲𑀺𑀤𑁆𑀥𑁂𑀧𑁆𑀬𑁂𑀯𑀁 𑀲𑀢𑀺 𑀅𑀢𑁆𑀣𑁂𑀢𑁆𑀣 𑀧𑀭𑁄 𑀓𑁄𑀘𑀺 𑀯𑀺𑀲𑁂𑀲𑁄𑀢𑀺 𑀜𑀸𑀧𑁂𑀢𑀼𑀁 𑀲𑀜𑁆𑀘 𑀭𑀽𑀧’𑀦𑁆𑀢𑀺 𑀯𑀼𑀢𑁆𑀢𑀺𑀓𑀸𑀭𑁄 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀭𑀽𑀧𑀲𑁆𑀲 𑀯𑀺𑀲𑁂𑀲𑀺𑀢𑀩𑁆𑀩𑀢𑁆𑀢𑀸 ‘𑀲𑀜𑁆𑀘 𑀭𑀽𑀧’𑀦𑁆𑀢𑀺 𑀯𑀼𑀢𑁆𑀢𑀺𑀬𑀁 𑀦𑀺𑀤𑁆𑀤𑀺𑀲𑀻𑀬𑀫𑀸𑀦𑀢𑁆𑀢𑀸 𑀘 𑀭𑀽𑀧𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 ‘𑀲𑀜𑁆𑀘 𑀕𑀬𑁆𑀳𑀢𑀻’𑀢𑀺 𑀯𑀼𑀢𑁆𑀢𑀁, 𑀲𑀁𑀭𑀽𑀧𑀕𑁆𑀕𑀳𑀡𑀸𑀬𑀸𑀧𑀺𑀲𑀤𑁆𑀤𑀁 𑀓𑀭𑁄𑀢𑁄-𑀥𑀺𑀧𑁆𑀧𑀸𑀬𑁄-𑀬𑀦𑁆𑀢𑀺 𑀯𑀢𑁆𑀢𑀼𑀫𑀸𑀳-‘𑀅𑀜𑁆𑀜𑀣𑁂’𑀘𑁆𑀘𑀸𑀤𑀺, 𑀅𑀜𑁆𑀜𑀣𑀸𑀢𑀺 𑀅𑀜𑁆𑀜𑁂𑀦𑀧𑁆𑀧𑀓𑀸𑀭𑁂𑀦 𑀲𑀁𑀭𑀽𑀧𑀕𑁆𑀕𑀳𑀡𑀸𑀬 𑀅𑀧𑀺𑀲𑀤𑁆𑀤𑀸𑀪𑀸𑀯𑁂𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀅𑀜𑁆𑀜𑀧𑀤𑀢𑁆𑀣𑁂𑀢𑀺 ¶ 𑀅𑀜𑁆𑀜𑀧𑀤𑀢𑁆𑀣 𑀲𑀫𑀸𑀲𑀯𑀺𑀲𑀬𑁂, 𑀕𑀼𑀡𑀻𑀪𑀽𑀢𑀲𑁆𑀲𑀸𑀢𑀺 𑀅𑀧𑁆𑀧𑀥𑀸𑀦𑀪𑀽𑀢𑀲𑁆𑀲𑀸𑀓𑀸𑀭𑁂 𑀓𑀸𑀭𑀸𑀤𑀺𑀦𑁄, 𑀲𑀫𑀸𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀧𑀥𑀸𑀦𑀢𑀽 𑀢𑀢𑁆𑀢𑁂𑀧𑀺 𑀕𑀼𑀡𑁄 𑀪𑀯𑀢𑀺 𑀅𑀜𑁆𑀜𑀧𑀤𑀢𑁆𑀣𑁄-𑀓𑀸𑀭𑁂𑀓𑀸𑀭𑀸𑀤𑀺 𑀯𑀺𑀥𑀸𑀬 𑀓𑀢𑁆𑀢𑀸, 𑀯𑀺𑀥𑀻𑀬𑀫𑀸𑀦𑁄 𑀲𑀯𑀡𑁆𑀡𑁄𑀯 𑀧𑀥𑀸𑀦𑀁… 𑀇𑀤𑀫𑀢𑁆𑀣𑀺𑀢𑀸𑀬 𑀢𑀧𑁆𑀧𑀯𑀢𑁆𑀢𑀺𑀬𑀸𑀢𑀺. 𑀦𑀦𑀼 𑀯𑀼𑀢𑁆𑀢𑀺𑀬𑀫𑀧𑀺𑀲𑀤𑁆𑀤𑀲𑁆𑀲𑀸𑀢𑁆𑀣𑀁 𑀯𑀤𑀢𑀸 𑀲𑀬𑀜𑁆𑀘𑁂𑀢𑀺 𑀯𑀢𑁆𑀢𑀩𑁆𑀩𑀁, ‘‘𑀢𑀣𑀸 𑀲𑀬𑀫𑀢𑁆𑀢𑀦𑀻’’𑀢𑀺 𑀦𑀺𑀖𑀡𑁆𑀟𑀼𑀢𑁄 𑀲𑀬𑀜𑁆𑀘-𑀢𑁆𑀢𑀸𑀓𑀸𑀭𑁂𑀓𑀸𑀭𑀸𑀤𑀺𑀜𑁆𑀘 𑀕𑀬𑁆𑀳𑀢𑀻𑀢𑁆𑀬𑀫𑀢𑁆𑀣𑁄 𑀲𑀫𑁆𑀪𑀸𑀯𑀻𑀬𑀢𑀻𑀢𑀺 𑀘𑁄𑀤𑀦𑀫𑁆𑀧𑀦𑀲𑀺 𑀦𑀺𑀥𑀸𑀬 ‘𑀲𑀜𑁆𑀘 𑀭𑀽𑀧’𑀦𑁆𑀢𑀺 𑀯𑀤𑀦𑁆𑀢𑁄 𑀲𑀸𑀥𑀺𑀧𑁆𑀧𑀸𑀬𑀸𑀭𑀼𑀴𑁆𑀳𑀁 𑀓𑀺𑀜𑁆𑀘𑀺 𑀅𑀢𑁆𑀣𑀯𑀺𑀲𑁂𑀲𑀁 𑀧𑀓𑀸𑀲𑁂𑀢𑀼𑀁 𑀢𑀣𑁂𑀯𑀸𑀳𑀸𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁-‘𑀲𑀬𑀜𑁆𑀘𑁂’𑀢𑁆𑀬𑀸𑀤𑀺, ‘‘𑀥𑀦𑀜𑁆𑀜𑀸𑀢𑀻𑀲𑀼 𑀲𑀁𑀲𑀤𑁆𑀤𑁄, 𑀢𑀣𑀸𑀢𑁆𑀢𑀢𑁆𑀢𑀦𑀺𑀬𑁂𑀲𑀼𑀧𑀻’’𑀢𑀺 𑀦𑀺𑀖𑀡𑁆𑀟𑀼𑀯𑀘𑀦𑀢𑁄 ‘𑀲’𑀦𑁆𑀢𑀺 𑀅𑀢𑁆𑀢𑀸𑀧𑀺 𑀕𑀬𑁆𑀳𑀢𑀺, 𑀓𑁄 𑀲𑁄 𑀲𑀤𑁆𑀤𑀭𑀽𑀧𑀁 𑀲𑀸𑀥𑀸𑀭𑀡𑀁, ‘𑀲’𑀦𑁆𑀢𑀺 𑀅𑀢𑁆𑀢𑀦𑀺𑀬𑀫𑁆𑀧𑀺, 𑀓𑀺𑀦𑁆𑀢𑀁 𑀲𑀤𑁆𑀤𑀸𑀦 𑀫𑀲𑀸𑀥𑀸𑀭𑀡𑀁 𑀲𑀤𑁆𑀤𑀭𑀽𑀧𑀁, 𑀢𑀣𑀸 𑀲𑀢𑀺 𑀅𑀢𑁆𑀢𑀦𑀺𑀬𑀁 𑀭𑀽𑀧𑀁 𑀦𑀸𑀫𑀸𑀢𑁆𑀢𑀲𑀗𑁆𑀔𑀸𑀢𑀲𑀤𑁆𑀤𑀲𑀫𑁆𑀩𑀦𑁆𑀥𑀻𑀢𑀺 𑀆𑀳-‘𑀲𑀁𑀭𑀽𑀧𑀁 𑀲𑀤𑁆𑀤𑀸𑀦𑀫𑀲𑀸𑀥𑀸𑀭𑀡𑀁 𑀭𑀽𑀧’𑀦𑁆𑀢𑀺, 𑀏𑀢𑀜𑁆𑀘 𑀇𑀤𑀦𑁆𑀢𑀻𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀅𑀲𑀸𑀥𑀸𑀭𑀡𑀦𑁆𑀢𑀺 𑀅𑀲𑀸𑀥𑀸𑀭𑀡𑀁 𑀲𑀤𑁆𑀤𑀭𑀽𑀧𑀁, 𑀲𑀢𑀺 𑀲𑀫𑁆𑀪𑀯𑁂 𑀩𑁆𑀬𑀪𑀺𑀘𑀸𑀭𑁂 𑀘 𑀯𑀺𑀲𑁂𑀲𑀦𑀲𑁆𑀲 𑀲𑀸𑀢𑁆𑀣𑀓𑀢𑀸𑀬 𑀅𑀲𑀸𑀥𑀸𑀭𑀡𑀦𑁆𑀢𑀺 𑀭𑀽𑀧𑀁 𑀯𑀺𑀲𑁂𑀲𑀢𑀸 𑀲𑀸𑀥𑀸𑀭𑀡𑀲𑁆𑀲𑀸𑀧𑀺 𑀲𑀫𑁆𑀪𑀯𑁄 𑀯𑀼𑀢𑁆𑀢𑁄𑀬𑁂𑀯 𑀦𑀸𑀫𑀸𑀢𑀺 𑀆𑀳-‘𑀤𑀼𑀯𑀺𑀥𑀁 𑀳𑀺’𑀘𑁆𑀘𑀸𑀤𑀺, 𑀓𑀺𑀦𑁆𑀢𑀁 𑀲𑀸𑀥𑀸𑀭𑀡𑀫𑀲𑀸𑀥𑀸𑀭𑀡𑀜𑁆𑀘𑀭𑀽𑀧𑀦𑁆𑀢𑀺 𑀲𑀸𑀫𑀜𑁆𑀜𑁂𑀦 𑀭𑀽𑀧𑀁 𑀦𑀺𑀤𑁆𑀤𑀺𑀲𑀺𑀢𑀼𑀫𑀸𑀳-‘𑀢𑀢𑁆𑀣𑀸’𑀢𑀺𑀆𑀤𑀺, 𑀢𑀢𑁆𑀣𑀸𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀢𑁆𑀢𑀫𑀻, 𑀲𑀤𑁆𑀤𑀸𑀦𑀦𑁆𑀢𑀺 𑀲𑀸𑀢𑁆𑀣𑀓𑀦𑀺𑀭𑀢𑁆𑀣𑀓𑀸𑀦𑀁 𑀬𑁂𑀲𑀁𑀓𑁂𑀲𑀜𑁆𑀘𑀺 𑀲𑀤𑁆𑀤𑀸𑀦𑀁, 𑀢𑀁𑀢𑀁 𑀲𑀤𑁆𑀤𑀢𑁆𑀢𑀸𑀤𑀻𑀳𑀺 𑀢𑁂𑀲𑀁𑀢𑁂𑀲𑀁 𑀩𑀼𑀤𑁆𑀥 𑀅𑀇𑀆𑀤𑀻𑀦𑀁 𑀲𑀤𑁆𑀤𑀸𑀦𑀁 𑀲𑀤𑁆𑀤𑀢𑁆𑀢𑀸𑀤𑀺, 𑀉𑀪𑀬𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀅𑀢𑁆𑀣𑁄 𑀲𑀗𑁆𑀕𑀳𑀺𑀢𑁄, 𑀢𑁂𑀦 𑀲𑀸𑀥𑀸𑀭𑀡𑀁 𑀲𑀤𑁆𑀤𑀭𑀽𑀧𑀫𑀢𑁆𑀣𑀭𑀽𑀧𑀁 𑀢𑀣𑀸-𑀲𑀸𑀥𑀸𑀭𑀡𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀲𑀁𑀭𑀽𑀧𑀦𑁆𑀢𑀺 𑀤𑀲𑁆𑀲𑁂𑀢𑀺, 𑀘𑀢𑀽𑀲𑀼𑀧𑀺 𑀘𑁂𑀢𑁂𑀲𑁆𑀯𑀲𑀸𑀥𑀸𑀭𑀡𑀲𑁆𑀲 𑀲𑀤𑁆𑀤𑀭𑀽𑀧𑀲𑁆𑀲𑁂𑀯𑁄𑀧𑀸𑀦𑀁 𑀤𑀲𑁆𑀲𑁂𑀢𑀼𑀫𑀸𑀳-‘𑀢𑀢𑁆𑀣𑀸’𑀢𑀺𑀆𑀤𑀺, 𑀲𑀸𑀥𑀸𑀭𑀡𑀭𑀽𑀧𑀩𑁆𑀬𑀼𑀤𑀸𑀲𑁂𑀦𑀸𑀢𑀺 𑀲𑀸𑀥𑀸𑀭𑀡𑀭𑀽𑀧𑀲𑁆𑀲 𑀧𑀭𑀺𑀘𑁆𑀘𑀸𑀕𑁂𑀦, 𑀉𑀧𑀸𑀤𑀺𑀬𑀦𑁆𑀢𑁄 𑀭𑀽𑀧𑀫𑁂𑀯 𑀲𑀤𑁆𑀤𑀲𑁆𑀲𑀲𑀁, 𑀦𑀸𑀢𑁆𑀣𑁄𑀢𑀺 𑀘 𑀤𑀲𑁆𑀲𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀘 𑀲𑀤𑁆𑀤𑁄 𑀧𑀦𑁂𑀢𑁆𑀣 ‘𑀇𑀤𑀁 𑀤𑀲𑁆𑀲𑁂𑀢𑀻’𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀲𑀫𑀼𑀘𑁆𑀘𑀺𑀦𑁄𑀢𑀺, 𑀅𑀲𑀸𑀥𑀸𑀭𑀡𑀲𑁆𑀲𑁂𑀯𑁄𑀧𑀸𑀤𑀺𑀬𑀦𑁂 𑀓𑀸𑀭𑀡𑀫𑀸𑀳-‘𑀢𑀦𑁆𑀢’𑀫𑀺𑀘𑁆𑀘𑀸𑀤𑀺, 𑀇𑀢𑀭𑀦𑁆𑀢𑀺 𑀬𑁂 𑀲𑀁𑀓𑁂𑀲𑀜𑁆𑀘𑀺 𑀲𑀤𑁆𑀤𑀸𑀦𑀁 𑀲𑀤𑁆𑀤𑀢𑁆𑀢𑀸𑀤𑀺, 𑀧𑀭𑀲𑁆𑀲𑀸𑀧𑀻𑀢𑀺 𑀅𑀜𑁆𑀜𑀲𑁆𑀲 𑀬𑀲𑁆𑀲𑀓𑀲𑁆𑀲𑀘𑀺 𑀲𑀤𑁆𑀤𑀲𑁆𑀲𑀸𑀧𑀺, 𑀇𑀢𑀺 𑀇𑀤𑀁, 𑀧𑀢𑀺𑀢𑀁 𑀧𑀲𑀺𑀤𑁆𑀥𑀁, 𑀏𑀢𑁆𑀣 𑀧𑀦 𑀇𑀢𑀺𑀲𑀤𑁆𑀤𑁄 𑀳𑁂𑀢𑀼𑀫𑁆𑀳𑀺, 𑀬𑀲𑁆𑀫𑀸 𑀇𑀤𑀁 𑀬𑀣𑀸𑀯𑀼𑀢𑁆𑀢𑀁 𑀧𑀲𑀺𑀤𑁆𑀥𑀁 𑀢𑀲𑁆𑀫𑀸 𑀧𑀼𑀩𑁆𑀩𑀸𑀘𑀭𑀺𑀬𑀧𑀭𑀫𑁆𑀧𑀭𑀸𑀬𑀸𑀕𑀢𑁄 𑀧𑀤𑁂𑀲𑀢𑁄 ¶ 𑀉𑀧𑀸𑀤𑀺𑀬𑀦𑁆𑀢𑁄𑀢𑀺 𑀧𑀓𑀢𑀁, 𑀲𑀁𑀲𑀤𑁆𑀤𑀯𑀺𑀲𑁂𑀲𑀦𑀲𑀸𑀫𑀢𑁆𑀣𑀺𑀬𑁂𑀦 𑀅𑀲𑀸𑀥𑀸𑀭𑀡𑀭𑀽𑀧𑁄𑀧𑀸𑀤𑀺𑀬𑀦𑁂𑀧𑀺 𑀅𑀲𑀸𑀥𑀸𑀭𑀡𑀁 𑀲𑀤𑁆𑀤𑀭𑀽𑀧𑀫𑁂𑀯𑁄𑀧𑀸𑀤𑀻𑀬𑀢𑀺 𑀦𑀸𑀲𑀸𑀥𑀸𑀭𑀡𑀫𑀢𑁆𑀣𑀭𑀽𑀧𑀁… 𑀇𑀫𑀺𑀦𑀸 𑀯𑀓𑁆𑀔𑀫𑀸𑀦𑀓𑀸𑀭𑀡𑀢𑀸 [𑀢𑀸𑀬 (𑀧𑁄𑀢𑁆𑀣𑀓𑁂)] 𑀯𑀲𑁂𑀦𑀸𑀢𑀺 𑀆𑀳-‘𑀲𑀤𑁆𑀤𑀲𑁆𑀲𑁂’𑀘𑁆𑀘𑀸𑀤𑀺, 𑀆𑀲𑀦𑁆𑀦𑀁…𑀲𑀤𑁆𑀤𑀢𑁄 𑀲𑀤𑁆𑀤𑀪𑀸𑀯𑀲𑀸 𑀦𑀜𑁆𑀜𑀢𑁆𑀢𑀸, 𑀯𑀺𑀧𑀭𑀺𑀬𑀬𑀢𑁄𑀢𑀺 𑀯𑀺𑀧𑀭𑀺𑀬𑀸𑀲𑁂𑀦 𑀅𑀦𑀸𑀲𑀦𑁆𑀦 𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄, 𑀘𑀓𑁆𑀔𑀼𑀯𑀺𑀲𑀬𑁄𑀧𑀺 𑀳𑀺 𑀅𑀢𑁆𑀣𑁄 𑀓𑀣𑀁 𑀲𑁄𑀢𑀯𑀺𑀲𑀬𑀲𑀤𑁆𑀤𑀲𑁆𑀲 𑀦 𑀆𑀲𑀦𑁆𑀦𑁄 𑀲𑀁𑀭𑀽𑀧𑀫𑁆𑀪𑀯𑀺𑀢𑀼𑀫𑀭𑀳𑀢𑀻𑀢𑀺, 𑀓𑀸𑀭𑀡𑀦𑁆𑀢𑀭𑀫𑀸𑀳-‘𑀅𑀳𑁂𑀬𑁆𑀬𑀢𑁆𑀢𑀸𑀘𑀸’𑀢𑀺𑀆𑀤𑀺, 𑀅𑀳𑁂𑀬𑁆𑀬𑀢𑁆𑀢𑀸𑀢𑀺 𑀅𑀧𑀭𑀺𑀘𑁆𑀘𑀚𑀦𑀻𑀬𑀢𑁆𑀢𑀸, 𑀇𑀤𑀫𑁆𑀧𑀺 𑀦𑀺𑀘𑁆𑀘𑀲𑀫𑁆𑀩𑀦𑁆𑀥𑀺𑀢𑁆𑀢𑁂 𑀓𑀸𑀭𑀡𑀯𑀘𑀦𑀁, 𑀢𑀁 𑀲𑀤𑁆𑀤𑀭𑀽𑀧𑀁, 𑀦𑀺𑀘𑁆𑀘𑀲𑀫𑁆𑀩𑀦𑁆𑀥𑀻𑀢𑀺 𑀦𑀺𑀭𑀦𑁆𑀢𑀭𑀲𑀁𑀬𑁄𑀕𑀻, 𑀯𑀺𑀧𑀭𑀺𑀬𑀬𑀢𑁄𑀢𑀺 𑀳𑁂𑀬𑁆𑀬𑀢𑁆𑀢𑀸, 𑀢𑀣𑀸𑀳𑀺𑀘𑁆𑀘𑀸𑀤𑀺𑀦𑀸 𑀅𑀢𑁆𑀣𑀲𑁆𑀲 𑀳𑁂𑀬𑁆𑀬𑀢𑁆𑀢𑀁 𑀩𑁄𑀥𑁂𑀢𑀺, 𑀅𑀧𑀭𑀁 𑀓𑀸𑀭𑀡𑀫𑀸𑀳-‘𑀅𑀲𑀸𑀥𑀸𑀭𑀡𑀜𑁆𑀘 𑀭𑀽𑀧𑀁’𑀢𑁆𑀬𑀸𑀤𑀺𑀦𑀸, 𑀲𑀸𑀥𑀸𑀭𑀡𑁄 𑀧𑀭𑀺𑀬𑀸𑀬 𑀲𑀤𑁆𑀤𑀸𑀦𑀁, 𑀧𑀘𑁆𑀘𑁂𑀢𑀩𑁆𑀩𑀢𑁆𑀢𑀸𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀢𑁆𑀢𑀸, 𑀇𑀤𑀸𑀦𑀺 𑀓𑀸𑀭𑀡𑀢𑁆𑀢𑀬𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀭𑀽𑀧𑀫𑁂𑀯 𑀲𑀤𑁆𑀤𑀲𑁆𑀲 𑀲𑀁𑀦𑀸𑀫, 𑀦𑀸𑀢𑁆𑀣𑁄𑀢𑀺 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘𑀢𑀤𑁂𑀯’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁, 𑀢𑀤𑁂𑀯𑀦𑁆𑀢𑀺 𑀬𑀲𑁆𑀫𑀸 𑀏𑀯𑀁, 𑀢𑀁 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄, 𑀲𑀭𑀽𑀧𑀧𑁆𑀧𑀥𑀸𑀦𑁂𑀢𑀺 ‘‘𑀕𑁄𑀲𑁆𑀲𑀸 𑀯𑀗’’ (𑁧-𑁩𑁨) 𑀢𑁆𑀬𑀸𑀤𑁄 𑀕𑁄𑀲𑁆𑀲𑀸𑀢𑁆𑀬𑀸𑀤𑀺𑀓𑁂 𑀲𑀭𑀽𑀧𑀧𑁆𑀧𑀥𑀸𑀦𑁂.

𑀦𑁆𑀢𑀼𑀲𑀼𑀢𑀺𑀬𑀸 𑀚𑀦𑁆𑀢𑁆𑀯𑀸𑀤𑀻𑀦𑀫𑁆𑀧𑀺 ‘‘𑀦𑁆𑀢𑀦𑁆𑀢𑀽𑀦𑀁𑀦𑁆𑀢𑁄 𑀬𑁄𑀫𑁆𑀳𑀺 𑀧𑀞𑀫𑁂’’ (𑁨-𑁨𑁧𑁫) 𑀢𑁆𑀬𑀸𑀤𑀺𑀦𑀸 𑀕𑀳𑀡𑀧𑁆𑀧𑀲𑀗𑁆𑀕𑁂 𑀚𑀸𑀢𑀺𑀬𑀫𑀪𑀺𑀧𑁆𑀧𑀲𑀗𑁆𑀕𑀩𑀸𑀥𑀦𑀢𑁆𑀣𑀁 𑀩𑁆𑀬𑀢𑁆𑀢𑀺𑀬𑀁 𑀯𑀦𑁆𑀢𑁆𑀯𑀸𑀤𑀺 𑀲𑀫𑁆𑀩𑀦𑁆𑀥𑀻𑀦𑀫𑀼𑀧𑀸𑀤𑀸𑀦𑀢𑁆𑀢𑀫𑀺𑀤𑀫𑀸𑀭𑀤𑁆𑀥𑀁 ‘‘𑀯𑀦𑁆𑀢𑁆𑀯𑀯𑀡𑁆𑀡𑀸’’ (𑁪-𑁭𑁯) ‘‘𑀢𑀫𑁂𑀢𑁆𑀣𑀲𑁆𑀲𑀢𑁆𑀢𑀻𑀢𑀺 𑀫𑀦𑁆𑀢𑀼’’ (𑁪-𑁭𑁮) ‘‘𑀓𑀢𑁆𑀢𑀭𑀺 𑀪𑀽𑀢𑁂 𑀓𑁆𑀢𑀯𑀦𑁆𑀢𑀼 𑀓𑁆𑀢𑀸𑀯𑀻’’ (𑁫-𑁫𑁫) 𑀢𑀺 𑀯𑀺𑀳𑀺𑀢𑀸 𑀯𑀦𑁆𑀢𑁆𑀯𑀸𑀤𑀬𑁄 𑀦𑀸𑀫.

𑀇𑀢𑀺 𑀫𑁄𑀕𑁆𑀕𑀮𑁆𑀮𑀸𑀦𑀧𑀜𑁆𑀘𑀺𑀓𑀸𑀝𑀻𑀓𑀸𑀬𑀁 𑀲𑀸𑀭𑀢𑁆𑀣𑀯𑀺𑀮𑀸𑀲𑀺𑀦𑀺𑀬𑀁

𑀆𑀥𑀸𑀭𑀯𑀺𑀲𑁂𑀲𑀸𑀧𑀲𑁆𑀲𑀬𑀦𑀦𑁆𑀢𑀺 𑀑𑀧𑀲𑀺𑀮𑁂𑀲𑀺𑀓𑀸𑀥𑀸𑀭𑀯𑀺𑀲𑁂𑀲𑀲𑁆𑀲 𑀦𑀺𑀲𑁆𑀲𑀬𑀦𑀁, 𑀑𑀧𑀲𑀺𑀮𑁂𑀲𑀺𑀓𑀸𑀥𑀸𑀭𑀁 𑀯𑀺𑀦𑀸 𑀆𑀥𑀸𑀭𑀦𑁆𑀢𑀭𑁂 𑀕𑀳𑀺𑀢𑁂 𑀲𑀢𑀺 𑀯𑀘𑀦𑀦𑁆𑀢𑀭𑀁 ¶ 𑀲𑀼𑀢𑁆𑀢𑀦𑁆𑀢𑀭𑀁 𑀯𑀺𑀦𑀸 𑀩𑁆𑀬𑀯𑀳𑀺𑀢𑀦𑀺𑀯𑀢𑁆𑀢𑀺 𑀓𑀸𑀢𑀼𑀁 𑀦 𑀘 𑀲𑀓𑁆𑀓𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀓𑁂𑀘𑀻𑀢𑀺 𑀩𑀼𑀤𑁆𑀥𑀧𑁆𑀧𑀺𑀬𑀸𑀘𑀭𑀺𑀬𑀸𑀤𑀬𑁄 𑀤𑀲𑁆𑀲𑁂𑀢𑀺, 𑀢𑁂 𑀳𑀺 𑀬𑀤𑀺 𑀯𑀡𑁆𑀡𑁂𑀦 𑀓𑀸𑀮𑁂𑀦 𑀯𑀸 𑀩𑁆𑀬𑀯𑀥𑀸𑀦𑁂𑀧𑀺 𑀲𑀦𑁆𑀥𑀺 𑀪𑀯𑁂𑀬𑁆𑀬 𑀢𑀤𑀸 𑀲𑀭𑁂𑀢𑀺 𑀦𑀺𑀫𑀺𑀢𑁆𑀢𑀲𑁆𑀲𑁄 𑀧𑀸𑀤𑀸𑀦𑀁 𑀦𑀺𑀭𑀢𑁆𑀣𑀓𑀁 𑀪𑀯𑁂𑀬𑁆𑀬𑀸𑀢𑀺 𑀲𑀭𑁂𑀢𑀺 𑀦𑀺𑀫𑀺𑀢𑁆𑀢𑁄𑀧𑀸𑀤𑀸𑀦𑀲𑀸𑀫𑀢𑁆𑀣𑀺𑀬𑁂𑀦𑀸𑀦𑁂𑀦 𑀯𑀡𑁆𑀡𑀸𑀤𑀺𑀩𑁆𑀬𑀯𑀥𑀸𑀦𑁂 𑀦𑁄 𑀲𑀦𑁆𑀥𑀻𑀢𑀺 𑀫𑀜𑁆𑀜𑀫𑀸𑀦𑀸 ‘𑀦𑀺𑀫𑀺𑀢𑁆𑀢𑁄’𑀘𑁆𑀘𑀸𑀤𑀺𑀓𑀁 𑀯𑀸𑀓𑁆𑀬𑀫𑀸𑀳𑀼, 𑀢𑀤𑀬𑀼𑀢𑁆𑀢𑀦𑁆𑀢𑀺 𑀢𑁂𑀳𑀺’𑀦𑀺𑀫𑀺𑀢𑁆𑀢𑁄’𑀘𑁆𑀘𑀸𑀤𑀺𑀦𑀸 𑀬𑀁 𑀯𑀼𑀢𑁆𑀢𑀁, 𑀢𑀁 𑀅𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄, 𑀅𑀬𑀼𑀢𑁆𑀢𑀢𑁆𑀢𑁂 𑀓𑀸𑀭𑀡𑀁 𑀩𑁆𑀬𑀪𑀺𑀘𑀸𑀭𑀲𑀩𑁆𑀪𑀸𑀯𑁂𑀦 𑀲𑀸𑀫𑀢𑁆𑀣𑀺𑀬𑀸𑀪𑀸𑀯𑁄𑀬𑁂𑀯𑀸𑀢𑀺 𑀩𑁆𑀬𑀪𑀺𑀘𑀸𑀭𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀸𑀫𑀢𑁆𑀣𑀺𑀬𑀸𑀪𑀸𑀯𑀦𑁆𑀤𑀲𑁆𑀲𑁂𑀢𑀼𑀫𑀸𑀳-‘𑀅𑀯𑀲𑀸𑀦𑁂,𑀘𑁆𑀘𑀸𑀤𑀺, 𑀓𑀸𑀭𑀺𑀬𑀸𑀪𑀸𑀯𑁂𑀧𑀻𑀢𑀺 𑀏𑀢𑁆𑀣 𑀦 𑀓𑁂𑀯𑀮𑀁 ‘𑀇𑀤𑀫𑁂𑀯 𑀲𑀘𑁆𑀘𑀁, 𑀲𑀼𑀫𑀦𑀸 𑀪𑀯𑀦𑁆𑀢𑀼 𑀅𑀣𑁄𑀧𑀺’𑀢𑁆𑀬𑀸𑀤𑁄 𑀯𑀡𑁆𑀡𑀓𑀸𑀮𑀩𑁆𑀬𑀯𑀥𑀸𑀦𑁂𑀬𑁂𑀯, 𑀅𑀣 𑀔𑁄 ‘𑀏𑀢𑁂 𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀽’𑀢𑁆𑀬𑀸𑀤𑁄 𑀅𑀯𑀲𑀸𑀦𑁂 ‘𑀧𑀫𑀸𑀤𑁄 𑀫𑀘𑁆𑀘𑀼𑀦𑁄 𑀧𑀤𑀁’ 𑀢𑁆𑀬𑀸𑀤𑁄 𑀅𑀦𑁆𑀢 𑀩𑀺𑀦𑁆𑀤𑀼 𑀲𑀗𑁆𑀔𑀸𑀢𑀦𑀺𑀫𑀺𑀢𑁆𑀢𑀦𑁆𑀢𑀭𑁂 𑀯𑀸 𑀓𑀸𑀭𑀺𑀬𑀸𑀪𑀸𑀯𑁂𑀧𑀺 𑀦𑀺𑀫𑀺𑀢𑁆𑀢𑁄 𑀧𑀸𑀤𑀸𑀦𑀲𑁆𑀲 𑀲𑀸𑀢𑁆𑀣𑀓𑀢𑁄𑀢𑀺 𑀅𑀧𑀺𑀲𑀤𑁆𑀤𑀲𑁆𑀲𑀢𑁆𑀣𑁄, 𑀲𑀸𑀢𑁆𑀣𑀓𑀢𑁄𑀢𑀺 𑀪𑀸𑀯𑀧𑁆𑀧𑀘𑁆𑀘𑀬𑀮𑁄𑀧𑁂𑀦 𑀪𑀸𑀯𑀧𑁆𑀧𑀥𑀸𑀦𑀯𑀲𑁂𑀦 𑀯𑀸 𑀯𑀼𑀢𑁆𑀢𑀁, 𑀲𑀸𑀢𑁆𑀣𑀓𑀢𑁆𑀢𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀅𑀜𑁆𑀜𑀣𑀸 𑀦𑀺𑀫𑀺𑀢𑁆𑀢𑁄𑀧𑀸𑀤𑀸𑀦𑀫𑁂𑀯 𑀲𑀸𑀢𑁆𑀣𑀓𑀁 𑀦𑀸𑀫𑀸𑀢𑀺 ‘𑀦𑀺𑀫𑀺𑀢𑁆𑀢𑁄 𑀧𑀸𑀤𑀸𑀦𑀲𑁆𑀲 𑀲𑀸𑀢𑁆𑀣𑀓𑀢𑁄’𑀢𑀺 𑀦 𑀬𑀼𑀚𑁆𑀚𑀢𑀺, 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 ‘𑀅𑀯𑀲𑀸𑀦𑁂 𑀦𑀺𑀫𑀺𑀦𑁆𑀢𑀭𑁂 𑀯𑀸 𑀓𑀸𑀭𑀺𑀬𑀸𑀪𑀸𑀯𑁂𑀦 𑀩𑁆𑀬𑀪𑀺𑀘𑀸𑀭𑀲𑀩𑁆𑀪𑀸𑀯𑀸 𑀅𑀜𑁆𑀜𑀣𑀸𑀦𑀼𑀧𑀧𑀢𑁆𑀢𑀺𑀮𑀓𑁆𑀔𑀡𑀁 𑀲𑀸𑀫𑀢𑁆𑀣𑀺𑀬𑀁 𑀦𑀢𑁆𑀣𑀺, 𑀦𑀺𑀫𑀺𑀢𑁆𑀢𑀦𑁆𑀢𑀼𑀩𑁆𑀬𑀯𑀥𑀸𑀦𑁂𑀧𑀺 𑀘𑀢𑁆𑀣𑀺, 𑀬𑀣𑀸’𑀤𑀸𑀭𑀼𑀦𑀺𑀫𑀺𑀢𑁆𑀢𑀁 𑀯𑀦𑁄𑀧𑀲𑀗𑁆𑀓𑀫𑀦’𑀦𑁆𑀢𑀺 𑀢𑀲𑁆𑀫𑀸 𑀯𑀡𑁆𑀡𑀓𑀸𑀮𑀩𑁆𑀬𑀯𑀥𑀸𑀦𑁂𑀧𑀺 𑀲𑀭𑁂𑀢𑀺 𑀦𑀺𑀫𑀺𑀢𑁆𑀢𑁂 𑀲𑀢𑀺 𑀮𑁄𑀧𑀓𑀸𑀭𑀺𑀬𑀁 𑀧𑀧𑁆𑀧𑁄𑀢𑁂 𑀯𑀸’𑀢𑀺. 𑀮𑀼𑀧𑁆𑀧𑀢𑀻𑀢𑀺 ‘𑀢𑀢𑁆𑀭𑀺𑀫𑁂’𑀘𑁆𑀘𑀸𑀤𑀺𑀦𑀸 𑀓𑀣𑀦𑀓𑀸𑀮𑁂 𑀦 𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄, 𑀅𑀤𑀲𑁆𑀲𑀦𑀫𑀢𑁆𑀢𑀫𑁂𑀯 𑀳𑀺 𑀮𑁄𑀧𑁄, 𑀅𑀜𑁆𑀜𑀣𑀸 ‘𑀢𑀢𑁆𑀭𑀸’𑀤𑀺𑀲𑀤𑁆𑀤𑀭𑀽𑀧𑀸𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀅𑀢𑁆𑀣𑀧𑁆𑀧𑀢𑀻𑀢𑀺 𑀓𑀸𑀭𑀺𑀢𑁆𑀢𑀫𑁂𑀲𑀁 𑀦 𑀲𑀺𑀬𑀸𑀢𑀺, 𑀧𑀞𑀫𑀸𑀬 𑀦𑀺𑀤𑁆𑀤𑀺𑀝𑁆𑀞𑁄… 𑀯𑀼𑀢𑁆𑀢𑀢𑁆𑀢𑀸 𑀓𑀫𑁆𑀫𑀲𑁆𑀲, 𑀲𑀭𑀲𑁆𑀲𑀸𑀢𑀺 𑀯𑀤𑁂𑀬𑁆𑀬… 𑀪𑀸𑀯𑁂 𑀔𑀸𑀤𑀺𑀧𑁆𑀧𑀘𑁆𑀘𑀬𑁂𑀦 𑀅𑀯𑀼𑀢𑁆𑀢𑀓𑀫𑁆𑀫𑀢𑁆𑀢𑀸, 𑀇𑀳𑀸𑀢𑀺 𑀇𑀫𑀺𑀦𑀸 𑀲𑀢𑁆𑀣𑀦𑁆𑀢𑀭𑁂 𑀪𑀸𑀯𑀲𑀸𑀥𑀦𑀯𑀲𑁂𑀦 𑀕𑀳𑀡𑀁 𑀯𑀺𑀪𑀸𑀯𑁂𑀢𑀺, 𑀕𑀦𑁆𑀣 𑀮𑀸𑀖𑀯𑁄… 𑀲𑀭𑀲𑁆𑀲 𑀮𑁄𑀧𑁄𑀢𑀺 𑀯𑀸 𑀮𑁄𑀧𑀁 𑀧𑀧𑁆𑀧𑁄𑀢𑀻𑀢𑀺 𑀯𑀸 𑀅𑀯𑀢𑁆𑀢𑀩𑁆𑀩𑀢𑁆𑀢𑀸, 𑀲𑀭𑁄𑀢𑀺 𑀧𑀞𑀫𑀸𑀬 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀲𑀭𑁄 𑀮𑁄𑀧𑁄 𑀦𑀸𑀫 𑀳𑁄𑀢𑀻𑀢𑀺 𑀲𑀗𑁆𑀓𑀸𑀧𑀺 𑀲𑀺𑀬𑀸𑀢𑀺 𑀆𑀳-‘𑀦 𑀘𑁂’𑀘𑁆𑀘𑀸𑀤𑀺, 𑀇𑀳𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂, 𑀳𑁄𑀦𑁆𑀢𑀺𑀘𑁆𑀘𑀸𑀤𑁄𑀧𑀺 𑀧𑀼𑀩𑁆𑀩𑀲𑀭𑀮𑁄𑀧𑁂 𑀳𑀦𑁆𑀢𑀺𑀘𑁆𑀘𑀸𑀤𑀺𑀓𑀫𑁆𑀧𑀺 𑀲𑀺𑀬𑀸𑀢𑁆𑀬𑀸𑀲𑀗𑁆𑀓𑀺𑀬𑀸𑀳-‘𑀲𑁄𑀘𑁂’𑀘𑁆𑀘𑀸𑀤𑀺, 𑀉𑀲𑁆𑀲𑀕𑁆𑀕𑀢𑁄 𑀆𑀕𑀢𑁄 𑀲𑀫𑁆𑀪𑀽𑀢𑁄 𑀢𑀲𑁆𑀲 𑀯𑀸 𑀅𑀬𑀁𑀢𑀺 𑀑𑀲𑁆𑀲𑀕𑁆𑀕𑀺𑀓𑁄 𑀧𑀼𑀩𑁆𑀩𑀮𑁄𑀧𑁄 ¶ , 𑀢𑀲𑁆𑀲 𑀪𑀸𑀯𑁄 𑀑𑀲𑁆𑀲𑀕𑁆𑀕𑀺𑀓𑀢𑁆𑀢𑀁, 𑀑𑀲𑁆𑀲𑀕𑁆𑀕𑀺𑀓𑀢𑁆𑀢𑀸 𑀧𑀼𑀩𑁆𑀩𑀮𑁄𑀧𑀲𑁆𑀲 𑀓𑀸𑀭𑀺𑀬𑀦𑁆𑀢𑀭𑁂𑀳𑀺 𑀧𑀭𑀮𑁄𑀧𑀸𑀤𑀻𑀳𑀺 𑀅𑀧𑀯𑀸𑀤𑀯𑀺𑀥𑀻𑀳𑀺 𑀆𑀩𑀸𑀥𑀺𑀢𑁄 𑀏𑀯, 𑀲𑁄 𑀘 𑀧𑀼𑀩𑁆𑀩𑀮𑁄𑀧𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, ‘‘𑀧𑀭𑁄 𑀓𑁆𑀯𑀘𑀻’’𑀢𑀺 (𑁯𑁧-𑁨𑁭) 𑀓𑁆𑀯𑀘𑀺𑀕𑁆𑀕𑀳𑀡𑁂𑀦 𑀧𑀼𑀩𑁆𑀩𑀧𑀭𑀮𑁄𑀧𑀸𑀦𑀁 𑀢𑀼𑀮𑁆𑀬𑀩𑀮𑀢𑁆𑀢𑀸𑀪𑀸𑀯𑀸 𑀬𑀣𑀸 𑀕𑀫𑀧𑁆𑀧𑀢𑁆𑀢𑀺𑀢𑁄 𑀧𑀭𑀮𑁄𑀧𑀲𑁆𑀲𑀸𑀧𑀯𑀸𑀤𑀭𑀽𑀧𑀢𑁆𑀢𑀁, 𑀅𑀚𑁆𑀛𑀸𑀲𑀺𑀢𑁂𑀢𑀺 𑀧𑀯𑀺𑀝𑁆𑀞𑁂, 𑀦 𑀳𑁄𑀢𑀺… 𑀧𑀭𑀮𑁄𑀧𑀸𑀧𑀯𑀸𑀤𑁂𑀦 𑀩𑀸𑀥𑀺𑀢𑀢𑁆𑀢𑀸, 𑀢𑁂𑀳𑀻𑀢𑀺 𑀧𑀭𑀮𑁄𑀧𑀸𑀤𑀻𑀳𑀺, 𑀲𑀩𑁆𑀩𑀣𑀸 𑀫𑀼𑀢𑁆𑀢𑀯𑀺𑀲𑀬𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀦𑁆𑀢𑀺, 𑀯𑀺𑀓𑀧𑁆𑀧𑁂𑀦 𑀫𑀼𑀢𑁆𑀢𑀯𑀺𑀲𑀬𑁄 𑀮𑀢𑁂 𑀯𑀸𑀢𑀺.

𑀇𑀢𑀺𑀲𑀤𑁆𑀤𑁄 𑀇𑀤𑀫𑀢𑁆𑀣𑁂, 𑀓𑁆𑀯𑀘𑀺 𑀮𑁄𑀧𑀦𑀻𑀬𑁄 𑀳𑁄𑀢𑀻𑀢𑀺 𑀇𑀤𑀁 𑀯𑀘𑀦𑀁 𑀤𑀻𑀧𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀓𑀺𑀦𑁆𑀢𑀺 𑀆𑀳-‘𑀧𑀬𑁄𑀕𑀸𑀦𑀼𑀲𑀸𑀭𑀺𑀢’𑀦𑁆𑀢𑀺, 𑀓𑀲𑁆𑀲𑀸𑀢𑀺 𑀆𑀳-‘𑀓𑀸𑀭𑀺𑀬𑀲𑁆𑀲 𑀧𑀭𑀮𑁄𑀧𑀲𑁆𑀲𑀸’𑀢𑀺, 𑀓𑁂𑀦 𑀳𑁂𑀢𑀼𑀦𑀸𑀢𑀺 𑀆𑀳 ‘𑀓𑁆𑀯𑀘𑀺𑀕𑁆𑀕𑀳𑀡𑁂𑀦𑀸’𑀢𑀺, 𑀓𑀢𑁆𑀣𑀸𑀢𑀺 𑀆𑀳-‘𑀇𑀳 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂’𑀢𑀺, 𑀢𑁂𑀦𑀸𑀢𑀺 𑀢𑁂𑀦 𑀧𑀬𑁄𑀕𑀸𑀦𑀼𑀲𑀸𑀭𑀺𑀢𑀸𑀤𑀻𑀧𑀦𑁂𑀦, 𑀬𑀣𑀸𑀧𑀬𑁄𑀕𑀦𑁆𑀢𑀺 𑀆𑀕𑀫𑀧𑀬𑁄𑀕𑀸𑀦𑀢𑀺𑀓𑁆𑀓𑀫𑁂𑀦, 𑀦𑀺𑀘𑁆𑀘𑀁 𑀧𑀓𑁆𑀔𑁂𑀯𑀸 𑀧𑀭𑀮𑁄𑀧𑁄 𑀲𑀺𑀬𑀸𑀢𑀺 𑀳𑁄𑀦𑁆𑀢𑀺𑀘𑁆𑀘𑀸𑀤𑁄 𑀦𑀺𑀘𑁆𑀘𑀁, 𑀮𑀢𑀸𑀯𑀸𑀢𑀺𑀆𑀤𑀻𑀲𑀼 𑀧𑀓𑁆𑀔𑁂 𑀯𑀸 𑀧𑀭𑀮𑁄𑀧𑁄 𑀪𑀯𑁂𑀬𑁆𑀬, 𑀏𑀯𑀁 𑀫𑀜𑁆𑀜𑀢𑁂 ‘‘𑀓𑀲𑁆𑀫𑀺𑀦𑁆𑀢𑀺 𑀅𑀢𑁆𑀣𑁂 𑀓𑁆𑀯𑀸𑀢𑀺 𑀦𑀺𑀧𑁆𑀨𑀦𑁆𑀦𑁂𑀦𑀸𑀦𑀺𑀬𑀫𑀯𑀼𑀢𑁆𑀢𑀺𑀦𑀸 𑀅𑀦𑀺𑀬𑀫𑀢𑁆𑀣𑀲𑁆𑀲𑁂𑀯 𑀯𑀺𑀲𑁂𑀲𑀓𑀢𑁄 𑀯𑀘𑀦𑁂 𑀲𑀩𑁆𑀩𑀢𑁆𑀣𑁂𑀯𑀸𑀦𑀺𑀬𑀢𑀢𑁆𑀣𑀯𑀼𑀢𑁆𑀢𑀺𑀢𑁆𑀢𑀸 𑀓𑁆𑀯𑀘𑀺𑀲𑀤𑁆𑀤𑁄-𑀬𑀁 𑀬𑀣𑀸𑀕𑀫𑀁 𑀦𑀺𑀘𑁆𑀘𑀫𑀦𑀺𑀘𑁆𑀘𑀫𑀲𑀦𑁆𑀢𑀜𑁆𑀘 𑀯𑀺𑀥𑀺𑀁 𑀤𑀻𑀧𑁂𑀢𑀺, 𑀢𑀢𑁆𑀣 𑀳𑁄𑀦𑁆𑀢𑀺𑀘𑁆𑀘𑀸𑀤𑀺𑀓𑁄 𑀦𑀺𑀘𑁆𑀘 𑀧𑀓𑁆𑀔𑁄 𑀧𑀭𑀮𑁄𑀧𑀲𑁆𑀲𑁂𑀯 𑀯𑀺𑀲𑀬𑁄, 𑀮𑀢𑀸𑀯𑀸𑀢𑀺𑀆𑀤𑀺𑀓𑁄 𑀅𑀦𑀺𑀘𑁆𑀘𑀧𑀓𑁆𑀔𑁄 𑀉𑀪𑀬𑀲𑀸𑀥𑀸𑀭𑀡𑀢𑁆𑀢𑀸 𑀧𑀼𑀩𑁆𑀩𑀮𑁄𑀧𑀲𑁆𑀲𑀸𑀧𑀺 𑀯𑀺𑀲𑀬𑁄𑀢𑀺 𑀇𑀫𑀺𑀦𑀸 𑀦𑀺𑀘𑁆𑀘𑀁 𑀧𑀓𑁆𑀔𑁂 𑀯𑀸 𑀧𑀭𑀮𑁄𑀧𑁄 𑀳𑁄𑀢𑀺, 𑀅𑀲𑀦𑁆𑀢𑀧𑀓𑁆𑀔𑁄 𑀧𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀦𑁆𑀢𑀺𑀆𑀤𑀺𑀓𑁄 𑀧𑀼𑀩𑁆𑀩𑀮𑁄𑀧𑀲𑁆𑀲𑁂𑀯 𑀯𑀺𑀲𑀬𑁄 𑀲𑀩𑁆𑀩𑀣𑀸𑀦𑁂𑀦 𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸’’𑀢𑀺, 𑀢𑀻𑀲𑀼𑀧𑀺 𑀘𑁂𑀢𑁂𑀲𑀼 𑀧𑀦 𑀧𑀓𑁆𑀔𑁂𑀲𑀼 𑀦𑀺𑀘𑁆𑀘𑀸𑀦𑀺𑀘𑁆𑀘𑀧𑀓𑁆𑀔𑁂𑀲𑀼 𑀬𑁂𑀯𑀲𑁆𑀲𑀸𑀧𑀯𑀸𑀤𑀭𑀽𑀧𑀢𑀸… 𑀧𑀼𑀩𑁆𑀩𑀮𑁄𑀧𑀲𑁆𑀲 𑀲𑀩𑁆𑀩𑀣𑀸 𑀳𑁄𑀦𑁆𑀢𑀺𑀘𑁆𑀘𑀸𑀤𑁄 𑀦𑀺𑀯𑀸𑀭𑀓𑀢𑁆𑀢𑀸 𑀯𑀸 𑀯𑀺𑀥𑀸𑀬𑀓𑀢𑁆𑀢𑀸 𑀯𑀸 𑀧𑀭𑀮𑁄𑀧𑀲𑁆𑀲, 𑀦 𑀢𑁆𑀯𑀲𑀦𑁆𑀢𑀧𑀓𑁆𑀔𑁂… 𑀧𑀼𑀩𑁆𑀩𑀮𑁄𑀧𑀲𑁆𑀲𑁂𑀯 𑀲𑀩𑁆𑀩𑀣𑀸𑀦𑁂𑀦 𑀤𑀺𑀦𑁆𑀦𑀸 𑀯𑀲𑀭𑀢𑁆𑀢𑀸, 𑀮𑁄𑀓𑀕𑁆𑀕𑁄𑀢𑀺𑀆𑀤𑀺 𑀢𑀼 𑀓𑁆𑀯𑀘𑀺𑀲𑀤𑁆𑀤𑀲𑁆𑀲 𑀧𑀬𑁄𑀕𑀸𑀦𑀼𑀲𑀸𑀭𑀺𑀢𑀸 𑀤𑀻𑀧𑀓𑀢𑁆𑀢𑀸 𑀦𑀺𑀘𑁆𑀘𑁂 𑀅𑀲𑀦𑁆𑀢𑁂𑀯𑀸𑀧𑀺 𑀯𑀺𑀥𑀺𑀫𑁆𑀳𑀺 𑀤𑀻𑀧𑀺𑀢𑁂 𑀧𑀭𑀮𑁄𑀧𑁂𑀦 𑀯𑀸 𑀦𑀺𑀧𑁆𑀨𑀚𑁆𑀚𑀢𑀻𑀢𑀺 𑀦𑁂𑀝𑁆𑀞𑀩𑁆𑀬𑀸𑀖𑀸𑀢𑁄, 𑀏𑀯𑀁 𑀢𑀸𑀯 𑀓𑁆𑀯𑀘𑀺𑀕𑁆𑀕𑀳𑀡𑁂 𑀲𑀩𑁆𑀩𑀣𑀸𑀦𑀺𑀝𑁆𑀞𑀧𑀭𑀺𑀳𑀸𑀭𑁂𑀦 𑀇𑀝𑁆𑀞𑀧𑁆𑀧𑀲𑀺𑀤𑁆𑀥𑀺 ¶ 𑀲𑀺𑀬𑀸, 𑀢𑀤𑀪𑀸𑀯𑁂𑀓𑀣𑀦𑁆𑀢𑀺 𑀢𑀤𑀪𑀸𑀯𑁂 𑀯𑀺𑀭𑁄𑀥𑀫𑀸𑀳-‘𑀅𑀜𑁆𑀜𑀢𑁂’𑀘𑁆𑀘𑀸𑀤𑀺, 𑀧𑀭𑀺𑀬𑀸𑀬𑁂𑀦 𑀪𑀯𑀦𑁆𑀢𑀻𑀢𑀺 𑀓𑁆𑀯𑀘𑀺𑀕𑁆𑀕𑀳𑀡𑀸𑀪𑀸𑀯𑁂 ‘𑀧𑀭𑁄’𑀢𑀺 𑀲𑀼𑀢𑁆𑀢𑀁 𑀲𑀺𑀬𑀸 𑀢𑀣𑀸 𑀲𑀢𑀺 𑀲𑀼𑀢𑁆𑀢𑀤𑁆𑀯𑀬𑀫𑁂𑀓𑀯𑀺𑀲𑀬𑀁 𑀢𑀼𑀮𑁆𑀬𑀩𑀮𑀜𑁆𑀘 𑀲𑀺𑀬𑀸, 𑀢𑀢𑁆𑀣 𑀯𑀺𑀧𑁆𑀧𑀝𑀺𑀲𑁂𑀥𑀸𑀪𑀸𑀯𑀸 𑀧𑀫𑀸𑀡𑀪𑀽𑀢𑀸𑀦𑀫𑀸𑀘𑀭𑀺𑀬 (𑀯𑀘𑀦𑀸)𑀦𑀁 𑀦𑀺𑀭𑀢𑁆𑀣𑀓𑀢𑀸 𑀫𑀸 𑀪𑀯𑀻𑀢𑀺 𑀯𑀸𑀭𑁂𑀦 𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄, 𑀇𑀢𑀻𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑀪𑀯𑀦𑀓𑀸𑀭𑀡𑁂𑀦, 𑀧𑀓𑁆𑀔𑁂𑀬𑁂𑀯 𑀲𑀺𑀬𑀸𑀢𑀺 𑀮𑀢𑀸𑀯𑀸𑀢𑀺𑀆𑀤𑀻𑀲𑀼 𑀧𑀼𑀩𑁆𑀩𑀮𑁄𑀧𑁂 𑀧𑀭𑀺𑀬𑀸𑀬𑀧𑁆𑀧𑀯𑀢𑁆𑀢𑁂 𑀧𑀭𑀺𑀬𑀸𑀬𑁂𑀦 𑀧𑀭𑀮𑁄𑀧𑀲𑁆𑀲𑀸𑀧𑁆𑀧𑀯𑀢𑁆𑀢𑀺𑀢𑁄 𑀮𑀢𑀸𑀯𑀸𑀢𑀺 𑀧𑀓𑁆𑀔𑁂𑀬𑁂𑀯 𑀧𑀭𑀮𑁄𑀧𑁄 𑀪𑀯𑁂𑀬𑁆𑀬, 𑀳𑁄𑀦𑁆𑀢𑀺𑀘𑁆𑀘𑀸𑀤𑁄 𑀦𑀺𑀘𑁆𑀘𑀁 𑀦 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀢𑀜𑁆𑀘𑀸𑀢𑀺 𑀢𑀁 𑀧𑀭𑀺𑀬𑀸𑀬𑀪𑀯𑀦𑀜𑁆𑀘, 𑀔𑁄 𑀯𑀸𑀓𑁆𑀬𑀸𑀮𑀗𑁆𑀓𑀸𑀭𑁂, 𑀧𑀝𑀺𑀧𑀤𑀦𑁆𑀢𑀺 𑀧𑀤𑀫𑁆𑀧 𑀤𑀫𑁆𑀧𑀢𑀺 𑀳𑁄𑀢𑀺, 𑀦𑁂𑀓𑀤𑁂𑀲𑀧𑀭𑀺𑀳𑀸𑀭𑁂𑀦𑀸𑀧𑀺, 𑀢𑁂𑀦𑀸𑀳 ‘𑀦 𑀓𑀢𑁆𑀣𑀘𑀻’𑀢𑀺, 𑀇𑀫𑀺𑀦𑀸 𑀇𑀤𑀁 𑀤𑀻𑀧𑁂𑀢𑀺 ‘‘𑀲𑀩𑁆𑀩𑀢𑁆𑀣 𑀯𑀺𑀓𑀧𑁆𑀧𑀧𑁆𑀧𑀲𑀢𑁆𑀢𑀺𑀬𑀸 𑀳𑀦𑁆𑀢𑀺, 𑀲𑀤𑁆𑀥𑀦𑁆𑀤𑁆𑀭𑀺𑀬𑀁𑀢𑁆𑀬𑀸𑀤𑀺𑀓𑀁 ‘‘𑀦 𑀤𑁆𑀯𑁂𑀯𑀸’’𑀢𑀺 (𑁧-𑁨𑁮) 𑀲𑀼𑀢𑁆𑀢𑁂𑀧𑀺 𑀳𑀦𑁆𑀢𑀺𑀘𑁆𑀘𑀸𑀤𑀺𑀓𑀜𑁆𑀘𑀸𑀦𑀺𑀝𑁆𑀞𑀭𑀽𑀧𑀫𑁆𑀧𑀺 𑀲𑀫𑁆𑀧𑀚𑁆𑀚𑀢𑀻’’𑀢𑀺. 𑀦𑀘𑁂𑀯𑀫𑀺𑀝𑁆𑀞𑀦𑁆𑀢𑀺 𑀏𑀯𑀫𑀺𑀤𑀁 𑀬𑀣𑀸𑀯𑀼𑀢𑁆𑀢𑀁 𑀯𑀺𑀓𑀧𑁆𑀧𑀯𑀺𑀥𑀸𑀦𑀁 𑀲𑀤𑁆𑀤𑀮𑀓𑁆𑀔𑀡𑀜𑁆𑀜𑀽𑀳𑀺 𑀦𑁂𑀯𑀸𑀪𑀺𑀫𑀢𑀦𑁆𑀢𑀺 𑀅𑀢𑁆𑀣𑁄, 𑀢𑀫𑁂𑀯 𑀲𑀸𑀥𑁂𑀢𑀺 ‘𑀧𑀭𑀮𑁄𑀧𑁄 𑀳𑀺’𑀘𑁆𑀘𑀸𑀤𑀺𑀦𑀸, 𑀅𑀣𑀸 𑀦𑀺𑀘𑁆𑀘𑀧𑀓𑁆𑀔𑁂 𑀯𑀸 𑀧𑀭𑀮𑁄𑀧𑁂 𑀓𑀢𑁂-𑀦𑁂𑀦 𑀧𑀭𑀺𑀘𑁆𑀘𑀢𑁆𑀢𑀝𑁆𑀞𑀸𑀦𑁂 𑀉𑀲𑁆𑀲𑀕𑁆𑀕𑀧𑁆𑀧𑀯𑀢𑁆𑀢𑀺𑀬𑀸 𑀮𑀢𑀸𑀯 𑀮𑀢𑁂𑀯𑀸𑀢𑀺 𑀭𑀽𑀧𑀤𑁆𑀯𑀬𑀁 𑀲𑀫𑁆𑀧𑀚𑁆𑀚𑀢𑀺 𑀢𑀲𑁆𑀫𑀸 𑀧𑀬𑁄𑀕𑀸𑀦𑀼𑀲𑀸𑀭𑀺𑀢𑀸𑀤𑀻𑀧𑀓𑁂𑀦 𑀓𑁆𑀯𑀘𑀺𑀲𑀤𑁆𑀤𑁂𑀦𑁂𑀯 𑀳𑁄𑀦𑁆𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀮𑀢𑀸𑀯 𑀮𑀢𑁂𑀯𑀸𑀢𑀺 𑀧𑀬𑁄𑀕 𑀲𑀫𑁆𑀪𑀯𑁄𑀧𑀺, 𑀢𑀣𑀸𑀧𑀺 𑀅𑀦𑀺𑀘𑁆𑀘𑀧𑀓𑁆𑀔𑁂 𑀮𑀢𑀸𑀇𑀯𑀸𑀢𑀺 𑀢𑀢𑀺𑀬𑀭𑀽𑀧𑀧𑁆𑀧𑀲𑀺𑀤𑁆𑀥𑀺𑀬𑀸 𑀧𑀭𑀺𑀬𑀸𑀬𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀧𑀭𑀺𑀓𑀧𑁆𑀧𑁂𑀢𑀺 ‘𑀦𑀦𑀼 𑀘𑁂𑀢𑁆𑀬𑀸𑀤𑀺𑀦𑀸, 𑀅𑀣 ‘‘𑀧𑀭𑁄 𑀓𑁆𑀯𑀘𑀻’𑀢𑀺 𑀓𑁆𑀯𑀘𑀺𑀕𑁆𑀕𑀳𑀡𑁂 𑀲𑀢𑀺 𑀅𑀧(𑀯𑀸𑀤𑀭𑀽𑀧)𑀢𑁆𑀢𑀸 𑀓𑀣𑀫𑁆𑀧𑀭𑀺𑀬𑀸𑀬𑀧𑁆𑀧𑀯𑀢𑁆𑀢𑀻𑀢𑀺 𑀫𑀦𑀲𑀺 𑀦𑀺𑀥𑀸𑀬𑀸𑀦𑀺𑀘𑁆𑀘𑀧𑀓𑁆𑀔𑁂 𑀧𑀭𑀺𑀬𑀸𑀬𑀧𑁆𑀧𑀯𑀢𑁆𑀢𑀺𑀤𑀻𑀧𑀦𑀢𑁆𑀣𑀁 ‘‘𑀦 𑀤𑁆𑀯𑁂𑀯𑀸’’𑀢𑀺 𑀲𑀼𑀢𑁆𑀢𑀺𑀢𑀦𑁆𑀢𑀺 𑀅𑀧𑀯𑀸𑀤𑁂 𑀭𑀽𑀧𑀢𑁆𑀢𑀬𑁂𑀧𑀺 𑀧𑀭𑀺𑀬𑀸𑀬𑀧𑁆𑀧𑀯𑀢𑁆𑀢𑀺𑀬𑀁 𑀤𑁄𑀲𑀸𑀪𑀸𑀯𑀫𑀸𑀳-‘𑀦𑀸𑀬𑀁 𑀤𑁄𑀲𑁄’𑀘𑁆𑀘𑀸𑀤𑀺, 𑀢𑀣𑀸𑀳𑀺𑀘𑁆𑀘𑀸𑀤𑀺𑀦𑀸 ‘‘𑀦 𑀤𑁆𑀯𑁂𑀯𑀸’’𑀢𑀺 𑀲𑀼𑀢𑁆𑀢𑁂𑀦𑁂𑀯 𑀧𑀭𑀺𑀬𑀸𑀬𑀲𑁆𑀲𑀸𑀧𑀺 𑀤𑀻𑀧𑀺𑀢𑀢𑁆𑀢𑀁 𑀲𑀸𑀥𑁂𑀢𑀺, 𑀲𑀸 𑀘 𑀏𑀓𑀢𑁆𑀣𑀧𑁆𑀧𑀯𑀢𑁆𑀢𑀺 𑀧𑀭𑀺𑀬𑀸𑀬𑀁 𑀯𑀺𑀦𑀸 𑀦 𑀲𑀫𑁆𑀪𑀯𑀢𑀺… 𑀏𑀓𑀓𑁆𑀔𑀡𑁂 𑀧𑀯𑀢𑁆𑀬𑀲𑀩𑁆𑀪𑀸𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀦𑀦𑀼 𑀘 𑀓𑁆𑀯𑀘𑀸𑀪𑀸𑀯𑁂 𑀧𑀭𑀺𑀬𑀸𑀬𑀧𑁆𑀧𑀯𑀢𑁆𑀢𑀺𑀬𑀁 𑀬𑀣𑀸𑀯𑀼𑀢𑁆𑀢 𑀤𑁄𑀲𑀲𑁆𑀲𑁂𑀯𑀸𑀧𑁆𑀧𑀲𑀗𑁆𑀕𑀢𑁄 𑀫𑀸 𑀳𑁄𑀢𑀼 𑀧𑀭𑀺𑀬𑀸𑀬𑁄, 𑀪𑀺𑀦𑁆𑀦𑀯𑀺𑀲𑀬𑁂 𑀧𑀦 𑀧𑀼𑀩𑁆𑀩𑀧𑀭𑀮𑁄𑀧𑀧𑁆𑀧𑀯𑀢𑁆𑀢𑀺𑀬𑀸 ‘‘𑀦 𑀤𑁆𑀯𑁂𑀯𑀸’𑀢𑀺 𑀦𑀺𑀲𑁂𑀥𑁂 𑀮𑀢𑁂𑀯 𑀮𑀢𑀸𑀯 𑀮𑀢𑀸𑀇𑀯𑀸𑀢𑀺 𑀭𑀽𑀧𑀢𑁆𑀢𑀬𑀁 𑀦𑀺𑀧𑁆𑀨𑀚𑁆𑀚𑀢𑀻𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀦𑀺𑀥𑀸𑀬𑀸𑀳-‘𑀦𑀘𑁂’𑀘𑁆𑀘𑀸𑀤𑀺, 𑀢𑀢𑁆𑀣 𑀤𑁄𑀲𑀫𑀸𑀳-‘𑀢𑀣𑀸 𑀘 𑀲𑀢𑀺’𑀘𑁆𑀘𑀸𑀤𑀺𑀦𑀸, 𑀓𑀢𑁆𑀣𑀘𑀺 𑀤𑁂𑀫𑀺𑀘𑁆𑀘𑀸𑀤𑁄 𑀦𑀺𑀘𑁆𑀘𑀁 𑀧𑀼𑀩𑁆𑀩𑀮𑁄𑀧𑀲𑁆𑀲𑁂𑀯, 𑀓𑀢𑁆𑀣𑀘𑀺 𑀳𑁄𑀦𑁆𑀢𑀺𑀘𑁆𑀘𑀸𑀤𑁄 𑀦𑀺𑀘𑁆𑀘𑀁 𑀧𑀭𑀮𑁄𑀧𑀲𑁆𑀲𑁂𑀯 ¶ , 𑀯𑀺𑀓𑀧𑁆𑀧𑁂𑀦 𑀯𑀸 𑀓𑀢𑁆𑀣𑀘𑀺 𑀬𑀣𑁄𑀤𑀓𑀁 𑀬𑀣𑀸𑀉𑀤𑀓𑀁 𑀢𑁆𑀬𑀸𑀤𑁄 𑀧𑀼𑀩𑁆𑀩𑀮𑁄𑀧𑀲𑁆𑀲𑁂𑀯 𑀓𑀢𑁆𑀣𑀘𑀺 𑀇𑀢𑀺𑀧𑀺 𑀇𑀘𑁆𑀘𑀧𑀺𑀘𑁆𑀘𑀸𑀤𑁄 𑀧𑀭𑀮𑁄𑀧𑀲𑁆𑀲𑁂𑀯 𑀓𑀢𑁆𑀣𑀘𑀺 𑀮𑀢𑁂𑀯 𑀮𑀢𑀸𑀯 𑀮𑀢𑀸𑀇𑀯𑀸𑀘𑁆𑀘𑀸𑀤𑁄 𑀧𑀭𑀺𑀬𑀸𑀬𑁂𑀦𑀼𑀪𑀬𑀮𑁄𑀧𑀲𑁆𑀲𑁂𑀯 𑀤𑀲𑁆𑀲𑀦𑀢𑁄𑀢𑀺 𑀲𑀫𑁆𑀩𑀦𑁆𑀥𑁄, 𑀏𑀢𑁆𑀣𑀘 𑀇𑀢𑀺𑀧𑀻𑀢𑀺 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀢 𑀤𑀻𑀧𑀦𑁂𑀦 𑀓𑁆𑀯𑀘𑀺𑀲𑀤𑁆𑀤𑁂𑀦 𑀧𑀭𑀮𑁄𑀧𑁂 𑀓𑀢𑁂-𑀜𑁆𑀜𑀢𑁆𑀭 𑀧𑀼𑀩𑁆𑀩 𑀮𑁄𑀧𑁂 𑀲𑀫𑁆𑀧𑀢𑁆𑀢𑁂 ‘‘𑀦 𑀤𑁆𑀯𑁂𑀯𑀸’’𑀢𑀺 𑀏𑀢𑁆𑀣𑀸𑀦𑀼𑀯𑀢𑁆𑀢𑀫𑀸𑀦 𑀓𑁆𑀯𑀘𑀸𑀦𑀼𑀪𑀸𑀯𑁂𑀦 𑀦𑀺𑀘𑁆𑀘𑀁 𑀦𑀺𑀲𑁂𑀥𑁂 𑀇𑀘𑁆𑀘𑀧𑀺𑀘𑁆𑀘𑁂𑀯 𑀪𑀯𑀢𑀺. 𑀲𑀫𑁆𑀩𑀚𑁆𑀛𑀢𑀺 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑁂𑀲𑀼. 𑀧𑀭𑀺𑀘𑁆𑀙𑁂𑀤𑁄𑀢𑀺 𑀓𑀫𑁆𑀫𑀢𑁆𑀣𑀯𑀲𑁂𑀦 𑀆𑀥𑀸𑀭𑀯𑀲𑁂𑀦 𑀯𑀸𑀢𑀺 𑀆𑀳-‘𑀧𑀭𑀺𑀘𑁆𑀙𑀺𑀚𑁆𑀚𑀢𑀺’𑀘𑁆𑀘𑀸𑀤𑀺.

𑀢𑀢𑁆𑀣𑀘𑀸𑀢𑀺 𑀘𑀲𑀤𑁆𑀤𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀣𑀸 𑀘 𑀲𑀢𑀺 𑀅𑀜𑁆𑀜𑁄𑀜𑁆𑀜𑀸𑀦𑀚𑁆𑀛𑀸𑀲𑀺 𑀢𑀁 𑀬𑀣𑁄𑀤𑀓𑀁 𑀬𑀣𑀸𑀉𑀤𑀓𑀁𑀢𑁆𑀬𑀸𑀤𑀺 𑀇𑀢𑀺𑀧𑀺 𑀇𑀘𑁆𑀘𑀧𑀺𑀘𑁆𑀘𑀸𑀤𑀺𑀘 𑀲𑀗𑁆𑀕𑀳𑀺𑀢𑀁 𑀪𑀯𑀢𑀻𑀢𑀺, 𑀧𑀼𑀩𑁆𑀩𑀮𑁄𑀧𑁂 𑀧𑀭𑀮𑁄𑀧𑁂 𑀘 𑀧𑀭𑀺𑀬𑀸𑀬𑁂𑀦 𑀲𑀫𑁆𑀧𑀢𑁆𑀢𑁂 𑀤𑁆𑀯𑀺𑀦𑁆𑀦𑀫𑁆𑀧𑀺 𑀧𑀓𑁆𑀔𑁂 𑀅𑀪𑀸𑀯𑁂 𑀲𑀢𑀺 𑀓𑀣𑀫𑀺𑀤𑀁 𑀬𑀼𑀚𑁆𑀚𑀢𑀻𑀢𑀺 𑀘𑁄𑀤𑁂𑀢𑀺‘𑀬𑀚𑁆𑀚𑁂𑀯’𑀫𑀺𑀘𑁆𑀘𑀸𑀤𑀺𑀦𑀸, 𑀬𑀚𑁆𑀚𑁂𑀯𑀦𑁆𑀢𑀺 𑀳𑀺 𑀅𑀬𑀁 𑀦𑀺𑀧𑀸𑀢𑀲𑀫𑀼𑀤𑀸𑀬𑁄 𑀅𑀦𑀺𑀝𑁆𑀞𑀸𑀧𑀸𑀤𑀦𑀸𑀭𑀫𑁆𑀪 𑀯𑀢𑁆𑀢𑀢𑁂, 𑀏𑀯𑀜𑁆𑀘𑁂 𑀕𑀬𑁆𑀳𑀢𑀻𑀢𑀺 𑀅𑀢𑁆𑀣𑁄, 𑀢𑀤𑁂𑀢𑀺 𑀅𑀢𑁆𑀣𑀢𑁄 𑀯𑀺𑀜𑁆𑀜𑀸𑀬𑀢𑀺, 𑀦𑀺𑀘𑁆𑀘𑀁 𑀲𑀦𑁆𑀥𑀺𑀓𑀸𑀭𑀺𑀬𑀸𑀪𑀸𑀯𑁂 𑀓𑀸𑀭𑀡𑀫𑀸𑀳-‘𑀉𑀧𑀲𑀺𑀮𑁂𑀲𑀸 𑀪𑀸𑀯𑀢𑁄’𑀢𑀺, 𑀢𑀤𑁂𑀯 𑀲𑀫𑀢𑁆𑀣𑁂𑀢𑀺 𑀈𑀤𑀺𑀲𑁂𑀲𑀼 𑀳𑀺’𑀘𑁆𑀘𑀸𑀤𑀺𑀦𑀸, 𑀯𑀢𑁆𑀢𑀼𑀫𑀺𑀝𑁆𑀞𑀢𑁆𑀢𑀸𑀢𑀺 𑀇𑀫𑀺𑀦𑀸 𑀲𑀦𑁆𑀦𑀺𑀓𑀁𑀲𑁄 𑀯𑀡𑁆𑀡𑀸𑀦 𑀫𑀤𑁆𑀥𑀫𑀢𑁆𑀢𑀓𑀸𑀮𑀩𑁆𑀬𑀯𑀥𑀸𑀦𑀸 𑀧𑀘𑁆𑀘𑀸𑀲𑀢𑁆𑀢𑀺, 𑀲𑀦𑁆𑀦𑀺𑀓𑀁𑀲𑀲𑁆𑀲𑁂𑀢𑀲𑁆𑀲 𑀯𑀘𑀦𑀺𑀘𑁆𑀙𑀸𑀬𑀁 𑀲𑀢𑀺𑀬𑁂𑀯 𑀲𑀦𑁆𑀥𑀺𑀓𑀸𑀭𑀺𑀬𑀁 𑀳𑁄𑀢𑀻𑀢𑀺 𑀤𑀻𑀧𑁂𑀢𑀺, 𑀉𑀧𑀲𑀺𑀮𑁂𑀲𑀸𑀪𑀸𑀯𑁄 𑀯𑀸𑀢𑀺 𑀉𑀧𑀲𑀺𑀮𑁂𑀲𑀸𑀪𑀸𑀯𑁄 𑀏𑀯 𑀪𑀯𑀢𑀺, 𑀦𑀸𑀜𑁆𑀜𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑀤𑀪𑀸𑀯𑁂𑀘𑀸𑀢𑀺 𑀢𑀲𑁆𑀲 𑀉𑀧𑀲𑀺𑀮𑁂𑀲𑀲𑁆𑀲 𑀅𑀪𑀸𑀯𑁂 𑀘, 𑀲𑀦𑁆𑀥𑀺𑀓𑀸𑀭𑀺𑀬𑀸𑀪𑀸𑀯𑁂 𑀓𑀸𑀭𑀡𑀫𑀸𑀳-‘𑀓𑀸𑀮𑀦𑁆𑀢𑀭𑁂𑀦 𑀩𑁆𑀬𑀯𑀥𑀸𑀦𑀸’𑀢𑀺, 𑀓𑀸𑀮𑀦𑁆𑀢𑀭𑁂𑀦𑀸𑀢𑀺 𑀉𑀪𑀬𑀢𑁆𑀣 𑀞𑀺𑀢𑀯𑀡𑁆𑀡𑀸𑀦 𑀫𑀼𑀘𑁆𑀘𑀸𑀭𑀡𑀓𑀸𑀮𑀢𑁄 𑀅𑀜𑁆𑀜𑁂𑀦 𑀫𑀚𑁆𑀛𑀧𑁆𑀧𑀢𑀺𑀢𑀓𑀸𑀮𑁂𑀦, 𑀲𑀦𑁆𑀥𑀺 𑀳𑁄𑀢𑁂𑀯… 𑀲𑀦𑁆𑀦𑀺𑀓𑀁𑀲𑀯𑀘𑀦𑀺𑀘𑁆𑀙𑀸𑀯𑀲𑁂𑀦 𑀉𑀧𑀲𑀺𑀮𑁂𑀲𑀪𑀸𑀯𑀢𑁄, 𑀩𑀼𑀤𑁆𑀥 𑀯𑀻𑀭 𑀅𑀢𑁆𑀣𑀼𑀭𑀸𑀚𑀧𑀼𑀢𑁆𑀢𑀁 𑀅𑀚𑀭𑀸𑀫𑀭𑁄𑀢𑀺 𑀙𑁂𑀤𑁄, 𑀬𑀤𑀺𑀧𑀺 𑀲𑀩𑁆𑀩𑀫𑁆𑀧𑁂𑀢𑀁 𑀬𑀚𑁆𑀚𑁂𑀯𑀁𑀢𑁆𑀬𑀸𑀤𑀺𑀦𑀸 𑀯𑀼𑀢𑁆𑀢𑀁 𑀓𑁆𑀯𑀘𑀺 𑀲𑀤𑁆𑀤𑀧𑁆𑀧𑀪𑀸𑀯𑁂𑀦𑁂𑀯 𑀲𑀺𑀚𑁆𑀛𑀢𑀺, 𑀢𑀣𑀸𑀧𑀺 𑀧𑀓𑀸𑀭𑁄-𑀬𑀫𑁆𑀧𑀺 𑀲𑀢𑁆𑀣𑁂 𑀬𑁄𑀚𑁂𑀢𑀩𑁆𑀩𑁄 𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑁄.

𑀦𑀦𑀼 ¶ 𑀲𑀼𑀢𑁆𑀢𑁂 ‘𑀮𑀼𑀢𑁆𑀢𑀸’𑀢𑀺 𑀧𑀜𑁆𑀘𑀫𑀻 𑀦𑀺𑀤𑁆𑀤𑁂𑀲𑀸 ‘𑀧𑀭𑁂𑀲’𑀦𑁆𑀢𑀺 𑀳𑁄𑀢𑀼, ‘𑀬𑀣𑀸𑀓𑁆𑀓𑀫𑀁’𑀢𑀺 𑀢𑀼 𑀯𑀘𑀦𑀸𑀪𑀸𑀯𑁂 𑀓𑀣𑀁 𑀬𑀣𑀸𑀓𑁆𑀓𑀫𑀦𑁆𑀢𑀻𑀤𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳-‘𑀲𑀫𑁂’𑀘𑁆𑀘𑀸𑀢𑀺, 𑀲𑀫𑀸 𑀲𑀗𑁆𑀔𑁆𑀬𑀸 𑀕𑀡𑀦𑀸 𑀬𑁂𑀲𑀼 𑀢𑁂 𑀲𑀫𑀲𑀗𑁆𑀔𑁆𑀬𑀸-𑀉𑀤𑁆𑀤𑁂𑀲𑀺𑀦𑁄 𑀅𑀦𑀼𑀤𑁂𑀲𑀺𑀦𑁄 𑀘, 𑀉𑀤𑁆𑀤𑀺𑀲𑀦𑀁 𑀧𑀞𑀫𑀁 𑀦𑀺𑀤𑁆𑀤𑀺𑀲𑀦𑀁 𑀉𑀤𑁆𑀤𑁂𑀲𑁄, 𑀅𑀦𑀼𑀤𑀺𑀲𑀦𑀁 𑀧𑀘𑁆𑀙𑀸 𑀓𑀣𑀦𑀁 𑀅𑀦𑀼𑀤𑁂𑀲𑁄, 𑀉𑀤𑁆𑀤𑁂𑀲𑁄 𑀅𑀦𑀼𑀤𑁂𑀲𑁄 𑀏𑀲𑀫𑀢𑁆𑀣𑀻𑀢𑀺 𑀉𑀤𑁆𑀤𑁂𑀲𑀺𑀦𑁄 𑀅𑀦𑀼𑀤𑁂𑀲𑀺𑀦𑁄, 𑀢𑁂𑀲𑀁 𑀲𑀫𑀲𑀗𑁆𑀔𑁆𑀬𑀸𑀦𑀫𑀼𑀤𑁆𑀤𑁂𑀲𑀻𑀦𑀁 𑀅𑀦𑀼𑀤𑁂𑀲𑀻𑀦𑀜𑁆𑀘, 𑀇𑀯𑀡𑁆𑀡𑀼𑀯𑀡𑁆𑀡𑀸𑀳𑀺 𑀉𑀤𑁆𑀤𑁂𑀲𑀺𑀦𑁄 𑀤𑁆𑀯𑁂, 𑀏 𑀑𑀓𑀸𑀭𑀸 𑀅𑀦𑀼𑀤𑁂𑀲𑀺𑀦𑁄 𑀘 𑀤𑁆𑀯𑁂𑀢𑀺 𑀉𑀤𑁆𑀤𑁂𑀲𑀻𑀦𑀫𑀦𑀼𑀤𑁂𑀲𑀻𑀦𑀜𑁆𑀘 𑀞𑀸𑀦𑁆𑀬𑀸𑀤𑁂𑀲𑀸𑀦𑀁 𑀲𑀫𑀲𑀗𑁆𑀔𑁆𑀬𑀸 𑀲𑀺𑀬𑀸, 𑀲𑀢𑀺𑀬𑀜𑁆𑀘 𑀢𑀲𑁆𑀲𑀁 𑀬𑀣𑀸𑀓𑁆𑀓𑀫 𑀫𑀸𑀤𑀲𑀸 𑀯𑀺𑀥𑀻𑀬𑀦𑁆𑀢𑁂, 𑀮𑁄𑀓𑀢𑁄 𑀲𑀺𑀤𑁆𑀥𑀺𑀫𑀼𑀧𑀤𑀲𑁆𑀲𑁂𑀢𑀺 ‘𑀢𑀣𑀸𑀳𑀺’𑀘𑁆𑀘𑀸𑀤𑀺𑀦𑀸. 𑀅𑀯…𑀧𑁂… 𑀏 𑀑𑀢𑀺 𑀧𑀭𑁂𑀲𑀁 𑀫𑀢𑀁, 𑀯𑀺𑀧𑁆𑀧𑀝𑀺𑀧𑀢𑁆𑀢𑀻𑀢𑀺 𑀯𑀺𑀭𑀼𑀤𑁆𑀥𑀸 𑀧𑀝𑀺𑀧𑀢𑁆𑀢𑀺 𑀧𑀝𑀺𑀚𑀸𑀦𑀦𑀁, 𑀧𑀭𑁂 ‘‘𑀲𑀢𑀺𑀧𑀺 𑀳𑁂𑀝𑁆𑀞𑀸 𑀯𑀸𑀕𑁆𑀕𑀳𑀡𑁂‘𑀓𑁆𑀯𑀘𑀸𑀲𑀯𑀡𑁆𑀡𑀁 𑀮𑀼𑀢𑁆𑀢𑁂’𑀢𑀺 𑀲𑀼𑀢𑁆𑀢𑁂 𑀓𑁆𑀯𑀘𑀺𑀕𑁆𑀕𑀳𑀡𑀓𑀭𑀡𑀢𑁄 𑀅𑀯𑀡𑁆𑀡𑁂 𑀏𑀯 𑀮𑀼𑀢𑁆𑀢𑁂 𑀅𑀲𑀯𑀡𑁆𑀡𑁄 𑀯𑀺𑀥𑀺 𑀳𑁄𑀢𑀺, 𑀢𑀢𑁄 𑀇𑀥 𑀦 𑀳𑁄𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦’’𑀦𑁆𑀢𑀺 𑀯𑀤𑀦𑁆𑀢𑀺, 𑀓𑁆𑀯𑀘𑀻𑀢𑀺 𑀅𑀥𑀺𑀓𑀸𑀭𑁄 𑀇𑀥 𑀦 𑀳𑁄𑀢𑀺 𑀫𑀳𑀼𑀲𑁆𑀲𑀯𑁄 𑀫𑀸𑀢𑀽𑀧𑀝𑁆𑀞𑀸𑀦𑀦𑁆𑀢𑀺, 𑀧𑀢𑀺𑀲𑀤𑁆𑀤𑁄 𑀆𑀥𑀸𑀭𑀢𑁆𑀣𑁄, 𑀢𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑁄 𑀉𑀭𑀲𑀤𑁆𑀤𑁄𑀧𑀻𑀢𑀺 𑀉𑀭𑀲𑁆𑀫𑀺𑀦𑁆𑀢𑀺 𑀦𑀺𑀘𑁆𑀘 𑀲𑀫𑀸𑀲𑀢𑁆𑀢𑀸 𑀅𑀲𑀓𑀧𑀤𑁂𑀦 𑀯𑀺𑀕𑁆𑀕𑀳𑁂 𑀓𑀢𑁂 ‘‘𑀅𑀲𑀗𑁆𑀔𑁆𑀬𑀁 𑀯𑀺𑀪𑀢𑁆𑀢𑀺’’𑀘𑁆𑀘𑀸𑀤𑀺𑀦𑀸 (𑁩-𑁨) 𑀲𑀼𑀢𑁆𑀢𑁂𑀦 𑀅𑀲𑀗𑁆𑀔𑁆𑀬𑀲𑀫𑀸𑀲𑁄𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘𑀯𑀺𑀪𑀢𑁆𑀬𑀢𑁆𑀣𑁂𑀲𑀗𑁆𑀔𑁆𑀬𑀲𑀫𑀸𑀲𑁄’𑀢𑀺, 𑀏𑀢𑁆𑀣 𑀧𑀦 𑀬𑀼𑀯𑀡𑁆𑀡𑀸𑀦𑀦𑁆𑀢𑀺 𑀲𑀁𑀲𑀸𑀫𑀺 𑀲𑀫𑀻𑀧𑀲𑀫𑀽𑀳 𑀯𑀺𑀓𑀸𑀭𑀸𑀯𑀬𑀯𑀸𑀤𑀻𑀲𑀼 𑀞𑀸𑀦𑁆𑀬𑀸𑀤𑁂𑀲𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀻, 𑀢𑀲𑁆𑀫𑀸 𑀇𑀯𑀡𑁆𑀡𑀼𑀯𑀡𑁆𑀡𑀸𑀦𑀁 𑀞𑀸𑀦𑁂 𑀏 𑀑𑀆𑀤𑁂𑀲𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄, 𑀞𑀸𑀦𑀫𑁆𑀧𑀦 𑀢𑀺𑀥𑀸 𑀅𑀧𑀓𑀁𑀲𑁄 𑀦𑀺𑀯𑀢𑁆𑀢𑀺 𑀧𑀲𑀗𑁆𑀕𑁄 𑀘𑁂𑀢𑀺, 𑀢𑀢𑁆𑀣 𑀕𑀼𑀦𑁆𑀦𑀁 𑀞𑀸𑀦𑁂 𑀅𑀲𑁆𑀲𑀸 𑀲𑀫𑁆𑀩𑀦𑁆𑀥𑀻𑀬𑀦𑁆𑀢𑀼 [𑀩𑀚𑁆𑀛𑀦𑁆𑀢𑀼 (𑀚𑀺𑀦𑀺𑀦𑁆𑀤𑀩𑀼𑀤𑁆𑀥𑀺)] 𑀢𑀺 𑀅𑀧𑀓𑀁𑀲𑁄 𑀞𑀸𑀦𑀲𑀤𑁆𑀤𑀲𑁆𑀲𑀢𑁆𑀣𑁄, ‘‘𑀲𑁂𑀫𑁆𑀳𑀲𑁆𑀲 𑀞𑀸𑀦𑁂 𑀓𑀝𑀼𑀓𑀫𑁄𑀲𑀥𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀦𑀺𑀯𑀢𑁆𑀢𑀺 ‘‘𑀤𑀩𑁆𑀪𑀸𑀦𑀁 𑀞𑀸𑀦𑁂 𑀲𑀭𑁂𑀳𑀺 𑀅𑀢𑁆𑀣𑀭𑀺𑀢𑀩𑁆𑀩’’𑀦𑁆𑀢𑀺 𑀧𑀲𑀗𑁆𑀕𑁄, 𑀢𑁂𑀲𑀼 𑀇𑀥 𑀧𑀞𑀫𑀤𑀼𑀢𑀺𑀬𑀸 𑀦 𑀬𑀼𑀚𑁆𑀚𑀦𑁆𑀢𑀺… 𑀦𑀺𑀘𑁆𑀘𑀢𑁆𑀢𑀸 𑀲𑀤𑁆𑀤𑀢𑁆𑀣𑀲𑀫𑁆𑀩𑀦𑁆𑀥𑀲𑁆𑀲 𑀅𑀧𑀦𑀬𑀦𑀯𑀺𑀦𑀸𑀲𑀸 𑀦 𑀬𑀼𑀚𑁆𑀚𑀦𑁆𑀢𑀻𑀢𑀺, 𑀢𑀢𑀺𑀬𑁄 𑀢𑀼 (𑀬𑀼𑀚𑁆𑀚𑀢𑀺)… 𑀲𑀼𑀢𑁆𑀢𑁂 𑀅𑀢𑁆𑀣𑀸𑀪𑀺𑀥𑀸𑀦𑀸𑀬 𑀇𑀯𑀡𑁆𑀡𑀼𑀯𑀡𑁆𑀡𑀸𑀦𑀁 𑀧𑀯𑀢𑁆𑀢𑀺𑀧𑁆𑀧𑀲𑀗𑁆𑀕𑁂 𑀢𑀤𑀢𑁆𑀣𑀸𑀪𑀺𑀥𑀸𑀦𑀸𑀬𑁂𑀯 𑀏𑀑𑀆𑀤𑁂𑀲𑀸 𑀪𑀯𑀦𑁆𑀢𑀻𑀢𑀺.

‘‘𑀲𑀢𑁆𑀢𑀫𑀺𑀬𑀁 ¶ 𑀧𑀼𑀩𑁆𑀩𑀲𑁆𑀲𑁂’’𑀢𑀺 (𑁧-𑁧𑁪) 𑀧𑀼𑀩𑁆𑀩𑀲𑁆𑀲 𑀓𑀸𑀭𑀺𑀬𑀯𑀺𑀥𑀸𑀦𑀢𑁄 𑀲𑀢𑁆𑀢𑀫𑀻 𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀧𑀭𑀢𑀸 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀼𑀢𑁆𑀢𑀺𑀬𑀁 ‘𑀧𑀭𑁂’𑀢𑀺 𑀯𑀼𑀢𑁆𑀢𑀁, 𑀏𑀯𑀫𑀼𑀧𑀭𑀺𑀧𑀺, 𑀧𑀭𑁂𑀳𑀺 𑀇𑀘𑁆𑀘𑀲𑁆𑀲 𑀅𑀚𑁆𑀛𑀺𑀡𑀫𑀼𑀢𑁆𑀢𑁄’𑀢𑀺 𑀲𑀸𑀥𑁂𑀢𑀼𑀁 ‘‘𑀲𑀩𑁆𑀩𑁄𑀘𑀦𑁆𑀢𑀺’’ ‘‘𑀅𑀚𑁆𑀛𑁄 𑀅𑀥𑀻’’𑀢𑀺 𑀘 𑀲𑀼𑀢𑁆𑀢𑀺𑀢𑀁, 𑀢𑁂𑀲𑀫𑀺𑀥 𑀧𑀘𑁆𑀘𑀓𑁆𑀔𑀸𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀫𑀸𑀳-‘𑀇𑀤’𑀫𑀺𑀘𑁆𑀘𑀸𑀤𑀺, 𑀅𑀩𑁆𑀪𑀓𑁆𑀔𑀸𑀦𑀦𑁆𑀢𑀺 [𑀅𑀩𑁆𑀪𑀼𑀕𑁆𑀕𑀪𑁄] 𑀇𑀫𑀺𑀦𑀸𑀯 𑀲𑀺𑀤𑁆𑀥𑀦𑁆𑀢𑀺 ‘‘𑀅𑀩𑁆𑀪𑁄 𑀅𑀪𑀻’’𑀢𑀺 𑀘 𑀦 𑀯𑀢𑁆𑀢𑀩𑁆𑀩𑀁, 𑀇𑀢𑀺+𑀅𑀲𑁆𑀲 𑀇𑀢𑀺 𑀞𑀺𑀢𑁂 𑀧𑀭𑀮𑁄𑀧𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 ‘𑀇𑀢𑀺 𑀅𑀲𑁆𑀲 𑀧𑀭𑀮𑁄𑀧𑁄’𑀢𑀺 𑀆𑀳, 𑀅𑀦𑁆𑀯𑀕𑀫𑀸𑀢𑀺𑀆𑀤𑀻𑀲𑀼 𑀦𑀺𑀘𑁆𑀘𑀁.

𑀧𑀼𑀢𑁆𑀢𑀸 𑀫𑁂+𑀅𑀢𑁆𑀣𑀺, 𑀅𑀲𑀦𑁆𑀢𑁄+𑀏𑀢𑁆𑀣𑀸𑀢𑀺 𑀧𑀤𑀘𑁆𑀙𑁂𑀤𑁄.

𑀅𑀦𑁆𑀢𑀸𑀤𑁂𑀲𑀢𑁆𑀣𑁄𑀢𑀺 ‘‘𑀙𑀝𑁆𑀞𑀺𑀬𑀦𑁆𑀢𑀲𑁆𑀲𑀸’’𑀢𑀺 (𑁧-𑁧𑁭) 𑀩𑀸𑀥𑀓𑀲𑁆𑀲 ‘‘𑀝𑀸𑀦𑀼𑀩𑀦𑁆𑀥𑀸𑀦𑁂𑀓𑀯𑀡𑁆𑀡𑀸 𑀲𑀩𑁆𑀩𑀲𑁆𑀲𑀸’’𑀢𑀺 (𑁧-𑁧𑁯) 𑀩𑀸𑀥𑀓𑁂𑀦 ‘‘𑀯𑀸𑀦𑀼𑀩𑀦𑁆𑀥𑁄’’𑀢𑀺 (𑁧-𑁧𑁮) 𑀲𑀼𑀢𑁆𑀢𑁂𑀦 𑀅𑀦𑁆𑀢𑀸𑀤𑁂𑀲𑀢𑁆𑀣𑁄, 𑀢𑁂𑀦𑁂𑀯 𑀯𑀼𑀢𑁆𑀢𑀁-‘𑀩𑀸𑀥𑀓𑀩𑀸𑀥𑀦𑀢𑁆𑀣𑁄𑀬𑀫𑀸𑀭𑀫𑁆𑀪𑁄’𑀢𑀺, 𑀅𑀯𑀯𑀸𑀤𑁂𑀲𑁂 𑀧𑀼𑀩𑁆𑀩𑀲𑀭𑀮𑁄𑀧𑁂 𑀤𑀻𑀖𑁂𑀘 𑀕𑀯𑀸𑀲𑁆𑀲𑀁, 𑀕𑀯𑀘𑁆𑀙𑀦𑁆𑀢𑀺 𑀦𑀺𑀘𑁆𑀘𑀁. 𑀇𑀤𑀁 𑀓𑀣𑀁 𑀲𑀺𑀚𑁆𑀛𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀇𑀤𑀦𑁆𑀢𑀺 𑀬𑀣𑀭𑀺𑀯𑁂𑀘𑁆𑀘𑀸𑀤𑀺𑀓𑀁, 𑀓𑀺𑀁 𑀯𑀺𑀦𑀸 𑀲𑀺𑀚𑁆𑀛𑀢𑀻𑀢𑀺 𑀆𑀳-‘𑀏𑀯𑀸𑀤𑀺𑀲𑁆𑀲𑀸’𑀢𑀺𑀆𑀤𑀺, 𑀏𑀯𑀲𑁆𑀲 𑀆𑀤𑀺𑀏𑀓𑀸𑀭𑁄 𑀏𑀯𑀸𑀤𑀺, 𑀢𑀲𑁆𑀲, 𑀭𑀺𑀆𑀤𑁂𑀲𑀫𑀦𑁆𑀢𑀭𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀘𑀲𑀤𑁆𑀤𑁄 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄, 𑀭𑀲𑁆𑀲𑀯𑀺𑀥𑀸𑀦𑀜𑁆𑀘𑀸𑀢𑀺 𑀬𑁄𑀚𑀦𑀻𑀬𑁄, 𑀓𑀢𑁂𑀧𑀺 𑀢𑀲𑁆𑀫𑀺𑀦𑁆𑀢𑀺 𑀢𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀺𑀳𑀺𑀢𑁂 𑀘, 𑀦 𑀲𑀺𑀚𑁆𑀛𑀢𑀻𑀢𑀺 𑀏𑀯𑀸𑀤𑀺𑀲𑁆𑀲 𑀭𑀺𑀆𑀤𑁂𑀲𑁄 𑀦 𑀓𑀢𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀪𑀼𑀲𑀁+𑀏𑀯𑀸𑀢𑀺 (𑀧𑀦) 𑀞𑀺𑀢𑁂 𑀫𑀳𑀸𑀯𑀼𑀢𑁆𑀢𑀺𑀦𑀸 𑀏𑀯𑀸𑀤𑀺𑀲𑁆𑀲 𑀇𑀆𑀤𑁂𑀲𑁂 𑀭𑀽𑀧𑀲𑀺𑀤𑁆𑀥𑀺 𑀳𑁄𑀢𑁂𑀯, 𑀇𑀥 𑀧𑀦 𑀧𑀓𑀸𑀭𑀦𑁆𑀢𑀭𑁂𑀦 ‘𑀪𑀼𑀲𑀸𑀫𑀺𑀯𑁂’𑀢𑀺 𑀲𑀸𑀥𑁂𑀢𑀼𑀫𑀸𑀳 ‘𑀢𑀫𑁆𑀧𑀺’𑀘𑁆𑀘𑀸𑀤𑀺.

𑀭𑀲𑁆𑀲𑀤𑀻𑀖𑀸𑀦𑀦𑁆𑀢𑀺 𑀲𑀼𑀢𑁆𑀢𑁂 𑀅𑀯𑀼𑀢𑁆𑀢𑁂 𑀓𑀣𑀁 𑀭𑀲𑁆𑀲𑀤𑀻𑀖𑀸𑀦𑀦𑁆𑀢𑀺 𑀮𑀪𑀢𑀺 𑀉𑀤𑁆𑀤𑁂𑀲𑀺𑀦𑁄𑀢𑀺 𑀆𑀳-‘𑀤𑀻𑀖𑀲𑁆𑀲𑀸’𑀢𑀺𑀆𑀤𑀺, 𑀤𑀻𑀖𑀲𑁆𑀲𑀸𑀢𑀺 𑀭𑀲𑁆𑀲𑀲𑁆𑀲𑀸𑀢𑀺 𑀘 𑀞𑀸𑀦𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀻, 𑀧𑀘𑁆𑀘𑀸𑀲𑀢𑁆𑀬𑀸𑀢𑀺 𑀞𑀸𑀦𑀲𑁄 𑀧𑀘𑁆𑀘𑀸𑀲𑀢𑁆𑀬𑀸, 𑀇𑀤𑀜𑁆𑀘 𑀦𑀺𑀲𑁆𑀲𑀬 𑀯𑀲𑁂𑀦 ¶ 𑀯𑀼𑀢𑁆𑀢𑀁, 𑀦𑀺𑀲𑁆𑀲𑀬𑀓𑀭𑀡𑀫𑁂𑀓𑁄 𑀲𑀢𑁆𑀣𑀸𑀕𑀢𑁄 𑀜𑀸𑀬𑁄𑀢𑀺, 𑀇𑀥 𑀦𑀺𑀘𑁆𑀘𑀁-𑀯𑀻𑀢𑀺𑀦𑀸𑀫𑁂𑀢𑀺 𑀣𑀼𑀮𑁆𑀮𑀘𑁆𑀘𑀬𑀁, 𑀇𑀥 𑀦 𑀳𑁄𑀢𑀺-𑀚𑀦𑁄 𑀲𑀸𑀬𑀁.

𑀞𑀸𑀦𑀲𑀫𑁆𑀩𑀦𑁆𑀥𑁂𑀢𑀺 𑀞𑀺𑀢𑀺 𑀞𑀸𑀦𑀁 𑀧𑀲𑀗𑁆𑀕𑁄, 𑀲𑀫𑁆𑀩𑀦𑁆𑀥𑀦𑀁-𑀲𑀫𑁆𑀩𑀦𑁆𑀥𑁄, 𑀞𑀸𑀦𑁆𑀬𑀸𑀤𑁂𑀲𑀪𑀸𑀯𑀮𑀓𑁆𑀔𑀡𑁄 𑀞𑀸𑀦𑁂𑀬𑁄𑀕𑀦𑀺𑀫𑀺𑀢𑁆𑀢𑀪𑀽𑀢𑁄 𑀲𑀫𑁆𑀩𑀦𑁆𑀥𑁄 𑀞𑀸𑀦𑀲𑀫𑁆𑀩𑀦𑁆𑀥𑁄 𑀢𑀲𑁆𑀫𑀺𑀁, 𑀤𑁆𑀯𑁂 𑀭𑀽𑀧𑀸𑀦𑀺 𑀳𑁄𑀦𑁆𑀢𑀻𑀢𑀺 𑀇𑀫𑀺𑀦𑀸 𑀦 𑀲𑀭𑀽𑀧𑀧𑁆𑀧𑀥𑀸𑀦𑁄𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀳𑁂𑀢𑀼𑀫𑀸𑀳-‘𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑀸’𑀢𑀺, 𑀤𑁆𑀯𑁂 𑀭𑀽𑀧𑀸𑀦𑀺𑀳𑁄𑀦𑁆𑀢𑀻𑀢𑁆𑀬𑀸𑀤𑀺 𑀯𑀘𑀦𑀫𑀺𑀤𑀁 [𑀧𑀤𑀫𑀺𑀤𑀁 (𑀧𑁄𑀢𑁆𑀣𑀓𑁂)] 𑀤𑀲𑁆𑀲𑁂𑀢𑀺 ‘‘𑀲𑀭𑀽𑀧𑀧𑁆𑀧𑀥𑀸𑀦𑁂𑀧𑀺 𑀤𑁆𑀯𑀺𑀲𑀤𑁆𑀤𑁂 𑀤𑁆𑀯𑀺𑀲𑀤𑁆𑀤𑀲𑀸𑀫𑀜𑁆𑀜𑁂𑀦 𑀲𑀗𑁆𑀔𑁆𑀬𑀸𑀤𑁆𑀯𑀺𑀲𑀤𑁆𑀤𑀸𑀦𑀼𑀲𑀺𑀝𑁆𑀞𑀁 𑀦𑀧𑁆𑀧𑀬𑀼𑀚𑁆𑀚𑀢𑁂, 𑀢𑀲𑁆𑀲 (𑀧𑀦) 𑀲𑀗𑁆𑀔𑁆𑀬𑁂𑀬𑁆𑀬𑀯𑀘𑀦𑀲𑀗𑁆𑀔𑁆𑀬𑀸𑀪𑀸𑀯𑀸 𑀏𑀓𑀯𑀘𑀦𑀫𑁂𑀯 ( ) [(𑀧𑀦) (𑀧𑁄𑀢𑁆𑀣𑀓𑁂)] 𑀳𑁄𑀢𑀻’’𑀢𑀺, 𑀇𑀫𑀺𑀦𑀸 𑀘-𑀢𑁆𑀣𑀧𑁆𑀧𑀥𑀸𑀦𑁄-𑀬𑀁 𑀦𑀺𑀤𑁆𑀤𑁂𑀲𑁄 𑀦 𑀲𑀭𑀽𑀧𑀧𑁆𑀧𑀥𑀸𑀦𑁄𑀢𑀺 𑀤𑀲𑁆𑀲𑁂𑀢𑀺, 𑀅𑀥𑀺𑀧𑀢𑀺𑀧𑀘𑁆𑀘𑀬𑁄 𑀅𑀥𑀺𑀧𑀢𑀺𑀧𑁆𑀧𑀘𑁆𑀘𑀬𑁄𑀢𑀺 𑀅𑀦𑀺𑀘𑁆𑀘𑀁, 𑀇𑀥 𑀦 𑀳𑁄𑀢𑀺 𑀇𑀥 𑀫𑁄𑀤𑀢𑀻𑀢𑀺, 𑀢𑀁 𑀔𑀡𑀦𑁆𑀢𑀺 𑀏𑀢𑁆𑀣 𑀏𑀓𑀗𑁆𑀕𑀯𑀺𑀓𑀮𑀁 𑀧𑀘𑁆𑀘𑀼𑀤𑀸𑀳𑀭𑀡𑀦𑁆𑀢𑀺 𑀲𑀭𑀫𑁆𑀳𑀸 𑀧𑀭𑀢𑁆𑀢𑀸𑀪𑀸𑀯𑀸 𑀦 𑀤𑁆𑀯𑀺𑀢𑁆𑀢𑀁.

𑀢𑀩𑁆𑀩𑀕𑁆𑀕𑁂 𑀢𑀢𑀺𑀬𑀧𑀞𑀫𑀸𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁 𑀘𑀢𑀼𑀢𑁆𑀣 (𑀤𑀼𑀢𑀺𑀬) 𑀲𑀤𑁆𑀤𑁂𑀳𑀺 𑀯𑀕𑁆𑀕𑀓𑁆𑀔𑀭𑁂𑀲𑁆𑀯𑁂𑀯 𑀕𑀬𑁆𑀳𑀫𑀸𑀦𑁂𑀲𑀼 𑀢𑀣𑀸 𑀦𑀺𑀤𑁆𑀤𑁂𑀲𑁄 𑀬𑀼𑀢𑁆𑀢𑁄, 𑀦 𑀳𑀺 𑀘𑀢𑀼𑀦𑁆𑀦𑀫𑁆𑀧𑀽𑀭𑀡𑁄 𑀘𑀢𑀼𑀢𑁆𑀣𑁄 𑀤𑁆𑀯𑀺𑀦𑁆𑀦𑀫𑁆𑀧𑀽𑀭𑀡𑁄 𑀤𑀼𑀢𑀺𑀬𑁄𑀢𑀺 𑀅𑀓𑁆𑀔𑀭𑀸𑀬𑁂𑀯 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀲𑀗𑁆𑀓𑀺𑀬 ‘𑀯𑀺𑀦𑀸𑀧𑀻’𑀢𑀺𑀆𑀤𑀺𑀫𑀸𑀳, 𑀅𑀓𑁆𑀔𑀭𑁂 𑀅𑀓𑁆𑀔𑀭𑀯𑀺𑀲𑀬𑁂 𑀘𑀢𑀼𑀢𑁆𑀣𑀸𑀤𑀺 𑀯𑁄𑀳𑀸𑀭𑁄 𑀓𑀭𑀻𑀬𑀫𑀸𑀦𑁄 𑀯𑀕𑁆𑀕𑀕𑁆𑀕𑀳𑀡𑀁 𑀯𑀺𑀦𑀸𑀧𑀺 𑀯𑀕𑁆𑀕𑀓𑁆𑀔𑀭𑁂𑀬𑁂𑀯 𑀭𑀼𑀴𑁆𑀳𑁄 𑀧𑀲𑀺𑀤𑁆𑀥𑁄𑀢𑀺 𑀲𑀫𑁆𑀩𑀦𑁆𑀥𑁄, 𑀳𑁂𑀢𑀼𑀫𑁆𑀳𑀺 𑀇𑀢𑀺𑀲𑀤𑁆𑀤𑁄, 𑀬𑀢𑁄 𑀏𑀯𑀁, 𑀢𑀲𑁆𑀫𑀸 𑀓𑀸𑀭𑀡𑀸 ‘𑀢𑀩𑁆𑀩𑀕𑁆𑀕𑁂 𑀢𑀢𑀺𑀬𑀧𑀞𑀫𑀸’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑀩𑁆𑀩𑀕𑁆𑀕𑁂𑀢𑀺 𑀘𑀢𑀼𑀢𑁆𑀣𑀤𑀼𑀢𑀺𑀬𑀸 𑀬𑀲𑁆𑀫𑀺𑀁, 𑀢𑀲𑁆𑀫𑀺𑀁𑀬𑁂𑀯 𑀯𑀕𑁆𑀕𑁂𑀢𑀺 𑀅𑀢𑁆𑀣𑁄, 𑀧𑀘𑁆𑀘𑀸𑀲𑀢𑁆𑀢𑀻𑀢𑀺 𑀧𑀢𑀺 𑀆𑀧𑀼𑀩𑁆𑀩𑀸 ‘𑀲𑀤-𑀯𑀺𑀲𑀭𑀡𑀕𑀢𑁆𑀬𑀯𑀲𑀸𑀤𑀦𑁂𑀲𑀼’𑀇𑀘𑁆𑀘𑀲𑁆𑀫𑀸 𑀇𑀢𑁆𑀣𑀺𑀬𑀁 𑀪𑀸𑀯𑁂𑀢𑁆𑀢𑀺𑀫𑁆𑀳𑀺 𑀦𑀺𑀧𑁆𑀨𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘𑀧𑀘𑁆𑀘𑀸𑀲𑀻𑀤𑀦’𑀫𑀺𑀘𑁆𑀘𑀸𑀤𑀺, 𑀬𑀣𑀸𑀬𑁄𑀕𑁆𑀕𑀦𑁆𑀢𑀺 𑀘𑀢𑀼𑀢𑁆𑀣𑀓𑁆𑀔𑀭𑁂 𑀘𑀢𑀼𑀢𑁆𑀣𑀲𑁆𑀲 𑀢𑀢𑀺𑀬𑁄 𑀤𑀼𑀢𑀺𑀬𑀓𑁆𑀔𑀭𑁂 𑀤𑀼𑀢𑀺𑀬𑀲𑁆𑀲 𑀧𑀞𑀫𑁄𑀢𑀺 𑀏𑀯𑀁 𑀬𑁄𑀕𑁆𑀕𑀫𑀦𑀢𑀺𑀓𑁆𑀓𑀫𑁆𑀫, 𑀥𑀲𑁆𑀲 𑀤𑀪𑀸𑀯𑁄𑀢𑀺 𑀇𑀫𑀺𑀦𑀸𑀯 𑀧𑀼𑀩𑁆𑀩𑀲𑁆𑀲 𑀥𑀲𑁆𑀲 𑀤𑀢𑁆𑀢𑀫𑀼𑀧𑀮𑀓𑁆𑀔𑁂𑀢𑀺, 𑀢𑀣𑀸 𑀬𑀲𑀢𑁆𑀣𑁂𑀭𑁄𑀢𑀺. 𑀣𑁂𑀭𑁄𑀢𑀺 𑀏𑀢𑁆𑀣 𑀏𑀓𑀸𑀭𑁄 𑀯𑀕𑁆𑀕𑀓𑁆𑀔𑀭𑁄 ¶ 𑀦 𑀳𑁄𑀢𑀻𑀢𑀺 𑀢𑀲𑁆𑀫𑀺𑀁 𑀢𑀯𑀕𑁆𑀕𑀤𑀼𑀢𑀺𑀬𑀓𑁆𑀔𑀭𑀲𑁆𑀲 𑀢𑀲𑁆𑀲 𑀢𑁄 𑀧𑀞𑀫𑁄 𑀦 𑀳𑁄𑀢𑀺. 𑀧𑀦𑁆𑀣𑁄𑀢𑀺 𑀏𑀢𑁆𑀣 𑀢𑀯𑀕𑁆𑀕 𑀤𑀼𑀢𑀺𑀬𑀓𑁆𑀔𑀭𑁂𑀦 𑀣𑀓𑀸𑀭𑁂𑀦 𑀢𑀩𑁆𑀩𑀕𑁆𑀕𑀪𑀽𑀢𑁂 𑀦𑀓𑀸𑀭𑁂 𑀲𑀢𑀻𑀧𑀺 𑀦 𑀲𑁄 𑀢𑀩𑁆𑀩𑀕𑁆𑀕𑀤𑀼𑀢𑀺𑀬𑀓𑁆𑀔𑀭𑁄𑀢𑀺 𑀦 𑀢𑀲𑁆𑀲 𑀧𑀞𑀫𑁄 𑀢𑁄, 𑀏𑀢𑁆𑀣 𑀦𑀺𑀕𑁆𑀖𑁄𑀲𑁄 𑀦𑀺𑀖𑁄𑀲𑁄𑀢𑀺𑀆𑀤𑀺 𑀅𑀦𑀺𑀘𑁆𑀘𑀁, 𑀤𑀟𑁆𑀠𑁄 𑀦𑀺𑀝𑁆𑀞𑀸𑀦𑀦𑁆𑀢𑀺 𑀦𑀺𑀘𑁆𑀘𑀁.

𑀇𑀢𑀺𑀲𑀤𑁆𑀤𑁄-𑀦𑀼𑀓𑀭𑀡𑀁. 𑀦𑀺𑀧𑀸𑀢𑀲𑁆𑀲 𑀧𑀓𑀢𑀺𑀯𑀺𑀬𑀸-𑀦𑀼𑀓𑀭𑀡𑀁 𑀪𑀯𑀢𑀺, 𑀅𑀦𑀼𑀓𑀭𑀡𑀜𑁆𑀘 𑀤𑁆𑀯𑀺𑀥𑀸 𑀅𑀲𑀸𑀥𑀼𑀲𑀤𑁆𑀤𑀭𑀽𑀧𑀁 𑀲𑀸𑀥𑀼𑀲𑀤𑁆𑀤𑀭𑀽𑀧𑀦𑁆𑀢𑀺, 𑀢𑁂𑀲𑀼 𑀪𑀸𑀭𑀯𑀸𑀳𑀓𑁄 𑀓𑁄𑀘𑀺 𑀢𑁂𑀦 𑀧𑀻𑀴𑀺𑀢𑁄 ‘𑀅𑀳𑁄 𑀪𑀸𑀭𑁄’𑀢𑀺 𑀯𑀢𑁆𑀢𑀩𑁆𑀩𑁂 𑀲𑀢𑁆𑀢𑀺𑀯𑁂𑀓𑀮𑁆𑀮𑀸 ‘𑀅𑀳𑁄 𑀩𑀸𑀮’ 𑀇𑀘𑁆𑀘𑀸𑀳, 𑀢𑀁𑀲𑀫𑀻𑀧𑀯𑀢𑁆𑀢𑀻 ‘𑀓𑀺𑀫𑀬𑀫𑀸𑀳𑁂’𑀢𑀺 𑀓𑁂𑀦𑀘𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀅𑀳𑁄 𑀩𑀸𑀮 𑀇𑀘𑁆𑀘𑀬𑀫𑀸𑀳𑁂’𑀢𑀺 𑀯𑀤𑀢𑀺, 𑀇𑀥𑀫𑀲𑀸𑀥𑀼𑀲𑀤𑁆𑀤𑀭𑀽𑀧𑀁, 𑀇𑀢𑀻𑀢𑀺 𑀧𑀦 𑀲𑀸𑀥𑀼𑀲𑀤𑁆𑀤𑀭𑀽𑀧𑀁, 𑀢𑀲𑁆𑀫𑀸 𑀢𑀢𑁄-𑀦𑀼𑀓𑀸𑀭𑀺𑀬𑁂𑀦𑀸𑀢𑁆𑀣𑁂𑀦 𑀲𑀸𑀢𑁆𑀣𑀓𑀢𑁆𑀢𑀸 𑀞𑀸𑀦𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀻.

𑀦𑀦𑀼 ‘‘𑀯𑀺𑀢𑀺𑀲𑁆𑀲𑁂𑀯𑁂 𑀯𑀸’’𑀢𑀺 (𑁧-𑁩𑁬) 𑀯𑁄𑀢𑁆𑀬𑀦𑀼𑀯𑀢𑁆𑀢𑀺𑀬 𑀅𑀯𑀡𑁆𑀡𑁂 𑀏𑀑𑀦𑀁 𑀯𑁄 𑀳𑁄𑀢𑀻𑀢𑀺 𑀘 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁, 𑀢𑀣𑀸 𑀲𑀢𑀺 ‘𑀅𑀯𑀡𑁆𑀡𑁂 𑀓𑁆𑀯𑀘𑀺 𑀯𑁄 𑀳𑁄𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁 ‘𑀅𑀳𑁄𑀢𑀺 𑀯𑀸’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀘𑁄𑀤𑀦𑀫𑀸𑀲𑀗𑁆𑀓𑀺𑀬𑀸𑀳-‘𑀑𑀓𑀸𑀭𑀲𑁆𑀲𑀧𑀺’𑀘𑁆𑀘𑀸𑀤𑀺, 𑀞𑀸𑀦𑀺𑀪𑀸𑀯𑁂𑀦 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸𑀢𑀺 ‘‘𑀏𑀑𑀦’’𑀦𑁆𑀢𑀺 (𑁧-𑁩𑁧) 𑀯𑀓𑀸𑀭𑀸𑀤𑁂𑀲𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀯𑀓𑀸𑀭𑀸𑀤𑁂𑀲𑀫𑁆𑀧𑀢𑀺 𑀧𑀼𑀦 𑀑𑀓𑀸𑀭𑁄 𑀞𑀸𑀦𑀺𑀪𑀸𑀯𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄 𑀦 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳, 𑀦 𑀦𑀺𑀫𑀺𑀢𑁆𑀢𑀦𑁆𑀢𑀺 𑀏𑀑𑀦𑀁 𑀯𑀓𑀸𑀭𑀸𑀤𑁂𑀲𑀢𑁆𑀣𑀁 𑀅𑀯𑀡𑁆𑀡𑁄 𑀓𑀸𑀭𑀡𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄, 𑀅𑀜𑁆𑀜𑀣𑀸𑀢𑀺 𑀅𑀯𑀡𑁆𑀡𑀲𑁆𑀲 𑀦𑀺𑀫𑀺𑀢𑁆𑀢𑀢𑁆𑀢𑁂, 𑀑𑀓𑀸𑀭𑀁 𑀦 𑀧𑀞𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀫𑀓𑀸𑀭𑀸𑀕𑀫𑁂’𑀬𑀸𑀘 𑀓𑀫𑀸𑀕𑀢𑁂 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’𑀢𑀺, 𑀲𑁆𑀯𑁂 𑀪𑀯𑀦𑁆𑀢𑀺 𑀯𑀺𑀕𑁆𑀕𑀬𑁆𑀳 𑀢𑀦𑀧𑁆𑀧𑀘𑁆𑀘𑀬𑁂 𑀢𑀤𑁆𑀥𑀺𑀢𑀯𑀼𑀢𑁆𑀢𑀺𑀬𑀁 𑀯𑀺𑀪𑀢𑁆𑀢𑀺𑀬𑀸 ‘‘𑀏𑀓𑀢𑁆𑀣𑀢𑀸𑀬𑀁’’𑀢𑀺 (𑁨-𑁧𑁧𑁯) 𑀮𑁄𑀧𑁂 𑀅𑀓𑀸𑀭𑀸𑀤𑁂𑀲𑁂 𑀤𑀻𑀖𑁂𑀘 𑀲𑁆𑀬𑀸𑀤𑀺𑀫𑁆𑀳𑀺 𑀲𑁆𑀯𑀸𑀢𑀦𑀁 𑀤𑁆𑀯𑀺𑀢𑁆𑀢𑁂 𑀳𑀺𑀬𑁆𑀬𑀢𑁆𑀢𑀦𑀁. 𑀲𑁆𑀯𑀸𑀢𑀦𑀦𑁆𑀢𑀺𑀆𑀤𑀻𑀲𑀼 𑀦𑀺𑀘𑁆𑀘𑀁, 𑀇𑀥 𑀦𑀳𑁄𑀢𑀺 𑀧𑀭𑁂𑀘 𑀦 𑀯𑀺𑀚𑀸𑀦𑀦𑁆𑀢𑀻𑀢𑀺.

𑀓𑀣‘𑀫𑀸𑀕𑀫𑁄 ¶ 𑀳𑁄𑀢𑀻’𑀢𑀺 𑀯𑀼𑀢𑁆𑀢𑀁 𑀬𑀤𑀺 𑀦𑀺𑀕𑁆𑀕𑀳𑀻𑀢𑀫𑀸𑀕𑀫𑁄 𑀲𑀺𑀬𑀸 𑀲𑀼𑀢𑁆𑀢𑁂 𑀆𑀕𑀫𑀕𑁆𑀕𑀳𑀡𑁂𑀦 𑀯𑀸 𑀪𑀯𑀺𑀢𑀩𑁆𑀩𑀁 𑀜-𑀫-𑀓𑀸𑀤𑁆𑀬 𑀦𑀼𑀩𑀦𑁆𑀥𑀯𑀺𑀲𑁂𑀲𑁂𑀦 𑀯𑀸 𑀢𑁆𑀬𑀸𑀲𑀗𑁆𑀓𑀺𑀬𑀸𑀳-‘𑀅𑀲𑀢𑀺 𑀧𑀺’𑀘𑁆𑀘𑀸𑀤𑀺, 𑀆𑀕𑀫𑀸𑀯𑀲𑀸𑀬𑁂 𑀓𑀸𑀭𑀡𑀫𑀸𑀳-‘𑀆𑀤𑁂𑀲𑀢𑁆𑀢𑀸𑀬𑁄𑀕𑀸’𑀢𑀺, 𑀆𑀤𑁂𑀲𑀢𑁆𑀢𑀸𑀬𑁄𑀕𑁄 𑀓𑀣𑀁 𑀯𑀺𑀜𑁆𑀜𑀸𑀬𑀢𑀺 𑀘𑁆𑀘𑀸𑀳-‘𑀞𑀸𑀦𑀺𑀦𑀺𑀤𑁆𑀤𑁂𑀲𑀸𑀪𑀸𑀯𑀢𑁄’𑀢𑀺, 𑀢𑀣𑀸 𑀲𑀢𑀺 𑀆𑀕𑀫𑀺𑀦𑀺𑀤𑁆𑀤𑁂𑀲𑀸𑀪𑀸𑀯𑀸 𑀆𑀕𑀫𑀢𑁆𑀢𑀫𑁆𑀧𑀺 𑀦 𑀲𑀺𑀬𑀸𑀢𑀺 𑀘𑁄𑀤𑁂𑀢𑀺 ‘𑀬𑀚𑁆𑀚𑁂𑀯’𑀫𑀺𑀘𑁆𑀘𑀸𑀤𑀺𑀦𑀸, 𑀦-𑀇𑀢𑀺 𑀘𑁄𑀤𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀆𑀕𑀫𑀢𑁆𑀢𑀫𑁂𑀯 𑀲𑀸𑀥𑁂𑀢𑀼𑀫𑀸𑀳-‘𑀢𑀲𑁆𑀲𑀸’𑀢𑀺𑀆𑀤𑀺, 𑀢𑀲𑁆𑀲𑀸𑀢𑀺 𑀦𑀺𑀕𑁆𑀕𑀳𑀻𑀢𑀲𑁆𑀲, 𑀭𑀲𑁆𑀲𑀸𑀦𑀼𑀧𑁆𑀧𑀯𑀢𑁆𑀢𑀺𑀢𑁄 𑀭𑀲𑁆𑀲𑀲𑀭𑀫𑁂𑀯 𑀅𑀦𑀼𑀕𑀦𑁆𑀢𑁆𑀯𑀸 𑀧𑀯𑀢𑁆𑀢𑀺𑀢𑁄, 𑀅𑀬𑀫𑁂𑀯𑀢𑁆𑀣𑁄 𑀯𑀼𑀢𑁆𑀢𑀺𑀬𑀫𑁆𑀧𑀺 𑀤𑀲𑁆𑀲𑀺𑀢𑁄𑀬𑁂𑀯𑀸𑀢𑀺 𑀯𑀢𑁆𑀢𑀼𑀫𑀸𑀳-‘𑀏𑀢𑀤𑁂𑀯𑁂’𑀘𑁆𑀘𑀸𑀤𑀺, 𑀧𑀼𑀭𑀺𑀫𑀸 𑀚𑀸𑀢𑀻𑀢𑀺 𑀯𑀺𑀲𑁂𑀲𑀦𑀲𑀫𑀸𑀲𑁂𑀓𑀢𑁂 𑀭𑀲𑁆𑀲𑁂 𑀘 𑀩𑀺𑀦𑁆𑀤𑁆𑀯𑀸𑀕𑀫𑁄, 𑀧𑀭𑀦𑀺𑀫𑀺𑀢𑁆𑀢𑀲𑁆𑀲𑀸𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀩𑀳𑀼𑀲𑀤𑁆𑀤𑁂-𑀦𑁆𑀢𑀲𑁆𑀲 𑀩𑀺𑀦𑁆𑀤𑁆𑀯𑀸𑀕𑀫𑁂 𑀩𑀳𑀼𑀁, 𑀲𑀢𑀺𑀧𑀺 𑀧𑀬𑁄𑀕𑀸𑀦𑀼𑀲𑀸𑀭𑀺𑀢𑁆𑀢𑀤𑀻𑀧𑀓𑀲𑁆𑀲 𑀓𑁆𑀯𑀘𑀺𑀲𑀤𑁆𑀤𑀲𑁆𑀲𑀸𑀧𑀺 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀢𑁂 𑀯𑀸𑀲𑀤𑁆𑀤𑀲𑁆𑀲𑀸𑀧𑀺 𑀢𑀸𑀤𑀺𑀲𑀢𑁆𑀢𑀲𑁆𑀲𑁂𑀯 𑀧𑀝𑀺𑀧𑀸𑀤𑀓𑀢𑁆𑀢 𑀲𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀢𑀸 𑀯𑀸𑀥𑀺𑀓𑀸𑀭𑀲𑁆𑀲𑀸’𑀢𑀺 𑀯𑀼𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀯𑀯𑀢𑁆𑀣𑀺𑀢𑀲𑁆𑀲 𑀮𑀓𑁆𑀔𑀺𑀬𑀲𑁆𑀲 𑀅𑀦𑀼𑀭𑁄𑀥𑁂𑀦 𑀮𑀓𑁆𑀔𑀡𑀧𑁆𑀧𑀯𑀢𑁆𑀢𑀺𑀓𑀸 𑀯𑀺𑀪𑀸𑀲𑀸 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀸, 𑀅𑀪𑁂𑀤𑁂𑀦 𑀢𑀼 𑀯𑀸𑀥𑀺𑀓𑀸𑀭𑁄 𑀯𑀯𑀢𑁆𑀣𑀺𑀢 𑀯𑀺𑀪𑀸𑀲𑀸, 𑀢𑀲𑁆𑀲𑀸 𑀪𑀸𑀯𑁄 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀢𑀁, 𑀢𑀲𑁆𑀫𑀸, 𑀇𑀥 𑀦 𑀳𑁄𑀢𑀺 𑀇𑀥 𑀫𑁄𑀤𑀢𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀆𑀕𑀫𑀢𑁆𑀢𑀧𑁆𑀧𑀓𑀸𑀲𑀓𑁄 𑀞𑀸𑀦𑀺𑀦𑀺𑀤𑁆𑀤𑁂 𑀲𑀸𑀪𑀸𑀯𑀸 𑀆𑀤𑁂𑀲𑀢𑁆𑀢𑀸𑀬𑁄𑀕𑀲𑀗𑁆𑀔𑀸𑀢𑁄 𑀓𑀸𑀭𑀡𑀯𑀺𑀲𑁂𑀲𑁄 𑀲𑀫𑀢𑁆𑀣𑁄, 𑀢𑀲𑁆𑀲 𑀪𑀸𑀯𑁄 𑀲𑀸𑀫𑀢𑁆𑀣𑀺𑀬𑀁-𑀅𑀢𑁆𑀣𑀩𑀮-𑀫𑀜𑁆𑀜𑀣𑀸𑀦𑀼𑀧𑀧𑀢𑁆𑀢𑀺𑀮𑀓𑁆𑀔𑀡𑀁, 𑀲𑀘𑀸𑀢𑀺 𑀲𑁄 𑀆𑀕𑀫𑁄 𑀘.

𑀮𑁄𑀧𑀲𑀤𑁆𑀤𑀲𑁆𑀲 𑀪𑀸𑀯𑀲𑀸𑀥𑀦𑀫𑀢𑁆𑀢𑀫𑁂𑀯 𑀲𑀸𑀥𑁂𑀢𑀼𑀫𑀸𑀳-‘𑀢𑁂𑀦𑁂’𑀘𑁆𑀘𑀸𑀤𑀺, 𑀮𑁄𑀧𑁄𑀢𑀺 𑀬𑀤𑀺 𑀓𑀫𑁆𑀫𑀲𑀸𑀥𑀦𑁄 𑀲𑀺𑀬𑀸 𑀢𑀤𑀸 𑀢𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀁 𑀓𑀢𑁆𑀯𑀸 𑀉𑀧𑀭𑀺 ‘‘𑀧𑀭𑀲𑀭𑁄’’𑀢𑀺 𑀲𑀼𑀢𑁆𑀢𑀫𑀸𑀭𑀪𑀻𑀬𑁂𑀬𑁆𑀬𑀸𑀢𑀺 𑀩𑁆𑀬𑀢𑀺𑀭𑁂𑀓𑀫𑀸𑀳 ‘𑀦 𑀧𑀭𑀲𑀭𑁄’𑀢𑀺, 𑀇𑀥 𑀦 𑀳𑁄𑀢𑀺 𑀲𑀗𑁆𑀕𑀭𑁄.

𑀢𑁆𑀯𑀁𑀲𑀺 ¶ 𑀢𑁆𑀯𑀫𑀲𑀻𑀢𑀺 𑀯𑀺𑀓𑀧𑁆𑀧𑁄, 𑀇𑀥 𑀦 𑀳𑁄𑀢𑀺 𑀢𑀸𑀲𑀸𑀳𑀁.

𑀦𑀦𑀼 𑀯𑀕𑁆𑀕𑁂𑀯𑀕𑁆𑀕𑀦𑁆𑀢𑁄𑀢𑀺 𑀏𑀢𑁆𑀢𑀓𑁂𑀬𑁂𑀯 𑀯𑀼𑀢𑁆𑀢𑁂 𑀬𑀲𑁆𑀫𑀺𑀁 (𑀓𑀺𑀲𑁆𑀫𑀺)𑀜𑁆𑀘𑀺 𑀯𑀕𑁆𑀕𑀓𑁆𑀔𑀭𑁂 𑀧𑀭𑁂 𑀩𑀺𑀦𑁆𑀤𑀼𑀦𑁄 𑀬𑁄𑀓𑁄𑀘𑀺 𑀯𑀕𑁆𑀕𑀦𑁆𑀢𑁄 𑀅𑀦𑀺𑀬𑀫𑁂𑀦 𑀪𑀯𑁂𑀬𑁆𑀬 𑀢𑀣𑀸 𑀲𑀢𑀺 𑀅𑀦𑀺𑀝𑁆𑀞𑀫𑁆𑀧𑀺 𑀲𑀺𑀬𑀸𑀢𑁆𑀬𑀸𑀲𑀗𑁆𑀓𑀺𑀬 𑀧𑀘𑁆𑀘𑀸𑀲𑀢𑁆𑀢𑀺𑀁 𑀲𑀦𑁆𑀦𑀺𑀲𑁆𑀲𑀸𑀬𑀸𑀦𑀺𑀝𑁆𑀞 𑀦𑀺𑀯𑀢𑁆𑀢𑀺𑀦𑁆𑀤𑀲𑁆𑀲𑁂𑀢𑀼𑀫𑀸𑀳-‘𑀯𑀕𑁆𑀕𑁂 𑀯𑀕𑁆𑀕𑀦𑁆𑀢𑁄’𑀢𑀺𑀘𑁆𑀘𑀸𑀤𑀺, 𑀲𑁄𑀯𑀸𑀢𑀺 𑀯𑀕𑁆𑀕𑀦𑁆𑀢𑁄𑀯, 𑀢𑀲𑁆𑀫𑀺𑀦𑁆𑀢𑀺 𑀯𑀕𑁆𑀕𑀓𑁆𑀔𑀭𑁂.

𑀦𑀦𑀼 𑀲𑀤𑁆𑀤𑀢𑁆𑀢𑀸 𑀩𑁆𑀬𑀪𑀺𑀘𑀸𑀭𑀺𑀢𑁆𑀢𑀸 𑀏𑀯𑀲𑁆𑀲 𑀢𑀸𑀯 𑀲𑀤𑁆𑀤𑁄 𑀳𑁄𑀢𑀼, 𑀲𑀁𑀬𑀢𑁄, 𑀲𑀁𑀳𑀺𑀢𑁄𑀢𑀺 𑀲𑀤𑁆𑀤𑁂𑀓𑀤𑁂𑀲𑀪𑀽𑀢𑀸𑀦𑀫𑁆𑀧𑀺 𑀲𑀫𑁆𑀪𑀯𑀸 𑀢𑁂𑀧𑀺 𑀕𑀳𑁂 𑀢𑀩𑁆𑀩𑀸 𑀲𑀺𑀬𑀼𑀦𑁆𑀢𑀺 ‘𑀬𑀏𑀯𑀳𑀺 𑀲𑀤𑁆𑀤𑁂𑀲𑀼’𑀢𑀺 𑀬𑀳𑀻𑀦𑀫𑁆𑀧𑀺 𑀓𑀣𑀁 𑀲𑀤𑁆𑀤𑀯𑁄𑀳𑀸𑀭𑁄 𑀓𑀢𑁄𑀢𑀺 𑀆𑀳 ‘𑀏𑀯𑀸’𑀢𑀺𑀆𑀤𑀺, 𑀏𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 ‘𑀅𑀩𑁆𑀬𑀪𑀺𑀘𑀸𑀭𑀺𑀦𑀸 𑀩𑁆𑀬𑀪𑀺𑀘𑀸𑀭𑀻 𑀦𑀺𑀬𑀫𑁆𑀬𑀢𑁂’𑀢𑀺.

𑀬𑀲𑀤𑁆𑀤𑁂 𑀧𑀼𑀩𑁆𑀩𑀲𑀼𑀢𑁆𑀢𑁂𑀦𑁂𑀯 𑀲𑀁𑀲𑁆𑀲𑀧𑁆𑀬𑀸𑀤𑁂𑀲𑁂 𑀲𑀺𑀤𑁆𑀥𑁂 𑀲𑁄 ( ) [(𑀢𑀲𑁆𑀲) (𑀧𑁄𑀢𑁆𑀣𑀓𑁂)] 𑀬 𑀓𑀸𑀭𑀫𑀢𑁆𑀢𑁂𑀬𑁂𑀯 𑀧𑀭𑁂 𑀲𑀁𑀲𑁆𑀲𑁂𑀯 (𑀬𑀣𑀸) 𑀲𑀺𑀬𑀸𑀢𑀺 𑀲𑀼𑀢𑁆𑀢𑀫𑀺𑀤𑀫𑀸𑀭𑀤𑁆𑀥𑀁.

𑀞𑀸𑀦𑀺𑀦𑀫𑀸𑀲𑀺𑀮𑀺𑀲𑁆𑀲 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀆𑀕𑀫𑁄 𑀦𑀸𑀫, 𑀓𑁄-𑀬𑀫𑁂𑀢𑁆𑀣 𑀞𑀸𑀦𑀻𑀢𑀺 𑀆𑀳-‘𑀲𑀭𑀲𑁆𑀲𑀸𑀢𑀺, 𑀲𑀼𑀢𑁆𑀢𑁂 𑀅𑀦𑀼𑀯𑀢𑁆𑀢𑀲𑁆𑀲 𑀘 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 ‘𑀲𑀭𑀲𑁆𑀲𑀸’𑀢𑀺 𑀓𑀼𑀢𑁄 𑀮𑀩𑁆𑀪𑀢𑀻𑀢𑀺 𑀘𑁄𑀤𑁂𑀢𑀺 ‘𑀦𑀦𑀼 𑀘𑁂’𑀢𑁆𑀬𑀸𑀤𑀺𑀦𑀸. 𑀆𑀕𑀫𑀲𑀼𑀢𑀺𑀬𑀸 𑀯𑀦𑀸𑀤𑀻𑀦𑀁 𑀞𑀸𑀦𑀺𑀲𑀼𑀢𑀺𑀬𑀸 𑀅𑀪𑀸𑀯𑁂𑀧𑀺 𑀲𑀸𑀫𑀢𑁆𑀣𑀺𑀬𑀸 𑀩𑁆𑀬𑀜𑁆𑀚𑀦𑀲𑁆𑀲 𑀯𑀸 𑀆𑀕𑀫𑁄 𑀲𑀺𑀬𑀸 𑀲𑀭𑀲𑁆𑀲 𑀯𑀸, 𑀬𑀤𑀺 𑀩𑁆𑀬𑀜𑁆𑀚𑀦𑀲𑁆𑀲 𑀯𑀸 𑀲𑀺𑀬𑀸 (𑀦) ‘‘𑀧𑀤𑀸𑀤𑀻𑀦𑀁 𑀓𑁆𑀯𑀘𑀻’’𑀢𑀺 (𑁫-𑁯𑁨) 𑀲𑀼𑀢𑁆𑀢𑀺𑀢 𑀫𑀸𑀘𑀭𑀺𑀬𑁂𑀦, 𑀢𑀲𑁆𑀫𑀸 𑀢𑀤𑁂𑀯 𑀜𑀸𑀧𑁂𑀢𑀺 ‘𑀲𑀭𑁄 𑀬𑁂𑀯𑁂𑀢𑁆𑀣 𑀞𑀸𑀦𑀻 𑀪𑀯𑀺𑀢𑀼𑀫𑀭𑀳𑀢𑀻’𑀢𑀺. 𑀯𑀼𑀘𑁆𑀘𑀢𑁂𑀘𑁆𑀘𑀸𑀤𑀺𑀦𑀸 𑀧𑀭𑀺𑀳𑀸𑀭𑀫𑀸𑀳, 𑀦𑀺𑀧𑀼𑀩𑁆𑀩𑀸 𑀧𑀤𑀺𑀲𑁆𑀫𑀸 𑀅𑀦𑀧𑁆𑀧𑀘𑁆𑀘𑀬𑁂 ‘‘𑀧𑀤𑀸𑀤𑀻𑀦𑀁 𑀓𑁆𑀯𑀘𑀻’’𑀢𑀺 𑀬𑀼𑀓𑀅𑀦𑁆𑀢𑀸𑀯𑀬𑀯𑁄 ¶ ‘‘𑀢𑀯𑀕𑁆𑀕𑀯𑀭𑀦𑀸’’𑀤𑀺𑀦𑀸 (𑁧-𑁪𑁮) 𑀬𑁂 𑀤𑀲𑁆𑀲 𑀚𑁄 ‘‘𑀯𑀕𑁆𑀕𑀮 𑀲𑁂𑀳𑀺𑀢𑁂’’𑀢𑀺 (𑁧-𑁪𑁯) (𑀬𑀲𑁆𑀲 𑀚𑁄) 𑀦𑀺𑀧𑀚𑁆𑀚𑀦𑀁, 𑀫𑀸𑀦𑀦𑁆𑀢𑀢𑁆𑀬𑀸𑀤𑀻𑀲𑀽𑀢𑀺 𑀅𑀥𑀺𑀓𑀸𑀭𑀸𑀢𑀺 ‘‘𑀓𑁆𑀬𑁄 𑀪𑀸𑀯𑀓𑀫𑁆𑀫𑁂𑀲𑁆𑀯𑀧𑀭𑁄𑀓𑁆𑀔𑁂𑀲𑀼 𑀫𑀸𑀦𑀦𑁆𑀢𑀢𑁆𑀬𑀸𑀤𑀻𑀲𑀽’’𑀢𑀺 (𑁫-𑁧𑁭) 𑀇𑀢𑁄 𑀫𑀸𑀦𑀦𑁆𑀢𑀢𑁆𑀬𑀸𑀤𑀻𑀲𑀼𑀢𑀺 𑀅𑀥𑀺𑀓𑀸𑀭𑀸, 𑀧𑀘𑁆𑀘𑀬𑀦𑁆𑀢𑀭𑁂𑀢𑀺 𑀫𑀸𑀦𑀦𑁆𑀢𑀢𑁆𑀬𑀸𑀤𑀻𑀢𑁄 𑀅𑀜𑁆𑀜𑀲𑁆𑀫𑀺𑀁 𑀧𑀘𑁆𑀘𑀬𑁂, 𑀓𑀘𑁆𑀘𑀸𑀬𑀦𑁂𑀦 ‘𑀅𑀢𑀺𑀧𑁆𑀧𑀕𑁄𑀔𑁄𑀢𑀸𑀯𑀸’𑀢𑀺 𑀲𑀸𑀥𑀦𑀢𑁆𑀣𑀁 ‘‘𑀓𑁆𑀯𑀘𑀺 𑀑 𑀩𑁆𑀬𑀜𑁆𑀚𑀦𑁂’’𑀢𑀺 𑀑𑀓𑀸𑀭𑀸𑀕𑀫𑁄 𑀕𑀓𑀸𑀭𑀸𑀕𑀫𑁄 𑀘 𑀲𑀼𑀢𑁆𑀢𑀦𑁆𑀢𑀭𑁂𑀦 𑀯𑀺𑀳𑀺𑀢𑁄, 𑀢𑀁 𑀧𑀓𑀸𑀭𑀦𑁆𑀢𑀭𑁂𑀦 𑀲𑀸𑀥𑁂𑀢𑀼𑀁 𑀯𑀼𑀢𑁆𑀢𑀺𑀬𑀁-‘𑀅𑀢𑀺𑀧𑁆𑀧𑀕𑁄 𑀔𑁄 𑀢𑀸𑀯𑀸’𑀢𑀺 𑀬𑀁 𑀯𑀼𑀢𑁆𑀢𑀁 𑀢𑀁 𑀤𑀲𑁆𑀲𑁂𑀢𑀼𑀁 ‘𑀅𑀢𑀺𑀧𑁆𑀧𑀸’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀤𑁆𑀯𑀸𑀤𑀬𑁄 𑀅𑀝𑁆𑀞𑀸𑀭𑀲𑀦𑁆𑀢𑀸 𑀩𑀳𑀼𑀯𑀘𑀦𑀦𑁆𑀢𑀸𑀢𑀺 ‘𑀙𑀓𑀻’𑀢𑀺 𑀯𑀢𑁆𑀢𑀩𑁆𑀩𑁂 ‘𑀙𑀸’𑀢𑀺 𑀏𑀓𑀯𑀘𑀦𑀁 𑀦 𑀬𑀼𑀚𑁆𑀚𑀢𑀻𑀢𑀺 𑀘𑁄𑀤𑁂𑀢𑀺 ‘𑀦𑀦𑀼𑀘𑀸’𑀢𑀺𑀆𑀤𑀺𑀦𑀸, 𑀧𑀭𑀺𑀳𑀭𑀢𑀺 𑀦𑀘𑁆𑀘𑀸𑀤𑀺𑀦𑀸, 𑀦𑁂𑀢𑀺 ‘𑀙𑀴𑁄’𑀢𑀺 𑀅𑀬𑀼𑀢𑁆𑀢𑁄-𑀬𑀁 𑀦𑀺𑀤𑁆𑀤𑁂𑀲𑁄 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄, 𑀙𑀲𑀤𑁆𑀤𑀲𑁆𑀲 𑀅𑀦𑀼𑀓𑀭𑀡𑀢𑁆𑀢𑀸 𑀙𑀲𑀤𑁆𑀤𑀸𑀦𑀼𑀓𑀭𑀡𑀢𑁆𑀢𑀸, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀸𑀥𑀼𑀲𑀤𑁆𑀤𑀭𑀽𑀧𑀸 𑀲𑀸𑀥𑀼𑀲𑀤𑁆𑀤𑀭𑀽𑀧𑀫𑀦𑀼𑀓𑀭𑀡𑀁 𑀯𑀺𑀪𑀚𑀢𑀺 ‘𑀅𑀦𑀼𑀓𑀭𑀡𑀜𑁆𑀘 𑀤𑀼𑀯𑀺𑀥’𑀫𑀺𑀘𑁆𑀘𑀸𑀤𑀺𑀦𑀸, 𑀧𑀭𑀺𑀘𑁆𑀘𑀢𑁆𑀢𑁄 𑀚𑀳𑀺𑀢𑁄 𑀅𑀢𑁆𑀣𑁄 𑀯𑀺𑀥𑀺𑀦𑀺𑀲𑁂𑀥𑀭𑀽𑀧𑁄 𑀬𑀲𑁆𑀲 𑀢𑀁 𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀁, 𑀏𑀢𑁆𑀣 𑀧𑀦 𑀙𑀲𑀤𑁆𑀤𑁂𑀦 𑀙𑀲𑀗𑁆𑀔𑁆𑀬𑀸𑀯𑀺𑀲𑁂𑀲𑁄 𑀧𑀭𑀺𑀘𑁆𑀘𑀢𑁆𑀢𑁄, 𑀅𑀪𑀺𑀥𑀸𑀬𑀢𑁄 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀙𑀲𑀤𑁆𑀤𑀲𑁆𑀲 𑀅𑀦𑀼𑀓𑀸𑀭𑀺𑀬𑁂𑀦𑀸𑀢𑁆𑀣𑁂𑀦𑀸𑀢𑁆𑀣𑀯𑀦𑁆𑀢𑀢𑁆𑀣𑀫𑀸𑀳, 𑀏𑀓𑀯𑀘𑀦𑀦𑁆𑀢𑀲𑁆𑀲 𑀦𑀺𑀤𑁆𑀤𑁂𑀲𑁄 𑀓𑀢𑁄… 𑀙𑀲𑀤𑁆𑀤𑀯𑀘𑀦𑀻𑀬𑀲𑁆𑀲 𑀙𑀲𑁆𑀲 𑀏𑀓𑀢𑁆𑀢𑀸, 𑀅𑀦𑀼𑀓𑀸𑀭𑀺𑀬𑀲𑁆𑀲𑀸𑀢𑀺 𑀏𑀓𑀸𑀤𑀺𑀦𑁄 𑀲𑀗𑁆𑀔𑁆𑀬𑀸 𑀲𑀤𑁆𑀤𑀲𑁆𑀲 𑀢𑀤𑀜𑁆𑀜𑀲𑁆𑀲 𑀯𑀸 𑀬𑀤𑀦𑀼𑀓𑀸𑀭𑀺𑀬𑀫𑁂𑀓𑀸𑀤𑀺𑀓𑀁 𑀢𑀤𑀜𑁆𑀜𑀁 𑀯𑀸 𑀲𑀤𑁆𑀤𑀭𑀽𑀧𑀁 𑀢𑀲𑁆𑀲. 𑀲𑀗𑁆𑀔𑁆𑀬𑀸𑀤𑀺𑀯𑀺𑀲𑁂𑀲𑀦𑁆𑀢𑀺 𑀏𑀓𑀢𑁆𑀢𑀸𑀤𑀺𑀲𑀗𑁆𑀔𑁆𑀬𑀸𑀯𑀺𑀲𑁂𑀲𑀁 𑀢𑀤𑀜𑁆𑀜𑀁 𑀯𑀸, ‘‘𑀬𑁄𑀫𑁆𑀳𑀺 𑀤𑁆𑀯𑀺𑀦𑁆𑀦𑀁 𑀤𑀼𑀯𑁂 𑀤𑁆𑀯𑁂’’𑀢𑀺 (𑁨-𑁨𑁧𑁯) 𑀲𑀼𑀢𑁆𑀢𑁂 𑀤𑁆𑀯𑀺𑀲𑀤𑁆𑀤𑁄-𑀦𑀼𑀓𑀸𑀭𑀺𑀬𑀁 𑀤𑁆𑀯𑀺𑀲𑀤𑁆𑀤𑀭𑀽𑀧𑀁 𑀢𑀩𑁆𑀩𑀘𑀦𑀻𑀬𑀜𑁆𑀘 𑀤𑁆𑀯𑀺𑀲𑀗𑁆𑀔𑁆𑀬𑀸𑀯𑀺𑀲𑁂𑀲𑀫𑁆𑀧𑀭𑀸𑀫𑀲𑀢𑀻𑀢𑀺 𑀢𑀩𑁆𑀩𑀸𑀘𑀓𑀁 𑀤𑁆𑀯𑀺𑀦𑁆𑀦𑀦𑁆𑀢𑀺 𑀩𑀳𑀼𑀯𑀘𑀦𑀁, 𑀅𑀣 ‘𑀴𑀜𑀺’𑀢𑀺 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀁 𑀏𑀯𑀜𑁆𑀳𑀺 𑀲𑀢𑀺 𑀜𑀸𑀦𑀩𑀦𑁆𑀥𑀢𑁆𑀢𑀸𑀴𑀓𑀸𑀭𑁄 𑀆𑀤𑁆𑀬𑀯𑀬𑀯𑁄 𑀪𑀯𑀺𑀢𑀼𑀫𑀭𑀳𑀢𑀻𑀢𑀺 𑀘𑁄𑀤𑀦𑀫𑁆𑀫𑀦𑀲𑀺 𑀦𑀺𑀥𑀸𑀬 ‘𑀙𑀲𑀤𑁆𑀤𑀸’𑀢𑀺𑀆𑀤𑀺𑀫𑀸𑀳, 𑀅𑀦𑁆𑀢𑀸𑀧𑀯𑀸𑀤𑁂𑀦 𑀯𑀺𑀥𑀻𑀬𑀫𑀸𑀦𑁄 𑀴𑀓𑀸𑀭𑁄 𑀙 𑀲𑀤𑁆𑀤𑀸 𑀧𑀭𑀲𑁆𑀲𑀸𑀤𑀺𑀲𑁆𑀲 𑀆𑀕𑀫𑀢𑁆𑀢𑀸…𑀧𑁂… 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀅𑀦𑁆𑀢𑀸𑀧𑀯𑀸𑀤𑁂𑀦𑀸𑀢𑀺 𑀇𑀫𑀺𑀦𑀸 ‘𑀲𑀭𑀲𑁆𑀲𑀸’𑀢𑀺 𑀙𑀝𑁆𑀞𑀻𑀦𑀺𑀤𑁆𑀤𑁂𑀲𑀢𑁄 ‘‘𑀙𑀴𑀻𑀬𑀦𑁆𑀢𑀲𑁆𑀲𑀸’’𑀢𑀻-𑀫𑀲𑁆𑀲 ¶ 𑀯𑀺𑀲𑀬𑀪𑀸𑀯𑀁 𑀤𑀻𑀧𑁂𑀢𑀺, 𑀧𑀭𑀲𑁆𑀲𑀸𑀢𑀺 𑀇𑀫𑀺𑀦𑀸 ‘𑀙𑀸’𑀢𑀺 𑀧𑀜𑁆𑀘𑀫𑀻𑀦𑀺𑀤𑁆𑀤𑁂𑀲𑀢𑁄 ‘‘𑀧𑀜𑁆𑀘𑀫𑀺𑀬𑀁 𑀧𑀭𑀲𑁆𑀲𑀸’’𑀢𑀻𑀫𑀲𑁆𑀲 𑀯𑀺𑀲𑀬𑀪𑀸𑀯𑀁, 𑀆𑀤𑀺𑀲𑁆𑀲𑀸𑀢𑀺 𑀇𑀫𑀺𑀦𑀸 𑀴𑀲𑁆𑀲𑁂𑀓𑀯𑀡𑁆𑀡𑀢𑁆𑀢𑀸 𑀅𑀦𑁆𑀢𑀸𑀧𑀯𑀸𑀤𑁂𑀦 ‘‘𑀆𑀤𑀺𑀲𑁆𑀲𑀸’’𑀢𑀺 𑀲𑀼𑀢𑁆𑀢𑁂 𑀦 𑀆𑀤𑁆𑀬𑀦𑁆𑀢𑁄 𑀯𑀺𑀬𑁂𑀓𑁄𑀧𑀺 𑀲𑀭𑁄𑀢𑀺 𑀲𑀭𑀲𑁆𑀲𑀸𑀤𑀺𑀲𑁆𑀲 𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺, 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 ‘𑀙𑀸’𑀢𑀺 𑀧𑀜𑁆𑀘𑀫𑀻𑀦𑀺𑀤𑁆𑀤𑁂𑀲𑀸 ‘‘𑀧𑀜𑁆𑀘𑀫𑀺𑀬𑀁 𑀧𑀭𑀲𑁆𑀲𑀸’’𑀢𑀺 (𑁧-𑁧𑁫) 𑀧𑀭𑀲𑁆𑀲 𑀲𑀫𑁆𑀧𑀢𑁆𑀢𑀁 𑀓𑀸𑀭𑀺𑀬𑀁 𑀏𑀓𑀯𑀡𑁆𑀡𑀢𑁆𑀢𑀸 ‘‘𑀙𑀝𑁆𑀞𑀺𑀬𑀦𑁆𑀢𑀲𑁆𑀲𑀸’’𑀢𑀺 (𑁧-𑁧𑁭) 𑀅𑀦𑁆𑀢𑀲𑁆𑀲 𑀲𑀫𑁆𑀧𑀢𑁆𑀢𑀁 ‘‘𑀆𑀤𑀺𑀲𑁆𑀲𑀸’’𑀢𑀺 (𑁧-𑁧𑁬) 𑀆𑀤𑀺𑀯𑀡𑁆𑀡𑀲𑁆𑀲 𑀧𑀧𑁆𑀧𑁄𑀢𑀻’’𑀢𑀺. 𑀆𑀤𑀺𑀪𑀽𑀢𑁄𑀯 𑀳𑁄𑀢𑀻𑀢𑀺 𑀅𑀲𑀢𑀺𑀧𑀺 𑀜𑀓𑀸𑀭𑁂 𑀆𑀕𑀫𑀕𑁆𑀕𑀳𑀡𑀸𑀦𑀼𑀯𑀢𑁆𑀢𑀺𑀬𑀸 𑀆𑀕𑀫𑀺𑀦𑀁 𑀲𑀭𑀁 𑀅𑀯𑀺𑀦𑀸𑀲𑁂𑀦𑁆𑀢𑁄 𑀢𑀲𑁆𑀲 𑀆𑀤𑁆𑀬𑀯𑀬𑀯𑀪𑀽𑀢𑁄𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄, 𑀮𑀓𑀸𑀭𑀁 𑀓𑀭𑁄𑀦𑁆𑀢𑀺 ‘‘𑀬𑀯𑀫𑀤𑀦𑀢𑀭𑀮𑀸𑀘𑀸𑀕𑀫𑀸’’𑀢𑀺 𑀲𑀼𑀢𑁆𑀢𑁂𑀦, 𑀢𑀦𑁆𑀢𑀺 𑀮𑀓𑀸𑀭𑀓𑀭𑀡𑀁 𑀉𑀪𑀺𑀦𑁆𑀦𑀫𑀯𑀺𑀲𑁂𑀲𑀯𑀘𑀦𑀜𑁆𑀘 𑀅𑀬𑀼𑀢𑁆𑀢𑀢𑀁 𑀤𑀲𑁆𑀲𑁂𑀢𑀺 ‘𑀢𑁂𑀲𑀫𑁆𑀧𑀺’𑀘𑁆𑀘𑀸𑀤𑀺𑀦𑀸, 𑀢𑁂𑀲𑀫𑁆𑀧𑀻𑀢𑀺 𑀓𑀘𑁆𑀘𑀸𑀬𑀦𑀸𑀦𑀫𑁆𑀧𑀺, 𑀅𑀓𑁆𑀔𑀭𑀲𑀜𑁆𑀜𑀸𑀬𑀦𑁆𑀢𑀺 ‘‘𑀅𑀓𑁆𑀔𑀭𑀸𑀧𑀸𑀤𑀬𑁄 𑀏𑀓𑀘𑀢𑁆𑀢𑀸𑀮𑀻𑀲’’𑀦𑁆𑀢𑀺 𑀯𑀺𑀥𑀻𑀬𑀫𑀸𑀦𑀅𑀓𑁆𑀔𑀭 𑀲𑀜𑁆𑀜𑀸𑀬𑀁. 𑀅𑀯𑀺𑀲𑁂𑀲𑁂 𑀮𑀴𑀸𑀦𑀁 𑀦𑀸𑀦𑀢𑁆𑀢𑀸𑀪𑀸𑀯𑁂, 𑀧𑀸𑀓𑀝𑁄 𑀯𑀸𑀢𑀺 𑀇𑀫𑀺𑀦𑀸 𑀲𑀼𑀢𑀺𑀮𑀺𑀧𑀺𑀪𑁂𑀤𑀲𑁆𑀲 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑀢𑀦𑁆𑀤𑀲𑁆𑀲𑁂𑀢𑀺, 𑀢𑀢𑁆𑀣 𑀳𑀺 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀮𑀴𑀸𑀦𑀁 𑀯𑀺𑀲𑀼𑀁𑀯𑀺𑀲𑀼𑀁 𑀕𑀳𑀡𑀁 𑀲𑀼𑀢𑀺, 𑀢𑀁𑀢𑀁 𑀤𑁂𑀲𑀯𑀸𑀲𑀻𑀦𑀁 𑀮𑁂𑀔𑀸 𑀯 𑀯𑀢𑁆𑀣𑀸𑀦𑀁 𑀮𑀺𑀧𑀺, 𑀢𑁂𑀲𑀁 𑀪𑁂𑀤𑁄 𑀲𑁄𑀢𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀕𑀬𑁆𑀳𑀢𑁆𑀢𑀸 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑁄, 𑀙𑀴𑀪𑀺𑀜𑁆𑀜𑀸𑀢𑀺 𑀯𑀺𑀓𑀧𑁆𑀧𑁂𑀦 𑀴𑀓𑀸𑀭𑀸𑀕𑀫𑀧𑀓𑁆𑀔𑁂 𑀭𑀽𑀧𑀁.

𑀇𑀲𑁆𑀲 𑀅𑀢𑁆𑀢𑀁 𑀦𑀺𑀧𑀸𑀢𑀦𑀸, 𑀤𑀓𑀸𑀭𑁄 𑀧𑀦 ‘‘𑀫𑀬𑀤𑀸 𑀲𑀭𑁂’’𑀢𑀺 (𑁧-𑁪𑁪), 𑀧𑀤𑀦𑁆𑀢𑀭𑁂𑀦𑀸𑀢𑀺𑀆𑀤𑀻𑀢𑀺 𑀇𑀫𑀺𑀦𑀸 𑀅𑀜𑁆𑀜𑁂𑀦 𑀧𑀤𑁂𑀦, 𑀲𑀸𑀥𑀽𑀦𑀺 𑀪𑀯𑀦𑁆𑀢𑀻𑀢𑀺 𑀯𑀼𑀢𑁆𑀢𑀺 𑀧𑀸𑀞𑀲𑁆𑀲 𑀅𑀢𑁆𑀣𑀁 𑀯𑀢𑁆𑀢𑀼𑀁 ‘𑀲𑀸𑀥𑀽𑀦𑀺 𑀪𑀯𑀦𑁆𑀢𑀻𑀢𑀺 𑀦𑀺𑀧𑀸𑀢𑀦𑀢𑁄’𑀢𑀺 𑀆𑀳, 𑀢𑀢𑁆𑀣 𑀓𑀸𑀭𑀡𑀫𑀸𑀳-‘𑀬’𑀫𑀺𑀘𑁆𑀘𑀸𑀤𑀺, 𑀅𑀧𑁆𑀧𑀢𑁆𑀢𑀲𑁆𑀲 𑀧𑀸𑀧𑀦𑀫𑁆𑀧𑀢𑁆𑀢𑀲𑁆𑀲 𑀧𑀝𑀺𑀲𑁂𑀥𑁄 𑀘 𑀦𑀺𑀧𑀸𑀢𑀦𑀁, 𑀢𑁂𑀲𑀁 𑀇𑀥 𑀧𑀸𑀞𑀸𑀢𑀺 𑀢𑁂𑀲𑀁 𑀢𑀣𑀸 𑀇𑀘𑁆𑀙𑀦𑁆𑀢𑀸𑀦𑀁 𑀇𑀥𑀸𑀢𑀺 𑀦𑀺𑀧𑀸𑀢𑀲𑁆𑀲 𑀇𑀫𑀲𑁆𑀫𑀺𑀁 𑀢𑀤𑀫𑀺𑀦𑀸𑀤𑀺𑀲𑀼𑀢𑁆𑀢𑁂 𑀧𑀸𑀞𑀸, 𑀉𑀤𑁆𑀥𑀲𑁆𑀲 𑀉𑀤𑀽𑀢𑀺 𑀉𑀤𑁆𑀥𑀁 𑀔𑀫𑀲𑁆𑀲𑀸𑀢𑀺 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁂 𑀉𑀤𑁆𑀥𑀁𑀔 𑀇𑀢𑀺 𑀞𑀺𑀢𑁂 𑀉𑀤𑁆𑀥𑀁𑀲𑀤𑁆𑀤𑀲𑁆𑀲 𑀉𑀤𑀼𑀆𑀤𑁂𑀲𑁄, 𑀅𑀲-𑀪𑁄𑀚𑀦𑁂 𑀇𑀘𑁆𑀘𑀲𑁆𑀫𑀸 ‘‘𑀓𑁆𑀯𑀘𑀡’ 𑀇𑀢𑀺 (𑁫-𑁪𑁧) 𑀲𑀼𑀢𑁆𑀢𑁂𑀦 𑀅𑀡𑁆𑀧𑀘𑁆𑀘𑀬𑁂 𑀅𑀲𑀲𑀤𑁆𑀤𑁄 𑀦𑀺𑀧𑁆𑀨𑀚𑁆𑀚𑀢𑀻𑀢𑀺 𑀆𑀳-‘𑀧𑀺𑀲𑀺𑀢𑀫𑀲𑀦𑀸’𑀢𑀺 ‘‘𑀓𑁆𑀯𑀘𑀡’’ 𑀇𑀢𑀺 𑀫𑀳𑀺𑀬𑀁 ¶ 𑀭𑀯𑀢𑀻𑀢𑀺 𑀞𑀺𑀢𑁂 𑀇𑀫𑀺𑀦𑀸𑀯 𑀕𑀡𑀦𑀺𑀧𑀸𑀢𑀦𑁂𑀦 𑀲𑀫𑀸𑀲𑁂 𑀓𑀢𑁂 𑀫𑀬𑀽𑀭𑀲𑀤𑁆𑀤𑁄 𑀦𑀺𑀧𑁆𑀨𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘𑀫𑀳𑀺𑀲𑀤𑁆𑀤𑀲𑁆𑀲𑁂’𑀘𑁆𑀘𑀸𑀤𑀺, 𑀅𑀲𑁆𑀲 𑀢𑀤𑀫𑀺𑀦𑀸𑀤𑀺𑀕𑀡𑀲𑁆𑀲 𑀆𑀕𑀢𑀺𑀕𑀡𑀢𑁆𑀢𑀸 𑀏𑀯𑀫𑀜𑁆𑀜𑁂𑀧𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀯𑀼𑀢𑁆𑀢𑀦𑁆𑀢𑀺 𑀧𑀸𑀞𑀲𑁂𑀲𑁄. 𑀤𑀻𑀖𑀦𑀺𑀓𑀸𑀬𑀸𑀤𑀻𑀲𑀼 𑀧𑀜𑁆𑀘𑀲𑀼 𑀦𑀺𑀓𑀸𑀬𑁂𑀲𑀽𑀢𑀺𑁋

‘‘𑀤𑀻𑀖𑀫𑀚𑁆𑀛𑀺𑀫𑀲𑀁𑀬𑀼𑀢𑁆𑀢, 𑀅𑀗𑁆𑀕𑀼𑀢𑁆𑀢𑀭𑀺𑀓𑀔𑀼𑀤𑁆𑀤𑀓𑀸;

𑀦𑀺𑀓𑀸𑀬𑀸 (𑀧𑀜𑁆𑀘) 𑀕𑀫𑁆𑀪𑀻𑀭𑀸, 𑀥𑀫𑁆𑀫𑀢𑁄 𑀅𑀢𑁆𑀣𑀢𑁄𑀘𑀺𑀫𑁂’’𑀢𑀺.

𑀯𑀼𑀢𑁆𑀢𑁂𑀲𑀼 𑀤𑀻𑀖𑀸𑀕𑀫𑀸𑀤𑀻𑀲𑀼 𑀧𑀜𑁆𑀘𑀲𑀼 𑀦𑀺𑀓𑀸𑀬𑁂𑀲𑀼, 𑀜𑀸𑀢𑀩𑁆𑀩𑀸𑀢𑀺 𑀯𑀡𑁆𑀡𑀸 𑀕𑀫𑀸𑀤𑀺𑀤𑁆𑀯𑀸𑀭𑁂𑀦 𑀚𑀸𑀦𑀺𑀢𑀩𑁆𑀩𑀸, 𑀧𑀜𑁆𑀘𑀯𑀺𑀥𑀁 𑀧𑀜𑁆𑀘𑀧𑁆𑀧𑀓𑀸𑀭𑀁 𑀦𑀺𑀭𑀼𑀢𑁆𑀢𑀫𑀼𑀘𑁆𑀘𑀢𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀦𑀺𑀩𑁆𑀩𑀘𑀦𑀁 𑀦𑀺𑀭𑀼𑀢𑁆𑀢𑀁, 𑀦𑀧𑀼𑀁𑀲𑀓𑁂 𑀪𑀸𑀯𑁂 𑀢𑁆𑀢𑁄, 𑀅𑀢𑁆𑀣𑀓𑀣𑀦𑀯𑀸𑀓𑁆𑀬 𑀧𑀼𑀩𑁆𑀩𑀓𑀫𑀼𑀘𑁆𑀘𑀸𑀭𑀡𑀫𑀺𑀘𑁆𑀘𑀢𑁆𑀣𑁄, 𑀢𑀤𑀪𑀺𑀥𑀸𑀬𑀺 𑀲𑀢𑁆𑀣𑀫𑀧𑁆𑀬𑀪𑀺𑀥𑀸𑀦𑁂-𑀪𑀺𑀥𑁂𑀬𑁆𑀬𑁄 𑀧𑀘𑀸𑀭𑀸 𑀢𑀤𑀢𑁆𑀣𑀢𑀸𑀬 𑀯𑀸 𑀦𑀺𑀭𑀼𑀢𑁆𑀢𑀫𑀼𑀘𑁆𑀘𑀢𑁂, 𑀯𑀼𑀢𑁆𑀢𑀦𑀺𑀭𑀼𑀢𑁆𑀢𑀺 𑀮𑀓𑁆𑀔𑀡𑁂𑀦…𑀧𑁂… 𑀯𑁂𑀤𑀺𑀢𑀩𑁆𑀩𑀸𑀢𑀺 𑀇𑀫𑀺𑀦𑀸 𑀦𑀺𑀭𑀼𑀢𑁆𑀢𑀲𑀢𑁆𑀣𑁂 𑀬𑁂 𑀲𑀤𑁆𑀤𑀸 𑀧𑀝𑀺𑀧𑀤𑀁 𑀦𑀺𑀧𑁆𑀨𑀸𑀤𑀺𑀬𑀦𑁆𑀢𑀺 𑀢𑁂𑀲𑀫𑀺𑀤𑀁 𑀲𑀸𑀫𑀜𑁆𑀜𑁂𑀦 𑀦𑀺𑀧𑁆𑀨𑀸𑀤𑀦𑀦𑁆𑀢𑀺 𑀤𑀻𑀧𑁂𑀢𑀺, 𑀤𑁆𑀯𑀸𑀭𑁂 𑀦𑀺𑀬𑀼𑀢𑁆𑀢𑁄 𑀤𑁄𑀯𑀸𑀭𑀺𑀓𑁄𑀢𑀺 𑀏𑀢𑁆𑀣 𑀡𑀺𑀓𑁂 𑀤𑀓𑀸𑀭𑀯𑀓𑀸𑀭𑀸𑀦𑀁 𑀫𑀚𑁆𑀛𑁂 𑀑𑀓𑀸𑀭𑀸𑀕𑀫𑁄, 𑀳𑀺𑀁𑀲𑀺𑀲𑁆𑀫𑀸𑀢𑀺 ‘𑀳𑀺𑀁𑀲-𑀳𑀺𑀁𑀲𑀸𑀬’ 𑀫𑀺𑀘𑁆𑀘𑀲𑁆𑀫𑀸, 𑀅𑀧𑁆𑀧𑀘𑁆𑀘𑀬𑁂𑀢𑀺 ‘‘𑀲𑀸𑀯𑀓𑀸𑀭𑀓𑁂𑀲𑁆𑀯 𑀖𑀡𑁆𑀖𑀓𑀸’’𑀢𑀺 (𑁫-𑁪𑁪) 𑀅𑀧𑁆𑀧𑀘𑁆𑀘𑀬𑁂, 𑀦𑀺𑀚𑀓𑁄𑀢𑀺 𑀏𑀢𑁆𑀣 𑀚𑀓𑀸𑀭𑀲𑁆𑀲 𑀬𑀓𑀸𑀭𑁂 𑀦𑀺𑀬𑀓𑁄. 𑀅𑀣 𑀯𑀡𑁆𑀡𑀯𑀺𑀓𑀸𑀭𑁄𑀢𑀺 𑀯𑀼𑀢𑁆𑀢𑀢𑁆𑀢𑀸 𑀚𑀯𑀡𑁆𑀡𑀲𑁆𑀲 𑀬𑀸𑀤𑁂𑀲𑁂 𑀦𑀺𑀬𑀓𑀸𑀤𑀬𑁄 𑀢𑀸𑀯 𑀲𑀺𑀚𑁆𑀛𑀦𑁆𑀢𑀼, 𑀲𑀼𑀲𑀸𑀦𑀸𑀤𑀬𑁄 𑀓𑀣𑀁 𑀙𑀯𑀧𑀤𑀸𑀤𑀺𑀯𑀺𑀓𑀸𑀭𑀢𑁆𑀢𑀸 𑀲𑀼𑀲𑀸𑀦𑀸𑀤𑀻𑀦𑀦𑁆𑀢𑀺 𑀆𑀳 ‘𑀧𑀤𑀯𑀺𑀓𑀸𑀭𑁄𑀧𑀺’𑀘𑁆𑀘𑀸𑀤𑀺. 𑀅𑀜𑁆𑀜𑀣𑀸 𑀯𑀡𑁆𑀡𑀲𑀫𑀼𑀤𑀸𑀬𑀸𑀤𑁂𑀲𑀲𑁆𑀲 𑀯𑀺𑀲𑀼𑀁𑀕𑀳𑀡𑁂 𑀙𑀩𑁆𑀩𑀺𑀢𑁄𑀧𑀢𑁆𑀢𑀺𑀬𑀸 ‘𑀧𑀜𑁆𑀘𑀯𑀺𑀥𑀁 𑀦𑀺𑀭𑀼𑀢𑁆𑀢’𑀦𑁆𑀢𑀺 𑀲𑀗𑁆𑀔𑁆𑀬𑀸𑀦𑀺𑀬𑀫𑁄 𑀦 𑀬𑀼𑀚𑁆𑀚𑁂𑀬𑁆𑀬𑀸𑀢𑀺 𑀪𑀸𑀯𑁄. 𑀬𑁄𑀕𑁄 𑀲𑀫𑁆𑀩𑀦𑁆𑀥𑁄, 𑀢𑀣𑀸𑀳𑀺𑀘𑁆𑀘𑀸𑀤𑀺𑀦𑀸 𑀥𑀸𑀢𑀼𑀲𑁆𑀲 𑀅𑀢𑁆𑀣𑀸𑀢𑀺𑀲𑀬𑁂𑀦 𑀬𑁄𑀕𑀫𑁆𑀧𑀸𑀓𑀝𑀻𑀓𑀭𑁄𑀢𑀺, 𑀭𑀯𑀦𑀓𑀺𑀭𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄𑀢𑀺 𑀓𑁂𑀓𑀸𑀬𑀺𑀢𑀸𑀦𑁆𑀬𑀲𑀤𑁆𑀤𑀦𑀓𑀺𑀭𑀺𑀬𑀸𑀪𑀺𑀲𑀫𑁆𑀩𑀦𑁆𑀥𑁄. 𑀫𑀬𑀽𑀭𑁄𑀢𑀺 𑀏𑀢𑁆𑀣 𑀭𑀯𑀢𑀺 𑀫𑀬𑀽𑀭𑀭𑀸𑀯𑁂 𑀏𑀯 𑀯𑀢𑁆𑀢𑀢𑁂, 𑀦 𑀲𑀸𑀫𑀜𑁆𑀜𑁂𑀦 𑀭𑀯𑀦𑀓𑀺𑀭𑀺𑀬𑀸𑀫𑀢𑁆𑀢𑁂𑀢𑀺 𑀪𑀸𑀯𑁄.

𑀯𑀡𑁆𑀡𑀫𑀢𑁆𑀢𑀲𑁆𑀲𑁂 𑀯𑀸𑀢𑀺 𑀯𑀡𑁆𑀡𑀲𑀸𑀫𑀜𑁆𑀜𑀲𑁆𑀲𑁂𑀯, 𑀫𑀢𑁆𑀢𑀲𑀤𑁆𑀤𑁄 𑀏𑀢𑁆𑀣 𑀲𑀸𑀫𑀜𑁆𑀜 𑀯𑀘𑀦𑁄. 𑀬𑀓𑀸𑀭𑀲𑁆𑀲𑀘 𑀘𑀸𑀤𑁂𑀲𑁄𑀢𑀺 𑀲𑀫𑁆𑀩𑀦𑁆𑀥𑁄, 𑀤𑀬𑀓𑀸𑀭𑀸𑀦𑀁 𑀚𑀢𑁆𑀢𑀦𑁆𑀢𑀺𑀲𑁆𑀲 ¶ 𑀇𑀫𑀺𑀦𑀸, 𑀬𑀲𑁆𑀲 ‘‘𑀯𑀕𑁆𑀕𑀮𑀲𑁂𑀳𑀺 𑀢𑁂’’𑀢𑀺 (𑁧-𑁪𑁯) 𑀚𑀢𑁆𑀢𑀁, 𑀅𑀢𑁆𑀢𑀸𑀦𑀫𑀥𑀺𑀓𑀺𑀘𑁆𑀘 𑀧𑀯𑀢𑁆𑀢𑀦𑁆𑀢𑀺 𑀅𑀢𑁆𑀣𑁂 𑀅𑀲𑀗𑁆𑀔𑁆𑀬𑀲𑀫𑀸𑀲𑁄.

𑀬𑀦𑁆𑀢𑀁 𑀲𑀤𑁆𑀤𑀸𑀦𑀁 𑀦𑀺𑀘𑁆𑀘𑀲𑀫𑁆𑀩𑀦𑁆𑀥𑀺𑀢𑁆𑀢𑁂𑀧𑀺 𑀧𑀓𑁆𑀓𑀦𑁆𑀢𑀯𑀺𑀲𑀬𑀢𑁆𑀢𑀸 𑀢𑀁𑀲𑀤𑁆𑀤𑁄 𑀬𑀁𑀲𑀤𑁆𑀤𑀁 𑀦𑀸𑀧𑁂𑀓𑁆𑀔𑀢𑁂𑀢𑁆𑀬𑀸𑀳-‘𑀢𑁂𑀢𑀺 𑀅𑀦𑀦𑁆𑀢𑀭’𑀇𑀘𑁆𑀘𑀸𑀤𑀺, 𑀢𑀁 𑀲𑀤𑁆𑀤𑁄 𑀳𑀺 𑀧𑀓𑁆𑀓𑀦𑁆𑀢 𑀯𑀺𑀲𑀬𑁄 𑀢𑀣𑀸 𑀧𑀲𑀺𑀤𑁆𑀥𑀯𑀺𑀲𑀬𑁄 𑀅𑀦𑀼𑀪𑀽𑀢𑀯𑀺𑀲𑀬𑁄 𑀘 𑀬𑀁𑀲𑀤𑁆𑀤𑀁 𑀦𑀸𑀧𑁂𑀓𑁆𑀔𑀢𑁂, 𑀬𑀣𑀸 𑀘𑁂𑀲𑁄 𑀬𑀁𑀲𑀤𑁆𑀤𑀦𑁆𑀦𑀸 𑀧𑁂𑀓𑁆𑀔𑀢𑁂, 𑀢𑀁 𑀲𑀩𑁆𑀩𑀁 𑀫𑀳𑀸𑀲𑀸𑀫𑀺𑀦𑀸𑀥𑀺𑀓𑀸𑀬𑀁 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑀝𑀻𑀓𑀸𑀬𑀁𑁋

𑀫𑀼𑀦𑀺𑀦𑁆𑀤𑀘𑀦𑁆𑀤𑀲𑀜𑁆𑀚𑀸𑀢, 𑀳𑀸𑀲𑀘𑀦𑁆𑀤𑀦𑀮𑀺𑀫𑁆𑀧𑀺𑀢𑀸;

𑀧𑀮𑁆𑀮𑀯𑀸𑀥𑀯𑀮𑀸𑀢𑀲𑁆𑀲𑁂, 𑀯𑁂𑀓𑁄 𑀦𑀸𑀥𑀭𑀧𑀮𑁆𑀮𑀯𑁄𑀢𑀺 (𑁧𑁨𑁨).

𑀏𑀢𑀺𑀲𑁆𑀲𑀸 𑀕𑀸𑀣𑀸𑀬 𑀅𑀫𑁆𑀳𑁂𑀳𑀺 𑀯𑀺𑀢𑁆𑀣𑀸𑀭𑀺𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑀁, 𑀬𑀣𑀸 𑀭𑀳𑀦𑁆𑀢𑀺 𑀲𑀓𑀫𑁆𑀫𑀸𑀓𑀫𑁆𑀫𑀥𑀸𑀢𑀽𑀦𑀫𑀦𑀼𑀭𑀽𑀧𑀁.

𑀓𑀺𑀜𑁆𑀘𑀸𑀧𑀻𑀤𑀁 [𑀇𑀤𑀁𑀓𑀺𑀜𑁆𑀘𑀸𑀧𑀺 (𑀧𑁄𑀢𑁆𑀣𑀓𑁂)] 𑀯𑀺𑀓𑀧𑁆𑀧𑀦𑀢𑁆𑀣𑀁 𑀓𑀢𑀦𑁆𑀢𑀺 𑀳𑁂𑀝𑁆𑀞𑀺𑀫𑁂𑀦 𑀦𑀺(𑀦𑁆𑀦𑀸𑀦)𑀢𑁆𑀢𑀁 𑀯𑀺𑀜𑁆𑀜𑀸𑀬𑀢𑀺, 𑀢𑀣𑀸𑀧𑀺 𑀇𑀫𑀺𑀦𑀸 𑀯𑀸𑀓𑀸𑀭𑁂𑀦 𑀯𑀺𑀓𑀧𑁆𑀧𑁄𑀯, 𑀳𑁂𑀝𑁆𑀞𑀺𑀫𑁂 𑀧𑀦 𑀓𑁆𑀯𑀘𑀸𑀥𑀺𑀓𑀸𑀭𑀸 𑀳𑀓𑀸𑀭𑀦𑁆𑀢𑀥𑀸𑀢𑀼𑀢𑁄 𑀥𑁆𑀬𑀡𑁆𑀧𑀘𑁆𑀘𑀬𑁂 𑀫𑁂𑀳𑁆𑀬𑀁, 𑀤𑁄𑀳𑁆𑀬𑀁 𑀲𑀺𑀦𑁂𑀳𑁆𑀬𑀁, 𑀮𑁂𑀳𑁆𑀬𑀦𑁆𑀢𑀺𑀧𑀺 𑀪𑀯𑀢𑁆𑀯𑁂𑀯.

𑀯𑀢𑁆𑀢𑀼𑀦𑁄-𑀢𑁆𑀢𑀧𑁆𑀧𑀥𑀸𑀦𑀢𑁆𑀢𑀫𑀢𑁆𑀢𑀯𑀘𑀲𑀻𑀢𑀺 𑀦𑀺𑀬𑀢𑀸𑀯𑀬𑀯𑀯𑀸𑀘𑀺𑀦𑁄 𑀉𑀧𑀸𑀤𑀸𑀦𑀸𑀢𑀺 𑀯𑀼𑀢𑁆𑀢𑀫𑀦𑁂𑀓𑀢𑁆𑀣𑀢𑁆𑀢𑁂𑀧𑁆𑀬𑀸𑀤𑀺𑀲𑀤𑁆𑀤𑀲𑁆𑀲, 𑀆𑀤𑀺𑀬𑀢𑀻𑀢𑁆𑀬𑀸𑀤𑀻𑀢𑀺 𑀓𑀫𑁆𑀫𑀲𑀸 𑀥𑀦𑁄𑀘𑀸𑀬𑀫𑀸𑀤𑀺𑀲𑀤𑁆𑀤𑁄, 𑀲𑁄𑀬𑀫𑀢𑁆𑀣𑁄 𑀲𑀼𑀫𑀗𑁆𑀕𑀮𑀧𑁆𑀧𑀲𑀸𑀤𑀦𑀺𑀬𑀸 𑀔𑀼𑀤𑁆𑀤𑀲𑀺𑀓𑁆𑀔𑀸 𑀝𑀻𑀓𑀸𑀬‘𑀆𑀤𑀺𑀢𑁄 𑀉𑀧𑀲𑀫𑁆𑀧𑀦𑁆𑀦𑀸’𑀢𑀺 𑀏𑀢𑁆𑀣 𑀅𑀫𑁆𑀳𑁂𑀳𑀺 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄, 𑀲𑀁𑀬𑀼𑀚𑁆𑀚𑀢𑀻𑀢𑀺 𑀲𑀁𑀬𑁄𑀕𑁄-𑀏𑀓𑀢𑁆𑀭𑀸𑀯𑀝𑁆𑀞𑀺𑀢𑀩𑁆𑀬𑀜𑁆𑀚𑀦𑀸.

𑀬𑀁𑀯𑀢𑁆𑀢𑀢𑁂𑀢𑀺 𑀯𑀼𑀢𑁆𑀢𑀺𑀯𑀘𑀦𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀅𑀢𑁆𑀣𑀁 𑀯𑀢𑁆𑀢𑀼𑀫𑀸𑀭𑀪𑀢𑁂 ‘𑀲𑀫𑁆𑀪𑀯𑀸𑀧𑁂𑀓𑁆𑀔𑀸𑀬𑁂’𑀘𑁆𑀘𑀸𑀤𑀺, 𑀬𑀁𑀯𑀢𑁆𑀢𑀢𑁂𑀢𑀺 𑀘 𑀲𑀼𑀢𑁆𑀢𑁂 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀕𑀫𑁆𑀫𑀫𑀸𑀦𑀢𑁆𑀣𑀲𑁆𑀲 ¶ 𑀲𑀤𑁆𑀤𑀲𑁆𑀲 𑀧𑀬𑁄𑀕𑀫𑁆𑀧𑀢𑀺 𑀓𑀸𑀫𑀘𑀸𑀭𑁄𑀢𑀺 𑀯𑀼𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀬𑀲𑀤𑁆𑀤𑀲𑁆𑀲𑀸𑀦𑀺𑀬𑀫𑀢𑁆𑀣𑀯𑀼𑀢𑁆𑀢𑀺𑀢𑁆𑀢𑁂𑀧𑀺 𑀧𑀤𑀯𑀸𑀓𑁆𑀬𑀢𑁄 𑀦𑀸𑀜𑁆𑀜𑀁 𑀲𑀫𑁆𑀪𑀯𑀢𑀺 𑀯𑀺𑀘𑁆𑀙𑀸𑀬𑀫𑀸𑀪𑀺𑀓𑁆𑀔𑀜𑁆𑀜𑁂 𑀘 𑀯𑀢𑁆𑀢𑀫𑀸𑀦𑀦𑁆𑀢𑀺 𑀆𑀳 ‘𑀲𑀫𑁆𑀪𑀯𑀸𑀧𑁂𑀓𑁆𑀔𑀸𑀬𑀧𑀤𑀁 𑀯𑀸𑀓𑁆𑀬𑀁𑀯𑀸’𑀢𑀺, 𑀲𑀫𑁆𑀪𑀯𑀢𑀻𑀢𑀺 𑀲𑀫𑁆𑀪𑀯𑁄-𑀧𑀤𑀁 𑀯𑀸𑀓𑁆𑀬𑀁 𑀯𑀸, 𑀢𑀲𑁆𑀫𑀺𑀁 𑀅𑀧𑁂𑀓𑁆𑀔𑀸𑀬 𑀧𑀤𑀁 𑀯𑀸𑀓𑁆𑀬𑀁 𑀯𑀸 𑀯𑀢𑁆𑀢𑀢𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀯𑀢𑁆𑀢𑀢𑁂𑀢𑀺 𑀯𑀺𑀘𑁆𑀙𑀸𑀬𑀫𑀸𑀪𑀺𑀜𑁆𑀜𑁂 𑀘𑀸𑀢𑁆𑀣𑁂 𑀯𑀢𑁆𑀢𑀢𑁂, 𑀦𑀦𑀼 𑀧𑀤𑀲𑁆𑀲 𑀯𑀸𑀓𑁆𑀬𑀲𑁆𑀲 𑀯𑀸 𑀯𑀺𑀲𑀼𑀁𑀬𑁂𑀯 𑀤𑀩𑁆𑀩𑀸𑀤𑀬𑁄 𑀅𑀢𑁆𑀣𑀸, 𑀢𑀁 𑀓𑀣𑀫𑀺𑀤 𑀫𑁂𑀢𑀲𑁆𑀫𑀺𑀁 𑀯𑀢𑁆𑀢𑀼𑀥𑀫𑁆𑀫𑁂 𑀓𑀺𑀭𑀺𑀬𑀸𑀥𑀫𑁆𑀫𑁂 𑀘 𑀯𑀺𑀘𑁆𑀙𑀸𑀪𑀺𑀓𑁆𑀔𑀜𑁆𑀜𑀢𑁆𑀣𑁂 𑀯𑀢𑁆𑀢𑀢𑁂𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬𑀸𑀳-‘𑀯𑀺𑀲𑀬𑀪𑀸𑀯𑁂𑀦𑀸’𑀢𑀺𑀆𑀤𑀺, 𑀯𑀺𑀘𑁆𑀙𑀸𑀬 𑀯𑀢𑁆𑀢𑀼𑀥𑀫𑁆𑀫𑀲𑁆𑀲 𑀓𑀺𑀭𑀺𑀬𑀸𑀥𑀫𑁆𑀫𑀲𑁆𑀲 𑀘𑀸𑀪𑀺𑀓𑁆𑀔𑀜𑁆𑀜𑀲𑁆𑀲 𑀯𑀺𑀲𑀬𑁄 𑀧𑀤𑀁 𑀯𑀸𑀓𑁆𑀬𑀁 𑀯𑀸… 𑀅𑀦𑀜𑁆𑀜𑀢𑁆𑀣𑀯𑀼𑀢𑁆𑀢𑀺𑀯𑀲𑁂𑀦 𑀢𑀢𑁆𑀣𑀧𑁆𑀧𑀯𑀢𑁆𑀢𑀺𑀬𑀸, 𑀢𑀁 𑀯𑀲𑁂𑀦𑀘, 𑀅𑀪𑀺𑀥𑀸𑀬𑀓𑀢𑁆𑀢𑁂𑀦 𑀘𑁂𑀢𑀺 𑀕𑁄𑀘𑀭𑀢𑁆𑀢𑁂𑀦 𑀧𑀓𑀸𑀲𑀓𑀢𑁆𑀢𑁂𑀦 𑀘𑀸𑀢𑀺 𑀅𑀢𑁆𑀣𑁄, 𑀬𑀁𑀯𑀢𑁆𑀢𑀢𑁂𑀢𑀺 𑀅𑀚𑁆𑀛𑀸𑀳𑀝𑀲𑁆𑀲 𑀬𑀦𑁆𑀢𑀺 𑀧𑀞𑀫𑀦𑁆𑀢𑀲𑁆𑀲 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑀁 𑀤𑀲𑁆𑀲𑁂𑀢𑀺 (𑀢𑀲𑁆𑀲𑀸𑀢𑀺) 𑀆𑀤𑀺𑀦𑀸, 𑀇𑀫𑀺𑀦𑀸 𑀇𑀤𑀁 𑀤𑀻𑀧𑁂𑀢𑀺 ‘‘𑀬𑀚𑁆𑀚𑀧𑀺 ‘𑀯𑀺𑀘𑁆𑀙𑀸𑀪𑀺𑀓𑁆𑀔𑀜𑁆𑀜𑁂𑀲𑁆𑀯𑀺’ 𑀢𑁆𑀬𑀢𑁆𑀭 𑀙𑀝𑁆𑀞𑀻𑀦𑁄𑀘𑁆𑀘𑀸𑀭𑀻𑀬𑀢𑁂, 𑀢𑀣𑀸𑀧𑀺 𑀙𑀝𑁆𑀞𑀻𑀧𑀲𑀺𑀤𑁆𑀥𑀺 𑀳𑁄𑀢𑁂𑀯, 𑀓𑀣𑀁 𑀤𑁆𑀯𑁂 𑀇𑀘𑁆𑀘𑀸𑀤𑁂𑀲𑀦𑀺𑀤𑁆𑀤𑁂𑀲𑀸 𑀆𑀤𑁂𑀲𑁄 𑀘 𑀲𑀫𑁆𑀩𑀦𑁆𑀥𑀻𑀦𑀫𑀧𑁂𑀓𑁆𑀔𑀢𑁂, ‘𑀯𑀺𑀘𑁆𑀙𑀸𑀪𑀺𑀓𑁆𑀔𑀜𑁆𑀜𑁂𑀲𑀽’𑀢𑀺 𑀘𑀸𑀢𑁆𑀣𑀦𑀺𑀤𑁆𑀤𑁂𑀲𑁄, 𑀦 𑀘𑀸𑀢𑁆𑀣𑀲𑁆𑀲𑀸𑀤𑁂𑀲𑁂𑀦 𑀲𑀫𑁆𑀩𑀦𑁆𑀥𑁄 𑀉𑀧𑀧𑀚𑁆𑀚𑀢𑁂, 𑀢𑀲𑁆𑀫𑀸 𑀯𑀺𑀘𑁆𑀙𑀸𑀪𑀺𑀓𑁆𑀔𑀜𑁆𑀜𑁂𑀲𑀼 𑀬𑀁 𑀧𑀤𑀁 𑀯𑀸𑀓𑁆𑀬𑀁 𑀯𑀸 𑀯𑀢𑁆𑀢𑀢𑁂 𑀢𑀲𑁆𑀲 𑀤𑁆𑀯𑁂 𑀪𑀯𑀦𑁆𑀢𑀺𑀘𑁆𑀘𑁂𑀯𑀁 𑀙𑀝𑁆𑀞𑀻𑀬𑀢𑁆𑀣𑁄 𑀲𑀓𑁆𑀓𑀸 𑀯𑀢𑁆𑀢𑀼’’𑀦𑁆𑀢𑀺, 𑀤𑁆𑀯𑁂 𑀭𑀽𑀧𑀸𑀦𑀺 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀲𑀤𑁆𑀤𑀭𑀽𑀧𑁂 𑀲𑀗𑁆𑀔𑁆𑀬𑀬𑁆𑀬𑁂𑀢𑀺 𑀤𑀼𑀢𑀺𑀬𑀸 𑀩𑀳𑀼𑀯𑀘𑀦𑀦𑁆𑀢𑀁 𑀧𑀝𑀺𑀧𑀸𑀤𑀬𑀫𑀸𑀦𑁄𑀢𑀺 𑀏𑀢𑁆𑀣 𑀧𑀝𑀺𑀧𑀸𑀤𑀦𑀓𑀺𑀭𑀺𑀬𑀸𑀬 𑀲𑀫𑁆𑀩𑀦𑁆𑀥𑁂𑀦𑁄𑀧𑀤𑀺𑀝𑁆𑀞𑀁, ‘‘𑀯𑀸𑀓𑁆𑀬𑀦𑁆𑀢𑀭𑀝𑁆𑀞𑁄𑀧𑀺 𑀲𑀤𑁆𑀤𑁄 𑀢𑀤𑀜𑁆𑀜𑀲𑁆𑀫𑀺𑀫𑁆𑀧𑀺 𑀲𑀫𑁆𑀩𑀦𑁆𑀥𑀫𑀼𑀧𑀬𑀸𑀢𑀻’’𑀢𑀺 𑀤𑁆𑀯𑀺𑀲𑀤𑁆𑀤𑁄𑀢𑀺 𑀇𑀤𑀁 𑀉𑀧𑀭𑀺 𑀯𑀸𑀓𑁆𑀬𑀤𑁆𑀯𑀬𑁂𑀧𑁆𑀬𑀼𑀧𑀬𑀼𑀚𑁆𑀚𑀢𑀺 ‘𑀤𑁆𑀯𑀺𑀲𑀤𑁆𑀤𑁄 𑀯𑀼𑀢𑁆𑀢𑁄, 𑀤𑁆𑀯𑀺𑀲𑀤𑁆𑀤𑁄 𑀦 𑀲𑀭𑀽𑀧𑀧𑁆𑀧𑀥𑀸𑀦𑁄’𑀢𑀺, 𑀅𑀣 𑀲𑀭𑀽𑀧𑀧𑁆𑀧𑀥𑀸𑀦𑁄 𑀓𑀲𑁆𑀫𑀸 𑀦 𑀯𑀼𑀢𑁆𑀢𑁄𑀢𑀺 𑀆𑀳-‘𑀩𑀳𑀼𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑀸’𑀢𑀺, 𑀅𑀣 𑀤𑁆𑀯𑁂𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀢𑁆𑀢𑀸 𑀧𑀤𑀯𑀸𑀓𑁆𑀬𑀸𑀦𑀁 𑀞𑀸𑀦𑁂 𑀤𑁆𑀯𑀺𑀩𑁆𑀩𑀘𑀦𑀁 𑀯𑀸 𑀲𑀺𑀬𑀸, 𑀢𑀸𑀦𑁂𑀯𑀸 𑀯𑀢𑁆𑀢𑀦𑁆𑀢𑀻𑀢𑀺 𑀤𑁆𑀯𑀺𑀧𑁆𑀧𑀬𑁄𑀕𑁄 𑀯𑀸, 𑀢𑀣𑀸 𑀲𑀢𑀺 ‘𑀬𑀁𑀯𑀢𑁆𑀢𑀢𑁂 𑀢𑀲𑁆𑀲𑀸’𑀢𑀺 𑀓𑀲𑁆𑀫𑀸 𑀧𑀞𑀫𑀫𑁂𑀯 𑀦𑀺𑀲𑁆𑀲𑀸𑀬 𑀯𑀼𑀢𑁆𑀢𑀺𑀬𑀁 𑀯𑀺𑀯𑀭𑀡𑀁 𑀓𑀢𑀦𑁆𑀢𑀺 𑀆𑀳-‘𑀏𑀯𑀜𑁆𑀘𑀸’𑀢𑀺𑀆𑀤𑀺, 𑀇𑀤𑀸𑀦𑀺 𑀤𑁆𑀯𑀺𑀧𑁆𑀧𑀬𑁄𑀕𑀧𑀓𑁆𑀔𑀲𑁆𑀲 𑀲𑀤𑁄𑀲𑀢𑁆𑀢𑀸 𑀅𑀕𑀳𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀫𑀸𑀳-‘𑀬𑀤𑀸𑀢𑁆𑀯𑀺’ 𑀢𑁆𑀬𑀸𑀤𑀺, 𑀢𑀼𑀲𑀤𑁆𑀤𑁄 𑀧𑀼𑀩𑁆𑀩𑀲𑁆𑀫𑀸 𑀧𑀓𑁆𑀔𑀸 𑀯𑀺𑀲𑁂𑀲𑀲𑁆𑀲 𑀧𑀤𑀲𑁆𑀲𑀓𑁄 [𑀯𑀺𑀲𑁂𑀲𑀦𑀢𑁆𑀣𑁄 (𑀧𑁄𑀢𑁆𑀣𑀓𑁂)], 𑀢𑀢𑁆𑀣 𑀳𑀺 𑀤𑁆𑀯𑁂 [𑀤𑁆𑀯𑁂𑀭𑀽𑀧 (𑀧𑁄𑀢𑁆𑀣𑀓𑁂)] 𑀲𑀤𑁆𑀤𑀭𑀽𑀧𑀸𑀦𑁆𑀬𑀸𑀤𑀺𑀲𑀻𑀬𑀦𑁆𑀢𑁂 ¶ , 𑀇𑀳 𑀢𑀼 𑀲𑁄𑀯 𑀲𑀤𑁆𑀤𑁄 𑀤𑁆𑀯𑀺𑀭𑀸𑀯𑀢𑁆𑀢𑀢𑁂, 𑀆𑀯𑀼𑀢𑁆𑀢𑀻 𑀲𑀗𑁆𑀔𑁆𑀬𑁂𑀬𑁆𑀬𑀸𑀢𑀺 𑀏𑀯𑀁 𑀫𑀜𑁆𑀜𑀢𑁂 ‘‘𑀤𑁆𑀯𑀺𑀲𑀤𑁆𑀤𑁄-𑀬𑀁 ‘‘𑀆𑀤𑀲𑀳𑀺 𑀲𑀗𑁆𑀔𑁆𑀬𑀸 𑀲𑀗𑁆𑀔𑁆𑀬𑁂𑀬𑁆𑀬𑁂 𑀯𑀢𑁆𑀢𑀦𑁆𑀢𑁂’’𑀢𑀺 𑀯𑀘𑀦𑀢𑁄 𑀲𑀗𑁆𑀔𑁆𑀬𑁂𑀬𑁆𑀬𑀯𑀘𑀦𑁄, 𑀢𑀲𑁆𑀫𑁂𑀳 𑀲𑀗𑁆𑀔𑁆𑀬𑁂𑀬𑁆𑀬𑀁 𑀲𑀤𑁆𑀤𑀭𑀽𑀧𑀁 𑀯𑀸 𑀲𑀺𑀬𑀸 𑀆𑀯𑀼𑀢𑁆𑀢𑀺 𑀯𑀸, 𑀇𑀘𑁆𑀘𑀧𑀺 𑀦𑀺𑀤𑁆𑀤𑁂𑀲𑁄 𑀢𑀤𑀼𑀪𑀬𑀫𑀧𑁂𑀓𑁆𑀔𑀺𑀬 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀦 𑀯𑀸 𑀲𑀺𑀬𑀸 𑀇𑀢𑁆𑀣𑀺𑀮𑀺𑀗𑁆𑀕𑁂𑀦 𑀯𑀸, 𑀢𑀢𑁆𑀣 𑀬𑀤𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀦 𑀦𑀺𑀤𑁆𑀤𑁂𑀲𑁄, 𑀢𑀤𑀸 𑀲𑀤𑁆𑀤𑀭𑀽𑀧𑀸𑀦𑀺 𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀪𑀯𑀦𑁆𑀢𑀺, 𑀬𑀤𑀸 𑀢𑀼 𑀇𑀢𑁆𑀣𑀺𑀮𑀺𑀗𑁆𑀕𑁂𑀦, 𑀢𑀤𑀸 𑀲𑀤𑁆𑀤𑀲𑁆𑀲𑀸𑀯𑀼𑀢𑁆𑀢𑀻 𑀉𑀘𑁆𑀘𑀸𑀭𑀡𑀮𑀓𑁆𑀔𑀡𑀸 𑀓𑀺𑀭𑀺𑀬𑀸 𑀲𑀗𑁆𑀔𑁆𑀬𑁂𑀬𑀸 𑀪𑀯𑀦𑁆𑀢𑀺, 𑀢𑀢𑁄 𑀘𑁂𑀢𑁆𑀣 𑀆𑀯𑀼𑀢𑁆𑀢𑀻𑀅𑀧𑀺 𑀲𑀗𑁆𑀔𑁆𑀬𑁂𑀬𑀸 𑀳𑁄𑀦𑁆𑀢𑀻’’𑀢𑀺, 𑀢𑀤𑀸 𑀤𑁆𑀯𑀺𑀧𑁆𑀧𑀬𑁄𑀕𑁄 𑀤𑁆𑀯𑀺𑀩𑁆𑀩𑀯𑀘𑀦𑀦𑁆𑀢𑀺 𑀏𑀲 𑀧𑀓𑁆𑀔𑁄𑀢𑀺 𑀅𑀬𑀫𑁂𑀢𑁆𑀣 𑀪𑀸𑀯𑁄’’ 𑀬𑀤𑀸 𑀤𑁆𑀯𑁂 𑀆𑀯𑀼𑀢𑁆𑀢𑀺𑀬𑁄 𑀯𑀺𑀥𑀻𑀬𑀦𑁆𑀢𑁂 𑀢𑀤𑀸 𑀤𑁆𑀯𑀺𑀧𑁆𑀧𑀬𑁄𑀕𑁄 𑀤𑁆𑀯𑀺𑀩𑁆𑀩𑀘𑀦𑀦𑁆𑀢𑁂 𑀲𑁄𑀧𑁂𑀓𑁆𑀔𑁄, (𑀅𑀢𑁆𑀭 𑀞𑀸𑀦𑁆𑀬𑀸𑀤𑁂𑀲𑀪𑀸𑀯𑁄 𑀦𑀢𑁆𑀣𑀺) [𑀦𑀢𑀼𑀝𑁆𑀞𑀸𑀦𑁂 𑀤𑁆𑀯𑀺𑀩𑁆𑀩𑀘𑀦𑀧𑀓𑁆𑀔𑁄 (𑀧𑁄𑀢𑁆𑀣𑀓𑁂)] 𑀆𑀯𑀼𑀢𑁆𑀢𑀺 𑀳𑀺 𑀓𑀺𑀭𑀺𑀬𑀸, 𑀢𑀲𑁆𑀲𑀸 𑀘𑁂𑀳 𑀲𑀤𑁆𑀤𑁄 𑀲𑀸𑀥𑀦𑀁, 𑀦 𑀘 𑀓𑀺𑀭𑀺𑀬𑀸𑀬 𑀲𑀸𑀥𑀦𑀲𑁆𑀲 𑀘 𑀞𑀸𑀦𑁆𑀬𑀸𑀤𑁂𑀲𑀪𑀸𑀯𑁄 𑀉𑀧𑀧𑀚𑁆𑀚𑀢𑁂, 𑀢𑀲𑁆𑀫𑀸 𑀬𑀤𑀸𑀯𑀼𑀢𑁆𑀢𑀻 𑀯𑀺𑀥𑀻𑀬𑀦𑁆𑀢𑁂, 𑀢𑀤𑀸 𑀤𑀺𑀧𑁆𑀧𑀬𑁄𑀕𑁄 𑀤𑁆𑀯𑀺𑀩𑁆𑀩𑀘𑀦𑀦𑁆𑀢𑁂-𑀲𑁄 𑀧𑀓𑁆𑀔𑁄 𑀪𑀯𑀢𑀻’’𑀢𑀺, 𑀅𑀬𑀫𑁆𑀧𑀺 𑀧𑀓𑁆𑀔𑁄 𑀧𑀸𑀡𑀺𑀦𑀻𑀬𑁂𑀳𑀺 𑀧𑀭𑀺𑀕𑁆𑀕𑀳𑀻𑀢𑁄, 𑀢𑀤𑀬𑀼𑀢𑁆𑀢𑀁 𑀤𑁄𑀲𑀤𑀼𑀝𑁆𑀞𑀢𑁆𑀢𑀸𑀢𑀺 𑀲𑀦𑁆𑀤𑀲𑁆𑀲𑀬𑀫𑀸𑀳-‘𑀲𑁄 𑀧𑀦𑁂’𑀢𑁆𑀬𑀸𑀤𑀺, 𑀢𑁂 𑀳𑀺 𑀤𑀼𑀢𑀺𑀬𑀫𑁆𑀧𑀺 𑀧𑀓𑁆𑀔𑀫𑀩𑁆𑀪𑀼𑀧𑀕𑀫𑁆𑀫 𑀉𑀧𑀘𑀸𑀭𑀫𑀢𑁆𑀢𑀢𑁄 𑀪𑁂𑀤𑁄, 𑀯𑀢𑁆𑀣𑀼𑀢𑁄𑀢𑁆𑀯𑀪𑁂𑀤𑁄 𑀯𑀸𑀢𑀺 𑀧𑁄𑀦𑁄𑀧𑀼𑀜𑁆𑀜𑁂𑀦 𑀢𑀁 𑀲𑀸𑀥𑁂𑀦𑁆𑀢𑀺. 𑀓𑀣𑀫𑁆𑀧𑀦 𑀲𑀤𑁄𑀲𑀢𑁆𑀢𑀁 𑀬𑁂𑀦𑀸𑀬𑀁 𑀦 𑀕𑀳𑀺𑀢𑁄𑀢𑁆𑀬𑀸𑀳- ‘𑀢𑀣𑀸𑀳𑀺’𑀘𑁆𑀘𑀸𑀤𑀺, 𑀡𑁆𑀬𑁄 𑀦𑀲𑀺𑀬𑀸𑀢𑀺 ‘‘𑀢𑀲𑁆𑀲 𑀪𑀸𑀯𑀓𑀫𑁆𑀫𑁂𑀲𑀼 𑀢𑁆𑀢 𑀢𑀸 𑀢𑁆𑀢𑀦 𑀡𑁆𑀬 𑀡𑁂𑀬𑁆𑀬 𑀡𑀺𑀬 𑀡𑀺𑀬𑀸’’𑀢𑀺 (𑁪-𑁫𑁯) 𑀪𑀸𑀯𑁂 𑀯𑀺𑀥𑀻𑀬𑀫𑀸𑀦𑁄 𑀡𑁆𑀬𑁄 𑀤𑁆𑀯𑀺𑀧𑁆𑀧𑀬𑁄𑀕𑀧𑀓𑁆𑀔𑁂 𑀲𑀤𑁆𑀤𑀪𑁂𑀤𑀲𑀩𑁆𑀪𑀸𑀯𑀸 𑀧𑀼𑀦 𑀧𑀼𑀦𑁂𑀢𑀺 𑀲𑀫𑀼𑀤𑀸𑀬𑀲𑀪𑀸𑀯𑀢𑁄 𑀧𑀼𑀦𑀧𑀼𑀦 𑀪𑀸𑀯𑁄𑀢𑀺 𑀅𑀢𑁆𑀣𑁂 𑀧𑀼𑀦𑀧𑀼𑀦 𑀲𑀫𑀼𑀤𑀸𑀬𑀢𑁄 𑀦 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄, 𑀦 𑀓𑁂𑀯𑀮𑀁 𑀡𑁆𑀬𑁄𑀯, 𑀅𑀣 𑀔𑁄 𑀏𑀓𑀧𑀤𑀦𑁆𑀢𑁄𑀕𑀥𑀸𑀦𑀁 𑀲𑀭𑀸𑀦𑀁 𑀲𑀭𑀸𑀦𑀫𑀸𑀤𑀺𑀪𑀽𑀢𑀲𑁆𑀲𑀼𑀓𑀸𑀭𑀲𑁆𑀲 𑀪𑀯𑀦𑁆𑀢𑁄 𑀑𑀓𑀸𑀭𑁄𑀧𑀺 ‘‘𑀲𑀭𑀸𑀦𑀫𑀸𑀤𑀺𑀲𑁆𑀲𑀸 𑀬𑀼𑀯𑀡𑁆𑀡𑀲𑁆𑀲𑀸 𑀏𑀑 𑀡𑀸𑀦𑀼𑀩𑀦𑁆𑀥𑁂’’𑀢𑀺 (𑁪-𑁧𑁨𑁪) 𑀦 𑀲𑀺𑀬𑀸, ‘‘𑀫𑀦𑀸𑀤𑁆𑀬𑀸𑀧𑀸𑀤𑀻𑀦𑀫𑁄𑀫𑀬𑁂 𑀘 ‘‘𑀇𑀢𑀺 (𑁩-𑁫𑁯) 𑀑𑀓𑀸𑀭𑁄 𑀧𑀦 𑀧𑀓𑁆𑀔𑀤𑁆𑀯𑀬𑁂𑀧𑀺 𑀳𑁄𑀢𑁂𑀯… 𑀉𑀢𑁆𑀢𑀭𑀧𑀤𑀲𑁆𑀲 𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸, 𑀧𑀼𑀩𑁆𑀩𑀧𑀓𑁆𑀔𑁂𑀧𑀺 𑀳𑀺 𑀤𑁆𑀯𑁂 𑀲𑀤𑁆𑀤𑀭𑀽𑀧𑀸𑀦𑁆𑀬𑁂𑀯𑀸𑀤𑀺𑀲𑀻𑀬𑀦𑁆𑀢𑁂𑀢𑀺 𑀳𑁄𑀢𑁂𑀯 𑀧𑀤 𑀪𑁂𑀤𑁄, 𑀯𑀓𑁆𑀔𑀢𑀺 𑀳𑀺 ‘𑀲𑀢𑀻𑀧𑀺 𑀅𑀢𑁆𑀢𑀕𑀢𑁂 𑀪𑁂𑀤𑁂’𑀢𑀺. 𑀦𑀦𑀼 𑀆𑀯𑀼𑀢𑁆𑀢𑀺𑀥𑀫𑁆𑀫𑀪𑁂𑀤 𑀲𑀤𑁆𑀤𑀲𑁆𑀲𑀼𑀧𑀘𑀭𑀺𑀢𑁄 𑀪𑁂𑀤𑁄, 𑀲𑀭𑀽𑀧𑀢𑁄 𑀢𑁆𑀯𑀪𑁂𑀤𑁄𑀯, 𑀅𑀜𑁆𑀜𑀣𑀸 𑀆𑀯𑀼𑀢𑁆𑀢𑀺𑀬𑁂𑀯 ¶ 𑀦 𑀲𑀺𑀬𑀸, 𑀏𑀓𑀲𑁆𑀲 𑀳𑀺 𑀯𑀢𑁆𑀣𑀼𑀦𑁄 𑀆𑀯𑀼𑀢𑁆𑀢𑀺 𑀳𑁄𑀢𑀺𑀘𑁆𑀘𑀸𑀳‘𑀦𑀸𑀦𑁆𑀢𑀭𑁂𑀦𑁂’𑀘𑁆𑀘𑀸𑀤𑀺, 𑀅𑀜𑁆𑀜𑀣𑁂𑀢𑀺 𑀉𑀧𑀘𑀭𑀺𑀢𑁄 𑀪𑁂𑀤𑁄 𑀦 𑀲𑀪𑀸𑀯𑀢𑁄𑀢𑀺 𑀘𑁂, 𑀓𑀸𑀭𑀺𑀬𑀫𑁆𑀪𑀯𑀢𑀻𑀢𑀺 𑀏𑀯𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀲𑀪𑀸𑀯𑀢𑁄 𑀢𑁆𑀯𑀪𑁂𑀤𑁄 𑀯𑀸𑀢𑀺 𑀉𑀧𑀘𑀸𑀭𑀸𑀪𑀸𑀯𑁂𑀦 𑀯𑀢𑁆𑀣𑀼𑀢𑁄 𑀯𑀺𑀚𑁆𑀚𑀫𑀸𑀦𑀪𑁂𑀤𑀫𑀯𑀥𑀸𑀭𑀬𑀢𑀺, 𑀅𑀜𑁆𑀜𑀣𑀸𑀢𑀺 𑀬𑀤𑀺 𑀪𑁂𑀤𑁄 𑀲𑀺𑀬𑀸, 𑀆𑀯𑀼𑀢𑁆𑀢𑀺𑀬𑁂𑀯 𑀦 𑀲𑀺𑀬𑀸𑀢𑀺 𑀏𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 ‘‘𑀬𑀤𑀺 𑀲𑀪𑀸𑀯𑀢𑁄𑀯 𑀪𑁂𑀤𑁄 𑀪𑀺𑀦𑁆𑀦𑀲𑁆𑀲 𑀧𑀦 𑀓𑀣𑀫𑀸𑀯𑀼𑀢𑁆𑀢𑀺 𑀲𑀺𑀬𑀸’’𑀢𑀺, 𑀞𑀸𑀦𑀺𑀲𑀤𑀺𑀲𑀢𑁆𑀢𑀸𑀢𑀺 ‘‘𑀞𑀸𑀦𑀻𑀯𑀺𑀬𑀸𑀤𑁂𑀲𑁄’’𑀢𑀺 𑀧𑀭𑀺𑀪𑀸𑀲𑀫𑀼𑀧𑀮𑀓𑁆𑀔𑁂𑀢𑀺.

𑀓𑀺𑀭𑀺𑀬𑀸𑀬𑀸𑀢𑀺𑀆𑀤𑀻𑀲𑀼 𑀲𑀳𑀢𑁆𑀣𑁂 𑀢𑀢𑀺𑀬𑀸… 𑀓𑀺𑀭𑀺𑀬𑀸𑀤𑀻𑀳𑀺 𑀤𑀩𑁆𑀩𑀸𑀤𑁆𑀬𑀢𑁆𑀣𑀸𑀦𑀁 𑀯𑀢𑁆𑀢𑀼 [𑀓𑀢𑁆𑀢𑀼] 𑀩𑁆𑀬𑀸𑀧𑀦𑀺𑀘𑁆𑀙𑀸𑀧𑀯𑀢𑁆𑀢𑀺𑀢𑁄, 𑀤𑁂𑀲𑀸𑀤𑀻𑀢𑀺 ( ) [(𑀳𑀺) (𑀧𑁄𑀢𑁆𑀣𑀓𑁂)] 𑀆𑀤𑀺𑀲𑀤𑁆𑀤𑁂𑀦 𑀓𑀸𑀮𑀸𑀯𑀢𑁆𑀣𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀦𑀸𑀦𑀸𑀓𑀸𑀭𑀬𑀼𑀢𑁆𑀢𑀫𑁂𑀯 𑀪𑀺𑀦𑁆𑀦𑀁 𑀦𑀸𑀫 𑀳𑁄𑀢𑀻𑀢𑀺 𑀆𑀳-‘𑀅𑀦𑁂𑀓𑀧𑁆𑀧𑀓𑀸𑀭𑀬𑀼𑀢𑁆𑀢𑁂’𑀢𑀺, 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑀢𑁄 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀢𑁂𑀦𑀸𑀢𑀺 𑀬𑁂𑀦 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁂𑀦 𑀲𑀓𑀺𑀁 𑀩𑁆𑀬𑀸𑀧𑀦𑀺𑀘𑁆𑀙𑀸 𑀚𑁄𑀢𑀻𑀬𑀢𑀺 𑀢𑁂𑀦 𑀓𑀭𑀡𑀪𑀽𑀢𑁂𑀦 𑀳𑁂𑀢𑀼𑀪𑀽𑀢𑁂𑀦 𑀯𑀸, 𑀓𑀫𑁂𑀦 𑀩𑁆𑀬𑀸𑀧𑀺𑀢𑀼𑀫𑀺𑀘𑁆𑀙𑀸𑀬𑀁 𑀚𑀸𑀢𑀺𑀆𑀤𑀻𑀦𑀜𑁆𑀘 𑀩𑁆𑀬𑀸𑀧𑀺𑀢𑀼𑀫𑀺𑀘𑁆𑀙𑀸𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀢𑀢𑁆𑀣 𑀅𑀬𑀜𑁆𑀘 𑀕𑀸𑀫𑁄 𑀭𑀫𑀡𑀻𑀬𑁄 𑀅𑀬𑀜𑁆𑀘 𑀕𑀸𑀫𑁄 𑀭𑀫𑀡𑀻𑀬𑁄𑀢𑀺 𑀓𑀫𑁂𑀦 𑀩𑁆𑀬𑀸𑀧𑀺𑀢𑀼𑀫𑀺𑀘𑁆𑀙𑀸, 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀭𑀫𑀡𑀻𑀬𑀕𑀼𑀡𑁂𑀦 𑀕𑀸𑀫𑀤𑀩𑁆𑀩𑀬𑁄𑀕𑁄 𑀅𑀢𑁆𑀣𑀺, 𑀢𑀣𑀸𑀧𑀺 𑀕𑀸𑀫𑀸𑀦𑀁 𑀕𑀼𑀡𑁂𑀦 𑀬𑁄𑀕𑁄, 𑀲𑀩𑁆𑀩𑁄 𑀕𑀸𑀫𑁄 𑀭𑀫𑀡𑀻𑀬𑁄𑀢𑀺 𑀩𑀸𑀳𑀼𑀮𑁆𑀮𑁂𑀦, 𑀦𑀢𑁆𑀣𑀺 𑀲𑀸𑀓𑀮𑁆𑀮𑁂𑀦 [𑀓𑀫𑁂𑀦 (𑀧𑁄𑀢𑁆𑀣𑀓𑁂)] 𑀩𑁆𑀬𑀸𑀧𑀺𑀢𑀼𑀫𑀺𑀝𑁆𑀞𑀢𑁆𑀢𑀦𑁆𑀢𑀺 𑀲𑀓𑀮𑀩𑁆𑀬𑀸𑀧𑀦𑀺𑀘𑁆𑀙𑀸𑀬𑀸𑀪𑀸𑀯𑁄𑀢𑀺 𑀦 𑀤𑁆𑀯𑀺𑀩𑁆𑀩𑀘𑀦𑀁, 𑀏𑀯𑀫𑀼𑀧𑀭𑀺 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀲𑀫𑁆𑀧𑀦𑁆𑀦𑁄 𑀬𑀯𑁄𑀢𑀺 𑀲𑀫𑁆𑀧𑀦𑁆𑀦𑀕𑀼𑀡𑁂𑀦 𑀬𑀯𑀚𑀸𑀢𑀺𑀬𑀸 𑀩𑁆𑀬𑀸𑀧𑀺𑀢𑀼𑀫𑀺𑀘𑁆𑀙𑀸, 𑀏𑀓𑀢𑁆𑀣𑀸 𑀚𑀸𑀢𑀺, 𑀅𑀦𑁂𑀓𑀢𑁆𑀣 𑀦𑀺𑀲𑁆𑀲𑀬𑀸 𑀯𑀺𑀘𑁆𑀙𑀸 [𑀏𑀓𑀢𑁆𑀣𑀸𑀚𑀸𑀢𑀺, 𑀏𑀓𑀫𑀢𑁆𑀣𑀁 𑀜𑀸𑀧𑀬𑀺𑀲𑁆𑀲𑀸𑀫𑀻𑀢𑀺 𑀚𑀸𑀢𑀺𑀲𑀤𑁆𑀤𑁄 𑀧𑀬𑀼𑀚𑁆𑀚𑀢𑁂 𑀅𑀦𑁂 𑀓𑀢𑁆𑀣𑀦𑀺𑀲𑁆𑀲𑀬𑀸𑀘 𑀯𑀺𑀘𑁆𑀙𑀸, 𑀅𑀦𑁂𑀓𑀢𑁆𑀣𑀁 𑀲𑀜𑁆𑀜𑀸𑀧𑀬𑀺𑀲𑁆𑀲𑀸𑀫𑀻𑀢𑀺 𑀯𑀺𑀘𑁆𑀙𑀸𑀧𑀬𑀼𑀚𑁆𑀚𑀢𑁂-𑀢𑀺 𑀫𑀳𑀸𑀪𑀲𑁆𑀲𑁂], 𑀲𑁄𑀪𑀦𑀁 𑀥𑀯𑀔𑀤𑀺𑀭𑀦𑁆𑀢𑀺 𑀲𑁄𑀪𑀦𑀕𑀼𑀡𑁂𑀦 𑀥𑀯𑀸𑀤𑀺𑀤𑀩𑁆𑀩𑀸𑀦𑀁 𑀩𑁆𑀬𑀸𑀧𑀺𑀢𑀼𑀫𑀺𑀘𑁆𑀙𑀸, 𑀅𑀢𑁆𑀣𑀲𑀤𑁆𑀤𑁂𑀦𑁂𑀢𑁆𑀣 𑀤𑀩𑁆𑀩𑀸𑀤𑀬𑁄 𑀯𑀢𑁆𑀢𑀼𑀫𑀺𑀝𑁆𑀞𑀸𑀢𑀺 𑀆𑀳-‘𑀤𑀩𑁆𑀩𑀕𑀼𑀡𑀓𑀺𑀭𑀺𑀬𑀸𑀮𑀓𑁆𑀔𑀡𑁂’𑀢𑀺, 𑀯𑀺𑀲𑀤𑁆𑀤𑁄 𑀧𑀦𑁂𑀢𑁆𑀣 𑀩𑁆𑀬𑀸𑀧𑀦𑀢𑁆𑀣𑁄𑀢𑀺 𑀆𑀳-‘𑀩𑁆𑀬𑀸𑀧𑀺𑀢𑀼𑀁 𑀲𑀫𑁆𑀩𑀦𑁆𑀥𑀺𑀢𑀼’𑀦𑁆𑀢𑀺, 𑀲𑀸𑀢𑀺 𑀯𑀺𑀘𑁆𑀙𑀸, 𑀯𑀢𑁆𑀢𑀼𑀥𑀫𑁆𑀫𑁄𑀢𑀺 ‘𑀭𑀼𑀓𑁆𑀔𑀁𑀭𑀼𑀓𑁆𑀔’𑀫𑀺𑀘𑁆𑀘𑀸𑀤𑀺𑀓𑀁 𑀬𑁄 𑀯𑀤𑀢𑀺, 𑀢𑀲𑁆𑀲 𑀯𑀢𑁆𑀢𑀼𑀦𑁄 𑀥𑀫𑁆𑀫𑁄… 𑀇𑀘𑁆𑀙𑀸𑀮𑀓𑁆𑀔𑀡𑀲𑁆𑀲 𑀥𑀫𑁆𑀫𑀲𑁆𑀲 𑀢𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸 ¶ , 𑀲𑀤𑁆𑀤𑁄𑀢𑀺 𑀭𑀼𑀓𑁆𑀔𑀫𑀺𑀘𑁆𑀘𑀸𑀤𑀺𑀓𑁄, 𑀢𑀲𑁆𑀲 𑀲𑀤𑁆𑀤𑀲𑁆𑀲 𑀬𑀁 𑀭𑀽𑀧𑀁 𑀅𑀢𑁆𑀢 𑀪𑀸𑀯𑁄, 𑀢𑀫𑁂𑀯 𑀧𑀘𑁆𑀘𑀸𑀲𑀢𑁆𑀬𑀸 ‘‘𑀲𑀼𑀢𑀸𑀦𑀼𑀫𑀺𑀢𑁂𑀲𑀼 𑀲𑀼𑀢𑀲𑀫𑁆𑀩𑀦𑁆𑀥𑁄𑀯 𑀩𑀮𑀯𑀸’’𑀢𑀺 𑀯𑀺𑀘𑁆𑀙𑀸 𑀪𑀺𑀓𑁆𑀔𑀜𑁆𑀜𑁂𑀲𑀼 𑀯𑀢𑁆𑀢𑀫𑀸𑀦𑀲𑁆𑀲 𑀲𑀼𑀢𑀲𑁆𑀲𑁂𑀯 𑀢𑀲𑁆𑀲 𑀭𑀽𑀧𑀲𑁆𑀲 𑀧𑀘𑁆𑀘𑀸𑀲𑀦𑁆𑀦𑀪𑀸𑀯𑀢𑁄 𑀤𑁆𑀯𑀺𑀲𑀗𑁆𑀔𑁆𑀬𑀸 𑀬𑀼𑀢𑁆𑀢𑀁 𑀤𑁆𑀯𑀺𑀲𑀗𑁆𑀔𑀸𑀢𑀸𑀬 𑀲𑀗𑁆𑀔𑁆𑀬𑀸𑀬 ‘𑀭𑀼𑀓𑁆𑀔𑀁 𑀭𑀼𑀓𑁆𑀔’𑀫𑀺𑀘𑁆𑀘𑁂𑀯𑀁 𑀬𑀼𑀢𑁆𑀢𑀁 𑀅𑀢𑀺𑀤𑀺𑀲𑀻𑀬𑀢𑁂 𑀲𑀼𑀢𑁆𑀢𑁂 𑀤𑁆𑀯𑁂𑀇𑀘𑁆𑀘𑀦𑁂𑀦, 𑀤𑁆𑀯𑀺𑀩𑁆𑀩𑀘𑀦𑀲𑁆𑀲𑁂𑀯 [𑀤𑁆𑀯𑀺𑀩𑁆𑀩𑀘𑀦𑀫𑁂𑀯 (𑀧𑁄𑀢𑁆𑀣𑀓𑁂)] 𑀳𑀺 𑀤𑁆𑀯𑀺𑀲𑀗𑁆𑀔𑁆𑀬𑀸𑀬𑀼𑀢𑁆𑀢𑀢𑀸, 𑀅𑀣 𑀓𑀢𑀫𑁂𑀓𑀯𑀘𑀦𑀦𑁆𑀢𑀲𑁆𑀲 𑀤𑁆𑀯𑀺𑀩𑁆𑀩𑀘𑀦𑀁, 𑀢𑀣𑀸𑀳𑀺 𑀲𑀩𑁆𑀩𑁂𑀬𑁂𑀯𑁂𑀢𑁂𑀢𑁆𑀣 𑀯𑀺𑀘𑁆𑀙𑀸𑀬𑀁 𑀤𑁆𑀯𑀺𑀢𑁆𑀢𑁂𑀳𑁆𑀬𑀪𑀺𑀥𑀬𑀦𑁆𑀢𑁂𑀢𑀺 𑀩𑀳𑀢𑁆𑀢𑀸 𑀩𑀳𑀼𑀯𑀘𑀦𑀁 𑀧𑀧𑁆𑀧𑁄𑀢𑀺, 𑀏𑀓𑀯𑀘𑀦𑀦𑁆𑀢𑀼 𑀦 𑀲𑀺𑀚𑁆𑀛𑀢𑀺 ‘𑀭𑀼𑀓𑁆𑀔𑀁 𑀭𑀼𑀓𑁆𑀔𑀁 𑀲𑀺𑀜𑁆𑀘𑀢𑀻’𑀢𑀺 𑀏𑀓𑀢𑁆𑀣𑀸𑀪𑀺𑀥𑀸𑀦𑀪𑀺𑀦𑁆𑀦𑀲𑀩𑁆𑀩𑀭𑀼𑀓𑁆𑀔𑀧𑁆𑀧𑀢𑀻𑀢𑀻𑀢𑀺 𑀓𑀣𑀫𑁂𑀓𑀯𑀘𑀦𑀦𑁆𑀢𑀲𑁆𑀲 𑀤𑁆𑀯𑀺𑀩𑁆𑀩𑀯𑀘𑀦𑀦𑁆𑀢𑀻 𑀆𑀲𑀗𑁆𑀓𑀺𑀬𑀸𑀳-‘𑀢𑀢𑁆𑀣𑁂’𑀘𑁆𑀘𑀸𑀤𑀺, 𑀅𑀢𑁆𑀣𑀲𑀸𑀫𑀢𑁆𑀣𑀺𑀬𑀸𑀢𑀺 ‘𑀩𑀳𑀼𑀯𑀘𑀦𑀦𑁆𑀢𑀧𑁆𑀧𑀬𑁄𑀕𑁂𑀳𑀺’𑀘𑁆𑀘𑀸𑀤𑀺𑀦𑀸 𑀯𑀓𑁆𑀔𑀫𑀸𑀦𑀦𑀬𑁂𑀦 𑀩𑀳𑀼𑀯𑀘𑀦𑀦𑁆𑀢𑀧𑁆𑀧𑀬𑁄𑀕𑁂𑀦𑁂𑀯 𑀯𑀺𑀘𑁆𑀙𑀸𑀢𑁆𑀣𑀚𑁄𑀢𑀦𑀢𑁄 𑀦 𑀢𑀢𑁆𑀣 𑀤𑁆𑀯𑀻𑀩𑁆𑀩𑀘𑀦𑀁 𑀲𑀺𑀬𑀸, 𑀪𑀯𑀺𑀢𑀩𑁆𑀩𑀜𑁆𑀘 𑀤𑁆𑀯𑀺𑀩𑁆𑀩𑀘𑀦𑁂 (𑀦, 𑀏) 𑀓𑀯𑀘𑀦𑀢𑁆𑀢𑀫𑀦𑁆𑀢𑀭𑁂𑀦 𑀦 𑀘𑀸𑀢𑁆𑀣𑀺 𑀤𑁆𑀯𑀺𑀩𑁆𑀩𑀘𑀦𑀸𑀯𑀓𑀸 𑀲𑁄𑀢𑀺 𑀧𑀢𑀻𑀢𑀺 𑀩𑀮𑀸𑀯𑀕𑀢𑁄 𑀬𑁄-𑀢𑁆𑀣𑁄, 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀜𑁆𑀜𑀣𑀸𑀦𑀼𑀧𑀧𑀢𑁆𑀢𑀺𑀮𑀓𑁆𑀔𑀡𑀁 𑀲𑀸𑀫𑀢𑁆𑀣𑀺𑀬𑀁 𑀅𑀢𑁆𑀣𑀲𑀸𑀫𑀢𑁆𑀣𑀺𑀬𑀁, 𑀅𑀢𑁆𑀣𑀲𑀸𑀫𑀢𑁆𑀣𑀺𑀬𑀸 𑀏𑀓𑀯𑀘𑀦𑀦𑁆𑀢𑀲𑁆𑀲 𑀤𑁆𑀯𑀻𑀩𑁆𑀩𑀘𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑀸, 𑀓𑀺𑀭𑀺𑀬𑀸𑀤𑀺𑀬𑁄𑀕𑀦𑁆𑀢𑀺 𑀓𑀺𑀭𑀺𑀬𑀸𑀕𑀼𑀡𑀸𑀤𑀺 𑀲𑀫𑁆𑀩𑀦𑁆𑀥𑁄, 𑀫𑀦𑁆𑀢𑁆𑀯𑀸𑀢𑀺 𑀩𑁆𑀬𑀸𑀧𑀺𑀢𑀼𑀫𑀺𑀘𑁆𑀙𑀸𑀬𑀦𑁆𑀢𑀻𑀫𑀲𑁆𑀲 𑀧𑀼𑀩𑁆𑀩𑀓𑀺𑀭𑀺𑀬𑀸𑀯𑀘𑀦𑀁, 𑀅𑀪𑀺𑀲𑀁𑀳𑀭𑀺𑀢𑁆𑀯𑀸𑀢𑀺 𑀏𑀓𑀢𑁄𑀓𑀢𑁆𑀯𑀸. 𑀲𑀤𑁆𑀤𑀲𑁆𑀲 𑀢𑀸𑀤𑀺𑀲𑀢𑁆𑀣𑀧𑀘𑁆𑀘𑀸𑀬𑀓𑀢𑁆𑀢𑁂 𑀲𑀸𑀫𑀢𑁆𑀣𑀺𑀬𑀁 𑀲𑀤𑁆𑀤𑀲𑀢𑁆𑀢𑀺 [𑀲𑀤𑁆𑀤𑀲𑁆𑀲]. 𑀬𑀼𑀕𑀧𑀤𑀸𑀥𑀺𑀓𑀭𑀡𑀢𑀸𑀬𑀁 𑀲𑀳𑀯𑀘𑀦𑀺𑀘𑁆𑀙𑀸𑀬𑀁 𑀩𑀳𑀼𑀯𑀘𑀦𑀧𑁆𑀧𑀯𑀢𑁆𑀢𑀺𑀬𑁂𑀯, 𑀦 𑀢𑀢𑁆𑀣 𑀤𑁆𑀯𑀺𑀩𑁆𑀩𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘𑀅𑀢𑁄𑀬𑁂𑀯𑁂’𑀘𑁆𑀘𑀸𑀤𑀺, 𑀅𑀢𑁄 𑀬𑁂𑀯𑀸𑀢𑀺 𑀩𑀳𑀼𑀯𑀘𑀦𑀦𑁆𑀢𑀲𑁆𑀲 𑀲𑀤𑁆𑀤𑀲𑀢𑁆𑀢𑀺𑀬𑀸 𑀯𑀺𑀘𑁆𑀙𑀸𑀚𑁄𑀢𑀦𑀢𑁄 𑀤𑁆𑀯𑀺𑀩𑁆𑀩𑀘𑀦𑀸𑀪𑀸𑀯𑀸𑀬𑁂𑀯, 𑀏𑀯𑀫𑀜𑁆𑀜𑀢𑁂- ‘𑀇𑀥 𑀧𑀦 𑀬𑁄𑀕𑀧𑀚𑁆𑀚𑀁 𑀤𑀼𑀯𑀺𑀥𑀁 𑀲𑀤𑁆𑀤𑀬𑁄𑀕𑀧𑀚𑁆𑀚𑀁 𑀅𑀢𑁆𑀣𑀬𑁄𑀕𑀧𑀚𑁆𑀚𑀜𑁆𑀘, 𑀢𑀢𑁆𑀣 𑀓𑀺𑀜𑁆𑀘𑀺 𑀲𑀸𑀢𑁆𑀣𑀓𑀸𑀦𑀁 𑀲𑀤𑁆𑀤𑀬𑁄𑀕𑀧𑀚𑁆𑀚𑀫𑀢𑁆𑀣𑀬𑁄𑀕 𑀧𑀚𑁆𑀚𑀁 𑀦 𑀲𑀫𑁆𑀪𑀯𑀢𑀻𑀢𑀺, 𑀬𑀼𑀕𑀧𑀤𑀺 𑀅𑀥𑀺𑀓𑀭𑀡𑀁 𑀥𑀯𑀸𑀤𑀺 𑀅𑀢𑁆𑀣𑁄 𑀬𑀲𑁆𑀲 𑀲𑁄𑀥𑀯𑀔𑀤𑀺𑀭𑀧𑀮𑀸𑀲𑀲𑀤𑁆𑀤𑁄 𑀬𑀼𑀕𑀧𑀤𑀸𑀥𑀺𑀓𑀭𑀡𑁄, 𑀢𑀲𑁆𑀲 𑀪𑀸𑀯𑁄 𑀢𑀣𑀸, 𑀢𑀲𑁆𑀲𑀜𑁆𑀘 𑀲𑀢𑀺, 𑀲𑀤𑁆𑀤𑀬𑁄𑀕𑀧𑀚𑁆𑀚𑀫𑀦𑁆𑀢𑀭𑁂𑀦 𑀪𑀺𑀦𑁆𑀦𑀢𑁆𑀣𑀸𑀦𑀫𑁂𑀓𑀲𑀤𑁆𑀤𑀯𑀘𑀦𑀻𑀬𑀸𑀦 𑀫𑁂𑀓𑀢𑁄 𑀧𑀧𑀢𑁆𑀢𑀺 𑀅𑀢𑁆𑀣𑀬𑁄𑀕𑀧𑀚𑁆𑀚𑀁, 𑀢𑀁 𑀲𑀳𑀯𑀘𑀦𑀺𑀘𑁆𑀙𑀸𑀬𑀦𑁆𑀢𑀺 𑀇𑀫𑀺𑀦𑀸 𑀤𑀲𑁆𑀲𑀺𑀢𑀦𑁆𑀢𑀺 𑀢𑀲𑁆𑀲𑀁 𑀲𑀳𑀯𑀘𑀦𑀺𑀘𑁆𑀙𑀸𑀬𑀜𑁆𑀘 𑀲𑀢𑀺, 𑀲𑁄𑀪𑀦𑀸 𑀥𑀯𑀔𑀤𑀺𑀭𑀧𑀮𑀸𑀲𑀸 𑀲𑁄𑀪𑀦𑀸 𑀭𑀼𑀓𑁆𑀔𑀸𑀢𑀺 𑀲𑁄𑀪𑀦𑀕𑀼𑀡𑀬𑁄𑀕𑁂𑀧𑀺 𑀩𑀳𑀼𑀯𑀘𑀦𑁂𑀦𑁂𑀯 𑀯𑀺𑀘𑁆𑀙𑀸𑀚𑁄𑀢𑀦𑀢𑁄 ¶ 𑀤𑁆𑀯𑀺𑀩𑁆𑀩𑀘𑀦𑀸𑀪𑀸𑀯𑁄𑀢𑀺, 𑀲𑁄𑀪𑀦𑀁 𑀥𑀯𑀔𑀤𑀺𑀭𑀦𑁆𑀢𑀺 𑀧𑀦 𑀲𑀢𑀻𑀧𑀺 𑀲𑀤𑁆𑀤𑀬𑁄𑀕𑀧𑀚𑁆𑀚𑁂 𑀲𑀫𑀸𑀳𑀸𑀭𑀢𑁆𑀢𑀸 𑀦𑀢𑁆𑀣𑀢𑁆𑀣𑀬𑁄𑀕𑀧𑀚𑁆𑀚 [𑀦𑀸𑀢𑁆𑀯𑀬𑀸𑀕𑀧𑀚𑁆𑀚 (𑀧𑁄𑀢𑁆𑀣𑀓𑁂)] 𑀦𑁆𑀢𑀺 𑀏𑀓𑀯𑀘𑀦𑀦𑁆𑀢𑀢𑁆𑀢𑀸 𑀤𑁆𑀯𑀺𑀢𑁆𑀢𑀧𑁆𑀧𑀲𑀗𑁆𑀕𑁂𑀧𑀺 𑀲𑁄𑀪𑀦𑀁 𑀥𑀯𑀔𑀤𑀺𑀭𑀦𑁆𑀢𑀺 𑀲𑀤𑁆𑀤𑀸𑀦𑀁 𑀲𑀓𑀺𑀁 𑀩𑁆𑀬𑀸𑀧𑀦𑀺𑀘𑁆𑀙𑀸𑀬𑀸𑀪𑀸𑀯𑀸 𑀦 𑀤𑁆𑀯𑀺𑀩𑁆𑀩𑀘𑀦𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁.

𑀯𑀸𑀢𑁆𑀢𑀺𑀓𑀓𑀸𑀭𑁂𑀦 ‘‘𑀆𑀦𑀼𑀧𑀼𑀩𑁆𑀩𑀺𑀬𑁂 𑀤𑁆𑀯𑁂 𑀪𑀯𑀦𑁆𑀢𑀻𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺 (𑁮-𑁧-𑁧-𑀯𑀸) 𑀯𑀼𑀢𑁆𑀢𑀁, 𑀢𑀤𑀸𑀳-‘𑀆𑀦𑀼𑀧𑀼𑀩𑁆𑀩𑀺𑀬𑁂𑀧𑀺’𑀘𑁆𑀘𑀸𑀤𑀺𑀦𑀸, 𑀅𑀢𑁆𑀣𑁂𑀯𑀸𑀦𑀼𑀧𑀼𑀩𑁆𑀩𑀺𑀬𑁂𑀧𑀺 𑀯𑀺𑀘𑁆𑀙𑀸 𑀢𑀢𑁄𑀯 𑀤𑁆𑀯𑀺𑀢𑁆𑀢𑀦𑁆𑀢𑀺 𑀧𑀝𑀺𑀧𑀸𑀤𑀬 ‘𑀫𑀸𑀦𑀼𑀧𑀼𑀩𑁆𑀩𑀺𑀬’𑀫𑀺𑀘𑁆𑀘𑀸𑀤𑀺𑀦𑀸 ‘𑀅𑀢𑁆𑀣𑀺𑀬𑁂𑀯𑁂𑀘𑁆𑀘𑀸𑀤𑀺𑀦𑁄 𑀯𑀼𑀢𑁆𑀢𑀺𑀯𑀸𑀓𑁆𑀬𑀲𑁆𑀲 𑀯𑀺𑀯𑀭𑀡𑀫𑀸𑀳. 𑀕𑀸𑀫𑀚𑀸𑀢𑀺𑀬𑀸 𑀢𑀼𑀮𑁆𑀬𑀚𑀸𑀢𑀺𑀬𑀸𑀦𑀁 𑀤𑀺𑀲𑀸 𑀤𑁂𑀲𑀸𑀤𑀺𑀪𑁂𑀤𑁂𑀦 𑀪𑀺𑀦𑁆𑀦𑀸𑀦𑀫𑀺𑀯 𑀕𑀸𑀫𑀸𑀦𑀁, 𑀦 𑀏𑀢𑁆𑀣 𑀯𑀺𑀘𑁆𑀙𑀸, 𑀫𑀽𑀮𑀫𑀕𑁆𑀕𑀁 𑀯𑀸 𑀳𑀺 𑀫𑀼𑀔𑁆𑀬 𑀫𑁂𑀓𑀫𑁂𑀯… 𑀳𑁂𑀝𑁆𑀞𑀼𑀤𑁆𑀥𑀪𑀸𑀕𑀦𑁆𑀢𑀭𑀸𑀪𑀸𑀯𑁂𑀦𑁂𑀓𑀢𑁆𑀢𑀸, 𑀬𑁂𑀦𑀼𑀧𑀭𑀺𑀬𑀥𑁄 𑀪𑀸𑀕𑀸𑀧𑁂𑀓𑁆𑀔𑀸𑀬 𑀓𑀢𑀫𑀽𑀮𑀕𑁆𑀕𑀩𑁆𑀬𑀧𑀤𑁂𑀲𑁂𑀦 𑀪𑀺𑀦𑁆𑀦𑀚𑀸𑀢𑀺𑀬𑀸 𑀫𑀽𑀮𑀕𑁆𑀕𑀪𑀸𑀕𑀸, 𑀢𑁂 𑀪𑀺𑀦𑁆𑀦𑀚𑀸𑀢𑀺𑀬𑀸, 𑀦 𑀘 𑀪𑀺𑀦𑁆𑀦𑀚𑀸𑀢𑀺𑀬𑀸𑀦𑀁 𑀯𑀺𑀘𑁆𑀙𑀸 𑀳𑁄𑀢𑀺, 𑀦 𑀳𑀺 𑀕𑁄𑀕𑁄𑀢𑀺 𑀯𑀼𑀢𑁆𑀢𑁂 (𑀯𑀸𑀳𑀻𑀓)𑀕𑀢𑀸 𑀯𑀺𑀘𑁆𑀙𑀸𑀯𑀕𑀫𑁆𑀬𑀢𑁂𑀢𑀺 𑀆𑀘𑀭𑀺𑀬𑀚𑀺𑀦𑀺𑀦𑁆𑀤𑀩𑀼𑀤𑁆𑀥𑀺𑀦𑀸 𑀆𑀦𑀼𑀧𑀼𑀩𑁆𑀩𑀺𑀬𑁂 𑀯𑀺𑀘𑁆𑀙𑀸𑀬𑀸𑀪𑀸𑀯𑀁 𑀧𑀝𑀺𑀧𑀸𑀤𑀺𑀢𑀁, 𑀢𑀁 𑀯𑀺𑀖𑀝𑀬𑀺𑀢𑀼𑀁 ‘𑀬𑀤𑀺 𑀳𑀺’𑀘𑁆𑀘𑀸𑀤𑀺𑀦𑀸 𑀬𑀁 𑀯𑀼𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀢𑀁 𑀯𑀺𑀧𑀜𑁆𑀘𑀺𑀢𑀼𑀫𑀸𑀳- ‘𑀬𑀣𑁂’𑀘𑁆𑀘𑀸𑀤𑀺, 𑀦𑀲𑀦𑁆𑀦𑀺𑀯𑀺𑀝𑁆𑀞𑁄𑀢𑀺 𑀦 𑀧𑀢𑀺𑀝𑁆𑀞𑀺𑀢𑁄, 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀬𑀲𑁆𑀲𑀽𑀧𑀭𑀺𑀪𑀸𑀕𑁄 𑀅𑀢𑁆𑀣𑀺 𑀢𑀫𑁆𑀧𑀺 𑀫𑀽𑀮𑀦𑁆𑀢𑀺 𑀫𑀽𑀮 𑀩𑁆𑀬𑀧𑀤𑁂𑀲𑀲𑁆𑀲𑀸𑀧𑁂𑀓𑁆𑀔𑀸 𑀓𑀢𑀢𑁆𑀢𑀫𑀸𑀳, 𑀉𑀪𑀬𑀦𑁆𑀢𑀺 𑀫𑀽𑀮𑀫𑀕𑁆𑀕𑀜𑁆𑀘, 𑀢𑀣𑀸 𑀅𑀜𑁆𑀜𑁂𑀧𑀺 𑀫𑀽𑀮𑀕𑁆𑀕𑀪𑀸𑀕𑀸𑀢𑀺 𑀇𑀫𑀺𑀦𑀸 𑀫𑀽𑀮𑀕𑁆𑀕𑀪𑁂𑀤𑀸𑀦𑀁 𑀳𑁂𑀝𑁆𑀞𑀸 𑀯𑀺𑀬 𑀕𑀳𑀡𑁂 𑀲𑀢𑀺 𑀩𑀳𑀼𑀢𑁆𑀢𑀫𑀸𑀳, 𑀧𑀼𑀩𑁆𑀩𑀓𑀣𑀺𑀢𑁂𑀦𑀸𑀢𑀺 ‘𑀭𑀼𑀓𑁆𑀔𑀸𑀤𑀻𑀦𑀁 𑀩𑀸𑀳𑀼𑀮𑁆𑀮𑁂𑀦𑀸’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦, 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀫𑀽𑀮𑀸𑀤𑀻𑀦𑀁 𑀩𑀸𑀳𑀼𑀮𑁆𑀮𑁂𑀦 𑀣𑀽𑀮𑀸𑀤𑀺 𑀕𑀼𑀡𑀬𑁄𑀕𑀫𑁆𑀫𑀦𑁆𑀢𑁆𑀯𑀸 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑁂𑀦 𑀫𑀽𑀮𑀸𑀤𑀺𑀲𑀤𑁆𑀤𑀲𑀳𑀺𑀢𑁂𑀦 𑀲𑀩𑁆𑀩 𑀲𑀤𑁆𑀤𑁂𑀦 𑀫𑀽𑀮𑀸𑀤𑀺𑀓𑀫𑀢𑁆𑀣𑀫𑀪𑀺𑀲𑀁𑀳𑀭𑀺𑀢𑁆𑀯𑀸 𑀲𑀩𑁆𑀩𑀲𑁆𑀫𑀺𑀁 𑀫𑀽𑀮𑁂 𑀣𑀽𑀮𑀸 𑀲𑀩𑁆𑀩𑀲𑁆𑀫𑀺𑀁 𑀅𑀕𑁆𑀕𑁂 𑀲𑀼𑀔𑀼𑀫𑀸𑀢𑀺 𑀏𑀯𑀁 (𑀯𑀢𑁆𑀢𑀼𑀦𑁄) 𑀩𑁆𑀬𑀸𑀧𑀺𑀢𑀼𑀫𑀺𑀘𑁆𑀙𑀸𑀬𑀫𑁂𑀓𑀯𑀘𑀦𑀦𑁆𑀢𑀲𑁆𑀲 𑀯𑀺𑀘𑁆𑀙𑀸𑀬𑀦𑁆𑀢𑁆𑀯𑁂𑀯 𑀤𑁆𑀯𑀺𑀩𑁆𑀩𑀘𑀦’’𑀦𑁆𑀢𑀺.

𑀚𑁂𑀝𑁆𑀞𑀸𑀦𑀁 𑀯𑀺𑀘𑁆𑀙𑀸𑀲𑀫𑁆𑀪𑀯𑁂 𑀲𑀩𑁆𑀩𑀓𑀦𑀺𑀝𑁆𑀞𑀲𑁆𑀲 𑀚𑁂𑀝𑁆𑀞𑀢𑁆𑀢𑀸𑀪𑀸𑀯𑀸𑀦𑀼𑀧𑁆𑀧𑀯𑁂𑀲𑁄 𑀦 𑀲𑀺𑀬𑀸𑀢𑀺 𑀆𑀦𑀼𑀧𑀼𑀩𑁆𑀩𑀺𑀬𑀫𑀢𑁆𑀢𑀯𑀘𑀦𑀺𑀘𑁆𑀙𑀸𑀬𑀁 𑀢𑁂𑀦𑁂𑀯 𑀤𑁆𑀯𑀺𑀢𑁆𑀢𑀫𑀪𑀺𑀳𑀺𑀢𑀁 ‘𑀚𑁂𑀝𑁆𑀞𑀁 𑀚𑁂𑀝𑁆𑀞𑀫𑀦𑀼𑀧𑁆𑀧𑀯𑁂𑀲𑀬𑀸’𑀢𑀺 𑀢𑁂𑀦𑁂𑀯𑀸𑀘𑀭𑀺𑀬𑁂𑀦, 𑀢𑀤𑀥𑀼𑀦𑀸 𑀯𑀺𑀖𑀝𑀻𑀬𑀢𑀺 ‘𑀚𑁂𑀝𑁆𑀞’ 𑀫𑀺𑀘𑁆𑀘𑀸𑀤𑀺𑀦𑀸 ¶ , 𑀓𑀦𑀺𑀝𑁆𑀞𑁄𑀧𑀺 𑀧𑀯𑁂𑀲𑀻𑀬𑀢𑀻𑀢𑀺 𑀓𑀦𑀺𑀝𑁆𑀞𑀲𑁆𑀲𑀧𑀺 𑀯𑀺𑀘𑁆𑀙𑀸𑀲𑀫𑁆𑀪𑀯𑀫𑀸𑀳, 𑀢𑀢𑁆𑀣 𑀓𑀸𑀭𑀡𑀫𑀸𑀳-‘𑀬𑀣𑁂𑀯 𑀳𑀺’𑀘𑁆𑀘𑀸𑀤𑀺, 𑀧𑀭𑀲𑁆𑀲𑀸𑀢𑀺 𑀫𑀚𑁆𑀛𑀺𑀫𑀲𑁆𑀲𑀸𑀢𑀺 𑀏𑀢𑁆𑀣 𑀯𑀺𑀲𑁂𑀲𑀦𑀁, 𑀓𑀦𑀺𑀝𑁆𑀞𑀲𑁆𑀲𑀸𑀧𑀺 𑀚𑁂𑀝𑁆𑀞𑀩𑁆𑀬𑀧𑀤𑁂𑀲𑁄𑀢𑀺 𑀲𑀫𑁆𑀩𑀦𑁆𑀥𑁄, 𑀬𑀣𑀸𑀯𑀼𑀢𑁆𑀢𑀫𑁂𑀯 𑀲𑀫𑀢𑁆𑀣𑁂𑀢𑀺 ‘𑀯𑀢𑁆𑀢𑀺𑀘𑁆𑀙𑀸𑀦𑀺𑀩𑀦𑁆𑀥𑀦𑁂 𑀳𑀺’𑀘𑁆𑀘𑀸𑀤𑀺𑀦𑀸, 𑀯𑀢𑁆𑀢𑀺𑀘𑁆𑀙𑀸𑀤𑀺𑀩𑀦𑁆𑀥𑀦𑁂𑀢𑀺 𑀯𑀢𑁆𑀢𑀼𑀦𑁄 𑀇𑀘𑁆𑀙𑀸 𑀦𑀺𑀩𑀦𑁆𑀥𑀦𑀁 𑀓𑀸𑀭𑀡𑀫𑀲𑁆𑀲𑀸𑀢𑀺 𑀲𑀫𑀸𑀲𑁄, 𑀯𑀢𑁆𑀣𑀼𑀲𑀪𑀸𑀯𑁂 𑀯𑀢𑁆𑀣𑀼 𑀢𑀢𑁆𑀣𑁂, 𑀅𑀪𑀺𑀦𑀺𑀯𑁂𑀲𑁄 𑀧𑀯𑀢𑁆𑀢𑀺, 𑀦𑀸𑀪𑀺𑀲𑀫𑁆𑀪𑀼𑀡𑀸𑀢𑀺 𑀦 𑀧𑀧𑁆𑀧𑁄𑀢𑀺.

‘‘𑀲𑀓𑀢𑁆𑀣𑁂 𑀯𑀥𑀸𑀭𑀺𑀬𑀫𑀸𑀦𑁂 𑀦𑁂𑀓𑀲𑁆𑀫𑀺𑀁 𑀤𑁆𑀯𑁂 𑀪𑀯𑀦𑁆𑀢𑀻𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺 (𑁮-𑁧-𑁧𑁨-𑀯𑀸) 𑀯𑀸𑀢𑁆𑀢𑀺𑀓𑀓𑀸𑀭𑁂𑀦 𑀯𑀼𑀢𑁆𑀢𑀁, 𑀢𑀤𑀸𑀳 ‘𑀲𑀓𑀢𑁆𑀣𑁂’𑀇𑀘𑁆𑀘𑀸𑀤𑀺, 𑀅𑀢𑁆𑀣𑀧𑁆𑀧𑀓𑀸𑀭𑀡𑀸𑀤𑁆𑀬𑀦𑀧𑁂𑀓𑁆𑀔𑀲𑁆𑀲 𑀧𑀤𑀲𑁆𑀲 𑀅𑀢𑁆𑀣𑁂 𑀲𑀓𑀢𑁆𑀣𑁂 𑀅𑀯𑀥𑀸𑀭𑀺𑀬𑀫𑀸𑀦𑁂 𑀏𑀢𑁆𑀢𑀓𑀫𑁂𑀯𑁂𑀢𑀺 𑀕𑀫𑁆𑀫𑀫𑀸𑀦𑁂 𑀅𑀦𑁂𑀓𑀲𑁆𑀫𑀺𑀁 𑀤𑀺𑀬𑁆𑀬𑀫𑀸𑀦𑁂 𑀤𑁆𑀯𑀺𑀩𑁆𑀩𑀘𑀦𑀫𑀺𑀝𑁆𑀞𑀁 𑀫𑀢𑀁 𑀧𑀸𑀡𑀺𑀦𑀺𑀬𑀸𑀦𑀦𑁆𑀢𑀺 𑀅𑀢𑁆𑀣𑁄, 𑀅𑀬𑀫𑁆𑀧𑀦𑁂𑀲𑀫𑀥𑀺𑀧𑁆𑀧𑀸𑀬𑁄 ‘𑀫𑀸𑀲𑀓𑀁 𑀫𑀸𑀲𑀓𑀁 𑀇𑀫𑀫𑁆𑀳𑀸 𑀓𑀳𑀸𑀧𑀡𑀸 𑀪𑀯𑀦𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀤𑁂𑀳𑀻 𑀢𑁆𑀬𑀢𑁆𑀭 𑀤𑁆𑀯𑁂 𑀏𑀯 𑀫𑀸𑀲𑀸 𑀤𑀸𑀢𑀼𑀫𑀺𑀘𑁆𑀙𑀺𑀢𑀸, 𑀓𑀳𑀸𑀧𑀡𑀁 𑀦𑀸𑀫𑁋

𑀘𑀢𑁆𑀢𑀸𑀭𑁄 𑀯𑀺𑀳𑀬𑁄 𑀕𑀼𑀜𑁆𑀚𑀸, 𑀤𑁆𑀯𑁂𑀕𑀼𑀜𑁆𑀚𑀸 𑀫𑀸𑀲𑀓𑁄 𑀪𑀯𑁂;

𑀤𑁆𑀯𑁂 𑀅𑀓𑁆𑀔𑀸𑀯 𑀫𑀸𑀲𑀓𑀸𑀧𑀜𑁆𑀘,𑀓𑁆𑀔𑀸𑀦𑀁 𑀥𑀭𑀡𑀫𑀝𑁆𑀞𑀓𑀁𑀢𑀺.

𑀯𑀼𑀢𑁆𑀢𑀯𑀺𑀥𑀺𑀦𑀸𑀦𑁂𑀓𑀫𑀸𑀲𑀓𑀲𑀫𑀼𑀤𑀸𑀬𑁄, 𑀢𑀢𑁆𑀣 𑀦 𑀲𑀩𑁆𑀩𑁂 𑀓𑀳𑀸𑀧𑀡 𑀲𑀫𑁆𑀩𑀦𑁆𑀥𑀺𑀦𑁄 𑀫𑀸𑀲𑀸 𑀤𑀸𑀦𑀓𑀺𑀭𑀺𑀬𑀸𑀬 𑀩𑁆𑀬𑀸𑀧𑀺𑀢𑀸, 𑀤𑁆𑀯𑁂𑀬𑁂𑀯𑀸𑀢𑀺 𑀦𑁂𑀢𑁆𑀣𑀢𑁆𑀣 𑀯𑀺𑀘𑁆𑀙𑀸𑀢𑀺 𑀬𑀣𑀸𑀯𑀼𑀢𑁆𑀢𑀯𑀢𑁆𑀢𑀩𑁆𑀩𑁂𑀦 𑀤𑁆𑀯𑀺𑀩𑁆𑀩𑀘𑀦’’𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀢𑀁 𑀤𑁆𑀯𑀺𑀩𑁆𑀩𑀘𑀦𑁄𑀤𑀸𑀳𑀭𑀡𑀁 𑀤𑀲𑁆𑀲𑁂𑀢𑁆𑀯𑀸, 𑀧𑀝𑀺𑀧𑀸𑀤𑀬𑀺𑀢𑀼𑀁 𑀯𑀺𑀘𑁆𑀙𑀸𑀬𑀫𑁂𑀯 𑀤𑁆𑀯𑀺𑀢𑁆𑀢𑀁 𑀤𑀲𑁆𑀲𑁂𑀢𑀼𑀁… 𑀫𑀸𑀲𑀓𑀁 𑀫𑀸𑀲𑀓𑀫𑀺𑀘𑁆𑀘𑀸𑀤𑁄𑀢𑁆𑀯𑀬𑀫𑀥𑀺𑀧𑁆𑀧𑀸𑀬𑁄-‘‘𑀤𑁂𑀳𑀻𑀢𑀺 𑀤𑀸𑀦𑀓𑀺𑀭𑀺𑀬𑀸𑀬 𑀫𑀸𑀲𑁆𑀲 𑀩𑁆𑀬𑀸𑀧𑀺𑀢𑀼𑀫𑀺𑀝𑁆𑀞𑀸𑀢𑀺 𑀯𑀺𑀘𑁆𑀙𑀸𑀬𑀫𑁂𑀯𑁂𑀢𑁆𑀣 𑀤𑁆𑀯𑀺𑀩𑁆𑀩𑀘𑀦𑀁, 𑀢𑀣𑀸𑀳𑁆𑀬𑀢𑁄 𑀤𑁆𑀯𑀺𑀭𑀼𑀢𑁆𑀢𑀸 𑀯𑀺𑀘𑁆𑀙𑀸𑀯 𑀕𑀫𑁆𑀬𑀢𑁂’’𑀢𑀺, 𑀲𑀤𑁆𑀤𑀦𑁆𑀢𑀭𑀢𑁄𑀘𑁆𑀘𑀸𑀤𑀺𑀓𑀁 𑀓𑀺𑀫𑀸𑀲𑀗𑁆𑀓𑀺𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳‘𑀤𑁂𑀳𑀻’𑀢𑀺𑀆𑀤𑀺, 𑀅𑀯𑀥𑀸𑀭𑀡𑁂 𑀧𑀢𑀻𑀬𑀫𑀸𑀦𑁂𑀢𑀺 𑀓𑀳𑀸𑀧𑀡𑀲𑀫𑁆𑀩𑀦𑁆𑀥𑀺𑀦𑀺 𑀩𑀳𑀼𑀫𑁆𑀳𑀺 𑀫𑀸𑀲𑀓𑀲𑀫𑀼𑀤𑀸𑀬𑁂 𑀫𑀸𑀲𑀓𑀤𑁆𑀯𑀬𑀦𑀺𑀘𑁆𑀙𑀬𑁂 𑀯𑀺𑀜𑁆𑀜𑀸𑀬𑀫𑀸𑀦𑁂 𑀲𑀢𑀺, 𑀅𑀯𑀺𑀲𑁂𑀲𑁂𑀦 𑀲𑀸𑀫𑀜𑁆𑀜𑁂𑀦 𑀫𑀸𑀲𑀸𑀦𑀁 𑀤𑁂𑀳𑀻𑀢𑀺 𑀤𑀸𑀦𑀓𑀺𑀭𑀺𑀬𑀸𑀬 𑀩𑁆𑀬𑀸𑀧𑀦𑀸 𑀪𑀸𑀯𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀲𑀤𑁆𑀤𑀦𑁆𑀢𑀭𑀢𑁄𑀘𑁆𑀘𑀸𑀤𑀺𑀦𑁄 𑀲𑀸𑀥𑀺𑀧𑁆𑀧𑀸𑀬𑀫𑀢𑁆𑀣𑀫𑀪𑀺𑀥𑀸𑀢𑀼𑀫𑀸𑀭𑀪𑀢𑁂 ‘𑀧𑀤𑁂𑀦𑁂’𑀘𑁆𑀘𑀸𑀤𑀺, 𑀏𑀢𑁆𑀣 𑀧𑀤𑁂𑀦𑀸𑀢𑀺 𑀫𑀸𑀲𑀓𑀫𑀺𑀘𑁆𑀘𑀦𑁂𑀦 𑀧𑀤𑁂𑀦, 𑀇𑀫𑀫𑁆𑀳𑀸 𑀓𑀳𑀸𑀧𑀡𑀸𑀢𑀺 𑀇𑀤𑀫𑁂𑀢𑁆𑀣 𑀲𑀤𑁆𑀤𑀦𑁆𑀢𑀭𑀁, 𑀓𑀢𑀸𑀪𑀺𑀲𑀗𑁆𑀔𑀭𑀡𑀲𑁆𑀲𑀸𑀢𑀺 𑀫𑀸𑀲𑀓𑀁 𑀫𑀸𑀲𑀓𑀫𑀺𑀘𑁆𑀘𑁂𑀯𑀁 ¶ 𑀦𑀺𑀧𑁆𑀨𑀸𑀤𑀺𑀢𑀲𑁆𑀲, 𑀲𑀤𑁆𑀤𑀦𑁆𑀢𑀭𑀢𑁄𑀢𑀺 𑀇𑀫𑀺𑀦𑀸 𑀧𑀤𑀦𑁆𑀢𑀭𑀬𑁄𑀕𑁄 𑀕𑀳𑀺𑀢𑁄𑀢𑀺 𑀆𑀳-‘𑀧𑀤𑀦𑁆𑀢𑀭𑁂𑀦 𑀬𑁄𑀕𑀢𑁄’𑀢𑀺 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 ‘‘𑀤𑁆𑀯𑀺𑀢𑁆𑀢𑀓𑀭𑀡𑀓𑀸𑀮𑁂 𑀲𑀤𑁆𑀤𑀦𑁆𑀢𑀭𑀯𑀘𑀦𑀻𑀬𑀲𑁆𑀲𑀢𑁆𑀣𑀲𑁆𑀲𑀸𑀦𑀧𑁂𑀓𑁆𑀔𑀺𑀢𑀢𑁆𑀢𑀸 𑀫𑀸𑀲𑀓𑀁𑀫𑀸𑀲𑀓𑀦𑁆𑀢𑀺 𑀅𑀯𑀺𑀲𑁂𑀲𑁂𑀦 𑀫𑀸𑀲𑀓𑀯𑀺𑀘𑁆𑀙𑀸𑀬𑀁 𑀤𑁆𑀯𑀺𑀢𑁆𑀢𑀁, 𑀢𑀤𑀦𑀼 𑀧𑀦 𑀇𑀫𑀫𑁆𑀳𑀸 𑀓𑀳𑀸𑀧𑀡𑀸𑀢𑀺𑀲𑀤𑁆𑀤𑀦𑁆𑀢𑀭𑀲𑀫𑁆𑀩𑀦𑁆𑀥𑁂 𑀲𑀢𑀺 𑀬𑀤𑀺 𑀓𑀳𑀸𑀧𑀡𑀲𑀫𑁆𑀩𑀦𑁆𑀥𑁆𑀬 𑀦 𑀯𑀲𑁂𑀲𑀫𑀸𑀲𑀓𑀯𑀺𑀘𑁆𑀙𑀸 𑀧𑀭𑀺𑀕𑁆𑀕𑀬𑁆𑀳𑀢𑀺 𑀢𑀤𑀸 𑀇𑀫𑀲𑁆𑀲 𑀓𑀳𑀸𑀧𑀡𑀲𑁆𑀲𑀸𑀢𑀺 𑀙𑀝𑁆𑀞𑀺𑀬𑀸 𑀪𑀯𑀺𑀢𑀩𑁆𑀩𑀁, 𑀇𑀫𑀫𑁆𑀳𑀸 𑀓𑀳𑀸𑀧𑀡𑀸𑀢𑀺 𑀧𑀦 𑀅𑀯𑀥𑀺𑀧𑀜𑁆𑀘𑀫𑀻𑀦𑀺𑀤𑁆𑀤𑁂𑀲𑀢𑁄 𑀓𑀳𑀸𑀧𑀡𑀢𑁄 𑀤𑁆𑀯𑀬𑀫𑁂𑀯 𑀕𑀳𑁂𑀢𑁆𑀯𑀸 𑀪𑀯𑀦𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀤𑁂𑀳𑀻𑀢𑀺 𑀇𑀫𑀫𑁆𑀳𑀸 𑀓𑀳𑀸𑀧𑀡𑀸𑀢𑀺 𑀲𑀤𑁆𑀤𑀦𑁆𑀢𑀭𑀢𑁄𑀯𑀥𑀸𑀭𑀡𑀁 𑀕𑀫𑁆𑀬𑀢𑁂’’𑀢𑀺.

‘‘𑀧𑀼𑀩𑁆𑀩𑀧𑀞𑀫𑀸𑀦𑀫𑀢𑁆𑀣𑀸𑀢𑀺𑀲𑀬𑀯𑀘𑀦𑀺𑀘𑁆𑀙𑀸𑀬𑀁 𑀤𑁆𑀯𑁂 𑀪𑀯𑀦𑁆𑀢𑀻𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺 (𑁮-𑁧-𑁧𑁨-𑀯𑀸) 𑀯𑀼𑀢𑁆𑀢𑀁, 𑀢𑀤𑀸𑀳-‘𑀧𑀼𑀩𑁆𑀩𑀧𑀞𑀫𑀸𑀦𑀁 𑀫𑀺𑀘𑁆𑀘𑀸𑀤𑀺, 𑀧𑀼𑀩𑁆𑀩𑀧𑀞𑀫𑀸𑀦𑀁 𑀧𑀼𑀩𑁆𑀩𑀧𑀞𑀫 𑀲𑀤𑁆𑀤𑀸𑀦𑀁 𑀅𑀢𑁆𑀣𑀸𑀢𑀺𑀲𑀬𑁄 𑀬𑁄 𑀅𑀢𑁆𑀣𑀲𑁆𑀲 𑀧𑀓𑀁𑀲𑁄, 𑀢𑀲𑁆𑀲 𑀯𑀘𑀦𑀺𑀘𑁆𑀙𑀸𑀬𑀁, 𑀲𑀩𑁆𑀩𑀧𑀞𑀫𑀪𑀸𑀯𑀲𑀗𑁆𑀔𑀸𑀢 𑀅𑀢𑁆𑀣𑀸𑀢𑀺𑀲𑀬𑀫𑀢𑁆𑀢𑀸𑀯 𑀯𑀘𑀦𑀺𑀘𑁆𑀙𑀸𑀢𑀺 𑀦 𑀏𑀢𑁆𑀣 𑀯𑀺𑀘𑁆𑀙𑀸𑀢𑀺 𑀢𑁂𑀲𑀫𑀥𑀺𑀧𑁆𑀧𑀸𑀬𑁄, 𑀯𑀺𑀓𑀲𑀦𑀓𑀺𑀭𑀺𑀬𑀸𑀬 𑀧𑀸𑀓𑀓𑀺𑀭𑀺𑀬𑀸𑀬𑀸𑀢𑀺 𑀯𑀼𑀢𑁆𑀢𑁂𑀧𑀺 𑀯𑀺𑀓𑀸𑀲𑀓𑀭𑀡𑀓𑀺𑀭𑀺𑀬𑀸𑀬 𑀧𑀸𑀓𑀓𑀭𑀡𑀓𑀺𑀭𑀺𑀬𑀸𑀬𑀸𑀢𑀺 𑀅𑀢𑁆𑀣𑀲𑀫𑁆𑀪𑀯𑀢𑁄 ‘𑀧𑀼𑀩𑁆𑀩𑀁 𑀧𑀼𑀩𑁆𑀩𑀁 𑀧𑀼𑀧𑁆𑀨’𑀦𑁆𑀢𑀺 𑀢𑁆𑀬𑀸𑀤𑁄, 𑀧𑀼𑀩𑁆𑀩𑀁 𑀧𑀼𑀩𑁆𑀩𑀁 𑀯𑀺𑀓𑀲𑀦𑀁 𑀓𑀭𑁄𑀦𑁆𑀢𑀺, 𑀧𑀞𑀫𑀁 𑀧𑀞𑀫𑀁 𑀯𑀘𑀦𑀁 𑀓𑀭𑁄𑀦𑁆𑀢𑀻𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀯𑀲𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀧𑀼𑀩𑁆𑀩𑀸𑀢𑀺 𑀫𑀢𑀸 𑀧𑀞𑀫𑀸𑀪𑀺𑀫𑀢𑀸𑀢𑀺 𑀇𑀫𑀺𑀦𑀸 𑀧𑀼𑀩𑁆𑀩𑀧𑀞𑀫𑀪𑀸𑀯𑁂𑀦𑀸𑀪𑀺𑀫𑀢𑀸𑀦𑀁 𑀩𑀳𑀼𑀢𑁆𑀢 𑀩𑁆𑀬𑀸𑀧𑀦𑁂𑀦 𑀯𑀺𑀘𑁆𑀙𑀸𑀲𑀩𑁆𑀪𑀸𑀯𑁂 𑀓𑀸𑀭𑀡𑀫𑀸𑀳.

‘‘𑀟𑀢𑀭 𑀟𑀢𑀫𑀸𑀦𑀁 𑀲𑀫𑀲𑀫𑁆𑀧𑀥𑀸𑀭𑀡𑀸𑀬𑀫𑀺𑀢𑁆𑀣𑀻𑀦𑀺𑀕𑀤𑁂 𑀪𑀸𑀯𑁂 𑀤𑁆𑀯𑁂 𑀪𑀯𑀦𑁆𑀢𑀻𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺 (𑁮-𑁧-𑁧𑁨-𑀯𑀸) 𑀯𑀼𑀢𑁆𑀢𑀁, 𑀏𑀢𑁆𑀣 𑀇𑀢𑁆𑀣𑀺𑀮𑀺𑀗𑁆𑀕𑀲𑀤𑁆𑀤𑁄 𑀇𑀢𑁆𑀣𑀺𑀮𑀺𑀗𑁆𑀕𑀬𑁄𑀕𑀸 𑀇𑀢𑁆𑀣𑀻𑀢𑀺 𑀯𑀼𑀢𑁆𑀢𑁄, 𑀦𑀺𑀕𑀤𑁆𑀬𑀢𑁂𑀦𑁂𑀦𑁂𑀢𑀺 𑀦𑀺𑀕𑀤𑁄, 𑀇𑀢𑁆𑀣𑀻 𑀦𑀺𑀕𑀤𑁄 𑀬𑀲𑁆𑀲 𑀲𑁄 𑀇𑀢𑁆𑀣𑀺𑀦𑀺𑀕𑀤𑁄𑀪𑀸𑀯𑁄, 𑀢𑀲𑁆𑀫𑀺𑀁 𑀇𑀢𑁆𑀣𑀻𑀦𑀺𑀕𑀤𑁂 𑀪𑀸𑀯𑁂, 𑀢𑀤𑀸𑀳-𑀭𑀢𑀭𑀭𑀢 𑀫𑀦𑁆𑀢𑀸𑀦’𑀫𑀺𑀘𑁆𑀘𑀸𑀤𑀺, 𑀇𑀢𑁆𑀣𑀺𑀮𑀺𑀗𑁆𑀕𑁂𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀁 𑀬𑀲𑁆𑀲 𑀲𑁄 𑀇𑀢𑁆𑀣𑀺𑀮𑀺𑀗𑁆𑀕𑁄𑀪𑀸𑀯𑁄, 𑀢𑀲𑁆𑀫𑀺𑀁 𑀇𑀢𑁆𑀣𑀺𑀮𑀺𑀗𑁆𑀕𑁂 𑀪𑀸𑀯𑁂 𑀯𑀢𑁆𑀢𑀫𑀸𑀦𑀸𑀦𑀁 𑀭𑀢𑀭𑀭𑀢𑀫𑀦𑁆𑀢𑀸𑀦𑀁 𑀤𑁆𑀯𑀺𑀩𑁆𑀩𑀘𑀦𑀫𑀪𑀺𑀫𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀓𑀲𑁆𑀫𑀺𑀁 𑀯𑀺𑀲𑀬𑁂𑀢𑀺 𑀆𑀳-‘𑀲𑀫𑀲𑀫𑁆𑀧𑀥𑀸𑀭𑀡 𑀯𑀺𑀲𑀬𑁂’𑀢𑀺, 𑀲𑀫𑁂𑀦 𑀅𑀟𑁆𑀠𑀢𑀸𑀤𑀺𑀦𑀸 𑀕𑀼𑀡𑁂𑀦 𑀇𑀫𑁂 𑀉𑀪𑁄 𑀅𑀟𑁆𑀠𑀸 𑀇𑀢𑁆𑀯𑁂𑀯𑀁 𑀭𑀽𑀧𑀸 𑀲𑀫𑁆𑀧𑀥𑀸𑀭𑀡𑀸 𑀦𑀺𑀭𑀽𑀧𑀦𑀸 𑀅𑀯𑀩𑁄𑀥𑁄 𑀲𑀫𑀲𑀫𑁆𑀧𑀥𑀸𑀭𑀡𑀸, 𑀲𑀸𑀏𑀯 𑀯𑀺𑀲𑀬𑁄, 𑀢𑀲𑁆𑀫𑀺𑀁 𑀲𑀢𑀺, 𑀅𑀟𑁆𑀠𑀢𑀸𑀬 𑀩𑀳𑀼𑀯𑀺𑀥𑀢𑁆𑀢𑀸𑀪𑀸𑀯𑀸 𑀓𑀺𑀭𑀺𑀬𑀸𑀤𑀺𑀬𑁄 𑀕𑀸𑀪𑀸𑀯𑀸 ¶ 𑀘 𑀦𑀢𑁆𑀣𑁂𑀢𑁆𑀣 𑀯𑀺𑀘𑁆𑀙𑀸𑀢𑀺 𑀢𑁂𑀲𑀫𑀥𑀺𑀧𑁆𑀧𑀸𑀬𑁄, 𑀧𑀼𑀘𑁆𑀙𑀺𑀬𑀫𑀸𑀦𑀸𑀢𑀺 𑀇𑀫𑀺𑀦𑀸 𑀇𑀫𑁂 𑀉𑀪𑁄’ 𑀇𑀘𑁆𑀘𑀸𑀤𑀻𑀦𑀁 𑀧𑀼𑀘𑁆𑀙𑀸𑀯𑀸𑀓𑁆𑀬𑀢𑀁 𑀤𑀲𑁆𑀲𑁂𑀢𑀺.

𑀧𑀭𑀩𑁆𑀬𑀯𑀳𑀸𑀭𑁂𑀦𑀸𑀳-‘𑀆𑀔𑁆𑀬𑀸𑀢𑀸𑀤𑀻𑀦𑀁 𑀯𑀺𑀲𑀬𑀢𑁆𑀢’𑀦𑁆𑀢𑀺, 𑀇𑀫𑀺𑀦𑀸 𑀆𑀔𑁆𑀬𑀸𑀢𑀸𑀤𑀻𑀦𑀫𑁂𑀯 𑀓𑀺𑀭𑀺𑀬𑀸𑀚𑁄𑀢𑀓𑀧𑀤𑀪𑀸𑀯𑁂𑀦 𑀧𑁄𑀦𑁄𑀧𑀼𑀜𑁆𑀜𑀲𑀗𑁆𑀔𑀸𑀢𑀓𑀺𑀭𑀺𑀬𑀸 𑀥𑀫𑁆𑀫𑀲𑁆𑀲 𑀥𑀦𑀲𑀫𑁂𑀯 𑀯𑀺𑀲𑀬𑀢𑁆𑀢𑀁 𑀤𑀻𑀧𑁂𑀢𑀺, 𑀅𑀢𑀺𑀲𑀬𑀯𑀺𑀲𑀺𑀝𑁆𑀞𑀦𑁆𑀢𑀺 𑀇𑀫𑀺𑀦𑀸 𑀧𑀧𑀘𑀢𑀺𑀲𑀤𑁆𑀤𑁂𑀧𑀓𑀸𑀭𑁄 𑀧𑀓𑀁𑀲𑀢𑁆𑀣 𑀚𑁄𑀢𑀓𑁄 𑀉𑀧𑀲𑀕𑁆𑀕𑁄𑀢𑀺 𑀤𑀲𑁆𑀲𑁂𑀢𑀺, 𑀳𑀺𑀯𑀺𑀥𑀺𑀫𑁆𑀳𑀻𑀢𑀺’𑀮𑀽-𑀘𑁆𑀙𑁂𑀤𑀦𑁂’𑀇𑀘𑁆𑀘𑀲𑁆𑀫𑀸 𑀯𑀺𑀥𑀺𑀫𑁆𑀳𑀺 𑀳𑀺𑀧𑁆𑀧𑀘𑁆𑀘𑀬𑁄 ‘‘𑀧𑀜𑁆𑀳𑀧𑀢𑁆𑀢𑀦𑀸𑀯𑀺𑀥𑀻𑀲𑀼’’𑀢𑀺 (𑁬-𑁯) 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄, 𑀑𑀲𑁆𑀲𑀸𑀢𑀺 ‘‘𑀬𑀼𑀯𑀡𑁆𑀡𑀸𑀦𑀫𑁂𑀑𑀧𑀘𑁆𑀘𑀬𑁂’’𑀢𑀺 (𑁫-𑁮𑁨) 𑀑𑀓𑀸𑀭𑀲𑁆𑀲, ‘𑀧𑀼𑀩𑁆𑀩𑁂𑀓-𑀓𑀢𑁆𑀢𑀼𑀓𑀸𑀦’’ (𑁫-𑁬𑁨) 𑀫𑀺𑀘𑁆𑀘𑁂𑀯𑀸𑀢𑀺 𑀏𑀯𑀓𑀸𑀭𑁂𑀦 𑀧𑀭𑁂𑀲𑀫𑀺𑀯𑀸𑀬𑀫𑀧𑁆𑀬𑀸𑀪𑀺𑀓𑁆𑀔𑀜𑁆𑀜𑁂 𑀧𑀘𑁆𑀘𑀬𑁄 𑀘𑁂 𑀯𑀺𑀥𑀻𑀬𑀢𑁂, 𑀢𑀤𑀸 𑀧𑀧𑀘𑀢𑀺𑀇𑀘𑁆𑀘𑀢𑁆𑀭 𑀯𑀺𑀬 𑀆𑀪𑀺𑀓𑁆𑀔𑀜𑁆𑀜𑁂 𑀯𑀺𑀥𑀻𑀬𑀫𑀸𑀦𑁂𑀦 𑀧𑀘𑁆𑀘𑀬𑁂𑀦𑁂𑀯 𑀆𑀪𑀺𑀓𑁆𑀔𑀜𑁆𑀜𑀢𑁆𑀣𑀲𑁆𑀲 𑀧𑀓𑀸𑀲𑀺𑀢𑀢𑁆𑀢𑀸 𑀦 𑀤𑁆𑀯𑀺𑀩𑁆𑀩𑀘𑀦𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺, 𑀬𑀤𑀸 𑀢𑀼 𑀪𑀼𑀲𑀁 𑀧𑀼𑀦𑀧𑁆𑀧𑀼𑀦𑀁 𑀧𑀘𑀢𑀻𑀢𑀺 𑀯𑀘𑀦𑀺𑀘𑁆𑀙𑀸 𑀢𑀤𑀸𑀧𑀺 𑀧𑀧𑀘𑀢𑀻𑀢𑀺 𑀪𑀯𑀢𑁆𑀬𑁂𑀯.

𑀇𑀳 𑀇𑀫𑀲𑁆𑀫𑀺𑀁 𑀉𑀤𑀸𑀳𑀭𑀡𑁂, 𑀆𑀪𑀺𑀓𑁆𑀔𑀜𑁆𑀜𑁂 𑀇𑀘𑁆𑀘𑁂𑀯𑀸𑀢𑀺 𑀇𑀫𑀺𑀦𑀸 𑀅𑀦𑀼𑀓𑀭𑀡𑀫𑀢𑁆𑀢𑀫𑁂𑀯𑁂𑀢𑀁 𑀦𑀢𑁆𑀣𑁂𑀢𑁆𑀣𑀸𑀪𑀺𑀓𑁆𑀔𑀜𑁆𑀜𑀦𑁆𑀢𑀺 𑀧𑀸𑀡𑀺𑀦𑀺𑀬𑀸 𑀲𑀼𑀢𑁆𑀢𑀦𑁆𑀢𑀭𑁂𑀦 𑀤𑁆𑀯𑀺𑀢𑁆𑀢𑀫𑁆𑀧𑀝𑀺𑀧𑀸𑀤𑁂𑀦𑁆𑀢𑀺, 𑀦𑀢𑁆𑀣𑁂𑀢𑁆𑀣 𑀢𑀸𑀤𑀺𑀲𑁂𑀦 𑀯𑀘𑀦𑁂𑀦 𑀧𑀬𑁄𑀚𑀦𑀁, 𑀆𑀪𑀺𑀓𑁆𑀔𑀜𑁆𑀜𑁂𑀬𑁂𑀯 𑀤𑁆𑀯𑀺𑀩𑁆𑀩𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺, 𑀏𑀯𑀫𑀜𑁆𑀜𑀢𑁂 ‘‘𑀧𑀝𑀇𑀘𑁆𑀘𑁂𑀢𑀫𑀦𑀼𑀓𑀭𑀡𑀁 𑀪𑀯𑀦 𑀓𑀺𑀭𑀺𑀬𑀫𑁆𑀧𑀢𑀺 𑀯𑀢𑁆𑀢𑀢𑀻𑀢𑀺 [𑀪𑀯𑀦𑀓𑀺𑀭𑀺𑀬𑀸𑀫𑀢𑀻 𑀯𑀼𑀢𑁆𑀢𑀻𑀢𑀺 (𑀧𑁄𑀢𑁆𑀣𑀓𑁂)] 𑀓𑀺𑀭𑀺𑀬𑀸𑀥𑀫𑁆𑀫𑀁 𑀧𑁄𑀦𑁄𑀧𑀼𑀜𑁆𑀜𑀫𑁂𑀢𑁆𑀣 𑀅𑀢𑁆𑀣𑁂𑀯𑀸’’𑀢𑀺, 𑀢𑁂𑀦𑁂𑀯 𑀯𑀓𑁆𑀔𑀢𑀺-‘𑀧𑀝𑀧𑀝𑀸 𑀪𑀯𑀢𑀻𑀢𑀺 𑀆𑀪𑀺𑀓𑁆𑀔𑀜𑁆𑀜𑁂 𑀤𑁆𑀯𑀺𑀩𑁆𑀩𑀘𑀦’𑀦𑁆𑀢𑀺, 𑀅𑀦𑀺𑀢𑀺𑀲𑁆𑀫𑀺𑀦𑁆𑀢𑀺 𑀇𑀢𑀺𑀲𑀤𑁆𑀤𑁂 𑀅𑀯𑀺𑀚𑁆𑀚𑀫𑀸𑀦𑁂, 𑀭𑀸𑀧𑁆𑀧𑀘𑁆𑀘𑀬𑁄𑀢𑀺 𑀧𑀞𑀫𑀁 𑀤𑁆𑀯𑀺𑀢𑁆𑀢𑁂 𑀓𑀢𑁂 𑀧𑀘𑁆𑀙𑀸 𑀭𑀸𑀧𑁆𑀧𑀘𑁆𑀘𑀬𑁄, 𑀭𑀸𑀧𑁆𑀧𑀘𑁆𑀘𑀬𑀫𑀓𑀢𑁆𑀯𑀸𑀧𑀺 𑀧𑀓𑀸𑀭𑀦𑁆𑀢𑀭𑁂𑀦 𑀲𑀸𑀥𑁂𑀢𑀼𑀫𑀸𑀳- ‘𑀅𑀣𑀯𑀸’ 𑀇𑀘𑁆𑀘𑀸𑀤𑀺, 𑀤𑀻𑀖𑁄 𑀦𑀺𑀘𑁆𑀘𑀦𑁆𑀢𑀺 𑀧𑀞𑀫𑀁 𑀤𑁆𑀯𑀺𑀢𑁆𑀢𑁂 𑀧𑀝𑀧𑀝𑀓𑀭𑁄𑀢𑀻𑀢𑀺 𑀞𑀺𑀢𑁂 𑀦𑀺𑀘𑁆𑀘𑀁 𑀤𑀻𑀖𑁄, 𑀧𑀝𑀧𑀝𑀸 𑀓𑀭𑁄𑀢𑀻𑀢𑀺 𑀏𑀢𑁆𑀣 𑀦𑀺𑀧𑁆𑀨𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀝𑀧𑀝𑀸𑀬𑀢𑀻𑀢𑀺 𑀏𑀢𑁆𑀣 𑀤𑀲𑁆𑀲𑁂𑀢𑀼𑀁 𑀧𑀝𑀧𑀝𑀸𑀬𑀢𑀻𑀢𑀺𑀆𑀤𑀺 𑀆𑀭𑀤𑁆𑀥𑀁.

𑀏𑀓𑀲𑁆𑀲 𑀏𑀓𑀲𑁆𑀲 𑀇𑀢𑀺 𑀞𑀺𑀢𑁂 𑀧𑀼𑀩𑁆𑀩𑀯𑀺𑀪𑀢𑁆𑀢𑀺𑀬𑀸 𑀮𑀼𑀢𑁆𑀢𑁂 𑀲𑀁𑀳𑀺𑀢𑀸𑀬𑀜𑁆𑀘 𑀓𑀢𑀸𑀬𑀁 𑀏𑀓𑁂𑀓𑀲𑁆𑀲, 𑀏𑀯𑀁 𑀫𑀢𑁆𑀣𑀓𑁂𑀦 𑀫𑀢𑁆𑀣𑀓𑁂𑀦𑀸𑀢𑀺 𑀞𑀺𑀢𑁂 𑀫𑀢𑁆𑀣𑀓 𑀫𑀢𑁆𑀣𑀓𑁂𑀦𑀸𑀢𑀺.

𑀅𑀜𑁆𑀜𑀁 ¶ 𑀅𑀜𑁆𑀜𑀦𑁆𑀢𑀺 𑀞𑀺𑀢𑁂 𑀇𑀫𑀺𑀦𑀸 𑀯𑀺𑀪𑀢𑁆𑀢𑀺𑀬𑀸 𑀮𑁄𑀧𑁂 𑀅𑀓𑀸𑀭𑀲𑁆𑀲 ‘‘𑀢𑀤𑀫𑀺𑀦𑀸’’ (𑁧-𑁪𑁭) 𑀤𑀺𑀦𑀸 𑀑𑀓𑀸𑀭𑁂 𑀅𑀜𑁆𑀜𑁄𑀜𑁆𑀜𑀦𑁆𑀢𑀺𑀧𑀺 𑀳𑁄𑀢𑀺.

𑀬𑀸𑀯𑀩𑁄𑀥𑀦𑁆𑀢𑀺 ‘‘𑀬𑀸𑀯𑀸𑀯𑀥𑀸𑀭𑀡𑁂’’𑀢𑀺 (𑁩-𑁪) 𑀅𑀲𑀗𑁆𑀔𑁆𑀬𑀲𑀫𑀸𑀲𑁄.

𑀓𑁆𑀯𑀘𑀺 𑀧𑀯𑀢𑁆𑀬𑀧𑁆𑀧𑀯𑀢𑁆𑀢𑀺, 𑀓𑁆𑀯𑀘𑀜𑁆𑀜𑀁 𑀓𑁆𑀯𑀘𑀺 𑀯𑀸 𑀓𑁆𑀯𑀘𑀺;

𑀲𑀺𑀬𑀸 𑀩𑀳𑀼𑀮𑀲𑀤𑁆𑀤𑁂𑀦, 𑀯𑀺𑀥𑀺 𑀲𑀩𑁆𑀩𑁄 𑀬𑀣𑀸𑀕𑀫𑀁𑀢𑀺.

𑀇𑀢𑀺 𑀫𑁄𑀕𑁆𑀕𑀮𑁆𑀮𑀸𑀦𑀧𑀜𑁆𑀘𑀺𑀓𑀸𑀝𑀻𑀓𑀸𑀬𑀁 𑀲𑀸𑀭𑀢𑁆𑀣𑀯𑀺𑀮𑀸𑀲𑀺𑀦𑀺𑀬𑀁

𑀅𑀯𑀬𑀯𑀲𑀫𑁆𑀩𑀦𑁆𑀥𑁂𑀢𑀺 𑀲𑁆𑀬𑀸𑀤𑁆𑀬𑀯𑀬𑀯𑀻𑀲𑀫𑀼𑀤𑀸𑀬𑁂𑀦 𑀤𑁆𑀯𑁂𑀤𑁆𑀯𑁂𑀢𑀺 𑀯𑀼𑀢𑁆𑀢𑀸𑀦𑀫𑀯𑀬𑀯𑀸𑀦𑀁 𑀲𑀫𑁆𑀩𑀦𑁆𑀥𑁂, 𑀅𑀢𑁂𑀢𑁆𑀣 𑀯𑀼𑀢𑁆𑀬𑀦𑀼𑀓𑀽𑀮𑀸𑀬 𑀧𑀜𑁆𑀘𑀺𑀓𑀸𑀬 𑀯𑀸 𑀪𑀯𑀺𑀢𑀩𑁆𑀩𑀁, 𑀧𑀜𑁆𑀘𑀺𑀓𑀸𑀦𑀼 𑀓𑀽𑀮𑀸𑀬 𑀯𑀼𑀢𑁆𑀢𑀺𑀬𑀸 𑀯𑀸, 𑀦 𑀘𑁂𑀢𑁆𑀣 𑀤𑁆𑀯𑀺𑀦𑁆𑀦𑀫𑀜𑁆𑀜𑁄𑀜𑁆𑀜𑀸𑀦𑀼𑀓𑀽𑀮𑀢𑀸 𑀤𑀺𑀲𑁆𑀲𑀢𑀺, 𑀢𑀣𑀸𑀳𑀺 𑀯𑀼𑀢𑁆𑀢𑀺𑀬𑀁-‘𑀏𑀓𑀸𑀦𑁂𑀓𑀢𑁆𑀣𑁂𑀲𑀼 𑀯𑀢𑁆𑀢𑀫𑀸𑀦𑀢𑁄 𑀦𑀸𑀫𑀲𑁆𑀫𑀸’𑀢𑀺 𑀏𑀢𑁆𑀢𑀓𑀫𑁂𑀯 𑀧𑀓𑀢𑀺𑀯𑀺𑀲𑁂𑀲𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀧𑀜𑁆𑀘𑀺𑀓𑀸𑀬𑀦𑁆𑀢𑀼 𑀢𑀩𑁆𑀩𑀺𑀲𑁂𑀲𑀦 𑀯𑀲𑁂𑀦 𑀘 𑀧𑀘𑁆𑀘𑀬𑀢𑁆𑀣𑀯𑀺𑀲𑁂𑀲𑀦𑀯𑀲𑁂𑀦 𑀘 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄, 𑀢𑀤𑁂𑀯 𑀫𑀼𑀪𑀺𑀦𑁆𑀦𑀦𑁆𑀦𑀸𑀜𑁆𑀜𑀫𑀜𑁆𑀜𑀸𑀦𑀼𑀓𑀽𑀮𑀢𑀸 𑀤𑀺𑀲𑁆𑀲𑀢𑀺, 𑀢𑀢𑁄 𑀏𑀢𑁆𑀣 𑀬𑀣𑀸 𑀤𑁆𑀯𑀺𑀦𑁆𑀦𑀫𑀜𑁆𑀜𑁄𑀜𑁆𑀜𑀸𑀦𑀼𑀓𑀽𑀮𑀢𑀸 𑀲𑀫𑁆𑀧𑀚𑁆𑀚𑀢𑀺, 𑀢𑀣𑀸 𑀩𑁆𑀬𑀸𑀘𑀺𑀓𑁆𑀔𑀺𑀲𑁆𑀲𑀸𑀫 ‘‘𑀬𑀤𑀺 𑀧𑀦𑁂𑀢𑁆𑀣 𑀯𑀼𑀢𑁆𑀬𑀸𑀦𑀼𑀓𑀽𑀮𑀸 𑀧𑀜𑁆𑀘𑀺𑀓𑀸 𑀪𑀯𑁂𑀬𑁆𑀬 𑀧𑀘𑁆𑀘𑀬𑀢𑁆𑀣𑀧𑀓𑁆𑀔𑁄 𑀚𑀳𑀺𑀢𑀩𑁆𑀩𑁄 𑀲𑀺𑀬𑀸𑀢𑀺 ‘𑀢𑁂…𑀧𑁂… 𑀏𑀓𑀸𑀦𑁂𑀓𑀢𑁆𑀣𑁂𑀲𑀼’𑀢𑀺 𑀘, 𑀢𑁂𑀦…𑀧𑁂… 𑀬𑁄𑀚𑀦𑀺𑀬’𑀦𑁆𑀢𑀺 𑀘 𑀏𑀢𑁂𑀲𑀁 𑀚𑀳𑀺𑀢𑀩𑁆𑀩𑀢𑀸𑀬 𑀩𑀳𑀼𑀧𑀸𑀞𑀯𑀺𑀮𑁄𑀧𑁄 𑀆𑀧𑀚𑁆𑀚𑀢𑀺, 𑀬𑀤𑀺 𑀧𑀦 𑀧𑀜𑁆𑀘𑀺𑀓𑀸𑀦𑀼𑀓𑀽𑀮𑀸 𑀯𑀼𑀢𑁆𑀢𑀺 𑀪𑀯𑁂𑀬𑁆𑀬 𑀯𑀼𑀢𑁆𑀢𑀺𑀬𑀁 𑀓𑀺𑀜𑁆𑀘𑀺𑀫𑀢𑁆𑀢𑀁 𑀧𑀓𑁆𑀔𑀺𑀧𑀺𑀢𑀩𑁆𑀩 𑀫𑀢𑁆𑀢𑀫𑁂𑀯 𑀲𑀺𑀬𑀸𑀢𑀺 𑀩𑀳𑀼𑀯𑀺𑀮𑁄𑀧𑀸𑀧𑀢𑁆𑀢𑀺 (𑀦) 𑀳𑁄𑀢𑀻𑀢𑀺 𑀏𑀢𑁂𑀲𑀁 𑀤𑁆𑀯𑁂𑀤𑁆𑀯𑁂 𑀳𑁄𑀦𑁆𑀢𑀺 𑀏𑀓𑀸𑀦𑁂 𑀓𑀢𑁆𑀣𑁂𑀲𑀼 𑀯𑀢𑁆𑀢𑀫𑀸𑀦𑀢𑁄 𑀦𑀸𑀫𑀲𑁆𑀫𑀸’𑀢𑀺 𑀯𑀼𑀢𑁆𑀢𑀺𑀬𑀸 𑀪𑀯𑀺𑀢𑀩𑁆𑀩’’𑀦𑁆𑀢𑀺, 𑀏𑀯𑀜𑁆𑀳𑀺 𑀲𑀢𑀺 𑀲𑀢𑁆𑀣𑀦𑁆𑀢𑀭𑁂𑀦𑀸𑀧𑀺 𑀲𑀳 𑀖𑀝𑀢𑁂, 𑀲𑀼𑀢𑁆𑀢𑁂 ‘𑀤𑁆𑀯𑁂𑀤𑁆𑀯𑁂𑀓𑀸𑀦𑁂𑀓𑁂𑀲𑀼 𑀦𑀸𑀫𑀲𑁆𑀫𑀸’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘𑀏𑀓𑀸𑀦𑁂𑀓𑁂𑀲𑀽’𑀢𑀺 𑀇𑀤𑀁 𑀧𑀘𑁆𑀘𑀬𑀯𑀺𑀲𑁂𑀲𑀦𑀁 𑀯𑀸 𑀬𑀼𑀚𑁆𑀚𑀢𑀺

𑀧𑀓𑀢𑀺𑀯𑀺𑀲𑁂𑀲𑀦𑀯𑀲𑁂𑀦 ¶ 𑀯𑀸 𑀬𑀤𑁂𑀢𑀁 𑀧𑀘𑁆𑀘𑀬𑀯𑀺𑀲𑁂𑀲𑀦𑀁, 𑀢𑀤𑀸 𑀲𑀸𑀫𑀢𑁆𑀣𑀺𑀬𑀸 𑀏𑀓𑀸𑀦𑁂𑀓𑁂𑀲𑀽𑀢𑀺 𑀧𑀓𑀢𑀺𑀯𑀺𑀲𑁂𑀲𑀦𑀫𑁆𑀧𑀺 𑀮𑀩𑁆𑀪𑀢𑀺, 𑀢𑀢𑁆𑀣 𑀲𑀸𑀫𑀢𑁆𑀣𑀺𑀬𑀫𑀢𑁆𑀣 𑀩𑀮𑀁, 𑀢𑀣𑀸𑀳𑁆𑀬𑁂𑀓𑀸𑀤𑀻𑀲𑀼 𑀪𑀯𑀦𑁆𑀢𑀸 𑀧𑀓𑀢𑀺𑀯𑀸𑀘𑁆𑀘𑀸𑀦𑀫𑁂𑀯𑁂𑀓𑀢𑁆𑀢𑀸𑀤𑀺𑀅𑀩𑁆𑀬𑀢𑀺 𑀭𑀺𑀢𑁆𑀢𑀅𑀢𑁆𑀣𑀫𑀢𑁆𑀢𑀸𑀤𑀻𑀭𑀽𑀧𑀸𑀦𑀁 𑀚𑁄𑀢𑀓𑀸 𑀲𑁆𑀬𑀸𑀤𑀬𑁄 𑀓𑀣𑀫𑁂𑀓𑀢𑁆𑀢𑀸𑀤𑀻𑀲𑀼 𑀯𑀢𑁆𑀢𑀫𑀸𑀦𑀢𑁄 𑀦𑀸𑀫𑀲𑁆𑀫𑀸 𑀅𑀜𑁆𑀜𑀢𑁄 𑀲𑀺𑀬𑀼𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀦𑀸𑀫𑀯𑀺𑀲𑁂𑀲𑀸𑀓𑁆𑀔𑁂𑀧𑁄, 𑀢𑀣𑀸 𑀇𑀢𑁆𑀣𑀺𑀡𑀸𑀤𑀺𑀧𑁆𑀧𑀘𑁆𑀘𑀬𑀸𑀤𑀻𑀦𑀫𑁆𑀧𑀺 𑀧𑀦 𑀧𑀓𑀢𑀺𑀯𑀺𑀲𑁂𑀲𑀸𑀦𑀼𑀧𑀸𑀤𑀸𑀦𑁂𑀧𑀺 𑀬𑀢𑁄 𑀥𑀸𑀢𑁆𑀯𑀸𑀤𑀺 𑀯𑀸𑀘𑁆𑀘𑁄𑀢𑁆𑀣𑁄 𑀦𑀢𑁆𑀣𑀺, 𑀲𑀸𑀫𑀢𑁆𑀣𑀺𑀬𑀸 𑀢𑀢𑁄, 𑀥𑀸𑀢𑀼𑀢𑁆𑀬𑀸𑀤𑁆𑀬𑀦𑁆𑀢𑁂𑀳𑀺 [𑀢𑁆𑀬𑀸𑀤𑁆𑀬𑀦𑁆𑀢 𑀯𑀸𑀘𑁆𑀘𑁂𑀳𑀺 (𑀧𑁄𑀢𑁆𑀣𑀓𑁂)] 𑀦 𑀳𑁄𑀦𑁆𑀢𑁂 𑀯𑀺𑀢𑁆𑀢𑀺𑀧𑀘𑁆𑀘𑀬𑀸, 𑀢𑀣𑀸 𑀡𑀸𑀤𑀺𑀧𑀘𑁆𑀘𑀬𑀸𑀧𑀺… 𑀯𑀺𑀪𑀢𑁆𑀬𑀦𑁆𑀢𑀸 𑀯𑀺𑀥𑀸𑀦𑀢𑁄, 𑀬𑀤𑁂𑀢𑀫𑁆𑀧𑀓𑀢𑀺𑀯𑀺𑀲𑁂𑀲𑀦𑀁 𑀢𑀤𑀸𑀧𑀺 𑀲𑀸𑀫𑀢𑁆𑀣𑀺𑀬𑁂𑀦𑁂𑀯 𑀏𑀓𑀢𑁆𑀢𑀸𑀤𑀻𑀲𑀼 𑀯𑀢𑁆𑀢𑀫𑀸𑀦𑀢𑁄 𑀦𑀸𑀫𑀲𑁆𑀫𑀸 𑀢𑀚𑁆𑀚𑁄𑀢𑀦𑀸𑀬 𑀪𑀯𑀦𑁆𑀢𑀸 𑀲𑁆𑀬𑀸𑀤𑀬𑁄 𑀓𑀣𑀫𑀜𑁆𑀜𑀢𑁆𑀣 𑀳𑁄𑀦𑁆𑀢𑀺 𑀅𑀲𑀫𑁆𑀪𑀯𑀸𑀢𑀺 𑀏𑀓𑀸𑀦𑁂𑀓𑁂𑀲𑀼 𑀤𑁆𑀯𑁂𑀤𑁆𑀯𑁂𑀢𑀺 𑀮𑀩𑁆𑀪𑀢𑀺, 𑀅𑀣𑀯𑀸 𑀲𑀭𑀽𑀧𑁂𑀦 𑀅𑀯𑀼𑀢𑁆𑀢𑀫𑁆𑀧𑀺 𑀲𑀸𑀫𑀢𑁆𑀣𑀺𑀬𑁂𑀦𑁂𑀓𑀸𑀦𑁂𑀓𑀢𑁆𑀣𑁂𑀲𑀽𑀢𑀺 𑀕𑀫𑁆𑀫𑀫𑀸𑀦𑀁 𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀓𑀢𑁆𑀯𑀸‘𑀢𑁂𑀘𑀸’𑀢𑀺𑀆𑀤𑀺𑀓𑀁 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, 𑀏𑀓𑀸𑀦𑁂𑀓𑁂𑀲𑀼 𑀯𑀢𑁆𑀢𑀫𑀸𑀦𑀢𑁄 𑀦𑀸𑀫𑀲𑁆𑀫𑀸𑀢𑀺 𑀓𑀺𑀫𑀢𑁆𑀣𑀁 𑀅𑀲𑀢𑁆𑀯𑀪𑀽𑀢𑀸𑀬 𑀓𑀺𑀭𑀺𑀬𑀸𑀬𑁂𑀓𑀢𑁆𑀢𑀸𑀤𑀺𑀲𑀫𑁆𑀩𑀦𑁆𑀥𑀸𑀪𑀸𑀯𑀸 𑀓𑁆𑀭𑀺𑀬𑀢𑁆𑀣𑀸𑀘 𑀢𑁆𑀬𑀸𑀤𑀻𑀳𑀺 𑀬𑁂𑀯𑁂𑀓𑀢𑁆𑀢𑀸𑀤𑀻𑀦𑀁 𑀯𑀼𑀢𑁆𑀢𑀢𑁆𑀢𑀸 𑀢𑁆𑀬𑀸𑀤𑁆𑀬𑀦𑁆𑀢𑁂𑀳𑀺 𑀘 𑀦 𑀪𑀯𑁂𑀬𑁆𑀬𑀼𑀦𑁆𑀢𑀺 𑀧𑀬𑁄𑀚𑀦𑀦𑁆𑀢𑀭𑀫𑀸𑀳-‘𑀬𑀫𑁆𑀧𑀦𑀸’𑀢𑀺𑀆𑀤𑀺, 𑀧𑀜𑁆𑀘𑀓𑀦𑀸𑀫𑀢𑁆𑀣𑀲𑁆𑀲𑀸𑀥𑀺𑀧𑁆𑀧𑁂𑀢𑀪𑀸𑀯𑁄 𑀘𑁂𑀢𑁆𑀣 𑀧𑀓𑁆𑀔𑀲𑁆𑀲𑁂𑀢𑀲𑁆𑀲𑁂𑀯 𑀬𑀼𑀢𑁆𑀢𑀢𑁆𑀢𑀸. 𑀢𑀣𑀸𑀳𑀺 𑀲𑀗𑁆𑀔𑁆𑀬𑀸𑀓𑀫𑁆𑀫𑀸𑀤𑀬𑁄 𑀦𑀸𑀫 𑀯𑀸𑀘𑁆𑀘𑀲𑁆𑀲 𑀤𑀩𑁆𑀩𑀲𑁆𑀲 𑀥𑀫𑁆𑀫𑁄 𑀲𑀓𑀢𑁆𑀣𑁄-𑀧𑀲𑀚𑁆𑀚𑀦𑁄 𑀘 𑀲𑀤𑁆𑀤𑁄 𑀤𑀩𑁆𑀩𑁂𑀬𑁂𑀯 𑀯𑀢𑁆𑀢𑀢𑁂… 𑀤𑀩𑁆𑀩𑁂𑀬𑁂𑀯𑀸𑀦𑁆𑀬𑀦𑀬𑀸𑀤𑀺𑀯𑁄𑀳𑀸𑀭𑀸, 𑀢𑀢𑁆𑀣 𑀤𑀩𑁆𑀩𑀯𑀸𑀘𑀺𑀦𑀸 𑀲𑀤𑁆𑀤𑁂𑀦 𑀤𑀩𑁆𑀩𑀥𑀫𑁆𑀫𑀸𑀦𑀫𑀩𑁆𑀪𑀦𑁆𑀢𑀭𑀻𑀓𑀭𑀡𑀦𑁆𑀢𑀺 𑀦𑀸𑀬𑀼𑀢𑁆𑀢𑀫𑁂𑀢𑀁 𑀦𑀸𑀫𑁂𑀦 𑀧𑀜𑁆𑀘𑀦𑁆𑀦𑀫𑀪𑀺𑀥𑀸𑀦𑀁, 𑀯𑀺𑀪𑀢𑁆𑀢𑀺𑀬𑁄 𑀧𑀦 𑀚𑁄𑀢𑀺𑀓𑀸, 𑀇𑀢𑁆𑀣𑀺𑀧𑀘𑁆𑀘𑀬𑀸 𑀘 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲, 𑀢𑀣𑀸 𑀘𑀸𑀫𑁆𑀳𑁂𑀳𑀺 𑀯𑀼𑀢𑁆𑀢𑀁 𑀲𑀫𑁆𑀩𑀦𑁆𑀥𑀘𑀺𑀦𑁆𑀢𑀸𑀬𑀁𑁋

𑀲𑀤𑁆𑀤𑁄 𑀲𑀓𑀢𑁆𑀣𑀁 𑀯𑀢𑁆𑀯𑀸𑀦, 𑀧𑀤𑀢𑁆𑀣𑀁 𑀤𑀩𑁆𑀩𑀲𑀜𑁆𑀜𑀺𑀢𑀁;

𑀲𑀫𑀯𑁂𑀢𑀁 𑀯𑀤𑁂 𑀮𑀺𑀗𑁆𑀕𑀁, 𑀲𑀗𑁆𑀔𑁆𑀬𑀁 𑀓𑀫𑁆𑀫𑀸𑀤𑀺𑀓𑀫𑁆𑀫𑀺 𑀘𑁂𑀢𑀺.

𑀏𑀓𑀸𑀦𑁂𑀓𑁂𑀲𑀼 𑀲𑁆𑀬𑀸𑀤𑀻𑀦𑀁 𑀬𑀣𑀸𑀓𑁆𑀓𑀫𑀁 𑀤𑀲𑁆𑀲𑁂𑀢𑀼𑀁 ‘𑀢𑁂𑀦𑀸’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑁂𑀦𑀸𑀢𑀺 𑀬𑁂𑀦 𑀧𑀜𑁆𑀘𑀓𑁄 𑀦𑀸𑀫𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄 𑀏𑀓𑀸𑀤𑀻𑀲𑀼 𑀘 𑀅𑀢𑁆𑀣𑁂𑀲𑀼 𑀚𑁄-𑀢𑀦𑀻𑀬𑁂𑀲𑀼 𑀲𑁆𑀬𑀸𑀤𑀬𑁄 𑀯𑀺𑀥𑀺𑀬𑀺𑀲𑁆𑀲𑀦𑁆𑀢𑀺 𑀢𑁂𑀦, 𑀲𑀩𑁆𑀩𑀢𑁆𑀣𑀸𑀢𑀺 ‘𑀅𑀁𑀬𑁄’𑀆𑀤𑀻𑀲𑀼 ¶ 𑀲𑀩𑁆𑀩𑀢𑁆𑀣, 𑀲𑀪𑀸𑀯𑀢𑁄𑀢𑁆𑀬𑀸𑀤𑀺𑀓𑀲𑁆𑀲𑀸𑀬𑀫𑀥𑀺𑀧𑁆𑀧𑀸𑀬𑁄 ‘‘𑀬𑀤𑁆𑀬𑀧𑀺 𑀲𑁆𑀬𑀸𑀤𑀬𑁄 𑀏𑀓𑀸𑀦𑁂𑀓𑁂𑀲𑀼 𑀳𑁄𑀦𑁆𑀢𑀺 𑀢𑀣𑀸𑀧𑀺 𑀏𑀓𑀸𑀤𑀬𑁄 𑀲𑀗𑁆𑀔𑁆𑀬𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑁂 𑀅𑀢𑁆𑀣𑁂 𑀯𑀢𑁆𑀢𑀦𑁆𑀢𑀺 𑀦 𑀲𑀗𑁆𑀔𑁆𑀬𑀸𑀫𑀢𑁆𑀢𑁂, 𑀲𑀗𑁆𑀔𑁆𑀬𑀸𑀬 𑀲𑀫𑁆𑀪𑀯𑀸𑀪𑀸𑀯𑀸 𑀲𑀗𑁆𑀔𑁆𑀬𑁂𑀬𑁂 𑀪𑀯𑀢𑀻𑀢𑀺 𑀦 𑀲𑀗𑁆𑀔𑁆𑀬𑀸𑀧𑀺 𑀲𑁆𑀬𑀸𑀤𑀻𑀦𑀫𑀢𑁆𑀣𑁄’’𑀢𑀺 (𑀦) 𑀓𑁂𑀯𑀮𑀁 𑀲𑀓𑀢𑁆𑀣 𑀤𑀩𑁆𑀩𑀸𑀤𑀺𑀬𑁂𑀯 𑀲𑁆𑀬𑀸𑀤𑀻𑀦𑀫𑀢𑁆𑀣𑁄 𑀦 𑀪𑀯𑀢𑀺, 𑀅𑀧𑀺 𑀢𑀼 𑀲𑀗𑁆𑀔𑁆𑀬𑀸𑀧𑀻𑀢𑁆𑀬𑀧𑀺𑀲𑀤𑁆𑀤𑀢𑁆𑀣𑁄, 𑀅𑀦𑁂𑀦 𑀲𑀗𑁆𑀔𑁆𑀬𑀸 𑀯𑀺𑀪𑀢𑁆𑀬𑀢𑁆𑀣𑁄 𑀘𑀢𑀼𑀓𑁆𑀓𑁄 𑀦𑀸𑀫𑀢𑁆𑀣𑁄𑀢𑁆𑀬𑀬𑀫𑁆𑀧𑀓𑁆𑀔𑁄 𑀦𑀺𑀭𑀸𑀓𑀢𑁄 𑀧𑀜𑁆𑀘𑀓𑁄 𑀦𑀸𑀫𑀢𑁆𑀣𑁄𑀢𑀺 𑀤𑀲𑁆𑀲𑀦𑁂 𑀲𑀗𑁆𑀔𑁆𑀬𑀸𑀓𑀫𑁆𑀫𑀸𑀤𑀻𑀦𑀁 𑀯𑀺𑀪𑀢𑁆𑀢𑀺𑀬𑁄 𑀚𑁄𑀢𑀺𑀓𑀸 𑀳𑁄𑀦𑁆𑀢𑀺, 𑀢𑀺𑀓𑁄 𑀦𑀸𑀫𑀢𑁆𑀣𑁄𑀢𑀺 𑀤𑀲𑁆𑀲𑀦𑁂 𑀢𑀼 𑀲𑀗𑁆𑀔𑁆𑀬𑀸𑀓𑀫𑁆𑀫𑀸𑀤𑀬𑁄 𑀯𑀺𑀪𑀢𑁆𑀢𑀺𑀯𑀸𑀘𑁆𑀘𑀸 𑀳𑁄𑀦𑁆𑀢𑀺, 𑀇𑀤𑀸𑀦𑀺 𑀅𑀥𑀺𑀧𑁆𑀧𑁂𑀢𑀧𑀜𑁆𑀘𑀓𑀦𑀸𑀫𑀢𑁆𑀣𑁂 𑀲𑀓𑀢𑁆𑀣𑀸𑀤𑀺𑀓𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘𑀢𑀢𑁆𑀣𑀸’𑀢𑀺𑀆𑀤𑀺𑀫𑀸𑀳, 𑀢𑀢𑁆𑀣 𑀲𑀓𑀢𑁆𑀣𑁄 𑀯𑀺𑀲𑁂𑀲𑀦𑀦𑁆𑀢𑀺 𑀲𑀭𑀽𑀧𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀯𑀺𑀲𑁂𑀲𑀦𑀢𑁆𑀢𑁂𑀦 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀁 𑀢𑀁 𑀲𑀓𑀢𑁆𑀣𑁄 𑀦𑀸𑀫𑀢𑀺 𑀅𑀢𑁆𑀣𑁄, 𑀢𑀁 𑀤𑀲𑁆𑀲𑁂𑀢𑀺 ‘𑀲𑀭𑀽𑀧𑀚𑀸𑀢𑀺𑀕𑀼𑀡𑀤𑀩𑁆𑀩𑀸𑀦𑀺’𑀢𑀺.

𑀩𑀮𑁂𑀦 𑀬𑀲𑁆𑀲𑀸 𑀪𑀺𑀦𑁆𑀦𑁂𑀲𑀼, 𑀧𑀯𑀢𑁆𑀢𑀦𑁆𑀢𑁂 𑀕𑀕𑀸𑀤𑀻𑀲𑀼;

𑀲𑀸 𑀚𑀸𑀢𑁆𑀬𑀪𑀺𑀦𑁆𑀦𑀥𑀻𑀲𑀤𑁆𑀤𑀸, 𑀲𑀼𑀢𑁆𑀢𑀁 𑀧𑀼𑀧𑁆𑀨𑁂𑀲𑁆𑀯𑀺𑀯𑀸𑀦𑁆𑀯𑀻𑀢𑀁.

𑀤𑀩𑁆𑀩𑀸𑀥𑀸𑀭𑁄 𑀢𑀢𑁄 𑀪𑀺𑀦𑁆𑀦𑁄, 𑀦𑀺𑀫𑀺𑀢𑁆𑀢𑀁 𑀢𑀧𑁆𑀧𑀢𑀻𑀢𑀺𑀬𑀸;

𑀪𑀸𑀯𑀸𑀪𑀸𑀯𑀲𑀪𑀸𑀯𑁄 𑀬𑁄, 𑀲𑁄 𑀕𑀼𑀡𑁄 𑀦𑀺𑀕𑁆𑀕𑀼𑀡𑁄 𑀫𑀢𑁄.

𑀲𑀭𑀽𑀧𑀁 𑀲𑀤𑁆𑀤𑀭𑀽𑀧𑀁𑀯, 𑀚𑀸𑀢𑀺𑀬𑀸 𑀬𑀁 𑀯𑀺𑀲𑁂𑀲𑀦𑀁;

𑀯𑀺𑀲𑁂𑀲𑀻𑀬𑀢𑀺 𑀬𑀁𑀓𑀺𑀜𑁆𑀘𑀺, 𑀤𑀩𑁆𑀩𑀁 𑀢𑀁 𑀲𑀫𑀼𑀤𑀻𑀭𑀺𑀢𑀁.

𑀇𑀤𑀸𑀦𑀺 𑀲𑀭𑀽𑀧𑀸𑀤𑀺𑀦𑁄 𑀯𑀺𑀲𑁂𑀲𑀦𑀲𑁆𑀲 𑀲𑀓𑀢𑁆𑀣𑀪𑀸𑀯𑀁 𑀚𑀸𑀢𑁆𑀬𑀸𑀤𑀺𑀯𑀺𑀲𑁂𑀲𑀲𑁆𑀲 𑀤𑀩𑁆𑀩𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀼𑀁 ‘𑀢𑀢𑁆𑀣𑀸’𑀢𑀺𑀆𑀤𑀺𑀫𑀸𑀳, 𑀲𑀭𑀽𑀧𑁂 𑀯𑀢𑁆𑀢𑀢𑁂 𑀲𑀤𑁆𑀤𑁄𑀢𑀺 𑀯𑀺𑀬𑀪𑁂𑀤𑁄𑀧𑀘𑀸𑀭𑁂𑀦𑀸𑀳-‘𑀲𑀤𑁆𑀤𑀲𑁆𑀲 𑀲𑀭𑀽𑀧𑁂𑀦𑀸’𑀢𑀺, 𑀏𑀢𑁆𑀣 𑀧𑀦 𑀕𑁄𑀢𑀺 𑀚𑀸𑀢𑀺𑀫𑀢𑁆𑀢𑀯𑀸𑀘𑀺𑀦𑀺 𑀕𑁄𑀲𑀤𑁆𑀤𑁂 𑀧𑀬𑀼𑀢𑁆𑀢𑁂 𑀕𑁄𑀲𑀤𑁆𑀤𑁄 𑀚𑀸𑀢𑀺𑀫𑀢𑁆𑀢𑀫𑀸𑀳𑁂𑀢𑀺 𑀲𑁄 𑀚𑀸𑀢𑀺𑀁 𑀯𑀺𑀲𑁂𑀲𑁂𑀢𑀺 𑀦𑀸𑀫. 𑀬𑀝𑁆𑀞𑀺𑀆𑀤𑀺𑀲𑀤𑁆𑀤𑁂𑀳𑀺 𑀬𑀝𑁆𑀞𑀺𑀆𑀤𑀺𑀲𑀳𑀘𑀭𑀺𑀢𑀸 𑀉𑀧𑀘𑀸𑀭𑀢𑁄 𑀕𑀳𑀺𑀢𑀸𑀢𑀺 𑀬𑀝𑁆𑀞𑀺𑀆𑀤𑀺𑀤𑀩𑁆𑀩𑁂𑀳𑀺 𑀬𑀝𑁆𑀞𑀺𑀆𑀤𑀺𑀲𑀳𑀘𑀭𑀺𑀢𑀸 𑀧𑀼𑀭𑀺𑀲𑀸 𑀯𑀺𑀲𑁂𑀲𑀻𑀬𑀦𑁆𑀢𑀻𑀢𑀺 𑀆𑀳-‘𑀤𑀩𑁆𑀩𑀫𑁆𑀧𑀺 𑀤𑀩𑁆𑀩𑀦𑁆𑀢𑀭𑀲𑁆𑀲 𑀯𑀺𑀲𑁂𑀲𑀦𑀪𑀽𑀢𑀫𑁆𑀪𑀯𑀢𑀻’𑀢𑀺, 𑀬𑀝𑁆𑀞𑀺𑀬𑁄𑀧𑀯𑁂𑀲𑀬𑀸𑀢𑀺 𑀬𑀝𑁆𑀞𑀺𑀲𑀤𑁆𑀤𑀯𑀘𑀦𑀻𑀬 𑀬𑀝𑁆𑀞𑀺𑀤𑀩𑁆𑀩𑀯𑀺𑀲𑀺𑀝𑁆𑀞𑁂 𑀧𑀼𑀭𑀺𑀲𑁂 𑀧𑀯𑁂𑀲𑀬𑀸𑀢𑀺 𑀅𑀢𑁆𑀣𑁄, 𑀓𑀼𑀦𑁆𑀢𑁂𑀧𑀯𑁂𑀲𑀬𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯𑀦𑀬𑁄, 𑀬𑀣𑀸𑀯𑀼𑀢𑁆𑀢𑀘𑀢𑀼𑀩𑁆𑀩𑀺𑀥𑀲𑀓𑀢𑁆𑀣𑀢𑁄 𑀧𑀭𑁄𑀧𑀺 𑀅𑀢𑁆𑀣𑀺 𑀲𑀓𑀢𑁆𑀣𑁄𑀢𑀺 𑀆𑀳-‘𑀓𑀢𑁆𑀣𑀘𑀻’𑀢𑀺𑀆𑀤𑀺, 𑀲𑀫𑁆𑀩𑀦𑁆𑀥𑀦𑀺𑀫𑀺𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄 𑀦𑀺𑀫𑀺𑀢𑁆𑀢𑀁 𑀓𑀸𑀭𑀡𑀁 ¶ 𑀧𑀘𑁆𑀘𑀬𑀧𑁆𑀧𑀯𑀢𑁆𑀢𑀺𑀬𑀸 𑀅𑀲𑁆𑀲 𑀧𑀘𑁆𑀘𑀬𑀲𑁆𑀲 𑀲𑁄𑀢𑀺 𑀲𑀫𑀸𑀲𑁄, 𑀏𑀢𑁆𑀣 𑀳𑀺 𑀤𑀡𑁆𑀟𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀅𑀲𑁆𑀲𑀸𑀢𑀺 𑀲𑀸𑀫𑀺𑀦𑁄 𑀧𑀼𑀭𑀺𑀲𑀲𑁆𑀲 𑀲𑀁𑀲𑀗𑁆𑀔𑀸𑀢𑀤𑀡𑁆𑀟𑀸𑀤𑀺𑀤𑀩𑁆𑀩𑁂𑀦 𑀲𑀳𑀬𑁄 𑀲𑀲𑁆𑀲𑀸𑀫𑀺𑀲𑀫𑁆𑀩𑀦𑁆𑀥𑁄, 𑀲𑁄𑀧𑀺 𑀧𑀘𑁆𑀘𑀬𑀲𑁆𑀲 𑀦𑀺𑀫𑀺𑀢𑁆𑀢𑀁, 𑀢𑀣𑀸 𑀘 𑀯𑀓𑁆𑀔𑀢𑀺-‘𑀤𑀡𑁆𑀟𑀧𑀼𑀭𑀺𑀲𑀲𑀫𑁆𑀩𑀦𑁆𑀥𑀸 𑀤𑀡𑁆𑀟𑀻𑀢𑀺 𑀧𑀘𑁆𑀘𑀬𑁄’𑀢𑀺, (𑀓𑀺𑀭𑀺)𑀬𑀸 𑀧𑀤𑀢𑁆𑀣𑀲𑁆𑀲𑀸𑀧𑀺 𑀯𑀺𑀲𑁂𑀲𑀦𑀢𑁆𑀢𑁂𑀦 𑀲𑀓𑀢𑁆𑀣𑀪𑀸𑀯𑁄 𑀚𑀸𑀢𑀺𑀧𑀤𑀢𑁆𑀣𑀸𑀤𑀻𑀦𑀁 𑀯𑀼𑀢𑁆𑀢 𑀞𑀸𑀦𑁂𑀬𑁂𑀯 𑀯𑀢𑁆𑀢𑀩𑁆𑀩𑁄𑀢𑀺 𑀧𑀸𑀘𑀓𑁄𑀢𑀺 𑀏𑀢𑁆𑀣 𑀓𑀺𑀭𑀺𑀬𑀸𑀓𑀸𑀭𑀓𑀲𑀫𑁆𑀩𑀦𑁆𑀥𑀲𑀗𑁆𑀔𑀸𑀢𑀁 𑀧𑀭𑀸𑀪𑀺𑀫𑀢𑀁 𑀲𑀓𑀢𑁆𑀣𑀫𑁆𑀧𑀺 𑀧𑀭𑁄𑀧𑀤𑁂𑀲𑁂𑀦𑁄𑀧𑀤𑀺𑀲𑀺𑀢𑀼𑀓𑀸𑀫𑁄 𑀇𑀥 𑀲𑀫𑁆𑀩𑀦𑁆𑀥𑀲𑀓𑀢𑁆𑀣𑀲𑁆𑀲 𑀯𑀼𑀢𑁆𑀢𑀝𑁆𑀞𑀸𑀦𑁂𑀬𑁂𑀯 𑀓𑀺𑀭𑀺𑀬𑀸𑀲𑀓𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘𑀓𑀢𑁆𑀣𑀘𑀺 𑀓𑀺𑀭𑀺𑀬𑀸𑀧𑀻’𑀢𑀺𑀆𑀤𑀺𑀫𑀸𑀳. 𑀦𑀸𑀫𑀲𑀪𑀸𑀯𑁂𑀦 𑀯𑀺𑀜𑁆𑀜𑀸𑀬𑀫𑀸𑀦𑀁 𑀧𑀜𑁆𑀘𑀫𑀁 𑀦𑀸𑀫𑀲𑀗𑁆𑀔𑀸𑀢𑀫𑀢𑁆𑀣𑀁 𑀤𑀩𑁆𑀩𑀧𑀤𑀢𑁆𑀣𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀚𑀸𑀢𑀺𑀕𑀼𑀡𑀓𑀺𑀭𑀺𑀬𑀸𑀤𑀩𑁆𑀩𑀸𑀦𑀻𑀢𑀺 𑀳𑀺 𑀘𑀢𑀼𑀩𑁆𑀩𑀺𑀥𑁄 𑀦𑀸𑀫𑀢𑁆𑀣𑁄, 𑀦𑀸𑀫𑀫𑁆𑀧𑀺 𑀅𑀦𑁆𑀯𑀢𑁆𑀣𑀭𑀼𑀴𑁆𑀳𑀺𑀯𑀲𑁂𑀦 𑀤𑀼𑀯𑀺𑀥𑀁 𑀧𑀼𑀫𑀺𑀢𑁆𑀣𑀺𑀦𑀧𑀼𑀁𑀲𑀓 𑀮𑀺𑀗𑁆𑀕𑀯𑀲𑁂𑀦 𑀢𑀺𑀯𑀺𑀥𑀫𑁆𑀧𑀺 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺… 𑀬𑀣𑀸𑀯𑀼𑀢𑁆𑀢𑁂 𑀘𑀢𑀼𑀩𑁆𑀩𑀺𑀥𑁂 𑀅𑀢𑁆𑀣𑁂 𑀦𑀫𑀢𑀺, 𑀢𑁂 𑀯𑀸 𑀅𑀢𑁆𑀢𑀦𑀺 𑀦𑀸𑀫𑁂𑀢𑀻𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦. 𑀲𑀸𑀫𑀜𑁆𑀜𑀕𑀼𑀡 𑀓𑀺𑀭𑀺𑀬𑀸𑀬𑀤𑀺𑀘𑁆𑀙𑀸𑀯𑀲𑁂𑀦𑀸𑀜𑁆𑀜𑀣𑀸𑀧𑀺 𑀘𑀢𑀼𑀩𑁆𑀩𑀺𑀥𑀢𑁆𑀢𑀁 𑀦𑀸𑀫𑀲𑁆𑀲 𑀯𑀤𑀦𑁆𑀢𑀺, 𑀢𑀢𑁆𑀣𑀸𑀧𑀺 𑀬𑀤𑀺𑀘𑁆𑀙𑀸𑀦𑀸𑀫𑀲𑁆𑀲 𑀤𑀩𑁆𑀩𑀦𑀸𑀫𑁂𑀦𑁂𑀯 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄, 𑀇𑀢𑁆𑀣𑀢𑁆𑀢𑀁 𑀏𑀲𑀸𑀢𑀺 𑀧𑀲𑀺𑀤𑁆𑀥𑀺𑀫𑀸 𑀅𑀢𑁆𑀣𑁄, 𑀬𑀫𑁆𑀧𑀦𑀸𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀸𑀥𑁂𑀢𑀺 ‘𑀢𑀢𑁆𑀣𑁂’𑀘𑁆𑀘𑀸𑀤𑀺𑀦𑀸, 𑀅𑀪𑀺𑀥𑀸𑀬𑀓𑀢𑁆𑀢𑁂𑀦 𑀚𑁄𑀢𑀓𑀢𑁆𑀢𑁂𑀦, 𑀇𑀓𑀸𑀭𑀦𑁆𑀢𑀢𑁄𑀢𑀺 𑀫𑀼𑀦𑀺𑀲𑀤𑁆𑀤𑀢𑁄, 𑀅𑀜𑁆𑀜𑀣𑀸𑀢𑀺 𑀇𑀓𑀸𑀭𑀦𑁆𑀢𑀢𑁄 𑀦 𑀪𑀯𑀢𑀺 𑀘𑁂, 𑀅𑀢𑁄𑀢𑀺 𑀆𑀤𑁂𑀲 𑀪𑀯𑀦𑀢𑁄 𑀨𑀮𑀁 𑀤𑀲𑁆𑀲𑀺𑀢𑀁 𑀦 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀯𑀼𑀢𑁆𑀢𑀺𑀬𑀁 ‘𑀏𑀯𑀁 𑀓𑀼𑀫𑀸𑀭𑀻 𑀓𑀼𑀫𑀸𑀭𑀺𑀬𑁄’𑀢𑀺𑀆𑀤𑀻𑀲𑀼 𑀏𑀯𑀦𑁆𑀢𑀺 𑀬𑀣𑀸 𑀧𑀼𑀮𑁆𑀮𑀺𑀗𑁆𑀕𑁂 𑀇𑀓𑀸𑀭𑀦𑁆𑀢𑀢𑁄 𑀲𑁆𑀬𑀸𑀤𑀻𑀦𑀫𑀼𑀤𑀸𑀳𑀭𑀡𑀫𑀦𑀸𑀤𑁂𑀲𑀢𑁆𑀣𑀁 𑀯𑀼𑀢𑁆𑀢𑀁 𑀏𑀯𑀫𑀺𑀢𑁆𑀣𑀺𑀬𑀫𑁆𑀧𑀺 𑀅𑀦𑀸𑀓𑀸𑀭𑀦𑁆𑀢𑀢𑁄𑀢𑀺 𑀤𑀲𑁆𑀲𑁂𑀢𑀺, 𑀉𑀧𑀮𑀓𑁆𑀔𑀡𑀁 𑀘𑁂𑀢𑀫𑀺𑀦𑀻-𑀦𑀻-𑀊-𑀢𑀺-𑀧𑀘𑁆𑀘𑀬𑀦𑁆𑀢𑀸𑀤𑀻𑀦𑀁, 𑀅𑀲𑀢𑀺…𑀧𑁂… 𑀯𑀘𑀦𑁂𑀢𑀺 𑀇𑀫𑀺𑀦𑀸 𑀧𑀸𑀡𑀺𑀦𑀺𑀬𑀸𑀦𑀁 𑀯𑀺𑀪𑀢𑁆𑀢𑀺𑀲𑀜𑁆𑀜𑀸𑀯𑀺𑀥𑀸𑀬𑀓𑀲𑁆𑀲 𑀲𑀼𑀢𑁆𑀢𑀦𑁆𑀢𑀭𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀤𑀲𑁆𑀲𑁂𑀢𑀺, ‘‘𑀯𑀺𑀪𑀢𑁆𑀢𑀺𑀘’’ (𑁧-𑁪-𑁧𑁦𑁪) 𑀇𑀢𑀺 𑀳𑀺 𑀢𑁂𑀲𑀁 𑀲𑀼𑀢𑁆𑀢𑀁, 𑀢𑀲𑁆𑀲𑀢𑁆𑀣𑁄 ‘𑀲𑁆𑀬𑀸𑀤𑀻𑀦𑀁 𑀢𑁆𑀬𑀸𑀤𑀻𑀦𑀜𑁆𑀘 𑀯𑀺𑀪𑀢𑁆𑀢𑀺𑀲𑀜𑁆𑀜𑀸 𑀳𑁄𑀢𑀻’𑀢𑀺, 𑀪𑀯𑀦𑁆𑀢𑀻𑀢𑀺 𑀅𑀦𑁆𑀯𑀢𑁆𑀣𑀯𑀲𑁂𑀦 𑀯𑀺𑀪𑀢𑁆𑀢𑀺𑀲𑀤𑁆𑀤𑀯𑀘𑀦𑀻𑀬𑀸𑀦𑀺 𑀪𑀯𑀦𑁆𑀢𑀺, 𑀲𑁄 (𑀬𑁂𑀯𑀢𑁆𑀣𑁄) 𑀯𑀺𑀪𑀢𑁆𑀢𑀺𑀘𑁆𑀘𑀦𑁂𑀦 𑀯𑀺𑀪𑀚𑀻𑀬𑀢𑀻𑀢𑀺 𑀯𑀺𑀪𑀢𑁆𑀢𑀺, 𑀓𑀫𑁆𑀫𑁂 𑀓𑁆𑀢𑀺𑀧𑁆𑀧𑀘𑁆𑀘𑀬𑀦𑁆𑀢𑁄𑀬𑀁 𑀯𑀺𑀪𑀢𑁆𑀢𑀺 𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀢𑀺, 𑀓𑀣𑀫𑁆𑀧𑀦𑁂𑀢𑁂𑀲𑀼 𑀲𑁆𑀬𑀸𑀤𑀻𑀲𑀼 𑀯𑀺𑀪𑀚𑀻𑀬𑀢𑀺𑀘𑁆𑀘𑀲𑁆𑀲 𑀯𑀸𑀓𑁆𑀬𑀢𑁆𑀣𑀸𑀲𑁆𑀲𑀸𑀦𑀼𑀕𑀫𑁄 𑀬𑁂𑀦𑁂𑀯𑀁 𑀯𑀼𑀘𑁆𑀘𑀢𑀺𑀘𑁆𑀘𑀸𑀲𑀗𑁆𑀓𑀺𑀬 𑀬𑁂𑀦 𑀬𑀣𑀸 𑀘 𑀯𑀺𑀪𑀚𑀻𑀬𑀢𑀺 𑀢𑀫𑀼𑀧𑀤𑀲𑁆𑀲𑁂𑀦𑁆𑀢𑁄 𑀆𑀳-‘𑀢𑀣𑀸 𑀳𑀺’𑀘𑁆𑀘𑀸𑀤𑀺.

𑀯𑀼𑀢𑁆𑀢𑀺𑀬𑀁 ¶ 𑀓𑀢𑁆𑀢𑀼𑀓𑀺𑀭𑀺𑀬𑀸𑀬𑀸𑀢𑀺 𑀓𑀢𑁆𑀢𑀼𑀲𑀸𑀤𑁆𑀬𑀢𑀸𑀬 𑀢𑀁 𑀲𑀫𑁆𑀩𑀦𑁆𑀥𑀺𑀦𑀺𑀬𑀸 𑀓𑀢𑁆𑀢𑀼𑀓𑀫𑁆𑀫𑀝𑁆𑀞𑀸𑀬𑀧𑀺 𑀤𑀼𑀯𑀺𑀥𑀸𑀬 𑀓𑀺𑀭𑀺𑀬𑀸𑀬, 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀁 𑀓𑀭𑁄𑀢𑀺 𑀏𑀢𑁆𑀣 𑀲𑀫𑁆𑀩𑀦𑁆𑀥𑀦𑀢𑁆𑀣𑁄𑀢𑀺 𑀆𑀳-‘𑀓𑀭𑀻𑀬𑀢𑀺 𑀅𑀪𑀺𑀲𑀫𑁆𑀩𑀦𑁆𑀥𑀻𑀬𑀢𑀻’𑀢𑀺, 𑀬𑀁𑀓𑀺𑀜𑁆𑀘𑀺 𑀧𑀤𑀢𑁆𑀣𑀭𑀽𑀧𑀁 𑀲𑀫𑁆𑀩𑀚𑁆𑀛𑀢𑀻𑀢𑀺 𑀅𑀢𑁆𑀣𑁄, 𑀇𑀫𑀺𑀦𑀸 𑀘𑀸𑀦𑁆𑀯𑀢𑁆𑀣𑀯𑀲𑁂𑀦𑁂𑀯𑀸𑀬𑀁 𑀓𑀫𑁆𑀫𑀯𑁄𑀳𑀸𑀭𑁄 𑀲𑀺𑀤𑁆𑀥𑁄𑀢𑀺 𑀤𑀲𑁆𑀲𑁂𑀢𑀺, 𑀲𑀩𑁆𑀩𑀓𑀸𑀭𑀓𑀸𑀦𑀫𑁆𑀧𑀺 𑀧𑀦 𑀓𑀺𑀭𑀺𑀬𑀸𑀲𑀫𑁆𑀩𑀦𑁆𑀥 𑀲𑀩𑁆𑀪𑀸𑀯𑁂𑀧𑀺 𑀓𑀺𑀭𑀺𑀬𑀸𑀪𑀺𑀲𑀫𑁆𑀩𑀦𑁆𑀥𑀻𑀬𑀫𑀸𑀦𑀢𑁆𑀢𑁂𑀦𑁂𑀯 𑀬𑀁 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀁 𑀢𑀤𑁂𑀯 𑀓𑀫𑁆𑀫𑀁 𑀯𑀺𑀜𑁆𑀜𑁂𑀬𑁆𑀬𑀁, 𑀓𑀢𑁆𑀢𑀸𑀤𑀺 𑀓𑀢𑁆𑀢𑀼 𑀓𑀺𑀭𑀺𑀬𑀸𑀬𑀸𑀪𑀺𑀲𑀫𑁆𑀩𑀦𑁆𑀥𑀻𑀬𑀫𑀸𑀦𑀢𑁆𑀢𑁂𑀧𑀺 𑀓𑀢𑁆𑀢𑀸𑀤𑀺𑀢𑁆𑀢𑀯𑀘𑀦𑀺𑀘𑁆𑀙𑀸𑀬𑁂𑀯 𑀓𑀫𑁆𑀫𑀁 𑀦 𑀳𑁄𑀢𑀺… 𑀬𑀲𑁆𑀫𑀸 𑀯𑀘𑀦𑀺𑀘𑁆𑀙𑀸𑀬𑁂𑀯 𑀓𑀸𑀭𑀓𑀸𑀦𑀺 𑀪𑀯𑀦𑁆𑀢𑀺, 𑀏𑀯𑀁 𑀲𑀩𑁆𑀩𑀓𑀸𑀭𑀓𑀸𑀦𑀫𑁆𑀧𑀺 𑀓𑀸𑀭𑀓𑀦𑁆𑀢𑀭𑀧𑁆𑀧𑀢𑁆𑀢𑀺𑀬𑀁 𑀢𑀤𑀪𑀸𑀯𑁄 𑀬𑀣𑀸𑀬𑁄𑀕𑀁 𑀯𑀢𑁆𑀢𑀩𑁆𑀩𑁄, 𑀯𑀸𑀓𑁆𑀬𑁂𑀓𑀤𑁂𑀲𑁂𑀦𑁂𑀢𑁆𑀬𑀦𑁂𑀦 ‘‘𑀤𑁆𑀯𑁂𑀤𑁆𑀯𑁂𑀓𑀸’’𑀤𑀺𑀦𑁄 𑀯𑀸𑀓𑁆𑀬𑀲𑁆𑀲 ‘‘𑀓𑀫𑁆𑀫𑁂 𑀤𑀼𑀢𑀺𑀬𑀸’’𑀇𑀘𑁆𑀘𑀸𑀤𑀺𑀦𑁄 𑀘 𑀏𑀓𑀯𑀸𑀓𑁆𑀬𑀢𑁆𑀢𑀁 𑀲𑀽𑀘𑁂𑀢𑀺, 𑀧𑀓𑀭𑀡𑀲𑁆𑀲 𑀫𑀳𑀸𑀯𑀸𑀓𑁆𑀬𑀭𑀽𑀧𑀢𑁆𑀢𑀸 𑀯𑀺𑀧𑁆𑀧𑀓𑀝𑁆𑀞𑀸𑀦𑀺𑀧𑀺 𑀯𑀸𑀓𑁆𑀬𑀸𑀦𑀺 𑀆𑀓𑀗𑁆𑀔𑀸𑀤𑀺𑀲𑀪𑀸𑀯𑁂 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀸𑀦𑀼𑀪𑀯𑀦𑁂𑀦𑁂𑀓𑀯𑀸𑀓𑁆𑀬𑀪𑀸𑀯𑀫𑁆𑀧𑀝𑀻𑀧𑀚𑁆𑀚𑀦𑁆𑀢𑁂, 𑀯𑀼𑀢𑁆𑀢𑀻 𑀳𑀺𑁋

‘‘𑀆𑀓𑀗𑁆𑀔𑀸𑀬𑁄𑀕𑁆𑀕𑀢𑀸 𑀲𑀢𑁆𑀢𑀸, 𑀩𑀻𑀚𑀁 𑀲𑀦𑁆𑀦𑀺𑀥𑀺𑀦𑁄 𑀬𑀢𑁄;

𑀯𑀺𑀧𑁆𑀧𑀓𑀝𑁆𑀞𑀸𑀦𑀺 𑀯𑀸𑀓𑁆𑀬𑀸𑀦𑀺, 𑀫𑀳𑀸𑀯𑀸𑀓𑁆𑀬𑀁 𑀓𑀭𑁄𑀦𑁆𑀢𑁆𑀬𑀢𑁄𑀢𑀺.

𑀲𑀸𑀫𑀜𑁆𑀜𑁂𑀦𑀸𑀢𑀺 𑀓𑀫𑁆𑀫𑀸𑀤𑁆𑀬𑀯𑀺𑀲𑁂𑀲𑁂𑀦, 𑀧𑀼𑀩𑁆𑀩𑀸𑀘𑀭𑀺𑀬𑀲𑀫𑀜𑁆𑀜𑀸𑀯𑀲𑁂𑀦𑀸𑀳 ‘𑀤𑀼𑀢𑀺𑀬𑀸𑀤𑀺𑀓𑀸’𑀢𑀺, 𑀢𑁂𑀦 𑀬𑀤𑁆𑀬𑀧𑀺 𑀢𑁆𑀬𑀸𑀤𑀺𑀦𑁄𑀧𑀺 𑀤𑁆𑀯𑀺𑀦𑁆𑀦𑀁 𑀧𑀽𑀭𑀡𑀺𑀬𑀸 𑀤𑀼𑀢𑀺𑀬𑀸𑀢𑀺 𑀲𑀓𑁆𑀓𑀸 𑀯𑁄𑀳𑀭𑀺𑀢𑀼𑀁, 𑀢𑀣𑀸𑀧𑀺 𑀲𑁆𑀬𑀸𑀤𑀻𑀦𑀁 𑀤𑀼𑀓𑁂𑀬𑁂𑀯 𑀤𑀼𑀢𑀺𑀬𑀸𑀢𑀢𑀺𑀬𑀸 𑀭𑀼𑀴𑁆𑀳𑀻𑀢𑀺 𑀦𑀢𑁆𑀬𑀸𑀤𑀻𑀦𑀁 𑀤𑀼𑀓𑀸𑀦𑀺 𑀤𑀼𑀢𑀺𑀬𑀸𑀤𑀺𑀲𑀤𑁆𑀤𑁂𑀦 𑀕𑀬𑁆𑀳𑀦𑁆𑀢𑀺, 𑀯𑀺𑀲𑀺𑀝𑁆𑀞𑁂𑀲𑀽𑀢𑀺 𑀓𑀫𑁆𑀫𑀸𑀤𑀺𑀦𑀸 𑀯𑀺𑀲𑁂𑀲𑀺𑀢𑁂𑀲𑀼, 𑀢𑀺𑀯𑀺𑀥𑀁 𑀓𑀫𑁆𑀫𑀦𑁆𑀢𑀺 𑀲𑀓𑀲𑀫𑀬𑀧𑁆𑀧𑀲𑀺𑀤𑁆𑀥𑀺𑀬𑀸 𑀓𑀫𑁆𑀫𑀲𑁆𑀲 𑀢𑀺𑀯𑀺𑀥𑀢𑁆𑀢𑀫𑀸𑀳, 𑀅𑀜𑁆𑀜𑁂 𑀢𑀼 𑀲𑀢𑁆𑀢𑀯𑀺𑀥𑀫𑀺𑀘𑁆𑀙𑀦𑁆𑀢𑀺, 𑀓𑀣𑀁𑁋

𑀦𑀺𑀩𑁆𑀩𑀢𑁆𑀢𑀺𑀯𑀺𑀓𑀢𑀺𑀧𑁆𑀧𑀢𑁆𑀢𑀺, 𑀪𑁂𑀤𑁂𑀦 𑀢𑀺𑀯𑀺𑀥𑀁 𑀫𑀢𑀁,

𑀢𑀢𑁆𑀣𑁂𑀘𑁆𑀙𑀺𑀢𑀢𑀫𑀁 𑀓𑀫𑁆𑀫𑀁, 𑀓𑀫𑁆𑀫𑀁𑀢𑁆𑀯𑀜𑁆𑀜𑀁 𑀘𑀢𑀼𑀩𑁆𑀩𑀺𑀥𑀁;

𑀇𑀘𑁆𑀙𑀺𑀢𑀜𑁆𑀘𑀸𑀦𑀺𑀘𑁆𑀙𑀺𑀢𑀜𑁆𑀘, 𑀦𑁂𑀯𑀺𑀘𑁆𑀙𑀺𑀢𑀫𑀦𑀺𑀘𑁆𑀙𑀺𑀢𑀁,

𑀢𑀣𑀸𑀜𑁆𑀜𑀧𑀼𑀩𑁆𑀩𑀁 𑀦𑀸𑀜𑁆𑀜𑀧𑀼𑀩𑁆𑀩𑀦𑁆𑀢𑀺, 𑀏𑀯𑀫𑀜𑁆𑀜𑀁 𑀘𑀢𑀼𑀩𑁆𑀩𑀺𑀥𑀦𑁆𑀢𑀺.

𑀢𑀢𑁆𑀣 𑀇𑀘𑁆𑀙𑀺𑀢𑀸𑀤𑀻𑀦𑀺 𑀉𑀧𑀭𑀺𑀬𑁂𑀯𑀸𑀧𑀺 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀢𑁆𑀭𑁂𑀘𑁆𑀘𑀸𑀤𑀺𑀦𑀸 𑀢𑀺𑀯𑀺𑀥𑀁 𑀓𑀫𑁆𑀫𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺, 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀓𑀫𑁆𑀫𑀫𑁂𑀓𑁂-𑀦𑁂𑀓𑀥𑀸 𑀧𑀭𑀺𑀓𑀧𑁆𑀧𑁂𑀦𑁆𑀢𑀺, 𑀢𑀤𑀺𑀳 𑀧𑀓𑀸𑀲𑀬𑀺𑀲𑁆𑀲𑀸𑀫𑁋

𑀲𑀢𑀻-𑀲𑀢𑀻 ¶ 𑀯𑀸 𑀧𑀓𑀢𑀺, 𑀦 𑀬𑀢𑁆𑀣 𑀧𑀭𑀺𑀡𑀸𑀫𑀺𑀦𑀻,

𑀦𑀺𑀲𑁆𑀲𑀻𑀬𑀢𑁂 𑀢𑀁 𑀦𑀺𑀩𑁆𑀩𑀢𑁆𑀢𑀺, 𑀓𑀫𑁆𑀫𑀫𑀜𑁆𑀜𑁂𑀲𑀫𑀜𑁆𑀜𑀣𑀸;

𑀅𑀲𑀦𑁆𑀢𑀁 𑀚𑀸𑀬𑀢𑁂 𑀬𑀁 𑀯𑀸, 𑀬𑀁 𑀲𑀦𑁆𑀢𑀫𑀧𑁆𑀧𑀓𑀸𑀲𑀢𑀺,

𑀉𑀧𑁆𑀧𑀢𑁆𑀬𑀸-𑀪𑀺𑀩𑁆𑀬𑀢𑁆𑀢𑀺𑀬𑀸 𑀯𑀸, 𑀢𑀦𑁆𑀦𑀺𑀩𑁆𑀩𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 ‘‘𑀓𑀝𑀯𑀺𑀓𑀸𑀭𑀲𑁆𑀲 𑀓𑀸𑀲𑀲𑀗𑁆𑀔𑀸𑀢𑀸 𑀯𑀺𑀚𑁆𑀚𑀫𑀸𑀦𑀸 𑀧𑀓𑀢𑀺 𑀧𑀭𑀺𑀡𑀸𑀫𑀺𑀦𑀻 𑀓𑀝𑀯𑀺𑀓𑀸𑀭𑀫𑁆𑀧𑀢𑀺 𑀧𑀭𑀺𑀡𑀫𑀦𑁆𑀢𑀻 𑀬𑀢𑁆𑀣𑀧𑁆𑀧𑀬𑁄𑀕𑁂 𑀦 𑀦𑀺𑀲𑁆𑀲𑀻𑀬𑀢𑁂… 𑀓𑀝𑀁 𑀓𑀭𑁄𑀢𑀻𑀢𑁂𑀢𑁆𑀣 𑀓𑁂𑀯𑀮𑀫𑀢𑁆𑀣𑀸𑀯𑀕𑀫𑀫𑀢𑁆𑀢𑀲𑁆𑀲 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀢𑁆𑀢𑀸 𑀓𑀸𑀲𑁂𑀢𑀺 𑀅𑀲𑀼𑀬𑁆𑀬𑀫𑀸𑀦𑀢𑁆𑀢𑀸 𑀘, 𑀧𑀓𑀢𑀺𑀬𑀸 𑀢𑀼 𑀲𑀼𑀬𑁆𑀬 𑀫𑀸𑀦𑀢𑁆𑀢𑁂 𑀯𑀺𑀓𑀸𑀭𑀺𑀬𑀁 𑀲𑀺𑀬𑀸, 𑀢𑁂𑀦𑁂𑀯 𑀓𑀸𑀲𑁂 𑀓𑀝𑀁 𑀓𑀭𑁄𑀢𑀺, 𑀢𑀡𑁆𑀟𑀼𑀮𑁂 𑀑𑀤𑀦𑀁 𑀧𑀘𑀢𑀻𑀢𑀺 𑀤𑁆𑀯𑀬𑀢𑁆𑀣𑁄 𑀓𑀭𑁄𑀢𑀺 𑀧𑀘𑀢𑀺 𑀘, 𑀢𑀲𑁆𑀫𑀸 𑀓𑀸𑀲𑁂 𑀓𑀭𑁄𑀢𑀺 𑀢𑀡𑁆𑀟𑀼𑀮𑁂 𑀧𑀘𑀢𑀻𑀢𑀺 𑀯𑀺𑀓𑀸𑀭𑀻𑀬𑀢𑀺, 𑀓𑀝𑀁 𑀓𑀭𑁄𑀢𑀺 𑀑𑀤𑀦𑀫𑁆𑀧𑀘𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀻 𑀬𑀢𑀻𑀢𑀺 𑀅𑀢𑁆𑀣𑁄, 𑀅𑀲𑀢𑀻 𑀯𑀸 𑀧𑀓𑀢𑀺 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸𑀬𑁂𑀯 𑀬𑀢𑁆𑀣 𑀦 𑀦𑀺𑀲𑁆𑀲𑀻𑀬𑀢𑁂… [(𑀬𑀣𑀸) (𑀧𑁄𑀢𑁆𑀣𑀓𑁂)] ( ) 𑀲𑀁𑀬𑁄𑀕𑀁 𑀚𑀦𑀬𑀢𑀺 𑀯𑀺𑀪𑀸𑀕𑀫𑀼𑀧𑁆𑀧𑀸𑀤𑀬𑀢𑀻𑀢𑀺 𑀲𑀁𑀬𑁄𑀕𑀯𑀺𑀪𑀸𑀕𑀸𑀦𑀁 𑀓𑀲𑁆𑀲𑀸𑀧𑀺 𑀧𑀓𑀢𑀺𑀬𑀸 𑀅𑀯𑀺𑀓𑀸𑀭𑀢𑁆𑀢𑀸 𑀲𑀁𑀬𑁄𑀕𑀯𑀺𑀪𑀸𑀕𑀯𑀦𑁆𑀢𑁂 𑀳𑁆𑀬𑀯𑀺𑀓𑀢𑁂𑀳𑁂𑀯 𑀢𑁂𑀲𑀁 𑀚𑀦𑀦𑀢𑁄, 𑀢𑀫𑁂𑀯𑀫𑁆𑀪𑀽𑀢𑀫𑀦𑀺𑀲𑁆𑀲𑀺𑀢𑀧𑀓𑀢𑀺𑀓𑀁 𑀅𑀯𑀺𑀚𑁆𑀚𑀫𑀸𑀦 (𑀧𑀓𑀢𑀺) 𑀓𑀁 𑀯𑀸 𑀓𑀸𑀭𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀓𑀫𑁆𑀫𑀁 𑀦𑀸𑀫𑀸𑀢𑀺 𑀏𑀓𑁄, 𑀅𑀜𑁆𑀜𑁂𑀲𑀫𑀜𑁆𑀜𑀣𑀸𑀢𑀺 𑀯𑀢𑁆𑀯𑀸 𑀢𑀦𑁆𑀤𑀲𑁆𑀲𑁂𑀢𑀺 ‘𑀅𑀲𑀦𑁆𑀢’𑀫𑀺𑀘𑁆𑀘𑀸𑀤𑀺𑀦𑀸, 𑀬𑀁 𑀅𑀲𑀦𑁆𑀢𑀫𑀯𑀺𑀚𑁆𑀚𑀫𑀸𑀦𑀁 𑀚𑀸𑀬𑀢𑁂, 𑀢𑀦𑁆𑀦𑀺𑀩𑁆𑀩𑀢𑁆𑀢𑀺𑀓𑀫𑁆𑀫𑀁, 𑀬𑀣𑀸 𑀲𑀼𑀔𑀁 𑀚𑀦𑀬𑀢𑀺 𑀩𑀼𑀤𑁆𑀥𑀺𑀫𑀼𑀧𑁆𑀧𑀸𑀤𑀬𑀢𑀻𑀢𑀺, 𑀲𑀦𑁆𑀢𑀁 𑀯𑀺𑀚𑁆𑀚𑀫𑀸𑀦𑀫𑁂𑀯 𑀯𑀸 𑀓𑁂𑀯𑀮𑀫𑀧𑁆𑀧𑀓𑀸𑀲𑀺𑀢𑀧𑀼𑀩𑁆𑀩𑀁 𑀬𑀁 𑀉𑀧𑁆𑀧𑀢𑁆𑀢𑀺𑀬𑀸 𑀅𑀪𑀺𑀩𑁆𑀬𑀢𑁆𑀢𑀺𑀬𑀸 𑀯𑀸 𑀧𑀓𑀸𑀲𑀢𑀺, 𑀢𑀫𑁆𑀧𑀺 𑀦𑀺𑀩𑁆𑀩𑀢𑁆𑀢𑀺𑀓𑀫𑁆𑀫𑀁, 𑀬𑀣𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀢𑀺𑀲𑀸𑀫𑀜𑁆𑀜𑀫𑀪𑀺𑀩𑁆𑀬𑀜𑁆𑀚𑀬𑀢𑀻’’𑀢𑀺, 𑀢𑀤𑁂𑀯𑀁 𑀓𑁂𑀲𑀜𑁆𑀘𑀺 𑀫𑀢𑁂𑀦 𑀅𑀦𑀺𑀲𑁆𑀲𑀺𑀢𑀧𑀓𑀢𑀺𑀓𑀁 𑀅𑀯𑀺𑀚𑁆𑀚𑀫𑀸𑀦𑀧𑀓𑀢𑀺𑀓𑀦𑁆𑀢𑀺 𑀤𑀼𑀯𑀺𑀥𑀁 𑀦𑀺𑀩𑁆𑀩𑀢𑁆𑀢𑀺𑀓𑀫𑁆𑀫𑀫𑁆𑀧𑀺 𑀅𑀜𑁆𑀜𑁂𑀲𑀫𑁆𑀫𑀢𑁂𑀦 𑀅𑀲𑀦𑁆𑀢𑀁 𑀚𑀸𑀬𑀫𑀸𑀦𑀁 𑀲𑀦𑁆𑀢𑀫𑀧𑁆𑀧𑀓𑀸𑀲𑀫𑀸𑀦𑀦𑁆𑀢𑀺 𑀤𑀼𑀯𑀺𑀥𑀁 𑀦𑀺𑀩𑁆𑀩𑀢𑁆𑀢𑀺𑀓𑀫𑁆𑀫𑀫𑁆𑀧𑀻𑀢𑀺𑀲𑀩𑁆𑀩𑀫𑁆𑀧𑀺 𑀅𑀝𑁆𑀞𑀺𑀢𑀧𑀼𑀩𑁆𑀩𑀫𑁂𑀯 𑀚𑀸𑀬𑀢𑀻𑀢𑁆𑀬𑀲𑀢𑁄 𑀚𑀸𑀦𑀦𑀸 𑀦 𑀩𑁆𑀬𑀢𑀺𑀭𑀺𑀘𑁆𑀘𑀢𑀺𑀘𑁆𑀘𑀸𑀳-‘𑀅𑀲𑀢𑁄 𑀚𑀦𑀦𑀁 𑀓𑀭𑀻𑀬𑀢𑀻’𑀢𑀺, 𑀅𑀯𑀢𑁆𑀣𑀦𑁆𑀢𑀭𑀦𑁆𑀢𑀺 𑀑𑀤𑀦𑀸𑀤𑀺𑀦𑁄 𑀓𑁆𑀮𑁂𑀤𑀦𑀸𑀤𑀺𑀮𑀓𑁆𑀔𑀡𑀫𑀜𑁆𑀜𑀫𑀯𑀢𑁆𑀣𑀁.

𑀧𑀓𑀢𑁆𑀬𑀼𑀘𑁆𑀙𑁂𑀤𑀲𑀫𑁆𑀪𑀽𑀢𑀁, 𑀯𑀺𑀓𑀸𑀭𑀺𑀬𑀁 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀢𑀼;

𑀕𑀼𑀡𑀦𑁆𑀢𑀭𑀲𑀫𑀼𑀧𑁆𑀧𑀢𑁆𑀬𑀸, 𑀏𑀯𑀁 𑀲𑀸 𑀯𑀺𑀓𑀢𑀺 𑀤𑁆𑀯𑀺𑀥𑀸.

𑀓𑀺𑀜𑁆𑀘𑀺 𑀯𑀺𑀓𑀸𑀭𑀺𑀬𑀁 𑀓𑀫𑁆𑀫𑀁 𑀧𑀓𑀢𑀺𑀬𑀸 𑀓𑀸𑀭𑀡𑀲𑁆𑀲 𑀉𑀘𑁆𑀙𑁂𑀤𑁂𑀦 𑀲𑀫𑁆𑀪𑀽𑀢𑀁, 𑀬𑀣𑀸 ¶ 𑀓𑀝𑁆𑀞𑀁 𑀪𑀲𑁆𑀫𑀁 𑀓𑀭𑁄𑀢𑀻𑀢𑀺 𑀓𑀝𑁆𑀞𑀲𑁆𑀲𑀸𑀘𑁆𑀘𑀦𑁆𑀢𑀧𑀭𑀸𑀯𑀢𑁆𑀢𑀺 [𑀧𑀭𑀸𑀯𑀢𑁆𑀢𑀺𑀬𑀸 (𑀧𑁄𑀢𑁆𑀣𑀓𑁂)], 𑀓𑀺𑀜𑁆𑀘𑀺 𑀧𑀦 𑀕𑀼𑀡𑀦𑁆𑀢𑀭𑀸𑀦𑀫𑀼𑀧𑁆𑀧𑀢𑁆𑀢𑀺𑀬𑀸, 𑀬𑀣𑀸 𑀲𑀼𑀯𑀡𑁆𑀡𑀁 𑀓𑀝𑀓𑀁 𑀓𑁂𑀬𑀼𑀭𑀁 𑀯𑀸 𑀓𑀭𑁄𑀢𑀻𑀢𑀺 𑀏𑀯𑀁 𑀤𑁆𑀯𑀻𑀥𑀸 𑀲𑀸 𑀯𑀺𑀓𑀢𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄, 𑀦 𑀯𑀺𑀪𑀸𑀯𑀻𑀬𑀦𑁆𑀢𑁂𑀢𑀺 𑀦 𑀕𑀫𑁆𑀬𑀦𑁆𑀢𑁂, 𑀲𑀸 𑀧𑀢𑁆𑀢𑀺‘𑀧𑀸𑀧𑀻𑀬𑀢𑀺 𑀯𑀺𑀲𑀬𑀻𑀓𑀭𑀻𑀬𑀢𑀻’𑀢𑀺 𑀓𑀢𑁆𑀯𑀸.

𑀬𑀢𑁆𑀭 𑀓𑁆𑀭𑀺𑀬𑀸𑀓𑀢𑁄 𑀓𑁄𑀘𑀺, 𑀯𑀺𑀲𑁂𑀲𑁄 𑀦𑀸𑀯𑀕𑀫𑁆𑀬𑀢𑁂;

𑀤𑀲𑁆𑀲𑀦𑀸 𑀯𑀸𑀦𑀼𑀫𑀸𑀦𑀸 𑀯𑀸, 𑀲𑀸 𑀧𑀢𑁆𑀢𑀻𑀢𑀺 𑀧𑀓𑀺𑀢𑁆𑀢𑀺𑀢𑀸.

𑀬𑀢𑁆𑀣 𑀓𑀺𑀭𑀺𑀬𑀸𑀓𑀢𑁄 𑀓𑀺𑀭𑀺𑀬𑀸𑀲𑀫𑁆𑀧𑀸𑀤𑀺𑀢𑁄 𑀯𑀺𑀲𑁂𑀲𑁄 𑀅𑀢𑀺𑀲𑀬𑁄 𑀓𑁄𑀘𑀺 𑀦𑀸𑀯𑀕𑀫𑁆𑀬𑀢𑁂 𑀦𑀧𑁆𑀧𑀢𑀻𑀬𑀢𑁂 𑀤𑀲𑁆𑀲𑀦𑀸 𑀯𑀸 𑀧𑀘𑁆𑀘𑀓𑁆𑀔𑀧𑁆𑀧𑀫𑀸𑀡𑁂𑀦 𑀅𑀦𑀼𑀫𑀸𑀦𑀧𑁆𑀧𑀫𑀸𑀡𑁂𑀦 𑀯𑀸 𑀬𑀣𑀸 𑀦𑀺𑀩𑁆𑀩𑀢𑁆𑀢𑀺𑀯𑀺𑀓𑀢𑀻𑀦𑀫𑀢𑀺𑀲𑀬𑁄 𑀧𑀘𑁆𑀘𑀓𑁆𑀔𑀸𑀦𑀼𑀫𑀸𑀦𑀸 𑀯𑀕𑀫𑀦𑀻𑀬𑁄, 𑀢𑀢𑁆𑀭 𑀳𑀺 𑀦𑀺𑀩𑁆𑀩𑀢𑁆𑀢𑀺𑀬𑀁 𑀯𑀺𑀲𑁂𑀲𑀲𑀺𑀤𑁆𑀥𑀺𑀭𑀢𑀺𑀧𑀲𑀺𑀤𑁆𑀥𑀸… 𑀅𑀢𑁆𑀣𑀮𑀸𑀪𑀸𑀔𑁆𑀬𑀲𑁆𑀲 𑀯𑀺𑀲𑁂𑀲𑀲𑁆𑀲𑀸𑀯𑀺𑀚𑁆𑀚𑀫𑀸𑀦𑀲𑁆𑀲 𑀓𑀺𑀭𑀺𑀬𑀸𑀓𑀢𑁆𑀢𑀸, 𑀯𑀺𑀓𑀸𑀭𑀺𑀬𑁂 ( ) [(𑀏𑀯) (𑀧𑁄𑀢𑁆𑀣𑀓𑁂)] 𑀢𑀼 𑀓𑁆𑀯𑀘𑀺 𑀧𑀘𑁆𑀘𑀓𑁆𑀔𑀯𑀺𑀲𑀬𑁄… 𑀓𑀝𑁆𑀞𑀁 𑀟𑀳𑀢𑀻𑀢𑀺 𑀓𑀡𑁆𑀳𑀢𑁆𑀢𑀸𑀤𑀺𑀪𑀸𑀯𑀲𑁆𑀲 𑀧𑀘𑁆𑀘𑀓𑁆𑀔𑁂𑀦𑁂𑀯𑁄𑀧𑀮𑀩𑁆𑀪𑀦𑀢𑁄, 𑀓𑁆𑀯𑀘𑀺𑀤𑀦𑀼𑀫𑀸𑀦𑀕𑀫𑁆𑀫𑁄… 𑀤𑁂𑀯𑀤𑀢𑁆𑀢𑀁 𑀭𑁄𑀲𑁂𑀢𑀺 𑀧𑀲𑀸𑀤𑀬𑀢𑀺 𑀯𑁂𑀢𑀺 𑀯𑀺𑀲𑀺𑀝𑁆𑀞𑀫𑀼𑀔𑀯𑀡𑁆𑀡𑀸𑀤𑀺𑀓𑀸𑀭𑀺𑀬𑀸𑀦𑀼𑀫𑁂𑀬𑁆𑀬𑀢𑁆𑀢𑀸 𑀭𑁄𑀲𑀸𑀤𑀺𑀦𑁄, 𑀏𑀯𑀁 𑀬𑀢𑁆𑀣 𑀦 𑀯𑀺𑀲𑁂𑀲𑀲𑀺𑀤𑁆𑀥𑀺 𑀅𑀧𑀺 𑀢𑀼 𑀧𑀢𑁆𑀢𑀺𑀫𑀢𑁆𑀢𑀁, 𑀲𑀸 𑀧𑀢𑁆𑀢𑀻𑀢𑀺 𑀧𑀓𑀺𑀢𑁆𑀢𑀺𑀢𑀸 𑀓𑀣𑀺𑀢𑀸, 𑀆𑀤𑀺𑀘𑁆𑀘𑀫𑁆𑀧𑀲𑁆𑀲𑀢𑀺 𑀥𑀫𑁆𑀫𑀫𑀚𑁆𑀛𑁂𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄, 𑀓𑀣𑀜𑁆𑀘𑀭𑀳𑀺 𑀅𑀲𑀦𑁆𑀢𑀲𑁆𑀲 [𑀲𑀦𑁆𑀢𑀲𑁆𑀲 (𑀧𑁄𑀢𑁆𑀣𑀓𑁂)] 𑀧𑀢𑁆𑀢𑀺𑀓𑀫𑁆𑀫𑀲𑁆𑀲 𑀓𑀺𑀜𑁆𑀘𑀺 (𑀅𑀓𑀭𑁄𑀦𑁆𑀢)𑀲𑁆𑀲 𑀓𑀸𑀭𑀓𑀢𑁆𑀢𑀁, 𑀦 𑀳𑀺 𑀓𑀺𑀜𑁆𑀘𑀺 𑀅𑀓𑀭𑁄𑀦𑁆𑀢𑀁 𑀓𑀸𑀭𑀓𑀫𑁆𑀪𑀯𑀺𑀢𑀼𑀫𑀭𑀳𑀢𑀻𑀢𑀺 𑀉𑀘𑁆𑀘𑀢𑁂-

𑀤𑀲𑁆𑀲𑀦𑀓𑁆𑀔𑀫𑀢𑀸𑀪𑀸𑀲𑁄, 𑀧𑀕𑀫𑀩𑁆𑀬𑀢𑁆𑀢𑀺𑀆𑀤𑀬𑁄;

𑀯𑀺𑀲𑁂𑀲𑀸 𑀧𑀢𑁆𑀢𑀺𑀓𑀫𑁆𑀫𑀲𑁆𑀲, 𑀓𑁆𑀭𑀺𑀬𑀸𑀲𑀺𑀤𑁆𑀥𑀺𑀬𑀫𑀺𑀘𑁆𑀙𑀺𑀢𑀸.

𑀅𑀢𑁆𑀭 𑀤𑀝𑁆𑀞𑀼𑀁 𑀲𑀓𑁆𑀓𑀸 𑀇𑀢𑀺 𑀤𑀲𑁆𑀲𑀦𑁂 𑀔𑀫𑀢𑀸 𑀆𑀪𑀸𑀲𑁄𑀧𑀕𑀫𑁄 𑀯𑀺𑀲𑀬𑀢𑁆𑀢𑁄𑀧𑀕𑀫𑁄 𑀯𑀺𑀲𑀬𑀢𑁆𑀢𑁄𑀧𑀕𑀫𑀦𑀁 𑀩𑁆𑀬𑀢𑁆𑀢𑀺 𑀘𑁂𑀢𑀺 𑀏𑀯𑀫𑀸𑀤𑀬𑁄 𑀯𑀺𑀲𑁂𑀲𑀸 𑀬𑀣𑀸𑀬𑁄𑀕𑀁 𑀧𑀢𑁆𑀢𑀺𑀓𑀫𑁆𑀫𑀲𑁆𑀲 𑀓𑀺𑀭𑀺𑀬𑀸𑀦𑀺𑀧𑁆𑀨𑀢𑁆𑀢𑀺𑀬𑀁 𑀇𑀘𑁆𑀙𑀺𑀢𑀸, 𑀢𑀢𑁄 𑀢𑀲𑁆𑀲 𑀓𑀸𑀭𑀓𑀢𑁆𑀢𑀦𑁆𑀢𑀺 𑀅𑀢𑁆𑀣𑁄, 𑀆𑀤𑀺𑀘𑁆𑀘𑀁 𑀧𑀲𑁆𑀲𑀢𑀻𑀢𑀺 𑀏𑀢𑁆𑀣 𑀳𑀺 𑀆𑀤𑀺𑀘𑁆𑀘𑁄 𑀤𑀝𑁆𑀞𑀼𑀁 𑀲𑀓𑁆𑀓𑀸, 𑀢𑀢𑁄𑀯 𑀲𑁄 𑀤𑀺𑀲𑁆𑀲𑀢𑀺 𑀅𑀪𑀺𑀩𑁆𑀬𑀢𑁆𑀢𑀺𑀜𑁆𑀘𑁄𑀧𑀬𑀸𑀢𑀻𑀢𑀺 𑀤𑀲𑁆𑀲𑀦𑀓𑀺𑀭𑀺𑀬𑀸𑀦𑀺𑀧𑁆𑀨𑀸𑀤𑀓𑀢𑁆𑀣𑁂𑀦𑀸𑀲𑁆𑀲 𑀓𑀸𑀭𑀓𑀢𑁆𑀢𑀫𑀼𑀧𑀧𑀚𑁆𑀚𑀢𑁂, 𑀢𑀣𑀸 𑀜𑁆𑀜𑀢𑁆𑀭𑀸𑀧𑁆𑀬𑀸𑀤𑀺𑀲𑀤𑁆𑀤𑀕𑀳𑀺𑀢𑀯𑀺𑀲𑁂𑀲𑀯𑀲𑁂𑀦 𑀓𑀺𑀭𑀺𑀬𑀸𑀲𑀺𑀤𑁆𑀥𑀺𑀢𑁄 𑀓𑀸𑀭𑀓𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁 ¶ , 𑀦𑀦𑀼 𑀯𑀺𑀓𑀸𑀭𑀺𑀬𑀫𑁆𑀧𑀺 𑀦𑀺𑀩𑁆𑀩𑀢𑁆𑀢𑀺𑀓𑀫𑁆𑀫𑀫𑁂𑀯… 𑀢𑁂𑀦 𑀭𑀽𑀧𑁂𑀦𑀸𑀲𑀢𑁄𑀬𑁂𑀯 𑀚𑀦𑀦𑀢𑁄, 𑀧𑀢𑁆𑀢𑀺𑀓𑀫𑁆𑀫𑀫𑁆𑀧𑀺 𑀓𑀺𑀭𑀺𑀬𑀸𑀲𑀫𑁆𑀩𑀦𑁆𑀥𑀭𑀽𑀧𑁂𑀦𑀸𑀲𑀦𑁆𑀢𑀫𑁂𑀯 𑀧𑀘𑁆𑀙𑀸 𑀢𑀣𑀸 𑀪𑀯𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀺𑀬𑁂𑀯𑀸𑀢𑀺 𑀲𑀘𑁆𑀘𑀁-

𑀅𑀢𑁆𑀣𑁂𑀲𑀸 𑀯𑀢𑁆𑀣𑀼𑀝𑁆𑀞𑀺𑀢𑀺, 𑀲𑀼𑀔𑀼𑀫𑀩𑀼𑀤𑁆𑀥𑀺𑀕𑁄𑀘𑀭𑀧𑀢𑀻𑀢𑁆𑀬𑀦𑀼𑀭𑁄𑀥𑁂𑀦,

𑀢𑀢𑁆𑀭 𑀬𑀫𑁆𑀧𑁂𑀢𑀁 𑀖𑀝𑀢𑁂, 𑀬𑀣𑀸 𑀧𑀢𑀻𑀢𑀺 𑀲𑀤𑁆𑀤𑀢𑁆𑀣𑀸𑀯𑀢𑁆𑀢𑀸𑀦𑀢𑁄.

𑀯𑀺𑀲𑁂𑀲𑀸𑀦𑀼𑀧𑀸𑀤𑀸𑀦𑀢𑁄𑀢𑀺 ‘‘𑀓𑀫𑁆𑀫𑁂 𑀤𑀼𑀢𑀺𑀬𑀸’’𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀓𑀭𑀻𑀬𑀢𑀺 𑀓𑀝𑁄, 𑀓𑀢𑁄 𑀓𑀝𑁄 𑀘𑁆𑀘𑁂𑀯𑀫𑀸𑀤𑀻𑀲𑀼 𑀢𑁆𑀬𑀸𑀤𑀺𑀧𑁆𑀧𑀪𑀼𑀢𑀻𑀳𑀺 𑀅𑀢𑀺𑀳𑀺𑀢𑀓𑀫𑁆𑀫𑀸𑀤𑀺𑀦𑀺𑀲𑁆𑀲𑀬𑁂𑀲𑀼𑀧𑀺 𑀏𑀓𑀢𑁆𑀢𑀸𑀤𑀻𑀲𑀼 𑀤𑀼𑀢𑀺𑀬𑀸𑀤𑀬𑁄 𑀧𑀧𑁆𑀧𑁄𑀦𑁆𑀢𑀺 𑀦𑀺𑀬𑀫𑀸𑀪𑀸𑀯𑀸, 𑀢𑀣𑀸𑀳𑀺 𑀧𑀜𑁆𑀘𑀓𑁂 𑀦𑀸𑀫𑀢𑁆𑀣𑁂 𑀓𑀝𑀸𑀤𑀺𑀯𑀘𑀦𑀻𑀬𑀲𑁆𑀲 𑀲𑀫𑁆𑀩𑀦𑁆𑀥𑀻 𑀓𑀫𑁆𑀫𑀸𑀤𑁆𑀬𑀢𑁆𑀣𑁄, 𑀢𑁆𑀬𑀸𑀤𑀺𑀧𑁆𑀧𑀪𑀼𑀢𑀻𑀢𑀺 𑀅𑀦𑀪𑀺 𑀳𑀺𑀢𑀲𑁆𑀲 𑀲𑀗𑁆𑀔𑁆𑀬𑀸𑀔𑁆𑀬𑀲𑁆𑀲𑀸𑀧𑀭𑀲𑁆𑀲 𑀯𑀺𑀪𑀢𑁆𑀬𑀢𑁆𑀣𑀲𑁆𑀲𑀸𑀪𑀺𑀥𑀸𑀦𑀸𑀬 𑀅𑀪𑀺𑀳𑀺𑀢𑁂𑀲𑀼𑀧𑀺 𑀓𑀝𑀸𑀤𑀻𑀲𑀼 𑀓𑀫𑁆𑀫𑀸𑀤𑀻𑀲𑀼 𑀤𑀼𑀢𑀺𑀬𑀸𑀤𑀬𑁄 𑀲𑀺𑀬𑀼𑀦𑁆𑀢𑀺 𑀧𑀸𑀡𑀺𑀦𑀺𑀬𑀸 ‘‘𑀓𑀫𑁆𑀫𑁂 𑀤𑀼𑀢𑀺𑀬𑀸’’𑀘𑁆𑀘𑀸𑀤𑀻𑀲𑀼 (𑁨-𑁩-𑁨) ‘‘𑀅𑀦𑀪𑀺𑀳𑀺𑀢𑁂’’𑀢𑀺 (𑁨-𑁩-𑁧) 𑀯𑀘𑀦𑀫𑀥𑀺𑀓𑀭𑁄𑀦𑁆𑀢𑀺, 𑀯𑁂𑀬𑁆𑀬𑀢𑁆𑀢𑀺𑀬𑀸𑀬𑁂𑀯 𑀤𑀼𑀢𑀺𑀬𑀸𑀤𑀻𑀦𑀧𑁆𑀧𑀲𑀗𑁆𑀕𑁂𑀧𑀺 𑀢𑀦𑁆𑀦𑀺𑀲𑁆𑀲𑀬𑀪𑀽𑀢𑁂-𑀓𑀢𑁆𑀢𑀸𑀤𑁆𑀬𑀢𑁆𑀣𑁂 𑀚𑁄𑀢𑀦𑀸𑀬𑀸𑀪𑀺𑀳𑀺𑀢𑁂𑀲𑀼 𑀤𑀼𑀢𑀺𑀬𑀸𑀤𑀬𑁄 𑀲𑀺𑀬𑀼𑀁, 𑀢𑀺𑀓𑁂 𑀧𑀦 𑀲𑀗𑁆𑀔𑁆𑀬𑀸𑀓𑀫𑁆𑀫𑀸𑀤𑀬𑁄 𑀯𑀺𑀪𑀢𑁆𑀢𑀺 𑀯𑀘𑀦𑀻𑀬𑀸, 𑀢𑀢𑁆𑀣 𑀬𑀚𑁆𑀚𑀧𑀺 𑀓𑀫𑁆𑀫𑀸𑀤𑀺𑀦𑁄 𑀧𑀘𑁆𑀘𑀬𑁂𑀦𑀸𑀪𑀺𑀥𑀸𑀦𑀁, 𑀢𑀣𑀸𑀧𑁆𑀬𑁂𑀓𑀢𑁆𑀢𑀸𑀤𑀬𑁄 𑀦𑀸𑀪𑀺𑀳𑀺𑀢𑀸𑀢𑀺 𑀢𑀲𑁆𑀲 𑀲𑀗𑁆𑀔𑁆𑀬𑀸𑀔𑁆𑀬𑀲𑁆𑀲𑀸𑀧𑀭𑀲𑁆𑀲 𑀯𑀺𑀪𑀢𑁆𑀬𑀢𑁆𑀣𑀲𑁆𑀲𑀸𑀢𑀺 𑀥𑀸𑀦𑀸𑀬 𑀅𑀪𑀺𑀳𑀺𑀢𑁂𑀲𑀼𑀧𑀺 𑀓𑀫𑁆𑀫𑀸𑀤𑀻𑀲𑀼 𑀤𑀼𑀢𑀺𑀬𑀸𑀤𑀬𑁄 𑀲𑀺𑀬𑀼𑀦𑁆𑀢𑀺 𑀧𑀸𑀡𑀺𑀦𑀺𑀬𑀸 ‘‘𑀓𑀫𑁆𑀫𑁂 𑀤𑀼𑀢𑀺𑀬𑀸’’𑀢𑀺 ‘‘𑀅𑀦𑀪𑀺𑀳𑀺𑀢𑁂’’𑀢𑀺 𑀯𑀘𑀦𑀫𑀥𑀺𑀓𑀭𑁄𑀦𑁆𑀢𑀺, 𑀢𑀫𑀼𑀧𑀤𑀲𑁆𑀲𑁂𑀦𑁆𑀢𑁄 𑀆𑀳-‘𑀢𑀢𑁆𑀭𑀺𑀤𑀁 𑀲𑀺𑀬𑀸’𑀢𑀺𑀆𑀤𑀺, 𑀢𑀢𑁆𑀭 𑀢𑀲𑁆𑀫𑀺𑀁 𑀤𑀼𑀢𑀺𑀬𑀸𑀤𑀺 𑀯𑀺𑀪𑀢𑁆𑀢𑀺𑀯𑀺𑀥𑀸𑀦𑁂 𑀇𑀤𑀁 𑀘𑁄𑀤𑁆𑀬𑀁 𑀲𑀺𑀬𑀸, 𑀓𑀺𑀦𑁆𑀢𑀺 𑀆𑀳-‘𑀧𑀜𑁆𑀘𑀓𑁂’𑀇𑀘𑁆𑀘𑀸𑀤𑀺, 𑀅𑀦𑀪𑀺𑀳𑀺𑀢𑀓𑀫𑁆𑀫𑀸𑀤𑀺𑀦𑀺𑀲𑁆𑀲𑀬𑁂𑀲𑀼𑀢𑀺 𑀅𑀦𑀪𑀺𑀳𑀺𑀢𑀸 𑀓𑀫𑁆𑀫𑀸𑀤𑀬𑁄 𑀦𑀺𑀲𑁆𑀲𑀬𑀸 𑀬𑁂𑀲𑀫𑁂𑀓𑀢𑁆𑀢𑀸𑀤𑀻𑀦𑀁, 𑀢𑁂𑀲𑀽𑀢𑁆𑀬𑀢𑁆𑀣𑁄, 𑀤𑀼𑀢𑀺𑀬𑀸𑀤𑀬𑁄 𑀯𑀺𑀪𑀢𑁆𑀢𑀺𑀬𑁄 𑀬𑀣𑀸 𑀲𑀺𑀬𑀼𑀦𑁆𑀢𑀺 𑀚𑁄𑀢𑀦𑀸𑀬𑀸𑀪𑀺𑀥𑀸𑀦𑀸𑀬 𑀘𑀸𑀢𑀺 𑀬𑀼𑀚𑁆𑀚𑀫𑀸𑀦𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀅𑀪𑀺𑀳𑀺𑀢𑀓𑀫𑁆𑀫𑀸𑀤𑀺𑀦𑀺𑀲𑁆𑀲𑀬𑁂𑀲𑀼𑀧𑀻𑀢𑀺 𑀅𑀧𑀺𑀲𑀤𑁆𑀤𑁂𑀦 𑀅𑀦𑀪𑀺𑀳𑀺𑀢𑀓𑀫𑁆𑀫𑀸𑀤𑀺𑀦𑀺𑀲𑁆𑀲𑀬𑀫𑁂𑀓𑀢𑁆𑀢𑀸𑀤𑀺𑀁 𑀲𑀫𑀼𑀘𑁆𑀘𑀺𑀦𑁄𑀢𑀺, 𑀆𑀲𑀗𑁆𑀓𑀺𑀬𑀸𑀢𑀺 𑀧𑀼𑀩𑁆𑀩𑀓𑀺𑀭𑀺𑀬𑀸𑀬 𑀯𑀼𑀢𑁆𑀢𑀦𑁆𑀢𑀺 𑀅𑀧𑀭𑀓𑀺𑀭𑀺𑀬𑀸 𑀯𑁂𑀤𑀺𑀢𑀩𑁆𑀩𑀸, 𑀧𑀜𑁆𑀘𑀓𑁂 𑀢𑀺𑀓𑁂 𑀘𑀸 𑀪𑀺𑀳𑀺𑀢𑀓𑀫𑁆𑀫𑀸𑀤𑀺𑀦𑀺𑀲𑁆𑀲𑀬𑁂 𑀲𑁂𑀓𑀢𑁆𑀢𑀸𑀤𑀻𑀲𑀼 𑀤𑀼𑀢𑀺𑀬𑀸𑀤𑀺𑀧𑁆𑀧𑀢𑁆𑀢𑀺𑀫𑀸𑀲𑀗𑁆𑀓𑀸𑀯𑀲𑁂𑀦 𑀤𑀲𑁆𑀲𑁂𑀢𑁆𑀯𑀸 𑀘𑀢𑀼𑀓𑁆𑀓𑀯𑀸𑀤𑀻𑀦𑀫𑁆𑀧𑀺 𑀧𑀓𑁆𑀔𑀫𑀼𑀩𑁆𑀪𑀸𑀯𑀺𑀬 𑀧𑀭𑀺𑀳𑀭𑀺𑀢𑀼𑀁 ‘𑀬𑀤𑀺𑀘𑁆𑀘𑀸’𑀤𑀺𑀫𑀸𑀳, 𑀅𑀬𑀦𑁆𑀢𑁂𑀲𑀫𑀥𑀺𑀧𑁆𑀧𑀸𑀬𑁄 ¶ ‘‘𑀬𑀤𑁂𑀲𑀸 𑀲𑀗𑁆𑀔𑁆𑀬𑀸 𑀧𑀸𑀝𑀺𑀧𑀤𑀺𑀓𑀢𑁆𑀣𑁄 𑀢𑀧𑁆𑀧𑀝𑀺𑀧𑀚𑁆𑀚𑀦𑁂 𑀓𑀫𑁆𑀫𑀸𑀤𑀬𑁄 𑀯𑀺𑀪𑀢𑁆𑀢𑀺𑀯𑀘𑀦𑀻𑀬𑀸, 𑀢𑀤𑀸 ‘𑀅𑀦𑀪𑀺𑀳𑀺𑀢𑁂 𑀓𑀫𑁆𑀫𑁂’𑀢𑀺𑀆𑀤𑀺𑀦𑀸 𑀅𑀦𑀪𑀺𑀳𑀺𑀢𑀕𑁆𑀕𑀳𑀡𑀁 𑀓𑀫𑁆𑀫𑀸𑀤𑀺𑀯𑀺𑀲𑁂𑀲𑀸𑀦𑀫𑀦𑀼𑀪𑀯𑀦𑁆𑀢𑀫𑀦𑀢𑁆𑀣𑀓𑀁… 𑀅𑀪𑀺𑀳𑀺𑀢𑁂 𑀯𑀺𑀪𑀢𑁆𑀢𑀺𑀯𑀸𑀘𑁆𑀘𑀸𑀪𑀸𑀯𑀢𑁄, 𑀬𑀤𑀸 𑀧𑀦𑀸𑀬𑀁 𑀧𑀓𑁆𑀔𑁄 ‘𑀲𑀗𑁆𑀔𑁆𑀬𑀸 𑀯𑀺𑀪𑀢𑁆𑀢𑀺𑀯𑀘𑀦𑀻𑀬𑀸’𑀢𑀺 𑀢𑀤𑀸 ‘‘𑀓𑀫𑁆𑀫𑁂 𑀤𑀼𑀢𑀺𑀬𑀸’’ 𑀢𑁆𑀬𑁂𑀯𑀫𑀸𑀤𑀬𑁄 𑀦𑀺𑀤𑁆𑀤𑁂𑀲𑀸 𑀯𑀺𑀲𑀬𑀲𑀦𑁆𑀤𑀲𑁆𑀲𑀦𑀫𑀢𑁆𑀢𑀸𑀬𑁂𑀯 𑀯𑁂𑀤𑀺𑀢𑀩𑁆𑀩𑀸’’𑀢𑀺, 𑀲𑀩𑁆𑀩𑀣𑀸𑀢𑀺 𑀧𑀜𑁆𑀘𑀓𑀢𑀺𑀓𑀯𑀸𑀤𑀻𑀦𑀁 𑀘𑀢𑀼𑀓𑁆𑀓𑀯𑀸𑀤𑀻𑀦𑀜𑁆𑀘 𑀫𑀢𑀯𑀲𑁂𑀦 𑀲𑀩𑁆𑀩𑀧𑁆𑀧𑀓𑀸𑀭𑁂𑀦, 𑀲𑀤𑁆𑀤𑀢𑁆𑀣𑀸𑀩𑁆𑀬𑀢𑀺𑀭𑀺𑀢𑁆𑀢𑀢𑁆𑀣𑀫𑀢𑁆𑀢𑁄𑀬𑁂𑀯𑀸𑀢𑀺 𑀩𑁆𑀬𑀢𑀺𑀭𑁂𑀓𑁄 𑀩𑁆𑀬𑀢𑀺𑀭𑀺𑀢𑁆𑀢𑀁, 𑀦𑀧𑀼𑀁𑀲𑀓𑁂 𑀪𑀸𑀯𑁂 𑀓𑁆𑀢𑁄, 𑀦 𑀯𑀺𑀚𑁆𑀚𑀢𑁂 𑀩𑁆𑀬𑀢𑀺𑀭𑀺𑀢𑁆𑀢𑀁 𑀩𑁆𑀬𑀢𑀺𑀭𑁂𑀓𑁄 𑀪𑁂𑀤𑁄 𑀬𑀲𑁆𑀲 𑀢𑀁 𑀅𑀩𑁆𑀬𑀢𑀺𑀭𑀺𑀢𑁆𑀢𑀁, 𑀅𑀩𑁆𑀬𑀢𑀺𑀪𑀺𑀦𑁆𑀦𑀦𑁆𑀢𑀺 𑀅𑀢𑁆𑀣𑁄, 𑀲𑀤𑁆𑀤𑀢𑁆𑀣𑀢𑁄 𑀲𑀓𑀢𑁆𑀣𑀢𑁄 𑀅𑀩𑁆𑀬𑀢𑀺𑀭𑀺𑀢𑁆𑀢𑀁 𑀅𑀢𑁆𑀣𑀫𑀢𑁆𑀢𑀁 𑀅𑀢𑁆𑀣𑀲𑀸𑀫𑀜𑁆𑀜𑀁 𑀬𑀲𑁆𑀲 𑀑𑀤𑀦𑀸𑀤𑀺𑀲𑀤𑁆𑀤𑀲𑁆𑀲 𑀲𑁄 𑀢𑀣𑀸 𑀯𑀼𑀢𑁆𑀢𑁄.

𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑀺𑀬𑀁 𑀢𑀩𑁆𑀩𑀸𑀤𑀺𑀡𑀸𑀤𑀺𑀲𑀫𑀸𑀲𑁂𑀳𑀺 𑀅𑀪𑀺𑀳𑀺𑀢𑀫𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀢𑁂𑀳𑀺 𑀅𑀪𑀺𑀳𑀺𑀢𑁂𑀧𑁆𑀬𑁂𑀯𑀫𑁂𑀯 𑀤𑀝𑁆𑀞𑀩𑁆𑀩𑀦𑁆𑀢𑀺 𑀦𑀺𑀤𑀲𑁆𑀲𑁂𑀦𑁆𑀢𑁄 𑀆𑀳-‘𑀏𑀯’𑀫𑀺𑀘𑁆𑀘𑀸𑀤𑀺, 𑀓𑀭-𑀓𑀭𑀡𑁂 𑀓𑀭𑀻𑀬𑀺𑀢𑁆𑀣𑀸𑀢𑀺 𑀓𑀢𑁄‘𑀓𑁆𑀢𑁄 𑀪𑀸𑀯𑀓𑀫𑁆𑀫𑁂𑀲𑀼’𑀢𑀺 (𑁫-𑁫𑁬) 𑀓𑀫𑁆𑀫𑁂 𑀓𑁆𑀢𑁄, 𑀲𑀢𑀺𑀓𑁄𑀢𑀺 𑀏𑀢𑁆𑀣 𑀓𑀻𑀢𑁄𑀢𑀺 𑀓𑀫𑁆𑀫𑀢𑁆𑀣𑁂 ‘‘𑀤𑀺𑀲𑁆𑀲𑀦𑁆𑀢𑀜𑁆𑀜𑁂𑀧𑀺 𑀧𑀘𑁆𑀘𑀬𑀸’’𑀢𑀺 (𑁪-𑁧𑁨𑁦) 𑀇𑀓𑁄, 𑀓𑀫𑁆𑀫𑀢𑀸𑀕𑀫𑁆𑀬𑀢𑁂 𑀓𑀺𑀢𑀧𑁆𑀧𑀘𑁆𑀘𑀬𑀸𑀤𑀻𑀦𑀁 𑀓𑀫𑁆𑀫𑁂 𑀯𑀺𑀳𑀺𑀢𑀢𑁆𑀢𑀸, 𑀏𑀯𑀜𑁆𑀘 𑀥𑀼𑀳𑀺 𑀓𑀺𑀫𑁂𑀓𑀫𑀼𑀤𑀸𑀳𑀭𑀡𑀁 𑀤𑀢𑁆𑀢𑀫𑀸𑀘𑀭𑀺𑀬𑁂𑀦𑁂 𑀢𑁆𑀬𑀢𑁄 𑀆𑀳- ‘𑀉𑀤𑀸𑀳𑀭𑀡’𑀇𑀘𑁆𑀘𑀸𑀤𑀺, 𑀅𑀦𑀪𑀺𑀳𑀺𑀢𑁂𑀢𑀺 𑀯𑀘𑀦𑀁 𑀯𑀺𑀦𑀸𑀧𑀻𑀢𑀺 𑀯𑀘𑀦𑀁 𑀯𑀺𑀦𑀸 𑀏𑀯𑀸𑀢𑀺 𑀅𑀯𑀥𑀸𑀭𑀡𑁂-𑀅𑀧𑀺𑀲𑀤𑁆𑀤𑁄, 𑀲𑀫𑁆𑀪𑀸𑀯𑀦𑁂𑀯𑀸, 𑀬𑀤𑁆𑀬𑀪𑀺𑀳𑀺𑀢𑁂𑀳𑀺 𑀯𑀘𑀦𑀁 𑀯𑀺𑀦𑀸𑀧𑀺 𑀤𑀼𑀢𑀺𑀬𑀸𑀤𑀻𑀦𑀫𑀧𑁆𑀧𑀯𑀢𑁆𑀢𑀺 𑀪𑀯𑁂𑀬𑁆𑀬, 𑀯𑀘𑀦𑀲𑀩𑁆𑀪𑀸𑀯𑁂 𑀢𑀼 𑀓𑀣𑀸𑀬𑁂𑀯 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄, 𑀏𑀯𑀜𑁆𑀘 𑀧𑀦𑁂𑀢𑁆𑀣 𑀤𑀼𑀢𑀺𑀬𑀸𑀤𑀻𑀦𑀫𑀪𑀺𑀳𑀺𑀢𑁂 𑀧𑀲𑀗𑁆𑀕𑀸𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄 ‘‘𑀧𑀘𑁆𑀘𑀢𑁂 𑀑𑀤𑀦𑁄, 𑀓𑀢𑁄 𑀓𑀝𑁄𑀘𑁆𑀘𑀸𑀤𑁄𑀧𑀺 𑀬𑀤𑀺 𑀤𑀼𑀢𑀺𑀬𑀸𑀤𑀬𑁄 𑀲𑀺𑀬𑀼𑀁 𑀧𑀞𑀫𑀸𑀯𑀺𑀥𑀸𑀦𑀲𑁆𑀲𑀸𑀯𑀓𑀸𑀲𑁄 𑀦 𑀪𑀯𑁂𑀬𑁆𑀬 𑀢𑀢𑁄 𑀲𑀸𑀫𑀢𑁆𑀣𑀺𑀬𑀸𑀦𑀪𑀺𑀳𑀺𑀢𑁂𑀬𑁂𑀯 𑀓𑀫𑁆𑀫𑀸𑀤𑁄 𑀤𑀼𑀢𑀺𑀬𑀸𑀤𑀬𑁄 𑀲𑀓𑀺𑀭𑀺𑀬𑀸 (𑀬𑀁 𑀢𑀤)𑀪𑀺𑀩𑁆𑀬𑀢𑁆𑀢𑀺𑀬𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀧𑀞𑀫𑁂𑀯𑀢𑁆𑀯𑀪𑀺𑀳𑀺𑀢𑁂’’𑀢𑀺, 𑀦 𑀦𑀼𑀘 𑀧𑀞𑀫𑀸𑀬𑀸𑀓𑀸𑀭𑀓𑀫𑀯𑀓𑀸𑀲𑁄 𑀭𑀼𑀓𑁆𑀔𑁄 𑀧𑀺𑀮𑀓𑁆𑀔𑁄𑀢𑀺 [𑀭𑀼𑀓𑁆𑀔𑁄 𑀧𑀺𑀮𑀓𑁆𑀔𑁄𑀢𑀺 𑀓𑁆𑀭𑀺𑀬𑀸𑀧𑀤𑀁 𑀦 𑀲𑀽𑀬𑀢𑁂𑀢𑀺 𑀯𑀺𑀪𑀢𑁆𑀬𑀦𑁆𑀢𑀭𑀲𑁆𑀲𑀧𑁆𑀧𑀢𑁆𑀢𑀺 𑀫𑀜𑁆𑀜𑀢𑁂𑀪𑀲𑁆𑀲𑀸𑀧𑀤𑀻𑀧] 𑀓𑀺𑀫𑀺𑀤𑀫𑀼𑀘𑁆𑀘𑀢𑁂 𑀅𑀓𑀸𑀭𑀓𑀦𑁆𑀢𑀺 𑀬𑀤𑁆𑀬 𑀓𑀸𑀭𑀓𑀁 𑀦𑁂𑀤𑀫𑁆𑀧𑀬𑁄𑀕𑀫𑀭𑀳𑀢𑀺 𑀢𑀢𑁄 𑀬𑀢𑁆𑀣 𑀯𑀺𑀲𑁂𑀲𑀓𑀺𑀭𑀺𑀬𑀸𑀦 𑀫𑀲𑁆𑀲𑀯𑀦𑀁 𑀢𑀢𑁆𑀣 𑀧𑀤𑀢𑁆𑀣𑀲𑀳𑀘𑀭𑀺𑀢𑀸𑀬 𑀲𑀢𑁆𑀢𑀸𑀬 𑀧𑀢𑀻𑀢𑀺𑀬𑀸 ‘𑀭𑀼𑀓𑁆𑀔𑁄 𑀅𑀢𑁆𑀣𑀺 ¶ 𑀧𑀺𑀮𑀓𑁆𑀔𑁄 𑀅𑀢𑁆𑀣𑀻’𑀢𑀺 𑀅𑀧𑁂𑀓𑁆𑀔𑀻𑀬𑀢𑀻𑀢𑀺 𑀓𑀸𑀭𑀓𑀢𑁆𑀢𑀁 𑀭𑀼𑀓𑁆𑀔𑀸𑀤𑀻𑀦 𑀫𑀢𑁆𑀣𑁂𑀯𑁂𑀢𑀺 [𑀅𑀢𑁆𑀣𑁂𑀯𑁂𑀢𑀺 𑀜𑁆𑀜𑀢𑀁 𑀯𑀢𑁆𑀣𑀼𑀁 𑀧𑀭𑀁 𑀧𑀢𑀺𑀧𑀸𑀤𑀬𑀺𑀢𑀼𑀁 𑀲𑀤𑁆𑀤𑁄 𑀧𑀬𑀼𑀚𑁆𑀚𑀢𑁂 𑀜𑁆𑀜𑀡𑀜𑁆𑀘 𑀲𑀢𑁄𑀇𑀢𑀺 𑀬𑀢𑁆𑀭 𑀓𑁆𑀭𑀺𑀬𑀸𑀧𑀤𑀦𑁆𑀢𑀭𑀲𑁆𑀲 𑀅𑀧𑁆𑀧𑀬𑁄𑀕𑁄 𑀢𑀢𑁆𑀭 𑀉𑀲𑁆𑀲𑀕𑁆𑀕𑀢𑁄 𑀲𑀢𑁆𑀢𑀸 𑀧𑀢𑀻𑀢𑀺𑀢𑀼𑀢𑁆𑀣𑀻𑀢𑀺 𑀓𑁆𑀭𑀺𑀬𑀸𑀧𑀤𑀸𑀦𑀼𑀲𑀗𑁆𑀕𑀭 𑀓𑀢𑁆𑀢𑀭𑀺 𑀢𑀢𑀺𑀬𑀧𑁆𑀧𑀲𑀗𑁆𑀕𑀭𑀦𑀯𑀓𑀸𑀲𑀸 𑀧𑀞𑀫𑀸 𑀢𑁆𑀬𑀢𑁆𑀣𑁄-𑀪𑀲𑁆𑀲𑀧𑀤𑀻𑀧], 𑀦 𑀘 𑀉𑀘𑁆𑀘𑀁 𑀦𑀻𑀘𑀁𑀢𑁆𑀬𑀥𑀺𑀓𑀭𑀡𑀯𑀸𑀘𑀺𑀢𑁆𑀢𑁂 [𑀯𑀸𑀘𑀺𑀓𑀸] 𑀦𑀺𑀧𑀸𑀢𑀲𑁆𑀲 𑀅𑀢𑁆𑀣𑀻𑀢𑁆𑀬𑀦𑁂𑀦 𑀦𑀢𑁆𑀣𑀺 𑀲𑀫𑁆𑀩𑀦𑁆𑀥𑁄𑀢𑀺 𑀉𑀘𑁆𑀘𑀫𑀢𑁆𑀣𑀻𑀢𑁆𑀬𑀸𑀥𑁂𑀬𑁆𑀬𑀲𑁆𑀲𑁂𑀯 𑀓𑀢𑁆𑀢𑀼𑀢𑁆𑀢𑀁 𑀦𑀸𑀥𑀸𑀭𑀲𑁆𑀲𑀸𑀢𑁆𑀬 𑀓𑀸𑀭𑀓𑀢𑁆𑀢𑀫𑀸𑀥𑀸𑀭𑀲𑁆𑀲𑀸𑀢𑁆𑀬𑀯𑀓𑀸𑀲𑁄-𑀢𑁆𑀣𑀺 𑀧𑀞𑀫𑀸𑀬𑀸𑀢𑀺 ‘‘𑀧𑀞𑀫𑀸𑀯𑀺𑀥𑀸 𑀦𑀲𑁆𑀲𑀸𑀯𑀓𑀸𑀲𑁄 𑀦 𑀪𑀯𑁂𑀬𑁆𑀬𑀸’’𑀢𑀺 𑀬𑀣𑀸𑀯𑀼𑀢𑁆𑀢𑁄-𑀬𑀁 𑀳𑁂𑀢𑀼 𑀅𑀲𑀺𑀤𑁆𑀥𑁄𑀢𑀺 𑀘 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀅𑀲𑀗𑁆𑀔𑁆𑀬𑀢𑁄 𑀧𑀞𑀫𑀸𑀢𑁆𑀬𑀯𑀢𑁆𑀯𑀸 ‘‘𑀧𑀞𑀫𑀸𑀢𑁆𑀣 𑀫𑀢𑁆𑀢𑁂’’𑀢𑀺 (𑁨.𑁩𑁯) 𑀲𑀸𑀫𑀜𑁆𑀜𑀯𑀺𑀥𑀸𑀦𑀢𑁄 𑀲𑀺𑀤𑁆𑀥𑁄𑀬𑁂𑀯, 𑀬𑀁 𑀳𑁂𑀢𑀼𑀢𑁆𑀢𑀸𑀦𑀪𑀺𑀳𑀺𑀢𑀯𑀘𑀦𑀫𑀦𑀢𑁆𑀣𑀓𑀫𑀺𑀘𑁆𑀘𑁂𑀯 𑀞𑀺𑀢𑀁.

𑀬𑀜𑁆𑀘𑀸𑀢𑀺 𑀘𑀲𑀤𑁆𑀤𑁄 𑀯𑀢𑁆𑀢𑀩𑁆𑀩𑀦𑁆𑀢𑀭𑀲𑀫𑀼𑀘𑁆𑀘𑀬𑁂 𑀅𑀧𑀭𑀫𑁆𑀧𑀺 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀫𑀢𑁆𑀣𑀻𑀢𑀺 𑀅𑀢𑁆𑀣𑁄, 𑀬𑀜𑁆𑀘 𑀨𑀮𑀁 𑀫𑀜𑁆𑀜𑀢𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀬𑀤𑁂𑀢𑁆𑀣𑀸𑀦 𑀪𑀺𑀳𑀺𑀢𑀸𑀥𑀺𑀓𑀸𑀭𑁄 𑀦𑀢𑁆𑀣𑀺 𑀢𑀤𑀸 𑀬𑀣𑀸 ‘𑀓𑀢𑁄 𑀓𑀝𑁄’𑀘𑁆𑀘𑀢𑁆𑀭𑀢𑁆𑀢𑁂𑀦 𑀓𑀫𑁆𑀫𑀲𑁆𑀲𑀸𑀪𑀺𑀳𑀺𑀢𑀢𑁆𑀢𑀸 𑀤𑀼𑀢𑀺𑀬𑀸 𑀦 𑀳𑁄𑀢𑀺 𑀢𑀣𑀸 ‘𑀓𑀝𑀁 𑀓𑀭𑁄𑀢𑀺 𑀯𑀺𑀧𑀼𑀮𑀁 𑀤𑀲𑁆𑀲𑀦𑀻𑀬’𑀦𑁆𑀢𑀺 𑀓𑀝𑀲𑀤𑁆𑀤𑀢𑁄 𑀉𑀧𑁆𑀧𑀦𑁆𑀦𑀸𑀬 𑀤𑀼𑀢𑀺𑀬𑀸𑀬 (𑀯𑀺𑀧𑀼𑀮𑀸𑀤𑀺𑀕𑀢𑀲𑁆𑀲) 𑀓𑀫𑁆𑀫𑀲𑁆𑀲𑀸 𑀪𑀺𑀳𑀺𑀢𑀢𑁆𑀢𑀸 𑀯𑀺𑀧𑀼𑀮𑀸𑀤𑀻𑀳𑀺 𑀯𑀺𑀲𑁂𑀲𑀦𑁂𑀳𑀺 𑀤𑀼𑀢𑀺𑀬𑀸 𑀦 𑀲𑀺𑀬𑀸, 𑀢𑀢𑁄 𑀢𑁆𑀬𑀸𑀤𑀺 𑀢𑀩𑁆𑀩𑀸𑀤𑀺𑀡𑀸𑀤𑀺𑀲𑀫𑀸𑀲𑁂𑀳𑀺 𑀓𑀫𑁆𑀫𑀲𑁆𑀲𑀸𑀦 𑀪𑀺𑀳𑀺𑀢𑀢𑁆𑀢𑀫𑀢𑁆𑀢𑁂𑀯𑀸𑀢𑀺 𑀯𑀺𑀧𑀼𑀮𑀸𑀤𑀻𑀳𑀺𑀧𑀺 𑀤𑀼𑀢𑀺𑀬𑀸𑀯𑀺𑀥𑀸𑀦𑀲𑀗𑁆𑀔𑀸𑀢𑀁 𑀅𑀦𑀪𑀺𑀳𑀺𑀢𑁂’’𑀢𑀺 (𑁨-𑁩-𑁧) 𑀅𑀦𑀪𑀺𑀳𑀺𑀢 𑀯𑀘𑀦𑀲𑁆𑀲 𑀅𑀥𑀺𑀓𑀸𑀭𑁂 𑀬𑀜𑁆𑀘 𑀨𑀮𑀁 𑀘𑀺𑀦𑁆𑀢𑀬𑀢𑀻𑀢𑀺 𑀅𑀢𑁆𑀣𑁄, 𑀬𑀼𑀢𑁆𑀢𑀲𑁆𑀲𑀸𑀢𑀺𑀫𑀲𑁆𑀲 𑀅𑀢𑁆𑀣𑁄 𑀲𑀫𑁆𑀩𑀦𑁆𑀥𑀲𑁆𑀲𑀸𑀢𑀺, 𑀧𑀘𑁆𑀘𑁂𑀓𑀁 𑀓𑀭𑁄𑀢𑁆𑀬𑀪𑀺𑀲𑀫𑁆𑀩𑀦𑁆𑀥𑀢𑀸𑀬𑀸𑀢𑀺 ‘𑀓𑀝𑀁 𑀓𑀭𑁄𑀢𑀺 𑀯𑀺𑀧𑀼𑀮𑀁 𑀓𑀭𑁄𑀢𑀺 𑀤𑀲𑁆𑀲𑀦𑀻𑀬𑀁 𑀓𑀭𑁄𑀢𑀺’𑀘𑁆𑀘𑁂𑀯𑀁 𑀧𑀘𑁆𑀘𑁂𑀓𑀁 𑀧𑀘𑁆𑀘𑁂𑀓𑀁 𑀓𑀭𑁄𑀢𑀺𑀲𑁆𑀲𑀸𑀪𑀺𑀲𑀫𑁆𑀩𑀦𑁆𑀥𑀢𑀸𑀬𑀸𑀢𑀺 𑀅𑀢𑁆𑀣𑁄, 𑀓𑀫𑁆𑀫𑀢𑀸 𑀅𑀢𑁆𑀣𑀻𑀢𑀺 𑀲𑁂𑀲𑁄, 𑀏𑀯𑀁 𑀫𑀜𑁆𑀜𑀢𑁂-‘‘𑀓𑀝𑀁 𑀓𑀭𑁄𑀫𑀻𑀢𑀺 𑀧𑀯𑀢𑁆𑀢𑁄 𑀯𑀺𑀧𑀼𑀮𑀁 𑀓𑀭𑁄𑀫𑀻 𑀤𑀲𑁆𑀲𑀦𑀺𑀬𑀁 𑀓𑀭𑁄𑀫𑀻𑀢𑀺 𑀘 𑀧𑀯𑀢𑁆𑀢𑁄𑀯𑀸𑀢𑀺 𑀯𑀺𑀧𑀼𑀮𑀸𑀤𑀻𑀦𑀫𑁆𑀧𑀺 𑀧𑀘𑁆𑀘𑁂𑀓𑀁 𑀓𑀫𑁆𑀫𑀢𑀸 𑀅𑀢𑁆𑀣𑁂𑀯, 𑀢𑀢𑁆𑀣𑁂𑀓𑀲𑁆𑀲𑀸𑀪𑀺𑀥𑀸𑀦𑁂 𑀧𑀭𑁂𑀓𑀲𑁆𑀲 𑀲𑀼𑀔𑀫𑀯𑀮𑁄𑀓𑀬𑀦𑁆𑀢𑀻𑀢𑀺 𑀢𑀤𑀪𑀺𑀥𑀸𑀦𑀸𑀬𑀧𑀺 𑀤𑀼𑀢𑀺𑀬𑀸 𑀪𑀯𑀺𑀲𑁆𑀲𑀢𑀻’’𑀢𑀺, 𑀧𑀓𑀸𑀭𑀦𑁆𑀢𑀭𑀸𑀯𑀢𑀸𑀭𑁄 𑀦𑀸𑀘𑀭𑀺𑀬𑁂 𑀦𑁄𑀧𑀭𑁄𑀥𑀺𑀢𑁄𑀢𑀺 𑀢𑀫𑁆𑀧𑀺 𑀧𑀦𑁂𑀢𑁆𑀣 𑀤𑀲𑁆𑀲𑀬𑀺𑀲𑁆𑀲𑀸𑀫-‘‘𑀓𑀝𑀲𑀤𑁆𑀤𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀤𑀼𑀢𑀺𑀬𑀸 ¶ 𑀓𑀝𑀚𑀸𑀢𑀺 𑀓𑀫𑁆𑀫𑀫𑀪𑀺𑀳𑀺𑀢𑀯𑀢𑀻, 𑀦 𑀯𑀺𑀧𑀼𑀮𑀸𑀤𑀺𑀕𑀼𑀡𑀓𑀫𑁆𑀫𑀁, 𑀢𑀢𑁄 𑀢𑀤𑀪𑀺𑀥𑀸𑀦𑀸𑀬 𑀘 𑀤𑀼𑀢𑀺𑀬𑀸𑀬𑁂𑀯 𑀪𑀯𑀢𑀺, 𑀅𑀣𑀯𑀸 𑀓𑀝𑁄𑀯 𑀓𑀫𑁆𑀫𑀁, 𑀢𑀁 𑀲𑀸𑀫𑀸𑀦𑀸𑀥𑀺𑀓𑀭𑀡𑁆𑀬𑁂𑀦 𑀯𑀺𑀧𑀼𑀮𑀸𑀤𑀻𑀳𑀺𑀧𑀺 𑀤𑀼𑀢𑀺𑀬𑀸 𑀪𑀯𑀺𑀲𑁆𑀲𑀢𑀺, 𑀓𑀝𑀁 𑀓𑀭𑁄𑀢𑀺 𑀯𑀺𑀧𑀼𑀮𑁄 𑀤𑀲𑁆𑀲𑀦𑀻𑀬𑁄𑀢𑀺 𑀳𑀺 𑀯𑀼𑀘𑁆𑀘𑀫𑀸𑀦𑁂 𑀯𑀺𑀧𑀼𑀮𑀸𑀤𑀬𑁄 𑀓𑀢𑁆𑀢𑀼𑀲𑀫𑀸𑀦𑀸𑀥𑀺𑀓𑀭𑀡𑀢𑀸𑀬𑁂𑀯 𑀧𑀢𑀻𑀬𑁂𑀬𑁆𑀬𑀼𑀁 𑀢𑀲𑁆𑀫𑀸 𑀓𑀝𑀲𑀤𑁆𑀤𑀲𑀸𑀫𑀸𑀦𑀸𑀥𑀺𑀓𑀭𑀡𑁆𑀬𑀫𑁆𑀧𑀝𑀺𑀧𑀸𑀤𑀬𑀢𑀸 𑀯𑀲𑁆𑀲𑀫𑁂𑀢𑁆𑀣 𑀤𑀼𑀢𑀺𑀬𑀸 𑀓𑀭𑀡𑀻𑀬𑀸’’𑀢𑀺. 𑀦𑀦𑁆𑀯𑁂𑀫𑀺𑀘𑁆𑀘𑀸𑀤𑀺𑀘𑁄𑀤𑁆𑀬𑀁, 𑀏𑀯𑀦𑁆𑀢𑀺 𑀏𑀯𑀁 𑀕𑀼𑀡𑀬𑀼𑀢𑁆𑀢𑀲𑁆𑀲 𑀓𑀫𑁆𑀫𑀢𑀸𑀬 𑀲𑀢𑀺, 𑀧𑀧𑁆𑀧𑁄𑀢𑀻𑀢𑀺 𑀓𑀝 𑀓𑀫𑁆𑀫𑁂-𑀪𑀺𑀥𑀸𑀦𑀺𑀬𑁂 (𑀓𑀢𑁄) 𑀢𑀺 𑀓𑁆𑀢𑀧𑁆𑀧𑀘𑁆𑀘𑀬𑀲𑁆𑀲 𑀓𑀢𑀢𑁆𑀢𑀸 𑀉𑀤𑀸𑀭𑀸𑀤𑀺𑀢𑁄 𑀓𑀭𑁄𑀢𑁆𑀬𑀪𑀺𑀲𑀫𑁆𑀩𑀦𑁆𑀥𑀸 𑀤𑀼𑀢𑀺𑀬𑀸 𑀧𑀧𑁆𑀧𑁄𑀢𑀻𑀢𑀺 𑀅𑀢𑁆𑀣𑁄, 𑀏𑀯𑀁 𑀫𑀜𑁆𑀜𑀢𑁂𑀘𑁆𑀘𑀸𑀤𑀺 𑀧𑀭𑀺𑀳𑀸𑀭𑁄, 𑀅𑀯𑀬𑀯𑁂𑀦 𑀓𑀫𑁆𑀫𑀁 𑀦 𑀯𑀤𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀅𑀯𑀬𑀯𑁂𑀦𑀸𑀢𑀺 𑀯𑀺𑀲𑀼𑀁𑀯𑀺𑀲𑀼𑀁, 𑀓𑀺𑀜𑁆𑀘𑀭𑀳𑀻𑀢𑀺 𑀆𑀳-‘𑀲𑀪𑀸𑀯𑀢𑁄 𑀲𑀩𑁆𑀩𑀁 𑀓𑀫𑁆𑀫𑀁 𑀯𑀤𑀢𑀻’𑀢𑀺. 𑀳𑁄𑀢𑀼 𑀓𑀸𑀫𑀁 𑀉𑀤𑀸𑀭𑀸𑀤𑀺𑀢𑁄𑀧𑀺 𑀯𑀼𑀢𑁆𑀢𑁂𑀦 𑀯𑀺𑀥𑀺𑀦𑀸 𑀧𑀞𑀫𑀸, 𑀓𑀢𑀲𑀤𑁆𑀤𑀢𑁄 𑀓𑀸 𑀧𑀯𑀢𑁆𑀢𑀢𑀻𑀢𑀺 𑀆𑀳-‘𑀓𑀢𑀲𑀤𑁆𑀤𑀢𑁄 𑀧𑀺’𑀘𑁆𑀘𑀸𑀤𑀺, 𑀅𑀦𑁆𑀢𑁄𑀪𑀽𑀢𑁄 𑀅𑀦𑁆𑀢𑁄𑀕𑀥𑁄 𑀦𑀸𑀫𑀲𑁆𑀲 𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀬𑀲𑁆𑀫𑀺𑀁 𑀓𑀫𑁆𑀫𑀮𑀓𑁆𑀔𑀡𑀢𑁆𑀣𑁂𑀲𑁄 𑀅𑀢𑁆𑀣𑁄 𑀓𑀫𑁆𑀫𑀮𑀓𑁆𑀔𑀡𑁄 𑀅𑀪𑀺𑀳𑀺𑀢𑁄 𑀓𑀣𑀺𑀢𑁄 𑀲𑀫𑁆𑀧𑀦𑁆𑀦𑁄 𑀲𑀫𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄, 𑀦𑀦𑀼 ‘𑀓𑀢𑁄 𑀓𑀝𑁄’𑀘𑁆𑀘𑀸𑀤𑁄 𑀲𑀪𑀸𑀯𑀢𑁄 𑀲𑀩𑁆𑀩𑀓𑀫𑁆𑀫𑀯𑀼𑀢𑁆𑀢𑀺𑀬𑀸 𑀅𑀦𑁆𑀢𑁄𑀪𑀽𑀢𑀦𑀸𑀫𑀢𑁆𑀣𑀯𑀼𑀢𑁆𑀢𑀺𑀬𑀸 𑀘𑀸𑀢𑁆𑀣𑀫𑀢𑁆𑀢𑁂 𑀳𑁄𑀢𑀺 𑀲𑀩𑁆𑀩𑀢𑁆𑀣 𑀧𑀞𑀫𑀸𑀢𑀺 ‘𑀓𑀝𑀁 𑀓𑀭𑁄𑀢𑀺 𑀉𑀴𑀸𑀭𑀁 𑀲𑁄𑀪𑀦𑀁 𑀤𑀲𑁆𑀲𑀦𑀻𑀬’𑀦𑁆𑀢𑀺 𑀓𑀝𑀸𑀤𑀺𑀢𑁄𑀧𑀺 𑀉𑀧𑁆𑀧𑀦𑁆𑀦𑀸𑀬 𑀤𑀼𑀢𑀺𑀬𑀸𑀬 𑀓𑀫𑁆𑀫𑀲𑁆𑀲𑀸𑀪𑀺𑀳𑀺𑀢𑀢𑁆𑀢𑀸 𑀉𑀴𑀸𑀭𑀸𑀤𑀻𑀳𑀺 𑀧𑀞𑀫𑀸𑀧𑁆𑀧𑀲𑀗𑁆𑀕𑁄 𑀲𑀺𑀬𑀸𑀢𑀺 𑀅𑀪𑀺𑀳𑀺𑀢𑀸𑀪𑀺𑀥𑀸𑀦𑀧𑁆𑀧𑀲𑀗𑁆𑀕𑁄𑀧𑀕𑀢𑀁 𑀘𑁄𑀤𑀦𑀁 𑀫𑀦𑀲𑀺 𑀦𑀺𑀥𑀸𑀬𑀸𑀳-‘𑀓𑀝𑀸𑀤𑀺𑀲𑀤𑁆𑀤𑁄 𑀢𑁆𑀯𑀺’𑀘𑁆𑀘𑀸𑀤𑀺, 𑀲𑀸𑀫𑀜𑁆𑀜𑁂𑀦𑀸𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀝𑀸𑀤𑀺𑀲𑀸𑀫𑀜𑁆𑀜𑁂𑀦.

‘‘𑀓𑀢𑁆𑀢𑀼𑀭𑀺𑀘𑁆𑀙𑀺𑀢𑀢𑀫’’𑀦𑁆𑀢𑁆𑀬𑀦𑁂𑀦 (𑁧-𑁪-𑁪𑁯) 𑀓𑀢𑁆𑀢𑀼𑀦𑁄 𑀓𑀺𑀭𑀺𑀬𑀸𑀬 𑀲𑀫𑁆𑀩𑀦𑁆𑀥𑀺 𑀢𑀼𑀫𑀺𑀝𑁆𑀞𑀢𑀫𑀁 𑀢𑀲𑁆𑀫𑀺𑀁 𑀇𑀘𑁆𑀙𑀺𑀢𑀢𑀫𑁂 𑀓𑀫𑁆𑀫𑀲𑀜𑁆𑀜𑀁 𑀯𑀺𑀥𑀸𑀬 𑀦𑀺𑀩𑁆𑀩𑀢𑁆𑀬𑀸𑀤𑀺𑀓𑁂𑀲𑀼𑀢𑀻𑀲𑀼 𑀓𑀫𑁆𑀫𑁂𑀲𑀼 𑀤𑀼𑀢𑀺𑀬𑀸 𑀯𑀺𑀥𑀻𑀬𑀢𑁂 𑀧𑀸𑀡𑀺𑀦𑀻𑀬𑁂𑀳𑀺, 𑀇𑀘𑁆𑀙𑀺𑀢𑀢𑀫𑀢𑁆𑀢𑀜𑁆𑀘 𑀢𑀤𑀢𑁆𑀣𑀢𑁆𑀢𑀸 𑀓𑀺𑀭𑀺𑀬𑀸𑀬, 𑀑𑀤𑀦𑀁 𑀧𑀘𑀢𑀺 𑀕𑀸𑀯𑀼𑀫𑁆𑀧𑀬𑁄 𑀤𑁄𑀳𑀢𑀺𑀢𑁆𑀬𑀸𑀤𑁄(𑀳𑀺) 𑀑𑀤𑀦𑀸𑀤𑁆𑀬𑀢𑁆𑀣𑀸 𑀧𑀘𑀦𑀸𑀤𑀺𑀓𑀺𑀭𑀺𑀬𑀸𑀭𑀩𑁆𑀪𑀢𑁂𑀢𑀺 𑀑𑀤𑀦𑀧𑀬𑀸𑀤𑀻𑀦𑀫𑀺𑀘𑁆𑀙𑀺𑀢𑀢𑀫𑀢𑁆𑀢𑀁, 𑀢𑀤𑀼𑀧𑀤𑀲𑁆𑀲𑁂𑀦𑁆𑀢𑁄 𑀆𑀳-‘𑀬𑀁 𑀓𑀢𑁆𑀢𑀼’𑀘𑁆𑀘𑀸𑀤𑀺, 𑀯𑀺𑀪𑀢𑁆𑀢𑀺𑀁 𑀯𑀺𑀥𑀸𑀬 𑀤𑀼𑀢𑀺𑀬𑀸𑀪𑀺𑀫𑀢𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀧𑀼𑀦 𑀧𑀬𑀸𑀤𑀺𑀦𑀺𑀧𑁆𑀨𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀬𑀁𑀓𑀺𑀜𑁆𑀘𑀺 𑀤𑁄𑀳𑀦𑀸𑀤𑀺𑀓𑀺𑀭𑀺𑀬𑀸 𑀬𑀼𑀢𑁆𑀢𑀁 ¶ 𑀓𑀭𑀡𑀸𑀤𑀺𑀭𑀽𑀧𑁂𑀦 𑀅𑀓𑀣𑀺𑀢𑀁 𑀕𑀯𑀸𑀤𑀺𑀓𑀫𑀺𑀘𑁆𑀙𑀺𑀢𑀁 𑀓𑀸𑀭𑀓𑀁, 𑀢𑀢𑁆𑀣𑀸𑀧𑀺 ‘‘𑀅𑀓𑀣𑀺𑀢𑀜𑁆𑀘𑀸’’𑀢𑀺 (𑁧-𑁪-𑁫𑁧) 𑀓𑀫𑁆𑀫𑀲𑀜𑁆𑀜𑀁 𑀯𑀺𑀥𑀸𑀬 𑀢𑁂𑀦𑁂𑀯 𑀤𑀼𑀢𑀺𑀬𑀸 𑀯𑀺𑀥𑀻𑀬𑀢𑁂, 𑀢𑀤𑀼𑀧𑀤𑀲𑁆𑀲𑁂𑀢𑀼𑀫𑀸𑀳-‘𑀉𑀧𑀬𑀼𑀚𑁆𑀚𑀫𑀸𑀦𑁂’𑀘𑁆𑀘𑀸𑀤𑀺, 𑀅𑀢𑁆𑀭 𑀘𑁂𑀯𑀫𑀓𑀣𑀺𑀢𑀦𑀺𑀬𑀫𑁄 𑀓𑀢𑁄 𑀯𑀸𑀢𑁆𑀢𑀺𑀓𑀓𑀸𑀭𑁂𑀦-

𑀧𑀼𑀘𑁆𑀙𑀺𑀘𑀺𑀪𑀺𑀓𑁆𑀔𑀻𑀦𑀁 𑀤𑀼𑀳𑀺,𑀬𑀸𑀘𑀻𑀦𑀁 𑀦𑀺𑀫𑀺𑀢𑁆𑀢𑀫𑀼𑀧𑀬𑁄𑀕𑁂;

𑀧𑀼𑀩𑁆𑀩𑀯𑀺𑀥𑀺𑀫𑁆𑀳𑀺-𑀓𑀣𑀺𑀢𑀁, 𑀩𑁆𑀭𑀽𑀲𑀸𑀲𑀻𑀦𑀜𑁆𑀘 𑀕𑀼𑀡𑀸𑀲𑀢𑁆𑀢𑀦𑁆𑀢𑀺.

𑀉𑀧𑀬𑀼𑀚𑁆𑀚𑀢𑁂 𑀇𑀝𑁆𑀞𑀢𑁆𑀣𑀲𑀺𑀤𑁆𑀥𑀺𑀬𑀁 𑀩𑁆𑀬𑀸𑀧𑀸𑀭𑀻𑀬𑀢𑀻𑀢𑁆𑀬𑀼𑀧𑀬𑁄𑀕𑁄-𑀧𑀬𑁄𑀧𑁆𑀧𑀪𑀼𑀢𑀺, 𑀢𑀲𑁆𑀫𑀺𑀁, 𑀦𑀺𑀫𑀺𑀢𑁆𑀢𑀁 𑀕𑀯𑀸𑀤𑀺, 𑀅𑀧𑀼𑀩𑁆𑀩𑀯𑀺𑀥𑀺𑀫𑁆𑀳𑀺 𑀅𑀧𑀸𑀤𑀸𑀦𑀸𑀥𑀺𑀓𑀭𑀡𑀸𑀤𑀺 𑀧𑀼𑀩𑁆𑀩𑀲𑀜𑁆𑀜𑀸 𑀯𑀺𑀥𑀸𑀦𑀸𑀪𑀸𑀯𑁂, 𑀯𑀺𑀥𑀸𑀦𑁂 𑀳𑀺 𑀫𑀸𑀡𑀯𑀓𑀸 𑀫𑀕𑁆𑀕𑀁 𑀧𑀼𑀘𑁆𑀙𑀢𑀺, 𑀭𑀼𑀓𑁆𑀔𑀸 𑀨𑀮𑀸𑀦𑁆𑀬𑀯𑀘𑀺𑀦𑀸𑀢𑁆𑀬𑀸𑀤𑀺 𑀬𑀣𑀸𑀭𑀳𑀁 𑀪𑀯𑀢𑀺, 𑀕𑀼𑀡𑀸𑀲𑀢𑁆𑀢𑀦𑁆𑀢𑀺 𑀕𑀼𑀡𑁂𑀦 𑀲𑀢𑁆𑀢𑀁 𑀲𑀫𑁆𑀩𑀦𑁆𑀥𑀻, 𑀕𑀼𑀡𑀲𑀤𑁆𑀤𑁂𑀦𑁂𑀢𑁆𑀣 𑀧𑀥𑀸𑀦𑀲𑀸𑀥𑀦𑀁 𑀥𑀫𑁆𑀫𑀸𑀤𑀺𑀓𑀁 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀁 𑀧𑀥𑀸𑀦𑀲𑀸𑀥𑀦𑀜𑁆𑀳𑀺 𑀓𑀺𑀭𑀺𑀬𑀸𑀬𑁄𑀧𑀓𑀸𑀭𑀓𑀫𑀼𑀧𑀓𑀸𑀭𑀺𑀬𑀁 𑀧𑀥𑀸𑀦𑀪𑀽𑀢𑀁 𑀓𑀺𑀭𑀺𑀬𑀫𑀧𑁂𑀓𑁆𑀔𑀺𑀬 𑀕𑀼𑀡𑁄 𑀪𑀯𑀢𑀺, 𑀘𑁄-𑀦𑀼𑀢𑁆𑀢𑀲𑀫𑀼𑀘𑁆𑀘𑀬𑁂, 𑀧𑀥𑀸𑀦𑀦𑁆𑀢𑀼 𑀥𑀫𑁆𑀫𑀸𑀤𑀺𑀦𑁄 𑀧𑀯𑀢𑁆𑀢𑀺𑀬𑀸 𑀢𑀤𑀢𑁆𑀣𑀢𑁆𑀢𑀸, 𑀉𑀧𑀬𑀼𑀚𑁆𑀚𑀫𑀸𑀦𑀜𑁆𑀘 𑀢𑀁 𑀧𑀬𑁄𑀧𑀪𑀼𑀢𑀺𑀘𑁂𑀢𑀺 𑀯𑀺𑀲𑁂𑀲𑀦𑀲𑀫𑀸𑀲𑀁 𑀓𑀢𑁆𑀯𑀸 𑀉𑀧𑀬𑀼𑀚𑁆𑀚𑀫𑀸𑀦𑀧𑀬𑁄𑀧𑁆𑀧𑀪𑀼𑀢𑀺𑀦𑁄 𑀦𑀺𑀫𑀺𑀢𑁆𑀢𑀦𑁆𑀢𑀺 𑀙𑀝𑁆𑀞𑀻𑀲𑀫𑀸𑀲𑁄, 𑀧𑀪𑀼𑀢𑀺 𑀲𑀤𑁆𑀤𑁂𑀦 𑀕𑀯𑀸𑀤𑀺𑀦𑁄 𑀕𑀳𑀡𑀁, 𑀆𑀤𑀺𑀲𑀤𑁆𑀤𑁂𑀦 𑀕𑁄𑀫𑀦𑁆𑀢𑀸𑀤𑀺𑀦𑁄, 𑀤𑀼𑀢𑀺𑀬𑁂𑀦𑀸𑀤𑀺 𑀲𑀤𑁆𑀤𑁂𑀦 𑀅𑀥𑀺𑀓𑀭𑀡𑀸𑀤𑀺𑀦𑁄, 𑀘𑀢𑀼𑀢𑁆𑀣𑁂𑀦 𑀯𑀺𑀦𑀬𑀸𑀤𑀺𑀦𑁄, 𑀯𑀺𑀥𑀸𑀦𑀦𑁆𑀢𑀺 𑀤𑀼𑀢𑀺𑀬𑀸 𑀯𑀺𑀥𑀸𑀦𑀁, 𑀤𑀼𑀢𑀺𑀬𑀸𑀯𑀺𑀥𑀸𑀦𑀫𑀪𑀺𑀫𑀢𑀦𑁆𑀢𑀺 𑀬𑁄𑀚𑀦𑀻𑀬𑀁. 𑀧𑀸𑀡𑀺𑀦𑀺𑀬𑁂𑀳𑀺 ‘‘𑀢𑀣𑀸 𑀬𑀼𑀢𑁆𑀢𑀜𑁆𑀘𑀸𑀦𑀺𑀘𑁆𑀙𑀺𑀢𑀁’’ (𑁧-𑁪-𑁫𑁦) 𑀇𑀘𑁆𑀘𑀦𑁂𑀦 𑀓𑀫𑁆𑀫𑀲𑀜𑁆𑀜𑀁 𑀯𑀺𑀥𑀸𑀬 ‘‘𑀓𑀫𑁆𑀫𑁂 𑀤𑀼𑀢𑀺𑀬𑀸’’ (𑁨-𑁩-𑁨) 𑀢𑁆𑀬𑀦𑁂𑀦𑁂𑀯 𑀤𑀼𑀢𑀺𑀬𑀸 𑀯𑀺𑀥𑀻𑀬𑀢𑁂, 𑀢𑀦𑁆𑀤𑀲𑁆𑀲𑁂𑀢𑀼𑀫𑀸𑀳-‘𑀬𑁂𑀦𑁂’𑀘𑁆𑀘𑀸𑀤𑀺, ‘‘𑀢𑀣𑀸 𑀬𑀼𑀢𑁆𑀢𑀜𑁆𑀘𑀸𑀦𑀺𑀘𑁆𑀙𑀺𑀢’’𑀦𑁆𑀢𑀻𑀫𑀲𑁆𑀲 𑀅𑀢𑁆𑀣𑁄 𑀬𑁂𑀦𑁂𑀯𑁂𑀘𑁆𑀘𑀸𑀤𑀺𑀧𑀜𑁆𑀘𑀺𑀓𑀸𑀧𑀸𑀞𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄, 𑀬𑀼𑀚𑁆𑀚𑀢𑁂𑀢𑀺 𑀓𑀺𑀭𑀺𑀬𑀸𑀪𑀺𑀲𑀫𑁆𑀩𑀚𑁆𑀛𑀢𑁂, 𑀬𑀼𑀢𑁆𑀢𑀦𑁆𑀢𑀺 𑀓𑀺𑀭𑀺𑀬𑀸𑀪𑀺𑀲𑀫𑁆𑀩𑀦𑁆𑀥𑀁, 𑀅𑀢𑁆𑀭 𑀢𑀼𑁋

𑀬𑀤𑁆𑀬𑀩𑀼𑀤𑁆𑀥𑁆𑀬𑀸𑀳𑀺𑀮𑀗𑁆𑀖𑀸𑀤𑀺, 𑀢𑀤𑀸𑀳𑁆𑀬𑀸𑀤𑀺𑀫𑀦𑀺𑀘𑁆𑀙𑀺𑀢𑀁;

𑀬𑀤𑀸 𑀮𑀚𑁆𑀚𑀸𑀪𑀬𑀸𑀤𑀻𑀳𑀺, 𑀢𑀤𑁂𑀘𑁆𑀙𑀺 𑀢𑀢𑀫𑀁 𑀫𑀢𑀁.

‘‘𑀢𑀣𑀸 𑀬𑀼𑀢𑁆𑀢𑀜𑁆𑀘𑀸𑀦𑀺𑀘𑁆𑀙𑀺𑀢’’𑀦𑁆𑀢𑀺 𑀲𑀼𑀢𑁆𑀢𑁂𑀦𑀲𑁆𑀲 𑀧𑀭𑀺𑀬𑀼𑀤𑀸𑀲𑀯𑀼𑀢𑁆𑀢𑀺𑀢𑁄 𑀇𑀘𑁆𑀙𑀺𑀢𑀸 𑀅𑀜𑁆𑀜𑀫𑀦𑀺𑀘𑁆𑀙𑀺𑀢𑀫𑀦𑀪𑀺𑀫𑀢𑀫𑀺𑀢𑀭𑀜𑁆𑀘, 𑀢𑀢𑁄𑀬𑁂𑀯‘𑀕𑀸𑀫𑀁 𑀕𑀘𑁆𑀙𑀦𑁆𑀢𑁄 𑀭𑀼𑀓𑁆𑀔𑀫𑀽𑀮𑀫𑀼𑀧𑀲𑀧𑁆𑀧𑀢𑀻’𑀢𑁆𑀬𑀢𑁆𑀭 𑀦𑁂𑀯𑀺𑀘𑁆𑀙𑀺𑀢𑀦𑀸𑀦𑀺𑀘𑁆𑀙𑀺𑀢𑀲𑁆𑀲𑀧𑀺 𑀭𑀼𑀓𑁆𑀔𑀫𑀽𑀮𑀲𑁆𑀲 𑀓𑀫𑁆𑀫 𑀲𑀜𑁆𑀜𑀸 ¶ 𑀲𑀺𑀤𑁆𑀥𑀸𑀢𑀺 𑀢𑀢𑁆𑀣 ‘‘𑀓𑀫𑁆𑀫𑁂 𑀤𑀼𑀢𑀺𑀬𑀸’’𑀢𑀺 𑀤𑀼𑀢𑀺𑀬𑀸 𑀯𑀺𑀥𑀻𑀬𑀢𑁂, 𑀢𑀦𑁆𑀤𑀲𑁆𑀲𑁂𑀢𑀺’𑀦𑁂𑀯𑀺𑀘𑁆𑀙𑀺𑀢𑀦𑀸𑀦𑀺𑀘𑁆𑀙𑀺𑀢𑀲𑁆𑀫𑀸’𑀇𑀘𑁆𑀘𑀸𑀤𑀺, 𑀭𑀼𑀓𑁆𑀔𑀫𑀽𑀮𑀁 𑀦𑁂𑀯𑀺𑀘𑁆𑀙𑀺𑀢𑀁 𑀧𑀼𑀩𑁆𑀩𑀫𑀦𑀪𑀺𑀫𑀢𑀢𑁆𑀢𑀸, 𑀦𑀸𑀧𑁆𑀬𑀦𑀺𑀘𑁆𑀙𑀺𑀢𑀁 𑀅𑀧𑁆𑀧𑀝𑀺𑀓𑀽𑀮𑀢𑁆𑀢𑀸, 𑀕𑀸𑀫𑀕𑀫𑁂𑀦 𑀳𑁆𑀬𑀲𑁆𑀲 𑀢𑀧𑁆𑀧𑀭𑀢𑀸, 𑀭𑀼𑀓𑁆𑀔𑀫𑀽𑀮𑁄𑀧𑀲𑀧𑁆𑀧𑀦𑀦𑁆𑀢𑀼 𑀧𑀲𑀗𑁆𑀕𑀸𑀕𑀢𑀦𑁆𑀢𑀺 𑀭𑀼𑀓𑁆𑀔𑀫𑀽𑀮𑀸𑀦𑀫𑁆𑀧𑀺 𑀓𑀺𑀭𑀺𑀬𑀸𑀪𑀺𑀲𑀫𑁆𑀩𑀦𑁆𑀥𑁄 𑀅𑀢𑁆𑀣𑁂𑀯, 𑀅𑀢𑁆𑀭𑀸𑀧𑀺-

𑀦𑁂𑀯𑀺𑀘𑁆𑀙𑀺𑀢𑀸𑀦𑀺𑀘𑁆𑀙𑀺𑀢𑀦𑁆𑀢𑀼, 𑀫𑀩𑀼𑀤𑁆𑀥𑀺𑀬𑀼𑀧𑀲𑀧𑁆𑀧𑀦𑁂;

𑀫𑀽𑀮𑀁 𑀯𑀺𑀲𑁆𑀲𑀫𑀦𑀢𑁆𑀣𑀦𑁆𑀢𑀼, 𑀢𑀫𑀺𑀘𑁆𑀙𑀺𑀢𑀢𑀫𑀁 𑀲𑀺𑀬𑀸.

𑀩𑁆𑀭𑀽𑀲𑀸𑀲𑀺𑀦𑀜𑁆𑀘𑀸𑀢𑀺 𑀘𑀲𑀤𑁆𑀤𑁄𑀧𑀲𑀗𑁆𑀕𑀳𑀺𑀢𑁂 𑀤𑀲𑁆𑀲𑁂𑀢𑀼𑀫𑀸𑀳-‘𑀏𑀯’𑀫𑀺𑀘𑁆𑀘𑀸𑀤𑀺, 𑀏𑀢𑁆𑀣 𑀕𑀸𑀫𑀤𑁂𑀯𑀤𑀢𑁆𑀢𑀕𑀕𑁆𑀕𑀸𑀦𑀫𑀓𑀣𑀺𑀢𑀲𑀜𑁆𑀜𑀸, 𑀅𑀚𑀸𑀤𑀬𑁄 𑀢𑁆𑀯𑀺𑀘𑁆𑀙𑀺𑀢𑀢𑀫𑀸, 𑀆𑀤𑀺𑀲𑀤𑁆𑀤𑁂𑀦 ‘𑀧𑀢𑁆𑀣𑁂𑀢𑀺 𑀕𑀸𑀯𑀼𑀁 𑀧𑀼𑀭𑀺𑀲𑀁 𑀤𑁆𑀯𑀺𑀚𑁄’𑀢𑁆𑀬𑀸𑀤𑀬𑁄 𑀲𑀗𑁆𑀕𑀳𑀺𑀢𑀸, 𑀦𑀬𑀢𑀺𑀦𑀻=𑀧𑀸𑀧𑀼𑀡𑀦𑁂, 𑀯𑀳𑀢𑀺 𑀯𑀳=𑀧𑀸𑀧𑀼𑀡𑀦𑁂, 𑀳𑀭𑀢𑀺 𑀳𑀭=𑀳𑀭𑀡𑁂, 𑀚𑀬𑀢𑀺𑀚𑀺=𑀚𑀬𑁂, 𑀲𑀩𑁆𑀩𑀢𑁆𑀣𑀮𑁂𑀘 𑀏𑀢𑁆𑀢𑁂 𑀅𑀬𑀸𑀤𑁂𑀲𑁂 𑀘 𑀭𑀽𑀧𑀁, 𑀤𑀡𑁆𑀟=𑀤𑀡𑁆𑀟𑀦𑁂 𑀘𑀼𑀭𑀸𑀤𑀺𑀢𑁆𑀢𑀸 𑀡𑀺𑀫𑁆𑀳𑀺 𑀭𑀽𑀧𑀁, 𑀅𑀣 ‘‘𑀅𑀥𑀺𑀲𑀻𑀝𑁆𑀞𑀸𑀲𑀸𑀦𑀁 𑀓𑀫𑁆𑀫𑀁’’𑀢𑁆𑀬𑀸𑀤𑀺𑀦𑀸 (𑁧-𑁪-𑁪𑁬) 𑀢𑁂𑀦 𑀢𑁂𑀦 𑀓𑀫𑁆𑀫𑀲𑀜𑁆𑀜𑀁 𑀯𑀺𑀥𑀸𑀬 ‘𑀧𑀞𑀯𑀺𑀁 𑀅𑀥𑀺𑀲𑁂𑀲𑁆𑀲𑀢𑀻’𑀢𑀺 𑀆𑀤𑁄 (𑀢𑀢𑁆𑀣) 𑀢𑀢𑁆𑀣 ‘‘𑀓𑀫𑁆𑀫𑁂 𑀤𑀼𑀢𑀺𑀬𑀸’’𑀢𑀺 (𑁨-𑁩-𑁨) 𑀤𑀼𑀢𑀺𑀬𑀸 𑀯𑀺𑀥𑀻𑀬𑀢𑁂 𑀢𑁂𑀳𑀺 𑀢𑁂𑀳𑀺 𑀲𑀢𑁆𑀣 𑀓𑀸𑀭𑁂𑀳𑀺, 𑀲𑀩𑁆𑀩𑀢𑁆𑀣𑁂𑀯𑁂𑀢𑁆𑀣 𑀮𑁄𑀓𑀲𑁆𑀲 𑀓𑀫𑁆𑀫𑀯𑀘𑀦𑀺𑀘𑁆𑀙𑀸𑀢𑀺 𑀓𑀫𑁂𑀦𑁂𑀢𑀁𑀜𑁆𑀜𑀲𑀜𑁆𑀜𑀸𑀧𑀼𑀩𑁆𑀩𑀓𑀁 𑀓𑀫𑁆𑀫𑀫𑀼𑀧𑀤𑀲𑁆𑀲𑁂𑀦𑁆𑀢𑁄 𑀆𑀳-‘𑀅𑀥𑀺𑀧𑀼𑀩𑁆𑀩’𑀇𑀘𑁆𑀘𑀸𑀤𑀺, 𑀬𑀸𑀬 𑀯𑀢𑁆𑀢𑀺𑀘𑁆𑀙𑀸𑀬 𑀤𑀼𑀢𑀺𑀬𑀸 𑀲𑀺𑀬𑀸 𑀢𑀸𑀬 𑀯𑀢𑁆𑀢𑀺𑀘𑁆𑀙𑀸𑀬 𑀓𑀫𑁆𑀫𑀢𑀸 𑀓𑀣𑀁𑀳𑀺𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀦𑁂𑀯 𑀉𑀧𑀮𑀩𑁆𑀪𑀦𑁆𑀢𑀻𑀢𑀺 𑀓𑀤𑀸𑀘𑀺𑀓𑀲𑁆𑀲𑀘𑀺 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀧𑀬𑀢𑀺𑀢𑀩𑁆𑀩𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑀭𑀫𑀸𑀭𑀩𑁆𑀪𑀦𑀻𑀬𑀁, 𑀢𑀢𑁆𑀣𑁂𑀯𑀁 𑀓𑀺𑀁 𑀪𑀯𑀢𑁄 𑀫𑀦𑀲𑀺 𑀤𑁄𑀲𑀥𑀺𑀚𑀫𑁆𑀪𑀦𑁂𑀦𑀸𑀢𑀺 𑀅𑀢𑁆𑀣𑁄, 𑀥𑀫𑁆𑀫𑁂𑀢𑀺 𑀏𑀢𑁆𑀣𑀸𑀧𑀺 𑀏𑀯𑀁 𑀲𑀤𑁆𑀤𑀁 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀬𑀣𑀸 𑀆𑀥𑀸𑀭𑁂 𑀓𑀫𑁆𑀫𑀯𑀘𑀦𑀺𑀘𑁆𑀙𑀸, 𑀢𑀣𑁂𑀳𑀸𑀧𑀺 𑀆𑀥𑀸𑀭𑀯𑀘𑀦𑀺𑀘𑁆𑀙𑀸𑀢𑀺 𑀅𑀢𑁆𑀣𑁄, 𑀢𑁂𑀦𑁂𑀯𑀸𑀳-‘𑀥𑀫𑁆𑀫𑁂𑀢𑀺 𑀆𑀥𑀸𑀭𑀯𑀘𑀦𑀺𑀘𑁆𑀙𑀸’𑀢𑀺, 𑀥𑀫𑁆𑀫𑁂 𑀅𑀪𑀺𑀦𑀺𑀯𑀺𑀲𑀢𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀏𑀯𑀁𑀲𑀤𑁆𑀤𑀲𑀫𑀸𑀦𑀢𑁆𑀣𑀢𑁆𑀢𑀸 𑀢𑀣𑀸 𑀲𑀤𑁆𑀤𑀲𑁆𑀲 𑀢𑀤𑀢𑁆𑀣𑀸𑀦𑀼𑀲𑀸𑀭𑁂𑀦𑁂𑀯 𑀯𑀺𑀜𑁆𑀜𑀸𑀬𑀢𑀻𑀢𑀺 𑀢𑀣𑀸𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑀺𑀲𑀼𑀁 𑀦 𑀯𑀼𑀢𑁆𑀢𑁄, 𑀧𑀸𑀦𑀜𑁆𑀘 𑀆𑀘𑀸𑀭𑁄𑀘 𑀧𑀸𑀦𑀸𑀘𑀸𑀭𑀁, 𑀢𑀁𑀧𑀸𑀦𑀸𑀘𑀸𑀭𑀫𑀲𑁆𑀲 𑀆𑀥𑀸𑀭𑀲𑁆𑀲 𑀢𑀲𑁆𑀫𑀺𑀁 𑀢𑀧𑁆𑀧𑀸𑀦𑀸𑀘𑀸𑀭𑁂, 𑀧𑀸𑀦𑀢𑁆𑀣𑀸𑀘𑀸𑀭𑀢𑁆𑀣𑀥𑀸𑀢𑀼𑀲𑀫𑁆𑀩𑀦𑁆𑀥𑀻 𑀬𑁄 𑀦𑀤𑁆𑀬𑀸𑀤𑀺 𑀓𑁄 𑀆𑀥𑀸𑀭𑁄 𑀲𑁄 𑀧𑀸𑀦𑀸𑀘𑀸𑀭𑀯𑀸𑀬𑁂𑀯𑀸𑀢𑀺 𑀆𑀳- ‘𑀧𑀸𑀦𑀢𑁆𑀣𑀸𑀘𑀸𑀭𑀢𑁆𑀣𑀸𑀦𑀁 𑀥𑀸𑀢𑀽𑀦𑀫𑀸𑀥𑀸𑀭𑁂’𑀢𑀺 ¶ , 𑀓𑁂𑀲𑀜𑁆𑀘𑀻𑀢𑀺 𑀅𑀦𑀺𑀬𑀫𑁂𑀦 𑀓𑁂𑀲𑀜𑁆𑀘𑀺 𑀲𑀤𑁆𑀤𑀲𑀢𑁆𑀣𑀓𑀸𑀭𑀸𑀦𑀁, 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀆𑀥𑀸𑀭𑀯𑀘𑀦𑀺𑀘𑁆𑀙𑀸𑀧𑀓𑁆𑀔𑁂, 𑀧𑀢𑀺𑀧𑀭𑀻𑀳𑀺 𑀪𑀸𑀕𑁂𑀘𑁂𑀢𑁆𑀬𑀯𑀲𑀺𑀤𑁆𑀥𑀸𑀢𑀺 𑀇𑀫𑀺𑀦𑀸 𑀧𑀢𑀺𑀲𑀤𑁆𑀤𑀲𑁆𑀲 𑀥𑀸𑀢𑀼𑀦𑀸 𑀅𑀬𑀼𑀢𑁆𑀢𑀢𑀁 𑀤𑀲𑁆𑀲𑁂𑀢𑀺… 𑀬𑀤𑀺 𑀬𑀼𑀚𑁆𑀚𑁂𑀬𑁆𑀬 𑀙𑀝𑁆𑀞𑀺𑀬𑀸𑀪𑀸𑀯𑀸, 𑀢𑁂𑀦𑀸𑀳-‘𑀬𑀤𑀸𑀢𑁆𑀯𑀺’𑀘𑁆𑀘𑀸𑀤𑀺, 𑀯𑀼𑀢𑁆𑀢𑀺𑀬𑀁 𑀢𑁂𑀦𑀸𑀢𑀺 𑀢𑀲𑀤𑁆𑀤𑁂𑀦, 𑀅𑀧𑀺𑀲𑀤𑁆𑀤𑁄𑀧𑀲𑀗𑁆𑀕𑀳𑀺𑀢𑀁 𑀢𑀢𑀺𑀬𑀫𑁆𑀧𑀺 𑀕𑀳𑁂𑀢𑁆𑀯𑀸 𑀯𑀸𑀘𑀸𑀢𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄.

𑀬𑀤𑀸 𑀓𑀸𑀮𑀤𑁆𑀥𑀸𑀦𑀫𑀺𑀘𑁆𑀘𑀸𑀤𑀺𑀦𑀸‘𑀫𑀸𑀲𑀫𑀸𑀲𑀢𑁂 𑀓𑁄𑀲𑀁 𑀲𑀬𑀢𑀺’𑀘𑁆𑀘𑀸𑀤𑁄 𑀅𑀓𑀫𑁆𑀫𑀓𑁂𑀳𑀺𑀧𑀺 𑀬𑁄𑀕𑁂 𑀓𑀸𑀮𑀪𑀸𑀯𑀤𑁆𑀥𑀤𑁂𑀲𑀸𑀦𑀁 𑀧𑀭𑁂𑀳𑀺 𑀓𑀫𑁆𑀫𑀢𑁆𑀢𑀫𑀦𑀼𑀜𑁆𑀜𑀸𑀢𑀦𑁆𑀢𑀺 𑀘, 𑀬𑀤𑀸𑀢𑁆𑀯𑀺𑀘𑁆𑀘𑀸𑀤𑀺𑀦𑀸 𑀢𑀼 𑀓𑀺𑀭𑀺𑀬𑀸𑀯 𑀲𑀩𑁆𑀩𑁂𑀦𑀲𑀩𑁆𑀩𑀁 𑀦 𑀲𑀽𑀬𑀢𑀺, 𑀢𑀣𑀸 𑀲𑀢𑀺 𑀓𑀼𑀢𑁄 𑀘 𑀓𑀫𑁆𑀫𑀢𑁆𑀢𑀦𑁆𑀢𑀺 𑀢𑁂𑀳𑁂𑀯 𑀯𑀼𑀢𑁆𑀢𑀦𑁆𑀢𑀻 𑀘 𑀤𑀲𑁆𑀲𑁂𑀢𑀺, 𑀕𑀫𑁆𑀫 𑀫𑀸𑀦𑀓𑀺𑀭𑀺𑀬𑀸𑀬𑁄𑀕𑁄𑀧𑀺 𑀦 𑀦𑀺𑀲𑁆𑀲𑀺𑀢𑁄… 𑀫𑀸𑀲𑀫𑀸𑀲𑀢𑁂𑀘𑁆𑀘𑀸𑀤𑀻𑀲𑀼 𑀆𑀲𑀦𑀸𑀤𑀺 [𑀆𑀲𑀦𑀸𑀤𑀻𑀲𑀼 (𑀧𑁄𑀢𑁆𑀣𑀓𑁂)] 𑀓𑀺𑀭𑀺𑀬𑀸𑀦𑀁 𑀫𑀸𑀲𑀸𑀤𑀺𑀬𑁄𑀕𑁄 𑀯𑀺𑀬 𑀓𑀮𑁆𑀬𑀸𑀡𑀺𑀢𑁆𑀢𑀕𑀼𑀡𑀸𑀤𑀺𑀬𑁄𑀕𑁄 𑀘 𑀮𑁄𑀓𑀲𑁆𑀲 𑀧𑀢𑀻𑀢𑀺𑀧𑀣𑀫𑀼𑀧𑀬𑀸𑀢𑀻𑀢𑀺, 𑀦 𑀲𑀺𑀚𑁆𑀛𑀢𑀻𑀢𑀺 𑀓𑀺𑀭𑀺𑀬𑀸 𑀦 𑀳𑁄𑀦𑁆𑀢𑀺 𑀕𑀼𑀡𑀤𑀩𑁆𑀩𑀸𑀦𑀻𑀢𑀺 𑀓𑀺𑀭𑀺𑀬𑀸𑀲𑀫𑁆𑀩𑀦𑁆𑀥𑀸𑀪𑀸𑀯𑀸 𑀓𑀫𑁆𑀫𑀢𑁆𑀢𑀸𑀪𑀸𑀯𑁄𑀢𑀺 𑀦 𑀲𑀺𑀚𑁆𑀛𑀢𑀺, 𑀕𑀼𑀴𑁂𑀦 𑀫𑀺𑀲𑁆𑀲𑀸 𑀥𑀸𑀦𑀸 𑀪𑀚𑁆𑀚𑀺𑀢𑀬𑀯𑀸 𑀕𑀼𑀴𑀥𑀸𑀦𑀸. 𑀅𑀚𑁆𑀛𑀬𑀦𑀓𑀺𑀭𑀺𑀬𑀸𑀬 𑀧𑀩𑁆𑀩𑀢𑁂𑀦 𑀘 𑀫𑀸𑀲𑀓𑁄𑀲𑀸𑀦𑀁 𑀲𑀸𑀓𑀮𑁆𑀮𑁂𑀦 𑀲𑀫𑁆𑀩𑀦𑁆𑀥𑀸𑀪𑀸𑀯𑀸 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀸𑀪𑀸𑀯𑁄𑀢𑀺 𑀫𑀸𑀲𑀲𑁆𑀲𑀸𑀢𑀺𑀆𑀤𑀻𑀲𑀼 𑀦 𑀤𑀼𑀢𑀺𑀬𑀸. 𑀧𑀼𑀩𑁆𑀩𑀡𑁆𑀳𑁂 𑀲𑀫𑀬𑀦𑁆𑀢𑀺 𑀇𑀫𑀺𑀦𑀸 𑀧𑀼𑀩𑁆𑀩𑀡𑁆𑀳𑁂 𑀲𑀫𑀬𑁄𑀢𑀺 𑀲𑀢𑁆𑀢𑀫𑀻𑀆𑀫𑀸𑀤𑀺𑀲𑀫𑀸𑀲𑀁 𑀤𑀲𑁆𑀲𑁂𑀢𑀺, 𑀅𑀘𑁆𑀘𑀦𑁆𑀢 𑀫𑁂𑀯𑀸𑀢𑀺 𑀇𑀫𑀺𑀦𑀸 𑀲𑀫𑀬𑀲𑁆𑀲 𑀲𑀸𑀓𑀮𑁆𑀮𑁂𑀦 𑀯𑀺𑀳𑀭𑀡𑀓𑀺𑀭𑀺𑀬𑀸𑀬 𑀲𑀫𑁆𑀩𑀦𑁆𑀥𑀫𑀸𑀳, 𑀬𑀁𑀲𑀫𑀬𑀁 𑀓𑀭𑀼𑀡𑀸𑀯𑀺𑀳𑀸𑀭𑁂𑀦 𑀯𑀺𑀳𑀸𑀲𑀺, 𑀢𑀁 𑀏𑀓𑀁𑀲𑀫𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀉𑀧𑀲𑀗𑁆𑀓𑀫𑀦𑀓𑀺𑀭𑀺𑀬𑀸𑀬𑀘𑁆𑀘𑀦𑁆𑀢𑀫𑁂𑀯 𑀬𑀼𑀢𑁆𑀢𑁄𑀢𑀺 𑀇𑀫𑀺𑀦𑀸 𑀦𑀺𑀯𑀸𑀲𑀦𑀯𑀺𑀳𑀭𑀡 𑀓𑀺𑀭𑀺𑀬𑀸𑀳𑀺𑀧𑀺 𑀧𑀼𑀩𑁆𑀩𑀡𑁆𑀳𑀲𑀫𑀬𑀸𑀤𑀻𑀦𑀫𑀘𑁆𑀘𑀦𑁆𑀢𑀫𑁂𑀯 𑀬𑀼𑀢𑁆𑀢𑀢𑀁 𑀉𑀧𑀮𑀓𑁆𑀔𑁂𑀢𑀺, 𑀧𑀓𑀸𑀭𑀦𑁆𑀢𑀭𑁂𑀦𑀸𑀧𑀺 𑀲𑀺𑀤𑁆𑀥𑀺𑀬𑀫𑀸𑀲𑀗𑁆𑀓𑀫𑀼𑀩𑁆𑀪𑀸𑀯𑀬𑀢𑀺 ‘𑀬𑀤𑀸 𑀢𑁆𑀯𑀺’𑀘𑁆𑀘𑀸𑀤𑀺𑀦𑀸, 𑀯𑀺𑀪𑀢𑁆𑀢𑀺𑀬𑀸 𑀯𑀺𑀧𑀮𑁆𑀮𑀸𑀲𑁄 𑀬𑀣𑀸𑀧𑀓𑀢𑀫𑀢𑀺𑀓𑁆𑀓𑀫𑁆𑀫 𑀅𑀜𑁆𑀜𑀣𑀸 𑀪𑀯𑀦𑀁, 𑀇𑀥 𑀧𑀦 𑀲𑀢𑁆𑀢𑀫𑀺 𑀬𑀫𑁆𑀧𑀢𑁆𑀢𑀸𑀬𑀁 𑀲𑀢𑁆𑀢𑀫𑁆𑀬𑀢𑁆𑀣𑁂 𑀩𑀸𑀳𑀼𑀮𑀓𑁂𑀦 ‘‘𑀓𑀫𑁆𑀫𑁂 𑀤𑀼𑀢𑀺𑀬𑀸’’𑀘𑁆𑀘𑁂𑀯 𑀤𑀼𑀢𑀺𑀬𑀸𑀧𑁆𑀧𑀢𑁆𑀢𑀺.

𑀢𑀢𑀺𑀬𑀸𑀪𑀺𑀫𑀢𑀸𑀢𑀺 ‘‘𑀅𑀧𑀯𑀕𑁆𑀕𑁂 𑀢𑀢𑀺𑀬𑀸’’𑀢𑀺 (𑁨-𑁩-𑁬) 𑀯𑀘𑀦𑁂𑀦 𑀧𑀸𑀡𑀺𑀦𑀺𑀬𑀸𑀦𑀁𑀧𑀧𑀜𑁆𑀘𑀢𑁆𑀢𑀫𑀪𑀺𑀫𑀢𑀸, 𑀓𑀣𑀫𑁆𑀧𑀦 𑀓𑀸𑀮𑀤𑁆𑀥𑀸𑀦𑀁 𑀓𑀭𑀡𑀢𑁆𑀢𑀫𑀺𑀘𑁆𑀘𑀸𑀲𑀗𑁆𑀓𑀺𑀬 𑀓𑀭𑀡𑀢𑁆𑀢𑀫𑁂𑀲𑀫𑁆𑀧𑀝𑀺𑀧𑀸𑀤𑁂𑀦𑁆𑀢𑁄 ¶ 𑀆𑀳-‘𑀢𑀣𑀸𑀧𑀺’𑀘𑁆𑀘𑀸𑀤𑀺, 𑀢𑀣𑀸𑀧𑀻𑀢𑀺 𑀯𑀼𑀢𑁆𑀢𑀓𑁆𑀓𑀫𑁂𑀦 𑀓𑀭𑀡𑀢𑁆𑀢𑀲𑀫𑁆𑀪𑀯𑀸 𑀢𑀢𑀺𑀬𑀸𑀬 𑀯𑀺𑀚𑁆𑀚𑀫𑀸𑀦𑀸𑀬𑀧𑀺, 𑀲𑀺𑀬𑀸𑀢𑀺 𑀢𑀢𑀺𑀬𑀸 𑀲𑀺𑀬𑀸, 𑀢𑀜𑁆𑀘𑀸𑀢𑀺 𑀢𑀁 𑀓𑀭𑀡𑀜𑁆𑀘. 𑀓𑀸𑀭𑀓𑀫𑀚𑁆𑀛𑁂𑀢𑀺 𑀏𑀢𑁆𑀣 𑀙𑀝𑁆𑀞𑀻 𑀲𑀫𑀸𑀲𑁄 𑀓𑀸𑀭𑀓𑀲𑀤𑁆𑀤𑁂𑀦 𑀘 𑀲𑀢𑁆𑀢𑀺𑀓𑀸𑀭𑀓𑀁 𑀕𑀳𑀺𑀢𑀦𑁆𑀢𑀺 (𑀆𑀳) ‘𑀤𑁆𑀯𑀺𑀦𑁆𑀦𑀁 𑀓𑀢𑁆𑀢𑀼𑀲𑀢𑁆𑀢𑀻𑀦𑀁 𑀫𑀚𑁆𑀛𑁂’𑀢𑀺, 𑀅𑀪𑀺𑀦𑁆𑀦𑀲𑁆𑀲𑀸𑀧𑀺 𑀳𑀺 𑀏𑀓𑀲𑁆𑀲 𑀤𑁂𑀯𑀤𑀢𑁆𑀢𑀸𑀤𑀺𑀓𑀢𑁆𑀢𑀼𑀦𑁄 𑀪𑀺𑀦𑁆𑀦𑀸𑀦𑀁 𑀢𑀁𑀲𑀫𑀯𑁂𑀢𑀸𑀦𑀁 𑀓𑀢𑁆𑀢𑀼𑀲𑀢𑁆𑀢𑀻𑀦𑀁 𑀫𑀚𑁆𑀛𑁂 𑀓𑀸𑀮𑀤𑁆𑀥𑀸𑀦𑀸𑀦𑀺, 𑀲𑀢𑁆𑀢𑀺𑀪𑁂𑀤𑀫𑁂𑀯 𑀩𑁆𑀬𑀜𑁆𑀚𑀬𑀫𑀸𑀳-‘𑀢𑀣𑀸𑀳𑀺’𑀘𑁆𑀘𑀸𑀤𑀺, 𑀏𑀓𑀢𑁆𑀣𑀸𑀢𑀺 𑀏𑀓𑀲𑁆𑀫𑀺𑀁 𑀤𑁂𑀯𑀤𑀢𑁆𑀢𑁂, 𑀤𑁆𑀯𑀻𑀳𑁂𑀢𑀻𑀢𑁂 (𑀪𑀼𑀜𑁆𑀚𑀺𑀓𑁆𑀭𑀺𑀬𑀸) 𑀲𑀸𑀥𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀤𑁆𑀯𑀺𑀦𑁆𑀦𑀁 𑀅𑀳𑀸𑀦𑀁 𑀲𑀫𑀸𑀳𑀸𑀭𑁄 𑀤𑁆𑀯𑀻𑀳𑀁 𑀢𑀲𑁆𑀫𑀺𑀁. 𑀇𑀲𑀼𑀫𑀲𑀢𑀻𑀢𑀺 𑀯𑀸, 𑀇𑀲𑀼𑀫𑁆𑀳𑀺 𑀆𑀲𑁄 𑀅𑀲𑁆𑀲𑁂𑀢𑀺 𑀯𑀸 𑀦𑀺𑀧𑁆𑀨𑀦𑁆𑀦𑁂𑀦 𑀇𑀲𑁆𑀲𑀸𑀲𑀲𑀤𑁆𑀤𑁂𑀦 𑀕𑀫𑁆𑀫𑀫𑀸𑀦𑀁 𑀓𑀺𑀭𑀺𑀬𑀁 𑀤𑀲𑁆𑀲𑁂𑀢𑀺 ‘𑀇𑀲𑁆𑀯𑀲𑀦𑁂’𑀢𑀺, 𑀦𑀦𑁆𑀯𑀺𑀘𑁆𑀘𑀸𑀤𑀺 𑀘𑁄𑀤𑁆𑀬𑀁, 𑀥𑀦𑀼𑀧𑀜𑁆𑀘𑀲𑀢𑀁 𑀓𑁄𑀲𑁄, 𑀏𑀯𑀫𑀜𑁆𑀜𑀢𑁂𑀘𑁆𑀘𑀸𑀤𑀺 𑀧𑀭𑀺𑀳𑀸𑀭𑁄, 𑀙𑀝𑁆𑀞𑀺𑀬𑀸𑀲𑀫𑁆𑀧𑀢𑁆𑀢𑀸𑀬𑀦𑁆𑀢𑀺 𑀓𑁄𑀲𑀲𑁆𑀲𑁂𑀓𑀤𑁂𑀲𑁂𑀢𑀺 𑀏𑀯𑀁 𑀙𑀝𑁆𑀞𑀺𑀬𑀸 𑀲𑀫𑁆𑀧𑀢𑁆𑀢𑀸𑀬𑀁, 𑀫𑀼𑀢𑁆𑀢𑀲𑀁𑀲𑀬𑁂𑀦𑁂𑀤𑀁 𑀲𑀫𑀸𑀦𑀦𑁆𑀢𑀺 𑀫𑀼𑀢𑁆𑀢𑁄 𑀲𑀁𑀲𑀬𑁄 𑀬𑀲𑁆𑀫𑀺𑀁 𑀅𑀯𑀥𑁆𑀬𑀸𑀤𑁄 𑀢𑁂𑀦𑁂𑀢𑀁 𑀢𑀼𑀮𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀺𑀬𑀁 𑀅𑀪𑀺𑀫𑀢𑀸𑀢𑀺 ‘‘𑀲𑀢𑁆𑀢𑀫𑀻 𑀧𑀜𑁆𑀘𑀫𑀺𑀬𑁄 𑀓𑀸𑀭𑀓𑀫𑀚𑁆𑀛𑁂’’𑀢𑀺 (𑁨-𑁩-𑁭) 𑀯𑀘𑀦𑁂𑀦 𑀲𑀢𑁆𑀢𑀫𑀻𑀧𑀜𑁆𑀘𑀫𑀺𑀬𑁄 𑀧𑀧𑀜𑁆𑀘𑀢𑁆𑀢𑀫𑀪𑀺𑀫𑀢𑀸, 𑀤𑁆𑀯𑀻𑀳𑁂 𑀪𑀼𑀜𑁆𑀚𑀺𑀲𑁆𑀲𑀢𑀻𑀢𑀺 𑀤𑁆𑀯𑀻𑀲𑀼 𑀤𑀺𑀯𑀲𑁂𑀲𑀼 𑀕𑀢𑁂𑀲𑀼 𑀪𑀼𑀜𑁆𑀚𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄, ‘‘𑀬𑀩𑁆𑀪𑀸𑀯𑁄 𑀪𑀸𑀯𑀮𑀓𑁆𑀔𑀡’’𑀦𑁆𑀢𑀺 (𑁨-𑁩𑁬) 𑀲𑀢𑁆𑀢𑀫𑀻, 𑀲𑀓𑀲𑀓𑀓𑀸𑀭𑀓𑀯𑀘𑀦𑀺𑀘𑁆𑀙𑀸𑀬𑁂𑀯𑀸𑀢𑀺 𑀳𑀺 𑀇𑀤𑀁 𑀩𑀸𑀳𑀼𑀮𑁆𑀮𑀁 𑀦𑀺𑀲𑁆𑀲𑀸𑀬 𑀯𑀼𑀢𑁆𑀢𑀁, 𑀤𑁆𑀯𑀻𑀳𑀸 𑀪𑀼𑀜𑁆𑀚𑀺𑀲𑁆𑀲𑀢𑀺 𑀓𑁄𑀲𑀸 𑀯𑀺𑀚𑁆𑀛𑀢𑀻𑀢𑀺 𑀤𑁆𑀯𑀻𑀳𑀸 𑀦𑀺𑀓𑁆𑀔𑀫𑁆𑀫 𑀪𑀼𑀜𑁆𑀚𑀺𑀲𑁆𑀲𑀢𑀺, 𑀓𑁄𑀲𑀸 𑀦𑀺𑀓𑁆𑀔𑀫𑁆𑀫 𑀞𑀺𑀢𑀁 𑀮𑀓𑁆𑀔𑀁 𑀯𑀺𑀚𑁆𑀛𑀢𑀺 𑀉𑀧𑀸𑀢𑁆𑀢𑀯𑀺𑀲𑀬𑁄-𑀬𑀫𑀯𑀥𑀺, 𑀓𑁄𑀲𑁂 𑀯𑀺𑀚𑁆𑀛𑀢𑀻𑀢𑀺 𑀓𑁄𑀲𑁂 𑀞𑀺𑀢𑀁 𑀮𑀓𑁆𑀔𑀁 𑀯𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄.

𑀓𑀢𑀘𑀢𑁆𑀣𑀲𑀫𑀸𑀲𑀸𑀢𑀺 𑀓𑀢𑁄 𑀘𑀢𑁆𑀣𑀲𑀫𑀸𑀲𑁄 𑀬𑁂𑀲𑀼 𑀢𑁂 𑀢𑀣𑀸 𑀯𑀼𑀢𑁆𑀢𑀸, 𑀅𑀜𑁆𑀜𑀧𑀤𑀢𑁆𑀣𑀯𑀼𑀢𑁆𑀢𑀬𑁄𑀢𑀺 𑀅𑀜𑁆𑀜𑀧𑀤𑀢𑁆𑀣𑁂 𑀯𑀼𑀢𑁆𑀢𑀺 𑀬𑁂𑀲𑀦𑁆𑀢𑀺 𑀩𑁆𑀬𑀥𑀺𑀓𑀭𑀡𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁄, 𑀘𑀢𑁆𑀢𑀲𑀫𑀸𑀲𑁂 𑀕𑀢𑁆𑀬𑀸𑀤𑀻𑀦𑀁 𑀯𑀺𑀲𑀼𑀁𑀯𑀺𑀲𑀼𑀁 𑀧𑀥𑀸𑀦𑀢𑁆𑀢𑀸 𑀢𑁂𑀳𑀺 𑀧𑀭𑀁 𑀧𑀬𑀼𑀚𑁆𑀚𑀫𑀸𑀦𑁄 𑀅𑀢𑁆𑀣𑀲𑀤𑁆𑀤𑁄 𑀕𑀢𑁆𑀬𑀸𑀤𑀻𑀳𑀺 𑀧𑀘𑁆𑀘𑁂𑀓𑀫𑀪𑀺𑀲𑀫𑁆𑀩𑀚𑁆𑀛𑀢𑀻𑀢𑀺 𑀫𑀜𑁆𑀜𑀢𑁂, 𑀅𑀣 𑀲𑀼𑀢𑁆𑀢𑁂 ‘𑀧𑀬𑁄𑀚𑁆𑀚𑁂’𑀇𑀘𑁆𑀘𑁂𑀢𑀸𑀯𑀢𑁆𑀬𑀼𑀘𑁆𑀘𑀫𑀸𑀦𑁂 𑀧𑀬𑁄𑀚𑁆𑀚𑁄 𑀲𑀬𑀁 𑀓𑀢𑁆𑀢𑀸𑀢𑀺 𑀓𑀣𑀁 𑀯𑀺𑀜𑁆𑀜𑀸𑀬𑀢𑀺 𑀬𑁂𑀦 ‘𑀧𑀬𑁄𑀚𑁆𑀚𑁂 𑀓𑀢𑁆𑀢𑀭𑀻’𑀢𑀺 𑀯𑀺𑀯𑀭𑀡𑀁 𑀓𑀢𑀫𑀺𑀘𑁆𑀘𑀸𑀲𑀗𑁆𑀓𑀺𑀬𑀸𑀳-‘𑀕𑀢𑁆𑀬𑀸𑀤𑁆𑀬𑀢𑁆𑀣’𑀫𑀺𑀘𑁆𑀘𑀸𑀤𑀺, 𑀆𑀤𑀺𑀲𑀤𑁆𑀤𑁂𑀦 𑀩𑁄𑀥𑀸 𑀤𑀻𑀦𑀁 ¶ 𑀕𑀳𑀡𑀁, 𑀢𑀓𑁆𑀓𑀺𑀭𑀺𑀬𑀸𑀲𑀫𑀢𑁆𑀣𑁄𑀯𑀸𑀢𑀺 𑀢𑀲𑁆𑀲𑀸 𑀕𑀢𑁆𑀬𑀸𑀤𑀺𑀓𑀸𑀬 𑀓𑀺𑀭𑀺𑀬𑀸𑀬 𑀲𑀫𑀢𑁆𑀣𑁄 𑀏𑀯 𑀦𑀺𑀬𑀼𑀚𑁆𑀚𑀢𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀓𑀺𑀭𑀺𑀬𑀸𑀓𑀭𑀡𑁂 𑀲𑀫𑀢𑁆𑀣𑁄 𑀦𑀸𑀫 𑀓𑀢𑁆𑀢𑀸𑀯𑀸𑀢𑀺 𑀆𑀳-‘𑀲𑁄𑀘 𑀓𑀢𑁆𑀢𑀸’𑀢𑀺. 𑀤𑀼𑀢𑀺𑀬𑀸𑀬 𑀲𑀺𑀤𑁆𑀥𑀸𑀬𑀸𑀢𑀺 𑀯𑀓𑁆𑀔𑀫𑀸𑀦𑀦𑀬𑁂𑀦 𑀧𑀬𑁄𑀚𑁆𑀚𑀲𑁆𑀲 𑀓𑀢𑁆𑀢𑀼𑀦𑁄 𑀓𑀫𑁆𑀫𑀢𑁆𑀢𑀲𑀺𑀤𑁆𑀥𑀺𑀬𑀸 ‘‘𑀓𑀫𑁆𑀫𑁂 𑀤𑀼𑀢𑀺𑀬𑀸’’𑀢𑀺 𑀲𑀼𑀢𑁆𑀢𑁂𑀦𑁂𑀯 𑀓𑀫𑁆𑀫𑁂 𑀤𑀼𑀢𑀺𑀬𑀸𑀬 𑀲𑀺𑀤𑁆𑀥𑀸𑀬. 𑀓𑀺𑀁 𑀮𑀓𑁆𑀔𑀡𑁄-𑀬𑀁 𑀦𑀺𑀬𑀫𑁄 𑀬𑀤𑀢𑁆𑀣𑀫𑀺 𑀤𑀫𑀸𑀭𑀪𑀻𑀬𑀢𑀺𑀘𑁆𑀘𑀸𑀳-‘𑀕𑀢𑁆𑀬𑀸𑀤𑁆𑀬𑀢𑁆𑀣𑀸𑀦’𑀫𑀺𑀘𑁆𑀘𑀸𑀤𑀺, 𑀧𑀘𑁆𑀘𑀼𑀤𑀸𑀳𑀭𑀻𑀬𑀺𑀲𑁆𑀲𑀢𑁂 ‘𑀏𑀢𑁂𑀲𑀫𑁂𑀯𑁂’𑀘𑁆𑀘𑀸𑀤𑀺𑀦𑀸, 𑀢𑀣𑀸𑀘𑀸𑀩𑁆𑀪𑀼𑀧𑀕𑀫𑁂, 𑀧𑀬𑁄𑀚𑁆𑀚𑁄 𑀓𑀢𑁆𑀢𑀸 𑀦 𑀓𑀫𑁆𑀫𑀁 𑀢𑁆𑀬𑀩𑁆𑀪𑀼𑀧𑀕𑀫𑁆𑀫 𑀧𑀬𑁄𑀚𑁆𑀚𑁂 𑀓𑀢𑁆𑀢𑀭𑀻’𑀢𑀺 𑀯𑀺𑀯𑀭𑀺𑀢𑀦𑁆𑀢𑀺 𑀅𑀢𑁆𑀣𑁄, 𑀲𑀸𑀫𑀢𑁆𑀣𑀺𑀬𑀫𑁆𑀧𑀦𑀇𑀘𑁆𑀘𑀸𑀤𑀺𑀦𑀸 𑀲𑀸𑀫𑀢𑁆𑀣𑀺𑀬𑀲𑀭𑀽𑀧𑀫𑀸𑀳, 𑀕𑀢𑀺 𑀆𑀤𑁆𑀬𑀢𑁆𑀣𑀸𑀦𑀦𑁆𑀢𑀺 𑀧𑀤𑀘𑁆𑀙𑁂𑀤𑁄, 𑀦𑀺𑀬𑀼𑀚𑁆𑀚𑀫𑀸𑀦𑁄 𑀧𑀬𑁄𑀚𑀓𑀩𑁆𑀬𑀸𑀧𑀸𑀭𑀲𑀗𑁆𑀔𑀸𑀢𑀸𑀬 𑀓𑀺𑀭𑀺𑀬𑀸𑀬 𑀲𑀫𑁆𑀩𑀦𑁆𑀥𑀻𑀬𑀫𑀸𑀦𑀢𑁆𑀢𑀸 𑀓𑀫𑁆𑀫𑀪𑀽𑀢𑁄𑀯 𑀪𑀯𑀢𑀻𑀢𑀺 𑀅𑀢𑁆𑀣𑁄, 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 ‘‘𑀕𑀫𑀦𑀸𑀤𑀺𑀓𑀺𑀭𑀺𑀬𑀸𑀬 𑀲𑀸𑀥𑀦𑀢𑁆𑀢𑀸 𑀬𑀤𑀺𑀧𑀺 𑀧𑀬𑁄𑀚𑁆𑀚𑁄 𑀓𑀢𑁆𑀢𑀸, 𑀢𑀣𑀸𑀧𑀺 𑀲𑁄 𑀧𑀬𑁄𑀚𑀓𑁂𑀦 𑀕𑀫𑀦𑀸𑀤𑀻𑀲𑀼 𑀩𑁆𑀬𑀸𑀧𑀸𑀭𑀺𑀬𑀫𑀸𑀦𑁄 𑀧𑀬𑁄𑀚𑀓𑀲𑁆𑀲 𑀩𑁆𑀬𑀸𑀧𑀸𑀭𑀮𑀓𑁆𑀔𑀡𑀸𑀬 𑀓𑀺𑀭𑀺𑀬𑀸𑀬 𑀲𑀫𑁆𑀩𑀦𑁆𑀥𑀻𑀬𑀫𑀸𑀦𑁄 𑀬𑀤𑀺 𑀓𑀫𑁆𑀫𑀁 𑀦 𑀳𑁄𑀢𑀺 𑀅𑀜𑁆𑀜𑀣𑀸 𑀓𑀺𑀁 𑀳𑁄𑀢𑀻𑀢𑀺 𑀅𑀜𑁆𑀜𑀣𑀸𑀦𑀼𑀧𑀧𑀢𑁆𑀢𑀺𑀮𑀓𑁆𑀔𑀡𑁂𑀦 𑀲𑀸𑀫𑀢𑁆𑀣𑀺𑀬𑁂𑀦 𑀓𑀫𑁆𑀫𑀪𑀽𑀢𑁄𑀯 𑀳𑁄𑀢𑀻’’𑀢𑀺 [(𑀅𑀢𑁆𑀣𑁄) (𑀧𑁄𑀢𑁆𑀣𑀓𑁂)] ( ), 𑀧𑀢𑀻𑀬𑀢𑁂𑀢𑀺 𑀇𑀫𑀺𑀦𑀸 𑀧𑀢𑀻𑀢𑀺𑀯𑀲𑁂𑀦𑁂𑀯𑀸𑀲𑁆𑀲 𑀓𑀫𑁆𑀫𑀢𑀸, 𑀲𑀪𑀸𑀯𑀢𑁄 𑀢𑀼 𑀧𑀬𑁄𑀚𑁆𑀚𑁄 𑀓𑀢𑁆𑀢𑀸𑀯𑀸𑀢𑀺𑀧𑀺 𑀜𑀸𑀧𑁂𑀢𑀺, 𑀧𑀬𑁄𑀚𑀓𑁄𑀢𑀺 𑀲𑀩𑁆𑀩𑀢𑁆𑀣 𑀤𑁂𑀯𑀤𑀢𑁆𑀢𑀸𑀤𑀺𑀓𑁄 𑀯𑀺𑀜𑁆𑀜𑁂𑀬𑁆𑀬𑁄, 𑀅𑀢𑁆𑀣𑀕𑀳𑀡𑀲𑁆𑀲𑀸𑀢𑀺 ‘‘𑀲𑀤𑁆𑀤𑀸𑀓𑀫𑁆𑀫𑀓𑀪𑀚𑁆𑀚𑀸𑀤𑀻𑀦’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀲𑀤𑁆𑀤𑀢𑁆𑀣𑀸𑀓𑀫𑁆𑀫𑀓𑀪𑀚𑁆𑀚𑀸𑀤𑀻𑀦’’𑀦𑁆𑀢𑀺 𑀅𑀢𑁆𑀣𑀕𑁆𑀕𑀳𑀡𑀲𑁆𑀲, 𑀩𑁄𑀥𑀢𑁆𑀣𑀲𑁆𑀲 𑀉𑀤𑀸𑀳𑀭𑀡𑀦𑁆𑀢𑀺 𑀲𑁂𑀲𑁄, 𑀦𑀦𑀼 𑀯𑀘𑀦𑀧𑁆𑀧𑀬𑁄𑀚𑀦𑀁 𑀤𑀲𑁆𑀲𑀬𑀢𑀸 𑀯𑀘𑀦𑀫𑁂𑀯𑁄𑀧𑀤𑀲𑁆𑀲𑀺𑀬 𑀧𑀜𑁆𑀳𑁄 𑀓𑀸𑀢𑀩𑁆𑀩𑁄, 𑀅𑀣 ‘𑀏𑀢𑁂𑀲𑀫𑁂𑀯𑀸’𑀢𑁆𑀬𑀯𑀺𑀚𑁆𑀚𑀫𑀸𑀦𑁂𑀦𑁂𑀯 𑀓𑀣𑀁 𑀢𑁆𑀬𑀸𑀲𑀗𑁆𑀓𑀺𑀬𑀸𑀳 ‘𑀏𑀢𑁂𑀲𑀫𑁂𑀯𑁂’𑀘𑁆𑀘𑀸𑀤𑀺, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀓𑁆𑀓𑀫𑁂𑀦 𑀦𑀺𑀬𑀫𑀢𑁆𑀣𑀢𑁆𑀢𑀸 𑀯𑀘𑀦𑀲𑁆𑀲 𑀏𑀯𑀓𑀸𑀭𑁄 𑀮𑀩𑁆𑀪𑀢𑀺, 𑀲𑀫𑁆𑀩𑀦𑁆𑀥𑀺𑀯𑀘𑀦𑀢𑁆𑀢𑀸 𑀏𑀢𑀲𑀤𑁆𑀤𑀲𑁆𑀲 𑀢𑁂𑀦 𑀬𑀣𑀸𑀧𑀞𑀺𑀢𑀸 𑀕𑀢𑁆𑀬𑀸𑀤𑀬𑁄𑀯 𑀯𑀺𑀲𑁂𑀲𑁆𑀲𑀪𑀽𑀢𑀸 𑀲𑀗𑁆𑀔𑁂𑀧𑁂𑀦 𑀧𑀭𑀸𑀫𑀲𑀻𑀬𑀦𑁆𑀢𑀻𑀢𑀺 𑀏𑀢𑁂 𑀲𑀫𑁂𑀯𑀸𑀢𑀺 𑀓𑀢𑀦𑁆𑀢𑀺 𑀫𑀜𑁆𑀜𑀢𑁂 [𑀏𑀯𑁄𑀲𑀜𑁆𑀘𑀸𑀢𑀺 𑀫𑀜𑁆𑀜𑀢𑁂 (𑀧𑁄𑀢𑁆𑀣𑀓𑁂)], (𑀕𑀘𑁆𑀙𑀢𑀺 𑀤𑁂𑀯𑀤𑀢𑁆𑀢𑁄𑀢𑀺…𑀧𑁂… 𑀦𑀳𑁄𑀢𑀻𑀢𑀺) 𑀇𑀫𑀺𑀦𑀸 𑀇𑀫𑀫𑀢𑁆𑀣𑀜𑁆𑀘 𑀚𑁄𑀢𑁂𑀢𑀺 ‘‘𑀬𑀤𑀺𑀧𑀺 𑀓𑀺𑀭𑀺𑀬𑀸𑀪𑀺𑀲𑀫𑁆𑀩𑀦𑁆𑀥𑀸 𑀧𑀬𑁄𑀚𑁆𑀚𑀲𑁆𑀲 𑀯𑀺𑀬 𑀓𑀢𑁆𑀢𑀼𑀦𑁄𑀧𑀺 𑀓𑀫𑁆𑀫𑀢𑁆𑀢𑀫𑁆𑀧𑀲𑀚𑁆𑀚𑀢𑀺, 𑀢𑀣𑀸𑀧𑀺 𑀧𑀬𑁄𑀚𑁆𑀚𑁂𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀢𑁆𑀢𑀭𑀺 𑀤𑁂𑀯𑀤𑀢𑁆𑀢𑁂 𑀤𑀼𑀢𑀺𑀬𑀸 𑀦𑀧𑁆𑀧𑀲𑀚𑁆𑀚𑀢𑀻’’𑀢𑀺, 𑀅𑀪𑀺𑀫𑀢𑀸𑀢𑀺 ‘‘𑀕𑀢𑀺𑀩𑀼𑀤𑁆𑀥𑁆𑀬𑀸’’𑀤𑀺 (𑁧-𑁪-𑁫𑁨) 𑀲𑀼𑀢𑁆𑀢𑁂𑀦 ¶ 𑀧𑀬𑁄𑀚𑁆𑀚𑀲𑁆𑀲 𑀓𑀢𑁆𑀢𑀼𑀦𑁄 𑀓𑀫𑁆𑀫𑀲𑀜𑁆𑀜𑀁 𑀯𑀺𑀥𑀸𑀬 𑀢𑀲𑁆𑀫𑀺𑀁 𑀧𑀬𑁄𑀚𑁆𑀚𑁂𑀤𑀼𑀢𑀺𑀬𑀸𑀪𑀺𑀫𑀢𑀸, 𑀘𑀭𑀳𑀺𑀲𑀤𑁆𑀤𑁄 𑀧𑀼𑀘𑁆𑀙𑀸𑀬𑀁, 𑀧𑀬𑁄𑀚𑁂𑀢𑀻𑀢𑀺 𑀅𑀲𑁆𑀫𑀺𑀁 𑀉𑀤𑁆𑀤𑁂𑀲𑁂 𑀢𑀤𑀸 𑀓𑀣𑀁 𑀪𑀯𑀺𑀢𑀩𑁆𑀩𑀦𑁆𑀢𑀺 𑀲𑁂𑀲𑁄𑀢𑀺 𑀬𑀤𑀸𑀘𑀭𑀳𑀺𑀘𑁆𑀘𑀸𑀤𑀺𑀯𑀸𑀓𑁆𑀬𑀲𑁆𑀲𑀸𑀯𑀲𑀸𑀦𑁂 𑀧𑀬𑁄𑀚𑁂𑀢𑀻𑀢𑀺 𑀅𑀲𑁆𑀫𑀺𑀁 𑀉𑀤𑁆𑀤𑁂𑀲𑁂 𑀯𑀘𑀦𑀲𑀫𑀻𑀧𑁂’𑀢𑀤𑀸 𑀓𑀣𑀫𑁆𑀪𑀯𑀺𑀢𑀩𑁆𑀩’𑀦𑁆𑀢𑀺 𑀧𑀸𑀞𑀲𑁂𑀲𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀬𑀸𑀯𑀢𑀸𑀢𑀺 𑀢𑀢𑀺𑀬𑀦𑁆𑀢𑀧𑀝𑀻𑀭𑀽𑀧𑀓𑁄 𑀦𑀺𑀧𑀸𑀢𑁄, 𑀬𑀲𑁆𑀫𑀸 𑀤𑀢𑁆𑀣𑁄 𑀯𑀢𑁆𑀢𑀢𑁂, 𑀬𑀲𑁆𑀫𑀸 𑀤𑀼𑀢𑀺𑀬𑀸 𑀧𑀧𑁆𑀧𑁄𑀢𑀺 𑀢𑀲𑁆𑀫𑀸 ‘𑀬𑀜𑁆𑀜𑀤𑀢𑁆𑀢𑁂𑀦𑁂’𑀢𑀺 𑀪𑀯𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀦𑀺𑀬𑀫𑁂𑀦𑁂𑀘𑁆𑀘𑀸𑀤𑀺𑀦𑀸 𑀯𑀘𑀦𑀸𑀭𑀫𑁆𑀪𑀲𑁆𑀲 𑀧𑀬𑁄𑀚𑀦𑀫𑀸𑀳, 𑀲𑀸𑀧𑀺 𑀢𑀢𑀺𑀬𑀸𑀧𑀺 [𑀤𑀼𑀢𑀺𑀬𑀸𑀧𑀺𑀢𑀺 𑀯𑀢𑁆𑀢𑀩𑁆𑀩] 𑀬𑀤𑀸𑀢𑁆𑀯𑀺𑀘𑁆𑀘𑀸𑀤𑀺𑀦𑀸 𑀳𑀭𑀢𑀺 𑀦𑀸𑀳𑀸𑀭𑀢𑁆𑀣𑁂 [𑀦𑀳𑀭𑀢𑁆𑀬𑀢𑁆𑀣𑁂 (𑀧𑁄𑀢𑁆𑀣𑀓𑁂)] 𑀢𑀺𑀧𑀺 𑀯𑀺𑀜𑁆𑀜𑀸𑀧𑁂𑀢𑀺, 𑀉𑀪𑀬𑀢𑁆𑀣𑀸𑀢𑀺 𑀤𑀼𑀢𑀺𑀬𑀸𑀬 𑀧𑀢𑁆𑀢𑀸𑀬 𑀅𑀧𑁆𑀧𑀢𑁆𑀢𑀸𑀬 𑀘, 𑀯𑀺𑀪𑀸𑀲𑀸 𑀯𑀺𑀓𑀧𑁆𑀧𑁄𑀢𑀺 𑀅𑀢𑁆𑀣𑁄, 𑀓𑀸𑀭𑁂𑀢𑀺𑀓𑀭-𑀓𑀭𑀡𑁂, 𑀮𑁂𑀢𑁆𑀢𑀸𑀬𑀸𑀤𑁂𑀲𑀸𑀢𑀺𑀮𑀢𑁆𑀢 𑀏𑀢𑁆𑀢𑀅𑀬𑀸𑀤𑁂𑀲𑁆𑀲, 𑀯𑀤-𑀯𑀘𑀦𑁂, 𑀅𑀪𑀺𑀯𑀤𑀦𑀫𑀪𑀺𑀯𑀸𑀤𑁄 𑀢𑀁 𑀓𑀭𑁄𑀢𑀻𑀢𑀺 ‘‘𑀥𑀸𑀢𑁆𑀯𑀢𑁆𑀣𑁂𑀦𑀸𑀫𑀲𑁆𑀫𑀻’’𑀢𑀺 (𑁫-𑁧𑁨) 𑀇𑀫𑁆𑀳𑀺 𑀦𑀸𑀫𑀥𑀸𑀢𑀼 ‘𑀅𑀪𑀺𑀯𑀸𑀤𑀺’𑀢𑀺𑀲𑀼𑀢𑁆𑀢𑁂 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀆𑀳-‘𑀅𑀪𑀺𑀯𑀸𑀤𑀺𑀲𑁆𑀫𑀸’𑀇𑀘𑁆𑀘𑀸𑀤𑀺.

𑀔𑀸𑀤𑀬𑀢𑀺 𑀆𑀤𑀬𑀢𑀺 𑀔𑀸𑀤, 𑀅𑀤=𑀪𑀓𑁆𑀔𑀡𑁂, 𑀅𑀯𑁆𑀳𑀸𑀧𑀬𑀢𑀺 𑀯𑁆𑀳𑁂=𑀅𑀯𑁆𑀳𑀸𑀦𑁂 𑀆𑀧𑀼𑀩𑁆𑀩𑁄, ‘‘𑀧𑀬𑁄𑀚𑀓𑀩𑁆𑀬𑀸𑀧𑀸𑀭𑁂 𑀡𑀸𑀧𑀺𑀘𑁂’’𑀢𑀺 (𑁫-𑁧𑁬) 𑀡𑀸𑀧𑀺𑀫𑁆𑀳𑀺 𑀧𑀼𑀩𑁆𑀩𑀲𑀭𑀮𑁄𑀧𑁄, 𑀓𑀦𑁆𑀤𑀬𑀢𑀺 𑀓𑀦𑁆𑀤=𑀅𑀯𑁆𑀳𑀸𑀦𑀭𑁄𑀤𑀦𑁂𑀲𑀼.

‘‘𑀯𑀳𑀺𑀲𑁆𑀲𑀸𑀦𑀺𑀬𑀦𑁆𑀢𑀼𑀓𑁂’’𑀢𑀺 𑀕𑀡𑀲𑀼𑀢𑁆𑀢𑁂 𑀅𑀬𑀫𑁂𑀢𑁆𑀣𑁄 ‘‘𑀯𑀳𑀺𑀲𑁆𑀲𑀥𑀸𑀢𑀼𑀲𑁆𑀲 𑀧𑀬𑁄𑀚𑁆𑀚𑁂 𑀓𑀢𑁆𑀢𑀭𑀺 𑀦𑀺𑀬𑀦𑁆𑀢𑀼𑀭𑀳𑀺𑀢𑁂 𑀤𑀼𑀢𑀺𑀬𑀸 𑀦 𑀪𑀯𑀢𑀻’’𑀢𑀺, 𑀦𑀺𑀬𑀦𑁆𑀢𑀸 𑀲𑀸𑀭𑀣𑀺 𑀓𑀺𑀭𑀺𑀬𑀸𑀲𑀺𑀤𑁆𑀥𑀺𑀁 𑀦𑀺𑀬𑀸𑀫𑀓𑁄𑀢𑀺 𑀯𑀢𑁆𑀯𑀸 𑀢𑀫𑁂𑀯 𑀧𑀓𑀸𑀲𑁂𑀢𑀼𑀫𑀸𑀳-‘𑀓𑀺𑀭𑀺𑀬𑀗𑁆𑀕’𑀫𑀺𑀘𑁆𑀘𑀸𑀤𑀺, 𑀓𑀺𑀭𑀺𑀬𑀗𑁆𑀕 𑀓𑀺𑀭𑀺𑀬𑁄𑀧𑀓𑀭𑀡𑀪𑀽𑀢𑀁 𑀩𑀮𑀻 𑀩𑀤𑁆𑀤𑀸𑀤𑀺𑀁 𑀓𑀺𑀭𑀺𑀬𑀸𑀓𑀸𑀭𑀡𑀁, 𑀦𑀺𑀬𑀫𑁂𑀢𑁆𑀯𑀸𑀢𑀺 𑀏𑀓𑀲𑁆𑀫𑀺𑀁 𑀓𑀭𑀡𑀻𑀬𑁂 𑀓𑀺𑀭𑀺𑀬𑀸 𑀯𑀺𑀲𑀬𑁂 𑀧𑀢𑀺𑀝𑁆𑀞𑀧𑁂𑀢𑁆𑀯𑀸, 𑀯𑀸𑀳𑀬𑀢𑀺 𑀪𑀸𑀭𑀁 𑀤𑁂𑀯𑀤𑀢𑁆𑀢𑁂𑀦𑁂𑀢𑁆𑀬𑀢𑁆𑀭 𑀳𑀺 𑀤𑁂𑀯𑀤𑀢𑁆𑀢𑁄 𑀧𑀜𑁆𑀜𑀯𑀸 𑀧𑀼𑀭𑀺𑀲𑁄 𑀦𑀺𑀬𑀦𑁆𑀢𑀸𑀭𑀫𑀦𑁆𑀢𑀭𑁂𑀦𑁂𑀯 𑀪𑀸𑀭𑀁 𑀯𑀳𑀢𑀻𑀢𑁆𑀬𑀦𑀺𑀬𑀦𑁆𑀢𑀼𑀓𑁄 𑀓𑀢𑁆𑀢𑀸, 𑀯𑀸𑀳𑀬𑀢𑀺 𑀪𑀸𑀭𑀁 𑀩𑀮𑀻𑀩𑀤𑁆𑀤𑁂 𑀇𑀘𑁆𑀘𑀢𑁆𑀭 𑀢𑀼 𑀩𑀮𑀻𑀩𑀤𑁆𑀤𑀸 𑀦𑀺𑀬𑀦𑁆𑀢𑀸 𑀭𑀫𑀦𑁆𑀢𑀭𑁂𑀦 𑀦 𑀯𑀳𑀦𑁆𑀢𑀻𑀢𑀺 𑀲𑀦𑀺𑀬𑀦𑁆𑀢𑀼𑀓𑀸.

‘‘𑀪𑀺𑀓𑁆𑀔𑀺𑀲𑁆𑀲𑀸𑀳𑀺𑀁𑀲𑀸𑀬’’𑀦𑁆𑀢𑀺 ¶ 𑀕𑀡𑀲𑀼𑀢𑁆𑀢𑀲𑁆𑀲𑀸𑀬𑀫𑀢𑁆𑀣𑁄 ‘‘𑀪𑀓𑁆𑀔𑀺𑀲𑁆𑀲𑀸𑀳𑀺𑀁𑀲𑀢𑁆𑀣𑀲𑁆𑀲 𑀧𑀬𑁄𑀚𑁆𑀚𑁂 𑀓𑀢𑁆𑀢𑀭𑀺 𑀤𑀼𑀢𑀺𑀬𑀸 𑀦 𑀪𑀯𑀢𑀻’’𑀢𑀺, 𑀅𑀣 𑀓𑀣𑀫𑁂𑀢𑁆𑀣 𑀳𑀺𑀁𑀲𑀢𑁆𑀣𑀢𑀸 𑀪𑀓𑁆𑀔𑀺𑀲𑁆𑀲 𑀳𑀺𑀁𑀲𑀸 𑀳𑀺 𑀘𑁂𑀢𑀦𑀸𑀯𑀢𑀺 𑀲𑀫𑁆𑀪𑀯𑀢𑀺, 𑀦 𑀘𑁂𑀢𑁆𑀣𑀲𑀲𑁆𑀲𑀁 𑀘𑁂𑀢𑀦𑀸𑀯𑀦𑁆𑀢𑀦𑁆𑀢𑀺 𑀆𑀳-‘𑀲𑀩𑁆𑀩𑁂’𑀇𑀘𑁆𑀘𑀸𑀤𑀺, 𑀲𑀩𑁆𑀩𑁂𑀢𑀺 𑀭𑀼𑀓𑁆𑀔𑀸𑀤𑀬𑁄, 𑀪𑀸𑀯𑀸 𑀧𑀤𑀢𑁆𑀣𑀸, 𑀇𑀤𑀸𑀦𑀺 𑀲𑀩𑁆𑀩𑀤𑀲𑁆𑀲𑀦𑀸𑀦𑀼𑀓𑀽𑀮𑀳𑀺𑀁𑀲𑀢𑁆𑀣𑀢𑀫𑀼𑀧𑀤𑀲𑁆𑀲𑁂𑀢𑀼𑀫𑀸𑀳-‘𑀬𑀤𑀺𑀯𑁂’𑀘𑁆𑀘𑀸𑀤𑀺, 𑀦𑀦𑀼 𑀩𑀼𑀤𑁆𑀥𑀯𑀘𑀦 𑀦𑀺𑀲𑁆𑀲𑀺𑀢𑀫𑀺𑀤𑀁 𑀩𑁆𑀬𑀸𑀓𑀭𑀡𑀁, 𑀢𑀣𑀸 𑀲𑀢𑀺 𑀲𑀫𑁆𑀫𑀢𑀫𑁂𑀯𑁂-𑀢𑁆𑀣𑁄-𑀧𑀤𑀲𑁆𑀲𑁂𑀢𑁆𑀯𑀸 𑀕𑀦𑁆𑀢𑀩𑁆𑀩𑀁 𑀓𑀺𑀦𑁆𑀦𑀸𑀫𑀸𑀜𑁆𑀜𑀤𑀲𑁆𑀲𑀦𑁄𑀧𑀕𑀸𑀢𑀸𑀥𑀺𑀭𑁂𑀦𑀸𑀢𑀺 𑀢𑀼𑀡𑁆𑀳𑀻 𑀳𑁄𑀢𑀺 𑀦𑀺𑀓𑁆𑀓𑀸𑀭𑀡𑀺𑀲𑁆𑀲𑀸 [𑀦𑀺𑀓𑁆𑀓𑀫𑁆𑀫𑀺𑀲𑁆𑀲𑀸 (𑀧𑁄𑀢𑁆𑀣𑀓𑁂)] 𑀪𑀯𑀢𑁄-𑀧𑀸𑀬𑁄𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀧𑀭𑀢𑁆𑀣𑀸𑀦𑀼𑀩𑀤𑁆𑀥𑀓𑀺𑀘𑁆𑀙𑀁 𑀧𑀦 𑀫𑀳𑀸𑀧𑀼𑀜𑁆𑀜𑀧𑀜𑁆𑀜𑀸 𑀦 𑀓𑀺𑀜𑁆𑀘𑀺 𑀯𑀺𑀬 𑀫𑀜𑁆𑀜𑀦𑁆𑀢𑀺, 𑀳𑁄𑀢𑀺 (𑀳𑀺) 𑀏𑀢𑁂𑀦 𑀧𑀭𑀢𑁆𑀣𑁄 ‘‘𑀫𑀢𑀦𑁆𑀢𑀭𑁂𑀧𑀺 𑀲𑀺𑀤𑁆𑀥𑀺 𑀲𑀺𑀲𑁆𑀲𑀸𑀦𑀁, 𑀢𑀁𑀢𑀁 𑀫𑀢𑀜𑁆𑀜𑀼𑀦𑁄 𑀯𑀸 𑀓𑀤𑀸𑀘𑀺 𑀓𑀭𑀳𑀘𑀺 𑀬𑀤𑀺𑀤𑀫𑀯𑀮𑁄𑀓𑁂𑀬𑁆𑀬𑀼𑀁 𑀢𑁂 𑀘𑁂𑀢𑁆𑀣𑀸𑀯𑀢𑀸𑀭𑀁 [𑀘𑁂𑀢𑁆𑀣𑀓𑀸𑀭𑀁 (𑀧𑁄𑀢𑁆𑀣𑀓𑁂)] 𑀮𑀪𑁂𑀬𑁆𑀬𑀼𑀁 𑀏𑀢𑀸𑀤𑀺𑀲𑁄 𑀘 𑀧𑀜𑁆𑀜𑀯𑀸 𑀧𑀝𑀺𑀮𑀤𑁆𑀥𑀩𑀼𑀤𑁆𑀥𑀯𑀘𑀦𑀧𑁆𑀧𑀲𑀸𑀤𑁄’𑀢𑀺 𑀢𑀤𑀯𑀢𑀸𑀭𑁂𑀦 𑀘 𑀩𑀼𑀤𑁆𑀥𑁂 𑀪𑀕𑀯𑀢𑀺 𑀓𑀫𑁂𑀦 𑀤𑀴𑁆𑀳𑀁 𑀧𑀲𑀸𑀤𑀁 𑀧𑀝𑀺𑀮𑀪𑁂𑀬𑁆𑀬𑀼’’𑀦𑁆𑀢𑀺, 𑀏𑀯𑀫𑁂𑀯𑀁 𑀢𑀢𑁆𑀣 𑀢𑀢𑁆𑀣 𑀢𑀁𑀢𑀁𑀩𑁆𑀬𑀸𑀓𑀭𑀡𑁄𑀤𑀸𑀳𑀭𑀡𑀧𑁆𑀧𑀲𑀗𑁆𑀕𑁂𑀧𑀺 𑀢𑀤𑀦𑀼𑀲𑀸𑀭𑁂𑀦𑁂𑀯 𑀢𑀦𑁆𑀢𑀁𑀧𑀬𑁄𑀚𑀦𑀁 𑀯𑁂𑀤𑀺𑀢𑀩𑁆𑀩𑀁, 𑀦 𑀦𑀺𑀭𑀢𑁆𑀣𑀓𑀓𑀣𑀸𑀧𑀲𑀼𑀢𑁄-𑀬𑀫𑀸𑀘𑀭𑀺𑀬𑁄𑀢𑀺.

𑀤𑀼𑀳𑀸𑀤𑀻𑀦𑀁 𑀢𑁆𑀬𑁂𑀯𑀫𑀸𑀤𑁄 𑀅𑀫𑁆𑀳𑀸𑀓𑀫𑁆𑀧𑀭𑀫𑀕𑀼𑀭𑀼𑀦𑀸 𑀭𑀢𑀦𑀫𑀢𑀺𑀧𑀜𑁆𑀘𑀺𑀓𑀸𑀮𑀗𑁆𑀓𑀸𑀭𑀸𑀤𑀺𑀓𑀸𑀭𑁂𑀦 𑀦𑀸𑀦𑀸𑀓𑀸𑀭𑀲𑀸𑀭𑀢𑁆𑀣𑀯𑁂𑀤𑀯𑁂𑀤𑀺𑀢𑀼 [𑀯𑁂𑀤𑀸𑀯𑁂𑀤𑀺𑀢 (𑀧𑁄𑀢𑁆𑀣𑀓𑁂)] 𑀫𑀳𑀸𑀧𑀜𑁆𑀜𑀸𑀧𑀸𑀝𑀯𑀸𑀦𑀁 𑀧𑀜𑁆𑀜𑀯𑀦𑁆𑀢𑀸𑀦𑀁 𑀲𑀸𑀫𑀺𑀦𑀸 𑀫𑀳𑀸𑀲𑀸𑀫𑀺𑀦𑀸 𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑀭𑀢𑀦𑀯𑀭𑁄𑀧𑀓𑀸𑀭𑀓𑁂𑀦 ‘𑀇𑀤𑀫𑁂𑀢𑁆𑀣 𑀯𑀺𑀘𑀸𑀭𑀡𑀻𑀬𑀁’𑀢𑁆𑀬𑀪𑀺𑀥𑀸𑀬 𑀦𑀸𑀦𑀸𑀫𑀢𑀦𑁆𑀢𑀭𑀫𑀸𑀓𑀟𑁆𑀠𑀺𑀬 𑀩𑀳𑀼𑀁 𑀲𑀫𑁆𑀧𑀯𑁂𑀤𑀺𑀢𑀫𑀢𑁆𑀣𑀺, 𑀫𑀬𑀫𑁆𑀧𑀦𑁂𑀢𑁆𑀣 𑀆𑀘𑀭𑀺𑀬𑁂𑀦𑀸𑀥𑀺𑀧𑁆𑀧𑁂𑀢𑀫𑀢𑁆𑀢𑀫𑁂𑀯𑀸𑀮𑀫𑁆𑀩 𑀅𑀢𑁆𑀣𑀫𑁆𑀧 𑀓𑀸𑀲𑀬𑀺𑀲𑁆𑀲𑀸𑀫. 𑀲𑀢𑁆𑀬𑀧𑁆𑀬𑀦𑁂𑀓𑀤𑀲𑁆𑀲𑀦𑀪𑁂𑀤𑁂 𑀲𑀺𑀝𑁆𑀞𑀧𑁆𑀧𑀬𑁄𑀕𑀸𑀦𑀼𑀲𑀸𑀭𑁂𑀦 𑀬𑀢𑁆𑀣 𑀧𑀥𑀸𑀦𑁂𑀓𑀫𑁆𑀫𑀦𑀺𑀢𑁆𑀬𑀸𑀤𑀺𑀧𑁆𑀧𑀪𑀼𑀢𑀬𑁄𑀤𑀺𑀲𑁆𑀲𑀦𑁆𑀢𑀺, 𑀬𑀢𑁆𑀭 𑀢𑁆𑀯𑀧𑁆𑀧𑀥𑀸𑀦𑁂𑀢𑁆𑀬𑀸𑀤𑀻, 𑀬𑀢𑁆𑀭𑁄𑀪𑀬𑀢𑁆𑀭𑀧𑀺, 𑀢𑀁𑀲𑀩𑁆𑀩𑀫𑀺𑀳 𑀪𑀲𑁆𑀲𑀓𑀸𑀭𑀸𑀤𑁆𑀬𑀦𑀼𑀫𑀢𑀓𑁆𑀓𑀫𑁂𑀦 𑀧𑀝𑀺𑀧𑀸𑀤𑀬𑀫𑀸𑀳-𑀤𑀼𑀳𑀸𑀤𑀻𑀦’𑀫𑀺𑀘𑁆𑀘𑀸𑀤𑀺, 𑀏𑀢𑁆𑀣𑀸𑀤𑀺𑀲𑀤𑁆𑀤𑁄 𑀧𑀓𑀸𑀭𑀯𑀸𑀘𑀻, 𑀢𑁂𑀦 𑀬𑀸𑀘𑀺𑀧𑁆𑀧𑀪𑀼𑀢𑀬𑁄 𑀕𑀬𑁆𑀳𑀦𑁆𑀢𑀺, 𑀓𑀫𑁆𑀫𑀤𑁆𑀯𑀬𑀬𑀼𑀢𑁆𑀢𑀸𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀙𑀝𑁆𑀞𑀻, 𑀢𑁂𑀦 𑀓𑀫𑁆𑀫𑀤𑁆𑀯𑀬𑀬𑀼𑀢𑁆𑀢𑀸𑀦𑀁 𑀫𑀚𑁆𑀛𑁂 𑀤𑀼𑀳𑀸𑀤𑀻𑀦𑀫𑀧𑁆𑀧𑀥𑀸𑀦𑁂𑀧𑀺 𑀕𑀯𑀸𑀤𑁄 𑀓𑀫𑁆𑀫𑁂 𑀢𑁆𑀬𑀸𑀤𑀺𑀧𑁆𑀧𑀪𑀼𑀢𑀬𑁄𑀢𑀺 𑀬𑁄𑀚𑀦𑀸 ¶ . 𑀇𑀘𑁆𑀘𑀸𑀤𑀺𑀢𑀺𑀆𑀤𑀺𑀲𑀤𑁆𑀤𑁂𑀦 ‘𑀅𑀯𑀭𑀼𑀦𑁆𑀥𑀢𑀺 𑀯𑀚𑀁 𑀕𑀸𑀯𑀁 𑀅𑀯𑀭𑀼𑀦𑁆𑀥𑀻𑀬𑀢𑁂 𑀯𑀚𑀁 𑀕𑁄’𑀇𑀘𑁆𑀘𑀸𑀤𑀻𑀦𑀁 𑀧𑀭𑀺𑀕𑁆𑀕𑀳𑁄, 𑀕𑀫𑀦𑀸𑀤𑁆𑀬𑀢𑁆𑀣𑀸𑀦 𑀫𑀺𑀢𑁆𑀬𑀸𑀤𑀺𑀲𑀤𑁆𑀤𑁂𑀦 𑀩𑁄𑀥𑀢𑁆𑀣𑀸𑀤𑀻𑀦𑀁 𑀕𑀳𑀡𑀁. 𑀕𑀫𑀻𑀬𑀢𑁂 𑀕𑀸𑀫𑁄 𑀤𑁂𑀯𑀤𑀢𑁆𑀢𑀦𑁆𑀢𑀺 𑀏𑀢𑁆𑀣 𑀓𑀣𑀁 𑀧𑀬𑁄𑀚𑁆𑀚𑀢𑁆𑀢𑀲𑀫𑁆𑀪𑀯𑁄𑀢𑀺 𑀆𑀳-‘𑀧𑀼𑀭𑀺𑀲𑁂’𑀘𑁆𑀘𑀸𑀤𑀺, 𑀬𑀚𑁆𑀚𑀧𑀺 𑀕𑀸𑀫𑁄 𑀢𑀼𑀡𑁆𑀳𑀻 𑀳𑁄𑀢𑀺 𑀦𑀺𑀩𑁆𑀬𑀸𑀧𑀸𑀭𑀢𑁆𑀢𑀸 𑀧𑀼𑀭𑀺𑀲𑁄𑀯 𑀢𑀼 𑀕𑀫𑀦𑀓𑀺𑀭𑀺𑀬𑀁 𑀦𑀺𑀧𑁆𑀨𑀸𑀤𑁂𑀢𑀺, 𑀢𑀣𑀸𑀧𑀺 𑀧𑀼𑀭𑀺𑀲𑀲𑁆𑀲 𑀕𑀫𑀦𑀓𑀺𑀭𑀺𑀬𑀸𑀬 𑀬𑀁𑀨𑀮𑀧𑁆𑀧𑀢𑁆𑀢𑀺𑀮𑀓𑁆𑀔𑀡𑀁, 𑀢𑀫𑀼𑀪𑀺𑀦𑁆𑀦𑀫𑁆𑀧𑀺 𑀕𑀸𑀫𑀧𑀼𑀭𑀺𑀲𑀸𑀦𑀁 𑀲𑀫𑀸𑀦𑀦𑁆𑀢𑀺 𑀧𑀼𑀭𑀺𑀲 𑀓𑀺𑀭𑀺𑀬𑀸𑀢𑀼𑀮𑁆𑀬𑀨𑀮𑀢𑁆𑀢𑀸 𑀕𑀸𑀫𑁄𑀧𑀺 𑀕𑀫𑀦𑀓𑀺𑀭𑀺𑀬𑀸𑀬 𑀓𑀢𑁆𑀢𑀼𑀩𑁆𑀬𑀧𑀤𑁂𑀲𑁂 𑀓𑀸𑀭𑀡𑀁 𑀪𑀯𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑀣𑀸𑀳𑀺 𑀕𑀸𑀫𑀁 𑀕𑀘𑁆𑀙𑀦𑁆𑀢𑁄 𑀓𑁄𑀘𑀺 𑀕𑀸𑀫𑁂 𑀆𑀲𑀦𑁆𑀦𑁂 𑀲𑀢𑀺 𑀯𑀤𑀢𑀺 ‘𑀆𑀕𑀢𑁄 𑀕𑀸𑀫𑁄 𑀧𑀢𑁆𑀢𑁄 𑀕𑀸𑀫𑁄’𑀢𑀺, 𑀅𑀢𑁄𑀜𑁆𑀜𑁂𑀲𑀦𑁆𑀢𑀺 𑀬𑁂 𑀓𑀫𑁆𑀫𑀤𑁆𑀯𑀬𑀬𑀼𑀢𑁆𑀢𑀸 𑀤𑀼𑀳𑀸𑀤𑀬𑁄 𑀕𑀫𑀦𑀸𑀤𑁆𑀬𑀢𑁆𑀣𑀸𑀘𑁄𑀤𑀸𑀳𑀝𑀸, 𑀏𑀢𑁂𑀳𑀺 𑀅𑀜𑁆𑀜𑁂𑀲𑀁, 𑀧𑀥𑀸𑀦𑁂 𑀓𑀫𑁆𑀫𑁂𑀪𑀺 𑀅𑀚𑀸𑀤𑀺𑀫𑁆𑀳𑀺 𑀧𑀥𑀸𑀦𑁂 𑀓𑀫𑁆𑀫𑁂, 𑀧𑀥𑀸𑀦𑀢𑁆𑀢𑀫𑁆𑀧𑀦 𑀅𑀚𑀸𑀤𑀻𑀦𑀁 𑀓𑀺𑀭𑀺𑀬𑀸𑀬 𑀧𑀬𑁄𑀚𑀦𑀢𑁆𑀢𑀸, 𑀅𑀚𑀸𑀤𑁆𑀬𑀢𑁆𑀣𑀸 𑀳𑁆𑀬𑀸𑀦𑀬𑀦𑀓𑀺𑀭𑀺𑀬𑀸𑀭𑀪𑁆𑀬𑀢𑁂. 𑀅𑀬𑀫𑁆𑀧𑀦𑁂𑀢𑁆𑀣 𑀲𑀗𑁆𑀕𑀳𑁄-

‘‘𑀤𑀼𑀳𑀺 𑀬𑀸𑀘𑀺 𑀭𑀼𑀥𑀺 𑀧𑀼𑀘𑁆𑀙𑀺, 𑀪𑀺𑀓𑁆𑀔𑀺 𑀘𑀺 𑀩𑁆𑀭𑀼𑀯𑀺 𑀲𑀸𑀲𑀺 𑀘;

𑀚𑀺 𑀤𑀡𑁆𑀟𑀺 𑀧𑀢𑁆𑀣𑀺 𑀫𑀦𑁆𑀣𑀻 𑀘, 𑀥𑀸𑀢𑀽 𑀳𑁄𑀦𑁆𑀢𑀺 𑀤𑀼𑀳𑀸𑀤𑀬𑁄.

𑀕𑀢𑁆𑀬𑀸𑀤𑀺𑀲𑀼𑀢𑁆𑀢𑀧𑀝𑁆𑀞𑀺𑀢𑀸, 𑀕𑀢𑁆𑀬𑀸𑀤𑁆𑀬𑀢𑁆𑀣𑀸 𑀪𑀯𑀦𑁆𑀢𑀺 𑀢𑁂;

𑀦𑀻𑀯𑀳𑀳𑀭𑀓𑀲𑀸𑀘, 𑀦𑀻𑀯𑀳𑀸𑀤𑀻 𑀪𑀯𑀦𑁆𑀢𑀺 𑀢𑁂.

𑀤𑁆𑀯𑀺𑀓𑀫𑁆𑀫𑀓𑁂𑀲𑀼 𑀘𑁂𑀢𑁂𑀲𑀼, 𑀅𑀧𑁆𑀧𑀥𑀸𑀦𑁂 𑀤𑀼𑀳𑀸𑀤𑀺𑀦𑀁;

𑀢𑁆𑀬𑀸𑀤𑀺𑀧𑁆𑀧𑀪𑀼𑀢𑀬𑁄 𑀳𑁄𑀦𑁆𑀢𑀺, 𑀧𑀥𑀸𑀦𑁂 𑀦𑀻𑀯𑀳𑀸𑀤𑀺𑀦𑀁;

𑀉𑀪𑀬𑀢𑁆𑀣 𑀧𑀬𑁄𑀕𑀸𑀦𑀼, 𑀲𑀸𑀭𑀸 𑀕𑀢𑁆𑀬𑀢𑁆𑀣𑀆𑀤𑀺𑀦𑀁’’𑀢𑀺.

𑀧𑀬𑁄𑀕𑁄 𑀧𑀦 𑀲𑀫𑁆𑀩𑀦𑁆𑀥𑀘𑀺𑀦𑁆𑀢𑀸𑀬𑀫𑀺𑀳 𑀘 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀲𑀩𑁆𑀩𑀣𑀸 𑀯𑀺𑀜𑁆𑀜𑁂𑀬𑁆𑀬𑀸.

𑀧𑀼𑀩𑁆𑀩𑁂 𑀓𑀺𑀭𑀺𑀬𑀸𑀦𑀺𑀲𑁆𑀲𑀬𑁂𑀦 [𑀓𑀸𑀭𑀓𑀦𑀺𑀲𑁆𑀲𑀬𑁂𑀦 (𑀧𑁄𑀢𑁆𑀣𑀓𑁂)] 𑀤𑀼𑀢𑀺𑀬𑀸𑀬 𑀯𑀺𑀳𑀺𑀢𑀢𑁆𑀢𑀸 𑀆𑀳 ‘𑀇𑀤𑀸𑀦𑀺’𑀘𑁆𑀘𑀸𑀤𑀺, 𑀥𑀺𑀲𑀤𑁆𑀤𑀲𑁆𑀲 𑀅𑀢𑁆𑀣𑀧𑁆𑀧𑀥𑀸𑀦 𑀦𑀺𑀤𑁆𑀤𑁂𑀲𑁂𑀦 𑀯𑀸 𑀆𑀤𑀺𑀲𑀤𑁆𑀤𑁂𑀦 𑀯𑀸 ‘𑀳𑀸 𑀤𑁂𑀯𑀤𑀢𑁆𑀢’𑀦𑁆𑀢𑀺𑀧𑀺 𑀳𑁄𑀢𑀺, 𑀳𑀸 𑀤𑁂𑀯𑀤𑀢𑁆𑀢𑀤𑀼𑀓𑁆𑀔𑀦𑁆𑀢𑀺 𑀢𑀼 𑀤𑀼𑀓𑁆𑀔𑁂𑀦 𑀬𑁄𑀕𑀸 𑀤𑁂𑀯𑀤𑀢𑁆𑀢𑁂𑀦 𑀦 𑀬𑀼𑀢𑁆𑀢𑁄 𑀳𑁄𑀢𑀻𑀢𑀺 𑀧𑀞𑀫𑀸𑀯𑀸𑀫𑀦𑁆𑀢𑀡𑁂. 𑀦𑀦𑀼𑀘 𑀅𑀦𑁆𑀢𑀭𑀸𑀲𑀤𑁆𑀤𑁂𑀦 𑀬𑁄𑀕𑁂 𑀬𑀣𑀸𑀭𑀸𑀚𑀕𑀳𑀦𑀸𑀮𑀦𑁆𑀤𑀸𑀳𑀺 ¶ 𑀤𑀼𑀢𑀺𑀬𑀸 [(𑀢𑀣𑀸)] 𑀅𑀦𑁆𑀢𑀭𑀸 𑀘 𑀭𑀸𑀚𑀕𑀳𑀁 𑀅𑀦𑁆𑀢𑀭𑀸 𑀘 𑀦𑀸 𑀮𑀦𑁆𑀤(𑀦𑁆𑀢𑀺 𑀢𑀣𑀸) 𑀅𑀦𑁆𑀢𑀭𑀸𑀫𑀕𑁆𑀕𑁂𑀢𑀺 𑀏𑀢𑁆𑀣 𑀫𑀕𑁆𑀕𑀢𑁄𑀧𑀺 [𑀅𑀦𑁆𑀢𑀭𑀸𑀫𑀕𑁆𑀕𑀢𑁄𑀧𑀺] 𑀓𑀲𑁆𑀫𑀸 𑀦 𑀤𑀼𑀢𑀺𑀬𑀸𑀢𑀺 𑀢𑁂𑀦𑀸𑀬𑁄𑀕𑀸, 𑀬𑁂𑀲𑀜𑁆𑀳𑀺 𑀢𑀁𑀫𑀚𑁆𑀛𑀁 𑀢𑁂 𑀢𑁂𑀦 𑀬𑀼𑀚𑁆𑀚𑀦𑁆𑀢𑀻𑀢𑀺 𑀢𑁂𑀳𑀺𑀬𑁂𑀯 𑀤𑀼𑀢𑀺𑀬𑀸, 𑀅𑀣𑀯𑀸𑀩𑁆𑀪𑀼𑀧𑀕𑀢𑁂𑀧𑀺 𑀢𑀁𑀬𑁄𑀕𑁂 𑀢𑀁𑀲𑀫𑁆𑀩𑀦𑁆𑀥𑀻𑀬𑁂𑀯 𑀫𑀕𑁆𑀕𑁄𑀢𑀺 𑀫𑀼𑀔𑁆𑀬𑀢𑁆𑀢𑀸 𑀢𑀢𑁄 [𑀲𑀩𑁆𑀩𑀲𑁆𑀲 (𑀧𑁄𑀢𑁆𑀣𑀓𑁂)] 𑀦 𑀤𑀼𑀢𑀺𑀬𑀸, 𑀅𑀢𑁆𑀭𑀸𑀧𑀺 𑀙𑀝𑁆𑀞𑀻𑀬𑁂𑀯 𑀧𑀧𑁆𑀧𑁄𑀢𑀺 𑀅𑀦𑁆𑀢𑀭𑀸 𑀢𑀜𑁆𑀘 𑀫𑀜𑁆𑀘 𑀓𑀫𑀡𑁆𑀟𑀮𑀼𑀇𑀢𑀺, 𑀢𑀯 𑀫𑀫 𑀫𑀚𑁆𑀛𑁂 𑀓𑀫𑀡𑁆𑀟𑀮𑀼𑀢𑁆𑀬𑀢𑁆𑀣𑁄, 𑀅𑀣 𑀓𑀫𑀡𑁆𑀟𑀮𑀼𑀲𑀤𑁆𑀤𑀢𑁄 𑀤𑀼𑀢𑀺𑀬𑀸 𑀓𑀲𑁆𑀫𑀸 𑀦 𑀪𑀯𑀢𑀺 𑀲𑀢𑀻𑀧𑁆𑀬𑀦𑁆𑀢𑀭𑁂𑀦 𑀬𑁄𑀕𑁂 𑀢𑀲𑁆𑀲 𑀧𑀥𑀸𑀦𑀢𑁆𑀢𑀸, 𑀢𑀣𑀸𑀳𑀺 𑀓𑀫𑀡𑁆𑀟𑀮𑀼𑀦𑁄 𑀲𑀓𑀢𑁆𑀣𑀸 𑀧𑀯𑀢𑁆𑀢𑀺, 𑀢𑀼𑀫𑁆𑀳𑀫𑁆𑀳𑀸𑀦𑀦𑁆𑀢𑀼 𑀧𑀭𑀢𑁆𑀣𑀸-𑀓𑀫𑀡𑁆𑀟𑀮𑀼𑀯𑀺𑀲𑁂𑀲𑀦𑀢𑁆𑀢𑁂𑀦 𑀢𑁂𑀲𑀁 𑀧𑀯𑀢𑁆𑀢𑀢𑁆𑀢𑀸, 𑀢𑀢𑁆𑀭 𑀓𑀫𑀡𑁆𑀟𑀮𑀼𑀦𑁄 𑀲𑀓𑀢𑁆𑀣𑁂 𑀯𑀢𑁆𑀢𑀫𑀸𑀦𑀢𑁆𑀢𑀸 𑀧𑀥𑀸𑀦𑀢𑁆𑀢𑁂𑀦𑀸𑀯𑀢𑀢𑁆𑀢𑀸 𑀧𑀸𑀝𑀺𑀧𑀤𑀺𑀓𑀢𑁄 𑀅𑀘𑁆𑀘𑀼𑀢𑀢𑁆𑀢𑀸 𑀧𑀭𑀢𑁆𑀢𑀸 𑀧𑀞𑀫𑁂𑀯 𑀪𑀯𑀢𑀻𑀢𑀺 𑀚𑀻𑀦𑀺𑀦𑁆𑀤𑀩𑀼𑀤𑁆𑀥𑀺𑀦𑁆𑀬𑀸𑀲. 𑀦𑀺𑀦𑁆𑀤𑀸𑀤𑀺 𑀮𑀓𑁆𑀔𑀡𑀲𑁆𑀲 𑀲𑀫𑁆𑀩𑀦𑁆𑀥𑀲𑁆𑀲 𑀲𑀩𑁆𑀪𑀸𑀯𑀸 𑀲𑀩𑁆𑀩𑀢𑁆𑀣 𑀲𑀫𑁆𑀩𑀦𑁆𑀥𑀙𑀝𑁆𑀞𑀺𑀬𑀸 𑀲𑀫𑁆𑀧𑀢𑁆𑀢𑀸𑀬𑀁 𑀯𑀘𑀦𑀁, 𑀆𑀓𑀢𑀺𑀕𑀡𑁄-𑀬𑀁.

𑀮𑀓𑁆𑀔𑀡𑀸𑀤𑀻𑀲𑁆𑀯𑀢𑁆𑀣𑁂𑀲𑀼𑀢𑀺 𑀦𑀸𑀫𑀲𑁆𑀲𑀸 [𑀓𑀲𑁆𑀲𑀸 (𑀧𑁄𑀢𑁆𑀣𑀓𑁂)] 𑀬𑀫𑀢𑁆𑀣𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘𑀅𑀪𑀺𑀦𑀸𑀬𑁄 𑀬𑀼𑀢𑁆𑀢𑁄’𑀘𑁆𑀘𑀸𑀤𑀺, 𑀢𑁂𑀦𑀸𑀢𑀺 𑀅𑀪𑀺𑀦𑀸 𑀬𑀼𑀢𑁆𑀢𑀲𑁆𑀲𑀸𑀢𑁆𑀣𑀦𑀺𑀤𑁆𑀤𑁂𑀲 𑀓𑀸𑀭𑀡𑁂𑀦, 𑀮𑀓𑁆𑀔𑀡𑀲𑀤𑁆𑀤𑁂𑀦 𑀳𑁂𑀢𑀼 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑁄𑀢𑀺 𑀆𑀳-‘𑀢𑀢𑁆𑀣𑁂’𑀘𑁆𑀘𑀸𑀤𑀺, 𑀤𑀼𑀯𑀺𑀥𑁄 𑀳𑁂𑀢𑀼, 𑀯𑀼𑀢𑁆𑀢𑀜𑁆𑀳𑀺 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂 ‘‘𑀚𑀦𑀓𑁄 𑀜𑀸𑀧𑀓𑁄 𑀘𑁂𑀢𑀺, 𑀤𑀼𑀯𑀺𑀥𑀸 𑀳𑁂𑀢𑀯𑁄 𑀲𑀺𑀬𑀼’’𑀦𑁆𑀢𑀺 (𑁨𑁫𑁨), 𑀲𑀫𑀼𑀧𑀮𑀓𑁆𑀔𑀬𑀢𑀻𑀢𑀺 𑀲𑀫𑀼𑀧𑀮𑀓𑁆𑀔𑀡𑀁, 𑀲𑀗𑁆𑀓𑁂𑀢𑀫𑀢𑁆𑀢𑀁 𑀜𑀸𑀧𑀓𑀁, 𑀦 𑀢𑀼 𑀚𑀦𑀓𑀁, 𑀲𑀗𑁆𑀓𑁂𑀢𑁄𑀧𑀺 𑀮𑀓𑁆𑀔𑀡𑀫𑀼𑀘𑁆𑀘𑀢𑁂 𑀮𑀓𑁆𑀔𑀻𑀬𑀢𑁂 𑀓𑀸𑀭𑀺𑀬𑀫𑀸𑀦𑁂𑀦𑀸𑀢𑀺 𑀓𑀢𑁆𑀯𑀸, 𑀚𑀦𑀓𑀲𑁆𑀲𑀸𑀧𑁆𑀬𑀢𑁆𑀭 𑀮𑀓𑁆𑀔𑀡𑀢𑁆𑀢𑁂𑀦 𑀕𑀳𑀡𑁂 𑀧𑀬𑁄𑀚𑀦𑀁 ‘‘𑀅𑀦𑀼𑀦𑀸’’ (𑁨-𑁧𑁦) 𑀇𑀘𑁆𑀘𑀢𑁆𑀭 𑀤𑀝𑁆𑀞𑀩𑁆𑀩𑀁. 𑀓𑀜𑁆𑀘𑀺𑀧𑀓𑀸𑀭𑀦𑁆𑀢𑀺 𑀇𑀫𑀺𑀦𑀸 𑀇𑀢𑁆𑀣𑀁𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀤𑀢𑀺. 𑀧𑀢𑁆𑀢𑁄𑀢𑀺 𑀇𑀫𑀺𑀦𑀸 𑀪𑀽𑀢𑀲𑀤𑁆𑀤𑀲𑁆𑀲, 𑀏𑀢𑁆𑀣 𑀳𑀺 𑀪𑀽𑀥𑀸𑀢𑀼 𑀧𑀢𑁆𑀢𑀺𑀬𑀁 𑀯𑀢𑁆𑀢𑀢𑁂, 𑀭𑀼𑀓𑁆𑀔𑁄𑀮𑀓𑁆𑀔𑀡𑀦𑁆𑀢𑀺 𑀭𑀼𑀓𑁆𑀔𑁄 𑀜𑀸𑀧𑀓𑀳𑁂𑀢𑀽𑀢𑀺 𑀅𑀢𑁆𑀣𑁄… 𑀭𑀼𑀓𑁆𑀔𑁂𑀦 𑀯𑀺𑀚𑁆𑀚𑀼𑀬𑀸 𑀜𑀸𑀧𑀻𑀬𑀫𑀸𑀦𑀢𑁆𑀢𑀸, 𑀆𑀘𑀭𑀺𑀬𑀚𑀺𑀦𑀺𑀦𑁆𑀤𑀩𑀼𑀤𑁆𑀥𑀺 𑀧𑀦 𑀅𑀜𑁆𑀜𑀣𑀸 𑀯𑀡𑁆𑀡𑀬𑀢𑀺, 𑀢𑀲𑁆𑀲𑁂𑀤𑀁 𑀫𑀢𑀁-

𑀓𑁆𑀭𑀺𑀬𑀸𑀬 𑀚𑁄𑀢𑀓𑁄 𑀦𑀸𑀬𑀁, 𑀲𑀫𑁆𑀩𑀦𑁆𑀥𑀲𑁆𑀲 𑀦 𑀯𑀸𑀘𑀓𑁄;

𑀦𑀸𑀧𑀺 𑀓𑁆𑀭𑀺𑀬𑀦𑁆𑀢𑀭𑀸𑀧𑁂𑀓𑁆𑀔𑀻, 𑀲𑀫𑁆𑀩𑀦𑁆𑀥𑀲𑁆𑀲 𑀢𑀼 𑀪𑁂𑀤𑀓𑁄𑀢𑀺.

𑀅𑀬𑀫𑁂𑀢𑁆𑀣 ¶ 𑀅𑀢𑁆𑀣𑁄 ‘‘𑀅𑀬𑀫𑀪𑀺 𑀅𑀪𑀺𑀦𑀦𑁆𑀤𑀢𑀺𑀢𑁆𑀬𑀸𑀤𑀻𑀲𑀼 𑀯𑀺𑀬 𑀓𑀺𑀭𑀺𑀬𑀸𑀬 𑀚𑁄𑀢𑀓𑁄 𑀦 𑀳𑁄𑀢𑀺, 𑀙𑀝𑁆𑀞𑀻 𑀯𑀺𑀬 𑀲𑀫𑁆𑀩𑀦𑁆𑀥𑀲𑁆𑀲 𑀯𑀸𑀘𑀓𑁄 𑀦 𑀳𑁄𑀢𑀺, 𑀦𑀺𑀓𑁆𑀓𑁄𑀲𑀫𑁆𑀩𑀻𑀢𑁆𑀬𑀢𑁆𑀭 𑀕𑀫𑀦𑀓𑀺𑀭𑀺𑀬𑀸𑀧𑁂𑀓𑁆𑀔𑀻 𑀦𑀺𑀲𑀤𑁆𑀤𑁄 𑀯𑀺𑀬 𑀦𑀸𑀧𑀺 𑀓𑀺𑀭𑀺𑀬𑀦𑁆𑀢𑀭𑀸 𑀧𑁂𑀓𑁆𑀔𑀻, 𑀓𑀺𑀜𑁆𑀘𑀭𑀳𑀺 𑀲𑀫𑁆𑀩𑀦𑁆𑀥𑀲𑁆𑀲 𑀢𑀼 𑀪𑁂𑀤𑀓𑁄 𑀯𑀺𑀲𑁂𑀲𑀓𑁄 𑀪𑀯𑀢𑀻’’𑀢𑀺 𑀢𑀫𑀼𑀧𑀤𑀲𑁆𑀲𑁂𑀢𑀼𑀫𑀸𑀳-‘𑀅𑀜𑁆𑀜𑁂 𑀢𑁆𑀯𑀺’𑀘𑁆𑀘𑀸𑀤𑀺, 𑀏𑀢𑁆𑀣 𑀇𑀢𑀺𑀲𑀤𑁆𑀤𑁄 𑀦𑀺𑀤𑀲𑁆𑀲𑀦𑁂, 𑀭𑀼𑀓𑁆𑀔𑀫𑁆𑀧𑀢𑁆𑀯𑀸 𑀯𑀺𑀚𑁆𑀚𑁄𑀢𑀢𑁂 𑀇𑀢𑀺𑀏𑀯𑀁 𑀧𑀢𑁆𑀢𑀺𑀓𑀺𑀭𑀺𑀬𑀸𑀬 𑀧𑀢𑁆𑀯𑀸𑀢𑀺𑀯𑀼𑀢𑁆𑀢𑀭𑀼𑀓𑁆𑀔𑀧𑀸𑀧𑀦𑀓𑀺𑀭𑀺𑀬𑀸𑀬 𑀚𑀦𑀺𑀢𑁄𑀢𑀺 𑀅𑀢𑁆𑀣𑁄, 𑀢𑀣𑀸𑀳𑀺 𑀭𑀼𑀓𑁆𑀔𑀲𑁆𑀲 𑀯𑀺𑀚𑁆𑀚𑀼𑀬𑀸 𑀧𑀸𑀧𑀦𑀸𑀪𑀸𑀯𑁂 𑀯𑀺𑀚𑁆𑀚𑀼𑀬𑀸 𑀮𑀓𑁆𑀔𑀺𑀬𑀸𑀬 𑀢𑀮𑁆𑀮𑀡𑀲𑁆𑀲 𑀘 𑀭𑀼𑀓𑁆𑀔𑀲𑁆𑀲 𑀬𑁄 𑀮𑀓𑁆𑀔𑀺𑀬𑀮𑀓𑁆𑀔𑀡𑀪𑀸𑀯𑁄 𑀲𑀫𑁆𑀩𑀦𑁆𑀥𑁄, 𑀲𑁄 𑀓𑁂𑀦 𑀲𑀫𑁆𑀧𑀸𑀤𑀺𑀢𑁄 𑀪𑀯𑁂𑀬𑁆𑀬, 𑀦𑀦𑀼 𑀲𑀫𑁆𑀩𑀦𑁆𑀥𑁂 𑀅𑀪𑀺𑀦𑀸 𑀚𑁄𑀢𑀻𑀬𑀫𑀸𑀦𑁂 𑀭𑀼𑀓𑁆𑀔𑀲𑁆𑀲 𑀮𑀓𑁆𑀔𑀡𑀯𑀼𑀢𑁆𑀢𑀺𑀢𑀸 𑀓𑀣𑀁 𑀚𑁄𑀢𑀻𑀬𑀢𑀻𑀢𑀺 𑀆𑀳-‘𑀮𑀓𑁆𑀔𑀡𑀢𑁆𑀣𑁄𑀘 𑀯𑀺𑀲𑀬𑀪𑀸𑀯𑁂𑀦𑀸’𑀢𑀺, 𑀢𑀣𑀸𑀘𑁂𑀢𑁆𑀬𑀸𑀤𑀺𑀦𑀸 𑀢𑀲𑁆𑀫𑀺𑀁 𑀧𑀓𑁆𑀔𑁂 𑀲𑀫𑁆𑀪𑀸𑀯𑀺𑀢𑀁 𑀤𑁄𑀲𑀫𑀼𑀩𑁆𑀪𑀸𑀯𑀬𑀢𑀺, 𑀢𑀢𑁆𑀭𑀸𑀬 𑀫𑀺𑀘𑁆𑀘𑀸𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀤𑁄𑀲𑀧𑀭𑀺𑀳𑀸𑀭𑀸𑀬 𑀧𑀭𑁂𑀳𑁂𑀯𑀸𑀪𑀺𑀥𑀻𑀬𑀫𑀸𑀦𑀫𑁆𑀧𑀭𑀺𑀳𑀸𑀭𑀫𑀸𑀳, 𑀧𑀭𑀺𑀳𑀸𑀭𑁄𑀧𑀤𑀲𑁆𑀲𑀦𑁂𑀦𑀸𑀲𑁆𑀲𑀸𑀧𑀺 𑀧𑀓𑁆𑀔𑀲𑁆𑀲𑀸𑀤𑀼𑀝𑁆𑀞𑀢𑀸𑀔𑁆𑀬𑀸𑀧𑀦𑁂𑀦𑁂𑀲𑁄𑀧𑀺 𑀧𑀓𑁆𑀔𑁄-𑀩𑁆𑀪𑀼𑀧𑀕𑀢𑁄𑀢𑁆𑀬𑀯𑀲𑁂𑀬𑁄, 𑀅𑀢𑁄𑀬𑁂𑀯𑀼𑀧𑀭𑀺 𑀬𑀣𑀸𑀯𑀼𑀢𑁆𑀢 𑀧𑀓𑁆𑀔𑀦𑀺𑀲𑁆𑀲𑀬𑁂𑀦𑁂𑀯 𑀩𑁆𑀬𑀸𑀔𑁆𑀬𑀸𑀬𑀢𑁂, 𑀤𑁂𑀯𑀤𑀢𑁆𑀢𑀲𑁆𑀲 𑀲𑀸𑀥𑀼𑀢𑁆𑀢𑀲𑀗𑁆𑀔𑀸𑀢𑀇𑀢𑁆𑀣𑀫𑁆𑀧𑀓𑀸𑀭𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑀬𑀪𑀸𑀯𑁂𑀦𑀸𑀯𑀝𑁆𑀞𑀺𑀢𑀸 𑀫𑀸𑀢𑀸 𑀢𑀢𑁆𑀣 𑀯𑀢𑁆𑀢𑀢𑀺 𑀦𑀸𑀫𑀸𑀢𑀺 𑀆𑀳-‘𑀫𑀸𑀢𑀼𑀬𑀸’𑀢𑀺𑀆𑀤𑀺, 𑀫𑀸𑀢𑀸 𑀘 𑀇𑀢𑁆𑀣𑀫𑁆𑀪𑀽𑀢𑁂 𑀧𑀯𑀢𑁆𑀢𑀸 𑀯𑀺𑀲𑀬 𑀪𑀸𑀯𑁂𑀦 𑀤𑁂𑀯𑀤𑀢𑁆𑀢𑁄 𑀘 𑀢𑀢𑁆𑀣 𑀯𑀺𑀲𑀬𑀻𑀪𑀸𑀯𑁂𑀦, 𑀢𑁂𑀲𑀜𑁆𑀘 𑀯𑀺𑀲𑀬𑀯𑀺𑀲𑀬𑀻𑀪𑀸𑀯𑀮𑀓𑁆𑀔𑀡𑁄 𑀲𑀫𑁆𑀩𑀦𑁆𑀥𑁄 𑀇𑀢𑁆𑀣𑀫𑁆𑀧𑀢𑁆𑀢𑀺𑀮𑀓𑁆𑀔𑀡𑀸𑀬 𑀓𑀺𑀭𑀺𑀬𑀸𑀬 𑀚𑀸𑀢𑁄, 𑀲𑁄 𑀫𑀸𑀢𑀼𑀲𑀫𑁆𑀩𑀦𑁆𑀥𑁄 𑀳𑁄𑀢𑀺 𑀓𑀸𑀭𑀡𑀯𑀲𑁂𑀦, 𑀲𑁄𑀘𑀸𑀢𑀺𑀦𑀸 𑀚𑁄𑀢𑀻𑀬𑀢𑀻𑀢𑀺 𑀫𑀸𑀢𑀼 𑀢𑁂𑀦𑀸𑀪𑀺𑀦𑀸 𑀬𑁄𑀕𑁄𑀢𑀺 𑀆𑀳-‘𑀬𑁆𑀯𑀸𑀬’𑀘𑁆𑀘𑀸𑀤𑀺, 𑀫𑀸𑀢𑀼𑀲𑀫𑁆𑀩𑀦𑁆𑀥𑁄𑀇𑀢𑀺 𑀬𑁄𑀚𑀦𑀸, 𑀇𑀢𑁆𑀣𑀫𑁆𑀧𑀢𑁆𑀢𑀺𑀬𑀸𑀢𑀺 𑀇𑀢𑁆𑀣𑀫𑁆𑀧𑀢𑁆𑀢𑀺𑀮𑀓𑁆𑀔𑀡𑀸𑀬 𑀓𑀺𑀭𑀺𑀬𑀸𑀬 𑀓𑀭𑀡𑀪𑀽𑀢𑀸𑀬, 𑀏𑀯𑀁 𑀫𑀜𑁆𑀜𑀢𑁂 ‘‘𑀓𑀺𑀜𑁆𑀘𑀸𑀧𑀺 𑀲𑁄 𑀲𑀫𑁆𑀩𑀦𑁆𑀥𑁄 𑀤𑁂𑀯𑀤𑀢𑁆𑀢𑁂𑀦𑀸𑀧𑁆𑀬𑀯𑀺𑀦𑀸𑀪𑀸𑀯𑀻𑀢𑀺 𑀢𑀲𑁆𑀲 𑀲𑁄𑀪𑀺𑀦𑀸 𑀚𑁄𑀢𑀻𑀬𑀢𑁂, 𑀢𑀣𑀸𑀧𑀺 𑀫𑀸𑀢𑀼𑀲𑀫𑁆𑀩𑀦𑁆𑀥𑁄𑀪𑀺𑀦𑀸 𑀚𑁄𑀢𑀻𑀬𑀢𑀻𑀢𑀺 ‘𑀫𑀸𑀢𑀼 𑀢𑁂𑀦 𑀬𑁄𑀕𑁄’𑀢𑀺 𑀘 (𑀯𑀼𑀘𑁆𑀘𑀢𑀺)… 𑀲𑀤𑁆𑀤𑀲𑀢𑁆𑀢𑀺𑀬𑀸 𑀢𑀕𑁆𑀕𑀢𑀸𑀬𑁂𑀯 𑀤𑀼𑀢𑀺𑀬𑀸𑀬 𑀉𑀪𑀬𑀕𑀢𑀲𑁆𑀲𑀸𑀧𑀺 𑀲𑀫𑁆𑀩𑀦𑁆𑀥𑀲𑁆𑀲 𑀚𑁄𑀢𑀦𑀢𑁄’’𑀢𑀺 𑀭𑀼𑀓𑁆𑀔𑁄 𑀭𑀼𑀓𑁆𑀔𑁄 𑀢𑀺𑀝𑁆𑀞𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀞𑀺𑀢𑀺𑀫𑁆𑀧𑀝𑀺𑀘𑁆𑀘𑀸𑀢𑀺 𑀞𑀺𑀢𑀺𑀦𑁆𑀦𑀺𑀲𑁆𑀲𑀸𑀬 𑀏𑀲𑀁 𑀭𑀼𑀓𑁆𑀔𑀸𑀦𑀁 𑀬𑁄 𑀘 𑀲𑀫𑁆𑀩𑀦𑁆𑀥𑁄𑀢𑀺 𑀬𑁄𑀚𑀦𑀸, 𑀭𑀼𑀓𑁆𑀔𑀸𑀦𑀦𑁆𑀢𑀺 𑀇𑀫𑀺𑀦𑀸 𑀭𑀼𑀓𑁆𑀔𑀸 𑀓𑀺𑀭𑀺𑀬𑀸𑀬 𑀧𑀭𑁂 𑀲𑀫𑁆𑀩𑀦𑁆𑀥𑀺𑀦𑁄𑀢𑀺 𑀜𑀸𑀧𑁂𑀢𑀺, 𑀞𑀺𑀢𑀺𑀫𑁆𑀧𑀝𑀺𑀘𑁆𑀘𑀸𑀢𑀺 ¶ 𑀇𑀫𑀺𑀦𑀸 𑀧𑀦 𑀢𑀺𑀝𑁆𑀞𑀢𑀺𑀲𑀤𑁆𑀤𑀯𑀘𑀦𑀻𑀬𑀸 𑀲𑀸𑀥𑁆𑀬𑀭𑀽𑀧𑀸 𑀞𑀺𑀢𑀺𑀓𑀺𑀭𑀺𑀬𑀸 𑀭𑀼𑀓𑁆𑀔𑀢𑁄 𑀧𑀭𑁂 𑀲𑀫𑁆𑀩𑀦𑁆𑀥𑀻𑀢𑀺, 𑀅𑀘𑁂𑀢𑀦𑀸𑀦𑀁 𑀭𑀼𑀓𑁆𑀔𑀸𑀦𑀫𑀧𑁂𑀓𑁆𑀔𑀸𑀯𑀺𑀭𑀳𑁂𑀧𑀺 𑀮𑁄𑀓𑀫𑁆𑀧𑀢𑀻𑀢𑀺𑀯𑀲𑁂𑀦 ‘𑀧𑀺𑀧𑀢𑀻𑀲𑀸’𑀤𑀻𑀦𑀁 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸 𑀯𑀺𑀜𑁆𑀜𑀸𑀬𑀫𑀸𑀦𑀞𑀸𑀦𑀸𑀧𑁂𑀓𑁆𑀔𑀡𑀓𑀺𑀭𑀺𑀬𑀸𑀬𑀲𑀸𑀥𑁆𑀬𑀲𑀸𑀥𑀦𑀮𑀓𑁆𑀔𑀡𑁄 𑀲𑀫𑁆𑀩𑀦𑁆𑀥𑁄 𑀚𑀸𑀢𑁄𑀢𑀺 𑀯𑀺𑀜𑁆𑀜𑁂𑀬𑁆𑀬𑀁, 𑀲𑁄 𑀘 𑀭𑀼𑀓𑁆𑀔𑀲𑀫𑁆𑀩𑀦𑁆𑀥𑁄-𑀪𑀺𑀦𑀸 𑀚𑁄𑀢𑀻𑀬𑀢𑀻𑀢𑀺 𑀆𑀳-‘𑀲𑁄’𑀢𑀺𑀆𑀤𑀺, 𑀤𑁆𑀯𑀺𑀩𑁆𑀩𑀘𑀦𑁂𑀦𑁂𑀯 𑀚𑁄𑀢𑀦𑀻𑀬𑀸𑀢𑀺 𑀯𑀺𑀘𑁆𑀙𑀸𑀢𑁆𑀣𑁂 𑀯𑀼𑀢𑁆𑀢𑀺𑀫𑀢𑁆𑀢𑁂 𑀲𑀢𑀻𑀧𑀺 𑀯𑀺𑀪𑀢𑁆𑀢𑀺𑀬𑀸 [𑀯𑀺𑀘𑁆𑀙𑀢𑁆𑀣𑁂 𑀯𑀼𑀢𑁆𑀓𑀺𑀫𑀢𑁆𑀢𑁂𑀢𑁆𑀬𑀸𑀤𑀺𑀯𑀘𑀦𑀁 𑀯𑀺𑀘𑀸𑀭𑁂𑀭𑁂𑀢𑀩𑁆𑀩𑀁𑀯𑀺𑀢𑀢𑁆𑀢𑀺𑀬𑀸 𑀅𑀩𑀺𑀲𑀤𑁆𑀤𑀲𑁆𑀲𑀘 𑀯𑀺𑀘𑁆𑀙𑀢𑁆𑀣𑁂 𑀯𑀼𑀢𑁆𑀢𑀺𑀬𑀸 𑀅𑀪𑀸𑀯𑀸, 𑀮𑀓𑁆𑀔𑀡𑀺𑀢𑁆𑀣𑀫𑁆𑀪𑀽𑀢𑀺 𑀳𑀺 𑀧𑀓𑀢𑀺𑀯𑀺𑀲𑁂𑀲𑀦𑀁] 𑀚𑁄𑀢𑁂𑀢𑀼𑀫𑀲𑀫𑀢𑁆𑀣𑀢𑁆𑀢𑀸 𑀯𑀺𑀘𑁆𑀙𑀸𑀬 𑀚𑁄𑀢𑀦𑀸𑀬 𑀤𑁆𑀯𑀺𑀩𑁆𑀩𑀯𑀘𑀦𑀁 𑀓𑀢𑁆𑀢𑀩𑁆𑀩𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀉𑀧𑀸𑀤𑀺𑀬𑀫𑀸𑀦𑁄𑀢𑀺 𑀅𑀩𑁆𑀪𑀼𑀧𑀕𑀫𑁆𑀫𑀫𑀸𑀦𑁄, 𑀬𑀤𑀺 𑀧𑀦 𑀉𑀧𑀸𑀤𑀺𑀬𑀫𑀸𑀦𑁄 𑀪𑀸𑀕𑁄, 𑀅𑀦𑀼𑀧𑀸𑀤𑀺𑀬𑀫𑀸𑀦𑁄 𑀓𑀣𑀦𑁆𑀢𑀺 𑀆𑀳-‘𑀬𑁄 𑀧𑀦𑀸’𑀢𑀺𑀆𑀤𑀺, 𑀢𑀕𑀭𑀓𑀼𑀝𑁆𑀞𑀸 𑀕𑀦𑁆𑀥𑀩𑁆𑀩𑀯𑀺𑀲𑁂𑀲𑀸, 𑀫𑀫𑀸𑀪𑀚𑀢𑀻𑀢𑀺 𑀫𑀁 𑀆𑀪𑀚𑀢𑀺, 𑀫𑀫 𑀓𑁄𑀝𑁆𑀞𑀸𑀲𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑀢𑀼𑀮𑀓𑁆𑀔𑀡𑀦𑁆𑀢𑀺 𑀲𑀘𑁆𑀘𑀓𑀺𑀭𑀺𑀬𑀸 𑀯𑀼𑀝𑁆𑀞𑀺𑀬𑀸 𑀳𑁂𑀢𑀼 𑀳𑁄𑀢𑀺, 𑀦 𑀢𑀼 𑀲𑀗𑁆𑀓𑁂𑀢𑁄𑀢𑀺 𑀅𑀢𑁆𑀣𑁄, 𑀳𑁂𑀢𑀼𑀢𑁆𑀢𑀸 𑀮𑀓𑁆𑀔𑀡𑀢𑁆𑀢𑀸𑀪𑀸𑀯𑁂 𑀲𑀘𑁆𑀘𑀓𑀺𑀭𑀺𑀬𑀸𑀬 𑀓𑀣𑀁 𑀮𑀓𑁆𑀔𑀡𑁂 𑀤𑀼𑀢𑀺𑀬𑀸𑀢𑀺 𑀳𑁂𑀢𑀼𑀢𑁆𑀢𑁂𑀧𑀺 𑀮𑀓𑁆𑀔𑀡𑀢𑁆𑀢𑀫𑀲𑁆𑀲 𑀲𑀸𑀥𑁂𑀦𑁆𑀢𑁄 𑀲𑀸𑀥𑀫𑁆𑀫𑀧𑀬𑁄𑀕𑁂𑀦𑀸𑀦𑁆𑀯𑀬𑀫𑀸𑀳-‘𑀬𑀁 𑀲𑀓𑀺𑀫𑁆𑀧𑀺’𑀘𑁆𑀘𑀸𑀤𑀺, 𑀏𑀢𑁆𑀣 𑀳𑀺 𑀮𑀓𑁆𑀔𑀡𑀁 𑀲𑀘𑁆𑀘 𑀓𑀺𑀭𑀺𑀬𑀸𑀢𑀺 𑀧𑀝𑀺𑀜𑁆𑀜𑀸, [𑀧𑀓𑁆𑀔𑁄 (𑀧𑁄𑀢𑁆𑀣𑀓𑁂)] 𑀲𑀓𑀺𑀫𑁆𑀧𑀺 𑀦𑀺𑀫𑀺𑀢𑁆𑀢𑀢𑀸𑀬 𑀓𑀧𑁆𑀧𑀦𑀢𑁆𑀢𑀸𑀢𑀺 𑀳𑁂𑀢𑀼, 𑀬𑀁 𑀲𑀓𑀺𑀫𑁆𑀧𑀺 𑀦𑀺𑀫𑀺𑀢𑁆𑀢𑀢𑀸𑀬 𑀓𑀧𑁆𑀧𑀢𑁂 𑀢𑀫𑁆𑀧𑀺 𑀮𑀓𑁆𑀔𑀡𑀁 𑀪𑀯𑀢𑀺, 𑀬𑀣𑀸’𑀅𑀧𑀺 𑀪𑀯𑀁 𑀓𑀫𑀡𑁆𑀟𑀮𑀼𑀧𑀸𑀡𑀺𑀁 𑀲𑀺𑀲𑁆𑀲𑀫𑀤𑁆𑀤𑀓𑁆𑀔𑀻’𑀢𑀺 𑀲𑀸𑀥𑀫𑁆𑀫𑀧𑀬𑁄𑀕𑁂𑀦𑀸𑀦𑁆𑀯𑀬𑁄 𑀤𑀝𑁆𑀞𑀩𑁆𑀩𑁄, 𑀓𑀧𑁆𑀧𑀢𑁂𑀢𑀺 𑀲𑀫𑀢𑁆𑀣𑁄𑀢𑀺 𑀅𑀢𑁆𑀣𑁄, 𑀓𑀫𑀡𑁆𑀟𑀮𑀼 𑀧𑀸𑀡𑀺𑀫𑁆𑀳𑀺 𑀅𑀲𑁆𑀲𑁂𑀢𑀺 𑀓𑀫𑀡𑁆𑀟𑀮𑀼𑀧𑀸𑀡𑀻, 𑀅𑀧𑀻𑀢𑀺 𑀧𑀜𑁆𑀳𑁂, 𑀓𑀤𑀸𑀘𑀺 𑀓𑁂𑀦𑀘𑀺 𑀓𑀫𑀡𑁆𑀟𑀮𑀼𑀧𑀸𑀡𑀻𑀲𑀺𑀲𑁆𑀲𑁄 𑀤𑀺𑀝𑁆𑀞𑁄 𑀲𑁄 𑀢𑀫𑁂𑀯 𑀤𑀲𑁆𑀲𑀦𑀁 𑀮𑀓𑁆𑀔𑀡𑀁 𑀓𑀢𑁆𑀯𑀸 𑀧𑀼𑀘𑁆𑀙𑀢𑀺 ‘𑀅𑀧𑀺’𑀢𑁆𑀬𑀸𑀤𑀺𑀦𑀸, 𑀅𑀣 𑀬𑀣𑀸 𑀯𑀼𑀢𑁆𑀢𑁂𑀦 𑀳𑁂𑀢𑀼𑀦𑁄𑀧𑀺 𑀮𑀓𑁆𑀔𑀡𑀢𑁆𑀢𑀫𑀢𑁆𑀢𑀼 𑀢𑀣𑀸𑀧𑀺 𑀧𑀭𑀯𑀺𑀧𑁆𑀧𑀝𑀺𑀲𑁂𑀥𑁂𑀦 𑀳𑁂𑀢𑀼𑀫𑁆𑀳𑀺 𑀢𑀢𑀺𑀬𑀸 𑀓𑀲𑁆𑀫𑀸 𑀦 𑀲𑀺𑀬𑀸𑀢𑀺 𑀘𑁄𑀤𑀬𑀫𑀸𑀳 ‘𑀦 𑀦𑁆𑀯𑁂𑀯𑀫𑁆𑀧𑀺’𑀘𑁆𑀘𑀸𑀤𑀺, 𑀧𑀼𑀩𑁆𑀩𑀯𑀺𑀧𑁆𑀧𑀝𑀺𑀲𑁂𑀥𑁂𑀦𑀸𑀢𑀺 𑀅𑀧𑀯𑀸𑀤𑀧𑀼𑀩𑁆𑀩𑀯𑀺𑀧𑁆𑀧𑀝𑀺𑀲𑁂𑀥𑁂𑀦, 𑀢𑀣𑀸𑀳𑀺 𑀙𑀝𑁆𑀞𑀺𑀬𑀸 ¶ 𑀧𑀯𑀸𑀤𑁄 𑀳𑁄𑀢𑀺 𑀳𑁂𑀢𑀼𑀫𑁆𑀳𑀺 𑀢𑀢𑀺𑀬𑀸𑀯𑀺𑀥𑀺… 𑀲𑀫𑁆𑀩𑀦𑁆𑀥𑀙𑀝𑁆𑀞𑀺𑀬𑀸 𑀧𑀢𑁆𑀢𑀸𑀬 𑀳𑁂𑀢𑀼𑀢𑀢𑀺𑀬𑀸𑀯𑀺𑀥𑀸𑀦𑀢𑁄 𑀉𑀧𑀧𑀤𑀯𑀺𑀪𑀢𑁆𑀢𑀺𑀯𑀺𑀥𑀺𑀧𑀺 𑀙𑀝𑁆𑀞𑀺𑀬𑀸𑀧𑀯𑀸𑀤𑁄… 𑀲𑀫𑁆𑀩𑀦𑁆𑀥𑀯𑀺𑀲𑁂𑀲𑀸𑀪𑀺𑀩𑁆𑀬𑀢𑁆𑀢𑀺𑀳𑁂𑀢𑀼𑀦𑁄𑀧𑀧𑀤𑁂𑀦 𑀬𑁄𑀕𑁂 𑀢𑀲𑁆𑀫𑀺𑀁𑀬𑁂𑀯 𑀲𑀫𑁆𑀩𑀦𑁆𑀥𑁂 𑀯𑀺𑀥𑀸𑀦𑀢𑁄, 𑀢𑀢𑁆𑀣 𑀳𑁂𑀢𑀼𑀢𑀢𑀺𑀬𑀸𑀯𑀓𑀸𑀲𑁄 ‘𑀥𑀦𑁂𑀦 𑀓𑀼𑀮’𑀦𑁆𑀢𑀺, 𑀉𑀧𑀧𑀤𑀯𑀺𑀪𑀢𑁆𑀢𑀺𑀬𑀸𑀯𑀓𑀸𑀲𑁄 ‘𑀭𑀼𑀓𑁆𑀔𑀫𑀦𑀼𑀯𑀺𑀚𑁆𑀚𑁄𑀢𑀢𑁂’𑀢𑀺, 𑀲𑀘𑁆𑀘𑀓𑀺𑀭𑀺𑀬𑀫𑀦𑀼 𑀧𑀸𑀯𑀲𑁆𑀲𑀻𑀢𑀺 𑀢𑀼 𑀳𑁂𑀢𑀼𑀫𑁆𑀳𑀺 𑀮𑀓𑁆𑀔𑀡𑁂-𑀧𑀯𑀸𑀤𑀯𑀺𑀧𑁆𑀧𑀝𑀺𑀲𑁂𑀥𑁂 𑀲𑀢𑀺 𑀧𑀼𑀩𑁆𑀩𑀯𑀺𑀧𑁆𑀧𑀝𑀺𑀲𑁂𑀥𑁂𑀦 𑀤𑀼𑀢𑀺𑀬𑀸 𑀪𑀯𑀢𑀺.

𑀲𑀳𑀢𑁆𑀣𑁂-𑀦𑀼𑀦𑁄 𑀯𑀢𑁆𑀢𑀦𑁂 𑀧𑀩𑁆𑀩𑀢𑁂𑀦 𑀬𑁄𑀕𑁄 𑀓𑀣𑀦𑁆𑀢𑀺 𑀆𑀳‘𑀧𑀩𑁆𑀩𑀢𑁂𑀦𑁂’𑀘𑁆𑀘𑀸𑀤𑀺.

𑀯𑀺𑀲𑀬𑀪𑀸𑀯𑁂𑀦𑀸𑀢𑀺𑀆𑀤𑀺𑀦𑀸 𑀳𑀻𑀦𑀢𑁆𑀣𑁂𑀢𑀺 𑀯𑀺𑀲𑀬𑀲𑀢𑁆𑀢𑀫𑀺𑀢𑁆𑀢𑀫𑀸𑀳, 𑀯𑀺𑀚𑀸𑀦𑀦𑀧𑁆𑀧𑀓𑀸𑀭𑀫𑀸𑀳-‘𑀳𑀻𑀦𑁂’𑀘𑁆𑀘𑀸𑀤𑀺, 𑀢𑁂𑀦𑀸𑀢𑀺 𑀅𑀦𑀼𑀦𑀸, 𑀓𑀣𑀁 𑀢𑁂𑀦 𑀬𑀼𑀢𑁆𑀢𑀢𑁆𑀢𑀁 𑀉𑀓𑁆𑀓𑀝𑁆𑀞𑀲𑁆𑀲𑀸𑀢𑀺 𑀳𑀻𑀦𑀼𑀓𑁆𑀓𑀝𑁆𑀞𑀲𑀫𑁆𑀩𑀦𑁆𑀥𑀫𑀼𑀔𑁂𑀦 𑀯𑀺𑀪𑀸𑀯𑁂𑀦𑁆𑀢𑁄’𑀢𑀢𑁆𑀣𑀸’𑀢𑀺𑀆𑀤𑀺𑀫𑀸𑀳, 𑀢𑀢𑁆𑀣𑀸𑀢𑀺 𑀳𑀻𑀦𑁂𑀘𑁆𑀘𑀸𑀤𑀺𑀦𑀸 𑀯𑀼𑀢𑁆𑀢𑁂 𑀢𑀲𑁆𑀫𑀺𑀁, 𑀬𑀢𑁄𑀢𑀺 𑀉𑀓𑁆𑀓𑀝𑁆𑀞𑀲𑀸𑀭𑀺𑀧𑀼𑀢𑁆𑀢𑀸𑀤𑀺𑀓𑁄, 𑀳𑀻𑀦𑁄𑀢𑀺 𑀧𑀜𑁆𑀜𑀯𑀢𑁆𑀢𑀸𑀤𑀺(𑀢𑁄 𑀦𑀺𑀓𑁆𑀓𑀝𑁆𑀞𑁄, 𑀲𑁄 𑀲𑀸𑀭𑀺𑀧𑀼𑀢𑁆𑀢𑀸𑀤𑀺𑀓𑁄 𑀉𑀓𑁆𑀓𑀝𑁆𑀞𑁄) 𑀳𑀻𑀦𑀢𑁆𑀣𑀯𑀺𑀲𑀬𑁄 𑀚𑀸𑀬𑀢𑁂… 𑀢𑀩𑁆𑀩𑀺𑀲𑀬𑁂 𑀢𑀲𑁆𑀲 𑀉𑀓𑁆𑀓𑀝𑁆𑀞𑀢𑀸 𑀧𑀢𑁆𑀢𑀺𑀢𑁄, 𑀳𑀻𑀦𑀼𑀓𑁆𑀓𑀝𑁆𑀞𑀲𑀫𑁆𑀩𑀦𑁆𑀥𑁄 𑀧𑀦 𑀅𑀢𑀺𑀲𑀸𑀬𑀦𑀸𑀤𑀺𑀓𑀸𑀬 𑀓𑀸𑀬𑀘𑀺 𑀓𑀺𑀭𑀺𑀬𑀸𑀬 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀓𑀺𑀦𑁆𑀢𑀁 𑀆𑀥𑀺𑀓𑁆𑀬𑀫𑀺𑀘𑁆𑀘𑀸𑀳- ‘𑀅𑀥𑀺𑀓𑀸𑀥𑀺𑀓𑀻𑀲𑀫𑁆𑀩𑀦𑁆𑀥𑁄’𑀢𑀺, 𑀅𑀥𑀺𑀓𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀅𑀥𑀺𑀓𑀻=𑀔𑀸𑀭𑀻, 𑀅𑀣𑀸𑀥𑀺𑀓𑀻𑀯𑀺𑀦𑀺𑀫𑀼𑀢𑁆𑀢𑁂 𑀅𑀥𑀺𑀓𑀸𑀥𑀺𑀓𑀺𑀲𑀫𑁆𑀩𑀦𑁆𑀥𑁄 𑀓𑀣𑀫𑀯𑀲𑀻𑀬𑀢𑁂 𑀦𑀳𑁆𑀬𑀢𑁆𑀭𑀸𑀥𑀺𑀓𑀻 𑀓𑁄𑀘𑀺 𑀲𑀽𑀬𑀢𑀺𑀘𑁆𑀘𑀸𑀳-‘𑀦𑀯𑀺𑀦𑁂’𑀘𑁆𑀘𑀸𑀤𑀺, 𑀇𑀢𑀺 𑀲𑀤𑁆𑀤𑁄 𑀳𑁂𑀢𑀼𑀫𑁆𑀳𑀺 𑀬𑀣𑀸𑀯𑀼𑀢𑁆𑀢𑀲𑀫𑁆𑀩𑀦𑁆𑀥𑀲𑀸𑀥𑀦𑁄, 𑀢𑀤𑁄𑀧𑀲𑀤𑁆𑀤𑁂𑀦𑀬𑁄𑀕𑁄𑀢𑀺 𑀢𑀤𑀸 𑀉𑀧𑀲𑀤𑁆𑀤𑁂𑀦𑀸𑀥𑀺𑀓𑀺𑀦𑁄𑀬𑁄𑀕𑁄𑀢𑀺 𑀅𑀢𑁆𑀣𑁄. 𑀤𑁆𑀯𑀺𑀝𑁆𑀞𑀢𑁆𑀢𑀸 𑀲𑀫𑁆𑀩𑀦𑁆𑀥𑀲𑁆𑀲 𑀅𑀥𑀺𑀓𑀲𑁆𑀲𑀸𑀧𑁆𑀬𑀼𑀧𑀲𑀤𑁆𑀤𑁂𑀦 𑀬𑁄𑀕𑀸 𑀢𑀢𑁄𑀧𑀺 𑀓𑀲𑁆𑀫𑀸 𑀦 𑀲𑀢𑁆𑀢𑀫𑀻𑀢𑁆𑀬𑀸𑀳-‘𑀅𑀥𑀺𑀓𑀫𑁆𑀳𑀸𑀢𑁆𑀯𑀺’𑀘𑁆𑀘𑀸𑀤𑀺, 𑀬𑀣𑀸 𑀏𑀓𑀸𑀬𑁂𑀯 𑀯𑀺𑀪𑀢𑁆𑀢𑀺𑀬𑀸 𑀉𑀪𑀬𑀕𑀢𑀲𑁆𑀲𑀸𑀧𑀺 𑀲𑀫𑁆𑀩𑀦𑁆𑀥𑀲𑁆𑀲 𑀚𑁄𑀢𑀺𑀢𑀢𑁆𑀢𑀸 𑀯𑀺𑀚𑁆𑀚𑀼𑀲𑀗𑁆𑀔𑀸𑀢𑀮𑀓𑁆𑀔𑀺𑀬𑀸 𑀲𑀢𑁆𑀢𑀫𑁆𑀬𑀪𑀸𑀯𑁄, 𑀏𑀯𑀫𑀺𑀥𑀸 𑀧𑀻𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑀫𑀸𑀥𑀺𑀫𑀢𑀺𑀤𑀺𑀲𑀦𑁆𑀢𑁄 𑀆𑀳-‘𑀮𑀓𑁆𑀔𑀺𑀢𑀸 𑀯𑀺𑀬 𑀲𑀢𑁆𑀢𑀫𑁆𑀬 𑀪𑀸𑀯𑁄’𑀢𑀺, ‘‘𑀫𑀸𑀡𑀺𑀓𑀸 𑀘𑀢𑀼𑀭𑁄𑀤𑁄𑀡𑀸, 𑀔𑀸𑀭𑀺𑀢𑁆𑀣𑀻 𑀘𑀢𑀼𑀫𑀸𑀡𑀺𑀓𑀸’’.

𑀓𑀺𑀦𑁆𑀢𑀁 ¶ 𑀲𑀸𑀫𑀺𑀢𑁆𑀢𑀫𑀺𑀘𑁆𑀘𑀸𑀳-‘𑀲𑀲𑁆𑀲𑀸𑀫𑀺𑀲𑀫𑁆𑀩𑀦𑁆𑀥𑁄’𑀢𑀺, 𑀓𑀸𑀬 𑀓𑀺𑀭𑀺𑀬𑀸𑀬 𑀚𑀦𑀺𑀢𑁄𑀢𑀺 𑀆𑀳-‘𑀧𑀭𑀺𑀧𑀸𑀮𑀦𑀸𑀤𑀺𑀓𑀺𑀭𑀺𑀬𑀸𑀬 𑀚𑀦𑀺𑀢𑁄’𑀢𑀺, 𑀢𑀜𑁆𑀘𑀸𑀢𑀺 𑀲𑀸𑀫𑀺𑀢𑁆𑀢𑀸𑀧𑁂𑀓𑁆𑀔𑁄 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀲𑀫𑁆𑀩𑀦𑁆𑀥𑀲𑁆𑀲𑀸𑀦𑁂𑀓𑀯𑀺𑀥𑀢𑁆𑀢𑀸 𑀆𑀳‘𑀲𑀩𑁆𑀩𑀢𑁆𑀣 𑀲𑀫𑁆𑀩𑀦𑁆𑀥𑁂’𑀢𑀺, 𑀆𑀔𑁆𑀬𑀸𑀬𑀢𑁂𑀢𑀻𑀫𑀲𑁆𑀲 𑀅𑀢𑁆𑀣𑁄 𑀯𑀺𑀥𑀻𑀬𑀢𑁂 𑀜𑀸𑀧𑀻𑀬𑀢𑁂𑀢𑀺, 𑀤𑀺𑀝𑁆𑀞𑀦𑁆𑀢𑁄-𑀧𑀦𑀻𑀢𑁄𑀢𑁆𑀣𑁄 𑀲𑀼𑀔𑁂𑀦 𑀧𑀝𑀺𑀧𑀢𑁆𑀢𑀼𑀁 𑀲𑀓𑁆𑀓𑀸𑀢𑀺 𑀧𑀲𑀺𑀤𑁆𑀥𑀫𑀦𑀼𑀯𑀤𑀺𑀬𑀫𑀸𑀦𑀫𑀧𑁆𑀧𑀲𑀺𑀤𑁆𑀥𑀜𑁆𑀘 𑀯𑀺𑀥𑀻𑀬𑀫𑀸𑀦𑀁 𑀤𑀺𑀝𑁆𑀞𑀦𑁆𑀢𑀫𑀸𑀳-‘𑀬𑀣𑀸 𑀬𑁄 𑀓𑀼𑀡𑁆𑀟𑀮𑀻 𑀲𑁄 𑀤𑁂𑀯𑀤𑀢𑁆𑀢𑁄’𑀢𑀺, 𑀓𑀼𑀡𑁆𑀟𑀮𑀺𑀢𑁆𑀢𑀫𑁆𑀧𑀲𑀺𑀤𑁆𑀥𑀁, 𑀤𑁂𑀯𑀤𑀢𑁆𑀢𑀢𑁆𑀢𑀫𑀧𑁆𑀧𑀲𑀺𑀤𑁆𑀥𑀫𑀺𑀘𑁆𑀘𑀸𑀳-‘𑀓𑀼𑀡𑁆𑀟𑀮𑀺𑀢𑁆𑀢𑀸𑀦𑀼𑀯𑀸𑀤𑁂𑀦𑁂’𑀘𑁆𑀘𑀸𑀤𑀺. 𑀬𑀣𑁂𑀯𑁄𑀪𑀬𑀸𑀥𑀺𑀝𑁆𑀞𑀸𑀦𑀢𑁆𑀢𑁂𑀧𑁆𑀬𑀼𑀧𑀲𑀚𑁆𑀚𑀦𑀢𑁄𑀯 𑀙𑀝𑁆𑀞𑀻 ‘𑀭𑀜𑁆𑀜𑁄 𑀧𑀼𑀭𑀺𑀲𑁄’𑀢𑀺, 𑀦 𑀯𑀺𑀲𑁂𑀲𑁆𑀲𑀢𑁄 ‘𑀧𑀼𑀭𑀺𑀲𑀲𑁆𑀲 𑀭𑀸𑀚𑀸’𑀢𑀺, 𑀢𑀣𑀸 𑀲𑀫𑁆𑀩𑀦𑁆𑀥𑀸𑀪𑀺𑀩𑁆𑀬𑀜𑁆𑀚𑀦𑀓𑁂𑀦𑀸𑀥𑀺𑀦𑀸 𑀬𑁄𑀕𑁂𑀧𑀺 𑀯𑀺𑀲𑁂𑀲𑀦𑀢𑁄𑀯 𑀪𑀯𑀢𑀺, 𑀦𑀸𑀜𑁆𑀜𑀢𑁄𑀢𑀺 𑀆𑀳-‘𑀢𑀢𑁆𑀣𑀸’𑀢𑀺𑀆𑀤𑀺. 𑀩𑁆𑀬𑀢𑀺𑀭𑁂𑀓𑀫𑀸𑀧𑀸𑀤𑀻𑀬𑀢𑀻𑀢𑀺 𑀓𑀸𑀭𑀓𑀙𑀓𑁆𑀓𑀢𑁄 𑀩𑁆𑀬𑀢𑀺𑀭𑀺𑀢𑁆𑀢𑀢𑁆𑀢𑀸 𑀲𑀫𑁆𑀩𑀦𑁆𑀥𑁄 𑀩𑁆𑀬𑀢𑀺𑀭𑁂𑀓𑁄 𑀢𑀁 𑀆𑀧𑀸𑀤𑀻𑀬𑀢𑀺 𑀧𑀸𑀧𑀻𑀬𑀢𑀻𑀢𑀺 𑀅𑀢𑁆𑀣𑁄, 𑀉𑀪𑀬𑀢𑁄𑀢𑀺 𑀲𑀁𑀢𑁄 𑀲𑀸𑀫𑀺𑀢𑁄 𑀘, 𑀅𑀥𑀺𑀩𑁆𑀭𑀳𑁆𑀫𑀤𑀢𑁆𑀢𑁂 𑀧𑀜𑁆𑀘𑀸𑀮𑀸𑀢𑀺 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀧𑀜𑁆𑀘𑀸𑀮𑀸 𑀲𑀦𑁆𑀢𑀓𑀸 [𑀲𑀸𑀫𑀺𑀦𑁄 (𑀧𑁄𑀢𑁆𑀣𑀓𑁂)] 𑀢𑀺 𑀅𑀢𑁆𑀣𑁄, 𑀲𑀦𑁆𑀢𑀓𑀸 [𑀲𑀸𑀫𑀺𑀦𑁄 (𑀧𑁄𑀢𑁆𑀣𑀓𑁂)] 𑀳𑀺 𑀧𑀜𑁆𑀘𑀸𑀮𑀸, 𑀦 𑀲𑀸𑀫𑀺 [𑀦𑀲𑀁 (𑀧𑁄𑀢𑁆𑀣𑀓𑁂)], 𑀅𑀥𑀺𑀧𑀜𑁆𑀘𑀸𑀮𑁂𑀲𑀼 𑀩𑁆𑀭𑀳𑁆𑀫𑀤𑀢𑁆𑀢𑁄𑀢𑀺 𑀧𑀜𑁆𑀘𑀸𑀮𑀸𑀦𑀁 𑀩𑁆𑀭𑀳𑁆𑀫𑀤𑀢𑁆𑀢𑁄 𑀲𑀸𑀫𑀻𑀢𑁆𑀬𑀢𑁆𑀣𑁄.

𑀓𑀺𑀁 𑀮𑀓𑁆𑀔𑀡𑁄-𑀬𑀁 𑀓𑀢𑁆𑀢𑀸𑀇𑀘𑁆𑀘𑀸𑀳-‘𑀓𑀢𑁆𑀢𑀭𑀺’𑀘𑁆𑀘𑀸𑀤𑀺, 𑀕𑀘𑁆𑀙𑀢𑀺 𑀤𑁂𑀯𑀤𑀢𑁆𑀢𑁄𑀘𑁆𑀘𑀸𑀤𑁄 𑀓𑀢𑁆𑀢𑀭𑀺 𑀧𑀢𑀺𑀝𑁆𑀞𑀺𑀢𑀁, 𑀧𑀘𑀢𑁆𑀬𑁄𑀤𑀦𑀁 𑀤𑁂𑀯𑀤𑀢𑁆𑀢𑁄𑀘𑁆𑀘𑀸𑀤𑁄 𑀓𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑀁 𑀓𑀺𑀭𑀺𑀬𑀁 𑀓𑀭𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀓𑀭𑁄𑀢𑀻𑀢𑀺 𑀘 𑀇𑀫𑀺𑀦𑀸 𑀅𑀦𑁆𑀯𑀢𑁆𑀣 𑀩𑁆𑀬𑀧𑀤𑁂𑀲𑁄𑀯 𑀲𑀺𑀤𑁆𑀥𑁄-𑀬𑀁 𑀓𑀢𑁆𑀢𑀼 𑀯𑁄𑀳𑀸𑀭𑁄𑀢𑀺 𑀜𑀸𑀧𑁂𑀢𑀺, 𑀓𑁂𑀦𑀘𑀺 𑀧𑀬𑀼𑀚𑁆𑀚𑀫𑀸𑀦𑁄𑀧𑀺 𑀲𑀓𑁂 𑀓𑀫𑁆𑀫𑁂 𑀲𑀬𑀫𑁂𑀯 𑀧𑀥𑀸𑀦𑀢𑁆𑀢𑀫𑀦𑀼𑀪𑀯𑀢𑀻𑀢𑀺‘𑀧𑀬𑀼𑀢𑁆𑀢𑁄 𑀯𑀸 𑀧𑀥𑀸𑀦𑀪𑀸𑀯𑁂𑀦𑀸’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 𑀘𑁂𑀢𑁆𑀣-

𑀧𑀥𑀸𑀦𑀢𑀸𑀬 𑀬𑁄 𑀓𑀢𑁆𑀢𑀼, 𑀓𑀫𑁆𑀫𑀝𑁆𑀞𑀁 𑀓𑀼𑀭𑀼𑀢𑁂 𑀓𑁆𑀭𑀺𑀬𑀁;

𑀲𑀸 𑀓𑀢𑁆𑀢𑀸 𑀦𑀸𑀫𑀧𑁆𑀧𑀬𑀼𑀢𑁆𑀢𑁄, 𑀧𑀬𑀼𑀢𑁆𑀢𑁄 𑀯𑀸𑀢𑁆𑀬𑀬𑀁 𑀤𑁆𑀯𑀺𑀥𑀸𑀢𑀺.

𑀢𑀢𑁆𑀣 𑀧𑀼𑀭𑀺𑀲𑁂𑀦 𑀓𑀢𑀦𑁆𑀢𑀺 𑀅𑀧𑁆𑀧𑀬𑀼𑀢𑁆𑀢𑁄, 𑀧𑀼𑀭𑀺𑀲𑁂𑀦 𑀓𑀭𑁄𑀢𑀺 𑀤𑁂𑀯𑀤𑀢𑁆𑀢𑁄𑀢𑀺 𑀧𑀬𑀼𑀢𑁆𑀢𑁄, 𑀦𑀦𑀼 𑀓𑀺𑀭𑀺𑀬𑀸-𑀬𑀫𑀩𑁆𑀬𑀯𑀥𑀸𑀦𑁂𑀦 𑀓𑀭𑀡𑀸𑀥𑀺𑀓𑀭𑀡𑁂 𑀳𑁂𑀯 ¶ 𑀲𑀸𑀥𑁆𑀬𑀢𑁂 𑀓𑀢𑁆𑀢𑀸𑀭𑀸 𑀢𑀼 𑀤𑀽𑀭𑀝𑁆𑀞𑁂𑀦, 𑀢𑀣𑀸𑀲𑀢𑀺 𑀓𑀣𑀫𑀦𑁂𑀓𑀲𑀸𑀥𑀦𑀲𑀸𑀥𑀦𑀻𑀬𑀁 𑀓𑀺𑀭𑀺𑀬𑀁 𑀓𑀢𑁆𑀢𑀸𑀯 𑀓𑀭𑁄𑀢𑀺 𑀫𑀼𑀔𑁆𑀬𑀪𑀸𑀯𑁂𑀦𑀸𑀧𑀭𑁂𑀢𑁆𑀯𑀫𑀼𑀔𑁆𑀬𑀪𑀸𑀯𑁂𑀦𑀸𑀢𑀺 𑀯𑀼𑀘𑁆𑀘𑀢𑁂-

𑀓𑀢𑁆𑀢𑀼𑀢𑁄𑀜𑁆𑀜𑁂𑀲𑀫𑀼𑀩𑁆𑀪𑀽𑀢𑁆𑀬𑀸, 𑀯𑀺𑀯𑀺𑀢𑁆𑀢𑀸𑀮𑁄𑀘𑀦𑀸𑀤𑀺𑀦𑀸 [𑀯𑀯𑀺𑀯𑁂𑀓𑁂𑀘 𑀤𑀲𑁆𑀲𑀦𑀸𑀢𑀺 𑀯𑀸𑀓𑁆𑀬𑀧𑀤𑀻𑀬𑁂, 𑀧𑀯𑀺𑀯𑁂𑀓𑁂𑀘 𑀓𑀸𑀭𑀓𑀦𑁆𑀣𑀭𑀸𑀫𑀪𑀸𑀯𑁂𑀤𑀺𑀲𑁆𑀲𑀪𑁂 𑀓𑀢𑁆𑀢𑀭𑀺𑀓𑁆𑀭𑀺𑀬𑀸 𑀅𑀢𑁆𑀣𑀺 𑀪𑀯𑀢𑀺 𑀯𑀺𑀚𑁆𑀚𑀢𑀺𑀘𑁆𑀘𑀸𑀤𑁄 𑀢𑀺𑀢𑀝𑀻𑀓𑀸, 𑀢𑀢𑀺𑀬𑀧𑀸𑀣𑀸𑀦𑀁𑀧𑀸𑀢 𑁧𑁦𑁦, 𑀦𑀁𑀧𑀸𑀢 𑁨𑁪𑁩];

𑀤𑀽𑀭𑀸𑀤𑀧𑁆𑀬𑀼𑀧𑀓𑀸𑀭𑀺𑀢𑁆𑀢𑁂, 𑀓𑀢𑁆𑀢𑀼 𑀯𑀸𑀢𑁆𑀢𑀧𑁆𑀧𑀥𑀸𑀦𑀢𑀸.

𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 ‘‘𑀓𑀢𑁆𑀢𑀼𑀦𑁄 𑀲𑀓𑀸𑀲𑀸 𑀅𑀜𑁆𑀜𑁂𑀲𑀁 𑀓𑀭𑀡𑀸𑀤𑀻𑀦𑀁 𑀉𑀩𑁆𑀪𑀽𑀢𑁆𑀬𑀸 𑀲𑀫𑁆𑀪𑀯𑁂𑀦𑀘, 𑀢𑀣𑀸𑀳𑀺 𑀧𑀲𑀺𑀤𑁆𑀥𑀓𑀭𑀡𑀲𑀪𑀸𑀯𑁄𑀧𑀺 𑀨𑀭𑀲𑀼 𑀓𑀢𑁆𑀢𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀥𑀺𑀓𑀭𑀡𑀫𑁆𑀪 𑀯𑀢𑀺‘𑀨𑀭𑀲𑀼𑀫𑁆𑀳𑀺 𑀞𑀧𑁂𑀢𑁆𑀯𑀸 𑀙𑀺𑀦𑁆𑀤𑀢𑀻’𑀢𑀺, 𑀯𑀺𑀯𑀺𑀢𑁆𑀢𑀲𑁆𑀲 𑀓𑀭𑀡𑀸𑀤𑀻𑀳𑀺 𑀧𑀼𑀣𑀩𑁆𑀪𑀽𑀢𑀲𑁆𑀲, 𑀓𑀢𑁆𑀢𑀼𑀦𑁄 𑀓𑀺𑀭𑀺𑀬𑀸𑀬 𑀆𑀮𑁄𑀘𑀦𑁂𑀦 𑀤𑀲𑁆𑀲𑀦𑁂𑀦 𑀘 ‘𑀤𑁂𑀯𑀤𑀢𑁆𑀢𑁄 𑀅𑀢𑁆𑀣𑀺 𑀪𑀯𑀢𑀺 𑀯𑀺𑀚𑁆𑀚𑀢𑀻’𑀢𑀺 [𑀯𑀼𑀣𑀩𑁆𑀪𑀽𑀢𑀲𑁆𑀲𑀸𑀦𑁂𑀦 𑀆𑀮𑁄𑀘𑀦𑁂𑀦 𑀤𑀲𑁆𑀲𑀦𑁂𑀦𑀘 𑀓𑀢𑁆𑀢𑀼𑀦𑁄𑀤𑁂𑀯𑀤𑀢𑁆𑀢𑁂𑀦𑀤𑁂𑀯𑀤𑀢𑁆𑀢𑀁 𑀪𑀯𑀢𑀺 𑀯𑀺𑀚𑁆𑀚𑀢𑀻𑀢𑀺 (𑀧𑁄𑀢𑁆𑀣𑀓𑁂)], 𑀆𑀤𑀺𑀲𑀤𑁆𑀤𑁂𑀦 𑀓𑀭𑀡𑀸𑀤𑀺𑀦𑁄 (𑀢𑀤𑀥𑀻𑀦) 𑀧𑀯𑀢𑁆𑀢𑀺𑀆𑀤𑀻𑀦𑀁 𑀕𑀳𑀡𑀁, 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀤𑀽𑀭𑀢𑁄 𑀉𑀧𑀓𑀸𑀭𑀺𑀢𑁆𑀢𑁂𑀧𑀺 𑀓𑀢𑁆𑀢𑀼𑀬𑁂𑀯 𑀲𑀧𑁆𑀧𑀥𑀸𑀦𑀢𑀸 𑀲𑀺𑀬𑀸’’𑀢𑀺, 𑀧𑀼𑀦𑀧𑀺-

𑀣𑀸𑀮𑁆𑀬𑀸𑀤𑀻𑀦𑀦𑁆𑀢𑀼 𑀓𑀢𑁆𑀢𑀼𑀢𑁆𑀢𑀁, 𑀳𑁄𑀢𑁂𑀯𑀸𑀘𑁂𑀢𑀦𑀸𑀦𑀧𑀺;

𑀬𑀢𑁄 𑀲𑀤𑁆𑀤𑀲𑁆𑀲 𑀯𑀼𑀢𑁆𑀬𑀢𑁆𑀣𑁂, 𑀫𑀺𑀘𑁆𑀙𑀸𑀢𑁆𑀬𑀸𑀲𑁂𑀦-𑀦𑀸𑀤𑀺𑀦𑀸.

𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 ‘‘𑀅𑀘𑁂𑀢𑀦𑀸𑀦𑀫𑁆𑀧𑀺 𑀣𑀸𑀮𑀻𑀅𑀲𑀺𑀆𑀤𑀻𑀦𑀁 𑀓𑀢𑁆𑀢𑀼𑀢𑁆𑀢𑀫𑁆𑀪𑀯𑀢𑀺 𑀬𑀣𑀸𑀯𑀡𑁆𑀡𑀺𑀢𑀲𑀧𑁆𑀧𑀥𑀸𑀦𑀢𑁆𑀢𑀦𑀺𑀫𑀺𑀢𑁆𑀢𑀸𑀪𑀸𑀯𑁂𑀧𑀺, 𑀓𑀲𑁆𑀫𑀸𑀢𑀺 𑀘𑁂 𑀬𑀢𑁄 𑀓𑀸𑀭𑀡𑀸 𑀅𑀢𑁆𑀣𑁂 𑀅𑀢𑁆𑀢𑀦𑁄 𑀅𑀪𑀺𑀥𑁂𑀬𑁆𑀬𑁂𑀲𑀤𑁆𑀤𑀲𑁆𑀲 𑀯𑀼𑀢𑁆𑀢𑀺 𑀧𑀝𑀺𑀧𑀢𑁆𑀢𑀺 𑀅𑀦𑀸𑀤𑀺𑀦𑀸 𑀫𑀺𑀘𑁆𑀙𑀸𑀪𑁆𑀬𑀸𑀲𑁂𑀦𑀪𑀯𑀢𑀺 𑀢𑀲𑁆𑀫𑀸 𑀣𑀸𑀮𑁆𑀬𑀸𑀤𑀻𑀦𑀦𑁆𑀢𑀺𑀆𑀤𑀺 𑀧𑀓𑀢𑀁, 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀅𑀜𑁆𑀜𑀣𑀸 𑀲𑀤𑁆𑀤𑀢𑁆𑀣𑁄, 𑀅𑀜𑁆𑀜𑀣𑀸 𑀲𑀪𑀸𑀯𑀢𑁆𑀣𑁄, 𑀦 𑀳𑀺 𑀲𑀤𑁆𑀤𑁄 𑀩𑀸𑀳𑁆𑀬𑁂 𑀯𑀢𑁆𑀣𑀼𑀫𑁆𑀳𑀺 𑀩𑁆𑀬𑀸𑀧𑀸𑀭𑀫𑀸𑀧𑀚𑁆𑀚𑀢𑀺, 𑀢𑀣𑀸𑀳𑀺𑁋

𑀅𑀜𑁆𑀜𑀣𑁂 𑀯𑀸𑀕𑁆𑀕𑀺 𑀲𑀁𑀲𑀕𑁆𑀕𑀸, 𑀤𑀸𑀳𑀁 𑀤𑀟𑁆𑀠𑁄𑀢𑀺 𑀫𑀜𑁆𑀜𑀢𑀺;

𑀅𑀜𑁆𑀜𑀣𑀸 𑀤𑀸𑀳𑀲𑀤𑁆𑀤𑁂𑀦, 𑀤𑀸𑀳𑀢𑁆𑀣𑁄 𑀲𑀫𑁆𑀧𑀢𑀻𑀬𑀢𑁂.

𑀩𑀸𑀳𑁆𑀬𑀧𑀤𑀢𑁆𑀣𑀲𑁆𑀲 𑀲𑀪𑀸𑀯𑁄 𑀯𑀺𑀬 𑀳𑀼𑀢𑁆𑀯𑀸 𑀫𑀺𑀘𑁆𑀙𑀸𑀪𑁆𑀬𑀸𑀲𑁂𑀦 𑀅𑀦𑀸𑀤𑀺𑀦𑀸 𑀧𑀦 𑀧𑀯𑀢𑁆𑀢𑁂𑀦 𑀩𑀸𑀳𑁆𑀬𑁂 𑀯𑀢𑁆𑀣𑀽𑀦𑀺 𑀅𑀯𑀺𑀚𑁆𑀚𑀫𑀸𑀦𑁂𑀦 𑀓𑀭𑀡𑀪𑀽𑀢𑁂𑀦 𑀣𑀸𑀮𑁆𑀬𑀸𑀤𑀻𑀦𑀁 𑀓𑀢𑁆𑀢𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀅𑀣 𑀘 𑀧𑀦𑁋

𑀯𑀢𑁆𑀢𑀺𑀘𑁆𑀙𑀸𑀤𑁄 ¶ 𑀧𑀯𑀢𑁆𑀢𑁂𑀳𑀺, 𑀲𑀧𑁆𑀧𑀥𑀸𑀦𑀢𑁆𑀢 𑀳𑁂𑀢𑀼𑀳𑀺;

𑀓𑀢𑁆𑀢𑀼𑀥𑀫𑁆𑀫𑁂𑀳𑀺 𑀯𑀼𑀢𑁆𑀢𑁂𑀳𑀺, 𑀓𑀢𑁆𑀢𑀸 𑀲𑀤𑁆𑀤𑀸𑀯 𑀜𑀸𑀬𑀢𑁂.

𑀏𑀓𑀲𑁆𑀲𑀸𑀫𑀼𑀔𑁆𑀬𑀯𑀢𑁆𑀣𑀸𑀳𑀺, 𑀪𑁂𑀤𑁂𑀦 𑀧𑀭𑀺𑀓𑀧𑁆𑀧𑀦𑁂;

𑀓𑀫𑁆𑀫𑀢𑁆𑀢𑀁 𑀓𑀭𑀡𑀢𑁆𑀢𑀜𑁆𑀘, 𑀓𑀢𑁆𑀢𑀼𑀢𑁆𑀢𑀁 𑀘𑁄𑀧𑀚𑀸𑀬𑀢𑁂.

𑀯𑀼𑀢𑁆𑀢𑁂𑀳𑀻𑀢𑀺 ‘𑀓𑀢𑁆𑀢𑀼𑀢𑁄𑀜𑁆𑀜𑁂𑀲𑀫𑀼𑀩𑁆𑀪𑀽𑀢𑁆𑀬𑀸’𑀘𑁆𑀘𑀸𑀤𑀺𑀦𑀸, 𑀲𑀤𑁆𑀤𑀸𑀯𑀸𑀢𑀺 𑀲𑀤𑁆𑀤𑁂 𑀢𑁂𑀥𑀫𑁆𑀫𑀸 𑀳𑁄𑀦𑁆𑀢𑀼 𑀯𑀸 𑀫𑀸 𑀯𑀸 𑀓𑀢𑁆𑀢𑀼𑀲𑀫𑁆𑀩𑀦𑁆𑀥𑀺𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀯𑀘𑀦𑀺𑀘𑁆𑀙𑀸𑀬 𑀲𑀤𑁆𑀤𑀢𑁄𑀯 𑀓𑀢𑁆𑀢𑀸 𑀧𑀢𑀻𑀬𑀢𑁂, 𑀦𑀺𑀬𑀫𑁂𑀦 𑀦 𑀯𑀢𑁆𑀣𑀼𑀢𑁄𑀢𑀺 𑀅𑀢𑁆𑀣𑁄, 𑀅𑀫𑀼𑀔𑁆𑀬𑀸 𑀯𑀢𑁆𑀣𑀸𑀳𑀻𑀢𑀺 𑀩𑀼𑀤𑁆𑀥𑀺𑀬𑀸 𑀢𑀤𑀸𑀓𑀸𑀭𑀢𑀸𑀬 𑀧𑀭𑀺𑀡𑀸𑀫𑀸𑀯𑀢𑁆𑀣𑀸𑀳𑀺, 𑀳𑀦𑁆𑀢𑁆𑀬𑀢𑁆𑀢 𑀦𑀸𑀯𑀢𑁆𑀢𑀸𑀦𑀦𑁆𑀢𑀺 𑀏𑀓𑀲𑁆𑀲𑁂𑀯𑀸𑀢𑁆𑀢𑀦𑁄 𑀓𑀫𑁆𑀫𑀢𑁆𑀢𑀸𑀤𑀺 𑀚𑀸𑀬𑀢𑁂, 𑀅𑀢𑁄𑀬𑁂𑀯𑀸𑀘𑁆𑀘𑀦𑁆𑀢𑀫𑀲𑀦𑁆𑀢𑁄𑀧𑀺 𑀅𑀗𑁆𑀓𑀼𑀭𑁄 𑀚𑀦𑀦𑀓𑀺𑀭𑀺𑀬𑀸𑀬 𑀓𑀢𑁆𑀢𑀸 𑀪𑀯𑀢𑀺 ‘𑀅𑀗𑁆𑀓𑀼𑀭𑁄 𑀚𑀸𑀬𑀢𑁂’𑀢𑀺, 𑀯𑀼𑀢𑁆𑀢𑀁 𑀳𑀺𑁋

𑀧𑀼𑀭𑀸𑀲𑀜𑁆𑀚𑀦𑀺𑀢𑁄 [𑀧𑀼𑀭𑀸𑀲𑀜𑁆𑀚𑀸𑀢𑀺𑀢𑁄] 𑀪𑀸𑀯𑀸, 𑀩𑀼𑀤𑁆𑀥𑀬𑀯𑀢𑁆𑀣𑀸𑀦𑀺 𑀩𑀦𑁆𑀥𑀦𑁄;

𑀅𑀯𑀲𑀺𑀝𑁆𑀞𑁄 𑀲𑀢𑀸𑀜𑁆𑀜𑁂𑀦, 𑀓𑀢𑁆𑀢𑀸 𑀪𑀯𑀢𑀺 𑀚𑀸𑀢𑀺𑀬𑀸𑀇𑀢𑀺.

𑀲𑀢𑀸 𑀅𑀜𑁆𑀜𑁂𑀦 𑀤𑁂𑀯𑀤𑀢𑁆𑀢𑀸𑀤𑀺𑀦𑀸.

𑀓𑀺𑀦𑁆𑀢𑀁 𑀓𑀭𑀡𑀁 𑀦𑀸𑀫𑀸𑀢𑀺 𑀆𑀳-‘𑀬𑁄 𑀧𑀦𑀸’𑀢𑀺𑀆𑀤𑀺, 𑀬𑁄𑀢𑀺 𑀬𑁄 𑀧𑀤𑀢𑁆𑀣𑁄, 𑀇𑀫𑀺𑀦𑀸 𑀇𑀤𑀁 𑀤𑀻𑀧𑁂𑀢𑀺 ‘‘𑀓𑀭𑀡𑀩𑁆𑀬𑀧𑀤𑁂𑀲𑀸𑀬 𑀲𑀼𑀢𑁆𑀢𑀦𑁆𑀢𑀭𑀸𑀪𑀸𑀯𑁂𑀧𑀺 𑀓𑀭𑁄𑀢𑁆𑀬𑀦𑁂𑀦𑁂𑀢𑀺 𑀓𑀭𑀡𑀦𑁆𑀢𑁆𑀬𑀦𑁆𑀯𑀢𑁆𑀣𑀢𑁄 𑀧𑀲𑀺𑀤𑁆𑀥𑁄-𑀬𑀁 𑀓𑀭𑀡𑀯𑁄𑀳𑀸𑀭𑁄’’𑀢𑀺, 𑀅𑀢𑁆𑀭𑁂𑀤𑀁 𑀧𑀝𑀺𑀪𑀸𑀦𑀁𑁋

𑀬𑀁 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀁 𑀓𑀢𑁆𑀢𑀼, 𑀓𑁆𑀭𑀺𑀬𑀸𑀬𑀘𑁆𑀘𑀦𑁆𑀢𑀲𑀸𑀥𑀦𑀁;

𑀓𑀭𑀡𑀦𑁆𑀢𑀁 𑀤𑁆𑀯𑀺𑀥𑀸 𑀳𑁄𑀢𑀺, 𑀩𑀸𑀳𑁆𑀬𑀩𑁆𑀪𑀦𑁆𑀢𑀭𑀪𑁂𑀤𑀢𑁄𑀢𑀺.

𑀢𑀢𑁆𑀣 𑀬𑀁𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀁𑀢𑁆𑀬𑀸𑀤𑀺𑀦𑀸 𑀇𑀤𑀁 𑀤𑀲𑁆𑀲𑁂𑀢𑀺-‘‘𑀦 𑀯𑀢𑁆𑀣𑀼𑀢𑁄 𑀓𑀺𑀜𑁆𑀘𑀺 𑀓𑀭𑀡𑀁 𑀦𑀸𑀫 𑀅𑀢𑁆𑀣𑀺, 𑀯𑀘𑀦𑀺𑀘𑁆𑀙𑀸𑀯𑀲𑁂𑀦 𑀧𑀦 𑀧𑀲𑀺𑀤𑁆𑀥𑀓𑀭𑀡𑀸𑀦𑀫𑁆𑀧𑀺 𑀨𑀭𑀲𑀼𑀆𑀤𑀻𑀦𑀁 ‘𑀨𑀭𑀲𑀼 𑀙𑀺𑀦𑁆𑀤𑀢𑀺, 𑀨𑀭𑀲𑀼𑀫𑁆𑀳𑀺 𑀙𑀺𑀦𑁆𑀤𑀢𑀻’𑀢𑀺 𑀓𑀢𑁆𑀢𑀼𑀅𑀥𑀺𑀓𑀭𑀡𑀢𑁆𑀢𑀲𑁆𑀲𑀧𑀺, 𑀧𑀲𑀺𑀤𑁆𑀥𑀸𑀥𑀺𑀓𑀭𑀡𑀸𑀦𑀫𑁆𑀧𑀺 𑀢𑀤𑀦𑀼𑀢𑁆𑀢𑀸𑀤𑀺𑀯𑀺𑀲𑁂𑀲𑀲𑀫𑁆𑀪𑀯𑁂 𑀣𑀸𑀮𑁆𑀬𑀸 𑀧𑀘𑀢𑀻’𑀢𑀺 𑀓𑀭𑀡𑀢𑁆𑀢𑀲𑁆𑀲𑀧𑀺 𑀤𑀲𑁆𑀲𑀦𑀢𑁄 𑀯𑀘𑀦𑀺𑀘𑁆𑀙𑀸𑀢𑁄𑀬𑁂𑀯 𑀓𑀭𑀡𑀁 𑀓𑀸𑀭𑀓𑀁 𑀯𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺, 𑀢𑀜𑁆𑀘 𑀤𑀼𑀯𑀺𑀥𑀦𑁆𑀢𑀺 𑀆𑀳-‘𑀤𑁆𑀯𑀺𑀥𑀸 𑀳𑁄𑀢𑀻’𑀢𑀺𑀆𑀤𑀺, 𑀢𑀢𑁆𑀣 𑀅𑀲𑀺𑀦𑀸 𑀙𑀺𑀦𑁆𑀤𑀢𑀻𑀢𑀺 𑀩𑀸𑀳𑁆𑀬𑀁, 𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀻𑀢𑁆𑀬𑀩𑁆𑀪𑀦𑁆𑀢𑀭𑀁. 𑀓𑀺𑀭𑀺𑀬𑀸𑀦𑀺𑀫𑀺𑀢𑁆𑀢𑀢𑁆𑀢𑀸 𑀓𑀸𑀭𑀓𑀦𑁆𑀢𑀺 𑀇𑀫𑀺𑀦𑀸 𑀓𑀸𑀭𑀓𑀲𑀤𑁆𑀤𑀲𑁆𑀲 𑀦𑀺𑀫𑀺𑀢𑁆𑀢𑀧𑀭𑀺𑀬𑀸𑀬𑀢𑁆𑀢𑀫𑀸𑀳. 𑀧𑀓𑀢𑀺 𑀬𑀸𑀪𑀺𑀭𑀽𑀧𑁄𑀘𑁆𑀘𑀸𑀤𑁄 ¶ 𑀓𑀺𑀭𑀺𑀬𑀸𑀬𑀸𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀲𑀫𑁆𑀩𑀦𑁆𑀥𑀫𑀢𑁆𑀢𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑀮𑀓𑁆𑀔𑀡𑀸 𑀙𑀝𑁆𑀞𑀻 𑀲𑀺𑀬𑀸, 𑀲𑀫𑁂𑀦 𑀥𑀸𑀯𑀢𑀻𑀢𑁆𑀬𑀸𑀤𑁄 𑀢𑀼 𑀓𑀺𑀭𑀺𑀬𑀸𑀬 𑀯𑀺𑀚𑁆𑀚𑀫𑀸𑀦𑀢𑁆𑀢𑁂𑀧𑀺 𑀓𑀫𑁆𑀫𑀢𑁆𑀢𑀁 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀦𑁆𑀢𑀺 𑀤𑀼𑀢𑀺𑀬𑀸 𑀲𑀺𑀬𑀸, 𑀲𑀫𑀁 𑀥𑀸𑀯𑀢𑀺 𑀯𑀺𑀲𑀫𑀁 𑀥𑀸𑀯𑀢𑀻𑀢𑁆𑀬𑀢𑁆𑀣𑁄, 𑀢𑀣𑀸 𑀤𑁆𑀯𑀺𑀤𑁄𑀡𑁂𑀦𑀸𑀢𑀺 𑀤𑁆𑀯𑁂𑀤𑁄𑀡𑁂 𑀓𑀺𑀡𑀸𑀢𑀻𑀢𑁆𑀬𑀢𑁆𑀣𑁄, 𑀧𑀜𑁆𑀘𑀓𑁂𑀦𑀸𑀢𑀺 𑀧𑀜𑁆𑀘 𑀧𑀭𑀺𑀫𑀸𑀡𑀲𑁆𑀲 𑀧𑀜𑁆𑀘𑀓𑁄 𑀧𑀜𑁆𑀘𑀓𑀁 𑀯𑀕𑁆𑀕𑀁 𑀓𑀢𑁆𑀯𑀸 𑀧𑀲𑀯𑁄 𑀓𑀺𑀡𑀸𑀢𑀺 𑀧𑀜𑁆𑀘𑀧𑀜𑁆𑀘 𑀓𑀢𑁆𑀯𑀸 𑀓𑀺𑀡𑀸𑀢𑀻𑀢𑁆𑀬𑀢𑁆𑀣𑁄𑀢𑀺 𑀯𑀸𑀢𑁆𑀢𑀺𑀓𑀓𑀸𑀭𑁂𑀦 ‘𑀢𑀢𑀺𑀬𑀸 𑀯𑀺𑀥𑀸𑀦𑀸𑀬𑁄𑀧𑀲𑀗𑁆𑀔𑁆𑀬𑀸𑀦𑀁’𑀓𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀫𑀸𑀳- ‘𑀧𑀓𑀢𑀺𑀆𑀤𑀻𑀳𑀻’𑀢𑀺𑀆𑀤𑀺, 𑀬𑀢𑁆𑀣𑁂𑀲𑀁𑀓𑀭𑀡𑀪𑀸𑀯𑁄𑀢𑀺 𑀬𑀲𑁆𑀲𑀁 𑀓𑀺𑀭𑀺𑀬𑀸𑀬𑀫𑁂 𑀲𑀫𑁆𑀧𑀓𑀢𑁆𑀬𑀸𑀤𑀻𑀦𑀁 𑀓𑀭𑀡𑀢𑁆𑀢𑀁, 𑀢𑀁 𑀓𑀺𑀭𑀺𑀬𑀁 𑀓𑀣𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀲𑀩𑁆𑀩𑀲𑁆𑀲𑁂𑀯 𑀧𑀤𑀢𑁆𑀣𑀲𑁆𑀲 𑀲𑀢𑁆𑀢𑀸𑀩𑁆𑀬𑀪𑀺𑀘𑀸𑀭𑀢𑁄 𑀆𑀳-‘𑀪𑀽’𑀇𑀘𑁆𑀘𑀸𑀤𑀺, 𑀧𑀓𑀢𑀺𑀬𑀸𑀪𑀺𑀭𑀽𑀧𑁄𑀢𑀺 𑀲𑀪𑀸𑀯𑁂𑀦𑀸𑀬𑀫𑀪𑀺𑀭𑀽𑀧𑁄 𑀪𑀯𑀢𑀺, 𑀦 𑀢𑀼 𑀯𑀢𑁆𑀣𑀸𑀮𑀗𑁆𑀓𑀸𑀭𑀸𑀤𑀺𑀦𑁂𑀢𑁆𑀬𑀢𑁆𑀣𑁄, 𑀓𑀭𑁄𑀢𑀺𑀲𑁆𑀲 𑀕𑀫𑁆𑀫𑀫𑀸𑀦𑀢𑁆𑀢𑁂 𑀧𑀦 𑀧𑀓𑀢𑀺𑀬𑀸𑀪𑀺𑀭𑀽𑀧𑁄 𑀓𑀢𑁄𑀢𑀺𑀆𑀤𑀺, 𑀢𑀤𑀸 𑀓𑀢𑁆𑀢𑀭𑀺𑀬𑁂𑀯 𑀢𑀢𑀺𑀬𑀸, 𑀬𑀁 𑀬𑀲𑁆𑀫𑀸 𑀅𑀜𑁆𑀜𑀕𑁄𑀢𑁆𑀢𑁄 𑀕𑁄𑀢𑀫𑁄 𑀦 𑀳𑁄𑀢𑀺 𑀅𑀢𑁄𑀘 𑀕𑁄𑀢𑀫𑁄 𑀪𑀯𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀦𑀦𑀼𑀘 𑀤𑁆𑀯𑀺𑀤𑁄𑀡 𑀧𑀜𑁆𑀘𑀓𑀸 𑀓𑀬𑀫𑁆𑀧𑀝𑀺𑀘𑁆𑀘 𑀓𑀫𑁆𑀫𑀪𑀽𑀢𑀸 𑀳𑁄𑀦𑁆𑀢𑀺 𑀤𑁆𑀯𑀺𑀤𑁄𑀡𑀸𑀤𑀺𑀦𑀸 𑀓𑁂𑀬𑀢𑁆𑀢𑀸 𑀢𑀢𑁄 𑀓𑀺𑀫𑀼𑀘𑁆𑀘𑀢𑁂‘𑀓𑀬𑀫𑁆𑀧𑀝𑀺𑀘𑁆𑀘 𑀤𑁆𑀯𑀺𑀤𑁄𑀡𑀧𑀜𑁆𑀘𑀓𑀸 𑀓𑀭𑀡𑀸𑀦𑀺 𑀪𑀯𑀦𑁆𑀢𑀻’𑀢𑁆𑀬𑀸 𑀲𑀗𑁆𑀓𑀻𑀬𑀸𑀳-‘𑀢𑀣𑀸𑀳𑀺’𑀘𑁆𑀘𑀸𑀤𑀺, 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺-‘‘𑀤𑁆𑀯𑀺𑀤𑁄𑀡𑀸𑀤𑀺𑀲𑀤𑁆𑀤𑁂𑀦 𑀳𑀺 𑀦 𑀕𑀬𑁆𑀳𑀼𑀧𑀕𑀁 𑀯𑀢𑁆𑀣𑀼𑀫𑀼𑀘𑁆𑀘𑀢𑀺, 𑀢𑁂𑀳𑀺 𑀧𑀦 𑀤𑁆𑀯𑀺𑀤𑁄𑀡𑀸𑀤𑁆𑀬𑀢𑁆𑀣𑀁 𑀫𑀽𑀮𑀁 𑀢𑀸𑀤𑀢𑁆𑀣𑀺𑀬𑀸 𑀪𑀺𑀳𑀺𑀢𑀦𑁆𑀢𑀺 𑀦 𑀯𑀼𑀢𑁆𑀢𑀤𑁄𑀲𑀸𑀯𑀲𑀭𑁄’’𑀢𑀺.

𑀬𑀣𑀸𑀓𑁆𑀓𑀫𑀫𑀸𑀕𑀫𑀦𑀓𑀺𑀭𑀺𑀬𑀸𑀬 𑀣𑀽𑀮𑀢𑁆𑀢𑀕𑀼𑀡𑁂𑀦 𑀕𑁄𑀫𑀦𑁆𑀢𑀤𑀩𑁆𑀩𑁂𑀦 𑀘 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀼𑀁 ‘𑀢𑀁 𑀬𑀣𑁂’𑀘𑁆𑀘𑀸𑀤𑀺𑀫𑀸𑀳, 𑀉𑀤𑀸𑀳𑀭𑀡𑀫𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄𑀧𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑀸𑀧𑀺 𑀤𑀲𑁆𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 ‘𑀲𑀩𑁆𑀩𑀢𑁆𑀣𑁂𑀯 𑀯𑀸’𑀢𑀺𑀆𑀤𑀺, 𑀧𑀼𑀢𑁆𑀢𑁂𑀦 𑀲𑀳𑀸𑀕𑀢𑁄𑀢𑀺𑀆𑀤𑀻𑀲𑀼 𑀆𑀕𑀫𑀦𑀸𑀤𑀺𑀓𑀺𑀭𑀺𑀬𑀫𑁆𑀧𑀝𑀺𑀘𑁆𑀘 𑀤𑁆𑀯𑁂 𑀓𑀢𑁆𑀢𑀸𑀭𑁄 𑀧𑀥𑀸𑀦𑀸𑀧𑁆𑀧𑀥𑀸𑀦𑀯𑀲𑁂𑀦, 𑀢𑁂𑀲𑀼 𑀧𑀥𑀸𑀦𑁂 𑀓𑀸𑀭𑀺𑀬𑀲𑀫𑁆𑀧𑀘𑁆𑀘𑀬𑀜𑀸𑀬𑁂𑀦 𑀯𑀸 𑀩𑀳𑀼𑀮𑀁𑀯𑀘𑀦𑁂𑀦 𑀯𑀸 𑀧𑀥𑀸𑀦𑁂 𑀓𑀢𑁆𑀢𑀭𑀺 𑀧𑀘𑁆𑀘𑀬𑁄, 𑀇𑀢𑀭𑁂’𑀓𑀢𑁆𑀢𑀭𑀺 𑀢𑀢𑀺𑀬𑀸’𑀢𑁆𑀬𑁂𑀯 𑀢𑀢𑀺𑀬𑀸 𑀲𑀺𑀤𑁆𑀥𑀸, 𑀢𑀢𑁄-𑀬𑀁 𑀯𑀘𑀦𑀸𑀭𑀫𑁆𑀪𑁄-𑀦𑀢𑁆𑀣𑀓𑁄𑀢𑀺 𑀫𑀜𑁆𑀜𑀫𑀸𑀦𑁄𑀘𑁄 𑀤𑁂𑀢𑀺 ‘𑀦𑀦𑁆𑀯𑀺’𑀘𑁆𑀘𑀸𑀤𑀺𑀦𑀸, 𑀢𑁆𑀢𑁂𑀦𑀸𑀪𑀺𑀥𑀻𑀬𑀢𑁂 𑀧𑀺𑀢𑁂𑀢𑀺 𑀧𑀥𑀸𑀦𑀓𑀢𑁆𑀢𑀸, 𑀢𑀼𑀮𑁆𑀬𑁄𑀧𑀺 𑀓𑀺𑀭𑀺𑀬𑀸𑀲𑀫𑁆𑀩𑀦𑁆𑀥𑁂 𑀧𑀺𑀢𑀸𑀧𑀼𑀢𑁆𑀢𑀸𑀦𑀁 𑀧𑀺𑀢𑀸𑀢𑁆𑀭 𑀧𑀥𑀸𑀦𑀁 𑀲𑀤𑁆𑀤𑀘𑁄𑀤𑀺𑀢𑀢𑁆𑀢𑀸, 𑀧𑀼𑀢𑁆𑀢𑁄-𑀧𑁆𑀧𑀥𑀸𑀦𑀫𑀲𑀤𑁆𑀤𑀘𑁄𑀤𑀺𑀢𑀢𑁆𑀢𑀸 ¶ , 𑀲𑀤𑁆𑀤𑀩𑁆𑀬𑀸𑀧𑀸𑀭𑀸𑀧𑁂𑀓𑁆𑀔𑀸𑀬 𑀳𑀺 𑀧𑀥𑀸𑀦𑀸𑀧𑁆𑀧𑀥𑀸𑀦𑀸𑀬 𑀯𑀯𑀢𑁆𑀣𑀸𑀦𑀁, 𑀧𑀺𑀢𑀼𑀭𑁂𑀯𑀸𑀢𑁆𑀭𑀸𑀕𑀢𑀸𑀤𑀺𑀲𑀤𑁆𑀤𑀲𑀸𑀫𑀸𑀦𑀸𑀥𑀺𑀓𑀭𑀡𑁆𑀬𑀸 𑀆𑀕𑀫𑀦𑀓𑀺𑀭𑀺𑀬𑀸 𑀲𑀫𑁆𑀩𑀦𑁆𑀥𑁄 𑀲𑀤𑁆𑀤𑁂𑀦𑁄𑀘𑁆𑀘𑀢𑁂, 𑀦𑁂𑀢𑀭𑀲𑁆𑀲 𑀲𑀤𑁆𑀤𑀲𑀢𑁆𑀢𑀺𑀲𑀪𑀸𑀯𑀢𑁄, 𑀢𑀣𑀸 𑀯𑀺𑀥𑀸 𑀳𑀺 𑀲𑀤𑁆𑀤𑀲𑁆𑀲 𑀲𑀢𑁆𑀢𑀺 𑀬𑀢𑁄 𑀧𑀺𑀢𑀼𑀭𑁂𑀯𑀸𑀢𑁆𑀭 𑀓𑀺𑀭𑀺𑀬𑀸 𑀲𑀫𑁆𑀩𑀦𑁆𑀥𑀁 𑀲𑀓𑁆𑀓𑁄𑀢𑀺 𑀧𑀝𑀺𑀧𑀸𑀤𑁂𑀢𑀼𑀁, 𑀦 𑀧𑀼𑀢𑁆𑀢𑀲𑁆𑀲, 𑀏𑀯𑀜𑁆𑀘𑀸𑀕𑀢𑁄𑀘𑁆𑀘𑀸𑀤𑁄 𑀏𑀓𑀯𑀘𑀦𑀫𑀼𑀧𑀚𑁆𑀚𑀢𑁂, 𑀅𑀜𑁆𑀜𑀣𑀸 𑀳𑀺 𑀩𑀳𑀼𑀯𑀘𑀦𑀁 𑀲𑀺𑀬𑀸, ‘𑀧𑀺𑀢𑀸 𑀧𑀼𑀢𑁆𑀢𑀸 𑀆𑀕𑀢𑀸’𑀢𑀺. (𑀬𑀤𑀺) 𑀯𑀼𑀢𑁆𑀢𑀦𑀬𑁂𑀦 𑀢𑀢𑀺𑀬𑀸 𑀲𑀺𑀤𑁆𑀥𑀸 ‘𑀲𑀺𑀤𑁆𑀥𑁂 𑀲𑀢𑁆𑀬𑀸𑀭𑀫𑁆𑀪𑁄 𑀦𑀺𑀬𑀫𑀸𑀬 𑀯𑀸 𑀯𑀺𑀓𑀧𑁆𑀧𑀸𑀬 𑀯𑀸’ 𑀦 𑀘𑁂𑀢𑁆𑀣 𑀦𑀺𑀬𑀫𑁄, 𑀦𑀸𑀧𑀺 𑀯𑀺𑀓𑀧𑁆𑀧𑁄, 𑀢𑀢𑁄 𑀓𑀺𑀫𑀦𑁂𑀦 𑀬𑁄𑀕𑁂𑀦𑀸 𑀢𑁆𑀬𑀸𑀲𑀬𑁂𑀦𑀸𑀳-‘𑀅𑀧𑁆𑀧𑀥𑀸𑀦𑁂𑀬𑁂𑀯’𑀘𑁆𑀘𑀸𑀤𑀺. 𑀦𑀬𑀺𑀤𑀫𑁂𑀯𑀫𑀺𑀘𑁆𑀘𑀸𑀤𑀺 𑀧𑀭𑀺𑀳𑀸𑀭𑁄. 𑀲𑀳𑀪𑀸𑀯𑀫𑀢𑁆𑀢𑀁 𑀯𑀢𑁆𑀢𑀼𑀫𑀺𑀝𑁆𑀞𑀁 𑀯𑀸𑀢𑀺 𑀬𑁄𑀚𑀦𑀸, 𑀲𑀸𑀫𑀢𑁆𑀣𑀺𑀬𑀸𑀢𑀺 𑀪𑁂𑀤𑀸𑀥𑀺𑀝𑁆𑀞𑀸𑀦𑀢𑁆𑀢𑀸 𑀲𑀳𑀢𑁆𑀣𑀬𑁄𑀕𑀲𑁆𑀲 𑀧𑀼𑀢𑁆𑀢𑀲𑁆𑀲𑀸𑀧𑀺 𑀓𑀺𑀭𑀺𑀬𑀸𑀪𑀺𑀲𑀫𑁆𑀩𑀦𑁆𑀥𑁄 𑀯𑀺𑀜𑁆𑀜𑀸𑀬𑀢𑀺 𑀓𑀣𑀫𑀜𑁆𑀜𑀣𑀸 𑀲𑀳𑀢𑁆𑀣𑀬𑁄𑀕𑁄 𑀲𑀺𑀬𑀸𑀢𑀺 𑀇𑀫𑀺𑀦𑀸 𑀅𑀢𑁆𑀣 𑀩𑀮𑁂𑀦. 𑀅𑀢𑁆𑀣𑀕𑁆𑀕𑀳𑀡𑀦𑁆𑀢𑀺 𑀲𑀼𑀢𑁆𑀢𑁂 ‘‘𑀲𑀳𑀢𑁆𑀣𑁂𑀦𑁂’’𑀢𑀺 𑀅𑀢𑁆𑀣𑀕𑁆𑀕𑀳𑀡𑀁. 𑀧𑀭𑀺𑀬𑀸𑀬𑀢𑁆𑀣𑀦𑁆𑀢𑀺 𑀧𑀭𑀺𑀢𑁄 𑀅𑀬𑀦𑁆𑀢𑀺 𑀅𑀯𑀕𑀘𑁆𑀙𑀦𑁆𑀢𑀺 𑀅𑀢𑁆𑀣𑀫𑀦𑁂𑀦𑁂𑀢𑀺 𑀧𑀭𑀺𑀬𑀸𑀬𑁄 𑀅𑀢𑁆𑀣𑁄 𑀧𑀬𑁄𑀚𑀦𑀁 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄, 𑀏𑀢𑁆𑀣 𑀘 𑀧𑀭𑀺𑀬𑀸𑀬𑀢𑁆𑀣𑀫𑁂𑀯𑀸𑀢𑀺 𑀦𑀸𑀯𑀥𑀸𑀭𑀡𑀁, 𑀅𑀢𑁄𑀬𑁂𑀯 𑀯𑀺𑀦𑀸𑀧𑀺 𑀲𑀳𑀲𑀤𑁆𑀤𑀧𑁆𑀧𑀬𑁄𑀕𑀁 𑀢𑀧𑁆𑀧𑀭𑀺𑀬𑀸𑀬𑀧𑁆𑀧𑀬𑁄𑀕𑀁 𑀯𑀸 𑀲𑀳𑀢𑁆𑀣𑁂𑀦 𑀬𑁄𑀕𑁂 𑀯𑀺𑀥𑀸𑀦𑀢𑁄 𑀅𑀲𑀢𑁆𑀬𑀧𑀺 𑀲𑀳𑀸𑀤𑀺𑀲𑀤𑁆𑀤𑀧𑁆𑀧𑀬𑁄𑀕𑁂 𑀬𑀢𑁆𑀣 𑀢𑀤𑀢𑁆𑀣𑁄 𑀕𑀫𑁆𑀬𑀢𑁂 𑀢𑀢𑁆𑀣𑀸𑀧𑀺 𑀪𑀯𑀢𑁆𑀬𑁂𑀯 𑀢𑀢𑀺𑀬𑀸… 𑀕𑀫𑁆𑀬𑀫𑀸𑀦𑁂𑀦 𑀲𑀳𑀢𑁆𑀣𑁂𑀦 𑀬𑁄𑀕𑀸, 𑀬𑀣𑀸‘‘𑀲𑁆𑀬𑀸𑀤𑀺 𑀲𑁆𑀬𑀸𑀦𑁂’’𑀢𑀺. (𑁩-𑁧) 𑀲𑀳 𑀧𑀭𑀺𑀬𑀸𑀬𑁂𑀦𑀸𑀢𑀺 𑀲𑀳𑀲𑀤𑁆𑀤𑀲𑁆𑀲 𑀧𑀭𑀺𑀬𑀸𑀬𑀢𑁄. 𑀯𑀺𑀲𑁂𑀲𑀸𑀦𑀼𑀧𑀸𑀤𑀸𑀦𑀢𑁄𑀢𑀺 ‘‘𑀲𑀳𑀬𑀼𑀢𑁆𑀢𑁂-𑀧𑁆𑀧𑀥𑀸𑀦𑁂’’𑀢𑀺 (𑁨-𑁩-𑁧𑁯) 𑀧𑀸𑀡𑀺𑀦𑀻𑀬 𑀲𑀼𑀢𑁆𑀢𑁂 𑀯𑀺𑀬 𑀅𑀧𑁆𑀧𑀥𑀸𑀦𑁂𑀢𑀺 𑀯𑀺𑀲𑁂𑀲𑀲𑁆𑀲𑀸𑀦𑀼𑀧𑀸𑀤𑀸𑀦𑀢𑁄.

𑀮𑀓𑁆𑀔𑀻𑀬𑀢𑁆𑀬𑀦𑁂𑀦𑀸𑀢𑀺 𑀮𑀓𑁆𑀔𑀡𑀁 𑀲𑀗𑁆𑀓𑁂𑀢𑁄, 𑀓𑀺𑀦𑁆𑀢𑀁 𑀓𑀫𑀡𑁆𑀟𑀮𑀼𑀧𑁆𑀧𑀪𑀼𑀢𑀺, 𑀅𑀢𑁆𑀣𑁂 𑀓𑀸𑀭𑀺𑀬𑀲𑁆𑀲𑀸𑀲𑀫𑁆𑀪𑀯𑀸 𑀢𑀁𑀯𑀸𑀘𑀻𑀳𑀺 𑀯𑀺𑀪𑀢𑁆𑀢𑀻𑀢𑀺 𑀫𑀜𑁆𑀜𑀫𑀸𑀦𑁂𑀦 𑀬𑀁𑀯𑀺𑀯𑀭𑀡𑀁 𑀓𑀢𑀁 ‘𑀮𑀓𑁆𑀔𑀡𑁂 𑀯𑀢𑁆𑀢𑀫𑀸𑀦𑀢𑁄’𑀢𑀺, 𑀢𑀫𑀼𑀮𑁆𑀮𑀗𑁆𑀕𑀺𑀬𑀸𑀢𑁆𑀣𑀁 𑀯𑀤𑀢𑀺 ‘𑀬𑁄 𑀅𑀢𑁆𑀣𑁄’𑀇𑀘𑁆𑀘𑀸𑀤𑀺, 𑀯𑀢𑁆𑀢𑀫𑀸𑀦𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺… 𑀦𑀸𑀫𑀲𑁆𑀫𑀸 𑀧𑀘𑁆𑀘𑀬𑀯𑀺𑀥𑀸𑀦𑀧𑁆𑀧 𑀲𑀗𑁆𑀕𑀢𑁄, 𑀉𑀧𑀸𑀢𑁆𑀢𑁄𑀢𑀺 𑀕𑀳𑀺𑀢𑁄. 𑀓𑀜𑁆𑀘𑀺𑀧𑁆𑀧𑀡𑀭𑀫𑀸𑀧𑀦𑁆𑀦𑀲𑁆𑀲 𑀮𑀓𑁆𑀔𑀡𑁂 𑀢𑀢𑀺𑀬𑀸 𑀬𑀣𑀸 𑀲𑀺𑀬𑀸 ‘𑀭𑀼𑀓𑁆𑀔𑀫𑁆𑀧𑀢𑀺 𑀯𑀺𑀚𑁆𑀚𑁄𑀢𑀦’𑀫𑀺𑀘𑁆𑀘𑀢𑁆𑀭 𑀮𑀓𑁆𑀔𑀡𑀫𑀢𑁆𑀢𑁂 𑀫𑀸 ¶ 𑀪𑀯𑀻𑀢𑀺 𑀧𑀸𑀡𑀺𑀦𑀻𑀬𑁂𑀳𑀺 ‘‘𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂’’𑀢𑀺 (𑁨-𑁩-𑁨𑁧) 𑀇𑀢𑁆𑀣𑀫𑁆𑀪𑀽𑀢𑀕𑁆𑀕𑀳𑀡𑀁 𑀓𑀢𑀁, 𑀢𑀫𑁆𑀫𑀦𑀲𑀺 𑀦𑀺𑀥𑀸𑀬 𑀘𑁄𑀤𑀬𑀫𑀸𑀳𑁋‘𑀦𑀦𑁆𑀯𑀺’𑀘𑁆𑀘𑀸𑀤𑀺, 𑀇𑀢𑁆𑀣𑀫𑁆𑀪𑀽𑀢𑀲𑁆𑀲 𑀮𑀓𑁆𑀔𑀡𑀦𑁆𑀢𑀺 𑀙𑀝𑁆𑀞𑀻𑀲𑀫𑀸𑀲𑁄, 𑀆𑀧𑀦𑁆𑀦𑀲𑁆𑀲𑀸𑀢𑀺 𑀪𑀽𑀢𑀲𑁆𑀲, 𑀲𑀸𑀫𑀜𑁆𑀜𑀲𑁆𑀲 𑀪𑁂𑀤𑀓𑁄 𑀯𑀺𑀲𑁂𑀲𑁄 𑀧𑀓𑀸𑀭𑁄 𑀯𑀼𑀘𑁆𑀘𑀢𑁂, 𑀢𑀣𑀸𑀳𑀺 ‘𑀢𑀺𑀤𑀡𑁆𑀟𑀓𑁂𑀦 𑀧𑀭𑀺𑀩𑁆𑀩𑀸𑀚𑀓𑀫𑀤𑁆𑀤𑀓𑁆𑀔𑀻’𑀢𑀺 𑀫𑀦𑀼𑀲𑁆𑀲𑀢𑁆𑀢𑀲𑀸𑀫𑀜𑁆𑀜𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀢𑁆𑀢𑀫𑁆𑀧𑀓𑀸𑀭𑁄, 𑀢𑀫𑁆𑀧𑀭𑀺𑀩𑁆𑀩𑀸𑀚𑀓𑁄 𑀧𑀢𑁆𑀢𑁄, 𑀢𑀲𑁆𑀲 𑀢𑀺𑀤𑀡𑁆𑀟𑀓𑀁 𑀮𑀓𑁆𑀔𑀡𑀁. 𑀉𑀧𑀮𑀓𑁆𑀔𑀡𑀢𑁆𑀢𑁂𑀢𑀺 𑀇𑀫𑀺𑀦𑀸 𑀇𑀢𑁆𑀣𑀫𑁆𑀪𑀽𑀢𑀲𑁆𑀲 𑀮𑀓𑁆𑀔𑀡𑀢𑁆𑀢𑀸𑀪𑀸𑀯𑀫𑀸𑀳, 𑀉𑀧𑀮𑀓𑁆𑀔𑀡𑀦𑁆𑀢𑀺 𑀲𑀗𑁆𑀓𑁂𑀢𑁄. 𑀦𑀬𑀺𑀤𑀫𑀢𑁆𑀣𑀺𑀘𑁆𑀘𑀸𑀤𑀺 𑀧𑀭𑀺𑀳𑀸𑀭𑁄, 𑀭𑀼𑀓𑁆𑀔𑀫𑁆𑀧𑀢𑀺 𑀯𑀺𑀚𑁆𑀚𑁄𑀢𑀦𑀦𑁆𑀢𑀺 𑀏𑀢𑁆𑀣 𑀓𑀲𑁆𑀲𑀘𑀺 𑀇𑀢𑁆𑀣𑀫𑁆𑀪𑀽𑀢𑀲𑁆𑀲𑀸𑀪𑀸𑀯𑀸 𑀇𑀢𑁆𑀣𑀫𑁆𑀪𑀽𑀢𑀕𑁆𑀕𑀳𑀡𑁂 𑀧𑀬𑁄𑀚𑀦𑀁 𑀦 𑀤𑀺𑀲𑁆𑀲𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁄, 𑀭𑀼𑀓𑁆𑀔𑀫𑁆𑀧𑀢𑀺 𑀯𑀺𑀚𑁆𑀚𑁄𑀢𑀢𑁂𑀢𑀺 𑀏𑀢𑁆𑀣𑀢𑀼 𑀇𑀢𑁆𑀣𑀫𑁆𑀪𑀽𑀢𑀲𑁆𑀲 𑀯𑀺𑀚𑁆𑀚𑀼𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀩𑁆𑀪𑀸𑀯𑀸 𑀢𑀢𑀺𑀬𑀸𑀧𑁆𑀧𑀢𑁆𑀢𑀺𑀬𑀁 𑀢𑀁𑀦𑀺𑀯𑀢𑁆𑀢𑀺𑀬𑀸 𑀬𑀣𑀸𑀯𑀼𑀢𑁆𑀢𑀁 𑀜𑀸𑀬𑀫𑀦𑁆𑀢𑀭𑁂𑀦 𑀦𑀸𑀜𑁆𑀜𑀁 𑀓𑀺𑀜𑁆𑀘𑀺 𑀧𑀝𑀺𑀲𑀭𑀡𑀫𑀢𑁆𑀣𑀻𑀢𑀺 𑀲𑀜𑁆𑀜𑀸𑀧𑀬𑀫𑀸𑀳-‘𑀅𑀯𑀲𑁆𑀲’𑀫𑀺𑀘𑁆𑀘𑀸𑀤𑀺, 𑀅𑀜𑁆𑀜𑀣𑀸𑀢𑀺 𑀏𑀯𑀫𑀦𑀩𑁆𑀪𑀼𑀧𑀕𑀫𑁆𑀫 ‘𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂’𑀢𑀺 𑀯𑀘𑀦𑁂 𑀓𑀭𑀻𑀬𑀫𑀸𑀦𑁂 𑀲𑀢𑀺, 𑀇𑀢𑁆𑀣𑀫𑁆𑀪𑀽𑀢𑀯𑀸𑀤𑀺𑀦𑁄 𑀉𑀢𑁆𑀢𑀭𑀫𑀸𑀲𑀗𑁆𑀓𑀺𑀬𑀸𑀳-‘𑀦𑀘𑀸’𑀢𑀺𑀆𑀤𑀺, 𑀯𑀢𑁆𑀢𑀼𑀦𑁆𑀢𑀺 𑀯𑀘𑀦𑀲𑁂𑀲𑁄, 𑀘𑁄-𑀯𑀥𑀸𑀭𑀡𑁂, 𑀦𑁂𑀯 𑀲𑀓𑁆𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀤𑀼𑀢𑀺𑀬𑀸𑀯𑀺𑀥𑀸𑀦𑀲𑀸𑀫𑀢𑁆𑀣𑀺𑀬𑀸𑀢𑀺 ‘‘𑀧𑀢𑀺𑀧𑀭𑀻𑀳𑀺 𑀪𑀸𑀕𑁂 𑀘𑀸’’𑀢𑀺 (𑁨-𑁯) 𑀓𑀲𑁆𑀫𑀸 𑀦 𑀲𑀓𑁆𑀓𑀸𑀢𑀺 𑀆𑀳-‘𑀅𑀢𑁆𑀣𑀺’𑀘𑁆𑀘𑀸𑀤𑀺, 𑀅𑀲𑀢𑀺 𑀳𑀺 𑀧𑀬𑁄𑀚𑀦𑁂 𑀲𑀸𑀫𑀢𑁆𑀣𑀺𑀬𑀦𑁆𑀢𑀺 𑀪𑀸𑀯𑁄. 𑀅𑀣 𑀓𑀫𑀡𑁆𑀟𑀮𑀼 𑀧𑀸𑀡𑀺𑀫𑁆𑀳𑀺 𑀅𑀲𑁆𑀲𑀸𑀢𑀺 𑀆𑀤𑁄 𑀢𑀢𑀺𑀬𑀸 𑀓𑀲𑁆𑀫𑀸 𑀦 𑀲𑀺𑀬𑀸 𑀢𑁆𑀬𑀸𑀳-‘𑀓𑀫𑀡𑁆𑀟𑀮𑀼’𑀇𑀘𑁆𑀘𑀸𑀤𑀺, 𑀓𑀫𑀡𑁆𑀟𑀮𑀼𑀲𑁆𑀲 𑀲𑁂𑀢𑀲𑁆𑀲 𑀘 𑀉𑀧𑀮𑀓𑁆𑀔𑀡 𑀪𑀸𑀯𑁂𑀦𑀸𑀦𑀼𑀧𑀸𑀤𑀸𑀦𑀢𑁄𑀢𑀺 𑀲𑀫𑁆𑀩𑀦𑁆𑀥𑁄, 𑀇𑀫𑀺𑀦𑀸 𑀉𑀧𑀸𑀤𑀸𑀢𑀼𑀦𑁄 𑀲𑀯𑀘𑀲𑀺 𑀲𑀢𑀦𑁆𑀢𑀢𑀫𑀸𑀳, 𑀯𑀺𑀲𑀺𑀝𑁆𑀞𑀸𑀯𑀬𑀯𑀸𑀥𑁂𑀬𑁆𑀬𑁂𑀦𑀸𑀢𑀺 𑀧𑀸𑀡𑀺 𑀓𑀫𑀡𑁆𑀟𑀮𑀼𑀦𑀸 𑀯𑀺𑀲𑀺𑀝𑁆𑀞𑁄𑀯𑀬𑀯𑁄, 𑀢𑀲𑁆𑀲𑀸𑀥𑁂𑀬𑁆𑀬𑁄 𑀓𑀫𑀡𑁆𑀟𑀮𑀼 𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀬𑁂𑀦𑀸𑀗𑁆𑀕𑁂𑀦 𑀯𑀺𑀓𑀢𑁂𑀦 𑀅𑀗𑁆𑀕𑀺𑀦𑁄 𑀯𑀺𑀓𑀸𑀭𑁄 𑀮𑀓𑁆𑀔𑀻𑀬𑀢𑁂 𑀢𑀢𑁄 𑀢𑀢𑀺𑀬𑀸 𑀬𑀣𑀸𑀲𑀺𑀬𑀸𑀢𑀺 𑀧𑀭𑁂𑀳𑀺 ‘‘𑀬𑁂𑀦𑀸𑀗𑁆𑀕𑀯𑀺𑀓𑀸𑀭𑁄’’𑀢𑀺 (𑁨-𑁩-𑁨𑁦) 𑀆𑀭𑀤𑁆𑀥𑀁, 𑀢𑀤𑀸𑀳-‘𑀬𑁂𑀦𑁂’𑀘𑁆𑀘𑀸𑀤𑀺, 𑀢𑀢𑁆𑀣 𑀬𑀲𑀤𑁆𑀤𑁂𑀦 𑀯𑀺𑀓𑀢𑀸𑀯𑀬𑀯𑁄 𑀳𑁂𑀢𑀼𑀢𑁆𑀢𑁂𑀦 𑀦𑀺𑀤𑁆𑀤𑀺𑀝𑁆𑀞𑁄 𑀅𑀗𑁆𑀕𑀲𑀤𑁆𑀤𑁄 𑀘 𑀲𑀫𑀼𑀤𑀸𑀬𑀯𑀘𑀦𑁄 𑀉𑀧𑀸𑀢𑁆𑀢𑁄 𑀢𑁂𑀦𑀸𑀳-‘𑀬𑁂𑀦𑁂𑀘𑁆𑀘𑀸𑀤𑀺, 𑀦𑀦𑀼𑀘 𑀓𑀸𑀡𑀸𑀤𑀻𑀦𑀁 𑀦𑀺𑀬𑀢𑀕𑀼𑀡𑀻𑀦𑀫𑀪𑀺𑀥𑀸𑀬𑀺𑀢𑁆𑀢𑀸 𑀅𑀓𑁆𑀔𑀺𑀲𑀤𑁆𑀤𑀲𑁆𑀲 𑀧𑀬𑁄𑀕𑁄 𑀦 𑀬𑀼𑀢𑁆𑀢𑁄 𑀩𑁆𑀬𑀸𑀯𑀢𑁆𑀢𑀺𑀬𑀸𑀪𑀸𑀯𑀸𑀢𑀺, 𑀦𑁂𑀲 𑀤𑁄𑀲𑁄, 𑀮𑁄𑀓𑀺𑀬𑁄-𑀬𑀁 𑀲𑀤𑁆𑀤𑀲𑁆𑀲 𑀯𑁄𑀳𑀸𑀭𑁄, 𑀮𑁄𑀓𑀲𑁆𑀲 𑀘 𑀲𑀤𑁆𑀤𑀧𑁆𑀧𑀬𑁄𑀕𑁂 𑀕𑀼𑀭𑀼𑀮𑀖𑀼𑀫𑁆𑀧𑀢𑁆𑀬𑀤𑀬𑁄 𑀦𑀢𑁆𑀣𑀺, 𑀢𑀣𑀸𑀳𑀺 𑀮𑁄𑀓𑁂𑀦 ‘𑀲𑀻𑀲𑀧𑀸𑀢𑀺’𑀧𑀺 𑀯𑀼𑀘𑁆𑀘𑀢𑁂, 𑀭𑀼𑀓𑁆𑀔𑁄 ¶ 𑀲𑀻𑀲𑀧𑀸𑀢𑀺𑀧𑀺, 𑀬𑀲𑁆𑀲 𑀢𑀼 𑀢𑀢𑁆𑀣𑀸𑀤𑀭𑁄, 𑀲𑁄-𑀓𑁆𑀔𑀺𑀲𑀤𑁆𑀤𑀁 𑀧𑀬𑀼𑀚𑁆𑀚𑀢𑁂𑀯, 𑀅𑀣𑀯𑀸 𑀲𑀸𑀫𑀜𑁆𑀜𑀼𑀧𑀓𑁆𑀓𑀫𑁂 𑀯𑀺𑀲𑁂𑀲𑁄 𑀧𑀬𑁄𑀕𑀫𑀭𑀳𑀢𑀺, 𑀅𑀓𑁆𑀔𑀺(𑀦𑀸𑀢𑀺) 𑀳𑀺 𑀯𑀼𑀢𑁆𑀢𑁂 𑀲𑀦𑁆𑀤𑁂𑀳𑁄 𑀲𑀺𑀬𑀸 ‘𑀓𑀺𑀫𑀲𑁆𑀲 𑀯𑀢𑁆𑀢𑀼𑀫𑀺𑀘𑁆𑀙𑀺𑀢’𑀦𑁆𑀢𑀺 𑀢𑀢𑁄 𑀓𑀸𑀡𑁄𑀢𑀺 𑀯𑀼𑀘𑁆𑀘𑀢𑁂, 𑀦𑀸𑀓𑁆𑀔𑀺𑀦𑀸 𑀦𑀺𑀭𑀽𑀧𑀬𑀢𑀺 𑀲𑁄𑀪𑀦𑁄𑀢𑀺, 𑀓𑀺𑀜𑁆𑀘𑀭𑀳𑀺 𑀓𑀸𑀡𑁄𑀢𑀺, 𑀅𑀓𑁆𑀔𑀺𑀓𑀸𑀡𑀫𑀲𑁆𑀲𑁂𑀢𑁆𑀬𑀸𑀤𑁄 𑀓𑀲𑁆𑀫𑀸 𑀦 𑀲𑀺𑀬𑀸𑀢𑀺 𑀆𑀲𑀗𑁆𑀓𑀺𑀬‘𑀓𑀫𑀡𑁆𑀟𑀮𑀼 𑀧𑀸𑀡𑀺𑀫𑁆𑀳𑀺 𑀅𑀲𑁆𑀲𑀸’𑀢𑁆𑀬𑀢𑁆𑀭 𑀬𑁄 𑀯𑀼𑀢𑁆𑀢𑁄 𑀧𑀭𑀺𑀳𑀸𑀭𑁄, 𑀢 𑀫𑁂𑀢𑁆𑀣𑁄𑀧𑀤𑀺𑀲𑀦𑁆𑀢𑁄 𑀆𑀳-‘𑀳𑁂𑀝𑁆𑀞𑀸 𑀯𑀺𑀬 𑀅𑀧𑁆𑀧𑀲𑀗𑁆𑀕𑁄’𑀢𑀺.

𑀓𑀺𑀲𑁆𑀫𑀺𑀜𑁆𑀘𑀺 𑀨𑀮𑁂 𑀤𑀺𑀝𑁆𑀞𑀲𑀸𑀫𑀢𑁆𑀣𑀺𑀬𑁂𑀢𑁆𑀣𑁂 𑀳𑁂𑀢𑀼 𑀦𑀺𑀭𑀼𑀴𑁆𑀳𑁄. 𑀏𑀓𑀢𑁆𑀭 𑀳𑀺 𑀤𑀺𑀝𑁆𑀞𑀲𑀸𑀫𑀢𑁆𑀣𑀺𑀬𑁄𑀢𑁆𑀣𑁄 𑀢𑀁𑀬𑁄𑀕𑁆𑀕𑀢𑀸𑀬 𑀓𑀸𑀭𑀺𑀬 (𑀫)𑀓𑀭𑁄𑀦𑁆𑀢𑁄𑀧𑀺 𑀳𑁂𑀢𑀼 𑀯𑀼𑀘𑁆𑀘𑀢𑁂 𑀲𑀢𑀺 𑀲𑀳 𑀓𑀸𑀭𑀺𑀦𑁆𑀬𑀲𑀢𑀺 𑀘 𑀯𑀺𑀥𑀼𑀭𑀧𑁆𑀧𑀘𑁆𑀘𑀬𑁄 𑀧𑀧𑀸(𑀢) 𑀢𑁄, 𑀢𑁂𑀦 𑀓𑀸𑀭𑀺𑀬𑀲𑁆𑀲 𑀩𑁆𑀬𑀪𑀺𑀘𑀸𑀭𑁄, 𑀢𑁂𑀦𑁂𑀯𑀸𑀳- ‘𑀅𑀦𑀺𑀧𑁆𑀨𑀸𑀤𑀬𑀦𑁆𑀢𑁄𑀧𑀻’𑀢𑀺, 𑀓𑀸𑀭𑀡𑁂 𑀢𑀢𑀺𑀬𑀸𑀬𑀸𑀪𑀸𑀯𑁂 𑀓𑀸𑀭𑀡𑀫𑀸𑀳- ‘𑀢𑀓𑁆𑀓𑀺𑀭𑀺𑀬𑀸𑀬𑁄𑀕𑁆𑀕𑀢𑀸𑀫𑀢𑁆𑀢𑁂’𑀘𑁆𑀘𑀸𑀤𑀺.

𑀉𑀧𑀸𑀥𑀺 𑀯𑀺𑀲𑁂𑀲𑀦𑀁, 𑀧𑀭𑀸𑀗𑁆𑀕𑀪𑀽𑀢𑁂𑀢𑀺 𑀧𑀭𑀲𑁆𑀲 𑀩𑀦𑁆𑀥𑀢𑁆𑀢𑀸(𑀤𑀺𑀦𑁄) 𑀯𑀺𑀥𑀸𑀦𑀸 𑀬𑀸𑀗𑁆𑀕𑀪𑀽𑀢𑁂 𑀚𑀴𑀢𑁆𑀢𑀸𑀤𑀺𑀳𑁂𑀢𑀼𑀫𑁆𑀳𑀻𑀢𑀺 𑀅𑀢𑁆𑀣𑁄, 𑀇𑀫𑀺𑀦𑀸 𑀕𑀼𑀡𑀲𑀤𑁆𑀤𑁄 𑀬𑀫𑀧𑁆𑀧𑀥𑀸𑀦𑀯𑀘𑀦𑁄𑀢𑀺 𑀯𑀤𑀢𑀺, 𑀬𑀜𑁆𑀘𑀸𑀧𑁆𑀧𑀥𑀸𑀦𑀁 𑀢𑀫𑁆𑀧𑀭𑀸𑀗𑁆𑀕𑀪𑀽𑀢𑀦𑁆𑀢𑀺 𑀕𑀼𑀡𑁂𑀢𑀻𑀫𑀲𑁆𑀲 ‘𑀧𑀭𑀸𑀗𑁆𑀕𑀪𑀽𑀢𑁂’𑀢𑀺 𑀅𑀢𑁆𑀣𑀫𑀸𑀳, 𑀬𑀜𑁆𑀳𑀺 𑀧𑀭𑀢𑁆𑀣𑀫𑀼𑀧𑀸𑀤𑀻𑀬𑀢𑁂 𑀢𑀤𑀧𑁆𑀧𑀥𑀸𑀦𑀫𑀦𑀼 𑀯𑀸𑀤𑀭𑀽𑀧𑁂𑀦𑁄𑀧𑀸𑀤𑀻𑀬𑀫𑀸𑀦𑀢𑁆𑀢𑀸, 𑀬𑀣𑀸 ‘𑀚𑀴𑀢𑁆𑀢𑀸 𑀩𑀤𑁆𑀥𑁄, 𑀭𑀼𑀓𑁆𑀔𑁄 𑀬𑀁 𑀲𑀻𑀲 𑀧𑀢𑁆𑀢𑀸, 𑀅𑀕𑁆𑀕𑀺 𑀏𑀢𑁆𑀣 𑀥𑀼𑀫𑀢𑁆𑀢𑁂’𑀘𑁆𑀘𑀸𑀤𑀺, 𑀢𑁂𑀦𑁂𑀯𑀸𑀳-‘𑀧𑀭𑀢𑁆𑀣𑀭𑀽𑀧𑀸𑀧𑀦𑁆𑀦’𑀦𑁆𑀢𑀺, 𑀯𑀸𑀯𑀺𑀥𑀸𑀦𑀦𑁆𑀢𑀺 ‘‘𑀯𑀺𑀪𑀸𑀲𑀸 𑀕𑀼𑀡𑁂-𑀣𑀺𑀬𑀁’’𑀦𑁆𑀢𑀺 (𑁨-𑁩-𑁨𑁫) 𑀏𑀯𑀁 𑀯𑀺𑀥𑀸𑀦𑀁, 𑀇𑀢𑁆𑀣𑀺𑀬𑀦𑁆𑀢𑀺𑀆𑀤𑀺𑀦𑀸 𑀧𑀜𑁆𑀘𑀫𑀻𑀭𑀽𑀧𑀲𑁆𑀲𑀧𑀺 𑀅𑀪𑀺𑀫𑀢𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀢𑁂𑀦𑁂𑀯𑀸𑀳-‘𑀉𑀪𑀬𑀢𑁆𑀣𑀸’𑀢𑀺𑀆𑀤𑀺, 𑀦𑀦𑀼 ‘𑀢𑁄 𑀧𑀜𑁆𑀘𑀫𑁆𑀬𑀸’’𑀢𑀺 (𑁪-𑁯𑁫) 𑀲𑀼𑀢𑁆𑀢𑁂𑀦 𑀢𑀤𑁆𑀥𑀺𑀢𑀧𑀘𑁆𑀘𑀬𑀦𑁆𑀢𑀲𑁆𑀲 𑀓𑀣𑀁 𑀧𑀜𑁆𑀘𑀫𑁆𑀬𑀦𑁆𑀢𑀢𑀸 𑀢𑁆𑀬𑀸𑀲𑀗𑁆𑀓𑀺𑀬𑀸𑀳-‘𑀧𑀜𑁆𑀘𑀫𑀺𑀦𑀺𑀤𑁆𑀤𑁂𑀲𑁂’ 𑀇𑀘𑁆𑀘𑀸𑀤𑀺, 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀧𑀜𑁆𑀘𑀫𑀺𑀬𑀸 𑀯𑀺𑀦𑀸𑀢𑀺 𑀬𑁄𑀚𑀦𑀸, 𑀯𑀸 𑀧𑀜𑁆𑀘𑀫𑀺𑀬𑀸 𑀯𑀺𑀥𑀸𑀦𑀢𑁄 𑀢𑀢𑀺𑀬𑀸𑀭𑀽𑀧𑁂𑀦𑀧𑀺 𑀪𑀯𑀺𑀢𑀩𑁆𑀩𑀦𑁆𑀢𑀺 𑀘𑁄𑀤𑀦𑀫𑀦𑀲𑀺 𑀦𑀺𑀥𑀸𑀬 𑀧𑀜𑁆𑀘𑀫𑁆𑀬𑀼 𑀤𑀸𑀳𑀭𑀡𑁂𑀬𑁂𑀯 𑀓𑀸𑀭𑀡𑀁 𑀢𑀢𑀺𑀬𑁄𑀤𑀸𑀳𑀭𑀡𑀲𑁆𑀲 𑀘 𑀧𑀞𑀫𑁄𑀤𑀸𑀳𑀭𑀡𑀸𑀦𑀼𑀲𑀸𑀭𑁂𑀦𑀸𑀦𑀼 𑀫𑀦𑁆𑀢𑀩𑁆𑀩𑀢𑀜𑁆𑀘𑀤𑀲𑁆𑀲𑁂𑀦𑁆𑀢𑁄 𑀆𑀳 ‘𑀧𑀜𑁆𑀘𑀫𑁆𑀬𑀸𑀬𑁂𑀯𑀺’𑀘𑁆𑀘𑀸𑀤𑀺, 𑀅𑀪𑀸𑀯𑁂𑀦 𑀲𑀗𑁆𑀔𑀸𑀭𑀦𑀺𑀭𑁄𑀥𑁂𑀦𑀸𑀢𑀺 𑀢𑀢𑀺𑀬𑀦𑁆𑀢𑀭𑀽𑀧𑀸𑀦𑀺.

𑀲𑀫𑁆𑀩𑀦𑁆𑀥𑀯𑀘𑀦𑀺𑀘𑁆𑀙𑀸𑀬𑁂𑀯𑁂𑀢𑁆𑀣 ¶ 𑀙𑀝𑁆𑀞𑀻 𑀲𑀺𑀤𑁆𑀥𑀸𑀢𑀺 𑀆𑀲𑀗𑁆𑀓𑀺𑀬𑀸𑀳-‘𑀳𑁂𑀢𑀼𑀫𑁆𑀳𑀺’𑀘𑁆𑀘𑀸𑀤𑀺, 𑀳𑁂𑀢𑀼𑀫𑀸𑀳-‘𑀢𑀁 𑀬𑁄𑀕𑁆𑀕𑀢𑀸’ 𑀇𑀘𑁆𑀘𑀸𑀤𑀺, 𑀲𑀤𑁆𑀤𑀲𑀢𑁆𑀢𑀺𑀲𑀸𑀫𑀢𑁆𑀣𑀺𑀬𑀸𑀢𑀺 𑀲𑀤𑁆𑀤𑀲𑀢𑁆𑀢𑀺𑀲𑀗𑁆𑀔𑀸𑀢𑀸𑀬 𑀲𑀸𑀫𑀢𑁆𑀣𑀺𑀬𑀸, 𑀢𑀫𑁂𑀯 𑀨𑀼𑀝𑀬𑀢𑀺 ‘𑀬𑀢𑁆𑀣’𑀇𑀘𑁆𑀘𑀸𑀤𑀺𑀦𑀸, 𑀳𑁂𑀢𑁆𑀯𑀢𑁆𑀣𑀯𑀸𑀘𑀓𑁂𑀳𑀺 𑀅𑀦𑁆𑀢𑀭𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀲𑀫𑀸𑀦𑀸𑀥𑀺𑀓𑀭𑀡𑁂𑀳𑀻𑀢𑀺 𑀳𑁂𑀢𑁆𑀯𑀢𑁆𑀣𑀲𑀫𑀸𑀦𑀸𑀥𑀺𑀓𑀭𑀡𑁂𑀳𑀺 𑀉𑀤𑀭𑀸𑀤𑀻𑀳𑀺, 𑀢𑀚𑁆𑀚𑁄𑀢𑀦𑀸𑀬𑀸𑀢𑀺 𑀳𑁂𑀢𑁆𑀯𑀢𑁆𑀣𑀚𑁄𑀢𑀦𑀸𑀬𑀸𑀮𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀩𑁆𑀬𑀢𑀺𑀭𑁂𑀓𑁂𑀦 𑀢𑀼 𑀳𑁂𑀢𑁆𑀯𑀢𑁆𑀣𑀢𑁄 𑀢𑀧𑁆𑀧𑀯𑀢𑁆𑀢𑀺𑀫𑀸𑀳-‘𑀬𑀢𑁆𑀣 𑀧𑀦𑀺’𑀘𑁆𑀘𑀸𑀤𑀺, 𑀳𑁂𑀢𑁆𑀯𑀢𑁆𑀣𑁂𑀳𑀺𑀧𑀺𑀘𑁆𑀘𑀸𑀤𑀺𑀦𑀸 𑀲𑀸𑀫𑀢𑁆𑀣𑀺𑀬𑀫𑀼𑀧𑀤𑀲𑁆𑀲𑀺𑀢𑀁 ‘𑀯𑀲𑁂 𑀥𑀫𑁆𑀫𑀲𑁆𑀲 𑀳𑁂𑀢𑀼𑀦𑁄’𑀢𑀺 𑀢𑀢𑁆𑀣𑁄𑀤𑀸𑀳𑀭𑀡𑀁.

𑀦𑀸𑀫𑀪𑀽𑀢𑁂𑀳𑀻𑀢𑀺 𑀲𑀩𑁆𑀩𑀸𑀤𑀻𑀲𑀼 𑀓𑁂𑀘𑀺 𑀓𑁂𑀲𑀜𑁆𑀘𑀺 𑀬𑀤𑀺 𑀦𑀸𑀫𑀸𑀦𑀺 𑀲𑀺𑀬𑀼𑀁 𑀢𑁂𑀳𑀺, 𑀅𑀧𑁆𑀧𑀥𑀸𑀦𑀪𑀽𑀢𑁂𑀳𑀻𑀢𑀺 𑀧𑀺𑀬𑀲𑀩𑁆𑀩𑀸𑀤𑀻𑀳𑀺, 𑀓𑀺𑀫𑁆𑀧𑀬𑁄𑀚𑀦𑀦𑁆𑀢𑀺𑀆𑀤𑁄 𑀧𑀬𑁄𑀚𑀦𑀲𑀤𑁆𑀤𑁄 ‘‘𑀧𑀬𑁄𑀚𑀦𑀁 𑀓𑀸𑀭𑀺𑀬𑀳𑁂𑀢𑀽𑀲𑀼’’𑀢𑀺 𑀦𑀺𑀖𑀡𑁆𑀟𑀼𑀢𑁄 𑀳𑁂𑀢𑀼𑀯𑀘𑀦𑁄.

𑀬𑀲𑁆𑀲 𑀲𑀘𑁂𑀢𑀦𑀸𑀬𑀸𑀘𑁂𑀢𑀦𑀸𑀬 𑀯𑀸 𑀓𑀲𑁆𑀲𑀘𑀺, 𑀧𑀽𑀚𑀸𑀦𑀼𑀕𑁆𑀕𑀳𑀓𑀸𑀫𑀢𑁆𑀢 𑀫𑀦𑁆𑀢𑀭𑁂𑀦 𑀲𑀫𑁆𑀫𑀸𑀧𑀤𑀸𑀦𑀁 𑀦 𑀲𑀫𑁆𑀪𑀯𑀢𑀻𑀢𑀺 𑀆𑀳-‘𑀧𑀽𑀚𑀸’ 𑀇𑀘𑁆𑀘𑀸𑀤𑀺, 𑀢𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦, 𑀘𑀸𑀕𑀗𑁆𑀕𑀦𑁆𑀢𑀺 𑀤𑀤𑀸𑀢𑀺𑀦𑁄 𑀤𑀸𑀦𑀓𑀺𑀭𑀺𑀬𑀸𑀬 𑀓𑀫𑁆𑀫𑁂𑀦 𑀲𑀫𑁆𑀩𑀚𑁆𑀛𑀫𑀸𑀦𑀜𑁆𑀘𑀸𑀕𑀓𑀸𑀭𑀡𑀁, 𑀇𑀤𑀸𑀦𑀺 𑀲𑀫𑁆𑀧𑀤𑀸𑀦𑀮𑀓𑁆𑀔𑀡𑀁 𑀲𑀧𑁆𑀧𑀪𑁂𑀤𑀫𑀸𑀯𑀺𑀓𑀸𑀢𑀼𑀓𑀸𑀫𑁄 𑀆𑀳-‘𑀢𑀤𑀺𑀤’𑀫𑀺𑀘𑁆𑀘𑀸𑀤𑀺, 𑀦𑀦𑀺𑀭𑀸𑀓𑀭𑁄𑀢𑀻𑀢𑁆𑀬 𑀦𑀺𑀭𑀸𑀓𑀭𑀡𑀁, 𑀆𑀭𑀸𑀥𑀬𑀢𑀻𑀢𑁆𑀬𑀸𑀭𑀸𑀥𑀦𑀁, 𑀅𑀩𑁆𑀪𑀦𑀼𑀚𑀸𑀦𑀸𑀢𑀻𑀢𑁆𑀬𑀩𑁆𑀪𑀦𑀼𑀜𑁆𑀜𑀁, 𑀢𑁂𑀲𑀁 𑀯𑀲𑁂𑀦, 𑀇𑀥 𑀲𑀫𑁆𑀧𑀤𑀸𑀦𑀦𑁆𑀢𑀺𑀥𑀸 𑀯𑀼𑀢𑁆𑀢𑀁 𑀓𑀣𑀺𑀢𑀁, 𑀓𑁂𑀢𑁂𑀢𑀺 𑀆𑀳-‘𑀭𑀼𑀓𑁆𑀔𑀬𑀸𑀘𑀓𑀪𑀺𑀓𑁆𑀔𑀯𑁄’𑀢𑀺, 𑀭𑀼𑀓𑁆𑀔𑀸𑀤𑀺𑀓𑀁 𑀢𑀁 𑀲𑀫𑁆𑀧𑀤𑀸𑀦𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀫𑀸𑀳-‘𑀢𑀢𑁆𑀣 𑀳𑀺’𑀘𑁆𑀘𑀸𑀤𑀺, 𑀅𑀚𑁆𑀛𑁂𑀲𑀦𑁂𑀦𑀸𑀭𑀸𑀥𑀦𑁂𑀦 𑀲𑀫𑁆𑀧𑀤𑀸𑀦𑀁 𑀪𑀯𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀅𑀦𑀼𑀫𑀢𑀺𑀬𑀸 𑀅𑀩𑁆𑀪𑀦𑀼𑀚𑀸𑀦𑁂𑀦, 𑀯𑀺𑀚𑁆𑀚𑀫𑀸𑀦𑁂𑀧𑁆𑀬𑀦𑀺𑀭𑀸𑀓𑀭𑀡𑁂 𑀪𑀺𑀓𑁆𑀔𑀼𑀦𑁄-𑀥𑀺𑀓𑀫𑀦𑀼𑀫𑀢𑀦𑁆𑀢𑁆𑀬𑀥𑀺𑀧𑁆𑀧𑀸𑀬𑁂𑀦𑀸𑀳-‘𑀲𑁄’ 𑀇𑀘𑁆𑀘𑀸𑀤𑀺.

𑀧𑀬𑁄𑀚𑀦𑀧𑀭𑀺𑀬𑀸𑀬𑁂 𑀅𑀢𑁆𑀣𑀲𑀤𑁆𑀤𑁂 𑀲𑀢𑀺 𑀇𑀤𑀦𑁆𑀢𑀺 𑀧𑀬𑁄𑀚𑀦𑀁 𑀧𑀭𑀸𑀫𑀝𑁆𑀞𑀼𑀁 𑀲𑀓𑁆𑀓𑀸𑀢𑀺 ‘𑀢𑀲𑁆𑀲𑁂𑀤’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀲𑀤𑁆𑀤𑁂𑀦𑁂𑀢𑁆𑀣 𑀯𑀺𑀓𑀢𑀺𑀬𑀸𑀢𑀺𑀲𑀫𑁆𑀩𑀦𑁆𑀥𑁄, 𑀅𑀢𑁆𑀣𑀲𑀤𑁆𑀤𑁂𑀦 ¶ 𑀢𑀼 𑀧𑀓𑀢𑀺𑀬𑀸, 𑀅𑀢𑁆𑀣 𑀓𑀣𑀦𑀫𑁂𑀢𑀦𑁆𑀢𑀺 𑀇𑀫𑀺𑀦𑀸 𑀯𑀘𑀦𑀺𑀘𑁆𑀙𑀸𑀬 𑀫𑁂𑀢𑀺𑀲𑁆𑀲𑀁 𑀦𑀢𑁆𑀣𑀺 𑀲𑀫𑀸𑀲𑁄𑀢𑀺 𑀤𑀻𑀧𑁂𑀢𑀺, 𑀯𑀺𑀕𑁆𑀕𑀳𑁂 𑀯𑀸𑀲𑁆𑀫𑀺𑀫𑀺𑀫𑀲𑁆𑀫𑀸𑀬𑁂𑀯 𑀦𑀺𑀧𑀸𑀢𑀦𑀸 𑀲𑀫𑀸𑀲𑁄 𑀤𑀝𑁆𑀞𑀩𑁆𑀩𑁄,𑀲𑁄 𑀯𑀺𑀓𑀢𑀺𑀲𑀗𑁆𑀔𑀸𑀢𑁄 𑀅𑀢𑁆𑀣𑁄, 𑀧𑀓𑀢𑀺𑀢𑁆𑀯𑀜𑁆𑀜𑀧𑀤𑀢𑁆𑀣𑁂𑀦𑀸𑀓𑁆𑀔𑀺𑀧𑀻𑀬𑀢𑁂, 𑀢𑀢𑁄 𑀢𑀤𑀢𑁆𑀣𑀲𑀤𑁆𑀤𑀢𑁄, 𑀓𑁄𑀬𑀁 𑀢𑀤𑀢𑁆𑀣 𑀪𑀸𑀯𑁄 𑀘𑁆𑀘𑀸𑀳-‘𑀢𑀤𑀢𑁆𑀣𑀪𑀸𑀯𑁄 𑀦𑀸𑀫𑀸’𑀢𑀺𑀆𑀤𑀺, 𑀦𑀺𑀫𑀺𑀢𑁆𑀢𑀁 𑀬𑀽𑀧𑀸𑀤𑀺𑀯𑀺𑀓𑀢𑀺, 𑀦𑀺𑀫𑀺𑀢𑁆𑀢𑀻𑀤𑀸𑀭𑀼𑀆𑀤𑀺𑀧𑀓𑀢𑀺 𑀢𑀲𑀤𑁆𑀤𑁂𑀦𑀸𑀢𑁆𑀣𑀲𑀤𑁆𑀤𑁂𑀦 𑀘 𑀕𑀳𑀺𑀢𑀸, 𑀢𑁂𑀲𑀁 𑀲𑀫𑁆𑀩𑀦𑁆𑀥𑁄 𑀢𑀤𑀢𑁆𑀣𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀢𑀤𑀢𑁆𑀣𑀪𑀸𑀯𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄, 𑀳𑁂𑀢𑀼 𑀳𑁂𑀢𑀼𑀫𑀦𑁆𑀢𑀪𑀸𑀯𑀮𑀓𑁆𑀔𑀡𑁄 𑀲𑀫𑁆𑀩𑀦𑁆𑀥𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀧𑀥𑀸𑀦𑀸𑀯𑀘𑁆𑀙𑁂𑀤𑀕𑀼𑀡𑀲𑁆𑀫𑀸𑀢𑀺 𑀯𑀺𑀥𑀻𑀬𑀫𑀸𑀦𑀢𑁆𑀢𑁂𑀦 𑀧𑀥𑀸𑀦𑀲𑁆𑀲 𑀧𑀼𑀭𑀺𑀲𑀲𑁆𑀲 𑀆𑀘𑁆𑀙𑁂𑀤𑀓𑀸 𑀯𑀺𑀲𑁂𑀲𑀓𑀸 𑀕𑀼𑀡𑀸, 𑀬𑀜𑁆𑀳𑀺 𑀯𑀺𑀥𑀻𑀬𑀢𑁂 𑀜𑀸𑀧𑀻𑀬𑀢𑁂 𑀢𑀫𑁆𑀧𑀥𑀸𑀦, 𑀫𑀺𑀢𑀭𑀫𑀧𑁆𑀧𑀥𑀸𑀦𑀫𑀦𑀼𑀯𑀚𑁆𑀚𑀫𑀸𑀦𑀢𑁆𑀢𑀸, 𑀬𑀤𑀸 𑀉𑀧𑀸𑀤𑀻𑀬𑀢𑁂𑀢𑀺 𑀯𑀢𑁆𑀯𑀸 𑀉𑀧𑀸𑀤𑀻𑀬𑀫𑀸𑀦𑀧𑁆𑀧𑀓𑀸𑀭𑀁 𑀤𑀺𑀝𑁆𑀞𑀦𑁆𑀢𑁂𑀦 𑀨𑀼𑀝𑀬𑀺𑀢𑀼𑀫𑀸𑀳-‘𑀬𑀣𑀸’𑀇𑀘𑁆𑀘𑀸𑀤𑀺, 𑀬𑀽𑀧𑁄 𑀦𑀺𑀫𑀺𑀢𑁆𑀢𑀁 𑀬𑀲𑁆𑀲 𑀤𑀸𑀭𑀼𑀦𑁄 𑀢𑀁 𑀢𑀣𑀸 𑀯𑀼𑀢𑁆𑀢𑀁 𑀦𑀸𑀜𑁆𑀜𑀦𑀺𑀫𑀺𑀢𑁆𑀢𑀦𑁆𑀢𑀺 𑀬𑀤𑀸 𑀦𑀺𑀫𑀺𑀢𑁆𑀬𑀯𑀘𑁆𑀙𑁂𑀤𑀓𑀢𑁆𑀢𑁂𑀦𑀼𑀧𑀸𑀤𑀻𑀬𑀢𑁂 𑀢𑀤𑀸 𑀦𑀺𑀫𑀺𑀢𑁆𑀢𑀲𑀤𑁆𑀤𑀢𑁄𑀯 𑀘𑀢𑀼𑀢𑁆𑀣𑀻 𑀲𑀫𑁆𑀩𑀦𑁆𑀥𑁄, 𑀢𑀢𑁄 𑀅𑀜𑁆𑀜𑀦𑀺𑀫𑀺𑀢𑁆𑀢𑀢𑁄, 𑀦𑀺𑀫𑀺𑀢𑁆𑀢𑀦𑀺𑀫𑀺𑀢𑁆𑀢𑀻𑀦𑀁 𑀲𑀫𑁆𑀩𑀦𑁆𑀥𑀲𑁆𑀲 𑀅𑀪𑀺𑀫𑀼𑀔𑀪𑀸𑀯𑁂𑀦 𑀢𑀢𑁆𑀣𑁂𑀯 𑀦𑀺𑀫𑀺𑀢𑁆𑀢𑁂 𑀧𑀯𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀦𑀺𑀫𑀺𑀢𑁆𑀢𑀲𑀤𑁆𑀤𑀢𑁄 𑀳𑁂𑀢𑀼𑀢𑀢𑀺𑀬𑀸𑀧𑀺 𑀦𑀸𑀲𑀗𑁆𑀓𑀦𑀻𑀬𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀓𑀸𑀭𑀡𑀫𑀸𑀳-‘𑀦𑀺𑀫𑀺𑀢𑁆𑀢’ [𑀳𑁂𑀢𑀼] 𑀇𑀘𑁆𑀘𑀸𑀤𑀺. 𑀉𑀪𑀬𑀢𑁆𑀣𑀸𑀢𑀺 𑀬𑀽𑀧𑀸𑀬 𑀧𑀸𑀓𑀸𑀬𑀸𑀢𑀺 𑀉𑀪𑀬𑀢𑁆𑀣.

𑀧𑀺𑀡𑀺𑀬𑀫𑀸𑀦𑀸 𑀓𑀺𑀁 𑀲𑀤𑁆𑀤𑀸𑀤𑀺𑀯𑀘𑀦𑀻𑀬𑀸 𑀧𑀭𑁄 𑀲𑀸𑀤𑀼𑀆𑀤𑀺𑀓𑁄 𑀬𑁄-𑀢𑁆𑀣𑁄 𑀲𑁄 𑀅𑀜𑁆𑀜𑁄 𑀓𑀢𑁆𑀢𑀸 𑀬𑀲𑁆𑀲 𑀲𑁄 𑀅𑀜𑁆𑀜𑀓𑀢𑁆𑀢𑀼𑀓𑁄-𑀪𑀺𑀮𑀸𑀲𑁄, 𑀅𑀪𑀺𑀮𑀸𑀲𑁄 𑀭𑀼𑀘𑀻𑀢𑀺 𑀇𑀫𑀺𑀦𑀸 𑀤𑀺𑀢𑁆𑀬𑀸𑀤𑁆𑀬𑀦𑁂𑀓𑀢𑁆𑀣𑀦𑁆𑀢𑁄𑀧𑀺 𑀭𑀼𑀘𑀺𑀲𑀤𑁆𑀤𑁄-𑀪𑀺𑀮𑀸𑀲𑁂 𑀭𑀼𑀴𑁆𑀳𑁄𑀯 𑀕𑀬𑁆𑀳𑀢𑀻𑀢𑀺 𑀯𑀤𑀢𑀺, 𑀲𑀸 𑀭𑀼𑀘𑀺 𑀅𑀢𑁆𑀣𑁄-𑀪𑀺𑀥𑁂𑀬𑁆𑀬𑁄 𑀬𑁂𑀲𑀁 𑀪𑁂 𑀢𑀤𑀢𑁆𑀣𑀸, 𑀢𑁂𑀲𑀁 𑀲𑀫𑁆𑀩𑀦𑁆𑀥𑀺𑀦𑁄 𑀧𑀺𑀡𑀺𑀬𑀫𑀸𑀦𑀲𑁆𑀲, 𑀇𑀫𑀺𑀦𑀸 𑀘 𑀓𑀺𑀜𑁆𑀘𑀸𑀧𑀺 𑀭𑀼𑀘𑀺𑀭𑀬𑀁 𑀬𑀲𑁆𑀲𑀼𑀧𑁆𑀧𑀚𑁆𑀚𑀢𑁂𑀬𑁄 𑀯𑀸 𑀢𑀲𑁆𑀲𑀸 𑀚𑀦𑀓𑁄, 𑀢𑁂𑀲𑀫𑀼𑀪𑀺𑀦𑁆𑀦𑀫𑁆𑀧𑀺 𑀅𑀢𑁆𑀣𑀺, 𑀢𑀣𑀸𑀧𑀺 𑀬𑀲𑁆𑀲𑀼𑀧𑁆𑀧𑀚𑁆𑀚𑀢𑁂 𑀲𑁄𑀯 𑀢𑀲𑁆𑀲𑀸𑀥𑀺𑀓𑀭𑀡𑀁, 𑀅𑀚𑀦𑀓𑁄𑀧𑀺 𑀲𑁄 𑀢𑀸𑀬 𑀲𑀁𑀲𑀢𑁆𑀢𑁄𑀢𑀺 𑀢𑀲𑁆𑀲𑁂𑀯 𑀧𑀺𑀡𑀺𑀬𑀫𑀸𑀦𑀲𑁆𑀲 𑀲𑀫𑁆𑀧𑀤𑀸𑀦𑀲𑀜𑁆𑀜𑀸, 𑀦𑀢𑀼𑀚𑀦𑀓𑀲𑁆𑀲 𑀢𑀸𑀬𑀸𑀲𑀁𑀲𑀢𑁆𑀢𑀲𑁆𑀲𑀸𑀢𑀺 𑀤𑀻𑀧𑁂𑀢𑀺, 𑀇𑀥𑀸𑀢𑀺 𑀇𑀫𑀺𑀦𑀸 𑀲𑀓𑁆𑀓𑀢𑁂 𑀉𑀤𑀸𑀳𑀭𑀡𑀸𑀦𑀫𑀲𑀫𑀸𑀦𑀭𑀽𑀧𑀓𑀁 𑀤𑀲𑁆𑀲𑁂𑀢𑀺, 𑀇𑀫𑀺𑀦𑀸 𑀘 𑀉𑀤𑀸𑀳𑀭𑀡𑀸𑀦𑀫𑀲𑀫𑀸𑀦 𑀭𑀽𑀧𑀢𑁆𑀢𑀫𑁂𑀯 ¶ 𑀘𑀢𑀼𑀢𑁆𑀣𑀻𑀯𑀺𑀥𑀸𑀦𑁂 𑀓𑀸𑀭𑀡𑀁, 𑀅𑀜𑁆𑀜𑀣𑀸 𑀙𑀝𑁆𑀞𑀻𑀬𑁂𑀯 𑀢𑁂𑀳𑀺𑀧𑀺 𑀯𑀺𑀥𑀻𑀬𑁂𑀬𑁆𑀬 𑀓𑀸𑀭𑀡𑀸𑀲𑀫𑁆𑀪𑀯𑀸 [𑀓𑀸𑀭𑀡𑀲𑀩𑁆𑀪𑀸𑀯𑀸] 𑀳𑀺 𑀤𑀻𑀧𑁂𑀢𑀺, 𑀈𑀤𑀺𑀲𑀲𑁆𑀲 𑀧𑀘𑁆𑀘𑀼𑀤𑀸𑀳𑀭𑀡(𑀲𑁆𑀲) 𑀪𑀸𑀯𑁂 𑀓𑀸𑀭𑀡𑀫𑀸𑀳-‘𑀅𑀦𑀜𑁆𑀜𑀓𑀢𑁆𑀢𑀼 𑀓𑀢𑁆𑀢𑀸-𑀪𑀺𑀮𑀸𑀲𑀲𑁆𑀲𑀸’𑀢𑀺, 𑀧𑀭𑁂𑀲𑀫𑀺𑀤𑀫𑁆𑀧𑀘𑁆𑀘𑀼𑀤𑀸𑀳𑀭𑀡𑀫𑁆𑀪𑀯𑀢𑀼 𑀇𑀥 𑀓𑀣𑀦𑁆𑀢𑀺 𑀆𑀳-‘𑀇𑀳𑀢𑁆𑀯𑀺’𑀘𑁆𑀘𑀸𑀤𑀺, 𑀢𑁆𑀯𑀦𑁆𑀢𑀺 𑀅𑀢𑁆𑀢𑀫𑀢𑁆𑀢𑁂 𑀧𑀞𑀫𑀸𑀬𑁂𑀯, 𑀲𑀫𑁆𑀪𑀯𑁂 𑀓𑀸𑀭𑀡𑀦𑁆𑀢𑀭𑀫𑀸𑀳-‘𑀅𑀣𑀯𑀸’𑀢𑀺𑀆𑀤𑀺, 𑀦𑀢𑁆𑀣𑀺 𑀅𑀜𑁆𑀜𑁄 𑀓𑀢𑁆𑀢𑀸 𑀬𑀲𑁆𑀲𑀸 𑀲𑀸 𑀅𑀦𑀜𑁆𑀜𑀓𑀢𑁆𑀢𑀼𑀓𑀸 𑀭𑀼𑀘𑀺, 𑀪𑀸𑀬 𑀭𑀼𑀘𑀺𑀬𑀸 𑀲𑀫𑁆𑀩𑀦𑁆𑀥𑀺𑀦𑁄 𑀧𑀺𑀡𑀺𑀬𑀫𑀸𑀦𑀲𑁆𑀲 𑀲𑀫𑁆𑀧𑀤𑀸𑀦𑀲𑀜𑁆𑀜𑀁 𑀬𑁂 𑀧𑀦 𑀇𑀘𑁆𑀙𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀬𑁂 𑀧𑀦 𑀆𑀳𑀼 𑀘𑀸𑀢𑀺𑀲𑀫𑁆𑀩𑀦𑁆𑀥𑁄, 𑀉𑀧𑁆𑀧𑀚𑁆𑀚𑀦𑀫𑀼𑀧𑁆𑀧𑀢𑁆𑀢𑀺, 𑀓𑀲𑁆𑀲 𑀉𑀧𑁆𑀧𑀢𑁆𑀢𑀺, 𑀭𑀼𑀘𑀺𑀬𑀸, 𑀉𑀧𑁆𑀧𑀢𑁆𑀢𑀺𑀬𑀸 𑀆𑀥𑀸𑀭𑁄 𑀉𑀧𑁆𑀧𑀢𑁆𑀬𑀸𑀥𑀸𑀭𑁄‘𑀤𑁂𑀯𑀤𑀢𑁆𑀢𑀸𑀬 𑀭𑁄𑀘𑀢𑁂’𑀘𑁆𑀘𑀸𑀤𑁄 𑀤𑁂𑀯𑀤𑀢𑁆𑀢𑀸𑀤𑀺𑀁 𑀉𑀧𑀮𑀓𑁆𑀔𑁂𑀢𑀻𑀢𑀺 𑀉𑀧𑁆𑀧𑀢𑁆𑀬𑀸𑀥𑀸𑀭𑁄𑀧𑀮𑀓𑁆𑀔𑀡𑀁 𑀯𑀘𑀦𑀁, 𑀏𑀢𑁆𑀣 𑀭𑀼𑀘𑀺𑀬𑀸 𑀉𑀧𑁆𑀧𑀢𑁆𑀬𑀸𑀥𑀸𑀭𑁄𑀧𑀮𑀓𑁆𑀔𑀡𑀫𑁂𑀯 𑀯𑀘𑀦𑀦𑁆𑀢𑀺 𑀲𑀸𑀯𑀥𑀸𑀭𑀡 𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄… 𑀲𑀩𑁆𑀩𑁂𑀲𑀁 𑀯𑀸𑀓𑁆𑀬𑀸𑀦𑀫𑀯𑀥𑀸𑀭𑀡𑀨𑀮𑀢𑁆𑀢𑀸, 𑀢𑁂𑀦 𑀧𑀺𑀡𑀺𑀬 𑀫𑀸𑀦𑀯𑀘𑀦𑀫𑀪𑀺𑀮𑀸𑀲𑀲𑁆𑀲 𑀅𑀜𑁆𑀜𑀓𑀢𑁆𑀢𑀼𑀓𑀢𑀸𑀲𑀦𑁆𑀤𑀲𑁆𑀲𑀦𑀧𑀭𑀁 𑀦 𑀳𑁄𑀢𑀻𑀢𑀺 𑀩𑁆𑀬𑀯𑀘𑁆𑀙𑀺𑀦𑁆𑀦𑀫𑁆𑀪𑀯𑀢𑀺, 𑀢𑁂𑀲𑀁 𑀓𑀘𑁆𑀘𑀸𑀬𑀦𑀲𑁆𑀲 𑀘𑁂𑀳𑀸𑀧𑀺 𑀧𑀲𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀇𑀳𑀸𑀧𑀻𑀢𑀺 𑀢𑁆𑀯𑀫𑀺𑀢𑀺 𑀏𑀢𑁆𑀣𑀸𑀧𑀺, 𑀅𑀜𑁆𑀜𑀣𑀸𑀲𑀺𑀤𑁆𑀥𑀢𑁆𑀢𑀸𑀢𑀺 𑀅𑀢𑁆𑀣𑀫𑀢𑁆𑀢𑁂 𑀧𑀞𑀫𑀸𑀬 𑀏𑀯 𑀲𑀺𑀤𑁆𑀥𑀢𑁆𑀢𑀸, 𑀯𑀘𑀦𑀲𑁆𑀲𑀸𑀢𑀺 𑀉𑀪𑀺𑀦𑁆𑀦𑀫𑁆𑀧𑀺 𑀘𑀢𑀼𑀢𑁆𑀣𑀻𑀯𑀺𑀥𑀸𑀦𑀯𑀘𑀦𑀲𑁆𑀲, 𑀅𑀢𑀺𑀧𑁆𑀧𑀲𑀗𑁆𑀕𑁄𑀘𑀸𑀢𑀺 ‘‘𑀓𑀲𑁆𑀲 𑀯𑀸 𑀢𑁆𑀯𑀁 𑀥𑀫𑁆𑀫𑀁 𑀭𑁄𑀘𑁂𑀲𑀻’’𑀢𑀺𑀆𑀤𑁄 𑀢𑀯𑀸𑀢𑀺 𑀅𑀦𑀪𑀺𑀫𑀢𑀝𑁆𑀞𑀸𑀦𑀧𑁆𑀧𑀢𑁆𑀢𑀺𑀘.

𑀥𑀸𑀭𑀺𑀧𑁆𑀧𑀬𑁄𑀕𑁂𑀢𑀺 𑀥𑀸𑀭𑀺𑀥𑀸𑀢𑀼𑀦𑁄 𑀧𑀬𑁄𑀕𑁂, 𑀉𑀢𑁆𑀢𑀫𑀻𑀡𑁄 𑀅𑀥𑀫𑀻𑀡𑁄𑀢𑀺 𑀥𑀦𑀺𑀓𑀕𑀳𑁂𑀢𑀽𑀦𑀁 𑀭𑀼𑀴𑁆𑀳𑀻𑀢𑁆𑀬𑀸𑀳-‘𑀉𑀢𑁆𑀢𑀫𑀻𑀡𑁄 𑀥𑀦𑀲𑀸𑀫𑀻’𑀢𑀺, 𑀉𑀢𑁆𑀢𑀫𑀻𑀡𑀫𑀲𑁆𑀲𑀸𑀢𑀺 𑀉𑀢𑁆𑀢𑀫𑀻𑀡𑁄, 𑀥𑀸𑀭𑀬𑀢𑀻𑀢𑀺𑀫𑀲𑁆𑀲𑀢𑁆𑀣𑀫𑀸𑀳-‘𑀯𑀳𑀢𑀻’𑀢𑀺, 𑀥𑀸𑀭𑀺𑀢𑁄𑀢𑀺 𑀥𑀸𑀭𑀁𑀥𑀸𑀢𑀼𑀢𑁄. 𑀲𑀼𑀢𑁆𑀢𑀦𑁆𑀢𑀭𑁂𑀦 (𑀢𑀁 𑀢𑀁) 𑀦𑀺𑀬𑀫𑁂𑀦 𑀦𑀺𑀬𑀫𑀺𑀢𑀸𑀦𑀁 𑀢𑁂𑀲𑀁𑀢𑁂𑀲𑀁 𑀲𑀫𑁆𑀧𑀤𑀸𑀦𑀲𑀜𑁆𑀜𑀁 𑀯𑀺𑀥𑀸𑀬 𑀘𑀢𑀼𑀢𑁆𑀣𑀻 𑀯𑀺𑀳𑀺𑀢𑀸 𑀧𑀭𑁂𑀳𑀺, 𑀢𑀤𑀸𑀳 ‘𑀲𑀺𑀮𑀸𑀖 𑀳𑀦𑀼𑀝𑁆𑀞𑀸𑀲𑀧𑀸𑀦’𑀫𑀺𑀘𑁆𑀘𑀸𑀤𑀺, 𑀲𑀩𑁆𑀩𑀢𑁆𑀣 𑀬𑁄𑀕𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀻, 𑀜𑀸𑀧𑁂𑀢𑀼𑀦𑁆𑀢𑀺 𑀲𑀺𑀮𑀸𑀖𑀸𑀤𑀺𑀓𑁂 𑀩𑁄𑀥𑁂𑀢𑀼𑀁, 𑀇𑀘𑁆𑀙𑀺𑀢𑁄𑀢𑀺 𑀅𑀢𑀺𑀫𑀢𑁄. 𑀢𑀤𑀢𑁆𑀣𑀯𑀸𑀘𑀻𑀦𑀜𑁆𑀘 𑀥𑀸𑀢𑀽𑀦𑀁 𑀲𑀗𑁆𑀕𑀳𑀡𑀢𑁆𑀣𑀁 ‘𑀓𑀼𑀥𑀤𑀼𑀳𑀺𑀲𑁆𑀲𑁄𑀲𑀽𑀬𑀢𑁆𑀣𑀸𑀦’𑀦𑁆𑀢𑀺 𑀯𑀼𑀢𑁆𑀢𑀁, 𑀬𑀫𑁆𑀧𑀢𑀺 𑀓𑁄𑀧𑁄𑀢𑀺 𑀇𑀫𑀺𑀦𑀸 𑀓𑁄𑀧𑀲𑁆𑀲 𑀯𑀺𑀲𑀬𑀫𑀸𑀳, 𑀬𑀲𑁆𑀲𑀸𑀢𑀺 𑀇𑀫𑀺𑀦𑀸 𑀬𑀁𑀓𑀸𑀭𑀓𑀦𑁆𑀢𑀺 𑀯𑀼𑀢𑁆𑀢𑀫𑁂𑀯 𑀧𑀭𑀸𑀫𑀲𑀢𑀺, 𑀬𑀲𑁆𑀲𑀸𑀢𑀺 𑀭𑀸𑀚𑀸𑀤𑀺𑀦𑁄, 𑀧𑀼𑀘𑁆𑀙𑀢𑀻𑀢𑀺 𑀧𑀼𑀘𑁆𑀙𑀺𑀬𑀢𑁂 ¶ , 𑀢𑁂𑀦𑁂𑀯 𑀯𑀓𑁆𑀔𑀢𑀺-‘𑀬𑀲𑁆𑀲 𑀲𑀫𑁆𑀩𑀦𑁆𑀥𑀺𑀁 𑀲𑀼𑀪𑀸𑀲𑀼𑀪𑀁 𑀧𑀼𑀘𑁆𑀙𑀢𑀺 𑀦𑁂𑀫𑀺𑀢𑁆𑀢𑀺𑀓𑁄’𑀢𑀺, 𑀬𑁄𑀘𑀸𑀦𑀼𑀓𑀽𑀮𑀢𑁆𑀢𑀫𑁆𑀪 𑀚𑀢𑀻𑀢𑀺 𑀇𑀫𑀺𑀦𑀸 𑀇𑀤𑀁 𑀤𑀲𑁆𑀲𑁂𑀢𑀺 ‘‘𑀧𑀢𑀺𑀧𑀼𑀩𑁆𑀩𑀓𑁄 𑀆𑀧𑀼𑀩𑁆𑀩𑀓𑁄𑀘 𑀲𑀼𑀡𑁄𑀢𑀺 𑀅𑀩𑁆𑀪𑀼𑀧𑀕𑀫𑁂 𑀧𑀝𑀺𑀚𑀸𑀦𑀦𑁂𑀘 𑀯𑀢𑁆𑀢𑀢𑁂, 𑀬𑀤𑀸𑀬𑀫𑀩𑁆𑀪𑀼𑀧𑀕𑀫𑁄 𑀧𑀢𑁆𑀣𑀦𑀸 𑀧𑀼𑀩𑁆𑀩𑀢𑁄 𑀪𑀯𑀢𑀺 𑀢𑀤𑀸 𑀧𑀢𑁆𑀣𑀦𑀸𑀬 𑀓𑀢𑁆𑀢𑀼 𑀧𑀢𑁆𑀣𑀬𑀺𑀢𑀼𑀦𑁄 𑀘𑀢𑀼𑀢𑁆𑀣𑀻 𑀭𑀽𑀧𑀫𑁆𑀪𑀯𑀢𑀺, 𑀬𑀤𑀸𑀢𑁆𑀯𑀧𑀢𑁆𑀣𑀢𑀫𑁆𑀧𑀺 𑀓𑁂𑀯𑀮𑀫𑀸𑀦𑀼𑀓𑀽𑀮𑁆𑀬𑁂𑀦 𑀯𑀢𑁆𑀢𑀫𑀸𑀦𑀁𑀤𑀺𑀲𑁆𑀯𑀸 𑀤𑁂𑀬𑁆𑀬𑀫𑀩𑁆𑀪𑀼𑀧𑀕𑀘𑁆𑀙𑀦𑁆𑀢𑀺 𑀇𑀤𑀫𑀺𑀤𑀁 𑀯𑁄𑀤𑀲𑁆𑀲𑀸𑀫𑀸𑀢𑀺 [𑀓𑁄𑀧𑀺𑀲𑁆𑀲𑀲𑀸𑀫𑀸𑀢𑀺 (𑀧𑁄𑀢𑁆𑀣𑀓𑁂)] 𑀢𑀤𑀸𑀦𑀼𑀓𑀽𑀮𑁆𑀬𑁂𑀦 𑀧𑀯𑀢𑁆𑀢𑀦𑀲𑀗𑁆𑀔𑀸𑀢𑀸𑀬 𑀓𑀺𑀭𑀺𑀬𑀸𑀬 𑀓𑀢𑁆𑀢𑀼𑀦𑁄 𑀘𑀢𑀼𑀢𑁆𑀣𑀻𑀭𑀽𑀧𑀫𑁆𑀪𑀯𑀢𑀻’’𑀢𑀺, 𑀇𑀫𑀺𑀦𑀸 𑀘 𑀧𑀸𑀡𑀺𑀦𑀺𑀬𑀯𑀼𑀢𑁆𑀢𑀺𑀓𑀸𑀭𑀲𑁆𑀲 𑀚𑀬𑀸𑀤𑀺𑀘𑁆𑀘𑀲𑁆𑀲𑀫𑀢𑁂 𑀩𑁆𑀬𑀪𑀺𑀘𑀸𑀭𑀫𑀸𑀳, 𑀲𑁄 𑀳𑀺 ‘‘𑀅𑀩𑁆𑀪𑀼𑀧𑀕𑀫𑁄 𑀦𑀸𑀫 𑀧𑀭𑁂𑀦 𑀧𑀢𑁆𑀣𑀺𑀢𑀲𑁆𑀲 𑀪𑀯𑀢𑀺 𑀢𑀢𑁆𑀣 𑀧𑀢𑁆𑀣𑀬𑀺𑀢𑀼𑀬𑁂𑀯 𑀘𑀢𑀼𑀢𑁆𑀣𑀻𑀭𑀽𑀧𑀫𑁆𑀪𑀯𑀢𑀻’’𑀢𑀺 𑀯𑀤𑀢𑀺, 𑀧𑀼𑀩𑁆𑀩𑀲𑁆𑀲𑀸𑀓𑀺𑀭𑀺𑀬𑀸𑀬 𑀬𑁄 𑀓𑀢𑁆𑀢𑀸𑀢𑀺 𑀯𑁂𑀤𑀯𑀸𑀓𑁆𑀬𑁂𑀦 𑀯𑀺𑀳𑀺𑀢𑀣𑀼𑀢𑀺𑀓𑀓𑀭𑀡 𑀲𑀗𑁆𑀔𑀸𑀢𑀸𑀬 𑀉𑀲𑁆𑀲𑀸𑀳𑀸𑀦𑀼𑀚𑀸𑀦𑀦𑀢𑁄 𑀧𑀼𑀩𑁆𑀩𑀪𑀽𑀢𑀸𑀬 𑀓𑀺𑀭𑀺𑀬𑀸𑀬 𑀬𑁄 𑀓𑀢𑁆𑀢𑀸 𑀳𑁄𑀢𑀸 𑀧𑁄𑀢𑀸 𑀘, 𑀲𑀩𑁆𑀩𑀢𑁆𑀣𑀸𑀧𑀺‘𑀢𑀲𑁆𑀲𑀸’𑀢𑀺 𑀇𑀤𑀁 ‘𑀘𑀢𑀼𑀢𑁆𑀣𑀻𑀬𑀸𑀬𑀤𑀪𑀺𑀫𑀢𑀁 𑀭𑀽𑀧’𑀦𑁆𑀢𑀺𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀙𑀝𑁆𑀞𑀺𑀬𑀸 𑀲𑀩𑁆𑀩𑀩𑁆𑀬𑀸𑀧𑀺𑀪𑀸𑀯𑀫𑀸𑀮𑀫𑁆𑀩 𑀏𑀯𑀦𑁆𑀢𑀺 𑀅𑀢𑀺𑀤𑁂𑀲𑁄𑀢𑀺 𑀆𑀳 ‘𑀏𑀯𑀦𑁆𑀢𑀻’𑀢𑀺𑀆𑀤𑀺, 𑀭𑀽𑀧𑀲𑀸𑀫𑁆𑀬𑀢𑁄 𑀧𑀦 𑀢𑀸𑀤𑀢𑁆𑀣𑀺𑀬𑀢𑁆𑀣𑀲𑀩𑁆𑀪𑀸𑀯𑀸𑀘 𑀬𑀣𑀸𑀬𑁄𑀕𑀁 𑀢𑀸𑀤𑀢𑁆𑀣𑁆𑀳 𑀘𑀢𑀼𑀢𑁆𑀣𑀻𑀧𑀺 𑀦 𑀯𑀺𑀭𑀼𑀚𑁆𑀛𑀢𑀺, 𑀯𑀓𑁆𑀔𑀢𑀺 𑀳𑀺‘𑀢𑀸𑀤𑀢𑁆𑀣𑁆𑀳 𑀯𑀘𑀦𑀺𑀘𑁆𑀙𑀸𑀬𑀦𑁆𑀢𑀼 ‘𑀇𑀘𑁆𑀘𑀸𑀤𑀺𑀦𑀸, 𑀇𑀘𑁆𑀙𑀺𑀢𑁄 𑀭𑀸𑀚𑀸, 𑀓𑀫𑁆𑀫 𑀯𑀘𑀦𑀺𑀘𑁆𑀙𑀸𑀢𑀺 𑀇𑀫𑀺𑀦𑀸 𑀯𑀘𑀦𑀺𑀘𑁆𑀙𑀸𑀬 𑀧𑀥𑀸𑀦𑀢𑁆𑀢𑀫𑀸𑀳… 𑀯𑀘𑀦𑀺𑀘𑁆𑀙𑀸𑀪𑀺𑀫𑀼𑀔𑀢𑁆𑀢𑀸 𑀲𑀩𑁆𑀩𑁂𑀲𑀁 𑀓𑀸𑀭𑀓𑀸𑀦𑀁, 𑀅𑀧𑁆𑀧𑀘𑀼𑀭𑀧𑁆𑀧𑀬𑁄𑀕𑀢𑁆𑀢𑀸𑀢𑀺 𑀅𑀩𑀳𑀼𑀧𑁆𑀧𑀬𑁄𑀕𑀢𑁆𑀢𑀸, 𑀳𑀦𑀼𑀢𑁂 𑀅𑀧𑀦𑀬𑀢𑀺, 𑀉𑀧𑀢𑀺𑀝𑁆𑀞𑀢𑁂 𑀉𑀧𑀝𑁆𑀞𑀸𑀦𑀁 𑀉𑀧𑀕𑀫𑀦𑀁 𑀓𑀭𑁄𑀢𑀺, 𑀧𑀺𑀳𑀬𑀦𑁆𑀢𑀺 𑀧𑀢𑁆𑀣𑁂𑀦𑁆𑀢𑀺, 𑀓𑀼𑀚𑁆𑀛 𑀅𑀫𑀭𑀺𑀲𑀁 𑀓𑀭𑁄𑀢𑀺, 𑀤𑀼𑀳𑀦𑀸𑀤𑀬𑁄 𑀓𑁄𑀧𑀧𑁆𑀧𑀪𑀯𑀸 𑀦𑀸𑀦𑀦𑁆𑀢𑀭𑁂𑀦 𑀢𑁂 𑀲𑀫𑁆𑀪𑀯𑀦𑁆𑀢𑀻𑀢𑀺 𑀤𑀽𑀪𑀸𑀤𑀬𑁄𑀧𑁆𑀬𑀼𑀤𑀸𑀳𑀝𑀸 ‘‘𑀩𑁆𑀬𑀜𑁆𑀚𑀦𑁂 𑀤𑀻𑀖𑀭𑀲𑁆𑀲𑀸’’𑀢𑀺 (𑁧-𑁩𑁩) 𑀭𑀲𑁆𑀲𑁂 𑀅𑀧𑀭𑀚𑁆𑀛𑀸𑀫𑀺, 𑀇𑀲𑁆𑀲𑀬𑀦𑁆𑀢𑀺 𑀦𑀲𑀳𑀦𑁆𑀢𑀺, 𑀆𑀭𑀚𑁆𑀛𑀢𑀺 𑀧𑀼𑀘𑁆𑀙𑀺𑀢𑁄 𑀦𑁂𑀫𑀺𑀢𑁆𑀢𑀺𑀓𑁄 𑀉𑀧𑀧𑀭𑀺𑀓𑁆𑀔𑀢𑀺, 𑀪𑀸𑀤𑀢𑁆𑀣𑁆𑀳𑀁 𑀯𑀺𑀪𑀸𑀯𑁂𑀢𑀺 ‘𑀬𑀲𑁆𑀲𑁂’𑀘𑁆𑀘𑀸𑀤𑀺𑀦𑀸, 𑀧𑀭𑀺𑀬𑀸 𑀮𑁄𑀘𑁂𑀢𑀺 𑀉𑀧𑀧𑀭𑀺𑀓𑁆𑀔𑀢𑀺, 𑀓𑀺𑀁 𑀮𑀓𑁆𑀔𑀡𑁄-𑀬𑀫𑀦𑀺𑀬𑀫𑁄𑀘𑁆𑀘𑀸𑀳-‘𑀦𑀸𑀯𑀲𑁆𑀲’𑀫𑀺𑀘𑁆𑀘𑀸𑀤𑀺, 𑀬𑀸𑀘𑀺𑀢𑀼𑀲𑁆𑀫𑀸𑀬𑁂𑀯 [𑀬𑀸𑀘𑀺𑀢𑀼𑀬𑁂𑀯 (𑀧𑁄𑀢𑁆𑀣𑀓𑁂)] 𑀙𑀝𑁆𑀞𑀻𑀢𑀺 𑀦𑀸𑀯𑀲𑁆𑀲𑀫𑀬𑀦𑁆𑀦𑀺𑀬𑀫𑁄𑀢𑀺 𑀅𑀢𑁆𑀣𑁄, 𑀓𑀼𑀢𑁄𑀘𑁆𑀘𑀸𑀳-‘𑀲𑀫𑁆𑀩𑀦𑁆𑀥𑁂’𑀘𑁆𑀘𑀸𑀤𑀺, 𑀅𑀜𑁆𑀜𑀲𑁆𑀫𑀸𑀧𑀻𑀢𑀺 𑀅𑀬𑀸𑀘𑀺𑀢𑀼𑀢𑁄𑀅𑀧𑀺, 𑀣𑀼𑀢𑀺𑀓𑀭𑀡𑀲𑁆𑀲 𑀓𑀢𑁆𑀢𑀼𑀪𑀽𑀢𑀸 𑀳𑁄𑀢𑀸𑀧𑁄𑀢𑀸𑀭𑁄 𑀉𑀲𑁆𑀲𑀸𑀳𑀦𑀸𑀦𑀼𑀚𑀸𑀦𑀦𑀸𑀦𑀁 𑀓𑀫𑁆𑀫𑀁 𑀳𑁄𑀢𑀻𑀢𑀺 𑀆𑀳-‘𑀧𑀘𑁆𑀘𑀦𑀼𑀧𑀼𑀩𑁆𑀩𑀲𑁆𑀲 𑀕𑀺𑀡𑀸𑀢𑀺𑀲𑁆𑀲 𑀓𑀫𑁆𑀫𑁂’𑀢𑀺. 𑀳𑁄𑀢𑀼𑀧𑁄𑀢𑀼𑀲𑀤𑁆𑀤𑁂𑀳𑀺𑀘𑁆𑀘𑀸𑀤𑀺𑀦𑀸 ¶ 𑀧𑁄𑀢𑀼𑀲𑀤𑁆𑀤𑀲𑁆𑀲𑀧𑀺 𑀙𑀝𑁆𑀞𑀺𑀭𑀽𑀧𑀁 𑀤𑀲𑁆𑀲𑀺𑀢𑀁, 𑀯𑀼𑀢𑁆𑀢𑀺𑀬𑀦𑁆𑀢𑀼 ‘𑀳𑁄𑀢𑀼 𑀧𑀢𑀺𑀕𑀺𑀡𑀸𑀢𑀺’𑀘𑁆𑀘𑁂𑀯 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀳𑁄𑀢𑁆𑀯𑁂𑀯𑀫𑁆𑀧𑀺𑀢𑁆𑀬𑀫𑁆𑀳𑀸𑀓𑀫𑀢𑁆𑀭𑁄𑀧𑁂𑀓𑁆𑀔𑀸, 𑀉𑀲𑁆𑀲𑀸𑀳𑀬𑀢𑀻𑀢𑁆𑀬𑀢𑁆𑀣𑁂 𑀕𑀺𑀡𑀸𑀢𑀺 𑀅𑀦𑁆𑀢𑁄𑀕𑀢𑀡𑁆𑀬𑀢𑁆𑀣𑁄. 𑀅𑀦𑀸𑀯𑀸𑀤𑁄𑀢𑀺 𑀦𑀸𑀯𑀸𑀅𑀦𑁆𑀦𑀸𑀤𑀺𑀯𑀚𑁆𑀚𑀺𑀢𑁂. 𑀏𑀢𑁆𑀣 𑀧𑀦 𑀢𑀣𑀸 𑀧𑀝𑀺𑀲𑁂𑀥𑀸𑀪𑀸𑀯𑁂𑀧𑀺 𑀩𑀳𑀼𑀮𑀸𑀥𑀺𑀓𑀸𑀭𑀢𑁄 ‘𑀦 𑀢𑀁 𑀦𑀸𑀯𑀫𑁆𑀫𑀜𑁆𑀜𑁂 𑀦𑀢𑀁 𑀅𑀦𑁆𑀦𑀫𑁆𑀫𑀜𑁆𑀜𑁂’𑀘𑁆𑀘𑀸𑀤𑀺 𑀪𑀯𑀢𑀺, 𑀅𑀢𑁆𑀣𑁂𑀯 𑀳𑀺 𑀩𑀳𑀼𑀮𑀸𑀥𑀺𑀓𑀸𑀭𑀢𑁄𑀯𑀸 𑀢𑀺𑀧𑁆𑀧𑀲𑀗𑁆𑀕𑀸𑀪𑀸𑀯𑁄, 𑀧𑀞𑀫𑀦𑁆𑀢𑀁 𑀭𑀽𑀧𑀦𑁆𑀢𑀺 𑀫𑀜𑁆𑀜𑀫𑀸𑀦𑁄𑀢𑀺 𑀧𑀞𑀫𑀦𑁆𑀢𑀁 𑀭𑀽𑀧𑀁, 𑀏𑀢𑁆𑀣𑀘 𑀬𑀤𑀸 𑀢𑀺𑀡𑀸𑀤𑀺𑀢𑁄𑀧𑀺 𑀔𑀺𑀓𑀁𑀲𑀻𑀬𑀢𑁂 𑀢𑀤𑀸 𑀦𑀺𑀦𑁆𑀤𑀸𑀯𑀕𑀫𑁄, 𑀢𑀢𑁆𑀣 𑀘 𑀦𑀺𑀬𑁄𑀕𑀢𑁄𑀯 𑀦𑀜𑁆𑀧𑀬𑁄𑀕𑁄 𑀜𑀸𑀣𑀸𑀦𑀼𑀧 𑀧𑀢𑁆𑀢𑀺𑀬𑀸𑀢𑀺 𑀲𑀧𑁆𑀧𑀝𑀺𑀲𑁂𑀥𑀫𑀼𑀤𑀸𑀳𑀝𑀁 ‘𑀦 𑀫𑀜𑁆𑀜𑀫𑀸𑀦𑁄’𑀢𑀺, 𑀅𑀯𑀥𑀺𑀫𑁆𑀳𑀺𑀬𑁂𑀯 𑀧𑀜𑁆𑀘𑀫𑀻𑀢𑀺𑀡𑀸𑀢𑀺, 𑀦𑀜𑁆𑀧𑀬𑁄𑀕𑁂𑀯 𑀦𑀺𑀬𑁄𑀕𑀢𑁄 𑀦𑀺𑀦𑁆𑀤𑀸𑀯𑀕𑀫𑀸 𑀢𑀺𑀡𑀦𑁆𑀢𑀺 𑀓𑀫𑁆𑀫𑁂𑀬𑁂𑀯 𑀤𑀼𑀢𑀺𑀬𑀸, 𑀅𑀣𑀯𑀸 𑀲𑀢𑀻𑀧𑀺 𑀦𑀺𑀦𑁆𑀤𑀸𑀯𑀕𑀫𑁂 𑀯𑀘𑀦𑀺𑀘𑁆𑀙𑀸𑀢𑁄 𑀲𑀯𑀺𑀲𑀬𑁂𑀬𑁂𑀯 𑀤𑀼𑀢𑀺𑀬𑀸, 𑀲𑀫𑁆𑀫𑀼𑀢𑀺𑀧𑁆𑀧𑀬𑁄𑀕𑁂𑀢𑀺 𑀲𑀫𑁆𑀫𑀼𑀢𑀺𑀲𑀤𑁆𑀤𑀲𑁆𑀲 𑀧𑀬𑁄𑀕𑁂, 𑀘𑀢𑀼𑀢𑁆𑀣𑀺𑀁 𑀇𑀘𑁆𑀙𑀦𑁆𑀢𑀻𑀢𑀺 𑀫𑀢𑁆𑀢𑀸𑀬𑀸𑀢𑀺 𑀏𑀢𑁆𑀣 𑀘𑀢𑀼𑀢𑁆𑀣𑀺𑀁 𑀇𑀘𑁆𑀙𑀦𑁆𑀢𑀺, 𑀧𑀼𑀦 𑀭𑀼𑀢𑁆𑀢𑀢𑁆𑀢𑁂 𑀓𑀸𑀭𑀡𑀫𑀸𑀳-‘𑀅𑀣 𑀲𑁄𑀢𑀺𑀯𑀺𑀚𑁆𑀚𑀫𑀸𑀦𑀢𑁆𑀢𑀸’𑀢𑀺, 𑀘𑀡𑁆𑀟𑀲𑁆𑀲 𑀓𑀼𑀓𑁆𑀓𑀼𑀭𑀲𑁆𑀲𑀸𑀢𑀺𑀆𑀤𑀺𑀲𑀼𑀢𑁆𑀢𑁂 ‘‘𑀅𑀣 𑀲𑁄’’𑀢𑀺 𑀧𑀸𑀞𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 ‘𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬𑀸’𑀢𑀺 𑀏𑀢𑁆𑀣 𑀲𑁄𑀓𑀸𑀭𑁄 𑀧𑀼𑀦𑀭𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀘𑀕𑁆𑀕𑀳𑀡𑁂𑀦𑀸𑀢𑀺 ‘‘𑀲𑀺𑀮𑀸𑀖𑀳𑀦𑀼…𑀧𑁂… 𑀲𑀢𑁆𑀢𑀫𑁆𑀬𑀢𑁆𑀣𑁂𑀲𑀼𑀘𑀸’’𑀢𑀺 𑀲𑀼𑀢𑁆𑀢𑁂 𑀘𑀕𑁆𑀕𑀳𑀡𑁂𑀦, 𑀘𑀢𑀼𑀢𑁆𑀣𑀻𑀪𑀺𑀫𑀢𑀸𑀢𑀺 ‘‘𑀦𑀫𑁄 𑀬𑁄𑀕𑀸𑀤𑀺𑀲𑁆𑀯𑀧𑀺𑀘𑀸’’𑀢𑀺 𑀲𑀼𑀢𑁆𑀢𑁂𑀦.

𑀅𑀯𑀥𑀻𑀬𑀢𑁂 𑀯𑀺𑀲𑀺𑀮𑀺𑀲𑁆𑀲𑀢𑁂 𑀏𑀢𑀲𑁆𑀫𑀸𑀢𑁆𑀬𑀯𑀥𑀺, 𑀅𑀯𑀧𑀼𑀩𑁆𑀩𑀸𑀬 𑀥𑀸𑀥𑀸𑀢𑀼𑀢𑁄 𑀅𑀯𑀥𑀺𑀫𑁆𑀳𑀺‘‘𑀤𑀸𑀥𑀸𑀢𑁆𑀯𑀻’’𑀢𑀺 (𑁫-𑁪𑁫) 𑀇.

𑀬𑀢𑁄-𑀯𑀥𑀻𑀬𑀢𑁂 𑀓𑀺𑀜𑁆𑀘𑀺, 𑀓𑁆𑀭𑀺𑀬𑀸𑀧𑀼𑀩𑁆𑀩𑀁 𑀓𑀼𑀢𑁄𑀘𑀺𑀧𑀺;

𑀘𑀮𑀜𑁆𑀘𑀸𑀘𑀮𑀫𑀜𑁆𑀜𑀜𑁆𑀘, 𑀢𑀁 𑀯𑀤𑀦𑁆𑀢𑁆𑀬 𑀯𑀥𑀺𑀫𑁆𑀩𑀼𑀥𑀸.

𑀏𑀢𑁆𑀣𑀸𑀬𑀫𑀢𑁆𑀣𑁄 ‘‘𑀬𑀢𑁄𑀓𑀼𑀢𑁄𑀘𑀺𑀧𑀺 𑀅𑀢𑁆𑀣𑁄 𑀓𑀺𑀜𑁆𑀘𑀺 𑀯𑀢𑁆𑀣𑀼𑀅𑀯𑀥𑀻𑀬𑀢𑁂 𑀲𑀁𑀬𑁄𑀕𑀲𑁆𑀲 𑀯𑀸 𑀓𑀺𑀭𑀺𑀬𑀸𑀦𑀺𑀫𑀺𑀢𑁆𑀢𑀁 𑀕𑀫𑀦𑀤𑀸𑀦𑀸𑀤𑀺𑀓𑀺𑀭𑀺𑀬𑀸𑀧𑀼𑀩𑁆𑀩𑀁 𑀯𑀺𑀲𑀺𑀮𑀺𑀲𑁆𑀲𑀢𑁂 𑀲𑀬𑀁 𑀯𑀸 𑀅𑀧𑁂𑀢𑀺 𑀅𑀜𑁆𑀜𑁂𑀦 𑀯𑀸 𑀯𑀺𑀲𑀼𑀁 𑀓𑀭𑀻𑀬𑀢𑁂, 𑀢𑀫𑁂𑀯𑀁𑀯𑀺𑀥𑀁 𑀘𑀮𑀜𑁆𑀘𑀸 𑀘𑀮𑀜𑁆𑀘 𑀯𑀺𑀲𑀺𑀮𑁂𑀲𑀧𑀭𑀺𑀘𑁆𑀙𑁂𑀤𑀪𑀽𑀢𑀁 𑀧𑀤𑀢𑁆𑀣𑀫𑀯𑀥𑀺𑀁 𑀯𑀤𑀦𑁆𑀢𑀺 𑀩𑀼𑀥𑀸 𑀢𑀩𑁆𑀩𑀺𑀤𑀼𑀦𑁄’’𑀢𑀺, 𑀢𑀁 𑀬𑀣𑀸 𑀥𑀸𑀯𑀢𑀸𑀲𑁆𑀲𑀸 𑀧𑀼𑀭𑀺𑀲𑁄 𑀧𑀢𑀢𑀺, 𑀧𑀼𑀭𑀺𑀲𑀁 𑀧𑀸𑀢𑁂𑀢𑀺 𑀯𑀸, 𑀭𑀼𑀓𑁆𑀔𑀸 𑀧𑀡𑁆𑀡𑀁 ¶ 𑀧𑀢𑀢𑀺, 𑀧𑀡𑁆𑀡𑀁 𑀧𑀸𑀢𑁂𑀢𑀺 𑀯𑀸𑀢𑀺, 𑀲𑁄𑀘 𑀢𑀺𑀥𑀸𑀧𑁆𑀬𑀼𑀘𑁆𑀘𑀢𑁂 𑀯𑀺𑀲𑀬𑀪𑁂𑀤𑁂𑀦, 𑀬𑀣𑀸𑁋

𑀦𑀺𑀤𑁆𑀤𑀺𑀝𑁆𑀞𑀯𑀺𑀲𑀬𑁄 𑀓𑁄𑀘𑀺, 𑀉𑀧𑀸𑀢𑁆𑀢𑀯𑀺𑀲𑀬𑁄 𑀢𑀣𑀸;

𑀅𑀦𑀼𑀫𑁂𑀬𑁆𑀬𑀯𑀺𑀲𑀬𑁄 𑀘𑀸𑀢𑀺, 𑀢𑀺𑀥𑀸𑀯𑀥𑀺 𑀲𑀫𑀻𑀭𑀺𑀢𑁄𑀢𑀺.

𑀢𑀢𑁆𑀣 𑀦𑀺𑀤𑁆𑀤𑀺𑀝𑁆𑀞𑀸 𑀯𑀘𑀦𑁄𑀧𑀦𑀻𑀢𑀸 𑀓𑀺𑀭𑀺𑀬𑀸 𑀯𑀺𑀲𑀬𑁄 𑀬𑀢𑁆𑀣 𑀲𑁄 𑀦𑀺𑀤𑁆𑀤𑀺𑀝𑁆𑀞 𑀯𑀺𑀲𑀬𑁄 𑀯𑀥𑀺, 𑀬𑀣𑀸-‘𑀕𑀸𑀫𑀲𑁆𑀫𑀸 𑀆𑀕𑀢𑁄’𑀢𑀺, 𑀉𑀧𑀸𑀢𑁆𑀢𑀸𑀚𑁆𑀛𑀸𑀳𑀝𑀸 𑀓𑀺𑀭𑀺𑀬𑀸 𑀯𑀺𑀲𑀬𑁄 𑀬𑀢𑁆𑀣 𑀲𑁄 𑀉𑀧𑀸𑀢𑁆𑀢𑀯𑀺𑀲𑀬𑁄, 𑀬𑀣𑀸-‘𑀯𑀮𑀸𑀳𑀓𑀸 𑀯𑀺𑀚𑁆𑀚𑁄𑀢𑀢𑁂’𑀢𑀺, 𑀯𑀮𑀸𑀳𑀓𑀸 𑀦𑀺𑀓𑁆𑀔𑀫𑁆𑀫 𑀯𑀺𑀚𑁆𑀚𑁄𑀪𑀢𑁂𑀢𑀺 𑀅𑀢𑁆𑀣𑁄, 𑀅𑀦𑀼𑀫𑁂𑀬𑁆𑀬𑀸 𑀓𑀺𑀭𑀺𑀬𑀸 𑀯𑀺𑀲𑀬𑁄 𑀬𑀢𑁆𑀣 𑀲𑁄 𑀅𑀦𑀼𑀫𑁂𑀬𑁆𑀬𑀯𑀺𑀲𑀬𑁄, 𑀬𑀣𑀸‘𑀫𑀸𑀣𑀼𑀭𑀸 𑀧𑀸𑀝𑀮𑀺𑀧𑀼𑀢𑁆𑀢𑀓𑁂𑀳𑀺 𑀅𑀪𑀺𑀭𑀽𑀧𑀢𑀭𑀸’𑀢𑀺, 𑀏𑀢𑁆𑀣 𑀅𑀪𑀺𑀭𑀽𑀧𑀕𑀼𑀡𑁂𑀦 𑀉𑀓𑁆𑀓𑀁𑀲𑀦𑀫𑀦𑀼𑀫𑁂𑀬𑁆𑀬𑀁, 𑀅𑀢𑁄𑀬𑁂𑀯𑁂𑀢𑁆𑀣𑀸𑀬𑀫𑁂𑀯 𑀲𑀜𑁆𑀜𑀸 𑀧𑀭𑀺𑀧𑁆𑀨𑀼𑀝𑀸 𑀯𑀺𑀜𑁆𑀜𑀸𑀬𑀢𑀻𑀢𑀺 𑀦 𑀓𑀸𑀘𑀺𑀤𑀺𑀳 𑀲𑀜𑁆𑀜𑀸 𑀧𑀭𑀺𑀪𑀸𑀲𑀻𑀬𑀢𑁂 𑀩𑁆𑀬𑀸𑀫𑁄𑀳𑀓𑀸𑀭𑀺𑀡𑀻, 𑀅𑀣𑀸𑀯𑀥𑀺𑀲𑁆𑀫𑀸𑀢𑀺 𑀯𑀼𑀘𑁆𑀘𑀫𑀸𑀦𑁂 ‘𑀧𑀤𑀢𑁆𑀣𑀸𑀯𑀥𑀺𑀲𑁆𑀫𑀸’𑀢𑀺 𑀓𑀼𑀢𑁄-𑀯𑀲𑀻𑀬𑀢𑁂 𑀬𑁂𑀦𑁂𑀯𑀁 𑀯𑀺𑀯𑀭𑀡𑀁 𑀓𑀢𑀦𑁆𑀢𑁆𑀬𑀸𑀲𑀗𑁆𑀓𑀺𑀬𑀸𑀳-𑀧𑀤𑀸𑀦’𑀫𑀺𑀘𑁆𑀘𑀸𑀤𑀺. 𑀬𑀣𑀸 𑀕𑀸𑀫𑀲𑁆𑀫𑀸𑀢𑀺𑀆𑀤𑀺𑀦𑀸 𑀇𑀤𑀁 𑀤𑀻𑀧𑁂𑀢𑀺 ‘‘𑀦 𑀓𑁂𑀯𑀮𑀁 𑀓𑀸𑀬𑀲𑀁𑀲𑀕𑁆𑀕𑀧𑀼𑀩𑁆𑀩𑀓𑁄𑀯 𑀯𑀺𑀲𑀺𑀮𑁂𑀲𑁄, 𑀓𑀺𑀜𑁆𑀘𑀭𑀳𑀺 𑀩𑀼𑀤𑁆𑀥𑀺𑀲𑀁𑀲𑀕𑁆𑀕𑀧𑀼𑀩𑁆𑀩𑀓𑁄𑀧𑀺, 𑀅𑀢𑁆𑀣𑀺 𑀘𑁂𑀳 𑀩𑀼𑀤𑁆𑀥𑀺𑀲𑀁𑀲𑀕𑁆𑀕 𑀧𑀼𑀩𑁆𑀩𑀓𑁄, 𑀢𑀣𑀸𑀳𑀺 𑀘𑁄𑀭𑁂𑀳𑀺 𑀪𑀸𑀬𑀢𑀺𑀢𑁆𑀬𑀸𑀤𑁄 𑀬𑁄 (𑀪𑀬)𑀧𑁂𑀓𑁆𑀔𑀡 𑀲𑀻𑀮𑁄 𑀪𑀯𑀢𑀺, 𑀲𑁄 𑀬𑀤𑀺 𑀫𑀁 𑀘𑁄𑀭𑀸 𑀧𑀲𑁆𑀲𑁂𑀬𑁆𑀬𑀼𑀁, 𑀥𑀼𑀯𑀁 𑀫𑁂 𑀫𑀭𑀡𑀦𑁆𑀢𑀺 𑀯𑀺𑀘𑀸𑀭𑁂𑀦𑁆𑀢𑁄 𑀢𑁂 𑀩𑀼𑀤𑁆𑀥𑀺𑀬𑀸 𑀧𑀧𑁆𑀧𑁄𑀢𑀺 𑀧𑀧𑁆𑀧𑀼𑀬𑁆𑀬 𑀘 𑀢𑀢𑁄 𑀦𑀺𑀯𑀢𑁆𑀢𑀢𑁂, 𑀢𑀣𑀸 𑀘𑁄𑀭𑁂𑀳𑀺 𑀢𑀸𑀬𑀢𑀺𑀢𑁆𑀬𑀸𑀤𑁄 𑀬𑁄 𑀏𑀓𑀲𑁆𑀲 𑀫𑀺𑀢𑁆𑀢𑁄 𑀪𑀯𑀢𑀺 𑀲𑁄 𑀬𑀤𑁆𑀬𑁂𑀢𑀁 𑀘𑁄𑀭𑀸 𑀧𑀲𑁆𑀲𑁂𑀬𑁆𑀬𑀼𑀁 𑀥𑀼𑀯𑀫𑀲𑁆𑀲 𑀫𑀭𑀡𑀦𑁆𑀢𑀺 𑀧𑀲𑁆𑀲𑀦𑁆𑀢𑁄 𑀢𑁂 𑀩𑀼𑀤𑁆𑀥𑀺𑀬𑀸 𑀧𑀢𑁆𑀯𑀸 𑀢𑀢𑁄 𑀦𑀺𑀯𑀢𑁆𑀢𑀬𑀢𑀻𑀢𑁆𑀬𑀯𑀥𑀺𑀢𑁆𑀢𑀸 𑀅𑀯𑀥𑀺𑀲𑁆𑀫𑀸𑀯 𑀲𑀩𑁆𑀩𑀢𑁆𑀣 𑀧𑀜𑁆𑀘𑀫𑀻’’𑀢𑀺, 𑀧𑀭𑁂𑀳𑀺 𑀧𑀦 𑀏𑀢𑀸𑀤𑀺𑀲𑁂𑀲𑀼 𑀲𑀩𑁆𑀩𑀢𑁆𑀣 𑀧𑀝𑀺𑀧𑀢𑁆𑀢𑀼𑀯𑀺𑀲𑁂𑀲𑀸𑀦𑀼𑀕𑁆𑀕𑀳𑀸𑀬 𑀲𑀼𑀢𑁆𑀢𑁂𑀳𑁂𑀯 𑀧𑀧𑀜𑁆𑀘𑁄 𑀓𑀢𑁄, 𑀇𑀥 𑀧𑀦 𑀲𑀸𑀫𑀜𑁆𑀜𑀯𑀘𑀦𑁂𑀦𑁂𑀯 𑀲𑀺𑀤𑁆𑀥𑀢𑁆𑀢𑀸 𑀢𑀤𑀦𑀼𑀕𑁆𑀕𑀳𑀸𑀬 𑀉𑀤𑀸𑀳𑀭𑀡𑁂𑀳𑁂𑀯 𑀧𑀧𑀜𑁆𑀘𑀺𑀢𑀁, 𑀪𑀻𑀢𑀺𑀪𑀸𑀬𑀦𑀢𑁆𑀣𑀸𑀦𑀦𑁆𑀢𑀺 𑀪𑀻𑀢𑀺 𑀢𑀸𑀬𑀦𑀸𑀦𑀁 𑀅𑀢𑁆𑀣𑁄 𑀬𑁂𑀲𑀁 𑀢𑁂 𑀪𑀻𑀢𑀺𑀢𑀸𑀬𑀦𑀢𑁆𑀣𑀸 𑀢𑁂𑀲𑀦𑁆𑀢𑀺 𑀅𑀢𑁆𑀣𑁄, 𑀦𑀦𑀼 𑀪𑀻𑀢𑁆𑀬𑀢𑁆𑀣𑀸𑀦𑀁 𑀧𑀬𑁄𑀕𑁂 𑀪𑀬𑀳𑁂𑀢𑀼 𑀲𑀫𑁆𑀪𑀯𑀢𑀺 𑀦𑀢𑀼 𑀢𑀸𑀬𑀦𑀢𑁆𑀣𑀸𑀦𑀦𑁆𑀢𑀺, 𑀦𑁂𑀲 𑀤𑁄𑀲𑁄, 𑀢𑀸𑀬𑀦𑀜𑁆𑀳𑀺 𑀭𑀓𑁆𑀔𑀦𑀫𑀼𑀘𑁆𑀘𑀢𑁂 [𑀲𑀸𑀬𑀦𑀸𑀳𑀺 𑀭𑀓𑁆𑀔𑀦𑀫𑀼𑀧𑁆𑀧𑀚𑁆𑀚𑀪𑁂 (𑀧𑁄𑀢𑁆𑀣𑀓𑁂)] 𑀢𑀜𑁆𑀘 𑀪𑀬𑀳𑁂𑀢𑀼𑀢𑁄 𑀯𑁂𑀢𑁆𑀬𑀸𑀳-‘𑀬𑁄 ¶ 𑀪𑀬𑀳𑁂𑀢𑀼’𑀢𑀺𑀆𑀤𑀺, 𑀇𑀫𑀺𑀦𑀸 𑀘 ‘‘𑀪𑀻𑀢𑁆𑀬𑀢𑁆𑀣𑀸𑀦𑀁 𑀪𑀬𑀳𑁂𑀢𑀼’’𑀢𑀺 (𑁧-𑁪-𑁨𑁫) 𑀧𑀸𑀡𑀺𑀦𑀺𑀬𑀸𑀦𑀫𑀧𑀸𑀤𑀸𑀦𑀲𑀜𑁆𑀜𑀸 𑀲𑀼𑀢𑁆𑀢𑀫𑁆𑀧𑀝𑀺𑀓𑁆𑀔𑀺𑀧𑀢𑀺, 𑀢𑀢𑁄𑀢𑀺 𑀪𑀬𑀳𑁂𑀢𑀼𑀢𑁄, 𑀢𑁂𑀲𑀦𑁆𑀢𑀺 𑀪𑀬𑀢𑀸𑀬𑀦𑀸𑀦𑀁, 𑀪𑀬𑀫𑀦𑀺𑀝𑁆𑀞𑀧𑀸𑀢𑀲𑀗𑁆𑀓𑀸, 𑀉𑀢𑁆𑀢𑀸𑀲𑁄𑀢𑁆𑀬𑀢𑁆𑀣𑁄, 𑀢𑀸𑀬𑀦 𑀫𑀦𑀺𑀝𑁆𑀞𑀧𑀸𑀢𑀢𑁄 𑀧𑀭𑀺𑀭𑀓𑁆𑀔𑀦𑀁, 𑀬𑀣𑀸 𑀤𑀲𑁆𑀲𑀦𑀁 𑀳𑁄𑀦𑁆𑀢𑁂𑀯𑀸𑀢𑀻𑀫𑀺𑀦𑀸 𑀯𑀘𑀦𑀺𑀘𑁆𑀙𑀸𑀬𑁂𑀯 𑀧𑀥𑀸𑀦𑀢𑁆𑀢𑀫𑀸𑀳, 𑀓𑁄 𑀳𑀺 𑀮𑁄𑀓𑀺𑀬𑀁 𑀯𑀘𑀦𑀺𑀘𑁆𑀙𑀫𑀢𑀺𑀯𑀢𑁆𑀢𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀣𑀸𑀳𑀺 𑀲𑀩𑁆𑀩𑁂𑀯 𑀤𑀩𑁆𑀩𑀸𑀤𑀬𑁄 𑀲𑀩𑁆𑀩𑀓𑀸𑀭𑀓𑀲𑀢𑁆𑀢𑀺𑀬𑀼𑀢𑁆𑀢𑀸𑀯, 𑀢𑀢𑁆𑀣𑀸𑀬𑀁 𑀓𑀸𑀭𑀓𑀯𑀺𑀪𑀸𑀕𑁄 𑀯𑀘𑀦𑀺𑀘𑁆𑀙𑀸𑀯𑀲𑁂𑀦𑁂𑀯, 𑀢𑀁 𑀬𑀣𑀸 ‘𑀯𑀮𑀸𑀳𑀓𑁄 𑀯𑀺𑀚𑁆𑀚𑁄𑀢𑀢𑁂, 𑀯𑀮𑀸𑀳𑀓𑁂𑀦 𑀯𑀺𑀚𑁆𑀚𑁄𑀢𑀢𑁂, 𑀯𑀮𑀸𑀳𑀓𑁂 𑀯𑀺𑀚𑁆𑀚𑁄𑀢𑀢𑁂’𑀢𑀺. 𑀧𑀭𑀸𑀧𑀼𑀩𑁆𑀩𑀲𑁆𑀲𑀸𑀢𑀺𑀆𑀤𑀺𑀦𑀸 ‘‘𑀧𑀭𑀸𑀚𑀺𑀲𑁆𑀲𑀸𑀲𑀬𑁆𑀳𑁄’’𑀢𑀺 (𑁧-𑁪-𑁨𑁬) 𑀲𑀜𑁆𑀜𑀸𑀲𑀼𑀢𑁆𑀢𑀁 𑀧𑀘𑁆𑀘𑀓𑁆𑀔𑀸𑀢𑀺, 𑀅𑀲𑀬𑁆𑀳𑁄 𑀅𑀢𑁆𑀣𑁄𑀢𑀺 𑀲𑀳𑀺𑀢𑀼𑀁 𑀅𑀪𑀺𑀪𑀯𑀺𑀢𑀼𑀫𑀲𑀫𑀢𑁆𑀣𑁄 𑀅𑀢𑁆𑀣𑁄, 𑀅𑀚𑁆𑀛𑁂𑀦𑀲𑀓𑀸𑀲𑀸𑀇𑀘𑁆𑀘𑀸𑀤𑀺𑀦𑀸 𑀉𑀤𑀸𑀳𑀭𑀡𑀢𑁆𑀣𑀫𑀸𑀘𑀺𑀓𑁆𑀔𑀢𑀺, 𑀦𑀦𑀼𑀘𑁂𑀯𑀫𑀢𑁆𑀣𑀁 𑀯𑀤𑀢𑀸 𑀬𑀜𑁆𑀜𑀤𑀢𑁆𑀢𑀲𑁆𑀲𑀸𑀲𑀬𑁆𑀳𑀢𑁆𑀢𑀁 𑀯𑀼𑀢𑁆𑀢𑀁, 𑀢𑀁 𑀓𑀣𑀁 𑀅𑀚𑁆𑀛𑀬𑀦𑀲𑁆𑀲𑀸𑀲𑀬𑁆𑀳𑀢𑁆𑀢𑀁, 𑀬𑁂𑀦𑀸𑀲𑀬𑁆𑀳𑀢𑁆𑀢𑀲𑁆𑀲𑀸𑀯𑀥𑀺𑀢𑁆𑀢𑀁 𑀧𑀝𑀺𑀧𑀸𑀤𑀬𑀢𑀺 𑀢𑁆𑀬𑀸𑀲𑀗𑁆𑀓𑀺𑀬𑀸𑀳-‘𑀬𑀜𑁆𑀜𑀤𑀢𑁆𑀢𑀸𑀦𑀪𑀺𑀪𑀯𑁄’𑀘𑁆𑀘𑀸𑀤𑀺, 𑀅𑀲𑀬𑁆𑀳𑁄𑀢𑀻𑀫𑀲𑁆𑀲 𑀧𑀘𑁆𑀘𑀼𑀤𑀸𑀳𑀭𑀡𑀁 𑀧𑀝𑀺𑀧𑀸𑀤𑀬𑀢𑀺 ‘𑀬𑁄 𑀧𑀦𑀺’𑀘𑁆𑀘𑀸𑀤𑀺. ‘‘𑀯𑀸𑀭𑀡𑀢𑁆𑀣𑀸𑀦𑀫𑀺𑀘𑁆𑀙𑀺𑀢𑁄’’𑀢𑀺 (𑁧-𑁪-𑁨𑁭) 𑀲𑀼𑀢𑁆𑀢𑀺𑀢𑀁, 𑀢𑀤𑀸𑀳 ‘𑀯𑀸𑀭𑀡𑀢𑁆𑀣𑀸𑀦’𑀫𑀺𑀘𑁆𑀘𑀸𑀤𑀺, 𑀯𑀸𑀭𑀡𑀫𑀢𑁆𑀣𑁄 𑀬𑁂𑀲𑀁 𑀢𑁂 𑀯𑀸𑀭𑀡𑀢𑁆𑀣𑀸, 𑀅𑀯𑀥𑀺𑀫𑀢𑁆𑀢𑀯𑀘𑀦𑀺𑀘𑁆𑀙𑀸𑀬𑀦𑁆𑀢𑀺 𑀯𑀺𑀲𑁂𑀲𑀢𑁄 𑀯𑀺𑀥𑀸𑀦𑀫𑀦𑁆𑀢𑀭𑁂𑀦𑀸 𑀯𑀥𑀺𑀫𑀢𑁆𑀢 𑀯𑀘𑀦𑀺𑀘𑁆𑀙𑀸𑀬𑀁, 𑀯𑀺𑀲𑁂𑀲𑀯𑀺𑀥𑀸𑀦𑁂𑀢𑀺 𑀇𑀘𑁆𑀙𑀺𑀢𑁄𑀢𑀺 𑀯𑀺𑀲𑁂𑀲𑀯𑀺𑀥𑀸𑀦𑁂, 𑀘𑀺𑀢𑁆𑀢𑀲𑁆𑀲𑀸𑀯𑀥𑀺𑀯𑀘𑀦𑀺𑀘𑁆𑀙𑀸𑀬𑀫𑁆𑀧𑀦 𑀘𑀺𑀢𑁆𑀢𑀢𑁄 𑀧𑀸𑀧𑀁 𑀦𑀺𑀯𑀸𑀭𑀬𑁂𑀢𑀺 𑀪𑀯𑀢𑀺. ‘‘𑀭𑀓𑁆𑀔𑀦𑀢𑁆𑀣𑀸𑀦𑀫𑀺𑀘𑁆𑀙𑀺𑀢’’𑀦𑁆𑀢𑀺 (𑁨-𑁬-𑁩) 𑀲𑀼𑀢𑁆𑀢𑀺𑀢𑀁, 𑀢𑀤𑀸𑀳-‘𑀭𑀓𑁆𑀔𑀦𑀢𑁆𑀣𑀸𑀦’𑀫𑀺𑀘𑁆𑀘𑀸𑀤𑀺, 𑀓𑁂𑀲𑀜𑁆𑀘𑀻𑀢𑀺 𑀓𑀘𑁆𑀘𑀸𑀬𑀦𑀸𑀤𑀺𑀓𑁂 𑀤𑀲𑁆𑀲𑁂𑀢𑀺. ‘‘𑀅𑀦𑁆𑀢𑀭𑀥𑀸𑀦𑁂 𑀬𑁂𑀦𑀸𑀤𑀲𑁆𑀲𑀦𑀫𑀺𑀘𑁆𑀙𑀢𑀻’’𑀢𑀺 (𑁧-𑁪-𑁨𑁮) 𑀲𑀜𑁆𑀜𑀸𑀲𑀼𑀢𑁆𑀢𑀫𑀸𑀭𑀤𑁆𑀥𑀁, 𑀢𑀤𑀸𑀳-‘𑀅𑀦𑁆𑀢𑀭𑀥𑀸𑀦𑁂’𑀘𑁆𑀘𑀸𑀤𑀺, 𑀅𑀬𑀫𑀼𑀧𑀚𑁆𑀛𑀸𑀬𑁄 𑀬𑀤𑀺 𑀫𑀁 𑀧𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀤𑀲𑁆𑀲𑀦𑁂 𑀤𑁄𑀲𑀁 𑀢𑀓𑁆𑀓𑁂𑀢𑀺 ‘𑀦𑀼𑀦’𑀫𑀺𑀘𑁆𑀘𑀸𑀤𑀺𑀦𑀸, 𑀧𑁂𑀲𑀦𑀫𑀲𑀓𑁆𑀓𑀸𑀭𑀧𑀼𑀩𑁆𑀩𑀓𑁄 𑀦𑀺𑀬𑁄𑀕𑁄, 𑀅𑀚𑁆𑀛𑁂𑀲𑀦𑀁 𑀲𑀓𑁆𑀓𑀸𑀭𑀧𑀼𑀩𑁆𑀩𑀓𑁄, 𑀫𑀜𑁆𑀜𑀫𑀸𑀦𑁄 𑀲𑀺𑀲𑁆𑀲𑀸 𑀅𑀳𑀁 𑀓𑀣𑀦𑁆𑀦𑀸𑀫 𑀩𑁆𑀬𑀯𑀳𑀺𑀢𑁄 𑀪𑀯𑀸𑀫𑀻𑀢𑀺 𑀅𑀦𑁆𑀢𑀭𑀥𑀸𑀦𑁂 𑀩𑁆𑀬𑀯𑀥𑀸𑀦 𑀦𑀺𑀫𑀺𑀢𑁆𑀢𑀁, 𑀬𑁂𑀦 𑀅𑀢𑁆𑀢𑀦𑁄 𑀅𑀤𑀲𑁆𑀲𑀦𑀫𑀺𑀘𑁆𑀙𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀅𑀦𑁆𑀢𑀭𑀥𑀸𑀦𑁂𑀢𑀺 𑀦𑀺𑀫𑀺𑀢𑁆𑀢𑀲𑀢𑁆𑀢𑀫𑀻𑀘𑀸𑀬𑀁, 𑀅𑀢𑁄 𑀆𑀳-‘𑀩𑁆𑀬𑀯𑀥𑀸𑀦𑀦𑀺𑀫𑀺𑀢𑁆𑀢’𑀦𑁆𑀢𑀺, 𑀩𑁆𑀬𑀯𑀳𑀺𑀢𑁄𑀢𑀺 𑀅𑀦𑁆𑀢𑀭𑀳𑀺𑀢𑁄, 𑀫𑀸𑀫𑀁 𑀉𑀧𑀚𑁆𑀛𑀸𑀬𑁄𑀢𑁆𑀬𑀸𑀤𑀺𑀦𑀸 𑀉𑀤𑀸𑀳𑀭𑀡𑀢𑁆𑀣𑀫𑀸𑀳, 𑀩𑁆𑀬𑀯𑀥𑀸𑀦𑀢𑁆𑀣𑀁 𑀩𑁆𑀬𑀯𑀳𑀺𑀢𑀢𑁆𑀣𑀁, ‘‘𑀅𑀦𑁆𑀢𑀭𑀥𑀸𑀦𑁂𑀢𑀺 𑀓𑀺𑀁 𑀘𑁄𑀭𑁂 𑀦 𑀤𑀺𑀤𑀺𑀓𑁆𑀔𑀢𑀻’’𑀢𑀺 𑀧𑀘𑁆𑀘𑀼𑀤𑀸𑀳𑀝𑀁 ¶ 𑀧𑀭𑁂𑀳𑀺, 𑀢𑀫𑁆𑀧𑀝𑀺𑀧𑀸𑀤𑀬𑀫𑀸𑀳-‘𑀬𑀢𑁆𑀣𑀸𑀤𑀲𑁆𑀲𑀦’𑀫𑀺𑀘𑁆𑀘𑀸𑀤𑀺, 𑀘𑁄𑀭𑁂 𑀦 𑀤𑀺𑀤𑀺𑀓𑁆𑀔𑀢𑀻 (𑀢𑁆𑀬), 𑀢𑁆𑀭 𑀳𑀺 𑀬𑁄 𑀘𑁄𑀭𑁂 𑀦 𑀤𑀺𑀤𑀺𑀓𑁆𑀔𑀢𑀺 𑀢𑁂𑀳𑀺 𑀅𑀢𑁆𑀢𑀦𑁄 𑀅𑀤𑀲𑁆𑀲𑀦𑀫𑀺𑀘𑁆𑀙𑀢𑀻𑀢𑀺 𑀦 𑀅𑀦𑁆𑀢𑀭𑀥𑀸𑀦𑀦𑀺𑀫𑀺𑀢𑁆𑀢𑀁, 𑀓𑀺𑀦𑁆𑀢𑀼𑀧𑀖𑀸𑀢𑀦𑀺𑀯𑀢𑁆𑀬𑀢𑁆𑀣𑀁, 𑀓𑀺𑀦𑁆𑀢𑀼𑀧𑀖𑀸𑀢𑀦𑀺𑀯𑀢𑁆𑀢𑀺𑀬𑀸𑀢𑀺 𑀏𑀯𑀁 𑀫𑀜𑁆𑀜𑀢𑁂 ‘‘𑀦𑀸𑀢𑁆𑀭𑀸𑀦𑁆𑀢𑀭𑀥𑀸𑀦𑀫𑁂 (𑀯𑀸𑀯𑀲𑁂𑀬𑀁), 𑀓𑀺𑀦𑁆𑀢𑀼 𑀢𑀦𑁆𑀦𑀺𑀫𑀺𑀢𑁆𑀢𑁄 𑀧𑀖𑀸𑀢𑀦𑀺𑀯𑀢𑁆𑀢𑀺𑀧𑀺, ‘𑀉𑀧𑀚𑁆𑀛𑀸𑀬𑀸 𑀅𑀦𑁆𑀢𑀭𑀥𑀸𑀬𑀢𑀻’𑀢𑁆𑀬𑀢𑁆𑀭 𑀯𑀺𑀦𑀸𑀧𑁆𑀬𑀼𑀧𑀖𑀸𑀢𑀲𑀫𑁆𑀪𑀯𑀫𑀦𑁆𑀢𑀭𑀥𑀸𑀦𑀲𑀫𑁆𑀧𑀸𑀤𑀦𑀫𑁂𑀯 𑀲𑀫𑁆𑀪𑀯𑀢𑀻’’𑀢𑀺. 𑀇𑀘𑁆𑀙𑀢𑀺𑀕𑁆𑀕𑀳𑀡𑀁 𑀓𑀺𑀫𑀢𑁆𑀣𑀁 𑀅𑀤𑀲𑁆𑀲𑀦𑀺𑀘𑁆𑀙𑀸𑀬𑀁 𑀲𑀢𑀺 𑀲𑀢𑁆𑀬𑀧𑀺 𑀤𑀲𑁆𑀲𑀦𑁂 𑀬𑀣𑀸𑀲𑀺𑀬𑀸’’𑀢𑀺 𑀯𑀼𑀢𑁆𑀢𑀁, (𑀢𑀁) 𑀧𑀝𑀺𑀧𑀸𑀤𑀬𑀫𑀸𑀳-‘𑀅𑀤𑀲𑁆𑀲𑀦𑀺𑀘𑁆𑀙𑀸𑀬𑀫𑁆𑀧𑀦𑀺’𑀘𑁆𑀘𑀸𑀤𑀺, 𑀲𑀢𑀻𑀧𑀺 𑀤𑀲𑁆𑀲𑀦𑁂𑀢𑀺 𑀉𑀧𑀚𑁆𑀛𑀸𑀬𑁂𑀦 𑀤𑀲𑁆𑀲𑀦𑁂 𑀲𑀢𑀻𑀧𑀺, 𑀢𑀢𑁄𑀢𑀺 𑀉𑀧𑀚𑁆𑀛𑀸𑀬𑀢𑁄, 𑀅𑀯𑀥𑀺𑀭𑀽𑀧𑀢𑀸 𑀏𑀯𑀸𑀢𑀺 𑀉𑀧𑀚𑁆𑀛𑀸𑀬𑀲𑁆𑀲𑀸𑀯𑀥𑀺𑀭𑀽𑀧𑀢𑀸 𑀏𑀯. ‘‘𑀆𑀔𑁆𑀬𑀸𑀢𑁄 𑀧𑀬𑁄𑀕𑁂’’𑀢𑀺 (𑁧-𑁪-𑁨𑁯) 𑀧𑀭𑀯𑀘𑀦𑀁, 𑀢𑀤𑀸𑀳 ‘𑀉𑀧𑀬𑁄𑀕𑁂’𑀘𑁆𑀘𑀸𑀤𑀺, 𑀦𑀺𑀬𑀫𑀧𑀼𑀩𑁆𑀩𑀓𑀁 𑀯𑀺𑀚𑁆𑀚𑀸𑀕𑀳𑀡𑀫𑀼𑀧𑀬𑁄𑀕𑁄 𑀢𑁆𑀭𑀸𑀥𑀺𑀧𑁆𑀧𑁂𑀢𑁄, 𑀉𑀧𑀬𑁄𑀕𑀯𑀘𑀦𑀲𑀸𑀫𑀢𑁆𑀣𑀺𑀬𑀸 𑀯𑀺𑀚𑁆𑀚𑀸𑀕𑀳𑀡𑀢𑁆𑀣𑀁 𑀲𑀺𑀲𑁆𑀲𑀯𑀢𑁆𑀢𑀁 𑀦𑀺𑀬𑀫𑁄, 𑀢𑀢𑁄𑀢𑀺 𑀆𑀔𑁆𑀬𑀸𑀢𑀼𑀢𑁄. ‘‘𑀚𑀦𑀺𑀓𑀢𑁆𑀢𑀼𑀦𑁄 𑀧𑀓𑀢𑀻’’𑀢𑀺 (𑁧-𑁪-𑁩𑁦) 𑀲𑀜𑁆𑀜𑀸𑀲𑀼𑀢𑁆𑀢𑀁 𑀓𑀢𑀁, 𑀢𑀤𑀸𑀳-‘𑀚𑀦𑁆𑀬𑀢𑁆𑀣𑀲𑁆𑀲𑀸’𑀢𑀺𑀆𑀤𑀺, 𑀚𑀦𑀺𑀦𑁄 𑀅𑀢𑁆𑀣𑁄 𑀚𑀦𑁆𑀬𑀢𑁆𑀣𑁄, 𑀓𑀺𑀦𑁆𑀢𑀁 𑀚𑀦𑀦𑀁, 𑀢𑀢𑁄𑀢𑀺 𑀚𑀦𑀺𑀓𑀢𑁆𑀢𑀼𑀳𑁂𑀢𑀼𑀢𑁄, 𑀧𑀓𑀢𑀺𑀲𑀤𑁆𑀤𑁂𑀦 𑀓𑀸𑀭𑀡𑀫𑀢𑁆𑀢𑀁 𑀕𑀳𑀺𑀢𑀁𑀧𑀭𑁂𑀳𑀺 ‘𑀧𑀼𑀢𑁆𑀢𑀸 𑀧𑀫𑁄𑀤𑀸 𑀚𑀸𑀬𑀢𑁂’𑀘𑁆𑀘𑀸𑀤𑁄 𑀧𑀼𑀢𑁆𑀢𑀸𑀤𑀺𑀢𑁄𑀧𑀺 𑀬𑀣𑀸 𑀲𑀺𑀬𑀸’𑀢𑀺, 𑀤𑀼𑀯𑀺𑀥𑀁 (𑀳𑀺) 𑀓𑀸𑀭𑀡𑀁 𑀉𑀧𑀸𑀤𑀸𑀦𑀓𑀸𑀭𑀡𑀁 𑀲𑀳𑀓𑀸𑀭𑀺𑀓𑀸𑀭𑀡𑀜𑁆𑀘, 𑀢𑀢𑁆𑀣 𑀓𑀸𑀭𑀺𑀬𑁂𑀦𑀸𑀪𑀺𑀦𑁆𑀦𑀤𑁂𑀲𑁄 𑀖𑀝𑀲𑁆𑀲 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑁄 𑀉𑀧𑀸𑀤𑀸𑀦𑀓𑀸𑀭𑀡𑀁, 𑀢𑀲𑁆𑀲𑁂𑀯 𑀧𑀦 𑀤𑀡𑁆𑀟𑀘𑀓𑁆𑀓𑀸𑀤𑀺 (𑀓𑀸𑀭𑀺𑀬𑁂𑀦 𑀪𑀺𑀦𑁆𑀦𑀤𑁂𑀲𑁄) 𑀲𑀳𑀓𑀸𑀭𑀺𑀓𑀸𑀭𑀡𑀁, 𑀢𑁂𑀲𑀽𑀧𑀸𑀤𑀸𑀦𑀓𑀸𑀭𑀡𑀲𑁆𑀲𑁂𑀳 𑀕𑀳𑀡𑁂’𑀲𑀺𑀗𑁆𑀕𑀸 𑀲𑀭𑁄 𑀚𑀸𑀬𑀢𑁂’𑀘𑁆𑀘𑀢𑁆𑀭𑁂𑀯 𑀲𑀺𑀬𑀸, 𑀦 𑀢𑀼 ‘𑀧𑀼𑀢𑁆𑀢𑀸 𑀧𑀫𑁄𑀤𑀸 𑀚𑀸𑀬𑀢𑁂’𑀘𑁆𑀘𑀸𑀤𑁄, 𑀓𑀸𑀭𑀓𑀦𑁆𑀢𑀭𑀯𑀘𑀦𑀺𑀘𑁆𑀙𑀸𑀬𑀦𑁆𑀢𑀺 𑀏𑀢𑁆𑀣 𑀓𑀸𑀭𑀓𑀦𑁆𑀢𑀭𑀸𑀤𑀺𑀯𑀘𑀦𑀺𑀘𑁆𑀙𑀸𑀬𑀦𑁆𑀢𑀺 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁… 𑀏𑀢𑁆𑀣𑀦𑁆𑀢𑀭𑁂 𑀲𑀫𑁆𑀩𑀦𑁆𑀥 𑀯𑀘𑀦𑀺𑀘𑁆𑀙𑀸𑀬𑀧𑀺 𑀲𑀫𑁆𑀪𑀯𑀢𑁄, 𑀢𑀢𑁆𑀭 𑀢𑀺𑀝𑁆𑀞𑀦𑁆𑀢𑀻𑀢𑀺 𑀢𑀢𑁆𑀭𑀝𑁆𑀞𑀸, 𑀢𑁂𑀲𑀁, 𑀮𑁄𑀓𑁄-𑀦𑀜𑁆𑀜𑀣𑀸𑀯𑀸𑀤𑀻 𑀯𑁄𑀳𑀸𑀭𑀺𑀓𑀚𑀦𑁄, 𑀢𑀢𑁆𑀣 𑀪𑀯𑀸 𑀮𑁄𑀓𑀺𑀬𑀸, 𑀦𑀯𑀢𑁆𑀢𑀼 𑀧𑀝𑀺𑀩𑀤𑁆𑀥𑀸𑀢𑀺 𑀮𑁄𑀓𑀯𑀘𑀦𑀺𑀘𑁆𑀙𑀫𑀼𑀮𑁆𑀮𑀗𑁆𑀕𑀺𑀬 𑀅𑀳𑀫𑁂𑀯 𑀯𑀤𑀸𑀫𑀻𑀢𑀺 𑀲𑀓𑀚𑁆𑀛𑀸𑀲𑀬𑁂𑀦 𑀯𑀤𑀦𑁆𑀢𑁄 𑀯𑀢𑁆𑀢𑀸, 𑀢𑀧𑁆𑀧𑀝𑀺𑀩𑀤𑁆𑀥𑀸 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀧𑀪𑀯𑁄 𑀪𑀯𑀢𑀺𑀲𑁆𑀲𑀸’’𑀢𑀺 (𑁧-𑁪-𑁩𑁧) 𑀲𑀼𑀢𑁆𑀢𑀺𑀢𑀁, 𑀢𑀤𑀸𑀳-‘𑀪𑀯𑀢𑀺𑀲𑁆𑀲𑀸’𑀢𑀺𑀆𑀤𑀺, 𑀧𑀞𑀫𑀢𑁄 𑀉𑀧𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑀓𑀣𑀦𑁂𑀦 𑀚𑀦𑁆𑀬𑀢𑁆𑀣𑁄-𑀢𑁆𑀭 𑀦 𑀲𑀫𑁆𑀪𑀯𑀢𑀻𑀢𑀺 𑀯𑀤𑀢𑀺, 𑀦𑀳𑀺 𑀳𑀺𑀫𑀯𑀸 𑀕𑀗𑁆𑀕𑀸𑀬 𑀓𑀸𑀭𑀡𑀁, 𑀲𑀸 𑀳𑀺 𑀅𑀜𑁆𑀜𑁂𑀳𑀺 𑀏𑀯𑀓𑀸𑀭𑀡𑁂𑀳𑀺 𑀉𑀧𑁆𑀧𑀦𑁆𑀦𑀸 ¶ , 𑀳𑀺𑀫𑀯𑀢𑀺 𑀢𑀼 𑀓𑁂𑀯𑀮𑀁 𑀧𑀞𑀫𑀢𑁄 𑀉𑀧𑀮𑀩𑁆𑀪𑀢𑀺. ‘‘𑀚𑀺𑀕𑀼𑀘𑁆𑀙𑀸𑀯𑀺𑀭𑀸𑀫𑀧𑀫𑀸𑀤𑀢𑁆𑀣𑀸𑀦𑀼𑀫𑀼𑀧𑀲𑀗𑁆𑀔𑁆𑀬𑀸𑀦𑀁’’𑀢𑀺 (𑁧-𑁪-𑁨𑁪𑀯𑀸) 𑀯𑀼𑀢𑁆𑀢𑀁, 𑀢𑀤𑀸𑀳-‘𑀯𑀺𑀭𑀫𑀡𑀢𑁆𑀣𑁂’𑀢𑁆𑀬𑀸𑀤𑀺, 𑀚𑀺𑀕𑀼𑀘𑁆𑀙𑀸𑀧𑀫𑀸𑀤𑀢𑁆𑀣𑀥𑀸𑀢𑀼𑀬𑁄𑀕𑁂 𑀧𑀦 𑀓𑀫𑁆𑀫𑀸𑀥𑀺𑀓𑀭𑀡𑀯𑀘𑀦𑀺𑀘𑁆𑀙𑀸 𑀤𑀺𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀁, 𑀅𑀯𑀥𑀺𑀯𑀘𑀦𑀺𑀘𑁆𑀙𑀸𑀧𑀺 𑀧𑀦 𑀤𑀺𑀲𑁆𑀲𑀓𑁂 ‘𑀚𑀺𑀕𑀼𑀘𑁆𑀙𑀢𑀺 𑀦𑀸𑀳𑀺𑀭𑀺𑀓𑁄 𑀧𑀸𑀧𑀸’𑀢𑀺, 𑀥𑀫𑁆𑀫𑀸 𑀧𑀫𑀚𑁆𑀚𑀢𑀻𑀢𑀺𑀧𑀺 𑀳𑁄𑀢𑁂𑀯 𑀧𑀝𑀺𑀲𑁂𑀥𑀸𑀪𑀸𑀯𑀸. ‘‘𑀅𑀜𑁆𑀜𑀸𑀭𑀸𑀤𑀺𑀢𑀭𑀭𑀺𑀢𑁂 𑀤𑀺𑀲𑀸𑀲𑀤𑁆𑀤𑀸𑀜𑁆𑀘𑀼𑀢𑁆𑀢𑀭𑀧𑀤𑀸𑀘𑀸𑀳𑀺 𑀬𑀼𑀢𑁆𑀢𑁂’’𑀢𑀺 (𑁨-𑁩-𑁨𑁯) 𑀲𑀼𑀢𑁆𑀢𑀺𑀢𑀁, 𑀢𑀤𑀸𑀳-‘𑀅𑀜𑁆𑀜𑀲𑀤𑁆𑀤𑀬𑁄𑀕𑁂’𑀘𑁆𑀘𑀸𑀤𑀺, 𑀬𑀢𑁄𑀢𑀺 𑀤𑁂𑀯𑀤𑀢𑁆𑀢𑀸𑀤𑀺𑀢𑁄, ‘‘𑀅𑀜𑁆𑀜𑀇𑀢𑁆𑀬𑀢𑁆𑀣𑀕𑁆𑀕𑀳𑀡𑀁, 𑀢𑁂𑀦 𑀧𑀭𑀺𑀬𑀸𑀬𑀧𑁆𑀧𑀬𑁄𑀕𑁂𑀧𑀺 𑀪𑀯𑀢𑀻’’𑀢𑀺 𑀅𑀜𑁆𑀜𑁂𑀳𑀺 𑀩𑁆𑀬𑀸𑀔𑁆𑀬𑀸𑀢𑀢𑁆𑀢𑀸 𑀆𑀳-‘𑀪𑀺𑀦𑁆𑀦𑁄 𑀤𑁂𑀯𑀤𑀢𑁆𑀢𑀸’𑀢𑀺, 𑀆𑀭𑀸𑀲𑀤𑁆𑀤𑀲𑁆𑀲 𑀤𑀽𑀭𑀢𑁆𑀣𑀢𑁆𑀢𑀸 𑀆𑀲𑀯𑀓𑁆𑀔𑀬𑀢𑁄 𑀆𑀭𑀸 𑀤𑀽𑀭𑁄 𑀪𑀯𑀢𑀻(𑀢𑁆𑀬𑀢𑁆𑀣𑁄 𑀉) 𑀧𑀸𑀤𑀻𑀬𑀢𑁂𑀢𑁆𑀬𑀸𑀳‘𑀆𑀭𑀸𑀲𑀤𑁆𑀤𑁄 𑀤𑀽𑀭𑀢𑁆𑀣𑁄’𑀢𑀺, 𑀦𑀺𑀤𑁆𑀤𑀺𑀲𑁆𑀲𑀫𑀸𑀦𑀧𑀝𑀺𑀬𑁄𑀕𑀻𑀢𑀺 ‘𑀤𑁂𑀯𑀤𑀢𑁆𑀢𑁄 𑀲𑀽𑀭𑁄’𑀢𑀺 𑀦𑀺𑀤𑁆𑀤𑀺𑀲𑁆𑀲𑀫𑀸𑀦𑀲𑁆𑀲 𑀓𑀲𑁆𑀲𑀘𑀺 𑀬𑁄 𑀲𑁄 𑀤𑀼𑀢𑀺𑀬𑁄, 𑀲𑁄 𑀧𑀝𑀺𑀬𑁄𑀕𑀻. 𑀤𑀺𑀲𑀸𑀤𑁂𑀲𑀓𑀸𑀮𑀯𑀼𑀢𑁆𑀢𑀻𑀦𑀁 𑀤𑀺𑀲𑀸𑀲𑀤𑁆𑀤𑀢𑁆𑀢𑁂𑀦 𑀧𑀭𑀺𑀕𑁆𑀕𑀳𑀢𑁄 𑀆𑀳‘𑀤𑀺𑀲𑀸 𑀤𑁂𑀲𑀓𑀸𑀮𑀯𑀸𑀘𑀻𑀦𑀁 𑀬𑁄𑀕𑁂’𑀢𑀺, 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸𑀢𑀺𑀆𑀤𑀻𑀦𑀺 𑀓𑀸𑀮𑀯𑀸𑀘𑀻𑀬𑁄𑀕𑁂 𑀉𑀤𑀸𑀳𑀭𑀡𑀸𑀦𑀺, 𑀅𑀜𑁆𑀘𑀼𑀢𑁆𑀢𑀭𑀧𑀤𑀆𑀘𑀆𑀳𑀺𑀧𑀘𑁆𑀘𑀬𑀬𑁄 𑀕𑁂𑀢𑁆𑀯𑀺𑀳 𑀦𑁄𑀤𑀸𑀳𑀝𑀁. ‘‘𑀧𑀜𑁆𑀘𑀫𑀻𑀯𑀺𑀥𑀸𑀦𑁂 𑀮𑁆𑀬𑀧𑁆𑀮𑁄𑀧𑁂 𑀓𑀫𑁆𑀫𑀦𑁆𑀬𑀼𑀧𑀲𑀗𑁆𑀔𑁆𑀬𑀸𑀦𑀁 ‘‘𑀅𑀥𑀺𑀓𑀭𑀡𑁂 𑀘𑁄𑀧𑀲𑀗𑁆𑀔𑁆𑀬𑀸𑀦’’𑀫𑀺𑀢𑀺 (𑁨-𑁩-𑁨𑁮-𑀯𑀸) 𑀯𑀸𑀢𑁆𑀢𑀺𑀓𑀁, 𑀢𑀤𑀸𑀳‘𑀬𑀢𑁆𑀣’𑀘𑁆𑀘𑀸𑀤𑀺, 𑀮𑁆𑀬𑀧𑁆𑀧𑀘𑁆𑀘𑀬𑀲𑁆𑀲 𑀬𑀢𑁆𑀭𑀸𑀧𑁆𑀧𑀬𑁄𑀕𑁄, 𑀢𑀲𑁆𑀲𑀢𑁆𑀣𑁄 𑀘𑁂 𑀕𑀫𑁆𑀬𑀢𑁂, 𑀲𑁄 𑀮𑁆𑀬𑀧𑁆𑀮𑁄𑀧𑁄, 𑀢𑁆𑀯𑀸𑀮𑁄𑀧𑁄 𑀮𑁆𑀬𑀧𑀮𑁄𑀧𑁄𑀢𑁆𑀬𑀯𑀺𑀲𑁂𑀲𑁄, 𑀧𑀸𑀲𑀸𑀤 𑀫𑀸𑀭𑀼𑀬𑁆𑀳 𑀧𑁂𑀓𑁆𑀔𑀢𑀺 𑀆𑀲𑀦𑁂 𑀉𑀧𑀯𑀺𑀲𑀺𑀢𑁆𑀯𑀸 𑀧𑁂𑀓𑁆𑀔𑀢𑀻𑀢𑀺 𑀇𑀤𑀁 𑀯𑀺𑀲𑀬𑁄 𑀧𑀤𑀲𑁆𑀲𑀦𑀁 𑀧𑀼𑀩𑁆𑀩𑀁 𑀬𑀲𑁆𑀲𑀸𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑁂 𑀲𑀫𑀸𑀲𑁄, 𑀯𑀓𑁆𑀔𑀫𑀸𑀦𑀲𑀩𑁆𑀩𑀤𑀲𑁆𑀲𑀦𑁂𑀲𑀼𑀧𑀺 𑀧𑀸𑀲𑀸𑀤𑀢𑁄-𑀧𑀓𑁆𑀓𑀫𑀦𑀮𑁂𑀲𑀲𑀩𑁆𑀪𑀸𑀯𑀸 𑀧𑀸𑀲𑀸𑀤𑁄 (𑀬𑁂𑀯𑀸) 𑀯𑀥𑀺𑀭𑀽𑀧𑁂𑀦 𑀯𑀢𑁆𑀢𑀼𑀫𑀺𑀝𑁆𑀞𑁄𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘𑀢𑀣𑀸𑀳𑀺’𑀘𑁆𑀘𑀸𑀤𑀺, 𑀅𑀧𑀓𑁆𑀓𑀫𑀢𑀺 𑀢𑀢𑁄 𑀢𑀁 𑀤𑀲𑁆𑀲𑀦𑀦𑁆𑀢𑀺 𑀢𑀢𑁄 𑀧𑀸𑀲𑀸𑀤𑀢𑁄 𑀢𑀲𑁆𑀲 𑀤𑀝𑁆𑀞𑀼𑀦𑁄 𑀤𑀲𑁆𑀲𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀧𑀓𑁆𑀓𑀫𑀢𑁆𑀬𑀧𑀬𑀸𑀢𑀻𑀢𑁆𑀬𑀢𑁆𑀣𑁄, 𑀅𑀯𑀥𑀺𑀪𑀸𑀯𑁄 𑀧𑀸𑀲𑀸𑀤𑀲𑁆𑀲𑀸𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀬𑁂𑀲𑀦𑁆𑀢𑀺 𑀯𑁂𑀲𑁂𑀲𑀺𑀓𑀸𑀦𑀁, 𑀢𑁂 𑀳𑁆𑀬𑁂𑀯𑀫𑀸𑀘𑀺𑀓𑁆𑀔𑀦𑁆𑀢𑀺 ‘‘𑀇𑀦𑁆𑀤𑁆𑀭𑀺𑀬𑁂𑀲𑀼 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀘𑀓𑁆𑀔𑀼𑀕𑁄𑀴𑀓𑀢𑁄-𑀘𑁆𑀘𑀦𑁆𑀢𑀲𑀼𑀔𑀼𑀫𑀪𑀸𑀯𑁂𑀦 𑀦𑀺𑀓𑁆𑀔𑀫𑁆𑀫 𑀯𑀺𑀲𑀸𑀮𑀻𑀪𑀯𑀦𑁆𑀢𑀁 𑀯𑀺𑀲𑀬𑀤𑁂𑀲𑀫𑀼𑀧𑀕𑀫𑁆𑀫 𑀲𑀓𑀮𑀫𑀢𑁆𑀢𑀦𑀸 𑀤𑀺𑀝𑁆𑀞𑀁 𑀧𑀲𑁆𑀲𑀢𑀺 𑀭𑀁𑀲𑀺𑀭𑀽𑀧𑁂𑀦, 𑀬𑀣𑀸 𑀓𑀸𑀳𑀮𑀸 𑀫𑀽𑀮𑁂 𑀓𑀺𑀲𑀸 𑀅𑀕𑁆𑀕𑁂𑀫𑀳𑀢𑀻, 𑀢𑀣𑀸 𑀜𑀸𑀡𑀺𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺, 𑀅𑀥𑀺𑀝𑁆𑀞𑀸𑀦𑀤𑁂𑀲𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀸𑀥𑀺𑀝𑁆𑀞𑀸𑀦𑀪𑀽𑀢𑀁 𑀘𑀓𑁆𑀔𑀼𑀕𑁄𑀴𑀓𑀤𑁂𑀲𑀁, 𑀯𑀺𑀲𑀬𑀧𑁆𑀧𑀯𑀢𑁆𑀢𑀻𑀢𑀺 𑀕𑁄𑀘𑀭𑁂 ¶ 𑀧𑀯𑀢𑁆𑀢𑀺, 𑀲𑀦𑁆𑀢𑀢𑀺𑀬𑀸𑀢𑀺 𑀇𑀦𑁆𑀤𑁆𑀭𑀺𑀬𑀧𑀩𑀦𑁆𑀥𑀲𑁆𑀲, 𑀅𑀥𑀺𑀝𑁆𑀞𑀸𑀦 𑀫𑀦𑀺𑀦𑁆𑀤𑁆𑀭𑀺𑀬𑀁 𑀦𑀸𑀧𑀚𑁆𑀚𑀢𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀢𑀢𑁄𑀢𑀺 𑀧𑀸𑀲𑀸𑀤𑀢𑁄, 𑀅𑀧𑀓𑁆𑀓𑀦𑁆𑀢𑁆𑀬𑀸𑀢𑀺 𑀅𑀧𑀕𑀫𑀦𑁂𑀦, 𑀬𑀚𑁆𑀚𑀧𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀘𑀓𑁆𑀔𑀼𑀕𑁄𑀴𑀓𑀢𑁄 𑀩𑀳𑀺 𑀦𑀺𑀕𑁆𑀕𑀘𑁆𑀙𑀢𑀺, 𑀢𑀣𑀸𑀧𑀺𑀧𑀸𑀲𑀸𑀤𑀝𑁆𑀞𑀲𑁆𑀲𑀘𑀓𑁆𑀔𑀼𑀕𑁄𑀴𑀓𑀸 𑀦𑀺𑀕𑁆𑀕𑀘𑁆𑀙𑀢𑀻𑀢𑀺 𑀧𑀸𑀲𑀸𑀤𑀲𑁆𑀲𑀸𑀧𑁆𑀬𑀯𑀥𑀺𑀪𑀸𑀯𑁄, 𑀬𑁂𑀲𑀦𑁆𑀢𑀽𑀢𑀺 𑀔𑀡𑀺𑀓𑀯𑀸𑀤𑀻𑀦𑀦𑁆𑀢𑀼, 𑀇𑀦𑁆𑀤𑁆𑀭𑀺𑀬𑀸𑀥𑀺𑀝𑁆𑀞𑀸𑀦𑀫𑁆𑀧𑀢𑁆𑀢𑁂 𑀯𑀺𑀲𑀬𑁂 𑀯𑀺𑀜𑁆𑀜𑀸𑀡𑀮𑀓𑁆𑀔𑀡𑀁 𑀓𑀸𑀭𑀺𑀬𑀁 𑀓𑀭𑁄𑀦𑁆𑀢𑀺 𑀲𑀻𑀮𑁂𑀦𑀸𑀢𑀺 𑀧𑀢𑁆𑀢𑀓𑀸𑀭𑀻𑀦𑀺, 𑀅𑀦𑀺𑀦𑁆𑀤𑁆𑀭𑀺𑀬𑀸𑀥𑀺𑀝𑁆𑀞𑀸𑀦𑀤𑁄𑀲𑁄 𑀦𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀢𑀢𑁄𑀢𑀺 𑀧𑀸𑀲𑀸𑀤𑀢𑁄, 𑀬𑁂𑀲𑀫𑁆𑀧𑀦𑀸𑀢𑀺 𑀔𑀡𑀺𑀓𑀯𑀸𑀤𑀺𑀦𑁄𑀯 𑀤𑀲𑁆𑀲𑁂𑀢𑀺, 𑀅𑀢𑁆𑀭 𑀳𑀺 𑀘𑀢𑁆𑀢𑀸𑀭𑁄 𑀧𑀓𑁆𑀔𑀸 𑀧𑀢𑁆𑀢𑀓𑀸𑀭𑀻𑀦𑀺𑀦𑁆𑀤𑁆𑀭𑀺𑀬𑀸𑀦𑀺, 𑀅𑀧𑁆𑀧𑀢𑁆𑀢𑀓𑀸𑀭𑀻𑀦𑀺, 𑀘𑀓𑁆𑀔𑀼𑀲𑁄𑀢𑀸𑀦𑀺 𑀅𑀧𑁆𑀧𑀢𑁆𑀢𑀓𑀸𑀭𑀻𑀦𑀺 𑀲𑁂𑀲𑀸𑀦𑀺 𑀯𑀼𑀢𑁆𑀢𑀯𑀺𑀧𑀭𑀺𑀢𑀸𑀦𑀺, 𑀘𑀓𑁆𑀔𑀼𑀬𑁂𑀯 𑀧𑀢𑁆𑀢𑀓𑀸𑀭𑀻 𑀲𑁂𑀲𑀫𑀜𑁆𑀜𑀣𑁂𑀢𑀺, 𑀘𑀢𑀼𑀲𑁆𑀯𑁂𑀯 𑀢𑁂𑀲𑀼 𑀧𑀞𑀫𑀧𑀓𑁆𑀔𑀤𑁆𑀯𑀬𑀫𑀼𑀧𑀦𑁆𑀬𑀲𑁆𑀬 𑀧𑀝𑀺𑀧𑀸𑀤𑀺𑀢𑀁… 𑀢𑀧𑁆𑀧𑀝𑀺𑀧𑀸𑀤𑀦𑁂𑀦𑁂𑀢𑀭𑁂𑀲𑀫𑁆𑀧𑀺 𑀧𑀝𑀺𑀧𑀸𑀤𑀺𑀢𑀢𑁆𑀢𑀸, 𑀲𑀩𑁆𑀩𑀲𑀸𑀫𑀬𑀺𑀓𑀲𑀸𑀥𑀸𑀭𑀡𑀢𑁆𑀢𑀸𑀲𑀤𑁆𑀤𑀲𑀢𑁆𑀣𑀲𑁆𑀲𑀸𑀢𑀺 𑀇𑀤𑀁 𑀅𑀬𑀼𑀢𑁆𑀢𑀫𑀺𑀯 𑀤𑀺𑀲𑁆𑀲𑀢𑀺… 𑀲𑀤𑁆𑀤𑀲𑀢𑁆𑀣𑀲𑁆𑀲𑀺𑀫𑀲𑁆𑀲 𑀩𑀼𑀤𑁆𑀥𑀯𑀘𑀦𑁄𑀧𑀬𑁄𑀕𑀺𑀢𑁆𑀢𑁂𑀦 𑀲𑁄𑀕𑀢𑀲𑀫𑀬𑀸𑀦𑀼𑀕𑀼𑀡𑀧𑁆𑀧𑀯𑀢𑁆𑀢𑀺𑀢𑁄, 𑀔𑀡𑀺𑀓𑀯𑀸𑀤𑀺𑀦𑁄 𑀧𑀦 𑀦𑀺𑀲𑁆𑀲𑀸𑀬𑁂𑀤𑀁 𑀲𑀼𑀦𑁆𑀤𑀭𑀫𑁂𑀯, 𑀫𑀦𑀲𑀺𑀓𑀸𑀭𑀸𑀤𑀻𑀢𑀺𑀆𑀤𑀺𑀲𑀤𑁆𑀤𑁂𑀦 𑀘𑀓𑁆𑀔𑀼𑀢𑁄 [𑀘𑀓𑁆𑀔𑀼𑀦𑀸 (𑀧𑁄𑀢𑁆𑀣𑀓𑁂)] 𑀅𑀪𑁂𑀤𑁄 𑀭𑀽𑀧𑀸𑀧𑀸𑀣𑀕𑀫𑁄 𑀘 𑀤𑀲𑁆𑀲𑀺𑀢𑁄, 𑀬𑁄𑀕𑁆𑀕𑀤𑁂𑀲𑁂𑀢𑀺 𑀤𑀲𑁆𑀲𑀦𑀬𑁄𑀕𑁆𑀕𑁂 𑀧𑀤𑁂𑀲𑁂. ‘‘𑀧𑀼𑀘𑁆𑀙𑀦𑀸𑀔𑁆𑀬𑀸𑀦𑁂𑀲𑀼 𑀘 𑀧𑀜𑁆𑀘𑀫𑀻 𑀯𑀢𑁆𑀢𑀩𑁆𑀩𑀸’’𑀢𑀺 (𑁨-𑁩-𑁨𑁮𑀯𑀸) 𑀯𑀼𑀢𑁆𑀢𑀁, 𑀢𑀤𑀸𑀳-‘𑀧𑀼𑀘𑁆𑀙𑀦𑀲𑀤𑁆𑀤𑀢𑁄’𑀘𑁆𑀘𑀸𑀤𑀺, 𑀧𑀼𑀘𑁆𑀙𑀦𑀸𑀔𑁆𑀬𑀸𑀦𑁂𑀲𑀼 𑀲𑀸𑀫𑀜𑁆𑀜𑁂𑀦 𑀧𑀜𑁆𑀘𑀫𑀻𑀯𑀺𑀥𑀸𑀦𑁂-𑀢𑀺𑀧𑁆𑀧𑀲𑀗𑁆𑀕𑀁 𑀤𑀲𑁆𑀲𑁂𑀢𑀼𑀫𑀸𑀳-‘𑀅𑀯𑀲𑁆𑀲’𑀫𑀺𑀘𑁆𑀘𑀸𑀤𑀺, 𑀓𑀲𑁆𑀲𑀸𑀢𑀺 𑀧𑀜𑁆𑀳𑁄, 𑀤𑁂𑀯𑀤𑀢𑁆𑀢𑀲𑁆𑀲𑁂𑀢𑁆𑀬𑀸𑀔𑁆𑀬𑀸𑀦𑀁, 𑀓𑁄𑀲𑁄 𑀬𑀜𑁆𑀜 𑀤𑀢𑁆𑀢𑁄𑀢𑀺 𑀧𑀜𑁆𑀳𑁄 𑀯𑀺𑀥𑀺𑀭𑀽𑀧𑁄𑀯𑀸𑀬𑀁, 𑀬𑁄-𑀗𑁆𑀕𑀤𑀻𑀢𑁆𑀬𑀸𑀤𑁆𑀬𑀦𑀼𑀯𑀸𑀤𑀭𑀽𑀧𑀫𑀸𑀔𑁆𑀬𑀸𑀦𑀁, 𑀅𑀗𑁆𑀕𑀤𑀻𑀓𑁂𑀬𑀽𑀭𑀻. ‘‘𑀬𑀢𑁄𑀘𑀸𑀤𑁆𑀥𑀓𑀸𑀮𑀦𑀺𑀫𑁆𑀫𑀸𑀦𑀁 𑀢𑀢𑁄 𑀧𑀜𑁆𑀘𑀫𑀻 𑀯𑀢𑁆𑀢𑀩𑁆𑀩𑀸’’𑀢𑀺 (𑁨-𑁩-𑁨𑁮𑀯𑀸) 𑀯𑀼𑀢𑁆𑀢𑀁, 𑀢𑀤𑀸𑀳-‘𑀅𑀤𑁆𑀥’𑀘𑁆𑀘𑀸𑀤𑀺, 𑀦𑀺𑀫𑀻𑀬𑀢𑁂 𑀧𑀭𑀺𑀘𑁆𑀙𑀺𑀚𑁆𑀚𑀢𑁂 𑀬𑁂𑀦 𑀢𑀁 𑀦𑀺𑀫𑀸𑀦𑀁, 𑀢𑀤𑁂𑀯 𑀦𑀺𑀫𑁆𑀫𑀸𑀦𑀁. ‘‘𑀅𑀤𑁆𑀥𑀲𑁆𑀲 𑀧𑀞𑀫𑀸 𑀲𑀢𑁆𑀢𑀫𑀻 𑀘 𑀯𑀢𑁆𑀢𑀩𑁆𑀩𑀸’’𑀢𑀺 (𑁨-𑁩-𑁨𑁮) 𑀯𑀼𑀢𑁆𑀢𑀁, 𑀢𑀢𑁆𑀣𑀸𑀬𑀫𑀢𑁆𑀣𑁄 ‘‘𑀢𑀁 𑀬𑀼𑀢𑁆𑀢𑀸𑀢𑀺 𑀯𑀢𑁆𑀢𑀢𑁂, 𑀢𑀁 𑀬𑀼𑀢𑁆𑀢𑀸 𑀧𑀜𑁆𑀘𑀫𑀺𑀬𑀼𑀢𑁆𑀣𑀸 𑀧𑀭𑀲𑁆𑀲𑀸𑀤𑁆𑀥𑀲𑁆𑀲 𑀧𑀞𑀫𑀸 𑀘 𑀲𑀢𑁆𑀢𑀫𑀻 𑀘 𑀯𑀢𑁆𑀢𑀩𑁆𑀩𑀸’’𑀢𑀺, 𑀧𑀸𑀝𑀮𑀺𑀧𑀼𑀢𑁆𑀢𑀲𑁆𑀫𑀸𑀢𑀺 𑀧𑀜𑁆𑀘𑀫𑀺 𑀬𑀼𑀢𑁆𑀢𑀁, 𑀏𑀢𑀸𑀧𑀺 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘𑀲𑀢𑁆𑀢𑀬𑁄𑀚𑀦𑀸𑀦𑀻’𑀢𑀺𑀆𑀤𑀺, 𑀅𑀢𑁆𑀭 𑀳𑀺 𑀬𑀤𑀸 𑀭𑀸𑀚𑀕𑀳𑀲𑁆𑀲 𑀬𑁄𑀚𑀦𑀜𑁆𑀘𑀸𑀪𑁂𑀤𑁄 𑀯𑀢𑁆𑀢𑀼𑀫𑀺𑀘𑁆𑀙𑀻𑀬𑀢𑁂, 𑀢𑀤𑀸 𑀧𑀸𑀝𑀮𑀺𑀧𑀼𑀢𑁆𑀢𑀲𑁆𑀫𑀸 𑀭𑀸𑀚𑀕𑀳𑀁 𑀲𑀢𑁆𑀢𑀬𑁄𑀚𑀦𑀸𑀦𑀻𑀢𑀺, 𑀪𑁂𑀤𑀯𑀘𑀦𑀺𑀘𑁆𑀙𑀸𑀬𑀦𑁆𑀢𑀼 ‘‘𑀲𑀩𑁆𑀪𑀸𑀯𑁄’’𑀢𑁆𑀬𑀸𑀤𑀺𑀦𑀸 (𑁨-𑁩𑁪) 𑀲𑀢𑁆𑀢𑀫𑀻 𑀲𑀺𑀤𑁆𑀥𑀸‘𑀲𑀢𑁆𑀢𑀲𑀼 𑀬𑁄𑀚𑀦𑁂𑀲𑀼’𑀢𑀺. 𑀢𑀣𑀸𑀳𑀺 ¶ 𑀧𑀸𑀝𑀮𑀺𑀧𑀼𑀢𑁆𑀢𑀲𑁆𑀫𑀸 𑀲𑀢𑁆𑀢𑀲𑀼 𑀬𑁄𑀚𑀦𑁂𑀲𑀼 𑀲𑀢𑀺 𑀭𑀸𑀚𑀕𑀳𑀁𑀪𑀯𑀢𑀻𑀢𑁆𑀬𑀬𑀫𑀢𑁆𑀣𑁄 𑀧𑀢𑀻𑀬𑀢𑁂, 𑀲𑀢𑁆𑀢𑀬𑁄𑀚𑀦𑀲𑀫𑁆𑀩𑀦𑁆𑀥𑀺𑀪𑀯𑀦𑀁 𑀭𑀸𑀚𑀕𑀳 (𑀪𑀯𑀦)𑀲𑁆𑀲 𑀮𑀓𑁆𑀔𑀡𑀫𑁆𑀪𑀯𑀢𑀺. 𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀻𑀢𑀺 𑀇𑀫𑀺𑀦𑀸 ‘‘𑀢𑀁 𑀬𑀼𑀢𑁆𑀢𑀸 𑀓𑀸𑀮𑁂 𑀲𑀢𑁆𑀢𑀫𑀻 𑀯𑀢𑁆𑀢𑀩𑁆𑀩𑀸’’𑀢𑀺 (𑁨-𑁩-𑁨𑁮𑀯𑀸) 𑀯𑀘𑀦𑀫𑁆𑀧𑀝𑀺𑀓𑁆𑀔𑀺𑀧𑀢𑀺. ‘‘𑀓𑀭𑀡𑁂𑀘 𑀣𑁄𑀓𑀧𑁆𑀧𑀓𑀺𑀘𑁆𑀙𑀓𑀢𑀺𑀧𑀬𑀲𑁆𑀲𑀸 𑀲𑀢𑁆𑀢𑀯𑀘𑀦𑀲𑁆𑀲𑁂’’𑀢𑀺 (𑁨-𑁩-𑁩𑁩) 𑀲𑀼𑀢𑁆𑀢𑀺𑀢𑀁, 𑀢𑀤𑀸𑀳-‘𑀬𑀤𑀸 𑀇𑀘𑁆𑀘𑀸𑀤𑀺, 𑀓𑀺𑀘𑁆𑀙𑀸𑀤𑀬𑁄𑀢𑀺𑀆𑀤𑀺𑀲𑀤𑁆𑀤𑁂𑀦 𑀣𑁄𑀓𑀅𑀧𑁆𑀧𑀓𑀢𑀺𑀧𑀬𑁂 𑀲𑀗𑁆𑀕𑀡𑁆𑀳𑀸𑀢𑀺, 𑀅𑀲𑀢𑁆𑀢𑀭𑀽𑀧𑀦𑁆𑀢𑀺 𑀅𑀤𑁆𑀤𑀩𑁆𑀩𑀭𑀽𑀧𑀁, 𑀕𑀼𑀡𑁂 𑀳𑁂𑀢𑀼𑀫𑁆𑀳𑀻𑀢𑀺 𑀕𑀼𑀡𑀧𑀤𑀢𑁆𑀣𑁂 𑀳𑁂𑀢𑀼𑀪𑀽𑀢𑁂 ‘‘𑀕𑀼𑀡𑁂’’𑀢𑀺 (𑁨-𑁨𑁧) 𑀧𑀜𑁆𑀘𑀫𑀻𑀢𑀺 𑀅𑀢𑁆𑀣𑁄, 𑀬𑀣𑀸𑀯𑀼𑀢𑁆𑀢𑀯𑀺𑀥𑀸𑀦𑁂𑀦𑁂𑀢𑀺 ‘‘𑀕𑀼𑀡𑁂’’𑀢𑀺 𑀲𑀼𑀢𑁆𑀢𑁂 𑀯𑀼𑀢𑁆𑀢𑀯𑀺𑀥𑀸𑀦𑁂𑀦, ‘‘𑀕𑀼𑀡𑁂’’𑀢𑀺 𑀲𑀼𑀢𑁆𑀢𑁂 𑀯𑀼𑀢𑁆𑀢𑀯𑀺𑀥𑀸𑀦𑁂𑀦, 𑀬𑀤𑀸𑀢𑁆𑀯𑀺𑀘𑁆𑀘𑀸𑀤𑀺𑀦𑀸 𑀧𑀭𑁂𑀲𑀁 𑀯𑀺𑀬 𑀓𑀭𑀡𑁂 𑀯𑀺𑀲𑀼𑀁 𑀯𑀺𑀥𑀸𑀦𑁂 𑀧𑀬𑁄𑀚𑀦𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀢𑁆𑀢𑀩𑁆𑀩𑀭𑀽𑀧𑀲𑁆𑀲 𑀘𑀮𑀦𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑁂𑀦 𑀯𑀺𑀲𑁂𑀲𑀦𑀦𑁆𑀢𑀺 𑀬𑁄𑀚𑀦𑀸, 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑁂𑀦𑀸𑀢𑀺 𑀘 ‘𑀭𑀜𑁆𑀜𑁄 𑀧𑀼𑀭𑀺𑀲𑁄’𑀢𑁆𑀬𑀸𑀤𑁄 𑀅𑀲𑀫𑀸𑀦𑀸𑀥𑀺𑀓𑀭𑀡𑀲𑁆𑀲𑀸𑀧𑀺 𑀯𑀺𑀲𑁂𑀲𑀦𑀢𑁆𑀢𑀤𑀲𑁆𑀲𑀦𑀢𑁄 𑀯𑀼𑀢𑁆𑀢𑀁, 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑁂𑀦 𑀯𑀺𑀲𑁂𑀲𑀦𑀪𑀸𑀯𑁄 𑀘𑀸𑀲𑁆𑀲 𑀣𑁄𑀓𑀕𑀼𑀡𑀸𑀦𑁆𑀯𑀺𑀢𑁂 𑀘𑀮𑀦𑁂 𑀯𑀢𑁆𑀢𑀫𑀸𑀦𑁄 𑀣𑁄𑀓𑀲𑀤𑁆𑀤𑁄 𑀅𑀲𑀢𑁆𑀢𑀯𑀘𑀦𑁄𑀯 𑀯𑀺𑀲𑁂𑀲𑀦𑀦𑁆𑀢𑀺, 𑀢𑁂𑀦𑁂𑀯𑀸𑀔𑁆𑀬𑀸𑀬𑀢𑁂 ‘𑀣𑁄𑀓𑀲𑁆𑀲 𑀓𑀫𑁆𑀫𑀢𑁆𑀢𑀸 𑀓𑀫𑁆𑀫𑁂 𑀤𑀼𑀢𑀺𑀬𑀸’𑀢𑀺. 𑀧𑀜𑁆𑀘𑀫𑀻𑀢𑁆𑀬𑀦𑀼𑀯𑀢𑁆𑀢𑀫𑀸𑀦𑁂 ‘‘𑀤𑀽𑀭𑀦𑁆𑀢𑀺𑀓𑀢𑁆𑀣𑁂𑀳𑀺 𑀙𑀝𑁆𑀞𑀻 𑀯𑀸’’𑀢𑀺 (𑁨-𑁩-𑁩𑁪) 𑀯𑀼𑀢𑁆𑀢𑀁, 𑀢𑀤𑀸𑀳‘𑀤𑀽𑀭𑀦𑁆𑀢𑀺 𑀓𑀢𑁆𑀣𑁂𑀳𑀺’𑀘𑁆𑀘𑀸𑀤𑀺, 𑀅𑀯𑀥𑀺𑀲𑀫𑁆𑀩𑀦𑁆𑀥𑀮𑀓𑁆𑀔𑀡𑀸𑀢𑀺 𑀅𑀯𑀥𑀺𑀲𑀫𑁆𑀩𑀦𑁆𑀥𑀸𑀯 𑀮𑀓𑁆𑀔𑀡𑀁 𑀦𑀺𑀫𑀺𑀢𑁆𑀢𑀫𑀸𑀲𑀁 𑀧𑀜𑁆𑀘𑀫𑀻𑀙𑀝𑁆𑀞𑀻𑀦𑀁 𑀢𑀸 𑀢𑀣𑀸 𑀯𑀼𑀢𑁆𑀢𑀸, 𑀯𑀢𑁆𑀢𑀼𑀫𑀺𑀝𑁆𑀞𑁄𑀢𑀺 𑀇𑀫𑀺𑀦𑀸 𑀯𑀘𑀦𑀺𑀘𑁆𑀙𑀸𑀬𑁂𑀯 𑀧𑀥𑀸𑀦𑀢𑁆𑀢𑀫𑀸𑀳, 𑀏𑀯𑀁 𑀘𑀭𑀳𑀺 𑀢𑀁𑀢𑀁 𑀓𑀸𑀭𑀓𑀯𑀘𑀦𑀺𑀘𑁆𑀙𑀸𑀬𑀫𑀜𑁆𑀜𑀸𑀧𑀺 𑀯𑀺𑀪𑀢𑁆𑀢𑀺𑀬𑁄 𑀓𑀲𑁆𑀫𑀸 𑀦𑀧𑁆𑀧𑀬𑀼𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀆𑀳-‘𑀮𑁄𑀓𑀺𑀬𑀸 𑀘𑁂𑀢𑁆𑀣𑀸’𑀢𑀺𑀆𑀤𑀺, 𑀏𑀢𑁆𑀣 𑀯𑀺𑀪𑀢𑁆𑀢𑀻𑀦𑀁 𑀦𑀺𑀬𑀫𑁂 𑀮𑁄𑀓𑀺𑀬𑀸 𑀏𑀯 𑀯𑀘𑀦𑀺𑀘𑁆𑀙𑀸 𑀦𑀺𑀩𑀦𑁆𑀥𑀦𑀁 𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄, 𑀧𑀜𑁆𑀘𑀫𑀻𑀘𑀸𑀢𑁆𑀬𑀦𑀼𑀯𑀢𑁆𑀢𑀫𑀸𑀦𑁂 ‘‘𑀤𑀽𑀭𑀦𑁆𑀢𑀺 𑀓𑀢𑁆𑀣𑁂𑀳𑀺 𑀤𑀼𑀢𑀺𑀬𑀸 𑀘𑁂’’𑀢𑀺 (𑁨-𑁩-𑁩𑁫) 𑀯𑀼𑀢𑁆𑀢𑀁, ‘‘𑀧𑀜𑁆𑀘𑀫𑁆𑀬𑀥𑀺𑀓𑀭𑀡𑁂𑀘’’ (𑁨-𑁩-𑁩𑁬) 𑀇𑀘𑁆𑀘𑀢𑁆𑀭 𑀘 𑀓𑀸𑀭𑁂𑀦 𑀤𑀽𑀭𑀦𑁆𑀢𑀺 𑀓𑀢𑁆𑀣𑁂𑀳𑀺 𑀲𑀢𑁆𑀢𑀫𑀻 𑀘 𑀯𑀼𑀢𑁆𑀢𑀸 𑀧𑀸𑀝𑀺 𑀧𑀤𑀺𑀓𑀢𑁆𑀣𑁂 𑀲𑀸𑀭𑀲𑀗𑁆𑀕𑀳𑀓𑀸𑀭𑀸𑀤𑀻𑀳𑀺, 𑀢𑀤𑀓𑁆𑀔𑀺𑀧𑁆𑀧 𑀅𑀜𑁆𑀜𑀸𑀧𑀤𑁂𑀲𑁂𑀦 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀓𑁂𑀘𑀺𑀢𑁆𑀬𑀸𑀤𑀺 𑀬𑀁 𑀯𑀼𑀢𑁆𑀢𑀁 𑀯𑀼𑀢𑁆𑀢𑀺𑀬𑀁, 𑀢𑀁 𑀤𑀲𑁆𑀲𑁂𑀢𑀼𑀫𑀸𑀳’𑀓𑁂𑀘𑀻𑀢𑀺 𑀲𑀸𑀭𑀲𑀗𑁆𑀕𑀳𑀸𑀤𑀬𑁄’𑀢𑀺𑀆𑀤𑀺. 𑀤𑀽𑀭𑀸𑀧𑀸𑀤𑀸𑀯𑀲𑁂𑀘𑀦𑀦𑁆𑀢𑀺 𑀅𑀬𑀁 𑀢𑁂𑀲𑀫𑁆𑀧𑀝𑀺𑀓𑁆𑀔𑁂𑀧𑀦 𑀬𑁄𑀢𑀺 𑀲𑀫𑁆𑀩𑀦𑁆𑀥𑁄, 𑀇𑀢𑀺𑀲𑀤𑁆𑀤𑁄 𑀧𑀦𑁂𑀢𑁆𑀣 𑀧𑀭𑀺𑀳𑀻𑀦𑁄, 𑀦𑀳𑀺𑀢𑀦𑁆𑀢𑀺𑀆𑀤𑀻𑀲𑀼 𑀢𑀲𑀤𑁆𑀤𑁂𑀦𑀸𑀲𑀢𑁆𑀢𑀭𑀽𑀧𑀁 𑀤𑀽𑀭𑀸𑀤𑀺 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀦𑁆𑀢𑁆𑀬𑀯𑀲𑁂𑀬𑀁, 𑀦 𑀳𑀺 𑀢𑀁 𑀕𑀫𑁆𑀬𑀢𑁂, 𑀦 𑀳𑀺 𑀢𑀢𑁄 𑀕𑀫𑁆𑀬𑀢𑁂, 𑀦 𑀳𑀺 𑀢𑁂𑀦 𑀕𑀫𑁆𑀬𑀢𑁂, 𑀦 𑀳𑀺 𑀢𑀲𑁆𑀫𑀺𑀁 𑀞𑀻𑀬𑀢𑁂’𑀢𑀺 𑀯𑀺𑀲𑀼𑀁 𑀲𑀫𑁆𑀩𑀦𑁆𑀥𑁄 ¶ 𑀯𑀲𑁂𑀬𑁄. 𑀧𑀢𑀻𑀬𑀦𑁆𑀢𑁂𑀘𑀸𑀢𑀺 𑀘𑁄 𑀯𑀢𑁆𑀢𑀩𑁆𑀩𑀦𑁆𑀢𑀭𑀲𑀫𑀼𑀘𑁆𑀘𑀬𑁂, 𑀅𑀢𑁄𑀘𑁂𑀢𑀺 𑀯𑀓𑁆𑀔𑀫𑀸𑀦𑀳𑁂𑀢𑀼𑀧𑀭𑀸𑀫𑀸𑀲𑁄, 𑀬𑀦𑁆𑀢𑀺 𑀬𑀲𑁆𑀫𑀸 𑀅𑀢𑁆𑀣𑁂 𑀦𑀺𑀧𑀸𑀢𑁄, 𑀯𑀸𑀓𑁆𑀬𑀓𑀸𑀭𑁄 𑀯𑀭𑀭𑀼𑀘𑀺, 𑀢𑀁𑀲𑀸𑀫𑀸𑀦𑀸𑀥𑀺𑀓𑀭𑀡𑁆𑀬𑀢𑁄𑀢𑀺 𑀤𑀽𑀭𑀸𑀤𑀺𑀲𑀸 𑀫𑀸𑀦𑀸𑀥𑀺𑀓𑀭𑀡𑁆𑀬𑀢𑁄, 𑀢𑀁𑀬𑀼𑀢𑁆𑀢𑀢𑁄𑀧𑀻𑀢𑀺 𑀤𑀽𑀭𑀸𑀤𑀺𑀬𑀼𑀢𑁆𑀢𑀸 𑀕𑀸𑀫𑀸𑀤𑀺𑀲𑀤𑁆𑀤𑀢𑁄𑀧𑀺, 𑀧𑀘𑁆𑀘𑀓𑁆𑀔𑀦𑁆𑀢𑁄𑀢𑀺 𑀯𑀸𑀓𑁆𑀬𑀓𑀸𑀭𑀯𑀘𑀦𑀁 𑀧𑀘𑁆𑀘𑀸𑀘𑀺𑀓𑁆𑀔𑀦𑁆𑀢𑁄, 𑀢𑀣𑀸𑀳𑁆𑀬𑀢𑁆𑀭𑀸𑀬𑀁 𑀫𑀳𑀸𑀪𑀸𑀲𑁆𑀲 𑀧𑀸𑀞𑁄 ‘‘𑀤𑀽𑀭𑀦𑁆𑀢𑀺𑀓𑀢𑁆𑀣𑁂𑀳𑀺 𑀧𑀜𑁆𑀘𑀫𑀻𑀯𑀺𑀥𑀸𑀦𑁂 𑀢𑀁𑀬𑀼𑀢𑁆𑀢𑀸 𑀧𑀜𑁆𑀘𑀫𑀻𑀧𑀝𑀺𑀲𑁂𑀥𑁄 𑀯𑀢𑁆𑀢𑀩𑁆𑀩𑁄 𑀤𑀽𑀭𑀸 𑀕𑀸𑀫𑀲𑁆𑀲, 𑀢𑀢𑁆𑀭𑀸𑀧𑀺 𑀤𑀲𑁆𑀲𑀦𑀸 𑀅𑀦𑀢𑁆𑀣𑀓𑁄-𑀬𑀫𑁆𑀧𑀝𑀺𑀲𑁂𑀥𑁄, 𑀢𑀢𑁆𑀭𑀸𑀧𑀺 𑀳𑀺 𑀧𑀜𑁆𑀘𑀫𑀻 𑀤𑀺𑀲𑁆𑀲𑀢𑀺𑁋

𑀤𑀽𑀭𑀲𑁆𑀫𑀸𑀯𑀲𑀣𑀸 𑀫𑀼𑀢𑁆𑀢𑀁, 𑀤𑀽𑀭𑀸𑀧𑀸𑀤𑀸𑀯𑀲𑁂𑀘𑀦𑀁;

𑀕𑀼𑀭𑀼𑀢𑁄 𑀓𑀼𑀧𑀺𑀢𑀸 𑀤𑀽𑀭𑀸,𑀪𑀸𑀩𑁆𑀬𑀁 𑀤𑀽𑀭𑀸 𑀘 𑀤𑀲𑁆𑀲𑀼𑀳𑀺𑀢𑀺.

𑀅𑀢𑁆𑀭 𑀤𑀽𑀭𑀦𑁆𑀢𑀺𑀓𑁂𑀢𑁆𑀬𑀸𑀤𑀺 𑀯𑀢𑁆𑀢𑀩𑁆𑀩𑀁 𑀯𑀸𑀓𑁆𑀬𑀓𑀸𑀭𑀯𑀘𑀦𑀁, 𑀤𑀽𑀭𑀸 𑀕𑀸𑀫𑀲𑁆𑀲𑀸𑀢𑀺 𑀢𑀲𑁆𑀲𑁄𑀤𑀸𑀳𑀭𑀡𑀁, 𑀢𑀢𑁆𑀭𑀸𑀧𑀺𑀘𑁆𑀘𑀸𑀤𑀺 𑀧𑀘𑁆𑀘𑀓𑁆𑀔𑀸𑀦𑀪𑀸𑀲𑁆𑀲𑀁, 𑀤𑀽𑀭𑀲𑁆𑀫𑀸𑀯𑀲𑀣𑀸𑀢𑀺 𑀆𑀯𑀲𑀣𑀲𑁆𑀲 𑀤𑀽𑀭𑁂𑀢𑀺 𑀅𑀢𑁆𑀣𑁄𑀳𑀺 𑀪𑀸𑀲𑁆𑀲𑀧𑀤𑀻𑀧𑁂 𑀓𑁂𑀬𑁆𑀬𑀝𑁄, 𑀧𑀞𑀫𑁄 𑀧𑀼𑀭𑀺𑀲𑁄 𑀬𑀲𑁆𑀲 𑀲𑁄 𑀧𑀞𑀫𑀧𑀼𑀭𑀺𑀲𑁄 𑀪𑀯𑀢𑀺 ‘‘𑀤𑀽𑀭𑀦𑁆𑀢𑀺𑀓𑀸’’𑀤𑀺 (𑁨-𑁬-𑁫) 𑀓𑀘𑁆𑀘𑀸𑀬𑀦𑀲𑀼𑀢𑁆𑀢𑁂 𑀲𑀼𑀤𑁆𑀥𑀸𑀤𑀺𑀬𑁄𑀕𑁄𑀧𑀺 𑀲𑀗𑁆𑀕𑀳𑀺𑀢𑁄, 𑀢𑁂𑀦𑀸𑀳𑁋‘𑀲𑀼𑀤𑁆𑀥𑀧𑁆𑀧 𑀫𑁄𑀘𑀦𑀯𑀺𑀯𑀺𑀢𑁆𑀢𑀧𑁆𑀧𑀫𑀸𑀡𑀬𑁄𑀕𑁂’𑀢𑀺, ‘‘𑀥𑀸𑀢𑀼𑀦𑀸𑀫𑀸𑀦𑀫𑀼𑀧𑀲𑀕𑁆𑀕𑀬𑁄𑀕𑀸𑀤𑀻𑀲𑁆𑀯𑀧𑀺𑀘’’ 𑀇𑀢𑀺 (𑁨-𑁬-𑁨) 𑀲𑀼𑀢𑁆𑀢𑁂 𑀘𑀕𑁆𑀕𑀳𑀡𑀢𑁄 𑀧𑀪𑀼𑀢𑀺𑀬𑁄𑀕𑁄 𑀘 𑀕𑀳𑀺𑀢𑁄, 𑀢𑁂𑀦𑀸𑀳𑁋‘𑀧𑀪𑀼𑀢𑀺 𑀬𑁄𑀕𑁂𑀘𑀸’𑀢𑀺, 𑀧𑀪𑀼𑀢𑀺𑀬𑁄𑀕𑁂𑀘𑀸𑀢𑀺 𑀇𑀫𑀺𑀦𑀸 𑀧𑀪𑀼𑀢𑁆𑀬𑀢𑁆𑀣𑀬𑁄𑀕𑁄𑀧𑀺 𑀲𑀗𑁆𑀕𑀳𑀺𑀢𑁄, 𑀢𑁂𑀦𑁂𑀯 ‘𑀬𑀢𑁄𑀲𑀭𑀸𑀫𑀺 𑀅𑀢𑁆𑀢𑀸𑀦’𑀦𑁆𑀢𑀺 𑀉𑀤𑀸𑀳𑀝𑀁.

𑀦𑀦𑀼 𑀨𑀼𑀝𑁄𑀯 𑀢𑁂𑀲𑀁 𑀲𑀸𑀮𑀸𑀤𑀻𑀦𑀁 𑀬𑁄𑀕𑁄𑀢𑀺 𑀓𑀺𑀫𑁂𑀢𑁆𑀣 𑀧𑀜𑁆𑀳𑁂𑀦 𑀓𑀲𑁆𑀲 𑀧𑀦𑁂𑀢𑁂𑀳𑀺 𑀬𑁄𑀕𑁄’𑀢𑁆𑀬𑀸𑀲𑀗𑁆𑀓𑀺𑀬𑀸𑀳-‘𑀯𑀚𑁆𑀚𑀦𑀁 𑀳𑀺𑀘𑁆𑀘𑀸𑀤𑀺, 𑀯𑀚𑁆𑀚𑀦𑀸𑀦𑀦𑁆𑀢𑀺 𑀓𑀢𑁆𑀢𑀭𑀺 𑀅𑀦𑁄, 𑀯𑀚𑁆𑀚𑀦𑁂 𑀲𑀫𑁆𑀩𑀦𑁆𑀥𑁂 𑀯𑀢𑁆𑀢𑀫𑀸𑀦𑁂𑀳𑀻𑀢𑀺 𑀯𑀚𑁆𑀚𑀦𑀲𑀗𑁆𑀔𑀸𑀢𑁂 𑀲𑀫𑁆𑀩𑀦𑁆𑀥𑁂 𑀯𑀢𑁆𑀢 𑀫𑀸𑀦𑁂𑀳𑀺 𑀅𑀧𑀧𑀭𑀻𑀳𑀺, 𑀬𑀼𑀢𑁆𑀢𑀲𑁆𑀫𑀸𑀢𑀺 𑀬𑀼𑀢𑁆𑀢𑀢𑁄𑀯 𑀏𑀓𑀲𑁆𑀫𑀸, 𑀦𑀸𑀜𑁆𑀜𑀢𑁄, 𑀓𑀺𑀫𑁂𑀢𑁆𑀣 𑀯𑀢𑁆𑀢𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀅𑀧𑀧𑀭𑀻𑀳𑀺 𑀬𑀼𑀢𑁆𑀢𑀲𑁆𑀫𑀸𑀯 𑀧𑀜𑁆𑀘𑀫𑀻𑀪𑀯𑀦𑁂 𑀧𑀲𑀺𑀤𑁆𑀥𑀢𑁆𑀢𑀫𑀸𑀳, 𑀧𑀲𑀺𑀤𑁆𑀥𑀫𑁆𑀧𑁂𑀢𑀫𑀸𑀳𑀭𑀺𑀢𑁆𑀯𑀸 𑀧𑀓𑀸𑀲𑁂𑀢𑀼𑀫𑀸𑀳-‘𑀓𑀢𑁆𑀢𑀼𑀦𑁄’𑀘𑁆𑀘𑀸𑀤𑀺, 𑀬𑀤𑀢𑁆𑀣𑁄𑀢𑀺 𑀬𑁄𑀲𑀸𑀮𑀸𑀤𑀺 𑀅𑀢𑁆𑀣𑁄 𑀧𑀬𑁄𑀚𑀦𑀁 𑀬𑀲𑁆𑀲 𑀯𑀚𑁆𑀚𑀦𑀓𑀺𑀭𑀺𑀬𑀸 𑀭𑀫𑁆𑀪𑀲𑁆𑀲 ¶ 𑀲𑁄 𑀬𑀤𑀢𑁆𑀣𑁄. ‘‘𑀧𑀜𑁆𑀘𑀫𑁆𑀬𑀧𑀸𑀧𑀭𑀻𑀳𑀻’’𑀢𑀺 (𑁨-𑁩-𑁧𑁦) 𑀆𑀬𑀼𑀢𑁆𑀢𑁂𑀧𑀺 𑀧𑀜𑁆𑀘𑀫𑀻 𑀯𑀺𑀥𑀻𑀬𑀢𑁂 𑀧𑀭𑁂𑀳𑀺, 𑀢𑀤𑀸𑀳-‘𑀫𑀭𑀺𑀬𑀸𑀤𑀸𑀬’𑀫𑀺𑀘𑁆𑀘𑀸𑀤𑀺, 𑀅𑀯𑀥𑀺𑀫𑀸 𑀏𑀢𑁆𑀣 𑀯𑀲𑁆𑀲𑀦𑀁.

𑀤𑀺𑀝𑁆𑀞𑀲𑀫𑁆𑀩𑀦𑁆𑀥𑀲𑁆𑀲𑀸𑀢𑀺 𑀧𑀲𑀺𑀤𑁆𑀥𑀯𑀲𑁂𑀦 𑀤𑀺𑀝𑁆𑀞𑀓𑀸𑀭𑀺𑀬𑀓𑀸𑀭𑀡𑀲𑁆𑀲 𑀫𑀼𑀔𑁆𑀬𑀲𑁆𑀲, 𑀢𑀲𑁆𑀲 𑀓𑀸𑀭𑀺𑀬𑀢𑁆𑀣𑀦𑁆𑀢𑀺 𑀢𑀲𑁆𑀲 𑀫𑀼𑀔𑁆𑀬𑀲𑁆𑀲 𑀬𑀁 𑀓𑀸𑀭𑀺𑀬𑀁, 𑀢𑀤𑀢𑁆𑀣𑀁 𑀫𑀼𑀔𑁆𑀬𑀓𑀸𑀭𑀺𑀬 𑀓𑀭𑀡𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀧𑀝𑀺𑀦𑀺𑀥𑀺𑀫𑁆𑀳𑀺 𑀯𑀢𑁆𑀢𑀫𑀸𑀦𑁂𑀦 𑀧𑀪𑀺𑀦𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀯𑀺𑀦𑀺𑀫𑀬𑁂𑀢𑀺 𑀧𑀭𑀺𑀯𑀢𑁆𑀢𑀦 𑀦𑀺𑀫𑀺𑀢𑁆𑀢𑀁 𑀧𑀝𑀺𑀤𑀸𑀦𑁂𑀘𑀸𑀢𑀺 𑀘 𑀲𑀤𑁆𑀤𑀲𑁆𑀲𑀸𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑀺 𑀤𑀝𑁆𑀞𑀩𑁆𑀩𑀸, 𑀧𑀢𑀺𑀦𑀸 𑀢𑀲𑁆𑀲 𑀬𑁄𑀕𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀬𑀤𑀺 𑀯𑀚𑁆𑀚𑀦𑀓𑀺𑀭𑀺𑀬𑀸𑀬 𑀲𑀫𑁆𑀩𑀚𑁆𑀛𑀫𑀸𑀦𑀲𑁆𑀲 𑀓𑀫𑁆𑀫𑀢𑁆𑀢𑀸 𑀓𑀫𑁆𑀫𑁂 𑀤𑀼𑀢𑀺𑀬𑀸, 𑀓𑀺𑀫𑀢𑁆𑀣𑀁 𑀘𑀭𑀳𑀺 𑀧𑀼𑀦 𑀤𑀼𑀢𑀺𑀬𑀸𑀯𑀘𑀦𑀦𑁆𑀢𑀺 𑀆𑀳-‘𑀧𑀝𑀺𑀧𑀤𑀯𑀺𑀥𑀸𑀦𑁂’𑀘𑁆𑀘𑀸𑀤𑀺, 𑀧𑀝𑀺𑀧𑀤𑀁 𑀉𑀚𑀼𑀓𑀫𑁂𑀯𑁄𑀘𑁆𑀘𑀸𑀭𑀺𑀢𑀁 𑀯𑀺𑀥𑀸𑀦𑀁 𑀬𑀲𑁆𑀲𑀸 𑀲𑀸 𑀧𑀝𑀺𑀧𑀤𑀯𑀺𑀥𑀸𑀦𑀸, 𑀯𑀺𑀲𑁂𑀲𑀯𑀺𑀥𑀸𑀦 𑀯𑀢𑀻𑀢𑁆𑀬𑀢𑁆𑀣𑁄, 𑀬𑀚𑁆𑀚𑀢𑁆𑀭 𑀤𑀼𑀢𑀺𑀬𑀸𑀯𑀘𑀦𑀁 𑀦 𑀲𑀺𑀬𑀸 𑀢𑀤𑀸 𑀭𑀺𑀢𑁂𑀲𑀤𑁆𑀤𑁂𑀦 𑀬𑁄𑀕𑁂 𑀉𑀚𑀼𑀓𑀁 𑀯𑀺𑀥𑀻𑀬𑀫𑀸𑀦𑀸𑀬 𑀧𑀜𑁆𑀘𑀫𑀺𑀬𑀸 𑀤𑀼𑀢𑀺𑀬𑀸 𑀩𑀸𑀥𑀻𑀬𑁂𑀣𑀸𑀢𑀺 𑀫𑀜𑁆𑀜𑀢𑁂. 𑀬𑀤𑁆𑀬𑀢𑁆𑀭 𑀧𑀜𑁆𑀘𑀫𑀺𑀬𑀸 𑀤𑀼𑀢𑀺𑀬𑀸𑀬 𑀩𑀸𑀥𑀸𑀪𑀸𑀯𑁄 𑀏𑀯 𑀧𑀬𑁄𑀚𑀦𑀁, 𑀏𑀯𑀜𑁆𑀘𑀭𑀳𑀺 ‘𑀭𑀺𑀢𑁂 𑀯𑀸’𑀢𑀺 𑀲𑀼𑀢𑁆𑀢𑀬𑀺𑀢𑀩𑁆𑀩𑀁 𑀏𑀯𑀁 𑀲𑀢𑀺 𑀧𑀓𑁆𑀔𑁂 𑀤𑀼𑀢𑀺𑀬𑀸 𑀘 𑀪𑀯𑀺𑀲𑁆𑀲𑀢𑀺, 𑀮𑀳𑀼 𑀘 𑀲𑀼𑀢𑁆𑀢𑀫𑁆𑀧𑀡𑀻𑀢𑀫𑁆𑀪𑀯𑀢𑀻 𑀢𑁆𑀬𑀸𑀲𑀗𑁆𑀓𑀺𑀬 𑀧𑀬𑁄𑀚𑀦𑀦𑁆𑀢𑀭𑀫𑀸𑀳-‘𑀉𑀢𑁆𑀢𑀭𑀢𑁆𑀣𑀜𑁆𑀘𑁂’𑀢𑀺, 𑀅𑀢𑁄𑀬𑁂𑀯𑀸𑀢𑀺 𑀉𑀢𑁆𑀢𑀭𑀢𑁆𑀣𑀢𑁆𑀢𑀸𑀬𑁂𑀯, 𑀧𑀼𑀦 𑀧𑀬𑁄𑀚𑀦𑀦𑁆𑀢𑀭𑀁𑀤𑀼𑀢𑀺𑀬𑀸 𑀕𑀳𑀡𑀲𑁆𑀲 𑀤𑀲𑁆𑀲𑀬𑀫𑀸𑀳-‘𑀯𑀺𑀪𑀢𑁆𑀬𑀦𑁆𑀢𑀭𑁂’𑀘𑁆𑀘𑀸𑀤𑀺, 𑀆𑀳𑀘𑁆𑀘 𑀓𑀡𑁆𑀞𑀸𑀤𑀺𑀝𑁆𑀞𑀸𑀦𑁂 𑀯𑀸𑀬𑀼𑀦𑀸𑀆𑀳𑀦𑀺𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀯𑀸 𑀯𑀘𑀦𑀁 𑀆𑀳𑀘𑁆𑀘𑀯𑀘𑀦𑀁, 𑀉𑀚𑀼𑀓𑀯𑀘𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀯𑀺𑀪𑀢𑁆𑀬𑀦𑁆𑀢𑀭𑀁 𑀙𑀝𑁆𑀞𑀻𑀯𑀺𑀪𑀢𑁆𑀢𑀺, 𑀢𑀲𑁆𑀲 𑀩𑁆𑀬𑀼𑀤𑀸𑀲𑀢𑁆𑀣𑀁, 𑀦𑀺𑀭𑀸𑀲𑀢𑁆𑀣𑀦𑁆𑀢𑀼𑀢𑁆𑀣𑁄, 𑀅𑀜𑁆𑀜𑀸𑀧𑀻𑀢𑀺 𑀤𑀼𑀢𑀺𑀬𑀸𑀬 𑀅𑀜𑁆𑀜𑀸 𑀙𑀝𑁆𑀞𑀻𑀧𑀺, 𑀧𑀓𑀢𑀸𑀬 𑀧𑀜𑁆𑀘𑀫𑀺𑀬𑀸 𑀲𑀫𑁆𑀩𑀦𑁆𑀥𑀦𑀢𑁆𑀣𑁄 𑀧𑀓𑀢𑀲𑀫𑁆𑀩𑀦𑁆𑀥𑀦𑀢𑁆𑀣𑁄.

𑀦 𑀤𑀼𑀢𑀺𑀬𑀸𑀧𑀺 𑀬𑁄𑀕𑀯𑀺𑀪𑀸𑀕𑀢𑁄𑀢𑀺 𑀏𑀯𑀁 𑀫𑀜𑁆𑀜𑀢𑁂 ‘‘𑀢𑀢𑀺𑀬𑀸 𑀘𑁂𑀢𑀺 𑀯𑀢𑁆𑀢𑀫𑀸𑀦𑁂 𑀢𑀢𑁆𑀣 𑀬𑀤𑀺 𑀘𑀓𑀸𑀭𑁂𑀦 ‘𑀤𑀼𑀢𑀺𑀬𑀸 𑀘𑁂’𑀢𑀺 𑀲𑀫𑁆𑀩𑀦𑁆𑀥𑀻𑀬𑁂𑀬𑁆𑀬, 𑀢𑀢𑁆𑀭𑀸𑀧𑀺 𑀘 𑀓𑀸𑀭𑁂𑀦 𑀧𑀜𑁆𑀘𑀫𑀻𑀢𑁆𑀬𑁂𑀯𑀁 𑀦 𑀓𑀲𑁆𑀲𑀸𑀧𑁆𑀬𑀧𑀓𑀁𑀲𑁄𑀢𑀺‘𑀯𑀺𑀦𑀸𑀜𑁆𑀜𑀢𑁆𑀭𑀧𑀼𑀣𑀦𑀸𑀦𑀸𑀳𑀺 ¶ 𑀢𑀢𑀺𑀬𑀸 𑀘𑁂’𑀢𑁆𑀬𑁂𑀓𑀬𑁄𑀕𑀫𑀓𑀢𑁆𑀯𑀸 𑀬𑁄𑀕𑀯𑀺𑀪𑀸𑀕𑀲𑀸𑀫𑀢𑁆𑀣𑀺𑀬𑀸 ‘𑀢𑀢𑀺𑀬𑀸 𑀘𑁂’𑀢𑀺 𑀘 𑀓𑀸𑀭𑁂𑀦 𑀚𑀸𑀢𑀼 𑀧𑀜𑁆𑀘𑀫𑀻’’𑀢𑀺, 𑀅𑀲𑀳𑀸𑀬𑀢𑁆𑀣𑀢𑁆𑀢𑁂 𑀲𑀢𑀺 ‘𑀯𑀺𑀦𑀸𑀢𑁆𑀣𑁂 𑀳𑀻’𑀢𑁆𑀬𑁂𑀯𑀫𑀯𑀢𑁆𑀯𑀸 𑀓𑀺𑀁 𑀯𑀺𑀲𑀼𑀁 𑀲𑀼𑀢𑁆𑀢𑀭𑀘𑀦𑀸𑀬𑁂𑀢𑁆𑀬𑀸𑀳-‘𑀪𑁂𑀤𑁄 𑀧𑀸𑀤𑀸𑀦𑀦𑁆𑀢𑁆𑀯𑀺’𑀘𑁆𑀘𑀸𑀤𑀺.

𑀬𑀦𑁆𑀢𑀁 𑀲𑀤𑁆𑀤𑀸𑀦𑀁 𑀦𑀺𑀘𑁆𑀘𑀢𑁆𑀢𑀸 𑀲𑀫𑁆𑀩𑀦𑁆𑀥𑀲𑁆𑀲 𑀬𑀢𑁆𑀣𑀸𑀢𑀺 𑀧𑀭𑀸𑀫𑀝𑁆𑀞𑀁 𑀲𑁄𑀢𑀺, 𑀬𑁄𑀢𑀺 𑀧𑀭𑀸𑀫𑀝𑁆𑀞𑀁 𑀢𑀲𑁆𑀲𑀸𑀢𑀺 𑀘 𑀦𑀺𑀤𑁆𑀤𑀺𑀲𑀢𑀺, 𑀬𑁄 𑀬𑀢𑁆𑀣𑁂𑀢𑁆𑀬𑀸𑀤𑀺𑀓𑀜𑁆𑀘 ‘𑀓𑀺𑀭𑀺𑀬𑀸𑀥𑀸𑀭𑀪𑀽𑀢𑁂’𑀘𑁆𑀘𑀸𑀤𑀺𑀯𑀼𑀢𑁆𑀢𑀺𑀕𑀦𑁆𑀣 𑀯𑀺𑀯𑀭𑀡𑀦𑁆𑀢𑀺 𑀬𑁄𑀢𑀺 𑀓𑀺𑀭𑀺𑀬𑀸𑀥𑁂𑀬𑁆𑀬𑀪𑀽𑀢𑀸𑀥𑀺𑀧𑁆𑀧𑁂𑀢𑀸, 𑀏𑀢𑀦𑁂𑀯𑀸𑀳‘𑀓𑀺𑀭𑀺𑀬𑀸 𑀘𑀸’𑀢𑀺𑀆𑀤𑀺, 𑀢𑁂𑀦𑀸𑀬𑀫𑀸𑀥𑀸𑀭𑀻𑀬𑀢𑀺 𑀓𑀢𑁆𑀢𑀼𑀓𑀫𑁆𑀫 𑀲𑀫𑀯𑁂𑀢𑀸 𑀓𑀺𑀭𑀺𑀬𑀸𑀲𑁆𑀫𑀺𑀦𑁆𑀢𑁆𑀬𑀥𑀺𑀓𑀭𑀡𑁂 𑀯𑀸 𑀢𑀁 𑀆𑀥𑀸𑀭𑀬𑀢𑀻𑀢𑀺 𑀓𑀢𑁆𑀢𑀭𑀺 𑀯𑀸 𑀖𑀡𑀦𑁆𑀢𑁂𑀦 𑀤𑀝𑁆𑀞𑀩𑁆𑀩𑁄, 𑀓𑀢𑁆𑀢𑀸𑀭𑀁 𑀓𑀫𑁆𑀫𑀜𑁆𑀘 𑀓𑀺𑀭𑀺𑀬𑀸𑀦𑀺𑀲𑁆𑀲𑀬𑀪𑀽𑀢𑀫𑀸𑀥𑀸𑀭 𑀬𑀢𑀻𑀢𑁆𑀬𑀸𑀥𑀸𑀭𑁄𑀢𑀺 𑀯𑀸 𑀓𑀢𑁆𑀢𑀭𑀺 𑀖𑀡, 𑀯𑀼𑀢𑁆𑀢𑀁 𑀳𑀺𑁋

𑀆𑀥𑀸𑀭𑀬𑀢𑀺 𑀬𑁄 𑀓𑀢𑁆𑀢𑀼, 𑀓𑀫𑁆𑀫𑀁 𑀓𑀺𑀭𑀺𑀬𑀦𑀺𑀲𑁆𑀲𑀬𑀁;

𑀆𑀥𑀸𑀭𑀁 𑀓𑀸𑀭𑀓𑀜𑁆𑀘𑀸𑀳𑀼, 𑀢𑀁 𑀘𑀢𑀼𑀩𑁆𑀩𑀺𑀥𑀫𑁂𑀯 𑀘𑁂𑀢𑀺.

𑀦𑀦𑀼 𑀘 𑀓𑀺𑀭𑀺𑀬𑀸𑀥𑀸𑀭𑀡𑁂𑀦𑀸𑀥𑀸𑀭𑁄𑀢𑁆𑀬𑀼𑀘𑁆𑀘𑀢𑁂, 𑀢𑀁 𑀓𑀺𑀫𑁂𑀯𑀫𑀼𑀘𑁆𑀘𑀢𑁂𑀢𑀺 𑀘𑁂, 𑀦𑁂𑀲𑀤𑁄𑀲𑁄 𑀬𑀤𑁂𑀯 𑀳𑀺 𑀓𑀺𑀭𑀺𑀬𑀸𑀥𑀸𑀭𑀡𑀫𑀲𑁆𑀲, 𑀢𑀦𑁆𑀢𑀦𑁆𑀦𑀺𑀲𑁆𑀲𑀬𑀪𑀽𑀢 𑀓𑀢𑁆𑀢𑀼𑀓𑀫𑁆𑀫𑀥𑀸𑀭𑀡𑀁, 𑀦𑀳𑁆𑀬𑀜𑁆𑀜𑀢𑀸 𑀢𑀤𑁆𑀥𑀸𑀭𑀡𑀁 𑀲𑀫𑁆𑀪𑀯𑀢𑀺 𑀢𑀢𑁄 𑀓𑀺𑀭𑀺𑀬𑀸 𑀓𑀸𑀭𑀡𑁂𑀦𑀸𑀥𑀸𑀭𑀡𑁂𑀦𑀸𑀥𑀸𑀭𑁄𑀢𑁆𑀬 𑀬𑀫𑁂𑀯𑀢𑁆𑀣𑁄, 𑀦 𑀓𑀢𑁆𑀢𑀼𑀓𑀫𑁆𑀫𑀧𑀭𑀺𑀘𑁆𑀘𑀸𑀕𑁂𑀦𑀸𑀥𑀸𑀭𑁂𑀦 𑀉𑀚𑀼𑀓𑀁 𑀓𑀺𑀭𑀺𑀬𑀸 𑀕𑀬𑁆𑀳𑀢𑁂, 𑀢𑁂𑀦𑁂𑀯 𑀯𑀓𑁆𑀔𑀢𑀺-‘𑀓𑀺𑀭𑀺𑀬𑀸𑀬𑀬𑁄 𑀆𑀥𑀸𑀭𑁄’𑀘𑁆𑀘𑀸𑀤𑀺, 𑀦𑀦𑀼 𑀬𑀤𑁆𑀬𑀧𑁆𑀬𑀼𑀚𑀼𑀓𑀫𑁂𑀯 𑀓𑀺𑀭𑀺𑀬𑀁 𑀥𑀸𑀭𑀬𑀢𑀺 𑀓𑀢𑁆𑀢𑀸 𑀓𑀢𑁆𑀢𑀼𑀲𑀫𑀯𑀸𑀬𑀺𑀦𑀺𑀁, 𑀓𑀫𑁆𑀫𑀲𑀫𑀯𑁂𑀢𑀜𑁆𑀘 𑀯𑀺𑀓𑁆𑀢𑁂𑀤𑀦𑀸𑀤𑀺𑀁 𑀓𑀺𑀭𑀺𑀬𑀁 𑀓𑀫𑁆𑀫𑀁… 𑀢𑀣𑀸 𑀲𑀢𑀺 𑀢𑀸𑀦𑁂𑀯𑀸𑀥𑀸𑀭𑁄𑀢𑀺, 𑀦… 𑀮𑁄𑀓𑁂 𑀲𑀢𑁆𑀣𑁂 𑀘 𑀢𑁂𑀲𑀫𑀸𑀥𑀸𑀭𑀢𑁆𑀣𑁂 𑀦𑀸𑀧𑁆𑀧𑀢𑀻𑀢𑀺𑀢𑁄, 𑀓𑀢𑁆𑀢𑀼𑀓𑀫𑁆𑀫𑀢𑀸𑀬𑁂𑀯 𑀳𑀺 𑀢𑁂𑀲𑀫𑁆𑀧𑀢𑀻𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘𑀓𑀺𑀭𑀺𑀬𑀸 𑀘𑁂’𑀢𑁆𑀬𑀸𑀤𑀺, 𑀢𑀣𑀸 𑀘 𑀯𑀼𑀢𑁆𑀢𑀁𑁋

𑀓𑀢𑁆𑀢𑀼𑀓𑀫𑁆𑀫 𑀩𑁆𑀬𑀯𑀳𑀺𑀢𑀁, 𑀥𑀸𑀭𑁂𑀦𑁆𑀢𑀫𑀦𑀼𑀚𑀼 𑀓𑁆𑀭𑀺𑀬𑀁;

𑀓𑁆𑀭𑀺𑀬𑀸𑀲𑀺𑀤𑁆𑀥𑀼𑀧𑀓𑀸𑀭𑀺 𑀘, 𑀲𑀢𑁆𑀣𑁂-𑀥𑀺𑀓𑀭𑀡𑀁 𑀫𑀢𑀦𑁆𑀢𑀺.

𑀓𑀢𑁆𑀢𑀼𑀓𑀫𑁆𑀫𑀩𑁆𑀬𑀯𑀳𑀺𑀢𑀦𑁆𑀢𑀺 𑀓𑀢𑁆𑀢𑀼𑀓𑀫𑁆𑀫𑁂𑀳𑀺 𑀢𑀁𑀲𑀫𑀯𑁂𑀢𑀪𑀸𑀯𑁂𑀦 𑀩𑁆𑀬𑀯𑀳𑀺𑀢𑀁, 𑀅𑀦𑀼𑀚𑀼 𑀧𑀸𑀭𑀫𑁆𑀧𑀭𑀺𑀬𑁂𑀦, 𑀓𑁆𑀭𑀺𑀬𑀸𑀲𑀺𑀤𑁆𑀥𑀼𑀧𑀓𑀸𑀭𑀺𑀢𑀺 𑀓𑀢𑁆𑀢𑀼𑀓𑀫𑁆𑀫𑀲𑀫𑀯𑁂𑀢𑀸𑀬 𑀓𑀺𑀭𑀺𑀬𑀸𑀬 𑀧𑀲𑀺𑀤𑁆𑀥𑀺𑀬𑀁 𑀉𑀧𑀓𑀸𑀭𑀻 𑀉𑀧𑀓𑀼𑀩𑁆𑀩𑀦𑁆𑀢𑀁, 𑀦𑀦𑀼 𑀘 𑀦 𑀓𑀺𑀭𑀺𑀬𑀸 𑀥𑀸𑀭𑀡𑁂𑀦𑁂𑀯𑀸𑀬𑀫𑀸𑀥𑀸𑀭𑁄, 𑀓𑀢𑁆𑀢𑀼𑀓𑀫𑁆𑀫𑀸𑀦𑀁 𑀥𑀸𑀭𑀡𑁂𑀦𑀸𑀧𑁆𑀬𑀸𑀥𑀸𑀭𑁄𑀢𑀺 𑀲𑀓𑁆𑀓𑀸 ¶ 𑀯𑀯𑀢𑁆𑀣𑀧𑁂𑀢𑀼𑀦𑁆𑀢𑀺 𑀘𑁄𑀤𑀦𑀫𑁆𑀫𑀦𑀲𑀺 𑀦𑀺𑀥𑀸𑀬𑀸𑀳-‘𑀦 𑀘𑁂’𑀢𑁆𑀬𑀸𑀤𑀺, 𑀓𑀺𑀭𑀺𑀬𑀸 𑀦𑀺𑀫𑀺𑀢𑁆𑀢𑀲𑁆𑀲𑁂𑀯𑀸𑀢𑀺 𑀓𑀢𑁆𑀢𑀼𑀓𑀫𑁆𑀫𑀲𑀫𑀯𑀸𑀬𑀺𑀦𑀺𑀬𑀸 𑀓𑀺𑀭𑀺𑀬𑀸𑀬 𑀦𑀺𑀫𑀺𑀢𑁆𑀢𑀲𑁆𑀲𑁂𑀯, 𑀢𑀤𑁂𑀯𑀁𑀯𑀺𑀥𑀫𑀸𑀥𑀸𑀭𑀁 𑀘𑀢𑀼𑀩𑁆𑀩𑀺𑀥𑀫𑁆𑀫𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘𑀆𑀥𑀸𑀭𑁄 𑀘𑀸𑀬’𑀫𑀺𑀘𑁆𑀘𑀸𑀤𑀺, 𑀘𑀢𑁆𑀢𑀸𑀭𑁄 𑀯𑀺𑀥𑀸𑀧𑀓𑀸𑀭𑀸 𑀅𑀲𑁆𑀲𑀸𑀢𑀺 𑀘𑀢𑀼𑀩𑁆𑀩𑀺𑀥𑁄, 𑀆𑀥𑁂𑀬𑁆𑀬𑁂𑀦 𑀲𑀳𑁄𑀧𑀲𑀺𑀮𑁂𑀲𑁄 𑀲𑀁𑀬𑁄𑀕𑀮𑀓𑁆𑀔𑀡𑁄-𑀲𑁆𑀲 𑀅𑀢𑁆𑀣𑀻𑀢𑀺 𑀑𑀧𑀲𑀺𑀮𑁂𑀲𑀺𑀓𑁄 𑀆𑀥𑀸𑀭𑁄-‘𑀓𑀝𑁂𑀦𑀺𑀲𑀻𑀤𑀢𑀺 𑀣𑀸𑀮𑀺𑀬𑀁 𑀧𑀘𑀢𑀺’𑀢𑁆𑀬𑀸𑀤𑁄 𑀓𑀝𑀸𑀤𑀺, 𑀢𑀣𑀸𑀳𑀺 𑀤𑁂𑀯𑀤𑀢𑁆𑀢𑀲𑀫𑀯𑁂𑀢𑀁 𑀦𑀺𑀲𑀻𑀤𑀦𑀓𑀺𑀭𑀺𑀬𑀁 𑀓𑀝𑁄 𑀤𑁂𑀯𑀤𑀢𑁆𑀢𑀁 𑀥𑀸𑀭𑀬𑀁 𑀥𑀸𑀭𑀬𑀢𑀺 𑀤𑁂𑀯𑀤𑀢𑁆𑀢𑀩𑁆𑀬𑀯𑀳𑀺𑀢𑀁, 𑀏𑀯𑀁 𑀣𑀸𑀮𑀻𑀧𑀺 𑀢𑀡𑁆𑀟𑀼𑀮𑀲𑀫𑀯𑁂𑀢𑀁 𑀯𑀺𑀓𑁆𑀮𑁂𑀤𑀦𑀸𑀤𑀺𑀓𑀺𑀭𑀺𑀬𑀁 𑀢𑀡𑁆𑀟𑀼𑀮𑁂 𑀥𑀸𑀭𑀬𑀁 𑀥𑀸𑀭𑀬𑀢𑀻𑀢𑁆𑀬𑁄𑀧𑀲𑀺𑀮𑁂𑀲𑀺𑀓𑀸𑀥𑀸𑀭𑀢𑁆𑀢𑀁 𑀓𑀝𑀸𑀤𑀺𑀦𑁄. 𑀬𑀢𑁄-𑀜𑁆𑀜𑀢𑁆𑀭𑀸𑀥𑁂𑀬𑁆𑀬𑀁 𑀦 𑀯𑀢𑁆𑀢𑀢𑁂 𑀲𑀩𑁆𑀩𑀣𑀸 𑀪𑀺𑀬𑁆𑀬𑁄 𑀯𑀸, 𑀲𑁄 𑀯𑁂𑀲𑀬𑀺𑀓𑁄, 𑀯𑀺𑀲𑀬𑁄𑀳𑁆𑀬𑀸𑀥𑁂𑀬𑁆𑀬𑀲𑁆𑀲𑀸𑀦𑀜𑁆𑀜𑀢𑁆𑀭𑀪𑀸𑀯𑁄, 𑀬𑀣𑀸 𑀘𑀓𑁆𑀔𑀸𑀤𑀺𑀧𑁆𑀧𑀯𑀢𑁆𑀢𑀻𑀦𑀫𑀜𑁆𑀜𑀢𑁆𑀭𑀸𑀪𑀸𑀯𑀸 𑀘𑀓𑁆𑀔𑀸𑀤𑀻𑀦𑀁 𑀭𑀽𑀧𑀸𑀤𑀬𑁄 𑀯𑀺𑀲𑀬𑀸𑀢𑀺 𑀯𑀼𑀘𑁆𑀘𑀦𑁆𑀢𑁂, 𑀏𑀯𑀫𑀸𑀓𑀸𑀲𑁂 𑀲𑀓𑀼𑀦𑀬𑁄𑀢𑁆𑀬𑀸𑀤𑁄 𑀲𑀓𑀼𑀦𑁆𑀬𑀸𑀤𑀻𑀦𑀫𑀸𑀓𑀸𑀲𑀸𑀤𑀺𑀢𑁄-𑀜𑁆𑀜𑀢𑁆𑀭𑀸𑀪𑀸𑀯𑀸𑀢𑁂 𑀢𑁂𑀲𑀁 𑀯𑀺𑀲𑀬𑀸𑀢𑁆𑀬𑀼𑀘𑁆𑀘𑀦𑁆𑀢𑁂, 𑀯𑀺𑀲𑀬𑁄 𑀏𑀯 𑀯𑁂𑀲𑀬𑀺𑀓𑁄. 𑀬𑁄 𑀆𑀥𑀸𑀭𑀸𑀥𑁂𑀬𑁆𑀬𑀸𑀦𑀫𑀪𑀺𑀩𑁆𑀬𑀸𑀧𑁂𑀢𑁆𑀬𑀸𑀥𑁂𑀬𑁆𑀬𑀫𑀺𑀢𑁆𑀬𑀪𑀺𑀩𑁆𑀬𑀸𑀧𑀓𑁄, 𑀢𑀣𑀸 𑀳𑀺‘𑀢𑀺𑀮𑁂𑀲𑀼 𑀢𑁂𑀮𑀁, 𑀤𑀥𑀺𑀫𑁆𑀳𑀺 𑀲𑀧𑁆𑀧𑀺,𑀢𑁆𑀬𑀢𑁆𑀭 𑀢𑀺𑀮𑀸𑀤𑀺𑀓𑀁 𑀢𑁂𑀮𑀸𑀤𑀺𑀓𑀫𑀸𑀥𑁂𑀬𑁆𑀬𑀁 𑀩𑁆𑀬𑀸𑀧𑁂𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀢𑀺𑀮𑀸𑀤𑀺 𑀩𑁆𑀬𑀸𑀧𑀓𑀸𑀥𑀸𑀭𑁄. 𑀲𑀫𑀻𑀧𑁂 𑀪𑀯𑁄, 𑀲𑀫𑀻𑀧𑁄 𑀏𑀯 𑀯𑀸 𑀲𑀸𑀫𑀻𑀧𑀺𑀓𑁄, 𑀬𑀲𑁆𑀲 𑀲𑀫𑀻𑀧𑀤𑁂𑀲𑁂 𑀆𑀥𑁂𑀬𑁆𑀬𑀁 𑀯𑀢𑁆𑀢𑀢𑁂 𑀲𑁄 𑀏𑀯𑀫𑀼𑀘𑁆𑀘𑀢𑁂, 𑀅𑀢𑁆𑀭𑁄𑀤𑀸𑀳𑀭𑀡𑀁 ‘𑀕𑀼𑀭𑀽𑀲𑀼 𑀯𑀲𑀢𑀺 𑀕𑀗𑁆𑀕𑀸𑀬𑀁 𑀖𑁄𑀲𑁄’𑀢𑀺. 𑀦𑀦𑀼 𑀘𑀸𑀢𑁆𑀭𑀸𑀧𑁆𑀬𑀸𑀥𑀸𑀭𑁂 𑀲𑀢𑁆𑀢𑀫𑀻 𑀯𑀺𑀥𑀻𑀬𑀢𑁂 𑀆𑀥𑀸𑀭𑁄 𑀘 𑀦𑀺𑀲𑁆𑀲𑀬𑁄 𑀯𑀼𑀘𑁆𑀘𑀢𑁂, 𑀦𑀺𑀲𑁆𑀲𑀬𑁄 𑀘 𑀲𑀁𑀬𑁄𑀕𑀲𑀫𑀯𑀸𑀬𑁂𑀳𑀺 𑀳𑁄𑀢𑀺, 𑀦 𑀘 𑀲𑀺𑀲𑁆𑀲𑀸𑀤𑀻𑀦𑀁 𑀕𑀼𑀭𑀼𑀧𑁆𑀧𑀪𑀼𑀢𑀻𑀢𑀺 𑀤𑁂𑀯𑀤𑀢𑁆𑀢𑀲𑀓𑀼𑀦𑁆𑀬𑀸𑀤𑀻𑀦𑀫𑀺𑀯 𑀓𑀝𑀸𑀓𑀸𑀲𑀸𑀤𑀻𑀳𑀺 𑀲𑀁𑀬𑁄𑀕𑁄, 𑀢𑁂𑀮𑀸𑀤𑀻𑀦𑀫𑀺𑀯 𑀘 𑀢𑀺𑀮𑀸𑀤𑀻𑀳𑀺 𑀲𑀫𑀯𑀸𑀬𑁄 𑀯𑀸 𑀅𑀢𑁆𑀣𑀺, 𑀢𑁂𑀦𑀸𑀬𑀼𑀢𑁆𑀢𑀁 𑀢𑁂 𑀲𑀫𑀸𑀥𑀸𑀭𑀢𑁆𑀢𑀦𑁆𑀢𑀺, 𑀦𑁂𑀢𑀤𑀢𑁆𑀣𑀺, 𑀬𑀤𑀸𑀬𑀢𑁆𑀢𑀸 𑀳𑀺 𑀬𑀲𑁆𑀲 𑀞𑀺𑀢𑀺 𑀲𑁄 𑀯𑀺𑀦𑀸𑀧𑀺 𑀲𑀁𑀬𑁄𑀕𑀲𑀫𑀯𑀸𑀬𑁂𑀳𑀺 𑀢𑀲𑁆𑀲 𑀦𑀺𑀲𑁆𑀲𑀬𑁄 𑀪𑀯𑀢𑀺, 𑀢𑀣𑀸𑀳𑀺 𑀧𑀼𑀭𑀺𑀲𑀲𑁆𑀲 𑀦 𑀭𑀜𑁆𑀜𑀸 𑀲𑀳 𑀲𑀁𑀬𑁄𑀕𑁄𑀲𑀫𑀯𑀸𑀬𑁄 𑀯𑀸𑀢𑁆𑀣𑀺, 𑀅𑀣 𑀧𑀦 𑀢𑀤𑀥𑀻𑀦𑀝𑁆𑀞𑀺𑀢𑀺𑀢𑁆𑀢𑀸 𑀭𑀸𑀚𑀦𑀺𑀲𑁆𑀲𑀬𑁄 𑀧𑀼𑀭𑀺𑀲𑁄𑀢𑀺 𑀩𑁆𑀬𑀧𑀤𑀺𑀲𑁆𑀲𑀻𑀬𑀢𑁂, 𑀲𑀺𑀲𑁆𑀲𑀸𑀤𑀻𑀦𑀜𑁆𑀘 𑀕𑀼𑀭𑀼𑀧𑁆𑀧𑀪𑀼𑀢𑀺𑀦 𑀫𑀸𑀬𑀢𑁆𑀢𑀸 𑀞𑀺𑀢𑀻𑀢𑀺 𑀢𑁂𑀲𑀫𑀬𑀁 [𑀢𑁂𑀦𑀲𑁆𑀲𑀸𑀬𑀁 (𑀧𑁄𑀢𑁆𑀣𑀓𑁂) 𑀬𑀼𑀢𑁆𑀣𑁄 𑀢𑁂 𑀧𑀢𑀺 𑀕𑀼𑀭𑀼𑀧𑀪𑀼𑀢𑀻𑀦𑀁 𑀦𑀺𑀲𑁆𑀲𑀬𑀪𑀸𑀯𑁄 (𑀚𑀺𑀦𑀺𑀦𑁆𑀤𑀩𑀼𑀤𑁆𑀥𑀺)] 𑀬𑀼𑀢𑁆𑀢𑁄 𑀕𑀼𑀭𑀼𑀧𑁆𑀧𑀪𑀼𑀢𑀺𑀦𑀁 𑀦𑀺𑀲𑁆𑀲𑀬𑀪𑀸𑀯𑁄𑀢𑀺, 𑀏𑀢𑁆𑀣 ¶ 𑀧𑀦 𑀬𑀚𑁆𑀚𑀧𑀺 𑀯𑁂𑀲𑀬𑀺𑀓𑀸𑀪𑀺𑀩𑁆𑀬𑀧𑀓𑀸𑀦𑀫𑀸𑀥𑀸𑀭𑀸𑀥𑁂𑀬𑁆𑀬𑁄𑀧𑀲𑀺𑀮𑁂𑀲𑁄 𑀅𑀢𑁆𑀣𑀺, 𑀢𑀣𑀸𑀧𑀺 𑀧𑀓𑀸𑀭𑀦𑁆𑀢𑀭𑀲𑁆𑀲𑁂𑀯 𑀧𑀭𑀺𑀧𑁆𑀨𑀼𑀝𑀢𑁆𑀢𑀸 𑀢𑀣𑁂𑀯 𑀯𑀘𑀦𑀺𑀘𑁆𑀙𑀸, 𑀦𑀸𑀜𑁆𑀜𑀣𑀸 𑀑𑀧𑀲𑀺𑀮𑁂𑀲𑀺𑀓𑁂𑀦 𑀯𑀸 [𑀑𑀧𑀲𑀺𑀮𑁂𑀲𑀺𑀓𑁂𑀯] 𑀯𑀺𑀲𑀬𑀸𑀪𑀺𑀩𑁆𑀬𑀸𑀧𑀓𑀸𑀦𑀫𑀕𑁆𑀕𑀳𑀡𑀢𑁄 𑀉𑀧𑀲𑀺𑀮𑁂𑀲𑀲𑁆𑀲𑁂 𑀯𑀸 [𑀉𑀧𑀲𑀺𑀮𑁂𑀲𑀲𑁆𑀲𑁂𑀯] 𑀧𑀭𑀺𑀩𑁆𑀬𑀢𑁆𑀢𑀢𑁆𑀢𑀸 𑀢𑀣𑁂𑀯 𑀯𑁄𑀳𑀸𑀭𑁄𑀢𑀺 𑀦 𑀲𑀗𑁆𑀓𑀭𑁄 𑀲𑀗𑁆𑀓𑀦𑀻𑀬𑁄𑀢𑀺.

𑀦𑀺𑀫𑀺𑀢𑁆𑀢𑀪𑀸𑀯𑀫𑀢𑁆𑀢𑁂𑀢𑀻𑀫𑀺𑀦𑀸 𑀓𑀫𑁆𑀫𑀲𑀁𑀬𑁄𑀕𑀸𑀪𑀸𑀯𑁂𑀧𑀺 𑀲𑀢𑁆𑀢𑀫𑀺𑀬𑀸 𑀧𑀯𑀢𑁆𑀢𑀺 𑀫𑀸𑀳, 𑀦 𑀧𑀭𑁂𑀲𑀁 𑀯𑀺𑀬 𑀓𑀫𑁆𑀫𑀲𑀁𑀬𑁄𑀕𑁂 𑀏𑀯, 𑀢𑁂𑀦𑁂𑀯 𑀯𑀓𑁆𑀔𑀢𑀺-‘𑀏𑀯𑀫𑀜𑁆𑀜𑀢𑁂’𑀘𑁆𑀘𑀸𑀤𑀺, 𑀩𑀸𑀳𑀺𑀭𑀸𑀦𑀁 𑀳𑀺-‘𑀦𑀺𑀫𑀺𑀢𑁆𑀢𑀸 𑀓𑀫𑁆𑀫𑁂𑀦’’ (𑀘𑀁, 𑁨-𑁧-𑁮𑁯) 𑀇𑀢𑀺 𑀲𑀼𑀢𑁆𑀢𑀁, 𑀢𑀢𑁆𑀣 𑀓𑀫𑁆𑀫𑁂𑀦 𑀬𑁄𑀕𑁂 𑀧𑀬𑁄𑀚𑀦𑀸 𑀲𑀢𑁆𑀢𑀫𑀻𑀪𑀯𑀢𑀻𑀢𑁆𑀬𑀢𑁆𑀣𑁄, 𑀅𑀚𑀺𑀦𑀫𑁆𑀳𑀺 𑀳𑀜𑁆𑀜𑀢𑁂 𑀤𑀻𑀧𑀻𑀢𑀺𑀤𑀻𑀧𑀺𑀦𑁄𑀳𑀦𑀦𑀲𑁆𑀲 𑀧𑀬𑁄𑀚𑀦𑀁 𑀘𑀫𑁆𑀫𑀁, 𑀢𑀲𑁆𑀲 𑀤𑀻𑀧𑀺𑀦𑀁𑀳𑀦𑁆𑀢𑀻𑀢𑀺 𑀓𑀫𑁆𑀫𑁂𑀦 𑀬𑁄 𑀕𑁄, 𑀲𑀼𑀢𑁆𑀢𑁂 𑀓𑀫𑁆𑀫𑁂𑀦𑀸𑀢𑁆𑀬𑀯𑀘𑀦𑁂 𑀧𑀬𑁄𑀚𑀦𑀁 𑀯𑀢𑁆𑀢𑀼𑀫𑀸𑀭𑀪𑀢𑁂 ‘𑀦 𑀧𑀦𑁂’𑀘𑁆𑀘𑀸𑀤𑀺.

𑀬𑀲𑁆𑀲 𑀓𑀺𑀭𑀺𑀬𑀸𑀢𑀺 𑀬𑀲𑁆𑀲 𑀕𑀯𑀸𑀤𑁆𑀬𑀢𑁆𑀣𑀲𑁆𑀲 𑀲𑀫𑁆𑀩𑀦𑁆𑀥𑀺𑀦𑀻 𑀤𑁄𑀳𑀦𑀸𑀤𑀺𑀓𑀺𑀭𑀺𑀬𑀸, 𑀓𑀺𑀭𑀺𑀬𑀦𑁆𑀢𑀭𑀲𑁆𑀲𑀸𑀢𑀺 𑀕𑀫𑀦𑀸𑀤𑀺𑀓𑀺𑀭𑀺𑀬𑀦𑁆𑀢𑀭𑀲𑁆𑀲, 𑀏𑀢𑁂𑀦𑀸𑀢𑀺 𑀮𑀓𑁆𑀔𑀡𑀦𑁆𑀢𑀺 𑀏𑀢𑁂𑀦, 𑀢𑀢𑁄-𑀘𑁆𑀘𑀲𑁆𑀲 𑀯𑀺𑀯𑀭𑀡𑀁 𑀓𑀺𑀭𑀺𑀬𑀸𑀯𑀢𑀸𑀢𑀺, ‘‘𑀓𑀸𑀮𑀪𑀸𑀯𑁂𑀲𑀼 𑀘𑁂’’𑀢𑀺 (𑁨-𑁬-𑁪𑁩) 𑀓𑀘𑁆𑀘𑀸𑀬𑀦𑁂𑀳𑀺 𑀲𑀼𑀢𑁆𑀢𑀺𑀢𑀁, 𑀢𑀤𑀸𑀳-‘𑀓𑀸𑀮𑀢𑁆𑀣𑁂𑀳𑀺 𑀘𑀸’𑀢𑀺𑀆𑀤𑀺.

𑀲𑀸𑀫𑀺𑀲𑁆𑀲𑀭𑀸𑀤𑀺𑀬𑁄𑀕𑁂 𑀙𑀝𑁆𑀞𑀻𑀲𑀢𑁆𑀢𑀫𑀺𑀬𑁄 𑀬𑀣𑀸 𑀲𑀺𑀬𑀼𑀦𑁆𑀢𑀺 ‘‘𑀲𑀸𑀫𑀺𑀲𑁆𑀲𑀭𑀸𑀥𑀺𑀧𑀢𑀺𑀤𑀸𑀬𑀸𑀤𑀲𑀓𑁆𑀔𑀺𑀧𑀢𑀺𑀪𑀽𑀧𑀲𑀼𑀢𑁂𑀳𑀺 𑀘 ‘‘𑀇𑀢𑀺 (𑁨-𑁩-𑁩𑁯) 𑀆𑀭𑀤𑁆𑀥𑀁 𑀧𑀭𑁂𑀳𑀺, 𑀢𑀤𑀸𑀳-‘𑀲𑀸𑀫𑀺’𑀘𑁆𑀘𑀸𑀤𑀺, 𑀅𑀢𑁆𑀭 𑀘 𑀚𑀺𑀦𑀺𑀦𑁆𑀤𑀩𑀼𑀤𑁆𑀥𑀺𑀦𑀸 ‘‘𑀲𑀸𑀫𑁆𑀬𑀸𑀤𑀻𑀦𑀁 𑀪𑁂𑀤𑁂𑀦𑁄 𑀧𑀸𑀤𑀸𑀦𑀁 𑀧𑀭𑀺𑀬𑀸𑀬𑀦𑁆𑀢𑀭𑀦𑀺𑀯𑀢𑁆𑀬𑀢𑁆𑀣𑀫𑀺𑀳 𑀫𑀸 𑀳𑁄𑀢𑀼 𑀕𑀸𑀫𑀲𑁆𑀲 𑀭𑀸𑀚𑀸’’𑀢𑀺 𑀯𑀼𑀢𑁆𑀢𑀁 𑀯𑀸𑀓𑁆𑀬𑀫𑀼𑀧𑀦𑁆𑀬𑀲𑁆𑀬 𑀳𑀲𑁆𑀲𑀸𑀧𑁆𑀬 𑀬𑀼𑀢𑁆𑀢𑀢𑁆𑀢𑀫𑀼𑀧𑀤𑀲𑁆𑀲𑀬𑀫𑀸𑀳-‘𑀲𑀸𑀫𑀺𑀲𑁆𑀲𑀭𑁂’𑀘𑁆𑀘𑀸𑀤𑀺, 𑀓𑁂𑀦 𑀦𑀺𑀯𑀸𑀭𑀻𑀬𑀢𑁂, 𑀦 𑀓𑁂𑀦𑀸𑀧𑀻𑀢𑁆𑀬𑀢𑁆𑀣𑁄, 𑀯𑀺𑀲𑀬𑀯𑀘𑀦𑀺𑀘𑁆𑀙𑀸𑀬𑀁 ‘𑀕𑀸𑀫𑁂 𑀭𑀸𑀚𑀸’𑀢𑁆𑀬𑀧𑀺 𑀪𑀯𑀺𑀢𑀩𑁆𑀩𑀫𑀺𑀢𑁆𑀬𑀦𑁂𑀦𑀸𑀳, ‘‘𑀆𑀬𑀼𑀢𑁆𑀢𑀓𑀼𑀲𑀮𑁂𑀳𑁆𑀬𑀸𑀲𑁂𑀯𑀸𑀬’’𑀫𑀻𑀢𑀺 (𑁨-𑁩-𑁪𑁦) 𑀆𑀭𑀤𑁆𑀥𑀁, 𑀢𑀤𑀸𑀳-‘𑀆𑀬𑀼𑀢𑁆𑀢𑁂’𑀘𑁆𑀘𑀸𑀤𑀺, 𑀆𑀲𑀯𑀸 𑀢𑀧𑁆𑀧𑀭𑀢𑀸, 𑀩𑁆𑀬𑀸𑀯𑀝𑁄 𑀦𑀺𑀬𑀼𑀢𑁆𑀢𑁄, 𑀢𑀢𑁆𑀣𑁂𑀤𑀁 𑀲𑀺𑀬𑀸 ‘‘𑀆𑀲𑁂𑀯𑀸𑀬𑀦𑁆𑀢𑀺 𑀯𑀓𑁆𑀔𑀸𑀫𑀻 𑀢𑁆𑀬𑀯𑀲𑁆𑀲𑀁 ¶ 𑀯𑀘𑀦𑀫𑀺𑀤𑀫𑀸𑀭𑀩𑁆𑀪𑀦𑀻𑀬𑀫𑀜𑁆𑀜𑀣𑀸 𑀈𑀲𑀁𑀬𑀼𑀢𑁆𑀢𑁂𑀧𑀺 ‘𑀆𑀬𑀼𑀢𑁆𑀢𑁄 𑀕𑁄 𑀲𑀓𑀝𑀲𑁆𑀲𑀸’𑀢𑀺 𑀧𑀲𑀚𑁆𑀚𑀢𑀻’’𑀢𑁆𑀬𑀸𑀲𑀗𑁆𑀓𑀺𑀬 𑀦𑀢𑁆𑀣𑁂𑀯𑁂𑀢𑀫𑁆𑀧𑀺 𑀧𑀬𑁄𑀚𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘𑀯𑀺𑀦𑀸𑀧𑀺’𑀘𑁆𑀘𑀸𑀤𑀺, ‘‘𑀲𑀸𑀫𑀺𑀲𑁆𑀲𑀭𑀸’’𑀢𑁆𑀬𑀤𑀺𑀓𑀁 𑀓𑀘𑁆𑀘𑀸𑀬𑀦𑀲𑀼𑀢𑁆𑀢𑀁, 𑀢𑁂𑀦𑁂𑀯𑀸𑀢𑀺 𑀓𑀘𑁆𑀘𑀸𑀬𑀦𑀲𑀼𑀢𑁆𑀢𑁂 𑀧𑀲𑀽𑀢𑀲𑀤𑁆𑀤𑀸𑀦𑀦𑁆𑀢𑀭𑀁 𑀓𑀼𑀲𑀮𑀲𑀤𑁆𑀤𑀦𑀺𑀤𑁆𑀤𑁂𑀲𑁂𑀦𑁂𑀯, 𑀇𑀥𑀸𑀢𑀺 𑀫𑁄𑀕𑁆𑀕𑀮𑁆𑀮𑀸𑀦𑀯𑀼𑀢𑁆𑀢𑀺𑀬𑀁. 𑀓𑀘𑁆𑀘𑀸𑀬𑀦𑁂𑀦 ‘‘𑀓𑀫𑁆𑀫𑀓𑀭𑀡 𑀦𑀺𑀫𑀺𑀢𑁆𑀢𑀢𑁆𑀣𑁂𑀲𑀼 𑀲𑀢𑁆𑀢𑀫𑀻’’ (𑁨-𑁬-𑁪𑁦) ‘‘𑀧𑀜𑁆𑀘𑀫𑁆𑀬𑀢𑁆𑀣𑁂 𑀘’’ (𑁨-𑁬-𑁪𑁧) 𑀇𑀢𑀺 𑀘 𑀲𑀼𑀢𑁆𑀢𑀺𑀢𑀁, 𑀢𑁂𑀦𑀸𑀳-‘𑀓𑀫𑁆𑀫𑁂’𑀘𑁆𑀘𑀸𑀤𑀺, 𑀕𑀳𑀡𑀲𑁆𑀲 𑀩𑀸𑀳𑀸 𑀯𑀺𑀲𑀬𑁄𑀢𑀺 𑀲𑀫𑁆𑀩𑀦𑁆𑀥𑁄, 𑀓𑀘𑁆𑀘𑀸𑀬𑀦𑀸𑀦𑀁‘𑀪𑀺𑀓𑁆𑀔𑀽𑀲𑀽’𑀢𑀺𑀆𑀤𑀻𑀦𑀺 𑀓𑀫𑁆𑀫𑀢𑁆𑀣𑁂 𑀉𑀤𑀸𑀳𑀭𑀡𑀸𑀦𑀺, 𑀳𑀢𑁆𑀣𑁂𑀲𑀽𑀢𑀺𑀆𑀤𑀻𑀦𑀺 𑀓𑀭𑀡𑀢𑁆𑀣𑁂, 𑀓𑀤𑀮𑀻𑀲𑀽𑀢𑀺 𑀧𑀜𑁆𑀘𑀫𑁆𑀬𑀢𑁆𑀣𑁂. ‘‘𑀫𑀡𑁆𑀟𑀺𑀢𑀼𑀲𑁆𑀲𑀼𑀓𑁆𑀓𑁂𑀲𑀼 𑀢𑀢𑀺𑀬𑀸 𑀘𑁂’’𑀢𑀺 (𑁨-𑁬-𑁪𑁫) 𑀓𑀘𑁆𑀘𑀸𑀬𑀦𑀲𑀼𑀢𑁆𑀢𑀁, 𑀢𑀤𑀸𑀳 ‘𑀧𑀲𑀦𑁆𑀦𑀢𑁆𑀣𑁂’𑀘𑁆𑀘𑀸𑀤𑀺, 𑀧𑀲𑀦𑁆𑀦𑀢𑁆𑀣𑁂𑀢𑀺 𑀫𑀡𑁆𑀟𑀺𑀢𑀢𑁆𑀣𑁂, 𑀉𑀲𑁆𑀲𑀼𑀓𑁆𑀓𑀢𑁆𑀣𑁂𑀢𑀺 𑀉𑀲𑁆𑀲𑀸𑀳𑀢𑁆𑀣𑁂.

𑀯𑀺𑀲𑀼𑀁 𑀓𑀭𑀡𑀁 𑀦𑀺𑀤𑁆𑀥𑀸𑀭𑀡𑀁, 𑀚𑀺𑀦𑀺𑀦𑁆𑀤𑀩𑀼𑀤𑁆𑀥𑀸𑀘𑀭𑀺𑀬𑁂𑀦 ‘‘𑀓𑀺𑀫𑀢𑁆𑀣𑀫𑁆𑀧𑀼𑀦𑀭𑀺𑀤𑀁 𑀯𑀘𑀦𑀁 𑀬𑀸𑀯𑀢𑀸 𑀦𑀺𑀤𑁆𑀥𑀸𑀭𑀺𑀬𑀫𑀸𑀦𑁄-𑀯𑀬𑀯𑁄 𑀲𑀫𑀼𑀤𑀸𑀬𑀩𑁆𑀪𑀦𑁆𑀢𑀭𑁄, 𑀢𑀢𑁆𑀣 𑀬𑀤𑀸 𑀲𑀫𑀼𑀤𑀸𑀬𑀲𑁆𑀲𑀸-𑀥𑀺𑀓𑀭𑀡𑀢𑁆𑀢𑀁 𑀯𑀢𑁆𑀢𑀼𑀫𑀺𑀘𑁆𑀙𑀻𑀬𑀢𑁂, 𑀢𑀤𑀸 𑀲𑀢𑁆𑀢𑀫𑀻 𑀲𑀺𑀤𑁆𑀥𑀸𑀯, 𑀬𑀣𑀸 𑀭𑀼𑀓𑁆𑀔𑁂 𑀲𑀸𑀔𑀸𑀢𑀺, 𑀬𑀤𑀸 𑀢𑁆𑀯𑀯𑀬𑀯𑀲𑀫𑁆𑀩𑀦𑁆𑀥𑁄 𑀢𑀤𑀸 𑀙𑀝𑁆𑀞𑀻, 𑀬𑀣𑀸 𑀭𑀼𑀓𑁆𑀔𑀲𑁆𑀲 𑀲𑀸𑀔𑀸𑀢𑀺 𑀲𑀘𑁆𑀘𑀫𑁂𑀢𑀁 𑀧𑀧𑀜𑁆𑀘𑀢𑁆𑀣𑀦𑁆𑀢𑀼 𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀜𑁆𑀘𑁂𑀢 𑀫𑀬𑀼𑀢𑁆𑀢𑀦𑁆𑀢𑀺𑀤𑀲𑁆𑀲𑁂𑀦𑁆𑀢𑁄 𑀆𑀳-‘𑀦 𑀲𑀸𑀮𑀬𑁄’𑀘𑁆𑀘𑀸𑀤𑀺𑀲𑀽𑀓𑀬𑀼𑀢𑁆𑀢𑀸𑀦𑀺𑀥𑀜𑁆𑀜𑀸𑀦𑀺 𑀲𑀽𑀓𑀥𑀜𑁆𑀜𑀸𑀦𑀺, 𑀆𑀳𑀺𑀢𑀸 𑀅𑀯𑀝𑁆𑀞𑀺𑀢𑀸, 𑀆𑀥𑁂𑀬𑁆𑀬 𑀪𑀽𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀢𑁄𑀢𑀺 𑀆𑀳𑀺𑀢𑀢𑁆𑀢𑀓𑀸𑀭𑀡𑀸, 𑀢𑀢𑁄𑀢𑀺 𑀬𑀢𑁄 𑀚𑀺𑀦𑀺𑀦𑁆𑀤𑀩𑀼𑀤𑁆𑀥𑀺𑀯𑀘𑀦𑀫𑁂𑀯𑀫𑀬𑀼𑀢𑁆𑀢𑀁, 𑀢𑀲𑁆𑀫𑀸 𑀓𑀸𑀭𑀡𑀸. ‘𑀧𑀜𑁆𑀘𑀫𑀻 𑀯𑀺𑀪𑀢𑁆𑀢𑁂’’𑀢𑀺 (𑁨-𑁩-𑁪𑁨) 𑀧𑀸𑀡𑀺𑀦𑀻𑀬 𑀲𑀼𑀢𑁆𑀢𑀁, 𑀢𑀤𑀸𑀳-‘𑀲𑀫𑀼𑀤𑀸𑀬𑀢𑁄’𑀘𑁆𑀘𑀸𑀤𑀺, 𑀲𑀼𑀢𑀢𑁄 𑀲𑀓𑀸𑀲𑀸 𑀲𑀻𑀮𑀁 𑀅𑀢𑀺𑀲𑀬𑁂𑀦 𑀲𑁂𑀬𑁆𑀬𑁄𑀢𑀺 𑀲𑀫𑁆𑀩𑀦𑁆𑀥𑁄, ‘‘𑀦𑀺𑀤𑁆𑀥𑀸𑀭𑀡𑁂 𑀙𑀝𑁆𑀞𑀻 𑀲𑀢𑁆𑀢𑀫𑀻𑀲𑀼 𑀧𑀢𑁆𑀢𑁂𑀲𑀼 𑀢𑀤𑀧𑀯𑀸𑀤𑁄, 𑀬𑀁 𑀬𑁄𑀕𑁄’’𑀢𑀺 𑀧𑀭𑁂𑀳𑀸𑀔𑁆𑀬𑀸𑀬𑀢𑁂, 𑀢𑀢𑁆𑀣 𑀢𑀸𑀯 𑀦𑀺𑀤𑁆𑀥𑀸𑀭𑀡𑀫𑁂𑀯𑁂𑀢𑁆𑀣 𑀦𑀢𑁆𑀣𑀺 𑀓𑀼𑀢𑁄 𑀙𑀝𑁆𑀞𑀻𑀲𑀢𑁆𑀢𑀫𑀻𑀦𑀁 𑀢𑀢𑁆𑀣𑀧𑁆𑀧𑀯𑀢𑁆𑀢𑀺, 𑀬𑀢𑁄 𑀢𑀸𑀲𑀁 𑀩𑀸𑀥𑀦𑀢𑁆𑀣𑀫𑀺𑀤𑀫𑀸𑀭𑀩𑁆𑀪𑀢𑁂𑀢𑀺 𑀤𑀲𑁆𑀲𑀬𑀫𑀸𑀳-‘𑀦𑀸𑀢𑁆𑀭 𑀚𑀸𑀢𑁆𑀬𑀸𑀤𑀻𑀳𑀺’𑀘𑁆𑀘𑀸𑀤𑀺, 𑀦𑀳𑀺𑀘𑁆𑀘𑀸𑀤𑀺𑀦𑀸 𑀚𑀸𑀢𑁆𑀬𑀸𑀤𑀻𑀳𑀺 𑀦𑀺𑀤𑁆𑀥𑀸𑀭𑀡𑀸𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀚𑀘𑁆𑀘𑀸𑀤𑀻𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀙𑀝𑁆𑀞𑀻, 𑀓𑀼𑀢𑁄 𑀦 𑀪𑀯𑀢𑀺𑀘𑁆𑀘𑀸𑀳-‘𑀚𑀘𑁆𑀘𑀸𑀤𑀺𑀲𑀫𑁆𑀩𑀦𑁆𑀥𑁂𑀦𑁂’𑀘𑁆𑀘𑀸𑀤𑀺, 𑀅𑀢𑀁 𑀩𑁆𑀬𑀧𑀤𑁂𑀲𑀢𑁄𑀢𑀺 𑀲𑀻𑀮𑀢𑁆𑀢𑀸𑀤𑀺𑀩𑁆𑀬𑀧𑀤𑁂𑀲𑀸𑀪𑀸𑀯𑀢𑁄, 𑀧𑀼𑀦 𑀦𑀺𑀤𑁆𑀥𑀸𑀭𑀡𑀸𑀪𑀸𑀯𑁂 𑀳𑁂𑀢𑁆𑀯𑀦𑁆𑀢𑀭𑀫𑀸𑀳-‘𑀢𑀼𑀮𑁆𑀬𑀸𑀦𑀜𑁆𑀘𑁂’’𑀘𑁆𑀘𑀸𑀤𑀺 ¶ . 𑀲𑀸𑀥𑀼𑀦𑀺𑀧𑀼𑀡𑁂𑀳𑀺 𑀬𑁄𑀕𑁂 𑀧𑀽𑀚𑀸𑀬𑀁 𑀕𑀫𑁆𑀫𑀫𑀸𑀦𑀸𑀬𑀁 𑀲𑀢𑁆𑀢𑀫𑀻, 𑀢𑀣𑀸 𑀅𑀲𑀸𑀥𑀼𑀬𑁄𑀕𑁂, 𑀢𑀣𑀸 𑀧𑀲𑀺𑀢𑀉𑀲𑁆𑀲𑀼𑀓𑁆𑀓𑁂𑀳𑀺 𑀬𑁄𑀕𑁂 𑀢𑀢𑀺𑀬𑀸𑀲𑀢𑁆𑀢𑀫𑀺𑀬𑁄, 𑀢𑀣𑀸 𑀮𑁄𑀧𑀦𑁆𑀢𑀦𑀓𑁆𑀔𑀢𑁆𑀢𑀲𑀤𑁆𑀤𑀸 𑀘 𑀢𑁂𑀦 𑀢𑁂𑀦 𑀯𑀘𑀦𑀦𑁆𑀢𑀭𑁂𑀦 𑀧𑀸𑀡𑀺𑀦𑀺𑀬𑁂𑀳𑀺 𑀯𑀺𑀳𑀺𑀢𑀸, 𑀢𑀁 𑀲𑀩𑁆𑀩𑀁 𑀢𑀁𑀢𑀁𑀓𑀸𑀭𑀓𑀯𑀘𑀦𑀺𑀘𑁆𑀙𑀸𑀬𑀫𑁂𑀯 𑀲𑀸𑀥𑁂𑀢𑀼𑀁 ‘𑀫𑀸𑀢𑀭𑀺 𑀲𑀸𑀥𑀼’ 𑀇𑀘𑁆𑀘𑀸𑀤𑀬𑁄 𑀉𑀤𑀸𑀳𑀝𑀸 𑀓𑁂𑀲𑁂𑀲𑀼 𑀧𑀲𑀺𑀢𑁄 𑀧𑀲𑀢𑁆𑀢𑁄, 𑀅𑀯𑀩𑀤𑁆𑀥𑁄𑀢𑀺 𑀅𑀢𑁆𑀣𑁄, 𑀓𑁂𑀲𑁂𑀳𑀺 𑀓𑀭𑀡𑀪𑀽𑀢𑁂𑀳𑀺 𑀧𑀲𑀺𑀢𑁄 𑀪𑀯𑀢𑀺, 𑀓𑀢𑁆𑀢𑀼𑀪𑀽𑀢𑁂𑀳𑀺 𑀯𑀸 𑀧𑀲𑀺𑀢𑁄 𑀓𑀢𑁄𑀢𑀺 𑀅𑀢𑁆𑀣𑁄, 𑀨𑀼𑀲𑁆𑀲𑁂𑀦𑀺𑀦𑁆𑀤𑀼𑀬𑀼𑀢𑁆𑀢𑁂𑀦 𑀮𑀓𑁆𑀔𑀺𑀢𑁄 𑀓𑀸𑀮𑁄 𑀲𑁄𑀬𑀫𑀺𑀢𑁆𑀬𑀪𑁂𑀤𑁂𑀦 𑀲𑀫𑁆𑀩𑀦𑁆𑀥𑀸 𑀨𑀼𑀲𑁆𑀲𑁂, 𑀢𑁂𑀦 𑀓𑀭𑀡𑀪𑀽𑀢𑁂𑀦.

𑀧𑀞𑀫𑀸𑀢𑁆𑀣𑀫𑀢𑁆𑀢𑁂𑀢𑀺 𑀏𑀢𑁆𑀢𑀓𑁂 𑀯𑀼𑀢𑁆𑀢𑁂𑀧𑀺 𑀯𑀸𑀓𑁆𑀬𑀢𑁆𑀣𑁄 𑀧𑀤𑀢𑁆𑀣𑁄 𑀯𑀸 𑀦 𑀯𑀺𑀜𑁆𑀜𑀸𑀬𑀢𑁂 𑀦𑀸𑀫𑀕𑁆𑀕𑀳𑀡𑀸𑀦𑀼𑀯𑀢𑁆𑀢𑀺𑀢𑁄𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘𑀤𑁆𑀯𑁂𑀤𑁆𑀯𑁂𑀓𑀸𑀦𑁂𑀓𑀸𑀤𑀺 𑀲𑀼𑀢𑁆𑀢𑀢𑁄’𑀢𑀺𑀆𑀤𑀺, 𑀦𑀸𑀫𑁂𑀦𑀸𑀢𑁆𑀣𑁄 𑀧𑀝𑀺𑀧𑀸𑀤𑀺𑀬𑀫𑀸𑀦𑁄 𑀦𑀸𑀫𑀲𑀗𑁆𑀔𑀸𑀢𑁂-𑀢𑁆𑀢𑀦𑀺 𑀅𑀪𑀺𑀥𑁂𑀬𑁆𑀬𑀢𑁆𑀢𑁂𑀦𑀸𑀚𑁆𑀛𑀸𑀭𑁄𑀧𑁆𑀬 𑀧𑀝𑀺𑀧𑀸𑀤𑀬𑀢𑁆𑀬𑀦𑀧𑁂𑀓𑁆𑀔𑀺𑀢 𑀯𑀺𑀪𑀢𑁆𑀢𑀺𑀯𑀺𑀲𑁂𑀲𑀦𑁆𑀢𑀺 𑀆𑀳-‘𑀅𑀪𑀺𑀥𑀻𑀬𑀢𑀺’𑀘𑁆𑀘𑀸𑀤𑀺, 𑀧𑀓𑀢𑀺𑀭𑀽𑀧𑁂𑀦𑀸𑀢𑀺 𑀦𑀸𑀫𑁂𑀦, 𑀢𑀲𑁆𑀲 𑀅𑀪𑀺𑀥𑁂𑀬𑁆𑀬𑀲𑁆𑀲, 𑀫𑀢𑁆𑀢𑀲𑀤𑁆𑀤𑀲𑁆𑀲𑀸𑀢𑀺𑀆𑀤𑀺𑀦𑀸 𑀲𑀸𑀫𑀜𑁆𑀜𑀦𑁆𑀢𑀻𑀤𑀁 𑀫𑀢𑁆𑀢𑀲𑀤𑁆𑀤𑀲𑁆𑀲𑀢𑁆𑀣𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺, 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀦𑀸𑀫𑀲𑁆𑀲𑀸𑀪𑀺𑀥𑁂𑀬𑁆𑀬𑀫𑀢𑁆𑀢𑁂𑀢𑀺 𑀇𑀫𑀺𑀦𑀸 𑀇𑀤𑀁 𑀯𑀓𑁆𑀔𑀫𑀸𑀦𑀁 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀧𑀸𑀝𑀺𑀧𑀤𑀺𑀓𑀢𑁆𑀣𑀮𑀺𑀗𑁆𑀕𑀧𑀭𑀺𑀫𑀸𑀡𑀯𑀘𑀦𑀫𑀢𑁆𑀢𑁂 𑀧𑀞𑀫𑀸’’𑀢𑀺 (𑁨-𑁩-𑁪𑁬) 𑀮𑀺𑀗𑁆𑀕𑀸𑀤𑀻𑀲𑀼 𑀪𑁂𑀤𑁂𑀦 𑀧𑀞𑀫𑀸𑀯𑀺𑀥𑀸𑀦𑀫𑁆𑀧𑀝𑀺𑀧𑀦𑁆𑀦𑀸, 𑀢𑀤𑀸𑀳-‘𑀮𑀺𑀗𑁆𑀕𑀧𑀭𑀺𑀫𑀸𑀡𑁂’𑀘𑁆𑀘𑀸𑀤𑀺, 𑀮𑀺𑀗𑁆𑀕𑀁 𑀇𑀢𑁆𑀣𑀺𑀧𑀼𑀦𑁆𑀦𑀧𑀼𑀁𑀲𑀓𑀸𑀦𑀺, 𑀧𑀭𑀺𑀫𑀸𑀡𑀁 𑀧𑀭𑀺𑀘𑁆𑀙𑁂𑀤𑁄, 𑀲𑀗𑁆𑀔𑁆𑀬𑀸 𑀏𑀓𑀢𑁆𑀢𑀩𑀳𑀼𑀢𑁆𑀢𑀸𑀦𑀺, 𑀢𑀩𑁆𑀩𑀦𑁆𑀢𑁄𑀧𑀺 𑀲𑀤𑁆𑀤𑀢𑁆𑀣𑁄𑀏𑀯𑀸𑀢𑀺 𑀮𑀺𑀗𑁆𑀕𑀸𑀤𑀺𑀯𑀦𑁆𑀢𑁄𑀧𑀺 𑀲𑀭𑀽𑀧𑀸 𑀩𑁆𑀬𑀢𑀺𑀭𑀺𑀢𑁆𑀢𑁄 𑀲𑀤𑁆𑀤𑀢𑁆𑀣𑁄 𑀏𑀯, 𑀉𑀘𑁆𑀘𑀢𑁆𑀢𑀦𑀻𑀘𑀢𑁆𑀢𑀲𑀸𑀫𑀜𑁆𑀜𑀫𑁆𑀧𑀼𑀭𑁄𑀥𑀸𑀬 𑀧𑀯𑀢𑁆𑀢𑀺𑀬𑀸 𑀉𑀘𑁆𑀘𑀦𑀻𑀘𑀲𑀤𑁆𑀤𑁂𑀳𑀺 𑀧𑀞𑀫𑀸 𑀳𑁄𑀢𑁂𑀯, 𑀢𑀁𑀬𑀼𑀢𑁆𑀢𑀲𑁆𑀲𑀸𑀧𑀺 𑀲𑀤𑁆𑀤𑀢𑁆𑀣𑀪𑀸𑀯𑀢𑁄 ‘𑀉𑀘𑁆𑀘𑀁 𑀖𑀭𑀸𑀦𑀺’𑀢𑁆𑀬𑀸𑀤𑀻𑀦𑀺𑀧𑀺 𑀉𑀘𑁆𑀘𑀢𑁆𑀢𑀁 𑀕𑀼𑀡𑀁 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀲𑁄𑀬𑀫𑀺𑀢𑁆𑀬𑀪𑁂𑀤𑀲𑀫𑁆𑀩𑀦𑁆𑀥 𑀖𑀭𑁂𑀲𑀼 𑀯𑀢𑁆𑀢𑀦𑁆𑀢𑀻𑀢𑀺. 𑀧𑀮𑀫𑁆𑀩𑀢𑁂 𑀅𑀚𑁆𑀛𑀸𑀕𑀘𑁆𑀙𑀢𑀺𑀢𑁆𑀬𑀸𑀤𑁄 ‘‘𑀅𑀲𑀗𑁆𑀔𑁆𑀬𑁂𑀳𑀺 𑀲𑀩𑁆𑀩𑀸𑀲𑀁’’𑀢𑀺 (𑁨-𑁧𑁧𑁯) 𑀮𑁄𑀧𑀯𑀺𑀥𑀸𑀦𑀲𑀸𑀫𑀢𑁆𑀣𑀺𑀬𑀸 𑀧𑀸𑀤𑀻𑀳𑁆𑀬𑀦𑀢𑁆𑀣𑀓𑁂𑀳𑀺𑀧𑀺 𑀧𑀞𑀫𑀸 𑀲𑀺𑀤𑁆𑀥𑀸𑀬𑁂𑀯.

𑀅𑀪𑀺𑀫𑀼𑀔𑀁 𑀓𑀢𑁆𑀯𑀸𑀢𑀺𑀆𑀤𑀺𑀦𑀸 𑀬𑁄𑀕𑀸𑀭𑀫𑁆𑀪𑀲𑁆𑀲 𑀨𑀮𑀁 𑀤𑀲𑁆𑀲𑁂𑀢𑀺, 𑀦𑀸𑀫𑀢𑁆𑀣𑁂𑀢𑀺 ¶ 𑀲𑀤𑁆𑀤𑀢𑁆𑀣𑁂, 𑀧𑀤𑀢𑁄𑀢𑀺 𑀆𑀫𑀦𑁆𑀢𑀡𑀸𑀥𑀺𑀓𑀅𑀢𑁆𑀣𑀫𑀢𑁆𑀢𑀧𑁆𑀧𑀓𑀸𑀲𑀓𑀧𑀤𑀢𑁄, 𑀳𑁄𑀦𑁆𑀢𑀺 𑀘𑁂𑀢𑁆𑀣…

𑀲𑀺𑀤𑁆𑀥𑀲𑁆𑀲𑀸𑀪𑀺𑀫𑀼𑀔𑀻𑀓𑀸𑀭 [𑀪𑀺𑀫𑀼𑀔𑀻𑀪𑀸𑀯 (𑀧𑁄𑀢𑁆𑀣𑀓𑁂)], 𑀫𑀢𑁆𑀢𑀫𑀸𑀫𑀦𑁆𑀢𑀡𑀁 𑀲𑀺𑀬𑀸;

𑀅𑀢𑁆𑀣𑁄 𑀓𑀢𑀸𑀪𑀺𑀫𑀼𑀔𑁄 𑀳𑀺, 𑀓𑁆𑀭𑀺𑀬𑀸𑀬𑀁 𑀯𑀺𑀦𑀺𑀬𑀼𑀚𑁆𑀚𑀢𑁂;

𑀆𑀫𑀦𑁆𑀢𑀡𑀁 𑀦 𑀯𑀸𑀓𑁆𑀬𑀢𑁆𑀣𑁄, 𑀧𑀤𑀢𑁄𑀯 𑀧𑀢𑀻𑀢𑀺𑀢𑁄;

𑀦𑀢𑁆𑀣𑁂𑀯𑀸𑀫𑀦𑁆𑀢𑀡𑀁 𑀮𑁄𑀓𑁂, 𑀯𑀺𑀥𑀸𑀢𑀩𑁆𑀩𑁂𑀦 𑀯𑀢𑁆𑀣𑀼𑀦𑀸;

𑀢𑀁 𑀬𑀣𑀸 𑀪𑀯 𑀭𑀸𑀚𑁂𑀢𑀺, 𑀦𑀺𑀧𑁆𑀧𑀦𑁆𑀦𑀢𑁆𑀣𑁄 𑀪𑀯𑁂𑀢𑀺 𑀘.

𑀲𑀺𑀤𑁆𑀥𑀲𑁆𑀲𑀸𑀢𑀺 𑀤𑁂𑀯𑀤𑀢𑁆𑀢𑀢𑁆𑀢𑀸𑀤𑀺𑀦𑀸 𑀲𑀺𑀤𑁆𑀥𑀲𑁆𑀲, 𑀅𑀢𑁆𑀣𑁄𑀢𑀺 𑀤𑁂𑀯𑀤𑀢𑁆𑀢𑀸𑀤𑀺, 𑀓𑀢𑀁 𑀆𑀪𑀺𑀫𑀼𑀔𑁆𑀬𑀁 𑀲𑀫𑀸𑀥𑀸𑀦𑀁 𑀬𑁂𑀦𑀸𑀢𑀺 𑀯𑀺𑀕𑁆𑀕𑀳𑁄, 𑀓𑁆𑀭𑀺𑀬𑀸𑀬𑀁 𑀯𑀺𑀦𑀺𑀬𑀼𑀚𑁆𑀚𑀢𑁂 𑀕𑀘𑁆𑀙 𑀪𑀼𑀜𑁆𑀚𑀸𑀢𑀺, 𑀆𑀫𑀦𑁆𑀢𑀡𑀁 𑀦𑀢𑁆𑀣𑀺… 𑀇𑀤𑀸𑀦𑀺 𑀯𑀺𑀥𑀻𑀬𑀫𑀸𑀦𑀢𑁆𑀢𑁂𑀦𑀸𑀮𑀤𑁆𑀥𑀲𑀢𑁆𑀢𑀺𑀓𑀲𑁆𑀲𑀸𑀪𑀺𑀫𑀼𑀔𑀬𑀺𑀢𑀼𑀫𑀲𑀓𑁆𑀓𑀭𑀽𑀧𑀢𑁆𑀢𑀸, 𑀯𑀺𑀥𑀸𑀢𑀩𑁆𑀩𑁂𑀦𑀸𑀢𑀺 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂𑀦.

𑀓𑀺𑀭𑀺𑀬𑀸𑀓𑀸𑀭𑀓𑁂𑀘𑁆𑀘𑀸𑀤𑀺𑀯𑀼𑀢𑁆𑀢𑀺𑀕𑀦𑁆𑀣𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀁 𑀓𑀢𑁆𑀢𑀼𑀫𑀸𑀭𑀪𑀢𑁂 ‘𑀏𑀓𑀸𑀬𑀁 𑀲𑀫𑁆𑀩𑀦𑁆𑀥𑁄 𑀦𑀸𑀫𑁂’𑀘𑁆𑀘𑀸𑀤𑀺, 𑀓𑀺𑀭𑀺𑀬𑀸𑀬 𑀓𑀸𑀭𑀓𑁂𑀳𑀺 𑀘 𑀦𑀺𑀧𑁆𑀨𑀸𑀤𑀺𑀢𑁄𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀲𑁆𑀲 𑀓𑀺𑀭𑀺𑀬𑀸𑀓𑀸𑀭𑀓𑀲𑀫𑁆𑀩𑀦𑁆𑀥 𑀧𑀼𑀩𑁆𑀩𑀓𑀢𑁆𑀢𑀫𑀸𑀳, 𑀢𑀢𑁄𑀬𑁂𑀯𑀸𑀬𑀁 𑀦𑀸𑀓𑀲𑁆𑀫𑀻𑀓𑁄𑀢𑀺 𑀦 𑀬𑁂𑀲𑀁𑀓𑁂𑀲𑀜𑁆𑀘𑀺 𑀤𑁆𑀯𑀺𑀦𑁆𑀦𑀁 𑀪𑀯𑀢𑀺, 𑀯𑀺𑀲𑀺𑀝𑁆𑀞𑀸𑀦𑀁𑀬𑁂𑀯 𑀢𑀼 𑀤𑁆𑀯𑀺𑀦𑁆𑀦𑀁 𑀪𑀯𑀢𑀻𑀢𑁆𑀬𑀢𑀺𑀧𑁆𑀧𑀲𑀗𑁆𑀕𑀸𑀪𑀸𑀯𑁄, 𑀓𑀺𑀭𑀺𑀬𑀸𑀓𑀸𑀭𑀓𑀲𑀫𑁆𑀩𑀦𑁆𑀥𑀧𑀼𑀩𑁆𑀩𑀓𑁄 𑀳𑀺 𑀓𑀸𑀭𑀓𑁂𑀳𑀺 𑀅𑀜𑁆𑀜𑁄 𑀲𑀲𑁆𑀲𑀸𑀫𑀺𑀪𑀸𑀯𑀸𑀤𑀺𑀓𑁄 𑀲𑀫𑁆𑀩𑀦𑁆𑀥𑁄, 𑀢𑀣𑀸 𑀘 𑀯𑀼𑀢𑁆𑀢𑀁𑁋

‘‘𑀲𑀫𑁆𑀩𑀦𑁆𑀥𑁄 𑀓𑀸𑀭𑀓𑁂𑀳𑀜𑁆𑀜𑁄, 𑀓𑁆𑀭𑀺𑀬𑀸𑀓𑀸𑀭𑀓𑀧𑀼𑀩𑁆𑀩𑀓𑁄;

𑀲𑀼𑀢𑀸𑀬𑀫𑀲𑁆𑀲𑀼𑀢𑀸𑀬𑀁𑀯𑀸, 𑀓𑁆𑀭𑀺𑀬𑀸𑀬𑀁 𑀲𑁄-𑀪𑀺𑀥𑀻𑀬𑀢𑁂𑀢𑀺.

𑀢𑀢𑁆𑀣 𑀅𑀲𑁆𑀲𑀼𑀢𑀸𑀬𑀁 𑀓𑀺𑀭𑀺𑀬𑀸𑀬𑀁 ‘𑀭𑀜𑁆𑀜𑁄 𑀧𑀼𑀭𑀺𑀲𑁄’𑀘𑁆𑀘𑀸𑀤𑁄 𑀓𑀺𑀭𑀺𑀬𑀸 𑀓𑀸𑀭𑀓𑀲𑀫𑁆𑀩𑀦𑁆𑀥𑀧𑀼𑀩𑁆𑀩𑀓𑁄-𑀜𑁆𑀜𑁄 𑀏𑀯 𑀲𑀲𑁆𑀲𑀸𑀫𑀺𑀪𑀸𑀯𑀸𑀤𑀺𑀓𑁄 𑀲𑀫𑁆𑀩𑀦𑁆𑀥𑁄 𑀧𑀢𑀻𑀬𑀢𑁂𑀢𑀺, ‘𑀲𑀭𑀢𑀺 𑀭𑀚𑁆𑀚𑀲𑁆𑀲’𑀢𑁆𑀬𑀸𑀤𑁄 𑀢𑀼 𑀲𑀼𑀬𑁆𑀬𑀫𑀸𑀦𑁂 𑀓𑀺𑀭𑀺𑀬𑀸𑀲𑀤𑁆𑀤𑁂, 𑀏𑀢𑁆𑀣 𑀧𑀦 𑀲𑀦𑁆𑀢𑀫𑀧𑀺 𑀓𑀫𑁆𑀫𑀁 𑀯𑀢𑁆𑀢𑀼𑀫𑀦𑀺𑀘𑁆𑀙𑀺𑀢𑀁, 𑀯𑀺𑀲𑁂𑀲𑀦𑀪𑀸𑀯𑁄𑀬𑁂𑀯 𑀲𑀭𑀡𑀫𑁆𑀧𑀢𑀺 𑀭𑀚𑁆𑀚𑀲𑁆𑀲 𑀧𑀝𑀺𑀧𑀸𑀤𑀻𑀬𑀢𑁂’𑀭𑀚𑁆𑀚𑀲𑀫𑁆𑀩𑀦𑁆𑀥𑀺𑀲𑀭𑀡’𑀦𑁆𑀢𑀺, 𑀓𑀺𑀭𑀺𑀬𑀸𑀓𑀸𑀭𑀓 𑀲𑀫𑁆𑀩𑀦𑁆𑀥𑁄 𑀳𑀺 𑀲𑀩𑁆𑀩𑀢𑁆𑀣 𑀯𑀢𑁆𑀣𑀼𑀝𑁆𑀞𑀺𑀢𑀺𑀯𑀲𑁂𑀦𑁂𑀯𑀢𑁆𑀣𑀺, 𑀢𑀦𑁆𑀦𑀺𑀫𑀺𑀢𑁆𑀢𑁄 𑀘 𑀲𑀲𑁆𑀲𑀸𑀫𑀺 𑀪𑀸𑀯𑀸𑀤𑀺, 𑀢𑀢𑁆𑀣 𑀲𑀲𑁆𑀲𑀸𑀫𑀺𑀪𑀸𑀯𑀯𑀺𑀯𑀘𑁆𑀙𑀸𑀬𑀁 𑀯𑀺𑀚𑁆𑀚𑀫𑀸𑀦𑁄𑀧𑀺 𑀓𑀺𑀭𑀺𑀬𑀸𑀓𑀸𑀭𑀓 𑀲𑀫𑁆𑀩𑀦𑁆𑀥𑁄 ¶ 𑀦 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑁄, 𑀬𑀣𑀸 ‘𑀅𑀦𑀼𑀤𑀭𑀸 𑀓𑀜𑁆𑀜𑀸’𑀢𑀺, 𑀲𑁄 𑀘𑀸𑀬𑀁 𑀲𑀫𑁆𑀩𑀦𑁆𑀥𑁄 𑀲𑀲𑁆𑀲𑀸𑀫𑀺𑀪𑀸𑀯𑀚𑀜𑁆𑀜𑀚𑀦𑀓𑀪𑀸𑀯𑀸-𑀯𑀬𑀯𑀸𑀯𑀬𑀯𑀯𑀺𑀪𑀸𑀯𑀸𑀤𑀺𑀮𑀓𑁆𑀔𑀡𑁄 𑀩𑀳𑀼𑀯𑀺𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀢𑀢𑁆𑀣 𑀲𑀲𑁆𑀲𑀸𑀫𑀺𑀲𑀫𑁆𑀩𑀦𑁆𑀥𑁂 𑀭𑀜𑁆𑀜𑁄 𑀧𑀼𑀭𑀺𑀲𑁄, 𑀚𑀜𑁆𑀜𑀚𑀦𑀓𑀲𑀫𑁆𑀩𑀦𑁆𑀥𑁂 𑀦𑀺𑀕𑁆𑀭𑁄𑀥𑀲𑁆𑀲 𑀩𑀻𑀚𑀁, 𑀅𑀯𑀬𑀯𑀸𑀯𑀬𑀯𑀺𑀲𑀫𑁆𑀩𑀦𑁆𑀥𑁂 𑀭𑀼𑀓𑁆𑀔𑀲𑁆𑀲 𑀲𑀸𑀔𑀸, 𑀇𑀤𑀸𑀦𑀺 𑀲𑀫𑁆𑀩𑀦𑁆𑀥𑀲𑁆𑀲𑁂𑀢𑀲𑁆𑀲 𑀓𑀺𑀭𑀺𑀬𑀸𑀓𑀸𑀭𑀓𑀲𑀫𑁆𑀩𑀦𑁆𑀥𑀲𑀜𑁆𑀚𑀸𑀢𑀢𑁆𑀢𑀁 𑀬𑀣𑀸𑀬𑁄𑀕𑀫𑀜𑁆𑀜𑀢𑁆𑀭𑀸𑀧𑁆𑀬𑀯𑀕𑀫𑀬𑀺𑀢𑀼𑀁 𑀓𑀺𑀜𑁆𑀘𑀺 𑀉𑀤𑀸𑀳𑀭𑀡𑀫𑀸𑀳-‘𑀢𑀣𑀸 𑀳𑀺’𑀘𑁆𑀘𑀸𑀤𑀺, 𑀧𑀭𑀺𑀧𑀸𑀮𑀦𑀓𑀺𑀭𑀺𑀬𑀸𑀓𑀢𑁄 𑀦𑁂𑀲𑀁 𑀲𑀫𑁆𑀩𑀦𑁆𑀥𑁄𑀢𑀺 𑀇𑀫𑀺𑀦𑀸 𑀧𑀭𑀺𑀧𑀸𑀮𑁆𑀬𑀧𑀭𑀺𑀧𑀸𑀮𑀦𑀮𑀓𑁆𑀔𑀡𑁄-𑀬𑀁 𑀲𑀫𑁆𑀩𑀦𑁆𑀥𑁄𑀢𑀺 𑀤𑀲𑁆𑀲𑁂𑀢𑀺, 𑀲𑀸 𑀅𑀬𑀫𑁆𑀧𑀭𑀺 𑀧𑀸𑀮𑀦𑀮𑀓𑁆𑀔𑀡𑀸 𑀓𑀺𑀭𑀺𑀬𑀸 𑀲𑀫𑁆𑀩𑀦𑁆𑀥𑀫𑀲𑁆𑀲𑁂𑀤𑀫𑁆𑀪𑀸𑀯𑀳𑁂𑀢𑀼𑀁 𑀚𑀦𑀬𑀺𑀢𑁆𑀯𑀸 𑀦𑀺𑀯𑀢𑁆𑀢𑀢𑀺, 𑀅𑀢𑁆𑀣𑀧𑁆𑀧𑀓𑀭𑀡𑀸𑀤𑀺𑀦𑀸 𑀢𑁆𑀯𑀺𑀫𑀸𑀬 𑀓𑀺𑀭𑀺𑀬𑀸𑀬𑀸𑀬𑀁 𑀲𑀫𑁆𑀩𑀦𑁆𑀥𑁄𑀢𑀺 𑀯𑀺𑀲𑁂𑀲𑁄 𑀯𑀲𑀻𑀬𑀢𑁂, 𑀦 𑀙𑀝𑁆𑀞𑀺𑀬𑀸 𑀯𑀺𑀲𑁂𑀲𑀸𑀯𑀕𑀫𑀦𑁂 𑀲𑀸𑀫𑀢𑁆𑀣𑀺𑀬𑀁… 𑀢𑀲𑁆𑀲𑀸 𑀲𑀩𑁆𑀩𑀢𑁆𑀣𑁂𑀓𑀭𑀽𑀧𑀢𑁆𑀢𑀸, 𑀲𑀼𑀬𑁆𑀬𑀫𑀸𑀦𑁂 𑀏𑀯 𑀯𑀸 𑀓𑀺𑀭𑀺𑀬𑀸𑀲𑀤𑁆𑀤𑁂 𑀓𑀸𑀭𑀓𑀪𑀸𑀯𑀲𑁆𑀲 𑀳𑁂𑀢𑀼𑀦𑁄 𑀯𑀘𑀦𑀺𑀘𑁆𑀙𑀸𑀬𑀸𑀪𑀸𑀯𑁂 𑀅𑀲𑁆𑀲𑁂𑀤𑀫𑁆𑀪𑀸𑀪𑀸𑀯𑀲𑀗𑁆𑀔𑀸𑀢𑀲𑁆𑀲𑁂𑀯 𑀨𑀮𑀲𑁆𑀲 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀢𑁆𑀢𑀸 𑀢𑀣𑁂𑀯 𑀲𑀫𑁆𑀩𑀦𑁆𑀥𑁄 𑀚𑀸𑀢𑁄 𑀙𑀝𑁆𑀞𑀺𑀬𑀸𑀪𑀺𑀥𑀻𑀬𑀢𑁂 ‘𑀭𑀚𑁆𑀚𑀲𑁆𑀲 𑀲𑀭𑀢𑀻’𑀢𑀺, 𑀯𑀼𑀢𑁆𑀢𑀁 𑀳𑀺𑁋

𑀚𑀦𑀬𑀺𑀢𑁆𑀯𑀸𑀦 𑀲𑀫𑁆𑀩𑀦𑁆𑀥𑀁, 𑀓𑁆𑀭𑀺𑀬𑀸 𑀓𑀸𑀘𑀺 𑀦𑀺𑀯𑀢𑁆𑀢𑀢𑀺;

𑀲𑀼𑀬𑁆𑀬𑀫𑀸𑀦𑁂 𑀓𑁆𑀭𑀺𑀬𑀸𑀲𑀤𑁆𑀤𑁂, 𑀲𑀫𑁆𑀩𑀦𑁆𑀥𑁄 𑀚𑀸𑀬𑀢𑁂 𑀓𑁆𑀯𑀘𑀻𑀢𑀺.

𑀧𑀭𑀺𑀧𑀸𑀮𑀬𑀢𑀻𑀢𑀺 𑀧𑀼𑀭𑀺𑀲𑀫𑁆𑀧𑀭𑀺𑀧𑀸𑀮𑀬𑀢𑀺, 𑀢𑀢𑁄 𑀧𑀸𑀮𑀦𑀸𑀤𑀺𑀓𑀸 𑀉𑀧𑀓𑀸𑀭 𑀲𑀪𑀸𑀯𑀸 𑀓𑀺𑀭𑀺𑀬𑀸𑀤𑁆𑀯𑀺𑀦𑁆𑀦𑀫𑁆𑀧𑀺 𑀢𑁂𑀲𑀁 𑀲𑀫𑁆𑀩𑀦𑁆𑀥𑀺𑀦𑀻 𑀪𑀯𑀢𑀺, 𑀭𑀜𑁆𑀜𑀸 𑀳𑀺 𑀓𑀸𑀭𑀺𑀬𑀫𑀸𑀦𑀸 𑀢𑀁𑀲𑀫𑁆𑀩𑀦𑁆𑀥𑀺𑀦𑀻𑀧𑀼𑀭𑀺𑀲𑀯𑀺𑀲𑀬𑀢𑁆𑀢𑀸𑀯𑀧𑀼𑀭𑀺𑀲𑀬𑁄𑀕𑀺𑀦𑀻𑀢𑁆𑀬𑀼𑀪𑀺𑀦𑁆𑀦𑀫𑁆𑀧𑀺𑀓𑀺𑀭𑀺𑀬𑀸𑀲𑀫𑁆𑀪𑀯𑀢𑀺, 𑀢𑀢𑁄𑀬𑁂𑀯𑀢𑀲𑁆𑀲𑀸 𑀉𑀪𑀬𑀲𑀫𑁆𑀩𑀦𑁆𑀥𑀺𑀦𑀺𑀬𑀸 𑀓𑀺𑀭𑀺𑀬𑀸𑀬 𑀲𑀫𑁆𑀪𑀯𑁂𑀅𑀲𑁆𑀲𑁂𑀤𑀦𑁆𑀢𑀺 𑀩𑀼𑀤𑁆𑀥𑀺𑀬𑀸 𑀳𑁂𑀢𑀼𑀪𑀽𑀢𑀲𑁆𑀲 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀲𑀪𑀸𑀯𑀲𑁆𑀲 𑀲𑀫𑁆𑀩𑀦𑁆𑀥𑀲𑁆𑀲 𑀪𑀸𑀯𑀢𑁄 𑀓𑀺𑀭𑀺𑀬𑀸𑀚𑀦𑀺𑀢𑀢𑁆𑀢𑀫𑀲𑁆𑀲, 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀸𑀮𑀓𑁆𑀔𑀡𑁄… 𑀲𑀩𑁆𑀩𑀣𑀸 𑀦𑀺𑀭𑀧𑁂𑀓𑁆𑀔𑀢𑁆𑀢𑁂 𑀲𑀫𑁆𑀩𑀦𑁆𑀥𑀸𑀪𑀸𑀯𑀸, 𑀲𑀫𑁆𑀩𑀦𑁆𑀥𑀺 𑀩𑀼𑀤𑁆𑀥𑀺𑀲𑀩𑁆𑀪𑀯𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑀻𑀲𑀼 𑀭𑀸𑀚𑀧𑀼𑀭𑀺𑀲𑀸𑀤𑀻𑀲𑀼 𑀅𑀲𑁆𑀲𑁂𑀤𑀦𑁆𑀢𑀺 𑀏𑀯𑀫𑁆𑀧𑀯𑀢𑁆𑀢𑀸𑀬 𑀩𑀼𑀤𑁆𑀥𑀺𑀬𑀸 𑀲𑀩𑁆𑀪𑀯𑀲𑁆𑀲. 𑀧𑀭𑁂𑀲𑀁 𑀯𑀺𑀬 ‘‘𑀕𑀼𑀡𑁂 𑀙𑀝𑁆𑀞𑀻’’𑀢𑀺 𑀯𑀘𑀦𑀦𑁆𑀢𑀭𑀸𑀪𑀸𑀯𑁂 𑀉𑀪𑀬𑀢𑁆𑀣𑀧𑀺 (𑀘𑁂𑀢𑁆𑀣) [(𑀬𑁂𑀯) (𑀧𑁄𑀢𑁆𑀣𑀓𑁂)] 𑀙𑀝𑁆𑀞𑀺𑀧𑁆𑀧- 𑀲𑀗𑁆𑀕𑁄𑀢𑀺 𑀩𑁄𑀥𑁂𑀢𑀼𑀫𑀸𑀳-‘𑀦𑀦𑀼 𑀘𑁂’𑀘𑁆𑀘𑀸𑀤𑀺, 𑀲𑀘𑁆𑀘𑀦𑁆𑀢𑀺 𑀬𑀣𑀸 𑀯𑀼𑀢𑁆𑀢𑀁 𑀘𑁄𑀤𑀦𑀫𑀩𑁆𑀪𑀼𑀧𑀕𑀫𑁆𑀫 𑀘𑁄𑀤𑀓𑀫𑁆𑀧𑀢𑀺 𑀬𑀣𑀸𑀯𑀼𑀢𑁆𑀢𑀁 𑀲𑀫𑁆𑀩𑀦𑁆𑀥𑀭𑀽𑀧𑀁 𑀢𑀢𑁄-𑀜𑁆𑀜𑀢𑁆𑀭𑀸𑀧𑁆𑀬𑀼𑀧𑀲𑀁 𑀳𑀭𑀺𑀢𑁆𑀯𑀸 ¶ 𑀢𑀢𑁆𑀣 𑀙𑀝𑁆𑀞𑀺𑀧𑁆𑀧𑀲𑀗𑁆𑀕𑀁 𑀘𑁄𑀤𑁂𑀢𑀼𑀫𑀸𑀳-‘𑀤𑁂𑀯𑀤𑀢𑁆𑀢𑁄’𑀘𑁆𑀘𑀸𑀤𑀺, 𑀅𑀣𑁂𑀯 𑀫𑀺𑀘𑁆𑀘𑀸𑀤𑀺𑀦𑀸𑀲𑀢𑀻𑀧𑀺𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀸𑀮𑀓𑁆𑀔𑀡𑁂 𑀲𑀫𑁆𑀩𑀦𑁆𑀥𑁂 𑀯𑀘𑀦𑀺𑀘𑁆𑀙𑀸𑀬𑁂𑀯𑁂𑀢𑁆𑀣 𑀓𑀸𑀭𑀡𑀦𑁆𑀢𑀺 𑀘𑁄𑀤𑀓𑀸𑀥𑀺𑀧𑁆𑀧𑀸𑀬𑀫𑀢𑁆𑀭𑁄𑀧𑀦𑁂𑀢𑁆𑀯𑀸 𑀢𑀤𑁂𑀯 𑀯𑀺𑀲𑁂𑀲𑀢𑁄 𑀙𑀝𑁆𑀞𑀺𑀬𑀸 𑀅𑀪𑀸𑀯𑁂 𑀲𑀫𑀼𑀧𑀦𑁂𑀢𑀼𑀁‘𑀬𑀚𑁆𑀚𑁂𑀯𑀫𑀺𑀳𑀸𑀧𑀺’𑀘𑁆𑀘𑀸𑀤𑀺𑀓𑀫𑀸𑀳, 𑀢𑀢𑁆𑀣 𑀅𑀣𑀸𑀢𑀺 𑀘𑁄𑀤𑀓𑀸𑀥𑀺𑀧𑁆𑀧𑀸𑀬𑀧𑁆𑀧𑀓𑀸𑀲𑀦𑀸𑀭𑀫𑁆𑀪𑁂 𑀦𑀺𑀧𑀸𑀢𑁄, 𑀏𑀯𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀏𑀯𑀁 𑀬𑀤𑀺𑀧𑀺𑀘𑁆𑀘𑀸𑀤𑀺𑀦𑀸 𑀯𑀓𑁆𑀔𑀫𑀸𑀦𑀦𑀬𑁂𑀦 𑀯𑀢𑁆𑀢𑀩𑁆𑀩𑀁, 𑀧𑀝𑀺𑀧𑀸𑀤𑁂𑀢𑀩𑁆𑀩𑀢𑀸𑀬𑀸𑀢𑁆𑀬𑀸𑀤𑀺𑀦𑀸 𑀇𑀤𑀦𑁆𑀤𑀻𑀧𑁂𑀢𑀺 ‘‘𑀯𑀺𑀲𑁂𑀲𑁆𑀲𑀁 𑀯𑀺𑀥𑁂𑀬𑀢𑀸𑀬 𑀦 𑀧𑀭𑀸𑀥𑀻𑀦𑀦𑁆𑀢𑀺 𑀅𑀧𑁆𑀧𑀥𑀸𑀦𑀪𑀸𑀯𑀢𑁄 𑀩𑁆𑀬𑀢𑀺𑀭𑀺𑀘𑁆𑀘𑀢𑁂 𑀢𑀢𑁄-𑀢𑁆𑀢𑀦𑀺𑀝𑁆𑀞𑀫𑁂𑀯, 𑀦 𑀭𑀽𑀧𑀦𑁆𑀢𑀭𑀫𑁆𑀪𑀚𑀢𑀺‘𑀧𑀼𑀭𑀺𑀲𑀲𑁆𑀲𑁂’𑀢𑀺, 𑀯𑀺𑀲𑁂𑀲𑀦𑀦𑁆𑀢𑀼 𑀭𑀸𑀚𑀸𑀤𑀺𑀓𑀁 𑀢𑀤𑀗𑁆𑀕𑀢𑀸𑀬𑀸𑀦𑀼𑀯𑀤𑀺𑀬𑀫𑀸𑀦𑀫𑀧𑁆𑀧𑀥𑀸𑀦𑀢𑁆𑀢𑀸 𑀓𑀸𑀭𑀓𑀭𑀽𑀧𑀢𑁄 𑀩𑁆𑀬𑀢𑀺𑀭𑀺𑀘𑁆𑀘𑀢𑁂, 𑀢𑀢𑁄 𑀭𑀽𑀧𑀦𑁆𑀢𑀭𑀁 𑀪𑀚𑀢𑀺 ‘𑀭𑀜𑁆𑀜𑁄’𑀢𑀺, 𑀢𑀢𑁄 𑀩𑁆𑀬𑀢𑀺𑀭𑁂𑀓 𑀮𑀓𑁆𑀔𑀡𑁄 𑀲𑀫𑁆𑀩𑀦𑁆𑀥𑁄 𑀳𑁄𑀢𑀺, 𑀏𑀓𑀲𑁆𑀲 𑀲𑀫𑁆𑀩𑀦𑁆𑀥𑀺𑀢𑁆𑀢𑀸𑀲𑀫𑁆𑀪𑀯𑀸 𑀯𑀢𑁆𑀣𑀼𑀢𑁄 𑀤𑁆𑀯𑀺𑀝𑁆𑀞𑁄 𑀯𑀺𑀲𑁂𑀲𑀦𑀕𑀢𑀢𑁆𑀢𑁂𑀦 𑀧𑀢𑀻𑀬𑀢𑁂 𑀢𑀢𑁄 𑀙𑀝𑁆𑀞𑀻 𑀯𑀺𑀲𑁂𑀲𑀦𑀫𑁂𑀯𑀸𑀦𑀼𑀥𑀸𑀯𑀢𑀺 𑀧𑀢𑀻𑀢𑀺𑀯𑀺𑀲𑀬𑁂 𑀲𑀤𑁆𑀤𑀧𑁆𑀧𑀯𑀢𑁆𑀢𑀻’’𑀢𑀺, 𑀬𑁄 𑀳𑀺 𑀯𑀺𑀓𑀧𑁆𑀧𑀦𑀁 𑀯𑀺𑀲𑀬𑁄 𑀲𑁄 𑀲𑀤𑁆𑀤𑀸𑀦𑀦𑁆𑀢𑀺, 𑀅𑀢𑁄𑀬𑁂𑀯 𑀲𑀫𑁆𑀩𑀦𑁆𑀥𑁄 𑀦𑀺𑀬𑀫𑁂𑀦 𑀯𑀺𑀲𑁂𑀲𑀦𑀪𑁂𑀤𑀫𑀦𑀼𑀯𑀺𑀤𑀥𑀸𑀢𑀺… 𑀯𑀢𑁆𑀣𑀼𑀢𑁄 𑀤𑁆𑀯𑀺𑀝𑁆𑀞𑀲𑁆𑀲𑀸𑀧𑀺 𑀢𑀕𑁆𑀕𑀢𑀢𑁆𑀢𑁂𑀦 𑀧𑀢𑀻𑀢𑀺𑀬𑀸 𑀬𑀣𑀸 𑀪𑀸𑀢𑀽𑀦𑀁 𑀥𑀦𑀦𑁆𑀢𑀺, 𑀦𑀸𑀯𑀲𑁆𑀲𑀫𑁆𑀪𑀸𑀢𑀽𑀦𑀁 𑀥𑀦𑀦𑁆𑀢𑀺𑀘𑁆𑀘𑁂𑀯 𑀪𑀯𑀢𑀺, 𑀢𑀣𑀸 𑀲𑀢𑁆𑀬𑀧𑀺 𑀯𑀺𑀲𑁂𑀲𑁆𑀲 𑀪𑁂𑀤𑁂 𑀯𑀺𑀲𑁂𑀲𑀦𑀕𑀢𑀫𑁂𑀯 𑀪𑁂𑀤𑀫𑀦𑀼(𑀯𑀺𑀤𑀥𑀸)𑀢𑀺 ‘𑀤𑁂𑀯𑀤𑀢𑁆𑀢𑀲𑁆𑀲 𑀅𑀲𑁆𑀲𑀸’𑀢𑀺, 𑀢𑀤𑁂𑀢𑀁 𑀲𑀩𑁆𑀩𑀁 𑀯𑀺𑀲𑁂𑀲𑀦𑀕𑀢𑀢𑁆𑀢𑁂𑀦 𑀲𑀫𑁆𑀩𑀦𑁆𑀥𑀧𑀢𑀻𑀢𑀺𑀢𑁄-𑀯𑀓𑀧𑁆𑀧𑀻𑀬𑀢𑁂, 𑀯𑀺𑀲𑁂𑀲𑁆𑀲𑀕𑀢𑀢𑁆𑀢𑁂𑀦𑀸𑀧𑀺 𑀢𑀧𑁆𑀧𑀢𑀻𑀢𑀺𑀬𑀁 𑀦𑀺𑀬𑀫𑁂𑀦 𑀢𑀕𑁆𑀕𑀢𑀪𑁂𑀤𑀸𑀦𑀼𑀯𑀺𑀥𑀸𑀦𑀁 𑀲𑀺𑀬𑀸 𑀯𑀺𑀲𑁂𑀲𑀦𑀕𑀢𑀪𑁂𑀤𑀸𑀦𑀼𑀯𑀺𑀥𑀸𑀦𑀫𑀺𑀯, 𑀤𑁆𑀯𑀺𑀝𑁆𑀞𑀢𑁆𑀢𑀦𑁆𑀢𑀼 𑀯𑀢𑁆𑀣𑀼𑀢𑁄 [𑀘𑀢𑁆𑀢𑀼𑀦𑁄] 𑀦 𑀯𑀺𑀭𑀼𑀚𑁆𑀛𑀢𑁂, 𑀯𑀢𑁆𑀢𑀼𑀧𑀝𑀺𑀩𑀤𑁆𑀥𑀫𑁂𑀯 𑀘 𑀤𑁆𑀯𑀺𑀝𑁆𑀞𑀢𑁆𑀢𑀁 𑀫𑀦𑀲𑀺𑀓𑀢𑁆𑀯𑀸 𑀢𑀁𑀯𑀸𑀤𑀻𑀳𑀺 𑀤𑁆𑀯𑀺𑀝𑁆𑀞𑁄 𑀲𑀫𑁆𑀩𑀦𑁆𑀥𑁄𑀪𑀺𑀥𑀻𑀬𑀢𑁂, 𑀅𑀢𑁄𑀬𑁂𑀯𑀸𑀬𑀁 𑀩𑁆𑀬𑀢𑀺𑀭𑁂𑀓𑀯𑀺𑀪𑀢𑁆𑀢𑀺 (𑀬𑀸𑀕𑀫𑁆𑀬𑀢𑁂)… 𑀩𑁆𑀬𑀢𑀺𑀭𑀺𑀘𑁆𑀘𑀫𑀸𑀦𑀯𑀺𑀲𑁂𑀲𑀦𑀪𑀽𑀢𑀲𑀫𑁆𑀩𑀦𑁆𑀥𑀺𑀕𑀢𑀩𑁆𑀬𑀢𑀺𑀭𑁂𑀓𑀮𑀓𑁆𑀔𑀡𑀲𑀫𑁆𑀩𑀦𑁆𑀥𑀸𑀪𑀺- 𑀥𑀸𑀦𑀧𑁆𑀧𑀯𑀢𑁆𑀢𑀺𑀢𑁄𑀢𑀺, 𑀦𑀻𑀮𑀸𑀤𑀺𑀯𑀺𑀲𑁂𑀲𑀦𑀦𑁆𑀢𑀼 𑀧𑀭𑀢𑁆𑀣𑀢𑁆𑀢𑁂𑀦𑀸𑀧𑁆𑀧𑀥𑀸𑀦𑀫𑁆𑀧𑀺 𑀦 𑀓𑀸𑀭𑀓𑀪𑀸𑀯𑀢𑁄 𑀩𑁆𑀬𑀢𑀺𑀭𑀺𑀘𑁆𑀘𑀢𑀺… 𑀦𑀻𑀮𑀸𑀤𑀺𑀲𑀤𑁆𑀤𑁂𑀦𑀼𑀧𑁆𑀧𑀮𑀸𑀤𑀺𑀤𑀩𑁆𑀩𑀸𑀪𑀺𑀥𑀸𑀦𑀢𑁄, 𑀬𑀣𑀸 ‘𑀦𑀻𑀮𑀫𑀼𑀧𑁆𑀧𑀮𑀫𑁆𑀧𑀲𑁆𑀲, 𑀦𑀻𑀮𑁂𑀦𑀼𑀧𑁆𑀧𑀮𑁂𑀦 𑀞𑀺𑀢𑀁, 𑀦𑀻𑀮𑀲𑁆𑀲𑀼𑀧𑁆𑀧𑀮𑀲𑁆𑀲 𑀕𑀦𑁆𑀥𑁄’𑀢𑀺, 𑀬𑀤𑀸 𑀢𑀼 𑀦 𑀯𑀺𑀲𑁂𑀲𑁆𑀲𑀧𑀯𑀢𑁆𑀢𑀺 𑀢𑀤𑀸 𑀩𑁆𑀬𑀢𑀺𑀭𑀺𑀘𑁆𑀘𑀢𑁂𑀯 ‘𑀦𑀻𑀮𑀲𑁆𑀲 𑀕𑀼𑀡𑀲𑁆𑀲 𑀉𑀧𑁆𑀧𑀮𑀦𑁆𑀦𑀺𑀲𑁆𑀲𑀬𑁄’𑀢𑀺 𑀓𑀸𑀭𑀓𑀪𑀸𑀯𑀮𑀓𑁆𑀔𑀡𑀸 𑀧𑀥𑀸𑀦𑀪𑀸𑀯𑀸 𑀩𑁆𑀬𑀢𑀺𑀭𑀺𑀘𑁆𑀘𑀢𑁂 𑀏𑀯 𑀦𑀻𑀮𑀸𑀤𑀺, 𑀢𑀢𑁄 𑀯𑀺𑀲𑁂𑀲𑀦𑀫𑁂𑀯𑀸𑀦𑁂𑀓𑀧𑁆𑀧𑀓𑀸𑀭𑀢𑀸𑀬𑀸𑀯 𑀢𑀺𑀝𑁆𑀞𑀢𑁂, 𑀢𑀢𑁄 𑀯𑀺𑀲𑁂- 𑀲𑀦𑀁 ¶ 𑀓𑀺𑀜𑁆𑀘𑀺𑀤𑁂𑀯 𑀓𑀸𑀭𑀓𑀭𑀽𑀧𑀢𑁄 𑀧𑀥𑀸𑀦𑀪𑀸𑀯𑀸 𑀩𑁆𑀬𑀢𑀺𑀭𑀺𑀘𑁆𑀘𑀢𑁂𑀢𑀺 𑀯𑀺𑀲𑁂𑀲𑀦 𑀫𑀢𑁆𑀢𑁂𑀦𑀸𑀧𑀺 𑀲𑁂𑀲𑀁 𑀲𑀩𑁆𑀩𑀁 𑀢𑀣𑀸 𑀲𑀺𑀬𑀸𑀢𑀺 𑀦𑀸𑀲𑀗𑁆𑀓𑀦𑀻𑀬𑀦𑁆𑀢𑀺.

𑀤𑁆𑀯𑁂𑀧𑀻𑀢𑀺 𑀭𑀸𑀚𑀧𑀼𑀭𑀺𑀲𑀸 𑀤𑁆𑀯𑁂𑀧𑀺, 𑀢𑀢𑀺𑀬𑁂 𑀕𑁂𑀳𑀲𑀗𑁆𑀔𑀸𑀢𑁂 𑀲𑀫𑁆𑀩𑀦𑁆𑀥𑀺𑀦𑀻. 𑀲𑀳𑀬𑀼𑀢𑁆𑀢𑀫𑁆𑀧𑀝𑀺𑀘𑁆𑀘 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀧𑀼𑀭𑀺𑀲𑀲𑁆𑀲 𑀅𑀧𑁆𑀧𑀥𑀸𑀦𑀢𑁆𑀢𑀫𑁂𑀯 𑀤𑀻𑀧𑁂𑀢𑀺, 𑀅𑀪𑀺𑀫𑀢𑀸𑀢𑀺 𑀧𑀸𑀡𑀺𑀦𑀺𑀬𑀸𑀦𑀁 𑀲𑀼𑀢𑁆𑀢𑀦𑁆𑀢𑀭𑁂𑀦 𑀅𑀪𑀺𑀫𑀢𑀸, 𑀬𑀢𑁄 𑀙𑀝𑁆𑀞𑀻𑀬-𑀫𑀢𑁆𑀢𑀦𑁄 𑀫𑀢𑁂 𑀲𑀫𑁆𑀩𑀦𑁆𑀥𑀦𑀺𑀲𑁆𑀲𑀬𑀸, 𑀢𑁂𑀦𑀸𑀳- ‘𑀲𑀫𑁆𑀩𑀦𑁆𑀥𑀫𑁂𑀯𑀺’𑀘𑁆𑀘𑀸𑀤𑀺, 𑀲𑀫𑁆𑀩𑀦𑁆𑀥𑁄 𑀘𑁂𑀢𑁆𑀣 𑀫𑀸𑀢𑀼 𑀲𑀭𑀡𑀸𑀦𑀫𑀯𑀝𑁆𑀞𑀸𑀦𑀸𑀤𑀺𑀓𑀺𑀭𑀺𑀬𑀸𑀦𑀺𑀫𑀺𑀢𑁆𑀢𑁄𑀢𑀺 𑀓𑁂𑀘𑀺, 𑀅𑀜𑁆𑀜𑁂 𑀢𑀼 𑀲𑀭𑀡𑀲𑁆𑀲 𑀓𑀺𑀭𑀺𑀬𑀸𑀭𑀽𑀧𑀢𑁆𑀢𑀸 𑀓𑀺𑀭𑀺𑀬𑀦𑁆𑀢𑀭𑀫𑀦𑁆𑀢𑀭𑁂𑀦𑁂𑀯 𑀤𑀩𑁆𑀩𑁂𑀦 𑀲𑀫𑁆𑀩𑀦𑁆𑀥𑁄𑀧𑀧𑀢𑁆𑀢𑀺𑀫𑀸𑀳𑀼𑀬𑀣𑀸 𑀤𑁆𑀯𑀺𑀦𑁆𑀦𑀁 𑀚𑀢𑀼𑀓𑀢𑁄 𑀲𑀁𑀲𑀺𑀮𑁂𑀲𑁄, 𑀚𑀢𑀼𑀦𑁄 𑀢𑀼 𑀓𑀝𑁆𑀞𑁂𑀦𑀸𑀢𑁆𑀢𑀦𑀸𑀬𑁂𑀯, 𑀦 𑀚𑀢𑁆𑀯𑀦𑁆𑀢𑀭𑀓𑀢𑁄 𑀲𑀁𑀲𑀺𑀮𑁂𑀲𑁄𑀢𑀺. 𑀧𑀭𑁂𑀲𑀁 𑀢𑀢𑀺𑀬𑀢𑁆𑀣𑁂 𑀤𑀼𑀢𑀺𑀬𑀢𑁆𑀣𑁂 𑀘 𑀓𑀺𑀢𑀓𑀧𑁆𑀧𑀬𑁄𑀕𑁂 𑀜𑁆𑀜𑀢𑁆𑀭𑀸𑀧𑀺 (𑀧𑀜𑁆𑀘𑀫𑁆𑀬𑀢𑁆𑀣𑁂) 𑀲𑀢𑁆𑀢𑀫𑁆𑀬𑀢𑁆𑀣𑁂 𑀘 (‘‘𑀙𑀝𑁆𑀞𑀻 𑀘𑀸’’) 𑀢𑀺 (𑁨-𑁬-𑁨𑁦) 𑀤𑀼𑀢𑀺𑀬𑀸 𑀧𑀜𑁆𑀘𑀫𑀻𑀦𑀜𑁆𑀘𑀸’’𑀢𑀺 (𑁨-𑁬-𑁨𑁯) 𑀘 𑀲𑀼𑀢𑁆𑀢𑀦𑁆𑀢𑀭𑁂𑀳𑀺 𑀙𑀝𑁆𑀞𑀻𑀢𑀺𑀫𑀢𑀸, 𑀢𑀲𑁆𑀲𑀸𑀧𑀺 𑀯𑀢𑁆𑀢𑀺𑀘𑁆𑀙𑀸𑀢𑁄𑀯 𑀲𑀸𑀥𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀫𑀸𑀳-𑀬𑀣𑀸𑀘𑁂𑀢𑁆𑀣𑀸𑀢𑀺𑀆𑀤𑀺, 𑀏𑀢𑁆𑀣𑀸𑀧𑁆𑀬𑀸𑀤𑁄 𑀉𑀤𑀸𑀳𑀭𑀡𑀤𑁆𑀯𑀬𑁂 𑀲𑀼𑀢𑁆𑀢𑀦𑁆𑀢𑀭𑀫𑀦𑁆𑀢𑀭𑁂𑀦 𑀲𑀫𑁆𑀧𑀤𑀸𑀦𑀢𑁆𑀢𑀸𑀪𑀸𑀯𑀸 𑀲𑀫𑁆𑀩𑀦𑁆𑀥𑀯𑀘𑀦𑀺𑀘𑁆𑀙𑀸𑀬𑀫𑁂𑀯 𑀧𑀭𑁂𑀲𑀫𑁆𑀧𑀺 𑀙𑀝𑁆𑀞𑀻, 𑀢𑁂𑀦𑀸𑀳-‘𑀏𑀢𑁆𑀣𑀸’𑀢𑀺𑀆𑀤𑀺, 𑀩𑀳𑀼𑀮𑀦𑁆𑀢𑀻𑀫𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺 ‘𑀬𑀣𑀸 𑀤𑀲𑁆𑀲𑀦’𑀦𑁆𑀢𑀺, 𑀅𑀯𑀺𑀲𑀁𑀯𑀸𑀤𑀓𑀸𑀮𑁄𑀓𑀲𑁆𑀲𑀢𑁆𑀬𑀸𑀤𑀺𑀓𑀁 𑀓𑀫𑁆𑀫𑁂 𑀉𑀤𑀸𑀳𑀭𑀡𑀁, 𑀧𑀜𑁆𑀘𑀫𑁆𑀬𑀢𑁆𑀣𑁂 𑀧𑀦 𑀯𑀢𑁆𑀢𑀺𑀘𑁆𑀙𑀸𑀢𑁄𑀯 𑀲𑀩𑁆𑀩𑁂 𑀢𑀲𑀦𑁆𑀢𑀺 𑀤𑀡𑁆𑀟𑀲𑁆𑀲𑀸𑀢𑁆𑀬𑀸𑀤𑀻𑀦𑀺 𑀉𑀤𑀸𑀳𑀭𑀡𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀅𑀦𑀪𑀺𑀫𑀢𑀸𑀢𑀺 ‘𑀢𑀼𑀮𑁆𑀬𑀢𑁆𑀣𑁂𑀳𑁆𑀬𑀢𑀼𑀮𑁄𑀧𑀫𑀸𑀳𑀺 𑀢𑀢𑀺𑀬𑀸𑀜𑁆𑀜𑀢𑀭𑀺𑀲𑁆𑀲’𑀦𑁆𑀢𑀺 (𑁨-𑁩-𑁭𑁨) 𑀲𑀼𑀢𑁆𑀢𑁂𑀦 𑀢𑀼𑀮𑁄𑀧𑀫𑀸𑀳𑀺 𑀅𑀜𑁆𑀜𑁂𑀳𑀺 𑀢𑀼𑀮𑁆𑀬𑀢𑁆𑀣𑁂𑀳𑀺 𑀬𑁄𑀕𑁂 𑀢𑀢𑀺𑀬𑀸𑀬 𑀯𑀺𑀥𑀻𑀬𑀫𑀸𑀦𑀢𑁆𑀢𑀸 𑀧𑀸𑀡𑀺𑀦𑀺𑀬𑀸𑀦𑀁 𑀅𑀦𑀪𑀺𑀫𑀢𑀸, 𑀬𑀲𑁆𑀫𑀸 𑀲𑀤𑀺𑀲𑀸 𑀪𑀸𑀯𑀸 𑀢𑁂𑀲𑀁 𑀦𑁄𑀧𑀫𑀸𑀢𑀺 ‘𑀅𑀚𑁆𑀚𑀼𑀦𑀲𑁆𑀲 𑀢𑀼𑀮𑀸 𑀦𑀢𑁆𑀣𑀻’𑀢𑁆𑀬𑀸𑀤𑀺𑀓𑀫𑀼𑀘𑁆𑀘𑀢𑁂, 𑀢𑀲𑁆𑀫𑀸 𑀏𑀯𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀢𑀤𑁂𑀯𑀦𑁆𑀢𑀻𑀫𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀢𑀤𑁂𑀯𑀦𑁆𑀢𑀺 𑀯𑀸 𑀦𑀺𑀧𑀸𑀢𑀲𑀫𑀼𑀤𑀸𑀬𑁄 𑀬𑀣𑀸𑀯𑀼𑀢𑁆𑀢𑀦𑀺𑀤𑀲𑁆𑀲𑀦𑀢𑁆𑀣𑁄, 𑀢𑀼𑀮𑁆𑀬𑁂𑀲𑀽𑀢𑀺 𑀲𑀤𑀺𑀲𑁂𑀲𑀼, 𑀢𑀣𑀸𑀯𑀼𑀢𑁆𑀢𑀸𑀢𑀺 𑀅𑀚𑁆𑀚𑀼𑀦𑀲𑁆𑀲𑀢𑀼𑀮𑀸𑀦𑀢𑁆𑀣𑀻𑀢𑁆𑀬𑀸𑀤𑀺𑀦𑀸 𑀢𑁂𑀦 𑀧𑀓𑀸𑀭𑁂𑀦 𑀯𑀼𑀢𑁆𑀢𑀸.

𑀲𑀼𑀢𑁆𑀢𑁂 ¶ ‘𑀅𑀢𑁄’𑀢𑀺 𑀯𑀼𑀢𑁆𑀢𑀁 ‘𑀅𑀓𑀸𑀭𑀦𑁆𑀢𑀢𑁄’𑀢𑀺 𑀓𑀣𑀁 𑀯𑀼𑀢𑁆𑀢𑀻𑀢𑀺 𑀆𑀳 ‘𑀅𑀢𑁄’𑀢𑀺𑀆𑀤𑀺, 𑀆𑀤𑁂𑀲𑀸 𑀳𑁄𑀦𑁆𑀢𑀻𑀢𑀺 𑀲𑁂𑀲𑁄, 𑀬𑀓𑀸𑀭𑀸𑀦𑀁𑀬𑁂𑀯 𑀲𑀺𑀬𑀼𑀁… 𑀆𑀏𑀆𑀤𑁂𑀲𑀸𑀦𑀫𑁂𑀓𑀯𑀡𑁆𑀡𑀢𑁆𑀢𑀸, 𑀮𑁄𑀧𑁂 𑀓𑀢𑁂𑀢𑀺 𑀑𑀓𑀸𑀭𑀲𑁆𑀲 𑀮𑁄𑀧𑁂 𑀓𑀢𑁂, 𑀢𑀦𑁆𑀦𑁂𑀢𑀺 𑀬𑀣𑀸𑀯𑀼𑀢𑁆𑀢𑀁 𑀥𑀘𑀸𑀤𑁆𑀬𑀧𑁆𑀧𑀝𑀺𑀓𑁆𑀔𑀺𑀧𑀢𑀺, 𑀧𑀝𑀺𑀓𑁆𑀔𑁂𑀧𑁂 𑀓𑀸𑀭𑀡𑀫𑀸𑀳-‘𑀧𑀭𑀮𑁄𑀧𑀲𑁆𑀲𑀸’𑀢𑀺𑀆𑀤𑀺, 𑀓𑀸𑀭𑀡𑀦𑁆𑀢𑀭𑀁 𑀯𑀢𑁆𑀢𑀼𑀫𑀸𑀭𑀪𑀢𑁂 ‘𑀓𑀺𑀜𑁆𑀘𑀸’𑀢𑀺𑀆𑀤𑀺, 𑀦𑀺𑀘𑁆𑀘𑀫𑁆𑀧𑀭𑀮𑁄𑀧𑁄𑀯 𑀲𑀺𑀬𑀸, 𑀦 𑀧𑀼𑀩𑁆𑀩𑀮𑁄𑀧𑁄𑀧𑀺 𑀆𑀕𑀫𑀧𑁆𑀧𑀬𑁄𑀕𑀸𑀦𑀼𑀓𑀽𑀮𑁆𑀬𑁂𑀦𑀸𑀢𑀺𑀧𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀆𑀳-‘𑀦𑀘𑀸’𑀢𑀺𑀆𑀤𑀺, 𑀦𑀺𑀘𑁆𑀘𑀫𑁆𑀧𑀭𑀮𑁄𑀧𑁄𑀬𑁂𑀯𑀸𑀢𑀺 𑀦 𑀘 𑀲𑀓𑁆𑀓𑀸 𑀫𑀦𑁆𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀏𑀯𑀁 𑀲𑀦𑁆𑀢𑁂𑀢𑁆𑀬𑀸𑀤𑀺𑀦𑀸 𑀢𑀢𑁆𑀣 𑀯𑀺𑀭𑁄𑀥𑀫𑀸𑀳, 𑀅𑀢𑁄𑀲𑀫𑁆𑀪𑀯𑀸𑀢𑀺 𑀆𑀤𑁂𑀲𑀸𑀓𑀸𑀭𑀢𑁄 𑀲𑀫𑁆𑀪𑀯𑀸, 𑀛𑀺𑀲𑁆𑀲𑀸𑀓𑀸𑀭𑀯𑀺𑀥𑀸𑀦𑀁 ‘‘𑀬𑁄𑀲𑀼 𑀛𑀺𑀲𑁆𑀲 𑀧𑀼𑀫𑁂’’𑀢𑀺 (𑁨-𑁯𑁩) 𑀏𑀢𑀤𑁂𑀯𑀧𑀬𑁄𑀚𑀦𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀬𑁄𑀚𑀦𑀸𑀪𑀸𑀯𑁂 𑀓𑀸𑀭𑀡𑀫𑀸𑀳-‘𑀅𑀦𑀺𑀝𑁆𑀞𑀢𑁆𑀢𑀸’𑀢𑀺, 𑀅𑀦𑀪𑀺𑀫𑀢𑀢𑁆𑀢𑀸𑀢𑀺 𑀅𑀢𑁆𑀣𑁄, 𑀧𑀬𑁄𑀚𑀦𑀸𑀪𑀸𑀯𑀸𑀦𑀪𑀺𑀫𑀢𑀢𑁆𑀢𑀫𑁂𑀯 𑀤𑀲𑁆𑀲𑁂𑀲𑀼𑀫𑀸𑀳-‘𑀏𑀢𑀤𑀢𑁆𑀣𑀫𑁂𑀯𑀸’𑀢𑀺𑀆𑀤𑀺, 𑀇𑀫𑀲𑁆𑀲𑀸𑀢𑀺 ‘‘𑀅𑀢𑁄 𑀬𑁄𑀦𑀁 𑀝𑀸𑀝𑁂’’𑀢𑀻 𑀫𑀲𑁆𑀲 𑀲𑀼𑀢𑁆𑀢𑀲𑁆𑀲, 𑀛𑀺𑀲𑁆𑀫𑀸𑀢𑁆𑀯𑁂𑀯𑀸𑀢𑀺 ‘𑀛𑀺𑀲𑁆𑀫𑀸’ 𑀇𑀢𑀺 𑀏𑀢𑀸𑀤𑀺𑀲𑀁 𑀲𑀼𑀢𑁆𑀢𑀫𑁂𑀯, 𑀛𑀺𑀲𑁆𑀫𑀸 𑀬𑁄𑀦𑀁 𑀝𑀸𑀝𑁂𑀢𑀺𑀯𑀸𑀢𑀺 ‘‘𑀛𑀺𑀲𑁆𑀫𑀸 𑀬𑁄𑀦𑀁 𑀝𑀸𑀝𑁂’’𑀢𑀺 𑀲𑀼𑀢𑁆𑀢𑀁 𑀯𑀸, 𑀅𑀢𑁄𑀢𑀺 ‘𑀅𑀢𑁄’ 𑀇𑀢𑀺 𑀲𑀼𑀢𑁆𑀢𑀁, 𑀢𑀸𑀤𑀺𑀲𑀲𑁆𑀲𑀧𑀬𑁄𑀕𑀲𑁆𑀲𑀸𑀢𑀺 𑀅𑀕𑁆𑀕𑀸, 𑀅𑀕𑁆𑀕𑁂 𑀇𑀢𑀺 𑀧𑀬𑁄𑀕𑀲𑁆𑀲.

𑀬𑀲𑁆𑀫𑀸 𑀏𑀓𑀫𑁂𑀯 𑀭𑀽𑀧𑀫𑀼𑀤𑀸𑀳𑀝𑀁, 𑀢𑀲𑁆𑀫𑀸 𑀭𑀽𑀧𑀸𑀭𑀽𑀧𑀸𑀦𑀺 𑀭𑀽𑀧𑁂𑀭𑀽𑀧𑀸𑀦𑀻𑀢𑀺 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄, 𑀢𑁂𑀦 𑀳𑀺 𑀩𑀳𑀼𑀯𑀘𑀦𑁂 [𑀩𑀳𑀼𑀯𑀘𑀦𑁂𑀦 (𑀧𑁄𑀢𑁆𑀣𑀓𑁂)] 𑀧𑀞𑀫𑀸𑀤𑀼𑀢𑀺𑀬𑀸𑀲𑀼 ‘𑀅𑀝𑁆𑀞𑀻𑀦𑀻’𑀢𑀺 𑀏𑀓𑀫𑁂𑀯 𑀭𑀽𑀧𑀫𑀼𑀤𑀸𑀳𑀝𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀲𑀼𑀜𑀺𑀢𑀺 𑀜𑀓𑀸𑀭𑁄 𑀓𑀺𑀫𑀢𑁆𑀣𑁄𑀢𑀺 𑀆𑀳-‘𑀜𑀓𑀸𑀭𑁄’𑀢𑀺𑀆𑀤𑀺, 𑀅𑀲𑀢𑀺 𑀳𑀺 𑀜𑀓𑀸𑀭𑁂‘𑀜𑀸𑀦𑀼𑀩𑀦𑁆𑀥𑁄’𑀢𑀺 𑀜𑀓𑀸𑀭𑁂𑀦 𑀯𑀺𑀲𑁂𑀲𑀦𑁂𑀦 𑀲𑀼𑀓𑀸𑀭𑁄 𑀦 𑀯𑀺𑀲𑁂𑀲𑀻 𑀬𑁂𑀬𑁆𑀬 𑀲𑀢𑀺𑀬𑁂𑀯 𑀢𑀲𑁆𑀫𑀺𑀁 𑀢𑁂𑀦 𑀲𑁄 𑀯𑀺𑀲𑁂𑀲𑀻𑀬𑁂𑀬𑁆𑀬, 𑀢𑀲𑁆𑀫𑀸 ‘‘𑀜𑀓𑀸𑀦𑀼𑀩𑀦𑁆𑀥𑀸𑀤𑁆𑀬𑀦𑁆𑀢𑀸’’𑀢𑀺 𑀲𑀼𑀢𑁆𑀢𑁂 ‘𑀜𑀓𑀸𑀦𑀼𑀩𑀦𑁆𑀥𑀸’𑀢𑀺 𑀯𑀺𑀲𑁂𑀲𑀦𑀁 ¶ 𑀯𑀺𑀲𑁂𑀲𑀦𑀪𑀸𑀯𑁄 𑀅𑀢𑁆𑀣𑁄 𑀧𑀬𑁄𑀚𑀦𑀁 𑀬𑀲𑁆𑀲 𑀲𑁄 𑀯𑀺𑀲𑁂𑀲𑀦𑀢𑁆𑀣𑁄, 𑀩𑀳𑀼𑀮𑀁 𑀯𑀘𑀦𑁂𑀦𑀸𑀦𑀪𑀺𑀫𑀢𑀫𑀦𑀯𑀲𑁂𑀲𑀁 𑀯𑀯𑀢𑁆𑀣𑀸𑀧𑀻𑀬𑀢𑀻𑀢𑀺 𑀯𑀼𑀢𑁆𑀢𑀺𑀬𑀁 ‘‘𑀪𑀺𑀬𑁆𑀬𑁄’’𑀢𑁆𑀬𑀸𑀤𑀺𑀓𑀫𑀼𑀧𑀤𑀺𑀝𑁆𑀞𑀦𑁆𑀢𑀺 𑀤𑀲𑁆𑀲𑁂𑀢𑀼𑀫𑀼𑀧𑀓𑁆𑀓𑀫𑀢𑁂 ‘𑀲𑀸𑀫𑀜𑁆𑀜𑁂𑀦𑀸’𑀢𑀺𑀆𑀤𑀺𑀦𑀸, 𑀙𑀝𑁆𑀞𑀻 𑀪𑀯𑀢𑀻𑀢𑀺 (𑀲𑁂)𑀲𑁄, 𑀦𑀦𑀼𑀘 𑀅𑀢𑁆𑀣𑀲𑀤𑁆𑀤𑁂𑀦𑀸𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁂 𑀓𑀣𑀁 𑀘𑀢𑀼𑀢𑁆𑀣𑁆𑀬𑀢𑁆𑀣𑁄-𑀯𑀲𑀻𑀬𑀢𑀻𑀢𑀺 𑀯𑀼𑀘𑁆𑀘𑀢𑁂, 𑀘𑀢𑀼𑀢𑁆𑀣𑀻𑀏𑀓𑀯𑀘𑀦𑁂 𑀅𑀢𑁆𑀢𑀢𑁆𑀣’𑀦𑁆𑀢𑀺 𑀏𑀢𑁆𑀣 𑀲𑀤𑁆𑀥𑀫𑁆𑀫𑀲𑀯𑀦𑀸𑀤𑀺𑀓𑀫𑀢𑁆𑀢𑀦𑀺𑀫𑀺𑀢𑁆𑀢𑀦𑁆𑀢𑀺 𑀬𑁄-𑀢𑁆𑀣𑁄, 𑀲𑁄 𑀘𑀢𑁆𑀣𑁄-𑀜𑁆𑀜 𑀧𑀤𑀢𑁆𑀣𑁂𑀧𑀺, 𑀢𑀲𑁆𑀲𑀸-𑀜𑁆𑀜𑀧𑀤𑀢𑁆𑀣𑀪𑀽𑀢𑀲𑁆𑀲𑀸𑀧𑀺 𑀅𑀢𑁆𑀢𑀸 𑀅𑀢𑁆𑀣𑁄 𑀧𑀬𑁄𑀚𑀦𑀫𑁆𑀪𑀯𑀢𑀺 𑀦𑀺𑀫𑀺𑀢𑁆𑀢𑀪𑀸𑀯𑁂𑀦𑀸𑀢𑀺 𑀦𑀸𑀢𑁆𑀣𑀪𑁂𑀤𑁄𑀢𑀺 𑀢 𑀏𑀢 𑀇𑀫𑀯𑀚𑁆𑀚𑀺𑀢𑀸𑀦𑀁 𑀲𑀩𑁆𑀩𑀸𑀤𑀻𑀦𑀦𑁆𑀢𑀺 𑀢 𑀏𑀢𑀇𑀫𑀲𑀤𑁆𑀤𑁂𑀳𑀺 𑀏𑀯 𑀯𑀚𑁆𑀚𑀺𑀢𑀸𑀦𑀫𑀜𑁆𑀜𑁂𑀲𑀁 𑀲𑀩𑁆𑀩𑀸𑀤𑀻𑀦𑀁, 𑀧𑀝𑀺𑀲𑀺𑀤𑁆𑀥𑁂𑀲𑀼𑀧𑀺 𑀓𑀲𑁆𑀲𑀘𑀺 𑀆𑀤𑁂𑀲𑁄 𑀤𑀺𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳‘𑀢𑀲𑀤𑁆𑀤𑀲𑁆𑀲 𑀘𑀸’𑀢𑀺.

𑀇𑀢𑁆𑀣𑀺𑀬𑀸 𑀯𑀥𑀼𑀬𑀸𑀢𑀺 𑀧𑀲𑀜𑁆𑀜𑀸𑀦𑀫𑀻 𑀊𑀦𑀫𑀼𑀤𑀸𑀳𑀭𑀡𑀸𑀦𑀺.

𑀖𑀧𑀲𑀜𑁆𑀜𑁂𑀳𑀻𑀢𑀺 𑀇𑀤𑀁 𑀢𑁂𑀢𑀺𑀫𑀸𑀫𑀽𑀳𑀺 𑀢𑀻𑀫𑀲𑁆𑀲 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁂𑀦 𑀯𑀸 𑀯𑀺𑀲𑁂𑀲𑀦𑀁 𑀤𑀝𑁆𑀞𑀩𑁆𑀩𑀁, 𑀯𑀼𑀢𑁆𑀢𑀺𑀬𑀁 𑀓𑀢𑀦𑁆𑀢𑀺 𑀆𑀤𑀺𑀓𑀁 𑀓𑀢𑁆𑀢𑀸𑀤𑀺𑀧𑁆𑀧𑀓𑀸𑀲𑀦𑀢𑁆𑀣𑀁 𑀓𑀢𑀁, 𑀢𑀸𑀬𑀸𑀢𑀺 𑀲𑀩𑁆𑀩𑀢𑁆𑀣 𑀯𑀺𑀓𑀧𑁆𑀧𑁄𑀤𑀸𑀳𑀭𑀡𑀁.

‘‘𑀆𑀕𑀫𑀸 𑀢𑀕𑁆𑀕𑀼𑀡𑀻𑀪𑀽𑀢𑀸 𑀢𑀕𑁆𑀕𑀳𑀡𑁂𑀦 𑀕𑀬𑁆𑀳𑀦𑁆𑀢𑀻’’𑀢𑀺 𑀧𑀭𑀺𑀪𑀸𑀲𑀸 𑀯𑀘𑀦𑀫𑁂𑀢𑀁 𑀢𑀢𑁆𑀣 𑀢𑀕𑁆𑀕𑀼𑀡𑀻𑀪𑀽𑀢𑀸𑀢𑀺 𑀢𑀲𑁆𑀫𑀺𑀁 𑀆𑀕𑀫𑀺𑀫𑁆𑀳𑀺 𑀕𑀼𑀡𑀻𑀪𑀽𑀢𑀸, 𑀅𑀯𑀬𑀯𑀯𑀲𑁂𑀦 𑀧𑀘𑁆𑀙𑀸 𑀪𑀯𑀦𑁆𑀢𑁄 𑀅𑀫𑀼𑀔𑁆𑀬𑀪𑀽𑀢𑀸, 𑀢𑀕𑁆𑀕𑀳𑀡𑁂𑀦𑀸𑀢𑀺 𑀆𑀕𑀫𑀺𑀕𑁆𑀕𑀳𑀡𑁂𑀦 𑀢𑀕𑁆𑀕𑀳𑀡𑁂𑀦 𑀕𑀳𑀡𑀢𑁄𑀢𑀺 𑀆𑀕𑀫𑀺𑀪𑀽𑀢𑀲𑁆𑀲 𑀦𑀁 𑀇𑀘𑁆𑀘𑀲𑁆𑀲 𑀕𑀳𑀡𑁂𑀦 𑀕𑀳𑀡𑀢𑁄, ‘𑀦𑀫𑁆𑀳𑀺 𑀯𑀺𑀪𑀢𑁆𑀢𑀺𑀫𑁆𑀳𑀺’𑀢𑀺 𑀢𑀼 𑀯𑀢𑁆𑀢𑀩𑁆𑀩𑀁, 𑀯𑀺𑀧𑀮𑁆𑀮𑀸𑀲𑁄 𑀯𑀸 𑀏𑀢𑁆𑀣 𑀤𑀝𑁆𑀞𑀩𑁆𑀩𑁄.

(𑁪𑁯) 𑀇𑀓𑀸𑀭𑀲𑁆𑀲𑁂𑀯𑀯𑀸𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯 𑀯𑀺𑀯𑀭𑀢𑀺 𑀢𑀺𑀲𑁆𑀲 𑀇𑀘𑁆𑀘𑀸𑀤𑀺𑀦𑀸, 𑀢𑀲𑁆𑀲 𑀢𑀺𑀲𑁆𑀲, 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸𑀢𑀺 𑀢𑀺𑀲𑁆𑀲 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸, ‘‘𑀦𑀫𑁆𑀳𑀺 𑀢𑀺𑀘𑀢𑀼𑀦𑁆𑀦𑀫𑀺𑀢𑁆𑀣𑀺𑀬𑀁 𑀢𑀺𑀲𑁆𑀲 𑀘𑀢𑀲𑁆𑀲𑀸’’𑀢𑀺 (𑁨-𑁨𑁦) 𑀢𑀺𑀲𑁆𑀲𑀸𑀤𑁂𑀲𑁄 ‘‘𑀦𑀫𑁆𑀳𑀺 𑀦𑀼𑀓 𑀤𑁆𑀯𑀸𑀤𑀻𑀦𑀁 𑀲𑀢𑁆𑀢𑀭𑀲𑀦𑁆𑀦’’𑀦𑁆𑀢𑀺 (𑁨-𑁪𑁭) 𑀦𑀼𑀓, 𑀢𑀺𑀲𑁆𑀲𑀦𑁆𑀦𑀁.

𑀯𑀺𑀪𑀢𑁆𑀢𑀺𑀲𑀼𑀢𑁆𑀢𑁂𑀢𑀺 ¶ ‘‘𑀤𑁆𑀯𑁂𑀤𑁆𑀯𑁂𑀓𑀸𑀦𑁂𑀓𑁂𑀲𑁆𑀯𑀺’’(𑁨-𑁧) 𑀘𑁆𑀘𑀸𑀤𑀺𑀲𑀼𑀢𑁆𑀢𑁂, 𑀲𑁆𑀲𑀦𑀦𑁆𑀢𑀺 𑀩𑀳𑀼𑀯𑀘𑀦𑁂𑀦 𑀲𑀳𑀺𑀢𑀫𑁂𑀓𑀯𑀘𑀦𑀫𑀸𑀳, 𑀲𑀼𑀢𑁆𑀢𑀫𑀺𑀤𑀦𑁆𑀢𑀺 ‘‘𑀲𑀼𑀜𑁆𑀲𑀲𑁆𑀲𑀸’’𑀢𑀺 𑀇𑀤𑀁 𑀲𑀼𑀢𑁆𑀢𑀁, 𑀲𑀼𑀢𑁆𑀢𑁂 𑀧𑀦 𑀲𑀢𑀻𑀢𑀺 ‘‘𑀲𑀼𑀜 𑀲𑀲𑁆𑀲𑀸’’𑀢𑀺 𑀲𑀼𑀢𑁆𑀢𑁂 𑀲𑀢𑀺.

𑀭𑀢𑁆𑀢𑀺 𑀘 𑀆𑀤𑀺 𑀘 𑀭𑀢𑁆𑀬𑀸𑀤𑀬𑁄, 𑀢𑁂𑀳𑀺.

𑀅𑀦𑀼𑀓𑀭𑀡𑀯𑀲𑁂𑀦𑀸𑀢𑀺 𑀅𑀦𑀼𑀲𑀤𑀺𑀲𑀁 𑀓𑀭𑀡𑀁 𑀯𑀘𑀦𑀫𑀦𑀼𑀓𑀭𑀡𑀁.

𑀢𑁂𑀦𑀸𑀢𑀺 𑀬𑀢𑁄 𑀮𑁆𑀢𑀼𑀇𑀢𑀺 𑀯𑀺𑀲𑁂𑀲𑀦𑀢𑁆𑀢𑁂𑀦 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀕𑀳𑀡𑀁, 𑀢𑁂𑀦𑀸𑀢𑀺 𑀅𑀢𑁆𑀣𑁄, 𑀧𑀘𑁆𑀘𑀬𑀲𑁆𑀲 𑀕𑀳𑀡𑀸 𑀢𑀤𑀸𑀤𑀺𑀕𑀳𑀡𑀁 𑀮𑀩𑁆𑀪𑀢𑁂… ‘‘𑀧𑀘𑁆𑀘𑀬𑀕𑁆𑀕𑀳𑀡𑁂 𑀬𑀢𑁄 𑀲𑁄 𑀯𑀺𑀳𑀺𑀢𑁄, 𑀢𑀤𑀸𑀤𑀺𑀦𑁄 𑀕𑀳𑀡’’𑀦𑁆𑀢𑀺 𑀜𑀸𑀬𑀸, 𑀯𑀺𑀲𑁂𑀲𑀦𑀢𑁆𑀢𑁂𑀦 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀢𑁆𑀢𑀸 𑀢𑀤𑀦𑁆𑀢𑀕𑁆𑀕𑀳𑀡𑀁… ‘‘𑀯𑀺𑀥𑀺𑀩𑁆𑀩𑀺𑀲𑁂𑀲𑀦𑀦𑁆𑀢𑀲𑁆𑀲𑀸’’𑀢𑀺 (𑁧-𑁧𑁩) 𑀯𑀘𑀦𑀢𑁄𑀢𑀺 𑀫𑀦𑀲𑀺 𑀦𑀺𑀥𑀸𑀬𑀸𑀳- ‘𑀬𑀢𑁄’𑀇𑀘𑁆𑀘𑀸𑀤𑀺, 𑀲𑁄 𑀓𑁆𑀭𑀺𑀬𑀢𑁆𑀣𑁄 𑀆𑀤𑀺 𑀬𑀲𑁆𑀲 𑀲𑁄 𑀢𑀤𑀸𑀤𑀺, 𑀲𑁄 𑀧𑀘𑁆𑀘𑀬𑁄-𑀦𑁆𑀢𑁄 𑀬𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀲𑁄 𑀢𑀤𑀦𑁆𑀢𑁄, 𑀢𑀸𑀤𑀺𑀲𑀲𑁆𑀲 𑀢𑀤𑀸 𑀤𑀺𑀢𑀤𑀦𑁆𑀢𑀲𑀫𑀼𑀤𑀸𑀬𑀯𑀺𑀲𑁂𑀲(𑀲𑁆𑀲) 𑀕𑀳𑀡𑀁, 𑀦 𑀢𑀼 𑀢𑀤𑀦𑁆𑀢𑀫𑀢𑁆𑀢𑀲𑁆𑀲𑁂𑀢𑁆𑀬𑀢𑁆𑀣𑁄, 𑀦𑀦𑀼 𑀘 ‘𑀮𑁆𑀢𑁆𑀯𑀻’𑀢𑀺 𑀯𑀺𑀲𑁂𑀲𑀦𑀢𑁆𑀢𑁂𑀦 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑁂 𑀪𑀯𑀢𑀼 ‘‘𑀯𑀺𑀥𑀺𑀩𑁆𑀩𑀺𑀲𑁂𑀲𑀦𑀦𑁆𑀢𑀲𑁆𑀲𑀸’’𑀢𑀺 𑀢𑀤𑀦𑁆𑀢𑀲𑁆𑀲 𑀕𑀳𑀡𑀁, 𑀧𑀘𑁆𑀘𑀬𑀕𑁆𑀕𑀳𑀡𑁂𑀦 𑀧𑀦 𑀢𑀤𑀸𑀤𑀺𑀦𑁄 𑀕𑀳𑀡𑀁 𑀓𑀣𑀁 𑀲𑀺𑀬𑀸 𑀯𑀘𑀦𑀸𑀪𑀸𑀯𑀸𑀢𑁆𑀬𑀸𑀳-‘𑀢𑀤𑀯𑀺𑀦𑀸𑀪𑀸𑀯𑀺𑀢𑁆𑀢𑀸’𑀢𑀺, 𑀬𑀢𑁄 𑀯𑀺𑀳𑀺𑀢𑁄, 𑀢𑁂𑀦 𑀯𑀺𑀦𑀸 𑀦 𑀪𑀯𑀢𑀺 𑀲𑀻𑀮𑁂𑀦𑀸𑀢𑀺 𑀢𑀤𑀯𑀺𑀦𑀸𑀪𑀸𑀯𑀻, 𑀢𑀲𑁆𑀲 𑀪𑀸𑀯𑁄 𑀢𑀲𑁆𑀫𑀸. ‘‘𑀧𑀘𑁆𑀘𑀬𑀕𑁆𑀕𑀳𑀡𑁂 𑀬𑀢𑁄 𑀲𑁄 𑀯𑀺𑀳𑀺𑀢𑁄 𑀢𑀤𑀸𑀤𑀺𑀦𑁄 𑀕𑀳𑀡’’𑀦𑁆𑀢𑀺 𑀜𑀸𑀬𑀲𑁆𑀲 𑀬𑀢𑁆𑀣 𑀧𑀘𑁆𑀘𑀬𑀕𑁆𑀕𑀳𑀡𑀁 𑀢𑀢𑁆𑀣 𑀲𑀸𑀥𑀸𑀭𑀡𑀢𑁆𑀢𑀸 ‘𑀢𑀤𑀸𑀤𑀺𑀦𑁄’𑀢𑀺 𑀯𑀼𑀢𑁆𑀢𑀁, 𑀢𑀤𑀸𑀤𑀺𑀲𑀫𑀼𑀤𑀸𑀬𑀲𑁆𑀲 𑀕𑀳𑀡𑁂 𑀧𑀦𑁂𑀢𑁆𑀣 𑀯𑀺𑀲𑁂𑀲𑁄 𑀦 𑀤𑀺𑀲𑁆𑀲𑀢𑀺… 𑀅𑀥𑀺𑀓𑀢𑁆𑀢𑀸𑀢𑀺 [𑀅𑀥𑀺𑀕𑀢𑀦𑁆𑀢𑀸𑀯𑀸𑀢𑀺 (𑀧𑁄𑀢𑁆𑀣𑀓𑁂)] 𑀆𑀤𑀻𑀲𑀼 𑀯𑀺𑀲𑁂𑀲𑀤𑀲𑁆𑀲𑀦𑀸𑀲𑀫𑁆𑀪𑀯𑀸, ‘𑀢𑀼𑀁𑀲𑁆𑀫𑀸 𑀮𑁄𑀧𑁄 𑀘𑀺𑀘𑁆𑀙𑀸𑀬𑀁 𑀢𑁂’’ 𑀢𑁆𑀬𑀢𑁆𑀭 (𑁫-𑁪) 𑀢𑀼 𑀤𑀺𑀲𑁆𑀲𑀢𑀺 𑀯𑀺𑀲𑁂𑀲𑁄, 𑀯𑀓𑁆𑀔𑀢𑀺𑀳𑀺 𑀢𑀢𑁆𑀣 ‘‘𑀢𑀼𑀁𑀢𑀸𑀬𑁂𑀢𑀯𑁂 𑀪𑀸𑀯𑁂 𑀪𑀯𑀺𑀲𑁆𑀲𑀢𑀺 𑀓𑁆𑀭𑀺𑀬𑀸𑀬𑀁 𑀢𑀤𑀢𑁆𑀣𑀸𑀬’’𑀦𑁆𑀢𑀺 (𑁫-𑁬𑁧) 𑀢𑀼𑀁𑀧𑀘𑁆𑀘𑀬𑀁 𑀯𑀓𑁆𑀔𑀢𑀺’’𑀘𑁆𑀘𑀸𑀤𑀺.

𑀅𑀇𑀢𑁆𑀬𑁂𑀯𑀯𑀢𑁆𑀢𑀩𑁆𑀩𑀦𑁆𑀢𑀺 ¶ ‘𑀕𑁂𑀅’𑀇𑀢𑁆𑀬𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀧𑀓𑁆𑀔𑁂 𑀤𑀻𑀖𑀯𑀺𑀥𑀸𑀦𑁂𑀦𑁂𑀯𑀸𑀢𑀺 𑀇𑀫𑀺𑀦𑀸 𑀅𑀓𑀸𑀭𑀸𑀤𑁂𑀲𑁂 𑀓𑀢𑁂 𑀧𑀓𑁆𑀔𑁂 𑀤𑀻𑀖𑀯𑀺𑀥𑀸𑀦𑁂𑀦𑁂𑀯, 𑀅𑀜𑁆𑀜𑀢𑁆𑀣𑀘𑀭𑀺𑀢𑀢𑁆𑀣𑀢𑀸𑀬𑀸𑀢𑀺 𑀮𑁆𑀢𑁆𑀯𑀦𑁆𑀢𑀸𑀤𑀺𑀢𑁄 𑀅𑀜𑁆𑀜𑀢𑁆𑀣 𑀪𑁄𑀧𑀼𑀭𑀺𑀲𑀸 𑀪𑁄𑀧𑀼𑀭𑀺𑀲𑀇𑀘𑁆𑀘𑀸𑀤𑁄 𑀚𑀸𑀢𑀺𑀧𑀤𑀢𑁆𑀣𑀦𑀺𑀲𑁆𑀲𑀬𑀦𑁂𑀦 𑀓𑀢𑀢𑁆𑀣𑀢𑀸𑀬, 𑀧𑀭𑀺𑀲 𑀫𑀢𑁆𑀢𑀢𑁆𑀣𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀅𑀯𑀲𑁆𑀲𑀁 𑀤𑀻𑀖𑀪𑀸𑀯𑁂 𑀓𑀸𑀭𑀡𑀫𑀸𑀳 ‘𑀬𑀤𑀺𑀘𑀸𑀓𑀸𑀭𑁄’𑀇𑀘𑁆𑀘𑀸𑀤𑀺, 𑀬𑀤𑀺𑀘 𑀆𑀓𑀸𑀭𑁄𑀢𑀺 𑀧𑀤𑀘𑁆𑀙𑁂𑀤𑁄.

𑀖𑀇𑀢𑀺𑀲𑀜𑁆𑀜𑀸 𑀖𑀲𑀜𑁆𑀜𑀸 𑀢𑀸𑀲𑀁, 𑀓𑀜𑁆𑀜𑀸𑀲𑀜𑁆𑀜𑀸𑀢𑀺𑀆𑀤𑀻𑀲𑀼 𑀖𑀲𑀜𑁆𑀜𑀸𑀦𑀁 𑀩𑀳𑀼𑀢𑁆𑀢𑀸 𑀩𑀳𑀼𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄, 𑀖𑀭𑀽𑀧𑀲𑁆𑀲𑀸𑀢𑀺 𑀖𑀲𑁆𑀲𑀸𑀢𑀺 𑀖𑀲𑀤𑁆𑀤𑀭𑀽𑀧𑀲𑁆𑀲, 𑀢𑀣𑀸 𑀪𑁄 𑀩𑁆𑀭𑀳𑁆𑀫𑀸𑀢𑀺 𑀏𑀢𑁆𑀣 𑀢𑀣𑀸𑀢𑀺 𑀇𑀫𑀺𑀦𑀸 𑀩𑁆𑀭𑀳𑁆𑀫𑀸𑀢𑀺𑀭𑀽𑀧𑀲𑁆𑀲 𑀦𑀺𑀭𑀼𑀢𑁆𑀢𑀺𑀬𑀁 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸𑀯 𑀏𑀢𑁆𑀣 𑀲𑀗𑁆𑀕𑀳𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀏𑀯𑀁 𑀯𑀺𑀯𑀭𑀦𑁆𑀢𑀻𑀢𑀺 𑀢𑀲𑁆𑀫𑀸 𑀲 𑀲𑀔𑀢𑁄 𑀕𑀲𑁆𑀲 𑀅𑀓𑀸𑀭𑀆𑀓𑀸𑀭𑀸’’𑀢𑀺𑀆𑀤𑀺𑀦𑀸 𑀏𑀯𑀁 𑀯𑀺𑀯𑀭𑀦𑁆𑀢𑀺, 𑀢𑁂 𑀳𑀺 𑀅𑀘 𑀆𑀘 𑀇𑀘 𑀈𑀘 𑀏𑀘𑀸𑀢𑀺 𑀤𑁆𑀯𑀦𑁆𑀤𑁂 𑀧𑀼𑀩𑁆𑀩𑀲𑀭𑀸𑀦𑀁 𑀮𑁄𑀧𑀁 𑀓𑀢𑁆𑀯𑀸 𑀏𑀢𑁆𑀢𑀼𑀧𑀲𑀺𑀮𑁂𑀲𑀦𑀺𑀤𑁆𑀤𑁂𑀲𑀁 𑀯𑀡𑁆𑀡𑁂𑀦𑁆𑀢𑀺, 𑀲𑀸𑀫𑀜𑁆𑀜𑀯𑀺𑀥𑀸𑀦𑀦𑁆𑀢𑀺 ‘𑀩𑁆𑀭𑀳𑁆𑀫𑀓𑀢𑁆𑀢𑀼𑀇𑀲𑀺 𑀲𑀔𑀢𑁄’𑀘𑁆𑀘𑁂𑀯𑀫𑀯𑀺𑀲𑁂𑀲𑁂𑀢𑁆𑀯𑀸 𑀲𑀸𑀫𑀜𑁆𑀜𑁂𑀦 𑀓𑀣𑀦𑀁, 𑀓𑀺𑀫𑀢𑁆𑀣𑀦𑁆𑀢𑀺 𑀓𑀺𑀁 𑀅𑀢𑁆𑀣𑁄 𑀧𑀬𑁄𑀚𑀦𑀁 𑀬𑀲𑁆𑀲 𑀢𑀁 𑀓𑀺𑀫𑀢𑁆𑀣𑀁. 𑀲𑀸𑀫𑀜𑁆𑀜𑀯𑀺𑀥𑀸𑀦𑀁 𑀓𑀺𑀫𑀢𑁆𑀣𑀫𑁆𑀧𑀦𑁂𑀯𑀁 𑀧𑀬𑁄𑀚𑀦𑀸𑀲𑀗𑁆𑀓𑀸𑀬𑀁 𑀧𑀬𑁄𑀚𑀦𑀸𑀲𑀗𑁆𑀓𑀸𑀯𑀺𑀘𑀸𑀭𑀡𑀁 𑀫𑀦𑀲𑀺 𑀦𑀺𑀥𑀸𑀬 ‘𑀆𑀕𑀢𑀺 𑀕𑀡𑁄𑀬’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀆𑀳𑁋 ‘𑀅𑀢𑁆𑀣𑀢𑁄’𑀘𑁆𑀘𑀸𑀤𑀺, 𑀅𑀢𑁆𑀣𑀢𑁄𑀢𑀺 𑀲𑀸 𑀫𑀢𑁆𑀣𑀺𑀬𑀢𑁄, 𑀅𑀦𑁂𑀦𑀸𑀢𑀺‘𑀆𑀕𑀢𑀺𑀕𑀡𑁄𑀬’𑀦𑁆𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦, 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘𑀆𑀕𑀢𑀺𑀕𑀡𑁄𑀬𑀦𑁆𑀢𑀺 𑀇𑀫𑀺𑀦𑀸 𑀢𑀤𑀸𑀓𑀸𑀭𑀲𑀗𑁆𑀔𑀸𑀢𑀚𑀸𑀢𑀺𑀧𑁆𑀧𑀥𑀸𑀦𑀕𑀡𑀢𑁆𑀢𑀧𑁆𑀧𑀓𑀸𑀲𑀦𑁂𑀦 𑀬𑀤𑀺 𑀲𑀫𑁆𑀩𑁄𑀥𑀦𑁂 𑀏𑀓𑀸𑀭𑀦𑁆𑀢𑀸𑀓𑀸𑀭𑀦𑁆𑀢𑀮𑀸𑀪𑀻𑀦𑀁 𑀓𑀢𑁆𑀢𑀼 𑀇𑀲𑀺 𑀲𑀔 𑀫𑀼𑀦𑀺 𑀪𑀤𑀦𑁆𑀢𑀸𑀤𑀻𑀦𑀁 𑀕𑀳𑀡𑀁 𑀧𑀬𑁄𑀚𑀦𑀁 𑀦 𑀲𑀺𑀬𑀸, 𑀅𑀜𑁆𑀜𑀣𑀸 𑀅𑀦𑀼𑀧𑀧𑀚𑁆𑀚𑀦𑀁 𑀲𑀺𑀬𑀸𑀢𑀺 𑀏𑀯𑀫𑀜𑁆𑀜𑀣𑀸𑀦𑀼𑀧𑀧𑀢𑁆𑀢𑀺𑀮𑀓𑁆𑀔𑀡𑀲𑀸𑀫𑀢𑁆𑀣𑀺𑀬𑀢𑁄 𑀲𑀸𑀫𑀜𑁆𑀜𑀯𑀺𑀥𑀸𑀦𑁂 𑀧𑀬𑁄𑀚𑀦𑀫𑀸𑀳𑁂’’𑀢𑀺, 𑀲𑁄𑀬𑀦𑁆𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀺𑀬𑀁 ‘𑀆𑀕𑀢𑀺 𑀕𑀡𑁄𑀬’𑀦𑁆𑀢𑀺 𑀯𑀼𑀢𑁆𑀢𑀁 𑀯𑀘𑀦𑀁 𑀦𑀺𑀤𑀲𑁆𑀲𑁂𑀢𑀺.

𑀲𑁆𑀲𑀜𑁆𑀘 𑀲𑁆𑀲𑀸𑀘 𑀲𑁆𑀲𑀸𑀬𑁄𑀘 𑀅𑀜𑁆𑀘 𑀢𑀺𑀜𑁆𑀘𑀸𑀢𑀺 𑀇𑀢𑀭𑀻𑀢𑀭𑀬𑁄𑀕𑁂 𑀘𑀢𑁆𑀣 𑀲𑀫𑀸𑀲𑁄,𑀲𑁆𑀲𑀁 𑀲𑁆𑀲𑀸 𑀲𑁆𑀲𑀸𑀬𑀁 𑀢𑀺𑀁𑀲𑀼.

𑀖𑁄𑀘 ¶ 𑀑𑀘 𑀖𑁄 𑀖𑀸𑀦𑁆𑀢𑀑𑀓𑀸𑀭𑀦𑁆𑀢𑀸, 𑀦𑀢𑁆𑀣𑀺 𑀖𑁄 𑀬𑁂𑀲𑀦𑁆𑀢𑁂 𑀅𑀖𑁄, 𑀢𑁂𑀲𑀁, 𑀲𑀸𑀫𑀜𑁆𑀜𑀯𑀺𑀥𑀸𑀦𑀢𑁄𑀢𑀺 𑀓𑀲𑁆𑀲𑀘𑀺 𑀮𑀺𑀗𑁆𑀕𑀲𑁆𑀲 𑀅𑀧𑀭𑀸𑀫𑀸𑀲𑀸 𑀲𑀸𑀫𑀜𑁆𑀜𑁂𑀦 𑀯𑀺𑀥𑀸𑀦𑀢𑁄, 𑀦𑀸𑀤𑁂𑀓𑀯𑀘𑀦𑁂𑀲𑀽𑀢𑀺 𑀦𑀸𑀤𑀻𑀲𑀼 𑀏𑀓𑀯𑀘𑀦𑁂𑀲𑀽𑀢𑀺 𑀅𑀢𑁆𑀣𑁄, 𑀳𑀺 𑀳𑁂𑀢𑀼𑀫𑁆𑀳𑀺, 𑀬𑀲𑁆𑀫𑀸 𑀓𑀲𑁆𑀲𑀘𑀺 𑀏𑀯𑀁 𑀤𑀼𑀝𑁆𑀞𑀸𑀥𑀺𑀧𑁆𑀧𑀸𑀬𑁄 𑀲𑀺𑀬𑀸, 𑀢𑀲𑁆𑀫𑀸 𑀤𑀼𑀢𑀺𑀬𑀫𑀼𑀤𑀸𑀳𑀭𑀡𑀦𑁆𑀢𑀺 𑀅𑀢𑁆𑀣𑁄, 𑀤𑀼𑀢𑀺𑀬𑁄𑀧𑀺 𑀳𑁂𑀢𑀼𑀫𑁆𑀳𑀺, 𑀬𑀲𑁆𑀫𑀸 𑀲𑀩𑁆𑀩𑁂𑀲𑀁 𑀲𑀗𑁆𑀕𑀳𑀡𑀢𑁆𑀣𑀁, 𑀢𑀲𑁆𑀫𑀸 𑀦 𑀘 𑀢𑀣𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀅𑀢𑁆𑀣𑁄, 𑀲𑀩𑁆𑀩𑁂𑀲𑀫𑁂𑀓𑀯𑀘𑀦𑀸𑀦𑀁 𑀲𑀗𑁆𑀕𑀳𑀡𑀸𑀪𑀸𑀯𑁂 𑀲𑀼𑀢𑁆𑀢𑀸𑀦𑀁 𑀯𑀺𑀭𑀘𑀦𑀧𑁆𑀧𑀓𑀸𑀭𑀫𑀸𑀳-‘𑀅𑀜𑁆𑀜𑀣𑀸’𑀢𑀺𑀆𑀤𑀺, 𑀉𑀧𑀭𑀺𑀘𑀸𑀢𑁆𑀬𑀸𑀤𑀻𑀲𑁆𑀯𑀬𑀫𑀥𑀺𑀧𑁆𑀧𑀸𑀬𑁄 ‘‘𑀲𑀼𑀢𑁆𑀢𑀲𑁆𑀲 ‘𑀅𑀁𑀬𑁄𑀲𑁆𑀯𑀖𑁄𑀦’𑀦𑁆𑀢𑀺 𑀯𑀺𑀭𑀘𑀺𑀢𑀢𑁆𑀢𑀸 𑀲𑀸𑀫𑀜𑁆𑀜𑁂𑀦𑁂-𑀓𑀯𑀘𑀦𑁂𑀲𑁆𑀯𑀖𑀲𑁆𑀲 𑀦𑀭𑀲𑁆𑀲𑀢𑁆𑀢𑀧𑁆𑀧𑀢𑀻𑀢𑀺 𑀢𑀧𑁆𑀧𑀝𑀺𑀲𑁂𑀥𑀸𑀪𑀸𑀯𑀸’𑀤𑀡𑁆𑀟𑀺 𑀓𑀼𑀮’𑀦𑁆𑀢𑀺 𑀭𑀲𑁆𑀲𑀢𑁆𑀢𑀁 ‘𑀲𑀺𑀲𑁆𑀫𑀺𑀁 𑀦𑀧𑀼𑀁𑀲𑀓𑁂’𑀢𑀺 𑀯𑀺𑀥𑀺𑀲𑀼𑀢𑁆𑀢𑀁 𑀯𑀤𑁂𑀬𑁆𑀬𑀸’’𑀢𑀺, 𑀑𑀓𑀸𑀭𑀦𑁆𑀢𑀧𑁆𑀧𑀝𑀺𑀲𑁂𑀥𑀦𑁆𑀢𑀺 ‘𑀅𑀖𑁄𑀦’𑀦𑁆𑀢𑀺 𑀑𑀓𑀸𑀭𑀦𑁆𑀢𑀧𑁆𑀧𑀝𑀺𑀲𑁂𑀥𑀁, 𑀆𑀤𑁂𑀲𑀦𑁆𑀢𑀭𑀁 ‘‘𑀕𑁄𑀲𑁆𑀲𑀸 𑀕𑀲𑀺𑀳𑀺𑀦𑀁 𑀲𑀼𑀕𑀸𑀯𑀕𑀯𑀸’’𑀢𑁆𑀬𑀸𑀤𑀺𑀦𑀸 (𑁨-𑁬𑁭) 𑀓𑀭𑀻𑀬𑀫𑀸𑀦𑀁 𑀕𑀸𑀯𑀸𑀤𑁂𑀲𑀸𑀤𑀺𑀓𑀁, 𑀏𑀢𑁆𑀣 𑀧𑀦 𑀦𑀧𑀼𑀁𑀲𑀓𑁂 𑀏𑀓𑀯𑀘𑀦𑀦𑁆𑀢𑀁 𑀤𑀡𑁆𑀟𑀺 𑀓𑀼𑀮𑀦𑁆𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀦𑁄𑀤𑀸𑀳𑀝𑀁, 𑀬𑁄𑀲𑀼 𑀧𑀦 ‘‘𑀬𑁄𑀮𑁄𑀧𑀦𑀺𑀲𑀼𑀤𑀻𑀖𑁄’’𑀢𑀺 (𑁨-𑁮𑁮) 𑀅𑀤𑀻𑀖𑀲𑁆𑀲𑀸𑀧𑀺 𑀤𑀻𑀖𑀯𑀺𑀥𑀸𑀦𑀲𑀸𑀫𑀢𑁆𑀣𑀺𑀬𑀸 𑀧𑀞𑀫𑀫𑁂𑀯 𑀤𑀻𑀖𑀲𑁆𑀲 𑀭𑀲𑁆𑀲𑀸𑀪𑀸𑀯𑁂𑀓𑀸𑀯 𑀓𑀣𑀸𑀢𑀺 𑀦𑁄𑀤𑀸𑀳𑀝𑀁, 𑀤𑀡𑁆𑀟𑀻𑀤𑀡𑁆𑀟𑀻𑀦𑀺 𑀇𑀘𑁆𑀘𑁂𑀯 𑀢𑀼 𑀪𑀯𑀢𑀺, 𑀦𑁄𑀲𑁆𑀲𑀯𑀸𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀏𑀢𑁆𑀣 𑀯𑀺𑀚𑁆𑀚𑀫𑀸𑀦𑁂 𑀕𑁂 𑀧𑀭𑁂 𑀑𑀓𑀸𑀭𑀦𑁆𑀢𑀲𑁆𑀲 𑀯𑀸 𑀭𑀲𑁆𑀲𑀸𑀧𑀚𑁆𑀚𑀦𑀤𑁄𑀲𑀫𑁆𑀧𑀲𑀗𑁆𑀕𑀢𑁄 𑀦𑁄𑀲𑁆𑀲𑀸’𑀢𑀺 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁.

𑀕𑀸𑀯𑁂𑀦 𑀕𑀯𑁂𑀦𑀸𑀢𑀺 𑀓𑀭𑀡𑁂𑀧𑀺 𑀲𑀫𑀸𑀦𑀁, 𑀕𑀸𑀯𑀲𑁆𑀲 𑀕𑀯𑀲𑁆𑀲𑀸𑀢𑀺 𑀙𑀝𑁆𑀞𑀺𑀬𑀸𑀧𑀺.

𑀲𑁂𑀦𑀸𑀢𑀺 𑀲𑀼𑀢𑀢𑁆𑀢𑀸 𑀲𑁂𑀇𑀢𑀺 𑀯𑀼𑀢𑁆𑀢𑀺𑀬𑀁 𑀦𑀺𑀫𑀺𑀢𑁆𑀢𑀁 𑀧𑀭𑀺𑀓𑀧𑁆𑀧𑀺𑀢𑀁.

𑀲𑀤𑁆𑀤𑀦𑁆𑀢𑀭𑀢𑁆𑀢𑁂𑀦 𑀓𑁄𑀘𑀺 𑀤𑁄𑀲𑁄𑀢𑀺 𑀲𑀫𑁆𑀩𑀦𑁆𑀥𑁄, 𑀆𑀤𑀺𑀲𑀺𑀢𑀩𑁆𑀩𑀸 𑀆𑀤𑁂𑀲𑀸 𑀓𑀸𑀢𑀩𑁆𑀩𑀸.

𑀧𑁂𑀦 ¶ 𑀧𑀲𑀜𑁆𑀜𑀸𑀬 𑀬𑀼𑀢𑁆𑀢𑀸 𑀈𑀧𑀻, 𑀧𑀘 𑀲𑁄 𑀈𑀘𑀸𑀢𑀺 𑀯𑀸𑀧𑀻 𑀅𑀪𑁂𑀤𑀕𑁆𑀕𑀳𑀡𑁂𑀦, 𑀅𑀜𑁆𑀜𑀲𑁆𑀲𑀸𑀢𑀺 𑀇𑀓𑀸𑀭 𑀉𑀓𑀸𑀭𑀊𑀓𑀸𑀭𑀲𑁆𑀲.

𑀮𑁄𑀓𑁂 𑀤𑁂𑀯𑀤𑀢𑁆𑀢𑁄 𑀤𑀢𑁆𑀢𑁄𑀢𑀺 𑀏𑀓𑀤𑁂𑀲𑁂𑀦 𑀲𑀫𑀼𑀤𑀸𑀬𑀯𑁄𑀳𑀸𑀭 𑀤𑀲𑁆𑀲𑀦𑀢𑁄 𑀲𑁆𑀫𑀺𑀦𑁄𑀢𑀻𑀫𑀲𑁆𑀲 𑀲𑁆𑀫𑀺𑀁 𑀯𑀘𑀦𑀲𑁆𑀲𑀸𑀢𑁆𑀬𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄𑀢𑁆𑀬𑀸𑀳-‘𑀲𑁆𑀫𑀺𑀢𑀺 𑀇𑀫𑀺𑀦𑀸’𑀢𑀺𑀆𑀤𑀺.

𑀩𑁆𑀭𑀳𑁆𑀫𑀸𑀤𑀻𑀲𑀼 ‘𑀇𑀢𑁄 𑀓𑁆𑀯𑀘𑀺 𑀲𑀲𑁆𑀲 𑀝𑀸𑀦𑀼𑀩𑀦𑁆𑀥𑁄’𑀢𑀺 𑀧𑀸𑀞𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀩𑁆𑀭𑀳𑁆𑀫𑀸𑀤𑀻𑀲𑀽𑀢𑀺 ‘‘𑀖𑀩𑁆𑀭𑀳𑁆𑀫𑀸𑀤𑀺𑀢𑁂’’𑀢𑀺 (𑁨-𑁬𑁦) 𑀲𑀼𑀢𑁆𑀢𑁂 𑀯𑀼𑀢𑁆𑀢𑀩𑁆𑀭𑀳𑁆𑀫𑀸𑀤𑀻𑀲𑀼, 𑀧𑀸𑀞𑀸𑀢𑀺 ‘𑀇𑀢𑁄’𑀢𑁆𑀬𑀸𑀤𑀺𑀦𑁄 𑀕𑀡𑀲𑀼𑀢𑁆𑀢𑀲𑁆𑀲 𑀧𑀸𑀞𑀸, 𑀝𑀸𑀦𑀼𑀩𑀦𑁆𑀥𑁄𑀢𑀺 𑀇𑀫𑀺𑀦𑀸 (𑀏𑀝𑀸𑀤𑁂𑀲𑀁) 𑀦𑀺𑀤𑁆𑀤𑀺𑀲𑀢𑀺.

𑀲𑁄 [𑀪𑀲𑁆𑀫𑀸] 𑀅𑀦𑁆𑀢𑁄 𑀬𑀲𑁆𑀲 𑀲𑁄 𑀢𑀤𑀦𑁆𑀢𑁄 𑀲𑀫𑀼𑀤𑀸𑀬𑁄, 𑀢𑀲𑁆𑀲, ‘‘𑀘𑀸𑀦𑀼𑀓𑀟𑁆𑀠𑀺𑀢𑀁 𑀦𑁄𑀢𑁆𑀢𑀭𑀢𑁆𑀭𑀸𑀦𑀼𑀯𑀢𑁆𑀢𑀢𑀻’’𑀢𑀺 𑀯𑀺𑀜𑁆𑀜𑀽𑀯𑀘𑀦𑀁, 𑀯𑀺𑀤𑀼𑀦𑁄 𑀯𑀺𑀤𑀽𑀢𑀺 𑀓𑀽𑀧𑀘𑁆𑀘𑀬𑀦𑁆𑀢𑀲𑁆𑀲 𑀉𑀤𑀸𑀳𑀭𑀡𑀁, 𑀯𑀺𑀜𑁆𑀜𑀼𑀦𑁄 𑀯𑀺𑀜𑁆𑀜𑀽𑀢𑀺 ‘‘𑀯𑀺𑀢𑁄 𑀜𑀸𑀢𑁄’’𑀢𑀺 (𑁫-𑁩𑁯) 𑀲𑀩𑁆𑀩𑀜𑁆𑀜𑀼𑀦𑁄 𑀲𑀩𑁆𑀩𑀜𑁆𑀜𑀽𑀢𑀺 ‘‘𑀓𑀫𑁆𑀫𑀸’’𑀢𑀺 (𑁫-𑁪𑁦).

𑀮𑁄𑀧𑁄𑀢𑁆𑀯𑁂𑀯 𑀲𑀺𑀤𑁆𑀥𑀢𑁆𑀢𑀸𑀢𑀺 𑀯𑁄𑀫𑀼𑀢𑁆𑀢𑀧𑀓𑁆𑀔𑁂 𑀮𑁄𑀧𑁄𑀢𑀻𑀫𑀺𑀦𑀸𑀯 𑀲𑀺𑀤𑁆𑀥𑀢𑁆𑀢𑀸.

𑀅𑀫𑀼𑀬𑀸𑀢𑀺 𑀇𑀢𑁆𑀣𑀺𑀬𑀁 𑀬𑀸𑀤𑁂𑀲𑁄, 𑀦𑀦𑁄𑀢𑀻𑀫𑀲𑁆𑀲𑀺𑀤𑀁 𑀧𑀘𑁆𑀘𑀼𑀤𑀸𑀳𑀭𑀡𑀁.

𑀧𑀞𑀫𑀸𑀤𑀼𑀢𑀺𑀬𑀸𑀬𑁄𑀦𑀫𑁂𑀓𑀢𑁄 𑀉𑀤𑀸𑀳𑀭𑀡𑀸𑀦𑀺 𑀅𑀝𑁆𑀞𑀻 𑀅𑀝𑁆𑀞𑀻𑀦𑀺𑀢𑀺, 𑀢𑀸𑀦𑀺𑀘 𑀬𑁄𑀮𑁄𑀧𑀦𑀺𑀮𑀸𑀢𑀺𑀲𑁆𑀲𑁂𑀯 𑀤𑀲𑁆𑀲𑀺𑀢𑀸𑀦𑀺, 𑀢𑀣𑀸𑀬𑁂𑀯𑀸𑀜𑁆𑀜𑀸𑀦𑀺𑀧𑀺 𑀜𑀸𑀬𑀦𑁆𑀢𑀻𑀢𑀺.

𑀝𑀫𑀼𑀢𑁆𑀢𑀧𑀓𑁆𑀔𑁄𑀢𑀺 ¶ 𑀅𑀲𑀦𑁆𑀢𑀁 𑀓𑀼𑀩𑁆𑀩𑀦𑁆𑀢𑀲𑁆𑀲𑀸𑀢𑀺 𑀝𑀸𑀤𑁂𑀲𑁂𑀦 𑀫𑀼𑀢𑁆𑀢𑀧𑀓𑁆𑀔𑁄,𑀦𑁆𑀢𑀼𑀲𑁆𑀲𑀘𑁂𑀯𑀦𑁆𑀢𑀺 𑀧𑀲𑀺𑀤𑁆𑀥𑀢𑁆𑀢𑀸𑀯 𑀝𑀸𑀤𑁂𑀲𑀫𑀼𑀢𑁆𑀢𑀧𑀓𑁆𑀔𑀁 𑀉𑀧𑀫𑁂𑀢𑀺, ‘‘𑀲𑀜𑁆𑀚𑀸𑀢𑀁 𑀢𑀸𑀭𑀓𑀸𑀤𑀺𑀢𑁆𑀯𑀺𑀢𑁄’’𑀢𑀺 (𑁫-𑁪𑁫) 𑀇𑀢𑁄 𑀅𑀦𑁆𑀥𑀺𑀢𑀸.

𑀝𑀸𑀤𑁂𑀲𑁄-𑀢𑀺𑀧𑁆𑀧𑀲𑀚𑁆𑀚𑀢𑀻𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁 𑀦𑀦𑀼 𑀢𑀤𑀦𑁆𑀢𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀧𑀢𑁆𑀢𑁂 ‘‘𑀙𑀝𑁆𑀞𑀺𑀬𑀦𑁆𑀢𑀲𑁆𑀲𑀸’’𑀢𑀺 (𑁧-𑁧𑁭) 𑀅𑀦𑁆𑀢𑀲𑁆𑀲𑁂𑀯 𑀳𑁄𑀢𑀺, 𑀢𑀣𑀸𑀲𑀢𑀺 𑀦𑁂𑀯𑀸𑀢𑀺𑀧𑁆𑀧𑀲𑀗𑁆𑀕𑁄, 𑀢𑀲𑁆𑀫𑀸 𑀓𑀲𑁆𑀫𑀸𑀢𑀺𑀧𑁆𑀧𑀲𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺, 𑀲𑀘𑁆𑀘𑀁, 𑀢𑀣𑀸𑀧𑀺 ‘𑀛𑀺𑀲𑁆𑀲𑀸’𑀢𑀺 𑀯𑀢𑁆𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑁂 𑀇𑀲𑁆𑀲𑀸𑀢𑀺 𑀯𑀼𑀢𑁆𑀢𑀢𑁆𑀢 [𑀯𑀼𑀢𑁆𑀢𑀦𑁆𑀣𑀺] 𑀲𑀸𑀫𑀢𑁆𑀣𑀺𑀬𑀢𑁄 𑀢𑀤𑀦𑁆𑀢𑀲𑁆𑀲 𑀝𑀸𑀤𑁂𑀲𑁄-𑀢𑀺𑀧𑁆𑀧𑀲𑀚𑁆𑀚𑀢𑀻𑀢𑀺 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺, 𑀦𑀦𑀼 ‘𑀛𑀺𑀲𑁆𑀲𑀸’𑀢𑀺 𑀯𑀼𑀢𑁆𑀢𑁂𑀧𑀺 𑀲𑁄𑀯𑀸𑀢𑀺𑀧𑁆𑀧𑀲𑀗𑁆𑀕𑁄 𑀢𑀤𑀯𑀢𑁆𑀣𑁄𑀬𑁂𑀯𑀸𑀢𑀺 𑀲𑀘𑁆𑀘𑀁, 𑀢𑀣𑀸𑀧𑀺 𑀬𑀤𑀺 𑀲𑀫𑀼𑀤𑀸𑀬𑀲𑁆𑀲 𑀝𑀸𑀤𑁂𑀲𑁄-𑀪𑀺𑀫𑀢𑁄 𑀲𑀺𑀬𑀸 ‘𑀢𑀣𑀸 𑀲𑀢𑀺 𑀓𑀺𑀁 𑀛𑀕𑁆𑀕𑀳𑀡𑁂𑀦 𑀇𑀲𑁆𑀲𑀢𑁆𑀯𑁂𑀯 𑀯𑀤𑁂𑀬𑁆𑀬𑀸𑀢𑀺 𑀦𑀸𑀢𑀺𑀧𑁆𑀧𑀲𑀚𑁆𑀚𑀢𑀻𑀢𑀺, 𑀛𑀕𑁆𑀕𑀳𑀡𑁂 𑀦𑀸𑀫𑀦𑁆𑀢𑁂 𑀇𑀓𑀸𑀭𑀲𑁆𑀲𑁂𑀯 𑀛𑀲𑀜𑁆𑀜𑀢𑁆𑀢𑀸𑀢𑀺 𑀇𑀤𑀁 𑀧𑀦 𑀯𑀺𑀲𑁂𑀲𑀦𑀢𑁆𑀢𑁂𑀦 𑀯𑀢𑁆𑀢𑀼 𑀫𑀦𑀺𑀘𑁆𑀙𑀺𑀢𑁂 𑀬𑀼𑀚𑁆𑀚𑀢𑀺.

𑀲𑀳𑀘𑀭𑀺𑀢𑀜𑀸𑀬𑀲𑁆𑀲𑀸𑀢𑀺 ‘‘𑀢𑀁𑀲𑀳𑀘𑀭𑀺𑀢𑀸 𑀢𑀕𑁆𑀕𑀳𑀡𑁂𑀦 𑀕𑀬𑁆𑀳𑀦𑁆𑀢𑀻’’𑀢𑀺 𑀜𑀸𑀬𑀲𑁆𑀲.

𑀳𑁂𑀢𑀼𑀓𑀼𑀭𑀼𑀲𑀤𑁆𑀤𑁂𑀳𑀺 𑀬𑁄𑀲𑀼 𑀇𑀫𑀺𑀦𑀸 𑀝𑀸𑀤𑁂𑀲𑁂 ‘‘𑀮𑁄𑀧𑁄’’𑀢𑀻𑀫𑀺𑀦𑀸 𑀬𑁄𑀮𑁄𑀧𑁂 𑀯𑀸 𑀲𑀫𑁆𑀧𑀢𑁆𑀢𑁂 ‘‘𑀧𑀘𑁆𑀘𑀬𑀦𑀺𑀲𑁆𑀲𑀺𑀢𑀁 𑀩𑀳𑀺𑀭𑀗𑁆𑀕’’𑀦𑁆𑀢𑀺 𑀬𑁄𑀮𑁄𑀧𑀢𑁄 ‘‘𑀧𑀓𑀢𑀺𑀦𑀺𑀲𑁆𑀲𑀺𑀢𑀫𑀦𑁆𑀢𑀭𑀗𑁆𑀕’’𑀦𑁆𑀢𑀺 ‘‘𑀅𑀦𑁆𑀢𑀭𑀗𑁆𑀕𑀩𑀳𑀺𑀭𑀗𑁆𑀕𑀲𑀼 𑀅𑀦𑁆𑀢𑀭𑀗𑁆𑀕𑀯𑀺𑀥𑀺 𑀩𑀮𑀯𑀸’’𑀢𑀺 𑀧𑀞𑀫𑀁 𑀝𑀸𑀤𑁂𑀲𑁂 𑀦𑀺𑀫𑀺𑀢𑁆𑀢𑀸𑀪𑀸𑀯𑀸𑀯 𑀮𑁄𑀧𑀸 𑀪𑀸𑀯𑁄𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘𑀳𑁂𑀢𑀼𑀓𑀼𑀭𑀼𑀲𑀤𑁆𑀤𑁂𑀳𑀺’𑀘𑁆𑀘𑀸𑀤𑀺.

𑀦𑀦𑀼 𑀓𑀢𑀭𑀸𑀤𑀬𑁄𑀯 𑀲𑀩𑁆𑀩𑀸𑀤𑀺𑀲𑀤𑁆𑀤𑀯𑀘𑀦𑀻𑀬𑀸 𑀳𑁄𑀦𑁆𑀢𑀺 𑀲𑀫𑀸𑀲𑁂𑀦𑀸𑀪𑀺𑀳𑀺𑀢𑀢𑁆𑀢𑀸, 𑀦 𑀢𑀼 𑀲𑀩𑁆𑀩𑀲𑀤𑁆𑀤𑁄 [𑀲𑀤𑁆𑀤𑀲𑁆𑀲𑁂 (𑀧𑁄𑀢𑁆𑀣𑀓𑁂)] 𑀢𑁆𑀬𑀸𑀳-‘𑀅𑀯𑀬𑀯𑁂𑀦𑁂’𑀢𑁆𑀬𑀸𑀤𑀺,𑀬𑀤𑀺𑀧𑀺 ‘𑀲𑀩𑁆𑀩 𑀲𑀤𑁆𑀤𑁄 ¶ 𑀆𑀤𑀺 𑀬𑁂𑀲’𑀦𑁆𑀢𑀺 𑀅𑀯𑀬𑀯𑁂𑀦 𑀯𑀺𑀕𑁆𑀕𑀳𑁄, 𑀢𑀣𑀸𑀧𑀺 𑀲𑀫𑀼𑀤𑀸𑀬𑁄𑀯𑀸𑀲𑁆𑀲𑀢𑁆𑀣𑁄 𑀪𑀯𑀢𑀺… 𑀬𑁂𑀲𑀦𑁆𑀢𑁆𑀬𑀦𑁂𑀦 𑀲𑀫𑀼𑀤𑀸𑀬𑀲𑁆𑀲 𑀧𑀭𑀸𑀫𑀸𑀲𑀸𑀢𑀺 𑀪𑀸𑀯𑁄, 𑀇𑀢𑀻𑀢𑀺 𑀳𑁂𑀢𑀼𑀫𑁆𑀳𑀺, 𑀓𑁄 𑀪𑀯𑀦𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀩𑀳𑀼𑀦𑁆𑀦𑀁 𑀯𑀸 𑀏𑀓𑁄 𑀤𑁂𑀯 𑀤𑀢𑁆𑀢𑁄 𑀓𑀞𑀸𑀤𑀻𑀳𑀺 𑀯𑀸 𑀅𑀢𑁆𑀣𑁂 𑀤𑁆𑀯𑀻𑀳𑀺 𑀩𑀳𑀽𑀳𑀺 𑀯𑀸 𑀏𑀓𑀲𑁆𑀲 𑀦𑀺𑀤𑁆𑀥𑀸𑀭𑀡𑁂 𑀲𑀢𑀺 𑀓𑀺𑀫𑁆𑀳𑀸 𑀦𑀺𑀤𑁆𑀥𑀸𑀭𑀡𑁂 𑀭𑀢𑀭 𑀭𑀢𑀫𑁂𑀲𑀼 𑀡𑀸𑀤𑀺𑀯𑀼𑀢𑁆𑀢𑀺𑀬𑀁 ‘‘𑀏𑀓𑀢𑁆𑀣𑀢𑀸𑀬’’𑀦𑁆𑀢𑀺 (𑁨-𑁧𑁧𑁯) 𑀯𑀺𑀪𑀢𑁆𑀢𑀺𑀮𑁄𑀧𑁂 ‘‘𑀭𑀸𑀦𑀼𑀩𑀦𑁆𑀥𑁂𑀦𑁆𑀢𑀲𑀭𑀸𑀤𑀺𑀲𑁆𑀲𑀸’’𑀢𑀺 (𑁪-𑁧𑁩𑁨) 𑀅𑀦𑁆𑀢𑀲𑀭𑀸𑀤𑀺𑀮𑁄𑀧𑁂 𑀓𑀺𑀁𑀲𑀤𑁆𑀤𑀲𑁆𑀲 𑀭𑀽𑀧𑀲𑀺𑀤𑁆𑀥𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 𑀓𑀢𑀫𑀸’𑀢𑀺𑀆𑀤𑀺, 𑀉𑀪𑁄 𑀅𑀁𑀲𑀸 𑀅𑀲𑁆𑀲𑀸𑀢𑀺 𑀅𑀢𑁆𑀣𑁂 ‘‘𑀅𑀬𑀼𑀪𑀤𑁆𑀯𑀺𑀢𑀻𑀳𑀁𑀲𑁂’’𑀢𑀺 (𑁪-𑁪𑁯) 𑀅𑀬𑁂‘‘𑀲𑀭𑁄 𑀮𑁄𑀧𑁄 𑀲𑀭𑁂’’𑀢𑀺 (𑁧-𑁨𑁬) 𑀲𑀭𑀮𑁄𑀧𑁂 𑀭𑀽𑀧𑀲𑀺𑀤𑁆𑀥𑀻𑀢𑀺 𑀆𑀳-‘𑀉𑀪𑁄 𑀅𑀁𑀲𑀸’𑀇𑀘𑁆𑀘𑀸𑀤𑀺, 𑀓𑀸𑀬𑀁 𑀯𑀯𑀢𑁆𑀣𑀸 𑀦𑀸𑀫𑁂 𑀢𑁆𑀬𑀸𑀳-‘𑀲𑀸𑀪𑀺𑀥𑁂𑀬𑁆𑀬𑀸’𑀢𑁆𑀬𑀸𑀤𑀺, 𑀅𑀯𑀥𑀺𑀘𑁆𑀘𑀸𑀤𑀺𑀦𑀸 𑀢𑀲𑁆𑀲𑁂𑀯𑀸𑀢𑁆𑀣𑀁 𑀯𑀺𑀪𑀸𑀯𑁂𑀢𑀺, 𑀅𑀥𑀁𑀲𑁄 𑀅𑀪𑀝𑁆𑀞𑀢𑀸 𑀅𑀯𑀥𑀺𑀪𑀸𑀯𑁂𑀬𑁂𑀯𑀸𑀯𑀝𑁆𑀞𑀸𑀦𑀁, 𑀲𑀸𑀪𑀺𑀥𑁂𑀬𑁆𑀬𑀸 𑀧𑁂𑀓𑁆𑀔𑀸𑀢𑀺 𑀏𑀢𑁆𑀣 𑀲𑁄 𑀲𑀓𑁄 𑀅𑀪𑀺𑀥𑁂𑀬𑁆𑀬𑁄 𑀅𑀢𑁆𑀣𑁄 𑀤𑀺𑀲𑀸𑀤𑀺 𑀲𑀸𑀪𑀺𑀥𑁂𑀬𑁆𑀬𑁄𑀢𑀺 𑀕𑀳𑀺𑀢𑁄𑀢𑀺 𑀆𑀳-‘𑀧𑀼𑀩𑁆𑀩𑀸𑀤𑀻𑀦’𑀦𑁆𑀢𑀺𑀆𑀤𑀺, 𑀲𑀸𑀪𑀺𑀥𑁂𑀬𑁆𑀬𑀦𑁆𑀢𑀺 𑀓𑀫𑁆𑀫𑀢𑁄 𑀧𑀭𑀸 𑀅𑀧𑀧𑀼𑀩𑁆𑀩𑀸 ‘𑀇𑀓𑁆𑀔=𑀤𑀲𑁆𑀲𑀦𑁂’𑀢𑀻𑀫𑀲𑁆𑀫𑀸 ‘‘𑀓𑁆𑀯𑀘𑀡’’𑀇𑀢𑀺 (𑁫-𑁪𑁧) 𑀅𑀡𑁆𑀧𑀘𑁆𑀘𑀬𑁂 𑀲𑀸𑀪𑀺𑀥𑁂𑀬𑁆𑀬𑀸𑀧𑁂𑀓𑁆𑀔𑁄, 𑀲𑁄 𑀯𑀸𑀯𑀥𑀺𑀦𑀺𑀬𑀫𑁄𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘𑀢𑀫𑀧𑁂𑀓𑁆𑀔𑀢𑀺’𑀘𑁆𑀘𑀸𑀤𑀺, 𑀢𑀢𑁆𑀣𑀸𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀢𑀺 ‘𑀢𑀣𑀸𑀳𑀺’𑀘𑁆𑀘𑀸𑀤𑀺𑀦𑀸, 𑀏𑀢𑁆𑀣 𑀘 𑀧𑀭𑀸𑀤𑀺𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑁄-𑀢𑁆𑀣𑁄 𑀤𑀺𑀲𑀸𑀤𑁂𑀲𑀸𑀤𑀺 𑀧𑀼𑀩𑁆𑀩𑀸𑀤𑀺𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀲𑁆𑀲𑀸𑀢𑁆𑀣𑀲𑁆𑀲 𑀤𑀺𑀲𑀸𑀬 𑀤𑁂𑀲𑀸𑀤𑀺𑀦𑁄 𑀯𑀸𑀯𑀥𑀺𑀪𑀸𑀯𑁂𑀦 𑀦𑀺𑀬𑀫𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀬𑁄 𑀘𑀸𑀯𑀥𑀺𑀪𑀸𑀯𑁄 𑀦𑀺𑀬𑀫𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀲𑁄𑀘𑀸𑀯𑀥𑀺𑀪𑀸𑀯𑁄 𑀦𑀺𑀬𑀫𑀯𑀲𑁂𑀦 𑀧𑀯𑀢𑁆𑀢𑁄 𑀧𑀼𑀩𑁆𑀩𑀸𑀤𑀺𑀲𑀤𑁆𑀤𑀯𑀘𑀦𑀻𑀬𑀁 𑀤𑀺𑀲𑀸𑀤𑁂𑀲𑀸𑀤𑀺 𑀫𑀧𑁂𑀓𑁆𑀔𑀢𑀻𑀢𑀺 𑀲𑀸𑀪𑀺𑀥𑁂𑀬𑁆𑀬𑀸𑀧𑁂𑀓𑁆𑀔𑁄𑀯𑀥𑀺𑀦𑀺𑀬𑀫𑁄𑀬𑁂𑀯 𑀯𑀯𑀢𑁆𑀣𑀸𑀢𑀺 𑀯𑀼𑀘𑁆𑀘𑀢𑀻𑀢𑁆𑀬𑀬𑀫𑀥𑀺𑀧𑁆𑀧𑀸𑀬𑁄, 𑀦 𑀢𑀼 𑀅𑀪𑀺𑀥𑁂𑀬𑁆𑀬𑀸𑀬𑀦𑁆𑀢𑀺 𑀅𑀲𑀫𑁆𑀪𑀯𑀸, 𑀅𑀲𑀫𑁆𑀪𑀯𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 𑀆𑀳-‘𑀬𑁄 𑀳𑀺’𑀘𑁆𑀘𑀸𑀤𑀺, 𑀓𑁄𑀲𑀮𑁆𑀮𑁂𑀦 𑀦𑀺𑀫𑀺𑀢𑁆𑀢𑁂𑀦𑀸𑀢𑀺 𑀓𑀼𑀲𑀮 𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑁂𑀦 𑀓𑁄𑀲𑀮𑁆𑀮𑁂𑀦, 𑀉𑀢𑁆𑀢𑀭𑀸𑀓𑀼𑀭𑀯𑁄 𑀉𑀢𑁆𑀢𑀭𑀓𑀼𑀭𑀼𑀤𑀻𑀧 𑀯𑀸𑀲𑀺𑀦𑁄, 𑀤𑁂𑀲𑁄 𑀯𑀸, ‘𑀦𑀸𑀜𑁆𑀜𑀜𑁆𑀘 𑀦𑀸𑀫𑀧𑁆𑀧𑀥𑀸𑀦𑀸’’𑀢𑀺 (𑁨-𑁧𑁩𑁬) 𑀅𑀦𑁂𑀦𑁂𑀯 𑀲𑀜𑁆𑀜𑀸𑀬𑀁 𑀲𑀩𑁆𑀩𑀸𑀤𑀺𑀓𑀸𑀭𑀺𑀬𑀲𑁆𑀲 𑀦𑀺𑀲𑀺𑀤𑁆𑀥𑀢𑁆𑀢𑁂 𑀓𑀺𑀫𑀲𑀜𑁆𑀜𑀸𑀬𑀁𑀪𑁆𑀬𑀦𑁂𑀦𑁂𑀢𑁆𑀬𑀸𑀳 ‘𑀦𑀸𑀜𑁆𑀜𑀜𑁆𑀘𑁂’𑀢𑁆𑀬𑀸𑀤𑀺, 𑀓𑀺𑀜𑁆𑀘𑀺 𑀧𑀼𑀩𑁆𑀩𑀢𑁆𑀢𑀸𑀤𑀺𑀓𑀫𑀼𑀤𑁆𑀤𑀺𑀲𑁆𑀲 𑀓𑁂𑀲𑀜𑁆𑀘𑀺 𑀧𑀼𑀩𑁆𑀩𑁄𑀧𑀭𑁄𑀢𑁆𑀬𑀸𑀤𑀺𑀓𑀸 𑀅𑀢𑁆𑀣𑀸𑀦𑀼𑀕𑀢𑀸 𑀲𑀜𑁆𑀜𑀸 𑀅𑀦𑁆𑀯𑀢𑁆𑀣𑀲𑀜𑁆𑀜𑀸.

‘‘𑀯𑀸𑀦𑁂𑀓𑀜𑁆𑀜𑀢𑁆𑀣𑁂’’𑀢𑀺 (𑁩-𑁧𑁭) ¶ 𑀯𑀺𑀓𑀧𑁆𑀧𑀸𑀦𑀼𑀯𑀢𑁆𑀢𑀦𑀢𑁄 𑀅𑀬𑀼𑀢𑁆𑀢𑀢𑁆𑀢𑀸𑀪𑀸𑀯𑀁 𑀤𑀲𑁆𑀲𑁂𑀢𑀺‘𑀦𑀬𑀺𑀤𑀫𑀬𑀼𑀢𑁆𑀢’𑀦𑁆𑀢𑀺, 𑀬𑀼𑀢𑁆𑀢𑀢𑀸 𑀘𑀸𑀲𑁆𑀲 𑀧𑀸𑀞𑁂 𑀩𑁆𑀬𑀪𑀺𑀘𑀸𑀭 𑀤𑀲𑁆𑀲𑀦𑀢𑁄𑀢𑀺 𑀯𑀢𑁆𑀢𑀼𑀫𑀸𑀳-‘𑀦𑀧𑀼𑀁𑀲𑀓𑁂’𑀘𑁆𑀘𑀸𑀤𑀺, 𑀧𑀸𑀞𑀸𑀦𑀼𑀕𑀢𑀸 𑀳𑀺 𑀲𑀼𑀢𑁆𑀢𑀭𑀘𑀦𑀸, 𑀯𑀺𑀓𑀧𑁆𑀧𑀸𑀦𑀼𑀯𑀢𑁆𑀢𑀺𑀬𑀸 𑀅𑀦𑀧𑀼𑀁𑀲𑀓𑀫𑀺𑀤𑀫𑁂𑀯 𑀯𑀘𑀦𑀁 𑀢𑀲𑁆𑀲 𑀓𑁆𑀯𑀘𑀺 𑀩𑁆𑀬𑀪𑀺𑀘𑀸𑀭𑀢𑁆𑀢𑁂 𑀜𑀸𑀧𑀓𑀦𑁆𑀢𑀺 𑀯𑀢𑁆𑀢𑀼𑀫𑀸𑀳-‘𑀢𑀲𑁆𑀲 𑀘𑀸’𑀢𑀺𑀆𑀤𑀺, 𑀅𑀯𑀲𑁆𑀲𑀫𑁂𑀯𑀫𑁂𑀢𑁆𑀣 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄, 𑀅𑀜𑁆𑀜𑀣𑀸 𑀬𑀣𑀸𑀯𑀝𑁆𑀞𑀺𑀢𑀧𑀸𑀞𑀸𑀦𑀼𑀓𑁆𑀓𑀫𑁂𑀦𑀸𑀢𑁆𑀣𑀕𑁆𑀕𑀳𑀡𑁂 𑀲𑀢𑀺 𑀲𑀼𑀢𑁆𑀢𑀲𑁆𑀲 [𑀲𑀼𑀢𑁆𑀢𑀲𑁆𑀲𑀸 (𑀧𑁄𑀢𑁆𑀣𑀓𑁂)] 𑀫𑀼𑀔𑁆𑀬𑀢𑁆𑀢𑀧𑁆𑀧𑀢𑀻𑀢𑀺𑀢𑁄 𑀓𑀣𑀦𑁆𑀢𑀫𑀜𑁆𑀜𑀲𑁆𑀲 𑀜𑀸𑀧𑀓𑀁 𑀪𑀯𑁂𑀬𑁆𑀬, 𑀫𑀼𑀔𑁆𑀬𑀪𑀸𑀯𑁂 𑀳𑀺 𑀜𑀸𑀧𑀓𑀢𑁆𑀣𑀁 𑀦 𑀬𑀼𑀚𑁆𑀚𑁂𑀬𑁆𑀬.

𑀦𑀦𑀼 𑀘 ‘‘𑀮𑀓𑁆𑀔𑀡𑀧𑀝𑀺𑀧𑀤𑀯𑀼𑀢𑁆𑀢𑁂𑀲𑀼 𑀧𑀝𑀺𑀧𑀤𑀯𑀼𑀢𑁆𑀢𑀲𑁆𑀲𑁂𑀯 𑀕𑀳𑀡’’𑀦𑁆𑀢𑀻𑀫𑀸𑀬 𑀧𑀭𑀺𑀪𑀸𑀲𑀸𑀬 𑀮𑀓𑁆𑀔𑀡𑀺𑀓𑀲𑁆𑀲𑀸𑀓𑀸𑀭𑀲𑁆𑀲 𑀕𑀳𑀡𑀁 𑀦 𑀧𑀧𑁆𑀧𑁄𑀢𑀻𑀢𑁆𑀬𑀸𑀲𑀗𑁆𑀓𑀺𑀬 𑀧𑀝𑀺𑀧𑀸𑀤𑀬𑀫𑀸𑀳-‘𑀭𑀲𑁆𑀲𑀸𑀓𑀸𑀭𑁂’𑀘𑁆𑀘𑀸𑀤𑀺, 𑀧𑀭𑀺𑀪𑀸𑀲𑀸𑀬 𑀘𑀲𑁆𑀲𑀸𑀬𑀫𑀢𑁆𑀣𑁄 ‘‘𑀮𑀓𑁆𑀔𑀻𑀬𑀢𑁂𑀦𑁂𑀦𑁂𑀢𑀺 𑀮𑀓𑁆𑀔𑀡𑀁, 𑀲𑀸𑀥𑁆𑀯𑀲𑀸𑀥𑀼𑀚𑀸𑀦𑀦 𑀳𑁂𑀲𑀼𑀢𑁆𑀢𑀸 𑀲𑀼𑀢𑁆𑀢 [𑀲𑀢𑁆𑀣] 𑀫𑀼𑀘𑁆𑀘𑀢𑁂, 𑀧𑀝𑀺𑀕𑀢𑀫𑁆𑀧𑀤𑀁 𑀧𑀝𑀺𑀧𑀤𑀁, 𑀉𑀘𑁆𑀘𑀸𑀭𑀺𑀢𑀫𑀜𑁆𑀚𑀲𑁂𑀢𑁆𑀬𑀢𑁆𑀣𑁄, 𑀮𑀓𑁆𑀔𑀡𑀜𑁆𑀘 𑀧𑀝𑀺𑀧𑀤𑀜𑁆𑀘 𑀮𑀓𑁆𑀔𑀡𑀧𑀝𑀺𑀧𑀤𑀸𑀦𑀺, 𑀢𑁂𑀳𑀺 𑀯𑀼𑀢𑁆𑀢𑀸𑀦𑀺 𑀭𑀽𑀧𑀸𑀦𑀺 𑀮𑀓𑁆𑀔𑀡𑀧𑀝𑀺𑀧𑀤𑀯𑀼𑀢𑁆𑀢𑀸𑀦𑀺, 𑀢𑁂𑀲𑀼, 𑀯𑀼𑀢𑁆𑀢𑀲𑀤𑁆𑀤𑁄 𑀧𑀘𑁆𑀘𑁂𑀓𑀫𑁆𑀧𑀭𑀺𑀲𑀫𑀸𑀧𑀻𑀬𑀢𑁂 ‘𑀮𑀓𑁆𑀔𑀡𑀯𑀼𑀢𑁆𑀢𑁂𑀲𑀼 𑀧𑀝𑀺𑀧𑀤𑀯𑀼𑀢𑁆𑀢𑁂𑀲𑀽’𑀢𑀺, 𑀢𑀢𑁆𑀭𑀸𑀜𑁆𑀘𑀲𑀸 𑀬𑀫𑀦𑀺𑀤𑁆𑀤𑀺𑀝𑁆𑀞𑀁, 𑀓𑁂𑀯𑀮𑀁 𑀮𑀓𑁆𑀔𑀡𑀤𑀲𑁆𑀲𑀦𑁂𑀦𑀸𑀲𑁆𑀫𑀺𑀁 𑀮𑀓𑁆𑀔𑀡𑁂 𑀲𑀢𑁆𑀬𑀯𑀲𑁆𑀲𑀫𑀦𑁂𑀦 𑀭𑀽𑀧𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀮𑀓𑁆𑀔𑀡𑁂𑀦 𑀧𑀝𑀺𑀧𑀸𑀤𑀺𑀢𑀁, 𑀢𑀁 𑀮𑀓𑁆𑀔𑀡𑀯𑀼𑀢𑁆𑀢𑀫𑀺𑀢𑁆𑀬𑀼𑀘𑁆𑀘𑀢𑁂, 𑀬𑀦𑁆𑀢𑁆𑀯𑀜𑁆𑀚𑀲𑀸 𑀲𑀤𑁆𑀤𑁂𑀦𑁂𑀯 𑀧𑀝𑀺𑀧𑀸𑀤𑀺𑀢𑀁, 𑀢𑀁 𑀧𑀝𑀺𑀧𑀤𑀯𑀼𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑁂, 𑀢𑀲𑁆𑀫𑀺𑀁 𑀮𑀓𑁆𑀔𑀡𑀯𑀼𑀢𑁆𑀢𑁂 𑀧𑀝𑀺𑀧𑀤𑀯𑀼𑀢𑁆𑀢𑁂 𑀘 𑀭𑀽𑀧𑁂 𑀲𑀢𑀺 𑀧𑀝𑀺𑀧𑀤𑀯𑀼𑀢𑁆𑀢𑀲𑁆𑀲𑁂𑀯 𑀕𑀳𑀡𑀁, 𑀦𑁂𑀢𑀭𑀲𑁆𑀲𑁂’’𑀢𑀺, 𑀧𑀝𑀺𑀧𑀤𑀯𑀼𑀢𑁆𑀢𑀲𑁆𑀲𑁂𑀯𑁂𑀢𑁆𑀬𑀯𑀥𑀸𑀭𑀡𑁂𑀦 𑀦𑀺𑀬𑀫𑀭𑀽𑀧𑀪𑀸𑀲𑁆𑀲𑀸 𑀧𑀭𑀺𑀪𑀸𑀲𑀸𑀬𑀸𑀯𑀕𑀫𑁆𑀬𑀢𑁂, 𑀲𑁄 𑀘 𑀦𑀺𑀬𑀫𑁄 𑀅𑀦𑀺𑀬𑀫𑀧𑀼𑀩𑁆𑀩𑀓𑁂 𑀲𑀦𑁆𑀤𑁂𑀳𑁂 𑀲𑀢𑁆𑀬𑀯𑀢𑀺𑀝𑁆𑀞𑀢𑁂, 𑀢𑀲𑁆𑀫𑀸 𑀬𑀢𑁆𑀭 𑀮𑀓𑁆𑀔𑀡𑀯𑀼𑀢𑁆𑀢𑀫𑁂𑀯 𑀓𑁂𑀯𑀮𑀁, 𑀦 𑀧𑀝𑀺𑀧𑀤𑀯𑀼𑀢𑁆𑀢𑀁, 𑀢𑀢𑁆𑀭 𑀦𑀸𑀬𑀁 𑀧𑀭𑀺𑀪𑀸𑀲𑀸 𑀯𑀢𑀺𑀝𑁆𑀞𑀢𑁂, 𑀬𑀢𑁆𑀭𑀸𑀧𑀺 𑀧𑀝𑀺𑀧𑀤𑀯𑀼𑀢𑁆𑀢𑀫𑁂𑀯 𑀓𑁂𑀯𑀮𑀁, 𑀦 𑀮𑀓𑁆𑀔𑀡𑀯𑀼𑀢𑁆𑀢𑀁, 𑀲𑁄𑀧𑁆𑀬𑁂𑀢𑀺𑀲𑁆𑀲𑀸 𑀅𑀯𑀺𑀲𑀬𑁄, 𑀬𑀢𑁆𑀭 𑀤𑁆𑀯𑁂 𑀭𑀽𑀧𑀸𑀦𑀺 𑀲𑀫𑁆𑀪𑀯𑀦𑁆𑀢𑀺 𑀢𑀢𑁆𑀭𑁂𑀯𑀸 𑀬𑀫𑁆𑀧𑀭𑀺𑀪𑀸𑀲𑀸 𑀲𑀦𑁆𑀤𑁂𑀳𑀸𑀧𑀸𑀓𑀭𑀡𑀫𑀼𑀔𑁂𑀦 𑀧𑀯𑀢𑁆𑀢𑀸𑀢𑀺 𑀜𑀸𑀬𑀧𑁆𑀧𑀢𑁆𑀢𑁄𑀬𑁂𑀯𑀸 𑀫𑀢𑁆𑀣𑁄 ¶ 𑀇𑀫𑀸𑀬 𑀧𑀭𑀺𑀪𑀸𑀲𑀸𑀬𑀸𑀦𑀼𑀯𑀸𑀤𑁆𑀬𑀢𑁂, 𑀢𑀣𑀸𑀳𑀺 𑀲𑀦𑁆𑀤𑁂𑀳𑀞𑀸𑀦𑁂𑀲𑀼 𑀬𑀤𑁆𑀬𑀧𑁆𑀬𑁂𑀓𑀭𑀽𑀧𑀫𑁂𑀯𑀫𑀪𑀺𑀦𑁆𑀦𑀫𑀼𑀪𑀺𑀦𑁆𑀦𑀁, 𑀢𑀣𑀸𑀧𑀺 𑀮𑀓𑁆𑀔𑀡𑀯𑀼𑀢𑁆𑀢𑀁 𑀭𑀽𑀧𑀁 𑀮𑀓𑁆𑀔𑀡𑁂 𑀦𑁄𑀦𑁆𑀦𑀻𑀬𑀫𑀸𑀦𑀁 𑀥𑀽𑀫𑀕𑁆𑀕𑀺 𑀯𑀺𑀬 𑀚𑀮𑀩𑀮𑀸𑀓𑀸 𑀯𑀺𑀬 𑀘𑀸𑀦𑀼 𑀫𑀸𑀦𑀺𑀓𑀁, 𑀬𑀦𑁆𑀢𑀼 𑀧𑀝𑀺𑀧𑀤 𑀯𑀼𑀢𑁆𑀢𑀁 𑀭𑀽𑀧𑀁, 𑀢𑀁 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑀁, 𑀧𑀘𑁆𑀘𑀓𑁆𑀔𑀸𑀦𑀼𑀫𑀸𑀦𑁂𑀲𑀼 𑀘 𑀧𑀘𑁆𑀘𑀓𑁆𑀔𑀫𑁆𑀩𑀮𑀯𑀦𑁆𑀢𑀭𑀁 𑀧𑀫𑀸𑀡𑀦𑁆𑀢𑀺 𑀅𑀢𑁄 𑀧𑀝𑀺𑀧𑀤𑀯𑀼𑀢𑁆𑀢𑀫𑁂𑀯 𑀕𑀬𑁆𑀳𑀢𑀻𑀢𑀺.

𑀦𑀧𑀼𑀁𑀲𑀓𑀮𑀺𑀗𑁆𑀕𑁂 𑀏𑀓𑀸𑀭𑁂𑀦 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀓𑀸𑀭𑀲𑁆𑀲𑀦𑁆𑀢𑀭𑀗𑁆𑀕𑀢𑁆𑀢𑁂 𑀓𑀸𑀭𑀡𑀫𑀸𑀳-‘𑀧𑀓𑀢𑀺𑀦𑀺𑀲𑁆𑀲𑀺𑀢𑀢𑁆𑀢𑀸’𑀢𑀺, 𑀧𑀓𑀢𑀺𑀬𑀸 𑀇𑀤𑀁 𑀧𑀸𑀓𑀢𑀁 ‘‘𑀡𑁄’’𑀢𑀺 (𑁪-𑁩𑁪) 𑀡𑁄, 𑀮𑁄𑀧𑀲𑁆𑀲 𑀩𑀳𑀺𑀭𑀗𑁆𑀕𑀢𑁆𑀢𑁂 𑀓𑀸𑀭𑀡𑀫𑀸𑀳-‘𑀧𑀘𑁆𑀘𑀬𑀦𑀺𑀲𑁆𑀲𑀺𑀢𑀢𑁆𑀢𑀸’𑀢𑀺, 𑀅𑀦𑁆𑀢𑀭𑀗𑁆𑀕𑁂𑀘𑁆𑀘𑀸𑀤𑀺𑀦𑀸 ‘‘𑀅𑀦𑁆𑀢𑀭𑀗𑁆𑀕𑀩𑀳𑀺𑀭𑀗𑁆𑀕𑁂𑀲𑁆𑀯𑀦𑁆𑀢𑀭𑀗𑁆𑀕𑀯𑀺𑀥𑀺 𑀩𑀮𑀯𑀸’’𑀢𑀺 𑀧𑀭𑀺𑀪𑀸𑀲𑀫𑀼𑀧𑀮𑀓𑁆𑀔𑁂𑀢𑀺, 𑀅𑀗𑁆𑀕𑀲𑀤𑁆𑀤𑁄-𑀯𑀬𑀯𑀯𑀸𑀘𑀻, 𑀅𑀦𑁆𑀢𑁂 𑀲𑀤𑁆𑀤𑁄 𑀲𑀢𑁆𑀢𑀫𑁆𑀬𑀢𑁆𑀣𑁂, 𑀅𑀗𑁆𑀕𑁂 𑀪𑀯𑀫𑀦𑁆𑀢𑀭𑀗𑁆𑀕𑀁 𑀯𑀺𑀪𑀢𑁆𑀣𑁆𑀬𑀢𑁆𑀣𑁂-𑀲𑀗𑁆𑀔𑁆𑀬𑀲𑀫𑀸𑀲𑁄 ‘‘𑀏𑀑𑀦𑀫 𑀯𑀡𑁆𑀡𑁂’’𑀢𑀺 (𑁧-𑁩𑁭) 𑀅𑀢𑁆𑀢𑀁 𑀭𑀸𑀕𑀫𑁄, 𑀅𑀗𑁆𑀕𑀢𑁄 𑀩𑀳𑀺 𑀩𑀳𑀺𑀭𑀗𑁆𑀕𑀁 ‘‘𑀧𑀬𑁆𑀬𑀧𑀸𑀩𑀳𑀺𑀢𑀺𑀭𑁄 𑀧𑀼𑀭𑁂𑀧𑀘𑁆𑀙𑀸 𑀯𑀸 𑀧𑀜𑁆𑀘𑀫𑁆𑀬𑀸’’𑀢𑀺 (𑁩-𑁫) 𑀅𑀲𑀗𑁆𑀔𑁆𑀬𑀲𑀫𑀸𑀲𑁄, 𑀅𑀢𑁆𑀭 𑀘𑀸𑀦𑁆𑀢𑀭𑀗𑁆𑀕𑀁 𑀩𑀳𑀺𑀭𑀗𑁆𑀕𑀦𑁆𑀢𑀺 𑀦𑀸𑀗𑁆𑀕𑁂𑀪𑀯𑀫𑀦𑁆𑀢𑀭𑀗𑁆𑀕𑀁, 𑀅𑀧𑀺𑀢𑁆𑀯𑀦𑁆𑀢𑀭𑀗𑁆𑀕𑀦𑀺𑀲𑁆𑀲𑀺𑀢𑀁 𑀓𑀸𑀭𑀺𑀬𑀫𑀦𑁆𑀢𑀭𑀗𑁆𑀕𑀁, 𑀦𑀸𑀧𑁆𑀬𑀗𑁆𑀕𑀢𑁄 𑀩𑀳𑀺𑀪𑀽𑀢𑁄 𑀲𑀫𑀼𑀤𑀸𑀬𑁄 𑀩𑀳𑀺𑀭𑀗𑁆𑀕𑀁, 𑀓𑀺𑀦𑁆𑀢𑀼 𑀩𑀳𑀺𑀭𑀗𑁆𑀕𑀦𑀺𑀲𑁆𑀲𑀺𑀢𑀁 𑀓𑀸𑀭𑀺𑀬𑀫𑁆𑀩𑀳𑀺𑀭𑀗𑁆𑀕𑀁 𑀬𑀣𑀸 𑀫𑀜𑁆𑀘𑀦𑀺𑀲𑁆𑀲𑀺𑀢𑁂𑀲𑀼 𑀲𑀤𑁆𑀤𑀸𑀬𑀦𑁆𑀢𑁂𑀲𑀼 ‘𑀫𑀜𑁆𑀘𑀸 𑀲𑀤𑁆𑀤𑀸𑀬𑀦𑁆𑀢𑀻’𑀢𑁆𑀬𑀼𑀘𑁆𑀘𑀢𑁂 𑀢𑀁 𑀯𑀺𑀬𑁂𑀢𑀺 𑀅𑀢𑁄𑀬𑁂𑀯𑀸 𑀲𑀗𑁆𑀔𑁆𑀬𑀲𑀫𑀸𑀲𑁂𑀧𑀺 𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀯𑀘𑀦𑀦𑁆𑀢𑀭𑀬𑁄𑀕𑁄 ‘𑀅𑀦𑁆𑀢𑀭𑀗𑁆𑀕𑁄 𑀅𑀦𑁆𑀢𑀭𑀗𑁆𑀕𑀸’𑀢𑀺, 𑀲𑀗𑁆𑀓𑁂𑀢𑀺𑀓𑁄 𑀳𑁆𑀬𑀬𑀫𑀲𑀗𑁆𑀔𑁆𑀬𑀲𑀫𑀸𑀲𑁄, 𑀦 𑀧𑀼𑀩𑁆𑀩𑀧𑀤𑀢𑁆𑀣𑀧𑁆𑀧𑀥𑀸𑀦𑁄, 𑀬𑀣𑀸-𑀧𑀘𑁆𑀘𑀓𑁆𑀔𑀲𑁆𑀲𑀸𑀓𑁆𑀔𑀦𑀺𑀲𑁆𑀲𑀺𑀢𑀢𑁆𑀢𑀸𑀯𑀩𑁄𑀥𑀢𑁆𑀣𑀁 ‘𑀅𑀓𑁆𑀔𑀫𑀓𑁆𑀔𑀫𑁆𑀧𑀢𑀺 𑀯𑀢𑁆𑀢𑀢𑁂’𑀢𑀺 𑀯𑀺𑀘𑁆𑀙𑀸𑀬-𑀫𑀲𑀗𑁆𑀔𑁆𑀬𑀲𑀫𑀸𑀲𑁂𑀧𑀺 𑀓𑀢𑁂 𑀧𑀘𑁆𑀘𑀓𑁆𑀔 𑀜𑀸𑀡𑀲𑁆𑀲𑀸𑀓𑁆𑀔𑀦𑀺𑀲𑁆𑀲𑀺𑀢𑀢𑁆𑀢𑀜𑀸𑀧𑀦𑀢𑁆𑀣𑀁 𑀲𑀗𑁆𑀓𑁂𑀢𑀯𑀲𑁂𑀦 𑀓𑀢𑁄-𑀬𑀫𑀲𑀗𑁆𑀔𑁆𑀬 𑀲𑀫𑀸𑀲𑁄, 𑀦 𑀧𑀼𑀩𑁆𑀩𑀧𑀤𑀢𑁆𑀣𑀧𑁆𑀧𑀥𑀸𑀦𑁄𑀢𑀺‘𑀧𑀘𑁆𑀘𑀓𑁆𑀔𑁄 𑀧𑀘𑁆𑀘𑀓𑁆𑀔𑀸’𑀢𑀺 𑀮𑀺𑀗𑁆𑀕𑀯𑀺𑀪𑀢𑁆𑀢𑀺 𑀯𑀘𑀦𑀦𑁆𑀢𑀭𑀬𑁄𑀕𑁄, 𑀢𑀣𑁂𑀯𑀸𑀬-𑀫𑀦𑁆𑀢𑀭𑀗𑁆𑀕𑀦𑀺𑀲𑁆𑀲𑀺𑀢𑁄-𑀬𑀁 𑀲𑀫𑀼𑀤𑀸𑀬𑀦𑀺𑀲𑁆𑀲𑀺𑀢𑁄𑀢𑀺 𑀜𑀸𑀧𑀦𑀢𑁆𑀣𑀁 𑀲𑀗𑁆𑀓𑁂𑀢𑀯𑀲𑁂𑀦 𑀓𑀢𑁄-𑀬𑀫𑀲𑀗𑁆𑀔𑁆𑀬𑀲𑀫𑀸𑀲𑁄𑀢𑀺 𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀯𑀘𑀦𑀦𑁆𑀢𑀭𑀬𑁄𑀕𑁄 𑀦 𑀯𑀺𑀭𑀼𑀚𑁆𑀛𑀢𑁂, 𑀅𑀣𑀯𑀸 𑀅𑀦𑁆𑀢𑀭𑀫𑀗𑁆𑀕𑀫𑀲𑁆𑀲 𑀓𑀸𑀭𑀺𑀬𑀲𑁆𑀲𑀸𑀢𑁆𑀣𑀻𑀢𑀺 ‘‘𑀲𑀤𑁆𑀥𑀸𑀤𑀺𑀢𑁆𑀯’’ (𑁪-𑁮𑁪) 𑀢𑀣𑀸 𑀩𑀳𑀺𑀭𑀗𑁆𑀕𑀦𑁆𑀢𑀺, 𑀅𑀦𑁆𑀢𑀭𑀗𑁆𑀕𑀜𑁆𑀘 𑀩𑀳𑀺𑀭𑀗𑁆𑀕𑀜𑁆𑀘 ¶ 𑀅𑀦𑁆𑀢𑀭𑀗𑁆𑀕𑀩𑀳𑀺𑀭𑀗𑁆𑀕𑀸𑀦𑀺, 𑀢𑁂𑀲𑁆𑀯𑀦𑁆𑀢𑀭𑀗𑁆𑀕𑁄 𑀩𑀮𑀯𑀸𑀢𑀺. 𑀅𑀦𑁆𑀢𑀭𑀗𑁆𑀕 𑀓𑀸𑀭𑀺𑀬𑀲𑁆𑀲 𑀩𑀮𑀯𑀢𑁆𑀢𑀁 𑀲𑀸𑀥𑁂𑀢𑀼𑀁 ‘𑀲𑀩𑁆𑀩𑀧𑀞𑀫𑀁 𑀯𑀺𑀥𑁂𑀬𑁆𑀬𑀢𑁆𑀢𑀸’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀇𑀤𑀫𑁆𑀧𑀦 𑀅𑀦𑁆𑀢𑀭𑀗𑁆𑀕𑀓𑀸𑀭𑀺𑀬𑀲𑁆𑀲 𑀩𑀮𑀯𑀪𑀸𑀯𑀲𑀸𑀥𑀦𑁂 𑀓𑀸𑀭𑀡𑀁 𑀦 𑀳𑁄𑀢𑀺, 𑀅𑀦𑁆𑀢𑀭𑀗𑁆𑀕𑀢𑁆𑀢𑀸 𑀩𑀮𑀯𑀪𑀸𑀯𑁄𑀬𑁂𑀯 𑀳𑀺 𑀲𑀩𑁆𑀩𑀧𑀞𑀫𑀁 𑀯𑀺𑀥𑁂𑀬𑁆𑀬𑀢𑁆𑀢 𑀓𑀸𑀭𑀡𑀁, 𑀢𑀣𑀸 𑀘𑀸𑀳-‘𑀬𑁄 𑀮𑁄𑀧𑀢𑁄 𑀅𑀓𑀸𑀭𑀲𑁆𑀲 𑀧𑀞𑀫𑀫𑁂𑀯 𑀪𑀯𑀦𑁂 𑀓𑀸𑀭𑀡𑀫𑀸𑀳 𑀅𑀦𑁆𑀢𑀭𑀗𑁆𑀕𑀢𑁆𑀢𑀸 𑀅𑀓𑀸𑀭𑀲𑁆𑀲𑀸’𑀢𑀺, 𑀢𑀲𑁆𑀫𑀸 𑀦𑀸𑀬𑀁 𑀧𑀸𑀞𑁄 𑀖𑀝𑀢𑁂, 𑀅𑀦𑁆𑀢𑀭𑀗𑁆𑀕𑀩𑀮𑀯𑀪𑀸𑀯𑀲𑀸𑀥𑀦𑀲𑁆𑀲 𑀧𑀦 𑀮𑁄𑀓𑀢𑁄 𑀇𑀘𑁆𑀙𑀺𑀢𑀢𑁆𑀢𑀸 𑀅𑀬𑀫𑁂𑀯𑀢𑁆𑀣𑁂 𑀧𑀸𑀞𑁄 𑀖𑀝𑀢𑁂’’𑀅𑀦𑁆𑀢𑀭𑀗𑁆𑀕𑀫𑁂𑀯 𑀓𑀸𑀭𑀺𑀬𑀫𑁆𑀩𑀮𑀯𑀁 𑀮𑁄𑀓𑁂 𑀢𑀣𑀸𑀤𑀺𑀝𑁆𑀞𑀢𑁆𑀢𑀸, 𑀢𑀣𑀸 𑀳𑀺 𑀮𑁄𑀓𑁄 𑀧𑀸𑀢𑁄𑀯𑀸’’𑀢𑁆𑀬𑀸𑀤𑀺, 𑀮𑁄𑀓𑁂 𑀢𑀣𑀸𑀤𑀺𑀝𑁆𑀞𑀢𑁆𑀢𑀸𑀢𑀺 𑀅𑀦𑁆𑀢𑀭𑀗𑁆𑀕𑀩𑀮𑀯𑀪𑀸𑀯𑀲𑁆𑀲 𑀮𑁄𑀓𑁂 𑀏𑀯𑀁 𑀯𑀓𑁆𑀔𑀫𑀸𑀦𑀦𑀬𑁂𑀦 𑀤𑀺𑀝𑁆𑀞𑀢𑁆𑀢𑀸, 𑀅𑀣𑀯𑀸 𑀓𑁂𑀦𑀘𑀺 𑀯𑀺𑀥𑀼𑀭𑀧𑁆𑀧𑀘𑁆𑀘𑀬𑁄𑀧𑀦𑀺𑀧𑀸𑀢𑁂𑀦 𑀓𑀸𑀭𑀡𑀯𑁂 𑀓𑀮𑁆𑀮𑁂𑀦 𑀯𑀸 𑀓𑀤𑀸𑀘𑀺 𑀓𑀢𑁆𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑁂𑀧𑀺 𑀅𑀦𑁆𑀢𑀭𑀗𑁆𑀕𑀲𑁆𑀲 𑀅𑀯𑀲𑁆𑀲𑀁 𑀯𑀺𑀥𑁂𑀬𑁆𑀬𑀢𑁆𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 𑀲𑀩𑁆𑀩𑀧𑀞𑀫𑀁 𑀯𑀺𑀥𑁂𑀬𑁆𑀬𑀢𑁆𑀢𑀸’𑀢𑀺, 𑀲𑀢𑀺𑀲𑀫𑁆𑀪𑀯𑁂𑀢𑀺 𑀦𑀺𑀫𑀺𑀢𑁆𑀢𑀲𑁆𑀲𑀸𑀦𑀼𑀧𑀳𑀢𑀢𑁆𑀢𑀸 𑀓𑀸𑀭𑀺𑀬𑀲𑁆𑀲 𑀲𑀫𑁆𑀪𑀯𑁂 𑀲𑀢𑀺.

𑀇𑀯𑀡𑁆𑀡𑀲𑁆𑀲𑀸𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺 ‘𑀬𑁂 𑀧𑀲𑁆𑀲𑀺𑀯𑀡𑁆𑀡𑀲𑁆𑀲𑀸’’𑀢𑀺 𑀏𑀢𑁆𑀣 𑀇𑀯𑀡𑁆𑀡𑀲𑁆𑀲𑀸𑀢𑀺 𑀯𑀼𑀢𑁆𑀢𑀢𑁆𑀢𑀸.

𑀮𑀺𑀗𑁆𑀕𑀯𑀘𑀦𑀪𑁂𑀤𑁂𑀧𑀺 𑀩𑁆𑀬𑀬𑀭𑀳𑀺𑀢𑀢𑁆𑀢𑀸 𑀅𑀩𑁆𑀬𑀬𑀯𑀦𑁆𑀢𑀉𑀧𑀲𑀗𑁆𑀕𑀦𑀺𑀧𑀸𑀢𑀸𑀦𑀁 𑀧𑀼𑀩𑁆𑀩𑀸𑀘𑀭𑀺𑀬𑀲𑀜𑁆𑀜𑀸, 𑀅𑀲𑀢𑀻 𑀲𑀗𑁆𑀔𑁆𑀬𑀸 𑀬𑁂𑀲𑀦𑁆𑀢𑁆𑀬𑀸𑀦𑁆𑀬𑀲𑀗𑁆𑀔𑁆𑀬𑀸𑀦𑀻𑀢𑁆𑀬𑀸𑀳- ‘𑀏𑀓𑀢𑁆𑀢𑁂’𑀘𑁆𑀘𑀸𑀤𑀺, 𑀏𑀓𑀸𑀦𑁂𑀓𑁂𑀲𑀽𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀗𑁆𑀔𑁆𑀬𑀸𑀯𑀺𑀲𑁂𑀲𑁂 𑀯𑀺𑀥𑀻𑀬𑀫𑀸𑀦𑀸𑀲𑁆𑀬𑀸𑀤𑀬𑁄 𑀓𑀣𑀫𑀲𑀗𑁆𑀔𑁆𑀬𑁂𑀳𑀺 𑀉𑀧𑁆𑀧𑀚𑁆𑀚𑀺𑀢𑀼𑀫𑀼𑀲𑁆𑀲𑀳𑀦𑁆𑀢𑁂 𑀇𑀘𑁆𑀘𑀸𑀲𑀬𑁂𑀦𑀸𑀳- ‘𑀓𑀣𑀫𑀲𑀗𑁆𑀔𑁆𑀬𑁂𑀳𑀺 𑀲𑁆𑀬𑀸𑀤𑀻𑀦𑀁 𑀲𑀫𑁆𑀪𑀯𑁄’𑀢𑀺. 𑀅𑀣 𑀦𑀺𑀲𑁆𑀲𑀗𑁆𑀔𑁆𑀬𑁂𑀳𑀺 𑀳𑁄𑀢𑀼𑀲𑁆𑀬𑀸𑀤𑀻𑀦𑀫𑀲𑀫𑁆𑀪𑀯𑁄 𑀉𑀘𑁆𑀘𑀁 𑀭𑀼𑀓𑁆𑀔𑀲𑁆𑀲𑀺𑀘𑁆𑀘𑀸𑀤𑁄𑀢𑀼 𑀲𑀗𑁆𑀔𑁆𑀬𑀸𑀲𑀫𑁆𑀪𑀯𑁂 𑀪𑀯𑀺𑀢𑀩𑁆𑀩𑀫𑁂𑀯 𑀲𑁆𑀬𑀸𑀤𑀻𑀳𑀺𑀘𑁆𑀘𑀸𑀳-‘𑀲𑀗𑁆𑀔𑁆𑀬𑀸𑀲𑀫𑁆𑀪𑀯𑁂𑀯𑁂’𑀘𑁆𑀘𑀸𑀤𑀺. 𑀯𑀼𑀢𑁆𑀢𑀺𑀕𑀦𑁆𑀣𑀲𑁆𑀲𑀸𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀢𑀺 ‘𑀅𑀜𑁆𑀜𑀣𑁂’ 𑀢𑁆𑀬𑀸𑀤𑀺𑀦𑀸, 𑀓𑀺𑀫𑁂𑀲𑀫𑀼𑀧𑁆𑀧𑀢𑁆𑀢𑀺𑀬𑀫𑁆𑀧𑀬𑁄𑀚𑀦𑀁 𑀬𑁂𑀦𑀸𑀲𑀗𑁆𑀔𑁆𑀬𑁂𑀳𑀺 𑀢𑀤𑀼𑀧𑁆𑀧𑀢𑁆𑀢𑀺 𑀦𑁄-𑀦𑀼𑀫𑀻𑀬𑀢𑁂 𑀘𑁆𑀘𑀸𑀲𑀗𑁆𑀓𑀺𑀬𑀸𑀳-‘𑀢𑀲𑁆𑀲𑀜𑁆𑀘 𑀲𑀢𑀺𑀬’𑀦𑁆𑀢𑁆𑀬𑀸𑀤𑀺, 𑀅𑀲𑀢𑀺 𑀳𑀺 𑀲𑁆𑀬𑀸𑀤𑀻𑀦𑀫𑀼𑀧𑁆𑀧𑀢𑁆𑀢𑀺𑀬𑀫𑀼𑀘𑁆𑀘𑀫𑀸𑀤𑀻𑀦𑀫𑀲𑀗𑁆𑀔𑁆𑀬𑀸𑀦𑀫𑁆𑀧𑀤𑀢𑁆𑀢𑀁 𑀦𑀢𑁆𑀣𑀻𑀢𑀺 𑀬𑁄 𑀆𑀤𑀻𑀲𑀼 𑀧𑀤𑀲𑁆𑀫𑀸 𑀧𑀭𑁂𑀲𑀁 𑀢𑀼𑀫𑁆𑀳𑀸𑀫𑁆𑀳𑀲𑀤𑁆𑀤𑀸𑀦𑀁 𑀲𑀯𑀺𑀪𑀢𑁆𑀢𑀻𑀦𑀁 𑀯𑁄𑀦𑁄𑀆𑀤𑀺𑀓𑀁 𑀧𑀤𑀦𑀺𑀫𑀺𑀢𑁆𑀢𑀁 ¶ 𑀓𑀸𑀭𑀺𑀬𑀁 𑀦 𑀲𑀺𑀬𑀸𑀢𑀺 ‘𑀉𑀘𑁆𑀘𑀁 𑀯𑁄, 𑀉𑀘𑁆𑀘𑀁 𑀦𑁄’𑀢𑀺𑀆𑀤𑀬𑁄 𑀧𑀬𑁄𑀕𑀸 𑀦 𑀲𑀺𑀚𑁆𑀛𑀦𑁆𑀢𑀺, 𑀲𑀢𑀺 𑀢𑀼 𑀲𑁆𑀬𑀸𑀤𑀼𑀧𑁆𑀧𑀢𑁆𑀢𑀺𑀬𑀁 𑀮𑀼𑀢𑁆𑀢𑁂𑀲𑀼𑀧𑀺 𑀢𑁂𑀲𑀼 𑀧𑀤𑀢𑁆𑀢𑀦𑀺𑀧𑁆𑀨𑀢𑁆𑀢𑀺𑀬𑀸𑀬𑁂𑀯 𑀢𑀤𑀼𑀧𑁆𑀧𑀢𑁆𑀢𑀺𑀢𑁄 𑀧𑀤𑀢𑁆𑀢𑁂 𑀲𑀺𑀤𑁆𑀥𑁂 𑀧𑀤𑀮𑀓𑁆𑀔𑀡𑀁 𑀓𑀸𑀭𑀺𑀬𑀁 𑀲𑀺𑀚𑁆𑀛𑀢𑁂𑀯𑀸𑀢𑀺 𑀪𑀸𑀯𑁄. 𑀧𑀭𑁂𑀳𑀺 𑀏𑀢𑁆𑀣 ‘𑀢𑀲𑁆𑀲𑀁 𑀲𑀸𑀮𑀸𑀬’𑀦𑁆𑀢𑀺 𑀯𑀘𑀦𑀺𑀘𑁆𑀙𑀸𑀬𑀁 ‘𑀢𑀢𑁆𑀭 𑀲𑀸𑀮𑀸𑀬’𑀦𑁆𑀢𑀺 𑀬𑀣𑀸 𑀲𑀺𑀬𑀸𑀢𑀺 ‘‘𑀅𑀩𑁆𑀬𑀬𑀢𑁆𑀯𑀸 𑀲𑁆𑀬𑀸𑀤𑀺𑀦𑁄’’𑀢𑀺 (𑀧𑀸, 𑁨-𑁪-𑁮𑁨) 𑀅𑀩𑁆𑀬𑀬𑀢𑁄 𑀧𑀭𑀲𑁆𑀲𑀺𑀢𑁆𑀣𑀺𑀬𑀫𑀸𑀧𑁆𑀧𑀘𑁆𑀘𑀬𑀲𑁆𑀲𑀸𑀧𑀺 𑀮𑁄𑀧𑁄 𑀯𑀺𑀳𑀺𑀢𑁄, 𑀢𑁂𑀦𑀸𑀳- ‘𑀅𑀲𑀗𑁆𑀔𑁆𑀬𑁂𑀳𑀺’𑀘𑁆𑀘𑀸𑀤𑀺, 𑀢𑀤𑀬𑀼𑀢𑁆𑀢𑀦𑁆𑀢𑀺 𑀆𑀧𑁆𑀧𑀘𑁆𑀘𑀬𑀲𑁆𑀲 𑀮𑁄𑀧𑀯𑀺𑀥𑀸𑀦 𑀫𑀬𑀼𑀢𑁆𑀢𑀁𑀢𑁆𑀬𑀢𑁆𑀣𑁄. 𑀅𑀣 𑀓𑁂𑀦𑀸𑀢𑁆𑀭 𑀆𑀧𑁆𑀧𑀘𑁆𑀘𑀬𑁄 𑀯𑀺𑀥𑀻𑀬𑀢𑁂 𑀬𑁂𑀦𑀸𑀲𑁆𑀲𑀸𑀧𑀺 𑀮𑁄𑀧𑁄-𑀦𑀼𑀲𑀸𑀲𑀻𑀬𑀢𑁂 ‘‘𑀇𑀢𑁆𑀣𑀺𑀬𑀫𑀢𑁆𑀯𑀸’’𑀢𑀺 (𑁩-𑁨𑁬) 𑀘𑁂 𑀦𑁂𑀢𑀤𑀢𑁆𑀣𑀺, 𑀇𑀢𑁆𑀣𑀺𑀬𑀫𑀸𑀧𑁆𑀧𑀘𑁆𑀘𑀬𑀲𑁆𑀲 𑀯𑀺𑀥𑀸𑀦𑀢𑁄-𑀲𑀗𑁆𑀔𑁆𑀬𑀸𑀦𑀜𑁆𑀘𑀸𑀮𑀺𑀗𑁆𑀕𑀢𑁆𑀢𑀸, 𑀢𑀲𑁆𑀫𑀸 𑀅𑀲𑀗𑁆𑀔𑁆𑀬𑁂𑀳𑀺 𑀆𑀧𑁆𑀧𑀘𑁆𑀘𑀬𑀲𑁆𑀲 𑀲𑀫𑁆𑀪𑀯𑁄𑀬𑁂𑀯 𑀦𑀢𑁆𑀣𑀻𑀢𑁆𑀬𑀦𑀢𑁆𑀣𑀓𑀫𑀸𑀧𑁆𑀧𑀘𑁆𑀘𑀬𑀲𑁆𑀲 𑀮𑁄𑀧𑀯𑀘𑀦𑀦𑁆𑀢𑀺 𑀦𑀸𑀦𑀢𑁆𑀣𑀓𑀁 𑀇𑀢𑁆𑀣𑀺𑀬𑀦𑁆𑀢𑀺 (𑁩-𑁨𑁬) 𑀳𑀺 𑀕𑀼𑀡𑀺𑀧𑁆𑀧𑀥𑀸𑀦𑁄 𑀦𑀺𑀤𑁆𑀤𑁂𑀲𑁄 𑀇𑀢𑁆𑀣𑀢𑁆𑀢𑀯𑀢𑀺 𑀆𑀧𑁆𑀧𑀘𑁆𑀘𑀬𑀸𑀤𑀬𑁄 𑀯𑀺𑀥𑀻𑀬𑀦𑁆𑀢𑁂 ‘𑀢𑀲𑁆𑀲𑀁 𑀲𑀸𑀮𑀸𑀬 (𑀫𑀺𑀘𑁆𑀘𑁂 𑀢𑀲𑁆𑀫𑀺𑀁 𑀧𑀤𑀢𑁆𑀣𑁂) 𑀢𑀢𑁆𑀭𑁂’𑀢𑀺 𑀅𑀲𑀗𑁆𑀔𑁆𑀬𑀫𑀺𑀤𑀫𑀺𑀢𑁆𑀣𑀢𑁆𑀢𑀯𑀢𑀺 𑀯𑀢𑁆𑀢𑀢𑁂, 𑀢𑀲𑁆𑀫𑀸 𑀲𑀺𑀬𑀸𑀬𑁂 𑀯𑁂𑀢𑀲𑁆𑀫𑀸 𑀆𑀧𑁆𑀧𑀘𑁆𑀘𑀬𑁄𑀢𑁆𑀬𑀯𑀲𑁆𑀲𑀫𑀸𑀧𑁆𑀧𑀘𑁆𑀘𑀬𑀲𑁆𑀲 𑀮𑁄𑀧𑁄 𑀯𑀺𑀥𑁂𑀬𑁆𑀬𑁄𑀢𑀺 𑀬𑁄 𑀫𑀜𑁆𑀜𑀢𑁂, 𑀢𑀫𑁆𑀧𑀢𑀺 𑀆𑀳-‘𑀬𑀤𑀻𑀧𑀺’𑀘𑁆𑀘𑀸𑀤𑀺, 𑀯𑀺𑀲𑁂𑀲𑀸𑀪𑀺𑀥𑀸𑀦𑀸𑀢𑁆𑀬𑀼𑀧𑀕𑀫𑁂 𑀯𑀢𑁆𑀢 𑀫𑀸𑀦𑁄𑀬𑀫𑀲𑀗𑁆𑀔𑁆𑀬𑀲𑀫𑀼𑀤𑀸𑀬𑁄‘𑀦𑀺𑀤𑁆𑀤𑁂𑀲𑁄 𑀯𑀢𑁆𑀢𑀢𑁂’𑀢𑀺 𑀘𑁄𑀪𑀬𑀫𑀺𑀓𑁆𑀔𑀢𑁂, 𑀇𑀢𑁆𑀣𑀺𑀬𑀦𑁆𑀢𑀺 𑀦𑀺𑀤𑁆𑀤𑁂𑀲𑀲𑁆𑀲 𑀕𑀼𑀡𑀺𑀧𑁆𑀧𑀥𑀸𑀦𑀢𑁆𑀢𑀁 𑀲𑀸𑀥𑁂𑀢𑀼𑀁 ‘𑀇𑀢𑁆𑀣𑀢𑁆𑀢𑀯𑀢𑀺 𑀳𑀺 𑀆𑀧𑁆𑀧𑀘𑁆𑀘𑀬𑀸𑀤𑀬𑁄’𑀢𑀺𑀆𑀳, 𑀢𑀢𑁆𑀭𑁂𑀢𑀻𑀫𑀲𑁆𑀲𑀸𑀲𑀗𑁆𑀔𑁆𑀬𑀲𑁆𑀲 𑀲𑀸𑀮𑀸𑀬𑀁 𑀯𑀢𑁆𑀢𑀦𑀢𑁄 𑀆𑀳- ‘𑀇𑀢𑁆𑀣𑀢𑁆𑀢𑀯𑀢𑀺 𑀘𑀸’𑀢𑀺, 𑀅𑀬𑀫𑁆𑀧𑀲𑀺𑀤𑁆𑀥𑀺𑀭𑀽𑀧𑁂𑀦 𑀦 𑀯𑀢𑁆𑀢𑀢𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀬𑀤𑀺 𑀅𑀬𑀫𑁆𑀧𑀲𑀺𑀤𑁆𑀥𑀺𑀭𑀽𑀧𑁂𑀦 𑀯𑀢𑁆𑀢𑀢𑁂, 𑀓𑀼𑀢𑁄 𑀘𑀭𑀳𑀺 𑀇𑀢𑁆𑀣𑀢𑁆𑀢𑀸𑀯𑀲𑀸𑀬𑁄𑀢𑁆𑀬𑀸𑀳- ‘𑀇𑀢𑁆𑀣𑀢𑁆𑀢𑀸𑀯𑀲𑀸𑀬𑁄’𑀘𑁆𑀘𑀸𑀤𑀺. 𑀇𑀤𑀸𑀦𑀺 𑀚𑀺𑀦𑀺𑀦𑁆𑀤𑀩𑀼𑀤𑁆𑀥𑀺𑀯𑀘𑀦𑀫𑀸𑀦𑀻𑀬 𑀢𑀲𑁆𑀲𑀸 𑀬𑀼𑀢𑁆𑀢𑀢𑁆𑀢𑀫𑀼𑀩𑁆𑀪𑀸𑀯𑀬𑀺𑀢𑀼𑀫𑀸𑀳- ‘𑀬𑁄𑀧𑁆𑀬𑀸𑀳𑀺’𑀘𑁆𑀘𑀸𑀤𑀺, 𑀬𑀤𑀻𑀧𑀺𑀘𑁆𑀘𑀸𑀤𑀺 𑀚𑀺𑀦𑀺𑀦𑁆𑀤𑀩𑀼𑀤𑁆𑀥𑀺𑀯𑀘𑀦𑀁, 𑀢𑀲𑁆𑀲𑀸𑀢𑀺 𑀇𑀢𑁆𑀣𑀢𑁆𑀢𑀲𑁆𑀲, 𑀧𑀤𑀢𑁆𑀣𑁄 𑀘 𑀇𑀢𑁆𑀣𑀢𑁆𑀢𑀁 𑀲𑀺𑀬𑀸𑀢𑀺 𑀬𑁄𑀧𑁆𑀬𑀸𑀳𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀕𑀫𑁆𑀫𑀫𑀸𑀦𑀢𑁆𑀣𑀢𑁆𑀢𑀸 𑀇𑀢𑀺𑀲𑀤𑁆𑀤𑀸𑀧𑁆𑀧𑀬𑁄𑀕𑁄, 𑀢𑀲𑁆𑀲𑀸𑀬𑀼𑀢𑁆𑀢𑀦𑁆𑀢𑀺 𑀢𑀲𑁆𑀲𑁂𑀯𑀁 𑀯𑀸𑀤𑀺𑀦𑁄 𑀚𑀺𑀦𑀺𑀦𑁆𑀤𑀩𑀼𑀤𑁆𑀥𑀺𑀦𑁄 𑀯𑀘𑀦𑀫𑀬𑀼𑀢𑁆𑀢𑀁𑀢𑁆𑀬𑀢𑁆𑀣𑁄, 𑀓𑀼𑀢𑁄𑀘𑁆𑀘𑀸𑀳- ‘𑀏𑀯𑀁 𑀳𑀺’𑀘𑁆𑀘𑀸𑀤𑀺, 𑀬𑀤𑀺 𑀇𑀢𑁆𑀣𑀢𑁆𑀢𑀲𑁆𑀲 𑀯𑀸𑀓𑁆𑀬𑀢𑁆𑀣𑀢𑀸 𑀇𑀢𑁆𑀣𑀺𑀧𑁆𑀧𑀘𑁆𑀘𑀬𑀦𑀺𑀯𑀢𑁆𑀢𑀺𑀓𑀢𑀸, 𑀏𑀯𑀁 𑀲𑀢𑀺 𑀲𑀸𑀮𑀸𑀬𑀫𑀺𑀘𑁆𑀘𑀸𑀤𑀺𑀲𑀤𑁆𑀤𑀦𑁆𑀢𑀭𑀸𑀧𑁂𑀓𑁆𑀔𑀸 𑀇𑀢𑁆𑀣𑀢𑁆𑀢𑀧𑁆𑀧𑀢𑀻𑀢𑀺 𑀢𑀢𑁆𑀭𑁂𑀢𑁆𑀬𑀸𑀤𑀻𑀲𑀼 𑀲𑀺𑀬𑀸𑀢𑀺 𑀅𑀢𑁆𑀣𑁄, 𑀦𑁂𑀯 𑀢𑀣𑀸 𑀧𑀢𑀻𑀬𑀢𑀻𑀢𑀺 𑀪𑀸𑀯𑁄, 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀨𑀼𑀝𑀬𑀺𑀢𑀼𑀫𑀸𑀳- ‘𑀢𑀣𑀸𑀳𑀺’𑀘𑁆𑀘𑀸𑀤𑀺, 𑀅𑀯𑀺𑀤𑁆𑀤𑀲𑀼𑀅𑀬𑀦𑁆𑀢𑀺 𑀤𑀺𑀝𑁆𑀞𑀦𑁆𑀢𑁄 𑀧𑀜𑁆𑀜𑀸𑀲𑁄, 𑀅𑀯𑀺𑀤𑁆𑀤𑀲𑀼 ¶ 𑀅𑀬𑀦𑁆𑀢𑀺 𑀉𑀪𑀬𑀢𑁆𑀭𑀸𑀧𑁆𑀬𑀢𑁆𑀭𑁂𑀓𑀯𑀘𑀦𑀲𑀺𑀲𑁆𑀲 𑀦𑀺𑀯𑀢𑁆𑀢𑀺𑀬𑀸 𑀓𑀢𑀁 𑀬𑀫𑁂𑀓𑀢𑁆𑀢𑀁, 𑀢𑀁 𑀲𑀤𑁆𑀤𑀦𑁆𑀢𑀭𑀸𑀤𑁆𑀬𑀦𑀧𑁂𑀓𑁆𑀔𑀫𑁂𑀯 𑀧𑀢𑀻𑀬𑀢𑁂𑀢𑁆𑀬𑀢𑁆𑀣𑁄, 𑀇𑀢𑁆𑀣𑀢𑁆𑀢 𑀯𑀼𑀢𑁆𑀢𑀺𑀦𑀸 𑀲𑀸𑀮𑀸𑀤𑀺𑀲𑀤𑁆𑀤𑁂𑀦 𑀲𑀸𑀫𑀸𑀦𑀸𑀥𑀺𑀓𑀭𑀡𑁆𑀬𑀁 𑀢𑀢𑁆𑀭𑁂𑀢𑁆𑀬𑁂𑀢𑀲𑁆𑀲𑀸𑀢𑀺 𑀏𑀢𑀸𑀯𑀢𑀸 𑀆𑀧𑁆𑀧𑀘𑁆𑀘𑀬𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀘 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳-‘𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀫𑁆𑀧𑀺’𑀘𑁆𑀘𑀸𑀤𑀺, 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀫𑁆𑀧𑀻𑀢𑀺 (𑀇𑀢𑁆𑀣𑀺) 𑀯𑀼𑀢𑁆𑀢𑀺𑀦𑀸 𑀲𑀸𑀮𑀸𑀤𑀺𑀲𑀤𑁆𑀤𑁂𑀦 𑀲𑀸𑀫𑀸𑀦𑀸𑀥𑀺𑀓𑀭𑀡𑁆𑀬𑀫𑁆𑀧𑀺, 𑀆𑀧𑁆𑀧𑀘𑁆𑀘𑀬𑀸𑀤𑀻𑀦𑀁 𑀦𑀸𑀗𑁆𑀕𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀏𑀯𑀸𑀢𑀺 𑀅𑀦𑀼𑀯𑀢𑁆𑀢𑀢𑁂𑀏𑀯, 𑀏𑀓𑁄𑀢𑁆𑀣𑁄 𑀬𑀲𑁆𑀲 𑀧𑀓𑀢𑁆𑀬𑀸𑀤𑀺𑀲𑀫𑀼𑀤𑀸𑀬𑀲𑁆𑀲 𑀲𑁄 𑀏𑀓𑀢𑁆𑀣𑁄 ‘𑀅𑀲𑁆𑀲 𑀘𑁂𑀓𑀢𑁆𑀣𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀈𑀬𑀸𑀤𑀺 𑀯𑀺𑀥𑀸𑀦𑀦𑁆𑀢𑁆𑀬𑀸𑀳- ‘𑀏𑀓𑀢𑁆𑀣𑀢𑀸 𑀈𑀬𑀸𑀤𑀺𑀯𑀺𑀥𑀸𑀦’𑀦𑁆𑀢𑀺, 𑀈𑀬𑀸𑀤𑀺𑀯𑀼𑀢𑁆𑀢𑀺𑀬𑀦𑁆𑀢𑀺 𑀯𑀢𑁆𑀢𑀦𑀁 𑀯𑀼𑀢𑁆𑀢𑀺 𑀈𑀬𑀸𑀤𑀻𑀦𑀁 𑀯𑀼𑀢𑁆𑀢𑀺, 𑀈𑀬𑀸𑀤𑀺𑀯𑀺𑀥𑀸𑀦𑁂 𑀲𑀢𑀺𑀢𑁆𑀬𑀢𑁆𑀣𑁄, 𑀲𑀫𑀸𑀲𑀢𑁄𑀢𑀺 𑀲𑀫𑀸𑀲𑀺𑀢𑀸, 𑀢𑁂𑀦𑁂𑀯𑀸𑀢𑀺 ‘‘𑀤𑀺𑀲𑁆𑀲𑀦𑁆𑀢𑀜𑁆𑀜𑁂𑀧𑀺 𑀧𑀘𑁆𑀘𑀬𑀸’’𑀢𑀺 (𑁪-𑁧𑁨𑁦) 𑀲𑀼𑀢𑁆𑀢𑁂𑀦𑁂𑀯.

𑀬𑀤𑀸 𑀘𑀸𑀢𑁆𑀭𑀸𑀥𑀺𑀲𑀤𑁆𑀤𑀧𑁆𑀧𑀬𑁄𑀕𑁄 𑀢𑀤𑀸 𑀢𑁂𑀦𑁂𑀯 𑀯𑀺𑀪𑀢𑁆𑀬𑀢𑁆𑀣𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀦 𑀲𑀢𑁆𑀢𑀫𑀻 𑀧𑀬𑀼𑀚𑁆𑀚𑀢𑁂, 𑀬𑀤𑀸 𑀲𑀢𑁆𑀢𑀫𑀻, 𑀦 𑀢𑀤𑀸𑀥𑀺𑀲𑀤𑁆𑀤𑁄, 𑀢𑁂𑀦𑀸 𑀲𑀓𑀧𑀤𑁂𑀦𑁂𑀯 𑀯𑀺𑀕𑁆𑀕𑀳𑁄 𑀏𑀯𑀁 𑀤𑀲𑁆𑀲𑀦𑀻𑀬𑁄𑀢𑀺 𑀆𑀳- ‘𑀇𑀢𑁆𑀣𑀻𑀲𑀼 𑀓𑀣𑀸 𑀧𑀯𑀢𑁆𑀢𑀸’𑀢𑀺, 𑀇𑀢𑁆𑀣𑀺𑀲𑀤𑁆𑀤𑀢𑁄 𑀲𑀢𑁆𑀢𑀫𑀻𑀪𑀯𑀦𑁂 𑀓𑀸𑀭𑀡𑀫𑀸𑀳- ‘𑀢𑀁𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀸’𑀢𑀺, 𑀢𑁂𑀦 𑀅𑀥𑀺𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀲𑁄 𑀘 𑀅𑀫𑀸𑀤𑁂𑀲𑁄, 𑀆𑀤𑁂𑀲𑀲𑁆𑀲𑁂𑀯𑀸𑀢𑀺 𑀅𑀁𑀆𑀤𑁂𑀲𑀲𑁆𑀲𑁂𑀯, 𑀅𑀧𑀜𑁆𑀘𑀫𑀺𑀬𑀸𑀢𑀺 𑀧𑀜𑁆𑀘𑀫𑀺𑀁 𑀯𑀚𑁆𑀚𑁂𑀢𑁆𑀯𑀸. 𑀅𑀜𑁆𑀜𑀢𑁆𑀭 𑀯𑀺𑀥𑀻𑀬𑀫𑀸𑀦𑁄-𑀬𑀫𑀫𑀸𑀤𑁂𑀲𑁄 𑀧𑀜𑁆𑀘𑀫𑀺𑀬𑀫𑁆𑀧𑀝𑀺𑀲𑀺𑀤𑁆𑀥𑀢𑁆𑀢𑀸 𑀧𑀜𑁆𑀘𑀫𑀺𑀬𑀸 𑀧𑀝𑀺𑀲𑁂𑀥𑁂𑀦 𑀲𑀬𑀫𑁆𑀧𑀺 𑀧𑀝𑀺𑀲𑀺𑀤𑁆𑀥𑁄 𑀦𑀸𑀫 𑀳𑁄𑀢𑀻𑀢𑁆𑀬𑀸𑀳 ‘𑀆𑀤𑁂𑀲𑀲𑁆𑀲𑁂𑀯𑀸𑀬𑀁 𑀧𑀝𑀺𑀲𑁂𑀥𑁄’𑀢𑀺, 𑀮𑁄𑀧𑀧𑀝𑀺𑀲𑁂𑀥𑀲𑁆𑀲 ‘𑀦𑀸𑀢𑁄’𑀢𑀺 𑀧𑀼𑀩𑁆𑀩𑀯𑀸𑀓𑁆𑀬𑁂𑀦 𑀯𑀼𑀢𑁆𑀢𑀲𑁆𑀲 𑀅𑀬𑀫𑁆𑀧𑀝𑀺𑀲𑁂𑀥𑁄 𑀦𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀅𑀣 𑀓𑀣𑀫𑀺𑀤𑀫𑀧𑀜𑁆𑀘𑀫𑁆𑀬𑀸𑀢𑁆𑀬𑀫𑀸𑀤𑁂𑀲𑁂𑀦𑁂𑀯𑀸𑀢𑀺𑀲𑀫𑁆𑀩𑀦𑁆𑀥𑀢𑀺 𑀦 𑀮𑁄𑀧 𑀧𑀝𑀺𑀲𑁂𑀥𑁂𑀦𑀸𑀢𑀺 𑀧𑀭𑀺𑀪𑀸𑀲𑀫𑀸𑀳-‘𑀅𑀦𑀦𑁆𑀢𑀭𑀲𑁆𑀲 𑀯𑀺𑀥𑀺 𑀯𑀸 𑀳𑁄𑀢𑀺 𑀧𑀝𑀺𑀲𑁂𑀥𑁄 ¶ 𑀯𑀸’𑀢𑀺, 𑀏𑀢𑁆𑀣 𑀅𑀦𑁆𑀢𑀭𑀲𑀤𑁆𑀤𑀲𑁆𑀲𑀸𑀦𑁂𑀓𑀢𑁆𑀣𑀢𑁆𑀢𑁂𑀧𑀻𑀳𑀸𑀦𑁆𑀢𑀭𑀸𑀴𑀯𑀸𑀘𑀻𑀢𑀺 𑀦 𑀯𑀺𑀚𑁆𑀚𑀢𑁂 𑀅𑀦𑁆𑀢𑀭𑀫𑁆𑀫𑀚𑁆𑀛𑀫𑀲𑁆𑀲𑁂𑀢𑁆𑀬𑀦𑀦𑁆𑀢𑀭𑁄, 𑀅𑀦𑁆𑀢𑀭𑀸𑀴𑀫𑀢𑁆𑀢𑀧𑀝𑀺𑀲𑁂𑀥𑁂 𑀧𑀬𑁄𑀚𑀦𑀁 𑀦𑀢𑁆𑀣𑀻𑀢𑁆𑀬𑀦𑁆𑀢𑀭𑀸𑀴𑀕𑀢𑀲𑁆𑀲 𑀯𑀺𑀥𑀺𑀦𑁄 𑀧𑀝𑀺𑀲𑁂𑀥𑀲𑁆𑀲 𑀘𑀸𑀪𑀸𑀯𑀸𑀦𑀦𑁆𑀢𑀭𑁄𑀢𑁆𑀬𑀼𑀧 𑀘𑀭𑀻𑀬𑀢𑁂 𑀅𑀦𑀦𑁆𑀢𑀭𑀸 𑀕𑀸𑀫𑀸𑀢𑁆𑀬𑀸𑀤𑀺 𑀯𑀺𑀬, 𑀤𑀺𑀝𑁆𑀞𑀢𑁆𑀢𑁂 𑀧𑀦 𑀫𑀚𑁆𑀛𑀲𑁆𑀲 𑀦 𑀯𑀺𑀚𑁆𑀚𑀢𑁂-𑀦𑁆𑀢𑀭 𑀫𑁂𑀲𑀦𑁆𑀢𑀺 𑀯𑀺𑀕𑁆𑀕𑀳𑁂 𑀲𑀼𑀢𑁆𑀢𑁂𑀧𑁆𑀬𑀦𑀦𑁆𑀢𑀭𑀲𑁆𑀲 𑀯𑀺𑀥𑀸𑀦𑀦𑁆𑀢𑀭𑀲𑁆𑀲𑀸𑀧𑀺 𑀤𑀺𑀝𑁆𑀞𑀢𑁆𑀢𑀸 𑀤𑁆𑀯𑀺𑀦𑁆𑀦𑀫𑁂𑀓𑁄𑀧𑁆𑀬𑀦𑀦𑁆𑀢𑀭𑁄𑀢𑁆𑀬𑀼𑀘𑁆𑀘𑀢𑁂, 𑀢𑁂𑀦𑁂𑀯𑀸𑀦𑀦𑁆𑀢𑀭𑀲𑁆𑀲𑀸𑀢𑀺 𑀧𑀭𑀺𑀪𑀸𑀲𑀸𑀬𑀫𑁂𑀓 𑀯𑀘𑀦𑀁, 𑀇𑀢𑀺𑀲𑀤𑁆𑀤𑁄 𑀇𑀤𑀫𑀢𑁆𑀣𑁂, 𑀇𑀢𑀺 𑀇𑀫𑀸𑀬 𑀧𑀭𑀺𑀪𑀸𑀲𑀸𑀬𑀸𑀤𑁂𑀲𑁂𑀦𑀸𑀪𑀺𑀲𑀫𑁆𑀩𑀦𑁆𑀥𑀢𑀻𑀢𑁆𑀬𑀢𑁆𑀣𑁄, 𑀢𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀧𑀭𑀺𑀪𑀸𑀲𑀸𑀬 𑀯𑀲𑁂𑀦, 𑀬𑁂𑀦 𑀓𑀸𑀭𑀡𑁂𑀦𑀸𑀤𑁂𑀲𑁂𑀦𑀸𑀪𑀺𑀲𑀫𑁆𑀩𑀦𑁆𑀥𑀢𑀺 𑀢𑁂𑀦𑀸𑀢𑁆𑀬𑀢𑁆𑀣𑁄, 𑀅𑀮𑁄𑀧𑁄𑀢𑀺 𑀮𑁄𑀧 𑀧𑀝𑀺𑀲𑁂𑀥𑁄, 𑀲𑀸𑀫𑀢𑁆𑀣𑀺𑀬𑀸𑀮𑀤𑁆𑀥𑀦𑁆𑀢𑀺 𑀤𑁆𑀯𑀺𑀦𑁆𑀦𑀫𑀢𑁆𑀣𑀸𑀦𑀁 𑀯𑀺𑀥𑀸𑀦𑀸𑀬 𑀤𑁆𑀯𑁂 𑀯𑀸𑀓𑁆𑀬𑀸𑀦𑀺 𑀪𑀯𑀦𑁆𑀢𑀺, 𑀢𑀢𑁆𑀭 ‘𑀦𑀸𑀢𑁄’𑀢𑀻𑀤𑀁 𑀧𑀝𑀺𑀲𑁂𑀥𑀯𑀺𑀥𑀸𑀬𑀓𑀫𑁂𑀓𑀁 𑀯𑀸𑀓𑁆𑀬𑀁, ‘𑀅𑀫𑀧𑀜𑁆𑀘𑀫𑀺𑀬𑀸’𑀢𑀺 𑀤𑀼𑀢𑀺𑀬𑀫𑀫𑀸𑀤𑁂𑀲𑀲𑁆𑀲, 𑀢𑀢𑁆𑀭𑀸𑀧𑀜𑁆𑀘𑀫𑀺𑀬𑀸𑀢𑁆𑀬𑀸𑀤𑁂𑀲𑁂𑀦𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑀢𑀺, 𑀯𑀼𑀢𑁆𑀢𑀯𑀺𑀥𑀸𑀦𑀸 𑀦 𑀮𑁄𑀧𑀧𑀝𑀺𑀲𑁂𑀥𑁂𑀦, 𑀢𑀣𑀸𑀲𑀢𑁆𑀬𑀫𑀧𑀜𑁆𑀘𑀫𑀺𑀬𑀸𑀢𑀺𑀤𑀁 𑀯𑀸𑀓𑁆𑀬𑀁 𑀬𑀤𑀺 𑀦 𑀯𑀺𑀲𑁂𑀲𑀢𑁆𑀣𑀫𑀸𑀮𑀫𑁆𑀩𑀢𑁂 𑀢𑀫𑀦𑁆𑀢𑀭𑁂𑀦𑀸𑀦𑀼𑀧𑀧𑀢𑁆𑀢𑀺𑀢𑁄-𑀜𑁆𑀜𑀣𑀸 𑀓𑀺𑀦𑁆𑀢𑁆𑀬𑀦𑁂𑀦𑀸𑀢𑁆𑀣𑀩𑀮𑁂𑀦 𑀮𑀤𑁆𑀥𑀦𑁆𑀢𑀺 𑀅𑀢𑁆𑀣𑁄, 𑀅𑀮𑁄𑀧𑁄𑀢𑀺 𑀚𑁄𑀢𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀯𑀸𑀓𑁆𑀬𑀪𑁂𑀤𑁂𑀦 𑀯𑀺𑀯𑀭𑀡𑀁 𑀓𑀢𑀁, 𑀦 𑀏𑀓𑀯𑀸𑀓𑁆𑀬𑀢𑁆𑀢𑁂𑀦𑀸𑀢𑀺 𑀩𑁆𑀬𑀢𑀺𑀭𑁂𑀓𑁄 𑀏𑀓𑀯𑀸𑀓𑁆𑀬𑀢𑀸𑀬𑀜𑁆𑀳𑀺 𑀓𑀸𑀭𑀺𑀬 𑀤𑁆𑀯𑀬𑀲𑁆𑀲𑀧𑀺 𑀧𑀜𑁆𑀘𑀫𑀺𑀬𑀫𑁆𑀧𑀝𑀺𑀲𑁂𑀥𑁄 𑀲𑀺𑀬𑀸 ‘𑀧𑀜𑁆𑀘𑀫𑀺𑀁 𑀯𑀚𑁆𑀚𑁂𑀢𑁆𑀯𑀸 𑀢𑀁 𑀓𑀸𑀭𑀺𑀬𑀤𑁆𑀯𑀬𑀁 𑀯𑁂𑀤𑀺𑀢𑀩𑁆𑀩’𑀦𑁆𑀢𑀺, 𑀬𑀤𑀺𑀧𑀺 𑀲𑀺𑀤𑁆𑀥𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀬𑁂𑀦 𑀦𑀸𑀧𑁆𑀧𑀢𑁆𑀢𑀺𑀬𑀸𑀢𑁆𑀬𑀦𑁂𑀦 ‘‘𑀬𑁂𑀦 𑀦𑀸𑀧𑁆𑀧𑀢𑁆𑀢𑁂 𑀯𑀺𑀥𑀺𑀭𑀸𑀭𑀩𑁆𑀪𑀢𑁂, 𑀢𑀲𑁆𑀲 𑀩𑀸𑀥𑀦𑀫𑁆𑀪𑀯𑀢𑀻’’𑀢𑀺 𑀫𑀫𑁆𑀧𑀭𑀺𑀪𑀸𑀲𑀫𑀼𑀧𑀮𑀓𑁆𑀔𑁂𑀢𑀺, 𑀓𑀺𑀫𑀢𑁆𑀣𑀫𑀺𑀳𑀸𑀬𑀁 𑀧𑀭𑀺𑀪𑀸𑀲𑀸 𑀧𑀞𑁆𑀬𑀢𑁂 𑀇𑀳 𑀲𑀢𑁆𑀣𑁂-𑀧𑀯𑀸𑀤𑀸 𑀉𑀲𑁆𑀲𑀕𑁆𑀕𑁂 𑀩𑀸𑀥𑀦𑁆𑀢𑁂𑀢𑀺 𑀦𑀺𑀬𑀫𑁄, 𑀢𑀢𑁆𑀭 𑀘𑀼𑀲𑁆𑀲𑀕𑁆𑀕𑀸 𑀤𑀼𑀯𑀺𑀥𑀸 𑀦𑀺𑀬𑀢𑀧𑁆𑀧𑀢𑁆𑀢𑀬𑁄 𑀅𑀦𑀺𑀬𑀢𑀧𑁆𑀧𑀢𑁆𑀢𑀬𑁄 𑀘𑁂𑀢𑀺, 𑀬𑁂 𑀲𑀩𑁆𑀩𑀢𑁆𑀣𑀸𑀧𑀯𑀸𑀤𑀯𑀺𑀲𑀬𑀫𑁆𑀧𑀯𑀺𑀲𑀦𑁆𑀢𑀺, 𑀢𑁂 𑀦𑀺𑀬𑀢𑀧𑁆𑀧𑀢𑁆𑀢𑀬𑁄 𑀯𑀼𑀘𑁆𑀘𑀦𑁆𑀢𑁂, 𑀬𑁂 𑀓𑁆𑀯𑀘𑀺𑀤𑁂𑀯𑀸𑀧𑀯𑀸𑀤𑀯𑀺𑀲𑀬𑀫𑀯𑀕𑀸𑀳𑀦𑁆𑀢𑁂, 𑀢𑁂 𑀅𑀦𑀺𑀬𑀢𑀧𑁆𑀧𑀢𑁆𑀢𑀬𑁄 𑀯𑀼𑀘𑁆𑀘𑀦𑁆𑀢𑁂, 𑀏𑀯𑀁 𑀤𑀼𑀯𑀺𑀥𑁂𑀲𑀼𑀲𑁆𑀲𑀕𑁆𑀕𑁂𑀲𑀼 𑀬𑁂-𑀦𑀺𑀬𑀢𑀧𑁆𑀧𑀢𑁆𑀢𑀬𑁄, 𑀢𑁂𑀲𑀫𑁂𑀯 𑀩𑀸𑀥𑀦𑀫𑀺𑀘𑁆𑀙𑀻𑀬𑀢𑁂, 𑀦 𑀦𑀺𑀬𑀢𑀺𑀓𑀸𑀦𑀁, 𑀢𑁂𑀦 𑀢𑀧𑁆𑀧𑀤𑀲𑁆𑀲𑀦𑀢𑁆𑀣𑀫𑀬𑀫𑁆𑀧𑀭𑀺𑀪𑀸𑀲𑀸 𑀧𑀞𑁆𑀬𑀢𑁂𑀢𑀺, 𑀬𑁂𑀦𑁂𑀢𑁆𑀬𑀼𑀲𑁆𑀲𑀕𑁆𑀕𑀲𑁆𑀲 𑀦𑀺𑀤𑁆𑀤𑁂𑀲𑁄, 𑀦𑁂𑀢𑀺 𑀧𑀝𑀺𑀲𑁂𑀥𑀯𑀸𑀘𑀻 𑀦𑀺𑀧𑀸𑀢𑁄, 𑀅𑀧𑁆𑀧𑀢𑁆𑀢𑁂 𑀅𑀲𑀫𑁆𑀨𑀼𑀝𑁆𑀞𑁂 𑀯𑀺𑀲𑀬𑁂 𑀇𑀢𑁆𑀬𑀚𑁆𑀛𑀸𑀳𑀸𑀭𑀺𑀬𑀁, 𑀬𑁂𑀦 𑀉𑀲𑁆𑀲𑀕𑁆𑀕𑁂𑀦 𑀦𑀸𑀧𑁆𑀧𑀢𑁆𑀢𑁂 𑀧𑀢𑁆𑀢𑁂𑀏𑀯 𑀲𑀫𑁆𑀨𑀼𑀝𑁆𑀞𑁂𑀏𑀯 𑀯𑀺𑀲𑀬𑁂𑀢𑁆𑀬𑀢𑁆𑀣𑁄… ‘𑀤𑁆𑀯𑁂 𑀧𑀝𑀺𑀲𑁂𑀥𑀸 𑀧𑀸𑀓𑀢𑀫𑀢𑁆𑀣𑀁 𑀕𑀫𑁂𑀦𑁆𑀢𑀻’𑀢𑀺 𑀓𑀢𑁆𑀯𑀸, 𑀯𑀺𑀥𑀻𑀬𑀢𑀻𑀢𑀺, 𑀧𑀝𑀺𑀲𑁂𑀥𑁄 𑀯𑀺𑀥𑀸𑀦𑀜𑁆𑀘, 𑀆𑀭𑀩𑁆𑀪𑀢𑁂 𑀯𑀺𑀥𑀻

𑀬𑀢𑁂 ¶ 𑀧𑀞𑁆𑀬𑀢𑁂𑀢𑁆𑀬𑀢𑁆𑀣𑁄, 𑀅𑀦𑁂𑀦𑀸𑀧𑀯𑀸𑀤𑀯𑀺𑀥𑀺𑀦𑁆𑀤𑀲𑁆𑀲𑁂𑀢𑀺, 𑀢𑀲𑁆𑀲𑁂𑀢𑀺 𑀆𑀤𑁄𑀬𑁂𑀦𑁂𑀢𑀺 𑀦𑀺𑀤𑁆𑀤𑀺𑀝𑁆𑀞𑀲𑁆𑀲𑀉𑀲𑁆𑀲𑀕𑁆𑀕𑀲𑁆𑀲𑀩𑀸𑀥𑀦𑀫𑁆𑀪𑀯𑀢𑁆𑀬𑀧𑀯𑀸𑀤𑁂𑀦, 𑀬𑁂𑀦 𑀢𑁆𑀯𑀧𑁆𑀧𑀢𑁆𑀢𑁂 𑀯𑀺𑀲𑀬𑁂 𑀆𑀭𑀩𑁆𑀪𑀢𑁂 𑀢𑀲𑁆𑀲 𑀩𑀸𑀥𑀦𑀁 𑀦 𑀪𑀯𑀢𑀻𑀢𑁆𑀬𑀢𑁆𑀣𑁄, 𑀓𑀼𑀢𑁄𑀢𑀺 𑀘𑁂 𑀅𑀦𑀯𑀓𑀸𑀲𑀢𑁆𑀢𑀸, 𑀢𑀣𑀸𑀳𑀺 𑀬𑀤𑀺 𑀉𑀲𑁆𑀲𑀕𑁆𑀕𑁂𑀦 𑀲𑀩𑁆𑀩𑁄 𑀯𑀺𑀲𑀬𑁄 𑀕𑀳𑀺𑀢𑁄 𑀲𑀺𑀬𑀸, 𑀓𑁄-𑀧𑀯𑀸𑀤𑀲𑁆𑀲𑀅𑀜𑁆𑀜𑁄 𑀯𑀺𑀲𑀬𑁄 𑀲𑀺𑀬𑀸, 𑀢𑀲𑁆𑀫𑀸 𑀅𑀦𑀯𑀓𑀸𑀲𑀢𑁆𑀢𑀸 (𑀦) 𑀅𑀧 (𑀯𑀸𑀤𑁂) 𑀧𑀦 𑀢𑀲𑁆𑀲 𑀩𑀸𑀥𑀦𑀫𑁆𑀪𑀯𑀢𑀻𑀢𑁆𑀬𑀯𑀲𑁂𑀬𑀁, 𑀬𑁂𑀦 𑀢𑀼𑀲𑁆𑀲𑀕𑁆𑀕𑁂𑀦 𑀓𑁄𑀘𑀺 𑀤𑁂𑀯𑀸𑀧𑀯𑀸𑀤𑀯𑀺𑀲𑀬𑁄-𑀦𑀼𑀧𑁆𑀧𑀢𑁆𑀢𑁄𑀲𑀺𑀬𑀸, 𑀦𑀲𑀩𑁆𑀩𑁄, 𑀢𑀫𑁆𑀧𑀢𑀺 𑀲𑀸𑀯𑀓𑀸 𑀲𑀢𑁆𑀢𑀸 𑀢𑀫𑁆𑀩𑀸𑀥𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, ‘𑀧𑀜𑁆𑀘𑀧𑀽𑀮𑀺𑀫𑀸𑀦𑀬𑁂’𑀢𑁆𑀬𑀢𑁆𑀭 𑀧𑀜𑁆𑀘𑀦𑁆𑀦𑀁 𑀧𑀽𑀮𑀸𑀦𑀁 𑀲𑀫𑀸𑀳𑀸𑀭𑁄𑀢𑀺 𑀯𑀺𑀲𑁂𑀲𑀦𑀲𑀫𑀸𑀲𑁄 ‘‘𑀦𑀤𑀸𑀤𑀺𑀢𑁄𑀯𑀻’’ (𑁩-𑁨𑁭) 𑀲𑀫𑀸𑀳𑀭𑀡𑀁 𑀲𑀫𑀸𑀳𑀸𑀭𑁄𑀢𑀺 𑀲𑀫𑀸𑀳𑀸𑀭𑀲𑁆𑀲𑀧𑀺 𑀪𑀸𑀯𑀭𑀽𑀧𑀢𑁆𑀢𑀸 𑀆𑀳 ‘𑀪𑀸𑀯𑀧𑁆𑀧𑀥𑀸𑀦𑀢𑁆𑀢𑁂𑀧𑀻’𑀢𑀺, 𑀕𑀼𑀡𑀪𑀽𑀢𑀤𑀩𑁆𑀩𑀸𑀦𑀺 𑀧𑀽𑀮𑀸𑀦𑀺.

𑀲𑀼𑀢𑁆𑀢𑁂 𑀅𑀦𑀺𑀢𑁆𑀣𑀺𑀬𑀦𑁆𑀢𑀺 𑀓𑀺𑀫𑀢𑁆𑀣𑀺𑀬 (𑀫𑀦𑁂𑀦) 𑀧𑀝𑀺𑀲𑁂𑀥𑀯𑀘𑀦𑁂𑀦, 𑀬𑀢𑁄 𑀇𑀫𑀲𑁆𑀲𑁂𑀢𑁆𑀯𑁂𑀯𑀸𑀦𑀺𑀢𑁆𑀣𑀺𑀮𑀺𑀗𑁆𑀕𑁂𑀦 𑀦𑀺𑀤𑁆𑀤𑁂𑀲𑁄𑀢𑀺 𑀫𑀦𑀲𑀺𑀓𑀢𑁆𑀯𑀸 𑀆𑀳-𑀦𑀸𑀫𑀕𑁆𑀕𑀳𑀡𑁂’𑀇𑀘𑁆𑀘𑀸𑀤𑀺, ‘‘𑀦𑀸𑀫𑀕𑁆𑀕𑀳𑀡𑁂 𑀮𑀺𑀗𑁆𑀕𑀯𑀺𑀲𑀺𑀝𑁆𑀞𑀲𑁆𑀲𑀸𑀧𑀺 𑀕𑀳𑀡’’𑀦𑁆𑀢𑀺 𑀧𑀭𑀺𑀪𑀸𑀲𑀸𑀬𑀁, 𑀢𑀢𑁆𑀣 𑀮𑀺𑀗𑁆𑀕𑁂𑀦 𑀲𑀼𑀢𑁆𑀢𑁂 𑀦𑀺𑀤𑁆𑀤𑀺𑀝𑁆𑀞𑀢𑁄 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀯𑀺𑀲𑀺𑀝𑁆𑀞𑀁 𑀦𑀸𑀫𑀁 𑀮𑀺𑀗𑁆𑀕𑀯𑀺𑀲𑀺𑀝𑁆𑀞𑀁, 𑀢𑀲𑁆𑀲, 𑀬𑀢𑁆𑀣 𑀲𑀤𑁆𑀤𑀲𑀸𑀫𑀜𑁆𑀜𑀲𑀦𑁆𑀦𑀺𑀲𑁆𑀲𑀬𑀦𑀁, 𑀢𑀢𑁆𑀣 𑀦𑀸𑀫𑀕𑁆𑀕𑀳𑀡𑁂 𑀲𑀢𑀺𑀮𑀺𑀗𑁆𑀕𑀯𑀺𑀲𑀺𑀝𑁆𑀞𑀲𑁆𑀲𑀸𑀧𑀺 𑀕𑀳𑀡𑀁 𑀳𑁄𑀢𑀺… 𑀲𑀸𑀫𑀜𑁆𑀜𑁂 𑀲𑀩𑁆𑀩𑀯𑀺𑀲𑁂𑀲𑀸𑀦𑀼𑀧𑁆𑀧𑀯𑁂 𑀲𑀢𑁄𑀢𑁆𑀬𑀥𑀺𑀧𑁆𑀧𑀸𑀬𑁄, 𑀇𑀤𑀫𑁂𑀯𑀸𑀢𑀺 𑀅𑀦𑀺𑀢𑁆𑀣𑀺𑀬𑀦𑁆𑀢𑀺 𑀯𑀘𑀦𑀫𑁂𑀯, 𑀜𑀸𑀧𑀓𑀦𑁆𑀢𑀺 𑀧𑀢𑁆𑀢𑀺 𑀧𑀼𑀩𑁆𑀩𑀓𑁄 𑀧𑀝𑀺𑀲𑁂𑀥𑁄, 𑀲𑁄 𑀇𑀢𑁆𑀣𑀺𑀬𑀫𑁆𑀧𑀢𑁆𑀢𑀺𑀬𑀁 𑀲𑀢𑀺 𑀅𑀦𑀺𑀢𑁆𑀣𑀺𑀬𑀦𑁆𑀢𑀺 𑀓𑀢𑁄 𑀲𑀺𑀬𑀸𑀢𑀺 𑀅𑀦𑀺𑀢𑁆𑀣𑀺𑀬𑀦𑁆𑀢𑀺 𑀧𑀝𑀺𑀲𑁂𑀥𑀯𑀘𑀦𑀫𑁂𑀯𑁂𑀫𑀁 𑀧𑀭𑀺𑀪𑀸𑀲𑀁 𑀜𑀸𑀧𑁂𑀢𑀻𑀢𑀺 𑀅𑀢𑁆𑀣𑁄, 𑀇𑀫𑀺𑀦𑀸 𑀇𑀫𑀺𑀲𑁆𑀲𑀸 𑀧𑀭𑀺𑀪𑀸𑀲𑀸𑀬 𑀲𑀸𑀫𑀢𑁆𑀣𑀺𑀬𑀮𑀤𑁆𑀥𑀢𑀁 𑀤𑀲𑁆𑀲𑁂𑀢𑀺.

𑀅𑀦𑀧𑀼𑀁𑀲𑀓𑀲𑁆𑀲𑀸𑀢𑀺 𑀧𑀭𑀺𑀬𑀼𑀤𑀸𑀲𑁄𑀢𑀺 𑀅𑀦𑀧𑀼𑀁𑀲𑀓𑀲𑁆𑀲𑀸𑀢𑀺 𑀏𑀢𑁆𑀣 𑀦𑀜𑁆𑀲𑀤𑁆𑀤𑀲𑁆𑀲 𑀧𑀭𑀺𑀬𑀼𑀤𑀸𑀲𑁄-𑀢𑁆𑀣𑁄𑀢𑁆𑀬𑀢𑁆𑀣𑁄.

𑀢𑀦𑁆𑀦𑁂𑀢𑀺𑀆𑀤𑀺𑀦𑀸 𑀓𑀢𑁆𑀣𑀘𑀺 𑀧𑀭𑀺𑀪𑀸𑀲𑀸𑀯𑀢𑀺𑀭𑀦𑀺𑀘𑁆𑀘𑀸𑀢𑀺 𑀲𑀽𑀘𑁂𑀢𑀺.

𑀳𑁄𑀢𑀼 ¶ 𑀲𑀺𑀢𑁄-𑀜𑁆𑀜𑀢𑁆𑀭𑀓𑁂 𑀲𑀢𑀺 𑀲𑀸𑀤𑁂𑀲𑁄, 𑀲𑀺𑀫𑁆𑀳𑀺 𑀢𑀼 𑀓𑀧𑁆𑀧𑀘𑁆𑀘𑀬𑀸 𑀧𑀞𑀫𑀫𑁂𑀯 𑀓𑀢𑁄 𑀫𑀲𑁆𑀲 𑀲𑀸𑀤𑁂𑀲𑁄𑀢𑀺 𑀢𑀧𑁆𑀧𑀘𑁆𑀘𑀬𑁂 𑀲𑀢𑀺 ‘𑀓𑁂𑀯𑀸’𑀢𑀺 𑀓𑀺𑀁 𑀲𑀸𑀫𑀜𑁆𑀜𑁂𑀦 𑀲𑀸𑀤𑁂𑀲𑀯𑀺𑀥𑀸𑀦𑁂𑀦𑁂 𑀢𑁆𑀬𑀸𑀲𑀗𑁆𑀓𑀺𑀬 𑀲𑀼𑀢𑁆𑀢𑀲𑁆𑀲 𑀲𑀸𑀫𑀜𑁆𑀜 𑀯𑀺𑀥𑀸𑀦𑁂 𑀨𑀮𑀁 𑀤𑀲𑁆𑀲𑁂𑀢𑀼𑀁 ‘𑀓𑁂𑀦𑁂𑀓𑀢𑁆𑀣𑀢𑀸𑀬𑀁’𑀢𑁆𑀬𑀸𑀤𑀺𑀫𑀸𑀳, 𑀓𑁂𑀦𑁂𑀓𑀢𑁆𑀣𑀢𑀸𑀬𑀦𑁆𑀢𑀺 𑀓𑀧𑁆𑀧𑀘𑁆𑀘𑀬𑁂𑀦 𑀲𑀳 𑀡𑀸𑀤𑀺𑀯𑀼𑀢𑁆𑀢𑀺𑀬𑀁, 𑀧𑀼𑀩𑁆𑀩𑀪𑀸𑀕𑀲𑁆𑀲𑀸𑀢𑀺 𑀅𑀲𑀼𑀪𑀸𑀕𑀲𑁆𑀲 𑀧𑀤𑀢𑁆𑀢𑀸𑀪𑀸𑀯𑀸𑀢𑀺 ‘‘𑀏𑀓𑀢𑁆𑀣𑀢𑀸𑀬𑀸’’𑀢𑀺 (𑁨-𑁧𑁧𑁯) 𑀯𑀺𑀪𑀢𑁆𑀢𑀺𑀬𑀸 𑀧𑀤𑀢𑁆𑀢𑀲𑀸𑀥𑀺𑀓𑀸𑀬𑀸𑀧𑀕𑀫𑁂𑀦 𑀧𑀤𑀢𑁆𑀢𑀸𑀪𑀸𑀯𑀸, 𑀧𑀤𑀲𑀗𑁆𑀔𑀸𑀭𑀦𑀺𑀩𑀦𑁆𑀥𑀦𑁄𑀢𑀺 𑀧𑀤 𑀲𑀺𑀤𑁆𑀥𑀺 𑀳𑁂𑀢𑀼𑀓𑁄, ‘‘𑀦𑀺𑀫𑀺𑀢𑁆𑀢𑀸𑀪𑀸𑀯𑁂 𑀦𑁂𑀫𑀺𑀢𑁆𑀢𑀺𑀓𑀲𑁆𑀲𑀸𑀧𑁆𑀬𑀪𑀸𑀯𑁄’’𑀢𑀺 𑀜𑀸𑀬𑀲𑁆𑀲𑀸𑀬𑀫𑀢𑁆𑀣𑁄 ‘‘𑀦𑀺𑀫𑀺𑀢𑁆𑀢𑀁 𑀓𑀸𑀭𑀡𑀁 𑀳𑁂𑀢𑀽𑀢𑁆𑀬𑀦𑀢𑁆𑀣𑀦𑁆𑀢𑀭𑀁, 𑀦𑀺𑀫𑀺𑀢𑁆𑀢𑀲𑁆𑀲 𑀅𑀪𑀸𑀯𑁄 𑀦𑀺𑀫𑀺𑀢𑁆𑀢𑀸𑀪𑀸𑀯𑁄, 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀸𑀪𑀸𑀯𑁂 𑀳𑁂𑀢𑀼𑀯𑀺𑀦𑀸𑀲𑁂𑀢𑁆𑀬𑀢𑁆𑀣𑁄, 𑀦𑀺𑀫𑀺𑀢𑁆𑀢𑀸 𑀆𑀕𑀢𑁄 𑀦𑁂𑀫𑀺𑀢𑁆𑀢𑀺𑀓𑁄, 𑀨𑀮𑀪𑀽𑀢𑁄 𑀥𑀫𑁆𑀫𑁄, 𑀦𑀺𑀫𑀺𑀢𑁆𑀢𑁂 𑀪𑀸𑀯𑁄 𑀯𑀸 𑀦𑁂𑀫𑀺𑀢𑁆𑀢𑀺𑀓𑁄, 𑀦𑀺𑀫𑀺𑀢𑁆𑀢𑀲𑁆𑀲𑀸𑀪𑀸𑀯𑁂 𑀢𑀁 𑀳𑁂𑀢𑀼𑀢𑁄 𑀧𑀯𑀢𑁆𑀢𑀲𑁆𑀲 𑀦𑁂𑀫𑀺𑀢𑁆𑀢𑀺𑀓𑀲𑁆𑀲 𑀨𑀮𑀲𑁆𑀲𑀸𑀧𑁆𑀬𑀪𑀸𑀯𑁄 𑀪𑀯𑀢𑀻’’𑀢𑀺, 𑀢𑀣𑀸𑀳𑀺 𑀙𑀢𑁆𑀢𑀦𑀺𑀫𑀺𑀢𑁆𑀢𑀙𑀸𑀬𑀸 𑀙𑀢𑁆𑀢𑀸𑀧𑀸𑀬𑁂𑀦 𑀪𑀯𑀢𑀺, 𑀧𑀤𑀻𑀧𑀦𑀺𑀫𑀺𑀢𑁆𑀢𑀤𑀲𑁆𑀲𑀦𑀁 𑀧𑀤𑀻𑀧𑀸𑀧𑀸𑀬𑁂 𑀦 𑀪𑀸𑀢𑀺, 𑀢𑀣𑁂𑀳𑀸𑀧𑀺 𑀦𑀺𑀫𑀺𑀢𑁆𑀢𑀢𑁄 𑀧𑀯𑀢𑁆𑀢𑀸𑀦𑀁 𑀦𑀺𑀫𑀺𑀢𑁆𑀢𑀸𑀪𑀸𑀯𑁂 𑀅𑀪𑀸𑀯𑁄𑀬𑁂𑀯 𑀬𑀼𑀢𑁆𑀢𑀺 𑀫𑀸𑀢𑀺 𑀫𑀜𑁆𑀜𑀢𑁂, 𑀅𑀜𑁆𑀜𑀢𑁆𑀭𑀘𑀸𑀢𑀺 𑀲𑀺𑀢𑁄 𑀅𑀜𑁆𑀜𑀢𑁆𑀭 𑀘.

𑀢𑁆𑀬𑀏𑀢𑀸𑀦𑀁 𑀢𑀓𑀸𑀭𑀲𑁆𑀲 𑀧𑀭𑀺𑀘𑁆𑀘𑀸𑀕𑀸𑀬 ‘𑀢𑀢𑀲𑁆𑀲𑀸’𑀢𑀺 𑀯𑀼𑀢𑁆𑀢𑀁.

𑀇𑀫𑀺𑀲𑁆𑀲𑀸𑀬𑀸𑀢𑁆𑀬𑀸𑀤𑀻𑀲𑀼 ‘‘𑀲𑁆𑀲𑀁 𑀲𑁆𑀲𑀸 𑀲𑁆𑀲𑀸𑀬𑁂’’𑀢𑁆𑀬𑀸𑀤𑀺𑀦𑀸 (𑁨-𑁫𑁨) 𑀇, ‘‘𑀢𑀤𑀸𑀤𑁂𑀲𑀸 𑀢𑁂 𑀯𑀺𑀬 𑀳𑁄𑀦𑁆𑀢𑀻’’𑀢𑀺 𑀧𑀭𑀺𑀪𑀸𑀲𑀢𑁄 𑀲𑀸𑀤𑁆𑀬𑀸𑀤𑁂𑀲𑀻𑀦𑀁 𑀕𑀳𑀡𑀸𑀲𑁆𑀲𑀸𑀬𑀸𑀤𑁂𑀲𑀸𑀤𑀻𑀦𑀁 𑀕𑀳𑀡𑀲𑀫𑁆𑀪𑀯𑁂𑀧𑀺 𑀓𑀺𑀁 𑀲𑁆𑀲𑀸𑀬𑀸𑀤𑀺𑀕𑁆𑀕𑀳𑀡𑁂 𑀦 𑀲𑀼𑀢𑁆𑀢𑀕𑀼𑀭𑀼𑀓𑀭𑀡𑁂𑀦𑁂 𑀢𑁆𑀬𑀸𑀲𑀗𑁆𑀓𑀺𑀬‘𑀲𑁆𑀲𑀸𑀬𑀸𑀤𑀺𑀕𑁆𑀕𑀳𑀡’𑀫𑀺𑀘𑁆𑀘𑀸𑀤𑀺, 𑀯𑀼𑀢𑁆𑀢𑀺 𑀕𑀦𑁆𑀣𑁄 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘𑀦𑀦𑀼 𑀘𑁂’𑀢𑁆𑀬𑀸𑀤𑀺, 𑀝𑀲𑀲𑁆𑀫𑀸𑀤𑀺𑀓𑀁 ‘𑀝𑀲𑀲𑁆𑀫𑀸𑀲𑁆𑀫𑀺𑀦𑁆𑀦𑀦𑁆𑀦𑀸𑀲𑁆𑀯𑀺𑀫𑀲𑁆𑀲 𑀘𑀸’𑀢𑀺 𑀯𑀢𑁆𑀢𑀩𑁆𑀩𑀁, 𑀦𑀫𑀸𑀤𑀻𑀦𑀫𑁆𑀧𑀺 𑀯𑀺𑀥𑀺𑀕𑁆𑀕𑀳𑀡𑀸𑀬 [𑀦𑀸𑀤𑀻𑀦𑀫𑁆𑀧𑀯𑀺𑀕𑁆𑀕𑀳𑀸𑀬 (𑀧𑁄𑀢𑁆𑀣𑀓𑁂)], 𑀢𑀲𑁆𑀲𑀸

𑀤𑁂𑀲𑀺𑀦𑁄 ¶ 𑀆𑀤𑁂𑀲𑁄 𑀢𑀤𑀸𑀤𑁂𑀲𑁄, 𑀢𑀲𑁆𑀲, 𑀢𑀲𑁆𑀲 𑀆𑀤𑁂𑀲𑀺𑀦𑁄 𑀕𑀳𑀡𑀁 𑀢𑀕𑁆𑀕𑀳𑀡𑀁, 𑀢𑁂𑀦.

𑀅𑀜𑁆𑀜𑀣𑀸𑀢𑀺 𑀕𑀼𑀭𑀼𑀦𑀺𑀤𑁆𑀤𑁂𑀲𑀫𑀓𑀢𑁆𑀯𑀸 𑀅𑀜𑁆𑀜𑁂𑀦 𑀮𑀳𑀼𑀧𑁆𑀧𑀓𑀸𑀭𑁂𑀦 𑀦𑀺𑀤𑁆𑀤𑀺𑀲𑀦𑁂 𑀲𑀢𑀺, 𑀏𑀓𑀯𑀺𑀪𑀢𑁆𑀢𑀺𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸𑀢𑀺‘𑀤𑀼𑀢𑀺𑀬𑀸𑀬𑁄𑀲𑁆𑀲𑀸’𑀢𑀺 𑀏𑀓𑀯𑀺𑀪𑀢𑁆𑀢𑀺𑀬𑀸 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸, 𑀅𑀜𑁆𑀜𑀣𑀸𑀢𑀺𑀆𑀤𑀺𑀦𑀸 𑀦𑁂𑀓𑀤𑁂𑀲𑁄𑀢𑀺𑀯𑀘𑀦𑀧𑀭𑀺𑀬𑀦𑁆𑀢𑁂𑀦𑁂𑀢𑁂𑀦 ‘𑀦 𑀢𑁆𑀯𑁂𑀓𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀸𑀦’𑀦𑁆𑀢𑀺 𑀧𑀭𑀺𑀪𑀸𑀲𑁂𑀓𑀤𑁂𑀲𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑀧𑀓𑀸𑀲𑀺𑀢𑁄𑀢𑀺 𑀜𑀸𑀢𑀩𑁆𑀩𑀁, 𑀏𑀢𑀤𑁂𑀯𑀸𑀦𑀼𑀯𑀢𑁆𑀢𑀢𑀻𑀢𑁆𑀬𑀦𑁂𑀦 𑀢𑀼 ‘‘𑀏𑀓𑀬𑁄𑀕 𑀦𑀺𑀤𑁆𑀤𑀺𑀝𑁆𑀞𑀸𑀦𑀫𑁆𑀧𑁂𑀓𑀤𑁂𑀲𑁄-𑀦𑀼𑀯𑀢𑁆𑀢𑀢𑁂’’𑀢𑀻𑀫𑀲𑁆𑀲, 𑀏𑀓𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀸𑀦𑀁 𑀏𑀓𑀤𑁂𑀲𑁄 𑀦𑀸𑀦𑀼𑀯𑀢𑁆𑀢𑀢𑁂𑀢𑀺 𑀬𑁄𑀚𑀦𑀸 𑀧𑀭𑀺𑀪𑀸𑀲𑀸𑀬𑀁, 𑀜𑀸𑀧𑁂𑀢𑀻𑀢𑀺 𑀧𑀼𑀩𑁆𑀩𑁂 𑀯𑀺𑀬 𑀲𑀸𑀫𑀢𑁆𑀣𑀺𑀬𑁂𑀦 𑀜𑀸𑀧𑁂𑀢𑀺.

𑀅𑀧𑁆𑀧𑀥𑀸𑀦𑀧𑁆𑀧𑀝𑀺𑀲𑁂𑀥𑀢𑁄 𑀲𑀩𑁆𑀩𑀸𑀤𑀻𑀦𑀁 𑀢𑀤𑀦𑁆𑀢𑀯𑀺𑀥𑀺𑀦𑀸 𑀪𑀯𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀳𑀺 𑀲𑀩𑁆𑀩𑀸𑀤𑀺𑀕𑁆𑀕𑀳𑀡𑁂 𑀓𑁄 𑀧𑀲𑀗𑁆𑀕𑁄 𑀧𑀺𑀬𑀲𑀩𑁆𑀩𑀸𑀤𑀻𑀦𑀁, 𑀬𑀢𑁄 𑀅𑀧𑁆𑀧𑀥𑀸𑀦𑀧𑁆𑀧𑀝𑀺𑀲𑁂𑀥𑁄, 𑀓𑀭𑀻𑀬𑀢𑁂 𑀢𑁂𑀦 𑀧𑀭𑀫𑀲𑀩𑁆𑀩𑁂𑀇𑀘𑁆𑀘𑀸𑀤𑀺 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘𑀅𑀧𑁆𑀧𑀥𑀸𑀦𑀧𑁆𑀧𑀝𑀺𑀲𑁂𑀥𑁄’𑀇𑀘𑁆𑀘𑀸𑀤𑀺.

𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀓𑀢𑁆𑀢𑀭𑀺 𑀓𑀭𑀡𑁂 𑀯𑀸, 𑀓𑀢𑁆𑀢𑀭𑀺 𑀢𑀢𑀺𑀬𑀸𑀲𑀺𑀤𑁆𑀥𑀺𑀫𑀸𑀳-‘𑀓𑀭𑁄𑀢𑀺’𑀘𑁆𑀘𑀸𑀤𑀺, 𑀓𑀭𑁄𑀢𑀺𑀫𑁆𑀳𑀺 𑀓𑀭𑀥𑀸𑀢𑀼𑀫𑁆𑀳𑀺 𑀕𑀫𑁆𑀫𑀫𑀸𑀦𑁂, 𑀫𑀸𑀲𑁂𑀦 𑀓𑀢𑀸𑀢𑀺 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁… 𑀫𑀸𑀲𑁂𑀦 𑀓𑀢𑀸𑀦𑀁 𑀧𑀼𑀩𑁆𑀩𑀸𑀦𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸, 𑀧𑀼𑀩𑁆𑀩𑀪𑀸𑀯𑁂𑀢𑀺 𑀧𑀼𑀩𑁆𑀩𑀪𑀯𑀦𑁂 𑀫𑀸𑀲𑀲𑁆𑀲 𑀓𑀭𑀡𑀢𑁆𑀢𑀁, 𑀏𑀢𑁆𑀣 𑀢𑀼 𑀫𑀸𑀲𑁂𑀦 𑀓𑀭𑀡𑀪𑀽𑀢𑁂𑀦 𑀧𑀼𑀩𑁆𑀩𑀪𑀽𑀢𑀸𑀦𑀦𑁆𑀢𑀺 𑀅𑀢𑁆𑀣𑁄, 𑀢𑁂𑀦𑁂𑀯𑁂𑀢𑁆𑀣𑀸𑀧𑀺 𑀪𑀯𑀦𑁆𑀢𑀻𑀢𑀺 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁.

𑀘𑀲𑁆𑀲 𑀅𑀢𑁆𑀣𑁄 𑀘𑀢𑁆𑀣𑁄, 𑀲𑁄𑀬𑁂𑀯𑀸𑀢𑀺 𑀏𑀢𑁆𑀣 𑀲𑀫𑀸𑀲𑀲𑁆𑀲 𑀧𑀭𑀸𑀫𑀸𑀲𑁄, 𑀘𑀢𑁆𑀣𑁄 𑀏𑀢𑁆𑀣 𑀲𑀫𑁆𑀪𑀯𑀢𑀺 𑀓𑀺𑀦𑁆𑀢𑀼 𑀲𑀩𑁆𑀩𑀸𑀤𑀺 𑀦 𑀘𑀢𑁆𑀣𑀲𑀫𑀸𑀲𑀯𑀺𑀲𑀬𑁄𑀢𑀺 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁.

𑀓𑀺𑀁 𑀩𑀳𑀼𑀮𑀁𑀯𑀺𑀥𑀸𑀦𑀸 ‘𑀯𑀼𑀤𑁆𑀥𑁆𑀬𑀪𑀸𑀯𑁄’ [𑀑𑀢𑁆𑀣𑀸𑀪𑀸𑀯𑁄 (𑀧𑀜𑁆𑀘𑀺𑀓𑀸𑀬𑀁)] 𑀢𑀺 𑀧𑀸𑀞𑁂𑀦 𑀧𑀬𑁄𑀚𑀦𑀁 𑀬𑁂𑀦𑁂 𑀢𑀤𑀢𑁆𑀣𑀫𑁂𑀯 ¶ ‘‘𑀲𑀼𑀫𑁂𑀥𑀸𑀤𑀻𑀦𑀫𑀯𑀼𑀤𑁆𑀥𑀺 𑀘𑁂’’𑀢𑀺 𑀕𑀡𑀧𑀸𑀞𑁄 𑀓𑀢𑁄, 𑀳𑁂𑀫𑀲𑀤𑁆𑀤𑁂𑀦 𑀳𑁂𑀫𑀫𑀬𑀸𑀦𑀺 𑀕𑀳𑀺𑀢𑀸𑀦𑁆𑀬𑀪𑁂𑀤𑁂𑀦𑀢𑁆𑀬𑀸𑀳- ‘𑀳𑁂𑀫𑀫𑀬𑀸𑀦𑀻’𑀢𑀺, 𑀓𑀧𑁆𑀧𑀦 𑀲𑀤𑁆𑀤𑁂𑀦 𑀲𑀻𑀲𑀸𑀮𑀗𑁆𑀓𑀸𑀭𑀚𑀸𑀮𑀸𑀦𑀺 𑀕𑀬𑁆𑀳𑀦𑁆𑀢𑀺, 𑀢𑀸𑀦𑀺𑀬𑁂𑀯 𑀯𑀸𑀲𑀲𑀸𑀦𑀺 𑀧𑀝𑀸 𑀢𑀁𑀲𑀭𑀺𑀓𑁆𑀔𑀢𑀸𑀬, 𑀲𑀓𑀢𑁆𑀣𑁂𑀧𑀺 𑀬𑀣𑀸𑀕𑀫𑀫𑁆𑀪𑀯𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀩𑀸𑀡𑀸𑀤𑀻𑀲𑀼 𑀅𑀪𑀺𑀥𑁂𑀬𑁆𑀬𑁂𑀲𑀼 𑀫𑀦𑀸𑀤𑀻𑀲𑀼 𑀦 𑀧𑀝𑁆𑀞𑀻𑀬𑀦𑁆𑀢𑀻𑀢𑀺 𑀬𑁄𑀚𑀦𑀸, 𑀩𑀸𑀡𑀸𑀤𑀻𑀲𑀼𑀢𑀺 𑀩𑀸𑀡 𑀲𑀤𑁆𑀤𑀓𑁆𑀔𑀬𑀸𑀤𑀻𑀲𑀼, 𑀅𑀳𑀲𑀤𑁆𑀤𑀲𑁆𑀲 𑀫𑀦𑀸𑀤𑀺𑀓𑀸𑀭𑀺𑀬𑀸𑀲𑀫𑁆𑀪𑀯𑀸 𑀅𑀳𑀲𑀤𑁆𑀤𑁄 𑀫𑀦𑀸𑀤𑀻𑀲𑀼 𑀦 𑀤𑀝𑁆𑀞𑀩𑁆𑀩𑁄, 𑀭𑀳𑀲𑀻𑀢𑀺 𑀦𑀺𑀧𑀸𑀢𑀢𑁆𑀢𑀸 𑀇𑀓𑀸𑀭𑀲𑁆𑀲 𑀘 𑀅𑀲𑀩𑁆𑀪𑀯𑀸 𑀭𑀳𑀲𑀤𑁆𑀤𑁄 𑀘 𑀫𑀦𑀸𑀤𑀻𑀲𑀼 𑀦 𑀤𑀝𑁆𑀞𑀩𑁆𑀩𑁄𑀢𑀺 𑀲𑀚𑁆𑀛𑀸𑀳𑀸𑀭𑁄 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀇𑀓𑀸𑀭𑀲𑁆𑀲 𑀓𑀘𑁆𑀘𑀸𑀬𑀦𑁂 𑀲𑁆𑀫𑀺𑀦𑁄 𑀓𑀭𑀻𑀬𑀫𑀸𑀦𑀲𑁆𑀲 𑀇𑀓𑀸𑀭𑀸𑀤𑁂𑀲𑀲𑁆𑀲 𑀘, 𑀭𑀳𑀢𑀺𑀲𑀤𑁆𑀤𑀲𑁆𑀲 𑀦𑀺𑀧𑀸𑀢𑀢𑁆𑀢𑀁 𑀲𑀪𑀸𑀯𑀢𑁄 𑀧𑀓𑀸𑀲𑁂𑀢𑀼𑀁 ‘𑀭𑀳𑀲𑀻𑀢𑁆𑀬𑀸𑀤𑀺’𑀫𑀸𑀳, 𑀭𑀳𑁄𑀲𑀤𑁆𑀤𑁂𑀢𑀺 𑀏𑀢𑁆𑀣 𑀭𑀳𑀲𑀤𑁆𑀤𑁄𑀢𑀺 𑀧𑀸𑀞𑁄-𑀯𑀕𑀦𑁆𑀢𑀩𑁆𑀩𑁄, 𑀢𑁂𑀦𑀸𑀢𑀺 𑀬𑁂𑀦 𑀅𑀳𑀲𑀤𑁆𑀤𑀲𑁆𑀲 𑀫𑀦𑀸𑀤𑀺𑀓𑀸𑀭𑀺𑀬𑀸𑀲𑀫𑁆𑀪𑀯𑁄 𑀭𑀳𑀲𑀻𑀢𑀺𑀘 𑀦𑀺𑀧𑀸𑀢𑁄, 𑀢𑁂𑀦, 𑀇𑀳𑀫𑀦𑀸𑀤𑀻𑀲𑀼.

𑀕𑁂𑀢𑀺 𑀕𑀲𑀜𑁆𑀜𑁂 𑀧𑀭𑁂, 𑀓𑀼𑀢𑁄-𑀦𑀼𑀇𑀘𑁆𑀘𑀸𑀤𑁄 𑀪𑁄’𑀇𑀢𑀺 𑀩𑀳𑀼𑀯𑀘𑀦𑀦𑁆𑀢𑁄 𑀦𑀺𑀧𑀸𑀢𑁄, 𑀢𑀣𑀸𑀲𑀢𑀺 ‘𑀢𑀬𑁄𑀚𑀦𑀸’𑀢𑀺 𑀬𑀼𑀚𑁆𑀚𑀢𑀺, 𑀢𑀜𑁆𑀘 𑀦𑀺𑀧𑀸𑀢𑀢𑁆𑀢𑀁 𑀲𑀫𑀢𑁆𑀣𑁂𑀢𑀻𑀢𑀺 [𑀦𑀺𑀧𑀸𑀢𑀫𑀢𑁆𑀢𑁂𑀢𑀺] 𑀤𑀲𑁆𑀲𑁂𑀢𑀼𑀫𑀸𑀳- ‘𑀩𑀳𑀼𑀢𑁆𑀢𑁂’𑀘𑁆𑀘𑀸𑀤𑀺.

𑀲𑀢𑁆𑀢𑀫𑁆𑀬𑀦𑁆𑀢𑀁 𑀪𑀯𑀢𑀻𑀢𑀺 𑀲𑁂𑀲𑁄, 𑀦𑀦𑀼𑀘𑀦𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑁂 𑀦𑁆𑀢𑀦𑁆𑀢𑀼𑀧𑁆𑀧𑀘𑁆𑀘𑀬𑁄𑀯𑀸𑀯𑀲𑀻𑀬𑀢𑀺, 𑀦 𑀢𑀤𑀦𑁆𑀢𑀯𑀺𑀥𑀻𑀢𑀺 [𑀦𑁆𑀢𑀦𑁆𑀢𑀼𑀧𑁆𑀧𑀘𑁆𑀘𑀬𑁄𑀯 𑀦𑀸𑀯𑀲𑀻𑀬𑀢𑀺, 𑀢𑀤𑀦𑁆𑀢𑀯𑀺𑀥𑀺𑀧𑀻𑀢𑀺 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁] 𑀆𑀳- ‘𑀦𑁆𑀢𑀧𑁆𑀧𑀘𑁆𑀘𑀬 𑀲𑁆𑀲𑁂𑀯𑁂’𑀘𑁆𑀘𑀸𑀤𑀺, 𑀲𑀼𑀢𑀢𑁆𑀢𑀸𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑁂𑀦 𑀕𑀳𑀺𑀢𑀢𑁆𑀢𑀸 𑀧𑀘𑁆𑀘𑀓𑁆𑀔𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀅𑀦𑀼𑀫𑀺𑀢𑀲𑁆𑀲 ‘‘𑀯𑀺𑀥𑀺𑀩𑁆𑀩𑀺𑀲𑁂𑀲𑀦𑀦𑁆𑀢𑀲𑁆𑀲𑀸’’𑀢𑀺 (𑁧-𑁨𑁬) 𑀮𑀺𑀗𑁆𑀕𑀢𑁄 𑀢𑀤𑀦𑁆𑀢𑀲𑀗𑁆𑀔𑀸𑀢 𑀅𑀢𑁆𑀣𑀤𑀲𑁆𑀲𑀦𑀲𑀗𑁆𑀔𑀸𑀢𑀅𑀦𑀼𑀫𑀸𑀦𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀢𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀤𑀴𑁆𑀳𑁄 𑀥𑀫𑁆𑀫𑁄 𑀥𑀦𑀼 𑀅𑀲𑁆𑀲 𑀤𑀴𑁆𑀳𑀥𑀫𑁆𑀫𑀸. 𑀭𑀸𑀚𑀸𑀤𑀻𑀲𑁆𑀯𑀺𑀫𑀧𑁆𑀧𑀘𑁆𑀘𑀬𑁂 𑀧𑀞𑀺𑀢𑁂

𑀢𑀤𑀦𑁆𑀢𑁄 ¶ 𑀧𑀘𑁆𑀘𑀬𑀕𑁆𑀕𑀳𑀡 𑀧𑀭𑀺𑀪𑀸𑀲𑀸𑀬 𑀕𑀬𑁆𑀳𑀢𑀻 𑀢𑁆𑀬𑀸𑀳- ‘𑀇𑀫𑀺𑀦𑀸 𑀇𑀘𑁆𑀘𑀸𑀤𑀺.

𑀧𑀘𑁆𑀘𑀬𑀇𑀘𑁆𑀘𑀸𑀤𑀺𑀦𑀸 ‘‘𑀧𑀘𑁆𑀘𑀬𑀕𑁆𑀕𑀳𑀡𑁂 𑀬𑀲𑁆𑀫𑀸 𑀲𑁄 𑀯𑀺𑀳𑀺𑀢𑁄 𑀢𑀤𑀸𑀤𑀺𑀦𑁄 𑀢𑀤𑀦𑁆𑀢𑀲𑁆𑀲 𑀘 𑀕𑀳𑀡’’𑀦𑁆𑀢𑀺 𑀜𑀸𑀬𑀁 𑀤𑀲𑁆𑀲𑁂𑀢𑀺, 𑀢𑀢𑁆𑀣 𑀬𑀢𑁄 𑀯𑀺𑀳𑀺𑀢𑁄 𑀢𑀁 𑀯𑀺𑀦𑀸 𑀦 𑀪𑀯𑀢𑀺 𑀧𑀘𑁆𑀘𑀬𑁄𑀢𑁆𑀬𑀦𑁂𑀦 𑀜𑀸𑀬𑁂𑀦 𑀧𑀢𑁆𑀢𑁄𑀬𑁂𑀯𑀸𑀢𑁆𑀣𑁄 𑀆𑀔𑁆𑀬𑀸𑀬𑀢𑁂 ‘𑀧𑀘𑁆𑀘𑀬𑀕𑁆𑀕𑀳𑀡𑁂 𑀬𑀲𑁆𑀫𑀸 𑀲𑁄 𑀯𑀺𑀳𑀺𑀢𑁄, 𑀢𑀤𑀸𑀤𑀺𑀦𑁄 𑀕𑀳𑀡’𑀦𑁆𑀢𑀺, ‘‘𑀯𑀺𑀥𑀺𑀩𑁆𑀩𑀺𑀲𑁂𑀲𑀦𑀦𑁆𑀢𑀲𑁆𑀲𑁂’’𑀢𑀺 𑀢𑀤𑀦𑁆𑀢𑀕𑁆𑀕𑀳𑀡𑀁𑀢𑁆𑀬𑀸𑀔𑁆𑀬𑀸𑀬𑀢𑁂 ‘𑀢𑀤𑀦𑁆𑀢𑀲𑁆𑀲 𑀘 𑀕𑀳𑀡’𑀦𑁆𑀢𑀺, 𑀲𑁄 𑀧𑀓𑀢𑀺𑀯𑀺𑀲𑁂𑀲𑁄 𑀆𑀤𑀺 𑀬𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀲𑁄 𑀢𑀤𑀸𑀤𑀺, 𑀲𑁄 𑀧𑀘𑁆𑀘𑀬𑁄-𑀦𑁆𑀢𑁂 𑀬𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀲𑁄 𑀢𑀤𑀦𑁆𑀢𑁄, 𑀢𑀸𑀤𑀺𑀲𑀲𑁆𑀲 𑀢𑀤𑀸𑀤𑀺𑀢𑀤𑀦𑁆𑀢𑀲𑀫𑀼𑀤𑀸𑀬𑀯𑀺𑀲𑁂𑀲𑀲𑁆𑀲 𑀕𑀳𑀡𑀁, 𑀦 𑀢𑀼 𑀢𑀤𑀦𑁆𑀢𑀫𑀢𑁆𑀢𑀲𑁆𑀲𑁂𑀢𑁆𑀬𑀢𑁆𑀣𑁄, 𑀇𑀳 𑀢𑀼 𑀢𑀤𑀦𑁆𑀢𑀕𑁆𑀕𑀳𑀡𑀫𑁂𑀯𑀸𑀦𑀼𑀭𑀽𑀧𑀦𑁆𑀢𑀺’ 𑀤𑀲𑁆𑀲𑁂𑀢𑀼𑀫𑀸𑀳-‘‘𑀓𑀢𑁆𑀢𑀭𑀺 𑀮𑁆𑀢𑀼𑀡𑀓𑀸’’𑀢𑀺 𑀇𑀫𑀺𑀦𑀸 𑀢𑁆𑀬𑀸𑀤𑀺, 𑀢𑀤𑀸𑀤𑀺𑀢𑀤𑀦𑁆𑀢 𑀲𑀫𑀼𑀤𑀸𑀬𑀲𑁆𑀲 𑀢𑀼 𑀕𑀳𑀡𑁂 𑀨𑀮𑀁 ‘𑀩𑁆𑀬𑀚𑀺𑀕𑀺𑀲𑀻’𑀢𑀺𑀆𑀤𑀻𑀲𑀼 𑀤𑀝𑁆𑀞𑀩𑁆𑀩𑀁, 𑀢𑀜𑁆𑀘 ‘‘𑀢𑀼𑀁𑀲𑁆𑀫𑀸 𑀮𑁄𑀧𑁄𑀘𑀺𑀘𑁆𑀙𑀸𑀬𑀁 𑀢𑁂’’𑀢𑀺 (𑁫-𑁪) 𑀲𑀼𑀢𑁆𑀢𑁂 𑀲𑀬𑀫𑁂𑀯 𑀯𑀓𑁆𑀔𑀢𑀺.

𑀓𑀘𑁆𑀘𑀸𑀬𑀦𑁂 ‘‘𑀲𑀓𑀫𑀦𑁆𑀥𑀸𑀢𑀸𑀤𑀻𑀦𑀜𑁆𑀘𑁂’’𑀢𑀺 (𑁨-𑁩-𑁪𑁪) 𑀲𑀼𑀢𑁆𑀢𑀺𑀢𑀁, 𑀲𑁄𑀧𑀺 𑀮𑁆𑀢𑁆𑀯𑀦𑁆𑀢𑁄𑀬𑁂𑀯𑀸𑀢𑁆𑀬𑀪𑀺𑀫𑀢𑀲𑀺𑀤𑁆𑀥𑀻𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀺𑀬𑀫𑀼𑀤𑀸𑀳𑀝𑀁𑀢𑁆𑀬𑀸𑀳- ‘𑀲𑀓𑀫𑀦𑁆𑀥𑀸𑀢𑀼’𑀇𑀘𑁆𑀘𑀸𑀤𑀺, 𑀮𑁆𑀢𑁆𑀯𑀦𑁆𑀢𑁄 𑀫𑀦𑁆𑀥𑀸𑀢𑀼𑀲𑀤𑁆𑀤𑁄 𑀅𑀢𑁆𑀣𑀻𑀢𑀺 ‘𑀲𑀓𑀫𑀦𑁆𑀥𑀸𑀢𑀼’ 𑀲𑀤𑁆𑀤𑁄𑀧𑀺 𑀮𑁆𑀢𑁆𑀯𑀦𑁆𑀢𑁄𑀢𑀺 𑀲𑀚𑁆𑀛𑀸𑀳𑀸𑀭𑁄 𑀧𑀤𑀲𑀫𑁆𑀩𑀦𑁆𑀥𑁄 𑀤𑀝𑁆𑀞𑀩𑁆𑀩𑁄, 𑀢𑀢𑁄𑀧𑀻𑀢𑀺 𑀦 𑀓𑁂𑀯𑀮𑀁 𑀓𑀢𑁆𑀢𑀼𑀢𑁄𑀯, 𑀫𑀦𑁆𑀥𑀸𑀢𑀼𑀲𑀤𑁆𑀤𑀲𑁆𑀲 𑀮𑁆𑀢𑁆𑀯𑀦𑁆𑀢𑀢𑀁 𑀲𑀸𑀥𑁂𑀢𑁆𑀯𑀸 𑀲𑀓𑀫𑀦𑁆𑀥𑀸𑀢𑀼𑀲𑀤𑁆𑀤𑀫𑁆𑀧𑀝𑀺𑀧𑀸𑀤𑁂𑀢𑀼𑀁 ‘𑀲𑀩𑁆𑀩𑁂𑀲’𑀦𑁆𑀢𑀺𑀆𑀤𑀺𑀫𑀸𑀳.

𑀲𑀗𑁆𑀔𑁆𑀬𑀸𑀲𑀤𑁆𑀤𑁄 𑀬𑀤𑀻𑀧𑀺 𑀲𑀗𑁆𑀔𑁆𑀬𑀸𑀦𑁂 𑀯𑀢𑁆𑀢𑀢𑁂, 𑀢𑀣𑀸𑀧𑀺 𑀲𑀗𑁆𑀔𑁆𑀬𑀸𑀦𑀤𑁆𑀯𑀸𑀭𑁂𑀦𑀺𑀥𑀲𑀗𑁆𑀔𑁆𑀬𑁂𑀬𑁆𑀬𑁂 𑀯𑀢𑁆𑀢𑀢𑀻𑀢𑁆𑀬𑀸𑀳-‘𑀘𑀼𑀤𑁆𑀤𑀲𑀳𑀺 𑀲𑀗𑁆𑀔𑁆𑀬𑀸𑀳𑀻’𑀢𑀺 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁, 𑀘𑀼𑀤𑁆𑀤𑀲𑀲𑀤𑁆𑀤𑀯𑀘𑀦𑀻𑀬𑀸𑀯 𑀧𑀜𑁆𑀘𑀸𑀤𑀺𑀲𑀗𑁆𑀔𑁆𑀬𑀸, 𑀬𑀢𑁄 𑀲𑀗𑁆𑀔𑁆𑀬𑀸𑀲𑀤𑁆𑀤𑁄 𑀦𑁂𑀳 𑀧𑀭𑀺𑀕𑁆𑀕𑀳𑀺𑀢𑁄𑀢𑀺.

𑀤𑀺𑀯𑀲𑀢𑁄 𑀲𑁆𑀫𑀺𑀦𑁄 𑀝𑀺𑀫𑁆𑀳𑀺 𑀧𑀼𑀩𑁆𑀩𑀲𑀭𑀮𑁄𑀧𑁂 𑀤𑀺𑀯𑀺.

𑀤𑀼𑀢𑀺𑀬𑀸𑀕𑁆𑀕𑀳𑀡𑁂𑀦𑀸𑀢𑀺 ¶ ‘𑀤𑀼𑀢𑀺𑀬𑀸𑀬𑁄𑀲𑁆𑀲 𑀦𑁂 𑀯𑀸’𑀢𑁆𑀬𑁂𑀯𑀁 𑀲𑀼𑀢𑁆𑀢 𑀭𑀘𑀦𑀸𑀬𑀁 𑀤𑀼𑀢𑀺𑀬𑀸𑀕𑁆𑀕𑀳𑀡𑁂𑀦.

𑀏𑀦𑀸𑀤𑁂𑀲𑀲𑁆𑀲𑀸𑀲𑀫𑁆𑀪𑀯𑀸𑀢𑀺 𑀦𑀸𑀲𑁆𑀲 𑀲𑁆𑀫𑀸𑀤𑁂𑀲𑀢𑁆𑀢𑀸.

𑀉𑀪𑀬𑀯𑀺𑀓𑀧𑁆𑀧𑁄𑀢𑀺 𑀲𑀫𑀸𑀲𑀸𑀲𑀫𑀸𑀲𑀧𑀓𑁆𑀔𑀤𑁆𑀯𑀬𑀯𑀺𑀥𑀸𑀦𑀁, 𑀓𑀘𑁆𑀘𑀸𑀬𑀦𑀯𑀼𑀢𑁆𑀢𑀺 𑀓𑀸𑀭𑀲𑁆𑀲 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀫𑀸𑀯𑀻𑀓𑀢𑁆𑀢𑀼𑀫𑀸𑀳-‘𑀓𑀘𑁆𑀘𑀸𑀬𑀦𑁂’𑀘𑁆𑀘𑀸𑀤𑀺, 𑀇𑀢𑁆𑀣𑀺𑀧𑀼𑀫𑀦𑁆𑀦𑀧𑀼𑀁𑀲𑀓 𑀲𑀫𑀽𑀳𑁄𑀢𑀺 𑀏𑀢𑁆𑀣𑀸𑀬𑀦𑁆𑀢𑁂𑀲𑀁 𑀲𑀸𑀥𑀦𑀓𑁆𑀓𑀫𑁄 ‘𑀤𑁆𑀯𑀦𑁆𑀤𑀙𑀝𑁆𑀞𑀻𑀳𑀺 𑀲𑀫𑀸𑀲𑁂 𑀇𑀢𑁆𑀣𑀺𑀧𑀼𑀫𑀦𑀧𑀼𑀁𑀲𑀓𑀲𑀫𑀽𑀳𑁄’𑀢𑀺 𑀞𑀺𑀢𑁂 ‘‘𑀲𑀫𑀸𑀲𑁂 𑀘 𑀯𑀺𑀪𑀸𑀲𑀸’’𑀢𑀺 (𑁨-𑁨-𑁩𑁫) 𑀧𑀼𑀫𑀦𑁆𑀢𑀲𑁆𑀲 𑀅𑀫𑀸𑀤𑁂𑀲𑁂 ‘‘𑀯𑀕𑁆𑀕𑀦𑁆𑀢𑀁 𑀯𑀸 𑀯𑀕𑁆𑀕𑁂’’𑀢𑀺 (𑁧-𑁪𑁨) 𑀦𑀺𑀕𑁆𑀕𑀳𑀻𑀢𑀲𑁆𑀲 𑀯𑀕𑁆𑀕𑀦𑁆𑀢𑁄.

𑀓𑀫𑁆𑀫𑀸𑀤𑀺𑀢𑁆𑀢𑀸 𑀏𑀦𑀲𑁆𑀲𑀸𑀧𑀺 𑀅𑀪𑀸𑀯𑀧𑀓𑁆𑀔𑁂𑀢𑀺 ‘‘𑀦𑀸 𑀲𑁆𑀲𑁂 𑀦𑁄’’𑀢𑀺 (𑁨-𑁮𑁦) 𑀓𑀫𑁆𑀫𑀸𑀤𑀺𑀢𑁄 𑀦𑀸𑀲𑁆𑀲 𑀏𑀦𑀸𑀤𑁂𑀲𑀓𑀭𑀡𑀢𑁄 𑀯𑀼𑀢𑁆𑀢𑀁.

𑀆𑀤𑁂𑀲𑁄 𑀓𑀣𑀦𑀁, 𑀅𑀦𑁆𑀯𑀸𑀤𑁂𑀲𑁄-𑀦𑀼𑀓𑀣𑀦𑀫𑀺𑀘𑁆𑀘𑀸𑀳-‘𑀅𑀦𑁆𑀯𑀸𑀤𑁂𑀲𑁄 𑀓𑀣𑀺𑀢𑀸𑀦𑀼𑀓𑀣𑀦’𑀫𑀻𑀢𑀺, 𑀓𑀣𑀺𑀢𑀲𑁆𑀲𑀸𑀦𑀼𑀓𑀣𑀦𑀁 𑀓𑀣𑀺𑀢𑀸𑀦𑀼𑀓𑀣𑀦𑀁, 𑀅𑀦𑁂𑀦 𑀘 𑀦𑁂𑀳 𑀧𑀘𑁆𑀙𑀸 𑀉𑀘𑁆𑀘𑀸𑀭𑀡𑀫𑀢𑁆𑀢𑀫𑀦𑁆𑀯𑀸𑀤𑁂𑀲𑁄, 𑀓𑀺𑀜𑁆𑀘𑀭𑀳𑀺 𑀏𑀓𑀲𑁆𑀲𑀸𑀪𑀺𑀥𑁂𑀬𑁆𑀬𑀲𑁆𑀲 𑀧𑀼𑀩𑁆𑀩𑀲𑀤𑁆𑀤𑁂𑀦 𑀧𑀝𑀺𑀧𑀸𑀤𑀺𑀢𑀲𑁆𑀲 𑀤𑀼𑀢𑀺𑀬𑀫𑁆𑀧𑀢𑀺𑀧𑀸𑀤𑀦𑀫𑀦𑁆𑀯𑀸𑀤𑁂𑀲𑁄𑀢𑀺 𑀯𑀤𑀢𑀺, 𑀢𑁂𑀦𑁂𑀳 𑀦 𑀪𑀯𑀢𑀺 ‘𑀤𑁂𑀯𑀤𑀢𑁆𑀢𑀁 𑀪𑁄𑀚𑀬, 𑀇𑀫𑀜𑁆𑀘 𑀬𑀜𑁆𑀜𑀤𑀢𑁆𑀢’𑀦𑁆𑀢𑀺, 𑀓𑁂𑀦𑀘𑀺 𑀯𑀺𑀲𑁂𑀲𑀦𑁆𑀢𑀭𑀬𑁄𑀕𑁂𑀦 𑀓𑀣𑀺𑀢𑀲𑁆𑀲𑀸𑀦𑀼𑀓𑀣𑀦𑀁 𑀅𑀦𑁆𑀯𑀸𑀤𑁂𑀲𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀫𑁆𑀧𑀦 𑀯𑀺𑀲𑁂𑀲𑀦𑁆𑀢𑀭𑀬𑁄𑀕𑁄 𑀕𑀫𑁆𑀬𑀢𑁂𑀘𑁆𑀘𑀸𑀳- ‘𑀲𑀸𑀫𑀢𑁆𑀣𑀺𑀬𑀸’𑀢𑀺, 𑀓𑁂𑀦𑀘𑀺 𑀯𑀺𑀲𑁂𑀲𑁂𑀦𑀸𑀬𑁄𑀕𑁂 𑀯𑀼𑀢𑁆𑀢𑀲𑁆𑀲𑁂𑀯 𑀧𑀼𑀦𑀩𑁆𑀩𑀘𑀦𑀸𑀦𑀼𑀧𑀧𑀚𑁆𑀚𑀦𑀁 𑀲𑀸𑀫𑀢𑁆𑀣𑀺𑀬𑀁, 𑀢𑁂𑀦𑁂𑀯𑀸𑀳- ‘𑀅𑀜𑁆𑀜𑀣𑁂’𑀘𑁆𑀘𑀸𑀤𑀺.

𑀦𑀯𑀺𑀭𑀼𑀚𑁆𑀛𑀢𑀻𑀢𑀺 𑀇𑀫𑀺𑀦𑀸 ‘‘𑀇𑀢𑁆𑀣𑀺𑀬𑀫𑀢𑁆𑀯𑀸’’𑀢𑀺 (𑁩-𑁨𑁬) 𑀲𑀸𑀫𑀜𑁆𑀜𑁂𑀦 𑀯𑀺𑀥𑀸𑀦𑀢𑁄 𑀲𑁆𑀬𑀸𑀤𑁆𑀬𑀦𑁆𑀢𑀫𑀚𑁆𑀛𑁂𑀧𑀺 𑀇𑀢𑁆𑀣𑀺𑀬𑀫𑁆𑀧𑀘𑁆𑀘𑀬𑁄 𑀦𑀯𑀺𑀭𑀼𑀚𑁆𑀛𑀢𑀻𑀢𑀺 𑀯𑀤𑀢𑀺.

𑀦𑀦𑀼 ¶ 𑀬𑀣𑀸𑀓𑁆𑀓𑀫𑀁 𑀦𑀁𑀯𑀺𑀪𑀢𑁆𑀢𑀺𑀓𑁆𑀓𑀫𑁂𑀦𑀸𑀧𑀺 𑀲𑀫𑁆𑀪𑀯𑀢𑀺, 𑀢𑀣𑀸𑀲𑀢𑀺 ‘𑀤𑁆𑀯𑀺𑀦𑁆𑀦𑀁 𑀲𑀤𑁆𑀤𑀸𑀦𑀁 𑀤𑁆𑀯𑁂𑀆𑀤𑁂𑀲𑀸 𑀓𑀫𑁂𑀦𑁂’𑀘𑁆𑀘𑁂𑀯 𑀓𑀲𑁆𑀫𑀸 𑀯𑀼𑀢𑁆𑀢𑀁 𑀢𑁆𑀬𑀸𑀲𑀗𑁆𑀓𑀺𑀬𑀸𑀳 ‘𑀦 𑀦𑀁𑀯𑀺𑀪𑀢𑁆𑀢𑀺𑀓𑁆𑀓𑀫𑁂𑀦𑀸𑀧𑀻’𑀢𑀺. 𑀓𑀸𑀭𑀡𑀫𑀸𑀳- ‘𑀢𑀲𑁆𑀲𑀸𑀦𑀧𑁂𑀓𑁆𑀔𑀺𑀢𑀢𑁆𑀢𑀸’𑀢𑀺, 𑀇𑀫𑀺𑀦𑀸 𑀦𑀺𑀲𑁆𑀲𑀬𑀓𑀭𑀡𑀫𑁂𑀓𑀸 𑀲𑀢𑁆𑀣𑀺𑀬𑀸 𑀬𑀼𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀅𑀧𑁂𑀓𑁆𑀔𑀺𑀢𑁂 𑀓𑀣𑀁 𑀪𑀯𑁂𑀬𑁆𑀬𑀸 𑀢𑁆𑀬𑀸𑀳- ‘𑀬𑀤𑀺 𑀳𑀺’𑀘𑁆𑀘𑀸𑀤𑀺, 𑀅𑀧𑁂𑀓𑁆𑀔𑀺𑀢𑀺 𑀬𑀣𑀸𑀓𑁆𑀓𑀫𑀁, 𑀏𑀯𑀫𑀜𑁆𑀜𑀢𑁂 ‘‘𑀓𑀺𑀜𑁆𑀘𑀸𑀧𑀺 𑀚𑀸𑀢𑀺𑀦𑀺𑀤𑁆𑀤𑁂𑀲𑁂𑀦 𑀤𑁆𑀯𑁂𑀧𑀺 𑀦𑀁 𑀭𑀽𑀧𑀸𑀦𑀺 𑀕𑀬𑁆𑀳𑀦𑁆𑀢𑀺, 𑀢𑀣𑀸𑀧𑀺 ‘𑀢𑀺𑀘𑀢𑀼𑀦𑁆𑀦’𑀦𑁆𑀢𑀺 𑀯𑀺𑀬 𑀩𑁆𑀬𑀢𑁆𑀢𑀺𑀦𑀺𑀤𑁆𑀤𑁂𑀲𑁄𑀯 𑀬𑀣𑀸𑀓𑁆𑀓𑀫𑁄𑀧𑀓𑀸𑀭𑀻𑀬𑀫𑀸𑀦𑀸𑀦, 𑀫𑀦𑀼𑀤𑁂𑀲𑀲𑁆𑀲 𑀢𑀣𑀸 𑀯𑀺𑀜𑁆𑀜𑀬𑀫𑀸𑀦𑀢𑁆𑀢𑀸𑀢𑀺 𑀦𑀁𑀲𑀼𑀇𑀘𑁆𑀘𑁂𑀯 𑀯𑀤𑁂𑀬𑁆𑀬, 𑀦 𑀢𑀣𑀸 𑀯𑀼𑀢𑁆𑀢𑀁, 𑀢𑀢𑁄-𑀯𑀲𑀻𑀬𑀢𑁂 ‘𑀦 𑀬𑀣𑀸𑀓𑁆𑀓𑀫𑀫𑁂𑀢𑁆𑀣𑀸𑀧𑁂𑀓𑁆𑀔𑀺𑀢’𑀦𑁆𑀢𑀺.

𑀦𑀦𑀼 𑀦𑁆𑀢𑀦𑁆𑀢𑀽𑀦𑀦𑁆𑀢𑀺 𑀢𑀤𑀦𑁆𑀢𑀸 𑀕𑀬𑁆𑀳𑀦𑁆𑀢𑀺 𑀧𑀘𑁆𑀘𑀬𑀕𑁆𑀕𑀳𑀡𑀧𑀭𑀺𑀪𑀸𑀲𑀸𑀬, 𑀢𑀣𑀸 𑀲𑀢𑀺 𑀓𑀸𑀭𑀺𑀬𑀺𑀢𑁆𑀢𑁂𑀦 𑀢𑀤𑀦𑁆𑀢𑀸𑀯 𑀕𑀬𑁆𑀳𑀦𑁆𑀢𑀺 𑀓𑀣𑀁 𑀦𑁆𑀢𑀦𑁆𑀢𑀽𑀬𑁂𑀯𑀸 𑀢𑁆𑀬𑀸𑀲𑀗𑁆𑀓𑀺𑀬𑀸𑀳- 𑀢𑁂𑀬𑁂𑀯𑁂’𑀘𑁆𑀘𑀸𑀤𑀺, 𑀧𑀘𑁆𑀘𑀓𑁆𑀔𑀢𑀸𑀬𑀸𑀢𑀺 [𑀲𑀼𑀢𑀣𑀸𑀬-𑀧𑀜𑁆𑀘𑀺𑀓𑀸] 𑀲𑀼𑀢𑀢𑁆𑀢𑀸, 𑀩𑀮𑀯𑀢𑁆𑀢𑀸 𑀢𑁂𑀬𑁂𑀯 𑀓𑀸𑀭𑀺𑀬𑀺𑀢𑁆𑀢𑁂𑀦 𑀕𑀬𑁆𑀳𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀦 𑀢𑀤𑀦𑁆𑀢𑀸, 𑀤𑀼𑀩𑁆𑀩𑀮𑀸𑀢𑀺 𑀩𑁆𑀬𑀢𑀺𑀭𑁂𑀓𑀁 𑀯𑀢𑁆𑀯𑀸 𑀤𑀼𑀩𑁆𑀩𑀮𑀢𑁆𑀢𑁂 𑀓𑀸𑀭𑀡𑀫𑀸𑀳- ‘𑀅𑀦𑀼𑀫𑀺𑀢𑀢𑁆𑀢𑀸’𑀢𑀺, 𑀅𑀦𑀼𑀫𑀺𑀢𑀢𑁆𑀢𑀁 𑀲𑀸𑀥𑁂𑀢𑀼𑀫𑀸𑀳- ‘𑀅𑀦𑀼𑀫𑀺𑀢𑀸𑀳𑀺’𑀘𑁆𑀘𑀸𑀤𑀺, 𑀪𑀯𑀺𑀪𑀢𑁆𑀢𑀻𑀦𑀦𑁆𑀢𑀺 𑀧𑀸𑀞𑁄 𑀬𑀼𑀢𑁆𑀢 𑀢𑀭𑁄, 𑀢𑀲𑁆𑀲 𑀅𑀦𑁆𑀢𑀸𑀤𑁂𑀲𑁂 𑀅𑀓𑀸𑀭𑁂𑀢𑀺 𑀲𑀫𑁆𑀩𑀦𑁆𑀥𑁄.

𑀬𑁄𑀫𑁆𑀳𑀻𑀢𑀺 𑀲𑀢𑁆𑀢𑀫𑁆𑀬𑀦𑁆𑀢𑀚𑀸𑀢𑀺𑀦𑀺𑀤𑁆𑀤𑁂𑀲𑀸 𑀮𑀩𑁆𑀪𑀫𑀸𑀦𑀢𑁆𑀣𑀯𑀲𑁂𑀦 ‘𑀧𑀘𑁆𑀘𑁂𑀓’𑀦𑁆𑀢𑀺 𑀯𑀼𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀢𑁂𑀦𑁂𑀯𑀸𑀳 𑀧𑀜𑁆𑀘𑀺𑀓𑀸𑀬𑀁- ‘𑀓𑀣𑀫𑀺𑀤𑀫𑀯𑀲𑀻𑀬𑀢𑁂 𑀬𑁄𑀫𑁆𑀳𑀻𑀢𑀺 𑀦𑀺𑀤𑁆𑀤𑁂𑀲𑀸’𑀢𑀺, 𑀢𑀲𑁆𑀲𑀤𑀸𑀦𑀺 𑀅𑀢𑁆𑀣𑀫𑁆𑀧𑀓𑀸𑀲𑁂𑀢𑀼𑀁 ‘𑀧𑀘𑁆𑀘𑁂𑀓𑀦𑁆𑀢𑀺 𑀏𑀓𑁂𑀓𑀲𑁆𑀫𑀺’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀓𑁂𑀓𑀲𑁆𑀫𑀺𑀁 𑀬𑁄𑀫𑁆𑀳𑀺 𑀤𑁆𑀯𑀺𑀦𑁆𑀦𑀁 𑀆𑀤𑁂𑀲𑀸𑀦𑀁 𑀲𑀫𑁆𑀪𑀯𑀸 𑀆𑀤𑁂𑀲𑀻𑀦𑀫𑁆𑀧𑀺 𑀩𑀳𑀼𑀢𑁆𑀢𑀲𑀫𑁆𑀪𑀯𑁄𑀢𑀺 𑀲𑀼𑀢𑁆𑀢𑁂 ‘𑀤𑁆𑀯𑀺𑀦𑁆𑀦’𑀦𑁆𑀢𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄, 𑀯𑀼𑀢𑁆𑀢𑀺𑀬𑀫𑁆𑀧𑀦 𑀧𑀘𑁆𑀘𑁂𑀓𑀁 𑀬𑁄𑀫𑁆𑀳𑀺 𑀧𑀘𑁆𑀘𑁂𑀓𑀁 𑀤𑁆𑀯𑀺𑀲𑀤𑁆𑀤𑀲𑀫𑁆𑀪𑀯𑀸 ‘𑀤𑁆𑀯𑀺𑀲𑁆𑀲𑀸’𑀢𑀺 𑀯𑀼𑀢𑁆𑀢𑀁, 𑀤𑀼𑀢𑀺𑀬𑀸𑀬𑀫𑁆𑀧𑀺 𑀤𑀼𑀯𑁂 𑀤𑁆𑀯𑁂.

𑀧𑀓𑀢𑀯𑀲𑁂𑀦𑀸𑀢𑀺 ¶ 𑀢𑀼𑀫𑁆𑀳𑀸𑀫𑁆𑀳𑀸𑀦𑀫𑀸𑀤𑁂𑀲𑀸𑀦𑀫𑀥𑀺𑀓𑀢𑀯𑀲𑁂𑀦, 𑀓𑀫𑀫𑀦𑀢𑀺𑀓𑁆𑀓𑀫𑁆𑀫 𑀦 𑀪𑀯𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀓𑀘𑁆𑀘𑀸𑀬𑀦𑀸𑀘𑀭𑀺𑀬𑁄 𑀢𑀼𑀫𑁆𑀳𑀸𑀫𑁆𑀳𑁂𑀳𑀺 𑀧𑀭𑀸𑀬 𑀘𑀢𑀼𑀢𑁆𑀣𑀻 𑀙𑀝𑁆𑀞𑀻 𑀲𑀯𑀺𑀪𑀢𑁆𑀢𑀺𑀬𑀸 ‘‘𑀲𑀲𑁆𑀲𑀁’’𑀢𑀺 (𑁨-𑁩-𑁩) 𑀲𑀼𑀢𑁆𑀢𑁂𑀦 𑀅𑀫𑀸𑀤𑁂𑀲𑀁 𑀯𑀺𑀥𑀸𑀬 ‘𑀢𑀼𑀫𑁆𑀳𑀁 𑀅𑀫𑁆𑀳’𑀦𑁆𑀢𑀺 𑀩𑀳𑀼𑀯𑀘𑀦𑀭𑀽𑀧𑀸𑀦𑀺 𑀲𑀸𑀥𑁂𑀢𑀺… 𑀏𑀓𑀲𑁆𑀫𑀺𑀫𑁆𑀧𑀺 𑀅𑀢𑁆𑀢𑀦𑀺 𑀕𑀼𑀭𑀼𑀆𑀤𑀺𑀓𑁂 𑀘 𑀕𑀸𑀭𑀯 𑀯𑀲𑁂𑀦 𑀩𑀳𑀼𑀯𑀘𑀦𑀭𑀽𑀧𑀤𑀲𑁆𑀲𑀦𑀢𑁄𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-𑀢𑀼𑀫𑁆𑀳𑀁 𑀅𑀫𑁆𑀳’𑀦𑁆𑀢𑀺𑀆𑀤𑀺, 𑀢𑀲𑁆𑀲𑀸𑀬𑀼𑀢𑁆𑀢𑀢𑁆𑀢𑀸 ‘𑀢𑀫𑀬𑀼𑀢𑁆𑀢’𑀦𑁆𑀢𑀺 𑀯𑀢𑁆𑀯𑀸 𑀅𑀬𑀼𑀢𑁆𑀢𑀢𑀁 𑀲𑀸𑀥𑁂𑀢𑀺 ‘𑀏𑀯𑀁 𑀳𑀺’𑀘𑁆𑀘𑀸𑀤𑀺𑀦𑀸, 𑀇𑀫𑀲𑁆𑀫𑀺𑀫𑁆𑀧𑀦 𑀲𑀢𑁆𑀣𑁂 𑀏𑀓𑀲𑁆𑀫𑀺𑀫𑁆𑀧𑀺 𑀲𑀩𑁆𑀩𑀣𑀸 𑀩𑀳𑀼𑀯𑀘𑀦 𑀭𑀽𑀧𑀲𑀸𑀥𑀦𑀓𑁆𑀓𑀫𑀁 𑀤𑀲𑁆𑀲𑁂𑀢𑀼𑀁 ‘𑀇𑀥 𑀧𑀦𑀸’𑀢𑀺𑀆𑀤𑀺𑀫𑀸𑀭𑀤𑁆𑀥𑀁.

𑀦𑁂𑀦𑀸𑀢𑀺 𑀦𑀓𑀸𑀭𑁂𑀦, 𑀧𑀤𑀲𑀜𑁆𑀜𑀸𑀯𑀺𑀥𑀸𑀬 𑀓𑀯𑀘𑀦𑀸𑀪𑀸𑀯𑁂𑀧𑀻𑀢𑀺 𑀧𑀸𑀡𑀺𑀦𑀺 𑀬𑀸𑀦𑀫𑀺𑀯 𑀲𑁆𑀬𑀸𑀤𑀺𑀢𑁆𑀬𑀸𑀤𑁆𑀬𑀦𑁆𑀢𑀸𑀦𑀁 𑀧𑀤𑀲𑀜𑁆𑀜𑀸𑀯𑀺𑀥𑀸𑀬𑀓𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀪𑀸𑀯𑁂𑀧𑀺, 𑀅𑀦𑁆𑀯𑀢𑁆𑀣𑀯𑀲𑁂𑀦 𑀧𑀤𑀦𑁆𑀢𑀺 𑀕𑀬𑁆𑀳𑀫𑀸𑀦𑁂 𑀅𑀢𑀺𑀧𑁆𑀧𑀲𑀗𑁆𑀕𑁄𑀧𑀺 𑀲𑀺𑀬𑀸𑀢𑀺 𑀆𑀳-‘𑀭𑀼𑀴𑁆𑀳𑀺𑀬𑀸𑀯𑀸𑀢𑀺𑀧𑁆𑀧𑀲𑀗𑁆𑀕𑀸 𑀪𑀸𑀯𑁄’𑀢𑀺, 𑀆𑀔𑁆𑀬𑀸𑀢𑀁 𑀲𑀸𑀩𑁆𑀬𑀬𑀓𑀸𑀭𑀓 𑀯𑀺𑀲𑁂𑀲𑀦𑀁 𑀯𑀸𑀓𑁆𑀬𑀦𑁆𑀢𑀺 𑀓𑁂𑀘𑀺, 𑀏𑀓𑀸𑀔𑁆𑀬𑀸𑀢𑀺𑀓𑀁 𑀯𑀸𑀓𑁆𑀬𑀦𑁆𑀢𑁆𑀬𑀧𑀭𑁂, 𑀢𑀁 𑀲𑀩𑁆𑀩𑀁 𑀏𑀓𑀢𑁄 𑀲𑀗𑁆𑀕𑀳𑁂𑀢𑁆𑀯𑀸 ‘𑀧𑀤𑀲𑀫𑀽𑀳𑁄 𑀯𑀸𑀓𑁆𑀬’𑀦𑁆𑀢𑀺 𑀯𑀼𑀢𑁆𑀢𑀺𑀓𑀸𑀭𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀲𑀸𑀩𑁆𑀬𑀬𑁂’𑀘𑁆𑀘𑀸𑀤𑀺, 𑀆𑀔𑁆𑀬𑀸𑀢𑀁 𑀢𑁆𑀬𑀸𑀤𑁆𑀬𑀦𑁆𑀢𑀫𑀸𑀳𑀼, 𑀅𑀩𑁆𑀬𑀬𑀫𑀲𑀗𑁆𑀔𑁆𑀬𑀁, 𑀆𑀔𑁆𑀬𑀸𑀢𑀁 𑀲𑀸𑀩𑁆𑀬𑀬𑀁 𑀲𑀓𑀸𑀭𑀓𑀁 𑀲𑀯𑀺𑀲𑁂𑀲𑀦𑀜𑁆𑀘 𑀯𑀸𑀓𑁆𑀬𑁂𑀲𑀜𑁆𑀜𑀁 𑀪𑀯𑀢𑀻𑀢𑁆𑀬𑀢𑁆𑀣𑁄, 𑀯𑀺𑀲𑁂𑀲𑀦𑀦𑁆𑀢𑀺 𑀓𑀸𑀭𑀓𑀯𑀺𑀲𑁂𑀲𑀦𑀲𑁆𑀲 𑀓𑀺𑀭𑀺𑀬𑀸 𑀯𑀺𑀲𑁂𑀲𑀦𑀲𑁆𑀲 𑀘 𑀲𑀸𑀫𑀜𑁆𑀜𑁂𑀦 𑀕𑀳𑀡𑀁, 𑀲𑀸𑀩𑁆𑀬𑀬𑀁-𑀲𑀤𑁆𑀥𑀺𑀁 𑀯𑀘𑀢𑀺, 𑀲𑀓𑀸𑀭𑀓𑀁 𑀑𑀤𑀦𑀁 𑀧𑀘𑀢𑀺 𑀤𑁂𑀯𑀤𑀢𑁆𑀢𑁄 𑀧𑀘𑀢𑀺, 𑀲𑀓𑀸𑀭𑀓𑀯𑀺𑀲𑁂𑀲𑀦𑀁-𑀫𑀼𑀤𑀼𑀁 𑀯𑀺𑀲𑀤𑀫𑁄𑀤𑀦𑀫𑁆𑀧𑀘𑀢𑀺, 𑀤𑀲𑁆𑀲𑀦𑀻𑀬𑁄 𑀤𑁂𑀯𑀤𑀢𑁆𑀢𑁄 𑀧𑀘𑀢𑀺, 𑀲𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁- 𑀫𑀼𑀤𑀼𑀁 𑀧𑀘𑀢𑀺, 𑀫𑀦𑁆𑀤𑀁 𑀧𑀘𑀢𑀺, 𑀧𑀤𑀲𑀫𑀽𑀳𑁄 𑀯𑀸𑀓𑁆𑀬𑀦𑁆𑀢𑀺 𑀯𑀼𑀢𑁆𑀢𑁂 𑀅𑀬𑀫𑁆𑀧𑀺 𑀅𑀥𑀺𑀧𑁆𑀧𑀸𑀬𑀯𑀺𑀲𑁂𑀲𑁄𑀯𑀲𑀻𑀬𑀢𑀻𑀢𑀺 𑀯𑀢𑁆𑀢𑀼𑀫𑀸𑀳-𑀯𑀢𑁆𑀢𑀼’𑀫𑀺𑀘𑁆𑀘𑀸𑀤𑀺, 𑀬𑀣𑁂𑀘𑁆𑀘𑀸𑀤𑀺𑀦𑀸 𑀅𑀦𑁂𑀓𑀸𑀔𑁆𑀬𑀸𑀢𑀺 𑀓𑀫𑁆𑀧𑀺 𑀕𑀼𑀡𑀧𑁆𑀧𑀥𑀸𑀦𑀪𑀸𑀯𑁂 𑀦𑁄𑀧𑀓𑀸𑀭𑀢𑁄 𑀯𑀸𑀓𑁆𑀬𑀫𑁂𑀓𑀫𑁆𑀪𑀯𑀢𑀺… 𑀧𑀤 𑀲𑀫𑀽𑀳𑁄 𑀯𑀸𑀓𑁆𑀬𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺 𑀯𑀤𑀢𑀺, 𑀬𑀣𑀸 𑀯𑀸𑀓𑁆𑀬𑀦𑀸𑀦𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀳𑀸𑀧𑀻𑀢𑀺 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀢𑁆𑀣𑁂𑀢𑁆𑀬𑀸𑀤𑁄𑀧𑀺.

𑀳𑀺𑀕𑁆𑀕𑀳𑀡𑁂 ¶ 𑀧𑀜𑁆𑀘𑀫𑀻𑀳𑀺𑀲𑁆𑀲𑀸𑀧𑀺 𑀕𑀳𑀡𑀫𑁆𑀪𑀯𑁂𑀬𑁆𑀬𑀸𑀢𑀺 𑀲𑀼𑀢𑁆𑀢𑁂 ‘𑀅𑀧𑀜𑁆𑀘𑀫𑁆𑀬𑀸’𑀢𑀺 𑀯𑀼𑀢𑁆𑀢𑀁, 𑀢𑀼𑀫𑁆𑀳𑁂𑀳𑀺 𑀧𑀼𑀜𑁆𑀜𑀁 𑀧𑀲𑀼𑀢𑀁 𑀅𑀦𑀧𑁆𑀧𑀓𑀦𑁆𑀢𑀺 𑀕𑀸𑀣𑀸𑀧𑀸𑀤𑁂 𑀢𑀼𑀫𑁆𑀳𑁂𑀳𑀺𑀢𑀺𑀆𑀤𑀺𑀲𑀽 𑀢𑀢𑁆𑀢𑀸 𑀦 𑀯𑁄𑀆𑀤𑁂𑀲𑁄, 𑀢𑀼𑀫𑁆𑀳𑁂 𑀢𑀺𑀝𑁆𑀞𑀣 𑀦𑀕𑀭𑁂𑀢𑀺 𑀧𑀼𑀩𑁆𑀩𑀯𑀸𑀓𑁆𑀬𑀢𑁄 𑀯𑀸𑀓𑁆𑀬𑀦𑁆𑀢𑀭𑀢𑁆𑀢𑀸 𑀏𑀓𑀯𑀸𑀓𑁆𑀬𑀢𑀸 𑀦𑀢𑁆𑀣𑀺, 𑀢𑀼𑀫𑁆𑀳𑁂 𑀯𑀺𑀬 𑀤𑀺𑀬 𑀤𑀺𑀲𑁆𑀲𑀦𑁆𑀢𑀺 𑀅𑀫𑁆𑀳𑁂 𑀯𑀺𑀬 𑀤𑀺𑀲𑁆𑀲𑀦𑁆𑀢𑀻𑀢𑀺 𑀯𑀺𑀕𑁆𑀕𑀬𑁆𑀳 ‘𑀤𑀺𑀲-𑀧𑁂𑀓𑁆𑀔𑀡𑁂’ 𑀇𑀘𑁆𑀘𑀲𑁆𑀫𑀸 ‘‘𑀲𑀫𑀸𑀦𑀜𑁆𑀜𑀪𑀯𑀦𑁆𑀢𑀬𑀸𑀤𑀺 𑀢𑀽𑀧𑀫𑀸𑀦𑀸 𑀤𑀺𑀲𑀸 𑀓𑀫𑁆𑀫𑁂 𑀭𑀻𑀭𑀺𑀓𑁆𑀔𑀓𑀸’’𑀢𑀺 (𑁫-𑁪𑁩) 𑀓𑀧𑁆𑀧𑀘𑁆𑀘𑀬𑁂 ‘‘𑀦𑀢𑁂 𑀓𑀸𑀦𑀼𑀩𑀦𑁆𑀥𑀦𑀸𑀕𑀫𑁂𑀲𑀽’’𑀢𑀺 (𑁫-𑁮𑁫) 𑀏𑀢𑁆𑀢𑀸𑀪𑀸𑀯𑁂 ‘‘𑀲𑁆𑀬𑀸𑀤𑀺𑀲𑁆𑀬𑀸𑀤𑀺𑀦𑁂𑀓𑀢𑁆𑀣’’𑀦𑁆𑀢𑀺 (𑁩-𑁧) 𑀲𑀫𑀸𑀲𑁂 𑀘 ‘𑀏𑀓𑀢𑁆𑀣𑀢𑀸𑀬𑀁’’𑀢𑀺 (𑁨-𑁧𑁧𑁯) 𑀯𑀺𑀪𑀢𑁆𑀢𑀺𑀮𑁄𑀧𑁂 𑀘 ‘‘𑀲𑀩𑁆𑀩𑀸𑀤𑀻𑀦𑀫𑀸’’𑀢𑀺 (𑁩-𑁮𑁬) 𑀆 ‘𑀢𑀼𑀫𑁆𑀳𑀸𑀤𑀺𑀲𑀸𑀦’𑀫𑀺𑀘𑁆𑀘𑀸𑀤𑀺.

𑀧𑀘𑁆𑀙𑀸 𑀆𑀤𑁂𑀲𑁄 𑀅𑀦𑁆𑀯𑀸𑀤𑁂𑀲𑁄𑀢𑀺 𑀕𑀳𑀺𑀢𑁂 𑀓𑀣𑀺𑀢𑀸𑀦𑀼𑀓𑀣𑀦𑀦𑁆𑀢𑀺 𑀓𑀣𑀁 𑀜𑀸𑀬𑀢𑀻𑀢𑀺 𑀆𑀳- ‘𑀧𑀘𑁆𑀙𑀸 𑀓𑀣𑀦𑀜𑁆𑀘 𑀓𑀣𑀺𑀢𑀸𑀧𑁂𑀓𑁆𑀔𑀦𑁆𑀢𑀺 𑀓𑀢𑁆𑀯𑀸’𑀢𑀺.

𑀲𑀳 𑀯𑀺𑀚𑁆𑀚𑀫𑀸𑀦𑁄 𑀧𑀼𑀩𑁆𑀩𑁄 𑀬𑀲𑁆𑀲 𑀲𑁄 𑀲𑀧𑀼𑀩𑁆𑀩𑁄.

𑀅𑀧𑀭𑀫𑁆𑀧𑀭𑀬𑁄𑀕𑀧𑁆𑀧𑀢𑀺𑀧𑀢𑁆𑀬𑀢𑁆𑀣𑀦𑁆𑀢𑀺 ‘𑀕𑀸𑀫𑀦𑀕𑀭𑀸𑀦𑀁 𑀘𑁂𑀦𑀸’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲 𑀧𑀭𑀫𑁆𑀧𑀭𑀬𑁄𑀕𑀲𑁆𑀲 𑀅𑀕𑁆𑀕𑀳𑀡𑀢𑁆𑀣𑀁.

𑀚𑀝𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀚𑀝𑀺𑀮𑁄, 𑀲𑁄𑀯 𑀚𑀝𑀺𑀮𑀓𑁄, 𑀚𑀝𑀺𑀮𑀓𑀸𑀢𑀺 𑀏𑀓𑀢𑁆𑀣𑁂 𑀦𑀺𑀤𑀲𑁆𑀲𑀺𑀢𑀯𑀺𑀲𑁂𑀲𑀯𑀘𑀦𑀁, 𑀫𑀸𑀡𑀯𑀓𑀸𑀢𑀺 𑀯𑀺𑀬 𑀦 𑀲𑀸𑀫𑀜𑁆𑀜𑀯𑀘𑀦𑀁, 𑀅𑀲𑀢𑁆𑀢𑁂 𑀲𑀫𑁆𑀧𑀢𑁆𑀢𑁂𑀢𑀺 𑀇𑀤𑀁 ‘‘𑀆𑀫𑀦𑁆𑀢𑀡𑀁 𑀧𑀼𑀩𑁆𑀩𑀫𑀲𑀦𑁆𑀢𑀁 𑀯𑀸’’𑀢𑀺 (𑁨-𑁨𑁩𑁯) 𑀲𑀼𑀢𑁆𑀢𑀲𑁆𑀲 𑀲𑀸𑀫𑀜𑁆𑀜𑀢𑀸 𑀯𑀼𑀢𑁆𑀢𑀁, 𑀲𑀸𑀫𑀜𑁆𑀜𑀯𑀘𑀦𑀲𑁆𑀲 𑀧𑀝𑀺𑀲𑁂𑀥𑁄𑀢𑀺 𑀇𑀫𑀺𑀦𑀸 𑀯𑀺𑀲𑁂𑀲𑀯𑀘𑀦𑁂 𑀚𑀝𑀺𑀮𑀓𑀇𑀘𑁆𑀘𑀢𑁆𑀭 ‘𑀆𑀫𑀦𑁆𑀢𑀡𑀁 𑀧𑀼𑀩𑁆𑀩𑀫𑀲𑀦𑁆𑀢𑀁 𑀯𑀸’’𑀢𑀻𑀫𑀲𑁆𑀲 𑀧𑀢𑁆𑀢𑀺𑀦𑁆𑀤𑀲𑁆𑀲𑁂𑀢𑀺, 𑀤𑁂𑀯𑀤𑀢𑁆𑀢𑀸𑀤𑀺𑀲𑀸𑀫𑀜𑁆𑀜𑀯𑀘𑀦𑁂𑀢𑀺 𑀤𑁂𑀯𑀤𑀢𑁆𑀢𑁄 𑀤𑁂𑀯𑀤𑀢𑁆𑀢𑀲𑀤𑁆𑀤𑁄 𑀆𑀤𑀺 𑀬𑀲𑁆𑀲, 𑀢𑀜𑁆𑀘 𑀢𑀁 𑀲𑀸𑀫𑀜𑁆𑀜𑀯𑀘𑀦𑀜𑁆𑀘, 𑀢𑀲𑁆𑀫𑀺𑀁 𑀤𑁂𑀯𑀤𑀢𑁆𑀢𑀸𑀤𑀺𑀲𑀸𑀫𑀜𑁆𑀜𑀯𑀘𑀦𑁂 𑀫𑀸𑀡𑀯𑀓𑁂 𑀫𑀸𑀡𑀯𑀓𑀲𑀤𑁆𑀤𑁂 𑀧𑀭𑀪𑀽𑀢𑁂 𑀲𑀢𑀺, 𑀉𑀪𑀺𑀦𑁆𑀦𑀫𑁆𑀧𑀺 𑀅𑀲𑀢𑁆𑀢𑁂𑀢𑀺 𑀇𑀫𑀺𑀦𑀸 ¶ 𑀇𑀤𑀁 𑀤𑀻𑀧𑁂𑀢𑀺 ‘‘𑀤𑁂𑀯𑀤𑀢𑁆𑀢𑀸𑀢𑀺 𑀯𑀺𑀲𑁂𑀲𑀯𑀘𑀦𑀢𑁆𑀢𑀸 𑀧𑀝𑀺𑀲𑁂𑀥𑀸𑀪𑀸𑀯𑀸 𑀧𑀼𑀩𑁆𑀩𑀧𑀭𑀸𑀦𑀫𑀼𑀪𑀺𑀦𑁆𑀦𑀫𑁆𑀧𑀺 ‘‘𑀆𑀫𑀦𑁆𑀢𑀡𑀁 𑀧𑀼𑀩𑁆𑀩𑀫𑀲𑀦𑁆𑀢𑀁 𑀯𑀸’’𑀢𑀻𑀤𑀁 𑀧𑀧𑁆𑀧𑁄𑀢𑀻’’𑀢𑀺.

𑀇𑀢𑀺 𑀫𑁄𑀕𑁆𑀕𑀮𑁆𑀮𑀸𑀦𑀧𑀜𑁆𑀘𑀺𑀓𑀸𑀝𑀻𑀓𑀸𑀬𑀁 𑀲𑀸𑀭𑀢𑁆𑀣𑀯𑀺𑀮𑀸𑀲𑀺𑀦𑀺𑀬𑀁

𑀤𑀼𑀢𑀺𑀬𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀬𑀲𑁆𑀲𑀸𑀢𑀺𑀓𑀫𑀸𑀯𑀝𑁆𑀞𑀺𑀢𑀲𑁆𑀲𑀬𑁄𑀆𑀤𑀺𑀅𑀓𑁆𑀔𑀭𑀲𑀫𑀼𑀤𑀸𑀬𑀲𑁆𑀲, 𑀓𑀺𑀦𑁆𑀢𑀦𑁆𑀢𑀺 𑀆𑀳- ‘𑀇𑀤’𑀫𑀺𑀘𑁆𑀘𑀸𑀤𑀺, 𑀇𑀤𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀲𑁆𑀬𑀸𑀤𑀺𑀲𑀫𑀼𑀤𑀸𑀬𑀭𑀽𑀧𑀁, 𑀅𑀯𑀬𑀯𑁂𑀦 𑀯𑀺𑀕𑁆𑀕𑀳𑁄 𑀲𑀫𑀼𑀤𑀸𑀬𑁄 𑀲𑀫𑀸𑀲𑀢𑁆𑀣𑁄, 𑀲𑀫𑀼𑀤𑀸𑀬𑁂 𑀧𑀯𑀢𑁆𑀢𑀸 𑀲𑀤𑁆𑀤𑀸 𑀅𑀯𑀬𑀯𑁂𑀲𑀼𑀧𑀺 𑀯𑀢𑁆𑀢𑀦𑁆𑀢𑀻𑀢𑀺 𑀲𑁆𑀬𑀸𑀤𑀺𑀲𑀤𑁆𑀤𑁄 𑀲𑀺𑀆𑀤𑀺𑀓𑁂 𑀅𑀯𑀬𑀯𑁂𑀧𑀺 𑀯𑀢𑁆𑀢𑀢𑁂, 𑀯𑀺𑀥𑀺𑀕𑁆𑀕𑀳𑀡𑀜𑀸𑀬𑁂𑀦𑀸𑀢𑀺 ‘‘𑀧𑀘𑁆𑀘𑀬𑀕𑁆𑀕𑀳𑀡𑁂 𑀬𑀲𑁆𑀫𑀸 𑀲 𑀯𑀺𑀳𑀺𑀢𑁄 𑀢𑀤𑀸𑀤𑀺𑀦𑁄 𑀢𑀤𑀦𑁆𑀢𑀲𑁆𑀲 𑀘 𑀕𑀳𑀡’’𑀦𑁆𑀢𑀺 𑀜𑀸𑀬𑁂𑀦. 𑀲𑁆𑀬𑀸𑀤𑀺 𑀅𑀦𑁆𑀢𑁂 𑀬𑀲𑁆𑀲 𑀢𑀁 𑀲𑁆𑀬𑀸𑀤𑁆𑀬𑀦𑁆𑀢𑀁. 𑀦𑀦𑀼 𑀘 ‘‘𑀲𑁆𑀬𑀸𑀤𑀺𑀲𑁆𑀬𑀸𑀤𑀺𑀦𑁂𑀓𑀢𑁆𑀣’’𑀦𑁆𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀘𑁆𑀘𑀫𑀸𑀦𑁂 𑀬𑀁𑀓𑀺𑀜𑁆𑀘𑀺 𑀲𑁆𑀬𑀸𑀤𑁆𑀬𑀦𑁆𑀢𑀁 𑀬𑁂𑀦𑀓𑁂𑀦𑀘𑀺 𑀲𑁆𑀬𑀸𑀤𑁆𑀬𑀦𑁆𑀢𑁂𑀦 𑀲𑀳𑁂𑀓𑀢𑁆𑀣𑀻𑀪𑀸𑀯𑀫𑀭𑀳𑀢𑀺, 𑀢𑀣𑀸𑀳𑀺 𑀬𑀣𑀸 𑀕𑀸𑀫𑀕𑀢𑁄𑀢𑀺𑀆𑀤𑁄, 𑀢𑀣𑀸 𑀧𑀲𑁆𑀲 𑀤𑁂𑀯𑀤𑀢𑁆𑀢𑁂 𑀕𑀸𑀫𑀁, 𑀕𑀢𑁄 𑀬𑀜𑁆𑀜𑀤𑀢𑁆𑀢𑁄 𑀕𑀼𑀭𑀼𑀓𑀼𑀮𑀦𑁆𑀢𑀺 𑀆𑀤𑁄𑀧𑀺 𑀲𑀫𑀸𑀲𑁄 𑀢𑁆𑀬𑀸𑀲𑀗𑁆𑀓𑀺𑀬𑀸𑀳-‘𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑁂𑀧𑀺’𑀘𑁆𑀘𑀸𑀤𑀺, 𑀬𑀲𑁆𑀲 𑀲𑁆𑀬𑀸𑀤𑁆𑀬𑀦𑁆𑀢𑀲𑁆𑀲𑀬𑁂𑀦 𑀲𑁆𑀬𑀸𑀤𑁆𑀬𑀦𑁆𑀢𑁂𑀦 𑀲𑀫𑁆𑀩𑀦𑁆𑀥𑁄, 𑀢𑁂𑀦 𑀲𑁆𑀬𑀸𑀤𑁆𑀬𑀦𑁆𑀢𑁂𑀦 𑀲𑀳𑀢𑀁 𑀲𑁆𑀬𑀸𑀤𑁆𑀬𑀦𑁆𑀢𑀫𑁂𑀓𑀢𑁆𑀣𑀫𑁆𑀪𑀯𑀢𑀻𑀢𑀺 𑀲𑀫𑁆𑀩𑀦𑁆𑀥𑀢𑁄 𑀯𑀺𑀜𑁆𑀜𑀸𑀬𑀢𑀺 𑀅𑀯𑀲𑀻𑀬𑀢𑀻𑀢𑀺 𑀬𑀲𑁆𑀲𑀸𑀢𑁆𑀬𑀸𑀤𑀺𑀲𑁆𑀯𑀢𑁆𑀣𑁄, 𑀢𑀣𑀸 𑀘 𑀕𑀸𑀫𑀕𑀢𑁄𑀢𑁆𑀬𑀢𑁆𑀭𑀢𑁆𑀣𑀻𑀫𑁂𑀲-𑀫𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀸𑀮𑀓𑁆𑀔𑀡𑁄 𑀲𑀫𑁆𑀩𑀦𑁆𑀥𑁄𑀢𑁆𑀬𑁂𑀓𑀢𑁆𑀣𑀻𑀪𑀸𑀯𑁄, 𑀢𑀢𑁄𑀬𑁂𑀯𑁂𑀢𑁆𑀣𑀸𑀳𑀼-

𑀦𑀺𑀬𑀢𑀁 𑀲𑀸𑀥𑀦𑀁 𑀲𑀸𑀥𑁆𑀬𑁂, 𑀓𑁆𑀭𑀺𑀬𑀸 𑀦𑀺𑀬𑀢𑀲𑀸𑀥𑀦𑀸;

𑀲𑀦𑁆𑀦𑀺𑀥𑀸𑀦𑁂𑀦 𑀫𑁂𑀢𑁂𑀲𑀁 [𑀘𑁂𑀣𑀺𑀲𑁆𑀲𑀸 (𑀧𑁄𑀢𑁆𑀣𑀓𑁂)], 𑀦𑀺𑀬𑀫𑁄-𑀬𑀫𑁆𑀧𑀓𑀸𑀲𑀢𑀻𑀢𑀺.

𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 ‘‘𑀬𑀢𑁄 𑀕𑀸𑀫𑀫𑀺𑀘𑁆𑀘𑁂𑀢𑀁 𑀲𑀸𑀥𑀦𑀁 𑀲𑀸𑀥𑁆𑀬𑀁 𑀓𑀺𑀭𑀺𑀬𑀁 𑀢𑀁𑀩𑁆𑀬𑀧𑀤𑁂𑀲𑀚𑀸𑀦𑀦𑀬𑁄𑀕𑁆𑀬𑀫𑀧𑁂𑀓𑁆𑀔𑀢𑁂 𑀕𑀢𑁄𑀢𑀺, 𑀅𑀢𑁄 𑀲𑀸𑀥𑀦𑀁 𑀓𑀸𑀭 𑀓𑀁 ¶ 𑀲𑀸𑀥𑁆𑀬𑁂 𑀓𑀺𑀭𑀺𑀬𑀸𑀬 𑀦𑀺𑀬𑀢𑀁, 𑀬𑀢𑁄 𑀘 𑀓𑀺𑀭𑀺𑀬𑀸 𑀲𑀬𑀁 𑀲𑀸𑀥𑀦𑀫𑀧𑁂𑀓𑁆𑀔𑀢𑁂 𑀓𑀺𑀁 𑀕𑀢𑁄𑀢𑀺, 𑀅𑀢𑁄 𑀓𑀺𑀭𑀺𑀬𑀸𑀧𑀺 𑀦𑀺𑀬𑀢𑀁 𑀲𑀸𑀥𑀦𑀫𑁂𑀢𑀺𑀲𑁆𑀲𑀸𑀢𑀺 𑀦𑀺𑀬𑀢𑀲𑀸𑀥𑀦𑀸 𑀳𑁄𑀢𑀺 𑀅𑀬𑀁 𑀬𑀣𑀸𑀯𑀼𑀢𑁆𑀢𑁄 𑀦𑀺𑀬𑀫𑁄 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀸𑀯𑀲𑁂𑀦 𑀯𑀢𑁆𑀢𑀫𑀸𑀦𑁄 𑀏𑀢𑁂𑀲𑀁 𑀲𑀸𑀥𑁆𑀬𑀲𑀸𑀥𑀦𑀸𑀦𑀁 𑀲𑀦𑁆𑀦𑀺𑀥𑀸𑀦 𑀫𑀢𑁆𑀢𑁂𑀦 𑀅𑀜𑁆𑀜𑀫𑀜𑁆𑀜𑀢𑁄 𑀧𑀓𑀸𑀲𑀢𑀻’’𑀢𑀺. 𑀧𑀲𑁆𑀲 𑀤𑁂𑀯𑀤𑀢𑁆𑀢 𑀕𑀸𑀫𑀁, 𑀕𑀢𑁄 𑀬𑀜𑁆𑀜𑀤𑀢𑁆𑀢𑁄 𑀕𑀼𑀭𑀼𑀓𑀼𑀮𑀁𑀢𑁆𑀬𑀢𑁆𑀭 𑀢𑀼 𑀕𑀸𑀫𑀦𑁆𑀢𑀺 𑀲𑀸𑀥𑀦𑀁 𑀧𑀲𑁆𑀲𑁂𑀢𑀺 𑀲𑀸𑀥𑁆𑀬𑀫𑀧𑁂𑀓𑁆𑀔𑀢𑁂, 𑀕𑀢𑁄𑀢𑀺 𑀕𑀫𑀦𑀓𑀺𑀭𑀺𑀬𑀸 𑀢𑀼 𑀕𑀼𑀭𑀼𑀓𑀼𑀮𑀫𑀧𑁂𑀓𑁆𑀔𑀢𑁂, 𑀢𑀢𑁄 𑀘 𑀕𑀸𑀫𑀕𑀢𑀸𑀦𑀁 𑀯𑀸𑀓𑁆𑀬𑀦𑁆𑀢𑀭𑀸𑀯𑀬𑀯𑀸𑀦𑀁 𑀦𑀢𑁆𑀣𑁂𑀯𑀸𑀧𑁂𑀓𑁆𑀔𑀸𑀢𑀺 𑀦 𑀪𑀯𑀢𑀺 𑀲𑀫𑀸𑀲𑁄, 𑀲𑀩𑁆𑀩𑀢𑁆𑀣𑁂𑀯𑀫𑀽𑀳𑀦𑀻𑀬𑀁, 𑀲𑀫𑁆𑀩𑀦𑁆𑀥𑁄 𑀳𑀺 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀸𑀮𑀓𑁆𑀔𑀡𑁄 𑀲𑀫𑁆𑀩𑀦𑁆𑀥𑁆𑀬𑀦𑁆𑀢𑀭𑀢𑁄-𑀦𑀯𑀝𑁆𑀞𑀺𑀢𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀯𑀺𑀲𑁂𑀲𑁂 𑀦𑀺𑀯𑁂𑀲𑁂𑀢𑀺, 𑀢𑀣𑀸𑀘 𑀯𑀼𑀢𑁆𑀢𑀁𑁋

𑀢𑀲𑁆𑀲 𑀢𑁆𑀯𑀸𑀓𑀗𑁆𑀔𑀢𑁄 𑀪𑁂𑀤𑁂, 𑀬𑀸 𑀧𑀭𑀺𑀧𑁆𑀮𑀯𑀫𑀸𑀦𑀢𑀸;

𑀯𑀺𑀲𑁂𑀲𑁂 𑀢𑀁 𑀦𑀺𑀯𑁂𑀲𑁂𑀦𑁆𑀢𑁄, 𑀲𑀫𑁆𑀩𑀦𑁆𑀥𑁄𑀯𑀸𑀯𑀙𑀺𑀦𑁆𑀤𑀢𑀻𑀢𑀺.

𑀪𑁂𑀤𑁂 𑀯𑀺𑀲𑁂𑀲𑁂 𑀕𑀸𑀫𑀦𑁆𑀢𑁂𑀢𑀁 𑀲𑀸𑀫𑀜𑁆𑀜𑀁 𑀯𑀺𑀲𑁂𑀲𑀸𑀧𑁂𑀓𑁆𑀔𑀁 ‘𑀕𑀸𑀫𑀫𑀸𑀲𑀻𑀲𑀢𑀺, 𑀚𑀳𑀸𑀢𑀺, 𑀕𑀢𑁄’𑀢𑀺, 𑀢𑀣𑀸 ‘𑀕𑀢𑁄 𑀕𑀸𑀫𑀁, 𑀯𑀦𑀁, 𑀕𑀼𑀭𑀼𑀓𑀼𑀮’𑀦𑁆𑀢𑀺 𑀯𑁂𑀯𑀫𑀸𑀓𑀗𑁆𑀔𑀢𑁄-𑀪𑀺𑀮𑀲𑀢𑁄 𑀢𑀲𑁆𑀲 𑀢𑀼 𑀧𑀥𑀸𑀦𑀧𑀤𑀲𑁆𑀲𑀼𑀧𑀲𑀚𑁆𑀚𑀦𑀧𑀤𑀲𑁆𑀲 𑀘 𑀬𑀸 𑀧𑀭𑀺𑀧𑁆𑀮𑀯𑀫𑀸𑀦𑀢𑀸 𑀅𑀦𑀯𑀝𑁆𑀞𑀺𑀢𑀢𑀸 𑀢𑀁 𑀯𑀺𑀲𑁂𑀲𑁂 𑀯𑀺𑀲𑀺𑀝𑁆𑀞𑁂 𑀲𑀫𑁆𑀩𑀦𑁆𑀥𑀺𑀦𑀺 𑀦𑀺𑀯𑁂𑀲𑁂𑀦𑁆𑀢𑁄 𑀧𑀢𑀺𑀝𑁆𑀞𑀧𑁂𑀦𑁆𑀢𑁄 𑀲𑀫𑁆𑀩𑀦𑁆𑀥𑁄𑀯𑀸𑀦𑁂𑀓𑀧𑁆𑀧𑀓𑀸𑀭𑁄 𑀓𑁆𑀯𑀘𑀺 𑀲𑀸𑀥𑁆𑀬𑀲𑀸𑀥𑀦𑀪𑀸𑀯𑀮𑀓𑁆𑀔𑀡𑁄 𑀓𑁆𑀯𑀘𑀺 𑀧𑀓𑀢𑀺𑀯𑀺𑀓𑀸𑀭𑀪𑀸𑀯𑀲𑀪𑀸𑀯𑁄 𑀓𑁆𑀯𑀘𑀺 𑀲𑀲𑁆𑀲𑀸𑀫𑀺 𑀲𑀫𑁆𑀩𑀦𑁆𑀥𑀭𑀽𑀧𑁄 𑀅𑀯𑀙𑀺𑀦𑁆𑀤𑀢𑀺 𑀲𑀫𑁆𑀩𑀦𑁆𑀥𑁆𑀬𑀦𑁆𑀢𑀭𑀢𑁄 𑀦𑀺𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄, 𑀬𑀢𑁄-𑀬𑀫𑀧𑁂𑀓𑁆𑀔𑀸 𑀯𑀸𑀓𑁆𑀬𑀓𑀸𑀮𑁂𑀬𑁂𑀯 𑀦𑀺𑀭𑀽𑀧𑁆𑀬𑀢𑁂, 𑀢𑀢𑁄 𑀬𑀢𑁆𑀣𑀸𑀢𑁆𑀣𑀺 𑀧𑀤𑀸𑀦𑀫𑀧𑁂𑀓𑁆𑀔𑀸, 𑀢𑀢𑁆𑀣 𑀲𑀫𑀸𑀲𑀸𑀯𑀕𑀫𑁄, 𑀬𑀢𑁆𑀭 𑀢𑀼 𑀦𑀢𑁆𑀣𑀺, 𑀢𑀢𑁆𑀭 𑀦 𑀪𑀯𑀢𑀻𑀢𑁆𑀬𑀦𑀼𑀧𑀤𑀺𑀝𑁆𑀞𑁄 𑀯𑀺𑀲𑀬𑀯𑀺𑀪𑀸𑀕𑁄 𑀜𑀸𑀬𑀢𑁂𑀢𑀺 𑀪𑀸𑀯𑁄, 𑀩𑀸𑀮𑁂 𑀅𑀩𑀼𑀥𑁂𑀢𑀼 𑀦𑀺𑀲𑁆𑀲𑀸𑀬 𑀯𑀺𑀘𑀺𑀢𑁆𑀢𑁄 𑀲𑀫𑀸𑀲𑀯𑀺𑀥𑀸𑀦𑀮𑁄𑀧𑀸𑀤𑀺𑀦𑀸𑀦𑁂𑀓𑀧𑁆𑀧𑀓𑀸𑀭𑁄 𑀧𑀝𑀺𑀧𑀢𑁆𑀢𑀺𑀬𑀸 𑀲𑀸𑀥𑀼𑀲𑀤𑁆𑀤𑀧𑀭𑀺𑀚𑀸𑀦𑀦𑀢𑁆𑀣𑀫𑀼𑀧𑀸𑀬𑁄 𑀲𑀫𑁆𑀪𑀯𑀢𑀺, 𑀧𑀭𑀫𑀢𑁆𑀣𑀢𑁄 𑀢𑀼 𑀲𑀤𑁆𑀤𑀦𑁆𑀢𑀭𑀢𑁆𑀢𑀸 𑀅𑀘𑁆𑀘𑀦𑁆𑀢𑀁 [𑀅𑀜𑁆𑀜𑀢𑁆𑀢𑀁] 𑀯𑀸𑀓𑁆𑀬𑀲𑀫𑀸𑀲𑀸𑀦𑀁 𑀪𑁂𑀤𑁄, 𑀦 𑀳𑀺 𑀯𑀸𑀓𑁆𑀬𑁂 𑀤𑀺𑀝𑁆𑀞𑀧𑀤𑀸𑀦𑀺 𑀲𑀫𑀸𑀲𑁂 𑀲𑀦𑁆𑀢𑀺, 𑀢𑀣𑀸 𑀘 𑀯𑀼𑀢𑁆𑀢𑀁𑁋

𑀩𑀸𑀮𑁂 𑀦𑀺𑀲𑁆𑀲𑀸𑀬𑀼𑀧𑀸𑀬𑁄-𑀬𑀁, 𑀯𑀺𑀘𑀺𑀢𑁆𑀢𑁄 𑀧𑀝𑀺𑀧𑀢𑁆𑀢𑀺𑀬𑀸;

𑀪𑁂𑀤𑁄 𑀯𑀸𑀓𑁆𑀬𑀲𑀫𑀸𑀲𑀸𑀦𑀁, 𑀘𑁆𑀘𑀦𑁆𑀢𑀁 [𑀜𑁆𑀜𑀢𑁆𑀢𑀁 (𑀧𑁄𑀢𑁆𑀣𑀓𑁂)] 𑀲𑀤𑁆𑀤𑀦𑁆𑀢𑀭𑀁 𑀬𑀢𑁄𑀢𑀺.

𑀅𑀢𑁄𑀬𑁂𑀯𑀸𑀢𑀺 ¶ 𑀬𑀢𑁄 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑁂𑀧𑀺𑀬𑀲𑁆𑀲𑀬𑁂𑀦 𑀲𑀫𑁆𑀩𑀦𑁆𑀥𑁄𑀢𑁂𑀦 𑀲𑀳 𑀢𑀤𑁂𑀓𑀢𑁆𑀣𑀫𑁆𑀪𑀯𑀢𑀻𑀢𑀺 𑀲𑀫𑁆𑀩𑀦𑁆𑀥𑀢𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀦𑀸𑀦𑀺𑀝𑁆𑀞𑀁 𑀓𑀺𑀜𑁆𑀘𑀺𑀧𑀻𑀳 𑀳𑁄𑀢𑀺, 𑀅𑀢𑁄𑀬𑁂𑀯 𑀳𑁂𑀢𑀼𑀢𑁄𑀢𑀺 𑀅𑀢𑁆𑀣𑁄. 𑀩𑁆𑀬𑀧𑁂𑀓𑁆𑀔𑀸 𑀲𑀸𑀫𑀢𑁆𑀣𑀺𑀬𑀧𑀭𑀺𑀕𑁆𑀕𑀳𑀸𑀬𑁂𑀢𑀺 𑀧𑀤𑀸𑀦𑀫𑀜𑁆𑀜𑁄𑀜𑁆𑀜𑀸𑀓𑀗𑁆𑀔𑀸 𑀩𑁆𑀬𑀧𑁂𑀓𑁆𑀔𑀸, 𑀲𑀸𑀯 𑀲𑀸 𑀫𑀢𑁆𑀣𑀺𑀬𑀁, 𑀢𑀲𑁆𑀲 𑀧𑀭𑀺𑀕𑁆𑀕𑀳𑀸𑀬. 𑀲𑀫𑀢𑁆𑀣𑀯𑀘𑀦𑀁 𑀦 𑀓𑀢𑀦𑁆𑀢𑀺 𑀧𑀸𑀡𑀺𑀦𑀺𑀬𑁂𑀳𑀺 𑀯𑀺𑀬 ‘‘𑀲𑀫𑀢𑁆𑀣𑁄 𑀧𑀤𑀯𑀺𑀥𑀻’’𑀢𑀺 (𑀧𑀸, 𑁨-𑁧-𑁧) 𑀲𑀫𑀢𑁆𑀣𑀯𑀘𑀦𑀁 𑀦 𑀓𑀢𑀁. 𑀲𑀫𑀢𑁆𑀣𑁄 𑀧𑀤 𑀯𑀺𑀥𑀻𑀢𑀺 𑀧𑀭𑀺𑀪𑀸𑀲𑀸𑀬𑀫𑀬𑀫𑀢𑁆𑀣𑁄 ‘‘𑀯𑀺𑀥𑀻𑀬𑀢𑁂 [𑀯𑀺𑀥𑀻𑀬𑀢𑀻𑀢𑀺 (𑀧𑁄𑀢𑁆𑀣𑀓𑁂)] 𑀯𑀺𑀥𑀺, 𑀧𑀤𑀸𑀦𑀁 𑀯𑀺𑀥𑀺 𑀧𑀤𑀯𑀺𑀥𑀺𑀲𑀫𑀸𑀲𑀸𑀤𑀺, 𑀬𑁄𑀓𑁄𑀘𑀻𑀳 𑀲𑀢𑁆𑀣𑁂 𑀧𑀤𑀯𑀺𑀥𑀺,𑀲𑁄 𑀲𑀫𑀢𑁆𑀣𑁄 𑀯𑀺𑀕𑁆𑀕𑀳 𑀯𑀸𑀓𑁆𑀬𑀢𑁆𑀣𑀸𑀪𑀺𑀥𑀸𑀦𑁂 (𑀲𑀢𑁆𑀢𑀺) 𑀯𑁂𑀤𑀺𑀢𑀩𑁆𑀩𑁄’’𑀢𑀺, 𑀢𑀸𑀤𑀺𑀲𑀧𑀭𑀺𑀪𑀸𑀲𑀸𑀬 𑀩𑁆𑀬𑀸𑀧𑀸𑀭𑀢𑁄 𑀢𑁂𑀲𑀁 ‘𑀧𑀲𑁆𑀲 𑀤𑁂𑀯𑀤𑀢𑁆𑀢 𑀕𑀸𑀫𑀁, 𑀕𑀢𑁄 𑀬𑀜𑁆𑀜𑀤𑀢𑁆𑀢𑁄 𑀕𑀼𑀭𑀼𑀓𑀼𑀮𑀁’ 𑀢𑁆𑀬𑀸𑀤𑁄 𑀦𑀸𑀦𑀺𑀝𑁆𑀞𑀧𑁆𑀧𑀢𑁆𑀢𑀺, 𑀲𑀸𑀫𑀢𑁆𑀣𑀺𑀬𑀜𑁆𑀘𑁂𑀢𑁆𑀣 𑀤𑁆𑀯𑀺𑀥𑀸𑀢𑁆𑀬𑀼𑀧𑀕𑀫𑁆𑀬𑀢𑁂 𑀯𑀸𑀓𑁆𑀬𑁂 𑀩𑁆𑀬𑀧𑁂𑀓𑁆𑀔𑀸𑀯𑀼𑀢𑁆𑀢𑀺𑀬𑀫𑁂𑀓𑀢𑁆𑀣𑀻𑀪𑀸𑀯𑁄 𑀘𑁂𑀢𑀺 [𑀯𑀼𑀢𑁆𑀢𑀺𑀬𑀫𑁂𑀓𑀢𑁆𑀣𑀻𑀪𑀸𑀯𑁄 𑀯𑀸𑀓𑁆𑀬𑁂 𑀩𑁆𑀬𑀧𑁂𑀓𑁆𑀔𑀸𑀘𑁂𑀢𑀺 (𑀧𑁄𑀢𑁆𑀣𑀓𑁂)]. 𑀢𑀢𑁆𑀣 𑀧𑀞𑀫𑀲𑁆𑀲 𑀧𑀭𑀺𑀕𑁆𑀕𑀳𑀁 𑀯𑀘𑀦𑀫𑀦𑁆𑀢𑀭𑁂𑀦 𑀧𑀝𑀺𑀧𑀸𑀤𑀺𑀬 𑀤𑀼𑀢𑀺𑀬𑀲𑁆𑀲 𑀧𑀭𑀺𑀕𑁆𑀕𑀳𑀫𑀺𑀤𑀸𑀦𑀺 𑀯𑀘𑀦𑁂𑀦 𑀧𑀝𑀺𑀧𑀸𑀤𑀬𑀫𑀸𑀳- ‘𑀏𑀓𑀢𑁆𑀣𑀻 𑀪𑀸𑀯𑁄’𑀘𑁆𑀘𑀸𑀤𑀺, 𑀏𑀓𑀢𑁆𑀣𑀻𑀪𑀸𑀯𑁄 𑀪𑀺𑀦𑁆𑀦𑀢𑁆𑀣𑀸𑀦𑀁 𑀲𑀸𑀥𑀸𑀭𑀡𑀢𑁆𑀣𑀢𑀸𑀯𑀲𑁂𑀦 𑀧𑀯𑀢𑁆𑀢𑀺𑀯𑀺𑀲𑁂𑀲𑁄, 𑀯𑀸𑀓𑁆𑀬𑁂 𑀳𑀺 𑀲𑀸𑀥𑀸𑀭𑀡𑀢𑁆𑀣𑀢𑀸 𑀦𑀢𑁆𑀣𑀺 𑀪𑀺𑀦𑁆𑀦𑀢𑁆𑀣𑀢𑁆𑀢𑀸, 𑀅𑀢𑁄𑀬𑁂𑀯𑁂𑀢𑁆𑀣 𑀪𑁂𑀤𑀦𑀺𑀩𑀦𑁆𑀥𑀦𑀸 𑀙𑀝𑁆𑀞𑁆𑀬𑀼𑀧𑀚𑀸𑀬𑀢𑁂 ‘𑀭𑀜𑁆𑀜𑁄 𑀧𑀼𑀭𑀺𑀲𑁄’𑀢𑀺, 𑀯𑀼𑀢𑁆𑀢𑀺𑀬𑀦𑁆𑀢𑀽𑀪𑀬𑀧𑀤𑀩𑁆𑀬𑀯𑀘𑁆𑀙𑀺𑀦𑁆𑀦𑀢𑁆𑀣𑀸𑀪𑀺𑀥𑀸𑀦𑀢𑁄 𑀲𑀸𑀥𑀸𑀭𑀡𑀢𑁆𑀣𑀢𑀸 𑀪𑀯𑀢𑀺, 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀲𑀫𑀸𑀲𑁂 𑀯𑀺𑀲𑁂𑀲𑀦𑀁 𑀯𑀺𑀲𑁂𑀲𑁆𑀲𑀫𑀦𑀼𑀧𑀯𑀻𑀲𑀢𑀺 𑀏𑀓𑀻𑀪𑀯𑀢𑀺 𑀯𑀺𑀲𑁂𑀲𑀦𑀁, 𑀯𑀸𑀓𑁆𑀬𑁂 𑀢𑀼 𑀯𑀺𑀲𑁂𑀲𑀦𑀁 𑀯𑀺𑀲𑁂𑀲𑁆𑀲𑀢𑁄 𑀯𑀺𑀲𑀼𑀁𑀬𑁂𑀯𑀸 𑀯𑀢𑀺𑀝𑁆𑀞𑀢𑁂’’𑀢𑀺. 𑀤𑁆𑀯𑀦𑁆𑀤𑀲𑀫𑀸𑀲𑀲𑁆𑀲 𑀢𑀼 𑀧𑀤𑀸𑀦𑀁 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀲𑀸𑀪𑀸𑀯𑁂𑀧𑀺 𑀲𑀓𑀮𑀧𑀤𑀢𑁆𑀣𑀧𑁆𑀧𑀥𑀸𑀦𑀢𑁆𑀢𑀸 ‘𑀭𑀜𑁆𑀜𑁄 𑀕𑁄 𑀘 𑀅𑀲𑁆𑀲𑁄 𑀘 𑀧𑀼𑀭𑀺𑀲𑁄 𑀘𑀸’𑀢𑀺 𑀯𑀸𑀓𑁆𑀬𑀢𑁄 ‘𑀭𑀜𑁆𑀜𑁄 𑀕𑀯𑀸𑀲𑁆𑀲 𑀧𑀼𑀭𑀺𑀲𑀸’𑀢𑀺 𑀲𑀫𑀸𑀲𑀲𑁆𑀲 𑀯𑀺𑀲𑁂𑀲𑁄 𑀏𑀓𑀢𑁆𑀣𑀻 𑀪𑀸𑀯𑀮𑀓𑁆𑀔𑀡𑁄 𑀪𑀯𑀢𑁆𑀬𑁂𑀯, 𑀢𑀣𑀸𑀳𑀺 𑀢𑀢𑁆𑀣 𑀯𑀸𑀓𑁆𑀬𑁂 𑀪𑀺𑀦𑁆𑀦𑀢𑁆𑀣𑀦𑀺𑀩𑀦𑁆𑀥𑀦 𑀲𑀫𑀼𑀘𑁆𑀘𑀬𑀧𑀝𑀺𑀧𑀸𑀤𑀦𑀸𑀬 𑀘𑀲𑀤𑁆𑀤𑁄 𑀧𑀬𑀼𑀚𑁆𑀚𑀢𑁂, 𑀲𑀫𑀸𑀲𑁂 𑀢𑀼 𑀦𑀧𑁆𑀧𑀬𑀼𑀚𑁆𑀚𑀢𑁂, 𑀏𑀓𑀢𑁆𑀣 𑀯𑀘𑀦𑁂𑀦𑁂𑀯𑀸𑀢𑀺 ‘‘𑀲𑁆𑀬𑀸𑀤𑀺𑀲𑁆𑀬𑀸𑀤𑀺𑀦𑁂𑀓𑀢𑁆𑀣’’ 𑀢𑁆𑀬𑁂𑀓𑀢𑁆𑀣𑀯𑀘𑀦𑁂𑀦𑁂𑀯, 𑀏𑀓𑀢𑁆𑀢𑀻𑀪𑀸𑀯𑁄𑀬𑁂𑀯 𑀪𑀯𑀢𑀻𑀢𑀺 𑀲𑁂𑀲𑁄, 𑀏𑀯𑀓𑀸𑀭𑁄 𑀦 𑀯𑀸𑀓𑁆𑀬𑁂 𑀢𑀣𑀸𑀳𑀺 𑀤𑀻𑀧𑁂𑀢𑀺. 𑀯𑀸𑀓𑁆𑀬𑁂 𑀓𑀣𑀦𑁆𑀢𑀺 𑀆𑀳- 𑀯𑀸𑀓𑁆𑀬𑁂’𑀢𑀺𑀆𑀤𑀺.

𑀯𑀸𑀓𑁆𑀬𑁂𑀢𑀺 𑀯𑀺𑀕𑁆𑀕𑀳𑀯𑀸𑀓𑁆𑀬𑁂, 𑀯𑀺𑀲𑁂𑀲𑁂𑀦 𑀕𑀬𑁆𑀳𑀢𑀺 𑀜𑀸𑀬𑀢𑁆𑀬𑀦𑁂𑀦𑁂𑀢𑀺 𑀯𑀺𑀕𑁆𑀕- 𑀳𑁄 ¶ , 𑀲𑁄 𑀘 𑀢𑀁 𑀯𑀸𑀓𑁆𑀬𑀁 𑀘𑁂𑀢𑀺 𑀯𑀺𑀕𑁆𑀕𑀳𑀯𑀸𑀓𑁆𑀬𑀁, 𑀯𑀺𑀲𑁂𑀲𑁂𑀦 𑀯𑀸 𑀕𑀳𑀡𑀁 𑀯𑀺𑀕𑁆𑀕𑀳𑁄, 𑀢𑀤𑀢𑁆𑀣𑀁 𑀯𑀸𑀓𑁆𑀬𑀁 𑀯𑀺𑀕𑁆𑀕𑀳𑀯𑀸𑀓𑁆𑀬𑀁, 𑀢𑀲𑁆𑀫𑀺𑀁, 𑀓𑀸𑀬𑀁 𑀩𑁆𑀬𑀸𑀧𑁂𑀓𑁆𑀔𑀸𑀢𑀺 𑀆𑀳-‘𑀪𑁂𑀤𑀸𑀤𑀺𑀮𑀓𑁆𑀔𑀡𑀸’𑀢𑀺, 𑀆𑀤𑀺𑀲𑀤𑁆𑀤𑁂𑀦 𑀲𑀁𑀲𑀕𑁆𑀕 𑀪𑁂𑀤 𑀲𑀁𑀲𑀕𑁆𑀕𑀸𑀦𑀜𑁆𑀘 𑀕𑀳𑀡𑀁.

𑀢𑀢𑁆𑀣 𑀲𑀸𑀦𑁆𑀢𑀭𑁂𑀳𑀺 𑀲𑀸𑀫𑁆𑀬𑀦𑁆𑀢𑀭𑁂𑀳𑀺 𑀘 𑀩𑁆𑀬𑀸𑀯𑀼𑀢𑁆𑀢𑀺 𑀙𑁂𑀤𑁄, 𑀲𑀁𑀯𑀺𑀲𑁂𑀲 𑀲𑀸𑀫𑀺𑀯𑀺𑀲𑁂𑀲𑀸𑀦𑀁 𑀲𑀫𑁆𑀩𑀦𑁆𑀥𑁄 𑀲𑀁𑀲𑀕𑁆𑀕𑁄, 𑀢𑀤𑀸𑀳- ‘𑀢𑀣𑀸𑀳𑀺’𑀘𑁆𑀘𑀸𑀤𑀺𑀦𑀸, 𑀪𑁂𑀤𑀓𑁄 𑀩𑁆𑀬𑀸𑀯𑀢𑁆𑀢𑀓𑁄, 𑀅𑀢𑁆𑀣𑀕𑀳𑀺𑀢𑁄𑀢𑀺 𑀓𑀸𑀭𑀡𑀯𑀲𑁂𑀦 𑀪𑁂𑀤𑀯𑀸𑀤𑀺𑀦𑀸 𑀕𑀳𑀺𑀢𑁄, 𑀬𑀤𑁂𑀘𑁆𑀘𑀸𑀤𑀺𑀦𑀸 𑀲𑀁𑀲𑀕𑁆𑀕𑀯𑀸𑀤𑀺𑀦𑁄-𑀥𑀺𑀧𑁆𑀧𑀸𑀬𑀫𑀸𑀳 𑀬𑀤𑀸 𑀢𑀽𑀪𑀬𑀫𑁆𑀧𑀺𑀘𑁆𑀘𑀸𑀤𑀺𑀦𑀸 𑀉𑀪𑀬𑀯𑀸𑀤𑀺𑀦𑁄, 𑀅𑀪𑀺𑀫𑀢𑁄𑀢𑀺 ‘‘𑀧𑀸𑀓𑁆𑀓𑀟𑀸𑀭𑀸𑀲𑀫𑀸𑀲𑁄’’𑀘𑁆𑀘𑀦𑁂𑀦 (𑁨-𑁧-𑁩) 𑀧𑀸𑀡𑀺𑀦𑀺𑀦𑀸 𑀇𑀘𑁆𑀙𑀺𑀢𑁄. 𑀧𑀸𑀓𑁆𑀓𑀟𑀸𑀭𑀸𑀢𑀺 ‘‘𑀓𑀟𑀸𑀭𑀸 𑀓𑀫𑁆𑀫𑀥𑀸𑀭𑀬𑁂’’𑀘𑁆𑀘𑀦𑁂𑀦 (𑁨-𑁨-𑁩𑁮) 𑀓𑀟𑀸𑀭𑀸𑀲𑀁𑀲𑀤𑁆𑀤𑀦𑀸 𑀧𑀕𑁂𑀯𑀸𑀢𑀺 𑀅𑀢𑁆𑀣𑁄.

‘𑀧𑀼𑀣 𑀪𑀺𑀦𑁆𑀦𑁄 𑀅𑀢𑁆𑀣𑁄 𑀬𑁂𑀲𑀁 𑀧𑀤𑀸𑀦𑀁 𑀢𑀸𑀦𑀺 𑀧𑀼𑀣𑀕𑀢𑁆𑀣𑀸𑀦𑀺, 𑀯𑀸𑀓𑁆𑀬𑁂 𑀳𑀺 𑀭𑀜𑁆𑀜𑁄 𑀧𑀼𑀭𑀺𑀲𑁄 𑀢𑁂𑀢𑁆𑀣 𑀭𑀸𑀚𑀲𑀤𑁆𑀤𑁄 𑀭𑀸𑀚𑀢𑁆𑀣𑀫𑁂𑀯 𑀯𑀤𑀢𑀺, 𑀧𑀼𑀭𑀺𑀲𑀲𑀤𑁆𑀤𑁄 𑀧𑀼𑀭𑀺𑀲𑀢𑁆𑀣𑀫𑁂𑀯, 𑀯𑀼𑀢𑁆𑀢𑀺𑀬𑀦𑁆𑀢𑀼 𑀭𑀸𑀚𑀧𑀼𑀭𑀺𑀲𑁄𑀢𑁂𑀢𑁆𑀣 𑀭𑀸𑀚𑀲𑀤𑁆𑀤𑁄𑀧𑀺 𑀧𑀼𑀭𑀺𑀲𑀢𑁆𑀣𑀫𑁂𑀯 𑀯𑀤𑀢𑀻𑀢𑀺 𑀤𑁆𑀯𑀺𑀦𑁆𑀦𑀫𑁂𑀓𑀢𑁆𑀣𑀻𑀪𑀸𑀯𑁄 𑀪𑀯𑀢𑀺, 𑀅𑀜𑁆𑀜𑁄𑀬𑁂𑀯𑀸𑀯𑀬𑀯𑀢𑁆𑀣𑀸𑀦𑁆𑀯𑀺𑀢𑁄 𑀲𑀫𑀼𑀤𑀸𑀬𑀢𑁆𑀣𑁄 𑀧𑀸𑀢𑀼𑀪𑀯𑀢𑀻𑀢𑀺 𑀢𑀤𑀧𑁂𑀓𑁆𑀔𑀸𑀬 𑀘𑁂𑀓𑀢𑁆𑀣𑀻𑀪𑀸𑀯𑁄 𑀯𑀼𑀘𑁆𑀘𑀢𑁂, 𑀚𑀳𑀫𑀸𑀦𑀲𑀓𑀢𑁆𑀣𑀯𑀼𑀢𑁆𑀢𑀺𑀫𑀪𑁆𑀬𑀼𑀧𑀕𑀫𑁆𑀫 𑀯𑀼𑀢𑁆𑀢𑀁- ‘𑀯𑀺𑀲𑁂𑀲𑀦𑀲𑁆𑀲 𑀲𑀓𑀢𑁆𑀣 𑀧𑀭𑀺𑀘𑁆𑀘𑀸𑀕𑁂𑀦𑁂’𑀘𑁆𑀘𑀸𑀤𑀺, 𑀅𑀢𑁄𑀬𑁂𑀯 𑀧𑀭𑁄 𑀘𑁄𑀤𑁂𑀲𑁆𑀲𑀢𑀺 ‘𑀦𑀦𑀼 𑀘𑁂’𑀘𑁆𑀘𑀸𑀤𑀺𑀦𑀸. 𑀏𑀓𑀢𑁆𑀣𑀻𑀪𑀯𑀦𑀁 𑀲𑀫𑀲𑀦𑀦𑁆𑀢𑀺 𑀇𑀫𑀺𑀦𑀸 𑀏𑀓𑀢𑁆𑀣𑀦𑁆𑀢𑀺 𑀲𑀫𑀸𑀲𑁄𑀢𑀺 𑀦𑀸𑀢𑁆𑀣𑀦𑁆𑀢𑀭𑀦𑁆𑀢𑀺 𑀤𑀻𑀧𑁂𑀢𑀺.

𑀚𑀳𑀫𑀸𑀦𑀸𑀦𑀺 𑀧𑀤𑀸𑀦𑀺 𑀲𑀓𑀢𑁆𑀣𑀁 𑀬𑀲𑁆𑀲𑀁 (𑀲𑀸) 𑀢𑀣𑀸 𑀯𑀼𑀢𑁆𑀢𑀸, 𑀦𑀸𑀘𑁆𑀘𑀦𑁆𑀢𑀸𑀬 𑀚𑀬𑀸𑀢𑀻𑀢𑀺 𑀏𑀯𑀫𑁆𑀫𑀜𑁆𑀜𑀢𑁂 ‘‘𑀧𑀭𑀺𑀘𑁆𑀘𑀸𑀕𑀫𑀢𑁆𑀢𑀫𑀪𑀺𑀲𑀦𑁆𑀥𑀸𑀬 𑀚𑀳𑀫𑀸𑀦𑀲𑀓𑀢𑁆𑀣𑀁𑀢𑁆𑀬𑀼𑀘𑁆𑀘𑀢𑁂, 𑀦 𑀢𑀼 𑀲𑀩𑁆𑀩𑀣𑀸 𑀧𑀭𑀺𑀘𑁆𑀘𑀸𑀕𑁄𑀧𑀭𑁄𑀧𑀓𑀸𑀭𑀸𑀬 𑀢𑀲𑁆𑀲𑁄𑀧𑀸𑀤𑀸𑀦𑀢𑁄, 𑀲𑀩𑁆𑀩𑀣𑀸 𑀘 𑀲𑀓𑀢𑁆𑀣𑀧𑀭𑀺𑀘𑁆𑀘𑀸𑀕𑁂 𑀧𑀭𑁄𑀧𑀓𑀸𑀭𑀸𑀲𑀫𑁆𑀧𑀸𑀤𑀦𑀢𑁄-𑀦𑀼𑀧𑀸𑀤𑀸𑀦𑀫𑁂𑀯 𑀧𑀬𑁄𑀚𑀦𑀸𑀪𑀸𑀯𑀸 𑀢𑀲𑁆𑀲 𑀲𑀺𑀬𑀸’’𑀢𑀺, 𑀣𑀧𑀢𑀺 𑀯𑀟𑁆𑀠𑀢𑀻. 𑀅𑀢𑁆𑀣𑀦𑁆𑀢𑀺 𑀭𑀸𑀚𑀲𑀤𑁆𑀤𑀯𑀸𑀘𑁆𑀘𑀁. 𑀅𑀘𑁆𑀘𑀦𑁆𑀢𑀧𑀭𑀺𑀘𑁆𑀘𑀸𑀕𑁂𑀧𑀺 𑀦 𑀤𑁄𑀲𑁄… 𑀯𑀸𑀓𑁆𑀬𑁂 𑀤𑀺𑀝𑁆𑀞𑀲𑁆𑀲𑀼𑀧𑀲𑀚𑁆𑀚𑀦𑀲𑁆𑀲 𑀯𑀼𑀢𑁆𑀢𑀺𑀬𑀁 𑀲𑁄𑀬𑁂𑀯𑀸𑀬𑀦𑁆𑀢𑁆𑀬𑀦𑁆𑀯𑀬𑀸𑀯𑀲𑀸𑀬𑀢𑁄 𑀢𑀤𑀢𑁆𑀣𑀸𑀯 𑀕𑀢𑀺𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳- ‘𑀅𑀣 𑀯𑁂’𑀘𑁆𑀘𑀸𑀤𑀺.

𑀲𑁄𑀬𑁂𑀯𑀸𑀬𑀦𑁆𑀢𑁆𑀬𑀚𑁆𑀛𑀯𑀲𑀸𑀬𑁄-𑀦𑁆𑀯𑀬𑁄, 𑀲𑁄𑀬𑁂𑀯𑀸𑀬𑀁 𑀭𑀸𑀚𑀲𑀤𑁆𑀤𑁄 𑀬𑁄 𑀯𑀸𑀓𑁆𑀬𑀢𑀸𑀮𑁂 𑀤𑀺𑀝𑁆𑀞𑁄𑀢𑀺 𑀯𑁄𑀳𑀸𑀭𑀻𑀦𑀫𑁂𑀓𑀢𑁆𑀢𑀸𑀯𑀲𑀸𑀬𑁂𑀦𑀸𑀲𑀢𑁆𑀬𑀧𑀺 (𑀭𑀸𑀚𑀲𑀤𑁆𑀤𑀲𑁆𑀲)𑀢𑁆𑀣𑁂 ¶ 𑀧𑀼𑀭𑀺𑀲𑀲𑁆𑀲 𑀯𑀺𑀲𑁂𑀲𑀦𑀫𑁆𑀪𑀯𑀺𑀲𑁆𑀲𑀢𑀻𑀢𑀺 𑀪𑀸𑀯𑁄, 𑀏𑀢𑁆𑀣𑁂𑀯 𑀤𑀺𑀝𑁆𑀞𑀦𑁆𑀢𑀫𑀸𑀳- ‘𑀬𑀣𑁂’𑀘𑁆𑀘𑀸𑀤𑀺.

𑀅𑀩𑁆𑀬𑀬𑀦𑁆𑀢𑀺 𑀬𑀤𑀜𑁆𑀜𑁂𑀲𑀁 𑀧𑀲𑀺𑀤𑁆𑀥𑀦𑁆𑀢𑀺 𑀮𑀺𑀗𑁆𑀕𑀯𑀘𑀦𑀪𑁂𑀤𑁂𑀧𑀺 𑀩𑁆𑀬𑀬𑀭𑀳𑀺𑀢𑀢𑁆𑀢𑀸 𑀉𑀧𑀲𑀕𑁆𑀕𑀦𑀺𑀧𑀸𑀢𑀸𑀦𑀁 𑀧𑀭𑁂𑀳𑀺 𑀅𑀩𑁆𑀬𑀬𑀲𑀜𑁆𑀜𑀸𑀓𑀭𑀡𑀢𑁄 𑀅𑀩𑁆𑀬𑀬𑀦𑁆𑀢𑀺 𑀧𑀭𑁂𑀲𑀁 𑀧𑀲𑀺𑀤𑁆𑀥𑀁, 𑀢𑁂𑀲𑀦𑁆𑀢𑁆𑀯𑀬𑀁 𑀲𑀫𑀸𑀲𑁄 𑀅𑀩𑁆𑀬𑀬𑀢𑁆𑀣𑀧𑀼𑀩𑁆𑀩𑀗𑁆𑀕𑀫𑀢𑁆𑀢𑀸 𑀅𑀦𑀩𑁆𑀬𑀬𑀁 𑀅𑀩𑁆𑀬𑀬𑀫𑁆𑀪𑀯𑀢𑀻𑀢𑀺 𑀅𑀩𑁆𑀬𑀬𑀻𑀪𑀸𑀯𑁄 𑀧𑀲𑀺𑀤𑁆𑀥𑁄, 𑀅𑀲𑀗𑁆𑀔𑁆𑀬𑀲𑁆𑀲 𑀲𑀼𑀢𑀢𑁆𑀢𑀸 𑀢𑀲𑁆𑀲𑁂𑀯 𑀯𑀺𑀪𑀢𑁆𑀬𑀢𑁆𑀣𑀸𑀤𑀬𑁄 𑀯𑀺𑀲𑀬𑀪𑀸𑀯𑁂𑀦 𑀯𑀺𑀲𑁂𑀲𑀦𑀸𑀦𑀻𑀢𑀺 𑀯𑀺𑀜𑁆𑀜𑀸𑀬𑀦𑁆𑀢𑀻𑀢𑁆𑀬𑀸𑀳- ‘𑀅𑀲𑀗𑁆𑀔𑁆𑀬𑁂’𑀘𑁆𑀘𑀸𑀤𑀺, 𑀇𑀫𑀺𑀦𑀸 𑀦𑁂𑀫𑁂𑀲𑀫𑀸𑀲𑀢𑁆𑀣𑀸𑀢𑀺 𑀤𑀻𑀧𑁂𑀢𑀺.

𑀢𑀸𑀯𑀲𑀤𑁆𑀤𑀲𑁆𑀲 𑀓𑀫𑀯𑀼𑀢𑁆𑀢𑀺𑀬𑀁 𑀬𑁄-𑀢𑁆𑀣𑁄 𑀲𑀫𑁆𑀧𑀚𑁆𑀚𑀢𑁂 𑀢𑀫𑀸𑀳- ‘𑀯𑀺𑀪𑀢𑁆𑀬’𑀘𑁆𑀘𑀸𑀤𑀺, 𑀯𑀺𑀪𑀢𑁆𑀬𑀢𑁆𑀣𑁂 𑀉𑀤𑀸𑀳𑀭𑀺𑀢𑁆𑀯𑀸𑀢𑀺 𑀯𑀺𑀪𑀢𑁆𑀬𑀢𑁆𑀣𑀯𑀺𑀲𑀬𑁂 𑀯𑀢𑁆𑀢𑀫𑀸𑀦𑀲𑁆𑀲𑀸𑀲𑀗𑁆𑀔𑁆𑀬𑀲𑁆𑀲 𑀇𑀢𑁆𑀣𑀺𑀲𑀤𑁆𑀤𑁂𑀦 𑀲𑀫𑀸𑀲𑀫𑀥𑀺𑀢𑁆𑀣𑀻𑀢𑀺 𑀉𑀯𑀸𑀳𑀭𑀺𑀢𑁆𑀯𑀸, 𑀦𑀺𑀘𑁆𑀘𑀬𑀫𑀸𑀲𑀸𑀦 𑀫𑀯𑀺𑀕𑁆𑀕𑀳𑁄, 𑀅𑀲𑀓𑀧𑀤𑀯𑀺𑀕𑁆𑀕𑀳𑁄 𑀯𑀸 𑀬𑀼𑀢𑁆𑀢𑁄, 𑀅𑀜𑁆𑀜𑀣𑀸 𑀅𑀦𑀺𑀘𑁆𑀘𑀢𑀸𑀧𑀢𑁆𑀢𑀻𑀢𑁆𑀬𑀸𑀳- ‘𑀦𑀺𑀘𑁆𑀘𑀲𑀫𑀸𑀲𑀢𑁆𑀢𑀸’𑀇𑀘𑁆𑀘𑀸𑀤𑀺.

𑀅𑀲𑀓𑀧𑀤𑁂𑀦 𑀅𑀦𑀢𑁆𑀢𑀦𑀺𑀬𑀧𑀤𑁂𑀦 𑀅𑀜𑁆𑀜𑀧𑀤𑁂𑀦 𑀯𑀺𑀕𑁆𑀕𑀳𑁄 𑀅𑀲𑀓𑀧𑀤𑀯𑀺𑀕𑁆𑀕𑀳𑁄, 𑀢𑁂𑀦, 𑀏𑀢𑁆𑀣 𑀳𑀺 𑀬𑀣𑀸 𑀓𑀼𑀫𑁆𑀪𑀲𑁆𑀲 𑀲𑀫𑀻𑀧𑀁𑀢𑁆𑀬𑀜𑁆𑀜𑀧𑀤𑀯𑀸𑀓𑁆𑀬𑁂 𑀲𑀫𑀻𑀧 𑀲𑀤𑁆𑀤𑁂𑀦𑀼𑀧𑀲𑀤𑁆𑀤𑀯𑀘𑀦𑀻𑀬𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀉𑀧𑀲𑀤𑁆𑀤𑁄 𑀦𑀧𑁆𑀧𑀬𑀼𑀚𑁆𑀚𑀢𑁂, 𑀬𑀣𑀸 𑀇𑀢𑁆𑀣𑀻 𑀲𑀽𑀢𑀺 𑀏𑀢𑁆𑀣𑀸𑀥𑀺𑀲𑀤𑁆𑀤𑀯𑀘𑀦𑀻𑀬𑀲𑁆𑀲𑀸 (𑀥𑀸)𑀭𑀢𑁆𑀣𑀲𑁆𑀲 𑀲𑀢𑁆𑀢𑀫𑀺𑀬𑀸 𑀯𑀼𑀢𑁆𑀢𑀢𑁆𑀢𑀸 𑀦𑀸𑀥𑀺𑀲𑀤𑁆𑀤𑁄𑀢𑀺 ‘𑀇𑀢𑁆𑀣𑀻𑀲𑀽’𑀢𑀺 𑀅𑀜𑁆𑀜𑀧𑀤𑀯𑀸𑀓𑁆𑀬𑀁 𑀯𑀼𑀢𑁆𑀢𑀁, 𑀓𑀣𑀸𑀧𑀯𑀢𑁆𑀢𑀸𑀢𑀺 𑀢𑁆𑀯𑀸𑀥𑁂𑀬𑁆𑀬𑁄 𑀧𑀤𑀲𑁆𑀲𑀦𑀁, 𑀏𑀯𑀁 𑀲𑀩𑁆𑀩𑀢𑁆𑀣𑁄𑀦𑁆𑀦𑁂𑀬𑀁, 𑀅𑀲𑀓𑀧𑀤𑀯𑀺𑀕𑁆𑀕𑀳𑁂𑀦𑀸𑀢𑁆𑀣𑁄𑀯 𑀯𑀼𑀢𑁆𑀢𑁄,

𑀅𑀥𑀺𑀲𑀤𑁆𑀤𑀲𑁆𑀲 𑀧𑀦 𑀧𑀼𑀭𑀢𑁄𑀯𑀝𑁆𑀞𑀺𑀢𑀲𑁆𑀲𑀸𑀥𑀸𑀭𑁂 𑀯𑀢𑁆𑀢𑀫𑀸𑀦𑀲𑁆𑀲 𑀢𑀁𑀲𑀫𑀸𑀦𑀸𑀥𑀺𑀓𑀭𑀡𑁂𑀦 𑀲𑀢𑁆𑀢𑀫𑁆𑀬𑀦𑁆𑀢𑁂𑀦𑀺𑀢𑁆𑀣𑀺𑀲𑀤𑁆𑀤𑁂𑀦 𑀲𑀳 𑀲𑀫𑀸𑀲𑁄𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘𑀅𑀥𑀺𑀲𑀤𑁆𑀤𑁄’𑀘𑁆𑀘𑀸𑀤𑀺.

𑀲𑁆𑀬𑀸𑀤𑀺𑀮𑁄𑀧𑁄𑀢𑀺 𑀅𑀥𑀺𑀲𑀤𑁆𑀤𑀢𑁄 𑀇𑀢𑁆𑀣𑀺𑀲𑀤𑁆𑀤𑀢𑁄 𑀘 𑀧𑀭𑁂𑀲𑀁 𑀲𑀢𑁆𑀢𑀫𑀻 𑀩𑀳𑀼𑀯𑀘𑀦𑀸𑀦𑀁 𑀮𑁄𑀧𑁄𑀢𑀺 𑀅𑀢𑁆𑀣𑁄. 𑀅𑀢𑁆𑀢 (𑀪𑀸𑀯) 𑀲𑀫𑁆𑀧𑀢𑁆𑀢𑀻𑀢𑀺 𑀲𑀭𑀻𑀭𑀲𑀫𑁆𑀧𑀢𑁆𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀩𑁆𑀭𑀳𑁆𑀫𑀲𑀤𑁆𑀤𑀲𑁆𑀲 𑀲𑀭𑀻𑀭𑀁 𑀅𑀢𑁆𑀣𑁄𑀢𑀺 𑀆𑀳- ‘𑀩𑁆𑀭𑀳𑁆𑀫𑀁 𑀲𑀭𑀻𑀭𑀦𑁆𑀢𑀺, 𑀓𑀢𑁆𑀣𑀘𑀻 𑀉𑀢𑁆𑀢𑀭𑀧𑀤𑀢𑁆𑀣𑀧𑁆𑀧𑀥𑀸𑀦𑀢𑁆𑀢𑀸𑀯𑀸𑀲𑀗𑁆𑀔𑁆𑀬𑀲𑀫𑀸𑀲𑀲𑁆𑀲 ‘𑀲𑀫𑁆𑀧𑀦𑁆𑀦𑀁 𑀩𑁆𑀭𑀳𑁆𑀫’𑀦𑁆𑀢𑀺 𑀯𑀺𑀕𑁆𑀕𑀳𑁄 𑀯𑀼𑀢𑁆𑀢𑁄.

𑀲𑀫𑀸𑀲𑀯𑀺𑀪𑀢𑁆𑀢𑀺𑀬𑀸𑀢𑀺 ¶ 𑀲𑀫𑀸𑀲𑀢𑁄 𑀉𑀧𑁆𑀧𑀦𑁆𑀦𑀯𑀺𑀪𑀢𑁆𑀢𑀺𑀬𑀸, 𑀲𑀓𑀮𑁄 𑀧𑀤𑁂𑀲𑀲𑀓𑀮𑁄, 𑀧𑀭𑀺𑀕𑁆𑀕𑀳𑀸𑀧𑁂𑀓𑁆𑀔𑀸𑀢𑀺 𑀅𑀪𑁆𑀬𑀼𑀧𑀕𑀫𑀸𑀧𑁂𑀓𑁆𑀔𑀸𑀬𑀸𑀢𑀺 𑀅𑀢𑁆𑀣𑁄, 𑀅𑀪𑁆𑀬𑀼𑀧𑀕𑀫𑁂𑀧𑀺 𑀳𑀺 𑀧𑀭𑀺𑀕𑁆𑀕𑀳𑀲𑀤𑁆𑀤𑁄𑁋

𑀲𑀧𑀣𑁂 𑀧𑀭𑀺𑀯𑀸𑀭𑁂 𑀘, 𑀫𑀽𑀮𑀸𑀪𑁆𑀬𑀼𑀧𑀕𑀫𑁂𑀲𑀼 𑀘;

𑀭𑀯𑀺𑀫𑁆𑀳𑀺 𑀭𑀸𑀳𑀼𑀕𑀳𑀺𑀢𑁂, 𑀤𑀸𑀭𑁂𑀲𑀼 𑀘 𑀧𑀭𑀺𑀕𑁆𑀕𑀳𑁄’’𑀢𑀺 𑀦𑀺𑀖𑀡𑁆𑀝𑀼.

𑀲𑀓𑀮𑀲𑁆𑀲 𑀪𑀸𑀯𑁄 𑀲𑀸𑀓𑀮𑁆𑀬𑀁-𑀲𑀓𑀮𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁, 𑀢𑀫𑁆𑀧𑀦 𑀦𑀺𑀲𑁆𑀲𑁂𑀲 [𑀫𑀢𑀦𑀺𑀲𑁆𑀲𑁂𑀲 (𑀧𑁄𑀢𑁆𑀣𑀓𑁂)] 𑀕𑁆𑀕𑀳𑀡𑀸 𑀧𑀼𑀣𑀼 𑀪𑀯𑀢𑀻𑀢𑁆𑀬𑀸𑀳- ‘𑀅𑀲𑁂𑀲𑀕𑁆𑀕𑀳𑀡’𑀦𑁆𑀢𑀺, 𑀢𑀺𑀡𑀸𑀦𑀁 𑀲𑀸𑀓𑀮𑁆𑀬𑀦𑁆𑀢𑀺 𑀯𑀺𑀕𑁆𑀕𑀳𑁄, 𑀢𑀺𑀡𑀲𑀤𑁆𑀤𑁂𑀦 𑀳𑀺 𑀢𑀺𑀡𑀲𑀳𑀺𑀢𑀸𑀦𑀺 𑀕𑀳𑀺𑀢𑀸𑀦𑀺, 𑀢𑁂𑀦𑁂𑀯 𑀯𑀓𑁆𑀔𑀢𑀺 𑀩𑁆𑀬𑀢𑀺𑀭𑁂𑀓𑀦𑀬𑁂- ‘𑀢𑀁 𑀲𑀩𑁆𑀩𑀁 𑀢𑀺𑀡𑀲𑀳𑀺𑀢𑀫𑀚𑁆𑀛𑁄- 𑀳𑀭𑀢𑀻’𑀢𑀺, 𑀲𑀢𑀺𑀡𑀫𑀚𑁆𑀛𑁄𑀳𑀭𑀢𑀻𑀢𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑀢𑁆𑀣 𑀫𑀸𑀳-‘𑀬𑀸𑀯𑀸’𑀢𑀺𑀆𑀤𑀺.

𑀢𑀺𑀡𑀲𑀤𑁆𑀤𑁄 𑀉𑀧𑀮𑀓𑁆𑀔𑀡𑀁 𑀲𑁂𑀲𑀸-𑀦𑀚𑁆𑀛𑁄𑀳𑀸𑀭𑀺𑀬𑀸𑀦𑀁, 𑀢𑁂𑀦𑀸𑀳 ‘𑀢𑀺𑀡𑀸𑀤𑀺𑀓𑀫𑁆𑀧𑀻’𑀢𑀺. 𑀧𑀭𑀺𑀕𑁆𑀕𑀳𑀸𑀧𑁂𑀓𑁆𑀔𑀸𑀬𑀦𑁆𑀢𑀪𑀽𑀢𑀲𑁆𑀲 𑀕𑀳𑀡𑀢𑁆𑀣𑀁 ‘‘𑀅𑀩𑁆𑀬𑀬𑀁 𑀯𑀺𑀪𑀢𑁆𑀢𑀺𑀲𑀫𑀻𑀧𑀸’’𑀤𑀺𑀲𑀼𑀢𑁆𑀢𑁂 ‘𑀲𑀸𑀕𑁆𑀬𑀥𑀻𑀢𑁂’𑀢𑀺 𑀦𑀺𑀧𑁆𑀨𑀸𑀤𑀦𑀢𑁆𑀣𑀫𑀦𑁆𑀢𑀯𑀘𑀦 𑀫𑀼𑀤𑀸𑀳𑀢𑀫𑁆𑀧𑀸𑀡𑀺𑀦𑀺𑀦𑀸, 𑀢𑀫𑁆𑀧𑀺 𑀲𑀸𑀓𑀮𑁆𑀬𑁂𑀬𑁂𑀯𑀸𑀳𑀭𑀺𑀢𑀼𑀁 [𑀲𑀸𑀓𑀮𑁆𑀮𑁂𑀦𑁄𑀤𑀸𑀳𑀭𑀺𑀢𑀼𑀁] 𑀲𑀸𑀕𑁆𑀬𑀥𑀻𑀢𑁂𑀢𑁆𑀬𑀽𑀤𑀸𑀳𑀝𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘𑀢𑀢𑁄’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁.

𑀢𑀢𑁄𑀢𑀺 𑀬𑀢𑁄 𑀲𑀓𑀮𑀲𑀓𑀮𑁂 𑀦 𑀯𑀢𑁆𑀢𑀢𑀺, 𑀧𑀭𑀺𑀕𑁆𑀕𑀳𑀸𑀧𑁂𑀓𑁆𑀔𑀸𑀬 𑀲𑀫𑀢𑁆𑀢𑀺𑀬𑀸 𑀅𑀦𑁆𑀢𑀢𑁄 𑀲𑀓𑀸𑀲𑀸 𑀲𑀸𑀓𑀮𑁆𑀬𑀁 𑀦 𑀪𑀺𑀚𑁆𑀚𑀢𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀲𑀫𑀢𑁆𑀣𑀺𑀬𑀫𑁆𑀧𑀺 𑀅𑀦𑁆𑀢𑁂 𑀉𑀤𑀸𑀳𑀭𑀡𑀦𑁆𑀢𑀺 𑀲𑁂𑀲𑁄.

𑀅𑀕𑁆𑀕𑀺𑀧𑀭𑀺𑀬𑀦𑁆𑀢𑀦𑁆𑀢𑀺 𑀅𑀕𑁆𑀕𑀺𑀅𑀢𑁆𑀣𑁄 𑀕𑀦𑁆𑀣𑁄 𑀢𑀸𑀤𑀢𑁆𑀣𑀺𑀬𑀸 𑀅𑀕𑁆𑀕𑀺, 𑀲𑁄𑀧𑀭𑀺𑀬𑀦𑁆𑀢𑁄-𑀲𑁆𑀲 𑀅𑀚𑁆𑀛𑁂𑀬𑀲𑁆𑀲𑀸𑀢𑀺 𑀅𑀕𑁆𑀕𑀺𑀧𑀭𑀺𑀬𑀦𑁆𑀢𑀁, 𑀬𑀢𑁆𑀢𑀓𑀲𑁆𑀲𑀸𑀚𑁆𑀛𑁂𑀬𑀲𑁆𑀲 𑀧𑀭𑀺𑀕𑁆𑀕𑀳𑁄, 𑀢𑀲𑁆𑀲 𑀅𑀕𑁆𑀕𑀺 𑀧𑀭𑀺𑀬𑀦𑁆𑀢𑁄, 𑀅𑀕𑁆𑀕𑀺𑀦𑀸 𑀧𑀭𑀺𑀬𑀦𑁆𑀢𑀪𑀽𑀢𑁂𑀦 𑀲𑀳𑀺𑀢𑁄 𑀲𑀓𑀮𑁄𑀢𑀺 𑀯𑀺𑀕𑁆𑀕𑀳𑁄, 𑀅𑀕𑁆𑀕𑀺𑀦𑁄 𑀲𑀸𑀓𑀮𑁆𑀬𑀦𑁆𑀢𑀺 𑀯𑀸.

𑀲𑀤𑁆𑀤𑀺𑀓𑀸𑀦𑀦𑁆𑀢𑀺 𑀩𑁆𑀬𑀸𑀓𑀭𑀡𑀜𑁆𑀜𑀽𑀦𑀁. 𑀅𑀢𑁆𑀣𑀸𑀪𑀸𑀯𑁂𑀇𑀢𑁆𑀬𑀢𑁆𑀣𑀕𑁆𑀕𑀳𑀡𑀁 𑀇𑀢𑀭𑁂𑀢𑀭𑀸𑀪𑀸𑀯𑁂 𑀥𑀫𑁆𑀫𑀸𑀪𑀸𑀯𑁂 𑀘 𑀫𑀸 𑀲𑀺𑀬𑀸𑀢𑀺, 𑀅𑀢𑁄𑀬𑁂𑀯 𑀘𑁄𑀘𑁆𑀘𑀢𑁂 ‘𑀅𑀣𑁂𑀢𑀭𑁂𑀢𑀭𑀸𑀪𑀸𑀯𑁂’𑀇𑀘𑁆𑀘𑀸𑀤𑀺, 𑀇𑀢𑀭𑀲𑁆𑀫𑀺𑀁 𑀇𑀢𑀭𑀲𑁆𑀲 𑀅𑀪𑀸𑀯𑁄 𑀇𑀢𑀭𑁂𑀢𑀭𑀸𑀪𑀸𑀯𑁄, 𑀕𑁄 𑀅𑀲𑁆𑀲𑁄 𑀦 𑀪𑀯𑀢𑀻𑀢𑀺 𑀳𑀺 𑀅𑀢𑁆𑀣𑀦𑁆𑀢𑀭𑀢𑁆𑀢𑀁 𑀦𑀺𑀲𑁂𑀥𑀻𑀬𑀢𑁂, 𑀦 𑀯𑀢𑁆𑀣𑀼𑀪𑀸𑀯𑁄, 𑀩𑁆𑀭𑀸𑀳𑁆𑀫𑀡𑁄 𑀦 𑀪𑀯𑀢𑀻𑀢𑁆𑀬𑀢𑁆𑀭𑀧𑀺𑀩𑁆𑀭𑀸𑀳𑁆𑀫𑀡𑀢𑁆𑀢𑀥𑀫𑁆𑀫𑁄 ¶ 𑀦𑀺𑀲𑁂𑀥𑀻𑀬𑀢𑁂, 𑀦 𑀯𑀢𑁆𑀣𑀼𑀪𑀸𑀯𑁄, 𑀧𑀭𑀢𑁆𑀢𑀸𑀢𑀺𑀆𑀤𑀺𑀦𑀸 𑀯𑀺𑀧𑁆𑀧𑀝𑀺𑀲𑁂𑀥 𑀯𑀺𑀲𑀬𑀫𑀸𑀳.

𑀅𑀢𑀺𑀓𑁆𑀓𑀫𑀸𑀪𑀸𑀯𑁂𑀢𑀻 𑀏𑀢𑁆𑀣 𑀅𑀢𑀺𑀓𑁆𑀓𑀫𑀸𑀢𑀺 𑀧𑀜𑁆𑀘𑀫𑀺𑀬𑀸 𑀅𑀲𑀫𑀸𑀲𑀦𑀺𑀤𑁆𑀤𑁂𑀲𑁄𑀢𑀺 𑀆𑀳- ‘𑀅𑀢𑀺𑀓𑁆𑀓𑀫𑀸’𑀢𑀺, 𑀦 𑀧𑀦𑀼𑀧𑁆𑀧𑀦𑁆𑀦𑀲𑁆𑀲 𑀧𑀘𑁆𑀙𑀸𑀢𑀺 𑀇𑀫𑀺𑀦𑀸 𑀅𑀢𑀺𑀓𑁆𑀓𑀫𑀸𑀪𑀸𑀯𑁄 𑀦𑀸𑀫 𑀉𑀧𑁆𑀧𑀦𑁆𑀦𑀲𑁆𑀲 𑀧𑀘𑁆𑀙𑀸 𑀅𑀪𑀸𑀯𑁄𑀢𑀺 𑀤𑀲𑁆𑀲𑁂𑀢𑀺.

𑀦𑀺𑀢𑁆𑀢𑀺𑀡𑀦𑁆𑀢𑀺 𑀉𑀢𑁆𑀢𑀭𑀧𑀤𑀢𑁆𑀣𑀧𑁆𑀧𑀥𑀸𑀦𑁄-𑀲𑀗𑁆𑀔𑁆𑀬𑀲𑀫𑀸𑀲𑁄. 𑀲𑀫𑁆𑀧𑀢𑀺𑀲𑀤𑁆𑀤𑀲𑁆𑀲 𑀲𑀸𑀫𑀜𑁆𑀜𑀯𑀘𑀦𑀢𑁆𑀢𑁂𑀧𑀺 𑀇𑀥𑀸𑀥𑀺𑀧𑁆𑀧𑁂𑀢𑀁 𑀓𑀸𑀮𑀁 𑀤𑀲𑁆𑀲𑁂𑀢𑀼𑀫𑀸𑀳- ‘𑀉𑀧𑀪𑁄𑀕𑀲𑁆𑀲𑁂’’𑀘𑁆𑀘𑀸𑀤𑀺, 𑀉𑀧𑀪𑁄𑀕𑁄 𑀓𑀫𑁆𑀫𑀲𑀸𑀥𑀦𑁄 𑀮𑀳𑀼𑀧𑀸𑀯𑀼𑀭𑀡𑀲𑁆𑀲 𑀦𑀸𑀬𑀫𑀼𑀧𑀪𑁄𑀕𑀓𑀸𑀮𑁄𑀢𑀺 𑀯𑀺𑀕𑁆𑀕𑀳𑁄, (𑀅𑀢𑀺) 𑀮𑀳𑀼𑀧𑀸𑀯𑀼𑀭𑀡𑀦𑁆𑀢𑀺 𑀭𑀽𑀧𑀲𑀺𑀤𑁆𑀥𑀻𑀢𑀺 𑀤𑀲𑁆𑀲𑁂𑀢𑀼𑀁 𑀮𑀳𑀼𑀧𑀸𑀯𑀼𑀭𑀡𑀲𑁆𑀲𑀸𑀢𑀺𑀆𑀤𑀺 𑀯𑀼𑀢𑁆𑀢𑀺𑀬𑀁 𑀯𑀼𑀢𑁆𑀢𑀁.

𑀬𑁄𑀕𑁆𑀕𑀁 𑀭𑀽𑀧𑀦𑁆𑀢𑀺 𑀯𑀺𑀕𑁆𑀕𑀳𑁂 𑀅𑀦𑀼𑀭𑀽𑀧𑀁, 𑀦𑀦𑀼 𑀘𑀸𑀢𑁆𑀭 𑀦𑀺𑀘𑁆𑀘𑀲𑀫𑀸𑀲𑀢𑁆𑀢𑀸𑀲𑀧𑀤𑀯𑀺𑀕𑁆𑀕𑀳𑁂𑀦 𑀪𑀯𑀺𑀢𑀩𑁆𑀩𑀁𑀢𑁆𑀬𑀸𑀲𑀗𑁆𑀓𑀺𑀬𑀸𑀳-‘𑀯𑀺𑀘𑁆𑀙𑀸𑀬’𑀫𑀺𑀘𑁆𑀘𑀸𑀤𑀺, 𑀅𑀦𑀼𑀲𑀤𑁆𑀤𑁂𑀦 𑀳𑀺 𑀬𑁄𑀕𑁂 𑀯𑀺𑀘𑁆𑀙𑀸𑀬𑀁 ‘‘𑀅𑀦𑀼𑀦𑀸’’𑀢𑀺 (𑁨-𑁧𑁦) 𑀤𑀼𑀢𑀺𑀬𑀸 𑀯𑀺𑀥𑀻𑀬𑀢𑁂, 𑀯𑀸𑀓𑁆𑀬𑁂𑀬𑁂𑀯𑀸𑀲𑁆𑀲 𑀘 𑀧𑀬𑁄𑀕𑁄 𑀦𑀸𑀜𑁆𑀜𑀢𑁆𑀭𑁂𑀢𑀺 𑀯𑀸𑀓𑁆𑀬𑀫𑁆𑀧𑀺 𑀪𑀯𑀢𑀻𑀢𑀺 𑀫𑀜𑁆𑀜𑀢𑁂. 𑀲𑀓𑀺𑀔𑀻𑀢𑀺 𑀏𑀢𑁆𑀣𑀸𑀧𑀺 ‘‘𑀅𑀓𑀸𑀮𑁂 𑀲𑀓𑀢𑁆𑀣𑁂’’𑀢𑀺 (𑁩-𑁮𑁧) 𑀲𑀳𑀲𑁆𑀲 𑀲𑁄.

𑀲𑀤𑀺𑀲𑁄 𑀓𑀺𑀔𑀺𑀬𑀸𑀢𑀺 𑀏𑀢𑁆𑀣 𑀓𑀺𑀔𑀺𑀬𑀸 𑀧𑀲𑀺𑀤𑁆𑀥𑀪𑀽𑀢𑀸𑀬 𑀲𑀸𑀥𑀺𑀬𑀲𑁆𑀲 𑀲𑀸𑀥𑀦𑀪𑀸𑀯𑁂𑀦 𑀕𑀳𑀺𑀢𑀸𑀬 𑀲𑀥𑀫𑁆𑀫𑀢𑁆𑀢𑁂𑀦 𑀓𑁄𑀘𑀺 𑀲𑀸𑀥𑀺𑀬𑁄 𑀲𑀤𑀺𑀲𑁄𑀢𑀺 𑀯𑀼𑀢𑁆𑀢𑁄𑀢𑀺 𑀓𑀺𑀫𑀺𑀥 𑀲𑀤𑀺𑀲𑁄 𑀅𑀧𑁆𑀧𑀥𑀸𑀦𑀁 [𑀧𑀥𑀸𑀦𑀫𑁂𑀯𑀸𑀢𑀺 𑀅𑀢𑁆𑀣𑁄] 𑀢𑀣𑀸 𑀲𑀢𑀺 𑀧𑀼𑀧𑁆𑀧𑀧𑀤𑀢𑁆𑀣𑀧𑁆𑀧𑀥𑀸𑀦𑁂𑀦𑀸𑀲𑀗𑁆𑀔𑁆𑀬𑀲𑀫𑀸𑀲𑁂𑀦 𑀲𑀓𑀺𑀔𑀻𑀢𑀺 𑀏𑀢𑁆𑀣 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀆𑀳-‘𑀦𑀦𑀼𑀘𑁂’𑀢𑁆𑀬𑀸𑀤𑀺, 𑀓𑀺𑀔𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀻, 𑀏𑀢𑁆𑀣 𑀧𑀦 𑀲𑀤𑀺𑀲𑀢𑁆𑀢𑀲𑁆𑀲 𑀓𑀺𑀔𑀻𑀬𑀸-𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸𑀧𑁆𑀧𑀥𑀸𑀦𑀢𑁆𑀢𑀁. 𑀦𑁂𑀢𑀤𑀢𑁆𑀣𑀻𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀁 𑀘𑁄𑀤𑀦𑀁 𑀧𑀭𑀺𑀳𑀭𑀢𑀺.

𑀬𑀣𑀸 𑀤𑁂𑀯𑀤𑀢𑁆𑀢𑁄𑀢𑀺 𑀏𑀢𑁆𑀣 𑀬𑀤𑀺 𑀲𑀫𑀸𑀲𑁄 𑀪𑀯𑁂𑀬𑁆𑀬, 𑀤𑁂𑀯𑀤𑀢𑁆𑀢𑁂𑀦 𑀲𑀤𑀺𑀲𑁄 𑀬𑀣𑀸𑀤𑁂𑀯𑀤𑀢𑁆𑀢𑀦𑁆𑀢𑀺 𑀪𑀯𑁂𑀬𑁆𑀬, 𑀧𑀝𑀺𑀲𑀺𑀤𑁆𑀥𑀢𑁆𑀢𑀸 𑀧𑀦 (𑀦) 𑀲𑀫𑀸𑀲𑁄𑀢𑀺, 𑀓𑀺𑀔𑀻𑀢𑀺 𑀫𑀓𑁆𑀓𑀝𑀲𑁆𑀲𑀸𑀪𑀺𑀥𑀸𑀦𑀁. 𑀚𑁂𑀝𑁆𑀞𑀸𑀦𑀼𑀓𑁆𑀓𑀫𑁂𑀦𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀦𑀼𑀚𑁂𑀝𑁆𑀞𑀦𑁆𑀢𑀺 𑀢𑀢𑀺𑀬𑀦𑁆𑀢𑀢𑀸 𑀕𑀫𑁆𑀬𑀢𑁂. 𑀘𑀓𑁆𑀓𑁂𑀦 𑀬𑀼𑀕𑀧𑀤𑀺 𑀲𑀘𑀓𑁆𑀓𑀁.

𑀅𑀫𑀢𑁆𑀢𑀸𑀦𑀁 𑀬𑀢𑁆𑀢𑀓𑁄 𑀧𑀭𑀺𑀘𑁆𑀙𑁂𑀤𑁄 𑀬𑀸𑀯𑀸𑀫𑀢𑁆𑀢𑀁.

𑁫. 𑀧𑀬𑁆𑀬𑀧𑀸𑀩𑀳𑀺𑀢𑀺𑀭𑁄 𑀧𑀼𑀭𑁂𑀧𑀘𑁆𑀙𑀸𑀯𑀸𑀧𑀜𑁆𑀘𑀫𑁆𑀬𑀸

𑀧𑀜𑁆𑀘𑀫𑁆𑀬𑀸𑀢𑀺 ¶ 𑀓𑀲𑁆𑀫𑀸 𑀯𑀼𑀢𑁆𑀢𑀁 𑀦𑀦𑀼 𑀅𑀯𑀼𑀢𑁆𑀢𑁂𑀧𑀺 𑀢𑀲𑁆𑀫𑀺𑀁 𑀯𑀓𑁆𑀔𑀫𑀸𑀦𑀦𑀬𑁂𑀦 𑀧𑀜𑁆𑀘𑀫𑁆𑀬𑀦𑁆𑀢𑀢𑁆𑀢𑀸 𑀧𑀜𑁆𑀘𑀫𑁆𑀬𑀦𑁆𑀢𑁂𑀳𑁂𑀯 𑀲𑀫𑀸𑀲𑁄 𑀯𑀺𑀜𑁆𑀜𑀸𑀬𑀢𑀻𑀢𑁆𑀬𑀸𑀲𑀗𑁆𑀓𑀺𑀬𑀸𑀳‘𑀬𑀤𑀺𑀧𑀺’𑀘𑁆𑀘𑀸𑀤𑀺. 𑀢𑀣𑀸𑀧𑀺𑀘𑁆𑀘𑀸𑀤𑀺𑀦𑀸 𑀧𑀭𑀺𑀳𑀭𑀢𑀺, 𑀳𑁄𑀢𑀼 𑀓𑀸𑀫𑀁 ‘𑀧𑀭𑀺𑀧𑀩𑁆𑀩𑀢𑀁 𑀯𑀺𑀚𑁆𑀚𑁄𑀢𑀢𑁂’𑀢𑀺 𑀤𑀼𑀢𑀺𑀬𑀸𑀦𑀺𑀲𑁂𑀥𑀸𑀬, 𑀅𑀜𑁆𑀜𑀢𑁆𑀭 𑀓𑀣𑀦𑁆𑀢𑀺 𑀆𑀳 ‘𑀇𑀳 𑀘𑁂’𑀢𑁆𑀬𑀸𑀤𑀺.

𑀆𑀘𑀢𑁆𑀢𑀸𑀭𑁄 𑀯𑀸𑀢𑀺 𑀆𑀲𑀤𑁆𑀤𑁄 𑀯𑀸𑀓𑁆𑀬𑁂, 𑀲𑀭𑀡𑁂 𑀯𑀸, 𑀕𑀸𑀫𑁄 𑀩𑀳𑀺 𑀢𑀺𑀝𑁆𑀞𑀢𑀻𑀢𑁆𑀬𑀢𑁆𑀣𑁄, 𑀧𑀼𑀭𑀢𑁄 𑀕𑀸𑀫𑀫𑁆𑀧𑀲𑁆𑀲𑀸𑀢𑀺 𑀯𑀤𑀦𑁆𑀢𑁄 𑀧𑀼𑀭𑁂𑀢𑁆𑀬𑀢𑁆𑀣𑀧𑁆𑀧𑀖𑀸𑀦𑁄𑀬𑀦𑁆𑀦𑀺𑀤𑁆𑀤𑁂𑀲𑁄, 𑀦𑀲𑀭𑀽𑀧𑀧𑁆𑀧𑀥𑀸𑀦𑁄𑀢𑀺 𑀤𑀲𑁆𑀲𑁂𑀢𑀺, 𑀅𑀪𑀺𑀫𑀼𑀔𑁂 𑀕𑀸𑀫𑀫𑁆𑀧𑀲𑁆𑀲𑀸𑀢𑁆𑀬𑀢𑁆𑀣𑁄. 𑀅𑀯𑀼𑀢𑁆𑀢𑀸𑀦𑀫𑁂𑀢𑀸𑀦𑁆𑀬𑀼𑀧𑀮𑀓𑁆𑀔𑀡𑀸𑀦𑀺, 𑀢𑀲𑁆𑀫𑀸 ‘𑀢𑀺𑀭𑁄 𑀕𑀸𑀫𑀫𑁆𑀧𑀲𑁆𑀲𑀸’𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀺𑀭𑀺𑀬𑀢𑁄 𑀕𑀸𑀫𑀫𑁆𑀧𑀲𑁆𑀲, 𑀧𑀘𑁆𑀙𑀢𑁄 𑀕𑀸𑀫𑀫𑁆𑀧𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀅𑀧𑀲𑀤𑁆𑀤𑀬𑁄𑀕𑁂 𑀦𑀺𑀘𑁆𑀘𑀧𑀜𑁆𑀘𑀦𑁆𑀢𑀲𑁆𑀲 𑀯𑀺𑀓𑀧𑁆𑀧𑁂𑀦 𑀲𑀫𑀸𑀲𑀯𑀺𑀥𑀸𑀦𑀸𑀯𑀸𑀪𑀯𑀦𑁂𑀦𑁄𑀤𑀸𑀳𑀭𑀡𑀁 𑀤𑀺𑀦𑁆𑀦𑀁 (𑀏𑀢𑁆𑀣) 𑀧𑀜𑁆𑀘𑀫𑁆𑀬𑀸𑀢𑀺 𑀧𑀬𑁄𑀚𑀦𑀸𑀪𑀸𑀯𑁂𑀧𑀺 𑀅𑀜𑁆𑀜𑀤𑀢𑁆𑀣𑀁 𑀓𑀭𑀺𑀬𑀫𑀸𑀦𑀫𑀺𑀳𑀸𑀧𑁆𑀬𑀢𑁆𑀣𑀯𑀦𑁆𑀢𑀁 𑀳𑁄𑀢𑀺.

‘‘𑀅𑀦𑀼 𑀬𑀁 𑀲𑀫𑀬𑀸’’𑀢𑀺 (𑁨-𑁧-𑁧𑁫) 𑀘 ‘‘𑀬𑀲𑁆𑀲 𑀘𑀸𑀬𑀸𑀫𑁄’’𑀢𑀺 (𑁨-𑁧-𑁧𑁬) 𑀘 𑀧𑀸𑀡𑀺𑀦𑀺𑀦𑁄 𑀯𑀘𑀦𑀤𑁆𑀯𑀬𑀁, 𑀅𑀬𑀫𑁂𑀢𑁂𑀲𑀫𑀢𑁆𑀣𑁄 ‘‘𑀬𑀲𑁆𑀲 𑀲𑀫𑀬𑀸 𑀲𑀫𑀻𑀧𑀯𑀸𑀘𑀻 𑀅𑀦𑀼𑀲𑀤𑁆𑀤𑁄, 𑀢𑁂𑀦 𑀲𑀳 𑀲𑀫𑀲𑁆𑀲𑀢𑁂𑀢𑀺 𑀘, 𑀅𑀦𑀼 𑀬𑀲𑁆𑀲𑀸𑀬𑀸𑀫𑀯𑀸𑀘𑀻, 𑀢𑁂𑀦 𑀲𑁆𑀬𑀸𑀤𑁆𑀬𑀦𑁆𑀢𑁂𑀦 𑀲𑀳 𑀲𑀫𑀲𑁆𑀲𑀢𑁂’’𑀢𑀺 𑀘. 𑀯𑀢𑁆𑀣𑀼𑀢𑁄 𑀢𑀼 𑀲𑀸𑀫𑀻𑀧𑁆𑀬𑀸𑀬𑀸𑀫𑀯𑀦𑁆𑀢𑀸𑀦𑀫𑀦𑀺𑀤𑁆𑀤𑁂𑀲𑁂𑀧𑀺 𑀲𑀸𑀫𑀢𑁆𑀣𑀺𑀬𑀸 𑀢𑀤𑀸𑀓𑁆𑀔𑁂𑀧𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳-‘𑀲𑀫𑀻𑀧𑀸𑀬𑀸𑀫𑀸𑀦’𑀫𑀺𑀘𑁆𑀘𑀸𑀤𑀺.

𑀲𑀫𑁆𑀩𑀦𑁆𑀥𑀺𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑀺𑀲𑀤𑁆𑀤𑀸 𑀲𑀓𑀢𑁆𑀣𑀫𑀺𑀯 𑀦𑀺𑀬𑀢𑀧𑀝𑀺𑀬𑁄𑀕𑀺𑀦𑀫𑀸𑀓𑁆𑀔𑀧𑀦𑁆𑀢𑀺… 𑀢𑁂𑀦 𑀯𑀺𑀦𑀸 𑀢𑁂𑀲𑀁 𑀲𑀓𑀢𑁆𑀣𑀸𑀪𑀸𑀯𑀸. 𑀆𑀬𑀸𑀫𑁄 𑀤𑀻𑀖𑀢𑀸, ‘‘𑀬𑀲𑁆𑀲 𑀲𑀫𑀻𑀧𑀸𑀬𑀸𑀫𑁂𑀲𑁆𑀯𑀦𑀼’’𑀢𑀺 𑀬𑀣𑀸𑀯𑀼𑀢𑁆𑀢𑀲𑀼𑀢𑁆𑀢𑀤𑁆𑀯𑀬𑀫𑀸𑀓𑁆𑀔𑁂𑀧𑁂𑀦𑀼𑀧𑀤𑀺𑀲𑀢𑀺, 𑀯𑀦𑀲𑁆𑀲 𑀲𑀸𑀫𑀺𑀧𑁆𑀬𑀫𑀦𑀼𑀯𑀦𑀁, ‘‘𑀅𑀲𑀗𑁆𑀔𑁆𑀬𑀁 𑀯𑀺𑀪𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀲𑀫𑀻𑀧’’ 𑀇𑀘𑁆𑀘𑁂𑀯 (𑁩-𑁨) 𑀲𑀺𑀤𑁆𑀥𑁂𑀧𑀼𑀦 𑀲𑀫𑀻𑀧𑀕𑁆𑀕𑀳𑀡𑀁 𑀯𑀺𑀓𑀧𑁆𑀧𑀢𑁆𑀣𑀁, 𑀢𑁂𑀦 𑀯𑀦𑀲𑁆𑀲𑀸𑀦𑀼𑀢𑀺 𑀯𑀸𑀓𑁆𑀬𑁂𑀦𑀸𑀧𑀺 𑀪𑀯𑀺𑀢𑀩𑁆𑀩𑀁.

𑀕𑀗𑁆𑀕𑀸𑀬 ¶ 𑀆𑀬𑀸𑀫𑁄 𑀅𑀦𑀼𑀕𑀗𑁆𑀕𑀁, 𑀪𑀸𑀕𑀯𑀼𑀢𑁆𑀢𑀺𑀓𑀸𑀭𑁄 ‘‘𑀮𑀓𑁆𑀔𑀡𑁂𑀦𑁂’’𑀢𑀺 𑀯𑀢𑁆𑀢𑀢𑁂. 𑀬𑀲𑁆𑀲𑀸𑀬𑀸𑀫𑀯𑀸𑀘𑀻 𑀅𑀦𑀼, 𑀢𑁂𑀦 𑀮𑀓𑁆𑀔𑀡𑁂𑀦 𑀲𑀫𑀲𑁆𑀲𑀢𑁂 𑀅𑀦𑀼𑀕𑀗𑁆𑀕𑀁 𑀩𑀸𑀭𑀸𑀡𑀲𑀻, 𑀕𑀗𑁆𑀕𑀸𑀬 𑀮𑀓𑁆𑀔𑀡𑀪𑀽𑀢𑀸𑀬 𑀧𑀲𑀺𑀤𑁆𑀥𑀸𑀬𑀸𑀫𑀕𑀼𑀡𑀸𑀬 𑀩𑀸𑀭𑀸𑀡𑀲𑀻 𑀮𑀓𑁆𑀔𑀻𑀬𑀢𑁂 𑀬𑀸𑀯𑀸𑀬𑀢𑀸𑀬𑀸𑀫𑀸 𑀕𑀗𑁆𑀕𑀸 𑀢𑀸𑀯𑀸𑀬𑀫𑁆𑀧𑀻𑀢𑀺 𑀲𑀪𑀸𑀯𑀢𑁄 𑀢𑀽𑀧𑀫𑀸𑀦𑁄𑀧𑀫𑁂𑀬𑁆𑀬𑀪𑀸𑀯𑁄 𑀲𑀫𑀸𑀲𑁂 𑀧𑀢𑀻𑀬𑀢𑁂 𑀕𑀗𑁆𑀕𑀸 𑀯𑀺𑀬 𑀤𑀻𑀖𑀸’’𑀢𑀺 𑀮𑀓𑁆𑀔𑀺𑀬𑀮𑀓𑁆𑀔𑀡𑀪𑀸𑀯𑀁 𑀯𑀡𑁆𑀡𑁂𑀢𑀺. 𑀏𑀯𑀁 𑀲𑀢𑀺 𑀩𑀸𑀭𑀸𑀡𑀲𑀻𑀢𑀺 𑀧𑀞𑀫𑀸 𑀦𑁄𑀧𑀧𑀚𑁆𑀚𑀢𑁂𑀢𑀺 𑀫𑀜𑁆𑀜𑀫𑀸𑀦𑁄 𑀆𑀳-‘𑀕𑀗𑁆𑀕𑀸𑀬𑀸 𑀫𑁂𑀦 𑀬𑀼𑀢𑁆𑀢𑀸 ‘‘𑀢𑁆𑀬𑀸𑀤𑀺. 𑀅𑀦𑀼𑀕𑀗𑁆𑀕𑀁 𑀩𑀸𑀭𑀸𑀡𑀲𑀺𑀬𑀸𑀢𑀺 𑀩𑀸𑀭𑀸𑀡𑀲𑀺𑀬𑀸 𑀕𑀗𑁆𑀕𑀸𑀬𑀸𑀫𑁄 𑀮𑀓𑁆𑀔𑀡𑀦𑁆𑀢𑀺 𑀅𑀢𑁆𑀣𑁄.

𑀅𑀓𑀢𑀲𑀫𑀸𑀲𑀸𑀘𑀸𑀢𑀺 𑀅𑀦𑁂𑀦 𑀇𑀫𑀺𑀦𑀸 𑀓𑀢𑀲𑀫𑀸𑀲𑀢𑀁 𑀤𑀻𑀧𑁂𑀢𑀺, 𑀢𑀺𑀝𑁆𑀞𑀦𑁆𑀢𑀻𑀢𑀺 𑀇𑀤𑀁𑀦𑁆𑀢𑀧𑁆𑀧𑀘𑁆𑀘𑀬𑀦𑁆𑀢𑀲𑁆𑀲𑀸𑀢𑁆𑀣𑀧𑀤𑀦𑁆𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘‘𑀦𑁆𑀢𑁄𑀓𑀢𑁆𑀢𑀭𑀺 𑀯𑀢𑁆𑀢𑀫𑀸𑀦𑁂’’𑀢𑀺𑀘𑁆𑀘𑀸𑀤𑀺, (𑁫-𑁬𑁪) 𑀆𑀬𑀢𑀻𑀢𑀻𑀫𑀲𑁆𑀲𑀸𑀢𑁆𑀢𑀧𑀤𑀁 𑀆𑀬𑀦𑁆𑀢𑀻𑀢𑀺, 𑀧𑀼𑀫𑁆𑀪𑀸𑀯𑀸𑀪𑀸𑀯𑁄 𑀦𑀻𑀧𑀸𑀢𑀦𑀸, 𑀅𑀓𑀸𑀭𑁄 𑀘 𑀦𑀺𑀧𑀸𑀢𑀦𑀸 ‘‘𑀕𑁄𑀢𑁆𑀯 𑀘𑀢𑁆𑀣𑁂 𑀘𑀸 𑀮𑁄𑀧𑁂’’𑀢𑁆𑀬𑀢𑁆𑀭 (𑁩-𑁪𑁬) ‘𑀦𑀸𑀜𑁆𑀜𑀸𑀲𑀗𑁆𑀔𑁆𑀬𑀢𑁆𑀣𑁂𑀲𑀽’𑀢𑁆𑀬𑀦𑀼𑀯𑀢𑁆𑀢𑀦𑀢𑁄.

𑀮𑀽𑀦𑀬𑀯𑀸𑀤𑀻𑀦𑀫𑁂𑀢𑁆𑀣 𑀦𑀺𑀧𑀸𑀢𑀦𑀸 𑀓𑀸𑀮𑁂𑀧𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀁, 𑀲𑀁𑀳𑀝𑀸𑀬𑀯𑀸 𑀬𑀲𑁆𑀫𑀺𑀁 𑀓𑀸𑀮𑁂 𑀲𑀁𑀳𑀝𑀬𑀯𑀁, 𑀉𑀫𑁆𑀫𑀢𑁆𑀢𑀕𑀗𑁆𑀕𑀦𑁆𑀢𑀺 𑀲𑀜𑁆𑀜𑀸𑀬𑀫𑀜𑁆𑀜𑀧𑀤𑀢𑁆𑀣𑁂 𑀯𑀸𑀥𑀺𑀓𑀸𑀭𑁂𑀧𑀺 𑀦𑀺𑀘𑁆𑀘𑀲𑀫𑀸𑀲𑁄, 𑀦 𑀳𑀺 𑀯𑀸𑀓𑁆𑀬𑀁 𑀲𑀜𑁆𑀜𑀸𑀢𑀺, 𑀆𑀤𑀺𑀲𑀤𑁆𑀤𑁂𑀦‘𑀲𑀫𑀲𑁆𑀲 𑀲𑁄𑀪𑀦𑀢𑁆𑀢𑀁 𑀲𑀼𑀲𑀫’𑀫𑀺𑀘𑁆𑀘𑀸𑀤𑀻𑀦𑀜𑁆𑀘 𑀲𑀗𑁆𑀕𑀳𑁄, 𑀧𑀪𑀸𑀯𑀦𑀁 𑀧𑀓𑀸𑀲𑀦𑀁.

𑀑𑀭𑀁 𑀕𑀗𑁆𑀕𑀸𑀬, 𑀧𑀸𑀭𑀁 𑀬𑀫𑀼𑀦𑀸𑀬𑀸𑀢𑀺 𑀲𑀫𑀸𑀲𑁂 𑀓𑀢𑁂 𑀦𑀺𑀧𑀸𑀢𑀦𑀸 𑀏𑀓𑀸𑀭𑁄, 𑀢𑁂𑀦𑁂𑀯 𑀯𑀼𑀢𑁆𑀢𑀺𑀬𑀁 𑀯𑀼𑀢𑁆𑀢𑀁 ‘𑀏𑀓𑀸𑀭𑀦𑁆𑀢𑀢𑁆𑀢𑀁 𑀦𑀺𑀧𑀸𑀢𑀦𑀢𑁄’𑀢𑀺, 𑀯𑀼𑀢𑁆𑀢𑀺𑀯𑀺𑀓𑀧𑁆𑀧𑀦𑀢𑁆𑀣𑀢𑁄𑀢𑀺 𑀯𑀼𑀢𑁆𑀢𑀺𑀬𑀸 𑀯𑀺𑀓𑀧𑁆𑀧𑁄 𑀅𑀢𑁆𑀣𑁄 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄.

𑀲𑁄𑀘𑁂𑀓𑀢𑁆𑀣𑀻𑀪𑀸𑀯𑁄 𑀯𑀺𑀲𑀺𑀝𑁆𑀞𑁄-𑀪𑀺𑀫𑀢𑁄𑀢𑀺 𑀲𑀫𑁆𑀩𑀦𑁆𑀥𑁄, 𑀫𑀼𑀳𑀼𑀢𑁆𑀢𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀤𑀼𑀢𑀺𑀬𑀸, 𑀧𑀸𑀤𑀺𑀲𑀫𑀸𑀲𑀁 𑀓𑀢𑁆𑀯𑀸𑀢𑀺 𑀆𑀲𑀤𑁆𑀤𑀲𑁆𑀲 𑀳𑀭𑀲𑀤𑁆𑀤𑁂𑀦 𑀯𑀼𑀢𑁆𑀢𑀺𑀲𑀤𑁆𑀤𑁂𑀦 [𑀯𑀼𑀢𑁆𑀢𑀺𑀧𑀤𑁂𑀦 (𑀧𑀜𑁆𑀘𑀺𑀓𑀸)] 𑀓𑀺𑀭𑀺𑀬𑀸𑀔𑁆𑀬𑀸𑀧𑁆𑀬𑀢𑁂𑀢𑀺 𑀅𑀲𑀢𑁆𑀬𑀼𑀧𑀲𑁂𑀘𑀦𑀸𑀤𑀺𑀓𑀺𑀭𑀺𑀬𑀸𑀬𑀁 ¶ 𑀲𑀗𑁆𑀔𑀸𑀭𑀓𑀁 𑀲𑀗𑁆𑀔𑀸𑀭𑀺𑀬𑀁 𑀯𑀸 𑀦 𑀪𑀯𑀢𑀺, 𑀅𑀢𑁆𑀣𑀺𑀘𑁂𑀳 𑀢𑀤𑀼𑀪𑀬𑀁, 𑀢𑀢𑁄 𑀢𑁂𑀲𑀁 𑀲𑀫𑁆𑀪𑀯𑀸𑀬𑁂𑀯 𑀲𑀫𑀸𑀲𑀦𑁆𑀢𑁄𑀪𑀽𑀢𑀓𑀺𑀭𑀺𑀬𑀸 𑀕𑀫𑁆𑀬𑀢𑁂𑀢𑀺 𑀫𑀜𑁆𑀜𑀢𑁂, 𑀢𑀣𑀸𑀳𑀺 𑀤𑀥𑀺𑀪𑁄𑀚𑀦𑀁𑀢𑁆𑀬𑀸𑀤𑁄 𑀯𑀼𑀢𑁆𑀢𑁂 𑀅𑀥𑁆𑀬𑀸𑀤𑀺𑀦𑁄 𑀲𑀗𑁆𑀔𑀸𑀭𑀓𑀢𑁆𑀢𑀁 𑀪𑁄𑀚𑀦𑀸𑀤𑀺𑀦𑁄 𑀘 𑀲𑀗𑁆𑀔𑀸𑀭𑀺𑀬𑀢𑁆𑀢𑀁 𑀧𑀢𑀻𑀬𑀢𑁂, 𑀦 𑀘𑁄𑀧𑀲𑁂𑀓𑀸𑀤𑀺𑀫𑀦𑁆𑀢𑀭𑁂𑀦 𑀲𑀗𑁆𑀔𑀸𑀭𑀺𑀬𑀲𑀗𑁆𑀔𑀸𑀭𑀓𑀪𑀸𑀯𑁄-𑀢𑁆𑀣𑀻𑀢𑀺 𑀲𑀸𑀫𑀢𑁆𑀣𑀺𑀬𑀸𑀬𑁂𑀯𑀼𑀧𑀲𑁂𑀓𑀸𑀤𑀺𑀧𑁆𑀧𑀢𑀻𑀢𑀺.

𑀢𑀤𑀧𑁂𑀓𑁆𑀔𑀸𑀬𑀸𑀢𑀺 𑀕𑀫𑁆𑀫𑀫𑀸𑀦𑁄𑀧𑀲𑁂𑀘𑀦𑀸𑀤𑀺𑀓𑀺𑀭𑀺𑀬𑀸𑀧𑁂𑀓𑁆𑀔𑀸𑀬. 𑀧𑀸𑀡𑀺𑀦𑀺𑀬𑁂𑀳𑀺 𑀅𑀢𑁆𑀣𑁂𑀦 ‘𑀏𑀢𑀲𑁆𑀲𑀺𑀤’𑀦𑁆𑀢𑀺 𑀅𑀢𑁆𑀣𑁂 𑀦𑀺𑀘𑁆𑀘𑀲𑀫𑀸𑀲𑁄-𑀪𑀺𑀫𑀢𑁄 𑀲𑀩𑁆𑀩𑀮𑀺𑀗𑁆𑀕𑀢𑀸 𑀘, 𑀢𑀣𑀸 𑀯𑀘𑀦𑀸𑀪𑀸𑀯𑀫𑀺𑀳 𑀫𑀦𑀲𑀺𑀓𑀢𑁆𑀯𑀸 ‘𑀓𑀣’𑀫𑀺𑀘𑁆𑀘𑀸𑀤𑀺𑀦𑀸 𑀯𑀼𑀢𑁆𑀢𑀺 𑀬𑀁𑀯𑀼𑀢𑁆𑀢𑀁𑀘𑁄𑀤𑀓𑀯𑀘𑀦𑀫𑀸𑀳𑀭𑀺𑀢𑁆𑀯𑀸 𑀢𑀢𑁆𑀣𑀸𑀥𑀺𑀧𑁆𑀧𑀸𑀬𑀁𑀯𑀺𑀯𑀭𑀢𑀺 ‘𑀏𑀯𑀫𑀜𑁆𑀜𑀢𑁂’𑀘𑁆𑀘𑀸𑀤𑀺𑀦𑀸, 𑀯𑀺𑀥𑀸𑀦𑀁 𑀓𑀢𑀦𑁆𑀢𑀺 𑀏𑀯𑀫𑀜𑁆𑀜𑀢𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀢𑀢𑁆𑀣𑁂𑀘𑁆𑀘𑀸𑀤𑀺𑀦𑀸 𑀅𑀜𑁆𑀜 𑀧𑀤𑀢𑁆𑀣𑁂 𑀪𑀯𑀺𑀲𑁆𑀲𑀢𑀻𑀢𑁆𑀬𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀦𑁆𑀢𑁄 𑀦𑀺𑀘𑁆𑀘𑀲𑀫𑀸𑀲𑀢𑀁 𑀲𑀩𑁆𑀩𑀮𑀺𑀗𑁆𑀕𑀢𑀜𑁆𑀘 𑀧𑀝𑀺𑀧𑀸𑀤𑀬𑀢𑀺, 𑀯𑀸𑀓𑁆𑀬𑀦𑀺𑀯𑀢𑁆𑀢𑀺𑀲𑀺𑀤𑁆𑀥𑀸𑀬𑁂𑀯𑀸𑀢𑀺.

𑀅𑀢𑁆𑀣𑀲𑀤𑁆𑀤𑁂𑀦𑀸𑀯𑀕𑀢𑀢𑁆𑀣𑀢𑀸𑀬 𑀏𑀢𑀲𑁆𑀲𑀸𑀢𑀺 𑀯𑀢𑁆𑀢𑀼𑀫𑀬𑀼𑀢𑁆𑀢𑀦𑁆𑀢𑀺 ‘𑀏𑀢𑀲𑁆𑀲 𑀅𑀢𑁆𑀣𑁄’𑀢𑀺 𑀯𑀸𑀓𑁆𑀬𑀦𑀺𑀯𑀢𑁆𑀢𑀺 𑀲𑀺𑀤𑁆𑀥𑀸𑀬𑁂𑀯, 𑀓𑀣𑀜𑁆𑀘𑀺𑀧𑀺 𑀘𑀢𑀼𑀢𑁆𑀣𑁆𑀬𑀦𑁆𑀢𑀸 𑀪𑀺𑀦𑁆𑀦𑀢𑁆𑀣𑀲𑁆𑀲 𑀲𑀫𑀸𑀲𑁂 𑀓𑀢𑁂𑀧𑀺 𑀢𑀢𑁆𑀣 𑀯𑀺𑀭𑁄𑀥𑀫𑀸𑀳- ‘𑀘𑀢𑀼𑀢𑁆𑀣𑁆𑀬𑀦𑁆𑀢𑀲𑁆𑀲𑁂’𑀢𑁆𑀬𑀸𑀤𑀺.

𑀯𑀘𑀦𑀫𑁆𑀧𑀻𑀢𑀺 ‘‘𑀅𑀢𑁆𑀣𑁂𑀦 𑀦𑀺𑀘𑁆𑀘𑀲𑀫𑀸𑀲𑁄 𑀲𑀩𑁆𑀩𑀮𑀺𑀗𑁆𑀕𑀢𑀸𑀘’’𑀇𑀢𑀺 (𑁩-𑁧-𑁩𑁬) 𑀯𑀸𑀓𑁆𑀬𑀓𑀸𑀭𑁂𑀦 𑀧𑀢𑀺𑀝𑁆𑀞𑀺𑀢𑀯𑀘𑀦𑀫𑁆𑀧𑀺, 𑀧𑀸𑀡𑀺𑀦𑀻𑀬𑀸𑀦𑀁 ‘𑀏𑀢𑀲𑁆𑀲 𑀇𑀤’𑀦𑁆𑀢𑀺 𑀅𑀢𑁆𑀣𑁂 𑀲𑀫𑀸𑀲𑁂 𑀓𑀢𑁂 𑀬𑁄-𑀢𑁆𑀣𑁄 𑀲𑀫𑁆𑀧𑀚𑁆𑀚𑀢𑀺, 𑀅𑀜𑁆𑀜𑀢𑁆𑀣𑀲𑀫𑀸𑀲𑁂𑀧𑀺 𑀲𑁄𑀬𑁂𑀯𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺 ‘𑀬𑁄’ 𑀇𑀘𑁆𑀘𑀸𑀤𑀺𑀦𑀸, 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀦𑀺𑀫𑀺𑀢𑁆𑀢𑀁 𑀯𑀸𑀬𑀸𑀫𑁄𑀘𑁆𑀘𑀸𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁… 𑀢𑀁𑀦𑀺𑀫𑀺𑀢𑁆𑀢𑀢𑁆𑀢𑀸 𑀯𑀸𑀬𑀸𑀫𑀸𑀤𑀻𑀦𑀁, 𑀢𑁂𑀲𑀁 𑀓𑀣𑀸𑀤𑀻𑀦𑀦𑁆𑀢𑀺 𑀏𑀢𑁆𑀣 𑀢𑁂𑀲𑀁 𑀯𑀸𑀬𑀸𑀫𑀸𑀤𑀻𑀦𑀦𑁆𑀢𑀺 𑀯𑀢𑁆𑀢𑀩𑁆𑀩𑀁… 𑀯𑀸𑀬𑀸𑀫𑁄𑀢𑁆𑀬𑀸𑀤𑀺𑀦𑀸 𑀯𑀼𑀢𑁆𑀢𑀢𑁆𑀢𑀸 𑀲𑁄 𑀘 𑀢𑀦𑁆𑀦𑀺𑀫𑀺𑀢𑁆𑀢𑀁 𑀳𑁄𑀢𑁂𑀯, 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 ‘‘𑀏𑀢𑀲𑁆𑀲 𑀇𑀤𑀦𑁆𑀢𑀺 𑀯𑀸𑀓𑁆𑀬𑁂 𑀅𑀢𑁆𑀣𑁂𑀦 𑀲𑀫𑀸𑀲𑁂 𑀲𑀩𑁆𑀩𑀮𑀺𑀗𑁆𑀕𑀢𑀸 𑀘 ‘𑀏𑀢𑀤𑀢𑁆𑀣𑁄 𑀏𑀢𑀤𑀢𑁆𑀣𑀸 𑀏𑀢𑀤𑀢𑁆𑀣’𑀦𑁆𑀢𑀺 𑀯𑀸𑀬𑀸𑀫𑀸𑀤𑀬𑁄 𑀘 𑀲𑀫𑀸𑀲𑀢𑁆𑀣𑀸 𑀳𑁄𑀦𑁆𑀢𑀺, 𑀏𑀢𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀫𑀢𑁆𑀣𑁄 𑀧𑀬𑁄𑀚𑀦𑀫𑁂𑀢𑀲𑁆𑀲 𑀏𑀢𑀺𑀲𑁆𑀲𑀸 𑀏𑀢𑀲𑁆𑀲𑀸𑀢𑀺 𑀅𑀜𑁆𑀜𑀧𑀤𑀢𑁆𑀣𑁂𑀧𑀺 𑀏𑀲𑀁 𑀧𑀤𑀸𑀦𑀁 𑀲𑁄𑀬𑁂𑀯𑀢𑁆𑀣𑁄𑀢𑀺 𑀦𑀸𑀢𑁆𑀣𑀪𑁂𑀤𑁄’’𑀢𑀺.

𑀇𑀤𑀜𑁆𑀘 ‘‘𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁆𑀣𑀸𑀦𑀺 𑀔𑁄 𑀆𑀦𑀦𑁆𑀤𑀁 𑀓𑀼𑀲𑀮𑀸𑀦𑀺, 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀧𑀸𑀫𑁄𑀚𑁆𑀚𑀢𑁆𑀣𑀸𑀬…𑀧𑁂… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀏𑀢𑀤𑀢𑁆𑀣𑁄 ¶ 𑀯𑀸𑀬𑀸𑀫𑁄 𑀏𑀢𑀤𑀢𑁆𑀣𑀸 𑀓𑀣𑀸 𑀏𑀢𑀤𑀢𑁆𑀣𑀸 𑀫𑀦𑁆𑀢𑀦𑀸 𑀏𑀢𑀤𑀢𑁆𑀣𑀁 𑀲𑁄𑀢𑀸𑀯𑀥𑀸𑀦’’𑀦𑁆𑀢𑀺𑀆𑀤𑀺 (𑀢𑀺𑀓𑀗𑁆𑀕𑀼𑀢𑁆𑀢𑀭, 𑀆𑀦𑀦𑁆𑀤𑀯𑀕𑁆𑀕) 𑀧𑀸𑀴𑀺𑀁 𑀦𑀺𑀲𑁆𑀲𑀸𑀬 𑀯𑀼𑀢𑁆𑀢𑀁.

𑀧𑀸𑀡𑀺𑀦𑀺𑀬𑁂𑀳𑀺 ‘‘𑀓𑀢𑁆𑀢𑀼𑀓𑀭𑀡𑁂 𑀓𑀺𑀢𑀦𑁆𑀢𑁂𑀦 𑀩𑀳𑀼𑀮’’𑀦𑁆𑀢𑀺 (𑁨-𑁧-𑁩𑁨) 𑀓𑀺𑀢𑀦𑁆𑀢𑁂𑀦 𑀢𑀢𑀺𑀬𑀸𑀲𑀫𑀸𑀲𑀯𑀺𑀥𑀸𑀦𑀸 𑀢𑀢𑁆𑀣𑁂𑀯 𑀩𑀳𑀼𑀮𑀕𑁆𑀕𑀳𑀡𑁂𑀦 ‘𑀕𑀸𑀫𑀦𑀺𑀕𑁆𑀕𑀢𑀸’𑀤𑀻𑀲𑀼 𑀲𑀫𑀸𑀲𑁄 𑀯𑀼𑀢𑁆𑀢𑁄, 𑀢𑁂𑀦𑁂𑀢𑁆𑀣𑀸𑀦𑁆𑀢𑁄𑀤𑀸𑀳𑀭𑀡𑀸𑀦𑀁 𑀤𑁆𑀯𑀺𑀦𑁆𑀦𑀫𑀥𑀺𑀓𑀢𑁆𑀢𑀁, 𑀲𑀫𑀸𑀲𑀸𑀪𑀸𑀯𑁄-𑀪𑀺𑀫𑀢𑁄𑀢𑀺 𑀧𑀸𑀡𑀺𑀦𑀻𑀬𑁂𑀳𑀺 ‘‘𑀧𑀽𑀭𑀡𑀕𑀼𑀡𑀲𑀼𑀳𑀺𑀢𑀢𑁆𑀣𑀲𑀤𑀩𑁆𑀬𑀬𑀢𑀩𑁆𑀩𑀲𑀫𑀸𑀦𑀸𑀥𑀺𑀓𑀭𑀡𑁂𑀦𑁂’’𑀢𑀺 (𑁨-𑁨-𑁧𑁧) 𑀲𑀼𑀢𑁆𑀢𑁂 𑀕𑀼𑀡 𑀇𑀢𑀺𑀯𑀘𑀦𑁂𑀦𑀸𑀪𑀺𑀫𑀢𑁄, 𑀲𑀤𑀺𑀢𑀺 𑀲𑀜𑁆𑀜𑀸 𑀢𑁂𑀲𑀁 𑀦𑁆𑀢𑀫𑀸𑀦𑀸𑀦𑀁.

𑀲𑁄 𑀓𑀣𑀦𑁆𑀢𑀺 𑀇𑀳 ‘𑀪𑀸𑀯𑀢𑀺𑀢𑁆𑀢𑀢𑁆𑀣𑁂𑀳𑀻’𑀢𑀺 𑀪𑀸𑀯𑀧𑁆𑀧𑀘𑁆𑀘𑀬𑀦𑁆𑀢𑁂𑀦𑁂𑀯 𑀲𑀫𑀸𑀲𑀧𑀝𑀺𑀲𑁂𑀥𑀯𑀺𑀥𑀸𑀦𑀸 ‘𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀼𑀓𑁆𑀓𑀸’ 𑀇𑀘𑁆𑀘𑀸𑀤𑁄 𑀲𑁄 𑀲𑀫𑀸 𑀲𑀧𑁆𑀧𑀝𑀺𑀲𑁂𑀥𑁄 𑀓𑀣𑀁 𑀲𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄.

𑀕𑀼𑀡𑀢𑁆𑀢𑀦𑀺𑀬𑁂𑀯𑀸𑀢𑀺 𑀕𑀼𑀡𑀲𑀪𑀸𑀯𑁂 𑀏𑀯, 𑀅𑀪𑀺𑀫𑀢𑁄𑀢𑀺 𑀯𑀸𑀢𑁆𑀢𑀺𑀓𑀓𑀸𑀭𑀲𑁆𑀲𑀸𑀪𑀺𑀫𑀢𑁄 ‘‘𑀢𑀤𑀯𑀝𑁆𑀞𑁂𑀳𑀺 𑀘 𑀕𑀼𑀡𑁂𑀳𑀻’’𑀢𑀺, 𑀢𑀲𑀤𑁆𑀤𑁂𑀦𑀸𑀲𑁆𑀲 𑀕𑀼𑀡𑀲𑁆𑀲 𑀧𑀭𑀸𑀫𑀸𑀲𑁄 𑀢𑀲𑁆𑀫𑀺𑀁𑀬𑁂𑀯 𑀕𑀼𑀡𑁂 𑀅𑀯𑀢𑀺𑀝𑁆𑀞𑀦𑁆𑀢𑀻𑀢𑀺 𑀢𑀤𑀯𑀝𑁆𑀞𑀸, 𑀕𑀼𑀡𑁂𑀬𑁂𑀯 𑀕𑀼𑀡𑀸𑀢𑀺𑀝𑁆𑀞𑀦𑁆𑀢𑀺 𑀦 𑀓𑀤𑀸𑀘𑀺𑀧𑀺 𑀲𑁄𑀬𑀫𑀺𑀢𑁆𑀬𑀪𑁂𑀤𑀸 𑀤𑀩𑁆𑀩𑀯𑀼𑀢𑁆𑀢𑀬𑁄 𑀲𑀼𑀓𑁆𑀓𑀸𑀤𑀬𑁄 𑀯𑀺𑀬 𑀢𑁂 𑀢𑀤𑀯𑀝𑁆𑀞𑀸 𑀕𑀼𑀡𑀸 𑀕𑀦𑁆𑀥𑀸𑀤𑀬𑁄, 𑀢𑀤𑀯𑀝𑁆𑀞𑀺𑀢𑁂𑀳𑀺 𑀕𑀼𑀡𑁂𑀳𑀺 𑀙𑀝𑁆𑀞𑀻 𑀲𑀫𑀲𑁆𑀲𑀢𑁂𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀆𑀪𑀺𑀫𑀢𑁄𑀢𑀺 ‘‘𑀧𑀽𑀭𑀡𑀸’’𑀤𑀺𑀲𑀼𑀢𑁆𑀢𑁂 𑀅𑀩𑁆𑀬𑀬𑀕𑁆𑀕𑀳𑀡𑁂𑀦, 𑀤𑁂𑀯𑀤𑀢𑁆𑀢𑀲𑁆𑀲𑀸𑀢𑀺 𑀙𑀝𑁆𑀞𑀺𑀬𑀸 𑀕𑀼𑀭𑀼𑀫𑁆𑀳𑀺 𑀲𑀸𑀧𑁂𑀓𑁆𑀔𑀢𑁆𑀢𑁂𑀧𑀺 𑀕𑀼𑀭𑀼𑀲𑀤𑁆𑀤𑀲𑁆𑀲 𑀲𑀫𑁆𑀩𑀦𑁆𑀥𑀺𑀲𑀤𑁆𑀤𑀢𑁆𑀢𑀸 𑀲𑀓𑀢𑁆𑀣𑁂 [𑀯𑀸𑀓𑁆𑀬𑁂] 𑀯𑀺𑀬 𑀯𑀼𑀢𑁆𑀢𑀺𑀬𑀁 𑀩𑁆𑀬𑀧𑁂𑀓𑁆𑀔𑀸-𑀬𑀸𑀳𑀸𑀦𑀺𑀢𑁄 𑀯𑀼𑀢𑁆𑀢𑀺𑀲𑀩𑁆𑀪𑀸𑀯𑀁 𑀯𑀘𑀦𑀦𑁆𑀢𑀭𑁂𑀦 𑀲𑀸𑀥𑁂𑀢𑀼𑀫𑀸𑀳- ‘𑀢𑀣𑀸𑀘𑀸𑀳𑀽’𑀢𑀺.

𑀲𑀸𑀢𑁆𑀣𑁂𑀯𑀸𑀢𑀺 𑀲𑀓𑀢𑁆𑀣𑁂 𑀯𑀺𑀬, 𑀅𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑀺𑀲𑀤𑁆𑀤𑀲𑁆𑀲, 𑀲𑀸𑀫𑀢𑁆𑀣𑀺𑀬𑀁 𑀕𑀫𑀓𑀢𑁆𑀢𑀜𑁆𑀘𑀢𑁆𑀣𑀻𑀢𑀺 𑀧𑀤𑀸𑀦𑀫𑀜𑁆𑀜𑁄𑀜𑁆𑀜𑀸𑀧𑁂𑀓𑁆𑀔𑀸𑀮𑀓𑁆𑀔𑀡𑀁 𑀲𑀸𑀫𑀢𑁆𑀣𑀺𑀬𑀁 𑀲𑀸𑀫𑀢𑁆𑀣𑀺𑀬𑀸𑀪𑀸𑀯𑁂𑀧𑀺 𑀯𑀺𑀕𑁆𑀕𑀳𑀯𑀸𑀓𑁆𑀬𑀢𑁆𑀣𑀲𑁆𑀲 𑀕𑀫𑀓𑀢𑁆𑀢𑀁 𑀯𑀸 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄, 𑀕𑀼𑀭𑀼𑀦𑁄 𑀓𑀼𑀮𑀁 𑀤𑀸𑀲𑀲𑁆𑀲 𑀪𑀭𑀺𑀬𑀸𑀢𑀺 𑀯𑀺𑀕𑁆𑀕𑀳𑁄, 𑀅𑀣𑀸𑀢𑁆𑀭 𑀩𑁆𑀭𑀸𑀳𑁆𑀫𑀡𑀲𑁆𑀲 𑀉𑀘𑁆𑀘𑁂’𑀇𑀘𑁆𑀘𑀸𑀤𑁄 𑀲𑀸𑀫𑀢𑁆𑀣𑀺𑀬𑀁 𑀕𑀫𑀓𑀢𑁆𑀢𑀁 𑀯𑀸 𑀦𑀢𑁆𑀣𑀻𑀢𑀺 𑀓𑀼𑀢𑁄-𑀯𑀲𑀺𑀢𑀁, 𑀬𑁂𑀦 𑀢𑀤𑀸𑀪𑀸𑀯𑀸𑀢𑁆𑀭 ¶ 𑀲𑀫𑀸𑀲𑀸𑀪𑀸𑀯𑁄 𑀯𑀡𑁆𑀡𑀻𑀬𑀢𑁂𑀘𑁆𑀘𑀸𑀳-‘𑀲𑀸𑀫𑀢𑁆𑀣𑁆𑀬𑀸𑀤𑀺𑀦𑁄𑀢𑁆𑀯𑀺’𑀘𑁆𑀘𑀸𑀤𑀺.

𑀲𑀫𑀸𑀲𑀸𑀪𑀸𑀯𑁄-𑀪𑀺𑀫𑀢𑁄𑀢𑀺 ‘‘𑀧𑀽𑀭𑀡𑀸’’𑀤𑀺𑀲𑀼𑀢𑁆𑀢𑁂 𑀲𑀫𑀸𑀦𑀸𑀥𑀺𑀓𑀭𑀲𑁆𑀲𑀸𑀧𑀺 𑀉𑀧𑀸𑀤𑀸𑀦𑀢𑁄. 𑀲𑁂𑀳𑀻𑀢𑀺 𑀅𑀢𑁆𑀢𑀦𑀺𑀬𑁂𑀳𑀺, 𑀦𑀸𑀪𑀺𑀫𑀢𑁄𑀢𑀺 ‘‘𑀘𑀬𑀼𑀢𑁆𑀢𑁂𑀳𑀺 𑀲𑁂𑀳𑀺 𑀅𑀲𑀫𑀸𑀲𑀺𑀢𑁂𑀳𑀺 𑀙𑀝𑁆𑀞𑀻𑀲𑀫𑀸𑀲𑀧𑁆𑀧𑀝𑀺𑀲𑁂𑀥𑁄𑀯𑀢𑁆𑀢𑀩𑁆𑀩𑁄’’ (𑀯𑀸) 𑀢𑁆𑀬𑀦𑁂𑀦, 𑀧𑀼𑀣𑀕𑀢𑁆𑀣𑀢𑀸𑀬 [𑀪𑀺𑀦𑁆𑀦𑀢𑁆𑀣𑀢𑀸𑀬𑀁-𑀯𑀼𑀢𑁆𑀢𑀺] 𑀫𑀺𑀘𑁆𑀘𑀲𑁆𑀲𑀯𑀺𑀯𑀭𑀡𑀁 𑀕𑀯𑀸𑀤𑀻𑀦𑀫𑀲𑀫𑀸𑀲𑁂𑀢𑀺, 𑀏𑀯𑀫𑀲𑁆𑀲𑀸𑀤𑀻𑀦𑀁 𑀲𑀫𑀸𑀲𑁂𑀦𑀸𑀮𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀬𑁄𑀕𑀻𑀦𑀦𑁆𑀢𑀺 𑀇𑀢𑀭𑀻𑀢𑀭𑀬𑁄𑀕𑀻𑀦𑀁, 𑀅𑀦𑁂𑀦𑁂𑀢𑀭𑁂𑀢𑀭𑀬𑁄𑀕𑀘𑀢𑁆𑀣𑀲𑀫𑀸𑀲𑀁 𑀯𑀤𑀢𑀺. 𑀯𑀼𑀢𑁆𑀢𑀺𑀳𑁄𑀢𑀻𑀢𑁆𑀬𑀲𑁆𑀲 𑀯𑀺𑀯𑀭𑀡𑀁 𑀙𑀝𑁆𑀞𑀻𑀲𑀫𑀸𑀲𑁄 𑀪𑀯𑀢𑀻𑀢𑀺, 𑀏𑀓𑀢𑁆𑀣𑀻𑀪𑀸𑀯𑁂𑀇𑀘𑁆𑀘𑀲𑁆𑀲 𑀯𑀺𑀯𑀭𑀡𑀁 𑀕𑀯𑀸𑀤𑀻𑀦𑀜𑁆𑀘 𑀘𑀢𑁆𑀣𑀲𑀫𑀸𑀲𑁂 𑀲𑀢𑀻𑀢𑀺.

𑀭𑀼𑀴𑁆𑀳𑀺𑀢𑁆𑀢𑀸𑀢𑀺 𑀲𑀫𑀸𑀲𑀲𑁆𑀲𑁂𑀯 𑀓𑀻𑀴𑀸𑀯𑀸𑀘𑀓𑀢𑁆𑀢𑁂𑀦 𑀚𑀻𑀯𑀺𑀓𑀸𑀬 𑀘 𑀧𑀘𑁆𑀘𑀸𑀬 𑀓𑀢𑁆𑀢𑁂𑀦 𑀧𑀲𑀺𑀤𑁆𑀥𑀢𑁆𑀢𑀸, 𑀦 𑀯𑀸𑀓𑁆𑀬𑀲𑁆𑀲𑀸𑀢𑀺 ‘𑀉𑀤𑁆𑀤𑀸𑀮𑀧𑀼𑀧𑁆𑀨𑀪𑀜𑁆𑀚𑀺𑀓𑀸’𑀢𑁆𑀬𑀸𑀤𑁄 𑀭𑀼𑀴𑁆𑀳𑀻𑀯𑀲𑁂𑀦 𑀦𑀺𑀘𑁆𑀘𑀲𑀫𑀸𑀲𑁄 𑀪𑀯𑀺𑀲𑁆𑀲𑀢𑀻𑀢𑀺 𑀢𑀢𑁆𑀭 𑀓𑀺𑀁 𑀯𑀘𑀦𑁂𑀦𑁂𑀢𑀺 𑀫𑀜𑁆𑀜𑀢𑁂, 𑀲𑀭𑀲𑀺 𑀭𑀼𑀴𑁆𑀳𑀦𑁆𑀢𑀺 𑀯𑀺𑀕𑁆𑀕𑀳𑁄.

𑀅𑀬𑀫𑁆𑀧𑀦 𑀅𑀫𑀸𑀤𑀺𑀲𑀫𑀸𑀲𑁄 𑀓𑀫𑁆𑀫𑀥𑀸𑀭𑀬𑀤𑀺𑀕𑀼𑀲𑀫𑀸𑀲𑀸𑀢𑀺 𑀲𑀩𑁆𑀩𑁂𑀧𑀺 𑀧𑀭𑁂𑀲𑀁 𑀢𑀧𑁆𑀧𑀼𑀭𑀺𑀲𑀲𑀤𑀺𑀲𑀢𑁆𑀢𑀸 𑀢𑀧𑁆𑀧𑀼𑀭𑀺𑀲𑀸, 𑀬𑀣𑀸 𑀳𑀺 𑀢𑀲𑁆𑀲 𑀧𑀼𑀭𑀺𑀲𑁄 𑀢𑀧𑁆𑀧𑀼𑀭𑀺𑀲𑁄𑀢𑀺 𑀉𑀢𑁆𑀢𑀭𑀧𑀤𑀢𑁆𑀣𑀧𑁆𑀧𑀥𑀸𑀦𑁄, 𑀢𑀣𑀸 𑀢𑁂 𑀲𑀺𑀬𑀼𑀁, 𑀲𑀗𑁆𑀔𑁆𑀬𑀸𑀧𑀼𑀩𑁆𑀩𑀢𑁆𑀢 𑀦𑀧𑀼𑀁𑀲𑀓𑀢𑁆𑀢𑀲𑀗𑁆𑀔𑀸𑀢𑁂𑀳𑀺 𑀤𑁆𑀯𑀻𑀳𑀺 𑀮𑀓𑁆𑀔𑀡𑁂𑀳𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺𑀤𑀺𑀕𑀼.

𑀓𑀺𑀦𑁆𑀢𑀁 𑀯𑀺𑀲𑁂𑀲𑀦 𑀫𑀺𑀘𑁆𑀙𑀸𑀳-‘𑀬𑀫𑀺’𑀘𑁆𑀘𑀸𑀤𑀺, 𑀬𑀁 𑀅𑀯𑀢𑁆𑀣𑀸𑀧𑀬𑀢𑀺 𑀢𑀁 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀓𑀺𑀦𑁆𑀢𑀁 𑀯𑀺𑀲𑁂𑀲𑁆𑀲𑀫𑀺𑀘𑁆𑀘𑀸𑀳-‘𑀬𑀤𑀦𑁂𑀓𑁂’𑀘𑁆𑀘𑀸𑀤𑀺, 𑀬𑀁 𑀅𑀯𑀢𑁆𑀣𑀸 𑀧𑀻𑀬𑀢𑁂 𑀢𑀫𑀪𑀺𑀥𑀻𑀬𑀢𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀦𑀦𑁆𑀯𑁂𑀓𑀢𑁆𑀣𑁂𑀦𑁂𑀢𑁆𑀬𑀼𑀘𑁆𑀘𑀫𑀸𑀦𑁂 𑀯𑀺𑀲𑁂𑀲𑁆𑀲𑁂𑀦𑁂𑀢𑀺 𑀓𑀣𑀫𑀯𑀕𑀫𑁆𑀬𑀢𑁂, 𑀬𑀢𑁄 𑀏𑀯𑀁 𑀯𑀺𑀯𑀭𑀺𑀢𑀯𑀸 𑀢𑁆𑀬𑀸𑀲𑀗𑁆𑀓𑀺𑀬𑀸𑀳- ‘𑀬𑀤𑀺𑀧𑀺’𑀘𑁆𑀘𑀸𑀤𑀺.

𑀲𑀫𑁆𑀩𑀦𑁆𑀥𑀺𑀲𑀤𑁆𑀤𑀢𑁆𑀢𑀸𑀢𑀺 𑀏𑀯𑀁 𑀫𑀜𑁆𑀜𑀢𑁂 ‘‘𑀲𑀫𑁆𑀩𑀦𑁆𑀥𑀺𑀲𑀤𑁆𑀤𑀸 𑀲𑀓𑀢𑁆𑀣𑀫𑀺𑀯 𑀦𑀺𑀬𑀢𑀫𑁆𑀧𑀝𑀺-𑀬𑁄𑀕𑀺𑀦𑀫𑀸𑀓𑁆𑀔𑀺𑀧𑀦𑁆𑀢𑀺… 𑀢𑁂𑀦 𑀯𑀺𑀦𑀸 𑀢𑁂𑀲𑀁 𑀲𑀓𑀢𑁆𑀣𑀲𑁆𑀲𑀸𑀲𑀫𑁆𑀪𑀯𑀸𑀢𑀺, 𑀯𑀺𑀯𑀭𑀺𑀢𑀯𑀸𑀢𑀺 𑀯𑀺𑀯𑀭𑀺𑀢𑁆𑀣, 𑀏𑀓𑀢𑁆𑀣𑁂𑀦𑁂𑀢𑀻𑀫𑀲𑁆𑀲 𑀲𑀫𑀸𑀦𑀸𑀥𑀺𑀓𑀭𑀡𑁂𑀦 𑀲𑀳 𑀲𑀫𑀸𑀲𑁄 ¶ 𑀳𑁄𑀢𑀻𑀢𑀺 𑀏𑀯𑀁 𑀲𑀸𑀚𑁆𑀛𑀸𑀳𑀸𑀭𑁄 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀅𑀢𑁆𑀣𑀲𑀤𑁆𑀤𑀲𑁆𑀲𑀸𑀦𑁂𑀓𑀢𑁆𑀣𑀢𑁆𑀢𑀸 𑀯𑀺𑀲𑁂𑀲𑁂𑀢𑀺 ‘𑀅𑀢𑁆𑀣𑁄 𑀅𑀪𑀺𑀥𑁂𑀬𑁆𑀬𑁄’𑀢𑀺. 𑀓𑀣𑀁 𑀢𑁂𑀦𑀢𑁆𑀣𑁄 𑀯𑀼𑀘𑁆𑀘𑀢𑀻𑀢𑁆𑀬𑀸𑀳- ‘𑀅𑀥𑀺𑀓𑀭𑀻𑀬𑀢𑀺’𑀘𑁆𑀘𑀸𑀤𑀺.

𑀯𑀺𑀲𑁂𑀲𑁆𑀲𑀲𑁆𑀲 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀜𑁆𑀘 𑀯𑀺𑀲𑁂𑀲𑀦𑀸𑀧𑁂𑀓𑁆𑀔𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀲𑁂𑀲𑁆𑀲𑀲𑀤𑁆𑀤𑀲𑁆𑀲 𑀯𑀺𑀲𑁂𑀲𑀦𑁂𑀦 𑀲𑀳 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀁 𑀯𑀺𑀲𑁂𑀲𑀦 𑀲𑀤𑁆𑀤𑀸𑀧𑁂𑀓𑁆𑀔𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀢𑀢𑁆𑀣 𑀓𑀸𑀭𑀡𑀫𑀸𑀳- ‘𑀲𑀫𑁆𑀩𑀦𑁆𑀥𑀸’𑀢𑀺, 𑀅𑀥𑀺𑀓𑀭𑀡𑀲𑁆𑀲 𑀲𑀫𑀸𑀦𑀢𑁆𑀢𑀁 𑀦𑀸𑀫 𑀪𑀺𑀦𑁆𑀦𑀸𑀦𑀁 𑀲𑀫𑁆𑀩𑀦𑁆𑀥𑀻𑀦𑀁 𑀪𑀯𑀢𑀺, 𑀲𑀫𑁆𑀩𑀦𑁆𑀥𑀺𑀦𑁄 𑀘 𑀲𑀫𑁆𑀩𑀦𑁆𑀥𑀫𑀦𑁆𑀢𑀭𑁂𑀦 𑀦 𑀳𑁄𑀦𑁆𑀢𑀻 [𑀳𑁄𑀢𑀺 (𑀧𑁄𑀢𑁆𑀣𑀓𑁂)] 𑀢𑀺 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀲𑀸𑀦𑀁 𑀲𑀫𑁆𑀩𑀦𑁆𑀥𑁄 𑀯𑀺𑀜𑁆𑀜𑀸𑀬𑀢𑁂, 𑀏𑀯𑀁 𑀯𑀺𑀜𑁆𑀜𑀸𑀢𑀸 𑀢𑀲𑁆𑀫𑀸 𑀲𑀫𑁆𑀩𑀦𑁆𑀥𑀸𑀢𑀺 𑀅𑀢𑁆𑀣𑁄.

𑀲𑀤𑁆𑀤𑀩𑁆𑀬𑀢𑀺𑀭𑁂𑀓𑁂𑀦 𑀳𑁂𑀢𑁆𑀣 𑀅𑀢𑁆𑀣𑀸𑀦𑀁 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀲𑀪𑀸𑀯𑁄 𑀦 𑀲𑀫𑁆𑀪𑀯𑀢𑀺, 𑀢𑀣𑀸 𑀳𑀺 ‘𑀦𑀻𑀮𑀫𑀼𑀧𑁆𑀧𑀮’𑀦𑁆𑀢𑀺 𑀧𑀜𑁆𑀘 𑀯𑀢𑁆𑀣𑀽𑀦𑀺 𑀲𑀦𑁆𑀦𑀺𑀳𑀺𑀢𑀸𑀦𑀺 𑀦𑀻𑀮𑀦𑁆𑀢𑀺 𑀦𑀻𑀮𑀢𑁆𑀢𑀁 𑀕𑀼𑀡𑀲𑀸𑀫𑀜𑁆𑀜𑀁, 𑀦𑀻𑀮𑁄 𑀕𑀼𑀡𑁄, 𑀢𑀤𑀸𑀥𑀸𑀭𑁄 𑀤𑀩𑁆𑀩𑀦𑁆𑀢𑀺 𑀢𑀻𑀡𑀺, 𑀉𑀧𑁆𑀧𑀮𑀦𑁆𑀢𑀺 𑀉𑀧𑁆𑀧𑀮𑀢𑁆𑀢𑀁 𑀉𑀧𑁆𑀧𑀮𑀚𑀸𑀢𑀺, 𑀤𑀩𑁆𑀩𑀜𑁆𑀘 𑀢𑀦𑁆𑀦𑀺𑀲𑁆𑀲𑀬𑁄𑀢𑀺 𑀤𑁆𑀯𑁂.

𑀢𑀢𑁆𑀣 𑀉𑀧𑁆𑀧𑀮𑀚𑀸𑀢𑀺 𑀕𑀼𑀡𑀚𑀸𑀢𑀻𑀦𑀁 [𑀦𑀻𑀮𑀚𑀸𑀢𑀺𑀉𑀧𑁆𑀧𑀮𑀚𑀸𑀪𑀥𑀦𑀁 (𑀓𑀸𑀢𑀦𑁆𑀢𑀝𑀻𑀓𑀸)] 𑀢𑀸𑀯 𑀦 𑀲𑀫𑁆𑀪𑀯𑀢𑀺 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀲𑀪𑀸𑀯𑁄 𑀚𑀸𑀢𑀺𑀬𑀸 𑀦𑀺𑀕𑁆𑀕𑀼𑀡𑀢𑁆𑀢𑀸, 𑀦𑀻𑀮𑀢𑁆𑀢𑀲𑁆𑀲 𑀘 𑀦𑀻𑀮𑀕𑀼𑀡𑁂 𑀲𑀫𑀯𑀸𑀬𑀺𑀦𑁄, 𑀉𑀧𑁆𑀧𑀮𑀢𑁆𑀢𑀲𑁆𑀲 𑀘 𑀉𑀧𑁆𑀧𑀮𑀤𑀩𑁆𑀩𑁂 𑀲𑀫𑀯𑀸𑀬𑀺𑀦𑁄 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, 𑀉𑀧𑁆𑀧𑀮𑀚𑀸𑀢𑀺𑀬𑀸 𑀦𑀻𑀮𑀲𑁆𑀲 𑀘 𑀕𑀼𑀡𑀲𑁆𑀲 𑀅𑀢𑁆𑀣𑀺 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀁… 𑀦𑀻𑀮 𑀫𑀼𑀧𑁆𑀧𑀮𑀦𑁆𑀢𑀺 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀸𑀦𑀁 𑀉𑀧𑁆𑀧𑀮𑀚𑀸𑀢𑀺𑀦𑀻𑀮𑀕𑀼𑀡𑀸𑀦𑀫𑁂𑀓𑀫𑀥𑀺 𑀓𑀭𑀡𑀁𑀦𑀺𑀲𑁆𑀲𑀬𑁄𑀢𑀺, 𑀯𑀺𑀲𑁂𑀲𑀦 𑀯𑀺𑀲𑁂𑀲𑁆𑀲𑀪𑀸𑀯𑁄 𑀢𑀼 𑀦𑀢𑁆𑀣𑀺 𑀚𑀸𑀢𑀺𑀬𑀸 𑀅𑀦𑀻𑀮𑀢𑁆𑀢𑀸, 𑀕𑀼𑀡𑀤𑀩𑁆𑀩𑀸𑀦𑀦𑁆𑀢𑀼 𑀲𑀫𑁆𑀪𑀯𑀢𑀺𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀲𑀢𑁆𑀢𑀁 𑀤𑀩𑁆𑀩𑀲𑁆𑀲𑀸𑀦𑁂𑀓𑀕𑀼𑀡𑀢𑁆𑀢𑀸, 𑀲𑀫𑀸𑀦𑀦𑁆𑀢𑀼 𑀢𑁂𑀲𑀫𑁆𑀧𑀭𑀫𑀥𑀺𑀓𑀭𑀡𑀁 𑀢𑀢𑀺𑀬𑀁 𑀦𑀢𑁆𑀣𑀺, 𑀬𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀁 𑀲𑀺𑀬𑀸, 𑀏𑀯𑀁 𑀦𑀻𑀮𑀤𑀩𑁆𑀩 𑀉𑀧𑁆𑀧𑀮𑀤𑀩𑁆𑀩𑀸𑀦𑀫𑁆𑀧𑀺 𑀅𑀜𑁆𑀜𑀫𑀜𑁆𑀜𑀧𑀭𑀺𑀳𑀸𑀭𑁂𑀦 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀸𑀦𑀁 𑀦 𑀯𑀺𑀲𑁂𑀲𑀦 𑀯𑀺𑀲𑁂𑀲𑁆𑀲𑀪𑀸𑀯𑁄, 𑀦𑀸𑀧𑀺 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀁, 𑀓𑀲𑁆𑀫𑀸 𑀅𑀜𑁆𑀜𑀫𑀜𑁆𑀜𑀸𑀲𑀫𑁆𑀩𑀦𑁆𑀥𑀢𑁄 𑀅𑀧𑁂𑀓𑁆𑀔𑀸𑀪𑀸𑀯𑀢𑁄, 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀢𑁄 𑀧𑀦 𑀯𑀓𑁆𑀔𑀫𑀸𑀦𑀦𑀬𑁂𑀦 𑀲𑀤𑁆𑀤𑀸𑀦𑀫𑁂𑀯 𑀲𑀸𑀫𑀸𑀦𑀸𑀥𑀺𑀓𑀭𑀡𑁆𑀬𑀁 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀲𑀢𑁆𑀢𑀜𑁆𑀘 𑀯𑁂𑀤𑀺𑀢𑀩𑁆𑀩𑀁, 𑀢𑁂𑀦𑁂𑀯𑀸𑀳-‘𑀅𑀢𑁄𑀬𑁂𑀯𑁂’𑀘𑁆𑀘𑀸𑀤𑀺.

𑀅𑀢𑁄𑀬𑁂𑀯𑀸𑀢𑀺 𑀬𑀢𑁄 𑀯𑀺𑀲𑁂𑀲𑁆𑀲𑀲𑁆𑀲 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀁 𑀯𑀺𑀲𑁂𑀲𑀦𑀸𑀧𑁂𑀓𑁆𑀔𑀁, 𑀅𑀢𑁄𑀬𑁂𑀯 𑀳𑁂𑀢𑀼𑀢𑁄𑀢𑀺 𑀅𑀢𑁆𑀣𑁄, 𑀪𑀺𑀦𑁆𑀦𑀦𑀺𑀫𑀺𑀢𑁆𑀢𑀧𑁆𑀧 𑀬𑀼𑀢𑁆𑀢𑀸𑀦𑀫𑁂𑀯𑀸𑀢𑀺 ¶ 𑀲𑀸𑀫𑀜𑁆𑀜𑁂𑀦 𑀦𑀻𑀮𑀕𑀼𑀡𑀸𑀥𑀸𑀭𑁂 𑀤𑀩𑁆𑀩𑁂 𑀕𑀼𑀡𑁂𑀬𑁂𑀯 𑀯𑀸 𑀦𑀻𑀮𑀲𑀤𑁆𑀤𑀲𑁆𑀲, 𑀉𑀧𑁆𑀧𑀮𑀲𑀤𑁆𑀤𑀲𑁆𑀲 𑀘 𑀲𑀸𑀫𑀜𑁆𑀜𑁂𑀦 𑀕𑀼𑀡𑀯𑀢𑀺 𑀤𑀩𑁆𑀩𑁂 𑀯𑀢𑁆𑀢𑀫𑀸𑀦𑀢𑁆𑀢𑀸 𑀅𑀜𑁆𑀜𑀫𑀜𑁆𑀜𑁂𑀲𑀼 𑀪𑀺𑀦𑁆𑀦𑁂𑀲𑀼 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀬𑀸 𑀓𑀸𑀭𑀡𑁂𑀲𑀼 𑀧𑀬𑀼𑀢𑁆𑀢𑀸𑀦𑀁 𑀲𑀤𑁆𑀤𑀸𑀦𑀫𑁂𑀯 [𑀦𑀺𑀝𑁆𑀞𑀸𑀦𑀫𑁂𑀯 (𑀧𑁄𑀢𑁆𑀣𑀓𑁂)].

𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀦𑁆𑀢𑀺 𑀦𑀻𑀮𑀼𑀧𑁆𑀧𑀮𑀲𑀤𑁆𑀤𑀸𑀦𑀁 𑀯𑀺𑀲𑀼𑀁𑀯𑀺𑀲𑀼𑀁 𑀬𑁄𑀕𑁂 𑀯𑀺𑀲𑀺𑀝𑁆𑀞𑀤𑀩𑁆𑀩 𑀯𑀸𑀘𑀺𑀢𑁆𑀢𑀲𑁆𑀲𑀸𑀲𑀫𑁆𑀪𑀯𑀸, 𑀦𑀻𑀮𑀜𑁆𑀘 𑀢𑀁 𑀉𑀧𑁆𑀧𑀮𑀁 𑀘𑁂𑀢𑀺 𑀲𑀸𑀫𑀸𑀦𑀸𑀥𑀺𑀓𑀭𑀡𑁆𑀬𑁂 𑀲𑀦𑁆𑀦𑀺𑀧𑀢𑀺𑀢𑁂 𑀲𑀢𑀺 𑀲𑀫𑁆𑀪𑀯𑀸 𑀏𑀯𑀁 𑀢𑀢𑁆𑀣 𑀯𑀺𑀲𑀺𑀝𑁆𑀞𑁂 𑀯𑀢𑁆𑀣𑀼𑀫𑁆𑀳𑀺 𑀧𑀯𑀢𑁆𑀢𑀸𑀦𑀁 𑀢𑁂𑀲𑀁 𑀲𑀫𑀸𑀦𑀢𑁆𑀣𑀢𑀸, 𑀏𑀯𑀓𑀸𑀭𑁂𑀦 𑀩𑁆𑀬𑀯𑀘𑁆𑀙𑀺𑀦𑁆𑀦𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀫𑀸𑀳-‘𑀦𑀢𑁆𑀯𑀪𑀺𑀦𑁆𑀦𑁂’𑀘𑁆𑀘𑀸𑀤𑀺.

𑀦𑀦𑀼𑀘𑁂𑀢𑁆𑀬𑀸𑀤𑀺 𑀘𑁄𑀤𑁆𑀬𑀁, 𑀲𑀻𑀲𑀫𑁆𑀧𑀸𑀢𑀻𑀢𑀺 𑀲𑀻𑀲𑀧𑀸 𑀭𑀼𑀓𑁆𑀔𑀯𑀺𑀲𑁂𑀲𑁄, 𑀦𑀬𑀺𑀤 𑀫𑁂𑀯𑀫𑀺𑀘𑁆𑀘𑀸𑀤𑀺 𑀧𑀭𑀺𑀳𑀸𑀭𑁄.

𑀅𑀣 𑀢𑀼𑀘𑁆𑀘𑀢𑁂𑀇𑀘𑁆𑀘𑀸𑀤𑀺𑀦𑀸 𑀧𑀭𑀲𑁆𑀲 𑀯𑀘𑀦𑀸𑀯𑀓𑀸𑀲𑀫𑀸𑀲𑀗𑁆𑀓𑀢𑁂, 𑀯𑀺𑀲𑁂𑀲𑀯𑀼𑀢𑁆𑀢𑀻𑀢𑀺 𑀨𑀮𑀲𑁆𑀲 𑀭𑀼𑀓𑁆𑀔𑀲𑁆𑀲 𑀘 𑀲𑀸𑀫𑀜𑁆𑀜𑀲𑀤𑁆𑀤𑀢𑁆𑀢𑀸 𑀪𑀸𑀯𑁂𑀦 𑀯𑀺𑀲𑁂𑀲𑁂 𑀯𑀼𑀢𑁆𑀢𑀺, 𑀇𑀫𑁂𑀲𑀦𑁆𑀢𑀺 𑀲𑀻𑀲𑀧𑀸𑀤𑀻𑀦𑀁 𑀦 𑀲𑀫𑁄𑀥𑀸𑀭𑀺𑀢𑀸𑀢𑀺 𑀦 𑀦𑀺𑀘𑁆𑀙𑀺𑀢𑀸, 𑀲𑀸𑀫𑀜𑁆𑀜𑀯𑀼𑀢𑁆𑀢𑀺𑀬𑁂𑀯 𑀲𑀫𑁄𑀥𑀸𑀭𑀺𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀅𑀯𑀲𑀺𑀢𑀸 𑀦𑀺𑀘𑁆𑀙𑀺𑀢𑀸 𑀯𑀼𑀢𑁆𑀢𑀺 𑀬𑁂𑀲𑀁 𑀲𑀻𑀲𑀧𑀸𑀤𑀻𑀦𑀁 𑀢𑁂 𑀅𑀯𑀲𑀺𑀢𑀯𑀼𑀢𑁆𑀢𑀬𑁄, 𑀧𑀬𑀢𑀦𑀁 𑀯𑀺𑀦𑀸 𑀢𑀤𑀸 𑀧𑀧𑁆𑀧𑁄𑀢𑀺 𑀘𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀧𑀬𑀢𑀦𑀦𑁆𑀢𑀺 ‘𑀲𑀸𑀫𑀢𑁆𑀣𑀺𑀬𑀮𑀤𑁆𑀥𑁂𑀧𑀺𑀯𑀺𑀲𑁂𑀲𑁆𑀲𑁂’𑀢𑀺𑀯𑀘𑀦𑀁. 𑀢𑀜𑁆𑀘𑀦𑀢𑁆𑀣𑀺𑀘𑁆𑀘𑀸𑀤𑀺 𑀧𑀭𑀺𑀳𑀸𑀭𑁄, 𑀲𑀭𑀽𑀧𑀫𑀢𑁆𑀢𑀓𑀣𑀦𑀸𑀬𑀸𑀢𑀺 𑀯𑀼𑀢𑁆𑀢𑀢𑁆𑀣𑀸𑀦𑀫𑁆𑀧𑀺 𑀲𑀭𑀽𑀧𑀫𑀢𑁆𑀢𑀓𑀣𑀦𑀸𑀬 ‘𑀧𑀽𑀧𑁂 𑀩𑀳𑀽 𑀆𑀦𑀬𑁂’𑀢𑀺 𑀬𑀣𑀸, 𑀏𑀯𑀁 𑀚𑀸𑀢𑀻𑀬𑀓𑀦𑁆𑀢𑀺 𑀲𑀭𑀽𑀧𑀓𑀣𑀦𑀧𑁆𑀧𑀓𑀸𑀭𑀬𑀼𑀢𑁆𑀢𑀁. 𑀉𑀧𑀲𑀁𑀳𑀭𑀫𑀸𑀳-‘𑀢𑀤𑁂𑀯’𑀫𑀺𑀘𑁆𑀘𑀸𑀤𑀺, 𑀦𑀺𑀧𑀸𑀢𑀲𑀫𑀼𑀤𑀸𑀬𑁄𑀯𑀸𑀬𑀁 𑀯𑀼𑀢𑁆𑀢𑁂𑀦 𑀧𑀓𑀸𑀭𑁂𑀦𑁂𑀢𑁆𑀬𑀲𑁆𑀲 𑀅𑀢𑁆𑀣𑁂 𑀯𑀢𑁆𑀢𑀢𑁂.

𑀅𑀜𑁆𑀜𑀢𑀭𑀲𑀫𑁆𑀪𑀯𑁂𑀧𑀺 𑀢𑀦𑁆𑀦𑀺𑀯𑀢𑁆𑀢𑀺𑀬𑀸 𑀯𑀘𑀦𑀲𑀩𑁆𑀪𑀸𑀯𑀁 𑀤𑀲𑁆𑀲𑁂𑀢𑀼𑀫𑀸𑀳- ‘𑀅𑀣𑀧𑀺’𑀘𑁆𑀘𑀸𑀤𑀺, 𑀅𑀜𑁆𑀜𑀢𑀭𑀲𑀫𑁆𑀪𑀯𑁂𑀧𑀻𑀢𑀺 𑀯𑀺𑀲𑁂𑀲𑀦𑀲𑁆𑀲 𑀯𑀺𑀲𑁂𑀲𑁆𑀲𑀲𑁆𑀲 𑀯𑀸 𑀲𑀫𑁆𑀪𑀯𑁂𑀧𑀺, 𑀬𑀢𑁆𑀭𑀧𑁆𑀬𑀼𑀪𑀺𑀦𑁆𑀦𑀫𑀢𑁆𑀣𑀺 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀲𑀪𑀸𑀯𑀲𑀫𑁆𑀪𑀯𑁄 𑀢𑀢𑁆𑀣𑀧𑀺𑀢𑀸𑀯 𑀩𑀳𑀼𑀮𑀁𑀯𑀘𑀦𑀢𑁄𑀯 𑀦𑀺𑀯𑀢𑁆𑀢𑀺 𑀳𑁄𑀢𑀺, 𑀓𑀺𑀫𑁆𑀧𑀦𑀸-𑀜𑁆𑀜𑀢𑀭𑀲𑀫𑁆𑀪𑀯𑁂𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘𑀬𑀣𑀸 𑀧𑀼𑀡𑁆𑀡𑁄’𑀇𑀘𑁆𑀘𑀸𑀤𑀺, 𑀏𑀢𑁆𑀣 𑀧𑀦 𑀅𑀜𑁆𑀜𑁂𑀧𑀺 𑀧𑀼𑀡𑁆𑀡𑀦𑀸𑀫𑀓𑀸 𑀲𑀦𑁆𑀢𑀻𑀢𑀺 𑀩𑁆𑀬𑀪𑀺𑀘𑀸𑀭𑀲𑀫𑁆𑀪𑀯𑀸 𑀉𑀪𑀺𑀦𑁆𑀦𑀫𑁆𑀧𑀺 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀲𑀪𑀸𑀯𑀲𑀫𑁆𑀪𑀯𑁂 𑀩𑀳𑀼𑀮𑀁𑀯𑀘𑀦𑀫𑁂𑀯 𑀲𑀫𑀸𑀲𑀁 𑀦𑀺𑀯𑀢𑁆𑀢𑁂𑀢𑀺, 𑀏𑀯𑀁 𑀯𑀺𑀥𑁂𑀧𑀻𑀢𑀺 𑀅𑀜𑁆𑀜𑀢𑀭𑀲𑀫𑁆𑀪𑀯𑁂𑀧𑀺, 𑀦 ¶ 𑀓𑁂𑀯𑀮𑀁 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀲𑀪𑀸𑀯𑀲𑀫𑁆𑀪𑀯𑁂, 𑀅𑀣 𑀔𑁄 𑀏𑀯𑀁 𑀯𑀺𑀥𑁂𑀧𑁆𑀬𑀜𑁆𑀜 𑀢𑀭𑀲𑀫𑁆𑀪𑀯𑁂𑀧𑀺𑀢𑁆𑀬𑀯𑀺𑀲𑀤𑁆𑀤𑀲𑁆𑀲 𑀅𑀢𑁆𑀣𑁄.

𑀬𑀚𑁆𑀚𑁂𑀯𑀫𑀺𑀘𑁆𑀘𑀸𑀤𑀺 𑀧𑀘𑁆𑀘𑁂𑀓𑀁 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀲𑀪𑀸𑀯𑁂 𑀲𑀢𑀺 𑀅𑀦𑀺𑀝𑁆𑀞𑀸 𑀧𑀸𑀤𑀦𑀘𑁄𑀤𑀦𑀸, 𑀧𑀘𑁆𑀘𑁂𑀓𑀁 𑀯𑀺𑀲𑁂𑀲𑀦𑀁 𑀲𑀺𑀬𑀸 𑀉𑀪𑀺𑀦𑁆𑀦𑀫𑁆𑀧𑀺 𑀯𑀺𑀲𑁂𑀲𑀦𑀢𑁆𑀢𑀸, 𑀢𑀢𑁆𑀣 𑀤𑁄𑀲𑀫𑀸𑀳-‘𑀯𑀺𑀲𑁂𑀲𑁆𑀲𑀲𑁆𑀲𑀘 𑀧𑀼𑀩𑁆𑀩𑀦𑀺𑀧𑀸𑀢𑁄’𑀢𑀺, 𑀘𑁄-𑀯𑀥𑀸𑀭𑀡𑁂, 𑀯𑀢𑁆𑀢𑀩𑁆𑀩𑀦𑁆𑀢𑀭𑀲𑀫𑀼𑀘𑁆𑀘𑀬𑁂 𑀯𑀸, 𑀓𑀼𑀢𑁄𑀘𑁆𑀘𑀸𑀳- ‘𑀦𑀸𑀕𑁆𑀕𑀳𑀺𑀢𑁂’𑀘𑁆𑀘𑀸𑀤𑀺, 𑀇𑀢𑀺 𑀓𑀸𑀭𑀡𑁂, 𑀅𑀢𑁄 𑀓𑀺𑀫𑀦𑀺𑀝𑁆𑀞𑀫𑀸𑀬𑀸𑀢 𑀫𑀺𑀘𑁆𑀘𑀸𑀳- ‘𑀉𑀧𑁆𑀧𑀮𑀦𑀻𑀮𑀦𑁆𑀢𑀺𑀧𑀺 𑀲𑀺𑀬𑀸’𑀢𑀺, 𑀇𑀢𑁆𑀣𑀜𑁆𑀘𑀭𑀳𑀺 𑀓𑀺𑀦𑁆𑀢𑁆𑀬𑀸𑀳- ‘𑀦𑀻𑀮𑀼𑀧𑁆𑀧𑀮𑀦𑁆𑀢𑀺 𑀘𑁂’𑀘𑁆𑀘𑀸𑀤𑀺. 𑀧𑀭𑀺𑀳𑀸𑀭𑀫𑀸𑀳-‘𑀦𑁂𑀲𑀤𑁄𑀲𑁄’𑀘𑁆𑀘𑀸𑀤𑀺, 𑀉𑀧𑀧𑀢𑁆𑀢𑁆𑀬𑀦𑁆𑀢𑀭𑀫𑀸𑀳- ‘𑀅𑀣 𑀘𑁂’𑀘𑁆𑀘𑀸𑀤𑀺.

𑀅𑀜𑁆𑀜𑀫𑀜𑁆𑀜𑀸𑀦𑀼𑀧𑀓𑀸𑀭𑀺𑀢𑁆𑀢𑀸𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀲𑀢𑁆𑀢𑁂 𑀦𑀸𑀦𑀼𑀧𑀓𑀸𑀭𑀺𑀢𑁆𑀢𑀸 𑀲𑀧𑁆𑀧𑀥𑀸𑀦𑀢𑁆𑀢𑀸𑀢𑀺 𑀅𑀢𑁆𑀣𑁄, 𑀅𑀣 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀧𑁆𑀧𑀥𑀸𑀦𑀢𑁆𑀢𑀁 𑀓𑀲𑁆𑀫𑀸 𑀦 𑀲𑀺𑀬𑀸 𑀢𑁆𑀬𑀸𑀳- ‘𑀅𑀧𑁆𑀧𑀥𑀸𑀦𑀢𑁆𑀢𑁂𑀧𑀺’𑀘𑁆𑀘𑀸𑀤𑀺, 𑀲𑀓𑀲𑀓𑀧𑁆𑀧𑀥𑀸𑀦𑀸𑀧𑁂𑀓𑁆𑀔𑀸𑀯𑀦𑁆𑀢𑀸𑀦𑀦𑁆𑀢𑀺 𑀲𑀓𑁂𑀲𑀓𑁂 𑀧𑀥𑀸𑀦𑁂 𑀅𑀢𑁆𑀢𑀦𑀺 𑀅𑀧𑁂𑀓𑁆𑀔𑀸𑀯𑀦𑁆𑀢𑀸𑀦𑀁. 𑀅𑀣 𑀓𑀼𑀢𑁄 𑀤𑀩𑁆𑀩𑀲𑁆𑀲𑁂𑀯 𑀧𑀥𑀸𑀦𑀢𑁆𑀢𑀫𑀲𑀺𑀢𑀁, 𑀦 𑀢𑀼 𑀕𑀼𑀡𑀲𑁆𑀲𑁂𑀢𑁆𑀬𑀸𑀲𑀗𑁆𑀓𑀺𑀬 𑀜𑀸𑀬𑀫𑀼𑀧𑀦𑀺𑀲𑁆𑀲𑀬𑀢𑀺 ‘𑀅𑀣 𑀘𑁂’𑀢𑁆𑀬𑀸𑀤𑀺𑀦𑀸. 𑀙𑀸𑀕𑁄𑀢𑁆𑀬𑀚𑁄 𑀯𑀼𑀘𑁆𑀘𑀢𑁂, 𑀢𑀁 𑀲𑁂𑀢𑀯𑀡𑁆𑀡𑀫𑀸𑀮𑀪𑁂𑀣 𑀫𑀸𑀭𑁂𑀬𑁆𑀬, 𑀨𑀼𑀲𑀦𑀁 𑀯𑀸 𑀓𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄, 𑀆𑀧𑀼𑀩𑁆𑀩𑁄 𑀮𑀪𑀺 𑀳𑀺 𑀫𑀸𑀭𑀡𑁂 𑀨𑀼𑀲𑀦𑁂 𑀘 𑀯𑀢𑁆𑀢𑀢𑁂, 𑀤𑁂𑀲𑀦𑀸𑀬𑀦𑁆𑀢𑀺 [𑀘𑁄𑀤𑀦𑀸𑀬𑀦𑁆𑀢𑀺 𑀘𑁄𑀤𑀦𑀸𑀯𑀸𑀓𑁆𑀬 (𑀧𑁄𑀢𑁆𑀣𑀓𑁂)] 𑀯𑁂𑀤𑀯𑀸𑀓𑁆𑀬𑁂𑀢𑀺 𑀅𑀢𑁆𑀣𑁄, 𑀓𑀼𑀢𑁄 𑀙𑀸𑀕𑀢𑁄-𑀜𑁆𑀜𑁄 𑀦𑀸𑀮𑀩𑁆𑀪𑀢𑁂𑀘𑁆𑀘𑀸𑀳- ‘𑀦 𑀳𑀺’𑀘𑁆𑀘𑀸𑀤𑀺.

𑀙𑀸𑀕𑀸𑀪𑀸𑀯𑁂𑀢𑀺 𑀲𑁂𑀢𑀕𑀼𑀡𑀬𑀼𑀢𑁆𑀢𑀲𑁆𑀲 𑀙𑀸𑀕𑀲𑁆𑀲𑀸𑀪𑀸𑀯𑁂, 𑀧𑀺𑀝𑁆𑀞𑀧𑀺𑀡𑁆𑀟𑀺𑀫𑀸𑀮𑀩𑁆𑀪𑀸𑀢𑀺 𑀲𑁂𑀢𑀕𑀼𑀡𑀬𑁄𑀕𑁂𑀦 𑀯𑀺𑀝𑁆𑀞𑀧𑀺𑀡𑁆𑀟𑀺𑀁 𑀆𑀮𑀫𑁆𑀪, 𑀦 𑀘 𑀦𑀸𑀮𑀫𑁆𑀪𑀢𑁂 𑀢𑀲𑁆𑀫𑀸 𑀕𑀼𑀡𑁄 𑀅𑀧𑁆𑀧𑀥𑀸𑀦𑀦𑁆𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁.

𑀧𑀼𑀦 𑀘𑁄𑀤𑁂𑀦𑁆𑀢𑁄 𑀆𑀳- ‘𑀦𑀦𑀼 𑀘𑁂’𑀘𑁆𑀘𑀸𑀤𑀺, 𑀅𑀣𑁂𑀢𑁆𑀬𑀥𑀺𑀧𑁆𑀧𑀸𑀬𑀫𑀸𑀲𑀗𑁆𑀓𑀢𑁂, 𑀅𑀦𑀺𑀝𑁆𑀞𑀫𑀸𑀧𑀸𑀤𑀬𑀢𑀺 𑀦𑀻𑀮𑀲𑀤𑁆𑀤𑁂𑀧𑀺 𑀧𑀲𑀗𑁆𑀕𑁄’𑀢𑀺, 𑀓𑀼𑀢𑁄𑀘𑁆𑀘𑀸𑀳- ‘𑀲𑁄𑀧𑀺𑀳𑀺’𑀘𑁆𑀘𑀸𑀤𑀺, 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺- ‘‘𑀉𑀧𑁆𑀧𑀮𑀲𑀤𑁆𑀤𑁄 𑀚𑀸𑀢𑀺𑀯𑀸𑀘𑀻, 𑀦 𑀢𑀼 𑀤𑀩𑁆𑀩𑀯𑀸𑀘𑀻, 𑀚𑀸𑀢𑀺 𑀯𑀺𑀲𑀺𑀝𑁆𑀞𑀤𑀩𑁆𑀩𑀯𑀸𑀘𑀺𑀢𑁆𑀢𑀸 𑀬𑀤𑀺 𑀤𑀩𑁆𑀩𑀯𑀸𑀘𑀻𑀢𑀺 𑀯𑀼𑀘𑁆𑀘𑀢𑁂, 𑀢𑀤𑀸 𑀦𑀻𑀮𑀲𑀤𑁆𑀤𑁄𑀧𑀺 𑀕𑀼𑀡𑀯𑀺𑀲𑀺𑀝𑁆𑀞 𑀤𑀩𑁆𑀩𑀯𑀸𑀘𑀺𑀢𑁆𑀢𑀸 𑀤𑀩𑁆𑀩𑀯𑀘𑀦𑀫𑀸𑀧𑀚𑁆𑀚𑀢𑀻𑀢𑀺 𑀇𑀫𑁂𑀲𑀁 𑀦 𑀓𑁄𑀘𑀺 𑀯𑀺𑀲𑁂𑀲𑁄’’𑀢𑀺, 𑀧𑀭𑀺𑀳𑀭𑀦𑁆𑀢𑁄 𑀆𑀳 ‘𑀦𑁂𑀤𑀫𑀢𑁆𑀣𑀺’𑀘𑁆𑀘𑀸𑀤𑀺, 𑀅𑀧𑀸𑀬𑀺𑀦𑁄 𑀅𑀧𑀕𑀦𑁆𑀢𑀸𑀭𑁄 𑀤𑀩𑁆𑀩𑀸𑀢𑀺 𑀕𑀫𑁆𑀬𑀢𑁂, 𑀓𑀼𑀢𑁄𑀘𑁆𑀘𑀸𑀳- ‘𑀲𑀢𑀻𑀧𑀺’𑀘𑁆𑀘𑀸𑀤𑀺, 𑀇𑀢𑀺 𑀓𑀸𑀭𑀡𑁂.

𑀯𑀺𑀲𑁂𑀲𑀦𑀫𑁂𑀓𑀢𑁆𑀣𑁂𑀦𑁂𑀢𑀺 ¶ 𑀲𑀺𑀤𑁆𑀥𑁂𑀧𑀺 𑀧𑀧𑀜𑁆𑀘𑀢𑁆𑀣𑀁 𑀧𑀭𑀺𑀧𑁆𑀨𑀼𑀝𑀢𑁆𑀣𑀜𑁆𑀘 𑀉𑀤𑀸𑀳𑀭𑀡𑀩𑀳𑀼𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 𑀧𑀸𑀡𑀺𑀦𑀺𑀬𑁂𑀳𑀺 𑀩𑀳𑀼𑀁 𑀲𑀼𑀢𑁆𑀢𑀺𑀢𑀁, 𑀲𑀩𑁆𑀩𑀲𑁆𑀲𑁂𑀢𑀲𑁆𑀲 𑀧𑀘𑁆𑀘𑀓𑁆𑀔𑀸𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀺𑀬𑀫𑀼𑀤𑀸𑀳𑀭𑀡𑀫𑀢𑁆𑀢𑀁 𑀤𑀲𑁆𑀲𑀺𑀢𑀁, 𑀢𑀤𑀺𑀤𑀸𑀦𑀺 𑀩𑁆𑀬𑀸𑀔𑁆𑀬𑀸𑀢𑀼𑀓𑀸𑀫𑁄 𑀆𑀳- ‘𑀧𑀼𑀩𑁆𑀩𑀓𑀸𑀮𑁂’𑀘𑁆𑀘𑀸𑀤𑀺, 𑀙𑀺𑀦𑁆𑀦𑁄𑀘 𑀯𑀺𑀲𑁂𑀲𑀦𑀦𑁆𑀢𑀻 𑀲𑀫𑁆𑀩𑀦𑁆𑀥𑁄 ‘‘𑀧𑀼𑀩𑁆𑀩𑀓𑀸𑀮𑁂𑀓 𑀲𑀩𑁆𑀩𑀥𑀼𑀭𑀧𑀼𑀭𑀸𑀡𑀦𑀯𑀓𑁂𑀯𑀮𑀸𑀦𑀺 𑀲𑀫𑀸𑀦𑀸𑀥𑀺𑀓𑀭𑀡𑁂𑀦𑁂’’𑀢𑀺 (𑁨-𑁧-𑁪𑁯) 𑀢𑁂 𑀲𑀫𑁂𑀢𑁆𑀣 𑀲𑀼𑀢𑁆𑀢𑀁, 𑀢𑀢𑁆𑀣𑁂𑀓𑀸𑀤𑀻𑀦𑀁 𑀯𑀼𑀢𑁆𑀢𑀺𑀬𑀫𑀼𑀤𑀸𑀳𑀭𑀡𑀸𑀦𑀺 𑀦 𑀤𑀲𑁆𑀲𑀺𑀢𑀸𑀦𑁆𑀬𑀼𑀧𑀮𑀓𑁆𑀔𑀡𑀢𑁄𑀯 𑀯𑀺𑀜𑁆𑀜𑀸𑀬𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀏𑀓𑁂’𑀘𑁆𑀘𑀸𑀤𑀺, 𑀏𑀓𑁄 𑀘 𑀲𑁄 𑀧𑀼𑀭𑀺𑀲𑁄𑀘𑀸𑀢𑁆𑀬𑀸𑀤𑀺𑀦𑀸 𑀯𑀺𑀕𑁆𑀕𑀳𑁄 𑀉𑀧𑀮𑀓𑁆𑀔𑀡𑀢𑁆𑀢𑀸𑀬𑁂𑀯 𑀘 ‘𑀲𑀢𑁆𑀢 𑀘 𑀢𑁂 𑀇𑀲𑀬𑁄 𑀘 𑀲𑀢𑁆𑀢𑀺𑀲𑀬𑁄’𑀘𑁆𑀘𑀸𑀤𑀺𑀓𑀜𑁆𑀘 𑀤𑀝𑁆𑀞𑀩𑁆𑀩𑀁.

𑀉𑀧𑀫𑀻𑀬𑀢𑁂 𑀧𑀭𑀺𑀘𑁆𑀙𑀺𑀚𑁆𑀚𑀢𑁂-𑀦𑁂𑀦𑁂𑀢𑁆𑀬𑀼𑀧𑀫𑀸𑀦𑀁, 𑀉𑀧𑀫𑀻𑀬𑀢𑀻𑀢𑁆𑀬𑀼𑀧𑀫𑁂𑀬𑁆𑀬𑀁, 𑀢𑁂𑀲𑀁 𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀸𑀦𑀁 𑀲𑀸𑀥𑀸𑀭𑀡𑁄 𑀬𑁄 𑀥𑀫𑁆𑀫𑁄 𑀲𑀸𑀫𑀢𑀸𑀢𑁂𑀦 𑀯𑀺𑀲𑀺𑀝𑁆𑀞𑀁 𑀬𑀤𑀼𑀧𑀫𑁂𑀬𑁆𑀬𑀁, 𑀢𑀁 𑀯𑀘𑀦𑁂𑀦𑁂𑀢𑁆𑀬𑀢𑁆𑀣𑁄 𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀘𑁆𑀘𑀸𑀤𑀺 𑀓𑀲𑁆𑀲, 𑀲𑀫𑀸𑀲𑁄 𑀪𑀯𑀢𑀻𑀢𑀺 𑀲𑁂𑀲𑁄, 𑀓𑀸𑀭𑀡𑀫𑀸𑀳- ‘𑀯𑀺𑀲𑁂𑀲𑁂’𑀘𑁆𑀘𑀸𑀤𑀺, 𑀯𑀺𑀲𑁂𑀲𑀸𑀧𑀭𑀺𑀕𑁆𑀕𑀳𑀸𑀢𑀺 𑀯𑀺𑀲𑁂𑀲𑀦𑀦𑁆𑀢𑁆𑀬𑁂𑀯 𑀲𑀸𑀫𑀜𑁆𑀜𑁂𑀦 𑀧𑀭𑀺𑀕𑁆𑀕𑀳𑀸, 𑀏𑀯𑀫𑁆𑀪𑀽 𑀢𑀲𑁆𑀲𑀸𑀧𑀻𑀢𑀺 𑀉𑀧𑀫𑀸𑀦𑀭𑀽𑀧𑀲𑁆𑀲𑀸𑀧𑀺. 𑀦𑀦𑀼 𑀲𑀢𑁆𑀣𑀻𑀲𑀤𑁆𑀤𑀲𑁆𑀲𑀲𑀢𑁆𑀣𑀺𑀬𑀁 𑀯𑀼𑀢𑁆𑀢𑀺 𑀲𑀸𑀫𑀸𑀲𑀤𑁆𑀤𑀲𑁆𑀲 𑀢𑀼 𑀤𑁂𑀯𑀤𑀢𑁆𑀢𑀸𑀬, 𑀅𑀢𑁄 𑀩𑁆𑀬𑀥𑀺𑀓𑀭𑀡𑀢𑁆𑀢𑀸 𑀓𑀣𑀫𑁂𑀢𑁆𑀣 𑀲𑀫𑀸𑀲𑁄𑀘𑁆𑀘𑀸𑀲𑀗𑁆𑀓𑀻𑀬𑀸𑀳- ‘𑀬𑀤𑁂’𑀘𑁆𑀘𑀸𑀤𑀺, 𑀲𑀫𑀸𑀦𑁄 𑀥𑀫𑁆𑀫𑁄 𑀲𑀸𑀫𑀢𑁆𑀢𑀸𑀤𑀺 𑀬𑀲𑁆𑀲 𑀲𑁄 𑀲𑀥𑀫𑁆𑀫𑁄, 𑀢𑀲𑁆𑀲 𑀪𑀸𑀯𑁄 𑀲𑀸𑀥𑀫𑁆𑀫𑀺𑀬𑀁 𑀲𑀸𑀫𑀢𑁆𑀢𑀁, 𑀢𑀲𑁆𑀫𑀸 𑀤𑁂𑀯𑀤𑀢𑁆𑀢𑀸𑀢𑁆𑀣𑁂 𑀯𑀢𑁆𑀢𑀢𑁂 𑀉𑀧𑀘𑀸𑀭𑀯𑀲𑁂𑀦, 𑀲𑀸𑀫𑀸𑀲𑀤𑁆𑀤𑁄𑀧𑀺 𑀕𑀼𑀡𑀯𑀘𑀦𑁄𑀧𑀺 𑀲𑀸𑀫𑀢𑁆𑀢𑀁 𑀯𑀢𑁆𑀯𑀸 𑀲𑀤𑁆𑀥𑀸𑀤𑀺𑀢𑁆𑀢𑀯𑀲𑁂𑀦𑀸𑀪𑁂𑀤𑁄𑀧𑀘𑀸𑀭𑁂𑀦 𑀯𑀸 𑀤𑁂𑀯𑀤𑀢𑁆𑀢𑀸𑀬𑀁 𑀯𑀢𑁆𑀢𑀢𑁂, 𑀦𑀦𑀼 𑀘 𑀲𑀸𑀫𑀸𑀲𑀤𑁆𑀤𑀲𑁆𑀲 𑀤𑁂𑀯𑀤𑀢𑁆𑀢𑀸𑀪𑀺𑀥𑀸𑀦𑁂 𑀘𑀭𑀺𑀢𑀢𑁆𑀣𑀢𑀸𑀬 𑀲𑀢𑁆𑀣𑀻 𑀕𑀼𑀡𑁂𑀦 𑀦𑀺𑀤𑁆𑀤𑀺𑀝𑁆𑀞𑀸𑀢𑁆𑀬𑀦𑀺𑀬𑀢𑀕𑀼𑀡𑀧𑁆𑀧𑀢𑀻𑀢𑀺𑀧𑁆𑀧𑀲𑀗𑁆𑀕𑁄 𑀦𑁂𑀓𑀕𑀼𑀡𑀸𑀥𑀸𑀭𑀢𑁆𑀢𑀸 𑀲𑀢𑁆𑀣𑀺𑀬𑀸𑀢𑁆𑀬𑀸𑀲𑀗𑁆𑀓𑀺𑀬𑀸𑀳- ‘𑀬𑀤𑀺𑀧𑀺’𑀘𑁆𑀘𑀸𑀤𑀺.

𑀇𑀳𑀸𑀢𑀺 𑀦𑀺𑀤𑁆𑀥𑀸𑀭𑀡𑁂, 𑀏𑀢𑁂𑀲𑀁 𑀕𑀼𑀡𑀸𑀦𑀁 𑀫𑀚𑁆𑀛𑁂𑀢𑀺 𑀅𑀢𑁆𑀣𑁄, 𑀇𑀳 𑀯𑀸 𑀲𑀢𑁆𑀣𑀺𑀬𑀁, 𑀲𑀸𑀫𑀕𑀼𑀡𑀯𑀦𑁆𑀢𑀢𑀸𑀬 𑀲𑀸𑀫𑀸𑀬𑀸𑀢𑀺 𑀕𑀫𑁆𑀬𑀢𑁂, 𑀧𑀲𑀺𑀤𑁆𑀥𑀺𑀯𑀲𑁂𑀦𑀸𑀢𑀺 𑀲𑀢𑁆𑀣𑀺𑀲𑀸𑀫𑀸𑀢𑁆𑀬𑀢𑁆𑀭𑁄𑀧𑀫𑀸𑀦𑀁 𑀲𑀢𑁆𑀣𑀻, 𑀉𑀧𑀫𑁂𑀬𑁆𑀬𑀸 𑀤𑁂𑀯𑀤𑀢𑁆𑀢𑀸, 𑀧𑀲𑀺𑀤𑁆𑀥𑀦𑁆𑀢𑀼𑀧𑀫𑀸𑀦𑀁 𑀪𑀯𑀢𑀺 𑀦𑀸𑀧𑁆𑀧𑀲𑀺𑀤𑁆𑀥𑀁… 𑀧𑀲𑀺𑀤𑁆𑀥𑀲𑀸𑀥𑀫𑁆𑀫𑀺𑀬𑀸 𑀲𑀸𑀥𑁆𑀬𑀼 𑀲𑀸𑀥𑀦𑀫𑀼𑀧𑀫𑀸𑀦𑀦𑁆𑀢𑀺 𑀓𑀢𑁆𑀯𑀸 𑀲𑀢𑁆𑀣𑀺𑀬𑁂𑀯 𑀲𑀸𑀫𑀗𑁆𑀕𑀼𑀡𑁂𑀦 𑀧𑀲𑀺𑀤𑁆𑀥𑀸 𑀦 𑀤𑁂𑀯𑀤𑀢𑁆𑀢𑀸, 𑀢𑀲𑁆𑀫𑀸 𑀲𑀸𑀫𑀕𑀼𑀡𑀧𑁆𑀧𑀲𑀺𑀤𑁆𑀥𑀺𑀬𑀸𑀢𑀺 𑀅𑀢𑁆𑀣𑁄. 𑀲𑀸𑀥𑁆𑀬𑀼𑀢𑁂 𑀉𑀧𑀫𑀻𑀬𑀢𑁂𑀦𑁂𑀦𑁂𑀢𑀺 𑀲𑀸𑀥𑀦𑀫𑀼𑀧𑀫𑀸𑀦𑀁, 𑀲𑀸𑀥𑁆𑀬𑀢𑁂 ¶ 𑀉𑀧𑀥𑀻𑀬𑀢𑁂𑀢𑀺 𑀲𑀸𑀥𑁆𑀬𑀫𑀼𑀧𑀫𑁂𑀬𑁆𑀬𑀁, 𑀧𑀲𑀺𑀤𑁆𑀥𑀲𑁆𑀲 𑀲𑀸𑀥𑀫𑁆𑀫𑀺𑀬𑀁 𑀢𑁂𑀦, 𑀲𑀸𑀥𑁆𑀬𑀲𑁆𑀲𑀸𑀧𑁆𑀧𑀲𑀺𑀤𑁆𑀥𑀲𑁆𑀲 𑀓𑀲𑁆𑀲𑀘𑀺 𑀲𑀸𑀥𑀦𑀁 𑀲𑀸𑀥𑁆𑀬𑀲𑀸𑀥𑀦𑀁. 𑀬𑀢𑁆𑀭𑀢𑁆𑀯𑀺𑀘𑁆𑀘𑀸𑀤𑀺𑀦𑀸 𑀩𑀳𑀼𑀮𑀁𑀯𑀘𑀦𑀲𑀸𑀫𑀢𑁆𑀣𑀺𑀬𑀸 𑀲𑀸𑀫𑀜𑁆𑀜𑀯𑀘𑀦𑁂𑀦𑁂𑀯 𑀲𑀫𑀸𑀲𑀲𑀩𑁆𑀪𑀸𑀯𑀁 𑀯𑀢𑁆𑀯𑀸 𑀅𑀜𑁆𑀜𑁂𑀦𑀸𑀲𑀩𑁆𑀪𑀸𑀯𑀫𑀼𑀤𑀸𑀳𑀭𑀡𑁂𑀦 𑀨𑀼𑀝𑀬𑀺𑀢𑀼𑀁 ‘𑀨𑀸𑀮𑀸 𑀇𑀯 𑀢𑀡𑁆𑀟𑀼𑀮𑀸’𑀢𑁆𑀬𑀸𑀤𑀺 𑀆𑀭𑀤𑁆𑀥𑀁.

𑀢𑀡𑁆𑀟𑀼𑀮𑀲𑀤𑁆𑀤𑁄𑀢𑀺 𑀉𑀧𑀫𑁂𑀬𑁆𑀬𑀪𑀽𑀢𑀢𑀡𑁆𑀟𑀼𑀮𑀲𑀤𑁆𑀤𑁄, 𑀢𑀡𑁆𑀟𑀼𑀮𑀢𑁆𑀢𑀫𑁆𑀧𑀺 𑀯𑀢𑁆𑀯𑀸 𑀤𑀩𑁆𑀩𑁂 𑀧𑀯𑀢𑁆𑀢𑁄 𑀲𑀸𑀫𑀜𑁆𑀜𑀯𑀘𑀦𑁄 𑀦𑀢𑀼 𑀪𑀯𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀤𑀩𑁆𑀩𑁂𑀢𑀺 𑀢𑀡𑁆𑀟𑀼𑀮𑀤𑀩𑁆𑀩𑁂 𑀨𑀸𑀮𑀤𑀩𑁆𑀩𑁂 𑀘.

𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀲𑀸𑀥𑀸𑀭𑀡𑀲𑀽𑀭𑀢𑁆𑀢𑀸𑀤𑀺𑀥𑀫𑁆𑀫𑀯𑀘𑀦𑀸𑀧𑁆𑀧𑀬𑁄𑀕𑁂𑀢𑀺 𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀸𑀦𑀁 𑀲𑀸𑀥𑀸𑀭𑀡𑁄 𑀬𑁄 𑀯𑀺𑀲𑀸𑀭𑀤𑀢𑁆𑀢𑀸𑀤𑀺𑀥𑀫𑁆𑀫𑁄 𑀢𑀩𑁆𑀩𑀘𑀦𑀲𑁆𑀲 ‘𑀫𑀼𑀦𑀺 𑀅𑀬𑀁 𑀲𑀻𑀳𑁄 𑀯𑀺𑀬 𑀯𑀺𑀲𑀸𑀭𑀤𑁄’𑀢𑁆𑀬𑀸𑀤𑁄 𑀯𑀺𑀲𑀸𑀭𑀤𑀸𑀤𑀺𑀲𑀤𑁆𑀤𑀲𑁆𑀲𑀸𑀧𑁆𑀧𑀬𑁄𑀕𑁂𑀢𑀺 𑀅𑀢𑁆𑀣𑁄, 𑀓𑁂𑀲𑀜𑁆𑀘𑀺𑀢𑀺 𑀓𑁂𑀲𑀜𑁆𑀘𑀺 𑀲𑀤𑁆𑀤𑀸𑀦𑀁 𑀫𑀚𑁆𑀛𑁂, 𑀯𑀺𑀲𑁂𑀲𑁆𑀲𑀢𑁆𑀢𑀫𑁂𑀯 𑀨𑀼𑀝𑀬𑀢𑀺. ‘𑀢𑀣𑀸 𑀘𑁂’𑀢𑁆𑀬𑀸𑀤𑀺𑀦𑀸, 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀲𑀸𑀦𑀁 𑀬𑀣𑀺𑀝𑁆𑀞𑀢𑁆𑀢𑀸 𑀦𑀺𑀘𑁆𑀘𑀁 𑀲𑀻𑀳𑀸𑀤𑀻𑀦𑀁 𑀯𑀺𑀲𑁂𑀲𑁆𑀲𑀢𑀸𑀬𑁂𑀯 𑀯𑀘𑀦𑀺𑀘𑁆𑀙𑀸𑀢𑀺 𑀧𑀼𑀩𑁆𑀩𑀦𑀺𑀧𑀸𑀢𑀢𑁆𑀢𑀸𑀧𑁆𑀧𑀲𑀗𑁆𑀕𑁄𑀢𑀺 𑀪𑀸𑀯𑁄, 𑀉𑀧𑀧𑀢𑁆𑀬𑀦𑁆𑀢𑀭𑀫𑀸𑀳-‘𑀯𑀺𑀲𑁂𑀲𑀦𑀲𑁆𑀲𑁂𑀯𑁂’𑀘𑁆𑀘𑀸𑀤𑀺, 𑀬𑀤𑀺𑀧𑀺 𑀲𑀻𑀳𑁄 𑀯𑀺𑀲𑁂𑀲𑀦𑀫𑁂𑀯 𑀦 𑀯𑀺𑀲𑁂𑀲𑁆𑀲𑀁, 𑀢𑀣𑀸𑀧𑀺 𑀩𑀳𑀼𑀮𑀸𑀥𑀺𑀓𑀸𑀭𑀸 𑀯𑀺𑀲𑁂𑀲𑀦𑀲𑁆𑀲𑀸𑀧𑀺 𑀧𑀭𑀦𑀺𑀧𑀸𑀢𑁄𑀢𑀺 𑀪𑀸𑀯𑁄.

𑀅𑀣𑀸𑀢𑁆𑀭𑀸𑀧𑀺 𑀯𑀺𑀲𑁂𑀲𑀦𑀦𑁆𑀢𑁂𑀯 𑀲𑀫𑀸𑀲𑀧𑁆𑀧𑀝𑀺𑀧𑀸𑀤𑀦𑁂’𑀫𑀼𑀦𑀺 𑀅𑀬𑀁 𑀲𑀻𑀳𑁄𑀯 𑀯𑀺𑀲𑀸𑀭𑀤𑁄’𑀘𑁆𑀘𑀸𑀤𑁄 𑀲𑀸𑀫𑀢𑁆𑀣𑀺𑀬𑀢𑁄𑀯 𑀲𑀫𑀸𑀲𑀸𑀧𑁆𑀧𑀲𑀗𑁆𑀕𑁂𑀧𑀺 𑀉𑀧𑀫𑀸𑀦𑁄 𑀧𑀫𑁂𑀬𑁆𑀬𑀸𑀦𑀁 𑀲𑀸𑀥𑀸𑀭𑀡𑀯𑀺𑀲𑀸𑀭𑀤𑀢𑁆𑀢𑀸𑀤𑀺𑀥𑀫𑁆𑀫𑀯𑀘𑀦𑀸𑀧𑁆𑀧𑀬𑁄𑀕𑁂 𑀲𑀢𑀺 𑀢𑀧𑁆𑀧𑀲𑀗𑁆𑀕𑀸𑀪𑀸𑀯𑀢𑁆𑀣𑀁 𑀯𑀘𑀦𑀫𑀸𑀭𑀩𑁆𑀪𑀦𑀻𑀬𑀦𑁆𑀢𑀺 𑀘𑁄𑀤𑁂𑀢𑀺 ‘𑀦𑀦𑀼𑀘𑁂’𑀢𑁆𑀬𑀸𑀤𑀺𑀦𑀸, 𑀲𑀸𑀫𑀢𑁆𑀣𑀺𑀬𑀢𑁄𑀢𑀺 𑀲𑀸𑀫𑀜𑁆𑀜𑀯𑀘𑀦𑀧𑁆𑀧𑀬𑁄𑀕𑁂 𑀲𑀸𑀧𑁂𑀓𑁆𑀔𑀢𑁆𑀢𑀸 𑀲𑀫𑀸𑀲𑀸𑀧𑁆𑀧𑀲𑀗𑁆𑀕𑁄𑀢𑀺 𑀲𑀸𑀫𑀢𑁆𑀣𑀺𑀬𑀁 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀲𑀸𑀫𑀜𑁆𑀜𑀧𑁆𑀧𑀬𑁄𑀕𑀢𑁆𑀣𑀦𑁆𑀢𑀺 𑀲𑀫𑀸𑀲𑀯𑀸𑀓𑁆𑀬𑁂 𑀲𑀸𑀫𑀜𑁆𑀜𑀯𑀘𑀦𑀲𑁆𑀲 𑀲𑀽𑀭𑀢𑁆𑀢𑀸𑀤𑀺(𑀦𑁄), 𑀅𑀧𑁆𑀧𑀬𑁄𑀕𑀢𑁆𑀣𑀁, 𑀢𑀣𑀸 𑀳𑀺𑀘𑁆𑀘𑀸𑀤𑀺𑀦𑀸 𑀲𑀸𑀫𑀜𑁆𑀜𑀲𑀤𑁆𑀤𑀧𑁆𑀧𑀬𑁄𑀕𑁂 𑀲𑀸𑀫𑀢𑁆𑀣𑀺𑀬𑀢𑁄 𑀲𑀫𑀸𑀲𑀸𑀲𑀩𑁆𑀪𑀸𑀯𑀸 𑀲𑀼𑀢𑁆𑀢𑀦𑁆𑀢𑀭𑀲𑁆𑀲𑀸𑀦𑀸𑀭𑀩𑁆𑀪𑀦𑀻𑀬𑀪𑀸𑀯𑀁 𑀲𑀸𑀥𑁂𑀢𑀺.

𑀯𑀺𑀲𑁂𑀲𑀸𑀦𑀦𑁆𑀢𑀩𑁆𑀪𑀸𑀯𑀸𑀢𑀺 𑀲𑀸𑀫𑀜𑁆𑀜𑀲𑁆𑀲 𑀲𑀫𑀸𑀲𑁂 𑀅𑀦𑁆𑀢𑁄𑀪𑀸𑀯𑁂𑀧𑀺 𑀢𑀺𑀔𑀻𑀡𑀢𑁆𑀢𑀸𑀤𑀺𑀢𑁄 𑀯𑀺𑀲𑀺𑀝𑁆𑀞𑀲𑁆𑀲 𑀲𑀽𑀭𑀲𑁆𑀲𑀸𑀤𑀺𑀯𑀘𑀦𑀻𑀬𑀲𑁆𑀲 𑀯𑀺𑀲𑁂𑀲𑀲𑁆𑀲 𑀲𑀫𑀸𑀲𑁂 𑀅𑀦𑀦𑁆𑀢𑁄𑀕𑀥𑀢𑁆𑀢𑀸 𑀅𑀧𑁆𑀧𑀲𑀗𑁆𑀕𑁄 𑀲𑀸𑀧𑁂𑀓𑁆𑀔𑀫𑀲𑀫𑀢𑁆𑀣𑀦𑁆𑀢𑀺. 𑀅𑀣𑁂𑀢𑀺 ‘𑀲𑀘𑁆𑀘𑀫𑁂𑀢’𑀦𑁆𑀢𑀺𑀆𑀤𑀺𑀁 ¶ 𑀧𑀭𑀯𑀘𑀦𑀫𑀸𑀲𑀗𑁆𑀓𑀺𑀬 𑀯𑀤𑀢𑀺, 𑀏𑀯𑀫𑀸𑀤𑀺𑀲𑀺𑀚𑁆𑀛𑀦𑀢𑁆𑀣𑀁 𑀲𑀫𑀸𑀲𑁄𑀢𑀺 (𑀜𑀸𑀧𑀦𑀢𑁆𑀣𑀁) 𑀆𑀭𑀩𑁆𑀪𑀦𑀻𑀬𑀫𑁆𑀪𑀯𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀥𑀸𑀦𑀲𑁆𑀲𑀸𑀢𑀺 ‘𑀭𑀜𑁆𑀜𑁄𑀧𑀼𑀭𑀺𑀲𑁄-𑀪𑀺𑀭𑀽𑀧𑁄’𑀢𑁂𑀢𑁆𑀣 𑀅𑀪𑀺𑀭𑀽𑀧𑀲𑀸𑀧𑁂𑀓𑁆𑀔𑀲𑁆𑀲 𑀧𑀼𑀭𑀺𑀲𑀲𑁆𑀲 𑀯𑀺𑀲𑁂𑀲𑀦𑀢𑁆𑀢𑁂𑀦𑁂𑀯𑀸 [𑀯𑀺𑀲𑁂𑀲𑀦𑀁 𑀢𑁂𑀦𑁂𑀯𑀸 (𑀧𑁄𑀢𑁆𑀣𑀓𑁂)] 𑀧𑁆𑀧𑀥𑀸𑀦𑀁, 𑀲𑀫𑀸𑀲𑀸𑀯𑀬𑀯𑀪𑀽𑀢𑀁 𑀭𑀸𑀚𑀸𑀦𑀁 𑀧𑀢𑀺 𑀯𑀺𑀲𑁂𑀲𑁆𑀲𑀪𑀸𑀯𑁂𑀦𑀸𑀯𑀺𑀨𑀮𑀺𑀢𑀲𑀓𑀢𑁆𑀣𑀢𑀸𑀬 𑀧𑀥𑀸𑀦𑀪𑀽𑀢𑀲𑁆𑀲 𑀧𑀼𑀭𑀺𑀲𑀲𑁆𑀲. 𑀆𑀤𑀺𑀲𑀤𑁆𑀤𑁂𑀦 ‘𑀭𑀸𑀚𑀧𑀼𑀭𑀺𑀲𑀲𑁆𑀲 𑀤𑀲𑁆𑀲𑀦𑀻𑀬𑀲𑁆𑀲 𑀕𑁂𑀳’𑀦𑁆𑀢𑀺 𑀲𑀗𑁆𑀕𑀡𑁆𑀳𑀸𑀢𑀺.

𑀏𑀢𑁆𑀣 𑀳𑀺 𑀕𑁂𑀳𑀫𑁆𑀧𑀢𑀺 𑀯𑀺𑀲𑁂𑀲𑀦𑀪𑀸𑀯𑁂𑀦𑀸𑀧𑁆𑀧𑀥𑀸𑀦𑀢𑁆𑀢𑁂𑀧𑀺 𑀭𑀸𑀚𑀸𑀦𑀫𑁆𑀧𑀢𑀺 𑀧𑀥𑀸𑀦𑀪𑀽𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀸𑀧𑁂𑀓𑁆𑀔𑀲𑁆𑀲𑀸𑀧𑀺 𑀲𑀫𑀸𑀲𑁄 𑀳𑁄𑀢𑁂𑀯. 𑀇𑀤𑀜𑁆𑀘𑀜𑀸𑀧𑀦𑀢𑁆𑀣𑀁 𑀯𑀘𑀦𑀸𑀭𑀫𑁆𑀪𑀧𑁆𑀧𑀬𑁄𑀚𑀦𑀜𑁆𑀘, 𑀓𑀸𑀭𑀡𑀫𑀸𑀳- ‘𑀕𑀫𑀓𑀢𑁆𑀢𑀸’𑀇𑀘𑁆𑀘𑀸𑀤𑀺.

𑀕𑀫𑀓𑀢𑁆𑀢𑀸𑀢𑀺 𑀯𑀺𑀕𑁆𑀕𑀳𑀯𑀸𑀓𑁆𑀬𑀢𑁆𑀣𑀲𑁆𑀲 𑀯𑀼𑀢𑁆𑀢𑀺𑀬𑀫𑁆𑀧𑀢𑀻𑀬𑀫𑀸𑀦𑀢𑁆𑀢𑀸 𑀕𑀫𑀓𑀢𑁆𑀢𑀁 𑀢𑀲𑁆𑀫𑀸, 𑀦𑀘𑁂𑀳 𑀕𑀫𑀓𑀢𑁆𑀢𑀫𑀢𑁆𑀣𑀻𑀢𑀺 ‘𑀫𑀼𑀦𑀺 𑀲𑀻𑀳𑁄𑀯 𑀲𑀽𑀭𑁄’𑀢𑁆𑀬𑀢𑁆𑀭 𑀢𑀼 𑀯𑀸𑀓𑁆𑀬𑀢𑁄 𑀬𑁄𑀢𑁆𑀣𑁄 𑀧𑀢𑀻𑀬𑀢𑁂, 𑀦𑀸𑀬𑀁 ‘𑀫𑀼𑀦𑀺 𑀲𑀻𑀳𑁄 𑀲𑀽𑀭𑁄’𑀢𑁆𑀬𑀢𑁄 𑀕𑀫𑁆𑀬𑀢𑁂𑀢𑀺 𑀕𑀫𑀓𑀢𑁆𑀢𑀁 𑀦𑀢𑁆𑀣𑀻-𑀢𑀺 𑀅𑀢𑁆𑀣𑁄, 𑀢𑀣𑀸𑀳𑀺 𑀫𑀼𑀦𑀺𑀲𑀻𑀳𑀲𑀤𑁆𑀤𑁂𑀦𑁂𑀯𑁄 𑀧𑀫𑀸𑀦𑁄𑀧𑀫𑁂𑀬𑁆𑀬𑀪𑀸𑀯𑀦𑀺𑀫𑀺𑀢𑁆𑀢𑀲𑁆𑀲 𑀯𑀺𑀲𑀸𑀭𑀤𑀢𑁆𑀢𑀲𑁆𑀲 𑀲𑀪𑀸𑀯𑁂𑀦𑁂𑀯𑁄𑀧𑀸𑀤𑀸𑀦𑀢𑁄 𑀯𑀺𑀲𑀸𑀭𑀤𑀲𑀤𑁆𑀤𑀲𑁆𑀲 𑀢𑁂𑀦 𑀲𑀫𑁆𑀩𑀦𑁆𑀥𑀸𑀪𑀸𑀯𑁄.

𑀅𑀧𑀯𑀕𑁆𑀕𑁄 𑀦𑀺𑀩𑁆𑀩𑀸𑀦𑀁, 𑀯𑀸𑀓𑁆𑀬𑀫𑁂𑀯𑁂𑀢𑀺 𑀏𑀯𑀓𑀸𑀭𑁂𑀦 𑀩𑁆𑀬𑀯𑀘𑁆𑀙𑀺𑀦𑁆𑀦𑀫𑀢𑁆𑀣𑀫𑁆𑀧𑀤𑀲𑁆𑀲𑀬𑀫𑀸𑀳- ‘𑀯𑀼𑀢𑁆𑀢𑀺𑀦𑀺𑀯𑀢𑁆𑀢𑁂𑀢𑀻’𑀢𑀺 𑀩𑀳𑀼𑀮𑀸𑀥𑀺𑀓𑀸𑀭𑀢𑁄 𑀯𑀺𑀜𑁆𑀜𑀸𑀬𑀢𑀺, 𑀦𑀦𑀼 𑀘𑀸𑀢𑁆𑀭 𑀯𑀺𑀲𑁂𑀲𑁆𑀲𑀪𑀸𑀯𑀸𑀲𑀫𑁆𑀪𑀯𑀸𑀧𑁆𑀧𑀲𑀗𑁆𑀕𑁄𑀬𑁂𑀯 𑀯𑀼𑀢𑁆𑀢𑀺𑀬𑀸𑀢𑀺 𑀘𑁄𑀤𑁂𑀢𑀺. ‘𑀦𑀦𑀼𑀘𑁂’𑀢𑁆𑀬𑀸𑀤𑀺𑀦𑀸.

𑀧𑀼𑀡𑁆𑀡𑀢𑀸𑀩𑁆𑀬𑀪𑀺𑀘𑀸𑀭𑀸𑀢𑀺 𑀧𑀼𑀡𑁆𑀡𑀢𑀸𑀲𑀗𑁆𑀔𑀸𑀢𑀲𑁆𑀲 𑀩𑀸𑀮𑀸𑀤𑀺𑀅𑀯𑀢𑁆𑀣𑀸𑀯𑀺𑀲𑁂𑀲𑀲𑁆𑀲 𑀅𑀯𑀺𑀦𑀸𑀧𑁆𑀧𑀯𑀢𑁆𑀢𑀺𑀢𑁄 𑀩𑁆𑀬𑀪𑀺𑀘𑀸𑀭𑀻 𑀳𑀺 𑀯𑀺𑀲𑁂𑀲𑁆𑀲𑀫𑁆𑀪𑀯𑀢𑀺 𑀬𑀣𑀸 𑀦𑀻𑀮𑀢𑀸𑀬𑀼𑀧𑁆𑀧𑀮𑀁, 𑀧𑀭𑀺𑀳𑀭𑀢𑀺 ‘𑀦𑁂𑀤𑀫𑀢𑁆𑀢𑀺’𑀘𑁆𑀘𑀸𑀤𑀺𑀦𑀸, 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀸𑀦𑀁 𑀅𑀦𑁂𑀓𑀢𑁆𑀢𑀸𑀢𑀺 𑀓𑁂𑀯𑀮𑀁 𑀫𑀦𑁆𑀢𑀸𑀡𑀺𑀬𑀸 𑀧𑀼𑀢𑁆𑀢𑁄 𑀧𑀼𑀡𑁆𑀡𑁄𑀬𑁂𑀯𑀸𑀢𑀺 𑀅𑀪𑀸𑀯𑀸 𑀢𑁂𑀲𑀁 𑀩𑀳𑀼𑀪𑀸𑀯𑀢𑁄, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑀳𑀲𑁆𑀲 𑀧𑀢𑀬𑁄𑀢𑀺 𑀕𑀳𑀧𑀢𑀻𑀦𑀁 𑀩𑀳𑀼𑀢𑁆𑀢𑀁 𑀧𑀸𑀓𑀝𑀫𑁂𑀯.

𑀯𑀼𑀢𑁆𑀢𑀺𑀬𑁂𑀯𑁂𑀢𑀺 𑀏𑀯𑀓𑀸𑀭𑁂𑀦 𑀩𑁆𑀬𑀯𑀘𑁆𑀙𑀺𑀦𑁆𑀦𑀫𑀢𑁆𑀣𑀫𑀸𑀳-‘𑀯𑀸𑀓𑁆𑀬𑀁 𑀦𑀺𑀯𑀢𑁆𑀢𑁂𑀢𑀻’𑀢𑀺. 𑀯𑀺𑀲𑀺𑀝𑁆𑀞𑀚𑀸𑀢𑀺𑀯𑀘𑀦𑀸𑀢𑀺 𑀯𑀼𑀢𑁆𑀢𑀁 𑀓𑀡𑁆𑀳𑀲𑀧𑁆𑀧𑀚𑀸𑀢𑀺𑀬𑀸 𑀮𑁄𑀳𑀺𑀢𑀲𑀸𑀮𑀺𑀚𑀸𑀢𑀺𑀬𑀸 𑀘 𑀯𑀺𑀲𑀺𑀝𑁆𑀞𑀢𑁆𑀢𑀸.

𑀢𑀘𑁆𑀙𑀓𑁄 ¶ 𑀲𑀧𑁆𑀧𑁄𑀢𑀺 𑀩𑁆𑀬𑀸𑀔𑁆𑀬𑁂𑀬𑀫𑀼𑀧𑀦𑀺𑀓𑁆𑀔𑀺𑀧𑁆𑀧𑀘𑁄𑀤𑀬𑀫𑀸𑀳- ‘𑀦𑀦𑀼 𑀘𑁂’𑀘𑁆𑀘𑀸𑀤𑀺. 𑀢𑀘𑁆𑀙𑀓𑀪𑀸𑀯𑀸𑀦𑀧𑁂𑀢𑁄𑀢𑀺 𑀩𑀸𑀮𑀬𑀼𑀯𑀢𑁆𑀢𑀸𑀤𑀺𑀲𑀗𑁆𑀔𑀸𑀢𑀢𑀘𑁆𑀙𑀓𑀪𑀸𑀯𑀢𑁄 𑀅𑀩𑁆𑀬𑀸𑀯𑀼𑀢𑁆𑀢𑁄, 𑀅𑀢𑁆𑀣𑀺𑀦𑀸𑀫𑀥𑁂𑀬𑁆𑀬𑁄𑀢𑀺 𑀢𑀘𑁆𑀙𑀓𑁄 𑀦𑀸𑀫 𑀓𑁄𑀘𑀺 𑀢𑀦𑁆𑀦𑀸𑀫𑁄 𑀅𑀢𑁆𑀣𑀺, 𑀓𑀺𑀭𑀺𑀬𑀸𑀲𑀤𑁆𑀤𑁄𑀢𑀺 𑀢𑀘𑁆𑀙𑀢𑀻𑀢𑀺 𑀢𑀘𑁆𑀙𑀓𑁄𑀢𑀺 𑀏𑀯𑀁 𑀓𑀺𑀭𑀺𑀬𑀸𑀬 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑁆𑀢𑁂𑀦𑁄𑀧𑀸𑀤𑀺𑀦𑁆𑀦𑁄 𑀯𑀟𑁆𑀠𑀓𑀻𑀯𑀸𑀘𑀻 𑀢𑀘𑁆𑀙𑀓𑀲𑀤𑁆𑀤𑁄, 𑀏𑀯𑀁 𑀫𑀜𑁆𑀜𑀢𑁂 ‘‘𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀲𑀲𑀩𑁆𑀪𑀸𑀯𑀸 𑀲𑀫𑀸𑀲𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀣𑀸 𑀲𑀢𑀺 𑀓𑀺𑀫𑀺𑀤𑀁 𑀧𑀘𑁆𑀘𑀼𑀤𑀸𑀳𑀭𑀡𑀁 𑀓𑀢’’𑀦𑁆𑀢𑀺. 𑀅𑀢𑁆𑀭 𑀓𑁂𑀦𑀘𑀺 𑀦 𑀦𑀸𑀫𑀥𑁂𑀬𑁆𑀬𑀲𑁆𑀲𑁂𑀢𑁆𑀬𑀸𑀤𑀺 𑀦𑁄𑀧𑀚𑀸𑀬𑀢𑁂𑀯𑀸𑀢𑁆𑀬𑁂𑀢𑀤𑀯𑀲𑀸𑀦𑀁 𑀯𑀼𑀘𑁆𑀘𑀫𑀸𑀦𑀫𑀦𑀼𑀤𑁆𑀬𑀢𑀁 𑀦𑀺𑀭𑀸𑀓𑀢𑁆𑀢𑀼𑀓𑀸𑀫𑁄 𑀆𑀳-‘𑀬𑁄𑀧𑀸 𑀳𑁂’𑀘𑁆𑀘𑀸𑀤𑀺.

𑀇𑀫𑀲𑁆𑀲𑀸𑀬𑀫𑀥𑀺𑀧𑁆𑀧𑀸𑀬𑁄 ‘‘𑀯𑀼𑀢𑁆𑀢𑀦𑀬𑁂𑀦 𑀢𑀘𑁆𑀙𑀓𑀲𑀤𑁆𑀤𑀲𑁆𑀲 𑀓𑀺𑀭𑀺𑀬𑀸 𑀲𑀤𑁆𑀤𑀲𑁆𑀲𑀸𑀢𑁆𑀣𑀯𑀺𑀲𑀬𑀸𑀧𑁂𑀓𑁆𑀔𑀸𑀬𑀸𑀪𑀸𑀯𑀢𑁄 𑀯𑀺𑀲𑁂𑀲𑁆𑀲𑀢𑁆𑀢𑀸𑀪𑀸𑀯𑀸 𑀧𑀘𑁆𑀘𑀼𑀤𑀸𑀳𑀭𑀡𑀫𑀺𑀤𑀁 𑀓𑀢’’𑀦𑁆𑀢𑀺.

𑀓𑀲𑁆𑀫𑀸 𑀅𑀬𑀼𑀢𑁆𑀢𑀫𑀺𑀘𑁆𑀘𑀸𑀳-‘𑀬𑀢𑁄’𑀘𑁆𑀘𑀸𑀤𑀺, 𑀦𑀸𑀫𑀥𑁂𑀬𑁆𑀬𑀲𑁆𑀲 𑀓𑀺𑀭𑀺𑀬𑀸𑀯𑀸𑀘𑀺𑀦𑁄 𑀘 𑀅𑀢𑁆𑀣𑀸𑀪𑀺𑀥𑀸𑀦𑀲𑀸𑀫𑀢𑁆𑀣𑀺𑀬𑀁 𑀢𑀼𑀮𑁆𑀬𑀁 𑀯𑀸 𑀦 𑀯𑀸, 𑀅𑀯𑀬𑀯𑀧𑁆𑀧𑀲𑀺𑀤𑁆𑀥𑀺𑀬𑀸 𑀲𑀫𑀼𑀤𑀸𑀬𑀧𑁆𑀧𑀲𑀺𑀤𑁆𑀥𑀺 𑀩𑀮𑀯𑀢𑀺 𑀯𑀸 𑀦𑀯𑁂𑀢𑁆𑀬𑁂𑀢𑀁 𑀯𑀺𑀘𑀸𑀭𑁂𑀢𑀼𑀁 𑀬𑀢𑁄 𑀦𑀸𑀥𑀺𑀓𑀢𑀦𑁆𑀢𑁆𑀬𑀢𑁆𑀣𑁄, 𑀓𑀺𑀜𑁆𑀘𑀭𑀳𑀺 𑀅𑀥𑀺𑀓𑀢𑀦𑁆𑀢𑁆𑀬𑀸𑀳- ‘𑀅𑀧𑀺𑀢𑁆𑀯𑀺’𑀘𑁆𑀘𑀸𑀤𑀺, 𑀢𑀘𑁆𑀙𑀓𑀲𑀤𑁆𑀤𑁄𑀦𑁂𑀓𑀢𑁆𑀣𑀯𑀼𑀢𑁆𑀢𑀺 𑀦𑀸𑀦𑁂𑀓𑀢𑁆𑀣𑁄𑀢𑀺 𑀯𑀺𑀘𑀸𑀭𑁂𑀢𑀼𑀫𑀥𑀺𑀓𑀢𑀦𑁆𑀢𑀺 𑀬𑁄𑀚𑀦𑀸.

𑀏𑀯𑀁 𑀫𑀜𑁆𑀜𑀢𑁂- ‘‘𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀲𑀪𑀸𑀯𑀘𑀺𑀦𑁆𑀢𑀸𑀬𑀁 𑀲𑀤𑁆𑀤𑀸𑀦𑀫𑀢𑁆𑀣𑀸𑀪𑀺𑀥𑀸𑀦𑀲𑀸𑀫𑀢𑁆𑀣𑀺𑀬𑀘𑀺𑀦𑁆𑀢𑀸 𑀦 𑀬𑀼𑀚𑁆𑀚𑀢𑁂 ‘𑀲𑀢𑀺 𑀲𑀫𑁆𑀪𑀯𑁂 𑀩𑁆𑀬𑀪𑀺𑀘𑀸𑀭𑁂 𑀘 𑀯𑀺𑀲𑁂𑀲𑀦𑀁 𑀲𑀸𑀢𑁆𑀣𑀓𑀁 𑀳𑁄𑀢𑀻’𑀢𑀺 𑀯𑀺𑀲𑁂𑀲𑀦𑀁 𑀫𑀕𑁆𑀕𑀻𑀬𑀢𑁂, 𑀦𑀸𑀲𑀫𑁆𑀪𑀯𑁂 𑀦𑀸𑀩𑁆𑀬𑀪𑀺𑀘𑀸𑀭𑁂 𑀬𑀣𑀸 𑀲𑀻𑀢𑀁 (𑀳𑀺𑀫𑀁) 𑀉𑀡𑁆𑀳𑁄𑀕𑁆𑀕𑀻𑀢𑀺, 𑀢𑀲𑁆𑀫𑀸 𑀲𑀫𑁆𑀪𑀯𑀩𑁆𑀬𑀪𑀺𑀘𑀸𑀭𑀘𑀺𑀦𑁆𑀢𑀸 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀲𑀪𑀸𑀯𑀘𑀺𑀦𑁆𑀢𑀸𑀬𑀫𑀼𑀧𑀬𑀼𑀚𑁆𑀚𑀢𑀻𑀢𑀺 𑀢𑀘𑁆𑀙𑀓𑀲𑀤𑁆𑀤𑁄-𑀦𑁂𑀓𑀢𑁆𑀣𑀯𑀼𑀢𑁆𑀢𑀺𑀯𑀸 𑀦 𑀯𑁂𑀢𑁆𑀬𑁂𑀢𑀤𑁂𑀯 𑀯𑀺𑀘𑀸𑀭𑁂𑀢𑀼𑀫𑀥𑀺𑀓𑀢𑀦𑁆𑀢𑀺 𑀓𑀢𑁆𑀣𑀘𑀺𑀧𑀺 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀲 𑀲𑀩𑁆𑀪𑀸𑀯𑁂 𑀲𑀫𑀸𑀲𑁄 𑀳𑁄𑀢𑁂𑀯𑀸’’𑀢𑀺, 𑀬𑀤𑀺𑀧𑀺 𑀦𑀸𑀫𑀥𑁂𑀬𑁆𑀬𑀓𑀺𑀭𑀺𑀬𑀸𑀯𑀸𑀘𑀻𑀦𑀫𑀢𑀼𑀮𑁆𑀬𑀫𑀢𑁆𑀣𑀸𑀪𑀺𑀥𑀸𑀦𑀁 𑀲𑀫𑀼𑀤𑀸𑀬𑀧𑁆𑀧𑀲𑀺𑀤𑁆𑀥𑀺𑀬𑀸 𑀘 𑀩𑀮𑀯𑀢𑀺𑀢𑁆𑀢𑀁, 𑀢𑀣𑀸𑀧𑀺 𑀯𑀓𑁆𑀔𑀫𑀸𑀦𑀦𑀬𑁂𑀦 𑀲𑀫𑀸𑀲𑀲𑀩𑁆𑀪𑀸𑀯𑀸 𑀦 𑀓𑀸𑀘𑀺 𑀳𑀸𑀦𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀏𑀢𑁆𑀣 𑀘𑀸’𑀢𑀺𑀆𑀤𑀺.

𑀏𑀢𑁆𑀣𑀘𑀸𑀢𑀺 𑀓𑁂𑀘𑀺 𑀧𑀓𑁆𑀔𑁂 𑀘, 𑀓𑀜𑁆𑀘𑀺 𑀧𑀻𑀴𑀫𑀸𑀯𑀳𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀓𑀼𑀢𑁄𑀘𑁆𑀘𑀸𑀳 ‘𑀢𑀣𑀸𑀳𑀺’𑀘𑁆𑀘𑀸𑀤𑀺. 𑀏𑀯𑀁 𑀫𑀜𑁆𑀜𑀢𑁂- ‘‘𑀬𑀤𑀻𑀧𑀺 𑀲𑀫𑀼𑀤𑀸𑀬𑀧𑁆𑀧𑀲𑀺𑀤𑁆𑀥𑀺𑀬𑀸 𑀲𑀢𑀺 𑀓𑀺𑀭𑀺𑀬𑀸𑀲𑀤𑁆𑀤𑀢𑁆𑀣𑀯𑀺𑀲𑀬𑀸𑀧𑁂𑀓𑁆𑀔𑀸 ¶ 𑀦𑁄𑀧𑀚𑀸𑀬𑀢𑁂, 𑀢𑀣𑀸𑀧𑀺 𑀦𑀸𑀫𑀥𑁂𑀬𑁆𑀬𑀲𑁆𑀲𑁂𑀯 𑀢𑀘𑁆𑀙𑀓𑀲𑀤𑁆𑀤𑀲𑁆𑀲𑀸𑀧𑁆𑀬𑀦𑁂𑀓𑀢𑁆𑀣𑀯𑀼𑀢𑁆𑀢𑀺𑀢𑁆𑀢𑀫𑀢𑁆𑀣𑁂𑀯… 𑀲𑀧𑁆𑀧𑀯𑀺𑀲𑁂𑀲𑁂 𑀫𑀦𑀼𑀲𑁆𑀲𑁂 𑀘 𑀢𑀦𑁆𑀦𑀸𑀫𑀓𑁂 𑀦𑀸𑀫𑀥𑁂𑀬𑁆𑀬𑀲𑁆𑀲 𑀢𑀘𑁆𑀙𑀓𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀸(𑀢𑀺) 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀲𑀲𑀩𑁆𑀪𑀸𑀯𑀢𑁄 𑀲𑀫𑀸𑀲𑀧𑁆𑀧𑀲𑀗𑁆𑀕𑁄 𑀢𑀤𑀯𑀢𑁆𑀣𑁄 𑀬𑁂𑀯𑀸’’𑀢𑀺, 𑀦 𑀓𑁂𑀯𑀮𑀁 𑀲𑀧𑁆𑀧𑀯𑀺𑀲𑁂𑀲𑀲𑁆𑀲𑁂𑀯 𑀢𑀘𑁆𑀙𑀓𑀲𑀤𑁆𑀤𑁄 𑀦𑀸𑀫𑀥𑁂𑀬𑁆𑀬𑀫𑀧𑀺𑀢𑀼 𑀫𑀦𑀼𑀲𑁆𑀲𑀸𑀦𑀫𑁆𑀧𑀻𑀢𑀺 𑀧𑀺𑀲𑀤𑁆𑀤𑀢𑁆𑀣𑁄. 𑀢𑀘𑁆𑀙𑀓𑀲𑀤𑁆𑀤𑀲𑁆𑀲𑀸𑀦𑁂𑀓𑀢𑁆𑀣𑀯𑀼𑀢𑁆𑀢𑀺𑀢𑁆𑀢𑁂𑀧𑀺 𑀦 𑀲𑀫𑀼𑀤𑀸𑀬𑀧𑁆𑀧𑀲𑀺𑀤𑁆𑀥𑀺𑀬𑀸 𑀅𑀯𑀬𑀯𑀧𑁆𑀧𑀲𑀺𑀤𑁆𑀥𑀻𑀩𑀸𑀥𑀸𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀦𑀘𑀸’𑀢𑀺𑀆𑀤𑀺. 𑀘𑁄-𑀯𑀥𑀸𑀭𑀡𑁂, 𑀓𑀼𑀢𑁄𑀘𑁆𑀘𑀸𑀳 ‘𑀓𑀺𑀭𑀺𑀬𑁂’𑀘𑁆𑀘𑀸𑀤𑀺. 𑀓𑀫𑁂𑀦𑀢𑁆𑀣𑀧𑁆𑀧𑀲𑀺𑀤𑁆𑀥𑀻𑀢𑀺 𑀬𑀁, 𑀏𑀢𑀫𑁆𑀧𑀦 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀬𑁄𑀚𑀦𑀸.

𑀬𑀦𑁆𑀢𑀺 𑀬𑀁 𑀧𑀲𑀺𑀚𑁆𑀛𑀦𑀁, 𑀓𑀫𑁂𑀦𑀸𑀢𑀺 𑀩𑀸𑀥𑀸𑀪𑀸𑀯𑀢𑁄 𑀅𑀦𑀼𑀓𑁆𑀓𑀫𑁂𑀦. 𑀏𑀯𑀜𑁆𑀘𑁂𑀢𑀺 𑀇𑀫𑀺𑀦𑀸 𑀦𑀘𑁂𑀢𑁆𑀬𑀸𑀤𑀺𑀦𑀸 𑀯𑀼𑀢𑁆𑀢𑀁 𑀧𑀘𑁆𑀘𑀸𑀫𑀲𑀢𑀺… 𑀓𑀺𑀫𑁆𑀧𑀝𑀺𑀯𑀺𑀳𑀺𑀢𑀁 𑀲𑀺𑀬𑀸 𑀧𑀭𑀺𑀳𑀝𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄, 𑀇𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 ‘𑀢𑀘𑁆𑀙𑀓𑁄 𑀲𑀧𑁆𑀧𑁄’𑀢𑀺 𑀧𑀘𑁆𑀘𑀼𑀤𑀸𑀳𑀭𑀡𑀁 𑀦 𑀬𑀼𑀢𑁆𑀢𑀁… 𑀢𑀘𑁆𑀙𑀓𑀲𑀧𑁆𑀧𑁄𑀢𑀺 𑀲𑀫𑀸𑀲𑀲𑀩𑁆𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀦𑁂𑀤𑀫𑁂𑀯𑀫𑀺𑀘𑁆𑀘𑀸𑀤𑀺𑀦𑀸 𑀧𑀭𑀺𑀳𑀭𑀢𑀺, 𑀬𑀤𑀸 𑀘𑀭𑀢𑀺 𑀬𑀣𑀸 𑀯𑀼𑀢𑁆𑀢𑁂𑀦 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀲𑀪𑀸𑀯𑀲𑀫𑁆𑀪𑀯𑁄, 𑀢𑀤𑀸 𑀓𑀣𑀁𑀢𑁆𑀬𑀸𑀳- ‘𑀬𑀤𑀸 𑀯𑀺𑀲𑁂𑀲𑀦𑁂’𑀘𑁆𑀘𑀸𑀤𑀺. 𑀢𑀤𑀸𑀧𑀺 𑀓𑀣𑀁 𑀯𑀸𑀓𑁆𑀬𑁂𑀦 𑀪𑀯𑀺𑀢𑀩𑁆𑀩𑀫𑀺𑀘𑁆𑀘𑀸𑀳- ‘𑀇𑀤𑀜𑁆𑀘𑁂’𑀘𑁆𑀘𑀸𑀤𑀺. 𑀩𑀳𑀼𑀮𑀁𑀯𑀘𑀦𑀢𑁄𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀜𑁆𑀜𑀲𑁆𑀲𑀸𑀢𑀺 𑀓𑀫𑁆𑀫𑀦𑀺 𑀲𑀫𑁆𑀩𑀦𑁆𑀥𑀯𑀘𑀦𑀺𑀘𑁆𑀙𑀸𑀬𑀁 𑀙𑀝𑁆𑀞𑀻. 𑀅𑀯𑀘𑁆𑀙𑁂𑀤𑀓𑀢𑁆𑀢𑀸𑀢𑀺 𑀏𑀢𑁆𑀣 𑀓𑀢𑁆𑀢𑀼𑀦𑀸 𑀪𑀯𑀺𑀢𑀩𑁆𑀩𑀦𑁆𑀢𑀺 𑀓𑀸𑀴𑀲𑁆𑀲𑀸𑀢𑀺 𑀓𑀢𑁆𑀢𑀭𑀺 𑀪𑀸𑀯𑀬𑁄𑀕𑁂 𑀙𑀝𑁆𑀞𑀺𑀬𑀸 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁. 𑀧𑀢𑁆𑀢𑀸𑀧𑀦𑁆𑀦𑁂𑀳𑀺 𑀤𑀼𑀢𑀺𑀬𑀦𑁆𑀢𑀲𑁆𑀲 𑀚𑀻𑀯𑀺𑀓𑀫𑁆𑀧𑀢𑁆𑀢𑁄 𑀚𑀻𑀯𑀺𑀓𑀸 𑀧𑀦𑁆𑀦𑁄𑀢𑀺 𑀲𑀫𑀸𑀲𑁄 ‘𑀓𑀸𑀭𑀓𑀁 𑀩𑀳𑀼𑀮’’𑀦𑁆𑀢𑁂𑀯 (𑀘𑀁-𑁨-𑁨-𑁧𑁯) 𑀯𑀺𑀳𑀺𑀢𑁄 𑀤𑀼𑀢𑀺𑀬𑀦𑁆𑀢𑁂𑀦 𑀢𑀼 𑀢𑁂𑀲𑀁 𑀲𑀫𑀸𑀲𑀢𑁆𑀣𑀁 𑀲𑀼𑀢𑁆𑀢𑀦𑁆𑀢𑀭𑀁 𑀓𑀢𑀁 𑀧𑀭𑁂𑀳𑀺, 𑀅𑀢𑁆𑀣𑀜𑁆𑀘 𑀢𑁂𑀲𑀫𑀺𑀢𑁆𑀣𑀺𑀮𑀺𑀗𑁆𑀕𑀸𑀦𑀫𑁆𑀧𑀺 𑀲𑀫𑀸𑀲𑁂𑀦𑁂𑀯, 𑀓𑀸𑀭𑀦𑀺𑀯𑀢𑁆𑀢𑀺𑀬𑀸, 𑀢𑀣𑀸 𑀫𑀸𑀲𑁄 𑀚𑀸𑀢𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁂 𑀧𑀭𑀺𑀫𑀸𑀡𑀺𑀯𑀸𑀘𑀺𑀦𑀸 𑀙𑀝𑁆𑀞𑀺𑀬𑀦𑁆𑀢𑁂𑀦 𑀧𑀭𑀺𑀫𑀸𑀡𑀯𑀘𑀦𑀸𑀦𑀁 𑀓𑀸𑀮𑀲𑀤𑁆𑀤𑀸𑀦𑀁, 𑀢𑀤𑀸𑀳- ‘𑀧𑀢𑁆𑀢𑀸𑀧𑀦𑁆𑀦𑀸𑀦’𑀫𑀺𑀘𑁆𑀘𑀸𑀤𑀺, 𑀧𑀭𑀺𑀫𑀸𑀡𑀁 𑀫𑀸𑀲𑀸𑀤𑀺 𑀧𑀭𑀺𑀘𑁆𑀙𑁂𑀤𑁄 𑀢𑀫𑀲𑁆𑀲𑀢𑁆𑀣𑀻𑀢𑀺 𑀧𑀭𑀺𑀫𑀸𑀡𑀻 𑀚𑀸𑀢𑀸𑀤𑀺.

𑀏𑀢𑁆𑀣 𑀳𑀺 𑀫𑀸𑀲𑁄 𑀧𑀭𑀺𑀫𑀸𑀡𑀁 𑀧𑀭𑀺𑀘𑁆𑀙𑁂𑀤𑀓𑀢𑁆𑀢𑀸, 𑀚𑀸𑀢𑁄 𑀧𑀭𑀺𑀫𑀸𑀡𑀻 𑀧𑀭𑀺𑀘𑁆𑀙𑁂𑀚𑁆𑀚𑀢𑁆𑀢𑀸, 𑀧𑀢𑁆𑀢𑀸 𑀚𑀻𑀯𑀺𑀓𑀸𑀦𑁂𑀦𑀸𑀢𑀺 [𑀧𑀢𑁆𑀢𑁄 𑀚𑀻𑀯𑀺𑀓𑀦𑁆𑀢𑀺 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁] 𑀯𑀘𑀦𑀺𑀘𑁆𑀙𑀸𑀬𑀁 𑀬𑁄-𑀢𑁆𑀣𑁄 𑀲𑁄- 𑀜𑀸𑀧𑀤𑀢𑁆𑀣𑀲𑀫𑀸𑀲𑁂𑀧𑁆𑀬𑀢𑀺𑀦𑁆𑀦𑁄 ¶ 𑀯𑀘𑀦𑀺𑀘𑁆𑀙𑀸𑀪𑁂𑀤𑀫𑀦𑁆𑀢𑀭𑁂𑀦𑀸𑀢𑀺𑀤𑀲𑁆𑀲𑁂𑀢𑀼𑀁 ‘𑀅𑀜𑁆𑀜𑀧𑀤𑀢𑁆𑀣𑁂 𑀪𑀯𑀺𑀲𑁆𑀲𑀢𑀻’𑀢𑀺 𑀬𑀁 𑀯𑀼𑀢𑁆𑀢𑀺𑀬𑀁 𑀯𑀼𑀢𑁆𑀢𑀁, 𑀢𑀁 𑀩𑁆𑀬𑀸𑀔𑁆𑀬𑀸𑀢𑀼𑀓𑀸𑀫𑁄 𑀆𑀳- ‘𑀯𑀸𑀦𑁂𑀓𑀜𑁆𑀜𑀢𑁆𑀣𑁂 𑀇𑀘𑁆𑀘𑁂𑀯𑀸’𑀢𑀺𑀆𑀤𑀺. 𑀅𑀜𑁆𑀜𑀢𑁆𑀣 𑀲𑀫𑀸𑀲𑁂 𑀓𑀢𑁂 𑀲𑀩𑁆𑀩𑀢𑁆𑀣 ‘‘𑀇𑀢𑁆𑀣𑀺𑀬𑀁 𑀪𑀸𑀲𑀺𑀢𑁂’’𑀘𑁆𑀘𑀸𑀤𑀺𑀦𑀸 (𑁩-𑁬𑁭) 𑀧𑀼𑀫𑁆𑀪𑀸𑀯𑁄. 𑀫𑀸𑀲𑁄 𑀚𑀸𑀢𑀲𑁆𑀲𑀸𑀢𑀺 𑀯𑀘𑀦𑀺𑀘𑁆𑀙𑀸𑀬𑀁 𑀬𑁄-𑀢𑁆𑀣𑁄, 𑀲𑁄-𑀜𑁆𑀜𑀢𑁆𑀣𑀲𑀫𑀸𑀲𑁂𑀧𑁆𑀬𑀪𑀺𑀦𑁆𑀦𑁄 𑀯𑀘𑀦𑀺𑀘𑁆𑀙𑀸𑀪𑁂𑀤 𑀫𑀦𑁆𑀢𑀭𑁂𑀦𑀸𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀬𑀲𑁆𑀲 𑀚𑀸𑀢𑀸𑀤𑀺𑀦𑁄’𑀘𑁆𑀘𑀸𑀤𑀺.

𑀚𑀸𑀢𑀲𑀤𑁆𑀤𑀲𑁆𑀲𑀢𑁆𑀣𑀫𑀸𑀳 𑀲𑀫𑁆𑀧𑀦𑁆𑀦𑁄𑀢𑀺, 𑀲𑀫𑁆𑀧𑀼𑀡𑁆𑀡𑁄𑀢𑁆𑀬𑀢𑁆𑀣𑁄, 𑀇𑀫𑀺𑀦𑀸 𑀘 𑀫𑀸𑀲𑁄 𑀚𑀸𑀢𑁄-𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑀲𑁆𑀲 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄, 𑀅𑀜𑁆𑀜𑀣𑀸𑀢𑀺 𑀬𑀤𑀺 𑀫𑀸𑀲𑁄 𑀢𑀲𑁆𑀲 𑀅𑀜𑁆𑀜𑀧𑀤𑀢𑁆𑀣𑀲𑁆𑀲 𑀚𑀸𑀢𑀸𑀤𑀺𑀦𑁄 𑀲𑀫𑁆𑀧𑀼𑀡𑁆𑀡𑁄 𑀦 𑀪𑀸𑀢𑀻𑀢𑀺 𑀅𑀢𑁆𑀣𑁄. 𑀢𑁆𑀢𑀢𑁆𑀢𑀯𑀦𑁆𑀢𑀽𑀦𑀁 𑀦𑀺𑀝𑁆𑀞𑀸𑀲𑀜𑁆𑀜𑀁 𑀯𑀺𑀥𑀸𑀬 𑀢𑀤𑀦𑁆𑀢𑀲𑁆𑀲𑀜𑁆𑀜𑀢𑁆𑀣𑀲𑀫𑀸𑀲𑁂 ‘‘𑀦𑀺𑀝𑁆𑀞𑀸’’𑀢𑀺 (𑁨-𑁨-𑁩𑁬) 𑀲𑀼𑀢𑁆𑀢𑁂𑀦 𑀧𑀼𑀩𑁆𑀩𑀦𑀺𑀧𑀸𑀢𑁄 𑀯𑀼𑀢𑁆𑀢𑁄, 𑀢𑀤𑀸𑀳- ‘𑀦𑀘𑁂’𑀘𑁆𑀘𑀸𑀤𑀺, 𑀧𑀼𑀩𑁆𑀩𑀦𑀺𑀧𑀸𑀢𑀧𑁆𑀧𑀲𑀗𑁆𑀕𑁄 𑀦𑀘 𑀲𑀺𑀬𑀸𑀢𑀺𑀲𑀫𑁆𑀩𑀦𑁆𑀥𑁄, 𑀓𑀼𑀢𑁄𑀘𑁆𑀘𑀸𑀳- ‘𑀚𑀸𑀢𑀺’𑀘𑁆𑀘𑀸𑀤𑀺. 𑀓𑁂𑀲𑀜𑁆𑀘𑀺𑀢𑀺 𑀯𑀸𑀓𑁆𑀬𑀓𑀸𑀭𑀫𑀸𑀳, 𑀦𑀘 𑀬𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀓𑀸𑀭𑀡𑀫𑀸𑀳- ‘𑀯𑀺𑀲𑁂𑀲𑀦’𑀫𑁂𑀘𑁆𑀘𑀸𑀤𑀺, 𑀢𑀣𑀸𑀳𑀺𑀘𑁆𑀘𑀸𑀤𑀺𑀦𑀸 𑀯𑀺𑀲𑁂𑀲𑀦𑀲𑁆𑀲 𑀲𑀸𑀢𑁆𑀣𑀓𑀢𑁆𑀢𑁂 𑀲𑀫𑀸𑀲𑀩𑁆𑀪𑀸𑀯𑀫𑀪𑀸𑀯𑁂 𑀘𑀸𑀪𑀸𑀯𑀁 𑀲𑀸𑀥𑁂𑀢𑀺… 𑀙𑀝𑁆𑀞𑀻𑀲𑀫𑀸𑀲𑁂 ‘𑀲𑀢𑀺 𑀲𑀫𑁆𑀪𑀯𑁂 𑀩𑁆𑀬𑀪𑀺𑀘𑀸𑀭𑁂 𑀘 𑀯𑀺𑀲𑁂𑀲𑀦𑀲𑁆𑀲 𑀲𑀸𑀢𑁆𑀣𑀓𑀫𑁆𑀪𑀯𑀢𑀻𑀢𑀺 𑀯𑀺𑀲𑁂𑀲𑀦𑀲𑁆𑀲 𑀲𑀸𑀢𑁆𑀣𑀓𑀢𑁆𑀢𑀸.

𑀅𑀯𑀘𑀦𑁂𑀧𑀻𑀢𑀺 𑀦𑀺𑀬𑀫𑀯𑀘𑀦𑁂 (𑀅)𑀲𑀢𑀻𑀧𑀺, 𑀙𑀝𑁆𑀞𑀻𑀲𑀫𑀸𑀲𑀧𑁆𑀧𑀲𑀗𑁆𑀕𑁄 𑀘𑀭𑀳𑀺 𑀯𑀼𑀢𑁆𑀢𑀦𑀬𑁂𑀦 𑀩𑁆𑀬𑀯𑀘𑁆𑀙𑁂𑀚𑁆𑀚 𑀩𑁆𑀬𑀯𑀘𑁆𑀙𑁂𑀤𑀓𑀢𑁆𑀢𑀸𑀪𑀸𑀯𑁂𑀦 𑀯𑀺𑀲𑁂𑀲𑀦𑀸𑀦𑀢𑁆𑀣𑀓𑁆𑀬𑀸 𑀦 𑀪𑀯𑁂𑀬𑁆𑀬 𑀘𑁂 𑀯𑀸𑀓𑁆𑀬𑁂𑀦𑀸𑀧𑀺 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀆𑀳- ‘𑀯𑀸𑀓𑁆𑀬𑀁 𑀢𑁆𑀯𑀺’𑀘𑁆𑀘𑀸𑀤𑀺. 𑀅𑀬𑀫𑁆𑀧𑀦 𑀯𑀺𑀲𑁂𑀲𑀦𑀲𑀫𑀸𑀲𑁄 𑀧𑀭𑁂𑀳𑀺 𑀓𑀫𑁆𑀫𑀥𑀸𑀭𑀬𑁄𑀢𑀺 𑀜𑀸𑀬𑀢𑀺… 𑀬𑀣𑀸 𑀓𑀫𑁆𑀫𑀁 𑀓𑀺𑀭𑀺𑀬𑀁 𑀧𑀬𑁄𑀚𑀦𑀜𑁆𑀘 𑀥𑀸𑀭𑁂𑀢𑀺 𑀏𑀯𑀫𑀬𑀁 𑀲𑀫𑀸𑀲𑁄 𑀓𑀫𑁆𑀫𑀫𑀺𑀯 𑀤𑁆𑀯𑀬𑀁 𑀥𑀸𑀭𑀬𑀢𑀻𑀢𑀺.

𑀏𑀢𑁆𑀣𑁂𑀯𑀸𑀢𑀺 ‘‘𑀝 𑀦𑀜𑁆𑀲𑁆𑀲’’𑀇𑀢𑀺 (𑁩-𑁭𑁪) 𑀲𑀼𑀢𑁆𑀢𑁂𑀏𑀯. 𑀧𑀸𑀫𑀦𑀧𑀼𑀢𑁆𑀢𑁄𑀢𑀺𑀧𑀸𑀫𑀸 𑀓𑀼𑀝𑁆𑀞𑀯𑀺𑀲𑁂𑀲𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀧𑀸𑀫𑀲𑀤𑁆𑀤𑀸 ‘‘𑀤𑀺𑀲𑁆𑀲𑀦𑁆𑀢𑀜𑁆𑀜𑁂𑀧𑀺 𑀧𑀘𑁆𑀘𑀬𑀸’’𑀢𑀺 (𑁪-𑁧𑁨𑁦) 𑀦𑀧𑁆𑀧𑀘𑁆𑀘𑀬𑁄, 𑀧𑀸𑀫𑀦𑀲𑁆𑀲 𑀧𑀼𑀢𑁆𑀢𑁄, 𑀬𑀤𑀺 𑀳𑁂𑀢𑁆𑀣 𑀜𑀓𑀸𑀭𑁄 𑀯𑀺𑀲𑁂𑀲𑀦𑀢𑁆𑀣𑁄 𑀦 𑀓𑀭𑀻𑀬𑁂𑀣, 𑀢𑀤𑀸 ‘‘𑀝 𑀦𑀲𑁆𑀲𑀸’’𑀢𑀺 𑀲𑀼𑀢𑁆𑀢𑀁 𑀓𑀭𑀻𑀬𑁂𑀣, 𑀢𑀣𑀸 𑀘 𑀲𑀢𑁆𑀬𑀼𑀢𑁆𑀢𑀭𑀧𑀤𑁂 𑀧𑀭𑀢𑁄 𑀧𑀸𑀫𑀦𑀲𑀤𑁆𑀤𑁂 𑀦𑀓𑀸𑀭𑀲𑁆𑀲𑀸𑀧𑀺 𑀝𑁄

𑀲𑀺𑀬𑀸𑀢𑀺 ¶ 𑀪𑀸𑀯𑁄, 𑀦𑀦𑀼 𑀘𑀺𑀳 𑀲𑀫𑀸𑀲𑀯𑀺𑀥𑀺𑀫𑁆𑀳𑀺 𑀜 𑀓𑀸𑀭𑁄𑀘𑁆𑀘𑀸𑀭𑀡𑀸 𑀜 𑀮𑁄𑀧 𑀭𑀳𑀺𑀢𑀲𑁆𑀲 𑀲𑀫𑀸𑀲𑁄 𑀦 𑀪𑀯𑀢𑀻𑀢𑀺 𑀯𑀢𑁆𑀢𑀼𑀫𑀼𑀘𑀺𑀢𑀁, 𑀦 𑀢𑀼 ‘‘𑀝 𑀦𑀜𑁆𑀲𑁆𑀲𑀸’’𑀢𑀺 𑀯𑀺𑀲𑁂𑀲𑀦𑀢𑁆𑀣𑁄𑀢𑀺 [𑀜𑁆𑀜𑀓𑀸𑀭𑁄 𑀏𑀢𑁆𑀣𑁄𑀯 𑀯𑀺𑀲𑁂𑀲𑀦𑀢𑁆𑀣𑁄, 𑀢𑀺 𑀪𑀯𑀺𑀢𑀩𑁆𑀩] 𑀲𑀘𑁆𑀘𑀁, 𑀓𑀺𑀦𑁆𑀢𑁆𑀯𑀺𑀳 𑀲𑀫𑀸𑀲𑀯𑀺𑀥𑀺𑀫𑁆𑀳𑀺 𑀜 𑀓𑀸𑀭𑀲𑁆𑀲 𑀩𑁆𑀬𑀯𑀘𑁆𑀙𑀚𑁆𑀚𑀁 𑀦 𑀤𑀺𑀲𑁆𑀲𑀢𑁂.

𑀧𑀭𑀺𑀬𑀼𑀤𑀸𑀲𑀯𑀼𑀢𑁆𑀢𑀻𑀢𑀺 𑀧𑀭𑀺 𑀢𑀼𑀮𑀺𑀢𑀫𑀼𑀕𑁆𑀕𑀬𑁆𑀳 𑀦𑀺𑀲𑁂𑀥𑀦𑀻𑀬𑀲𑁆𑀲 𑀅𑀲𑀦𑀁 𑀔𑁂𑀧𑀦𑀁 𑀯𑀚𑁆𑀚𑀦𑀁 𑀧𑀭𑀺𑀬𑀼𑀤𑀸𑀲𑁄, 𑀢𑁂𑀦 𑀧𑀭𑀺𑀬𑀼𑀤𑀸𑀲𑁂𑀦 𑀯𑀺𑀲𑀺𑀝𑁆𑀞𑁂-𑀢𑁆𑀣𑁂 𑀯𑀼𑀢𑁆𑀢𑀺 𑀅𑀲𑁆𑀲𑁂𑀢𑀺 𑀧𑀭𑀺𑀬𑀼𑀤𑀸𑀲𑀯𑀼𑀢𑁆𑀢𑀺, 𑀧𑀲𑀚𑁆𑀚𑀧𑁆𑀧𑀝𑀺𑀲𑁂𑀥𑀯𑀼𑀢𑁆𑀢𑀻𑀢𑀺 𑀧𑀝𑀺𑀲𑁂𑀥𑀦𑀻𑀬𑀫𑁂𑀯 𑀧𑀲𑀚𑁆𑀚 𑀧𑀢𑁆𑀯𑀸 𑀢𑀁𑀲𑀤𑀺𑀲𑀫𑀦𑀧𑁂𑀓𑁆𑀔𑀺𑀬 𑀦𑀺𑀲𑁂𑀥𑁄, 𑀢𑁂𑀦 𑀯𑀼𑀢𑁆𑀢𑀺 𑀅𑀲𑁆𑀲𑁂𑀢𑀺 𑀧𑀲𑀚𑁆𑀚𑀧𑁆𑀧𑀝𑀺𑀲𑁂𑀥 𑀯𑀼𑀢𑁆𑀢𑀺.

𑀬𑀢𑁆𑀣 𑀩𑁆𑀭𑀸𑀳𑁆𑀫𑀡𑀸 𑀅𑀜𑁆𑀜𑁄𑀯 𑀪𑀯𑀢𑀻𑀢𑁆𑀬𑁂𑀯𑀁 𑀯𑀸𑀓𑁆𑀬𑁂𑀦𑀸𑀢𑁆𑀣𑀦𑁆𑀢𑀭𑀯𑀺𑀥𑀸𑀦𑀸 𑀯𑀺𑀥𑀺𑀦𑁄 𑀧𑀥𑀸𑀦𑀢𑁆𑀢𑀁, 𑀅𑀢𑁆𑀣𑀦𑁆𑀢𑀭𑀯𑀺𑀥𑀸𑀦𑀲𑀸𑀫𑀢𑁆𑀣𑀺𑀬𑁂𑀦𑁂𑀯 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀝𑀺𑀲𑁂𑀥𑁄 𑀧𑀢𑀻𑀬𑀢𑁂, 𑀩𑁆𑀭𑀸𑀳𑁆𑀫𑀡𑀲𑁆𑀲 [𑀩𑁆𑀭𑀸𑀳𑁆𑀫𑀡𑀲𑁆𑀲𑀸 (𑀧𑁄𑀢𑁆𑀣𑀓𑁂)] 𑀦𑀺𑀯𑀢𑁆𑀢𑀦𑁂 𑀢𑀤𑀧𑁂𑀓𑁆𑀔𑀸𑀬𑀸𑀜𑁆𑀜𑀲𑁆𑀲 𑀯𑀺𑀥𑀸𑀦𑀬𑁄𑀕𑀢𑁄 𑀲𑀓𑀧𑀤𑁂𑀦 𑀦𑀜𑁆𑀔𑁆𑀬𑁂𑀦 𑀯𑀺𑀥𑀺𑀪𑀸𑀕𑀻 𑀦 𑀯𑀼𑀘𑁆𑀘𑀢𑁂, 𑀓𑀺𑀜𑁆𑀘𑀭𑀳𑀺 𑀅𑀜𑁆𑀜𑀲𑀤𑁆𑀤𑁂𑀦… 𑀧𑀭𑀺𑀬𑀼𑀤𑀸𑀲𑀦𑀺𑀲𑁆𑀲𑀬𑀺𑀦𑁄𑀜𑁆𑀜𑀲𑀤𑁆𑀤𑀲𑁆𑀲𑁂𑀯 𑀯𑀸𑀓𑁆𑀬𑁂 𑀧𑀬𑁄𑀕𑀢𑁄’ 𑀅𑀜𑁆𑀜𑁄 𑀩𑁆𑀭𑀸𑀳𑁆𑀫𑀡𑀸 𑀅𑀩𑁆𑀭𑀸𑀳𑁆𑀫𑀡𑁄’𑀢𑀺, 𑀦𑀜𑁆𑀲𑁆𑀲𑀘 𑀲𑁆𑀬𑀸𑀤𑁆𑀬𑀦𑁆𑀢𑁂𑀦 𑀲𑀸𑀫𑀢𑁆𑀣𑀺𑀬𑀁, 𑀦 𑀢𑁆𑀬𑀸𑀤𑁆𑀬𑀦𑁆𑀢𑁂𑀦𑁂𑀢𑁆𑀬𑁂𑀓𑀯𑀸𑀓𑁆𑀬𑀢𑀸… 𑀅𑀜𑁆𑀜𑁄 𑀩𑁆𑀭𑀸𑀳𑁆𑀫𑀡𑀸 𑀅𑀩𑁆𑀭𑀸𑀳𑁆𑀫𑀡𑁄𑀢𑀺 𑀢𑀢𑁆𑀣 𑀢𑀢𑁆𑀣 𑀧𑀭𑀺𑀬𑀼𑀤𑀸𑀲𑀯𑀼𑀢𑁆𑀢𑀺𑀢𑁆𑀢𑀸.

𑀧𑀲𑀚𑁆𑀚𑀧𑁆𑀧𑀝𑀺𑀲𑁂𑀥𑁂𑀢𑀼 𑀧𑀝𑀺𑀲𑁂𑀥𑀲𑁆𑀲 𑀧𑀥𑀸𑀦𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄 𑀦 𑀪𑀯𑀢𑀻𑀢𑀺 𑀯𑀸𑀓𑁆𑀬𑁂𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀝𑀺𑀲𑁂𑀥𑁄 𑀯𑀺𑀥𑀺 𑀅𑀢𑁆𑀣𑀕𑀫𑁆𑀫𑁄 𑀯𑀸𑀓𑁆𑀬𑀪𑁂𑀤𑁄, 𑀲𑀓𑀧𑀤𑁂𑀦 𑀘 𑀦𑀜𑁆𑀔𑁆𑀬𑁂𑀦 𑀧𑀝𑀺𑀲𑁂𑀥𑀪𑀸𑀕𑀺𑀯𑀸𑀘𑀻 𑀲𑀫𑁆𑀩𑀚𑁆𑀛𑀢𑁂. 𑀓𑁄 𑀲𑁄 𑀩𑁆𑀭𑀸𑀳𑁆𑀫𑀡𑀸 𑀅𑀜𑁆𑀜𑁄𑀢𑀺 𑀆𑀳- ‘𑀩𑁆𑀭𑀸𑀳𑁆𑀫𑀡𑀢𑁆𑀢𑀸𑀦𑀚𑁆𑀛𑀸𑀲𑀺𑀢𑁄’𑀘𑁆𑀘𑀸𑀤𑀺.

𑀇𑀢𑀭𑀲𑁆𑀫𑀺𑀦𑁆𑀢𑀺 𑀧𑀲𑀚𑁆𑀚𑀧𑁆𑀧𑀝𑀺𑀲𑁂𑀧𑁂𑀓𑁆𑀔𑁂, 𑀓𑁂𑀦𑀘𑀺 𑀲𑀁𑀲𑀬𑀦𑀺𑀫𑀺𑀢𑁆𑀢𑁂𑀦𑀸𑀢𑀺 𑀉𑀧𑀯𑀻𑀢𑀤𑀲𑁆𑀲𑀦𑀸𑀤𑀺𑀦𑀸 𑀓𑁂𑀦𑀘𑀺 𑀲𑀁𑀲𑀬𑀓𑀸𑀭𑀡𑁂𑀦, 𑀲𑀩𑁆𑀩𑀫𑁆𑀧𑀺 𑀧𑀤𑀁 𑀲𑀓𑀢𑁆𑀣𑁂 𑀧𑀬𑁄𑀕𑀫𑁆𑀧𑀢𑀺 𑀜𑀸𑀡𑀫𑀧𑁂𑀓𑁆𑀔𑀢𑁂, 𑀢𑀜𑁆𑀘 𑀜𑀸𑀡𑀁 𑀤𑁆𑀯𑀺𑀥𑀸 𑀲𑀫𑁆𑀫𑀸𑀜𑀸𑀡𑀁 𑀫𑀺𑀘𑁆𑀙𑀸 𑀜𑀸𑀡𑀜𑁆𑀘. 𑀉𑀪𑀬𑀫𑁆𑀧𑁂𑀢𑀩𑁆𑀭𑀸𑀳𑁆𑀫𑀡𑀲𑀤𑁆𑀤𑀁 𑀧𑀯𑀢𑁆𑀢𑀬𑀢𑀺. 𑀢𑀢𑁆𑀣 𑀲𑀫𑁆𑀫𑀸𑀜𑀸𑀡 𑀧𑀼𑀩𑁆𑀩𑀓𑁂 𑀅𑀩𑁆𑀭𑀸𑀳𑁆𑀫𑀡𑀲𑀤𑁆𑀤𑀧𑁆𑀧𑀬𑁄𑀕𑁂 𑀦𑀢𑁆𑀣𑀺 𑀦𑀜𑁆𑀲𑁆𑀲 𑀩𑁆𑀬𑀸𑀧𑀸𑀭𑁄, 𑀦 𑀳𑀺 𑀢𑀢𑁆𑀣 𑀢𑁂𑀦 𑀓𑀺𑀜𑁆𑀘𑀺 𑀓𑀭𑀻𑀬𑀢𑀺. 𑀫𑀺𑀘𑁆𑀙𑀸𑀜𑀸𑀡𑀧𑀼𑀩𑁆𑀩𑀓𑁂 𑀢𑀼 𑀯𑀺𑀚𑁆𑀚𑀢𑁂 𑀢𑀲𑁆𑀲 𑀩𑁆𑀬𑀸𑀧𑀸 𑀭𑁄 ¶ 𑀢𑀢𑁆𑀣 𑀳𑀺 𑀢𑁂𑀦 𑀫𑀺𑀘𑁆𑀙𑀸𑀜𑀸𑀡𑀧𑁆𑀧𑀪𑀯𑀢𑀸 𑀧𑀭𑀲𑁆𑀲𑀸𑀔𑁆𑀬𑀸𑀬𑀢𑁂, 𑀫𑀺𑀘𑁆𑀙𑀸𑀜𑀸𑀡𑀁 𑀘𑁂𑀦𑁆𑀤𑁆𑀭𑀺𑀬𑀳𑁂𑀢𑀼𑀓𑀁, 𑀯𑀺𑀦𑀸 𑀲𑀤𑀺𑀲𑀢𑁆𑀢𑀁 𑀦 𑀪𑀯𑀢𑀻𑀢𑀺 𑀧𑀝𑀺𑀲𑁂𑀥𑁂 𑀲𑀢𑀺 𑀉𑀢𑁆𑀢𑀭𑀧𑀤𑀢𑁆𑀣𑀲𑀤𑀺𑀲𑁄 𑀲𑀫𑀸𑀲𑀢𑁆𑀣𑁄 𑀚𑀸𑀬𑀢𑁂𑀘𑁆𑀘𑀸𑀳- ‘𑀢𑀢𑁆𑀣 𑀲𑀤𑀺𑀲𑀢𑁆𑀢𑀁 𑀯𑀺𑀦𑁂’𑀘𑁆𑀘𑀸𑀤𑀺. 𑀭𑀚𑁆𑀚𑀼𑀬𑀁 𑀳𑀺 𑀲𑀧𑁆𑀧𑀩𑀼𑀤𑁆𑀥𑀺 𑀲𑀤𑀺𑀲𑀢𑁆𑀢𑀸.

𑀧𑀬𑁄𑀕𑀲𑀸𑀫𑀢𑁆𑀣𑀺𑀬𑀸𑀘𑁂𑀢𑀺 𑀅𑀩𑁆𑀭𑀸𑀳𑁆𑀫𑀡𑀫𑀸𑀦𑀬𑁂𑀘𑁆𑀘𑀸𑀤𑀺𑀧𑀬𑁄𑀕𑀲𑀸𑀫𑀢𑁆𑀣𑀺𑀬𑀸 𑀘. 𑀏𑀯𑀫𑁆𑀫𑀜𑁆𑀜𑀢𑁂- ‘‘𑀬𑀤𑁆𑀬𑀢𑁆𑀭 𑀩𑁆𑀭𑀸𑀳𑁆𑀫𑀡𑀫𑀢𑁆𑀢𑀲𑁆𑀲𑀸𑀦𑀬𑀦𑀁 𑀲𑀺𑀬𑀸 𑀧𑀼𑀩𑁆𑀩𑀧𑀤𑀲𑁆𑀲𑀼𑀘𑁆𑀘𑀸𑀭𑀡𑀫𑀦𑀢𑁆𑀣𑀓𑀁 𑀲𑀺𑀬𑀸, 𑀅𑀣 𑀦 𑀓𑀲𑁆𑀲𑀘𑀺 𑀆𑀦𑀬𑀦𑀁 𑀏𑀯𑀫𑁆𑀧𑀺 𑀲𑀩𑁆𑀩𑀲𑁆𑀲𑁂𑀯𑀸 𑀩𑁆𑀭𑀸𑀳𑁆𑀫𑀡𑀲𑀤𑁆𑀤𑀲𑁆𑀲𑀸𑀦𑀢𑁆𑀣𑀓𑀢𑁆𑀢𑀁, 𑀢𑀲𑁆𑀫𑀸 𑀧𑀬𑁄𑀕𑀲𑀸𑀫𑀢𑁆𑀣𑀺𑀬𑀸𑀧𑀺 𑀲𑀤𑀺𑀲𑀧𑁆𑀧𑀝𑀺𑀧𑀢𑁆𑀢𑀻’’𑀢𑀺.

𑀢𑀕𑁆𑀕𑀢𑀸𑀢𑀺 𑀲𑀤𑀺𑀲𑀢𑁆𑀣𑀕𑀢𑀸. 𑀬𑀣𑀸𑀯𑀼𑀢𑁆𑀢𑀲𑁆𑀲𑁂𑀯𑀸-𑀢𑁆𑀣𑀲𑁆𑀲𑀼𑀧𑀩𑁆𑀭𑀽𑀳𑀦𑀸𑀬 𑀯𑀺𑀜𑁆𑀜𑀽𑀯𑀘𑀦𑀫𑀼𑀧𑀜𑁆𑀜𑀲𑁆𑀲𑀢𑀺 ‘𑀅𑀢𑁄𑀬𑁂𑀯 𑀯𑀼𑀘𑁆𑀘𑀢𑁂’𑀘𑁆𑀘𑀸𑀤𑀺. 𑀅𑀬𑀜𑁆𑀘𑁂𑀢𑁆𑀣 𑀅𑀢𑁆𑀣𑁄 ‘‘𑀦𑀜𑁆𑀯𑀘𑀦𑁂𑀦 𑀇𑀯𑀲𑀤𑁆𑀤𑁂𑀦 𑀘 𑀬𑀁 𑀬𑀼𑀢𑁆𑀢𑀁 𑀢𑀤𑀜𑁆𑀜𑀲𑁆𑀫𑀺𑀁 𑀢𑀧𑁆𑀧𑀤𑀢𑁆𑀣𑀲𑀤𑀺𑀲𑁂-𑀢𑁆𑀣𑁂 𑀧𑀝𑀺𑀧𑀢𑁆𑀢𑀺𑀁 𑀚𑀦𑁂𑀢𑀺, 𑀢𑀣𑀸𑀳𑁆𑀬𑀢𑁆𑀣𑀲𑀫𑁆𑀧𑀘𑁆𑀘𑀬𑁄 𑀮𑁄𑀓𑁂 𑀤𑀺𑀲𑁆𑀲𑀢𑀺 ‘𑀅𑀩𑁆𑀭𑀸𑀳𑁆𑀫𑀡𑀫𑀸𑀦𑀬𑀸’𑀢𑀺 𑀩𑁆𑀭𑀸𑀳𑁆𑀫𑀡𑀲𑀤𑀺𑀲𑁄 𑀔𑀢𑁆𑀢𑀺𑀬𑀸𑀤𑀺 𑀆𑀦𑀻𑀬𑀢𑀻𑀢𑀺, 𑀅𑀥𑀺𑀓𑀭𑀻𑀬𑀢𑀺 𑀦𑀺𑀬𑀼𑀚𑁆𑀚𑀢𑁂 𑀲𑀤𑁆𑀤𑁄-𑀲𑁆𑀫𑀺𑀦𑁆𑀢𑁆𑀬𑀥𑀺𑀓𑀭𑀡𑀁. 𑀬𑀣𑀸𑀯𑀼𑀢𑁆𑀢𑁂𑀦 𑀘 𑀩𑁆𑀬𑀸𑀔𑁆𑀬𑀸𑀦𑁂𑀦 𑀓𑀺𑀫𑀺𑀝𑁆𑀞𑀁 𑀲𑀺𑀤𑁆𑀥𑀦𑁆𑀢𑁆𑀬𑀸𑀳- ‘𑀢𑀤𑁂𑀯’𑀫𑀺𑀘𑁆𑀘𑀸𑀤𑀺. 𑀓𑁂𑀘𑀺 𑀧𑀦 𑀉𑀢𑁆𑀢𑀭𑀧𑀤𑀢𑁆𑀣𑀧𑁆𑀧𑀥𑀸𑀦𑀢𑁆𑀢𑀫𑀺𑀳 𑀯𑀡𑁆𑀡𑁂𑀦𑁆𑀢𑀺.

𑀲𑀫𑀢𑁆𑀣𑀯𑀸𑀤𑀻𑀦𑀦𑁆𑀢𑀺 ‘‘𑀲𑀫𑀢𑁆𑀣𑁄 𑀧𑀤𑀯𑀺𑀥𑀺’’ (𑀧𑀸 𑁨-𑁧-𑁧) 𑀢𑁆𑀯𑁂𑀯𑀁 𑀯𑀸𑀤𑀻𑀦𑀁. 𑀲𑀫𑀢𑁆𑀣 𑀯𑀸𑀤𑀻𑀦𑀁 𑀲𑀫𑀸𑀲𑁄 𑀯𑀺𑀥𑁂𑀬𑁆𑀬𑁄𑀢𑀺 𑀲𑀫𑁆𑀩𑀦𑁆𑀥𑁄, 𑀯𑀺𑀥𑁂𑀬𑁆𑀬𑁄𑀢𑀺 𑀯𑀘𑀦𑀦𑁆𑀢𑀭𑁂𑀦 𑀯𑀺𑀥𑁂𑀬𑁆𑀬𑁄, 𑀢𑀣𑀸𑀳𑀺 𑀅𑀧𑀼𑀦𑀕𑁂𑀬𑁆𑀬𑀸𑀢𑀺 𑀕𑀸𑀬𑀦𑁂𑀦 𑀦𑀜𑁆𑀲𑁆𑀲 𑀲𑀫𑁆𑀩𑀦𑁆𑀥𑁄, 𑀦 𑀢𑀼 𑀧𑀼𑀦𑀲𑀤𑁆𑀤𑀢𑁆𑀣𑁂𑀦. 𑀅𑀦𑁄𑀓𑀸𑀲𑀁 𑀓𑀸𑀭𑁂𑀢𑁆𑀯𑀸𑀢𑀺 𑀓𑀭𑀡𑁂𑀦 𑀲𑀫𑁆𑀩𑀦𑁆𑀥𑁄 𑀦 𑀑𑀓𑀸𑀲𑁂𑀦. 𑀅𑀫𑀽𑀮𑀸𑀫𑀽𑀮𑀁 𑀕𑀦𑁆𑀢𑁆𑀯𑀸𑀢𑀺 𑀕𑀫𑀦𑁂𑀦, 𑀦 𑀫𑀽𑀮𑁂𑀦𑀸𑀢𑀺 𑀅𑀲𑀸𑀫𑀢𑁆𑀣𑀺𑀬𑀁. 𑀕𑀫𑀓𑀢𑁆𑀢𑀯𑀸𑀤𑀺𑀦𑁄𑀢𑀺 𑀅𑀲𑀸𑀫𑀢𑁆𑀣𑀺𑀬𑁂𑀧𑀺 𑀬𑀢𑁆𑀭 𑀕𑀫𑀓𑀢𑁆𑀢𑀁 𑀢𑀢𑁆𑀣 𑀲𑀫𑀸𑀲𑁄 𑀳𑁄𑀢𑁂𑀯, 𑀢𑀢𑁄 𑀕𑀫𑀓𑀢𑁆𑀢𑀜𑁆𑀘 𑀲𑀫𑀸𑀲𑀲𑁆𑀲 𑀦𑀺𑀩𑀦𑁆𑀥𑀦𑀦𑁆𑀢𑀺 𑀬𑁄 𑀯𑀤𑀢𑀺 𑀢𑀲𑁆𑀲𑁂𑀢𑁆𑀬𑀢𑁆𑀣𑁄. 𑀏𑀢𑁆𑀣𑀸𑀧𑀻𑀢𑀺 𑀅𑀧𑀼𑀦𑀕𑁂𑀬𑁆𑀬𑀸𑀢𑁆𑀬𑀸𑀤𑁄𑀧𑀺, 𑀦𑀦𑁆𑀯𑀬𑀫𑀧𑁆𑀬𑀸𑀘𑀭𑀺𑀬𑁄 𑀕𑀫𑀓𑀢𑁆𑀢𑀯𑀸𑀤𑀻, 𑀢𑀣𑀸𑀲𑀢𑀺 𑀕𑀫𑀓𑀢𑁆𑀢𑀸𑀇𑀘𑁆𑀘𑀦𑀪𑀺𑀥𑀸𑀬 𑀩𑀳𑀼𑀮𑀸𑀥𑀺𑀓𑀸𑀭𑀸𑀢𑀺 𑀓𑀲𑁆𑀫𑀸𑀯𑀼𑀢𑁆𑀢𑀦𑁆𑀢𑀺 𑀆𑀳-‘𑀲𑁄 𑀘𑁂’𑀘𑁆𑀘𑀸𑀤𑀺.

𑀓𑁂𑀳𑀺𑀘𑀻𑀢𑀺 𑀯𑀼𑀢𑁆𑀢𑀺𑀕𑁆𑀕𑀦𑁆𑀣𑁂𑀦 𑀩𑁆𑀬𑀯𑀘𑁆𑀙𑀺𑀦𑁆𑀦𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳- ‘𑀓𑁂𑀳𑀺𑀘𑀺𑀬𑁂𑀯 ¶ 𑀦 𑀲𑀩𑁆𑀩𑁂𑀳𑀻’𑀢𑀺, 𑀅𑀧𑀼𑀦𑀕𑁂𑀬𑁆𑀬𑀸𑀢𑀺 ‘‘𑀝 𑀦𑀜𑁆𑀲𑁆𑀲𑀸’’𑀢𑀺 (𑁩-𑁭𑁪) 𑀦𑀲𑁆𑀲𑀝𑁄, 𑀅𑀢𑀺𑀧𑁆𑀧𑀲𑀗𑁆𑀕𑀸𑀪𑀸𑀯𑀢𑁄𑀢𑀺 𑀲𑀼𑀢𑁆𑀢𑀦𑁆𑀢𑀭𑁂𑀦 𑀲𑀫𑀸𑀲𑁂 𑀅𑀯𑀺𑀳𑀺𑀢𑁂𑀧𑀺 𑀅𑀦𑀪𑀺𑀫𑀢𑀢𑁆𑀣𑀸𑀦𑀫𑁆𑀧𑀢𑀻𑀢𑀺𑀬𑀸 𑀅𑀪𑀸𑀯𑀢𑁄.

𑀲𑁆𑀬𑀸𑀤𑀺𑀯𑀺𑀥𑀺𑀦𑁄𑀢𑀺 𑀓𑀸𑀭𑀓𑀯𑀺𑀪𑀢𑁆𑀢𑀺𑀯𑀺𑀥𑀸𑀦𑀢𑁄 𑀯𑀺𑀲𑀼𑀁 𑀇𑀢𑁆𑀣𑀫𑁆𑀪𑀽𑀢𑀸𑀤𑀻𑀲𑀼𑀯𑀺𑀥𑀸𑀦𑀸 𑀲𑁆𑀬𑀸𑀤𑀺𑀯𑀺𑀥𑀻𑀢𑀺𑀲𑀗𑁆𑀔𑀁 𑀕𑀢𑀲𑁆𑀲 𑀲𑁆𑀬𑀸𑀤𑀺𑀯𑀺𑀥𑀺𑀦𑁄, 𑀅𑀲𑁆𑀬𑀸𑀤𑀺𑀯𑀺𑀥𑀺𑀫𑁆𑀳𑀻𑀢𑀺 𑀧𑀭𑀺𑀬𑀼𑀤𑀸𑀲𑁄-𑀦𑀢𑁆𑀣𑀓𑁄𑀢𑀺 𑀘𑁄𑀤𑁂𑀦𑁆𑀢𑁄 𑀆𑀳 ‘𑀦𑀦𑁆𑀯𑀺’𑀘𑁆𑀘𑀸𑀤𑀺, 𑀅𑀦𑀢𑁆𑀣𑀓𑀁 𑀪𑀯𑁂𑀬𑁆𑀬… 𑀮𑀓𑁆𑀔𑀡𑀸𑀤𑁆𑀬𑀢𑁆𑀣𑀸𑀦𑀁 𑀲𑀫𑀸𑀲𑁂 𑀕𑀼𑀡𑀻𑀪𑀽𑀢𑀢𑁆𑀢𑀸 𑀲𑀫𑀸𑀲𑀢𑁄 𑀓𑀺𑀭𑀺𑀬𑀸𑀲𑀫𑁆𑀩𑀦𑁆𑀥𑀸𑀦𑀼𑀭𑀽𑀧𑀯𑀺𑀪𑀢𑁆𑀢𑀺𑀬𑀢𑁆𑀣𑀲𑁆𑀲 𑀧𑀥𑀸𑀦𑀪𑀸𑀯𑀢𑁄, 𑀧𑀭𑀺𑀳𑀭𑀢𑀺 ‘𑀦𑀬𑀺𑀤𑀫𑁂𑀯’𑀫𑀺𑀘𑁆𑀘𑀸𑀤𑀺𑀦𑀸. ‘‘𑀅𑀦𑀼𑀦𑀸’’𑀢𑀺 (𑁨-𑁧𑁦) 𑀯𑀺𑀘𑁆𑀙𑀸𑀬𑀫𑀦𑀼𑀦𑀸 𑀬𑁄𑀕𑁂 𑀤𑀼𑀢𑀺𑀬𑀸 𑀯𑀺𑀥𑀸𑀦𑀲𑀸𑀫𑀢𑁆𑀣𑀺𑀬𑀸 𑀯𑀸𑀓𑁆𑀬𑀫𑁆𑀧𑀺 𑀳𑁄𑀢𑀺, 𑀅𑀜𑁆𑀜𑀣𑀸 𑀦𑀺𑀘𑁆𑀘𑀲𑀫𑀸𑀲𑁂 𑀤𑀼𑀢𑀺𑀬𑀸 𑀯𑀺𑀥𑀸𑀦𑀫𑀦𑀢𑁆𑀣𑀓𑀦𑁆𑀢𑀺 𑀪𑀸𑀯𑁄, 𑀦𑀺𑀕𑀫𑀬𑀢𑀺 𑀢𑀲𑁆𑀫𑀸𑀇𑀘𑁆𑀘𑀸𑀤𑀺𑀦𑀸, ‘‘𑀓𑀼 𑀧𑀸𑀧𑀢𑁆𑀣𑁂’’𑀢𑀺 𑀧𑀭𑁂𑀲𑀁 𑀕𑀡𑀧𑀸𑀞𑁄, 𑀏𑀯𑀫𑀼𑀧𑀭𑀺𑀧𑀺 ‘‘𑀤𑀼𑀦𑀺𑀦𑁆𑀤𑀸𑀬𑀁’’𑀢𑁆𑀬𑀸𑀤𑀺 𑀯𑁂𑀤𑀺𑀢𑀩𑁆𑀩𑀁.

𑀘𑀻𑀲𑀤𑁆𑀤𑁄𑀢𑀺 𑀏𑀢𑁆𑀣 𑀘𑀻𑀢𑀺 𑀇𑀫𑀺𑀦𑀸 𑀘𑀻𑀧𑁆𑀧𑀘𑁆𑀘𑀬𑀦𑁆𑀢𑀁 𑀧𑀭𑀸𑀫𑀲𑀢𑀺, 𑀘𑀻𑀧𑁆𑀧𑀘𑁆𑀘𑀬𑀦𑁆𑀢 𑀲𑀤𑁆𑀤𑁄𑀢𑀺 𑀅𑀢𑁆𑀣𑁄.

𑀧𑀻𑀢𑀺𑀲𑀫𑁆𑀪𑀫𑁄𑀢𑀺 𑀧𑀻𑀢𑀺𑀬𑀸 𑀲𑀫𑁆𑀪𑀫𑁄 𑀧𑀻𑀢𑀺𑀧𑀼𑀩𑁆𑀩𑀺𑀓𑀸 𑀧𑀘𑁆𑀘𑀼𑀝𑁆𑀞𑀸𑀦𑀸𑀲𑀦 𑀤𑀸𑀦𑀸𑀤𑀺𑀯𑀺𑀲𑀬𑀸 𑀢𑀼𑀭𑀺𑀢𑀢𑀸, 𑀅𑀮𑀁𑀪𑀼𑀢𑁆𑀯𑀸 𑀧𑀭𑀺𑀬𑀢𑁆𑀢𑀁 𑀲𑀫𑁆𑀧𑀼𑀡𑁆𑀡𑀁 𑀪𑀼𑀢𑁆𑀯𑀸.

𑀧𑀼𑀭𑁄𑀪𑀽𑀬 𑀅𑀕𑁆𑀕𑀢𑁄𑀪𑀽𑀬. 𑀢𑀺𑀭𑁄𑀪𑀽𑀬 𑀅𑀦𑁆𑀢𑀭𑀥𑀸𑀦𑀻𑀪𑀽𑀬. 𑀅𑀦𑀘𑁆𑀘𑀸𑀥𑀸𑀦𑁂𑀢𑀺 𑀇𑀫𑀲𑁆𑀲 𑀅𑀢𑁆𑀣𑁄 ‘𑀉𑀧𑀭𑀺𑀬𑀸𑀥𑀸𑀦𑀢𑁄 𑀅𑀜𑁆𑀜𑀢𑁆𑀭𑀸’𑀢𑀺, 𑀆𑀥𑀸𑀦𑀁 𑀧𑀢𑀺𑀝𑁆𑀞𑀸𑀧𑀦𑀁, 𑀇𑀘𑁆𑀙𑀦𑁆𑀢𑀻𑀢𑀺 𑀧𑀸𑀡𑀺𑀦𑀺𑀬𑀸𑀤𑀬𑁄 𑀇𑀘𑁆𑀙𑀦𑁆𑀢𑀺, 𑀉𑀭𑀲𑀺 𑀓𑀢𑁆𑀯𑀸 𑀧𑀸𑀡𑀺𑀦𑁆𑀢𑀺 𑀧𑀸𑀡𑀺𑀁 𑀉𑀭𑀲𑀺 𑀓𑀢𑁆𑀯𑀸.

𑀅𑀦𑁂𑀓𑀕𑁆𑀕𑀳𑀡𑀲𑁆𑀲 𑀧𑀬𑁄𑀚𑀦𑀁 𑀯𑀢𑁆𑀢𑀼𑀫𑀼𑀧𑀲𑀓𑁆𑀓𑀢𑀺 ‘𑀇𑀥𑁂’𑀘𑁆𑀘𑀸𑀤𑀺, 𑀯𑀺𑀯𑀘𑁆𑀙𑀺𑀢𑁂𑀓𑀲𑀗𑁆𑀔𑁆𑀬𑀸𑀲𑀸𑀫𑀜𑁆𑀜𑀦𑁆𑀢𑀺 𑀯𑀺𑀯𑀘𑁆𑀙𑀺𑀢𑀁 𑀏𑀓𑀲𑀗𑁆𑀔𑁆𑀬𑀸𑀬 𑀲𑀸𑀫𑀜𑁆𑀜𑀁, 𑀏𑀯𑀁 𑀫𑀜𑁆𑀜𑀢𑁂 ‘‘𑀬𑀤𑀺‘𑀲𑁆𑀬𑀸𑀤𑀺 ¶ 𑀲𑁆𑀬𑀸𑀤𑀺𑀦𑁂’𑀢𑀺 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑁂𑀓𑀲𑀗𑁆𑀔𑁆𑀬𑀸𑀲𑀸𑀫𑀜𑁆𑀜𑀲𑁆𑀲 𑀧𑀭𑀺𑀕𑁆𑀕𑀳𑁄 𑀦 𑀲𑀺𑀬𑀸 𑀢𑀤𑀸 𑀇𑀳𑀸𑀦𑀢𑁆𑀣𑀓 (𑀫𑀦𑁂𑀓)𑀕𑁆𑀕𑀳𑀡𑀁 𑀲𑀺𑀬𑀸 𑀢𑁂𑀦𑁂𑀳𑀸𑀦𑁂 𑀓𑀕𑁆𑀕𑀳𑀡𑀲𑀸𑀫𑀢𑁆𑀣𑀺𑀬𑀸𑀬𑁂𑀯 ‘𑀲𑁆𑀬𑀸𑀤𑀺𑀲𑁆𑀬𑀸𑀤𑀺𑀦𑁂’𑀢𑀺 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑁂𑀓𑀲𑀗𑁆𑀔𑁆𑀬𑀸 𑀲𑀸𑀫𑀜𑁆𑀜𑀫𑁆𑀧𑀭𑀺𑀕𑁆𑀕𑀳𑀺𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑁂’’𑀢𑀺 𑀢𑁂𑀦𑁂𑀘𑁆𑀘𑀸𑀤𑀺𑀦𑀸 𑀇𑀤𑀁 𑀤𑀲𑁆𑀲𑁂𑀢𑀺 ‘‘𑀢𑁂𑀦 𑀬𑀣𑀸𑀯𑀼𑀢𑁆𑀢𑁂𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄 𑀲𑀩𑁆𑀩𑁄𑀧𑀺 𑀲𑀫𑀸𑀲𑁄 𑀧𑀼𑀩𑁆𑀩𑀧𑀭𑀸𑀦𑀁 𑀤𑁆𑀯𑀺𑀦𑁆𑀦𑀁𑀬𑁂𑀯 𑀲𑁆𑀬𑀸𑀤𑁆𑀬𑀦𑁆𑀢𑀸𑀦𑀁 𑀳𑁄𑀢𑀻’’𑀢𑀺.

𑀬𑀚𑁆𑀚𑁂𑀯𑀁 𑀓𑀣𑀁 ‘𑀢𑀤𑀳𑀼𑀚𑀸𑀢𑁄’𑀢𑀺 𑀩𑀳𑀼𑀮𑀸𑀥𑀺𑀓𑀸𑀭𑁂𑀦 𑀯𑀺𑀲𑁂𑀲𑀦 𑀲𑀫𑀸𑀲𑀕𑀩𑁆𑀪𑀓𑀸𑀭𑀓𑀲𑀫𑀸𑀲𑁂𑀦 𑀯𑀸 𑀲𑀺𑀚𑁆𑀛𑀢𑀺, 𑀅𑀬𑀁 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁄. 𑀘𑀢𑁆𑀣𑁂 𑀩𑀳𑀼𑀦𑁆𑀦𑀫𑀺𑀝𑁆𑀞𑀢𑁆𑀢𑀸 𑀢𑀤𑀢𑁆𑀣𑀜𑁆𑀘𑀸𑀦𑁂𑀓𑀕𑁆𑀕𑀳𑀡𑀁, 𑀢𑁂𑀦 ‘𑀳𑁄𑀢𑀼 𑀧𑁄𑀢𑀼 𑀧𑀺𑀢𑀸 𑀧𑀼𑀢𑁆𑀢𑀸’𑀢𑀺 𑀳𑁄𑀢𑀺 𑀉𑀢𑁆𑀢𑀭𑀧𑀤𑁂 (𑀬𑁄𑀦𑀺) 𑀲𑀫𑁆𑀩𑀦𑁆𑀥𑁂 𑀧𑀭𑀢𑁄 𑀧𑀼𑀩𑁆𑀩𑀧𑀤𑀲𑁆𑀲 ‘‘𑀧𑀼𑀢𑁆𑀢𑁂’’𑀢𑀺 (𑁩-𑁬𑁫) 𑀲𑀼𑀢𑁆𑀢𑁂𑀦𑀸𑀢𑁆𑀢𑁂𑀦, 𑀅𑀜𑁆𑀜𑀣𑀸 𑀤𑁆𑀯𑀺𑀦𑁆𑀦𑀁𑀤𑁆𑀯𑀺𑀦𑁆𑀦𑀁 𑀲𑀫𑀸𑀲𑁂 𑀲𑀩𑁆𑀩𑀢𑁆𑀣 𑀉𑀢𑁆𑀢𑀭𑀧𑀤𑀲𑀫𑁆𑀪𑀯𑁂𑀦 ‘‘𑀯𑀺𑀚𑁆𑀚𑀸𑀬𑁄𑀦𑀺𑀲𑀫𑁆𑀩𑀦𑁆𑀥𑀸𑀦𑀫𑀸 𑀢𑀢𑁆𑀭 𑀘𑀢𑁆𑀣𑁂’’𑀢𑀺 (𑁩-𑁬𑁪) ‘‘𑀧𑀼𑀢𑁆𑀢𑁂’’𑀢𑀺 𑀘 𑀲𑀼𑀢𑁆𑀢𑀤𑁆𑀯𑀬𑁂𑀦𑀸𑀢𑁆𑀢𑁂𑀦‘𑀳𑁄𑀢𑀸 𑀧𑁄𑀢𑀸 𑀧𑀺𑀢𑀸 𑀧𑀼𑀢𑁆𑀢𑀸’𑀢𑀺 𑀆𑀧𑀚𑁆𑀚𑁂𑀬𑁆𑀬. 𑀅𑀦𑁂𑀓𑀦𑁆𑀢𑀺 𑀧𑀞𑀫𑀦𑁆𑀢𑀢𑁆𑀢𑀸 𑀲𑁆𑀬𑀸𑀤𑀻𑀢𑀻𑀤𑀫𑁂𑀯𑀸𑀦𑀼𑀯𑀢𑁆𑀢𑀢𑁂, 𑀢𑁂𑀦𑁂𑀯𑀸𑀦𑁂𑀓𑀁 𑀲𑁆𑀬𑀸𑀤𑁆𑀬𑀦𑁆𑀢𑀫𑀺𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀅𑀣𑀸𑀜𑁆𑀜𑀢𑁆𑀣𑁂𑀢𑀺 𑀯𑀼𑀢𑁆𑀢𑁂-𑀜𑁆𑀜𑀲𑁆𑀲 𑀯𑀸𑀓𑁆𑀬𑀲𑁆𑀲𑀢𑁆𑀣𑁂𑀢𑀺 𑀅𑀯𑀢𑁆𑀯𑀸 𑀧𑀤𑀲𑁆𑀲𑁂𑀘𑁆𑀘𑁂𑀯 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑁆𑀬𑀸𑀲𑀗𑁆𑀓𑀺𑀬𑀸 𑀳- ‘𑀲𑁆𑀬𑀸𑀤𑁆𑀬𑀦𑁆𑀢𑀲𑁆𑀲𑁂’𑀘𑁆𑀘𑀸𑀤𑀺, 𑀢𑀲𑁆𑀲𑁂𑀯𑀸𑀢𑀺 𑀲𑀸𑀫𑀢𑁆𑀣𑀺𑀬𑀮𑀤𑁆𑀥𑀲𑁆𑀲 𑀲𑁆𑀬𑀸𑀤𑁆𑀬𑀦𑁆𑀢 𑀧𑀤𑀲𑁆𑀲𑁂𑀯 𑀲𑀫𑀸𑀲𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀲𑁆𑀲 𑀕𑀼𑀡𑀸 𑀢𑀕𑁆𑀕𑀼𑀡𑀸 𑀢𑀲𑁆𑀲𑁂𑀘𑁆𑀘𑀦𑁂𑀦𑀸𑀜𑁆𑀜𑀧𑀤𑀢𑁆𑀣𑁄 𑀦𑀺𑀤𑁆𑀤𑀺𑀲𑀻𑀬𑀢𑁂, 𑀢𑀲𑁆𑀲 𑀅𑀜𑁆𑀜𑀧𑀤𑀢𑁆𑀣𑀲𑁆𑀲 𑀬𑁂 𑀕𑀼𑀡𑀸 𑀬𑀸𑀦𑀺 𑀯𑀺𑀲𑁂𑀲𑀦𑀸𑀦𑀺, 𑀢𑁂𑀲𑀁 𑀲𑀁𑀯𑀺𑀜𑁆𑀜𑀸𑀡𑀁 𑀕𑀳𑀡𑀁 𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑀁, 𑀅𑀣𑀯𑀸 𑀲𑁄 𑀕𑀼𑀡𑁄 𑀬𑀲𑁆𑀲 𑀲𑁄 𑀢𑀕𑁆𑀕𑀼𑀡𑁄, 𑀢𑀕𑁆𑀕𑀼𑀡𑀲𑁆𑀲 𑀢𑀕𑁆𑀕𑀼𑀡𑀬𑀼𑀢𑁆𑀢𑀲𑁆𑀲𑀸𑀜𑁆𑀜𑀧𑀤𑀢𑁆𑀣𑀲𑁆𑀲𑀲𑀁𑀯𑀺𑀜𑁆𑀜𑀸𑀡𑀁, 𑀦 𑀕𑀼𑀡𑀯𑀺𑀭𑀳𑀺𑀢𑀲𑁆𑀲𑀸(𑀢𑀺) 𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑀁, 𑀏𑀢𑁆𑀣 𑀧𑀦 ‘𑀅𑀜𑁆𑀜𑀧𑀤𑀢𑁆𑀣𑁂 𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑀁 𑀧𑁆𑀬𑀢𑁆𑀣𑀻’𑀢𑀺 𑀧𑀭𑀺𑀪𑀸𑀲𑀻𑀬𑀢𑀺, 𑀢𑀢𑁆𑀣𑀸𑀬𑀫𑀢𑁆𑀣𑁄 ‘‘𑀅𑀜𑁆𑀜𑀧𑀤𑀢𑁆𑀣𑁂 𑀲𑀫𑀸𑀲𑁂-𑀜𑁆𑀜𑀧𑀤𑀢𑁆𑀣𑁄 𑀯𑀺𑀲𑁂𑀲𑀦𑁂𑀦 𑀲𑀳 𑀯𑀺𑀜𑁆𑀜𑀸𑀬𑀢𑀺 𑀦𑀯𑀺𑀲𑁂𑀲𑀦𑀭𑀳𑀺𑀢𑁄’’𑀢𑀺, 𑀓𑁆𑀯𑀘𑀺 𑀅𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑀲𑁆𑀲𑀸𑀧𑀺 𑀤𑀲𑁆𑀲𑀦𑁂 𑀦𑀸𑀧𑀺𑀲𑀤𑁆𑀤𑁄, 𑀬𑀢𑁆𑀭𑀸𑀯𑀬𑀯𑁂𑀦 𑀯𑀺𑀕𑁆𑀕𑀳𑁄 𑀲𑀫𑀼𑀤𑀸𑀬𑁄 𑀲𑀫𑀸𑀲𑀢𑁆𑀣𑁄 𑀢𑀢𑁆𑀣𑁂𑀯 𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑀁 𑀪𑀯𑀢𑀺, 𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑀢𑁄 𑀅𑀜𑁆𑀜𑀁 𑀅𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑀁, 𑀢𑀲𑁆𑀫𑀺𑀁, 𑀬𑀢𑁆𑀭𑀸𑀯𑀬𑀯𑁄𑀬𑁂𑀯 𑀲𑀫𑀸𑀲𑀢𑁆𑀣𑁄 𑀢𑀢𑁆𑀭𑀸𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑀁.

𑀏𑀢𑁆𑀣 ¶ 𑀧𑀦 𑀩𑀳𑀼𑀥𑀦𑀲𑀤𑁆𑀤𑁄 𑀧𑀼𑀭𑀺𑀲𑀲𑁆𑀲 𑀉𑀧𑀮𑀓𑁆𑀔𑀡𑀪𑀸𑀯𑁂𑀦 𑀓𑀢𑀢𑁆𑀢𑀸. 𑀅𑀪𑀺𑀫𑀢𑁄𑀢𑀺 𑀧𑀸𑀡𑀺𑀦𑀻𑀬𑀸𑀦𑀁 𑀅𑀪𑀺𑀫𑀢𑁄 𑀤𑀲𑀦𑁆𑀦𑀁 𑀲𑀫𑀻𑀧𑁂 𑀆𑀲𑀦𑁆𑀦𑀸 𑀤𑀲𑀦𑁆𑀦𑀫𑀺𑀘𑁆𑀘𑀸𑀤𑀺𑀯𑀸𑀓𑁆𑀬𑁂.

𑀧𑀭𑀺𑀫𑀸𑀡𑀫𑁂𑀯𑀲𑀗𑁆𑀔𑁆𑀬𑁂𑀬𑀦𑁆𑀢𑀺 𑀧𑀭𑀺𑀫𑀸𑀡𑀮𑀓𑁆𑀔𑀡𑀫𑁂𑀯 𑀲𑀗𑁆𑀔𑁆𑀬𑁂𑀬𑀁, 𑀢𑀜𑁆𑀘 𑀧𑀭𑀺𑀫𑀸𑀡𑀮𑀓𑁆𑀔𑀡𑀁 𑀲𑀗𑁆𑀔𑁆𑀬𑁂𑀬𑀜𑁆𑀘.

𑀲𑀗𑁆𑀔𑁆𑀬𑀸𑀦𑀭𑀽𑀧𑀦𑁆𑀢𑀺 𑀲𑀗𑁆𑀔𑁆𑀬𑀸𑀦𑀲𑀪𑀸𑀯𑀁.

𑀧𑀭𑀺𑀫𑀸𑀡𑁂𑀦𑀸𑀢𑀺 𑀧𑀜𑁆𑀘𑀲𑀗𑁆𑀔𑁆𑀬𑀸𑀬 𑀧𑀭𑀺𑀘𑁆𑀙𑀺𑀚𑁆𑀚𑀫𑀸𑀦𑁂𑀦 𑀲𑀗𑁆𑀔𑁆𑀬𑁂𑀬𑀲𑀗𑁆𑀔𑀸𑀢𑁂𑀦 𑀧𑀭𑀺𑀫𑀸𑀡𑁂𑀦.

𑀲𑀗𑁆𑀔𑁆𑀬𑀸𑀦𑀯𑀼𑀢𑁆𑀢𑀻𑀢𑀺 𑀢𑁂𑀦 𑀅𑀦𑀢𑀺𑀯𑀢𑁆𑀢𑀺𑀬𑀫𑀸𑀦𑀢𑀧𑁆𑀧𑀭𑀺𑀘𑁆𑀙𑁂𑀤𑀓 𑀲𑀗𑁆𑀔𑁆𑀬𑀸𑀦𑀭𑀽𑀧 𑀲𑀗𑁆𑀔𑀸𑀢𑁂 𑀲𑀗𑁆𑀔𑁆𑀬𑀸𑀦𑁂 𑀯𑀼𑀢𑁆𑀢𑀺 𑀬𑀲𑁆𑀲𑀸 𑀲𑀸 𑀲𑀗𑁆𑀔𑁆𑀬𑀸𑀦𑀯𑀼𑀢𑁆𑀢𑀺-𑀧𑀜𑁆𑀘𑀲𑀗𑁆𑀔𑁆𑀬𑀸.

𑀤𑀺𑀝𑁆𑀞𑀦𑁆𑀢𑁂𑀦𑀺𑀫𑀺𑀦𑀸 𑀇𑀫𑀁 𑀤𑀻𑀧𑁂𑀢𑀺 ‘‘𑀬𑀣𑀸 𑀧𑀜𑁆𑀘 𑀧𑀭𑀺𑀫𑀸𑀡𑀫𑁂𑀲𑀦𑁆𑀢𑀺 𑀧𑀜𑁆𑀘𑀓𑀸𑀢𑀺 𑀏𑀢𑁆𑀣 𑀧𑀭𑀺𑀫𑀸𑀡𑀭𑀽𑀧𑁄-𑀯𑀬𑀯𑀪𑁂𑀤𑀲𑀫𑀼𑀤𑀸𑀬𑀲𑀪𑀸𑀯𑁄 𑀧𑀓𑀢𑀺𑀬𑀢𑁆𑀣𑁄 𑀲𑀫𑀼𑀤𑀸𑀬𑀺𑀦𑁄 𑀲𑀓𑀼𑀦𑀸 𑀧𑀘𑁆𑀘𑀬𑀢𑁆𑀣𑁄, 𑀢𑀣𑀸 𑀢𑀺𑀤𑀲𑀸𑀢𑀺 𑀏𑀢𑁆𑀣𑀸𑀧𑀺’’𑀢𑀺, 𑀓𑀧𑁆𑀧𑀘𑁆𑀘𑀬𑁄 𑀧𑀓𑀢𑀺𑀧𑁆𑀧𑀘𑁆𑀘𑀬𑀢𑁆𑀣𑀪𑁂𑀤𑀲𑀫𑁆𑀪𑀯𑁂𑀦.

𑀓𑁂𑀘𑀺 𑀧𑀦𑀸𑀢𑀺 𑀇𑀫𑀺𑀦𑀸 𑀧𑀸𑀡𑀺𑀦𑀻𑀬𑁂 𑀤𑀲𑁆𑀲𑁂𑀢𑀺.

𑀧𑀓𑀢𑀺𑀧𑁆𑀧𑀘𑁆𑀘𑀬𑀢𑁆𑀣𑀪𑁂𑀤𑀲𑀫𑁆𑀪𑀯𑀸𑀢𑀺 𑀇𑀫𑀺𑀦𑀸 𑀧𑀭𑁂𑀲𑀁 𑀧𑀓𑀢𑀺𑀧𑁆𑀧𑀘𑁆𑀘𑀬𑀢𑁆𑀣𑀸𑀦𑀁 𑀪𑁂𑀤𑀸𑀪𑀸𑀯𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸 𑀲𑀜𑁆𑀜𑀸𑀬𑀁 𑀲𑀓𑀢𑁆𑀣𑁂 𑀓𑀧𑁆𑀧𑀘𑁆𑀘𑀬𑀲𑁆𑀲 𑀯𑀺𑀥𑀸𑀦𑀁 𑀤𑀲𑁆𑀲𑁂𑀢𑀺.

𑀲𑁆𑀬𑀸𑀤𑁆𑀬𑀦𑁆𑀢𑀲𑁆𑀲𑀸𑀢𑀺 𑀇𑀫𑀺𑀦𑀸 𑀯𑀸𑀲𑀤𑁆𑀤𑀲𑁆𑀲 𑀧𑀤𑀢𑁆𑀢𑀁 𑀤𑀲𑁆𑀲𑁂𑀢𑀺.

𑀢𑀤𑀢𑁆𑀣𑁂𑀧𑀻𑀢𑀺 𑀢𑀲𑁆𑀲 𑀯𑀸𑀇𑀢𑀺 𑀅𑀜𑁆𑀜𑀧𑀤𑀲𑁆𑀲 𑀅𑀢𑁆𑀣𑁂𑀧𑀺, 𑀢𑀤𑀢𑁆𑀣𑁄 𑀘𑁂𑀢𑁆𑀣 𑀯𑀺𑀓𑀧𑁆𑀧𑀢𑁆𑀣𑁄 𑀯𑀸 𑀲𑀺𑀬𑀸 𑀢𑀤𑀸 𑀧𑀦 𑀤𑁆𑀯𑀺𑀦𑁆𑀦𑀁 𑀕𑀳𑀡𑁂 𑀦 𑀢𑀺𑀡𑁆𑀡𑀁, 𑀢𑁂𑀲𑀦𑁆𑀢𑀼 𑀕𑀳𑀡𑁂 𑀦 𑀤𑁆𑀯𑀺𑀦𑁆𑀦𑀁, 𑀲𑀁𑀲𑀬𑁄 𑀯𑀸, 𑀢𑀤𑀸 𑀢𑀼 𑀲𑀁𑀲𑀬𑀲𑁆𑀲𑁄𑀪𑀬𑀸 𑀮𑀫𑁆𑀩𑀦𑀭𑀽𑀧𑀢𑁆𑀢𑀸 𑀤𑁆𑀯𑁂𑀯𑀸𑀢𑀺 𑀯𑀼𑀢𑁆𑀢𑁂 𑀢𑀬𑁄, 𑀢𑀬𑁄𑀯𑀸𑀢𑀺 𑀯𑀼𑀢𑁆𑀢𑁂 𑀤𑁆𑀯𑁂 𑀅𑀧𑁂𑀓𑁆𑀔𑀻𑀬𑀦𑁆𑀢𑀻𑀢𑀺 𑀩𑀼𑀤𑁆𑀥𑀺𑀯𑀺𑀲𑀬𑀸 𑀧𑀜𑁆𑀘 𑀅𑀢𑁆𑀣𑀸 𑀲𑀫𑀸𑀲𑀸𑀪𑀺𑀥𑁂𑀬𑁆𑀬𑁄 𑀳𑁄𑀦𑁆𑀢𑀺.

𑀦𑀸𑀫𑀢𑁆𑀢𑁂𑀦𑀸𑀢𑀺 𑀭𑀼𑀴𑁆𑀳𑀺𑀦𑀸𑀫𑀢𑁆𑀢𑁂𑀦, 𑀅𑀪𑀺𑀫𑀢𑁄 𑀧𑀸𑀡𑀺𑀦𑀺𑀬𑀸𑀦𑀁, 𑀯𑀺𑀓𑀧𑁆𑀧𑀺𑀢𑀁 𑀲𑀼𑀢𑁆𑀢𑀦𑁆𑀢𑀭𑁂𑀦 𑀯𑀺𑀪𑀸𑀲𑀸 𑀲𑀩𑁆𑀩𑀦𑀸𑀫𑀲𑀜𑁆𑀜𑀸𑀯𑀺𑀥𑀸𑀦𑁂𑀦.

𑀅𑀯𑀬𑀯𑀥𑀫𑁆𑀫𑁂𑀦𑀸𑀢𑀺 𑀅𑀯𑀬𑀯𑀲𑀗𑁆𑀔𑀸𑀢𑁂𑀦 𑀲𑀪𑀸𑀯𑁂𑀦.

𑀦𑀦𑀼 ¶ 𑀘 𑀲𑀫𑀸𑀦𑀸𑀥𑀺𑀓𑀭𑀡𑀸𑀦𑀁 𑀩𑀳𑀼𑀩𑁆𑀩𑀻𑀳𑀺 𑀯𑀼𑀢𑁆𑀢𑁄 𑀧𑀸𑀡𑀺𑀦𑀺𑀬𑁂𑀳𑀺 ‘𑀧𑀜𑁆𑀘𑀳𑀺 𑀪𑀼𑀢𑁆𑀢𑀫𑀲𑁆𑀲𑁂𑀢𑀺 𑀩𑁆𑀬𑀥𑀺𑀓𑀭𑀡𑀸𑀦𑀁 𑀦 𑀲𑀺𑀬𑀸’𑀢𑀺, 𑀢𑀣𑀸 𑀧𑀞𑀫𑀢𑁆𑀣𑀁 𑀯𑀚𑁆𑀚𑁂𑀢𑁆𑀯𑀸 𑀲𑀩𑁆𑀩𑀯𑀺𑀪𑀢𑁆𑀬𑀢𑁆𑀣𑁂𑀲𑀼 𑀇𑀝𑁆𑀞𑁄 ‘𑀯𑀼𑀝𑁆𑀞𑁂 𑀤𑁂𑀯𑁂𑀕𑀢𑁄𑀘𑁆𑀘𑀢𑁆𑀭 𑀯𑀼𑀝𑁆𑀞𑀤𑁂𑀯𑁄𑀢𑀺 𑀦 𑀲𑀺𑀬𑀸’𑀢𑀺 𑀢𑀲𑁆𑀫𑀸 𑀓𑀣𑀫𑀢𑁆𑀭 𑀩𑁆𑀬𑀥𑀺𑀓𑀭𑀡𑀸𑀦𑀁 𑀧𑀞𑀫𑀢𑁆𑀣𑁂 𑀲𑀫𑀸𑀲𑁄 𑀯𑀡𑁆𑀡𑀻𑀬𑀢𑁂𑀘𑁆𑀘𑀸𑀲𑀗𑁆𑀓𑀺𑀬𑀸𑀳-‘𑀩𑁆𑀬𑀥𑀺𑀓𑀭𑀡𑀸𑀦𑀫𑁆𑀧𑀺’𑀘𑁆𑀘𑀸𑀤𑀺, 𑀩𑁆𑀬𑀥𑀺𑀓𑀭𑀡𑀸𑀦𑀫𑁆𑀧𑀺 𑀬𑀣𑀸𑀪𑀺𑀥𑀸𑀦𑀁𑀲𑀫𑀸𑀲𑀲𑀩𑁆𑀪𑀸𑀯𑀢𑁄 𑀧𑀜𑁆𑀘𑀳𑀺 𑀪𑀼𑀢𑁆𑀢𑀫𑀲𑁆𑀲𑁂𑀢𑁆𑀬𑀸𑀤𑁄 𑀩𑀳𑀼𑀮𑀸𑀥𑀺𑀓𑀸𑀭𑀸 𑀅𑀦𑀪𑀺𑀥𑀸𑀦𑀢𑁄 𑀯𑀸 𑀦 𑀪𑀯𑀺𑀲𑁆𑀲𑀢𑀺, 𑀢𑀢𑁄𑀬𑁂𑀯 𑀘 𑀧𑀜𑁆𑀘 𑀪𑀼𑀢𑁆𑀢 𑀯𑀦𑁆𑀢𑁄-𑀲𑁆𑀲𑁂𑀢𑀺 𑀲𑀫𑀸𑀦𑀸𑀥𑀺𑀓𑀭𑀡𑀸𑀦𑀫𑁆𑀧𑀺 𑀓𑁆𑀯𑀘𑀺 𑀦 𑀪𑀯𑀺𑀲𑁆𑀲𑀢𑀺, 𑀢𑀣𑀸 𑀧𑀞𑀫𑀢𑁆𑀣𑁂𑀧𑀺 𑀓𑁆𑀯𑀘𑀺 𑀦 𑀪𑀯𑀺𑀲𑁆𑀲𑀢𑀺 𑀯𑀼𑀝𑁆𑀞𑁂 𑀤𑁂𑀯𑁂 𑀕𑀢𑁄’𑀢𑀺. 𑀢𑀼𑀮𑁆𑀬𑀬𑁄𑀕𑁂 𑀕𑀫𑁆𑀬𑀫𑀸𑀦𑁂𑀢𑀺 𑀅𑀢𑁆𑀣𑁄.

𑀅𑀜𑁆𑀜𑀢𑁆𑀭𑀘𑀸𑀢𑀺 𑀢𑀼𑀮𑁆𑀬𑀬𑁄𑀕𑀢𑁄-𑀜𑁆𑀜𑀢𑁆𑀭 𑀲𑀮𑁄𑀫𑀓𑁄𑀢𑁆𑀬𑀸𑀤𑀻𑀲𑀼 𑀘, 𑀯𑀺𑀚𑁆𑀚𑀫𑀸𑀦𑀸𑀦𑀺 𑀮𑁄𑀫𑀸𑀦𑁆𑀬𑀲𑁆𑀲, 𑀯𑀺𑀚𑁆𑀚𑀫𑀸𑀦𑀸 𑀧𑀓𑁆𑀔𑀸 𑀅𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀉𑀧𑀲𑀗𑁆𑀔𑁆𑀬𑀸𑀢𑁄 ‘‘𑀲𑁆𑀬𑀸𑀤𑁆𑀬𑀥𑀺𑀓𑀸𑀭𑁂-𑀢𑁆𑀣𑀺𑀔𑀻𑀭𑀸𑀤𑀻𑀦𑀫𑀼𑀧𑀲𑀗𑁆𑀔𑁆𑀬𑀸𑀦’’𑀦𑁆𑀢𑀺 (𑁨-𑁨-𑁨𑁪-𑀯𑀸) 𑀲𑀪𑀸𑀯𑀢𑁄 𑀏𑀯 𑀦𑀺𑀯𑀢𑁆𑀢𑁄 𑀦 𑀲𑀼𑀢𑁆𑀢𑀦𑁆𑀢𑀭𑀢𑁄, 𑀕𑀢𑀢𑁆𑀣𑀲𑁆𑀲𑀸𑀧𑀺 𑀳𑀺 𑀧𑀬𑁄𑀕𑁂 𑀅𑀦𑀯𑀝𑁆𑀞𑀸𑀦𑀁 𑀲𑀺𑀬𑀸 𑀧𑀺𑀝𑁆𑀞𑀧𑁂𑀲𑀦𑁂 𑀯𑀺𑀬, 𑀓𑀣𑀜𑁆𑀘𑀭𑀳𑀺 𑀩𑁆𑀭𑀸𑀳𑁆𑀫𑀡𑁂 𑀩𑀳𑀽 𑀆𑀦𑀬, 𑀅𑀳𑀁 𑀧𑀘𑀸𑀫𑀻𑀢𑀺 𑀦𑀸𑀯𑀲𑁆𑀲𑀫𑁂𑀯𑀁 𑀧𑀬𑁄𑀕𑁄, 𑀓𑀢𑁆𑀣𑀘𑀺 𑀧𑀦 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀤𑀺𑀧𑁆𑀧𑀬𑁄𑀚𑀦𑁂 𑀲𑀢𑀺 𑀳𑁄𑀢𑁂𑀯.

𑀓𑀡𑁆𑀞𑁂 𑀲𑀫𑁆𑀪𑀯𑁄𑀢𑀺 𑀓𑀸𑀴𑀲𑁆𑀲 𑀓𑀡𑁆𑀞𑁂 𑀲𑀫𑁆𑀪𑀯𑁄. 𑀝𑁆𑀞𑀲𑀤𑁆𑀤𑀢𑁆𑀣𑁄𑀢𑀺 𑀓𑀡𑁆𑀞𑀝𑁆𑀞𑀲𑀤𑁆𑀤𑁂 𑀝𑁆𑀞𑀲𑀤𑁆𑀤𑀢𑁆𑀣𑁄. 𑀑𑀝𑁆𑀞𑀲𑀤𑁆𑀤𑁄𑀯 𑀫𑀼𑀔𑀯𑀼𑀢𑁆𑀢𑀻𑀢𑁆𑀬𑀦𑁂𑀦 𑀕𑀫𑁆𑀫𑀫𑀸𑀦𑀢𑁆𑀣𑀢𑁆𑀢𑀸 𑀤𑀼𑀢𑀺𑀬𑀲𑁆𑀲 𑀫𑀼𑀔𑀲𑀤𑁆𑀤𑀲𑁆𑀲𑀸𑀧𑁆𑀧𑀬𑁄𑀕𑀫𑀸𑀳, 𑀢𑀲𑁆𑀫𑀸 𑀑𑀝𑁆𑀞𑁄𑀯 𑀫𑀼𑀔𑀫𑀲𑁆𑀲𑀸𑀢𑀺 𑀯𑀺𑀕𑁆𑀕𑀬𑁆𑀳 𑀑𑀝𑁆𑀞𑀫𑀼𑀔𑁄𑀢𑀺 𑀲𑀫𑀸𑀲𑁄, 𑀦 𑀘 𑀧𑀸𑀡𑀺 𑀧𑀸𑀡𑁆𑀬𑀦𑁆𑀢𑀭𑀲𑁆𑀲 𑀫𑀼𑀔𑀁, 𑀫𑀼𑀔𑁂𑀦𑁂𑀯 𑀘 𑀧𑀸𑀡𑀺𑀫𑀼𑀔𑀲𑁆𑀲 𑀲𑀤𑀺𑀲𑀢𑁆𑀢𑀁 𑀧𑀲𑀺𑀤𑁆𑀥𑀦𑁆𑀢𑀺 𑀲𑀸𑀫𑀢𑁆𑀣𑀺𑀬𑀸 𑀑𑀝𑁆𑀞𑀫𑀼𑀔𑀫𑀺𑀯 𑀫𑀼𑀔𑀫𑀲𑁆𑀲𑁂𑀢𑁆𑀬𑀢𑁆𑀣𑁂𑀯 𑀢𑀺𑀝𑁆𑀞𑀢𑁂, 𑀉𑀧𑀦𑁆𑀬𑀲𑁆𑀬𑀦𑁆𑀢𑁂𑀢𑁆𑀬𑀼𑀧𑀦𑁆𑀬𑀸𑀲𑀸, 𑀯𑀺𑀲𑀬𑀤𑀲𑁆𑀲𑀦𑀢𑁆𑀣𑀸𑀢𑀺 𑀇𑀫𑀺𑀦𑀸’𑀓𑀡𑁆𑀞𑁂 𑀓𑀸𑀴𑁄 𑀬𑀲𑁆𑀲𑀸’𑀢𑁆𑀬𑀸𑀤𑀻𑀓𑀫𑁂𑀯 𑀯𑀸𑀓𑁆𑀬𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀫𑀼𑀤𑀸𑀬𑁂 𑀯𑀺𑀓𑀸𑀭𑁂𑀘𑀸𑀢𑀺 𑀲𑀫𑀼𑀤𑀸𑀬𑀲𑀫𑁆𑀩𑀦𑁆𑀥𑁂 𑀯𑀺𑀓𑀸𑀭𑀲𑀫𑁆𑀩𑀦𑁆𑀥𑁂 𑀘. 𑀢𑀁𑀲𑀫𑀸𑀲𑀲𑁆𑀲𑀸𑀢𑀺 𑀢𑀲𑁆𑀲𑀸 𑀙𑀝𑁆𑀞𑀺𑀬𑀸 𑀲𑀫𑀸𑀲𑀲𑁆𑀲, 𑀢𑀤𑀪𑀺𑀥𑀸𑀬𑀺𑀦𑀦𑁆𑀢𑀺 𑀲𑀗𑁆𑀖𑀸𑀢 𑀯𑀺𑀓𑀸𑀭𑀸𑀪𑀺𑀥𑀸𑀬𑀻𑀦𑀁, 𑀓𑁂𑀲𑀸𑀦𑀁 𑀲𑀗𑁆𑀖𑀸𑀢𑁄 𑀇𑀘𑁆𑀘𑀸𑀤𑀺 𑀧𑀭𑁂𑀲𑀁 𑀯𑀸𑀓𑁆𑀬𑀁. 𑀥𑀸𑀢𑀼𑀢𑁄 𑀚𑀸𑀢𑀁 𑀥𑀸𑀢𑀼𑀚𑀁, 𑀉𑀢𑁆𑀢𑀭𑀧𑀤𑀁 𑀧𑀢𑀺𑀢𑀲𑀤𑁆𑀤𑀸𑀤𑀺, 𑀢𑀲𑁆𑀲 𑀧𑀬𑁄𑀕𑁄𑀢𑀺 𑀧𑀢𑀺𑀢𑀲𑀤𑁆𑀤𑀲𑁆𑀲 𑀧𑀬𑁄𑀕𑁄.

‘‘𑀦𑀜𑁆𑀲𑁆𑀫𑀸𑀢𑁆𑀣𑁆𑀬𑀢𑁆𑀣𑀸𑀦’’𑀦𑁆𑀢𑀺 (𑁨-𑁨-𑁨𑁪) ¶ 𑀯𑀸𑀢𑁆𑀢𑀺𑀓𑀁, 𑀏𑀢𑀦𑀸𑀳-‘𑀜 𑀓𑀸𑀭𑀸𑀦𑀼 𑀩𑀦𑁆𑀥𑀸’𑀇𑀘𑁆𑀘𑀸𑀤𑀺. 𑀧𑀸𑀡𑀺𑀦𑀺𑀬𑀸 𑀢𑀼 𑀅𑀯𑀺𑀚𑁆𑀚𑀫𑀸𑀦𑀲𑀤𑁆𑀤𑁄 𑀦𑀜𑁆𑀲𑀫𑀸𑀲𑁄, 𑀧𑀤𑀦𑁆𑀢𑀭𑁂 𑀦𑀸𑀲𑁆𑀲 𑀩𑀳𑀼𑀩𑁆𑀩𑀻𑀳𑀺 𑀯𑁄𑀢𑁆𑀢𑀭𑀧𑀤𑀮𑁄𑀧𑁄, 𑀅𑀯𑀺𑀚𑁆𑀚𑀫𑀸𑀦𑀸 𑀧𑀼𑀢𑁆𑀢𑀸𑀲𑁆𑀲 𑀅𑀧𑀼𑀢𑁆𑀢𑁄𑀯𑀺𑀚𑁆𑀚𑀫𑀸𑀦𑀧𑀼𑀢𑁆𑀢𑁄𑀢𑀺 𑀲𑀸𑀥𑁂𑀦𑁆𑀢𑀺, 𑀇𑀘𑁆𑀙𑀢𑁂 𑀧𑀸𑀡𑀺𑀦𑀻𑀬𑁂𑀳𑀺… 𑀤𑀓𑁆𑀔𑀺𑀡𑀧𑀼𑀩𑁆𑀩𑀸 𑀲𑀤𑁆𑀤𑀸𑀦𑀁 𑀦𑀸𑀦𑀢𑁆𑀣𑀢𑁆𑀢𑀸 𑀩𑁆𑀬𑀥𑀺𑀓𑀭𑀡𑀢𑁆𑀢𑀸, 𑀯𑀘𑀦𑁂𑀧𑀻𑀢𑀺 𑀲𑀼𑀢𑁆𑀢𑁂 𑀯𑀺𑀚𑁆𑀚𑀫𑀸𑀦𑁂𑀧𑀺, 𑀅𑀬 𑀫𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁄 𑀧𑀭𑁂𑀳𑀺 𑀩𑀳𑀼𑀩𑁆𑀩𑀻𑀳𑀻𑀢𑀺 𑀯𑀼𑀘𑁆𑀘𑀢𑀺 𑀢𑀣𑀸𑀳𑀺 𑀩𑀳𑀯𑁄 𑀯𑀺𑀳𑀬𑁄 𑀬𑀲𑁆𑀲 𑀲𑁄 𑀩𑀳𑀼𑀩𑁆𑀩𑀻𑀳𑀺, 𑀬𑀣𑀸 𑀩𑀳𑀼𑀩𑁆𑀩𑀻𑀳𑀻𑀢𑀺 𑀅𑀜𑁆𑀜𑀧𑀤𑀢𑁆𑀣𑀧𑁆𑀧𑀥𑀸𑀦𑁄 𑀢𑀣𑀸 𑀅𑀬𑀫𑁆𑀧𑀺.

𑀲𑀫𑀼𑀘𑁆𑀘𑀻𑀢𑀺 𑀧𑀺𑀡𑁆𑀟𑀻𑀓𑀭𑀡𑀁, 𑀓𑁄 𑀲𑁄𑀢𑀺 𑀆𑀳- ‘𑀲𑀸𑀥𑀦𑀫𑁂𑀓’𑀫𑀺𑀘𑁆𑀘𑀸𑀤𑀺. 𑀏𑀓𑀁 𑀲𑀸𑀥𑀦𑀁 𑀏𑀓𑀁 𑀓𑀺𑀭𑀺𑀬𑀁 𑀯𑀸 𑀧𑀝𑀺𑀘𑁆𑀘 𑀘𑀻𑀬𑀫𑀸𑀦𑀢𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀓𑁂𑀲𑀦𑁆𑀢𑀺 𑀆𑀳- ‘𑀓𑀺𑀭𑀺𑀬𑀸𑀲𑀸𑀥𑀦𑀸𑀦’𑀦𑁆𑀢𑀺, 𑀓𑁂𑀦𑀸𑀢𑀺 𑀆𑀳- ‘𑀅𑀢𑁆𑀢𑀭𑀽𑀧𑀪𑁂𑀤𑁂𑀦𑀸’’𑀢𑀺. 𑀢𑀢𑁆𑀣 𑀤𑁂𑀯𑀤𑀢𑁆𑀢𑁄 𑀪𑀼𑀜𑁆𑀚𑀢𑀺 𑀢𑀺𑀝𑁆𑀞𑀢𑀺 𑀧𑀘𑀢𑀺𑀘𑀸𑀢𑀺 𑀲𑀸𑀥𑀦𑀫𑁆𑀧𑀝𑀺𑀘𑁆𑀘 𑀓𑀺𑀭𑀺𑀬𑀸𑀦𑀁 𑀅𑀢𑁆𑀢𑀭𑀽𑀧𑀪𑁂𑀤𑁂𑀦 𑀘𑀻𑀬𑀫𑀸𑀦𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀥𑀯𑁂 𑀘 𑀔𑀤𑀺𑀭𑁂 𑀘 𑀧𑀮𑀸𑀲𑁂 𑀘 𑀙𑀺𑀦𑁆𑀤𑀸𑀢𑀺 𑀓𑀺𑀭𑀺𑀬𑀫𑁆𑀧𑀝𑀺𑀘𑁆𑀘 𑀅𑀢𑁆𑀢𑀭𑀽𑀧𑀪𑁂𑀤𑁂𑀦 𑀲𑀸𑀥𑀦𑀸𑀦𑀁 𑀘𑀻𑀬𑀫𑀸𑀦𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀲𑁄𑀢𑀺 𑀲𑀫𑀼𑀘𑁆𑀘𑀬𑁄 𑀪𑀯𑀢𑀻𑀢𑀺 𑀲𑁂𑀲𑁄, 𑀓𑁂𑀲𑀦𑁆𑀢𑀺 𑀆𑀳- ‘𑀢𑀼𑀮𑁆𑀬 𑀩𑀮𑀸𑀦’𑀫𑀺𑀘𑁆𑀘𑀸𑀤𑀺.

𑀢𑀼𑀮𑁆𑀬𑀩𑀮𑀸𑀦𑀦𑁆𑀢𑀺 𑀇𑀫𑀺𑀦𑀸 𑀯𑀺𑀲𑀼𑀁 𑀧𑀥𑀸𑀦𑀪𑀸𑀯𑁂𑀦 𑀓𑀺𑀭𑀺𑀬𑀸𑀪𑀺𑀲𑀫𑁆𑀩𑀦𑁆𑀥𑀸 𑀅𑀜𑁆𑀜𑀫𑀜𑁆𑀜𑀸𑀦𑀧𑁂𑀓𑁆𑀔𑀢𑁆𑀢𑀫𑀸𑀳.

𑀅𑀦𑀺𑀬𑀢𑀓𑁆𑀓𑀫𑀬𑁄𑀕𑀧𑀚𑁆𑀚𑀸𑀦𑀦𑁆𑀢𑀺 𑀓𑀫𑁄 𑀘 𑀬𑁄𑀕𑀧𑀚𑁆𑀚𑀜𑁆𑀘, 𑀅𑀦𑀺𑀬𑀢𑀁 𑀓𑀫𑀬𑁄𑀕𑀧𑀚𑁆𑀚𑀁 𑀬𑁂𑀲𑀁 𑀲𑀤𑁆𑀤𑀸𑀦𑀁 𑀢𑁂𑀲𑀁, 𑀬𑀣𑁂𑀢𑁆𑀬𑀸𑀤𑀺𑀦𑀸 𑀢𑀢𑁆𑀣𑁄𑀤𑀸𑀳𑀭𑀡𑀁 𑀤𑀲𑁆𑀲𑁂𑀢𑀺, 𑀏𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 ‘‘𑀏𑀢𑁆𑀣 𑀕𑀯𑀸𑀤𑀻𑀦𑀁 𑀯𑀺𑀲𑀼𑀁 𑀧𑀥𑀸𑀦𑀪𑀸𑀯𑁂𑀦𑀸𑀦𑀬𑀦𑀓𑀺𑀭𑀺𑀬𑀸𑀪𑀺𑀲𑀫𑁆𑀩𑀦𑁆𑀥𑀸 𑀢𑀼𑀮𑁆𑀬𑀩𑀮𑀢𑀸 𑀕𑀯𑀸𑀤𑀻𑀦𑀁 𑀯𑀼𑀢𑁆𑀢𑀓𑁆𑀓𑀫𑁂𑀦𑁂𑀯 𑀦𑀬𑀦𑀸𑀪𑀸𑀯𑀸 𑀅𑀦𑀺𑀬𑀢𑀓𑁆𑀓𑀫𑀢𑀸 𑀕𑀯𑀸𑀤𑀻𑀦𑀁 𑀬𑀼𑀕𑀧𑀤𑀺 𑀦𑀬𑀦𑀸𑀪𑀸𑀯𑀸 𑀅𑀦𑀺𑀬𑀢 𑀬𑁄𑀕𑀧𑀚𑁆𑀚𑀢𑀸 𑀘 𑀳𑁄𑀢𑀺, 𑀢𑀣𑀸 𑀅𑀜𑁆𑀜𑀁 𑀢𑀸𑀤𑀺𑀲𑀫𑁆𑀧𑀻’’𑀢𑀺. 𑀅𑀦𑀼 𑀧𑀘𑁆𑀙𑀸 𑀧𑀥𑀸𑀦𑀸𑀦𑀼𑀭𑁄𑀥𑁂𑀦 (𑀘𑀬𑀦𑀁) 𑀅𑀦𑁆𑀯𑀸𑀘𑀬𑁄, 𑀢𑀁 𑀩𑁆𑀬𑀜𑁆𑀚𑀬𑀢𑀺 ‘𑀬𑀢𑁆𑀣𑁂’𑀘𑁆𑀘𑀸𑀤𑀺, 𑀢𑀤𑀦𑀼𑀭𑁄𑀥𑁂𑀦𑀸𑀢𑀺 𑀢𑀤𑀦𑀼𑀕𑀼𑀡𑁂𑀦, 𑀉𑀤𑀸𑀳𑀭𑀢𑀺 ‘𑀬𑀣𑁂’𑀘𑁆𑀘𑀸𑀤𑀺, 𑀪𑀺𑀓𑁆𑀔𑀸𑀕𑀫𑀦𑀫𑁂𑀢𑁆𑀣 𑀧𑀥𑀸𑀦𑀫𑀦𑁆𑀢𑀭𑀗𑁆𑀕𑀢𑁆𑀢𑀸 ¶ , 𑀦𑁂𑀢𑀭𑀁 𑀩𑀳𑀺𑀭𑀗𑁆𑀕𑀢𑁆𑀢𑀸, 𑀢𑀁 𑀓𑀭𑀡𑁂 𑀬𑀤𑀺 𑀕𑀸𑀯𑁄𑀧𑀺 𑀧𑀲𑁆𑀲𑀢𑀺 𑀢𑀸𑀧𑁆𑀬𑀸𑀦𑀬𑀢𑀺, 𑀏𑀢𑁆𑀣 𑀢𑀼 𑀕𑁄𑀲𑁆𑀲𑀸𑀦𑀬𑀦𑀁 𑀪𑀺𑀓𑁆𑀔𑀸𑀝𑀦𑀫𑀧𑁂𑀓𑁆𑀔𑀢𑁂, 𑀦𑁂𑀢𑀭𑀫𑀺𑀢𑀭𑀲𑁆𑀲… 𑀯𑀺𑀦𑀸𑀧𑀺 𑀢𑁂𑀦 𑀢𑀤𑀦𑀼𑀝𑁆𑀞𑀸𑀦𑀢𑁄. 𑀇𑀢𑀭𑀲𑁆𑀲 𑀇𑀢𑀭𑁂𑀦 𑀬𑁄 𑀕𑁄 𑀇𑀢𑀭𑁂𑀢𑀭𑀬𑁄𑀕𑁄, 𑀲𑁄 𑀘 𑀏𑀢𑀸𑀤𑀺𑀲𑁄𑀢𑀺 𑀆𑀳- ‘𑀅𑀜𑁆𑀜𑀫𑀜𑁆𑀜𑁂’𑀘𑁆𑀘𑀸𑀤𑀺.

𑀅𑀯𑀬𑀯𑀧𑁆𑀧𑀥𑀸𑀦𑁄 𑀘𑀸𑀢𑀺 𑀲𑀸𑀪𑀸𑀯𑀺𑀓𑀸𑀪𑀺𑀥𑀸𑀦𑀲𑀸𑀫𑀢𑁆𑀣𑀺𑀬𑁂𑀦𑀸𑀧𑀼𑀣𑀼𑀪𑀽𑀢𑁄 𑀘, 𑀯𑀼𑀢𑁆𑀢𑀺𑀯𑀬𑁂𑀦 𑀲𑀸𑀭𑀺𑀧𑀼𑀢𑁆𑀢𑀲𑀤𑁆𑀤𑁄 𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁄 𑀳𑁄𑀢𑀺 𑀫𑁄𑀕𑁆𑀕𑀮𑁆𑀮𑀸𑀦𑀲𑀤𑁆𑀤𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁄𑀧𑀻𑀢𑀺 𑀅𑀜𑁆𑀜𑀫𑀜𑁆𑀜𑀢𑁆𑀣𑁂 𑀧𑀥𑀸𑀦𑀢𑁄 𑀬𑀼𑀕𑀧𑀤𑁆𑀬𑀥𑀺𑀓𑀭𑀡𑀯𑀘𑀦𑁂 𑀲𑀢𑀺 𑀘𑀢𑁆𑀣 𑀲𑀫𑀸𑀲𑁄𑀢𑀺 𑀲𑁄-𑀬𑀫𑀥𑀺𑀓𑀭𑀡 𑀲𑀫𑀼𑀤𑀸𑀬𑁄 𑀉𑀪𑀬𑀧𑀤𑀸𑀦𑀼𑀕𑀢𑀉𑀪𑀬𑀢𑁆𑀣𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄𑀧𑀺 𑀬𑀼𑀕𑀧𑀤𑀺 𑀩𑀼𑀤𑁆𑀥𑀺𑀬𑀸 𑀕𑀬𑁆𑀳𑀫𑀸𑀦𑁄 𑀓𑀤𑀸𑀘𑀺 𑀉𑀩𑁆𑀪𑀽𑀢𑀸𑀯𑀬𑀯𑀪𑁂𑀤𑁄 𑀢𑁂𑀦𑁂𑀯 𑀲𑀸𑀪𑀸𑀯𑀺𑀓𑀸𑀪𑀺𑀥𑀸𑀦𑀲𑀸𑀫𑀢𑁆𑀣𑀺𑀬𑁂𑀦𑁂𑀘𑁆𑀘𑁂𑀯𑀫𑀯𑀬𑀯𑀧𑁆𑀧𑀥𑀸𑀦𑁄 𑀘, 𑀦𑀦𑀼 𑀘 𑀚𑀦𑀦𑀫𑀭𑀡𑀸𑀦𑀻𑀢𑀺 𑀯𑀺𑀭𑀼𑀤𑁆𑀥𑀸𑀦𑀁 𑀓𑀣𑀫𑁂𑀓𑁂𑀦𑀸𑀪𑀺𑀥𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑁂- 𑀲𑀩𑁆𑀩𑁄𑀧𑀺 𑀲𑀤𑁆𑀤𑁄 𑀧𑀬𑀼𑀚𑁆𑀚𑀫𑀸𑀦𑁄 (𑀇𑀢𑀭𑀻) 𑀢𑀭𑁂𑀦𑀸𑀯𑀥𑀸𑀭𑀡𑀁 𑀯𑀢𑁆𑀢𑀢𑁂, 𑀢𑁂𑀦 𑀏𑀓𑁂𑀓𑁄 𑀲𑀤𑁆𑀤𑁄 𑀏𑀓𑁂𑀓𑀲𑁆𑀲𑀢𑁆𑀣𑀲𑁆𑀲 𑀯𑀸𑀘𑀓𑁄, 𑀢𑀣𑀸𑀧𑀺 𑀬𑀣𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀢𑀺 𑀏𑀢𑁆𑀣 𑀩𑀳𑀼𑀯𑀘𑀦𑀲𑁆𑀲𑀜𑁆𑀜𑀣𑀸𑀦𑀼𑀧𑀧𑀢𑁆𑀢𑀺𑀬𑀸 𑀬𑀼𑀕𑀧𑀤𑁆𑀬𑀥𑀺𑀓𑀭𑀡𑀯𑀘𑀦𑀢𑀸 𑀳𑁄𑀢𑀻, 𑀢𑀣𑀸𑀢𑁆𑀭𑀸𑀧𑀺 𑀩𑀳𑀼𑀯𑀘𑀦𑀲𑁆𑀲𑀜𑁆𑀜𑀣𑀸𑀦𑀼𑀧𑀧𑀢𑁆𑀢𑀺𑀮𑀓𑁆𑀔𑀡𑁂𑀦 𑀲𑀸𑀫𑀢𑁆𑀣𑀺𑀬𑁂𑀦 𑀏𑀓𑁂𑀦𑀸𑀧𑁆𑀬𑀪𑀺𑀥𑀸𑀦𑀁 𑀳𑁄𑀢𑀺. 𑀇𑀢𑀺 𑀳𑁂𑀢𑀼𑀫𑁆𑀳𑀺, 𑀬𑀢𑁄 𑀏𑀯𑀫𑀯𑀬𑀯𑀧𑁆𑀧𑀥𑀸𑀦𑁄 𑀢𑀢𑁄𑀢𑀺 𑀅𑀢𑁆𑀣𑁄.

𑀩𑀳𑀼𑀢𑁆𑀢𑀸𑀢𑀺 𑀓𑀺𑀜𑁆𑀘𑀸𑀧𑀺 𑀯𑀸𑀓𑁆𑀬𑁂 𑀦𑁂𑀲𑀁 [𑀯𑀸𑀓𑁆𑀬𑁂𑀦𑁂𑀯𑁂𑀲𑀁 (𑀧𑁄𑀢𑁆𑀣𑀓𑁂)] 𑀯𑀺𑀲𑀼𑀁 𑀩𑀳𑁆𑀯𑀢𑁆𑀣𑀢𑀸, 𑀦 𑀳𑀺 𑀲𑀸𑀭𑀺𑀧𑀼𑀢𑁆𑀢𑀫𑀸𑀦𑀬𑀸𑀢𑀺 𑀯𑀼𑀢𑁆𑀢𑁂 𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲𑀸𑀧𑀺 𑀲𑀫𑁆𑀧𑀘𑁆𑀘𑀬𑁄 𑀪𑀯𑀢𑀺, 𑀢𑀣𑀸𑀧𑀺 𑀬𑀢𑁄 𑀯𑀼𑀢𑁆𑀢𑀺𑀯𑀺𑀲𑀬𑁂 𑀲𑀳𑀪𑀽𑀢𑀸𑀦𑀫𑁂𑀯𑁂𑀲𑀁 𑀯𑀺𑀲𑀼𑀁 𑀩𑀳𑁆𑀯𑀢𑁆𑀣𑀢𑀸, 𑀢𑀢𑁄 𑀢𑀢𑁆𑀣 𑀯𑀘𑀦𑀻𑀬𑀲𑁆𑀲 𑀅𑀢𑁆𑀣𑀲𑁆𑀲 𑀲𑀗𑁆𑀔𑁆𑀬𑀸𑀢𑁂𑀤𑁂𑀦 𑀩𑀳𑀼𑀢𑁆𑀢𑀁. 𑀲𑀫𑀸𑀳𑀭𑀡𑀁 𑀧𑀺𑀡𑁆𑀟𑀻𑀓𑀭𑀡𑀯𑀲𑁂𑀦 𑀲𑀁𑀳𑀭𑀡𑀁 𑀲𑀫𑀸𑀳𑀸𑀭𑁄, 𑀲𑁄 𑀘𑁂𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘𑀅𑀜𑁆𑀜𑀫𑀜𑁆𑀜𑁂’𑀘𑁆𑀘𑀸𑀤𑀺.

𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀇𑀢𑀭𑀻𑀢𑀭𑀬𑁄𑀕𑀲𑁆𑀲 𑀲𑀫𑀸𑀳𑀸𑀭𑀲𑁆𑀲 𑀘 𑀪𑀸𑀯𑀭𑀽𑀧𑀢𑁆𑀢𑀸 𑀅𑀤𑀩𑁆𑀩𑀭𑀽𑀧𑀢𑀸, 𑀢𑀣𑀸𑀧𑀻𑀢𑀭𑀻𑀢𑀭𑀬𑁄𑀕𑁂 𑀢𑀼 𑀬𑀣𑀸 𑀕𑀼𑀡𑀯𑀘 𑀦𑀸𑀦𑀁 ¶ 𑀲𑀼𑀓𑁆𑀓𑀁 𑀯𑀢𑁆𑀣𑀁 𑀲𑀼𑀓𑁆𑀓𑁄 𑀓𑀫𑁆𑀩𑀮𑁄 𑀲𑀼𑀓𑁆𑀓𑀸 𑀕𑀸𑀯𑀻𑀢𑀺 𑀦𑀺𑀲𑁆𑀲𑀬𑀪𑁂𑀤𑀢𑁄 𑀮𑀺𑀗𑁆𑀕𑀯𑀘𑀦𑀲𑀺𑀤𑁆𑀥𑀺, 𑀢𑀣𑀸 𑀢𑀤𑁆𑀥𑀫𑁆𑀫𑀸𑀦𑀫𑀪𑀺𑀥𑀸𑀦𑀢𑁄 𑀦𑀺𑀲𑁆𑀲𑀬𑀢𑁄 𑀮𑀺𑀗𑁆𑀕𑀯𑀘𑀦 𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸, 𑀲𑀁𑀳𑀢𑀺𑀧𑁆𑀧𑀥𑀸𑀦𑀢𑁆𑀢𑀸𑀘𑁂𑀓𑀯𑀘𑀦𑀦𑁆𑀢𑀺 𑀬𑀤𑀸 𑀩𑀳𑀼𑀦𑁆𑀦𑀁 𑀲𑀫𑀼𑀤𑀸𑀬𑁄 𑀢𑀺𑀭𑁄𑀳𑀺𑀢𑀸𑀯𑀬𑀯𑀪𑁂𑀤𑁄 𑀲𑀁𑀖𑀸𑀢𑁄 𑀧𑀓𑁆𑀓𑀫𑀻𑀬𑀢𑁂, 𑀢𑀤𑀸 𑀲𑀫𑀸𑀳𑀸𑀭𑁄𑀘𑁆𑀘𑁂𑀯 𑀲𑀁𑀳𑀢𑀺𑀧𑁆𑀧𑀥𑀸𑀦𑀢𑁆𑀢𑀸 𑀏𑀓𑀯𑀘𑀦𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀤𑀦𑀼𑀝𑁆𑀞𑀸𑀦𑀢𑁄𑀢𑀺 𑀢𑀲𑁆𑀲 𑀓𑀭𑀡𑀢𑁄. 𑀩𑁆𑀬𑀢𑀺𑀓𑀭𑁄 𑀫𑀺𑀲𑁆𑀲𑀢𑀸, 𑀩𑁆𑀬𑀢𑀺𑀓𑀭𑀁 𑀤𑀲𑁆𑀲𑁂𑀢𑀺 𑀧𑀸𑀡𑀺𑀘𑁆𑀘𑀸𑀤𑀺𑀦𑀸, 𑀧𑀘𑁆𑀘𑁂𑀓𑀁 𑀧𑀭𑀺𑀲𑀫𑀢𑁆𑀢𑀺𑀬𑀁 𑀯𑀸𑀓𑁆𑀬𑀩𑀳𑀼𑀢𑁆𑀢𑀁 𑀤𑀲𑁆𑀲𑁂𑀢𑀺 ‘𑀢𑀢𑁆𑀣 𑀳𑀺𑀘𑁆𑀘𑀸𑀤𑀺.

𑀘𑀓𑁆𑀔𑀼𑀜𑁆𑀘 𑀲𑁄𑀢𑀜𑁆𑀘, 𑀫𑀼𑀔𑀜𑁆𑀘 𑀦𑀸𑀲𑀺𑀓𑀸 𑀘, 𑀳𑀦𑀼 𑀘 𑀕𑀻𑀯𑀸 𑀘, 𑀙𑀯𑀺 𑀘 𑀫𑀁𑀲𑀜𑁆𑀘 𑀮𑁄𑀳𑀺𑀢𑀜𑁆𑀘, 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀚𑀭𑀸 𑀘 𑀫𑀭𑀡𑀜𑁆𑀘𑀸𑀢𑀺 𑀯𑀺𑀕𑁆𑀕𑀬𑁆𑀳 𑀲𑀫𑀸𑀲𑁄, ‘‘𑀲𑀫𑀸𑀳𑀸𑀭𑁂 𑀦𑀧𑀼𑀁𑀲𑀓’’𑀦𑁆𑀢𑀺 (𑁩-𑁨𑁦) 𑀲𑀩𑁆𑀩𑀢𑁆𑀣 𑀦𑀧𑀼𑀁𑀲𑀓𑀮𑀺𑀗𑁆𑀕𑀁, 𑀲𑁆𑀬𑀸𑀤𑀺𑀫𑁆𑀳𑀺 𑀫𑀼𑀔 𑀦𑀸𑀲𑀺𑀓𑀦𑁆𑀢𑀺𑀆𑀤𑀻𑀲𑀼 ‘‘𑀲𑁆𑀬𑀸𑀤𑀻𑀲𑀼 𑀭𑀲𑁆𑀲𑁄’’𑀢𑀺 (𑁩-𑁨𑁩) 𑀭𑀲𑁆𑀲𑁄. 𑀅𑀮𑀪𑀢𑀸 𑀕𑁄𑀫𑀼𑀔𑀁 𑀟𑀺𑀡𑁆𑀟𑀺𑀫𑁄 𑀪𑁂𑀭𑀺𑀯𑀺𑀲𑁂𑀲𑀸, 𑀆𑀴𑀫𑁆𑀩𑀭𑀁 𑀧𑀡𑀯𑁄, 𑀫𑀼𑀭𑀚𑁄 𑀫𑀼𑀤𑀗𑁆𑀕𑁄, 𑀫𑀤𑁆𑀤𑀯𑁄 𑀫𑀼𑀤𑀗𑁆𑀕𑁄. 𑀫𑀤𑁆𑀤𑀯𑀯𑀸𑀤𑀦𑀁 𑀧𑀡𑀯𑀯𑀸𑀤𑀦𑀜𑁆𑀘 𑀲𑀺𑀧𑁆𑀧𑀫𑀲𑁆𑀲 𑀫𑀤𑁆𑀤𑀯𑀺𑀓𑁄 𑀧𑀸𑀡𑀯𑀺𑀓𑁄, 𑀲𑀫𑁆𑀫𑀁 𑀓𑀁𑀲𑀢𑀸𑀴𑀁, 𑀢𑀸𑀴𑀁 𑀳𑀢𑁆𑀣𑀢𑀸𑀴𑀁, 𑀅𑀮𑀲𑀢𑀸 𑀘 𑀆𑀴𑀫𑁆𑀩𑀭𑁄 𑀘, 𑀫𑀼𑀭𑀚𑁄 𑀘, 𑀕𑁄𑀫𑀼𑀔𑁄 𑀘, 𑀲𑀗𑁆𑀔𑁄 𑀘 𑀟𑀺𑀡𑁆𑀟𑀺𑀫𑁄 𑀘, 𑀫𑀤𑁆𑀤𑀯𑀺𑀓𑁄 𑀘, 𑀧𑀸𑀡𑀯𑀺𑀓𑁄 𑀘, 𑀕𑀻𑀢𑀜𑁆𑀘 𑀯𑀸𑀤𑀺𑀢𑀜𑁆𑀘, 𑀲𑀫𑁆𑀫𑀜𑁆𑀘 𑀢𑀸𑀴𑀜𑁆𑀘𑀸𑀢𑀺 𑀯𑀺𑀕𑁆𑀕𑀳𑁄. 𑀬𑀼𑀕𑀲𑁆𑀲 𑀳𑀺𑀢𑀸 𑀬𑁄𑀕𑁆𑀕𑀸 𑀕𑁄𑀡𑀸, 𑀢𑁂𑀲𑀫𑀺𑀤𑀁 𑀬𑁄𑀕𑁆𑀕𑀁 𑀓𑀲𑀺𑀓𑀫𑁆𑀫𑀁, 𑀢𑀲𑁆𑀲 𑀅𑀗𑁆𑀕𑀁. 𑀢𑁂𑀦𑀸𑀳- ‘𑀓𑀲𑀺𑀪𑀡𑁆𑀟𑀸𑀦’𑀦𑁆𑀢𑀺, 𑀨𑀸𑀮𑁄𑀓𑀲𑀓𑁄, 𑀧𑀸𑀘𑀦𑀁 𑀧𑀢𑁄𑀤𑁄, 𑀬𑀼𑀕𑁄 𑀘 𑀦𑀗𑁆𑀕𑀮𑀜𑁆𑀘𑀸𑀢𑀺 𑀯𑀺𑀕𑁆𑀕𑀳𑁄. 𑀧𑀺𑀡𑁆𑀟𑀫𑀸𑀬𑀼𑀥𑀯𑀺𑀲𑁂𑀲𑁄, 𑀅𑀲𑀺 𑀘 𑀲𑀢𑁆𑀢𑀺 𑀘 𑀢𑁄𑀫𑀭𑀜𑁆𑀘 𑀧𑀺𑀡𑁆𑀟𑀜𑁆𑀘𑀸𑀢𑀺 𑀯𑀺𑀕𑁆𑀕𑀳𑁄. 𑀘𑀫𑁆𑀫𑀁 𑀲𑀭𑀯𑀸𑀭𑀡𑀨𑀮𑀓𑀁, 𑀓𑀮𑀸𑀧𑁄 𑀢𑀽𑀡𑀻𑀭𑀁, 𑀧𑀳𑀭𑀡𑀜𑁆𑀘 𑀆𑀯𑀭𑀡𑀜𑁆𑀘𑀸𑀢𑀺 𑀯𑀺𑀕𑁆𑀕𑀳𑁄. 𑀅𑀳𑀺 𑀘 𑀦𑀓𑀼𑀮𑁄 𑀘, 𑀩𑀻𑀴𑀸𑀭𑁄 𑀘 𑀫𑀽𑀲𑀺𑀓𑁄 𑀘, 𑀓𑀸𑀓𑁄 𑀘 𑀉𑀮𑀽𑀓𑁄 𑀘, 𑀦𑀸𑀕𑁄 𑀘 𑀲𑀼𑀧𑀡𑁆𑀡𑁄𑀘𑀸𑀢𑀺 𑀯𑀺𑀕𑁆𑀕𑀳𑁄. 𑀲𑀗𑁆𑀔𑁆𑀬𑀸 𑀘 𑀧𑀭𑀺𑀫𑀸𑀡𑀜𑁆𑀘 𑀲𑀗𑁆𑀔𑁆𑀬𑀸𑀧𑀭𑀺𑀫𑀸𑀡𑀁, 𑀢𑀢𑁆𑀣 𑀧𑀭𑀺𑀫𑀸𑀡𑀲𑀜𑁆𑀜𑀸𑀦𑀁 𑀬𑀣𑀸𑀤𑀻𑀖𑁄 𑀘 𑀫𑀚𑁆𑀛𑀺𑀫𑁄 𑀘 𑀤𑀻𑀖𑀫𑀚𑁆𑀛𑀺𑀫𑀁. 𑀏𑀓𑀓𑀜𑁆𑀘 𑀤𑀼𑀓𑀜𑁆𑀘𑀸𑀢𑀺 𑀯𑀺𑀕𑁆𑀕𑀳𑁄, 𑀤𑀼𑀓𑀢𑀺𑀓𑀸𑀤𑀻𑀲𑀼𑀧𑀺 𑀏𑀲𑁂𑀯𑀦𑀬𑁄.

𑀔𑀼𑀤𑁆𑀤𑀚𑀦𑁆𑀢𑀼 𑀲𑀺𑀬𑀸- 𑀦𑀝𑁆𑀞𑀺, 𑀅𑀣𑀯𑀸 𑀔𑀼𑀤𑁆𑀤𑀓𑁄𑀯 𑀬𑁄;

𑀲𑀢𑀁 𑀯𑀸 𑀧𑀲𑀢𑁂 𑀬𑁂𑀲𑀁, 𑀓𑁂𑀘𑀺 𑀆𑀦𑀓𑀼𑀮𑀸 𑀅𑀧𑀺.

𑀓𑀻𑀝𑁄 𑀘 𑀧𑀢𑀗𑁆𑀕𑁄 𑀘, 𑀓𑀼𑀦𑁆𑀣𑁄 𑀘 𑀓𑀺𑀧𑀺𑀮𑁆𑀮𑀺𑀓𑁄 𑀘, 𑀟𑀁𑀲𑁄 𑀘 𑀫𑀓𑀲𑁄 𑀘, 𑀫𑀓𑁆𑀔𑀺𑀓𑀸 𑀘 𑀓𑀺𑀧𑀺𑀮𑁆𑀮𑀺𑀓𑀸𑀘𑀸𑀢𑀺 𑀯𑀺𑀕𑁆𑀕𑀳𑁄. 𑀧𑀘𑀦𑀘𑀡𑁆𑀟𑀸𑀮𑀸𑀢𑀺 𑀑 𑀭𑀩𑁆𑀪𑀺𑀓𑀸𑀤𑀻𑀦𑀁 ¶ 𑀭𑀼𑀴𑁆𑀳𑀻𑀲𑀜𑁆𑀜𑀸. 𑀉𑀭𑀩𑁆𑀪𑁂 𑀳𑀦𑁆𑀢𑁆𑀯𑀸 𑀚𑀻𑀯𑀢𑀻𑀢𑀺 𑀑𑀭𑀩𑁆𑀪𑀺𑀓𑁄, 𑀏𑀯𑀁 𑀲𑁂𑀲𑁂𑀲𑀼. 𑀲𑀸𑀦𑀁 𑀲𑀼𑀦𑀔𑀁 𑀧𑀘𑀢𑀻𑀢𑀺 𑀲𑀧𑀸𑀓𑁄, 𑀯𑁂𑀦𑀸 𑀢𑀘𑁆𑀙𑀓𑀸, 𑀭𑀣𑀓𑀸𑀭𑀸 𑀘𑀫𑁆𑀫𑀓𑀸𑀭𑀸. 𑀲𑀸𑀥𑀸𑀭𑀡𑀸 𑀲𑀫𑀸𑀦𑀸, 𑀘𑀭𑀡𑀲𑀤𑁆𑀤𑁄- 𑀬𑀁 𑀇𑀥 𑀕𑀬𑁆𑀳𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀬𑀣𑀸 𑀲𑀓𑀫𑀚𑁆𑀛𑀬𑀦𑀸𑀬 𑀘𑀭𑀻𑀬𑀦𑁆𑀢𑀺 𑀯𑀢𑀸𑀦𑁆𑀬𑁂𑀢𑁂𑀲𑀽𑀢𑀺 𑀘𑀭𑀡𑀸𑀦𑀺, 𑀓𑀞𑀸𑀤𑀺𑀯𑀸𑀛𑀸𑀦𑁆𑀬𑀚𑁆𑀛𑀬𑀦𑀸𑀦𑀺 𑀲𑀸𑀔𑀸𑀲𑀜𑁆𑀜𑀓𑀸𑀦𑀺. 𑀬𑀲𑁆𑀫𑀸 𑀏𑀢𑁂𑀳𑀺 𑀘𑀭𑀢𑀺 𑀅𑀭𑀺𑀬𑀲𑀸𑀯𑀓𑁄 𑀕𑀘𑁆𑀙𑀢𑀺 𑀅𑀫𑀢𑀁 𑀤𑀺𑀲𑀁, 𑀢𑀲𑁆𑀫𑀸 𑀘𑀭𑀡𑀸𑀦𑀺 𑀲𑀻𑀮𑀸𑀤𑀬𑁄 𑀧𑀡𑁆𑀡𑀭𑀲 𑀥𑀫𑁆𑀫𑀸. 𑀢𑁂𑀦𑀸𑀳- ‘𑀓𑀞𑀸𑀤𑀻𑀳𑀻’𑀢𑀺𑀆𑀤𑀺, 𑀓𑀞𑀸𑀤𑀻𑀳𑀻𑀢𑀺 𑀧𑀲𑀺𑀤𑁆𑀥𑀺𑀯𑀲𑁂𑀦 𑀓𑀫𑀸𑀢𑀺𑀓𑁆𑀓𑀫𑁂𑀦𑀸𑀧𑀺 𑀯𑀼𑀢𑁆𑀢𑀁, 𑀢𑀢𑁄 𑀆𑀤𑀺𑀲𑀤𑁆𑀤𑁂𑀦 𑀅𑀢𑀺𑀲𑀸𑀤𑀬𑁄 𑀕𑀬𑁆𑀳𑀦𑁆𑀢𑀺. 𑀅𑀢𑀺𑀲𑁂𑀦 𑀪𑀸𑀭𑀤𑁆𑀯𑀸𑀚𑁂𑀦 𑀓𑀞𑁂𑀦 𑀯𑀼𑀢𑁆𑀢𑀁 𑀯𑀺𑀤𑀦𑁆𑀢𑁆𑀬𑀥𑀻𑀬𑀦𑁆𑀢𑀺 𑀯𑀸𑀢𑀺 ‘‘𑀅𑀜𑁆𑀜𑀲𑁆𑀫𑀺’’𑀢𑀺 (𑁪-𑁧𑁨𑁧) 𑀡𑁄, ‘‘𑀮𑁄𑀧𑁄’’𑀢𑀺 (𑁪-𑁧𑁨𑁩) 𑀮𑁄𑀧𑁄 𑀅𑀢𑀺𑀲𑀸 𑀪𑀸𑀭𑀤𑁆𑀯𑀸𑀚𑀸 𑀓𑀞𑀸. 𑀓𑀮𑀸𑀧𑀺𑀦𑀸 𑀯𑀼𑀢𑁆𑀢𑀁 𑀯𑀺𑀤𑀦𑁆𑀢𑁆𑀬𑀥𑀻𑀬𑀦𑁆𑀢𑀺 𑀯𑀸𑀢𑀺, 𑀢𑁂𑀦𑁂𑀯 𑀡𑁄, 𑀓𑀮𑀸𑀧𑀸, 𑀓𑀞𑀸 𑀆𑀤𑀺 𑀬𑁂𑀲𑀁 𑀢𑁂 𑀓𑀞𑀸𑀤𑀬𑁄, 𑀢𑁂𑀳𑀺 𑀅𑀚𑁆𑀛𑁂𑀦𑀯𑀺𑀲𑁂𑀲𑁂 𑀘 𑀧𑀼𑀭𑀺𑀲𑁂 𑀘 𑀉𑀧𑀘𑀸𑀭𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀲𑀻𑀮𑀸𑀤𑀬𑁄𑀢𑀺𑀆𑀤𑀺𑀲𑀤𑁆𑀤𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀬𑁄 𑀕𑀬𑁆𑀳𑀦𑁆𑀢𑀺. 𑀲𑀻𑀮𑀜𑁆𑀘 𑀧𑀜𑁆𑀜𑀸𑀡𑀜𑁆𑀘, 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘 𑀯𑀺𑀚𑁆𑀚𑀸 𑀘 𑀘𑀭𑀡𑀜𑁆𑀘𑀸𑀢𑀺 𑀯𑀺𑀕𑁆𑀕𑀳𑁄. 𑀏𑀓𑀢𑁄 𑀅𑀚𑁆𑀛𑀬𑀦𑀫𑁂𑀢𑁂𑀲𑀽𑀢𑀺 𑀏𑀓𑀚𑁆𑀛𑀬𑀦𑀸𑀦𑀺, 𑀧𑀓𑀞𑀸𑀦𑀺 𑀯𑀘𑀦𑀸𑀦𑀺 𑀧𑀸𑀯𑀘𑀦𑀸𑀦𑀺 𑀲𑀤𑁆𑀥𑀫𑁆𑀫𑁄, 𑀏𑀓𑀚𑁆𑀛𑀬𑀦𑀸𑀦𑀺 𑀘 𑀢𑀸𑀦𑀺 𑀧𑀸𑀯𑀘𑀦𑀸𑀦𑀺 𑀘 𑀢𑁂𑀲𑀁, 𑀤𑀻𑀖𑁄 𑀘 𑀤𑀻𑀖𑀸𑀕𑀫𑁄 𑀘 𑀫𑀚𑁆𑀛𑀺𑀫𑁄 𑀘 𑀫𑀚𑁆𑀛𑀺𑀫𑀸𑀕𑀫𑁄 𑀘, 𑀏𑀓𑀼𑀢𑁆𑀢𑀭𑁄 𑀘 𑀅𑀗𑁆𑀕𑀼𑀢𑁆𑀢𑀭𑀸𑀕𑀫𑁄 𑀘 𑀲𑀁𑀬𑀼𑀢𑁆𑀢𑀸𑀕𑀫𑁄 𑀘, 𑀔𑀦𑁆𑀥𑀓𑁄 𑀘 𑀯𑀺𑀪𑀗𑁆𑀕𑁄𑀘𑀸𑀢𑀺 𑀯𑀺𑀕𑁆𑀕𑀳𑁄.

𑀢𑁂𑀲𑀦𑁆𑀢𑀺 𑀇𑀫𑀺𑀦𑀸 𑀮𑀺𑀗𑁆𑀕𑀯𑀺𑀲𑁂𑀲𑀸𑀦𑀦𑁆𑀢𑀺 𑀙𑀝𑁆𑀞𑀺𑀬𑀦𑁆𑀢𑀢𑀁 𑀤𑀻𑀧𑁂𑀢𑀺, 𑀇𑀢𑁆𑀣𑀻 𑀘 𑀧𑀼𑀫𑀸 𑀘, 𑀤𑀸𑀲𑀻 𑀘 𑀤𑀸𑀲𑁄 𑀘, 𑀘𑀻𑀯𑀭𑀜𑁆𑀘 𑀧𑀺𑀡𑁆𑀟𑀧𑀸𑀢𑁄 𑀘 𑀲𑁂𑀦𑀸𑀲𑀦𑀜𑁆𑀘 𑀕𑀺𑀮𑀸𑀦𑀧𑀘𑁆𑀘𑀬𑁄 𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁄 𑀘, 𑀢𑀺𑀡𑀜𑁆𑀘 𑀓𑀝𑁆𑀞𑁄 𑀘 𑀲𑀸𑀔𑀸 𑀘 𑀧𑀮𑀸𑀲𑁄 𑀘𑀸𑀢𑀺 𑀯𑀺𑀕𑁆𑀕𑀳𑁄. 𑀙𑁂𑀓𑁄 𑀤𑀓𑁆𑀔𑁄, 𑀧𑀼𑀩𑁆𑀩𑀸 𑀘 𑀧𑀭𑀸𑀘𑀸𑀢𑀺𑀆𑀤𑀺𑀦𑀸 𑀯𑀺𑀕𑁆𑀕𑀳𑁄.

𑀧𑀼𑀩𑁆𑀩𑀤𑀓𑁆𑀔𑀺𑀡𑀦𑁆𑀢𑀺𑀆𑀤𑀻𑀲𑀼 ‘‘𑀩𑁆𑀬𑀜𑁆𑀚𑀦𑁂 𑀤𑀻𑀖𑀭𑀲𑁆𑀲𑀸’’𑀢𑀺 (𑁧-𑁩𑁩) 𑀭𑀲𑁆𑀲𑁄. 𑀓𑀸𑀲𑁄 𑀘 𑀓𑀼𑀲𑁄 𑀘 𑀉𑀲𑀺𑀭𑁄 𑀘 𑀩𑀻𑀭𑀡𑀜𑁆𑀘, 𑀫𑀼𑀜𑁆𑀚𑀜𑁆𑀘 𑀩𑀩𑁆𑀩𑀚𑀜𑁆𑀘𑀸𑀢𑀺 𑀯𑀺𑀕𑁆𑀕𑀳𑁄. 𑀔𑀤𑀺𑀭𑁄 𑀘 𑀧𑀮𑀸𑀲𑁄𑀘𑀸𑀢𑀺𑀆𑀤𑀺𑀦𑀸 𑀘, 𑀕𑀚𑁄 𑀘 𑀕𑀯𑀚𑁄 𑀘𑀸𑀢𑀺𑀆𑀤𑀺𑀦𑀸 𑀘, 𑀳𑀢𑁆𑀣𑀻 𑀘 𑀕𑁄𑀘 𑀅𑀲𑁆𑀲𑁄 𑀘 𑀯𑀴𑀯𑀸𑀘𑀸𑀢𑀺 𑀘, 𑀳𑀁𑀲𑁄 𑀘 𑀩𑀮𑀸𑀯𑀸 𑀘𑀸𑀢𑀺𑀆𑀤𑀺𑀦𑀸 𑀘, 𑀩𑀓𑁄 𑀘 𑀩𑀮𑀸𑀓𑀸𑀘𑀸𑀢𑀺 𑀘. 𑀳𑀺𑀭𑀜𑁆𑀜𑀜𑁆𑀘 𑀲𑀼𑀯𑀡𑁆𑀡𑁄 𑀘, 𑀫𑀡𑀺 𑀘 𑀲𑀗𑁆𑀔𑁄 𑀘 𑀫𑀼𑀢𑁆𑀢𑀸 𑀘 𑀯𑁂𑀴𑀼𑀭𑀺𑀬𑁄 𑀘 𑀚𑀸𑀢𑀭𑀽𑀧𑀜𑁆𑀘 𑀭𑀚𑀢𑀜𑁆𑀘𑀸𑀢𑀺 𑀘, 𑀲𑀸𑀮𑀺 𑀘 ¶ 𑀬𑀯𑀓𑁄𑀘𑀸𑀢𑀺𑀆𑀤𑀺𑀦𑀸 𑀘, 𑀲𑀸𑀓𑀜𑁆𑀘 𑀲𑀼𑀯𑀜𑁆𑀘𑀸𑀢𑀺𑀆𑀤𑀺𑀦𑀸𑀘, 𑀓𑀸𑀲𑀺𑀬𑁄 𑀘 𑀓𑁄𑀲𑀮𑀸𑀘𑀸𑀢𑀺𑀆𑀤𑀺𑀦𑀸 𑀘 𑀯𑀺𑀕𑁆𑀕𑀳𑁄, 𑀚𑀦𑀧𑀤𑀯𑀸𑀘𑀺𑀦𑀸 𑀘 𑀩𑀳𑀼𑀯𑀘𑀦𑀦𑁆𑀢𑀸.

𑀏𑀓𑀯𑀻𑀲𑀢𑀺𑀘𑁆𑀘𑀸𑀤𑀺𑀦𑁄 𑀏𑀓𑀜𑁆𑀘 𑀢𑀁 𑀯𑀻𑀲𑀢𑀺𑀘𑀸𑀢𑀺 𑀯𑀺𑀲𑁂𑀲𑀦𑀲𑀫𑀸𑀲𑁄 𑀯𑀸 𑀲𑀺𑀬𑀸, 𑀏𑀓𑀜𑁆𑀘 𑀯𑀻𑀲𑀢𑀺 𑀘 𑀏𑀓𑀯𑀻𑀲𑀢𑀻𑀢𑀺 𑀘𑀢𑁆𑀣𑀲𑀫𑀸𑀲𑁄 𑀯𑀸, 𑀲𑀫𑀸𑀳𑀸𑀭𑁂 𑀦𑀧𑀼𑀁𑀲𑀓𑀢𑁆𑀢𑀦𑁆𑀢𑀼 𑀦 𑀧𑀧𑁆𑀧𑁄𑀢𑀺, ‘‘𑀦𑀸𑀦𑀼𑀲𑀸𑀲𑀦𑀻𑀬𑀁 𑀮𑀺𑀗𑁆𑀕𑀁 𑀲𑁄𑀓𑀦𑀺𑀲𑁆𑀲𑀬𑀢𑁆𑀢𑀸 𑀮𑀺𑀗𑁆𑀕𑀲𑁆𑀲𑁂’’𑀢𑀺 𑀮𑁄𑀓𑁂 𑀦𑀧𑀼𑀁𑀲𑀓𑀮𑀺𑀗𑁆𑀕𑀲𑁆𑀲𑁂𑀳𑀸𑀦𑀪𑀺𑀥𑀸𑀦𑀢𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑀁 𑀦 𑀪𑀯𑀺𑀲𑁆𑀲𑀢𑀻𑀢𑁆𑀬𑀥𑀺𑀧𑁆𑀧𑀸𑀬𑁄, 𑀲𑀪𑀸𑀧𑀭𑀺𑀲𑀸𑀬𑀸𑀢𑀺 𑀜𑀸𑀧𑀓𑀢𑁄 𑀯𑀸 𑀲𑀫𑀸𑀳𑀸𑀭𑁂 𑀦𑀧𑀼𑀁𑀲𑀓𑀮𑀺𑀗𑁆𑀕𑀫𑀢𑁆𑀭 𑀩𑁆𑀬𑀪𑀺𑀘𑀭𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀼𑀩𑁆𑀩𑀧𑁆𑀧𑀬𑁄𑀕𑁄-𑀪𑀺𑀫𑀢𑁄𑀢𑀺 𑀉𑀧𑀲𑀚𑁆𑀚𑀦𑀲𑀜𑁆𑀜𑀓𑀲𑁆𑀲 𑀲𑁆𑀬𑀸𑀤𑀻𑀢𑀺 𑀧𑀞𑀫𑀸𑀬 𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀲𑀫𑀸𑀲𑁂 𑀧𑀼𑀩𑁆𑀩𑀦𑀺𑀧𑀸𑀢𑁄 ‘‘𑀉𑀧𑀲𑀚𑁆𑀚𑀦𑀁 𑀧𑀼𑀩𑁆𑀩’’𑀫𑀺𑀘𑁆𑀘𑀦𑁂𑀦 (𑁨-𑁨-𑁩𑁧) 𑀇𑀝𑁆𑀞𑁄 𑀓𑀫𑀲𑁆𑀲 𑀧𑀥𑀸𑀦𑀪𑀸𑀯𑁂𑀦 𑀯𑀢𑁆𑀢𑀼𑀫𑀺𑀝𑁆𑀞𑀢𑁆𑀢𑀸𑀢𑀺 ‘‘𑀲𑁆𑀬𑀸𑀤𑀺𑀲𑁆𑀬𑀸𑀤𑀺𑀦𑁂𑀓𑀢𑁆𑀣’’𑀦𑁆𑀢𑀺 (𑁩-𑁧) 𑀏𑀢𑁆𑀣 𑀲𑁆𑀬𑀸𑀤𑀻𑀢𑀺 𑀧𑀞𑀫𑀸𑀦𑀺𑀤𑁆𑀤𑀺𑀝𑁆𑀞𑀲𑁆𑀲𑀸𑀲𑀗𑁆𑀔𑁆𑀬𑀸𑀤𑀺𑀦𑁄 𑀧𑀼𑀩𑁆𑀩𑀫𑀯𑀝𑁆𑀞𑀸𑀦𑀢𑁄 𑀲𑁆𑀬𑀸𑀤𑀺𑀦𑁂𑀢𑀺 𑀢𑀢𑀺𑀬𑀸𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀧𑀘𑁆𑀙𑀸𑀯𑀝𑁆𑀞𑀸𑀦𑀢𑁄 ‘‘𑀲𑁆𑀬𑀸𑀤𑀺𑀲𑁆𑀬𑀸𑀤𑀺𑀦𑀸’’𑀢𑀺 𑀲𑀼𑀢𑁆𑀢𑁂 𑀧𑀝𑀺𑀧𑀸𑀝𑀺𑀬𑀸 𑀧𑀥𑀸𑀦𑀪𑀸𑀯𑁂𑀦 𑀯𑀢𑁆𑀢𑀼𑀫𑀺𑀝𑁆𑀞𑀢𑁆𑀢𑀸.

𑀧𑀭𑀧𑁆𑀧𑀬𑁄𑀕𑁄-𑀪𑀺𑀫𑀢𑁄𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀼𑀢𑁆𑀢𑁂𑀦 𑀧𑀼𑀩𑁆𑀩𑀦𑀺𑀧𑀸𑀢𑁂 𑀧𑀢𑁆𑀢𑁂 ‘‘𑀭𑀸𑀚𑀤𑀦𑁆𑀢𑀸𑀤𑀻𑀲𑀼 𑀧𑀭’’𑀦𑁆𑀢𑀻𑀫𑀺𑀦𑀸 (𑁨-𑁨-𑁩𑁦) 𑀧𑀭𑀦𑀺𑀧𑀸𑀢𑁄-𑀪𑀺𑀫𑀢𑁄, 𑀯𑀘𑀦𑁂𑀦𑀸𑀢𑀺- ‘‘𑀩𑀳𑀼𑀮’’𑀦𑁆𑀢𑀺 𑀯𑀘𑀦𑁂𑀦, 𑀧𑀼𑀩𑁆𑀩𑀓𑀸 𑀮𑀬𑀼𑀢𑁆𑀢𑀲𑁆𑀲 𑀧𑀭𑀧𑁆𑀧𑀬𑁄𑀕𑁄-𑀪𑀺𑀫𑀢𑁄𑀢𑀺 𑀭𑀸𑀚𑀤𑀦𑁆𑀢𑀸𑀤𑀺𑀧𑀸𑀞𑀢𑁄 𑀏𑀯𑀸-𑀪𑀺𑀫𑀢𑁄.

𑀓𑀫𑀫𑁆𑀧𑀘𑁆𑀘𑀦𑀸𑀤𑀭𑀸𑀢𑀺 𑀇𑀫𑀺𑀦𑀸 𑀧𑀥𑀸𑀦𑀪𑀸𑀯𑁂𑀦𑀸-𑀓𑁆𑀓𑀫𑀲𑁆𑀲 𑀯𑀢𑁆𑀢𑀼𑀫𑀺𑀝𑁆𑀞𑀢𑁆𑀢𑀫𑀸𑀳. 𑀲𑀭𑁄 𑀆𑀤𑀺 𑀬𑀲𑁆𑀲 𑀢𑀁 𑀲𑀭𑀸𑀤𑀺, 𑀲𑀗𑁆𑀔𑁄 𑀘 𑀤𑀼𑀦𑁆𑀤𑀼𑀪𑀺 𑀘 𑀯𑀻𑀡𑀸 𑀘, 𑀉𑀤𑀼𑀓𑁆𑀔𑀮𑀜𑁆𑀘 𑀫𑀼𑀲𑀮𑁄 𑀘, 𑀥𑀦𑀧𑀢𑀺 𑀘 𑀭𑀸𑀫𑁄 𑀘 𑀓𑁂𑀲𑀯𑁄𑀘𑀸𑀢𑀺 𑀯𑀺𑀕𑁆𑀕𑀳𑁄. 𑀚𑀁𑀤𑀁𑀲𑀤𑁆𑀤𑀸 𑀚𑀸𑀬𑀸𑀲𑀤𑁆𑀤𑀲𑀫𑀸𑀦𑀢𑁆𑀣𑀸 𑀅𑀲𑀗𑁆𑀔𑁆𑀬𑀸-𑀚𑀜𑁆𑀘 𑀧𑀢𑀺 𑀘, 𑀤𑀜𑁆𑀘 𑀧𑀢𑀺𑀘𑀸𑀢𑀺 𑀯𑀺𑀕𑁆𑀕𑀳𑁄, 𑀅𑀯𑀦𑁆𑀢𑀬𑁄 𑀘 𑀅𑀲𑁆𑀲𑀓𑀸𑀘, 𑀅𑀕𑁆𑀕𑀺 𑀘 𑀇𑀦𑁆𑀤𑁄𑀘𑀸𑀢𑀺 𑀯𑀺𑀕𑁆𑀕𑀳𑁄, 𑀢𑀁𑀦𑀺𑀯𑀸𑀲𑀺𑀫𑁆𑀳𑀺 𑀕𑀳𑀺𑀢𑁂 𑀅𑀯𑀦𑁆𑀢𑀺 𑀘 𑀅𑀲𑁆𑀲𑀓𑁄𑀘𑀸𑀢𑀺 𑀏𑀓𑀢𑁆𑀢𑁂𑀦𑀧𑀺 𑀯𑀺𑀕𑁆𑀕𑀳𑁄 𑀯𑀢𑁆𑀢𑀢𑀺. 𑀤𑁆𑀯𑀦𑁆𑀤𑀲𑀫𑀸𑀲𑁄- 𑀬𑀁 𑀤𑁆𑀯𑀦𑁆𑀤𑀲𑀤𑀺𑀲𑀢𑁆𑀢𑀸 𑀤𑁆𑀯𑀦𑁆𑀤𑁄, 𑀤𑁆𑀯𑁂 𑀘 𑀤𑁆𑀯𑁂 𑀘 𑀧𑀤𑀸𑀦𑀺 𑀤𑁆𑀯𑀦𑁆𑀤𑀸𑀦𑀻𑀢𑀺 𑀳𑀺 𑀉𑀪𑀬𑀢𑁆𑀣𑀧𑁆𑀧𑀥𑀸𑀦𑁄- 𑀬𑀁 𑀤𑁆𑀯𑀦𑁆𑀤𑀲𑀤𑁆𑀤𑁄.

𑀅𑀣 ‘‘𑀲𑀫𑀸𑀳𑀸𑀭𑁂 𑀦𑀧𑀼𑀁𑀲𑀓’’𑀦𑁆𑀢𑀺 (𑁩-𑁨𑁦) 𑀯𑀺𑀚𑁆𑀚𑀫𑀸𑀦𑁂 𑀓𑀺𑀁 ‘‘𑀲𑀗𑁆𑀔𑁆𑀬𑀸𑀤𑀻’’ 𑀢𑀺 𑀇𑀫𑀺𑀦𑀸 ¶ 𑀲𑀢𑁆𑀣𑀕𑀸𑀭𑀯𑀓𑀭𑁂𑀦𑀸𑀢𑀺 𑀆𑀲𑀗𑁆𑀓𑀺𑀬 𑀘𑁄𑀤𑁂𑀢𑀺 ‘𑀦𑀦𑀼𑀘𑁂’𑀘𑁆𑀘𑀸𑀤𑀺. 𑀢𑀣𑀸𑀳𑀺𑀘𑁆𑀘𑀸𑀤𑀺𑀦𑀸 ‘‘𑀲𑀫𑀸𑀳𑀸𑀭𑁂 𑀦𑀧𑀼𑀁𑀲𑀓’’𑀦𑁆𑀢𑁂𑀯 𑀲𑀺𑀚𑁆𑀛𑀦𑀁 𑀲𑀫𑀢𑁆𑀣𑁂𑀢𑀺. 𑀬𑀣𑀸𑀯𑀼𑀢𑁆𑀢𑀘𑁄𑀤𑀦𑀸𑀘𑀸𑀮𑀦𑁂 𑀧𑀭𑀸𑀥𑀺𑀧𑁆𑀧𑀸𑀬𑀁 𑀧𑀭𑀺𑀓𑀧𑁆𑀧𑁂𑀦𑁆𑀢𑁄’𑀘𑀢𑁆𑀣𑁂’𑀢𑀺𑀆𑀤𑀺𑀫𑀸𑀳.

𑀦𑁂𑀢𑀺 𑀇𑀫𑀺𑀦𑀸 𑀘𑀢𑁆𑀣𑁂𑀢𑀺𑀆𑀤𑀺𑀦𑀸 𑀓𑀢𑀧𑀭𑀺𑀓𑀧𑁆𑀧𑀦𑀸 𑀦 𑀲𑀺𑀚𑁆𑀛𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀢𑀢𑁆𑀣 𑀳𑁂𑀢𑀼𑀫𑀸𑀳- ‘𑀲𑀫𑁆𑀩𑀦𑁆𑀥𑀲𑁆𑀲 𑀧𑀼𑀭𑀺𑀲𑀸𑀥𑀻𑀦𑀢𑁆𑀢𑀸’𑀢𑀺, 𑀲𑀢𑀺𑀘𑁂𑀘𑁆𑀘𑀸𑀤𑀺𑀦𑀸 ‘𑀲𑀫𑀸𑀳𑀸𑀭𑁂 𑀦𑀧𑀼𑀁𑀲𑀓’𑀦𑁆𑀢𑁂𑀢𑁆𑀣 𑀯𑀺𑀲𑁂𑀲𑀦𑀕𑁆𑀕𑀳𑀡𑁂 𑀧𑀬𑁄𑀚𑀦𑀁 𑀯𑀢𑁆𑀯𑀸 ‘𑀲𑀗𑁆𑀔𑁆𑀬𑀸𑀤𑀻’𑀢𑀺 𑀇𑀫𑀲𑁆𑀲 𑀦𑀺𑀭𑀢𑁆𑀣𑀓𑀢𑁆𑀢𑀫𑁂𑀯 𑀣𑀺𑀭𑀻𑀓𑀭𑁄𑀢𑀺.

𑀧𑀬𑁄𑀚𑀦𑁂𑀢𑀺 𑀮𑀸𑀖𑀯𑀧𑁆𑀧𑀬𑁄𑀚𑀦𑁂;

𑀲𑀫𑁆𑀩𑀦𑁆𑀥𑀻𑀬𑀢𑀻𑀢𑀺 𑀯𑀺𑀲𑁂𑀲𑀦𑀕𑁆𑀕𑀳𑀡𑀁 𑀲𑀫𑁆𑀩𑀦𑁆𑀥𑀻𑀬𑀢𑀺;

𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 ‘𑀲𑀗𑁆𑀔𑁆𑀬𑀸𑀤𑀻’𑀲𑀼𑀢𑁆𑀢𑁂;

𑀢𑀦𑁆𑀦𑁂𑀢𑀺 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑀁 𑀘𑁄𑀤𑀦𑀁 𑀦𑀺𑀯𑀢𑁆𑀢𑁂𑀢𑀺.

‘𑀲𑀗𑁆𑀔𑁆𑀬𑀸𑀤𑀻’𑀢𑀺 𑀲𑀼𑀢𑁆𑀢𑀲𑁆𑀲 𑀲𑀸𑀢𑁆𑀣𑀓𑀢𑁆𑀢𑀫𑀸𑀳- ‘𑀘𑀢𑁆𑀣𑀲𑀫𑀸𑀲𑀸𑀦𑀦𑁆𑀢𑀭’𑀫𑀺𑀘𑁆𑀘𑀸𑀤𑀺𑀦𑀸. 𑀏𑀓𑀢𑁆𑀢𑀩𑁆𑀬𑀧𑀤𑁂𑀲𑁄 𑀓𑀸𑀢𑀩𑁆𑀩𑁄𑀢𑀺 ‘‘𑀲𑀗𑁆𑀔𑁆𑀬𑀸𑀧𑀼𑀩𑁆𑀩𑁄 𑀤𑀺𑀕𑀽’’𑀢𑀺 (𑁨-𑁧-𑁫𑁨) 𑀲𑀗𑁆𑀔𑁆𑀬𑀸𑀧𑀼𑀩𑁆𑀩𑀲𑁆𑀲 𑀲𑀫𑀸𑀲𑀲𑁆𑀲 𑀤𑀺𑀕𑀼𑀲𑀜𑁆𑀜𑀁 𑀯𑀺𑀥𑀸𑀬 𑀢𑀤𑀢𑁆𑀣𑀲𑁆𑀲 ‘‘𑀤𑀺𑀕𑀼𑀭𑁂𑀓𑀯𑀘𑀦’’𑀦𑁆𑀢𑀻𑀫𑀺𑀦𑀸 (𑁨-𑁪-𑁧) 𑀏𑀓𑀢𑁆𑀢𑀩𑁆𑀬𑀧𑀤𑁂𑀲𑁄 𑀧𑀭𑁂𑀳𑀺 𑀯𑀺𑀬 𑀓𑀸𑀢𑀩𑁆𑀩𑁄.

𑀲𑀫𑀸𑀳𑀭𑀡𑀁 𑀲𑀫𑀸𑀳𑀸𑀭𑁄𑀢𑀺 𑀇𑀫𑀺𑀦𑀸 𑀪𑀸𑀯𑀲𑀸𑀥𑀦𑁄-𑀬𑀁 𑀲𑀫𑀸𑀳𑀸𑀭𑀲𑀤𑁆𑀤𑁄. 𑀬𑀤𑀺 𑀲𑀫𑀸𑀳𑀭𑀻𑀬𑀢𑀻𑀢𑀺 𑀲𑀫𑀸𑀳𑀸𑀭𑁄𑀢𑀺 𑀓𑀫𑁆𑀫𑀲𑀸𑀥𑀦𑁄 𑀲𑀺𑀬𑀸, 𑀢𑀤𑀸 𑀧𑀜𑁆𑀘 𑀓𑀼𑀫𑀸𑀭𑀺𑀬𑁄 𑀲𑀫𑀸𑀳𑀝𑀸𑀢𑀺 𑀯𑀸𑀓𑁆𑀬𑀲𑁆𑀲𑀸𑀢𑁆𑀣𑁂 𑀯𑀼𑀢𑁆𑀢𑀺 𑀲𑀺𑀬𑀸 𑀧𑀜𑁆𑀘𑀓𑀼𑀫𑀸𑀭𑀻𑀢𑁆𑀬𑁂𑀢𑁆𑀣 𑀲𑀓𑀧𑀤𑀢𑁆𑀣𑀧𑁆𑀧𑀥𑀸𑀦𑀢𑁆𑀢𑀸 𑀩𑀳𑀼𑀯𑀘𑀦𑀁 𑀲𑀺𑀬𑀸 ‘‘𑀖𑀸𑀧𑀲𑁆𑀲𑀸𑀦𑁆𑀢𑀲𑁆𑀲𑀸𑀧𑁆𑀧𑀥𑀸𑀦𑀲𑁆𑀲𑀸’’𑀢𑀺 (𑁩-𑁨𑁪) 𑀅𑀧𑁆𑀧𑀥𑀸𑀦𑀭𑀲𑁆𑀲𑀢𑁆𑀢𑀜𑁆𑀘 𑀦 𑀲𑀺𑀬𑀸… 𑀲𑀫𑀸𑀳𑀝𑀸𑀦𑀫𑁂𑀯 𑀓𑀼𑀫𑀸𑀭𑀻𑀦𑀁 𑀧𑀥𑀸𑀦𑀢𑁆𑀢𑀸, 𑀢𑀲𑁆𑀫𑀸 𑀧𑀜𑁆𑀘 𑀕𑀸𑀯𑁄 𑀲 𑀫𑀸𑀳𑀝𑀸𑀢𑁆𑀬𑁂𑀢𑀲𑁆𑀫𑀺𑀁 𑀯𑀸𑀓𑁆𑀬𑁂 𑀲𑀫𑀸𑀲𑁄𑀯 𑀦𑀢𑁆𑀣𑀺 𑀓𑀫𑁆𑀫𑀲𑀸𑀥𑀦𑀲𑁆𑀲𑀸𑀦𑀼𑀧𑀕𑀫𑀢𑁄. 𑀧𑀜𑁆𑀘𑀦𑁆𑀦𑀁 𑀕𑀼𑀦𑁆𑀦𑀁 𑀲𑀫𑀸𑀳𑀸𑀭𑁄, 𑀘𑀢𑀼𑀦𑁆𑀦𑀁 𑀧𑀣𑀸𑀦𑀁 𑀲𑀫𑀸𑀳𑀸𑀭𑁄𑀢𑀺 𑀯𑀸𑀓𑁆𑀬𑁂 𑀧𑀦 𑀅𑀢𑁆𑀣𑀺, 𑀲𑀫𑀸𑀳𑀸𑀭𑀲𑁆𑀲𑁂𑀓𑀢𑁆𑀢𑀸 𑀢𑀼 𑀲𑀢𑀁 𑀬𑀽𑀣𑀁 𑀯𑀦𑀦𑁆𑀢𑀺 𑀏𑀢𑁆𑀣 𑀯𑀺𑀬 𑀲𑀸𑀪𑀸𑀯𑀺𑀓𑀫𑁂𑀓𑀯𑀘𑀦𑀁 𑀲𑀺𑀤𑁆𑀥𑀫𑁂𑀯𑁂𑀢𑀺 𑀯𑀺𑀜𑁆𑀜𑀸𑀧𑁂𑀢𑀺.

𑀓𑁆𑀯𑀘𑀺𑀲𑀤𑁆𑀤𑀲𑁆𑀲 ¶ 𑀧𑀬𑁄𑀕𑀦𑀺𑀬𑀫𑀦𑀢𑁆𑀣𑁄 ‘‘𑀧𑀭𑁄 𑀓𑁆𑀯𑀺𑀘𑀻’’𑀢𑀺 (𑁧-𑁨𑁭) 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀯𑀺𑀲𑁂𑀲𑁂𑀦 𑀉𑀤𑀸𑀳𑀭𑀡𑁂𑀧𑀻𑀢𑀺 𑀧𑀭𑁂𑀲𑀁 𑀯𑀺𑀬 ‘‘𑀙𑀸𑀬𑀸’’𑀢𑀺 (𑁨-𑁨-𑁭𑁩) 𑀲𑀼𑀢𑁆𑀢𑀬𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀦 ‘(𑀓𑀼𑀟𑁆𑀟𑀘𑁆𑀙𑀸𑀬) 𑀓𑀼𑀟𑁆𑀟𑀘𑁆𑀙𑀸𑀬𑀸𑀢𑀺 𑀘 ‘‘𑀩𑀸𑀳𑀼𑀮𑁆𑀮𑁂’’𑀢𑀺 (𑀘𑀁, 𑁨-𑁨-𑁭𑁪) 𑀲𑀼𑀢𑁆𑀢𑀬𑀺𑀢𑁆𑀯𑀸 𑀦𑀺𑀘𑁆𑀘𑀁 ‘𑀉𑀘𑁆𑀙𑀼𑀘𑁆𑀙𑀸𑀬𑀁 𑀲𑀮𑀪𑀘𑁆𑀙𑀸𑀬’𑀦𑁆𑀢𑀺 𑀘 𑀦𑁄𑀤𑀸𑀳𑀭𑀺𑀢𑁆𑀯𑀸 𑀲𑀸𑀫𑀜𑁆𑀜𑁂𑀦 ‘𑀲𑀮𑀪𑀘𑁆𑀙𑀸𑀬𑀁 𑀲𑀓𑀼𑀦𑁆𑀢𑀘𑁆𑀙𑀸𑀬’𑀦𑁆𑀢𑀺 𑀉𑀤𑀸𑀳𑀭𑀡𑁂 𑀤𑀲𑁆𑀲𑀺𑀢𑁂𑀧𑀺. 𑀅𑀜𑁆𑀜𑀢𑁆𑀣𑀸𑀢𑀺 𑀩𑀳𑀼𑀮𑀪𑀸𑀯𑀢𑁄 𑀅𑀜𑁆𑀜𑀢𑁆𑀣. 𑀯𑀺𑀕𑁆𑀕𑀳𑀲𑀫𑀢𑁆𑀢𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑀲𑀸𑀫𑀜𑁆𑀜𑀲𑁆𑀲, 𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀧𑀸𑀲𑀸𑀤𑀲𑁆𑀲 𑀙𑀸𑀬𑀸𑀇𑀘𑁆𑀘𑀸𑀤𑀺𑀦𑀸 𑀲𑀫𑁆𑀪𑀯𑀸𑀦𑀢𑀺𑀓𑁆𑀓𑀫𑁂𑀦, 𑀲𑀤𑁆𑀤𑀸𑀢𑀺 𑀲𑀤𑁆𑀤𑀢𑁄 𑀧𑀭𑀸𑀬.

𑀦𑀦𑀼𑀘𑁂𑀘𑁆𑀘𑀸𑀤𑀺𑀦𑀸 𑀯𑀼𑀢𑁆𑀢𑀁 𑀘𑁄𑀤𑀦𑀁 𑀦𑀺𑀲𑁂𑀥𑁂𑀢𑀺 ‘𑀢𑀦𑁆𑀦𑁂’𑀢𑀺. 𑀢𑀢𑁆𑀣 𑀓𑀸𑀭𑀡𑀫𑀸𑀳- ‘𑀖𑀲𑀜𑁆𑀜𑀢𑁆𑀢𑀸’𑀢𑁆𑀬𑀸𑀤𑀺. 𑀅𑀖𑁄𑀦𑀦𑁆𑀢𑀺 𑀖𑀑𑀓𑀸𑀭𑀯𑀚𑁆𑀚𑀺𑀢𑀸𑀦𑀁, 𑀦𑀦𑀼 𑀇𑀢𑁆𑀣𑀺 𑀬𑀫𑀸𑀓𑀸𑀭𑁄 𑀖𑁄, 𑀢𑀣𑀸𑀲𑀢𑀺 𑀦𑀧𑀼𑀁𑀲𑀓𑁂 𑀲𑁄 (𑀦 𑀲𑀺𑀬𑀸𑀢𑀺) 𑀧𑀭𑀺𑀓𑀧𑁆𑀧𑁂𑀢𑀺 ‘𑀦𑀧𑀼𑀁𑀲𑀓𑀢𑁆𑀢𑀸 𑀖𑀢𑁆𑀢𑀫𑁂𑀯 𑀦𑀢𑁆𑀣𑀻𑀢𑀺 𑀘𑁂𑀤𑀺’𑀢𑀺. 𑀢𑀫𑁆𑀧𑀺 𑀦𑁂𑀢𑀺 𑀬𑀣𑀸 𑀯𑀼𑀢𑁆𑀢𑀫𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀢𑁆𑀣𑁂𑀯 𑀦𑀧𑀼𑀁𑀲𑀓𑁂 𑀖𑀢𑁆𑀢𑀦𑁆𑀢𑀺 [𑀦𑀧𑀼𑀁𑀲𑀓𑀢𑁆𑀢𑀦𑁆𑀢𑀺 (𑀧𑁄𑀢𑁆𑀣𑀓𑁂)] 𑀤𑀲𑁆𑀲𑁂𑀢𑀼𑀫𑀸𑀳-𑀙𑀝𑁆𑀞𑀻𑀲𑀫𑀸𑀲𑀲𑁆𑀲𑁂’𑀘𑁆𑀘𑀸𑀤𑀺. 𑀦𑀧𑀼𑀁𑀲𑀓𑁂 𑀖𑀢𑁆𑀢𑀲𑁆𑀲 [𑀦𑀧𑀼𑀁𑀲𑀓𑀢𑁆𑀢𑀲𑁆𑀲 (𑀧𑁄𑀢𑁆𑀣𑀓𑁂)] 𑀲𑀩𑁆𑀪𑀸𑀯𑀫𑁂𑀯 𑀲𑀫𑀢𑁆𑀣𑁂𑀢𑀺 𑀦𑀧𑀼𑀁𑀲𑀓𑀢𑁆𑀢𑀁 𑀳𑀺’𑀘𑁆𑀘𑀸𑀤𑀺𑀦𑀸, 𑀧𑀸𑀭𑀺𑀪𑀸𑀲𑀺𑀓𑀦𑁆𑀢𑀺 𑀏𑀢𑁆𑀣 𑀲𑀼𑀢𑁆𑀢𑀫𑁂𑀯𑀸𑀥𑀺𑀧𑁆𑀧𑁂𑀢𑀁, 𑀧𑀭𑀺𑀪𑀸𑀲𑀸𑀬 𑀦𑀺𑀩𑁆𑀩𑀢𑁆𑀢𑀁 𑀧𑀸𑀭𑀺𑀪𑀸𑀲𑀺𑀓𑀁 𑀲𑀼𑀢𑁆𑀢𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀆𑀭𑀪𑀺𑀢𑀩𑁆𑀩𑀫𑁂𑀯𑀺𑀤𑀁 𑀲𑀼𑀢𑁆𑀢𑀁 (𑀦𑀧𑀼𑀁𑀲𑀓𑀲𑁆𑀲𑀸𑀧𑀺) 𑀭𑀲𑁆𑀲𑀢𑁆𑀢𑀯𑀺𑀥𑀸𑀦𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀖𑀦𑀺𑀲𑁆𑀲𑀺𑀢𑀫𑁆𑀧𑀺 𑀓𑀸𑀭𑀺𑀬𑀦𑁆𑀢𑀺 ‘‘𑀖𑀩𑁆𑀭𑀳𑁆𑀫𑀸𑀤𑀻𑀢𑁂’’𑀢𑁆𑀬𑀸𑀤𑀺𑀦𑀸 (𑁨-𑁬𑁦) 𑀯𑀺𑀥𑀺𑀬𑀫𑀸𑀦𑀫𑁂𑀓𑀸𑀭𑀸𑀤𑀺𑀓𑀸𑀭𑀺𑀬𑀫𑁆𑀧𑀺. 𑀏𑀢𑀁 𑀖𑀦𑀺𑀲𑁆𑀲𑀺𑀢𑀁 𑀓𑀸𑀭𑀺𑀬𑀁 𑀦𑀘 𑀬𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀬𑀼𑀢𑁆𑀢𑀢𑁆𑀢𑁂𑀧𑀺 𑀤𑁄𑀲𑁄-𑀬𑀫𑀸𑀧𑀢𑀢𑁂𑀯𑀸𑀓𑁆𑀬𑀸𑀲𑀗𑁆𑀓𑀺𑀬𑀸𑀳-‘𑀦𑀸𑀬𑀫𑁆𑀧𑀺𑀤𑁄𑀲𑁄’𑀘𑁆𑀘𑀸𑀤𑀺, 𑀦 𑀭𑀲𑁆𑀲𑀲𑁆𑀲 𑀏𑀢𑁆𑀣𑁂𑀯 𑀮𑀤𑁆𑀥𑀸𑀯𑀲𑀭𑀢𑁆𑀢𑀸 𑀧𑀞𑀫𑀁 𑀢𑁂𑀦 𑀧𑀯𑀺𑀝𑁆𑀞𑁂… (𑀖𑀦𑀺)𑀲𑁆𑀲𑀺𑀢𑀁 𑀓𑀸𑀭𑀺𑀬𑀦𑁆𑀢𑀺 𑀦𑀸𑀬𑀫𑁆𑀧𑀺 𑀤𑁄𑀲𑁄 𑀧𑀭𑀺𑀪𑀸𑀲𑀸𑀯 𑀲𑁂𑀦𑀸𑀢𑀺 𑀫𑀦𑁆𑀢𑀩𑁆𑀩𑀁. 𑀲𑀮𑀪𑀘𑁆𑀙𑀸𑀬𑁂 𑀇𑀢𑀺 𑀧𑀤𑀘𑁆𑀙𑁂𑀤𑁄.

𑀅𑀢𑁄𑀏𑀯𑀘𑀸𑀢𑀺𑀆𑀤𑀺 ¶ 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀯𑀮𑀫𑁆𑀩𑁂𑀦 𑀯𑀼𑀢𑁆𑀢𑀁.

𑀲𑀓𑀢𑁆𑀣𑀧𑀭𑀺𑀘𑁆𑀘𑀸𑀕𑁂𑀦 𑀓𑀼𑀮𑁂 𑀧𑀯𑀢𑁆𑀢𑀢𑁆𑀢𑀸𑀢𑀺 𑀇𑀫𑀺𑀦𑀸 𑀙𑀝𑁆𑀞𑀻𑀲𑀫𑀸𑀲𑀲𑁆𑀲 𑀉𑀢𑁆𑀢𑀭𑀧𑀤𑀢𑁆𑀣𑀧𑁆𑀧𑀥𑀸𑀦𑀢𑁆𑀢𑀫𑀸𑀳.

𑀇𑀢𑁆𑀣𑀺𑀯𑀺𑀥𑀻𑀲𑀼 ‘‘𑀧𑀼𑀣𑀼𑀲𑁆𑀲 𑀧𑀣𑀯𑀧𑀼𑀣𑀯𑀸’’𑀢𑀺 (𑁩-𑁩𑁯) 𑀲𑀼𑀢𑁆𑀢𑀧𑀭𑀺𑀬𑀦𑁆𑀢𑁂𑀲𑀼. 𑀇𑀢𑁆𑀣𑀺𑀬𑀦𑁆𑀢𑀺 𑀇𑀤𑀁 𑀦𑀸𑀫𑀯𑀺𑀲𑁂𑀲𑀦𑀁 𑀯𑀸 𑀲𑀺𑀬𑀸 𑀧𑀘𑁆𑀘𑀬𑀢𑁆𑀣𑀯𑀺𑀲𑁂𑀲𑀦𑀁 𑀯𑀸, 𑀢𑀢𑁆𑀣 𑀦𑀸𑀫𑀯𑀺𑀲𑁂𑀲𑀦𑀫𑁂𑀯𑀺𑀤𑀁 𑀦 𑀧𑀘𑁆𑀘𑀬𑀢𑁆𑀣𑀯𑀺𑀲𑁂𑀲𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀦𑀸𑀫𑁂’𑀘𑁆𑀘𑀸𑀤𑀺. 𑀅𑀓𑀸𑀭𑀦𑁆𑀢𑀢𑁄 𑀦𑀸𑀫𑀲𑁆𑀫𑀸𑀢𑀺 𑀏𑀓𑀢𑁆𑀢𑀸𑀤𑀺𑀫𑀳𑀦𑁆𑀢𑀢𑁆𑀣𑀯𑀸𑀘𑀺𑀢𑁄 𑀅𑀓𑀸𑀭𑀦𑁆𑀢𑀢𑁄 𑀦𑀸𑀫𑀲𑁆𑀫𑀸. 𑀇𑀢𑁆𑀣𑀢𑁆𑀢𑀦𑁆𑀢𑀺 𑀏𑀢𑁆𑀣 𑀇𑀢𑁆𑀣𑀻𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀁 𑀯𑀼𑀘𑁆𑀘𑀢𑀺. 𑀇𑀢𑁆𑀣𑀺𑀬𑁂𑀯 𑀳𑀺 𑀏𑀲𑀸𑀢𑀺 𑀮𑀺𑀗𑁆𑀕𑀻𑀬𑀢𑀺 𑀲𑀗𑁆𑀓𑁂𑀢𑀻𑀬𑀢𑀻𑀢𑀺 𑀮𑀺𑀗𑁆𑀕𑀁. 𑀇𑀢𑁆𑀣𑀺𑀬𑀸 𑀏𑀲𑀸𑀢𑀺 𑀧𑀲𑀺𑀤𑁆𑀥𑀺𑀫𑀢𑁄 𑀅𑀢𑁆𑀣𑀲𑁆𑀲 𑀪𑀸𑀯𑁄 𑀲𑀸𑀫𑀜𑁆𑀜𑀁 𑀩𑀸𑀮𑀬𑀼𑀯𑀢𑁆𑀢𑀸𑀤𑀺 𑀮𑀓𑁆𑀔𑀡𑀁 𑀇𑀢𑁆𑀣𑀢𑁆𑀢𑀁. 𑀓𑀺𑀫𑁂𑀢𑁆𑀣 𑀮𑀺𑀗𑁆𑀕𑀁 𑀦𑀸𑀫𑁋

𑀧𑀲𑀺𑀤𑁆𑀥𑀺 𑀅𑀢𑁆𑀣𑁂𑀲𑀼 𑀬𑁂𑀲𑀼 𑀮𑁄𑀓𑀲𑁆𑀲;

𑀅𑀢𑁆𑀣𑁂𑀲𑀼 𑀬𑁂𑀲𑀼 𑀏𑀲𑀸 𑀏𑀲𑁄 𑀏𑀢𑀦𑁆𑀢𑀺 𑀧𑀲𑀺𑀤𑁆𑀥𑀺 𑀮𑁄𑀓𑀲𑁆𑀲 𑀳𑁄𑀢𑀺 𑀏𑀢𑀸𑀦𑀺 𑀬𑀣𑀸𑀓𑁆𑀓𑀫𑀁 𑀇𑀢𑁆𑀣𑀺𑀧𑀼𑀭𑀺𑀲𑀦𑀧𑀼𑀁𑀲𑀓𑀮𑀺𑀗𑁆𑀕𑀸𑀦𑀻𑀢𑀺 𑀮𑁄𑀓𑁂𑀦 𑀯𑀼𑀘𑁆𑀘𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀘𑀓𑀢𑁆𑀯𑀸 𑀯𑀼𑀘𑁆𑀘𑀢𑁂 ‘‘𑀮𑀺𑀗𑁆𑀕𑀁 𑀦𑀸𑀦𑀼𑀲𑀸𑀲𑀦𑀻𑀬𑀁 𑀮𑁄𑀓𑀦𑀺𑀲𑁆𑀲 𑀬𑀢𑁆𑀢𑀸 𑀮𑀺𑀗𑁆𑀕𑀲𑁆𑀲𑀸’’𑀢𑀺. 𑀢𑀢𑁆𑀣 𑀕𑁄𑀇𑀘𑁆𑀘𑀸𑀤𑀻𑀲𑁆𑀯𑁂𑀲𑀸 𑀏𑀲𑁄𑀢𑀺 𑀧𑀲𑀺𑀤𑁆𑀥𑀺𑀬𑀸 𑀇𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑀁, 𑀅𑀘𑁆𑀘𑀺𑀆𑀤𑀻𑀲𑁆𑀯𑁂𑀲𑀸 𑀏𑀢𑀦𑁆𑀢𑀺 𑀧𑀲𑀺𑀤𑁆𑀥𑀺𑀬𑀸 𑀇𑀢𑁆𑀣𑀺𑀦𑀧𑀼𑀁𑀲𑀓𑀢𑁆𑀢𑀁, 𑀢𑀝𑁄𑀪𑀝𑀻 𑀢𑀝𑀫𑀺𑀘𑁆𑀘𑀸𑀤𑀻𑀲𑁆𑀯𑁂𑀲𑁄 𑀏𑀲𑀸𑀏𑀢𑀦𑁆𑀢𑀺 𑀧𑀲𑀺𑀤𑁆𑀥𑀺𑀬𑀸 𑀧𑀼𑀫𑀺𑀢𑁆𑀣𑀺𑀦𑀧𑀼𑀁𑀲𑀓𑀢𑁆𑀢𑀁, 𑀫𑀸𑀮𑀸𑀇𑀘𑁆𑀘𑀸𑀤𑀻𑀲𑁆𑀯𑁂𑀲𑀸𑀢𑀺 𑀧𑀲𑀺𑀤𑁆𑀥𑀺𑀬𑀸 𑀇𑀢𑁆𑀣𑀢𑁆𑀢𑀁, 𑀭𑀼𑀓𑁆𑀔𑁄𑀘𑁆𑀘𑀸𑀤𑀻𑀲𑁆𑀯𑁂𑀲𑁄𑀢𑀺 𑀧𑀲𑀺𑀤𑁆𑀥𑀺𑀬𑀸 𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀁, 𑀓𑀼𑀮𑀫𑀺𑀘𑁆𑀘𑀸𑀤𑁄 𑀏𑀢𑀦𑁆𑀢𑀺 𑀧𑀲𑀺𑀤𑁆𑀥𑀺𑀬𑀸 𑀦𑀧𑀼𑀁𑀲𑀓𑀢𑁆𑀢𑀁. 𑀲𑀫𑀸𑀲𑀲𑁆𑀲𑀸𑀧𑁆𑀬𑁂𑀯𑀁 𑀤𑀝𑁆𑀞𑀩𑁆𑀩𑀁, 𑀚𑁄𑀢𑀓𑀸𑀢𑀺 𑀤𑀲𑁆𑀲𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀚𑁄𑀢𑀓𑀸 ¶ 𑀇𑀢𑁆𑀣𑀢𑁆𑀢𑀲𑁆𑀲𑁂𑀢𑀺 𑀧𑀓𑀭𑀡𑀢𑁄 𑀯𑀺𑀜𑁆𑀜𑀸𑀬𑀢𑀺. 𑀢𑀢𑁄 𑀯𑁂𑀘𑁆𑀘𑀸𑀤𑀺𑀦𑀸 𑀧𑀘𑁆𑀘𑀬𑀢𑁆𑀣𑀪𑀸𑀯𑀺𑀦𑁄 𑀬𑁂 𑀤𑁄𑀲𑀸 𑀢𑁂𑀲𑀫𑁂𑀢𑁆𑀣𑀦𑀸𑀯𑀓𑀸𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀁 𑀩𑀳𑀼𑀯𑀘𑀦𑀫𑁆𑀧𑀺 𑀳𑁄𑀢𑀻𑀢𑀺𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 𑀇𑀤𑀁 𑀤𑀻𑀧𑁂𑀢𑀺 ‘‘𑀇𑀢𑁆𑀣𑀢𑁆𑀢𑀲𑁆𑀲 𑀧𑀘𑁆𑀘𑀬𑀢𑁆𑀣𑀢𑁆𑀢𑁂 𑀲𑀢𑀺 𑀧𑀥𑀸𑀦𑀢𑁆𑀢𑀸𑀲𑁆𑀲 𑀩𑁆𑀬𑀢𑀺𑀭𑁂𑀓𑀮𑀓𑁆𑀔𑀡𑀸𑀬 𑀙𑀝𑁆𑀞𑀺𑀬𑀸 ‘𑀓𑀼𑀫𑀸𑀭𑀺𑀢𑁆𑀢𑀁 (𑀤𑁂𑀯𑀤𑀢𑁆𑀢𑀸𑀬𑀸’𑀢𑀺𑀪𑀯𑀺𑀢𑀩𑁆𑀩𑀁, 𑀢𑀢𑁄 𑀘 𑀦 𑀲𑀺𑀬𑀸 𑀓𑀼𑀫𑀸𑀭𑀻) 𑀤𑁂𑀯𑀤𑀢𑁆𑀢𑀸’𑀢𑀺 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀁, 𑀢𑀣𑀸 𑀓𑀼𑀫𑀸𑀭𑀺𑀬𑁄𑀢𑀺 𑀩𑀳𑀼𑀯𑀘𑀦𑀫𑁆𑀧𑀺 𑀇𑀢𑁆𑀣𑀢𑁆𑀢𑀲𑁆𑀲𑁂𑀓𑀢𑁆𑀢𑀸. 𑀧𑀓𑀢𑀺𑀬𑀢𑁆𑀣 𑀯𑀺𑀲𑁂𑀲𑀦𑀧𑀓𑁆𑀔𑁂 𑀢𑀼 𑀧𑀓𑀢𑀺𑀬𑀸 𑀇𑀢𑁆𑀣𑀢𑁆𑀢𑀯𑀺𑀲𑀺𑀝𑁆𑀞𑀁 𑀤𑀩𑁆𑀩𑀫𑁂𑀯𑁄𑀘𑁆𑀘𑀢𑁂, 𑀆𑀆𑀤𑀬𑁄 𑀢𑀼 𑀚𑁄𑀢𑀓𑀢𑀸𑀢𑀺 𑀢𑀢𑁆𑀣 𑀩𑁆𑀬𑀢𑀺𑀭𑁂𑀓𑀸𑀪𑀸𑀯𑀸 𑀙𑀝𑁆𑀞𑀺𑀬𑀸 𑀅𑀧𑁆𑀧𑀲𑀗𑁆𑀕𑁄 𑀘 𑀩𑀳𑀼𑀯𑀘𑀦𑀫𑁆𑀧𑀺 𑀅𑀦𑁂𑀓𑀢𑁆𑀢𑀸𑀯 𑀤𑀩𑁆𑀩𑀲𑁆𑀲 𑀬𑀼𑀢𑁆𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀤𑁄𑀲𑀸𑀯𑀲𑀭𑀸𑀪𑀸𑀯𑀸 𑀇𑀝𑁆𑀞𑀢𑁆𑀣𑀲𑀺𑀤𑁆𑀥𑀻’’𑀢𑀺. 𑀅𑀜𑁆𑀜𑁂𑀢𑀺 𑀚𑀬𑀸𑀤𑀺𑀘𑁆𑀘 𑀚𑀺𑀦𑀺𑀦𑁆𑀤𑀩𑀼𑀤𑁆𑀥𑁆𑀬𑀸𑀘𑀭𑀺𑀬𑀸𑀤𑀬𑁄 𑀤𑀲𑁆𑀲𑁂𑀢𑀺.

𑀇𑀢𑁆𑀣𑀺𑀬𑀫𑀪𑀺𑀥𑁂𑀬𑁆𑀬𑀸𑀬𑀦𑁆𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀲𑀗𑁆𑀔𑀸𑀢𑁂 𑀇𑀢𑁆𑀣𑀢𑁆𑀢𑁂 𑀅𑀢𑁆𑀣𑀪𑀽𑀢𑁂, 𑀬𑀣𑁂𑀯𑀳𑀻𑀢𑀺𑀆𑀤𑀺𑀦𑀸 𑀉𑀧𑀫𑀸𑀯𑀲𑁂𑀦 𑀬𑀣𑀸𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀺. 𑀢𑀢𑁆𑀣 𑀇𑀢𑁆𑀣𑀢𑁆𑀢𑀫𑀺𑀘𑁆𑀘𑀸𑀤𑀺𑀦𑀸 𑀧𑀭𑁄𑀧𑀯𑀡𑁆𑀡𑀺𑀢𑀧𑀓𑁆𑀔𑀲𑁆𑀲𑀸𑀬𑀼𑀢𑁆𑀢𑀢𑁆𑀢𑀦𑁆𑀦𑀺𑀘𑁆𑀙𑀺𑀦𑁆𑀤𑁂𑀢𑀺, 𑀦𑁄 𑀧𑀧𑀚𑁆𑀚𑀢𑁂 [𑀦𑁄𑀧𑀧𑀚𑁆𑀚𑁂𑀬𑁆𑀬 (𑀧𑀜𑁆𑀘𑀺𑀓𑀸)] 𑀤𑁂𑀯𑀤𑀢𑁆𑀢𑀸𑀲𑀤𑁆𑀤𑀯𑀘𑀦𑀻𑀬𑀲𑁆𑀲𑀸𑀧𑀺 𑀇𑀢𑁆𑀣𑀢𑁆𑀢𑀢𑁄 𑀅𑀩𑁆𑀬𑀢𑀺𑀭𑀺𑀢𑁆𑀢𑀢𑁆𑀢𑀸 ‘𑀇𑀢𑁆𑀣𑀢𑁆𑀢𑀁 𑀤𑁂𑀯𑀤𑀢𑁆𑀢𑀸𑀬𑀸’𑀢𑀺 𑀪𑀺𑀦𑁆𑀦𑀸𑀥𑀺𑀓𑀭𑀡𑀢𑀸 𑀦 𑀬𑀼𑀚𑁆𑀚𑀢𑁂, 𑀅𑀦𑀼𑀧𑀧𑀢𑁆𑀢𑀺𑀫𑁂𑀯 𑀲𑀫𑀢𑁆𑀣𑁂𑀢𑀺 ‘𑀤𑁂𑀯𑀤𑀢𑁆𑀢𑀸𑀬𑀸𑀢𑀺’𑀘𑁆𑀘𑀸𑀤𑀺𑀦𑀸. 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀫𑁂𑀯 𑀲𑀺𑀬𑀸 𑀇𑀢𑁆𑀣𑀺𑀲𑀤𑁆𑀤𑀯𑀘𑀦𑀻𑀬𑀢𑁄 𑀅𑀦𑀜𑁆𑀜𑀢𑁆𑀢𑀸 𑀤𑁂𑀯𑀤𑀢𑁆𑀢𑀸 𑀲𑀤𑁆𑀤𑀯𑀘𑀦𑀻𑀬𑀲𑁆𑀲 𑀇𑀢𑁆𑀣𑀻 𑀤𑁂𑀯𑀤𑀢𑁆𑀢𑀸𑀢𑀺.

𑀅𑀢𑁄𑀏𑀯𑀸𑀢𑀺 𑀇𑀢𑁆𑀣𑀢𑁆𑀢𑁂 𑀆𑀯𑀺𑀥𑀸𑀦𑀢𑁄𑀬𑁂𑀯. 𑀢𑀩𑁆𑀩𑀢𑁄𑀢𑁆𑀣𑀲𑁆𑀲𑀸𑀢𑀺 𑀇𑀤𑀁 𑀚𑀬𑀸𑀤𑀺𑀘𑁆𑀘𑀸𑀤𑀺𑀫𑀢𑀸𑀦𑀼𑀕𑀸𑀫𑀺𑀦𑀸 [𑀦𑀼𑀕𑀸𑀫𑀻 𑀧𑀦 (𑀧𑁄𑀢𑁆𑀣𑀓𑁂)] 𑀯𑀼𑀢𑁆𑀢𑀁, 𑀢𑀣𑀸 𑀳𑀺 𑀢𑁂 𑀏𑀯𑀁 𑀮𑀺𑀗𑁆𑀕𑀮𑀓𑁆𑀔𑀡 𑀫𑀸𑀳𑀼 (𑀧𑀸, 𑁪-𑁧-𑁩 𑀓𑀸𑀲𑀺𑀓𑀸𑀬𑀁) ‘‘𑀲𑀸𑀫𑀜𑁆𑀜𑀯𑀺𑀲𑁂𑀲𑀸 𑀇𑀢𑁆𑀣𑀢𑁆𑀢𑀸𑀤𑀬𑁄 𑀕𑁄𑀢𑁆𑀢𑀸𑀤𑀬𑁄 𑀯𑀺𑀬 𑀩𑀳𑀼𑀧𑁆𑀧𑀓𑀸𑀭𑀩𑁆𑀬𑀢𑁆𑀢𑀺𑀬𑁄𑀢𑀺 [𑀲𑀸𑀫𑀜𑁆𑀜𑀸𑀦𑀺 𑀘 𑀢𑀼𑀮𑁆𑀬𑀚𑀸𑀢𑀺𑀬𑀧𑀤𑀢𑁆𑀣𑀲𑀸𑀥𑀸𑀭𑀡𑀢𑁆𑀢𑀸 𑀢𑀸𑀦𑀺 𑀯𑀺𑀲𑁂𑀲𑀸 𑀘 𑀅𑀜𑁆𑀜 𑀫𑀜𑁆𑀜𑁂𑀳𑀺 𑀯𑀺𑀚𑀸𑀢𑀺𑀬𑁂𑀢𑀺 𑀘 𑀯𑀺𑀲𑀺𑀲𑁆𑀲𑀦𑁆𑀢𑁂 𑀩𑁆𑀬𑀸𑀯𑀢𑁆𑀢𑀦𑁆𑀢𑁂𑀢𑀺 𑀲𑀸𑀫𑀜𑁆𑀜𑀯𑀺𑀲𑁂𑀲𑀸. 𑀩𑁆𑀬𑀜𑁆𑀚𑀻𑀬𑀦𑁆𑀢𑀺𑀆 𑀏𑀢𑁂𑀳𑀻𑀢𑀺 𑀩𑁆𑀬𑀢𑁆𑀢𑀺𑀬𑁄 𑀲𑀸𑀫𑀜𑁆𑀜𑀯𑀺𑀲𑁂𑀲𑀸𑀦𑀁 𑀦𑀺𑀲𑁆𑀲𑀬𑀸, 𑀩𑀳𑀼𑀧𑁆𑀧𑀓𑀸𑀭𑀸 𑀩𑁆𑀬𑀢𑁆𑀢𑀺 𑀬𑁄 𑀬𑁂𑀲𑀁 𑀲𑀸𑀫𑀜𑁆𑀜𑀯𑀺𑀲𑁂𑀲𑀸𑀦𑀁 𑀢𑁂 𑀢𑀣𑀸𑀯𑀼𑀢𑁆𑀢𑀸𑀢𑀺𑁋 (𑀓𑀸𑀲𑀺𑀓𑀸𑀯𑀺𑀯𑀭𑀡 𑀧𑀜𑁆𑀚𑀺𑀓𑀸.)] 𑀢𑁂 𑀳𑁆𑀬𑁂𑀯𑀁 𑀫𑀜𑁆𑀜𑀦𑁆𑀢𑁂 ‘‘𑀬𑀣𑀸 ¶ 𑀕𑁄𑀢𑁆𑀢𑀸𑀤𑀬𑁄 𑀲𑀫𑀸𑀦𑀚𑀸𑀢𑀺𑀬𑁂𑀲𑀼 𑀲𑀩𑁆𑀩𑁂𑀲𑁆𑀯𑀦𑀼𑀯𑀢𑁆𑀢𑀦𑁆𑀢𑁂, 𑀯𑀺𑀚𑀸𑀢𑀺𑀬𑁂𑀳𑀺 𑀧𑀦 𑀦𑀺𑀯𑀢𑁆𑀢𑀦𑁆𑀢𑁂, 𑀢𑀣𑀸 𑀇𑀢𑁆𑀣𑀢𑁆𑀢𑀸𑀤𑀬𑁄𑀧𑀺. 𑀯𑀺𑀘𑀺𑀢𑁆𑀢𑀢𑁆𑀢𑀸 𑀧𑀦 𑀲𑀸𑀫𑀜𑁆𑀜𑀯𑀺𑀲𑁂𑀲𑀦𑀺𑀲𑁆𑀲𑀬𑀸𑀦𑀁 𑀩𑁆𑀬𑀜𑁆𑀚𑀓𑀸𑀦𑀁 𑀓𑁄𑀘𑀺𑀬𑁂𑀯 𑀲𑀸𑀫𑀜𑁆𑀜𑀯𑀺𑀲𑁂𑀲𑁄 𑀓𑁂𑀦𑀘𑀺𑀤𑁂𑀯 𑀦𑀺𑀲𑁆𑀲𑀬𑁂𑀦 𑀩𑁆𑀬𑀜𑁆𑀚𑀢𑁂, 𑀦 𑀲𑀩𑁆𑀩𑁄 𑀲𑀩𑁆𑀩𑁂𑀦 (𑀧𑀢𑀺) 𑀦𑀺𑀬𑀢𑀯𑀺𑀲𑀬𑀢𑁆𑀢𑀸 𑀪𑀸𑀯𑀲𑀢𑁆𑀢𑀻𑀦𑀁, 𑀢𑀢𑁆𑀣 𑀬𑁂𑀦𑀢𑁆𑀣𑁂𑀦 𑀇𑀢𑁆𑀣𑀢𑁆𑀢𑀫𑁂𑀯 𑀩𑁆𑀬𑀜𑁆𑀚𑀢𑁂 𑀦 𑀧𑀼𑀫𑀢𑁆𑀢𑀁 𑀦𑀸𑀧𑀺 𑀦𑀧𑀼𑀁𑀲𑀓𑀢𑁆𑀢𑀁, 𑀲𑀸 𑀇𑀢𑁆𑀣𑀺𑀬𑁂𑀯 𑀪𑀯𑀢𑀺 𑀦 𑀧𑀼𑀫𑀸 𑀦𑀸𑀧𑀺 𑀦𑀧𑀼𑀁𑀲𑀓𑀁. 𑀬𑁂𑀦 𑀧𑀼𑀫𑀢𑁆𑀢𑀫𑁂𑀯 𑀩𑁆𑀬𑀜𑁆𑀚𑀢𑁂, 𑀲𑁄 𑀧𑀼𑀫𑀸𑀬𑁂𑀯. 𑀬𑁂𑀦 𑀢𑀼 𑀦𑀧𑀼𑀁𑀲𑀓𑀢𑁆𑀢𑀁 𑀢𑀁 𑀦𑀧𑀼𑀁𑀲𑀓𑀫𑁂𑀯. 𑀬𑁄 𑀢𑀼 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 (𑀯𑀸) 𑀩𑁆𑀬𑀜𑁆𑀚𑀓𑁄, 𑀲𑁄 𑀤𑁆𑀯𑀺𑀮𑀺𑀗𑁆𑀕𑁄 𑀢𑀺𑀮𑀺𑀗𑁆𑀕𑁄 𑀯𑁂’’𑀢𑀺 (𑀧𑀸, 𑁪-𑁧-𑁩 𑀓𑀸𑀲𑀺𑀓𑀸𑀯𑀺𑀯𑀭𑀡𑀧𑀜𑁆𑀚𑀺𑀓𑀸) 𑀢𑀲𑁆𑀫𑀸 𑀧𑀩𑁆𑀩𑀢𑁄 𑀬𑀣𑀸 𑀯𑀼𑀢𑁆𑀢𑀇𑀢𑁆𑀣𑀢𑁆𑀢𑀯𑀢𑁄 𑀅𑀢𑁆𑀣𑀲𑁆𑀲 𑀅𑀪𑀺𑀥𑁂𑀬𑁆𑀬𑀲𑁆𑀲𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀣𑁂𑀘𑁆𑀘𑀸𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀤𑁄𑀲𑀧𑀭𑀺𑀳𑀸𑀭𑀸𑀬 𑀚𑀺𑀦𑀺𑀦𑁆𑀤𑀩𑀼𑀤𑁆𑀥𑀺𑀦𑀸 𑀬𑀤𑀼𑀧𑀯𑀡𑁆𑀡𑀺 𑀢𑀁 𑀢𑀁 𑀧𑀭𑀺𑀓𑀧𑁆𑀧𑁂𑀢𑀺. 𑀲𑁄 𑀏𑀯 𑀘𑀭𑀳𑀺𑀘𑁆𑀘𑀸𑀤𑀺𑀦𑀸 𑀉𑀧𑀳𑀸𑀲𑀧𑀼𑀩𑁆𑀩𑀓𑀫𑀼𑀢𑁆𑀢𑀭 𑀫𑀸𑀘𑀺𑀓𑁆𑀔𑀢𑁂. 𑀫𑀲𑀺𑀫𑀓𑁆𑀔𑀺𑀢𑀓𑀼𑀓𑁆𑀓𑀼𑀝𑁄𑀯𑀺𑀬𑀸𑀢𑀺 𑀬𑀤𑀸 𑀓𑁄𑀘𑀺 𑀅𑀜𑁆𑀜𑀓𑀼𑀓𑁆𑀓𑀼𑀝𑁄 𑀅𑀜𑁆𑀜𑀲𑁆𑀫𑀸 𑀪𑀻𑀢𑁄 𑀲𑀺𑀬𑀸, 𑀢𑀤𑀸 𑀯𑀺𑀚𑀬𑀺𑀦𑁄 𑀓𑀼𑀓𑁆𑀓𑀼𑀝𑀲𑁆𑀲 𑀫𑀼𑀔𑀁 𑀫𑀲𑀺𑀬𑀸 𑀫𑀓𑁆𑀔𑁂𑀢𑁆𑀯𑀸 𑀉𑀧𑀦𑁂𑀦𑁆𑀢𑀺 𑀲𑁄 𑀧𑀞𑀫𑀁 𑀢𑀢𑁄 𑀪𑀻𑀢𑁄𑀧𑀺 𑀧𑀼𑀦 𑀅𑀜𑁆𑀜𑁄𑀢𑀺 𑀫𑀦𑁆𑀢𑁆𑀯𑀸 𑀬𑀼𑀚𑁆𑀛𑀺𑀢𑀼𑀫𑀼𑀲𑁆𑀲𑀳𑀢𑁂. 𑀬𑀣𑀸𑀢𑁆𑀭 𑀲𑁄𑀯 𑀓𑀼𑀓𑁆𑀓𑀼𑀝𑁄 𑀩𑁆𑀬𑀸𑀚𑁂 𑀦𑁄𑀧𑀤𑀲𑁆𑀲𑀺𑀢𑁄, 𑀢𑀣𑀸 𑀢𑁆𑀭𑀸𑀫𑀻𑀢𑁆𑀬𑀢𑁆𑀣𑁄.

𑀧𑀼𑀁𑀬𑁄𑀕𑁂𑀦 𑀪𑀭𑀺𑀬𑀸𑀬𑀁 𑀯𑀢𑁆𑀢𑀫𑀸𑀦𑀢𑁄𑀯 𑀦𑀺𑀬𑀫𑁂𑀦 ‘‘𑀫𑀸𑀢𑀼𑀮𑀸𑀤𑀺𑀢𑁆𑀯𑀸𑀦𑀻 𑀪𑀭𑀺𑀬𑀸𑀬𑀁’’ (𑁩-𑁩𑁩) 𑀢𑁆𑀬𑀸𑀦𑀻, 𑀇𑀫𑀺𑀦𑀸 𑀢𑁆𑀯𑀦𑀺𑀬𑀫𑁂𑀦 𑀪𑀭𑀺𑀬𑀸𑀬𑀫𑀪𑀭𑀺𑀬𑀸𑀬𑀜𑁆𑀘 𑀇𑀦𑀻𑀢𑁆𑀬𑀦𑀺𑀬𑀫𑁂𑀦 𑀯𑀢𑁆𑀢𑀼𑀫𑀸𑀳- ‘𑀆𑀭𑀸𑀫𑀺𑀓𑀲𑁆𑀲 𑀪𑀭𑀺𑀬𑀸’𑀇𑀘𑁆𑀘𑀸𑀤𑀺.

𑀢𑁆𑀢𑀺𑀫𑁆𑀳𑀸𑀢𑀺 𑀏𑀢𑁆𑀢𑀓𑁂 𑀯𑀼𑀢𑁆𑀢𑁂𑀧𑀺 𑀢𑁆𑀢𑀺𑀧𑁆𑀧𑀘𑁆𑀘𑀬𑀦𑁆𑀢𑀢𑁄𑀢𑀺 𑀯𑀘𑀦𑁂 𑀓𑀸𑀭𑀡𑀫𑀸𑀳-𑀓𑁂𑀯𑀮𑀲𑁆𑀲 𑀅𑀜𑁆𑀜𑀧𑀤𑀢𑁆𑀣𑁂 𑀧𑀬𑁄𑀕𑀸𑀪𑀸𑀯𑀸’𑀢𑀺. 𑀇𑀫𑀺𑀦𑀸 𑀧𑀘𑁆𑀘𑀬𑀕𑁆𑀕𑀳𑀡𑀧𑀭𑀺𑀪𑀸𑀲𑀫𑀦𑁆𑀢𑀭𑁂𑀦𑀸𑀧𑀺 𑀲𑀸𑀫𑀢𑁆𑀣𑀺𑀬𑁂𑀦𑁂𑀯𑀸𑀬𑀫𑀢𑁆𑀣𑀯𑀺𑀲𑁂𑀲𑁄 𑀮𑀩𑁆𑀪𑀢𑀻𑀢𑀺 𑀤𑀻𑀧𑁂𑀢𑀺.

𑀢𑀁𑀲𑀦𑁆𑀦𑀺𑀬𑁄𑀕𑀸𑀢𑀺 ¶ 𑀢𑁂𑀦 𑀦𑀻𑀧𑁆𑀧𑀘𑁆𑀘𑀬𑁂𑀦 𑀲𑀦𑁆𑀦𑀺𑀬𑁄𑀕𑀸 𑀏𑀓𑀻𑀪𑀸𑀯𑀸, 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 ‘𑀬𑀢𑁆𑀣 𑀦𑀻𑀧𑁆𑀧𑀘𑁆𑀘𑀬𑁄 𑀢𑀢𑁆𑀣𑁂𑀯 𑀬𑀮𑁄𑀧𑁄’𑀢𑀺.

𑀪𑀭𑀺𑀬𑀸𑀬𑀦𑁆𑀢𑀺 𑀧𑀓𑀢𑀺𑀯𑀺𑀲𑁂𑀲𑀦𑀢𑁆𑀢𑀸 𑀫𑀸𑀳- ‘𑀪𑀭𑀺𑀬𑀸𑀬’𑀦𑁆𑀢𑀺𑀆𑀤𑀺. 𑀧𑀼𑀦𑁆𑀦𑀸𑀫𑀥𑁂𑀬𑁆𑀬𑀸𑀢𑀺 𑀧𑀼𑀭𑀺𑀲𑀲𑁆𑀲 𑀲𑀫𑀜𑁆𑀜𑀸𑀪𑀽𑀢𑀸, 𑀧𑀼𑀁𑀬𑁄𑀕𑁂𑀦𑀸𑀢𑀺 𑀧𑀼𑀭𑀺𑀲𑁂𑀦 𑀲𑀳 𑀲𑀫𑁆𑀩𑀦𑁆𑀥𑁂𑀦 𑀳𑁂𑀢𑀼𑀦𑀸. 𑀇𑀢𑁆𑀣𑀺𑀬𑀁 𑀯𑀢𑁆𑀢𑀦𑁆𑀢𑀻𑀢𑀺 𑀲𑁄𑀬𑀫𑀺𑀢𑁆𑀬𑀪𑁂𑀤𑀯𑀘𑀦𑀺𑀘𑁆𑀙𑀸𑀬𑀁 𑀬𑀤𑀸 𑀪𑀭𑀺𑀬𑀸𑀲𑀗𑁆𑀔𑀸𑀢𑀸𑀬𑀫𑀺𑀢𑁆𑀣𑀺𑀬𑀁 𑀯𑀢𑁆𑀢𑀦𑁆𑀢𑁂, 𑀦𑀤𑀸𑀤𑀺𑀧𑀸𑀞𑀸𑀢𑀺 𑀯𑀼𑀢𑁆𑀢𑁂 𑀯𑀺𑀜𑁆𑀜𑀸𑀬𑀢𑀺 ‘𑀆𑀓𑀢𑀺𑀕𑀡𑀢𑁆𑀢𑀸 𑀦𑀤𑀸𑀤𑀺𑀧𑀸𑀞𑁄 𑀳𑁄𑀦𑁆𑀢𑁄 𑀏𑀯𑀁 𑀳𑁄𑀢𑀻’𑀢𑀺 𑀤𑀲𑁆𑀲𑁂𑀢𑀺, 𑀧𑀼𑀦𑁆𑀦𑀸𑀫𑀲𑁆𑀫𑀸𑀬𑁄𑀕𑀸𑀅𑀧𑀸𑀮𑀓𑀦𑁆𑀢𑀸𑀢𑀺 𑀦𑀤𑀸𑀤𑀺𑀧𑀸𑀞𑀢𑁄𑀢𑀺 𑀅𑀢𑁆𑀣𑁄𑀢𑀺 𑀲𑁂𑀲𑁄. 𑀇𑀤𑀜𑁆𑀘 𑀦𑀤𑀸𑀤𑀻𑀲𑀼 𑀕𑀡𑀲𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀢𑀲𑁆𑀲 𑀅𑀢𑁆𑀣𑀁 𑀯𑀤𑀢𑀺-‘𑀧𑀼𑀫𑀼𑀦𑁄’𑀇𑀘𑁆𑀘𑀸𑀤𑀺, 𑀅𑀧𑀸𑀮𑀓𑀦𑁆𑀢𑀸𑀢𑀺 𑀓𑀺𑀁𑀧𑀲𑀼𑀧𑀸𑀮𑀺𑀓𑀸 𑀔𑁂𑀢𑁆𑀢𑀧𑀸𑀮𑀺𑀓𑀸.

𑀧𑀼𑀣𑀼𑀲𑀤𑁆𑀤𑀢𑁄 𑀲𑀜𑁆𑀜𑀸𑀬𑀁 𑀯𑀻𑀧𑁆𑀧𑀘𑁆𑀘𑀬𑀁 𑀲𑀫𑀢𑁆𑀣𑁂𑀢𑀺‘𑀧𑀼𑀣𑀼𑀪𑀽𑀢𑀸 𑀧𑀣𑀯𑀻𑀢𑀺 𑀳𑀺 𑀫𑀳𑀻 𑀯𑀼𑀘𑁆𑀘𑀢𑀻’’𑀢𑀺, 𑀧𑀼𑀣𑀼𑀪𑀽𑀢𑀸𑀢𑀺 𑀳𑀺 𑀇𑀫𑀺𑀦𑀸 𑀧𑀣𑀯𑀻𑀲𑀤𑁆𑀤𑀲𑁆𑀲 𑀧𑀼𑀣𑀼𑀲𑀤𑁆𑀤𑀪𑀽𑀢𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀫𑀳𑀻 𑀯𑀼𑀘𑁆𑀘𑀢𑀻𑀢𑀺 𑀇𑀫𑀺𑀦𑀸 𑀦𑀤𑀸𑀤𑀺𑀧𑀸𑀞𑀸 𑀲𑀜𑁆𑀜𑀸𑀬𑀁 𑀯𑀻𑀧𑁆𑀧𑀘𑁆𑀘𑀬𑀢𑁆𑀢𑀁, 𑀧𑀼𑀣𑀼𑀪𑀽𑀢𑀸 𑀧𑀢𑁆𑀣𑀝𑀸𑀢𑀺 𑀅𑀢𑁆𑀣𑁄.

𑀧𑀭𑀸𑀥𑀺𑀓𑀸𑀭𑀢𑁄 𑀧𑀘𑁆𑀘𑀬𑀲𑁆𑀲 𑀧𑀭𑀯𑀺𑀥𑀺𑀦𑀸𑀯 𑀲𑀸𑀫𑀻𑀧𑁆𑀬𑀲𑁆𑀲 𑀲𑀺𑀤𑁆𑀥𑀢𑁆𑀢𑀸 𑀲𑀸𑀥𑀻𑀧𑁆𑀬𑀯𑀘𑀦𑀲𑁆𑀲𑀦𑁆𑀢𑀲𑀤𑁆𑀤𑀲𑁆𑀲 𑀕𑀳𑀡𑀫𑀦𑀢𑁆𑀣𑀓𑀁 𑀲𑀺𑀬𑀸𑀢𑀺 𑀫𑀦𑁆𑀢𑁆𑀯𑀸𑀯𑀬𑀯𑀯𑀘𑀦𑁄 𑀬𑀫𑀦𑁆𑀢𑀲𑀤𑁆𑀤𑁄 𑀕𑀬𑁆𑀳𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳- ‘𑀢𑀲𑁆𑀲 𑀅𑀦𑁆𑀢𑁄’𑀇𑀘𑁆𑀘𑀸𑀤𑀺. 𑀅𑀯𑀲𑀸𑀦𑀯𑀢𑀺+𑀅𑀯𑀬𑀯𑁄𑀢𑀺 𑀧𑀤𑀘𑁆𑀙𑁂𑀤𑁄, 𑀲𑀫𑀸𑀲𑀕𑁆𑀕𑀳𑀡𑁂𑀦 𑀕𑀳𑀡𑁂 𑀓𑀸𑀭𑀡𑀫𑀸𑀳-‘𑀅𑀯𑀬𑀯𑀢𑁆𑀢𑀸’𑀢𑀺. 𑀬𑀣𑀸𑀯𑀼𑀢𑁆𑀢𑀘𑁄𑀤𑀦𑀸𑀬 𑀦𑀺𑀤𑁆𑀤𑁄𑀲𑀢𑁆𑀢𑀫𑀼𑀧𑀫𑀸𑀯𑀲𑁂𑀦 𑀤𑀲𑁆𑀲𑁂𑀢𑀼𑀫𑀸𑀳-‘𑀦𑀸𑀬𑀁 𑀤𑁄𑀲𑁄’𑀘𑁆𑀘𑀸𑀤𑀺. 𑀧𑀮𑁆𑀮𑀯𑀺𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀧𑀮𑁆𑀮𑀯𑀸𑀦𑀫𑀯𑀬𑀯𑀢𑁆𑀢𑀁 𑀯𑀺𑀬 𑀲𑀫𑀸𑀲𑀢𑁄 𑀉𑀢𑁆𑀢𑀭𑀓𑀸𑀮𑀁 𑀯𑀺𑀥𑀻𑀬 𑀫𑀸𑀦𑀲𑁆𑀲 𑀅𑀓𑀸𑀭𑀲𑁆𑀲 𑀲𑀫𑀸𑀲𑀸𑀯𑀬𑀯𑀢𑁆𑀢𑀁 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀅𑀢𑁆𑀣𑁄.

𑀅𑀢𑀺𑀓𑁆𑀓𑀦𑁆𑀢𑀫𑀗𑁆𑀕𑀼𑀮𑀺𑀬𑁄𑀢𑀺 ¶ 𑀯𑀺𑀕𑁆𑀕𑀳𑁄. 𑀤𑁆𑀯𑁂 𑀅𑀗𑁆𑀕𑀼𑀮𑀺𑀬𑁄 𑀲𑀫𑀸𑀳𑀝𑀸𑀢𑀺 𑀧𑀭𑀯𑀺𑀕𑁆𑀕𑀳𑁂𑀦𑀸𑀢𑁆𑀣𑀫𑀸𑀳, 𑀤𑁆𑀯𑁂 𑀅𑀗𑁆𑀕𑀼𑀮𑀺𑀬𑁄 𑀧𑀫𑀸𑀡𑀫𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁂𑀦𑁂𑀯𑀁 𑀲𑀫𑀸𑀲𑁄 𑀢𑀢𑁄 𑀫𑀢𑁆𑀢𑀧𑁆𑀧𑀘𑁆𑀘𑀬𑁂 𑀢𑀕𑁆𑀖𑀧𑁆𑀧𑀘𑁆𑀘𑀬𑁂 𑀯𑀸 𑀢𑀲𑁆𑀲 ‘‘𑀮𑁄𑀧𑁄’’𑀢𑀺 (𑁪-𑁧𑁨𑁩) 𑀇𑀫𑀺𑀦𑀸 𑀮𑁄𑀧𑁂 𑀓𑀢𑁂 𑀯𑀺𑀲𑁂𑀲𑀦𑀲𑀫𑀸𑀲𑀸 𑀅𑀓𑀸𑀭𑁄𑀢𑀺 𑀤𑀲𑁆𑀲𑁂𑀢𑀼𑀁 ‘𑀓𑀣’𑀫𑀺𑀘𑁆𑀘𑀸𑀤𑀺𑀦𑀸 𑀬𑀁 𑀯𑀼𑀢𑁆𑀢𑀁 𑀢𑀁 𑀤𑀲𑁆𑀲𑁂𑀢𑀼𑀁 ‘𑀅𑀜𑁆𑀜𑀧𑀤𑀢𑁆𑀣𑁂’𑀘𑁆𑀘𑀸𑀤𑀺 𑀯𑀼𑀢𑁆𑀢𑀁. 𑀲𑀫𑀸𑀲𑀯𑀺𑀥𑀸𑀦𑀁 𑀅𑀢𑁄𑀧𑀻𑀢𑀺 𑀫𑀢𑁆𑀢𑀸𑀤𑀺𑀧𑁆𑀧𑀘𑁆𑀘𑀬𑀮𑁄𑀧𑀁 𑀓𑀢𑁆𑀯𑀸 ‘‘𑀯𑀺𑀲𑁂𑀲𑀦𑀫𑁂𑀓𑀢𑁆𑀣𑁂𑀦𑁂’’𑀢𑀺 (𑁩-𑁧𑁧) 𑀲𑀫𑀸𑀲𑀯𑀺𑀥𑀸𑀦𑀸, 𑀅𑀣 𑀦𑀸𑀬𑀫𑀗𑁆𑀕𑀼𑀮𑀺𑀲𑀤𑁆𑀤𑁂𑀦𑁂𑀯𑀁 𑀲𑀫𑀸𑀲𑁄, 𑀫𑀸𑀦𑁂 𑀧𑀘𑁆𑀘𑀬𑀮𑁄𑀧𑀯𑀲𑁂𑀦 𑀯𑀺𑀦𑀸𑀯 𑀅𑀧𑁆𑀧𑀘𑁆𑀘𑀬𑁂𑀦 𑀦𑀺𑀝𑁆𑀞𑀧𑁆𑀧𑀢𑁆𑀢𑀻𑀢𑀺 𑀫𑀦𑁆𑀢𑁆𑀯𑀸 ‘𑀅𑀗𑁆𑀕𑀼𑀮𑀲𑀤𑁆𑀤𑁄 𑀯𑀸’𑀘𑁆𑀘𑀸𑀤𑀺𑀦𑀸 𑀬𑀁 𑀯𑀼𑀢𑁆𑀢𑀺𑀬𑀁 𑀯𑀼𑀢𑁆𑀢𑀁 𑀢𑀢𑁆𑀣 𑀆𑀲𑀗𑁆𑀓𑀁 𑀯𑀺𑀭𑀘𑀬𑀢𑀺 ‘𑀅𑀣𑁂’𑀘𑁆𑀘𑀸𑀤𑀺. 𑀤𑁆𑀯𑀗𑁆𑀕𑀼𑀮𑀲𑀤𑁆𑀤𑀲𑁆𑀲 𑀧𑀫𑀸𑀡𑀺𑀦𑀺𑀯𑀢𑁆𑀢𑀦𑀢𑁄 𑀓𑀣𑀜𑁆𑀘𑀺𑀧𑀺 𑀅𑀜𑁆𑀜𑀧𑀤𑀢𑁆𑀣𑀢𑀸 𑀲𑀺𑀬𑀸𑀢𑀺 ‘𑀬𑀣𑀸 𑀢𑀣𑀸 𑀅𑀜𑁆𑀜𑀧𑀤𑀢𑁆𑀣𑁂 𑀯𑀢𑁆𑀢𑀢𑀽’𑀢𑀺𑀯𑀼𑀢𑁆𑀢𑀁. 𑀦𑀦𑀼 𑀦𑀺𑀭𑀗𑁆𑀕𑀼𑀮𑀦𑁆𑀢𑁆𑀬𑀸𑀤𑀺 𑀲𑀩𑁆𑀩𑀫𑀗𑁆𑀕𑀼𑀮𑀲𑀤𑁆𑀤𑁂𑀦 𑀲𑀸𑀥𑁂𑀢𑀼𑀁 𑀲𑀓𑁆𑀓𑀸, 𑀢𑀣𑀸 𑀲𑀢𑀺 𑀓𑀺𑀫𑀗𑁆𑀕𑀼𑀮𑀺 𑀲𑀤𑁆𑀤𑀸 𑀅𑀧𑁆𑀧𑀘𑁆𑀘𑀬𑀯𑀺𑀥𑀸𑀦𑁂𑀦𑁂𑀢𑁆𑀬𑀸𑀲𑀗𑁆𑀓𑀺𑀬 𑀧𑀬𑁄𑀚𑀦𑀦𑁆𑀢𑀭𑀁 𑀅𑀧𑀤𑀺𑀲𑀺𑀢𑀼𑀫𑀸𑀳- ‘𑀲𑀩𑁆𑀩𑀢𑁆𑀣𑁂’𑀘𑁆𑀘𑀸𑀤𑀺. 𑀅𑀗𑁆𑀕𑀼𑀮𑀺𑀲𑀤𑁆𑀤𑀢𑁄 𑀅𑀧𑁆𑀧𑀘𑁆𑀘𑀬𑁂 𑀅𑀯𑀺𑀳𑀺𑀢𑁂 𑀦𑀺𑀭𑀗𑁆𑀕𑀼𑀮𑀺𑀘𑁆𑀘𑀸𑀤𑀺𑀧𑀺 𑀲𑀺𑀬𑀸 𑀢𑀦𑁆𑀦𑀺𑀯𑀢𑁆𑀢𑀦𑀫𑁂𑀢𑁆𑀣 𑀧𑀬𑁄𑀚𑀦𑀦𑁆𑀢𑀺 𑀤𑀲𑁆𑀲𑁂𑀢𑀺 ‘𑀅𑀗𑁆𑀕𑀼𑀮𑀺𑀲𑀤𑁆𑀤𑀦𑀺𑀯𑀢𑁆𑀢𑀦𑀢𑁆𑀣’𑀦𑁆𑀢𑀺.

𑀤𑀻𑀖𑀭𑀢𑁆𑀢𑀦𑁆𑀢𑁆𑀬𑀸𑀤𑁄 𑀦𑀸𑀦𑀼𑀲𑀺𑀝𑁆𑀞𑀢𑁆𑀢𑀸 𑀮𑀺𑀗𑁆𑀕𑀯𑀺𑀲𑁂𑀲𑀲𑁆𑀲 𑀓𑀣𑀁 𑀦𑀧𑀼𑀁𑀲𑀓𑀢𑁆𑀢𑀫𑁂𑀯𑀺𑀘𑁆𑀘𑀸𑀲𑀗𑁆𑀓𑀺𑀬 𑀘𑁄𑀤𑁂𑀢𑀺 ‘𑀦𑀦𑀼𑀘𑁂’𑀘𑁆𑀘𑀸𑀤𑀺. 𑀦𑀸𑀬𑀁𑀤𑁄𑀲𑁄𑀘𑁆𑀘𑀸𑀤𑀺𑀦𑀸 𑀧𑀭𑀺𑀳𑀭𑀢𑀺. ‘‘𑀮𑀺𑀗𑁆𑀕𑀁 𑀦𑀸𑀦𑀼𑀲𑀸𑀲𑀦𑀻𑀬𑀁 𑀮𑁄𑀓𑀦𑀺𑀲𑁆𑀲𑀬𑀢𑁆𑀢𑀸 𑀮𑀺𑀗𑁆𑀕𑀲𑁆𑀲𑀸’’𑀢𑀻𑀤𑀫𑀸𑀮𑀫𑁆𑀩 𑀯𑀤𑀢𑀺 ‘𑀮𑁄𑀓𑁂’𑀢𑀺𑀆𑀤𑀺. 𑀅𑀣𑀯𑀸𑀢𑀺 𑀧𑀓𑁆𑀔𑀦𑁆𑀢𑀭𑁄𑀧𑀤𑀲𑁆𑀲𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀯𑀺𑀪𑀚𑁆𑀚𑀸𑀢𑀺 𑀯𑀺𑀪𑀚𑀺𑀢𑁆𑀯𑀸. 𑀓𑁆𑀯𑀘𑀻𑀢𑀺 𑀬𑁄𑀕𑀯𑀺𑀪𑀸𑀕𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀳𑁄𑀭𑀢𑁆𑀢𑀦𑁆𑀢𑀺 𑀲𑀫𑀸𑀳𑀸𑀭𑁂 (𑀘𑀢𑁆𑀣) 𑀲𑀫𑀸𑀲𑀸 𑀦𑀧𑀼𑀁𑀲𑀓𑀢𑁆𑀢𑀁. 𑀅𑀢𑀺𑀭𑀢𑁆𑀢𑁄𑀢𑀺 𑀧𑀼𑀮𑁆𑀮𑀺𑀗𑁆𑀕𑁂 𑀧𑀸𑀤𑀺𑀲𑀫𑀸𑀲𑁄, 𑀲𑀫𑀼𑀤𑀸𑀬𑀲𑀤𑁆𑀤𑀲𑁆𑀲𑀸𑀧𑁆𑀬𑀯𑀬𑀯𑁂 𑀯𑀼𑀢𑁆𑀢𑀺 𑀲𑀩𑁆𑀪𑀸𑀯𑀢𑁄 𑀏𑀓𑀤𑁂𑀲𑀯𑀘𑀦𑁄 𑀧𑀼𑀩𑁆𑀩𑀭𑀢𑁆𑀢𑀸𑀤𑁄 𑀭𑀢𑁆𑀢𑀺𑀲𑀤𑁆𑀤𑁄𑀘𑁆𑀘𑀸𑀳-‘𑀧𑀼𑀩𑁆𑀩𑀸 𑀘 𑀲𑀸 𑀭𑀢𑁆𑀢𑀺 𑀘𑀸’𑀢𑀺𑀆𑀤𑀺. 𑀏𑀯𑀫𑁂𑀓𑀭𑀢𑁆𑀢𑀦𑁆𑀢𑀺 𑀧𑀸𑀞𑁂𑀦 𑀦 𑀪𑀯𑀺𑀢𑀩𑁆𑀩𑀁… 𑀢𑀲𑁆𑀲 𑀲𑀫𑀸𑀳𑀸𑀭𑁂𑀦 𑀲𑀫𑀸𑀲𑀢𑁆𑀢𑀸𑀪𑀸𑀯𑀸. 𑀦𑀧𑀼𑀁𑀲𑀓𑀮𑀺𑀗𑁆𑀕𑀫𑁆𑀧𑀦 𑀮𑁄𑀓𑀲𑀦𑁆𑀦𑀺𑀲𑁆𑀲 𑀬𑀢𑁆𑀢𑀸 𑀯𑀺𑀜𑁆𑀜𑁂𑀬𑁆𑀬𑀁.

𑀅𑀲𑀫𑀸𑀲𑀦𑁆𑀢𑀧𑀓𑁆𑀔𑁂𑀢𑀺 ¶ 𑀲𑀫𑀸𑀲𑀦𑁆𑀢𑀅𑀧𑁆𑀧𑀘𑁆𑀘𑀬𑀲𑁆𑀲𑀸𑀪𑀸𑀯𑀧𑀓𑁆𑀔𑁂. 𑀧𑀼𑀩𑁆𑀩𑀸 𑀅𑀢𑀺𑀓𑁆𑀓𑀦𑁆𑀢𑀸 𑀭𑀢𑁆𑀢𑀺 𑀧𑀼𑀩𑁆𑀩𑀭𑀢𑁆𑀢𑀻(𑀢𑀺 𑀭𑀢𑁆𑀢𑀺 𑀲𑀤𑁆𑀤𑁄) 𑀦𑁂𑀓𑀤𑁂𑀲𑀯𑀘𑀦𑁄𑀢𑀺 𑀲𑀫𑀸𑀲𑀦𑁆𑀢𑀸𑀪𑀸𑀯𑁄.

𑀦𑀦𑀼𑀘𑁂𑀘𑁆𑀘𑀸𑀤𑀺𑀦𑀸 𑀬𑀣𑀸𑀧𑀸𑀤𑀺𑀢𑀤𑁄𑀲𑀁 𑀦𑀸𑀬𑀁 𑀤𑁄𑀲𑁄𑀢𑀺 𑀧𑀭𑀺𑀳𑀭𑀢𑀺. 𑀲𑁆𑀬𑀸𑀤𑀺𑀮𑁄𑀧𑀲𑁆𑀲𑀺𑀘𑁆𑀘𑀸𑀤𑀺𑀦𑀸 𑀲𑀼𑀮𑀪𑀲𑁆𑀬𑀸𑀤𑀺 𑀮𑁄𑀧𑀢𑁄 𑀧𑁆𑀬𑀲𑀼𑀮𑀪𑀢𑀤𑁆𑀥𑀺𑀢 𑀮𑁄𑀧𑁄𑀯 𑀅𑀮𑁄𑀧𑁂𑀢𑀻𑀫𑀺𑀦𑀸 𑀧𑀭𑀸𑀫𑀝𑁆𑀞𑀼𑀁 𑀬𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺.

𑀭𑀢𑁆𑀢𑀺𑀦𑁆𑀤𑀺𑀯𑀁 𑀪𑀼𑀜𑁆𑀚𑀢𑀻𑀢𑀺 𑀧𑀬𑁄𑀕𑁂 𑀆𑀥𑁂𑀬𑁆𑀬𑁂 𑀪𑁄𑀚𑀦𑀲𑀗𑁆𑀔𑀸𑀢𑁂 𑀅𑀧𑁂𑀓𑁆𑀔𑀺𑀢𑁂 𑀭𑀢𑁆𑀬𑀸𑀤𑀬𑁄 𑀆𑀤𑁂𑀬𑁆𑀬𑀲𑀸𑀧𑁂𑀓𑁆𑀔𑀸, 𑀢𑁂𑀲𑀫𑁆𑀧𑀺 𑀇𑀫𑀺𑀦𑀸 𑀦𑀺𑀧𑀸𑀢 𑀦𑁂𑀦𑁂𑀯𑀸𑀢𑀺𑀫𑀢𑀸 𑀲𑀫𑀸𑀲𑀲𑁆𑀲 𑀲𑀺𑀤𑁆𑀥𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳- ‘𑀭𑀢𑁆𑀢𑀦𑁆𑀤𑀺𑀯’𑀦𑁆𑀢𑀺𑀆𑀤𑀺, 𑀭𑀢𑁆𑀢𑀺 𑀘 𑀤𑀺𑀯𑀸𑀘𑀸𑀢𑀺 𑀯𑀺𑀕𑁆𑀕𑀳𑁄, 𑀘𑀢𑁆𑀣𑀲𑀫𑀸𑀲𑁂 𑀢𑀼 𑀭(𑀢𑁆𑀢𑀺𑀦𑁆𑀤𑀺) 𑀯𑀸.

𑀲𑀫𑀸𑀲𑀢𑁆𑀣𑁄 (𑀏𑀢𑁆𑀣) 𑀤𑀸𑀭𑀼, 𑀦𑀸𑀲𑁆𑀲 𑀫𑀼𑀔𑁆𑀬𑀸𑀳𑀺 𑀅𑀗𑁆𑀕𑀼𑀮𑀻𑀳𑀺 𑀲𑀫𑁆𑀩𑀦𑁆𑀥𑁄 𑀬𑀼𑀚𑁆𑀚𑀢𑀺, 𑀦𑀦𑀼 𑀤𑁆𑀯𑁂 𑀅𑀗𑁆𑀕𑀼𑀮𑀻 𑀧𑀫𑀸𑀡𑀫𑀲𑁆𑀲 𑀤𑀸𑀭𑀼𑀦𑁄𑀘𑁆𑀘𑀸𑀤𑀺𑀁 𑀫𑀼𑀔𑁆𑀬𑁄 𑀅𑀗𑁆𑀕𑀼𑀮𑀺𑀲𑀤𑁆𑀤𑁄𑀕𑀳𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄 𑀲𑀫𑁆𑀪𑀯𑀢𑀺 𑀓𑀺𑀫𑁂𑀯𑀁 𑀯𑀼𑀘𑁆𑀘𑀢𑁂𑀘𑁆𑀘𑀸𑀲𑀗𑁆𑀓𑀺𑀬𑀸𑀳-‘𑀬𑀤𑀺𑀧𑀺’𑀘𑁆𑀘𑀸𑀤𑀺, 𑀧𑀫𑀸𑀡𑀯𑀘𑀦𑁂𑀦𑀸𑀢𑀺 𑀫𑀢𑁆𑀢𑀸𑀤𑀺𑀧𑀘𑁆𑀘𑀬𑀢𑁆𑀣𑀪𑀽𑀢𑀧𑀫𑀸𑀡𑀯𑀸𑀘𑀓𑁂𑀦, 𑀅𑀗𑁆𑀕𑀼𑀮𑀺 𑀲𑀤𑁆𑀤𑀲𑁆𑀲 𑀤𑀸𑀭𑀼𑀦𑁄 𑀧𑀫𑀸𑀡𑀯𑀸𑀘𑀓𑀢𑁆𑀢𑀸 𑀯𑀼𑀢𑁆𑀢𑀁- ‘𑀤𑀸𑀭𑀼𑀦𑁄 𑀲𑀫𑁆𑀩𑀦𑁆𑀥𑁄 𑀅𑀢𑁆𑀣𑀻’𑀢𑀺. 𑀯𑀺𑀲𑁂𑀲𑀦𑀲𑀫𑀸𑀲𑀢𑁄 𑀧𑀭𑀁 𑀢𑀤𑀢𑁆𑀣𑀯𑀺𑀲𑀬𑁂 𑀢𑀲𑁆𑀫𑀺𑀁𑀧𑀫𑀸𑀡𑀢𑁆𑀣𑀯𑀺𑀲𑀬𑁂 ‘‘𑀫𑀸𑀦𑁂𑀫𑀢𑁆𑀢𑁄’’𑀢𑀺𑀆𑀤𑀺𑀦𑀸 (𑁪-𑁪𑁬) 𑀫𑀢𑁆𑀢𑀸𑀤𑀺𑀧𑁆𑀧𑀘𑁆𑀘𑀬𑁂𑀦𑀪𑀯𑀺𑀢𑀩𑁆𑀩𑀦𑁆𑀢𑀺𑀅𑀢𑁆𑀣𑁄, 𑀮𑁄𑀧𑁂𑀦𑀪𑀯𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, ‘‘𑀅𑀲𑀗𑁆𑀔𑁆𑀬𑁂𑀳𑀺 𑀘𑀸𑀗𑁆𑀕𑀼𑀮𑁆𑀬𑀸 𑀦𑀜𑁆𑀜𑀸𑀲𑀗𑁆𑀔𑁆𑀬𑀢𑁆𑀣𑁂𑀲𑀼’’𑀇𑀘𑁆𑀘𑀢𑁆𑀭 (𑁩-𑁪𑁪) 𑀬𑀤𑀸𑀔𑁆𑀬𑀸𑀢𑀁, 𑀢𑀤𑀺𑀳𑀸𑀧𑁆𑀬𑀢𑀺𑀤𑀺𑀲𑀫𑀸𑀳-‘𑀧𑀼𑀩𑁆𑀩𑁂 𑀯𑀺𑀬𑀲𑀺𑀤𑁆𑀥’𑀦𑁆𑀢𑀺, 𑀅𑀦𑀓𑀸𑀭𑀦𑁆𑀢𑀸𑀦𑀦𑁆𑀢𑀺 𑀪𑀽𑀫𑀺𑀆𑀤𑀻𑀦𑀁, 𑀢𑀩𑁆𑀩𑀺𑀥𑀸𑀦𑁂 𑀢𑀲𑁆𑀲 𑀅𑀧𑁆𑀧𑀘𑁆𑀘𑀬𑀲𑁆𑀲 𑀯𑀺𑀥𑀸𑀦𑁂 𑀧𑀬𑁄𑀚𑀦𑀁𑀲𑀺𑀲𑁆𑀲𑁄𑀓𑀸𑀭𑁄𑀢𑀺𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 𑀓𑀘𑁆𑀘𑀸𑀬𑀦𑀸𑀦𑀁 𑀧𑀓𑀭𑀡𑁂 𑀧𑀬𑁄𑀚𑀦𑀁 𑀤𑀲𑁆𑀲𑀺𑀢𑀁. 𑀅𑀣𑀘 𑀧𑀦𑁂𑀢𑁆𑀣 ‘‘𑀓𑁆𑀯𑀘𑀺 𑀲𑀫𑀸𑀲𑀦𑁆𑀢𑀕𑀢𑀸𑀦𑀫𑀓𑀸𑀭𑀦𑁆𑀢𑁄’’𑀢𑀺 (𑀓, 𑁨-𑁭-𑁨𑁨) 𑀇𑀫𑀺𑀦𑀸 𑀅𑀓𑀸𑀭𑀦𑁆𑀢𑀲𑁆𑀲 𑀲𑀫𑀸𑀲𑀦𑁆𑀢𑁂 𑀓𑀢𑁂 𑀲𑀸𑀫𑀢𑁆𑀣𑀺𑀬𑀸 ‘𑀲𑁆𑀬𑀸𑀘’𑀇𑀢𑀺 (𑀓, 𑁨-𑁩-𑁨𑁯) 𑀲𑀺𑀲𑁆𑀲𑀸𑀓𑀸𑀭𑀸𑀤𑁂𑀲𑀸𑀪𑀸𑀯𑀸 𑀦𑀺𑀘𑁆𑀘𑀫𑁄𑀓𑀸𑀭𑀦𑁆𑀢𑀭𑀽𑀧𑀁 𑀲𑀫𑁆𑀧𑀚𑁆𑀚𑀢𑀻𑀢𑀺 𑀧𑀭𑀺𑀓𑀧𑁆𑀧𑀺𑀬𑀢𑀲𑁆𑀲𑀸𑀬𑀼𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀬𑀁 ¶ 𑀯𑀼𑀢𑁆𑀢𑀁𑀯𑀼𑀢𑁆𑀢𑀺𑀓𑀸𑀭𑁂𑀦, 𑀢𑀁 𑀤𑀲𑁆𑀲𑁂𑀢𑀼𑀫𑀸𑀳‘𑀅𑀓𑀸𑀭𑀦𑁆𑀢𑀲𑁆𑀲𑀧𑀺’𑀘𑁆𑀘𑀸𑀤𑀺, 𑀬𑀁-𑀯𑀼𑀢𑁆𑀢𑀁 𑀲𑀺𑀲𑁆𑀲𑀸𑀓𑀸𑀭𑀸 𑀤𑁂𑀲𑀦𑀺𑀯𑀢𑁆𑀢𑀦𑁂 𑀅𑀓𑀸𑀭𑀓𑀭𑀡𑁂 𑀲𑀸𑀫𑀢𑁆𑀣𑀺𑀬𑀁, 𑀢𑀤𑀪𑀸𑀯𑀸 𑀲𑀺𑀲𑁆𑀲𑀸𑀓𑀸𑀭𑀸𑀤𑁂𑀲𑁄 𑀦 𑀦𑀺𑀯𑀸𑀭𑀻𑀬𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘𑀦𑀘𑁂’𑀘𑁆𑀘𑀸𑀤𑀺. 𑀘𑀭𑀺𑀢𑀢𑁆𑀣𑀢𑀸𑀬 𑀦𑀺𑀝𑁆𑀞𑀺𑀢𑀧𑁆𑀧𑀬𑁄𑀚𑀦𑀢𑀸𑀬, 𑀢𑁂𑀦𑁂𑀯 𑀓𑀘𑁆𑀘𑀸𑀬𑀦𑀯𑀼𑀢𑁆𑀢𑀺𑀓𑀸𑀭𑁂𑀦𑁂𑀯 𑀅𑀧𑁆𑀧𑀘𑁆𑀘𑀬𑀦𑁆𑀢 𑀫𑀼𑀤𑀸𑀳𑀝𑀁 𑀲𑀓𑁆𑀓𑀢𑀕𑀦𑁆𑀣𑀸𑀦𑀼𑀲𑀸𑀭𑁂𑀦, 𑀅𑀩𑁆𑀬𑀜𑁆𑀚𑀦𑀦𑁆𑀢𑀢𑁆𑀢𑀸𑀢𑀺 𑀇𑀫𑀺𑀦𑀸 𑀢𑀺𑀡𑁆𑀡𑀫𑁂𑀲𑀁 𑀲𑀤𑁆𑀤𑀸𑀦𑀁 𑀲𑀓𑁆𑀓𑀢𑁂 𑀩𑁆𑀬𑀜𑁆𑀚𑀦𑀦𑁆𑀢𑀢𑁆𑀢𑀫𑁂𑀯 𑀩𑁄𑀥𑁂𑀢𑀺, 𑀦𑀺𑀭𑀢𑁆𑀣𑀓𑀦𑁆𑀢𑀺 𑀧𑀼𑀩𑁆𑀩𑁂𑀯 𑀅𑀓𑀸𑀭𑀦𑁆𑀢𑀢𑁆𑀢𑀸 𑀦𑀺𑀭𑀢𑁆𑀣𑀓𑀁, 𑀆𑀓𑀸𑀭𑀯𑀺𑀥𑀸𑀦𑁂𑀦𑁂𑀯𑀸𑀢𑀺 (𑀓, 𑁨-𑁭-𑁨𑁫) ‘‘𑀥𑀦𑀼𑀫𑁆𑀳𑀸𑀘’’ 𑀇𑀢𑁆𑀬𑀸𑀓𑀸𑀭𑀯𑀺𑀥𑀸𑀦𑁂𑀦𑁂𑀯.

𑀅𑀜𑁆𑀜𑀫𑀜𑁆𑀜𑀓𑀺𑀭𑀺𑀬𑁂𑀢𑀺 𑀓𑀺𑀭𑀺𑀬𑀸𑀧𑀭𑀺𑀯𑀢𑁆𑀢𑀦𑀫𑀸𑀳, 𑀇𑀫𑀺𑀦𑀸 𑀲𑀼𑀢𑁆𑀢𑁂 𑀓𑀺𑀭𑀺𑀬 𑀲𑀤𑁆𑀤𑀸𑀪𑀸𑀯𑁂𑀧𑀺 𑀯𑀻𑀢𑀺𑀳𑀭𑀡𑀲𑀤𑁆𑀤𑁂𑀦𑁂𑀯 𑀓𑀺𑀭𑀺𑀬𑀸𑀩𑁆𑀬𑀢𑀺𑀳𑀸𑀭𑁂𑀢𑀺 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀧𑀝𑀺𑀫𑀼𑀓𑁆𑀓𑀓𑀫𑁆𑀩𑀽 𑀆𑀫𑀼𑀓𑁆𑀓𑀯𑀮𑀬𑀸.

𑀓𑀸𑀧𑁂𑀓𑁆𑀔𑁂𑀳𑀻𑀢𑀺 𑀓𑀧𑁆𑀧𑀘𑁆𑀘𑀬𑀫𑀧𑁂𑀓𑁆𑀔𑀺𑀢𑁂𑀳𑀺.

𑀆𑀧𑀭𑀺𑀘𑁆𑀙𑁂𑀤𑀸𑀯𑀲𑀸𑀦𑀸 𑀦 𑀧𑀭𑁂 [𑀧𑀭𑁂𑀦 (𑀧𑁄𑀢𑁆𑀣𑀓𑁂)] 𑀢𑀢𑁄 𑀧𑀭𑀁 𑀡𑀸𑀤𑀺𑀓𑀸𑀭𑀺𑀬𑀯𑀺𑀥𑀸𑀦𑀸.

𑀝𑀸𑀤𑁂𑀲𑁂 𑀧𑀼𑀩𑁆𑀩𑀲𑀭𑀮𑁄𑀧𑁄, 𑀅𑀢𑀺𑀲𑀬𑁂𑀦 𑀫𑀳𑀦𑁆𑀢𑀻𑀢𑀺 𑀯𑀺𑀕𑁆𑀕𑀳𑁂 ‘‘𑀢𑀭𑀢𑀫𑀺𑀲𑁆𑀲𑀺𑀓𑀺𑀬𑀺𑀝𑁆𑀞𑀸𑀢𑀺𑀲𑀬𑁂’’𑀢𑀺 (𑁪-𑁬𑁪) 𑀢𑀭𑀧𑁆𑀧𑀘𑁆𑀘𑀬𑁄 𑀡𑀸𑀤𑀺𑀯𑀼𑀢𑁆𑀢𑀺𑀬𑀁 𑀯𑀺𑀪𑀢𑁆𑀢𑀺𑀮𑁄𑀧𑁄. 𑀫𑀳𑀢𑁆𑀢𑀭𑀲𑀤𑁆𑀤𑀸 ‘𑀦𑀤𑀸𑀤𑀺𑀢𑁄𑀯𑀻’’ (𑁩-𑁨𑁭) 𑀫𑀳𑀢𑁄 𑀪𑀸𑀯𑁄𑀢𑀺 𑀯𑀸𑀓𑁆𑀬𑁂‘‘𑀢𑀲𑁆𑀲 𑀪𑀸𑀯𑀓𑀫𑁆𑀫𑁂𑀲𑀼𑀢𑁆𑀢𑀢𑀸 𑀢𑁆𑀢𑀦 𑀡𑁆𑀬 𑀡𑁂𑀬𑁆𑀬 𑀡𑀺𑀬 𑀡𑀺𑀬𑀸’’𑀢𑀺 (𑁪-𑁫𑁬) 𑀢𑁆𑀢𑁄, 𑀯𑀺𑀪𑀢𑁆𑀢𑀺𑀮𑁄𑀧𑁄, 𑀙𑀝𑁆𑀞𑀻𑀲𑀫𑀸𑀲𑁄, 𑀢𑁂𑀦𑀸𑀳 ‘𑀭𑀢𑁆𑀢𑀜𑁆𑀜𑀽𑀦’𑀫𑀺𑀘𑁆𑀘𑀸𑀤𑀺.

𑀧𑀭𑀸𑀲𑀤𑁆𑀤𑁄 𑀏𑀢𑁆𑀣 𑀅𑀥𑀺𑀓𑀢𑁆𑀣𑁄𑀢𑀺 𑀆𑀳-‘𑀅𑀥𑀺𑀓𑀸’𑀢𑀺.

𑀅𑀧𑀯𑀸𑀤𑀯𑀺𑀲𑀬𑁂𑀧𑀻𑀢𑀺 ‘‘𑀯𑀺𑀚𑁆𑀚𑀸𑀬𑁄𑀦𑀺𑀲𑀫𑁆𑀩𑀦𑁆𑀥𑀸𑀦𑀫𑀸 𑀢𑀢𑁆𑀭 𑀘𑀢𑁆𑀣𑁂’’𑀢𑀺 (𑁩-𑁬𑁪) 𑀇𑀫𑀲𑁆𑀲 𑀅𑀧𑀯𑀸𑀤𑀲𑀼𑀢𑁆𑀢𑀲𑁆𑀲 𑀯𑀺𑀲𑀬𑁂𑀧𑀺.

𑀅𑀣 𑀯𑀺𑀚𑁆𑀚𑀸𑀬𑁄𑀦𑀺𑀲𑀫𑁆𑀩𑀦𑁆𑀥𑀸𑀦𑀫𑀺𑀢𑁆𑀬𑀼𑀘𑁆𑀘𑀫𑀸𑀦𑁂 𑀯𑀺𑀚𑁆𑀚𑀸𑀲𑀫𑁆𑀩𑀦𑁆𑀥𑀻𑀦𑀁 𑀬𑁄𑀦𑀺𑀲𑀫𑁆𑀩𑀦𑁆𑀥𑀻𑀦𑀦𑁆𑀢𑀺 𑀓𑀣𑀁 𑀯𑀺𑀯𑀭𑀡𑀫𑀺𑀘𑁆𑀘𑀸𑀳-‘𑀯𑀺𑀚𑁆𑀚𑀸𑀬𑁄𑀦𑀺’𑀘𑁆𑀘𑀸𑀤𑀺, 𑀯𑀺𑀚𑁆𑀚𑀸 𑀘 𑀬𑁄𑀦𑀺 𑀘 𑀯𑀺𑀚𑁆𑀚𑀸 𑀬𑁄𑀦𑀻 𑀢𑀸𑀲𑀁 𑀲𑀫𑁆𑀩𑀦𑁆𑀥𑁄, 𑀲𑁄 𑀬𑁂𑀲𑀁 𑀅𑀢𑁆𑀣𑀺 𑀢𑁂 𑀳𑁄𑀢𑀸𑀤𑀬𑁄 𑀫𑀸𑀢𑀸𑀤𑀬𑁄 𑀘 𑀅𑀪𑁂𑀤𑁄𑀧𑀘𑀸𑀭𑁂𑀦𑁂𑀳 𑀯𑀺𑀚𑁆𑀚𑀸𑀬𑁄𑀦𑀺𑀲𑀫𑁆𑀩𑀦𑁆𑀥𑀺𑀲𑀤𑁆𑀤𑁂𑀦 𑀕𑀬𑁆𑀳𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑀲𑀤𑁆𑀤𑁂𑀦𑀸𑀢𑀺 𑀢𑀢𑁆𑀭𑁂𑀢𑁆𑀬𑀢𑁆𑀭. 𑀢𑁂 𑀘 𑀮𑁆𑀢𑀼𑀧𑀺𑀢𑀸𑀤𑀬𑁄𑀢𑀺 𑀢𑀲𑀤𑁆𑀤𑁂𑀦 𑀧𑀭𑀸𑀫𑀝𑁆𑀞𑀸 𑀮𑁆𑀢𑀼𑀧𑀺𑀢𑀸𑀤𑀬𑁄 𑀘, 𑀅𑀢𑁆𑀣𑁂 𑀓𑀸𑀭𑀺𑀬𑀸 𑀲𑀫𑁆𑀪𑀯𑀸 𑀢𑀁𑀯𑀸𑀘𑀓𑁄 𑀲𑀤𑁆𑀤𑁄 𑀕𑀬𑁆𑀳𑀢𑀺.

𑀮𑁆𑀢𑀼𑀧𑀺𑀢𑀸𑀤𑀻 (𑀢𑀺 𑀧𑀼𑀩𑁆𑀩) 𑀲𑀼𑀢𑁆𑀢𑁂 𑀢𑀢𑁆𑀭𑁂𑀢𑀺 𑀕𑀳𑀺𑀢𑀮𑁆𑀢𑀼𑀧𑀺𑀢𑀸𑀤𑀺.

𑀧𑀘𑁆𑀘𑀬𑀕𑁆𑀕𑀳𑀡𑀧𑀭𑀺𑀪𑀸𑀲𑀸𑀬 𑀘𑀺𑀧𑁆𑀧𑀘𑁆𑀘𑀬𑀦𑁆𑀢𑁂𑀢𑀺 𑀯𑀼𑀢𑁆𑀢𑀁.

𑀇𑀢𑁆𑀣𑀺𑀲𑀤𑁆𑀤𑁂𑀦 𑀇𑀢𑁆𑀣𑀺𑀮𑀺𑀗𑁆𑀕𑀁 𑀕𑀳𑀺𑀢𑀁 𑀦 𑀇𑀢𑁆𑀣𑀻, 𑀢𑀕𑁆𑀕𑀳𑀡𑁂 𑀲𑀢𑀺 ‘𑀇𑀢𑁆𑀣𑀺𑀬𑀁 𑀯𑀢𑁆𑀢𑀫𑀸𑀦𑁂’𑀢𑀺 𑀯𑀼𑀢𑁆𑀢𑀺𑀕𑀦𑁆𑀣𑀲𑁆𑀲 𑀇𑀢𑁆𑀣𑀺𑀲𑀗𑁆𑀔𑀸𑀢𑁂 𑀅𑀢𑁆𑀣𑁂 𑀯𑀢𑁆𑀢𑀫𑀸𑀦𑁂𑀢𑀺 𑀅𑀢𑁆𑀣𑁄 𑀕𑀬𑁆𑀳𑁂𑀬𑁆𑀬, 𑀏𑀯𑀁 𑀲𑀢𑀺 ‘𑀓𑀮𑁆𑀬𑀸𑀡𑀺𑀧𑁆𑀧𑀥𑀸𑀦𑀸’𑀢𑀺 𑀏𑀢𑁆𑀣𑀸𑀧𑀺 𑀧𑀼𑀫𑁆𑀪𑀸𑀯𑁄 𑀧𑀲𑀚𑁆𑀚𑁂𑀬𑁆𑀬… 𑀧𑀥𑀸𑀦𑀲𑀤𑁆𑀤𑀲𑁆𑀲 𑀓𑀮𑁆𑀬𑀸𑀡𑀺𑀬𑀁 𑀯𑀢𑁆𑀢𑀫𑀸𑀦𑀢𑁆𑀢𑀸𑀢𑀺 𑀆𑀳- ‘𑀇𑀢𑁆𑀣𑀺𑀬𑀦𑁆𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑁂’𑀢𑀺. 𑀅𑀣 𑀇𑀢𑁆𑀣𑀺𑀬𑀦𑁆𑀢𑀺 𑀏𑀢𑁆𑀢𑀓𑁂 𑀯𑀼𑀢𑁆𑀢𑁂 𑀓𑀣𑀁 𑀢𑀕𑁆𑀕𑀳𑀡𑀁 ¶ 𑀲𑀺𑀬𑀸𑀢𑀺 𑀆𑀳-‘𑀯𑀺𑀲𑁂𑀲𑀦𑁂’𑀘𑁆𑀘𑀸𑀤𑀺, 𑀏𑀓𑀢𑁆𑀣𑁂𑀢𑀺 𑀯𑀼𑀢𑁆𑀢𑁂𑀧𑀺 𑀇𑀢𑁆𑀣𑀺𑀬𑀁 𑀯𑀢𑁆𑀢𑀫𑀸𑀦𑁂𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀇𑀢𑁆𑀣𑀺𑀬𑀦𑁆𑀢𑀺 𑀯𑀘𑀦𑀫𑀦𑀢𑁆𑀣𑀁 𑀲𑀺𑀬𑀸𑀢𑀺 𑀲𑀫𑀢𑁆𑀣𑀫𑀜𑁆𑀜𑀣𑀸𑀦𑀼𑀧𑀧𑀢𑁆𑀢𑀺𑀬𑀦𑁆𑀢𑀺 𑀇𑀢𑁆𑀣𑀺𑀬𑀦𑁆𑀢𑀺 𑀯𑀺𑀲𑁂𑀲𑀦𑀫𑀺𑀢𑁆𑀣𑀺𑀮𑀺𑀗𑁆𑀕𑀲𑁆𑀲𑁂𑀯 𑀕𑀳𑀡𑁂𑀢𑀺 𑀆𑀳- ‘𑀯𑀺𑀲𑁂𑀲𑀦𑁂’𑀘𑁆𑀘𑀸𑀤𑀺, 𑀇𑀢𑁆𑀣𑀺𑀬𑀦𑁆𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲𑁂𑀯 𑀕𑀳𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀩𑁆𑀬𑀯𑀘𑁆𑀙𑁂𑀚𑁆𑀚𑀸𑀪𑀸𑀯𑀸 𑀯𑀺𑀲𑁂𑀲𑀦𑀫𑀦𑀢𑁆𑀣𑀓𑀁 𑀲𑀺𑀬𑀸𑀢𑀺 𑀏𑀓𑀢𑁆𑀣𑁂𑀇𑀘𑁆𑀘𑀦𑁂𑀦𑁂𑀯 𑀇𑀢𑁆𑀣𑀺𑀬𑀁 𑀯𑀼𑀢𑁆𑀢𑀺𑀬𑀸 (𑀕𑀫𑁆𑀫) 𑀪𑀸𑀯𑀢𑁄𑀢𑀺 𑀪𑀸𑀯𑁄. 𑀧𑀼𑀫𑁂 𑀧𑀼𑀮𑁆𑀮𑀺𑀗𑁆𑀕𑁂 𑀯𑀢𑁆𑀢𑀫𑀸𑀦𑁄 𑀲𑀤𑁆𑀤𑁄 𑀧𑀼𑀫𑀸𑀲𑀤𑁆𑀤𑁄, 𑀲𑀓𑀮𑁄𑀢𑀺 𑀧𑀤𑁂𑀲𑀲𑀓𑀮𑁄 𑀳𑀺 𑀕𑀬𑁆𑀳𑀢𑀺… 𑀓𑀲𑁆𑀲𑀘𑀺 𑀲𑀼𑀢𑁆𑀢𑀢𑁆𑀣𑀲𑁆𑀲 𑀧𑀼𑀣𑀪𑀽𑀢𑀢𑁆𑀢𑀸, 𑀢𑁂𑀦𑁂𑀯𑀘𑀸𑀳- ‘𑀇𑀢𑁆𑀣𑀺𑀬𑀦𑁆𑀢𑀼 𑀦 𑀯𑀢𑁆𑀢𑀢𑁆𑀢𑁂’𑀢𑀺.

𑀯𑀢𑁆𑀢𑀦𑀁 𑀏𑀓𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀢𑁆𑀣𑀺𑀘𑁆𑀘𑀸𑀤𑁄 𑀇𑀢𑁆𑀣𑀺𑀯𑀺𑀲𑀺𑀝𑁆𑀞𑁂 𑀲𑀢𑁆𑀢𑀫𑀺𑀬𑀢𑁆𑀣𑀸𑀤𑁄, 𑀯𑀸𑀲𑀺𑀝𑁆𑀞𑁄𑀘𑁆𑀘𑀸𑀤𑁄 𑀯𑀲𑀺𑀝𑁆𑀞𑀸𑀤𑀺𑀯𑀺𑀲𑀺𑀝𑁆𑀞𑁂 𑀅𑀧𑀘𑁆𑀘𑀸𑀤𑁄, 𑀧𑀼𑀢𑁆𑀢𑀻𑀬𑀢𑀺𑀘𑁆𑀘𑀸𑀤𑁄 𑀧𑀼𑀢𑁆𑀢𑀸𑀤𑀺𑀯𑀺𑀲𑀺𑀝𑁆𑀞𑁂 𑀇𑀘𑁆𑀙𑀸𑀤𑁆𑀬𑀢𑁆𑀣𑁂 𑀧𑀯𑀢𑁆𑀢𑀺, 𑀢𑁂𑀦𑀸𑀳-‘𑀏𑀓𑀢𑁆𑀣𑀻𑀪𑀸𑀯𑁄’𑀢𑀺. 𑀲𑀸𑀫𑀜𑁆𑀜 𑀕𑀳𑀡𑀢𑁆𑀣𑀦𑁆𑀢𑀺 𑀇𑀫𑀺𑀦𑀸 𑀫𑀢𑁆𑀢𑀲𑀤𑁆𑀤𑀲𑁆𑀲 𑀓𑀲𑀺𑀡𑀢𑁆𑀣𑁂 𑀧𑀯𑀢𑁆𑀢𑀺𑀫𑀸𑀳.

𑀏𑀯𑀦𑁆𑀢𑀺 𑀇𑀫𑀺𑀦𑀸 𑀇𑀢𑀭𑀻𑀢𑀭𑀬𑁄𑀕𑁂 𑀘𑀢𑁆𑀣𑀲𑀫𑀸𑀲𑀁 𑀯𑀺𑀪𑀸𑀯𑁂𑀢𑀺. 𑀚𑀸𑀦𑀺𑀚𑀸𑀬𑀸, 𑀲𑀤𑁆𑀤𑀦𑁆𑀢𑀭𑁂𑀦𑀸𑀢𑀺 𑀚𑀸𑀦𑀺𑀲𑀤𑁆𑀤𑁂𑀦 𑀢𑀣𑀸𑀲𑀤𑁆𑀤𑁄𑀧𑀤𑀺𑀝𑁆𑀞𑁂𑀦 𑀤𑀁 𑀚𑀁 𑀲𑀤𑁆𑀤𑀦𑁆𑀢𑀭𑁂𑀦 𑀘, 𑀓𑁂𑀲𑀜𑁆𑀘𑀺𑀢𑀺 𑀔𑀭𑀻𑀕𑀢𑀦𑁆𑀢𑀺𑀆𑀤𑀻𑀲𑀼 ‘𑀔𑀭𑀻’𑀢𑀺𑀆𑀤𑀻𑀦𑀁 𑀓𑁂𑀲𑀜𑁆𑀘𑀺, 𑀔𑀭𑀻𑀢𑀺 𑀔𑀭𑀢𑁆𑀣𑁂 𑀯𑀢𑁆𑀢𑀫𑀸𑀦𑁄-𑀬𑀁 𑀲𑀤𑁆𑀤𑁄 𑀦𑀺𑀬𑀢𑀯𑀺𑀲𑀬𑁄… 𑀕𑀢𑀲𑀤𑁆𑀤𑀁 𑀯𑀺𑀦𑀸 𑀅𑀜𑁆𑀜𑀢𑁆𑀣 𑀅𑀤𑀺𑀝𑁆𑀞𑀢𑁆𑀢𑀸, 𑀦𑀸𑀬𑀫𑁆𑀧𑀬𑁄𑀕𑁄𑀢𑀺 𑀢𑀼𑀤𑀫𑁆𑀧𑀢𑀺𑀧𑁆𑀧𑀬𑁄𑀕𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀳𑁂𑀢𑀼𑀫𑀸𑀳- ‘𑀆𑀕𑀫𑁂’𑀘𑁆𑀘𑀸𑀤𑀺, 𑀅𑀜𑁆𑀜𑁂𑀳𑀺 𑀘𑀸𑀢𑀺 𑀇𑀫𑀺𑀦𑀸 𑀭𑀽𑀧𑀲𑀺𑀤𑁆𑀥𑀺𑀁 𑀕𑀡𑁆𑀳𑀸𑀢𑀺.

𑀦𑀦𑀼 𑀲𑀼𑀢𑁆𑀢𑁂‘𑀲𑀭𑁂’𑀢𑀺 𑀏𑀢𑁆𑀢𑀓𑀁 𑀯𑀼𑀢𑁆𑀢𑀁‘𑀲𑀭𑀸𑀤𑁄’𑀢𑀺 𑀓𑀣𑀁 𑀮𑀤𑁆𑀥𑀦𑁆𑀢𑀺 𑀆𑀳-‘𑀲𑀭𑁂’𑀢𑀺𑀆𑀤𑀺, 𑀯𑀡𑁆𑀡𑁂 𑀬𑀦𑁆𑀢𑀦𑁆𑀢𑀤𑀸𑀤𑁄𑀢𑀺 𑀲𑀺𑀝𑁆𑀞𑀯𑀘𑀦𑀁, 𑀯𑀡𑁆𑀡𑁂 𑀧𑀭𑀪𑀽𑀢𑁂 𑀬𑀁 𑀓𑀸𑀭𑀺𑀬𑀁 𑀯𑀺𑀥𑀻𑀬𑀢𑁂 𑀢𑀁 𑀲𑁄 𑀯𑀡𑁆𑀡𑁄 𑀆𑀤𑀺 𑀬𑀲𑁆𑀲 𑀢𑀁 𑀢𑀤𑀸𑀤𑀺, 𑀢𑀲𑁆𑀫𑀺𑀁 𑀢𑀤𑀸𑀤𑁄 𑀉𑀢𑁆𑀢𑀭𑀧𑀤𑁂 𑀲𑀫𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄, 𑀔𑀸𑀥𑀸𑀢𑀼𑀢𑁄 𑀓𑁆𑀢𑀧𑁆𑀧𑀘𑁆𑀘𑀬𑁂 𑀯𑀺𑀳𑀺𑀢𑁂 𑀭𑀲𑁆𑀲𑁂𑀦𑀸𑀓𑀸𑀭𑁂𑀦𑁂𑀯𑀸𑀬𑀫𑁆𑀧𑀬𑁄𑀕𑁄, 𑀦 𑀯𑀺𑀲𑀼𑀁 𑀅𑀓𑀸𑀭𑁂𑀦𑀸𑀢𑀺 𑀤𑀲𑁆𑀲𑁂𑀢𑀼𑀁 𑀦 𑀆𑀓𑁆𑀔𑀸𑀢𑀁 𑀅𑀦𑀓𑁆𑀔𑀸𑀢 ‘‘𑀩𑁆𑀬𑀜𑁆𑀚𑀦𑁂 𑀤𑀻𑀖𑀭𑀲𑁆𑀲𑀸’’𑀢𑀺 𑀉𑀢𑁆𑀢𑀭𑀧𑀤𑀸𑀤𑀺 𑀲𑀭𑀲𑁆𑀲 𑀭𑀲𑁆𑀲𑀢𑁆𑀢’𑀦𑁆𑀢𑀺 𑀯𑀼𑀢𑁆𑀢𑀁.

𑀲𑀜𑁆𑀜𑀸𑀲𑀤𑁆𑀤𑁂𑀲𑀼𑀘𑀸𑀢𑀺𑀆𑀤𑀺𑀦𑀸 ¶ 𑀅𑀯𑀬𑀯𑀢𑁆𑀣𑀦𑀺𑀭𑀧𑁂𑀓𑁆𑀔𑀸𑀦𑀫𑁆𑀧𑀺 𑀬𑀣𑀸𑀓𑀣𑀜𑁆𑀘𑀺 𑀦𑀺𑀧𑁆𑀨𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀲𑀩𑁆𑀩𑁂𑀲𑀫𑁂𑀯 𑀲𑀤𑁆𑀤𑀸𑀦𑀁 𑀦𑀺𑀧𑁆𑀨𑀦𑁆𑀦𑀯𑀸𑀘𑀺𑀢𑀜𑁆𑀘𑀸𑀢𑁆𑀢𑀦𑁄 𑀤𑀻𑀧𑁂𑀢𑀺, 𑀬𑀣𑀸𑀓𑀣𑀜𑁆𑀘𑀺 𑀦𑀺𑀧𑁆𑀨𑀢𑁆𑀢𑀺, 𑀭𑀼𑀴𑁆𑀳𑀺𑀬𑀸 𑀅𑀢𑁆𑀣𑀦𑀺𑀘𑁆𑀙𑀬𑁄, 𑀢𑁂𑀦 𑀲𑀜𑁆𑀜𑁂𑀘𑁆𑀘𑀸𑀤𑁄-𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀢𑀺 ‘𑀬𑀁𑀓𑀺𑀜𑁆𑀘𑀺’𑀢𑁆𑀬𑀸𑀤𑀺𑀦𑀸, 𑀇𑀢𑁆𑀣𑀻 𑀘 𑀧𑀼𑀫𑀸 𑀘 𑀇𑀢𑁆𑀣𑀺𑀧𑀼𑀫𑀁, 𑀦 𑀇𑀢𑁆𑀣𑀺 𑀧𑀼𑀫𑀦𑁆𑀢𑀺 𑀲𑀫𑀸𑀲𑁂 𑀦𑀺𑀧𑀸𑀢𑀦𑁂𑀦𑀺𑀫𑀺𑀦𑀸 𑀦𑀧𑀼𑀁𑀲𑀓𑀸𑀤𑁂𑀲𑁄 [𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 (𑀧𑁄𑀢𑁆𑀣𑀓𑁂)] 𑀢𑀺 𑀤𑀲𑁆𑀲𑁂𑀢𑀺 ‘𑀦 𑀇𑀢𑁆𑀣𑀺’𑀘𑁆𑀘𑀸𑀤𑀺𑀦𑀸. 𑀔𑀻-𑀔𑀬𑁂, 𑀔𑀭-𑀯𑀺𑀦𑀸𑀲𑁂 𑀘𑀸𑀢𑀺 𑀳𑀺 𑀏𑀢𑁂𑀳𑀺 ‘𑀦 𑀔𑀻𑀬𑀢𑀺 𑀦 𑀔𑀭𑀢𑀻’𑀢𑀺 𑀅𑀢𑁆𑀣𑁂 ‘‘𑀪𑀸𑀯𑀓𑀸𑀭𑀓𑁂𑀲𑁆𑀯 𑀖𑀡 𑀖𑀓𑀸’’𑀢𑀺 (𑁫-𑁪𑁪) 𑀅𑀧𑁆𑀧𑀘𑁆𑀘𑀬𑁂’ 𑀦 𑀔𑀬 𑀦 𑀔𑀭’𑀇𑀢𑀺 𑀞𑀺𑀢𑁂 𑀔𑀢𑁆𑀢𑀸𑀤𑁂𑀲𑁄𑀢𑀺 𑀆𑀳- 𑀦 𑀔𑀻𑀬𑀢𑀺’𑀘𑁆𑀘𑀸𑀤𑀺.

𑀏𑀯𑀦𑁆𑀢𑀺 𑀇𑀫𑀺𑀦𑀸 𑀕𑀘𑁆𑀙𑀢𑀻𑀢𑀺 𑀯𑀸𑀓𑁆𑀬𑁂 𑀓𑁆𑀯𑀺𑀧𑁆𑀧𑀘𑁆𑀘𑀬𑀸𑀤𑀺𑀁 𑀤𑀲𑁆𑀲𑁂𑀢𑀺, 𑀯𑀺𑀲𑁂𑀲𑁄 𑀧𑀦𑁂𑀢𑁆𑀣 𑀦𑀜𑁆𑀲𑁆𑀲(𑀝𑁄) 𑀯𑀲𑀮𑁄 𑀘𑀡𑁆𑀟𑀸𑀮𑁄, 𑀲𑀻𑀢𑁂𑀦 𑀓𑀭𑀡𑀪𑀽𑀢𑁂𑀦.

𑀢𑀢𑁆𑀣 𑀢𑀲𑁆𑀫𑀺𑀁 𑀧𑀭𑀪𑀽𑀢𑁂, 𑀬𑀲𑁆𑀲 𑀘 𑀛𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀧𑁆𑀧𑀘𑁆𑀘𑀓𑁆𑀔𑀁 𑀧𑀘𑁆𑀘𑀓𑁆𑀔𑀜𑀸𑀡𑁂𑀦𑀸𑀦𑀼𑀧𑀮𑀩𑁆𑀪𑀦𑀻𑀬𑀁 𑀢𑀫𑁆𑀧𑀦𑀸𑀢𑁆𑀣𑀢𑁄-𑀦𑀼𑀫𑁂𑀬𑁆𑀬𑀫𑁂𑀯. 𑀢𑀲𑁆𑀫𑀺𑀁 𑀕𑀫𑁆𑀫𑀫𑀸𑀦𑁂 𑀬𑀫𑀸𑀤𑁂𑀲𑁄𑀢𑀺 𑀓𑁂𑀦𑀘𑀺 𑀮𑀺𑀗𑁆𑀕𑁂𑀦𑀸𑀥𑀺𑀕𑀢𑁂𑀦𑀸𑀦𑀼𑀫𑀸𑀦𑀜𑀸𑀡𑁂𑀦𑀸𑀦𑀼𑀫𑁂𑀬𑀼𑀢𑁆𑀢𑀫𑀕𑁆𑀬𑀸𑀤𑀺𑀦𑁄𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀓𑀧𑁄𑀢𑁂’𑀘𑁆𑀘𑀸𑀤𑀺. 𑀓𑀧𑁄𑀢𑀸𑀤𑀺𑀪𑀸𑀯𑁂𑀢𑀺 𑀓𑀢𑁆𑀣𑀘𑀺 𑀖𑀭𑀸𑀤𑁄 𑀓𑀧𑁄𑀢𑀯𑀸𑀢𑀫𑀡𑁆𑀟𑀮𑀺𑀓𑀸𑀤𑀻𑀦𑀁 𑀤𑀲𑁆𑀲𑀦𑀯𑀲𑁂𑀦 𑀲𑀩𑁆𑀪𑀸𑀯𑁂 𑀲𑀢𑀺. 𑀅𑀕𑁆𑀬𑀸𑀤𑀺𑀤𑀲𑁆𑀲𑀦𑀢𑁄𑀢𑀺 𑀅𑀕𑁆𑀕𑀺𑀧𑀺𑀲𑀸𑀘𑀸𑀤𑀺𑀤𑀲𑁆𑀲𑀦𑀢𑁄, 𑀅𑀜𑁆𑀜𑀢𑁆𑀭𑀸𑀧𑀻𑀢𑀺 𑀖𑀭𑀸𑀤𑀺𑀢𑁄 𑀅𑀜𑁆𑀜𑀢𑁆𑀭, 𑀓𑀧𑁄𑀢𑀯𑀸𑀢𑀫𑀡𑁆𑀟𑀮𑀺𑀓𑀸𑀤𑀺𑀦𑁄 𑀮𑀺𑀗𑁆𑀕𑀲𑁆𑀲, 𑀅𑀕𑁆𑀬𑀸𑀤𑀺𑀬𑁄𑀕𑀦𑁆𑀢𑀺 𑀅𑀕𑁆𑀕𑀺𑀆𑀤𑀻𑀳𑀺 𑀅𑀦𑀼𑀫𑁂𑀬𑁆𑀬𑁂𑀳𑀺 𑀲𑀫𑁆𑀩𑀦𑁆𑀥𑀁. 𑀫𑀦𑁆𑀢𑁆𑀯𑀸𑀢𑀺 𑀅𑀦𑀼𑀫𑀸𑀦𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸𑀧𑀬𑁄𑀕𑁄𑀢𑀺 𑀲𑀸𑀕𑁆𑀕𑀺𑀲𑀧𑀺𑀲𑀸𑀘𑀸𑀢𑀺 𑀧𑀬𑁄𑀕𑁄.

𑀲𑀓𑀢𑁆𑀣𑁂 ¶ 𑀯𑀢𑁆𑀢𑀫𑀸𑀦𑀲𑁆𑀲 𑀲𑀳𑀲𑀤𑁆𑀤𑀲𑁆𑀲𑀸𑀢𑀺 𑀯𑀢𑁆𑀢𑀩𑁆𑀩𑁂 𑀯𑀢𑁆𑀢𑀫𑀸𑀦𑁄 𑀢𑀧𑁆𑀧𑀥𑀸𑀦𑁄𑀬𑁂𑀯𑀸𑀢𑀺 𑀆𑀳- ‘𑀲𑀓𑀢𑁆𑀣𑀧𑁆𑀧𑀥𑀸𑀦𑀲𑁆𑀲 𑀲𑀳𑀲𑀤𑁆𑀤𑀲𑁆𑀲𑀸’𑀢𑀺, 𑀯𑀼𑀢𑁆𑀢𑀺 𑀪𑀯𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀬𑀼𑀕𑀧𑀤𑀺 𑀥𑀼𑀭𑀸 𑀲𑀥𑀼𑀭𑀁. 𑀅𑀧𑀭𑀡𑁆𑀳𑁂𑀦 𑀲𑀳𑀺𑀢𑀁 𑀲𑀳𑀸 𑀧𑀭𑀡𑁆𑀳𑀁.

‘‘𑀅𑀝𑁆𑀞𑀸𑀤𑀲 𑀦𑀺𑀫𑁂𑀲𑀸 𑀢𑀼, 𑀓𑀝𑁆𑀞𑀸 𑀢𑀺𑀁𑀲𑀦𑁆𑀢𑀼 𑀢𑀸𑀓𑀮𑀸’’𑀢𑀺 𑀯𑀘𑀦𑀢𑁄 𑀆𑀳- ‘𑀓𑀮𑀸 𑀓𑀸𑀮𑀯𑀺𑀲𑁂𑀲𑁄’𑀢𑀺. 𑀓𑀮𑀸𑀤𑀺𑀲𑀗𑁆𑀔𑀸𑀢𑀕𑀦𑁆𑀣𑀲𑁆𑀲𑀸𑀦𑁆𑀢𑁂 𑀲𑀳𑀲𑀤𑁆𑀤𑁄 𑀯𑀢𑁆𑀢𑀢𑀻𑀢𑀺𑀲𑀫𑀸𑀲𑀯𑀸𑀓𑁆𑀬𑀁 𑀦𑀺𑀤𑁆𑀤𑀺𑀲𑀢𑀺 ‘𑀓𑀮𑀦𑁆𑀢’𑀫𑀺𑀘𑁆𑀘𑀸𑀤𑀺. 𑀕𑀦𑁆𑀣𑀦𑁆𑀢𑁂𑀘𑁆𑀘𑀸𑀤𑀺𑀦𑀸 𑀆𑀲𑀗𑁆𑀓𑀢𑁄𑀬𑀫𑀥𑀺𑀧𑁆𑀧𑀸𑀬𑁄 ‘‘𑀓𑀸𑀮𑀢𑁆𑀣𑀧𑀭𑀺𑀘𑁆𑀘𑀸𑀕𑁂𑀦 𑀕𑀦𑁆𑀣𑀦𑁆𑀢𑁂 𑀯𑀢𑁆𑀢𑀫𑀸𑀦𑀢𑁆𑀢𑀸 𑀅𑀓𑀸𑀮𑀢𑁆𑀣𑁄’’𑀢𑀺. 𑀕𑀦𑁆𑀣𑀯𑀼𑀢𑁆𑀢𑀺𑀧𑀺 𑀓𑀮𑀸𑀤𑀺 𑀓𑀸𑀮𑀲𑀤𑁆𑀤𑀢𑁆𑀣𑀁 𑀦𑀸𑀢𑀺𑀓𑁆𑀓𑀫𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳- ‘𑀕𑀦𑁆𑀣𑀯𑀼𑀢𑁆𑀢𑀺𑀧𑀺’𑀘𑁆𑀘𑀸𑀤𑀺. 𑀅𑀥𑀺𑀓𑁄 𑀫𑀸𑀲𑀓𑁄 𑀅𑀲𑁆𑀲𑀸𑀢𑀺 𑀲𑀫𑀸𑀲𑀓𑁄, 𑀯𑀺𑀓𑀧𑁆𑀧𑁂𑀦 𑀲𑀺𑀤𑁆𑀥𑁂𑀢𑀺 ‘‘𑀲𑀳𑀲𑁆𑀲 𑀲𑁄-𑀜𑁆𑀜𑀢𑁆𑀣𑁂’’𑀢𑀺 (𑁩-𑁭𑁮).

𑀲𑀫𑀸𑀦𑁄 𑀧𑀢𑀺 𑀬𑀲𑁆𑀲𑀸 𑀲𑀧𑀢𑁆𑀢𑀺𑀦𑀻 𑀲𑀧𑀢𑁆𑀢𑀻 𑀇𑀢𑀺 𑀦𑀺𑀧𑁆𑀨𑀦𑁆𑀦𑀸𑀦𑀫𑁂𑀓𑀤𑁂𑀲𑁄 ‘𑀧𑀢𑁆𑀢𑀺𑀦𑀻 𑀧𑀢𑁆𑀢𑀻’𑀢𑀺 𑀤𑀲𑁆𑀲𑀺𑀢𑁄𑀢𑀺 𑀯𑀢𑁆𑀢𑀼𑀫𑀸𑀳- ‘𑀬𑀓𑁆𑀔𑀸𑀤𑀺 𑀢𑁆𑀯𑀺𑀦𑀺’𑀘𑁆𑀘𑀸𑀤𑀺. 𑀯𑀬𑀲𑀤𑁆𑀤𑀲𑁆𑀲 ‘‘𑀲𑀭𑀯𑀬𑀸𑀬𑀯𑀸𑀲𑀘𑁂𑀢𑀸 𑀚𑀮𑀸𑀲𑀬𑀸𑀓𑁆𑀔𑀬𑀮𑁄𑀳𑀧𑀝𑀫𑀦𑁂𑀲𑀽’’𑀢𑀺 𑀕𑀡𑀧𑀸𑀞𑀢𑁄 𑀅𑀓𑁆𑀔𑀬𑁂 𑀯𑀢𑁆𑀢𑀫𑀸𑀦𑀲𑁆𑀲𑁄 𑀫𑀦𑀸𑀤𑀺𑀢𑁆𑀢𑀸 𑀑𑀓𑀸𑀭𑀦𑁆𑀢𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀯𑀬𑁄’𑀢𑀺𑀆𑀤𑀺. 𑀬𑀧𑁆𑀧𑀘𑁆𑀘𑀬𑀦𑁆𑀢𑁄𑀢𑀺 𑀇𑀫𑀺𑀦𑀸 𑀦𑀺𑀧𑀸𑀢𑀦𑁂𑀦 𑀢𑀓𑀬𑀧𑁆𑀧𑀘𑁆𑀘𑀬𑀦𑁆𑀢𑁄.

‘‘𑀅𑀜𑁆𑀜𑀲𑁆𑀫𑀺’’𑀦𑁆𑀢𑀺 (𑁪-𑁧𑁨𑁧) 𑀇𑀬𑀧𑁆𑀧𑀘𑁆𑀘𑀬𑀯𑀺𑀥𑀸𑀬𑀓𑀁 𑀲𑀼𑀢𑁆𑀢𑀁.

𑀢𑀼𑀫𑁆𑀳𑁂 𑀯𑀺𑀬 𑀤𑀺𑀲𑁆𑀲𑀦𑁆𑀢𑀻𑀢𑀺 𑀢𑀼𑀫𑁆𑀳𑀸𑀤𑀻 𑀅𑀫𑁆𑀳𑀸𑀤𑀻𑀘𑁆𑀘𑀸𑀤𑀺𑀁 ‘‘𑀲𑀩𑁆𑀩𑀸𑀤𑀻𑀦𑀫𑀸’’𑀢𑀺 (𑁩-𑁮𑁬) 𑀆.

𑀕𑀩𑁆𑀪𑁂𑀦𑀸𑀢𑀺 𑀇𑀫𑀺𑀦𑀸 𑀓𑀼𑀘𑁆𑀙𑀺𑀕𑀢𑁂𑀦 𑀕𑀩𑁆𑀪𑁂𑀦 𑀲𑀳 𑀤𑁆𑀯𑀺𑀳𑀤𑀬𑀢𑁆𑀢𑀫𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀺, 𑀧𑀼𑀩𑁆𑀩𑀧𑀤𑁂𑀢𑀺 𑀤𑀼𑀲𑀤𑁆𑀤𑁂.

𑀕𑀼𑀡𑀸 ¶ 𑀧𑀝𑀮𑀸 [𑀤𑁆𑀯𑁂 𑀧𑀤𑀸𑀦𑀺 𑀅𑀲𑁆𑀲 𑀇𑀢𑀺 𑀪𑀯𑀺𑀢𑀩𑁆𑀩𑀁] 𑀤𑁆𑀯𑁂 𑀧𑀸𑀤𑀸 𑀏𑀲𑀁 𑀤𑁆𑀯𑁂 𑀲𑀢𑀸𑀦𑀺 𑀅𑀲𑁆𑀲, 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀅𑀲𑁆𑀲, 𑀤𑁆𑀯𑀺𑀦𑁆𑀦𑀁 𑀲𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑀳𑀲𑁆𑀲𑀸𑀦𑀁 𑀯𑀸 𑀲𑀫𑀸𑀳𑀸𑀭𑁄𑀢𑀺 𑀯𑀺𑀕𑁆𑀕𑀳𑁄.

𑀤𑁆𑀯𑀢𑁆𑀢𑀺𑀧𑀢𑁆𑀢𑀸𑀢𑀺 𑀧𑀞𑀫𑀦𑁆𑀢𑀸‘𑀧𑀽𑀭-𑀧𑀽𑀭𑀡𑁂’𑀇𑀘𑁆𑀘𑀲𑁆𑀫𑀸 𑀓𑀭𑀡𑀢𑁆𑀣𑁂 ‘‘𑀪𑀸𑀯 𑀓𑀸𑀭𑀓𑁂𑀲𑁆𑀯 𑀖𑀡 𑀖𑀓𑀸’’𑀢𑀺 (𑁫-𑁪𑁪) 𑀅𑀧𑁆𑀧𑀘𑁆𑀘𑀬𑁂 𑀲𑁆𑀬𑀸𑀤𑀺𑀲𑀫𑀸𑀲𑁄𑀢𑀺 𑀤𑀲𑁆𑀲𑁂𑀢𑀼 𑀫𑀸𑀳- ‘𑀤𑁆𑀯𑀢𑁆𑀢𑀺𑀧𑀢𑁆𑀢’𑀇𑀘𑁆𑀘𑀸𑀤𑀺.

𑀤𑁆𑀯𑁂 𑀘 𑀢𑀺𑀁𑀲𑀸 𑀘, 𑀤𑁆𑀯𑀻𑀳𑀺 𑀯𑀸 𑀅𑀥𑀺𑀓𑀸 𑀢𑀺𑀁𑀲𑀸𑀢𑀺 𑀯𑀺𑀕𑁆𑀕𑀳𑁄.

𑀲𑀫𑁆𑀧𑀢𑁆𑀢𑀯𑀺𑀪𑀸𑀲𑀸𑀬𑀦𑁆𑀢𑀺 𑀅𑀬𑀁𑀬𑁄𑀕𑁄 (𑀲𑀫𑁆𑀧𑀢𑁆𑀢𑀯𑀺𑀪𑀸𑀲𑀸𑀢𑀺) 𑀤𑀲𑁆𑀲𑁂𑀢𑀺, 𑀲𑀫𑁆𑀧𑀢𑁆𑀢𑁂 𑀯𑀺𑀪𑀸𑀲𑀸 𑀯𑀺𑀓𑀧𑁆𑀧𑁄𑀢𑀺 𑀅𑀢𑁆𑀣𑁄, 𑀢𑀬𑁄 𑀘 𑀘𑀢𑁆𑀢𑀸𑀮𑀻𑀲𑀸 𑀘, 𑀢𑀻𑀳𑀺 𑀯𑀸 𑀅𑀥𑀺𑀓𑀸 𑀘𑀢𑁆𑀢𑀸𑀮𑀻𑀲𑀸𑀘𑁆𑀘𑀸𑀤𑀺𑀦𑀸 𑀯𑀺𑀕𑁆𑀕𑀳𑁄, 𑀢𑀺𑀲𑁆𑀲𑁄 𑀘𑀢𑁆𑀢𑀸𑀮𑀻𑀲𑀸 𑀅𑀲𑁆𑀲 𑀢𑀺𑀘𑀢𑁆𑀢𑀸𑀮𑀻𑀲𑀁 𑀕𑀡𑁄.

𑀲𑀫𑁆𑀧𑀢𑁆𑀢𑀯𑀺𑀪𑀸𑀲𑀢𑁆𑀢𑀸𑀢𑀺 ‘‘𑀆𑀲𑀗𑁆𑀔𑁆𑀬𑀸𑀬𑁂’’𑀘𑁆𑀘𑀸𑀤𑀺𑀦𑀸 (𑁩-𑁯𑁪) 𑀆𑀓𑀸𑀭𑁂 𑀲𑀫𑁆𑀧𑀢𑁆𑀢𑁂 𑀯𑀺𑀪𑀸𑀲𑀢𑁆𑀢𑀸.

𑀇𑀢𑀺 𑀫𑁄𑀕𑁆𑀕𑀮𑁆𑀮𑀸𑀦𑀧𑀜𑁆𑀘𑀺𑀓𑀸𑀝𑀻𑀓𑀸𑀬𑀁 𑀲𑀸𑀭𑀢𑁆𑀣𑀯𑀺𑀮𑀸𑀲𑀺𑀦𑀺𑀬𑀁

𑀢𑀢𑀺𑀬𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀦𑀼 ¶ 𑀘 ‘𑀡𑁄 𑀯𑀸𑀧𑀘𑁆𑀘𑁂’𑀢𑀺 𑀯𑀘𑀦𑀢𑁄 𑀓𑀣𑀁 𑀧𑀓𑀢𑀺𑀯𑀺𑀲𑀬𑀸𑀯𑀕𑀫𑁄 𑀲𑀺𑀬𑀸. 𑀬𑀣𑀸𑀓𑀣𑀜𑁆𑀘𑀺 𑀧𑀓𑀢𑀺𑀯𑀺𑀲𑀬𑀸𑀯𑀕𑀫𑁂𑀧𑀺 𑀲𑀸𑀫𑀜𑁆𑀜𑀯𑀘𑀦𑀢𑁄 𑀧𑀦 𑀥𑀫𑁆𑀫𑁂𑀦𑀸𑀧𑀘𑁆𑀘𑀦𑁆𑀢𑁆𑀬𑀸𑀤𑁄 𑀬𑀢𑁄 𑀓𑀼𑀢𑁄𑀘𑀺 𑀥𑀫𑁆𑀫𑁂𑀦𑀺𑀘𑁆𑀘𑀸𑀤𑀺𑀢𑁄𑀧𑀺 𑀲𑀺𑀬𑀸 𑀡𑀸 𑀤𑀺𑀧𑀘𑁆𑀘𑀬𑁄𑀢𑁆𑀬𑀸𑀲𑀗𑁆𑀓𑀺𑀬𑀸𑀳 ‘𑀅𑀧𑀘𑁆𑀘𑀯𑀢𑀸’𑀘𑁆𑀘𑀸𑀤𑀺. 𑀅𑀧𑀘𑁆𑀘𑀲𑁆𑀲𑀸𑀢𑀺 𑀅𑀧𑀘𑁆𑀘𑀢𑁆𑀣𑀲𑁆𑀲, 𑀅𑀧𑀘𑁆𑀘𑀯𑀢𑀸𑀢𑀺 ‘‘𑀡𑁄 𑀯𑀸𑀧𑀘𑁆𑀘𑁂’’𑀢𑀺 𑀯𑀲𑀺𑀝𑁆𑀞𑀸𑀤𑁆𑀬𑀢𑁆𑀣𑀲𑁆𑀲𑁂𑀯 𑀧𑀭𑀺𑀕𑁆𑀕𑀳𑀡𑀸𑀬 𑀲𑀸𑀫𑀜𑁆𑀜𑀯𑀘𑀦𑀢𑁄 𑀬𑁄 𑀅𑀧𑀘𑁆𑀘𑀯𑀸 𑀢𑀢𑁄, 𑀅𑀢𑁆𑀣𑀢𑁄 𑀧𑀦 𑀅𑀲𑀫𑁆𑀪𑀯𑀸 𑀤𑀩𑁆𑀩𑀸𑀘𑀓𑀲𑀤𑁆𑀤𑀸𑀯 𑀲𑀸𑀫𑀢𑁆𑀣𑀺𑀬𑁂𑀦 𑀙𑀝𑁆𑀞𑀺𑀬𑀦𑁆𑀢𑀸 𑀲𑀩𑁆𑀩𑀮𑀺𑀗𑁆𑀕𑀯𑀘𑀦𑀸 𑀚𑀸𑀬𑀢𑁂𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀁. 𑀥𑀫𑁆𑀫𑀲𑁆𑀫𑀸𑀧𑀘𑁆𑀘𑀁𑀢𑁆𑀬𑀸𑀤𑀻𑀲𑀼 𑀡𑀸𑀤𑀺𑀧𑁆𑀧𑀘𑁆𑀘𑀬𑁄 (𑀦 𑀚𑀸𑀬𑀢𑁂) 𑀢𑀺 𑀲𑀫𑁆𑀩𑀦𑁆𑀥𑁄.

𑀥𑀫𑁆𑀫𑁂𑀦𑀸𑀢𑀺 𑀥𑀫𑁆𑀫𑁂𑀦 𑀓𑀭𑀡𑀪𑀽𑀢𑁂𑀦. 𑀥𑀫𑁆𑀫𑀸𑀬𑀸𑀢𑀺 𑀥𑀫𑁆𑀫𑀢𑁆𑀣𑀁, 𑀥𑀫𑁆𑀫𑀲𑁆𑀫𑀸𑀢𑀺 𑀥𑀫𑁆𑀫𑀳𑁂𑀢𑀼𑀦𑀸, 𑀢𑀢𑁄 𑀅𑀲𑀫𑁆𑀪𑀯𑁂 𑀓𑀸𑀭𑀡𑀫𑀸𑀳 ‘𑀲𑀸𑀧𑁂𑀓𑁆𑀔𑀢𑁆𑀢𑀸’𑀢𑀺. 𑀲𑀸𑀧𑁂𑀓𑁆𑀔𑀢𑁆𑀢𑀫𑁂𑀯 𑀲𑀫𑀢𑁆𑀣𑁂𑀢𑀺 ‘𑀅𑀧𑀘𑁆𑀘𑀯𑀸𑀳𑀺’𑀘𑁆𑀘𑀸𑀤𑀺𑀦𑀸, 𑀥𑀫𑁆𑀫𑁂𑀦𑀸𑀧𑀘𑁆𑀘𑀁 𑀓𑀲𑁆𑀲𑀸𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀤𑁂𑀯𑀤𑀢𑁆𑀢𑀲𑁆𑀲𑀸𑀢𑀺 𑀅𑀧𑁂𑀓𑁆𑀔𑀺𑀬𑀫𑀸𑀦𑀁 𑀯𑀤𑀢𑀺. 𑀤𑁂𑀯𑀤𑀢𑁆𑀢𑀲𑁆𑀲𑀸𑀢𑀺 𑀅𑀧𑀘𑁆𑀘𑀯𑀸 𑀤𑁂𑀯𑀤𑀢𑁆𑀢𑀸𑀤𑀺 𑀅𑀧𑁂𑀓𑁆𑀔𑀻𑀬𑀢𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀳𑀺𑀲𑀤𑁆𑀤𑁄 𑀳𑁂𑀢𑀼𑀫𑁆𑀳𑀺. 𑀦 𑀳𑁂𑀢𑁆𑀣 𑀡𑀸𑀤𑀺𑀯𑀼𑀢𑁆𑀢𑀺 𑀅𑀜𑁆𑀜𑀢𑁆𑀣 [𑀦𑀳𑁂𑀢𑀓𑀸𑀫𑀦𑁆𑀢𑀢𑁆𑀣 (𑀧𑁄𑀢𑁆𑀣𑀓𑁂)] 𑀲𑀸𑀧𑁂𑀓𑁆𑀔𑀢𑁆𑀢𑀸 𑀓𑀫𑁆𑀩𑀮𑁄 𑀯𑀲𑀺𑀝𑁆𑀞𑀲𑁆𑀲𑀸𑀧𑀘𑁆𑀘𑀁 𑀤𑁂𑀯𑀤𑀢𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀧𑀦 𑀯𑀲𑀺𑀝𑁆𑀞𑁄-𑀧𑀘𑁆𑀘𑀯𑀸𑀢𑀺 𑀢𑀢𑁄 𑀙𑀝𑁆𑀞𑀺𑀬𑀦𑁆𑀢𑀸 𑀳𑁄𑀢𑀺𑀘𑁆𑀘𑀸𑀲𑀗𑁆𑀓𑀺𑀬𑀸𑀳- ‘𑀦 𑀘𑁂’𑀘𑁆𑀘𑀸𑀤𑀺. 𑀦 𑀘 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀓𑀸𑀭𑀡𑀫𑀸𑀳- ‘𑀅𑀲𑀫𑁆𑀩𑀦𑁆𑀥𑀸’𑀢𑀺. 𑀦 𑀳𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑀯𑀲𑀺𑀝𑁆𑀞𑀲𑁆𑀲 𑀓𑀫𑁆𑀩𑀮𑀸𑀧𑁂𑀓𑁆𑀔𑀢𑁆𑀢𑁂𑀦 𑀅𑀧𑀘𑁆𑀘𑀲𑁆𑀲 𑀘 𑀤𑁂𑀯𑀤𑀢𑁆𑀢𑀸𑀧𑁂𑀓𑁆𑀔𑀢𑁆𑀢𑁂𑀦𑀸𑀢𑁆𑀣𑀦𑁆𑀢𑀭𑀸𑀧𑁂𑀓𑁆𑀔𑀸𑀬 𑀯𑀲𑀺𑀝𑁆𑀞𑀲𑁆𑀲𑀸𑀧𑀘𑁆𑀘𑁂𑀦 𑀲𑀫𑁆𑀩𑀦𑁆𑀥𑀸𑀪𑀸𑀯𑀸𑀬𑁂𑀯 𑀯𑀲𑀺𑀝𑁆𑀞𑀲𑁆𑀲 𑀅𑀧𑀘𑁆𑀘𑀁 𑀯𑀸𑀲𑀺𑀝𑁆𑀞𑁄𑀢𑀺 𑀡𑀸𑀤𑀺𑀯𑀼𑀢𑁆𑀢𑀺𑀬𑀸 𑀪𑀸𑀯𑁂 𑀲𑀸𑀫𑀢𑁆𑀣𑀺𑀬𑀁 𑀦𑀢𑁆𑀣𑀺, 𑀲𑀫𑀢𑁆𑀣𑀜𑁆𑀳𑀺 𑀯𑀲𑀺𑀝𑁆𑀞𑀁 𑀭𑀸𑀚𑀧𑀼𑀭𑀺𑀲𑀸𑀤𑀺 𑀲𑀫𑀸𑀲𑀯𑀼𑀢𑁆𑀢𑀺𑀬𑀫𑁂𑀓𑀢𑁆𑀣𑀢𑁆𑀢𑀫𑀺𑀯 𑀯𑀸𑀲𑀺𑀝𑁆𑀞𑀸𑀤𑀺𑀡𑀸𑀤𑀺𑀯𑀼𑀢𑁆𑀢𑀺𑀬𑀁 𑀡𑀸𑀤𑀺𑀧𑁆𑀧𑀘𑁆𑀘𑀬𑀫𑀼𑀧𑀚𑀦𑀬𑀢𑀺, 𑀦𑀸𑀲𑀫𑀢𑁆𑀣𑀁, 𑀢𑀢𑁄 𑀲𑀩𑁆𑀩𑀫𑁂𑀯𑁂𑀢𑀫𑁆𑀫𑀦𑀲𑀺 𑀦𑀺𑀥𑀸𑀬 𑀯𑀼𑀢𑁆𑀢𑀁- ‘𑀅𑀲𑀫𑁆𑀩𑀦𑁆𑀥𑀸’𑀢𑀺.

𑀬𑀤𑀺 ¶ 𑀧𑀦𑁂𑀢𑁆𑀣 𑀡𑀸𑀤𑀺𑀧𑁆𑀧𑀘𑁆𑀘𑀬𑁄 𑀲𑀩𑁆𑀩𑀣𑀸 𑀲𑀫𑁆𑀩𑀦𑁆𑀥𑀫𑀧𑁂𑀓𑁆𑀔𑀢𑁂, 𑀢𑀤𑀸 𑀯𑀺𑀲𑁂𑀲𑀢𑁄 𑀬𑀲𑁆𑀲𑀸𑀧𑀘𑁆𑀘𑁂𑀦 𑀲𑀫𑁆𑀩𑀦𑁆𑀥𑁄 𑀢𑀢𑁄𑀯 𑀚𑀦𑀓𑀢𑁄 𑀲𑁄 𑀲𑀺𑀬𑀸𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀬𑀚𑁆𑀚𑁂𑀯’𑀫𑀺𑀘𑁆𑀘𑀸𑀤𑀺.

𑀬𑁄 𑀚𑀦𑀓𑁄𑀢𑀺 𑀬𑁄𑀬𑁄 𑀬𑀲𑁆𑀲 𑀬𑀲𑁆𑀲 𑀅𑀧𑀘𑁆𑀘𑀲𑁆𑀲 𑀚𑀦𑀓𑁄. 𑀢𑀢𑁄𑀬𑁂𑀯𑀸𑀢𑀺 𑀢𑀲𑁆𑀫𑀸𑀢𑀲𑁆𑀫𑀸 𑀚𑀦𑀓𑀢𑁄𑀬𑁂𑀯. 𑀲𑀺𑀬𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀧𑀘𑁆𑀘𑀢𑁆𑀣𑁂 𑀡𑀸𑀤𑀺𑀧𑁆𑀧𑀘𑁆𑀘𑀬𑁄 𑀲𑀺𑀬𑀸. 𑀢𑀢𑁆𑀣 𑀳𑁂𑀢𑀼𑀫𑀸𑀳- ‘𑀢𑀲𑁆𑀲𑁂𑀯𑀸𑀧𑀘𑁆𑀘𑁂𑀦 𑀬𑁄𑀕𑀸’𑀢𑀺. 𑀬𑁄𑀕𑀸𑀢𑀺 𑀅𑀧𑀘𑁆𑀘𑀲𑀫𑁆𑀩𑀦𑁆𑀥𑀢𑁄, 𑀦 𑀫𑀽𑀮𑀧𑁆𑀧𑀓𑀢𑀺𑀢𑁄𑀢𑀺 𑀧𑀭𑀫𑀧𑁆𑀧𑀓𑀢𑀺𑀢𑁄 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑁂𑀢𑀼𑀫𑀸𑀳- ‘𑀅𑀬𑁄𑀕𑀸,𑀢𑀺, 𑀯𑀘𑀦𑀸𑀪𑀸𑀯𑀫𑁆𑀧𑁂𑀢𑁆𑀣 𑀤𑀲𑁆𑀲𑁂𑀢𑀼𑀁 𑀘𑁂’𑀢𑁆𑀬𑀸𑀤𑀺 𑀯𑀼𑀢𑁆𑀢𑀁.

𑀯𑀘𑀦𑀦𑁆𑀢𑀺 𑀲𑀼𑀢𑁆𑀢𑀁, 𑀲𑀫𑁆𑀩𑀦𑁆𑀥𑀸𑀪𑀸𑀯𑀸 (𑀢𑀸𑀤𑀺𑀲𑀯𑀘𑀦𑀸𑀪𑀸𑀯𑀸) 𑀘 𑀫𑀽𑀮𑀧𑁆𑀧𑀓𑀢𑀺𑀢𑁄 𑀡𑀸𑀤𑀺𑀧𑁆𑀧𑀘𑁆𑀘𑀬𑀲𑁆𑀲𑀸𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀫𑀽𑀮𑀧𑁆𑀧𑀓𑀢𑀺𑀢𑁄𑀯𑀸𑀲𑁆𑀲𑀸𑀪𑀺𑀫𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘𑀫𑀽𑀮𑀧𑁆𑀧𑀓𑀢𑀺𑀢𑁄’𑀘𑁆𑀘𑀸𑀤𑀺 𑀯𑀼𑀢𑁆𑀢𑀁.

𑀓𑀣𑀫𑁆𑀧𑀦𑀺𑀤𑀁 𑀯𑀺𑀜𑁆𑀜𑀸𑀬𑀢𑀺𑀘𑁆𑀘𑀸𑀤𑀺𑀦𑀸 𑀚𑀦𑀓𑀲𑁆𑀲𑁂𑀯𑀸𑀩𑁆𑀬𑀸𑀳𑀺𑀢𑀲𑁆𑀲𑀸𑀧𑀘𑁆𑀘𑁂𑀦 𑀫𑀼𑀔𑁆𑀬 𑀲𑀫𑁆𑀩𑀦𑁆𑀥𑀫𑀸𑀦𑀻𑀬 𑀇𑀤𑀫𑀬𑀼𑀢𑁆𑀢𑀦𑁆𑀢𑁆𑀬𑀸𑀤𑀺𑀦𑀸 𑀩𑁆𑀬𑀯𑀳𑀺𑀢𑀚𑀦𑀺𑀢𑀲𑁆𑀲𑀸𑀧𑁆𑀬𑀧𑀘𑁆𑀘𑀬𑀲𑁆𑀲 𑀧𑀭𑀫𑀧𑁆𑀧𑀓𑀢𑀺𑀬𑀸𑀪𑀺𑀲𑀫𑁆𑀩𑀦𑁆𑀥𑀲𑀩𑁆𑀪𑀸𑀯𑀁 𑀯𑀢𑁆𑀯𑀸 𑀢𑀁 𑀲𑀸𑀥𑀬𑀺𑀢𑀼𑀫𑀸𑀭𑀪𑀢𑁂 ‘𑀓𑀣’𑀫𑀺𑀘𑁆𑀘𑀸𑀤𑀺, 𑀏𑀯𑀁 𑀳𑀺𑀘𑁆𑀘𑀸𑀤𑀺 𑀓𑀣𑀁𑀧𑀦𑀺𑀤𑀫𑀺𑀘𑁆𑀘𑀸𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀲𑁆𑀲 𑀲𑀫𑀢𑁆𑀣 𑀦𑀯𑀸𑀓𑁆𑀬𑀁, 𑀳𑀺𑀬𑀲𑁆𑀫𑀸 𑀢𑀁 𑀤𑀺𑀲𑁆𑀯𑀸 𑀢𑀣𑀸 𑀧𑀼𑀘𑁆𑀙𑀺𑀢𑁄 𑀤𑁂𑀯𑀤𑀢𑁆𑀢𑀲𑁆𑀲𑀯𑀸𑀢𑀺𑀆𑀤𑀺𑀦𑀸 𑀉𑀧𑁆𑀧𑀸𑀤𑁂𑀢𑀸𑀭𑀫𑁂𑀯 𑀦𑀺𑀤𑁆𑀤𑀺𑀲𑀢𑀺, 𑀦𑀸𑀢𑁆𑀢𑀸𑀦𑀁 𑀧𑀺𑀢𑀸𑀫𑀳𑁄, 𑀢𑀲𑁆𑀫𑀸 𑀉𑀧𑁆𑀧𑀸𑀤𑁂𑀢𑀸𑀬𑁂𑀯𑀸𑀧𑀘𑁆𑀘𑁂𑀦 𑀲𑀫𑁆𑀩𑀚𑁆𑀛𑀢𑀺 𑀦 𑀧𑀺𑀢𑀸𑀫𑀳𑁄𑀢𑀺 𑀬𑁄𑀚𑁂𑀢𑁆𑀯𑀸 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀁 𑀬𑀣𑀸𑀯𑀼𑀢𑁆𑀢𑀫𑀼𑀧𑁆𑀧𑀸𑀤𑁂𑀢𑀼𑀦𑀺𑀤𑁆𑀤𑀺𑀲𑀦𑀁, 𑀢𑁂𑀦 𑀅𑀧𑀘𑁆𑀘𑁂𑀦 𑀲𑀤𑁆𑀥𑀺𑀁 𑀉𑀧𑁆𑀧𑀸𑀤𑁂𑀢𑀼𑀬𑁂𑀯 𑀚𑀦𑀓𑀲𑁆𑀲𑁂𑀯 𑀬𑁄𑀕𑁄 𑀲𑀫𑁆𑀩𑀦𑁆𑀥𑁄 𑀧𑀝𑀺𑀧𑀸𑀤𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀦𑁆𑀢𑀺𑀢𑀁 [𑀢𑀢𑁆𑀣-𑀇𑀢𑀺 (𑀧𑀜𑁆𑀘𑀺𑀓𑀸𑀬𑀁)] 𑀧𑀼𑀘𑁆𑀙𑀸𑀦𑀺𑀫𑀺𑀢𑁆𑀢𑀁, 𑀢𑁂𑀦𑀸𑀢𑀺 𑀅𑀧𑀘𑁆𑀘𑁂𑀦. 𑀅𑀧𑀢𑀦𑀦𑁆𑀢𑀺 𑀦𑀭𑀓𑁂 𑀅𑀧𑀢𑀦𑀁 𑀪𑀯𑀢𑀺, 𑀲𑁄𑀢𑀺 𑀬𑁄𑀲𑁄 𑀬𑀲𑁆𑀲𑀸𑀢𑁆𑀬𑀦𑀺𑀬𑀫𑀦𑀺𑀤𑁆𑀤𑀺𑀝𑁆𑀞𑁄 𑀲𑁄 𑀜𑀸𑀢𑀼𑀁 𑀦 𑀇𑀘𑁆𑀙𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 𑀇𑀤𑀁 𑀤𑀻𑀧𑁂𑀢𑀺- ‘‘𑀦𑀧𑀢𑀢𑁆𑀬𑀦𑁂𑀦 𑀦𑀭𑀓𑁂𑀢𑁆𑀬𑀧𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀢𑀺 𑀅𑀧𑀘𑁆𑀘𑁂𑀦𑀸𑀦𑁂𑀦 𑀬𑀲𑁆𑀲𑀓𑀲𑁆𑀲𑀘𑀺 𑀅𑀯𑀺𑀲𑁂𑀲𑁂𑀦𑀸𑀧𑀢𑀦𑀫𑁆𑀪𑀯𑀢𑀺 𑀦𑀭𑀓𑁂 𑀲𑁄𑀲𑁄 𑀢𑀸𑀬 𑀧𑀼𑀘𑁆𑀙𑀸𑀬 𑀜𑀸𑀢𑀼𑀁 𑀦 𑀇𑀘𑁆𑀙𑀺𑀢𑁄’’𑀢𑀺. 𑀲𑁄 𑀯𑀸𑀢𑀺 ¶ 𑀓𑀲𑁆𑀲𑀸𑀬𑀁 𑀧𑀼𑀢𑁆𑀢𑁄𑀢𑀺 𑀧𑀼𑀘𑁆𑀙𑀸𑀬𑀸𑀦𑀼𑀭𑁄𑀥𑀦𑁂 𑀲𑁄 𑀉𑀧𑁆𑀧𑀸𑀤𑁂𑀢𑀸𑀬𑁂𑀯 𑀜𑀸𑀢𑀼𑀫𑀺𑀘𑁆𑀙𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀼𑀲𑀤𑁆𑀤𑁄 𑀘𑁂𑀢𑁆𑀣𑀸𑀧𑀘𑁆𑀘𑁂𑀦 𑀦𑀭𑀓𑀸𑀧𑀸𑀢𑀲𑀩𑁆𑀩 𑀚𑀦𑀚𑀸𑀦𑀦𑀺𑀘𑁆𑀙𑀸𑀯𑀺𑀲𑁂𑀲𑀚𑁄𑀢𑀓𑁄, 𑀬𑀤𑀺 𑀲𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀅𑀢𑁆𑀢𑀸𑀦𑀫𑁆𑀧𑀺 𑀦𑀺𑀤𑁆𑀤𑀺𑀲𑁂𑀬𑁆𑀬 𑀦 𑀓𑁂𑀯𑀮𑀫𑀼𑀧𑁆𑀧𑀸𑀤𑁂𑀢𑀸𑀭𑀁, 𑀅𑀢𑁆𑀣𑀺𑀘𑁆𑀘𑀸𑀤𑀺 𑀧𑀺𑀢𑀸𑀫𑀳𑀲𑁆𑀲 𑀅𑀢𑁆𑀢𑀦𑁄𑀧𑀺 𑀦𑀺𑀤𑁆𑀤𑁂𑀲𑁂 𑀓𑀸𑀭𑀡𑀯𑀘𑀦𑀁, 𑀢𑀁 𑀅𑀧𑀘𑁆𑀘𑀁 𑀦𑀺𑀫𑀺𑀢𑁆𑀢𑀁 𑀓𑀸𑀭𑀡𑀁, 𑀬𑀲𑁆𑀲 𑀢𑀁 𑀢𑀁𑀦𑀺𑀫𑀺𑀢𑁆𑀢𑀁 𑀢𑀲𑁆𑀫𑀸 [𑀓𑀢𑁆𑀯𑀸 (𑀧𑁄𑀢𑁆𑀣𑀓𑁂)] 𑀏𑀯𑀁 𑀤𑀺𑀝𑁆𑀞𑀺𑀓𑁄 𑀳𑀺𑀘𑁆𑀘𑀸𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀁 𑀲𑀫𑀢𑁆𑀣𑁂𑀢𑀺.

𑀩𑁆𑀬𑀯𑀳𑀺𑀢𑀚𑀦𑀺𑀢𑁂𑀦𑀸𑀧𑀻𑀢𑀺 𑀩𑁆𑀬𑀯𑀳𑀺𑀢𑁂𑀦 𑀓𑀢𑁆𑀢𑀼𑀦𑀸 𑀚𑀦𑀺𑀢𑁂𑀦𑀸𑀧𑀺, 𑀓𑀭𑀡𑁂 𑀘𑀸𑀬𑀁 𑀢𑀢𑀺𑀬𑀸, 𑀳𑁂𑀢𑀼𑀫𑁆𑀳𑀺 𑀯𑀸. 𑀓𑀲𑁆𑀫𑀸 𑀏𑀯𑀁 𑀤𑀺𑀝𑁆𑀞𑀺𑀓𑁄𑀢𑀺 𑀆𑀳 ‘𑀬𑀁 𑀦𑀺𑀫𑀺𑀢𑁆𑀢𑀁 𑀳𑀺’𑀘𑁆𑀘𑀸𑀤𑀺. 𑀳𑀺𑀲𑀤𑁆𑀤𑁄 𑀬𑀲𑁆𑀫𑀸𑀤𑀢𑁆𑀣𑁂. 𑀬𑀲𑁆𑀲𑀸𑀢𑀺 𑀧𑀼𑀩𑁆𑀩𑀚𑀲𑁆𑀲, 𑀢𑁂𑀦 𑀅𑀧𑀘𑁆𑀘𑁂𑀦 𑀅𑀧𑀢𑀦𑀁 𑀢𑀤𑀧𑀢𑀦𑀁 𑀢𑀢𑁄, 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀢𑁂𑀦 𑀩𑁆𑀬𑀯𑀳𑀺𑀢𑀚𑀦𑀺𑀢𑁂𑀦𑀸𑀧𑀺 𑀧𑀼𑀫𑀼𑀦𑀸 𑀧𑀼𑀩𑁆𑀩𑀚𑁄𑀧𑀺 𑀦𑀭𑀓𑀁 𑀦 𑀧𑀢𑀢𑀺 𑀲𑁄 𑀧𑀼𑀩𑁆𑀩𑀚𑀲𑁆𑀲𑀸𑀧𑁆𑀬 𑀧𑀘𑁆𑀘𑀁 𑀪𑀯𑀢𑀺 𑀬𑀣𑀸𑀯𑀼𑀢𑁆𑀢𑁂𑀦 𑀦𑀺𑀩𑁆𑀩𑀘𑀦𑁂𑀦𑀸’’𑀢𑀺. 𑀢𑀲𑁆𑀫𑀸𑀘𑁆𑀘𑀲𑁆𑀲 𑀧𑀼𑀩𑁆𑀩𑁂 𑀯𑀼𑀢𑁆𑀢𑀬𑀲𑁆𑀫𑀸𑀢𑁆𑀬𑀦𑁂𑀦𑀸𑀪𑀺𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀧𑀧𑀢𑁆𑀬𑀦𑁆𑀢𑀭𑀫𑀸𑀳-‘𑀉𑀧𑀘𑀸𑀭𑀢𑁄𑀯𑁂’𑀘𑁆𑀘𑀸𑀤𑀺. 𑀧𑀼𑀩𑁆𑀩 𑀧𑀼𑀩𑁆𑀩𑀪𑀸𑀯𑁂 𑀲𑀢𑀻𑀢𑀺 𑀧𑀼𑀩𑁆𑀩𑀲𑁆𑀲 𑀧𑀼𑀩𑁆𑀩𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑁂 𑀲𑀢𑀺. 𑀩𑁆𑀬𑀯𑀳𑀺𑀢𑁂𑀦 𑀚𑀦𑀺𑀢𑁂 𑀅𑀧𑀘𑁆𑀘𑁂𑀧𑀺 𑀦𑀺𑀫𑀺𑀢𑁆𑀢𑀁 𑀅𑀧𑀸𑀬𑀸𑀧𑀢𑀓𑀸𑀭𑀡𑀪𑀸𑀯𑁄 𑀅𑀢𑁆𑀣𑀺𑀬𑁂 𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑁂𑀲𑀦𑁆𑀢𑀺 𑀆𑀳-‘𑀧𑀼𑀩𑁆𑀩𑁂𑀲𑀦𑁆𑀢𑀺 𑀧𑀼𑀩𑁆𑀩𑀚𑀸𑀦𑀦𑁆𑀢𑀺 𑀅𑀢𑁆𑀣𑁄, 𑀓𑁂 𑀦𑀸𑀢𑀺 𑀆𑀳- ‘𑀧𑀸𑀭𑀫𑁆𑀧𑀭𑀺𑀬𑁂𑀦𑀸’𑀢𑀺. 𑀅𑀪𑁂𑀤𑁄𑀧𑀘𑀸𑀭𑁂𑀦𑀸𑀢𑀺 𑀧𑀼𑀩𑁆𑀩𑀧𑀼𑀩𑁆𑀩𑀪𑀸𑀯𑁂 𑀲𑀢𑀺𑀘𑁆𑀘𑀸𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦 𑀚𑀦𑀓𑀲𑁆𑀲 𑀯𑀺𑀬 𑀧𑀸𑀭𑀫𑁆𑀧𑀭𑀺𑀬𑁂𑀦𑀧𑀼𑀩𑁆𑀩𑁂𑀲𑀫𑁆𑀧𑀺𑀦𑀺𑀫𑀺𑀢𑁆𑀢𑀢𑀸 𑀯𑀢𑁄 𑀚𑀦𑀓𑀲𑀤𑀺𑀲𑀢𑁆𑀢𑀸 𑀚𑀦𑀓𑀸𑀯 𑀦𑀸𑀫 𑀢𑁂 𑀲𑀺𑀬𑀼𑀦𑁆𑀢𑀺 𑀏𑀯𑀫𑀪𑁂𑀤𑁂𑀦 𑀉𑀧𑀘𑀭𑀡𑀢𑁄 𑀘𑀺𑀦𑁆𑀢𑀦𑀢𑁄𑀢𑀺 𑀅𑀢𑁆𑀣𑁄. 𑀉𑀪𑀬𑀣𑀸𑀢𑀺 𑀜𑀸𑀬𑁂𑀦 𑀉𑀧𑀘𑀸𑀭𑁂𑀦𑀘𑀸𑀢𑀺 𑀉𑀪𑀬𑁂𑀦 𑀧𑀓𑀸𑀭𑁂𑀦, 𑀏𑀯𑀫𑀼𑀪𑀬𑀣𑀸𑀧𑀺 𑀫𑀽𑀮𑀧𑁆𑀧𑀓𑀢𑀺𑀬𑀸 𑀧𑀘𑁆𑀘𑁂𑀦𑀸𑀪𑀺𑀲𑀫𑁆𑀩𑀦𑁆𑀥𑀸 𑀓𑀣𑀫𑀦𑀦𑁆𑀢𑀭 [𑀫𑀦𑀦𑁆𑀢𑀭𑀸𑀤𑀺 (𑀧𑁄𑀢𑁆𑀣𑀓𑁂) (𑀢𑀢𑁆𑀣) 𑀧𑁄𑀢𑁆𑀣𑀓𑁂] 𑀚𑀦𑀺𑀢𑁂𑀦𑀸𑀧𑀘𑁆𑀘𑁂𑀦𑀸𑀤𑀺𑀧𑀼𑀭𑀺𑀲𑀲𑀫𑁆𑀩𑀦𑁆𑀥𑁄𑀬𑁂𑀦 𑀢𑀢𑁄 𑀡𑀸𑀤𑀺𑀧𑁆𑀧𑀘𑁆𑀘𑀬𑁄 𑀲𑀺𑀬𑀸𑀢𑀺 𑀦𑀸𑀲𑀗𑁆𑀓𑁆𑀦𑀻𑀬𑀁.

𑀢𑀢𑁄 𑀘𑀸𑀢𑀺 𑀫𑀽𑀮𑀧𑁆𑀧𑀓𑀢𑀺𑀢𑁄 𑀘, 𑀅𑀧𑀘𑁆𑀘𑀲𑀸𑀫𑀜𑁆𑀜𑀯𑀘𑀦𑀺𑀘𑁆𑀙𑀸𑀬𑀦𑁆𑀢𑀺 𑀇𑀢𑁆𑀣𑀺 𑀧𑀼𑀦𑁆𑀦𑀧𑀼𑀁𑀲𑀓𑀢𑁆𑀢𑀯𑀺𑀲𑁂𑀲𑁄𑀧𑀕𑁆𑀕𑀸𑀳𑀺 𑀅𑀧𑀘𑁆𑀘𑀲𑀸𑀫𑀜𑁆𑀜𑀲𑁆𑀲 𑀯𑀘𑀦𑀺𑀘𑁆𑀙𑀸𑀬𑀁.

𑀏𑀯𑀫𑁆𑀫𑀽𑀮𑀓𑀢𑀺𑀢𑁄- 𑀧𑀘𑁆𑀘𑀲𑀸𑀫𑀜𑁆𑀜𑁂𑀦 𑀡𑀸𑀤𑀺𑀧𑁆𑀧𑀘𑁆𑀘𑀬𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀇𑀤𑀸𑀦𑀺 𑀅𑀧𑀘𑁆𑀘𑀸𑀤𑀺𑀢𑁄𑀧𑀺 𑀳𑁄𑀢𑁂𑀯 𑀡𑀸𑀤𑀺 𑀲𑀸𑀫𑀜𑁆𑀜𑀯𑀺𑀥𑀸𑀦𑀸. 𑀲𑁄 𑀘 𑀩𑀳𑀼𑀮𑀸𑀥𑀺𑀓𑀸𑀭𑀢𑁄 ¶ 𑀕𑀼𑀭𑀼𑀚𑀦𑀸𑀬𑀢𑁆𑀢𑀢𑁆𑀢𑀸 𑀢𑀦𑁆𑀦𑀺𑀬𑁄𑀕𑀸𑀘𑀭𑀡𑁂𑀦 𑀧𑀲𑀢𑁆𑀣𑁂 𑀬𑁂𑀯𑀸𑀧𑀘𑁆𑀘𑁂 𑀩𑁆𑀬𑀯𑀳𑀺𑀢𑀚𑀦𑀺𑀢𑁂𑀧𑀺 𑀇𑀢𑁆𑀣𑀺𑀯𑀚𑁆𑀚𑀺𑀢𑁂 𑀲𑀺𑀬𑀸𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘𑀦𑀢𑁆𑀢𑀸𑀤𑀻𑀳𑀺’𑀘𑁆𑀘𑀸𑀤𑀺. 𑀲𑀢𑀺𑀬𑁂𑀯 𑀕𑀼𑀭𑀼𑀚𑀦𑁂 𑀲𑀧𑁆𑀧𑀥𑀸𑀦𑀪𑀸𑀯𑁂𑀦 𑀓𑀼𑀘𑁆𑀙𑀺𑀢𑁂-𑀧𑀘𑁆𑀘𑁂𑀢𑀼 𑀦𑀢𑁆𑀢𑀸𑀤𑀻𑀯𑀼𑀢𑁆𑀢𑀻𑀳𑀺 𑀯𑀲𑀺𑀝𑁆𑀞𑀸𑀤𑀻𑀳𑀺 𑀡𑀸𑀤𑀺𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 𑀯𑀸𑀲𑀺𑀝𑁆𑀞𑁄𑀢𑀺𑀆𑀤𑀺, 𑀇𑀢𑁆𑀣𑀺𑀬𑀜𑁆𑀘 𑀦 𑀳𑁄𑀢𑀺 𑀯𑀸𑀲𑀺𑀝𑁆𑀞𑀻𑀢𑀺𑀆𑀤𑀺.

𑀅𑀢𑁆𑀣𑀢𑁄𑀢𑀺 𑀲𑀸𑀫𑀢𑁆𑀣𑀺𑀬𑀢𑁄. 𑀅𑀧𑀘𑁆𑀘𑁂 𑀯𑀺𑀥𑀻𑀬𑀫𑀸𑀦𑁄 𑀧𑀘𑁆𑀘𑀬𑁄 𑀅𑀧𑀘𑁆𑀘𑀯𑀢𑀸 𑀚𑀸𑀬𑀫𑀸𑀦𑁄 𑀢𑀲𑁆𑀲𑀸𑀧𑀘𑁆𑀘𑀦𑁆𑀢𑀺 𑀅𑀢𑁆𑀣𑁂 𑀚𑀸𑀬𑀢𑀺. 𑀲𑁄𑀘𑀸𑀬 𑀫𑀢𑁆𑀣𑀯𑀺𑀲𑁂𑀲𑁄 𑀙(𑀝𑁆𑀞𑀺𑀬𑀦𑁆𑀢) 𑀢𑀸𑀪𑀸𑀯𑁂 𑀓𑀣𑀁 𑀲𑀺𑀬𑀸𑀢𑀺 𑀇𑀤𑀫𑁂𑀢𑁆𑀣 𑀲𑀸𑀫𑀢𑁆𑀣𑀺𑀬𑀁. 𑀅𑀦𑀦𑁆𑀢𑀭𑁂 𑀯𑀸𑀧𑀘𑁆𑀘𑁂 𑀧𑀼𑀢𑁆𑀢𑁂-𑀪𑀺𑀥𑁂𑀬𑁆𑀬 𑀦𑀢𑁆𑀢𑀸𑀤𑁄 𑀯𑀸𑀧𑀘𑁆𑀘𑁂-𑀪𑀺𑀥𑁂𑀬𑁆𑀬𑀸𑀢𑀺 𑀲𑀲𑀫𑁆𑀩𑀦𑁆𑀥𑁄. 𑀓𑀼𑀢𑁄𑀘𑀺 𑀅𑀧𑀘𑁆𑀘𑀯𑀢𑀸 𑀦𑀢𑁆𑀢𑀸𑀤𑁄 𑀏𑀯. 𑀇𑀤𑀜𑁆𑀘 𑀲𑀩𑁆𑀩𑀫𑁆𑀩𑀳𑀼𑀮𑀯𑀘𑀦𑁂𑀯 𑀲𑀫𑁆𑀧𑀚𑁆𑀚𑀢𑀻𑀢𑀺 𑀆𑀳- ‘𑀩𑀳𑀼𑀮𑀸𑀥𑀺𑀓𑀸𑀭𑀸’𑀢𑀺. 𑀅𑀧𑀘𑁆𑀘𑁂𑀢𑀺 𑀏𑀓𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁂 𑀧𑀼𑀫𑀼𑀦𑀸 𑀦𑀧𑀼𑀁𑀲𑀓𑁂𑀦 𑀓𑀭𑀺𑀬𑀢𑀺, 𑀢𑁂𑀦𑁂 𑀓𑀲𑁆𑀫𑀺𑀁 𑀬𑁂𑀯𑀸𑀧𑀘𑁆𑀘𑁂 𑀲𑀺𑀬𑀸, 𑀦 𑀩𑀳𑀽𑀲𑀼 𑀯𑀲𑀺𑀝𑁆𑀞𑀲𑁆𑀲𑀸𑀧𑀘𑁆𑀘𑀸𑀦𑀺 𑀯𑀸𑀲𑀺𑀝𑁆𑀞𑀸𑀦𑀺, 𑀦 𑀘𑀺𑀢𑁆𑀣𑀺 𑀯𑀸𑀲𑀺𑀝𑁆𑀞𑀸𑀦𑀺, 𑀦 𑀘𑀺𑀢𑁆𑀣𑀺𑀬𑀁 𑀯𑀸𑀲𑀺𑀝𑁆𑀞𑀻𑀢𑁆𑀬𑀸𑀲𑀗𑁆𑀓𑀺𑀬𑀸𑀳-‘𑀇𑀤𑀜𑁆𑀘𑁂’𑀘𑁆𑀘𑀸𑀤𑀺. 𑀇𑀤𑀜𑁆𑀘 𑀅𑀧𑀘𑁆𑀘𑀯𑀘𑀦𑀜𑁆𑀘. 𑀇𑀫𑀺𑀦𑀸 𑀘𑁂𑀢𑁆𑀣 𑀢𑀣𑀸 𑀦𑀺𑀲𑁆𑀲𑀬𑀓𑀭𑀡𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀲 𑀯𑀘𑀦𑀺𑀘𑁆𑀙𑀸𑀪𑀸𑀯𑀢𑁄𑀢𑀺 𑀢𑀲𑁆𑀲 𑀮𑀺𑀗𑁆𑀕𑀯𑀘𑀦𑀲𑁆𑀲 𑀲𑀼𑀢𑁆𑀢𑁂 𑀯𑀢𑁆𑀢𑀼𑀫𑀺𑀘𑁆𑀙𑀸𑀬𑀸𑀪𑀸𑀯𑀢𑁄𑀢𑀺 𑀅𑀢𑁆𑀣𑁄.

𑀓𑀺𑀁 𑀧𑀦 𑀓𑀸𑀭𑀡𑀁 𑀲𑀼𑀢𑁆𑀢𑁂 𑀮𑀺𑀗𑁆𑀕𑀯𑀘𑀦𑀸𑀯𑀘𑀦𑀺𑀘𑁆𑀙𑀸𑀬𑀁 𑀢𑀲𑁆𑀲𑀸𑀧𑁆𑀧𑀥𑀸𑀦𑀢𑁆𑀢𑀸 𑀬𑁂𑀦𑀓𑁂𑀦𑀘𑀺 𑀮𑀺𑀗𑁆𑀕𑀸𑀤𑀺𑀦𑀸 𑀦𑀺𑀤𑁆𑀤𑁂𑀲𑁄-𑀯𑀲𑁆𑀲𑀁 𑀓𑀢𑁆𑀢𑀩𑁆𑀩𑁄𑀢𑀺 𑀦𑀸𑀦𑀦𑁆𑀢𑀭𑀺𑀬𑀓𑀢𑁆𑀢𑀸 𑀢𑀲𑁆𑀲𑁂𑀳𑁄𑀧𑀸𑀤𑀸𑀦𑀁, 𑀬𑀣𑀸𑀥𑀜𑁆𑀜𑀢𑁆𑀣𑀺𑀦𑁄𑀧𑀮𑀸𑀮𑀸𑀤𑀺𑀦𑁄𑀧𑁆𑀬𑀧𑁆𑀧𑀥𑀸𑀦𑀲𑁆𑀲𑁄𑀧𑀸𑀤𑀸𑀦𑀦𑁆𑀢𑀺. 𑀢𑀢𑁄𑀬𑁂𑀯𑀸𑀳-‘𑀉𑀧𑀮𑀓𑁆𑀔𑀻𑀬𑀲𑁆𑀲𑁂𑀢𑁆𑀣 𑀧𑀥𑀸𑀦𑀢𑁆𑀢𑀸’𑀘𑁆𑀘𑀸𑀤𑀺. 𑀇𑀢𑁆𑀣𑀺𑀧𑀼𑀫𑀢𑁆𑀢𑀬𑀼𑀢𑁆𑀢𑀚𑀜𑁆𑀜𑀯𑀺𑀲𑁂𑀲𑁄 𑀉𑀧𑀮𑀓𑁆𑀔𑀻𑀬𑁄, 𑀅𑀧𑀘𑁆𑀘𑁂𑀢𑀻𑀤𑀫𑀼𑀧𑀮𑀓𑁆𑀔𑀡𑀁, 𑀲𑀬𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀫𑀼𑀧𑀮𑀓𑁆𑀔𑀡𑀁 𑀲𑀬𑀁. 𑀓𑀸𑀭𑀺𑀬𑀧𑁆𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀧𑀼𑀫𑁂 𑀦𑀧𑀼𑀁𑀲𑀓𑁂𑀧𑀘𑁆𑀘𑁂-𑀪𑀺𑀥𑁂𑀬𑁆𑀬𑁂 𑀯𑀺𑀥𑀺 𑀳𑁄𑀢𑀺𑀘𑁆𑀘𑁂𑀯𑀁 𑀓𑀸𑀭𑀺𑀬𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀯𑀢𑁆𑀢𑀼𑀁 𑀦 𑀇𑀝𑁆𑀞𑀁.

𑀯𑀘𑀦𑀦𑁆𑀢𑀭𑁂𑀧𑀺 𑀅𑀜𑁆𑀜𑀲𑁆𑀫𑀺𑀁 𑀯𑀘𑀦𑁂. 𑀆𑀡𑀻𑀢𑀺 𑀡𑀺𑀧𑁆𑀧𑀘𑁆𑀘𑀬𑀲𑀼𑀢𑁆𑀢𑀁 𑀯𑀤𑀢𑀺. 𑀅𑀕𑁄𑀢𑁆𑀢𑀸𑀤𑀺𑀢𑁄𑀢𑀺 𑀬𑁄𑀕𑁄𑀢𑁆𑀢𑀲𑁆𑀲𑀸𑀤𑀺𑀪𑀽𑀢𑁄 𑀦 𑀳𑁄𑀢𑀺, 𑀢𑀢𑁄, 𑀢𑁂𑀦𑁂𑀯 ‘‘𑀆𑀡𑀻’’𑀢𑀺 𑀲𑀼𑀢𑁆𑀢𑁂 (𑁪-𑁫) 𑀯𑀓𑁆𑀔𑀢𑀺-‘𑀅𑀓𑀸𑀭𑀦𑁆𑀢𑀫𑀢𑁆𑀢𑀢𑁄𑀯𑀸𑀬𑀁𑀡𑀺𑀦 𑀕𑁄𑀢𑁆𑀢𑀸𑀤𑀺𑀪𑀽𑀢𑀢𑁄’𑀢𑀺. 𑀯𑀸𑀓𑁆𑀬𑀲𑀫𑀸𑀲𑀸𑀧𑀻𑀢𑀺 𑀬𑀣𑀸𑀲𑀗𑁆𑀔𑁆𑀬𑁂𑀦𑀸𑀳. 𑀢𑀲𑁆𑀫𑀺𑀁 𑀅𑀢𑁆𑀣𑁂𑀢𑀺 𑀢𑀲𑁆𑀫𑀺𑀁 𑀯𑀸𑀓𑁆𑀬𑁄𑀧𑀤𑀲𑁆𑀲𑀺𑀢𑁂 𑀅𑀢𑁆𑀣𑁂, 𑀢𑀦𑁆𑀢𑀺 𑀯𑀸𑀓𑁆𑀬𑀁. 𑀲𑀫𑀸𑀲𑀯𑀼𑀢𑁆𑀢𑀺𑀜𑁆𑀘 𑀦𑀺𑀯𑀢𑁆𑀢𑁂𑀬𑁆𑀬𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀲𑀢𑀺𑀧𑀦𑀸𑀢𑀺 ¶ 𑀯𑀸𑀓𑀸𑀭𑁂 𑀲𑀢𑀺 𑀢𑀼 𑀅𑀦𑀺𑀘𑁆𑀘𑀢𑁆𑀢𑀸 𑀡𑀧𑁆𑀧𑀘𑁆𑀘𑀬𑀲𑁆𑀲. 𑀲𑁄𑀧𑀻𑀢𑀺 𑀲𑀫𑀸𑀲𑁄𑀧𑀺, 𑀲𑀫𑀸𑀲𑁄𑀢𑀺𑀆𑀤𑀺𑀦𑀸 𑀧𑀓𑁆𑀔𑀦𑁆𑀢𑀭𑀫𑀸𑀳. 𑀢𑁂𑀦 𑀯𑀸𑀓𑁆𑀬𑀲𑀺𑀚𑁆𑀛𑀦𑁂𑀦. 𑀧𑀓𑁆𑀔𑁂 𑀯𑀸𑀓𑁆𑀬𑀲𑀫𑀸𑀲𑀸𑀧𑀺 𑀲𑀺𑀬𑀼𑀦𑁆𑀢𑀺 𑀧𑀓𑁆𑀔𑁂 𑀲𑀫𑀸𑀲𑀯𑀼𑀢𑁆𑀢𑀺𑀬𑀸 𑀏𑀯 𑀩𑀸𑀥𑀺𑀢𑀢𑁆𑀢𑀸 𑀧𑀓𑁆𑀔𑀦𑁆𑀢𑀭𑁂 𑀡𑀸𑀤𑀺𑀯𑀼𑀢𑁆𑀢𑀺 𑀦 𑀩𑀸𑀥𑀻𑀬𑀢𑀻𑀢𑀺 𑀯𑀸𑀓𑁆𑀬𑀯𑀼𑀢𑁆𑀢𑀺𑀬𑁄𑀧𑀺 𑀲𑀺𑀬𑀼𑀦𑁆𑀢𑀺 𑀅𑀢𑁆𑀣𑁄.

𑀯𑀘𑁆𑀙𑀓𑀘𑁆𑀘𑀸𑀤𑀺𑀦𑀸 𑀓𑀘𑁆𑀘𑀸𑀤𑀺𑀕𑀡𑀁 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲 𑀯𑀺𑀪𑀸𑀕𑁂𑀦 𑀦𑀺𑀧𑁆𑀨𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘𑀯𑀘𑁆𑀙𑀸𑀤𑀻𑀳𑀻’𑀢𑀺𑀆𑀤𑀺𑀫𑀸𑀳. ‘‘𑀓𑀡𑁆𑀳𑁄 𑀩𑁆𑀭𑀸𑀳𑁆𑀫𑀡𑁂’’𑀢𑀺 𑀕𑀡𑀲𑀼𑀢𑁆𑀢𑀁. 𑀢𑀢𑁆𑀣 𑀓𑀡𑁆𑀳𑀲𑀤𑁆𑀤𑁄 𑀩𑁆𑀭𑀸𑀳𑁆𑀫𑀡𑁂 𑀯𑀢𑁆𑀢𑀫𑀸𑀦𑁄 𑀡𑀸𑀦𑀡𑀸𑀬 𑀦𑀧𑁆𑀧𑀘𑁆𑀘𑀬𑁂 𑀉𑀧𑁆𑀧𑀸𑀤𑀬𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀫𑀸𑀤𑀻𑀳𑀺𑀘𑁆𑀘𑀸𑀤𑀺𑀦𑀸 𑀆𑀓𑀢𑀺𑀕𑀡𑀢𑁆𑀢𑀫𑀲𑁆𑀲 𑀤𑀲𑁆𑀲𑁂𑀢𑀺. ‘‘𑀓𑀢𑀸𑀡𑀺𑀬𑁄𑀯𑁂’’𑀢𑀺 𑀕𑀡𑀲𑀼𑀢𑁆𑀢𑀁, 𑀤𑀺𑀘𑁆𑀘𑀸𑀤𑀻𑀲𑀽𑀢𑀺 𑀬𑀢𑁄𑀡𑁆𑀬𑁄 𑀤𑀺𑀲𑁆𑀲𑀢𑀺 ‘‘𑀡𑁆𑀬 𑀤𑀺𑀘𑁆𑀘𑀸𑀤𑀻𑀳𑀻’’𑀢𑀺 (𑁪-𑁪), 𑀢𑁂 𑀤𑀺𑀘𑁆𑀘𑀸𑀤𑀬𑁄, 𑀢𑁂𑀲𑀼 𑀧𑀸𑀞𑀸𑀢𑀺 𑀢𑀁𑀲𑀼𑀢𑁆𑀢𑀧𑁆𑀧𑀤𑁂𑀲𑁂 ‘‘𑀓𑀢𑀸 𑀡𑀺𑀬𑁄𑀯𑁂’’𑀢𑀺 𑀧𑀸𑀞𑀸𑀪𑀸𑀯𑁂𑀧𑀺 𑀤𑀺𑀘𑁆𑀘𑀸 𑀤𑀻𑀦𑀫𑀸𑀓𑀢𑀺𑀕𑀡𑀢𑁆𑀢𑀸 𑀧𑀞𑀺𑀢𑀫𑁂𑀯 𑀦𑀸𑀫 𑀢𑀦𑁆𑀢𑀺 𑀯𑀼𑀢𑁆𑀢𑀁.

𑀡𑁆𑀬𑁂𑀢𑀺 𑀡𑁆𑀬𑀧𑁆𑀧𑀘𑁆𑀘𑀬𑁂 𑀓𑀢𑁂. 𑀕𑁄𑀢𑁆𑀢𑀸𑀤𑀺𑀲𑀤𑁆𑀤𑀸𑀢𑀺 𑀕𑁄𑀢𑁆𑀢𑁂 𑀯𑀁𑀲𑁂 𑀆𑀤𑀺𑀪𑀽𑀢𑀸 𑀲𑀤𑁆𑀤𑀸. 𑀯𑀁𑀲𑁄𑀢𑀺 𑀅𑀦𑁆𑀯𑀬𑁄. 𑀲𑁄𑀬𑁂𑀯 𑀕𑀸𑀯𑀁 𑀲𑀚𑀸𑀢𑀺 𑀲𑀸𑀥𑀸𑀭𑀡𑀁 𑀯𑀺𑀚𑀸𑀢𑀺𑀯𑀺𑀦𑀺𑀯𑀢𑁆𑀢𑀦𑀁 𑀲𑀓𑀝𑀸𑀤𑀺𑀯𑀘𑀦𑀁 𑀢𑀸𑀬𑀢𑀻𑀢𑀺 𑀕𑁄𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁, 𑀢𑁂𑀦𑀸𑀳-‘𑀕𑁄𑀢𑁆𑀢𑀁 𑀯𑀁𑀲𑁄’𑀢𑀺. 𑀢𑀲𑁆𑀲𑀸𑀢𑀺 𑀕𑁄𑀢𑁆𑀢𑀲𑁆𑀲, 𑀢𑀲𑁆𑀲𑀸𑀤𑀬𑁄 𑀕𑁄𑀢𑁆𑀢𑀸𑀤𑀬𑁄𑀢𑀺 𑀲𑁂𑀲𑁄. 𑀓𑁂𑀢𑁂 𑀕𑁄𑀢𑁆𑀢𑀸𑀤𑀬𑁄𑀘𑁆𑀘𑀸𑀳- ‘𑀲𑀜𑁆𑀜𑀸𑀓𑀸𑀭𑀺𑀦𑁄’𑀘𑁆𑀘𑀸𑀤𑀺. 𑀯𑀘𑁆𑀙𑀸𑀤𑀬𑁄 𑀦𑀢𑁆𑀢𑀸𑀤𑀺𑀦𑁄 𑀅𑀧𑀘𑁆𑀘𑀲𑁆𑀲 𑀅𑀧𑀘𑁆𑀘𑀁 𑀢𑀤𑀧𑀘𑁆𑀘𑀸𑀤𑀺 𑀘𑀸𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘𑀦𑀢𑁆𑀢𑀸𑀤𑀺𑀦𑁄’𑀘𑁆𑀘𑀸𑀤𑀺.

𑀖𑀧𑀲𑀜𑁆𑀜𑀦𑁆𑀢𑀸𑀯𑁂𑀢𑁆𑀣 𑀪𑀻𑀬𑁆𑀬𑁄 𑀓𑀢𑁆𑀢𑀺𑀓𑀸𑀤𑀬𑁄𑀢𑀺 𑀕𑀬𑁆𑀳𑀦𑁆𑀢𑀺. 𑀬𑀤𑀺 𑀧𑀦𑁂𑀢𑁆𑀣 𑀅𑀜𑁆𑀜𑁂𑀧𑀺 𑀕𑀬𑁆𑀳𑀦𑁆𑀢𑀺, 𑀅𑀢𑁆𑀣𑀺 𑀧𑀡𑁆𑀳𑀺𑀆𑀤𑀬𑁄 𑀓𑁂𑀘𑀺𑀬𑁂𑀯 𑀓𑀢𑁆𑀢𑀺𑀓𑀸𑀤𑀻𑀲𑀼 𑀅𑀦𑁆𑀢𑁄𑀕𑀥𑀸 𑀳𑁄𑀦𑁆𑀢𑀻𑀢𑀺 𑀯𑀢𑁆𑀢𑀼𑀫𑀸𑀳- ‘𑀏𑀢𑁆𑀣𑀸’𑀢𑀺𑀆𑀤𑀺. 𑀯𑀺𑀦𑀢𑀸 𑀲𑀼𑀧𑀡𑁆𑀡𑀫𑀸𑀢𑀸, 𑀢𑁂𑀳𑀻𑀢𑀺 𑀯𑀺𑀥𑀯𑀸𑀤𑀻𑀳𑀺. 𑀯𑀺𑀥𑀯𑀸𑀤𑀺𑀕𑀡𑀁 𑀤𑀲𑁆𑀲𑁂𑀢𑀺 ‘𑀩𑀦𑁆𑀥𑀓’𑀘𑁆𑀘𑀸𑀤𑀺. 𑀯𑀺𑀕𑀢𑁄 𑀥𑀯𑁄 𑀧𑀢𑀺 𑀅𑀲𑁆𑀲𑀸𑀢𑀺 𑀯𑀺𑀥𑀯𑀸, 𑀩𑀦𑁆𑀥𑀓𑀻 𑀅𑀪𑀺𑀲𑀸𑀭𑀺𑀡𑀻.

𑀬𑀲𑁆𑀲 ¶ 𑀘 𑀘𑀯𑀕𑁆𑀕𑁄𑀢𑀺 𑀲𑀫𑁆𑀩𑀦𑁆𑀥𑁄, 𑀓𑁂𑀯𑀮𑀁 𑀕𑀕𑁆𑀕𑁆𑀬𑁄𑀢𑀺 𑀏𑀢𑁆𑀢𑀓𑀫𑁂𑀯𑀸 𑀤𑀲𑁆𑀲𑁂𑀢𑁆𑀯𑀸 𑀧𑀭𑀲𑀢𑁆𑀣𑀸𑀕𑀢𑀕𑀕𑁆𑀕𑀸𑀤𑀺𑀕𑀡𑁂𑀓𑀤𑁂𑀲𑀪𑀽𑀢𑀓𑀼𑀡𑁆𑀟𑀦𑀻𑀲𑀤𑁆𑀤𑀢𑁄𑀧𑀺 𑀓𑁄𑀡𑁆𑀟𑀜𑁆𑀜𑁄𑀢𑀺 𑀫𑀼𑀤𑀸𑀳𑀭𑀦𑁆𑀢𑁄 𑀲𑁄 𑀕𑀕𑁆𑀕𑀸𑀤𑀺𑀕𑀡𑁄𑀧𑁆𑀬𑀢𑁆𑀭𑀸𑀪𑁆𑀬𑀼𑀧𑀕𑀢𑁄𑀢𑀺 𑀯𑀺𑀜𑁆𑀜𑀸𑀧𑁂𑀢𑀺. 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀕𑀕𑁆𑀕𑀸𑀤𑀺𑀓𑁂𑀧𑀺 𑀧𑀭𑀲𑀢𑁆𑀣𑀧𑀞𑀺𑀢𑁂 𑀬𑁄𑀬𑁄 𑀧𑀬𑁄𑀕𑁄 𑀆𑀕𑀫𑁂 𑀤𑀺𑀲𑁆𑀲𑀢𑀺 𑀯𑀘𑁆𑀙𑁄 𑀅𑀕𑁆𑀕𑀺𑀯𑁂𑀲𑁆𑀲𑁄𑀘𑁆𑀘𑀸𑀤𑀺. 𑀲𑁄𑀧𑀻𑀳 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀫𑀸𑀳-‘𑀕𑀕𑁆𑀕𑀸𑀤𑀺’𑀘𑁆𑀘𑀸𑀤𑀺. 𑀕𑀕𑁆𑀕𑀸𑀤𑀻𑀢𑀺 𑀕𑀕𑁆𑀕𑀸𑀤𑀺 𑀅𑀬𑀁. 𑀕𑁄𑀢𑁆𑀢𑀲𑁆𑀲 𑀕𑀕𑁆𑀕𑀯𑀁𑀲𑀲𑁆𑀲 𑀆𑀤𑀺𑀪𑀽𑀢𑁂𑀦 𑀕𑀕𑁆𑀕𑁂𑀦 𑀉𑀧𑀮𑀓𑁆𑀔𑀺𑀢𑁄 𑀕𑀡𑁄 𑀕𑁄𑀢𑁆𑀢𑀸𑀤𑀺𑀕𑀡𑁄, 𑀢𑁂𑀦 𑀕𑀕𑁆𑀕𑁄 𑀦𑀸𑀫 𑀓𑁄𑀘𑀺, 𑀢𑀲𑁆𑀲𑀢𑁆𑀯𑀧𑀘𑁆𑀘𑀁 𑀕𑀕𑁆𑀕𑀻𑀢𑀺 𑀪𑀯𑀢𑀺. 𑀧𑀧𑀼𑀢𑁆𑀢𑀸𑀤𑁄𑀯𑀸𑀢𑀺 𑀅𑀯𑀥𑀸𑀭𑀡𑀁 𑀕𑀕𑁆𑀕𑀲𑁆𑀲𑀸𑀧𑀘𑁆𑀘𑀁 𑀕𑀕𑁆𑀕𑀺𑀘𑁆𑀘𑁂𑀯 𑀬𑀣𑀸𑀲𑀺𑀬𑀸𑀢𑀺.

𑀧𑀓𑀢𑀲𑁆𑀲𑀸𑀢𑀺 ‘‘𑀫𑀸𑀕𑀥𑀁 𑀲𑀤𑁆𑀤𑀮𑀓𑁆𑀔𑀡’’𑀦𑁆𑀢𑀺 𑀯𑀸 ‘‘𑀦𑀸𑀫𑀲𑁆𑀫𑀸’’𑀢𑀺 𑀯𑀸 𑀧𑀓𑀢𑀲𑁆𑀲. 𑀆𑀢𑀺 𑀦𑀸𑀫𑀯𑀺𑀲𑁂𑀲𑀦𑁂𑀲𑀢𑀺 ‘‘𑀯𑀺𑀥𑀺𑀩𑁆𑀩𑀺𑀲𑁂𑀲𑀦𑀦𑁆𑀢𑀲𑁆𑀲𑀸’’𑀢𑀺 𑀢𑀤𑀦𑁆𑀢 𑀯𑀺𑀥𑀺𑀦𑀸 𑀅𑀓𑀸𑀭𑀦𑁆𑀢𑁄 𑀕𑀬𑁆𑀳𑀢𑀻𑀢𑀺 𑀆𑀳-‘𑀯𑀺𑀲𑁂𑀲𑀦𑁂𑀦 𑀘𑀸’𑀢𑀺𑀆𑀤𑀺. 𑀅𑀦𑀦𑁆𑀢𑀭𑀫𑀧𑀘𑁆𑀘𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀘𑁆𑀘𑀬𑀦𑁆𑀢𑁂𑀦𑀸𑀢𑀺 𑀭𑀸𑀚𑀜𑁆𑀜𑁄𑀢𑀺 𑀧𑀘𑁆𑀘𑀬𑀦𑁆𑀢𑁂𑀦. 𑀭𑀸𑀚𑀜𑁆𑀜𑁄𑀢𑀻𑀫𑀲𑁆𑀲𑀢𑁆𑀣𑁄 𑀔𑀢𑁆𑀢𑀺𑀬𑀚𑀸𑀢𑀻𑀢𑀺, 𑀭𑀸𑀚𑀜𑁆𑀜𑀚𑀸𑀢𑀻𑀢𑀺 𑀅𑀢𑁆𑀣𑁄. 𑀭𑀜𑁆𑀜𑁄 𑀅𑀧𑀘𑁆𑀘𑀁 𑀭𑀸𑀚𑀸𑀧𑀘𑁆𑀘𑀁.

𑀲𑀫𑀼𑀤𑀸𑀬𑁂𑀦𑀸𑀢𑀺 𑀧𑀘𑁆𑀘𑀬𑀦𑁆𑀢𑀲𑀫𑀼𑀤𑀸𑀬𑁂𑀦, 𑀚𑀸𑀢𑀺𑀬𑀦𑁆𑀢𑀺 𑀫𑀦𑀼𑀲𑁆𑀲𑀚𑀸𑀢𑀺𑀬𑀁. 𑀚𑀸𑀢𑀺𑀲𑀤𑁆𑀤𑀸𑀏𑀢𑁂𑀢𑀺 𑀇𑀤𑀁 𑀫𑀦𑀼𑀲𑁆𑀲𑁄 𑀫𑀸𑀦𑀼𑀲𑁄𑀢𑀺 𑀏𑀢𑁆𑀣 𑀅𑀧𑀘𑁆𑀘𑀢𑁆𑀣𑀸𑀪𑀸𑀯𑁂 𑀳𑁂𑀢𑀼𑀯𑀘𑀦𑀁. 𑀅𑀧𑀘𑁆𑀘𑀢𑁆𑀣𑁄 𑀏𑀢𑁆𑀣 𑀦𑀢𑁆𑀣𑁂𑀯𑀸𑀢𑀺 𑀘 𑀇𑀤𑀁 𑀯𑀺𑀲𑀼𑀁 𑀫𑀦𑀼𑀲𑁆𑀲𑀫𑀸𑀦𑀼𑀲 𑀲𑀗𑁆𑀔𑀸𑀢𑀲𑁆𑀲 𑀧𑀘𑁆𑀘𑀢𑁆𑀣𑀲𑁆𑀲𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀡𑁄𑀯𑀸𑀢𑀺 𑀫𑀦𑀼𑀦𑁄 𑀅𑀧𑀘𑁆𑀘𑀦𑁆𑀢𑀺 𑀅𑀢𑁆𑀣𑁂‘‘𑀡𑁄 𑀯𑀸𑀧𑀘𑁆𑀘𑁂’’𑀢𑀺 (𑁪-𑁧) 𑀡𑀧𑁆𑀧𑀘𑁆𑀘𑀬𑁄𑀯. 𑀦 𑀚𑀸𑀢𑀻𑀢𑀺 𑀩𑁆𑀬𑀢𑀺𑀭𑁂𑀓𑀫𑀸𑀳.

𑀭𑀸𑀚𑀲𑀫𑁆𑀩𑀦𑁆𑀥𑁂𑀢𑀺 ¶ 𑀭𑀜𑁆𑀜𑁂𑀢𑀺 𑀯𑀼𑀢𑁆𑀢𑀭𑀸𑀚𑀲𑀫𑁆𑀩𑀦𑁆𑀥𑁂. 𑀧𑀜𑁆𑀘𑀸𑀮𑀸𑀦𑀁 𑀔𑀢𑁆𑀢𑀺𑀬𑀸𑀦𑀁 𑀅𑀧𑀘𑁆𑀘𑀁, 𑀧𑀜𑁆𑀘𑀸𑀮𑀸𑀦𑀁 𑀚𑀦𑀧𑀤𑀸𑀦𑀁 𑀭𑀸𑀚𑀸𑀢𑀺 𑀯𑀸 𑀏𑀯𑀫𑁂𑀢𑁆𑀣 𑀯𑀺(𑀪𑀸𑀕𑁄) 𑀯𑁂𑀤𑀺𑀢𑀩𑁆𑀩𑁄 𑀑𑀓𑁆𑀓𑀸𑀓𑀸𑀦𑀁 𑀅𑀧𑀘𑁆𑀘𑀁 𑀭𑀸𑀚𑀸 𑀯𑀸 𑀑𑀓𑁆𑀓𑀸𑀓𑁄.

𑀲𑀸𑀫𑀜𑁆𑀜𑁂𑀦 𑀭𑀢𑁆𑀢𑀲𑀤𑁆𑀤𑀲𑁆𑀲𑀸𑀢𑁆𑀣𑀫𑀸𑀳- ‘𑀓𑀼𑀗𑁆𑀓𑀼𑀫𑀸𑀤𑀺𑀦𑀸’𑀢𑀺. 𑀅𑀜𑁆𑀜𑀣𑀸 ‘𑀭𑀸𑀕𑁄 𑀓𑀼𑀲𑀼𑀫𑁆𑀪𑀸𑀤𑀻’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀼𑀲𑀼𑀫𑁆𑀪𑀸𑀤𑀺𑀦𑀸𑀢𑀺 (𑀯𑀼𑀢𑁆𑀢𑀁) 𑀲𑀺𑀬𑀸, 𑀭𑀜𑁆𑀚𑀺 𑀅𑀬 𑀫𑀢𑁆𑀣𑀺 𑀅𑀪𑀺𑀲𑀗𑁆𑀕𑁂‘𑀪𑁄𑀚𑀦𑁂 𑀭𑀢𑁆𑀢𑁄’𑀢𑀺. 𑀅𑀢𑁆𑀣𑀺 𑀯𑀡𑁆𑀡𑀯𑀺𑀲𑁂𑀲𑁂 ‘𑀭𑀢𑁆𑀢𑁄𑀕𑁄’𑀢𑀺, 𑀮𑁄𑀳𑀺𑀢𑁄𑀢𑁆𑀬𑀢𑁆𑀣𑁄, 𑀅𑀢𑁆𑀣𑀺 𑀲𑀼𑀓𑁆𑀓𑀲𑀚 𑀯𑀡𑁆𑀡𑀦𑁆𑀢𑀭𑀸𑀧𑀸𑀤𑀦𑁂‘𑀭𑀢𑁆𑀢𑁄 𑀧𑀝𑁄’𑀢𑀺. 𑀇𑀳 𑀢𑀼 𑀢𑀢𑀺𑀬𑁂-𑀢𑁆𑀣𑁂 𑀯𑀢𑁆𑀢𑀫𑀸𑀦𑁄 𑀕𑀬𑁆𑀳𑀢𑀻𑀢𑀺 𑀯𑀼𑀢𑁆𑀢𑀁- ‘𑀯𑀡𑁆𑀡𑀦𑁆𑀢𑀭𑀫𑀸𑀧𑀸𑀤𑀺𑀢’𑀦𑁆𑀢𑀺. 𑀭𑀸𑀕𑀸𑀢𑀺.

𑀅𑀢𑁆𑀣𑀕𑁆𑀕𑀳𑀡𑀦𑁆𑀢𑀺 𑀅𑀢𑁆𑀣𑀧𑁆𑀧𑀥𑀸𑀦𑀢𑁆𑀢𑀸 𑀦𑀺𑀤𑁆𑀤𑁂𑀲𑀲𑁆𑀲 𑀯𑀼𑀢𑁆𑀢𑀁. 𑀢𑀜𑁆𑀘𑀸𑀘𑀭𑀺𑀬𑀸𑀦 𑀫𑀼𑀧𑀤𑁂𑀲𑀢𑁄 𑀅𑀯𑀺𑀘𑁆𑀙𑀺𑀦𑁆𑀦𑀸 (𑀘𑀭𑀺𑀬) 𑀧𑀸𑀭𑀫𑁆𑀧𑀭𑀺𑀬𑀸𑀯𑀕𑀫𑁆𑀬𑀢𑁂, 𑀭𑀸𑀕𑀸𑀢𑀺 𑀓𑀲𑀸𑀯 𑀲𑀗𑁆𑀔𑀸𑀢𑀅𑀢𑁆𑀣𑀦𑀺𑀤𑁆𑀤𑁂𑀲𑁄. 𑀢𑁂𑀦𑀸𑀢𑀺 𑀧𑀝𑀲𑁆𑀲 𑀭𑀢𑁆𑀢𑀪𑀸𑀯𑁂 𑀭𑀸𑀕𑀲𑁆𑀲 𑀓𑀭𑀡𑀦𑀺𑀤𑁆𑀤𑁂𑀲𑁄, 𑀭𑀢𑁆𑀢𑀦𑁆𑀢𑀺 𑀧𑀘𑁆𑀘𑀬𑀢𑁆𑀣𑀦𑀺𑀤𑁆𑀤𑁂𑀲𑁄, 𑀧𑀘𑁆𑀘𑀬𑁄 𑀘𑀸𑀬𑀁 𑀓𑀲𑀸 𑀯𑀢𑁆𑀣𑀢𑁄 𑀪𑀯𑀢𑁆𑀬𑀲𑀫𑁆𑀪𑀯𑀸, 𑀢𑁂𑀦 𑀲𑀼𑀢𑁆𑀢𑁂 𑀭𑀸𑀕𑀸𑀢𑀺 𑀯𑀼𑀢𑁆𑀢𑁂𑀧𑀺 𑀢𑀩𑁆𑀩𑀸𑀘𑀓𑀸 𑀓𑀲𑀸𑀯𑀲𑀤𑁆𑀤𑀸𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀭𑀸𑀕𑀸𑀢𑀺 𑀧𑀦 𑀢𑁂𑀦𑀸𑀢𑀺 𑀭𑀸𑀕𑀲𑁆𑀲𑁂𑀯 𑀦𑀺𑀤𑁆𑀤𑀺𑀝𑁆𑀞𑁂𑀧𑀺 𑀢𑀩𑁆𑀪𑀸𑀯𑁂𑀦𑀸 [𑀢𑀩𑁆𑀩𑀸𑀯𑀓𑀪𑀸𑀯𑁂𑀦𑀸-𑀢𑀺 𑀪𑀯𑀺𑀢𑀩𑁆𑀩𑀁] 𑀢𑁆𑀣𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀢𑀩𑁆𑀩𑀸𑀘𑀓𑀸 𑀘 𑀳𑁄𑀦𑁆𑀢𑁄‘𑀢𑁂𑀦 𑀭𑀢𑁆𑀢’𑀦𑁆𑀢𑀺 𑀅𑀢𑁆𑀣𑁂 𑀳𑁄𑀢𑀻𑀢𑀺 𑀓𑀲𑀸𑀯𑁂𑀦 𑀭𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀭𑀸𑀕𑀯𑀸𑀘𑀺𑀦𑁄 𑀢𑀢𑀺𑀬𑀦𑁆𑀢𑀢𑁆𑀢𑀁 𑀲𑀫𑁆𑀧𑀚𑁆𑀚𑀢𑀺, 𑀢𑁂𑀦 ‘𑀡 𑀭𑀸𑀕𑀸 𑀢𑁂𑀦 𑀭𑀢𑁆𑀢’𑀦𑁆𑀢𑀺 𑀯𑀼𑀢𑁆𑀢𑁂𑀧𑀺 𑀮𑀩𑁆𑀪𑀫𑀸𑀦𑀢𑁆𑀣𑀯𑀲𑁂𑀦 𑀯𑀼𑀢𑁆𑀢𑀁- ‘𑀭𑀸𑀕𑀯𑀸𑀘𑀺𑀢𑀢𑀺𑀬𑀦𑁆𑀢𑀢𑁄’𑀢𑀺. 𑀲𑀼𑀢𑁆𑀢𑁂 𑀧𑀦 𑀭𑀸𑀕𑁂𑀦 𑀭𑀢𑁆𑀢𑀦𑁆𑀢𑁂𑀢𑀲𑁆𑀫𑀺𑀁 𑀅𑀢𑁆𑀣𑁂 𑀭𑀸𑀕𑀸 𑀭𑀸𑀕𑀯𑀸𑀘𑀻𑀲𑀤𑁆𑀤𑀸 𑀢𑀢𑀺𑀬𑀦𑁆𑀢𑀸 𑀡𑀧𑁆𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀪𑀺𑀥𑀸𑀦𑀢𑁄𑀢𑀺 𑀉𑀧𑀘𑀸𑀭𑀯𑀲𑁂𑀦 𑀓𑀣𑀦𑀢𑁄. 𑀯𑀺𑀦𑀸𑀧𑀺 𑀢𑁂𑀦𑀸𑀢𑀺 𑀢𑀁𑀧𑀘𑁆𑀘𑀬𑀁 𑀯𑀺𑀦𑀸𑀧𑀺.

𑀢𑀢𑀺𑀬𑀦𑁆𑀢𑀢𑁄 𑀯𑀺𑀚𑁆𑀛𑀢𑁆𑀣𑀁 𑀢𑁂𑀦𑀸𑀢𑀺 𑀅𑀦𑀼𑀯𑀢𑁆𑀢𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀼𑀢𑁆𑀢𑁂 𑀅𑀬𑀫𑀢𑁆𑀣𑁄 ‘‘𑀇𑀦𑁆𑀤𑀼𑀬𑀼𑀢𑁆𑀢𑁂𑀦 𑀦𑀓𑁆𑀔𑀢𑁆𑀢𑁂𑀦 𑀮𑀓𑁆𑀔𑀺𑀢𑁄 𑀘𑁂 𑀓𑀸𑀮𑁄, 𑀢𑀤𑀸 𑀢𑁂𑀦 ¶ 𑀮𑀓𑁆𑀔𑀺𑀢𑁂 𑀓𑀸𑀮𑁂𑀢𑁆𑀬𑀲𑁆𑀫𑀺𑀁 𑀅𑀢𑁆𑀣𑁂 𑀢𑀢𑀺𑀬𑀦𑁆𑀢𑀢𑁄 𑀦𑀓𑁆𑀔𑀢𑁆𑀢𑀸 𑀡𑁄 𑀳𑁄𑀢𑀻’’𑀢𑀺. 𑀲𑀼𑀢𑁆𑀢𑀯𑀺𑀯𑀭𑀡𑁂 𑀢𑀼 𑀢𑀜𑁆𑀘𑁂𑀢𑁆𑀬𑀸𑀤𑀺𑀓𑀫𑀥𑀺𑀧𑁆𑀧𑀸𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀢𑁂𑀦𑀸𑀢𑁆𑀬𑀦𑀼𑀯𑀼𑀢𑁆𑀢𑀺𑀬𑀸 𑀢𑀢𑀺𑀬𑀦𑁆𑀢𑀢𑁄𑀢𑀺 𑀮𑀩𑁆𑀪𑀢𑀺 𑀦𑀓𑁆𑀔𑀢𑁆𑀢𑁂𑀦𑀸𑀢𑀺 𑀲𑀼𑀢𑀢𑁆𑀢𑀸𑀢𑀺, 𑀓𑀸𑀮𑁂𑀢𑀺 𑀧𑀦 𑀅𑀢𑁆𑀣𑀦𑀺𑀤𑁆𑀤𑁂𑀲𑀢𑁄 𑀡𑀧𑁆𑀧𑀘𑁆𑀘𑀬𑀸𑀥𑁂𑀬𑁆𑀬𑀲𑁆𑀲 𑀓𑀸𑀮𑁄 𑀆𑀥𑀸𑀭𑁄𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 ‘𑀮𑀓𑁆𑀔𑀺𑀢𑁂 𑀓𑀸𑀮𑁂’𑀢𑀺 𑀯𑀼𑀢𑁆𑀢𑀁, 𑀯𑀺𑀲𑁂𑀲𑁆𑀲𑀕𑀢𑀯𑀺𑀪𑀢𑁆𑀢𑀺𑀬𑀸 𑀯𑀺𑀘𑀸𑀭𑀺𑀢𑀸𑀬 𑀯𑀺𑀲𑁂𑀲𑀦 𑀕𑀢𑀸 𑀘 (𑀯𑀺𑀘𑀸𑀭𑀺𑀢𑀸) 𑀦𑀸𑀫𑀸𑀢𑀺 𑀆𑀳- ‘𑀦𑀓𑁆𑀔𑀢𑁆𑀢𑁂𑀦𑁂’𑀢𑀺𑀘𑁆𑀘𑀸𑀤𑀺, 𑀇𑀳 𑀓𑁂𑀘𑀺 𑀔𑀦𑁆𑀥𑀧𑀜𑁆𑀘𑀓𑀲𑀗𑁆𑀔𑀸𑀢𑀁 𑀓𑀺𑀭𑀺𑀬𑀸𑀲𑀪𑀸𑀯𑀫𑀺𑀘𑁆𑀙𑀦𑁆𑀢𑀺 𑀅𑀦𑀺𑀘𑁆𑀘𑀁, 𑀅𑀧𑀭𑁂 𑀢𑀼 𑀤𑀩𑁆𑀩𑀲𑀪𑀸𑀯𑀁 𑀦𑀺𑀘𑁆𑀘𑀁. 𑀢𑀲𑁆𑀲𑁄 𑀪𑀬𑀲𑁆𑀲𑀧𑀺 𑀓𑀸𑀮𑀲𑁆𑀲 𑀘𑀦𑁆𑀤𑀬𑀼𑀢𑁆𑀢𑁂𑀦 𑀨𑀼𑀲𑁆𑀲𑀸𑀤𑀺𑀦𑀸 𑀮𑀓𑁆𑀔𑀺𑀬𑀪𑀸𑀯𑀸 𑀮𑀓𑁆𑀔𑀡𑁂 𑀢𑀢𑀺𑀬𑀸 𑀬𑀼𑀢𑁆𑀢𑀦𑁆𑀢𑀺 𑀯𑀢𑁆𑀢𑀼𑀫𑀸𑀳- ‘𑀓𑀺𑀭𑀺𑀬𑀸 𑀭𑀽𑀧𑁄 𑀓𑀸𑀮𑁄’𑀘𑁆𑀘𑀸𑀤𑀺.

𑀯𑀺𑀲𑁂𑀲𑀸𑀯𑀲𑀸𑀬𑁄𑀢𑀺 𑀓𑀸𑀮𑀲𑁆𑀲 𑀯𑀺𑀲𑁂𑀲𑀸𑀯𑀥𑀸𑀭𑀡𑀢𑁆𑀣𑀫𑁂𑀯 𑀳𑀺 ‘𑀨𑀼𑀲𑁆𑀲𑀻 𑀭𑀢𑁆𑀢𑀺’𑀘𑁆𑀘𑀸𑀤𑀺. 𑀮𑁄𑀓𑁂 𑀧𑀬𑀼𑀚𑁆𑀚𑀢𑁂. 𑀕𑀼𑀭𑀼𑀦𑀸𑀢𑀺 𑀏𑀢𑁆𑀣 𑀕𑀼𑀭𑀼 𑀚𑀻𑀯𑁄, 𑀦 𑀦𑀓𑁆𑀔𑀢𑁆𑀢𑀁, 𑀘𑀦𑁆𑀤𑀬𑀼𑀢𑁆𑀢𑀢𑀸 𑀧𑀦𑁂𑀢𑁆𑀣 𑀅𑀢𑁆𑀣𑀺… 𑀘𑀦𑁆𑀤𑀬𑀼𑀢𑁆𑀢𑁂𑀦 𑀕𑀼𑀭𑀼𑀦𑀸 𑀭𑀢𑁆𑀢𑀺𑀬𑀸 𑀮𑀓𑁆𑀔𑀺𑀢𑀢𑁆𑀢𑀸. 𑀓𑀢𑁆𑀢𑀺𑀓𑀸𑀬 𑀮𑀓𑁆𑀔𑀺𑀢𑁄 𑀫𑀼𑀳𑀼𑀢𑁆𑀢𑁄𑀢𑀺 𑀏𑀢𑁆𑀣 𑀘𑀦𑁆𑀤𑀁 𑀯𑀺𑀦𑀸 𑀓𑀢𑁆𑀢𑀺𑀓𑀸𑀬 𑀢𑀼 𑀓𑁂𑀯𑀮𑀸𑀬 𑀫𑀼𑀳𑀼𑀢𑁆𑀢𑁄 𑀓𑀸𑀮𑁄 𑀮𑀓𑁆𑀔𑀺𑀢𑁄 ‘𑀓𑀢𑁆𑀢𑀺𑀓𑀸 𑀫𑀼𑀳𑀼𑀢𑁆𑀢𑁄’𑀢𑀺. 𑀨𑀼𑀲𑁆𑀲𑁂𑀦 𑀮𑀓𑁆𑀔𑀺𑀢𑀸 𑀅𑀢𑁆𑀣𑀲𑀺𑀤𑁆𑀥𑀻𑀢𑀺 𑀏𑀢𑁆𑀣 𑀨𑀼𑀲𑁆𑀲𑁂𑀦𑀺𑀦𑁆𑀤𑀼𑀬𑀼𑀢𑁆𑀢𑁂𑀦 𑀅𑀢𑁆𑀣𑀲𑀺𑀤𑁆𑀥𑀺 𑀮𑀓𑁆𑀔𑀺𑀢𑀸 𑀦 𑀓𑀸𑀮𑁄 𑀨𑀼𑀲𑁆𑀲𑁄𑀢𑀺. 𑀦𑀓𑁆𑀔𑀢𑁆𑀢𑀬𑀼𑀢𑁆𑀢𑀲𑁆𑀲 𑀓𑀸𑀮𑀲𑁆𑀲 𑀭𑀢𑁆𑀬𑀸𑀤𑀺𑀯𑀺𑀲𑁂𑀲𑀸𑀧𑀭𑀸𑀫𑀸𑀲𑁂𑀦 𑀦𑀓𑁆𑀔𑀢𑁆𑀢𑀯𑀸𑀘𑀺𑀢𑁄 𑀉𑀧𑁆𑀧𑀦𑁆𑀦𑀲𑁆𑀲 𑀧𑀘𑁆𑀘𑀬𑀲𑁆𑀲 𑀲𑀼𑀢𑁆𑀢𑀦𑁆𑀢𑀭𑁂𑀦 𑀮𑁄𑀧𑀁 𑀯𑀺𑀥𑀸𑀬 𑀧𑀼𑀦 𑀅𑀜𑁆𑀜𑁂𑀦 𑀲𑀼𑀢𑁆𑀢𑁂𑀦 𑀬𑀼𑀢𑁆𑀢𑀸𑀢𑀺 𑀤𑁂𑀲𑀯𑀺𑀥𑀸𑀦𑁂𑀦 𑀲𑀓𑀮𑀺𑀗𑁆𑀕𑀲𑀗𑁆𑀔𑁆𑀬𑀸𑀬𑀼𑀢𑁆𑀢𑁂𑀳𑀺-𑀝𑁆𑀞𑀫𑀪𑀺𑀥𑀸𑀦𑀁 𑀧𑀭𑁂𑀳𑀺, 𑀢𑀤𑀸𑀳- ‘𑀅𑀳𑁄 𑀭𑀢𑁆𑀢𑁄’𑀘𑁆𑀘𑀸𑀤𑀺.

𑀭𑀢𑁆𑀬𑀸𑀤𑀺𑀯𑀺𑀲𑁂𑀲𑀸𑀧𑀭𑀸𑀫𑀸𑀲𑁂𑀦𑀸𑀢𑀺 𑀨𑀼𑀲𑁆𑀲𑀻 𑀭𑀢𑁆𑀢𑀺 𑀨𑀼𑀲𑁆𑀲𑁄 𑀅𑀳𑁄𑀢𑀺 𑀏𑀯𑀁 𑀭𑀢𑁆𑀬𑀸𑀤𑀺𑀯𑀺𑀲𑁂𑀲𑀲𑁆𑀲 𑀅𑀧𑀭𑀸𑀫𑀸𑀲𑁂𑀦 𑀅𑀲𑀫𑁆𑀫𑀲𑁆𑀲𑁂𑀦 𑀅𑀕𑁆𑀕𑀳𑀡𑁂𑀦. 𑀲𑀓𑀮𑀺𑀗𑁆𑀕𑀲𑀗𑁆𑀔𑁆𑀬𑀸𑀬𑀼𑀢𑁆𑀢𑁂𑀦𑀸𑀢𑀺 𑀨𑀼𑀲𑁆𑀲𑀓𑀢𑁆𑀢𑀺𑀓𑀸𑀤𑀻𑀦𑀁 𑀬𑀁𑀬𑀁 𑀮𑀺𑀗𑁆𑀕𑀁 𑀬𑀸𑀬𑀸 𑀲𑀗𑁆𑀔𑁆𑀬𑀸, 𑀅𑀢𑁆𑀢𑀦𑀺𑀬𑁂𑀳𑀺 𑀢𑁂𑀳𑀺 𑀢𑁂𑀳𑀺 𑀮𑀺𑀗𑁆𑀕𑁂𑀳𑀺 𑀢𑀸𑀳𑀺𑀢𑀸𑀳𑀺 𑀘 𑀲𑀗𑁆𑀔𑁆𑀬𑀸𑀳𑀺 𑀬𑀼𑀢𑁆𑀢𑁂𑀦 𑀦𑀓𑁆𑀔𑀢𑁆𑀢𑀲𑀤𑁆𑀤𑁂𑀦. 𑀦 𑀢𑀤𑀼𑀧𑀮𑀓𑁆𑀔𑀺𑀢𑁄 𑀓𑀸𑀮𑁄𑀢𑀺 𑀓𑀢𑁆𑀢𑀺𑀓𑀸 𑀲𑀤𑁆𑀤𑁄𑀩𑀳𑀼𑀯𑀘𑀦𑀦𑁆𑀢𑁄 𑀩𑀳𑀼𑀢𑀸𑀭𑀓𑀢𑁆𑀢𑀸 𑀓𑀢𑁆𑀢𑀺𑀓𑀸𑀬, 𑀢𑀸𑀬𑀓𑀢𑁆𑀢𑀺𑀓𑀸𑀬 𑀮𑀓𑁆𑀔𑀺𑀢𑁄𑀓𑀸𑀮𑁄𑀧𑀭𑁂𑀳𑀺𑀯𑀺𑀬 𑀦 𑀓𑀣𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀢𑀤𑀼𑀧𑀮𑀓𑁆𑀔𑀺𑀢𑀲𑁆𑀲𑀓𑀸𑀮𑀲𑁆𑀲𑁂𑀯𑀓𑀢𑁆𑀢𑀺𑀓𑀸𑀲𑀤𑁆𑀤𑁂𑀦𑀸𑀪𑀺𑀥𑀸𑀦𑁂 𑀓𑁄 𑀤𑁄𑀲𑁄 𑀬𑁂 𑀦𑁂𑀯𑀫𑀼𑀘𑁆𑀘𑀢𑁂𑀘𑁆𑀘𑀸𑀳- ¶ ‘𑀅𑀚𑁆𑀚𑁂𑀢𑀺’𑀘𑁆𑀘𑀸𑀤𑀺. 𑀇𑀫𑀺𑀦𑀸 𑀘 𑀧𑀭𑀫𑀢𑁂 𑀤𑁄𑀲𑁄 𑀉𑀩𑁆𑀪𑀸𑀯𑀺𑀢𑁄, 𑀢𑀤𑀢𑁆𑀣𑀢𑁆𑀢𑁂 𑀲𑀢𑀻𑀢𑀺 𑀢𑀤𑀼𑀧𑀮𑀓𑁆𑀔𑀺𑀢𑀓𑀸𑀮𑀢𑁆𑀣𑀢𑁆𑀢𑁂 𑀲𑀢𑀺.

𑀲𑀢𑁆𑀢𑀫𑀻 𑀲𑀺𑀬𑀸𑀢𑀺 𑀦𑀓𑁆𑀔𑀢𑁆𑀢𑀲𑀤𑁆𑀤𑀸 𑀢𑀤𑁆𑀥𑀺𑀢𑀮𑁄𑀧𑀦𑁆𑀢𑀸 𑀨𑀼𑀲𑁆𑀲𑁂𑀦 𑀧𑀸𑀬𑀲𑀁 𑀪𑀼𑀜𑁆𑀚𑁂𑀬𑁆𑀬, 𑀨𑀼𑀲𑁆𑀲𑁂 𑀧𑀸𑀬𑀲𑀁 𑀪𑀼𑀜𑁆𑀚𑁂𑀬𑁆𑀬𑀸’𑀢𑁆𑀬𑀸𑀤𑁄 𑀆𑀥𑁂𑀬𑁆𑀬𑀦𑁆𑀢𑀭𑀸𑀧𑁂𑀓𑁆𑀔𑀸 𑀲𑀺𑀬𑀸 𑀲𑀢𑁆𑀢𑀫𑀻, 𑀬𑀸 𑀲𑀼𑀢𑁆𑀢𑀦𑁆𑀢𑀭𑁂𑀦 𑀯𑀺𑀥𑀻𑀬𑀢𑀺 𑀧𑀸𑀡𑀺𑀦𑀻𑀬𑁂𑀳𑀺, 𑀢𑀢𑁄 ‘𑀅𑀚𑁆𑀚𑀓𑀢𑁆𑀢𑀺𑀓𑀸’𑀢𑁂𑀢𑁆𑀣𑀸𑀧𑁆𑀬𑀸𑀥𑁂𑀬𑁆𑀬𑀦𑁆𑀢𑀭𑀸𑀧𑁂𑀓𑁆𑀔𑀸 𑀲𑀢𑁆𑀢𑀫𑀻 𑀲𑀺𑀬𑀸 𑀮𑁄𑀧𑀦𑁆𑀢𑀢𑁆𑀢𑀸 ‘𑀅𑀚𑁆𑀚𑀓𑀢𑁆𑀢𑀺𑀓𑀸𑀲𑀽’𑀢𑀺, 𑀦 𑀧𑀞𑀫𑀸. 𑀧𑀞𑀫𑀸𑀬𑁂𑀯 𑀧𑀦𑀸𑀬𑀁 𑀧𑀬𑁄𑀕𑁄 ‘𑀅𑀚𑁆𑀚𑀓𑀢𑁆𑀢𑀺𑀓𑀸,𑀢𑀺. 𑀅𑀚𑁆𑀚𑁂𑀢𑁆𑀬𑀥𑀺𑀓𑀭𑀡𑀧𑁆𑀧𑀥𑀸𑀦𑁄 𑀅𑀳𑁄𑀭𑀢𑁆𑀢𑀓𑀸𑀮𑀯𑀸𑀘𑀻 𑀲𑀤𑁆𑀤𑁄, 𑀓𑀢𑁆𑀢𑀺𑀓𑀸𑀲𑀤𑁆𑀤𑁄𑀧𑀺 𑀢𑀤𑁆𑀥𑀺𑀢𑀮𑁄𑀧𑁂𑀦 𑀢𑀓𑁆𑀓𑀸𑀮𑀸𑀪𑀺𑀥𑀸𑀬𑀓𑁄, 𑀢𑀢𑁄 𑀬𑁂𑀯𑀉𑀪𑀺𑀦𑁆𑀦𑀫𑁆𑀧𑀺𑀲𑀸𑀫𑀸𑀦𑀸𑀥𑀺𑀓𑀭𑀡𑁆𑀬𑀸 𑀓𑀢𑁆𑀢𑀺𑀓𑀸𑀬𑁄𑀧𑁆𑀬𑀥𑀺𑀓𑀭𑀡𑀁 𑀲𑀫𑁆𑀧𑀚𑁆𑀚𑀦𑁆𑀢𑁂, 𑀢𑀜𑁆𑀘 𑀦 𑀯𑀺𑀦𑀸𑀥𑁂𑀬𑁆𑀬𑁂𑀦 𑀳𑁄𑀢𑀻𑀢𑁆𑀬𑀸𑀥𑁂𑀬𑁆𑀬𑀦𑁆𑀢𑀭𑀸𑀧𑁂𑀓𑁆𑀔𑀸𑀬𑀁 𑀢𑁂𑀲𑀼 𑀲𑀢𑁆𑀢𑀫𑀻𑀬𑁂𑀯 𑀲𑀺𑀬𑀸, 𑀦 𑀧𑀞𑀫𑀸 (𑀉𑀧) 𑀧𑀚𑁆𑀚𑁂𑀬𑁆𑀬𑀸𑀢𑁆𑀬𑀥𑀺𑀧𑁆𑀧𑀸𑀬𑁄. 𑀅𑀢𑁆𑀢𑀦𑁄𑀤𑀸𑀦𑀺 𑀤𑀲𑁆𑀲𑀦𑁂 𑀲𑀢𑁆𑀢𑀫𑀺𑀬𑀸 𑀅𑀧𑁆𑀧𑀲𑀗𑁆𑀕𑀁 𑀧𑀞𑀫𑀸𑀬𑁂𑀯𑁄𑀧𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀫𑀸𑀳- ‘𑀘𑀦𑁆𑀤𑁂 𑀧𑀦𑀽𑀧𑀘𑀸𑀭𑁂𑀦𑁂’𑀘𑁆𑀘𑀸𑀤𑀺, 𑀦𑀸𑀥𑁂𑀬𑁆𑀬𑀦𑁆𑀢𑀭𑀸𑀧𑁂𑀓𑁆𑀔𑀸𑀘𑁆𑀘𑀦𑁂𑀦 𑀲𑀢𑁆𑀢𑀫𑀺𑀬𑀸 𑀅𑀧𑁆𑀧𑀲𑀗𑁆𑀕𑀫𑀸𑀳. 𑀏𑀯𑀜𑁆𑀘𑀭𑀳𑀺 𑀯𑀘𑀦𑀫𑀦𑁆𑀢𑀭𑁂𑀦 𑀧𑀭𑁂𑀲𑀁 𑀯𑀺𑀬 𑀲𑀢𑁆𑀢𑀫𑀻𑀯𑀺𑀥𑀸𑀬𑀓𑀁 𑀓𑀣𑀁 𑀓𑀢𑁆𑀢𑀺𑀓𑀸𑀬 𑀚𑀸𑀢𑁄𑀘𑁆𑀘𑀸𑀲𑀗𑁆𑀓𑀺𑀬 𑀢𑀫𑁆𑀧𑀝𑀺𑀧𑀸𑀤𑁂𑀢𑀼𑀫𑀸𑀳- ‘𑀓𑀢𑁆𑀢𑀺𑀓𑀸𑀬 𑀚𑀸𑀢𑁄’𑀘𑁆𑀘𑀸𑀤𑀺. 𑀩𑀳𑀼𑀯𑀘𑀦𑀦𑁆𑀢𑀢𑁆𑀢𑁂𑀧𑀺 𑀓𑀢𑁆𑀢𑀺𑀓𑀸𑀬 𑀚𑀸𑀢𑀺𑀬𑀫𑁂𑀓 𑀯𑀘𑀦𑀦𑁆𑀢𑀁. 𑀧𑀓𑀸𑀭𑀦𑁆𑀢𑀭𑀫𑀸𑀳- ‘𑀮𑁄𑀧𑁄𑀢𑀺’𑀘𑁆𑀘𑀸𑀤𑀺. 𑀮𑁄𑀧𑁂𑀦𑀸𑀢𑀺 𑀓𑀢𑁆𑀢𑀺𑀓𑀸𑀳𑀺 𑀇𑀦𑁆𑀤𑀼𑀬𑀼𑀢𑁆𑀢𑀸𑀳𑀺 𑀮𑀓𑁆𑀔𑀺𑀢𑁄 𑀓𑀸𑀮𑁄𑀢𑀺 𑀯𑀺𑀕𑁆𑀕𑀬𑁆𑀳 𑀓𑀢𑀡𑀧𑁆𑀧𑀘𑁆𑀘𑀬𑀲𑁆𑀲 𑀮𑁄𑀧𑁂𑀦.

𑀲𑁂𑀢𑀺 𑀧𑀞𑀫𑀦𑁆𑀢𑀸𑀢𑀺 𑀲𑀸𑀢𑀺 𑀦𑀺𑀤𑁆𑀤𑀺𑀝𑁆𑀞𑀧𑀞𑀫𑀦𑁆𑀢𑀸, 𑀬𑀁 𑀧𑀞𑀫𑀦𑁆𑀢𑀦𑁆𑀢𑀺 𑀲𑀸𑀘𑁂𑀢𑀺 𑀤𑀲𑁆𑀲𑀺𑀢𑀁 𑀧𑀞𑀫𑀦𑁆𑀢𑀫𑀸𑀳. 𑀧𑀞𑀫𑀦𑁆𑀢𑀲𑁆𑀲 𑀤𑁂𑀯𑀢𑀸𑀧𑀼𑀡𑁆𑀡𑀫𑀸𑀲𑀺𑀢𑁆𑀢𑀪𑀸𑀯𑀢𑁄 𑀢𑀤𑀢𑁆𑀣𑀫𑀪𑁂𑀤𑁂𑀦𑀸𑀳- ‘𑀲𑀸’𑀢𑀺. 𑀓𑀸 𑀲𑀸 𑀤𑁂𑀯𑀢𑀸𑀘𑁆𑀘𑀸𑀳- ‘𑀮𑁄𑀓𑀧𑁆𑀧𑀲𑀺𑀤𑁆𑀥𑀸𑀬𑁂𑀯 𑀤𑁂𑀯𑀢𑀸’𑀢𑀺. 𑀬𑀸𑀕𑀲𑀫𑁆𑀧𑀤𑀸𑀦𑀫𑁆𑀧𑀺 𑀮𑁄𑀓𑁂 𑀤𑁂𑀯𑀢𑀸𑀢𑀺 𑀧𑀲𑀺𑀤𑁆𑀥𑀦𑁆𑀢𑀺 𑀬𑀸𑀕𑀲𑁆𑀲 𑀬𑀚𑀺𑀢𑀩𑁆𑀩𑀲𑁆𑀲 𑀧𑀼𑀭𑁄𑀟𑀸𑀲𑀸𑀤𑀺𑀦𑁄 𑀲𑀫𑁆𑀧𑀤𑀸𑀦𑀫𑁆𑀧𑀺 𑀧𑀝𑀺𑀕𑁆𑀕𑀸𑀳𑀓𑁄 𑀧𑀺𑀦𑁆𑀤𑀸𑀤𑀺 𑀮𑁄𑀓𑁂 𑀤𑁂𑀬𑁆𑀬𑀲𑁆𑀲 𑀧𑀼𑀭𑁄𑀟𑀸𑀲𑀸𑀤𑀺𑀦𑁄 𑀤𑁂𑀯𑀢𑀸 𑀲𑀸𑀫𑀻𑀢𑀺 𑀧𑀲𑀺𑀤𑁆𑀥𑀦𑁆𑀢𑁆𑀬𑀢𑁆𑀣𑁄, 𑀇𑀦𑁆𑀤𑁄 𑀤𑁂𑀯𑀢𑀸 𑀅𑀲𑁆𑀲 𑀇𑀦𑁆𑀤𑀁, 𑀆𑀤𑀺𑀘𑁆𑀘𑁄 𑀤𑁂𑀯𑀢𑀸 𑀅𑀲𑁆𑀲 𑀆𑀤𑀺𑀘𑁆𑀘𑀁, 𑀳𑀯𑀺 𑀧𑀼𑀭𑁄𑀟𑀸𑀲𑀸𑀤𑀺 𑀬𑀸𑀕𑀤𑀩𑁆𑀩𑀁.

𑀫𑀦𑁆𑀢𑀣𑁄𑀫𑀦𑀻𑀬𑀫𑁆𑀧𑀺 ¶ 𑀤𑁂𑀯𑀢𑀸𑀢𑀺 𑀧𑀲𑀺𑀤𑁆𑀥𑀦𑁆𑀢𑀺 𑀬𑁂𑀦 𑀫𑀦𑁆𑀣𑁂𑀦 𑀬𑁄 𑀣𑀽𑀬𑀢𑁂 𑀲𑁄 𑀢𑀲𑁆𑀲 𑀫𑀦𑁆𑀢𑀲𑁆𑀲 𑀤𑁂𑀯𑀢𑀸 𑀲𑀸𑀫𑀻𑀢𑀺 𑀮𑁄𑀓𑁂 𑀧𑀲𑀺𑀤𑁆𑀥𑀦𑁆𑀢𑁆𑀬𑀢𑁆𑀣𑁄 𑀫𑀳𑀺𑀦𑁆𑀤𑁄 𑀬𑀫𑁄 𑀯𑀭𑀼𑀡𑁄 𑀤𑁂𑀯𑀢𑀸 𑀅𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀯𑀼𑀢𑁆𑀢𑀦𑀬 𑀫𑁂𑀯𑀸𑀢𑀺 ‘‘𑀦𑀓𑁆𑀔𑀢𑁆𑀢𑁂𑀦𑀺𑀦𑁆𑀤𑀼𑀬𑀼𑀢𑁆𑀢𑁂𑀦 𑀓𑀸𑀮𑁂’’𑀢𑀺 𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀚𑀸𑀢𑁆𑀬𑁂𑀓𑀯𑀘𑀦𑀁 𑀫𑀖𑀸𑀬𑀸𑀢𑀺, 𑀢𑀸𑀭𑀓𑀭𑀽𑀧𑀸𑀦𑀫𑁆𑀧𑀦 𑀩𑀳𑀼𑀢𑁆𑀢𑀸 𑀫𑀖𑀸𑀲𑀤𑁆𑀤𑁄 𑀩𑀳𑀼𑀯𑀘𑀦𑀦𑁆𑀢𑁄. 𑀧𑀸𑀡𑀺𑀦𑀻𑀬𑀸 ‘‘𑀲𑀸𑀲𑁆𑀫𑀺𑀁 𑀧𑀼𑀡𑁆𑀡𑀫𑀸𑀲𑀻𑀢𑀺 𑀲𑀜𑁆𑀜𑀸𑀬’’𑀦𑁆𑀢𑀺 (𑁪-𑁨-𑁨𑁧) 𑀲𑀼𑀢𑁆𑀢𑀬𑀺𑀢𑁆𑀯𑀸 𑀨𑀼𑀲𑁆𑀲𑀻 𑀧𑀼𑀡𑁆𑀡𑀫𑀸𑀲𑀻 𑀅𑀲𑁆𑀫𑀺𑀁 𑀨𑀼𑀲𑁆𑀲𑁄 𑀫𑀸𑀲𑁄 𑀨𑀼𑀲𑁆𑀲𑁄 𑀅𑀤𑁆𑀥𑀫𑀸𑀲𑁄 𑀨𑀼𑀲𑁆𑀲𑁄 𑀲𑀁𑀯𑀘𑁆𑀙𑀭𑁄𑀢𑀺 𑀲𑀜𑁆𑀜𑀸𑀬𑀁 𑀧𑀝𑀺𑀧𑀸𑀤𑁂𑀦𑁆𑀢𑀺, 𑀢𑁂𑀦 𑀢𑁂𑀲𑀁 𑀨𑀼𑀲𑁆𑀲𑀻 𑀧𑀼𑀡𑁆𑀡𑀫𑀸𑀲𑀻 𑀅𑀲𑁆𑀫𑀺𑀁 𑀧𑀜𑁆𑀘𑀤𑀲𑀭𑀢𑁆𑀢𑁂𑀢𑀺 𑀏𑀢𑁆𑀣 𑀘 𑀪𑀢𑀓𑀫𑀸𑀲𑁂 𑀘 𑀢𑀤𑁆𑀥𑀺𑀢𑁄 𑀦 𑀪𑀯𑀢𑀺. 𑀇𑀥 𑀧𑀦 ‘𑀲𑀜𑁆𑀜𑀸𑀬’𑀦𑁆𑀢𑀺 𑀯𑀘𑀦𑀸𑀪𑀸𑀯𑁂 𑀪𑀢𑀓𑀫𑀸𑀲𑁂𑀧𑀺 𑀙𑀝𑁆𑀞𑁆𑀬𑀢𑁆𑀣𑁂 𑀪𑀯𑀢𑀻𑀢𑁆𑀬𑀸𑀲𑀗𑁆𑀓 𑀯𑀺𑀭𑀘𑀬𑀢𑀺 ‘𑀪𑀢𑀓𑀫𑀸𑀲𑁂𑀧𑀺’𑀘𑁆𑀘𑀸𑀤𑀺. 𑀧𑀼𑀡𑁆𑀡𑁄 𑀫𑀸 𑀇𑀘𑁆𑀘𑀢𑁆𑀭 𑀫𑀸𑀲𑀤𑁆𑀤𑁄 𑀘𑀦𑁆𑀤𑀧𑀭𑀺𑀬𑀸𑀬𑁄𑀢𑀺 𑀆𑀳- ‘𑀫𑀸𑀲𑀤𑁆𑀤𑁂𑀦𑁂’𑀘𑁆𑀘𑀸𑀤𑀺. 𑀧𑀼𑀡𑁆𑀡𑁄 𑀫𑀸 𑀅𑀲𑁆𑀲𑀦𑁆𑀢𑀺 𑀦𑀺𑀩𑁆𑀩𑀘𑀦𑀸𑀢𑀺 𑀏𑀢𑁆𑀣 𑀧𑀼𑀡𑁆𑀡𑀫𑀸𑀲𑀻𑀲𑀤𑁆𑀤𑀲𑁆𑀲 𑀧𑀼𑀡𑁆𑀡𑁄 𑀫𑀸 𑀅𑀲𑁆𑀲𑀦𑁆𑀢𑀺 𑀦𑀻𑀳𑀭𑀺𑀢𑁆𑀯𑀸 𑀯𑀘𑀦𑀸𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀺𑀬𑀸 𑀅𑀢𑁆𑀣𑀲𑁆𑀲 𑀨𑀼𑀝𑀻𑀓𑀭𑀡𑀸𑀬 𑀯𑀼𑀢𑁆𑀢𑀁- ‘𑀲𑁄 𑀧𑀼𑀡𑁆𑀡𑁄 𑀢𑀺𑀆𑀤𑀺. 𑀢𑀲𑁆𑀲𑀦𑁆𑀢𑀺 𑀧𑀼𑀡𑁆𑀡𑀫𑀸𑀲𑀺𑀬𑀁. 𑀲𑀸𑀧𑀼𑀡𑁆𑀡𑀫𑀸𑀲𑀻, 𑀪𑀢𑀓𑀲𑁆𑀲 𑀪𑀢𑀺𑀬𑀸 𑀓𑀫𑁆𑀫𑀓𑀸𑀭𑀓𑀲𑁆𑀲 𑀬𑁄 𑀢𑀺𑀁𑀲𑀢𑀺 𑀭𑀢𑁆𑀢𑁄 𑀫𑀸𑀲𑁄 𑀧𑀭𑀺𑀩𑁆𑀩𑀬𑀦𑀺𑀬𑀫𑀺𑀢𑁄, 𑀢𑀲𑁆𑀲 𑀲𑀫𑁆𑀩𑀦𑁆𑀥𑀺𑀦𑀻 𑀦𑁂𑀢𑀺 𑀲𑀫𑁆𑀩𑀦𑁆𑀥𑁄.

𑀬𑀲𑁆𑀲𑀜𑁆𑀘𑀢𑀺𑀣𑀻𑀬𑀦𑁆𑀢𑀺 𑀅𑀦𑀺𑀬𑀫𑁂𑀦 𑀧𑀝𑀺𑀧𑀤𑀸𑀤𑀺𑀫𑀸𑀳. 𑀅𑀢𑁄𑀏𑀯 𑀘 𑀦𑀺𑀧𑀸𑀢𑀦𑀸𑀢𑀺 𑀇𑀫𑀲𑁆𑀫𑀸𑀯 𑀦𑀺𑀧𑀸𑀢𑀦𑀸, 𑀢𑁂𑀦𑁂𑀯𑀸𑀳- ‘𑀲𑀼𑀢𑁆𑀢𑁂 𑀯𑀘𑀦𑀫𑁂𑀯 𑀦𑀺𑀧𑀸𑀢𑀦’𑀦𑁆𑀢𑀺. 𑀫𑀸𑀲𑀲𑀼𑀢𑀺𑀬𑀸𑀘𑁆𑀘𑀸𑀤𑁄 𑀲𑀸𑀥𑀺𑀧𑁆𑀧𑀸𑀬𑀫𑀢𑁆𑀣𑀁 𑀯𑀺𑀯𑀭𑀢𑀺 ‘𑀬𑀤𑀺𑀧𑀺’𑀘𑁆𑀘𑀸𑀤𑀺𑀦𑀸. 𑀅𑀲𑁆𑀲𑀸𑀢𑀺 𑀲𑀸𑀫𑀜𑁆𑀜𑀯𑀘𑀦𑁂𑀧𑀺 ‘𑀲𑀸𑀲𑁆𑀲 𑀤𑁂𑀯𑀢𑀸 𑀧𑀼𑀡𑁆𑀡𑀫𑀸𑀲𑀻’𑀢𑀺 𑀲𑀼𑀢𑁆𑀢𑁂 𑀅𑀲𑁆𑀲𑀸𑀢𑀺 𑀅𑀯𑀺𑀲𑁂𑀲𑀯𑀘𑀦𑁂𑀧𑀺 𑀲𑁄𑀬𑁂𑀯 𑀧𑀼𑀡𑁆𑀡𑀫𑀸𑀲𑀻𑀲𑀤𑁆𑀤𑁂 𑀲𑀽𑀬𑀫𑀸𑀦𑁄 𑀫𑀸𑀲𑁄𑀬𑁂𑀯 𑀙𑀝𑁆𑀞𑁆𑀬𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀜𑁆𑀘𑀤𑀲𑀭𑀢𑁆𑀢𑀸𑀤𑁄𑀢𑀺 𑀧𑀭𑁂𑀲𑀁 𑀲𑀜𑁆𑀜𑀸𑀕𑀳𑀡𑁂𑀦 𑀦𑀺𑀯𑀢𑁆𑀢𑀺𑀢𑀧𑀜𑁆𑀘𑀤𑀲𑀭𑀢𑁆𑀢𑀸𑀤𑁄. 𑀅𑀣 𑀅𑀤𑁆𑀥𑀫𑀸𑀲𑀲𑀁𑀯𑀘𑁆𑀙𑀭𑀸𑀦𑀫𑁆𑀧𑀺 𑀉𑀤𑀸𑀳𑀭𑀡𑀢𑁆𑀢𑁂 𑀦𑁄𑀧𑀜𑁆𑀜𑀸𑀲𑁄 𑀓𑀲𑁆𑀫𑀸 𑀦 𑀓𑀢𑁄𑀘𑁆𑀘𑀸𑀳- ‘𑀅𑀤𑁆𑀥𑀫𑀸𑀲𑀲𑀁𑀯𑀘𑁆𑀙𑀭𑀸𑀦’𑀫𑀺𑀘𑁆𑀘𑀸𑀤𑀺. 𑀏𑀯𑀫𑁆𑀫𑀜𑁆𑀜𑀢𑁂 ‘‘𑀅𑀤𑁆𑀥𑀫𑀸𑀲𑀲𑀁𑀯𑀘𑁆𑀙𑀭𑀸𑀦𑀁 𑀦 𑀧𑀘𑁆𑀘𑀬𑁂𑀦𑁄𑀚𑀼𑀓𑀫𑀪𑀺𑀥𑀸𑀦𑀫𑀧𑀺 𑀢𑀼 𑀲𑀁𑀯𑀘𑁆𑀙𑀭𑁂𑀧𑀺 𑀨𑀼𑀲𑁆𑀲𑀸𑀤𑀺𑀫𑀸𑀲𑀲𑀫𑁆𑀪𑀯𑀸𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀨𑀼𑀲𑁆𑀲𑁂𑀦 𑀫𑀸𑀲𑁂𑀦 𑀲𑀫𑁆𑀩𑀦𑁆𑀥𑀸 𑀨𑀼𑀲𑁆𑀲𑁄𑀢𑁆𑀬𑀼𑀧𑀘𑀸𑀭𑀻𑀬𑀢𑁂, 𑀬𑀣𑀸 𑀘 𑀨𑀼𑀲𑁆𑀲𑀸𑀤𑀺𑀫𑀸𑀲𑀲𑁆𑀲 𑀲𑀫𑁆𑀩𑀦𑁆𑀥𑀻 𑀅𑀤𑁆𑀥𑀫𑀸𑀲𑁄 𑀨𑀼𑀲𑁆𑀲𑁄 𑀅𑀤𑁆𑀥𑀫𑀸𑀲𑁄𑀢𑁆𑀬𑀼𑀧𑀘𑀸𑀭𑀻𑀬𑀢𑁂 ¶ , 𑀦 𑀧𑀦𑁄𑀚𑀼𑀓𑀦𑁆𑀢𑀺 𑀢𑁂𑀲𑀫𑀼𑀤𑀸𑀳𑀭𑀡𑀢𑁆𑀢𑁂 𑀦𑀸𑀦𑀼𑀧𑀸𑀤𑀸𑀦’’𑀦𑁆𑀢𑀺.

𑀦𑀸𑀓𑀟𑁆𑀠𑀦𑀢𑁆𑀣𑁄𑀢𑀺 𑀡𑀲𑁆𑀲𑀸𑀓𑀟𑁆𑀠𑀦𑀢𑁆𑀣𑁄 𑀦 𑀳𑁄𑀢𑀺. 𑀬𑀤𑁆𑀬𑀸𑀓𑀟𑁆𑀠𑀦𑀢𑁆𑀣𑁄 𑀅𑀲𑁆𑀲, 𑀢𑀤𑀸 𑀘𑀸𑀦𑀼𑀓𑀟𑁆𑀠𑀺𑀢𑀁 𑀦𑁄𑀢𑁆𑀢𑀭𑀢𑁆𑀭𑀸𑀦𑀼𑀓𑀟𑁆𑀠𑁂𑀬𑁆𑀬𑀸𑀢𑀺 𑀫𑀜𑁆𑀜𑀢𑁂, 𑀓𑁄𑀘𑀺𑀬𑁂𑀯 𑀳𑁄𑀢𑀻𑀢𑀺 𑀳𑁄𑀦𑁆𑀢𑀻𑀢𑀺 𑀇𑀢𑁄 𑀪𑀺𑀦𑁆𑀤𑀺𑀢𑁆𑀯𑀸 𑀆𑀦𑁂𑀢𑀩𑁆𑀩𑀁. 𑀢𑀤𑀸 𑀤𑁂𑀲𑀲𑁆𑀲𑀸𑀢𑀺 𑀇𑀫𑀺𑀦𑀸 ‘‘𑀢𑀤𑀸𑀤𑁂𑀲𑀸 𑀢𑀕𑁆𑀕𑀳𑀡𑁂𑀦 𑀕𑀬𑁆𑀳𑀦𑁆𑀢𑀻’’𑀢𑀺 𑀧𑀭𑀺𑀪𑀸𑀲𑀫𑀼𑀧𑀮𑀓𑁆𑀔𑁂𑀢𑀺. 𑀓𑀢𑀬𑀸𑀤𑁂𑀲𑀲𑁆𑀲𑀸𑀧𑀻𑀢𑀺 𑀓𑀢𑁄 𑀬𑀸𑀤𑁂𑀲𑁄 𑀬𑀲𑁆𑀲 𑀢𑀲𑁆𑀲 𑀓𑀢𑀬𑀸𑀤𑁂𑀲𑀲𑁆𑀲𑀸𑀧𑀻𑀢𑀺. 𑀇𑀓𑀸𑀭𑀲𑁆𑀲𑀸𑀢𑀺 𑀬𑀸𑀤𑁂𑀲𑀢𑁄 𑀧𑀼𑀩𑁆𑀩𑁂 𑀇𑀓𑀸𑀭𑀲𑁆𑀲, 𑀇𑀫𑀺𑀦𑀸 𑀘𑀸𑀤𑁂𑀲𑀸𑀤𑁂𑀲𑀻𑀦𑀫𑀪𑁂𑀤𑁄 𑀤𑀲𑁆𑀲𑀺𑀢𑁄. 𑀢𑀲𑀤𑁆𑀤𑁂 𑀦𑁂𑀓𑁂𑀦𑀸𑀧𑀺 𑀧𑀘𑁆𑀘𑁂𑀓𑀸𑀪𑀺𑀲𑀫𑁆𑀩𑀦𑁆𑀥𑁂 𑀲𑀺𑀤𑁆𑀥𑁂𑀢𑀺 𑀏𑀯𑀫𑀜𑁆𑀜𑀢𑁂- ‘‘𑀬𑀣𑀸’𑀢𑁂𑀦 𑀓𑀢𑀁𑀓𑀻𑀢’ (𑁪-𑁨𑁯) 𑀦𑁆𑀢𑁆𑀬𑀸𑀤𑀺𑀲𑀼𑀢𑁆𑀢𑁂 𑀏𑀓𑁄𑀯 𑀢𑀲𑀤𑁆𑀤𑁄 𑀩𑀳𑀽𑀳𑀺 𑀧𑀘𑁆𑀘𑀬𑀢𑁆𑀢𑁂𑀳𑀺 𑀲𑀫𑁆𑀩𑀚𑁆𑀛𑀢𑁂, 𑀢𑀣𑀺𑀳𑀸𑀧𑀺 𑀏𑀓𑀫𑁂𑀯 𑀢𑀲𑀤𑁆𑀤𑀕𑁆𑀕𑀳𑀡𑀁 ‘𑀢𑀫𑀥𑀻𑀢𑁂 𑀢𑀁𑀚𑀸𑀦𑀸𑀢𑀻’𑀢𑀺 𑀧𑀘𑁆𑀘𑁂𑀓𑀫𑀪𑀺𑀲𑀫𑁆𑀩𑀚𑁆𑀛𑀢𑁂, 𑀢𑀲𑁆𑀫𑀸 𑀓𑀺𑀫𑁂𑀢𑀤𑀢𑁆𑀣𑁂𑀦 𑀤𑁆𑀯𑀺𑀢𑀕𑁆𑀕𑀳𑀡𑁂𑀦𑁂’’𑀢𑀺. 𑀤𑁆𑀯𑀺𑀢𑀕𑁆𑀕𑀳𑀡𑁂 𑀧𑀬𑁄𑀚𑀦𑀢𑁆𑀢𑀬𑀁 𑀯𑀼𑀢𑁆𑀢𑀁, 𑀢𑀢𑁆𑀣 𑀧𑀞𑀫𑀁 𑀤𑀲𑁆𑀲𑁂𑀦𑁆𑀢𑁄 𑀚𑀸𑀦𑀦𑀺𑀘𑁆𑀘𑀸𑀤𑀺𑀦𑀸𑀥𑀺𑀧𑁆𑀧𑀸𑀬𑀫𑀸𑀯𑀻𑀓𑀢𑁆𑀯𑀸 𑀤𑁆𑀯𑀺𑀢𑀕𑁆𑀕𑀳𑀡𑀫𑀺𑀘𑁆𑀘𑀸𑀤𑀺𑀦𑀸 𑀧𑀤𑀢𑁆𑀣𑀫𑀸𑀳.

𑀢𑀢𑁆𑀣-‘𑀬𑁄 𑀬𑀫𑀥𑀻𑀢𑁂 𑀚𑀸𑀦𑀸𑀢𑀺 𑀘𑀸’𑀢𑀺 𑀇𑀫𑀺𑀦𑀸 𑀤𑁆𑀯𑀺𑀢𑀕𑁆𑀕𑀳𑀡𑀸𑀪𑀸𑀯𑁂 𑀧𑀘𑁆𑀘𑀬𑀢𑁆𑀣𑀸𑀯𑀬𑀯𑀲𑁆𑀲 𑀲𑀫𑀼𑀘𑁆𑀘𑀬𑀧𑁆𑀧𑀲𑀗𑁆𑀕𑀫𑀸𑀳. 𑀲𑀫𑀼𑀘𑁆𑀘𑀬𑁂 𑀲𑀢𑀺(𑀬𑁄) 𑀬𑀫𑀥𑀻𑀢𑁂 𑀚𑀸𑀦𑀸𑀢𑀺 𑀘, 𑀢𑀢𑁆𑀣𑁂𑀯 𑀲𑀺𑀬𑀸, 𑀬𑁄 𑀧𑀦𑀸𑀥𑀻𑀢𑁂 𑀓𑁂𑀯𑀮𑀁, 𑀦 (𑀚𑀸𑀦𑀸𑀢𑀺) 𑀢𑀢𑁆𑀣 𑀦 𑀲𑀺𑀬𑀸𑀢𑀺 𑀩𑁄𑀥𑀬𑀺𑀢𑀼𑀁 𑀩𑁆𑀬𑀪𑀺𑀘𑀸𑀭𑀫𑀸𑀳‘𑀦 𑀧𑀘𑁆𑀘𑁂𑀓𑀸𑀢𑀺 𑀲𑀫𑁆𑀩𑀦𑁆𑀥𑁂𑀦𑁂’𑀢𑀺. 𑀬𑀣𑀸 ‘‘𑀢𑁂𑀦 𑀓𑀣𑀁 𑀓𑀻𑀢’’𑀫𑀺𑀘𑁆𑀘𑀸𑀤𑁄 ‘‘𑀢𑁂𑀦 𑀚𑀺𑀢𑀁 𑀚𑀬𑀢𑀺’’𑀘𑁆𑀘𑀸𑀤𑀺 𑀧𑀘𑁆𑀘𑁂𑀓𑀲𑀫𑁆𑀩𑀦𑁆𑀥𑁂𑀦 𑀪𑀯𑀢𑀺 𑀏𑀯𑀫𑁆𑀫𑀸𑀯𑀺𑀜𑁆𑀜𑀸𑀬𑀻𑀢𑀺 𑀬𑀣𑁂𑀘𑁆𑀘𑀸𑀤𑀺 𑀓𑀲𑁆𑀲𑀸𑀢𑁆𑀣𑁄. ‘𑀢𑁂𑀦 𑀓𑀢𑀁 𑀓𑀻𑀢’’𑀫𑀺𑀘𑁆𑀘𑀸𑀤𑀻𑀳𑀺 𑀅𑀯𑀢𑁆𑀯𑀸 ‘‘𑀢𑁂𑀦 𑀚𑀺𑀢𑀁 𑀚𑀬𑀢𑀺’’𑀘𑁆𑀘𑀸𑀤𑀺𑀲𑀼𑀢𑁆𑀢𑁂𑀓𑀤𑁂𑀲𑀯𑀘𑀦𑀫𑀢𑁆𑀣𑀩𑁆𑀬𑀢𑁆𑀢𑀺 𑀢𑀣𑀸 𑀯𑀼𑀢𑁆𑀢𑁂 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁, 𑀢𑁂𑀦 𑀚𑀺𑀢𑀫𑀺𑀘𑁆𑀘𑀸𑀤𑁄 𑀚𑀬𑀦𑀸𑀤𑀺𑀓𑀸 𑀓𑀺𑀭𑀺𑀬𑀸𑀦𑁂 𑀓𑀤𑀩𑁆𑀩𑀲𑀫𑀯𑀸𑀬𑀺𑀢𑁆𑀢𑁂𑀦 𑀧𑀲𑀺𑀤𑁆𑀥𑀸𑀢𑀺 𑀬𑀼𑀢𑁆𑀢𑁄 𑀢𑀢𑁆𑀣 𑀧𑀘𑁆𑀘𑁂𑀓𑀸𑀪𑀺𑀲𑀫𑁆𑀩𑀦𑁆𑀥𑁄, 𑀦𑁂𑀯𑀫𑀚𑁆𑀛𑁂𑀦 𑀯𑁂𑀤𑀦𑀸 𑀧𑁆𑀬𑁂𑀓𑀤𑀩𑁆𑀩𑀲𑀫𑀯𑀸𑀬𑀺𑀢𑁆𑀢𑀸𑀪𑀺𑀬𑁆𑀬𑁄𑀢𑁆𑀬𑀥𑀺𑀧𑁆𑀧𑀸𑀬𑁄.

𑀇𑀤𑀸𑀦𑀺 ¶ 𑀤𑀼𑀢𑀺𑀬𑀁 𑀤𑀲𑁆𑀲𑁂𑀢𑀺 ‘𑀚𑀸𑀦𑀦’𑀫𑀺𑀘𑁆𑀘𑀸𑀤𑀺, 𑀦𑀺𑀫𑀺𑀢𑁆𑀢 𑀫𑀺𑀝𑁆𑀞𑀸𑀦𑀺𑀝𑁆𑀞𑀩𑁄𑀥𑀓𑀸𑀭𑀡𑀁 𑀫𑀼𑀳𑀼𑀢𑁆𑀢𑁄 𑀓𑀢𑁆𑀢𑀺𑀓𑀸𑀤𑀺, 𑀉𑀧𑁆𑀧𑀸𑀢𑁄 𑀇𑀝𑁆𑀞𑀸𑀦𑀺𑀝𑁆𑀞𑀲𑀽𑀘𑀓𑀁 𑀧𑀣𑀯𑀺𑀲𑀫𑀼𑀤𑁆𑀤𑀸𑀤𑀻𑀦𑀁 𑀲𑀪𑀸𑀯𑀧𑀭𑀺𑀘𑁆𑀘𑀸𑀕𑁂𑀦𑀸𑀜𑁆𑀜𑀢𑀢𑁆𑀢𑀕𑀫𑀦𑀁. 𑀚𑀸𑀦𑀦𑀲𑀸𑀫𑀜𑁆𑀜𑁂𑀢𑀺 𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀚𑀸𑀦𑀦 𑀲𑀸𑀫𑀜𑁆𑀜𑁂. ‘𑀬𑀣𑀸𑀯𑀼𑀢𑁆𑀢𑀚𑀸𑀦𑀦𑀲𑁆𑀲 𑀅𑀚𑁆𑀛𑁂𑀦 𑀯𑀺𑀲𑀬𑀢𑁆𑀢𑁂 𑀳𑁂𑀢𑀼𑀫𑀸𑀳- ‘𑀢𑀁 𑀚𑀸𑀦𑀸𑀢𑀻𑀢𑀺 𑀢𑀲𑀤𑁆𑀤𑁂𑀦 𑀅𑀥𑀻𑀬𑀫𑀸𑀦𑀧𑀭𑀸𑀫𑀲𑀢𑁄’𑀢𑀺. 𑀢𑀢𑀺𑀬𑀁 𑀤𑀲𑁆𑀲𑁂𑀢𑀺 ‘𑀬𑀢𑁄 𑀘𑁂’𑀘𑁆𑀘𑀸𑀤𑀺𑀦𑀸. 𑀬𑀢𑁄 𑀘 𑀉𑀧𑁆𑀧𑀦𑁆𑀦𑁂𑀦 𑀯𑀺𑀥𑀺𑀦𑀸 𑀅𑀚𑁆𑀛𑁂𑀦 𑀜𑀸𑀢𑀼 𑀅𑀪𑀺𑀥𑀸𑀦𑀫𑁆𑀧𑀲𑀺𑀤𑁆𑀥𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀧𑁄𑀢𑁆𑀣𑀓𑁂𑀲𑀼 𑀧𑀦 𑀅𑀚𑁆𑀛𑁂𑀢𑀼𑀜𑀸𑀢𑀽𑀲𑀼𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀏𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 ‘‘𑀓𑀢𑁆𑀣𑀘𑀺 𑀧𑀲𑀺𑀤𑁆𑀥𑀺𑀯𑀺𑀲𑀬𑁄 𑀳𑁄𑀢𑀺 𑀢𑀲𑀤𑁆𑀤𑁄, 𑀢𑀣𑀸 𑀘 𑀯𑀼𑀢𑁆𑀢𑀁 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑀝𑀻𑀓𑀸𑀬𑀁 𑀧𑀓𑁆𑀓𑀦𑁆𑀢𑀯𑀺𑀲𑀬𑁄 𑀢𑀣𑀸 𑀧𑀲𑀺𑀤𑁆𑀥𑀯𑀺𑀲𑀬𑁄 𑀅𑀦𑀼𑀪𑀽𑀢𑀯𑀺𑀲𑀬𑁄 𑀘 𑀢𑀁𑀲𑀤𑁆𑀤𑁄 𑀬𑀁 𑀲𑀤𑁆𑀤𑀁 𑀦𑀸 𑀧𑁂𑀓𑁆𑀔𑀢𑁂’𑀢𑀺, 𑀢𑀲𑁆𑀫𑀸 𑀧𑀲𑀺𑀤𑁆𑀥𑀺𑀯𑀺𑀲𑀬𑁂𑀦 𑀢𑀲𑀤𑁆𑀤𑁂𑀦 𑀧𑀼𑀣𑀕𑁂𑀯 𑀧𑀲𑀺𑀤𑁆𑀥𑀺𑀬𑀸 𑀉𑀧𑀲𑀗𑁆𑀕𑀳𑀢𑁆𑀣𑀁 𑀤𑁆𑀯𑀺𑀢𑀕𑁆𑀕𑀳𑀡𑀁 𑀓𑀢𑁆𑀢𑀩𑁆𑀩’’𑀦𑁆𑀢𑀺. 𑀅𑀢𑁆𑀣𑀢𑁆𑀢𑀬𑁂 𑀯𑀢𑁆𑀢𑀫𑀸𑀦𑀲𑁆𑀲 𑀢𑀼 𑀢𑀲𑀤𑁆𑀤𑀲𑁆𑀲 𑀲𑀯𑀺𑀲𑀬𑁄 𑀯𑀺𑀲𑁂𑀲𑁄 𑀢𑀢𑁄𑀯𑀸𑀢𑁆𑀣𑀺𑀓𑁂𑀳𑀺 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀲𑀬𑀲𑀤𑁆𑀤𑁄 𑀕𑀸𑀫𑀲𑀫𑀼𑀤𑀸𑀬𑁂𑀧𑀺 𑀯𑀢𑁆𑀢𑀢𑁂, 𑀕𑀸𑀫𑀲𑀫𑀼𑀤𑀸𑀬𑁄 𑀘 𑀦𑀸𑀫 𑀤𑁂𑀲𑁄𑀬𑁂𑀯, 𑀢𑁂𑀦𑀸𑀳 𑀯𑀺𑀲𑀬𑁄𑀧𑀺 𑀕𑀸𑀫𑀲𑀫𑀼𑀤𑀸𑀬𑀢𑁆𑀢𑀸 𑀤𑁂𑀲𑁄𑀬𑁂𑀯𑀸’𑀢𑀺, 𑀇𑀫𑀺𑀦𑀸 𑀯𑀺𑀲𑀬𑀤𑁂𑀲𑀲𑀤𑁆𑀤𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀫𑀸𑀳. 𑀯𑀲𑀸𑀢𑀺 𑀤𑁂𑀲𑀯𑀸𑀲𑀺𑀦𑁄 𑀯𑀲𑀸𑀢𑀬𑁄, 𑀅𑀦𑀼𑀯𑀸𑀓𑁄 𑀕𑀦𑁆𑀣𑀯𑀺𑀲𑁂𑀲𑁄.

𑀢𑀦𑁆𑀦𑀸𑀫𑁂𑀘𑁆𑀘𑀸𑀤𑀺𑀦𑀸 𑀦 𑀓𑁂𑀯𑀮𑀁 𑀦𑀺𑀯𑀸𑀲𑁂𑀬𑁂𑀯, 𑀅𑀣𑀔𑁄 𑀯𑀓𑁆𑀔𑀫𑀸𑀦𑁂𑀲𑀼 𑀧𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀘𑁆𑀘𑀬𑀦𑁆𑀢𑀁 𑀲𑁂𑀩𑁆𑀩𑀸𑀤𑀺. 𑀤𑁂𑀲𑀦𑀸𑀫𑀫𑁆𑀪𑀯𑀢𑀺 𑀘𑀢𑀽𑀲𑀼 𑀅𑀢𑁆𑀣𑁂𑀲𑀽𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀢𑁂𑀦𑀸𑀳-‘𑀦𑀺𑀯𑀸𑀲𑀸𑀤𑁄 𑀯𑀺𑀥𑀻’𑀢𑀺. 𑀦𑀺𑀯𑀸𑀲𑀸𑀤𑁄𑀢𑀺 𑀦𑀺𑀯𑀸𑀲 𑀅𑀤𑀽𑀭𑀪𑀯𑀦𑀺𑀩𑁆𑀩𑀢𑁆𑀢𑀅𑀢𑁆𑀣𑀺𑀅𑀢𑁆𑀣𑁂𑀲𑀼. 𑀲𑀁𑀳𑀺𑀢𑀦𑀸𑀫𑀁 𑀦𑀸𑀫 𑀮𑁄𑀓𑀺𑀬𑀲𑀤𑁆𑀤𑀯𑁄 𑀳𑀸𑀭𑀸𑀧𑁆𑀧𑀲𑀗𑁆𑀕𑀫𑀜𑁆𑀜𑀲𑀤𑁆𑀤𑀯𑁄𑀳𑀸𑀭𑁂𑀦𑀼𑀧𑀸𑀢𑁆𑀢𑀦𑀸𑀫𑀁.

𑀦𑀕𑀭𑀫𑁆𑀧𑀺 𑀤𑁂𑀲𑁄𑀬𑁂𑀯𑀸𑀢𑀺 𑀆𑀳- ‘𑀅𑀤𑀽𑀭𑀪𑀯’𑀦𑁆𑀢𑀺.

𑀬𑀣𑀸𑀬𑁄𑀕𑀢𑁆𑀣𑁄𑀢𑀺 𑀯𑀼𑀢𑁆𑀢𑀺𑀬𑀁 𑀯𑀼𑀢𑁆𑀢𑀬𑀣𑀸𑀬𑁄𑀕𑀲𑀤𑁆𑀤𑀲𑁆𑀲 𑀅𑀢𑁆𑀣𑁄.

𑀧𑀘𑁆𑀘𑀬𑀦𑁆𑀢𑀦𑀸𑀫𑁂𑀢𑀺 ¶ 𑀧𑀘𑁆𑀘𑀬𑀦𑁆𑀢𑀦𑀸𑀫𑀁 𑀬𑀲𑁆𑀲 𑀲𑀢𑁆𑀢𑀫𑁆𑀬𑀢𑁆𑀣𑀪𑀽𑀢𑀲𑁆𑀲 𑀤𑁂𑀲𑀲𑁆𑀲 𑀳𑀲𑁆𑀫𑀺𑀦𑁆𑀢𑀺 𑀅𑀢𑁆𑀣𑁄, 𑀦𑀸𑀜𑁆𑀜𑀲𑁆𑀲𑁂𑀢𑀺 𑀪𑀽𑀫𑀸𑀤𑀺𑀯𑀺𑀲𑀺𑀝𑁆𑀞𑀢𑁆𑀣𑀬𑀼𑀢𑁆𑀢𑀢𑁄 𑀅𑀜𑁆𑀜𑀲𑁆𑀲 𑀧𑀘𑁆𑀘𑀬𑀦𑁆𑀢𑀦𑀸𑀫𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀩𑀤𑀭𑀸 𑀩𑀩𑁆𑀩𑀚𑀸 𑀅𑀲𑁆𑀫𑀺𑀁 𑀤𑁂𑀲𑁂 𑀲𑀦𑁆𑀢𑀻𑀢𑀺 𑀯𑀺𑀕𑁆𑀕𑀳𑁄.

𑀳𑀻𑀬𑁆𑀬𑀢𑁆𑀢𑀦𑁄𑀢𑀺 ‘‘𑀲𑀭𑀫𑁆𑀳𑀸 𑀤𑁆𑀯𑁂’’𑀢𑀺 (𑁧𑁩𑁪) 𑀤𑁆𑀯𑀺𑀢𑁆𑀢𑀁.

𑀫𑀚𑁆𑀛𑁂 𑀪𑀯𑁄 𑀫𑀚𑁆𑀛𑀺𑀫𑁄, 𑀅𑀦𑁆𑀢𑁂 𑀪𑀯𑁄 𑀅𑀦𑁆𑀢𑀺𑀫𑁄 𑀇𑀘𑁆𑀘𑀸𑀤𑀺.

𑀫𑀕𑀥𑁂𑀲𑀼 𑀅𑀭𑀜𑁆𑀜𑁂 𑀕𑀗𑁆𑀕𑀸𑀬𑀁 𑀧𑀩𑁆𑀩𑀢𑁂 𑀯𑀦𑁂 𑀓𑀼𑀮𑁂 𑀩𑀸𑀭𑀸𑀡𑀲𑀺𑀬𑀁 𑀘𑀫𑁆𑀧𑀸𑀬𑀁 𑀫𑀺𑀣𑀺𑀮𑀸𑀬𑀁 𑀲𑀫𑁆𑀪𑀯𑁄𑀢𑀺 𑀯𑀺𑀕𑁆𑀕𑀳𑁄. ‘‘𑀤𑀺𑀲𑁆𑀲𑀦𑁆𑀢𑀜𑁆𑀜𑁂𑀧𑀺 𑀧𑀘𑁆𑀘𑀬𑀸’’𑀢𑀺 (𑁪-𑁧𑁨𑁦) 𑀏𑀬𑁆𑀬𑀓𑁄𑀢𑀺 𑀲𑁂𑀲𑁄. 𑀧𑀘𑁆𑀘𑀬𑀦𑁆𑀢𑀭𑀤𑀲𑁆𑀲𑀦𑁂 𑀲𑀢𑀺 𑀇𑀫𑀺𑀦𑀸𑀯 𑀲𑀼𑀢𑁆𑀢𑁂𑀦 𑀇𑀢𑁄 𑀅𑀜𑁆𑀜𑀢𑁆𑀭𑀸𑀧𑀺 𑀧𑀘𑁆𑀘𑀬𑀦𑁆𑀢𑀭𑀸𑀦𑀺 𑀳𑁄𑀦𑁆𑀢𑀻𑀢𑀺 𑀲𑁂𑀲𑁄, 𑀕𑀸𑀫𑁂 𑀪𑀯𑁄 𑀉𑀤𑀭𑁂 𑀪𑀯𑁄 𑀧𑀜𑁆𑀘𑀸𑀮𑁂𑀲𑀼 𑀪𑀯𑁄 𑀩𑁄𑀥𑀺𑀧𑀓𑁆𑀔𑁂 𑀪𑀯𑁄𑀢𑀺 𑀯𑀺𑀕𑁆𑀕𑀳𑁄.

𑀲𑀭𑀤𑁂 𑀪𑀯𑁄, 𑀪𑀯𑀸 𑀯𑀸𑀢𑀺 𑀯𑀺𑀕𑁆𑀕𑀳𑁄.

𑀲𑀺𑀧𑁆𑀧𑀲𑀤𑁆𑀤𑀢𑁆𑀣𑀫𑀸𑀳-‘𑀮𑁄𑀲𑀮𑁆𑀮’𑀦𑁆𑀢𑀺. 𑀢𑀫𑁂𑀯 𑀩𑁆𑀬𑀜𑁆𑀚𑀬𑀢𑀺 ‘𑀓𑀺𑀭𑀺𑀬𑁂’𑀘𑁆𑀘𑀸𑀤𑀺𑀦𑀸, 𑀓𑀭𑀡𑀁 𑀓𑀺𑀭𑀺𑀬𑀸 𑀯𑀸𑀤𑀦𑀸𑀤𑀺𑀓𑀲𑁆𑀲 𑀅𑀪𑁆𑀬𑀸𑀲𑁄, 𑀲𑁄 𑀧𑀼𑀩𑁆𑀩𑁄 𑀬𑀲𑁆𑀲𑀸𑀢𑀺 𑀲𑀫𑀸𑀲𑁄, 𑀯𑀻𑀡𑀸𑀤𑀺𑀲𑀤𑁆𑀤𑁂𑀳𑀺 𑀓𑀺𑀫𑀼𑀘𑁆𑀘𑀢𑁂𑀘𑁆𑀘𑀸𑀳- ‘𑀯𑀻𑀡𑀸𑀤𑀺’𑀘𑁆𑀘𑀸𑀤𑀺, 𑀤𑀩𑁆𑀩𑀁 𑀢𑀁𑀢𑀁𑀲𑀫𑀼𑀤𑀸𑀬𑀭𑀽𑀧𑀁. 𑀲𑀺𑀧𑁆𑀧𑀜𑁆𑀘𑀸𑀢𑀺 𑀯𑀢𑁆𑀯𑀸 𑀢𑀤𑀢𑁆𑀣𑀁 𑀯𑀺𑀪𑀸𑀯𑁂𑀢𑀺 ‘𑀓𑀺𑀭𑀺𑀬𑀸 𑀯𑀺𑀲𑁂𑀲𑁄’𑀢𑀺. 𑀯𑀸𑀤𑀦𑀸𑀤𑀺𑀓𑀺𑀭𑀺𑀬𑀸𑀬 𑀯𑀺𑀲𑀺𑀝𑁆𑀞𑁄 𑀚𑀸𑀦𑀦𑀓𑀺𑀭𑀺𑀬𑀸𑀯𑀺𑀲𑁂𑀲𑁄𑀢𑀺 𑀅𑀢𑁆𑀣𑁄, 𑀇𑀫𑀺𑀦𑀸 𑀯𑀻𑀡𑀸𑀤𑀺𑀲𑀤𑁆𑀤𑀸 𑀤𑀩𑁆𑀩𑀢𑁆𑀣𑀯𑀼𑀢𑁆𑀢𑀺𑀦𑁄 𑀯𑀸𑀤𑀦𑀸𑀤𑀺𑀓𑀺𑀭𑀺𑀬𑀁 𑀓𑀺𑀭𑀺𑀬𑀸 𑀯𑀺𑀲𑁂𑀲𑀜𑁆𑀘 ¶ 𑀲𑀺𑀧𑁆𑀧𑀫𑀼𑀧𑀘𑀸𑀭𑁂𑀦 𑀯𑀤𑀦𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀇𑀢𑀺𑀲𑀤𑁆𑀤𑁄 𑀳𑁂𑀢𑀼𑀫𑁆𑀳𑀺. 𑀲𑀸𑀬𑁂𑀯𑁂𑀢𑀺 𑀅𑀪𑁆𑀬𑀸𑀲𑀺𑀢𑀩𑁆𑀩𑀸 𑀚𑀸𑀦𑀦𑀓𑀺𑀭𑀺𑀬𑀸𑀯𑀺𑀲𑁂𑀲𑀲𑁆𑀲 𑀧𑀼𑀩𑁆𑀩𑀪𑀽𑀢𑀸 𑀯𑀸𑀤𑀦𑀓𑀺𑀭𑀺𑀬𑀸, 𑀯𑀺𑀲𑁂𑀲𑁂𑀢𑀼𑀁 𑀬𑀼𑀢𑁆𑀢𑀸 𑀯𑀻𑀡𑀸𑀤𑀺𑀲𑀤𑁆𑀤𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑀼𑀢𑁆𑀢𑀢𑀸 𑀘𑁂𑀢𑁆𑀣… 𑀯𑀻𑀡𑀸𑀤𑀺𑀯𑀸𑀤𑀦𑀯𑀲𑁂𑀦 𑀲𑀺𑀧𑁆𑀧𑀲𑁆𑀲 𑀕𑀳𑁂𑀢𑀩𑁆𑀩𑀪𑀸𑀯𑀢𑁄, 𑀓𑀣𑀁 𑀯𑀻𑀡𑀸𑀤𑀺𑀲𑀤𑁆𑀤𑁂𑀳𑀺 𑀤𑀩𑁆𑀩𑀯𑀼𑀢𑁆𑀢𑀻𑀢𑀺 𑀯𑀸𑀤𑀦𑀸 𑀯𑀼𑀘𑁆𑀘𑀢𑀻𑀢𑀺 𑀆𑀳- ‘𑀯𑀻𑀡𑀸𑀤𑀺 𑀯𑀺𑀲𑀬𑀢𑁆𑀢𑀸’𑀢𑀺, 𑀯𑀸𑀤𑀦𑀯𑀼𑀢𑁆𑀢𑀺𑀯𑀻𑀡𑀸𑀤𑀺𑀲𑀤𑁆𑀤𑀸𑀦𑀁 𑀲𑀺𑀧𑁆𑀧𑀯𑀼𑀢𑁆𑀢𑀺𑀢𑁆𑀢𑀁 𑀬𑀣𑀸𑀯𑀼𑀢𑁆𑀢𑀲𑁆𑀲𑁄 𑀧𑀫𑀸𑀯𑀲𑁂𑀦 𑀯𑀢𑁆𑀢𑀼𑀫𑀸𑀳- ‘𑀬𑀣𑁂’𑀘𑁆𑀘𑀸𑀤𑀺. 𑀯𑀻𑀡𑀸𑀤𑀺𑀯𑀸𑀤𑀦𑀦𑁆𑀢𑀺 𑀬𑀣𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀼𑀢𑁆𑀢𑀫𑁂𑀯 𑀨𑀼𑀝𑀬𑀦𑁆𑀢𑁄 𑀯𑀼𑀢𑁆𑀢𑀺𑀕𑀦𑁆𑀣𑀲𑁆𑀲 𑀫𑀼𑀔𑀁 𑀯𑀺𑀯𑀭𑀻𑀬𑀢𑀺 ‘𑀓𑀺𑀭𑀺𑀬𑁂’𑀘𑁆𑀘𑀸𑀤𑀺𑀦𑀸. 𑀓𑀺𑀭𑀺𑀬𑀸𑀢𑁆𑀬𑀸𑀲𑀧𑀼𑀩𑁆𑀩𑀓𑀁 𑀜𑀸𑀡𑀓𑁆𑀔𑀫𑀁 𑀓𑁄𑀲𑀮𑁆𑀮𑀁 𑀯𑀸𑀤𑀦𑀓𑀺𑀭𑀺𑀬𑀸 𑀯𑀺𑀲𑀬𑀢𑁆𑀢𑀸 𑀯𑀻𑀡𑀸𑀯𑀸𑀤𑀦𑀫𑀺𑀘𑁆𑀘𑀦𑁂𑀦 𑀓𑀺𑀭𑀺𑀬𑀸𑀲𑀤𑁆𑀤𑁂𑀦 𑀯𑀼𑀘𑁆𑀘𑀢𑀻𑀢𑁆𑀬𑀢𑁆𑀣𑁄. 𑀫𑀼𑀤𑀗𑁆𑀕𑀁 𑀫𑀼𑀤𑀗𑁆𑀕𑀯𑀸𑀤𑀦𑀁 𑀲𑀺𑀧𑁆𑀧𑀫𑀲𑁆𑀲, 𑀯𑀁𑀲𑁄 𑀲𑀺𑀧𑁆𑀧𑀫𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀲𑀻𑀮𑀫𑀤𑁆𑀤𑀩𑁆𑀩𑀁 𑀓𑀣𑀁 𑀧𑀁𑀲𑀼𑀓𑀽𑀮𑀸𑀤𑀺(𑀦𑁄) 𑀲𑀻𑀮𑀢𑁆𑀣𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑁂𑀦𑀸𑀪𑀺𑀥𑀸𑀦𑀦𑁆𑀢𑁆𑀬𑀸𑀳- ‘𑀧𑀁𑀲𑀼𑀓𑀽𑀮𑀸𑀤𑀺𑀥𑀸𑀭𑀡’𑀫𑀺𑀘𑁆𑀘𑀸𑀤𑀺. 𑀢𑀜𑁆𑀘 𑀲𑀻𑀮𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀧𑁆𑀧𑀺𑀘𑁆𑀙𑀢𑀸𑀬𑀸𑀢𑀺 𑀧𑀘𑁆𑀘𑀬𑀧𑁆𑀧𑀺𑀘𑁆𑀙𑀢𑀸𑀬. 𑀲𑀦𑁆𑀢𑀼𑀝𑁆𑀞𑀺𑀢𑀸𑀬𑀸𑀢𑀺 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀤𑁆𑀯𑀸𑀤𑀲𑀯𑀺𑀥𑀲𑀦𑁆𑀢𑀼𑀝𑁆𑀞𑀺𑀬𑀸. 𑀅𑀦𑀼𑀯𑀺𑀥𑀻𑀬𑀫𑀸𑀦𑀁 𑀓𑀭𑀻𑀬𑀫𑀸𑀦𑀁. 𑀨𑀮𑀦𑀺𑀭𑀧𑁂𑀓𑁆𑀔𑀦𑁆𑀢𑀺 𑀇𑀫𑀺𑀦𑀸 𑀇𑀥 𑀮𑁄𑀓𑁂 𑀘𑀻𑀯𑀭𑀸𑀤𑀺𑀳𑁂𑀢𑀼 𑀧𑀡𑀺𑀥𑀸𑀬 𑀧𑀁𑀲𑀼𑀓𑀽𑀮 𑀥𑀸𑀭𑀡𑀸𑀤𑀺𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀲𑀻𑀮𑀁 𑀢𑀧𑁆𑀧𑀭𑀪𑀸𑀯𑁂𑀦 𑀲𑁂𑀯𑀦𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀧𑀁𑀲𑀼𑀓𑀽𑀮𑀸𑀤𑀺𑀥𑀸𑀭𑀡𑀁 𑀧𑀁𑀲𑀼𑀓𑀽𑀮𑀸𑀤𑀺𑀯𑀺𑀲𑀬𑀦𑁆𑀢𑀺 𑀧𑀁𑀲𑀼𑀓𑀽𑀮𑀸𑀤𑀺𑀲𑀤𑁆𑀤𑁂𑀦𑁄𑀧𑀘𑀸𑀭𑁂𑀦𑀸𑀪𑀺𑀥𑀻𑀬𑀢𑁂, 𑀲𑀻𑀮𑀁 𑀧𑀁𑀲𑀼𑀓𑀽𑀮𑀥𑀸𑀭𑀡𑀯𑀺𑀲𑀬𑀦𑁆𑀢𑀺 𑀧𑀁𑀲𑀼𑀓𑀽𑀮𑀸𑀤𑀺 𑀲𑀤𑁆𑀤𑁂𑀦𑁄𑀧𑀘𑀸𑀭𑁂𑀦𑁄𑀘𑁆𑀘𑀢𑀻’’𑀢𑀺. 𑀢𑀺𑀘𑀻𑀯𑀭𑀁 𑀲𑀻𑀮𑀫𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄 𑀢𑁂𑀲𑀁 𑀕𑀼𑀴𑁄 𑀧𑀡𑁆𑀬𑀫𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄 𑀢𑁄𑀫𑀭𑀁, 𑀫𑀼𑀕𑁆𑀕𑀭𑁄 𑀧𑀳𑀭𑀡𑀫𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄, 𑀉𑀧𑀥𑀻𑀬𑀢𑁆𑀬𑀼𑀧𑀭𑀺𑀆𑀥𑀻𑀬𑀢𑀻𑀢𑀺 𑀭𑀣𑀗𑁆𑀕𑀁 𑀯𑀼𑀘𑁆𑀘𑀢𑀺. 𑀓𑀸𑀫𑀓𑁆𑀔𑀦𑁆𑀥𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀸 𑀯𑀸 𑀉𑀧𑀥𑀺 𑀉𑀧𑀤𑀥𑀸𑀢𑀺 𑀲𑀼𑀔𑀁 𑀤𑀼𑀓𑁆𑀔𑀁𑀯𑀸𑀢𑀺 𑀓𑀢𑁆𑀯𑀸.

𑀩𑀳𑀼𑀫𑁆𑀳𑀺 𑀪𑀽𑀢𑀸𑀦𑀕𑀢𑁂𑀲𑀼𑀧𑀺 𑀧𑀘𑁆𑀘𑀬𑀪𑀸𑀯𑁂 𑀓𑀸𑀭𑀡𑀫𑀸𑀳-‘𑀲𑀗𑁆𑀔𑁆𑀬𑀸𑀓𑀸𑀮𑀸𑀦𑀫𑀯𑀺𑀯𑀘𑁆𑀙𑀺𑀢𑀢𑁆𑀢𑀸’𑀢𑀺, 𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀬 𑀏𑀓𑀲𑀗𑁆𑀔𑁆𑀬𑀸𑀬 𑀯𑀼𑀢𑁆𑀢𑀫𑀸𑀦𑀓𑀸 𑀮𑀲𑁆𑀲𑁂𑀯 𑀘 𑀯𑀢𑁆𑀢𑀼𑀫𑀦𑀺𑀘𑁆𑀙𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀢𑀤𑀼𑀧𑀸𑀤𑀸𑀦𑀦𑁆𑀢𑀽𑀢𑀺 ¶ 𑀢𑁂𑀲𑀫𑁂𑀓𑀯𑀘𑀦𑀸𑀤𑀻𑀦𑀫𑀼𑀧𑀸𑀤𑀸𑀦𑀦𑁆𑀢𑀼. 𑀢𑀁 𑀦𑀸𑀦𑀦𑁆𑀢𑀭𑀻𑀬 𑀓𑀢𑁆𑀢𑀸𑀢𑀺 𑀉𑀧𑀮𑀓𑁆𑀔𑀡𑀯𑀲𑁂𑀦 𑀢𑁂𑀲𑀁 𑀯𑀘𑀦𑀓𑀸𑀮𑀦𑁆𑀢𑀭𑀸𑀦𑀫𑀯𑀺𑀦𑀸𑀪𑀸𑀯𑀺𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀳𑀦𑁆𑀢𑀺𑀘𑁆𑀘𑀸𑀤𑀺𑀢𑁆𑀬𑀸𑀤𑁆𑀬𑀦𑁆𑀢𑀲𑁆𑀲 𑀓𑀺𑀭𑀺𑀬𑀸𑀧𑁆𑀧𑀥𑀸𑀦𑀢𑁆𑀢𑁂 𑀓𑀣𑀁 𑀡𑀸𑀤𑀻𑀦𑀁 𑀢𑀤𑀢𑁆𑀣𑁂 𑀚𑀸𑀬𑀫𑀸𑀦𑀸𑀦𑀁 𑀲𑀸𑀥𑀦𑀧𑁆𑀧𑀥𑀸𑀦𑀢𑁆𑀢 𑀫𑀺𑀘𑁆𑀘𑀢𑁆𑀭 𑀳𑁂𑀢𑀼𑀫𑀸𑀳 ‘𑀲𑀪𑀸𑀯𑀢𑁄’𑀢𑀺. 𑀫𑀻𑀦𑁂 𑀳𑀦𑁆𑀢𑀻𑀢𑀺 𑀫𑁂𑀦𑀺𑀓𑁄. 𑀅𑀚𑀺𑀯𑁆𑀳𑀸 𑀅𑀦𑀺𑀫𑀺𑀲𑀸 𑀘 𑀫𑀘𑁆𑀙𑀸, 𑀤𑀺𑀝𑁆𑀞𑁄𑀯 𑀲𑀦𑁆𑀤𑀺𑀝𑁆𑀞𑀦𑁆𑀢𑀺 𑀇𑀫𑀺𑀦𑀸 𑀲𑀁𑀲𑀤𑁆𑀤𑀲𑁆𑀲 𑀯𑀺𑀲𑀼𑀁 𑀅𑀢𑁆𑀣𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄𑀢𑀺 𑀦𑀯𑀯𑀺𑀥𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄, 𑀨𑀮𑀥𑀫𑁆𑀫𑁄𑀧𑀺 𑀳𑁂𑀝𑁆𑀞𑀺𑀫𑁄 𑀲𑀓𑀤𑀸𑀕𑀸𑀫𑀺𑀯𑀺𑀧𑀲𑁆𑀲𑀦𑀸𑀤𑀻𑀦𑀁 𑀧𑀘𑁆𑀘𑀬𑀪𑀸𑀯𑁂𑀦 𑀉𑀧𑀭𑀺𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀸𑀯𑀢𑁄 𑀧𑀭𑀺𑀬𑀸𑀬𑀢𑁄 𑀤𑀺𑀲𑁆𑀲𑀫𑀸𑀦𑁄𑀯 𑀯𑀝𑁆𑀝𑀪𑀬𑀁 𑀦𑀺𑀯𑀢𑁆𑀢𑁂𑀢𑀺, 𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀫𑀕𑁆𑀕𑀥𑀫𑁆𑀫𑁄 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀦𑀺𑀩𑁆𑀩𑀸𑀦𑀥𑀫𑁆𑀫𑁄.

𑀯𑀝𑁆𑀝𑀪𑀬𑀦𑁆𑀢𑀺 𑀓𑀫𑁆𑀫𑀓𑀺𑀮𑁂𑀲𑀯𑀺𑀧𑀸𑀓𑀲𑀗𑁆𑀔𑀸𑀢𑀁 𑀢𑀺𑀯𑀺𑀥𑀯𑀝𑁆𑀝𑀪𑀬𑀁. 𑀯𑀺𑀥𑀸𑀦 𑀯𑀘𑀦𑀦𑁆𑀢𑀺 𑀅𑀧𑁆𑀧𑀢𑁆𑀢𑁂-𑀢𑁆𑀣𑁂 𑀦𑀺𑀬𑁄𑀕𑀲𑀗𑁆𑀔𑀸𑀢𑀯𑀺𑀥𑀺𑀦𑁄 𑀧𑀓𑀸𑀲𑀢𑀁 𑀏𑀳𑀺𑀧𑀲𑁆𑀲 𑀯𑀘𑀦𑀁. 𑀧𑀭𑀺𑀲𑀼𑀤𑁆𑀥𑀢𑁆𑀢𑀸𑀢𑀺 𑀓𑀺𑀮𑁂𑀲𑀫𑀮𑀯𑀺𑀭𑀳𑁂𑀦 𑀲𑀩𑁆𑀩𑀣𑀸 𑀯𑀺𑀲𑀼𑀤𑁆𑀥𑀢𑁆𑀢𑀸. 𑀅𑀫𑀦𑀼𑀜𑁆𑀜𑀫𑁆𑀧𑀺 𑀓𑀤𑀸𑀘𑀺 𑀲𑀧𑁆𑀧𑀬𑁄𑀚𑀦𑀁 𑀬𑀣𑀸𑀲𑀪𑀸𑀯𑀧𑁆𑀧𑀓𑀸𑀲𑀦𑁂𑀦 𑀤𑀲𑁆𑀲𑁂𑀢𑀩𑁆𑀩𑀁 𑀪𑀯𑁂𑀬𑁆𑀬𑀸𑀢𑀺 𑀢𑀤𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀘𑁂’𑀘𑁆𑀘𑀸𑀤𑀺. 𑀦𑀦𑀼 𑀘 𑀏𑀳𑀺𑀧𑀲𑁆𑀲𑀸𑀢𑀺 𑀢𑁆𑀬𑀸𑀤𑁆𑀬𑀦𑁆𑀢𑀸, 𑀢𑀲𑁆𑀫𑀸 𑀦𑁂𑀢𑁂𑀢𑀺 𑀧𑀘𑁆𑀘𑀬𑁄 𑀧𑀧𑁆𑀧𑁄𑀢𑀺, 𑀢𑀣𑀸𑀳𑀺 𑀧𑀸𑀝𑀺𑀧𑀤𑀺𑀓𑀢𑁄 𑀧𑀘𑁆𑀘𑀬𑀯𑀺𑀥𑀸𑀦𑀫𑁆𑀧𑀝𑀺𑀧𑀸𑀤𑀺𑀢𑀁, 𑀦 𑀢𑁆𑀬𑀸𑀤𑁆𑀬𑀦𑁆𑀢𑀢𑁄 𑀦𑀸𑀧𑀺 𑀯𑀸𑀓𑁆𑀬𑀢𑁄, 𑀢𑀲𑁆𑀫𑀸 𑀓𑀣𑀫𑁂𑀳𑀺𑀧𑀲𑁆𑀲𑀺𑀓𑁄𑀢𑀺 𑀳𑁄𑀢𑀻𑀢𑀺 𑀆𑀳-‘𑀏𑀳𑀺𑀧𑀲𑁆𑀲𑀲𑀤𑁆𑀤𑁄𑀘𑀸𑀬’𑀫𑀺𑀘𑁆𑀘𑀸𑀤𑀺. 𑀧𑀤𑀲𑀫𑀼𑀤𑀸𑀬𑀲𑁆𑀲𑀸𑀦𑀼𑀓𑀭𑀡𑁄𑀢𑀺 𑀧𑀤𑀲𑀫𑀽𑀳𑀲𑁆𑀲 𑀅𑀦𑀼𑀓𑀭𑀡𑀪𑀽𑀢𑁄 𑀏𑀓𑁄 𑀏𑀳𑀺𑀧𑀲𑁆𑀲𑀲𑀤𑁆𑀤𑁄. 𑀅𑀣𑀯𑀸 𑀏𑀳𑀺 𑀆𑀕𑀘𑁆𑀙 𑀇𑀫𑀁 𑀥𑀫𑁆𑀫𑀁 𑀧𑀲𑁆𑀲𑀸𑀢𑀺 𑀬𑁄 𑀅𑀧𑁆𑀧𑀢𑁆𑀢𑁂-𑀢𑁆𑀣𑁂 𑀦𑀺𑀬𑁄𑀕𑀲𑀗𑁆𑀔𑀸𑀢𑁄 𑀯𑀺𑀥𑀺, 𑀢𑀩𑁆𑀩𑀸𑀘𑀓𑁄 𑀬𑀦𑁆𑀦𑀺𑀧𑀸𑀢𑁄 𑀏𑀳𑀺𑀧𑀲𑁆𑀲𑀸𑀢𑀺, 𑀏𑀳𑀺𑀧𑀲𑁆𑀲𑀯𑀺𑀥𑀺𑀁 𑀅𑀭𑀳𑀢𑀻𑀢𑀺 𑀏𑀳𑀺𑀧𑀲𑁆𑀲𑀺𑀓𑁄, 𑀅𑀣𑀯𑀸 𑀏𑀳𑀺𑀘𑁆𑀘𑁂𑀯 𑀦𑀺𑀧𑀸𑀢𑁄, 𑀤𑀲𑁆𑀲𑀦𑀁 𑀜𑀸𑀧𑀦𑀁 𑀧𑀲𑁆𑀲𑁄, 𑀏𑀳𑀻𑀢𑀺 𑀧𑀲𑁆𑀲𑁄 𑀜𑀸𑀧𑀦𑀁 𑀏𑀳𑀺𑀧𑀲𑁆𑀲𑁄, 𑀏𑀳𑀺𑀧𑀲𑁆𑀲𑀁 𑀅𑀭𑀳𑀢𑀻𑀢𑀺 𑀏𑀳𑀺𑀧𑀲𑁆𑀲𑀺𑀓𑁄.

𑀏𑀓𑀻𑀪𑀸𑀯𑁄𑀢𑀺 𑀫𑀼𑀕𑁆𑀕𑁂𑀳𑀺 𑀲𑀁𑀲𑀝𑁆𑀞𑀸𑀦𑀁 𑀫𑀸𑀲𑀸𑀦𑀫𑀺𑀯 𑀫𑀺𑀲𑁆𑀲𑀻𑀪𑀸𑀯𑁄. 𑀏𑀲𑁄𑀢𑀺 𑀲𑀁𑀲𑀕𑁆𑀕𑁄, 𑀉𑀓𑁆𑀓𑀁𑀲𑁂𑀦𑀸𑀢𑀺 𑀉𑀓𑁆𑀓𑀁𑀲𑀸𑀥𑀸𑀦𑁂𑀦 [𑀉𑀢𑁆𑀓𑀁𑀲𑀲𑀸𑀥𑀦𑁂𑀦 (𑀧𑁄𑀢𑁆𑀣𑀓𑁂)] 𑀘 𑀪𑀯𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄 ¶ . 𑀲𑀁𑀲𑀕𑁆𑀕𑀉𑀓𑁆𑀓𑀁𑀲𑀸𑀦𑀁 𑀲𑀳𑀪𑀸𑀯𑀲𑁆𑀲 𑀅𑀦𑁂𑀓𑀦𑁆𑀢𑀺 𑀓𑀢𑁆𑀢𑁂 𑀓𑀸𑀭𑀡𑀫𑀸𑀳- ‘𑀅𑀲𑀼𑀘𑀺𑀤𑀩𑁆𑀩𑁂’𑀘𑁆𑀘𑀸𑀤𑀺𑀦𑀸. 𑀩𑁆𑀬𑀢𑀺𑀭𑁂𑀓𑀫𑀸𑀳- ‘𑀦𑀼𑀓𑁆𑀓𑀁𑀲𑁄’𑀢𑀺 𑀬𑀢𑁆𑀣 𑀲𑀁𑀲𑀕𑁆𑀕𑀭𑀳𑀺𑀢𑀁 𑀓𑁂𑀯𑀮𑀫𑀪𑀺𑀲𑀗𑁆𑀔𑀢𑁆𑀢𑀫𑀢𑁆𑀣𑀺, 𑀢𑀢𑁆𑀣 𑀧𑀘𑁆𑀘𑀬𑀫𑀼𑀤𑀸𑀳𑀭𑀡𑁂𑀦 𑀤𑀲𑁆𑀲𑁂𑀢𑁆𑀯𑀸 𑀯𑀺𑀚𑁆𑀚𑀸𑀬 𑀲𑀳 𑀲𑀁𑀲𑀕𑁆𑀕𑀲𑁆𑀲𑀸𑀯𑀺𑀚𑁆𑀚𑀫𑀸𑀦𑀢𑁆𑀢𑁂 𑀓𑀸𑀭𑀡𑀁 𑀯𑀤𑀢𑀺 ‘𑀭𑀽𑀧𑀻 𑀥𑀫𑁆𑀫𑀢𑁆𑀢𑀸’𑀢𑀺𑀆𑀤𑀺. 𑀭𑀽𑀧𑀁 𑀪𑀽𑀢𑁄𑀧𑀸𑀤𑀸𑀬𑀪𑁂𑀤𑀫𑀲𑁆𑀲 𑀅𑀢𑁆𑀣𑀻𑀢𑀺 𑀭𑀽𑀧𑀻, 𑀖𑀢𑀸𑀤𑀺 𑀲𑀁𑀲𑀝𑁆𑀞𑀁 𑀪𑀢𑁆𑀢𑀸𑀤𑀺. 𑀢𑀲𑁆𑀲 𑀥𑀫𑁆𑀫𑁄 𑀲𑀪𑀸𑀯𑁄 𑀲𑀁𑀲𑀕𑁆𑀕𑁄, 𑀢𑀲𑁆𑀲 𑀪𑀸𑀯𑁄 𑀢𑀢𑁆𑀢𑀁, 𑀢𑀲𑁆𑀫𑀸, 𑀢𑀲𑁆𑀲𑀸𑀢𑀺 𑀲𑀁𑀲𑀕𑁆𑀕𑀲𑁆𑀲, 𑀯𑀺𑀚𑁆𑀚𑀸𑀢𑁆𑀯𑀭𑀽𑀧𑀻… 𑀬𑀣𑀸𑀯𑀼𑀢𑁆𑀢 𑀭𑀽𑀧𑀲𑀪𑀸𑀯𑀸𑀪𑀸𑀯𑀸, 𑀢𑁂𑀦𑀸𑀳- ‘𑀯𑀺𑀚𑁆𑀚𑀸𑀬 𑀘 𑀅𑀭𑀽𑀧𑀺𑀢𑁆𑀢𑀸’𑀢𑀺 𑀘𑀭𑀇𑀘𑁆𑀘𑀦𑁆𑀥𑀸𑀢𑀼𑀬𑁂𑀯 𑀘𑀭𑀢𑀺.

𑀯𑀸𑀘𑀲𑀺𑀓𑀁 𑀫𑀸𑀦𑀲𑀺𑀓𑀦𑁆𑀢𑀺 ‘‘𑀫𑀦𑀸𑀤𑀻𑀦𑀁 𑀲𑀓, 𑀬𑀁𑀓𑀺𑀜𑁆𑀘𑀻𑀢𑀺 𑀲𑀢𑀸𑀤𑀺𑀓𑀁 𑀬𑀁𑀓𑀺𑀜𑁆𑀘𑀺. 𑀩𑀸𑀳𑀼𑀮𑀓𑁂𑀦𑁂𑀯𑁂𑀢𑁆𑀣𑀸𑀯𑀥𑀸𑀭𑀡𑀁 𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁- ‘𑀢𑀢𑁄 𑀯𑀸’𑀢𑀺, 𑀤𑁂𑀯𑀤𑀢𑁆𑀢𑁂𑀦 𑀓𑀻𑀢𑁄𑀢𑀺 𑀲𑁄 𑀅𑀢𑁆𑀣𑁄 𑀢𑀤𑀢𑁆𑀣𑁄, 𑀢𑀲𑁆𑀲 𑀅𑀧𑁆𑀧𑀢𑀻𑀢𑀺 𑀅𑀪𑀺𑀥𑀸𑀦𑀲𑀢𑁆𑀢𑀺𑀯𑁂𑀓𑀮𑁆𑀮𑁂𑀦 𑀯𑀼𑀢𑁆𑀢𑀺𑀬𑀫𑀦𑀯𑀕𑀫𑁄, 𑀤𑁂𑀯𑀤𑀢𑁆𑀢𑀺𑀓𑁄𑀢𑀺 𑀳𑀺 𑀯𑀼𑀢𑁆𑀢𑁂 𑀤𑁂𑀯𑀤𑀢𑁆𑀢𑁂𑀦 𑀓𑀻𑀢𑁄𑀢𑁆𑀬𑀬𑀫𑀢𑁆𑀣𑁄 𑀦𑀧𑁆𑀧𑀢𑀻𑀬𑀢𑁂… 𑀢𑀸𑀤𑀺𑀲 𑀲𑀤𑁆𑀤𑀲𑀢𑁆𑀢𑀺𑀯𑁂𑀓𑀮𑁆𑀮𑁂𑀦 𑀢𑀤𑀢𑁆𑀣𑀲𑁆𑀲𑀸𑀦𑀫𑀺𑀥𑀻𑀬𑀫𑀸𑀦𑀢𑁆𑀢𑀸, 𑀅𑀯𑀕𑀫𑁄 𑀘 𑀦𑀸𑀫 𑀲𑀢𑀺 𑀲𑀸𑀫𑀢𑁆𑀣𑀺𑀬𑁂 𑀲𑀺𑀬𑀸𑀢𑀺 𑀇𑀫𑀫𑀢𑁆𑀣𑀁 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑁂𑀢𑀼𑀫𑀸𑀳- ‘𑀢𑀤𑀢𑁆𑀣𑀸𑀧𑁆𑀧𑀢𑀻𑀢𑀺𑀬𑀸’𑀢𑀺𑀆𑀤𑀺.

𑀅𑀪𑀺𑀥𑀸𑀦𑀮𑀓𑁆𑀔𑀡𑀢𑁆𑀢𑀦𑁆𑀢𑀺 𑀅𑀪𑀺𑀥𑀸𑀦𑀁 𑀲𑀢𑀺 𑀲𑀸𑀫𑀢𑁆𑀣𑀺𑀬𑁂 𑀯𑀸𑀓𑁆𑀬𑁂 𑀯𑀘𑀦𑀻𑀬𑀲𑁆𑀲𑀸𑀢𑁆𑀣𑀲𑁆𑀲 𑀯𑀼𑀢𑁆𑀢𑀺𑀬𑀸 𑀓𑀣𑀦𑀁 𑀮𑀓𑁆𑀔𑀡𑀁 𑀲𑀪𑀸𑀯𑁄 𑀬𑁂𑀲𑀦𑁆𑀢𑁂 𑀅𑀪𑀺𑀥𑀸𑀦𑀮𑀓𑁆𑀔𑀡𑀸, 𑀢𑁂𑀲𑀁 𑀪𑀸𑀯𑁄 𑀢𑀢𑁆𑀢𑀁, 𑀢𑀩𑁆𑀩𑀸𑀤𑀺𑀲𑀫𑀸𑀧𑁆𑀬𑁂𑀯𑀫𑁂𑀯 𑀤𑀝𑁆𑀞𑀩𑁆𑀩𑀸. 𑀫𑀭𑀺𑀘𑁂𑀦 𑀅𑀪𑀺𑀲𑀗𑁆𑀔𑀢𑀁 𑀲𑀁𑀲𑀝𑁆𑀞𑀁 𑀯𑀸𑀢𑀺, 𑀲𑀮𑀸𑀓𑀸𑀬 𑀚𑀺𑀢𑀦𑁆𑀢𑀺 𑀯𑀺𑀕𑁆𑀕𑀳𑁄.

𑀬𑁄 ‘‘𑀤𑀺𑀲𑁆𑀲𑀦𑁆𑀢𑀜𑁆𑀜𑁂𑀧𑀺 𑀧𑀘𑁆𑀘𑀬𑀸’’𑀢𑀺 (𑁪-𑁧𑁨𑁦)

𑀧𑀯𑀼𑀢𑁆𑀢𑁂𑀧𑀻𑀢𑀺 𑀓𑀘𑁆𑀘𑀸𑀬𑀦𑁂𑀦 𑀧𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁂 ‘‘𑀅𑀜𑁆𑀜𑀲𑁆𑀫𑀺𑀁’’𑀢𑀺𑀲𑁆𑀫𑀺𑀁𑀡𑁄 𑀳𑁄𑀢𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑀸𑀢𑀸𑀧𑀺𑀢𑀼𑀦𑁆𑀦𑀁 ¶ 𑀫𑀸𑀢𑀸𑀧𑀺𑀢𑀭𑁄𑀢𑀺 𑀫𑀸𑀢𑀼𑀬𑀸 𑀫𑀸𑀢𑀸𑀧𑀺𑀢𑀭𑁄 𑀧𑀺𑀢𑀼𑀲𑁆𑀲 𑀫𑀸𑀢𑀸𑀧𑀺𑀢𑀭𑁄, 𑀦 𑀏𑀓𑀫𑁂𑀓𑀢𑁄 𑀤𑁆𑀯𑀻𑀲𑀽𑀢𑀺 𑀏𑀓𑀢𑁄 𑀏𑀓𑀢𑁄 𑀯𑀼𑀢𑁆𑀢𑀦𑀬𑁂𑀦 𑀤𑁆𑀯𑀻𑀲𑀼𑀤𑁆𑀯𑀻𑀲𑀼 𑀅𑀢𑁆𑀣𑁂𑀲𑀼 𑀦 𑀪𑀯𑀢𑀻𑀢𑀺 𑀅𑀢𑁆𑀣𑁄.

𑀫𑀸𑀢𑀼 𑀳𑀺𑀢𑁄, 𑀧𑀺𑀢𑀼 𑀳𑀺𑀢𑁄𑀢𑀺 𑀯𑀺𑀕𑁆𑀕𑀳𑁄.

𑀲𑁂𑀦 𑀭𑀽𑀧𑁂𑀦 𑀜𑀸𑀢𑁂𑀧𑀺 𑀯𑀺𑀲𑁂𑀲𑀭𑀽𑀧𑁂𑀦 𑀅𑀜𑁆𑀜𑀸𑀢𑁄 𑀅𑀜𑁆𑀜𑀸𑀢𑀯𑀺𑀲𑁂𑀲𑁄. 𑀓𑀝𑁆𑀞𑀸𑀤𑀺𑀫𑀬𑀸 𑀬𑀸 𑀧𑀝𑀺𑀫𑀸 𑀢𑀫𑁆𑀧𑀝𑀺𑀘𑁆𑀙𑀦𑁆𑀤𑀓𑀁. 𑀲𑀫𑁆𑀩𑀦𑁆𑀥𑁄 𑀲𑀲𑁆𑀲𑀸𑀫𑀻𑀮𑀓𑁆𑀔𑀡𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀫𑁆𑀩𑀦𑁆𑀥𑀺 𑀓𑀲𑁆𑀲𑀸𑀢𑀺 𑀓𑀺𑀁 𑀲𑀤𑁆𑀤𑀦𑀺𑀤𑁆𑀤𑀺𑀝𑁆𑀞𑁄, 𑀲𑁄𑀯 𑀯𑀺𑀲𑁂𑀲𑁄, 𑀲𑀫𑁆𑀩𑀦𑁆𑀥𑀺𑀯𑀺𑀲𑁂𑀲𑁄 𑀯𑀺𑀲𑀬𑁄 𑀅𑀲𑁆𑀲 𑀅𑀜𑁆𑀜𑀸𑀡𑀲𑁆𑀲𑀸𑀢𑀺 𑀲𑀫𑀸𑀲𑁄. 𑀧𑀬𑁄𑀕𑀸𑀲𑀫𑁆𑀪𑀯𑀸𑀢𑀺 𑀅𑀬𑀫𑀲𑁆𑀲𑁄𑀢𑀺 𑀯𑀼𑀢𑁆𑀢 𑀅𑀲𑁆𑀲𑀧𑁆𑀧𑀓𑀢𑀺𑀬𑀸𑀧𑀺 𑀧𑀬𑁄𑀕𑀸 𑀲𑀫𑁆𑀪𑀯𑀸. 𑀢𑀣𑀸𑀳𑀺 𑀬𑀤𑀺 𑀬𑀲𑁆𑀲𑀸𑀘𑁆𑀘𑀦𑁆𑀢𑀫𑀚𑀸𑀦𑀦𑀁 𑀲𑀺𑀬𑀸 𑀢𑀣𑀸 𑀲𑀢𑀺 𑀲𑀩𑁆𑀩𑀣𑀸 𑀯𑀢𑁆𑀣𑀼𑀚𑀸𑀦𑀦𑀸𑀪𑀸𑀯𑁂 𑀧𑀓𑀢𑀺𑀬𑁂𑀯 𑀦 𑀲𑀺𑀬𑀸, 𑀦 𑀳𑀺 𑀲𑀩𑁆𑀩𑀣𑀸 𑀅𑀯𑀺𑀜𑁆𑀜𑀸𑀢𑀢𑁆𑀣𑁄 𑀲𑀤𑁆𑀤𑁄 𑀧𑀬𑁄𑀕𑀫𑀳𑀭𑀢𑀺, 𑀢𑀲𑁆𑀫𑀸 𑀲𑀭𑀽𑀧𑁂𑀦 𑀜𑀸𑀢𑀲𑁆𑀲 𑀬𑀲𑁆𑀲 𑀯𑀺𑀲𑁂𑀲𑁄 𑀅𑀯𑀺𑀜𑁆𑀜𑀸𑀢𑁄, 𑀲𑁄𑀬𑁂𑀯𑀺𑀥 𑀅𑀜𑁆𑀜𑀸𑀢𑁄-𑀢𑀺𑀫𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑁂, 𑀅𑀜𑁆𑀜𑀸𑀢𑁄-𑀲𑁆𑀲𑁄𑀓𑀲𑁆𑀲 [𑀅𑀜𑁆𑀜𑀸𑀢𑁄 𑀲𑁂𑀲𑀜𑁆𑀜𑀲𑁆𑀲 (𑀧𑁄𑀢𑁆𑀣𑀓𑁂)] 𑀯𑀸 𑀓𑀼𑀢𑁄𑀢𑀺𑀯𑀸 𑀓𑀺𑀁 𑀲𑀪𑀸𑀯𑁄 𑀯𑁂𑀢𑀺 𑀳𑀺 𑀅𑀲𑁆𑀲𑀓𑁄𑀢𑀺. 𑀓𑀧𑁆𑀧𑀘𑁆𑀘𑀬𑀦𑁆𑀢𑁄 𑀳𑀢𑁆𑀣𑀺𑀓𑀇𑀘𑁆𑀘𑀬𑀦𑁆𑀦𑀸𑀫𑀥𑁂𑀬𑁆𑀬𑀁 𑀦𑀸𑀫𑀁 𑀬𑀲𑁆𑀲 𑀳𑀢𑁆𑀣𑀺𑀯𑀺𑀬𑀸𑀢𑀺 𑀤𑀲𑁆𑀲𑀺𑀢𑀧𑀝𑀺𑀪𑀸𑀕𑀲𑁆𑀲 𑀲𑁄 𑀓𑀧𑁆𑀧𑀘𑁆𑀘𑀬𑀦𑁆𑀢𑀦𑀸𑀫𑀥𑁂𑀬𑁆𑀬𑁄. 𑀅𑀪𑀺𑀦𑀺𑀯𑁂𑀲𑁂𑀦 𑀯𑀸 𑀲𑀺𑀚𑁆𑀛𑀦𑁆𑀢𑀺 𑀬𑀣𑀸 𑀅𑀚𑁆𑀚𑀼𑀦𑀸𑀤𑀺𑀯𑁂𑀲𑀥𑀸𑀭𑀺𑀦𑀺 𑀅𑀚𑁆𑀚𑀼𑀦𑀸𑀤𑀺𑀲𑀤𑁆𑀤𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀝𑀺𑀫𑀸𑀬𑀸𑀢𑀺 𑀏𑀢𑁆𑀣 𑀧𑀽𑀚𑀦𑀢𑁆𑀣𑀸 𑀏𑀯 𑀧𑀝𑀺𑀫𑀸 𑀕𑀳𑀺𑀢𑀸, 𑀫𑁄𑀭𑀲𑀫𑀸𑀦 𑀦𑀸𑀫𑀢𑁆𑀢𑀸 𑀫𑁄𑀭𑁄𑀯𑀺𑀬𑀸𑀢𑀺 𑀬𑁄𑀚𑀦𑀸, 𑀘𑀜𑁆𑀘𑀸 𑀢𑀺𑀡𑀧𑀼𑀭𑀺𑀲𑁄, 𑀇𑀥 𑀧𑀦 𑀢𑀁 𑀲𑀤𑀺𑀲𑁄 𑀧𑀼𑀭𑀺𑀲𑁄 𑀫𑀦𑀼𑀲𑁆𑀲𑁄 𑀘𑀜𑁆𑀘𑀸. 𑀅𑀓𑀲𑁆𑀫𑀸 𑀏𑀯 𑀆𑀓𑀲𑁆𑀫𑀺𑀓𑀁 ‘‘𑀲𑀓𑀢𑁆𑀣𑁂’’𑀢𑀺 (𑁪-𑁧𑁨𑁨) 𑀡𑀺𑀓𑁄. 𑀬𑀁𑀓𑀺𑀜𑁆𑀘𑀺 𑀅𑀩𑀼𑀤𑁆𑀥𑀺𑀧𑀼𑀩𑁆𑀩𑀓𑀁, 𑀢𑀫𑀸𑀓𑀲𑁆𑀫𑀺𑀓𑀁, 𑀢𑀲𑁆𑀫𑀺𑀁 𑀆𑀓𑀲𑁆𑀫𑀺𑀓𑁂𑀪𑀺𑀥𑁂𑀬𑁆𑀬𑁄 𑀲𑀢𑀺 𑀇𑀯𑀲𑀤𑁆𑀤𑀢𑁆𑀣𑁂 𑀯𑀢𑁆𑀢𑀫𑀸𑀦𑀢𑁄 𑀈𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀓𑁄 𑀘 𑀢𑀸𑀮𑀜𑁆𑀘 𑀨𑀮𑀁 𑀓𑀸𑀓𑀢𑀸𑀮𑀸𑀦𑀺, 𑀢𑁂𑀲𑀫𑀺𑀯 𑀫𑀺𑀮𑀦𑀁. 𑀅𑀚𑀸𑀔𑀕𑁆𑀕𑀸𑀦𑀫𑀺𑀯 𑀫𑀺𑀮𑀦𑀁 𑀬𑀤𑀸𑀓𑀲𑁆𑀫𑀺𑀓𑀁, 𑀓𑀺𑀜𑁆𑀘𑀺 𑀢𑀫 𑀚𑀸𑀔𑀕𑁆𑀕𑀻𑀬𑀁 ¶ , 𑀡𑁄 𑀇𑀯𑀢𑁆𑀣𑁂. 𑀲𑀓𑁆𑀓𑀭𑀦𑁆𑀢𑀺 ‘‘𑀲𑀁𑀬𑁄𑀕𑁂 𑀓𑁆𑀯𑀘𑀻’’𑀢𑀺 (𑁪-𑁧𑁨𑁫) 𑀯𑀼𑀤𑁆𑀥𑁆𑀬𑀪𑀸𑀯𑁄. 𑀫𑀼𑀦𑀻𑀯, 𑀩𑀸𑀮𑁄𑀯, 𑀓𑀼𑀮𑀺𑀲𑀫𑀺𑀯, 𑀏𑀓𑀲𑀸𑀮𑀸𑀇𑀯𑀸𑀢𑀺 𑀯𑀺𑀕𑁆𑀕𑀳𑁄, 𑀮𑁄𑀳𑀺𑀢𑁄𑀯 𑀮𑁄𑀳𑀺𑀢𑀺𑀓𑁄 𑀨𑀝𑀺𑀓𑀫𑀡𑀺.

𑀤𑁄𑀡𑀸𑀤𑀻𑀢𑁆𑀬𑀸𑀤𑀺𑀲𑀤𑁆𑀤𑁂𑀦 𑀔𑀸𑀭𑀲𑀢𑀸𑀤𑀬𑁄𑀧𑀺 𑀧𑀭𑀺𑀫𑀸𑀡𑀯𑀺𑀲𑁂𑀲𑀸 𑀕𑀬𑁆𑀳𑀦𑁆𑀢𑀺. 𑀲𑀗𑁆𑀔𑁆𑀬𑀸 𑀅𑀲𑀻𑀢𑀺𑀧𑀜𑁆𑀘𑀸𑀤𑀬𑁄, 𑀅𑀜𑁆𑀜𑀁 𑀯𑀸 𑀬𑀁𑀓𑀺𑀜𑁆𑀘𑀻𑀢𑀺 𑀉𑀧𑀟𑁆𑀠𑀓𑀸𑀬𑀸𑀤𑀺, 𑀲𑁄𑀴𑀲 𑀤𑁄𑀡𑀸 𑀏𑀓𑀸 𑀔𑀸𑀭𑀻. 𑀦𑀦𑀼 𑀧𑀜𑁆𑀘𑀓𑀁 𑀕𑀦𑁆𑀣𑀚𑀸𑀢𑀦𑁆𑀢𑀺 𑀯𑀢𑁆𑀯𑀸 𑀅𑀜𑁆𑀜𑀁 𑀯𑀸 𑀲𑀗𑁆𑀖𑀸𑀤𑀺𑀓𑀦𑁆𑀢𑀺 𑀯𑀼𑀢𑁆𑀢𑀁 𑀢𑀁 𑀓𑀣𑀁 𑀧𑀸𑀡𑀺𑀦𑀺𑀬𑁂𑀳𑀺 𑀯𑀺𑀬 ‘‘𑀲𑀗𑁆𑀔𑁆𑀬𑀸𑀬 𑀲𑀜𑁆𑀜𑀸𑀲𑀗𑁆𑀖𑀲𑀼𑀢𑁆𑀢𑀸𑀚𑁆𑀛𑀬𑀦𑁂𑀲𑀽’’𑀢𑀺 (𑁫-𑁧-𑁫𑁮) 𑀲𑀼𑀢𑁆𑀢𑀺𑀢𑀢𑁆𑀢𑀸𑀪𑀸𑀯𑀸𑀢𑀺 𑀫𑀦𑀲𑀺 𑀦𑀺𑀥𑀸𑀬 ‘𑀲𑀗𑁆𑀔𑁆𑀬𑀸𑀯𑀸𑀘𑀻𑀳𑀺’𑀘𑁆𑀘𑀸𑀤𑀺 𑀯𑀼𑀢𑁆𑀢𑀁. ‘‘𑀆𑀤𑀲𑀳𑀺 𑀲𑀗𑁆𑀔𑁆𑀬𑁂𑀬𑁂 𑀯𑀢𑁆𑀢𑀦𑁆𑀢𑀻’’𑀢𑀺 𑀧𑀜𑁆𑀘𑀲𑀤𑁆𑀤𑀲𑁆𑀲 𑀲𑀗𑁆𑀔𑁆𑀬𑁂𑀬𑁂 𑀯𑀼𑀢𑁆𑀢𑀢𑁆𑀢𑀸 𑀆𑀳- ‘𑀧𑀜𑁆𑀘𑀸𑀯𑀬𑀯𑀸’𑀢𑀺. 𑀧𑀭𑀺𑀫𑀸𑀡𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂 𑀲𑀗𑁆𑀔𑁆𑀬𑀸𑀦𑁂𑀧𑀺 𑀧𑀜𑁆𑀘𑀲𑀤𑁆𑀤𑁄𑀢𑀺 𑀫𑀜𑁆𑀜𑀫𑀸𑀦𑁄 𑀆𑀳- ‘𑀧𑀜𑁆𑀘𑀲𑀗𑁆𑀔𑁆𑀬𑀸𑀦𑀜𑁆𑀘𑁂’𑀢𑀺. 𑀧𑀜𑁆𑀘𑀸 𑀯𑀼𑀢𑁆𑀢𑀬𑁄𑀢𑀺 𑀧𑀜𑁆𑀘𑀯𑀸𑀭𑀸, 𑀭𑀽𑀧𑀸𑀦𑀻𑀢𑀺 𑀘 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀆𑀯𑀼𑀢𑁆𑀢𑀺𑀲𑀤𑁆𑀤𑀲𑁆𑀲𑁂 𑀯𑀸𑀢𑁆𑀣𑀁 𑀩𑁆𑀬𑀢𑁆𑀢𑀁 𑀓𑀭𑁄𑀢𑀺.

𑀦𑀦𑀼 𑀲𑀼𑀢𑁆𑀢𑁂 𑀲𑀗𑁆𑀔𑁆𑀬𑀸𑀬𑀦𑁆𑀢𑀺 𑀦 𑀯𑀼𑀢𑁆𑀢𑀁 𑀓𑀢𑁆𑀬𑀸𑀤𑀬𑁄 𑀘 𑀧𑀬𑁄𑀕𑀸 𑀲𑀗𑁆𑀔𑁆𑀬𑀸 𑀧𑀭𑀺𑀫𑀸𑀡𑁂𑀬𑁂𑀯 𑀤𑀺𑀲𑁆𑀲𑀦𑁆𑀢𑀺 𑀓𑀣𑀁 𑀦𑀸𑀫𑁂𑀢𑁆𑀣𑀸𑀬𑀁 𑀯𑀺𑀥𑀻𑀢𑀺 𑀆𑀳- ‘𑀩𑀳𑀼𑀮𑁂’𑀘𑁆𑀘𑀸𑀤𑀺. 𑀲𑀗𑁆𑀔𑁆𑀬𑀸𑀧𑀭𑀺𑀫𑀸𑀡𑁂𑀬𑁂𑀯𑀸𑀬𑀁 𑀯𑀺𑀥𑀻𑀢𑀺 𑀓𑀺𑀁 𑀲𑀤𑁆𑀤𑁂 𑀲𑀗𑁆𑀔𑁆𑀬𑀸𑀧𑀭𑀺𑀫𑀸𑀡 𑀯𑀺𑀲𑀬𑁂𑀬𑁂𑀯 𑀯𑀢𑁆𑀢𑀫𑀸𑀦𑁂 𑀅𑀬𑀁 𑀭𑀢𑁆𑀬𑀸𑀤𑀺𑀓𑁄 𑀯𑀺𑀥𑀻𑀢𑀺 𑀅𑀢𑁆𑀣𑁄, 𑀦𑀦𑀼 𑀘𑁂𑀢𑁆𑀣 𑀓𑀺𑀁 𑀲𑀤𑁆𑀤𑁄 𑀧𑀜𑁆𑀳𑁂 𑀯𑀢𑁆𑀢𑀫𑀸𑀦𑁄 𑀓𑀣𑀁 𑀲𑀗𑁆𑀔𑁆𑀬𑀸𑀧𑀭𑀺𑀫𑀸𑀡𑁂 𑀯𑀢𑁆𑀢𑀢𑁂𑀢𑀺 𑀯𑀼𑀘𑁆𑀘𑀢𑁂, 𑀬𑀚𑁆𑀚𑀧𑀺 𑀲𑀗𑁆𑀔𑁆𑀬𑀸𑀧𑀭𑀺𑀫𑀸𑀡𑁂 𑀦 𑀯𑀢𑁆𑀢𑀢𑁂, 𑀢𑀣𑀸𑀧𑀺 𑀲𑀗𑁆𑀔𑁆𑀬𑀸𑀧𑀭𑀺𑀫𑀸𑀡𑀲𑁆𑀲 𑀧𑀼𑀘𑁆𑀙𑀺𑀬𑀫𑀸𑀦𑀢𑁆𑀢𑀸 𑀲𑀗𑁆𑀔𑁆𑀬𑀸𑀧𑀭𑀺𑀫𑀸𑀡𑀯𑀺𑀲𑀬𑁂 𑀯𑀢𑁆𑀢𑀢𑁂 𑀯𑀸𑀢𑀺. 𑀩𑀳𑀼𑀮𑀸𑀥𑀺𑀓𑀸𑀭 𑀧𑀬𑁄𑀕𑀲𑀸𑀫𑀢𑁆𑀣𑀺𑀬𑀳𑁂𑀢𑀼𑀦𑀺𑀤𑀲𑁆𑀲𑀦𑁂 𑀨𑀮𑀫𑀸𑀳- ‘𑀬𑀢𑁆𑀭𑀢𑁆𑀯𑀺’𑀘𑁆𑀘𑀸𑀤𑀺, 𑀧𑀭𑀺𑀘𑁆𑀙𑁂𑀤𑀓𑀢𑁆𑀢𑁂𑀦 𑀧𑀭𑀺𑀫𑀸𑀡𑀓𑀢𑁆𑀢𑁂𑀦. 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 ‘‘𑀬𑀤𑀸𑀓𑀺𑀫𑀺𑀤𑀁 𑀲𑀗𑁆𑀔𑁆𑀬𑀸 𑀧𑀭𑀺𑀫𑀸𑀡𑀫𑁂𑀲𑀁 𑀤𑀲𑀦𑁆𑀦𑀁 𑀦 𑀓𑀺𑀜𑁆𑀘𑀺 𑀅𑀧𑁆𑀧𑀓𑀫𑁂𑀯𑁂𑀢𑀦𑁆𑀢𑀺 𑀲𑀗𑁆𑀔𑁆𑀬𑀸𑀧𑀭𑀺𑀫𑀸𑀡𑀫𑁂𑀯 𑀓𑀺𑀁 𑀲𑀤𑁆𑀤𑁂𑀦 𑀦𑀺𑀦𑁆𑀤𑀻𑀬𑀢𑁂, 𑀢𑀤𑀸𑀧𑀺 𑀲𑀗𑁆𑀔𑁆𑀬𑀸 𑀧𑀭𑀺𑀫𑀸𑀡𑀲𑁆𑀲 𑀦𑀺𑀦𑁆𑀤𑀻𑀬𑀫𑀸𑀦𑀢𑁆𑀢𑀸 𑀲𑀗𑁆𑀔𑁆𑀬𑀸𑀧𑀭𑀺𑀫𑀸𑀡𑀯𑀺𑀲𑀬𑀢𑁆𑀢𑀫𑁂𑀯𑁂𑀢𑀺 𑀔𑁂𑀧𑁂 𑀯𑀢𑁆𑀢𑀫𑀸𑀦𑀸𑀧𑀺 𑀓𑀺𑀁 𑀲𑀤𑁆𑀤𑀸 𑀭𑀢𑀺𑀘𑁆𑀘𑀸𑀤𑀺 𑀲𑀺𑀬𑀸, 𑀩𑀳𑀼𑀮𑀸𑀥𑀺𑀓𑀸𑀭𑀸𑀤𑀺𑀢𑁄𑀯 𑀧𑀦𑁂𑀢𑁆𑀣 𑀦 𑀲𑀺𑀬𑀸’’𑀢𑀺. 𑀭𑀓𑀸𑀭𑀸𑀦𑀼𑀩𑀦𑁆𑀥𑀸 𑀇𑀲𑀤𑁆𑀤𑀮𑁄𑀧𑀢𑁆𑀣𑀸𑀢𑀺 𑀬𑁄𑀚𑀦𑀸.

𑀩𑀼𑀪𑀼𑀓𑁆𑀔𑀸𑀧𑀺𑀧𑀸𑀲𑀧𑁆𑀧𑀓𑀢𑀻𑀳𑀺 ¶ 𑀔𑀲𑀦𑁆𑀢𑀸𑀳𑀺 𑀅𑀓𑀫𑁆𑀫𑀯𑀘𑀦𑀺𑀘𑁆𑀙𑀸𑀬𑀁 ‘‘𑀕𑀫𑀦𑀢𑁆𑀣𑀸 𑀓𑀫𑁆𑀫𑀓𑀸𑀥𑀸𑀭𑁂 𑀘𑀸’’𑀢𑀺 (𑁫-𑁫𑁯) 𑀓𑀢𑁆𑀢𑀭𑀺 𑀓𑁆𑀢𑁂 𑀜𑀺𑀫𑁆𑀳𑀺 𑀘 𑀩𑀼𑀪𑀼𑀓𑁆𑀔𑀺𑀢𑁄 𑀧𑀺𑀧𑀸𑀲𑀺𑀢𑁄𑀢𑀺 𑀲𑀺𑀤𑁆𑀥𑁂𑀧𑀺 𑀯𑀢𑁆𑀢𑀫𑀸𑀦𑁂 𑀧𑀬𑁄𑀕𑀢𑁆𑀣𑀁 𑀩𑀼𑀪𑀼𑀓𑁆𑀔𑀸𑀧𑀺𑀧𑀸𑀲𑀸𑀢𑀺 𑀧𑀸𑀞𑁄.

𑀲𑀩𑁆𑀩𑀫𑁆𑀧𑀭𑀺𑀘𑁆𑀙𑁂𑀤𑀭𑀽𑀧𑀦𑁆𑀢𑀺 𑀉𑀫𑁆𑀫𑀸𑀦𑀧𑀭𑀺𑀫𑀸𑀡𑀸𑀤𑀺𑀓𑀁 𑀲𑀩𑁆𑀩𑀁 𑀧𑀭𑀺𑀘𑁆𑀙𑁂𑀤𑀭𑀽𑀧𑀁. 𑀢𑀢𑁆𑀭 𑀘 𑀉𑀘𑁆𑀘𑀢𑁆𑀢𑁂𑀦 𑀫𑀸𑀦𑀫𑀼𑀫𑁆𑀫𑀸𑀦𑀁, 𑀲𑀩𑁆𑀩𑀢𑁄 𑀫𑀸𑀦𑀁 𑀧𑀭𑀺𑀫𑀸𑀡𑀁.

‘‘𑀧𑀫𑀸𑀡𑀧𑀭𑀺𑀫𑀸𑀡𑁂𑀳𑀺 𑀲𑀗𑁆𑀔𑁆𑀬𑀸𑀬𑀘𑀸𑀧𑀺 𑀲𑀁𑀲𑀬𑁂 𑀫𑀢𑁆𑀢𑁄𑀯𑀢𑁆𑀢𑀩𑁆𑀩𑁄’’𑀢𑀺 (𑁫-𑁨-𑁩𑁭) 𑀧𑀸𑀡𑀺𑀦𑀺𑀬𑀯𑀢𑁆𑀢𑀩𑁆𑀩𑀓𑀸𑀭𑀯𑀘𑀦𑀁, 𑀢𑀢𑁆𑀣 𑀧𑀫𑀸𑀡 𑀫𑀸𑀬𑀸𑀫𑁄. 𑀲𑀗𑁆𑀔𑁆𑀬𑀸𑀬𑀸𑀢𑀺 𑀧𑀜𑁆𑀘𑀫𑀻. 𑀏𑀢𑁂𑀳𑀺 𑀲𑀁𑀲𑀬𑁂 𑀫𑀢𑁆𑀢𑁄 𑀯𑀢𑁆𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀯𑀺𑀤𑀢𑁆𑀣𑀺𑀫𑀢𑁆𑀢𑀁 𑀭𑀢𑀦𑀫𑀢𑁆𑀢𑀁 𑀯𑀸𑀢𑀺𑀆𑀤𑀻𑀦𑀺 𑀓𑀫𑁂𑀦 𑀢𑀢𑁆𑀣𑁄𑀤𑀸𑀳𑀭𑀡𑀸𑀦𑀺.

𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀯𑀢𑁆𑀢𑀩𑁆𑀩𑀯𑀘𑀦𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀝𑀺𑀓𑁆𑀔𑀺𑀢𑁆𑀢𑁂 𑀢𑀲𑁆𑀫𑀺𑀁 𑀯𑀺𑀤𑀢𑁆𑀣𑀺𑀫𑀢𑁆𑀢𑀁 𑀭𑀢𑀦𑀫𑀢𑁆𑀢𑀁 𑀯𑀸𑀢𑀺𑀆𑀤𑀺(𑀦𑀸) 𑀬𑀁𑀓𑀺𑀜𑁆𑀘𑀺 𑀤𑀡𑁆𑀟𑀧𑀼𑀩𑁆𑀩𑀡𑁆𑀡𑀸𑀤𑀺𑀓𑀁 [𑀧𑀡𑁆𑀡𑀸𑀤𑀺𑀓𑀁 (𑀧𑁄𑀢𑁆𑀣𑀓𑁂)] 𑀲𑀁𑀲𑀬𑀺𑀢𑀁, 𑀢𑁂𑀦 𑀫𑀸𑀦𑀲𑀗𑁆𑀔𑀸𑀢𑀲𑁆𑀲 𑀧𑀭𑀺𑀘𑁆𑀙𑁂𑀤𑀲𑁆𑀲𑀸𑀪𑀸𑀯𑀸 𑀓𑀣𑀫𑁂𑀢𑁂 𑀧𑀬𑁄𑀕𑀸 𑀲𑀺𑀬𑀼𑀦𑁆𑀢𑀺 𑀆𑀲𑀗𑁆𑀓𑀺𑀬 𑀢𑀢𑁆𑀣 𑀓𑀸𑀭𑀡𑀫𑀸𑀳- ‘𑀢𑀣𑀸𑀪𑁆𑀬𑀽𑀳𑀦𑀢𑁄 𑀲𑀺𑀤𑁆𑀥𑀢𑁆𑀢𑀸’𑀢𑀺. 𑀢𑀣𑀸𑀪𑁆𑀬𑀽𑀳𑀦𑀢𑁄𑀢𑀺 𑀯𑀺𑀤𑀢𑁆𑀣𑀺𑀫𑀸𑀦𑀫𑁆𑀧𑀫𑀸𑀡𑀫𑀲𑁆𑀲 𑀭𑀢𑀦𑀫𑁆𑀫𑀸𑀦 𑀫𑀲𑁆𑀲𑀸𑀢𑁆𑀬𑀸𑀤𑀺𑀦𑀸 𑀢𑁂𑀦𑀧𑁆𑀧𑀓𑀸𑀭𑁂𑀦 𑀅𑀪𑁆𑀬𑀽𑀳𑀦𑀢𑁄 𑀅𑀪𑁆𑀬𑀼𑀧𑀕𑀫𑀢𑁄𑀢𑀺 𑀅𑀢𑁆𑀣𑁄. 𑀲𑀁𑀲𑀬𑁄 𑀘 𑀦𑀸𑀫 𑀉𑀪𑀬𑀧𑀓𑁆𑀔𑀧𑀭𑀸𑀫𑀲𑀦𑁂 𑀲𑀢𑀺 𑀲𑀺𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀫𑀩𑁆𑀪𑀽𑀳𑀦𑀁 𑀲𑀸𑀥𑁂𑀢𑀼𑀫𑀸𑀳-𑀦𑀸𑀦𑁆𑀢𑀭𑁂𑀦𑁂’𑀘𑁆𑀘𑀸𑀤𑀺. 𑀧𑀓𑁆𑀔𑀤𑁆𑀯𑀬𑁂𑀳𑀻𑀢𑀺 𑀯𑀺𑀤𑀢𑁆𑀣𑀺 𑀫𑀸𑀦𑀫𑀲𑁆𑀲 𑀭𑀢𑀦𑀫𑁆𑀫𑀸𑀦𑀫𑀲𑁆𑀲𑀸𑀢𑀺 𑀏𑀯𑀫𑀸𑀤𑀺𑀓𑁂𑀳𑀺 𑀧𑀓𑁆𑀔𑀤𑁆𑀯𑀬𑁂𑀳𑀺. 𑀅𑀪𑁆𑀬𑀽𑀳𑀦𑀁 𑀲𑀁𑀲𑀬𑀲𑁆𑀲𑀸𑀢𑀺 𑀕𑀫𑁆𑀬𑀢𑁂. 𑀚𑀡𑁆𑀡𑀼 𑀫𑀸𑀦𑀫𑀲𑁆𑀲 𑀚𑀡𑁆𑀡𑀼𑀢𑀕𑁆𑀖𑀁.

𑀧𑀼𑀭𑀺𑀲𑁄 𑀧𑀫𑀸𑀡𑀫𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄.

𑀉𑀧𑀸𑀥𑁆𑀬𑀦𑁆𑀢𑀭𑁄𑀧𑀸𑀤𑀸𑀦𑀸𑀢𑀺 ‘𑀅𑀁𑀲𑁂’𑀢𑀺 𑀦𑀺𑀫𑀺𑀢𑁆𑀢𑀦𑁆𑀢𑀭𑁄𑀧𑀸𑀤𑀸𑀦𑀸 𑀦𑀺𑀯𑀢𑁆𑀢𑀢𑀻𑀢𑀺 𑀬𑁄𑀚𑀦𑀸.

𑀲𑀘𑁆𑀘𑀼𑀢𑀻𑀲𑀸𑀲𑀤𑀲𑀦𑁆𑀢𑀸𑀬 ¶ 𑀲𑀗𑁆𑀔𑁆𑀬𑀸𑀬 𑀧𑀞𑀫𑀦𑁆𑀢𑀸𑀬 𑀅𑀲𑁆𑀫𑀺𑀁 𑀲𑀢𑀲𑀳𑀲𑁆𑀲𑁂 𑀅𑀥𑀺𑀓𑀸 𑀲𑀗𑁆𑀔𑁆𑀬𑀸𑀢𑀺 𑀅𑀢𑁆𑀣𑁂 𑀟𑁄 𑀪𑀯𑀢𑀻𑀢𑀺 𑀲𑀼𑀢𑁆𑀢𑀢𑁆𑀣𑁄. 𑀲𑀘𑁆𑀘𑀼𑀢𑀻𑀲𑀸 𑀲𑀤𑀲𑀦𑁆𑀢𑀸𑀢𑀺 𑀧𑀞𑀫𑀸𑀯𑀘𑀦𑀁 𑀧𑀞𑀫𑀦𑁆𑀢𑀢𑁄 𑀯𑀺𑀥𑀺𑀜𑀸𑀧𑀦𑀢𑁆𑀣𑀁. 𑀦𑀦𑀼 𑀘 𑀲𑀼𑀢𑁆𑀢𑁂 ‘𑀲𑀢𑀲𑀳𑀲𑁆𑀲 𑀲𑀢𑀲𑀳𑀲𑁆𑀲𑁂 𑀟𑁄’𑀢𑀺 𑀦 𑀯𑀼𑀢𑁆𑀢𑀁, 𑀢𑀣𑀸 𑀲𑀢𑀺 𑀯𑀼𑀢𑁆𑀢𑀺𑀬𑀁 𑀓𑀣𑀁 ‘𑀲𑀢𑀁 𑀲𑀳𑀲𑁆𑀲𑀁 𑀲𑀢𑀲𑀳𑀲𑁆𑀲𑀁 𑀯𑀸’𑀢𑀺 𑀯𑀼𑀢𑁆𑀢𑀦𑁆𑀢𑁆𑀬𑀸𑀲𑀗𑁆𑀓𑀺𑀬𑀸𑀳-𑀉𑀪𑀬𑀣𑀸𑀯𑀕𑀫𑀸’𑀢𑀺𑀆𑀤𑀺. 𑀉𑀪𑀬𑀣𑀸𑀯𑀕𑀫𑀸𑀢𑀺 𑀲𑀢𑀁 𑀲𑀳𑀲𑁆𑀲𑀦𑁆𑀢𑀺 𑀘 𑀲𑀢𑀲𑀳𑀲𑁆𑀲𑀦𑁆𑀢𑀺 𑀘 𑀉𑀪𑀬𑀧𑁆𑀧𑀓𑀸𑀭𑁂𑀦𑀸𑀯𑀕𑀫𑀸, 𑀉𑀪𑀬𑀣𑀸𑀯𑀕𑀫𑁄 𑀧𑀬𑁄𑀕 𑀤𑀲𑁆𑀲𑀦𑀜𑁆𑀘𑁂𑀢𑁆𑀣 𑀏𑀯𑀁 𑀯𑀺𑀯𑀭𑀡𑁂 𑀓𑀸𑀭𑀡𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀘𑁆𑀘𑀬𑀢𑁆𑀣𑁂𑀦 𑀲𑀫𑀸𑀦𑀚𑀸𑀢𑀺𑀬𑁂 𑀧𑀓𑀢𑁆𑀬𑀢𑁆𑀣𑁂 𑀲𑀢𑀻𑀢𑀺 𑀬𑁂𑀦𑀓𑁂𑀦𑀘𑀺 𑀲𑀼𑀯𑀡𑁆𑀡𑀓𑀳𑀸𑀧𑀡𑀸𑀤𑀺𑀦𑀸 𑀧𑀘𑁆𑀘𑀬𑀢𑁆𑀣𑁂𑀦 𑀲𑀫𑀸𑀦𑀚𑀸𑀢𑀺𑀬𑁂. 𑀲𑀼𑀯𑀡𑁆𑀡𑀫𑀸𑀲𑀓𑀤𑀻𑀦 [𑀲𑀼𑀯𑀡𑁆𑀡𑀓𑀳𑀸𑀧𑀡𑀸𑀤𑀻𑀦𑀁 (𑀧𑁄𑀢𑁆𑀣𑀓𑁂)] 𑀫𑀲𑀫𑀸𑀦 𑀚𑀸𑀢𑀺𑀬𑀸𑀦𑀁. 𑀅𑀓𑁂𑀯𑀮𑀁 𑀘𑁄𑀤𑀸𑀳𑀭𑀡𑀁 𑀤𑀲𑁆𑀲𑁂𑀢𑀼𑀁 ‘𑀏𑀓𑀯𑀻𑀲’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀲𑀤𑁆𑀤𑀸𑀦𑀫𑀺𑀥 𑀧𑀘𑁆𑀘𑀬𑀕𑁆𑀕𑀳𑀡𑀧𑀭𑀺𑀪𑀸𑀲𑀸𑀯𑀢𑀸𑀭𑁄 𑀦𑀢𑁆𑀣𑀺.

𑀦𑀦𑀼 𑀘 𑀲𑀗𑁆𑀔𑁆𑀬𑀸𑀲𑀤𑁆𑀤𑁄 𑀲𑀗𑁆𑀔𑁆𑀬𑀸𑀦𑁂 𑀲𑀗𑁆𑀔𑁆𑀬𑁂𑀬𑁆𑀬𑁂 𑀘 𑀯𑀢𑁆𑀢𑀢𑁂, 𑀓𑀣𑀫𑁂𑀢𑁆𑀣 𑀲𑀗𑁆𑀔𑁆𑀬𑀸𑀦𑁂𑀯𑀲𑀺𑀢𑀸 𑀯𑀼𑀢𑁆𑀢𑀺 𑀬𑁂𑀦𑁂𑀯𑀁 𑀯𑀺𑀯𑀭𑀡𑀁 𑀓𑀢𑀫𑀺𑀘𑁆𑀘𑀸𑀳- ‘𑀬𑀤𑀺𑀧𑀺’𑀘𑁆𑀘𑀸𑀤𑀺, 𑀧𑀘𑁆𑀘𑀸𑀲𑀦𑁆𑀦𑀁 𑀲𑀗𑁆𑀔𑁆𑀬𑀸𑀲𑀤𑁆𑀤𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀫𑀺𑀦𑀸 𑀘 𑀓𑀭𑀡𑀲𑀸𑀥𑀦𑁄-𑀬𑀁 𑀧𑀽𑀭𑀡𑀲𑀤𑁆𑀤𑁄𑀢𑀺 𑀯𑀺𑀜𑁆𑀜𑀸𑀧𑁂𑀢𑀺. 𑀬𑀢𑁄𑀢𑀺 𑀯𑀼𑀢𑁆𑀢𑀬𑀁 𑀲𑀤𑁆𑀤𑀲𑀫𑁆𑀩𑀦𑁆𑀥𑀺𑀦𑀸 𑀢𑀁𑀲𑀤𑁆𑀤𑁂𑀦 𑀲𑁂𑀢𑀺 𑀉𑀮𑁆𑀮𑀺𑀗𑁆𑀕𑀺𑀢𑀲𑁆𑀲 𑀲𑀗𑁆𑀔𑁆𑀬𑀸𑀢𑀺𑀅𑀢𑁆𑀣𑀫𑀼𑀧𑀤𑀲𑁆𑀲𑀺𑀬 𑀲𑀸𑀬𑁂𑀯 𑀧𑀽𑀭𑀻𑀬𑀢𑁂𑀢𑀻𑀫𑀲𑁆𑀲 𑀓𑀫𑁆𑀫𑀪𑀸𑀯𑁂𑀦 𑀢𑀺𑀝𑁆𑀞𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀢𑁂𑀦 𑀧𑀽𑀭𑀡𑁂𑀦 𑀧𑀽𑀭𑀻𑀬𑀢𑁂’𑀢𑀺 𑀆𑀳.

𑀲𑀫𑁆𑀧𑀚𑁆𑀚𑀢𑁂𑀢𑀺 𑀧𑀽𑀭𑀻𑀬𑀢𑁂𑀢𑁆𑀬𑀲𑁆𑀲𑀢𑁆𑀣𑀫𑀸𑀘𑀺𑀓𑁆𑀔𑀢𑀺. 𑀅𑀦𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 ‘‘(𑀦) 𑀖𑀝𑀺𑀓𑀸𑀤𑀻𑀦𑀫𑀺𑀯 𑀤𑀩𑁆𑀩𑀸𑀦𑀁 𑀤𑀩𑁆𑀩𑀦𑁆𑀢𑀭𑁂 𑀦𑀸𑀢𑀺𑀭𑀺𑀢𑁆𑀢𑀻𑀓𑀭𑀡𑀁 𑀲𑀗𑁆𑀔𑁆𑀬𑀸𑀬 𑀧𑀽𑀭𑀡𑀁 𑀓𑀺𑀜𑁆𑀘𑀭𑀳𑀺 𑀢𑀲𑁆𑀲 𑀲𑀫𑀧𑁆𑀧𑀢𑁆𑀢𑀺𑀬𑁂𑀯𑀸’’𑀢𑀺. 𑀅𑀣 𑀓𑀸𑀬𑀁 𑀯𑀘𑁄𑀬𑀼𑀢𑁆𑀢𑀺 ‘𑀲𑀸𑀲𑀗𑁆𑀔𑁆𑀬𑀸 𑀧𑀽𑀭𑀻𑀬𑀢𑁂 𑀬𑁂𑀦𑁂’𑀢𑀺, 𑀬𑀸𑀯𑀢𑀸 𑀲𑀸𑀢𑀺 𑀬𑀲𑁆𑀫𑀸 𑀧𑀘𑁆𑀘𑀬𑁄 𑀯𑀺𑀳𑀺𑀢𑁄 𑀢𑀲𑁆𑀲 𑀲𑀗𑁆𑀔𑁆𑀬𑀸𑀲𑀤𑁆𑀤𑀲𑁆𑀲 𑀧𑀭𑀸𑀫𑀸𑀲𑁄 𑀢𑀲𑁆𑀲 𑀘 𑀧𑀽𑀭𑀡𑁂𑀦 𑀅𑀪𑁂𑀤𑁄𑀘𑁆𑀘𑀸𑀲𑀗𑁆𑀓𑀺𑀬𑀸𑀳- ‘𑀅𑀪𑁂𑀤𑁂𑀦𑁄𑀘𑁆𑀘𑀢𑁂 𑀲𑀗𑁆𑀔𑁆𑀬𑀸 𑀧𑀽𑀭𑀻𑀬𑀢𑁂 𑀬𑁂𑀦𑁂𑀢𑀻’𑀢𑀺 𑀅𑀪𑀺𑀥𑀸𑀦𑀸𑀪𑀺𑀥𑁂𑀬𑁆𑀬𑀸𑀦𑀫𑀪𑁂𑀤𑁄𑀧𑀘𑀸𑀭𑁂𑀦 𑀯𑀼𑀘𑁆𑀘𑀢𑀻𑀢𑁆𑀬𑀢𑁆𑀣𑁄, 𑀲𑀗𑁆𑀔𑁆𑀬𑁂𑀬𑁆𑀬𑀧𑀽𑀭𑀡𑁂 ¶ 𑀟𑁄 𑀦 𑀳𑁄𑀢𑀻𑀢𑀺 𑀯𑀢𑁆𑀯𑀸 𑀢𑀤𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀫𑀸𑀳- ‘𑀤𑁆𑀯𑀸𑀤𑀲𑀦𑁆𑀦’𑀫𑀺𑀘𑁆𑀘𑀸𑀤𑀺. 𑀲𑁄 𑀖𑀝𑁄 𑀢𑀸𑀲𑀁 𑀖𑀝𑀺𑀓𑀸𑀦𑀁 𑀧𑀽𑀭𑀡𑁄 𑀤𑀩𑁆𑀩𑀸𑀦𑀁 𑀤𑀩𑁆𑀩𑀦𑁆𑀢𑀭𑁂 𑀦𑀸𑀢𑀺 𑀭𑀺𑀢𑁆𑀢𑀻𑀓𑀭𑀡𑀯𑀲𑁂𑀦. 𑀯𑀻𑀲𑀢𑀺𑀬𑀸 𑀧𑀽𑀭𑀡𑁄𑀢𑀺𑀆𑀤𑀺𑀦𑀸 𑀯𑀺𑀕𑁆𑀕𑀳𑁄.

𑀓𑀘𑁆𑀘𑀸𑀬𑀦𑁂𑀦 ‘‘𑀤𑁆𑀯𑀺𑀢𑀻𑀳𑀺 𑀢𑀺𑀬𑁄’’𑀢𑀺 (𑁨-𑁮-𑁪𑁨) 𑀲𑀼𑀢𑁆𑀢𑁂𑀦 𑀤𑁆𑀯𑀺𑀢𑀺𑀲𑀤𑁆𑀤𑁂𑀳𑀺 𑀢𑀺𑀬𑀧𑁆𑀧𑀘𑁆𑀘𑀬𑀁 𑀯𑀺𑀥𑀸𑀬 ‘‘𑀢𑀺𑀬𑁂 𑀤𑀼𑀢𑀸𑀧𑀺 𑀘𑀸’’𑀢𑀺 (𑁨-𑁮-𑁪𑁩) 𑀤𑁆𑀯𑀺𑀢𑀻𑀦𑀁 𑀤𑀼𑀢𑀸𑀤𑁂𑀲𑁂𑀦 𑀤𑀼𑀢𑀺𑀬𑀁 𑀢𑀢𑀺𑀬𑀦𑁆𑀢𑀺 𑀘 ‘‘𑀘𑀢𑀼𑀙𑁂𑀳𑀺 𑀣𑀞𑀸’’𑀢𑀺 (𑁨-𑁮-𑁪𑁧) 𑀲𑀼𑀢𑁆𑀢𑁂𑀦 𑀘𑀢𑀼𑀢𑁄 𑀣𑀧𑁆𑀧𑀘𑁆𑀘𑀬𑀁 𑀯𑀺𑀥𑀸𑀬 𑀤𑁆𑀯𑀺𑀢𑁆𑀢𑁂𑀦 𑀘𑀢𑀼𑀢𑁆𑀣𑀦𑁆𑀢𑀺 𑀘 𑀦𑀺𑀧𑁆𑀨𑀸𑀤𑀺𑀢𑀁. 𑀇𑀥 𑀢𑀣𑀸 𑀪𑀸𑀯𑁂𑀦 𑀓𑀣𑀁 𑀢𑁂 𑀲𑀺𑀚𑁆𑀛𑀦𑁆𑀢𑀻𑀢𑀺 𑀆𑀲𑀗𑁆𑀓𑀺𑀬 𑀯𑀼𑀢𑁆𑀢𑀺𑀬𑀁 ‘𑀓𑀣’𑀫𑀺𑀘𑁆𑀘𑀸𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘𑀲𑀗𑁆𑀔𑁆𑀬𑁂’𑀘𑁆𑀘𑀸𑀤𑀺. 𑀯𑀼𑀢𑁆𑀢𑀺𑀬𑀁 ‘𑀤𑀼𑀢𑀺𑀬𑀲𑁆𑀲𑀸’𑀢𑀺𑀆𑀤𑀺𑀦𑀸 𑀲𑀼𑀢𑁆𑀢𑁂𑀓𑀤𑁂𑀲𑀸 𑀤𑀲𑁆𑀲𑀺𑀢𑀸𑀢𑀺 𑀢𑀸𑀦𑀺 𑀲𑀫𑁆𑀧𑀼𑀡𑁆𑀡𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘𑀤𑀼𑀢𑀺𑀬𑀲𑁆𑀲𑀸’𑀢𑀺𑀆𑀤𑀺𑀦𑀸 ‘𑀘𑀢𑀼𑀢𑁆𑀣𑀢𑀢𑀺𑀬𑀸𑀦’𑀫𑀺𑀘𑁆𑀘𑀸𑀤𑀺𑀦𑀸 𑀘 𑀯𑀼𑀢𑁆𑀢𑀸𑀦𑀺.

𑀲𑀗𑁆𑀔𑁆𑀬𑀸𑀯𑀘𑀦𑀲𑁆𑀲 𑀕𑀳𑀡𑁂 𑀓𑁄 𑀤𑁄𑀲𑁄𑀘𑁆𑀘𑀸𑀳-‘𑀲𑀗𑁆𑀔𑁆𑀬𑀸𑀯𑀸𑀘𑀺’𑀘𑁆𑀘𑀸𑀤𑀺. 𑀩𑀳𑀼𑀢𑁆𑀢𑀯𑀺𑀲𑀬𑁂 𑀧𑀬𑁄𑀕𑁄 𑀦 𑀲𑀺𑀬𑀸𑀢𑀺 𑀲𑀗𑁆𑀔𑁆𑀬𑀸𑀯𑀘𑀦𑀲𑁆𑀲 𑀏𑀓𑀢𑁆𑀣𑁂 𑀦𑀺𑀬𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀏𑀓𑀸𑀓𑀻𑀳𑀺𑀘𑁆𑀘𑀲𑁆𑀲 𑀅𑀢𑁆𑀣𑀫𑀸𑀘𑀺𑀓𑁆𑀔𑀢𑀺 𑀧𑀥𑀸𑀦𑀪𑀽𑀢𑁂𑀳𑁂𑀯’𑀘𑁆𑀘𑀸𑀤𑀺𑀦𑀸. 𑀉𑀧𑀧𑀚𑁆𑀚𑀓𑁂 𑀩𑀳𑀼𑀢𑁆𑀢𑀯𑀺𑀲𑀬𑁂 𑀧𑀬𑁄𑀕𑁄𑀢𑁆𑀬𑀧𑁂𑀓𑁆𑀔𑀢𑁂.

𑀢𑀭𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑁂𑀧𑀺 𑀢𑁂𑀳𑀺 𑀢𑀭𑁄 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀯𑀘𑁆𑀙𑀸𑀤𑀻𑀳𑀻𑀢𑀺 𑀲𑀼𑀢𑀢𑁆𑀢𑀸 𑀧𑀦 𑀯𑀘𑁆𑀙𑀸𑀤𑀻𑀦𑀦𑁆𑀢𑀺 𑀘 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀘𑁆𑀙𑀸𑀤𑀻𑀦𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀺𑀕𑀦𑁆𑀣𑁄𑀧𑀤𑀲𑁆𑀲𑀦𑀁. 𑀦𑀦𑀼 𑀢𑀦𑀼𑀢𑁆𑀢𑁂 𑀯𑀯𑀘𑁆𑀙𑀸𑀤𑀻𑀳𑀺 𑀧𑀘𑁆𑀘𑀬𑁄 𑀯𑀺𑀥𑀻𑀬𑀢𑁂, 𑀬𑁂 𑀘 𑀲𑀭𑀻𑀭𑁂𑀦 𑀓𑀺𑀲𑀸𑀯𑀘𑁆𑀙𑀸𑀤𑀬𑁄, 𑀢𑀢𑁆𑀭𑀸𑀧𑁆𑀬𑀯𑀺𑀲𑁂𑀲𑁂𑀦 𑀧𑀬𑁄𑀕𑁄 𑀧𑀲𑀚𑁆𑀚𑀢𑀺 [𑀧𑀬𑁄𑀧𑀲𑀚𑁆𑀚𑀦𑁂 (𑀧𑁄𑀢𑁆𑀣𑀓𑁂)] 𑀯𑀺𑀲𑁂𑀲𑀸𑀦𑀼𑀧𑀸𑀤𑀸𑀦𑀢𑁄, 𑀢𑀲𑁆𑀫𑀸 𑀓𑀣𑀫𑀢𑁆𑀭 𑀲𑀪𑀸𑀯𑀲𑁆𑀲𑁂𑀯 𑀢𑀦𑀼𑀢𑁆𑀢𑀁 𑀯𑀺𑀜𑁆𑀜𑀸𑀬𑀢𑁂 𑀬𑁂𑀦𑁂𑀯𑀁 𑀯𑀺𑀯𑀝𑀫𑀺𑀘𑁆𑀘𑀸𑀳- ‘𑀯𑀘𑁆𑀙𑀸𑀤𑀺𑀲𑀤𑁆𑀤𑀸𑀦’ 𑀫𑀺𑀘𑁆𑀘-𑀤𑀺, 𑀯𑀘𑁆𑀙𑀸𑀤𑀻𑀳𑀺 𑀧𑀓𑀢𑀻𑀢𑀺 𑀧𑀘𑁆𑀘𑀬𑁂 𑀯𑀺𑀥𑀻𑀬𑀫𑀸𑀦𑁂 𑀢𑀸𑀲𑀁 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀯𑀬𑁄𑀯𑀺𑀲𑁂𑀲𑀸𑀤𑀺, 𑀬𑀲𑁆𑀫𑀺𑀁 𑀲𑀢𑀺 𑀯𑀘𑁆𑀙𑀸𑀤𑀬𑁄 𑀲𑀤𑁆𑀤𑀸 𑀤𑀩𑁆𑀩𑁂-𑀪𑀺𑀦𑀺𑀯𑀺𑀲𑀦𑁆𑀢𑁂, 𑀢𑀁 𑀧𑀘𑁆𑀘𑀬𑀸-𑀲𑀦𑁆𑀦𑀁, 𑀦 𑀘 𑀓𑀺𑀲𑀢𑁆𑀢𑀲𑁆𑀲 𑀪𑀸𑀯𑀸 𑀤𑀩𑁆𑀩𑁂 𑀯𑀘𑁆𑀙𑀸𑀤𑀺𑀲𑀤𑁆𑀤𑀸 𑀧𑀯𑀢𑁆𑀢𑀦𑁆𑀢𑁂. 𑀅𑀢𑁄 ¶ 𑀢𑀲𑁆𑀲𑁂𑀯 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀲𑁆𑀲 𑀢𑀦𑀼𑀢𑁆𑀢𑁂 𑀬𑀼𑀢𑁆𑀢𑀁 𑀧𑀘𑁆𑀘𑀬𑁂𑀦 𑀪𑀯𑀺𑀢𑀼𑀁, (𑀦) 𑀢𑀦𑀼𑀢𑁆𑀢𑀫𑀢𑁆𑀢𑁂𑀢𑀺 𑀫𑀜𑁆𑀜𑀢𑁂. 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀲𑀫𑁆𑀩𑀦𑁆𑀥𑀺 𑀆𑀲𑀦𑁆𑀦𑀦𑁆𑀢𑀺 𑀲𑀫𑀸𑀦𑀸𑀥𑀺𑀓𑀭𑀡𑀸𑀦𑀺.

𑀯𑀘𑁆𑀙𑁄 𑀧𑀞𑀫𑀯𑀬𑁄, 𑀢𑀲𑁆𑀲 𑀢𑀦𑀼𑀢𑁆𑀢𑀁 𑀤𑀼𑀢𑀺𑀬𑀯𑀬𑀧𑁆𑀧𑀢𑁆𑀢𑀺. 𑀤𑀼𑀢𑀺𑀬𑀜𑁆𑀳𑀺 𑀯𑀬𑀁 𑀧𑀧𑁆𑀧𑁄𑀦𑁆𑀢𑀲𑁆𑀲 𑀯𑀘𑁆𑀙𑀲𑁆𑀲 𑀧𑀞𑀫𑁄 𑀯𑀬𑁄 𑀯𑀘𑁆𑀙𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀓𑀺𑀜𑁆𑀘𑀺𑀫𑀢𑁆𑀢𑀸𑀯𑀲𑁂𑀲𑀁 𑀪𑀯𑀢𑀺 𑀅𑀫𑀼𑀫𑁂𑀯𑀸𑀳-‘𑀲𑀼𑀲𑀼𑀢𑁆𑀢𑀲𑁆𑀲𑁂’𑀘𑁆𑀘𑀸𑀤𑀺𑀦𑀸. 𑀉𑀓𑁆𑀔𑁄𑀢𑀭𑀼𑀡𑁄𑀤𑀼𑀢𑀺𑀬𑀯𑀬𑀧𑁆𑀧𑀢𑁆𑀢𑁄 𑀯𑀼𑀘𑁆𑀘𑀢𑁂, 𑀢𑀲𑁆𑀲 𑀢𑀦𑀼𑀢𑁆𑀢𑀁 𑀢𑀢𑀺𑀬𑀯𑀬𑀧𑁆𑀧𑀢𑁆𑀢𑀺. 𑀢𑀢𑀺𑀬𑀜𑁆𑀳𑀺 𑀯𑀬𑀧𑁆𑀧𑀢𑁆𑀢𑀓𑀸𑀮𑁂 𑀤𑀼𑀢𑀺𑀬𑀲𑁆𑀲 𑀯𑀬𑀲𑁆𑀲 𑀉𑀓𑁆𑀔𑀲𑀤𑁆𑀤𑀧𑁆𑀧𑀯𑀢𑁆𑀢𑀺 𑀦𑀺𑀫𑀺𑀢𑁆𑀢𑀲𑁆𑀲 𑀓𑀺𑀜𑁆𑀘𑀺𑀫𑀢𑁆𑀢𑀸 𑀯𑀲𑁂𑀲𑀢𑁄 [𑀯𑀲𑀺𑀲𑁆𑀲𑀢𑁂 (𑀧𑁄𑀢𑁆𑀣𑀓𑁂)] 𑀚𑀸𑀢𑀺𑀲𑀗𑁆𑀓𑀭𑀢𑁆𑀢𑀸 𑀕𑀤𑁆𑀤𑀪𑀚𑀸𑀢𑀺𑀬𑀸 𑀯𑀴𑀯𑀸𑀚𑀸𑀢𑀺𑀬𑀸 𑀘 𑀫𑀺𑀲𑁆𑀲𑀢𑁆𑀢𑀸. 𑀪𑀸𑀭𑀯𑀸𑀳𑀓𑀢𑁆𑀢𑀫𑁆𑀧𑀢𑀺 𑀬𑁄 𑀲𑀫𑀢𑁆𑀣𑁄, 𑀲𑁄 𑀉𑀲𑀪𑁄𑀢𑁆𑀬𑀼𑀘𑁆𑀘𑀢𑁂, 𑀬𑀤𑀸𑀢𑀼 𑀢𑀲𑁆𑀲 𑀪𑀸𑀭𑀯𑀸𑀳𑀓𑀢𑁆𑀢𑁂 𑀲𑀸𑀫𑀢𑁆𑀣𑀺𑀬𑀁 𑀫𑀦𑁆𑀤𑀁 𑀪𑀯𑀢𑀺 𑀧𑀭𑀺𑀓𑁆𑀔𑀻𑀡𑀁, 𑀢𑀤𑀸 𑀢𑀦𑀼𑀢𑁆𑀢𑀫𑁆𑀪𑀯𑀢𑀻𑀢𑁆𑀬𑀸𑀳- ‘𑀲𑀸𑀫𑀢𑁆𑀣𑀺𑀬𑀲𑁆𑀲 𑀢𑀦𑀼𑀢𑁆𑀢𑀁 𑀅𑀧𑁆𑀧𑀩𑀮𑀢𑀸’𑀢𑀺.

𑀲𑀫𑀼𑀤𑀸𑀬𑁄 𑀦𑀸𑀫 𑀤𑁆𑀯𑁆𑀬𑀯𑀬𑀯𑁄 𑀯𑀸 𑀲𑀺𑀬𑀸 𑀩𑀳𑀼𑀓𑀸𑀯𑀬𑀯𑁄 𑀯𑀸, 𑀢𑀢𑁆𑀣 𑀤𑁆𑀯𑁆𑀬𑀯𑀬𑀯𑀲𑀫𑀼𑀤𑀸𑀬𑀸 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀢𑁆𑀣𑀺𑀬𑀸 𑀏𑀓𑀲𑁆𑀲𑁂𑀯 𑀦𑀺𑀤𑁆𑀥𑀸𑀭𑀡𑀁 𑀯𑀺𑀜𑁆𑀜𑀸𑀬𑀢𑀺 𑀢𑀫𑁂𑀯𑀸𑀦𑀼𑀲𑀭𑀢𑀺. 𑀩𑀳𑀼𑀓𑀸𑀯𑀬𑀯𑀲𑀫𑀼𑀤𑀸𑀬𑀸𑀧𑁆𑀬𑁂 ‘𑀓𑀲𑁆𑀲 𑀦𑀺𑀤𑁆𑀥𑀸𑀭𑀡𑁂’𑀢𑀺 𑀲𑀼𑀢𑁆𑀢𑁂 𑀏𑀓𑀲𑁆𑀲𑀸𑀢𑀺 𑀯𑀘𑀦𑀸𑀪𑀸𑀯𑁂𑀧𑀺 𑀏𑀓𑀲𑁆𑀲𑁂𑀯 𑀦𑀺𑀤𑁆𑀥𑀸𑀭𑀡𑀁 𑀯𑀺𑀜𑁆𑀜𑀸𑀢𑀩𑁆𑀩𑀁 𑀢𑁂𑀦𑁂𑀯 𑀓𑀢𑀭𑁄 𑀪𑀯𑀢𑀁 𑀤𑁂𑀯𑀤𑀢𑁆𑀢𑁄’𑀢𑁆𑀬𑀸𑀤𑀺𑀓𑀫𑀼𑀤𑀸𑀳𑀭𑀡𑀫𑀤𑀸𑀲𑀺. 𑀓𑀢𑀭𑁄 𑀪𑀯𑀢𑀁 𑀤𑁂𑀯𑀤𑀢𑁆𑀢𑁄 𑀓𑀢𑀭𑁄 𑀪𑀯𑀢𑀁 𑀓𑀞𑁄𑀢𑁆𑀬𑀸𑀤𑁆𑀬𑀼𑀤𑀸𑀳𑀭𑀡𑀩𑀳𑀼𑀢𑁆𑀢𑁂𑀦 𑀦𑀺𑀤𑁆𑀥𑀸𑀭𑀡𑀯𑀸𑀘𑀻𑀦𑀫𑀩𑀳𑀼𑀢𑁆𑀣𑁂𑀧𑀺 𑀦𑀺𑀤𑁆𑀥𑀸𑀭𑀺𑀬𑀫𑀸𑀦𑀯𑀸𑀘𑀻𑀳𑀻’𑀢𑀺 𑀩𑀳𑀼𑀢𑁆𑀢𑁂𑀦 𑀯𑀼𑀢𑁆𑀢𑀁. 𑀅𑀧𑀘𑁆𑀘𑀧𑀭𑀁𑀧𑀭𑀸𑀬 𑀧𑀯𑀢𑁆𑀢𑀁 𑀕𑁄𑀢𑁆𑀢𑀁 𑀯𑀁𑀲𑁄, 𑀢𑀤𑀪𑀺 𑀥𑀸𑀬𑀺𑀦𑁄 𑀅𑀧𑀘𑁆𑀘𑀧𑁆𑀧𑀘𑁆𑀘𑀬𑀦𑁆𑀢𑀸𑀧𑀺 𑀅𑀪𑁂𑀤𑁄𑀧𑀘𑀸𑀭𑁂𑀦 𑀕𑁄𑀢𑁆𑀢𑀁, 𑀢𑁂𑀯𑀸𑀧𑀘𑁆𑀘𑀸 𑀧𑀘𑁆𑀘𑀯𑀦𑁆𑀢𑀲𑀫𑁆𑀩𑀦𑁆𑀥𑀤𑁆𑀯𑀸𑀭𑁂𑀦𑀸𑀧𑀘𑁆𑀘𑁂 𑀧𑀯𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑀺𑀲𑀤𑁆𑀤𑀸 𑀪𑀯𑀦𑁆𑀢𑀺, 𑀘𑀭𑀡𑀲𑀤𑁆𑀤𑀸 𑀘 𑀓𑀞𑀸 𑀬𑁄 𑀓𑀺𑀭𑀺𑀬𑀸𑀲𑀤𑁆𑀤𑀸 𑀪𑀯𑀦𑁆𑀢𑀺 𑀓𑀞𑀸𑀤𑀻𑀳𑀺 𑀯𑀼𑀢𑁆𑀢𑀚𑁆𑀛𑀬𑀦𑀢𑁆𑀣𑀁 𑀬𑀣𑀸 𑀲𑀓𑀁𑀯𑀢𑀘𑀭𑀡𑀓𑀺𑀭𑀺𑀬𑀸𑀦𑀺𑀫𑀺𑀢𑁆𑀢𑀢𑁆𑀢𑁂𑀦𑀸𑀚𑁆𑀛𑁂𑀢𑀽𑀲𑀼 𑀧𑀯𑀢𑁆𑀢𑀸𑀢𑀺 𑀢𑁂𑀲𑀁 𑀲𑀫𑁆𑀩𑀦𑁆𑀥𑀺𑀲𑀤𑁆𑀤𑀸𑀦𑀁 𑀓𑁂𑀲𑀜𑁆𑀘𑀺 𑀅𑀢𑁆𑀣𑀲𑁆𑀲 𑀓𑀺𑀭𑀺𑀬𑀸𑀲𑀤𑁆𑀤𑀸𑀦𑀁 𑀘𑀸𑀢𑁆𑀣𑀲𑁆𑀲 𑀅𑀲𑀢𑁆𑀬𑀧𑀺 𑀚𑀸𑀢𑀺𑀢𑁆𑀢𑁂 𑀚𑀸𑀢𑀺𑀦𑀺𑀩𑀦𑁆𑀥𑀦𑀁 𑀮𑁄𑀓𑁂 𑀓𑀸𑀭𑀺𑀬𑀫𑀺𑀝𑁆𑀞𑀁 𑀢𑀤𑀼𑀢𑁆𑀢𑀁 ‘‘𑀕𑁄𑀢𑁆𑀢𑀜𑁆𑀘 𑀘𑀭- 𑀡𑁂𑀳𑀺 ¶ 𑀲𑀳𑀸’’𑀢𑀺. 𑀢𑀢𑁆𑀣𑀸𑀧𑀺 𑀚𑀸𑀢𑀺𑀢𑁆𑀢𑀫𑁆𑀧𑀭𑀺𑀪𑀸𑀲𑀺𑀢𑀁, 𑀢𑁂𑀦𑀸𑀳- ‘𑀓𑀞𑀲𑁆𑀲 𑀘𑀭𑀡𑀢𑁆𑀢𑀸 𑀚𑀸𑀢𑀺𑀢𑁆𑀢𑀁 𑀕𑁄𑀢𑀢𑁆𑀢𑀸 𑀚𑀸𑀢𑀺𑀢𑁆𑀢’𑀦𑁆𑀢𑀺 𑀘.

𑀮𑁄𑀓𑀺𑀬𑀸𑀢𑀺 𑀧𑀭𑀲𑀤𑁆𑀤𑀲𑀢𑁆𑀣𑀓𑀸𑀭𑁂 𑀲𑀦𑁆𑀥𑀸𑀬𑀸𑀳. 𑀇𑀳 𑀢𑀼 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀭𑀼𑀢𑁆𑀢𑀺𑀬𑀁 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘𑀓𑀣’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑁂𑀯𑁂𑀳𑀺 𑀤𑀢𑁆𑀢𑁄 𑀩𑁆𑀭𑀳𑁆𑀫𑀼𑀦𑀸 𑀤𑀢𑁆𑀢𑁄𑀢𑀺𑀆𑀤𑀻𑀦𑀺 𑀓𑀢𑁆𑀢𑀭𑀺 𑀓𑀭𑀡𑁂 𑀯𑀸 𑀯𑀺𑀕𑁆𑀕𑀳𑀯𑀸𑀓𑁆𑀬𑀸𑀦𑀺. 𑀤𑁂𑀯𑀤𑀢𑁆𑀢𑁄 𑀤𑁂𑀯𑀤𑀢𑁆𑀢𑀺𑀓𑁄 𑀤𑁂𑀯𑀺𑀬𑁄 𑀤𑁂𑀯𑀮𑁄𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀺𑀧𑀤𑀸𑀦𑀺.

𑀢𑀢𑁆𑀣 𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑀸𑀕𑀢𑀸𑀦𑀁 ‘𑀤𑁂𑀯𑀤𑀢𑁆𑀢𑀸 𑀤𑁂𑀯𑀤𑀢𑁆𑀢𑀺𑀓𑁄’𑀢𑀺𑀆𑀤𑀻𑀦𑀁 𑀯𑀼𑀢𑁆𑀢𑀺𑀧𑀤𑀸𑀦𑀫𑀜𑁆𑀜𑀣𑀸 𑀦𑀺𑀧𑁆𑀨𑀢𑁆𑀢𑀺𑀫𑀼𑀧𑀤𑀲𑁆𑀲𑀺𑀬 𑀤𑁂𑀯𑀮𑁄 𑀤𑁂𑀯𑀺𑀬𑁄𑀢𑀺𑀆𑀤𑀻𑀦𑀫𑁆𑀧𑀦 𑀯𑀘𑀦𑀦𑁆𑀢𑀭𑁂𑀦𑁂𑀯 𑀦𑀺𑀧𑁆𑀨𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘𑀤𑁂𑀯𑁂𑀳𑀺 𑀤𑀢𑁆𑀢𑁄’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀲𑀤𑁆𑀤𑀲𑀢𑁆𑀣𑀓𑀸𑀭𑀸𑀦𑀫𑁆𑀧𑀺 𑀤𑁂𑀯𑀮𑁄 𑀤𑁂𑀯𑀺𑀬𑁄𑀢𑀺 𑀯𑀘𑀦𑀦𑁆𑀢𑀭𑁂𑀦𑁂𑀯 𑀲𑀸𑀥𑀦𑀁 𑀲𑀸𑀥𑀦𑀸𑀓𑀸𑀭𑀜𑁆𑀘 𑀢𑁂𑀲𑀁 𑀤𑀲𑁆𑀲𑁂𑀢𑀼𑀁 ‘𑀓𑁂𑀘𑀻𑀳𑀻’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀓𑀤𑁂𑀲𑀢𑁄𑀬𑁂𑀯 𑀧𑀘𑁆𑀘𑀬𑀫𑀺𑀘𑁆𑀙𑀦𑁆𑀢𑀺 𑀢𑁂𑀦 𑀢𑁂𑀲𑀁 𑀤𑁂𑀯𑀮𑁄 𑀤𑁂𑀯𑀺𑀬𑁄 𑀤𑀢𑁆𑀢𑀺 𑀮𑁄𑀘𑁆𑀘𑀸𑀤𑀺 𑀪𑀯𑀢𑀺. 𑀓𑀧𑁆𑀧𑀦𑀸𑀕𑀸𑀭𑀯𑁄𑀢𑀺 𑀤𑀢𑁆𑀢𑀲𑀤𑁆𑀤𑀮𑁄𑀧𑀦𑀸𑀫𑁂𑀓𑀤𑁂𑀲𑀯𑀲𑁂𑀦 𑀓𑀧𑁆𑀧𑀦𑀸𑀕𑀸𑀭𑀯𑁄.

𑀦 𑀘 𑀲𑀩𑁆𑀩𑁂𑀢𑀺𑀆𑀤𑀺𑀦𑀸 𑀩𑀳𑀼𑀮𑀸𑀥𑀺𑀓𑀸𑀭𑁂 𑀨𑀮𑀁 𑀯𑀼𑀢𑁆𑀢𑀁. 𑀪𑀸𑀯𑀲𑀤𑁆𑀤𑁄 𑀓𑀢𑁆𑀣𑀘𑀺 𑀓𑀺𑀭𑀺𑀬𑀸𑀬𑀁 𑀯𑀢𑁆𑀢𑀢𑁂 ‘𑀪𑀸𑀯𑁂 𑀅𑀬𑀁 𑀯𑀺𑀥𑀻’𑀢𑀺. 𑀓𑀢𑁆𑀣𑀘𑀺 𑀅𑀥𑀺𑀧𑁆𑀧𑀸𑀬𑁂 ‘𑀅𑀬𑀫𑁂𑀢𑁂𑀲𑀁 𑀪𑀸𑀯𑁄 [𑀪𑀸𑀯𑁄𑀥𑀺𑀧𑁆𑀧𑀸𑀬𑁄]’𑀢𑀺. 𑀓𑀢𑁆𑀣𑀘𑀺 𑀧𑀤𑀢𑁆𑀣𑁂 ‘𑀇𑀫𑁂 𑀪𑀸𑀯𑀸’𑀢𑀺. 𑀓𑀢𑁆𑀣𑀘𑀺 𑀲𑀢𑁆𑀢𑀸𑀫𑀢𑁆𑀢𑁂‘𑀢𑀺𑀡𑀸𑀦𑀁 𑀪𑀸𑀯𑁄’𑀢𑀺. 𑀢𑁂𑀦𑀸𑀳-‘𑀪𑀸𑀯𑀲𑀤𑁆𑀤𑀲𑁆𑀲𑁂’𑀘𑁆𑀘𑀸𑀤𑀺. 𑀭𑀽𑀧𑀲𑀸𑀥𑀦 𑀤𑁆𑀯𑀸𑀭𑁂𑀦𑀸𑀢𑀺 𑀪𑀸𑀯𑀲𑀤𑁆𑀤𑀲𑁆𑀲 𑀭𑀽𑀧𑀲𑀸𑀥𑀦𑀤𑁆𑀯𑀸𑀭𑁂𑀦, 𑀲𑀧𑁆𑀧𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑀺 𑀅𑀢𑁆𑀣 𑀫𑀦𑁂𑀦𑀸𑀢𑀺 𑀲𑀤𑁆𑀤𑁄. 𑀲𑁄𑀯 𑀅𑀪𑀺𑀥𑀸𑀦𑀁 𑀅𑀪𑀺𑀥𑀻𑀬𑀢𑁂-𑀦𑁂𑀦𑀢𑁆𑀣𑁄𑀢𑀺 𑀓𑀢𑁆𑀯𑀸. 𑀩𑀼𑀚𑁆𑀛𑀢𑀺 𑀅𑀢𑁆𑀣𑀲𑀭𑀽𑀧𑀦𑁆𑀢𑀺 𑀩𑀼𑀤𑁆𑀥𑀺, 𑀲𑀸𑀯 𑀧𑀢𑀻𑀬𑀢𑁂-𑀦𑁂𑀦𑀸𑀢𑁆𑀣𑁄 𑀧𑀘𑁆𑀘𑁂𑀢𑀺 𑀅𑀢𑁆𑀣 𑀫𑀺𑀢𑀺 𑀯𑀸 𑀧𑀘𑁆𑀘𑀬𑁄𑀢𑀺 𑀯𑀼𑀘𑁆𑀘𑀢𑀺.

𑀦𑀦𑀼 𑀘 ‘𑀪𑀯𑀦𑁆𑀢𑀺 𑀏𑀢𑀲𑁆𑀫𑀸 𑀩𑀼𑀤𑁆𑀥𑀺𑀲𑀤𑁆𑀤𑀸’𑀢𑀺 𑀯𑀼𑀢𑁆𑀢𑀁 𑀢𑀲𑁆𑀫𑀸 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀫𑀼𑀪𑀺𑀦𑁆𑀦𑀫𑁆𑀧𑀺 𑀪𑀯𑀢𑀺, 𑀢𑀣𑀸𑀲𑀢𑀺 ‘𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢’𑀦𑁆𑀢𑀺 𑀲𑀤𑁆𑀤𑀲𑁆𑀲𑁂𑀯 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑀸 𑀓𑀲𑁆𑀫𑀸 ¶ 𑀯𑀼𑀢𑁆𑀢𑀸𑀢𑀺 𑀯𑀼𑀘𑁆𑀘𑀢𑁂. 𑀧𑀸𑀓𑀝𑀪𑀸𑀯𑁂𑀦 𑀅𑀪𑀺𑀥𑀸𑀦𑀸𑀪𑀺𑀥𑁂𑀬𑁆𑀬𑀲𑀫𑁆𑀩𑀦𑁆𑀥𑀲𑁆𑀲 𑀲𑀤𑁆𑀤𑀲𑁆𑀲𑁂𑀯 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑀁 𑀯𑀢𑁆𑀯𑀸 𑀯𑀺𑀲𑀼𑀁 𑀩𑀼𑀤𑁆𑀥𑀺𑀬𑀸 𑀦𑀺𑀫𑀺𑀢𑁆𑀢𑀲𑁆𑀲 𑀭𑀽𑀧𑀸𑀦𑀼𑀕𑀢𑀢𑁆𑀢𑀁 𑀯𑀺𑀲𑁂𑀲𑁂𑀢𑁆𑀯𑀸 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑀫𑀲𑁆𑀲𑀸 𑀤𑀻𑀧𑁂𑀢𑀼𑀁 ‘𑀦𑀺𑀫𑀺𑀢𑁆𑀢𑀯𑀲𑀸𑀳𑀺’𑀘𑁆𑀘𑀸𑀤𑀺𑀫𑀸𑀳. 𑀤𑀩𑁆𑀩𑁂𑀕𑀼𑀡𑁄𑀢𑀺 𑀤𑀩𑁆𑀩𑁂 𑀯𑀼𑀢𑁆𑀢𑀺𑀬𑀁 𑀕𑀼𑀡𑁄 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀼𑀡𑀲𑀤𑁆𑀤𑀲𑁆𑀲𑁂𑀯 𑀚𑀸𑀢𑀺𑀲𑀤𑁆𑀤𑀢𑁆𑀢𑁂𑀦𑁄𑀤𑀸𑀳𑀭𑀡𑀤𑁆𑀯𑀬𑀁 𑀤𑀢𑁆𑀢𑀁… 𑀕𑀼𑀡𑀲𑁆𑀲 𑀚𑀸𑀢𑀺𑀬𑀸 𑀯𑀺𑀲𑀼𑀁 𑀚𑀸𑀢𑀺𑀦𑀺𑀫𑀺𑀢𑁆𑀢𑀲𑁆𑀲𑀸𑀪𑀸𑀯𑀢𑁄 [𑀦𑀺𑀥𑀺𑀢𑁆𑀢𑀲𑁆𑀲 𑀪𑀸𑀯𑀢𑁄]. 𑀓𑀺𑀭𑀺𑀬𑀸𑀤𑀻𑀢𑀺𑀆𑀤𑀺𑀲𑀤𑁆𑀤𑁂𑀦 𑀤𑀩𑁆𑀩𑀸𑀤𑀻𑀦𑀁 𑀕𑀳𑀡𑀁, 𑀓𑁂𑀘𑀺 𑀧𑀦 𑀓𑀺𑀭𑀺𑀬𑀸𑀲𑀤𑁆𑀤𑀸𑀦𑀁 𑀓𑀺𑀭𑀺𑀬𑀸 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀦𑁆𑀢𑁆𑀬𑀸𑀳𑀼. 𑀢𑁂𑀲𑀁 𑀤𑁂𑀯𑀤𑀢𑁆𑀢𑀸𑀤𑀻𑀦𑀁 𑀅𑀯𑀢𑁆𑀣𑀸𑀯𑀺𑀲𑁂𑀲𑁂𑀦 𑀅𑀯𑀢𑁆𑀣𑀸𑀪𑁂𑀤𑁂𑀦 𑀲𑀸𑀫𑀜𑁆𑀜𑀁 𑀢𑀤𑀯𑀢𑁆𑀣𑀸 𑀯𑀺𑀲𑁂𑀲𑀲𑀸𑀫𑀜𑁆𑀜𑀁. 𑀢𑁂𑀦𑀸𑀳- ‘𑀤𑁂𑀯𑀤𑀢𑁆𑀢𑀲𑁆𑀲𑀸’𑀢𑀺𑀆𑀤𑀺. 𑀯𑀺𑀚𑁆𑀚𑀫𑀸𑀦𑁄 𑀧𑀤𑀢𑁆𑀣𑁄 𑀯𑀺𑀲𑀬𑁄 𑀬𑁂𑀲𑀁 𑀤𑁂𑀯𑀤𑀢𑁆𑀢𑀸𑀤𑀻𑀦𑀁 𑀲𑀜𑁆𑀜𑀸𑀲𑀤𑁆𑀤𑀸𑀦𑀁 𑀢𑁂𑀲𑀁 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀚𑀸𑀢𑀺𑀮𑀓𑁆𑀔𑀡𑀫𑀸𑀘𑀺𑀓𑁆𑀔𑀺𑀢𑀫𑁆𑀧𑀝𑀺𑀧𑀸𑀤𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀅𑀦𑁂𑀦 𑀘 𑀤𑁂𑀯𑀤𑀢𑁆𑀢𑀸𑀤𑀬𑁄 𑀲𑀜𑁆𑀜𑀸𑀲𑀤𑁆𑀤𑀸𑀧𑀺 𑀲𑀫𑀸𑀦𑀸 𑀚𑀸𑀢𑀺𑀲𑀤𑁆𑀤𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀤𑀺 𑀘𑀭𑀳𑀺 𑀲𑀜𑁆𑀜𑀸𑀲𑀤𑁆𑀤𑀸𑀧𑀺 𑀚𑀸𑀢𑀺𑀯𑀘𑀦𑀸 𑀲𑀺𑀬𑀼𑀁, 𑀧𑀜𑁆𑀘𑀯𑀺𑀥𑀢𑁆𑀢𑀫𑁂𑀲𑀁 𑀧𑀭𑀺𑀳𑀸𑀬𑀢𑀻𑀢𑀺. 𑀦𑁂𑀤𑀫𑁂𑀯𑀁 𑀯𑀺𑀜𑁆𑀜𑁂𑀬𑁆𑀬𑀁… 𑀧𑀲𑀺𑀤𑁆𑀥𑀢𑀭𑀚𑀸𑀢𑁆𑀬𑀸𑀪𑀺𑀥𑀸𑀦 𑀓𑀞𑀕𑁄𑀯𑀻𑀳𑀺𑀬𑀯𑀸𑀤𑀺𑀲𑀤𑁆𑀤𑀸 𑀚𑀸𑀢𑀺𑀲𑀤𑁆𑀤𑀢𑁆𑀢𑁂𑀦 𑀯𑀺𑀲𑀼𑀁 𑀧𑀭𑀺𑀕𑁆𑀕𑀬𑁆𑀳𑀦𑁆𑀢𑀺.

𑀲𑀫𑁆𑀩𑀦𑁆𑀥𑀺𑀪𑁂𑀤𑀢𑁄𑀢𑀺 𑀖𑀝𑀸𑀤𑀺𑀲𑀫𑁆𑀩𑀦𑁆𑀥𑀻𑀦𑀁 𑀪𑁂𑀤𑀢𑁄. 𑀅𑀪𑀸𑀯𑀲𑁆𑀲𑀪𑁂𑀤𑀢𑁄𑀢𑀺 𑀖𑀝𑀧𑀝𑀸𑀤𑀻𑀦𑀁 𑀲𑀫𑁆𑀩𑀦𑁆𑀥𑀻𑀦𑀁 𑀪𑁂𑀤𑁂𑀦 𑀅𑀪𑀸𑀯𑀲𑁆𑀲 𑀪𑁂𑀤𑀢𑁄 𑀅𑀪𑁂𑀤𑁂𑀧𑀺 𑀪𑁂𑀤𑀸 𑀉𑀧𑀘𑀭𑀺𑀢𑀸 𑀲𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀬𑀲𑁆𑀲 𑀲𑀸𑀫𑀜𑁆𑀜𑀲𑁆𑀲 𑀯𑀲𑀸, 𑀢𑁂𑀲𑀼 𑀉𑀧𑀘𑀭𑀺𑀢𑀪𑁂𑀤𑁂𑀲𑁆𑀯𑀸𑀓𑀸𑀲𑀸𑀤𑀻𑀲𑀼. 𑀦𑀺𑀭𑀯𑀬𑀯𑀸𑀯𑀺𑀚𑁆𑀚𑀫𑀸𑀦𑀯𑀺𑀲𑀬𑀸𑀦𑀦𑁆𑀢𑀺𑀬𑁂 𑀆𑀓𑀸𑀲𑁄 𑀯𑀺𑀬 𑀦𑀺𑀭𑀯𑀬𑀯𑀸 𑀅𑀪𑀸𑀯𑁄 𑀯𑀺𑀬 𑀅𑀲𑀦𑁆𑀢𑀸 𑀘, 𑀢𑁂 𑀯𑀺𑀲𑀬𑁄 𑀬𑁂𑀲𑀁 𑀲𑀤𑁆𑀤𑀸𑀦𑀁 𑀢𑁂𑀲𑀦𑁆𑀢𑀺 𑀅𑀢𑁆𑀣𑁄. 𑀲𑀸𑀫𑀜𑁆𑀜𑀁 𑀪𑀸𑀯𑁄𑀢𑀺 𑀧𑀼𑀣𑀼𑀚𑁆𑀚𑀦𑀸𑀤𑀺𑀲𑀸𑀫𑀜𑁆𑀜𑀁 𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀅𑀮𑀲𑀲𑁆𑀲 𑀪𑀸𑀯𑁄 𑀓𑀺𑀭𑀺𑀬𑀸𑀲𑀫𑁆𑀩𑀦𑁆𑀥𑀺𑀢𑁆𑀢𑀁, 𑀩𑁆𑀭𑀳𑁆𑀫𑀜𑁆𑀜𑀁 𑀚𑀸𑀢𑀺 𑀘𑀸𑀧𑀮𑁆𑀬𑀁 𑀦𑁂𑀧𑀼𑀜𑁆𑀜𑀁 𑀕𑀼𑀡𑁄 𑀯𑀸. 𑀯𑀼𑀢𑁆𑀢𑀺𑀬𑀁 𑀲𑀓𑀢𑁆𑀣𑁂𑀓𑀦𑁆𑀢𑀸𑀢𑀺 ‘‘𑀲𑀓𑀢𑁆𑀣𑁂’’𑀢𑀺 (𑁪-𑁧𑁨𑁨) 𑀇𑀫𑀺𑀦𑀸 𑀲𑀓𑀢𑁆𑀣𑁂 𑀓𑀢𑀓𑀧𑁆𑀧𑀘𑁆𑀘𑀬𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀦 𑀤𑀝𑁆𑀞𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀢𑁆𑀢𑀓𑀸𑀮𑁄𑀯 𑀧𑀢𑁆𑀢𑀓𑀮𑁆𑀮𑀁. 𑀓𑀭𑀼𑀡𑀸 𑀏𑀯 𑀓𑀸𑀭𑀼𑀜𑁆𑀜𑀁.

‘‘𑀏𑀓𑀬𑁄𑀕𑀦𑀺𑀤𑁆𑀤𑀺𑀝𑁆𑀞𑀸𑀦𑀁 𑀲𑀳𑀯𑀸𑀧𑀯𑀢𑁆𑀢𑀺 𑀲𑀳𑀯𑀸 𑀦𑀺𑀯𑀢𑁆𑀢𑀻’’𑀢𑀺 ‘𑀪𑀸𑀯 𑀓𑀫𑁆𑀫𑁂𑀲𑀽’𑀢𑀺 ¶ 𑀅𑀦𑀼𑀯𑀢𑁆𑀢𑀢𑁂. 𑀢𑀣𑀸𑀧𑀺 𑀪𑀸𑀯𑁂𑀢𑀻𑀫𑀺𑀦𑀸𑀯𑁂𑀢𑁆𑀣 𑀲𑀧𑁆𑀧𑀬𑁄𑀚𑀦𑀢𑁆𑀢𑀁 𑀤𑀲𑁆𑀲𑁂𑀢𑀼𑀫𑀸𑀳- ‘𑀪𑀸𑀯𑀓𑀫𑁆𑀫𑁂𑀲𑀼’𑀘𑁆𑀘𑀸𑀤𑀺.

𑀬𑀚𑁆𑀚𑀧𑀺 𑀲𑀻𑀥𑀸𑀢𑀼𑀲𑁆𑀲 𑀓𑁂𑀯𑀮𑀲𑁆𑀲 𑀲𑀼𑀧𑀦𑁂 𑀧𑀯𑀢𑁆𑀢𑀺, 𑀢𑀣𑀸𑀧𑁆𑀬𑀢𑀺𑀧𑀼𑀩𑁆𑀩𑀲𑁆𑀲 𑀉𑀓𑁆𑀓𑀁𑀲𑁂 𑀧𑀯𑀢𑁆𑀢𑀻𑀢𑀺 𑀆𑀳- ‘𑀅𑀢𑀺𑀲𑀬𑁄 𑀉𑀓𑁆𑀓𑀁𑀲𑁄’𑀢𑀺. 𑀲𑁄 𑀘 𑀅𑀢𑀺𑀲𑀬𑁄 𑀓𑀲𑁆𑀲 𑀲𑀫𑁆𑀪𑀯𑀢𑀺𑀘𑁆𑀘𑀸𑀳- ‘𑀲𑁄 𑀘 𑀓𑀺𑀭𑀺𑀬𑀸𑀕𑀼𑀡𑀸𑀦’𑀦𑁆𑀢𑀺. 𑀓𑀣𑀁 𑀢𑁂𑀲𑀫𑀢𑀺𑀲𑀬𑁄𑀘𑁆𑀘𑀸𑀳- ‘𑀆𑀥𑀸𑀭𑀪𑀽𑀢𑀤𑀩𑁆𑀩𑀯𑀲𑀸’𑀢𑀺. 𑀓𑀼𑀢𑁄𑀘𑁆𑀘𑀸𑀳- ‘𑀅𑀦𑀧𑁂𑀓𑁆𑀔𑀺𑀢𑁂’𑀘𑁆𑀘𑀸𑀤𑀺. 𑀅𑀦𑀧𑁂𑀓𑁆𑀔𑀺𑀢𑁄 𑀓𑀺𑀭𑀺𑀬𑀸𑀕𑀼𑀡𑀸𑀦𑀁 𑀦𑀺𑀲𑁆𑀲𑀬𑁄 𑀤𑀩𑁆𑀩𑀲𑀗𑁆𑀔𑀸𑀢𑁄 𑀬𑁂𑀲𑀦𑁆𑀢𑀺 𑀯𑀺𑀕𑁆𑀕𑀳𑁄, 𑀤𑀩𑁆𑀩𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀲𑁆𑀲𑀸-𑀢𑀺𑀲𑀬𑀢𑁆𑀢𑀁 𑀳𑁄𑀦𑁆𑀢𑀫𑁆𑀧𑀺 𑀦𑀺𑀲𑁆𑀲𑀺𑀢𑀸𑀦𑀁 𑀓𑀺𑀭𑀺𑀬𑀸 𑀕𑀼𑀡𑀸𑀦𑀁 𑀯𑀲𑁂𑀦𑁂𑀯 𑀲𑀺𑀬𑀸 𑀦𑀸𑀜𑁆𑀜𑀣𑀸𑀢𑀺 𑀯𑀢𑁆𑀢𑀼𑀫𑀸𑀳-‘𑀧𑀘𑁆𑀘𑀥𑀺𑀓𑀭𑀡’𑀦𑁆𑀢𑀺𑀆𑀤𑀺.

𑀦𑀦𑀼 𑀘 𑀬𑀤𑀺 𑀓𑀺𑀭𑀺𑀬𑀸𑀕𑀼𑀡𑀸𑀦𑀫𑁂𑀯𑀸𑀢𑀺𑀲𑀬𑁄, 𑀢𑀤𑀸 𑀦 𑀲𑀺𑀚𑁆𑀛𑀢𑀺 ‘𑀕𑁄𑀢𑀭𑁄’𑀢𑀺 𑀦𑁂𑀲 𑀤𑁄𑀲𑁄, 𑀦𑁄 𑀘𑁂𑀢𑁆𑀣 𑀚𑀸𑀢𑀺𑀬𑀸𑀢𑀺𑀲𑀬𑁄, 𑀓𑀲𑁆𑀲 𑀘𑀭𑀳𑀺 𑀕𑀼𑀡𑀲𑁆𑀲 𑀕𑁄 𑀅𑀬𑀁 𑀬𑁄 𑀲𑀓𑀝𑀁 𑀯𑀳𑀢𑀺, 𑀕𑁄𑀢𑀭𑁄-𑀬𑀁 𑀬𑁄 𑀲𑀓𑀝𑀁 𑀯𑀳𑀢𑀺 𑀲𑀺𑀭𑀜𑁆𑀘𑀸𑀢𑀺, 𑀚𑀸𑀢𑀺𑀬𑀸 𑀳𑀺 𑀦𑀺𑀘𑁆𑀘𑀸𑀬𑁂𑀓𑀭𑀽𑀧𑀸𑀬 𑀦𑁄𑀓𑁆𑀓𑀁𑀲𑀸𑀧𑀓𑀁𑀲𑀬𑁄𑀕𑁄 𑀲𑀫𑁆𑀪𑀯𑀢𑀻𑀢𑀺 𑀤𑀩𑁆𑀩𑀲𑁆𑀲𑀸𑀧𑀺 𑀦𑀸𑀢𑀺𑀲𑀬𑀲𑀫𑁆𑀪𑀯𑁄. 𑀢𑀣𑀸𑀳𑀺 𑀢𑀼𑀮𑁆𑀬𑀧𑁆𑀧𑀫𑀸𑀡𑀲𑁆𑀲 𑀕𑀼𑀡𑀓𑀢𑁄𑀯 𑀫𑀽𑀮𑀢𑁄 𑀉𑀓𑁆𑀓𑀁𑀲𑁄 𑀤𑀺𑀲𑁆𑀲𑀢𑀺 𑀲𑀫𑀸𑀦𑁂𑀧𑀺 𑀳𑀺 𑀆𑀬𑀸𑀫𑁂 𑀯𑀺𑀢𑁆𑀣𑀸𑀭𑁂 𑀘 𑀧𑀝𑀲𑁆𑀲 𑀓𑀸𑀲𑀺𑀓𑀲𑁆𑀲𑀸𑀜𑁆𑀜𑁄𑀯𑀸𑀕𑁆𑀖𑁄 𑀪𑀯𑀢𑀺 𑀫𑀸𑀣𑀼𑀭𑀲𑁆𑀲𑀸𑀜𑁆𑀜𑁄 𑀯𑀸𑀢𑀺. 𑀤𑀩𑁆𑀩𑀲𑁆𑀲𑀸𑀧𑀺 𑀲𑀸𑀢𑀺𑀲𑀬𑁂𑀳𑀺 𑀬𑀼𑀢𑁆𑀢𑀢𑀸𑀫𑀢𑁆𑀢𑁂𑀦 𑀲𑀸𑀢𑀺𑀲𑀬𑀢𑁆𑀢𑀲𑁆𑀲𑀼𑀧𑀝𑁆𑀞𑀸𑀧𑀺𑀢𑀢𑁆𑀢𑀸 𑀯𑀼𑀢𑁆𑀢𑀁- ‘𑀢𑁂𑀦𑁂𑀯𑀸𑀳𑀸’𑀢𑀺𑀆𑀤𑀺. 𑀬𑀤𑀕𑁆𑀕𑁂𑀦 𑀓𑀺𑀭𑀺𑀬𑀸𑀕𑀼𑀡𑀸𑀦𑀁 𑀦𑀺𑀲𑁆𑀲𑀺𑀢𑀸𑀦𑀫𑀢𑀺𑀲𑀬𑀯𑀲𑁂𑀦 𑀦𑀺𑀲𑁆𑀲𑀬𑀪𑀽𑀢𑀫𑁆𑀧𑀺 𑀤𑀩𑁆𑀩𑀁 𑀓𑀣𑀜𑁆𑀘𑀺𑀤𑀧𑁆𑀬𑀢𑀺𑀲𑀬𑁂 𑀯𑀢𑁆𑀢𑀢𑀺 𑀦𑀸𑀫, 𑀢𑀤𑀕𑁆𑀕𑁂 𑀢𑀩𑁆𑀩𑀸𑀘𑀺𑀓𑀸𑀧𑀺 𑀧𑀓𑀢𑀺 𑀅𑀢𑁆𑀢𑀦𑁄 𑀯𑀘𑀦𑀻𑀬𑀢𑁆𑀣𑀯𑀲𑁂𑀦 𑀢𑀢𑁆𑀣 𑀯𑀢𑁆𑀢𑀢𑀺𑀬𑁂𑀯 𑀦𑀸𑀫𑀸𑀢𑀺 ‘𑀅𑀢𑀺𑀬𑀬𑁂 𑀯𑀢𑁆𑀢𑀫𑀸𑀦𑀢𑁄’𑀢𑀺 𑀧𑀓𑀢𑀺𑀯𑀺𑀲𑁂𑀲𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀢𑁂𑀦𑁂𑀯𑀸𑀳- ‘𑀇𑀫𑀺𑀦𑀸 𑀧𑀓𑀢𑀺 𑀯𑀺𑀲𑁂𑀲𑀦𑀢𑁆𑀢𑀜𑁆𑀘𑀸𑀳𑀸’𑀢𑀺. 𑀲𑀓𑀢𑁆𑀣𑀺𑀓𑀸𑀦𑀁 𑀧𑀓𑀢𑀺𑀅𑀢𑁆𑀣𑁄 𑀚𑁄𑀢𑀦𑀻𑀬𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀲𑀓𑀢𑁆𑀣𑀺𑀓𑀸𑀦𑀦𑁆𑀢𑀺 𑀓𑀢𑁆𑀢𑀭𑀺 𑀙𑀝𑁆𑀞𑀻 𑀲𑀫𑁆𑀩𑀦𑁆𑀥𑀯𑀘𑀦𑀺𑀘𑁆𑀙𑀸𑀬, 𑀲𑀓𑀢𑁆𑀣𑀺𑀓𑁂𑀳𑀻𑀢𑀺 𑀅𑀢𑁆𑀣𑁄. 𑀳𑁂𑀢𑀼𑀫𑀸𑀳- ‘𑀧𑀓𑀢𑀺𑀯𑀺𑀲𑁂𑀲𑀦𑀦𑁆𑀢𑀻’𑀢𑀺. 𑀇𑀢𑀺𑀲𑀤𑁆𑀤𑁄 𑀳𑁂𑀢𑀼𑀫𑁆𑀳𑀺, 𑀬𑀲𑁆𑀫𑀸 ¶ ‘𑀅𑀢𑀺𑀲𑀬𑁂 𑀯𑀢𑁆𑀢𑀫𑀸𑀦𑀢𑁄’𑀢𑀺, 𑀧𑀓𑀢𑀺𑀯𑀺𑀲𑁂𑀲𑀦𑀁, 𑀢𑀢𑁄 𑀧𑀓𑀢𑁆𑀬𑀢𑁆𑀣𑀪𑀽𑀢𑁂-𑀢𑀺𑀲𑀬𑁂 𑀚𑀸𑀢𑀢𑁆𑀢𑀸 𑀲𑀓𑀢𑁆𑀣𑀺𑀓𑁂𑀳𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀧𑀓𑀢𑁆𑀬𑀢𑁆𑀣𑀪𑀽𑀢𑁂𑀢𑀺𑀲𑀬𑁄 𑀚𑁄𑀢𑀦𑀻𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀦𑀸𑀪𑀺𑀥𑁂𑀬𑁆𑀬𑁄𑀢𑀺 𑀩𑁆𑀬𑀢𑀺𑀭𑁂𑀓𑀫𑀸𑀳, 𑀢𑀣𑀸 𑀘 𑀯𑀓𑁆𑀔𑀢𑀺- ‘𑀅𑀢𑀺𑀲𑀬𑀚𑁄𑀢𑀓𑀸𑀢𑀭𑀸𑀤𑀬𑁄’𑀢𑀺.

𑀅𑀣 𑀧𑀓𑀢𑀺𑀯𑀺𑀲𑁂𑀲𑀦𑀢𑁆𑀢𑁂 𑀓𑀲𑁆𑀫𑀸 𑀦𑀸𑀪𑀺𑀥𑁂𑀬𑁆𑀬𑁄 𑀚𑁄𑀢𑀦𑀻𑀬𑁄𑀘𑁆𑀘𑀸𑀳 ‘𑀧𑀓𑀢𑀺𑀬𑀸𑀬𑁂𑀯’𑀘𑁆𑀘𑀸𑀤𑀺. 𑀉𑀓𑁆𑀓𑀁𑀲𑁄 𑀲𑀫𑀸𑀦𑀕𑀼𑀡𑀯𑀺𑀲𑀬𑁂𑀬𑁂𑀯 𑀮𑁄𑀓𑁂 𑀤𑀺𑀝𑁆𑀞𑁄 [𑀧𑀯𑀺𑀝𑁆𑀞𑁄 (𑀧𑁄𑀢𑁆𑀣𑀓𑁂)] 𑀢𑁂𑀦 𑀲𑀸𑀫𑀜𑁆𑀜𑀯𑀘𑀦𑁂𑀧𑀺 𑀢𑀸𑀤𑀺𑀣𑀯𑀺𑀲𑀬𑁂𑀬𑁂𑀯 [𑀲𑁄𑀬𑁂𑀯] 𑀓𑀸𑀭𑀡 𑀯𑀲𑁂𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀅𑀢𑀺𑀲𑀬𑁂𑀦𑁂’𑀘𑁆𑀘𑀸𑀤𑀺. 𑀤𑁆𑀯𑀺𑀦𑁆𑀦𑀫𑁂𑀓𑀲𑁆𑀲𑀸-𑀢𑀺𑀲𑀬𑁂𑀘𑁆𑀘𑀸𑀤𑀺𑀦𑀸 ‘𑀤𑁆𑀯𑀺𑀩𑀳𑀽𑀲𑀼𑀓𑁆𑀓𑀁𑀲𑁂 𑀢𑀭𑀢𑀫𑀸’’𑀢𑀺 (𑀘𑀁 𑁪-𑁩-𑁪𑁫) 𑀲𑀓𑁆𑀓𑀢𑀲𑀼𑀢𑁆𑀢𑀢𑁆𑀣𑀲𑁆𑀲𑀸𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀢𑀺. 𑀢𑀭𑀇𑀬𑀸𑀢𑀺 𑀲𑀓𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑀁, 𑀢𑁂𑀲𑀦𑁆𑀢𑀼 𑀈𑀬𑀧𑁆𑀧𑀘𑁆𑀘𑀬𑁄. 𑀏𑀯𑀫𑀺𑀳𑀸𑀯𑀺𑀥𑀸𑀦𑀁 𑀲𑀼𑀔𑀲𑀸𑀦𑁂𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 ‘𑀬𑀣𑀸𑀯𑀼𑀢𑁆𑀢𑀲𑀼𑀢𑁆𑀢𑀢𑁆𑀣𑀯𑀲𑁂𑀦 𑀤𑁆𑀯𑀺𑀦𑁆𑀦𑀫𑁂𑀓𑀲𑁆𑀲 𑀉𑀓𑁆𑀓𑀁𑀲𑀸𑀪𑀸𑀯𑀸 ‘𑀫𑀸𑀣𑀼𑀭𑀸 𑀧𑀸𑀝𑀮𑀺𑀧𑀼𑀢𑁆𑀢𑀓𑁂𑀳𑀺 𑀲𑀼𑀓𑀼𑀫𑀸𑀭𑀢𑀭𑀸’𑀘𑁆𑀘𑀸𑀤𑁄 𑀢𑀭𑀧𑁆𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀏𑀓𑁄 𑀫𑀸𑀣𑀼𑀭𑁄 𑀤𑀼𑀢𑀺𑀬𑁄 𑀧𑀸𑀝𑀮𑀺𑀧𑀼𑀢𑁆𑀢𑀓𑁄 𑀇𑀫𑁂𑀲𑀁 𑀲𑀼𑀓𑀼𑀫𑀸𑀭𑀸𑀦𑀁 𑀤𑁆𑀯𑀺𑀦𑁆𑀦𑀫𑁂𑀓𑁄 𑀫𑀸𑀣𑀼𑀭𑁄-𑀢𑀺𑀲𑀬𑁂𑀦 𑀲𑀼𑀓𑀼𑀫𑀸𑀭𑁄 𑀲𑀼𑀓𑀼𑀫𑀸𑀭𑀢𑀭𑁄, 𑀏𑀓𑀫𑀜𑁆𑀜𑁂𑀲𑀁 𑀤𑁆𑀯𑀺𑀦𑁆𑀦𑀫𑀼𑀓𑁆𑀓𑀁𑀲𑁂𑀢𑀣𑀸𑀜𑁆𑀜𑁂𑀲𑀁 𑀤𑁆𑀯𑀺𑀦𑁆𑀦𑀫𑁂𑀓𑀲𑁆𑀲𑀸𑀢𑀺 𑀏𑀯𑀁 𑀤𑁆𑀯𑀺𑀦𑁆𑀦𑀁𑀤𑁆𑀯𑀺𑀦𑁆𑀦𑀫𑁂𑀓𑁂𑀓𑀲𑁆𑀲 𑀉𑀓𑁆𑀓𑀁𑀲𑁂 𑀢𑀭𑀧𑁆𑀧𑀘𑁆𑀘𑀬𑁄 𑀪𑀯𑀢𑀺, 𑀉𑀪𑀬𑀢𑁆𑀭 𑀢𑁆𑀯𑀯𑀬𑀯𑀸𑀧𑁂𑀓𑁆𑀔𑀫𑁆𑀩𑀳𑀼𑀯𑀘𑀦𑀁, 𑀢𑀣𑀸𑀳𑀺 𑀲𑀼𑀓𑀼𑀫𑀸𑀭𑀢𑁆𑀢𑁂𑀦𑀼𑀓𑁆𑀓𑀁𑀲𑀺𑀬𑀫𑀸𑀦𑀸𑀦𑀁 𑀲𑀫𑀼𑀤𑀸𑀬𑀸𑀦𑀫𑀯𑀬𑀯𑀸 𑀫𑀸𑀣𑀼𑀭𑀸 𑀩𑀳𑀯𑁄 𑀧𑀸𑀝𑀮𑀺𑀧𑀼𑀢𑁆𑀢𑀓𑀸𑀧𑀺 𑀦𑀺𑀓𑁆𑀓𑀁𑀲𑀺𑀬𑀫𑀸𑀦𑀸 𑀢𑀣𑁂𑀯𑀸𑀯𑀬𑀯𑀸 𑀩𑀳𑀯𑁄 𑀳𑁄𑀦𑁆𑀢𑀺, 𑀏𑀯𑀁 𑀫𑀸𑀣𑀼𑀭𑀸 𑀧𑀸𑀝𑀮𑀺 𑀧𑀼𑀢𑁆𑀢𑀓𑁂𑀳𑀺 𑀲𑀼𑀓𑀼𑀫𑀸𑀭𑀢𑀭𑀸’𑀢𑀺 𑀢𑀭𑀧𑁆𑀧𑀘𑁆𑀘𑀬𑁂𑀦 𑀲𑀺𑀚𑁆𑀛𑀢𑀺. 𑀇𑀫𑀲𑁆𑀫𑀺𑀁 𑀕𑀸𑀫𑁂 𑀅𑀟𑁆𑀠𑀢𑀭𑀸 𑀯𑀸𑀡𑀺𑀚𑁆𑀚𑀸𑀘𑁆𑀘𑀸𑀤𑁄𑀧𑀺 𑀓𑀣𑀺𑀢𑁂𑀦 𑀜𑀸𑀬𑁂𑀦 𑀤𑁆𑀯𑀺𑀦𑁆𑀦𑀁𑀤𑁆𑀯𑀺𑀦𑁆𑀦𑀫𑁂𑀓𑁂𑀓𑀲𑁆𑀲 𑀉𑀓𑁆𑀓𑀁𑀲𑁂 𑀢𑀭𑀧𑁆𑀧𑀘𑁆𑀘𑀬𑁄 𑀪𑀯𑀢𑀺, 𑀩𑀳𑀼𑀯𑀘𑀦𑀦𑁆𑀢𑀼 𑀓𑀢𑁆𑀣𑀘𑀺 𑀅𑀯𑀬𑀯𑀸𑀧𑁂𑀓𑁆𑀔𑀦𑁆𑀢𑀺 𑀲𑀩𑁆𑀩𑀁 𑀲𑀓𑁆𑀓𑀢𑁂 𑀓𑀺𑀘𑁆𑀙𑁂𑀦 𑀲𑀸𑀥𑁂𑀦𑁆𑀢𑀺. 𑀇𑀳 𑀢𑀼 𑀢𑀣𑀸𑀯𑀺𑀥𑀲𑁆𑀲 𑀲𑀼𑀢𑁆𑀢𑀲𑁆𑀲𑀸 𑀯𑀺𑀥𑀸𑀦𑀸 ‘‘𑀢𑀭𑀢𑀫𑀺𑀲𑁆𑀲𑀺𑀓𑀺𑀬𑀺𑀝𑁆𑀞𑀸𑀢𑀺𑀲𑀬𑁂’’𑀢𑀺 𑀢𑀭𑀸𑀤𑀻𑀦𑀫𑀢𑀺𑀲𑀬𑁂 𑀲𑀸𑀫𑀜𑁆𑀜𑁂𑀦 𑀯𑀺𑀥𑀸𑀦𑀸 𑀲𑀩𑁆𑀩𑀢𑁆𑀣 𑀢𑀭𑀧𑁆𑀧𑀘𑁆𑀘𑀬𑁂𑀦 𑀲𑀼𑀔𑀲𑀸𑀥𑀦𑀁 𑀳𑁄𑀢𑀻’’𑀢𑀺.

𑀅𑀯𑀢𑁆𑀣𑀸𑀪𑁂𑀤𑁂𑀦𑀸𑀢𑀺 ¶ 𑀧𑀝𑀼𑀢𑀭𑀸𑀯𑀢𑁆𑀣𑀸𑀯𑀢𑁄 𑀧𑀝𑀼𑀅𑀯𑀢𑁆𑀣𑀸𑀬 𑀪𑀺𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀁, 𑀢𑀣𑀸𑀳𑀺 𑀢𑀫𑁂𑀯𑀸𑀯𑀢𑁆𑀣𑀦𑁆𑀢𑀭𑀬𑀼𑀢𑁆𑀢𑀁 𑀯𑀢𑁆𑀢𑀸𑀭𑁄 𑀪𑀯𑀦𑁆𑀢𑀺 𑀅𑀜𑁆𑀜𑁂 ‘𑀪𑀯𑀁𑀲𑀽𑀅𑀯𑀢𑁆𑀣𑁄’𑀢𑀺. 𑀧𑀓𑀸𑀭𑀦𑁆𑀢𑀭𑁂𑀦𑀧𑀺 𑀲𑀸𑀥𑀦𑁂 𑀳𑁂𑀢𑀼𑀫𑀸𑀳- ‘𑀅𑀢𑀺𑀲𑀬𑀫𑀢𑁆𑀢𑁂 𑀯𑀸 𑀯𑀺𑀥𑀸𑀦𑀢𑁄’𑀢𑀺. 𑀅𑀦𑀯𑀝𑁆𑀞𑀺𑀢𑀢𑁆𑀢𑀫𑀸𑀳- (‘𑀅𑀢𑀺𑀲𑀬𑀯𑀸𑀧𑀺’𑀘𑁆𑀘𑀸𑀤𑀺). 𑀧𑀜𑁆𑀘𑀲𑁆𑀯𑁂𑀢𑁂𑀲𑀽𑀢𑀺 𑀏𑀢𑁂𑀲𑀁 𑀬𑀣𑀸𑀯𑀼𑀢𑁆𑀢𑀸𑀦𑀁 𑀢𑀭𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀫𑀚𑁆𑀛𑁂, 𑀭𑀽𑀧𑀸𑀦𑀺 𑀕𑀼𑀡𑀯𑀘𑀦𑀲𑁆𑀲 𑀯𑀼𑀢𑁆𑀢𑀺𑀬𑀫𑀼𑀤𑀸𑀳𑀭𑀺𑀢𑀸𑀦𑀺. 𑀓𑀺𑀭𑀺𑀬𑀸𑀯𑀘𑀦𑀲𑁆𑀲 𑀢𑀼 ‘𑀅𑀢𑀺𑀲𑀬𑁂𑀦 𑀧𑀸𑀘𑀓𑀢𑀭𑁄 𑀧𑀸𑀘𑀓𑀢𑀫𑁄’𑀢𑀺. 𑀇𑀲𑁆𑀲𑀺𑀓 𑀇𑀬𑀇𑀝𑁆𑀞𑀸 𑀲𑀭𑀸𑀤𑀻 𑀢𑀢𑁄 (𑀅𑀜𑁆𑀜𑀢𑁄) 𑀦 𑀳𑁄𑀦𑁆𑀢𑀺 𑀩𑀳𑀼𑀮𑀸𑀥𑀺𑀓𑀸𑀭𑀸.

𑀢𑀲𑁆𑀲𑀸𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑁂𑀧𑀺 𑀯𑀺𑀓𑀸𑀭𑀲𑀫𑁆𑀩𑀦𑁆𑀥𑀻𑀬𑁂𑀯 𑀙𑀝𑁆𑀞𑀺𑀬𑀦𑁆𑀢𑁄 𑀕𑀬𑁆𑀳𑀢𑀺, 𑀙𑀝𑁆𑀞𑀺𑀬𑀦𑁆𑀢𑀲𑀫𑁆𑀩𑀦𑁆𑀥𑀻𑀬𑁂𑀯 𑀘 𑀯𑀺𑀓𑀸𑀭𑁄 𑀕𑀬𑁆𑀳𑀢𑀺 𑀲𑀫𑁆𑀩𑀦𑁆𑀥𑀯𑀲𑀸𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘𑀬𑀲𑁆𑀲𑀸’𑀘𑁆𑀘𑀸𑀤𑀺. 𑀓𑁄𑀲𑀓𑀸𑀭𑀓𑀧𑀸𑀡𑀯𑀺𑀲𑁂𑀲𑁂𑀳𑀺 𑀓𑀢𑁄 𑀓𑁄𑀲𑁄. 𑀧𑀸𑀡𑀬𑁄 𑀲𑀢𑁆𑀢𑀸, 𑀑𑀲𑀥𑁆𑀬𑁄𑀨𑀮𑀧𑀸𑀓𑀦𑁆𑀢𑀸, 𑀭𑀼𑀓𑁆𑀔𑀸 𑀧𑀼𑀧𑁆𑀨𑀨𑀮𑀽𑀧𑀕𑀸𑀢𑀺 𑀭𑀼𑀓𑁆𑀔𑁄𑀲𑀥𑀻𑀦𑀁 𑀮𑀓𑁆𑀔𑀡𑀁 𑀯𑀤𑀦𑁆𑀢𑀺 𑀢𑀮𑁆𑀮𑀓𑁆𑀔𑀡𑁂𑀦𑁂𑀢𑁆𑀣 𑀭𑀼𑀓𑁆𑀔𑁄 𑀲𑀥𑀬𑁄 𑀦 𑀕𑀬𑁆𑀳𑀦𑁆𑀢𑀺, 𑀓𑀺𑀜𑁆𑀘𑀭𑀳𑀺 𑀑𑀲𑀥𑀺𑀲𑀤𑁆𑀤𑁂𑀦 𑀮𑀢𑀸𑀤𑀺𑀧𑀺 𑀕𑀬𑁆𑀳𑀢𑀺, 𑀭𑀼𑀓𑁆𑀔𑀲𑀤𑁆𑀤𑁂𑀦 (𑀯𑀦𑀧𑁆𑀧)𑀢𑀬𑁄𑀧𑀺, 𑀯𑀦𑀧𑁆𑀧𑀢𑀬𑁄 𑀳𑀺 𑀨𑀮𑀯𑀦𑁆𑀢𑀸 𑀦 𑀧𑀼𑀧𑁆𑀨𑀯𑀦𑁆𑀢𑀸. 𑀓𑀣𑀁 𑀕𑀸𑀯𑀲𑁆𑀲 𑀯𑀺𑀓𑀸𑀭𑁂 𑀧𑀼𑀭𑀺𑀲𑁂 𑀫𑀬𑁄𑀘𑁆𑀘𑀸𑀳- ‘𑀅𑀜𑁆𑀜𑀲𑁆𑀫𑀺’𑀦𑁆𑀢𑀺𑀆𑀤𑀺. 𑀕𑀸𑀯𑀲𑁆𑀲 𑀇𑀤𑀁 𑀕𑁄𑀫𑀬𑀁.

𑀉𑀧𑀧𑀢𑁆𑀬𑀦𑁆𑀢𑀭𑀦𑁆𑀢𑀺 𑀧𑀘𑁆𑀘𑀬𑀮𑁄𑀧𑀢𑁄 𑀬𑀼𑀢𑁆𑀬𑀦𑁆𑀢𑀭𑀁.

𑀢𑀻𑀲𑀼𑀢𑁆𑀢𑀭𑁂𑀲𑀼 𑀘 𑀯𑀢𑁆𑀢𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀭𑀸𑀚𑀜𑁆𑀜𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀚𑀸𑀢𑀺𑀬𑀫𑀧𑀘𑁆𑀘𑁂 𑀜𑁆𑀜𑀲𑁆𑀲𑀧𑁆𑀧𑀘𑁆𑀘𑀬𑀸𑀦𑀁 𑀯𑀺𑀥𑀸𑀦𑀸 𑀯𑀼𑀢𑁆𑀢𑀁 ‘𑀕𑁄𑀢𑁆𑀢𑀧𑁆𑀧𑀘𑁆𑀘𑀬𑀦𑁆𑀢𑀸’𑀢𑀺 𑀆𑀳- ‘𑀭𑀸𑀚𑀜𑁆𑀜𑀸𑀦𑀁 𑀲𑀫𑀽𑀳𑁄’𑀘𑁆𑀘𑀸𑀤𑀺. 𑀉𑀓𑁆𑀔𑁄 𑀉𑀲𑀪𑁄. 𑀑𑀝𑁆𑀞𑁄 𑀔𑀭𑀢𑁄, 𑀉𑀭𑀩𑁆𑀪𑁄 𑀫𑁂𑀲𑁄, 𑀏𑀯𑀫𑀺𑀘𑁆𑀘𑀸𑀤𑀺𑀦𑀸 ‘𑀉𑀓𑁆𑀔𑀸𑀦𑀁 𑀲𑀫𑀽𑀳𑁄’𑀘𑁆𑀘𑀸𑀤𑀺. 𑀯𑀸𑀓𑁆𑀬𑀫𑀧𑀤𑀺𑀲𑀢𑀺. 𑀓𑀸𑀓𑀸𑀦𑀁 𑀲𑀫𑀽𑀳𑁄𑀢𑀺 𑀯𑀺𑀕𑁆𑀕𑀳𑁄, 𑀡𑀺𑀓𑀅𑀘𑀺𑀢𑁆𑀢𑀸𑀢𑀺 𑀇𑀫𑀺𑀦𑀸 𑀡𑀺𑀓𑁄 𑀅𑀘𑀺𑀢𑁆𑀢𑀯𑀸𑀘 𑀓𑁂𑀳𑁂𑀯 𑀤𑀺𑀲𑁆𑀲𑀢𑀻𑀢𑀺 𑀜𑀸𑀧𑁂𑀢𑀺. 𑀅𑀧𑀽𑀧𑁄 𑀧𑀺𑀝𑁆𑀞𑀧𑀽𑀧𑁄, 𑀲𑀁𑀓𑀼𑀮𑀦𑁆𑀢𑀺 (𑀕𑀼𑀴) 𑀫𑀺𑀲𑁆𑀲𑀓𑀔𑀚𑁆𑀚𑀓𑀯𑀺𑀲𑁂𑀲𑁄.

‘‘𑀢𑀤𑀲𑁆𑀲𑀝𑁆𑀞𑀸𑀦𑀫𑀻𑀬𑁄 ¶ 𑀘𑀸’’𑀢𑀺 (𑁨-𑁮-𑁧𑁩) 𑀓𑀘𑁆𑀘𑀸𑀬𑀦𑀲𑀼𑀢𑁆𑀢𑀲𑁆𑀲𑀸𑀬 𑀫𑀢𑁆𑀣𑁄 ‘‘𑀢𑀤𑀲𑁆𑀲𑀝𑁆𑀞𑀸𑀦𑀫𑀺𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂 𑀙𑀝𑁆𑀞𑀺𑀬𑀦𑁆𑀢𑀢𑁄 𑀈𑀬𑀧𑁆𑀧𑀘𑁆𑀘𑀬𑁄 𑀳𑁄𑀢𑀻’𑀢𑀺. 𑀢𑁂𑀦 𑀫𑀤𑀦𑀲𑁆𑀲 𑀞𑀸𑀦𑀁 𑀫𑀤𑀦𑀻𑀬𑀁 𑀩𑀦𑁆𑀥𑀦𑀲𑁆𑀲 𑀞𑀸𑀦𑀁 𑀩𑀦𑁆𑀥𑀦𑀻𑀬𑀁𑀢𑁆𑀬𑀸𑀤𑀺𑀓𑀁 𑀲𑀸𑀥𑁂𑀦𑁆𑀢𑀺. 𑀇𑀥 𑀧𑀦 𑀢𑀣𑀸𑀯𑀺𑀥𑀲𑁆𑀲𑀸𑀪𑀸𑀯𑀸 𑀓𑀣𑀁 𑀢𑀁 𑀲𑀺𑀚𑁆𑀛𑀢𑀻𑀢𑁆𑀬𑀸𑀲𑀗𑁆𑀓𑀺𑀬 ‘𑀫𑀤𑀦𑀻𑀬’𑀦𑁆𑀢𑀺𑀆𑀤𑀺𑀓𑀁 𑀯𑀼𑀢𑁆𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀫𑀸𑀳- ‘𑀫𑀤𑀦𑀻𑀬𑀸𑀤𑀺𑀧𑁆𑀧𑀲𑀺𑀤𑁆𑀥𑀺𑀬𑀸’𑀘𑁆𑀘𑀸𑀤𑀺. 𑀲𑀸𑀥𑀦𑀓𑁆𑀓𑀫𑀁 𑀤𑀲𑁆𑀲𑁂𑀢𑀼𑀫𑀸𑀳- ‘𑀏𑀯𑀫𑀜𑁆𑀜𑀢𑁂’𑀘𑁆𑀘𑀸𑀤𑀺.

𑀞𑀸𑀦𑀦𑁆𑀢𑀺 𑀓𑀸𑀭𑀡𑀁. ‘‘𑀉𑀧𑀫𑀢𑁆𑀣𑀸𑀬𑀺𑀢𑀢𑁆𑀢’’𑀦𑁆𑀢𑀺 (𑁨-𑁮-𑁧𑁪) 𑀓𑀘𑁆𑀘𑀸𑀬𑀦𑀲𑀼𑀢𑁆𑀢𑀲𑁆𑀲𑀸𑀬𑀫𑀢𑁆𑀣𑁄 ‘‘𑀉𑀧𑀫𑀢𑁆𑀣𑁂 𑀆𑀬𑀺𑀢𑀢𑁆𑀢𑀧𑁆𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺 𑀢𑁂𑀦 𑀥𑀽𑀫𑁄 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺 𑀥𑀽𑀫𑀸𑀬𑀺𑀢𑀢𑁆𑀢𑀁 𑀢𑀺𑀫𑀺𑀭𑀫𑀺𑀯 𑀤𑀺𑀲𑁆𑀲𑀢𑀻𑀢𑀺 𑀢𑀺𑀫𑀺𑀭𑀸𑀬𑀺𑀢𑀢𑁆𑀢𑀁𑀢𑁆𑀬𑀸𑀤𑀺𑀓𑀁 𑀲𑀸𑀥𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀢𑀫𑁆𑀧𑀺𑀳𑀘𑁆𑀘𑀸𑀤𑀺𑀓𑀁 𑀤𑁆𑀯𑀻𑀲𑀼 𑀲𑀸𑀥𑀦𑀓𑁆𑀓𑀫𑀤𑀲𑁆𑀲𑀦𑀁, 𑀥𑀽𑀫𑁄 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺 𑀤𑀲𑁆𑀲𑀺𑀢𑁄 𑀬𑁄 𑀓𑀫𑁆𑀫𑀢𑁆𑀣𑁄 𑀲𑁄𑀧𑀺 𑀥𑀽𑀫𑀸𑀬𑀻𑀢𑀺 𑀓𑀢𑁆𑀢𑀼𑀯𑀲𑁂𑀦 𑀲𑀓𑁆𑀓𑀸 𑀧𑀭𑀺𑀓𑀧𑁆𑀧𑁂𑀢𑀼𑀦𑁆𑀢𑀺 𑀓𑀢𑁆𑀢𑀼𑀲𑀸𑀥𑀦𑀢𑁄 𑀥𑀽𑀫𑀸𑀬𑀺𑀢𑀲𑀤𑁆𑀤𑀸 𑀲𑀓𑀢𑁆𑀣𑁂𑀢𑁆𑀢𑀧𑁆𑀧𑀘𑁆𑀘𑀬𑁂𑀧𑀺 𑀥𑀽𑀫𑁄 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁂 𑀆𑀬𑀺𑀢𑀢𑁆𑀣𑀧𑁆𑀧𑀘𑁆𑀘𑀬𑁂𑀧𑀺 𑀦𑀸𑀢𑁆𑀣𑀪𑁂𑀤𑁄-𑀜𑁆𑀜𑀢𑁆𑀭𑀯𑀘𑀦𑀺𑀘𑁆𑀙𑀸𑀪𑁂𑀤𑀸𑀢𑀺 𑀤𑀝𑁆𑀞𑀩𑁆𑀩𑀁, 𑀪𑀸𑀯𑀢𑁆𑀣𑁄 𑀧𑀦 𑀢𑁂𑀲𑀁 𑀪𑀸𑀯𑀧𑁆𑀧𑀥𑀸𑀦𑀯𑀲𑁂𑀦 𑀮𑀩𑁆𑀪𑀢𑀺, 𑀥𑀽𑀫𑀲𑁆𑀲𑁂𑀯 𑀤𑀲𑁆𑀲𑀦𑀦𑁆𑀢𑀺 𑀯𑀺𑀕𑁆𑀕𑀳𑁂 𑀆𑀬𑀺𑀢𑀢𑁆𑀢𑁂𑀦 𑀯𑀸.

𑀅𑀜𑁆𑀜𑀲𑁆𑀫𑀺𑀦𑁆𑀢𑀺 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀅𑀢𑁆𑀣𑁂 𑀇𑀬𑁄𑀢𑀺 𑀬𑁄𑀚𑀦𑀸.

𑀧𑀯𑀸𑀲𑁂 𑀤𑀽𑀭𑀕𑀫𑀦𑁂 𑀲𑀸𑀥𑀼 𑀧𑀯𑀸𑀲𑀺𑀓𑁄, 𑀉𑀧𑀯𑀸𑀲𑁂 𑀭𑀢𑁆𑀬𑀪𑁄𑀚𑀦𑁂 𑀲𑀸𑀥𑀼 𑀉𑀧𑀯𑀸𑀲𑀺𑀓𑁄.

𑀧𑀣𑁂 𑀲𑀸𑀥𑀼 𑀉𑀧𑀸𑀓𑀸𑀭𑀓𑀁 𑀧𑀸𑀣𑁂𑀬𑁆𑀬𑀁, 𑀫𑀕𑁆𑀕𑁄𑀧𑀓𑀭𑀡𑀁, 𑀲𑀧𑀢𑀺𑀫𑁆𑀳𑀺 𑀥𑀦 𑀧𑀢𑀺𑀫𑁆𑀳𑀺 𑀲𑀸𑀥𑀼 𑀉𑀧𑀓𑀭𑀡𑀁 𑀲𑀸𑀧𑀢𑁂𑀬𑁆𑀬𑀁 𑀥𑀦𑀁.

𑀢𑀼𑀫𑀦𑁆𑀢𑀓𑀺𑀭𑀺𑀬𑀸𑀬𑀸𑀢𑀺 𑀖𑀸𑀢𑁂𑀢𑀼𑀁 (𑀢𑁆𑀬𑀸𑀤𑀻𑀢𑀼) 𑀫𑀦𑁆𑀢𑀓𑀺𑀭𑀺𑀬𑀸𑀬. 𑀯𑀸 𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑁄, 𑀖𑀸𑀢𑁂𑀢𑀼𑀁 𑀯𑀸𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑁄.

𑀇𑀢𑀺𑀲𑀤𑁆𑀤𑁂𑀦 ¶ 𑀩𑁆𑀬𑀯𑀘𑁆𑀙𑀺𑀦𑁆𑀦𑀫𑀢𑁆𑀣𑀫𑀼𑀧𑀤𑀲𑁆𑀲𑀬𑀫𑀜𑁆𑀜𑀦𑀸𑀧𑁂𑀓𑁆𑀔𑀁 𑀲𑀧𑁆𑀧𑀥𑀸𑀦𑀁 𑀫𑀦𑁆𑀢𑁆𑀯𑀸𑀤𑀺 𑀯𑀺𑀥𑀺𑀫𑁆𑀳𑀺𑀤𑀫𑀢𑁆𑀣𑀤𑁆𑀯𑀬𑀁 𑀩𑁆𑀬𑀸𑀧𑀸𑀭𑀻𑀬𑀢𑀺𑀘𑁆𑀘𑀸𑀳-‘𑀏𑀢𑁆𑀣 𑀅𑀲𑁆𑀲 𑀅𑀢𑁆𑀣𑀻’𑀢𑀺. 𑀦𑀦𑀼 𑀘 𑀬𑀁 𑀬𑀲𑁆𑀲 𑀳𑁄𑀢𑀺 𑀢𑀁 𑀢𑀲𑁆𑀫𑀺𑀫𑁆𑀧𑀺 𑀳𑁄𑀢𑀺 (𑀬𑀁 𑀬𑀲𑁆𑀫𑀺𑀁 𑀳𑁄𑀢𑀺) 𑀢𑀲𑁆𑀲𑀸𑀧𑀺 𑀢𑀁 𑀳𑁄𑀢𑀺 𑀢𑁂𑀦𑁂𑀯 𑀯𑀼𑀘𑁆𑀘𑀢𑁂- ‘𑀙𑀝𑁆𑀞𑀻𑀲𑀢𑁆𑀢𑀫𑀻𑀦𑀫𑀯𑀺𑀲𑁂𑀲𑁄’𑀢𑀺, 𑀢𑀢𑁆𑀭𑀜𑁆𑀜 𑀢𑀭𑀦𑀺𑀤𑁆𑀤𑁂𑀲𑁂𑀦𑁂𑀯 𑀲𑀺𑀤𑁆𑀥𑁂 𑀓𑀺𑀫𑀢𑁆𑀣𑀫𑀺𑀳 𑀙𑀝𑁆𑀞𑀻𑀲𑀢𑁆𑀢𑀫𑀻𑀦𑀁 𑀪𑁂𑀤𑁂𑀦𑁄𑀧𑀸𑀤𑀸𑀦𑀁 𑀓𑀭𑀻𑀬𑀢𑀻𑀢𑀺 𑀯𑀼𑀘𑁆𑀘𑀢𑁂-𑀬𑀢𑁆𑀭𑀸𑀯𑀬𑀯𑀸𑀯𑀬𑀯𑀺𑀪𑀸𑀯𑁄, 𑀢𑀢𑁆𑀣𑁂𑀯 𑀙𑀝𑁆𑀞𑀻𑀲𑀢𑁆𑀢𑀫𑀻𑀦𑀫𑀢𑁆𑀣𑀲𑁆𑀲 𑀅𑀯𑀺𑀲𑁂𑀲𑁄 [𑀯𑀢𑁆𑀣𑀼𑀢𑁄 (𑀧𑁄𑀢𑁆𑀣𑀓𑁂)] 𑀬𑀣𑀸 ‘𑀭𑀼𑀓𑁆𑀔𑁂𑀲𑀸𑀔𑀸 𑀭𑀼𑀓𑁆𑀔𑀲𑁆𑀲 𑀲𑀸𑀔𑀸’𑀢𑀺. 𑀲𑀲𑁆𑀲𑀸𑀫𑀺𑀪𑀸𑀯𑀚𑀜𑁆𑀜𑀚𑀦𑀓𑀪𑀸𑀯𑀸𑀤𑁄 𑀢𑀼 𑀦𑀸𑀯𑀲𑁆𑀲𑀫𑀸𑀥𑀸𑀭𑀸𑀥𑁂𑀬𑁆𑀬𑀪𑀸𑀯𑁄𑀢𑀺 𑀤𑁆𑀯𑀺𑀦𑁆𑀦𑀫𑁂𑀯𑀢𑁆𑀣𑀸𑀦𑀫𑀼𑀧𑀸𑀤𑀸𑀦𑀦𑁆𑀢𑀺.

𑀦𑀦𑀼 𑀘 𑀲𑀫𑁆𑀪𑀯𑁂 𑀩𑁆𑀬𑀪𑀺𑀘𑀸𑀭𑁂 𑀘 𑀲𑀢𑀺 𑀯𑀺𑀲𑁂𑀲𑀦𑀁 𑀲𑀸𑀢𑁆𑀣𑀓𑀁 𑀪𑀯𑀢𑀺 𑀬𑀣𑀸 ‘𑀦𑀻𑀮𑀫𑀼𑀧𑁆𑀧𑀮’𑀦𑁆𑀢𑀺, 𑀦𑁂𑀯𑀸𑀢𑁆𑀣𑀺𑀢𑁆𑀢𑀲𑁆𑀲𑀸𑀢𑁆𑀣𑀺 𑀩𑁆𑀬𑀪𑀺𑀘𑀸𑀭𑁄, 𑀢𑀣𑀸 𑀘 𑀯𑀼𑀢𑁆𑀢𑀁- ‘𑀦 𑀲𑀢𑁆𑀢𑀁 𑀧𑀤𑀢𑁆𑀣𑁄 𑀩𑁆𑀬𑀪𑀺𑀘𑀭𑀢𑀻’𑀢𑀺, 𑀢𑀲𑁆𑀫𑀸 𑀩𑁆𑀬𑀯𑁂𑀘𑁆𑀙𑁂𑀚𑁆𑀚𑀸𑀪𑀸𑀯𑀸 𑀦𑀺𑀭𑀢𑁆𑀣𑀓𑀫𑀢𑁆𑀣𑀻𑀢𑀺𑀯𑀺𑀲𑁂𑀲𑀦𑀦𑁆𑀢𑁆𑀬𑀸𑀳- ‘𑀧𑀤𑀢𑁆𑀣𑀲𑁆𑀲𑁂’𑀘𑁆𑀘𑀸𑀤𑀺. 𑀲𑀢𑁆𑀢𑀸𑀬𑀁 𑀅𑀩𑁆𑀬𑀪𑀺𑀘𑀸𑀭𑁂 𑀧𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀸𑀮𑀦𑁆𑀢𑀭𑀸 𑀩𑁆𑀬𑀪𑀺𑀘𑀸𑀭𑀢𑁆𑀣𑀫𑀢𑁆𑀣𑀻𑀢𑀺𑀯𑀺𑀲𑁂𑀲𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀓𑀸𑀮𑁂’𑀘𑁆𑀘𑀸𑀤𑀺.

𑀦𑀦𑀼 𑀘 𑀲𑀼𑀢𑁆𑀢𑁂𑀲𑀼 𑀓𑀸𑀮𑁄 𑀧𑀥𑀸𑀦𑀁 𑀦 𑀳𑁄𑀢𑀺, ‘‘𑀢𑁂𑀦 𑀓𑀢𑀁 𑀓𑀻𑀢𑀁’’𑀢𑁆𑀬𑀸𑀤𑀺𑀦𑀸 𑀳𑀺 𑀧𑀘𑁆𑀘𑀬𑀢𑁆𑀣𑁄 𑀤𑀲𑁆𑀲𑀺𑀢𑁄, 𑀢𑀣𑀸 𑀳𑀺 𑀓𑀸𑀬𑀺𑀓𑀁𑀯𑀸𑀘𑀲𑀺𑀓𑀁 𑀢𑁆𑀬𑀸𑀤𑁄 𑀦 𑀓𑀸𑀮𑀲𑀫𑁆𑀧𑀘𑁆𑀘𑀬𑁄, 𑀏𑀯𑀫𑀺𑀳𑀸𑀧𑀺 𑀲𑀢𑁆𑀢𑀸𑀫𑀢𑁆𑀢𑁂 𑀪𑀯𑀺𑀢𑀩𑁆𑀩𑀁, 𑀅𑀢𑁆𑀣𑀻𑀢𑀺 𑀢𑀼 𑀯𑀢𑁆𑀢𑀫𑀸𑀦𑀲𑀢𑁆𑀢𑀸𑀬 𑀏𑀯 𑀧𑀭𑀺𑀕𑁆𑀕𑀳𑁄 𑀓𑀣𑀫𑀯𑀲𑀻𑀬𑀢𑁂 𑀬𑁂𑀦 𑀓𑀸𑀮𑀯𑀺𑀲𑁂𑀲𑀦𑀁 𑀲𑀺𑀬𑀸𑀢𑀺. 𑀲𑀘𑁆𑀘𑀁, 𑀓𑀺𑀦𑁆𑀢𑀼 𑀧𑀤𑀢𑁆𑀣𑀲𑁆𑀲 𑀲𑀢𑁆𑀢𑀸𑀩𑁆𑀬𑀪𑀺𑀘𑀸𑀭𑀸𑀪𑀸𑀯𑁂𑀧𑀺 𑀅𑀢𑁆𑀣𑀻𑀢𑀺𑀯𑀺𑀲𑁂𑀲𑀦𑁄𑀧𑀸𑀤𑀸𑀦𑀲𑀸𑀫𑀢𑁆𑀣𑀺𑀬𑀸𑀢𑁆𑀭 𑀯𑀺𑀲𑀺𑀝𑁆𑀞𑁄 𑀲𑀢𑁆𑀢𑀸 𑀅𑀢𑁆𑀣𑀻𑀢𑀺 𑀯𑀺𑀲𑁂𑀲𑀦𑀢𑁆𑀢𑁂𑀦𑁄𑀧𑀸𑀢𑁆𑀢𑀸, 𑀦 𑀲𑀢𑁆𑀢𑀸𑀫𑀢𑁆𑀢𑀦𑁆𑀢𑀺 𑀧𑀢𑀻𑀬𑀢𑁂, 𑀲𑀸 𑀧𑀦 𑀯𑀺𑀲𑀺𑀝𑁆𑀞𑀸 𑀲𑀢𑁆𑀢𑀸 𑀲𑀫𑁆𑀧𑀢𑀺𑀲𑀢𑁆𑀢𑀸, 𑀅𑀢𑁆𑀣𑀺 𑀘 𑀢𑀲𑁆𑀲𑀸 𑀩𑁆𑀬𑀪𑀺𑀘𑀸𑀭𑁄 𑀲𑀸𑀫𑀜𑁆𑀜𑀲𑀢𑁆𑀢𑀸𑀬𑀸𑀢𑀺 𑀬𑀼𑀚𑁆𑀚𑀢𑁂𑀯 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀲𑀪𑀸𑀯𑁄𑀢𑀺 𑀫𑀜𑁆𑀜𑀢𑁂. 𑀉𑀧𑀸𑀥𑀻𑀢𑀺 𑀯𑀺𑀲𑁂𑀲𑀦𑀁.

𑀦 𑀪𑀼𑀜𑁆𑀚𑀢𑀺𑀘𑁆𑀘𑀸𑀤𑀺𑀯𑀺𑀬𑀸𑀢𑀺 𑀬𑀣𑀸 𑀦 𑀪𑀼𑀜𑁆𑀚𑀢𑀻𑀢𑀺 𑀦𑀜𑁆𑀲𑁆𑀲 𑀧𑀝𑀺𑀲𑁂𑀥𑀢𑁆𑀢𑀸 𑀯𑀺𑀭𑀼𑀤𑁆𑀥𑀢𑁆𑀣𑀧𑀤𑀲𑁆𑀲 𑀲𑀦𑁆𑀦𑀺𑀥𑀸𑀦𑁂-𑀢𑁆𑀣𑀦𑁆𑀢𑀭𑀲𑁆𑀲 𑀧𑀝𑀺𑀲𑁂𑀥𑀭𑀽𑀧𑀲𑁆𑀲𑀢𑁆𑀣𑀲𑁆𑀲𑀸𑀯𑀕𑀢𑀺 𑀧𑀤𑀦𑀺𑀩𑀦𑁆𑀥𑀦𑀲𑁆𑀲 𑀯𑀺𑀥𑀺𑀦𑁄 𑀅𑀩𑀸𑀥𑀺𑀓𑀸 𑀪𑀯𑀢𑀺, 𑀢𑀫𑀺𑀯𑀸𑀓𑁆𑀬𑀢𑁆𑀣𑁄. 𑀅𑀥𑀺𑀧𑁆𑀧𑀸𑀬𑀢𑁆𑀣 𑀫𑀸𑀳- ¶ ‘𑀅𑀢𑁆𑀣𑀺𑀯𑀘𑀦𑀺𑀘𑁆𑀙𑀸𑀬 𑀬𑁄 𑀯𑀺𑀲𑀬𑁄 𑀢𑀲𑁆𑀲 𑀦𑀺𑀬𑀫𑁄’𑀢𑀺. 𑀓𑀢𑀺 𑀧𑀬𑀲𑀫𑁆𑀪𑀯𑁂 𑀦 𑀧𑀦 𑀕𑁄𑀫𑀸 𑀭𑀼𑀓𑁆𑀔𑀯𑀸𑀢𑀺 𑀬𑁄𑀚𑀦𑀸, 𑀢𑁂𑀳𑀻𑀢𑀺 𑀧𑀲𑀁𑀲𑀸𑀧𑀳𑀽𑀢𑁂𑀳𑀺. 𑀓𑀓𑀼𑀤𑁂 𑀆𑀯𑀢𑁆𑀢𑁄 𑀓𑀓𑀼𑀤𑀸𑀯𑀢𑁆𑀢𑁄, 𑀦𑀺𑀦𑁆𑀤𑀺𑀢𑁄 𑀓𑀓𑀼𑀤𑀸𑀯𑀢𑁆𑀢𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀓𑀓𑀼𑀤𑀸𑀯𑀢𑁆𑀢𑀻. 𑀓𑀣𑀁 𑀦𑀺𑀦𑁆𑀤𑀺𑀢𑀢𑁆𑀢𑀫𑀲𑁆𑀲𑀺𑀘𑁆𑀘𑀸𑀳-‘𑀓𑀓𑀼𑀤𑀸 𑀯𑀢𑁆𑀢𑁄’𑀘𑁆𑀘𑀸𑀤𑀺. 𑀲𑀁𑀲𑀢𑁆𑀢𑁄 𑀤𑀡𑁆𑀟𑁄 𑀅𑀲𑁆𑀲 𑀅𑀢𑁆𑀣𑀺𑀘𑁆𑀘𑀦𑁂𑀦 𑀕𑁂𑀳𑀝𑁆𑀞𑀺𑀢𑁂𑀦 𑀯𑀺𑀚𑁆𑀚𑀫𑀸𑀦𑁂𑀦𑀧𑀺 𑀤𑀡𑁆𑀟𑁂𑀦 𑀤𑀡𑁆𑀟𑀻𑀢𑀺 𑀦𑀸𑀪𑀺𑀥𑀻𑀬𑀢𑀻𑀢𑀺 𑀯𑀤𑀢𑀺. 𑀤𑀩𑁆𑀩𑁂𑀪𑀺𑀥𑁂𑀬𑁆𑀬𑁂𑀢𑀺 𑀚𑀸𑀢𑀺𑀲𑀦𑁆𑀦𑀺𑀲𑁆𑀲𑀬𑀕𑁄𑀧𑀺𑀡𑁆𑀟𑀅𑀲𑁆𑀲𑀧𑀺𑀡𑁆𑀟𑀸𑀤𑀺𑀲𑀗𑁆𑀔𑀸𑀢𑁂 𑀤𑀩𑁆𑀩𑁂-𑀪𑀺𑀥𑁂𑀬𑁆𑀬𑁂, 𑀪𑀯𑀁 𑀪𑀯𑁂𑀬𑁆𑀬𑀸𑀢𑀺 𑀬𑀤𑀸𑀓𑀤𑀸𑀘𑀺 𑀪𑀯𑀦𑁆𑀢𑁄 𑀬𑀤𑀺 𑀪𑀯𑁂𑀬𑁆𑀬.

𑀧𑀜𑁆𑀜𑀯𑀸 ‘‘𑀩𑁆𑀬𑀜𑁆𑀚𑀦𑁂 𑀤𑀻𑀖𑀭𑀲𑁆𑀲𑀸’’𑀢𑀺 (𑁧-𑁩𑁩) 𑀭𑀲𑁆𑀲𑁄.

𑀤𑁆𑀯𑁂 𑀳𑁄𑀦𑁆𑀢𑀻𑀢𑀺 𑀇𑀓𑁄 𑀈𑀘𑁂𑀢𑀺 𑀤𑁆𑀯𑁂 𑀳𑁄𑀦𑁆𑀢𑀺, 𑀏𑀓𑀫𑁂𑀓𑀁𑀯𑀸𑀢𑀺 𑀉𑀪𑀺𑀦𑁆𑀦𑀁. 𑀯𑀸𑀲𑀤𑁆𑀤𑁄 𑀤𑁆𑀯𑁂 𑀳𑁄𑀦𑁆𑀢𑀻𑀢𑀺 𑀏𑀢𑁆𑀣𑀸𑀧𑀺 𑀤𑀝𑁆𑀞𑀩𑁆𑀩𑁄. 𑀉𑀢𑁆𑀢𑀫𑀻𑀡𑁂𑀯 𑀥𑀦𑀸 𑀇𑀓𑁄𑀢𑀺 𑀕𑀡𑀲𑀼𑀢𑁆𑀢𑀁 𑀯𑀺𑀯𑀭𑀢𑀺 ‘𑀉𑀢𑁆𑀢𑀫𑀻𑀡𑁂𑀯𑀸’𑀢𑀺𑀆𑀤𑀺. 𑀓𑁂𑀦𑁂𑀢𑁆𑀣 𑀲𑀫𑀸𑀲𑁄𑀢𑀺 𑀆𑀳- ‘𑀲𑁆𑀬𑀸𑀤𑀺𑀲𑁆𑀬𑀸𑀤𑀺𑀦𑁂𑀓𑀢𑁆𑀣𑀦𑁆𑀢𑀺 𑀲𑀫𑀸𑀲𑁄’𑀢𑀺. 𑀉𑀢𑁆𑀢𑀫𑀻𑀡𑁄 𑀥𑀦𑀲𑀸𑀫𑀻. 𑀅𑀲𑀦𑁆𑀦𑀺𑀳𑀺𑀢𑁂 𑀅𑀢𑁆𑀣𑀸𑀢𑀺 𑀕𑀡𑀲𑀼𑀢𑁆𑀢𑀁, 𑀅𑀲𑀦𑁆𑀦𑀺𑀳𑀺𑀢𑁂𑀢𑀻𑀫𑀲𑁆𑀲 𑀅𑀢𑁆𑀣𑀁 𑀯𑀺𑀯𑀭𑀢𑀺 ‘𑀅𑀧𑁆𑀧𑀢𑁆𑀢𑁂’𑀢𑀺. 𑀅𑀲𑀫𑁆𑀧𑀢𑁆𑀢𑁂𑀢𑀺 𑀅𑀢𑁆𑀣𑁄. 𑀅𑀲𑀦𑁆𑀦𑀺𑀳𑀺𑀢𑁂𑀢𑀺 𑀘 𑀅𑀢𑁆𑀣𑁄 𑀇𑀘𑁆𑀘𑀲𑁆𑀲 𑀯𑀺𑀲𑁂𑀲𑀦𑀁. 𑀅𑀢𑁆𑀣𑀦𑀁 𑀅𑀲𑀦𑁆𑀦𑀺𑀳𑀺𑀢𑁂 𑀅𑀢𑁆𑀣𑁂 𑀆𑀲𑀺𑀲𑀦𑀁 𑀅𑀢𑁆𑀣𑁄, 𑀲𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀅𑀢𑁆𑀣𑀺𑀓𑁄 𑀅𑀢𑁆𑀣𑀻. 𑀢𑀤𑀦𑁆𑀢𑀸𑀘𑀸𑀢𑀺 𑀕𑀡𑀲𑀼𑀢𑁆𑀢𑀁, 𑀅𑀲𑀦𑁆𑀦𑀺𑀳𑀺𑀢𑁂𑀢𑁆𑀬𑀦𑀼𑀯𑀢𑁆𑀢𑀢𑁂, 𑀅𑀲𑀦𑁆𑀦𑀺𑀳𑀺𑀢𑁄𑀧𑀸𑀥𑀺𑀓𑀸 𑀅𑀢𑁆𑀣𑀦𑁆𑀢𑀸 𑀘 𑀇𑀓 𑀈𑀧𑁆𑀧𑀘𑁆𑀘𑀬𑁄 𑀪𑀯𑀢𑀻𑀢𑁆𑀬𑀢𑁆𑀣𑁄. 𑀯𑀡𑁆𑀡𑀦𑁆𑀢𑀸𑀈𑀬𑁂𑀯𑀸𑀢𑀺 𑀕𑀡𑀲𑀼𑀢𑁆𑀢𑀁, 𑀩𑁆𑀭𑀳𑁆𑀫𑀸𑀦𑀁 𑀤𑁂𑀯𑀸𑀦𑀁 𑀯𑀡𑁆𑀡𑁄𑀢𑀺 𑀯𑀸 𑀲𑀫𑀸𑀲𑁄. 𑀳𑀢𑁆𑀣𑀤𑀦𑁆𑀢𑁂𑀳𑀺 𑀚𑀸𑀢𑀺𑀬𑀦𑁆𑀢𑀺 𑀕𑀡𑀲𑀼𑀢𑁆𑀢𑀁.

𑀚𑀸𑀢𑀺𑀬𑀦𑁆𑀢𑀺 𑀧𑀘𑁆𑀘𑀬𑀯𑀺𑀲𑁂𑀲𑀦𑀁. 𑀯𑀡𑁆𑀡𑀢𑁄 𑀩𑁆𑀭𑀳𑁆𑀫𑀘𑀸𑀭𑀺𑀫𑁆𑀳𑀻𑀢𑀺 𑀕𑀡𑀲𑀼𑀢𑁆𑀢𑀁. 𑀩𑁆𑀭𑀳𑁆𑀫𑀲𑀤𑁆𑀤𑁂𑀦 𑀦𑀺𑀬𑀫𑀯𑀺𑀲𑁂𑀲𑁄 𑀯𑀼𑀘𑁆𑀘𑀢𑀺𑀘𑁆𑀘𑀸𑀳-‘𑀯𑀺𑀚𑁆𑀚𑁂’𑀘𑁆𑀘𑀸𑀤𑀺. 𑀢𑀲𑁆𑀫𑀺𑀜𑁆𑀘𑀦𑀺𑀬𑀫𑀯𑀺𑀲𑁂𑀲𑀘𑀭𑀡𑁂 𑀢𑀺𑀡𑁆𑀡𑀁 𑀩𑁆𑀭𑀸𑀳𑁆𑀫𑀡𑀸𑀤𑀻𑀦𑀫𑁂𑀯𑀸𑀥𑀺𑀓𑀸𑀭𑁄, 𑀦𑀲𑀼𑀤𑁆𑀤𑀲𑁆𑀲𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳- ‘𑀢𑀜𑁆𑀘𑁂’𑀘𑁆𑀘𑀸𑀤𑀺. 𑀢𑁂𑀯𑀡𑁆𑀡𑀺𑀓𑁄 𑀯𑀡𑁆𑀡𑀻𑀢𑀺 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀻𑀲𑀼 𑀯𑀡𑁆𑀡𑁂𑀲𑀼 𑀪𑀯𑁄 𑀢𑀤𑀦𑁆𑀢𑁄𑀕𑀥𑀢𑁆𑀢𑀸 𑀢𑁂𑀯𑀡𑁆𑀡𑀺𑀓𑁄𑀢𑀺 𑀪𑀯𑀢𑁆𑀣𑁂 𑀡𑀺𑀓𑁄. 𑀯𑀡𑁆𑀡𑀲𑀤𑁆𑀤𑁄 𑀩𑁆𑀭𑀸𑀳𑁆𑀫𑀡𑀸𑀤𑀺𑀯𑀡𑁆𑀡𑀯𑀘𑀦𑁄. 𑀢𑀢𑁆𑀭 𑀩𑁆𑀭𑀳𑁆𑀫𑀘𑀸𑀭𑀺𑀫𑁆𑀳𑀺𑀢𑁆𑀬𑀦𑁂𑀦 𑀲𑀼𑀤𑁆𑀤𑁄 𑀩𑁆𑀬𑀯𑀘𑁆𑀙𑀺𑀚𑁆𑀚𑀢𑁂.

𑀅𑀣𑀯𑀸 ¶ 𑀩𑁆𑀭𑀳𑁆𑀫𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀢𑀤𑀢𑁆𑀣𑁄 𑀕𑀦𑁆𑀣𑁄𑀧𑀺, 𑀢𑀁 𑀩𑁆𑀭𑀳𑁆𑀫𑀁 𑀦𑀺𑀩𑁆𑀩𑀸𑀦𑀁 𑀥𑀫𑁆𑀫𑀁 𑀯𑀸 𑀢𑁂𑀧𑀺𑀝𑀓𑀁 𑀘𑀭𑀢𑀻𑀢𑀺 𑀩𑁆𑀭𑀳𑁆𑀫𑀘𑀸𑀭𑀻, 𑀬𑀢𑀺. 𑀬𑀢𑀬𑁄𑀧𑀺 𑀳𑀺 𑀯𑀡𑁆𑀡𑀻𑀢𑀺 𑀩𑁆𑀭𑀳𑁆𑀫𑀘𑀸𑀭𑀺𑀦𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑀡𑁆𑀡𑀻𑀮𑀺𑀗𑁆𑀕𑀻𑀢𑀺 𑀳𑀺 𑀯𑀼𑀢𑁆𑀢𑁂 𑀢𑀺𑀮𑀺𑀗𑁆𑀕𑀯𑀸𑀢𑀺 𑀅𑀢𑁆𑀣𑁄. 𑀯𑀡𑁆𑀡 𑀲𑀤𑁆𑀤𑁄 𑀧𑀦𑁂𑀢𑁆𑀣 𑀬𑀣𑀸𑀯𑀼𑀢𑁆𑀢 𑀩𑁆𑀭𑀳𑁆𑀫𑀧𑀭𑀺𑀬𑀸𑀬𑁄. 𑀧𑁄𑀓𑁆𑀔𑀭𑀸𑀤𑀺𑀢𑁄 𑀤𑁂𑀲𑁂𑀢𑀺 𑀕𑀡𑀲𑀼𑀢𑁆𑀢𑀁. 𑀤𑁂𑀲𑁄 𑀘𑁂𑀢𑁆𑀣 𑀬𑀢𑁆𑀣(𑀢𑁆𑀣𑀺 𑀧𑁄𑀓𑁆𑀔𑀭𑀸𑀤𑀻𑀦𑀺 𑀲𑁄). 𑀧𑀤𑀼𑀫𑀕𑀘𑁆𑀙 𑀧𑁄𑀓𑁆𑀔𑀭𑀡𑀻𑀦𑀁 𑀯𑀸𑀘𑀓𑀲𑁆𑀲𑀸𑀢𑀺 𑀇𑀫𑀺𑀦𑀸 𑀧𑀤𑀼𑀫𑀸𑀦𑀺 𑀅𑀲𑁆𑀲𑀁 𑀲𑀦𑁆𑀢𑀻𑀢𑀺 𑀧𑀤𑀼𑀫𑀺𑀦𑀻𑀢𑀺 𑀧𑁄𑀓𑁆𑀔𑀭𑀡𑀻𑀧𑀺 𑀯𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀦𑀸𑀯𑀸 𑀅𑀢𑁆𑀣𑀻𑀢𑀺 𑀦𑀸𑀯𑀺𑀓𑁄, 𑀬𑀸𑀕𑀫𑁂 𑀦𑀸𑀯𑀸𑀬𑀺𑀓𑁄. 𑀲𑀼𑀔𑀤𑀼𑀓𑁆𑀔𑀸 𑀈, 𑀩𑀮𑀸 𑀩𑀸𑀳𑀽𑀭𑀼𑀧𑀼𑀩𑁆𑀩𑀸 𑀘𑁂𑀢𑀺 𑀘 𑀕𑀡𑀲𑀼𑀢𑁆𑀢𑀸𑀦𑀺.

𑀇𑀳𑀸𑀧𑀺 𑀧𑀲𑀚𑁆𑀚𑁂𑀬𑁆𑀬 𑀫𑀥𑀼 𑀅𑀲𑁆𑀫𑀺𑀁 𑀖𑀝𑁂 𑀅𑀢𑁆𑀣𑀻𑀢𑀺 𑀏𑀢𑁆𑀣𑀸𑀧𑀺 𑀧𑀬𑁄𑀕𑁂 𑀫𑀥𑀼𑀭𑀦𑁆𑀢𑀺 𑀭𑀧𑁆𑀧𑀘𑁆𑀘𑀬𑁄 𑀧𑀸𑀧𑀼𑀡𑁂𑀬𑁆𑀬 𑀫𑀥𑀼𑀫𑁆𑀳𑀺 𑀅𑀪𑀺𑀥𑁂𑀬𑁆𑀬𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀕𑀘𑁆𑀙𑀦𑁆𑀢𑀻𑀢𑀺 𑀦𑀕𑀸. 𑀬𑀚𑁆𑀚𑀧𑀺 𑀊𑀲𑀯𑀸𑀘𑁆𑀘𑀸𑀤𑁄 𑀧𑀳𑀽𑀢𑀸𑀤𑀺𑀯𑀺𑀲𑀬𑀸𑀬𑀸𑀢𑁆𑀣𑀺𑀢𑀸𑀬 𑀲𑀫𑁆𑀪𑀯𑁄, 𑀢𑀣𑀸𑀧𑀺 𑀜𑀼𑀲𑀸𑀤𑀺𑀯𑀢𑁄 𑀧𑀘𑁆𑀘𑀬(𑀢𑁆𑀣)𑀢𑁆𑀢𑁂𑀦 𑀯𑀘𑀦𑀺𑀘𑁆𑀙𑀸𑀪𑀸𑀯𑀸 𑀜𑀼𑀲𑀯𑀸 𑀖𑀝𑁄𑀘𑁆𑀘𑀸𑀤𑀺 𑀦 𑀲𑀺𑀚𑁆𑀛𑀢𑀺 𑀢𑀲𑁆𑀫𑀸 𑀧𑀳𑀽𑀢𑀸𑀤𑀺𑀯𑀺𑀲𑀬𑀸𑀢𑁆𑀣𑀺𑀢𑀸𑀲𑀫𑁆𑀪𑀯𑁂𑀧𑀺 𑀢𑀁𑀯𑀢𑁄-𑀢𑁆𑀣𑀲𑁆𑀲 𑀧𑀘𑁆𑀘𑀬(𑀢𑁆𑀣)𑀢𑁆𑀢𑁂𑀦 𑀜𑀼𑀲𑀭𑁄 𑀤𑁂𑀲𑁄𑀢𑀺 𑀯𑀢𑁆𑀢𑀼 𑀫𑀺𑀘𑁆𑀙𑀸𑀬𑀁 𑀧𑀘𑁆𑀘𑀬𑁄 𑀬𑀣𑀸 𑀲𑀺𑀬𑀸 𑀅𑀜𑁆𑀜𑀢𑁆𑀭𑀫𑀸𑀪𑀯𑀺𑀘𑁆𑀘𑁂𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳- ‘𑀇𑀢𑀺’𑀘𑁆𑀘𑀸𑀤𑀺. 𑀓𑀼𑀜𑁆𑀚𑀯𑀸𑀢𑀺𑀏𑀢𑁆𑀣 𑀓𑀼𑀜𑁆𑀚𑀲𑀤𑁆𑀤𑁄 𑀢𑀺𑀡𑀮𑀢𑀸𑀤𑁆𑀬𑀘𑁆𑀙𑀸𑀤𑀺𑀢𑀧𑀩𑁆𑀩𑀢𑁂𑀓𑀤𑁂𑀲𑁂 𑀯𑀢𑁆𑀢𑀢𑁂.

𑀧𑀭𑁂𑀳𑀺 𑀯𑀸𑀘𑀸𑀲𑀤𑁆𑀤𑀸 𑀆𑀮𑁄 𑀯𑀺𑀳𑀺𑀢𑁄 𑀦𑀺𑀦𑁆𑀤𑀸𑀬𑀁, 𑀦𑁂𑀳 𑀢𑀣𑁂𑀢𑀺 𑀘𑁄𑀤𑀦𑀫𑀼𑀩𑁆𑀪𑀸𑀯𑀬𑀢𑀺 ‘𑀦𑀺𑀦𑁆𑀤𑀸𑀬’𑀫𑀺𑀘𑁆𑀘𑀸𑀤𑀺𑀦𑀸.

𑀲𑀻𑀮𑀫𑀲𑁆𑀲 𑀅𑀢𑁆𑀣𑀺, 𑀓𑁂𑀲𑀸 𑀅𑀲𑁆𑀲 𑀲𑀦𑁆𑀢𑀻𑀢𑀺 𑀯𑀺𑀕𑁆𑀕𑀳𑁄. 𑀅𑀡𑁆𑀡𑀸 𑀦𑀺𑀘𑁆𑀘𑀦𑁆𑀢𑀺 𑀦𑀺𑀘𑁆𑀘𑀯𑀺𑀥𑁆𑀬𑀼𑀢𑁆𑀣𑀁 𑀕𑀡𑀲𑀼𑀢𑁆𑀢𑀁. 𑀕𑀸𑀡𑁆𑀟𑀻𑀭𑀸𑀚𑀻𑀳𑀺 𑀲𑀜𑁆𑀜𑀸𑀬𑀦𑁆𑀢𑀺 𑀲𑀜𑁆𑀜𑀸𑀯𑀺𑀲𑀬𑀦𑀺𑀬𑀫𑀦𑀢𑁆𑀣𑀁 𑀕𑀡𑀲𑀼𑀢𑁆𑀢𑀁. 𑀕𑀡𑁆𑀟𑀲𑁆𑀲 𑀕𑀡𑁆𑀟𑀫𑀺𑀕𑀲𑀺𑀗𑁆𑀕𑀲𑁆𑀲 𑀅𑀬𑀁 𑀕𑀸𑀡𑁆𑀟𑀻, 𑀲𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀕𑀸𑀡𑁆𑀟𑀻𑀯𑁄.

𑀲𑀫𑀲𑁆𑀲 𑀅𑀢𑁆𑀣𑀻𑀢𑀺 𑀲𑀼𑀯𑀸𑀫𑀻,𑀲𑀁 𑀲𑀓𑀺𑀬𑀁.

𑀅𑀓𑀸𑀭𑀸𑀤𑁂𑀲𑁄 ¶ 𑀘 𑀡𑀲𑀦𑁆𑀦𑀺𑀬𑁄𑀕𑁂𑀦𑀸𑀢𑀺 𑀇𑀫𑀺𑀦𑀸 𑀬𑀢𑁆𑀣 𑀡𑀓𑀸𑀭𑁄 𑀢𑀢𑁆𑀣𑁂𑀯𑀸𑀬𑀫𑀓𑀸𑀭𑀸𑀤𑁂𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀉𑀧𑀸𑀤𑀸𑀦𑀢𑁄𑀢𑀺 𑀇𑀫𑀺𑀦𑀸 𑀦𑀺𑀲𑁆𑀲𑀬𑀓𑀭𑀡𑀫𑁂𑀓𑁄 𑀲𑀢𑁆𑀣𑀺𑀬𑁄 𑀜𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀦𑁆𑀢𑀲𑁆𑀲 𑀅𑀯𑀺𑀥𑀸𑀦𑀲𑀸𑀫𑀢𑁆𑀣𑀺𑀬𑀸𑀘𑀸𑀢𑀺 𑀇𑀫𑀺𑀦𑀸 𑀲𑀢𑀺𑀧𑀺 𑀧𑀼𑀩𑁆𑀩𑀮𑁄𑀧𑁂𑀦 𑀧𑀬𑁄𑀕 𑀦𑀺𑀧𑁆𑀨𑀢𑁆𑀢𑀺𑀬𑀁 𑀅𑀓𑀸𑀭𑀁 𑀯𑀺𑀥𑀸𑀬 𑀢𑀲𑁆𑀲 𑀮𑁄𑀧𑁄 𑀦𑀺𑀭𑀢𑁆𑀣𑀓𑁄𑀢𑀺 𑀤𑀲𑁆𑀲𑁂𑀢𑀺. 𑀮𑀓𑁆𑀔𑀻 𑀲𑀺𑀭𑀻 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀮𑀓𑁆𑀔𑀡𑁄.

𑀓𑀧𑁆𑀧𑁄 𑀬𑁄𑀕𑁆𑀬𑀢𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀓𑀧𑁆𑀧𑀺𑀬𑁄, 𑀚𑀝𑀸 𑀳𑀸𑀦𑀪𑀸𑀕𑁄, 𑀲𑁂𑀦𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀯𑀺𑀕𑁆𑀕𑀳𑁄.

‘𑀑𑀳𑀸𑀓 𑀘𑀸𑀕𑁂’ 𑀇𑀢𑀺 𑀲𑀓𑀓𑀸𑀭𑀲𑁆𑀲 𑀳𑀸𑀥𑀸𑀢𑀼𑀦𑁄 𑀧𑀬𑁄𑀕𑁂 𑀢𑁄𑀧𑁆𑀧𑀘𑁆𑀘𑀬𑀁 𑀦𑀺𑀲𑁂𑀥𑁂𑀢𑁆𑀯𑀸‘𑀲𑀢𑁆𑀣𑀸 𑀳𑀻𑀬𑀢𑁂 𑀲𑀢𑁆𑀣𑀸 𑀳𑀻𑀦𑁄’𑀢𑀺 𑀉𑀤𑀸𑀳𑀭𑀡𑀁 𑀤𑀲𑁆𑀲𑀺𑀢𑀁. 𑀢𑁂𑀦𑀸𑀳- ‘𑀲𑀓𑁆𑀓𑀢𑁂𑀘𑁆𑀘𑀸𑀤𑀺. 𑀤𑀲𑁆𑀲𑁂𑀢𑀼𑀁 𑀢𑀢𑀺𑀬𑀫𑁆𑀧𑀦𑀼𑀤𑀸𑀳𑀭𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀻𑀧𑁆𑀧𑀘𑁆𑀘𑀬𑀸𑀯𑀲𑀸𑀦𑀸𑀦𑀦𑁆𑀢𑀺 ‘‘𑀅𑀪𑀽𑀢𑀢𑀩𑁆𑀪𑀸𑀯𑁂 𑀓𑀭𑀸𑀲𑀪𑀽𑀬𑁄𑀕𑁂 𑀯𑀺𑀓𑀸𑀭𑀸𑀘𑀻’’𑀢𑀺 (𑁪-𑁧𑁧𑁯) 𑀯𑀼𑀢𑁆𑀢𑁄 𑀘𑀻𑀧𑁆𑀧𑀘𑁆𑀘𑀬𑁄 𑀅𑀯𑀲𑀸𑀦𑁂 𑀬𑁂 𑀲𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀚𑀸𑀢𑀺𑀬𑀯𑀚𑁆𑀚𑀺𑀢𑀸𑀦𑀦𑁆𑀢𑀺 ‘‘𑀢𑀩𑁆𑀩𑀢𑀺 𑀚𑀸𑀢𑀺𑀬𑁄’’𑀢𑀺 (𑁪-𑁧𑁧𑁩) 𑀲𑀼𑀢𑁆𑀢𑁂𑀦 𑀚𑀸𑀢𑀺𑀬𑀧𑁆𑀧𑀘𑁆𑀘𑀬𑁂𑀦 𑀯𑀚𑁆𑀚𑀺𑀢𑀸𑀦𑀁. 𑀓𑀘𑁆𑀘𑀸𑀬𑀦𑁂 𑀢𑀼 𑀢𑁄𑀆𑀤𑀻𑀦𑀁 𑀯𑀺𑀪𑀢𑁆𑀢𑀺 𑀲𑀜𑁆𑀜𑀢𑁆𑀢𑀸 𑀦 𑀢𑀢𑁄 𑀧𑀼𑀦 𑀯𑀺𑀪𑀢𑁆𑀢𑀼𑀧𑁆𑀧𑀢𑁆𑀢𑀺.

𑀯𑀼𑀢𑁆𑀢𑀺𑀬𑀁 ‘𑀏𑀢𑀲𑁆𑀲 𑀝 𑀏𑀢’ 𑀇𑀢𑀺 𑀅𑀢𑁄𑀇𑀘𑁆𑀘𑀢𑁆𑀭 𑀏𑀢𑀲𑁆𑀲 𑀝𑀸𑀤𑁂𑀲𑁄 𑀏𑀢𑁆𑀢𑁄 𑀇𑀘𑁆𑀘𑀢𑁆𑀭 𑀏𑀢𑀆𑀤𑁂𑀲𑁄𑀢𑀺 𑀅𑀢𑁆𑀣𑁄.

𑀦𑀦𑀼 𑀘 𑀓𑀺𑀁 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦, 𑀧𑀜𑁆𑀘𑀫𑁆𑀬𑀦𑁆𑀢𑀸 ‘‘𑀢𑁄 𑀧𑀜𑁆𑀘𑀫𑁆𑀬𑀸’’𑀢𑀺 (𑁪-𑁯𑁫) 𑀪𑀯𑀺𑀲𑁆𑀲𑀢𑀺, 𑀅𑀧𑀜𑁆𑀘𑀫𑁆𑀬𑀦𑁆𑀢𑀸𑀢𑀼 ‘‘𑀆𑀤𑁆𑀬𑀸𑀤𑀻𑀳𑀻’’𑀢𑀺 (𑁪-𑁯𑁮) 𑀦𑁂𑀢𑀤𑁂𑀯𑀁 𑀤𑀝𑁆𑀞𑀩𑁆𑀩𑀁. ‘‘𑀢𑁄 𑀧𑀜𑁆𑀘𑀫𑁆𑀬𑀸’’𑀢𑀺 (𑁪-𑁯𑁫) 𑀧𑀓𑀢𑀺𑀯𑀺𑀲𑁂𑀲𑀸𑀦𑀫𑀧𑀭𑀸𑀫𑀸𑀲𑀢𑁄 𑀓𑀼𑀢𑁄𑀘𑀺 𑀧𑀜𑁆𑀘𑀫𑁆𑀬𑀦𑁆𑀢𑀸 𑀳𑁄𑀢𑀼, 𑀅𑀧𑀜𑁆𑀘𑀫𑁆𑀬𑀦𑁆𑀢𑀸 𑀧𑀦 ‘‘𑀆𑀤𑁆𑀬𑀸𑀤𑀻𑀳𑀻’’𑀢𑀺 𑀲𑀼𑀢𑁆𑀢𑁂 𑀲𑀲𑀗𑁆𑀔𑁆𑀬𑀲𑁆𑀲𑀸𑀤𑀺𑀲𑀤𑁆𑀤𑀲𑁆𑀲 ¶ 𑀕𑀳𑀡𑁂𑀦 𑀢𑀁𑀲𑀤𑀺𑀲𑀸 𑀲𑀲𑀗𑁆𑀔𑁆𑀬𑀸𑀏𑀯𑁄𑀧𑀮𑀓𑁆𑀔𑀻𑀬𑀦𑁆𑀢𑀻𑀢𑀺𑀧𑀺 𑀯𑀺𑀜𑁆𑀜𑀸𑀬𑁂𑀬𑁆𑀬 𑀢𑀢𑁄 𑀅𑀧𑀜𑁆𑀘𑀫𑁆𑀬𑀦𑁆𑀢𑁂𑀳𑀺 𑀅𑀪𑁆𑀬𑀸𑀤𑀻𑀳𑀺 𑀢𑁄 𑀦 𑀲𑀺𑀬𑀸𑀢𑀺 𑀅𑀪𑀺𑀢𑁄𑀘𑁆𑀘𑀸𑀤𑀺 𑀦 𑀲𑀺𑀚𑁆𑀛𑀢𑀻𑀢𑀺 ‘‘𑀅𑀪𑁆𑀬𑀸𑀤𑀻𑀳𑀻’’𑀢𑀺 𑀲𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀦𑀦𑀼 𑀘 𑀢𑁄𑀇𑀘𑁆𑀘𑁂𑀯 𑀲𑀸𑀫𑀜𑁆𑀜𑁂𑀦 𑀲𑀼𑀢𑁆𑀢𑀺𑀢𑁂 𑀬𑀢𑁄𑀓𑀼𑀢𑁄𑀘𑀺 𑀧𑀜𑁆𑀘𑀫𑁆𑀬𑀦𑁆𑀢𑀸 𑀯𑀸 𑀅𑀧𑀜𑁆𑀘𑀫𑁆𑀬𑀦𑁆𑀢𑀸 𑀯𑀸 𑀩𑀳𑀼𑀮𑀁 𑀯𑀸 𑀢𑁄𑀫𑁆𑀳𑀺 𑀇𑀝𑁆𑀞𑀧𑁆𑀧𑀲𑀺𑀤𑁆𑀥𑀻𑀢𑀺 𑀓𑀺𑀁 𑀆𑀤𑁆𑀬𑀸𑀤𑀻𑀳𑀻𑀢𑀺 𑀲𑀼𑀢𑁆𑀢𑁂𑀦𑀸𑀢𑀺 𑀲𑀘𑁆𑀘𑀁, 𑀢𑀣𑀸𑀧𑀺 𑀯𑀺𑀪𑀸𑀕𑁂𑀦 𑀤𑀲𑁆𑀲𑀺𑀢𑁂 𑀯𑀺𑀪𑀸𑀕𑀲𑁄 𑀯𑀺𑀲𑁂𑀲𑀸𑀯𑀲𑀸𑀬𑁄 𑀲𑀺𑀬𑀸𑀢𑀺 𑀦 𑀤𑁄𑀲𑁄𑀢𑀺. 𑀬𑀦𑁆𑀢𑀺 𑀧𑀞𑀫𑀦𑁆𑀢𑀸 𑀢𑁄𑀫𑁆𑀳𑀺 𑀬𑀢𑁄.

𑀧𑀼𑀩𑁆𑀩𑁂𑀦𑁂𑀯𑀸𑀢𑀺 ‘‘𑀲𑀩𑁆𑀩𑀸𑀤𑀺𑀢𑁄’’ (𑁪-𑁯𑁯) 𑀘𑁆𑀘𑀸𑀤𑀺𑀦𑀸𑀯. 𑀏𑀢𑀲𑁆𑀲𑀸𑀢𑀺 𑀏𑀢𑀲𑀤𑁆𑀤𑀲𑁆𑀲, 𑀇𑀫𑀲𑁆𑀲𑀸𑀢𑀺 𑀇𑀫𑀲𑀤𑁆𑀤𑀲𑁆𑀲.

𑀯𑀸𑀯𑀺𑀥𑀸𑀦𑀸𑀢𑀺 𑀯𑀺𑀓𑀧𑁆𑀧𑁂𑀦 𑀥𑀺𑀧𑁆𑀧𑀘𑁆𑀘𑀬𑀲𑁆𑀲 𑀯𑀺𑀥𑀸𑀦𑀸.

𑀬𑀢𑁆𑀭𑀸𑀢𑀺 𑀯𑀼𑀢𑁆𑀢𑁂 𑀬𑀢𑁆𑀣𑀸𑀢𑀺 𑀉𑀧𑁆𑀧𑀮𑀓𑁆𑀔𑀺𑀢𑀫𑁂𑀯 𑀲𑀺𑀬𑀸𑀢𑀺 𑀦 𑀯𑀼𑀢𑁆𑀢𑀁. 𑀏𑀯𑀫𑀼𑀧𑀭𑀺𑀧𑀺.

𑀳𑀺𑀜𑁆𑀘𑀦𑀁 𑀯𑀺𑀥𑀻𑀬𑀢𑁂 ‘‘𑀳𑀺𑀁 𑀳𑀁 𑀳𑀺𑀜𑁆𑀘𑀦’’𑀦𑁆𑀢𑀺 (𑁨-𑁫-𑁯) 𑀲𑀼𑀢𑁆𑀢𑁂𑀦. 𑀳𑀺𑀜𑁆𑀘𑀺𑀆𑀤𑀻𑀦𑀦𑁆𑀢𑀺 𑀳𑀺𑀜𑁆𑀘𑀺𑀤𑀸𑀘𑀺𑀭𑀳𑀘𑀺𑀆𑀤𑀻𑀦𑀁.

𑀏𑀢𑀲𑁆𑀫𑀺𑀁 𑀓𑀸𑀮𑁂 𑀏𑀓𑀤𑀸𑀇𑀘𑁆𑀘𑀸𑀤𑀺 𑀤𑀝𑁆𑀞𑀩𑁆𑀩𑀁.

𑀓𑀼𑀤𑀸𑀲𑀤𑁆𑀤𑁄 𑀘𑀦𑀁𑀲𑀤𑁆𑀤𑀬𑁄𑀕𑁂𑀯 𑀤𑀺𑀲𑁆𑀲𑀢𑀺 𑀓𑀼𑀤𑀸𑀘𑀦𑀦𑁆𑀢𑀺.

𑀦𑀺𑀫𑀺𑀢𑁆𑀢𑀦𑀺𑀫𑀺𑀢𑁆𑀢𑀻𑀦𑀦𑁆𑀢𑀺 𑀓𑀸𑀭𑀡𑀓𑀸𑀭𑀺𑀬𑀸𑀦𑀁, 𑀲𑀫𑀸𑀦𑁂𑀢𑀺 𑀲𑀸𑀥𑀸𑀭𑀡𑁂. 𑀲𑀫𑀸𑀦𑀫𑁂𑀯 𑀩𑁄𑀥𑁂𑀢𑀺 ‘𑀢𑀁𑀬𑀣𑁂’𑀘𑁆𑀘𑀸𑀤𑀺𑀦𑀸. 𑀏𑀢𑁆𑀣 𑀧𑀦 𑀫𑀫𑁆𑀫𑀢𑀸𑀴𑀦𑀁 𑀦𑀺𑀫𑀺𑀢𑁆𑀢𑀁 𑀧𑀸𑀡 𑀳𑀭𑀡𑀁 ¶ 𑀦𑀺𑀫𑀺𑀢𑁆𑀢𑀻, 𑀢𑀲𑁆𑀲𑀸𑀢𑀺 𑀅𑀦𑀚𑁆𑀚𑀢𑀦𑀲𑁆𑀲. 𑀉𑀧𑀭𑀺 𑀢𑁆𑀬𑀸𑀤𑀺𑀓𑀡𑁆𑀟𑁂 𑀓𑀭𑀳𑀲𑀤𑁆𑀤𑁄 𑀢𑀼 𑀘𑀺𑀲𑀤𑁆𑀤𑀲𑀁𑀬𑀼𑀢𑁆𑀢𑁄𑀯 𑀤𑀺𑀲𑁆𑀲𑀢𑀺 𑀓𑀭𑀳𑀘𑀻𑀢𑀺.

𑀲𑀗𑁆𑀔𑁆𑀬𑀸𑀯𑀸𑀘𑀺𑀦𑁄 𑀲𑀤𑁆𑀤𑀸 𑀲𑀗𑁆𑀔𑁆𑀬𑀸𑀲𑀤𑁆𑀤𑁂𑀦 𑀕𑀳𑀺𑀢𑀸𑀢𑀺 𑀆𑀳- ‘𑀅𑀢𑁆𑀣𑁂’𑀘𑁆𑀘𑀸𑀤𑀺. 𑀧𑀓𑀸𑀭𑁄 𑀤𑀩𑁆𑀩𑀕𑀼𑀡𑀥𑀺𑀲𑀬𑁄𑀧𑀺 𑀅𑀢𑁆𑀣𑀺, 𑀢𑀢𑁆𑀣 𑀬𑀤𑀺 𑀲𑁄𑀧𑀺 𑀕𑀬𑁆𑀳𑁂𑀬𑁆𑀬 𑀤𑀩𑁆𑀩 𑀕𑀼𑀡𑀸𑀦𑀁 𑀮𑀺𑀗𑁆𑀕𑀲𑀗𑁆𑀔𑁆𑀬𑀸𑀳𑀺 𑀬𑁄𑀕𑀸 𑀥𑀸𑀧𑁆𑀧𑀘𑁆𑀘𑀬𑀦𑁆𑀢(𑀫𑁆𑀧𑀺 𑀢𑀩𑁆𑀩𑀺𑀲𑀬𑁄𑀬𑁂𑀯𑁂𑀢𑀺) [𑀘𑁂𑀢𑁆𑀣 (𑀧𑁄𑀢𑁆𑀣𑀓𑁂] (𑀧𑀓𑀸𑀭𑀯𑀸𑀘𑀓𑀮𑀺𑀗𑁆𑀕𑀲𑀗𑁆𑀔𑁆𑀬𑀸𑀳𑀺 𑀬𑁄𑀕𑀸) 𑀅𑀮𑀺𑀗𑁆𑀕𑀫𑀲𑀗𑁆𑀔𑁆𑀬𑀜𑁆𑀘 [𑀥𑀸𑀧𑁆𑀧𑀘𑁆𑀘𑀬𑀦𑁆𑀢𑀫𑀮𑀺𑀗𑁆𑀕𑀫𑀲𑀗𑁆𑀔𑁆𑀬𑀜𑁆𑀘-𑀇𑀢𑀺 𑀓𑀸𑀲𑀺𑀓𑀸𑀯𑀼𑀢𑁆𑀢𑀺𑀧𑀜𑁆𑀚𑀓𑀸𑀬𑀁] 𑀦 𑀲𑀺𑀬𑀸, 𑀏𑀯𑀜𑁆𑀘 𑀲𑀢𑁆𑀬𑀩𑁆𑀬𑀬𑀢𑁆𑀢𑀫𑀪𑀺𑀫𑀢𑀦𑁆𑀢𑀲𑁆𑀲 𑀦 𑀲𑀺𑀬𑀸, 𑀢𑀜𑁆𑀘𑀺𑀝𑁆𑀞𑀁, 𑀓𑀺𑀭𑀺𑀬𑀸𑀯𑀺𑀲𑀬𑁂 𑀢𑀼 𑀢𑀲𑁆𑀫𑀺𑀁 𑀕𑀬𑁆𑀳𑀫𑀸𑀦𑁂 𑀏𑀓𑀥𑀸𑀪𑀼𑀜𑁆𑀚𑀢𑀺 𑀤𑁆𑀯𑀺𑀥𑀸𑀪𑀼𑀜𑁆𑀚𑀢𑀺 𑀤𑁆𑀯𑀺𑀥𑀸𑀕𑀘𑁆𑀙𑀢𑀺𑀘𑁆𑀘𑀸𑀤𑁄 𑀪𑁄𑀚𑀦 𑀕𑀫𑀦𑀸𑀤𑀺𑀓𑀺𑀭𑀺𑀬𑀸𑀬 𑀲𑀩𑁆𑀩𑀣𑀸 𑀮𑀺𑀗𑁆𑀕𑀲𑀗𑁆𑀔𑁆𑀬𑀸𑀳𑀺 𑀬𑁄𑀕𑀸𑀪𑀸𑀯𑀸 𑀬𑀣𑀸𑀯𑀼𑀢𑁆𑀢 𑀤𑁄𑀲𑁄 𑀦 𑀲𑀺𑀬𑀸𑀢𑀺 𑀧𑀸𑀡𑀺𑀦𑀻𑀬𑀯𑀼𑀢𑁆𑀢𑀺𑀓𑀸𑀭𑁂𑀦 𑀚𑀬𑀸𑀤𑀺𑀘𑁆𑀘𑁂𑀦 𑀓𑀺𑀭𑀺𑀬𑀸 𑀯𑀺𑀲𑀬𑁄𑀬𑁂𑀯𑁂𑀢𑁆𑀣 𑀧𑀓𑀸𑀭𑁄 𑀕𑀳𑀺𑀢𑁄. 𑀢𑀫𑁆𑀧𑀢𑀺 𑀆𑀳- ‘𑀤𑀩𑁆𑀩𑁂’𑀘𑁆𑀘𑀸𑀤𑀺. 𑀓𑀲𑁆𑀫𑀸 𑀧𑀦𑁂𑀯𑀫𑀸𑀳𑀸𑀢𑀺 𑀆𑀳- ‘𑀦𑀯𑀥𑀸𑀤𑀩𑁆𑀩’𑀫𑀺𑀘𑁆𑀘𑀸𑀤𑀺. ‘‘𑀦𑀯𑀥𑀸 𑀤𑀩𑁆𑀩𑀁, 𑀩𑀳𑀼𑀥𑀸 𑀕𑀼𑀡𑁄’’𑀢𑀺 𑀯𑁂𑀲𑁂𑀲𑀺𑀓𑀸𑀦𑀁 𑀲𑀗𑁆𑀓𑁂𑀢𑁄.

𑀢𑀢𑁆𑀣 𑀧𑀼𑀣𑀩𑁆𑀬𑀸𑀧𑁄𑀢𑁂𑀚𑁄𑀯𑀸𑀬𑁆𑀯𑀸𑀓𑀸𑀲𑀓𑀸𑀮𑀤𑀺𑀲𑀸𑀢𑁆𑀢𑀫𑀦𑀸𑀦𑀻𑀢𑀺 𑀦𑀯 𑀤𑀩𑁆𑀩𑀸𑀦𑀺. 𑀭𑀽𑀧 𑀭𑀲 𑀕𑀦𑁆𑀥 𑀨𑀲𑁆𑀲 𑀲𑀗𑁆𑀔𑁆𑀬𑀸𑀧𑀭𑀺𑀫𑀸𑀡 𑀧𑀼𑀣𑀼𑀢𑁆𑀢𑀲𑀁𑀬𑁄𑀕𑀯𑀺𑀪𑀸𑀕 𑀧𑀭𑀢𑁆𑀢𑀸𑀧𑀭𑀢𑁆𑀢𑀩𑀼𑀤𑁆𑀥𑀺𑀲𑀼𑀔𑀤𑀼𑀓𑁆𑀔𑁂𑀘𑁆𑀙𑀸𑀤𑁄𑀲𑀧𑀬𑀢𑀦𑀸 𑀘 𑀕𑀼𑀡𑀸, 𑀘𑀲𑀤𑁆𑀤𑁂𑀦 𑀕𑀼𑀭𑀼𑀢𑁆𑀢 𑀤𑀯𑀢𑁆𑀢𑀲𑀺𑀦𑁂𑀳𑀲𑀗𑁆𑀔𑀸𑀭𑀥𑀫𑁆𑀫𑀸𑀥𑀫𑁆𑀫𑀲𑀤𑁆𑀤𑀸 𑀘𑁂𑀢𑀺 𑀘𑀢𑀼𑀩𑁆𑀩𑀻𑀲𑀢𑀺 𑀩𑀳𑀼𑀥𑀸 𑀕𑀼𑀡𑁄. 𑀅𑀢𑁆𑀭𑀸𑀧𑀺 𑀬𑀣𑀸𑀯𑀼𑀢𑁆𑀢𑀓𑀸𑀲𑀺𑀓𑀸𑀯𑀼𑀢𑁆𑀢𑀺𑀬𑀸 𑀧𑀜𑁆𑀘𑀺𑀓𑀸𑀓𑀸𑀭𑁂𑀦 𑀚𑀺𑀦𑀺𑀦𑁆𑀤𑀩𑀼𑀤𑁆𑀥𑀺𑀦𑀸 𑀦𑀯𑀥𑀸 𑀤𑀩𑁆𑀩𑀁 𑀩𑀳𑀼𑀥𑀸 𑀕𑀼𑀡𑁄𑀢𑁆𑀬𑀢𑁆𑀭𑀸𑀧𑀺 ‘‘𑀓𑀺𑀭𑀺𑀬𑀸𑀚𑁆𑀛𑀸𑀳𑀭𑀺𑀢𑀩𑁆𑀩𑀸 𑀦𑀯𑀥𑀸 𑀤𑀩𑁆𑀩𑀁 𑀩𑀳𑀼𑀥𑀸 𑀕𑀼𑀡𑁄 𑀉𑀧𑀤𑀺𑀲𑀻𑀬𑀢𑀺 𑀯𑀺𑀜𑁆𑀜𑀸𑀬𑀢𑀺 𑀩𑁆𑀬𑀸𑀔𑁆𑀬𑀸𑀬𑀢𑁂 𑀯𑀺𑀚𑁆𑀚𑀢𑁂𑀯𑀸’’𑀢𑀺 𑀓𑀺𑀭𑀺𑀬𑀸𑀯𑀺𑀲𑀬𑁄𑀬𑁂𑀯 𑀧𑀓𑀸𑀭𑁄 𑀧𑀝𑀺𑀧𑀸𑀤𑀺𑀢𑁄, 𑀧𑀬𑁄𑀕𑀤𑀲𑁆𑀲𑀦𑀢𑁄 𑀩𑁆𑀬𑀯𑀘𑁆𑀙𑁂𑀚𑁆𑀚𑀪𑀸𑀯𑀸 𑀲𑀩𑁆𑀩𑀢𑁆𑀣 𑀓𑀺𑀭𑀺𑀬𑁂𑀯𑁂𑀢𑀺 𑀯𑀺𑀲𑁂𑀲𑀦𑁄𑀧𑀸𑀤𑀸𑀦𑀫𑀬𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀦𑀯𑀥𑀸 𑀤𑀩𑁆𑀩𑀁 𑀩𑀳𑀼𑀥𑀸 𑀕𑀼𑀡𑁄𑀢𑀺 𑀧𑀬𑁄𑀕𑀤𑀲𑁆𑀲𑀦𑀢𑁄 𑀤𑀩𑁆𑀩𑀕𑀼𑀡𑀯𑀺𑀲𑀬𑀸𑀦𑀫𑁆𑀧𑀓𑀸𑀭𑀸𑀦𑀁 𑀕𑀬𑁆𑀳𑀼𑀧𑀕𑀢𑁆𑀢𑀸 𑀩𑁆𑀬𑀯𑀘𑁆𑀙𑁂𑀤𑀬𑀺𑀢𑀩𑁆𑀩𑀸𑀦𑀁 𑀤𑀩𑁆𑀩𑀕𑀼𑀡𑀯𑀺𑀲𑀬𑀸𑀦𑀫𑁆𑀧𑀓𑀸𑀭𑀸𑀦𑀁 𑀪𑀸𑀯𑀸 𑀲𑀩𑁆𑀩𑀲𑁆𑀫𑀺𑀁 𑀤𑀩𑁆𑀩𑀕𑀼𑀡𑀯𑀺𑀲𑀬𑁂 𑀚𑀺𑀦𑀺𑀦𑁆𑀤𑀩𑀼𑀤𑁆𑀥𑀺𑀦𑀸 𑀯𑀼𑀢𑁆𑀢𑀦𑀬𑁂𑀦 𑀓𑀺𑀭𑀺𑀬𑀸 ¶ 𑀅𑀢𑁆𑀣𑁂𑀯𑀸𑀢𑀺 𑀓𑀺𑀭𑀺𑀬𑀸𑀯𑀺𑀲𑀬𑁄𑀯 𑀧𑀓𑀸𑀭𑁄 𑀕𑀬𑁆𑀳𑀢𑀻𑀢𑀺 𑀯𑀼𑀢𑁆𑀢𑀺𑀓𑀸𑀭 𑀧𑀜𑁆𑀚𑀺𑀓𑀸𑀓𑀸𑀭𑀸𑀦𑀁 𑀯𑀺𑀲𑁂𑀲𑀦𑁄𑀧𑀸𑀤𑀸𑀦𑀫𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀢𑀢𑁄𑀬𑁂𑀯𑀸𑀢𑀺 𑀬𑀢𑁄 𑀯𑀺𑀲𑁂𑀲𑀦𑁄𑀧𑀸𑀤𑀸𑀦𑀫𑀬𑀼𑀢𑁆𑀢𑀁 𑀢𑀢𑁄𑀬𑁂𑀯 𑀤𑁆𑀯𑀻𑀳𑀺𑀘𑁆𑀘𑀸𑀤𑀺𑀓𑀫𑀸𑀳𑁂𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 ‘‘𑀤𑁆𑀯𑀺𑀥𑀸 𑀓𑀭𑁄𑀢𑀻𑀢𑀺 𑀓𑀺𑀭𑀺𑀬𑀸𑀧𑀬𑁄𑀕𑁂𑀧𑀺 𑀧𑀓𑀸𑀭𑁄 𑀤𑀩𑁆𑀩𑀕𑀼𑀡𑀯𑀺𑀲𑀬𑁄… 𑀤𑀩𑁆𑀩𑀯𑀺𑀲𑀬𑀲𑁆𑀲 𑀕𑀼𑀡𑀯𑀺𑀲𑀬𑀲𑁆𑀲 𑀯𑀸 𑀤𑁆𑀯𑀺𑀥𑀸𑀪𑀸𑀯𑀲𑁆𑀲 𑀓𑀭𑀻𑀬𑀫𑀸𑀦𑀢𑁆𑀢𑀸, 𑀦𑀢𑀼 𑀓𑀺𑀭𑀺𑀬𑀸𑀯𑀺𑀲𑀬𑁄… 𑀤𑁆𑀯𑀺𑀥𑀸𑀪𑀸𑀯𑀲𑁆𑀲 𑀓𑀭𑀡𑀓𑀺𑀭𑀺𑀬𑀸𑀯𑀺𑀲𑀬𑀲𑁆𑀲𑁂𑀢𑁆𑀣 𑀯𑀢𑁆𑀢𑀼𑀫𑀦𑀺𑀘𑁆𑀙𑀺𑀢𑀢𑁆𑀢𑀸. 𑀢𑀢𑁄𑀬𑁂𑀯 𑀓𑀺𑀭𑀺𑀬𑀸𑀧𑀓𑀸𑀭𑁄𑀧𑀸𑀤𑀸𑀦𑁂 [𑀧𑀓𑀸𑀭𑁄𑀢𑀺𑀲𑀬𑀦𑁂 (𑀧𑁄𑀢𑁆𑀣𑀓𑁂)] 𑀅𑀢𑁆𑀭 𑀥𑀸𑀧𑁆𑀧𑀘𑁆𑀘𑀬𑀦𑁆𑀢𑀧𑁆𑀧𑀬𑁄𑀕𑁄 𑀦 𑀲𑀺𑀬𑀸𑀢𑀺 𑀯𑀺𑀜𑁆𑀜𑀸𑀧𑁂𑀢𑀼𑀁 ‘𑀤𑁆𑀯𑀻𑀳𑀺’𑀘𑁆𑀘𑀸𑀤𑀺𑀓𑀫𑀸𑀳𑁂’’𑀢𑀺 𑀢𑁂𑀦𑀸𑀳‘𑀅𑀢𑁆𑀭𑁂’𑀘𑁆𑀘𑀸𑀤𑀺.

𑀤𑀩𑁆𑀩𑀕𑀼𑀡𑀯𑀺𑀲𑀬𑁂 𑀧𑀓𑀸𑀭𑁂 𑀕𑀬𑁆𑀳𑀫𑀸𑀦𑁂 𑀬𑁄𑀬𑀁 𑀤𑁄𑀲𑁄 𑀲𑀫𑁆𑀪𑀸𑀯𑀺𑀢𑁄 𑀧𑀭𑁂𑀳𑀺, 𑀢𑀁 𑀤𑀸𑀦𑀺 𑀦𑀺𑀭𑀸𑀓𑀢𑁆𑀢𑀼𑀫𑀸𑀳 ‘𑀲𑀢𑀺𑀧𑀺𑀘𑁂’𑀘𑁆𑀘𑀸𑀤𑀺. 𑀲𑀪𑀸𑀯𑀢𑁄 𑀅𑀮𑀺𑀗𑁆𑀕𑀫𑀲𑀗𑁆𑀔𑁆𑀬𑀜𑁆𑀘𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀲𑀗𑁆𑀔𑁆𑀬𑀦𑁆𑀢𑀭𑀸𑀧𑀸𑀤𑀦𑁂 𑀕𑀫𑁆𑀬𑀫𑀸𑀦𑁂 𑀥𑀸𑀧𑁆𑀧𑀘𑁆𑀘𑀬𑁄 𑀯𑀺𑀳𑀺𑀢𑁄 𑀧𑀸𑀡𑀺𑀦𑀺𑀬𑁂𑀳𑀺, 𑀢𑀤𑀸𑀳- ‘𑀤𑀩𑁆𑀩𑀲𑁆𑀲𑁂’𑀘𑁆𑀘𑀸𑀤𑀺 𑀲𑀗𑁆𑀔𑁆𑀬𑀸𑀦𑁆𑀢𑀭𑀸𑀧𑀸𑀤𑀦𑁂𑀧𑀻𑀢𑀺 𑀧𑀼𑀩𑁆𑀩𑀁 𑀬𑀸 𑀯𑀯𑀢𑁆𑀣𑀺𑀢𑀸 𑀲𑀗𑁆𑀔𑁆𑀬𑀸, 𑀢𑀢𑁄- 𑀜𑁆𑀜𑀁 𑀲𑀗𑁆𑀔𑁆𑀬𑀸𑀦𑁆𑀢𑀭𑀁 𑀢𑀲𑁆𑀲𑀸𑀧𑀸𑀤𑀦𑀁 𑀓𑀭𑀡𑀁 𑀲𑀗𑁆𑀔𑁆𑀬𑀦𑁆𑀢𑀭𑀸𑀧𑀸𑀤𑀦𑀁, 𑀢𑀲𑁆𑀫𑀺𑀫𑁆𑀧𑀻𑀢𑀺 𑀅𑀢𑁆𑀣𑁄.

𑀲𑁄 𑀧𑀓𑀸𑀭𑁄 𑀅𑀲𑁆𑀲𑀸𑀢𑀺 𑀢𑀩𑁆𑀩𑀸, 𑀢𑀲𑀤𑁆𑀤𑁂𑀦 𑀧𑀓𑀸𑀭𑀲𑁆𑀲 𑀧𑀭𑀸𑀫𑀝𑁆𑀞𑀢𑁆𑀢𑀸 𑀢𑀩𑁆𑀩𑀢𑀻𑀢𑁂𑀢𑁆𑀣 𑀧𑀓𑀸𑀭𑀯𑀢𑀻𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀆𑀳- ‘𑀢𑀲𑀤𑁆𑀤𑁂𑀦𑁂’𑀘𑁆𑀘𑀸𑀤𑀺. 𑀧𑀓𑀸𑀭𑀯𑀢𑀻𑀢𑀺 𑀧𑀓𑀸𑀭𑀯𑀢𑀺 𑀅𑀢𑁆𑀣𑁂. 𑀫𑀼𑀤𑀼𑀧𑁆𑀧𑀓𑀸𑀭𑀯𑀸 𑀫𑀼𑀤𑀼𑀚𑀸𑀢𑀺𑀬𑁄.

𑀓𑀺𑀁 𑀲𑀗𑁆𑀔𑁆𑀬𑀸𑀦𑀫𑁆𑀧𑀭𑀺𑀫𑀸𑀡𑀫𑁂𑀲𑀦𑁆𑀢𑀺 𑀅𑀢𑁆𑀣𑁂 ‘‘𑀓𑀺𑀫𑁆𑀳𑀸 𑀭𑀢𑀺 𑀭𑀻𑀯𑀭𑀻𑀯𑀢𑀓 𑀭𑀺𑀢𑁆𑀢𑀓𑀸’’𑀢𑀺 (𑁪-𑁪𑁪) 𑀲𑀼𑀢𑁆𑀢𑁂𑀦 𑀭𑀢𑀺𑀧𑁆𑀧𑀘𑁆𑀘𑀬𑀁 𑀯𑀺𑀥𑀸𑀬 𑀓𑀢𑀻𑀢𑀺 𑀲𑀺𑀤𑁆𑀥𑀢𑁆𑀢𑀸 𑀯𑀼𑀢𑁆𑀢𑀁- ‘𑀲𑀗𑁆𑀔𑁆𑀬𑀸𑀧𑀭𑀺𑀫𑀸𑀡𑀯𑀺𑀲𑀬𑁂 𑀲𑀸𑀥𑀺𑀢𑀢𑁆𑀢𑀸’𑀢𑀺, 𑀓𑀢𑀺 𑀘 𑀲𑁄 𑀲𑀗𑁆𑀔𑁆𑀬𑀸 𑀧𑀭𑀺𑀫𑀸𑀡𑀯𑀺𑀲𑀬𑀢𑁆𑀢𑀸 𑀲𑀗𑁆𑀔𑁆𑀬𑀸 𑀘𑁂𑀢𑀺 𑀓𑀢𑀺𑀲𑀗𑁆𑀔𑁆𑀬𑀸, 𑀢𑀸𑀬.

𑀧𑀘𑁆𑀘𑀸𑀲𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑀺𑀫𑁆𑀳𑀺 𑀏𑀓𑀫𑁆𑀳𑀺 𑀤𑀲𑁆𑀲𑀺𑀢𑁂 𑀤𑁆𑀯𑀺𑀝𑁆𑀞𑀢𑁆𑀢𑀸 𑀲𑀫𑁆𑀩𑀦𑁆𑀥𑀲𑁆𑀲 𑀧𑀭𑁄 𑀲𑀫𑁆𑀩𑀦𑁆𑀥𑀻 ¶ 𑀯𑀺𑀜𑁆𑀜𑀸𑀬𑀫𑀸𑀦𑁄 𑀧𑀭𑁄𑀯 𑀯𑀺𑀜𑁆𑀜𑀸𑀬𑀢𑀺 𑀬𑀼𑀢𑁆𑀢𑀺𑀢𑁄𑀢𑀺 ‘𑀲𑀫𑁆𑀩𑀦𑁆𑀥𑀢𑁄𑀯𑀸’𑀢𑀺 𑀯𑀼𑀢𑁆𑀢𑀁.

𑀦𑀺𑀧𑀸𑀢𑀦𑀲𑁆𑀲𑀸𑀢𑀺 𑀲𑀓𑀺𑀦𑁆𑀢𑀺 𑀦𑀺𑀧𑀸𑀢𑀦𑀲𑁆𑀲.

𑀔𑀡𑁆𑀟𑀁 𑀔𑀡𑁆𑀟𑀁 𑀔𑀡𑁆𑀟𑀲𑁄, 𑀧𑀼𑀣𑀼 𑀧𑀓𑀸𑀭𑁄 𑀧𑀼𑀣𑀼𑀲𑁄.

𑀦𑀦𑀼 𑀘 𑀅𑀪𑀯𑀦𑀦𑁆𑀦𑀸𑀫 𑀲𑀩𑁆𑀩𑀣𑀸 𑀅𑀦𑀼𑀧𑁆𑀧𑀢𑁆𑀢𑀺𑀬𑀸 𑀯𑀸 𑀅𑀯𑀢𑁆𑀣𑀦𑁆𑀢𑀭𑁂𑀦 𑀯𑀸, 𑀢𑀣𑀸 𑀲𑀢𑁆𑀬𑀪𑀽𑀢𑀲𑀤𑁆𑀤𑁄-𑀦𑀼𑀧𑁆𑀧𑀦𑁆𑀦𑀫𑀢𑁆𑀢𑀯𑀘𑀦𑁄𑀧𑀻𑀢𑀺 𑀓𑀣𑀫𑀪𑀽𑀢𑀲𑀤𑁆𑀤𑁄-𑀯𑀢𑁆𑀣𑀦𑁆𑀢𑀭𑁂 𑀦𑀸𑀪𑀽𑀢𑁂 𑀯𑀼𑀢𑁆𑀢𑁄𑀘𑁆𑀘𑀸𑀳- ‘𑀅𑀪𑀽𑀢𑀲𑁆𑀲𑀺’𑀘𑁆𑀘𑀸𑀤𑀺. 𑀓𑀣𑀫𑀯𑀢𑁆𑀣𑀸𑀯 𑀢𑀲𑀤𑁆𑀤𑁂𑀦 𑀧𑀭𑀸𑀫𑀲𑀻𑀬𑀢𑀻𑀢𑀺 𑀘𑁂 𑀅𑀪𑀽𑀢𑀲𑀤𑁆𑀤𑁄 𑀬𑀤𑁆𑀬𑀦𑀼𑀧𑁆𑀧𑀦𑁆𑀦𑀯𑀸𑀘𑀻 𑀲𑀺𑀬𑀸, 𑀢𑀤𑀸 𑀢𑀲𑀤𑁆𑀤𑀧𑁆𑀧 𑀬𑁄𑀕𑁄𑀬𑁂𑀯 𑀦 𑀲𑀺𑀬𑀸… 𑀢𑀲𑀤𑁆𑀤𑁂𑀦𑀸𑀪𑀽𑀢𑀲𑁆𑀲𑁂𑀯 𑀕𑀳𑀡𑀢𑁄, 𑀅𑀪𑀽𑀢𑀪𑀸𑀯𑁂𑀘𑁆𑀘𑀸𑀤𑀺𑀦𑀸 𑀲𑀼𑀢𑁆𑀢𑀺𑀢𑀁 𑀲𑀺𑀬𑀸, 𑀢𑁂𑀦 𑀢𑀲𑀤𑁆𑀤𑀧𑁆𑀧𑀬𑁄𑀕𑀲𑀸𑀫𑀢𑁆𑀣𑀺𑀬𑀸 𑀅𑀯𑀢𑁆𑀣𑀸𑀯 𑀢𑀲𑀤𑁆𑀤𑁂𑀦 𑀧𑀭𑀸𑀫𑀲𑀻𑀬𑀢𑀺, 𑀢𑀧𑁆𑀧𑀭𑀸𑀫𑀝𑁆𑀞𑀜𑁆𑀘𑀸𑀯𑀢𑁆𑀣𑀦𑁆𑀢𑀭𑀫𑀪𑀽𑀢 𑀲𑀤𑁆𑀤𑁄 𑀅𑀧𑁂𑀓𑁆𑀔𑀢𑁂, 𑀢𑁂𑀦𑀸𑀳- ‘𑀢𑀩𑁆𑀪𑀸𑀯𑁂𑀢𑀺𑀯𑀘𑀦𑀸’𑀇𑀘𑁆𑀘𑀸𑀤𑀺. 𑀪𑀯𑀦𑀁 𑀪𑀸𑀯𑁄 𑀢𑀸𑀬 𑀅𑀯𑀢𑁆𑀣𑀦𑁆𑀢𑀭𑁂 𑀪𑀸𑀯𑁄 𑀢𑀩𑁆𑀪𑀸𑀯𑁄 𑀢𑀲𑁆𑀫𑀺𑀁. 𑀢𑁂𑀦𑀸𑀳 ‘𑀅𑀪𑀽𑀢𑀲𑁆𑀲𑁂’𑀘𑁆𑀘𑀸𑀤𑀺. 𑀪𑀸𑀯𑁂𑀢𑀺 𑀯𑀺𑀲𑀬𑀲𑀢𑁆𑀢𑀫𑀻, 𑀲𑀁𑀲𑀢𑁆𑀢𑀫𑀻 𑀯𑀸𑀢𑀺 𑀆𑀳- ‘𑀯𑀺𑀲𑀬𑁂 𑀕𑀫𑁆𑀫𑀫𑀸𑀦𑁂 𑀯𑀸’𑀢𑀺. 𑀓𑀼𑀡𑁆𑀟𑀮𑀢𑁆𑀢𑁂𑀦𑀸𑀢𑀺 𑀓𑀼𑀡𑁆𑀟𑀮𑀲𑀪𑀸𑀯𑁂𑀦.

𑀤𑀺𑀲𑁆𑀲𑀦𑁆𑀢𑀻𑀢𑀺 𑀯𑀼𑀢𑁆𑀢𑁂 𑀧𑀬𑁄𑀕𑁂 𑀤𑀺𑀲𑁆𑀲𑀦𑁆𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘𑀤𑀺𑀲𑀺’𑀘𑁆𑀘𑀸𑀤𑀺, 𑀇𑀤𑀁 𑀲𑀼𑀢𑁆𑀢𑀁 𑀯𑀺𑀚𑁆𑀛𑀗𑁆𑀕 𑀧𑀭𑀺𑀪𑀸𑀲𑀸 𑀪𑀯𑀢𑀻𑀢𑀺 𑀲𑁂𑀲𑁄. ‘‘𑀡𑁄𑀯𑀸-𑀧𑀘𑁆𑀘𑁂’’𑀢𑀺𑀆𑀤𑀺𑀦𑀸 (𑁪-𑁧) 𑀲𑀼𑀢𑁆𑀢𑁂𑀦 𑀯𑀼𑀢𑁆𑀢𑁂𑀲𑁆𑀯𑀦𑁂𑀓𑀯𑀺𑀥𑁂𑀲𑀼 𑀅𑀢𑁆𑀣𑁂𑀲𑀼 𑀧𑀭𑀺 𑀲𑀫𑀦𑁆𑀢𑀢𑁄 𑀪𑀸𑀲𑀢𑀻𑀢𑀺 𑀧𑀭𑀺𑀪𑀸𑀲𑀸, 𑀯𑀺𑀥𑀺𑀦𑁄 𑀧𑀘𑁆𑀘𑀬𑀲𑁆𑀲 𑀅𑀗𑁆𑀕𑀪𑀽𑀢𑀸 𑀧𑀭𑀺𑀪𑀸𑀲𑀸 𑀯𑀺𑀚𑁆𑀛𑀗𑁆𑀕𑀧𑀭𑀺𑀪𑀸𑀲𑀸. 𑀯𑀺𑀥𑀺𑀬𑁂𑀯𑀸𑀢𑀺 𑀲𑀼𑀢𑁆𑀢𑀫𑀺𑀤𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀓𑁆𑀔𑀫𑀸𑀦𑀲𑀼𑀢𑁆𑀢𑀤𑁆𑀯𑀬𑀦𑁆𑀢𑀺 ‘‘𑀅𑀜𑁆𑀜𑀲𑁆𑀫𑀺𑀁 𑀲𑀓𑀢𑁆𑀣𑁂’’𑀢𑀺 𑀲𑀼𑀢𑁆𑀢𑀤𑁆𑀯𑀬𑀁.

𑀅𑀦𑁆𑀢𑀭𑀲𑀤𑁆𑀤𑁄-𑀦𑁂𑀓𑀢𑁆𑀣𑁄𑀧𑀻𑀳𑀸𑀦𑁆𑀢𑀭𑀸𑀴𑀯𑀸𑀘𑀻 𑀫𑀚𑁆𑀛𑀯𑀸𑀘𑀻 𑀕𑀬𑁆𑀳𑀢𑀺, 𑀦 𑀯𑀺𑀚𑁆𑀚𑀢𑁂𑀦𑁆𑀢𑀭𑀫𑁂𑀲𑀦𑁆𑀢𑀺 𑀅𑀦𑁆𑀢𑀭𑀸𑀴𑀫𑀢𑁆𑀢𑀧𑀝𑀺𑀲𑁂𑀥𑁂𑀧𑀬𑁄𑀚𑀦𑀁 𑀦𑀢𑁆𑀣𑀻𑀢𑀺 𑀓𑀢𑁆𑀯𑀸𑀦𑁆𑀢𑀭𑀸 𑀴𑀝𑁆𑀞𑀲𑁆𑀲𑀸𑀪𑀸𑀯𑀸𑀦𑁆𑀢𑀭𑀸𑀴𑀁 ¶ 𑀦𑀢𑁆𑀣𑀻𑀢𑁆𑀬𑀼𑀧𑀘𑀭𑀻𑀬𑀢𑀺, 𑀏𑀯𑀜𑁆𑀳𑀺 𑀮𑁄𑀓𑁂 𑀧𑀬𑀼𑀚𑁆𑀚𑀢𑁂 ‘𑀅𑀦𑀦𑁆𑀢𑀭𑀸 𑀇𑀫𑁂 𑀕𑀸𑀫𑀸 𑀅𑀦𑀦𑁆𑀢𑀭𑀸 𑀇𑀫𑁂 𑀧𑀸𑀲𑀸𑀤𑀸’𑀢𑀺 𑀅𑀦𑁆𑀢𑀭𑀸𑀴𑀕𑀢𑀲𑁆𑀲 𑀜𑁆𑀜𑀲𑁆𑀲 𑀕𑀸𑀫𑀲𑁆𑀲𑀜𑁆𑀜𑀲𑁆𑀲 𑀧𑀸𑀲𑀸𑀤𑀲𑁆𑀲 𑀯𑀸𑀪𑀸𑀯𑀸 𑀢𑀣𑀸 𑀩𑁆𑀬𑀧𑀤𑀺𑀲𑀻𑀬𑀢𑁂, 𑀢𑀣𑁂𑀯𑀫𑀺𑀳𑀸𑀧𑁆𑀬𑀦𑁆𑀢𑀭𑀸𑀴𑀕𑀢𑀲𑁆𑀲𑀜𑁆𑀜𑀲𑁆𑀲 𑀩𑁆𑀬𑀜𑁆𑀚𑀦𑀲𑁆𑀲𑀸𑀪𑀸𑀯𑀸 𑀅𑀦𑀦𑁆𑀢𑀭𑀸 𑀇𑀢𑁆𑀬𑀼𑀘𑁆𑀘𑀦𑁆𑀢𑁂, 𑀅𑀣𑀯𑀸𑀦𑁆𑀢𑀭𑀲𑀤𑁆𑀤𑁄 𑀩𑁆𑀬𑀯𑀥𑀸𑀦𑀯𑀸𑀘𑀻 𑀩𑁆𑀬𑀯𑀥𑀸𑀦𑀸𑀪𑀸𑀯𑀢𑁄-𑀦𑀦𑁆𑀢𑀭𑀸 𑀇𑀢𑀺 𑀯𑀼𑀘𑁆𑀘𑀦𑁆𑀢𑁂. 𑀅𑀦𑁆𑀢𑀭𑀁 𑀓𑀭𑁄𑀢𑀻𑀢𑀺 𑀯𑀸 𑀔𑀸𑀤𑀺𑀇𑀧𑁆𑀧𑀘𑁆𑀘𑀬𑀁 [𑀡𑀺𑀧𑁆𑀧𑀘𑁆𑀘𑀬𑀁 (𑀧𑁄𑀢𑁆𑀣𑀓𑁂)] 𑀯𑀺𑀥𑀸𑀬 𑀅𑀦𑁆𑀢𑀭𑀸𑀬𑀢𑀺 𑀩𑁆𑀬𑀯𑀥𑀸𑀦𑀁 𑀓𑀭𑁄𑀢𑀻𑀢𑀺 𑀓𑀢𑁆𑀢𑀭𑀺 𑀅𑀧𑁆𑀧𑀘𑁆𑀘𑀬𑀁 𑀯𑀺𑀥𑀸𑀬 𑀅𑀦𑁆𑀢𑀭𑁄 𑀩𑁆𑀬𑀯𑀥𑀸𑀬𑀓𑁄 𑀦𑀢𑁆𑀣𑁂𑀢𑁂𑀲𑀦𑁆𑀢𑀺 𑀅𑀦𑀦𑁆𑀢𑀭𑀸. 𑀬𑀣𑀸 ‘𑀭𑀼𑀓𑁆𑀔𑀸 𑀯𑀦𑀦𑁆𑀢𑁂’𑀢𑁆𑀣 𑀭𑀼𑀓𑁆𑀔𑀸 𑀲𑀫𑀼𑀤𑀺𑀢𑀸𑀯𑁂𑀓𑀯𑀦𑀩𑁆𑀬𑀧𑀤𑁂𑀲𑀁 𑀮𑀪𑀦𑁆𑀢𑁂, 𑀢𑀣𑀸𑀢𑁆𑀭𑀸𑀧𑀺 𑀩𑁆𑀬𑀜𑁆𑀚𑀦𑀸 𑀲𑀫𑀼𑀤𑀺𑀢𑀸𑀯𑁂𑀢𑁂 𑀲𑀁𑀬𑁄𑀕𑀩𑁆𑀬𑀧𑀤𑁂𑀲𑀕𑁄𑀘𑀭𑀢𑁆𑀢𑀁 𑀧𑀝𑀺𑀧𑀚𑁆𑀚𑀦𑁆𑀢𑁂.

𑀲𑀁𑀬𑁄𑀕𑁄𑀢𑀺 𑀳𑀺 𑀲𑀫𑀼𑀤𑀸𑀬𑀧𑁆𑀧𑀥𑀸𑀦𑁄 𑀦𑀺𑀤𑁆𑀤𑁂𑀲𑁄 𑀩𑁆𑀬𑀜𑁆𑀚𑀦𑀸𑀢𑁆𑀬𑀯𑀬𑀯𑀧𑁆𑀧𑀥𑀸𑀦𑁄, 𑀢𑀲𑁆𑀫𑀸 𑀩𑁆𑀬𑀜𑁆𑀚𑀦𑀸𑀢𑀺 𑀩𑀳𑀼𑀯𑀘𑀦𑁂𑀦 𑀲𑀁𑀬𑁄𑀕𑁄𑀢𑀺 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁄 𑀖𑀝𑀢𑁂, 𑀦𑀦𑀼 𑀘 𑀯𑀡𑁆𑀡𑀸𑀦𑀫𑀼𑀘𑁆𑀘𑀸𑀭𑀺𑀢𑀧𑁆𑀧𑀥𑀁𑀲𑀺𑀢𑁆𑀢𑀸 𑀬𑁄𑀕𑀧𑀚𑁆𑀚𑀫𑀝𑁆𑀞𑀺𑀢𑀫𑀸𑀦𑀸𑀦𑀁 𑀦 𑀲𑀫𑁆𑀪𑀯𑀢𑀺 𑀲𑀫𑀼𑀤𑀸𑀬𑀢𑁆𑀢𑀦𑁆𑀢𑀺 𑀲𑀫𑀼𑀤𑀸𑀬𑀢𑁆𑀢𑀫𑀬𑀼𑀢𑁆𑀢𑀦𑁆𑀢𑀺 𑀦𑀸𑀬𑀼𑀢𑁆𑀢𑀁, 𑀢𑀣𑀸𑀳𑀺 𑀉𑀢𑁆𑀢𑀭𑀼𑀢𑁆𑀢𑀭𑀕𑁆𑀕𑀸𑀳𑀺𑀦𑀺 𑀩𑀼𑀤𑁆𑀥𑀺 𑀧𑀼𑀩𑁆𑀩𑀧𑀭𑀻𑀪𑀽𑀢𑁂 𑀩𑁆𑀬𑀜𑁆𑀚𑀦𑀸𑀯𑀬𑀯𑁂 𑀲𑀫𑀼𑀤𑀸𑀬𑀭𑀽𑀧𑁂𑀦 𑀲𑀗𑁆𑀓𑀧𑁆𑀧𑁂𑀦𑁆𑀢𑀻 𑀲𑀫𑀼𑀤𑀸𑀬𑀯𑁄𑀳𑀸𑀭𑀫𑁆𑀧𑀯𑀢𑁆𑀢𑀬𑀻𑀢𑀺.

𑀡𑀸𑀦𑀼𑀩𑀦𑁆𑀥𑁂𑀢𑀺 𑀤𑀺𑀢𑀺𑀲𑀤𑁆𑀤𑀲𑁆𑀲 𑀲𑀁𑀬𑁄𑀕𑀸𑀯𑀺𑀲𑀬𑀢𑁆𑀢𑀸 𑀤𑁂𑀘𑁆𑀘𑁄𑀢𑀺 ‘𑀲𑀭𑀸𑀦𑀫𑀸𑀤𑀺𑀲𑁆𑀲𑀸’𑀢𑀺 𑀯𑀺𑀲𑀬𑁄, 𑀉𑀴𑀼𑀫𑁆𑀧𑀲𑀤𑁆𑀤𑀲𑁆𑀲 𑀲𑀁𑀬𑁄𑀕𑀯𑀺𑀲𑀬𑀢𑁆𑀢𑀸 𑀑𑀴𑀼𑀫𑁆𑀧𑀺𑀓𑁄𑀢𑀺 𑀏𑀢𑀲𑁆𑀲 𑀯𑀺𑀲𑀬𑁄𑀢𑀺 𑀢𑀢𑁆𑀣 𑀭𑀸𑀖𑀯𑁄 𑀯𑁂𑀦𑀢𑁂𑀬𑁆𑀬𑁄 𑀫𑁂𑀦𑀺𑀓𑁄 𑀤𑁂𑀘𑁆𑀘𑁄 𑀤𑁄𑀲𑀕𑁆𑀕𑀸𑀦𑁆𑀢𑀺 𑀭𑀽𑀧𑀸𑀦𑀺. 𑀇𑀥 𑀢𑀼 𑀑𑀴𑀼𑀫𑁆𑀧𑀺𑀓𑁄 𑀓𑁄𑀡𑁆𑀟𑀜𑁆𑀜𑁄𑀢𑀺 𑀬𑀼𑀚𑁆𑀚𑀦𑁆𑀢𑀺. 𑀢𑁂𑀦𑁂𑀯 𑀘 𑀢𑀢𑁆𑀣 𑀧𑀜𑁆𑀘𑀺𑀓𑀸 𑀏𑀢𑁆𑀣, 𑀏𑀢𑁆𑀣 𑀘 𑀧𑀜𑁆𑀘𑀺𑀓𑀸 𑀢𑀢𑁆𑀣 𑀉𑀧𑀦𑁂𑀢𑀩𑁆𑀩𑀸𑀢𑀺.

𑀓𑁄𑀲𑀚𑁆𑀚𑀦𑁆𑀢𑀺 𑀏𑀢𑁆𑀣 𑀢𑀲𑁆𑀲 𑀚𑀢𑁆𑀢𑀜𑁆𑀘 𑀦𑀺𑀧𑀸𑀢𑀦𑀸, 𑀅𑀚𑁆𑀚𑀯𑀦𑁆𑀢𑀺 𑀏𑀢𑁆𑀣𑁆𑀳 ‘‘𑀉𑀯𑀡𑁆𑀡𑀲𑁆𑀲𑀸 𑀯𑀯 𑀲𑀭𑁂’’𑀢𑀺 (𑁪-𑁧𑁨𑁯).

𑀬𑀓𑀸𑀭𑀲𑁆𑀲 𑀤𑁆𑀯𑀺𑀢𑁆𑀢𑁂 𑀚𑁂𑀬𑁆𑀬𑁄.

𑀅𑀢𑀺𑀲𑀬𑁂𑀦 𑀅𑀧𑁆𑀧𑁄, 𑀅𑀢𑀺𑀲𑀬𑁂𑀦 𑀬𑀼𑀯𑀸𑀢𑀺 𑀯𑀺𑀕𑁆𑀕𑀳𑁄.

𑀲𑀢𑀺𑀲𑁆𑀲𑀸𑀢𑀺 ¶ 𑀯𑀼𑀢𑁆𑀢𑁂 𑀲𑀢𑀺𑀲𑀤𑁆𑀤𑁄 𑀯𑀺𑀜𑁆𑀜𑀸𑀬𑀢𑀺 𑀲𑀢𑁆𑀬𑀦𑁆𑀢𑁂𑀧𑀺 𑀯𑀺𑀲𑁂𑀲𑀦𑀢𑁆𑀢𑁂𑀦 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑁂𑀲𑀢𑁆𑀬𑀦𑁆𑀢𑁄 𑀓𑀣𑀁 𑀯𑀺𑀜𑁆𑀜𑀸𑀬𑀢𑀺𑀘𑁆𑀘𑀸𑀲𑀗𑁆𑀓𑀺𑀬 ‘‘𑀲𑀗𑁆𑀔𑁆𑀬𑀸𑀬 𑀲𑀘𑁆𑀘𑀼𑀢𑀻𑀲𑀸𑀲𑁂’’𑀘𑁆𑀘𑀸𑀤𑀺𑀦𑀸 (𑁪-𑁫𑁦) 𑀲𑀢𑁆𑀬𑀦𑁆𑀢𑀸𑀤𑀻𑀳𑀺 𑀟𑁄 𑀯𑀺𑀳𑀺𑀢𑁄, 𑀢𑀲𑁆𑀫𑀺𑀜𑁆𑀘 𑀟𑁂𑀢𑀺𑀦𑀺𑀫𑀺𑀢𑁆𑀢𑁂𑀦𑁄𑀧𑀸𑀤𑀺𑀦𑁆𑀦𑁂 𑀢𑀤𑀼𑀧𑀸𑀤𑀸𑀦𑀲𑀸𑀫𑀢𑁆𑀣𑀺𑀬𑀸𑀲𑀢𑁆𑀬𑀦𑁆𑀢𑁄𑀯 𑀯𑀺𑀜𑁆𑀜𑀸𑀬𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀟𑁂𑀢𑀺 𑀦𑀺𑀫𑀺𑀢𑁆𑀢𑁄𑀧𑀸𑀤𑀸𑀦𑀸’𑀢𑀺𑀆𑀤𑀺.

𑀥𑀸𑀢𑀼𑀢𑁄 𑀅𑀜𑁆𑀜𑁄 𑀲𑀤𑁆𑀤𑁄 𑀅𑀥𑀸𑀢𑀼 𑀢𑀲𑁆𑀲. 𑀧𑀜𑁆𑀘𑀺𑀓𑀸𑀬𑀫𑁆𑀧𑀦 𑀧𑀓𑀢𑀺𑀧𑀺 𑀲𑀤𑁆𑀤𑁄𑀬𑁂𑀯𑀸𑀢𑀺 𑀥𑀸𑀢𑀼𑀢𑁄𑀇𑀘𑁆𑀘𑀸𑀤𑀺𑀦𑀸 𑀅𑀥𑀸𑀢𑀼𑀲𑀤𑁆𑀤𑀲𑁆𑀲 𑀅𑀢𑁆𑀣𑀫𑀢𑁆𑀢𑀁 𑀯𑀼𑀢𑁆𑀢𑀁.

𑀢𑀲𑁆𑀲𑀸𑀢𑀺 𑀅𑀥𑀸𑀢𑀼𑀧𑁆𑀧𑀓𑀢𑀺𑀬𑀸, 𑀅𑀥𑀸𑀢𑀼𑀲𑀤𑁆𑀤𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀘𑀸𑀢𑀺 𑀓𑀓𑀸𑀭𑁂𑀦 𑀘, 𑀢𑀲𑁆𑀫𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦. 𑀧𑀼𑀩𑁆𑀩𑀕𑁆𑀕𑀳𑀡𑀫𑀦𑁆𑀢𑀭𑁂𑀦𑀸𑀢𑀺𑀧𑀸𑀡𑀺𑀦𑀺𑀦𑀸 𑀇𑀓𑀸𑀭𑀸𑀤𑁂𑀲𑀯𑀺𑀥𑀸𑀬𑀓𑁂 𑀇𑀫𑀲𑁆𑀫𑀺𑀁𑀬𑁂𑀯 𑀲𑀼𑀢𑁆𑀢𑁂𑀓𑀓𑀸𑀭𑀢𑁄 𑀧𑀼𑀩𑁆𑀩𑀲𑁆𑀲 𑀇𑀓𑀸𑀭𑀸𑀤𑁂𑀲𑀯𑀺𑀥𑀸𑀦𑀢𑁆𑀣𑀁 𑀧𑀼𑀩𑁆𑀩𑀕𑁆𑀕𑀳𑀡𑀁 𑀓𑀢𑀁, 𑀢𑀁 𑀧𑀼𑀩𑁆𑀩𑀲𑁆𑀲𑀸𑀢𑀺𑀯𑀘𑀦𑀁 𑀯𑀺𑀦𑀸𑀢𑀺 𑀅𑀢𑁆𑀣𑁄. 𑀲𑀘𑁂𑀢𑀺𑀆𑀤𑀺𑀦𑀸 𑀓𑀣𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀩𑁆𑀬𑀜𑁆𑀚𑀦𑁂 𑀤𑀻𑀖𑀭𑀲𑁆𑀲𑀸’’𑀢𑀺 (𑁧-𑁩𑁩) 𑀭𑀲𑁆𑀲𑁄 𑀯𑀼𑀢𑁆𑀢𑁄, 𑀅𑀲𑁆𑀲𑀸𑀢𑀺 𑀚𑀸𑀢𑀺𑀦𑀺𑀤𑁆𑀤𑁂𑀲𑁂 𑀢𑀼 𑀆𑀓𑀸𑀭𑀲𑁆𑀲𑀘𑀺𑀓𑀸𑀭𑁄 𑀪𑀯𑀢𑁆𑀬𑁂𑀯, 𑀲𑀺𑀬𑀸 𑀏𑀢𑀦𑁆𑀢𑀺 𑀩𑀳𑀼𑀧𑀭𑀺𑀩𑁆𑀩𑀸𑀚𑀓𑀸𑀢𑀺 𑀏𑀢𑀁 𑀭𑀽𑀧𑀁 𑀳𑁄𑀢𑀺. 𑀲𑁆𑀬𑀸𑀤𑁆𑀬𑀢𑁆𑀭 𑀩𑁆𑀬𑀯𑀳𑀺𑀢𑁄… 𑀓𑀓𑀸𑀭𑀢𑁄 𑀧𑀼𑀩𑁆𑀩𑁂 𑀲𑁆𑀬𑀸𑀤𑀺, 𑀦 𑀲𑁆𑀬𑀸𑀤𑀺 𑀓𑀓𑀸𑀭𑀸 𑀧𑀭𑁄𑀢𑀺.

𑀦𑀦𑀼 𑀘 𑀅𑀲𑁆𑀬𑀸𑀤𑀺𑀢𑁄𑀢𑀺 𑀏𑀢𑁆𑀣 𑀧𑀲𑀚𑁆𑀚𑀧𑁆𑀧𑀝𑀺𑀲𑁂𑀥𑁄 𑀦𑀜 𑀓𑀲𑁆𑀫𑀸 𑀕𑀳𑀺𑀢𑁄, 𑀦 𑀧𑀭𑀺𑀬𑀼𑀤𑁄𑀲𑁄𑀢𑀺 𑀆𑀲𑀗𑁆𑀓𑀺𑀬 𑀧𑀭𑀺𑀬𑀼𑀤𑀸𑀲𑁂𑀲𑁆𑀫𑀺𑀁 𑀕𑀳𑀺𑀢𑁂 𑀲𑀢𑀺 𑀤𑁄𑀲𑀁 𑀯𑀢𑁆𑀢𑀼𑀫𑀸𑀭𑀪𑀢𑁂 ‘𑀧𑀭𑀺𑀬𑀼𑀤𑀸𑀲𑁂’𑀇𑀘𑁆𑀘𑀸𑀤𑀺𑀦𑀸. 𑀲𑁆𑀬𑀸𑀤𑀺𑀢𑁄𑀢𑀺 𑀲𑁆𑀬𑀸𑀤𑁆𑀬𑀦𑁆𑀢𑀢𑁄 𑀧𑀭𑀺𑀩𑁆𑀩𑀸𑀚𑀓𑀲𑀤𑁆𑀤𑀢𑁄. 𑀧𑀭𑀺𑀩𑁆𑀩𑀸𑀚𑀓𑀲𑀤𑁆𑀤𑁄𑀳𑀺 𑀲𑁆𑀬𑀸𑀤𑁆𑀬𑀦𑁆𑀢𑁄 𑀯𑀸𑀓𑁆𑀬𑁂 𑀲𑁆𑀬𑀸𑀤𑁆𑀬𑀦𑁆𑀢𑀢𑁆𑀢𑀸, 𑀢𑁂𑀦𑁂𑀯 𑀯𑀓𑁆𑀔𑀢𑀺- ‘𑀧𑀭𑀺𑀩𑁆𑀩𑀸𑀚𑀓𑀲𑀤𑁆𑀤𑀢𑁄 𑀏𑀢𑁆𑀣 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀻’𑀢𑀺. 𑀅𑀲𑁆𑀬𑀸𑀤𑀺𑀲𑁆𑀫𑀸 𑀧𑀭𑁄𑀢𑀺 𑀓𑀢𑁆𑀯𑀸 𑀩𑀳𑀼𑀧𑀭𑀺𑀩𑁆𑀩𑀸𑀚𑀓𑀲𑀤𑁆𑀤𑀢𑁄 𑀦 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀢𑁄𑀘𑀸𑀢𑀺 𑀩𑀳𑀼𑀧𑀭𑀺𑀩𑁆𑀩𑀸𑀚𑀓𑀲𑀤𑁆𑀤𑀢𑁄 𑀘. 𑀧𑀲𑀚𑁆𑀚𑀧𑁆𑀧𑀝𑀺𑀲𑁂𑀥𑁂𑀦 𑀦𑀜𑀲𑀤𑁆𑀤𑁂𑀦 ¶ 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁂𑀧𑀺 𑀲𑀺𑀬𑀸𑀯 𑀤𑁄𑀲𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳- ‘𑀅𑀯𑀺𑀚𑁆𑀚𑀫𑀸𑀦𑁄𑀲𑁆𑀬𑀸𑀤𑀺’𑀘𑁆𑀘𑀸𑀤𑀺.

𑀇𑀢𑀺 𑀫𑁄𑀕𑁆𑀕𑀮𑁆𑀮𑀸𑀦𑀧𑀜𑁆𑀘𑀺𑀓𑀸𑀝𑀻𑀓𑀸𑀬𑀁 𑀲𑀸𑀭𑀢𑁆𑀣𑀯𑀺𑀮𑀸𑀲𑀺𑀦𑀺𑀬𑀁

𑀘𑀢𑀼𑀢𑁆𑀣𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀔𑀫𑀸𑀯𑀻𑀫𑀁𑀲𑀸𑀲𑀽𑀢𑀺 𑀧𑀓𑀢𑀺𑀯𑀺𑀲𑁂𑀲𑀦𑀫𑁂𑀯 𑀓𑀣𑀫𑀺𑀘𑁆𑀙𑀺𑀢𑀦𑁆𑀢𑀺 𑀆𑀳- ‘𑀲𑀫𑁆𑀩𑀦𑁆𑀥𑀲𑁆𑀲𑀺’𑀘𑁆𑀘𑀸𑀤𑀺, 𑀧𑀤𑀸𑀦𑀫𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀲𑁆𑀲 𑀧𑀼𑀭𑀺𑀲𑀸𑀥𑀻𑀦𑀢𑁆𑀢𑀸𑀢𑀺 𑀅𑀢𑁆𑀣𑁄, 𑀧𑀓𑀢𑀺 𑀯𑀺𑀲𑁂𑀲𑀦𑀦𑁆𑀢𑀺 𑀢𑀺𑀚𑀫𑀸𑀳 𑀲𑀤𑁆𑀤𑀸𑀦𑀁 𑀯𑀺𑀲𑁂𑀲𑀦𑀁, 𑀓𑀺𑀫𑁆𑀧𑀦 𑀧𑀓𑀢𑀺𑀯𑀺𑀲𑁂𑀲𑀦𑁂 𑀨𑀮 𑀫𑀺𑀘𑁆𑀘𑀸𑀳- ‘𑀧𑀓𑀢𑀺𑀯𑀺𑀲𑁂𑀲𑀦𑁄𑀧𑀸𑀤𑀸𑀦’𑀫𑀺𑀘𑁆𑀘𑀸𑀤𑀺. 𑀬𑀚𑁆𑀚𑀢𑁆𑀭 ‘𑀔𑀫𑀸𑀯𑀻𑀫𑀁𑀲𑀸𑀲𑀽’𑀢𑀺 𑀧𑀓𑀢𑀺𑀯𑀺𑀲𑁂𑀲𑀦𑀁, 𑀓𑀲𑁆𑀫𑀺𑀁 𑀅𑀢𑁆𑀣𑁂 𑀘𑀭𑀢𑀺 𑀔𑀲𑀸 𑀯𑀺𑀥𑀻𑀬𑀦𑁆𑀢𑀺𑀘𑁆𑀘𑀸𑀳- ‘𑀅𑀢𑁆𑀣𑀦𑁆𑀢𑀭𑀲𑁆𑀲𑀸 𑀦𑀺𑀤𑁆𑀤𑁂𑀲𑀸’𑀇𑀘𑁆𑀘𑀸𑀤𑀺. 𑀅𑀢𑁆𑀣𑀦𑁆𑀢𑀭𑀲𑁆𑀲𑀸𑀢𑀺 𑀦𑀺𑀲𑀸𑀦𑀸𑀤𑀺𑀅𑀢𑁆𑀣𑀦𑁆𑀢𑀭𑀲𑁆𑀲. ‘‘𑀲𑀼𑀢𑀸𑀦𑀼𑀫𑀺𑀢𑁂𑀲𑀼 𑀲𑀼𑀢𑀲𑀫𑁆𑀩𑀦𑁆𑀥𑁄𑀯 𑀩𑀮𑀯𑀸’’𑀢𑀺 𑀧𑀭𑀺𑀪𑀸𑀲𑀫𑀼𑀧𑀮𑀓𑁆𑀔𑁂𑀢𑀺 ‘𑀲𑀼𑀢𑀸𑀦𑀼𑀫𑀺𑀢𑀸𑀦’𑀫𑀺𑀘𑁆𑀘𑀸𑀤𑀺𑀦𑀸. 𑀢𑁂𑀦𑁂𑀯𑀸𑀢𑀺 𑀓𑀺𑀭𑀺𑀬𑀸𑀭𑀽𑀧𑀸𑀲𑀼 𑀔𑀫𑀸𑀯𑀻𑀫𑀁𑀲𑀼 𑀔𑀲𑀸𑀦𑀁 𑀯𑀻𑀥𑀸𑀦𑁂𑀦𑁂𑀯, 𑀲𑀓𑀢𑁆𑀣𑁂 𑀯𑀺𑀥𑀸𑀦𑁂𑀦𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀺𑀢𑀺𑀓𑁆𑀔𑀓𑀺𑀭𑀺𑀬𑀢𑁆𑀢𑀸𑀢𑀺 𑀇𑀫𑀺𑀦𑀸 𑀧𑀭𑁂𑀲𑀁 𑀯𑀺𑀬 𑀔𑀸𑀤𑁆𑀬𑀦𑁆𑀢𑀸𑀦𑀁 𑀥𑀸𑀢𑀼𑀲𑀜𑁆𑀜𑀸𑀯𑀺𑀥𑀸𑀦 𑀫𑀦𑀢𑁆𑀣𑀓𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀢𑀺𑀢𑀺𑀓𑁆𑀔𑀸 𑀔𑀫𑀸, 𑀢𑀺𑀢𑀺𑀓𑁆𑀔𑀢𑀺 𑀔𑀫𑀢𑀺, 𑀯𑀻𑀫𑀁𑀲𑀸 𑀉𑀧𑀧𑀭𑀺𑀓𑁆𑀔𑀸, 𑀯𑀻𑀫𑀁𑀲𑀢𑀺 𑀉𑀧𑀧𑀭𑀺𑀓𑁆𑀔𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀢𑁆𑀢𑁂 𑀢𑀺𑀚𑀇𑀢𑀺 𑀦𑀺𑀤𑁆𑀤𑁂𑀲𑀸 𑀪𑀽𑀯𑀸𑀤𑀺𑀓𑀲𑁆𑀲 𑀕𑀳𑀡𑀁. 𑀦𑀺𑀘𑁆𑀘𑀡𑁆𑀬𑀦𑁆𑀢𑀲𑁆𑀲 𑀘𑀼𑀭𑀸𑀤𑀺𑀓𑀲𑁆𑀲 𑀳𑀺 𑀢𑀸𑀤𑀺𑀲𑁂 𑀧𑀬𑁄𑀚𑀦𑁂 𑀲𑀢𑀺 𑀩𑀳𑀼𑀮𑀁 𑀯𑀺𑀥𑀻𑀬𑀫𑀸𑀦𑁂𑀧𑀺 𑀦𑀺𑀘𑁆𑀘𑀢𑁆𑀢𑀫𑀢𑁆𑀢𑀦𑁄 𑀦𑀸𑀢𑀺𑀯𑀢𑁆𑀢𑀢𑀺. 𑀅𑀣𑀯𑀸 𑀘𑀼𑀭𑀸𑀤𑀺𑀫𑀸𑀦𑁂𑀦𑀸𑀩𑁆𑀬𑀪𑀺𑀘𑀸𑀭𑀺𑀦𑀸 𑀲𑀸𑀳𑀘𑀭𑀺𑀬𑀸 𑀢𑀺𑀚𑁄𑀧𑀺 𑀘𑀼𑀭𑀸𑀤𑀺𑀓𑁄𑀯, 𑀢𑀁 𑀬𑀣𑀸 ‘𑀕𑀸𑀯𑀲𑁆𑀲 𑀤𑀼𑀢𑀺𑀬𑁂𑀦𑀸𑀢𑁆𑀣𑁄’𑀢𑀺. 𑀯𑀼𑀢𑁆𑀢𑁂𑀕𑁄𑀬𑁂𑀯𑁄𑀧𑀸𑀤𑀻𑀬𑀢𑁂, 𑀦𑀸𑀲𑁆𑀲𑁄, 𑀦 𑀕𑀤𑁆𑀭𑀪𑁄. 𑀓𑀤𑀸𑀘𑀺 𑀧𑀦 𑀅𑀲𑁆𑀲𑀸𑀤𑀺𑀦𑁄𑀧𑀺 𑀤𑀼𑀢𑀺𑀬𑀲𑁆𑀲 𑀕𑀳𑀡𑀁 𑀲𑀺𑀬𑀸 𑀅𑀢𑁆𑀣𑀧𑁆𑀧𑀓𑀭𑀡𑀸 𑀤𑀺𑀧𑁆𑀧𑀪𑀸𑀯𑀢𑁄.

𑀦𑀦𑀼 ¶ 𑀘 𑀯𑀻𑀫𑀁𑀲𑀸𑀬𑀁 𑀲𑀧𑁆𑀧𑀘𑁆𑀘𑀬𑀯𑀺𑀥𑀸𑀦 𑀫𑀦𑀼𑀧𑀧𑀦𑁆𑀦𑀫𑀺𑀢𑀭𑁂𑀢𑀭𑀦𑀺𑀲𑁆𑀲𑀬𑀤𑁄𑀲 𑀤𑀼𑀝𑁆𑀞𑀢𑁆𑀢𑀸, 𑀢𑀣𑀸𑀳𑀺 𑀲𑀺𑀤𑁆𑀥𑁂 𑀯𑀻𑀫𑀁𑀲𑀸𑀲𑀤𑁆𑀤𑁂 𑀲𑀧𑁆𑀧𑀘𑁆𑀘𑀬𑁄 𑀉𑀧𑁆𑀧𑀚𑁆𑀚𑀢𑁂, 𑀲𑀢𑀺 𑀘 𑀢𑀲𑁆𑀫𑀺𑀁 𑀯𑀻𑀫𑀁𑀲𑀸𑀢𑀺 𑀭𑀽𑀧𑀁 𑀲𑀫𑁆𑀧𑀚𑁆𑀚𑀢𑀻𑀢𑀺 𑀇𑀢𑀭𑁂𑀢𑀭𑀦𑀺𑀲𑁆𑀲𑀬𑁄, 𑀇𑀢𑀭𑁂𑀢𑀭 𑀦𑀺𑀲𑁆𑀲𑀬𑀸𑀦𑀺 𑀘 𑀓𑀸𑀭𑀺𑀬𑀸𑀦𑀻 𑀦𑁄𑀧𑀓𑀧𑁆𑀧𑀦𑁆𑀢𑀻𑀢𑀺 𑀢𑁂𑀦𑀸𑀳- ‘𑀅𑀦𑀼𑀯𑀸𑀤𑀭𑀽𑀧𑀸𑀦’𑀫𑀺𑀘𑁆𑀘𑀸𑀤𑀺. 𑀅𑀦𑀸𑀤𑀺𑀓𑀸𑀮𑀲𑀁𑀲𑀺𑀤𑁆𑀥𑀲𑀤𑁆𑀤𑀸𑀦𑀼𑀯𑀸𑀢𑁄 𑀦𑀢𑁆𑀣𑀺 𑀇𑀢𑀭𑁂𑀢𑀭𑀦𑀺𑀲𑁆𑀲𑀬𑁄 𑀤𑁄𑀲𑁄𑀢𑀺 𑀪𑀸𑀯𑁄. 𑀧𑀬𑁄𑀚𑀓𑀩𑁆𑀬𑀸𑀧𑀸𑀭𑀡𑀺𑀧𑁆𑀧𑀘𑁆𑀘𑀬𑀸𑀪𑀸𑀯𑁂 𑀢𑁂𑀚𑀢𑁂𑀢𑀺 𑀭𑀽𑀧𑀁.

𑀧𑀼𑀩𑁆𑀩𑁂𑀯𑀺𑀬 𑀧𑀓𑀢𑀺𑀯𑀺𑀲𑁂𑀲𑀦𑀸𑀤𑀻𑀢𑁆𑀬𑀦𑁂𑀦 ‘‘𑀲𑀫𑁆𑀩𑀦𑁆𑀥𑀲𑁆𑀲 𑀧𑀼𑀭𑀺𑀲𑀸𑀬𑀢𑁆𑀢𑀢𑁆𑀢𑀸 ‘𑀢𑀺𑀓𑀺𑀘𑁆𑀙𑀸𑀲𑀁𑀲𑀬𑁂𑀲𑀽’𑀢𑀺 𑀧𑀓𑀢𑀺𑀯𑀺𑀲𑁂𑀲𑀦𑀦𑁆𑀢𑀺 𑀆𑀳- ‘𑀢𑀺𑀓𑀺𑀘𑁆𑀙𑀸𑀬’𑀫𑀺𑀘𑁆𑀘𑀸𑀤𑀺’𑀢𑁆𑀬𑀸𑀤𑀺𑀓𑀁 𑀲𑀩𑁆𑀩𑀁 𑀬𑀣𑀸𑀬𑁄𑀕𑀫𑁂𑀢𑁆𑀣𑀸𑀧𑀺 𑀯𑀢𑁆𑀢𑀩𑁆𑀩𑀦𑁆𑀢𑁆𑀬𑀢𑀺𑀤𑀺𑀲𑀢𑀺. 𑀯𑀺𑀲𑁆𑀲𑀢𑁆𑀣𑁄𑀢𑀺 𑀯𑀺𑀲𑀤𑁆𑀤𑀲𑁆𑀲 𑀅𑀢𑁆𑀣𑁄. 𑀅𑀣 𑀓𑀺𑀫𑀺𑀢𑁆𑀣𑀁 𑀙𑀧𑁆𑀧𑀘𑁆𑀘𑀬𑀦𑁆𑀢𑀲𑁆𑀲𑁂𑀯 𑀤𑁆𑀯𑀺𑀥𑁄𑀤𑀸𑀳𑀭𑀡𑀦𑁆𑀢𑁆𑀬𑀸𑀲𑀗𑁆𑀓𑀺𑀬𑀸𑀳- ‘𑀅𑀢𑁆𑀣𑀪𑁂𑀤𑀸 𑀤𑁆𑀯𑀺𑀥𑁄𑀤𑀸𑀳𑀭𑀡’𑀦𑁆𑀢𑀺. 𑀦𑀺𑀓𑁂𑀢𑁄 𑀦𑀺𑀯𑀸𑀲𑁄, 𑀲𑀗𑁆𑀓𑁂𑀢𑁄 𑀮𑀓𑁆𑀔𑀡𑀁.

𑀦𑀺𑀦𑁆𑀤=𑀕𑀭𑀳𑀸𑀬𑀁 𑀢𑀢𑁄 ‘‘𑀇𑀢𑁆𑀣𑀺𑀬𑀫𑀡𑀢𑁆𑀢𑀺𑀓𑀬𑀓𑁆𑀬𑀸 𑀘𑁂’’𑀢𑀺 (𑁫-𑁪𑁯) 𑀅𑀧𑁆𑀧𑀘𑁆𑀘𑀬𑁂 𑀢𑀢𑁄 ‘‘𑀇𑀢𑁆𑀣𑀺𑀬𑀫𑀢𑁆𑀯𑀸’’𑀢𑀺 (𑁩-𑁨𑁬) 𑀆𑀧𑁆𑀧𑀘𑁆𑀘𑀬𑁂 𑀭𑀽𑀧𑀁. 𑀩𑀦𑁆𑀥𑀢𑀻𑀢𑀺 𑀩𑀥𑀓𑁄.

𑀢𑀼𑀁𑀲𑁆𑀫𑀸𑀢𑀻𑀳 𑀧𑀘𑁆𑀘𑀬𑀕𑁆𑀕𑀳𑀡𑀫𑀸𑀘𑀺𑀓𑁆𑀔𑀢𑀺 ‘𑀢𑀼𑀁𑀢𑀸𑀬𑁂’𑀘𑁆𑀘𑀸𑀤𑀺𑀦𑀸. 𑀢𑀢𑁄 𑀘𑁂𑀢𑀺 𑀬𑀢𑁄 𑀢𑀼𑀁𑀲𑁆𑀫𑀸𑀢𑀺 𑀧𑀘𑁆𑀘𑀬𑀲𑁆𑀲𑁂𑀯 𑀕𑀳𑀡𑀁 𑀬𑀢𑁄 𑀘 𑀯𑀺𑀲𑁂𑀲𑀦 𑀦𑀺𑀤𑁆𑀤𑁂𑀲𑁄, 𑀢𑀢𑁄𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀕𑁆𑀕𑀳𑀡𑁂 𑀢𑀤𑀸𑀤𑀺𑀕𑁆𑀕𑀳𑀡𑀁 𑀯𑀺𑀜𑁆𑀜𑀸𑀬𑀢𑁂… ‘‘𑀧𑀘𑁆𑀘𑀬𑀕𑁆𑀕𑀳𑀡𑁂 𑀬𑀲𑁆𑀫𑀸 𑀲𑁄 𑀯𑀺𑀳𑀺𑀢𑁄 𑀢𑀤𑀸𑀤𑀺𑀦𑁄 𑀕𑀳𑀡’’𑀦𑁆𑀢𑀺 𑀜𑀸𑀬𑀢𑁄. 𑀯𑀺𑀲𑁂𑀲𑀦𑀢𑁆𑀢𑁂𑀦 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀢𑁆𑀢𑀸 𑀢𑀤𑀦𑁆𑀢𑀕𑁆𑀕𑀳𑀡𑀁… ‘‘𑀯𑀺𑀥𑀺𑀩𑁆𑀩𑀺𑀲𑁂𑀲𑀦𑀦𑁆𑀢𑀲𑁆𑀲𑀸’’𑀢𑀺 (𑁧-𑁧𑁩) 𑀯𑀘𑀦𑀸𑀪𑀺 𑀫𑀦𑀲𑀺 𑀦𑀺𑀥𑀸𑀬𑀸𑀳- ‘𑀬𑀢𑁄 𑀓𑀺𑀭𑀺𑀬𑀢𑁆𑀣𑀸’𑀇𑀘𑁆𑀘𑀸𑀤𑀺. 𑀲𑁄 𑀓𑀺𑀭𑀺𑀬𑀢𑁆𑀣𑁄 𑀆𑀤𑀺 𑀬𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀲𑁄 𑀢𑀤𑀸𑀤𑀺 𑀲𑁄 𑀧𑀘𑁆𑀘𑀬𑁄𑀦𑁆𑀢𑁂 𑀢𑀲𑁆𑀲 (𑀲𑁄 𑀢𑀤𑀦𑁆𑀢𑁄). 𑀢𑀤𑀸𑀤𑀺𑀢𑀤𑀦𑁆𑀢𑀲𑀫𑀼𑀤𑀸𑀬𑀯𑀺𑀲𑁂𑀲𑀲𑁆𑀲 𑀕𑀳𑀡𑀁, (𑀦𑀢𑀼) 𑀢𑀤𑀦𑁆𑀢𑀫𑀢𑁆𑀢𑀲𑁆𑀲𑁂 𑀢𑁆𑀬𑀢𑁆𑀣𑁄 ¶ . 𑀦𑀦𑀼 𑀘 𑀢𑀼𑀁𑀲𑁆𑀫𑀸𑀇𑀢𑀺 𑀯𑀺𑀲𑁂𑀲𑀦𑀢𑁆𑀢𑁂𑀦 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑁂 𑀪𑀯𑀢𑀼 ‘‘𑀯𑀺𑀥𑀺𑀩𑁆𑀩𑀺𑀲𑁂𑀲𑀦𑀦𑁆𑀢𑀲𑁆𑀲𑁂’’𑀢𑀺 𑀢𑀤𑀦𑁆𑀢𑀕𑁆𑀕𑀳𑀡𑀁 𑀧𑀘𑁆𑀘𑀬𑀕𑁆𑀕𑀳𑀡𑁂 𑀢𑀼 𑀓𑀣𑀁 𑀢𑀤𑀸𑀤𑀺𑀦𑁄 𑀕𑀳𑀡𑀁 𑀯𑀘𑀦𑀸𑀪𑀸𑀯𑀢𑁄𑀘𑁆𑀘𑀸𑀳- ‘𑀢𑀤𑀯𑀺𑀦𑀸𑀪𑀸𑀯𑀺𑀢𑁆𑀢𑀸’𑀢𑀺. 𑀬𑀢𑁄 𑀯𑀺𑀳𑀺𑀢𑁄 𑀢𑁂𑀦 𑀯𑀺𑀦𑀸 𑀦 𑀪𑀯𑀢𑀺 𑀲𑀻𑀮𑁂𑀦𑁂𑀢𑀺 𑀢𑀤𑀯𑀺𑀦𑀸𑀪𑀸𑀯𑀻 𑀢𑀲𑁆𑀲 𑀪𑀸𑀯𑁄 𑀢𑀲𑁆𑀫𑀸. 𑀇𑀫𑀸𑀬 𑀬𑀼𑀢𑁆𑀢𑀺𑀬𑀸 𑀯𑀺𑀜𑁆𑀜𑀸𑀬𑀢𑁂-𑀢𑁆𑀣𑁄, 𑀬𑀫𑀸𑀔𑁆𑀬𑀸𑀬𑀢𑁂 ‘𑀧𑀘𑁆𑀘𑀬𑀕𑁆𑀕𑀳𑀡𑁂 𑀬𑀲𑁆𑀫𑀸 𑀲𑁄 𑀯𑀺𑀳𑀺𑀢𑁄 𑀢𑀤𑀸𑀤𑀺𑀦𑁄 𑀕𑀳𑀡’𑀦𑁆𑀢𑀺. 𑀪𑀯𑀢𑁆𑀯𑁂𑀯𑀁 𑀢𑀤𑀸𑀤𑀺𑀦𑁄 𑀢𑀤𑀦𑁆𑀢𑀲𑁆𑀲 𑀘 𑀕𑀳𑀡𑀁, 𑀢𑀢𑁄 𑀓𑀺𑀧𑁆𑀨𑀮𑀁𑀢𑁆𑀬𑀸𑀳- ‘𑀢𑁂𑀦𑁂’𑀘𑁆𑀘𑀸𑀤𑀺.

𑀲𑀧𑀸𑀤𑀺𑀢𑁄𑀢𑀺 𑀧𑀸𑀤𑀺𑀲𑀳𑀺𑀢𑀢𑁄. 𑀔 𑀙 𑀲𑀼𑀧𑁆𑀧𑀢𑁆𑀢𑀸𑀪𑀸𑀯𑀸𑀢𑀺 𑀔 𑀙 𑀲𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀸. 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲𑁂𑀯 𑀢𑀼𑀁𑀧𑁆𑀧𑀘𑁆𑀘𑀬𑀦𑁆𑀢𑀲𑁆𑀲 𑀧𑀓𑀢𑀺𑀪𑀸𑀯𑁂𑀦 𑀕𑀳𑀡𑀸 𑀲𑀧𑀸𑀤𑀺𑀢𑁄 𑀔 𑀙 𑀲𑀸𑀦𑀫𑀦𑀼𑀧𑁆𑀧𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀧𑀼𑀩𑁆𑀩𑀸 ‘𑀚𑀺-𑀚𑀬𑁂’𑀇𑀘𑁆𑀘𑀲𑁆𑀫𑀸 𑀢𑀼𑀁𑀧𑀘𑁆𑀘𑀬𑀦𑁆𑀢𑀸 ‘𑀯𑀺𑀚𑁂𑀢𑀼𑀫𑀺𑀘𑁆𑀙𑀢𑀻’𑀢𑀺 𑀅𑀢𑁆𑀣𑁂 ‘‘𑀢𑀼𑀁𑀲𑁆𑀫𑀸’’𑀇𑀘𑁆𑀘𑀸𑀤𑀺𑀦𑀸(𑀲𑁄), 𑀢𑀼𑀁𑀲𑁆𑀲𑀘 𑀮𑁄𑀧𑁄, 𑀦𑁂𑀫𑀺𑀢𑁆𑀢𑀺𑀓𑁂 𑀏𑀓𑀸𑀭𑁂 𑀦𑀺𑀯𑀢𑁆𑀢𑁂 ‘𑀚𑀺𑀲 𑀚𑀺𑀲 𑀇𑀢𑀺 𑀤𑁆𑀯𑀺𑀢𑁆𑀢𑁂 𑀅𑀦𑀸𑀤𑀺𑀩𑁆𑀬𑀜𑁆𑀚𑀦𑀮𑁄𑀧𑁄 ‘‘𑀚𑀺𑀳𑀭𑀸𑀦𑀁 𑀕𑀻’’𑀢𑀺 (𑁫-𑁧𑁦𑁨) 𑀕𑀻. 𑀚𑀺𑀕𑀻𑀲𑀧𑁆𑀧𑀓𑀢𑀺𑀢𑁄 ‘‘𑀪𑀽𑀢𑁂 𑀈𑀊𑀁’’𑀇𑀘𑁆𑀘𑀸𑀤𑀺𑀦𑀸 (𑁬-𑁪) 𑀈. 𑀢𑀲𑁆𑀫𑀺𑀁 𑀅𑀜. ‘‘𑀆 𑀈 𑀊 𑀫𑁆𑀳𑀸 𑀲𑁆𑀲𑀸 𑀲𑁆𑀲𑀫𑁆𑀳𑀸𑀦𑀁 𑀯𑀸’’𑀢𑀺 (𑁬-𑁩𑁩) 𑀈𑀲𑁆𑀲 𑀭𑀲𑁆𑀲𑁂 𑀩𑁆𑀬𑀚𑀺𑀕𑀻𑀲𑀺. 𑀬𑀤𑀺 𑀢𑀼 𑀲𑀧𑀸𑀤𑀺𑀢𑁄 𑀲𑀲𑁆𑀲 𑀉𑀧𑁆𑀧𑀢𑁆𑀢𑀺 𑀲𑀺𑀬𑀸, 𑀢𑀤𑀸 𑀩𑁆𑀬𑀚𑀺𑀕𑀻𑀲𑀻𑀢𑀺 𑀏𑀢𑁆𑀣 𑀤𑁆𑀯𑀺𑀩𑁆𑀩𑀘𑀦𑀁 𑀓𑀭𑀻𑀬𑀫𑀸𑀦𑀁 𑀲𑀧𑁆𑀧𑀘𑁆𑀘𑀬𑀦𑁆𑀢𑀲𑁆𑀲 𑀧𑀞𑀫𑀲𑁆𑀲𑁂𑀓𑀲𑁆𑀲𑀭𑀲𑁆𑀲 𑀤𑁆𑀯𑀺𑀩𑁆𑀩𑀘𑀦𑀁 𑀪𑀯𑀢𑀻𑀢𑀺 ‘‘𑀔 𑀙 𑀲𑀸𑀦’’𑀫𑀺𑀘𑁆𑀘𑀸𑀤𑀺𑀦𑀸 (𑁫-𑁬𑁯) 𑀯𑀺𑀚𑀺𑀬 𑀇𑀢𑀺 𑀲𑀫𑀼𑀤𑀸𑀬𑁂 𑀆𑀤𑀺𑀪𑀽𑀢𑀲𑁆𑀲 𑀯𑀺𑀲𑀤𑁆𑀤𑀲𑁆𑀲 𑀲𑀺𑀬𑀸 𑀈𑀫𑁆𑀳𑀺 𑀘 𑀯𑀺𑀳𑀺𑀢𑁂 𑀲𑀧𑀸𑀤𑀺𑀦𑁄 𑀧𑀓𑀢𑀺𑀪𑀸𑀯𑁄𑀢𑀺 𑀯𑀺𑀲𑀤𑁆𑀤 𑀧𑀼𑀩𑁆𑀩𑁂 𑀅𑀜𑀸𑀕𑀫𑁄 𑀲𑀺𑀬𑀸, 𑀢𑀢𑁄 𑀘 𑀅𑀯𑀺𑀯𑀺𑀚𑀺𑀲𑀻𑀢𑀺 𑀅𑀦𑀺𑀝𑁆𑀞𑀫𑁆𑀧𑀲𑀚𑁆𑀚𑁂𑀬𑁆𑀬.

𑀢𑀼𑀁𑀲𑁆𑀫𑀸 𑀇𑀘𑁆𑀙𑀸𑀬𑀦𑁆𑀢𑀺 𑀘 𑀧𑀓𑀢𑀺𑀧𑁆𑀧𑀘𑁆𑀘𑀬𑀢𑁆𑀣𑀸𑀦𑀫𑀼𑀧𑀤𑀺𑀝𑁆𑀞𑀢𑁆𑀢𑀸 𑀢𑁂𑀦 𑀲𑀪𑀸𑀯 𑀮𑀺𑀗𑁆𑀕𑁂𑀦 𑀔 𑀙 𑀲𑀧𑁆𑀧𑀘𑁆𑀘𑀬𑀸 𑀢𑀤𑀦𑁆𑀢𑁄 𑀘 𑀅𑀦𑀼𑀫𑀺𑀢𑁄 𑀦 𑀧𑀦 𑀢𑀼𑀁, 𑀢𑀼𑀫𑀺𑀳 𑀲𑀼𑀢𑁄𑀢𑀺 𑀆𑀳- ‘𑀦 𑀢𑀤𑀦𑁆𑀢𑁄, 𑀦𑀸𑀧𑀺 𑀙 𑀙𑀲𑀸’𑀢𑀺. 𑀚𑀺𑀖𑀘𑁆𑀙𑀸𑀇𑀘𑁆𑀘𑀢𑁆𑀭 𑀤𑁆𑀯𑀺𑀢𑁆𑀢𑁂 𑀧𑀼𑀩𑁆𑀩𑀲𑁆𑀲 𑀖𑀲𑁆𑀲 ‘‘𑀘𑀢𑀼𑀢𑁆𑀣 𑀤𑀼𑀢𑀺𑀬𑀸𑀦𑀁 𑀢𑀢𑀺𑀬𑀧𑀞𑀫𑀸’’𑀢𑀺 (𑁫-𑁭𑁮) 𑀕𑁄. 𑀢𑀲𑁆𑀲 ‘‘𑀓𑀯𑀕𑁆𑀕𑀳𑀸𑀦𑀁 𑀘𑀯𑀕𑁆𑀕𑀚𑀸’’𑀢𑀺 (𑁫-𑁭𑁯) 𑀚𑁄. 𑀧𑀸𑀡𑀺𑀦𑀺𑀦𑀸𑀧𑀻𑀳 𑀲𑀧𑁆𑀧𑀘𑁆𑀘𑀬 𑀯𑀺𑀥𑀸𑀬𑀓𑁂 𑀲𑀼𑀢𑁆𑀢𑁂 𑀯𑀸𑀓𑁆𑀬𑀫𑁆𑀧𑀺 𑀬𑀣𑀸 𑀲𑀺𑀬𑀸𑀢𑀺 𑀯𑀸𑀯𑀘𑀦𑀁 𑀓𑀢𑀁, 𑀢𑀤𑀬𑀼𑀢𑁆𑀢𑀦𑁆𑀢𑀺 𑀦𑀺𑀭𑀸𑀓𑀢𑁆𑀢𑀼𑀫𑀸𑀳- ‘𑀯𑀸𑀓𑁆𑀬𑀫𑁆𑀧𑀺’𑀘𑁆𑀘𑀸𑀤𑀺. 𑀧𑀓𑀢𑁆𑀬𑀸𑀤𑀺𑀢𑁆𑀬𑀢𑁆𑀭 𑀆𑀤𑀺 𑀲𑀤𑁆𑀤𑁂𑀦 𑀅𑀢𑁆𑀣𑀯𑀺𑀲𑁂𑀲𑁄 𑀕𑀳𑁂𑀢𑀩𑁆𑀩𑁄, 𑀧𑀓𑀢𑀺 𑀯𑀺𑀲𑁂𑀲𑁄 𑀢𑀼𑀫𑀦𑁆𑀢𑁄, 𑀇𑀘𑁆𑀙𑀢𑁆𑀣𑁄-𑀢𑁆𑀣𑀯𑀺𑀲𑁂𑀲𑁄 ¶ . 𑀇𑀤𑀁 𑀮𑀓𑁆𑀔𑀡𑀦𑁆𑀢𑀺 ‘‘𑀢𑀼𑀁𑀲𑁆𑀫𑀸 𑀮𑁄𑀧𑁄 𑀘𑀺𑀘𑁆𑀙𑀸𑀬𑀁 𑀢𑁂’’𑀇𑀢𑀺 𑀇𑀤𑀁 𑀮𑀓𑁆𑀔𑀡𑀁. 𑀦𑀺𑀬𑁄𑀕𑀢𑁄𑀢𑀺 𑀦𑀺𑀬𑀫𑁂𑀦. 𑀆𑀲𑀗𑁆𑀓𑀸𑀬𑀫𑀼𑀧𑀲𑀗𑁆𑀔𑁆𑀬𑀸𑀦’’𑀦𑁆𑀢𑀺 (𑁩-𑁧-𑁭) 𑀯𑀸𑀓𑁆𑀬𑀓𑀸𑀭𑁂𑀦 𑀯𑀼𑀢𑁆𑀢𑀁 𑀦𑀺𑀭𑀸𑀓𑀢𑁆𑀢𑀼𑀫𑀸𑀳- ‘𑀆𑀲𑀗𑁆𑀓𑀸𑀬’𑀫𑀺𑀘𑁆𑀘𑀸𑀤𑀺.

𑀅𑀘𑁂𑀢𑀦𑀢𑁆𑀢𑀸 𑀓𑀽𑀮𑀲𑁆𑀲 𑀇𑀘𑁆𑀙𑀸𑀬𑀸𑀲𑀫𑁆𑀪𑀯𑁄𑀢𑀺 ‘𑀓𑀽𑀮𑀧𑁆𑀧𑀢𑀺𑀢𑀼𑀫𑀺𑀘𑁆𑀙𑀢𑀻’𑀢𑀺 𑀯𑀸𑀓𑁆𑀬𑀫𑁂𑀯𑁂𑀘𑁆𑀙𑀸𑀧𑀓𑀸𑀲𑀦𑀫𑀲𑀺𑀤𑁆𑀥𑀁, 𑀢𑁂𑀦𑀸𑀲𑀺𑀤𑁆𑀥𑁂𑀦 𑀯𑀸𑀓𑁆𑀬𑁂𑀦𑀸𑀲𑀺𑀤𑁆𑀥𑀸𑀦𑀁 𑀔 𑀙 𑀲𑀸𑀦𑀁 𑀲𑀸𑀥𑀦𑀁 𑀅𑀲𑀺𑀤𑁆𑀥𑁂𑀦𑀸𑀲𑀺𑀤𑁆𑀥𑀲𑀸𑀥𑀦𑀁. 𑀇𑀘𑁆𑀙𑀸𑀯𑀘𑀦𑀺𑀘𑁆𑀙𑀸𑀢𑀺 𑀇𑀘𑁆𑀙𑀸𑀬 𑀯𑀢𑁆𑀢𑀼𑀫𑀺𑀘𑁆𑀙𑀸. 𑀇𑀘𑁆𑀙𑀸𑀬𑀧𑀯𑀢𑁆𑀢𑀺𑀢𑁄 𑀉𑀧𑀮𑀤𑁆𑀥𑀻𑀢𑀺 𑀇𑀘𑁆𑀙𑀸𑀬 𑀉𑀧𑀮𑀤𑁆𑀥𑀺 𑀉𑀧𑀸𑀮𑀫𑁆𑀩𑁄 𑀧𑀭𑀺𑀚𑀸𑀦𑀦𑀁 𑀧𑀯𑀢𑁆𑀢𑀺𑀢𑁄𑀢𑀺 𑀅𑀢𑁆𑀣𑁄. 𑀘𑁂𑀢𑀦𑀸𑀯𑀢𑀺𑀘𑀸𑀢𑀺 𑀯𑀼𑀢𑁆𑀢𑀁 𑀢𑀲𑁆𑀫𑀸 𑀘𑁂𑀢𑀦𑀸𑀯𑀢𑀺 𑀧𑀯𑀢𑁆𑀢𑀺𑀢𑁄 𑀉𑀧𑀮𑀤𑁆𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀢𑀤𑀧𑀤𑁂𑀲𑁂 𑀦𑀸𑀘𑁂𑀢𑀦𑁂𑀧𑀺 𑀤𑀲𑁆𑀲𑁂𑀢𑀼𑀁 ‘𑀬𑁄𑀧𑁂𑀲𑀸’𑀢𑀺𑀆𑀤𑀺𑀫𑀸𑀳. 𑀤𑁂𑀯𑀤𑀢𑁆𑀢𑁂 𑀭𑀚𑁆𑀚𑀼 𑀔𑀻𑀮𑀸𑀤𑀺𑀧𑀸𑀡𑀺𑀦𑀸 𑀉𑀬𑁆𑀬𑁄𑀕𑁄, 𑀓𑀽𑀮𑁂 𑀫𑀢𑁆𑀢𑀺𑀓𑀸𑀯𑀺𑀓𑀻𑀭𑀡𑀸𑀤𑀺. 𑀭𑀚𑁆𑀚𑀼 𑀕𑀼𑀡𑁄. 𑀔𑀻𑀮𑁄 [𑀓𑀻𑀮 (𑀧𑀜𑁆𑀘𑀺𑀓𑀸)] 𑀲𑀁𑀓𑁆𑀯𑀸𑀤𑀺.

𑀧𑀼𑀮𑁄 𑀢𑀺𑀡𑀸𑀤𑀻𑀦𑀁 𑀲𑀗𑁆𑀖𑀸𑀢𑁄. 𑀲𑀸 𑀲𑀼𑀦𑀔𑁄 𑀫𑀺𑀫𑀭𑀺𑀲𑀢𑀻𑀢𑀺 𑀫𑀭=𑀧𑀸𑀡𑀘𑀸𑀕𑁂’𑀇𑀘𑁆𑀙𑀸𑀬𑀁 𑀢𑀼𑀫𑀦𑁆𑀢𑀸 𑀲𑁄. ‘‘𑀜𑀺 𑀩𑁆𑀬𑀜𑁆𑀚𑀦𑀲𑁆𑀲𑁂’’𑀢𑀺 (𑁫-𑁧𑁭𑁦) 𑀜𑀺. 𑀤𑁆𑀯𑀺𑀢𑁆𑀢𑁂 𑀧𑀼𑀩𑁆𑀩𑀢𑁄-𑀜𑁆𑀜𑀲𑁆𑀲 𑀮𑁄𑀧𑁄 ‘‘𑀔 𑀙 𑀲𑁂𑀲𑁆𑀯𑀻’’𑀢𑀺 (𑁫-𑁭𑁬) 𑀤𑁆𑀯𑀺𑀢𑁆𑀢𑁂 𑀧𑀼𑀩𑁆𑀩𑀲𑁆𑀲𑀸𑀲𑁆𑀲 𑀇𑀫𑀺𑀫𑀭𑀺𑀲𑀢𑀺. 𑀢𑀣𑀸 𑀧𑀺𑀧𑀢𑀺𑀲𑀢𑀻𑀢𑀺 ‘𑀧𑀢𑀧𑀣=𑀕𑀫𑁂𑀦’ 𑀇𑀘𑁆𑀘𑀲𑁆𑀲. 𑀲𑀸 𑀫𑀺𑀫𑀭𑀺𑀲𑀢𑀻𑀢𑀺 𑀲𑀢𑀺𑀧𑀺 𑀲𑀘𑁂𑀢𑀦𑀢𑁆𑀢𑁂 𑀯𑀺𑀲𑀢𑁆𑀢𑀚𑀻𑀯𑀺𑀢𑀲𑁆𑀲 𑀲𑀼𑀦𑀔𑀲𑁆𑀲 𑀫𑀭𑀡𑀺𑀘𑁆𑀙𑀸 𑀲𑀫𑁆𑀪𑀯𑀢𑀻𑀢𑀺 𑀧𑀝𑀺𑀧𑀸𑀤𑀺𑀢𑀁. ‘‘𑀇𑀘𑁆𑀙𑀸𑀲𑀦𑁆𑀢𑀸 𑀧𑀝𑀺𑀲𑁂𑀥𑁄 𑀯𑀢𑁆𑀢𑀩𑁆𑀩𑁄’’𑀢𑀺 (𑁩-𑁧-𑁭) 𑀧𑀸𑀡𑀺𑀦𑀻𑀬𑀯𑀸𑀢𑁆𑀢𑀺𑀓𑀓𑀸𑀭𑁂𑀦 𑀯𑀼𑀢𑁆𑀢𑀁, 𑀢𑀦𑁆𑀦𑀺𑀭𑀸𑀓𑀢𑁆𑀢𑀼𑀫𑀸𑀳- ‘𑀩𑀼𑀪𑀼𑀓𑁆𑀔𑀺𑀢𑀼’𑀫𑀺𑀘𑁆𑀘𑀸𑀤𑀺. 𑀚𑀸𑀢𑀺𑀧𑀤𑀢𑁆𑀣𑀦𑀺𑀲𑁆𑀲𑀬𑁂𑀦 𑀦𑀺𑀯𑀼𑀢𑁆𑀢𑀺𑀫𑁆𑀧𑀝𑀺𑀧𑀸𑀤𑀬𑀫𑀸𑀳- ‘𑀚𑀸𑀢𑀺𑀧𑀤𑀢𑁆𑀣𑁂’𑀘𑁆𑀘𑀸𑀤𑀺. 𑀇𑀢𑀭𑁄 𑀇𑀘𑁆𑀙𑀢𑁆𑀣𑁄.

𑀓𑀭𑀻𑀬𑀢𑀺 𑀲𑀫𑁆𑀩𑀦𑁆𑀥𑀻𑀬𑀢𑀻𑀢𑀺 𑀓𑀫𑁆𑀫𑀁. 𑀢𑀜𑁆𑀘 𑀦𑀸𑀫 𑀚𑀸𑀢𑀺 𑀕𑀼𑀡𑀓𑀺𑀭𑀺𑀬𑀸𑀤𑀩𑁆𑀩 𑀲𑀫𑁆𑀩𑀦𑁆𑀥𑀢𑁄 𑀧𑀜𑁆𑀘𑀥𑀸 𑀪𑀯𑀢𑀺. 𑀢𑀢𑁆𑀣 𑀦𑀸𑀫𑀓𑀫𑁆𑀫𑀁’ 𑀟𑀺𑀢𑁆𑀣𑁄 𑀟𑀯𑀺𑀢𑁆𑀣𑁄𑀢𑀺 𑀦𑀸𑀫𑁂𑀦 𑀧𑀺𑀡𑁆𑀟𑀲𑁆𑀲 𑀲𑀫𑁆𑀩𑀦𑁆𑀥𑀸. 𑀚𑀸𑀢𑀺𑀓𑀫𑁆𑀫𑀁 𑀕𑁄𑀅𑀲𑁆𑀲𑁄𑀢𑀺 𑀕𑁄𑀢𑁆𑀢𑀸𑀤𑀺𑀚𑀸𑀢𑀺𑀬𑀸 𑀧𑀺𑀡𑁆𑀟𑀲𑁆𑀲 𑀲𑀫𑁆𑀩𑀦𑁆𑀥𑀸. 𑀕𑀼𑀡𑀓𑀫𑁆𑀫𑀁 𑀲𑀼𑀓𑁆𑀓𑁄𑀦𑀻𑀮𑁄𑀢𑀺 𑀲𑀼𑀓𑁆𑀓𑀸𑀤𑀺𑀦𑀸 𑀕𑀼𑀡𑁂𑀦 𑀤𑀩𑁆𑀩𑀲𑁆𑀲 ¶ 𑀲𑀫𑁆𑀩𑀦𑁆𑀥𑀸. 𑀓𑀺𑀭𑀺𑀬𑀸𑀓𑀫𑁆𑀫𑀁 𑀧𑀸𑀘𑀓𑁄 𑀧𑀸𑀬𑀓𑁄𑀢𑀺 𑀧𑀸𑀘𑀓𑀸𑀤𑀺𑀓𑀺𑀭𑀺𑀬𑀸𑀬 𑀤𑀩𑁆𑀩𑀲𑁆𑀲 𑀲𑀫𑁆𑀩𑀦𑁆𑀥𑀸. 𑀤𑀩𑁆𑀩𑀓𑀫𑁆𑀫𑀁 𑀤𑀡𑁆𑀟𑀻𑀯𑀺𑀲𑀸𑀡𑀻𑀢𑀺 𑀤𑀡𑁆𑀟𑀸𑀤𑀺𑀦𑀸 𑀤𑀩𑁆𑀩𑁂𑀦 𑀧𑀺𑀡𑁆𑀟𑀲𑁆𑀲 𑀲𑀫𑁆𑀩𑀦𑁆𑀥𑀸. 𑀏𑀯𑀁 𑀓𑀫𑁆𑀫𑀲𑁆𑀲 𑀧𑀜𑁆𑀘𑀧𑁆𑀧𑀓𑀸𑀭𑀲𑀫𑁆𑀪𑀯𑁂𑀧𑀺𑀘𑁆𑀙𑀸𑀬𑀫𑀢𑁆𑀣𑁂 𑀈𑀬𑀲𑁆𑀲 𑀯𑀺𑀥𑀸𑀦𑀢𑁄 𑀇𑀘𑁆𑀙𑀸𑀲𑀫𑁆𑀩𑀦𑁆𑀥𑀺𑀬𑁂𑀯 𑀓𑀫𑁆𑀫𑀁 𑀕𑀬𑁆𑀳𑀢𑀻𑀢𑀺 𑀓𑀺𑀭𑀺𑀬𑀸𑀓𑀫𑁆𑀫𑀫𑁂𑀯𑀸𑀢𑁆𑀭 𑀕𑀬𑁆𑀳𑀢𑁂 𑀅𑀫𑀼𑀓𑀫𑁂𑀯𑀢𑁆𑀣𑀫𑀼𑀧𑀤𑀲𑁆𑀲𑁂𑀦𑁆𑀢𑁄 𑀆𑀳- ‘𑀬𑀤𑀺𑀧𑀺’𑀘𑁆𑀘𑀸𑀤𑀺. 𑀅𑀬𑀜𑁆𑀘 𑀦𑀺𑀧𑀸𑀢 𑀲𑀫𑀼𑀤𑀸𑀬𑁄 𑀯𑀺𑀲𑁂𑀲𑀸𑀪𑀺𑀥𑀸𑀦𑀦𑀺𑀫𑀺𑀢𑁆𑀢𑀸𑀲𑁆𑀬𑀼𑀧𑀕𑀫𑁂 𑀯𑀢𑁆𑀢𑀢𑁂.

𑀢𑀣𑀸𑀧𑀻𑀢𑀺𑀮𑁄𑀓𑀯𑀼𑀢𑁆𑀢𑀺𑀭𑀬𑀁𑀯𑀺𑀲𑁂𑀲𑀸𑀪𑀺𑀥𑀸𑀦𑀸𑀭𑀫𑁆𑀪𑁂. 𑀢𑀁𑀲𑀫𑁆𑀩𑀦𑁆𑀥𑀺𑀬𑁂𑀯𑀸𑀢𑀺 𑀇𑀘𑁆𑀙𑀸𑀲𑀫𑁆𑀩𑀦𑁆𑀥𑀺𑀏𑀯. 𑀅𑀢𑁆𑀢𑀦𑁄𑀧𑀼𑀢𑁆𑀢𑀫𑀺𑀘𑁆𑀙𑀢𑀻𑀢𑁆𑀬𑀸𑀤𑀺𑀯𑀘𑀦𑀺𑀘𑁆𑀙𑀸𑀬𑀫𑀢𑁆𑀢𑀲𑀫𑁆𑀩𑀦𑁆𑀥𑀺𑀦𑀺𑀧𑀼𑀢𑁆𑀢𑀸𑀤𑁄 𑀅𑀢𑁆𑀢𑀦𑁄𑀢𑁆𑀬𑀦𑀼𑀯𑀢𑁆𑀢𑀺𑀬𑀲𑀼𑀢𑁆𑀢𑀦𑁆𑀢𑀭𑁂𑀦𑀧𑀘𑁆𑀘𑀬𑁄𑀯𑀺𑀥𑀻𑀬𑀢𑁂𑀧𑀸𑀡𑀺𑀦𑀺𑀦𑀸, 𑀏𑀢𑁆𑀣 𑀢𑁆𑀯(𑀢𑁆𑀢)𑀕𑁆𑀕𑀳𑀡𑀫𑀦𑁆𑀢𑀭𑁂𑀦𑀸𑀢𑁆𑀢 𑀲𑀫𑁆𑀩𑀦𑁆𑀥𑀺𑀦𑁆𑀬𑁂𑀯 𑀧𑀼𑀢𑁆𑀢𑀸𑀤𑁄 𑀓𑀣𑀁 𑀯𑀺𑀜𑁆𑀜𑀸𑀬𑀢𑁂 𑀯𑀺𑀲𑁂𑀲𑀯𑀘𑀦𑀸𑀪𑀸𑀯𑁂 𑀳𑀺 𑀧𑀭𑀲𑀫𑁆𑀩𑀦𑁆𑀥𑀺𑀦𑁆𑀬𑀧𑀺 𑀧𑀧𑁆𑀧𑁄𑀢𑀻𑀢𑀻𑀫𑀁𑀘𑁄𑀤𑁆𑀬𑀫𑀼𑀩𑁆𑀪𑀸𑀯𑀬 𑀫𑀸𑀳- ‘𑀅𑀢𑁆𑀢𑀲𑀫𑁆𑀩𑀦𑁆𑀥𑀺𑀦𑀺’𑀘𑁆𑀘𑀸𑀤𑀺. 𑀈𑀬𑀲𑁆𑀲 𑀧𑀭𑀲𑀫𑁆𑀩𑀦𑁆𑀥𑀺𑀦𑁆𑀬𑀧𑀺 𑀧𑀲𑀗𑁆𑀕𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀼𑀢𑁄𑀘𑀸𑀳-𑀈𑀬𑀲𑁆𑀲𑀸𑀇𑀢𑀺𑀥𑀸𑀦𑀸’𑀢𑀺. 𑀅𑀢𑁆𑀣𑀕𑁆𑀕𑀳𑀡𑀲𑁆𑀲𑀸𑀯𑀘𑀦𑁂 𑀈𑀬𑀲𑁆𑀲𑀸𑀦𑀪𑀺𑀥𑀸𑀦𑀸𑀢𑀺 𑀪𑀸𑀯𑁄.

𑀅𑀧𑁆𑀧𑀢𑁆𑀢𑀺𑀬𑀸𑀢𑀺 𑀓𑀭𑀡𑁂 𑀳𑁂𑀢𑀼𑀫𑁆𑀳𑀺 𑀯𑀸 𑀢𑀢𑀺𑀬𑀸. 𑀏𑀢𑁆𑀣𑀸𑀢𑀺 𑀅𑀢𑁆𑀢𑀦𑁄 𑀧𑀼𑀢𑁆𑀢𑀫𑀺𑀘𑁆𑀙𑀢𑀻𑀢𑁂𑀢𑁆𑀣𑀸𑀧𑀺. 𑀦 𑀇𑀝𑁆𑀞𑁄𑀢𑀺 𑀈𑀬𑀧𑁆𑀧𑀘𑁆𑀘𑀬𑁄 𑀦𑀸𑀪𑀺𑀫𑀢𑁄. 𑀦𑁂𑀯𑁂𑀢𑁆𑀣 𑀪𑀯𑀺𑀢𑀩𑁆𑀩𑀦𑁆𑀢𑀺 𑀯𑀤𑀢𑁄-𑀥𑀺𑀧𑁆𑀧𑀸𑀬𑀸𑀫𑀸𑀳 ‘𑀲𑀸𑀧𑁂𑀓𑁆𑀔𑀢𑁆𑀢 𑀬𑁂𑀯𑁂𑀢𑀺 𑀪𑀸𑀯𑁄’𑀢𑀺. 𑀬𑀤𑀺 𑀅𑀢𑁆𑀢𑀦𑁄 𑀧𑀼𑀢𑁆𑀢𑀫𑀺𑀘𑁆𑀙𑀢𑀻𑀢𑀺 𑀯𑀢𑁆𑀢𑀼𑀫𑀺𑀘𑁆𑀙𑀸𑀬𑀁 𑀲𑀸𑀧𑁂𑀓𑁆𑀔𑁂𑀢𑁆𑀢𑁂𑀧𑀺 𑀲𑀺𑀬𑀸, 𑀢𑀤𑀸𑀬𑀫𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑁄𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀬𑀤𑀺𑀘𑁂𑀢𑁆𑀣’𑀇𑀘𑁆𑀘𑀸𑀤𑀺.

𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀲𑁆𑀲 𑀲𑀭𑀽𑀧𑀫𑀸𑀳- ‘𑀅𑀢𑁆𑀢𑀦𑁄 𑀧𑀼𑀢𑁆𑀢𑀻𑀬𑀢𑀻𑀢𑀺 𑀲𑀺𑀬𑀸’𑀢𑀺. 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀈𑀬𑁂𑀦𑁂𑀯 𑀅𑀢𑁆𑀢𑀢𑁆𑀣𑀲𑁆𑀲𑀸𑀪𑀺𑀳𑀺𑀢𑀢𑁆𑀢𑀸 𑀅𑀢𑁆𑀢𑀲𑀤𑁆𑀤𑀲𑁆𑀲𑀸𑀧𑁆𑀧𑀬𑁄𑀕𑁄𑀢𑀺 𑀘𑁂𑀢𑀫𑁆𑀧𑀺 𑀦 𑀲𑀗𑁆𑀕𑀢𑀦𑁆𑀢𑀺 𑀧𑀝𑀺𑀧𑀸𑀤𑀬𑀫𑀸𑀳 ‘𑀦 𑀘 𑀲𑀓𑁆𑀓𑀸’𑀢𑀺𑀆𑀤𑀺. 𑀓𑀲𑁆𑀫𑀸𑀤𑁂𑀯𑀁 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀆𑀳- ‘𑀧𑀓𑀢𑀺’𑀘𑁆𑀘𑀸𑀤𑀺. 𑀅𑀧𑀽𑀧𑀸𑀤𑀺𑀓𑀸𑀬 𑀧𑀓𑀢𑀺𑀬𑀸 𑀲𑀫𑀸𑀦𑀢𑁆𑀣𑀲𑁆𑀲𑁂𑀯 𑀯𑀺𑀲𑁂𑀲𑀦𑀲𑁆𑀲 𑀯𑀼𑀢𑁆𑀢𑀺𑀧𑀤𑁂 𑀅𑀦𑁆𑀢𑁄𑀪𑀸𑀯 𑀤𑀲𑁆𑀲𑀦𑀸𑀢𑀺 𑀅𑀢𑁆𑀣𑁄. 𑀓𑁆𑀯𑀧𑀦𑁂𑀯𑀁 𑀤𑀺𑀝𑁆𑀞𑀦𑁆𑀢𑁆𑀬𑀸𑀳- ‘𑀢𑀁𑀬𑀣𑁂’𑀘𑁆𑀘𑀸𑀤𑀺. ‘‘𑀢𑀫𑀲𑁆𑀲 𑀲𑀺𑀧𑁆𑀧𑀁 𑀲𑀻𑀮𑀁 𑀧𑀡𑁆𑀬𑀁 𑀧𑀳𑀭𑀡𑀁 𑀧𑀬𑁄𑀚𑀦𑀁’’𑀢𑀺 (𑁪-𑁨𑁭) 𑀡𑀺𑀓𑁂 𑀆𑀧𑀽𑀧𑀺𑀓𑁄. 𑀦𑀢𑀼 𑀪𑀺𑀦𑁆𑀦𑀢𑁆𑀣𑀲𑁆𑀲𑀸𑀢𑀺 𑀩𑁆𑀬𑀢𑀺𑀭𑁂𑀓𑀁 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀤𑀺𑀝𑁆𑀞𑀦𑁆𑀢𑁂𑀦 𑀲𑀸𑀥𑁂𑀢𑀼𑀫𑀸𑀳- ‘𑀤𑁂𑀯𑀤𑀢𑁆𑀢𑀲𑁆𑀲𑀺’𑀘𑁆𑀘𑀸𑀤𑀺. 𑀓𑀸𑀭𑀡𑀫𑀸𑀳- ‘𑀲𑀸𑀫𑁆𑀬𑀦𑁆𑀢𑀭𑁂’𑀘𑁆𑀘𑀸𑀤𑀺. 𑀤𑁂𑀯𑀤𑀢𑁆𑀢𑀲𑁆𑀲 ¶ 𑀥𑀼𑀭𑀼𑀦𑁄 𑀓𑀼𑀮𑀦𑁆𑀢𑀺 𑀲𑀸𑀫𑁆𑀬𑀦𑁆𑀢𑀭𑀩𑁆𑀬𑀯𑀘𑁆𑀙𑁂𑀤𑀸𑀬 𑀤𑁂𑀯𑀤𑀢𑁆𑀢𑀲𑀤𑁆𑀤𑀲𑁆𑀲𑁄 𑀧𑀸𑀤𑀸𑀦𑀢𑁄 𑀕𑀼𑀭𑀼𑀓𑀼𑀮𑀦𑁆𑀢𑀺 𑀯𑀼𑀢𑁆𑀢𑀺𑀧𑀤𑁂𑀦 𑀤𑁂𑀯𑀤𑀢𑁆𑀢𑀢𑁆𑀣𑀲𑁆𑀲𑀸𑀦𑁆𑀢𑁄 𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀢𑀫𑁂𑀢𑁆𑀣𑁄𑀧𑀺 𑀲𑀫𑀸𑀦𑀦𑁆𑀢𑀽𑀧𑀤𑀲𑁆𑀲𑁂𑀦𑁆𑀢𑁄 𑀆𑀳- ‘𑀢𑀣𑁂𑀳𑀸𑀧𑀺’𑀘𑁆𑀘𑀸𑀤𑀺. 𑀅𑀣𑀸𑀢𑁆𑀢𑀦𑁄 𑀧𑀼𑀢𑁆𑀢𑀫𑀺𑀘𑁆𑀙𑀢𑀻𑀢𑁆𑀬𑁂𑀢𑀲𑁆𑀫𑀺𑀁 𑀯𑀸𑀓𑁆𑀬𑁂 𑀧𑀤𑀲𑁆𑀲𑀸𑀦𑁆𑀯𑀸𑀔𑁆𑀬𑀸𑀦𑀢𑁄 𑀅𑀢𑁆𑀢𑀲𑀤𑁆𑀤𑀲𑁆𑀲𑀸𑀧𑁆𑀨𑀬𑁄𑀕𑁄 𑀓𑀺𑀦𑁆𑀦 𑀲𑀺𑀬𑀸𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀦𑀘𑀸𑀧𑀺’𑀘𑁆𑀘𑀸𑀤𑀺.

𑀧𑀤𑀲𑁆𑀲𑀸𑀢𑀺 𑀧𑀼𑀢𑁆𑀢𑀻𑀬𑀸𑀤𑀺𑀦𑁄 𑀧𑀤𑀲𑁆𑀲. 𑀦𑀘𑀸𑀧𑀺 𑀅𑀧𑁆𑀧𑀬𑁄𑀕𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀸𑀭𑀡𑀫𑀸𑀳- ‘𑀈𑀬𑀦𑁆𑀢𑀲𑁆𑀲𑀸’𑀢𑀺𑀆𑀤𑀺. 𑀈𑀬𑀦𑁆𑀢𑁄 𑀧𑀼𑀢𑁆𑀢𑀻𑀬𑀸𑀤𑀺, 𑀦𑀺𑀬𑁄𑀕𑀢𑁄 𑀦 𑀧𑀧𑁆𑀧𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀩𑁆𑀩𑀸𑀘𑀻𑀲𑀤𑁆𑀤𑀧𑁆𑀧𑀬𑁄𑀕𑀦𑁆𑀢𑀺 𑀅𑀜𑁆𑀜𑀯𑀸𑀘𑀻𑀲𑀤𑁆𑀤𑀬𑁄𑀕𑀁. 𑀲𑀼𑀢𑀕𑁆𑀕𑀳𑀡𑀦𑁆𑀢𑀺 𑀅𑀲𑀼𑀢𑀢𑁆𑀢𑀸𑀢𑀺 𑀯𑀼𑀢𑁆𑀢𑀲𑀼𑀢𑀕𑁆𑀕𑀳𑀡𑀁. 𑀅𑀢𑁆𑀣𑀧𑁆𑀧𑀓𑀭𑀡𑀸𑀤𑁆𑀬𑀼𑀧𑀮𑀓𑁆𑀔𑀡𑀦𑁆𑀢𑁆𑀬𑀦𑁂𑀦 𑀅𑀢𑁆𑀣𑀢𑁄 𑀧𑀓𑀭𑀡𑀸𑀤𑀺𑀢𑁄𑀧𑀺 𑀧𑀼𑀢𑁆𑀢𑀲𑁆𑀲𑀢𑁆𑀢 𑀦𑀺𑀬𑀢𑀸 𑀕𑀫𑁆𑀬𑀢𑁂, 𑀲𑀼𑀢𑀲𑀤𑁆𑀤𑀲𑁆𑀲 𑀢𑀼 𑀕𑀳𑀡𑀫𑀼𑀧𑀮𑀓𑁆𑀔𑀡𑀢𑁆𑀣𑀦𑁆𑀢𑀺 𑀯𑀤𑀢𑀺.

𑀦𑀦𑀼 𑀘 𑀲𑀼𑀢𑁆𑀢𑁂 𑀓𑀫𑁆𑀫𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀫𑁆𑀫𑀲𑀫𑀼𑀤𑀸𑀬𑀢𑁄𑀧𑀻𑀬𑁄 𑀲𑀺𑀬𑀸 𑀢𑁆𑀬𑀸𑀲𑀗𑁆𑀓𑀺𑀬𑁂𑀯 (𑀫𑀪𑀸)𑀯𑀁 𑀲𑀸𑀥𑀬𑀫𑀸𑀳- ‘𑀓𑀫𑁆𑀫𑀸’𑀢𑀺𑀆𑀤𑀺. 𑀯𑀢𑁆𑀢𑀼𑀁 𑀇𑀝𑁆𑀞𑀸 𑀏𑀓𑀲𑀔𑁆𑀬𑀸 𑀬𑀲𑁆𑀲 𑀓𑀫𑁆𑀫𑀲𑀸𑀫𑀜𑁆𑀜𑀲𑁆𑀲 𑀢𑀁 𑀢𑀣𑀸𑀯𑀼𑀢𑁆𑀢𑀁. 𑀯𑀢𑁆𑀢𑀼𑀫𑀺𑀝𑁆𑀞𑁂𑀓 𑀲𑀗𑁆𑀔𑁆𑀬𑀲𑁆𑀲 𑀕𑀳𑀡𑀫𑀸𑀳- ‘𑀓𑀫𑁆𑀫𑀲𑀫𑀼𑀤𑀸𑀬𑀢𑁄’𑀢𑀺. 𑀓𑀺𑀫𑁆𑀧𑀦𑀸𑀯𑀬𑀯𑀢𑁄 𑀦 𑀲𑀺𑀬𑀸’ 𑀫𑀳𑀦𑁆𑀢𑀫𑁆𑀧𑀼𑀢𑁆𑀢𑀫𑀺𑀘𑁆𑀙𑀢𑀻’𑀘𑁆𑀘𑀢𑁆𑀭 𑀧𑀼𑀢𑁆𑀢𑀫𑀺𑀘𑁆𑀘𑀢𑁄𑀘𑁆𑀘𑀸𑀲𑀗𑁆𑀓𑀺𑀬𑀸𑀳 ‘𑀅𑀯𑀬𑀯𑀢𑁄𑀧𑀺 𑀲𑀸𑀧𑁂𑀓𑁆𑀔𑀢𑁆𑀢𑀸𑀬𑁂𑀯𑀸’𑀢𑀺. 𑀦 𑀪𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀜𑁆𑀘𑀭𑀳𑀺 𑀇𑀤𑀫𑁆𑀧𑀺 𑀦 𑀲𑀺𑀚𑁆𑀛𑀢𑀻𑀢𑀺 𑀘𑁄𑀤𑁂𑀦𑁆𑀢𑁄 𑀆𑀳 ‘𑀘𑀭𑀳𑀺’𑀘𑁆𑀘𑀸𑀤𑀺. 𑀫𑀳𑀸 𑀘𑀸𑀬𑀁 𑀧𑀼𑀢𑁆𑀢𑁄𑀘𑁂𑀢𑀺 𑀫𑀳𑀸𑀧𑀼𑀢𑁆𑀢𑀫𑀺𑀘𑁆𑀙𑀢𑀻𑀢𑀺 𑀬𑀤𑁂𑀯𑀁 𑀓𑀭𑀻𑀬𑀢𑀺 𑀢𑀤𑀸𑀬𑀫𑁆𑀧𑀬𑁄𑀕𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳- ‘𑀪𑀯𑀺𑀢𑀩𑁆𑀩𑀫𑁂𑀯𑁂’𑀘𑁆𑀘𑀸𑀤𑀺.

𑀉𑀧𑀫𑀻𑀬𑀢𑁂 𑀧𑀭𑀺𑀘𑁆𑀙𑀺𑀚𑁆𑀚𑀢𑀺 𑀲𑀸𑀥𑀻𑀬𑀢𑀻𑀢𑁆𑀬𑀢𑁆𑀣𑁄. 𑀓𑀻𑀤𑀺𑀲𑀦𑁆𑀢𑀫𑀼𑀧𑀫𑀸𑀦𑀫𑀺𑀘𑁆𑀘𑀸𑀳- ‘𑀧𑀲𑀺𑀤𑁆𑀥𑀲𑀸𑀥𑀫𑁆𑀬𑀸’𑀇𑀘𑁆𑀘𑀸𑀤𑀺. 𑀧𑀲𑀺𑀤𑁆𑀥𑁄 𑀕𑀯𑀸𑀤𑀺, 𑀢𑀲𑁆𑀲 𑀲𑀸𑀥𑀫𑁆𑀬𑀸 𑀲𑀫𑀸𑀦 𑀭𑀽𑀧𑀢𑀸𑀬 𑀬𑀫𑁆𑀧𑀲𑀺𑀤𑁆𑀥𑀲𑁆𑀲 𑀕𑀯𑀬𑀸𑀤𑀺𑀦𑁄 𑀲𑀸𑀥𑀺𑀬𑀲𑁆𑀲 𑀲𑀸𑀥𑀦𑀁 𑀢𑀫𑀼𑀧𑀫𑀸𑀦𑀦𑁆𑀢𑁆𑀬𑀢𑁆𑀣𑁄. 𑀲𑀫𑀸𑀦𑁄 𑀥𑀫𑁆𑀫𑁄-𑀲𑁆𑀲𑁂𑀢𑀺 𑀲𑀥𑀫𑁆𑀫𑁄, 𑀕𑀯𑀸𑀤𑀺𑀬𑁂𑀯. 𑀢𑀲𑁆𑀲 𑀪𑀸𑀯𑁄 𑀲𑀸𑀥𑀫𑁆𑀬𑀁. 𑀲𑀸𑀥𑁆𑀬𑀢𑁂 𑀉𑀧𑀫𑀻𑀬𑀢𑁂-𑀦𑁂𑀦𑁂𑀢𑀺 𑀲𑀸𑀥𑀦𑀫𑀼𑀧𑀫𑀸𑀦𑀁 𑀕𑀯𑀸𑀤𑀺. 𑀲𑀸𑀥𑀼𑀢𑁂 𑀉𑀧𑀫𑀻𑀬𑀢𑁂𑀢𑀺 𑀲𑀸𑀥𑀺𑀬𑁄, 𑀕𑀯𑀬𑀸𑀤𑀺. 𑀢𑀲𑁆𑀲 𑀲𑀸𑀥𑀦𑀁 𑀲𑀸𑀥𑀺𑀬𑀲𑀸𑀥𑀦𑀁.

𑀧𑀼𑀢𑁆𑀢𑀫𑀺𑀯𑀸𑀘𑀭𑀢𑀻𑀢𑀺 ¶ 𑀏𑀢𑁆𑀣 ‘𑀆𑀯𑀲𑀣𑀫𑀸𑀯𑀲𑀢𑀺’𑀘𑁆𑀘𑀸𑀤𑁄 𑀯𑀺𑀬 𑀆𑀥𑀸𑀭𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸 𑀧𑀼𑀢𑁆𑀢𑁂 𑀯𑀺𑀬 𑀫𑀸𑀡𑀯𑀓𑁂 𑀫𑀥𑀼𑀭𑀦𑁆𑀦𑀧𑀸𑀦𑀤𑀸𑀦𑀸𑀤𑀺𑀓𑀫𑀸𑀘𑀭𑀡𑀁 𑀓𑀭𑁄𑀢𑀺𑀘𑁆𑀘𑁂𑀯𑀫𑀢𑁆𑀣𑀲𑀫𑁆𑀪𑀯𑁂𑀦 𑀤𑁆𑀯𑀺𑀦𑁆𑀦𑀫𑁆𑀧𑀺 𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀪𑀸𑀯𑁄𑀢𑁆𑀬𑀯𑀕𑀫𑀬𑀺𑀢𑀼𑀫𑀸𑀳- ‘𑀧𑀼𑀢𑁆𑀢𑁂’𑀇𑀘𑁆𑀘𑀸𑀤𑀺. 𑀧𑀲𑀺𑀤𑁆𑀥𑁂𑀦 𑀲𑀸𑀥𑀦𑀪𑀸𑀯𑁂𑀦𑀼𑀧𑀫𑀸𑀦𑀪𑀽𑀢𑁂 𑀧𑀼𑀢𑁆𑀢𑁂 𑀆𑀘𑀭𑀡𑀫𑁆𑀧𑀺 𑀧𑀲𑀺𑀤𑁆𑀥𑀦𑁆𑀢𑀺 𑀆𑀳- ‘𑀢𑀫𑁆𑀧𑀲𑀺𑀤𑁆𑀥’𑀦𑁆𑀢𑀺. 𑀢𑀤𑀸𑀘𑀭𑀡𑁂𑀦 𑀢𑁂𑀦 𑀆𑀘𑀭𑀡𑁂𑀦 𑀧𑀼𑀢𑁆𑀢𑀫𑀸𑀡𑀯𑀓𑀯𑀺𑀲𑀬𑀫𑀸𑀘𑀭𑀡𑀁 𑀯𑀸 𑀧𑀼𑀢𑁆𑀢𑀫𑀸𑀡𑀯𑀓 𑀲𑀤𑁆𑀤𑁂𑀦𑀼𑀧𑀘𑀸𑀭𑀢𑁄 𑀕𑀳𑁂𑀢𑁆𑀯𑀸 𑀯𑀺𑀲𑀬𑀻𑀯𑀲𑁂𑀦 𑀯𑀺𑀲𑀬𑀪𑀸𑀯𑀯𑁄𑀳𑀸𑀭𑁄𑀢𑀺𑀧𑀺 𑀬𑀼𑀚𑁆𑀚𑀢𑀺. 𑀯𑀸𑀓𑁆𑀬𑀢𑁆𑀣𑁄 𑀧𑀦𑁂𑀢𑀲𑁆𑀫𑀺𑀁 𑀧𑀓𑁆𑀔𑁂 ‘𑀧𑀼𑀢𑁆𑀢𑀫𑀺𑀯 𑀧𑀼𑀢𑁆𑀢𑀯𑀺𑀲𑀬 𑀫𑀸𑀡𑀯𑀓𑀫𑀺𑀯 𑀆𑀘𑀭𑀢𑀺 𑀫𑀸𑀡𑀯𑀓𑀯𑀺𑀲𑀬𑀫𑀸𑀘𑀭𑀡𑀁 𑀓𑀭𑁄𑀢𑀻’𑀢𑀺, 𑀯𑀼𑀢𑁆𑀢𑀺𑀬𑀦𑁆𑀢𑀼 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀤𑁆𑀯𑀬𑀁 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁.

𑀦𑀦𑀼 𑀘 𑀬𑀚𑁆𑀚𑀢𑁆𑀭𑁄𑀧𑀫𑀸𑀦𑁄𑀧𑀫𑁂𑀬𑁆𑀬𑀪𑀸𑀯𑁄 𑀯𑀼𑀢𑁆𑀢𑀺𑀬𑀁 𑀈𑀬𑁂𑀦𑁂𑀯 𑀚𑁄𑀢𑀺𑀢𑁄𑀢𑀺 𑀇𑀯𑀲𑀤𑁆𑀤𑁄 𑀦𑀺𑀯𑀢𑁆𑀢𑀢𑁂, 𑀢𑀤𑁄𑀧𑀫𑀸𑀦𑁄𑀧𑀫𑁂𑀬𑁆𑀬𑀪𑀸𑀯𑁄 𑀧𑀼𑀢𑁆𑀢 𑀲𑀤𑁆𑀤𑁂𑀯 𑀯𑀢𑁆𑀢𑀢𑁂, 𑀢𑀁 𑀓𑀣𑀫𑀼𑀧𑀫𑁂𑀬𑁆𑀬𑀯𑀘𑀦𑀲𑁆𑀲 𑀫𑀸𑀡𑀯𑀓𑀲𑀤𑁆𑀤𑀲𑁆𑀲 𑀯𑀼𑀢𑁆𑀢𑀢𑁆𑀣𑀲𑁆𑀲 𑀧𑀬𑁄𑀕𑁄 𑀬𑀼𑀢𑁆𑀢𑁄𑀘𑁆𑀘𑀸𑀲𑀗𑁆𑀓𑀺𑀬𑀸𑀳- ‘𑀉𑀧𑀫𑀸𑀦𑀯𑀘𑀦𑀢𑁄’𑀘𑁆𑀘𑀸𑀤𑀺.

𑀢𑀩𑁆𑀩𑀺𑀲𑀺𑀝𑁆𑀞𑀸𑀘𑀭𑀡𑁂𑀢𑀺 𑀢𑁂𑀦𑁄𑀧𑀫𑀸𑀦𑁂𑀦 𑀯𑀺𑀲𑀺𑀝𑁆𑀞𑁂 𑀆𑀘𑀭𑀡𑁂. 𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀪𑀸𑀯𑀲𑁆𑀲𑀸𑀦𑀺𑀯𑀢𑁆𑀢𑀢𑁆𑀢𑀸𑀢𑀺 𑀏𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 ‘𑀉𑀧𑀫𑀸𑀦 𑀯𑀺𑀲𑀺𑀝𑁆𑀞𑀸𑀘𑀭𑀡𑁂 𑀉𑀧𑀫𑀸𑀦𑀯𑀘𑀦𑀢𑁄 𑀈𑀬𑀲𑁆𑀲 𑀯𑀺𑀥𑀸𑀦𑁂 𑀦𑁄𑀧𑀫𑁂𑀬𑁆𑀬𑀯𑀘𑀦𑀫𑀦𑁆𑀢𑀭𑁂𑀦𑁄𑀧𑀫𑀸𑀦𑀯𑀘𑀦𑀲𑁆𑀲 𑀧𑀯𑀢𑁆𑀢𑀻𑀢𑀺 𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀪𑀸𑀯𑀲𑁆𑀲𑀸𑀦𑀺𑀯𑀢𑁆𑀢𑀻’’𑀢𑀺. 𑀅𑀜𑁆𑀜𑀣𑀸𑀢𑀺 𑀬𑀤𑁆𑀬𑀼𑀧𑀫𑀸𑀦𑁄𑀧𑀫𑁂𑀬𑁆𑀬𑀪𑀸𑀯𑀲𑁆𑀲 𑀈𑀬𑁂𑀦𑁂𑀯 𑀚𑁄𑀢𑀺𑀢𑀢𑁆𑀢𑀸 𑀢𑀤𑀦𑁆𑀢𑀲𑁆𑀲𑀼𑀧𑀫𑁂𑀬𑁆𑀬𑁂 𑀯𑀼𑀢𑁆𑀢𑀺 𑀲𑀺𑀬𑀸𑀢𑁆𑀬𑀢𑁆𑀣𑁄. 𑀧𑀩𑁆𑀩𑀢𑀸𑀬𑀢𑀻𑀢𑀺 ‘‘𑀓𑀢𑁆𑀢𑀼𑀢𑀸𑀬𑁄’’𑀢𑀺 (𑁫-𑁮) 𑀆𑀬𑁄. 𑀉𑀧𑀫𑁂𑀬𑁆𑀬𑀲𑁆𑀲𑀸𑀦𑀺𑀯𑀢𑁆𑀢𑀢𑁆𑀢𑀸 𑀉𑀧𑀫𑁂𑀬𑁆𑀬 𑀓𑀢𑁆𑀢𑀼𑀲𑀸𑀫𑀜𑁆𑀜𑁂 𑀢𑀺𑀧𑁆𑀧𑀘𑁆𑀘𑀬𑁄.

𑀬𑀣𑀸𑀦𑀦𑁆𑀢𑀭𑀲𑀼𑀢𑁆𑀢𑁂 𑀉𑀧𑀫𑀸𑀦𑁂 𑀉𑀧𑀫𑁂𑀬𑁆𑀬𑀲𑁆𑀲 𑀫𑀸𑀡𑀯𑀓𑀲𑁆𑀲 𑀧𑀬𑁄𑀕𑁄 𑀉𑀧𑀧𑀦𑁆𑀦𑁄, 𑀢𑀣𑀸𑀢𑁆𑀭𑀸𑀧𑀺 ‘𑀧𑀸𑀲𑀸𑀤𑁂 𑀓𑀼𑀝𑀺𑀬’𑀦𑁆𑀢𑀺 𑀘𑁄𑀧𑀫𑁂𑀬𑁆𑀬𑀲𑁆𑀲𑀧𑀬𑁄𑀕𑁄𑀢𑀺 𑀅𑀢𑀺𑀤𑀺𑀲𑀦𑁆𑀢𑁄 𑀆𑀳- ‘𑀳𑁂𑀝𑁆𑀞𑀸𑀯𑀺𑀬𑁂’𑀘𑁆𑀘𑀸𑀤𑀺. 𑀉𑀧𑀫𑀸𑀦𑁂 𑀉𑀧𑀫𑁂𑀬𑁆𑀬𑀲𑁆𑀲𑀸𑀦𑀦𑁆𑀢𑁄𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀦𑀦𑀼 𑀓𑀺𑀫𑀢𑁆𑀣𑀫𑀺𑀤𑀫𑀼𑀘𑁆𑀘𑀢𑁂 𑀬𑀯𑀢𑀸𑀬𑁄 𑀧𑀸𑀲𑀸𑀤𑁂 ¶ 𑀇𑀯𑀸𑀘𑀭𑀢𑀺 𑀲𑁄 𑀧𑀸𑀲𑀸𑀤𑀫𑀺𑀯𑀸𑀘𑀭𑀢𑀻𑀢𑀺𑀧𑀺 𑀯𑀢𑁆𑀢𑀼𑀁 𑀲𑀓𑁆𑀓𑀸𑀢𑀺 𑀦𑀸𑀢𑁆𑀣𑀪𑁂𑀤𑁄-𑀜𑁆𑀜𑀢𑁆𑀭 𑀯𑀘𑀦𑀺𑀘𑁆𑀙𑀸𑀪𑁂𑀤𑀸𑀢𑀺 𑀧𑀼𑀩𑁆𑀩𑁂𑀦𑁂𑀯𑁂𑀢𑁆𑀣𑀸𑀧𑀺 𑀈𑀬𑁄 𑀲𑀺𑀤𑁆𑀥𑁄, 𑀢𑀢𑁄 𑀦𑀸𑀢𑁆𑀣𑁄-𑀦𑁂𑀦 𑀯𑀘𑀦𑁂𑀦𑁂 𑀘𑁆𑀘𑀸𑀲𑀗𑁆𑀓𑀺𑀬𑀸𑀳- ‘𑀬𑀤𑀺𑀧𑀺’𑀘𑁆𑀘𑀸𑀤𑀺.

𑀏𑀢𑁆𑀣 𑀓𑀢𑁆𑀢𑀼𑀢𑁄𑀇𑀢𑀺 𑀯𑀘𑀦𑀸 𑀓𑀫𑁆𑀫𑀸𑀢𑀺 𑀦𑀺𑀯𑀢𑁆𑀢𑀢𑁂, 𑀆𑀬𑀕𑁆𑀕𑀳𑀡𑀸 𑀈𑀬𑁄. 𑀓𑀤𑀸 𑀧𑀦 𑀓𑀢𑁆𑀢𑀼𑀯𑀺𑀲𑁂𑀲𑁄-𑀯𑀲𑀻𑀬𑀢𑀺𑀘𑁆𑀘𑀸𑀳-‘𑀬𑀢𑁆𑀣𑁆𑀬𑀸𑀤𑀺𑀲𑀤𑁆𑀤𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑁂’𑀢𑀺𑀆𑀤𑀺. 𑀧𑀩𑁆𑀩𑀢𑀸𑀬𑀢𑀺 𑀳𑀢𑁆𑀣𑀺𑀘𑁆𑀘𑁂𑀯𑀫𑀸𑀤𑀺𑀦𑀸 𑀳𑀢𑁆𑀣𑁆𑀬𑀸𑀤𑀺 𑀲𑀤𑁆𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑁂 𑀲𑀢𑀻𑀢𑀺 𑀅𑀢𑁆𑀣𑁄.

𑀓𑁄𑀬𑀁 𑀘𑁆𑀬𑀢𑁆𑀣𑁄𑀘𑁆𑀘𑀸𑀲𑀗𑁆𑀓𑀺𑀬 ‘‘𑀅𑀪𑀽𑀢𑀢𑀩𑁆𑀪𑀸𑀯𑁂 𑀓𑀭𑀸𑀲𑀪𑀽𑀬𑁄𑀕𑁂 𑀯𑀺𑀓𑀸𑀭𑀸𑀘𑀻’’𑀢𑀺 (𑁪-𑁧𑁧𑁯) 𑀘𑀻𑀲𑁆𑀲 𑀅𑀪𑀽𑀢𑀢𑀩𑁆𑀪𑀸𑀯𑁂 𑀓𑀭𑀸𑀤𑀺𑀬𑁄𑀕𑁂𑀲𑀢𑀺 𑀯𑀺𑀥𑀸𑀦𑀸 ‘𑀅𑀪𑀽𑀢𑀢𑀩𑁆𑀪𑀸𑀯𑁄 𑀓𑀭𑀸𑀤𑀺𑀯𑀺𑀲𑀺𑀝𑁆𑀞𑁄’𑀢𑀺 𑀆𑀳. 𑀅𑀪𑀽𑀢 𑀢𑀩𑁆𑀪𑀸𑀯𑀲𑁆𑀲 𑀓𑀭𑀸𑀤𑀺𑀯𑀺𑀲𑀺𑀝𑁆𑀞𑀢𑁆𑀢𑀸 𑀓𑀭𑁄𑀢𑁆𑀬𑀢𑁆𑀣𑀦𑀺𑀯𑀢𑁆𑀢𑀺𑀬𑀸𑀯𑀲𑁆𑀲𑀁 𑀧𑀸𑀡𑀺𑀦𑀺𑀬𑀸 𑀯𑀺𑀬 𑀪𑀼𑀯𑀺𑀕𑁆𑀕𑀳𑀡𑀁 𑀓𑀢𑁆𑀢𑀩𑁆𑀩𑀫𑀜𑁆𑀜𑀣𑀸 𑀓𑀭𑁄𑀢𑁆𑀬𑀢𑁆𑀣𑁂𑀧𑀺 𑀲𑀺𑀬𑀸𑀢𑁆𑀬𑀸𑀲𑀗𑁆𑀓𑀺𑀬 𑀦𑀺𑀯𑀢𑁆𑀢𑀺𑀳𑁂𑀢𑀼𑀫𑀸𑀳- ‘𑀢𑁂𑀦𑁂𑀯𑀸’𑀢𑀺𑀆𑀤𑀺. 𑀬𑁂𑀦𑁂𑀯 𑀓𑀭𑁄𑀢𑁆𑀬𑀸𑀤𑀺𑀯𑀺𑀲𑀺𑀝𑁆𑀞𑁄 𑀅𑀪𑀽𑀢𑀢𑀩𑁆𑀪𑀸𑀯𑁄𑀘𑁆𑀬𑀢𑁆𑀣𑁄 𑀢𑁂𑀦𑁂𑀯 𑀳𑁂𑀢𑀼𑀦𑀸𑀢𑀺 𑀅𑀢𑁆𑀣𑁄. 𑀪𑀯𑀢𑁆𑀬𑀢𑁆𑀣𑁂-𑀦𑁂𑀦 𑀓𑀸𑀭𑀡𑁂𑀦 𑀮𑀤𑁆𑀥𑁂 𑀓𑀭𑁄𑀢𑁆𑀬𑀢𑁆𑀣𑁄𑀧𑁆𑀬𑀦𑀺𑀝𑁆𑀞𑁄 𑀮𑀩𑁆𑀪𑀢𑀺𑀘𑁆𑀘𑀸𑀲𑀗𑁆𑀓𑀺𑀬 𑀢𑀦𑁆𑀦𑀺𑀯𑀢𑁆𑀢𑀺𑀫𑁆𑀧𑀝𑀺𑀧𑀸𑀤𑀬𑀫𑀸𑀳- ‘𑀓𑀭𑁄𑀢𑁆𑀬𑀢𑁆𑀣𑁂’𑀘𑁆𑀘𑀸𑀤𑀺. 𑀅𑀥𑀯𑀮𑀁 𑀥𑀯𑀮𑀁 𑀓𑀭𑁄𑀢𑀺 𑀥𑀯𑀮𑀻𑀓𑀭𑁄𑀢𑀺𑀘𑁆𑀘𑁂𑀯 𑀘𑀻𑀧𑁆𑀧𑀘𑁆𑀘𑀬𑁂 𑀓𑀢𑁆𑀢𑀩𑁆𑀩𑁂 𑀓𑀫𑁆𑀫𑁂𑀦𑁂𑀯 𑀓𑀭𑁄𑀢𑀺𑀲𑁆𑀲𑀸𑀪𑀺𑀲𑀫𑁆𑀩𑀦𑁆𑀥𑀲𑁆𑀲 𑀤𑀺𑀝𑁆𑀞𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀓𑀸𑀭𑀡𑀦𑁆𑀢𑀭𑀫𑀸𑀳- ‘𑀇𑀳 𑀘𑁂’𑀘𑁆𑀘𑀸𑀤𑀺. 𑀇𑀢𑀺𑀲𑀤𑁆𑀤𑁄 𑀳𑁂𑀢𑀼𑀫𑁆𑀳𑀺 𑀬𑀲𑁆𑀫𑀸 𑀇𑀳 𑀓𑀢𑁆𑀢𑀼𑀢𑁄𑀢𑀺 𑀯𑀢𑁆𑀢𑀢𑁂 𑀢𑀢𑁄𑀘𑁂𑀢𑀺 𑀅𑀢𑁆𑀣𑁄.

𑀅𑀲𑀢𑁆𑀬𑀢𑁆𑀣𑀲𑁆𑀲 𑀧𑀦 𑀪𑀯𑀢𑁆𑀬𑀢𑁆𑀣𑁂𑀬𑁂𑀯𑀸𑀦𑁆𑀢𑁄𑀪𑀸𑀯𑀸 𑀦 𑀢𑀦𑁆𑀦𑀺𑀯𑀢𑁆𑀢𑀺 𑀧𑀝𑀺𑀧𑀸𑀤𑀺𑀢𑀸. 𑀢𑀧𑁆𑀧𑀓𑀭𑀡𑁂𑀢𑀺 𑀥𑀸𑀢𑀼𑀧𑁆𑀧𑀘𑁆𑀘𑀬𑀧𑁆𑀧𑀓𑀭𑀡𑁂. 𑀤𑁆𑀯𑀺𑀩𑁆𑀩𑀘𑀦𑀦𑁆𑀢𑀺 𑀧𑀝𑀇𑀘𑁆𑀘𑀲𑁆𑀲 𑀤𑁆𑀯𑀺𑀩𑁆𑀩𑀘𑀦𑀁 𑀢𑀢𑁄 ‘‘𑀤𑀺𑀲𑁆𑀲𑀦𑁆𑀢𑀜𑁆𑀜𑁂𑀧𑀺 𑀧𑀘𑁆𑀘𑀬𑀸’’𑀢𑀺 (𑁪-𑁧𑁨𑁦) 𑀭𑀸𑀧𑁆𑀧𑀘𑁆𑀘𑀬𑁄. ‘‘𑀭𑀸𑀦𑀼𑀩𑀦𑁆𑀥𑁂𑀦𑁆𑀢𑀲𑀭𑀸𑀤𑀺𑀲𑁆𑀲𑀸’’𑀢𑀺 (𑁪-𑁧𑁩𑁨) 𑀅𑀦𑁆𑀢𑀲𑀭𑀸𑀤𑀺𑀲𑁆𑀲 𑀮𑁄𑀧𑁄. 𑀘𑁆𑀬𑀦𑁆𑀢𑀸 𑀧𑀘𑁆𑀘𑀬𑀸𑀪𑀸𑀯𑀢𑁆𑀣𑀁- ‘𑀅𑀘𑀻𑀢𑁄’𑀢𑀺 𑀧𑀘𑁆𑀘𑀬𑀯𑀺𑀥𑀸𑀦𑀲𑀼𑀢𑁆𑀢𑁂 𑀧𑀝𑀺𑀲𑁂𑀥𑁄 𑀦 𑀓𑀢𑁄, 𑀢𑁂𑀦𑀸𑀳-‘𑀅𑀘𑀻𑀢𑁄𑀢𑀺 𑀧𑀝𑀺𑀲𑁂𑀥𑀸𑀪𑀸𑀯𑀸’𑀢𑀺. 𑀘𑀻𑀢𑀺 𑀪𑀼𑀲𑁄𑀇𑀢𑀺

𑀧𑀞𑀫𑀦𑁆𑀢𑀸𑀘𑀻 ¶ . 𑀡𑀸𑀤𑀺𑀯𑀼𑀢𑁆𑀢𑀺𑀢𑁆𑀢𑀸 ‘‘𑀏𑀓𑀢𑁆𑀣𑀢𑀸𑀬’’𑀦𑁆𑀢𑀺 (𑁨-𑁧𑁧𑁯) 𑀯𑀺𑀪𑀢𑁆𑀢𑀺𑀮𑁄𑀧𑁄. 𑀇𑀳𑁂𑀘𑁂𑀢𑀺 ‘𑀘𑁆𑀬𑀢𑁆𑀣𑁂’’ 𑀇𑀢𑀻𑀫𑀲𑁆𑀫𑀺𑀁𑀬𑁂𑀯. 𑀦 𑀘 𑀯𑀼𑀘𑁆𑀘𑀢𑁂𑀢𑀺 𑀲𑀫𑁆𑀩𑀦𑁆𑀥𑁄.

𑀦𑀦𑀼 𑀘 𑀅𑀲𑀢𑀺 𑀲𑀼𑀢𑁆𑀢𑁂 𑀤𑀼𑀢𑀺𑀬𑀸𑀕𑁆𑀕𑀳𑀡𑁂 𑀤𑀼𑀢𑀺𑀬𑀦𑁆𑀢𑁂𑀳𑀺𑀘𑁆𑀘𑀸𑀬𑀁 𑀯𑀺𑀲𑁂𑀲𑁄 𑀓𑀼𑀢𑁄 𑀮𑀩𑁆𑀪𑀢𑁂 𑀬𑁂𑀦 ‘𑀲𑀤𑁆𑀤𑀸𑀤𑀻𑀳𑀺 𑀤𑀼𑀢𑀺𑀬𑀦𑁆𑀢𑁂𑀳𑀻’𑀢𑀺 𑀯𑀺𑀯𑀭𑀡𑀁 𑀓𑀢𑀦𑁆𑀢𑀺 𑀲𑀘𑁆𑀘𑀁, 𑀢𑀣𑀸𑀧𑀺 𑀧𑀘𑁆𑀘𑀬𑀯𑀺𑀥𑀺𑀫𑁆𑀳𑀺 𑀬𑀼𑀢𑁆𑀢𑁂𑀧𑀺 𑀧𑀜𑁆𑀘𑀫𑀺𑀬𑀸 𑀦𑀺𑀤𑁆𑀤𑁂𑀲𑁂 ‘𑀲𑀤𑁆𑀤𑀸𑀤𑀻𑀦𑀻’𑀢𑀺 𑀤𑀼𑀢𑀺𑀬𑀸𑀬𑁄𑀧𑀸𑀤𑀸𑀦𑀲𑀸𑀫𑀢𑁆𑀣𑀺𑀬𑀸 𑀢𑀣𑀸 𑀯𑀺𑀯𑀭𑀡𑀁 𑀓𑀢𑀁.

𑀲𑀩𑁆𑀩𑀢𑁆𑀣𑀸𑀢𑀺 ‘‘𑀢𑀫𑀥𑀻𑀢𑁂 𑀢𑀁 𑀚𑀸𑀦𑀸𑀢𑀺 𑀓𑀡𑀺𑀓𑀸𑀘𑀸’’𑀤𑁄 (𑁪-𑁧𑁪) 𑀲𑀩𑁆𑀩𑀢𑁆𑀣. 𑀓𑀺𑀭𑀺𑀬𑀸𑀯𑀸𑀢𑁆𑀬𑀯𑀥𑀸𑀭𑀡𑁂𑀦 𑀬𑀁 𑀩𑁆𑀬𑀯𑀘𑁆𑀙𑀺𑀦𑁆𑀦𑀁, 𑀢𑀫𑀼𑀧𑀤𑀲𑁆𑀲𑁂𑀦𑁆𑀢𑁄 𑀆𑀳- ‘𑀦 𑀓𑀸𑀮𑁂’𑀘𑁆𑀘𑀸𑀤𑀺. 𑀬𑀤𑀻𑀧𑀺 𑀅𑀥𑀻𑀢𑁂𑀘𑁆𑀘𑀸𑀤𑀻𑀲𑀼 𑀯𑀢𑁆𑀢𑀫𑀸𑀦𑀓𑀸𑀮𑁂𑀦 𑀓𑀢𑁆𑀢𑀼𑀦𑀸 𑀏𑀓𑀯𑀘𑀦𑁂𑀦 𑀘 𑀦𑀺𑀤𑁆𑀤𑁂𑀲𑁄, 𑀢𑀣𑀸𑀧𑀺 𑀢𑁂𑀲𑀫𑀧𑁆𑀧𑀥𑀸𑀦𑀢𑁆𑀢𑀸 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀪𑀽𑀢𑀸𑀤𑀺𑀓𑁂 𑀓𑀸𑀮𑁂 𑀓𑀫𑁆𑀫𑀸𑀤𑁄 𑀲𑀸𑀥𑀦𑁂 𑀩𑀳𑀼𑀯𑀘𑀦𑁂𑀦 𑀘 𑀧𑀘𑁆𑀘𑀬𑁄 𑀲𑀺𑀬𑀸 𑀏𑀯𑁂𑀢𑀺 𑀪𑀸𑀯𑁄.

𑀦𑀦𑀼 𑀘 ‘‘𑀥𑀸𑀢𑁆𑀯𑀢𑁆𑀣𑁂𑀦𑀸𑀫𑀲𑁆𑀫𑀻’’𑀢𑀺 (𑁫-𑁧𑁨) 𑀇𑀧𑁆𑀧𑀘𑁆𑀘𑀬𑁂 𑀧𑀢𑁆𑀢𑁂-𑀬𑀫𑀸𑀭𑀩𑁆𑀪𑀢𑁂 𑀅𑀲𑁆𑀲𑀧𑀺 𑀥𑀸𑀢𑁆𑀯𑀢𑁆𑀣𑁂𑀬𑁂𑀯 𑀯𑀺𑀥𑀸𑀦𑀁, 𑀢𑀢𑁄 𑀘 𑀲𑀤𑁆𑀤𑀸𑀤𑀻𑀳𑀺 𑀥𑀸𑀢𑁆𑀯𑀢𑁆𑀣𑁂 𑀇𑀧𑁆𑀧𑀘𑁆𑀘𑀬𑁂𑀦 𑀦 𑀪𑀯𑀺𑀢𑀩𑁆𑀩𑀁, 𑀤𑀺𑀲𑁆𑀲𑀢𑁂 𑀘 𑀇𑀧𑁆𑀧𑀘𑁆𑀘𑀬𑀧𑀬𑁄𑀕𑁄𑀘𑁆𑀘𑀸𑀲𑀗𑁆𑀓𑀺𑀬 ‘𑀦𑀸𑀬𑀫𑀺𑀧𑁆𑀧𑀘𑁆𑀘𑀬𑀲𑁆𑀲 𑀩𑀸𑀥𑀓𑁄’𑀢𑀺 𑀧𑀝𑀺𑀧𑀸𑀤𑁂𑀢𑀼𑀫𑀸𑀳- ‘𑀥𑀽𑀯𑀁 𑀓𑀭𑁄𑀢𑀺’𑀘𑁆𑀘𑀸𑀤𑀺. 𑀦𑀸𑀦𑀸𑀪𑀺𑀦𑁆𑀦𑀁 𑀯𑀸𑀓𑁆𑀬𑀁 𑀦𑀸𑀦𑀸𑀯𑀸𑀓𑁆𑀬𑀁, 𑀢𑀲𑁆𑀲 𑀪𑀸𑀯𑁂𑀦, 𑀢𑁂𑀦 𑀪𑀺𑀦𑁆𑀦𑀯𑀸𑀓𑁆𑀬𑀪𑀸𑀯𑁂𑀦𑀸𑀬𑀲𑁆𑀲 𑀇𑀧𑁆𑀧𑀘𑁆𑀘𑀬𑀲𑁆𑀲 𑀘 𑀲𑀫𑀼𑀘𑁆𑀘𑀬𑀢𑁄𑀢𑀺 𑀅𑀢𑁆𑀣𑁄. ‘‘𑀥𑀸𑀢𑁆𑀯𑀢𑁆𑀣𑁂𑀦𑀸𑀫𑀲𑁆𑀫𑀻’’𑀢𑁆𑀬𑁂𑀓𑀁 𑀯𑀸𑀓𑁆𑀬𑀁, ‘‘𑀲𑀤𑁆𑀤𑀸𑀤𑀻𑀦𑀺 𑀓𑀭𑁄𑀢𑁆𑀬’’𑀧𑀭𑀁. 𑀏𑀢𑀸𑀦𑀺 𑀤𑁆𑀯𑁂 𑀪𑀺𑀦𑁆𑀦𑀯𑀸𑀓𑁆𑀬𑀸𑀦𑀺- ‘𑀥𑀸𑀢𑁆𑀯𑀢𑁆𑀣𑁂 𑀦𑀸𑀫𑀲𑁆𑀫𑀸 𑀇𑀧𑁆𑀧𑀘𑁆𑀘𑀬𑁄 𑀪𑀯𑀢𑀺, 𑀲𑀤𑁆𑀤𑀸𑀤𑀻𑀦𑀺 𑀓𑀭𑁄𑀢𑀺𑀘𑁆𑀘𑀲𑁆𑀫𑀺𑀁 𑀅𑀢𑁆𑀣𑁂 𑀆𑀬𑁄 𑀪𑀯𑀢𑀻’𑀢𑀺 𑀧𑀘𑁆𑀘𑁂𑀓𑀫𑀸𑀔𑁆𑀬𑀸𑀢𑀸𑀧𑁂𑀓𑁆𑀔𑀸𑀬 𑀯𑀸𑀓𑁆𑀬𑀧𑀭𑀺𑀲𑀫𑀢𑁆𑀢𑀺𑀬𑀸 𑀪𑀺𑀦𑁆𑀦𑀢𑀸, 𑀅𑀪𑀺𑀦𑁆𑀦𑁂 𑀳𑀺 𑀓𑀺𑀭𑀺𑀬𑀸𑀧𑀤𑁂𑀓𑀯𑀸𑀓𑁆𑀬𑀢𑀸, 𑀪𑀺𑀦𑁆𑀦𑁂𑀢𑀼 𑀦𑀸𑀦𑀸𑀯𑀸𑀓𑁆𑀬𑀢𑀸, 𑀦𑀸𑀦𑀸𑀯𑀸𑀓𑁆𑀬𑁂 𑀘 𑀲𑀢𑀺 𑀲𑀫𑀼𑀘𑁆𑀘𑀬𑁄. 𑀦 𑀳𑀺 𑀲𑀸𑀫𑀜𑁆𑀜𑀯𑀺𑀲𑁂𑀲𑀪𑀸𑀯𑁂𑀦 𑀯𑀺𑀥𑀸𑀦𑀫𑁂𑀯 𑀩𑀸𑀥𑀸𑀳𑁂𑀢𑀼, 𑀓𑀺𑀜𑁆𑀘𑀭𑀳𑀺 𑀏𑀓𑀯𑀸𑀓𑁆𑀬𑀢𑀸𑀧𑀺, 𑀢𑀁 𑀬𑀣𑀸-‘𑀩𑁆𑀭𑀸𑀳𑁆𑀫𑀡𑀸𑀦𑀁 𑀤𑀥𑀺 𑀤𑀺𑀬𑁆𑀬𑀢𑀁, 𑀢𑀓𑁆𑀓𑀁 𑀓𑁄𑀡𑁆𑀟𑀜𑁆𑀜𑀸𑀬𑁂’𑀢𑀺. 𑀦𑀸𑀦𑀸𑀯𑀸𑀓𑁆𑀬𑁂 𑀢𑀼 𑀲𑀫𑀼𑀘𑁆𑀘𑀬𑁄, 𑀢𑀁 𑀬𑀣𑀸- ‘𑀩𑁆𑀭𑀸𑀳𑁆𑀫𑀡𑀸 𑀪𑁄𑀚𑀻𑀬𑀦𑁆𑀢𑀼, 𑀫𑀸𑀠𑀭𑀸𑀬 𑀯𑀢𑁆𑀣𑀬𑀼𑀕𑀮𑀁 𑀤𑀻𑀬𑀢𑀽’𑀢𑀺 𑀫𑀸𑀠𑀭𑁄 𑀩𑁆𑀭𑀸𑀳𑁆𑀫𑀡𑀪𑀸𑀯𑁂𑀦 𑀪𑁄𑀚𑀻𑀬𑀢𑁂 𑀯𑀢𑁆𑀣𑀬𑀼𑀕𑀮𑀜𑁆𑀘 𑀮𑀪𑀢𑁂, 𑀢𑁂𑀦𑁄𑀚𑀼𑀓𑀁 ¶ 𑀯𑀼𑀢𑁆𑀢𑁂𑀦 𑀯𑀢𑁆𑀣𑀬𑀼𑀕𑀮𑀤𑀸𑀦𑁂𑀦 𑀲𑀸𑀫𑀜𑁆𑀜𑀯𑀼𑀢𑁆𑀢𑀁 𑀪𑁄𑀚𑀦𑀁 𑀦 𑀩𑀸𑀥𑀻𑀬𑀢𑁂, 𑀢𑀣𑁂𑀳𑀸𑀧𑀺 𑀉𑀚𑀼𑀓𑀁 𑀯𑀺𑀳𑀺𑀢𑁂𑀦𑀸𑀬𑁂𑀦 𑀲𑀸𑀫𑀜𑁆𑀜𑀯𑀺𑀳𑀺𑀢𑁄 𑀇𑀧𑁆𑀧𑀘𑁆𑀘𑀬𑁄 𑀦 𑀩𑀸𑀥𑀻𑀬𑀢𑁂 𑀮𑀓𑁆𑀔𑀺𑀬𑀸𑀦𑀼𑀭𑁄𑀥𑁂𑀦 𑀲𑀢𑁆𑀣𑀓𑀸𑀭𑀲𑁆𑀲 𑀯𑀸𑀓𑁆𑀬 𑀪𑁂𑀤𑀸𑀪𑁂𑀤𑁄𑀢𑀺 𑀦𑀸𑀦𑀯𑀝𑁆𑀞𑀺𑀢𑀺𑀤𑁄𑀲𑁄𑀢𑀺 𑀫𑀜𑁆𑀜𑀢𑁂. 𑀢𑀺𑀫𑁆𑀳𑀺 𑀮𑁂 𑀘 𑀲𑀺𑀤𑁆𑀥𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀬𑀧𑁆𑀧𑀘𑁆𑀘𑀬𑁄 𑀦 𑀯𑀺𑀳𑀺𑀢𑁄 𑀧𑀸𑀡𑀺𑀦𑀻𑀆𑀤𑀻𑀳𑀺 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘𑀚𑀮 𑀤𑀮- 𑀤𑀺𑀢𑁆𑀢𑀺𑀬𑀁’. ‘‘𑀫𑀸𑀦𑁄’’𑀢𑀺 (𑁫-𑁬𑁫) 𑀫𑀸𑀦𑁄, ‘‘𑀓𑀢𑁆𑀢𑀭𑀺 𑀮𑁄’’𑀢𑀺 ‘‘𑀧𑀭𑁄𑀓𑁆𑀔𑀸𑀬𑀁 𑀘𑁂’’𑀢𑀺 (𑁫-𑁭𑁦) 𑀘𑀕𑁆𑀕𑀳𑀡𑁂𑀦 ‘𑀤𑀮 𑀤𑀮’𑀇𑀢𑀺𑀤𑁆𑀯𑀺𑀢𑁆𑀢𑀁 ‘‘𑀮𑁄𑀧𑁄𑀦𑀸𑀤𑀺𑀩𑁆𑀬𑀜𑁆𑀚𑀦𑀲𑁆𑀲’’ (𑁫-𑁭𑁫) ‘‘𑀲𑀭𑀫𑁆𑀳𑀸 𑀤𑁆𑀯𑁂’’𑀢𑀺 (𑁧-𑁩𑁪) 𑀤𑀲𑁆𑀲𑀮𑀲𑁆𑀲 𑀘 𑀤𑁆𑀯𑀺𑀪𑀸𑀯𑁂 𑀤𑀤𑁆𑀤𑀮𑁆𑀮𑀫𑀸𑀦𑀸. 𑀚𑀮𑀫𑀸𑀦𑀸𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀢𑁄𑀢𑀺 𑀇𑀫𑀺𑀦𑀸 𑀓𑀺𑀭𑀺𑀬𑀸𑀲𑀫𑀪𑀺𑀳𑀸𑀭𑁂 𑀬𑀧𑁆𑀧𑀘𑁆𑀘𑀬𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀇𑀫𑀺𑀦𑀸 𑀘 𑀲𑀓𑁆𑀓𑀢𑁂 𑀯𑀺𑀬 𑀪𑀼𑀲𑀸𑀪𑀺𑀓𑁆𑀔𑀜𑁆𑀜𑁂𑀧𑀺 𑀓𑀺𑀭𑀺𑀬𑀸𑀲𑀫𑀪𑀺𑀳𑀸𑀭𑁄 𑀓𑀺𑀭𑀺𑀬𑀸𑀧𑀭𑀺𑀯𑀢𑁆𑀢𑀦𑀁, 𑀢𑀜𑁆𑀘 𑀬𑀤𑀸 𑀓𑀺𑀭𑀺𑀬𑀫𑀜𑁆𑀜𑁂𑀦 𑀓𑀢𑁆𑀢𑀩𑁆𑀩𑀫𑀜𑁆𑀜𑁄 𑀓𑀭𑁄𑀢𑀺, 𑀢𑁂𑀦 𑀓𑀢𑁆𑀢𑀩𑁆𑀩𑀜𑁆𑀘𑁂𑀢𑀭𑁄, 𑀢𑀤𑀸 𑀪𑀯𑀢𑀻𑀢𑀺 𑀯𑀺𑀜𑁆𑀜𑁂𑀬𑁆𑀬𑀁. ‘‘𑀲𑀸𑀫𑀜𑁆𑀜𑀯𑀺𑀳𑀺𑀢𑀸 𑀯𑀺𑀥𑀬𑁄 𑀧𑀬𑁄𑀕𑀫𑀦𑀼𑀲𑀭𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 ‘𑀤𑀮-𑀤𑀺𑀢𑁆𑀢𑀺𑀬’𑀦𑁆𑀢𑀺 𑀇𑀫𑀲𑁆𑀫𑀸 ‘‘𑀫𑀸𑀦𑁄’’𑀢𑀺 𑀲𑀸𑀫𑀜𑁆𑀜𑁂𑀦 𑀯𑀺𑀳𑀺𑀢𑁄 𑀫𑀸𑀦𑀧𑁆𑀧𑀘𑁆𑀘𑀬𑁄 𑀪𑀼𑀲𑀢𑁆𑀣𑁂 𑀆𑀪𑀺𑀓𑁆𑀔𑀜𑁆𑀜𑁂 𑀘 𑀪𑀯𑀺𑀲𑁆𑀲𑀢𑀺. 𑀤𑀤𑁆𑀤𑀮𑁆𑀮 𑀫𑀸𑀦𑀸𑀢𑀺 𑀏𑀢𑁆𑀣 𑀪𑀼𑀲𑀁 𑀚𑀮𑀫𑀸𑀦𑀸, 𑀧𑀼𑀦𑀧𑁆𑀧𑀼𑀦 𑀚𑀮𑀫𑀸𑀦𑀸𑀢𑀺 𑀘 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀦𑀫𑁄 𑀓𑀭𑁄𑀢𑀺 𑀦𑀫𑁄𑀲𑀤𑁆𑀤𑀫𑀼𑀘𑁆𑀘𑀸𑀭𑁂𑀢𑀺, 𑀲𑀤𑁆𑀤𑀁 𑀓𑀭𑁄𑀢𑀺 𑀲𑀤𑁆𑀤𑀫𑀼𑀘𑁆𑀘𑀸𑀭𑁂𑀢𑀻𑀢𑀺𑀘𑁆𑀘𑁂𑀯𑀫𑀢𑁆𑀣𑁄 (𑀦) 𑀕𑀳𑁂𑀢𑀩𑁆𑀩𑁂 𑀅𑀦𑀺𑀲𑁆𑀲𑀬𑀦𑀢𑁄 𑀅𑀦𑀪𑀺𑀥𑀸𑀦𑀢𑁄 𑀯𑀸.

𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑁄𑀢𑀺 𑀅𑀦𑀺𑀧𑁆𑀨𑀦𑁆𑀦𑁄 𑀅𑀲𑀺𑀤𑁆𑀥𑀸𑀯𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀓𑀸𑀭𑀓𑀲𑀸𑀥𑀺𑀬𑁄𑀢𑀺 𑀬𑀣𑀸𑀮𑀸𑀪𑀁 𑀓𑀸𑀭𑀓𑁂𑀳𑀺 𑀲𑀸𑀥𑀺𑀬𑁄. 𑀅𑀲𑀢𑁆𑀯𑀪𑀽𑀢𑁄𑀢𑀺 𑀅𑀤𑀩𑁆𑀩𑀪𑀽𑀢𑁄. 𑀅𑀬𑀦𑁆𑀢𑀼 𑀓𑀺𑀭𑀺𑀬𑀸𑀭𑀽𑀧𑁄 𑀧𑀤𑀢𑁆𑀣𑁄 𑀧𑀘𑀢𑁆𑀬𑀸𑀤𑀻𑀦𑀁 𑀯𑀺𑀓𑁆𑀮𑁂𑀤𑀦𑀸𑀤𑀺𑀧𑀥𑀸𑀦𑀓𑀺𑀭𑀺𑀬𑀸𑀭𑀽𑀧𑁄 𑀘 𑀢𑀤𑀯𑀬𑀯𑀭𑀽𑀧𑀸 𑀧𑀼𑀩𑁆𑀩𑀧𑀭𑀻𑀪𑀽𑀢𑀉𑀤𑁆𑀥𑀦𑀸𑀭𑁄 𑀧𑀦𑀸𑀤𑀺𑀓𑀸𑀤𑀬𑁄 𑀢𑀸𑀤𑀢𑁆𑀣𑀺𑀬𑀸 𑀘 𑀧𑀘𑀢𑁆𑀬𑀸𑀤𑀺𑀯𑀘𑀦𑀻𑀬𑀸. 𑀢𑀲𑁆𑀫𑀸 𑀬𑀣𑀸 𑀯𑀼𑀢𑁆𑀢𑀮𑀓𑁆𑀔𑀡𑁂 𑀥𑀸𑀢𑁆𑀯𑀢𑁆𑀣𑁂 𑀥𑀸𑀢𑀼𑀢𑁄 𑀯𑀺𑀥𑀻𑀬𑀫𑀸𑀦𑁄 𑀢𑁆𑀬𑀸𑀤𑀺𑀧𑁆𑀧𑀘𑁆𑀘𑀬𑁄 𑀢𑀣𑀸𑀪𑀽𑀢𑀫𑁂𑀯 ¶ 𑀯𑀤𑀢𑀻𑀢𑀺 𑀪𑁂𑀤𑀸𑀪𑀸𑀯𑀸 𑀅𑀪𑁂𑀤𑀲𑀗𑁆𑀔𑁆𑀬𑀸𑀬𑁂𑀓𑀯𑀘𑀦𑁂𑀦𑁄𑀘𑁆𑀘𑀢𑁂, ‘𑀦 𑀩𑀳𑀼𑀯𑀘𑀦𑁂𑀦, 𑀢𑁂𑀦𑁂𑀢𑁆𑀣 ‘𑀞𑀻𑀬𑀢𑁂 𑀤𑁂𑀯𑀤𑀢𑁆𑀢𑁂𑀦, 𑀞𑀻𑀬𑀢𑁂 𑀤𑁂𑀯𑀤𑀢𑁆𑀢𑁂𑀳𑀻’𑀢𑀺 𑀪𑀯𑀢𑀺. 𑀦 𑀬𑀢𑁄𑀓𑀼𑀢𑁄𑀘𑀻𑀢𑀺𑀆𑀤𑀺𑀦𑀸 𑀬𑀢𑁄 𑀬𑀢𑁆𑀣 𑀦 𑀤𑀺𑀲𑁆𑀲𑀢𑀺, 𑀢𑀢𑁄 𑀢𑀢𑁆𑀣 𑀦 𑀳𑁄𑀢𑀻𑀢𑀺 𑀤𑀻𑀧𑁂𑀢𑀺. 𑀬𑀢𑁄 𑀬𑀢𑁆𑀣 𑀯𑀺𑀥𑀺, 𑀲 𑀢𑀲𑁆𑀲 𑀲𑀫𑁆𑀩𑀦𑁆𑀥𑀻 𑀪𑀯𑀢𑀻𑀢𑀺 𑀦𑀸𑀫𑁂𑀳𑀺 𑀯𑀘𑀦𑀻𑀬𑀢𑁆𑀣𑀢𑁄-𑀢𑁆𑀣𑀦𑁆𑀢𑀭𑀪𑀽𑀢𑁄 𑀬𑁄𑀬𑀁 𑀥𑀸𑀢𑁆𑀯𑀢𑁆𑀣𑁄 𑀓𑀫𑀸𑀤𑀻𑀦𑀫𑀢𑁆𑀣𑀪𑀽𑀢𑁄, 𑀲𑁄 𑀲𑀓𑀢𑁆𑀣𑁄𑀢𑀺 𑀲𑀓𑀢𑁆𑀣𑁂𑀬𑁂𑀯𑀸𑀬𑀫𑀺𑀧𑁆𑀧𑀘𑁆𑀘𑀬𑁄 𑀘𑀼𑀭𑀸𑀤𑀺𑀡𑀺𑀯𑀺𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀲𑁆𑀲𑀘𑀸𑀢𑀺 𑀏𑀓𑀸𑀭𑀲𑁆𑀲 𑀘. 𑀅𑀣 𑀅𑀢𑀺𑀳𑀢𑁆𑀣𑀬𑀢𑀺𑀘𑁆𑀘𑀸𑀤𑁄 𑀧𑀸𑀤𑀺𑀯𑀺𑀲𑀺𑀝𑁆𑀞𑁂 𑀏𑀯 𑀥𑀸𑀢𑁆𑀯𑀢𑁆𑀣𑁂 𑀇𑀧𑁆𑀧𑀘𑁆𑀘𑀬𑀲𑁆𑀲 𑀯𑀺𑀥𑀸𑀦𑀸 𑀢𑀤𑀢𑁆𑀣𑀯𑀺𑀳𑀺𑀢𑁂𑀦𑁂𑀯 𑀇𑀧𑁆𑀧𑀘𑁆𑀘𑀬𑁂𑀦 𑀧𑀸𑀤𑀺𑀯𑀺𑀲𑀺𑀝𑁆𑀞𑁄 𑀥𑀸𑀢𑁆𑀯𑀢𑁆𑀣𑁄 𑀯𑀼𑀢𑁆𑀢𑁄, 𑀢𑁂𑀦 𑀓𑀺𑀫𑀢𑁆𑀣𑁄 𑀇𑀧𑁆𑀧𑀘𑁆𑀘𑀬𑀦𑁆𑀢𑀲𑁆𑀲 𑀧𑀸𑀤𑀺𑀬𑁄𑀕𑁄𑀘𑁆𑀘𑀸𑀲𑀗𑁆𑀓𑀺𑀬 𑀧𑀬𑁄𑀚𑀦𑀫𑀸𑀔𑁆𑀬𑀸𑀢𑀼𑀫𑀸𑀳- ‘𑀅𑀢𑀺𑀳𑀢𑁆𑀣𑀬𑀢𑀺’𑀘𑁆𑀘𑀸𑀤𑀺. 𑀦 𑀲𑀸𑀫𑀢𑁆𑀣𑀺𑀬𑀦𑁆𑀢𑀺 𑀲𑀫𑀢𑁆𑀣𑀢𑀸 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀅𑀢𑁆𑀣𑀫𑀸𑀘𑀺𑀓𑁆𑀔𑀢𑀺, 𑀯𑁂𑀤𑀫𑀸𑀘𑀺𑀓𑁆𑀔𑀢𑀻𑀢𑀺 𑀯𑀺𑀕𑁆𑀕𑀳𑁄. 𑀲𑀼𑀔𑀸𑀧𑁂𑀢𑀺𑀘𑁆𑀘𑀸𑀤𑁄 𑀲𑀼𑀔𑀁 𑀯𑁂𑀤𑀬𑀢𑀺𑀘𑁆𑀘𑀸𑀤𑀺𑀦𑀸 𑀯𑀺𑀕𑁆𑀕𑀳𑁄. 𑀯𑀸𑀧𑀸𑀞𑀸𑀢𑀺 𑀯𑀺𑀓𑀧𑁆𑀧𑁂𑀦 𑀧𑀸𑀞𑀢𑁄.

𑀅𑀲𑀢𑀺 𑀲𑀼𑀢𑁆𑀢𑁂 𑀲𑀓𑀢𑁆𑀣𑁂𑀢𑀺 𑀓𑀣𑀁 𑀮𑀩𑁆𑀪𑀢𑀻𑀢𑀺 𑀆𑀳- ‘𑀅𑀢𑁆𑀣𑀸𑀦𑀢𑀺 𑀤𑁂𑀲𑀸’𑀢𑀺. 𑀅𑀢𑁆𑀣𑀸-𑀦𑀢𑀺𑀤𑁂𑀲𑀸𑀢𑀺 𑀅𑀢𑁆𑀣𑀯𑀺𑀲𑁂𑀲𑀲𑁆𑀲 𑀓𑀲𑁆𑀲𑀘𑀺 𑀲𑀼𑀢𑁆𑀢𑁂 𑀅𑀦𑀺𑀤𑁆𑀤𑁂𑀲𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀯𑀺𑀲𑁂𑀲𑀲𑁆𑀲𑀸-𑀦𑀢𑀺𑀤𑁂𑀲𑀫𑀢𑁆𑀢𑁂𑀦 𑀲𑀓𑀢𑁆𑀣𑁄𑀬𑁂𑀯 𑀡𑀺𑀦𑀸 𑀯𑀸𑀘𑁆𑀘𑁄𑀢𑀺 𑀓𑀣𑀁 𑀯𑀺𑀜𑁆𑀜𑀸𑀬𑀢𑁂𑀘𑁆𑀘𑀸𑀳- ‘𑀲𑀓𑀢𑁆𑀣𑀲𑁆𑀲 𑀘 𑀲𑀼𑀢𑀢𑁆𑀢𑀸’𑀢𑀺. 𑀘𑀼𑀭=𑀣𑁂𑀬𑁆𑀬𑁂 𑀇𑀘𑁆𑀘𑀸𑀤𑀻𑀲𑀼 𑀣𑁂𑀬𑁆𑀬𑀸𑀤𑀺𑀓𑀲𑁆𑀲 𑀲𑀓𑀢𑁆𑀣𑀲𑁆𑀲 𑀲𑀼𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀬𑁄𑀕𑀯𑀺𑀪𑀸𑀕𑀢𑁄𑀢𑀺 ‘𑀡𑀻’𑀢𑀺𑀬𑁄𑀕𑀯𑀺𑀪𑀸𑀕𑀢𑁄, 𑀭𑀚𑁆𑀚𑀁 𑀓𑀸𑀭𑁂𑀢𑀻𑀢𑀺 𑀏𑀢𑁆𑀣 𑀲𑀸𑀫𑁆𑀬𑀫𑀘𑁆𑀘𑀸𑀤𑀺𑀓𑀁 𑀲𑀢𑁆𑀢𑀗𑁆𑀕𑀁 𑀭𑀚𑁆𑀚𑀁 𑀧𑀯𑀢𑁆𑀢𑁂𑀢𑀻𑀢𑀺 𑀯𑀸 𑀅𑀢𑁆𑀣𑁄, 𑀧𑀬𑁄𑀚𑀓𑀩𑁆𑀬𑀸𑀧𑀸𑀭𑁂 𑀡𑀺.

𑀧𑀬𑁄𑀚𑀓𑁄 𑀘𑁄𑀤𑀓𑁄 𑀩𑁆𑀬𑀸𑀧𑀸𑀭𑀓𑁄𑀢𑀺 𑀅𑀢𑁆𑀣𑁄 𑀦𑀦𑀼 𑀘 𑀯𑀼𑀢𑁆𑀢𑀺𑀬𑀁 ‘𑀓𑀢𑁆𑀢𑀸𑀭𑀁 𑀧𑀬𑁄𑀚𑀬𑀢𑀻’𑀢𑀺 𑀯𑀼𑀢𑁆𑀢𑀁 𑀓𑀣𑀁 𑀧𑀬𑀼𑀚𑁆𑀚𑀫𑀸𑀦𑀲𑁆𑀲 𑀓𑀢𑁆𑀢𑀼𑀢𑁆𑀢𑀁𑀢𑀺 𑀆𑀳- ‘𑀧𑀬𑀼𑀚𑁆𑀚𑀫𑀸𑀦𑁄’𑀘𑁆𑀘𑀸𑀤𑀺. 𑀦𑀸𑀯𑀲𑁆𑀲𑀁 𑀓𑀺𑀭𑀺𑀬𑀸𑀧𑀯𑀢𑁆𑀢𑀓𑀢𑁆𑀢𑁂𑀦𑁂𑀯 𑀬𑁄𑀕𑁆𑀕𑀢𑀸𑀫𑀢𑁆𑀢𑁂𑀦𑀧𑀺 ¶ 𑀓𑀢𑁆𑀢𑀼𑀢𑁆𑀢𑀁 𑀲𑀺𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳- ‘𑀓𑀺𑀭𑀺𑀬𑀸𑀬 𑀬𑁄𑀕𑁆𑀕𑁄’𑀢𑀺𑀆𑀤𑀺. 𑀧𑀸𑀲𑀸𑀡𑀫𑁆𑀩𑀮𑁂𑀦𑀼𑀝𑁆𑀞𑀸𑀧𑁂𑀢𑀺’𑀘𑁆𑀘𑀸𑀤𑀻𑀲𑀼 𑀳𑀺 𑀬𑁄𑀕𑁆𑀬𑀢𑀸𑀬𑀧𑀺 𑀓𑀢𑁆𑀢𑀼𑀢𑁆𑀢𑀸𑀯𑀲𑀸𑀬𑁄𑀲𑀺𑀬𑀸, 𑀓𑁄𑀧𑀦𑀸𑀬𑀁 𑀧𑀬𑁄𑀚𑀓𑀩𑁆𑀬𑀧𑀸𑀭𑁄𑀢𑀺 𑀆𑀳- ‘𑀧𑁂𑀲𑀦𑁂’𑀘𑁆𑀘𑀸𑀤𑀺. 𑀤𑀸𑀲𑀸𑀤𑀺𑀦𑁄 𑀳𑀻𑀦𑀲𑁆𑀲 𑀓𑀢𑁆𑀣𑀘𑀺 𑀅𑀢𑁆𑀣𑁂 𑀦𑀺𑀬𑁄𑀚𑀦𑀁 𑀧𑁂𑀲𑀦𑀁. 𑀕𑀼𑀭𑀼𑀆𑀤𑀺𑀦𑁄 𑀲𑀓𑁆𑀓𑀸𑀭𑀧𑀼𑀩𑁆𑀩𑀁 𑀩𑁆𑀬𑀸𑀧𑀸𑀭𑀡𑀫𑀚𑁆𑀛𑁂𑀲𑀦𑀁. 𑀢𑀁 𑀧𑁂𑀲𑀦𑀚𑁆𑀛𑁂𑀲𑀦𑀸𑀤𑀺𑀓𑀁 𑀮𑀓𑁆𑀔𑀡𑀁 𑀲𑀪𑀸𑀯𑁄 𑀬𑀲𑁆𑀲 𑀲𑁄 𑀢𑀣𑀸 𑀯𑀼𑀢𑁆𑀢𑁄.

𑀆𑀤𑀺𑀲𑀤𑁆𑀤𑁂𑀦 𑀆𑀦𑀼𑀓𑀽𑀮𑁆𑀬𑀪𑀸𑀕𑀺𑀦𑁄 𑀩𑁆𑀬𑀸𑀧𑀸𑀭𑀲𑁆𑀲 𑀕𑀳𑀡𑀁, 𑀢𑀣𑀸 𑀘 ‘𑀪𑀺𑀓𑁆𑀔𑀸 𑀯𑀸𑀲𑀬𑀢𑀺 𑀓𑀸𑀭𑀻𑀲𑁄-𑀚𑁆𑀛𑀸𑀧𑁂𑀲𑀻’𑀢𑀺 𑀲𑀺𑀚𑁆𑀛𑀢𑀺. 𑀪𑀺𑀓𑁆𑀔𑀸 𑀳𑀺 𑀧𑀘𑀼𑀭𑀩𑁆𑀬𑀜𑁆𑀚𑀦𑀯𑀢𑀻 𑀮𑀩𑁆𑀪𑀫𑀸𑀦𑀸 𑀯𑀸𑀲𑀸𑀦𑀼𑀓𑀽𑀮𑀁 𑀢𑀺𑀢𑁆𑀢𑀺𑀯𑀺𑀲𑁂𑀲𑀫𑀼𑀧𑀚𑀦𑀬𑀢𑀺. 𑀓𑀸𑀭𑀻𑀲𑁄𑀧𑀺 𑀦𑀺𑀯𑀸𑀢𑁂 𑀧𑀤𑁂𑀲𑁂 𑀲𑀼𑀝𑁆𑀞𑀼 𑀧𑀚𑁆𑀚𑀮𑀺𑀢𑁄𑀚𑁆𑀛𑀬𑀦𑀯𑀺𑀭𑁄𑀥𑀺 𑀲𑀻𑀢𑀓𑀢𑀫𑀼𑀧𑀤𑁆𑀤𑀯𑀫𑀧𑀦𑀬𑀦𑁆𑀢𑁄-𑀚𑁆𑀛𑀬𑀦𑀸𑀦𑀼𑀓𑀽𑀮𑀲𑀸𑀫𑀢𑁆𑀣𑀺𑀬𑀫𑀸𑀤𑀥𑀸𑀢𑀺 𑀢𑀢𑁄 𑀢𑁂𑀲𑀫𑁆𑀧𑀺 𑀬𑀼𑀢𑁆𑀢𑀫𑁆𑀧𑀬𑁄𑀚𑀓𑀢𑁆𑀢𑀦𑁆𑀢𑀺.

𑀧𑀬𑁄𑀚𑀓𑀩𑁆𑀬𑀸𑀧𑀸𑀭𑁂𑀢𑀻𑀤𑀁 𑀧𑀘𑁆𑀘𑀬𑀯𑀺𑀲𑁂𑀲𑀦𑀁 𑀯𑀸 𑀲𑀺𑀬𑀸 𑀧𑀓𑀢𑀺𑀯𑀺𑀲𑁂𑀲𑀦𑀁 𑀯𑀸. 𑀢𑀢𑁆𑀣 𑀬𑀤𑀺 𑀧𑀓𑀢𑀺𑀯𑀺𑀲𑁂𑀲𑀦𑀁 𑀲𑀺𑀬𑀸, 𑀢𑀤𑀸 𑀧𑀬𑁄𑀚𑀓𑀩𑁆𑀬𑀸𑀧𑀸𑀭𑁂 𑀯𑀢𑁆𑀢𑀫𑀸𑀦𑀸 𑀡𑀻𑀡𑀸𑀧𑀻 𑀯𑀺𑀥𑀻𑀬𑀦𑁆𑀢𑀻𑀢𑀺 (𑀕𑀫𑀦𑀁) 𑀧𑀢𑀺 𑀬𑁄 𑀦𑀺𑀬𑁄𑀕𑁄 𑀢𑀤𑀢𑁆𑀣𑁄 𑀕𑀫𑀺, 𑀦 𑀕𑀢𑁆𑀬𑀢𑁆𑀣𑁄, 𑀢𑀲𑁆𑀲 𑀘𑀸𑀬𑀁 𑀧𑀬𑁄𑀚𑁆𑀚𑁄𑀢𑀺 ‘𑀕𑀫𑀬𑀢𑀺 𑀫𑀸𑀡𑀯𑀓𑀁 𑀕𑀸𑀫’𑀦𑁆𑀢𑀺 𑀕𑀢𑁆𑀬𑀢𑁆𑀣𑀲𑁆𑀲 𑀧𑀬𑁄𑀚𑁆𑀚𑁂 ‘‘𑀕𑀢𑀺𑀩𑁄𑀥𑀸𑀳𑀸𑀭𑁂’’𑀘𑁆𑀘𑀸𑀤𑀺𑀦𑀸 (𑁨-𑁪) 𑀯𑀺𑀳𑀺𑀢𑀸 𑀤𑀼𑀢𑀺𑀬𑀸 𑀦 𑀧𑀧𑁆𑀧𑁄𑀢𑀺, 𑀢𑀢𑁄 𑀧𑀓𑀢𑁆𑀬𑀢𑁆𑀣𑀯𑀺𑀲𑁂𑀲𑀦𑀧𑀓𑁆𑀔𑁄 𑀤𑀼𑀝𑁆𑀞𑁄𑀢𑀺 𑀧𑀘𑁆𑀘𑀬𑀯𑀺𑀲𑁂𑀲𑀦𑀧𑀓𑁆𑀔𑀁 𑀤𑀲𑁆𑀲𑁂𑀢𑀼𑀫𑀸𑀳- ‘𑀧𑀘𑁆𑀘𑀬𑀯𑀺𑀲𑁂𑀲𑀦𑀁 𑀯𑁂𑀤𑀁 𑀦 𑀧𑀓𑀢𑀺𑀯𑀺𑀲𑁂𑀲𑀦’𑀦𑁆𑀢𑀺.

𑀧𑀬𑁄𑀚𑀓𑀫𑀢𑁆𑀢𑀕𑁆𑀕𑀳𑀡𑁂𑀢𑀺 𑀫𑀢𑁆𑀢𑀲𑀤𑁆𑀤𑁄 𑀲𑀸𑀫𑀜𑁆𑀜𑀯𑀸𑀘𑀻, 𑀬𑀣𑀸 ‘𑀓𑀜𑁆𑀜𑀸 𑀫𑀢𑁆𑀢𑀁 𑀯𑀸𑀭𑀬𑀢𑀻’𑀢𑀺. 𑀓𑀢𑁆𑀢𑀸𑀭𑀁 𑀬𑁄 𑀧𑀬𑀼𑀚𑁆𑀚𑀢𑀺 𑀬𑁄 𑀘 𑀓𑀭𑀡𑀸𑀤𑀻𑀦𑀁 𑀧𑀬𑁄𑀚𑀓𑁄 𑀢𑁂𑀲𑀁 𑀲𑀸𑀫𑀜𑁆𑀜𑁂𑀦 𑀕𑀳𑀡𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀩𑁆𑀬𑀸𑀧𑀸𑀭𑁂𑀢𑁆𑀯𑁂𑀯𑀸𑀢𑀺 𑀧𑀬𑁄𑀚𑀓𑀕𑁆𑀕𑀳𑀡𑀫𑀦𑁆𑀢𑀭𑁂𑀦 𑀩𑁆𑀬𑀸𑀧𑀸𑀭𑁂𑀇𑀘𑁆𑀘𑁂𑀯 𑀯𑀘𑀦𑀁 𑀓𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺 𑀪𑀸𑀯𑁄, 𑀢𑀦𑁆𑀢𑀺 𑀧𑀬𑁄𑀚𑀓𑀕𑁆𑀕𑀳𑀡𑀁, 𑀯𑀺𑀲𑀺𑀝𑁆𑀞𑁄 𑀯𑀺𑀲𑀬𑁄 𑀬𑀲𑁆𑀲 𑀧𑀬𑁄𑀚𑀓𑀕𑁆𑀕𑀳𑀡𑀲𑁆𑀲𑀢𑀁𑀢𑀣𑀸𑀯𑀼𑀢𑁆𑀢𑀁. 𑀓𑁄𑀧𑀦𑀸𑀬𑀁𑀯𑀺𑀲𑀺𑀝𑁆𑀞𑁄 𑀯𑀺𑀲𑀬𑁄𑀘𑁆𑀘𑀸𑀳- ‘𑀬𑁄 𑀮𑁄𑀓𑁂’𑀇𑀘𑁆𑀘𑀸𑀤𑀺. 𑀇𑀢𑁄𑀯𑀸𑀢𑀺 𑀯𑀓𑁆𑀔𑀫𑀸𑀦𑀲𑁆𑀲 𑀳𑁂𑀢𑀼𑀦𑁄 𑀧𑀭𑀸𑀫𑀸𑀲𑁄. 𑀢𑀦𑁆𑀢𑀺 𑀘𑀼𑀭𑀸𑀤𑀻𑀳𑀺 𑀡𑀺𑀯𑀺𑀥𑀸𑀦𑀁. 𑀏𑀯𑀁𑀲𑀤𑁆𑀤𑁄 𑀯𑀓𑁆𑀔𑀫𑀸𑀦𑀸𑀧𑁂𑀓𑁆𑀔𑁄. 𑀢𑀁 ¶ 𑀯𑀺𑀲𑀼𑀁 𑀘𑀼𑀭𑀸𑀤𑀻𑀳𑀺 𑀡𑀺𑀯𑀺𑀥𑀸𑀦𑀫𑁂𑀯 𑀯𑀓𑁆𑀔𑀫𑀸𑀦𑀧𑁆𑀧𑀓𑀸𑀭𑁂𑀦 𑀲𑀨𑀮𑀁 𑀲𑀺𑀬𑀸 𑀦𑀸𑀜𑁆𑀜𑀣𑀸𑀢𑀺 𑀅𑀢𑁆𑀣𑁄. 𑀢𑀫𑁂𑀯 𑀧𑀓𑀸𑀭𑀁 𑀤𑀲𑁆𑀲𑁂𑀢𑀺‘𑀬𑀤𑀺𑀫𑀺𑀦𑀸’𑀘𑁆𑀘𑀸𑀤𑀺.

𑀓𑀢𑁆𑀢𑀭𑀺 𑀯𑀺𑀳𑀺𑀢𑁂𑀲𑀼𑀧𑀺 𑀫𑀸𑀦𑀦𑁆𑀢𑀢𑁆𑀬𑀸𑀤𑀻𑀲𑀼 𑀧𑀭𑀪𑀽𑀢𑁂𑀲𑀼 𑀓𑁆𑀬𑁄 𑀪𑀯𑀢𑀻𑀢𑀺 𑀯𑀺𑀜𑁆𑀜𑀸𑀬𑁂𑀬𑁆𑀬𑀸𑀢𑀺 ‘𑀪𑀸𑀯𑀓𑀫𑁆𑀫𑁂𑀲𑀽’𑀢𑀺 𑀦 𑀓𑁆𑀬𑀲𑁆𑀲 𑀯𑀺𑀲𑁂𑀲𑀦𑀦𑁆𑀢𑀺 𑀆𑀳- ‘𑀫𑀸𑀦𑀦𑁆𑀢𑀢𑁆𑀬𑀸𑀤𑀻𑀦’𑀫𑀺𑀘𑁆𑀘𑀸𑀤𑀺.

𑀬𑀤𑀺 𑀳𑀺 𑀓𑀢𑁆𑀢𑀭𑀺 𑀯𑀺𑀳𑀺𑀢𑁂𑀲𑀼 𑀲𑀺𑀬𑀸, 𑀢𑀣𑀸 𑀲𑀢𑀺 𑀢𑁂𑀲𑀫𑀼𑀪𑀺𑀦𑁆𑀦𑀁 𑀧𑀥𑀸𑀦𑀢𑁆𑀢𑁂𑀦𑀸𑀪𑀺𑀥𑀻𑀬𑀫𑀸𑀦𑀸𑀦𑀫𑀜𑁆𑀜𑀫𑀜𑁆𑀜𑀸𑀦𑀧𑁂𑀓𑁆𑀔𑀢𑁆𑀢𑀸 𑀅𑀲𑀫𑁆𑀩𑀦𑁆𑀥𑁄 𑀲𑀺𑀬𑀸, 𑀦 𑀘𑁂 𑀯𑀫𑁆𑀪𑀽𑀢𑀸𑀦𑀫𑀪𑀺𑀥𑀸𑀦𑀫𑀢𑁆𑀣𑀺, 𑀦 𑀳𑀺 ‘𑀞𑀻𑀬𑀢𑁂’𑀘𑁆𑀘𑀲𑁆𑀫𑀸 𑀪𑀸𑀯𑁄 𑀓𑀢𑁆𑀢𑀸 𑀘 𑀧𑀢𑀻𑀬𑀢𑁂, 𑀦𑀸𑀧𑀺 ‘𑀕𑀫𑁆𑀬𑀢𑁂’𑀘𑁆𑀘𑀲𑁆𑀫𑀸 𑀓𑀫𑁆𑀫𑀁 𑀓𑀢𑁆𑀢𑀸𑀘. 𑀅𑀧𑀺 𑀢𑀼 𑀪𑀸𑀯𑀓𑀫𑁆𑀫𑀸𑀦𑁂𑀯 𑀕𑀫𑁆𑀬𑀦𑁆𑀢𑁂, 𑀢𑁂𑀦𑀸𑀳- ‘𑀢𑀲𑁆𑀫𑀸’𑀇𑀘𑁆𑀘𑀸𑀤𑀺.

𑀢𑁂𑀲𑀫𑁂𑀯𑀸𑀢𑀺 𑀫𑀸𑀦𑀦𑁆𑀢𑀢𑁆𑀬𑀸𑀤𑀻𑀦𑀫𑁂𑀯. 𑀧𑀭𑀲𑀫𑀜𑁆𑀜𑀸𑀪𑀺 𑀧𑀭𑁂𑀲𑀁 𑀓𑀘𑁆𑀘𑀸𑀬𑀦𑀸 𑀦𑀁 𑀧𑀭𑁄𑀓𑁆𑀔𑀸𑀇𑀘𑁆𑀘𑁂𑀯 𑀦𑀸𑀫𑀁. 𑀢𑀩𑁆𑀩𑀚𑁆𑀚𑀺𑀢𑁂𑀲𑀽𑀢𑀺 𑀧𑀭𑁄𑀓𑁆𑀔𑀸𑀲𑀜𑁆𑀜𑀺𑀧𑀘𑁆𑀘𑀬𑀯𑀚𑁆𑀚𑀺𑀢𑁂𑀲𑀼. 𑀅𑀧𑀭𑁄𑀓𑁆𑀔𑁂𑀲𑀽𑀢𑀺 𑀏𑀢𑁆𑀣 𑀧𑀭𑀲𑀫𑀜𑁆𑀜𑀸𑀯𑀲𑁂𑀦 𑀧𑀭𑁄𑀓𑁆𑀔𑀸𑀇𑀘𑁆𑀘𑀦𑁂𑀦 𑀲𑀳 𑀲𑀫𑀸𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀜𑁆𑀜𑀣𑀸𑀧𑀺 𑀧𑀝𑀺𑀧𑀸𑀤𑁂𑀢𑀼𑀁 ‘𑀅𑀣𑀯𑀸’𑀢𑀺𑀆𑀤𑀺𑀫𑀸𑀳. 𑀧𑀭𑁄𑀓𑁆𑀔𑁂𑀢𑀺 𑀇𑀦𑁆𑀤𑁆𑀭𑀺𑀬𑀸𑀯𑀺𑀲𑀬𑁂 𑀓𑀸𑀮𑁂. 𑀧𑀭𑁄𑀓𑁆𑀔𑁂𑀯𑀺𑀳𑀺𑀢𑀸 𑀧𑀘𑁆𑀘𑀬𑀸𑀢𑀺 𑀇𑀫𑀺𑀦𑀸 𑀉𑀧𑀘𑀸𑀭𑁂𑀦 𑀢𑀤𑁆𑀥𑀺𑀢𑀧𑁆𑀧𑀘𑁆𑀘𑀬𑀯𑀲𑁂𑀦 𑀯𑀸 𑀧𑀭𑁄𑀓𑁆𑀔𑀸𑀢𑀺 𑀲𑀤𑁆𑀤𑀦𑀺𑀧𑁆𑀨𑀢𑁆𑀢𑀺𑀫𑀸𑀳. 𑀢𑁂 𑀧𑀦‘𑀅 𑀉’ 𑀇𑀘𑁆𑀘𑀸𑀤𑀬𑁄. 𑀢𑀢𑁄𑀢𑀺 𑀧𑀭𑁄𑀓𑁆𑀔𑀧𑁆𑀧𑀘𑁆𑀘𑀬𑀢𑁄.

𑀦𑀦𑀼 𑀧𑀼𑀩𑁆𑀩𑀧𑀓𑁆𑀔𑁂 ‘𑀅𑀧𑀭𑁄𑀓𑁆𑀔𑁂𑀲𑀽’𑀢𑀺 𑀏𑀢𑁆𑀣 ‘𑀧𑀭𑁄𑀓𑁆𑀔𑀸𑀯𑀚𑁆𑀚𑀺𑀢𑁂𑀲𑀽’𑀢𑀺 𑀅𑀢𑁆𑀣 𑀯𑀘𑀦𑀁 𑀬𑀼𑀚𑁆𑀚𑀢𑀺, 𑀤𑀼𑀢𑀺𑀬𑀧𑀓𑁆𑀔𑁂 𑀧𑀦 ‘𑀧𑀭𑁄𑀓𑁆𑀔𑀯𑀚𑁆𑀚𑀺𑀢𑁂𑀲𑀽’𑀢𑀺, 𑀢𑀣𑀸 𑀲𑀢𑀺 𑀓𑀣𑀫𑁂𑀢𑁆𑀣 ‘𑀧𑀭𑁄𑀓𑁆𑀔𑀸𑀯𑀚𑁆𑀚𑀺𑀢𑁂𑀲𑀽’𑀢𑀺 𑀅𑀢𑁆𑀣𑀯𑀘𑀦𑀁 𑀬𑀼𑀚𑁆𑀚𑀢𑀻𑀢𑀺 𑀆𑀳- ‘𑀢𑁂𑀧𑀦𑀸’𑀢𑀺𑀆𑀤𑀺. 𑀇𑀥𑀸𑀢𑀺 𑀅𑀧𑀭𑁄𑀓𑁆𑀔𑁂𑀲𑀽𑀢𑀺 𑀇𑀫𑀲𑁆𑀫𑀺𑀁. 𑀦𑀦𑀼 𑀘 ‘‘𑀧𑀭𑁄𑀓𑁆𑀔𑁂 𑀅 𑀉’’𑀇𑀘𑁆𑀘𑀸𑀤𑀺𑀲𑀼𑀢𑁆𑀢𑁂 (𑁬-𑁬) ‘𑀧𑀭𑁄𑀓𑁆𑀔𑁂’𑀢𑀺 𑀧𑀓𑀢𑀺𑀯𑀺𑀲𑁂𑀲𑀦𑀦𑁆𑀢𑀺 𑀧𑀘𑁆𑀘𑀬𑀸𑀦𑀁 𑀧𑀭𑁄𑀓𑁆𑀔𑁂 𑀯𑀺𑀳𑀺𑀢𑀢𑀸 𑀓𑀣𑀦𑁆𑀢𑀺 𑀫𑀦𑀲𑀺 𑀦𑀺𑀥𑀸𑀬𑀸𑀳 ‘𑀧𑀭𑁄𑀓𑁆𑀔𑁂’𑀇𑀘𑁆𑀘𑀸𑀤𑀺. 𑀪𑀯𑀦𑀁 𑀪𑀸𑀯𑁄 𑀓𑀺𑀭𑀺𑀬𑀸𑀥𑀸𑀢𑁆𑀯𑀢𑁆𑀣𑁄.

𑀲𑀸𑀥𑀻𑀬𑀫𑀸𑀦𑀸𑀯𑀢𑁆𑀣𑁄𑀢𑀺 𑀇𑀫𑀺𑀦𑀸 𑀲𑀺𑀤𑁆𑀥𑀸𑀯𑀢𑁆𑀣𑀸 𑀦𑀺𑀭𑀲𑁆𑀲𑀢𑁂. 𑀧𑀼𑀩𑁆𑀩𑀧𑀭𑀻𑀪𑀽𑀢𑁄 𑀧𑀥𑀸𑀦𑀓𑀺𑀭𑀺𑀬𑀸𑀯𑀬𑀯𑀪𑀽𑀢𑁄 𑀓𑀺𑀭𑀺𑀬𑀸𑀭𑀽𑀧𑁄 𑀅𑀢𑁆𑀣𑁄 𑀮𑀓𑁆𑀔𑀡𑀁 𑀲𑀪𑀸𑀯𑁄 ¶ 𑀬𑀲𑁆𑀲 𑀥𑀸𑀢𑁆𑀯𑀢𑁆𑀣𑀲𑁆𑀲 𑀲𑁄 𑀢𑀣𑀸 𑀯𑀼𑀢𑁆𑀢𑁄. 𑀲𑀢𑁆𑀯𑀪𑀽𑀢𑁄𑀢𑀺 𑀏𑀢𑁆𑀣 𑀧𑀢𑀻𑀬𑀢𑀻𑀢𑀺 𑀲𑁂𑀲𑁄. 𑀩𑀳𑀼𑀯𑀘𑀦𑀫𑁆𑀧𑀺 𑀳𑁄𑀢𑀺 𑀧𑀸𑀓𑀸𑀧𑀸𑀓𑁂𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀓𑀭𑀻𑀬𑀢𑀻𑀢𑀺 𑀓𑀫𑁆𑀫𑀁, 𑀢𑀜𑁆𑀘 𑀬𑀤𑀺𑀧𑀺 𑀦𑀸𑀫𑀸𑀤𑀺𑀓𑀫𑁆𑀫𑀫𑀢𑁆𑀣𑀺, 𑀢𑀣𑀸𑀧𑀺 𑀓𑁆𑀭𑀺𑀬𑀢𑁆𑀣𑀸𑀇𑀘𑁆𑀘𑀸𑀥𑀺𑀓𑀸𑀭𑀢𑁄 𑀫𑀸𑀦𑀸𑀤𑀻𑀦𑀫𑀜𑁆𑀜𑀢𑁆𑀣𑀸𑀮𑀩𑁆𑀪𑀦𑀢𑁄 𑀘 𑀓𑀺𑀭𑀺𑀬𑀸 𑀲𑀫𑁆𑀩𑀦𑁆𑀥𑁄𑀯 𑀕𑀬𑁆𑀳𑀢𑁂, 𑀲𑀼-𑀲𑀯𑀦𑁂 𑀲𑀽𑀬𑀫𑀸𑀦𑀁.

𑀧𑀸𑀡𑀺𑀦𑀺𑀬𑁂𑀳𑁂𑀢𑁆𑀣 ‘‘𑀪𑀺𑀦𑁆𑀤𑀢𑀺 𑀓𑀼𑀲𑀽𑀮𑀁’𑀢𑁆𑀬𑀸𑀤𑁄 𑀬𑀸 𑀪𑁂𑀤𑀦𑀸𑀤𑀺𑀓𑀺𑀭𑀺𑀬𑀸 𑀓𑀫𑁆𑀫𑀦𑀺 𑀤𑀺𑀲𑁆𑀲𑀢𑁂, 𑀲𑀸 𑀬𑀤𑀸 𑀲𑀼𑀓𑀭𑀢𑁆𑀢𑀫𑀢𑁆𑀢𑁂𑀦 𑀲𑀧𑁆𑀧𑀥𑀸𑀦𑀢𑁆𑀢𑀯𑀘𑀦𑀺𑀘𑁆𑀙𑀸𑀬𑀁 𑀓𑀢𑁆𑀢𑀼𑀢𑁆𑀢𑁂𑀧𑁆𑀬𑀼𑀧𑀮𑀩𑁆𑀪𑀢𑀺 ‘𑀪𑀺𑀚𑁆𑀚𑀢𑁂 𑀓𑀼𑀲𑀼𑀮𑁄 𑀲𑀬𑀫𑁂𑀯𑁂’𑀘𑁆𑀘𑀸𑀤𑀺𑀦𑀸, 𑀢𑀤𑀸𑀲𑁆𑀲 𑀓𑀢𑁆𑀢𑀼𑀦𑁄 𑀲𑀼𑀢𑁆𑀢𑀦𑁆𑀢𑀭𑁂𑀦 𑀓𑀫𑁆𑀫𑀲𑀭𑀺𑀓𑁆𑀔𑀪𑀸𑀯𑁄 𑀯𑀺𑀥𑀻𑀬𑀢𑁂 ‘𑀓𑀫𑁆𑀫𑀦𑀺𑀲𑁆𑀲𑀬𑀁 𑀓𑀸𑀭𑀺𑀬𑀁 𑀬𑀣𑀸 𑀲𑀺𑀬𑀸’𑀢𑀺. 𑀢𑀦𑁆𑀦𑀺𑀲𑁆𑀲𑀸𑀬𑀸𑀳- ‘𑀬𑀤𑀸 𑀓𑀫𑁆𑀫𑀫𑁂𑀯𑁂’𑀘𑁆𑀘𑀸𑀤𑀺. 𑀬𑀤𑀸 𑀓𑀫𑁆𑀫𑀫𑁂𑀯 𑀓𑀢𑁆𑀢𑀼𑀪𑀸𑀯𑁂𑀦 𑀯𑀺𑀯𑀘𑁆𑀙𑀻𑀬𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀁 𑀓𑀢𑁆𑀯𑀸 𑀢𑀣𑀸 𑀯𑀺𑀯𑀘𑁆𑀙𑀻𑀬𑀢𑁂𑀘𑁆𑀘𑀸𑀳- ‘𑀅𑀢𑁆𑀢𑀲𑀫𑀯𑁂𑀢𑀸𑀬’𑀇𑀘𑁆𑀘𑀸𑀤𑀺. 𑀅𑀢𑁆𑀢𑀲𑀤𑁆𑀤𑁂𑀦 𑀓𑀫𑁆𑀫𑀫𑀢𑁆𑀭 𑀯𑀺𑀯𑀘𑁆𑀙𑀺𑀢𑀁, 𑀅𑀢𑁆𑀢𑀦𑀺 𑀲𑀫𑀯𑁂𑀢𑀸 𑀏𑀓𑀤𑁂𑀲𑀻𑀪𑀽𑀢𑀸 𑀅𑀢𑁆𑀢𑀲𑀫𑀯𑁂𑀢𑀸, 𑀢𑀲𑁆𑀲𑀸 𑀓𑀺𑀭𑀺𑀬𑀸𑀬 𑀓𑀫𑁆𑀫𑀝𑁆𑀞𑀓𑀺𑀭𑀺𑀬𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀼𑀪𑁂𑀤𑀢𑁆𑀢𑀸𑀤𑀺𑀦𑁂𑀢𑀺 𑀳𑁂𑀢𑀼𑀫𑁆𑀳𑀺 𑀓𑀭𑀡𑁂 𑀯𑀸 𑀢𑀢𑀺𑀬𑀸. 𑀅𑀢𑁆𑀣𑀢𑁄𑀢𑀺 ‘𑀓𑀫𑁆𑀫𑁂𑀬𑁂𑀯 𑀓𑁆𑀬𑁄’𑀢𑀺 (𑀦 𑀲𑀓𑁆𑀔𑀺) [𑀢𑀲𑁆𑀫𑀸] 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀣𑀸𑀳𑀺 ‘𑀪𑀺𑀚𑁆𑀚𑀢𑁂𑀢𑀺 𑀲𑀯𑀦𑀸 𑀓𑀫𑁆𑀫𑀢𑀸𑀯𑀕𑀫𑁆𑀬𑀢𑁂’𑀢𑀺 𑀇𑀫𑀺𑀦𑀸 𑀅𑀢𑁆𑀣𑀢𑁄 𑀓𑀫𑁆𑀫𑁂𑀬𑁂𑀯𑀓𑁆𑀬𑁄𑀢𑀺𑀧𑀝𑀺𑀧𑀸𑀤𑀺𑀢𑀫𑁂𑀯. 𑀯𑀼𑀢𑁆𑀢𑀫𑁂𑀯 𑀨𑀼𑀝𑀻𑀓𑀭𑀫𑀸𑀳- ‘𑀪𑀺𑀚𑁆𑀚𑀢𑁂 𑀇𑀘𑁆𑀘𑀲𑁆𑀫𑀺𑀁 𑀧𑀤𑁂’𑀇𑀘𑁆𑀘𑀸𑀤𑀺. 𑀅𑀜𑁆𑀜𑀣𑀸𑀢𑀺 𑀬𑀤𑀺 𑀓𑀫𑁆𑀫𑁂𑀬𑁂𑀯 𑀢𑁂𑀧𑀘𑁆𑀘𑀬𑁄 𑀦 𑀲𑀺𑀬𑀸. 𑀅𑀢𑁄𑀢𑀺 𑀪𑀺𑀚𑁆𑀚𑀢𑁂 𑀇𑀘𑁆𑀘𑀲𑁆𑀫𑀸. 𑀉𑀧𑀲𑀁𑀳𑀭𑀫𑀸𑀳- ‘𑀢𑀲𑁆𑀫𑀸’𑀇𑀘𑁆𑀘𑀸𑀤𑀺. 𑀓𑀺𑀁 𑀯𑀘𑀦𑁂𑀦𑀸𑀢𑀺 𑀧𑀸𑀡𑀺𑀦𑀻𑀬𑀸𑀦𑀫𑀺𑀯 𑀓𑀺𑀁 𑀲𑀼𑀢𑁆𑀢𑀢𑁆𑀢𑀭𑁂𑀦𑀸𑀢𑀺 𑀅𑀢𑁆𑀣𑁄.

𑀯𑀘𑀦𑀸𑀪𑀸𑀯𑁂𑀧𑀺 𑀓𑀫𑁆𑀫𑀓𑀢𑁆𑀢𑀭𑀺 𑀧𑀤𑀲𑀗𑁆𑀔𑀸𑀭𑀓𑁆𑀓𑀫𑁄𑀧𑀤𑀲𑁆𑀲𑀦𑀫𑀼𑀔𑁂𑀦 𑀯𑀼𑀢𑁆𑀢𑀺 𑀕𑀦𑁆𑀣𑀁 𑀯𑀺𑀯𑀭𑀺𑀢𑀼𑀫𑀸𑀳- ‘𑀯𑀸𑀓𑁆𑀬𑀢𑁄’𑀇𑀘𑁆𑀘𑀸𑀤𑀺. 𑀯𑀸𑀓𑁆𑀬𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀧𑀤𑁂𑀲𑀗𑁆𑀔𑀭𑀺𑀬𑀫𑀸𑀦𑁂𑀢𑀺 ‘𑀪𑀺𑀚𑁆𑀚𑀢𑁂 𑀓𑀼𑀲𑀽𑀮𑁄 𑀲𑀬𑀫𑁂𑀯𑁂’𑀢𑀺 𑀯𑀸𑀓𑁆𑀬𑀢𑁄 𑀯𑀺𑀲𑀼𑀁 𑀓𑀢𑁆𑀯𑀸 𑀪𑀺𑀚𑁆𑀚𑀢𑁂’𑀢𑀺 𑀧𑀤𑁂 𑀲𑀗𑁆𑀔𑀭𑀺𑀬𑀫𑀸𑀦𑁂 𑀦𑀺𑀧𑁆𑀨𑀸𑀤𑀻𑀬𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀢𑀤𑁂𑀯𑀸𑀢𑀺 𑀧𑀤𑀢𑁆𑀣𑀲𑀸𑀫𑀜𑁆𑀜𑀫𑁂𑀯. 𑀢𑀦𑁆𑀦𑀺𑀧𑁆𑀨𑀸𑀤𑀦𑁂𑀢𑀺 𑀢𑀲𑁆𑀲 𑀲𑀗𑁆𑀔𑀭𑀺𑀫𑀸𑀦𑀲𑁆𑀲 𑀧𑀤𑀲𑁆𑀲 𑀲𑀗𑁆𑀔𑀭𑀡𑁂. 𑀲𑀬𑀦𑁆𑀢𑀻𑀫𑀲𑁆𑀲𑀸𑀢𑁆𑀭 𑀅𑀢𑁆𑀢𑀦𑀸𑀢𑀺 𑀅𑀢𑁆𑀣𑁄. 𑀦 𑀓𑁂𑀯𑀮 𑀫𑀦𑁂𑀦𑁂𑀢𑀤𑁂𑀯 𑀯𑀼𑀢𑁆𑀢𑀁- ‘𑀓𑀫𑁆𑀫𑁂𑀬𑁂𑀯 𑀧𑀘𑁆𑀘𑀬𑁄’𑀢𑀺, 𑀓𑀺𑀜𑁆𑀘𑀭𑀳𑀺 𑀅𑀜𑁆𑀜𑀫𑁆𑀧𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ¶ ‘𑀅𑀦𑁂𑀦 𑀘𑁂’𑀘𑁆𑀘𑀸𑀤𑀺. 𑀘𑁄 𑀯𑀢𑁆𑀢𑀩𑁆𑀩𑀦𑁆𑀢𑀭𑀲𑀫𑀼𑀘𑁆𑀘𑀬𑁂. 𑀅𑀦𑁂𑀦𑀪𑀺𑀚𑁆𑀚𑀢𑁂𑀢𑀺 𑀲𑀯𑀦𑀸𑀇𑀘𑁆𑀘𑀸𑀤𑀺𑀦𑀸 𑀇𑀤𑀜𑁆𑀘𑀸𑀳𑀸𑀢𑀺 𑀅𑀢𑁆𑀣𑁄. 𑀓𑀺𑀦𑁆𑀢𑀤𑀺𑀘𑁆𑀘𑀸𑀳 ‘𑀓𑀫𑁆𑀫 𑀓𑀢𑁆𑀢𑀼𑀦𑁄’𑀘𑁆𑀘𑀸𑀤𑀺, 𑀦 𑀧𑀤𑀫𑀼𑀤𑀸𑀳𑀭𑀡𑀦𑁆𑀢𑀺 𑀓𑀫𑁆𑀫𑀓𑀢𑁆𑀢𑀼𑀦𑁄 𑀯𑀸𑀓𑁆𑀬𑀫𑁂𑀯𑁄𑀤𑀸𑀳𑀭𑀡𑀁… 𑀯𑀸𑀓𑁆𑀬𑁂𑀦𑁂𑀯 𑀢𑀲𑁆𑀲 𑀧𑀢𑀻𑀢𑀺𑀬𑀸 𑀫𑀜𑁆𑀜𑀢𑁂. 𑀧𑀤𑀫𑁂𑀯𑁄𑀤𑀸𑀳𑀭𑀡𑀁 𑀓𑀲𑁆𑀫𑀸 𑀦 𑀲𑀺𑀬𑀸𑀢𑀺 𑀆𑀳- ‘𑀧𑀤𑁂𑀳𑀺’𑀘𑁆𑀘𑀸𑀤𑀺. 𑀤𑀼𑀢𑀺𑀬𑀫𑀼𑀤𑀸𑀳𑀭𑀡𑀁 𑀤𑀲𑁆𑀲𑁂𑀢𑀼𑀫𑀸𑀳- ‘𑀓𑀢𑁆𑀢𑀼𑀦𑀺𑀲𑁆𑀲𑀬𑁄 𑀧𑀺’𑀘𑁆𑀘𑀸𑀤𑀺.

𑀅𑀲𑁆𑀫𑀺𑀁 𑀧𑀓𑁆𑀔𑁂𑀢𑀺 𑀅𑀲𑁆𑀫𑀺𑀁 𑀓𑀢𑁆𑀢𑀼𑀢𑁆𑀢𑁂𑀦 𑀯𑀺𑀯𑀘𑁆𑀙𑀺𑀢𑁂 𑀧𑀓𑁆𑀔𑁂. 𑀢𑀩𑁆𑀩𑀺𑀲𑀬𑀢𑁆𑀢𑀦𑁆𑀢𑀺 𑀓𑀫𑁆𑀫𑀯𑀸𑀘𑀻𑀲𑀬𑀁 𑀲𑀤𑁆𑀤𑀯𑀺𑀲𑀬𑀢𑁆𑀢𑀁. 𑀪𑀸𑀯𑀓𑀫𑁆𑀫𑁂𑀲𑀽𑀢𑀻𑀫𑀲𑁆𑀲 𑀓𑀢𑁆𑀢𑀭𑀺𑀘𑁆𑀘𑀲𑁆𑀲 𑀘 𑀧𑀘𑁆𑀘𑀬𑀯𑀺𑀲𑁂𑀲𑀦𑀢𑁆𑀣𑁂 𑀲𑀢𑀺 𑀲𑀸𑀫𑀢𑁆𑀣𑀺𑀬𑀮𑀤𑁆𑀥𑀫𑁆𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀫𑀸𑀳- ‘𑀪𑀸𑀯𑀓𑀫𑁆𑀫𑁂𑀲𑀽’𑀢𑀺𑀆𑀤𑀺. 𑀇𑀫𑀺𑀦𑀸 𑀅𑀦𑁂𑀦 𑀘 𑀯𑀺𑀲𑁂𑀲𑀺𑀲𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀦𑁆𑀢𑀁 𑀯𑀺𑀲𑁂𑀲𑀺𑀢𑀦𑁆𑀢𑀺 𑀆𑀳- ‘𑀫𑀸𑀦𑀦𑁆𑀢 𑀢𑁆𑀬𑀸𑀤𑀻𑀲𑀽’𑀢𑀺. 𑀓𑀺𑀦𑁆𑀢𑀫𑁆𑀧𑀬𑁄𑀚𑀦𑀦𑁆𑀢𑀺 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀫𑀸𑀳- ‘𑀢𑁆𑀬𑀸𑀤𑀻𑀦’𑀫𑀺𑀘𑁆𑀘𑀸𑀤𑀺. 𑀬𑀤𑀺 𑀪𑀸𑀯𑀓𑀫𑁆𑀫𑁂𑀲𑀼 𑀓𑀢𑁆𑀢𑀭𑀺 𑀘 𑀢𑁂𑀦 𑀢𑁂𑀦 [𑀥𑀸𑀦𑁂𑀦] 𑀲𑀼𑀢𑁆𑀢𑁂𑀦 𑀫𑀸𑀦𑀸𑀤𑀬𑁄 𑀦 𑀲𑀺𑀬𑀼𑀁, 𑀓𑀣𑀦𑁆𑀢𑀁 𑀯𑀺𑀲𑁂𑀲𑀺𑀢𑁂𑀲𑀼 𑀫𑀸𑀦𑀸𑀤𑀻𑀲𑀼 𑀧𑀭𑁂𑀲𑀼 𑀓𑁆𑀬𑀸𑀤𑀬𑁄 𑀲𑀺𑀬𑀼𑀦𑁆𑀢𑀻𑀫𑀺𑀦𑀸 𑀲𑀸𑀫𑀢𑁆𑀣𑀺𑀬𑁂𑀦 ( ) [(𑀲𑀢𑀺)] 𑀪𑀸𑀯𑀓𑀫𑁆𑀫𑁂𑀲𑀼 𑀓𑀢𑁆𑀢𑀭𑀺 ( ) [(𑀢𑀺)] 𑀘 ‘‘𑀯𑀢𑁆𑀢𑀫𑀸𑀦𑁂𑀢𑀺 𑀅𑀦𑁆𑀢𑀺’’𑀘𑁆𑀘𑀸𑀤𑀺𑀧𑁆𑀧𑀪𑀼𑀢𑀺𑀓𑁂𑀳𑀺 (𑁬-𑁧) 𑀲𑀼𑀢𑁆𑀢𑁂𑀳𑀺 𑀬𑀣𑀸𑀮𑀸𑀪𑀁 𑀪𑀸𑀯𑀸𑀤𑀻𑀲𑀼 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀪𑀸𑀯𑁄.

𑀦𑀢𑀤𑀢𑁆𑀣𑀁 𑀯𑀘𑀦𑀫𑀸𑀭𑀤𑁆𑀥𑀦𑁆𑀢𑀺 𑀪𑀸𑀯𑀓𑀫𑁆𑀫𑁂𑀲𑀼 𑀓𑀢𑁆𑀢𑀭𑀺 𑀫𑀸𑀦𑀦𑁆𑀢𑀢𑁆𑀬𑀸𑀤𑀺𑀯𑀺𑀥𑀸𑀦𑀢𑁆𑀣𑀁 𑀧𑀸𑀡𑀺𑀦𑀺𑀬𑁂𑀳𑀺 𑀯𑀺𑀬 𑀲𑀼𑀢𑁆𑀢𑀦𑁆𑀢𑀭𑀁 𑀦𑀸𑀭𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀪𑀸𑀯𑀓𑀫𑁆𑀫𑁂𑀲𑀼 𑀓𑀢𑁆𑀢𑀭𑀺 𑀘 𑀫𑀸𑀦𑀸𑀤𑀺𑀯𑀺𑀥𑀸𑀦𑀢𑁆𑀣𑀁 𑀯𑀘𑀦𑀁 𑀦𑀸𑀭𑀤𑁆𑀥𑀁 𑀥𑀸𑀢𑀼𑀦𑀺𑀬𑀫𑀦𑀁 [𑀥𑀸𑀢𑀼𑀦𑀺𑀬𑀫𑀢𑁆𑀣𑀁] 𑀢𑁆𑀯𑀲𑁆𑀲 𑀯𑀢𑁆𑀢𑀩𑁆𑀩𑀦𑁆𑀢𑀺 𑀢𑀜𑁆𑀘 𑀲𑀸𑀫𑀢𑁆𑀣𑀺𑀬𑀸𑀯 (𑀮𑀩𑁆𑀪𑀢𑁂𑀢𑀺) 𑀤𑀲𑁆𑀲𑁂𑀢𑀼𑀫𑀸𑀳- ‘𑀓𑀺𑀭𑀺𑀬𑀢𑁆𑀣𑀦𑀺𑀬𑀫𑁄𑀧𑀺’𑀘𑁆𑀘𑀸𑀤𑀺. 𑀅𑀓𑀫𑁆𑀫𑀓𑀸 𑀥𑀸𑀢𑀼𑀢𑁄 𑀪𑀸𑀯𑁂 𑀓𑀢𑁆𑀢𑀭𑀺 𑀘 𑀲𑀓𑀫𑁆𑀫𑀓𑀸 𑀓𑀫𑁆𑀫𑁂 𑀓𑀢𑁆𑀢𑀭𑀺 𑀘𑁂𑀢𑀺 𑀓𑀺𑀭𑀺𑀬𑀢𑁆𑀣𑀦𑀺𑀬𑀫𑁄 𑀬𑀣𑀸𑀯𑀼𑀢𑁆𑀢𑁂𑀦 𑀲𑀸𑀫𑀢𑁆𑀣𑀺𑀬𑀸 𑀮𑀩𑁆𑀪𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀓𑀫𑁆𑀫𑀓𑀸𑀦𑀁 𑀓𑀫𑁆𑀫𑀯𑀺𑀭𑀳𑀸, 𑀲𑀓𑀫𑁆𑀫𑀓𑀸𑀦𑀜𑁆𑀘 𑀲𑀢𑁄𑀧𑀺 𑀪𑀸𑀯𑀲𑁆𑀲𑀸𑀧𑁆𑀧𑀥𑀸𑀦𑀢𑁆𑀢𑀸 𑀅𑀓𑀫𑁆𑀫𑀓𑀸 𑀓𑀢𑁆𑀢𑀭𑀺 𑀪𑀸𑀯𑁂 𑀘 𑀪𑀯𑀦𑁆𑀢𑀺 𑀦 𑀓𑀫𑁆𑀫𑁂, 𑀲𑀓𑀫𑁆𑀫𑀓𑀸 𑀓𑀫𑁆𑀫𑀲𑀩𑁆𑀪𑀸𑀯𑀸 𑀓𑀢𑁆𑀢𑀭𑀺 𑀓𑀫𑁆𑀫𑁂 𑀘 𑀪𑀯𑀦𑁆𑀢𑀺 𑀦 𑀪𑀸𑀯𑁂𑀢𑀻𑀤𑀁 𑀲𑀸𑀫𑀢𑁆𑀣𑀺𑀬𑀁.

𑀓𑀫𑁆𑀫𑀫𑀧𑁂𑀓𑁆𑀔𑀢𑁂𑀢𑀺 ¶ 𑀧𑀘𑀸𑀤𑀺𑀢𑁄 𑀓𑀢𑁆𑀢𑀭𑀺 𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑁂 𑀓𑀢𑁂 𑀧𑀘𑀢𑀺𑀘𑁆𑀘𑀸𑀤𑀻𑀲𑀼 𑀧𑀘𑀸𑀤𑀺𑀦𑁄 𑀧𑀘𑀦𑀸𑀤𑀺𑀓𑀺𑀭𑀺𑀬𑀸 𑀑𑀤𑀦𑀸𑀤𑀺𑀓𑀁 𑀓𑀫𑁆𑀫𑀫𑀧𑁂𑀓𑁆𑀔𑀢𑁂. 𑀓𑀢𑁆𑀢𑀼𑀢𑁆𑀢𑀫𑀧𑁂𑀓𑁆𑀔𑀢𑁂𑀢𑀺 𑀪𑀯𑀢𑀺𑀘𑁆𑀘𑀸𑀤𑀻𑀲𑀼 𑀪𑀽𑀆𑀤𑀻𑀦𑀁 𑀪𑀯𑀦𑀸𑀤𑀺𑀓𑀺𑀭𑀺𑀬𑀸 𑀓𑀢𑁆𑀢𑀼𑀫𑀢𑁆𑀢𑀫𑀧𑁂𑀓𑁆𑀔𑀢𑁂.

𑀚𑀺𑀦𑀦𑁆𑀢𑁄𑀢𑀺 ‘‘𑀩𑁆𑀬𑀜𑁆𑀚𑀦𑁂 𑀤𑀻𑀖𑀭𑀲𑁆𑀲𑀸’’𑀢𑀺 (𑁧-𑁩𑁩) 𑀭𑀲𑁆𑀲𑁄. 𑀲𑀩𑁆𑀩𑀢𑁆𑀣𑁂𑀯 𑀬𑀢𑁆𑀣 𑀓𑀢𑁆𑀢𑀭𑀺 𑀧𑀘𑁆𑀘𑀬𑁄 𑀢𑀢𑁆𑀣 𑀯𑀺𑀓𑀭𑀡𑀸𑀧𑀺 𑀓𑀢𑁆𑀢𑀭𑀺𑀬𑁂𑀯, 𑀬𑀢𑁆𑀣 𑀪𑀸𑀯𑀓𑀫𑁆𑀫𑁂𑀲𑀼 𑀢𑀢𑁆𑀣 𑀯𑀺𑀓𑀭𑀡𑀸𑀧𑀺 𑀪𑀸𑀯𑀓𑀫𑁆𑀫𑁂𑀲𑀼𑀬𑁂𑀯,… 𑀏𑀓𑀸𑀬 𑀧𑀓𑀢𑀺𑀬𑀸 𑀓𑀸𑀭𑀓𑀪𑁂𑀤𑁂(𑀦) 𑀧𑀘𑁆𑀘𑀬𑀲𑁆𑀲𑀸𑀲𑀫𑁆𑀪𑀯𑀢𑁄. 𑀢𑀲𑁆𑀫𑀸 𑀲𑀳𑀸𑀪𑀺𑀥𑀸𑀦𑀸𑀦𑀁 𑀫𑀸𑀦𑀸𑀤𑀺𑀯𑀺𑀓𑀭𑀡𑀸𑀦𑀁 𑀓𑀣𑀦𑁆𑀦𑀸𑀫 𑀲𑀳𑀸𑀲𑀫𑁆𑀪𑀯𑀁 𑀕𑀘𑁆𑀙𑁂𑀬𑁆𑀬𑀼𑀦𑁆𑀢𑀺 𑀯𑀺𑀥𑀻𑀬𑀦𑁆𑀢𑁂.

𑀯𑀺𑀯𑀘𑁆𑀙𑀸𑀪𑁂𑀤𑁂𑀦𑀸𑀢𑀺 𑀲𑀓𑀫𑁆𑀫𑀓𑀸𑀓𑀫𑁆𑀫𑀓𑀯𑀘𑀦𑀺𑀘𑁆𑀙𑀸𑀪𑁂𑀤𑁂𑀦. 𑀉𑀪𑀬𑀢𑁆𑀣𑀸𑀢𑀺 𑀪𑀸𑀯𑀓𑀫𑁆𑀫𑁂𑀲𑀼. 𑀓𑀭𑀻𑀬𑀢𑀻𑀢𑀺 𑀓𑀢𑁆𑀢𑀩𑁆𑀩𑁄 𑀓𑀭𑀡𑀻𑀬𑁄. ‘‘𑀅𑀧𑀯𑀸𑀤 𑀯𑀺𑀲𑀬𑁂 𑀉𑀲𑁆𑀲𑀕𑁆𑀕𑁄 𑀦𑀸𑀪𑀺𑀦𑀺𑀯𑀺𑀲𑀢𑀻’’𑀢𑀺 𑀏𑀲𑁄 𑀉𑀲𑁆𑀲𑀕𑁆𑀕𑀥𑀫𑁆𑀫𑁄. 𑀢𑀩𑁆𑀩𑀸𑀤𑀻𑀦𑀦𑁆𑀢𑀼 𑀓𑁂𑀲𑀜𑁆𑀘𑀼𑀲𑁆𑀲𑀕𑁆𑀕𑀸𑀦𑀫𑁆𑀧𑀺 𑀅𑀧𑀯𑀸𑀤𑀯𑀺𑀲𑀬𑁂 𑀧𑀯𑀢𑁆𑀢𑀺 𑀳𑁄𑀢𑀺 𑀩𑀳𑀼𑀮𑀸𑀥𑀺𑀓𑀸𑀭𑀸. 𑀬𑀣𑀸 ‘‘𑀪𑀸𑀯𑀓𑀫𑁆𑀫𑁂𑀲𑀼 𑀢𑀩𑁆𑀩𑀸𑀦𑀻𑀬𑀸’’𑀢𑀺 𑀉𑀲𑁆𑀲𑀕𑁆𑀕𑁄, ‘‘𑀯𑀤𑀸𑀤𑀻𑀳𑀺𑀬𑁄’’𑀢𑀺 (𑁫-𑁩𑁦) 𑀅𑀧𑀯𑀸𑀤𑁄 𑀢𑀁𑀯𑀺𑀲𑀬𑁂𑀧𑀺 𑀢𑀩𑁆𑀩𑀸𑀦𑀻𑀬𑀸 𑀳𑁄𑀦𑁆𑀢𑀺 ‘𑀕𑀦𑁆𑀢𑀩𑁆𑀩𑁄 𑀕𑀫𑀦𑀻𑀬𑁄’𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀓𑀸𑀭𑀺𑀬𑀁 ‘‘𑀜𑀺 𑀩𑁆𑀬𑀜𑁆𑀚𑀦𑀲𑁆𑀲𑀸’’𑀢𑀺 (𑁫-𑁧𑁭𑁦) 𑀜𑀺.

𑀅𑀦𑁆𑀦𑀢𑁄𑀢𑀻𑀫𑀺𑀦𑀸 ‘𑀪𑁄𑀕𑁆𑀕𑀫𑀜𑁆𑀜’𑀦𑁆𑀢𑁂𑀢𑁆𑀣 𑀅𑀜𑁆𑀜𑀁 𑀦𑀸𑀫 𑀅𑀦𑁆𑀦𑀯𑀢𑀸 𑀅𑀜𑁆𑀜𑀦𑁆𑀢𑀺 𑀅𑀢𑁆𑀣𑀫𑀸𑀳.

𑀓𑀫𑁆𑀫𑀓𑀭𑁄 ¶ 𑀪𑀭𑀺𑀢𑀩𑁆𑀩𑀢𑀸𑀬𑁂𑀘𑁆𑀘𑀸𑀤𑀺𑀦𑀸 𑀓𑀺𑀭𑀺𑀬𑀸𑀲𑀤𑁆𑀤𑀢𑁆𑀢𑀁 𑀪𑀘𑁆𑀘𑀲𑀤𑁆𑀤𑀲𑁆𑀲 𑀤𑀲𑁆𑀲𑁂𑀦𑁆𑀢𑁄 𑀲𑀜𑁆𑀜𑀸𑀪𑀸𑀯𑀫𑀧𑀸𑀓𑀭𑁄𑀢𑀺. ‘‘𑀲𑀜𑁆𑀜𑀸𑀬𑀁 𑀪𑀭𑀸’’𑀢𑀺 𑀘 𑀕𑀡𑀲𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀢𑁂𑀦𑀸𑀳- ‘𑀲𑀜𑁆𑀜𑀸𑀬𑀁 𑀪𑀭𑀸’𑀢𑀺𑀆𑀤𑀺.

𑀅𑀪𑀭𑀺𑀢𑀩𑁆𑀩𑀸𑀧𑀺𑀘𑁆𑀘𑀸𑀤𑀺𑀦𑀸 𑀇𑀤𑀁 𑀤𑀻𑀧𑁂𑀢𑀺 𑀤𑀼𑀯𑀺𑀥𑀸 𑀲𑀜𑁆𑀜𑀸𑀲𑀤𑁆𑀤𑀸 𑀓𑁂𑀘𑀺 𑀤𑀘𑁆𑀘𑀦𑁆𑀢 𑀯𑀺𑀕𑀢𑀸𑀯𑀬𑀯𑀢𑁆𑀣𑀸 𑀬𑀣𑀸 𑀟𑀺𑀢𑁆𑀣𑀸𑀤𑀬𑁄, 𑀓𑁂𑀘𑀺𑀤𑀯𑀬𑀯𑀢𑁆𑀣𑀸𑀦𑀼𑀕𑀢𑀸𑀬𑀣𑀸 𑀲𑀢𑁆𑀢𑀧𑀡𑁆𑀡𑀸𑀤𑀬𑁄, 𑀢𑀢𑁆𑀣 𑀪𑀭𑀺𑀬𑀸𑀲𑀤𑁆𑀤𑀲𑁆𑀲 𑀓𑀫𑁆𑀫𑀫𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 ‘𑀪𑀭𑀺𑀢𑀩𑁆𑀩𑀸 𑀪𑀭𑀺𑀬𑀸’𑀢𑀺, 𑀬𑀣𑀸 𑀲𑀢𑁆𑀢 𑀧𑀡𑁆𑀡𑀸𑀦𑀺 𑀅𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀲𑀢𑁆𑀢𑀧𑀡𑁆𑀡𑀲𑀤𑁆𑀤𑀲𑁆𑀲, 𑀏𑀢𑀜𑁆𑀘 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀲𑀤𑁆𑀤𑀦𑀺𑀧𑁆𑀨𑀢𑁆𑀢𑀺𑀓𑀺𑀭𑀺𑀬𑀸𑀬𑀫𑁂𑀯𑁄𑀧𑀤𑀺𑀲𑀻𑀬𑀢𑁂, 𑀓𑁆𑀯𑀘𑀺𑀤𑁂𑀯 𑀢𑁆𑀯𑀢𑁆𑀣𑀯𑀺𑀲𑁂𑀲𑁂 𑀲𑀢𑁆𑀬𑀲𑀢𑀺 𑀯𑀸 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀲𑀤𑁆𑀤𑁄 𑀯𑀢𑁆𑀢𑀢𑀻’’𑀢𑀺. 𑀑𑀓𑀸𑀭𑀲𑁆𑀲𑀸𑀢𑀺 ‘‘𑀬𑀼𑀯𑀡𑁆𑀡𑀸𑀦𑀫𑁂 𑀑𑀧𑁆𑀧𑀘𑁆𑀘𑀬𑁂’’𑀢𑀺 (𑁫-𑁮𑁨) 𑀓𑀢𑀑𑀓𑀸𑀭𑀲𑁆𑀲.

𑀲𑀤𑁆𑀤𑀺𑀓𑀸𑀦𑀦𑁆𑀢𑀺 𑀧𑀸𑀡𑀺𑀦𑀺𑀬𑀓𑀘𑁆𑀘𑀸𑀬𑀦𑀸𑀤𑀺𑀯𑁂𑀬𑁆𑀬𑀸𑀓𑀭𑀡𑀸𑀦𑀁. 𑀧𑁂𑀲𑀦𑀁 𑀲𑀓𑁆𑀓𑀸𑀭𑀧𑀼𑀩𑁆𑀩𑀓𑀁 𑀯𑀸 𑀦𑀺𑀬𑁄𑀚𑀦𑀁. 𑀓𑀸𑀫𑀘𑀸𑀭𑀸𑀦𑀼𑀜𑁆𑀜𑀸𑀢𑀺 𑀓𑀢𑁆𑀢𑀼𑀫𑀺𑀘𑁆𑀙𑀢𑁄 𑀬𑀣𑀺𑀘𑁆𑀙 𑀫𑀦𑀼𑀚𑀸𑀦𑀦𑀁 𑀅𑀢𑀺𑀲𑀕𑁆𑀕𑁄𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀦𑀺𑀫𑀺𑀢𑁆𑀢𑀪𑀽𑀢𑀲𑁆𑀲𑀸𑀢𑀺 ‘‘𑀪𑁄𑀢𑀸 𑀓𑀝𑁄 𑀓𑀢𑁆𑀢𑀩𑁆𑀩𑁄’𑀘𑁆𑀘𑀸𑀤𑀻𑀲𑀼 𑀓𑀝𑀓𑀭𑀡𑀸𑀤𑀺𑀦𑁄 𑀓𑀸𑀭𑀡𑀪𑀽𑀢𑀲𑁆𑀲.

𑀦𑀦𑀼 𑀘 𑀲𑀸𑀫𑀜𑁆𑀜𑁂𑀦 𑀯𑀺𑀳𑀺𑀢𑀸 𑀏(𑀢𑁂), 𑀢𑀣𑀸 𑀘 𑀲𑀢𑀺 𑀯𑀺𑀚𑁆𑀛𑀢𑁆𑀣𑀯𑀺𑀳𑀺 𑀢𑁂𑀳𑀺 𑀏𑀬𑁆𑀬𑀸𑀤𑀻𑀳𑀺 𑀢𑁂 𑀩𑀸𑀥𑀻𑀬𑀦𑁆𑀢𑀺𑀘𑁆𑀘𑀸𑀳- ‘𑀦𑀘𑁂’𑀘𑁆𑀘𑀸𑀤𑀺. 𑀯𑀺𑀥𑀺𑀯𑀺𑀲𑁂𑀲𑀢𑁆𑀢𑁂 𑀧𑀻𑀢𑀺 𑀯𑀺𑀥𑀸𑀦𑀁 𑀯𑀺𑀥𑀺 𑀦𑀺𑀬𑁄𑀚𑀦𑀁 𑀓𑀺𑀭𑀺𑀬𑀸𑀲𑀼 𑀩𑁆𑀬𑀸𑀧𑀸𑀭𑀡𑀸, 𑀢𑀲𑁆𑀲 𑀯𑀺𑀥𑀺𑀦𑁄 𑀧𑁂𑀲𑀸𑀤𑀻𑀦𑀁 𑀯𑀺𑀲𑁂𑀲𑀢𑁆𑀢𑁂𑀧𑀺, 𑀦𑀸𑀯𑀲𑁆𑀲𑀦𑁆𑀢𑀺𑀆𑀤𑀺 𑀚𑀬𑀸𑀤𑀺𑀘𑁆𑀘𑀩𑁆𑀬𑀸𑀔𑁆𑀬𑀸𑀦𑀁 𑀦𑀺𑀲𑁆𑀲𑀸𑀬 𑀯𑀼𑀢𑁆𑀢𑀁, 𑀯𑀼𑀢𑁆𑀢𑀜𑁆𑀳𑀺 𑀢𑁂𑀦 ‘‘𑀓𑀺𑀫𑀢𑁆𑀣𑀁 𑀧𑁂𑀲𑀸𑀤𑀻𑀲𑀼 𑀓𑀺𑀘𑁆𑀘𑀲𑀜𑁆𑀜𑀺𑀦𑁄 𑀢𑀩𑁆𑀩𑀅𑀦𑀻𑀬𑀡𑁆𑀬𑀢𑁆𑀬𑀧𑁆𑀧𑀘𑁆𑀘𑀬𑀸 𑀯𑀺𑀥𑀻𑀬𑀦𑁆𑀢𑁂, 𑀦 𑀲𑀸𑀫𑀜𑁆𑀜𑁂𑀦 𑀪𑀸𑀯𑀓𑀫𑁆𑀫𑁂𑀲𑀼 𑀯𑀺𑀳𑀺𑀢𑀸, 𑀏𑀯𑀫𑁂𑀢𑁂 [𑀯𑀺𑀳𑀺𑀢𑀸𑀏𑀯, 𑀯𑁄-𑀓𑀸𑀲𑀺𑀓𑀸𑀯𑀼𑀢𑁆𑀢𑀺] 𑀧𑁂𑀲𑁆𑀯𑀸𑀤𑀻𑀜𑁆𑀜𑀲𑁆𑀯𑀢𑁆𑀭 𑀘 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀯𑀺𑀲𑁂𑀲𑀯𑀺𑀳𑀺𑀢𑁂𑀦 𑀯𑀺𑀥𑁆𑀬𑀸𑀤𑀻𑀲𑀼 𑀧𑀘𑁆𑀘𑀬𑁂𑀦 𑀩𑀸𑀥𑀻𑀬𑀦𑁆𑀢𑁂, 𑀯𑀸𑀲𑀭𑀽𑀧𑀯𑀺𑀥𑀺𑀦𑀸 𑀪𑀯𑀺𑀲𑁆𑀲𑀦𑁆𑀢𑀺 𑀏𑀯𑀜𑁆𑀘𑀭𑀳𑀺 𑀏𑀢𑀁 𑀜𑀸𑀧𑁂𑀢𑀺 ‘𑀇𑀢𑁆𑀣𑀻𑀅𑀥𑀺𑀓𑀸𑀭𑀢𑁄 𑀧𑀭𑁂𑀦 𑀯𑀸𑀲𑀭𑀽𑀧𑀯𑀺𑀥𑀺 𑀦𑀸𑀯𑀲𑁆𑀲𑀫𑁆𑀪𑀯𑀢𑀻’𑀢𑀺 [𑀓𑀺𑀫𑀢𑁆𑀣𑀫𑀺𑀘𑁆𑀘𑀸𑀤𑀺 𑀘𑁄𑀤𑁆𑀬, 𑀯𑀺𑀘𑀲𑀲𑀯𑀺𑀳𑀺𑀢𑁂𑀘𑁆𑀘𑀸𑀤𑀺 𑀧𑀭𑀺𑀳𑀸𑀭𑁄, 𑀓𑀺𑀘𑁆𑀘𑀸 𑀳𑀺 𑀲𑀸𑀫𑀜𑁆𑀜𑁂𑀦 𑀯𑀺𑀳𑀺𑀢𑀸, 𑀧𑀜𑁆𑀘𑀫𑀻 𑀢𑀼 𑀧𑁂𑀲𑀸𑀤𑀺𑀦𑀸𑀢𑁆𑀣𑀯𑀺𑀲𑁂𑀲𑁂𑀦, 𑀅𑀢𑁄 𑀢𑁂𑀦 𑀯𑀺𑀲𑁂𑀲𑀯𑀺𑀳𑀺𑀢𑁂𑀦 𑀓𑀺𑀘𑁆𑀘𑀸 𑀧𑁂𑀲𑀸𑀤𑀺𑀯𑀺𑀲𑀬𑁂 𑀩𑀸𑀥𑀻𑀬𑁂𑀭𑀦𑁆𑀢𑀺 𑀧𑀼𑀦𑀩𑁆𑀩𑀺𑀬𑀢𑁂, 𑀯𑀸𑀲𑀭𑀽𑀧𑁂𑀘𑁆𑀘𑀸𑀤𑀺𑀦𑀸 𑀧𑀭𑀺𑀳𑀸𑀭𑀁 𑀯𑀺𑀖𑀝𑀬𑀢𑀺. 𑀏𑀯𑀁 𑀘𑀭𑀳𑀺𑀘𑁆𑀘𑀸𑀤𑀺𑀦𑀸 𑀧𑁂𑀲𑀸𑀤𑀻𑀲𑀼 𑀓𑀺𑀘𑁆𑀘𑀯𑀺𑀥𑀸𑀦𑀲𑁆𑀲 𑀜𑀸𑀧𑀓𑀢𑁆𑀢𑀁 𑀤𑀲𑁆𑀲𑀬𑀢𑀺. (𑀚𑀺𑀦𑀺𑀦𑁆𑀤𑀩𑀼𑀤𑁆𑀥𑀺𑀦𑀼 𑁨𑁧 𑀲)]. 𑀅𑀲𑀭𑀽𑀧𑀯𑀺𑀥𑀺 ¶ 𑀅𑀲𑀭𑀽𑀧𑀸𑀧𑀯𑀸𑀤𑀧𑁆𑀧𑀘𑁆𑀘𑀬𑁄 𑀯𑀸 𑀯𑀺𑀓𑀧𑁆𑀧𑁂𑀦 𑀩𑀸𑀥𑀓𑁄 𑀳𑁄𑀢𑀺 𑀉𑀲𑁆𑀲𑀕𑁆𑀕𑀲𑁆𑀲𑀸𑀢𑀺 𑀏𑀢𑀁 𑀅𑀯𑀲𑁆𑀲𑀁 𑀦 𑀳𑁄𑀢𑀻𑀢𑀺 𑀜𑀸𑀧𑀦𑀢𑁆𑀣𑀫𑁆𑀧𑀺 𑀦 𑀯𑀺𑀥𑀻𑀬𑀢𑁂𑀢𑀺 𑀬𑁄𑀚𑀦𑀸. ‘‘𑀯𑀸-𑀲𑀭𑀽𑀧𑁄-𑀦𑀺𑀢𑁆𑀣𑀺𑀬𑀁’’𑀢𑀺 (𑀧𑀸, 𑁩-𑁧-𑁯𑁪) 𑀧𑀭𑀲𑀼𑀢𑁆𑀢𑀁. 𑀥𑀸𑀢𑁆𑀯𑀥𑀺𑀓𑀸𑀭𑁂𑀯𑀺𑀳𑀺𑀢𑁄 𑀅𑀲𑀭𑀽𑀧𑁄 𑀅𑀧𑀯𑀸𑀤𑀧𑁆𑀧𑀘𑁆𑀘𑀬𑁄 𑀉𑀲𑁆𑀲𑀕𑁆𑀕𑀲𑁆𑀲 𑀩𑀸𑀥𑀓𑁄 𑀪𑀯𑀢𑀺 𑀇𑀢𑁆𑀣𑀺 𑀅𑀥𑀺𑀓𑀸𑀭𑁂 𑀯𑀺𑀳𑀺𑀢𑀧𑁆𑀧𑀘𑁆𑀘𑀬𑀁 𑀯𑀚𑁆𑀚𑀬𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀤𑀁 𑀯𑀺𑀜𑁆𑀜𑀸𑀢𑀩𑁆𑀩𑀁.

𑀪𑁄𑀢𑀸 𑀔𑀮𑀼 𑀓𑀝𑁄 𑀓𑀸𑀢𑀩𑁆𑀩𑁄𑀘𑁆𑀘𑀸𑀤𑀺 𑀧𑁂𑀲𑀦𑁂. 𑀢𑁆𑀯𑀬𑀸 𑀓𑀝𑁄 𑀓𑀸𑀢𑀩𑁆𑀩𑁄𑀢𑀺 𑀅𑀦𑀼𑀜𑁆𑀜𑀸𑀬𑀁. 𑀧𑀢𑁆𑀢𑀓𑀸𑀮𑁂 𑀧𑀭𑀫𑀼𑀤𑀸𑀳𑀭𑀡𑀁. 𑀏𑀢𑁆𑀣 𑀧𑀦 𑀓𑀝𑀓𑀭𑀡𑁂 𑀓𑀸𑀮𑀸𑀭𑁄𑀘𑀦𑀫𑀢𑁆𑀢𑀫𑁂𑀯 𑀯𑀺𑀜𑁆𑀜𑀸𑀬𑀢𑀺, 𑀦 𑀧𑁂𑀲𑀸𑀤𑀺. ‘‘𑀲𑀢𑁆𑀢𑁆𑀬𑀭𑀳𑁂𑀲𑁆𑀯𑁂𑀬𑁆𑀬𑀸𑀤𑀻’’𑀢𑀺 (𑁬-𑁧𑁧) 𑀲𑀼𑀢𑁆𑀢𑀁 𑀯𑀺𑀲𑁂𑀲𑀯𑀺𑀳𑀺𑀢𑀁, 𑀢𑁂𑀦𑀸𑀳- ‘𑀲𑀸𑀫𑀜𑁆𑀜 𑀯𑀺𑀥𑀸𑀦𑀢𑁄’𑀘𑁆𑀘𑀸𑀤𑀺. 𑀲𑀢𑁆𑀢𑀺𑀯𑀺𑀲𑀺𑀝𑁆𑀞𑁂𑀘𑁆𑀘𑀸𑀤𑀺𑀦𑀸 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀢𑀺 ‘𑀲𑀢𑁆𑀢𑀻’𑀢𑀺𑀆𑀤𑀺𑀦𑀸. 𑀓𑀣𑀁 𑀲𑀢𑁆𑀢𑀺𑀯𑀺𑀲𑀺𑀝𑁆𑀞𑀢𑀸 𑀓𑀢𑁆𑀢𑀼𑀦𑁄𑀢𑀺 𑀆𑀳- ‘𑀢𑀁𑀬𑁄𑀕𑀸’𑀢𑀺. 𑀢𑀸𑀬 𑀲𑀢𑁆𑀢𑀺𑀬𑀸 𑀬𑁄𑀕𑁄 𑀢𑀁𑀬𑁄𑀕𑁄. 𑀅𑀯𑀲𑁆𑀲𑀓𑀸𑀥𑀫𑀻𑀡𑀢𑀸𑀯𑀺𑀲𑀺𑀝𑁆𑀞𑁂 𑀢𑀼 𑀓𑀢𑁆𑀢𑀭𑀺 𑀓𑀺𑀘𑁆𑀘𑀸𑀦𑀁 𑀢𑀤𑀜𑁆𑀜𑁂𑀲𑀜𑁆𑀘 𑀪𑀸𑀯𑀸𑀬 𑀯𑀺𑀲𑀼𑀁- 𑀲𑀼𑀢𑁆𑀢𑀺𑀢𑀁, 𑀢𑁂𑀦, 𑀯𑀼𑀢𑁆𑀢𑀁 ‘𑀆𑀯𑀲𑁆𑀲𑀓𑀸𑀥𑀫𑀻𑀡𑀢𑀸 𑀯𑀺𑀲𑀺𑀝𑁆𑀞𑁂𑀯 𑀓𑀢𑁆𑀢𑀭𑀻’𑀢𑀺. 𑀲𑀩𑁆𑀩𑀢𑁆𑀣𑁂𑀯𑁂𑀢𑁆𑀣 ‘𑀉𑀤𑁆𑀥𑀁 𑀫𑀼𑀳𑀼𑀢𑁆𑀢𑀢𑁄’𑀢𑀺𑀆𑀤𑀺𑀦𑀸 𑀏𑀓𑁂𑀓𑀫𑀼𑀤𑀸𑀳𑀭𑀡𑀁 𑀓𑀫𑁂𑀦 𑀤𑀲𑁆𑀲𑀺𑀢𑀁. 𑀪𑁄𑀢𑀸 𑀭𑀚𑁆𑀚𑀁 𑀓𑀸𑀢𑀩𑁆𑀩𑀦𑁆𑀢𑀺 𑀅𑀭𑀳𑁂, 𑀪𑀯𑀢𑀸 𑀭𑀚𑁆𑀚𑀁 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀪𑀯𑀁 𑀅𑀭𑀳𑁄𑀢𑀺 𑀧𑀦 𑀅𑀭𑀳𑀓𑀢𑁆𑀢𑀼𑀢𑁆𑀢𑀧𑁆𑀧𑀓𑀸𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀯𑀫𑀼𑀧𑀭𑀺𑀧𑀺. 𑀲𑀩𑁆𑀩𑀫𑁂𑀢𑀁 𑀩𑀳𑀼𑀮𑀕𑁆𑀕𑀳𑀡𑀸𑀦𑀼𑀪𑀸𑀯𑁂𑀦𑁂𑀢𑀺 𑀯𑀺𑀜𑁆𑀜𑁂𑀬𑁆𑀬𑀁.

𑀕𑀮𑁂𑀘𑁄𑀧𑀓𑁄𑀢𑀺 𑀅𑀮𑁄𑀧𑀲𑀫𑀸𑀲𑁄. 𑀅𑀪𑀺𑀫𑀢𑁄 𑀧𑀭𑁂𑀳𑀺. 𑀅𑀭𑀳𑀸𑀤𑀻𑀲𑀼 𑀯𑀺𑀳𑀺𑀢𑀧𑁆𑀧𑀘𑁆𑀘𑀬𑁂𑀳𑀻𑀢𑀺 ‘‘𑀲𑀢𑁆𑀢𑁆𑀬𑀭𑀳𑁂𑀲𑁆𑀯𑁂𑀬𑁆𑀬𑀸𑀤𑀻’’ (𑁬-𑁧𑁧) 𑀘 ‘‘𑀲𑀻𑀮𑀸𑀪𑀺𑀓𑁆𑀔𑀜𑁆𑀜𑀸𑀯𑀲𑁆𑀲𑀓𑁂𑀲𑀼 𑀡𑀻’’𑀢𑀺 (𑁫-𑁫𑁩) 𑀘 𑀅𑀭𑀳𑀸𑀤𑀻𑀲𑀼 𑀯𑀺𑀳𑀺𑀢𑀧𑁆𑀧𑀘𑁆𑀘𑀬𑁂𑀳𑀺. 𑀉𑀧𑀸𑀤𑀸𑀦𑀲𑀻𑀮𑁄 𑀲𑀺𑀓𑁆𑀔𑀸𑀧𑀦𑀲𑀻𑀮𑁄. 𑀫𑀼𑀡𑁆𑀟𑀦𑀁 𑀥𑀫𑁆𑀫𑁄 𑀲𑀪𑀸𑀯𑁄 𑀬𑁂𑀲𑀁 𑀢𑁂 𑀫𑀼𑀡𑁆𑀟𑀦𑀥𑀫𑁆𑀫𑀸. 𑀯𑀥𑀼𑀁 𑀓𑀢𑀧𑀭𑀺𑀕𑁆𑀕𑀳𑀁 𑀲𑀸𑀯𑀺𑀝𑁆𑀞𑀸𑀬𑀦𑀸 𑀫𑀼𑀡𑁆𑀟𑀬𑀦𑁆𑀢𑀺 𑀏𑀢𑁂𑀲𑀁 𑀓𑀼𑀮𑀥𑀫𑁆𑀫𑁄.

𑀓𑀸𑀧𑀦𑀸𑀬𑀫𑀸𑀲𑀺𑀁𑀲𑀸 𑀦𑀸𑀫𑁂𑀘𑁆𑀘𑀸𑀳- ‘𑀅𑀧𑁆𑀧𑀢𑁆𑀢𑀲𑁆𑀲𑁂’𑀘𑁆𑀘𑀸𑀤𑀺. 𑀓𑀺𑀭𑀺𑀬𑀸 𑀯𑀺𑀲𑁂𑀲𑀓𑀢𑁆𑀢𑀼𑀯𑀺𑀲𑀬𑀸𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀲𑁆𑀲 𑀬𑁄 𑀓𑀢𑁆𑀢𑀸 𑀲𑁄 𑀯𑀺𑀲𑀬𑁄 ¶ 𑀬𑀲𑁆𑀲𑀸 𑀲𑀸 𑀢𑀣𑀸 𑀯𑀼𑀢𑁆𑀢𑀸. 𑀓𑀺𑀭𑀺𑀬𑀸𑀯𑀺𑀲𑁂𑀲𑀓𑀢𑁆𑀢𑀼𑀯𑀺𑀲𑀬𑀢𑁆𑀢𑀫𑁂𑀯 𑀨𑀼𑀝𑀻 𑀓𑀢𑁆𑀢𑀼𑀫𑀸𑀳- ‘𑀅𑀲𑁆𑀲𑀸’𑀇𑀘𑁆𑀘𑀸𑀤𑀺. 𑀅𑀲𑁆𑀲𑀸 𑀚𑀻𑀯𑀦𑀓𑀺𑀭𑀺𑀬𑀸𑀬 𑀦𑀦𑁆𑀤𑀦 𑀓𑀺𑀭𑀺𑀬𑀸𑀬 𑀪𑀯𑀦𑀓𑀺𑀭𑀺𑀬𑀸𑀬 𑀯𑀸 𑀓𑀢𑁆𑀢𑀸 𑀢𑀁𑀓𑀺𑀭𑀺𑀬𑀁 𑀲𑀫𑁆𑀧𑀸𑀤𑁂𑀦𑁆𑀢𑁄 𑀪𑀯𑁂𑀬𑁆𑀬 𑀪𑀯𑀢𑀽𑀢𑀺 𑀅𑀢𑁆𑀣𑁄. 𑀚𑀻𑀯𑀢𑀼 𑀦𑀦𑁆𑀤𑀢𑀼 𑀪𑀯𑀢𑀽𑀢𑀺 𑀆𑀲𑀺𑀁𑀲𑀸𑀬𑀁 𑀧𑀬𑁄𑀕𑁂𑀦 𑀚𑀻𑀯𑀓 𑀦𑀦𑁆𑀤𑀓 𑀪𑀯𑀓𑀲𑀤𑁆𑀤𑀸𑀦𑀁 𑀢𑀁𑀲𑀫𑀸𑀦𑀢𑁆𑀣𑀢𑀸 𑀤𑀲𑁆𑀲𑀺𑀢𑀸.

𑀅𑀓𑁂𑀦𑁂𑀯𑀸𑀲𑀺𑀁 𑀲𑀦𑀢𑁆𑀣𑀲𑁆𑀲 𑀕𑀫𑀺𑀢𑀢𑁆𑀢𑀸𑀢𑀺 𑀆𑀲𑀺𑀁𑀲𑀦𑀸 𑀏𑀯 𑀅𑀢𑁆𑀣𑁄, 𑀢𑀲𑁆𑀲 𑀅𑀓𑀧𑁆𑀧𑀘𑁆𑀘𑀬𑁂𑀦𑁂𑀯 𑀕𑀫𑀺𑀢𑀢𑁆𑀢𑀸 𑀅𑀯𑀩𑁄𑀥𑀺𑀢𑀢𑁆𑀢𑀸. 𑀦𑀸𑀲𑀺𑀁 𑀲𑀦𑀢𑁆𑀣𑀲𑁆𑀲 𑀧𑀬𑁄𑀕𑁄𑀢𑀺 𑀆𑀲𑀺𑀁𑀲𑀦𑀸 𑀅𑀢𑁆𑀣𑁄 𑀬𑀲𑁆𑀲 𑀚𑀻𑀯𑀢𑀼 𑀦𑀦𑁆𑀤𑀢𑀼 𑀪𑀯𑀢𑁆𑀯𑀺𑀘𑁆𑀘𑀸𑀤𑀺𑀦𑁄 𑀲𑀤𑁆𑀤𑀦𑁆𑀢𑀭𑀲𑁆𑀲, 𑀢𑀲𑁆𑀲 𑀦𑀧𑁆𑀧𑀬𑁄𑀕𑁄𑀢𑀺 𑀅𑀢𑁆𑀣𑁄.

𑀓𑀭𑁄𑀢𑀺 𑀅𑀢𑁆𑀢𑀦𑁄 𑀨𑀮𑀦𑁆𑀢𑀺 𑀓𑀸𑀭𑀡𑀁.

𑀚𑀳𑀦𑁆𑀢𑀺 𑀉𑀤𑀓𑀦𑁆𑀢𑀺 𑀯𑀻𑀳𑀻𑀲𑀼 𑀳𑀸𑀬𑀦𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀚𑀳𑀸𑀢𑀺 𑀪𑀸𑀯𑁂 𑀧𑀤𑀢𑁆𑀣𑁂𑀢𑀺 𑀇𑀫𑀺𑀦𑀸𑀧𑀺 𑀲𑀁𑀯𑀘𑁆𑀙𑀭𑁂. 𑀪𑀸𑀯𑁂𑀇𑀘𑁆𑀘𑀲𑁆𑀲𑀢𑁆𑀣𑀫𑀸𑀳 ‘𑀧𑀤𑀢𑁆𑀣𑁂’𑀢𑀺. 𑀦𑀺𑀧𑁆𑀨𑀢𑁆𑀢𑀺𑀫𑀢𑁆𑀢𑀁 𑀓𑀺𑀭𑀺𑀬𑁄𑀧𑀸𑀤𑀸𑀦𑀦𑁆𑀢𑀺 𑀓𑁂𑀘𑀺.

𑀦𑀦𑀼 𑀘 𑀯𑀺𑀢𑁄𑀢𑀺 𑀧𑀜𑁆𑀘𑀫𑀻𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 ‘𑀯𑀺𑀢𑁄 𑀧𑀭𑀲𑁆𑀫𑀸 𑀜𑀸𑀇𑀘𑁆𑀘𑀲𑁆𑀫𑀸’𑀢𑀺 𑀯𑀢𑁆𑀢𑀩𑁆𑀩𑀁 𑀓𑀣𑀁 𑀯𑀺𑀧𑀼𑀩𑁆𑀩𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳- ‘𑀯𑀺𑀢𑁄 𑀧𑀭𑁄’𑀇𑀘𑁆𑀘𑀸𑀤𑀺. 𑀯𑀺𑀧𑀼𑀩𑁆𑀩𑁄 𑀬𑀲𑁆𑀲𑀲𑁄 𑀯𑀺𑀧𑀼𑀩𑁆𑀩𑁄. 𑀯𑀺𑀲𑀤𑁆𑀤𑀢𑁄 𑀥𑀸𑀢𑀼𑀫𑁆𑀳𑀺 𑀧𑀭𑀪𑀽𑀢𑁂 𑀲𑀢𑀺 𑀯𑀺𑀲𑀤𑁆𑀤𑁄 𑀧𑀼𑀩𑁆𑀩𑁄 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀲𑀩𑁆𑀩𑀁 𑀚𑀸𑀦𑀸𑀢𑀺, 𑀓𑀸𑀮𑀁 𑀚𑀸𑀦𑀸𑀢𑀻𑀢𑀺 𑀯𑀺𑀕𑁆𑀕𑀳𑁄.

𑀦𑀸𑀫𑀚𑀸𑀢𑀺𑀕𑀼𑀡𑀓𑀺𑀭𑀺𑀬𑀸 𑀤𑀩𑁆𑀩𑀲𑀫𑁆𑀩𑀦𑁆𑀥𑀢𑁄 𑀧𑀜𑁆𑀘𑀯𑀺𑀥𑀢𑁆𑀢𑁂𑀧𑀺 𑀓𑀫𑁆𑀫𑀲𑁆𑀲 𑀓𑁆𑀭𑀺𑀬𑀢𑁆𑀣𑀲𑁆𑀲𑀸𑀯𑀥𑀺𑀭𑀬𑀫𑀼𑀧𑀸𑀤𑀺𑀦𑁆𑀦𑁄𑀢𑀺 𑀓𑁆𑀭𑀺𑀬𑀢𑁆𑀣𑀲𑀫𑁆𑀩𑀦𑁆𑀥𑀸 𑀓𑀺𑀭𑀺𑀬𑀸𑀓𑀫𑁆𑀫𑀲𑁆𑀲𑁂𑀳 𑀕𑀳𑀡𑀁. 𑀢𑀜𑁆𑀘 𑀦𑀺𑀩𑁆𑀩𑀢𑁆𑀢𑀺𑀯𑀺𑀓𑀢𑀺𑀧𑀢𑁆𑀢𑀺𑀪𑁂𑀤𑁂𑀦 𑀢𑀺𑀯𑀺𑀥𑀁, 𑀢𑀺𑀯𑀺𑀥𑀲𑁆𑀲𑀸𑀧𑁆𑀬𑁂𑀢𑀲𑁆𑀲 𑀯𑀺𑀲𑁂𑀲𑀸𑀦𑀼𑀧𑀸𑀦𑀢𑁄 𑀕𑀳𑀡𑀦𑁆𑀢𑀺 𑀓𑀫𑁂𑀦𑀼𑀤𑀸𑀳𑀭𑀦𑁆𑀢𑁄 𑀆𑀳- ‘𑀓𑀭𑀓𑀭𑀡𑁂’𑀇𑀘𑁆𑀘𑀸𑀤𑀺.

𑀮𑁄𑀓𑀯𑀺𑀤𑀽𑀢𑀺𑀆𑀤𑀺𑀤𑀲𑁆𑀲𑀦𑀢𑁄 ¶ 𑀓𑁆𑀯𑀘𑀺𑀕𑁆𑀕𑀳𑀡𑁂 𑀧𑀬𑁄𑀚𑀦𑀁 𑀯𑀢𑁆𑀢𑀼𑀫𑀸𑀳- ‘𑀓𑀫𑁆𑀫𑀢𑁄’𑀘𑁆𑀘𑀸𑀤𑀺. 𑀦𑀦𑀼 𑀘 𑀓𑁆𑀯𑀘𑀺𑀕𑁆𑀕𑀳𑀡𑁂𑀦𑁂𑀯 ‘𑀆𑀤𑀺𑀘𑁆𑀘𑀁 𑀧𑀲𑁆𑀲𑀢𑀺’𑀘𑁆𑀘𑀸𑀤𑁄𑀧𑀺 (𑀦𑀺𑀯𑀢𑁆𑀢𑀺) 𑀯𑀢𑁆𑀢𑀼𑀁 𑀲𑀓𑁆𑀓𑀸 𑀓𑀲𑁆𑀫𑀸 ‘𑀩𑀳𑀼𑀮𑀸𑀥𑀺𑀓𑀸𑀭𑀸’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘𑀢𑁂𑀦𑁂’𑀘𑁆𑀘𑀸𑀤𑀺. 𑀢𑁂𑀦𑀸𑀢𑀺 𑀬𑁂𑀦 𑀓𑁆𑀯𑀘𑀺𑀕𑁆𑀕𑀳𑀡𑀁 𑀓𑀼𑀢𑁄𑀘𑀺𑀬𑁂𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀓𑀢𑀁 𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀢𑀺 𑀯𑀸 𑀓𑁆𑀯𑀘𑀺𑀕𑁆𑀕𑀳𑀡𑁂𑀦. 𑀅𑀣 𑀆𑀤𑀺𑀘𑁆𑀘𑀁 𑀧𑀲𑁆𑀲𑀢𑀺𑀘𑁆𑀘𑀸𑀤𑁄 𑀯𑀺𑀬 𑀓𑀫𑁆𑀫𑀓𑀭𑀸𑀤𑀻𑀲𑀼𑀧𑀺 𑀦𑀺𑀯𑀢𑁆𑀢𑀺𑀫𑀤𑀲𑁆𑀲𑁂𑀢𑁆𑀯𑀸 ‘𑀓𑁆𑀯𑀘𑀻𑀢𑀺 𑀓𑀺𑀁 𑀓𑀫𑁆𑀫𑀓𑀭𑁄’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳- ‘𑀬𑀚𑁆𑀚𑁂𑀯’𑀫𑀺𑀘𑁆𑀘𑀸𑀤𑀺.

𑀢𑀲𑁆𑀲𑀸𑀢𑀺 𑀩𑀳𑀼𑀮𑀯𑀘𑀦𑀲𑁆𑀲, 𑀫𑀳𑀸𑀥𑀺𑀓𑀸𑀭𑀢𑁆𑀢𑀸𑀢𑀺 𑀫𑀳𑀸𑀯𑀺𑀲𑀬𑀢𑁆𑀢𑀸. 𑀓𑀼𑀢𑁄𑀘𑀺𑀬𑁂𑀯𑀸𑀢𑀺 𑀓𑀼𑀢𑁄𑀘𑀺 𑀥𑀸𑀢𑀼𑀢𑁄𑀬𑁂𑀯. 𑀅𑀣𑁂𑀳 𑀓𑀲𑁆𑀫𑀸 𑀦 𑀳𑁄𑀢𑀺 𑀤𑁂𑀯𑀤𑀢𑁆𑀢𑁄 𑀲𑀬𑀢𑀺 𑀤𑀸𑀢𑁆𑀢𑁂𑀦 𑀮𑀼𑀦𑀸𑀢𑀺 𑀲𑀼𑀦𑀔𑀸𑀦𑀁 𑀤𑀤𑀸𑀢𑀺 𑀦𑀕𑀭𑀸 𑀅𑀧𑁂𑀢𑀺 𑀣𑀸𑀮𑀺𑀬𑀁 𑀧𑀘𑀢𑀺 𑀫𑀸𑀢𑀼 𑀲𑀭𑀢𑀻’’𑀢𑀺, 𑀲𑀩𑁆𑀩𑀫𑁂𑀯𑁂𑀤𑀁 𑀓𑀺𑀭𑀺𑀬𑀸 (𑀬𑀸) 𑀪𑀺𑀲𑀫𑁆𑀩𑀦𑁆𑀥𑀻𑀬𑀢𑀻𑀢𑀺 𑀬𑀤𑀺𑀧𑁂𑀯𑀁, 𑀢𑀣𑀸𑀧𑀺 𑀓𑀫𑁆𑀫𑀢𑁆𑀢𑁂𑀦𑁂𑀯 𑀬𑀁 𑀯𑀢𑁆𑀢𑀼 𑀫𑀺𑀘𑁆𑀙𑀺𑀢𑀁 𑀦 𑀓𑀸𑀭𑀓𑀦𑁆𑀢𑀭𑀢𑁆𑀢𑁂𑀦 𑀦𑀸𑀧𑀺 𑀲𑀫𑁆𑀩𑀦𑁆𑀥𑀪𑀸𑀯𑁂𑀦, 𑀢𑀲𑁆𑀲𑁂𑀯 𑀓𑀫𑁆𑀫𑀲𑀤𑁆𑀤𑁂𑀦 𑀕𑀳𑀡𑀁 𑀓𑀫𑁆𑀫𑀯𑀘𑀦𑀲𑀸𑀫𑀢𑁆𑀣𑀺𑀬𑀸, 𑀅𑀜𑁆𑀜𑀣𑀸 𑀲𑁆𑀬𑀸𑀤𑀺𑀢𑁄𑀘𑁆𑀘𑁂𑀯 𑀯𑀤𑁂𑀬𑁆𑀬 𑀓𑀺𑀁 𑀓𑀫𑁆𑀫𑀸𑀢𑀺 𑀯𑀘𑀦𑁂𑀦𑀸𑀢𑀺.

𑀯𑁂𑀤𑀦𑁆𑀢𑀺 𑀏𑀢𑁆𑀣 𑀅𑀢𑁆𑀣𑀫𑀸𑀳 𑀯𑀺𑀢𑁆𑀢𑀺𑀦𑁆𑀢𑀺, 𑀢𑀼𑀝𑁆𑀞𑀺𑀦𑁆𑀢𑀺 𑀅𑀢𑁆𑀣𑁄.

𑀢𑀜𑁆𑀘𑁂𑀢𑀺 𑀉𑀧𑀫𑀸𑀦𑀲𑁆𑀲 𑀧𑀭𑀸𑀫𑀸𑀲𑁄. 𑀪𑁂𑀤𑁂𑀦 𑀯𑀺𑀯𑀭𑀡𑀦𑁆𑀢𑀺 𑀲𑀫𑀸𑀦𑀸𑀤𑀻𑀳𑀻𑀢𑀺 𑀅𑀯𑀢𑁆𑀯𑀸 𑀪𑁂𑀤𑁂𑀦 𑀯𑀺𑀯𑀭𑀡𑀁. 𑀢𑀼𑀮𑁆𑀬𑀢𑀸𑀬𑀼𑀧𑀮𑀩𑁆𑀪𑀫𑀸𑀦𑀲𑁆𑀲 𑀲𑀤𑀺𑀲𑀸𑀤𑀺𑀲𑀤𑁆𑀤𑀯𑀘𑀦𑀻𑀬𑀢𑁆𑀢𑀸 𑀅𑀯𑀬𑀯𑀢𑁆𑀣𑀸𑀦𑀼𑀕𑀫𑁂𑀦𑀸𑀢𑁆𑀢𑀦𑁄-𑀪𑀺𑀥𑁂𑀬𑁆𑀬𑁂 𑀲𑀤𑀺𑀲𑀸𑀤𑀺𑀲𑀤𑁆𑀤𑀸𑀦𑀫𑁆𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀸𑀭𑀓𑀁 𑀲𑀸𑀥𑀓𑀁 𑀦𑀺𑀩𑁆𑀩𑀢𑁆𑀢𑀓𑀦𑁆𑀢𑀺 𑀅𑀦𑀢𑁆𑀣𑀦𑁆𑀢𑀭𑀁. 𑀓𑀭𑁄𑀢𑀺 𑀓𑀺𑀭𑀺𑀬𑀁 𑀦𑀺𑀩𑁆𑀩𑀢𑁆𑀢𑁂𑀢𑀺 𑀦𑀺𑀫𑀺𑀢𑁆𑀢𑀪𑀸𑀯𑁂𑀦𑀸𑀢𑀺 𑀓𑀸𑀭𑀓𑀁. 𑀓𑀢𑁆𑀢𑀸𑀤𑀻𑀦𑀁 𑀓𑀺𑀭𑀺𑀬𑀸𑀦𑀺𑀫𑀺𑀢𑁆𑀢𑀢𑁆𑀢𑀦𑁆𑀢𑀼 𑀲𑀬𑀫𑁂𑀯 ‘𑀢𑀢𑁆𑀣 𑀓𑀢𑁆𑀢𑀸’𑀢𑀺𑀆𑀤𑀺𑀦𑀸 𑀪𑁂𑀤𑁂𑀦 𑀧𑀓𑀸𑀲𑀬𑀺𑀲𑁆𑀲𑀢𑀺. 𑀓𑀺𑀭𑀺𑀬𑀸𑀦𑀺𑀫𑀺𑀢𑁆𑀢𑀁… 𑀦𑀺𑀩𑁆𑀩𑀢𑁆𑀢𑀓𑁂𑀲𑀼 𑀓𑀢𑁆𑀢𑀸𑀤𑀻𑀲𑀼 𑀙𑀲𑀼𑀧𑀺 𑀭𑀼𑀴𑁆𑀳𑀢𑁆𑀢𑀸 𑀢𑁂𑀦𑁂𑀢𑁆𑀣 𑀓𑀢𑁆𑀢𑀸𑀯𑀸𑀢𑁆𑀢𑀧𑁆𑀧𑀥𑀸𑀦𑁄, 𑀓𑀭𑀡𑀸𑀤𑀬𑁄𑀧𑁆𑀬𑀧𑁆𑀧𑀥𑀸𑀦𑀸 𑀓𑀸𑀭𑀓𑀩𑁆𑀬𑀧𑀤𑁂𑀲𑁄 𑀮𑀩𑁆𑀪𑀦𑁆𑀢𑁂… ¶ 𑀅𑀜𑁆𑀜𑀣𑀸 𑀓𑀸𑀭𑀓𑀲𑀤𑁆𑀤𑁂𑀦 𑀢𑁂𑀲𑀁 𑀕𑀳𑀡𑀁 𑀦 𑀲𑀺𑀬𑀸𑀢𑀺. 𑀓𑀺𑀫𑀺𑀤𑀁 𑀓𑀸𑀭𑀓𑀦𑁆𑀢𑁆𑀬𑀸𑀳- ‘𑀲𑀢𑁆𑀢𑀺𑀓𑀸𑀭𑀓’𑀦𑁆𑀢𑀺. 𑀏𑀯𑀁 𑀘𑀭𑀳𑀺 𑀤𑀩𑁆𑀩𑀸𑀤𑀻𑀦𑀁 𑀓𑀣𑀁 𑀓𑀸𑀭𑀓𑀢𑁆𑀢𑀫𑀺𑀘𑁆𑀘𑀸𑀳- ‘𑀢𑀤𑀥𑀺𑀓𑀭𑀡𑀸’𑀢𑀺𑀆𑀤𑀺. 𑀢𑀲𑁆𑀲𑀸 𑀲𑀢𑁆𑀢𑀺𑀬𑀸 𑀆𑀥𑀸𑀭𑀸 𑀦𑀺𑀲𑁆𑀲𑀬𑀸𑀢𑀺 𑀅𑀢𑁆𑀣𑁄, 𑀧𑀼𑀁 𑀦𑀧𑀼𑀁𑀲𑀓𑁂 𑀅𑀥𑀺𑀓𑀭𑀡𑀲𑀤𑁆𑀤𑁄. 𑀢𑁂𑀲𑀼 𑀤𑀩𑁆𑀩𑀸 𑀤𑀻𑀲𑀼 𑀢𑀺𑀝𑁆𑀞𑀢𑀻𑀢𑀺 𑀢𑀢𑁆𑀭𑀝𑁆𑀞𑀸, 𑀲𑀢𑁆𑀢𑀺. 𑀢𑀲𑁆𑀲𑀸 𑀪𑀸𑀯𑁄 𑀢𑀢𑁆𑀭𑀝𑁆𑀞𑀢𑀸, 𑀢𑀸𑀬. 𑀅𑀣 𑀤𑀩𑁆𑀩𑀸𑀤𑀻𑀦𑀁 𑀫𑀼𑀔𑁆𑀬𑀢𑁄 𑀓𑀸𑀭𑀓𑀢𑁆𑀢𑁂 𑀲𑀢𑀺 𑀓𑀺𑀫𑀸𑀬𑀸𑀢𑀦𑁆𑀢𑁆𑀬𑀸𑀳 ‘𑀬𑀤𑀺’𑀘𑁆𑀘𑀸𑀤𑀺.

𑀢𑁂𑀲𑀦𑁆𑀢𑀺 𑀓𑀢𑁆𑀢𑀸𑀤𑀺𑀓𑀸𑀭𑀓𑀸𑀦𑀁. 𑀅𑀜𑁆𑀜𑀫𑀜𑁆𑀜𑀩𑁆𑀬𑀸𑀯𑀼𑀢𑁆𑀢𑀭𑀽𑀧𑀢𑁆𑀢𑀸𑀢𑀺 𑀅𑀜𑁆𑀜𑀫𑀜𑁆𑀜𑀢𑁄 𑀩𑁆𑀬𑀸𑀯𑀼𑀢𑁆𑀢𑀁 𑀦𑀺𑀯𑀢𑁆𑀢𑀁 𑀭𑀽𑀧𑀁 𑀓𑀭𑀡𑀸𑀤𑀺𑀲𑀪𑀸𑀯𑁄 𑀬𑁂𑀲𑀁 𑀓𑀢𑁆𑀢𑀸𑀤𑀺 𑀓𑀸𑀭𑀓𑀸𑀦𑀁 𑀢𑁂 𑀢𑀣𑀸 𑀯𑀼𑀢𑁆𑀢𑀸, 𑀢𑁂𑀲𑀁 𑀪𑀸𑀯𑁄 𑀢𑀢𑁆𑀢𑀁 𑀢𑀲𑁆𑀫𑀸. 𑀓𑀭𑀡 𑀭𑀽𑀧𑀦𑁆𑀢𑀺 𑀓𑀭𑀡𑀁 𑀭𑀽𑀧𑀁 𑀲𑀪𑀸𑀯𑁄 𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲 𑀢𑀁 𑀢𑀣𑀸 𑀯𑀼𑀢𑁆𑀢𑀁. 𑀏𑀯𑀜𑁆𑀘𑀲𑀢𑀺𑀓𑁄 𑀤𑁄𑀲𑁄𑀘𑁆𑀘𑀸𑀳 ‘𑀢𑀣𑀸 𑀘𑁂’𑀘𑁆𑀘𑀸𑀤𑀺. 𑀓𑁂𑀦𑀘𑀺 𑀲𑀼𑀓𑀭𑀢𑁆𑀢𑁂𑀦 𑀲𑀧𑁆𑀧𑀥𑀸𑀦𑀢𑁆𑀢𑀯𑀘𑀦𑀺𑀘𑁆𑀙𑀸𑀬𑀁 ‘𑀣𑀸𑀮𑀻 𑀧𑀘𑀢𑀻’𑀢𑀺 𑀪𑀯𑀢𑀺. 𑀢𑀢𑁆𑀭𑁂𑀯𑀼𑀓𑁆𑀓𑀁𑀲𑀯𑀘 𑀦𑀺𑀘𑁆𑀙𑀸𑀬𑀁 ‘𑀣𑀸𑀮𑀺𑀬𑀸 𑀧𑀘𑀢𑀻’𑀢𑀺.

𑀏𑀯𑀜𑁆𑀘𑀓𑀢𑁆𑀯𑀸𑀢𑀺 𑀦𑀺𑀧𑀸𑀢𑀲𑀫𑀼𑀤𑀸𑀬𑁄-𑀬𑀁 𑀳𑁂𑀢𑁆𑀯𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀓𑀢𑁆𑀢𑀸 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀢𑁆𑀢𑀼𑀝𑁆𑀞𑀓𑀺𑀭𑀺𑀬𑀸𑀦𑀺𑀫𑀺𑀢𑁆𑀢𑀲𑁆𑀲 𑀓𑀢𑁆𑀢𑀼𑀦𑁄 𑀉𑀤𑀸𑀳𑀭𑀡𑀁 ‘𑀳𑀲𑀢𑀺 𑀦𑀘𑁆𑀘𑀢𑀻’𑀢𑀺. 𑀢𑀤𑀢𑁆𑀣𑁂𑀢𑀺 𑀢𑀸𑀬 𑀓𑀫𑁆𑀫𑀲𑀫𑀯𑀸𑀬𑀺𑀦𑀺𑀬𑀸 𑀧𑀘𑀦𑀸𑀤𑀺𑀓𑀺𑀭𑀺𑀬𑀸𑀬 𑀅𑀢𑁆𑀣𑁂 𑀅𑀥𑀺𑀲𑁆𑀲𑀬𑀦𑀸𑀤𑀬𑁄 𑀧𑀯𑀢𑁆𑀢𑁂𑀦𑁆𑀢𑁄 𑀓𑀺𑀭𑀺𑀬𑀸𑀬 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀫𑀼𑀧𑀭𑀺𑀧𑀺.

𑀑𑀤𑀦𑀁 𑀧𑀘𑀢𑀺 𑀤𑁂𑀯𑀤𑀢𑁆𑀢𑁄𑀢𑀺 𑀓𑀫𑁆𑀫𑀝𑁆𑀞𑀓𑀺𑀭𑀺𑀬𑀸𑀬 𑀦𑀺𑀫𑀺𑀢𑁆𑀢𑀪𑀽𑀢𑀲𑁆𑀲 𑀓𑀢𑁆𑀢𑀼𑀦𑁄 𑀉𑀤𑀸𑀳𑀭𑀡𑀁. 𑀪𑀸𑀚𑀦𑀲𑀗𑁆𑀔𑀭𑀡𑀫𑀥𑀺𑀲𑁆𑀲𑀬𑀦𑀁. 𑀆𑀤𑀺𑀲𑀤𑁆𑀤𑁂𑀦 𑀢𑀡𑁆𑀟𑀼𑀮𑀯𑀧𑀦𑀇𑀦𑁆𑀥𑀦𑀸𑀧𑀳𑀭𑀡𑀸𑀤𑀬𑁄 𑀕𑀬𑁆𑀳𑀦𑁆𑀢𑀺. 𑀤𑁆𑀯𑀺𑀥𑀸𑀧𑀢𑁆𑀢𑀺𑀬𑀦𑁆𑀢𑀺 𑀭𑀼𑀓𑁆𑀔𑀸𑀤𑀻𑀦𑀁 𑀤𑁆𑀯𑀺𑀥𑀸 𑀧𑀯𑀢𑁆𑀢𑀺𑀬𑀁.

𑀩𑁆𑀬𑀸𑀧𑀦𑁂𑀢𑀺 𑀲𑀫𑁆𑀩𑀦𑁆𑀥𑁂. 𑀕𑀺𑀭𑀥𑀸𑀢𑀼𑀢𑁄 𑀅𑀧𑁆𑀧𑀘𑁆𑀘𑀬𑁂- ‘‘𑀏𑀑𑀦𑀫 𑀯𑀡𑁆𑀡𑁂’’𑀢𑀺 (𑁧𑁩𑁭) 𑀲𑀼𑀢𑁆𑀢𑁂 ‘𑀅𑀯𑀡𑁆𑀡𑁂𑀢𑀺 𑀬𑁄𑀕𑀯𑀺𑀪𑀸𑀕𑀢𑁄 𑀕𑀓𑀸𑀭𑁂 𑀇𑀓𑀸𑀭𑀲𑁆𑀲 𑀅𑀢𑁆𑀢𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀅𑀯𑀡𑁆𑀡𑁂𑀢𑀺 𑀬𑁄𑀕𑀯𑀺𑀪𑀸𑀕𑀸 𑀅𑀢𑁆𑀢𑀁 𑀇𑀲𑁆𑀲𑀸’𑀢𑀺. 𑀅𑀜𑁆𑀜𑀣𑀸𑀧𑀺 𑀧𑀝𑀺𑀧𑀸𑀤𑁂𑀢𑀼𑀫𑀸𑀳- ‘𑀏𑀲𑁆𑀲 𑀯𑀸’𑀢𑀺𑀆𑀤𑀺. 𑀏𑀲𑁆𑀲𑀸𑀢𑀺 ‘‘𑀮𑀳𑀼𑀲𑁆𑀲𑀼𑀧𑀦𑁆𑀣𑀲𑁆𑀲𑀸’’𑀢𑀺 (𑁫-𑁮𑁭) 𑀓𑀢𑀏𑀲𑁆𑀲. 𑀲𑀓𑀮𑁂𑀦𑀸𑀢𑀺 ‘𑀏𑀑𑀦𑀫 𑀯𑀡𑁆𑀡𑁂’’𑀢𑀺 𑀲𑀓𑀮𑁂𑀦 𑀲𑀼𑀢𑁆𑀢𑁂𑀦. 𑀧𑀼𑀭𑀻𑀢𑀺 𑀦𑀺𑀧𑀸𑀢𑁄.

𑀈𑀲𑀓𑁆𑀓𑀭𑁄𑀢𑀺 ¶ 𑀩𑀺𑀦𑁆𑀤𑀼𑀮𑁄𑀧𑁄, 𑀤𑁆𑀯𑀺𑀢𑁆𑀢𑀁, 𑀲𑀸𑀫𑀜𑁆𑀜𑁂𑀦 𑀯𑀺𑀥𑀸𑀦𑀢𑁄𑀢𑀺 𑀧𑀭𑁂𑀲𑀁 𑀯𑀺𑀲𑁂𑀲𑀯𑀺𑀥𑀸𑀦𑀲𑀩𑁆𑀪𑀸𑀯𑀫𑀸𑀳. 𑀕𑀡𑀺𑀓𑀸𑀮𑀬𑀁 𑀕𑀡𑀺𑀓𑀸𑀦𑀁 𑀕𑁂𑀳𑀁. 𑀦𑁂𑀧𑀣𑁆𑀬𑀫𑀸𑀓𑀧𑁆𑀧𑁄. 𑀤𑀢𑁆𑀢𑁄𑀮𑀤𑁆𑀥𑁄𑀢𑀺 𑀧𑀘𑁆𑀘𑀬𑀲𑁆𑀲 𑀓𑀫𑁆𑀫𑀲𑀸𑀥𑀦𑀢𑁆𑀢𑀁 𑀤𑀻𑀧𑁂𑀢𑀼𑀁𑀯𑀼𑀢𑁆𑀢𑀁. 𑀯𑀺𑀦𑀸𑀮𑀺𑀗𑁆𑀕𑀯𑀘𑀦𑁂𑀳𑀺 𑀧𑀸𑀝𑀺𑀧𑀤𑀺𑀓𑀢𑁆𑀣𑀁 𑀦𑀺𑀤𑁆𑀤𑀺𑀲𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀪𑀸𑀯𑁂𑀢𑀺 𑀲𑀩𑁆𑀩𑀮𑀺𑀗𑁆𑀕𑀲𑀗𑁆𑀔𑁆𑀬𑀸𑀲𑀫𑁆𑀩𑀦𑁆𑀥𑀬𑁄𑀕𑁆𑀕𑀧𑀸𑀝𑀺𑀧𑀤𑀺𑀓𑀢𑁆𑀣𑀲𑀸𑀫𑀜𑁆𑀜𑁂 𑀧𑀘𑁆𑀘𑀬𑀦𑀺𑀫𑀺𑀢𑁆𑀢𑀢𑁆𑀢𑁂𑀦 𑀕𑀳𑀺𑀢𑁂𑀧𑀺 𑀲𑀸𑀫𑀜𑁆𑀜𑁂 𑀘𑀭𑀺𑀢𑀢𑁆𑀣𑀢𑁆𑀢𑀸 𑀮𑀺𑀗𑁆𑀕𑀯𑀘𑀦𑀁 𑀦𑀧𑁆𑀧𑀥𑀸𑀦𑀦𑁆𑀢𑀺 𑀇𑀝𑁆𑀞𑀺𑀆𑀯𑀼𑀥𑀦𑁆𑀢𑀻 𑀇𑀢𑁆𑀣𑀺 𑀦𑀧𑀼𑀁𑀲𑀓𑁂𑀪𑀸𑀯𑁂, 𑀧𑀸𑀓𑀸𑀢𑀺 𑀩𑀳𑀼𑀯𑀘𑀦𑁂𑀧𑀺 𑀪𑀸𑀯𑁂 𑀪𑀯𑀢𑀺 𑀏𑀯.

𑀲𑀧𑀸𑀤𑀻𑀳𑀺 𑀅𑀧𑀸𑀤𑀻𑀳𑀺𑀘𑀸𑀢𑀺 𑀧𑀸𑀤𑀺𑀲𑀳𑀺𑀢𑁂𑀳𑀺 𑀧𑀸𑀤𑀺𑀭𑀳𑀺𑀢𑁂𑀳𑀺 𑀘 𑀤𑀸𑀥𑀸𑀳𑀺.

𑀲𑀸𑀧𑀸𑀦𑀤𑁄𑀡𑀺𑀬𑀦𑁆𑀢𑀺 𑀲𑀸𑀭𑀫𑁂𑀬𑀸𑀦𑀁 𑀪𑀼𑀜𑁆𑀚𑀦𑀓𑀅𑀫𑁆𑀩𑀡𑁂. 𑀞𑀺𑀢𑀲𑀼𑀧𑀸𑀦 𑀯𑀫𑀣𑀼𑀯𑀺𑀬𑀸𑀢𑀺 𑀧𑀯𑀢𑁆𑀢𑀲𑀼𑀦𑀔𑀘𑁆𑀙𑀤𑁆𑀤𑀦𑀁 𑀯𑀺𑀬.

𑀬𑀣𑀸𑀤𑀲𑁆𑀲𑀦𑀦𑁆𑀢𑀺 𑀆𑀘𑀺𑀓𑁆𑀔𑀢𑀻𑀢𑀺 𑀬𑁄𑀚𑀦𑀸. 𑀢𑁂𑀦 𑀓𑀼𑀢𑁄𑀘𑀺 𑀥𑀸𑀢𑀼𑀢𑁄𑀢𑀺. 𑀕𑀡𑁆𑀳𑀦𑁆𑀢𑀻𑀢𑀺 𑀕𑀳=𑀉𑀧𑀸𑀤𑀸𑀦𑁂𑀘𑁆𑀘𑀲𑁆𑀲. 𑀲𑀮𑀸𑀓𑀸𑀲𑀤𑁆𑀤𑀲𑁆𑀲 𑀲𑀮𑀸𑀓𑀦𑁆𑀢𑀺. 𑀲𑀪𑀸𑀲𑀇𑀘𑁆𑀘𑀲𑁆𑀲 𑀅𑀦𑁆𑀢𑀩𑁆𑀬𑀜𑁆𑀚𑀦𑀮𑁄𑀧𑁂 𑀲𑀪𑀸𑀧𑀓𑀢𑀺𑀢𑁄 ‘‘𑀇𑀢𑁆𑀣𑀺 𑀬𑀫𑀢𑁆𑀯𑀸’’𑀢𑀺 (𑁩-𑁨𑁬) 𑀆𑀧𑁆𑀧𑀘𑁆𑀘𑀬𑁄. 𑀧𑀪𑀸𑀢𑀻𑀢𑀺 𑀆=𑀤𑀺𑀢𑁆𑀢𑀺𑀬𑀫𑀺𑀘𑁆𑀘𑀲𑁆𑀲.

𑀘𑀮𑀦𑀸𑀤𑀻𑀦𑀁 𑀲𑀻𑀮𑀸𑀤𑀻𑀲𑀼 𑀦𑀺𑀧𑁆𑀨𑀸𑀤𑀦𑀢𑁆𑀣𑀁 𑀯𑀺𑀲𑀼𑀁 𑀲𑀼𑀢𑁆𑀢𑀺𑀢𑀁 𑀧𑀭𑁂𑀳𑀺, 𑀇𑀥 𑀧𑀦 𑀩𑀳𑀼𑀮𑀁 𑀯𑀘𑀦𑁂𑀦𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀘𑀮𑀦𑀸𑀤𑀻𑀲𑀽’𑀢𑀺𑀆𑀤𑀺.

𑀓𑁆𑀮𑀺𑀓𑀬𑀓𑀺𑀘𑁆𑀘𑀢𑁆𑀭 𑀓𑀓𑀸𑀭𑀩𑀳𑀼𑀢𑁆𑀢𑀸 𑀓𑀓𑀸𑀭𑀸𑀢𑀺 𑀩𑀳𑀼𑀯𑀘𑀦𑀁. 𑀢𑀺𑀢𑀺𑀓𑁆𑀔𑀸 𑀇𑀘𑁆𑀘𑀸𑀤𑁄 𑀢𑀺𑀢𑀺𑀓𑁆𑀔𑀦𑀫𑀺𑀘𑁆𑀘𑀸𑀤𑀺𑀦𑀸 𑀯𑀺𑀕𑁆𑀕𑀳𑁄 ‘‘𑀇𑀢𑁆𑀣𑀺𑀬𑀫𑀢𑁆𑀯𑀸’’ (𑁩-𑁨𑁬). 𑀅𑀧𑀭𑀺 𑀧𑀞𑀺𑀢𑁄𑀢𑀺 𑀥𑀸𑀢𑀼𑀧𑀸𑀞𑁂 𑀅𑀧𑀭𑀺𑀧𑀞𑀺𑀢𑁄. 𑀧𑀸𑀡𑀺𑀯𑀺𑀲𑁂𑀲𑁄𑀢𑀺 𑀲𑀢𑁆𑀢𑀯𑀺𑀲𑁂𑀲𑁄. 𑀇𑀫𑀺𑀦𑀸 𑀘 ‘‘𑀬𑀣𑀸𑀓𑀣𑀜𑁆𑀘𑀺 𑀦𑀺𑀧𑁆𑀨𑀢𑁆𑀢𑀺, 𑀭𑀼𑀴𑁆𑀳𑀺𑀬𑀸 𑀅𑀢𑁆𑀣𑀦𑀺𑀘𑁆𑀙𑀬𑁄’’𑀢𑀺 𑀤𑀲𑁆𑀲𑁂𑀢𑀺.

𑀆𑀲𑀺𑀁 ¶ 𑀲𑀸𑀬𑀁 𑀕𑀫𑁆𑀫𑀫𑀸𑀦𑀸𑀬𑀁 𑀲𑀜𑁆𑀜𑀸𑀯𑀺𑀲𑀬𑁂 𑀥𑀸𑀢𑀽𑀳𑀺 𑀢𑀺𑀧𑁆𑀧𑀘𑁆𑀘𑀬𑁄 𑀓𑀺𑀘𑁆𑀘𑀧𑁆𑀧𑀘𑁆𑀘𑀬𑁄 𑀘 𑀬𑀣𑀸 𑀲𑀺𑀬𑀸𑀢𑀺 ‘‘𑀢𑀺𑀓𑀺𑀘𑁆𑀘𑀸𑀲𑀺𑀝𑁆𑀞𑁂’’𑀢𑀺 (𑁭-𑁨-𑁩) 𑀲𑀼𑀢𑁆𑀢𑀺𑀢𑀁 𑀓𑀘𑁆𑀘𑀸𑀬𑀦𑁂𑀦. 𑀢𑀫𑀺𑀳 𑀲𑀸𑀫𑀜𑁆𑀜𑁂𑀦 𑀯𑀺𑀥𑀸𑀦𑀸𑀯 𑀲𑀺𑀤𑁆𑀥𑀦𑁆𑀢𑀺 𑀦𑀺𑀭𑀽𑀧𑀬𑀺𑀢𑀼𑀫𑀸𑀳- ‘𑀓𑀘𑁆𑀘𑀸𑀬𑀦𑁂𑀦 𑀧𑀦𑁂’𑀘𑁆𑀘𑀸𑀤𑀺. 𑀢𑀩𑁆𑀩 𑀅𑀦𑀻𑀬𑀡𑁆𑀬 𑀢𑁂𑀬𑁆𑀬 𑀭𑀺𑀘𑁆𑀘𑀧𑁆𑀧𑀘𑁆𑀘𑀬𑀸𑀦𑀁 ‘‘𑀢𑁂 𑀓𑀺𑀘𑁆𑀘𑀸’’𑀢𑀺 (𑁭-𑁧-𑁨𑁨) 𑀓𑀺𑀘𑁆𑀘𑀲𑀜𑁆𑀜𑀁 𑀯𑀺𑀥𑀸𑀬 𑀲𑁂𑀲𑀸𑀦𑀁 ‘‘𑀅𑀜𑁆𑀜𑁂𑀓𑀺𑀢𑀻’’𑀢𑀺 (𑁭-𑁧-𑁨𑁩) 𑀓𑀺𑀢𑁆𑀲𑀜𑁆𑀜𑀸 𑀓𑀢𑀸 𑀓𑀘𑁆𑀘𑀸𑀬𑀦𑁂𑀦. 𑀢𑁂𑀦𑀸𑀳- ‘𑀓𑀺𑀢 𑀲𑀜𑁆𑀜𑁄’𑀢𑀺.

𑀢𑀩𑁆𑀩𑀸𑀤𑀺𑀧𑁆𑀧𑀘𑁆𑀘𑀬𑁄 𑀘 𑀯𑀺𑀳𑀺𑀢𑁄𑀢𑀺 𑀲𑀓𑀺𑀬𑀯𑁄𑀳𑀸𑀭𑁂𑀦𑀸𑀳. 𑀲𑀓𑀺𑀬 𑀲𑀢𑁆𑀣𑁂 𑀅𑀯𑀼𑀢𑁆𑀢𑀤𑁄𑀲𑀁 [𑀲𑀼𑀢𑁆𑀢𑀤𑁄𑀲𑀁] 𑀧𑀭𑀺𑀳𑀭𑀺𑀢𑁆𑀯𑀸 𑀯𑀓𑁆𑀔𑀫𑀸𑀦𑀦𑀬𑁂𑀦 𑀬𑀼𑀢𑁆𑀬𑀪𑀸𑀯𑀸 𑀢𑀣𑀸 𑀯𑀺𑀥𑀸𑀦𑁂 𑀅𑀬𑀼𑀢𑁆𑀢𑀢𑀁 𑀤𑀲𑁆𑀲𑁂𑀦𑁆𑀢𑁄 ‘𑀦𑀘𑀸𑀲𑀺𑀁 𑀲𑀸𑀬’𑀫𑀺𑀘𑁆𑀘𑀸𑀤𑀺𑀫𑀸𑀳. 𑀕𑀼𑀳𑀦𑀁, 𑀭𑀼𑀚𑀦𑀁, 𑀫𑁄𑀤𑀦𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀲𑀬𑀦𑀁 𑀯𑀸 𑀲𑁂𑀬𑁆𑀬𑀸. 𑀯𑀚𑀥𑀸𑀢𑀼𑀦𑁄 𑀯𑀲𑁆𑀲 𑀩𑀓𑀸𑀭𑁂𑀦 𑀪𑀯𑀺𑀢𑀩𑁆𑀩𑀁, 𑀲𑁄 𑀓𑀣𑀁 𑀬𑀓𑀸𑀭𑁂 𑀧𑀭𑀪𑀽𑀢𑁂 𑀅𑀲𑀢𑀻𑀢𑀺 𑀆𑀳- ‘𑀘𑀯𑀕𑁆𑀕𑀩𑀬𑀜𑀸𑀢𑀺𑀬𑁄𑀕𑀯𑀺𑀪𑀸𑀕𑀸 𑀯𑀲𑁆𑀲 𑀩𑁄’𑀢𑀺.

𑀭𑀺𑀭𑀺𑀬𑀧𑁆𑀧𑀘𑁆𑀘𑀬𑁂 𑀆𑀤𑀺𑀭𑀓𑀸𑀭𑀲𑁆𑀲 𑀅𑀦𑀼𑀩𑀦𑁆𑀥𑀢𑁆𑀢𑀸 𑀆𑀳- ‘𑀅𑀦𑁆𑀢𑀲𑀭𑀸𑀤𑀺 𑀮𑁄𑀧𑁄’𑀢𑀺.

𑀅𑀣 𑀲𑀭𑀽𑀧𑁂𑀘𑁆𑀘𑁂𑀢𑀸𑀯𑀢𑀺 𑀯𑀼𑀢𑁆𑀢𑁂- ‘𑀓𑀺𑀭𑀺𑀬𑀢𑁆𑀣𑀲𑁆𑀲 𑀲𑀭𑀽𑀧𑁂’𑀢𑀺 𑀓𑀣𑀁 𑀯𑀺𑀜𑁆𑀜𑀸𑀬𑀢𑀺𑀘𑁆𑀘𑀸𑀳- ‘𑀓𑀺𑀭𑀺𑀬𑀢𑁆𑀣𑀸’𑀢𑀺𑀘𑁆𑀘𑀸𑀤𑀺. 𑀦𑀦𑀼 𑀘 𑀮𑁄-𑀬𑀁 𑀓𑀢𑁆𑀢𑀭𑀺 𑀯𑀺𑀥𑀻𑀬 𑀫𑀸𑀦𑁄𑀓𑀣𑀫𑁂𑀢𑁆𑀣 𑀲𑀺𑀬𑀸𑀢𑁆𑀬𑀸𑀳- ‘𑀅𑀓𑀢𑁆𑀢𑀭𑀺𑀧𑀺’𑀘𑁆𑀘𑀸𑀤𑀺. 𑀅𑀪𑀺𑀫𑀢𑁄 𑀓𑀘𑁆𑀘𑀸𑀬𑀦𑀲𑁆𑀲. 𑀧𑀝𑀺𑀧𑀸𑀤𑀬𑀺𑀢𑀼𑀫𑀸𑀳- ‘𑀢𑀢𑁆𑀣𑀸’𑀢𑀺𑀆𑀤𑀺. 𑀓𑀭𑀡𑀁 𑀉𑀘𑁆𑀘𑀸𑀭𑀡𑀁, 𑀅𑀲𑁆𑀲 𑀓𑀭𑁄𑀢𑀺 𑀲𑀫𑀸𑀲𑀯𑀸𑀓𑁆𑀬𑀁. 𑀦 𑀳𑀺 𑀏𑀯 𑀤𑀻𑀳𑀺 𑀓𑀸𑀭𑁄 𑀯𑀺𑀳𑀺𑀢𑁄𑀢𑀺 𑀅𑀓𑁆𑀔𑀭𑁂 𑀳𑁂𑀯 𑀓𑀸𑀭𑀲𑁆𑀲 𑀯𑀺𑀳𑀺𑀢𑀢𑁆𑀢𑀸 𑀅𑀓𑁆𑀔𑀭𑀲𑀫𑀼𑀤𑀸𑀬𑀢𑁄 𑀦 𑀧𑀧𑁆𑀧𑁄𑀢𑀻𑀢𑀺 𑀪𑀸𑀯𑁄. 𑀅𑀣 𑀘𑁂𑀢𑀺 𑀫𑀢𑀧𑁆𑀧𑀤𑀸𑀦𑁂. 𑀏𑀯𑀸𑀤𑀺𑀲𑀤𑁆𑀤𑀯𑀸𑀘𑀓𑀸 𑀏𑀯𑀓𑀸𑀭𑀸𑀤𑀬𑁄 𑀲𑀸𑀥𑀯𑁄𑀢𑀺 𑀅𑀣 𑀫𑀢𑀦𑁆𑀢𑀺 𑀅𑀢𑁆𑀣𑁄.

𑀢𑀢𑁆𑀣𑀸𑀢𑀺 𑀢𑀣𑀸 𑀅𑀪𑀺𑀫𑀢𑁂 𑀢𑀲𑁆𑀫𑀺𑀁. 𑀦𑀺𑀬𑀫𑀳𑁂𑀢𑀼𑀦𑁄 𑀅𑀪𑀸𑀯𑀸𑀢𑀺 𑀅𑀓𑁆𑀔𑀭𑁂𑀳𑁂𑀯 𑀓𑀸𑀭𑀧𑁆𑀧𑀘𑁆𑀘𑀬𑁄 𑀯𑀺𑀥𑁂𑀬𑁆𑀬𑁄 𑀦 𑀧𑀦 𑀏𑀯𑀸𑀤𑀻𑀳𑀺𑀘𑁆𑀘𑀲𑁆𑀲 𑀦𑀺𑀬𑀫𑀲𑁆𑀲 𑀬𑁄 𑀳𑁂𑀢𑀼 𑀢𑀲𑁆𑀲 𑀳𑁂𑀢𑀼𑀦𑁄 𑀅𑀪𑀸𑀯𑀸.

𑀓𑀺𑀫𑀺𑀤𑀲𑀻𑀮𑀫𑀺𑀘𑁆𑀘𑀸𑀳- ¶ ‘𑀲𑀻𑀮𑀫𑁆𑀧𑀓𑀢𑀺𑀲𑀪𑀸𑀯𑁄’𑀢𑀺. 𑀢𑀜𑁆𑀘 𑀲𑀻𑀮𑀫𑀦𑀼𑀫𑀸𑀦𑁂𑀦 𑀯𑀺𑀜𑁆𑀜𑀸𑀬𑀢𑀺𑀘𑁆𑀘𑀸𑀳- ‘𑀢𑀜𑁆𑀘𑁂’𑀘𑁆𑀘𑀸𑀤𑀺. 𑀓𑀺𑀭𑀺𑀬𑀸𑀯𑀺𑀲𑀬𑀭𑀼𑀘𑀺𑀯𑀺𑀲𑁂𑀲𑀸𑀦𑀼𑀫𑀺𑀢𑀦𑁆𑀢𑀺 𑀉𑀡𑁆𑀳𑀪𑁄𑀚𑀦𑀲𑀗𑁆𑀔𑀸𑀢𑀸 𑀓𑀺𑀭𑀺𑀬𑀸 𑀯𑀺𑀲𑀬𑁄 𑀬𑀲𑁆𑀲 𑀲𑁄 (𑀓𑀺𑀭𑀺𑀬𑀸) 𑀯𑀺𑀲𑀬𑁄 𑀭𑀼𑀘𑀺𑀯𑀺𑀲𑁂𑀲𑁄, 𑀢𑁂𑀦 𑀅𑀦𑀼𑀫𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀺𑀫𑀺𑀤𑀫𑀸𑀪𑀺𑀓𑁆𑀔𑀜𑁆𑀜𑀦𑁆𑀢𑀺 𑀆𑀳- ‘𑀆𑀪𑀺𑀓𑁆𑀔𑀜𑁆𑀜’𑀫𑀺𑀘𑁆𑀘𑀸𑀤𑀺. 𑀧𑀼𑀦𑀧𑁆𑀧𑀼𑀦𑀪𑀸𑀯𑁄 𑀧𑁄𑀦𑁄𑀧𑀼𑀜𑁆𑀜𑀁. 𑀆𑀲𑁂 𑀯𑀸 𑀢𑀧𑁆𑀧𑀭𑀢𑀸𑀢𑀺 𑀢𑀫𑁂𑀯𑀸𑀪𑀺𑀓𑁆𑀔𑀜𑁆𑀜𑀁 𑀧𑀭𑀺𑀬𑀸𑀬𑁂𑀳𑀺 𑀨𑀼𑀝𑀻𑀓𑀭𑁄𑀢𑀺.

𑀬𑀚𑁆𑀚𑁂𑀯𑀦𑁆𑀢𑀺 𑀬𑀤𑀺 𑀆𑀪𑀺𑀓𑁆𑀔𑀜𑁆𑀜𑀁 𑀢𑀧𑁆𑀧𑀢𑁄 𑀯𑀼𑀘𑁆𑀘𑀢𑁂. 𑀢𑀲𑁆𑀲𑀻𑀮𑁆𑀬𑀫𑀺𑀤𑀁 𑀳𑁄𑀢𑀻𑀢𑀺 𑀇𑀫𑀺𑀦𑀸- ‘𑀲𑀻𑀮𑀸𑀪𑀺𑀓𑁆𑀔𑀜𑁆𑀜𑀸𑀤𑀺’’𑀲𑀼𑀢𑁆𑀢𑁂 𑀲𑀻𑀮𑀲𑀤𑁆𑀤𑁂𑀦𑁂𑀯𑀸𑀪𑀺𑀓𑁆𑀔𑀜𑁆𑀜𑀲𑁆𑀲 𑀕𑀳𑀺𑀢𑀢𑁆𑀢𑀁 𑀤𑀻𑀧𑁂𑀢𑀺. 𑀅𑀜𑁆𑀜𑀣𑀸𑀧𑀺 𑀲𑀻𑀮𑀢𑁄 𑀅𑀜𑁆𑀜𑀫𑁂𑀯𑀸𑀪𑀺𑀓𑁆𑀔𑀜𑁆𑀜𑀦𑁆𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀬𑀲𑁆𑀫𑀺𑀁 𑀤𑁂𑀲𑁂’𑀢𑀺𑀆𑀤𑀺.

𑀕𑀫𑁆𑀫𑀫𑀸𑀦𑁂𑀢𑀺 𑀧𑀢𑀻𑀬𑀫𑀸𑀦𑁂. 𑀧𑀢𑀻𑀢𑀺 𑀘 𑀅𑀢𑁆𑀣𑀧𑁆𑀧𑀓𑀭𑀡𑀲𑀤𑁆𑀤𑀦𑁆𑀢𑀭𑀸𑀤𑀻𑀳𑀺. 𑀅𑀪𑀺𑀫𑀢𑁄𑀢𑀺 𑀧𑀸𑀡𑀺𑀦𑀺𑀬𑁂𑀳𑀺 𑀅𑀪𑀺𑀫𑀢𑁄. 𑀆𑀯𑀲𑁆𑀲𑀓𑀕𑁆𑀕𑀳𑀡𑀸𑀬𑁂𑀯 𑀲𑀺𑀤𑁆𑀥𑁄𑀢𑀺 𑀯𑀼𑀢𑁆𑀢𑀁 𑀓𑀣𑀫𑁂𑀢𑁆𑀣𑀸𑀯𑀲𑁆𑀲𑀫𑁆𑀪𑀸𑀯𑁄 𑀧𑀢𑀻𑀬𑀢𑀺 𑀘𑁆𑀘𑀸𑀳- ‘𑀢𑀜𑁆𑀘𑀸’𑀢𑀺𑀆𑀤𑀺.

𑀬𑁄𑀕𑀯𑀺𑀪𑀸𑀕𑀸𑀢𑀺 ‘𑀡𑀻’𑀢𑀺 𑀬𑁄𑀕 𑀯𑀺𑀪𑀸𑀕𑀸. 𑀲𑀸𑀥𑀼𑀁 𑀓𑀭𑁄𑀢𑀺, 𑀩𑁆𑀭𑀳𑁆𑀫𑀁 𑀯𑀤𑀢𑀺, 𑀅𑀲𑀤𑁆𑀥𑀁 𑀪𑀼𑀜𑁆𑀚𑀢𑀺, 𑀧𑀡𑁆𑀟𑀺𑀢𑀫𑀢𑁆𑀢𑀸𑀦𑀁 𑀫𑀜𑁆𑀜𑀢𑀻𑀢𑀺 𑀯𑀺𑀕𑁆𑀕𑀳𑁄. 𑀲𑀸𑀥𑀼𑀦𑁆𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀁. 𑀅𑀲𑁆𑀲𑀤𑁆𑀥𑀪𑁄𑀚𑀻𑀢𑀺 𑀯𑀢𑁂. 𑀯𑀢𑀜𑁆𑀘 𑀪𑁄𑀚𑀦𑁂 𑀅𑀢𑁆𑀣𑀺𑀢𑀸𑀬𑀁 𑀲𑀤𑁆𑀥𑀅𑀲𑁆𑀲𑀤𑁆𑀥𑀪𑁄𑀚𑀦𑀯𑀺𑀲𑀬𑀸𑀬𑀁 𑀧𑀯𑀢𑁆𑀢𑀺𑀬𑀁 𑀬𑀤𑀺 𑀪𑀼𑀜𑁆𑀚𑀢𑀺 𑀅𑀲𑁆𑀲𑀤𑁆𑀥𑀫𑁂𑀯 𑀪𑀼𑀜𑁆𑀚𑀢𑀺 𑀦 𑀲𑀤𑁆𑀥𑀦𑁆𑀢𑀺 𑀲𑀢𑁆𑀣𑁂 𑀯𑀼𑀢𑁆𑀢𑀦𑀺𑀬𑀫𑁄, 𑀅𑀲𑁆𑀲𑀤𑁆𑀥𑀁 𑀪𑀼𑀜𑁆𑀚𑀢𑀺 𑀏𑀯𑀸𑀢𑀺 𑀦𑁄𑀢𑁆𑀢𑀭𑀧𑀤𑀸𑀯𑀥𑀸𑀭𑀡𑀁… 𑀏𑀯𑀜𑁆𑀳𑀺 𑀯𑀺𑀜𑁆𑀜𑀸𑀬𑀫𑀸𑀦𑁂 𑀬𑀤𑁂𑀯𑀸𑀲𑁆𑀲𑀤𑁆𑀥𑀁 𑀦 𑀪𑀼𑀜𑁆𑀚𑀢𑀺 𑀢𑀤𑁂𑀯 𑀯𑀢𑀮𑁄𑀧𑁄 𑀲𑀺𑀬𑀸𑀢𑀺 [𑀅𑀢𑁆𑀣𑀺𑀢𑀸𑀬 (𑀪𑁄𑀚𑀦𑀸𑀓𑀗𑁆𑀔𑀺𑀢𑀢𑁆𑀢𑀸) 𑀬𑀣𑁂𑀘𑁆𑀙𑀁 𑀲𑀸𑀫𑀜𑁆𑀜𑁂𑀦 𑀪𑁄𑀚𑀦𑁂 𑀧𑀯𑀢𑁆𑀢𑀺𑀬𑀁 𑀫𑀢𑁆𑀢𑀸𑀬𑀁 𑀅𑀲𑀤𑁆𑀥𑀪𑁄𑀚𑀦𑀁 𑀲𑀢𑁆𑀣𑀯𑀺𑀳𑀺𑀢𑀫𑀼𑀧𑀮𑀪𑀫𑀸𑀦𑀲𑁆𑀲 𑀲𑀤𑁆𑀥𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀯𑀺𑀲𑁂𑀲𑁂 𑀳𑀺 𑀲𑀤𑁆𑀥𑁂 𑀧𑀯𑀢𑁆𑀢𑀺𑀦𑀺𑀬𑀫𑁄 𑀯𑀢𑀫𑀼𑀘𑁆𑀘𑀢𑁂, 𑀦𑀺𑀬𑀫𑁄𑀘𑀸𑀢𑁆𑀭𑀤𑀼𑀯𑀺𑀥𑁄 𑀲𑀫𑁆𑀪𑀯𑀢𑀺-𑀅𑀲𑀤𑁆𑀥𑀁 𑀪𑀽𑀜𑁆𑀚𑀢𑀺 𑀏𑀯, 𑀅𑀣𑀤𑁆𑀥𑀫𑁄 𑀪𑀼𑀜𑁆𑀚𑀢𑀻𑀢𑀺 𑀯𑀸, 𑀢𑀢𑁆𑀭𑀸𑀤𑀺𑀫𑁂 𑀦𑀺𑀬𑀫𑁂 𑀬𑀤𑁂𑀯𑀸 𑀲𑀤𑁆𑀥𑀁 𑀦 𑀪𑀼𑀜𑁆𑀚𑀢𑀺 𑀢𑀤𑁂𑀯𑀯𑀢 𑀮𑁄𑀧𑁄𑀲𑀺𑀬𑀸 (𑀭-𑁩-𑁨𑁨𑁮) 𑀓𑀸𑀢𑀦𑁆𑀢𑀧𑀜𑁆𑀚𑀺𑀓𑀸]. 𑀅𑀜𑁆𑀜𑀣𑀸𑀧𑀺 𑀧𑀝𑀺𑀧𑀸𑀤𑀬𑀺𑀢𑀼𑀫𑀸𑀳- ‘𑀖𑀡𑀦𑁆𑀢𑀸𑀤𑀻𑀳𑀺’𑀘𑁆𑀘𑀸𑀤𑀺.

𑀲𑀬𑀫𑁂𑀯 𑀅𑀢𑁆𑀢𑀦𑀸𑀏𑀯. 𑀓𑀫𑁆𑀫𑀓𑀢𑁆𑀢𑀭𑀻𑀢𑀺 𑀉𑀪𑀬𑀢𑁆𑀣𑀸𑀧𑀺 𑀓𑀫𑁆𑀫𑀓𑀢𑁆𑀢𑀭𑀺 𑀧𑀘𑁆𑀘𑀬𑁄 𑀩𑀳𑀼𑀮𑀸𑀥𑀺𑀓𑀸𑀭𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀧𑀦 𑀏𑀓𑁄𑀧𑀺 𑀧𑀤𑀢𑁆𑀣𑁄 𑀓𑀫𑁆𑀫𑀜𑁆𑀘 ¶ 𑀳𑁄𑀢𑀺 𑀓𑀢𑁆𑀢𑀸𑀘 𑀓𑀸𑀭𑀓𑀲𑀢𑁆𑀢𑀺𑀪𑁂𑀤𑀢𑁄. 𑀬𑀣𑀸 ‘𑀧𑀻𑀬𑀫𑀸𑀦𑀁 𑀫𑀥𑀼 𑀫𑀤𑀬𑀢𑀻’𑀢𑀺 𑀏𑀓𑀲𑁆𑀲𑀸𑀧𑀺 𑀲𑀢𑁆𑀢𑀺𑀪𑁂𑀤𑀸 𑀓𑀫𑁆𑀫𑀢𑁆𑀢𑀁 𑀓𑀢𑁆𑀢𑀼𑀢𑁆𑀢𑀁, 𑀢𑀣𑀸 𑀢𑁆𑀭𑀸𑀧𑀻𑀢𑀺 𑀯𑀺𑀜𑁆𑀜𑁂𑀬𑁆𑀬𑀁. 𑀬𑁄 𑀧𑀭𑀁 𑀪𑀜𑁆𑀚𑀢𑀺 𑀢𑀢𑁆𑀣𑀧𑀺 𑀲𑀺𑀬𑀸 𑀲𑀸𑀫𑀜𑁆𑀜𑀯𑀺𑀥𑀸𑀦𑀢𑁄𑀢𑀺 𑀆𑀳- ‘𑀦𑀺𑀧𑀸𑀢𑀦𑀲𑁆𑀲𑀺’𑀘𑁆𑀘𑀸𑀤𑀺. 𑀤𑁄𑀲𑀦𑁆𑀥𑀓𑀸𑀭𑀁 𑀪𑀺𑀦𑁆𑀤𑀢𑀻𑀢𑀺 𑀤𑁄𑀲𑀦𑁆𑀥𑀓𑀸𑀭𑀪𑀺𑀤𑀼𑀭𑁄.

𑀪𑀽𑀢𑀲𑀤𑁆𑀤𑁂𑀦𑁂𑀢𑁆𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀫𑀼𑀧𑀤𑀲𑁆𑀲𑁂𑀢𑀼𑀫𑀸𑀳- ‘𑀪𑀽𑀢𑀫𑀢𑀻𑀢’𑀫𑀺𑀘𑁆𑀘𑀸𑀤𑀺. 𑀅𑀜𑁆𑀜𑀣𑀸𑀢𑀺 𑀬𑀤𑁆𑀬𑀢𑀺𑀓𑁆𑀓𑀦𑁆𑀢𑀯𑀘𑀦𑁄 𑀦 𑀲𑀺𑀬𑀸𑀢𑀺 𑀅𑀢𑁆𑀣𑁄.

𑀦𑀦𑀼𑀘𑀸𑀢𑁆𑀭𑁂𑀢𑀭𑁂𑀢𑀭𑀦𑀺𑀲𑁆𑀲𑀬𑀤𑁄𑀲𑁄 𑀧𑀲𑀚𑁆𑀚𑀢𑁂, 𑀲𑀢𑀻 𑀳𑀺 𑀪𑀽𑀢𑀸𑀥𑀺𑀓𑀸𑀭𑁂𑀢𑁆𑀢𑁄 𑀯𑀺𑀥𑀻𑀬𑀢𑁂, 𑀲𑀢𑀺 𑀘 𑀢𑁆𑀢𑁂 𑀪𑀽𑀢𑀲𑀤𑁆𑀤𑀲𑁆𑀲 𑀦𑀺𑀧𑁆𑀨𑀢𑁆𑀢𑀻𑀢𑀺 𑀨𑀼𑀝𑁄 𑀬𑁂𑀯𑀺𑀢𑀭𑁂𑀢𑀭𑀦𑀺𑀲𑁆𑀲𑀬𑀤𑁄𑀲𑁄𑀢𑀺. 𑀦𑁂𑀲𑀤𑁄𑀲𑁄, 𑀲𑀗𑁆𑀓𑁂𑀢𑀸𑀢𑀺 𑀩𑁆𑀬𑀢𑁆𑀢𑁄 𑀲𑀤𑁆𑀤𑀢𑁆𑀣𑀲𑀫𑁆𑀩𑀦𑁆𑀥𑁄 𑀘𑀺𑀭𑀓𑀸𑀮𑀧𑁆𑀧𑀯𑀢𑁆𑀢𑁄, 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀅𑀲𑀸𑀥𑀼𑀢𑁆𑀢𑀁, 𑀅𑀢𑀺𑀓𑁆𑀓𑀦𑁆𑀢𑁂 𑀘𑀸𑀲𑁆𑀲 𑀯𑀼𑀢𑁆𑀢𑀺 𑀲𑀤𑁆𑀤𑀲𑀢𑁆𑀢𑀺𑀲𑀪𑀸𑀯𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀓𑁆𑀢𑀯𑀦𑁆𑀢𑀸 𑀤𑀬𑁄𑀧𑀺 𑀘𑀭𑀳𑀺 𑀲𑀤𑁆𑀤𑀲𑀢𑁆𑀢𑀺𑀲𑀪𑀸𑀯𑀢𑁄 𑀪𑀽𑀢𑁂𑀏𑀯 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀪𑀽𑀢𑀲𑀤𑁆𑀤𑁄-𑀬𑀫𑀢𑀺𑀓𑁆𑀓𑀦𑁆𑀢𑀢𑁆𑀣𑁂 𑀧𑀲𑀺𑀤𑁆𑀥𑁄 𑀓𑁆𑀢𑀯𑀦𑁆𑀢𑀸𑀤𑀬𑁄𑀢𑁆𑀯𑀧𑁆𑀧𑀲𑀺𑀤𑁆𑀥𑀸, 𑀅𑀢𑁄 𑀢𑁂𑀦 𑀧𑀲𑀺𑀤𑁆𑀥𑀢𑁆𑀣𑁂𑀦𑀸𑀧𑁆𑀧𑀲𑀺𑀤𑁆𑀥𑀸𑀦𑀫𑀦𑁆𑀯𑀸𑀔𑁆𑀬𑀸𑀦𑀁 𑀓𑀭𑀻𑀬𑀢𑀻𑀢𑀺. 𑀪𑀽𑀢𑁂𑀢𑀺 𑀘𑀸𑀬𑀁 𑀧𑀓𑀢𑀺𑀯𑀺𑀲𑁂𑀲𑀦𑀁 𑀯𑀸 𑀲𑀺𑀬𑀸 ‘𑀪𑀽𑀢𑀢𑁆𑀣𑁂 𑀯𑀢𑁆𑀢𑀫𑀸𑀦𑀸’𑀢𑀺, 𑀧𑀘𑁆𑀘𑀬𑀢𑁆𑀣 𑀯𑀺𑀲𑁂𑀲𑀦𑀁 𑀯𑀸’𑀪𑀽𑀢𑁂 𑀓𑀢𑁆𑀢𑀭𑀻’𑀢𑀺, 𑀢𑀢𑁆𑀭 𑀓𑀲𑁆𑀲𑀺𑀤𑀁 𑀯𑀺𑀲𑁂𑀲𑀦𑀦𑁆𑀢𑀺 𑀆𑀳𑀪𑀽𑀢𑁂𑀢𑀺 𑀧𑀓𑀢𑀺𑀯𑀺𑀲𑁂𑀲𑀦’𑀦𑁆𑀢𑀺. 𑀓𑀼𑀢𑁄𑀘𑁆𑀘𑀸𑀳- ‘𑀲𑀫𑁆𑀩𑀦𑁆𑀥𑀲𑁆𑀲 𑀘𑁂’𑀢𑁆𑀬𑀸𑀤𑀺. 𑀅𑀣 𑀧𑀘𑁆𑀘𑀬𑀢𑁆𑀣𑀯𑀺𑀲𑁂𑀲𑀦𑁂 𑀓𑁄 𑀤𑁄𑀲𑁄𑀘𑁆𑀘𑀸𑀳- ‘𑀧𑀘𑁆𑀘𑀬𑀢𑁆𑀣𑀯𑀺𑀲𑁂𑀲𑀦𑁂 𑀳𑀺’𑀘𑁆𑀘𑀸𑀤𑀺. 𑀧𑀘𑁆𑀘𑀬𑀢𑁆𑀣𑀲𑁆𑀲 𑀓𑀢𑁆𑀢𑀼𑀦𑁄 𑀅𑀦𑀪𑀺𑀓𑁆𑀓𑀦𑁆𑀢𑀢𑁆𑀢𑀸 𑀅𑀬𑀦𑁆𑀢𑀺 𑀧𑀬𑁄𑀕𑁄 𑀦𑁄𑀧𑀧𑀚𑁆𑀚𑀢𑁂𑀢𑀺 𑀪𑀸𑀯𑁄. 𑀅𑀪𑀺𑀥𑁂𑀬𑁆𑀬𑁂𑀢𑀺 𑀇𑀫𑀺𑀦𑀸 𑀧𑀬𑁄𑀚𑀦𑀸𑀤𑀺𑀁 𑀩𑁆𑀬𑀯𑀘𑁆𑀙𑀺𑀦𑁆𑀤𑀢𑀺.

𑀓𑀫𑁆𑀫𑁂 𑀕𑀼𑀡𑀻𑀪𑀽𑀢𑀢𑁆𑀢𑀸𑀢𑀺 𑀓𑀫𑁆𑀫𑁂 𑀲𑀢𑀺 𑀪𑀸𑀯𑀲𑁆𑀲𑀸𑀧𑁆𑀧𑀥𑀸𑀦𑀢𑁆𑀢𑀸. ‘‘𑀕𑀼𑀡𑀫𑀼𑀔𑁆𑀬𑁂𑀲𑀼 𑀫𑀼𑀔𑁆𑀬𑁂𑀬𑁂𑀯 𑀓𑀸𑀭𑀺𑀬𑀲𑀫𑁆𑀧𑀘𑁆𑀘𑀬𑁄’’𑀢𑀺 𑀫𑀼𑀔𑁆𑀬𑁂 𑀓𑀫𑁆𑀫𑁂𑀬𑁂𑀯 𑀧𑀘𑁆𑀘𑀬𑁄, 𑀦 𑀢𑀼 𑀪𑀸𑀯𑁂 𑀢𑀲𑁆𑀲𑁂𑀢𑁆𑀣𑀸𑀧𑁆𑀧𑀥𑀸𑀦𑀢𑁆𑀢𑀸.

𑀦𑀦𑀼𑀘𑀸𑀭𑀫𑁆𑀪𑁂𑀢𑀺 ¶ 𑀯𑀼𑀢𑁆𑀢𑀁- ‘𑀓𑀺𑀭𑀺𑀬𑀸𑀭𑀫𑁆𑀪𑁂’𑀢𑀺 𑀓𑀣𑀦𑁆𑀢𑀺 𑀆𑀳- ‘𑀲𑁄𑀘𑁂’𑀘𑁆𑀘𑀸𑀤𑀺. 𑀲𑁄 𑀘 𑀆𑀭𑀫𑁆𑀪𑁄. 𑀓𑀺𑀭𑀺𑀬𑀸𑀬𑁂𑀯 𑀆𑀭𑀫𑁆𑀪𑁄𑀓𑀺𑀭𑀺𑀬𑀸𑀭𑀫𑁆𑀪𑁄 𑀢𑀲𑁆𑀫𑀺𑀁. 𑀓𑀺𑀭𑀺𑀬𑀸𑀭𑀫𑁆𑀪𑁂𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀢𑁆𑀢𑀸 𑀓𑀺𑀭𑀺𑀬𑀢𑁆𑀣𑀯𑀺𑀲𑁂𑀲𑀦𑀁 𑀯𑀸 𑀏𑀢𑀁𑀲𑀺𑀬𑀸 𑀧𑀘𑁆𑀘𑀬𑀢𑁆𑀣𑀯𑀺𑀲𑁂𑀲𑀦𑀁 𑀯𑀸 𑀉𑀪𑀬𑀣𑀸𑀧𑀺 𑀦 𑀤𑁄𑀲𑁄𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀓𑀺𑀭𑀺𑀬𑀢𑁆𑀣𑀯𑀺𑀲𑁂𑀲𑀦𑀁 𑀘𑁂𑀢’𑀦𑁆𑀢𑀺𑀆𑀤𑀺. 𑀧𑀘𑁆𑀘𑀬𑀢𑁆𑀣𑀯𑀺𑀲𑁂𑀲𑀦𑀧𑀓𑁆𑀔𑁂𑀧𑀺 𑀲𑀸𑀫𑀢𑁆𑀣𑀺𑀬𑀸 𑀆𑀭𑀫𑁆𑀪𑁂 𑀓𑀺𑀭𑀺𑀬𑀢𑁆𑀣𑀲𑁆𑀲𑀸𑀧𑀺 𑀧𑀯𑀢𑁆𑀢𑀻 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀓𑀺𑀭𑀺𑀬𑀢𑁆𑀣𑀲𑁆𑀲𑀸𑀧𑀺’𑀘𑁆𑀘𑀸𑀤𑀺. 𑀲𑀸𑀫𑀢𑁆𑀣𑀺𑀬𑀁 𑀤𑀲𑁆𑀲𑁂𑀢𑀺 ‘𑀲𑀸𑀫𑀢𑁆𑀣𑀺𑀬𑀫𑁆𑀧𑀦𑀸’𑀢𑀺𑀆𑀤𑀺𑀦𑀸. 𑀅𑀦𑀦𑁆𑀢𑀭𑀲𑀼𑀢𑁆𑀢𑁂𑀦 𑀬𑁄 𑀯𑀺𑀳𑀺𑀢𑁄 𑀓𑁆𑀢𑁄, 𑀲𑁄𑀧𑀺 𑀲𑀸𑀫𑀜𑁆𑀜𑁂𑀦 𑀯𑀘𑀦𑀢𑁄 𑀪𑀸𑀯𑀓𑀫𑁆𑀫𑁂𑀲𑀼 𑀆𑀭𑀫𑁆𑀪𑁂𑀧𑀺 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀲𑀸𑀫𑀜𑁆𑀜𑁂𑀦 𑀯𑀘𑀦𑀢𑁄𑀢𑀺 ‘‘𑀓𑁆𑀢𑁄 𑀪𑀸𑀯𑀓𑀫𑁆𑀫𑁂𑀲𑀽’’𑀢𑀺 (𑁫-𑁫𑁬) 𑀲𑀸𑀫𑀜𑁆𑀜𑁂𑀦 𑀯𑀘𑀦𑀢𑁄. 𑀪𑀸𑀯𑀓𑀫𑁆𑀫𑁂𑀲𑀼𑀘𑁂𑀢𑀺 𑀏𑀯𑀁 𑀦 𑀯𑀼𑀢𑁆𑀢𑀦𑁆𑀢𑀺 ‘𑀬𑀣𑀸𑀧𑀢𑁆𑀢𑀜𑁆𑀘𑁂’𑀢𑀺 𑀯𑀤𑀢𑀸 𑀯𑀼𑀢𑁆𑀢𑀺𑀓𑀸𑀭𑁂𑀦𑁂𑀯𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀓𑀲𑁆𑀫𑀸 𑀏𑀯𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳- ‘𑀧𑀼𑀩𑁆𑀩𑀲𑁆𑀫𑀺𑀁 𑀯𑀺𑀬𑀸’𑀢𑀺 𑀆𑀤𑀺. 𑀅𑀦𑀺𑀬𑀫𑀼𑀧𑁆𑀧𑀢𑁆𑀢𑀺 𑀲𑀜𑁆𑀜𑀸𑀬 𑀲𑀢𑀺 𑀜𑀸𑀧𑀦𑀦𑁆𑀢𑀺 𑀢𑀦𑁆𑀦𑀺𑀲𑁂𑀥𑁂𑀢𑀼𑀫𑀸𑀳- ‘𑀧𑀼𑀦𑀩𑁆𑀩𑀘𑀦𑀢𑁄’𑀢𑀺𑀆𑀤𑀺. 𑀫𑀸𑀲𑀗𑁆𑀓𑀻𑀢𑀺 𑀓𑀫𑁆𑀫𑀦𑀺, 𑀢𑁂𑀦𑁂𑀯𑀼𑀧𑁆𑀧𑀢𑁆𑀢𑀻𑀢𑀺 𑀧𑀞𑀫𑀸. 𑀏𑀯𑀁 𑀫𑀜𑁆𑀜𑀢𑁂 ‘‘𑀪𑀸𑀯𑀓𑀫𑁆𑀫 𑀕𑀳𑀡𑀁 𑀘𑀸𑀓𑀸𑀭𑁂𑀦𑀸𑀦𑀼𑀓𑀟𑁆𑀠𑀺𑀬 ‘𑀪𑀸𑀯𑀓𑀫𑁆𑀫𑁂𑀲𑀼 𑀘𑀸’𑀢𑁆𑀬𑀦𑁂𑀦 𑀓𑁆𑀢𑁂𑀯𑀺𑀥𑀻𑀬 𑀫𑀸𑀦𑁂 𑀇𑀤𑀫𑀸𑀲𑀗𑁆𑀓𑀻𑀬𑀢𑁂 ‘𑀧𑀼𑀩𑁆𑀩𑁂𑀦𑁂𑀯 𑀲𑀸𑀫𑀜𑁆𑀜𑁂𑀦 𑀲𑀺𑀤𑁆𑀥𑁂 𑀧𑀼𑀦𑀩𑁆𑀩𑀘𑀦𑀸 [𑀧𑀼𑀦𑀩𑁆𑀩𑀘𑀦𑀁] 𑀓𑀺𑀭𑀺𑀬𑀢𑁆𑀣𑀸𑀦𑀺𑀬𑀫𑁂𑀦 𑀢𑁆𑀢𑀲𑁆𑀲𑀼𑀧𑁆𑀧𑀢𑁆𑀢𑀻’𑀢𑀺, 𑀬𑀣𑀸𑀧𑀢𑁆𑀢𑀜𑁆𑀘𑁂𑀢𑀺 𑀳𑁆𑀬𑀼𑀘𑁆𑀘𑀫𑀸𑀦𑁂 𑀘𑀓𑀸𑀭𑁂𑀦 𑀬𑀣𑀸𑀧𑀢𑁆𑀢𑀫𑁆𑀧𑀺 𑀓𑀸𑀭𑀺𑀬𑀫𑀦𑀼𑀜𑁆𑀜𑀸𑀬𑀢𑁂𑀢𑀺 𑀧𑀼𑀩𑁆𑀩𑁂𑀦𑁂𑀯 𑀯𑀘𑀦𑁂𑀦 𑀪𑀸𑀯𑀓𑀫𑁆𑀫𑁂𑀲𑁆𑀯𑀸𑀭𑀫𑁆𑀪𑁂𑀧𑀺 𑀬𑀣𑀸𑀧𑀢𑁆𑀢𑁄 𑀓𑁆𑀢𑁄 𑀪𑀯𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑁂’’𑀢𑀺. 𑀏𑀯𑀜𑁆𑀘𑀭𑀳𑀺 𑀪𑀸𑀯𑀓𑀫𑁆𑀫𑁂𑀲𑁆𑀯𑀸𑀭𑀫𑁆𑀪𑁂𑀧𑀺 𑀧𑀼𑀩𑁆𑀩𑁂𑀦𑁂𑀯 𑀲𑀺𑀤𑁆𑀥𑀢𑁆𑀢𑀸 ‘‘𑀓𑀢𑁆𑀢𑀭𑀺𑀆𑀭𑀫𑁆𑀪𑁂’’𑀇𑀘𑁆𑀘𑁂𑀯 𑀯𑀼𑀘𑁆𑀘𑁂𑀬𑁆𑀬 𑀓𑀺𑀁 𑀘𑀓𑀸𑀭𑁂𑀦𑁂 𑀘𑁆𑀘𑀸𑀲𑀗𑁆𑀓𑀺𑀬𑀸𑀳- ‘𑀧𑀤𑀸𑀦𑀫𑀯𑀥𑀸𑀭𑀡 𑀨𑀮𑀢𑁆𑀢𑀸’𑀘𑁆𑀘𑀸𑀤𑀺.

𑀦𑀦𑀼𑀘𑀸𑀤𑀺𑀪𑀽𑀢𑁄 𑀓𑀺𑀭𑀺𑀬𑀸𑀓𑁆𑀔𑀡𑁄 𑀆𑀭𑀫𑁆𑀪𑁄 𑀦𑀸𑀫, 𑀩𑀳𑀽𑀳𑀺 𑀓𑀺𑀭𑀺𑀬𑀸𑀓𑁆𑀔𑀡𑁂𑀳𑀺 𑀓𑀝𑁂 𑀧𑀭𑀺𑀲𑀫𑀢𑁆𑀢𑁂𑀬𑁂𑀯 𑀪𑀽𑀢𑁄 𑀓𑀸𑀮𑁄 𑀘 𑀪𑀯𑀢𑀻𑀢𑀺 𑀓𑀺𑀭𑀺𑀬𑀸𑀨𑀮𑀲𑁆𑀲𑀸𑀧𑀭𑀺𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀯𑀢𑁆𑀢𑀫𑀸𑀦𑁄𑀯 𑀓𑀸𑀮𑁄𑀢𑀺 𑀢𑀢𑁆𑀭𑀓𑁆𑀢𑁄 𑀦 𑀧𑀧𑁆𑀧𑁄𑀢𑀺𑀘𑁆𑀘𑀸𑀲𑀗𑁆𑀓𑀺𑀬𑀸𑀳- ‘𑀓𑀺𑀭𑀺𑀬𑀸𑀨𑀮𑀲𑁆𑀲𑀺’𑀘𑁆𑀘𑀸𑀤𑀺. 𑀓𑀝𑁂𑀓𑀤𑁂𑀲𑀲𑁆𑀲𑀸𑀧𑀺 𑀓𑀝𑀢𑁆𑀢𑀸 ¶ 𑀢𑀲𑁆𑀲 𑀘 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀪𑀽𑀢𑀯𑀘𑀦𑀺𑀘𑁆𑀙𑀸𑀢𑀺 𑀪𑀸𑀯𑁄. 𑀦𑀦𑀼𑀘𑀸𑀤𑀺𑀲𑀽𑀢𑁂 𑀓𑀺𑀭𑀺𑀬𑀸𑀓𑁆𑀔𑀡𑀓𑀸𑀮𑁂 𑀓𑀝𑁄 𑀦𑀸𑀪𑀺𑀦𑀺𑀩𑁆𑀩𑀢𑁆𑀢𑁄, 𑀓𑀝𑀓𑀸𑀭𑀡𑀪𑀽𑀢𑀸 𑀩𑀻𑀭𑀡𑀸𑀯 𑀳𑀺 𑀢𑀤𑀸 𑀲𑀦𑁆𑀢𑀺, 𑀦 𑀘 𑀢𑀤𑀯𑀢𑁆𑀣𑀸 𑀢𑁂 𑀏𑀯 𑀓𑀝𑁄𑀢𑀺 𑀓𑀣𑀁 ‘𑀧𑀓𑀢𑁄 𑀓𑀝𑁄’𑀢𑀺 𑀪𑀽𑀢𑀓𑀸𑀮𑁂𑀦 𑀧𑀓𑀢𑀲𑀤𑁆𑀤𑁂𑀦 𑀓𑀝𑀲𑀤𑁆𑀤𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀫𑀺𑀘𑁆𑀘𑀸𑀳- ‘𑀆𑀤𑀺𑀪𑀽𑀢𑁂𑀦𑁂’𑀘𑁆𑀘𑀸𑀤𑀺. 𑀢𑀢𑁆𑀣 𑀢𑀲𑁆𑀫𑀺𑀁 𑀯𑀺𑀲𑁂𑀲𑁂. 𑀧𑀓𑀢𑁆𑀢𑀼𑀁 𑀆𑀭𑀪𑀺, 𑀧𑀓𑀢𑁆𑀢𑀼𑀁 𑀆𑀭𑀪𑀻𑀬𑀺𑀢𑁆𑀣, 𑀧𑀲𑁄𑀢𑁆𑀢𑀼𑀁 𑀆𑀭𑀪𑀺, 𑀧𑀲𑁄𑀢𑁆𑀢𑀼𑀁 𑀆𑀭𑀪𑀦𑀦𑁆𑀢𑀺 𑀅𑀢𑁆𑀣𑁂 𑀢𑁆𑀢𑁄.

𑀅𑀦𑀸𑀭𑀫𑁆𑀪𑀢𑁆𑀣𑀁𑀯𑀘𑀦𑀦𑁆𑀢𑀺 𑀆𑀭𑀫𑁆𑀪𑁂 𑀧𑀼𑀩𑁆𑀩𑁂𑀦𑁂𑀯 𑀲𑀺𑀤𑁆𑀥𑀢𑁆𑀢𑀸. 𑀅𑀧𑀸𑀤𑀺𑀦𑁄𑀧𑀺𑀲𑀺𑀮𑀺𑀲𑀲𑁆𑀲 𑀲𑀓𑀫𑁆𑀫𑀓𑀢𑁆𑀢𑀸- ‘𑀬𑁂𑀪𑀼𑀬𑁆𑀬𑁂𑀦𑀸’𑀢𑀺 𑀯𑀼𑀢𑁆𑀢𑀁. 𑀲𑀓𑀫𑁆𑀫𑀓𑀢𑁆𑀣𑀦𑁆𑀢𑀺 𑀯𑀢𑁆𑀯𑀸 𑀲𑀓𑀫𑁆𑀫𑀢𑁆𑀢𑀫𑁂𑀲𑀁 𑀧𑀸𑀤𑀺𑀬𑁄𑀕𑁂 𑀲𑀢𑀺 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀧𑀸𑀤𑀺𑀲𑀳𑀺𑀢𑀸’𑀘𑁆𑀘𑀸𑀤𑀺. 𑀔𑀝𑁄𑀧𑀺𑀓𑀸 𑀫𑀜𑁆𑀘𑁄.

𑀅𑀯𑀺𑀯𑀘𑁆𑀙𑀺𑀢𑀓𑀫𑁆𑀫𑁄 𑀘𑁂𑀳𑀸𑀓𑀫𑁆𑀫𑀓𑁄𑀢𑀺 𑀓𑀣𑀬𑀫𑀸𑀳- ‘𑀅𑀯𑀺𑀚𑁆𑀚𑀫𑀸𑀦𑁂’𑀘𑁆𑀘𑀸𑀤𑀺. 𑀬𑀸𑀢𑀯𑀦𑁆𑀢𑁄 𑀬𑀸𑀢𑀸, 𑀬𑀸𑀦𑀁 𑀬𑀸𑀢𑀁. 𑀅𑀬𑁄𑀬𑀺𑀢𑁆𑀣𑀸𑀢𑀺 𑀬𑀸 𑀢𑁄. 𑀓𑁆𑀢𑁄 𑀦 𑀯𑀺𑀥𑀸𑀢𑀩𑁆𑀩𑁄 𑀧𑀸𑀡𑀺𑀦𑀺𑀬𑁂𑀳𑀺 𑀯𑀺𑀬. 𑀓𑀸𑀭𑀡𑀲𑀸𑀫𑀕𑁆𑀕𑀺𑀬𑀁 𑀪𑀽𑀢𑀸𑀬𑀦𑁆𑀢𑀺 𑀲𑀲𑁆𑀲𑀸𑀤𑀺𑀳𑁂𑀢𑀼𑀪𑀽𑀢𑀲𑀫𑀺𑀤𑁆𑀥𑀺𑀬𑀁 𑀪𑀽𑀢𑀸𑀬𑀁. 𑀲𑀸 𑀘 𑀪𑀽𑀢𑀸 𑀬𑁂𑀯𑀸𑀢𑀻𑀫𑀺𑀦𑀸 𑀓𑀸𑀭𑀡𑀲𑀸𑀫𑀕𑁆𑀕𑀺𑀬𑀸 𑀅𑀢𑀻𑀢𑀓𑀸𑀮𑀺𑀓𑀢𑁆𑀢𑀫𑀸𑀳.

𑀆𑀥𑀸𑀭𑁂𑀘𑁂𑀢𑀺 𑀅𑀦𑀼𑀯𑀼𑀢𑁆𑀢𑀺𑀬𑀸 𑀏𑀢𑁆𑀣 𑀘𑀓𑀸𑀭𑀢𑁄 ‘𑀬𑀣𑀸𑀧𑀢𑁆𑀢𑀜𑁆𑀘𑁂’𑀢𑀺 𑀲𑀫𑁆𑀩𑀦𑁆𑀥𑀸 𑀯𑀼𑀢𑁆𑀢𑀦𑁆𑀢𑀺 𑀲𑁂𑀲𑁄. 𑀏𑀯𑀁 𑀦 𑀓𑀼𑀢𑁄𑀘𑀺 𑀅𑀧𑀓𑀲𑁆𑀲𑀦𑀁 𑀲𑀺𑀬𑀸𑀢𑀺 𑀏𑀯𑀫𑀸𑀥𑀸𑀭𑀸𑀤𑀺𑀓𑁂 𑀅𑀦𑀼𑀯𑀢𑁆𑀢𑀫𑀸𑀦𑁂 𑀲𑀢𑀺 𑀓𑀼𑀢𑁄𑀘𑀺 𑀆𑀥𑀸𑀭𑀸𑀤𑀺𑀢𑁄 𑀅𑀧𑀓𑀲𑁆𑀲𑀦𑀁 𑀯𑀺𑀲𑀼𑀁 𑀓𑀭𑀡𑀁 𑀦 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀲𑀢𑀺 𑀳𑁂𑀝𑁆𑀞𑀸 𑀲𑀼𑀢𑁆𑀢𑁂𑀦𑁂𑀓𑀬𑁄𑀕𑀫𑁂𑀯 𑀓𑀭𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀸𑀯𑀓𑀫𑁆𑀫𑁂𑀲𑀽𑀢𑀺 𑀲𑀫𑁆𑀩𑀚𑁆𑀛𑀢𑁂𑀢𑀺 𑀬𑁄𑀚𑀦𑀸.

𑀩𑀳𑀼𑀮𑀲𑁆𑀲 𑀪𑀸𑀯𑁄 𑀓𑀫𑁆𑀫𑀁𑀯𑀸𑀢𑀺 𑀩𑀳𑁆𑀯𑀢𑁆𑀣𑀸𑀤𑀸𑀦𑀫𑁂𑀯𑀸𑀢𑁆𑀭 𑀩𑀳𑀼𑀮𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀪𑀸𑀯𑁄 𑀓𑀫𑁆𑀫𑀁𑀘𑁂𑀢𑀺 𑀢𑀢𑁆𑀣 𑀧𑀘𑁆𑀘𑀬𑁄. 𑀓𑁂𑀘𑀻𑀢𑀺 𑀧𑀸𑀡𑀺𑀦𑀺𑀬𑁂 𑀬𑁂𑀯 𑀲𑀦𑁆𑀥𑀸𑀬𑀸𑀳. 𑀢𑀲𑁆𑀲𑀸𑀧𑀺 𑀪𑀽𑀢𑁂𑀬𑁂𑀯 𑀧𑀯𑀢𑁆𑀢𑀺𑀫𑀼𑀧𑀤𑀺𑀲𑀢𑀺 ‘𑀲𑁄𑀧𑀺’𑀘𑁆𑀘𑀸𑀤𑀺

𑀦𑀸 ¶ . 𑀪𑀺𑀚𑁆𑀚𑀫𑀸𑀦𑀦𑁆𑀢𑀺 𑀧𑀘𑁆𑀘𑀫𑀸𑀦𑀁. 𑀧𑀭𑀭𑀽𑀧𑁂𑀦 𑀧𑀲𑁆𑀲𑀺𑀦𑁆𑀦𑁄𑀢𑀺 𑀬𑁄𑀚𑀦𑀸. 𑀓𑁂𑀘𑀺𑀢𑀺 𑀢𑁂𑀬𑁂𑀯. ‘‘𑀫𑀢𑀺𑀩𑀼𑀤𑁆𑀥𑀺𑀧𑀽𑀚𑀢𑁆𑀣𑁂𑀳𑀺 𑀘𑁂’’𑀢𑀺 (𑁩-𑁨-𑁧𑁮𑁮) 𑀢𑁂𑀲𑀁 𑀲𑀼𑀢𑁆𑀢𑁂 𑀘𑀲𑀤𑁆𑀤𑀸𑀓𑀟𑁆𑀠𑀺𑀢𑁂 𑀤𑀲𑁆𑀲𑁂𑀢𑀺 ‘𑀬𑀣𑀸’𑀢𑀺𑀆𑀤𑀺𑀦𑀸. 𑀅𑀓𑁆𑀓𑁄𑀘𑁆𑀙𑀺 𑀢𑀦𑁆𑀢𑀺 𑀓𑀫𑁆𑀫𑁂 𑀯𑀺𑀕𑁆𑀕𑀳𑀫𑀸𑀳, 𑀢𑀦𑁆𑀢𑀺 𑀓𑀫𑁆𑀫𑀧𑀤𑀁, 𑀏𑀯𑀫𑀼𑀧𑀭𑀺𑀧𑀺 𑀘𑀼𑀭𑀸𑀤𑀺𑀡𑀺𑀮𑁄𑀧𑁂 ‘‘𑀦𑀺𑀫𑀺𑀢𑁆𑀢𑀸𑀪𑀸𑀯𑁂 𑀦𑁂𑀫𑀺𑀢𑁆𑀢𑀺𑀓𑀲𑁆𑀲𑀸𑀧𑁆𑀬𑀪𑀸𑀯𑁄’’𑀢𑁆𑀬𑀸𑀓𑀸𑀭𑀦𑀺𑀯𑀢𑁆𑀢𑀺. 𑀓𑀲𑀺𑀭𑀬𑀁 𑀕𑀢𑁆𑀬𑀸𑀤𑁆𑀬𑀦𑁂 𑀓𑀢𑁆𑀣𑁄, 𑀓𑀝𑁆𑀞𑀁𑀢𑁆𑀬𑀢𑁆𑀭 𑀓𑀺𑀫𑀢𑁆𑀣𑁄𑀢𑀺 𑀆𑀳- ‘𑀏𑀢𑁆𑀣 𑀳𑀺𑀁𑀲𑀢𑁆𑀣𑁄’𑀢𑀺.

𑀳𑁂𑀢𑀼𑀦𑁄𑀢𑀺 𑀤𑀼𑀓𑁆𑀔𑀨𑀮𑀲𑁆𑀲 𑀳𑁂𑀢𑀼𑀦𑁄 𑀅𑀕𑁆𑀬𑀸𑀤𑀺𑀦𑁄. 𑀓𑀝𑁆𑀞𑀲𑀤𑁆𑀤𑀲𑁆𑀲 𑀨𑀮𑀳𑁂𑀢𑀼𑀪𑀽𑀢𑁂 𑀅𑀕𑁆𑀬𑀸𑀤𑀺𑀓𑁂 𑀯𑀢𑁆𑀢𑀫𑀸𑀦𑁂 𑀏𑀯𑀁 𑀳𑁄𑀢𑀼 𑀨𑀮𑁂𑀯𑀢𑁆𑀢𑀫𑀸𑀦𑁂 𑀓𑀣𑀦𑁆𑀢𑀺 𑀆𑀳- ‘𑀬𑀤𑀸𑀧𑀦𑀸’𑀢𑀺𑀆𑀤𑀺. 𑀓𑁄𑀥𑀸𑀢𑀺𑀓𑁄 𑀇𑀥.

𑀦𑀦𑀼 𑀘 𑀪𑀸𑀯𑁂𑀇𑀢𑀺 𑀪𑀯𑀢𑀺𑀦𑀸𑀬𑀁 𑀖𑀡𑀦𑁆𑀢𑁂𑀦 𑀦𑀺𑀤𑁆𑀤𑁂𑀲𑁄 𑀓𑀭𑀻𑀬𑀢𑀻𑀢𑀺 𑀪𑀯𑀢𑀺𑀯𑀺𑀲𑀬𑁄𑀯 𑀧𑀘𑁆𑀘𑀬𑀢𑁆𑀣𑀦𑀺𑀤𑁆𑀤𑁂𑀲𑁄 𑀓𑀢𑁄 𑀪𑀯𑀢𑀺, 𑀢𑀢𑁄 𑀘 𑀪𑀯𑀢𑀺𑀦𑁄 𑀬𑁄 𑀪𑀸𑀯𑁄 𑀢𑀲𑁆𑀫𑀺𑀁𑀬𑁂𑀯 𑀯𑀸𑀘𑁆𑀘𑁂 𑀧𑀘𑁆𑀘𑀬𑁄 𑀲𑀺𑀬𑀸, 𑀲𑁄 𑀘 𑀪𑀯𑀢𑀺𑀢𑁄 𑀬𑁂𑀯𑀼𑀧𑁆𑀧𑀚𑁆𑀚𑀫𑀸𑀦𑁂𑀦 𑀧𑀘𑁆𑀘𑀬𑁂𑀦 𑀲𑀓𑁆𑀓𑀸𑀪𑀺𑀥𑀸𑀢𑀼𑀁 𑀢𑀢𑁄 𑀢𑀲𑁆𑀫𑀸𑀯 𑀧𑀘𑁆𑀘𑀬𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀓𑀣𑀁 𑀧𑀘𑀺𑀢𑀼𑀁 𑀧𑀸𑀓𑁄 𑀘𑀸𑀕𑁄 𑀭𑀸𑀕𑁄𑀢𑀺𑀧𑀘𑀸𑀤𑀻𑀳𑀺𑀪𑀯𑀢𑀺 𑀘𑁆𑀘𑀸𑀳- ‘𑀪𑀯𑀦𑀁𑀪𑀸𑀯𑁄 𑀓𑀺𑀭𑀺𑀬𑀸𑀥𑀸𑀢𑁆𑀯𑀢𑁆𑀣𑁄’𑀢𑀺.

𑀓𑀺𑀭𑀺𑀬𑀸𑀲𑀸𑀫𑀜𑁆𑀜𑀜𑁆𑀳𑀺 𑀲𑀩𑁆𑀩𑀥𑀸𑀢𑁆𑀯𑀢𑁆𑀣𑀸𑀦𑀼𑀕𑀢𑀁 𑀪𑀯𑀢𑀺𑀲𑁆𑀲𑀢𑁆𑀣𑁄, 𑀢𑁂𑀦 𑀓𑀺𑀭𑀺𑀬𑀸𑀲𑀸𑀫𑀜𑁆𑀜𑀯𑀸𑀘𑀺𑀦𑀸𑀢𑁆𑀣𑀦𑀺𑀤𑁆𑀤𑁂𑀲𑁄 𑀓𑀭𑀻𑀬𑀫𑀸𑀦𑁄 𑀲𑀩𑁆𑀩𑀥𑀸𑀢𑀼𑀯𑀺𑀲𑀬𑁂 𑀓𑀢𑁄 𑀪𑀯𑀢𑀺 𑀢𑀲𑁆𑀫𑀸 𑀧𑀘𑀸𑀤𑀻𑀳𑀺𑀧𑀺 𑀪𑀯𑀢𑀻𑀢𑁆𑀬𑀥𑀺𑀧𑁆𑀧𑀸𑀬𑁄.

𑀦𑀦𑀼 𑀘𑀸𑀢𑁆𑀭 𑀢𑀼𑀫𑀸𑀤𑀬𑁄 𑀪𑀸𑀯𑁂 𑀪𑀯𑀦𑁆𑀢𑀻𑀢𑀺 𑀯𑀼𑀢𑁆𑀢𑁂 𑀦 𑀯𑀺𑀜𑁆𑀜𑀸𑀬𑀢𑁂 𑀓𑀺𑀁𑀯𑀺𑀲𑁂𑀲𑀺𑀢𑁂 𑀪𑀸𑀯𑁂 𑀢𑀼𑀫𑀸𑀤𑀬𑁄 𑀪𑀯𑀦𑁆𑀢𑀺𑀘𑁆𑀘𑀸𑀳- ‘𑀬𑀢𑁄’𑀘𑁆𑀘𑀸𑀤𑀺. 𑀢𑀲𑁆𑀲𑀸𑀢𑀺 𑀥𑀸𑀢𑀼𑀦𑁄. 𑀬𑁄 𑀯𑀢𑁆𑀢𑀩𑁆𑀩𑁄 𑀪𑀸𑀯𑁄𑀢𑀺 𑀬𑁄 𑀯𑀸𑀘𑁆𑀘𑁄 𑀪𑀸𑀯𑁄. 𑀓𑀼𑀢𑁄𑀘𑁆𑀘𑀸𑀳- ‘𑀲𑀫𑁆𑀩𑀦𑁆𑀥𑀸’𑀢𑀺. 𑀢𑀼𑀫𑀸𑀤𑀻𑀦𑀁 𑀬𑀸 𑀧𑀓𑀢𑀺 𑀢𑀸𑀬 𑀯𑀸𑀘𑁆𑀘𑁂𑀦𑁂𑀯 𑀪𑀸𑀯𑁂𑀦 𑀲𑀳 𑀲𑀫𑁆𑀩𑀦𑁆𑀥𑀸𑀢𑀺 𑀅𑀢𑁆𑀣𑁄. 𑀞𑀸𑀢𑀩𑁆𑀩𑀦𑁆𑀢𑀺 𑀪𑀸𑀯𑁂 𑀢𑀩𑁆𑀩𑁄. 𑀅𑀣 𑀓𑁆𑀭𑀺𑀬𑀸𑀬𑀁𑀢𑁆𑀬𑀦𑁂𑀦 𑀢𑀩𑁆𑀩𑀸𑀤𑁆𑀬𑀪𑀺𑀳𑀺𑀢𑀲𑁆𑀲 𑀤𑀩𑁆𑀩𑀭𑀽𑀧𑀸𑀧𑀦𑁆𑀦𑀲𑁆𑀲 𑀪𑀸𑀯𑀲𑁆𑀲 𑀓𑀣𑀁 𑀕𑀳𑀡𑀁𑀢𑁆𑀬𑀸𑀳- ‘𑀬𑀤𑀺𑀧𑀺’𑀘𑁆𑀘𑀸𑀤𑀺. 𑀲𑀓𑀦𑀺𑀲𑁆𑀲𑀬𑀓𑀺𑀭𑀺𑀬𑀸𑀩𑁆𑀬𑀧𑀤𑁂𑀲𑁄𑀢𑀺 𑀤𑀩𑁆𑀩 𑀭𑀽𑀧𑀲𑁆𑀲 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀪𑀽𑀢𑀸𑀬 𑀓𑀺𑀭𑀺𑀬𑀸𑀬 𑀩𑁆𑀬𑀧𑀤𑁂𑀲𑁄 𑀤𑀝𑁆𑀞𑀼𑀁 𑀘𑀓𑁆𑀔𑀼𑀘𑁆𑀘𑀸𑀤𑁄 𑀪𑀯𑀦𑀓𑀺𑀭𑀺𑀬𑀸𑀬 𑀧𑀢𑀻𑀬𑀫𑀸𑀦𑀢𑁆𑀢𑀸 𑀢𑀼𑀫𑀸𑀤𑀬𑁄 𑀪𑀯𑀦𑁆𑀢𑁂𑀯.

𑀦𑀦𑀼 ¶ 𑀘 𑀢𑀼𑀫𑀸𑀤𑀻𑀦𑀁 𑀪𑀸𑀯𑁂 𑀯𑀺𑀳𑀺𑀢𑀢𑁆𑀢𑀸 𑀓𑀺𑀭𑀺𑀬𑀸𑀬𑁂𑀯 𑀧𑀥𑀸𑀦𑀢𑁆𑀢𑀦𑁆𑀢𑀺 𑀓𑀫𑁆𑀫 𑀓𑀸𑀭𑀓𑀁 𑀦𑀧𑁆𑀧𑀢𑀻𑀬𑀢𑁂𑀢𑀺 𑀓𑀣𑀁 ‘𑀓𑀝𑀁 𑀓𑀸𑀢𑀼𑀁 𑀕𑀘𑁆𑀙𑀢𑀻’𑀢𑀺 𑀲𑀺𑀬𑀸𑀘𑁆𑀘𑀸 𑀲𑀗𑁆𑀓𑀺𑀬 𑀧𑀝𑀺𑀧𑀸𑀤𑁂𑀢𑀼𑀫𑀸𑀳- ‘𑀬𑀤𑀺𑀧𑀺’𑀘𑁆𑀘𑀸𑀤𑀺. 𑀥𑀸𑀢𑁆𑀯𑀢𑁆𑀣𑀓𑀢𑁄 𑀓𑀺𑀭𑀺𑀬𑀸𑀲𑀗𑁆𑀔𑀸𑀢𑁂𑀦 𑀥𑀸𑀢𑁆𑀯𑀢𑁆𑀣𑁂𑀦 𑀓𑀢𑁄. 𑀅𑀢𑁆𑀣𑀻𑀢𑀺 𑀇𑀫𑀺𑀦𑀸 𑀬𑀢𑁆𑀣 ‘𑀲𑀼𑀧𑁆𑀬𑀢𑁂 𑀤𑁂𑀯 𑀤𑀢𑁆𑀢𑁂𑀦𑁂’𑀘𑁆𑀘𑀸𑀤𑁄 𑀦𑀢𑁆𑀣𑀺, 𑀢𑀢𑁆𑀣 𑀦 𑀓𑀫𑁆𑀫𑀫𑁆𑀧𑀢𑀻𑀬𑀢𑁂𑀢𑀺 𑀤𑀲𑁆𑀲𑁂𑀢𑀺.

‘‘𑀇𑀘𑁆𑀙𑀢𑁆𑀣𑁂𑀲𑀼 𑀲𑀫𑀸𑀦𑀓𑀢𑁆𑀢𑀼𑀓𑁂𑀲𑀼 𑀢𑀯𑁂𑀢𑀼𑀁 𑀯𑀸’’𑀢𑀺 (𑁪-𑁨-𑁧𑁨) 𑀓𑀘𑁆𑀘𑀸𑀦𑁂𑀦 𑀅𑀢𑀤𑀢𑁆𑀣𑀸𑀬𑀫𑁆𑀧𑀺𑀓𑀺𑀭𑀺𑀬𑀸𑀬𑀁 𑀢𑀼𑀫𑀸𑀤𑀬𑁄 𑀬𑀣𑀸𑀲𑀺𑀬𑀼𑀦𑁆𑀢𑀺 𑀯𑀺𑀲𑀼𑀁 𑀲𑀼𑀢𑁆𑀢𑀺𑀢𑀁, 𑀢𑁂𑀦𑀸𑀳- ‘𑀇𑀘𑁆𑀙𑀢𑁆𑀣𑁂𑀲𑁆𑀫𑀺’𑀘𑁆𑀘𑀸𑀤𑀺. 𑀬𑀣𑀸 ‘𑀪𑁄𑀢𑁆𑀢𑀼𑀁 𑀧𑀘𑀢𑀻’𑀢𑁆𑀬𑀸𑀤𑁄 𑀪𑁄𑀚𑀦𑀓𑀺𑀭𑀺𑀬𑀸 𑀧𑀬𑁄𑀚𑀦𑀸 𑀧𑀘𑀦𑀓𑀺𑀭𑀺𑀬𑀸 𑀳𑁄𑀢𑀺, 𑀦𑁂𑀯𑀫𑁂𑀢𑁆𑀣 𑀢𑀧𑁆𑀧 𑀬𑁄𑀚𑀦𑀸 𑀇𑀘𑁆𑀙𑀸… 𑀧𑀘𑀦𑀓𑀺𑀭𑀺𑀬𑀸𑀬𑀯𑀺𑀬𑀢𑀧𑁆𑀧𑀬𑁄𑀚𑀦𑀢𑁆𑀢𑀸𑀪𑀸𑀯𑀢𑁄𑀢𑀺 𑀅𑀬𑀫𑀲𑁆𑀲𑀸𑀥𑀺𑀧𑁆𑀧𑀸𑀬𑁄. 𑀧𑀼𑀦𑁂𑀘𑁆𑀘𑀸𑀤𑀺𑀦𑀸 𑀯𑀼𑀢𑁆𑀢𑀸𑀦𑀺𑀝𑁆𑀞𑀧𑀸𑀢𑀲𑁆𑀲𑀸𑀲𑀗𑁆𑀓𑀁 𑀯𑀺𑀭𑀘𑀬𑀫𑀸𑀳- ‘𑀅𑀢𑀤𑀢𑁆𑀣𑀸𑀬𑀫𑁆𑀧𑀺’𑀘𑁆𑀘𑀸𑀤𑀺.

𑀇𑀘𑁆𑀙𑀢𑁆𑀣𑀲𑁆𑀲 𑀥𑀸𑀢𑀼𑀦𑁄 𑀧𑀬𑁄𑀕𑀸𑀢𑀺 𑀇𑀫𑀺𑀦𑀸 ‘𑀇𑀘𑁆𑀙𑀦𑁆𑀢𑁄 𑀓𑀭𑁄𑀢𑀻’𑀢𑀺 𑀏𑀢𑁆𑀣 𑀇𑀘𑁆𑀙𑀦𑁆𑀢𑁄𑀢𑀺 𑀇𑀘𑁆𑀙𑀢𑁆𑀣𑀲𑁆𑀲 𑀥𑀸𑀢𑀼𑀦𑁄 𑀧𑀬𑁄𑀕𑀢𑁆𑀣𑀫𑁂𑀯, 𑀦 𑀇𑀘𑁆𑀙𑀸𑀬 𑀧𑀬𑁄𑀚𑀦𑀁 𑀓𑀭𑀡𑀦𑁆𑀢𑀺 𑀤𑀻𑀧𑁂𑀢𑀺. 𑀤𑁂𑀯𑀤𑀢𑁆𑀢𑀁 𑀪𑀼𑀜𑁆𑀚𑀫𑀸𑀦𑀫𑀺𑀘𑁆𑀙𑀢𑀻𑀢𑁂𑀢𑁆𑀣 𑀪𑁄𑀢𑁆𑀢𑀼𑀦𑁆𑀢𑀺 𑀦 𑀳𑁄𑀢𑀺 𑀲𑀫𑀸𑀦𑀓𑀢𑁆𑀢𑀼𑀓𑁂𑀲𑀽𑀢𑀺 𑀯𑀘𑀦𑀢𑁄, 𑀪𑁄𑀚𑀦𑀲𑁆𑀲 𑀤𑁂𑀯𑀤𑀢𑁆𑀢𑁄 𑀓𑀢𑁆𑀢𑀸, 𑀇𑀘𑁆𑀙𑀢𑀺𑀲𑁆𑀲 𑀅𑀜𑁆𑀜𑁄𑀬𑁂𑀯𑀸𑀢𑀺𑀧𑀺 𑀲𑀼𑀢𑁆𑀢𑀲𑁆𑀲 𑀯𑀺𑀲𑀼𑀁 𑀧𑀬𑁄𑀚𑀦𑀁 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳- ‘𑀤𑁂𑀯𑀤𑀢𑁆𑀢’𑀫𑀺𑀘𑁆𑀘𑀸𑀤𑀺.

𑀇𑀘𑁆𑀙𑀢𑀺𑀲𑁆𑀲𑀸𑀢𑀺’𑀤𑁂𑀯𑀤𑀢𑁆𑀢𑀁 𑀪𑀼𑀜𑁆𑀚𑀫𑀸𑀦𑀫𑀺𑀘𑁆𑀙𑀢𑀻’𑀢𑀺 𑀏𑀢𑁆𑀣 𑀇𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀇𑀲𑀺𑀲𑁆𑀲. 𑀲𑀸𑀥𑀦𑀁 ‘𑀤𑁂𑀯𑀤𑀢𑁆𑀢𑀁 𑀪𑀼𑀜𑁆𑀚𑀫𑀸𑀦’𑀦𑁆𑀢𑀺 𑀯𑀼𑀢𑁆𑀢𑀓𑀫𑁆𑀫𑀲𑀗𑁆𑀔𑀸𑀢𑀁 𑀅𑀢𑁆𑀣𑁄 𑀧𑀬𑁄𑀚𑀦𑀁 𑀬𑀲𑁆𑀲 𑀲𑁄 𑀲𑀸𑀥𑀦𑀢𑁆𑀣𑁄-𑀇𑀘𑁆𑀙𑀢𑀺. 𑀢𑀲𑁆𑀲 𑀪𑀸𑀯𑁄 𑀢𑀢𑁆𑀢𑀁, 𑀢𑀲𑁆𑀫𑀸. 𑀓𑀫𑁆𑀫𑀫𑁂𑀯𑀺𑀘𑁆𑀙𑀸𑀬 𑀧𑀬𑁄𑀚𑀦𑀪𑀸𑀯𑁂 𑀞𑀺𑀢𑀦𑁆𑀢𑀺 𑀪𑀸𑀯𑁄. 𑀦𑀺𑀭𑀢𑁆𑀣𑀓𑀦𑁆𑀢𑀺 𑀏𑀢𑀤𑀢𑁆𑀣𑀫𑁂𑀯 𑀲𑀫𑀸𑀦𑀓𑀢𑁆𑀢𑀼𑀓𑀕𑁆𑀕𑀳𑀡𑀁 𑀓𑀢𑀁 𑀢𑀜𑁆𑀘 𑀬𑀣𑀸𑀯𑀼𑀢𑁆𑀢𑁂𑀦 𑀧𑀲𑀗𑁆𑀕𑀸𑀪𑀸𑀯𑀸 𑀦𑀺𑀭𑀢𑁆𑀣𑀓𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀓𑀸𑀤𑁆𑀬𑀢𑁆𑀣𑁂𑀲𑀼 𑀥𑀸𑀢𑀽 𑀲𑀽𑀧𑀧𑀤𑁂𑀲𑀼 𑀥𑀸𑀢𑀼 𑀫𑀢𑁆𑀢𑀸 𑀢𑀼𑀫𑀸𑀤𑀬𑁄 𑀲𑀼𑀢𑁆𑀢𑀦𑁆𑀢𑀭𑁂𑀦 𑀯𑀺𑀳𑀺𑀢𑀸 𑀧𑀸𑀡𑀺𑀦𑀺𑀬𑁂𑀳𑀺, 𑀢𑁂𑀦𑀸𑀳- ‘𑀲𑀓𑀸𑀤𑀺𑀥𑀸𑀢𑀼𑀧𑁆𑀧𑀬𑁄𑀕𑁂’𑀢𑀺𑀆𑀤𑀺. 𑀲𑀺𑀤𑁆𑀥𑀸𑀢𑀺 𑀢𑀼𑀫𑀸𑀤𑀬𑁄 𑀲𑀺𑀤𑁆𑀥𑀸. 𑀪𑀼𑀚𑀺𑀓𑀺𑀭𑀺𑀬𑀢𑁆𑀣𑀸𑀢𑀺 𑀪𑀼𑀚𑀺𑀓𑀺𑀭𑀺𑀬𑀸 𑀅𑀢𑁆𑀣𑁄 𑀬𑀲𑁆𑀲𑀸 𑀲𑀢𑁆𑀢𑀺𑀬𑀸 𑀲𑀸 𑀪𑀼𑀚𑀺𑀓𑀺𑀭𑀺𑀬𑀢𑁆𑀣𑀸 𑀧𑀢𑀻𑀬𑀢𑁂. 𑀧𑀢𑀻𑀬 𑀫𑀸𑀦𑀢𑁆𑀢𑁂 ¶ 𑀓𑀸𑀭𑀡𑀫𑀸𑀳- ‘𑀅𑀲𑀢𑁄𑀧𑀺 𑀳𑀺’𑀘𑁆𑀘𑀸𑀤𑀺. 𑀧𑀭𑁂𑀳𑁂𑀢𑁆𑀣 𑀅𑀓𑀺𑀭𑀺𑀬𑀢𑁆𑀣𑁄𑀧𑀧𑀤𑀢𑁆𑀣𑁄 𑀧𑀼𑀦𑀸𑀭𑀩𑁆𑀪𑁄𑀢𑀺 𑀯𑀡𑁆𑀡𑀺𑀢𑀁. 𑀢𑀤𑁂𑀢𑀁 𑀯𑀺𑀖𑀝𑀬𑀺𑀢𑀼𑀫𑀸𑀳- ‘𑀢𑁂𑀦𑁂’𑀘𑁆𑀘𑀸𑀤𑀺. 𑀧𑀭𑁂𑀲𑀫𑀬𑀫𑀥𑀺𑀧𑁆𑀧𑀸𑀬𑁄 ‘‘𑀲𑀓𑁆𑀓𑁄𑀢𑀺 𑀪𑁄𑀢𑁆𑀢𑀼𑀁𑀢𑁆𑀬𑀸𑀤𑁄 𑀓𑁄𑀲𑀮𑁆𑀬𑀁 𑀕𑀫𑁆𑀬𑀢𑁂. 𑀕𑀺𑀮𑀸𑀬𑀢𑀺 𑀪𑁄𑀢𑁆𑀢𑀼𑀁𑀢𑀺 𑀢𑀤𑀲𑀢𑁆𑀢𑀺. 𑀖𑀝𑀢𑁂 𑀪𑁄𑀢𑁆𑀢𑀼𑀁𑀢𑁆𑀬𑀸𑀤𑁄 𑀬𑁄𑀕𑁆𑀬𑀢𑀸. 𑀆𑀭𑀪𑀢𑁂 𑀪𑁄𑀢𑁆𑀢𑀼𑀁𑀢𑁆𑀬𑀸𑀤𑁄𑀪𑀼𑀚𑀺𑀲𑁆𑀲𑁂 𑀯𑀸𑀤𑁆𑀬𑀯𑀢𑁆𑀣𑀸𑀓𑀺𑀭𑀺𑀬𑀦𑁆𑀢𑀭𑀁. 𑀮𑀪𑀢𑁂 𑀪𑁄𑀢𑁆𑀢𑀼𑀁𑀢𑀺 𑀅𑀧𑁆𑀧𑀘𑁆𑀘𑀓𑁆𑀔𑀸𑀦𑀁. 𑀅𑀢𑁆𑀣𑀺 𑀪𑁄𑀢𑁆𑀢𑀼𑀦𑁆𑀢𑀺𑀆𑀤𑀻𑀲𑀼 𑀲𑀫𑁆𑀪𑀯𑀫𑀢𑁆𑀢𑀁. 𑀯𑀝𑁆𑀝𑀢𑀺 𑀪𑁄𑀢𑁆𑀢𑀼𑀁𑀢𑁆𑀬𑀸𑀤𑁄 𑀤𑁄𑀲𑀸 𑀪𑀸𑀯𑁄 𑀕𑀫𑁆𑀬𑀢𑁂. 𑀲𑀓𑁆𑀓𑁄𑀢𑀺𑀘𑁆𑀘𑀸𑀤𑀺𑀦𑁄 𑀉𑀧𑀧𑀤𑀲𑁆𑀲 𑀪𑁄𑀚𑀦𑀸𑀤𑀺𑀓𑀺𑀭𑀺𑀬𑀢𑁆𑀣𑀢𑀸 𑀦 𑀕𑀫𑁆𑀬𑀢𑁂 𑀢𑀲𑁆𑀫𑀸 𑀅𑀓𑀺𑀭𑀺𑀬𑀢𑁆𑀣𑁂𑀲𑀼𑀧𑀺 𑀲𑀓𑀸𑀤𑀻𑀲𑀽𑀧𑀧𑀤𑁂𑀲𑀼 𑀢𑀼𑀫𑀸𑀤𑀬𑁄 𑀪𑀯𑀦𑁆𑀢𑀻’’𑀢𑀺.

𑀧𑀢𑀻𑀬𑀫𑀸𑀦𑁂𑀲𑁆𑀯𑀧𑁆𑀬𑁂𑀢𑁂𑀲𑁆𑀯𑀢𑁆𑀣𑀦𑁆𑀢𑀭𑁂𑀲𑀼 𑀢𑀸𑀤𑀢𑁆𑀣𑀺𑀬𑀫𑀢𑁆𑀣𑀺𑀬𑁂𑀯𑀸𑀢𑀺 𑀧𑀼𑀩𑁆𑀩𑁂𑀦 𑀯𑀺𑀳𑀺𑀢𑀲𑁆𑀲 𑀢𑀼𑀫𑀸𑀤𑀺𑀦𑁄𑀢𑁆𑀭 𑀦 𑀩𑀸𑀥𑁂𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀬𑀤𑀺𑀧𑀺’𑀘𑁆𑀘𑀸𑀤𑀺. 𑀢𑀸𑀤𑀢𑁆𑀣𑀺𑀬𑀫𑀢𑁆𑀣𑀺𑀬𑁂𑀯𑀸𑀢𑀺 𑀪𑁄𑀚𑀦𑀓𑀺𑀭𑀺𑀬𑀢𑁆𑀣𑀢𑀸 𑀲𑀓𑁆𑀓𑁄𑀢𑀺𑀆𑀤𑀻𑀦𑀁 𑀅𑀢𑁆𑀣𑀺 𑀬𑁂𑀯𑀸𑀢𑀺 𑀅𑀢𑁆𑀣𑁄 𑀲𑀺𑀤𑁆𑀥𑀸𑀬𑁂𑀯 ‘‘𑀢𑀼𑀁𑀢𑀸𑀬𑁂’’𑀘𑁆𑀘𑀸𑀤𑀺𑀦𑀸. 𑀅𑀮𑀫𑀢𑁆𑀣𑀯𑀺𑀲𑀺𑀝𑁆𑀞𑁂𑀲𑀼 𑀧𑀭𑀺𑀬𑀢𑁆𑀢𑀺𑀯𑀘𑀦𑁂𑀲𑀽𑀧𑀧𑀤𑁂𑀲𑀼 𑀥𑀸𑀢𑀼𑀢𑁄 𑀢𑀼𑀫𑀸𑀤𑀬𑁄 𑀯𑀺𑀳𑀺𑀢𑀸 𑀧𑀭𑁂𑀳𑀺, 𑀢𑀢𑁆𑀣𑀸𑀳 ‘𑀅𑀮𑀫𑀢𑁆𑀣𑀯𑀺𑀲𑀺𑀝𑁆𑀞𑁂’𑀇𑀘𑁆𑀘𑀸𑀤𑀺. 𑀧𑀳𑀼𑀲𑀤𑁆𑀤𑀫𑁆𑀧𑀺 𑀅𑀦𑁆𑀢𑁄𑀕𑀥𑀁 𑀓𑀢𑁆𑀯𑀸 ‘𑀲𑀫𑀢𑁆𑀣𑀸𑀤𑀻’𑀢𑀺 𑀯𑀼𑀢𑁆𑀢𑀁, 𑀪𑀯𑀢𑀺𑀲𑁆𑀲 𑀲𑀫𑁆𑀪𑀯𑁄 ‘‘𑀧𑀼𑀩𑁆𑀩𑁂𑀓𑀓𑀢𑁆𑀢𑀼𑀓𑀸𑀦’’𑀦𑁆𑀢𑀺 (𑁫-𑁬𑁩) 𑀏𑀢𑁆𑀣 𑀩𑁆𑀬𑀸𑀔𑁆𑀬𑀸𑀬𑀺𑀲𑁆𑀲𑀢𑁂. 𑀅𑀪𑀺𑀫𑀢𑀸𑀢𑀺 𑀓𑀘𑁆𑀘𑀸𑀬𑀦𑁂𑀦 ‘‘𑀅𑀭𑀳𑀲𑀓𑁆𑀓𑀸𑀤𑀻𑀲𑀼 𑀘𑁂’’𑀢𑀺 (𑁪-𑁨-𑁧𑁩) 𑀘𑀲𑀤𑁆𑀤𑁂𑀦 𑀅𑀪𑀺𑀫𑀢𑀸 𑀇𑀫𑀲𑁆𑀲𑀸𑀢𑀺 ‘𑀓𑀸𑀮𑁄 𑀪𑁄𑀢𑁆𑀢𑀼𑀁’𑀢𑀺𑀆𑀤𑀺𑀦𑁄. 𑀬𑀣𑀸 𑀪𑁄𑀢𑁆𑀢𑀼𑀫𑀦𑁄𑀢𑀺𑀆𑀤𑀺𑀦𑀸 𑀧𑀭𑁂𑀲𑀫𑁆𑀧𑀺 𑀅𑀬𑀫𑁂𑀯 𑀦𑀺𑀧𑁆𑀨𑀢𑁆𑀢𑀺𑀓𑁆𑀓𑀫𑁄𑀢𑀺 𑀤𑀻𑀧𑁂𑀢𑀺. 𑀅𑀩𑁆𑀬𑀪𑀺𑀘𑀸𑀭𑀢𑁄𑀢𑀺 𑀅𑀯𑀺𑀦𑀸𑀪𑀸𑀯𑀢𑁄, 𑀪𑀯𑀢𑀺 𑀪𑁄𑀚𑀦𑀁 𑀪𑀸𑀯𑁄𑀢𑀺 𑀪𑁄𑀚𑀦𑀁 𑀪𑀼𑀜𑁆𑀚𑀦𑀁 𑀪𑀸𑀯𑁄 𑀪𑀯𑀢𑀻𑀢𑀺 𑀅𑀢𑁆𑀣𑁄. 𑀦𑀢𑀼𑀕𑀫𑀺𑀲𑁆𑀲𑀓𑀺𑀭𑀺𑀬𑀸𑀢𑀤𑀢𑁆𑀣𑀸𑀢𑀺 𑀕𑀫𑀦𑀓𑀺𑀭𑀺𑀬𑀸 𑀪𑁄𑀚𑀦𑀢𑁆𑀣𑀸 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀲𑀤𑁆𑀤𑁄𑀳𑁆𑀬𑀬𑀁 𑀧𑀬𑁄𑀚𑀦𑀯𑀘𑀦𑁄 𑀬𑀜𑁆𑀘 𑀬𑀫𑀼𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀢𑀺, 𑀢𑀁 𑀢𑀲𑁆𑀲 𑀧𑀬𑁄𑀚𑀦𑀁 𑀪𑀯𑀢𑀺. 𑀦𑀘𑀸𑀬𑀁 𑀪𑁄𑀚𑀦𑀫𑀼𑀤𑁆𑀤𑀺𑀲𑁆𑀲 𑀕𑀫𑀺𑀲𑁆𑀲𑀢𑀺, 𑀓𑀺𑀜𑁆𑀘𑀭𑀳𑀺 𑀓𑀸𑀭𑀺𑀬𑀦𑁆𑀢𑀭𑀁, 𑀓𑁂𑀯𑀮𑀁 𑀢𑁂𑀦 𑀦𑀺𑀫𑀺𑀢𑁆𑀢𑁂𑀦 𑀲𑀫𑁆𑀪𑀸𑀯𑀻𑀬𑀢𑁂. 𑀬𑀤𑀸 𑀢𑀼 𑀪𑁄𑀚𑀦𑀢𑁆𑀣𑀫𑁂𑀯𑀸𑀭𑀩𑁆𑀪𑀢𑁂 𑀕𑀫𑀦𑀓𑀺𑀭𑀺𑀬𑀸, 𑀢𑀤𑀸 𑀪𑀯𑀢𑁆𑀬𑁂𑀯’𑀕𑀫𑀺𑀲𑁆𑀲𑀢𑀺 𑀪𑁄𑀢𑁆𑀢𑀼’𑀦𑁆𑀢𑀺.

𑀢𑀼𑀁𑀯𑀺𑀲𑀬𑁂 𑀡𑀓𑁄𑀧𑀺 𑀯𑀺𑀳𑀺𑀢𑁄 𑀧𑀸𑀡𑀺𑀦𑀺𑀬𑁂𑀳𑀺, 𑀢𑀢𑁆𑀭𑀸𑀳- ‘𑀓𑀸𑀭𑀓𑁄 𑀯𑀚𑀢𑀺’𑀘𑁆𑀘𑀸𑀤𑀺. 𑀧𑀭𑀺𑀳𑀸𑀭𑀫𑀸𑀳- ‘𑀧𑀼𑀩𑁆𑀩𑁂’𑀘𑁆𑀘𑀸𑀤𑀺𑀦𑀸. ‘𑀓𑀢𑁆𑀢𑀭𑀺𑀮𑁆𑀢𑀼’𑀘𑁆𑀘𑀸𑀤𑀺𑀦𑀸 𑀬𑁄𑀬𑀁 ¶ 𑀡𑀓𑁄 𑀢𑀻𑀲𑀼𑀧𑀺 𑀓𑀸𑀮𑁂𑀲𑀼 𑀲𑀸𑀫𑀜𑁆𑀜𑁂𑀦 𑀯𑀺𑀳𑀺𑀢𑁄, 𑀓𑁆𑀭𑀺𑀬𑀢𑁆𑀣𑀸 𑀬𑀁 𑀓𑁆𑀭𑀺𑀬𑀸𑀬𑀁 𑀉𑀧𑀧𑀤𑁂 𑀓𑀢𑁆𑀢𑀼𑀦𑁄-𑀪𑀺𑀥𑀸𑀦𑀁 𑀲𑀺𑀤𑁆𑀥𑀁, 𑀦 𑀘𑀸𑀲𑁆𑀲 𑀯𑀺𑀲𑁂𑀲𑀯𑀺𑀳𑀺𑀢𑁂𑀦 𑀢𑀼𑀁𑀧𑀘𑁆𑀘𑀬𑁂𑀦 𑀩𑀸𑀥𑀸 𑀪𑀺𑀦𑁆𑀦𑀢𑁆𑀢𑀸, 𑀢𑀼𑀁𑀧𑀘𑁆𑀘𑀬𑀲𑁆𑀲 𑀳𑀺 𑀪𑀸𑀯𑁂 𑀯𑀺𑀥𑀸𑀦𑀁 𑀡𑀓𑀲𑁆𑀲 𑀢𑀼 𑀓𑀢𑁆𑀢𑀭𑀻𑀢𑀺. 𑀧𑀼𑀩𑁆𑀩𑀡𑀓𑁂𑀦𑁂𑀯 𑀲𑀺𑀤𑁆𑀥𑁂𑀧𑀺 𑀮𑁆𑀢𑁆𑀯𑀸𑀤𑀺𑀦𑀺𑀯𑀢𑁆𑀢𑀺𑀬𑀸 𑀲𑁄 𑀯𑀺𑀥𑁂𑀬𑁆𑀬𑁄𑀯, 𑀦𑁄 𑀘𑁂 𑀮𑁆𑀢𑁆𑀯𑀸𑀤𑀬𑁄𑀧𑀺 𑀲𑀺𑀬𑀼𑀦𑁆𑀢𑀺 𑀘𑁄𑀤𑀓𑀧𑁆𑀧𑀲𑀗𑁆𑀕𑀫𑀸𑀲𑀗𑁆𑀓𑀺𑀬𑀸𑀳- ‘𑀦𑀘𑁂𑀯’𑀫𑀺𑀘𑁆𑀘𑀸𑀤𑀺. 𑀅𑀯𑀕𑀫𑀸𑀪𑀸𑀯𑀫𑁂𑀯 𑀨𑀼𑀝𑀬𑀺𑀢𑀼𑀫𑀸𑀳- ‘𑀦𑀳𑀺𑀁’𑀘𑁆𑀘𑀸𑀤𑀺. 𑀳𑀺 𑀬𑀲𑁆𑀫𑀸𑀢𑁆𑀬𑀢𑁆𑀣𑁂 𑀬𑁄 𑀏𑀲𑁄 𑀯𑀚𑀢𑀺 𑀲𑁄 𑀓𑀢𑁆𑀢𑀸, 𑀬𑁄 𑀏𑀲𑁄 𑀯𑀚𑀢𑀺 𑀲𑁄 𑀯𑀺𑀓𑁆𑀔𑀺𑀧𑁄𑀢𑁆𑀬𑀬𑀫𑀢𑁆𑀣𑁄-𑀢𑁆𑀭 𑀕𑀫𑁆𑀬𑀢𑁂, 𑀦 𑀧𑀦 𑀢𑁂𑀳𑀺 𑀢𑀸𑀤𑀢𑁆𑀣𑀺𑀬𑀁 𑀕𑀫𑁆𑀬𑀢𑁂𑀢𑀺 𑀅𑀢𑁆𑀣𑁄. 𑀘𑁄𑀤𑀓𑁄 𑀮𑁆𑀢𑁆𑀯𑀸𑀤𑀻𑀳𑀺 𑀲𑀸𑀫𑁆𑀬𑀫𑀸𑀧𑀸𑀤𑀬𑀺𑀢𑀼𑀁 𑀲𑀸𑀫𑀭𑀺𑀲𑀁 𑀯𑀼𑀢𑁆𑀢𑀯𑀺𑀥𑀺𑀦𑁂𑀯𑀸𑀧𑁆𑀧𑀢𑁆𑀢𑀺𑀁 𑀡𑀓𑀲𑁆𑀲𑀸𑀧𑁆𑀬𑀸𑀳- ‘𑀡𑀓𑁄𑀧𑀺’𑀘𑁆𑀘𑀸𑀤𑀺. 𑀅𑀕𑀢𑁆𑀣𑀁 [𑀅𑀧𑀓𑀢𑀢𑁆𑀣𑀁 (𑀧𑁄𑀢𑁆𑀣𑀓𑁂)] 𑀬𑀤𑀺𑀧𑀺 𑀡𑀓𑁂𑀦 𑀢𑀸𑀤𑀢𑁆𑀣𑀺𑀬𑀁 𑀦 𑀕𑀫𑁆𑀬𑀢𑁂 𑀧𑀓𑀭𑀡𑀢𑁄 𑀕𑀫𑁆𑀬𑀢𑁂𑀢𑀺 𑀡𑀓𑁄 𑀪𑀯𑀺𑀲𑁆𑀲𑀢𑀻𑀢𑁆𑀬𑀸𑀲𑀗𑁆𑀓𑀺𑀬 𑀘𑁄𑀤𑀓𑁄 𑀆𑀳- ‘𑀅𑀣𑁂’𑀘𑁆𑀘𑀸𑀤𑀺. 𑀧𑀼𑀩𑁆𑀩𑁂𑀘𑁆𑀘𑀸𑀤𑀺𑀦𑀸 𑀯𑀼𑀢𑁆𑀢𑁄-𑀬𑀁 ‘𑀡𑀓𑁄 𑀦 𑀯𑀺𑀥𑁂𑀬𑁆𑀬𑁄’𑀘𑁆𑀘𑀲𑁆𑀲 𑀦 𑀧𑀭𑀺𑀳𑀸𑀭𑁄… 𑀲𑁄𑀢𑁆𑀢𑀭𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑁂𑀦, 𑀓𑀺𑀦𑁆𑀢𑀼‘𑀢𑀲𑁆𑀫𑀸 𑀦𑁂𑀯𑀺’𑀘𑁆𑀘𑀸𑀤𑀺𑀦𑀸 𑀇𑀫𑀺𑀦𑀸 𑀯𑀼𑀘𑁆𑀘𑀫𑀸𑀦𑁄𑀯𑀧𑀭𑀺𑀳𑀸𑀭𑁄𑀢𑀺𑀯𑀺𑀜𑁆𑀜𑀸𑀢𑀩𑁆𑀩𑀁. 𑀢𑀤𑁂𑀯𑀁𑀮𑁆𑀢𑁆𑀯𑀸𑀤𑀻𑀦𑀫𑁆𑀧𑀺𑀧𑀢𑁆𑀢𑀺𑀢𑁄𑀡𑀓𑀮𑁆𑀢𑁆𑀯𑀸𑀤𑀻𑀳𑀺 𑀢𑀸𑀤𑀢𑁆𑀣𑀺𑀬𑀸𑀦𑀯𑀕𑀫𑁂 𑀯𑀺𑀦𑀺𑀘𑁆𑀙𑀺𑀢𑁂 𑀢𑀸𑀤𑀢𑁆𑀣𑀺𑀬𑀯𑀺𑀲𑁂𑀲𑁂𑀦 𑀢𑁂𑀲𑀁 𑀲𑀫𑁆𑀪𑀯𑁄𑀢𑀺 𑀅𑀦𑀢𑁆𑀣𑀓𑀁 ‘‘𑀡𑀓𑀲𑁆𑀲 𑀓𑀺𑀭𑀺𑀬𑀢𑁆𑀣𑁄𑀧𑀧𑀤𑀲𑁆𑀲𑀯𑀺𑀥𑀸𑀦𑀁 𑀮𑁆𑀢𑁆𑀯𑀸𑀤𑀺𑀧𑀝𑀺𑀲𑁂𑀥𑀦𑀢𑁆𑀣’’𑀦𑁆𑀢𑀺 𑀯𑀸𑀓𑁆𑀬𑀓𑀸𑀭𑀯𑀘𑀦𑀦𑁆𑀢𑀺 𑀲𑀢𑁆𑀣𑀓𑀸𑀭𑁄 𑀦𑀺𑀕𑀫𑀬𑀫𑀸𑀳- ‘𑀢𑀲𑁆𑀫𑀸’’𑀘𑁆𑀘𑀸𑀤𑀺. 𑀪𑀯𑀢𑀼 𑀧𑀓𑀭𑀡𑀢𑁄𑀯 [𑀘𑀸𑀧𑀘𑁆𑀘𑀬𑀪𑁄𑀯] 𑀢𑀸𑀤𑀢𑁆𑀣𑀺𑀬𑀸𑀯𑀕𑀫𑁄, 𑀢𑀣𑀸𑀧𑀺𑀡𑀓𑁄 𑀧𑀭𑁄 𑀯𑀺𑀥𑁂𑀬𑁆𑀬𑁄𑀢𑁆𑀬𑀥𑀺𑀧𑁆𑀧𑀸𑀬𑁂𑀦𑀸𑀳- ‘𑀅𑀣𑀸𑀧𑀺’𑀘𑁆𑀘𑀸𑀤𑀺. 𑀕𑀢𑀢𑁆𑀢𑀁. 𑀪𑀯𑀺𑀲𑁆𑀲𑀢𑀺 𑀓𑀸𑀮𑁂 𑀓𑁆𑀭𑀺𑀬𑀢𑁆𑀣𑀸𑀬𑀁 𑀓𑁆𑀭𑀺𑀬𑀸𑀬𑀫𑀼𑀧𑀧𑀤𑁂 𑀪𑀸𑀯𑁂 𑀘 𑀡𑀧𑁆𑀧𑀘𑁆𑀘𑀬𑀸𑀤𑀬𑁄 𑀯𑀺𑀳𑀺𑀢𑀸, 𑀢𑀢𑁆𑀭𑀸𑀳- ‘𑀧𑀸𑀓𑀸𑀬 𑀯𑀚𑀢𑀺’𑀘𑁆𑀘𑀸𑀤𑀺. 𑀅𑀯𑀺𑀳𑀺𑀢𑁂𑀲𑀼𑀧𑀺 𑀢𑀸𑀤𑀢𑁆𑀣𑀺𑀬𑀸 𑀲𑀺𑀤𑁆𑀥𑀫𑁂𑀯𑁂𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑁄𑀢𑀼𑀦𑀸𑀤𑀻𑀲𑀼 ‘𑀲𑀯𑀦𑀁 𑀓𑀸𑀢𑀼𑀦’𑀇𑀘𑁆𑀘𑀸𑀤𑀺𑀦𑀸 𑀯𑀺𑀕𑁆𑀕𑀳𑁄. 𑀲𑀼𑀢𑁂𑀦𑁂𑀢𑀺 𑀲𑀯𑀦𑀦𑁆𑀢𑀺 𑀯𑀺𑀕𑁆𑀕𑀳𑁄.

𑀯𑁂𑀢𑀺 𑀦𑀸𑀢𑀺𑀲𑀫𑁆𑀩𑀚𑁆𑀛𑀢𑁂 𑀯𑀺𑀥𑀺𑀦𑁄 𑀦𑀺𑀘𑁆𑀘𑀢𑁆𑀢𑀸. 𑀏𑀓𑀲𑀤𑁆𑀤𑀲𑁆𑀲𑀸𑀦𑁂𑀓𑀢𑁆𑀣𑀢𑁆𑀢𑀸 𑀯𑀺𑀲𑁂𑀲𑁂𑀢𑀺 ¶ ‘𑀲𑀔𑁆𑀬𑀸𑀯𑀘𑀦𑁄𑀬𑀫𑁂𑀓𑀲𑀤𑁆𑀤𑁄’𑀢𑀺. 𑀓𑀼𑀢𑁄𑀘𑁆𑀘𑀸𑀳-‘𑀲𑀤𑁆𑀤𑀸𑀦’𑀫𑀺𑀘𑁆𑀘𑀸𑀤𑀺. 𑀏𑀓𑀲𑀤𑁆𑀤𑀲𑁆𑀲 𑀲𑀗𑁆𑀔𑁆𑀬𑀸𑀯𑀘𑀦𑀢𑁆𑀢𑁂 𑀬𑁄𑀢𑁆𑀣𑁄 𑀲𑀫𑁆𑀧𑀚𑁆𑀚𑀢𑁂, 𑀢𑀫𑀸𑀳 ‘𑀏𑀓𑀲𑀗𑁆𑀔𑁆𑀬𑀸𑀯𑀘𑁆𑀙𑀺𑀦𑁆𑀦𑁄’𑀢𑀺, 𑀢𑀤𑀢𑁆𑀣𑀸𑀢𑀺 𑀓𑁆𑀭𑀺𑀬𑀢𑁆𑀣𑀲𑁆𑀲𑀢𑁆𑀣𑀸. 𑀬𑀤𑀺𑀧𑀺 ‘𑀧𑀼𑀩𑁆𑀩𑀁 𑀩𑁆𑀬𑀸𑀧𑀸𑀭’𑀦𑁆𑀢𑀺 𑀲𑀫𑀼𑀤𑀸𑀬𑁂 𑀏𑀓𑀤𑁂𑀲𑀪𑀽𑀢𑁄 𑀩𑁆𑀬𑀸𑀧𑀸𑀭𑁄 𑀦𑀺𑀤𑁆𑀥𑀸𑀭𑀺𑀬𑀫𑀸𑀦𑁄𑀢𑀺 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀧𑀼𑀩𑁆𑀩𑀲𑀤𑁆𑀤𑁂𑀦 𑀩𑁆𑀬𑀸𑀧𑀸𑀭𑀯𑀸𑀘𑀓𑁄 𑀓𑁆𑀭𑀺𑀬𑀢𑁆𑀣𑁄 𑀯𑀼𑀘𑁆𑀘𑀢𑁂 𑀉𑀧𑀘𑀸𑀭𑀸, 𑀢𑁂𑀦𑁂𑀯 ‘𑀢𑁂𑀲𑀼 𑀬𑁄 𑀧𑀼𑀩𑁆𑀩𑁄 𑀢𑀤𑀢𑁆𑀣𑀢𑁄 𑀓𑁆𑀭𑀺𑀬𑀢𑁆𑀣𑀸’𑀢𑀺 𑀯𑀼𑀢𑁆𑀢𑀺𑀬𑀁𑀯𑀼𑀢𑁆𑀢𑀁. 𑀦𑀦𑀼 𑀘 𑀲𑀢𑁆𑀢𑀺 𑀓𑀸𑀭𑀓𑀁, 𑀅𑀜𑁆𑀜𑀸 𑀘 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀬 𑀲𑀢𑁆𑀢𑀺, 𑀅𑀜𑁆𑀜𑀸 𑀉𑀢𑁆𑀢𑀭 𑀓𑀸𑀮𑀓𑀺𑀭𑀺𑀬𑀸𑀬, 𑀢𑀲𑁆𑀫𑀸 𑀓𑀼𑀢𑁄 𑀏𑀓𑀓𑀢𑁆𑀢𑀼𑀓𑀢𑁆𑀢𑀫𑀺𑀘𑁆𑀘𑀸𑀲𑀗𑁆𑀓𑀺𑀬 𑀧𑀝𑀺𑀧𑀸𑀤𑁂𑀦𑁆𑀢𑁄 𑀆𑀳- ‘𑀬𑀤𑀺𑀧𑀺’𑀘𑁆𑀘𑀸𑀤𑀺. 𑀲𑀢𑁆𑀢𑀺𑀫𑀢𑁄 𑀤𑀩𑁆𑀩𑀲𑁆𑀲𑀸𑀢𑀺 𑀤𑁂𑀯𑀤𑀢𑁆𑀢𑀸𑀤𑀺𑀦𑁄 𑀲𑀢𑁆𑀢𑀺𑀫𑀢𑁄 𑀤𑀩𑁆𑀩𑀲𑁆𑀲. 𑀢𑀤𑀚𑁆𑀛𑀸𑀭𑁄𑀧𑀸𑀢𑀺 𑀏𑀓𑀢𑁆𑀢𑀲𑁆𑀲 𑀅𑀚𑁆𑀛𑀸𑀭𑁄𑀧𑀸. 𑀏𑀓 𑀓𑀢𑁆𑀢𑀼𑀓𑀸𑀦𑀁 𑀩𑁆𑀬𑀸𑀧𑀸𑀭𑀸𑀦𑀁 𑀓𑀫𑀸𑀪𑀺𑀥𑀸𑀦𑀸𑀬 𑀢𑀼𑀦𑀸𑀤𑀬𑁄 𑀯𑀺𑀥𑀻𑀬𑀫𑀸𑀦𑀸 𑀪𑀸𑀯𑁂𑀬𑁂𑀯𑀼𑀧𑁆𑀧𑀦𑁆𑀦𑀸 𑀲𑀓𑁆𑀓𑁄𑀦𑁆𑀢𑀺 𑀓𑀫𑀫𑀪𑀺𑀥𑀸𑀢𑀼𑀦𑁆𑀢𑀺 𑀪𑀸𑀯𑁂𑀢𑁆𑀬𑀢𑁆𑀭𑀸𑀪𑀺𑀲𑀫𑁆𑀩𑀚𑁆𑀛𑀢𑁂.

𑀏𑀓𑀓𑀢𑁆𑀢𑀼𑀓𑀸𑀦𑀦𑁆𑀢𑀺 𑀩𑀳𑀼𑀯𑀘𑀦𑀢𑁆𑀢𑀸 ‘𑀪𑀼𑀢𑁆𑀯𑀸 𑀧𑀺𑀢𑁆𑀯𑀸 𑀯𑀚𑀢𑀻’𑀢𑀺𑀧𑀺 𑀪𑀯𑀢𑀺. 𑀪𑀼𑀢𑁆𑀢𑀲𑁆𑀫𑀺𑀦𑁆𑀢𑁂𑀢𑁆𑀣 𑀅𑀦𑁂𑀓𑀓𑀢𑁆𑀢𑀼𑀓𑀢𑁆𑀢𑀸 𑀪𑀼𑀜𑁆𑀚𑀺𑀢𑁆𑀯𑀸𑀧𑀺 𑀪𑀯𑀢𑀺. 𑀧𑀸𑀡𑀺𑀦𑀺 𑀬𑀸𑀦𑀫𑀺𑀯 𑀯𑀺𑀲𑀼𑀁 𑀯𑀘𑀦𑀫𑀦𑁆𑀢𑀭𑁂𑀦 𑀢𑀼𑀦𑀸𑀤𑀺𑀯𑀺𑀥𑀺𑀧𑁆𑀧𑀝𑀺𑀧𑀸𑀤𑀬𑀫𑀸𑀳- ‘𑀫𑀼𑀔𑀁 𑀩𑁆𑀬𑀸𑀤𑀸𑀬 𑀲𑀼𑀧𑀢𑀺’𑀘𑁆𑀘𑀸𑀤𑀺. 𑀩𑁆𑀬𑀸𑀤𑀸𑀬𑀸𑀢𑀺 𑀤𑀸𑀥𑀸𑀢𑀼𑀲𑁆𑀲 𑀯𑀺𑀆𑀧𑀼𑀩𑁆𑀩𑀲𑁆𑀲 𑀢𑁆𑀯𑀸𑀧𑁆𑀧𑀘𑁆𑀘𑀬𑁂 ‘‘𑀧𑁆𑀬𑁄 𑀯𑀸 𑀢𑁆𑀯𑀸𑀲𑁆𑀲 𑀲𑀫𑀸𑀲𑁂’’𑀢𑀺 (𑁫-𑁦𑁬𑁪) 𑀢𑁆𑀯𑀸𑀲𑁆𑀲 𑀧𑁆𑀬𑀸𑀤𑁂𑀲𑁂 𑀭𑀽𑀧𑀁, 𑀫𑀼𑀔𑀯𑀺𑀯𑀭𑀡𑀁 𑀓𑀢𑁆𑀯𑀸𑀢𑁆𑀬𑀢𑁆𑀣𑁄, 𑀩𑁆𑀬𑀯𑀥𑀸𑀬𑀓𑀓𑀸𑀮𑀲𑁆𑀲𑀸𑀢𑀺 𑀩𑁆𑀬𑀸𑀤𑀸𑀦 𑀲𑀼𑀧𑀦𑀸𑀦𑀫𑀦𑁆𑀢𑀭𑁂𑀬𑁄 𑀓𑀸𑀮𑁄 𑀢𑀲𑁆𑀲, 𑀪𑁂𑀤𑀸𑀦𑀼𑀧𑀮𑀓𑁆𑀔𑀡𑀦𑁆𑀢𑀺 𑀪𑁂𑀤𑀲𑁆𑀲𑀸𑀤𑀲𑁆𑀲𑀦𑀁. 𑀪𑁂𑀤𑀲𑁆𑀲𑀻𑀦𑀁 𑀓𑁂𑀲𑀜𑁆𑀘𑀺𑀯𑀺𑀚𑁆𑀚𑀫𑀸𑀦𑀢𑁆𑀢𑀸’𑀓𑁂𑀳𑀻𑀘𑀻’𑀢𑀺 𑀯𑀼𑀢𑁆𑀢𑀁. 𑀲𑀳𑀪𑀸𑀯𑁂𑀧𑀻𑀢𑀺 𑀩𑁆𑀬𑀸𑀤𑀸𑀦𑀲𑀼𑀧𑀦𑀸𑀦𑀁 𑀲𑀳𑀪𑀸𑀯𑁂𑀧𑀺. 𑀯𑀟𑁆𑀠𑀺𑀢𑀓𑁄 𑀪𑀢𑁆𑀢𑀭𑀸𑀲𑀺.

𑀅𑀪𑀺𑀫𑀢𑀸 𑀧𑀸𑀡𑀺𑀦𑀺𑀬𑀸𑀦𑀁, 𑀧𑀭𑀸𑀬 𑀦𑀤𑀺𑀬𑀸 𑀧𑀩𑁆𑀩𑀢𑁄-𑀯𑀭𑁄 𑀯𑀺𑀲𑁂𑀲𑀻 𑀬𑀢𑁂𑀢𑀺 𑀅𑀧𑁆𑀧𑀢𑁆𑀯𑀸 𑀦𑀤𑀺𑀫𑁆𑀧𑀩𑁆𑀩𑀢𑁄’𑀢𑀺 𑀯𑀼𑀢𑁆𑀢𑁂 𑀦𑀤𑀺𑀬𑀸 𑀑𑀭𑀪𑀸𑀕𑁂 𑀧𑀩𑁆𑀩𑀢𑁄𑀢𑀺 𑀅𑀢𑁆𑀣𑁄. 𑀪𑀯𑀢𑀺, 𑀢𑀢𑁄 𑀘 𑀧𑀸𑀭𑁂𑀪𑀽𑀢𑀦𑀤𑀻𑀯𑀺𑀲𑀺𑀝𑁆𑀞𑁄 𑀧𑀩𑁆𑀩𑀢𑁄 𑀧𑀢𑀻𑀬𑀢𑁂. 𑀅𑀯𑀭𑁂𑀦 𑀧𑀩𑁆𑀩𑀢𑁂𑀦 𑀧𑀭𑀸 𑀦𑀤𑀻 𑀯𑀺𑀲𑁂𑀲𑀻𑀬𑀢𑁂𑀢𑀺 𑀅𑀢𑀺𑀓𑁆𑀓𑀫𑁆𑀫 𑀧𑀩𑁆𑀩𑀢𑀁 𑀦𑀤𑀻𑀢𑀺 𑀯𑀼𑀢𑁆𑀢𑁂 𑀧𑀸𑀭𑁂 𑀦𑀤𑀺𑀬𑀸 𑀑𑀭𑁂 𑀧𑀩𑁆𑀩𑀢𑁄𑀢𑀺 𑀅𑀢𑁆𑀣𑁄 𑀧𑀢𑀻𑀬𑀢𑁂, 𑀢𑀢𑁄 𑀘 𑀑𑀭𑀪𑀸𑀕𑁂 𑀧𑀩𑁆𑀩𑀢𑀯𑀺𑀲𑀺𑀝𑁆𑀞𑀸 𑀦𑀤𑀻 𑀯𑀺𑀜𑁆𑀜𑀸𑀬𑀢𑁂. 𑀪𑀯𑀢𑀺𑀦𑁄 𑀲𑀩𑁆𑀩𑀢𑁆𑀣 𑀲𑀫𑁆𑀪𑀯𑁂 𑀲𑀢𑀺 𑀏𑀓𑀓𑀢𑁆𑀢𑀼𑀓𑀢𑀸 𑀧𑀼𑀩𑁆𑀩𑀓𑀸𑀮𑀢𑀸 𑀬𑀣𑀸 𑀕𑀫𑁆𑀬 𑀢𑁂 ¶ 𑀢𑀣𑀸 𑀤𑀲𑁆𑀲𑁂𑀢𑀺 ‘𑀧𑀞𑀫𑀁 𑀦 𑀧𑀧𑁆𑀧𑁄𑀢𑀺’𑀘𑁆𑀘𑀸𑀤𑀺. 𑀦𑀺𑀕𑀫𑀬𑀢𑀺 ‘𑀢𑀤𑁂𑀯’𑀫𑀺𑀘𑁆𑀘𑀸𑀤𑀺𑀦𑀸.

𑀪𑀼𑀢𑁆𑀯𑀸 𑀪𑀼𑀢𑁆𑀯𑀸 𑀕𑀘𑁆𑀙𑀢𑀻𑀢𑀺 𑀧𑀭𑁂-𑀜𑁆𑀜𑀣𑀸 𑀦𑀺𑀧𑁆𑀨𑀢𑁆𑀢𑀺𑀫𑀸𑀓𑀗𑁆𑀔𑀦𑁆𑀢𑀺 𑀧𑀸𑀡𑀺𑀦𑀺𑀬𑀸𑀤𑀬𑁄, 𑀢𑀢𑁆𑀭𑀸𑀳- ‘𑀏𑀓𑀓𑀢𑁆𑀢𑀼𑀓𑀸𑀦’𑀫𑀺𑀘𑁆𑀘𑀸𑀤𑀺. 𑀆𑀪𑀺𑀓𑁆𑀔𑀜𑁆𑀜𑀸𑀯𑀕𑀫𑁂 𑀓𑀸𑀭𑀡𑀁 𑀧𑀼𑀘𑁆𑀙𑀢𑀺 ‘𑀬𑀚𑁆𑀚𑁂𑀯’𑀫𑀺𑀘𑁆𑀘𑀸𑀤𑀺. 𑀯𑀼𑀢𑁆𑀢𑀫𑁂𑀯 𑀨𑀼𑀝𑀬𑀢𑀺 ‘𑀬𑁂𑀳𑀺’𑀘𑁆𑀘𑀸𑀤𑀺𑀦𑀸. 𑀬𑁂𑀳𑀻𑀢𑀺 𑀯𑁂𑀬𑁆𑀬𑀸𑀓𑀭𑀡𑁂𑀳𑀺. 𑀚𑀺𑀯𑀕𑁆𑀕𑀸𑀳𑀁 𑀅𑀕𑀸𑀳𑀬𑀺𑀘𑁆𑀘𑀸𑀤𑁄 𑀧𑀭𑁂𑀜𑁆𑀜𑀣𑀸 𑀧𑀝𑀺𑀧𑀦𑁆𑀦𑀸𑀢𑀤𑀸𑀳- ‘𑀓𑀫𑁆𑀫’𑀫𑀺𑀘𑁆𑀘𑀸𑀤𑀺. 𑀲𑀓𑀗𑁆𑀕𑁂𑀢𑀺 𑀧𑀸𑀡𑀺𑀧𑀸𑀤𑀸𑀤𑀺𑀓𑁂-𑀢𑁆𑀢𑀦𑀺𑀬𑁂𑀯𑀬𑀯𑁂. 𑀡𑀁 𑀧𑀘𑁆𑀘𑀬𑁄 𑀅𑀪𑀺𑀫𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀁 𑀡𑀫𑁆𑀧𑀘𑁆𑀘𑀬𑁂𑀦𑀸𑀢𑀺 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀣𑀸 𑀲𑀺𑀤𑁆𑀥𑀺𑀧𑁆𑀧𑀓𑀸𑀭𑀫𑀸𑀳- ‘𑀚𑀻𑀯𑀲𑁆𑀲𑀺’𑀘𑁆𑀘𑀸𑀤𑀺. 𑀓𑀺𑀁 𑀯𑀺𑀲𑀺𑀝𑁆𑀞𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀚𑀻𑀯𑀕𑁆𑀕𑀸𑀳𑁂𑀦 𑀯𑀺𑀲𑀺𑀝𑁆𑀞𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀚𑀻𑀯𑀕𑁆𑀕𑀸𑀳’𑀦𑁆𑀢𑀺 𑀆𑀳. 𑀚𑀻𑀯𑀕𑁆𑀕𑀸𑀳𑀲𑀗𑁆𑀔𑀸𑀢𑀁 𑀕𑀳𑀡𑀫𑀓𑀸𑀲𑀻𑀢𑀺 𑀅𑀢𑁆𑀣𑁄.

𑀆𑀔𑁆𑀬𑀸𑀢𑀦𑁆𑀢𑀺 𑀅𑀕𑀸𑀳𑀬𑀻𑀢𑀺 𑀆𑀔𑁆𑀬𑀸𑀢𑀁 𑀓𑀢𑁆𑀢𑀩𑁆𑀩𑀭𑀽𑀧𑀦𑁆𑀢𑀺 𑀇𑀫𑀸𑀦𑀸 𑀕𑀳𑀡 𑀓𑀺𑀭𑀺𑀬𑀸𑀬 𑀓𑀫𑁆𑀫𑀢𑁆𑀢𑀁 𑀩𑁄𑀥𑁂𑀢𑀺. 𑀢𑀩𑁆𑀩𑀺𑀲𑁂𑀲𑀦𑀫𑁆𑀧𑀻𑀢𑀺 𑀓𑀢𑁆𑀢𑀩𑁆𑀩𑀭𑀽𑀧𑀸𑀬 𑀕𑀳𑀡 𑀓𑀺𑀭𑀺𑀬𑀸𑀬 𑀯𑀺𑀲𑁂𑀲𑀦𑀫𑁆𑀧𑀺. 𑀢𑀣𑀸𑀪𑀽𑀢𑀫𑁂𑀯𑀸𑀢𑀺 𑀓𑀢𑁆𑀢𑀩𑁆𑀩𑀭𑀽𑀧𑀫𑁂𑀯. 𑀢𑀣𑀸 𑀘𑁂𑀢𑀺 𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑁂 𑀤𑀼𑀢𑀺𑀬𑀸𑀬 𑀡𑀫𑀦𑁆𑀢𑁂 𑀚𑀸𑀢𑁂 𑀲𑀢𑀺. 𑀡𑀫𑀦𑁆𑀢 𑀭𑀽𑀧𑀦𑁆𑀢𑀺 𑀡𑀫𑀦𑁆𑀢𑀲𑁆𑀲 𑀭𑀽𑀧𑀁 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀡𑀁𑀧𑀘𑁆𑀘𑀬𑁂𑀦𑀺𑀳 𑀓𑀺𑀜𑁆𑀘𑀺𑀦𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀳𑁂𑀢𑀺 𑀇𑀫𑀲𑁆𑀫𑀺𑀁 𑀩𑁆𑀬𑀸𑀓𑀭𑀡𑁂. 𑀓𑀺𑀜𑁆𑀘𑀺 𑀧𑀬𑁄𑀚𑀦𑀁. 𑀧𑀘𑀸𑀤𑀺𑀢𑁄𑀢𑀺𑀆𑀤𑀺𑀲𑀤𑁆𑀤𑁂𑀦 𑀢𑁂𑀳𑀺 𑀅𑀯𑀺𑀳𑀺𑀢𑀡𑀫𑁆𑀧𑀘𑁆𑀘𑀬𑀸 𑀕𑀳𑀺𑀢𑀸.

𑀬𑁄 𑀲𑀸𑀥𑀬𑀺𑀢𑀼𑀫𑀸𑀭𑀤𑁆𑀥𑁄 𑀦𑀘 𑀦𑀺𑀝𑁆𑀞𑀫𑀼𑀧𑀕𑀢𑁄𑀢𑀺 𑀬𑁄 𑀓𑀝𑀸𑀤𑀺𑀲𑀸𑀥𑀬𑀺𑀢𑀼𑀁 𑀦𑀺𑀩𑁆𑀩𑀢𑁆𑀢𑀬𑀺𑀢𑀼𑀁 𑀆𑀭𑀤𑁆𑀥𑁄 𑀦𑀺𑀝𑁆𑀞𑀁 𑀧𑀭𑀺𑀲𑀫𑀢𑁆𑀢𑀺𑀁 𑀦 𑀘𑁄𑀧𑀕𑀢𑁄 𑀦𑀧𑁆𑀧𑀢𑁆𑀢𑁄. 𑀧𑀯𑀢𑁆𑀢𑁄-𑀦𑀼𑀧𑀭𑀢𑁄𑀯𑀸𑀢𑀺 𑀬𑁄 𑀧𑀩𑁆𑀩𑀢𑀸𑀤𑀺 𑀦𑀺𑀘𑁆𑀘𑀧𑁆𑀧𑀯𑀢𑁄-𑀅𑀯𑀺𑀭𑀢𑁄 𑀢𑁂𑀦𑁂𑀯 𑀦𑀺𑀝𑁆𑀞𑀁 𑀦𑁄𑀧𑀕𑀢𑁄𑀲𑁄𑀯𑀢𑁆𑀢𑀫𑀸𑀦𑁄𑀢𑀺 𑀯𑀼𑀘𑁆𑀘𑀢𑁂𑀢𑀺 𑀬𑁄𑀚𑀦𑀸. 𑀢𑀩𑁆𑀩𑀺 𑀲𑀬𑀓𑀺𑀭𑀺𑀬𑀸𑀤𑁆𑀯𑀸𑀭𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀓𑀝𑀸𑀤𑀺𑀯𑀺𑀲𑀬 𑀓𑀺𑀭𑀺𑀬𑀸𑀫𑀼𑀔𑁂𑀦, 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀬𑀣𑀸𑀯𑀼𑀢𑁆𑀢𑀓𑀝𑀸𑀤𑀻𑀦𑀁 𑀯𑀢𑁆𑀢𑀫𑀸𑀦𑀢𑁆𑀢𑀸 𑀢𑀩𑁆𑀩𑀺𑀲𑀬𑀸 𑀓𑀺𑀭𑀺𑀬𑀸𑀧𑀺 𑀯𑀢𑁆𑀢𑀫𑀸𑀦𑀸 𑀏𑀯𑀸𑀢𑀺 𑀢𑀁𑀤𑁆𑀯𑀸𑀭𑁂𑀦 𑀓𑁆𑀭𑀺𑀬𑀢𑁆𑀣𑀯𑀺𑀲𑁂𑀲𑀦’’𑀦𑁆𑀢𑀺.

𑀪𑀼𑀜𑁆𑀚𑀢𑀺 𑀤𑁂𑀯𑀤𑀢𑁆𑀢𑁄𑀢𑀺 𑀏𑀢𑁆𑀣 𑀬𑀚𑁆𑀚𑀧𑀺 𑀪𑀼𑀜𑁆𑀚𑀫𑀸𑀦𑁄 𑀳𑀲𑀢𑀺 𑀔𑀚𑁆𑀚𑀢𑀺 [𑀯𑀤𑀢𑀺] 𑀧𑀸𑀦𑀺𑀬𑀁 𑀧𑀺𑀯𑀢𑀺, 𑀢𑀣𑀸𑀧𑀺 𑀬𑀼𑀢𑁆𑀢𑀸 𑀯𑀢𑁆𑀢𑀫𑀸𑀦𑀢𑀸 𑀓𑀢𑁆𑀢𑀼𑀫𑀺𑀘𑁆𑀙𑀺𑀢𑀲𑁆𑀲𑀸𑀭𑀫𑁆𑀪𑁄 𑀦 ¶ 𑀧𑀭𑀺𑀲𑀫𑀢𑁆𑀢𑁄𑀢𑀺 𑀯𑀼𑀢𑁆𑀢𑀁- ‘𑀲𑀸𑀥𑀬𑀺𑀢𑀼𑀫𑀸𑀭𑀤𑁆𑀥𑁄 𑀦 𑀘 𑀦𑀺𑀝𑁆𑀞𑀫𑀼𑀧𑀕𑀢𑁄’𑀢𑀺. 𑀢𑀺𑀝𑁆𑀞𑀦𑁆𑀢𑀺 𑀧𑀩𑁆𑀩𑀢𑀸𑀢𑀺𑀆𑀤𑀻𑀲𑀼 𑀦𑀺𑀘𑁆𑀘𑁂𑀲𑀼 𑀧𑀩𑁆𑀩𑀢𑀸𑀤𑀻𑀲𑀼 𑀪𑀽𑀢𑀸𑀦𑀸𑀕𑀢𑀸𑀦𑀫𑀲𑀫𑁆𑀪𑀯𑀸 𑀢𑀦𑁆𑀦𑀺𑀲𑁂𑀥𑀺𑀦𑁄 𑀯𑀢𑁆𑀢𑀫𑀸𑀦𑀲𑁆𑀲𑀸𑀧𑁆𑀬𑀲𑀫𑁆𑀪𑀯𑀸 𑀬𑀤𑀻𑀧𑀺 𑀓𑀸𑀮𑀯𑀺𑀪𑀸𑀕𑁄 𑀦 𑀯𑀺𑀜𑁆𑀜𑀸𑀬𑀢𑁂, 𑀢𑀣𑀸𑀧𑀺 𑀆𑀭𑀤𑁆𑀥𑀲𑁆𑀲 𑀞𑀸𑀦𑀲𑁆𑀲𑀸𑀧𑀭𑀺𑀲𑀫𑀢𑁆𑀢𑀺𑀬𑀸 𑀯𑀢𑁆𑀢𑀫𑀸𑀦𑀸 𑀏𑀯𑀸𑀢𑀺 𑀯𑀼𑀢𑁆𑀢𑀁- ‘𑀧𑀯𑀢𑁆𑀢𑁄-𑀦𑀼𑀧𑀭𑀢𑁄 𑀯𑀸’𑀢𑀺. 𑀓𑀢𑁆𑀢𑀼𑀯𑀺𑀲𑁂𑀲𑀦𑁂 𑀲𑀢𑀺 𑀓𑁄 𑀤𑁄𑀲𑁄𑀘𑁆𑀘𑀸𑀳- ‘𑀓𑀢𑁆𑀢𑀼 𑀯𑀺𑀲𑁂𑀲𑀦𑁂’𑀘𑁆𑀘𑀸𑀤𑀺. 𑀇𑀳𑀸𑀧𑀺 𑀲𑀺𑀬𑀸 𑀓𑀢𑁆𑀢𑀼𑀦𑁄 𑀯𑀢𑁆𑀢𑀫𑀸𑀦𑀢𑁆𑀢𑀸, 𑀯𑀢𑁆𑀢𑀫𑀸𑀦𑀢𑁆𑀢 𑀫𑁂𑀯𑀸𑀲𑁆𑀲 𑀧𑀓𑀸𑀲𑁂𑀢𑀼𑀫𑀬𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀅𑀧𑀞𑀫𑀸 𑀲𑀫𑀸𑀦𑀸𑀥𑀺𑀓𑀭𑀡𑁂’’𑀢𑁆𑀬𑀸𑀤𑀻𑀳𑀺 (𑁩-𑁨-𑁧𑁨𑁪) 𑀅𑀦𑁂𑀓𑁂𑀳𑀺 𑀲𑀼𑀢𑁆𑀢𑁂𑀳𑀺𑀦𑁆𑀢𑀧𑁆𑀧𑀘𑁆𑀘𑀬𑁄 𑀧𑀸𑀡𑀺𑀦𑀺𑀬𑁂𑀳𑀺 𑀯𑀺𑀳𑀺𑀢𑁄.

𑀇𑀥 𑀧𑀦 𑀲𑀸𑀫𑀜𑁆𑀜𑁂𑀦 𑀯𑀺𑀳𑀺𑀢𑀢𑁆𑀢𑀸 𑀆𑀳- ‘𑀲𑀸𑀫𑀜𑁆𑀜𑁂𑀦𑀸’𑀢𑀺𑀆𑀤𑀺. 𑀲𑀦𑁆𑀢𑁄 ‘𑀅𑀲-𑀪𑀼𑀯𑀺’𑀦𑁆𑀢𑀧𑁆𑀧𑀘𑁆𑀘𑀬𑁄. ‘‘𑀓𑀢𑁆𑀢𑀭𑀺 𑀮𑁄’’ (𑁫-𑁧𑁮) ‘‘𑀦𑁆𑀢𑀫𑀸𑀦𑀸𑀦𑁆𑀢𑀺 𑀬𑀺𑀬𑀼𑀁𑀲𑁆𑀯𑀸𑀤𑀺𑀮𑁄𑀧𑁄’’𑀢𑀺 (𑁫-𑁧𑁩𑁦) 𑀅𑀓𑀸𑀭𑀲𑁆𑀲 𑀮𑁄𑀧𑁄. 𑀢𑀧𑀦𑁆𑀢𑁄 ‘𑀢𑀧-𑀲𑀦𑁆𑀢𑀸𑀧𑁂’. 𑀚𑀧𑁆𑀧𑀦𑁆𑀢𑁄 ‘𑀚𑀧𑁆𑀧=𑀯𑀘𑀦𑁂’. 𑀧𑀞𑀦𑁆𑀢𑁄 ‘𑀧𑀞=𑀉𑀘𑁆𑀘𑀸𑀭𑀡𑁂’ 𑀧𑀘𑀦𑁆𑀢𑁄 ‘𑀧𑀘=𑀧𑀸𑀓𑁂’𑀥𑀸𑀭𑀬𑀦𑁆𑀢𑁄 ‘𑀥𑀭=𑀥𑀸𑀭𑀡𑁂’. 𑀧𑀬𑁄𑀚𑀓𑀩𑁆𑀬𑀸𑀧𑀸𑀭𑁂 𑀡𑀺, 𑀥𑀭𑀺𑀢𑀼𑀁 𑀧𑀬𑀼𑀜𑁆𑀚𑀫𑀸𑀦𑁄 𑀥𑀸𑀭𑀬𑀦𑁆𑀢𑁄. 𑀤𑀺𑀲𑁆𑀲𑀦𑁆𑀢𑁄 𑀤𑀺𑀲 𑀤𑀼𑀲=𑀅𑀧𑁆𑀧𑀺𑀢𑀺𑀬𑀁’’ 𑀤𑀺𑀯𑀸𑀤𑀻𑀳𑀺 𑀬𑀓’’ (𑁫-𑁧𑁨) 𑀬𑀚𑀦𑁆𑀢𑁄 ‘𑀬𑀚-𑀤𑁂𑀯𑀧𑀽𑀚𑀸𑀬𑀁’. 𑀅𑀭𑀳𑀦𑁆𑀢𑁄 ‘𑀅𑀭𑀳-𑀧𑀽𑀚𑀸𑀬𑀁. 𑀬𑀣𑀸𑀘𑀸𑀢𑀺𑀆𑀤𑀺𑀦𑀸 𑀅𑀧𑀞𑀫𑀸𑀲𑀫𑀸𑀦𑀸𑀥𑀺𑀓𑀭𑀡𑀸𑀤𑀻𑀲𑀼 ‘𑀲𑀁𑀯𑀺𑀚𑁆𑀚𑀫𑀸𑀦𑁄 𑀯𑀺𑀭𑁄𑀘𑀫𑀸𑀦𑀁 𑀚𑀧𑁆𑀧𑀫𑀸𑀦𑁄’𑀘𑁆𑀘𑀸𑀤𑀻𑀲𑀼 𑀫𑀸𑀦𑁄 𑀦𑁆𑀢𑁄 𑀯𑀺𑀬 𑀤𑀝𑁆𑀞𑀩𑁆𑀩𑁄𑀢𑀺 𑀯𑀤𑀢𑀺.

𑀓𑀸𑀮𑀓𑀢𑁄 𑀅𑀯𑀢𑁆𑀣𑀸𑀯𑀺𑀲𑁂𑀲𑁄 𑀯𑀬𑁄. 𑀫𑀸𑀦𑁄𑀯𑀸𑀢𑀺 𑀇𑀫𑀺𑀦𑀸𑀦𑁆𑀢𑀧𑁆𑀧𑀘𑁆𑀘𑀬𑀸𑀪𑀸𑀯𑀫𑀸𑀳. 𑀬𑀼𑀚𑁆𑀛𑀫𑀸𑀦𑀸’𑀬𑀼𑀥=𑀲𑀫𑁆𑀧𑀳𑀸𑀭𑁂’ ‘‘𑀤𑀺𑀯𑀸𑀤𑀻𑀳𑀺 𑀬𑀓’’ (𑁫-𑁧𑁨) ‘‘𑀢𑀯𑀕𑁆𑀕𑀯𑀭𑀡𑀸𑀦’’𑀫𑀺𑀘𑁆𑀘𑀸𑀤𑀺𑀦𑀸 (𑁧-𑁪𑁮) 𑀥𑀲𑁆𑀲 𑀛𑁄’’𑀯𑀕𑁆𑀕𑀮𑀲𑁂𑀳𑀺 𑀢𑁂’’𑀢𑀺 (𑁧-𑁪𑁯) 𑀬𑀲𑁆𑀲 𑀘. ‘‘𑀘𑀢𑀼𑀢𑁆𑀣𑀤𑀼𑀢𑀺𑀬𑁂𑀲𑁆𑀯𑁂𑀲’’𑀦𑁆𑀢𑀺𑀆𑀤𑀺𑀦𑀸 (𑁧-𑁩𑁫) 𑀛𑀲𑁆𑀲 𑀚𑁄. 𑀦𑀘𑁆𑀘𑀫𑀸𑀦𑀸 ‘𑀦𑀘𑁆𑀘=𑀦𑀘𑁆𑀘𑀦𑁂’.

𑀲𑀯𑀺𑀲𑀬𑁂𑀢𑀺 𑀓𑀢𑁆𑀢𑀭𑀺 𑀪𑀸𑀯𑁂 𑀓𑀫𑁆𑀫𑁂𑀘.

𑀡𑁆𑀯𑀸𑀤𑀬𑁄𑀢𑀺 ¶ ‘𑀡𑁆𑀯𑀸𑀤𑀬𑁄’𑀘𑁆𑀘𑀦𑁂𑀦 𑀲𑀼𑀢𑁆𑀢𑁂𑀦. 𑀓𑀢𑀺𑀧𑀬𑀥𑀸𑀢𑁆𑀯𑀸𑀤𑀺𑀧𑀭𑀺𑀕𑁆𑀕𑀳𑁂𑀦𑀸𑀢𑀺 𑀥𑀸𑀢𑀯𑁄 𑀧𑀓𑀢𑀺𑀪𑀽𑀢𑀸 𑀆𑀤𑀻 𑀬𑁂𑀬𑀁 𑀓𑀸𑀮𑀸𑀤𑀻𑀦𑀁 𑀢𑁂 𑀥𑀸 𑀢𑁆𑀯𑀸𑀤𑀬𑁄 𑀢𑁂𑀲𑀁 𑀧𑀭𑀺𑀕𑁆𑀕𑀳𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀸𑀮𑁄 𑀯𑀢𑁆𑀢𑀫𑀸𑀦𑀸𑀤𑀺, 𑀓𑀸𑀭𑀓𑀁 𑀓𑀢𑁆𑀢𑀸𑀤𑀺 𑀧𑀓𑀁𑀲𑁂𑀦 𑀦𑀺𑀬𑀫𑁂𑀦 𑀧𑀘𑁆𑀘𑀬𑁄 𑀓𑀭𑀻𑀬𑀢𑁂 𑀏𑀢𑀲𑁆𑀫𑀸𑀢𑀺 𑀧𑀓𑀢𑀺. 𑀓𑀸𑀓𑁆𑀭𑀺𑀬𑀁 𑀆𑀬𑀼𑀓𑀸𑀤𑀺.

𑀓𑀸𑀭𑀺𑀬𑀯𑀺𑀲𑁂𑀲𑀦𑁆𑀢𑀺 𑀆𑀤𑁂𑀲𑀸𑀤𑀺𑀓𑀸𑀭𑀺𑀬𑀯𑀺𑀲𑁂𑀲𑀁. 𑀓𑀸𑀭𑀼 𑀲𑀺𑀧𑁆𑀧𑀺𑀚𑀸𑀢𑀺 𑀯𑀺𑀲𑁂𑀲𑁄. 𑀢𑀘𑁆𑀙𑀓𑀸𑀤𑀬𑁄 (𑀢𑀘𑁆𑀙𑀓𑀓𑀫𑁆𑀫) 𑀓𑀸𑀭𑀢𑀦𑁆𑀢𑀯𑀸𑀬𑀭𑀚𑀓𑀦𑀳𑀸𑀧𑀺𑀢𑀸 𑀧𑀜𑁆𑀘 𑀓𑀸𑀭𑀯𑁄 𑀘𑀸𑀭𑀼𑀤𑀸𑀭𑀼𑀢𑀺 𑀯𑀢𑁆𑀢𑀫𑀸𑀦𑁂 𑀓𑀸𑀮𑀦𑀺𑀬𑀫𑁂𑀦𑀸𑀜𑁆𑀜𑀢𑁆𑀭𑀸𑀧𑀺 𑀪𑀯𑀺𑀲𑁆𑀲𑀢𑀺. 𑀏𑀯𑀁 𑀓𑀸𑀭𑀼𑀆𑀤𑀻𑀲𑀼𑀧𑀺.

𑀔𑀙𑀲𑀸𑀦𑀦𑁆𑀢𑀺 𑀯𑀼𑀢𑁆𑀢𑁂 𑀢𑀤𑀦𑁆𑀢𑀕𑁆𑀕𑀳𑀡𑀁 𑀓𑀣𑀫𑀺𑀘𑁆𑀘𑀸𑀳- ‘𑀧𑀘𑁆𑀘𑀬𑀕𑁆𑀕𑀳𑀡𑁂’𑀘𑁆𑀘𑀸𑀤𑀺. 𑀩𑁆𑀬𑀸𑀔𑁆𑀬𑀸𑀢𑀢𑁆𑀣𑀁, 𑀦𑀦𑀼 𑀲𑀼𑀢𑁆𑀢𑁂 𑀏𑀓𑀲𑁆𑀲𑀭𑁄𑀢𑀺 𑀧𑀼𑀮𑁆𑀮𑀺𑀗𑁆𑀕𑁂𑀦 𑀦𑀺𑀤𑁆𑀤𑁂𑀲𑁄, 𑀆𑀤𑀻𑀢𑀺 𑀘 𑀢𑀩𑁆𑀩𑀺𑀲𑁂𑀲𑀦𑀁, 𑀏𑀯𑀁 𑀲𑀢𑀺 𑀦𑀧𑀼𑀁𑀲𑀓𑁂𑀦 𑀯𑀺𑀯𑀭𑀡𑀁 𑀓𑀣𑀁 𑀬𑀼𑀚𑁆𑀚𑀢𑀻𑀢𑀺 𑀆𑀳- ‘𑀲𑀤𑁆𑀤𑁂’𑀘𑁆𑀘𑀸𑀤𑀺, 𑀅𑀣 𑀚𑀸𑀕𑀭𑁂𑀘𑁆𑀘𑀸𑀤𑁄 𑀧𑀼𑀣𑀕𑀯𑀬𑀯𑁂𑀓𑀲𑁆𑀲𑀭𑀲𑁆𑀲 𑀚𑀸𑀕𑀭𑀲𑀤𑁆𑀤𑀲𑁆𑀲 𑀘 𑀧𑀘𑁆𑀘𑁂𑀓𑀁 𑀓𑀲𑁆𑀫𑀸 𑀦 𑀤𑁆𑀯𑀺𑀪𑀸𑀯𑁄𑀘𑁆𑀘𑀸𑀳- ‘𑀢𑁂𑀦𑁂𑀯𑁂’𑀘𑁆𑀘𑀸𑀤𑀺.

𑀢𑁂𑀦𑁂𑀯𑀸𑀢𑀺𑀆𑀤𑀻𑀢𑀺 𑀏𑀓𑀲𑁆𑀲𑀭𑁄𑀘𑁆𑀘𑀲𑁆𑀲 𑀯𑀺𑀲𑁂𑀲𑀦𑀢𑁆𑀢𑀳𑁂𑀢𑀼𑀦𑀸𑀯. 𑀅𑀯𑀬𑀯𑁂𑀓𑀲𑁆𑀲𑀭𑀲𑁆𑀲𑀸𑀢𑀺 𑀯𑀺𑀲𑁂𑀲𑀦𑀲𑀫𑀸𑀲𑁄 ‘𑀅𑀯𑀬𑀯𑁄 𑀘 𑀲𑁄 𑀏𑀓𑀲𑁆𑀲𑀭𑁄 𑀘𑁂’𑀢𑀺. 𑀅𑀣𑀸𑀤𑀻𑀳𑀺 𑀏𑀓𑀲𑁆𑀲𑀭𑀯𑀺𑀲𑁂𑀲𑀦𑀢𑁆𑀢𑁂𑀧𑁆𑀬𑀯𑀬𑀯𑁂𑀓𑀲𑁆𑀲𑀭𑀲𑁆𑀲 𑀓𑀲𑁆𑀫𑀸 𑀦 𑀤𑁆𑀯𑀺𑀪𑀸𑀯𑁄𑀘𑁆𑀘𑀸𑀳- ‘𑀏𑀓𑀲𑁆𑀲𑁂𑀯𑀸𑀤𑀺𑀢𑁆𑀢𑀸’𑀢𑀺.

𑀇𑀢𑀭𑀲𑁆𑀲𑀸𑀢𑀺 𑀧𑀞𑀫𑁂𑀓𑀲𑁆𑀲𑀭𑀢𑁄-𑀜𑀸𑀲𑁆𑀲𑀸𑀯𑀬𑀯𑁂𑀓𑀲𑁆𑀲𑀲𑀭𑀲𑁆𑀲. 𑀤𑁄𑀲𑀤𑀼𑀝𑁆𑀞𑀢𑁆𑀢𑀸 𑀦𑁂𑀢𑁆𑀣 𑀯𑀺𑀲𑁂𑀲𑀦𑀲𑀫𑀸𑀲𑁄𑀢𑀺 𑀯𑀢𑁆𑀢𑀼𑀫𑀸𑀳- ‘𑀏𑀓𑀲𑁆𑀲𑀭𑁄𑀢𑀺’𑀘𑁆𑀘𑀸𑀤𑀺. 𑀢𑀣𑀸 𑀲𑀢𑀺 𑀓𑁄 𑀤𑁄𑀲𑁄𑀢𑀺 𑀆𑀳- ‘𑀏𑀓𑁄 𑀘𑁂’𑀘𑁆𑀘𑀸𑀤𑀺. 𑀲𑀭𑁄𑀤𑀻𑀢𑀺 𑀘 𑀯𑀼𑀢𑁆𑀢𑁂 ‘𑀈𑀳-𑀖𑀝𑀦𑁂’𑀘𑁆𑀘𑀸𑀤𑀻𑀦𑀫𑁂𑀯 𑀲𑀺𑀬𑀸.

𑀦𑀦𑀼 𑀘 𑀧𑀘𑀢𑀺𑀫𑁆𑀳𑀺 𑀬𑁂𑀦𑁂𑀯𑀸𑀓𑀸𑀭𑁂𑀦 𑀧𑀘𑀲𑀤𑁆𑀤𑁄 𑀏𑀓𑀲𑁆𑀲𑀭𑁄 𑀢𑁂𑀦𑁂𑀯 𑀢𑀤𑀯𑀬𑀯𑀸𑀧𑀺 𑀅𑀘𑁆𑀲𑀤𑁆𑀤𑁄 𑀧𑀲𑀤𑁆𑀤𑁄 𑀘 𑀏𑀓𑀲𑁆𑀲𑀭𑁄, 𑀢𑀢𑁄𑀯𑀸𑀯𑀬𑀯𑀸𑀦𑀫𑁆𑀧𑀺 𑀧𑀘𑁆𑀘𑁂𑀓𑀁 𑀤𑁆𑀯𑀺𑀩𑁆𑀩𑀘𑀦𑀁 𑀧𑀧𑁆𑀧𑁄𑀢𑀺… 𑀤𑁆𑀯𑀺𑀩𑁆𑀩𑀘𑀦𑀓𑀸𑀭𑀺𑀬𑀺𑀦𑁄 𑀆𑀤𑀺𑀲𑁆𑀲 𑀏𑀓𑀲𑁆𑀲𑀭𑀲𑁆𑀲 𑀲𑀸𑀫𑀜𑁆𑀜𑁂𑀦 𑀦𑀺𑀤𑁆𑀤𑁂𑀲𑀸, 𑀏𑀯𑀜𑁆𑀘 𑀲𑀫𑀼𑀤𑀸𑀬𑀲𑁆𑀲 𑀢𑀤𑀯𑀬𑀯𑀸𑀦𑀜𑁆𑀘𑁂𑀓𑀲𑁆𑀲𑀭𑀸𑀦𑀁 𑀯𑀺𑀲𑀼𑀁 𑀤𑁆𑀯𑀺𑀩𑁆𑀩𑀘𑀦𑁂 ¶ 𑀓𑀢𑁂 𑀅𑀦𑀺𑀝𑁆𑀞𑀫𑁆𑀧𑀧𑁆𑀧𑁄𑀢𑀻𑀢𑀻𑀤𑀫𑀧𑀸𑀓𑀢𑁆𑀢𑀼𑀫𑀸𑀳- ‘𑀲𑀓𑀺𑀁𑀲𑀢𑁆𑀣𑀧𑁆𑀧𑀯𑀢𑁆𑀢𑀺𑀬𑀸 𑀲𑀸𑀯𑀬𑀯𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀕𑀳𑀡’𑀦𑁆𑀢𑀺. 𑀲𑀓𑀺𑀁 𑀲𑀢𑁆𑀣𑀧𑁆𑀧𑀯𑀢𑁆𑀢𑀺𑀬𑀸 𑀏𑀓𑀯𑀸𑀭𑀁 𑀤𑁆𑀯𑀺𑀩𑁆𑀩𑀘𑀦𑀲𑀼𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀬𑀸 𑀤𑁆𑀯𑀺𑀩𑁆𑀩𑀘𑀦𑀓𑀭𑀡𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀸𑀯𑀬𑀯𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀯𑀬𑀯𑁂𑀳𑀺 𑀲𑀳 𑀯𑀢𑁆𑀢𑀫𑀸𑀦𑀲𑁆𑀲 𑀦 𑀯𑀺𑀦𑀸 𑀢𑁂𑀳𑀺. 𑀏𑀯𑀁 𑀫𑀜𑁆𑀜𑀢𑁂 ‘‘𑀬𑀲𑁆𑀲 𑀤𑁆𑀯𑀺𑀩𑁆𑀩𑀘𑀦𑁂 𑀓𑀭𑀻𑀬𑀫𑀸𑀦𑁂 𑀲𑀩𑁆𑀩𑁂𑀲𑀫𑀯𑀬𑀯𑀸𑀦𑀁 𑀕𑀳𑀡𑀁 𑀪𑀯𑀢𑀺, 𑀢𑀲𑁆𑀲𑁂𑀯 𑀲𑀫𑀼𑀤𑀸𑀬𑀲𑁆𑀲 𑀤𑁆𑀯𑀺𑀩𑁆𑀩𑀘𑀦𑀁 𑀬𑀼𑀢𑁆𑀢𑀁 𑀦𑀸𑀯𑀬𑀯𑀸𑀦𑀁, 𑀢𑁂𑀲𑀜𑁆𑀳𑀺 𑀤𑁆𑀯𑀺𑀩𑁆𑀩𑀘𑀦𑁂 𑀏𑀓𑀸𑀬 𑀤𑁆𑀯𑀺𑀩𑁆𑀩𑀘𑀦𑀲𑁆𑀲𑀼𑀧𑁆𑀧𑀢𑁆𑀢𑀺𑀬𑀸 𑀦 𑀲𑀩𑁆𑀩𑁂𑀲𑀁 𑀕𑀳𑀡𑀁 𑀓𑀢𑀁 𑀳𑁄𑀢𑀺 𑀦𑀸𑀯𑀬𑀯𑀦𑁆𑀢𑀲𑁆𑀲 𑀲𑀫𑀼𑀤𑀸𑀬𑀲𑁆𑀲 𑀘 𑀓𑀢𑀦𑁆𑀢𑀺 𑀧𑀼𑀦 𑀢𑁂𑀲𑀁 𑀤𑁆𑀯𑀺𑀩𑁆𑀩𑀘𑀦𑀸𑀬 𑀲𑀢𑁆𑀣𑀧𑁆𑀧𑀯𑀢𑁆𑀢𑀺𑀬𑀸 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀉𑀧𑀧𑀢𑁆𑀢𑀦𑁆𑀢𑀭𑀫𑀸𑀳- ‘𑀅𑀣𑀯𑁂’𑀘𑁆𑀘𑀸𑀤𑀺. 𑀇𑀳 𑀞𑀸𑀦𑁂 𑀤𑁆𑀯𑀺𑀩𑁆𑀩𑀘𑀦𑀁 𑀤𑁆𑀯𑀺𑀧𑁆𑀧𑀬𑁄𑀕𑁄 𑀤𑁆𑀯𑀺𑀩𑁆𑀩𑀘𑀦𑀦𑁆𑀢𑀺 𑀤𑁆𑀯𑁂 𑀧𑀓𑁆𑀔𑀸. 𑀢𑀢𑁆𑀭 𑀞𑀸𑀦𑁂 𑀤𑁆𑀯𑀺𑀩𑁆𑀩𑀘𑀦𑀧𑀓𑁆𑀔𑁂 𑀤𑁄𑀲𑀤𑀲𑁆𑀲𑀦𑀢𑁄 𑀤𑁆𑀯𑀺𑀧𑁆𑀧𑀬𑁄𑀕𑁄 𑀤𑁆𑀯𑀺𑀩𑁆𑀩𑀘𑀦𑀦𑁆𑀢𑁆𑀬𑀬𑀫𑁂𑀯 𑀧𑀓𑁆𑀔𑁄𑀩𑁆𑀪𑀼𑀧𑀕𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀧𑀞𑀫𑀦𑁆𑀢𑀸𑀯 𑀞𑀸𑀦𑁂 𑀤𑁆𑀯𑀺𑀩𑁆𑀩𑀘𑀦𑀧𑀓𑁆𑀔𑁂 𑀪𑀸𑀯𑀺𑀦𑀁 𑀤𑁄𑀲𑀫𑀸𑀳- ‘𑀧𑀞𑀫𑀲𑁆𑀲𑁂𑀓𑀲𑁆𑀲𑀭𑀲𑁆𑀲𑀺’𑀘𑁆𑀘𑀸𑀤𑀺. 𑀤𑁆𑀯𑀺𑀲𑀤𑁆𑀤𑁄 𑀲𑀗𑁆𑀔𑁆𑀬𑁂𑀬𑁆𑀬𑁂 𑀯𑀢𑁆𑀢𑀢𑁂.

𑀲𑀗𑁆𑀔𑁆𑀬𑁂𑀬𑁆𑀬𑀜𑁆𑀘𑁂𑀢𑁆𑀣 𑀲𑀤𑁆𑀤𑀭𑀽𑀧𑀫𑀼𑀘𑁆𑀘𑀸𑀭𑀡𑀁 𑀯𑀸, 𑀢𑀢𑁆𑀣 𑀉𑀘𑁆𑀘𑀸𑀭𑀡𑁂 𑀲𑀗𑁆𑀔𑁆𑀬𑁂𑀬𑁆𑀬𑁂 𑀞𑀸𑀦𑁂 𑀤𑁆𑀯𑀺𑀩𑁆𑀩𑀘𑀦𑀁 𑀦 𑀲𑀫𑁆𑀪𑀯𑀢𑀺… 𑀉𑀘𑁆𑀘𑀸𑀭𑀡𑀲𑁆𑀲 𑀲𑀤𑁆𑀤𑀸(𑀦𑀼𑀕𑀢) 𑀥𑀫𑁆𑀫𑀢𑁆𑀢𑀸. 𑀲𑀤𑁆𑀤𑀭𑀽𑀧𑁂 𑀲𑀗𑁆𑀔𑁆𑀬𑁂𑀬𑁆𑀬𑁂 𑀞𑀸𑀦𑁂 𑀤𑁆𑀯𑀺𑀩𑁆𑀩𑀘𑀦𑀁, 𑀢𑀢𑁆𑀣 [𑀢𑀜𑁆𑀘 (𑀧𑁄𑀢𑁆𑀣𑀓𑁂)] 𑀤𑁄𑀲𑁄. 𑀢𑀣𑀸 𑀘𑀸𑀳- ‘𑀭𑀽𑀧𑀤𑁆𑀯𑀬𑁂 𑀯𑀺𑀥𑀻𑀬𑀫𑀸𑀦𑁂’𑀢𑀺. 𑀢𑀣𑀸 𑀲𑀢𑀺 𑀦𑀺𑀯𑀼𑀢𑁆𑀢𑀺𑀥𑀫𑁆𑀫𑁂 𑀞𑀸𑀦𑀻 𑀪𑀯𑀢𑀻𑀢𑀺 𑀞𑀸𑀦𑀺𑀦𑁄 𑀦𑀺𑀯𑀼𑀢𑁆𑀢𑀺𑀬𑀸 𑀪𑀯𑀺𑀢𑀩𑁆𑀩𑀁, 𑀦𑀺𑀯𑀼𑀢𑁆𑀢𑀺𑀬𑀸 𑀘 𑀥𑀸𑀢𑀼𑀢𑁆𑀢𑀸 𑀦𑀺𑀯𑀼𑀢𑁆𑀢𑀺, 𑀢𑁂𑀦𑀸𑀳- ‘𑀧𑀓𑀢𑀺𑀧𑁆𑀧𑀘𑁆𑀘𑀬𑀯𑀺𑀪𑀸𑀕𑀸𑀪𑀸𑀯𑀢𑁄’𑀢𑀺. 𑀢𑁂𑀦 𑀧𑁆𑀧𑀘𑁆𑀘𑀬𑁂 𑀧𑀭𑁂 𑀧𑀓𑀢𑀺𑀬𑀸 𑀯𑀺𑀥𑀻𑀬𑀫𑀸𑀦𑀁 𑀓𑀸𑀭𑀺𑀬𑀁 𑀦 𑀲𑀺𑀬𑀸, 𑀢𑁂𑀦 𑀯𑀼𑀢𑁆𑀢𑀁- ‘𑀅𑀲𑁆𑀲 𑀇𑀢𑁆𑀢𑀁 𑀦 𑀲𑀺𑀬𑀸’𑀢𑀺. 𑀧𑀺𑀧𑀸𑀲𑀢𑀺 ‘𑀧𑀸=𑀧𑀸𑀦𑁂’. 𑀇𑀘𑁆𑀙𑀸𑀬𑀁 𑀧𑀸𑀢𑀼𑀦𑁆𑀢𑀺𑀢𑀼𑀫𑀦𑁆𑀢𑀸 ‘‘𑀢𑀼𑀁𑀲𑁆𑀫𑀸’’𑀘𑁆𑀘𑀸𑀤𑀺𑀦𑀸 (𑁫-𑁬𑁧) 𑀲𑁄. ‘𑀧𑀸𑀲 𑀧𑀸𑀲’ 𑀇𑀢𑀺 𑀤𑁆𑀯𑀺𑀢𑁆𑀢𑁂 𑀧𑀼𑀩𑁆𑀩𑀢𑁄-𑀜𑁆𑀜𑀲𑁆𑀲 𑀮𑁄𑀧𑁄, ‘‘𑀭𑀲𑁆𑀲𑁄 𑀧𑀼𑀩𑁆𑀩𑀲𑁆𑀲’’ (𑁫-𑁭𑁪) ‘𑀔 𑀙 𑀲𑁂𑀲𑁆𑀯𑀲𑁆𑀲𑀺. 𑀤𑁆𑀯𑀺𑀧𑁆𑀧𑀬𑁄𑀕𑁂 𑀢𑀼 𑀤𑁆𑀯𑀺𑀩𑁆𑀩𑀘𑀦𑁂 𑀦𑀸𑀬𑀁 𑀤𑁄𑀲𑁄 𑀲𑀫𑀸𑀯𑀺𑀲𑀢𑀻𑀢𑀺 𑀆𑀳- ‘𑀆𑀯𑀼𑀢𑁆𑀢𑀺𑀬𑀁 𑀢𑀺’𑀘𑁆𑀘𑀸𑀤𑀺. 𑀤𑁆𑀯𑀺𑀥𑀸 𑀪𑀽𑀢𑀲𑁆𑀲𑀸 𑀢𑀺𑀥𑀺𑀦𑀸 𑀥𑀸𑀢𑀼𑀲𑁆𑀲𑁂𑀯 𑀤𑁆𑀯𑀺𑀥𑀸𑀪𑀽𑀢𑀢𑁆𑀢𑀁 𑀤𑀻𑀧𑁂𑀢𑀺.

𑀬𑁄𑀕𑀯𑀺𑀪𑀸𑀕𑀸 ‘𑀅 𑀜’𑀆𑀤𑀻𑀲𑀼 𑀕𑀫𑁆𑀬𑀢𑁂. 𑀬𑀤𑀺 𑀳𑁆𑀬𑀢𑁆𑀭𑀸𑀧𑀺 𑀙𑀝𑁆𑀞𑀻 𑀅𑀪𑀺𑀫𑀢𑀸 𑀲𑀺𑀬𑀸 𑀢𑀤𑀸 ‘‘𑀔 𑀙 𑀲 𑀧𑀭𑁄𑀓𑁆𑀔𑀸𑀦𑀫𑁂𑀓𑀲𑁆𑀲𑀭𑁄𑀤𑀺𑀤𑁆𑀯𑁂’’𑀢𑀺 𑀏𑀓𑀫𑁂𑀯 𑀬𑁄𑀕𑀁 ¶ 𑀓𑀭𑁂𑀬𑁆𑀬. 𑀧𑀭𑁄𑀓𑁆𑀔𑁂 𑀯𑀺𑀳𑀺𑀢𑀸 𑀅𑀜𑀆𑀤𑀬𑁄 𑀥𑀸𑀢𑀼𑀢𑁄𑀯, 𑀦𑀸𑀜𑁆𑀜𑀢𑁄𑀢𑀺 𑀧𑀭𑁄𑀓𑁆𑀔𑀸𑀯𑀘𑀦𑀲𑀦𑁆𑀦𑀺𑀥𑀸𑀦𑀸 𑀘𑀲𑀤𑁆𑀤𑁂𑀦 𑀥𑀸𑀢𑀼𑀯𑀺𑀳𑀺𑀢𑀧𑁆𑀧𑀘𑁆𑀘𑀬𑀸𑀯 𑀕𑀬𑁆𑀳𑀦𑁆𑀢𑀻𑀢𑀺 𑀆𑀳- ‘𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀥𑀸𑀢𑀼𑀯𑀺𑀳𑀺𑀢𑀧𑁆𑀧𑀘𑁆𑀘𑀬𑁂’𑀢𑀺. 𑀬𑀤𑀺 𑀧𑀦 𑀪𑀼𑀲𑀢𑁆𑀣𑁄 𑀆𑀪𑀺𑀓𑁆𑀔𑀜𑁆𑀜𑀢𑁆𑀣𑁄 𑀯𑀸 𑀯𑀢𑁆𑀢𑀼𑀫𑀺𑀝𑁆𑀞𑁄 𑀲𑀺𑀬𑀸, 𑀢𑀤𑀸 𑀪𑀽𑀲𑀢𑁆𑀣𑀸𑀤𑀻𑀲𑀼 𑀘 𑀤𑀤𑁆𑀤𑀮𑁆𑀮𑀢𑀺𑀘𑁆𑀘𑀸𑀤𑀺𑀓𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀘𑀗𑁆𑀓𑀫𑀢𑀺 𑀫𑁄𑀫𑀽𑀳𑀘𑀺𑀢𑁆𑀢𑀸𑀦𑀻𑀢𑀺 𑀪𑀼𑀲𑀢𑁆𑀣𑀲𑁆𑀲 𑀬𑀼𑀚𑁆𑀚𑀫𑀸𑀦𑀢𑁆𑀢𑀸 𑀢𑁆𑀬𑀸𑀤𑀬𑁄 𑀪𑀼𑀲𑀢𑁆𑀣𑁂 𑀪𑀯𑀦𑁆𑀢𑀺 𑀩𑀳𑀼𑀮𑀸𑀥𑀺𑀓𑀸𑀭𑀸𑀢𑀺 𑀯𑀢𑁆𑀢𑀼𑀁 𑀲𑀓𑁆𑀓𑀸𑀢𑀺.

𑀧𑀞𑀫𑁄 𑀤𑀼𑀢𑀺𑀬𑁄𑀢𑀺 𑀘 𑀤𑁆𑀯𑁂 𑀏𑀓𑀲𑁆𑀲𑀭𑀸. 𑀢𑀢𑁆𑀣 ‘‘𑀔𑀙𑀲𑀸𑀦𑀫𑁂𑀓𑀲𑁆𑀲𑀭𑁄𑀤𑀺 𑀤𑁆𑀯𑁂’’ (𑁫-𑁬𑁯) ‘‘𑀧𑀭𑁄𑀓𑁆𑀔𑀸𑀬𑀁 𑀘𑁂’’𑀢𑀺 (𑁫-𑁭𑁦) 𑀧𑀞𑀫𑀲𑁆𑀲𑁂𑀓𑀲𑁆𑀲 𑀭𑀲𑁆𑀲 𑀤𑁆𑀯𑀺𑀩𑁆𑀩𑀘𑀦𑀁 ‘𑀆𑀤𑀺𑀲𑁆𑀫𑀸 𑀲𑀭𑀸’’𑀢𑀺 𑀢𑀼 𑀤𑀼𑀢𑀺𑀬𑀲𑁆𑀲, 𑀢𑀲𑁆𑀫𑀸 𑀓𑀣𑀫𑀜𑁆𑀜𑀲𑁆𑀲𑀼𑀘𑁆𑀘𑀫𑀸𑀦𑁂𑀅𑀜𑁆𑀜𑀲𑁆𑀲𑀩𑀸𑀥𑀓𑀁𑀲𑀺𑀬𑀸 𑀢𑀲𑁆𑀫𑀸 𑀓𑀢𑁂𑀧𑀺𑀤𑀼𑀢𑀺𑀬 𑀤𑁆𑀯𑀺𑀩𑁆𑀩𑀘𑀦𑁂𑀧𑀞𑀫𑀤𑁆𑀯𑀺𑀩𑁆𑀩𑀘𑀦𑀁 𑀲𑀫𑁆𑀪𑀯𑀢𑁆𑀯𑁂𑀯𑀸𑀢𑀺𑀦𑀧𑀞𑀫𑀤𑁆𑀯𑀺𑀩𑁆𑀩𑀘𑀦𑀸𑀧𑀯𑀸𑀤𑁄-𑀬𑀁 𑀬𑁄𑀕𑁄𑀘𑁆𑀘𑀸𑀲𑀗𑁆𑀓𑀺𑀬𑀸𑀳- ‘𑀧𑀞𑀫𑁂’𑀘𑁆𑀘𑀸𑀤𑀺. 𑀓𑁆𑀭𑀺𑀬𑀢𑁆𑀣𑀸𑀥𑀺𑀓𑀸𑀭𑀸 𑀓𑁆𑀭𑀺𑀬𑀢𑁆𑀣𑀸𑀦𑀦𑁆𑀢𑀺 𑀙𑀝𑁆𑀞𑀺𑀬𑀸 𑀤𑀼𑀢𑀺𑀬𑁂𑀦𑁂𑀓𑀲𑁆𑀲 𑀭𑁂𑀦𑀘 𑀲𑀫𑁆𑀩𑀦𑁆𑀥𑀸 𑀧𑀞𑀫𑀤𑁆𑀯𑀺𑀩𑁆𑀩𑀘𑀦𑀲𑁆𑀲𑀯𑀺𑀥𑀸𑀬 𑀓𑀫𑀜𑁆𑀜𑀯𑀸𑀓𑁆𑀬𑀫𑀜𑁆𑀜𑀁 𑀤𑀼𑀢𑀺𑀬𑀲𑁆𑀲𑀸𑀢𑀺 𑀦 𑀯𑀸𑀓𑁆𑀬𑀪𑁂𑀤𑁄𑀢𑀺 𑀆𑀳- ‘𑀏𑀓𑁂’𑀘𑁆𑀘𑀸𑀤𑀺. 𑀅𑀲𑁆𑀲𑀸𑀢𑀺 ‘𑀆𑀤𑀺𑀲𑁆𑀫𑀸 𑀲𑀭𑀸’’𑀢𑀺 𑀅𑀲𑁆𑀲 𑀬𑁄𑀕𑀲𑁆𑀲, 𑀧𑀼𑀩𑁆𑀩𑀬𑁄𑀕𑁂𑀢𑀺 𑀧𑀼𑀩𑁆𑀩𑁂𑀳𑀺 𑀤𑁆𑀯𑀺𑀳𑀺 𑀲𑀼𑀢𑁆𑀢𑁂𑀳𑀺. ‘‘𑀆𑀤𑀺𑀲𑁆𑀫𑀸 𑀲𑀭𑀸’’𑀢𑀺 𑀲𑀭𑀫𑀤𑁆𑀯𑀺𑀢𑁆𑀢𑁂𑀦𑀼𑀧𑀸𑀤𑀸𑀬 𑀲𑀸𑀫𑀜𑁆𑀜𑁂𑀦 𑀲𑀤𑁆𑀤𑀭𑀽𑀧𑀲𑁆𑀲 𑀤𑁆𑀯𑀺𑀩𑁆𑀩𑀘𑀦𑀯𑀺𑀥𑀸𑀦𑀢𑁄 𑀧𑀼𑀩𑁆𑀩𑁂 𑀯𑀺𑀬 𑀩𑁆𑀬𑀜𑁆𑀚𑀦𑀬𑀼𑀢𑁆𑀢𑀲𑁆𑀲𑁂𑀯 𑀯𑀺𑀥𑀸𑀦𑀁 𑀢𑀣𑁂𑀯𑀺𑀝𑁆𑀞𑀢𑁆𑀣𑀢𑁆𑀢𑀸𑀢𑀺 𑀧𑀞𑀫𑀤𑁆𑀯𑀺𑀩𑁆𑀩𑀘𑀦 𑀲𑀫𑁆𑀩𑀦𑁆𑀥𑀺𑀦𑁄 𑀩𑁆𑀬𑀜𑁆𑀚𑀦𑀲𑁆𑀲 𑀤𑁆𑀯𑀺𑀩𑁆𑀩𑀘𑀦𑀩𑀸𑀥𑀸𑀢𑁆𑀬𑀯𑀕𑀦𑁆𑀢𑀩𑁆𑀩𑀁.

𑀧𑀝𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀦𑀺𑀫𑀺𑀢𑁆𑀢𑀁 𑀦𑀺𑀫𑀺𑀢𑁆𑀢𑀁 𑀧𑀢𑀺 𑀧𑀝𑀺𑀦𑀺𑀫𑀺𑀢𑁆𑀢𑀁, 𑀦𑀺𑀫𑀺𑀢𑁆𑀢𑁂 𑀲𑀢𑀻𑀢𑀺 𑀅𑀢𑁆𑀣𑁄.

𑀧𑀞𑀫𑁂𑀓𑀲𑁆𑀲𑀭𑀲𑁆𑀲 𑀧𑀞𑀫𑀤𑁆𑀯𑀺𑀩𑁆𑀩𑀘𑀦𑀁 𑀯𑀺𑀲𑀬𑁄, 𑀤𑀼𑀢𑀺𑀬𑁂𑀓𑀲𑁆𑀲𑀭𑀲𑁆𑀲 𑀤𑀼𑀢𑀺𑀬𑀤𑁆𑀯𑀺𑀩𑁆𑀩𑀘𑀦𑀁, 𑀢𑁂𑀦𑀸𑀳- ‘𑀬𑀣𑀸 𑀯𑀺𑀲𑀬’𑀦𑁆𑀢𑀺. 𑀧𑀞𑀫 𑀤𑀼𑀢𑀺𑀬 𑀢𑀢𑀺𑀬 𑀤𑁆𑀯𑀺𑀩𑁆𑀩𑀘𑀦𑀦𑁆𑀢𑀺 𑀏𑀢𑁆𑀣 𑀧𑀼𑀇𑀢𑀺 𑀧𑀞𑀫𑀁 𑀲𑀤𑁆𑀤𑀭𑀽𑀧𑀁, 𑀢𑁆𑀢𑀺𑀇𑀢𑀺 𑀤𑀼𑀢𑀺𑀬𑀁, 𑀬𑀺𑀲𑀺𑀢𑀺 𑀢𑀢𑀺𑀬𑀁.

𑀔𑀧𑁆𑀧𑀘𑁆𑀘𑀬𑀸𑀤𑀺 𑀓𑀭𑀻𑀬𑀢𑀻𑀢𑀺 𑀲𑁂𑀲𑁄.

𑀘𑀢𑁆𑀣𑀧𑀭𑀢𑁆𑀢𑀸𑀢𑀺 ¶ 𑀘𑀢𑁆𑀣𑀲𑀫𑀸𑀲𑀸 𑀧𑀭𑀪𑀽𑀢𑀢𑁆𑀢𑀸. 𑀢𑁂𑀦 𑀧𑀘𑁆𑀘𑁂𑀓𑀸𑀢𑀺 𑀲𑀫𑁆𑀩𑀦𑁆𑀥𑁂𑀦. 𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑁂𑀦 𑀯𑀺𑀲𑁂𑀲𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀘𑀭𑀺𑀬𑁂𑀦 𑀬𑁄𑀯𑀺𑀪𑀢𑁆𑀢𑀺𑀮𑁄𑀧𑁂𑀦𑁂𑀯 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀆𑀳- ‘𑀮𑀼𑀢𑁆𑀢𑀬𑁄𑀯𑀺𑀪𑀢𑁆𑀢𑀺𑀓𑁄 𑀯𑀸 𑀦𑀺𑀤𑁆𑀤𑁂𑀲𑁄’𑀢𑀺.

𑀥𑀽𑀧𑀸𑀬𑀢𑀻𑀢𑀺 𑀥𑀽𑀧𑀺𑀢𑀸, 𑀧𑀘𑁆𑀘𑀬𑀲𑁆𑀲𑀸𑀢𑀺 𑀢𑀺𑀧𑁆𑀧𑀘𑁆𑀘𑀬𑀲𑁆𑀲. 𑀓𑀸𑀦𑀼𑀩𑀦𑁆𑀥𑀓𑀭𑀡𑀫𑀦𑀢𑁆𑀣𑀓𑀁 𑀲𑀺𑀬𑀸𑀢𑀺 𑀖𑀓𑁆𑀯𑀺𑀓𑀭𑀡𑀲𑁆𑀲 𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑁂 (𑀢𑀁) 𑀦𑀺𑀩𑀦𑁆𑀥𑀦𑀲𑁆𑀲 𑀓𑀸𑀭𑀺𑀬𑀲𑁆𑀲𑀸𑀪𑀸𑀯𑀸 ‘𑀦 𑀢𑁂 𑀓𑀸𑀦𑀼𑀩𑀦𑁆𑀥𑀦𑀸𑀕𑀫𑁂𑀲𑀽’’𑀢𑀺 (𑁫-𑁮𑁫) 𑀧𑀝𑀺𑀲𑁂𑀥𑀸 𑀪𑀸𑀯𑁄𑀢𑀺 𑀓𑀓𑀸𑀭𑀸𑀦𑀼𑀩𑀦𑁆𑀥𑀫𑀦𑀢𑁆𑀣𑀓𑀁 𑀲𑀺𑀬𑀸.

𑀧𑀼𑀘𑁆𑀙𑀻𑀬𑀺𑀢𑁆𑀣𑀸𑀢𑀺 𑀯𑀺𑀕𑁆𑀕𑀬𑁆𑀳 𑀢𑁆𑀢𑁄, 𑀢𑀲𑁆𑀲 ‘‘𑀧𑀼𑀘𑁆𑀙𑀸𑀤𑀺𑀢𑁄’’𑀢𑀺 (𑁫-𑁧𑁪𑁩) 𑀞𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀏 𑀑𑀦𑀫𑁆𑀧𑀝𑀺𑀲𑁂𑀥𑀫𑀼𑀔𑁂𑀦𑀸𑀢𑀺 𑀏𑀑𑀦𑀫𑁆𑀧𑀝𑀺𑀲𑁂𑀥𑀲𑁆𑀲 𑀧𑀓𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀘𑀺𑀦𑀺𑀢𑀩𑁆𑀩𑀦𑁆𑀢𑀺𑀆𑀤𑀻𑀲𑀼 𑀘𑀻𑀬𑀺𑀢𑁆𑀣 𑀘𑀻𑀬𑀢𑀺 𑀯𑀸𑀢𑀺𑀆𑀤𑀺𑀦𑀸 𑀯𑀺𑀕𑁆𑀕𑀳𑁄. 𑀘𑀺𑀦𑀺𑀢𑀼𑀦𑁆𑀢𑀺𑀆𑀤𑀻𑀲𑀼 𑀘𑀺𑀦𑀦𑀸 𑀬𑀸𑀢𑀺(𑀆𑀤𑀺𑀦𑀸). 𑀦𑀦𑀼 𑀘 (𑀜𑀺𑀆𑀕)𑀫𑁄, 𑀦 𑀧𑀘𑁆𑀘𑀬𑁄𑀢𑀺 𑀓𑀣𑀫𑁆𑀧𑀘𑁆𑀘𑀬𑁂 ‘‘𑀮𑀳𑀼𑀲𑁆𑀲𑀼𑀧𑀦𑁆𑀢𑀲𑁆𑀲𑀸’’𑀢𑀺 (𑁫-𑁮𑁩) 𑀏𑀑 𑀧𑀧𑁆𑀧𑁄𑀦𑁆𑀢𑀺 𑀓𑀣𑀜𑁆𑀘𑁂 𑀲𑀫𑁆𑀧𑀝𑀺𑀲𑁂𑀥𑁄𑀘𑁆𑀘𑀸𑀲𑀗𑁆𑀓𑀺𑀬𑀸𑀳- ‘𑀜𑀺𑀲𑁆𑀲𑁂’𑀘𑁆𑀘𑀸𑀤𑀺. 𑀦𑀦𑀼𑀘𑀸𑀤𑀺𑀫𑁆𑀳𑀺 𑀦 𑀬𑀼𑀯𑀡𑁆𑀡𑀸𑀪𑀺 𑀓𑀣𑀫𑁂𑀢𑁆𑀣𑀧𑁆𑀧𑀲𑀗𑁆𑀕𑁄𑀢𑀺 𑀆𑀳- ‘𑀲𑀓𑀸𑀧𑀸𑀦𑀁 𑀓𑀼𑀓𑁆𑀓𑀽𑀡𑁂𑀢𑀺’𑀘𑁆𑀘𑀸𑀤𑀺.

𑀧𑀢𑁆𑀢𑁄𑀓𑀸𑀭𑀲𑁆𑀲𑀸𑀢𑀺 𑀥𑀼𑀲𑀤𑁆𑀤𑁂 𑀉𑀓𑀸𑀭𑀲𑁆𑀲 𑀧𑀢𑁆𑀢𑁄𑀓𑀸𑀭𑀲𑁆𑀲. 𑀬𑀼𑀯𑀡𑁆𑀡𑁂𑀘𑁆𑀘𑀸𑀤𑀺𑀦𑀸𑀧𑀢𑁆𑀢𑀲𑁆𑀲𑀸𑀢𑀺 (𑀢𑀩𑁆𑀩) 𑀢𑀼𑀁 𑀧𑀘𑁆𑀘𑀬𑁂𑀲𑀼 𑀘 𑀡𑀺𑀦𑁄 𑀧𑀢𑁆𑀢𑀲𑁆𑀲. 𑀯𑀸 𑀯𑀺𑀥𑀸𑀦𑀸 𑀦 𑀜𑀺. 𑀥𑀼𑀦𑀸𑀧𑁂𑀢𑀩𑁆𑀩𑀦𑁆𑀢𑀺𑀆𑀤𑀺𑀧𑀸𑀞𑁂 𑀜𑀺𑀫𑁆𑀳𑀺 𑀅𑀓𑀢𑁂 ‘‘𑀅𑀜𑁆𑀜𑀢𑁆𑀭𑀸𑀧𑀻’’𑀢𑀺 (𑁫-𑁮𑁭) 𑀧𑀝𑀺𑀲𑁂𑀥𑀸𑀪𑀸𑀯𑁄. 𑀥𑀼𑀦𑀸𑀧𑁂𑀢𑀻𑀢𑀺 𑀧𑀸𑀞𑁂𑀢𑀺𑀫𑁆𑀳𑀺 𑀮𑁂 𑀘 ‘‘𑀓𑁆𑀯𑀘𑀺 𑀯𑀺𑀓𑀭𑀡𑀸𑀦’’𑀦𑁆𑀢𑀺 (𑁫-𑁧𑁬𑁧) 𑀯𑀺𑀓𑀭𑀡𑀮𑁄𑀧𑁂 𑀘 𑀏𑀓𑀸𑀭𑁄. 𑀅𑀲𑀢𑀺 𑀦𑀸𑀕𑀫𑁂 ‘‘𑀬𑀼𑀯𑀡𑁆𑀡𑁂’’𑀘𑁆𑀘𑀸𑀤𑀺𑀦𑀸 𑀏𑀢𑁆𑀢𑀁 𑀲𑀺𑀬𑀸 𑀢𑀫𑁆𑀧𑀺𑀦𑀸𑀕𑀫𑁂 𑀉𑀧𑀦𑁆𑀢𑀢𑁆𑀢𑀸 𑀦𑁂𑀢𑁆𑀬𑀥𑀺𑀧𑁆𑀧𑀸𑀬𑁂𑀦𑀸𑀳- ‘𑀢𑀣𑀸𑀧𑀺’𑀘𑁆𑀘𑀸𑀤𑀺. 𑀧𑀓𑁆𑀔𑀦𑁆𑀢𑀭𑀫𑀸𑀳- ‘𑀦𑀸𑀕𑀫𑁂’𑀘𑁆𑀘𑀸𑀤𑀺.

𑀲𑀫 𑀤𑀫-𑀉𑀧𑀲𑀫𑁂. 𑀲𑀫𑁂𑀢𑀻𑀢𑀺 𑀲𑀫𑀓𑁄, 𑀤𑀫𑁂𑀢𑀻𑀢𑀺 𑀤𑀫𑀓𑁄, 𑀚𑀦-𑀚𑀦𑀦𑁂, 𑀚𑀦𑁂𑀢𑀻𑀢𑀺 𑀚𑀦𑀓𑁄 𑀩𑀥=𑀩𑀦𑁆𑀥𑀦𑁂, 𑀩𑀥𑀢𑀻𑀢𑀺 𑀩𑀥𑀓𑁄.

𑀦𑀺𑀧𑀚𑁆𑀚𑀢𑀺 ¶ 𑀦𑀺𑀧𑀚𑁆𑀚𑀦𑀁. 𑀧𑀫𑀚𑁆𑀚𑀢𑁂 𑀧𑀫𑀚𑁆𑀚𑀺𑀢𑀩𑁆𑀩𑀁. 𑀧𑀫𑀚𑁆𑀚𑀦𑀸𑀬 𑀧𑀫𑀚𑁆𑀚𑀺𑀢𑀼𑀁. 𑀧𑀫𑀚𑁆𑀚𑀢𑀺 𑀧𑀫𑀚𑁆𑀚𑀦𑀁.

𑀭𑀼𑀦𑁆𑀥𑀺𑀢𑀼𑀦𑁆𑀢𑀺𑀆𑀤𑀻𑀲𑀼 𑀭𑁄𑀥𑀦𑀸𑀬𑀸𑀢𑀺 𑀯𑀺𑀕𑁆𑀕𑀳𑁄.

𑀦𑀦𑀼 𑀓𑀺𑀫𑀢𑁆𑀣𑀫𑀦𑁆𑀢𑀕𑁆𑀕𑀳𑀡𑀁 𑀬𑀢𑁄 ‘‘𑀓𑁆𑀯𑀺𑀫𑁆𑀳𑀺 𑀮𑁄𑀧𑁄-𑀦𑁆𑀢𑀩𑁆𑀬𑀜𑁆𑀚𑀦𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, ‘‘𑀙𑀝𑁆𑀞𑀺𑀬𑀦𑁆𑀢𑀲𑁆𑀲𑀸’’𑀢𑀺 (𑁧-𑁧𑁭) 𑀅𑀦𑁆𑀢𑀲𑁆𑀲𑁂𑀯 𑀮𑁄𑀧𑁄 𑀲𑀺𑀬𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀦𑀺𑀥𑀸𑀬 𑀢𑀕𑁆𑀕𑀳𑀡𑁂 𑀧𑀬𑁄𑀚𑀦𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳- ‘𑀅𑀦𑁆𑀢𑀕𑁆𑀕𑀳𑀡’𑀫𑀺𑀘𑁆𑀘𑀸𑀤𑀺. 𑀮𑁄𑀧𑀯𑀺𑀥𑀻𑀲𑀽𑀢𑀺 (𑀯𑀻𑀆𑀤𑀺𑀮𑁄𑀧𑀯𑀺𑀥𑀻𑀲𑀼, 𑀙𑀝𑁆𑀞𑀻 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺) ‘‘𑀯𑀻𑀫𑀦𑁆𑀢𑀼 𑀯𑀦𑁆𑀢𑀽’’𑀦𑁆𑀢𑀺 (𑁪-𑁧𑁩𑁮) 𑀙𑀝𑁆𑀞𑀻𑀦𑀺𑀤𑁆𑀤𑀺𑀝𑁆𑀞𑀁. 𑀪𑀤𑀦𑁆𑀢𑀯𑀺𑀥𑀺𑀘𑀭𑀺𑀢𑀢𑁆𑀢𑀩𑁆𑀬𑀸𑀧𑀸𑀭𑀁 [𑀢𑀤𑀦𑁆𑀢𑀯𑀺𑀥𑀺𑀘𑀺𑀭𑀪𑁂𑀤𑀦𑀸𑀘𑁆𑀘𑀦𑀩𑁆𑀬𑀸𑀧𑀸𑀭𑀁 (𑀧𑁄𑀢𑁆𑀣𑀓𑁂)] 𑀦𑀺𑀲𑁆𑀲𑀸𑀬𑀸𑀳- ‘𑀙𑀝𑁆𑀞𑀺𑀬𑀦𑁆𑀢𑀲𑁆𑀲𑀸’’𑀢𑀻 𑀩𑁆𑀬𑀸𑀧𑀸𑀭𑀸’𑀢𑀺. 𑀅𑀦𑁆𑀢𑀲𑁆𑀲𑀸𑀢𑀺 𑀯𑀻𑀆𑀤𑀻𑀦𑀫𑀻𑀓𑀸𑀭𑀸𑀤𑀺𑀦𑁄. 𑀅𑀜𑁆𑀜𑀣𑀸𑀢𑀺 𑀲𑀩𑁆𑀩𑀸𑀧𑀳𑀸𑀭𑀺𑀮𑁄𑀧𑀜𑁆𑀜𑀸𑀧𑀦𑀸𑀪𑀸𑀯𑁂. 𑀅𑀦𑀢𑁆𑀣𑀓𑀁 𑀲𑀺𑀬𑀸 ‘‘𑀙𑀝𑁆𑀞𑀺𑀬𑀦𑁆𑀢𑀲𑁆𑀲𑀸’’𑀢𑀺𑀫𑀲𑁆𑀲 𑀩𑁆𑀬𑀸𑀧𑀸𑀭𑀲𑀫𑁆𑀪𑀸𑀯𑀸. 𑀇𑀤𑀸𑀦𑀺 𑀙𑀝𑁆𑀞𑀻𑀦𑀺𑀤𑁆𑀤𑀺𑀝𑁆𑀞𑀸𑀦𑀁 𑀯𑀺𑀲𑁂𑀲𑁂𑀦 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑁆𑀢𑀁 𑀅𑀦𑁆𑀢𑀲𑁆𑀲𑁂𑀯 𑀮𑁄𑀧𑀧𑀢𑁆𑀢𑀺𑀤𑁄𑀲𑀁 𑀤𑀲𑁆𑀲𑁂𑀢𑀼𑀫𑀸𑀳- ‘𑀢𑀤𑀦𑁆𑀢𑁂’𑀘𑁆𑀘𑀸𑀤𑀺.

𑀅𑀣 𑀤𑁆𑀯𑀺𑀢𑁆𑀢𑁂𑀢𑀺 𑀓𑀣𑀫𑀯𑀲𑀻𑀬𑀢𑁂 𑀲𑀤𑁆𑀤𑁂 𑀅𑀪𑀸𑀯𑁂𑀢𑀺𑀆𑀳- ‘𑀧𑀭’𑀇𑀘𑁆𑀘𑀸𑀤𑀺. 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 ‘‘𑀧𑀭𑀺𑀧𑀘𑁆𑀘𑀲𑀫𑁄 𑀳𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀢𑁄 𑀧𑀭𑀲𑁆𑀲𑀸𑀢𑀺 𑀓𑀺𑀦𑁆𑀦𑀸𑀯𑀲𑀻𑀬𑀢𑀻𑀢𑀺 𑀘𑁄𑀤𑀦 𑀫𑀼𑀩𑁆𑀪𑀸𑀯𑀺𑀬 𑀢𑀤𑀬𑀼𑀢𑁆𑀢𑀢𑀁 𑀤𑀲𑁆𑀲𑁂𑀢𑀼𑀫𑀸𑀳- ‘𑀦𑀦𑀼𑀘𑁂’𑀘𑁆𑀘𑀸𑀤𑀺.

𑀅𑀧𑀘𑀼𑀭𑀧𑁆𑀧𑀬𑁄𑀕𑀢𑁆𑀢𑀸𑀢𑀺 𑀅𑀩𑀳𑀼𑀧𑁆𑀧𑀬𑁄𑀕𑀢𑁆𑀢𑀸.

𑀓𑁆𑀢𑁄 𑀤𑀽𑀲𑀺𑀥𑀸𑀢𑀼𑀢𑁄 𑀤𑀽𑀲𑀬𑀢𑀻𑀢𑀺 𑀅𑀢𑁆𑀣𑁂.

‘‘𑀯𑀡𑁆𑀡𑁂 ¶ 𑀬𑀦𑁆𑀢𑀁 𑀢𑀤𑀸𑀤𑁄’’𑀢𑀺 𑀧𑀭𑀺𑀪𑀸𑀲𑀸𑀬 𑀅𑀬𑀫𑀢𑁆𑀣𑁄 ‘‘𑀯𑀡𑁆𑀡𑁂 𑀧𑀭𑁂 𑀬𑀁 𑀓𑀸𑀭𑀺𑀬𑀁 𑀢𑀁 𑀢𑀤𑀸𑀤𑁄 𑀢𑀲𑁆𑀫𑀺𑀁 𑀯𑀡𑁆𑀡𑁂 𑀆𑀤𑀺𑀪𑀽𑀢𑁂 𑀳𑁄𑀢𑀻’’𑀢𑀺 𑀢𑁂𑀢𑀺 𑀢𑀓𑀸𑀭𑁂 𑀧𑀭𑁂.

𑀢𑁂𑀢𑁆𑀯𑁂𑀯𑀸𑀢𑀺 𑀯𑀢𑁆𑀯𑀸 𑀧𑀘𑁆𑀘𑀼𑀤𑀸𑀳𑀭𑀡𑀁 𑀤𑀲𑁆𑀲𑁂𑀢𑀺 ‘𑀯𑀼𑀬𑁆𑀳𑀢𑀻’𑀢𑀺. 𑀯𑀼𑀢𑁆𑀢𑀺𑀯𑀘𑀦𑀁 𑀫𑀼𑀮𑁆𑀮𑀺𑀗𑁆𑀕𑀺𑀬 𑀅𑀢𑁆𑀣𑀁 𑀯𑀤𑀢𑀺 ‘𑀉𑀲𑁆𑀲𑀸’𑀢𑀺𑀆𑀤𑀺.

𑀭𑀸𑀦𑀦𑁆𑀢𑀺 𑀯𑀼𑀢𑁆𑀢𑁂 ‘𑀭𑀸-𑀆𑀤𑀸𑀦𑁂’𑀇𑀘𑁆𑀘𑀲𑁆𑀲 𑀕𑀳𑀡𑀫𑁆𑀧𑀺 𑀯𑀺𑀜𑁆𑀜𑀸𑀬𑁂𑀬𑁆𑀬𑀸𑀢𑀺 𑀆𑀳- ‘𑀭𑀸𑀦’𑀦𑁆𑀢𑀺𑀆𑀤𑀺.

𑀲𑀼𑀢𑁆𑀢𑁂 ‘𑀯𑀲𑁆𑀲𑀸’𑀢𑀺 𑀲𑀲𑁆𑀲𑀭𑁄𑀯 𑀕𑀬𑁆𑀳𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀯𑀲𑁆𑀲𑀸𑀢𑀺 𑀳𑀻’𑀢𑀺𑀆𑀤𑀺.

𑀯𑀢𑁆𑀢=𑀯𑀢𑁆𑀢𑀦𑁂𑀢𑀻𑀫𑀲𑁆𑀫𑀸 𑀢𑁆𑀢𑀺𑀧𑁆𑀧𑀘𑁆𑀘𑀬𑁂 𑀯𑀸 𑀉𑀓𑀸𑀭𑁄 𑀦 𑀯𑀺𑀳𑀺𑀢𑁄𑀢𑀺 𑀆𑀲𑀬𑁂𑀦 ‘𑀓𑀣’𑀫𑀺𑀘𑁆𑀘𑀸𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳- ‘𑀯𑀢𑁆𑀢𑀯𑀢𑁆𑀢𑀦𑁂𑀢𑀺’𑀘𑁆𑀘𑀸𑀤𑀺. 𑀯𑀼𑀢𑁆𑀢𑀺𑀫𑀢𑁆𑀢𑁂𑀢𑀺 𑀦𑀺𑀧𑀸𑀢𑀦𑀸𑀢𑀺 ‘‘𑀲𑀩𑁆𑀩𑀸𑀤𑀬𑁄 𑀯𑀼𑀢𑁆𑀢𑀺𑀫𑀢𑁆𑀢𑁂’’ 𑀢𑁂𑀢𑁆𑀣 (𑁩-𑁬𑁯) ‘𑀯𑀼𑀢𑁆𑀢𑀺𑀫𑀢𑁆𑀢𑁂’𑀢𑀺 𑀦𑀺𑀧𑀸𑀢𑀦𑀸. 𑀞𑀸=𑀕𑀢𑀺𑀦𑀺𑀯𑀢𑁆𑀢𑀺𑀬𑀦𑁆𑀢𑀺 𑀏𑀢𑁆𑀣 ‘𑀕𑀢𑀺𑀦𑀺𑀯𑀢𑁆𑀢𑀺𑀬’𑀦𑁆𑀢𑀺 𑀦𑀺𑀧𑀸𑀢𑀦𑀸 𑀧𑀓𑁆𑀔𑁂 𑀉𑀓𑀸𑀭𑁄 𑀦 𑀳𑁄𑀢𑀺, 𑀢𑁂𑀦𑀸𑀳- ‘𑀯𑀢𑁆𑀢𑀻’𑀢𑀺𑀆𑀤𑀺. 𑀯𑀢𑁆𑀢𑀦𑀁 𑀯𑀼𑀢𑁆𑀢𑀺 𑀯𑀢𑁆𑀢𑀺.

𑀓𑀲𑁆𑀲 𑀲𑀩𑁆𑀩𑀲𑁆𑀲𑀸𑀢𑀺 𑀆𑀳- ‘𑀬 𑀅𑀓𑀸𑀭𑀸𑀦’𑀦𑁆𑀢𑀺.

𑀩𑁆𑀬𑀢𑁆𑀢𑀺𑀦𑀺𑀤𑁆𑀤𑁂𑀲𑁂𑀦𑀸𑀢𑀺 𑀇𑀫𑀺𑀦𑀸 𑀚𑀸𑀢𑀺𑀦𑀺𑀤𑁆𑀤𑁂𑀲𑀲𑁆𑀲𑀸𑀦𑀺𑀲𑁆𑀲𑀺𑀢𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀈𑀲𑁆𑀲𑁂𑀘𑁆𑀘𑀸𑀤𑀺𑀦𑀸 𑀯𑀼𑀢𑁆𑀢𑀺𑀕𑀦𑁆𑀣𑀲𑁆𑀲𑀸𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀢𑀺.

𑀲𑀢𑁆𑀣𑀁 ¶ ‘‘𑀩𑁆𑀬𑀜𑁆𑀚𑀦𑁂 𑀤𑀻𑀖𑀭𑀲𑁆𑀲𑀸’’𑀢𑀺 (𑁧-𑁩𑁩) 𑀭𑀲𑁆𑀲𑁄.

‘‘𑀦𑁆𑀢𑁄 𑀓𑀢𑁆𑀢𑀭𑀺 𑀯𑀢𑁆𑀢𑀫𑀸𑀦𑁂’’𑀢𑀺 (𑁫-𑁬𑁪) 𑀦𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀓𑀼𑀓𑁆𑀧𑁆𑀧𑀘𑁆𑀘𑀬𑁂 𑀅𑀦𑁆𑀢𑀓𑀓𑀸𑀭𑁄 𑀓𑀼𑀧𑁆𑀧𑀘𑁆𑀘𑀬𑁂 𑀆𑀤𑀺𑀓𑀓𑀸𑀭𑁄 𑀅𑀦𑁆𑀢𑀸𑀯𑀬𑀯𑀢𑁆𑀣𑁄.

𑀦𑀸𑀜𑁆𑀜𑀢𑁆𑀭𑀘𑀬𑀸𑀤𑀻𑀲𑀽𑀢𑀺 𑀦𑀺𑀘𑁆𑀙𑀬𑀢𑁄-𑀜𑁆𑀜𑁂𑀲𑀼 [𑀅𑀜𑁆𑀜𑀲𑁆𑀫𑀺𑀁] 𑀘𑀬𑀸𑀤𑀻𑀲𑁆𑀯𑀢𑁆𑀣𑁂𑀲𑀼 𑀙𑁄 𑀦 𑀪𑀯𑀢𑀻𑀢𑀺 𑀅𑀢𑁆𑀣𑁄.

𑀈𑀫𑁆𑀳𑀺 𑀚𑀲𑀤𑁆𑀤𑁂 𑀅𑀓𑀸𑀭𑀲𑁆𑀲 𑀮𑁄𑀧𑁄, 𑀮𑁂 𑀢𑀼 𑀚𑀻𑀭𑀸𑀧𑀬𑀢𑀺. 𑀢𑀲𑁆𑀲𑀸𑀢𑀺𑀓𑁆𑀬𑀲𑁆𑀲.

𑀤𑀺𑀝𑁆𑀞𑀺 𑀤𑀲𑁆𑀲𑀦𑀁, 𑀤𑀲𑁆𑀲𑀦𑀸𑀬 𑀤𑀝𑁆𑀞𑀼𑀁. ‘‘𑀲𑀭𑀫𑁆𑀳𑀸 𑀤𑁆𑀯𑁂’’𑀢𑀺 (𑁧-𑁩𑁪) 𑀤𑁆𑀯𑀺𑀢𑁆𑀢𑁂 𑀤𑀼𑀤𑁆𑀤𑀲𑁄. ‘‘𑀆 𑀈’’𑀘𑁆𑀘𑀸𑀤𑀺𑀦𑀸 (𑁬-𑁩𑁩) 𑀈𑀲𑁆𑀲 𑀭𑀲𑁆𑀲𑁄 (𑀅𑀤𑁆𑀤𑀓𑁆𑀔𑀺). 𑀤𑀓𑁆𑀔𑀺𑀲𑁆𑀲𑀢𑀺 ‘‘𑀪𑀯𑀺𑀲𑁆𑀲𑀢𑀺 𑀲𑁆𑀲𑀢𑀺’’𑀘𑁆𑀘𑀸𑀤𑀺𑀦𑀸, (𑁬-𑁨) 𑀲𑁆𑀲𑀢𑀺.

𑀯𑀸𑀤𑀲𑁆𑀲𑀭𑁂𑀢𑀺 𑀯𑀺𑀓𑀧𑁆𑀧𑁂𑀦 𑀤𑀓𑀸𑀭𑀲𑁆𑀲 𑀭𑀸𑀤𑁂𑀲𑁂.

𑀤𑀲𑁆𑀲𑀸𑀢𑁆𑀬𑀦𑀦𑀼𑀯𑀢𑁆𑀢𑀫𑀸𑀦𑁂𑀧𑀺 𑀤𑀲𑁆𑀲𑁂𑀯 𑀧𑀧𑁆𑀧𑁄𑀢𑀺 𑀯𑀘𑀦𑀩𑀮𑁂𑀦𑀸𑀢𑀺 𑀤𑀲𑁆𑀲𑁂𑀢𑀼𑀁 𑀧𑀓𑁆𑀔𑀦𑁆𑀢𑀭𑀫𑀸𑀳- ‘𑀆𑀤𑀺𑀲𑁆𑀲𑀸’𑀢𑀺𑀆𑀤𑀺. 𑀅𑀦𑀖𑀡𑁆𑀲𑀼 𑀧𑀭𑁂𑀲𑀼 𑀆𑀧𑀭𑀻𑀳𑀺 𑀤𑀲𑁆𑀲𑀸𑀦𑀺𑀬𑀫𑁂𑀦 𑀴𑁄𑀘𑁆𑀘𑀸𑀲𑀗𑁆𑀓𑀺𑀬 𑀦𑁂𑀯𑀁, 𑀬𑀣𑀸𑀓𑁆𑀓𑀫𑀫𑁂𑀯 𑀦𑀺𑀲𑁆𑀲𑀺𑀢𑁄𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀅𑀦𑀖𑀡𑁆𑀲𑀼’𑀘𑁆𑀘𑀸𑀤𑀺. 𑀆𑀧𑀭𑀲𑁆𑀲𑀸𑀢𑀺 𑀆𑀓𑀸𑀭𑀢𑁄 𑀧𑀭𑀲𑁆𑀲 𑀤𑀲𑁆𑀲.

𑀯𑀼𑀢𑁆𑀢𑀺𑀬𑀁 𑀏𑀢𑀲𑁆𑀫𑀺𑀁 𑀯𑀺𑀲𑀬𑁂𑀢𑀺 𑀏𑀢𑁆𑀣 𑀏𑀢𑀲𑁆𑀫𑀺𑀦𑁆𑀢𑀺 𑀢𑁆𑀬𑀸𑀤𑀺𑀦𑁆𑀢𑀯𑀚𑁆𑀚𑀺𑀢𑀧𑀘𑁆𑀘𑀬 𑀯𑀺𑀲𑀬𑁂𑀢𑀺 𑀅𑀢𑁆𑀣𑁄. 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸 𑀜𑀸𑀧𑀺𑀢𑁄 𑀳𑁄𑀢𑀻𑀢𑀺 𑀕𑀫𑁆𑀬𑀢𑁂. 𑀦 ¶ 𑀜𑀸𑀧𑀓𑀢𑁄𑀢𑀺 𑀇𑀫𑀺𑀦𑀸 𑀇𑀤𑀁 𑀤𑀲𑁆𑀲𑁂𑀢𑀺 ‘‘𑀓𑀺𑀜𑁆𑀘𑀺 𑀯𑀘𑀦𑀸𑀦𑀼𑀲𑀸𑀭𑀢𑁄 𑀯𑀺𑀜𑁆𑀜𑀸𑀬𑀫𑀸𑀦𑀢𑀸𑀫𑀢𑁆𑀢𑁂𑀦 𑀜𑀸𑀧𑀻𑀬𑀢𑁂 𑀓𑀺𑀜𑁆𑀘𑀺 𑀜𑀸𑀧𑀓𑁂𑀦, 𑀅𑀲𑁆𑀫𑀺𑀫𑁆𑀧𑀓𑁆𑀔𑁂 𑀯𑀼𑀢𑁆𑀢𑀸𑀦𑀼𑀲𑀸𑀭𑀢𑁄 𑀓𑀢𑁆𑀣𑀘𑀺 𑀓𑀲𑁆𑀲𑀘𑀺 𑀥𑀸𑀢𑀼𑀦𑁄 𑀅𑀧𑁆𑀧𑀬𑁄𑀕𑁄 𑀯𑀺𑀜𑁆𑀜𑀸𑀧𑀻𑀬𑀢𑀻’’𑀢𑀺. 𑀧𑀓𑁆𑀔𑀦𑁆𑀢𑀭𑀫𑀸𑀳- ‘𑀜𑀸𑀧𑀓𑀢𑁆𑀢𑀸𑀬𑁂𑀯 𑀯𑀸’𑀢𑀺𑀆𑀤𑀺. 𑀲𑀫𑀢𑁆𑀣𑁂𑀢𑀺 𑀢𑀣𑀸𑀳𑀺𑀘𑁆𑀘𑀸𑀤𑀺𑀦𑀸. 𑀅𑀲𑀲𑁆𑀲𑀸𑀧𑁆𑀧𑀬𑁄𑀕𑁄𑀢𑀺 𑀅𑀲𑀥𑀸𑀢𑀼𑀲𑁆𑀲 𑀓𑀺𑀲𑁆𑀫𑀺𑀜𑁆𑀘𑀺 𑀢𑀩𑁆𑀩𑀸𑀤𑀺𑀓𑁂 𑀧𑀘𑁆𑀘𑀬𑁂 𑀧𑀭𑁂 𑀪𑀯𑀺𑀢𑀩𑁆𑀩𑀦𑁆𑀢𑀺𑀆𑀤𑀻𑀦𑀫𑀧𑁆𑀧𑀬𑁄𑀕𑁄𑀢𑀺 𑀅𑀢𑁆𑀣𑁄.

𑀯𑀺𑀦𑀸𑀧𑀺 𑀲𑀼𑀢𑁆𑀢𑀦𑁆𑀢𑀺 ‘‘𑀅𑀢𑁆𑀬𑀸𑀤𑀻’’𑀢𑀺𑀆𑀤𑀺𑀓𑀁 𑀲𑀼𑀢𑁆𑀢𑀁 𑀯𑀺𑀦𑀸𑀧𑀺. 𑀏𑀯𑀁 𑀫𑀜𑁆𑀜𑀢𑁂 ‘‘𑀅𑀲𑀲𑁆𑀲 𑀪𑀽𑀆𑀤𑁂𑀲𑁂𑀦 𑀲𑀸𑀥𑀻𑀬𑀫𑀸𑀦𑀁 𑀲𑀩𑁆𑀩𑀫𑀺𑀝𑁆𑀞𑀁 𑀩𑀳𑀼𑀮𑀸𑀥𑀺𑀓𑀸𑀭𑀢𑁄 𑀪𑀽𑀥𑀸𑀢𑀼𑀦𑀸𑀯 𑀲𑀺𑀚𑁆𑀛𑀢𑀺 𑀯𑀺𑀦𑀸𑀧𑀺 𑀪𑀽𑀆𑀤𑁂𑀲𑀲𑀼𑀢𑁆𑀢𑀦𑁆𑀢𑀭𑀦𑁆𑀢𑀺 𑀓𑀢𑁆𑀣𑀘𑀺 𑀓𑀲𑁆𑀲𑀘𑀺 𑀅𑀧𑁆𑀧𑀬𑁄𑀕𑀲𑁆𑀲 𑀜𑀸𑀧𑀓𑀢𑁆𑀢𑀫𑁆𑀧𑀺𑀲𑁆𑀲 𑀬𑀼𑀚𑁆𑀚𑀢𑀺 𑀅𑀜𑁆𑀜𑀢𑁆𑀣 𑀓𑀭𑀻𑀬𑀫𑀸𑀦𑀫𑀺𑀳𑀸𑀧𑀺 𑀅𑀢𑁆𑀣𑀯𑀦𑁆𑀢𑀁 𑀲𑀺𑀬𑀸’’𑀢𑀺.

𑀬𑁂𑀢𑀺 𑀥𑀸𑀢𑀼𑀧𑁆𑀧𑀬𑁄𑀕𑀸 𑀬𑀲𑁆𑀫𑀺𑀦𑁆𑀢𑀺 𑀯𑀺𑀲𑀬𑁂, 𑀧𑀸𑀢𑀺𑀲𑁆𑀲𑀸𑀢𑀺 ‘𑀧𑀸-𑀭𑀓𑁆𑀔𑀡𑁂’𑀢𑀻𑀫𑀲𑁆𑀲, 𑀦𑀧𑁆𑀧𑀬𑁄𑀕𑁄 𑀧𑀸𑀬𑀬𑀢𑀺 𑀧𑀸𑀬𑀬𑀺𑀢𑀩𑁆𑀩𑀦𑁆𑀢𑀺𑀆𑀤𑀺𑀧𑁆𑀧𑀬𑁄𑀕𑁄 𑀦 𑀳𑁄𑀢𑀻𑀢𑀺. 𑀏𑀯𑀫𑀼𑀧𑀭𑀺𑀧𑀺 𑀬𑀣𑀸𑀬𑁄𑀕𑀁 𑀜𑁂𑀬𑁆𑀬𑀁. 𑀩𑁆𑀭𑀽𑀲𑁆𑀲𑀸𑀢𑀺 ‘𑀩𑁆𑀭𑀽=𑀯𑀘𑀦𑁂’𑀇𑀘𑁆𑀘𑀲𑁆𑀲. 𑀅𑀤𑀺𑀲𑁆𑀲𑀸𑀢𑀺 ‘𑀅𑀤-𑀪𑀓𑁆𑀔𑀡𑁂’𑀇𑀘𑁆𑀘𑀲𑁆𑀲. 𑀈𑀆𑀤𑀻𑀢𑀺 𑀪𑀽𑀢𑁂 𑀈𑀆𑀤𑀺. 𑀏𑀢𑀺𑀲𑁆𑀲 𑀘 𑀈𑀆𑀤𑀻𑀲𑀽𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀯𑀩𑁄𑀥𑁂 𑀏𑀢𑀺𑀲𑁆𑀲 𑀡𑀺𑀲𑁂𑀲𑀼 𑀘 𑀈𑀆𑀤𑀻𑀲𑀼 𑀘, 𑀅𑀚𑁆𑀛𑁂𑀦𑁂 𑀏𑀢𑀺𑀲𑁆𑀲 𑀧𑀭𑁄𑀓𑁆𑀔𑀸𑀲𑀼 𑀘 𑀡𑀺𑀲𑁂𑀲𑀼 𑀘 𑀈𑀆𑀤𑀻𑀲𑀼𑀘𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀩𑁆𑀩𑀢𑁆𑀣 𑀦𑀧𑁆𑀧𑀬𑁄𑀕𑁄𑀢𑀺 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀩𑀳𑀼𑀮𑀁𑀯𑀺𑀥𑀸𑀦𑀢𑁄 𑀜𑀸𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. 𑀬𑀓𑁆𑀯𑀺𑀓𑀭𑀡𑁂𑀦 𑀦𑀺𑀤𑁆𑀤𑁂𑀲𑀸 ‘𑀅𑀲-𑀓𑁆𑀔𑁂𑀧𑀦𑁂𑀢𑀻 𑀫𑀲𑁆𑀲𑀸’𑀢𑀺 𑀯𑀼𑀢𑁆𑀢𑀁, 𑀢𑀤𑀸𑀳- ‘𑀅𑀲𑀲𑁆𑀲𑀸’𑀢𑀺𑀆𑀤𑀺.

𑀲𑁆𑀲𑀸𑀢𑀺 𑀚𑀸𑀢𑀺𑀦𑀺𑀤𑁆𑀤𑁂𑀲𑁄𑀢𑀺 𑀆𑀳- ‘𑀲𑁆𑀲𑀇𑀢𑀺’𑀘𑁆𑀘𑀸𑀤𑀺.

𑀧𑀼𑀩𑁆𑀩𑀲𑀭𑀮𑁄𑀧𑁂 𑀭𑀽𑀧𑀲𑁆𑀲 𑀲𑀫𑀸𑀦𑀢𑁆𑀢𑀸 𑀅𑀦𑁆𑀢𑀺𑀦𑀸 𑀅𑀦𑁆𑀢𑀼 𑀘 𑀕𑀳𑀺𑀢𑁄𑀢𑀺 ‘𑀲𑀦𑁆𑀢𑀺 𑀲𑀦𑁆𑀢𑀽’𑀢𑀺 𑀉𑀤𑀸𑀳𑀭𑀡𑀤𑁆𑀯𑀬𑀁 𑀤𑀲𑁆𑀲𑀺𑀢𑀁.

𑀢𑁂 𑀘 𑀧𑀸𑀤𑀬𑁄 𑀚𑁄𑀢𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑁆𑀯𑀬𑀩𑁆𑀬𑀢𑀺𑀭𑁂𑀓𑁂𑀳𑀺 𑀓𑀺𑀭𑀺𑀬𑀸 𑀬𑀤𑀺𑀧𑀺 𑀥𑀸𑀢𑀼𑀦𑀸𑀯 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀁 𑀯𑀺𑀲𑀺𑀝𑁆𑀞𑀸 𑀓𑀺𑀭𑀺𑀬𑁂 𑀘𑁆𑀘𑀸𑀳- ¶ ‘𑀲𑀸𑀫𑀜𑁆𑀜𑀪𑀽𑀢𑀸 𑀯𑀺𑀲𑀺𑀝𑁆𑀞𑀸 𑀯𑀸’𑀢𑀺. 𑀲𑁄 𑀯𑀺𑀲𑁂𑀲𑁄𑀢𑀺 𑀬𑁂𑀦 𑀯𑀺𑀲𑁂𑀲𑁂𑀦 𑀯𑀺𑀲𑀺𑀝𑁆𑀞𑀸 𑀓𑀺𑀭𑀺𑀬𑀸 𑀥𑀸𑀢𑀼𑀦𑀸𑀯 𑀯𑀼𑀘𑁆𑀘𑀢𑀺 𑀲𑁄 𑀯𑀺𑀲𑁂𑀲𑁄. 𑀯𑀸𑀘𑀓 𑀪𑁂𑀤𑀢𑁄𑀢𑀺 𑀲𑀸𑀫𑀜𑁆𑀜𑀸𑀬 𑀘 𑀓𑀺𑀭𑀺𑀬𑀸𑀬 𑀯𑀺𑀲𑀺𑀝𑁆𑀞𑀸𑀬 𑀘 𑀯𑀸𑀘𑀓𑀸𑀦𑀁 𑀥𑀸𑀢𑀽𑀦𑀁 𑀪𑁂𑀤𑀢𑁄 𑀢𑁂𑀦𑀸𑀧𑀻𑀢𑀺 𑀓𑀘𑁆𑀘𑀸𑀦𑁂𑀦𑀸𑀧𑀺. 𑀲𑀡𑁆𑀞𑀸𑀦𑀁 𑀲𑀡𑁆𑀞𑀺𑀢𑀺.

𑀓𑀺𑀝𑁆𑀞𑀫𑀤𑀢𑀻𑀢𑀺 𑀓𑀺𑀝𑁆𑀞𑀸𑀤𑁄, 𑀓𑀺𑀝𑁆𑀞𑀲𑀤𑁆𑀤𑁂𑀦𑀼𑀧𑀘𑀸𑀭𑀢𑁄 𑀓𑀲𑀺𑀢𑀝𑁆𑀞𑀸𑀦𑁂 𑀉𑀝𑁆𑀞𑀺𑀢 𑀲𑀲𑁆𑀲𑀁 𑀯𑀼𑀘𑁆𑀘𑀢𑀺.

𑀞𑀲𑁆𑀲𑀸𑀪𑀸𑀯𑀢𑁆𑀢𑀁 𑀦𑀺𑀧𑁆𑀧𑀘𑁆𑀘𑀦𑁆𑀢𑁂𑀢𑀺 𑀅𑀚𑁆𑀛𑀸𑀳𑀸𑀭𑁄.

𑀅𑀦𑀼𑀲𑀸𑀲𑀻𑀬𑀺𑀢𑁆𑀣𑀸𑀢𑀺 𑀅𑀦𑀼𑀲𑀺𑀝𑁆𑀞𑁄 𑀓𑀫𑁆𑀫𑁂 𑀓𑁆𑀢𑁄 ‘‘𑀲𑀸 𑀲𑀲𑁆𑀲 𑀲𑀺𑀲𑁆𑀯𑀸’’ (𑁫-𑁧𑁧𑁭) 𑀲𑀸𑀲𑀦𑀸𑀬 𑀲𑀸𑀲𑀺𑀢𑀼𑀁.

𑀅𑀣 𑀩𑀳𑀲𑁆𑀲𑀸𑀢𑀺 𑀠𑀸𑀤𑁂𑀲𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀻 𑀓𑀲𑁆𑀫𑀸 𑀦 𑀯𑀺𑀜𑁆𑀜𑀸𑀬𑀢𑁂𑀢𑀺 𑀆𑀳- ‘𑀩𑀳𑀲𑁆𑀲𑀸’𑀢𑀺𑀆𑀤𑀺. 𑀠𑀬𑁄𑀕𑀧𑀚𑁆𑀚𑁂𑀦𑀸𑀢𑀺 𑀠𑀓𑀸𑀭𑁂𑀦 𑀲𑀳 𑀬𑁄𑀕𑀧𑀚𑁆𑀚𑁂𑀦 𑀏𑀓𑀻𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄.

𑀴𑁄𑀘𑀸𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺 𑀏𑀯𑀁 𑀫𑀜𑁆𑀜𑀢𑁂 ‘‘𑀬𑀤𑀸𑀬𑀁 𑀧𑀘𑁆𑀘𑀬𑀸𑀤𑁂𑀲𑁄 𑀲𑀺𑀬𑀸 𑀢𑀤𑀸 𑀏𑀢𑁂 𑀲𑀫𑀸𑀲𑁂𑀦𑁂-𑀓𑀢𑁄 𑀦𑀺𑀤𑁆𑀤𑀺𑀲𑁂𑀬𑁆𑀬𑀸’’𑀢𑀺, 𑀢𑁂𑀦𑀸𑀳- ‘𑀳𑀴𑀸𑀢𑀺 𑀯𑀤𑁂𑀬𑁆𑀬𑀸’𑀢𑀺.

𑀫𑀼𑀤𑁆𑀥𑁄𑀢𑀺 ‘‘𑀥𑁄 𑀳𑁂𑀢𑁂𑀳𑀻’’𑀢𑀺 (𑁫-𑁧𑁪𑁫) 𑀢𑀲𑁆𑀲 𑀥𑁄.

𑀇𑀫𑀲𑁆𑀲𑀸𑀢𑀺 ‘𑀧𑀻-𑀢𑀧𑁆𑀧𑀦𑁂’𑀢𑀻𑀫𑀲𑁆𑀲, 𑀇𑀳𑀸𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂. 𑀧𑀺𑀦𑀬𑀻𑀢𑀺 𑀣𑀽𑀮𑁄 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄 𑀲𑀽𑀬𑀻𑀢𑀺 𑀇𑀢𑀺𑀲𑀤𑁆𑀤𑁄 𑀆𑀤𑁆𑀬𑀢𑁆𑀣𑁄, 𑀢𑁂𑀦 𑀅𑀤𑀻𑀬𑀺 𑀅𑀟𑀻𑀬𑀺 𑀅𑀮𑀻𑀬𑀺 𑀅𑀮𑀽𑀬𑀻𑀢𑀺𑀫𑁂 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀬𑀸𑀯 𑀓𑁆𑀢𑀺𑀕𑁆𑀕𑀳𑀡𑀸𑀢𑀺 ‘‘𑀮𑁄𑀧𑁄 𑀯𑀟𑁆𑀠𑀸𑀓𑁆𑀢𑀺𑀲𑁆𑀲𑀸’’𑀢𑀺 (𑁫-𑁧𑁫𑁮) 𑀓𑁆𑀢𑀺𑀯𑀘𑀦𑀸𑀯𑀥𑀺.

𑀅𑀤𑀻𑀬𑀺𑀢𑁆𑀣𑀸𑀢𑀺 ¶ 𑀤𑀺𑀦𑁆𑀦𑁄, 𑀅𑀤𑀤𑀻𑀢𑀺 𑀤𑀺𑀦𑁆𑀦𑀯𑀸.

𑀅𑀓𑀺𑀭𑀻, 𑀅𑀓𑀺𑀭𑀻𑀬𑀺𑀢𑁆𑀣𑀸𑀢𑀺 𑀯𑀸 𑀓𑀺𑀡𑁆𑀡𑁄, 𑀅𑀓𑀺𑀭𑀻𑀢𑀺 𑀓𑀺𑀡𑁆𑀡𑀯𑀸. 𑀅𑀧𑀼𑀭𑀻 𑀧𑀼𑀭𑀻𑀬𑀺𑀢𑁆𑀣𑀸𑀢𑀺 𑀧𑀼𑀡𑁆𑀡𑁄, 𑀅𑀧𑀼𑀭𑀻𑀢𑀺 𑀧𑀼𑀡𑁆𑀡𑀯𑀸. 𑀅𑀔𑀺𑀬𑀻𑀢𑀺 𑀔𑀻𑀡𑁄 𑀔𑀻𑀡𑀯𑀸.

𑀅𑀢𑀭𑀻, 𑀅𑀚𑀻𑀭𑀻𑀢𑀺 𑀓𑀫𑁂𑀦 𑀯𑀺𑀕𑁆𑀕𑀳𑁄. 𑀘𑀻𑀬𑀺𑀢𑁆𑀣𑀸𑀢𑀺 𑀘𑀺𑀡𑁆𑀡𑁄, 𑀘𑀺𑀦𑀻𑀢𑀺 𑀘𑀺𑀡𑁆𑀡𑀯𑀸.

𑀅𑀲𑀓𑁆𑀔𑀻𑀢𑀺 𑀲𑀢𑁆𑀢𑁄 𑀲𑀢𑁆𑀢𑀯𑀸. ‘𑀲𑀚=𑀲𑀗𑁆𑀕𑁂’𑀢𑀻 𑀫𑀲𑁆𑀲𑀸𑀧𑀺 𑀲𑀢𑁆𑀢𑁄 𑀲𑀢𑁆𑀢𑀯𑀸𑀢𑀺 𑀳𑁄𑀢𑀺.

𑀕𑀳𑁂𑀢𑁆𑀯𑀸 ‘𑀕𑀳-𑀉𑀧𑀸𑀤𑀸𑀦𑁂’𑀕𑀳𑀡𑀁 𑀓𑀢𑁆𑀯𑀸 𑀕𑀳𑁂𑀢𑁆𑀯𑀸.

𑀑𑀲𑁆𑀲𑀝𑁆𑀞𑀸𑀦𑀼𑀩𑀦𑁆𑀥𑀲𑁆𑀲𑀸𑀢𑀺 𑀧𑀭𑀺𑀘𑁆𑀘𑀢𑁆𑀢𑀸𑀦𑀼𑀩𑀦𑁆𑀥𑀲𑁆𑀲. 𑀬𑀓𑀸𑀭𑀫𑀢𑁆𑀢𑀲𑁆𑀲 𑀦𑀺𑀯𑀢𑁆𑀢𑀦𑀢𑁆𑀣𑁄𑀢𑀺 𑀯𑀺𑀲𑁂𑀲𑀦𑀢𑁆𑀣𑁄𑀢𑀻𑀫𑀲𑁆𑀲 𑀅𑀥𑀺𑀧𑁆𑀧𑀸𑀬𑀢𑁆𑀣𑀫𑀸𑀳. 𑀢𑀣𑀸𑀳𑀺 𑀯𑀺𑀲𑁂𑀲𑀦𑀁 𑀓𑁂𑀯𑀮𑀬𑀓𑀸𑀭𑀢𑁄 𑀯𑀺𑀲𑀼𑀁 𑀓𑀭𑀡𑀁 𑀅𑀢𑁆𑀣𑁄 𑀬𑀲𑁆𑀲𑀸𑀢𑀺 𑀅𑀜𑁆𑀜 𑀧𑀤𑀢𑁆𑀣𑁂 𑀲𑀢𑀺 𑀓𑁂𑀯𑀮𑀬𑀓𑀸𑀭𑀲𑁆𑀲 𑀦𑀺𑀯𑀢𑁆𑀢𑀦𑀁 𑀯𑀺𑀜𑁆𑀜𑀸𑀬𑀢𑁂. 𑀬𑀓𑀸𑀭𑀫𑀢𑁆𑀢𑁂 𑀕𑀳𑀺𑀢𑁂 𑀓𑁄 𑀤𑁄𑀲𑁄𑀢𑀺 𑀆𑀳- ‘𑀬𑁄 𑀯𑀸 𑀢𑁆𑀯𑀸𑀲𑁆𑀲 𑀲𑀫𑀸𑀲𑁂𑀢𑀺𑀳𑀻’𑀢𑀺𑀆𑀤𑀺. 𑀧𑀢𑁆𑀯𑀸𑀢𑀺 ‘𑀧𑀢 𑀧𑀣=𑀕𑀫𑀦𑁂, 𑀧𑀤=𑀕𑀫𑀦𑁂’𑀇𑀘𑁆𑀘𑀲𑁆𑀲 𑀯𑀸.

𑀦𑀸𑀧𑁆𑀧𑀓𑁆𑀓𑁂𑀢𑀺 ¶ 𑀦 𑀅𑀧𑁆𑀧𑀢𑁆𑀢𑁂 𑀧𑀢𑁆𑀢𑁂𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀜𑀸𑀧𑀓𑀸𑀮𑁄𑀧𑁄𑀢𑀺 ‘‘𑀢𑀺𑀢𑀸𑀮𑀻𑀲𑀸’’𑀢𑀺 (𑁧-𑁧) 𑀜𑀸𑀧𑀓𑀢𑁄𑀬𑁂𑀯 𑀓𑁆𑀢𑁆𑀯𑀸𑀧𑁆𑀧𑀘𑁆𑀘𑀬𑀲𑁆𑀲 𑀬𑁄 𑀯𑀓𑀸𑀭𑁄 𑀢𑀲𑁆𑀲 𑀮𑁄𑀧𑁄𑀢𑀺 𑀅𑀢𑁆𑀣𑁄.

𑀦𑀦𑀼 𑀦𑀲𑁆𑀲𑀸𑀢𑀺 𑀯𑀼𑀢𑁆𑀢𑁂 𑀧𑀘𑁆𑀘𑀬𑀦𑀓𑀸𑀭𑀲𑁆𑀲𑀸𑀢𑀺 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳- ‘𑀦𑀲𑁆𑀲𑀸’𑀢𑀺𑀆𑀤𑀺,𑀦𑁆𑀢𑀫𑀸𑀦𑀢𑁆𑀬𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀦𑀲𑁆𑀲 ‘‘𑀦𑀦𑁆𑀢𑀫𑀸𑀦𑀢𑁆𑀬𑀸𑀤𑀻𑀦’’𑀦𑁆𑀢𑀺 (𑁫-𑁧𑁭𑁨) 𑀡𑀢𑁆𑀢𑀧𑀝𑀺𑀲𑁂𑀥𑀸 𑀯𑀺𑀜𑁆𑀜𑀸𑀬𑀢𑀺 𑀧𑀓𑀭𑀡𑀢𑁄𑀢𑀺 [𑀧𑀓𑀸𑀭𑁄𑀢𑀺 (𑀧𑁄𑀢𑁆𑀣𑀓𑁂)] 𑀆𑀳- ‘𑀧𑀘𑁆𑀘𑀬𑀦𑀓𑀸𑀭𑁄𑀯𑀸’𑀢𑀺.

𑀇𑀘𑁆𑀙𑀻𑀬𑀢𑁂𑀢𑀺 𑀇𑀘𑁆𑀙𑀺𑀢𑀩𑁆𑀩𑀁. 𑀏𑀲𑀦𑀁 𑀇𑀘𑁆𑀙𑀸. 𑀇𑀘𑁆𑀙𑀻𑀬𑀺𑀢𑁆𑀣𑀸𑀢𑀺 𑀇𑀘𑁆𑀙𑀺𑀢𑀁, 𑀆𑀲𑀦𑀫𑀸𑀲𑀺𑀢𑀩𑁆𑀩𑀁. 𑀆𑀲𑀦𑀸𑀬 𑀅𑀘𑁆𑀙𑀺𑀢𑀼𑀁. ‘‘𑀩𑁆𑀬𑀜𑁆𑀚𑀦𑁂 𑀤𑀻𑀖𑀭𑀲𑁆𑀲𑀸’’𑀢𑀺 (𑁧-𑁩𑁩) 𑀭𑀲𑁆𑀲𑁄.

𑀅𑀫𑀸𑀦𑀧𑀭𑀘𑁆𑀙𑀓𑁆𑀓𑀢𑁆𑀢𑁂 𑀓𑀼𑀭𑀼𑀆𑀤𑁂𑀲𑁂𑀦 𑀦𑁄𑀤𑀸𑀳𑀝𑀁. 𑀓𑀭𑀸𑀦𑁄𑀢𑀺 ‘‘𑀫𑀸𑀦𑀲𑁆𑀲𑀫𑀲𑁆𑀲𑀸’’𑀢𑀺 (𑁫-𑁧𑁬) 𑀫𑀮𑁄𑀧𑁄. 𑀓𑀲𑁆𑀫𑀸 𑀦𑁆𑀢𑀧𑀼𑀩𑁆𑀩𑀙𑀓𑁆𑀓𑁂𑀲𑀼 𑀓𑀼𑀭𑀼 𑀆𑀤𑁂𑀲𑁂𑀦 𑀦𑁄𑀤𑀸𑀳𑀝𑀦𑁆𑀢𑀺 𑀆𑀳- ‘𑀯𑀯𑀢𑁆𑀣𑀺𑀢𑁂’𑀘𑁆𑀘𑀸𑀤𑀺.

𑀦𑀺𑀕𑁆𑀕𑀳𑀻𑀢𑀲𑁆𑀲𑀸𑀢𑀺 ‘‘𑀫𑀜𑁆𑀘𑀭𑀼𑀥𑀸𑀤𑀻𑀦’’𑀦𑁆𑀢𑀺 (𑁫-𑁧𑁯) 𑀓𑀢𑀦𑀺𑀕𑁆𑀕𑀳𑀻𑀢𑀲𑁆𑀲. 𑀕𑀳𑀡𑀻𑀬𑀁 𑀕𑀡𑁆𑀳𑀺𑀢𑀩𑁆𑀩𑀁.

𑀇𑀢𑀺 𑀫𑁄𑀕𑁆𑀕𑀮𑁆𑀮𑀸𑀦𑀧𑀜𑁆𑀘𑀺𑀓𑀸𑀝𑀻𑀓𑀸𑀬𑀁 𑀲𑀸𑀭𑀢𑁆𑀣𑀯𑀺𑀮𑀸𑀲𑀺𑀦𑀺𑀬𑀁

𑀧𑀜𑁆𑀘𑀫𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀤𑀢𑁆𑀣𑀲𑁆𑀲𑁂𑀯𑀸𑀢𑀺 𑀢𑀲𑁆𑀲 𑀓𑁆𑀭𑀺𑀬𑀢𑁆𑀣𑀲𑁆𑀲. 𑀬𑁄 𑀓𑀺𑀭𑀺𑀬𑀸𑀲𑀗𑁆𑀔𑀸𑀢𑁄 𑀅𑀢𑁆𑀢𑁄 𑀢𑀲𑁆𑀲𑁂𑀯. 𑀏𑀢𑁂𑀦 𑀆𑀥𑀸𑀭𑀫𑁂𑀢𑀁 𑀓𑁆𑀭𑀺𑀬𑀢𑁆𑀣𑀲𑁆𑀲𑀸𑀢𑀺 𑀜𑀸𑀧𑁂𑀢𑀺. 𑀦𑀳𑀺𑀘𑁆𑀘𑀸𑀤𑀺𑀦𑀸 𑀢𑀤𑀢𑁆𑀣𑀲𑁆𑀲𑁂𑀯 𑀯𑀺𑀲𑁂𑀲𑀦𑁂 𑀓𑀸𑀭𑀡𑀫𑀸𑀳. 𑀲𑀼𑀢𑁆𑀢𑀁𑀯𑀺𑀦𑀸𑀢𑀺𑀧𑀭𑁂𑀲𑀁𑀯𑀺𑀬 ¶ 𑀲𑀼𑀢𑁆𑀢𑀁 𑀯𑀺𑀦𑀸. 𑀢𑀸𑀧𑀺 𑀯𑀢𑁆𑀢𑀫𑀸𑀦𑁂𑀬𑁂𑀯 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀇𑀫𑀺𑀦𑀸 𑀯𑀢𑁆𑀢𑀼𑀫𑀺𑀝𑁆𑀞𑀢𑁆𑀢𑀸𑀢𑀺 𑀏𑀢𑁆𑀣 𑀲𑁂𑀲𑀯𑀘𑀦𑀫𑀯𑀩𑁄𑀥𑁂𑀢𑀺. 𑀏𑀯𑀓𑀸𑀭𑁂𑀦𑀸 (𑀢𑀺 𑀯𑀢𑁆𑀢𑀫𑀸𑀦𑀲𑁆𑀲𑁂𑀯𑀸𑀢𑀺 𑀏𑀢𑁆𑀣 𑀏𑀯𑀲𑀤𑁆𑀤𑁂𑀦.) 𑀢𑀩𑁆𑀩𑀺𑀯𑀘𑁆𑀙𑀸𑀢𑀺 𑀯𑀢𑁆𑀢𑀫𑀸𑀦𑀯𑀘𑀦𑀺𑀘𑁆𑀙𑀸.

𑀢𑀁𑀲𑀫𑀻𑀧𑀲𑁆𑀲𑀸𑀢𑀺 𑀏𑀢𑁆𑀣 𑀢𑀲𑀤𑁆𑀤𑁂𑀦 𑀫𑀳𑀸𑀓𑀲𑁆𑀲𑀧𑀲𑁆𑀲 𑀲𑀼𑀪𑀤𑁆𑀤𑀯𑀘𑀦𑀸𑀦𑀼𑀲𑁆𑀲𑀭𑀡𑀲𑀗𑁆𑀔𑀸𑀢𑁄 𑀫𑀭𑀡𑀧𑁆𑀧𑀢𑁆𑀢𑀺𑀳𑁂𑀢𑀼 𑀤𑀼𑀓𑁆𑀔𑀸𑀦𑀼𑀪𑀯𑀲𑀗𑁆𑀔𑀸𑀢𑁄 𑀘 𑀓𑀺𑀭𑀺𑀬𑀸𑀯𑀺𑀲𑁂𑀲𑁄 𑀧𑀭𑀺𑀕𑁆𑀕𑀳𑀺𑀢𑁄, 𑀢𑁂 𑀯𑀸 𑀯𑀢𑁆𑀢𑀫𑀸𑀦𑀓𑀺𑀭𑀺𑀬𑀸𑀯𑀺𑀲𑁂𑀲𑀸𑀢𑀺 𑀢𑁂𑀲𑀫𑀼𑀪𑀺𑀦𑁆𑀦𑀫𑀸𑀲𑀦𑁆𑀦𑀸𑀦𑀺 𑀓𑀫𑁂𑀦 𑀅𑀥𑀫𑁆𑀫𑀤𑀻𑀧𑀦𑀫𑀭𑀡𑀸𑀦𑀺, 𑀢𑁂𑀦𑀸𑀳-𑀤𑀻𑀧𑀦 𑀫𑀭𑀡𑀸𑀦𑀫𑀸𑀲𑀦𑁆𑀦𑀢𑁆𑀢𑀸’𑀢𑀺. 𑀏𑀯𑀁 𑀫𑀜𑁆𑀜𑀢𑁂 ‘‘𑀢𑀓𑁆𑀓𑀸𑀮𑀯𑀢𑁆𑀢𑀫𑀸𑀦𑀓𑀺𑀭𑀺𑀬𑀸𑀯𑀺𑀲𑁂𑀲𑀲𑁆𑀲 𑀤𑀻𑀧𑀦𑀫𑀭𑀡𑀲𑀗𑁆𑀔𑀸𑀢𑀁 𑀢𑀁𑀲𑀫𑀻𑀧𑀢𑀸𑀯𑀺𑀧𑀺 𑀓𑀺𑀭𑀺𑀬𑀦𑁆𑀢𑀭𑀁 𑀯𑀢𑁆𑀢𑀫𑀸𑀦𑀕𑁆𑀕𑀳𑀡𑁂𑀦 𑀢𑀁𑀲𑀸𑀫𑀻𑀧𑁆𑀬𑀁 𑀕𑀬𑁆𑀳𑀢𑀺, 𑀬𑀣𑀸 (𑀕𑀗𑁆𑀕𑀸𑀲𑀫𑀻𑀧𑁄) 𑀤𑁂𑀲𑁄 𑀕𑀗𑁆𑀕𑀸𑀢𑀺 𑀯𑀼𑀘𑁆𑀘𑀢𑀺 𑀢𑀢𑁄 ‘𑀕𑀗𑁆𑀕𑀸𑀬𑀁 𑀕𑀸𑀯𑁄’𑀢𑀺 𑀲𑀺𑀬𑀸’’𑀢𑀺. 𑀧𑀼𑀭𑁂 𑀇𑀘𑁆𑀘𑀸𑀤𑀺𑀦𑀸 𑀧𑀓𑁆𑀔𑀦𑁆𑀢𑀭𑀁 𑀯𑀺𑀭𑀘𑀺𑀢𑀁 𑀯𑀼𑀢𑁆𑀢𑀺𑀓𑀸𑀭𑁂𑀦, 𑀢𑀤𑀼𑀧𑀤𑀲𑁆𑀲𑁂𑀢𑀼𑀁 𑀫𑀼𑀔𑀬𑀢𑀺 ‘𑀲𑀪𑀸𑀯𑀢𑁄’ 𑀇𑀘𑁆𑀘𑀸𑀤𑀺.

𑀓𑀺𑀭𑀺𑀬𑀸𑀓𑀸𑀮𑁄𑀢𑀺 𑀯𑀢𑁆𑀢𑀫𑀸𑀦𑀓𑀺𑀭𑀺𑀬𑀸𑀓𑀸𑀮𑁄. 𑀅𑀯𑀲𑀺𑀲𑁆𑀲𑀢𑀻𑀢𑀺 𑀧𑀼𑀭𑁂𑀧𑀼𑀭𑀸𑀲𑀤𑁆𑀤𑁂𑀳𑀺 𑀤𑀻𑀧𑀺𑀢𑀅𑀦𑀸𑀕𑀢𑀓𑀸𑀮𑀢𑁄 𑀅𑀯𑀲𑀺𑀲𑁆𑀲𑀢𑀺. 𑀓𑀺𑀭𑀺𑀬𑀸 𑀓𑀸𑀮𑁂𑀢𑀺 𑀤𑀻𑀧𑀦𑀫𑀭𑀡𑀓𑀺𑀭𑀺𑀬𑀸𑀓𑀸𑀮𑁂. 𑀢𑀲𑁆𑀲𑀸𑀢𑀺 𑀤𑀻𑀧𑀦𑀫𑀭𑀡𑀲𑁆𑀲. 𑀯𑀢𑁆𑀢𑀫𑀸𑀦𑀢𑁆𑀢𑀸𑀢𑀺 𑀏𑀢𑁆𑀣 𑀯𑀢𑁆𑀢𑀫𑀸𑀦𑁂𑀬𑁂𑀯 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀲𑁂𑀲𑁄. 𑀅𑀦𑁂𑀦𑀸𑀢𑀺 𑀧𑀼𑀭𑁂𑀘𑁆𑀘𑀸𑀤𑀺𑀯𑀼𑀢𑁆𑀢𑀺𑀯𑀘𑀦𑁂𑀦. 𑀧𑀼𑀭𑁂𑀧𑀼𑀭𑀸𑀲𑀤𑁆𑀤𑁂𑀳𑀺 𑀅𑀦𑀸𑀕𑀢𑀓𑀸𑀮𑀸𑀯𑀕𑀫𑁂 𑀲𑀢𑀺 𑀤𑀺𑀧𑁆𑀧𑀢𑀺 𑀫𑀭𑀢𑀻𑀢𑀺 𑀏𑀢𑁆𑀣 𑀤𑀻𑀧𑀦𑀫𑀭𑀡𑀓𑀺𑀭𑀺𑀬𑀸𑀓𑀸𑀮𑁄 𑀫𑀼𑀔𑁆𑀬𑁂 𑀢𑀤𑀸 𑀯𑀢𑁆𑀢𑀢𑀻𑀢𑀺𑀆𑀳- ‘𑀫𑀼𑀔𑁆𑀬𑀁 𑀯𑀢𑁆𑀢𑀫𑀸𑀦𑀢𑁆𑀢𑀫𑀸𑀳𑁂’𑀢𑀺. 𑀧𑀼𑀦 𑀧𑀓𑁆𑀔𑀦𑁆𑀢𑀭𑀫𑀼𑀧𑀦𑀻𑀢𑀁 𑀓𑀸𑀮𑁂𑀘𑁆𑀘𑀸𑀤𑀺𑀦𑀸 𑀯𑀼𑀢𑁆𑀢𑀺𑀓𑀸𑀭𑁂𑀦, 𑀢𑀫𑀼𑀧𑀤𑀲𑁆𑀲𑁂𑀢𑀼𑀁 𑀫𑀼𑀔𑀫𑀸𑀯𑀢𑁆𑀢𑀬𑀢𑀺 ‘𑀅𑀦𑀸𑀕𑀢𑁂’𑀘𑁆𑀘𑀸𑀤𑀺.

𑀯𑀼𑀢𑁆𑀢𑀺𑀬𑀁 𑀓𑀸𑀮𑀩𑁆𑀬𑀢𑁆𑀢𑀬𑁄𑀢𑀺 𑀓𑀸𑀮𑀸𑀢𑀺𑀯𑀢𑁆𑀢𑀦𑀁, 𑀯𑀢𑁆𑀢𑀫𑀸𑀦𑀓𑀸𑀮𑀸𑀢𑀺𑀓𑁆𑀓𑀫𑁂𑀦 𑀅𑀦𑀸𑀕𑀢𑀓𑀸𑀮𑁂𑀧𑀺 𑀩𑀸𑀳𑀼𑀮𑀓𑀸𑀢𑁆𑀬𑀸𑀤𑀬𑁄 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀤𑁂𑀯 𑀲𑀫𑀢𑁆𑀣𑁂𑀢𑀺 ‘𑀪𑀯𑀦𑁆𑀢𑁂𑀯’𑀇𑀘𑁆𑀘𑀸𑀤𑀺𑀦𑀸. 𑀢𑁆𑀬𑀸𑀤𑀬𑁄𑀢𑀻𑀫𑀺𑀦𑀸 𑀲𑀩𑁆𑀩𑁂𑀲𑀁 𑀆𑀔𑁆𑀬𑀸𑀢𑀺𑀓𑀸𑀦𑀁 𑀕𑀳𑀡𑀁. 𑀮𑀲𑁆𑀲 𑀤𑀻𑀖𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀘𑁆𑀙𑀢𑀻𑀢𑀺 𑀲𑀓𑁆𑀓𑀲𑁆𑀲 𑀲𑀳𑀪𑀸𑀯𑀁 𑀕𑀫𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑀧𑀝𑀺𑀚𑀸𑀦𑀺𑀲𑁆𑀲𑀦𑁆𑀢𑀻𑀢𑀺 𑀯𑀢𑁆𑀢𑀫𑀸𑀦𑁂 𑀅𑀦𑀸𑀕𑀢𑀯𑀘𑀦𑀁, 𑀧𑀝𑀺𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀭𑀫𑁆𑀧𑀦 𑀪𑀽𑀢𑁂 𑀪𑀯𑀺𑀲𑁆𑀲𑀢𑀻𑀢𑀺 𑀆𑀲𑀺, 𑀓𑀭𑀺𑀲𑁆𑀲𑀢𑀻𑀢𑀺 𑀅𑀓𑀭𑀺, 𑀘𑁂𑀢𑁂 𑀲𑁆𑀲𑀲𑀻𑀢𑀺 ¶ 𑀘𑁂𑀢𑀺𑀢𑀸 𑀅𑀲𑀺, 𑀪𑀼𑀜𑁆𑀚𑀺𑀲𑁆𑀲𑀲𑀻𑀢𑀺 𑀪𑀼𑀜𑁆𑀚𑀺𑀢𑀸 𑀅𑀲𑀺. 𑀅𑀦𑁄𑀓𑀧𑁆𑀧𑀦𑀸 𑀅𑀲𑁆𑀲𑀤𑁆𑀥𑀸. 𑀅𑀫𑀭𑀺𑀲𑀦𑀁 𑀅𑀓𑁆𑀔𑀫𑀸. 𑀇𑀫𑀺𑀦𑀸𑀯𑀸𑀢𑀺 𑀅𑀢𑁆𑀣𑀺𑀯𑀘𑀦𑁂 𑀉𑀧𑀧𑀤𑁂 𑀓𑁄𑀥𑀸 𑀲𑀤𑁆𑀥𑀸𑀲𑀼 𑀕𑀫𑁆𑀫𑀫𑀸𑀦𑁂𑀲𑁆𑀯-𑀲𑀢𑀻𑀧𑀺 𑀯𑀘𑀦𑀦𑁆𑀢𑀭𑁂 𑀇𑀫𑀺𑀦𑀸𑀯 𑀲𑀸𑀫𑀜𑁆𑀜𑀯𑀘𑀦𑁂𑀦 𑀲𑀺𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀕𑀭𑀳𑀸𑀯𑀫𑀸𑀢𑀺 𑀢𑀲𑁆𑀲 𑀳𑁂𑀢𑀼𑀯𑀘𑀦𑀁. 𑀢𑀣𑀸𑀳𑀺𑀘𑁆𑀘𑀸𑀤𑀺𑀦𑀸 𑀕𑀭𑀳𑀸𑀯𑀕𑀫𑀫𑁂𑀯 𑀲𑀫𑀢𑁆𑀣𑁂𑀢𑀺. 𑀅𑀢𑁆𑀣𑀺𑀦𑀸𑀫 𑀈𑀤𑀺𑀲𑀦𑁆𑀢𑀺 [𑀅𑀢𑁆𑀣𑀺𑀦𑀸𑀫𑀸𑀢𑀺 (𑀧𑁄𑀢𑁆𑀣𑀓𑁂)] 𑀆𑀪𑀺𑀤𑁄𑀲𑀺𑀓𑀲𑁆𑀲 𑀓𑀼𑀫𑁆𑀫𑀸𑀲𑀲𑁆𑀲 𑀧𑀭𑀺𑀪𑀼𑀜𑁆𑀚𑀦𑀁 𑀯𑀺𑀚𑁆𑀚𑀢𑁂 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀢𑀁 𑀅𑀲𑀤𑁆𑀤𑀳𑀦𑁆𑀢𑁄 𑀅𑀫𑀭𑀺𑀲𑀦𑁆𑀢𑁄 𑀏𑀯𑀁 𑀯𑀤𑀢𑀺. 𑀦𑀢𑁆𑀣𑀻𑀢𑀺 𑀫𑀜𑁆𑀜𑁂𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑁂𑀦𑀸𑀳- ‘𑀧𑀘𑁆𑀘𑀓𑁆𑀔𑀫𑀧𑀻’𑀢𑀺 [𑀈𑀤𑀺𑀲𑀫𑁆𑀧𑀻𑀢𑀺] 𑀆𑀤𑀺. 𑀬𑁄𑀧𑀻𑀢𑀺 𑀲𑀤𑁆𑀤𑀲𑁆𑀲 𑀲𑁄𑀧𑀻𑀢𑀺 𑀢𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀣𑀻𑀢𑀺 𑀯𑀺𑀚𑁆𑀚𑀫𑀸𑀦𑀢𑁆𑀣𑁂𑀢𑀺 𑀯𑀼𑀢𑁆𑀢𑀯𑀺𑀚𑁆𑀚𑀫𑀸𑀦𑀢𑁆𑀣𑁄 𑀯𑀓𑁆𑀔𑀫𑀸𑀦𑀧𑀓𑁆𑀔𑀢𑁆𑀢𑀬𑁂𑀧𑀺 𑀤𑀝𑁆𑀞𑀩𑁆𑀩𑁄.

𑀦𑀦𑀼 𑀅𑀢𑁆𑀣𑀺𑀦𑀸𑀫 𑀢𑀸𑀢𑀸𑀢𑀺 𑀏𑀢𑁆𑀢𑀓𑁂 𑀯𑀼𑀢𑁆𑀢𑁂 𑀧𑀞𑀫𑁄 𑀅𑀢𑁆𑀣𑀺𑀦𑀼𑀔𑁄𑀘𑁆𑀘𑀸𑀤𑀺𑀓𑁄 𑀦𑀺𑀲𑀻𑀤𑀺𑀢𑁆𑀯𑀸𑀢𑀺 𑀲𑀤𑁆𑀤𑀧𑀭𑀺𑀬𑀦𑁆𑀢𑁄 𑀘, 𑀤𑀼𑀢𑀺𑀬𑁄 𑀅𑀢𑁆𑀣𑀺𑀦𑀼𑀔𑁄𑀘𑁆𑀘𑀸𑀤𑀺𑀓𑁄 𑀦𑀺𑀲𑀻𑀤𑀺𑀢𑁆𑀯𑀸𑀢𑀺 𑀲𑀤𑁆𑀤𑀧𑀭𑀺𑀬𑀦𑁆𑀢𑁄 𑀘 𑀢𑀢𑀺𑀬𑁄 𑀅𑀢𑁆𑀣𑀺𑀫𑀜𑁆𑀜𑁂𑀘𑁆𑀘𑀸𑀤𑀺𑀓𑁄 𑀚𑀺𑀕𑀼𑀘𑁆𑀙𑀦𑁂𑀬𑁆𑀬𑀦𑁆𑀢𑀺 𑀲𑀤𑁆𑀤𑀧𑀭𑀺𑀬𑀦𑁆𑀢𑁄 𑀘 𑀯𑀘𑀦𑀧𑁆𑀧𑀩𑀦𑁆𑀥𑁄 𑀓𑀣𑀁 𑀮𑀩𑁆𑀪𑀢𑀻𑀢𑀺 𑀫𑀦𑀲𑀺 𑀦𑀺𑀥𑀸𑀬𑀸𑀳- ‘𑀲𑁄𑀧𑀦𑀸’𑀢𑀺𑀆𑀤𑀺. 𑀇𑀫𑀺𑀦𑀸𑀢𑀺 ‘𑀅𑀢𑁆𑀣𑀺𑀬𑁂𑀯𑀺𑀳𑀸𑀧𑀺 𑀦𑀺𑀦𑁆𑀤𑀸𑀯𑀕𑀫𑁄’𑀢𑀺 𑀯𑀘𑀦𑁂𑀦. 𑀞𑀸𑀦𑀪𑁄𑀚𑀦𑁂 𑀕𑀭𑀳𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀼𑀢𑁆𑀢𑀁 𑀲𑀓𑁆𑀓𑀢𑀸𑀦𑀼𑀲𑀸𑀭𑁂𑀦. 𑀦𑀺𑀲𑁆𑀲𑀸𑀬𑀦𑀺𑀲𑁆𑀲𑀸𑀬𑀸𑀢𑀺 𑀬𑀢𑁆𑀣 𑀪𑀕𑀯𑀸 𑀦𑀺𑀲𑀺𑀦𑁆𑀦𑁄 𑀢𑀁 𑀞𑀸𑀦𑀁 𑀦𑀺𑀲𑁆𑀲𑀸𑀬 𑀦𑀺𑀲𑁆𑀲𑀸𑀬.

𑀓𑀺𑀭𑀺𑀬𑀸𑀭𑀽𑀧𑁂𑀢𑀺 𑀓𑀺𑀭𑀺𑀬𑀸𑀲𑀪𑀸𑀯𑁂, 𑀏𑀯𑀫𑀜𑁆𑀜𑀢𑁆𑀭𑀸𑀧𑀻𑀢𑀺 𑀅𑀕𑀫𑀺 𑀅𑀕𑀫𑀺𑀢𑁆𑀣𑀸𑀢𑀻𑀫𑁂𑀳𑀺 𑀅𑀜𑁆𑀜𑀢𑁆𑀭 𑀅𑀕𑀫𑀼𑀁 𑀇𑀘𑁆𑀘𑀸𑀤𑀺𑀓𑁂 𑀅𑀕𑀫𑁄𑀘𑁆𑀘𑀸𑀤𑀺𑀓𑁂 𑀘. 𑀅𑀦𑀼𑀤𑀭𑀸 𑀅𑀮𑁄𑀫𑀺𑀓𑀸𑀢𑀺 𑀲𑀦𑁆𑀢𑀫𑀧𑁆𑀬𑀼𑀤𑀭𑀸𑀤𑀺𑀓𑀁 𑀫𑀳𑀢𑁆𑀢𑀸𑀪𑀸𑀯𑀧𑀝𑀺𑀧𑀸𑀤𑀦𑀸𑀬 𑀩𑀳𑀼𑀢𑁆𑀢𑀸 𑀪𑀸𑀯𑀧𑀝𑀺𑀧𑀸𑀤𑀦𑀸𑀬 𑀘 𑀦 𑀯𑀢𑁆𑀢𑀼𑀫𑀺𑀘𑁆𑀙𑀻𑀬𑀢𑁂.

𑀅𑀜𑁆𑀜𑀧𑀤𑀢𑁆𑀣𑀯𑀼𑀢𑁆𑀢𑀺𑀬𑀸𑀢𑀺 𑀯𑀼𑀢𑁆𑀢𑀫𑀜𑁆𑀜𑀧𑀤𑀢𑁆𑀣𑀁 𑀤𑀲𑁆𑀲𑁂𑀢𑀺 ‘𑀯𑀓𑁆𑀔𑀫𑀸𑀦𑀮𑀓𑁆𑀔𑀡𑁄’𑀘𑁆𑀘𑀸𑀤𑀺𑀦𑀸. 𑀯𑀓𑁆𑀔𑀫𑀸𑀦𑀮𑀓𑁆𑀔𑀡𑁄𑀢𑀺𑀯𑀼𑀢𑁆𑀢𑀺𑀓𑀸𑀭𑁂𑀦 ‘‘𑀆𑀜𑀸𑀬𑁆𑀬𑀸’’𑀘𑁆𑀘𑀸𑀤𑀺𑀦𑀸 𑀯𑀓𑁆𑀔𑀫𑀸𑀦𑀮𑀓𑁆𑀔𑀡𑁄. 𑀅𑀦𑁆𑀢𑁄𑀓𑀢𑁆𑀯𑀸𑀢𑀺 𑀇𑀫𑀺𑀦𑀸 𑀆𑀲𑀤𑁆𑀤𑀲𑁆𑀲𑀸𑀪𑀺𑀯𑀺𑀥𑀺𑀫𑁆𑀳𑀺 𑀧𑀯𑀢𑁆𑀢𑀺𑀫𑀸𑀳. 𑀅𑀳𑀭𑀼𑀪𑀬𑀢𑀟𑁆𑀠𑀭𑀢𑁆𑀢𑀁 𑀯𑀸𑀢𑀺 𑀏𑀢𑁆𑀣 𑀯𑀸𑀲𑀤𑁆𑀤𑁄 𑀧𑀓𑁆𑀔𑀦𑁆𑀢𑀭𑁂. 𑀅𑀟𑁆𑀠𑀭𑀢𑁆𑀢𑀲𑀤𑁆𑀤𑁂𑀦 ¶ 𑀭𑀢𑁆𑀢𑀺𑀬𑀸 𑀘𑀢𑀼𑀢𑁆𑀣𑁄 𑀪𑀸𑀕𑁄-𑀢𑁆𑀭 𑀯𑀢𑁆𑀢𑀼𑀫𑀺𑀝𑁆𑀞𑁄, 𑀅𑀳𑁄 𑀘 𑀢𑀲𑁆𑀲 𑀅𑀟𑁆𑀠𑀭𑀢𑁆𑀢𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀲𑀸𑀥𑀺𑀧𑁆𑀧𑀸𑀬𑀢𑁆𑀣𑀫𑀸𑀳- ‘𑀅𑀢𑀻𑀢𑁂𑀘𑁆𑀘𑀸𑀤𑀺. 𑀉𑀪𑀬𑀢𑁆𑀣 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀢𑀺‘𑀅𑀬’𑀫𑀺𑀘𑁆𑀘𑀸𑀤𑀺𑀦𑀸. 𑀧𑀜𑁆𑀘𑀬𑀸𑀫𑁄𑀢𑀺 𑀅𑀢𑀻𑀢𑀸𑀬 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀯𑀺𑀦𑀸𑀟𑀺𑀓𑀸𑀥𑀺𑀓𑀖𑀝𑀺𑀓𑀸𑀢𑁆𑀢𑀬𑀁 𑀅𑀦𑀸𑀕𑀢𑀸𑀬 𑀧𑀼𑀭𑀺𑀫𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀯𑀺𑀦𑀸𑀟𑀺𑀓𑀸𑀥𑀺𑀓𑀖𑀝𑀺𑀓𑀢𑁆𑀣𑀬𑀜𑁆𑀘𑁂𑀢𑀺 𑀅𑀟𑁆𑀠𑀸𑀥𑀺𑀓𑀲𑀢𑁆𑀢𑀖𑀝𑀺𑀓𑀸𑀧𑀭𑀺𑀫𑀸𑀡𑁄 𑀏𑀓𑁄 𑀬𑀸𑀫𑁄 𑀅𑀳𑀲𑁆𑀲 𑀘𑀢𑁆𑀢𑀸𑀭𑁄𑀢𑀺 𑀧𑀜𑁆𑀘 𑀬𑀸𑀫𑀸 𑀧𑀳𑀸𑀭𑀸 𑀅𑀲𑁆𑀲𑀸𑀢𑀺 𑀧𑀜𑁆𑀘𑀬𑀸𑀫𑁄.

𑀕𑀢𑀸𑀬𑀧𑀘𑁆𑀙𑀺𑀫𑁄 𑀬𑀸𑀫𑁄, 𑀧𑀘𑁆𑀙𑀺𑀫𑀤𑁆𑀥𑀫𑀺𑀫𑀲𑁆𑀲 𑀯𑀸;

𑀧𑀳𑀸𑀭𑁄-𑀦𑀸𑀕𑀢𑀸𑀬𑀸𑀤𑀻, 𑀢𑀤𑀤𑁆𑀥𑀫𑀧𑀺 𑀯𑀸 𑀢𑀣𑀸.

𑀯𑀼𑀢𑁆𑀢𑀓𑀸𑀮𑀸𑀯𑀥𑀺 𑀫𑀚𑁆𑀛𑁄, 𑀓𑀸𑀮𑁄 𑀲𑁄-𑀚𑁆𑀚𑀢𑀦𑁄 𑀫𑀢𑁄;

𑀢𑀦𑁆𑀦𑀺𑀲𑁂𑀥𑁂𑀦 𑀬𑁄𑀢𑁆𑀯𑀜𑁆𑀜𑁄, 𑀲𑁄-𑀦𑀚𑁆𑀚𑀢𑀦𑁄 𑀫𑀢𑁄.

𑀅𑀕𑀫𑀢𑁆𑀣𑀸𑀢𑀺𑀆𑀤𑀻𑀲𑀼 𑀅𑀈𑀲𑁆𑀲𑀆𑀤𑀻𑀦𑀁 𑀲𑀫𑁆𑀩𑀦𑁆𑀥𑀺𑀩𑁆𑀬𑀜𑁆𑀚𑀦𑀲𑁆𑀲𑀸𑀪𑀸𑀯𑀸 𑀦 𑀇𑀜. 𑀩𑁆𑀬𑀸𑀫𑀺𑀲𑁆𑀲𑁂𑀧𑀻𑀢𑀺 𑀅𑀚𑁆𑀚𑀢𑀦𑀫𑀺𑀲𑁆𑀲𑁂𑀧𑀺 𑀪𑀽𑀢𑁂. 𑀦𑀜𑁆𑀲𑀫𑀸𑀲𑀦𑀺𑀲𑁆𑀲𑀬𑁂 𑀩𑁆𑀬𑀸𑀫𑀺𑀲𑁆𑀲𑁂 𑀬𑀣𑀸 𑀧𑀧𑁆𑀧𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳- ‘𑀧𑀭𑀺𑀬𑀼𑀤𑀸𑀲𑁂𑀢𑀸𑀯𑁂’𑀘𑁆𑀘𑀸𑀤𑀺.

𑀅𑀚𑁆𑀚𑀢𑀦𑀦𑀺𑀲𑁆𑀲𑀬𑁄𑀢𑀺 𑀩𑁆𑀬𑀸𑀫𑀺𑀲𑁆𑀲𑁂 𑀅𑀚𑁆𑀚𑀢𑀦𑀪𑀸𑀕𑀻𑀦𑀺𑀲𑁆𑀲𑀬𑁄. 𑀅𑀢𑁆𑀣𑀼𑀢𑀺 𑀧𑀜𑁆𑀳𑁂 𑀢𑀼 𑀢𑀤𑀜𑁆𑀜𑀦𑀺𑀲𑁆𑀲𑀬𑁄𑀢𑀺 𑀩𑁆𑀬𑀸𑀫𑀺𑀲𑁆𑀲𑁂𑀬𑁂𑀯 𑀢𑀢𑁄 𑀅𑀚𑁆𑀚𑀢𑀦𑀢𑁄 𑀇𑀢𑀭𑀸𑀦𑀚𑁆𑀚𑀢𑀦 𑀦𑀺𑀲𑁆𑀲𑀬𑁄 𑀅𑀜𑁆𑀜𑀢𑁆𑀭𑀸𑀢𑀺 𑀩𑁆𑀬𑀸𑀫𑀺𑀲𑁆𑀲𑀢𑁄 𑀅𑀜𑁆𑀜𑀢𑁆𑀭 𑀪𑀽𑀢𑀓𑀸𑀮𑁂. 𑀧𑀲𑀗𑁆𑀕𑁄𑀢𑀺 𑀆 𑀜𑀼𑀆𑀤𑀻𑀦𑀁 𑀧𑀲𑀗𑁆𑀕𑁄. 𑀅𑀚𑁆𑀚𑀳𑀺𑀬𑁆𑀬𑁄𑀯𑀸𑀢𑀺 𑀩𑁆𑀬𑀸𑀫𑀺𑀲𑁆𑀲𑀢𑀸𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁.

𑀲𑀫𑀸𑀲𑁄𑀢𑀺 𑀙𑀝𑁆𑀞𑀻𑀲𑀫𑀸𑀲𑁄 𑀓𑀸𑀭𑀓𑀲𑀫𑀸𑀲𑁄 𑀯𑀸. 𑀦𑀺𑀧𑀸𑀢𑀦𑀢𑀸 𑀘𑀸𑀲𑁆𑀲 𑀯𑀺𑀲𑁂𑀲𑀢𑁄𑀢𑀺. 𑀏𑀢𑀜𑁆𑀘𑀸𑀢𑀺 𑀧𑀭𑁄𑀓𑁆𑀔𑁂𑀢𑀺 𑀏𑀢𑀜𑁆𑀘. 𑀓𑁆𑀭𑀺𑀬𑀢𑁆𑀣𑀲𑁆𑀲 𑀉𑀧𑀸𑀥𑀺 𑀯𑀺𑀲𑁂𑀲𑀦𑀁 𑀓𑁆𑀭𑀺𑀬𑀢𑁆𑀣𑁄𑀧𑀸𑀥𑀺, 𑀢𑀲𑁆𑀲 𑀓𑁆𑀭𑀺𑀬𑀢𑁆𑀣𑁄𑀧𑀸𑀥𑀺𑀦𑁄 𑀪𑀽𑀢𑀸 𑀦𑀚𑁆𑀚𑀢𑀦𑀲𑁆𑀲 𑀲𑀸𑀥𑀦𑀤𑁆𑀯𑀸𑀭𑁂𑀦 𑀯𑀺𑀲𑁂𑀲𑀦𑀁, 𑀦 𑀢𑀽𑀚𑀼𑀓𑀁𑀢𑁆𑀬𑀢𑁆𑀣𑁄. 𑀓𑀲𑁆𑀫𑀸 𑀦𑁄𑀚𑀼𑀓𑀁 𑀯𑀺𑀲𑁂𑀲𑀦𑀁 𑀢𑁆𑀬𑀸𑀳 ‘𑀩𑁆𑀬𑀯𑀘𑁆𑀙𑁂𑀚𑁆𑀚𑀸𑀪𑀸𑀯𑀸’𑀢𑀺. 𑀢𑀫𑁂𑀯 𑀨𑀼𑀝𑀬𑀺𑀢𑀼𑀫𑀸𑀳- ‘𑀢𑀣𑀸𑀳𑀺’𑀘𑁆𑀘𑀸𑀤𑀺.

𑀲𑀸𑀥𑀺𑀬𑀫𑀸𑀦𑀸𑀢𑀺 𑀇𑀫𑀺𑀦𑀸 𑀥𑀸𑀢𑁆𑀯𑀢𑁆𑀣𑀲𑁆𑀲𑀸𑀧𑀭𑀺𑀦𑀺𑀧𑁆𑀨𑀦𑁆𑀦𑀢𑀁 𑀩𑁄𑀥𑁂𑀢𑀺. 𑀢𑁂 𑀲𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀁. 𑀲𑀦𑁆𑀢𑁄 𑀯𑀺𑀚𑁆𑀚𑀫𑀸𑀦𑁄 𑀯𑀺𑀲𑀬𑁄 𑀬𑁂𑀲𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑁂 𑀲𑀫𑁆𑀪𑀸𑀯𑁄 ¶ 𑀢𑀢𑁆𑀢𑀁, 𑀢𑀲𑁆𑀫𑀸. 𑀦𑁂𑀢𑀺 𑀧𑀝𑀺𑀲𑁂𑀥𑁂, 𑀲𑀸𑀥𑀦𑀤𑁆𑀯𑀸𑀭𑁂𑀦 𑀯𑀺𑀲𑁂𑀲𑀦𑀢𑁆𑀢𑁂 𑀩𑁆𑀬𑀯𑀘𑁆𑀙𑁂𑀚𑁆𑀚𑀲𑀩𑁆𑀪𑀸𑀯𑀸 𑀬𑀣𑀸𑀯𑀼𑀢𑁆𑀢𑀤𑁄𑀲𑁄 𑀦 𑀪𑀯𑀢𑀻𑀢𑀺 𑀅𑀢𑁆𑀣𑁄. 𑀤𑁄𑀲𑀸 𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀼𑀫𑀸𑀳- ‘𑀬𑀲𑁆𑀲𑀺’𑀘𑁆𑀘𑀸𑀤𑀺. 𑀬𑀲𑁆𑀲𑀸𑀢𑀺 𑀥𑀸𑀢𑁆𑀯𑀢𑁆𑀣𑀲𑁆𑀲. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀅𑀧𑁆𑀧𑀘𑁆𑀘𑀓𑁆𑀔𑁂 𑀥𑀸𑀢𑁆𑀯𑀢𑁆𑀣𑁂. 𑀓𑀸𑀭𑀓𑀸𑀦𑀁 𑀲𑀢𑁆𑀢𑀺𑀲𑀪𑀸𑀯𑀢𑁆𑀢𑀸 𑀲𑀸𑀧𑀺 𑀅𑀧𑀘𑁆𑀘𑀓𑁆𑀔𑀸 𑀯𑀸𑀢𑀺 𑀘𑁄𑀤𑁂𑀢𑀺 𑀦𑀦𑀼𑀘𑁂𑀘𑁆𑀘𑀸𑀤𑀺𑀦𑀸. 𑀅𑀲𑀢𑁆𑀢𑁄𑀢𑀺 𑀅𑀲𑀫𑀢𑁆𑀣𑁄.

𑀅𑀢𑁆𑀢𑀸𑀦𑀸𑀫 𑀅𑀢𑁆𑀢𑀦𑁄 𑀧𑀘𑁆𑀘𑀓𑁆𑀔𑁄𑀢𑀺 𑀢𑀩𑁆𑀩𑀺𑀲𑀬𑁂 𑀅𑀫𑁆𑀳𑀓𑀸𑀭𑀓𑀲𑁆𑀲 𑀯𑀺𑀥𑀸𑀦𑀫𑀬𑀼𑀢𑁆𑀢𑀦𑁆𑀢𑀺 𑀫𑀦𑀲𑀺 𑀦𑀺𑀥𑀸𑀬 𑀬𑀁 𑀯𑀼𑀢𑁆𑀢𑀁 𑀯𑀼𑀢𑁆𑀢𑀺𑀓𑀸𑀭𑁂𑀦, 𑀢𑀫𑀼𑀧𑀤𑀲𑁆𑀲𑁂𑀢𑀼𑀫𑀸𑀳- ‘𑀦𑀦𑀼𑀘𑁂’𑀘𑁆𑀘𑀸𑀤𑀺. 𑀅𑀢𑁆𑀢𑀩𑁄𑀥𑀦𑀻𑀬𑀸𑀧𑀺 𑀳𑀺 𑀓𑀺𑀭𑀺𑀬𑀸 𑀬𑀤𑀸 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀢𑁄 𑀦𑁄𑀧𑀮𑀓𑁆𑀔𑀻𑀬𑀢𑁂, 𑀢𑀤𑀸𑀬𑀁 𑀧𑀭𑁄𑀓𑁆𑀔𑀸 𑀪𑀯𑀢𑀺, 𑀢𑁂𑀦𑀼𑀢𑁆𑀢𑀫𑀯𑀺𑀲𑀬𑁂𑀧𑀺 𑀧𑀭𑁄𑀓𑁆𑀔𑀪𑀸𑀯𑁄 𑀢𑀲𑁆𑀲𑀸 𑀪𑀯𑀢𑁆𑀯𑁂𑀯. 𑀚𑀸𑀕𑀭𑀢𑁄𑀧𑀺 𑀬𑀤𑀸 𑀫𑀤𑀸 𑀫𑀦𑁄𑀩𑁆𑀬𑀸𑀢𑀗𑁆𑀕𑀢𑁄 𑀅𑀦𑀼𑀧𑀮𑀤𑁆𑀥𑀺, 𑀢𑀤𑀸𑀧𑀺 𑀪𑀯𑀢𑁆𑀬𑁂𑀯𑁂𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 𑀩𑁆𑀬𑀸𑀲𑀢𑁆𑀢𑀯𑀘𑀦𑀁. 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀓𑀸𑀮𑁂𑀢𑀺 𑀓𑀺𑀭𑀺𑀬𑀸 𑀦𑀺𑀩𑁆𑀩𑀢𑁆𑀢𑀺𑀓𑀸𑀮𑁂, ‘𑀲𑀼𑀢𑁆𑀢𑁄-𑀳𑀁 𑀓𑀺𑀁 𑀯𑀺𑀮𑀮𑀸𑀧, 𑀫𑀢𑁆𑀢𑁄-𑀳𑀁 𑀓𑀺𑀁𑀯𑀺𑀮𑀮𑀸𑀧𑁂’𑀢𑀺 𑀇𑀤𑀫𑀢𑁆𑀭𑁄𑀤𑀸𑀳𑀭𑀡𑀁. 𑀘𑀺𑀢𑁆𑀢 𑀘𑀺𑀓𑁆𑀔𑁂𑀧𑀯𑀺𑀲𑀬𑀧𑁆𑀧𑀤𑀲𑁆𑀲𑀦𑀸𑀬𑁂𑀢𑁆𑀣 𑀲𑀼𑀢𑁆𑀢𑀯𑀘𑀦𑀁.

𑀏𑀬𑁆𑀬𑀸𑀤𑁄𑀢𑀻𑀫𑀺𑀦𑀸 𑀏𑀬𑁆𑀬𑀸𑀤𑁆𑀬𑀢𑁆𑀣𑁄 𑀕𑀳𑀺𑀢𑁄𑀢𑀺 𑀩𑁄𑀥𑁂𑀢𑀼𑀁 𑀬𑁂𑀦𑁂𑀘𑁆𑀘𑀸𑀤𑀺𑀓𑀁 𑀯𑀼𑀢𑁆𑀢𑀁. 𑀦𑀺𑀫𑀺𑀢𑁆𑀢𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀢𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀯𑀺𑀲𑀬𑀲𑀤𑁆𑀤𑀸𑀧𑁂𑀓𑁆𑀔𑀸𑀬𑀲𑁄𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀦𑁆𑀢𑀺 𑀏𑀬𑁆𑀬𑀸𑀤𑀻𑀦𑀁. 𑀯𑀺𑀲𑀬𑀁 𑀤𑀲𑁆𑀲𑁂𑀢𑀺 ‘𑀳𑁂𑀢𑀼𑀨𑀮𑁂𑀲𑁆𑀯𑀺𑀘𑁆𑀘𑀸𑀤𑀺𑀓𑁄’𑀢𑀺. 𑀆𑀤𑀺𑀲𑀤𑁆𑀤𑁂𑀦 𑀧𑀜𑁆𑀳𑀧𑀢𑁆𑀣𑀦𑀸𑀤𑀬𑁄 𑀕𑀳𑀺𑀢𑀸. 𑀅𑀣𑀸𑀢𑁆𑀭 𑀓𑁆𑀭𑀺𑀬𑀕𑁆𑀕𑀳𑀡𑀸𑀪𑀸𑀯𑁂 𑀓𑁆𑀭𑀺𑀬𑀸𑀢𑀺𑀧𑀢𑁆𑀢𑀺𑀬𑀦𑁆𑀢𑀺 𑀓𑀣𑀁 𑀮𑀩𑁆𑀪𑀢𑀺𑀘𑁆𑀘𑀸𑀳- ‘𑀓𑁆𑀭𑀺𑀬𑀸𑀢𑀺 𑀧𑀢𑁆𑀢𑀺𑀬’𑀦𑁆𑀢𑀺 𑀆𑀤𑀺. 𑀓𑁆𑀭𑀺𑀬𑀸𑀢𑀺𑀧𑀢𑁆𑀢𑀺𑀬𑀦𑁆𑀢𑀺 𑀯𑀺𑀯𑀭𑀡𑀁 𑀓𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀪𑀺𑀥𑁂𑀬𑁆𑀬𑀤𑁆𑀯𑀸𑀭𑁂𑀦𑀸𑀢𑀺 𑀓𑀺𑀭𑀺𑀬𑀸𑀲𑀗𑁆𑀔𑀸𑀢𑀅𑀢𑁆𑀣𑀫𑀼𑀔𑁂𑀦, 𑀧𑀓𑀢𑀓𑁆𑀭𑀺𑀬𑀢𑁆𑀣 𑀯𑀺𑀲𑁂𑀲𑀦𑀢𑁆𑀢𑀸𑀢𑀺 𑀓𑁆𑀭𑀺𑀬𑀢𑁆𑀣𑀸𑀥𑀺𑀓𑀸𑀭𑀢𑁄 𑀅𑀥𑀺𑀓𑀢𑀲𑁆𑀲 𑀥𑀸𑀢𑀼𑀲𑁆𑀲 𑀯𑀺𑀲𑁂𑀲𑀦𑀢𑁆𑀢𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀅𑀢𑀺𑀧𑀢𑁆𑀢𑀺𑀬𑀦𑁆𑀢𑀺 𑀅𑀥𑀺𑀓𑀢𑀓𑁆𑀭𑀺𑀬𑀢𑁆𑀣𑀯𑀺𑀲𑁂𑀲𑀦𑀁, 𑀯𑀺𑀲𑁂𑀲𑀦𑀜𑁆𑀘 𑀳𑁄𑀦𑁆𑀢𑀁 𑀦𑁄𑀚𑀼𑀓𑀁 𑀪𑀯𑀺𑀢𑀼𑀫𑀭𑀳𑀢𑀺 𑀓𑀺𑀜𑁆𑀘𑀭𑀳𑀺 𑀅𑀪𑀺𑀥𑁂𑀬𑁆𑀬𑀤𑁆𑀯𑀸𑀭𑁂𑀦, 𑀢𑀣𑀸𑀳𑀺 𑀅𑀢𑀺𑀧𑀢𑀦𑀁 𑀦𑀸𑀫 𑀓𑁆𑀭𑀺𑀬𑀸𑀬 𑀳𑁄𑀢𑀺, 𑀦 𑀓𑁆𑀭𑀺𑀬𑀢𑁆𑀣𑀲𑁆𑀲 𑀅𑀬𑀼𑀚𑁆𑀚𑀦𑀢𑁄, 𑀢𑀲𑁆𑀫𑀸 𑀅𑀢𑀺𑀧𑀢𑁆𑀢𑀺𑀬𑀦𑁆𑀢𑀺𑀯𑀼𑀢𑁆𑀢𑁂𑀓𑁆𑀭𑀺𑀬𑀸𑀢𑀺𑀧𑀢𑁆𑀢𑀺 𑀬𑀦𑁆𑀢𑀺 ¶ 𑀇𑀤𑀁 𑀓𑁆𑀭𑀺𑀬𑀢𑁆𑀣𑀯𑀺𑀲𑁂𑀲𑀦𑀁 𑀳𑁄𑀦𑁆𑀢𑀁 𑀅𑀪𑀺𑀥𑁂𑀬𑁆𑀬𑀤𑁆𑀯𑀸𑀭𑁂𑀦 𑀳𑁄𑀢𑀻𑀢𑀺 𑀓𑁆𑀭𑀺𑀬𑀸𑀢𑀺𑀧𑀢𑁆𑀢𑀺𑀬𑀦𑁆𑀢𑀺 𑀯𑀺𑀯𑀭𑀡𑀁 𑀓𑀢’’𑀦𑁆𑀢𑀺. 𑀯𑀺𑀥𑀼𑀭𑀧𑁆𑀧𑀘𑁆𑀘𑀬𑁄𑀧𑀦𑀺𑀧𑀸𑀢𑀢𑁄𑀢𑀺 𑀯𑀺𑀭𑀼𑀤𑁆𑀥𑀧𑁆𑀧𑀘𑁆𑀘𑀬𑀲𑀫𑀯𑀸𑀬𑀸𑀢𑀺 𑀅𑀢𑁆𑀣𑁄.

𑀓𑀸𑀭𑀡𑀯𑁂𑀓𑀮𑁆𑀮𑀢𑁄𑀯𑀸𑀢𑀺 𑀳𑁂𑀢𑀼𑀫𑀢𑁄 𑀨𑀮𑀲𑁆𑀲 𑀬𑁄 𑀳𑁂𑀢𑀼 𑀢𑀲𑁆𑀲 𑀯𑀺𑀓𑀮𑀢𑁆𑀢𑁂𑀦. 𑀢𑀢𑁆𑀭𑁂𑀢𑀻𑀫𑀲𑁆𑀲 𑀅𑀢𑁆𑀣𑁄 𑀯𑀢𑁆𑀢𑀫𑀸𑀦𑀯𑀺𑀲𑀬𑁂𑀢𑀺. 𑀓𑁆𑀭𑀺𑀬𑀸𑀢𑀺𑀧𑀢𑁆𑀢𑀺𑀬𑀦𑁆𑀢𑀺 𑀪𑀽𑀢𑀸𑀤𑀺 𑀓𑁆𑀭𑀺𑀬𑀸𑀢𑀺𑀧𑀢𑁆𑀢𑀺𑀬𑀁. 𑀮𑀺𑀗𑁆𑀕𑀢𑁄𑀢𑀺 𑀦𑀺𑀫𑀺𑀢𑁆𑀢𑁂𑀦. 𑀕𑀫𑀓𑁂𑀦 𑀮𑀺𑀗𑁆𑀕𑁂𑀦 𑀕𑀫𑁆𑀫𑀸𑀬𑀸𑀢𑀺𑀧𑀢𑁆𑀢𑀺𑀬𑀸 𑀩𑀼𑀚𑁆𑀛𑀦𑀓𑀸𑀮𑀁 𑀯𑀢𑁆𑀢𑀫𑀸𑀦𑁄 𑀓𑀸𑀮𑁄 𑀦 𑀢𑀺𑀝𑁆𑀞𑀢𑀺 𑀅𑀢𑀺𑀓𑁆𑀓𑀫𑀢𑀻𑀢𑀺 𑀆𑀳- ‘𑀯𑀢𑁆𑀢𑀫𑀸𑀦𑀢𑀸𑀬 𑀩𑁆𑀬𑀢𑀺𑀓𑁆𑀓𑀫𑀸’𑀢𑀺. 𑀢𑀤𑁂𑀯 𑀨𑀼𑀝𑀬𑀢𑀺 ‘𑀲𑀫𑀓𑀸𑀮’𑀦𑁆𑀢𑀺𑀆𑀤𑀺𑀦𑀸. 𑀲𑀫𑀓𑀸𑀮𑀦𑁆𑀢𑀺 𑀏𑀓𑀓𑁆𑀔𑀡𑁂. 𑀯𑀢𑁆𑀢𑀫𑀸𑀦𑀲𑁆𑀲 𑀓𑁆𑀭𑀺𑀬𑀸𑀢𑀺𑀧𑀢𑁆𑀬𑀲𑀫𑁆𑀪𑀯𑀸 𑀢𑀤𑀯𑀲𑀺𑀝𑁆𑀞𑀸𑀢𑀻𑀢𑀸𑀦𑀸𑀕𑀢𑁂𑀲𑁆𑀯𑁂𑀬𑁆𑀬𑀸𑀤𑀻𑀦𑀫𑁆𑀪𑀸𑀯𑁄 (𑀅𑀜𑁆𑀜𑀣𑀸) 𑀦𑀼𑀧𑀧𑀢𑁆𑀢𑀺𑀬𑀸𑀢𑀺 𑀯𑀼𑀢𑁆𑀢𑀁 𑀯𑀼𑀢𑁆𑀢𑀺𑀬𑀁 ‘𑀲𑀸𑀫𑀢𑁆𑀣𑀺𑀬𑀸𑀢𑀺𑀆𑀤𑀺.

𑀮𑀺𑀗𑁆𑀕𑁂𑀦𑀸𑀢𑀺 𑀏𑀢𑁆𑀣 𑀧𑀼𑀩𑁆𑀩𑁂 𑀤𑀓𑁆𑀔𑀺𑀡𑁂𑀦 𑀕𑀫𑀦𑁂 𑀲𑀢𑀺 𑀲𑀓𑀝𑀺𑀲𑁆𑀲𑀸𑀧𑀭𑀺𑀬𑀸 𑀪𑀯𑀦𑀤𑀲𑁆𑀲𑀦𑀁 𑀤𑀓𑁆𑀔𑀺𑀡𑁂𑀦 𑀕𑀫𑀦𑀲𑁆𑀲 𑀲𑀓𑀝𑀸𑀧𑀭𑀺𑀬𑀸𑀪𑀯𑀦𑀳𑁂𑀢𑀼𑀢𑁆𑀢𑁂 𑀮𑀺𑀗𑁆𑀕𑀁, 𑀤𑀓𑁆𑀔𑀺𑀡𑁂𑀦 𑀕𑀫𑀦𑀲𑁆𑀲𑀸𑀢𑀺𑀧𑀢𑁆𑀢𑀺𑀬𑀸 𑀅𑀜𑁆𑀜𑀢𑁄 𑀕𑀫𑀦𑀸𑀤𑀺 𑀮𑀺𑀗𑁆𑀕𑀁. 𑀲𑀓𑀝𑀸 𑀓𑀺𑀭𑀺𑀬𑀸𑀪𑀯𑀦𑀸𑀢𑀺𑀧𑀢𑁆𑀢𑀺𑀬𑀸 𑀲𑀓𑀝𑁂 𑀕𑀭𑀼𑀪𑀸𑀭𑀸𑀭𑁄𑀧𑀦𑀸𑀤𑀺 𑀮𑀺𑀗𑁆𑀕𑀁. 𑀧𑀞𑀫𑀯𑀬𑁂 𑀅𑀭𑀳𑀢𑁆𑀢𑀪𑀯𑀦𑀁 𑀢𑀁𑀳𑁂𑀢𑀼𑀪𑀽𑀢𑀜𑁆𑀘 𑀧𑀩𑁆𑀩𑀚𑁆𑀚𑀁 𑀧𑀭𑁂𑀲𑀁 𑀧𑀞𑀫𑀯𑀬𑁂 𑀧𑀩𑁆𑀩𑀚𑁆𑀚𑀸𑀦𑀺𑀫𑀺𑀢𑁆𑀢𑀸𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀮𑀺𑀗𑁆𑀕𑁂𑀦 𑀯𑀺𑀜𑁆𑀜𑀸𑀬 𑀧𑀩𑁆𑀩𑀚𑁆𑀚𑀸𑀬𑀸𑀢𑀺𑀧𑀢𑁆𑀢𑀺 𑀖𑀭𑀓𑀫𑁆𑀫𑀩𑁆𑀬𑀸𑀯𑀝𑀢𑀸𑀤𑀺𑀮𑀺𑀗𑁆𑀕𑁂𑀦, 𑀅𑀭𑀳𑀢𑁆𑀢𑀲𑁆𑀲𑀸𑀢𑀺𑀧𑀢𑁆𑀢𑀺 𑀘 𑀧𑀩𑁆𑀩𑀚𑁆𑀚𑀸𑀦𑀺𑀫𑀺𑀢𑁆𑀢𑀸𑀪𑀸𑀯𑁂𑀦 [𑀪𑀸𑀯𑀯𑀺𑀭𑀳𑁂𑀦 (𑀧𑁄𑀢𑁆𑀣𑀓𑁂)] 𑀮𑀺𑀗𑁆𑀕𑁂𑀦𑀸𑀯𑀲𑀻𑀬𑀢𑁂𑀢𑀺 𑀮𑀺𑀗𑁆𑀕𑁂𑀦 𑀪𑀽𑀢 𑀓𑁆𑀭𑀺𑀬𑀸𑀢𑀺𑀧𑀢𑁆𑀢𑀺 𑀧𑀦 𑀯𑁂𑀤𑀺𑀢𑀩𑁆𑀩𑀸, 𑀬𑀤𑀺 𑀧𑀦𑁂𑀯𑀫𑀪𑀺𑀜𑁆𑀜𑀸𑀮𑀸𑀪𑀻 𑀧𑀬𑀼𑀜𑁆𑀚𑀢𑀺 𑀢𑀤𑀸 𑀧𑀘𑁆𑀘𑀓𑁆𑀔𑀜𑀸𑀡𑁂𑀦𑁂𑀯 𑀲𑀩𑁆𑀩𑀁 𑀯𑀺𑀜𑁆𑀜𑀸𑀬 𑀧𑀬𑀼𑀜𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀮𑀺𑀗𑁆𑀕𑀢𑁄𑀯𑀲𑀻𑀬𑀫𑀸𑀦𑀸𑀬𑀦𑁆𑀢𑀺 𑀧𑀦 𑀩𑀸𑀳𑀼𑀮𑁆𑀮𑁂𑀦 𑀯𑀼𑀢𑁆𑀢𑀁.

𑀦𑀺𑀘𑁆𑀘𑀪𑀯𑀦𑀁 𑀳𑁂𑀢𑀼 (𑀢𑁆𑀬𑀸𑀤𑀺𑀦𑀸) 𑀳𑁂𑀢𑀼𑀨𑀮𑀪𑀸𑀯𑁄𑀬𑁂𑀯𑁂𑀢𑁆𑀣, 𑀦𑀸𑀢𑀺 𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀲𑀩𑁆𑀩𑀧𑁆𑀧𑀘𑁆𑀘𑀬𑁄𑀤𑀸𑀳𑀭𑀡𑀯𑀲𑁂𑀦𑀸𑀢𑀺 𑀲𑀩𑁆𑀩𑁂𑀲𑀁 𑀏𑀬𑁆𑀬𑀸𑀤𑀻𑀦𑀫𑁆𑀧𑀘𑁆𑀘𑀬𑀸𑀦𑀁 𑀉𑀤𑀸𑀳𑀭𑀡𑀯𑀲𑁂𑀦. 𑀳𑁂𑀢𑀼𑀨𑀮𑀸𑀦𑀁 𑀲𑀩𑁆𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀢𑁆𑀢𑀸 𑀳𑁂𑀢𑀼𑀨𑀮𑀸𑀦𑀺 𑀤𑀲𑁆𑀲𑁂𑀢𑀺 𑀳𑀦𑀦𑀫𑀺𑀘𑁆𑀘𑀸𑀤𑀺𑀦𑀸. 𑀏𑀯𑀁 𑀳𑁂𑀢𑀼𑀨𑀮𑀲𑀩𑁆𑀪𑀸𑀯𑀢𑁄 𑀲𑀩𑁆𑀩𑀓𑀸𑀮𑁂 ¶ 𑀘 𑀯𑀺𑀥𑀸𑀦𑀢𑁄 𑀏𑀢𑁆𑀣 𑀯𑀢𑁆𑀢𑀫𑀸𑀦𑁂𑀧𑀺 𑀧𑀧𑁆𑀧𑁄𑀢𑀻𑀢𑀺 𑀪𑀸𑀯𑁄. 𑀲𑁄 𑀘 𑀳𑁂𑀢𑀼𑀳𑁂𑀢𑀼𑀫𑀦𑁆𑀢𑀪𑀸𑀯𑁄 𑀘.

𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀧𑀤𑀦𑁆𑀢𑀺𑀆𑀤𑀻𑀲𑀼 𑀧𑀜𑁆𑀳𑁄𑀢𑀺 𑀧𑀼𑀭𑀺𑀫𑀁 𑀧𑀤𑀁, 𑀲𑀫𑁆𑀧𑀼𑀘𑁆𑀙𑀦𑀸𑀢𑀺 𑀧𑀘𑁆𑀙𑀺𑀫𑀁 𑀧𑀤𑀦𑁆𑀢𑀺𑀆𑀤𑀺𑀦𑀸 𑀤𑀝𑁆𑀞𑀩𑁆𑀩𑀁. 𑀲𑀫𑁂𑀘𑁆𑀘 𑀅𑀜𑁆𑀜𑀫𑀜𑁆𑀜𑀁 𑀧𑀼𑀘𑁆𑀙𑀦𑀸 𑀲𑀫𑁆𑀧𑀼𑀘𑁆𑀙𑀦𑀸, 𑀬𑀸𑀘𑀦𑀁 𑀤𑁂𑀳𑀻 𑀢𑁆𑀬𑀸𑀤𑀺𑀦𑀸 𑀬𑀸𑀘𑀦𑀫𑀢𑁆𑀣𑀁, 𑀇𑀝𑁆𑀞𑀲𑁆𑀲𑀸𑀲𑀫𑁆𑀧𑀢𑁆𑀢𑀲𑁆𑀲𑀸𑀢𑁆𑀣𑀦𑀫𑀺𑀝𑁆𑀞𑀸𑀲𑀺𑀁𑀲𑀦𑀁. 𑀧𑀢𑁆𑀢𑀓𑀸𑀮𑀯𑀲𑁂𑀦 𑀘 𑀯𑀺𑀲𑀬𑀪𑁂𑀤𑁂𑀦 𑀪𑀺𑀦𑁆𑀦𑀸𑀬 𑀧𑀻𑀢𑀺 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀧𑀢𑁆𑀢𑀓𑀸𑀮𑀁 𑀤𑀲𑁆𑀲𑁂𑀢𑀺 𑀦𑀺𑀫𑀺𑀢𑁆𑀢𑀪𑀽𑀢𑀲𑁆𑀲𑀸𑀢𑀺𑀆𑀤𑀺𑀦𑀸. 𑀦𑀺𑀫𑀺𑀢𑁆𑀢𑀪𑀽𑀢𑀲𑁆𑀲𑀸𑀢𑀺 𑀢𑀁𑀢𑀁𑀓𑀺𑀘𑁆𑀘𑀲𑀫𑁆𑀧𑀚𑁆𑀚𑀦𑁂 𑀓𑀸𑀭𑀡𑀪𑀽𑀢𑀲𑁆𑀲. 𑀯𑀺𑀥𑀺 𑀦𑀸𑀫 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓 𑀦𑀺𑀫𑀦𑁆𑀢𑀡𑀸𑀫𑀦𑁆𑀢𑀡𑀸𑀚𑁆𑀛𑁂𑀲𑀦𑀧𑁂𑀲𑀦𑀸𑀦𑀺. 𑀏𑀢𑁆𑀣 𑀘 𑀅𑀦𑀼𑀜𑁆𑀜𑀸𑀧𑀢𑁆𑀢𑀓𑀸𑀮𑁂𑀲𑀼 𑀘 𑀧𑀜𑁆𑀘𑀫𑀻 𑀯𑀺𑀳𑀺𑀢𑀸 𑀧𑀭𑁂𑀳𑀺, 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀻𑀲𑀼 𑀧𑀜𑁆𑀘𑀲𑀼 𑀲𑀢𑁆𑀢𑀫𑀻. 𑀇𑀥 𑀧𑀦 𑀢𑁂 𑀤𑁆𑀯𑁂𑀧𑀺 𑀯𑀺𑀥𑀺𑀯𑀺𑀲𑁂𑀲𑀸𑀬𑁂𑀯𑀸𑀢𑀺 𑀯𑀺𑀥𑀺𑀫𑁆𑀳𑀺 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀏𑀬𑁆𑀬𑀸𑀤𑀺𑀁 𑀯𑀺𑀥𑀸𑀢𑀼𑀁 𑀬𑀁 𑀯𑀼𑀢𑁆𑀢𑀁 𑀯𑀼𑀢𑁆𑀢𑀺𑀓𑀸𑀭𑁂𑀦, 𑀢𑀤𑀺𑀤𑀸𑀦𑀺 𑀯𑀢𑁆𑀢𑀼𑀓𑀸𑀫𑁄 𑀆𑀳- ‘𑀅𑀦𑀼𑀜𑁆𑀜𑀸𑀧𑀢𑁆𑀢𑀓𑀸𑀮𑁂𑀲𑀼𑀧𑀺’𑀘𑁆𑀘𑀸𑀤𑀺. 𑀯𑀺𑀥𑀺𑀧𑁆𑀧𑀢𑀻𑀢𑀺𑀫𑁂𑀯 𑀧𑀓𑀸𑀲𑁂𑀢𑀺 ‘𑀏𑀯𑀁 𑀓𑀭𑁂𑀬𑁆𑀬𑀸𑀲𑀻’’𑀢𑀺𑀘𑁆𑀘𑀸𑀤𑀺𑀦𑀸. 𑀅𑀦𑀼𑀚𑀸𑀦𑀦𑁆𑀢𑁄𑀧𑀺 𑀤𑀻𑀧𑁂𑀦𑁆𑀢𑁄𑀧𑀺 𑀓𑀺𑀭𑀺𑀬𑀸𑀲𑀼 𑀩𑁆𑀬𑀸𑀧𑀸𑀭𑁂𑀢𑀺𑀬𑁂𑀯𑀸𑀢𑀺 𑀩𑁆𑀬𑀸𑀧𑀸𑀭𑀡𑀫𑁆𑀧𑀢𑀻𑀢𑀺𑀢𑁄𑀢𑀺 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀧𑁂𑀲𑀦𑁂𑀧𑀺 𑀓𑁂𑀲𑀜𑁆𑀘𑀺 𑀩𑁆𑀬𑀸𑀓𑀭𑀡𑀜𑁆𑀜𑀽𑀦𑀁 𑀲𑀢𑁆𑀢𑀫𑀻𑀯𑀺𑀥𑀺𑀘𑁆𑀙𑀺𑀢𑁄𑀢𑀺𑀯𑀼𑀢𑁆𑀢𑀺𑀓𑀸𑀭𑁂𑀦 𑀬𑀁 𑀯𑀼𑀢𑁆𑀢𑀁, 𑀢𑀁 𑀤𑀸𑀦𑀺 𑀯𑀢𑁆𑀢𑀼𑀫𑀸𑀳- ‘𑀧𑁂𑀲𑀦𑁂 𑀧𑀺’𑀘𑁆𑀘𑀸𑀤𑀺. 𑀲𑀫𑀽𑀮𑀢𑀦𑁆𑀢𑀺 𑀓𑁂𑀲𑀜𑁆𑀘𑀺 𑀲𑀤𑁆𑀤𑀺𑀓𑀸𑀦𑀁 𑀲𑀢𑁆𑀢𑀫𑀻𑀯𑀺𑀥𑀺𑀯𑀺𑀥𑀸𑀦𑀫𑀽𑀮𑁂𑀦 𑀲𑀫𑀽𑀮𑀢𑀁. ‘‘𑀅𑀦𑀼𑀫𑀢𑀺𑀧𑀭𑀺𑀓𑀧𑁆𑀧𑀢𑁆𑀣𑁂𑀲𑀼 𑀲𑀢𑁆𑀢𑀫𑀻’’𑀢𑀺 (𑁩-𑁧-𑁧𑁧) 𑀓𑀘𑁆𑀘𑀸𑀦𑀲𑀼𑀢𑁆𑀢𑀁. 𑀓𑀢𑁆𑀢𑀼𑀫𑀺𑀘𑁆𑀙𑀢𑁄 𑀧𑀭𑀲𑁆𑀲 𑀅𑀦𑀼𑀚𑀸𑀦𑀦𑀁 𑀅𑀦𑀼𑀫𑀢𑀺, 𑀧𑀭𑀺𑀓𑀧𑁆𑀧𑀦𑀁 𑀲𑀮𑁆𑀮𑀓𑁆𑀔𑀡𑀁 𑀦𑀺𑀭𑀽𑀧𑀦𑀁 𑀧𑀭𑀺𑀓𑀧𑁆𑀧𑁄 𑀳𑁂𑀢𑀼𑀨𑀮𑀓𑀺𑀭𑀺𑀬𑀸 𑀲𑀫𑁆𑀪𑀯𑁄 𑀘, 𑀢𑀲𑁆𑀫𑀺𑀁 𑀅𑀦𑀼𑀫𑀢𑁆𑀬𑀢𑁆𑀣𑁂 𑀘 𑀧𑀭𑀺𑀓𑀧𑁆𑀧𑀢𑁆𑀣𑁂 𑀘 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀕𑁆𑀕𑀳𑀡𑁂𑀦 𑀯𑀺𑀥𑀺𑀦𑀺𑀫𑀦𑁆𑀢𑀡𑀸𑀫𑀦𑁆𑀢𑀡𑀸𑀚𑁆𑀛𑁂𑀲𑀦 𑀧𑀢𑁆𑀣𑀦𑀸𑀧𑀢𑁆𑀢𑀓𑀸𑀮𑁂𑀲𑀼 𑀘.

𑀉𑀤𑀸𑀳𑀝𑀸𑀢𑀺 𑀕𑀘𑁆𑀙𑀢𑀼 𑀕𑀘𑁆𑀙𑀦𑁆𑀢𑀼𑀆𑀤𑀺𑀦𑀸 𑀉𑀤𑀸𑀳𑀝𑀸. 𑀤𑀤𑀸𑀢𑀽𑀢𑀺 𑀬𑀸𑀘𑀦𑁂.

𑀅𑀭𑀳𑀢𑁆𑀣𑁂 𑀘𑀸𑀬𑀫𑁂𑀯 𑀧𑀬𑁄𑀕𑁄, 𑀢𑁂𑀦 𑀪𑀯𑀁 𑀔𑀮𑀼 𑀭𑀚𑁆𑀚𑀁 𑀓𑀭𑁂𑀬𑁆𑀬 𑀪𑀯𑀁 𑀅𑀭𑀳𑁄𑀢𑀺 𑀬𑁄𑀚𑁂𑀢𑁆𑀯𑀸 𑀤𑀝𑁆𑀞𑀩𑁆𑀩𑁄.

𑀬𑁄𑀕𑁆𑀕𑀢𑀸𑀚𑁆𑀛𑀯𑀲𑀸𑀦𑀦𑁆𑀢𑀻𑀫𑀲𑁆𑀲𑀸𑀢𑁆𑀣𑀧𑀤𑀁 ¶ , 𑀲𑀢𑁆𑀢𑀺𑀲𑀤𑁆𑀤𑀳𑀦𑀦𑁆𑀢𑀺 𑀲𑀸𑀫𑀢𑁆𑀣𑀺𑀬𑀲𑁆𑀲 𑀲𑀤𑁆𑀤𑀳𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀬𑁄𑀕𑀸𑀦𑀼𑀲𑀸𑀭𑀺𑀢𑀁 𑀤𑀻𑀧𑁂𑀢𑀻 𑀲𑀫𑁆𑀩𑀦𑁆𑀥𑁄. 𑀕𑀫𑁆𑀫𑀫𑀸𑀦𑁂𑀢𑀺 𑀲𑀫𑁆𑀪𑀸𑀯𑁂𑀫𑀺𑀘𑁆𑀘𑀸𑀤𑀺𑀦𑀸 𑀪𑁆𑀯𑀸𑀤𑀺𑀥𑀸𑀢𑀽𑀳𑀺 𑀅𑀯𑀼𑀘𑁆𑀘𑀫𑀸𑀦𑁂𑀧𑀺 𑀕𑀫𑁆𑀬𑀫𑀸𑀦𑁂. 𑀉𑀤𑀸𑀳𑀝𑀁 ‘𑀅𑀧𑀺𑀧𑀩𑁆𑀩𑀢𑀁 𑀲𑀺𑀭𑀲𑀸 𑀪𑀺𑀦𑁆𑀤𑁂𑀬𑁆𑀬𑀸’𑀢𑀺. 𑀫𑀳𑀸𑀩𑀮𑀢𑀸𑀬 𑀳𑀢𑁆𑀣𑀺𑀳𑀦𑀦𑁂 𑀅𑀮𑀫𑀢𑁆𑀣𑀯𑀺𑀲𑀬𑁂 𑀲𑀫𑁆𑀪𑀸𑀯𑀦𑁂 𑀲𑀢𑁆𑀬𑀧𑀺 𑀅𑀮𑀁 𑀲𑀤𑁆𑀤𑁄-𑀢𑁆𑀭𑀸𑀮𑀫𑀢𑁆𑀣𑁄 𑀬𑀼𑀢𑁆𑀢𑁄𑀢𑀺 𑀦 𑀪𑀯𑀦𑁆𑀢𑁂𑀢𑁆𑀬𑀸𑀤𑀬𑁄 𑀳𑀦𑀺𑀲𑁆𑀲𑀢𑀺. 𑀥𑀸𑀢𑀼𑀦𑀸𑀢𑀺 𑀏𑀢𑁆𑀣 𑀥𑀸𑀢𑀼𑀕𑁆𑀕𑀳𑀡𑁂𑀦 𑀪𑁆𑀯𑀸𑀤𑀬𑁄 𑀕𑀬𑁆𑀳𑀦𑁆𑀢𑁂 𑀢𑀢𑁆𑀣 𑀥𑀸𑀢𑀼𑀲𑀤𑁆𑀤𑀲𑁆𑀲 𑀭𑀼𑀴𑁆𑀳𑀢𑁆𑀢𑀸 𑀧𑀼𑀩𑁆𑀩𑀸𑀘𑀭𑀺𑀬𑀲𑀜𑁆𑀜𑀸𑀬 𑀯𑀸. 𑀉𑀤𑀸𑀳𑀝𑀦𑁆𑀢𑀺 𑀪𑀼𑀜𑁆𑀚𑁂𑀬𑁆𑀬 𑀪𑀯𑀁 𑀢𑁆𑀬𑀸𑀤𑀺𑀦𑀸.

𑀲𑀽𑀢𑀺 𑀫𑀸𑀲𑀽𑀢𑀺 𑀏𑀢𑁆𑀣 𑀲𑀼𑀲𑀤𑁆𑀤𑁄. 𑀏𑀢𑁆𑀣 𑀇𑀫𑀲𑁆𑀫𑀺𑀁 𑀉𑀤𑀸𑀳𑀭𑀡𑁂. 𑀦𑀺𑀯𑀢𑁆𑀢𑁂𑀢𑀺 𑀫𑀸𑀲𑀤𑁆𑀤𑁄𑀢𑀺 𑀲𑁂𑀲𑁄. 𑀆𑀭𑀤𑁆𑀥𑀦𑁆𑀢𑀺 𑀇𑀫𑀺𑀦𑀸 𑀯𑀢𑁆𑀢𑀫𑀸𑀦𑀁 𑀯𑀦𑀕𑀫𑀦𑀁 𑀤𑀲𑁆𑀲𑁂𑀢𑀺. 𑀅𑀦𑁆𑀢𑁄𑀪𑀽𑀢𑀡𑁆𑀬𑀢𑁆𑀣𑀸𑀢𑀺 𑀡𑀺𑀧𑁆𑀧𑀘𑁆𑀘𑀬𑀸𑀪𑀸𑀯𑁂𑀧𑀺 𑀅𑀢𑁆𑀢𑀦𑀺 𑀅𑀦𑁆𑀢𑁄𑀪𑀽𑀢𑀡𑁆𑀬𑀢𑁆𑀣 𑀥𑀸𑀢𑀼𑀢𑁄. 𑀈𑀆𑀤𑀻𑀦𑀁 𑀆𑀆𑀤𑀻𑀦𑀜𑁆𑀘 𑀲𑀓𑀓𑀸𑀮𑁄𑀦𑀸𑀫 𑀪𑀽𑀢𑁄 𑀓𑀸𑀮𑁄. 𑀥𑀸𑀢𑀼𑀲𑀫𑁆𑀩𑀦𑁆𑀥𑁄 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀲𑀪𑀸𑀯𑁄, 𑀢𑁂𑀦𑀸𑀳- ‘𑀥𑀸𑀢𑁆𑀯𑀢𑁆𑀣 𑀲𑀫𑁆𑀩𑀦𑁆𑀥𑁂 𑀯𑀺𑀲𑁂𑀲𑀦 𑀯𑀺𑀲𑁂𑀲𑁆𑀲𑀪𑀸𑀯𑀮𑀓𑁆𑀔𑀡𑁂’𑀢𑀺. 𑀲𑀩𑁆𑀩𑀢𑁆𑀣𑀸𑀔𑁆𑀬𑀸𑀢 𑀯𑀸𑀘𑁆𑀘𑁄𑀢𑁆𑀣𑁄 𑀯𑀺𑀲𑁂𑀲𑁆𑀲𑁄 𑀲𑁆𑀬𑀸𑀤𑁆𑀬𑀦𑁆𑀢𑀯𑀸𑀘𑁆𑀘𑁄 𑀯𑀺𑀲𑁂𑀲𑀦𑀁.

𑀇𑀝𑁆𑀞𑁄𑀢𑀺 𑀧𑀭𑁂𑀲𑀫𑀺𑀝𑁆𑀞𑁄. 𑀚𑀸𑀦𑀦𑀢𑁆𑀣𑀯𑀲𑁂𑀦 𑀕𑀫𑀦𑀢𑁆𑀣𑀢𑁆𑀢𑀸𑀢𑀺 ‘‘𑀕𑀫𑀦𑀢𑁆𑀣𑀸 𑀓𑀫𑁆𑀫𑀓𑀸’’𑀢𑀺 (𑁫-𑁫𑁯) 𑀲𑀼𑀢𑁆𑀢𑁂 𑀕𑀫𑀦𑀢𑁆𑀣𑀲𑀤𑁆𑀤𑁂𑀦 ‘𑀬𑁂 𑀕𑀢𑁆𑀬𑀢𑁆𑀣𑀸 𑀢𑁂 𑀩𑀼𑀤𑁆𑀥𑁆𑀬𑀢𑁆𑀣𑀸’𑀢𑀺 𑀚𑀸𑀦𑀦𑀢𑁆𑀣𑁄𑀧𑀺 𑀕𑀳𑀺𑀢𑁄𑀢𑀺 𑀏𑀯𑀁 𑀕𑀳𑀺𑀢𑀚𑀸𑀦𑀦𑀢𑁆𑀣𑀯𑀲𑁂𑀦 𑀕𑀫𑀦𑀢𑁆𑀣𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀪𑀺𑀫𑀢𑀸𑀦𑀺 𑀧𑀸𑀡𑀺𑀦𑀺𑀬𑀸𑀦𑀁. 𑀢𑀣𑀸 𑀲𑀤𑁆𑀤𑀲𑁆𑀲𑀢𑁆𑀣𑀫𑀸𑀳- ‘𑀅𑀦𑀦𑁆𑀢𑀭𑁂𑀦 𑀕𑀢𑀢𑁆𑀣’(𑀦𑁆𑀢𑀺 𑀅𑀦)𑀦𑁆𑀢𑀭𑁂 𑀯𑀼𑀢𑁆𑀢𑁂𑀦 𑀓𑀭𑀡𑀪𑀽𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀪𑀺𑀫𑀢𑁄𑀢𑀺 𑀧𑀸𑀡𑀺𑀦𑀺𑀬𑀸𑀦𑀫𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀲𑀫𑀼𑀘𑁆𑀘𑀬𑀁 𑀯𑀢𑁆𑀢𑀼𑀫𑀸𑀳- ‘𑀲𑀫𑀼𑀘𑁆𑀘𑀬𑁄’𑀇𑀘𑁆𑀘𑀸𑀤𑀺. 𑀅𑀣𑀸𑀢𑁆𑀭 𑀓𑀣𑀫𑀦𑁂𑀓𑀸𑀲𑀁 𑀓𑀺𑀭𑀺𑀬𑀸𑀦𑀁 𑀘𑀻𑀬 𑀫𑀸𑀦𑀢𑀸 𑀬𑀸𑀯𑀢𑀸 𑀏𑀓𑀸𑀯𑀸𑀝𑀦𑀓𑀺𑀭𑀺𑀬𑀸𑀚𑁆𑀛𑀬𑀦𑀓𑀺𑀭𑀺𑀬𑀸 𑀘𑁂𑀢𑁆𑀬𑀸𑀲𑀗𑁆𑀓𑀺𑀬𑀸𑀳- ‘𑀲𑀸𑀥𑀦𑀪𑁂𑀤𑀦𑁂’𑀘𑁆𑀘𑀸𑀤𑀺. 𑀫𑀞𑀸𑀤𑀺𑀲𑀸𑀥𑀦𑀸𑀦𑀫𑁆𑀪𑁂𑀤𑁂𑀦𑀸𑀝𑀦 𑀓𑀺𑀭𑀺𑀬𑀸𑀬𑀧𑀺 𑀪𑁂𑀤𑁄𑀢𑀺 𑀅𑀢𑁆𑀣𑁄. 𑀢𑀓𑁆𑀓𑀺𑀭𑀺𑀬𑀸𑀧𑁆𑀧𑀥𑀸𑀦𑀲𑁆𑀲𑀸𑀢𑀺 𑀲𑀸 𑀮𑀯𑀦𑀓𑀺𑀭𑀺𑀬𑀸 𑀧𑀥𑀸𑀦𑀫𑀲𑁆𑀲 𑀓𑀢𑁆𑀢𑀼𑀦𑁄. 𑀬𑁄- 𑀬𑀫𑀜𑁆𑀜𑁂𑀧𑀺 𑀦𑀺𑀬𑁄𑀚𑁂𑀦𑁆𑀢𑁄 𑀯𑀺𑀬 𑀓𑀺𑀭𑀺𑀬𑀁 𑀓𑀭𑁄𑀢𑀺 𑀲𑁄 𑀦𑀸-𑀜𑁆𑀜𑀓𑀺𑀭𑀺𑀬𑀸𑀧𑀥𑀸𑀦𑁂 𑀬𑀼𑀢𑁆𑀢𑁄, 𑀢𑀓𑁆𑀓𑀺𑀭𑀺𑀬𑀸𑀧𑁆𑀧𑀥𑀸𑀦𑁂𑀬𑁂𑀯𑁂𑀢𑀺.

𑀫𑀳𑀸𑀯𑀸𑀓𑁆𑀬𑀭𑀽𑀧𑀢𑁆𑀢𑀸 ¶ 𑀧𑀓𑀭𑀡𑀲𑁆𑀲 𑀢𑀤𑀧𑁂𑀓𑁆𑀔𑀸𑀬 𑀯𑀸𑀓𑁆𑀬𑁂𑀓𑀤𑁂𑀲𑀢𑁆𑀢𑀁 ‘‘𑀯𑀢𑁆𑀢𑀫𑀸𑀦𑁂 𑀢𑀺𑀅𑀦𑁆𑀢𑀺, 𑀪𑀯𑀺𑀲𑁆𑀲𑀢𑀺’’𑀘𑁆𑀘𑀸𑀤𑀻𑀦𑀁 𑀯𑀸𑀓𑁆𑀬𑀸𑀦𑀦𑁆𑀢𑀺 𑀆𑀳 ‘𑀯𑀸𑀓𑁆𑀬𑁂𑀓𑀤𑁂𑀲𑁂𑀳𑀻’𑀢𑀺. 𑀅𑀢𑁄𑀬𑁂𑀯𑀫𑀸𑀳-𑀯𑀸𑀓𑁆𑀬𑀸𑀯𑀬𑀯𑁄𑀧𑀭𑁄-𑀥𑀼𑀦𑀸 𑀓𑀭𑀻𑀬𑀢𑁂’𑀢𑀺. 𑀯𑀺𑀥𑀺𑀯𑀸𑀓𑁆𑀬𑀢𑁆𑀢𑀫𑀲𑁆𑀲 𑀤𑀲𑁆𑀲𑁂𑀢𑁆𑀯𑀸 𑀦𑀺𑀬𑀫𑀯𑀸𑀓𑁆𑀬𑀢𑁆𑀢𑀁 𑀤𑀸𑀦𑀺 𑀤𑀲𑁆𑀲𑁂𑀢𑀼𑀁 ‘𑀅𑀣𑀯𑀸 𑀦𑀺𑀬𑀫𑀢𑁆𑀣𑀫𑀺𑀤𑀦𑁆𑀢𑁆𑀬𑀸𑀤𑀻𑀦’𑀦𑁆𑀢𑁆𑀬𑀸𑀳. 𑀦𑀺𑀬𑀫𑀲𑀼𑀢𑁆𑀢𑀢𑁆𑀢𑀫𑁂𑀯 𑀨𑀼𑀝𑀬𑀢𑀺 ‘𑀢𑁂𑀳𑀺’𑀘𑁆𑀘𑀸𑀤𑀺𑀦𑀸. 𑀢𑁂𑀳𑀺 𑀢𑁂𑀳𑀺 𑀲𑀼𑀢𑁆𑀢𑁂𑀳𑀻𑀢𑀺 ‘‘𑀯𑀢𑁆𑀢𑀫𑀸𑀦𑁂 𑀢𑀺 𑀅𑀦𑁆𑀢𑀺’’𑀘𑁆𑀘𑀸𑀤𑀻𑀳𑀺 𑀢𑁂𑀳𑀺 𑀢𑁂𑀳𑀺 𑀲𑀼𑀢𑁆𑀢𑁂𑀳𑀺. 𑀇𑀫𑀺𑀦𑀸𑀢𑀺 ‘‘𑀧𑀼𑀩𑁆𑀩𑀧𑀭𑀸’’𑀤𑀺𑀦𑀸 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦. 𑀦𑀦𑀼 𑀢𑀼𑀫𑁆𑀳𑀸𑀫𑁆𑀳𑀲𑁂𑀲𑁂𑀲𑀽𑀢𑀺 𑀏𑀢𑁆𑀢𑀓𑁂 𑀯𑀼𑀘𑁆𑀘𑀫𑀸𑀦𑁂 ‘𑀢𑀼𑀫𑁆𑀳𑀸𑀫𑁆𑀳𑀲𑀤𑁆𑀤𑀯𑀘𑀦𑀻𑀬𑁂𑀲𑀼 𑀢𑀤𑀜𑁆𑀜𑀲𑀤𑁆𑀤𑀯𑀘𑀦𑀻𑀬𑁂𑀲𑀼 𑀘 𑀓𑀸𑀭𑀓𑁂𑀲𑀽’𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀓𑀼𑀢𑁄 𑀕𑀫𑁆𑀬𑀢𑁂 𑀬𑁂𑀦𑁂𑀯𑀁 𑀯𑀺𑀯𑀝𑀁𑀢𑁆𑀬𑀸𑀳- ‘𑀓𑀢𑁆𑀢𑀼𑀓𑀫𑁆𑀫𑁂’𑀘𑁆𑀘𑀸𑀤𑀺. 𑀓𑀢𑁆𑀢𑀸𑀤𑀻𑀲𑀼 𑀯𑀺𑀥𑀸𑀦𑀜𑁆𑀘 𑀯𑀓𑁆𑀔𑀢𑀺.

𑀓𑀢𑁆𑀢𑀼𑀓𑀫𑁆𑀫𑀸𑀦𑀫𑁂𑀯𑀸𑀢𑀺 𑀇𑀫𑀺𑀦𑀸 𑀪𑀸𑀯𑀁 𑀩𑁆𑀬𑀯𑀘𑁆𑀙𑀺𑀦𑁆𑀤𑀢𑀺. 𑀢𑀣𑀸 𑀘 𑀯𑀓𑁆𑀔𑀢𑀺- ‘𑀢𑀼𑀫𑁆𑀳𑀸𑀫𑁆𑀳𑀲𑀤𑁆𑀤𑀯𑀘𑀦𑀻𑀬𑀢𑁆𑀢𑀸𑀪𑀸𑀯𑀸’𑀢𑀺. 𑀅𑀲𑀢𑁆𑀯𑀪𑀽𑀢𑀸𑀬𑁂𑀘𑁆𑀘𑀸𑀤𑀺𑀓𑀫𑁂𑀓𑀯𑀘𑀦 𑀲𑀫𑁆𑀪𑀯𑁂 𑀓𑀸𑀭𑀡𑀁, 𑀢𑀼𑀫𑁆𑀳𑀸𑀫𑁆𑀳𑁂𑀘𑁆𑀘𑀸𑀤𑀺𑀓𑀦𑁆𑀢𑀼 𑀧𑀞𑀫𑀧𑀼𑀭𑀺𑀲𑀲𑀫𑁆𑀪𑀯𑁂. 𑀢𑀼𑀫𑁆𑀳𑀸𑀫𑁆𑀳𑀲𑁂𑀲𑁂𑀲𑀼 𑀳𑁄𑀦𑁆𑀢𑀸 𑀫𑀚𑁆𑀛𑀺𑀫𑀼𑀢𑁆𑀢𑀫𑀧𑀞𑀫𑀸 𑀓𑀣𑀁 𑀪𑀸𑀯𑀸𑀤𑀻𑀲𑀼 𑀯𑀺𑀜𑁆𑀜𑀸𑀬𑀦𑁆𑀢𑀺 𑀓𑀣𑀜𑁆𑀘 𑀢𑀼𑀫𑁆𑀳𑀸𑀫𑁆𑀳𑀸𑀤𑀺𑀲𑀤𑁆𑀤𑀯𑀘𑀦𑀻𑀬𑀲𑁆𑀲 𑀓𑀸𑀭𑀓𑀢𑁆𑀣𑀲𑁆𑀲𑀸𑀔𑁆𑀬𑀸𑀢𑁂𑀦 𑀢𑀢𑁆𑀣 𑀯𑀺𑀳𑀺𑀢𑁂𑀦 𑀲𑀜𑁆𑀜𑀸𑀯𑀺𑀪𑀢𑁆𑀢𑀸 𑀢𑀼𑀫𑁆𑀳𑀸𑀫𑁆𑀳𑀸𑀤𑀺𑀲𑀤𑁆𑀤𑀧𑁆𑀧𑀬𑁄𑀕𑀸𑀪𑀸𑀯𑁄𑀘𑁆𑀘𑀸𑀲𑀗𑁆𑀓𑀺𑀬 𑀬𑀁 𑀯𑀼𑀢𑁆𑀢𑀁 𑀯𑀼𑀢𑁆𑀢𑀺𑀬𑀁 𑀢𑀁𑀤𑀸𑀦𑀺 𑀯𑀺𑀯𑀭𑀦𑁆𑀢𑁂𑀦 ‘𑀬𑀤𑀺 𑀪𑀸𑀯𑀸𑀤𑀻𑀲𑀼 𑀫𑀸𑀦𑀸𑀤𑀬𑁄 𑀦 𑀯𑀺𑀥𑀻𑀬𑀦𑁆𑀢𑁂 𑀢𑀤𑀸𑀫𑀸𑀦𑀸𑀤𑀻𑀲𑀼 𑀧𑀭𑁂𑀲𑀼 𑀪𑀸𑀯𑀸𑀤𑀻𑀲𑀼 𑀓𑁆𑀬𑀮𑀸𑀤𑀻𑀦𑀁 𑀯𑀺𑀥𑀸𑀦𑀫𑁂𑀯 𑀦𑁄𑀧𑀧𑀚𑁆𑀚𑀢𑀻’𑀢𑀺 𑀇𑀫𑀺𑀦𑀸 𑀲𑀸𑀫𑀢𑁆𑀣𑀺𑀬𑁂𑀦 𑀢𑀼𑀫𑁆𑀳𑀸𑀤𑀻𑀲𑀼 𑀓𑀸𑀭𑀓𑁂𑀲𑀼 𑀫𑀚𑁆𑀛𑀺𑀫𑀸𑀤𑀻𑀦𑀁 𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀺 𑀢𑁂𑀦𑁂𑀯 𑀢𑀼𑀫𑁆𑀳𑀸𑀤𑀺𑀓𑀸𑀭𑀓𑀢𑁆𑀣𑀲𑁆𑀲 𑀢𑀢𑁆𑀣 𑀯𑀺𑀳𑀺𑀢𑁂𑀦𑀸𑀔𑁆𑀬𑀸𑀢𑁂𑀦 𑀲𑀜𑁆𑀜𑀸𑀧𑀺𑀢𑀢𑁆𑀢𑀸 𑀢𑀼𑀫𑁆𑀳𑀸𑀤𑀺𑀲𑀤𑁆𑀤𑀧𑁆𑀧𑀬𑁄𑀕𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘𑀢𑀼𑀫𑁆𑀳𑀸𑀤𑀺𑀲𑁆𑀯𑀺’𑀘𑁆𑀘𑀸𑀤𑀺𑀓𑀫𑀸𑀭𑀤𑁆𑀥𑀁. 𑀬𑀚𑁆𑀚𑁂𑀯𑀁 𑀢𑀼𑀫𑁆𑀳𑀸𑀤𑀺𑀲𑀤𑁆𑀤𑀧𑁆𑀧𑀬𑁄𑀕𑁄𑀬𑁂𑀯 𑀦 𑀲𑀺𑀬𑀸 𑀘𑁆𑀘𑀸𑀳- ‘𑀬𑀚𑁆𑀚𑁂𑀯 𑀫𑀺𑀘𑁆𑀘𑀸𑀤𑀺. 𑀧𑀭𑀺𑀳𑀸𑀭𑀫𑀸𑀳- ‘𑀲𑀲𑀤𑁆𑀤𑁂𑀦𑀸’𑀢𑀺. 𑀢𑀼𑀫𑁆𑀳𑀸𑀤𑀺𑀲𑀤𑁆𑀤𑁂𑀦. 𑀩𑁆𑀭𑀸𑀳𑁆𑀫𑀡𑀸𑀇𑀘𑁆𑀘𑀦𑁂𑀦𑀸𑀪𑀺𑀳𑀺𑀢𑀫𑁂𑀯 𑀩𑀳𑀼𑀢𑁆𑀢𑀁 𑀩𑀳𑀯𑁄𑀢𑀺 𑀯𑀘𑀦𑁂𑀦𑀸𑀦𑀼𑀚𑁆𑀚𑀢𑁂. 𑀯𑀘𑀦𑀸𑀪𑀸𑀯𑁂 𑀓𑀣𑀁 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑁆𑀢𑀁𑀢𑁆𑀬𑀸𑀳- ‘𑀅𑀦𑀼𑀚𑁆𑀚𑀫𑀸𑀦𑀲𑁆𑀲𑀺’𑀘𑁆𑀘𑀸𑀤𑀺. 𑀅𑀦𑀼𑀚𑁆𑀚𑀫𑀸𑀦𑀲𑁆𑀲𑀸𑀢𑀺𑀅𑀦𑀼𑀯𑀤𑀺𑀢𑀩𑁆𑀩𑀲𑁆𑀲 𑀕𑀘𑁆𑀙𑀢𑀺𑀘𑁆𑀘𑀸𑀤𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀓𑀢𑁆𑀢𑀼𑀦𑁄.

𑀅𑀦𑀼𑀯𑀸𑀤𑁂𑀦𑀸𑀢𑀺 ¶ (𑀢𑀼𑀫𑁆𑀳𑀸𑀤𑀺) 𑀅𑀦𑀼𑀯𑀸𑀤𑁂𑀦. ‘‘𑀦𑀸𑀫𑀫𑁆𑀳𑀺 𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀧𑀞𑀫𑁄’’𑀢𑀺 (𑁩-𑁧-𑁫) 𑀓𑀘𑁆𑀘𑀸𑀦𑀯𑀘𑀦𑀁, 𑀢𑁂𑀦𑀸𑀳- ‘𑀢𑁂𑀦𑁂𑀯𑀺’𑀘𑁆𑀘𑀸𑀤𑀺. 𑀅𑀲𑀫𑀸𑀦𑀸𑀥𑀺𑀓𑀭𑀡𑀢𑁆𑀢𑀸 𑀳𑀺 ‘𑀢𑀬𑀸𑀧𑀘𑁆𑀘𑀢𑁂’𑀘𑁆𑀘𑀸𑀤𑁄 𑀦 𑀪𑀯𑀢𑀺. 𑀢𑀣𑀸𑀳𑀺 𑀢𑀬𑁂𑀘𑁆𑀘𑁂𑀢𑀁 𑀓𑀢𑁆𑀢𑀼𑀯𑀸𑀘𑀻 𑀧𑀘𑁆𑀘𑀢𑁂𑀘𑁆𑀘𑁂𑀢𑀁 𑀓𑀫𑁆𑀫𑀯𑀸𑀘𑀻 𑀓𑀫𑁆𑀫𑁂 𑀆𑀔𑁆𑀬𑀸𑀢𑀧𑁆𑀧𑀘𑁆𑀘𑀬 𑀯𑀺𑀥𑀸𑀦𑀢𑁄.

‘𑀏𑀳𑀺 𑀫𑀜𑁆𑀜𑁂 𑀭𑀣𑁂𑀦 𑀕𑀫𑀺𑀲𑁆𑀲𑀲𑀻’𑀢𑀺 𑀧𑀸𑀡𑀺𑀦𑀺𑀬𑀸𑀢𑀺𑀫𑀢𑀦𑀺𑀧𑁆𑀨𑀸𑀤𑀦𑀓𑁆𑀓𑀫𑁄 (𑀦𑀺𑀭𑀲𑁆𑀲) 𑀢𑁂 ‘𑀧𑀭𑀺𑀳𑀸𑀲𑁂’𑀘𑁆𑀘𑀸𑀤𑀺𑀦𑀸. 𑀫𑀜𑁆𑀜𑀢𑀺𑀲𑁆𑀲 𑀧𑀬𑁄𑀕𑁂𑀢𑀺 𑀉𑀧𑀧𑀤𑀯𑀲𑁂𑀦 𑀫𑀦𑀥𑀸𑀢𑀼𑀲𑁆𑀲 𑀧𑀬𑁄𑀕𑁂. 𑀥𑀸𑀢𑀼𑀫𑁆𑀳𑀸𑀢𑀺 𑀕𑀫𑀺𑀆𑀤𑀺𑀢𑁄. 𑀉𑀢𑁆𑀢𑀫 𑀧𑀼𑀭𑀺𑀲𑁂𑀓𑀯𑀘𑀦𑁂 𑀧𑀢𑁆𑀢𑁂𑀢𑀺 𑀕𑀫𑀺𑀲𑁆𑀲𑀸𑀫𑀻𑀢𑀺 𑀧𑀢𑁆𑀢𑁂. 𑀫𑀚𑁆𑀛𑀺𑀫𑁄𑀪𑀺𑀫𑀢𑁄𑀢𑀺 𑀕𑀫𑀺𑀲𑁆𑀲𑀲𑀻𑀢𑁆𑀬𑀪𑀺𑀫𑀢𑁄. 𑀫𑀚𑁆𑀛𑀺𑀫𑁂 𑀧𑀢𑁆𑀢𑁂𑀢𑀺 𑀫𑀜𑁆𑀜𑀲𑁂𑀢𑀺 𑀧𑀢𑁆𑀢𑁂, 𑀉𑀢𑁆𑀢𑀫𑁂𑀓𑀯𑀘𑀦 𑀫𑀺𑀝𑁆𑀞𑀦𑁆𑀢𑀺 𑀫𑀜𑁆𑀜𑁂𑀢𑀺𑀝𑁆𑀞𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀫𑀜𑁆𑀜𑀲𑁂 𑀢𑁆𑀯𑀁 𑀭𑀣𑁂𑀦 𑀕𑀫𑀺𑀲𑁆𑀲𑀸𑀫𑀻𑀢𑀺 𑀯𑀢𑁆𑀢𑀩𑁆𑀩𑁂 𑀫𑀜𑁆𑀜𑁂 𑀢𑁆𑀯𑀁 𑀭𑀣𑁂𑀦 𑀕𑀫𑀺𑀲𑁆𑀲𑀲𑀻𑀢𑀺 𑀪𑀯𑀢𑀻𑀢𑀺 (𑀯𑀼𑀢𑁆𑀢’’𑀦𑁆𑀢𑀺). 𑀏𑀳𑀺 𑀫𑀜𑁆𑀜𑁂𑀘𑁆𑀘𑀸𑀤𑀺 𑀦 𑀓𑀺𑀜𑁆𑀘𑀺 𑀯𑀼𑀢𑁆𑀢𑀁 𑀯𑀼𑀢𑁆𑀢𑀺𑀬𑀁. 𑀬𑀣𑀸𑀲𑀯𑀺𑀲𑀬𑁂𑀯𑀫𑀚𑁆𑀛𑀺𑀫𑀼𑀢𑁆𑀢𑀫𑀸 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀢𑀣𑀸𑀲𑀫𑁆𑀩𑀦𑁆𑀥𑀫𑀼𑀧𑀤𑀲𑁆𑀲𑀬𑀫𑀸𑀳- ‘𑀏𑀯𑀫𑁂𑀢𑁆𑀣𑀸𑀪𑀺𑀲𑀫𑁆𑀩𑀦𑁆𑀥𑁄’𑀘𑁆𑀘𑀸𑀤𑀺. 𑀧𑀭𑀸𑀪𑀺𑀫𑀢𑀁 𑀲𑀫𑁆𑀩𑀦𑁆𑀥𑀁 𑀓𑀼𑀭𑀼𑀫𑀸𑀦𑁄 𑀆𑀳- ‘𑀦𑀢𑁆𑀯𑁂𑀯’𑀫𑀺𑀘𑁆𑀘𑀸𑀤𑀺. 𑀅𑀣𑁄𑀘𑁆𑀘𑀢𑁂𑀘𑁆𑀘𑀸𑀤𑀺𑀦𑀸 𑀧𑀭𑀸𑀥𑀺𑀧𑁆𑀧𑀸𑀬𑀫𑀸𑀳- ‘𑀬𑀤𑁂’𑀘𑁆𑀘𑀸𑀤𑀺.

𑀬𑀤𑁂𑀯𑀫𑀪𑀺𑀲𑀫𑁆𑀩𑀦𑁆𑀥𑁄𑀢𑀺 ‘𑀫𑀜𑁆𑀜𑀲𑁂 𑀢𑁆𑀯𑀁 𑀭𑀣𑁂𑀦 𑀕𑀘𑁆𑀙𑀸𑀫𑀻’𑀢𑀺 𑀬𑀤𑀸 𑀏𑀯𑀫𑀪𑀺𑀲𑀫𑁆𑀩𑀦𑁆𑀥𑁄 𑀓𑀭𑀻𑀬𑀢𑀻𑀢𑁆𑀬𑀢𑁆𑀣𑁄. 𑀲𑁄 𑀘𑁂𑀯𑀫𑀦𑀼𑀕𑀢𑁄𑀢𑀺 ‘𑀫𑀜𑁆𑀜𑁂 𑀅𑀳𑀁 𑀢𑁆𑀯𑀁 𑀭𑀣𑁂𑀦 𑀕𑀘𑁆𑀙𑀲𑀺’𑀘𑁆𑀘𑁂𑀯𑀁 𑀲𑁄 𑀘 𑀧𑀬𑁄𑀕𑁄 𑀅𑀦𑀼𑀕𑀢𑁄𑀢𑁆𑀬𑀢𑁆𑀣𑁄. 𑀧𑀓𑀸𑀭𑀦𑁆𑀢𑀭𑀓𑀧𑁆𑀧𑀦𑀸𑀬𑀸𑀢𑀺 ‘𑀫𑀜𑁆𑀜𑀲𑁂 𑀢𑁆𑀯𑀁 𑀭𑀣𑁂𑀦 𑀕𑀘𑁆𑀙𑀸𑀫𑀻’𑀢𑀺 𑀅𑀦𑁆𑀢𑀭𑀓𑀧𑁆𑀧𑀦𑀸𑀬.

𑀢𑁂𑀦𑀘𑀸𑀢𑀺 𑀲𑀫𑀸𑀲𑀺𑀢𑀢𑁆𑀢𑁂𑀦 𑀘,𑀲𑁆𑀲𑀢𑁆𑀬𑀸𑀤𑀻𑀦𑀫𑀕𑁆𑀕𑀳𑀡𑀦𑁆𑀢𑀺 𑀬𑀤𑀺 𑀢𑁂𑀲𑀁 𑀕𑀳𑀡𑀁 𑀲𑀺𑀬𑀸 𑀆𑀈𑀲𑁆𑀲𑀸𑀤𑀻𑀲𑀽𑀢𑀺 𑀦 𑀲𑀫𑀸𑀲𑁂𑀦 𑀯𑀤𑁂𑀬𑁆𑀬.

𑀓𑀢𑀸𑀓𑀢𑀧𑁆𑀧𑀲𑀗𑁆𑀕𑀻𑀬𑁄 𑀯𑀺𑀥𑀺 𑀲𑁄 𑀦𑀺𑀘𑁆𑀘𑁄-𑀦𑀺𑀘𑁆𑀘𑀸 𑀩𑀮𑀯𑀸𑀢𑀺 𑀧𑀞𑀫𑀁 𑀯𑀼𑀓 𑀪𑀯𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳- ‘𑀓𑀢𑀸𑀓𑀢𑀧𑁆𑀧𑀲𑀗𑁆𑀕𑀺𑀢𑁆𑀢𑀸’𑀘𑁆𑀘𑀸𑀤𑀺.

𑀅𑀆𑀤𑁆𑀬𑀧𑁂𑀓𑁆𑀔𑁂𑀢𑀺 𑀅𑀆𑀤𑀻𑀲𑀽𑀢𑀺 𑀅𑀦𑀼𑀯𑀢𑁆𑀢𑀅𑀆𑀤𑁆𑀬𑀧𑁂𑀓𑁆𑀔𑁂.

𑀦𑀦𑀼 𑀘 ‘𑀲𑁄𑀲𑁆𑀲𑀸’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀓𑁆𑀯𑀘𑀺 𑀯𑀺𑀓𑀭𑀡𑀸𑀦 ‘‘𑀫𑀺𑀘𑁆𑀘𑁂𑀯 (𑁫-𑁧𑁬𑁧) 𑀮𑁄𑀧𑁄 ¶ 𑀲𑀺𑀬𑀸𑀢𑀺 ‘𑀓𑀭𑀲𑁆𑀲 𑀓𑀼’𑀦𑁆𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁄𑀤𑀦𑀫𑀦𑀲𑀺 𑀦𑀺𑀥𑀸𑀬𑀸𑀳- ‘𑀓𑁆𑀯𑀘𑀺 𑀯𑀺𑀓𑀭𑀡𑀸𑀦𑀁 𑀢𑁆𑀬𑀸𑀤𑀺. 𑀅𑀜𑁆𑀜𑀢𑁆𑀭𑀧𑀬𑁄𑀕𑀸𑀦𑀼𑀲𑀭𑀡𑀸 𑀧𑀬𑁄𑀕𑀸𑀦𑀼𑀲𑀭𑀡𑀁 𑀯𑀺𑀦𑀸 𑀑𑀮𑁄𑀧𑁄 𑀯𑀺𑀜𑁆𑀜𑀸𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀓𑀸𑀭𑀺𑀬𑀁 𑀆𑀳𑀗𑁆𑀲𑀗𑁆𑀔𑀸𑀢𑀫𑀲𑁆𑀲 𑀅𑀢𑁆𑀣𑀻𑀢𑀺 𑀓𑀸𑀭𑀺𑀬𑀻, 𑀢𑁂𑀦 𑀅𑀧𑀭𑁄 𑀓𑀸𑀭𑀺𑀬𑀻 𑀳𑀜𑁆𑀜𑀢𑀺 𑀳𑀺𑀁𑀲𑀻𑀬𑀢𑀻𑀢𑀺 𑀅𑀢𑁆𑀣𑁄.

𑀲𑀳𑁄𑀲𑁆𑀲𑁂𑀳𑀻𑀢𑀺 𑀓𑀭𑀲𑁆𑀲 𑀑𑀓𑀸𑀭𑁂𑀦 𑀲𑁆𑀲𑁂𑀦 𑀘 𑀲𑀳 𑀳𑀸𑀲𑁆𑀲 𑀲𑁆𑀲𑁂𑀦 𑀲𑀳𑀸𑀢𑀺 𑀅𑀢𑁆𑀣𑁄. 𑀅𑀣 𑀓𑀣𑀁 𑀑𑀲𑁆𑀲𑁂𑀳𑀺 𑀲𑀳𑁂𑀯 𑀯𑀼𑀢𑁆𑀢𑀸 𑀤𑁂𑀲𑁄𑀢𑀺𑀯𑀺𑀜𑁆𑀜𑀸𑀬𑀢𑀻𑀘𑁆𑀘𑀸𑀲𑀗𑁆𑀓𑀺𑀬𑀸𑀳- ‘𑀲𑀳𑀯𑀘𑀦𑀲𑀸𑀫𑀢𑁆𑀣𑀺𑀬𑀸’𑀢𑀺. 𑀲𑀳 𑀲𑀤𑁆𑀤𑀲𑁆𑀲 𑀲𑀳𑀢𑁆𑀣(𑀲𑁆𑀲 𑀘) 𑀲𑁄𑀲𑁆𑀲 𑀲𑁆𑀲𑁂𑀦𑀸𑀢𑀺 𑀓𑀣𑀦𑀲𑀸𑀫𑀢𑁆𑀣𑀺𑀬𑀸𑀢𑀺 𑀅𑀢𑁆𑀣𑁄. 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀢𑀺 ‘𑀏𑀯𑀁 𑀫𑀜𑁆𑀜𑀢𑁂’𑀘𑁆𑀘𑀸𑀤𑀺𑀦𑀸. 𑀏𑀯𑀁 𑀫𑀜𑁆𑀜𑀢𑁂- 𑀑𑀲𑁆𑀲𑀸𑀦 𑀫𑀦𑀸𑀤𑁂𑀲𑀺𑀢𑁆𑀢𑁂 𑀇𑀘𑁆𑀘𑀸𑀤𑀺𑀦𑀸 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀫𑀺𑀯 𑀮𑀓𑁆𑀔𑀻𑀬𑀢𑁂… 𑀢𑁂𑀦𑁂𑀯 𑀧𑀸𑀞𑁂𑀦𑀲𑀳𑀯𑀘𑀦𑀲𑀸𑀫𑀢𑁆𑀣𑀺𑀬𑀲𑁆𑀲 𑀧𑀢𑀻𑀢𑀺𑀲𑀩𑁆𑀪𑀸𑀯𑀢𑁄. 𑀦 𑀢𑀼 ‘𑀏𑀯𑀁𑀫𑀜𑁆𑀜𑀢𑁂𑀑𑀲𑁆𑀲𑀸𑀦𑀫𑀦𑁆𑀢𑀸𑀤𑁂𑀲𑀢𑁆𑀢𑁂 𑀳𑀸𑀲𑁆𑀲𑀘𑀸𑀢𑀺 𑀯𑀘𑀦𑀫𑀦𑀢𑁆𑀣𑀓𑀁 𑀲𑀺𑀬𑀸 𑀳𑀸 𑀢𑁄 𑀘𑁂𑀢𑁆𑀯𑁂𑀯 𑀯𑀤𑁂𑀢𑁆𑀬 𑀑𑀲𑁆𑀲𑀸𑀦𑀫𑀦𑀸𑀤𑁂𑀲𑀺𑀢𑁆𑀢𑁂’𑀘𑁆𑀘𑀸𑀤𑀺𑀦𑀸 𑀧𑀸𑀞𑁂𑀦… 𑀑𑀲𑁆𑀲𑀸𑀦𑀫𑀦𑁆𑀢𑀸𑀤𑁂𑀲𑀧𑁆𑀧𑀲𑀗𑁆𑀕𑀲𑁆𑀲𑁂𑀯𑀸𑀪𑀸𑀯𑀢𑁄. 𑀦𑀳𑁂𑀢𑁆𑀣𑀸𑀤𑁂𑀲𑀸𑀤𑁂𑀲𑀺 𑀲𑀫𑁆𑀩𑀦𑁆𑀥𑀙𑀝𑁆𑀞𑀻 𑀅𑀢𑁆𑀣𑀺… 𑀲𑁄𑀲𑁆𑀲𑀸𑀢𑀺 𑀯𑀺𑀲𑁂𑀲𑀦𑀙𑀝𑁆𑀞𑀺𑀬𑀸𑀧𑁆𑀧𑀥𑀸𑀦𑀸𑀬 𑀲𑁆𑀲𑁂𑀦𑀸𑀢𑀺 𑀲𑀳𑀢𑁆𑀣𑁂 𑀢𑀢𑀺𑀬𑀸𑀬 𑀘 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸. 𑀉𑀪𑀬𑀢𑁆𑀣𑀸𑀢𑀺 𑀲𑁆𑀲𑀢𑁆𑀬𑀸𑀤𑀻𑀲𑀼𑀲𑁆𑀲𑀸𑀤𑀻𑀲𑀼 𑀘.

𑀧𑀼𑀩𑁆𑀩𑀲𑀭𑀮𑁄𑀧𑁄𑀢𑀺 𑀯𑀺𑀓𑀭𑀡𑀮𑁄𑀧𑁄 𑀆𑀓𑀸𑀭𑀸𑀤𑁂𑀲𑁂 𑀘 𑀤𑁆𑀯𑀻𑀲𑀼 𑀯𑀸𑀭𑁂𑀲𑀼 𑀧𑀼𑀩𑁆𑀩𑀲𑀭𑀮𑁄𑀧𑁄.

𑀅𑀕𑀸𑀢𑀺 𑀈𑀫𑁆𑀳𑀺 𑀮𑀮𑁄𑀧𑁄, 𑀆𑀓𑀸𑀭𑀸𑀤𑁂𑀲𑁂 𑀘 𑀧𑀼𑀩𑁆𑀩𑀲𑀭𑀮𑁄𑀧𑁄.

𑀅𑀕𑀜𑁆𑀙𑀸 𑀅𑀕𑀘𑁆𑀙𑀻𑀢𑀺 𑀦𑀺𑀕𑁆𑀕𑀳𑀻𑀢𑀸𑀕𑀫𑁂𑀦.

𑀉𑀚𑁆𑀛𑀺𑀢𑀸𑀦𑀼𑀩𑀦𑁆𑀥𑀸𑀦𑀦𑁆𑀢𑀺 𑀧𑀭𑀺𑀘𑁆𑀘𑀢𑁆𑀢𑀸𑀦𑀼𑀩𑀦𑁆𑀥𑀸𑀦𑀁.

𑀲𑀼𑀢𑁆𑀢𑁂 ¶ 𑀆𑀢𑀺 𑀇𑀫𑀺𑀦𑀸 𑀉𑀪𑀬𑀢𑁆𑀣 𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀕𑀳𑀺𑀢𑀦𑁆𑀢𑀺 𑀆𑀳- ‘𑀆’𑀢𑀺𑀆𑀤𑀺.

𑀅𑀪𑀺𑀭𑀽𑀳𑀻𑀢𑀺 ‘‘𑀩𑁆𑀬𑀜𑁆𑀚𑀦𑁂 𑀤𑀻𑀖𑀭𑀲𑁆𑀲𑀸’’𑀢𑀺 (𑁧-𑁩𑁩) 𑀤𑀻𑀖𑁄.

𑀧𑀭𑁄𑀓𑁆𑀔𑀸𑀧𑀭𑀦𑀸𑀫𑀥𑁂𑀬𑁆𑀬𑀸𑀦𑀦𑁆𑀢𑀺 𑀧𑀭𑁄𑀓𑁆𑀔𑀸𑀢𑀺𑀅𑀜𑁆𑀜𑀦𑀸𑀫𑀸𑀦𑀁.

𑀢𑁂𑀳𑁂𑀯𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑀼𑀢𑁆𑀢𑀤𑁆𑀯𑀬𑁂𑀳𑁂𑀯, 𑀲𑀳𑀘𑀭𑀺𑀢𑀜𑀸𑀬𑁂𑀦𑀸𑀢𑀺 ‘‘𑀪𑀽𑀢𑁂 𑀈 𑀉𑀁’’𑀇𑀘𑁆𑀘𑀸𑀤𑁄 (𑁬-𑁪) 𑀧𑀭𑀘𑁆𑀙𑀓𑁆𑀓𑁂 𑀧𑀞𑀫 𑀧𑀼𑀭𑀺𑀲𑁂𑀓𑀯𑀘𑀦𑀆𑀓𑀸𑀭𑁂𑀦 ‘‘𑀅𑀦𑀚𑁆𑀚𑀢𑀦𑁂 𑀆𑀜𑀼’’𑀇𑀘𑁆𑀘𑀸𑀤𑁄 (𑁬-𑁫) 𑀧𑀼𑀩𑁆𑀩𑀘𑁆𑀙𑀓𑁆𑀓𑁂 𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦 𑀆𑀓𑀸𑀭𑁂𑀦 𑀘 𑀲𑀳𑀘𑀭𑀺𑀢𑀸𑀓𑀸𑀭𑀸𑀦𑀫𑁂𑀯 𑀧𑀘𑁆𑀘𑀸𑀲𑀢𑁆𑀢𑀺𑀬𑀸 𑀲𑀳𑀘𑀭𑀺𑀢𑀸 𑀧𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀜𑀸𑀬𑁂𑀦 𑀕𑀳𑀡𑀦𑁆𑀢𑀺 𑀅𑀢𑁆𑀣𑁄. 𑀕𑀳𑀺𑀢𑀢𑁆𑀢𑀸 𑀢𑁆𑀯𑀸𑀤𑀺 𑀲𑀫𑁆𑀩𑀦𑁆𑀥𑀻 𑀕𑀬𑁆𑀳𑀢𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀲𑁆𑀲𑀬𑀓𑀭𑀡𑀁 𑀦𑀸𑀫 𑀩𑁆𑀬𑀢𑁆𑀢𑀺𑀯𑀲𑁂𑀦𑁂𑀯, 𑀦 𑀲𑀸𑀫𑀜𑁆𑀜𑀯𑀲𑁂𑀦𑀸𑀢𑀺 𑀆𑀳 ‘𑀏𑀢𑁂𑀦𑀸’𑀢𑀺𑀆𑀤𑀺.

𑀅𑀦𑁆𑀢𑀲𑀭𑀸𑀤𑀺𑀮𑁄𑀧𑁄 ‘‘𑀭𑀸𑀦𑀼𑀩𑀦𑁆𑀥𑁂𑀦𑁆𑀢𑀲𑀭𑀸𑀤𑀺𑀲𑁆𑀲𑀸’’𑀢𑀺 (𑁪-𑁧𑁩𑁨).

𑀆𑀤𑁂𑀲𑀸𑀦𑀦𑁆𑀢𑀺 𑀅𑀆𑀤𑀻𑀦𑀫𑀸𑀤𑁂𑀲𑀸𑀦𑀁.

𑀧𑀼𑀩𑁆𑀩𑀲𑁆𑀫𑀺𑀦𑁆𑀢𑀺 𑀅𑀓𑀸𑀲𑀺𑀦𑁆𑀢𑀺 𑀏𑀢𑁆𑀣.

𑀓𑁆𑀭𑀺𑀬𑀢𑁆𑀣𑀯𑀺𑀳𑀺𑀢𑀸𑀦𑀫𑁆𑀧𑀺 𑀥𑀸𑀢𑀼𑀯𑀺𑀳𑀺𑀢𑀸𑀦𑀫𑁆𑀧𑀺 𑀅𑀜𑁆𑀜𑁂𑀲𑀁 𑀢𑀩𑁆𑀩𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀦 𑀕𑀳𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀫𑁆𑀳𑀻𑀢𑀺𑀆𑀤𑀻𑀦𑀺 𑀯𑀢𑁆𑀢𑀫𑀸𑀦𑁂 𑀢𑁆𑀯𑀸𑀤𑀻𑀲𑀼 𑀯𑀸 𑀫𑀺𑀫𑀸𑀦𑀫𑀼𑀤𑀸𑀳𑀭𑀡𑀸𑀦𑀺.

𑀫𑀼𑀬𑁆𑀳𑀸𑀫𑀺 ¶ 𑀫𑀼𑀳=𑀯𑁂𑀘𑀺𑀢𑁆𑀢𑁂 ‘‘𑀤𑀺𑀯𑀸𑀤𑀻𑀳𑀺 𑀬𑀓’’ (𑁫-𑁨𑁧).

𑀚𑀸𑀦𑀸𑀢𑀺 ‘‘𑀜𑀸𑀲𑁆𑀲 𑀦𑁂 𑀚𑀸’’ (𑁫-𑁧𑁨𑁦)

𑀇𑀫𑀺𑀦𑀸 𑀓𑀢𑀸 𑀓𑀬𑀺𑀭𑀸𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁.

𑀏𑀬𑁆𑀬𑀼𑀫𑀸𑀤𑀻𑀦𑀁 𑀏𑀬𑁆𑀬𑀲𑁆𑀲𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀉𑀧𑀸𑀤𑀺𑀯𑀚𑁆𑀚𑀺𑀢𑀲𑁆𑀲𑀸𑀢𑀺 𑀯𑀺𑀜𑁆𑀜𑀸𑀬𑀢𑀺.

𑀑𑀓𑀸𑀭𑁄 𑀕𑀼𑀭𑀼𑀢𑀺 𑀲𑀁𑀬𑁄𑀕𑀧𑀼𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁.

𑀯𑀺𑀓𑀭𑀡𑀲𑀤𑁆𑀤𑀲𑁆𑀲 𑀅𑀜𑁆𑀜𑀣𑀸𑀧𑀺 𑀩𑁆𑀬𑀯𑀘𑁆𑀙𑁂𑀤𑀓𑀢𑁆𑀢𑀲𑀫𑁆𑀪𑀯𑁂 𑀇𑀥𑀸𑀥𑀺𑀧𑁆𑀧𑁂𑀢𑀁 𑀩𑁆𑀬𑀯𑀘𑁆𑀙𑁂𑀤𑀓𑀢𑁆𑀢𑀫𑁆𑀧𑀝𑀺𑀧𑀸𑀤𑁂𑀢𑀼𑀫𑀸𑀳- ‘𑀬𑀤𑀺𑀧𑀺’𑀘𑁆𑀘𑀸𑀤𑀺.

𑀅𑀜𑁆𑀜𑀢𑁆𑀭𑀸𑀧𑀻𑀢𑀺 𑀪𑀯𑁂𑀬𑁆𑀬𑀸𑀫𑀼𑀪𑀯𑁂𑀬𑁆𑀬𑀸𑀫𑀇𑀘𑁆𑀘𑀢𑁆𑀭𑀸𑀧𑀺.

𑀇𑀢𑀺 𑀫𑁄𑀕𑁆𑀕𑀮𑁆𑀮𑀸𑀦𑀧𑀜𑁆𑀘𑀺𑀓𑀸𑀝𑀻𑀓𑀸𑀬𑀁 𑀲𑀸𑀭𑀢𑁆𑀣𑀯𑀺𑀮𑀸𑀲𑀺𑀦𑀺𑀬𑀁

𑀙𑀝𑁆𑀞𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀲𑀩𑁆𑀩𑀣𑀸 𑀲𑀸𑀭𑀢𑁆𑀣𑀯𑀺𑀮𑀸𑀲𑀺𑀦𑀻 𑀝𑀻𑀓𑁂𑀢𑀺.

𑀲𑀩𑁆𑀩𑀤𑀸 ¶ 𑀲𑀼𑀪𑀤𑀸𑀬𑀺𑀢𑁆𑀢𑀸, 𑀲𑀢𑁆𑀢𑀸𑀦𑀦𑁆𑀢𑀦𑀺𑀲𑁂𑀯𑀺𑀢𑁂;

𑀧𑀲𑀢𑁆𑀣𑁂-𑀦𑁆𑀯𑀢𑁆𑀣𑀲𑀜𑁆𑀜𑀸𑀬, 𑀧𑀜𑁆𑀜𑀸𑀢𑁂 𑀲𑀼𑀪𑀲𑀜𑁆𑀜𑀺𑀢𑁂.

𑀘𑀸𑀕𑀯𑀺𑀓𑁆𑀓𑀫𑀧𑀜𑁆𑀜𑀸𑀦𑀼𑀤𑁆𑀤𑀬𑀸𑀤𑀺𑀕𑀼𑀡𑀲𑀸𑀮𑀺𑀦𑀸;

𑀲𑀼𑀪𑀲𑁂𑀦𑀸𑀥𑀺𑀦𑀸𑀣𑁂𑀦, 𑀓𑀸𑀭𑀺𑀢𑁂 𑀯𑀲𑀢𑀸 𑀲𑀢𑀸.

𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑁂, 𑀯𑀺𑀳𑀸𑀭𑁂 𑀲𑀸𑀥𑀼𑀕𑁄𑀘𑀭𑁂;

𑀫𑀦𑁄𑀦𑀼𑀓𑀽𑀮𑁂 𑀬𑁄𑀕𑀻𑀦𑀁, 𑀯𑀭𑁂 𑀯𑀺𑀓𑁆𑀓𑀫𑀲𑀼𑀦𑁆𑀤𑀭𑁂.

𑀣𑁂𑀭𑁂𑀦 𑀭𑀘𑀺𑀢𑀸 𑀲𑀸𑀬𑀁, 𑀲𑀸𑀲𑀦𑀼𑀚𑁆𑀚𑁄𑀢𑀦𑀢𑁆𑀣𑀺𑀦𑀸;

𑀝𑀻𑀓𑀸 𑀕𑀼𑀭𑀼𑀧𑀤𑀫𑁆𑀪𑁄𑀚, 𑀭𑀚𑁄𑀫𑀢𑁆𑀣𑀓𑀲𑁂𑀯𑀺𑀦𑀸.

𑁫. 𑀩𑀳𑀼𑀲𑁆𑀲𑀼𑀢𑀸𑀦𑀁 𑀯𑀺𑀜𑁆𑀜𑀽𑀦𑀁, 𑀧𑀭𑀫𑀢𑁆𑀣𑀸𑀯𑀕𑀸𑀳𑀺𑀦𑀁.

𑀧𑀯𑀢𑁆𑀢𑀢𑀼 𑀘𑀺𑀭𑀁 𑀘𑁂𑀢𑁄, 𑀭𑀜𑁆𑀚𑀬𑀦𑁆𑀢𑀻 𑀦𑀺𑀭𑀦𑁆𑀢𑀭𑀁.

𑀬𑁂𑀲𑀁 𑀦 𑀲𑀜𑁆𑀘𑀺𑀢𑀸 𑀧𑀜𑁆𑀜𑀸, 𑀦𑁂𑀓𑀲𑀢𑁆𑀢𑀦𑁆𑀢𑀭𑁄𑀘𑀺𑀢𑀸;

𑀲𑀫𑁆𑀫𑁄𑀳𑀩𑁆𑀪𑀳𑀢𑀸𑀯𑁂𑀢𑁂, 𑀦𑀸𑀯𑀩𑀼𑀚𑁆𑀛𑀦𑁆𑀢𑀺 𑀓𑀺𑀜𑁆𑀘𑀺𑀧𑀺.

𑀓𑀺𑀦𑁆𑀢𑁂𑀳𑀺 𑀧𑀸𑀤𑀲𑀼𑀲𑁆𑀲𑀽𑀲𑀸, 𑀬𑁂𑀲𑀁 𑀦𑀢𑁆𑀣𑀺 𑀕𑀼𑀭𑀽𑀦𑀺𑀳;

𑀬𑁂 𑀢𑀧𑁆𑀧𑀸𑀤𑀭𑀚𑁄𑀓𑀺𑀡𑁆𑀡𑀸, 𑀢𑁂𑀯 𑀲𑀸𑀥𑀽𑀯𑀺𑀯𑁂𑀓𑀺𑀦𑁄.

𑀧𑀼𑀜𑁆𑀜𑁂𑀦 𑀲𑀢𑁆𑀣𑀭𑀘𑀦𑀸𑀚𑀦𑀺𑀢𑁂𑀦 𑀢𑁂𑀦,

𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑀯𑀭𑁄𑀤𑀬𑀓𑀸𑀭𑀡𑁂𑀦;

𑀮𑁄𑀓𑀸𑀫𑀺𑀲𑁂𑀲𑀼𑀧𑀺 𑀓𑀺𑀮𑁂𑀲𑀫𑀮𑀸 𑀅𑀮𑀕𑁆𑀕𑁄,

𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑀯𑀭𑁄𑀤𑀬𑀫𑀸𑀘𑀭𑁂𑀬𑁆𑀬𑀁.

𑀬𑁂-𑀦𑀦𑁆𑀢𑀢𑀦𑁆𑀢𑀭𑀢𑀦𑀸𑀓𑀭𑀫𑀦𑁆𑀣𑀦𑁂𑀦,

𑀫𑀦𑁆𑀣𑀸𑀘 𑀮𑁄𑀮𑁆𑀮𑀲𑀺𑀢𑀜𑀸𑀡𑀯𑀭𑁂𑀦 𑀮𑀤𑁆𑀥𑀸;

𑀲𑀸𑀭𑀸𑀫𑀣𑀸𑀢𑀺 𑀲𑀼𑀔𑀺𑀢𑀸 𑀲𑀼𑀔𑀬𑀦𑁆𑀢𑀺 𑀘𑀜𑁆𑀜𑁂,

𑀢𑁂𑀫𑁂 𑀚𑀬𑀦𑁆𑀢𑀺 𑀕𑀼𑀭𑀯𑀸 𑀕𑀼𑀭𑀯𑁄 𑀕𑀼𑀡𑁂𑀳𑀺.

𑀝𑀻𑀓𑀸𑀬𑁄 𑀯𑀺𑀦𑀲𑀸𑀤𑀺𑀦𑀁 𑀯𑀺𑀭𑀘𑀬𑀻 𑀬𑁄 𑀓𑀡𑁆𑀞𑀪𑀽𑀲𑀸𑀧𑀭𑁄,

𑀯𑀺𑀜𑁆𑀜𑀽𑀦𑀁 𑀚𑀺𑀦𑀲𑀸𑀲𑀦𑀸𑀫𑀮𑀫𑀢𑀻𑀲𑁄-𑀓𑀸𑀲𑀺 𑀘𑀸𑀦𑀸𑀓𑀼𑀮𑀁;

𑀲𑀦𑁆𑀢𑁄𑀲𑀓𑁆𑀓𑀫𑀦𑁄𑀫𑀦𑁄𑀫𑀓𑀫𑀦𑁄 𑀲𑀩𑁆𑀪𑀸𑀯𑀦𑀻𑀬𑁄 𑀫𑀳𑀸,

𑀲𑀸𑀫𑀻 𑀫𑁂 𑀕𑀼𑀭𑀼𑀧𑀼𑀗𑁆𑀕𑀯𑁄 𑀯𑀺𑀚𑀬𑀢𑁂 𑀲𑀸𑀭𑀻𑀲𑀼𑀢𑁄-𑀬𑀁 𑀪𑀼𑀯𑀺.

𑀭𑀸𑀚𑀸 ¶ 𑀯𑀺𑀓𑁆𑀓𑀫𑀩𑀸𑀳𑀼 𑀩𑀸𑀳𑀺𑀢𑀭𑀺𑀧𑀽 𑀢𑀸𑀢𑁆𑀯𑀲𑁆𑀲 [𑀪𑀸𑀢𑀸𑀲𑁆𑀲] 𑀮𑁄𑀓𑀺𑀲𑁆𑀲𑀭𑁄,

𑀲𑀫𑁆𑀫𑀺𑀢𑁆𑀢𑀸𑀦𑀺𑀳𑀦𑁄 𑀢𑀺𑀲𑀻𑀳𑀴𑀧𑀢𑀻 𑀬𑁄𑀬𑀁 𑀫𑀳𑀸𑀯𑀺𑀓𑁆𑀓𑀫𑁄;

𑀦𑀺𑀩𑁆𑀪𑀻𑀢𑁄 [𑀢𑀺𑀲𑀽𑀭𑁄] 𑀯𑀺𑀚𑀬𑀸𑀤𑀺𑀩𑀸𑀳𑀼 𑀯𑀺𑀚𑀬𑀻 𑀲𑁄 𑀆𑀲𑀺 𑀮𑀗𑁆𑀓𑀺𑀲𑁆𑀲𑀭𑁄,

𑀢𑀁 𑀦𑀺𑀲𑁆𑀲𑀸𑀬 𑀨𑀮𑀁 𑀘𑀺𑀭𑀸𑀬 𑀨𑀮𑀢𑀜𑁆𑀘𑁂𑀢𑀁 𑀲𑀢𑀁 𑀲𑀦𑁆𑀢𑀢𑀁.

𑀅𑀕𑁆𑀕𑀫𑁆𑀫𑁄𑀢𑀺𑀯𑀁𑀲𑁂𑀦, 𑀅𑀪𑀬𑀸𑀭𑀸𑀫𑀲𑀸𑀫𑀺𑀦𑀸;

𑀧𑀜𑁆𑀘𑀺𑀓𑀸𑀯𑀡𑁆𑀡𑀦𑀸𑀪𑀽𑀢𑀸, 𑀲𑀸 𑀲𑀸𑀭𑀢𑁆𑀣𑀯𑀺𑀮𑀸𑀲𑀺𑀦𑀻.

𑀫𑁆𑀭𑀫𑁆𑀫𑀓𑁆𑀔𑀭𑀫𑀸𑀭𑁄𑀧𑁂𑀢𑁆𑀯𑀸, 𑀯𑀺𑀲𑁄𑀥𑁂𑀢𑁆𑀯𑀸 𑀬𑀣𑀸𑀩𑀮𑀁;

𑀲𑀓𑀺𑀬𑀩𑁆𑀬𑀯𑀳𑀸𑀭𑁂𑀦, 𑀢𑀺𑀣𑀻𑀯𑀲𑀼 𑀓𑀭𑀺𑀦𑁆𑀤𑀼𑀦𑀸.

𑀬𑀼𑀢𑁆𑀢𑁂 𑀯𑀲𑁆𑀲𑁂 𑀮𑀗𑁆𑀓𑀸𑀤𑀻𑀧𑀸, 𑀲𑀭𑀝𑁆𑀞𑀫𑀸𑀳𑀢𑀸 𑀧𑀼𑀦;

𑀪𑀸𑀲𑁆𑀲𑀧𑁆𑀧𑀤𑀻𑀧𑀓𑀸𑀢𑀦𑁆𑀢, 𑀓𑀸𑀲𑀺𑀓𑀸𑀧𑀜𑁆𑀘𑀺𑀓𑀸𑀤𑀺𑀳𑀺.

𑀲𑀁𑀲𑀦𑁆𑀤𑀺𑀢𑁆𑀯𑀸 𑀯𑀺𑀘𑀸𑀭𑁂𑀢𑁆𑀯𑀸, 𑀯𑀸𑀘𑁂𑀢𑁆𑀯𑀸𑀘 𑀧𑀼𑀦𑀧𑁆𑀧𑀼𑀦𑀁;

𑀊𑀦𑀸𑀥𑀺𑀓𑀸𑀤𑀺 𑀤𑁄𑀲𑀸𑀦𑀺, 𑀅𑀧𑀦𑁂𑀢𑁆𑀯𑀸 𑀲𑀺𑀦𑁂𑀲𑀺𑀦𑁂.

𑀲𑀼𑀤𑁆𑀥𑀝𑁆𑀞𑀓𑁂 𑀘 𑀯𑀲𑁆𑀲𑁂𑀲𑀸, 𑀧𑀸𑀧𑀺𑀢𑀸 𑀧𑀓𑀢𑀺𑀝𑁆𑀞𑀺𑀢𑀺𑀁;

𑀲𑀼𑀤𑁆𑀥𑀸𑀲𑀼𑀤𑁆𑀥𑀁𑀯 𑀤𑀲𑁆𑀲𑁂𑀦𑁆𑀢𑀻, 𑀲𑁄𑀥𑁂𑀢𑀼 𑀧𑀸𑀞𑀲𑀼𑀤𑁆𑀥𑀺𑀬𑀸.