📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪

𑀬𑀲𑁆𑀲 ¶ 𑀜𑀸𑀡𑀁 𑀲𑀤𑀸 𑀜𑀸𑀡𑀁, 𑀦𑀸𑀜𑁆𑀜𑁂𑀬𑁆𑀬𑀸 𑀜𑀸𑀡𑀓𑀁 𑀯𑀺𑀦𑀸;

𑀦𑀺𑀲𑁆𑀲𑁂𑀲𑀕𑀼𑀡𑀬𑀼𑀢𑁆𑀢𑀲𑁆𑀲, 𑀢𑀲𑁆𑀲 𑀦𑀢𑁆𑀯𑀸 𑀫𑀳𑁂𑀲𑀺𑀦𑁄.

𑀲𑀢𑁆𑀣𑀦𑁆𑀢𑀭𑀸 𑀲𑀫𑀸𑀤𑀸𑀬, 𑀲𑀸𑀭𑀁 𑀲𑀩𑁆𑀩𑀥𑀭𑀸 𑀢𑀣𑀸;

𑀓𑀭𑀺𑀬𑁆𑀬𑀢𑁂’𑀪𑀺𑀥𑀸𑀦𑀧𑁆𑀧-𑀤𑀻𑀧𑀓𑀲𑁆𑀲𑀢𑁆𑀣𑀯𑀡𑁆𑀡𑀦𑀸.

𑀧𑀡𑀸𑀫𑀸𑀤𑀺𑀯𑀡𑁆𑀡𑀦𑀸

[𑀓] 𑀇𑀥𑀸𑀬𑀁 𑀕𑀦𑁆𑀣𑀓𑀸𑀭𑁄 𑀧𑀞𑀫𑀫𑀢𑁆𑀢𑀦𑁄 𑀧𑀭𑁂𑀲𑀫𑁆𑀧𑀺 𑀲𑀫𑁆𑀫𑀸 𑀳𑀺𑀢𑀢𑁆𑀣𑀦𑀺𑀧𑁆𑀨𑀸𑀤𑀦𑀢𑁆𑀣𑀁 𑀧𑀼𑀜𑁆𑀜𑀲𑀫𑁆𑀧𑀤’𑀫𑀸𑀘𑀺𑀦𑁄𑀢𑀺 ‘‘𑀢𑀣𑀸𑀕𑀢𑁄’’𑀘𑁆𑀘𑀸𑀤𑀺𑀦𑀸. 𑀢𑀢𑁆𑀣 𑀓𑀭𑀼𑀡𑀸𑀓𑀭𑁄 𑀫𑀳𑀸𑀓𑀭𑀼𑀡𑀸𑀬 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑁄 𑀬𑁄 𑀢𑀣𑀸𑀕𑀢𑁄 𑀪𑀕𑀯𑀸 𑀓𑀭𑁄𑀧𑀬𑀸𑀢𑀁 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑀁 𑀲𑀼𑀔𑀧𑁆𑀧𑀤𑀁 𑀲𑀼𑀔𑀲𑁆𑀲 𑀧𑀢𑀺𑀝𑁆𑀞𑀸𑀦𑀪𑀽𑀢𑀁 𑀲𑀼𑀔𑀓𑀸𑀭𑀡𑀁 𑀯𑀸 𑀲𑀼𑀔𑀤𑀸𑀬𑀓𑀁 𑀯𑀸 𑀧𑀤𑀁 𑀦𑀺𑀩𑁆𑀩𑀸𑀦𑀁 𑀑𑀲𑀚𑁆𑀚 𑀘𑀚𑀺𑀢𑁆𑀯𑀸 𑀓𑀮𑀺𑀲𑀫𑁆𑀪𑀯𑁂 𑀤𑀼𑀓𑁆𑀔𑀓𑀸𑀭𑀡𑀪𑀽𑀢𑁂 ¶ 𑀪𑀯𑁂 𑀲𑀁𑀲𑀸𑀭𑁂 𑀓𑁂𑀯𑀮𑀤𑀼𑀓𑁆𑀓𑀭𑀁 𑀲𑀼𑀓𑀭𑁂𑀦𑀸𑀲𑀫𑁆𑀫𑀺𑀲𑁆𑀲𑀁 𑀅𑀘𑁆𑀘𑀦𑁆𑀢𑀤𑀼𑀓𑁆𑀓𑀭𑀁 𑀧𑀜𑁆𑀘𑀯𑀺𑀥𑀧𑀭𑀺𑀘𑁆𑀘𑀸𑀕𑀸𑀤𑀺𑀓𑀁 𑀓𑀭𑀁 𑀓𑀭𑁄𑀦𑁆𑀢𑁄 𑀧𑀭𑀢𑁆𑀣𑀁 𑀧𑀭𑁂𑀲𑀫𑀢𑁆𑀣𑀁𑀬𑁂𑀯 𑀅𑀓𑀸 𑀓𑀢𑀯𑀸, 𑀢𑀫𑁂𑀤𑀺𑀲𑀁 𑀢𑀣𑀸𑀕𑀢𑀁 𑀅𑀳𑀁 𑀦𑀫𑀸𑀫𑀺.

[𑀔] 𑀬𑀜𑁆𑀘 𑀥𑀫𑁆𑀫𑀁 𑀚𑀭𑀸𑀭𑀼𑀚𑀸𑀤𑀺𑀫𑀼𑀢𑁆𑀢𑀸 𑀚𑀭𑀸𑀭𑁄𑀕𑀸𑀤𑀻𑀳𑀺 𑀯𑀺𑀫𑀼𑀢𑁆𑀢𑀸 𑀫𑀼𑀦𑀺𑀓𑀼𑀜𑁆𑀚𑀭𑀸 𑀫𑀼𑀦𑀺𑀲𑁂𑀝𑁆𑀞𑀸 𑀪𑀕𑀯𑀦𑁆𑀢𑁄 𑀅𑀧𑀽𑀚𑀬𑀼𑀁 𑀧𑀽𑀚𑀺𑀢𑀯𑀦𑁆𑀢𑁄, 𑀢𑀣𑀸 𑀉𑀢𑁆𑀢𑀭𑁂 𑀉𑀢𑁆𑀢𑀫𑁂 𑀲𑀢𑁆𑀢𑀸𑀦𑀁 𑀯𑀸 𑀲𑀁𑀲𑀸𑀭𑀫𑀳𑁄𑀖𑀧𑀓𑁆𑀔𑀦𑁆𑀤𑀸𑀦𑀁 𑀢𑀢𑁄 𑀉𑀢𑁆𑀢𑀭𑀡𑀲𑀫𑀢𑁆𑀣𑁂 𑀬𑀳𑀺𑀁 𑀢𑀭𑁂 𑀬𑀲𑁆𑀫𑀺𑀁 𑀥𑀫𑁆𑀫𑀧𑁆𑀮𑀯𑁂 𑀞𑀺𑀢𑀸 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀦𑀯𑀲𑁂𑀦 𑀆𑀭𑀽𑀴𑁆𑀳𑀸 𑀦𑀭𑀸𑀦𑀭𑀸 𑀫𑀦𑀼𑀲𑁆𑀲𑀸 𑀘 𑀤𑁂𑀯𑀸 𑀘 𑀢𑀺𑀯𑀝𑁆𑀝𑀫𑁆𑀩𑀼𑀦𑀺𑀥𑀺𑀁 𑀓𑀺𑀮𑁂𑀲𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀯𑀝𑁆𑀝𑁂𑀳𑀺 𑀆𑀓𑀼𑀮𑀺𑀢𑀁 𑀲𑀁𑀲𑀸𑀭𑀫𑀳𑀫𑁆𑀩𑀼𑀭𑀸𑀲𑀺𑀁 𑀢𑀭𑀺𑀁𑀲𑀼 𑀢𑀺𑀡𑁆𑀡𑀸, 𑀅𑀖𑀧𑁆𑀧𑀳𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑀓𑀭𑀁, 𑀲𑀁𑀲𑀸𑀭𑀤𑀼𑀓𑁆𑀔𑀧𑁆𑀧𑀳𑀸𑀦𑀓𑀭𑀁 𑀯𑀸 𑀢𑀁 𑀥𑀫𑁆𑀫𑀫𑀧𑀺 𑀅𑀳𑀁 𑀦𑀫𑀸𑀫𑀺.

[𑀕] 𑀫𑀼𑀦𑀺𑀦𑁆𑀤𑁄𑀭𑀲𑀲𑀽𑀦𑀼𑀢𑀁 𑀪𑀕𑀯𑀢𑁄 𑀉𑀭𑁂 𑀲𑀫𑁆𑀪𑀯𑀥𑀫𑁆𑀫𑀤𑁂𑀲𑀦𑀸𑀬 𑀅𑀭𑀺𑀬𑀪𑀸𑀯𑀧𑁆𑀧𑀢𑁆𑀢𑀢𑀸𑀬 𑀫𑀼𑀦𑀺𑀦𑁆𑀤𑀲𑁆𑀲 𑀑𑀭𑀲𑀧𑀼𑀢𑁆𑀢𑀪𑀸𑀯𑀁 𑀕𑀢𑀁 𑀧𑀢𑁆𑀢𑀁 𑀦𑀼𑀢𑀁 𑀓𑀺𑀮𑁂𑀲𑀔𑁂𑀧𑀦𑀓𑀁 𑀲𑀼𑀧𑀼𑀜𑁆𑀜𑀔𑁂𑀢𑁆𑀢𑀁 𑀧𑀼𑀜𑁆𑀜𑀢𑁆𑀣𑀺𑀓𑀸𑀦𑀁 𑀧𑀼𑀜𑁆𑀜𑀩𑀻𑀚𑀯𑀺𑀭𑀼𑀳𑀦𑀝𑁆𑀞𑀸𑀦𑀁 𑀲𑀼𑀔𑁂𑀢𑁆𑀢𑀪𑀽𑀢𑀁 𑀪𑀼𑀯𑀦𑁂 𑀮𑁄𑀓𑁂 𑀲𑀼𑀢𑀁 𑀯𑀺𑀲𑁆𑀲𑀼𑀢𑀁 ¶ , 𑀲𑀼𑀢𑀥𑀭𑀁 𑀯𑀸 𑀓𑀺𑀮𑁂𑀲𑀲𑀯𑀦𑀸𑀪𑀸𑀯𑁂𑀦 𑀅𑀲𑁆𑀲𑀼𑀢𑀁 𑀅𑀧𑀸𑀡𑁄𑀧𑀺 𑀧𑀸𑀡𑁄 𑀓𑀭𑀻𑀬𑀺𑀢𑁆𑀣𑀸𑀢𑀺 𑀧𑀸𑀡𑀻𑀓𑀢𑁄, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄, 𑀲𑁄𑀯 𑀲𑀁𑀯𑀭𑁄 𑀏𑀢𑀲𑁆𑀲𑀢𑁆𑀣𑀻𑀢𑀺 𑀧𑀸𑀡𑀻𑀓𑀢𑀲𑀁𑀯𑀭𑁄, 𑀢𑀁 𑀧𑀸𑀡𑀻𑀓𑀢𑀲𑀁𑀯𑀭𑀁, 𑀯𑀭𑀁 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀲𑀤𑁂𑀯𑀓𑁂𑀳𑀺 𑀮𑁄𑀓𑁂𑀳𑀺 𑀧𑀢𑁆𑀣𑀦𑀻𑀬𑀁. ‘‘𑀤𑁂𑀯𑀸𑀧𑀺 𑀢𑀲𑁆𑀲 𑀧𑀺𑀳𑀬𑀦𑁆𑀢𑀺 𑀢𑀸𑀤𑀺𑀦𑁄’’𑀢𑀺 [𑀉𑀤𑀸. 𑁨𑁭] 𑀳𑀺 𑀯𑀼𑀢𑁆𑀢𑀁. 𑀲𑀤𑀸 𑀲𑀩𑁆𑀩𑀲𑁆𑀫𑀺𑀁 𑀓𑀸𑀮𑁂 𑀕𑀼𑀡𑁄𑀖𑁂𑀦 𑀲𑀻𑀮𑀸𑀤𑀺𑀕𑀼𑀡𑀲𑀫𑀽𑀳𑁂𑀦 𑀦𑀺𑀭𑀦𑁆𑀢𑀭𑀦𑁆𑀢𑀭𑀁 𑀅𑀯𑀺𑀘𑁆𑀙𑀺𑀦𑁆𑀦𑀫𑀸𑀦𑀲𑀁, 𑀧𑀭𑀺𑀧𑀼𑀡𑁆𑀡𑀘𑀺𑀢𑁆𑀢𑀁 𑀯𑀸 𑀕𑀡𑀫𑁆𑀧𑀺 𑀅𑀝𑁆𑀞𑀦𑁆𑀦𑀁 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀲𑀫𑀽𑀳𑀁 𑀅𑀧𑀺 𑀅𑀳𑀁 𑀦𑀫𑀸𑀫𑀻𑀢𑀺 𑀏𑀯𑀫𑁂𑀢𑁆𑀣 𑀢𑀺𑀡𑁆𑀡𑀫𑁆𑀧𑀺 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸.

[𑀖-𑀗] 𑀏𑀯𑀁 𑀧𑀼𑀜𑁆𑀜𑀲𑀫𑁆𑀧𑀤𑀫𑀸𑀘𑀺𑀦𑀺𑀢𑁆𑀯𑀸 𑀓𑀺𑀫𑀪𑀺𑀫𑀢𑀁 𑀲𑀸𑀥𑀦𑀻𑀬𑀫𑀺𑀘𑁆𑀘𑀸𑀳 ‘‘𑀧𑀓𑀸𑀲𑀺𑀲𑁆𑀲𑀫𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓’’𑀦𑁆𑀢𑀺. 𑀩𑀼𑀤𑁆𑀥𑀸𑀤𑀻𑀦𑀫𑀪𑀺𑀥𑀸𑀦𑀸𑀦𑀁 𑀲𑀭𑀽𑀧𑀯𑀲𑁂𑀦, 𑀮𑀺𑀗𑁆𑀕𑀯𑀲𑁂𑀦 𑀘 𑀧𑀭𑀺𑀤𑀻𑀧𑀦𑀢𑁄 𑀧𑀓𑀸𑀲𑀦𑀢𑁄 ‘‘𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀲𑀢𑁆𑀣𑀁 𑀧𑀓𑀸𑀲𑀺𑀲𑁆𑀲𑀁 𑀅𑀦𑁆𑀢𑁄𑀪𑀸𑀯𑁂𑀦 𑀦𑀺𑀧𑁆𑀨𑀦𑁆𑀦𑀁 𑀩𑀳𑀺𑀪𑀸𑀯𑁂𑀦 𑀧𑀓𑀸𑀲𑀺𑀲𑁆𑀲𑀁. 𑀅𑀦𑁆𑀢𑁄𑀪𑀸𑀯𑀲𑁆𑀲 𑀳𑀺 𑀩𑀳𑀺𑀪𑀸𑀯𑀫𑀧𑁂𑀓𑁆𑀔𑀺𑀢𑁆𑀯𑀸 𑀪𑀸𑀯𑀺𑀢𑀫𑀼𑀧𑀧𑀦𑁆𑀦𑀁. 𑀦𑀦𑀼 𑀲𑀦𑁆𑀢𑁂𑀯 𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀁 𑀦𑀸𑀫𑀮𑀺𑀗𑁆𑀕𑀧𑁆𑀧𑀓𑀸𑀲𑀦𑀸𑀦𑁆𑀬𑀫𑀭𑀓𑁄𑀲𑀢𑀺𑀓𑀡𑁆𑀟𑁄𑀧𑁆𑀧𑀮𑀺𑀦𑁆𑀬𑀸𑀤𑁆𑀬𑀪𑀺𑀥𑀸𑀦𑀲𑀢𑁆𑀣𑀸𑀦𑀺, 𑀧𑀸𑀡𑀺𑀦𑀺 𑀩𑁆𑀬𑀸𑀟𑀺𑀯𑀭𑀭𑀼𑀘𑀺𑀘𑀦𑁆𑀤𑀕𑁄𑀫𑀺 𑀭𑀼𑀤𑁆𑀤𑀯𑀸𑀫𑀦𑀸𑀤𑀺𑀯𑀺𑀳𑀺𑀢𑀸𑀦𑀺 𑀘 𑀮𑀺𑀗𑁆𑀕𑀲𑀢𑁆𑀣𑀸𑀦𑀺, 𑀢𑀢𑁄 𑀓𑀺𑀫𑀺𑀤𑀫𑀼𑀘𑁆𑀘𑀢𑁂 𑀇𑀘𑁆𑀘𑀸𑀳 ‘‘𑀦𑀸𑀫𑀮𑀺𑀗𑁆𑀕𑀸𑀦𑀺 𑀩𑀼𑀤𑁆𑀥𑀪𑀸𑀲𑀺𑀢𑀲𑁆𑀲𑀸𑀭𑀳𑀸𑀦𑀺 𑀤𑀲𑁆𑀲𑀬𑀦𑁆𑀢𑁄’’𑀢𑀺. 𑀏𑀢𑁂𑀦 𑀲𑀦𑁆𑀢𑁂𑀲𑁆𑀯𑀧𑀺 𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀁 𑀲𑀢𑁆𑀣𑁂𑀲𑀼 𑀬𑀲𑁆𑀫𑀸 𑀦 𑀢𑁂𑀲𑀼 𑀦𑀸𑀫𑀮𑀺𑀗𑁆𑀕𑀸𑀦𑀺 𑀩𑀼𑀤𑁆𑀥𑀯𑀘𑀦𑀸𑀦𑀼𑀭𑀽𑀧𑀸𑀦𑀺 𑀳𑁄𑀦𑁆𑀢𑀺 ¶ , 𑀢𑀲𑁆𑀫𑀸 𑀢𑀤𑀦𑀼𑀭𑀽𑀧𑀸𑀦𑀺 𑀦𑀸𑀫𑀮𑀺𑀗𑁆𑀕𑀸𑀦𑀺 𑀤𑀲𑁆𑀲𑀬𑀦𑁆𑀢𑁄 𑀅𑀪𑀺𑀥𑀸𑀦𑀲𑀢𑁆𑀣𑀁 𑀧𑀓𑀸𑀲𑀺𑀲𑁆𑀲𑀸𑀫𑀻𑀢𑀺 𑀏𑀢𑀫𑀢𑁆𑀣𑀁 𑀤𑀻𑀧𑁂𑀢𑀺. 𑀦𑀫𑁆𑀬𑀢𑁂 𑀅𑀪𑀺𑀥𑀻𑀬𑀢𑁂 𑀅𑀢𑁆𑀣𑁄 𑀅𑀦𑁂𑀦𑀸𑀢𑀺 𑀦𑀸𑀫𑀁, 𑀲𑀤𑁆𑀤𑀲𑀢𑁆𑀣𑁂 𑀦𑀫𑀼𑀥𑀸𑀢𑀼𑀯𑀲𑁂𑀦. 𑀮𑀺𑀗𑁆𑀕𑀬𑀢𑁂 ‘‘𑀇𑀢𑁆𑀣𑀺𑀬𑀫𑀢𑁄 𑀆𑀧𑀘𑁆𑀘𑀬𑁄’’𑀢𑁆𑀬𑀸𑀤𑀺𑀦𑀸 𑀯𑀺𑀪𑀚𑁆𑀚𑀢𑁂𑀢𑀺, 𑀇𑀢𑁆𑀣𑀸𑀤𑀬𑁄 𑀯𑀸𑀦𑁂𑀦 𑀮𑀺𑀗𑁆𑀕𑀻𑀬𑀦𑁆𑀢𑁂 𑀩𑁆𑀬𑀜𑁆𑀚𑀻𑀬𑀦𑁆𑀢𑁂𑀢𑀺 𑀮𑀺𑀗𑁆𑀕𑀁, 𑀇𑀢𑁆𑀣𑀺𑀧𑀼𑀫𑀦𑀧𑀼𑀁𑀲𑀓𑀁. 𑀓𑀺𑀫𑁂𑀢𑀲𑁆𑀲 𑀅𑀪𑀺𑀥𑀸𑀦𑀲𑀢𑁆𑀣𑀲𑁆𑀲 𑀓𑀭𑀡𑁂 𑀧𑀬𑁄𑀚𑀦𑀦𑁆𑀢𑀺 𑀧𑀼𑀘𑁆𑀙𑀸𑀬𑀁 𑀬𑀲𑁆𑀫𑀺𑀁 𑀲𑀢𑀺 𑀢𑀁 𑀲𑁄𑀢𑀸𑀭𑁄 𑀲𑁄𑀢𑀼𑀫𑀼𑀲𑁆𑀲𑀳𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦𑀸𑀫𑀮𑀺𑀗𑁆𑀕𑁂𑀲𑁆𑀯𑀺’’𑀘𑁆𑀘𑀸𑀤𑀺. 𑀬𑀢𑁄 𑀩𑀼𑀤𑁆𑀥𑀯𑀘𑀦𑁂 𑀧𑀝𑀼𑀦𑁄 𑀪𑀸𑀯𑁄 𑀧𑀸𑀝𑀯𑀁, 𑀢𑀤𑁂𑀯 𑀅𑀢𑁆𑀣𑁄 𑀧𑀬𑁄𑀚𑀦𑀁, 𑀢𑀁 𑀇𑀘𑁆𑀙𑀦𑁆𑀢𑀻𑀢𑀺 𑀧𑀸𑀝𑀯𑀢𑁆𑀣𑀺𑀦𑁄, 𑀢𑁂𑀲𑀁 𑀧𑀸𑀝𑀯𑀢𑁆𑀣𑀻𑀦𑀁 𑀲𑁄𑀢𑀽𑀦𑀁 𑀦𑀸𑀫𑀮𑀺𑀗𑁆𑀕𑁂𑀲𑀼 𑀓𑁄𑀲𑀮𑁆𑀮𑀁 𑀓𑀼𑀲𑀮𑀢𑀸 𑀙𑁂𑀓𑀪𑀸𑀯𑁄 𑀩𑀼𑀤𑁆𑀥𑀯𑀘𑀦𑁂 𑀫𑀳𑀩𑁆𑀩𑀮𑀁 𑀅𑀢𑁆𑀣𑀲𑁆𑀲 𑀦𑀺𑀘𑁆𑀙𑀬𑀓𑀸𑀭𑀡𑀁 𑀳𑁄𑀢𑀺, 𑀅𑀢𑁄 𑀢𑀲𑁆𑀫𑀸 𑀓𑀸𑀭𑀡𑀸 𑀩𑀼𑀤𑁆𑀥𑀪𑀸𑀲𑀺𑀢𑀲𑁆𑀲𑀸𑀭𑀳𑀸𑀦𑀺 𑀦𑀸𑀫𑀮𑀺𑀗𑁆𑀕𑀸𑀦𑀺 𑀤𑀲𑁆𑀲𑀬𑀦𑁆𑀢𑁄 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀁 𑀲𑀢𑁆𑀣𑀁 𑀧𑀓𑀸𑀲𑀺𑀲𑁆𑀲𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

[𑀘] 𑀇𑀤𑀸𑀦𑀺 𑀲𑀢𑁆𑀣𑀮𑀳𑀼𑀪𑀸𑀯𑀢𑁆𑀣𑀫𑀸𑀳 ‘‘𑀪𑀺𑀬𑁆𑀬𑁄’’𑀘𑁆𑀘𑀸𑀤𑀺. 𑀪𑀺𑀬𑁆𑀬𑁄 𑀩𑀸𑀳𑀼𑀮𑁆𑀮𑁂𑀦 𑀭𑀽𑀧𑀦𑁆𑀢𑀭𑀸 𑀭𑀽𑀧𑀪𑁂𑀤𑁂𑀦 𑀇𑀢𑁆𑀣𑀺𑀧𑀘𑁆𑀘𑀬𑀧𑀼𑀫𑁆𑀪𑀸𑀯𑀸𑀤𑀺𑀓𑀸𑀭𑀺𑀬𑀓𑀢𑁂𑀦 𑀣𑀻𑀧𑀼𑀦𑁆𑀦𑀧𑀼𑀁𑀲𑀓𑀁 𑀜𑁂𑀬𑁆𑀬𑀁, 𑀲𑁄 𑀘 𑀦𑀸𑀫𑀸𑀦𑀁 𑀦𑀸𑀫𑀯𑀺𑀲𑁂𑀲𑀦𑀲𑁆𑀲, 𑀦𑀸𑀫𑀧𑀭𑀸𑀫𑀲𑀺𑀲𑀩𑁆𑀩𑀦𑀸𑀫𑀲𑀤𑁆𑀤𑀲𑁆𑀲 𑀘 𑀜𑁂𑀬𑁆𑀬𑁄 𑀧𑀓𑀸𑀭𑀦𑁆𑀢𑀭𑀸𑀪𑀸𑀯𑀸. 𑀢𑀢𑁆𑀭 𑀦𑀸𑀫𑀸𑀦𑀁 𑀭𑀽𑀧𑀪𑁂𑀤𑁄 𑀬𑀣𑀸 𑁋 𑀙𑀼𑀭𑀺𑀓𑀸 𑀲𑀢𑁆𑀬’𑀲𑀺𑀧𑀼𑀢𑁆𑀢𑀺 [𑀅𑀪𑀺𑀥𑀸𑀦 𑁩𑁯𑁨 𑀕𑀸𑀣𑀸]. 𑀅𑀲𑀺 𑀔𑀕𑁆𑀕𑁄 𑀘 𑀲𑀸𑀬𑀓𑁄 [𑀅𑀪𑀺𑀥𑀸𑀦 𑁩𑁯𑁧 𑀕𑀸𑀣𑀸]. 𑀧𑀸𑀦𑀻𑀬𑀁 𑀲𑀮𑀺𑀮𑀁 𑀤𑀓𑀦𑁆𑀢𑀺 [𑀅𑀪𑀺𑀥𑀸𑀦 𑁬𑁬𑁧 𑀕𑀸𑀣𑀸]. 𑀦𑀸𑀫𑀯𑀺𑀲𑁂𑀲𑀦𑀲𑁆𑀲 𑀬𑀣𑀸 𑁋 𑀦𑀺𑀲𑀻𑀣𑁄 𑀫𑀚𑁆𑀛𑀺𑀫𑀸 𑀭𑀢𑁆𑀢𑀻𑀢𑀺 [𑀅𑀪𑀺𑀥𑀸𑀦 𑁭𑁦 𑀕𑀸𑀣𑀸]. 𑀦𑀸𑀫𑀧𑀭𑀸𑀫𑀲𑀺𑀲𑀩𑁆𑀩𑀦𑀸𑀫𑀲𑀤𑁆𑀤𑀲𑁆𑀲 𑀬𑀣𑀸 𑁋 ¶ 𑀆𑀓𑀗𑁆𑀔𑀸 𑀭𑀼𑀘𑀺 𑀯𑀼𑀢𑁆𑀢𑀸 𑀲𑀸, 𑀢𑁆𑀯𑀥𑀺𑀓𑀸 𑀮𑀸𑀮𑀲𑀸 𑀤𑁆𑀯𑀺𑀲𑀽𑀢𑀺 [𑀅𑀪𑀺𑀥𑀸𑀦 𑁧𑁬𑁩 𑀕𑀸𑀣𑀸]. 𑀲𑀸𑀳𑀘𑀭𑀺𑀬𑁂𑀦 𑀦𑀺𑀬𑀢𑀮𑀺𑀗𑁆𑀕𑁂𑀦𑀸𑀯𑀺𑀧𑁆𑀧𑀬𑁄𑀕𑀢𑁄 𑀣𑀻𑀧𑀼𑀦𑁆𑀦𑀧𑀼𑀁𑀲𑀓𑀁 𑀜𑁂𑀬𑁆𑀬𑀁. 𑀓𑀢𑁆𑀣𑀘𑀻𑀢𑀺 𑀬𑀢𑁆𑀭 𑀭𑀽𑀧𑀪𑁂𑀤𑁄 𑀦𑀢𑁆𑀣𑀺, 𑀢𑀁 𑀬𑀣𑀸 𑁋 𑀫𑀭𑀻𑀘𑀺 𑀫𑀺𑀕𑀢𑀡𑁆𑀳𑀺𑀓𑀸 [𑀅𑀪𑀺𑀥𑀸𑀦 𑁬𑁫 𑀕𑀸𑀣𑀸]. 𑀭𑀁𑀲𑀺𑀫𑀸 𑀪𑀸𑀓𑀭𑁄 𑀪𑀸𑀦𑀼 [𑀅𑀪𑀺𑀥𑀸𑀦 𑁬𑁩 𑀕𑀸𑀣𑀸]. 𑀆𑀧𑁄 𑀧𑀬𑁄 𑀚𑀮𑀁 𑀯𑀸𑀭𑀺 [𑀅𑀪𑀺𑀥𑀸𑀦 𑁬𑁬𑁧 𑀕𑀸𑀣𑀸]. 𑀫𑀭𑀻𑀛𑀸𑀤𑀬𑁄 𑀳𑁆𑀬𑀪𑀺𑀦𑁆𑀦𑀭𑀽𑀧𑀢𑁆𑀢𑀸 𑀮𑀺𑀗𑁆𑀕𑀦𑁆𑀢𑀭𑁂𑀧𑀺 𑀲𑀫𑁆𑀪𑀸𑀯𑀺𑀬𑀦𑁆𑀢𑁂𑀳𑀺 𑀦𑀺𑀬𑀢𑀮𑀺𑀗𑁆𑀕𑁂𑀳𑀺 𑀫𑀺𑀕𑀢𑀡𑁆𑀳𑀺𑀓𑀸𑀪𑀸𑀓𑀭𑀚𑀮𑀸𑀤𑀺𑀲𑀤𑁆𑀤𑁂𑀳𑀺 𑀲𑀸𑀳𑀘𑀭𑀺𑀬𑁂𑀦 𑀢𑀁𑀮𑀺𑀗𑁆𑀕𑁂 𑀦𑀺𑀘𑁆𑀙𑀻𑀬𑀦𑁆𑀢𑁂. 𑀆𑀳𑀘𑁆𑀘𑀯𑀺𑀥𑀸𑀦𑁂𑀦 𑀇𑀢𑁆𑀣𑀺𑀧𑀼𑀫𑀦𑀧𑀼𑀁𑀲𑀓𑀸𑀦𑀁 𑀯𑀺𑀲𑁂𑀲𑁂𑀢𑁆𑀯𑀸 𑀓𑀣𑀦𑁂𑀦 𑀣𑀻𑀧𑀼𑀦𑁆𑀦𑀧𑀼𑀁𑀲𑀓𑀁 𑀜𑁂𑀬𑁆𑀬𑀁. 𑀓𑁆𑀯𑀘𑀻𑀢𑀺 𑀬𑀢𑁆𑀭 𑀦 𑀭𑀽𑀧𑀪𑁂𑀤𑁄 𑀮𑀺𑀗𑁆𑀕𑀦𑀺𑀡𑁆𑀡𑀬𑀲𑁆𑀲 𑀦𑀺𑀫𑀺𑀢𑁆𑀢𑀁, 𑀦 𑀘 𑀲𑀸𑀳𑀘𑀭𑀺𑀬𑀁 𑀮𑀺𑀗𑁆𑀕𑀪𑁂𑀤𑁄𑀪𑀺𑀫𑀢𑁄, 𑀦𑁂𑀓𑀫𑁂𑀯 𑀯𑀸 𑀮𑀺𑀗𑁆𑀕𑀫𑀺𑀘𑁆𑀙𑀢𑁂, 𑀢𑀁 𑀬𑀣𑀸 𑁋 𑀯𑀮𑁆𑀮𑀭𑀻 𑀫𑀜𑁆𑀚𑀭𑀻 𑀦𑀸𑀭𑀻 [𑀅𑀪𑀺𑀥𑀸𑀦 𑁫𑁫𑁦 𑀕𑀸𑀣𑀸]. 𑀯𑀺𑀝𑀧𑁄 𑀯𑀺𑀝𑀪𑀻𑀢𑁆𑀣𑀺𑀬𑀁 [𑀅𑀪𑀺𑀥𑀸𑀦 𑁫𑁪𑁭 𑀕𑀸𑀣𑀸]. 𑀪𑀻𑀢𑀺𑀢𑁆𑀣𑀻 𑀪𑀬𑀫𑀼𑀢𑁆𑀢𑀸𑀲𑁄 [𑀅𑀪𑀺𑀥𑀸𑀦 𑁧𑁬𑁬 𑀕𑀸𑀣𑀸]. 𑀯𑀚𑀺𑀭𑀁 𑀧𑀼𑀦𑁆𑀦𑀧𑀼𑀁𑀲𑀓𑁂𑀘𑁆𑀘𑀸𑀤𑀺 [𑀅𑀪𑀺𑀥𑀸𑀦 𑁨𑁪 𑀕𑀸𑀣𑀸].

[𑀙] 𑀇𑀤𑀸𑀦𑀺 𑀭𑀽𑀧𑀪𑁂𑀤𑁄𑀢𑀺 𑀮𑀺𑀗𑁆𑀕𑀦𑀺𑀡𑁆𑀡𑀬𑀲𑁆𑀲 𑀧𑀝𑀺𑀧𑀢𑁆𑀢𑀺𑀳𑁂𑀢𑀼𑀓𑁄 𑀬𑁄 𑀪𑀺𑀦𑁆𑀦𑀮𑀺𑀗𑁆𑀕𑀸𑀦𑀁 𑀤𑁆𑀯𑀦𑁆𑀤𑁄, 𑀢𑀓𑁆𑀓𑀭𑀡𑀧𑀝𑀺𑀲𑁂𑀥𑁂𑀦 𑀅𑀪𑀺𑀦𑁆𑀦𑀮𑀺𑀗𑁆𑀕𑀸𑀦𑀫𑁂𑀯 𑀤𑁆𑀯𑀦𑁆𑀤𑁄 𑀓𑀢𑁄𑀢𑀺 𑀧𑀭𑀺𑀪𑀸𑀲𑀺𑀢𑀼𑀫𑀼𑀧𑀓𑁆𑀓𑀫𑀢𑁂 ‘‘𑀅𑀪𑀺𑀦𑁆𑀦𑀮𑀺𑀗𑁆𑀕𑀺𑀦’’𑀫𑀺𑀘𑁆𑀘𑀸𑀤𑀺. 𑀅𑀪𑀺𑀦𑁆𑀦𑀮𑀺𑀗𑁆𑀕𑀻𑀦𑀁𑀬𑁂𑀯 𑀦𑀸𑀫𑀸𑀦𑀁 𑀤𑁆𑀯𑀦𑁆𑀤𑁄 𑀓𑀢𑁄, 𑀦 𑀪𑀺𑀦𑁆𑀦𑀮𑀺𑀗𑁆𑀕𑀻𑀦𑀁, 𑀬𑀣𑀸 𑁋 𑀯𑀺𑀫𑀼𑀢𑁆𑀬𑀲𑀗𑁆𑀔𑀢𑀥𑀸𑀢𑀼, 𑀲𑀼𑀤𑁆𑀥𑀺𑀦𑀺𑀩𑁆𑀩𑀼𑀢𑀺𑀬𑁄 𑀲𑀺𑀬𑀼𑀦𑁆𑀢𑀺 [𑀅𑀪𑀺𑀥𑀸𑀦 𑁯 𑀕𑀸𑀣𑀸]. 𑀦 𑀓𑁂𑀯𑀮𑀁 𑀤𑁆𑀯𑀦𑁆𑀤𑁄𑀬𑁂𑀯, 𑀅𑀣 𑀔𑁄 𑀏𑀓𑀲𑁂𑀲𑁄𑀧𑁆𑀬𑀪𑀺𑀦𑁆𑀦𑀮𑀺𑀗𑁆𑀕𑀸𑀦𑀁𑀬𑁂𑀯 𑀓𑀢𑁄, 𑀬𑀣𑀸 𑁋 𑀦𑀕𑁆𑀕𑁄 𑀤𑀺𑀕𑀫𑁆𑀩𑀭𑀸𑀯𑀢𑁆𑀣𑀸. [𑀅𑀪𑀺𑀥𑀸𑀦 𑁭𑁩𑁪 𑀕𑀸𑀣𑀸] 𑀲𑀩𑁆𑀩𑀥𑀭𑀓𑀢𑁂 𑀧𑀦 ‘‘𑀚𑀻𑀫𑀽𑀢𑀸 𑀫𑁂𑀖𑀧𑀩𑁆𑀩𑀢𑀸’’ 𑀇𑀘𑁆𑀘𑀼𑀤𑀸𑀳𑀝𑀁. 𑀦𑀦𑀼 𑀘 𑀪𑀺𑀦𑁆𑀦𑀮𑀺𑀗𑁆𑀕𑀸𑀦𑀫𑁆𑀧𑀺 𑀏𑀓𑀲𑁂𑀲𑁄 𑀓𑀢𑁄, 𑀬𑀣𑀸 ¶ 𑁋 𑀫𑀸𑀢𑀸 𑀧𑀺𑀢𑀸 𑀢𑀼 𑀧𑀺𑀢𑀭𑁄, 𑀧𑀼𑀢𑁆𑀢𑀸 𑀢𑀼 𑀧𑀼𑀢𑁆𑀢𑀥𑀻𑀢𑀭𑁄 [𑀅𑀪𑀺𑀥𑀸𑀦 𑁨𑁪𑁯 𑀕𑀸𑀣𑀸]. 𑀲𑀲𑀼𑀭𑀸 𑀲𑀲𑁆𑀲𑀼 𑀲𑀲𑀼𑀭𑀸, 𑀪𑀸𑀢𑀼𑀪𑀕𑀺𑀦𑀺 𑀪𑀸𑀢𑀭𑁄𑀢𑀺 [𑀅𑀪𑀺𑀥𑀸𑀦 𑁨𑁫𑁦 𑀕𑀸𑀣𑀸]. 𑀏𑀢𑁆𑀣 𑀳𑀺 𑀫𑀸𑀢𑀸 𑀘 𑀧𑀺𑀢𑀸 𑀘 𑀧𑀺𑀢𑀭𑁄, 𑀧𑀼𑀢𑁆𑀢𑁄 𑀘 𑀥𑀻𑀢𑀸 𑀘 𑀧𑀼𑀢𑁆𑀢𑀸, 𑀲𑀲𑁆𑀲𑀼 𑀘 𑀲𑀲𑀼𑀭𑁄 𑀘 𑀲𑀲𑀼𑀭𑀸, 𑀪𑀸𑀢𑀸 𑀘 𑀪𑀕𑀺𑀦𑀻 𑀘 𑀪𑀸𑀢𑀭𑁄𑀢𑀺 𑀪𑀺𑀦𑁆𑀦𑀮𑀺𑀗𑁆𑀕𑀸𑀦𑀫𑁆𑀧𑀺 𑀏𑀓𑀲𑁂𑀲𑁄 𑀤𑀲𑁆𑀲𑀺𑀢𑁄𑀢𑀺. 𑀞𑀸𑀦𑀦𑁆𑀢𑀭𑁂 𑀢𑁂𑀲𑀁 𑀪𑀺𑀦𑁆𑀦𑀮𑀺𑀗𑁆𑀕𑀢𑀸𑀬 𑀤𑀲𑁆𑀲𑀺𑀢𑀢𑁆𑀢𑀸 𑀦 𑀤𑁄𑀲𑁄. 𑀢𑀸𑀢𑁄 𑀢𑀼 𑀚𑀦𑀓𑁄 𑀧𑀺𑀢𑀸 [𑀅𑀪𑀺𑀥𑀸𑀦 𑁨𑁪𑁩 𑀕𑀸𑀣𑀸]. 𑀅𑀫𑁆𑀫𑀸’𑀫𑁆𑀩𑀸 𑀚𑀦𑀦𑀻 𑀫𑀸𑀢𑀸 [𑀅𑀪𑀺𑀥𑀸𑀦 𑁨𑁪𑁪 𑀕𑀸𑀣𑀸]. 𑀅𑀧𑀘𑁆𑀘𑀁 𑀧𑀼𑀢𑁆𑀢𑁄𑀢𑁆𑀭𑀚𑁄 𑀲𑀼𑀢𑁄 [𑀅𑀪𑀺𑀥𑀸𑀦 𑁨𑁪𑁦 𑀕𑀸𑀣𑀸]. 𑀦𑀸𑀭𑀺𑀬𑀁 𑀤𑀼𑀳𑀺𑀢𑀸 𑀥𑀻𑀢𑀸 [𑀅𑀪𑀺𑀥𑀸𑀦 𑁨𑁪𑁧 𑀕𑀸𑀣𑀸]. 𑀚𑀸𑀬𑀸𑀧𑀢𑀻𑀦𑀁 𑀚𑀦𑀦𑀻, 𑀲𑀲𑁆𑀲𑀼 𑀯𑀼𑀢𑁆𑀢𑀸𑀣 𑀢𑀧𑁆𑀧𑀺𑀢𑀸. 𑀲𑀲𑀼𑀭𑁄𑀢𑀺 𑀇𑀘𑁆𑀘𑀸𑀤𑀺𑀓𑀜𑁆𑀳𑀺 𑀢𑁂𑀲𑀁 [𑀅𑀪𑀺𑀥𑀸𑀦 𑁨𑁪𑁬 𑀕𑀸𑀣𑀸] 𑀞𑀸𑀦𑀦𑁆𑀢𑀭𑀦𑁆𑀢𑀺. 𑀢𑀣𑀸 𑀏𑀢𑁆𑀣 𑀓𑀫𑀁 𑀯𑀺𑀦𑀸 𑀪𑀺𑀦𑁆𑀦𑀮𑀺𑀗𑁆𑀕𑀸𑀦𑀁 𑀕𑀡𑀦𑀧𑀸𑀞𑁄 𑀯𑀺𑀬 𑀲𑀗𑁆𑀓𑀭𑁄𑀧𑀺 𑀦 𑀓𑀢𑁄. 𑀢𑀢𑁆𑀭 𑀳𑀺 𑀲𑀕𑁆𑀕𑀤𑀺𑀲𑀸𑀤𑀬𑁄 𑀅𑀢𑁆𑀣𑀸 𑀬𑀣𑀸𑀓𑁆𑀓𑀫𑀁 𑀢𑀁𑀲𑀫𑁆𑀩𑀦𑁆𑀥𑀸 𑀘 𑀲𑀓𑁆𑀓𑀯𑀺𑀤𑀺𑀲𑀸𑀤𑀬𑁄 𑀅𑀢𑁆𑀣𑀸 𑀲𑀓𑀲𑀓𑀲𑀫𑁆𑀩𑀦𑁆𑀥𑀲𑀳𑀺𑀢𑀸 𑀬𑀣𑀸𑀪𑀺𑀥𑀸𑀦𑀁 𑀲𑀭𑀽𑀧𑀧𑀝𑀺𑀧𑀢𑁆𑀬𑀫𑀢𑁆𑀣𑀪𑀺𑀥𑁂𑀬𑁆𑀬𑀸, 𑀢𑀣𑀸 𑀢𑀧𑁆𑀧𑀭𑀺𑀬𑀸𑀬𑀲𑀫𑁆𑀩𑀦𑁆𑀥𑀸𑀦𑀺 𑀘 𑀬𑀸𑀦𑀺 𑀦𑀸𑀫𑀸𑀦𑀺, 𑀢𑀸𑀦𑀺 𑀲𑀩𑁆𑀩𑀸𑀦𑀺 𑀢𑀤𑀪𑀺𑀥𑀸𑀦𑀸𑀯𑀲𑀭𑁂 𑀅𑀪𑀺𑀥𑁂𑀬𑁆𑀬𑀸𑀦𑀻𑀢𑀺 𑀲𑀼𑀔𑁂𑀦𑁂𑀓𑀢𑁆𑀭𑁂𑀯 𑀲𑀓𑀮𑀦𑀸𑀫𑀧𑀝𑀺𑀧𑀢𑁆𑀢𑀺 𑀲𑀭𑀽𑀧𑀧𑀝𑀺𑀧𑀢𑁆𑀢𑀺 𑀘 𑀬𑀣𑀸 𑀲𑀺𑀬𑀸𑀢𑀺𑀘𑁆𑀘𑁂𑀢𑀤𑀢𑁆𑀣𑀁 𑀓𑀫𑁄 𑀅𑀪𑁆𑀬𑀼𑀧𑀕𑀫𑁆𑀬𑀢𑁂, 𑀢𑀣𑀸 𑀘 𑀲𑀢𑁆𑀬𑀸𑀯𑀲𑁆𑀲𑀁 𑀲𑀕𑁆𑀕𑀸𑀤𑀺𑀧𑀭𑀺𑀬𑀸𑀬𑁂 𑀤𑀺𑀯𑀲𑀤𑁆𑀤𑀸𑀤𑀬𑁄, 𑀳𑀭𑀸𑀤𑁆𑀬𑀯𑀲𑀭𑁂 𑀓𑀼𑀫𑀸𑀭𑀸𑀤𑀬𑁄 𑀅𑀪𑀺𑀥𑁂𑀬𑁆𑀬𑀸 𑀇𑀢𑀺 𑀓𑀫𑀸𑀦𑀼𑀭𑁄𑀥𑁂𑀦 𑀮𑀺𑀗𑁆𑀕𑀲𑀗𑁆𑀓𑀭𑁄 𑀧𑀭𑀺𑀳𑀭𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑁄, 𑀬𑀣𑀸𑀯𑀼𑀢𑁆𑀢𑀦𑁆𑀢𑀼 𑀓𑀫𑀁 𑀯𑀺𑀦𑀸 𑀦𑁂𑀳 𑀲𑀗𑁆𑀓𑀭𑁄 𑀓𑀢𑁄, 𑀇𑀢𑀺 𑀧𑀭𑀺𑀬𑀸𑀬𑁂𑀦 𑀇𑀢𑁆𑀣𑀺𑀧𑁆𑀧𑀓𑀭𑀡𑀸𑀤𑀺𑀓𑁆𑀓𑀫𑁂𑀦 𑀬𑀣𑀸𑀲𑀫𑁆𑀪𑀯𑀫𑀪𑀺𑀥𑀸𑀦𑀢𑁄, 𑀢𑀁 𑀬𑀣𑀸 𑁋 𑀈𑀢𑀺 𑀢𑁆𑀯𑀺𑀢𑁆𑀣𑀻 𑀅𑀚𑀜𑁆𑀜𑀜𑁆𑀘, 𑀉𑀧𑀲𑀕𑁆𑀕𑁄 𑀉𑀧𑀤𑁆𑀤𑀯𑁄𑀢𑀺 [𑀅𑀪𑀺𑀥𑀸𑀦 𑁪𑁦𑁧 𑀕𑀸𑀣𑀸]. 𑀅𑀢𑁆𑀭 𑀳𑀺 𑀬𑁂 𑀢𑀺𑀮𑀺𑀗𑁆𑀕𑀸, 𑀢𑁂 𑀢𑀺𑀮𑀺𑀗𑁆𑀕𑀸𑀯𑀲𑀭𑁂 𑀏𑀯 𑀦𑀺𑀩𑀤𑁆𑀥𑀸, 𑀦 𑀕𑀡𑀦𑀧𑀸𑀞𑀸 𑀯𑀺𑀬 𑀉𑀘𑁆𑀘𑀸𑀭𑀡𑀯𑀲𑁂𑀦, 𑀏𑀯𑀁 𑀲𑀩𑁆𑀩𑀢𑁆𑀭 𑀬𑀣𑀸𑀲𑀫𑁆𑀪𑀯𑀁 𑀦𑀻𑀬𑀢𑁂. 𑀯𑀼𑀢𑁆𑀢𑀜𑁆𑀘 𑁋

‘‘𑀪𑁂𑀤𑀸𑀔𑁆𑀬𑀸𑀦𑀸𑀬 ¶ 𑀦 𑀤𑁆𑀯𑀦𑁆𑀤𑁄, 𑀦𑁂𑀓𑀲𑁂𑀲𑁄 𑀦 𑀲𑀗𑁆𑀓𑀭𑁄;

𑀓𑀢𑁄𑀢𑁆𑀭 𑀪𑀺𑀦𑁆𑀦𑀮𑀺𑀗𑁆𑀕𑀸𑀦-𑀫𑀯𑀼𑀢𑁆𑀢𑀸𑀦𑀁 𑀓𑀫𑀁 𑀯𑀺𑀦𑀸’’𑀢𑀺 [𑀅𑀫𑀭 𑁧.𑁪].

𑀇𑀤𑀸𑀦𑀺 𑀮𑀺𑀗𑁆𑀕𑀯𑀸𑀘𑀓𑀸𑀦𑀁 𑀞𑀸𑀦𑀯𑀲𑁂𑀦𑀢𑁆𑀣𑁂𑀲𑀼 𑀕𑀫𑀦𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀮𑀺𑀗𑁆𑀕𑀯𑀸𑀘𑀓𑁂’’𑀘𑁆𑀘𑀸𑀤𑀺. 𑀕𑀸𑀣𑀸𑀧𑀸𑀤𑀦𑁆𑀢𑀫𑀚𑁆𑀛𑀝𑁆𑀞𑀸 𑀕𑀸𑀣𑀸𑀦𑀁 𑀧𑀸𑀤𑀸𑀦𑀜𑁆𑀘 𑀅𑀦𑁆𑀢𑀫𑀚𑁆𑀛𑀝𑁆𑀞𑀸 𑀮𑀺𑀗𑁆𑀕𑀯𑀸𑀘𑀓𑀸 𑀅𑀦𑁂𑀓𑀢𑁆𑀣𑀮𑀺𑀗𑁆𑀕𑀯𑀸𑀘𑀓𑀸𑀦𑀺 𑀜𑀸𑀡𑀤𑀲𑁆𑀲𑀦𑀸𑀤𑀻𑀦𑀺 𑀮𑀺𑀗𑁆𑀕𑀸𑀦𑀺 𑀧𑀼𑀩𑁆𑀩𑀫𑀢𑁆𑀣𑀁 𑀯𑀸𑀘𑀓𑀯𑀲𑁂𑀦 𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺. 𑀅𑀧𑀭𑁂 𑀕𑀸𑀣𑀸𑀧𑀸𑀤𑀸𑀦𑀫𑀸𑀤𑀺𑀝𑁆𑀞𑀸 𑀮𑀺𑀗𑁆𑀕𑀯𑀸𑀘𑀓𑀸 𑀧𑀭𑀫𑀢𑁆𑀣𑀁 𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺. 𑀢𑀁 𑀬𑀣𑀸 𑁋

𑀨𑀮𑁂 𑀯𑀺𑀧𑀲𑁆𑀲𑀦𑀸𑀤𑀺𑀩𑁆𑀩-𑀘𑀓𑁆𑀔𑀼𑀲𑀩𑁆𑀩𑀜𑁆𑀜𑀼𑀢𑀸𑀲𑀼 𑀘;

𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀫𑁆𑀳𑀺, 𑀫𑀕𑁆𑀕𑁂 𑀘 𑀜𑀸𑀡𑀤𑀲𑁆𑀲𑀦𑀁 [𑀅𑀪𑀺𑀥𑀸𑀦 𑁭𑁯𑁪 𑀕𑀸𑀣𑀸].

𑀡𑀸𑀤𑁄 𑀲𑀤𑁆𑀥𑀸𑀘𑀻𑀯𑀭𑀸𑀤𑀺-𑀳𑁂𑀢𑁆𑀯𑀸𑀥𑀸𑀭𑁂𑀲𑀼 𑀧𑀘𑁆𑀘𑀬𑁄;

𑀓𑀻𑀴𑀸𑀤𑀺𑀩𑁆𑀩𑀯𑀺𑀳𑀸𑀭𑀸𑀤𑁄, 𑀯𑀺𑀳𑀸𑀭𑁄 𑀲𑀼𑀕𑀢𑀸𑀮𑀬𑁂 [𑀅𑀪𑀺𑀥𑀸𑀦 𑁮𑁫𑁭 𑀕𑀸𑀣𑀸].

𑀔𑀕𑁆𑀕𑁂 𑀓𑀼𑀭𑀽𑀭𑁂 𑀦𑁂𑀢𑁆𑀢𑀺𑀁𑀲𑁄, 𑀧𑀭𑀲𑁆𑀫𑀺𑀜𑁆𑀘𑀸𑀢𑁆𑀭 𑀢𑀻𑀲𑁆𑀯𑀫𑀼 [𑀅𑀪𑀺𑀥𑀸𑀦 𑁧𑁦𑁮𑁯 𑀕𑀸𑀣𑀸];

𑀓𑀼𑀲𑀮𑁂 𑀲𑀼𑀓𑀢𑀁 𑀲𑀼𑀝𑁆𑀞𑀼-𑀓𑀢𑁂 𑀘 𑀲𑀼𑀓𑀢𑁄 𑀢𑀺𑀲𑀼 [𑀅𑀪𑀺𑀥𑀸𑀦 𑁯𑁩𑁮 𑀕𑀸𑀣𑀸].

𑀲𑀫𑀬𑁄 𑀲𑀫𑀯𑀸𑀬𑁂 𑀘, 𑀲𑀫𑀽𑀳𑁂 𑀓𑀸𑀭𑀡𑁂 𑀔𑀡𑁂;

𑀧𑀝𑀺𑀯𑁂𑀥𑁂 𑀲𑀺𑀬𑀸 𑀓𑀸𑀮𑁂, 𑀧𑀳𑀸𑀦𑁂 𑀮𑀸𑀪𑀤𑀺𑀝𑁆𑀞𑀺𑀲𑀼 [𑀅𑀪𑀺𑀥𑀸𑀦 𑁭𑁭𑁮 𑀕𑀸𑀣𑀸].

𑀓𑀦𑁆𑀢𑀸𑀭𑁄 𑀯𑀦𑀤𑀼𑀕𑁆𑀕𑁂𑀲𑀼 [𑀅𑀪𑀺𑀥𑀸𑀦 𑁧𑁧𑁦𑁭 𑀕𑀸𑀣𑀸].

𑀏𑀢𑁆𑀣 𑀘 𑁋

𑀬𑁂𑀪𑀼𑀬𑁆𑀬𑀢𑀸𑀩𑁆𑀬𑀸𑀫𑀺𑀲𑁆𑀲𑁂𑀲𑀼, 𑀯𑀺𑀲𑀁𑀬𑁄𑀕𑁂 𑀘 𑀓𑁂𑀯𑀮𑀁;

𑀤𑀴𑁆𑀳𑀢𑁆𑀣𑁂𑀦𑀢𑀺𑀭𑁂𑀓𑁂 𑀘𑀸-𑀦𑀯𑀲𑁂𑀲𑀫𑁆𑀳𑀺 𑀢𑀁 𑀢𑀺𑀲𑀼 [𑀅𑀪𑀺𑀥𑀸𑀦 𑁭𑁮𑁬 𑀕𑀸𑀣𑀸].

𑀲𑀫𑀸𑀥𑀺𑀲𑁆𑀫𑀺𑀁 𑀧𑀼𑀫𑁂𑀓𑀕𑁆𑀕𑁄-𑀦𑀸𑀓𑀼𑀮𑁂 𑀯𑀸𑀘𑁆𑀘𑀮𑀺𑀗𑁆𑀕𑀺𑀓𑁄 [𑀅𑀪𑀺𑀥𑀸𑀦 𑁧𑁦𑁩𑁫 𑀕𑀸𑀣𑀸].

𑀚𑀴𑁂 𑀣𑀽𑀮𑁄 𑀫𑀳𑀢𑁆𑀬𑀧𑀺 [𑀅𑀪𑀺𑀥𑀸𑀦 𑁧𑁦𑁬𑁬 𑀕𑀸𑀣𑀸] 𑀘𑁆𑀘𑀸𑀤𑀻𑀲𑀼

𑀕𑀸𑀣𑀸𑀫𑀚𑁆𑀛𑀝𑁆𑀞𑀸𑀦𑀁 ¶ , 𑀧𑀸𑀤𑀦𑁆𑀢𑀫𑀚𑁆𑀛𑀝𑁆𑀞𑀸𑀦𑀜𑁆𑀘 𑀮𑀺𑀗𑁆𑀕𑀯𑀸𑀘𑀓𑀸𑀦𑀁 𑀧𑀼𑀩𑁆𑀩𑀧𑀭𑀢𑁆𑀣𑁂𑀲𑁆𑀯𑀧𑀺 𑀕𑀫𑀦𑀪𑀸𑀯𑀢𑁄 ‘‘𑀧𑀼𑀩𑁆𑀩𑀁 𑀬𑀦𑁆𑀢𑀻’’𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀕𑀸𑀣𑀸𑀦𑀁 𑀫𑀚𑁆𑀛𑀦𑁆𑀢𑀝𑁆𑀞𑀸 𑀧𑀼𑀩𑁆𑀩𑀁 𑀬𑀦𑁆𑀢𑀺, 𑀕𑀸𑀣𑀸𑀫𑀚𑁆𑀛𑀝𑁆𑀞𑀸, 𑀧𑀸𑀤𑀦𑁆𑀢𑀫𑀚𑁆𑀛𑀝𑁆𑀞𑀸 𑀘 𑀧𑀼𑀩𑁆𑀩𑀸𑀧𑀭𑀜𑁆𑀘 𑀬𑀦𑁆𑀢𑀻𑀢𑀺 𑀬𑀣𑀸𑀮𑀸𑀪𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸.

[𑀚] 𑀇𑀤𑀸𑀦𑀺 𑀯𑀺𑀲𑁂𑀲𑀯𑀺𑀥𑀺𑀫𑁆𑀳𑀺 𑀲𑀢𑁆𑀣𑀮𑀳𑀼𑀪𑀸𑀯𑀢𑁆𑀣𑀁 𑀧𑀭𑀺𑀪𑀸𑀲𑀢𑁂 ‘‘𑀧𑀼𑀫𑀺𑀢𑁆𑀣𑀺𑀬’’𑀫𑀺𑀘𑁆𑀘𑀸𑀤𑀺. 𑀧𑀼𑀫𑀺𑀢𑁆𑀣𑀺𑀬𑀁 ‘‘𑀤𑁆𑀯𑀻𑀲𑀽’’𑀢𑀺 𑀧𑀤𑀁 𑀜𑁂𑀬𑁆𑀬𑀁, 𑀬𑀣𑀸 𑁋 𑀅𑀲𑀦𑀺 𑀤𑁆𑀯𑀻𑀲𑀼 [𑀅𑀪𑀺𑀥𑀸𑀦 𑁨𑁪 𑀕𑀸𑀣𑀸]. 𑀲𑀩𑁆𑀩𑀮𑀺𑀗𑁆𑀕𑁂 𑀮𑀺𑀗𑁆𑀕𑀢𑁆𑀢𑀬𑁂 ‘‘𑀢𑀻𑀲𑀽’’𑀢𑀺 𑀧𑀤𑀁 𑀜𑁂𑀬𑁆𑀬𑀁, 𑀬𑀣𑀸 𑁋 𑀲𑀢𑁆𑀢𑀦𑁆𑀦𑀁 𑀧𑀽𑀭𑀡𑁂 𑀲𑁂𑀝𑁆𑀞𑁂’𑀢𑀺𑀲𑀦𑁆𑀢𑁂 𑀲𑀢𑁆𑀢𑀫𑁄 𑀢𑀺𑀲𑀼 [𑀅𑀪𑀺𑀥𑀸𑀦 𑁯𑁪𑁨 𑀕𑀸𑀣𑀸]. 𑀏𑀢𑁆𑀣 𑀘 𑀦𑀺𑀲𑀺𑀤𑁆𑀥𑀮𑀺𑀗𑁆𑀕𑀦𑀸𑀫𑀁 𑀧𑀸𑀭𑀺𑀲𑁂𑀲𑀢𑁄 ‘‘𑀲𑁂𑀲𑀮𑀺𑀗𑁆𑀕’’𑀦𑁆𑀢𑀺 𑀜𑁂𑀬𑁆𑀬𑀁 [𑀦𑀺𑀲𑀺𑀤𑁆𑀥𑀮𑀺𑀗𑁆𑀕 𑀲𑁂𑀲𑀢𑁆𑀣𑀁 (𑀅𑀫𑀭 𑁧.𑁫.)], 𑀬𑀣𑀸 𑁋 𑀯𑀲𑁆𑀲 𑀲𑀁𑀯𑀘𑁆𑀙𑀭𑀸 𑀦𑀺𑀢𑁆𑀣𑀻𑀢𑀺 [𑀅𑀪𑀺𑀥𑀸𑀦 𑁮𑁧 𑀕𑀸𑀣𑀸]. 𑀅𑀢𑁆𑀭 𑀘𑁂𑀓𑀮𑀺𑀗𑁆𑀕𑀦𑀺𑀲𑁂𑀥𑀩𑁆𑀬𑀸𑀔𑁆𑀬𑀸𑀦𑁂𑀦 𑀮𑀺𑀗𑁆𑀕𑀤𑁆𑀯𑀬𑀯𑀺𑀥𑀸𑀦𑀦𑁆𑀢𑀺 [𑀏𑀓𑀮𑀺𑀗𑁆𑀕𑀦𑀺𑀲𑁂𑀥𑀩𑁆𑀬𑀸𑀚𑁂𑀦 𑀮𑀺𑀗𑁆𑀕𑀤𑁆𑀯𑀬𑀸𑀪𑀺𑀥𑀸𑀦𑀫𑀺𑀢𑀺 (𑀅𑀫𑀭𑀓𑁄𑀲𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)].

𑀕𑀦𑁆𑀣𑀮𑀸𑀳𑀯𑀁 𑀯𑀺𑀥𑀸𑀬𑁂𑀤𑀸𑀦𑀺 𑀧𑀝𑀺𑀧𑀢𑁆𑀢𑀺𑀮𑀸𑀳𑀯𑀢𑁆𑀣𑀫𑀸𑀳 ‘‘𑀅𑀪𑀺𑀥𑀸𑀦𑀦𑁆𑀢𑀭𑀸𑀭𑀫𑁆𑀪𑁂’’𑀇𑀘𑁆𑀘𑀸𑀤𑀺. 𑀅𑀪𑀺𑀥𑀸𑀦𑀦𑁆𑀢𑀭𑀲𑁆𑀲 𑀅𑀜𑁆𑀜𑀲𑁆𑀲 𑀅𑀪𑀺𑀥𑀸𑀦𑀲𑁆𑀲 𑀆𑀭𑀫𑁆𑀪𑁂 𑀲𑀢𑀺, 𑀢𑀼 𑀅𑀦𑁆𑀢𑁄 𑀬𑀲𑁆𑀲 𑀅𑀪𑀺𑀥𑀸𑀦𑀲𑁆𑀲, 𑀅𑀣 𑀆𑀤𑀺 𑀬𑀲𑁆𑀲 𑀅𑀪𑀺𑀥𑀸𑀦𑀲𑁆𑀲𑀸𑀢𑀺 𑀇𑀤𑀁 𑀅𑀪𑀺𑀥𑀸𑀦𑀤𑁆𑀯𑀬𑀜𑁆𑀘 𑀜𑁂𑀬𑁆𑀬𑀁. 𑀢𑁆𑀯𑀦𑁆𑀢𑀫𑀣𑀸𑀤𑀺𑀓𑀁 𑀦𑀸𑀫𑀸𑀤𑀺𑀧𑀤𑀁 𑀧𑀼𑀩𑁆𑀩𑁂𑀦 𑀦 𑀲𑀫𑁆𑀩𑀚𑁆𑀛𑀢𑁂𑀢𑀺 𑀪𑀸𑀯𑁄. 𑀢𑀢𑁆𑀭 𑀦𑀸𑀫𑀧𑀤𑀁 𑀬𑀣𑀸 𑁋 𑀚𑀺𑀦𑁄 𑀲𑀓𑁆𑀓𑁄 𑀢𑀼 𑀲𑀺𑀤𑁆𑀥𑀢𑁆𑀣𑁄 [𑀅𑀪𑀺𑀥𑀸𑀦 𑁪 𑀕𑀸𑀣𑀸]. 𑀓𑁂𑀲𑀯𑁄 𑀘𑀓𑁆𑀓𑀧𑀸𑀡𑁆𑀬𑀣 [𑀅𑀪𑀺𑀥𑀸𑀦 𑁧𑁬 𑀕𑀸𑀣𑀸]. 𑀫𑀳𑀺𑀲𑁆𑀲𑀭𑁄 𑀲𑀺𑀯𑁄 𑀲𑀽𑀮𑀻 [𑀅𑀪𑀺𑀥𑀸𑀦 𑁧𑁬 𑀕𑀸𑀣𑀸]. 𑀮𑀺𑀗𑁆𑀕𑀧𑀤𑀁 𑀬𑀣𑀸 𑁋 𑀧𑀼𑀫𑁂 𑀢𑀼 𑀧𑀡𑁆𑀳𑀺 𑀧𑀸𑀲𑀡𑀺 [𑀅𑀪𑀺𑀥𑀸𑀦 𑁨𑁭𑁭 𑀕𑀸𑀣𑀸]. 𑀧𑀼𑀫𑁂 𑀢𑀽𑀢𑀼 𑀭𑀚𑁄 𑀧𑀼𑀧𑁆𑀨𑀁 [𑀅𑀪𑀺𑀥𑀸𑀦 𑁨𑁩𑁮 𑀕𑀸𑀣𑀸]. 𑀲𑀸 𑀢𑀺𑀭𑁄𑀓𑀭𑀡𑀻𑀧𑁆𑀬𑀣 ¶ [𑀅𑀪𑀺𑀥𑀸𑀦 𑁨𑁯𑁮 𑀕𑀸𑀣𑀸]. 𑀧𑀼𑀦𑁆𑀦𑀧𑀼𑀁𑀲𑀓𑀫𑀼𑀮𑁆𑀮𑁄𑀘𑀁 [𑀅𑀪𑀺𑀥𑀸𑀦 𑁨𑁯𑁯 𑀕𑀸𑀣𑀸]. 𑀅𑀢𑁆𑀣𑀧𑀤𑀁 𑀬𑀣𑀸 𑁋 𑀉𑀤𑀭𑁂 𑀢𑀼 𑀢𑀣𑀸 𑀧𑀸𑀘𑀸’𑀦𑀮𑀲𑁆𑀫𑀺𑀁 𑀕𑀳𑀡𑀻𑀢𑁆𑀣𑀺𑀬𑀁 [𑀅𑀪𑀺𑀥𑀸𑀦 𑁯𑁭𑁩 𑀕𑀸𑀣𑀸]. 𑀧𑀡𑀻𑀢𑁄 𑀢𑀻𑀲𑀼 𑀫𑀥𑀼𑀭𑁂, 𑀉𑀢𑁆𑀢𑀫𑁂 𑀯𑀺𑀳𑀺𑀢𑁂𑀧𑁆𑀬𑀣. 𑀅𑀜𑁆𑀚𑀲𑁂 𑀯𑀺𑀲𑀺𑀔𑀸𑀬𑀜𑁆𑀘, 𑀧𑀦𑁆𑀢𑀺𑀬𑀁 𑀯𑀻𑀣𑀺 𑀦𑀸𑀭𑀺𑀬𑀁 [𑀅𑀪𑀺𑀥𑀸𑀦 𑁯𑁪𑁦 𑀕𑀸𑀣𑀸]. 𑀅𑀣𑀲𑀤𑁆𑀤𑁂𑀦 𑀘𑀢𑁆𑀭 𑀅𑀦𑀦𑁆𑀢𑀭𑀺𑀬𑀢𑁆𑀣𑁂𑀦 𑀲𑀓𑀧𑀭𑀺𑀬𑀸𑀬𑁄𑀧𑀮𑀓𑁆𑀔𑀡𑀢𑁄 𑀅𑀣𑁄 𑀲𑀤𑁆𑀤𑀸𑀤𑀻𑀲𑀼 𑀘 𑀦 𑀧𑀼𑀩𑁆𑀩𑁂𑀦 𑀲𑀫𑁆𑀩𑀚𑁆𑀛𑀢𑁂. 𑀧𑀸𑀡𑀓𑁄 𑀘𑀸𑀧𑁆𑀬𑀣𑁄 𑀉𑀘𑁆𑀘𑀸𑀮𑀺𑀗𑁆𑀕𑁄 𑀮𑁄𑀫𑀲𑀧𑀸𑀡𑀓𑁄𑀢𑀺 [𑀅𑀪𑀺𑀥𑀸𑀦 𑁬𑁨𑁩 𑀕𑀸𑀣𑀸].

[𑀛] 𑀇𑀤𑀸𑀦𑀺 𑀩𑀼𑀤𑁆𑀥𑀯𑀘𑀦𑀸𑀦𑀫𑀦𑀼𑀭𑀽𑀧𑀸𑀦𑀫𑁆𑀧𑀺 𑀧𑀘𑀼𑀭𑀧𑁆𑀧𑀬𑁄𑀕𑀸𑀦𑀫𑁂𑀯 𑀓𑁂𑀲𑀜𑁆𑀘𑀺 𑀕𑀳𑀡𑀁 𑀅𑀢𑁆𑀢𑀦𑁄 𑀲𑀢𑁆𑀣𑀦𑁆𑀢𑀭𑀸𑀧𑀲𑀬𑁆𑀳𑀢𑀸𑀯𑀲𑁂𑀦 𑀅𑀳𑀁𑀓𑀸𑀭𑀧𑀼𑀩𑁆𑀩𑀺𑀓𑀸𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀪𑀺𑀬𑁆𑀬𑁄 𑀧𑀬𑁄𑀕’’𑀫𑀺𑀘𑁆𑀘𑀸𑀤𑀺. 𑀲𑁄𑀕𑀢𑁂 𑀲𑀼𑀕𑀢𑀲𑁆𑀲 𑀯𑀘𑀦𑀪𑀽𑀢𑁂 𑀆𑀕𑀫𑁂 𑀧𑀺𑀝𑀓𑀢𑁆𑀢𑀬𑁂, 𑀢𑀜𑁆𑀳𑀺 𑀆𑀕𑀘𑁆𑀙𑀦𑁆𑀢𑀺 𑀢𑀺𑀯𑀺𑀥𑀲𑀫𑁆𑀧𑀢𑁆𑀢𑀺𑀬𑁄 𑀏𑀢𑁂𑀦𑀸𑀢𑀺 𑀆𑀕𑀫𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀪𑀺𑀬𑁆𑀬𑁄 𑀧𑀬𑁄𑀕𑀁 𑀩𑀸𑀳𑀼𑀮𑁆𑀮𑁂𑀦 𑀧𑀬𑀼𑀚𑁆𑀚𑀢𑁂𑀢𑀺 𑀧𑀬𑁄𑀕𑁄, 𑀢𑀁 𑀆𑀕𑀫𑁆𑀫 𑀕𑀳𑁂𑀢𑁆𑀯𑀸 𑀓𑁆𑀯𑀘𑀺 𑀅𑀭𑀜𑁆𑀜𑀯𑀕𑁆𑀕𑀸𑀤𑀻𑀲𑀼 𑀦𑀺𑀖𑀡𑁆𑀝𑀼𑀬𑀼𑀢𑁆𑀢𑀺𑀜𑁆𑀘 𑀦𑀺𑀖𑀡𑁆𑀝𑀼𑀦𑀸𑀫𑀓𑁂 𑀲𑀢𑁆𑀣𑁂 𑀆𑀕𑀢𑀁 𑀩𑀼𑀤𑁆𑀥𑀯𑀘𑀦𑀸𑀦𑀼𑀭𑀽𑀧𑀁 𑀬𑀼𑀢𑁆𑀢𑀺𑀜𑁆𑀘 𑀆𑀦𑀻𑀬 𑀆𑀦𑁂𑀢𑁆𑀯𑀸 𑀦𑀸𑀫𑀮𑀺𑀗𑁆𑀕𑀁 𑀓𑀣𑀻𑀬𑀢𑀺 𑀅𑀦𑁆𑀢𑁄𑀪𑀸𑀯𑁂𑀦 𑀦𑀺𑀧𑁆𑀨𑀦𑁆𑀦𑀁 𑀩𑀳𑀺𑀪𑀸𑀯𑁂𑀦 𑀧𑀓𑀸𑀲𑀻𑀬𑀢𑁂. 𑀆𑀯𑀺𑀪𑀸𑀯𑀢𑁆𑀢𑀫𑁂𑀯 𑀳𑀺 𑀚𑀜𑁆𑀜𑀢𑁆𑀢𑀁 𑀲𑀦𑁆𑀢𑀓𑀸𑀭𑀺𑀬𑀓𑀸𑀭𑀺𑀦𑁄. 𑀆𑀲𑀻𑀲𑀸𑀬𑀁 𑀯𑀸 𑀅𑀯𑀲𑁆𑀲𑀫𑁆𑀪𑀸𑀯𑀺𑀦𑁄𑀧𑀺 𑀯𑀘𑀦𑀲𑁆𑀲 𑀯𑀢𑁆𑀢𑀫𑀸𑀦𑀢𑁆𑀣𑀯𑀢𑁆𑀢𑀺𑀘𑁆𑀙𑀸𑀬 𑀯𑀢𑁆𑀢𑀫𑀸𑀦𑀢𑁆𑀢𑀁, 𑀢𑀣𑀸 𑀳𑀺 𑀮𑁄𑀓𑁂 𑀅𑀯𑀲𑁆𑀲𑀫𑁆𑀪𑀸𑀯𑀺𑀦𑁄 𑀲𑀺𑀤𑁆𑀥𑀺𑀫𑀪𑀺𑀲𑀦𑁆𑀥𑀸𑀬 𑀪𑀸𑀯𑀺𑀦𑀫𑀧𑁆𑀧𑀢𑁆𑀢𑀁 𑀯𑀢𑁆𑀢𑀫𑀸𑀦𑀢𑁆𑀢𑁂𑀦 𑀯𑀸 𑀅𑀢𑀻𑀢𑀢𑁆𑀢𑁂𑀦 𑀯𑀸 𑀯𑀢𑁆𑀢𑀼𑀫𑀺𑀘𑁆𑀙𑀢𑀺, 𑀢𑀁 𑀬𑀣𑀸 𑁋 ‘‘𑀇𑀤𑀁 𑀫𑀫𑀫𑀧𑀸𑀧𑀬𑁂’’𑀢𑀺 𑀓𑁄𑀘𑀺 𑀓𑁂𑀦𑀘𑀸𑀪𑀺𑀳𑀺𑀢𑁄 𑀲𑀦𑁆𑀢𑁄 𑀅𑀯𑀲𑁆𑀲𑀁 𑀢𑀁 𑀪𑀯𑀺𑀲𑁆𑀲𑀢𑀻𑀢𑀺 𑀫𑀜𑁆𑀜𑀫𑀸𑀦𑁄 𑀧𑀸𑀧𑀺𑀬𑀫𑀸𑀦𑀁 𑀧𑀢𑁆𑀢𑀁 𑀯𑀸 𑀯𑀢𑁆𑀢𑀼𑀫𑀺𑀘𑁆𑀙𑀢𑀺 ¶ , 𑀢𑀢𑁄𑀬𑁂𑀯 ‘‘𑀆𑀲𑀻𑀲𑀸𑀬𑀁 𑀪𑀽𑀢𑀫𑀺𑀯 𑀘𑁂’’𑀢𑀺 [𑀧𑀸𑀡𑀺𑀦𑀺 𑁩.𑁩.𑁧𑁩𑁨] 𑀢𑀤𑀢𑀺𑀤𑁂𑀲𑀯𑀘𑀦𑀁 𑀧𑀘𑁆𑀘𑀸𑀔𑁆𑀬𑀸𑀬𑀢𑁂.

𑀧𑀡𑀸𑀫𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀲𑀕𑁆𑀕𑀓𑀡𑁆𑀟𑀯𑀡𑁆𑀡𑀦𑀸

𑁧. 𑀇𑀤𑀸𑀦𑀺 𑀬𑀲𑁆𑀫𑀸 𑀅𑀪𑀺𑀥𑁂𑀬𑁆𑀬𑀢𑁆𑀣𑁄 𑀦𑀸𑀫 𑀧𑀜𑁆𑀜𑀢𑁆𑀢𑀺𑀧𑀭𑀫𑀢𑁆𑀣𑀢𑁆𑀣𑀯𑀲𑁂𑀦 𑀤𑀼𑀯𑀺𑀥𑁄, 𑀢𑁂𑀲𑀼 𑀬𑁂𑀪𑀼𑀬𑁆𑀬𑁂𑀦 𑀧𑀜𑁆𑀜𑀢𑁆𑀢𑀢𑁆𑀣𑀢𑁄 𑀧𑀭𑀫𑀢𑁆𑀣𑀢𑁆𑀣𑁄𑀯 𑀲𑁂𑀝𑁆𑀞𑁄, 𑀢𑁂𑀲𑀼𑀧𑀺 𑀑𑀥𑀺𑀲𑁄 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀓𑀭𑀢𑁆𑀢𑀸 𑀬𑀣𑀸𑀓𑁆𑀓𑀫𑀁 𑀅𑀝𑁆𑀞 𑀥𑀫𑁆𑀫𑀸 𑀲𑁂𑀝𑁆𑀞𑀸, 𑀢𑀢𑁄𑀧𑀺 𑀦𑀺𑀩𑁆𑀩𑀸𑀦𑀫𑁂𑀯 𑀲𑁂𑀝𑁆𑀞𑀁, 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀥𑀫𑁆𑀫𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀯 𑀲𑁂𑀝𑁆𑀞𑁄. 𑀯𑀼𑀢𑁆𑀢𑀜𑁆𑀳𑀺 𑀪𑀕𑀯𑀢𑀸 ‘‘𑀯𑀺𑀭𑀸𑀕𑁄 𑀲𑁂𑀝𑁆𑀞𑁄 𑀥𑀫𑁆𑀫𑀸𑀦𑀁, 𑀤𑁆𑀯𑀺𑀧𑀤𑀸𑀦𑀜𑁆𑀘 𑀘𑀓𑁆𑀔𑀼𑀫𑀸’’𑀢𑀺 [𑀥. 𑀧. 𑁨𑁭𑁩; 𑀦𑁂𑀢𑁆𑀢𑀺. 𑁧𑁨𑁫]. 𑀏𑀢𑁆𑀣 𑀳𑀺 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸 𑀯𑀸 𑀅𑀲𑀗𑁆𑀔𑀢𑀸 𑀯𑀸, 𑀯𑀺𑀭𑀸𑀕𑁄 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 [𑀅. 𑀦𑀺. 𑁪.𑁩𑁪; 𑁫.𑁩𑁨; 𑀇𑀢𑀺𑀯𑀼. 𑁯𑁦] 𑀯𑀘𑀦𑀢𑁄 𑀲𑀩𑁆𑀩𑁂𑀲𑀫𑁆𑀧𑀺 𑀲𑀗𑁆𑀔𑀢𑀸𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀯𑀺𑀭𑀸𑀕𑀲𑀗𑁆𑀔𑀸𑀢𑁄 𑀦𑀺𑀩𑁆𑀩𑀸𑀦𑀫𑁂𑀯 𑀲𑁂𑀝𑁆𑀞𑁄, 𑀘𑀓𑁆𑀔𑀼𑀫𑀸 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀥𑀫𑁆𑀫𑀸𑀦𑀁, 𑀤𑁂𑀯𑀫𑀦𑀼𑀲𑁆𑀲𑀸𑀤𑀺𑀪𑁂𑀤𑀸𑀦𑀁 𑀤𑁆𑀯𑀺𑀧𑀤𑀸𑀦𑀜𑁆𑀘 𑀧𑀜𑁆𑀜𑀢𑁆𑀢𑀢𑁆𑀣𑀸𑀦𑀁 𑀲𑁂𑀝𑁆𑀞𑁄𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸, 𑀢𑀲𑁆𑀫𑀸 𑀲𑀩𑁆𑀩𑀢𑁆𑀣𑀲𑁂𑀝𑁆𑀞𑀢𑁆𑀣𑀸𑀪𑀺𑀥𑀸𑀬𑀓𑀸𑀪𑀺𑀥𑀸𑀦𑀪𑀽𑀢𑀁 𑀩𑀼𑀤𑁆𑀥𑀸𑀢𑀺𑀥𑀸𑀦𑀫𑁂𑀯 𑀧𑀞𑀫𑀁 𑀲𑀕𑁆𑀕𑀓𑀡𑁆𑀟𑀲𑁆𑀲 𑀆𑀤𑀺𑀫𑁆𑀳𑀺 𑀧𑀢𑁆𑀣𑀺𑀬𑀯𑀲𑁂𑀦 [𑀲𑀢𑁆𑀣𑀺𑀬𑀯𑀲𑁂𑀦 (𑀓.)] 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀩𑀼𑀤𑁆𑀥𑁄’’𑀘𑁆𑀘𑀸𑀤𑀺. 𑀢𑀢𑁆𑀣 𑀚𑀺𑀦𑀲𑀤𑁆𑀤𑀦𑁆𑀢𑀁 𑀲𑀩𑁆𑀩𑀩𑀼𑀤𑁆𑀥𑀲𑁆𑀲 𑀦𑀸𑀫𑀁. 𑀲𑀩𑁆𑀩𑀁 𑀩𑀼𑀤𑁆𑀥𑀯𑀸𑀢𑀺 𑀩𑀼𑀤𑁆𑀥𑁄, 𑀲𑀓𑀫𑁆𑀫𑀓𑀸 𑀓𑀢𑁆𑀢𑀭𑀺 𑀢𑀧𑀘𑁆𑀘𑀬𑁄. 𑀯𑀺𑀲𑀺𑀝𑁆𑀞𑀸 𑀩𑀼𑀤𑁆𑀥𑀺 𑀅𑀲𑁆𑀲𑀢𑁆𑀣𑀻𑀢𑀺 𑀩𑀼𑀤𑁆𑀥𑁄, 𑀧𑀲𑀁𑀲𑀸𑀬𑀁 𑀬𑀤𑀸𑀤𑀺𑀦𑀸 𑀡𑀧𑀘𑁆𑀘𑀬𑁄. 𑀤𑀸𑀦𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀞𑀸𑀦𑀸𑀝𑁆𑀞𑀸𑀦𑀜𑀸𑀡𑀸𑀤𑀬𑁄 𑀯𑀸 𑀤𑀲 ¶ 𑀩𑀮𑀸𑀦𑀺 𑀬𑀲𑁆𑀲𑁂𑀢𑀺 𑀤𑀲𑀩𑀮𑁄. 𑀲𑀸𑀲𑀢𑀺 𑀯𑀺𑀦𑀬𑀢𑀺 𑀲𑀢𑁆𑀢𑁂𑀢𑀺 𑀲𑀢𑁆𑀣𑀸. 𑀲𑀩𑁆𑀩𑀥𑀫𑁆𑀫𑀚𑀸𑀦𑀦𑀲𑀻𑀮𑀢𑀸𑀬 𑀲𑀩𑁆𑀩𑀜𑁆𑀜𑀽. 𑀤𑁆𑀯𑀺𑀧𑀤𑀸𑀦𑀁, 𑀤𑁆𑀯𑀺𑀧𑀤𑁂𑀲𑀼 𑀯𑀸 𑀉𑀢𑁆𑀢𑀫𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄, 𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸𑀬𑀁 [𑀩𑀼. 𑀯𑀁. 𑀅𑀝𑁆𑀞. 𑁩𑁭 𑀦𑀺𑀤𑀸𑀦𑀓𑀣𑀸] 𑀦𑀺𑀤𑁆𑀥𑀸𑀭𑀡𑀮𑀓𑁆𑀔𑀡𑀸𑀬 𑀙𑀝𑁆𑀞𑀺𑀬𑀸 𑀲𑀫𑀸𑀲𑀲𑁆𑀲 𑀧𑀝𑀺𑀲𑀺𑀤𑁆𑀥𑀢𑁆𑀢𑀸 𑀦𑁂𑀤𑀺𑀲𑀻 𑀦𑀺𑀤𑁆𑀥𑀸𑀭𑀡𑀮𑀓𑁆𑀔𑀡𑀸 𑀙𑀝𑁆𑀞𑀻 𑀕𑀫𑁆𑀬𑀢𑁂. 𑀓𑀲𑁆𑀫𑀸 𑀧𑀦 𑀲𑁄 𑀢𑀢𑁆𑀣 𑀧𑀝𑀺𑀲𑀺𑀤𑁆𑀥𑁄𑀢𑀺? 𑀲𑀫𑀸𑀲𑁂 𑀬𑁂𑀪𑀼𑀬𑁆𑀬𑁂𑀦 𑀦𑀺𑀤𑁆𑀥𑀸𑀭𑀡𑀮𑀓𑁆𑀔𑀡𑀢𑁆𑀢𑀬𑀲𑁆𑀲 𑀯𑀺𑀓𑀮𑀸𑀪𑀸𑀯𑀢𑁄. 𑀓𑀺𑀜𑁆𑀘𑀸𑀧𑀺 𑀳𑀺 𑀢𑀢𑁆𑀣 𑀙𑀝𑁆𑀞𑀺𑀬𑀸𑀬𑁂𑀯 𑀧𑀝𑀺𑀲𑀺𑀤𑁆𑀥𑁄, 𑀲𑀢𑁆𑀢𑀫𑀺𑀬𑀸 𑀧𑀦 𑀦𑀺𑀤𑁆𑀥𑀸𑀭𑀡𑀮𑀓𑁆𑀔𑀡𑀸𑀬 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀢𑀲𑁆𑀲𑀸𑀧𑀺 𑀲𑁄 𑀧𑀝𑀺𑀲𑁂𑀥𑀦𑀻𑀬𑁄𑀬𑁂𑀯. 𑀫𑀼𑀦𑀻𑀦𑀁 𑀇𑀦𑁆𑀤𑁄 𑀭𑀸𑀚𑀸 𑀫𑀼𑀦𑀺𑀦𑁆𑀤𑁄. 𑀧𑀼𑀜𑁆𑀜𑀜𑀸𑀡𑀪𑀸𑀕𑁆𑀬𑀸𑀤𑀬𑁄 𑀪𑀕𑀁 𑀦𑀸𑀫, 𑀢𑀁𑀬𑁄𑀕𑀸 𑀪𑀕𑀯𑀸. 𑀦𑀸𑀣𑀢𑀺 𑀲𑀢𑁆𑀢𑀸𑀦𑀁 𑀳𑀺𑀢𑀁 𑀬𑀸𑀘𑀢𑀺, 𑀓𑀺𑀮𑁂𑀲𑁂 𑀯𑀸 𑀉𑀧𑀢𑀸𑀧𑁂𑀢𑀺, 𑀲𑀢𑁆𑀢𑁂𑀲𑀼 𑀯𑀸 𑀇𑀲𑁆𑀲𑀭𑀺𑀬𑀁 𑀓𑀭𑁄𑀢𑀺, 𑀢𑁂𑀲𑀁 𑀯𑀸 𑀳𑀺𑀢𑀁 𑀆𑀲𑀻𑀲𑀢𑀻𑀢𑀺 𑀦𑀸𑀣𑁄. 𑀩𑀼𑀤𑁆𑀥𑀥𑀫𑁆𑀫𑀲𑀫𑀦𑁆𑀢𑀜𑀸𑀡𑀤𑀺𑀩𑁆𑀩𑀘𑀓𑁆𑀔𑀼𑀲𑀗𑁆𑀔𑀸𑀢𑁂𑀳𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀘𑀓𑁆𑀔𑀼𑀫𑀸. 𑀲𑀩𑁆𑀩𑀤𑀸 𑀩𑁆𑀬𑀸𑀫𑀧𑁆𑀧𑀪𑀸𑀬 𑀓𑀸𑀬𑀢𑁄 𑀦𑀺𑀘𑁆𑀙𑀭𑀡𑀯𑀲𑁂𑀦 𑀅𑀗𑁆𑀕𑀻𑀭𑀲𑁄. 𑀲𑀩𑁆𑀩𑀸𑀓𑀸𑀭𑁂𑀦 𑀲𑀩𑁆𑀩𑀥𑀫𑁆𑀫𑀸𑀦𑀁 𑀫𑀼𑀦𑀦𑀢𑁄 𑀫𑀼𑀦𑀺, 𑀥𑀫𑁆𑀫𑀯𑀸𑀤𑁂𑀲𑀼 𑀯𑀸 𑀫𑁄𑀦𑀓𑀭𑀡𑀢𑁄 𑀫𑀼𑀦𑀺.

𑁨. 𑀮𑁄𑀓𑀸𑀦𑀁, 𑀮𑁄𑀓𑁂𑀲𑀼 𑀯𑀸 𑀦𑀸𑀣𑁄 𑀮𑁄𑀓𑀦𑀸𑀣𑁄. 𑀅𑀢𑁆𑀢𑀦𑁄 𑀅𑀥𑀺𑀓𑀲𑁆𑀲 𑀓𑀲𑁆𑀲𑀘𑀺𑀧𑀺 𑀉𑀢𑁆𑀢𑀫𑀧𑀼𑀕𑁆𑀕𑀮𑀲𑁆𑀲 𑀅𑀪𑀸𑀯𑀢𑁄 𑀅𑀦𑀥𑀺𑀯𑀭𑁄, 𑀲𑀩𑁆𑀩𑀧𑀭𑀺𑀬𑀦𑁆𑀢𑀕𑀢𑀢𑁆𑀢𑀪𑀸𑀯𑀢𑁆𑀢𑀸 𑀯𑀸 𑀦𑀢𑁆𑀣𑀺 𑀏𑀢𑀲𑁆𑀲 𑀇𑀢𑁄 𑀅𑀜𑁆𑀜𑁄 𑀅𑀥𑀺𑀓𑁄 𑀧𑀢𑁆𑀣𑁂𑀢𑀩𑁆𑀩𑁄 𑀅𑀢𑁆𑀢𑀪𑀸𑀯𑁄𑀢𑀺 𑀅𑀦𑀥𑀺𑀯𑀭𑁄. 𑀫𑀳𑀦𑁆𑀢𑀸𑀦𑀁 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀏𑀲𑀦𑀢𑁄 𑀕𑀯𑁂𑀲𑀦𑀢𑁄 𑀫𑀳𑁂𑀲𑀺, 𑀫𑀳𑀦𑁆𑀢𑁄 𑀯𑀸 𑀈𑀲𑁄 𑀯𑀺𑀪𑀽𑀢𑀺 𑀏𑀢𑀲𑁆𑀲𑀸𑀢𑀺 𑀫𑀳𑁂𑀲𑀺. 𑀳𑀺𑀢𑀁 𑀯𑀺𑀦𑀬𑀢𑀺 𑀅𑀦𑀼𑀲𑀸𑀲𑀢𑀻𑀢𑀺 𑀯𑀺𑀦𑀸𑀬𑀓𑁄, 𑀯𑀺𑀲𑀺𑀝𑁆𑀞𑀁 𑀯𑀸 𑀦𑀺𑀩𑁆𑀩𑀸𑀦𑀁 𑀲𑀢𑁆𑀢𑁂 𑀦𑁂𑀢𑀻𑀢𑀺 𑀯𑀺𑀦𑀸𑀬𑀓𑁄. 𑀲𑀩𑁆𑀩𑀥𑀫𑁆𑀫𑀤𑀲𑁆𑀲𑀦𑀲𑀻𑀮𑀢𑀸𑀬 ¶ ‘‘𑀲𑀫𑀦𑁆𑀢𑀘𑀓𑁆𑀔𑀽’𑀢𑀺 𑀮𑀤𑁆𑀥𑀦𑀸𑀫𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀫𑀦𑁆𑀢𑀘𑀓𑁆𑀔𑀼. 𑀲𑁄𑀪𑀦𑀁 𑀕𑀢𑀁 𑀜𑀸𑀡𑀫𑀲𑁆𑀲, 𑀲𑀁𑀲𑀸𑀭𑀸 𑀯𑀸 𑀲𑀼𑀝𑁆𑀞𑀼 𑀅𑀧𑀼𑀦𑀭𑀸𑀯𑀢𑁆𑀢𑀺𑀬𑀸 𑀕𑀢𑀯𑀸𑀢𑀺 𑀲𑀼𑀕𑀢𑁄, 𑀲𑀧𑀭𑀲𑀼𑀔𑀲𑀺𑀤𑁆𑀥𑀢𑁆𑀣𑀁 𑀯𑀸 𑀲𑀫𑁆𑀫𑀸 𑀕𑀢𑀯𑀸𑀢𑀺 𑀲𑀼𑀕𑀢𑁄. 𑀪𑀽𑀭𑀺 𑀩𑀳𑀼𑀓𑀸 𑀧𑀜𑁆𑀜𑀸 𑀬𑀲𑁆𑀲, 𑀅𑀦𑀦𑁆𑀢𑀢𑁆𑀢𑀸 𑀯𑀸 𑀪𑀽𑀭𑀺𑀲𑀫𑀸 𑀧𑀜𑁆𑀜𑀸 𑀏𑀢𑀲𑁆𑀲𑀸𑀢𑀺 𑀪𑀽𑀭𑀺𑀧𑀜𑁆𑀜𑁄, 𑀅𑀦𑀦𑁆𑀢𑀸𑀬 𑀫𑀳𑀸𑀧𑀣𑀯𑀺𑀬𑀸 𑀲𑀤𑀺𑀲𑀧𑀜𑁆𑀜𑁄𑀢𑁆𑀬𑀢𑁆𑀣𑁄. 𑀓𑀺𑀮𑁂𑀲𑀸𑀤𑀺𑀧𑀜𑁆𑀘𑀯𑀺𑀥𑀁 𑀫𑀸𑀭𑀁 𑀚𑀺𑀢𑀯𑀸𑀢𑀺 𑀫𑀸𑀭𑀚𑀺.

𑁩. 𑀦𑀭𑀸𑀦𑀁 𑀲𑀻𑀳𑁄 𑀲𑁂𑀝𑁆𑀞𑁄, 𑀧𑀭𑀧𑁆𑀧𑀯𑀸𑀤𑀫𑀤𑁆𑀤𑀦𑀲𑀳𑀦𑀢𑁄 𑀯𑀸 𑀦𑀭𑁄 𑀘 𑀲𑁄 𑀲𑀻𑀳𑁄 𑀘𑀸𑀢𑀺 𑀦𑀭𑀲𑀻𑀳𑁄, 𑀲𑀳𑀢𑀻𑀢𑀺 𑀲𑀻𑀳𑁄, 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑀼𑀩𑁆𑀩𑀯𑀡𑁆𑀡𑀸𑀓𑀸𑀭𑀲𑁆𑀲𑀻𑀓𑀸𑀭𑁄, 𑀲𑀻𑀳𑀲𑀤𑀺𑀲𑀢𑁆𑀢𑀸 𑀯𑀸 𑀦𑀭𑁄 𑀘 𑀲𑁄 𑀲𑀻𑀳𑁄 𑀘𑀸𑀢𑀺 𑀦𑀭𑀲𑀻𑀳𑁄. 𑀬𑀣𑀸 𑀳𑀺 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀘𑀢𑀽𑀳𑀺 𑀤𑀸𑀞𑀸𑀳𑀺 𑀲𑀩𑁆𑀩𑀲𑀢𑁆𑀢𑁂 𑀳𑀺𑀁𑀲𑀢𑀺 𑀅𑀪𑀺𑀪𑀯𑀢𑀺, 𑀢𑀣𑀸 𑀪𑀕𑀯𑀸𑀧𑀺 𑀲𑀻𑀮𑀧𑀜𑁆𑀜𑀸𑀧𑀼𑀜𑁆𑀜𑀺𑀤𑁆𑀥𑀺𑀲𑀗𑁆𑀔𑀸𑀢𑁂𑀳𑀺 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀲𑀩𑁆𑀩𑀁 𑀮𑁄𑀓𑀁 𑀳𑀺𑀁𑀲𑀢𑀺 𑀅𑀪𑀺𑀪𑀯𑀢𑀻𑀢𑀺 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁. 𑀲𑀩𑁆𑀩𑀧𑀼𑀭𑀺𑀲𑀸𑀦𑀁 𑀲𑁂𑀝𑁆𑀞𑀢𑁆𑀢𑀸 𑀦𑀭𑀯𑀭𑁄, 𑀦𑀭𑀸𑀦𑀁 𑀯𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀲𑁂𑀝𑁆𑀞𑀢𑁆𑀢𑀸 𑀦𑀭𑀯𑀭𑁄, ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄’’𑀢𑀺 [𑀲𑀁. 𑀦𑀺. 𑁧.𑁨𑁩] 𑀏𑀢𑁆𑀣 𑀯𑀺𑀬 𑀦𑀭𑀲𑀤𑁆𑀤𑁂𑀦 𑀲𑀩𑁆𑀩𑁂 𑀤𑁂𑀯𑀫𑀦𑀼𑀲𑁆𑀲𑀸 𑀲𑀗𑁆𑀕𑀳𑀺𑀢𑀸. 𑀥𑀫𑁆𑀫𑀲𑁆𑀲 𑀭𑀸𑀚𑀧𑀯𑀢𑁆𑀢𑀓𑀢𑁆𑀢𑀸 𑀥𑀫𑁆𑀫𑀭𑀸𑀚𑀸, 𑀥𑀫𑁆𑀫𑀢𑁄 𑀯𑀸 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀭𑀸𑀚𑀸 𑀚𑀸𑀢𑁄, 𑀦𑀸𑀥𑀫𑁆𑀫𑀢𑁄𑀢𑀺 𑀥𑀫𑁆𑀫𑀭𑀸𑀚𑀸, 𑀥𑀫𑁆𑀫𑁂𑀦 𑀭𑀸𑀚𑀢𑀻𑀢𑀺 𑀯𑀸 𑀥𑀫𑁆𑀫𑀭𑀸𑀚𑀸, 𑀥𑀫𑁆𑀫𑀧𑀸𑀮𑀓𑁄 𑀯𑀸 𑀭𑀸𑀚𑀸 𑀥𑀫𑁆𑀫𑀭𑀸𑀚𑀸. 𑀫𑀼𑀦𑀻𑀦𑀁 𑀲𑁂𑀝𑁆𑀞𑀢𑁆𑀢𑀸 𑀫𑀳𑀸𑀫𑀼𑀦𑀺. 𑀤𑁂𑀯𑀸𑀦𑀁 𑀅𑀢𑀺𑀤𑁂𑀯𑁄𑀢𑀺 𑀤𑁂𑀯𑀤𑁂𑀯𑁄, 𑀤𑁂𑀯𑀸𑀦𑀁 𑀅𑀥𑀺𑀓𑁄 𑀯𑀸 𑀤𑁂𑀯𑁄 𑀤𑁂𑀯𑀤𑁂𑀯𑁄. 𑀮𑁄𑀓𑀸𑀦𑀁 𑀕𑀭𑀼 𑀆𑀘𑀭𑀺𑀬𑁄 𑀮𑁄𑀓𑀕𑀭𑀼, 𑀮𑁄𑀓𑀸𑀦𑀁 𑀕𑀭𑀼𑀪𑀸𑀚𑀦𑀢𑁆𑀢𑀸 𑀯𑀸 𑀮𑁄𑀓𑀕𑀭𑀼. 𑀥𑀫𑁆𑀫𑀲𑁆𑀲 𑀲𑀸𑀫𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀥𑀫𑁆𑀫𑀲𑁆𑀲𑀸𑀫𑀻. 𑀬𑀣𑀸 𑀧𑀼𑀭𑀺𑀫𑀓𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 ¶ 𑀲𑀩𑁆𑀩𑀜𑁆𑀜𑀼𑀪𑀸𑀯𑀁 𑀕𑀢𑀸, 𑀢𑀣𑀸 𑀅𑀬𑀫𑁆𑀧𑀺 𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀸 𑀯𑀸 𑀲𑀫𑁆𑀫𑀸 𑀕𑀢𑀁 𑀜𑀸𑀡𑀫𑀲𑁆𑀲𑀸𑀢𑀺 𑀢𑀣𑀸𑀕𑀢𑁄𑀢𑁆𑀬𑀸𑀤𑀺𑀦𑀸 𑀢𑀣𑀸𑀕𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑀧𑀧𑀜𑁆𑀘𑁄 𑀢𑀢𑁆𑀣 𑀢𑀢𑁆𑀣 [𑀤𑀻. 𑀦𑀺. 𑀅𑀝𑁆𑀞. 𑁧.𑁭; 𑀫. 𑀦𑀺. 𑀅𑀝𑁆𑀞. 𑁧.𑁧𑁨; 𑀲𑀁. 𑀦𑀺. 𑀅𑀝𑁆𑀞. 𑁨.𑁩.𑁭𑁮; 𑀅. 𑀦𑀺. 𑀅𑀝𑁆𑀞. 𑁧.𑁧.𑁭𑁦; 𑀉𑀤𑀸. 𑀅𑀝𑁆𑀞. 𑁧𑁮; 𑀇𑀢𑀺𑀯𑀼. 𑀅𑀝𑁆𑀞. 𑁩𑁮; 𑀣𑁂𑀭𑀕𑀸. 𑀅𑀝𑁆𑀞. 𑁧.𑁩; 𑀩𑀼. 𑀯𑀁. 𑀅𑀝𑁆𑀞. 𑁨 𑀦𑀺𑀤𑀸𑀦 𑀓𑀣𑀸; 𑀫𑀳𑀸𑀦𑀺. 𑀅𑀝𑁆𑀞. 𑁧𑁪; 𑀧𑀝𑀺. 𑀲. 𑀅𑀝𑁆𑀞. 𑁧.𑁧.𑁩𑁭; 𑀤𑀻. 𑀦𑀺. 𑀝𑀻. 𑁧.𑁭; 𑀤𑀻. 𑀦𑀺. 𑀅𑀪𑀺. 𑀝𑀻. 𑁧.𑁭; 𑀫. 𑀦𑀺. 𑀝𑀻. 𑁧.𑁧𑁨; 𑀅. 𑀦𑀺. 𑀝𑀻. 𑁧.𑁧.𑁧𑁭𑁦] 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑁪. 𑀲𑀬𑀫𑁂𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀯𑀢𑀺, 𑀅𑀦𑀜𑁆𑀜𑀩𑁄𑀥𑀺𑀢𑁄𑀢𑀺 𑀲𑀬𑀫𑁆𑀪𑀽. 𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑁂𑀦 𑀲’𑀫𑀢𑁆𑀢𑀦𑀸𑀬𑁂𑀯 𑀲𑀩𑁆𑀩𑀥𑀫𑁆𑀫𑁂 𑀩𑀼𑀚𑁆𑀛𑀢𑀺 𑀅𑀩𑀼𑀚𑁆𑀛𑀺 𑀩𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀲𑁂𑀝𑁆𑀞𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀯𑀭𑀧𑀜𑁆𑀜𑁄. 𑀲𑀢𑁆𑀢𑁂 𑀲𑀁𑀲𑀸𑀭𑀡𑁆𑀡𑀯𑀢𑁄 𑀦𑀺𑀩𑁆𑀩𑀸𑀦𑀧𑀸𑀭𑀁 𑀦𑁂𑀢𑀻𑀢𑀺 𑀦𑀸𑀬𑀓𑁄. 𑀚𑀺𑀢𑀧𑀜𑁆𑀘𑀫𑀸𑀭𑀢𑁆𑀢𑀸 𑀚𑀺𑀦𑁄. 𑀏𑀢𑁆𑀣 𑀘 𑀲𑀫𑀦𑁆𑀢𑀪𑀤𑁆𑀭, 𑀮𑁄𑀓𑀚𑀺, 𑀙𑀴𑀪𑀺𑀜𑁆𑀜, 𑀅𑀤𑁆𑀯𑀬𑀯𑀸𑀤𑀻, 𑀲𑀺𑀭𑀻𑀖𑀦, 𑀅𑀓𑀦𑀺𑀝𑁆𑀞𑀕 [𑀅𑀓𑀦𑀺𑀝𑁆𑀞𑀓 (𑀓.)], 𑀥𑀫𑁆𑀫𑀘𑀓𑁆𑀓, 𑀭𑀸𑀕𑀸𑀲𑀦𑀺 [𑀭𑀸𑀕𑀸𑀭𑀺 (𑀓.)], 𑀢𑀺𑀲𑀭𑀡, 𑀔𑀲𑀫 [𑀔𑀡𑀲𑀫 (𑀓.) 𑀔𑁂𑀦 𑀆𑀓𑀸𑀲𑁂𑀦 𑀲𑀫𑀸 𑀢𑀼𑀮𑁆𑀬𑀸 𑀕𑀼𑀡𑀸 𑀬𑀲𑁆𑀲 𑀲𑁄 (𑀢𑀺𑀓𑀡𑁆𑀟𑀲𑁂𑀲𑀝𑀻𑀓𑀸 𑁧.𑁧.𑁮)], 𑀕𑀼𑀡𑀸𑀓𑀭, 𑀫𑀳𑀸𑀲𑀼𑀔, 𑀯𑀚𑀺𑀭, 𑀫𑁂𑀢𑁆𑀢𑀸𑀩𑀮, 𑀅𑀲𑀫, 𑀚𑀺𑀢𑀸𑀭𑀺, 𑀫𑀳𑀸𑀩𑁄𑀥𑀺, 𑀥𑀫𑁆𑀫𑀥𑀸𑀢𑀼, 𑀲𑁂𑀢𑀓𑁂𑀢𑀼, 𑀔𑀚𑀺, 𑀢𑀺𑀫𑀼𑀢𑁆𑀢𑀺 [𑀔𑀚𑀺𑀭𑀯𑀺𑀫𑀼𑀢𑁆𑀢𑀺 (𑀓.) 𑀔𑁂𑀦 𑀆𑀓𑀸𑀲𑀚𑁆𑀛𑀸𑀦𑁂𑀦 𑁋 𑀲𑀼𑀜𑁆𑀜𑀪𑀸𑀯𑀦𑀸𑀬𑀸𑀢𑀺 𑀪𑀸𑀯𑁄 𑁋 𑀚𑀬𑀢𑀺 𑀲𑀁𑀲𑀸𑀭𑀪𑀸𑀯𑀁 𑀬𑁄, 𑀚𑀺+ 𑀓𑁆𑀯𑀺𑀧 𑀲𑀼𑀜𑁆𑀜𑀯𑀸𑀤𑀻𑀦𑀁 𑀩𑁄𑀤𑁆𑀥𑀸𑀦𑀁 ‘‘𑀲𑀼𑀜𑁆𑀜𑀁 𑀲𑀩𑁆𑀩𑀫𑁂𑀯’’ 𑀇𑀢𑁆𑀬𑀸𑀓𑀸𑀭𑀪𑀸𑀯𑀦𑀸𑀬 𑀲𑀁𑀲𑀸𑀭𑀪𑀸𑀯𑀚𑀬𑀦𑀢𑁄 𑀢𑀣𑀸𑀪𑀸𑀯𑁄 (𑀲𑀤𑁆𑀤𑀓𑀧𑁆𑀧𑀤𑁆𑀤𑀼𑀫)], 𑀤𑀲𑀪𑀽𑀫𑀺𑀲𑁆𑀲𑀭, 𑀧𑀜𑁆𑀘𑀜𑀸𑀡, 𑀩𑀳𑀼𑀓𑁆𑀔𑀫, 𑀲𑀫𑁆𑀩𑀼𑀤𑁆𑀥, 𑀲𑀩𑁆𑀩𑀤𑀲𑁆𑀲𑀻, 𑀫𑀳𑀸𑀩𑀮, 𑀲𑀩𑁆𑀩𑀩𑁄𑀥 ¶ [𑀲𑀫𑁆𑀩𑁄𑀥𑀥𑀫𑁆𑀫 (𑀓.)], 𑀥𑀫𑁆𑀫𑀓𑀸𑀬, 𑀲𑀁𑀕𑀼𑀢𑁆𑀢, 𑀅𑀭𑀳, 𑀤𑁆𑀯𑀸𑀤𑀲𑀓𑁆𑀔, 𑀯𑀻𑀢𑀭𑀸𑀕𑀸𑀤𑀻𑀦𑀺𑀧𑀺 𑀅𑀦𑁂𑀓𑀸𑀦𑀺 𑀩𑀼𑀤𑁆𑀥𑀲𑁆𑀲 𑀦𑀸𑀫𑀸𑀦𑀺 [𑀇𑀫𑀸𑀦𑀺 𑀧𑀭𑀺𑀬𑀸𑀬𑀯𑀘𑀦𑀸𑀦𑀺 𑀧𑀸𑀬𑀲𑁄 𑀅𑀫𑀭𑀓𑁄𑀲𑀢𑁄, 𑀢𑀺𑀓𑀡𑁆𑀟𑀲𑁂𑀲𑀸𑀪𑀺𑀥𑀸𑀦𑀢𑁄 𑀘 𑀕𑀳𑀺𑀢𑀸𑀦𑀺]. 𑀲𑀫𑀦𑁆𑀢𑀢𑁄 𑀧𑀼𑀜𑁆𑀜𑀲𑀫𑁆𑀪𑀸𑀭𑀢𑁄 𑀘 𑀜𑀸𑀡𑀲𑀫𑁆𑀪𑀸𑀭𑀢𑁄 𑀘 𑀪𑀤𑁆𑀭𑁄 𑀲𑁂𑀝𑁆𑀞𑁄𑀢𑀺 𑀲𑀫𑀦𑁆𑀢𑀪𑀤𑁆𑀭𑁄𑀢𑁆𑀬𑀸𑀤𑀻𑀦𑀺 𑀘 𑀦𑀺𑀩𑁆𑀩𑀘𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀯𑀼𑀢𑁆𑀢𑀜𑁆𑀘 𑁋

‘‘𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀦𑀸𑀫𑀸𑀦𑀺, 𑀲𑀕𑀼𑀡𑁂𑀦 𑀫𑀳𑁂𑀲𑀺𑀦𑁄;

𑀕𑀼𑀡𑁂𑀦 𑀦𑀸𑀫𑀫𑀼𑀤𑁆𑀥𑁂𑀬𑁆𑀬𑀁, 𑀅𑀧𑀺 𑀦𑀸𑀫𑀲𑀳𑀲𑁆𑀲𑀢𑁄’’𑀢𑀺 [𑀥. 𑀲. 𑀅𑀝𑁆𑀞. 𑁧𑁩𑁧𑁩; 𑀉𑀤𑀸. 𑀅𑀝𑁆𑀞. 𑁫𑁩; 𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁭𑁬; 𑀦𑁂𑀢𑁆𑀢𑀺. 𑀅𑀝𑁆𑀞. 𑁩𑁮].

𑀢𑀢𑁆𑀣 𑀉𑀤𑁆𑀥𑁂𑀬𑁆𑀬𑀦𑁆𑀢𑀺 𑀉𑀤𑁆𑀥𑀭𑀺𑀢𑀩𑁆𑀩𑀁. 𑀅𑀧𑀺 𑀦𑀸𑀫𑀲𑀳𑀲𑁆𑀲𑀢𑁄𑀢𑀺 𑀅𑀦𑁂𑀓𑁂𑀳𑀺 𑀦𑀸𑀫𑀲𑀳𑀲𑁆𑀲𑁂𑀳𑀻𑀢𑁆𑀬𑀢𑁆𑀣𑁄. 𑀲𑀩𑁆𑀩𑀩𑀼𑀤𑁆𑀥𑀦𑀸𑀫𑀓𑀣𑀸.

𑀲𑀓𑁆𑀓𑀸𑀤𑀺𑀲𑀢𑁆𑀢𑀓𑀁 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑀲𑁆𑀲 𑀦𑀸𑀫𑀁. 𑀧𑀜𑁆𑀘𑀫𑀸𑀭𑁂 𑀚𑁂𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀲𑀓𑁆𑀓𑁄, 𑀪𑀕𑀺𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑀓𑀭𑀡𑀢𑁄 𑀯𑀸 𑀮𑁄𑀓𑀫𑀭𑀺𑀬𑀸𑀤𑀁 𑀙𑀺𑀦𑁆𑀤𑀺𑀢𑀼𑀁 𑀲𑀓𑁆𑀓𑀼𑀡𑀦𑁆𑀢𑀻𑀢𑀺 𑀲𑀓𑁆𑀓𑀸, 𑀲𑀸𑀓𑀺𑀬𑀭𑀸𑀚𑀽𑀦𑀁 𑀧𑀼𑀩𑁆𑀩𑀭𑀸𑀚𑀸𑀦𑁄, 𑀢𑁂𑀲𑀁 𑀯𑀁𑀲𑀪𑀽𑀢𑀢𑁆𑀢𑀸 𑀪𑀕𑀯𑀸 ‘‘𑀲𑀓𑁆𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀲𑁆𑀲 𑀘 𑀚𑀸𑀢𑀺𑀲𑀫𑀦𑀦𑁆𑀢𑀭𑀁 𑀦𑀺𑀥𑀬𑁄 𑀭𑀢𑀦𑀸𑀦𑀺 𑀘 𑀉𑀧𑁆𑀧𑀦𑁆𑀦𑀸𑀦𑀻𑀢𑀺 𑀲𑀺𑀤𑁆𑀥𑀢𑁆𑀣𑁄𑀢𑀺 𑀦𑀸𑀫𑀁 𑀓𑀢𑀁, 𑀲𑀩𑁆𑀩𑁂𑀲𑀁 𑀯𑀸 𑀮𑁄𑀓𑀸𑀦𑀁 𑀲𑀺𑀤𑁆𑀥𑀸 𑀅𑀢𑁆𑀣𑀸 𑀏𑀢𑁂𑀦 𑀳𑁂𑀢𑀼𑀪𑀽𑀢𑁂𑀦𑀸𑀢𑀺 𑀲𑀺𑀤𑁆𑀥𑀢𑁆𑀣𑁄. 𑀲𑀼𑀤𑁆𑀥𑀁 𑀑𑀤𑀦𑀁 𑀅𑀲𑁆𑀲𑀸𑀢𑀺 𑀲𑀼𑀤𑁆𑀥𑁄𑀤𑀦𑁄, 𑀢𑀲𑁆𑀲 𑀅𑀧𑀘𑁆𑀘𑀁 𑀲𑀼𑀤𑁆𑀥𑁄𑀤𑀦𑀺. 𑀕𑁄𑀢𑀫𑀯𑀁𑀲𑀲𑁆𑀲 𑀓𑀧𑀺𑀮𑀲𑁆𑀲 𑀫𑀼𑀦𑀺𑀦𑁄 𑀲𑀺𑀲𑁆𑀲𑀢𑀸𑀬 𑀲𑀓𑁆𑀬𑀸 𑀕𑁄𑀢𑀫𑀸, 𑀪𑀕𑀯𑀸 𑀧𑀦 𑀕𑁄𑀢𑀫𑀯𑀁𑀲𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀕𑁄𑀢𑀫𑀲𑁆𑀲 𑀫𑀼𑀦𑀺𑀦𑁄 𑀅𑀧𑀘𑁆𑀘𑀁 𑀕𑁄𑀢𑀫𑁄.

𑁫. 𑀲𑀓𑁆𑀬𑀯𑀁𑀲𑀸𑀯𑀢𑀺𑀡𑁆𑀡𑁄 [𑀲𑀓𑁆𑀬𑀯𑀁𑀲𑀸 𑀧𑀺𑀢𑁆𑀣𑀺𑀡𑁆𑀡𑁄 (𑀓.)] 𑀲𑀓𑁆𑀬𑀫𑀼𑀦𑀺 𑀬𑁄 𑀩𑀼𑀤𑁆𑀥𑁄 𑀲𑁄 𑀲𑀓𑁆𑀬𑀲𑀻𑀳𑁄, 𑀲𑀓𑁆𑀬𑀸𑀦𑀁 𑀯𑀸 𑀲𑁂𑀝𑁆𑀞𑀢𑁆𑀢𑀸 𑀲𑀓𑁆𑀬𑀲𑀻𑀳𑁄. 𑀲𑀓𑁆𑀬𑀓𑀼𑀮𑀢𑁄 ¶ 𑀚𑀸𑀢𑁄 𑀫𑀼𑀦𑀺 𑀲𑀓𑁆𑀬𑀫𑀼𑀦𑀺. 𑀲𑀽𑀭𑀺𑀬𑀤𑁂𑀯𑀧𑀼𑀢𑁆𑀢𑀲𑁆𑀲 𑀲𑁄𑀢𑀸𑀧𑀦𑁆𑀦𑀢𑁆𑀢𑀸 𑀪𑀕𑀯𑀸 𑀆𑀤𑀺𑀘𑁆𑀘𑀩𑀦𑁆𑀥𑀽𑀢𑀺 𑀯𑀼𑀘𑁆𑀘𑀢𑀺, 𑀆𑀤𑀺𑀘𑁆𑀘𑀲𑁆𑀲 𑀩𑀦𑁆𑀥𑀼 𑀜𑀸𑀢𑀻𑀢𑀺 𑀦𑀺𑀩𑁆𑀩𑀘𑀦𑀁 𑀓𑀢𑁆𑀯𑀸. 𑀏𑀢𑁆𑀣𑀧𑀺 𑀫𑀸𑀬𑀸𑀤𑁂𑀯𑀻𑀲𑀼𑀢, 𑀫𑀳𑀸𑀲𑀫𑀡, 𑀓𑀮𑀺𑀲𑀸𑀲𑀦𑀸𑀤𑀻𑀦𑀺 [𑀓𑀼𑀮𑀺𑀲𑀸𑀲𑀦𑀸𑀤𑀻𑀦𑀺 (𑀓.) 𑀓𑀮𑀺𑀫𑁆𑀳𑀺 𑀬𑀼𑀕𑁂 𑀲𑀸𑀲𑀦𑀁 𑀅𑀦𑀼𑀲𑀸𑀲𑀦𑀁 𑀬𑀲𑁆𑀲 𑀲𑁄, 𑀅𑀣𑀯𑀸 𑀓𑀮𑀺𑀫𑁆𑀳𑀺 𑀧𑀸𑀧𑁂 𑀯𑀺𑀯𑀸𑀤𑁂 𑀯𑀸 𑀲𑀸𑀲𑀦𑀁 𑀳𑀺𑀢𑀲𑀸𑀥𑀦𑀁 𑀬𑀲𑁆𑀲 𑀲𑁄 (𑀢𑀺𑀓𑀡𑁆𑀟𑀲𑁂𑀲𑀝𑀻𑀓𑀸 𑁧.𑁧.𑁧𑁧)] 𑀕𑁄𑀢𑀫𑀧𑀭𑀺𑀬𑀸𑀬𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁬. 𑀫𑁄𑀓𑁆𑀔𑀸𑀤𑀻𑀦𑀺 𑀦𑀺𑀩𑁆𑀩𑀼𑀢𑀺𑀧𑀭𑀺𑀬𑀦𑁆𑀢𑀸𑀦𑀺 𑀙𑀘𑀢𑁆𑀢𑀸𑀮𑀻𑀲 𑀦𑀸𑀫𑀸𑀦𑀺 𑀦𑀺𑀩𑁆𑀩𑀸𑀦𑀲𑁆𑀲 𑀦𑀸𑀫𑀸𑀦𑀺. 𑀫𑀼𑀘𑁆𑀘𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸 𑀭𑀸𑀕𑀸𑀤𑀻𑀳𑀻𑀢𑀺 𑀫𑁄𑀓𑁆𑀔𑁄. 𑀦𑀺𑀭𑀼𑀚𑁆𑀛𑀦𑁆𑀢𑀺 𑀏𑀢𑁆𑀣 𑀭𑀸𑀕𑀸𑀤𑀬𑁄𑀢𑀺 𑀦𑀺𑀭𑁄𑀥𑁄, 𑀭𑀼𑀦𑁆𑀥𑀢𑀺 𑀯𑀸 𑀦𑀺𑀩𑁆𑀩𑀸𑀦𑀦𑁆𑀢𑀺 𑀭𑁄𑀥𑁄, 𑀓𑀺𑀮𑁂𑀲𑁄, 𑀲𑁄 𑀏𑀢𑁆𑀣 𑀦𑀢𑁆𑀣𑀻𑀢𑀺 𑀦𑀺𑀭𑁄𑀥𑁄. 𑀯𑀸𑀦𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 𑀦𑀺𑀓𑁆𑀔𑀦𑁆𑀢𑀢𑁆𑀢𑀸, 𑀦𑀺𑀩𑁆𑀩𑀸𑀢𑀺 𑀯𑀸 𑀏𑀢𑁂𑀦 𑀭𑀸𑀕𑀕𑁆𑀕𑀺𑀆𑀤𑀺𑀓𑁄𑀢𑀺 𑀦𑀺𑀩𑁆𑀩𑀸𑀦𑀁. 𑀬𑀣𑀸 𑀧𑀓𑀢𑀺𑀤𑀻𑀧𑁄 𑀦𑀤𑀻𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦𑀸𑀦𑀁 𑀧𑀢𑀺𑀝𑁆𑀞𑀸 𑀳𑁄𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀦𑀺𑀩𑁆𑀩𑀸𑀦𑀁 𑀲𑀁𑀲𑀸𑀭𑀫𑀳𑁄𑀖𑁂𑀦 𑀯𑀼𑀬𑁆𑀳𑀫𑀸𑀦𑀸𑀦𑀁 𑀧𑀢𑀺𑀝𑁆𑀞𑀸𑀢𑀺 𑀤𑀻𑀧𑁄 𑀯𑀺𑀬𑀸𑀢𑀺 𑀤𑀻𑀧𑁄, 𑀦𑀺𑀓𑁆𑀓𑀺𑀮𑁂𑀲𑀸𑀦𑀁 𑀯𑀸 𑀧𑀤𑀻𑀧𑀲𑀤𑀺𑀲𑀪𑀸𑀯𑀓𑀭𑀡𑀢𑁄 𑀤𑀻𑀧𑁄 𑀯𑀺𑀬𑀸𑀢𑀺 𑀤𑀻𑀧𑁄, ‘‘𑀦𑀺𑀩𑁆𑀩𑀦𑁆𑀢𑀺 𑀥𑀻𑀭𑀸 𑀬𑀣𑀬𑀁 𑀧𑀤𑀻𑀧𑁄’’𑀢𑀺 𑀳𑀺 𑀯𑀼𑀢𑁆𑀢𑀁, 𑀤𑀺𑀧𑁆𑀧𑀢𑀺 𑀯𑀸 𑀅𑀭𑀺𑀬𑀸𑀦𑀁 𑀜𑀸𑀡𑀘𑀓𑁆𑀔𑀼𑀲𑁆𑀲𑁂𑀯 𑀧𑀓𑀸𑀲𑀢𑀻𑀢𑀺 𑀤𑀻𑀧𑁄. 𑀢𑀡𑁆𑀳𑀸𑀦𑀁 𑀔𑀬𑀳𑁂𑀢𑀼𑀢𑁆𑀢𑀸 𑀢𑀡𑁆𑀳𑀓𑁆𑀔𑀬𑁄. 𑀭𑀸𑀕𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀢𑁆𑀢𑀸, 𑀉𑀢𑁆𑀢𑀫𑀝𑁆𑀞𑁂𑀦 𑀯𑀸 𑀧𑀭𑀁. 𑀢𑀸𑀬𑀢𑀺 𑀭𑀓𑁆𑀔𑀢𑀺 𑀅𑀧𑀸𑀬𑀸𑀤𑀺𑀢𑁄𑀢𑀺 𑀢𑀸𑀡𑀁. 𑀦𑀺𑀮𑀻𑀬𑀦𑁆𑀢𑀺 𑀏𑀢𑁆𑀣 𑀲𑀁𑀲𑀸𑀭𑀪𑀬𑀪𑀻𑀭𑀼𑀓𑀸𑀢𑀺 𑀮𑁂𑀡𑀁. 𑀦𑀢𑁆𑀣𑀺 𑀤𑀻𑀖𑀭𑀲𑁆𑀲𑀸𑀤𑀺𑀓𑀁 𑀭𑀽𑀧𑀁 𑀲𑀡𑁆𑀞𑀸𑀦𑀫𑁂𑀢𑀲𑁆𑀲𑀸𑀢𑀺 𑀅𑀭𑀽𑀧𑀁, 𑀅𑀧𑁆𑀧𑀘𑁆𑀘𑀬𑀢𑁆𑀢𑀸 𑀯𑀸 𑀅𑀭𑀽𑀧𑀁. 𑀭𑀸𑀕𑀸𑀤𑀻𑀦𑀁 𑀲𑀦𑁆𑀢𑀓𑀭𑀡𑀢𑁆𑀢𑀸 𑀲𑀦𑁆𑀢𑀁. 𑀭𑀸𑀕𑀓𑁆𑀔𑀬𑀳𑁂𑀢𑀼𑀪𑀸𑀯𑁂𑀦 𑀅𑀯𑀺𑀧𑀭𑀻𑀢𑀢𑁆𑀢𑀸, 𑀘𑀢𑀼𑀲𑀘𑁆𑀘𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 ¶ 𑀯𑀸 𑀲𑀘𑁆𑀘𑀁. 𑀦𑀢𑁆𑀣𑀺 𑀆𑀮𑀬𑁄 𑀢𑀡𑁆𑀳𑀸 𑀏𑀢𑁆𑀣𑀸𑀢𑀺 𑀅𑀦𑀸𑀮𑀬𑀁.

𑁭. 𑀧𑀘𑁆𑀘𑀬𑁂𑀳𑀺 𑀦 𑀲𑀗𑁆𑀓𑀭𑀻𑀬𑀢𑁂𑀢𑀺 𑀅𑀲𑀗𑁆𑀔𑀢𑀁. 𑀲𑀺𑀯𑀁 𑀔𑁂𑀫𑀪𑀸𑀯𑀁 𑀓𑀭𑁄𑀢𑀻𑀢𑀺 𑀲𑀺𑀯𑀁, 𑀲𑀁𑀲𑀸𑀭𑀪𑀻𑀭𑀼𑀓𑁂𑀳𑀺 𑀲𑁂𑀯𑀺𑀢𑀩𑁆𑀩𑀢𑁆𑀢𑀸 𑀯𑀸 𑀲𑀺𑀯𑀁, 𑀬𑀤𑀸𑀤𑀺𑀦𑀸 𑀯𑀧𑀘𑁆𑀘𑀬𑁄. 𑀦𑀢𑁆𑀣𑀺 𑀏𑀢𑁆𑀣 𑀫𑀢𑀁 𑀫𑀭𑀡𑀁, 𑀏𑀢𑀲𑁆𑀫𑀺𑀁 𑀯𑀸 𑀅𑀥𑀺𑀕𑀢𑁂 𑀧𑀼𑀕𑁆𑀕𑀮𑀲𑁆𑀲 𑀫𑀢𑀦𑁆𑀢𑀺 𑀅𑀫𑀢𑀁. 𑀧𑀲𑁆𑀲𑀺𑀢𑀼𑀁 𑀲𑀼𑀤𑀼𑀓𑁆𑀓𑀭𑀢𑀸𑀬 𑀲𑀼𑀤𑀼𑀤𑁆𑀤𑀲𑀁. 𑀧𑀭𑁂𑀳𑀺 𑀉𑀢𑁆𑀢𑀫𑁂𑀳𑀺 𑀅𑀭𑀺𑀬𑀧𑀼𑀕𑁆𑀕𑀮𑁂𑀳𑀺 𑀅𑀬𑀺𑀢𑀩𑁆𑀩𑀁 𑀕𑀦𑁆𑀢𑀩𑁆𑀩𑀦𑁆𑀢𑀺 𑀧𑀭𑀸𑀬𑀡𑀁, 𑀧𑀭𑀢𑁄 𑀯𑀸 𑀅𑀬𑀺𑀢𑀩𑁆𑀩𑀁 𑀕𑀦𑁆𑀢𑀩𑁆𑀩𑀦𑁆𑀢𑀺 𑀧𑀭𑀸𑀬𑀡𑀁, 𑀲𑀁𑀲𑀸𑀭𑀲𑀪𑀸𑀯𑀢𑁄 𑀅𑀜𑁆𑀜𑀲𑀪𑀸𑀯𑀯𑀲𑁂𑀦 𑀩𑀼𑀚𑁆𑀛𑀺𑀢𑀩𑁆𑀩𑀦𑁆𑀢𑁆𑀬𑀢𑁆𑀣𑁄, 𑀧𑀭𑁂𑀲𑀁 𑀯𑀸 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀧𑀢𑀺𑀝𑁆𑀞𑀸𑀦𑀢𑁆𑀢𑀸 𑀧𑀭𑀸𑀬𑀡𑀁. 𑀬𑁂𑀦 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀑𑀥𑀺𑀲𑁄 𑀓𑀺𑀮𑁂𑀲𑁂 𑀲𑀭𑀦𑁆𑀢𑀺 𑀳𑀺𑀁𑀲𑀦𑁆𑀢𑀺 𑀢𑀁 𑀥𑀫𑁆𑀫𑀁 𑀲𑀭𑀡𑀁, 𑀅𑀭𑀺𑀬𑀸𑀦𑀁 𑀯𑀲𑀺𑀢𑀕𑁂𑀳𑀢𑁆𑀢𑀸 𑀯𑀸 𑀲𑀭𑀡𑀁. 𑀈𑀢𑀺 𑀉𑀧𑀤𑁆𑀤𑀯𑁄 𑀧𑀯𑀸𑀲𑁄 𑀘 𑀢𑁂 𑀬𑀢𑁆𑀣 𑀦 𑀲𑀦𑁆𑀢𑀺, 𑀢𑀁 𑀅𑀦𑀻𑀢𑀺𑀓𑀁, 𑀲𑀢𑁆𑀢𑁂 𑀲𑀁𑀲𑀸𑀭𑀁 𑀦𑁂𑀢𑀻𑀢𑀺 ‘‘𑀦𑀻𑀢𑀻’’𑀢𑀺 𑀮𑀤𑁆𑀥𑀦𑀸𑀫𑀸𑀬 𑀢𑀡𑁆𑀳𑀸𑀬 𑀅𑀪𑀸𑀯𑀢𑁄 𑀯𑀸 𑀅𑀦𑀻𑀢𑀺𑀓𑀁. 𑀆𑀲𑀯𑀸𑀦𑀁 𑀅𑀦𑀸𑀭𑀫𑁆𑀫𑀡𑀢𑀸𑀬 𑀅𑀦𑀸𑀲𑀯𑀁. 𑀦𑀺𑀘𑁆𑀘𑀝𑁆𑀞𑁂𑀦 𑀥𑀼𑀯𑀁, 𑀥𑀯𑀢𑀺 𑀯𑀸 𑀫𑀕𑁆𑀕𑀸𑀦𑀫𑀸𑀭𑀫𑁆𑀫𑀡𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀥𑀼𑀯𑀁, ‘‘𑀥𑀼 𑀕𑀢𑀺𑀣𑁂𑀭𑀺𑀬𑁂𑀲𑀽’’𑀢𑀺 𑀳𑀺 𑀓𑀸𑀢𑀦𑁆𑀢𑀥𑀸𑀢𑀼. 𑀤𑀝𑁆𑀞𑀩𑁆𑀩𑀲𑀪𑀸𑀯𑀲𑁆𑀲 𑀦𑀢𑁆𑀣𑀺𑀢𑀸𑀬 𑀅𑀦𑀺𑀤𑀲𑁆𑀲𑀦𑀁. 𑀧𑀘𑁆𑀘𑀬𑁂𑀳𑀺 𑀅𑀓𑀢𑀢𑁆𑀢𑀸 𑀅𑀓𑀢𑀁. 𑀲𑀤𑀸 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀅𑀧𑀮𑀼𑀚𑁆𑀚𑀦𑀲𑀪𑀸𑀯𑀁 𑀕𑀘𑁆𑀙𑀢𑀺, 𑀢𑁂𑀦 𑀯𑀸 𑀯𑀺𑀜𑁆𑀜𑀸𑀬𑀢𑀻𑀢𑀺 𑀅𑀧𑀮𑁄𑀓𑀺𑀢𑀁. ‘‘𑀇𑀢𑀁 𑀕𑀢𑁂 𑀘 𑀯𑀺𑀜𑁆𑀜𑀸𑀢𑁂’’𑀢𑀺 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂 𑀯𑀼𑀢𑁆𑀢𑀁. 𑀮𑁄𑀓𑀲𑀪𑀸𑀯𑁂𑀦 𑀯𑀸 𑀯𑀺𑀜𑁆𑀜𑀸𑀬𑀢𑀻𑀢𑀺 𑀮𑁄𑀓𑀺𑀢𑀁, 𑀢𑀩𑁆𑀪𑀸𑀯𑀸𑀧𑀕𑀫𑀦𑀢𑁄 𑀅𑀧𑀮𑁄𑀓𑀺𑀢𑀁. 𑀲𑀡𑁆𑀳𑀝𑁆𑀞𑁂𑀦 𑀦𑀺𑀧𑀼𑀡𑀁, 𑀬𑁂𑀦 𑀯𑀸 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀑𑀥𑀺𑀲𑁄 𑀓𑀺𑀮𑁂𑀲𑁂 𑀦𑀺𑀲𑁆𑀲𑁂𑀲𑀢𑁄 𑀧𑀼𑀦𑀦𑁆𑀢𑀺 𑀲𑁄𑀥𑁂𑀦𑁆𑀢𑀺, 𑀢𑀁 𑀦𑀺𑀧𑀼𑀡𑀁. 𑀦 𑀓𑀤𑀸𑀘𑀺𑀧𑀺 𑀬𑀲𑁆𑀲 𑀅𑀦𑁆𑀢𑁄 𑀯𑀺𑀦𑀸𑀲𑁄 𑀅𑀢𑁆𑀣𑀺, 𑀢𑀁 𑀅𑀦𑀦𑁆𑀢𑀁. 𑀔𑀭𑀦𑁆𑀢𑀺 ¶ 𑀯𑀺𑀦𑀲𑁆𑀲𑀦𑁆𑀢𑀻𑀢𑀺 𑀔𑀭𑀸, 𑀲𑀗𑁆𑀔𑀢𑀸, 𑀢𑁂 𑀬𑀢𑁆𑀣 𑀦 𑀲𑀦𑁆𑀢𑀺, 𑀢𑀁 𑀅𑀓𑁆𑀔𑀭𑀁, 𑀔𑀭𑀲𑀗𑁆𑀔𑀸𑀢𑀸𑀦𑀁 𑀯𑀸 𑀲𑀗𑁆𑀔𑀢𑀸𑀦𑀁 𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀓𑁆𑀔𑀭𑀁. 𑀏𑀢𑁆𑀣 𑀘 𑀅𑀲𑀗𑁆𑀔𑀢𑀦𑁆𑀢𑁆𑀬𑀸𑀤𑀺𑀓𑀸 𑀕𑀸𑀣𑀸 𑀭𑀼𑀘𑀺𑀭𑀸 𑀦𑀸𑀫.

𑁮. 𑀲𑀩𑁆𑀩𑀤𑀼𑀓𑁆𑀔𑀸𑀦𑀁 𑀔𑀬𑀓𑀸𑀭𑀡𑀢𑁆𑀢𑀸 𑀤𑀼𑀓𑁆𑀔𑀓𑁆𑀔𑀬𑁄. 𑀩𑁆𑀬𑀸𑀩𑀸𑀥𑀢𑀻𑀢𑀺 𑀩𑁆𑀬𑀸𑀩𑀸𑀥𑁄, 𑀲𑁄 𑀏𑀯 𑀩𑁆𑀬𑀸𑀩𑀸𑀤𑁄, 𑀤𑀼𑀓𑁆𑀔𑀲𑀘𑁆𑀘𑀁, 𑀢𑀲𑁆𑀲 𑀪𑀸𑀯𑁄 𑀩𑁆𑀬𑀸𑀩𑀚𑁆𑀚𑀁, 𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀸𑀤𑁆𑀬𑀢𑁆𑀣𑁄, 𑀢𑀁 𑀬𑀢𑁆𑀣 𑀦𑀢𑁆𑀣𑀺, 𑀢𑀁 𑀅𑀩𑁆𑀬𑀸𑀩𑀚𑁆𑀚𑀁, 𑀅𑀩𑁆𑀬𑀸𑀧𑀚𑁆𑀛𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀢𑁆𑀣 𑀩𑁆𑀬𑀸𑀧𑀚𑁆𑀚𑀦𑁆𑀢𑀺 𑀯𑀺𑀦𑀲𑁆𑀲𑀦𑁆𑀢𑀻𑀢𑀺 𑀩𑁆𑀬𑀸𑀧𑀸𑀤𑀸, 𑀲𑀗𑁆𑀔𑀢𑀸, 𑀢𑁂𑀲𑀁 𑀪𑀸𑀯𑁄 𑀩𑁆𑀬𑀸𑀧𑀚𑁆𑀛𑀁, 𑀲𑀗𑁆𑀔𑀢𑀸𑀦𑀁 𑀯𑀺𑀦𑀲𑁆𑀲𑀦𑀪𑀸𑀯𑁄, 𑀢𑀁 𑀬𑀢𑁆𑀣 𑀦𑀢𑁆𑀣𑀺, 𑀢𑀁 𑀅𑀩𑁆𑀬𑀸𑀧𑀚𑁆𑀛𑀦𑁆𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀘 𑀤𑁆𑀬𑀲𑁆𑀲 𑀚𑁆𑀛𑀓𑀸𑀭𑁄. 𑀓𑀺𑀮𑁂𑀲𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑀸𑀦𑀫𑀪𑀸𑀯𑀢𑁄 𑀯𑀺𑀯𑀝𑁆𑀝𑀁. 𑀦𑀺𑀩𑁆𑀪𑀬𑀝𑁆𑀞𑁂𑀦 𑀔𑁂𑀫𑀁, 𑀔𑀬𑀦𑁆𑀢𑀺 𑀯𑀸 𑀏𑀢𑁂𑀦 𑀭𑀸𑀕𑀕𑁆𑀕𑀺𑀆𑀤𑀬𑁄𑀢𑀺 𑀔𑁂𑀫𑀁. 𑀲𑀗𑁆𑀔𑀸𑀭𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑀢𑀸𑀬, 𑀯𑀺𑀲𑀁𑀬𑁄𑀕𑀢𑀸𑀬 𑀘 𑀓𑁂𑀯𑀮𑀁. 𑀅𑀧𑀯𑀚𑁆𑀚𑀦𑁆𑀢𑀺 𑀲𑀗𑁆𑀔𑀸𑀭𑀸 𑀏𑀢𑀲𑁆𑀫𑀸𑀢𑀺 𑀅𑀧𑀯𑀕𑁆𑀕𑁄. 𑀬𑀲𑁆𑀫𑀸 𑀭𑀸𑀕𑁄 𑀯𑀺𑀕𑀢𑁄, 𑀲𑁄 𑀯𑀺𑀭𑀸𑀕𑁄. 𑀧𑀥𑀸𑀦𑀪𑀸𑀯𑀁 𑀦𑀻𑀢𑀁 𑀧𑀡𑀻𑀢𑀁. 𑀦𑀢𑁆𑀣𑀺 𑀏𑀢𑀲𑁆𑀫𑀺𑀁 𑀅𑀥𑀺𑀕𑀢𑁂 𑀅𑀭𑀺𑀬𑀸𑀦𑀁 𑀘𑀼𑀢𑀁 𑀘𑀯𑀦𑀦𑁆𑀢𑀺 𑀅𑀘𑁆𑀘𑀼𑀢𑀁. 𑀅𑀭𑀺𑀬𑁂𑀳𑀺 𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀕𑀦𑁆𑀢𑀩𑁆𑀩𑀢𑁆𑀢𑀸 𑀧𑀤𑀁.

𑁯. 𑀘𑀢𑁆𑀢𑀸𑀭𑁄 𑀬𑁄𑀕𑀸 𑀔𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀬𑁄𑀕𑀓𑁆𑀔𑁂𑀫𑁄. 𑀧𑀸𑀭𑁂𑀢𑀺 𑀲𑀓𑁆𑀓𑁄𑀢𑀺 𑀲𑀁𑀲𑀸𑀭𑀤𑀼𑀓𑁆𑀔𑀲𑀦𑁆𑀢𑀸𑀧𑀁 𑀲𑀫𑁂𑀢𑀼𑀦𑁆𑀢𑀺 𑀧𑀸𑀭𑀁, ‘‘𑀲𑀁𑀲𑀸𑀭𑀤𑀼𑀓𑁆𑀔𑀲𑀦𑁆𑀢𑀸𑀧𑀢𑀢𑁆𑀢𑀲𑁆𑀲𑀸’𑀮𑀁 𑀲𑀫𑁂𑀢𑀯𑁂’’𑀢𑀺 𑀳𑀺 𑀯𑀼𑀢𑁆𑀢𑀁. 𑀧𑀕𑀢𑀸 𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀅𑀭𑀸 𑀏𑀢𑀲𑁆𑀫𑀸𑀢𑀺 𑀯𑀸 𑀧𑀸𑀭𑀁. 𑀓𑀺𑀮𑁂𑀲𑁂𑀳𑀺 𑀫𑀼𑀘𑁆𑀘𑀦𑀢𑁄 𑀫𑀼𑀢𑁆𑀢𑀺, 𑀦𑀺𑀓𑀸𑀬𑀦𑁆𑀢𑀭𑀺𑀬𑀸 𑀧𑀦 ‘‘𑀲𑀭𑀻𑀭𑁂𑀦𑁆𑀤𑁆𑀭𑀺𑀬𑁂𑀳𑀺 𑀅𑀢𑁆𑀢𑀦𑁄 𑀫𑀼𑀢𑁆𑀢𑀢𑁆𑀢𑀸 𑀫𑀼𑀢𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀓𑀺𑀮𑁂𑀲𑀲𑀫𑀦𑀢𑁄 𑀲𑀦𑁆𑀢𑀺. 𑀯𑀺𑀲𑀼𑀚𑁆𑀛𑀦𑁆𑀢𑀺 𑀲𑀢𑁆𑀢𑀸 𑀏𑀢𑀸𑀬 𑀭𑀸𑀕𑀸𑀤𑀺𑀫𑀮𑁂𑀳𑀻𑀢𑀺 𑀯𑀺𑀲𑀼𑀤𑁆𑀥𑀺 ¶ . 𑀲𑀩𑁆𑀩𑀲𑀗𑁆𑀔𑀸𑀭𑀸 𑀯𑀺𑀫𑀼𑀘𑁆𑀘𑀦𑀢𑁄 𑀯𑀺𑀫𑀼𑀢𑁆𑀢𑀺. 𑀅𑀲𑀗𑁆𑀔𑀢𑀫𑁂𑀯 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀝𑁆𑀞𑁂𑀦, 𑀲𑀦𑁆𑀢𑀺𑀮𑀓𑁆𑀔𑀡𑀥𑀸𑀭𑀡𑀢𑁄 𑀯𑀸 𑀥𑀸𑀢𑀽𑀢𑀺 𑀅𑀲𑀗𑁆𑀔𑀢𑀥𑀸𑀢𑀼. 𑀲𑀼𑀚𑁆𑀛𑀦𑁆𑀢𑀺 𑀲𑀢𑁆𑀢𑀸 𑀏𑀢𑀸𑀬 𑀭𑀸𑀕𑀸𑀤𑀺𑀫𑀮𑁂𑀳𑀻𑀢𑀺 𑀲𑀼𑀤𑁆𑀥𑀺. 𑀆𑀯𑀼𑀡𑁄𑀢𑀺 𑀲𑀁𑀲𑀸𑀭𑀢𑁄 𑀦𑀺𑀓𑁆𑀔𑀦𑁆𑀢𑀼𑀫𑀧𑁆𑀧𑀤𑀸𑀦𑀯𑀲𑁂𑀦𑀸𑀢𑀺 𑀯𑀼𑀢𑀺, 𑀢𑀡𑁆𑀳𑀸, 𑀢𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑀺.

𑁧𑁦. 𑀔𑀻𑀡𑀸𑀲𑀯𑀸𑀤𑀺𑀘𑀢𑀼𑀓𑁆𑀓𑀁 𑀅𑀭𑀳𑀦𑁆𑀢𑁂. 𑀔𑀻𑀡𑀸 𑀆𑀲𑀯𑀸 𑀬𑀲𑁆𑀲 𑀲𑁄 𑀔𑀻𑀡𑀸𑀲𑀯𑁄. 𑀢𑀢𑁄 𑀉𑀢𑁆𑀢𑀭𑀺 𑀓𑀭𑀡𑀻𑀬𑀸𑀪𑀸𑀯𑀢𑁄 𑀦𑀢𑁆𑀣𑀺 𑀲𑀺𑀓𑁆𑀔𑀸 𑀏𑀢𑀲𑁆𑀲𑀸𑀢𑀺 𑀅𑀲𑁂𑀓𑁆𑀔𑁄. 𑀯𑀺𑀕𑀢𑁄 𑀭𑀸𑀕𑁄 𑀬𑀲𑁆𑀫𑀸𑀢𑀺 𑀯𑀻𑀢𑀭𑀸𑀕𑁄. 𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀅𑀭𑁂 𑀳𑀢𑀯𑀸𑀢𑀺 𑀅𑀭𑀳𑀸, ‘‘𑀅𑀭𑀳’’𑀦𑁆𑀢𑀺𑀧𑀺 𑀧𑀸𑀞𑁄.

𑀤𑁂𑀯𑀮𑁄𑀓𑀸𑀤𑀺𑀧𑀜𑁆𑀘𑀓𑀁 𑀲𑀕𑁆𑀕𑀲𑁆𑀲 𑀦𑀸𑀫𑀁. 𑀤𑁂𑀯𑀸𑀦𑀁 𑀮𑁄𑀓𑁄 𑀪𑀯𑀦𑀁 𑀤𑁂𑀯𑀮𑁄𑀓𑁄. 𑀤𑀺𑀩𑁆𑀩𑀦𑁆𑀢𑁆𑀬𑀢𑁆𑀭 𑀤𑀺𑀯𑁄. 𑀅𑀚 𑀕𑀢𑀺𑀬𑀁, 𑀅𑀦𑁂𑀓𑀢𑁆𑀣𑀢𑁆𑀢𑀸 𑀞𑀺𑀢𑀺𑀬𑀁, 𑀘𑀺𑀭𑀁 𑀞𑀺𑀬𑀢𑁂 𑀅𑀲𑁆𑀫𑀺𑀦𑁆𑀢𑀺 𑀅𑀕𑁆𑀕𑁄, 𑀞𑀸𑀦𑀁, 𑀲𑁄𑀪𑀦𑁄 𑀅𑀕𑁆𑀕𑁄 𑀲𑀕𑁆𑀕𑁄, 𑀧𑀼𑀜𑁆𑀜𑁂𑀦 𑀯𑀸 𑀲𑀼𑀝𑁆𑀞𑀼 𑀅𑀚𑀻𑀬𑀢𑁂𑀢𑀺 𑀲𑀕𑁆𑀕𑁄. 𑀢𑀬𑁄 𑀤𑁂𑀯𑀸 𑀤𑀺𑀩𑁆𑀩𑀦𑁆𑀢𑁆𑀬𑀢𑁆𑀭𑁂𑀢𑀺 𑀢𑀺𑀤𑀺𑀯𑁄. 𑀧𑀥𑀸𑀦𑀢𑁄 𑀳𑀺 𑀢𑀻𑀳𑀺 𑀳𑀭𑀺𑀳𑀭𑀩𑁆𑀭𑀳𑁆𑀫𑁂𑀳𑀺 𑀩𑁆𑀬𑀧𑀤𑁂𑀲𑁄. 𑀢𑀺𑀤𑀲𑀸𑀦𑀁 𑀤𑁂𑀯𑀸𑀦𑀁 𑀆𑀮𑀬𑁄 𑀞𑀸𑀦𑀦𑁆𑀢𑀺 𑀢𑀺𑀤𑀲𑀸𑀮𑀬𑁄. 𑀓𑁂𑀘𑀺 𑀧𑀦 ‘‘𑀤𑁂𑀯𑀮𑁄𑀓𑀸𑀤𑀺𑀢𑁆𑀢𑀬𑀁 𑀲𑀕𑁆𑀕𑀲𑀸𑀫𑀜𑁆𑀜𑀲𑁆𑀲 𑀦𑀸𑀫𑀁, 𑀢𑀺𑀤𑀺𑀯𑀸𑀤𑀺𑀤𑁆𑀯𑀬𑀁 𑀢𑀸𑀯𑀢𑀺𑀁𑀲𑀲𑁆𑀲𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀫𑀭𑀓𑁄𑀲𑀸𑀤𑀻𑀲𑀼 𑀲𑀸𑀫𑀜𑁆𑀜𑀲𑁆𑀫𑀺𑀁𑀬𑁂𑀯 𑀤𑁆𑀯𑀺𑀦𑁆𑀦𑀫𑁆𑀧𑀺 𑀕𑀳𑀡𑀢𑁄 𑀦 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁. 𑀏𑀢𑁆𑀣𑀸𑀧𑀺 𑀦𑀸𑀓, 𑀲𑀼𑀭𑀮𑁄𑀓, 𑀢𑀺𑀧𑀺𑀝𑁆𑀞𑀧 [𑀯𑀺𑀲𑀦𑁆𑀢𑀺 𑀲𑀼𑀓𑀢𑀺𑀦𑁄 𑀅𑀲𑁆𑀫𑀺𑀁 𑀇𑀢𑀺 𑀧𑀺𑀝𑁆𑀞𑀧𑀁 𑀧𑀺𑀲𑁄𑀤𑀭𑀸𑀤𑀺 𑀢𑀺𑀤𑀲𑀸𑀦𑀁 𑀧𑀺𑀝𑁆𑀞𑀧𑀥𑀺𑀢𑀺 𑀤𑀲𑀲𑀤𑁆𑀤𑀮𑁄𑀧𑁄 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)], 𑀅𑀯𑀭𑁄𑀳, 𑀨𑀮𑁄𑀤𑀬 ¶ [𑀨𑀮𑀲𑁆𑀲 𑀓𑀫𑁆𑀫𑀨𑀮𑀲𑁆𑀲 𑀉𑀤𑀬𑁄 𑀤𑀺𑀝𑁆𑀞𑀺𑀬𑁄𑀕𑁆𑀬𑀝𑁆𑀞𑀸𑀦𑀁 (𑀢𑀺𑀓𑀡𑁆𑀟𑀝𑀻𑀓𑀸)], 𑀫𑀦𑁆𑀤𑀭, 𑀲𑁂𑀭𑀺𑀓, 𑀲𑀓𑁆𑀓𑀪𑀯𑀦, 𑀔𑀁, 𑀦𑀪𑀸𑀤𑀻𑀦𑀺 𑀤𑁂𑀯𑀮𑁄𑀓𑀲𑀸𑀫𑀜𑁆𑀜𑀸𑀦𑀺 𑀇𑀥𑀸𑀦𑀸𑀕𑀢𑀸𑀦𑀺𑀧𑀺 𑀕𑀳𑁂𑀢𑀩𑁆𑀩𑀸𑀦𑀺.

𑁧𑁧-𑁧𑁨. 𑀢𑀺𑀤𑀲𑀸𑀤𑀺𑀘𑀢𑀼𑀤𑁆𑀤𑀲𑀓𑀁 𑀤𑁂𑀯𑀢𑀸𑀲𑀸𑀫𑀜𑁆𑀜𑀲𑁆𑀲 𑀦𑀸𑀫𑀁. 𑀚𑀸𑀢𑀻𑀲𑀼 [𑀚𑀸𑀢𑀺𑀚𑀸𑀢𑀻𑀲𑀼 (𑀓.)] 𑀯𑀼𑀢𑁆𑀢𑀸𑀲𑀼 𑀩𑁆𑀬𑀢𑁆𑀢𑀺𑀧𑀺 𑀯𑀼𑀘𑁆𑀘𑀢𑀻𑀢𑀺 𑀩𑁆𑀬𑀢𑁆𑀢𑀻𑀦𑀁 𑀩𑀳𑀼𑀢𑁆𑀢𑀸 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄. 𑀚𑀸𑀢𑀺𑀲𑀢𑁆𑀢𑀸𑀯𑀺𑀦𑀸𑀲𑀲𑀗𑁆𑀔𑀸𑀢𑀸 𑀢𑀺𑀲𑁆𑀲𑁄 𑀤𑀲𑀸 𑀧𑀭𑀺𑀫𑀸𑀡𑀸 𑀏𑀢𑁂𑀲𑀦𑁆𑀢𑀺 𑀢𑀺𑀤𑀲𑀸. 𑀏𑀢𑁂 𑀳𑀺 𑀫𑀦𑀼𑀲𑁆𑀲𑀸𑀤𑀬𑁄 𑀯𑀺𑀬 𑀩𑀼𑀤𑁆𑀥𑀺𑀯𑀺𑀧𑀭𑀺𑀡𑀸𑀫𑀔𑀬𑁂𑀳𑀺 𑀦 𑀬𑀼𑀚𑁆𑀚𑀦𑁆𑀢𑀺, 𑀧𑀜𑁆𑀘𑀯𑀻𑀲𑀢𑀺𑀯𑀲𑁆𑀲𑀼𑀤𑁆𑀤𑁂𑀲𑀺𑀬𑀸 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀺 𑀲𑀦𑁆𑀢𑀺 𑀯𑀺𑀦𑀲𑁆𑀲𑀦𑁆𑀢𑀺 𑀘. 𑀫𑀭𑀡𑀁 𑀫𑀭𑁄, 𑀲𑁄 𑀬𑁂𑀲𑀁 𑀦𑀢𑁆𑀣𑀺, 𑀢𑁂 𑀅𑀫𑀭𑀸. 𑀤𑀺𑀩𑁆𑀩𑀦𑁆𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀸𑀤𑀻𑀳𑀺 𑀓𑀻𑀴𑀦𑁆𑀢𑀻𑀢𑀺 𑀤𑁂𑀯𑀸. 𑀯𑀺𑀩𑀼𑀚𑁆𑀛𑀦𑁆𑀢𑀺 𑀦 𑀲𑀼𑀧𑀦𑁆𑀢𑀻𑀢𑀺 𑀯𑀺𑀩𑀼𑀥𑀸, 𑀅𑀢𑀻𑀢𑀸𑀦𑀸𑀕𑀢𑀚𑀸𑀢𑀺𑀁 𑀯𑀺𑀩𑀼𑀚𑁆𑀛𑀦𑁆𑀢𑀻𑀢𑀺 𑀯𑀸 𑀯𑀺𑀩𑀼𑀥𑀸. 𑀲𑀼𑀥𑀸𑀪𑁄𑀚𑀦𑀪𑀼𑀜𑁆𑀚𑀦𑀲𑀻𑀮𑀢𑀸𑀬 𑀲𑀼𑀥𑀸𑀲𑀺𑀦𑁄. 𑀲𑀫𑀼𑀤𑁆𑀤𑀼𑀝𑁆𑀞𑀸 [𑀅𑀫𑀢𑀫𑀣𑀦𑁄𑀝𑁆𑀞𑀸 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)] 𑀲𑀼𑀭𑀸 𑀅𑀢𑁆𑀣𑀺 𑀬𑁂𑀲𑀁, 𑀢𑁂 𑀲𑀼𑀭𑀸, 𑀲𑀼𑀭𑀦𑁆𑀢𑀺 𑀯𑀸 𑀓𑀻𑀴𑀦𑁆𑀢𑀻𑀢𑀺 𑀲𑀼𑀭𑀸, 𑀲𑀼𑀔𑁂𑀦 𑀭𑀫𑀦𑁆𑀢𑀻𑀢𑀺 𑀯𑀸 𑀲𑀼𑀭𑀸. 𑀤𑀻𑀖𑀸𑀬𑀼𑀓𑀸𑀧𑀺 𑀲𑀫𑀸𑀦𑀸 𑀬𑀣𑀸𑀧𑀭𑀺𑀘𑁆𑀙𑁂𑀤𑀁 𑀲𑀫𑁆𑀧𑀢𑁆𑀢𑀓𑀸𑀮𑁂 𑀫𑀭𑀦𑁆𑀢𑀺 𑀲𑀻𑀮𑁂𑀦𑀸𑀢𑀺 𑀫𑀭𑀽. 𑀤𑀺𑀯𑁄 𑀤𑁂𑀯𑀮𑁄𑀓𑁄 𑀑𑀓𑁄 𑀆𑀲𑀬𑁄 𑀬𑁂𑀲𑀁 𑀢𑁂 𑀤𑀺𑀯𑁄𑀓𑀸. 𑀲𑀼𑀥𑀸𑀳𑀸𑀭𑀲𑁆𑀲 𑀧𑀸𑀢𑀩𑁆𑀩𑀲𑁆𑀲𑀧𑀺 𑀲𑀫𑁆𑀪𑀯𑀢𑁄 𑀅𑀫𑀢𑀁 𑀧𑀺𑀯𑀦𑁆𑀢𑀻𑀢𑀺 𑀅𑀫𑀢𑀧𑀸, 𑀅𑀫𑀢𑁄𑀲𑀥𑀁 𑀯𑀸 𑀧𑀺𑀯𑀦𑁆𑀢𑀻𑀢𑀺 𑀅𑀫𑀢𑀧𑀸. 𑀲𑀕𑁆𑀕𑁂 𑀯𑀲𑀦𑀲𑀻𑀮𑀢𑁆𑀢𑀸 𑀲𑀕𑁆𑀕𑀯𑀸𑀲𑀺𑀦𑁄. 𑀲𑀤𑀸 𑀧𑀜𑁆𑀘𑀯𑀻𑀲𑀢𑀺𑀯𑀲𑁆𑀲𑀼𑀤𑁆𑀤𑁂𑀲𑀺𑀬𑀢𑁆𑀢𑀸 𑀦𑀺𑀭𑀸𑀓𑀢𑀸 𑀚𑀭𑀸 𑀏𑀢𑁂𑀲𑀦𑁆𑀢𑀺 𑀦𑀺𑀚𑁆𑀚𑀭𑀸. 𑀦 𑀦𑀺𑀫𑀺𑀲𑀦𑁆𑀢𑀻𑀢𑀺 𑀅𑀦𑀺𑀫𑀺𑀲𑀸, 𑀪𑀫𑀼𑀓𑀸 𑀦𑀺𑀘𑁆𑀘𑀮𑀁 𑀓𑀭𑁄𑀦𑁆𑀢𑀻𑀢𑁆𑀬𑀢𑁆𑀣𑁄. 𑀤𑀺𑀯𑁂 𑀯𑀲𑀦𑁆𑀢𑀻𑀢𑀺 𑀤𑀺𑀩𑁆𑀩𑀸. 𑀤𑁂𑀯𑀸 𑀏𑀯 𑀤𑁂𑀯𑀢𑀸, 𑀲𑀓𑀢𑁆𑀣𑁂 𑀤𑁂𑀯𑀲𑀤𑁆𑀤𑀢𑁄 𑀢𑀸𑀧𑀘𑁆𑀘𑀬𑁄, 𑀤𑁂𑀯𑀢𑀸 𑀏𑀯 𑀤𑁂𑀯𑀢𑀸𑀦𑀺, 𑀲𑀓𑀢𑁆𑀣𑁂 𑀦𑀺𑀧𑀘𑁆𑀘𑀬𑁄. ‘‘𑀅𑀧𑀼𑀫𑁂’’𑀢𑀺 𑀏𑀢𑁆𑀣 𑀧𑀞𑀫𑀲𑀓𑀢𑁆𑀣𑀺𑀓𑀯𑀲𑁂𑀦 𑀇𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑀁, 𑀤𑀼𑀢𑀺𑀬𑀲𑀓𑀢𑁆𑀣𑀺𑀓𑀯𑀲𑁂𑀦 ¶ 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁, 𑀤𑀼𑀢𑀺𑀬𑀲𑀓𑀢𑁆𑀣𑀺𑀓𑀯𑀲𑁂𑀦𑁂𑀯 𑀯𑀸 𑀤𑁆𑀯𑀺𑀮𑀺𑀗𑁆𑀕𑀢𑁆𑀢𑀁, 𑀢𑀢𑁆𑀣 𑀇𑀢𑁆𑀣𑀺𑀮𑀺𑀗𑁆𑀕𑀧𑀓𑁆𑀔𑁂 𑀬𑀤𑀸𑀤𑀺𑀦𑀸 𑀦𑀺𑀓𑀸𑀭𑀸𑀤𑁂𑀲𑁄. 𑀅𑀫𑀭𑀓𑁄𑀲𑁂 𑀧𑀦 ‘‘𑀤𑁂𑀯𑀢𑀸𑀦𑀺 𑀧𑀼𑀫𑁂 𑀯𑀸’’𑀢𑀺 [𑀅𑀫𑀭 𑁧.𑁯] 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀤𑁂𑀯𑀢𑀸𑀦𑀺𑀲𑀤𑁆𑀤𑁄 𑀯𑀺𑀓𑀧𑁆𑀧𑁂𑀦 𑀧𑀼𑀮𑁆𑀮𑀺𑀗𑁆𑀕𑁂, 𑀦𑀺𑀘𑁆𑀘𑀁 𑀦𑀧𑀼𑀁𑀲𑀓𑁂𑀢𑀺. 𑀝𑀻𑀓𑀸𑀬𑀜𑁆𑀘 ‘‘𑀲𑀓𑀢𑁆𑀣𑀺𑀓𑀸 𑀧𑀓𑀢𑀺𑀢𑁄 𑀮𑀺𑀗𑁆𑀕𑀯𑀘𑀦𑀸𑀦𑀺 𑀅𑀢𑀺𑀯𑀢𑁆𑀢𑀦𑁆𑀢𑀻𑀢𑀺 𑀧𑀼𑀦𑁆𑀦𑀧𑀼𑀁𑀲𑀓𑀢𑁆𑀢’’𑀦𑁆𑀢𑀺 [𑀤𑁂𑀯𑁄 𑀏𑀯 𑀤𑁂𑀯𑀢𑀸, 𑀲𑀓𑀢𑁆𑀣𑁂 𑀢𑀸, 𑀲𑀓𑀢𑁆𑀣𑀺𑀓𑀸 𑀅𑀧𑀺 𑀧𑀘𑁆𑀘𑀬𑀸 𑀧𑀓𑀢𑀺𑀢𑁄 𑀮𑀺𑀗𑁆𑀕𑀯𑀘𑀦𑀸𑀤𑁆𑀬𑀢𑀺𑀯𑀢𑁆𑀢𑀦𑁆𑀢𑁂, 𑀅𑀧𑀻𑀢𑀺 𑀇𑀢𑁆𑀣𑀺𑀢𑁆𑀢𑀁 𑀤𑁂𑀯𑀢𑀸 𑀏𑀯 𑀤𑁂𑀯𑀢𑀁 𑀧𑀜𑁆𑀜𑀸𑀤𑀺𑀢𑁆𑀢𑀸 𑀅𑀡 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)] 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀓𑀢𑁆𑀣𑀺𑀓𑀸𑀢𑀺 𑀤𑀼𑀢𑀺𑀬𑀲𑀓𑀢𑁆𑀣𑀺𑀓𑀁 𑀯𑀼𑀢𑁆𑀢𑀁, 𑀧𑀓𑀢𑀺𑀢𑁄𑀢𑀺 𑀧𑀞𑀫𑀲𑀓𑀢𑁆𑀣𑀺𑀓𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀦𑁆𑀦𑀧𑀼𑀁𑀲𑀓𑀢𑁆𑀢’’𑀦𑁆𑀢𑀺, 𑀇𑀢𑀭𑀣𑀸 𑀢𑀸𑀧𑀘𑁆𑀘𑀬𑀦𑁆𑀢𑀲𑁆𑀲 𑀦𑀺𑀘𑁆𑀘𑀁 𑀇𑀢𑁆𑀣𑀺𑀮𑀺𑀗𑁆𑀕𑀢𑀸𑀬 𑀇𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑀫𑁂𑀯 𑀯𑀤𑁂𑀬𑁆𑀬. 𑀲𑀼𑀧𑀩𑁆𑀩𑀸, 𑀲𑀼𑀫𑀦𑀸, 𑀢𑀺𑀤𑀺𑀯𑁂𑀲𑀸, 𑀆𑀤𑀺𑀢𑁂𑀬𑁆𑀬𑀸, 𑀤𑀺𑀯𑀺𑀲𑀤𑀸, 𑀮𑁂𑀔𑀸, 𑀅𑀤𑀺𑀢𑀺𑀦𑀦𑁆𑀤𑀦𑀸, 𑀆𑀤𑀺𑀘𑁆𑀘𑀸, 𑀭𑀺𑀪𑀯𑁄 [𑀯𑀺𑀪𑀯𑀸 (𑀓.), 𑀭𑀺𑀓𑀸𑀭𑁄 𑀤𑁂𑀯𑀫𑀸𑀢𑀸 𑀲𑀺𑀬𑀸 𑀇𑀢𑀺 𑀢𑀺𑀓𑀡𑁆𑀟𑁂, 𑀢𑀢𑁄 𑀪𑀯𑀦𑁆𑀢𑀻𑀢𑀺 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)] 𑀅𑀲𑁄𑀧𑁆𑀧𑀸, 𑀅𑀫𑀘𑁆𑀘𑀸 [𑀫𑀭𑀡𑀁 𑀫𑀢𑀺 𑀇𑀢𑀺 𑀢𑀺, 𑀫𑀢𑀺𑀬𑀁 𑀪𑀯𑀸 𑀫𑀘𑁆𑀘𑀸… 𑀦 𑀫𑀘𑁆𑀘𑀸 𑀅𑀫𑀘𑁆𑀘𑀸 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)], 𑀅𑀫𑀢𑀸𑀲𑀦𑀸, 𑀅𑀕𑁆𑀕𑀺𑀫𑀼𑀔𑀸, 𑀳𑀯𑀺𑀪𑁄𑀚𑀦𑀸, 𑀕𑀺𑀭𑀩𑁆𑀩𑀸𑀡𑀸, 𑀤𑀸𑀦𑀯𑀸𑀭𑀬𑁄, 𑀩𑀺𑀦𑁆𑀤𑀸𑀭𑀓𑀸, 𑀧𑀽𑀚𑀺𑀬𑀸, 𑀘𑀺𑀭𑀸𑀬𑀼𑀓𑀸, 𑀲𑀕𑁆𑀕𑀺𑀦𑁄, 𑀦𑀪𑁄𑀲𑀤𑀸𑀇𑀘𑁆𑀘𑀸𑀤𑀻𑀦𑀺𑀧𑀺 𑀤𑁂𑀯𑀢𑀸𑀦𑀁 𑀲𑀸𑀫𑀜𑁆𑀜𑀦𑀸𑀫𑀸𑀦𑁂𑀯.

𑁧𑁩. 𑀲𑀺𑀤𑁆𑀥𑀸𑀤𑀬𑁄 𑀇𑀫𑁂 𑀤𑁂𑀯𑀬𑁄𑀦𑀺𑀬𑁄 𑀤𑁂𑀯𑀧𑁆𑀧𑀪𑀯𑀸 𑀤𑁂𑀯𑀯𑀁𑀲𑀸 𑀏𑀢𑁂𑀲𑀫𑀼𑀧𑁆𑀧𑀢𑁆𑀢𑀺𑀬𑀁 𑀤𑁂𑀯𑀸𑀦𑀫𑁂𑀯 𑀆𑀤𑀺𑀓𑀸𑀭𑀡𑀢𑁆𑀢𑀸. 𑀅𑀡𑀺𑀫𑀸𑀤𑀺𑀕𑀼𑀡𑁄𑀧𑁂𑀢𑀢𑁆𑀢𑀸 𑀲𑀺𑀚𑁆𑀛𑀦𑁆𑀢𑀺 𑀏𑀢𑀲𑁆𑀲 𑀬𑀣𑀺𑀘𑁆𑀙𑀺𑀢𑀸 𑀅𑀢𑁆𑀣𑀸𑀢𑀺 𑀲𑀺𑀤𑁆𑀥𑁄. 𑀬𑀲𑁆𑀲 𑀪𑀸𑀲𑀸𑀬 𑀩𑁆𑀭𑀽𑀳𑀢𑀺 𑀓𑀣𑀸, 𑀲𑁄 𑀪𑀽𑀢𑁄 ¶ , 𑀧𑀺𑀲𑀸𑀘𑀧𑁆𑀧𑀪𑁂𑀤𑁄 𑀅𑀥𑁄𑀫𑀼𑀔𑀸𑀤𑀺. 𑀯𑀘𑀦𑀢𑁆𑀣𑁄 𑀧𑀦 𑀪𑀯𑀦𑁆𑀢𑀺 𑀩𑁆𑀭𑀽𑀳𑀦𑁆𑀢𑀺 𑀓𑀣𑀸 𑀏𑀢𑀲𑁆𑀫𑀸𑀢𑀺 𑀪𑀽𑀢𑁄𑀢𑀺. 𑀕𑀦𑁆𑀥𑀁 𑀅𑀩𑁆𑀩𑀢𑀺 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀕𑀦𑁆𑀥𑀩𑁆𑀩𑁄, 𑀤𑁂𑀯𑀕𑀸𑀬𑀦𑀸 ‘‘𑀳𑀸𑀳𑀸 𑀳𑀽𑀳𑀽’’ 𑀧𑀪𑀼𑀢𑀬𑁄 [𑀅𑀫𑀭 𑁧.𑁫𑁫]. 𑀦𑀺𑀥𑀬𑁄 𑀕𑀼𑀬𑁆𑀳𑀢𑀻𑀢𑀺 𑀕𑀼𑀬𑁆𑀳𑀓𑁄, 𑀲𑀜𑁆𑀜𑀸𑀬𑀁 𑀓𑁄, 𑀫𑀡𑀺𑀪𑀤𑁆𑀭𑀸𑀤𑀺𑀓𑁄 𑀓𑀼𑀯𑁂𑀭𑀸𑀦𑀼𑀘𑀭𑁄. 𑀬𑀓𑁆𑀔 𑀧𑀽𑀚𑀸𑀬𑀁, 𑀬𑀓𑁆𑀔𑀻𑀬𑀢𑁂 𑀧𑀽𑀚𑀻𑀬𑀢𑁂𑀢𑀺 𑀬𑀓𑁆𑀔𑁄, 𑀓𑀼𑀯𑁂𑀭𑀸𑀤𑀺𑀓𑁄. 𑀭𑀓𑁆𑀔𑀦𑁆𑀢𑀺 𑀅𑀢𑁆𑀢𑀸𑀦𑀁 𑀏𑀢𑀲𑁆𑀫𑀸𑀢𑀺 𑀭𑀓𑁆𑀔𑀲𑁄, 𑀯𑀺𑀪𑀻𑀲𑀡𑀸𑀤𑀺. 𑀓𑀼𑀫𑁆𑀪𑀧𑁆𑀧𑀫𑀸𑀡𑀡𑁆𑀟𑀢𑀸𑀬 𑀓𑀼𑀫𑁆𑀪𑀡𑁆𑀟𑁄. 𑀧𑀺𑀲𑀺𑀢𑀁 𑀫𑀁𑀲𑀁 𑀅𑀲𑀢𑀺 𑀪𑀓𑁆𑀔𑀢𑀻𑀢𑀺 𑀧𑀺𑀲𑀸𑀘𑁄, 𑀲𑀓𑀼𑀦𑀺 𑀲𑀓𑀼𑀦𑁆𑀢𑀺𑀆𑀤𑀺𑀓𑁄 𑀓𑀼𑀯𑁂𑀭𑀸𑀦𑀼𑀘𑀭𑁄, 𑀬𑀤𑀸𑀤𑀺𑀦𑀸 𑀧𑀺𑀲𑀺𑀢𑀲𑁆𑀲 𑀧𑀺𑀪𑀸𑀯𑁄, 𑀅𑀲𑀲𑁆𑀲 𑀘 𑀲𑀸𑀘𑀸𑀤𑁂𑀲𑀪𑀸𑀯𑁄 [𑀧𑀸𑀡𑀺𑀦𑀺 𑁬.𑁩.𑁧𑁦𑁯; 𑀫𑁄𑀕𑁆𑀕𑀮𑁆𑀮𑀸𑀦𑀧𑀜𑁆𑀘𑀺𑀓𑀸 𑁧.𑁪𑁭]. 𑀆𑀤𑀺𑀲𑀤𑁆𑀤𑁂𑀦 𑀯𑀺𑀚𑁆𑀚𑀸𑀥𑀭, 𑀅𑀧𑀲𑀭, 𑀓𑀺𑀦𑁆𑀦𑀭𑁂 𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀺𑀚𑁆𑀚𑀁 𑀕𑀼𑀴𑀺𑀓𑀸𑀜𑁆𑀚𑀦𑀫𑀦𑁆𑀢𑀸𑀤𑀺𑀓𑀁 𑀥𑀭𑀢𑀻𑀢𑀺 𑀯𑀺𑀚𑁆𑀚𑀸𑀥𑀭𑁄. 𑀅𑀧𑀲𑀸𑀭𑀬𑀦𑁆𑀢𑀺 𑀔𑀮𑀬𑀦𑁆𑀢𑀻𑀢𑀺 𑀅𑀧𑀲𑀭𑀸, 𑀉𑀩𑁆𑀩𑀲𑁆𑀬𑀸𑀤𑀺𑀓𑀸 𑀲𑀼𑀭𑀯𑁂𑀲𑀺𑀬𑁄 [𑀅𑀫𑀭 𑁧.𑁫𑁫], 𑀅𑀧𑀲𑀭𑀲𑀤𑁆𑀤𑀲𑁆𑀲 𑀚𑀸𑀢𑀺𑀬𑀁 𑀲𑀬𑀁 𑀩𑀳𑀼𑀢𑁆𑀢𑀁, 𑀩𑁆𑀬𑀢𑁆𑀢𑀺𑀬𑀦𑁆𑀢𑀼 𑀢𑀤𑀯𑀬𑀯𑀁 𑀯𑀸 𑀲𑀬𑀁, 𑀢𑀣𑀸 𑀘 𑀩𑀳𑀼𑀢𑁆𑀢𑀁𑀯. 𑀯𑀦𑀸𑀤𑀺𑀲𑀤𑁆𑀤𑁄 𑀓𑀤𑀸𑀘𑀺 𑀚𑀸𑀢𑀺𑀬𑀁 𑀧𑀬𑀼𑀚𑁆𑀚𑀢𑁂, 𑀓𑀤𑀸𑀘𑀺 𑀩𑁆𑀬𑀢𑁆𑀢𑀺𑀬𑀁. 𑀢𑀢𑁆𑀭 𑀬𑀤𑀸 𑀚𑀸𑀢𑀺𑀬𑀁, 𑀢𑀤𑀸 𑀩𑁆𑀬𑀢𑁆𑀢𑀺𑀕𑀢𑀁 𑀲𑀗𑁆𑀔𑁆𑀬𑀫𑀸𑀤𑀸𑀬 𑀧𑀯𑀢𑁆𑀢𑀢𑀺. 𑀬𑀤𑀸 𑀩𑁆𑀬𑀢𑁆𑀢𑀺𑀬𑀁 𑀧𑀬𑀼𑀚𑁆𑀚𑀢𑁂, 𑀢𑀤𑀸 𑀢𑀁𑀩𑁆𑀬𑀢𑁆𑀢𑀸𑀯𑀬𑀯𑀸𑀦𑀁 𑀧𑀸𑀡𑀺𑀧𑀸𑀤𑀸𑀤𑀻𑀦𑀁 𑀩𑀳𑀼𑀢𑁆𑀢𑀲𑀗𑁆𑀔𑁆𑀬𑀫𑀸𑀤𑀸𑀬 𑀧𑀯𑀢𑁆𑀢𑀢𑀺. 𑀯𑀦𑀲𑀤𑁆𑀤𑁄 𑀢𑀼 𑀚𑀸𑀢𑀺𑀕𑀢𑁂𑀓𑀲𑀗𑁆𑀔𑁆𑀬𑀸𑀯𑀺𑀲𑀺𑀝𑁆𑀞𑀤𑀩𑁆𑀩𑀸𑀪𑀺𑀥𑀸𑀦𑀢𑁄 𑀥𑀯𑀸𑀤𑀺𑀩𑁆𑀬𑀢𑁆𑀢𑀺𑀕𑀢𑀚𑀸𑀢𑁆𑀬𑀸𑀪𑀺𑀥𑀸𑀦𑀢𑁄 𑀯𑀸 𑀏𑀓𑀯𑀘𑀦𑀦𑁆𑀢𑀺 𑀅𑀧𑀲𑀭𑀲𑀤𑁆𑀤𑁄 𑀯𑀸𑀫𑀦𑀸𑀤𑀺𑀫𑀢𑁂𑀦 𑀇𑀢𑁆𑀣𑀺𑀬𑀁 𑀩𑀳𑀼𑀯𑀘𑀦𑁂 𑀘, 𑀢𑀤𑀜𑁆𑀜𑁂𑀲𑀁 𑀧𑀦 𑀫𑀢𑁂𑀦 𑀧𑀼𑀫𑀺𑀢𑁆𑀣𑀺𑀬𑀁 𑀯𑀘𑀦𑀤𑁆𑀯𑀬𑁂 𑀘 𑀤𑀝𑁆𑀞𑀩𑁆𑀩𑁄. 𑀅𑀲𑁆𑀲𑀫𑀼𑀔𑀦𑀭𑀲𑀭𑀻𑀭𑀢𑁆𑀢𑀸 𑀓𑀼𑀘𑁆𑀙𑀺𑀢𑁄 𑀦𑀭𑁄, 𑀓𑀺𑀜𑁆𑀘𑀺 𑀯𑀸 𑀦𑀭𑁄, 𑀦𑀭𑀲𑀤𑀺𑀲𑀢𑁆𑀢𑀸 𑀯𑀸 𑀓𑀺𑀦𑁆𑀦𑀭𑁄. 𑀏𑀢𑀸 𑀤𑁂𑀯𑀬𑁄𑀦𑀺𑀬𑁄. 𑀕𑀡𑀤𑁂𑀯𑀢𑀸 𑀧𑀦 𑁋

‘‘𑀆𑀤𑀺𑀘𑁆𑀘𑀸 𑀯𑀺𑀲𑀼 𑀯𑀲𑀯𑁄, 𑀢𑀼𑀲𑀺𑀢𑀸’𑀪𑀲𑁆𑀲𑀭𑀸’𑀦𑀺𑀮𑀸;

𑀫𑀳𑀸𑀭𑀸𑀚𑀺𑀓𑀸 𑀲𑀸𑀥𑁆𑀬𑀸 𑀘, 𑀭𑀼𑀤𑁆𑀤𑀸 𑀘 𑀕𑀡𑀤𑁂𑀯𑀢𑀸’’𑀢𑀺 [𑀅𑀫𑀭 𑁧.𑁧𑁦].

𑀅𑀫𑀭𑀓𑁄𑀲𑁂 ¶ 𑀓𑀣𑀺𑀢𑀸.

𑀢𑀢𑁆𑀭𑀸𑀤𑀺𑀘𑁆𑀘𑀸 𑀤𑁆𑀯𑀸𑀤𑀲𑀓𑀸, 𑀯𑀺𑀲𑀼𑀤𑁂𑀯𑀸 𑀤𑀲 𑀞𑀺𑀢𑀸;

𑀯𑀲𑀯𑁄 𑀅𑀝𑁆𑀞𑀲𑀗𑁆𑀔𑁆𑀬𑀸𑀢𑀸, 𑀙𑀢𑁆𑀢𑀺𑀁𑀲 𑀢𑀼𑀲𑀺𑀢𑀸 𑀫𑀢𑀸.

𑀆𑀪𑀲𑁆𑀲𑀭𑀸 𑀘𑀢𑀼𑀲𑀝𑁆𑀞𑀺, 𑀯𑀸𑀢𑀸 𑀧𑀡𑁆𑀡𑀸𑀲𑁂𑀓𑀽𑀦𑀓𑀸;

𑀫𑀳𑀸𑀭𑀸𑀚𑀺𑀓𑀦𑀸𑀫𑀸𑀬𑁄, 𑀤𑁆𑀯𑀺𑀲𑀢𑀁 𑀯𑀻𑀲𑀢𑀸𑀥𑀺𑀓𑀸.

𑀲𑀸𑀥𑁆𑀬𑀸 𑀤𑁆𑀯𑀸𑀤𑀲 𑀯𑀺𑀔𑁆𑀬𑀸𑀢𑀸, 𑀭𑀼𑀤𑁆𑀤𑀸 𑀘𑁂𑀓𑀸𑀤𑀲 𑀞𑀺𑀢𑀸;

𑀲𑀫𑀬𑀦𑁆𑀢𑀭𑀢𑁄 𑀏𑀢𑀸, 𑀯𑀺𑀜𑁆𑀜𑁂𑀬𑁆𑀬𑀸 𑀕𑀡𑀤𑁂𑀯𑀢𑀸.

𑁧𑁪. 𑀧𑀼𑀩𑁆𑀩𑀤𑁂𑀯𑀸𑀤𑀺𑀘𑀢𑀼𑀓𑁆𑀓𑀁 𑀅𑀲𑀼𑀭𑁂. 𑀧𑀼𑀩𑁆𑀩𑀁 𑀤𑁂𑀯𑀸 𑀧𑀼𑀩𑁆𑀩𑀤𑁂𑀯𑀸, 𑀤𑀼𑀢𑀺𑀬𑀸𑀲𑀫𑀸𑀲𑁄, 𑀧𑀼𑀩𑁆𑀩𑁂 𑀯𑀸 𑀤𑁂𑀯𑀸 𑀧𑀼𑀩𑁆𑀩𑀤𑁂𑀯𑀸, 𑀧𑀼𑀩𑁆𑀩𑁂 𑀳𑁆𑀬𑁂𑀢𑁂 𑀤𑁂𑀯𑀧𑀼𑀭𑁂 𑀞𑀺𑀢𑀸, 𑀅𑀦𑀦𑁆𑀢𑀭𑀁 𑀲𑀓𑁆𑀓𑀸𑀤𑀻𑀳𑀺 𑀢𑀢𑁄 𑀘𑀸𑀮𑀺𑀢𑀸. 𑀲𑀼𑀭𑀸𑀦𑀁 𑀭𑀺𑀧𑀽 𑀲𑀢𑁆𑀢𑀯𑁄 𑀲𑀼𑀭𑀭𑀺𑀧𑀽. 𑀲𑀼𑀭𑀸𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀅𑀲𑀼𑀭𑀸, 𑀤𑁂𑀯𑀸 𑀯𑀺𑀬 𑀦 𑀲𑀼𑀭𑀦𑁆𑀢𑀺 𑀦 𑀓𑀻𑀴𑀦𑁆𑀢𑀻𑀢𑀺 𑀯𑀸 𑀅𑀲𑀼𑀭𑀸, 𑀲𑀫𑀼𑀤𑁆𑀤𑀼𑀝𑁆𑀞𑀸 𑀯𑀸 𑀲𑀼𑀭𑀸 𑀤𑁂𑀯𑁂𑀳𑀺 𑀅𑀪𑁆𑀬𑀼𑀧𑀕𑀢𑀸, 𑀦𑀸𑀲𑀼𑀭𑁂𑀳𑀻𑀢𑀺 𑀦𑀢𑁆𑀣𑀺 𑀲𑀼𑀭𑀸 𑀏𑀢𑁂𑀲𑀦𑁆𑀢𑀺 𑀅𑀲𑀼𑀭𑀸𑀢𑀺 𑀦𑀺𑀓𑀸𑀬𑀦𑁆𑀢𑀭𑀺𑀬𑀸. 𑀤𑀦𑀼𑀦𑀸𑀫𑀸𑀬 𑀫𑀸𑀢𑀼𑀬𑀸 𑀅𑀧𑀘𑁆𑀘𑀁 𑀤𑀸𑀦𑀯𑀸. 𑀤𑀦𑀼 𑀦𑀸𑀫 𑀢𑁂𑀭𑀲𑀲𑀼 𑀭𑀓𑁆𑀔𑀲𑀤𑀼𑀳𑀺𑀢𑀻𑀲𑀼 𑀏𑀓𑀺𑀲𑁆𑀲𑀸 𑀤𑀼𑀳𑀺𑀢𑀼 𑀦𑀸𑀫𑀁. 𑀏𑀢𑁂 𑀧𑀼𑀩𑁆𑀩𑀤𑁂𑀯𑀸𑀤𑀬𑁄 𑀲𑀤𑀸 𑀧𑀼𑀫𑁂 𑀧𑀼𑀮𑁆𑀮𑀺𑀗𑁆𑀕𑁂 𑀯𑀢𑁆𑀢𑀦𑁆𑀢𑀺. 𑀤𑁂𑀘𑁆𑀘𑀸, 𑀤𑁂𑀢𑁂𑀬𑁆𑀬𑀸, 𑀤𑀦𑀼𑀚𑀸, 𑀇𑀦𑁆𑀤𑀸𑀭𑀻, 𑀲𑀼𑀭𑀤𑀺𑀲𑀸, 𑀲𑀼𑀓𑁆𑀓𑀲𑀺𑀲𑁆𑀲𑀸, 𑀤𑀺𑀢𑀺𑀲𑀼𑀢𑀸, 𑀧𑀼𑀩𑁆𑀩𑀚𑀸𑀇𑀘𑁆𑀘𑀸𑀤𑀻𑀦𑀺𑀧𑀺 𑀅𑀲𑀼𑀭𑀲𑁆𑀲 𑀲𑀸𑀫𑀜𑁆𑀜𑀦𑀸𑀫𑀸𑀦𑀺.

𑀢𑀩𑁆𑀩𑀺𑀲𑁂𑀲𑀸 𑀅𑀲𑀼𑀭𑀧𑁆𑀧𑀪𑁂𑀤𑀸. 𑀲𑀼𑀭𑁂𑀳𑀺 𑀲𑀤𑁆𑀥𑀺𑀁 𑀲𑀗𑁆𑀕𑀸𑀫𑀢𑁆𑀣𑀁 𑀅𑀢𑁆𑀢𑀦𑁄 𑀩𑀮𑀓𑀸𑀬𑀸𑀦𑀁 𑀧𑀳𑀸𑀭𑀁 𑀆𑀬𑀼𑀥𑀁 𑀤𑀤𑀸𑀢𑀻𑀢𑀺 𑀧𑀳𑀸𑀭𑀤𑁄, 𑀲𑁄 𑀏𑀯 𑀧𑀳𑀸𑀭𑀸𑀤𑁄. 𑀲𑀁 𑀧𑀲𑀢𑁆𑀣𑁄 𑀯𑀭𑁄 𑀚𑀸𑀫𑀸𑀢𑀸 𑀬𑀲𑁆𑀲 ¶ 𑀲𑁄 𑀲𑀫𑁆𑀩𑀭𑁄, 𑀢𑀲𑁆𑀲 𑀳𑀺 𑀲𑀓𑁆𑀓𑁄 𑀚𑀸𑀫𑀸𑀢𑀸 [𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁫𑁬], 𑀧𑀼𑀜𑁆𑀜𑀸𑀳𑀭𑀻𑀲𑀼 𑀯𑀸 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀁𑀯𑀼𑀡𑁄𑀢𑀻𑀢𑀺 𑀲𑀫𑁆𑀩𑀭𑁄. 𑀩𑀮𑀫𑁂𑀢𑀲𑁆𑀲𑀢𑁆𑀣𑀻𑀢𑀺 𑀩𑀮𑀻, 𑀅𑀢𑀺𑀲𑀬𑀩𑀮𑀓𑀸𑀬𑀢𑁆𑀢𑀸 𑀯𑀸 𑀩𑀮𑀻, 𑀲𑁄 𑀏𑀯 𑀩𑀮𑀺, ‘‘𑀩𑀮𑀺𑀆𑀤𑀬𑁄’’𑀢𑀺 𑀇𑀫𑀺𑀦𑀸 𑀲𑀫𑀸𑀲𑁂𑀧𑀺 𑀲𑀦𑁆𑀥𑀺 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. 𑀆𑀤𑀺𑀦𑀸 𑀫𑀘𑁆𑀙𑀲𑀓𑀼𑀡𑀸𑀤𑀺𑀓𑁂𑀧𑀺 𑀓𑀼𑀜𑁆𑀘𑀸𑀤𑀺𑀓𑁂𑀧𑀺 𑀅𑀲𑀼𑀭𑀪𑁂𑀤𑁂 𑀲𑀗𑁆𑀕𑀡𑁆𑀳𑀸𑀢𑀺.

𑁧𑁫. 𑀧𑀺𑀢𑀸𑀫𑀳𑀸𑀤𑁆𑀬𑀝𑁆𑀞𑀓𑀁 𑀩𑁆𑀭𑀳𑁆𑀫𑀦𑀺. 𑀧𑀺𑀢𑀽𑀦𑀁 𑀧𑀚𑀸𑀧𑀢𑀻𑀦𑀁 𑀮𑁄𑀓𑀧𑀺𑀢𑀽𑀦𑀫𑁆𑀧𑀺 𑀧𑀺𑀢𑀸 𑀧𑀺𑀢𑀸𑀫𑀳𑁄, 𑀆𑀫𑀳𑀧𑀘𑁆𑀘𑀬𑁄 [𑀫𑁄𑀕𑁆𑀕𑀮𑁆𑀮𑀸𑀦 𑁪.𑁩𑁮]. 𑀲𑀩𑁆𑀩𑀮𑁄𑀓𑀸𑀦𑀁 𑀧𑀺𑀢𑀼𑀝𑁆𑀞𑀸𑀦𑀺𑀬𑀢𑁆𑀢𑀸 𑀧𑀺𑀢𑀸, 𑀲𑀩𑁆𑀩𑀮𑁄𑀓𑀁 𑀯𑀸 𑀧𑀸𑀢𑀺 𑀭𑀓𑁆𑀔𑀢𑀻𑀢𑀺 𑀧𑀺𑀢𑀸, 𑀭𑀺𑀢𑀼𑀧𑀘𑁆𑀘𑀬𑁄. 𑀫𑀳𑀦𑁆𑀢𑀲𑀭𑀻𑀭𑀢𑀸𑀬 𑀩𑁆𑀭𑀳𑁆𑀫𑀸, 𑀩𑁆𑀭𑀳 𑀯𑀼𑀟𑁆𑀠𑀺𑀬𑀁 𑀫𑀧𑀘𑁆𑀘𑀬𑁄. 𑀮𑁄𑀓𑀸𑀦𑀁 𑀈𑀲𑁄 𑀇𑀦𑁆𑀤𑁄 𑀮𑁄𑀓𑁂𑀲𑁄. 𑀓𑀫𑀮𑀲𑀫𑁆𑀪𑀯𑀢𑁆𑀢𑀸 𑀓𑀫𑀮𑀁, 𑀧𑀤𑁆𑀫𑀁. 𑀢𑀁 𑀆𑀲𑀦𑀫𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀫𑀲𑁆𑀲 𑀓𑀫𑀮𑀸𑀲𑀦𑁄. 𑀳𑀺𑀭𑀜𑁆𑀜𑀁 𑀲𑀼𑀯𑀡𑁆𑀡𑀫𑀬𑀁 𑀅𑀡𑁆𑀟𑀁 𑀳𑀺𑀭𑀜𑁆𑀜𑀁, 𑀢𑀲𑁆𑀲 𑀕𑀩𑁆𑀪𑁄 𑀪𑀽𑀡𑁄 [𑀕𑀼𑀡𑁄 (𑀓.)] 𑀳𑀺𑀭𑀜𑁆𑀜𑀕𑀩𑁆𑀪𑁄. 𑀛𑀸𑀦𑀸𑀤𑀺𑀕𑀼𑀡𑁂𑀳𑀺 𑀲𑀼𑀭𑀸𑀦𑀁 𑀚𑁂𑀝𑁆𑀞𑀢𑁆𑀢𑀸 𑀲𑀼𑀭𑀚𑁂𑀝𑁆𑀞𑁄. 𑀧𑀚𑀸𑀦𑀁 𑀲𑀢𑁆𑀢𑀸𑀦𑀁 𑀧𑀢𑀺 𑀲𑀸𑀫𑀺𑀪𑀽𑀢𑁄 𑀧𑀚𑀸𑀧𑀢𑀺, 𑀧𑀚𑀁 𑀧𑀸𑀮𑁂𑀢𑀻𑀢𑀺 𑀯𑀸 𑀧𑀚𑀸𑀧𑀢𑀺. 𑀅𑀢𑁆𑀢𑀪𑀽, 𑀧𑀭𑀫𑁂𑀝𑁆𑀞𑀺, 𑀲𑀬𑀫𑁆𑀪𑀽, 𑀘𑀢𑀼𑀭𑀸𑀦𑀦𑁄, 𑀥𑀸𑀢𑀸, 𑀓𑀫𑀮𑀬𑁄𑀦𑀺, 𑀤𑀼𑀳𑀺𑀡𑁄, 𑀯𑀺𑀭𑀺𑀜𑁆𑀘𑀺, 𑀲𑀚𑀺𑀢𑀸, 𑀯𑁂𑀥𑀸, 𑀯𑀺𑀥𑀸𑀢𑀸, 𑀯𑀺𑀥𑀺, 𑀳𑀁𑀲𑀭𑀣𑁄, 𑀯𑀺𑀭𑀺𑀜𑁆𑀘𑁄, 𑀧𑀧𑀺𑀢𑀸𑀫𑀳𑁄 𑀇𑀘𑁆𑀘𑀸𑀤𑀬𑁄𑀧𑀺 𑀩𑁆𑀭𑀳𑁆𑀫𑀦𑀸𑀫𑀸𑀦𑀺.

𑁧𑁬-𑁧𑁭. 𑀯𑀸𑀲𑀼𑀤𑁂𑀯𑀸𑀤𑀺𑀧𑀜𑁆𑀘𑀓𑀁 ¶ 𑀓𑀡𑁆𑀳𑁂. 𑀯𑀲𑀼𑀤𑁂𑀯𑀲𑁆𑀲 𑀅𑀧𑀘𑁆𑀘𑀁 𑀯𑀸𑀲𑀼𑀤𑁂𑀯𑁄. 𑀫𑀘𑁆𑀘𑀸𑀦𑀁 𑀚𑀻𑀯𑀺𑀢𑀁 𑀳𑀭𑀢𑀺 𑀲𑀻𑀮𑁂𑀦𑀸𑀢𑀺 𑀳𑀭𑀺. 𑀓𑀡𑁆𑀳𑀕𑀼𑀡𑀬𑁄𑀕𑀢𑁄 𑀓𑀡𑁆𑀳𑁄. 𑀓𑁂𑀲𑀺𑀁 𑀦𑀸𑀫 𑀅𑀲𑀼𑀭𑀁 𑀳𑀢𑀯𑀸𑀢𑀺 𑀓𑁂𑀲𑀯𑁄, 𑀈𑀓𑀸𑀭𑀲𑁆𑀲 𑀅𑀓𑀸𑀭𑁄, 𑀳𑀦𑀲𑁆𑀲 𑀘 𑀯𑁄. 𑀯𑀼𑀢𑁆𑀢𑀜𑁆𑀘 𑁋

‘‘𑀬𑀲𑁆𑀫𑀸 𑀢𑀬𑀸 𑀳𑀢𑁄 𑀓𑁂𑀲𑀻,

𑀢𑀲𑁆𑀫𑀸 𑀫𑁂 𑀲𑀸𑀲𑀦𑀁 𑀲𑀼𑀡;

𑀓𑁂𑀲𑀯𑁄 𑀦𑀸𑀫 𑀦𑀸𑀫𑁂𑀦,

𑀲𑁂𑀬𑁆𑀬𑁄 𑀮𑁄𑀓𑁂 𑀪𑀯𑀺𑀲𑁆𑀲𑀲𑀻’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸𑀬𑀫𑁆𑀧𑀺].

𑀘𑀓𑁆𑀓𑀁 𑀧𑀸𑀡𑀺𑀫𑁆𑀳𑀺 𑀅𑀲𑁆𑀲 𑀘𑀓𑁆𑀓𑀧𑀸𑀡𑀺. 𑀯𑀺𑀲𑀡𑀼 [𑀧𑀺𑀡𑁆𑀳𑀼 (𑀓.)], 𑀦𑀸𑀭𑀸𑀬𑀦𑁄, 𑀯𑁂𑀓𑀼𑀡𑁆𑀞𑁄, 𑀤𑀸𑀫𑁄𑀤𑀭𑁄, 𑀫𑀸𑀥𑀯𑁄, 𑀲𑀫𑁆𑀪𑀽, 𑀤𑁂𑀘𑁆𑀘𑀸𑀭𑀺, 𑀧𑀼𑀡𑁆𑀟𑀭𑀻𑀓𑀓𑁆𑀔𑁄, 𑀕𑁄𑀯𑀺𑀦𑁆𑀤𑁄, 𑀕𑀭𑀼𑀴𑀤𑁆𑀥𑀚𑁄, 𑀧𑀻𑀢𑀫𑁆𑀩𑀭𑁄, 𑀅𑀘𑁆𑀘𑀼𑀢𑁄, 𑀫𑀗𑁆𑀕𑀮𑁄, 𑀲𑀺𑀗𑁆𑀕𑀻, 𑀚𑀦𑀸𑀤𑁆𑀤𑀦𑁄, 𑀉𑀧𑁂𑀦𑁆𑀤𑁄, 𑀇𑀦𑁆𑀤𑀸𑀯𑀭𑀚𑁄, 𑀘𑀢𑀼𑀪𑀼𑀚𑁄, 𑀧𑀤𑁆𑀫𑀦𑀸𑀪𑁄, 𑀫𑀥𑀼𑀭𑀺𑀧𑀼, 𑀢𑀺𑀯𑀺𑀓𑁆𑀓𑀫𑁄, 𑀤𑁂𑀯𑀓𑀻𑀦𑀦𑁆𑀤𑀦𑁄, 𑀲𑁄𑀭𑀻, 𑀲𑀺𑀭𑀻𑀧𑀢𑀺, 𑀧𑀼𑀭𑀺𑀲𑁄𑀢𑁆𑀢𑀫𑁄, 𑀯𑀦𑀫𑀸𑀮𑀻, 𑀩𑀮𑀺𑀥𑀁𑀲𑀻, 𑀓𑀁𑀲𑀸𑀭𑀸𑀢𑀺, 𑀅𑀥𑁄𑀓𑁆𑀔𑀚𑁄, 𑀲𑀩𑁆𑀩𑀫𑁆𑀪𑀭𑁄, 𑀓𑁂𑀝𑀪𑀚𑀺 [𑀓𑁂𑀝𑀪𑀁 𑀚𑀺𑀢𑀯𑀸 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)], 𑀯𑀺𑀥𑀼, 𑀲𑀲𑀩𑀺𑀦𑁆𑀤𑀼, 𑀲𑀺𑀭𑀻𑀓𑀭𑁄, 𑀲𑀺𑀭𑀻𑀯𑀭𑀸𑀳𑁄, 𑀅𑀚𑀺𑀢𑁄, 𑀧𑀭𑀧𑀼𑀭𑀺𑀲𑁄, 𑀲𑀺𑀭𑀻𑀕𑀩𑁆𑀪𑁄, 𑀙𑀩𑀺𑀦𑁆𑀤𑀼, 𑀅𑀦𑀦𑁆𑀢𑁄, 𑀦𑀭𑀓𑀚𑀺, 𑀓𑁂𑀲𑀭𑁄, 𑀚𑀸𑀢𑀺𑀓𑀻𑀮𑁄, 𑀦𑀭𑀲𑀻𑀳𑁄, 𑀧𑀼𑀭𑀸𑀡𑀧𑀼𑀭𑀺𑀲𑁄, 𑀦𑀮𑀺𑀦𑁂𑀲𑀬𑁄, 𑀯𑀸𑀲𑀼, 𑀦𑀭𑀸𑀬𑀦𑁄, 𑀧𑀼𑀦𑀩𑁆𑀩𑀲𑀼, 𑀲𑀩𑁆𑀩𑀭𑀽𑀧𑁄, 𑀥𑀭𑀡𑀻𑀥𑀭𑁄, 𑀯𑀸𑀫𑀦𑁄, 𑀏𑀓𑀲𑀺𑀗𑁆𑀕𑁄, 𑀲𑁄𑀫𑀕𑀩𑁆𑀪𑁄, 𑀆𑀤𑀺𑀤𑁂𑀯𑁄, 𑀆𑀤𑀺𑀯𑀭𑀸𑀳𑁄, 𑀲𑀼𑀯𑀡𑁆𑀡𑀩𑀺𑀦𑁆𑀤𑀼, 𑀲𑀤𑀸𑀬𑁄𑀕𑀻, 𑀲𑀦𑀸𑀢𑀦𑁄, 𑀭𑀸𑀳𑀼𑀫𑀼𑀤𑁆𑀥𑀪𑀺𑀤𑁄 ¶ , 𑀓𑀸𑀴𑀦𑁂𑀫𑀺, 𑀧𑀡𑁆𑀟𑀯𑁄, 𑀯𑀟𑁆𑀠𑀫𑀸𑀦𑁄, 𑀲𑀢𑀸𑀦𑀦𑁆𑀤𑁄, 𑀧𑀚𑀸𑀦𑀸𑀣𑁄, 𑀲𑀼𑀬𑀸𑀫𑀼𑀦𑁄𑀇𑀘𑁆𑀘𑀸𑀤𑀻𑀦𑀺 𑀯𑀺𑀲𑀡𑀼𑀦𑀸𑀫𑀸𑀦𑀺. 𑀅𑀲𑁆𑀲 𑀧𑀦 𑀧𑀺𑀢𑀼 𑀦𑀸𑀫𑀸𑀦𑀺 𑀯𑀲𑀼𑀤𑁂𑀯𑁄, 𑀆𑀦𑀓𑀤𑀼𑀦𑁆𑀤𑀼𑀪𑀺 [𑀅𑀫𑀭 𑁧.𑁨𑁩] 𑀇𑀘𑁆𑀘𑀸𑀤𑀻𑀦𑀺. 𑀭𑀣𑀯𑀸𑀳𑁄 𑀧𑀦𑀲𑁆𑀲 𑀤𑀸𑀭𑀼𑀓𑁄 𑀦𑀸𑀫 [𑀢𑀺𑀓𑀡𑁆𑀟𑀲𑁂𑀲 𑁧.𑁧.𑁩𑁪]. 𑀫𑀦𑁆𑀢𑀻 𑀧𑀦 𑀧𑀯𑀦𑀩𑁆𑀬𑀸𑀥𑀺 𑀦𑀸𑀫 [𑀫𑀦𑁆𑀢𑀻 𑀧𑀯𑀦𑀩𑁆𑀬𑀸𑀫𑀺 𑀉𑀤𑁆𑀥𑀯𑁄 (𑀢𑀺𑀢𑀡𑁆𑀟𑀲𑁂𑀲 𑁧.𑁧.𑁩𑁫) 𑀧𑀯𑀦𑀩𑁆𑀬𑀸𑀥𑀺… 𑀉𑀤𑁆𑀥𑀯𑁄 𑀇𑀢𑀺 𑀤𑁆𑀯𑁂 𑀧𑀺𑀡𑁆𑀳𑀼𑀲𑁆𑀲 𑀫𑀦𑁆𑀢𑀺𑀦𑁄 (𑀓𑀝𑁆𑀝𑀻𑀓𑀸)].

𑀫𑀳𑀺𑀲𑁆𑀲𑀭𑀸𑀤𑀺𑀙𑀓𑁆𑀓𑀁 𑀳𑀭𑁂. 𑀫𑀳𑀦𑁆𑀢𑁄 𑀇𑀲𑁆𑀲𑀭𑁄 𑀯𑀺𑀪𑀽𑀢𑀺 𑀏𑀢𑀲𑁆𑀲𑀸𑀢𑀺 𑀫𑀳𑀺𑀲𑁆𑀲𑀭𑁄. 𑀕𑀼𑀡𑀸𑀯𑀢𑁆𑀣𑀸𑀭𑀳𑀺𑀢𑁄 𑀲𑀫𑁆𑀧𑀢𑀺 𑀧𑀭𑀫𑀸𑀦𑀦𑁆𑀤𑀭𑀽𑀧𑀢𑁆𑀢𑀸 𑀦𑀺𑀩𑁆𑀩𑀺𑀓𑀸𑀭𑁄 𑀲𑀫𑀢𑀺 𑀪𑀯𑀢𑀻𑀢𑀺 𑀲𑀺𑀯𑁄, 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀅𑀓𑀸𑀭𑀲𑁆𑀲 𑀇𑀢𑁆𑀢𑀁, 𑀫𑀲𑁆𑀲 𑀯𑁄 𑀘. 𑀏𑀯𑀁 𑀲𑀩𑁆𑀩𑀢𑁆𑀣 𑀬𑀤𑀸𑀤𑀺𑀦𑀸 𑀯𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀯𑀸 𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀲𑀽𑀮𑀧𑀸𑀡𑀺𑀢𑁆𑀢𑀸 𑀲𑀽𑀮𑀻. 𑀇𑀝𑁆𑀞𑁂 𑀧𑀪𑀯𑀢𑀻𑀢𑀺 𑀇𑀲𑁆𑀲𑀭𑁄, 𑀇𑀲𑁆𑀲𑀢𑀺 𑀅𑀪𑀺𑀪𑀯𑀢𑀻𑀢𑀺 𑀯𑀸 𑀇𑀲𑁆𑀲𑀭𑁄. 𑀧𑀲𑀽𑀦𑀁 𑀧𑀫𑀣𑀸𑀦𑀁 𑀧𑀢𑀺 𑀧𑀲𑀼𑀧𑀢𑀺. ‘‘𑀧𑀲𑀼 𑀫𑀺𑀕𑀸𑀤𑁄 𑀙𑀕𑀮𑁂, 𑀧𑀫𑀣𑁂𑀧𑀺 𑀧𑀲𑀼 𑀧𑀼𑀫𑁂’’𑀢𑀺 𑀭𑀼𑀤𑁆𑀤𑁄 [𑀭𑀪𑀲𑁄 (𑀓.)]. ( ) [(𑀕𑀼𑀡𑁂) (𑀓.)] 𑀯𑀺𑀲𑀺𑀝𑁆𑀞𑀢𑀫𑁄𑀕𑀼𑀡𑀢𑁆𑀢𑀸 𑀲𑀩𑁆𑀩𑀁 𑀳𑀭𑀢𑀻𑀢𑀺 𑀳𑀭𑁄. 𑀯𑀼𑀢𑁆𑀢𑁄𑀢𑀺 𑀓𑁆𑀭𑀺𑀬𑀸𑀧𑀤𑀁. 𑀲𑀫𑁆𑀪𑀼, 𑀈𑀲𑁄, 𑀲𑀩𑁆𑀩𑁄, 𑀈𑀲𑀸𑀦𑁄, 𑀲𑀗𑁆𑀓𑀭𑁄, 𑀘𑀦𑁆𑀤𑀲𑁂𑀔𑀭𑁄, 𑀪𑀽𑀢𑁂𑀲𑁄, 𑀔𑀡𑁆𑀟𑀧𑀭𑀲𑀼, 𑀕𑀺𑀭𑀻𑀲𑁄, 𑀫𑀘𑁆𑀘𑀼𑀜𑁆𑀚𑀬𑁄, 𑀧𑀺𑀦𑀸𑀓𑀻, 𑀧𑀫𑀣𑀸𑀥𑀺𑀧𑁄, 𑀉𑀕𑁆𑀕𑁄, 𑀓𑀧𑀤𑁆𑀤𑀺, 𑀲𑀺𑀭𑀻𑀓𑀡𑁆𑀞𑁄, 𑀓𑀸𑀴𑀓𑀡𑁆𑀞𑁄, 𑀓𑀧𑀸𑀮𑀪𑀭𑁄, 𑀯𑀸𑀫𑀤𑁂𑀯𑁄, 𑀫𑀳𑀸𑀤𑁂𑀯𑁄, 𑀯𑀺𑀭𑀽𑀧𑀓𑁆𑀔𑁄, 𑀢𑀺𑀮𑁄𑀘𑀦𑁄, 𑀲𑀩𑁆𑀩𑀜𑁆𑀜𑀽, 𑀦𑀻𑀮𑀮𑁄𑀳𑀺𑀢𑁄, 𑀫𑀸𑀭𑀳𑀭𑁄, 𑀪𑀕𑁆𑀕𑁄, 𑀢𑁆𑀬𑀫𑁆𑀩𑀓𑁄, 𑀢𑀺𑀧𑀼𑀭𑀦𑁆𑀢𑀓𑁄, 𑀕𑀗𑁆𑀕𑀸𑀥𑀭𑁄, 𑀅𑀦𑁆𑀥𑀓𑀭𑀺𑀧𑀼, 𑀩𑁆𑀬𑁄𑀫𑀓𑁂𑀲𑁄, 𑀪𑀯𑁄, 𑀪𑀻𑀫𑁄, 𑀭𑀼𑀤𑁆𑀤𑁄, 𑀉𑀫𑀸𑀧𑀢𑀺, 𑀪𑀕𑀸𑀮𑀻, 𑀓𑀧𑀺𑀲𑀜𑁆𑀚𑀦𑁄, 𑀳𑀻𑀭𑁄, 𑀧𑀜𑁆𑀘𑀸𑀦𑀦𑁄, 𑀔𑀓𑀼𑀦𑁆𑀢𑀮𑁄, 𑀕𑁄𑀧𑀸𑀮𑀓𑁄, 𑀧𑀺𑀗𑁆𑀕𑀓𑁆𑀔𑁄 [𑀯𑀺𑀪𑀗𑁆𑀕𑁄 (𑀓.)], 𑀓𑀽𑀝𑀓𑀭𑁄, 𑀘𑀦𑁆𑀤𑀸𑀧𑀻𑀴𑁄, 𑀫𑀳𑀸𑀦𑀝𑁄, 𑀲𑀫𑀻𑀭𑁄, 𑀳𑁄, 𑀦𑀦𑁆𑀤𑀺𑀯𑀟𑁆𑀠𑀦𑁄, 𑀕𑀼𑀴𑀸𑀓𑁂𑀲𑁄 [𑀫𑀺𑀕𑀽𑀳𑁄 (𑀓.)], 𑀫𑀺𑀳𑀺𑀭𑀸𑀡𑁄, 𑀫𑁂𑀖𑀯𑀸𑀳𑀦𑁄, 𑀲𑀼𑀧𑁆𑀧𑀢𑀸𑀧𑁄 [𑀲𑀼𑀧𑁆𑀧𑀲𑀸𑀤𑁄 (𑀓.)], 𑀉, 𑀣𑀸𑀡𑀼 [𑀉𑀧𑀸𑀡𑁆𑀟𑁄 (𑀓.)], 𑀲𑀺𑀧𑀺𑀯𑀺𑀝𑁆𑀞𑁄, 𑀓𑀻𑀮𑁄, 𑀥𑀫𑁆𑀫𑀯𑀸𑀳𑀦𑁄𑀇𑀘𑁆𑀘𑀸𑀤𑀻𑀦𑀺𑀧𑀺 𑀳𑀭𑀦𑀸𑀫𑀸𑀦𑀺.

𑀓𑀼𑀫𑀸𑀭𑀸𑀤𑀺𑀢𑁆𑀢𑀬𑀁 ¶ 𑀳𑀭𑀲𑁆𑀲 𑀧𑀼𑀢𑁆𑀢𑁂. 𑀓𑀼𑀫𑀸𑀭 𑀓𑀻𑀴𑀸𑀬𑀁, 𑀓𑀼𑀫𑀸𑀭𑁂𑀢𑀺 𑀓𑀻𑀴𑀢𑀻𑀢𑀺 𑀓𑀼𑀫𑀸𑀭𑁄, 𑀲𑁄𑀴𑀲𑀯𑀲𑁆𑀲𑀺𑀓𑁄, 𑀅𑀬𑀜𑁆𑀘 𑀲𑁄𑀴𑀲𑀯𑀲𑁆𑀲𑀺𑀓𑁄. ‘‘𑀩𑀸𑀮𑁄 𑀘 𑀲𑁄𑀴𑀲 𑀪𑀯𑁂’’𑀢𑀺 𑀳𑀺 𑀯𑀼𑀢𑁆𑀢𑀁. 𑀔𑀡𑁆𑀟𑀢𑀺 𑀤𑀸𑀦𑀯𑀩𑀮𑀦𑁆𑀢𑀺 𑀔𑀦𑁆𑀤𑁄, 𑀡𑁆𑀟𑀲𑁆𑀲 𑀦𑁆𑀤𑁄. 𑀲𑀢𑁆𑀢𑀺𑀁𑀧𑀳𑀭𑀡𑀯𑀺𑀲𑁂𑀲𑀁 𑀥𑀭𑀢𑀻𑀢𑀺 𑀲𑀢𑁆𑀢𑀺𑀥𑀭𑁄, 𑀧𑀪𑀸𑀯𑀼𑀲𑁆𑀲𑀸𑀳𑀫𑀦𑁆𑀢𑀲𑀗𑁆𑀔𑀸𑀢𑀁 𑀯𑀸 𑀲𑀢𑁆𑀢𑀺𑀢𑁆𑀢𑀬𑀁 𑀥𑀭𑀢𑀻𑀢𑀺 𑀲𑀢𑁆𑀢𑀺𑀥𑀭𑁄. 𑀅𑀫𑀭𑀓𑁄𑀲𑁂 𑀧𑀦 𑁋

‘‘𑀓𑀢𑁆𑀢𑀺𑀓𑁂𑀬𑁆𑀬𑁄 𑀫𑀳𑀸𑀲𑁂𑀦𑁄,

𑀲𑀭𑀚𑀸𑀢𑁄 𑀙𑀴𑀸𑀦𑀦𑁄;

𑀧𑀩𑁆𑀩𑀢𑀻𑀦𑀦𑁆𑀤𑀦𑁄 𑀔𑀦𑁆𑀤𑁄,

𑀲𑁂𑀦𑀸𑀦𑀻 𑀅𑀕𑁆𑀕𑀺𑀪𑀽 𑀕𑀼𑀳𑁄.

𑀩𑀸𑀳𑀼𑀮𑁂𑀬𑁆𑀬𑁄 𑀢𑀸𑀭𑀓𑀚𑀺,

𑀯𑀺𑀲𑀸𑀔𑁄 𑀲𑀺𑀔𑀺𑀯𑀸𑀳𑀦𑁄;

𑀙𑀫𑀸𑀢𑀼𑀭𑁄 𑀲𑀢𑁆𑀢𑀺𑀥𑀭𑁄,

𑀓𑀼𑀫𑀸𑀭𑁄 𑀓𑁄𑀜𑁆𑀘𑀤𑀸𑀭𑀡𑁄’’𑀢𑀺 [𑀅𑀫𑀭 𑁧.𑁪𑁧-𑁨] 𑀯𑀼𑀢𑁆𑀢𑀁.

𑁧𑁮-𑁨𑁧. 𑀲𑀓𑁆𑀓𑀸𑀤𑀻𑀦𑀺 𑀯𑀻𑀲𑀢𑀺 𑀲𑀓𑁆𑀓𑀲𑁆𑀲 𑀦𑀸𑀫𑀸𑀦𑀺. 𑀅𑀲𑀼𑀭𑁂 𑀚𑁂𑀢𑀼𑀁 𑀲𑀓𑁆𑀓𑀼𑀡𑀸𑀢𑀻𑀢𑀺 𑀲𑀓𑁆𑀓𑁄. 𑀧𑀼𑀭𑁂, 𑀧𑀼𑀭𑀁 𑀯𑀸 𑀤𑀤𑀸𑀢𑀻𑀢𑀺 𑀧𑀼𑀭𑀺𑀦𑁆𑀤𑀤𑁄 ¶ . 𑀤𑁂𑀯𑀸𑀦𑀁 𑀭𑀸𑀚𑀸 𑀤𑁂𑀯𑀭𑀸𑀚𑀸. 𑀯𑀚𑀺𑀭𑀁 𑀧𑀸𑀡𑀺𑀫𑁆𑀳𑀺 𑀅𑀲𑁆𑀲 𑀯𑀚𑀺𑀭𑀧𑀸𑀡𑀺. 𑀲𑀼𑀚𑀸𑀬 𑀅𑀲𑀼𑀭𑀓𑀜𑁆𑀜𑀸𑀬 𑀧𑀢𑀺 𑀲𑀼𑀚𑀫𑁆𑀧𑀢𑀺. 𑀩𑀳𑀽𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀘𑀺𑀦𑁆𑀢𑀺𑀢𑀢𑁆𑀣𑀲𑁆𑀲 𑀤𑀲𑁆𑀲𑀦𑀲𑀫𑀢𑁆𑀣𑀢𑀸𑀬 𑀲𑀳𑀲𑁆𑀲𑀓𑁆𑀔𑁄. 𑀫𑀳𑀢𑀁 𑀤𑁂𑀯𑀸𑀦𑀁 𑀇𑀦𑁆𑀤𑁄 𑀭𑀸𑀚𑀸 𑀫𑀳𑀺𑀦𑁆𑀤𑁄, 𑀤𑁂𑀯𑁂𑀳𑀺 𑀫𑀳𑀺𑀢𑀩𑁆𑀩𑁄 𑀯𑀸 𑀇𑀦𑁆𑀤𑁄 𑀭𑀸𑀚𑀸 𑀫𑀳𑀺𑀦𑁆𑀤𑁄, 𑀫𑀳𑀦𑁆𑀢𑁄 𑀘 𑀲𑁄 𑀇𑀦𑁆𑀤𑁄 𑀘𑀸𑀢𑀺 𑀯𑀸 𑀫𑀳𑀺𑀦𑁆𑀤𑁄. 𑀯𑀚𑀺𑀭𑀁 𑀆𑀯𑀼𑀥𑀁 𑀬𑀲𑁆𑀲 𑀯𑀚𑀺𑀭𑀸𑀯𑀼𑀥𑁄, ‘‘𑀯𑀚𑀺𑀭𑀸𑀬𑀼𑀥𑁄’’𑀢𑀺𑀧𑀺 𑀧𑀸𑀞𑁄. 𑀯𑀲𑀽𑀦𑀺 𑀭𑀢𑀦𑀸𑀦𑀺 𑀲𑀦𑁆𑀢𑁆𑀬𑀲𑁆𑀲𑁂𑀢𑀺 𑀯𑀸𑀲𑀯𑁄. 𑀤𑀲𑀲𑀢𑀸𑀦𑀺 𑀦𑀬𑀦𑀸𑀦𑀺 𑀬𑀲𑁆𑀲 𑀲𑁄 𑀤𑀲𑀲𑀢𑀦𑀬𑀦𑁄. 𑀤𑁆𑀯𑀺𑀦𑁆𑀦𑀁 𑀤𑁂𑀯𑀮𑁄𑀓𑀸𑀦𑀁 𑀅𑀥𑀺𑀧𑀢𑀺𑀪𑀽𑀢𑀢𑁆𑀢𑀸 𑀢𑀺𑀤𑀺𑀯𑀸𑀥𑀺𑀪𑀽. 𑀲𑀼𑀭𑀸𑀦𑀁 𑀦𑀸𑀣𑁄 𑀲𑀼𑀭𑀦𑀸𑀣𑁄. 𑀯𑀚𑀺𑀭𑀁 𑀳𑀢𑁆𑀣𑁂 𑀬𑀲𑁆𑀲 𑀲𑁄 𑀯𑀚𑀺𑀭𑀳𑀢𑁆𑀣𑁄. 𑀪𑀽𑀢𑀸𑀦𑀁 𑀲𑀢𑁆𑀢𑀸𑀦𑀁 𑀧𑀢𑀺 𑀪𑀽𑀢𑀧𑀢𑀺. 𑀫𑀳𑀺𑀢𑀩𑁆𑀩𑀢𑁆𑀢𑀸 𑀫𑀖𑀯𑀸. 𑀫𑀳 𑀧𑀽𑀚𑀸𑀬𑀁, 𑀳𑀲𑁆𑀲 𑀖𑀯𑁄. 𑀓𑁄𑀲𑀲𑀗𑁆𑀔𑀸𑀢𑀸𑀦𑀺 𑀥𑀦𑀸𑀦𑀺 𑀲𑀦𑁆𑀢𑀺 𑀬𑀲𑁆𑀲, 𑀲𑁄 𑀓𑁄𑀲𑀺𑀬𑁄, ‘‘𑀓𑁄𑀲𑀺𑀬𑀕𑁄𑀢𑁆𑀢𑀢𑀸𑀬 𑀓𑁄𑀲𑀺𑀬𑁄’’𑀢𑀺 𑀘 𑀯𑀤𑀦𑁆𑀢𑀺. 𑀇𑀦𑁆𑀤𑀢𑀺 𑀧𑀭𑀫𑀺𑀲𑁆𑀲𑀭𑀺𑀬𑁂𑀦 𑀬𑀼𑀚𑁆𑀚𑀢𑁂𑀢𑀺 𑀇𑀦𑁆𑀤𑁄. 𑀯𑀢𑁆𑀭𑀁 𑀦𑀸𑀫 𑀅𑀲𑀼𑀭𑀁 𑀅𑀪𑀺𑀪𑀯𑀢𑀻𑀢𑀺 𑀯𑀢𑁆𑀭𑀪𑀽. 𑀧𑀸𑀓𑁄 𑀦𑀸𑀫𑀯𑀢𑁆𑀭𑀸𑀲𑀼𑀭𑀲𑁆𑀲 𑀪𑀸𑀢𑀸, 𑀢𑀲𑁆𑀲 𑀲𑀸𑀲𑀦𑀢𑁄 𑀦𑀺𑀕𑁆𑀕𑀳𑀢𑁄 𑀧𑀸𑀓𑀲𑀸𑀲𑀦𑁄. 𑀯𑀺𑀟𑀁 𑀩𑁆𑀬𑀸𑀧𑀓𑀁 𑀑𑀚𑁄 𑀏𑀢𑀲𑁆𑀲 𑀯𑀺𑀟𑁄𑀚𑁄. 𑀲𑀼𑀦𑀸𑀲𑀻𑀭𑁄, 𑀧𑀼𑀭𑀦𑁆𑀤𑀭𑁄, 𑀮𑁂𑀔𑀸𑀲𑀪𑁄 [𑀮𑁂𑀔𑀦𑀁 𑀤𑁂𑀯𑀸𑀦𑀁 𑀉𑀲𑀢𑁄 𑀉𑀢𑁆𑀢𑀫𑁄 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)], 𑀤𑀺𑀯𑀧𑀢𑀺, 𑀲𑀼𑀭𑀧𑀢𑀺, 𑀩𑀮𑀸𑀭𑀸𑀢𑀺, 𑀲𑀘𑀻𑀧𑀢𑀺, 𑀚𑀫𑁆𑀪𑀪𑁂𑀤𑀻, 𑀳𑀭𑀺𑀳𑀬𑁄, 𑀦𑀫𑀼𑀘𑀺𑀲𑀽𑀤𑀦𑁄, 𑀲𑀁𑀓𑀦𑁆𑀤𑀦𑁄, 𑀫𑁂𑀖𑀯𑀸𑀳𑀦𑁄, 𑀆𑀔𑀡𑁆𑀟𑀮𑁄 [𑀆𑀔𑀡𑁆𑀟𑀬𑀢𑀺 𑀧𑀭𑀩𑀮𑀁 𑀉𑀲𑀸𑀤𑀺𑀢𑁆𑀢𑀸 𑀓𑀮𑀘 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)], 𑀓𑁄𑀲𑀺𑀓𑁄, 𑀲𑀼𑀭𑀕𑀸𑀫𑀡𑀻, 𑀦𑀸𑀓𑀦𑀸𑀣𑁄, 𑀳𑀭𑀻 𑀇𑀘𑁆𑀘𑀸𑀤𑀻𑀦𑀺𑀧𑀺 𑀲𑀓𑁆𑀓𑀲𑁆𑀲 𑀦𑀸𑀫𑀸𑀦𑀺.

𑀅𑀲𑁆𑀲 𑀲𑀓𑁆𑀓𑀲𑁆𑀲 𑀪𑀭𑀺𑀬𑀸 𑀲𑀼𑀚𑀸𑀢𑀸 𑀦𑀸𑀫. 𑀲𑀼𑀔𑁂𑀦 𑀚𑀸𑀢𑀸, 𑀲𑀼𑀦𑁆𑀤𑀭𑀸 𑀯𑀸 𑀚𑀸𑀢𑀺 𑀬𑀲𑁆𑀲𑀸 𑀲𑀸 𑀲𑀼𑀚𑀸𑀢𑀸. 𑀧𑀼𑀮𑁄𑀫𑀚𑀸, 𑀲𑀘𑀻, 𑀇𑀦𑁆𑀤𑀸𑀦𑀻 𑀇𑀘𑁆𑀘𑀸𑀤𑀻𑀦𑀺𑀧𑀺 𑀲𑀓𑁆𑀓𑀪𑀭𑀺𑀬𑀸𑀬 𑀦𑀸𑀫𑀸𑀦𑀺.

𑀅𑀲𑁆𑀲 𑀲𑀓𑁆𑀓𑀲𑁆𑀲 𑀧𑀼𑀭𑀁 𑀫𑀲𑀓𑁆𑀓𑀲𑀸𑀭𑀸𑀤𑀬𑁄 𑀢𑀬𑁄 𑀪𑀯𑁂. 𑀫𑁄 𑀘 𑀲𑀓𑁆𑀓𑁄 𑀘 𑀫𑀲𑀓𑁆𑀓𑀸, 𑀢𑁂 𑀲𑀭𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀏𑀢𑁆𑀣 𑀓𑀻𑀴𑀸𑀯𑀲𑁂𑀦𑀸𑀢𑀺 𑀫𑀲𑀓𑁆𑀓𑀲𑀸𑀭𑀸, 𑀫𑀳𑀺𑀲𑁆𑀲𑀭𑀸𑀤𑀻𑀦𑀁 𑀧𑀭𑀺𑀲𑀸𑀦𑀁, 𑀲𑀓𑁆𑀓𑀲𑁆𑀲 𑀘 𑀓𑀻𑀴𑀸𑀦𑀼𑀪𑀯𑀦𑀝𑁆𑀞𑀸𑀦𑀦𑁆𑀢𑁆𑀬𑀢𑁆𑀣𑁄𑀢𑀺 ¶ 𑀘𑀺𑀦𑁆𑀢𑀸𑀫𑀡𑀺𑀣𑀼𑀢𑀺𑀝𑀻𑀓𑀸𑀬𑀁 𑀯𑀼𑀢𑁆𑀢𑀁. 𑀲𑀗𑁆𑀕𑀳𑀝𑀻𑀓𑀸𑀬𑀁 𑀧𑀦 ‘‘𑀫𑀲𑀓𑁆𑀓𑀦𑁆𑀢𑀺 𑀯𑀸 𑀯𑀲𑁄𑀓𑀦𑁆𑀢𑀺 𑀯𑀸 𑀅𑀲𑀼𑀭𑀧𑀼𑀭𑀲𑁆𑀲 𑀦𑀸𑀫𑀁, 𑀇𑀤𑀁 𑀧𑀦 𑀢𑁂𑀲𑀁 𑀉𑀢𑁆𑀢𑀫𑀢𑁆𑀢𑀸 𑀫𑀲𑀓𑁆𑀓𑀲𑀸𑀭𑁄, 𑀯𑀲𑁄𑀓𑀲𑀸𑀭𑁄𑀢𑀺 𑀘 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀫𑀭𑀸 𑀏𑀢𑀺𑀲𑁆𑀲𑀁 𑀲𑀦𑁆𑀢𑀺 𑀅𑀫𑀭𑀯𑀢𑀻, 𑀲𑀸 𑀏𑀯 𑀅𑀫𑀭𑀸𑀯𑀢𑀻, 𑀭𑀲𑁆𑀲𑀲𑁆𑀲 𑀤𑀻𑀖𑀢𑀸 [𑀧𑀸𑀡𑀺𑀦𑀻 𑁬.𑁩.𑁧𑁧𑁯].

𑀅𑀲𑁆𑀲 𑀲𑀓𑁆𑀓𑀲𑁆𑀲 𑀧𑀸𑀲𑀸𑀤𑁄 𑀯𑁂𑀚𑀬𑀦𑁆𑀢𑁄 𑀦𑀸𑀫. 𑀯𑁂𑀚𑀬𑀦𑁆𑀢𑀻 𑀧𑀝𑀸𑀓𑀸 𑀧𑀲𑀢𑁆𑀣𑀸, 𑀪𑀽𑀢𑀸 𑀯𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀯𑁂𑀚𑀬𑀦𑁆𑀢𑁄.

𑀅𑀲𑁆𑀲 𑀲𑀓𑁆𑀓𑀲𑁆𑀲 𑀲𑀪𑀸 𑀲𑀼𑀥𑀫𑁆𑀫𑀸 𑀫𑀢𑀸. 𑀲𑁄𑀪𑀦𑁄 𑀥𑀫𑁆𑀫𑁄 𑀅𑀲𑁆𑀲𑀸𑀢𑀺 𑀲𑀼𑀥𑀫𑁆𑀫𑀸, 𑀤𑁂𑀯𑀫𑀡𑁆𑀟𑀧𑁄.

𑁨𑁨. 𑀢𑀲𑁆𑀲 𑀲𑀓𑁆𑀓𑀲𑁆𑀲 𑀭𑀣𑁄 𑀯𑁂𑀚𑀬𑀦𑁆𑀢𑁄 𑀦𑀸𑀫. 𑀯𑁂𑀚𑀬𑀦𑁆𑀢𑀻𑀦𑀸𑀫𑀸𑀬 𑀧𑀝𑀸𑀓𑀸𑀬 𑀬𑁄𑀕𑀢𑁄 𑀯𑁂𑀚𑀬𑀦𑁆𑀢𑁄. 𑀢𑀲𑁆𑀲 𑀲𑀓𑁆𑀓𑀲𑁆𑀲 𑀲𑀸𑀭𑀣𑀺 𑀲𑀽𑀢𑁄 𑀫𑀸𑀢𑀮𑀺𑀦𑀸𑀫. 𑀫𑀢𑀮𑀲𑁆𑀲 [𑀫𑀸𑀢𑀮𑀸𑀬 (𑀓.)] 𑀅𑀧𑀘𑁆𑀘𑀁 𑀫𑀸𑀢𑀮𑀺, 𑀢𑀲𑁆𑀲 𑀲𑀓𑁆𑀓𑀲𑁆𑀲 𑀕𑀚𑁄 𑀏𑀭𑀸𑀯𑀡𑁄 𑀦𑀸𑀫, 𑀇𑀭𑀸𑀯𑀡𑁄 𑀲𑀫𑀼𑀤𑁆𑀤𑁄, 𑀢𑀢𑁆𑀭𑀚𑀸𑀢𑁄 𑀏𑀭𑀸𑀯𑀡𑁄 [𑀇𑀭𑀸𑀯𑀢𑀺 𑀲𑀫𑀼𑀤𑁆𑀤𑁂 𑀚𑀸𑀢𑁄 (𑀏𑀭𑀸𑀯𑀢𑁄), 𑀲𑁂𑀲𑁂 𑀅𑀡… 𑀧𑀺𑀲𑁄𑀤𑀭𑀸𑀤𑀺𑀢𑁆𑀢𑀸 𑀡𑀢𑁆𑀢𑁂 𑀏𑀭𑀸𑀯𑀡𑁄 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)]. 𑀢𑀲𑁆𑀲 𑀲𑀓𑁆𑀓𑀲𑁆𑀲 𑀲𑀺𑀮𑀸𑀲𑀦𑀁 𑀧𑀡𑁆𑀟𑀼𑀓𑀫𑁆𑀩𑀮𑁄 𑀦𑀸𑀫. 𑀧𑀡𑁆𑀟𑀼𑀯𑀡𑁆𑀡𑀓𑀫𑁆𑀩𑀮𑀲𑀤𑀺𑀲𑀢𑁆𑀢𑀸 𑀧𑀡𑁆𑀟𑀼𑀓𑀫𑁆𑀩𑀮𑁄. 𑀲𑀺𑀮𑀸 𑀧𑀸𑀲𑀸𑀡𑁄 𑀏𑀯 𑀆𑀲𑀦𑀁 𑀲𑀺𑀮𑀸𑀲𑀦𑀁.

𑁨𑁩. 𑀢𑀲𑁆𑀲 𑀲𑀓𑁆𑀓𑀲𑁆𑀲 𑀧𑀼𑀢𑁆𑀢𑀸 𑀲𑀼𑀯𑀻𑀭, 𑀚𑀬𑀦𑁆𑀢𑀇𑀘𑁆𑀘𑀸𑀤𑀬𑁄. 𑀅𑀢𑀺𑀲𑀬𑁂𑀦 𑀲𑀽𑀭𑀢𑁆𑀢𑀸 𑀲𑀼𑀯𑀻𑀭𑁄. 𑀅𑀲𑀼𑀭𑁂 𑀚𑀬𑀢𑀻𑀢𑀺 𑀚𑀬𑀦𑁆𑀢𑁄. 𑀢𑀲𑁆𑀲 𑀲𑀓𑁆𑀓𑀲𑁆𑀲 𑀧𑁄𑀓𑁆𑀔𑀭𑀡𑀻 𑀦𑀦𑁆𑀤𑀸 𑀦𑀸𑀫 𑀪𑀯𑁂. 𑀦𑀦𑁆𑀤𑀻𑀬𑀢𑀻𑀢𑀺 𑀦𑀦𑁆𑀤𑀸. 𑀧𑁄𑀓𑁆𑀔𑀭𑀁 𑀯𑀼𑀘𑁆𑀘𑀢𑀺 𑀧𑀤𑀼𑀫𑀁, 𑀲𑀮𑀺𑀮𑀜𑁆𑀘, 𑀢𑁂𑀳𑀺 𑀲𑀢𑁆𑀢𑀸𑀦𑀁 ¶ 𑀫𑀦𑀁 𑀅𑀢𑁆𑀢𑀸𑀦𑀁 𑀦𑀬𑀢𑀻𑀢𑀺 𑀧𑁄𑀓𑁆𑀔𑀭𑀡𑀻, 𑀧𑁄𑀓𑁆𑀔𑀭𑁂𑀦 𑀯𑀸 𑀲𑀼𑀦𑁆𑀤𑀭𑁂𑀦 𑀅𑀡𑁆𑀡𑁂𑀦 𑀚𑀮𑁂𑀦 𑀲𑀳𑀺𑀢𑀢𑁆𑀢𑀸 𑀧𑁄𑀓𑁆𑀔𑀭𑀡𑁆𑀡𑀻, 𑀲𑀸 𑀏𑀯 𑀧𑁄𑀓𑁆𑀔𑀭𑀡𑀻. 𑀢𑀲𑁆𑀲 𑀲𑀓𑁆𑀓𑀲𑁆𑀲 𑀯𑀦𑀸𑀦𑀺 𑀉𑀬𑁆𑀬𑀸𑀦𑀸𑀦𑀺 𑀦𑀦𑁆𑀤𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺. 𑀦𑀦𑁆𑀤𑀬𑀢𑀻𑀢𑀺 𑀦𑀦𑁆𑀤𑀦𑀁. 𑀦𑀸𑀦𑀸𑀤𑀺𑀩𑁆𑀩𑀭𑀼𑀓𑁆𑀔𑁂𑀳𑀺 𑀫𑀺𑀲𑁆𑀲𑀓𑀢𑁆𑀢𑀸 𑀫𑀺𑀲𑁆𑀲𑀓𑀁. 𑀦𑀸𑀦𑀸𑀮𑀢𑀸𑀳𑀺 𑀯𑀮𑁆𑀮𑀻𑀳𑀺 𑀘𑀺𑀢𑁆𑀢𑀢𑁆𑀢𑀸 𑀘𑀺𑀢𑁆𑀢𑀮𑀢𑀸, 𑀦𑀸𑀦𑀸𑀯𑀺𑀭𑀸𑀕𑀯𑀡𑁆𑀡𑀯𑀺𑀘𑀺𑀢𑁆𑀢𑀸𑀬 𑀯𑀸 𑀮𑀢𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀘𑀺𑀢𑁆𑀢𑀮𑀢𑀸, 𑀤𑁂𑀯𑀢𑀸𑀦𑀁 𑀯𑀸 𑀘𑀺𑀢𑁆𑀢𑀸𑀲𑀸 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀘𑀺𑀢𑁆𑀢𑀸, 𑀆𑀲𑀸𑀯𑀢𑀻 𑀦𑀸𑀫 𑀮𑀢𑀸, 𑀲𑀸 𑀬𑀲𑁆𑀲 𑀅𑀢𑁆𑀣𑀺, 𑀢𑀁 𑀘𑀺𑀢𑁆𑀢𑀮𑀢𑀸. 𑀤𑁂𑀯𑀢𑀸𑀦𑀁 𑀯𑀸 𑀘𑀺𑀢𑁆𑀢𑀁 𑀮𑀦𑁆𑀢𑀺 𑀕𑀡𑁆𑀳𑀦𑁆𑀢𑀻𑀢𑀺 𑀘𑀺𑀢𑁆𑀢𑀮𑀸, 𑀤𑀺𑀩𑁆𑀩𑀭𑀼𑀓𑁆𑀔𑀸, 𑀢𑁂𑀲𑀁 𑀲𑀫𑀽𑀳𑁄 𑀘𑀺𑀢𑁆𑀢𑀮𑀢𑀸, 𑀇𑀢𑁆𑀣𑀺𑀮𑀺𑀗𑁆𑀕𑁂𑀦 𑀢𑀲𑁆𑀲 𑀯𑀦𑀲𑁆𑀲 𑀦𑀸𑀫𑀁, 𑀬𑀣𑀸 ‘‘𑀔𑀼𑀤𑁆𑀤𑀲𑀺𑀓𑁆𑀔𑀸’’𑀢𑀺. 𑀨𑀸𑀭𑀼𑀲𑀓𑀸𑀦𑀺 𑀬𑀢𑁆𑀣 𑀲𑀦𑁆𑀢𑀺, 𑀢𑀁 𑀨𑀸𑀭𑀼𑀲𑀓𑀁.

𑁨𑁪. 𑀅𑀲𑀦𑁆𑀬𑀸𑀤𑀺𑀢𑁆𑀢𑀬𑀁 𑀢𑀲𑁆𑀲 𑀲𑀓𑁆𑀓𑀲𑁆𑀲 𑀆𑀬𑀼𑀥𑀁. 𑀅𑀲𑁆𑀲𑀢𑁂 𑀪𑀼𑀚𑁆𑀚𑀢𑁂 𑀮𑁄𑀓𑀥𑀸𑀢𑀼𑀓𑀫𑀦𑁂𑀦𑀸𑀬𑀼𑀥𑁂𑀦𑀸𑀢𑀺 𑀅𑀲𑀦𑀺, 𑀅𑀬𑀁 𑀅𑀲𑀦𑀺𑀲𑀤𑁆𑀤𑁄 𑀤𑁆𑀯𑀻𑀲𑀼 𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕𑁂𑀲𑀼 𑀯𑀢𑁆𑀢𑀢𑀺. 𑀓𑀼𑀮𑀺𑀫𑁆𑀳𑀺 𑀲𑀓𑁆𑀓𑀲𑁆𑀲 𑀳𑀢𑁆𑀣𑁂 𑀲𑁂𑀢𑀺 𑀢𑀺𑀝𑁆𑀞𑀢𑀻𑀢𑀺 𑀓𑀼𑀮𑀺𑀲𑀁, 𑀓𑀼𑀮𑀺 𑀳𑀢𑁆𑀣𑁄 𑀪𑀼𑀚𑀸𑀤𑀮𑁄𑀢𑀺 𑀳𑀺 𑀢𑀺𑀓𑀡𑁆𑀟𑀲𑁂𑀲𑁄 [𑀢𑀺𑀓𑀡𑁆𑀟𑀲𑁂𑀲 𑁨.𑁬.𑁨𑁬]. 𑀓𑀼𑀬𑀁 𑀯𑀸 𑀧𑀣𑀯𑀺𑀬𑀁 𑀮𑀺𑀲𑀢𑀺 𑀢𑀦𑀼 𑀪𑀯𑀢𑀻𑀢𑀺 𑀓𑀼𑀮𑀺𑀲𑀁. 𑀯𑀚 𑀕𑀢𑀺𑀬𑀁, 𑀯𑀚𑀢𑁂𑀯 𑀦 𑀧𑀝𑀺𑀳𑀜𑁆𑀜𑀢𑁂 𑀬𑀲𑁆𑀲 𑀕𑀫𑀦𑀁 𑀓𑁂𑀦𑀘𑀻𑀢𑀺 𑀯𑀚𑀺𑀭𑀁, 𑀇𑀭𑀧𑀘𑁆𑀘𑀬𑁄. 𑀯𑀚𑀺𑀭𑀲𑀳𑀘𑀭𑀡𑀢𑁄 𑀓𑀼𑀮𑀺𑀲𑀲𑀤𑁆𑀤𑁄𑀧𑀺 𑀧𑀼𑀦𑁆𑀦𑀧𑀼𑀁𑀲𑀓𑁂. 𑀪𑀺𑀤𑀼𑀭𑀁, 𑀧𑀯𑀺, 𑀲𑀢𑀓𑁄𑀝𑀺, 𑀲𑀼𑀭𑀼, 𑀲𑀫𑁆𑀩𑁄, 𑀤𑀫𑁆𑀪𑁄𑀮𑀺𑀇𑀘𑁆𑀘𑀸𑀤𑀻𑀦𑀺𑀧𑀺 𑀯𑀚𑀺𑀭𑀲𑁆𑀲 𑀦𑀸𑀫𑀸𑀦𑀺. 𑀢𑀢𑁆𑀭 𑀪𑀺𑀤𑀼𑀭𑀁 𑀧𑀼𑀦𑁆𑀦𑀧𑀼𑀁𑀲𑀓𑁂, 𑀧𑀯𑀺𑀆𑀤𑀬𑁄 𑀧𑀼𑀫𑁂.

𑀭𑀫𑁆𑀪𑀸 ¶ 𑀘 𑀅𑀮𑀫𑁆𑀩𑀼𑀲𑀸 𑀘 𑀇𑀘𑁆𑀘𑀸𑀤𑀺𑀓𑀸 𑀤𑁂𑀯𑀺𑀢𑁆𑀣𑀺𑀬𑁄 𑀅𑀘𑁆𑀙𑀭𑀸𑀬𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢𑀸. 𑀅𑀘𑁆𑀙𑀭𑀸𑀯𑀺𑀲𑁂𑀲𑀸 𑀳𑀺 𑀏𑀢𑀸. 𑀅𑀘𑁆𑀙𑁄 𑀦𑀺𑀫𑁆𑀫𑀮𑀯𑀡𑁆𑀡𑁄 𑀏𑀢𑀸𑀲𑀫𑀢𑁆𑀣𑀻𑀢𑀺 𑀅𑀘𑁆𑀙𑀭𑀸𑀬𑁄. ‘‘𑀅𑀧𑀲𑀭𑀸’’𑀢𑀺𑀧𑀺 𑀏𑀢𑀸𑀲𑀫𑁂𑀯 𑀲𑀸𑀫𑀜𑁆𑀜𑀲𑀜𑁆𑀜𑀸. 𑀤𑁂𑀯𑀧𑀼𑀢𑁆𑀢𑀸𑀦𑀁 𑀭𑀢𑀺𑀁 𑀪𑀸𑀯𑁂𑀦𑁆𑀢𑀺 𑀯𑀟𑁆𑀠𑁂𑀦𑁆𑀢𑀻𑀢𑀺 𑀭𑀫𑁆𑀪𑀸, 𑀭𑀁 𑀓𑀸𑀫𑀕𑁆𑀕𑀺𑀁 𑀪𑀦𑁆𑀢𑀺 𑀤𑀻𑀧𑀬𑀦𑁆𑀢𑀺 𑀚𑀸𑀮𑁂𑀦𑁆𑀢𑀻𑀢𑀺 𑀯𑀸 𑀭𑀫𑁆𑀪𑀸, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄. 𑀓𑀸𑀫𑀭𑀢𑀺𑀯𑀲𑁂𑀦 𑀤𑁂𑀯𑀧𑀼𑀢𑁆𑀢𑁂 𑀅𑀢𑁆𑀢𑀦𑀺 𑀯𑀲𑀸𑀧𑁂𑀢𑀼𑀁 𑀅𑀮𑀁 𑀲𑀫𑀢𑁆𑀣𑀸𑀢𑀺 𑀅𑀮𑀫𑁆𑀩𑀼𑀲𑀸, 𑀅𑀲𑁆𑀲𑀼𑀓𑀸𑀭𑁄. 𑀤𑁂𑀯𑀸𑀦𑀁 𑀤𑁂𑀯𑀧𑀼𑀢𑁆𑀢𑀸𑀦𑀁, 𑀤𑁂𑀯𑀻𑀪𑀽𑀢𑀸 𑀯𑀸 𑀇𑀢𑁆𑀣𑀺𑀬𑁄 𑀤𑁂𑀯𑀺𑀢𑁆𑀣𑀺𑀬𑁄.

‘‘𑀧𑀜𑁆𑀘𑀲𑀺𑀔𑁄, 𑀳𑀸𑀳𑀸, 𑀳𑀽𑀳𑀽’’𑀇𑀘𑁆𑀘𑀸𑀤𑀬𑁄 𑀕𑀦𑁆𑀥𑀩𑁆𑀩𑀸 𑀦𑀸𑀫. 𑀧𑀜𑁆𑀘 𑀲𑀺𑀔𑀸 𑀘𑀽𑀴𑀸 𑀬𑀲𑁆𑀲 𑀲𑁄 𑀧𑀜𑁆𑀘𑀲𑀺𑀔𑁄. ‘‘𑀳𑀸’’𑀢𑀺 𑀅𑀦𑀦𑁆𑀤𑀺𑀢𑀁 𑀥𑀦𑀺𑀁 [𑀦𑀺𑀦𑁆𑀤𑀺𑀪𑀤𑁆𑀥𑀦𑀺𑀁 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)] 𑀚𑀳𑀢𑀻𑀢𑀺 𑀳𑀸𑀳𑀸. ‘‘𑀳𑀽’’𑀢𑀺 𑀕𑀻𑀢𑀯𑀺𑀲𑁂𑀲𑀲𑀤𑁆𑀤𑀁 𑀳𑀽𑀬𑀢𑁂𑀢𑀺 𑀳𑀽𑀳𑀽. 𑀕𑀦𑁆𑀥𑀁 𑀅𑀩𑁆𑀩𑀦𑁆𑀢𑀺 𑀪𑀼𑀜𑁆𑀚𑀦𑁆𑀢𑀻𑀢𑀺 𑀕𑀦𑁆𑀥𑀩𑁆𑀩𑀸, 𑀕𑀸𑀬𑀦𑀁 𑀯𑀸 𑀥𑀫𑁆𑀫𑁄 𑀏𑀢𑁂𑀲𑀁 𑀕𑀦𑁆𑀥𑀩𑁆𑀩𑀸, 𑀫𑁆𑀫𑀲𑁆𑀲 𑀩𑁆𑀩𑁄.

𑁨𑁫. 𑀯𑀺𑀫𑀸𑀦𑀸𑀤𑀺𑀤𑁆𑀯𑀬𑀁 𑀯𑀺𑀫𑀸𑀦𑁂. 𑀤𑁂𑀯𑀸𑀦𑀫𑀸𑀓𑀸𑀲𑁂 𑀕𑀫𑀦𑀁 𑀬𑁂𑀦 𑀢𑀁 𑀯𑀺𑀫𑀸𑀦𑀁, 𑀯𑀺𑀕𑀢𑀁 [𑀯𑀺𑀦𑀸 (𑀓.)] 𑀫𑀸𑀦𑀁 𑀉𑀧𑀫𑀸𑀦𑀫𑀲𑁆𑀲 𑀯𑀺𑀫𑀸𑀦𑀁. 𑀯𑀺𑀳𑁂 𑀆𑀓𑀸𑀲𑁂 𑀕𑀘𑁆𑀙𑀢𑀻𑀢𑀺 𑀩𑁆𑀬𑀫𑁆𑀳𑀁, 𑀳𑀓𑀸𑀭𑀢𑁄 𑀧𑀼𑀩𑁆𑀩𑁂 𑀅𑀫𑀧𑀘𑁆𑀘𑀬𑁄. 𑀏𑀢𑁆𑀣 𑀘 𑀯𑀺𑀫𑀸𑀦𑀩𑁆𑀬𑀫𑁆𑀳𑀲𑀤𑁆𑀤𑀸 𑀤𑁆𑀯𑁂𑀧𑀺 𑀅𑀦𑀺𑀢𑁆𑀣𑀺𑀬𑀁 𑀧𑀼𑀦𑁆𑀦𑀧𑀼𑀁𑀲𑀓𑁂 𑀯𑀢𑁆𑀢𑀦𑁆𑀢𑀺.

𑀧𑀻𑀬𑀼𑀲𑀸𑀤𑀺𑀢𑁆𑀢𑀬𑀁 𑀅𑀫𑀢𑁂. 𑀧𑀻𑀬𑀢𑁂𑀢𑀺 𑀧𑀻𑀬𑀼𑀲𑀁, ‘‘𑀅𑀫𑀢𑀧𑀸’’𑀢𑀺 𑀳𑀺 𑀯𑀼𑀢𑁆𑀢𑀁, 𑀉𑀲𑀧𑀘𑁆𑀘𑀬𑁄 [𑀉𑀡𑀸𑀤𑀺 𑁪.𑁭𑁬 𑀡𑁆𑀯𑀸𑀤𑀺 𑁨𑁧𑁫 𑀲𑀼𑀢𑁆𑀢𑁂𑀲𑀼 𑀧𑀦 ‘‘𑀧𑀻𑀬𑀽𑀲’’𑀫𑀺𑀢𑀺 𑀤𑀺𑀲𑁆𑀲𑀢𑀺]. ‘‘𑀧𑁂𑀬𑀼𑀲𑁄’’𑀢𑀺𑀧𑀺 𑀦𑀸𑀫𑀫𑀲𑁆𑀲. 𑀦 𑀫𑀢𑀁 𑀫𑀭𑀡𑀫𑀦𑁂𑀦 𑀅𑀫𑀢𑀁. 𑀲𑀼𑀔𑁂𑀦 𑀥𑀬𑀦𑁆𑀢𑀺 𑀧𑀺𑀯𑀦𑁆𑀢𑀺 𑀢𑀁 𑀇𑀢𑀺 𑀲𑀼𑀥𑀸. 𑀏𑀢𑁆𑀣 𑀘 𑀅𑀫𑀢𑀲𑀤𑁆𑀤𑁄 𑀬𑀜𑁆𑀜𑀲𑁂𑀲𑀧𑀻𑀬𑀼𑀲𑀲𑀮𑀺𑀮𑀖𑀢𑀸𑀤𑀻𑀲𑀼 𑀦𑀧𑀼𑀁𑀲𑀓𑁂 ¶ , 𑀥𑀦𑁆𑀯𑀦𑁆𑀢𑀭𑀺𑀤𑁂𑀯𑀸𑀤𑀻𑀲𑀼 𑀧𑀼𑀮𑁆𑀮𑀺𑀗𑁆𑀕𑁂, 𑀕𑀴𑁄𑀛𑀸𑀪𑀬𑀸𑀫𑀮𑀓𑁆𑀬𑀸𑀤𑀻𑀲𑀼 𑀇𑀢𑁆𑀣𑀺𑀮𑀺𑀗𑁆𑀕𑁂𑀢𑀺 𑀢𑀻𑀲𑀼 𑀯𑀢𑁆𑀢𑀢𑀺 [𑀅𑀫𑀢𑀁 𑀬𑀜𑁆𑀜𑀲𑁂𑀲𑁂 𑀘, 𑀧𑀻𑀬𑀽𑀲𑁂 𑀲𑀮𑀺𑀮𑁂 𑀖𑀢𑁂 𑀅𑀬𑀸𑀘𑀺𑀢𑁂 𑀘 𑀫𑁄𑀓𑁆𑀔𑁂 𑀘, 𑀦𑀸 𑀥𑀦𑁆𑀯𑀦𑁆𑀢𑀭𑀺𑀤𑁂𑀯𑀲𑀼 𑀅𑀫𑀢𑀸 𑀫𑀸𑀕𑀥𑀻𑀧𑀣𑁆𑀬𑀸 𑀕𑀼𑀴𑀼𑀘𑁆𑀬𑀸𑀫𑀮𑀓𑀻𑀲𑀼 𑀘 (𑀫𑁂𑀤𑀺𑀦𑀻𑀓𑁄𑀲 𑁧𑁬 𑁭𑁭-𑁮)], 𑀢𑀁𑀲𑀳𑀘𑀭𑀡𑀢𑁄 𑀧𑀻𑀬𑀼𑀲𑀲𑀤𑁆𑀤𑁄𑀧𑀺 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼. 𑀲𑀼𑀥𑀸𑀲𑀤𑁆𑀤𑁄 𑀧𑀦 𑀅𑀫𑀢𑀦𑀼𑀳𑀻𑀮𑁂𑀧𑀸𑀤𑀻𑀲𑀼𑀧𑀺 𑀦𑀺𑀘𑁆𑀘𑀫𑀺𑀢𑁆𑀣𑀺𑀮𑀺𑀗𑁆𑀕𑁄𑀯 [𑀲𑀼𑀥𑀸 𑀮𑁂𑀧𑁄’𑀫𑀢𑀁 𑀦𑀼𑀳𑀻 (𑀅𑀫𑀭 𑁨𑁩.𑁧𑁦𑁧)].

𑀲𑀺𑀦𑁂𑀭𑀼𑀆𑀤𑀺𑀧𑀜𑁆𑀘𑀓𑀁 𑀧𑀩𑁆𑀩𑀢𑀭𑀸𑀚𑁂. 𑀲𑀺𑀦𑀸 𑀲𑁄𑀘𑁂𑀬𑁆𑀬𑁂, 𑀲𑀺𑀦𑀸𑀢𑀺 𑀲𑁄𑀘𑁂𑀢𑀺 𑀤𑁂𑀯𑁂𑀢𑀺 𑀲𑀺𑀦𑁂𑀭𑀼, 𑀏𑀭𑀼𑀧𑀘𑁆𑀘𑀬𑁄. 𑀫𑀻 𑀳𑀺𑀁𑀲𑀸𑀬𑀁, 𑀫𑀺𑀦𑀸𑀢𑀺 𑀳𑀺𑀁𑀲𑀢𑀺 𑀲𑀩𑁆𑀩𑁂 𑀧𑀩𑁆𑀩𑀢𑁂 𑀅𑀢𑁆𑀢𑀦𑁄 𑀉𑀘𑁆𑀘𑀢𑀭𑀝𑁆𑀞𑁂𑀦𑀸𑀢𑀺 𑀫𑁂𑀭𑀼, 𑀭𑀼𑀧𑀘𑁆𑀘𑀬𑁄. 𑀢𑀺𑀤𑀺𑀯𑀸𑀦𑀁 𑀤𑁆𑀯𑀺𑀦𑁆𑀦𑀁 𑀤𑁂𑀯𑀮𑁄𑀓𑀸𑀦𑀁 𑀆𑀥𑀸𑀭𑁄 𑀧𑀢𑀺𑀝𑁆𑀞𑀸𑀢𑀺 𑀢𑀺𑀤𑀺𑀯𑀸𑀥𑀸𑀭𑁄. 𑀤𑁂𑀯𑁂 𑀦𑀬𑀢𑀻𑀢𑀺 𑀦𑁂𑀭𑀼. 𑀲𑀼𑀫𑁂𑀭𑀽𑀢𑀺 𑀉𑀧𑀲𑀕𑁆𑀕𑁂𑀦 𑀦𑀸𑀫𑀁 𑀯𑀟𑁆𑀠𑀺𑀢𑀁. 𑀳𑁂𑀫𑀤𑁆𑀤𑀺, 𑀭𑀢𑀦𑀲𑀸𑀦𑀼, 𑀲𑀼𑀭𑀸𑀮𑀬𑀸𑀤𑀻𑀦𑀺𑀧𑀺 𑀧𑀩𑁆𑀩𑀢𑀭𑀸𑀚𑀲𑁆𑀲 𑀦𑀸𑀫𑀸𑀦𑀺.

𑁨𑁬. 𑀬𑀼𑀕𑀦𑁆𑀥𑀭𑀸𑀤𑀻𑀦𑀺 𑀲𑀺𑀦𑁂𑀭𑀼𑀲𑁆𑀲 𑀧𑀭𑀺𑀯𑀸𑀭𑀪𑀽𑀢𑀸𑀦𑀁 𑀲𑀢𑁆𑀢𑀦𑁆𑀦𑀁 𑀧𑀭𑀺𑀪𑀡𑁆𑀟𑀧𑀩𑁆𑀩𑀢𑀸𑀦𑀁 𑀦𑀸𑀫𑀸𑀦𑀺. 𑀘𑀦𑁆𑀤𑀲𑀽𑀭𑀺𑀬𑀲𑀗𑁆𑀔𑀸𑀢𑀁 𑀬𑀼𑀕𑀁 𑀥𑀸𑀭𑁂𑀢𑀺 𑀢𑀤𑀼𑀩𑁆𑀩𑁂𑀥𑀫𑀕𑁆𑀕𑀘𑀸𑀭𑀺𑀢𑁆𑀢𑀸𑀢𑀺 𑀬𑀼𑀕𑀦𑁆𑀥𑀭𑁄. 𑀈𑀲𑀁 𑀫𑀳𑀺𑀲𑁆𑀲𑀭𑀁 𑀥𑀸𑀭𑁂𑀢𑀺 𑀢𑀲𑁆𑀲 𑀦𑀺𑀯𑀸𑀲𑀝𑁆𑀞𑀸𑀦𑀢𑁆𑀢𑀸𑀢𑀺 𑀈𑀲𑀥𑀭𑁄. 𑀓𑀭𑀯𑀻𑀭𑀸 𑀅𑀲𑁆𑀲𑀫𑀸𑀭𑀓𑀸 𑀩𑀳𑀯𑁄 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀓𑀭𑀯𑀻𑀭𑁄, 𑀓𑁂 𑀯𑀸 𑀫𑀬𑀽𑀭𑀸 𑀭𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀓𑀭𑀯𑀻𑀭𑁄, ‘‘𑀓𑀭𑀯𑀻𑀓𑁄’’𑀢𑀺𑀧𑀺 𑀧𑀸𑀞𑁄, 𑀇𑀥𑀸𑀧𑀺 𑀧𑀘𑁆𑀙𑀺𑀫𑁄𑀬𑁂𑀯𑀢𑁆𑀣𑁄, 𑀓𑀭𑀯𑀻𑀓𑀲𑀓𑀼𑀡𑀸 𑀯𑀸 𑀩𑀳𑀯𑁄 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀓𑀭𑀯𑀻𑀓𑁄. 𑀲𑀼𑀤𑀲𑁆𑀲𑀦𑀸 𑀑𑀲𑀥𑀺𑀯𑀺𑀲𑁂𑀲𑀸 𑀩𑀳𑀼𑀓𑀸 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀲𑀼𑀤𑀲𑁆𑀲𑀦𑁄, 𑀲𑀼𑀔𑁂𑀦 𑀧𑀲𑁆𑀲𑀺𑀢𑀩𑁆𑀩𑀢𑁆𑀢𑀸 𑀯𑀸 𑀲𑀼𑀤𑀲𑁆𑀲𑀦𑁄 ¶ , 𑀲𑀼𑀦𑁆𑀤𑀭𑀁 𑀯𑀸 𑀤𑀲𑁆𑀲𑀦𑀁 𑀏𑀢𑁆𑀣𑀸𑀢𑀺 𑀲𑀼𑀤𑀲𑁆𑀲𑀦𑁄. 𑀧𑀜𑁆𑀘𑀦𑁆𑀦𑀁 𑀧𑀩𑁆𑀩𑀢𑀘𑀓𑁆𑀓𑀸𑀦𑀁 𑀦𑁂𑀫𑀺𑀲𑀤𑀺𑀲𑀁 𑀓𑀢𑁆𑀯𑀸 𑀅𑀢𑁆𑀢𑀸𑀦𑀁 𑀥𑀸𑀭𑁂𑀢𑀻𑀢𑀺 𑀦𑁂𑀫𑀺𑀦𑁆𑀥𑀭𑁄, 𑀦𑁂𑀫𑀺𑀪𑀸𑀯𑁂𑀦 𑀯𑀸 𑀥𑀸𑀭𑁂𑀢𑀩𑁆𑀩𑁄 𑀉𑀧𑀮𑀓𑁆𑀔𑁂𑀢𑀩𑁆𑀩𑁄𑀢𑀺 𑀦𑁂𑀫𑀺𑀦𑁆𑀥𑀭𑁄, 𑀦𑁂𑀫𑀺𑀁𑀯𑀸 𑀭𑀣𑀤𑁆𑀤𑀼𑀫𑀁 𑀥𑀸𑀭𑁂𑀢𑀺 𑀬𑁂𑀪𑀼𑀬𑁆𑀬𑁂𑀦𑀸𑀢𑀺 𑀦𑁂𑀫𑀺𑀦𑁆𑀥𑀭𑁄. 𑀯𑀺𑀦𑀢𑀸 𑀦𑀸𑀫 𑀲𑀼𑀧𑀡𑁆𑀡𑀫𑀸𑀢𑀸, 𑀢𑀲𑁆𑀲𑀸 𑀦𑀺𑀯𑀸𑀲𑀝𑁆𑀞𑀸𑀦𑀢𑁆𑀢𑀸 𑀯𑀺𑀦𑀢𑀓𑁄𑀢𑀺 𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸. 𑀯𑀺𑀢𑁆𑀣𑀺𑀡𑁆𑀡𑀸 𑀯𑀸 𑀦𑀢𑀸 𑀦𑀤𑀺𑀬𑁄 𑀏𑀢𑁆𑀣𑀸𑀢𑀺 𑀯𑀺𑀦𑀢𑀓𑁄. 𑀅𑀲𑁆𑀲𑀓𑀡𑁆𑀡𑀸 𑀲𑀚𑁆𑀚𑀤𑀼𑀫𑀸 𑀩𑀳𑀯𑁄 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀅𑀲𑁆𑀲𑀓𑀡𑁆𑀡𑁄, 𑀅𑀲𑁆𑀲𑀓𑀡𑁆𑀡𑀲𑀤𑀺𑀲𑀓𑀽𑀝𑀢𑁆𑀢𑀸 𑀯𑀸 𑀅𑀲𑁆𑀲𑀓𑀡𑁆𑀡𑁄. 𑀓𑀼𑀮𑀸𑀘𑀮𑀸𑀢𑀺 𑀏𑀢𑁂 𑀲𑀺𑀦𑁂𑀭𑀼𑀆𑀤𑀬𑁄 𑀅𑀝𑁆𑀞 𑀧𑀩𑁆𑀩𑀢𑀸 𑀅𑀘𑀮𑀲𑀗𑁆𑀔𑀸𑀢𑀸𑀦𑀁 𑀧𑀩𑁆𑀩𑀢𑀸𑀦𑀁 𑀓𑀼𑀮𑀸𑀦𑀺 𑀬𑁄𑀦𑀺𑀬𑁄 𑀧𑀪𑀯𑀸, 𑀏𑀢𑁂 𑀘 𑀲𑀺𑀦𑁂𑀭𑀼𑀆𑀤𑀬𑁄 𑀅𑀦𑀼𑀧𑀼𑀩𑁆𑀩𑀲𑀫𑀼𑀕𑁆𑀕𑀢𑀸, 𑀲𑀩𑁆𑀩𑀩𑀸𑀳𑀺𑀭𑁄 𑀘𑁂𑀢𑁆𑀣 𑀅𑀲𑁆𑀲𑀓𑀡𑁆𑀡𑁄. 𑀦𑀺𑀫𑀺𑀚𑀸𑀢𑀓𑁂 𑀧𑀦 𑁋

‘‘𑀲𑀼𑀤𑀲𑁆𑀲𑀦𑁄 𑀓𑀭𑀯𑀻𑀓𑁄, 𑀈𑀲𑀥𑀭𑁄 𑀬𑀼𑀕𑀦𑁆𑀥𑀭𑁄;

𑀦𑁂𑀫𑀺𑀦𑁆𑀥𑀭𑁄 𑀯𑀺𑀦𑀢𑀓𑁄, 𑀅𑀲𑁆𑀲𑀓𑀡𑁆𑀡𑁄 𑀕𑀺𑀭𑀺 𑀩𑁆𑀭𑀳𑀸’’𑀢𑀺 [𑀚𑀸. 𑁨.𑁨𑁨.𑁫𑁬𑁮].

𑀯𑀢𑁆𑀯𑀸 𑀲𑀺𑀦𑁂𑀭𑀼𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀲𑁆𑀲𑀓𑀡𑁆𑀡𑁄 𑀦𑀸𑀫 𑀧𑀩𑁆𑀩𑀢𑁄 𑀧𑀢𑀺𑀝𑁆𑀞𑀺𑀢𑁄, 𑀢𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀦𑀢𑀓𑁄 𑀦𑀸𑀫 𑀧𑀩𑁆𑀩𑀢𑁄𑀢𑀺 𑀏𑀯𑀫𑀜𑁆𑀜𑁄𑀬𑁂𑀯𑀸𑀦𑀼𑀓𑁆𑀓𑀫𑁄 𑀓𑀣𑀺𑀢𑁄. 𑀓𑀺𑀜𑁆𑀘𑀸𑀧𑀺 𑀓𑀣𑀺𑀢𑁄, 𑀦𑀸𑀫𑀪𑁂𑀤𑀫𑀢𑁆𑀢𑀓𑀢𑁄𑀬𑁂𑀯 𑀧𑀦𑁂𑀢𑁆𑀣 𑀪𑁂𑀤𑁄, 𑀦𑀸𑀢𑁆𑀣𑀪𑁂𑀤𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁨𑁭. 𑀆𑀓𑀸𑀲𑀯𑀸𑀳𑀻𑀕𑀗𑁆𑀕𑀸𑀬𑀁 𑀫𑁂𑀭𑀼𑀲𑀺𑀗𑁆𑀕𑁄𑀩𑁆𑀪𑀯𑀸𑀬𑀁 𑀫𑀦𑁆𑀤𑀸𑀓𑀺𑀦𑁆𑀬𑀸𑀤𑀺𑀦𑀸𑀫𑀢𑁆𑀢𑀬𑀁. 𑀫𑀦𑁆𑀤𑀁 𑀅𑀓𑀺𑀢𑀼𑀁 𑀲𑀻𑀮𑀫𑀲𑁆𑀲𑀸𑀢𑀺 𑀫𑀦𑁆𑀤𑀸𑀓𑀺𑀦𑀻. 𑀆𑀓𑀸𑀲𑁂 𑀲𑀦𑁆𑀤𑀫𑀸𑀦𑀸 𑀕𑀗𑁆𑀕𑀸 𑀆𑀓𑀸𑀲𑀕𑀗𑁆𑀕𑀸. 𑀲𑀼𑀭𑀸𑀦𑀁 𑀤𑁂𑀯𑀸𑀦𑀁 𑀦𑀤𑀻 𑀲𑀼𑀭𑀦𑀤𑀻. 𑀲𑀼𑀭𑀤𑀻𑀖𑀺𑀓𑀸𑀢𑀺𑀧𑀺 𑀏𑀢𑀺𑀲𑁆𑀲𑀸 𑀦𑀸𑀫𑀁.

𑁨𑁮. 𑀓𑁄𑀯𑀺𑀴𑀸𑀭𑀸𑀤𑀺𑀢𑁆𑀢𑀬𑀁 ¶ ‘‘𑀨𑀮𑀳𑀭𑁄’’𑀢𑀺𑀔𑁆𑀬𑀸𑀢𑁂 𑀧𑀸𑀭𑀺𑀘𑁆𑀙𑀢𑁆𑀢𑀓𑁂. 𑀓𑀼𑀁 𑀧𑀣𑀯𑀺𑀁 𑀯𑀺𑀤𑀸𑀭𑀬𑀢𑀺 𑀫𑀽𑀮𑁂𑀦𑀸𑀢𑀺 𑀓𑁄𑀯𑀺𑀴𑀸𑀭𑁄, 𑀤𑀲𑁆𑀲 𑀴𑁄. 𑀧𑀭𑀺 𑀲𑀫𑀦𑁆𑀢𑀢𑁄 𑀙𑀢𑁆𑀢𑀁 𑀯𑀺𑀬 𑀢𑀺𑀝𑁆𑀞𑀢𑀻𑀢𑀺 𑀧𑀸𑀭𑀺𑀘𑁆𑀙𑀢𑁆𑀢𑀓𑁄. 𑀧𑀸𑀭𑀺𑀦𑁄 𑀲𑀫𑀼𑀤𑁆𑀤𑀲𑁆𑀲 𑀚𑀸𑀢𑁄 𑀅𑀧𑀘𑁆𑀘𑀁 𑀧𑀸𑀭𑀺𑀚𑀸𑀢𑀓𑁄, 𑀲𑀓𑀢𑁆𑀣𑁂 𑀓𑁄. 𑀧𑀸𑀭𑀺𑀪𑀤𑁆𑀤𑁄, 𑀦𑀺𑀫𑁆𑀩𑀢𑀭𑀼, 𑀫𑀦𑁆𑀤𑀸𑀭𑁄𑀇𑀘𑁆𑀘𑀸𑀤𑀻𑀦𑀺𑀧𑀺 𑀧𑀸𑀭𑀺𑀘𑁆𑀙𑀢𑁆𑀢𑀓𑀲𑁆𑀲 𑀦𑀸𑀫𑀸𑀦𑀺.

𑀓𑀧𑁆𑀧𑀭𑀼𑀓𑁆𑀔𑁄 𑀘 𑀲𑀦𑁆𑀢𑀸𑀦𑁄 𑀘 𑀆𑀤𑀺𑀦𑀸 𑀫𑀦𑁆𑀤𑀸𑀭𑁄 𑀧𑀸𑀭𑀺𑀚𑀸𑀢𑀓𑁄 𑀘 𑀳𑀭𑀺𑀘𑀦𑁆𑀤𑀦𑀜𑁆𑀘 𑀏𑀢𑁂 𑀧𑀜𑁆𑀘 𑀤𑁂𑀯𑀤𑁆𑀤𑀼𑀫𑀸 [𑀅𑀫𑀭 𑁧.𑁫𑁩] 𑀤𑁂𑀯𑀢𑀭𑀯𑁄 𑀤𑁂𑀯𑀪𑀽𑀫𑀻𑀲𑁆𑀯𑁂𑀯 𑀲𑀫𑁆𑀪𑀯𑀢𑁄. 𑀓𑀧𑁆𑀧𑁄 𑀲𑀗𑁆𑀓𑀧𑁆𑀧𑀺𑀢𑁄 𑀅𑀢𑁆𑀣𑁄, 𑀢𑀲𑁆𑀲 𑀭𑀼𑀓𑁆𑀔𑁄 𑀚𑀜𑁆𑀜𑀚𑀦𑀓𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑁄, 𑀓𑀧𑁆𑀧𑀁 𑀯𑀸 𑀞𑀺𑀢𑁄 𑀭𑀼𑀓𑁆𑀔𑁄 𑀓𑀧𑁆𑀧𑀭𑀼𑀓𑁆𑀔𑁄. 𑀢𑀦𑀦𑀁 𑀢𑀸𑀦𑁄, 𑀪𑀸𑀯𑁂 𑀡𑁄. 𑀕𑀦𑁆𑀥𑀲𑁆𑀲 𑀲𑀫𑁆𑀫𑀸 𑀢𑀸𑀦𑁄 𑀅𑀲𑁆𑀲𑁂𑀢𑀺 𑀲𑀦𑁆𑀢𑀸𑀦𑁄, 𑀲𑀺𑀭𑀻𑀲𑀭𑀼𑀓𑁆𑀔𑁄. 𑀫𑀦𑁆𑀤𑀦𑁆𑀢𑁂 𑀫𑁄𑀤𑀦𑁆𑀢𑁂 𑀤𑁂𑀯𑀸 𑀅𑀦𑁂𑀦𑀸𑀢𑀺 𑀫𑀦𑁆𑀤𑀸𑀭𑁄, 𑀆𑀭𑀧𑀘𑁆𑀘𑀬𑁄. 𑀳𑀭𑀺𑀫𑀺𑀦𑁆𑀤𑀁 𑀘𑀤𑀬𑀢𑀺 𑀲𑀼𑀔𑀬𑀢𑀻𑀢𑀺 𑀳𑀭𑀺𑀘𑀦𑁆𑀤𑀦𑀁. 𑀏𑀢𑁂 𑀧𑀜𑁆𑀘 𑀤𑁂𑀯𑀢𑀭𑀯𑁄 𑀅𑀫𑀭𑀓𑁄𑀲𑀦𑀬𑁂𑀦 𑀯𑀼𑀢𑁆𑀢𑀸, 𑀲𑁄𑀕𑀢𑀦𑀬𑁂𑀦 𑀧𑀦 𑀲𑀢𑁆𑀢 𑀤𑁂𑀯𑀢𑀭𑀯𑁄. 𑀯𑀼𑀢𑁆𑀢𑀜𑁆𑀘 𑁋

‘‘𑀧𑀸𑀝𑀮𑀻 𑀲𑀺𑀫𑁆𑀩𑀮𑀻 𑀚𑀫𑁆𑀩𑀽, 𑀤𑁂𑀯𑀸𑀦𑀁 𑀧𑀸𑀭𑀺𑀙𑀢𑁆𑀢𑀓𑁄;

𑀓𑀤𑀫𑁆𑀩𑁄 𑀓𑀧𑁆𑀧𑀭𑀼𑀓𑁆𑀔𑁄 𑀘, 𑀲𑀺𑀭𑀻𑀲𑁂𑀦 𑀪𑀯𑀢𑀺 𑀲𑀢𑁆𑀢𑀫’’𑀦𑁆𑀢𑀺 [𑀥. 𑀲. 𑀅𑀝𑁆𑀞. 𑁫𑁮𑁪; 𑀲𑀸𑀭𑀢𑁆𑀣. 𑀝𑀻. 𑁧.𑁧𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸].

𑀢𑀢𑁆𑀣 𑀧𑀸𑀝𑀮𑀻𑀢𑀺 𑀘𑀺𑀢𑁆𑀭𑀧𑀸𑀝𑀮𑀻, 𑀲𑀸 𑀅𑀲𑀼𑀭𑀮𑁄𑀓𑁂 𑀢𑀺𑀝𑁆𑀞𑀢𑀺. 𑀢𑀣𑀸 𑀲𑀺𑀫𑁆𑀩𑀮𑀻 𑀕𑀭𑀼𑀴𑁂𑀲𑀼, 𑀚𑀫𑁆𑀩𑀽 𑀚𑀫𑁆𑀩𑀼𑀤𑀻𑀧𑁂, 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀢𑀸𑀯𑀢𑀺𑀁𑀲𑁂, 𑀓𑀤𑀫𑁆𑀩𑁄 𑀅𑀧𑀭𑀕𑁄𑀬𑀸𑀦𑁂. 𑀓𑀧𑁆𑀧𑀭𑀼𑀓𑁆𑀔𑁄 𑀉𑀢𑁆𑀢𑀭𑀓𑀼𑀭𑀽𑀲𑀼 ¶ , 𑀲𑀺𑀭𑀻𑀲𑁄 𑀧𑀼𑀩𑁆𑀩𑀯𑀺𑀤𑁂𑀳𑁂𑀢𑀺. 𑀏𑀢𑁂 𑀲𑀢𑁆𑀢 𑀤𑁂𑀯𑀸𑀦𑀫𑁂𑀯 𑀧𑀢𑀺𑀝𑁆𑀞𑀸𑀦𑀪𑀽𑀫𑀻𑀲𑀼 𑀲𑀫𑁆𑀪𑀯𑀢𑁄 𑀤𑁂𑀯𑀢𑀭𑀯𑁄𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺.

𑀲𑀕𑁆𑀕𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑁨𑁯. 𑀧𑀼𑀩𑁆𑀩𑀧𑀘𑁆𑀙𑀺𑀫𑀉𑀢𑁆𑀢𑀭𑀸 𑀤𑀺𑀲𑀸 𑀬𑀣𑀸𑀓𑁆𑀓𑀫𑀁 𑀧𑀸𑀘𑀻 𑀧𑀢𑀻𑀘𑀻 𑀉𑀤𑀻𑀘𑀻 𑀦𑀸𑀫 𑀪𑀯𑀦𑁆𑀢𑀺. 𑀧𑀞𑀫𑀁 𑀧𑀸𑀢𑁄 𑀅𑀦𑁆𑀘𑀢𑀺 𑀭𑀯𑀺 𑀬𑀲𑁆𑀲𑀁 𑀲𑀸 𑀧𑀸𑀘𑀻, 𑀦𑀓𑀸𑀭𑀮𑁄𑀧𑁄. 𑀧𑀘𑁆𑀙𑀸 𑀤𑀺𑀯𑀸𑀯𑀲𑀸𑀦𑁂 𑀅𑀦𑁆𑀘𑀢𑀺 𑀭𑀯𑀺 𑀬𑀲𑁆𑀲𑀁 𑀲𑀸 𑀧𑀢𑀻𑀘𑀻. 𑀉𑀤𑁆𑀥𑀁 𑀅𑀦𑁆𑀘𑀢𑀺 𑀭𑀯𑀺 𑀬𑀲𑁆𑀲𑀁 𑀲𑀸 𑀉𑀤𑀻𑀘𑀻, 𑀬𑀲𑁆𑀲𑀁 𑀯𑀸 𑀲𑀻𑀢𑀯𑀺𑀬𑁄𑀕𑀁 𑀤𑀢𑁆𑀯𑀸 𑀅𑀦𑁆𑀘𑀢𑀺 𑀲𑀸 𑀉𑀤𑀻𑀘𑀻, 𑀯𑀺𑀬𑁄𑀕𑀢𑁆𑀣𑀯𑀸𑀘𑀓𑁄 𑀳𑁂𑀢𑁆𑀣 𑀉𑀓𑀸𑀭𑁄, 𑀤𑀲𑀤𑁆𑀤𑁄 𑀤𑀸𑀦𑀢𑁆𑀣𑁄. 𑀅𑀣 𑀯𑀸 𑀧𑀦𑁆𑀘𑀢𑀺 𑀧𑀼𑀩𑁆𑀩𑀪𑀸𑀯𑀫𑀸𑀧𑀚𑁆𑀚𑀢𑁂𑀢𑀺 𑀧𑀸𑀘𑀻. 𑀧𑀢𑀺𑀦𑁆𑀘𑀢𑀺 𑀧𑀘𑁆𑀙𑀸𑀪𑀸𑀯𑀫𑀸𑀧𑀚𑁆𑀚𑀢𑁂𑀢𑀺 𑀧𑀢𑀻𑀘𑀻. 𑀉𑀤𑀜𑁆𑀘𑀢𑀺 𑀲𑀻𑀢𑀯𑀺𑀬𑁄𑀕𑀤𑀸𑀦𑀢𑁆𑀢𑀫𑀸𑀧𑀚𑁆𑀚𑀢𑁂𑀢𑀺 𑀉𑀤𑀻𑀘𑀻. 𑀏𑀢𑁆𑀣 𑀘 𑀉𑀤𑀻𑀘𑀻𑀲𑀳𑀘𑀭𑀡𑀢𑁄 𑀧𑀢𑀻𑀘𑀻 𑀇𑀢𑁆𑀣𑀺𑀬𑀁, 𑀧𑀢𑀻𑀘𑀻𑀲𑀳𑀘𑀭𑀡𑀢𑁄 𑀧𑀸𑀘𑀻 𑀇𑀢𑁆𑀣𑀺𑀬𑀁 𑀯𑀢𑁆𑀢𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀢𑀁𑀢𑀁𑀲𑀳𑀘𑀭𑀡𑀪𑀸𑀯𑁂𑀦 𑀢𑀲𑁆𑀲 𑀢𑀲𑁆𑀲 𑀢𑀁𑀢𑀁𑀮𑀺𑀗𑁆𑀕𑀢𑁆𑀢𑀫𑀼𑀧𑀦𑁂𑀬𑁆𑀬𑀼𑀁. 𑀧𑀼𑀩𑁆𑀩𑀧𑀘𑁆𑀙𑀺𑀫𑀉𑀢𑁆𑀢𑀭𑀸𑀢𑀺 𑀲𑀩𑁆𑀩𑀦𑀸𑀫𑀲𑁆𑀲 𑀯𑀼𑀢𑁆𑀢𑀫𑀢𑁆𑀢𑁂 𑀧𑀼𑀫𑁆𑀪𑀸𑀯𑁄.

𑀤𑀓𑁆𑀔𑀺𑀡𑀸𑀤𑀺𑀤𑁆𑀯𑀬𑀁 𑀤𑀓𑁆𑀔𑀺𑀡𑀤𑀺𑀲𑀸𑀬𑀁. 𑀫𑀚𑁆𑀛𑁂 𑀅𑀧𑀸𑀬𑀁 𑀅𑀜𑁆𑀘𑀢𑀺 𑀬𑀲𑁆𑀲𑀁 𑀭𑀯𑀺, 𑀲𑀸 𑀅𑀧𑀸𑀘𑀻. 𑀫𑀚𑁆𑀛𑀢𑁆𑀣𑁄𑀬𑀁 𑀅𑀧𑀲𑀤𑁆𑀤𑁄, 𑀬𑀣𑀸 ‘‘𑀅𑀧𑀤𑀺𑀲’’𑀦𑁆𑀢𑀺, ‘‘𑀅𑀯𑀸𑀘𑀻’’𑀢𑀺𑀧𑀺 𑀧𑀸𑀞𑁄, 𑀅𑀯𑀧𑀼𑀩𑁆𑀩𑁄 𑀅𑀜𑁆𑀘 𑀅𑀥𑁄𑀫𑀼𑀔𑀻𑀪𑀸𑀯𑁂. 𑀅𑀯𑀜𑁆𑀘𑀢𑀺 𑀅𑀥𑁄𑀫𑀼𑀔𑀻 𑀪𑀯𑀢𑀺 𑀬𑀲𑁆𑀲𑀁 𑀭𑀯𑀺, 𑀲𑀸 𑀅𑀯𑀸𑀘𑀻. 𑀉𑀡𑁆𑀳𑀸𑀤𑀺𑀓𑁂 𑀯𑀸 𑀢𑀩𑁆𑀩𑀺𑀬𑁄𑀕𑁂 𑀓𑀭𑁄𑀦𑁆𑀢𑁄 𑀬𑀲𑁆𑀲𑀁 𑀭𑀯𑀺 𑀅𑀜𑁆𑀘𑀢𑀺, 𑀲𑀸 𑀅𑀯𑀸𑀘𑀻. 𑀯𑀺𑀤𑀺𑀲𑀸𑀤𑀺𑀤𑁆𑀯𑀬𑀁 𑀤𑀺𑀲𑀸𑀫𑀚𑁆𑀛𑁂. 𑀤𑀺𑀲𑀸𑀳𑀺 𑀯𑀺𑀦𑀺𑀕𑁆𑀕𑀢𑀸 𑀯𑀺𑀤𑀺𑀲𑀸. 𑀤𑀺𑀲𑀸𑀦𑀫𑀦𑀼𑀭𑀽𑀧𑀸, 𑀅𑀦𑀼𑀯𑀢𑁆𑀢𑀓𑀸 𑀯𑀸 𑀤𑀺𑀲𑀸 𑀅𑀦𑀼𑀤𑀺𑀲𑀸. 𑀅𑀧𑀤𑀺𑀲𑀦𑁆𑀢𑀺𑀧𑀺 𑀯𑀺𑀤𑀺𑀲𑀸𑀬 𑀦𑀸𑀫𑀁 [𑀦𑀧𑀼𑀁𑀲𑀓𑀸𑀩𑁆𑀬𑀬𑀁 𑀢𑁆𑀯’𑀧𑀤𑀺𑀲𑀁 (𑀅𑀫𑀭 𑁩.𑁬)].

𑁩𑁦. 𑀏𑀭𑀸𑀯𑀢𑀸𑀤𑀬𑁄 ¶ 𑀅𑀝𑁆𑀞 𑀕𑀚𑀸 𑀧𑀼𑀩𑁆𑀩𑀸𑀤𑀻𑀦𑀁 𑀤𑀺𑀲𑀸𑀦𑀁 𑀭𑀓𑁆𑀔𑀡𑀢𑁄 𑀤𑀺𑀲𑀸𑀕𑀚𑀸 𑀦𑀸𑀫, 𑀧𑀼𑀡𑁆𑀟𑀭𑀻𑀓𑀁 𑀦𑀸𑀫 𑀲𑀺𑀢𑀫𑁆𑀩𑁄𑀚𑀁, 𑀢𑀁𑀲𑀤𑀺𑀲𑀯𑀡𑁆𑀡𑀢𑀸𑀬 𑀧𑀼𑀡𑁆𑀟𑀭𑀻𑀓𑁄. 𑀭𑀲𑁆𑀲𑀲𑀭𑀻𑀭𑀢𑀸𑀬 𑀯𑀸𑀫𑀦𑁄. 𑀓𑀼𑀬𑀁 𑀧𑀣𑀯𑀺𑀬𑀁 𑀫𑁄𑀤𑀢𑁂 𑀓𑀼𑀫𑀼𑀤𑁄. 𑀅𑀜𑁆𑀚𑀦𑀯𑀡𑁆𑀡𑀢𑀸𑀬 𑀅𑀜𑁆𑀚𑀦𑁄. 𑀧𑀼𑀧𑁆𑀨𑀸 𑀧𑀓𑀸𑀲𑀫𑀸𑀦𑀸 𑀤𑀦𑁆𑀢𑀸 𑀅𑀲𑁆𑀲 𑀧𑀼𑀧𑁆𑀨𑀤𑀦𑁆𑀢𑁄. 𑀲𑀩𑁆𑀩𑀪𑀽𑀫𑀺𑀬𑀁 𑀘𑀭𑀢𑀻𑀢𑀺 𑀲𑀩𑁆𑀩𑀪𑀼𑀫𑁆𑀫𑁄, 𑀲𑀩𑁆𑀩𑀪𑀼𑀫𑁆𑀫𑁄 𑀯𑀸 𑀘𑀓𑁆𑀓𑀯𑀢𑁆𑀢𑀻 𑀢𑀲𑁆𑀲𑀸𑀦𑀼𑀭𑀽𑀧𑀢𑁆𑀢𑀸 𑀲𑀩𑁆𑀩𑀪𑀼𑀫𑁆𑀫𑁄. 𑀲𑁄𑀪𑀦𑀤𑀦𑁆𑀢𑀸𑀯𑀬𑀯𑀢𑁆𑀢𑀸 𑀲𑀼𑀧𑁆𑀧𑀢𑀻𑀓𑁄 [𑀲𑁄𑀪𑀦𑀸 𑀧𑀢𑀻𑀓𑀸 𑀅𑀯𑀬𑀯𑀸’𑀲𑁆𑀲 𑀲𑀼𑀧𑁆𑀧𑀢𑀻𑀓𑁄 (𑀓.)]. ‘‘𑀲𑀼𑀧𑁆𑀧𑀢𑀻𑀓𑁄 𑀲𑁄𑀪𑀦𑀗𑁆𑀕𑁂, 𑀪𑀯𑁂 𑀈𑀲𑀸𑀦𑀤𑀺𑀲𑀸𑀕𑀚𑁂’’𑀢𑀺 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂 𑀯𑀼𑀢𑁆𑀢𑀁. 𑀏𑀭𑀸𑀯𑀢𑀸𑀤𑀻𑀦𑀁 𑀤𑀺𑀲𑀸𑀦𑀁 𑀲𑀫𑁆𑀩𑀦𑁆𑀥𑀓𑀣𑀦𑀁 𑀧𑀸𑀘𑀻𑀯𑀸𑀭𑀡𑀸𑀤𑀺𑀦𑀸𑀫𑀲𑀽𑀘𑀦𑀢𑁆𑀣𑀁, 𑀏𑀲𑀁 𑀓𑀭𑁂𑀡𑀼𑀬𑁄 𑀧𑀦 𑁋

𑀅𑀩𑁆𑀪𑀫𑀼 𑀓𑀧𑀺𑀮𑀸 𑀘𑁂𑀯, 𑀧𑀺𑀗𑁆𑀕𑀮𑀸 𑀦𑀼𑀧𑀫𑀸 𑀫𑀢𑀸;

𑀢𑀫𑁆𑀩𑀓𑀡𑁆𑀡𑀻 𑀲𑀼𑀪𑀤𑀦𑁆𑀢𑀻, 𑀅𑀗𑁆𑀕𑀦𑀸 𑀅𑀜𑁆𑀚𑀦𑀸𑀯𑀢𑀻 [𑀅𑀫𑀭 𑁩.𑁫].

𑁩𑁧. 𑀥𑀢𑀭𑀝𑁆𑀞𑀸𑀤𑀺𑀤𑁆𑀯𑀬𑀁 𑀧𑀼𑀩𑁆𑀩𑀤𑀺𑀲𑀸𑀥𑀺𑀧𑀢𑀺𑀤𑁂𑀯𑁂. 𑀥𑀸𑀭𑀺𑀢𑀁 𑀭𑀝𑁆𑀞𑀫𑀦𑁂𑀦𑀸𑀢𑀺 𑀥𑀢𑀭𑀝𑁆𑀞𑁄, 𑀭𑀲𑁆𑀲 𑀢𑁄. 𑀧𑀜𑁆𑀘𑀲𑀺𑀔𑀸𑀤𑀻𑀦𑀁 𑀕𑀦𑁆𑀥𑀩𑁆𑀩𑀸𑀦𑀁 𑀅𑀥𑀺𑀧𑁄 𑀦𑀸𑀬𑀓𑁄 𑀕𑀦𑁆𑀥𑀩𑁆𑀩𑀸𑀥𑀺𑀧𑁄. 𑀓𑀼𑀫𑁆𑀪𑀡𑁆𑀟𑀲𑀸𑀫𑁆𑀬𑀸𑀤𑀺𑀤𑁆𑀯𑀬𑀁 𑀤𑀓𑁆𑀔𑀺𑀡𑀤𑀺𑀲𑀸𑀥𑀺𑀧𑀢𑀺𑀤𑁂𑀯𑁂. 𑀓𑀼𑀫𑁆𑀪𑀡𑁆𑀟𑀸𑀦𑀁 𑀲𑀸𑀫𑀺 𑀦𑀸𑀬𑀓𑁄 𑀓𑀼𑀫𑁆𑀪𑀡𑁆𑀟𑀲𑀸𑀫𑀺. 𑀯𑀺𑀭𑀼𑀳𑀦𑁆𑀢𑀺 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀫𑀸𑀧𑀚𑁆𑀚𑀦𑁆𑀢𑀺 𑀏𑀢𑀲𑁆𑀫𑀺𑀁 𑀓𑀼𑀫𑁆𑀪𑀡𑁆𑀟𑀸𑀢𑀺 𑀯𑀺𑀭𑀽𑀴𑁆𑀳𑀓𑁄. 𑀯𑀺𑀭𑀽𑀴𑁆𑀳𑀁 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀁 𑀯𑀸 𑀓𑀁 𑀲𑀼𑀔𑀫𑁂𑀢𑀲𑁆𑀲𑀸𑀢𑀺 𑀯𑀺𑀭𑀽𑀴𑁆𑀳𑀓𑁄. 𑀯𑀺𑀭𑀽𑀧𑀓𑁆𑀔𑀸𑀤𑀺𑀤𑁆𑀯𑀬𑀁 𑀧𑀘𑁆𑀙𑀺𑀫𑀤𑀺𑀲𑀸𑀥𑀺𑀧𑀢𑀺𑀤𑁂𑀯𑁂. 𑀯𑀺𑀭𑀽𑀧𑀸𑀦𑀺 𑀅𑀓𑁆𑀔𑀻𑀦𑀺 𑀬𑀲𑁆𑀲 𑀯𑀺𑀭𑀽𑀧𑀓𑁆𑀔𑁄, 𑀯𑀺𑀯𑀺𑀥𑀲𑀡𑁆𑀞𑀸𑀦𑀸𑀦𑀺 𑀅𑀓𑁆𑀔𑀻𑀦𑀺 𑀬𑀲𑁆𑀲 𑀯𑀸 𑀯𑀺𑀭𑀽𑀧𑀓𑁆𑀔𑁄. 𑀦𑀸𑀕𑀸𑀦𑀁 𑀅𑀥𑀺𑀧𑀢𑀺 𑀦𑀸𑀕𑀸𑀥𑀺𑀧𑀢𑀺.

𑁩𑁨. 𑀬𑀓𑁆𑀔𑀸𑀥𑀺𑀧𑀸𑀤𑀺𑀘𑀢𑀼𑀓𑁆𑀓𑀁 ¶ 𑀓𑀼𑀯𑁂𑀭𑁂. 𑀆𑀴𑀯𑀓𑀸𑀤𑀺𑀬𑀓𑁆𑀔𑀸𑀦𑀁 𑀅𑀥𑀺𑀧𑁄 𑀬𑀓𑁆𑀔𑀸𑀥𑀺𑀧𑁄. 𑀯𑀺𑀲𑁆𑀲𑀯𑀡𑀲𑁆𑀲 𑀅𑀧𑀘𑁆𑀘𑀁 𑀯𑁂𑀲𑁆𑀲𑀯𑀡𑁄. 𑀢𑀺𑀘𑀭𑀡𑀸𑀝𑁆𑀞𑀤𑀸𑀞𑀸𑀪𑀬𑀸𑀦𑀓𑀫𑀢𑁆𑀣𑀺𑀢𑀸𑀬 𑀓𑀼𑀘𑁆𑀙𑀺𑀢𑀁 𑀯𑁂𑀭𑁄 𑀲𑀭𑀻𑀭𑀫𑀲𑁆𑀲 𑀓𑀼𑀯𑁂𑀭𑁄. 𑀔𑀼𑀤𑁆𑀤𑁂𑀦𑀸𑀲𑁆𑀲 𑀦𑀭𑀬𑀼𑀢𑁆𑀢𑀸 𑀲𑀺𑀯𑀺𑀓𑀸𑀭𑀣𑁂𑀢𑀺 𑀦𑀭𑁄 𑀯𑀸𑀳𑀦𑀫𑀲𑁆𑀲 𑀦𑀭𑀯𑀸𑀳𑀦𑁄. 𑀢𑁆𑀬𑀫𑁆𑀩𑀓𑀲𑀔𑁄, 𑀬𑀓𑁆𑀔𑀭𑀸𑀚𑁄, 𑀕𑀼𑀬𑁆𑀳𑀓𑁂𑀲𑀭𑁄, 𑀫𑀦𑀼𑀲𑁆𑀲𑀥𑀫𑁆𑀫𑀸, 𑀥𑀦𑀤𑁄, 𑀭𑀸𑀚𑀭𑀸𑀚𑁄, 𑀥𑀦𑀸𑀥𑀺𑀧𑁄, 𑀓𑀺𑀦𑁆𑀦𑀭𑁂𑀲𑁄, 𑀬𑀓𑁆𑀔𑁄, 𑀏𑀓𑀧𑀺𑀗𑁆𑀕𑀮𑁄, 𑀲𑀺𑀭𑀺𑀤𑁄, 𑀧𑀼𑀜𑁆𑀜𑀚𑀦𑁂𑀲𑁆𑀲𑀭𑁄𑀇𑀘𑁆𑀘𑀸𑀤𑀻𑀦𑀺𑀧𑀺 𑀓𑀼𑀯𑁂𑀭𑀲𑁆𑀲 𑀦𑀸𑀫𑀸𑀦𑀺.

𑀅𑀲𑁆𑀲 𑀓𑀼𑀯𑁂𑀭𑀲𑁆𑀲 𑀧𑀼𑀭𑀻 ‘‘𑀅𑀴𑀓𑀸, 𑀅𑀴𑀓𑀫𑀦𑁆𑀤𑀸’’𑀢𑀺 𑀘 𑀯𑀼𑀘𑁆𑀘𑀢𑀺. 𑀅𑀮𑀁 𑀯𑀺𑀪𑀽𑀲𑀦𑁂, 𑀅𑀮𑀁 𑀯𑀺𑀪𑀽𑀲𑀦𑀁 𑀓𑀭𑁄𑀢𑀻𑀢𑀺 𑀅𑀮𑀓𑀸, 𑀲𑀸 𑀏𑀯 𑀅𑀴𑀓𑀸. 𑀅𑀴𑀓𑀸 𑀏𑀯 𑀫𑁄𑀤𑀓𑀭𑀡𑀢𑁄 𑀅𑀴𑀓𑀫𑀦𑁆𑀤𑀸, 𑀉𑀓𑀸𑀭𑀲𑁆𑀲 𑀅𑀓𑀸𑀭𑁄, 𑀦𑀸𑀕𑀫𑁄 𑀘. 𑀓𑁂𑀮𑀸𑀲𑁄𑀢𑀺𑀧𑀺 𑀢𑀲𑁆𑀲 𑀦𑀸𑀫𑀁, 𑀓𑁂𑀮𑀺 𑀧𑀬𑁄𑀚𑀦𑀁 𑀅𑀲𑁆𑀲 𑀓𑁂𑀮𑁄, 𑀆𑀲𑀢𑁂 𑀅𑀲𑁆𑀫𑀺𑀦𑁆𑀢𑀺 𑀆𑀲𑁄, 𑀓𑁂𑀮𑁄 𑀘 𑀲𑁄 𑀆𑀲𑁄 𑀘𑁂𑀢𑀺 𑀓𑁂𑀮𑀸𑀲𑁄, 𑀓𑀡𑁆𑀳𑀲𑀧𑁆𑀧𑀸𑀤𑀺 𑀯𑀺𑀬 𑀦𑀺𑀘𑁆𑀘𑀁 𑀓𑀫𑁆𑀫𑀥𑀸𑀭𑀬𑁄. 𑀅𑀲𑁆𑀲 𑀓𑀼𑀯𑁂𑀭𑀲𑁆𑀲 𑀧𑀳𑀭𑀡𑀁 𑀆𑀬𑀼𑀥𑀁 𑀕𑀤𑀸, 𑀕𑀁 𑀯𑀼𑀘𑁆𑀘𑀢𑀺 𑀯𑀚𑀺𑀭𑀁, 𑀢𑀁 𑀯𑀺𑀬 𑀤𑀼𑀓𑁆𑀔𑀁 𑀤𑀤𑀸𑀢𑀻𑀢𑀺 𑀕𑀤𑀸. 𑀇𑀫𑁂 𑀘𑀢𑁆𑀢𑀸𑀭𑁄 𑀬𑀣𑀸𑀯𑀼𑀢𑁆𑀢𑀸 𑀥𑀢𑀭𑀝𑁆𑀞𑀸𑀤𑀬𑁄 𑀤𑁂𑀯𑀸 𑀓𑀫𑀢𑁄 𑀧𑀼𑀩𑁆𑀩𑀸𑀤𑀻𑀦𑀁 𑀘𑀢𑀼𑀤𑁆𑀤𑀺𑀲𑀸𑀦𑀁 𑀅𑀥𑀺𑀧𑀸 𑀅𑀥𑀺𑀧𑀢𑀬𑁄 𑀦𑀸𑀫. 𑀅𑀫𑀭𑀓𑁄𑀲𑁂 𑀧𑀦 𑁋

‘‘𑀇𑀦𑁆𑀤𑁄 𑀅𑀕𑁆𑀕𑀺 𑀧𑀺𑀢𑀼𑀧𑀢𑀺, 𑀦𑁂𑀭𑀺𑀢𑁄 𑀯𑀭𑀼𑀡𑁄’𑀦𑀺𑀮𑁄;

𑀓𑀼𑀯𑁂𑀭𑁄 𑀈𑀲𑁄 𑀧𑀢𑀬𑁄, 𑀧𑀼𑀩𑁆𑀩𑀸𑀤𑀻𑀦𑀁 𑀇𑀫𑁂 𑀓𑀫𑀸.

𑀭𑀯𑀺 ¶ 𑀲𑀼𑀓𑁆𑀓𑁄 𑀫𑀳𑀻𑀲𑀽𑀦𑀼, 𑀢𑀫𑁄 𑀘 𑀪𑀸𑀦𑀼𑀚𑁄 𑀯𑀺𑀥𑀼;

𑀩𑀼𑀥𑁄 𑀲𑀼𑀭𑀕𑀼𑀭𑀼 𑀘𑁂𑀢𑀺, 𑀤𑀺𑀲𑀸𑀥𑀺𑀧𑀸 𑀢𑀣𑀸 𑀕𑀳𑀸’’𑀢𑀺 [𑀅𑀫𑀭 𑁩.𑁩-𑁪].

𑀅𑀜𑁆𑀜𑁂𑀬𑁂𑀯 𑀤𑀺𑀲𑀸𑀥𑀺𑀧𑀢𑀬𑁄 𑀓𑀣𑀺𑀢𑀸, 𑀇𑀦𑁆𑀤𑀭𑀯𑀺𑀫𑀸𑀤𑀻𑀦𑀜𑁆𑀘 𑀤𑀺𑀲𑀸𑀥𑀺𑀧𑀘𑁆𑀘𑀓𑀣𑀦𑀁 𑀧𑀸𑀛𑀸𑀤𑀻𑀦𑀁 𑀇𑀦𑁆𑀤𑀤𑀺𑀲𑀸𑀭𑀯𑀺𑀤𑀺𑀲𑀸𑀤𑀺𑀦𑀸𑀫𑀲𑀽𑀘𑀦𑀨𑀮𑀁.

𑁩𑁩-𑁩𑁪. 𑀚𑀸𑀢𑀯𑁂𑀤𑀸𑀤𑁆𑀬𑀝𑁆𑀞𑀸𑀭𑀲𑀓𑀁 𑀅𑀕𑁆𑀕𑀺𑀫𑁆𑀳𑀺. 𑀚𑀸𑀢𑁂 𑀉𑀧𑁆𑀧𑀦𑁆𑀦𑁂 𑀯𑀺𑀦𑁆𑀤𑀢𑀺 𑀖𑀸𑀢𑀬𑀢𑀻𑀢𑀺 𑀚𑀸𑀢𑀯𑁂𑀤𑁄. 𑀅𑀦𑁆𑀥𑀓𑀸𑀭𑁂 𑀚𑀸𑀢𑀁 𑀯𑀺𑀚𑁆𑀚𑀫𑀸𑀦𑀁 𑀯𑀺𑀦𑁆𑀤𑀢𑀺 𑀮𑀪𑀢𑀺, 𑀯𑀺𑀤𑀢𑀺 𑀚𑀸𑀦𑀸𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀚𑀸𑀢𑀯𑁂𑀤𑁄, 𑀚𑀦𑀦𑀁 𑀚𑀸𑀢𑀁 𑀯𑁂𑀤𑁄 𑀧𑀸𑀓𑀝𑁄 𑀬𑀲𑁆𑀲 𑀯𑀸 𑀲𑁄 𑀚𑀸𑀢𑀯𑁂𑀤𑁄. 𑀲𑀺𑀔𑀸 𑀯𑀼𑀘𑁆𑀘𑀢𑀺 𑀚𑀸𑀮𑀸, 𑀢𑀸𑀬 𑀬𑁄𑀕𑀢𑁄 𑀲𑀺𑀔𑀻. 𑀚𑁄𑀢𑀢𑀺 𑀤𑀺𑀧𑁆𑀧𑀢𑀻𑀢𑀺 𑀚𑁄𑀢𑀺. 𑀧𑀼𑀦𑀸𑀢𑀻𑀢𑀺 𑀧𑀸𑀯𑀓𑁄, 𑀡𑁆𑀯𑀼. 𑀤𑀳𑀢𑀻𑀢𑀺 𑀤𑀳𑀦𑁄. 𑀅𑀦𑀦𑁆𑀢𑀺 𑀧𑀸𑀮𑁂𑀦𑁆𑀢𑁆𑀬𑀦𑁂𑀦𑁂𑀢𑀺 𑀅𑀦𑀮𑁄, 𑀅𑀮𑀧𑀘𑁆𑀘𑀬𑁄. 𑀯𑁂𑀤𑁂 𑀳𑀼𑀢𑀁 𑀯𑀳𑀢𑀺 𑀧𑀸𑀧𑀬𑀢𑀺, 𑀲𑀬𑀁 𑀯𑀸 𑀮𑀪𑀢𑁂𑀢𑀺 𑀳𑀼𑀢𑀸𑀯𑀳𑁄. 𑀅𑀘𑁆𑀘𑀺 𑀯𑀼𑀘𑁆𑀘𑀢𑀺 𑀚𑀸𑀮𑀸, 𑀢𑀸𑀬 𑀬𑁄𑀕𑀢𑁄 𑀅𑀘𑁆𑀘𑀺𑀫𑀸. 𑀥𑀽𑀫𑁄 𑀓𑁂𑀢𑀼 𑀥𑀚𑁄 𑀬𑀲𑁆𑀲𑀸𑀢𑀺 𑀥𑀽𑀫𑀓𑁂𑀢𑀼. 𑀅𑀚𑀢𑀺 𑀚𑀮𑀫𑀸𑀦𑁄 𑀓𑀼𑀝𑀺𑀮𑀁 𑀕𑀘𑁆𑀙𑀢𑀻𑀢𑀺 𑀅𑀕𑁆𑀕𑀺, 𑀇. 𑀕𑁄 𑀭𑀁𑀲𑀺 𑀏𑀢𑀲𑁆𑀲𑀢𑁆𑀣𑀻𑀢𑀺 𑀕𑀺𑀦𑀺, 𑀅𑀲𑁆𑀲𑀢𑁆𑀣𑁆𑀬𑀢𑁆𑀣𑁂 𑀇𑀦𑀺, 𑀅𑀕𑁆𑀕𑀺𑀦𑀻𑀢𑀺𑀧𑀺 𑀧𑀸𑀞𑁄, 𑀲𑁄 𑀅𑀕𑁆𑀕𑀺𑀲𑀤𑀺𑀲𑁄. 𑀪𑀸𑀦𑀼 𑀧𑀪𑀸 𑀬𑀲𑁆𑀲𑀢𑁆𑀣𑀺, 𑀲𑁄 𑀪𑀸𑀦𑀼𑀫𑀸. 𑀢𑁂𑀚𑁂𑀢𑀺 𑀲𑁂𑀲𑀪𑀽𑀢𑁄𑀧𑀸𑀤𑀸𑀭𑀽𑀧𑀸𑀦𑀻𑀢𑀺 𑀢𑁂𑀚𑁄. 𑀥𑀽𑀫𑁄 𑀲𑀺𑀔𑀸 𑀘𑀽𑀴𑀸 𑀬𑀲𑁆𑀲 𑀥𑀽𑀫𑀲𑀺𑀔𑁄. 𑀯𑀸𑀬𑀼 𑀲𑀔𑀸 𑀅𑀲𑁆𑀲 𑀯𑀸𑀬𑀼𑀲𑀔𑁄. 𑀤𑀳𑀺𑀢𑁆𑀯𑀸 [𑀤𑀳𑀢𑁄 (𑀓.)] 𑀕𑀘𑁆𑀙𑀢𑁄 𑀓𑀡𑁆𑀳𑀸 𑀯𑀢𑁆𑀢𑀦𑀻 𑀫𑀕𑁆𑀕𑁄 𑀬𑀲𑁆𑀲 𑀓𑀡𑁆𑀳𑀯𑀢𑁆𑀢𑀦𑀻. 𑀯𑀺𑀲𑁆𑀲𑀸𑀦𑀭𑀲𑁆𑀲 𑀇𑀲𑀺𑀦𑁄 𑀅𑀧𑀘𑁆𑀘𑀁 𑀯𑁂𑀲𑁆𑀲𑀸𑀦𑀭𑁄. 𑀳𑀼𑀢𑀁 ¶ 𑀳𑀯𑀺𑀁 𑀅𑀲𑀢𑀺 𑀪𑀼𑀜𑁆𑀚𑀢𑀻𑀢𑀺 𑀳𑀼𑀢𑀸𑀲𑁄. 𑀥𑀦𑀜𑁆𑀚𑀬𑁄, 𑀚𑀮𑀦𑁄, 𑀆𑀲𑀬𑀸𑀲𑁄, 𑀭𑁄𑀳𑀺𑀢𑀲𑁆𑀲𑁄, 𑀲𑀢𑁆𑀢𑀸𑀘𑁆𑀘𑀺, 𑀲𑀼𑀓𑁆𑀓𑁄, 𑀘𑀺𑀢𑁆𑀭𑀪𑀸𑀦𑀼, 𑀯𑀺𑀪𑀸𑀯𑀲𑀼, 𑀲𑀼𑀘𑀺𑀇𑀘𑁆𑀘𑀸𑀤𑀻𑀦𑀺𑀧𑀺 𑀅𑀕𑁆𑀕𑀺𑀲𑁆𑀲 𑀦𑀸𑀫𑀸𑀦𑀺.

𑀲𑀺𑀔𑀸𑀤𑀺𑀢𑁆𑀢𑀬𑀁 𑀅𑀕𑁆𑀕𑀺𑀚𑀸𑀮𑀸𑀬𑀁. 𑀲𑀺𑀦𑁄𑀢𑀺 𑀦𑀺𑀲𑀸𑀦𑀻 𑀪𑀯𑀢𑀻𑀢𑀺 𑀲𑀺𑀔𑀸, ‘‘𑀲𑀺 𑀦𑀺𑀲𑀸𑀦𑁂’’𑀢𑀺 𑀓𑀸𑀢𑀦𑁆𑀢 𑀥𑀸𑀢𑀼, 𑀔𑀧𑀘𑁆𑀘𑀬𑁄. 𑀚𑀮𑀢𑀻𑀢𑀺 𑀚𑀸𑀮𑀸. 𑀅𑀘𑁆𑀘𑀢𑁂 𑀧𑀼𑀚𑁆𑀚𑀢𑁂 𑀅𑀦𑁂𑀦𑁂𑀢𑀺 𑀅𑀘𑁆𑀘𑀺. 𑀲𑀺𑀔𑀸 𑀚𑀸𑀮𑀸 𑀪𑀺𑀬𑁆𑀬𑁄 𑀭𑀽𑀧𑀦𑁆𑀢𑀭𑀸 𑀇𑀢𑁆𑀣𑀺𑀬𑀁, 𑀅𑀘𑁆𑀘𑀺 𑀧𑀦 𑀅𑀧𑀼𑀫𑁂.

𑁩𑁫. 𑀤𑁆𑀯𑀬𑀁 𑀅𑀕𑁆𑀕𑀺𑀓𑀡𑁂 [𑀢𑀻𑀲𑀼 𑀨𑀼𑀮𑀺𑀗𑁆𑀕𑁄’𑀕𑁆𑀕𑀺𑀓𑀡𑁄 (𑀅𑀫𑀭 𑁧.𑁬𑁦) 𑀨𑀼𑀮𑀺𑀗𑁆𑀕𑀸𑀦𑀻𑀢𑀺 𑀅𑀕𑁆𑀕𑀺𑀓𑀡𑀸𑀦𑀺 (𑀫. 𑀦𑀺. 𑀝𑀻. 𑁩.𑁬𑁫)]. 𑀯𑀺𑀯𑀺𑀥𑀸𑀲𑀼 𑀤𑀺𑀲𑀸𑀲𑀼 𑀨𑀼𑀮𑁆𑀮𑀁 𑀕𑀘𑁆𑀙𑀢𑀻𑀢𑀺 𑀯𑀺𑀧𑁆𑀨𑀼𑀮𑀺𑀗𑁆𑀕𑀁. 𑀢𑀣𑀸 𑀨𑀼𑀮𑀺𑀗𑁆𑀕𑀁. 𑀲𑀩𑁆𑀩𑀥𑀭𑀓𑀢𑁂 𑀧𑀦 ‘‘𑀨𑀼𑀮𑀺𑀁 𑀕𑀘𑁆𑀙𑀢𑀻𑀢𑀺 𑀨𑀼𑀮𑀺𑀗𑁆𑀕𑁄’’𑀢𑀺 𑀯𑀼𑀢𑁆𑀢𑀁. 𑀢𑀺𑀓𑀁 𑀙𑀸𑀭𑀺𑀓𑀸𑀬𑀁. 𑀫𑀮𑀻𑀦𑀓𑀁𑀲𑀯𑀢𑁆𑀣𑀸𑀤𑀻𑀦𑀁 𑀢𑀁 𑀤𑀺𑀢𑁆𑀢𑀺𑀁 𑀲𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀪𑀲𑁆𑀫𑀁, 𑀫𑀧𑀘𑁆𑀘𑀬𑁄, 𑀪𑀲𑀢𑀺 𑀯𑀸 𑀅𑀥𑁄 𑀧𑀢𑀢𑀺 𑀯𑀢𑁆𑀣𑀸𑀤𑀻𑀦𑀁 𑀫𑀮𑀫𑁂𑀢𑁂𑀦𑀸𑀢𑀺 𑀪𑀲𑁆𑀫𑀁. 𑀓𑀁𑀲𑀸𑀤𑀻𑀦𑀁 𑀲𑀼𑀓𑁆𑀓𑀪𑀸𑀯𑀢𑁆𑀣𑀁 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸 𑀇𑀝𑁆𑀞𑀺 𑀅𑀪𑀺𑀮𑀸𑀲𑁄 𑀲𑁄𑀪𑀦𑀁 𑀏𑀢𑀲𑁆𑀲𑀸 𑀅𑀢𑁆𑀣𑀻𑀢𑀺 𑀲𑁂𑀝𑁆𑀞𑀺, ‘‘𑀲𑀧𑀓𑁆𑀔𑀓𑁄 𑀲𑀮𑁄𑀫𑀓𑁄’’𑀢𑁆𑀬𑀸𑀤𑀻𑀲𑀼 𑀯𑀺𑀬 𑀲𑀲𑀤𑁆𑀤𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀣𑀢𑁆𑀢𑀸. 𑀫𑀮𑀲𑁆𑀲 𑀲𑀭𑀡𑀁 𑀓𑀭𑁄𑀢𑀻𑀢𑀺 𑀲𑀸𑀭𑀺𑀓𑀸, 𑀲𑀸 𑀏𑀯 𑀙𑀸𑀭𑀺𑀓𑀸, 𑀬𑀣𑀸 ‘‘𑀲𑀴𑀸𑀬𑀢𑀦’’𑀦𑁆𑀢𑁆𑀬𑀸𑀤𑀻𑀲𑀼.

𑁩𑁬. 𑀤𑁆𑀯𑀬𑀁 𑀉𑀡𑁆𑀳𑀙𑀸𑀭𑀺𑀓𑀸𑀬𑀁. 𑀉𑀡𑁆𑀳𑀢𑁆𑀢𑀸 𑀓𑀼𑀓𑁆𑀓𑀼𑀁 𑀓𑀼𑀘𑁆𑀙𑀺𑀢𑀁 𑀮𑀸𑀢𑀻𑀢𑀺 𑀓𑀼𑀓𑁆𑀓𑀼𑀮𑁄, ‘‘𑀓𑀼𑀓𑁆𑀓𑀼 𑀯𑀺𑀤𑀢𑁆𑀣𑀺𑀬𑀁 𑀳𑀢𑁆𑀣𑁂, 𑀧𑀓𑁄𑀝𑁆𑀞𑁂 𑀓𑀼𑀘𑁆𑀙𑀺𑀢𑁂𑀧𑀺 𑀘𑁂’’𑀢𑀺 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂 𑀯𑀼𑀢𑁆𑀢𑀁. 𑀓𑀼𑀓𑁆𑀓𑀼𑀁 𑀯𑀸 𑀳𑀢𑁆𑀣𑀁 𑀮𑀼𑀦𑀸𑀢𑀺 𑀙𑀺𑀦𑁆𑀤𑀢𑀺 𑀤𑀳𑀢𑀻𑀢𑀺 𑀓𑀼𑀓𑁆𑀓𑀼𑀮𑁄, 𑀲𑁄 𑀏𑀯 𑀓𑀼𑀓𑁆𑀓𑀼𑀴𑁄 ¶ . 𑀉𑀡𑁆𑀳𑀫𑁂𑀯 𑀪𑀲𑁆𑀫𑀁 𑀉𑀡𑁆𑀳𑀪𑀲𑁆𑀫𑀁, 𑀢𑀲𑁆𑀫𑀺𑀁. 𑀢𑀺𑀓𑀁 𑀤𑀺𑀢𑁆𑀢𑀓𑀝𑁆𑀞𑀸𑀤𑀺𑀦𑁆𑀥𑀦𑁂. 𑀅𑀗𑁆𑀕𑀢𑀺 𑀳𑀸𑀦𑀺𑀁 𑀕𑀘𑁆𑀙𑀢𑀻𑀢𑀺 𑀅𑀗𑁆𑀕𑀸𑀭𑁄, 𑀆𑀭𑀧𑀘𑁆𑀘𑀬𑁄, 𑀧𑀼𑀦𑁆𑀦𑀧𑀼𑀁𑀲𑀓𑁄𑀬𑀁. ‘‘𑀅𑀮𑀸𑀢𑁂’𑀦𑀺𑀢𑁆𑀣𑀺 𑀓𑀼𑀚𑁂’𑀗𑁆𑀕𑀸𑀭𑁄’’𑀢𑀺 𑀳𑀺 𑀢𑀺𑀓𑀡𑁆𑀟𑀲𑁂𑀲𑁂 [𑀢𑀺𑀓𑀡𑁆𑀟𑀲𑁂𑀲 𑁩.𑁩𑁨𑁯] 𑀯𑀼𑀢𑁆𑀢𑀁. 𑀳𑀸𑀦𑀺𑀫𑁂𑀯 𑀮𑀸𑀢𑀺, 𑀦 𑀞𑀺𑀢𑀺𑀁 𑀯𑀺𑀲𑁂𑀲𑀜𑁆𑀘𑀸𑀢𑀺 𑀅𑀮𑀸𑀢𑀁. 𑀉𑀤𑁆𑀥𑀁 𑀥𑀽𑀫𑀁 𑀫𑀼𑀜𑁆𑀘𑀢𑀻𑀢𑀺 𑀉𑀫𑁆𑀫𑀼𑀢𑀁, 𑀢𑀤𑁂𑀯 𑀉𑀫𑁆𑀫𑀼𑀓𑀁. 𑀧𑀜𑁆𑀘𑀓𑀁 𑀓𑀝𑁆𑀞𑀸𑀤𑀺𑀦𑁆𑀥𑀦𑁂. 𑀲𑀦𑁆𑀢𑀫𑀕𑁆𑀕𑀺𑀁 𑀏𑀥𑀬𑀢𑀺 𑀯𑀟𑁆𑀠𑀬𑀢𑀻𑀢𑀺 𑀲𑀫𑀺𑀥𑀸. 𑀏𑀥𑀬𑀢𑀻𑀢𑀺 𑀇𑀥𑀼𑀫𑀁, 𑀉𑀫𑁄. 𑀏𑀥𑀬𑀢𑀻𑀢𑀺 𑀇𑀥𑁄. 𑀉𑀧𑀸𑀤𑀺𑀬𑀢𑁂 𑀅𑀕𑁆𑀕𑀺𑀦𑁂𑀢𑀺 𑀉𑀧𑀸𑀤𑀸𑀦𑀁. 𑀏𑀥𑀬𑀢𑀻𑀢𑀺 𑀇𑀦𑁆𑀥𑀦𑀁.

𑁩𑁭. 𑀧𑀜𑁆𑀘𑀓𑀁 𑀆𑀮𑁄𑀓𑁂. 𑀑𑀪𑀸𑀲𑀢𑀺 𑀤𑀺𑀧𑁆𑀧𑀢𑀻𑀢𑀺 𑀑𑀪𑀸𑀲𑁄. 𑀧𑀓𑀸𑀲𑀢𑀺 𑀤𑀺𑀧𑁆𑀧𑀢𑀻𑀢𑀺 𑀧𑀓𑀸𑀲𑁄. 𑀆𑀮𑁄𑀘𑀬𑀢𑀺 𑀧𑀲𑁆𑀲𑀢𑀺 𑀏𑀢𑁂𑀦𑀸𑀢𑀺 𑀆𑀮𑁄𑀓𑁄, 𑀆𑀮𑁄𑀓𑁂𑀢𑀺 𑀯𑀸 𑀏𑀢𑁂𑀦𑀸𑀢𑀺 𑀆𑀮𑁄𑀓𑁄, ‘‘𑀮𑁄𑀓, 𑀮𑁄𑀘 𑀤𑀲𑁆𑀲𑀦𑁂’’𑀢𑀺 𑀥𑀸𑀢𑀼𑀤𑁆𑀯𑀬𑀧𑀸𑀞𑀢𑁄. 𑀉𑀚𑁆𑀚𑁄𑀢𑀢𑀻𑀢𑀺 𑀉𑀚𑁆𑀚𑁄𑀢𑁄, 𑀅𑀦𑁆𑀥𑀓𑀸𑀭𑀁 𑀯𑀺𑀤𑁆𑀥𑀁𑀲𑁂𑀦𑁆𑀢𑁄 𑀚𑁄𑀢𑀢𑀻𑀢𑀺 𑀯𑀸 𑀉𑀚𑁆𑀚𑁄𑀢𑁄. 𑀆 𑀲𑀫𑀦𑁆𑀢𑀢𑁄 𑀢𑀧𑀢𑀺 𑀤𑀺𑀧𑁆𑀧𑀢𑀻𑀢𑀺 𑀆𑀢𑀧𑁄. 𑀲𑀫𑀸𑀢𑀺 𑀏𑀢𑁂 𑀧𑀜𑁆𑀘 𑀢𑀼𑀮𑁆𑀬𑀢𑁆𑀣𑀸𑀢𑀺 𑀪𑀸𑀯𑁄.

𑀤𑀲𑀓𑀁 𑀯𑀸𑀢𑁂. 𑀆𑀳𑀸𑀭𑁄 𑀯𑀺𑀬 𑀧𑀸𑀡𑀪𑀽𑀢𑁄𑀧𑀺 𑀓𑀤𑀸𑀘𑀺 𑀲𑀢𑁆𑀢𑁂 𑀫𑀸𑀭𑁂𑀢𑀻𑀢𑀺 𑀫𑀸𑀭𑀼𑀢𑁄, 𑀲𑁄𑀯 𑀫𑀸𑀮𑀼𑀢𑁄. 𑀧𑀼𑀦𑀸𑀢𑀺 𑀲𑀗𑁆𑀓𑀸𑀭𑀸𑀤𑀺𑀓𑀦𑁆𑀢𑀺 𑀧𑀯𑀦𑁄. 𑀯𑀸𑀬𑀢𑀺 𑀕𑀘𑁆𑀙𑀢𑀻𑀢𑀺 𑀯𑀸𑀬𑀼, 𑀯𑀸𑀬𑀢𑀺 𑀯𑀸 𑀧𑀼𑀧𑁆𑀨𑀸𑀤𑀻𑀦𑀁 𑀕𑀦𑁆𑀥𑁄 𑀬𑁂𑀦 𑀲𑁄 𑀯𑀸𑀬𑀼. 𑀢𑀣𑀸 𑀯𑀸𑀢𑁄. 𑀅𑀦𑀦𑁆𑀢𑀺 𑀧𑀸𑀡𑀦𑁆𑀢𑁆𑀬𑀦𑁂𑀦𑁂𑀢𑀺 𑀅𑀦𑀺𑀮𑁄, 𑀇𑀮𑁄. 𑀲𑀦𑁆𑀢𑀁 𑀦𑀺𑀘𑁆𑀘𑀮𑀁 ¶ 𑀈𑀭𑀬𑀢𑀺 𑀓𑀫𑁆𑀧𑁂𑀢𑀻𑀢𑀺 𑀲𑀫𑀻𑀭𑀡𑁄, 𑀲𑀫𑀻𑀭𑀺𑀢𑀼𑀁 𑀓𑀫𑁆𑀧𑀺𑀢𑀼𑀁 𑀲𑀻𑀮𑀫𑀲𑁆𑀲𑀸𑀢𑀺 𑀯𑀸 𑀲𑀫𑀻𑀭𑀡𑁄. 𑀕𑀦𑁆𑀥𑀁 𑀯𑀳𑀢𑀻𑀢𑀺 𑀕𑀦𑁆𑀥𑀯𑀸𑀳𑁄, 𑀡𑁄. 𑀯𑀸𑀬𑁄 𑀯𑀸𑀬𑀼𑀲𑀤𑀺𑀲𑁄, 𑀉𑀪𑀬𑀢𑁆𑀭𑀸𑀧𑀺 𑀬𑀸𑀕𑀫𑁄. 𑀲𑀫𑀦𑁆𑀢𑀢𑁄 𑀈𑀭𑀢𑀺 𑀔𑀺𑀧𑀢𑀺 𑀭𑀼𑀓𑁆𑀔𑀸𑀤𑀬𑁄𑀢𑀺 𑀲𑀫𑀻𑀭𑁄. 𑀲𑀤𑀸 𑀲𑀩𑁆𑀩𑀤𑀸 𑀕𑀢𑀺 𑀬𑀲𑁆𑀲 𑀲𑀤𑀸𑀕𑀢𑀺. 𑀲𑀲𑀦𑁄, 𑀕𑀦𑁆𑀥𑀯𑀳𑁄, 𑀆𑀲𑀼𑀕𑁄, 𑀫𑀭𑀼𑀢𑁄, 𑀚𑀕𑀢𑀺𑀧𑀸𑀡𑁄, 𑀧𑀯𑀫𑀸𑀦𑁄, 𑀧𑀪𑀜𑁆𑀚𑀦𑁄 𑀇𑀘𑁆𑀘𑀸𑀤𑀻𑀦𑀺𑀧𑀺 𑀯𑀸𑀢𑀦𑀸𑀫𑀸𑀦𑀺.

𑁩𑁮. 𑀇𑀫𑁂 𑀙 𑀯𑀓𑁆𑀔𑀫𑀸𑀦𑀸 𑀯𑀸𑀬𑀼𑀪𑁂𑀤𑀸 𑀯𑀸𑀬𑀼𑀯𑀺𑀲𑁂𑀲𑀸, 𑀉𑀤𑁆𑀥𑀁 𑀕𑀘𑁆𑀙𑀢𑀻𑀢𑀺 𑀉𑀤𑁆𑀥𑀗𑁆𑀕𑀫𑁄, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸𑀤𑀻𑀦𑀁 𑀦𑀻𑀳𑀭𑀡𑀯𑀲𑁂𑀦 𑀅𑀥𑁄𑀪𑀸𑀕𑀁 𑀕𑀘𑁆𑀙𑀢𑀻𑀢𑀺 𑀅𑀥𑁄𑀕𑀫𑁄. 𑀓𑀼𑀘𑁆𑀙𑀺𑀫𑁆𑀳𑀺 𑀉𑀤𑀭𑁂 𑀢𑀺𑀝𑁆𑀞𑀢𑀻𑀢𑀺 𑀓𑀼𑀘𑁆𑀙𑀺𑀝𑁆𑀞𑁄. 𑀓𑁄𑀝𑁆𑀞𑁂 𑀅𑀦𑁆𑀢𑁂 𑀲𑁂𑀢𑀺 𑀢𑀺𑀝𑁆𑀞𑀢𑀻𑀢𑀺 𑀓𑁄𑀝𑁆𑀞𑀸𑀲𑀬𑁄. 𑀧𑀼𑀦𑀧𑁆𑀧𑀼𑀦𑀁 𑀲𑀲𑀦𑁆𑀢𑀺 𑀬𑁂𑀦 𑀅𑀲𑁆𑀲𑀸𑀲𑁄, 𑀩𑀳𑀺𑀦𑀺𑀓𑁆𑀔𑀦𑁆𑀢𑀯𑀸𑀢𑁄. 𑀧𑀲𑁆𑀲𑀸𑀲𑁄𑀢𑀺 𑀅𑀦𑁆𑀢𑁄𑀧𑀯𑀺𑀲𑀦𑀓𑀯𑀸𑀢𑁄𑀧𑀺 ‘‘𑀅𑀲𑁆𑀲𑀸𑀲𑁄’’𑀢𑀺 𑀏𑀢𑁂𑀦 𑀲𑀗𑁆𑀕𑀬𑁆𑀳𑀢𑁂 𑀲𑀳𑀘𑀸𑀭𑀺𑀢𑀢𑁆𑀢𑀸. 𑀲𑀩𑁆𑀩𑀗𑁆𑀕𑁂𑀲𑀼 𑀅𑀦𑀼𑀲𑀭𑀢𑀺 𑀲𑀻𑀮𑁂𑀦 𑀲𑁂𑀤𑀮𑁄𑀳𑀺𑀢𑀸𑀤𑀺𑀲𑀫𑁆𑀧𑀸𑀤𑀦𑀢𑁄𑀢𑀺 𑀅𑀗𑁆𑀕𑀸𑀦𑀼𑀲𑀸𑀭𑀻. 𑀅𑀫𑀭𑀓𑁄𑀲𑁂 𑀧𑀦𑀸𑀬𑀁 𑀯𑀸𑀢𑁄 𑀞𑀸𑀦𑀩𑁆𑀬𑀸𑀧𑀸𑀭𑀪𑁂𑀤𑁂𑀦 𑀧𑀜𑁆𑀘𑀥𑀸 𑀓𑀣𑀺𑀢𑁄 [𑀧𑀸𑀡𑁄’𑀧𑀸𑀦𑁄 𑀲𑀫𑀸𑀦𑁄𑀘𑁄𑀤𑀸𑀦𑀩𑁆𑀬𑀸𑀦𑀸 𑀘 𑀯𑀸𑀬𑀯𑁄 𑀲𑀭𑀻𑀭𑀝𑁆𑀞𑀸 𑀇𑀫𑁂 (𑀅𑀫𑀭 𑁧.𑁬𑁭)], 𑀝𑀻𑀓𑀸𑀬𑀜𑁆𑀘𑀲𑁆𑀲 𑁋

‘‘𑀳𑀤𑀬𑁂 𑀧𑀸𑀡𑁄 𑀕𑀼𑀤𑁂’𑀧𑀸𑀦𑁄, 𑀲𑀫𑀸𑀦𑁄 𑀦𑀸𑀪𑀺𑀫𑀚𑁆𑀛𑀝𑁆𑀞𑁄;

𑀉𑀤𑀸𑀦𑁄 𑀓𑀡𑁆𑀞𑀤𑁂𑀲𑁂 𑀢𑀼, 𑀩𑁆𑀬𑀸𑀦𑁄 𑀲𑀩𑁆𑀩𑀗𑁆𑀕𑀲𑀦𑁆𑀥𑀺𑀲𑀼 [𑀳𑀤𑀬𑁂 𑀧𑀸𑀡𑁄 𑀕𑀼𑀤𑁂’𑀧𑀸𑀦𑁄, 𑀲𑀫𑀸𑀦𑁄 𑀦𑀸𑀪𑀺𑀲𑀡𑁆𑀞𑀺𑀢𑁄; 𑀉𑀤𑀸𑀦𑁄 𑀓𑀡𑁆𑀞𑀤𑁂𑀲𑀝𑁆𑀞𑁄, 𑀩𑁆𑀬𑀸𑀦𑁄 𑀲𑀩𑁆𑀩𑀲𑀭𑀻𑀭𑀕𑁄 𑀇𑀢𑀺 𑀞𑀸𑀦𑀦𑀺𑀡𑁆𑀡𑀬𑁄 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)].

𑀢𑀢𑁆𑀭𑀧𑀸𑀡𑁄𑀅𑀦𑁆𑀦𑀧𑁆𑀧𑀯𑁂𑀲𑀸𑀤𑀺𑀓𑀭𑁄 ¶ . 𑀅𑀧𑀸𑀦𑁄 𑀫𑀼𑀢𑁆𑀢𑀓𑀭𑀻𑀲𑀲𑀼𑀓𑁆𑀓𑀯𑀺𑀲𑀝𑁆𑀞𑀺𑀓𑀭𑁄. 𑀲𑀫𑀸𑀦𑁄 𑀫𑀚𑁆𑀛𑁂 𑀅𑀦𑁆𑀦𑀧𑀘𑀦𑀸𑀤𑀺𑀓𑀭𑁄. 𑀉𑀤𑀸𑀦𑁄 𑀪𑀸𑀲𑀺𑀢𑀕𑀻𑀢𑀸𑀤𑀺𑀓𑀭𑁄. 𑀩𑁆𑀬𑀸𑀦𑁄 𑀲𑁂𑀤𑀭𑀢𑁆𑀢𑀲𑀯𑀦𑀼𑀫𑁆𑀫𑁂𑀲𑀦𑀺𑀫𑁂𑀲𑀕𑀢𑁆𑀬𑀸𑀤𑀺𑀓𑀭𑁄 [𑀔𑁂𑀤𑀘𑁂𑀝𑁆𑀞𑀸𑀉𑀫𑁆𑀫𑁂𑀲𑀦𑀺𑀫𑁆𑀫𑁂𑀲𑀕𑀢𑁆𑀬𑀸𑀤𑀺𑀓𑀭𑁄 (𑀓.)]. 𑀧𑀓𑀝𑁆𑀞𑁂𑀦 𑀅𑀦𑀦𑁆𑀢𑁆𑀬𑀦𑁂𑀦 𑀪𑀢𑁆𑀢𑀸𑀤𑀺𑀧𑁆𑀧𑀯𑁂𑀲𑀦𑀢𑁄𑀢𑀺 𑀧𑀸𑀡𑁄. 𑀫𑀼𑀢𑁆𑀢𑀸𑀤𑀺𑀓𑀁 𑀅𑀧𑀦𑁂𑀢𑁆𑀯𑀸 𑀅𑀦𑀦𑁆𑀢𑁆𑀬𑀦𑁂𑀦𑀸𑀢𑀺 𑀅𑀧𑀸𑀦𑁄. 𑀲𑀫𑁆𑀫𑀸 𑀅𑀦𑀦𑁆𑀢𑀺 𑀅𑀦𑁂𑀦 𑀪𑀼𑀢𑁆𑀢𑀧𑀭𑀺𑀧𑀸𑀘𑀦𑀢𑁄𑀢𑀺 𑀲𑀫𑀸𑀦𑁄. 𑀉𑀤𑁆𑀥𑀫𑀦𑀦𑁆𑀢𑁆𑀬𑀦𑁂𑀦 𑀪𑀸𑀲𑀺𑀢𑀸𑀤𑁄 𑀲𑀸𑀫𑀢𑁆𑀣𑀺𑀬𑀚𑀦𑀦𑀢𑁄𑀢𑀺 𑀉𑀤𑀸𑀦𑁄. 𑀯𑀺𑀲𑁂𑀲𑁂𑀦 𑀅𑀦𑀦𑁆𑀢𑁆𑀬𑀦𑁂𑀦 𑀲𑁂𑀤𑀭𑀢𑁆𑀢𑀲𑁂𑀫𑁆𑀳𑀸𑀤𑀺 [𑀔𑁂𑀤𑀘𑁂𑀝𑁆𑀞𑀸𑀤𑀺 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)] 𑀲𑀫𑁆𑀧𑀸𑀤𑀦𑀢𑁄𑀢𑀺 𑀩𑁆𑀬𑀸𑀦𑁄’’𑀢𑀺 [𑀢𑀁𑀩𑁆𑀬𑀸𑀧𑀸𑀭𑀸 𑀘 𑀬𑀣𑀸 𑁋 𑀅𑀦𑁆𑀦𑀧𑁆𑀧𑀯𑁂𑀲𑀦𑀁 𑀫𑀼𑀢𑁆𑀢𑀸-𑀤𑁆𑀬𑀼𑀲𑁆𑀲𑀕𑁆𑀕𑁄’𑀦𑁆𑀦𑀯𑀺𑀧𑀸𑀘𑀦𑀁 𑀪𑀸𑀲𑀡𑀸𑀤𑀺 𑀦𑀺𑀫𑁂𑀲𑀸𑀤𑀺, 𑀢𑀁𑀩𑁆𑀬𑀸𑀧𑀸𑀭𑀸 𑀓𑀫𑀸 𑀇𑀫𑁂 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)] 𑀯𑀼𑀢𑁆𑀢𑀁.

𑁩𑁯. 𑀤𑁆𑀯𑀬𑀁 𑀅𑀦𑁆𑀢𑁄𑀧𑀯𑀺𑀲𑀦𑀓𑀯𑀸𑀢𑁂. 𑀆𑀦𑀁 𑀯𑀼𑀘𑁆𑀘𑀢𑀺 𑀩𑀳𑀺𑀦𑀺𑀓𑁆𑀔𑀫𑀦𑀯𑀸𑀢𑁄, 𑀢𑀢𑁄 𑀅𑀧𑀕𑀢𑀁 𑀅𑀧𑀸𑀦𑀁. 𑀅𑀲𑁆𑀲𑀸𑀲𑀢𑁄 𑀅𑀧𑀕𑀢𑁄 𑀧𑀲𑁆𑀲𑀸𑀲𑁄. 𑀤𑁆𑀯𑀬𑀁 𑀩𑀳𑀺𑀦𑀺𑀓𑁆𑀔𑀫𑀦𑀯𑀸𑀢𑁂. 𑀆𑀤𑀺𑀫𑁆𑀳𑀺 𑀧𑀯𑀢𑁆𑀢𑁄 𑀲𑀸𑀲𑁄 𑀅𑀲𑁆𑀲𑀸𑀲𑁄. 𑀅𑀦𑀦𑁆𑀢𑀺 𑀧𑀸𑀡𑀦𑁆𑀢𑁆𑀬𑀦𑁂𑀦𑁂𑀢𑀺 𑀆𑀦𑀁, 𑀆𑀤𑀺𑀫𑁆𑀳𑀺 𑀧𑀯𑀢𑁆𑀢𑀁 𑀆𑀦𑀁 𑀆𑀦𑀁, 𑀏𑀓𑀲𑁆𑀲𑀸𑀓𑀸𑀭𑀲𑁆𑀲 𑀮𑁄𑀧𑁄.

𑁪𑁦. 𑀯𑁂𑀕𑀔𑀺𑀧𑁆𑀧𑀸𑀤𑀬𑁄 𑀯𑀸𑀢𑀥𑀫𑁆𑀫𑀢𑁆𑀢𑁂𑀦 𑀦𑀺𑀘𑁆𑀘𑀧𑁆𑀧𑀯𑀢𑁆𑀢𑀺𑀓𑀸 𑀇𑀢𑀺 𑀢𑀧𑁆𑀧𑀓𑁆𑀓𑀫𑁂 [𑀢𑀧𑁆𑀧𑀓𑁆𑀓𑀫𑁂𑀦 𑀢𑀓𑁆𑀓𑀫𑁂𑀦 (𑀓.)] 𑀉𑀘𑁆𑀘𑀦𑁆𑀢𑁂. 𑀢𑀢𑁆𑀭 𑀭𑀬𑀦𑁆𑀢𑀁 𑀯𑁂𑀕𑁂. 𑀲𑀩𑁆𑀩𑀢𑁆𑀭 𑀓𑀭𑀡𑀲𑀸𑀥𑀦𑀁. 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀯𑀚𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑁂𑀕𑁄.

‘‘𑀓𑁆𑀭𑀺𑀬𑀸𑀯𑀸𑀘𑀺𑀢𑁆𑀢𑀫𑀸𑀔𑁆𑀬𑀸𑀢𑀼𑀁 ¶ , 𑀏𑀓𑁂𑀓𑀢𑁆𑀣𑁄 𑀦𑀺𑀤𑀲𑁆𑀲𑀺𑀢𑁄;

𑀧𑀬𑁄𑀕𑀢𑁄𑀦𑀼𑀕𑀦𑁆𑀢𑀩𑁆𑀩𑀸, 𑀅𑀦𑁂𑀓𑀢𑁆𑀣𑀸 𑀳𑀺 𑀥𑀸𑀢𑀯𑁄’’𑀢𑀺 [𑀘𑀦𑁆𑀤𑁆𑀭𑀥𑀸𑀢𑀼𑀧𑀸𑀞𑁂].

𑀯𑀼𑀢𑁆𑀢𑀢𑁆𑀢𑀸 𑀯𑀚𑀥𑀸𑀢𑀼 𑀧𑀸𑀧𑀼𑀡𑀦𑁂𑀧𑀺 𑀧𑀯𑀢𑁆𑀢𑀢𑀺, 𑀏𑀯𑀁 𑀲𑀩𑁆𑀩𑀢𑁆𑀭, 𑀅𑀓𑀸𑀭𑀲𑁆𑀲 𑀏. 𑀚𑀯𑀦𑁆𑀢𑀺 𑀏𑀢𑁂𑀦𑀸𑀢𑀺 𑀚𑀯𑁄, 𑀭𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀏𑀢𑁂𑀦𑀸𑀢𑀺 𑀭𑀬𑁄.

𑀔𑀺𑀧𑁆𑀧𑀸𑀤𑀺𑀦𑀯𑀓𑀁 𑀲𑀻𑀖𑁂. 𑀅𑀣 𑀚𑀯𑀲𑀻𑀖𑀸𑀦𑀁 𑀓𑁄 𑀪𑁂𑀤𑁄? 𑀲𑀯𑁂𑀕𑀕𑀢𑀺𑀯𑀘𑀦𑀸 𑀚𑀯𑀸𑀤𑀬𑁄, 𑀲𑀻𑀖𑀸𑀤𑀬𑁄 𑀢𑀼 𑀥𑀫𑁆𑀫𑀯𑀘𑀦𑀸, 𑀢𑀣𑀸 𑀘 ‘‘𑀲𑀻𑀖𑀁 𑀧𑀘𑀢𑀺 [𑀧𑀲𑁆𑀲𑀢𑀺 (𑀓.)], 𑀲𑀻𑀖𑀁 𑀕𑀘𑁆𑀙𑀢𑀻’’𑀢𑀺 𑀧𑀬𑁄𑀕𑁄, 𑀦 𑀢𑀼 ‘‘𑀚𑀯𑀁 𑀧𑀘𑀢𑀺, 𑀚𑀯𑀁𑀕𑀘𑁆𑀙𑀢𑀻’’𑀢𑀺 𑀧𑀦 𑀧𑀬𑁄𑀕𑁄. ‘‘𑀯𑁂𑀕𑁂𑀦 𑀕𑀘𑁆𑀙𑀢𑀺, 𑀚𑀯𑁂𑀦 𑀕𑀘𑁆𑀙𑀢𑀻’’𑀢𑁆𑀬𑀸𑀤𑀻𑀲𑀼 𑀓𑀣𑀁? 𑀢𑀢𑁆𑀭 𑀪𑁂𑀤𑀲𑁆𑀲 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀢𑁆𑀢𑀸 𑀦 𑀤𑁄𑀲𑁄. 𑀔𑀺𑀧𑁆𑀧𑀢𑀺 𑀧𑁂𑀭𑀢𑀻𑀢𑀺 𑀔𑀺𑀧𑁆𑀧𑀁, 𑀔𑀺𑀧 𑀧𑁂𑀭𑀡𑁂. 𑀲𑀬𑀢𑀻𑀢𑀺 𑀲𑀻𑀖𑀁, 𑀲𑀻 𑀲𑀬𑁂, 𑀖𑀧𑀘𑁆𑀘𑀬𑁄. 𑀩𑁆𑀬𑀼𑀧𑁆𑀧𑀢𑁆𑀢𑀺 𑀳𑀺 𑀬𑀣𑀸 𑀓𑀣𑀜𑁆𑀘𑀺𑀧𑀺 𑀪𑀯𑀢𑀺, 𑀲𑀜𑁆𑀜𑀸 𑀢𑀼 𑀮𑁄𑀓𑀢𑁄𑀯𑀸𑀯𑀕𑀦𑁆𑀢𑀩𑁆𑀩𑀸, 𑀲𑀩𑁆𑀩𑀢𑁆𑀭𑁂𑀯𑀁. 𑀢𑀭𑀢𑀻𑀢𑀺 𑀢𑀼𑀭𑀺𑀢𑀁. 𑀮𑀗𑁆𑀖𑀢𑀻𑀢𑀺 𑀮𑀳𑀼, 𑀮𑀗𑁆𑀖 𑀕𑀢𑀺𑀲𑁄𑀲𑀦𑁂𑀲𑀼, 𑀖𑀲𑁆𑀲 𑀳𑁄, 𑀦𑀺𑀕𑁆𑀕𑀳𑀻𑀢𑀮𑁄𑀧𑁄, 𑀉𑀧𑀘𑁆𑀘𑀬𑁄 𑀘, 𑀮𑀳𑀼𑀧𑀭𑀺𑀬𑀸𑀬𑁄 𑀮𑀖𑀼𑀲𑀤𑁆𑀤𑁄𑀧𑁆𑀬𑀢𑁆𑀣𑀺. 𑀅𑀲𑀢𑀺 𑀔𑁂𑀧𑀢𑀻𑀢𑀺 𑀆𑀲𑀼, 𑀉. 𑀢𑀭𑀢𑀻𑀢𑀺 𑀢𑀼𑀡𑁆𑀡𑀁, 𑀭𑀲𑁆𑀲 𑀡𑁄. 𑀅𑀭𑀢𑀺 𑀕𑀘𑁆𑀙𑀢𑀻𑀢𑀺 𑀅𑀭𑀁. 𑀦 𑀯𑀺𑀮𑀫𑁆𑀩𑀻𑀬𑀢𑀺 𑀦 𑀑𑀳𑀻𑀬𑀢𑀻𑀢𑀺 𑀅𑀯𑀺𑀮𑀫𑁆𑀩𑀺𑀢𑀁, 𑀮𑀩𑀺 𑀅𑀯𑀲𑀁𑀲𑀦𑁂. 𑀢𑀼𑀯𑀝𑁆𑀝𑀢𑀺 𑀲𑀬𑀢𑀻𑀢𑀺 𑀢𑀼𑀯𑀝𑁆𑀝𑀁, 𑀢𑀼𑀭𑀺𑀢𑀪𑀸𑀯𑁂𑀦 𑀯𑀢𑁆𑀢𑀢𑀻𑀢𑀺 𑀯𑀸 𑀢𑀼𑀯𑀝𑁆𑀝𑀁, 𑀭𑀺𑀢𑀮𑁄𑀧𑁄.

𑁪𑁧. 𑀅𑀭𑀺𑀬𑀸𑀲𑀸𑀫𑀜𑁆𑀜𑀲𑁆𑀲 𑀧𑀼𑀩𑁆𑀩𑀟𑁆𑀠𑀁 𑀲𑀦𑁆𑀢𑀢𑁂. 𑀏𑀢𑁆𑀣 𑀘 𑀅𑀝𑁆𑀞𑀲𑀼 𑀕𑀡𑁂𑀲𑀼 𑀙𑀝𑁆𑀞𑁄 𑀲𑀩𑁆𑀩𑀮𑀳𑀼𑀓𑁄, 𑀢𑀢𑁄𑀧𑀭𑁂 𑀙𑀕𑁆𑀕𑀡𑀸 𑀲 ¶ , 𑀪, 𑀲, 𑀪, 𑀪, 𑀪𑀸, 𑀅𑀝𑁆𑀞𑀫𑁄 𑀕𑁄. 𑀲𑀫𑀦𑁆𑀢𑀢𑁄 𑀢𑀦𑁄𑀢𑀻𑀢𑀺 𑀲𑀢𑀢𑀁. 𑀦𑀸𑀲𑀪𑀸𑀯𑁂𑀦 𑀦 𑀇𑀘𑁆𑀘𑀁 𑀦 𑀕𑀦𑁆𑀢𑀩𑁆𑀩𑀁 𑀦𑀺𑀘𑁆𑀘𑀁, 𑀦𑀸𑀲𑀁 𑀯𑀸 𑀦 𑀕𑀘𑁆𑀙𑀢𑀻𑀢𑀺 𑀦𑀺𑀘𑁆𑀘𑀁. ‘‘𑀦𑀸𑀕𑁄’’𑀢𑁆𑀬𑀸𑀤𑀻𑀲𑀼 𑀯𑀺𑀬𑀸𑀢𑀺 𑀏𑀢𑁆𑀣𑀸𑀧𑀺 𑀦 𑀤𑁄𑀲𑁄, 𑀢𑀲𑁆𑀲 𑀘𑁄. 𑀦 𑀯𑀺𑀭𑀫𑀢𑀻𑀢𑀺 𑀅𑀯𑀺𑀭𑀢𑀁. 𑀦 𑀆𑀭𑀫𑀢𑀻𑀢𑀺 𑀅𑀦𑀸𑀭𑀢𑀁. 𑀲𑀫𑀦𑁆𑀢𑀢𑁄, 𑀧𑀼𑀦𑀧𑁆𑀧𑀼𑀦𑀁 𑀯𑀸 𑀢𑀦𑁄𑀢𑀻𑀢𑀺 𑀲𑀦𑁆𑀢𑀢𑀁. 𑀦 𑀅𑀯𑀭𑀫𑀢𑀻𑀢𑀺 𑀅𑀦𑀯𑀭𑀢𑀁. 𑀲𑀤𑀸 𑀥𑀯𑀢𑀺 𑀕𑀘𑁆𑀙𑀢𑀻𑀢𑀺 𑀥𑀼𑀯𑀁. ‘‘𑀥𑀼 𑀕𑀢𑀺𑀣𑁂𑀭𑀺𑀬𑁂𑀲𑀽’’𑀢𑀺 𑀓𑀸𑀢𑀦𑁆𑀢𑀥𑀸𑀢𑀼.

𑀯𑀺𑀧𑀼𑀮𑀸𑀟𑁆𑀠𑀁 𑀅𑀢𑀺𑀲𑀬𑁂. 𑀏𑀢𑁆𑀣 𑀳𑀺 𑀅𑀬𑀼𑀕𑀧𑀸𑀤𑁂 𑀤𑁆𑀯𑀸𑀤𑀲𑀫𑀢𑁆𑀢𑀸, 𑀬𑀼𑀕𑁂 𑀅𑀝𑁆𑀞𑀸𑀭𑀲𑀫𑀢𑁆𑀢𑀸, 𑀲𑀩𑁆𑀩𑀸𑀲𑀼 𑀅𑀭𑀺𑀬𑀸𑀲𑀼 𑀧𑀞𑀫𑁂 𑀧𑀸𑀤𑁂 𑀤𑁆𑀯𑀸𑀤𑀲𑀫𑀢𑁆𑀢𑀸, 𑀤𑀼𑀢𑀺𑀬𑁂 𑀅𑀝𑁆𑀞𑀸𑀭𑀲, 𑀢𑀢𑀺𑀬𑁂 𑀤𑁆𑀯𑀸𑀤𑀲, 𑀘𑀢𑀼𑀢𑁆𑀣𑁂 𑀧𑀜𑁆𑀘𑀤𑀲. 𑀬𑀤𑀸 𑀧𑀦 𑀧𑀞𑀫𑀢𑀢𑀺𑀬𑁂𑀲𑀼 𑀧𑀭𑀺𑀳𑀸𑀬𑀦𑁆𑀢𑀺, 𑀢𑀤𑀸 𑀬𑀼𑀕𑁂 𑀅𑀥𑀺𑀓𑀸 𑀳𑁄𑀦𑁆𑀢𑀺, 𑀇𑀤𑀁 𑀯𑀺𑀧𑀼𑀮𑀸𑀮𑀓𑁆𑀔𑀡𑀁. 𑀅𑀣 𑀲𑀢𑀢𑀸𑀢𑀺𑀲𑀬𑀸𑀦𑀁 𑀓𑁄 𑀪𑁂𑀤𑁄? 𑀲𑀢𑀢𑀁 𑀲𑀦𑁆𑀢𑀢𑀺 𑀅𑀯𑀺𑀘𑁆𑀙𑁂𑀤𑁄𑀓𑁆𑀭𑀺𑀬𑀦𑁆𑀢𑀭𑁂𑀳𑀺 𑀅𑀩𑁆𑀬𑀯𑀥𑀸𑀦𑀁, 𑀅𑀢𑀺𑀲𑀬𑁄 𑀢𑀼 𑀧𑁄𑀦𑁄𑀧𑀼𑀜𑁆𑀜𑀁, 𑀧𑀓𑀝𑁆𑀞𑁄 𑀘. 𑀢𑁂𑀲𑀼 𑀧𑁄𑀦𑁄𑀧𑀼𑀜𑁆𑀜𑀁 𑀓𑁆𑀭𑀺𑀬𑀸𑀩𑁆𑀬𑀸𑀯𑀼𑀢𑁆𑀢𑀺, 𑀧𑀓𑀝𑁆𑀞𑁄 𑀢𑀼 𑀓𑁆𑀭𑀺𑀬𑀸𑀯𑀬𑀯𑀸𑀦𑀁 𑀉𑀓𑁆𑀓𑀁𑀲𑀢𑀸. 𑀪𑀸𑀲𑀢𑀺 𑀲𑀩𑁆𑀩𑁂𑀲𑀦𑁆𑀢𑀺 𑀪𑀼𑀲𑀁, 𑀆𑀲𑁆𑀲 𑀉. 𑀪𑀲𑁆𑀲𑀢𑀺 𑀅𑀥𑁄 𑀧𑀢𑀢𑀻𑀢𑀺 𑀯𑀸 𑀪𑀼𑀲𑀁. 𑀪𑀲 𑀅𑀥𑁄𑀧𑀢𑀦𑁂, 𑀅𑀲𑁆𑀲 𑀉. 𑀅𑀢𑀺𑀲𑀬𑀦𑀁 𑀅𑀢𑀺𑀲𑀬𑁄, 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀸𑀲𑀬𑀦𑀁 𑀧𑀯𑀢𑁆𑀢𑀦𑀁 𑀅𑀢𑀺𑀲𑀬𑁄. 𑀤𑀳𑀢𑀺 𑀲𑀩𑁆𑀩𑀦𑁆𑀢𑀺 𑀤𑀴𑁆𑀳𑀁, 𑀳𑀢𑁄 𑀧𑀼𑀩𑁆𑀩𑁂 𑀴𑁄, 𑀤𑀮𑀢𑀺 𑀯𑀺𑀤𑀸𑀭𑀬𑀢𑀻𑀢𑀺 𑀯𑀸 𑀤𑀴𑁆𑀳𑀁, 𑀳𑀧𑀘𑁆𑀘𑀬𑁄, 𑀤𑀳𑀦𑁆𑀢𑁄 𑀮𑀸𑀢𑀻𑀢𑀺 𑀯𑀸 𑀤𑀴𑁆𑀳𑀁, 𑀯𑀡𑁆𑀡𑀯𑀺𑀧𑀭𑀺𑀬𑀬𑁄, 𑀅𑀪𑀺𑀲𑀬𑁄 𑀘 𑀤𑀴𑁆𑀳𑀜𑁆𑀘 𑀅𑀢𑀺𑀲𑀬𑀤𑀴𑁆𑀳𑀸. 𑀢𑀭𑀢𑀺 𑀅𑀢𑀺𑀓𑁆𑀓𑀫𑀢𑀻𑀢𑀺 𑀢𑀺𑀩𑁆𑀩𑀁, 𑀭𑀲𑁆𑀲 𑀯𑁄, 𑀅𑀲𑁆𑀲 𑀇. 𑀏𑀢𑀺 𑀕𑀘𑁆𑀙𑀢𑀻𑀢𑀺 𑀏𑀓𑁄, 𑀲𑁄 𑀏𑀯 𑀏𑀓𑀦𑁆𑀢𑀁, 𑀏𑀓𑀁 𑀢𑀭𑀢𑀺 𑀅𑀢𑀺𑀓𑁆𑀓𑀫𑀢𑀻𑀢𑀺 𑀯𑀸 𑀏𑀓𑀦𑁆𑀢𑀁. 𑀫𑀢𑁆𑀢𑀢𑁄 𑀅𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀫𑀢𑁆𑀢𑀁. 𑀩𑀳𑀼𑀁 𑀮𑀸𑀢𑀻𑀢𑀺 𑀩𑀸𑀴𑁆𑀳𑀁, 𑀉𑀮𑁄𑀧𑁄, 𑀯𑀡𑁆𑀡𑀯𑀺𑀧𑀭𑀺𑀬𑀬𑁄 𑀘 𑀳𑀲𑀤𑁆𑀤𑁄. 𑀅𑀢𑀺𑀯𑁂𑀮𑀁, 𑀅𑀘𑁆𑀘𑀢𑁆𑀣𑀁, 𑀦𑀺𑀩𑁆𑀪𑀭𑀁, 𑀦𑀺𑀢𑀦𑁆𑀢𑀁, 𑀕𑀸𑀴𑁆𑀳𑀁𑀇𑀘𑁆𑀘𑀸𑀤𑀻𑀦𑀺𑀧𑀺 𑀅𑀢𑀺𑀲𑀬𑁂.

𑀤𑀩𑁆𑀩𑀁 𑀲𑀢𑁆𑀯𑀁, 𑀢𑀁𑀯𑀺𑀧𑀭𑀻𑀢𑁂 𑀥𑀫𑁆𑀫𑀫𑀢𑁆𑀢𑁂 𑀯𑀢𑁆𑀢𑀫𑀸𑀦𑀸 𑀩𑀸𑀴𑁆𑀳𑀧𑀭𑀺𑀬𑀦𑁆𑀢𑀸 𑀔𑀺𑀧𑁆𑀧𑀸𑀤𑀬𑁄 𑀅𑀢𑀺𑀲𑀬𑀁 𑀯𑀺𑀦𑀸 𑀧𑀡𑁆𑀟𑀓𑁂 𑀦𑀧𑀼𑀁𑀲𑀓𑁂 𑀯𑀢𑁆𑀢𑀦𑁆𑀢𑀺 ¶ . 𑀔𑀺𑀧𑁆𑀧𑀁 𑀪𑀯𑀢𑀺 [‘‘𑀔𑀺𑀧𑁆𑀧 𑀪𑀯𑀪𑀻’’𑀢𑀺 𑀧𑀤𑀤𑁆𑀯𑀬𑀁 𑀅𑀥𑀺𑀓𑀁 𑀯𑀺𑀬 𑀤𑀺𑀲𑁆𑀲𑀢𑀺], 𑀅𑀢𑀺𑀲𑀬𑁄 𑀧𑀼𑀮𑁆𑀮𑀺𑀗𑁆𑀕𑁄, 𑀅𑀲𑁆𑀲 𑀕𑀼𑀡𑀲𑁆𑀲𑀸𑀢𑀺𑀲𑀬𑁄, 𑀅𑀲𑁆𑀲 𑀤𑀩𑁆𑀩𑀲𑁆𑀲𑀸𑀢𑀺𑀲𑀬𑁄 𑀇𑀢𑀺. ‘‘𑀔𑀺𑀧𑁆𑀧𑀁 𑀪𑀼𑀜𑁆𑀚𑀢𑀺, 𑀲𑀢𑀢𑀁 𑀚𑀼𑀳𑁄𑀢𑀺, 𑀲𑀢𑀢𑀁 𑀭𑀫𑀡𑀻𑀬𑁄’’𑀇𑀘𑁆𑀘𑀢𑁆𑀭 𑀢𑀼 𑀓𑁆𑀭𑀺𑀬𑀸𑀯𑀺𑀲𑁂𑀲𑀦𑀢𑁆𑀢𑀸𑀬𑁂𑀯 𑀧𑀡𑁆𑀟𑀓𑀢𑁆𑀢𑀁. 𑀢𑁂𑀲𑀼 𑀔𑀺𑀧𑁆𑀧𑀸𑀤𑀻𑀲𑀼 𑀬𑁂 𑀤𑀩𑁆𑀩𑀕𑀸 𑀤𑀩𑁆𑀩𑀸𑀪𑀺𑀥𑀸𑀬𑀺𑀦𑁄, 𑀢𑁂 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼. ‘‘𑀤𑀩𑁆𑀩𑀥𑀫𑁆𑀫𑁄 𑀮𑀺𑀗𑁆𑀕’’𑀦𑁆𑀢𑀺 𑀤𑀲𑁆𑀲𑀦𑀦𑁆𑀢𑀭𑀁. 𑀬𑀣𑀸 𑀔𑀺𑀧𑁆𑀧𑀸 𑀚𑀭𑀸, 𑀔𑀺𑀧𑁆𑀧𑁄 𑀫𑀘𑁆𑀘𑀼, 𑀔𑀺𑀧𑁆𑀧𑀁 𑀕𑀫𑀦𑀁. 𑀲𑀦𑁆𑀢𑀢𑀸 𑀢𑀡𑁆𑀳𑀸, 𑀲𑀦𑁆𑀢𑀢𑀁 𑀤𑀼𑀓𑁆𑀔𑀁, 𑀲𑀦𑁆𑀢𑀢𑁄 𑀆𑀓𑀸𑀲𑁄. 𑀅𑀢𑀺𑀫𑀢𑁆𑀢𑀸 𑀓𑁆𑀭𑀺𑀬𑀸, 𑀅𑀢𑀺𑀫𑀢𑁆𑀢𑁄 𑀦𑀭𑁄, 𑀅𑀢𑀺𑀫𑀢𑁆𑀢𑀁 𑀧𑀤𑀁 𑀇𑀘𑁆𑀘𑀸𑀤𑀺.

𑁪𑁨-𑁪𑁩. 𑀤𑁆𑀯𑀸𑀤𑀲𑀓𑀁 𑀫𑀸𑀭𑁂. 𑀳𑀭𑀦𑀬𑀦𑀕𑁆𑀕𑀺𑀤𑀟𑁆𑀠𑀢𑁆𑀢𑀸 [𑀢𑀺𑀦𑀬𑀦𑀕𑁆𑀕𑀺𑀤𑀟𑁆𑀠𑀢𑁆𑀢𑀸 (𑀓.)] 𑀦𑀢𑁆𑀣𑀺 𑀯𑀺𑀕𑁆𑀕𑀳𑁄 𑀲𑀭𑀻𑀭𑀫𑁂𑀢𑀲𑁆𑀲 𑀅𑀯𑀺𑀕𑁆𑀕𑀳𑁄. 𑀓𑀸𑀫𑀬𑀢𑀺 𑀭𑀢𑀺𑀘𑁆𑀙𑀁 𑀉𑀧𑁆𑀧𑀸𑀤𑀬𑀢𑀻𑀢𑀺 𑀓𑀸𑀫𑁄, 𑀓𑀸𑀭𑀺𑀢𑀦𑁆𑀢𑀸 𑀅𑀧𑀘𑁆𑀘𑀬𑁄. 𑀲𑀺𑀗𑁆𑀕𑀸𑀭𑀭𑀽𑀧𑁂𑀦 𑀧𑀸𑀡𑀻𑀦𑀁 𑀫𑀦𑀲𑀺 𑀪𑀯𑀢𑀻𑀢𑀺 𑀫𑀦𑁄𑀪𑀽. 𑀧𑀜𑁆𑀘𑀓𑀸𑀫𑀕𑀼𑀡𑁂𑀲𑀼 𑀫𑀤𑀬𑀢𑀻𑀢𑀺 𑀫𑀤𑀦𑁄. 𑀮𑁄𑀓𑀸𑀦𑀁 𑀅𑀦𑁆𑀢𑀁 𑀯𑀺𑀦𑀸𑀲𑀁 𑀓𑀭𑁄𑀢𑀻𑀢𑀺 𑀅𑀦𑁆𑀢𑀓𑁄. 𑀯𑀲𑁂 𑀯𑀢𑁆𑀢𑁂𑀢𑀺 𑀲𑀻𑀮𑁂𑀦𑀸𑀢𑀺 𑀯𑀲𑀯𑀢𑁆𑀢𑀻. 𑀧𑀸𑀧𑀁 𑀇𑀘𑁆𑀙𑀢𑀺 𑀓𑀭𑁄𑀢𑀺, 𑀢𑁂𑀦 𑀬𑀼𑀢𑁆𑀢𑁄𑀢𑀺 𑀯𑀸 𑀧𑀸𑀧𑀺𑀫𑀸. 𑀧𑀭𑀢𑁄 𑀚𑀸𑀬𑀢𑀻𑀢𑀺 𑀧𑀚𑀸, 𑀅𑀘𑁆𑀙𑀦𑁆𑀤𑀺𑀓𑀸, 𑀢𑀸𑀲𑀁 𑀧𑀢𑀺 𑀧𑀚𑀸𑀧𑀢𑀺. 𑀬𑁂 𑀓𑀼𑀲𑀮𑀥𑀫𑁆𑀫𑁂𑀲𑀼 𑀧𑀫𑀢𑁆𑀢𑀸, 𑀢𑁂𑀲𑀫𑁂𑀯 𑀩𑀦𑁆𑀥𑀼 𑀧𑀫𑀢𑁆𑀢𑀩𑀦𑁆𑀥𑀼. 𑀓𑀡𑁆𑀳𑀥𑀫𑁆𑀫𑀬𑀼𑀢𑁆𑀢𑀢𑀸𑀬 𑀓𑀡𑁆𑀳𑁄. 𑀓𑀼𑀲𑀮𑀥𑀫𑁆𑀫𑁂 𑀫𑀸𑀭𑁂𑀢𑀻𑀢𑀺 𑀫𑀸𑀭𑁄. 𑀅𑀓𑀼𑀲𑀮𑀥𑀫𑁆𑀫𑁂 𑀦 𑀫𑀼𑀜𑁆𑀘𑀢𑀻𑀢𑀺 𑀦𑀫𑀼𑀘𑀺. 𑀫𑀻𑀦𑀓𑁂𑀢𑀦𑁄, 𑀓𑀦𑁆𑀤𑀧𑁆𑀧𑁄, 𑀤𑀧𑁆𑀧𑀓𑁄, 𑀅𑀦𑀗𑁆𑀕𑁄, 𑀧𑀜𑁆𑀘𑀲𑀭𑁄, 𑀲𑀫𑁆𑀩𑀭𑀸𑀭𑀺, 𑀫𑀦𑀲𑀺𑀚𑁄, 𑀓𑀼𑀲𑀼𑀫𑁂𑀲𑀼 ¶ , 𑀅𑀦𑀜𑁆𑀜𑀚𑁄, 𑀧𑀼𑀧𑁆𑀨𑀥𑀦𑁆𑀯𑀸, 𑀭𑀢𑀺𑀧𑀢𑀺, 𑀫𑀓𑀭𑀤𑁆𑀥𑀚𑁄𑀇𑀘𑁆𑀘𑀸𑀤𑀻𑀦𑀺𑀧𑀺 𑀯𑀺𑀡𑁆𑀳𑀼𑀲𑀼𑀢𑀲𑁆𑀲 𑀓𑀸𑀫𑀲𑁆𑀲 𑀦𑀸𑀫𑀸𑀦𑀺.

𑀢𑀡𑁆𑀳𑀸 𑀅𑀭𑀢𑀻 𑀭𑀕𑀸 𑀘𑁂𑀢𑀺 𑀏𑀢𑀸 𑀢𑀺𑀲𑁆𑀲𑁄 𑀢𑀲𑁆𑀲 𑀫𑀸𑀭𑀲𑁆𑀲 𑀥𑀻𑀢𑀭𑁄. 𑀬𑁄 𑀢𑀁 𑀧𑀲𑁆𑀲𑀢𑀺, 𑀢𑀁 𑀢𑀲𑀺𑀢𑀁 𑀓𑀭𑁄𑀢𑀻𑀢𑀺 𑀢𑀡𑁆𑀳𑀸, 𑀲𑀮𑁄𑀧𑁄, 𑀡𑁆𑀳𑀸 𑀘. 𑀧𑀭𑁂𑀲𑀁 𑀓𑀼𑀲𑀮𑀥𑀫𑁆𑀫𑁂𑀲𑀼 𑀅𑀭𑀢𑀺𑀁 𑀓𑀭𑁄𑀢𑀻𑀢𑀺 𑀅𑀭𑀢𑀻. 𑀭𑀚𑁆𑀚𑀦𑁆𑀢𑀺 𑀏𑀢𑁆𑀣𑀸𑀢𑀺 𑀭𑀕𑀸. 𑀢𑀲𑁆𑀲 𑀫𑀸𑀭𑀲𑁆𑀲 𑀳𑀢𑁆𑀣𑀻 𑀕𑀺𑀭𑀺𑀫𑁂𑀔𑀮𑁄 𑀦𑀸𑀫. 𑀲𑀭𑀻𑀭𑀫𑀳𑀦𑁆𑀢𑀪𑀸𑀯𑁂𑀦 𑀕𑀺𑀭𑀺𑀲𑀤𑀺𑀲𑀢𑁆𑀢𑀸 𑀕𑀺𑀭𑀺 𑀯𑀺𑀬𑀸𑀢𑀺 𑀕𑀺𑀭𑀺. 𑀫𑀸𑀭𑁂𑀦 𑀫𑀫𑀸𑀬𑀦𑀯𑀲𑁂𑀦 ‘‘𑀅𑀬𑀁 𑀫𑁂 𑀳𑀢𑁆𑀣𑀻 𑀫𑁂𑀔𑀮𑁄 𑀦𑀸𑀫 𑀳𑁄𑀢𑀽’’𑀢𑀺 𑀓𑀢𑀦𑀸𑀫𑀢𑁆𑀢𑀸 𑀫𑁂𑀔𑀮𑀸 𑀯𑀺𑀬𑀸𑀢𑀺 𑀫𑁂𑀔𑀮𑁄𑀢𑀺 𑀲𑀫𑀼𑀤𑀺𑀢𑀦𑀸𑀫𑀤𑁆𑀯𑀬𑁂𑀦 𑀏𑀓𑀫𑁂𑀯 𑀳𑀢𑁆𑀣𑀺𑀁 𑀯𑀤𑀢𑀺, 𑀬𑀣𑀸 ‘‘𑀯𑀚𑀺𑀭𑀸𑀲𑀦𑀺, 𑀲𑀻𑀢𑀼𑀡𑁆𑀳’’𑀦𑁆𑀢𑀺.

𑁪𑁪. 𑀢𑀺𑀓𑀁 𑀬𑀫𑁂. 𑀧𑀚𑀸𑀲𑀁𑀬𑀫𑀦𑀢𑁄 𑀬𑀫𑀸, 𑀫𑀘𑁆𑀘𑀼𑀧𑁆𑀧𑀪𑀼𑀢𑀬𑁄 𑀅𑀲𑁆𑀲 𑀓𑀺𑀗𑁆𑀓𑀸𑀭𑀸, 𑀢𑁂𑀲𑀼 𑀭𑀸𑀚𑀢𑁂𑀢𑀺 𑀬𑀫𑀭𑀸𑀚𑀸. 𑀢𑁂𑀥𑀸𑀢𑀼𑀓𑁂𑀲𑀼𑀧𑀺 𑀆𑀡𑀸𑀧𑀯𑀢𑁆𑀢𑀓𑀢𑁆𑀢𑀸 𑀫𑀳𑀦𑁆𑀢𑁄 𑀯𑀺𑀲𑀬𑁄 𑀏𑀢𑀲𑁆𑀲 𑀯𑀺𑀲𑀬𑀻, 𑀡𑀻, 𑀲𑁄 𑀏𑀯 𑀯𑁂𑀲𑀸𑀬𑀻. 𑀬𑀢𑁆𑀣 𑀮𑀓𑁆𑀔𑀡𑁂𑀦 𑀦 𑀲𑀺𑀚𑁆𑀛𑀢𑀺, 𑀢𑀢𑁆𑀣 𑀲𑀩𑁆𑀩𑀢𑁆𑀭 ‘‘𑀬𑀤𑀸𑀤𑀺𑀦𑀸 𑀯𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀯𑀸 𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀳𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁, 𑀤𑀼𑀓𑁆𑀔𑀚𑀦𑀓𑀢𑁆𑀢𑀸 𑀯𑀸 𑀯𑀺𑀲𑀤𑀺𑀲𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑁂𑀲𑀸, 𑀦𑁂𑀭𑀬𑀺𑀓𑀸, 𑀢𑁂𑀲𑀁 𑀅𑀥𑀺𑀧𑀢𑀺𑀪𑀸𑀯𑁂𑀦 𑀅𑀬𑀢𑀺 𑀧𑀯𑀢𑁆𑀢𑀢𑀻𑀢𑀺 𑀯𑁂𑀲𑀸𑀬𑀻, 𑀈. 𑀬𑀫𑀸𑀦𑀁 𑀭𑀸𑀚𑀸 𑀬𑀫𑁄. 𑀥𑀫𑁆𑀫𑀭𑀸𑀚𑁄, 𑀓𑀢𑀦𑁆𑀢𑁄, 𑀲𑀫𑀯𑀢𑁆𑀢𑀻, 𑀓𑀸𑀮𑁄, 𑀤𑀡𑁆𑀟𑀥𑀭𑁄, 𑀅𑀦𑁆𑀢𑀓𑁄𑀇𑀘𑁆𑀘𑀸𑀤𑀻𑀦𑀺𑀧𑀺 𑀬𑀫𑀲𑁆𑀲 𑀦𑀸𑀫𑀸𑀦𑀺. 𑀅𑀲𑁆𑀲 𑀬𑀫𑀲𑁆𑀲 𑀆𑀯𑀼𑀥𑀁 𑀦𑀬𑀦𑀫𑁂𑀯. 𑀢𑁂𑀦 𑀓𑀺𑀭 𑀓𑁄𑀥𑀘𑀺𑀢𑁆𑀢𑁂𑀦 𑀑𑀮𑁄𑀓𑀺𑀢𑀫𑀢𑁆𑀢𑁂𑀦 𑀲𑀢𑁆𑀢𑀸𑀦𑀁 𑀲𑀭𑀻𑀭𑀸𑀦𑀺 𑀆𑀢𑀧𑁂 𑀔𑀺𑀢𑁆𑀢𑀖𑀢𑀧𑀺𑀡𑁆𑀟𑀸𑀦𑀺 𑀯𑀺𑀬 𑀯𑀺𑀮𑀻𑀬𑀦𑁆𑀢𑀻𑀢𑀺.

𑀤𑁆𑀯𑀬𑀁 ¶ 𑀅𑀲𑀼𑀭𑀪𑁂𑀤𑁂. 𑀏𑀢𑁂𑀲𑀜𑁆𑀳𑀺 𑀲𑀢𑀺𑀧𑀺 𑀤𑁂𑀯𑀪𑀸𑀯𑁂 𑀳𑁂𑀝𑁆𑀞𑀸 𑀦𑀺𑀯𑀸𑀲𑀺𑀢𑀪𑀸𑀯𑀲𑀸𑀫𑀜𑁆𑀜𑀢𑁄 𑀏𑀢𑁆𑀣 𑀯𑀘𑀦𑀁, 𑀫𑀸𑀭𑀲𑁆𑀲 𑀧𑀦 𑀲𑀢𑁆𑀢𑀸𑀦𑀫𑀦𑀢𑁆𑀣𑀓𑀸𑀭𑀓𑀢𑀸𑀲𑀸𑀫𑀜𑁆𑀜𑁂𑀦 𑀬𑀫𑁂𑀦 𑀲𑀤𑁆𑀥𑀺𑀁 𑀯𑀘𑀦𑀁 𑀢𑀓𑁆𑀓𑀭𑀢𑁆𑀢𑀸. 𑀬𑀼𑀤𑁆𑀥𑀸𑀤𑀻𑀲𑀼 𑀯𑁂𑀧𑀺𑀢𑀁 𑀓𑀫𑁆𑀧𑀺𑀢𑀁 𑀘𑀺𑀢𑁆𑀢𑀫𑁂𑀢𑀲𑁆𑀲 𑀯𑁂𑀧𑀘𑀺𑀢𑁆𑀢𑀺 [𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁨𑁫𑁬]. 𑀧𑀼𑀡𑁆𑀡𑀁 𑀮𑁄𑀫𑀁 𑀬𑀲𑁆𑀲 𑀲𑁄 𑀧𑀼𑀮𑁄𑀫𑁄, 𑀧𑀼𑀮𑀸𑀫𑀳𑀢𑀻 𑀉𑀫𑀸 𑀓𑀺𑀢𑁆𑀢𑀺, 𑀓𑀦𑁆𑀢𑀺 𑀯𑀸 𑀬𑀲𑁆𑀲𑀸𑀢𑀺 𑀧𑀼𑀮𑁄𑀫𑁄. ‘‘𑀉𑀫𑀸𑀢𑀲𑀻𑀳𑁂𑀫𑀯𑀢𑀺-𑀳𑀮𑀺𑀤𑁆𑀤𑀸𑀓𑀺𑀢𑁆𑀢𑀺𑀓𑀦𑁆𑀢𑀺𑀲𑀽’’𑀢𑀺 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂 𑀯𑀼𑀢𑁆𑀢𑀁. 𑀅𑀬𑀁 𑀧𑀦 𑀲𑀓𑁆𑀓𑀲𑁆𑀲 𑀪𑀭𑀺𑀬𑀸𑀬 𑀲𑀼𑀚𑀸𑀢𑀸𑀬 𑀧𑀺𑀢𑀸. 𑀤𑁆𑀯𑀬𑀁 𑀓𑀺𑀦𑁆𑀦𑀭𑁂. 𑀅𑀲𑁆𑀲𑀫𑀼𑀔𑀦𑀭𑀲𑀭𑀻𑀭𑀢𑀸𑀬 𑀓𑀼𑀘𑁆𑀙𑀺𑀢𑁄 𑀧𑀼𑀭𑀺𑀲𑁄, 𑀓𑀺𑀜𑁆𑀘𑀺 𑀯𑀸 𑀧𑀼𑀭𑀺𑀲𑁄, 𑀧𑀼𑀭𑀺𑀲𑀲𑀤𑀺𑀲𑁄𑀢𑀺 𑀯𑀸 𑀓𑀺𑀫𑁆𑀧𑀼𑀭𑀺𑀲𑁄. 𑀏𑀯𑀁 𑀓𑀺𑀦𑁆𑀦𑀭𑁄. 𑀢𑀼𑀭𑀗𑁆𑀕𑀯𑀤𑀦, 𑀅𑀲𑁆𑀲𑀫𑀼𑀔𑀸𑀤𑀻𑀦𑀺𑀧𑀺 𑀓𑀺𑀦𑁆𑀦𑀭𑀲𑁆𑀲 𑀦𑀸𑀫𑀸𑀦𑀺.

𑁪𑁫-𑁪𑁬. 𑀅𑀤𑁆𑀥𑀧𑀚𑁆𑀚𑁂𑀦 𑀆𑀓𑀸𑀲𑀲𑁆𑀲 𑀦𑀸𑀫𑀸𑀦𑀺. 𑀢𑁂𑀲𑀁 𑀢𑁂𑀲𑀁 𑀯𑀢𑁆𑀣𑀽𑀦𑀁 𑀅𑀦𑁆𑀢𑀭𑀁 𑀦𑀸𑀦𑀢𑁆𑀢𑀁 𑀇𑀓𑁆𑀔𑀢𑁂 𑀮𑁄𑀓𑁄 𑀏𑀢𑁆𑀣, 𑀅𑀦𑁂𑀦𑀸𑀢𑀺 𑀯𑀸 𑀅𑀦𑁆𑀢𑀮𑀺𑀓𑁆𑀔𑀁, 𑀭𑀲𑁆𑀲 𑀮𑁄. 𑀇𑀓𑁆𑀔𑀦𑀁 𑀯𑀸 𑀤𑀲𑁆𑀲𑀦𑀁 𑀇𑀓𑁆𑀔𑀸, 𑀢𑀲𑁆𑀲 𑀅𑀦𑁆𑀢𑀭𑀁 𑀓𑀸𑀭𑀡𑀁 𑀅𑀦𑁆𑀢𑀮𑀺𑀓𑁆𑀔𑀁. 𑀔𑀦𑀢𑀺 𑀩𑁆𑀬𑀯𑀥𑀸𑀦𑀦𑁆𑀢𑀺 𑀔𑀁, 𑀓𑁆𑀯𑀺. 𑀲𑀩𑁆𑀩𑀕𑀳𑀕𑀸𑀫𑀡𑀺𑀦𑁄 𑀆𑀤𑀺𑀘𑁆𑀘𑀲𑁆𑀲 𑀧𑀣𑁄 𑀫𑀕𑁆𑀕𑁄 𑀆𑀤𑀺𑀘𑁆𑀘𑀧𑀣𑁄. 𑀦 𑀪𑀯𑀢𑀻𑀢𑀺 𑀅𑀩𑁆𑀪𑀁. 𑀕𑀘𑁆𑀙𑀦𑁆𑀢𑁆𑀬𑀦𑁂𑀦 𑀤𑁂𑀯𑀸𑀢𑀺 𑀕𑀕𑀦𑀁, 𑀬𑀼, 𑀫𑀲𑁆𑀲 𑀕𑁄. 𑀅𑀫𑁆𑀩𑀢𑁂 𑀲𑀤𑁆𑀤𑀸𑀬𑀢𑁂 𑀅𑀢𑁆𑀭𑀸𑀢𑀺 𑀅𑀫𑁆𑀩𑀭𑀁, 𑀭𑁄. 𑀳𑀬 𑀕𑀢𑀺𑀫𑁆𑀳𑀺, 𑀯𑀺𑀲𑁂𑀲𑁂𑀦 𑀳𑀬𑀢𑀺 𑀕𑀘𑁆𑀙𑀢𑀺 𑀲𑀩𑁆𑀩𑀢𑁆𑀭𑀸𑀢𑀺 𑀯𑁂𑀳𑀸𑀲𑁄, 𑀬𑀲𑁆𑀲 𑀲𑁄, 𑀯𑀺𑀕𑀢𑁄 𑀯𑀸 𑀳𑀸𑀲𑁄 𑀘𑀺𑀢𑁆𑀢𑀲𑁆𑀲 𑀏𑀢𑁆𑀣𑀸𑀭𑀫𑁆𑀫𑀡𑀸𑀮𑀸𑀪𑀢𑁄𑀢𑀺 𑀯𑁂𑀳𑀸𑀲𑁄. 𑀅𑀦𑀺𑀮𑀲𑁆𑀲 𑀯𑀸𑀢𑀲𑁆𑀲 𑀧𑀣𑁄 𑀅𑀦𑀺𑀮𑀧𑀣𑁄. 𑀪𑀼𑀲𑀁 𑀓𑀸𑀲𑀦𑁆𑀢𑁂 𑀤𑀺𑀧𑁆𑀧𑀦𑁆𑀢𑁂 𑀧𑀤𑀢𑁆𑀣𑀸 𑀏𑀢𑁂𑀦𑀸𑀢𑀺 𑀆𑀓𑀸𑀲𑁄, 𑀦 𑀓𑀲𑁆𑀲𑀢𑀺 𑀦 𑀯𑀺𑀮𑁂𑀔𑀻𑀬𑀢𑀻𑀢𑀺 𑀯𑀸 𑀆𑀓𑀸𑀲𑁄. 𑀦 𑀪𑀯𑀢𑀺 ¶ 𑀏𑀢𑁆𑀣 𑀓𑀺𑀜𑁆𑀘𑀺𑀧𑀺 𑀯𑀢𑁆𑀣𑀽𑀢𑀺 𑀦𑀪𑀁, 𑀦𑀢𑁆𑀣𑀺 𑀪𑀽𑀫𑀺 𑀏𑀢𑁆𑀣𑀸𑀢𑀺 𑀯𑀸 𑀦𑀪𑀁, 𑀦 𑀪𑀸𑀬𑀦𑁆𑀢𑀺 𑀧𑀓𑁆𑀔𑀺𑀦𑁄 𑀅𑀦𑁂𑀦, 𑀏𑀢𑁆𑀣𑀸𑀢𑀺 𑀯𑀸 𑀦𑀪𑀁. 𑀯𑀺𑀦𑁄 𑀧𑀓𑁆𑀔𑀺𑀦𑁄 𑀳𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑁂𑀳𑀸𑀬𑀲𑀁, 𑀅𑀲𑁄. 𑀢𑀸𑀭𑀸 𑀯𑀼𑀘𑁆𑀘𑀦𑁆𑀢𑀺 𑀦𑀓𑁆𑀔𑀢𑁆𑀢𑀸𑀤𑀬𑁄, 𑀢𑁂𑀲𑀁 𑀧𑀣𑁄 𑀢𑀸𑀭𑀸𑀧𑀣𑁄. 𑀲𑀼𑀭𑀸𑀦𑀁 𑀤𑁂𑀯𑀸𑀦𑀁 𑀧𑀣𑁄 𑀲𑀼𑀭𑀧𑀣𑁄. 𑀦 𑀳𑀜𑁆𑀜𑀢𑁂𑀢𑀺 𑀅𑀖𑀁, 𑀳𑀦𑀲𑁆𑀲 𑀖𑁄. 𑀅𑀦𑀦𑁆𑀢𑀁, 𑀯𑀺𑀲𑀡𑀼𑀧𑀤𑀁𑀇𑀘𑁆𑀘𑀸𑀤𑀻𑀦𑀺𑀧𑀺 𑀆𑀓𑀸𑀲𑀲𑁆𑀲 𑀦𑀸𑀫𑀸𑀦𑀺.

𑁪𑁭-𑁪𑁮. 𑀫𑁂𑀖𑀸𑀤𑁆𑀬𑁂𑀓𑀸𑀤𑀲𑀓𑀁 𑀫𑁂𑀖𑁂. 𑀫𑁂𑀳𑀢𑀺 𑀖𑀭𑀢𑀺 𑀲𑁂𑀘𑀢𑀻𑀢𑀺 𑀫𑁂𑀖𑁄. 𑀯𑀸𑀭𑀺𑀁 𑀯𑀳𑀢𑀻𑀢𑀺 𑀯𑀮𑀸𑀳𑀓𑁄, 𑀯𑀸𑀭𑀺𑀲𑀤𑁆𑀤𑀲𑁆𑀲 𑀯𑁄, 𑀯𑀲𑁆𑀲 𑀮𑁄 [𑀧𑀸𑀡𑀺𑀦𑀺 𑁬.𑁩.𑁧𑁦𑁯; 𑀫𑁄𑀕𑁆𑀕𑀮𑁆𑀮𑀸𑀦𑀧𑀜𑁆𑀘𑀺𑀓𑀸 𑁧.𑁪𑁭; 𑀦𑀻𑀢𑀺-𑀲𑀼𑀢𑁆𑀢 𑁧𑁩𑁪𑁦, 𑁧𑁩𑁪𑁩]. 𑀤𑀺𑀩𑁆𑀩𑀦𑁆𑀢𑀺 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀕𑀘𑁆𑀙𑀦𑁆𑀢𑀺 𑀮𑁄𑀓𑀸 𑀅𑀦𑁂𑀦𑀸𑀢𑀺 𑀤𑁂𑀯𑁄. 𑀧𑀚𑀸𑀦𑀁 𑀮𑁄𑀓𑀸𑀦𑀁 𑀅𑀦𑁆𑀦𑀁 𑀪𑁄𑀚𑀦𑀁 𑀪𑀯𑀢𑀺 𑀏𑀢𑁂𑀦𑀸𑀢𑀺 𑀧𑀚𑁆𑀚𑀼𑀦𑁆𑀦𑁄, 𑀅𑀓𑀸𑀭𑀲𑁆𑀲𑀼𑀓𑀸𑀭𑁄. 𑀅𑀫𑁆𑀩𑀼𑀁 𑀉𑀤𑀓𑀁 𑀥𑀸𑀭𑁂𑀢𑀻𑀢𑀺 𑀅𑀫𑁆𑀩𑀼𑀥𑀭𑁄. 𑀮𑁄𑀓𑀸𑀦𑀁 𑀲𑀦𑁆𑀢𑀸𑀧𑀁 𑀳𑀦𑁆𑀢𑀻𑀢𑀺 𑀖𑀦𑁄, 𑀳𑀲𑁆𑀲 𑀖𑁄. 𑀚𑀮𑀥𑀸𑀭𑀁 𑀥𑀸𑀭𑁂𑀢𑀻𑀢𑀺 𑀥𑀸𑀭𑀸𑀥𑀭𑁄. 𑀚𑀻𑀯𑀦𑀁 𑀚𑀮𑀁 𑀫𑀽𑀢𑀁 𑀩𑀦𑁆𑀥𑀫𑀦𑁂𑀦𑁂𑀢𑀺 𑀚𑀻𑀫𑀽𑀢𑁄, 𑀯𑀦𑀲𑀤𑁆𑀤𑀮𑁄𑀧𑁄, 𑀮𑁄𑀓𑀸𑀦𑀁 𑀯𑀸 𑀚𑀻𑀯𑀺𑀢𑀁 𑀫𑀼𑀦𑀸𑀢𑀺 𑀩𑀦𑁆𑀥𑀢𑀻𑀢𑀺 𑀚𑀻𑀫𑀽𑀢𑁄, 𑀯𑀺𑀢𑀮𑁄𑀧𑁄, 𑀚𑀻𑀯𑀺𑀢𑀲𑁆𑀲 𑀚𑀻 𑀆𑀤𑁂𑀲𑁄 𑀯𑀸 [𑀧𑀸𑀡𑀺𑀦𑀺 𑁬.𑁩.𑁧𑁦𑁯; 𑀫𑁄𑀕𑁆𑀕𑀮𑁆𑀮𑀸𑀦𑀧𑀜𑁆𑀘𑀺𑀓𑀸 𑁧.𑁪𑁭; 𑀦𑀻𑀢𑀺-𑀲𑀼𑀢𑁆𑀢 𑁧𑁩𑁪𑁦, 𑁧𑁩𑁪𑁩]. 𑀏𑀯𑀁 𑀅𑀜𑁆𑀜𑀢𑁆𑀭. 𑀯𑀸𑀭𑀺𑀁 𑀯𑀳𑀢𑀻𑀢𑀺 𑀯𑀸𑀭𑀺𑀯𑀸𑀳𑁄. 𑀅𑀫𑁆𑀩𑀼𑀁 𑀤𑀤𑀸𑀢𑀻𑀢𑀺 𑀅𑀫𑁆𑀩𑀼𑀤𑁄. 𑀆𑀧𑀁 𑀪𑀭𑀢𑀻𑀢𑀺 𑀅𑀩𑁆𑀪𑀁, 𑀓𑁆𑀯𑀺, 𑀧𑀲𑁆𑀲 𑀩𑁄.

𑀢𑀺𑀓𑀁 𑀯𑀼𑀝𑁆𑀞𑀺𑀬𑀁. 𑀯𑀲𑁆𑀲𑀢𑀺 𑀲𑀺𑀜𑁆𑀘𑀢𑀻𑀢𑀺 𑀯𑀲𑁆𑀲𑀁, 𑀯𑀲𑁆𑀲 𑀲𑁂𑀘𑀦𑁂. 𑀏𑀯𑀁 𑀯𑀲𑁆𑀲𑀦𑀯𑀼𑀝𑁆𑀞𑀺𑀬𑁄.

𑀧𑀜𑁆𑀘𑀓𑀁 ¶ 𑀯𑀺𑀚𑁆𑀚𑀼𑀬𑀁. 𑀲𑀢𑀢𑀁 𑀈𑀭𑀢𑀺 𑀓𑀫𑁆𑀧𑀢𑀻𑀢𑀺 𑀲𑀢𑁂𑀭𑁄, 𑀢𑀮𑁄𑀧𑁄, 𑀲𑁄 𑀏𑀯 𑀲𑀢𑁂𑀭𑀺𑀢𑀸. 𑀔𑀡𑀫𑀢𑁆𑀢𑀫𑁆𑀧𑀺 𑀦 𑀢𑀺𑀝𑁆𑀞𑀢𑀻𑀢𑀺 𑀅𑀓𑁆𑀔𑀡𑀸. 𑀓𑀼𑀝𑀺𑀮𑀁 𑀅𑀘𑀺𑀭𑀝𑁆𑀞𑀸𑀬𑀺𑀢𑀢𑁆𑀢𑀸 𑀯𑀺𑀭𑀽𑀧𑀁 𑀳𑀼𑀢𑁆𑀯𑀸 𑀚𑀯𑀢𑀻𑀢𑀺 𑀯𑀺𑀚𑁆𑀚𑀼. 𑀯𑀺𑀚𑁆𑀚𑁄𑀢𑀢𑀻𑀢𑀺 𑀯𑀺𑀚𑁆𑀚𑀼𑀢𑀸. 𑀅𑀘𑀺𑀭𑀁 𑀧𑀪𑀸 𑀬𑀲𑁆𑀲 𑀅𑀘𑀺𑀭𑀧𑁆𑀧𑀪𑀸.

𑁪𑁯. 𑀘𑀢𑀼𑀓𑁆𑀓𑀁 𑀫𑁂𑀖𑀦𑀸𑀤𑁂. 𑀫𑁂𑀖𑀸𑀦𑀁 𑀦𑀸𑀤𑁄 𑀫𑁂𑀖𑀦𑀸𑀤𑁄. 𑀥𑀦𑀻𑀬𑀢𑁂 𑀥𑀦𑀺𑀢𑀁[𑀣𑀦𑀺𑀢𑀁 (𑀲𑀻.)], 𑀥𑀦 𑀲𑀤𑁆𑀤𑁂. 𑀕𑀚𑁆𑀚𑀦𑀁 𑀕𑀚𑁆𑀚𑀺𑀢𑀁, 𑀕𑀚𑁆𑀚 𑀲𑀤𑁆𑀤𑁂. 𑀭𑀲𑀻𑀬𑀢𑁂 𑀭𑀲𑀺𑀢𑀁. 𑀆𑀤𑀺𑀦𑀸 𑀳𑀭𑀸𑀤𑀸𑀤𑀺 [𑀲𑀩𑁆𑀩𑀢𑁆𑀭 𑀦𑀧𑀼𑀁𑀲𑀓𑁂𑀪𑀸𑀯𑁂 𑀢𑁄, 𑀆𑀤𑀺𑀦𑀸 𑀲𑁆𑀯𑀦𑀺𑀢𑀥𑀦𑀺𑀢𑀸𑀤𑀬𑁄 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸), 𑀆𑀤𑀺𑀦𑀸 𑀥𑀦𑀺𑀢𑀳𑀭𑀸𑀤𑀭𑀸𑀲𑀸𑀤𑀬𑁄 (𑀩𑁆𑀬𑀸𑀔𑁆𑀬𑀸𑀲𑀼𑀥𑀸𑀝𑀻𑀓𑀸)]. 𑀤𑁆𑀯𑀬𑀁 𑀲𑀓𑁆𑀓𑀥𑀦𑀼𑀫𑁆𑀳𑀺. 𑀇𑀦𑁆𑀤𑀲𑁆𑀲 𑀆𑀯𑀼𑀥𑀁 𑀥𑀦𑀼 𑀘 𑀇𑀦𑁆𑀤𑀸𑀯𑀼𑀥𑀁, 𑀇𑀦𑁆𑀤𑀥𑀦𑀼 𑀘. 𑀯𑀸𑀢𑁂𑀦 𑀔𑀺𑀢𑁆𑀢𑀫𑀫𑁆𑀩𑀼 𑀯𑀸𑀢𑀓𑁆𑀔𑀺𑀢𑁆𑀢𑀫𑁆𑀩𑀼, 𑀩𑀺𑀦𑁆𑀤𑀼. 𑀲𑀻𑀢𑀁 𑀓𑀭𑁄𑀢𑀻𑀢𑀺 𑀲𑀻𑀓𑀭𑁄, 𑀲𑀺𑀜𑁆𑀘𑀢𑀻𑀢𑀺 𑀯𑀸 𑀲𑀻𑀓𑀭𑁄, 𑀘𑀲𑁆𑀲 𑀓𑁄, 𑀅𑀭𑁄 𑀘, 𑀯𑀸𑀢𑀯𑀲𑁂𑀦 𑀯𑀸 𑀢𑀢𑁄 𑀢𑀢𑁄 𑀲𑀭𑀢𑀻𑀢𑀺 𑀲𑀻𑀓𑀭𑁄, 𑀅𑀲𑁆𑀲 𑀈, 𑀫𑀚𑁆𑀛𑁂 𑀓𑀸𑀕𑀫𑁄 𑀘.

𑁫𑁦. 𑀢𑀺𑀓𑀁 𑀚𑀮𑀥𑀸𑀭𑀸𑀬𑀁. 𑀯𑁂𑀕𑀢𑁄 𑀚𑀮𑀥𑀸𑀭𑀸𑀦𑀁 𑀲𑀁 𑀪𑀼𑀲𑀁 𑀧𑀢𑀦𑀁 𑀆𑀲𑀸𑀭𑁄, 𑀧𑀼𑀦𑀧𑁆𑀧𑀼𑀦𑀁 𑀲𑀭𑀢𑀻𑀢𑀺 𑀆𑀲𑀸𑀭𑁄. 𑀯𑁂𑀕𑀁 𑀥𑀸𑀭𑁂𑀢𑀻𑀢𑀺 𑀥𑀸𑀭𑀸. 𑀅𑀥𑁄 𑀧𑀢𑀢𑀻𑀢𑀺 𑀲𑀫𑁆𑀧𑀸𑀢𑁄, 𑀲𑀁𑀲𑀤𑁆𑀤𑁄 𑀅𑀥𑁄𑀪𑀸𑀕𑁂 [𑀯𑁂𑀕𑀢𑁄 𑀚𑀮𑀥𑀸𑀭𑀸𑀦𑀁 𑀲𑀫𑁆𑀪𑀽𑀬 𑀧𑀢𑀦𑀁 𑀥𑀸𑀭𑀸𑀲𑀫𑁆𑀧𑀸𑀢𑁄, 𑀲𑀭 𑀕𑀢𑀺𑀬𑀁 𑀖𑀉 𑀇𑀢𑀺 𑀆𑀲𑀸𑀭𑁄 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)]. 𑀤𑁆𑀯𑀬𑀁 𑀯𑀲𑁆𑀲𑁄𑀧𑀮𑁂. 𑀓𑀭𑁂𑀦 𑀳𑀢𑁆𑀣𑁂𑀦 𑀕𑀬𑁆𑀳𑀼𑀧𑀕𑀢𑁆𑀢𑀸 𑀓𑀭𑀓𑀸, 𑀚𑀮𑀁 𑀧𑀺𑀡𑁆𑀟𑀁 𑀓𑀭𑁄𑀢𑀻𑀢𑀺 𑀯𑀸 𑀓𑀭𑀓𑀸, ‘‘𑀯𑀲𑁆𑀲𑁄𑀧𑀮𑁂 ¶ 𑀢𑀼 𑀓𑀭𑀓𑀸, 𑀓𑀭𑀓𑁄𑀧𑀺 𑀘 𑀤𑀺𑀲𑁆𑀲𑀢𑁂’’𑀢𑀺 𑀭𑀼𑀤𑁆𑀤𑁄, 𑀓𑀭𑀲𑀤𑁆𑀤𑁄𑀢𑁆𑀭. ‘‘𑀓𑀭𑁄 𑀯𑀲𑁆𑀲𑁄𑀧𑀮𑁂 𑀧𑀸𑀡𑀺-𑀲𑁄𑀡𑁆𑀟𑀸𑀧𑀘𑁆𑀘𑀸𑀬𑀭𑀁𑀲𑀺𑀲𑀽’’𑀢𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂 𑀯𑀼𑀢𑁆𑀢𑀁. 𑀖𑀦𑀢𑁄, 𑀖𑀦𑀓𑀸𑀮𑁂 𑀯𑀸 𑀲𑀜𑁆𑀚𑀸𑀢𑀁 𑀉𑀧𑀮𑀁 𑀲𑀺𑀮𑀸 𑀖𑀦𑁄𑀧𑀮𑀁. 𑀤𑀼𑀝𑁆𑀞𑀼 𑀤𑀺𑀦𑀁 𑀤𑀼𑀤𑁆𑀤𑀺𑀦𑀁, 𑀅𑀬𑀁 𑀤𑀼𑀤𑁆𑀤𑀺𑀦𑀲𑀤𑁆𑀤𑁄 𑀫𑁂𑀖𑀘𑁆𑀙𑀦𑁆𑀦𑀸𑀳𑁂 𑀯𑀢𑁆𑀢𑀢𑀺, 𑀅𑀲𑁄𑀪𑀦𑀢𑁆𑀣𑁄𑀧𑁆𑀬𑀢𑁆𑀣𑀺 𑀤𑀼𑀤𑁆𑀤𑀺𑀦𑀲𑀤𑁆𑀤𑁄, 𑀅𑀕𑀼𑀡𑀯𑀘𑀦𑀢𑀸𑀬𑀁 𑀯𑀸𑀘𑁆𑀘𑀮𑀺𑀗𑁆𑀕𑁄.

𑁫𑁧-𑁫𑁨. 𑀙𑀓𑁆𑀓𑀁 𑀢𑀺𑀭𑁄𑀥𑀸𑀦𑁂. 𑀥𑀭 𑀆𑀯𑀭𑀡𑁂, 𑀅𑀧𑀸𑀤𑀺𑀧𑀼𑀩𑁆𑀩𑁄. 𑀅𑀧𑀺𑀥𑀭𑀢𑀺 𑀆𑀯𑀼𑀡𑁄𑀢𑀻𑀢𑀺 𑀧𑀺𑀥𑀸𑀦𑀁, 𑀅𑀮𑁄𑀧𑁄. 𑀅𑀧𑀥𑀭𑀢𑀻𑀢𑀺 𑀅𑀧𑀥𑀸𑀭𑀡𑀁. 𑀢𑀺𑀭𑁄 𑀥𑀭𑀢𑀺 𑀧𑀺𑀤𑀳𑀢𑀻𑀢𑀺 𑀢𑀺𑀭𑁄𑀥𑀸𑀦𑀁. 𑀅𑀦𑁆𑀢𑀭𑀁 𑀥𑀭𑀢𑀻𑀢𑀺 𑀅𑀦𑁆𑀢𑀭𑀥𑀸𑀦𑀁, 𑀦𑀺𑀕𑁆𑀕𑀳𑀻𑀢𑀮𑁄𑀧𑁄. 𑀅𑀧𑀺𑀥𑀭𑀢𑀻𑀢𑀺 𑀅𑀧𑀺𑀥𑀸𑀦𑀁. 𑀏𑀢𑁆𑀣 𑀘 𑀅𑀧𑀸𑀤𑀺𑀉𑀧𑀲𑀕𑁆𑀕𑀸 𑀥𑀸𑀢𑀼𑀦𑁄 𑀆𑀯𑀭𑀡𑀢𑁆𑀣𑀚𑁄𑀢𑀓𑀸. 𑀙𑀸𑀤𑀬𑀢𑀻𑀢𑀺 𑀙𑀸𑀤𑀦𑀁. 𑀩𑁆𑀬𑀯𑀥𑀸, 𑀅𑀦𑁆𑀢𑀭𑀥𑀺𑀇𑀘𑁆𑀘𑀸𑀤𑀬𑁄𑀧𑀺 𑀢𑀺𑀭𑁄𑀥𑀸𑀦𑁂.

𑀲𑀸𑀤𑁆𑀥𑀧𑀚𑁆𑀚𑁂𑀦 𑀘𑀦𑁆𑀤𑀲𑁆𑀲 𑀦𑀸𑀫𑀸𑀦𑀺. 𑀇𑀦𑁆𑀤𑀢𑀺 𑀦𑀓𑁆𑀔𑀢𑁆𑀢𑀸𑀦𑀁 𑀧𑀭𑀫𑀺𑀲𑁆𑀲𑀭𑀺𑀬𑀁 𑀓𑀭𑁄𑀢𑀻𑀢𑀺 𑀇𑀦𑁆𑀤𑀼. 𑀘𑀦𑁆𑀤𑀢𑀺 𑀳𑀺𑀮𑀸𑀤𑀬𑀢𑀺 𑀲𑀼𑀔𑀬𑀢𑀺 𑀧𑀚𑀦𑁆𑀢𑀺 𑀘𑀦𑁆𑀤𑁄. 𑀦𑀓𑁆𑀔𑀢𑁆𑀢𑀸𑀦𑀁 𑀭𑀸𑀚𑀸 𑀦𑀓𑁆𑀔𑀢𑁆𑀢𑀭𑀸𑀚𑀸. 𑀉𑀫𑀸 𑀓𑀦𑁆𑀢𑀺, 𑀢𑀸𑀬 𑀲𑀳 𑀯𑀺𑀚𑁆𑀚𑀢𑀻𑀢𑀺 𑀲𑁄𑀫𑁄, 𑀲𑀼𑀔𑀁 𑀅𑀪𑀺𑀲𑁆𑀲𑀯𑀢𑀻𑀢𑀺 𑀯𑀸 𑀲𑁄𑀫𑁄, 𑀫𑀧𑀘𑁆𑀘𑀬𑁄. 𑀦𑀺𑀲𑀁 𑀭𑀢𑁆𑀢𑀺𑀁 𑀓𑀭𑁄𑀢𑀺, 𑀢𑀢𑁆𑀣 𑀯𑀸 𑀓𑀭𑁄 𑀭𑀁𑀲𑀺 𑀏𑀢𑀲𑁆𑀲 𑀦𑀺𑀲𑀸𑀓𑀭𑁄. 𑀅𑀦𑁆𑀥𑀓𑀸𑀭𑀁 𑀉𑀲𑁂𑀦𑁆𑀢𑀺 𑀤𑀳𑀦𑁆𑀢𑀺 𑀯𑀺𑀦𑀸𑀲𑁂𑀦𑁆𑀢𑀻𑀢𑀺 𑀑𑀲𑀸, 𑀭𑀁𑀲𑀬𑁄, 𑀢𑁂 𑀏𑀢𑁆𑀣 𑀥𑀺𑀬𑀦𑁆𑀢𑀺 𑀧𑀢𑀺𑀝𑁆𑀞𑀳𑀦𑁆𑀢𑀻𑀢𑀺 𑀑𑀲𑀥𑀺, 𑀢𑀸𑀭𑀸𑀯𑀺𑀲𑁂𑀲𑁄, 𑀢𑀲𑁆𑀲 𑀈𑀲𑁄 𑀧𑀢𑀺 𑀑𑀲𑀥𑀻𑀲𑁄. 𑀳𑀺𑀫𑁄 𑀲𑀻𑀢𑀮𑁄 𑀭𑀁𑀲𑀺 𑀬𑀲𑁆𑀲 𑀳𑀺𑀫𑀭𑀁𑀲𑀺. 𑀲𑀲𑁄 𑀅𑀗𑁆𑀓𑁄 𑀮𑀓𑁆𑀔𑀡𑀁 𑀬𑀲𑁆𑀲 𑀲𑀲𑀗𑁆𑀓𑁄. 𑀘𑀦𑁆𑀤𑀁 𑀓𑀧𑁆𑀧𑀽𑀭𑀁 𑀫𑀸𑀢𑀺 𑀲𑀤𑀺𑀲𑀁 𑀦𑀬𑀢𑀻𑀢𑀺 𑀘𑀦𑁆𑀤𑀺𑀫𑀸. 𑀇𑀓𑀸𑀭𑀸𑀤𑁂𑀲𑁄. 𑀲𑀲𑀮𑀓𑁆𑀔𑀡𑀫𑁂𑀢𑁆𑀣 𑀅𑀢𑁆𑀣𑀺 𑀲𑀲𑀻 ¶ . 𑀲𑀲𑀢𑀺 𑀯𑀸 𑀳𑀺𑀁𑀲𑀢𑀺 𑀉𑀡𑁆𑀳𑀕𑀼𑀡𑀦𑁆𑀢𑀺 𑀲𑀲𑀻, 𑀈𑀧𑀘𑁆𑀘𑀬𑁄 𑀢𑀤𑀼𑀧𑀮𑀓𑁆𑀔𑀺𑀢𑁂 𑀢𑀤𑀼𑀧𑀘𑀸𑀭𑀁. 𑀲𑀻𑀢𑀸 𑀭𑀁𑀲𑀬𑁄 𑀬𑀲𑁆𑀲𑀢𑁆𑀣𑀻𑀢𑀺 𑀲𑀻𑀢𑀭𑀁𑀲𑀺. 𑀦𑀺𑀲𑀸𑀬 𑀭𑀢𑁆𑀢𑀺𑀬𑀸 𑀦𑀸𑀣𑁄 𑀢𑀤𑀸𑀮𑀗𑁆𑀓𑀸𑀭𑀪𑀸𑀯𑀢𑁄𑀢𑀺 𑀦𑀺𑀲𑀸𑀦𑀸𑀣𑁄. 𑀉𑀴𑀽𑀦𑀁 𑀢𑀸𑀭𑀸𑀦𑀁 𑀭𑀸𑀚𑀸 𑀉𑀴𑀼𑀭𑀸𑀚𑀸. 𑀫𑀸𑀢𑀺 𑀅𑀢𑁆𑀢𑀸𑀦𑀁 𑀓𑀧𑁆𑀧𑀽𑀭𑁂𑀦 𑀲𑀤𑀺𑀲𑀁 𑀓𑀭𑁄𑀢𑀻𑀢𑀺 𑀫𑀸, 𑀫𑀸𑀲𑀤𑁆𑀤𑁄𑀬𑀁 𑀧𑀼𑀫𑁂, 𑀢𑀁𑀲𑀳𑀘𑀭𑀡𑀢𑁄 𑀉𑀴𑀼𑀭𑀸𑀚𑀸𑀤𑀬𑁄𑀧𑀺. 𑀳𑀺𑀫𑀁𑀲𑀼, 𑀓𑀼𑀫𑀼𑀤𑀩𑀦𑁆𑀥𑀼, 𑀯𑀺𑀥𑀼, 𑀲𑀼𑀥𑀁𑀲𑀼, 𑀲𑀼𑀩𑁆𑀪𑀁𑀲𑀼, 𑀦𑀺𑀲𑀸𑀧𑀢𑀺, 𑀫𑀺𑀕𑀗𑁆𑀓𑁄, 𑀓𑀮𑀸𑀦𑀺𑀥𑀺, 𑀤𑁆𑀯𑀺𑀚𑀭𑀸𑀚𑁄, 𑀲𑀲𑀥𑀭𑁄, 𑀦𑀓𑁆𑀔𑀢𑁆𑀢𑁂𑀲𑁄𑀇𑀘𑁆𑀘𑀸𑀤𑀻𑀦𑀺𑀧𑀺 𑀘𑀦𑁆𑀤𑀲𑁆𑀲 𑀦𑀸𑀫𑀸𑀦𑀺.

𑁫𑁩-𑁫𑁪. 𑀲𑁄𑀴𑀲𑀦𑁆𑀦𑀁 𑀪𑀸𑀕𑀸𑀦𑀁 𑀧𑀽𑀭𑀡𑁄 𑀲𑁄𑀴𑀲𑀫𑁄 𑀪𑀸𑀕𑁄 𑀘𑀦𑁆𑀤𑀲𑁆𑀲 𑀓𑀮𑀸, 𑀓𑀮 𑀲𑀗𑁆𑀔𑁆𑀬𑀸𑀦𑁂, 𑀓𑀮𑀻𑀬𑀢𑁂 𑀏𑀓𑀸𑀤𑀺𑀦𑀸 𑀲𑀗𑁆𑀔𑁆𑀬𑀸𑀬𑀢𑁂𑀢𑀺 𑀓𑀮𑀸. 𑀤𑁆𑀯𑀬𑀁 𑀘𑀦𑁆𑀤𑀲𑁆𑀲 𑀲𑀭𑀻𑀭𑁂. 𑀫𑀜𑁆𑀜𑀢𑁂 𑀜𑀸𑀬𑀢𑁂 𑀅𑀦𑁂𑀦𑁂𑀢𑀺 𑀩𑀺𑀫𑁆𑀩𑀁. 𑀫𑀦𑀢𑁄 𑀯𑀧𑀘𑁆𑀘𑀬𑁄, 𑀦𑀺𑀧𑀸𑀢𑀦𑀸 𑀫𑀲𑁆𑀲 𑀩𑁄, 𑀅𑀲𑁆𑀲𑀺, 𑀦𑀲𑁆𑀲 𑀫𑁄, 𑀯𑀲𑁆𑀲 𑀩𑁄, 𑀩𑀺𑀫𑁆𑀩𑀲𑀤𑁆𑀤𑁄 𑀅𑀦𑀺𑀢𑁆𑀣𑀺𑀬𑀁. 𑀫𑀡𑁆𑀟𑀬𑀢𑁂𑀢𑀺 𑀫𑀡𑁆𑀟𑀮𑀁, 𑀅𑀮𑁄, 𑀇𑀢𑁆𑀣𑀺𑀬𑀁 𑀫𑀡𑁆𑀟𑀮𑀻, 𑀅𑀬𑀁 𑀢𑀻𑀲𑁆𑀯𑀧𑀺 [𑀩𑀺𑀫𑁆𑀩𑁄 𑀅𑀦𑀺𑀢𑁆𑀣𑀻, 𑀫𑀡𑁆𑀟𑀮𑀁 𑀢𑀻𑀲𑀼 (𑀅𑀫𑀭 𑁩.𑁧𑁫)].

𑀧𑀸𑀤𑀳𑀻𑀦𑀧𑀚𑁆𑀚𑁂𑀦 𑀅𑀤𑁆𑀥𑀪𑀸𑀕𑁄. 𑀅𑀲𑀢𑀺 𑀔𑁂𑀧𑁂𑀢𑀺 𑀲𑀫𑀼𑀤𑀸𑀬𑀦𑁆𑀢𑀺 𑀅𑀟𑁆𑀠𑁄, 𑀢𑁄. 𑀢𑀣𑀸 𑀅𑀤𑁆𑀥𑁄. 𑀉𑀧𑀟𑁆𑀠𑁄𑀢𑀺 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁, 𑀏𑀢𑁂 𑀢𑀬𑁄 𑀧𑀼𑀫𑁂. 𑀔𑀡𑁆𑀟𑀬𑀢𑀺 𑀲𑀫𑀼𑀤𑀸𑀬𑀦𑁆𑀢𑀺 𑀔𑀡𑁆𑀟𑀁. 𑀲𑀓𑁆𑀬𑀢𑁂 ¶ 𑀉𑀩𑁆𑀩𑀸𑀳𑀦𑀸𑀤𑀻𑀲𑀼 𑀣𑁄𑀓𑀢𑁆𑀢𑀸𑀢𑀺 𑀲𑀓𑀮𑀁, 𑀅𑀮𑁄, 𑀔𑀡𑁆𑀟𑀲𑀓𑀮𑀸 𑀯𑀸 𑀧𑀼𑀫𑁂, 𑀲𑀢𑁆𑀣𑁂 𑀭𑀽𑀧𑀪𑁂𑀤𑀢𑁄 𑀦𑀧𑀼𑀁𑀲𑀓𑁂. 𑀏𑀢𑁂 𑀘 𑀅𑀟𑁆𑀠𑀸𑀤𑀬𑁄 𑀢𑀬𑁄 𑀅𑀲𑀫𑁂 𑀪𑀸𑀕𑁂 𑀧𑀼𑀫𑁂, 𑀲𑀫𑁂 𑀢𑀼 𑀦𑀧𑀼𑀁𑀲𑀓𑁂𑀢𑀺 𑀭𑀽𑀧𑀪𑁂𑀤𑁂𑀦𑀸𑀳 ‘‘𑀅𑀤𑁆𑀥𑀁 𑀯𑀼𑀢𑁆𑀢𑀁 𑀲𑀫𑁂 𑀪𑀸𑀕𑁂’’𑀢𑀺. 𑀔𑀡𑁆𑀟𑀸𑀤𑀺𑀤𑁆𑀯𑀬𑀁 𑀧𑀦 𑀅𑀲𑀫𑁂𑀧𑀺 𑀯𑀢𑁆𑀢𑀫𑀸𑀦𑀁 𑀧𑀼𑀦𑁆𑀦𑀧𑀼𑀁𑀲𑀓𑁂 𑀯𑀢𑁆𑀢𑀢𑀺, 𑀢𑀲𑁆𑀫𑀸 ‘‘𑀅𑀤𑁆𑀥𑀁 𑀯𑀼𑀢𑁆𑀢𑀁 𑀲𑀫𑁂 𑀪𑀸𑀕𑁂’’𑀢𑀺 𑀏𑀢𑁆𑀣 ‘‘𑀅𑀟𑁆𑀠𑀁, 𑀉𑀧𑀟𑁆𑀠’’𑀦𑁆𑀢𑀺 𑀇𑀤𑀁 𑀤𑁆𑀯𑀬𑀫𑁆𑀧𑀺 𑀲𑀗𑁆𑀕𑀳𑀺𑀢𑀁 [𑀅𑀲𑀫𑀪𑀸𑀕𑁂 𑀧𑀼𑀫𑀸𑀦𑀺, 𑀲𑀫𑁂 𑀅𑀁𑀲𑁂 𑀦𑀧𑀼𑀁𑀲𑀓𑀢𑁆𑀢𑀁 𑀭𑀽𑀧𑀪𑁂𑀤𑀢𑁄, 𑀉𑀧𑀘𑀸𑀭𑀢𑁄 𑀢𑀩𑁆𑀪𑀸𑀕𑀯𑀢𑀺 𑀯𑀸𑀘𑁆𑀘𑀮𑀺𑀗𑁆𑀕𑁄 𑁋 𑀅𑀤𑁆𑀥𑀸 𑀲𑀸𑀝𑀻, 𑀅𑀤𑁆𑀥𑀁 𑀯𑀢𑁆𑀣𑀁 𑀅𑀤𑁆𑀥𑁄 𑀓𑀫𑁆𑀩𑀮𑁄 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)].

𑀧𑀲𑀸𑀤𑀸𑀤𑀬𑁄 𑀘𑀦𑁆𑀤𑁂 𑀅𑀯𑀲𑁆𑀲𑀫𑁆𑀪𑀸𑀯𑀺𑀦𑁄, 𑀅𑀜𑁆𑀜𑀢𑁆𑀭 𑀢𑀼 𑀧𑀸𑀲𑀗𑁆𑀕𑀺𑀓𑀸 𑀇𑀢𑀺 𑀘𑀦𑁆𑀤𑀧𑀓𑁆𑀓𑀫𑁂 𑀉𑀘𑁆𑀘𑀦𑁆𑀢𑁂. 𑀯𑀺𑀲𑁂𑀲𑁂𑀦 𑀲𑀸𑀤𑀬𑀢𑀺 𑀧𑀲𑀸𑀤𑀬𑀢𑀻𑀢𑀺 𑀧𑀲𑀸𑀤𑁄. 𑀏𑀯𑀁 𑀧𑀲𑀦𑁆𑀦𑁄, 𑀲𑁄 𑀏𑀯 𑀧𑀲𑀦𑁆𑀦𑀢𑀸.

𑀢𑀺𑀓𑀁 𑀘𑀦𑁆𑀤𑀧𑁆𑀧𑀪𑀸𑀬𑀁. 𑀓𑀼𑀫𑀼𑀤𑀲𑁆𑀲𑀸𑀬𑀁 𑀯𑀺𑀓𑀸𑀲𑁄 [𑀯𑀺𑀓𑀸𑀭𑁄 (𑀓.)] 𑀓𑁄𑀫𑀼𑀤𑀻. 𑀘𑀦𑁆𑀤𑀁 𑀆𑀘𑀺𑀓𑁆𑀔𑀢𑀺 𑀧𑀝𑀺𑀧𑀸𑀤𑀬𑀢𑀻𑀢𑀺 𑀘𑀦𑁆𑀤𑀺𑀓𑀸. 𑀚𑀼𑀢𑀺 𑀅𑀲𑁆𑀲𑀸𑀢𑁆𑀣𑀻𑀢𑀺 𑀚𑀼𑀡𑁆𑀳𑀸. 𑀢𑀲𑁆𑀲 𑀡𑁄, 𑀳𑀧𑀘𑁆𑀘𑀬𑁄 𑀘, 𑀘𑀦𑁆𑀤𑀲𑁆𑀲 𑀯𑀸 𑀚𑀼𑀢𑀺𑀁 𑀲𑁄𑀪𑀁 𑀦𑀬𑁆𑀳𑀢𑀺 𑀩𑀦𑁆𑀥𑀢𑀻𑀢𑀺 𑀚𑀼𑀡𑁆𑀳𑀸.

𑀘𑀢𑀼𑀓𑁆𑀓𑀁 𑀲𑁄𑀪𑀦𑀫𑀢𑁆𑀢𑁂. 𑀓𑀦𑀢𑀺 𑀤𑀺𑀧𑁆𑀧𑀢𑀻𑀢𑀺 𑀓𑀦𑁆𑀢𑀺, 𑀓𑀦 𑀤𑀺𑀢𑁆𑀢𑀺𑀬𑀁, 𑀓𑀸𑀫𑀻𑀬𑀢𑀻𑀢𑀺 𑀯𑀸 𑀓𑀦𑁆𑀢𑀺. 𑀲𑀼𑀦𑁆𑀤𑀭𑀁 𑀪𑀸𑀢𑀺 𑀤𑀺𑀧𑁆𑀧𑀢𑀻𑀢𑀺 𑀲𑁄𑀪𑀸. 𑀚𑁄𑀢𑀬𑀢𑀻𑀢𑀺 𑀚𑀼𑀢𑀺. 𑀙𑀸𑀤𑀬𑀢𑀻𑀢𑀺 𑀙𑀯𑀺. 𑀙𑀤 𑀲𑀁𑀯𑀭𑀡𑁂, 𑀯𑀺𑀧𑀘𑁆𑀘𑀬𑁄, 𑀤𑀮𑁄𑀧𑁄.

𑁫𑁫. 𑀲𑀢𑁆𑀢𑀓𑀁 𑀮𑀓𑁆𑀔𑀡𑁂. 𑀓𑀁 𑀅𑀢𑁆𑀢𑀸𑀦𑀁 𑀮𑀗𑁆𑀓𑀬𑀢𑀺 𑀳𑀻𑀦𑀁 𑀓𑀭𑁄𑀢𑀻𑀢𑀺 𑀓𑀮𑀗𑁆𑀓𑁄. 𑀮𑀜𑁆𑀙𑀢𑁂 𑀮𑀓𑁆𑀔𑀢𑁂 𑀅𑀦𑁂𑀦𑁂𑀢𑀺 𑀮𑀜𑁆𑀙𑀦𑀁 ¶ . 𑀮𑀓𑁆𑀔𑁆𑀬𑀢𑁂 𑀅𑀦𑁂𑀦𑁂𑀢𑀺 𑀮𑀓𑁆𑀔𑀁. 𑀢𑀣𑀸 𑀮𑀓𑁆𑀔𑀡𑀁. 𑀅𑀗𑁆𑀓𑀻𑀬𑀢𑁂 𑀮𑀓𑁆𑀔𑁆𑀬𑀢𑁂 𑀅𑀦𑁂𑀦𑁂𑀢𑀺 𑀅𑀗𑁆𑀓𑁄. 𑀅𑀪𑀺 𑀯𑀺𑀲𑁂𑀲𑀁 𑀚𑀸𑀦𑀸𑀢𑀺 𑀏𑀢𑁂𑀦𑀸𑀢𑀺 𑀅𑀪𑀺𑀜𑁆𑀜𑀸𑀡𑀁. 𑀘𑀺𑀳𑀻𑀬𑀢𑀺 𑀮𑀓𑁆𑀔𑀻𑀬𑀢𑀺 𑀅𑀦𑁂𑀦𑁂𑀢𑀺 𑀘𑀺𑀳𑀦𑀁. 𑀘𑀺𑀳 𑀮𑀓𑁆𑀔𑀡𑁂.

𑀲𑀩𑁆𑀩𑀸𑀲𑀁 𑀲𑁄𑀪𑀸𑀦𑀁 𑀫𑀚𑁆𑀛𑁂 𑀧𑀭𑀫𑀸 𑀲𑁄𑀪𑀸 𑀲𑀼𑀲𑀫𑀸 𑀦𑀸𑀫, 𑀲𑁄𑀪𑀦𑀁 𑀲𑀫𑀁 𑀲𑀩𑁆𑀩𑀁 𑀅𑀲𑁆𑀲𑀁 𑀲𑀼𑀲𑀫𑀸, 𑀲𑁂𑀝𑁆𑀞𑀸 𑀲𑁄𑀪𑀸.

𑁫𑁬. 𑀕𑀼𑀡𑁂 𑀨𑁄𑀝𑁆𑀞𑀩𑁆𑀩𑀯𑀺𑀲𑁂𑀲𑁂 𑀲𑀻𑀢𑀦𑁆𑀢𑀺 𑀦𑀧𑀼𑀁𑀲𑀓𑀁 𑀪𑀯𑀢𑀺. 𑀤𑁂𑀯𑀤𑀢𑁆𑀢𑀲𑁆𑀲 𑀲𑀻𑀢𑀁 𑀯𑀢𑁆𑀢𑀢𑀺. 𑀲𑀻𑀢𑀸𑀤𑀬𑁄 𑀢𑀬𑁄 𑀕𑀼𑀡𑀻𑀮𑀺𑀗𑁆𑀕𑀸 𑀕𑀼𑀡𑀺𑀦𑁄 𑀮𑀺𑀗𑁆𑀕𑀁 𑀕𑀡𑁆𑀳𑀦𑁆𑀢𑀺, 𑀢𑀁 𑀬𑀣𑀸 𑁋 𑀲𑀻𑀢𑀮𑀸 𑀪𑀽𑀫𑀺, 𑀲𑀻𑀢𑀮𑀁 𑀚𑀮𑀁, 𑀲𑀻𑀢𑀮𑁄 𑀯𑀸𑀢𑁄. 𑀉𑀡𑁆𑀳𑀸𑀪𑀺𑀢𑀢𑁆𑀢𑁂𑀳𑀺 𑀲𑁂𑀯𑀻𑀬𑀢𑀻𑀢𑀺 𑀲𑀻𑀢𑀁, 𑀢𑁂𑀦 𑀬𑀼𑀢𑁆𑀢𑁄 𑀲𑀻𑀢𑁄. 𑀲𑀲 𑀕𑀢𑀺𑀬𑀁, 𑀇𑀭𑁄, 𑀇𑀢𑁆𑀢𑀜𑁆𑀘, 𑀲𑀻𑀢𑀢𑁆𑀣𑀺𑀓𑁂𑀦 𑀲𑀭𑀻𑀬𑀢𑀻𑀢𑀺 𑀯𑀸 𑀲𑀺𑀲𑀺𑀭𑀁. 𑀲𑀻𑀢𑀁 𑀕𑀼𑀡𑀁 𑀮𑀸𑀢𑀻𑀢𑀺 𑀲𑀻𑀢𑀮𑁄.

𑀫𑀳𑀺𑀓𑀸𑀦𑁆𑀢𑀁 𑀳𑀺𑀫𑁂. 𑀳𑀺𑀁𑀲𑀢𑀻𑀢𑀺 𑀳𑀺𑀫𑀁, 𑀲𑀲𑁆𑀲 𑀫𑁄,𑀦𑀺𑀕𑁆𑀕𑀳𑀻𑀢𑀮𑁄𑀧𑁄 𑀘. 𑀢𑀼𑀳 𑀅𑀤𑀦𑁂, 𑀢𑁄𑀳𑀢𑀺 𑀳𑀺𑀁𑀲𑀢𑀻𑀢𑀺 𑀢𑀼𑀳𑀺𑀦𑀁, 𑀇𑀦𑁄. 𑀉𑀧𑀭𑀺𑀢𑁄 𑀲𑀯𑀢𑀻𑀢𑀺 𑀉𑀲𑁆𑀲𑀸𑀯𑁄. 𑀦𑀻𑀳𑀭𑀦𑁆𑀢𑀺 𑀦𑀺𑀲𑁆𑀲𑀲𑀦𑁆𑀢𑁆𑀬𑀦𑁂𑀦𑁂𑀢𑀺 𑀦𑀻𑀳𑀸𑀭𑁄, 𑀦𑀢𑁆𑀣𑀺 𑀈𑀳𑀸 𑀯𑀸 𑀏𑀢𑀲𑁆𑀫𑀸 𑀳𑁂𑀢𑀼𑀪𑀽𑀢𑀸𑀢𑀺 𑀦𑀻𑀳𑀸𑀭𑁄, 𑀆𑀭𑁄. 𑀫𑀳𑀻𑀬𑀢𑁂 𑀭𑀸𑀕𑀻𑀳𑀻𑀢𑀺 [𑀯𑀸𑀘𑀸𑀪𑀺 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)] 𑀫𑀳𑀺𑀓𑀸, 𑀡𑁆𑀯𑀼.

𑁫𑁭. 𑀙𑀓𑁆𑀓𑀁 𑀦𑀓𑁆𑀔𑀢𑁆𑀢𑁂. 𑀧𑀼𑀦𑀧𑁆𑀧𑀼𑀦𑀁 𑀉𑀤𑀬𑀢𑁆𑀢𑀸 𑀦 𑀔𑀻𑀬𑀢𑁂 𑀦𑀓𑁆𑀔𑀢𑁆𑀢𑀁, 𑀅𑀢𑁆𑀢𑀦𑁄 𑀕𑀫𑀦𑀝𑁆𑀞𑀸𑀦𑀁 𑀦 𑀔𑀭𑀢𑀺 𑀦 𑀯𑀺𑀦𑀸𑀲𑁂𑀢𑀻𑀢𑀺 𑀯𑀸 𑀦𑀓𑁆𑀔𑀢𑁆𑀢𑀁, 𑀅𑀣 ¶ 𑀯𑀸 𑀦𑀓𑁆𑀔 𑀕𑀢𑀺𑀬𑀁, 𑀦𑀓𑁆𑀔𑀢𑀻𑀢𑀺 𑀦𑀓𑁆𑀔𑀢𑁆𑀢𑀁. 𑀚𑁄𑀢𑀢𑀺 𑀲𑀼𑀪𑀸𑀲𑀼𑀪𑀦𑀺𑀫𑀺𑀢𑁆𑀢𑀁 𑀧𑀓𑀸𑀲𑁂𑀢𑀻𑀢𑀺 𑀚𑁄𑀢𑀺, 𑀦𑀓𑁆𑀔𑀢𑁆𑀢 𑀪𑀁𑀲𑀤𑁆𑀤𑁂𑀳𑀺 𑀲𑀳𑀘𑀭𑀡𑀢𑁄 𑀦𑀧𑀼𑀁𑀲𑀓𑁂. 𑀬𑀣𑀸𑀯𑀼𑀢𑁆𑀢𑀁 𑀦𑀺𑀫𑀺𑀢𑁆𑀢𑀁 𑀪𑀸𑀢𑀺 𑀧𑀓𑀸𑀲𑁂𑀢𑀻𑀢𑀺 𑀪𑀁. 𑀓𑀢𑁆𑀢𑀩𑁆𑀩𑀁 𑀢𑀭𑀦𑁆𑀢𑀺 𑀮𑁄𑀓𑀸 𑀏𑀢𑀸𑀬𑀸𑀢𑀺 𑀢𑀸𑀭𑀸, 𑀅𑀢𑁆𑀢𑀦𑁄 𑀯𑀻𑀣𑀺𑀁 𑀢𑀸𑀬𑀢𑀺 𑀅𑀭𑀢𑀺 𑀕𑀘𑁆𑀙𑀢𑀻𑀢𑀺 𑀯𑀸 𑀢𑀸𑀭𑀸, 𑀢𑀸𑀭𑁂𑀢𑀺 𑀯𑀸 𑀮𑁄𑀓𑁂 𑀅𑀳𑀺𑀢𑀢𑁄𑀢𑀺 𑀢𑀸𑀭𑀸, 𑀅𑀬𑀜𑁆𑀘 𑀢𑀸𑀭𑀓𑀸, 𑀉𑀴𑀼 𑀘 𑀏𑀢𑁂 𑀢𑀬𑁄 𑀅𑀧𑀼𑀫𑁂. 𑀢𑀭𑀸 𑀏𑀯 𑀡𑁆𑀯𑀼, 𑀢𑀸𑀭𑀓𑀸 [𑀢𑀸𑀭𑀸 𑀏𑀯 𑀢𑀸𑀭𑀓𑀸 𑀡𑁆𑀯𑀼 (𑀓.)]. 𑀉𑀘𑁆𑀘𑀁 𑀮𑀯𑀢𑀺 [𑀉𑀮𑀬𑀢𑀺 (𑀓.)] 𑀕𑀘𑁆𑀙𑀢𑀻𑀢𑀺 𑀉𑀮𑀼. 𑀲𑁄 𑀏𑀯 𑀉𑀴𑀼. 𑀦 𑀓𑁂𑀯𑀮𑀁 𑀢𑀸𑀭𑀓𑀸 𑀏𑀯 𑀅𑀧𑀼𑀫𑁂, 𑀅𑀣 𑀔𑁄 𑀉𑀴𑀼 𑀘𑀸𑀢𑀺 𑀘𑀲𑀤𑁆𑀤𑀢𑁆𑀣𑁄. 𑀉𑀴𑀼𑀲𑀳𑀘𑀭𑀺𑀬𑀢𑁄 𑀧𑀓𑁆𑀔𑁂 𑀦𑀧𑀼𑀁𑀲𑀓𑁂 𑀘.

𑁫𑁮-𑁬𑁦. 𑀅𑀲𑁆𑀲𑀬𑀼𑀚𑀸𑀤𑀬𑁄 𑀭𑁂𑀯𑀢𑁆𑀬𑀦𑁆𑀢𑀸 𑀲𑀢𑁆𑀢𑀸𑀥𑀺𑀓𑀯𑀻𑀲𑀢𑀸𑀭𑀓𑀸 𑀦𑀓𑁆𑀔𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑀸𑀦𑀺 𑀘 𑀦𑀓𑁆𑀔𑀢𑁆𑀢𑀸𑀦𑀺 𑀆𑀓𑀸𑀲𑁂 𑀬𑀣𑀸𑀞𑀺𑀢𑀸𑀦𑀺 𑀓𑀫𑀢𑁄𑀬𑁂𑀯 𑀏𑀢𑁆𑀣 𑀓𑀣𑀺𑀢𑀸𑀦𑀺, 𑀦 𑀉𑀧𑁆𑀧𑀝𑀺𑀧𑀸𑀝𑀺𑀬𑀸. 𑀯𑀓𑁆𑀔𑀢𑀺 𑀘 ‘‘𑀓𑀫𑀢𑁄 𑀲𑀢𑁆𑀢𑀸𑀥𑀺𑀓𑀯𑀻𑀲𑀢𑀺 𑀦𑀓𑁆𑀔𑀢𑁆𑀢𑀸’’𑀢𑀺. 𑀅𑀲𑁆𑀲𑀭𑀽𑀧𑀬𑁄𑀕𑀢𑁄 𑀅𑀲𑁆𑀲𑀬𑀼𑀚𑁄. 𑀬𑀫𑀲𑀤𑀺𑀲𑀢𑁆𑀢𑀸𑀲𑀩𑁆𑀩𑀢𑁆𑀭 𑀪𑀭𑀢𑀻𑀢𑀺 𑀪𑀭𑀡𑀻. 𑀬𑀼, 𑀈. 𑀅𑀕𑁆𑀕𑀺𑀲𑀤𑀺𑀲𑀢𑁆𑀢𑀸 𑀓𑀦𑁆𑀢𑀢𑀺 𑀙𑀺𑀦𑁆𑀤𑀢𑀻𑀢𑀺 𑀓𑀢𑁆𑀢𑀺𑀓𑀸, 𑀓𑀭𑁄𑀢𑀺 𑀢𑀲𑁆𑀫𑀸 𑀯𑀸 𑀓𑀢𑁆𑀣𑀺𑀓𑀸, 𑀓𑀢𑁆𑀢𑀺𑀓𑀸𑀬 𑀲𑀳𑀺𑀢𑀸 𑀲𑀓𑀢𑁆𑀢𑀺𑀓𑀸. 𑀪𑀭𑀡𑀻, 𑀭𑁄𑀳𑀺𑀡𑀻 𑀯𑀸. 𑀓𑀫𑀮𑀲𑀫𑁆𑀪𑀯𑀢𑁆𑀢𑀸 𑀓𑀫𑀮𑁂 𑀭𑀼𑀳𑀢𑀺 𑀯𑀟𑁆𑀠𑀢𑀻𑀢𑀺 𑀭𑁄𑀳𑀺𑀡𑀻. 𑀫𑀺𑀕𑀲𑀻𑀲𑀡𑁆𑀞𑀸𑀦𑀢𑁆𑀢𑀸 ¶ 𑀢𑀸𑀭𑀸𑀧𑀼𑀜𑁆𑀚𑁄 𑀫𑀺𑀕𑀲𑀺𑀭𑀁, 𑀙𑀝𑁆𑀞𑀻𑀲𑀫𑀸𑀲𑁄 𑀉𑀢𑁆𑀢𑀭𑀧𑁆𑀧𑀥𑀸𑀦𑀢𑁆𑀢𑀸 𑀦𑀧𑀼𑀁𑀲𑀓𑀢𑁆𑀢𑀁. 𑀭𑀼𑀤𑁆𑀤𑀭𑀲𑀸𑀯𑀝𑁆𑀞𑀺𑀢𑀓𑁄𑀥𑀭𑀼𑀤𑁆𑀤𑀲𑀤𑀺𑀲𑀢𑁆𑀢𑀸 𑀓𑀤𑀸𑀘𑀺 𑀅𑀤𑀢𑀺 𑀖𑀲𑀢𑀻𑀢𑀺 𑀅𑀤𑁆𑀤𑀸. 𑀧𑀼𑀦𑀧𑁆𑀧𑀼𑀦𑀁 𑀲𑀢𑁆𑀢𑁂𑀲𑀼 𑀳𑀺𑀢𑀁 𑀯𑀲𑁆𑀲𑀢𑀻𑀢𑀺 𑀧𑀼𑀦𑀩𑁆𑀩𑀲𑀼, 𑀯𑀲𑁆𑀲 𑀲𑁂𑀘𑀦𑁂. 𑀧𑁄𑀲𑁂𑀢𑀺 𑀓𑁆𑀭𑀺𑀬𑀸𑀦𑀺, 𑀧𑁄𑀲𑁂𑀦𑁆𑀢𑁆𑀬𑀲𑁆𑀫𑀺𑀦𑁆𑀢𑀺 𑀯𑀸 𑀧𑀼𑀲𑁆𑀲𑁄. 𑀪𑀼𑀚𑀕𑀲𑀤𑀺𑀲𑀢𑁆𑀢𑀸 𑀦 𑀲𑀺𑀮𑀺𑀲𑁆𑀬𑀢𑁂 𑀦𑀸𑀮𑀺𑀗𑁆𑀕𑁆𑀬𑀢𑁂𑀢𑀺 𑀅𑀲𑀺𑀮𑁂𑀲𑁄.

𑀫𑀳𑀻𑀬𑀢𑁂 𑀓𑀸𑀭𑀺𑀬𑀢𑁆𑀣𑀺𑀓𑁂𑀳𑀻𑀢𑀺 𑀫𑀖𑀸 [𑀫𑀸𑀖𑀸 (𑀓.)], 𑀳𑀲𑁆𑀲 𑀖𑁄. 𑀨𑀮𑀁 𑀕𑀡𑁆𑀳𑀸𑀧𑁂𑀢𑀻𑀢𑀺 𑀨𑀕𑁆𑀕𑀼𑀦𑀻, 𑀬𑀼, 𑀈. 𑀤𑁆𑀯𑁂𑀢𑀺 𑀧𑀼𑀩𑁆𑀩𑀨𑀕𑁆𑀕𑀼𑀦𑀻, 𑀉𑀢𑁆𑀢𑀭𑀨𑀕𑁆𑀕𑀼𑀦𑀻 𑀘𑁂𑀢𑀺 𑀤𑁆𑀯𑁂. 𑀳𑀢𑁆𑀣𑀲𑀡𑁆𑀞𑀸𑀦𑀢𑀸𑀬 𑀳𑀢𑁆𑀣𑁄. 𑀢𑀘𑁆𑀙𑀓𑀲𑀤𑀺𑀲𑀢𑁆𑀢𑀸 𑀯𑀺𑀘𑀺𑀢𑁆𑀢𑀁 𑀨𑀮𑀁 𑀤𑀤𑀸𑀢𑀻𑀢𑀺 𑀘𑀺𑀢𑁆𑀢𑀸. 𑀲𑁄𑀪𑀦𑀸 𑀆𑀢𑀺, 𑀲𑀸𑀢𑀺 𑀯𑀸 𑀢𑀦𑀼𑀁 𑀓𑀭𑁄𑀢𑀺 𑀲𑀼𑀪𑀸𑀲𑀼𑀪𑀦𑁆𑀢𑀺 𑀲𑀸𑀢𑀺 [𑀲𑁆𑀯𑀸𑀢𑀺 (𑀓.)], 𑀲𑀼𑀪𑀸𑀲𑀼𑀪𑀨𑀮𑀤𑀸𑀦𑀢𑁄 𑀯𑀸 𑀲𑀸𑀢𑀺, ‘‘𑀲𑀸𑀢𑀺 𑀤𑀸𑀦𑀸𑀯𑀲𑀸𑀦𑁂𑀲𑀽’’𑀢𑀺 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂 𑀯𑀼𑀢𑁆𑀢𑀁, 𑀅𑀬𑀁 𑀤𑁆𑀯𑀻𑀲𑀼. 𑀯𑀺𑀲𑀤𑀺𑀲𑀁 𑀨𑀮𑀁 𑀔𑀡𑀢𑀻𑀢𑀺 𑀯𑀺𑀲𑀸𑀔𑀸, 𑀯𑀺𑀯𑀺𑀥𑀸 𑀯𑀸 𑀲𑀔𑀸 𑀫𑀺𑀢𑁆𑀢𑀸 𑀬𑀲𑁆𑀲𑀸 𑀲𑀸 𑀯𑀺𑀲𑀸𑀔𑀸. 𑀅𑀦𑀼𑀭𑀸𑀥𑀬𑀢𑀺 𑀲𑀁𑀲𑀺𑀚𑁆𑀛𑀢𑀺 𑀲𑀼𑀪𑀸𑀲𑀼𑀪𑀨𑀮𑀫𑁂𑀢𑀸𑀬𑀸𑀢𑀺 𑀅𑀦𑀼𑀭𑀸𑀥𑀸. 𑀕𑀼𑀡𑁂𑀳𑀺 𑀲𑀩𑁆𑀩𑀸𑀲𑀁 𑀯𑀼𑀟𑁆𑀠𑀢𑁆𑀢𑀸 𑀚𑁂𑀝𑁆𑀞𑀸. 𑀫𑀽𑀮𑀢𑀺 𑀧𑀢𑀺𑀝𑁆𑀞𑀸𑀢𑀺 𑀲𑀼𑀪𑀸𑀲𑀼𑀪𑀨𑀮𑀫𑁂𑀢𑁆𑀣𑀸𑀢𑀺 𑀫𑀽𑀮𑀁. 𑀆𑀲𑀸𑀴𑁆𑀳𑁄 𑀦𑀸𑀫 𑀪𑀢𑀻𑀦𑀁 𑀤𑀡𑁆𑀟𑁄, 𑀢𑀁𑀲𑀡𑁆𑀞𑀸𑀦𑀢𑁆𑀢𑀸 𑀆𑀲𑀸𑀴𑁆𑀳𑀸 𑀦𑀸𑀫 𑀤𑁆𑀯𑁂 𑀦𑀓𑁆𑀔𑀢𑁆𑀢𑀸 𑀧𑀼𑀩𑁆𑀩𑀸𑀲𑀸𑀴𑁆𑀳𑀉𑀢𑁆𑀢𑀭𑀸𑀲𑀸𑀴𑁆𑀳𑀯𑀲𑁂𑀦.

𑀲𑀯𑀢𑀺 𑀲𑀼𑀪𑀸𑀲𑀼𑀪𑀨𑀮𑀫𑁂𑀢𑁂𑀦𑀸𑀢𑀺 𑀲𑀯𑀡𑁄, 𑀲𑀯𑀡𑀁 𑀯𑀸. 𑀥𑀦𑀫𑁂𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀥𑀦𑀺𑀝𑁆𑀞𑀸, 𑀥𑀦𑀢𑀺 𑀯𑀸 𑀯𑀺𑀪𑀽𑀢𑀺 𑀦𑀺𑀥𑀸𑀦𑀁 𑀥𑀦𑀺𑀝𑁆𑀞𑀸. 𑀲𑀢𑀁 𑀪𑀺𑀲𑀚𑀸 𑀏𑀢𑁆𑀣, 𑀲𑀢𑀪𑀺𑀲𑀚𑀸𑀦𑀁 𑀯𑀸 𑀅𑀥𑀺𑀧𑀢𑀺 𑀲𑀢𑀪𑀺𑀲𑀚𑁄. 𑀪𑀤𑁆𑀤𑁄 𑀕𑁄, 𑀢𑀲𑁆𑀲𑁂𑀯 𑀧𑀤𑀸𑀦𑀺 𑀧𑀸𑀤𑀸 𑀅𑀲𑁆𑀲𑀁 𑀪𑀤𑁆𑀤𑀧𑀤𑀸, 𑀧𑀼𑀩𑁆𑀩𑀪𑀤𑁆𑀤𑀧𑀤𑀸 𑀤𑁆𑀯𑁂, 𑀉𑀢𑁆𑀢𑀭𑀪𑀤𑁆𑀤𑀧𑀤𑀸 𑀤𑁆𑀯𑁂, 𑀲𑀫𑀽𑀳𑁄 𑀘𑁂𑀲𑀁 𑀘𑀢𑀼𑀲𑀗𑁆𑀔𑁆𑀬𑀸𑀢𑀺 𑀩𑀳𑀼𑀯𑀘𑀦𑀁. 𑀭𑀸 𑀯𑀼𑀘𑁆𑀘𑀢𑀺 𑀥𑀦𑀁, 𑀢𑀩𑁆𑀩𑀦𑁆𑀢𑀢𑀸𑀬 𑀭𑁂𑀯𑀢𑀻, 𑀆𑀓𑀸𑀭𑀲𑁆𑀲𑁂, 𑀭𑁂𑀯𑀢𑁄 𑀯𑀸 𑀇𑀲𑀺𑀪𑁂𑀤𑁄, 𑀢𑀲𑁆𑀲 𑀅𑀧𑀘𑁆𑀘𑀁 𑀭𑁂𑀯𑀢𑀻.

𑁬𑁧. 𑀤𑁆𑀯𑀬𑀁 ¶ 𑀭𑀸𑀳𑀼𑀕𑁆𑀕𑀳𑁂. 𑀲𑁄 𑀯𑀼𑀘𑁆𑀘𑀢𑀺 𑀲𑀕𑁆𑀕𑁄, 𑀢𑀢𑁆𑀣 𑀪𑀸𑀢𑀻𑀢𑀺 𑀲𑁄𑀩𑁆𑀪𑀸𑀦𑀼. 𑀭𑀳𑀢𑀺 𑀘𑀦𑁆𑀤𑀸𑀤𑀻𑀦𑀁 𑀲𑁄𑀪𑀁 𑀚𑀳𑀸𑀧𑁂𑀢𑀻𑀢𑀺 𑀭𑀸𑀳𑀼. 𑀢𑀫𑁄, 𑀯𑀺𑀥𑀼𑀦𑁆𑀢𑀼𑀤𑁄, 𑀘𑀦𑁆𑀤𑀸𑀤𑁄, 𑀲𑁂𑀳𑀺𑀓𑁂𑀬𑁄𑀢𑀺𑀧𑀺 𑀭𑀸𑀳𑀼𑀲𑁆𑀲 𑀦𑀸𑀫𑀸𑀦𑀺.

𑀲𑀽𑀭, 𑀘𑀦𑁆𑀤, 𑀅𑀗𑁆𑀕𑀸𑀭𑀓, 𑀩𑀼𑀥, 𑀚𑀻𑀯, 𑀲𑀼𑀓𑁆𑀓, 𑀅𑀲𑀺𑀢, 𑀭𑀸𑀳𑀼, 𑀓𑁂𑀢𑀽𑀢𑀺 𑀏𑀢𑁂 𑀲𑀽𑀭𑀸𑀤𑀬𑁄 𑀦𑀯𑀕𑁆𑀕𑀳𑀸 𑀦𑀸𑀫.

𑀫𑁂𑀲𑀸𑀤𑀺𑀓𑁄 𑀤𑁆𑀯𑀸𑀤𑀲𑀓𑁄𑀝𑁆𑀞𑀸𑀲𑁄 𑀭𑀸𑀲𑀺 𑀦𑀸𑀫. 𑀆𑀤𑀺𑀦𑀸 𑀉𑀲𑀪, 𑀫𑁂𑀣𑀼𑀦, 𑀓𑀓𑁆𑀓𑀝, 𑀲𑀻𑀳, 𑀓𑀜𑁆𑀜𑀸, 𑀢𑀼𑀮𑀸, 𑀯𑀺𑀘𑁆𑀙𑀺𑀓, 𑀥𑀦𑀼, 𑀫𑀓𑀭, 𑀓𑀼𑀫𑁆𑀪, 𑀫𑀻𑀦𑁂 𑀲𑀗𑁆𑀕𑀡𑁆𑀳𑀸𑀢𑀺.

𑀤𑁆𑀯𑀬𑀁 𑀪𑀤𑁆𑀤𑀧𑀤𑀦𑀓𑁆𑀔𑀢𑁆𑀢𑀸𑀦𑀁 𑀦𑀸𑀫𑀁. 𑀧𑁄𑀝𑁆𑀞𑁄 𑀕𑁄 [𑀧𑀸𑀞𑁄 𑀪𑀤𑁆𑀤𑁄 𑀕𑁄 (𑀓.)], 𑀢𑀲𑁆𑀲𑁂𑀯 𑀧𑀤𑀸𑀦𑀺 𑀧𑀸𑀤𑀸 𑀅𑀲𑁆𑀲𑀁 𑀧𑁄𑀝𑁆𑀞𑀧𑀤𑀸.

𑁬𑁨-𑁬𑁩. 𑀧𑀚𑁆𑀚𑀤𑁆𑀯𑀬𑁂𑀦 𑀲𑀽𑀭𑀺𑀬𑀲𑁆𑀲 𑀦𑀸𑀫𑀸𑀦𑀺. 𑀆 𑀪𑀼𑀲𑁄 𑀤𑀺𑀧𑁆𑀧𑀢𑀻𑀢𑀺 𑀆𑀤𑀺𑀘𑁆𑀘𑁄, 𑀧𑁆𑀧𑀲𑁆𑀲 𑀘𑁆𑀘𑁄. 𑀮𑁄𑀓𑀸𑀦𑀁 𑀲𑀽𑀭𑀪𑀸𑀯𑀁 𑀚𑀦𑁂𑀢𑀻𑀢𑀺 𑀲𑀽𑀭𑀺𑀬𑁄. 𑀢𑀣𑀸 𑀲𑀽𑀭𑁄. 𑀲𑀢𑀁 𑀩𑀳𑀯𑁄 𑀭𑀁𑀲𑀬𑁄 𑀬𑀲𑁆𑀲 𑀲𑀢𑀭𑀁𑀲𑀺. 𑀤𑀺𑀯𑀸 𑀤𑀺𑀯𑀲𑀁 𑀓𑀭𑁄𑀢𑀻𑀢𑀺 𑀤𑀺𑀯𑀸𑀓𑀭𑁄, 𑀤𑀺𑀯𑀲𑁂 𑀯𑀸 𑀓𑀭𑁄 ¶ 𑀆𑀪𑀸 𑀬𑀲𑁆𑀲 𑀤𑀺𑀯𑀸𑀓𑀭𑁄, 𑀤𑀺𑀯𑀸𑀲𑀤𑁆𑀤𑁄𑀬𑀁 𑀲𑀩𑁆𑀩𑀓𑀸𑀭𑀓𑀯𑀘𑀦𑁄, 𑀦 𑀢𑀼 𑀆𑀥𑀸𑀭𑀯𑀘𑀦𑁄 𑀏𑀯. 𑀯𑀺𑀲𑁂𑀲𑁂𑀦 𑀭𑁄𑀘𑀢𑁂 𑀤𑀺𑀧𑁆𑀧𑀢𑁂𑀢𑀺 𑀯𑁂𑀭𑁄𑀘𑀦𑁄. 𑀤𑀺𑀦𑀁 𑀓𑀭𑁄𑀢𑀺, 𑀓𑀼𑀫𑀼𑀤𑀸𑀦𑀁 𑀯𑀸 𑀤𑀺𑀦𑀁 𑀫𑀸𑀓𑀼𑀮𑁆𑀬𑀁 𑀓𑀭𑁄𑀢𑀻𑀢𑀺 𑀤𑀺𑀦𑀓𑀭𑁄, 𑀉𑀡𑁆𑀳𑁄 𑀭𑀁𑀲𑀺 𑀬𑀲𑁆𑀲 𑀉𑀡𑁆𑀳𑀭𑀁𑀲𑀺. 𑀧𑀪𑀁 𑀓𑀭𑁄𑀢𑀻𑀢𑀺 𑀧𑀪𑀗𑁆𑀓𑀭𑁄.

𑀅𑀁𑀲𑀼𑀦𑁄 𑀫𑀸𑀮𑀸, 𑀲𑀸 𑀬𑀢𑁆𑀣 𑀅𑀢𑁆𑀣𑀺 𑀅𑀁𑀲𑀼𑀫𑀸𑀮𑀻. 𑀤𑀺𑀦𑀸𑀦𑀁 𑀧𑀢𑀺 𑀤𑀺𑀦𑀧𑀢𑀺. 𑀢𑀧𑀢𑀻𑀢𑀺 𑀢𑀧𑀦𑁄. 𑀭𑀯𑀦𑁆𑀢𑀺 𑀏𑀢𑁂𑀦 𑀲𑀢𑁆𑀢𑀸 𑀧𑀪𑀸𑀯𑀺𑀢𑁆𑀢𑀸𑀢𑀺 𑀭𑀯𑀺. 𑀪𑀸𑀦𑀼 𑀬𑀲𑁆𑀲 𑀅𑀢𑁆𑀣𑀻𑀢𑀺 𑀪𑀸𑀦𑀼𑀫𑀸. 𑀭𑀁𑀲𑀺 𑀬𑀲𑁆𑀲 𑀅𑀢𑁆𑀣𑀻𑀢𑀺 𑀭𑀁𑀲𑀺𑀫𑀸. 𑀪𑀁 𑀆𑀪𑀁 𑀓𑀭𑁄𑀢𑀺, 𑀢𑀸𑀲𑀁 𑀯𑀸 𑀆𑀓𑀭𑁄 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁 𑀪𑀸𑀓𑀭𑁄. 𑀪𑀸𑀢𑀺 𑀤𑀺𑀧𑁆𑀧𑀢𑀻𑀢𑀺 𑀪𑀸𑀦𑀼. 𑀤𑁂𑀯𑁂𑀳𑀺𑀧𑀺 𑀅𑀘𑁆𑀘𑀢𑁂 𑀧𑀽𑀚𑀻𑀬𑀢𑁂𑀢𑀺 𑀅𑀓𑁆𑀓𑁄. 𑀲𑀳𑀲𑁆𑀲𑀁 𑀩𑀳𑀯𑁄 𑀭𑀁𑀲𑀬𑁄 𑀬𑀲𑁆𑀲 𑀲𑀳𑀲𑁆𑀲𑀭𑀁𑀲𑀺. 𑀤𑁆𑀯𑀸𑀤𑀲𑀢𑁆𑀢𑀸, 𑀧𑀪𑀸𑀓𑀭𑁄, 𑀯𑀺𑀪𑀸𑀓𑀭𑁄, 𑀯𑀺𑀓𑀢𑁆𑀢𑀦𑁄 [𑀯𑀺𑀲𑁆𑀲𑀓𑀫𑁆𑀫𑀼𑀦𑀸 𑀯𑀺𑀓𑀢𑁆𑀢𑀺𑀢𑁄, 𑀓𑀫𑁆𑀫𑀦𑀺 𑀬𑀼 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)], 𑀫𑀢𑁆𑀢𑀡𑁆𑀟𑁄, 𑀤𑀺𑀯𑀫𑀡𑀺, 𑀢𑀭𑀡𑀺, 𑀫𑀺𑀢𑁆𑀢𑁄, 𑀘𑀺𑀢𑁆𑀭𑀪𑀸𑀦𑀼, 𑀯𑀺𑀪𑀸𑀯𑀲𑀼, 𑀕𑀳𑀧𑁆𑀧𑀢𑀺, 𑀳𑀁𑀲𑁄, 𑀲𑀯𑀺𑀢𑀸𑀇𑀘𑁆𑀘𑀸𑀤𑀻𑀦𑀺𑀧𑀺 𑀲𑀽𑀭𑀺𑀬𑀲𑁆𑀲 𑀦𑀸𑀫𑀸𑀦𑀺.

𑁬𑁪. 𑀧𑀚𑁆𑀚𑁂𑀦 𑀲𑀽𑀭𑀺𑀬𑀸𑀤𑀻𑀦𑀁 𑀭𑀁𑀲𑀺𑀧𑁆𑀧𑀪𑀸𑀦𑀁 𑀦𑀸𑀫𑀸𑀦𑀺. 𑀭𑀲𑀦𑁆𑀢𑀺 𑀢𑀁 𑀲𑀢𑁆𑀢𑀸𑀢𑀺 𑀭𑀁𑀲𑀺. 𑀆 𑀪𑀼𑀲𑁄 𑀪𑀸𑀢𑀻𑀢𑀺 𑀆𑀪𑀸. 𑀧𑀓𑀸𑀭𑁂𑀦 𑀪𑀸𑀢𑀻𑀢𑀺 𑀧𑀪𑀸. 𑀤𑀺𑀧𑁆𑀧𑀢𑀻𑀢𑀺 𑀤𑀺𑀢𑁆𑀢𑀺. 𑀭𑁄𑀘𑀢𑁂 𑀤𑀺𑀧𑁆𑀧𑀢𑁂𑀢𑀺 𑀭𑀼𑀘𑀺. 𑀤𑀻𑀥𑁆𑀬𑀢𑀺 𑀤𑀺𑀧𑁆𑀧𑀢𑀻𑀢𑀺 𑀤𑀻𑀥𑀺𑀢𑀺. 𑀤𑀺𑀧𑁆𑀧𑀢𑀻𑀢𑀺 𑀯𑀸 𑀤𑀻𑀥𑀺𑀢𑀺, 𑀧𑀲𑁆𑀲 𑀥𑁄, 𑀇𑀓𑀸𑀭𑀸𑀕𑀫𑁄. 𑀫𑀺𑀬𑁆𑀬𑀦𑁆𑀢𑁂 𑀔𑀼𑀤𑁆𑀤𑀚𑀦𑁆𑀢𑀯𑁄 𑀅𑀦𑁂𑀦𑁂𑀢𑀺 𑀫𑀭𑀻𑀘𑀺, 𑀈𑀘𑀺. 𑀅𑀲𑀢𑀺 𑀕𑀘𑁆𑀙𑀢𑀺 𑀤𑀺𑀲𑀦𑁆𑀢𑀦𑁆𑀢𑀺 𑀅𑀁𑀲𑀼, 𑀉𑀲𑁆𑀲𑀸𑀕𑀫𑁄. 𑀫𑀭𑀻𑀘𑀺𑀲𑀳𑀘𑀭𑀡𑀢𑁄 𑀤𑀻𑀥𑀺𑀢𑁆𑀬𑀸𑀤𑀬𑁄 [𑀔𑀮𑀺𑀢𑀧𑀸𑀞𑁄 (?), 𑀲𑀯𑀭𑀲𑀸𑀫𑀻 𑀢𑀼 𑀅𑀗𑁆𑀕𑀼𑀮𑀺 𑀓𑀸𑀓𑀮𑀺𑀲𑀸𑀭𑀺 𑀲𑀭𑀸𑀭𑀺 𑀢𑀼𑀫𑁆𑀩𑀺𑀅𑀭𑀺 𑀲𑀼𑀲𑀺 𑀤𑀻𑀫𑀺𑀢𑁆𑀬𑀢𑁆𑀢𑀬𑁄 𑀣𑀻𑀧𑀼𑀫𑁂𑀲𑀼 𑀇𑀘𑁆𑀘𑀸𑀳 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)] 𑀪𑀸𑀦𑀼 𑀅𑀁𑀲𑀼 𑀘 𑀤𑁆𑀯𑀻𑀲𑀼. 𑀫𑀬 𑀕𑀫𑀦𑀢𑁆𑀣𑁄 ¶ 𑀤𑀡𑁆𑀟𑀓𑁄 𑀥𑀸𑀢𑀼 [𑀤𑀡𑁆𑀟𑀓𑀧𑁆𑀧𑀓𑀭𑀡𑁂 𑀆𑀕𑀢𑀥𑀸𑀢𑀽𑀢𑀺 𑀅𑀢𑁆𑀣𑁄, 𑀦𑀺𑀭𑀼𑀢𑁆𑀢𑀺𑀲𑀸𑀭𑀫𑀜𑁆𑀚𑀼𑀲𑀸𑀝𑀻𑀓𑀸𑀬𑀁 𑁨𑁫𑁩.𑁪𑁧𑁩 𑀧𑀺𑀝𑁆𑀞𑁂𑀲𑀼 𑀧𑀲𑁆𑀲𑀺𑀢𑀩𑁆𑀩𑀁], 𑀔𑀧𑀘𑁆𑀘𑀬𑁄 𑀊𑀓𑀸𑀭𑀸𑀕𑀫𑁄, 𑀅𑀣 𑀯𑀸 𑀫𑀸 𑀫𑀸𑀦𑁂, 𑀉𑀔 𑀕𑀢𑁆𑀬𑀢𑁆𑀣𑁄 𑀤𑀡𑁆𑀟𑀓𑁄 𑀥𑀸𑀢𑀼 [𑀤𑀡𑁆𑀟𑀓𑀧𑁆𑀧𑀓𑀭𑀡𑁂 𑀆𑀕𑀢𑀥𑀸𑀢𑀽𑀢𑀺 𑀅𑀢𑁆𑀣𑁄, 𑀦𑀺𑀭𑀼𑀢𑁆𑀢𑀺𑀲𑀸𑀭𑀫𑀜𑁆𑀚𑀼𑀲𑀸𑀝𑀻𑀓𑀸𑀬𑀁 𑁨𑁫𑁩.𑁪𑁧𑁩 𑀧𑀺𑀝𑁆𑀞𑁂𑀲𑀼 𑀧𑀲𑁆𑀲𑀺𑀢𑀩𑁆𑀩𑀁], 𑀫𑀸𑀬 𑀫𑀸𑀦𑀸𑀬 𑀉𑀔𑀢𑀻𑀢𑀺 𑀫𑀬𑀽𑀔𑁄 [𑀫𑀸𑀧𑀲𑀁 𑀕𑀕𑀦𑀁 𑀧𑀫𑀸𑀡𑀬𑀁 𑀉𑀔𑀢𑀺 𑀕𑀘𑁆𑀙𑀢𑀻𑀢𑀺 𑀧𑀺𑀲𑁄𑀤𑀭𑀸𑀤𑀺 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)]. 𑀓𑀺𑀭𑀢𑀺 𑀢𑀺𑀫𑀺𑀭𑀁 𑀓𑀺𑀭𑀡𑁄. 𑀓𑀺𑀭𑀢𑀺 𑀢𑀺𑀫𑀺𑀭𑀁 𑀓𑀭𑁄.

𑁬𑁫. 𑀤𑁆𑀯𑀬𑀁 𑀆𑀤𑀺𑀘𑁆𑀘𑀫𑀡𑁆𑀟𑀮𑁄𑀢𑀺𑀔𑁆𑀬𑀸𑀢𑁂 𑀉𑀧𑁆𑀧𑀸𑀢𑀸𑀤𑀺𑀚𑀸𑀢𑁂 𑀭𑀁𑀲𑀺𑀫𑀡𑁆𑀟𑀮𑁂. 𑀲𑀽𑀭𑀺𑀬𑀲𑁆𑀲 𑀧𑀭𑀺 𑀲𑀫𑀦𑁆𑀢𑀢𑁄 𑀥𑀻𑀬𑀢𑁂 𑀧𑀭𑀺𑀥𑀻, 𑀧𑀭𑀺 𑀲𑀫𑀦𑁆𑀢𑀢𑁄 𑀯𑀺𑀲𑀢𑀻𑀢𑀺 𑀧𑀭𑀺𑀯𑁂𑀲𑁄, 𑀲𑀽𑀭𑀺𑀬𑀁 𑀯𑀸 𑀧𑀭𑀺𑀯𑁂𑀞𑀬𑀢𑀻𑀢𑀺 𑀧𑀭𑀺𑀯𑁂𑀲𑁄. 𑀞𑀲𑁆𑀲 𑀲𑁄. 𑀉𑀧𑀲𑀽𑀭𑀺𑀬𑀓𑀁, 𑀫𑀡𑁆𑀟𑀮𑀦𑁆𑀢𑀺 𑀤𑁆𑀯𑁂𑀧𑀺 𑀧𑀭𑀺𑀥𑀺𑀦𑁄 𑀦𑀸𑀫𑀸𑀦𑀺.

𑀤𑁆𑀯𑀬𑀁 𑀫𑀭𑀻𑀘𑀺𑀓𑀸𑀬𑀁. 𑀫𑀭𑀻𑀘𑀺𑀲𑀤𑀺𑀲𑀢𑀸𑀬 𑀫𑀭𑀻𑀘𑀺. 𑀫𑀺𑀕𑀸𑀦𑀁 𑀢𑀡𑁆𑀳𑀸 𑀧𑀺𑀧𑀸𑀲𑀸 𑀬𑀲𑁆𑀲𑀁 𑀚𑀮𑀸𑀪𑀸𑀲𑀢𑁆𑀢𑀸 𑀲𑀸 𑀫𑀺𑀕𑀢𑀡𑁆𑀳𑀺𑀓𑀸.

𑀲𑀽𑀭𑀺𑀬𑀲𑁆𑀲 𑀉𑀤𑀬𑀢𑁄 𑀧𑀼𑀩𑁆𑀩𑁂 𑀉𑀝𑁆𑀞𑀺𑀢𑀭𑀁𑀲𑀺 𑀉𑀕𑁆𑀕𑀢𑀭𑀁𑀲𑀺 𑀅𑀭𑀼𑀡𑁄 𑀦𑀸𑀫 𑀲𑀺𑀬𑀸. 𑀅𑀭𑀼𑀡𑀯𑀡𑁆𑀡𑀢𑀸𑀬 𑀅𑀭𑀢𑀺 𑀕𑀘𑁆𑀙𑀢𑀻𑀢𑀺 𑀅𑀭𑀼𑀡𑁄. 𑀲𑀽𑀭𑀲𑀽𑀢𑁄, 𑀅𑀦𑀽𑀭𑀼, 𑀓𑀲𑁆𑀲𑀧𑁂𑀬𑁆𑀬𑁄, 𑀓𑀲𑁆𑀲𑀧𑀺, 𑀕𑀭𑀼𑀟𑀸𑀕𑁆𑀕𑀚𑁄𑀢𑀺𑀧𑀺 𑀅𑀭𑀼𑀡𑀲𑁆𑀲 𑀦𑀸𑀫𑀸𑀦𑀻𑀢𑀺. 𑀆𑀓𑀸𑀲𑀯𑀡𑁆𑀡𑀦𑀸.

𑁬𑁬-𑁬𑁭. 𑀘𑀢𑀼𑀓𑁆𑀓𑀁 ¶ 𑀓𑀸𑀮𑁂. 𑀓𑀮𑁆𑀬𑀦𑁆𑀢𑁂 𑀲𑀗𑁆𑀔𑁆𑀬𑀸𑀬𑀦𑁆𑀢𑁂 𑀆𑀬𑀼𑀧𑁆𑀧𑀫𑀸𑀡𑀸𑀤𑀬𑁄 𑀅𑀦𑁂𑀦𑀸𑀢𑀺 𑀓𑀸𑀮𑁄, 𑀓𑀭𑀡𑀁 𑀯𑀸 𑀓𑀸𑀭𑁄, 𑀪𑀸𑀯𑁂 𑀡𑁄, 𑀲𑁄 𑀏𑀯 𑀓𑀸𑀮𑁄, 𑀦 𑀳𑀺 𑀓𑁆𑀭𑀺𑀬𑀸𑀯𑀺𑀦𑀺𑀫𑀼𑀢𑁆𑀢𑁄 𑀓𑀸𑀮𑁄 𑀦𑀸𑀫 𑀓𑁄𑀘𑀺 𑀅𑀢𑁆𑀣𑀺, 𑀫𑀳𑀸𑀓𑀸𑀮𑀲𑁆𑀲 𑀧𑀦 𑀲𑀲𑁆𑀲𑀢𑀪𑀸𑀯𑀢𑁄 𑀅𑀢𑀻𑀢𑀸𑀤𑀺𑀯𑁄𑀳𑀸𑀭𑁄 𑀦𑀢𑁆𑀣𑁂𑀯𑀸𑀢𑀺 𑀅𑀯𑀬𑀯𑀓𑀸𑀮𑀸𑀦𑀁 𑀲𑀫𑀽𑀳𑀪𑀸𑀯𑀢𑁄 𑀲𑁄𑀧𑀺 ‘‘𑀓𑀸𑀮𑁄’’𑀢𑀺 𑀯𑀼𑀢𑁆𑀢𑁄. 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀁 𑀅𑀲𑀢𑀺 𑀔𑁂𑀧𑁂𑀢𑀻𑀢𑀺 𑀅𑀤𑁆𑀥𑀸, 𑀢𑀲𑁆𑀲 𑀥𑁄, 𑀆𑀓𑀸𑀭𑀦𑁆𑀢𑁄𑀬𑀁 𑀅𑀤𑁆𑀥𑀸𑀲𑀤𑁆𑀤𑁄 𑀧𑀼𑀫𑁂. 𑀧𑀼𑀦𑀧𑁆𑀧𑀼𑀦𑀁 𑀏𑀢𑀻𑀢𑀺 𑀲𑀫𑀬𑁄. 𑀯𑀺𑀦𑀸𑀲𑀁 𑀮𑀸𑀢𑀻𑀢𑀺 𑀯𑁂𑀮𑀸, 𑀯𑀡𑁆𑀡𑀮𑁄𑀧𑁄. 𑀤𑀺𑀝𑁆𑀞𑁄, 𑀅𑀦𑁂𑀳𑁄𑀢𑀺𑀧𑀺 𑀓𑀸𑀮𑀲𑁆𑀲𑁂𑀯𑀦𑀸𑀫𑀸𑀦𑀺.

𑀔𑀡𑀸𑀤𑀬𑁄 𑀧𑀦 𑀢𑀩𑁆𑀩𑀺𑀲𑁂𑀲𑀸 𑀢𑀲𑁆𑀲 𑀓𑀸𑀮𑀲𑁆𑀲 𑀯𑀺𑀲𑁂𑀲𑀸 𑀪𑁂𑀤𑀸. 𑀓𑁂 𑀢𑁂, 𑀓𑀺𑀢𑁆𑀢𑀓𑀧𑁆𑀧𑀫𑀸𑀡𑀸 𑀘𑁂𑀢𑁆𑀬𑀸𑀳 ‘‘𑀔𑀡𑁄’’𑀇𑀘𑁆𑀘𑀸𑀤𑀺. 𑀤𑀲𑀳𑀺 𑀅𑀘𑁆𑀙𑀭𑀸𑀳𑀺 𑀅𑀗𑁆𑀕𑀼𑀮𑀺𑀨𑁄𑀝𑀦𑁂𑀳𑀺 𑀮𑀓𑁆𑀔𑀺𑀢𑁄 𑀓𑀸𑀮𑁄 𑀔𑀡𑁄 𑀦𑀸𑀫, 𑀔𑀡𑀼 𑀳𑀺𑀁𑀲𑀸𑀬𑀁, 𑀔𑀡𑁄𑀢𑀻𑀢𑀺 𑀔𑀡𑁄, 𑀅. 𑀤𑀲 𑀔𑀡𑀸 𑀮𑀬𑁄 𑀦𑀸𑀫 𑀪𑀯𑁂 𑀪𑀯𑀦𑁆𑀢𑀺, 𑀏𑀢𑁂𑀦 𑀯𑀸 𑀯𑀘𑀦𑁂𑀦 𑀯𑀺𑀓𑀪𑀺𑀲𑀗𑁆𑀔𑁆𑀬𑀸𑀧𑁂𑀓𑁆𑀔𑀺𑀦𑁄𑀧𑀺 𑀯𑀸𑀘𑀓𑀸 𑀲𑀦𑁆𑀢𑀻𑀢𑀺 𑀕𑀫𑁆𑀬𑀢𑁂. 𑀮𑀬𑀢𑀺 𑀕𑀘𑁆𑀙𑀢𑀺, 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀁 𑀮𑀼𑀦𑀦𑁆𑀢𑁄 𑀯𑀸 𑀅𑀬𑀢𑀺 𑀕𑀘𑁆𑀙𑀢𑀻𑀢𑀺 𑀮𑀬𑁄. 𑀤𑀲 𑀮𑀬𑀸 𑀔𑀡𑀮𑀬𑁄 𑀦𑀸𑀫, 𑀔𑀡𑀮𑀬𑀸𑀦𑀁 𑀲𑀫𑀽𑀳𑀪𑀸𑀯𑀢𑁄. 𑀢𑁂 𑀤𑀲 𑀔𑀡𑀮𑀬𑀸 𑀫𑀼𑀳𑀼𑀢𑁆𑀢𑁄 𑀦𑀸𑀫 𑀲𑀺𑀬𑀸 𑀲𑀺𑀬𑀼𑀁 𑀯𑀸, 𑀅𑀬𑀫𑀦𑀺𑀢𑁆𑀣𑀻. 𑀳𑀼𑀘𑁆𑀙 𑀓𑁄𑀝𑀺𑀮𑁆𑀬𑁂 ¶ , 𑀓𑀼𑀝𑀺𑀮𑀬𑀢𑀺 𑀭𑀢𑁆𑀢𑀺𑀤𑀺𑀯𑀲𑁂 𑀲𑀼𑀪𑀸𑀲𑀼𑀪𑀤𑀲𑁆𑀲𑀦𑀢𑁄𑀢𑀺 𑀫𑀼𑀳𑀼𑀢𑁆𑀢𑁄, 𑀢𑁄, 𑀥𑀸𑀢𑀼𑀬𑀸𑀤𑀺𑀫𑁆𑀳𑀺 𑀫𑀼𑀓𑀸𑀭𑀸𑀕𑀫𑁄, 𑀘𑁆𑀙𑀮𑁄𑀧𑁄 𑀘. 𑀢𑁂 𑀤𑀲 𑀫𑀼𑀳𑀼𑀢𑁆𑀢𑀸 𑀔𑀡𑀫𑀼𑀳𑀼𑀢𑁆𑀢𑁄 𑀦𑀸𑀫.

𑀢𑀺𑀓𑀁 𑀤𑀺𑀦𑁂. 𑀤𑀺𑀩𑁆𑀩𑀦𑁆𑀢𑀺 𑀓𑀻𑀴𑀦𑁆𑀢𑁆𑀬𑀲𑁆𑀫𑀺𑀁 𑀤𑀺𑀯𑀲𑁄, 𑀲𑁄. 𑀦 𑀚𑀳𑀸𑀢𑀺 𑀧𑀘𑁆𑀘𑀸𑀕𑀫𑀦𑀁 𑀅𑀳𑀁. 𑀆𑀤𑀤𑀸𑀢𑀺 𑀦𑀺𑀩𑁆𑀬𑀸𑀧𑀸𑀭𑀦𑁆𑀢𑀺 𑀤𑀺𑀦𑀁, 𑀇𑀦𑁄, 𑀆𑀮𑁄𑀧𑁄 𑀘, 𑀤𑀺𑀩𑁆𑀩𑀢𑀺 𑀯𑀸 𑀏𑀢𑁆𑀣𑀸𑀢𑀺 𑀤𑀺𑀦𑀁, 𑀯𑀲𑁆𑀲 𑀦𑁄. 𑀖𑀲𑀭𑁄 [𑀖𑀲𑀢𑀺 𑀅𑀦𑁆𑀥𑀓𑀸𑀭𑀁 𑀭𑁄 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)], 𑀯𑀸𑀲𑀭𑁄𑀢𑀺𑀧𑀺 𑀤𑀺𑀦𑀲𑁆𑀲 𑀦𑀸𑀫𑀸𑀦𑀺.

𑁬𑁮. 𑀓𑀮𑁆𑀮𑀦𑁆𑀢𑀁 𑀧𑀘𑁆𑀘𑀽𑀲𑁂. 𑀧𑀪𑀸𑀢𑁆𑀬𑀲𑁆𑀫𑀺𑀁 𑀮𑁄𑀓𑁄𑀢𑀺 𑀧𑀪𑀸𑀢𑀁. 𑀢𑀣𑀸 𑀯𑀺𑀪𑀸𑀢𑀁. 𑀉𑀲 𑀭𑀼𑀚𑀸𑀬𑀁, 𑀧𑀘𑁆𑀘𑀽𑀲𑀢𑀺 𑀯𑀺𑀦𑀸𑀲𑁂𑀢𑀺 𑀢𑀺𑀫𑀺𑀭𑀦𑁆𑀢𑀺 𑀧𑀘𑁆𑀘𑀽𑀲𑁄. 𑀓𑀮𑁆𑀬𑀦𑁆𑀢𑁂 𑀲𑀗𑁆𑀔𑁆𑀬𑀸𑀬𑀦𑁆𑀢𑁂 𑀅𑀦𑁂𑀦 𑀲𑀗𑁆𑀔𑁆𑀬𑀸𑀤𑀬𑁄𑀢𑀺 𑀓𑀮𑁆𑀮𑀁. 𑀅𑀳𑁄𑀫𑀼𑀔𑀁, 𑀊𑀲𑁄𑀢𑀺𑀧𑀺 𑀧𑀘𑁆𑀘𑀽𑀲𑀲𑁆𑀲 𑀦𑀸𑀫𑀸𑀦𑀺.

𑀤𑁆𑀯𑀬𑀁 𑀧𑀤𑁄𑀲𑁂. 𑀤𑁄𑀲𑀸𑀬 𑀭𑀢𑁆𑀢𑀺𑀬𑀸 𑀆𑀭𑀫𑁆𑀪𑁄 𑀅𑀪𑀺𑀤𑁄𑀲𑁄. 𑀤𑁄𑀲𑀸𑀬 𑀭𑀢𑁆𑀢𑀺𑀬𑀸 𑀧𑀸𑀭𑀫𑁆𑀪𑁄 𑀧𑀤𑁄𑀲𑁄. 𑀅𑀪𑀺𑀥𑀸𑀦𑀢𑁄 𑀧𑀸𑀲𑀤𑁆𑀤𑀲𑁆𑀲 𑀧𑀼𑀩𑁆𑀩𑀦𑀺𑀧𑀸𑀢𑁄, 𑀅𑀧𑁆𑀧𑀥𑀸𑀦𑀭𑀲𑁆𑀲𑁄 𑀘, 𑀅𑀣 𑀯𑀸 𑀅𑀪𑀺𑀤𑀼𑀲𑁆𑀲𑀦𑁆𑀢𑀺 𑀧𑀤𑀼𑀲𑁆𑀲𑀦𑁆𑀢𑀺 𑀘 𑀬𑀢𑁆𑀣 𑀲𑀩𑁆𑀩𑀓𑀫𑁆𑀫𑀸𑀦𑀺 𑀅𑀪𑀺𑀤𑁄𑀲𑁄 𑀧𑀤𑁄𑀲𑁄 𑀘.

𑀢𑀺𑀓𑀁 𑀲𑀸𑀬𑀦𑁆𑀳𑁂. 𑀲𑀸𑀬𑀢𑀺 𑀤𑀺𑀦𑀁 𑀅𑀯𑀲𑀸𑀬𑀢𑀻𑀢𑀺 𑀲𑀸𑀬𑁄, 𑀲𑀸𑀬𑀦𑁆𑀢𑁄 𑀯𑀸 𑀤𑀺𑀦𑀦𑁆𑀢𑀁 𑀓𑀭𑁄𑀦𑁆𑀢𑁄 𑀅𑀬𑀢𑀻𑀢𑀺 𑀲𑀸𑀬𑁄, 𑀧𑀼𑀦𑁆𑀦𑀧𑀼𑀁𑀲𑀓𑁂. 𑀲𑀫𑁆𑀫𑀸𑀛𑀸𑀬𑀦𑁆𑀢𑀺 𑀢𑀁 𑀲𑀜𑁆𑀛𑀸, (‘‘𑀩𑁆𑀭𑀳𑁆𑀫𑀼𑀦𑁄 𑀢𑀦𑀼 𑀧𑀺𑀢𑀸 𑀮𑁄𑀓𑀲𑁆𑀲 𑀚𑀦𑁂𑀢𑁆𑀢𑀻’’𑀢𑀺 𑀳𑀺 𑀆𑀕𑀫𑁄 𑀦𑀺𑀓𑀸𑀬𑀦𑁆𑀢𑀭𑀺𑀓𑀸𑀦𑀁.) ¶ [( ) 𑀏𑀢𑁆𑀣𑀦𑁆𑀢𑀭𑁂 𑀧𑀸𑀞𑁄 𑀅𑀥𑀺𑀓𑁄 𑀯𑀺𑀬 𑀤𑀺𑀲𑁆𑀲𑀢𑀺] 𑀤𑀺𑀦𑀸𑀦𑀁 𑀅𑀘𑁆𑀘𑀬𑁄 𑀅𑀢𑀺𑀓𑁆𑀓𑀫𑁄, 𑀅𑀯𑀲𑀸𑀦𑀁 𑀯𑀸 𑀤𑀺𑀦𑀘𑁆𑀘𑀬𑁄. 𑀤𑀺𑀦𑀦𑁆𑀢𑁄𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫𑀁.

𑀧𑀼𑀩𑁆𑀩𑀡𑁆𑀳𑀸𑀧𑀭𑀡𑁆𑀳𑀫𑀚𑁆𑀛𑀦𑁆𑀳𑀯𑀲𑁂𑀦 𑀢𑀺𑀯𑀺𑀥𑀸 𑀲𑀜𑁆𑀛𑀸 [𑀅𑀫𑀭 𑁪.𑁩]. 𑀧𑀼𑀩𑁆𑀩𑀜𑁆𑀘 𑀢𑀁 𑀅𑀳𑀜𑁆𑀘𑀸𑀢𑀺 𑀧𑀼𑀩𑁆𑀩𑀡𑁆𑀳𑀁. 𑀅𑀧𑀭𑀜𑁆𑀘 𑀢𑀁 𑀫𑀚𑁆𑀛𑀜𑁆𑀘 𑀢𑀁 𑀅𑀳𑀜𑁆𑀘𑁂𑀢𑀺 𑀅𑀧𑀭𑀡𑁆𑀳𑀁 𑀫𑀚𑁆𑀛𑀦𑁆𑀳𑀁. 𑀲𑀩𑁆𑀩𑀢𑁆𑀭𑀸𑀯𑀬𑀯𑁂 𑀲𑀫𑀼𑀤𑀸𑀬𑁄𑀧𑀘𑀸𑀭𑀢𑁄 𑀅𑀳𑀲𑁆𑀲𑁂𑀓𑀤𑁂𑀲𑁂 𑀅𑀳𑀲𑀤𑁆𑀤𑁄𑀢𑀺 𑀓𑀫𑁆𑀫𑀥𑀸𑀭𑀬𑁄, 𑀢𑀸𑀲𑀁 𑀢𑀺𑀲𑁆𑀲𑀦𑁆𑀦𑀁 𑀲𑀜𑁆𑀛𑀸𑀦𑀁 𑀲𑀫𑀸𑀳𑀸𑀭𑁄𑀢𑀺 𑀲𑀜𑁆𑀛𑀫𑀺𑀢𑁆𑀬𑀼𑀘𑁆𑀘𑀢𑁂. 𑀲𑀫𑀸𑀳𑀭𑀡𑀁 𑀲𑀫𑀸𑀳𑀸𑀭𑁄, 𑀏𑀓𑀻𑀪𑀸𑀯𑁄, 𑀲𑁄 𑀘 𑀪𑀺𑀦𑁆𑀦𑀓𑀸𑀮𑀸𑀦𑀁 𑀦 𑀪𑀯𑀢𑀻𑀢𑀺 𑀩𑀼𑀤𑁆𑀥𑀺𑀬𑀸 𑀲𑀫𑀓𑀸𑀮𑀕𑁆𑀕𑀳𑀡𑀢𑁄 𑀏𑀓𑀓𑀸𑀮𑀢𑁆𑀢𑀸 𑀢𑀲𑁆𑀫𑀺𑀁 𑀅𑀪𑀺𑀥𑁂𑀬𑁆𑀬𑁂 𑀤𑀺𑀕𑀼𑀲𑀫𑀸𑀲𑁄, 𑀢𑀣𑀸 𑀳𑀺 𑀲𑀫𑀸𑀳𑀸𑀭𑁄 𑀲𑀫𑀽𑀳𑁄 𑀢𑀁𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀺𑀬𑀸𑀬𑁂𑀯 𑀪𑀯𑀺𑀢𑀩𑁆𑀩𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀆𑀘𑀭𑀺𑀬𑁄 𑀦 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁄 𑀅𑀬𑀦𑁆𑀢𑀺 𑀆𑀓𑀸𑀭𑀲𑁆𑀲𑀸𑀧𑁆𑀧𑀥𑀸𑀦𑁂 𑀭𑀲𑁆𑀲𑀢𑁆𑀢𑀦𑁆𑀢𑀺 𑀲𑀜𑁆𑀛𑀁. 𑀲𑀫𑀸𑀳𑀸𑀭𑁄 𑀪𑀸𑀯𑁄 𑀢𑀲𑁆𑀲𑁂𑀓𑀢𑁆𑀢𑀸 𑀏𑀓𑀯𑀘𑀦𑀁, 𑀓𑀫𑁆𑀫𑀯𑀘𑀦𑁂 𑀢𑀼 𑀲𑀫𑀸𑀳𑀸𑀭𑁂 𑀢𑀺𑀲𑁆𑀲𑁄 𑀲𑀜𑁆𑀛𑀸 𑀲𑀫𑀸𑀳𑀝𑀸𑀢𑀺 𑀧𑀞𑀫𑀦𑁆𑀢𑀸𑀦𑀁 𑀲𑀫𑀸𑀲𑁂 𑀲𑀧𑀤𑀢𑁆𑀣𑀧𑀸𑀥𑀸𑀦𑁆𑀬𑀸 𑀩𑀳𑀼𑀯𑀘𑀦𑀁, 𑀭𑀲𑁆𑀲𑀸𑀪𑀸𑀯𑁄 𑀘.

𑁬𑁯. 𑀧𑀜𑁆𑀘𑀓𑀁 𑀭𑀢𑁆𑀢𑀺𑀬𑀁. 𑀦𑀺𑀲𑀢𑀺 𑀢𑀦𑀼𑀁 𑀓𑀭𑁄𑀢𑀺 𑀲𑀩𑁆𑀩𑀩𑁆𑀬𑀸𑀧𑀸𑀭𑀁 𑀦𑀺𑀲𑀸. 𑀭𑀚𑁆𑀚𑀦𑁆𑀢𑀺 𑀭𑀸𑀕𑀺𑀦𑁄 𑀅𑀢𑁆𑀭 𑀭𑀚𑀦𑀻, 𑀬𑀼, 𑀈. 𑀭𑀸𑀢𑀺 𑀕𑀡𑁆𑀳𑀸𑀢𑀺 𑀅𑀩𑁆𑀬𑀸𑀧𑀸𑀭𑀦𑁆𑀢𑀺 𑀭𑀢𑁆𑀢𑀺,𑀢𑀺, 𑀭𑀚𑁆𑀚𑀦𑁆𑀢𑀺 𑀯𑀸 𑀏𑀢𑁆𑀣 𑀭𑀢𑁆𑀢𑀺. 𑀧𑀞𑀫𑀫𑀚𑁆𑀛𑀺𑀫𑀧𑀘𑁆𑀙𑀺𑀫𑀬𑀸𑀫𑀯𑀲𑁂𑀦 𑀢𑀬𑁄 𑀬𑀸𑀫𑀸 𑀧𑀳𑀸𑀭𑀸 𑀬𑀲𑁆𑀲𑀸 𑀢𑀺𑀬𑀸𑀫𑀸. 𑀲𑀁𑀯𑀼𑀡𑁄𑀢𑀺 𑀤𑀺𑀦𑀁 𑀲𑀁𑀯𑀭𑀻. 𑀦𑀺𑀲𑀻𑀣𑀺𑀦𑀻, 𑀔𑀡𑀤𑀸, 𑀔𑀧𑀸, 𑀯𑀺𑀪𑀸𑀯𑀭𑀻, 𑀢𑀫𑀲𑁆𑀲𑀺𑀦𑀻, 𑀬𑀸𑀫𑀺𑀦𑀻, 𑀢𑀫𑀻𑀇𑀘𑁆𑀘𑀸𑀤𑀻𑀦𑀺𑀧𑀺 𑀭𑀢𑁆𑀢𑀺𑀬𑀸 𑀦𑀸𑀫𑀸𑀦𑀺.

𑀘𑀦𑁆𑀤𑀺𑀓𑀸𑀬𑀼𑀢𑁆𑀢𑀸 ¶ 𑀘𑀦𑁆𑀤𑀧𑁆𑀧𑀪𑀸𑀬 𑀬𑀼𑀢𑁆𑀢𑀸 𑀭𑀢𑁆𑀢𑀺 𑀚𑀼𑀡𑁆𑀳𑀸 𑀦𑀸𑀫, 𑀚𑀼𑀡𑁆𑀳𑀸𑀬𑁄𑀕𑀢𑁄 𑀚𑀼𑀡𑁆𑀳𑀸. 𑀢𑀫𑁄 𑀉𑀲𑁆𑀲𑀦𑁆𑀦𑁄 𑀬𑀲𑁆𑀲𑀁 𑀲𑀸 𑀢𑀫𑀼𑀲𑁆𑀲𑀦𑁆𑀦𑀸 𑀭𑀢𑁆𑀢𑀺 𑀢𑀺𑀫𑀺𑀲𑀺𑀓𑀸 𑀦𑀸𑀫, 𑀢𑀺𑀫𑀺𑀲𑀁 𑀉𑀲𑁆𑀲𑀦𑁆𑀦𑀁 𑀏𑀢𑁆𑀣𑀸𑀢𑀺 𑀢𑀺𑀫𑀺𑀲𑀺𑀓𑀸, 𑀉𑀧𑀥𑀸𑀬 𑀇𑀢𑁆𑀢𑀜𑁆𑀘.

𑁭𑁦. 𑀢𑀺𑀓𑀁 𑀅𑀟𑁆𑀠𑀭𑀢𑁆𑀢𑀺𑀬𑀁. 𑀫𑀚𑁆𑀛𑀺𑀫𑀸𑀭𑀢𑁆𑀢𑀺 𑀓𑀫𑁆𑀫𑀪𑀽𑀢𑀸 ‘‘𑀦𑀺𑀲𑀻𑀣𑁄, 𑀅𑀟𑁆𑀠𑀭𑀢𑁆𑀢𑁄, 𑀫𑀳𑀸𑀦𑀺𑀲𑀸’’𑀢𑀺 𑀘 𑀯𑀼𑀘𑁆𑀘𑀢𑀺. 𑀦𑀺𑀲𑁆𑀲𑀢𑁂 𑀲𑀬𑀢𑁂 𑀅𑀲𑁆𑀫𑀺𑀁 𑀦𑀺𑀲𑀻𑀣𑁄. 𑀅𑀟𑁆𑀠𑀜𑁆𑀘 𑀢𑀁 𑀭𑀢𑁆𑀢𑀺 𑀘𑀸𑀢𑀺 𑀅𑀟𑁆𑀠𑀭𑀢𑁆𑀢𑁄, 𑀭𑀢𑁆𑀢𑁂𑀓𑀤𑁂𑀲𑁂 𑀭𑀢𑁆𑀢𑀺𑀲𑀤𑁆𑀤𑁄, 𑀭𑀢𑁆𑀢𑀺𑀬𑀸 𑀅𑀟𑁆𑀠𑀦𑁆𑀢𑀺 𑀯𑀸 𑀅𑀟𑁆𑀠𑀭𑀢𑁆𑀢𑁄. 𑀫𑀳𑀢𑀻 𑀘 𑀲𑀸 𑀦𑀺𑀲𑀸 𑀘𑀸𑀢𑀺 𑀫𑀳𑀸𑀦𑀺𑀲𑀸.

𑀘𑀢𑀼𑀓𑁆𑀓𑀁 𑀅𑀦𑁆𑀥𑀓𑀸𑀭𑁂. 𑀅𑀦𑁆𑀥𑀁 𑀳𑀢𑀁 𑀤𑀺𑀝𑁆𑀞𑀲𑀢𑁆𑀢𑀺𑀓𑀁 𑀮𑁄𑀓𑀁 𑀓𑀭𑁄𑀢𑀻𑀢𑀺 𑀅𑀦𑁆𑀥𑀓𑀸𑀭𑁄. 𑀢𑀫𑀢𑀻𑀢𑀺 𑀢𑀫𑁄, 𑀅𑀣 𑀯𑀸 𑀢𑀫𑀦𑁆𑀢𑀺 𑀆𑀓𑀗𑁆𑀔𑀦𑁆𑀢𑀺 𑀭𑀢𑀺𑀁 𑀮𑁄𑀓𑀸 𑀏𑀢𑁆𑀣 𑀢𑀫𑁄, 𑀢𑀫𑀼 𑀆𑀓𑀗𑁆𑀔𑀸𑀬𑀁, 𑀢𑀫𑀲𑀤𑁆𑀤𑁄 𑀅𑀦𑀺𑀢𑁆𑀣𑀻, 𑀢𑀁𑀲𑀳𑀘𑀭𑀡𑀢𑁄 𑀅𑀦𑁆𑀥𑀓𑀸𑀭𑁄𑀧𑀺. 𑀢𑀺𑀫𑀺𑀲𑀁 𑀇𑀲𑁄, 𑀅𑀣 𑀯𑀸 𑀢𑀺𑀫𑀼 𑀢𑁂𑀫𑀦𑁂, 𑀢𑀺𑀫𑀦𑁆𑀢𑀺 𑀏𑀢𑁆𑀣 𑀭𑀸𑀕𑁂𑀦𑀸𑀢𑀺 𑀢𑀺𑀫𑀺𑀲𑀁. 𑀢𑀺𑀫𑀺𑀭𑀁, 𑀧𑀼𑀩𑁆𑀩𑁂𑀯 𑀇𑀭𑀧𑀘𑁆𑀘𑀬𑁄.

𑁭𑁧. 𑀘𑀢𑀼𑀤𑁆𑀤𑀲𑀦𑁆𑀦𑀁 𑀭𑀢𑁆𑀢𑀻𑀦𑀁 𑀧𑀽𑀭𑀡𑀻 𑀘𑀢𑀼𑀤𑁆𑀤𑀲𑀻𑀲𑀗𑁆𑀔𑀸𑀢𑁄 𑀓𑀸𑀴𑀧𑀓𑁆𑀔𑁄 𑀘 𑀏𑀓𑀕𑁆𑀖𑀦𑁄 𑀯𑀦𑀲𑀡𑁆𑀟𑁄 𑀘 𑀫𑁂𑀖𑀧𑀝𑀮𑀜𑁆𑀘 𑀅𑀟𑁆𑀠𑀭𑀢𑁆𑀢𑀺 𑀘 𑀏𑀢𑁂𑀳𑀺 𑀘𑀢𑀽𑀳𑀺 𑀲𑀫𑀦𑁆𑀦𑀸𑀕𑀢𑁄 𑀢𑀫𑁄 𑀘𑀢𑀼𑀭𑀗𑁆𑀕𑀢𑀫𑀁 𑀦𑀸𑀫.

𑁭𑁨. 𑀅𑀦𑁆𑀥𑀜𑁆𑀘 𑀢𑀁 𑀢𑀫𑀜𑁆𑀘𑀸𑀢𑀺 𑀅𑀦𑁆𑀥𑀢𑀫𑀁, 𑀬𑀁 𑀮𑁄𑀓𑀁 𑀅𑀦𑁆𑀥𑀓𑀸𑀭𑀁 𑀓𑀭𑁄𑀢𑀺. 𑀅𑀬𑀁 𑀅𑀦𑁆𑀥𑀢𑀫𑀲𑀤𑁆𑀤𑁄 𑀖𑀦𑀢𑀫𑁂 𑀩𑀸𑀴𑁆𑀳𑀢𑀫𑁂 𑀯𑀢𑁆𑀢𑀢𑀺.

𑀤𑁆𑀯𑀬𑀁 ¶ 𑀧𑀳𑀸𑀭𑁂. 𑀧𑀳𑀭𑀻𑀬𑀢𑁂 𑀪𑁂𑀭𑀺𑀬𑀸𑀤𑀺 𑀅𑀢𑁆𑀭𑀸𑀢𑀺 𑀧𑀳𑀸𑀭𑁄, 𑀧𑀼𑀫𑁂 𑀲𑀜𑁆𑀜𑀸𑀬𑀁 𑀅𑀧𑀘𑁆𑀘𑀬𑁄. 𑀬𑀸 𑀧𑀸𑀧𑀼𑀡𑁂 𑀫𑁄, 𑀉𑀧𑀬𑀫𑁂𑀢𑀺 𑀯𑀸 𑀅𑀳𑁄 𑀭𑀢𑁆𑀢𑀺 𑀘𑀸𑀦𑁂𑀦 𑀬𑀸𑀫𑁄, 𑀬𑀫𑀺𑀢𑁄 𑀡𑁄. 𑀧𑀳𑀸𑀭𑁄 𑀏𑀯 𑀬𑀸𑀫𑁄 𑀇𑀢𑀺 𑀲𑀜𑁆𑀜𑀺𑀢𑁄 𑀬𑀸𑀫𑀲𑀜𑁆𑀜𑀺𑀢𑁄.

𑀤𑀼𑀢𑀺𑀬𑀸 𑀢𑀺𑀣𑀺 𑀧𑀸𑀝𑀺𑀧𑀤𑁄 𑀦𑀸𑀫. 𑀧𑀝𑀺𑀧𑀚𑁆𑀚𑀢𑁂 𑀘𑀦𑁆𑀤𑁄 𑀔𑀬𑀁, 𑀉𑀤𑀬𑀁 𑀯𑀸 𑀬𑀲𑁆𑀲𑀁 𑀧𑀸𑀝𑀺𑀧𑀤𑁄. 𑀢𑀢𑀺𑀬𑀸𑀤𑀻 𑀢𑀺𑀣𑀺𑀬𑁂𑀯, 𑀦 𑀧𑀸𑀝𑀺𑀧𑀤𑁄. 𑀢𑀦𑁄𑀢𑀻𑀢𑀺 𑀢𑀺𑀣𑀺, 𑀅𑀣 𑀯𑀸 𑀢𑀸 𑀧𑀸𑀮𑀦𑁂 𑀇𑀣𑀺. 𑀢𑀺𑀣𑀺𑀲𑀤𑁆𑀤𑁄 𑀤𑁆𑀯𑀻𑀲𑀼.

𑁭𑁩. 𑀤𑁆𑀯𑀬𑀁 𑀧𑀦𑁆𑀦𑀭𑀲𑀺𑀬𑀁, 𑀧𑀦𑁆𑀦𑀭𑀲𑀦𑁆𑀦𑀁 𑀢𑀺𑀣𑀻𑀦𑀁 𑀧𑀽𑀭𑀡𑀻 𑀧𑀦𑁆𑀦𑀭𑀲𑀻, 𑀧𑀡𑁆𑀡𑀭𑀲𑀻𑀢𑀺𑀧𑀺 𑀧𑀸𑀞𑁄 𑀅𑀢𑁆𑀣𑀺. 𑀤𑁆𑀯𑀬𑀁 𑀧𑀼𑀡𑁆𑀡𑀫𑀸𑀬𑀁 𑀢𑀺𑀣𑀺𑀬𑀁. 𑀫𑀺𑀬𑁆𑀬𑀢𑁂 𑀢𑀺𑀣𑀻𑀦𑀁 𑀔𑀬𑁄 𑀯𑀼𑀟𑁆𑀠𑀺 𑀘𑀸𑀦𑁂𑀦 𑀫𑀸𑀲𑁄, 𑀘𑀦𑁆𑀤𑁄, 𑀧𑀼𑀡𑁆𑀡𑁄 𑀘 𑀲𑁄 𑀫𑀸𑀲𑁄 𑀘𑀸𑀢𑀺 𑀧𑀼𑀡𑁆𑀡𑀫𑀸𑀲𑁄, 𑀢𑀲𑁆𑀲𑀸𑀬𑀁 𑀢𑀺𑀣𑀺, 𑀧𑀼𑀡𑁆𑀡𑀫𑀸𑀲𑁄 𑀬𑀲𑁆𑀲𑀫𑀢𑁆𑀣𑀻𑀢𑀺 𑀯𑀸 𑀧𑀼𑀡𑁆𑀡𑀫𑀸𑀲𑀻. 𑀧𑀼𑀡𑁆𑀡𑁄 𑀫𑀸 𑀘𑀦𑁆𑀤𑁄 𑀬𑀢𑁆𑀣, 𑀧𑀼𑀡𑁆𑀡𑀫𑀲𑁆𑀲𑀸𑀬𑀁 𑀯𑀸 𑀢𑀺𑀣𑀺 𑀧𑀼𑀡𑁆𑀡𑀫𑀸, ‘‘𑀧𑀼𑀡𑁆𑀡𑀺𑀫𑀸’’𑀢𑀺 𑀧𑀸𑀞𑁂 𑀧𑀦 𑀲𑀢𑀺 𑀘𑀦𑁆𑀤𑀲𑁆𑀲 𑀧𑀼𑀡𑁆𑀡𑀪𑀸𑀯𑁄 𑀧𑀼𑀡𑁆𑀡𑁄, 𑀢𑁂𑀦 𑀦𑀺𑀩𑁆𑀩𑀢𑁆𑀢𑀸 𑀪𑀸𑀯𑀧𑀘𑁆𑀘𑀬𑀦𑁆𑀢𑀸 𑀢𑁂𑀦 𑀦𑀺𑀩𑁆𑀩𑀢𑁆𑀢𑁂 𑀇𑀫𑁄 𑀤𑀺𑀲𑁆𑀲𑀢𑀺, 𑀮𑁄𑀓𑀸𑀲𑀬𑀢𑁆𑀢𑀸 𑀮𑀺𑀗𑁆𑀕𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑀁, 𑀲𑀸 𑀧𑀼𑀡𑁆𑀡𑀫𑀸 𑀏𑀓𑀓𑀮𑀸𑀳𑀻𑀦𑁂 𑀘𑀦𑁆𑀤𑁂 𑀲𑀢𑀺 𑀅𑀦𑀼𑀫𑀢𑀺 𑀦𑀸𑀫, 𑀅𑀦𑀼𑀫𑀜𑁆𑀜𑀦𑁆𑀢𑁂 𑀅𑀦𑀼𑀕𑀘𑁆𑀙𑀦𑁆𑀢𑁂 𑀤𑁂𑀯𑀢𑀸𑀧𑀺𑀢𑀽𑀳𑀺 𑀲𑀳 𑀬𑀲𑁆𑀲𑀁 𑀲𑀸 𑀅𑀦𑀼𑀫𑀢𑀺. 𑀧𑀼𑀡𑁆𑀡𑁂 𑀧𑀦 𑀘𑀦𑁆𑀤𑁂 𑀲𑀸 𑀧𑀼𑀡𑁆𑀡𑀫𑀸 𑀭𑀸𑀓𑀸 𑀦𑀸𑀫, 𑀭𑀸𑀢𑀺 𑀤𑀲𑁆𑀲𑀦𑀸𑀯𑀓𑀸𑀲𑀁 𑀭𑀸𑀓𑀸, 𑀓𑁄 [𑀓𑀮𑀸𑀳𑀻𑀦𑁂 𑀲𑀸’𑀦𑀼𑀫𑀢𑀺 𑀧𑀼𑀡𑁆𑀡𑁂 𑀭𑀸𑀓𑀸 𑀦𑀺𑀲𑀸𑀓𑀭𑁂 (𑀅𑀫𑀭 𑁪.𑁮)].

𑀅𑀧𑀭𑀸 𑀓𑀸𑀴𑀧𑀓𑁆𑀔𑀲𑀫𑁆𑀪𑀽𑀢𑀸𑀧𑀦𑁆𑀦𑀭𑀲𑀻 𑀧𑀦 𑀅𑀫𑀸𑀯𑀲𑀻, 𑀅𑀫𑀸𑀯𑀸𑀲𑀻𑀢𑀺𑀧𑀺 𑀉𑀘𑁆𑀘𑀢𑁂. 𑀅𑀫𑀸 𑀲𑀳 𑀯𑀲𑀦𑁆𑀢𑀺 𑀭𑀯𑀺𑀘𑀦𑁆𑀤𑀸 𑀬𑀲𑁆𑀲𑀁 𑀅𑀫𑀸𑀯𑀲𑀻, 𑀅𑀫𑀸𑀯𑀸𑀲𑀻 𑀘 𑀤𑀻𑀖𑀁 𑀓𑀢𑁆𑀯𑀸, 𑀅𑀫𑀸𑀲𑀤𑁆𑀤𑁄 𑀲𑀳𑀢𑁆𑀣𑁄 𑀅𑀩𑁆𑀬𑀬𑀁. 𑀤𑀲𑁆𑀲𑁄 [𑀤𑀲𑁆𑀲𑀮𑀸 (𑀓.), 𑀤𑀺𑀲𑁆𑀲𑀦𑁆𑀢𑁂 𑀭𑀯𑀺𑀘𑀦𑁆𑀤𑀸 𑀅𑀢𑁆𑀭, ‘‘𑀕𑀡𑀓𑁂𑀳𑀻’’𑀢𑀺 𑀖 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)], 𑀲𑀽𑀭𑀺𑀬𑀺𑀦𑁆𑀤𑀼𑀲𑀗𑁆𑀕𑀫𑁄𑀢𑀺 𑀢𑀲𑁆𑀲𑀸𑀬𑁂𑀯 𑀦𑀸𑀫𑀸𑀦𑀺.

𑁭𑁪. 𑀲𑀝𑁆𑀞𑀺𑀖𑀝𑀺𑀓𑀸𑀳𑀺 ¶ 𑀮𑀓𑁆𑀔𑀺𑀢𑁄 𑀓𑀸𑀮𑁄 𑀅𑀳𑁄𑀭𑀢𑁆𑀢𑁄 𑀦𑀸𑀫. 𑀖𑀝𑁂𑀦𑁆𑀢𑀺 𑀅𑀳𑁄𑀭𑀢𑁆𑀢𑀺𑀬𑁄𑀢𑀺 𑀖𑀝𑀺𑀓𑀸. 𑀅𑀳𑁄 𑀘 𑀭𑀢𑁆𑀢𑀺 𑀘 𑀅𑀳𑁄𑀭𑀢𑁆𑀢𑁄, 𑀧𑀼𑀫𑁂. 𑀅𑀤𑀺𑀕𑀼𑀢𑁆𑀢𑁂𑀧𑀺 𑀅𑀳𑁄𑀭𑀢𑁆𑀢𑀦𑁆𑀢𑀺 𑀦𑀧𑀼𑀁𑀲𑀓𑁂𑀧𑀺. 𑀢𑁂 𑀧𑀜𑁆𑀘𑀤𑀲 𑀅𑀳𑁄𑀭𑀢𑁆𑀢𑀸 𑀧𑀓𑁆𑀔𑁄 𑀦𑀸𑀫. 𑀧𑀘𑀦𑁆𑀢𑀺 𑀧𑀭𑀺𑀡𑀫𑀦𑁆𑀢𑀺 𑀪𑀽𑀢𑀸𑀦𑁆𑀬𑀦𑁂𑀦𑁂𑀢𑀺 𑀧𑀓𑁆𑀔𑁄. 𑀧𑀼𑀩𑁆𑀩𑀸𑀧𑀭𑀪𑀽𑀢𑀸 𑀢𑁂 𑀘 𑀧𑀓𑁆𑀔𑀸 𑀬𑀣𑀸𑀓𑁆𑀓𑀫𑀁 𑀲𑀼𑀓𑁆𑀓𑀓𑀸𑀴𑀸 𑀲𑀼𑀓𑁆𑀓𑀧𑀓𑁆𑀔𑀓𑀸𑀴𑀧𑀓𑁆𑀔𑀸 𑀦𑀸𑀫. 𑀚𑁄𑀢𑀺𑀲𑀢𑁆𑀣𑀓𑁆𑀓𑀫𑁂𑀦 𑀲𑀼𑀓𑁆𑀓𑀧𑀓𑁆𑀔𑁄 𑀧𑀼𑀩𑁆𑀩𑀲𑀜𑁆𑀜𑀺𑀢𑁄, 𑀓𑀡𑁆𑀳𑀧𑀓𑁆𑀔𑁄 𑀅𑀧𑀭𑀲𑀜𑁆𑀜𑀺𑀢𑁄. 𑀢𑀢𑁄 𑀏𑀯 𑀫𑀸𑀲𑀯𑀺𑀲𑁂𑀲𑁂 𑀮𑁄𑀓𑁂 𑀲𑀓𑀧𑀭𑀧𑀓𑁆𑀔𑁄𑀢𑀺 [𑀮𑁄𑀓𑁂𑀧𑁆𑀬𑀧𑀭𑀧𑀓𑁆𑀔𑁄𑀢𑀺 (𑀓.)] 𑀭𑀽𑀴𑁆𑀳𑀻. 𑀲𑀼𑀘 𑀲𑁄𑀓𑁂, 𑀲𑀼𑀓𑁆𑀓𑁄, 𑀲𑁄𑀘𑀦𑁆𑀢𑀺 𑀏𑀢𑁆𑀣 𑀅𑀦𑁆𑀥𑀓𑀸𑀭𑀸𑀪𑀺𑀮𑀸𑀲𑀺𑀦𑁄𑀢𑀺 𑀓𑀢𑁆𑀯𑀸, 𑀲𑀽𑀘𑁂𑀢𑀺 𑀧𑀓𑀸𑀲𑁂𑀢𑀻𑀢𑀺 𑀯𑀸 𑀲𑀼𑀓𑁆𑀓𑁄. 𑀓𑀺𑀭𑀢𑀺 𑀲𑀼𑀓𑁆𑀓𑀦𑁆𑀢𑀺 𑀓𑀸𑀭𑁄, 𑀡𑁄, 𑀲𑁄𑀯 𑀓𑀸𑀴𑁄, 𑀓𑁂𑀦 𑀯𑀸 𑀚𑁄𑀢𑀺𑀦𑀸 𑀅𑀭𑀢𑀺 𑀏𑀢𑁆𑀣 𑀓𑀸𑀭𑁄, 𑀲𑁄𑀯 𑀓𑀸𑀴𑁄. 𑀢𑁂 𑀤𑀼𑀯𑁂 𑀲𑀼𑀓𑁆𑀓𑀓𑀸𑀴𑀧𑀓𑁆𑀔𑀸 𑀲𑀫𑀼𑀤𑀺𑀢𑀸 𑀫𑀸𑀲𑁄 𑀦𑀸𑀫. 𑀫𑀲𑀺 𑀧𑀭𑀺𑀫𑀸𑀡𑁂, 𑀓𑀫𑁆𑀫𑀦𑀺𑀡𑁄.

𑁭𑁫-𑁭𑁬. 𑀲𑀸𑀤𑁆𑀥𑀧𑀚𑁆𑀚𑁂𑀦 𑀤𑁆𑀯𑀸𑀤𑀲𑀫𑀸𑀲𑀸𑀦𑀁 𑀦𑀸𑀫𑀸𑀦𑀺. 𑀘𑀺𑀢𑁆𑀢𑀸𑀬 𑀧𑀭𑀺𑀧𑀼𑀡𑁆𑀡𑁂𑀦𑁆𑀤𑀼𑀬𑀼𑀢𑁆𑀢𑀸𑀬 𑀬𑀼𑀢𑁆𑀢𑁄, 𑀉𑀧𑀮𑀓𑁆𑀔𑀺𑀢𑁄 𑀯𑀸 𑀫𑀸𑀲𑁄 𑀘𑀺𑀢𑁆𑀢𑁄 ¶ , 𑀲𑀁𑀬𑁄𑀕𑀦𑁆𑀢𑀢𑁆𑀢𑀸 𑀦 𑀯𑀼𑀤𑁆𑀥𑀺, 𑀏𑀯𑀁 𑀲𑀩𑁆𑀩𑀢𑁆𑀭. 𑀧𑀭𑀺𑀧𑀼𑀡𑁆𑀡𑁂𑀦𑁆𑀤𑀼𑀬𑀼𑀢𑁆𑀢𑀢𑀁𑀢𑀁𑀦𑀓𑁆𑀔𑀢𑁆𑀢𑀦𑀸𑀫𑀯𑀲𑁂𑀦 𑀤𑁆𑀯𑀸𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀦𑀸𑀫𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀘𑀺𑀢𑁆𑀢𑀫𑀸𑀲𑀸𑀤𑀬𑁄 𑀨𑀕𑁆𑀕𑀼𑀦𑀫𑀸𑀲𑀧𑀭𑀺𑀬𑀦𑁆𑀢𑀸 𑀤𑁆𑀯𑀸𑀤𑀲 𑀓𑁄𑀝𑁆𑀞𑀸𑀲𑀸 𑀓𑀫𑁂𑀦 𑀫𑀸𑀲𑀸𑀢𑀺 𑀜𑁂𑀬𑁆𑀬𑀸. 𑀧𑀲𑀢𑁆𑀣𑀢𑀫𑀢𑁆𑀢𑀸 𑀚𑁂𑀝𑁆𑀞𑀸, 𑀢𑀁𑀬𑁄𑀕𑀸 𑀚𑁂𑀝𑁆𑀞𑁄. 𑀅𑀲𑀬𑁆𑀳𑁄 𑀭𑀯𑀺 𑀅𑀢𑁆𑀭𑁂𑀢𑀺 𑀆𑀲𑀸𑀴𑁆𑀳𑁄. 𑀬𑀲𑁆𑀲 𑀴𑁄, 𑀲𑀯𑀦𑁆𑀢𑁆𑀬𑀲𑁆𑀫𑀺𑀁 𑀲𑀸𑀯𑀡𑁄, 𑀬𑀼. 𑀨𑀮𑀦𑁆𑀢𑁆𑀬𑀢𑁆𑀭 𑀨𑀕𑁆𑀕𑀼𑀦𑁄, 𑀬𑀼, 𑀮𑀲𑁆𑀲 𑀕𑁄, 𑀅𑀲𑁆𑀲 𑀉. 𑀓𑀢𑁆𑀢𑀺𑀓𑀫𑀸𑀲𑁄 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑁄 𑀦𑀸𑀫. 𑀅𑀲𑁆𑀲𑀬𑀼𑀚𑀫𑀸𑀲𑁄 𑀧𑀼𑀩𑁆𑀩𑀓𑀢𑁆𑀢𑀺𑀓𑁄 𑀦𑀸𑀫.

𑁭𑁭. 𑀤𑁆𑀯𑀬𑀁 𑀲𑀸𑀯𑀡𑀫𑀸𑀲𑁂. 𑀅𑀦𑁆𑀢𑁄𑀯𑀻𑀣𑀺𑀢𑁄 𑀩𑀳𑀺 𑀦𑀺𑀓𑁆𑀔𑀫𑀢𑀺 𑀲𑀽𑀭𑀺𑀬𑁄 𑀏𑀢𑁆𑀣, 𑀅𑀥𑀺𑀓𑀭𑀡𑁂 𑀅𑀦𑀻𑀬𑁄. 𑀤𑁆𑀯𑀬𑀁 𑀘𑀺𑀢𑁆𑀢𑀫𑀸𑀲𑁂. 𑀦𑀸𑀦𑀸𑀧𑀼𑀧𑁆𑀨𑀨𑀮𑀯𑀺𑀘𑀺𑀢𑁆𑀢𑀢𑀸𑀬 𑀮𑁄𑀓𑀸𑀦𑀁 𑀭𑀫𑁆𑀫𑀁 𑀓𑀭𑁄𑀢𑀺, 𑀭𑀫𑀦𑁆𑀢𑀺 𑀯𑀸 𑀏𑀢𑁆𑀣𑀸𑀢𑀺 𑀭𑀫𑁆𑀫𑀓𑁄.

𑁭𑁮. 𑀓𑀢𑁆𑀢𑀺𑀓𑀓𑀸𑀴𑀧𑀓𑁆𑀔𑀢𑁄 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀢𑁄 𑀧𑀝𑁆𑀞𑀸𑀬 𑀘𑀢𑀼𑀭𑁄 𑀘𑀢𑀼𑀭𑁄 𑀫𑀸𑀲𑀸 𑀓𑀫𑀸 𑀓𑀫𑀢𑁄 𑀳𑁂𑀫𑀦𑁆𑀢𑀕𑀺𑀫𑁆𑀳𑀸𑀦𑀯𑀲𑁆𑀲𑀸𑀦𑀲𑀜𑁆𑀜𑀺𑀢𑀸 𑀉𑀢𑀼𑀬𑁄 𑀦𑀸𑀫 𑀳𑁄𑀦𑁆𑀢𑀺. 𑀳𑀺𑀫𑀸𑀦𑀺 𑀏𑀢𑁆𑀣 𑀲𑀦𑁆𑀢𑀺 𑀳𑁂𑀫𑁄, 𑀲𑁄 𑀏𑀯 𑀳𑁂𑀫𑀦𑁆𑀢𑁄, ‘‘𑀲𑀼𑀢𑁆𑀢𑀦𑁆𑀢𑁄 𑀯𑀦𑀦𑁆𑀢𑁄’’𑀢𑀺 𑀬𑀣𑀸, 𑀳𑀺𑀦𑁄𑀢𑀺 𑀯𑀸 𑀳𑀸𑀦𑀺𑀁 𑀕𑀘𑁆𑀙𑀢𑀺 𑀲𑀩𑁆𑀩𑀫𑁂𑀢𑁆𑀣𑀸𑀢𑀺 𑀳𑁂𑀫𑀦𑁆𑀢𑁄, 𑀅𑀦𑁆𑀢𑀧𑀘𑁆𑀘𑀬𑁄, 𑀫𑀸𑀕𑀫𑁄 𑀘. 𑀕𑀺𑀭𑀢𑀺 𑀧𑀻𑀴𑀬𑀢𑀻𑀢𑀺 𑀕𑀺𑀫𑁆𑀳𑀸𑀦𑁄, 𑀫𑀸𑀦𑁄, 𑀭𑀲𑁆𑀲 𑀳𑁄, 𑀯𑀡𑁆𑀡𑀯𑀺𑀧𑀭𑀺𑀬𑀬𑁄 𑀘. 𑀯𑀲𑁆𑀲𑀢𑀺 𑀏𑀢𑁆𑀣 𑀯𑀲𑁆𑀲𑀸𑀦𑁄𑀬𑀼. 𑀉𑀢𑀼𑀬𑁄 𑀤𑁆𑀯𑀻𑀲𑀽𑀢𑀺 𑀧𑀘𑁆𑀘𑀸𑀲𑀢𑁆𑀬𑀸 𑀉𑀢𑀼𑀲𑀤𑁆𑀤𑁄 𑀏𑀯 𑀤𑁆𑀯𑀻𑀲𑀼, 𑀦 𑀳𑁂𑀫𑀦𑁆𑀢𑀸𑀤𑀬𑁄, 𑀅𑀫𑀭𑀓𑁄𑀲𑁂 𑀧𑀦 𑀉𑀢𑀼𑀲𑀤𑁆𑀤𑁄 𑀧𑀼𑀫𑁂 𑀯𑀼𑀢𑁆𑀢𑁄 [𑀅𑀫𑀭 𑁪.𑁨𑁦].

𑁭𑁯. 𑀅𑀜𑁆𑀜𑀣𑀸𑀧𑀺 ¶ 𑀉𑀢𑀼𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 𑀅𑀭𑀺𑀬𑀲𑀸𑀫𑀜𑁆𑀜𑀫𑀸𑀳 ‘‘𑀳𑁂𑀫𑀦𑁆𑀢𑁄’’𑀇𑀘𑁆𑀘𑀸𑀤𑀺. 𑀯𑀸 𑀅𑀣 𑀯𑀸 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀉𑀢𑀼𑀢𑁆𑀢𑀬𑀧𑀪𑁂𑀤𑁂 𑀯𑀼𑀢𑁆𑀢𑀯𑀘𑀦𑀲𑁆𑀲𑀸𑀦𑀼𑀲𑀸𑀭𑁂𑀦. 𑀇𑀤𑀁 𑀧𑀦 ‘‘𑀓𑀢𑁆𑀢𑀺𑀓𑀓𑀸𑀴𑀧𑀓𑁆𑀔𑀢𑁄’’𑀢𑀺 𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀓𑀢𑁆𑀢𑀺𑀓𑀓𑀸𑀴𑀧𑀓𑁆𑀔𑀢𑁄 𑀧𑀪𑀼𑀢𑀺 𑀤𑁆𑀯𑁂 𑀤𑁆𑀯𑁂 𑀫𑀸𑀲𑀸 𑀓𑀫𑀸 𑀓𑀫𑀢𑁄 𑀳𑁂𑀫𑀦𑁆𑀢𑁄, 𑀲𑀺𑀲𑀺𑀭𑁄, 𑀯𑀲𑀦𑁆𑀢𑁄, 𑀕𑀺𑀫𑁆𑀳𑁄, 𑀯𑀲𑁆𑀲𑀸𑀦𑁄, 𑀲𑀭𑀤𑁄 𑀉𑀢𑀽𑀢𑀺 𑀙 𑀉𑀢𑀽 𑀪𑀯𑀦𑁆𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀏𑀢𑀻𑀢𑀺 𑀓𑀢𑁆𑀯𑀸, 𑀢𑀼, 𑀇𑀲𑁆𑀲 𑀉. 𑀲𑀺𑀲𑀺𑀭𑀁 𑀲𑀻𑀢𑀮𑀁, 𑀢𑀁𑀬𑁄𑀕𑀸 𑀲𑀺𑀲𑀺𑀭𑀁, 𑀯𑀸𑀯𑀺𑀥𑀸𑀦𑀢𑁄 𑀦 𑀯𑀼𑀤𑁆𑀥𑀺, 𑀫𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀯𑀲 𑀓𑀦𑁆𑀢𑀺𑀬𑀁. 𑀯𑀲𑀻𑀬𑀢𑁂𑀢𑀺 𑀯𑀲𑀦𑁆𑀢𑁄. 𑀧𑀼𑀧𑁆𑀨𑀥𑀦𑀼𑀢𑁆𑀢𑀸 [𑀧𑀼𑀧𑁆𑀨𑀯𑀦𑁆𑀢𑀢𑁆𑀢𑀸 (𑀓.)] 𑀯𑀸 𑀯𑀲𑀢𑀺 𑀓𑀸𑀫𑁄 𑀏𑀢𑁆𑀣 𑀯𑀲𑀦𑁆𑀢𑁄. 𑀲𑀭𑀢𑀺 𑀧𑀻𑀴𑀬𑀢𑀺 𑀅𑀲𑁆𑀫𑀺𑀦𑁆𑀢𑀺 𑀲𑀭𑀤𑁄, 𑀢𑀲𑁆𑀲 𑀤𑁄. 𑀲𑀸 𑀲𑀼𑀦𑀔𑀸 𑀭𑀫𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀲𑀭𑀤𑁄, 𑀫𑀲𑁆𑀲 𑀤𑁄.

𑁮𑁦-𑁮𑁧. 𑀢𑀺𑀓𑀁 𑀕𑀺𑀫𑁆𑀳𑁂. 𑀉𑀲𑀢𑀺 𑀤𑀳𑀢𑀻𑀢𑀺 𑀉𑀡𑁆𑀳𑁄, 𑀡𑁆𑀳𑁄, 𑀲𑀮𑁄𑀧𑁄 𑀘. 𑀦𑀺𑀤𑀳𑀦𑁆𑀢𑁂 𑀬𑀲𑁆𑀫𑀺𑀦𑁆𑀢𑀺 𑀦𑀺𑀤𑀸𑀖𑁄, 𑀳𑀲𑁆𑀲 𑀖𑁄. 𑀕𑀺𑀭𑀢𑀺 ¶ 𑀧𑀻𑀴𑀬𑀢𑀻𑀢𑀺 𑀕𑀺𑀫𑁆𑀳𑁄, 𑀫𑁄, 𑀭𑀲𑁆𑀲 𑀳𑁄, 𑀯𑀡𑁆𑀡𑀯𑀺𑀧𑀭𑀺𑀬𑀬𑁄 𑀘. 𑀢𑀺𑀓𑀁 𑀯𑀲𑁆𑀲𑀸𑀦𑁄𑀢𑀼𑀫𑁆𑀳𑀺. 𑀯𑀲𑁆𑀲𑀢𑀺 𑀧𑀯𑀲𑁆𑀲𑀢𑀺 𑀏𑀢𑁆𑀣𑀸𑀢𑀺 𑀯𑀲𑁆𑀲𑁄, 𑀯𑀲𑁆𑀲𑀸𑀦𑁄, 𑀧𑀸𑀯𑀼𑀲𑁄 𑀘. 𑀅𑀲𑁆𑀲 𑀉, 𑀲𑀁𑀬𑁄𑀕𑀮𑁄𑀧𑁄 𑀘.

𑀯𑀲𑁆𑀲𑀸𑀦𑀸𑀤𑀺𑀓𑁂𑀳𑀺 𑀢𑀻𑀳𑀺 𑀉𑀢𑀽𑀳𑀺 𑀤𑀓𑁆𑀔𑀺𑀡𑀸𑀬𑀦𑀁 𑀲𑀽𑀭𑀺𑀬𑀲𑁆𑀲 𑀤𑀓𑁆𑀔𑀺𑀡𑀤𑀺𑀲𑀸𑀕𑀫𑀦𑀁 𑀪𑀯𑀢𑀺, 𑀅𑀜𑁆𑀜𑁂𑀳𑀺 𑀢𑀻𑀳𑀺 𑀲𑀺𑀲𑀺𑀭𑀯𑀲𑀦𑁆𑀢𑀕𑀺𑀫𑁆𑀳𑁂𑀳𑀺 𑀉𑀢𑁆𑀢𑀭𑀸𑀬𑀦𑀁 𑀉𑀢𑁆𑀢𑀭𑀤𑀺𑀲𑀸𑀕𑀫𑀦𑀁 𑀪𑀯𑀢𑀺. 𑀇 𑀕𑀢𑀺𑀬𑀁, 𑀪𑀸𑀯𑁂 𑀬𑀼, 𑀅𑀬𑀦𑀁. 𑀧𑀼𑀲𑁆𑀲𑀲𑀗𑁆𑀓𑀦𑁆𑀢𑀺𑀫𑀸𑀭𑀩𑁆𑀪 𑀆𑀲𑀸𑀴𑁆𑀳𑀁 𑀬𑀸𑀯 𑀆𑀤𑀺𑀘𑁆𑀘𑀲𑁆𑀲 𑀉𑀢𑁆𑀢𑀭𑀸 𑀕𑀢𑀺 𑀉𑀢𑁆𑀢𑀭𑀸𑀬𑀦𑀁. 𑀆𑀲𑀸𑀴𑁆𑀳𑀲𑀗𑁆𑀓𑀦𑁆𑀢𑀺𑀫𑀸𑀭𑀩𑁆𑀪 𑀧𑀼𑀲𑁆𑀲𑀁 𑀬𑀸𑀯 𑀤𑀓𑁆𑀔𑀺𑀡𑀸 𑀕𑀢𑀺 𑀤𑀓𑁆𑀔𑀺𑀡𑀸𑀬𑀦𑀁. 𑀯𑀲𑁆𑀲𑁄𑀬𑀦𑀤𑁆𑀯𑀬𑀦𑁆𑀢𑀺 𑀇𑀤𑀁 𑀅𑀬𑀦𑀤𑁆𑀯𑀬𑀁 𑀲𑀫𑁆𑀧𑀺𑀡𑁆𑀟𑀺𑀢𑀁 𑀯𑀲𑁆𑀲𑁄 𑀦𑀸𑀫. 𑀯𑀲𑁆𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀲𑁆𑀲𑁄, 𑀯𑀲𑁆𑀲𑀓𑀸𑀮𑁂𑀦 𑀯𑀸 𑀉𑀧𑀮𑀓𑁆𑀔𑀺𑀢𑁄 𑀯𑀲𑁆𑀲𑁄, ‘‘𑀘𑀺𑀢𑁆𑀢𑁄, 𑀘𑀓𑁆𑀔𑀼𑀤𑀲𑀓’’𑀦𑁆𑀢𑀺 𑀬𑀣𑀸.

𑀧𑀚𑁆𑀚𑀤𑁆𑀥𑀁 𑀯𑀲𑁆𑀲𑁂. 𑀲𑀁𑀯𑀲𑀢𑀺 𑀏𑀢𑁆𑀣 𑀲𑀁𑀯𑀘𑁆𑀙𑀭𑁄, 𑀙𑀭𑁄, 𑀲𑀲𑁆𑀲 𑀘𑁄, ‘‘𑀯𑀘𑁆𑀙𑀭𑁄’’𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫𑀁. 𑀦𑀢𑁆𑀣𑀺 𑀇𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑀫𑁂𑀢𑁂𑀲𑀼 𑀅𑀦𑀺𑀢𑁆𑀣𑀻. 𑀧𑀘𑁆𑀘𑀸𑀲𑀢𑁆𑀬𑀸 𑀲𑀭𑀤𑁄𑀧𑀺 𑀢𑀁𑀧𑀘𑁆𑀘𑀸𑀲𑀢𑁆𑀬𑀸 𑀳𑀸𑀬𑀦𑁄𑀧𑀺. 𑀲𑀭𑀤𑀓𑀸𑀮𑁂𑀦 𑀮𑀓𑁆𑀔𑀺𑀢𑁄 𑀲𑀭𑀤𑁄, 𑀬𑀣𑀸 ‘‘𑀲𑁄𑀢𑀤𑀲𑀓𑀁, 𑀯𑁂𑀲𑀸𑀔𑁄’’𑀢𑀺. 𑀚𑀳𑀸𑀢𑀺 𑀪𑀸𑀯𑁂𑀢𑀺 𑀳𑀸𑀬𑀦𑁄, 𑀧𑀤𑀢𑁆𑀣𑁂 𑀯𑀸 𑀚𑀳𑀦𑁆𑀢𑁄 𑀅𑀬𑀢𑀻𑀢𑀺 𑀳𑀸𑀬𑀦𑁄. 𑀲𑀫𑀬𑀢𑀺 𑀯𑀺𑀓𑀮𑀬𑀢𑀺 𑀪𑀸𑀯𑁂𑀢𑀺 𑀲𑀫𑀸, 𑀲𑀫 𑀯𑁂𑀓𑀮𑁆𑀬𑁂. ‘‘𑀲𑀫𑀸 𑀯𑀲𑁆𑀲𑁂 𑀣𑀻𑀮𑀺𑀗𑁆𑀕𑁄 𑀢𑀼, 𑀲𑀫𑀁 𑀲𑀩𑁆𑀩𑀲𑀫𑀸𑀦𑁂𑀲𑀽’’𑀢𑀺 𑀭𑀼𑀤𑁆𑀤𑁄.

𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀩𑁆𑀩𑀧𑀸𑀭𑀺𑀲𑀤𑀢𑁆𑀢𑀸 [𑀲𑀩𑁆𑀩𑀧𑀝𑀺𑀧𑀤𑀢𑁆𑀢𑀸 (𑀓.)] 𑀲𑀩𑁆𑀩𑀯𑁄𑀳𑀸𑀭𑀓𑀼𑀲𑀮𑀢𑁆𑀣𑀁 𑀓𑀸𑀮𑀸𑀥𑀺𑀓𑀸𑀭𑀢𑁆𑀢𑀸 𑀧𑀭𑀲𑀫𑀬𑁂 𑀓𑀣𑀺𑀢𑀁 𑀤𑁂𑀯𑀸𑀦𑀁 𑀯𑀲𑁆𑀲𑀧𑁆𑀧𑀫𑀸𑀡𑀫𑁆𑀧𑀺 𑀇𑀥𑀸𑀳𑀭𑀺𑀢𑁆𑀯𑀸 𑀤𑀻𑀧𑁂𑀢𑀩𑁆𑀩𑀁. 𑀢𑀣𑀸 𑀳𑀺 𑀫𑀦𑀼𑀲𑁆𑀲𑀸𑀦𑀁 𑀫𑀸𑀲𑁂𑀦 𑀧𑀺𑀢𑀽𑀦𑀁 𑀅𑀳𑁄𑀭𑀢𑁆𑀢𑁄, 𑀏𑀯𑀁 𑀫𑀦𑀼𑀲𑁆𑀲𑀸𑀦𑀁 𑀯𑀲𑁆𑀲𑁂𑀦 𑀤𑁂𑀯𑀸𑀦𑀁 𑀅𑀳𑁄𑀭𑀢𑁆𑀢𑁄, 𑀢𑀢𑁆𑀭𑁄𑀢𑁆𑀢𑀭𑀸𑀬𑀦𑀁 𑀤𑁂𑀯𑀸𑀦𑀁 𑀤𑀺𑀦𑀁, 𑀭𑀢𑁆𑀢𑀺 𑀧𑀦 𑀤𑀓𑁆𑀔𑀺𑀡𑀸𑀬𑀦𑀁, 𑀤𑁂𑀯𑀢𑀸𑀦𑀁 𑀲𑀝𑁆𑀞𑁆𑀬𑀸𑀥𑀺𑀓𑀸𑀳𑁄𑀭𑀢𑁆𑀢𑀺𑀲𑀢𑀢𑁆𑀢𑀬𑁂𑀦 𑀯𑀲𑁆𑀲𑁂𑀦 𑀤𑁆𑀯𑀸𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀤𑁂𑀯𑀸𑀦𑀁 𑀬𑀼𑀕𑀁. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀏𑀲𑀸 ¶ 𑀤𑁆𑀯𑀸𑀤𑀲𑀲𑀳𑀲𑁆𑀲𑀻, 𑀬𑀼𑀕𑀸𑀔𑁆𑀬𑀸 𑀧𑀭𑀺𑀓𑀺𑀢𑁆𑀢𑀺𑀢𑀸;

𑀏𑀢𑀁 𑀲𑀳𑀲𑁆𑀲𑀕𑀼𑀡𑀺𑀢𑀁, 𑀅𑀳𑁄 𑀩𑁆𑀭𑀳𑁆𑀫𑀫𑀼𑀤𑀸𑀳𑀝’’𑀦𑁆𑀢𑀺 [‘‘𑀯𑁂𑀤𑀤𑀻𑀧𑀓𑀕𑀦𑁆𑀣𑁂’’𑀢𑀺 𑀦𑀺𑀲𑁆𑀲𑀬𑁂].

𑀢𑀜𑁆𑀘 𑀦𑀭𑀸𑀦𑀁 𑀘𑀢𑀼𑀬𑀼𑀕𑀁 𑀤𑀺𑀩𑁆𑀩𑀲𑀳𑀲𑁆𑀲𑀤𑁆𑀯𑀬𑁂𑀦 𑀩𑁆𑀭𑀳𑁆𑀫𑀼𑀦𑁄 𑀤𑁆𑀯𑁂 𑀤𑀺𑀯𑁂𑀢𑀺. 𑀓𑀢, 𑀢𑁂𑀢𑀸, 𑀤𑁆𑀯𑀸𑀧𑀭, 𑀓𑀮𑀺𑀯𑀲𑁂𑀦 𑀘𑀢𑀼𑀬𑀼𑀕𑀁. 𑀢𑀢𑁆𑀭 𑀓𑀢𑀬𑀼𑀕𑀲𑁆𑀲 𑀫𑀦𑀼𑀲𑁆𑀲𑀲𑀗𑁆𑀔𑁆𑀬𑀸𑀬 𑀧𑀫𑀸𑀡𑀁 𑀅𑀝𑁆𑀞𑀯𑀻𑀲𑀢𑀺𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀲𑀢𑁆𑀢𑀭𑀲𑀯𑀲𑁆𑀲𑀮𑀓𑁆𑀔𑀸𑀦𑀺, 𑀢𑁂𑀢𑀸𑀬 𑀙𑀦𑁆𑀦𑀯𑀼𑀢𑀺𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀤𑁆𑀯𑀸𑀤𑀲𑀯𑀲𑁆𑀲𑀮𑀓𑁆𑀔𑀸𑀦𑀺, 𑀤𑁆𑀯𑀸𑀧𑀭𑀲𑁆𑀲 𑀘𑀢𑀼𑀲𑀝𑁆𑀞𑀺𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀅𑀝𑁆𑀞𑀯𑀲𑁆𑀲𑀮𑀓𑁆𑀔𑀸𑀦𑀺, 𑀓𑀮𑀺𑀲𑁆𑀲 𑀩𑀸𑀢𑁆𑀢𑀺𑀁𑀲𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀯𑀲𑁆𑀲𑀮𑀓𑁆𑀔𑀸𑀦𑀺. 𑀯𑀼𑀢𑁆𑀢𑀜𑁆𑀘 𑁋

‘‘𑀲𑀼𑀜𑁆𑀜𑀁 𑀲𑀼𑀜𑁆𑀜𑀁 𑀔𑀁 𑀦𑀸𑀕𑀸, 𑀓𑀭𑀫𑀼𑀦𑀺𑀲𑀲𑀺𑀦𑁄;

𑀫𑀸𑀦’𑀫𑀸𑀤𑁄 𑀬𑀼𑀕𑀲𑁆𑀲, 𑀢𑁂𑀢𑀸𑀬 𑀔𑀁𑀔𑀁𑀲𑀼𑀜𑁆𑀜𑀁.

𑀭𑀲𑀦𑀯𑀲𑀽𑀭𑀺𑀬𑀸, 𑀯𑀲𑁆𑀲𑀲𑀗𑁆𑀔𑁆𑀬𑀸 𑀧𑀲𑀺𑀤𑁆𑀥𑀸;

𑀲𑀼𑀜𑁆𑀜𑀁 𑀲𑀼𑀜𑁆𑀜𑀁 𑀔𑀁 𑀯𑁂𑀤𑀸, 𑀭𑀲𑀪𑀼𑀚𑀕𑀫𑀺𑀢𑀺.

𑀤𑁆𑀯𑀸𑀧𑀭𑁂 𑀯𑀲𑁆𑀲𑀲𑀗𑁆𑀔𑁆𑀬𑀸, 𑀲𑀼𑀜𑁆𑀜𑀸𑀓𑀸𑀲𑀁𑀔𑀁𑀦𑁂𑀢𑁆𑀢-;

𑀕𑀼𑀡𑀚𑀮𑀦𑀺𑀥𑀬𑁄, 𑀯𑀲𑁆𑀲𑀲𑀗𑁆𑀔𑁆𑀬𑀸 𑀓𑀮𑀺𑀲𑁆𑀲𑁂’’𑀢𑀺.

𑀧𑀺𑀡𑁆𑀟𑁄 𑀘𑁂𑀲 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀢𑁂𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀮𑀓𑁆𑀔𑀸𑀦𑀺. 𑀯𑀼𑀢𑁆𑀢𑀜𑁆𑀘 ‘‘𑀔𑀸𑀓𑀸𑀲𑀲𑀼𑀜𑁆𑀜𑀫𑁆𑀩𑀭𑀤𑀦𑁆𑀢𑀲𑀸𑀕𑀭𑀸 𑀘𑀢𑀼𑀬𑀼𑀕𑀸𑀦𑀁 𑀧𑀭𑀺𑀫𑀸𑀡𑀲𑀗𑁆𑀕𑀳𑁄’’𑀢𑀺. 𑀩𑁆𑀭𑀳𑁆𑀫𑀼𑀦𑁄 𑀅𑀳𑁄𑀭𑀢𑁆𑀢𑁂𑀦 𑀦𑀭𑀸𑀦𑀁 𑀤𑁆𑀯𑁂 𑀓𑀧𑁆𑀧𑀸.

𑀢𑀢𑁆𑀭 𑀅𑀝𑁆𑀞 𑀦𑀸𑀕𑀸, 𑀤𑁆𑀯𑁂 𑀓𑀭𑀸, 𑀲𑀢𑁆𑀢 𑀫𑀼𑀦𑀬𑁄, 𑀏𑀓𑁄 𑀲𑀲𑀻, 𑀙 𑀭𑀲𑀸, 𑀤𑁆𑀯𑀸𑀤𑀲 𑀲𑀽𑀭𑀺𑀬𑀸, 𑀘𑀢𑁆𑀢𑀸𑀭𑁄 𑀯𑁂𑀤𑀸 𑀚𑀮𑀦𑀺𑀥𑀬𑁄 𑀘. 𑀤𑁆𑀯𑁂 𑀦𑁂𑀢𑁆𑀢𑀸𑀦𑀺, 𑀢𑀬𑁄 𑀕𑀼𑀡𑀸, 𑀩𑀸𑀢𑁆𑀢𑀺𑀁𑀲 𑀤𑀦𑁆𑀢𑀸, 𑀲𑀗𑁆𑀔𑁆𑀬𑀸𑀬 𑀧𑀲𑀺𑀤𑁆𑀥𑁂𑀳𑁂𑀢𑁂𑀳𑀺 𑀲𑀗𑁆𑀔𑁆𑀬𑀸 𑀕𑀳𑁂𑀢𑀩𑁆𑀩𑀸. 𑀔𑀸𑀓𑀸𑀲𑀫𑁆𑀩𑀭𑀲𑀤𑁆𑀤𑀸 𑀲𑀼𑀜𑁆𑀜𑀧𑀭𑀺𑀬𑀸𑀬𑀸. 𑀲𑀼𑀜𑁆𑀜𑀜𑁆𑀘 𑀕𑀡𑀺𑀢𑁂 𑀩𑀺𑀦𑁆𑀤𑀼𑀦𑀸 𑀲𑀗𑁆𑀕𑀳𑀺𑀢𑀁. 𑀲𑀩𑁆𑀩𑀜𑁆𑀘𑁂𑀢𑀁 𑀧𑀝𑀺𑀬𑀼𑀕𑀁 𑀧𑀝𑀺𑀮𑁄𑀫𑁂𑀦 𑀧𑀢𑁆𑀣𑀸𑀭𑀬𑁂. 𑀢𑀢𑁆𑀭 𑀓𑀢𑀬𑀼𑀕𑀲𑁆𑀲 𑀧𑀢𑁆𑀣𑀸𑀭𑁄 𑀬𑀣𑀸 𑁋 𑁧𑁭𑁨𑁮𑁦𑁦𑁦. 𑀢𑁂𑀢𑀸𑀬 𑀬𑀣𑀸 𑁋 𑁧𑁨𑁯𑁬𑁦𑁦𑁦 ¶ . 𑀤𑁆𑀯𑀸𑀧𑀭𑀲𑁆𑀲 𑀬𑀣𑀸 𑁋 𑁮𑁬𑁪𑁦𑁦𑁦. 𑀓𑀮𑀺𑀲𑁆𑀲 𑀬𑀣𑀸 𑁋 𑁪𑁩𑁨𑁦𑁦𑁦. 𑀘𑀢𑀼𑀬𑀼𑀕𑀧𑀺𑀡𑁆𑀟𑀲𑁆𑀲 𑀘 𑀬𑀣𑀸 𑁋 𑁪𑁩𑁨𑁦𑁦𑁦𑁦. 𑀬𑀼𑀕𑀸𑀦𑀁 𑀧𑀝𑀺𑀧𑀢𑁆𑀣𑀸𑀭𑀜𑁆𑀘 𑀧𑀺𑀡𑁆𑀟𑀲𑁆𑀲 𑀘 𑀬𑀣𑀸𑀓𑁆𑀓𑀫𑀁 𑀅𑀦𑁆𑀢𑀺𑀫𑀁 𑀩𑀺𑀦𑁆𑀤𑀼𑀫𑀸𑀤𑀸𑀬 𑀧𑀝𑀺𑀮𑁄𑀫𑁂𑀦 𑀕𑀡𑀬𑁂. 𑀢𑀁 𑀬𑀣𑀸 𑁋

‘‘𑀏𑀓𑀁 𑀤𑀲 𑀲𑀢𑀜𑁆𑀘𑁂𑀯, 𑀲𑀳𑀲𑁆𑀲’𑀫𑀬𑀼𑀢𑀁 𑀢𑀣𑀸;

𑀮𑀓𑁆𑀔𑀜𑁆𑀘 𑀦𑀺𑀬𑀼𑀢𑀜𑁆𑀘𑁂𑀯, 𑀓𑀫𑀸 𑀤𑀲𑀕𑀼𑀡𑁄𑀢𑁆𑀢𑀭’’𑀦𑁆𑀢𑀺.

𑀢𑀢𑁆𑀭 𑀤𑀲𑀲𑀳𑀲𑁆𑀲𑀸𑀦𑀺 𑀅𑀬𑀼𑀢𑀁. 𑀤𑀲𑀮𑀓𑁆𑀔𑀸𑀦𑀺 𑀦𑀺𑀬𑀼𑀢𑀁. 𑀢𑀜𑁆𑀘 𑀓𑀮𑀺𑀤𑁆𑀯𑀸𑀧𑀭𑁂𑀲𑀼 𑀦𑀢𑁆𑀣𑀻𑀢𑀺 𑀮𑀓𑁆𑀔𑀧𑀭𑀺𑀬𑀦𑁆𑀢𑀫𑁂𑀯 𑀢𑀢𑁆𑀭 𑀕𑀡𑀬𑁂, 𑀢𑀤𑁂𑀯𑀁 𑀬𑀼𑀕𑀸𑀦𑀁, 𑀢𑀁𑀧𑀺𑀡𑁆𑀟𑀲𑁆𑀲 𑀘 𑀅𑀗𑁆𑀓𑀢𑁄 𑀧𑀼𑀩𑁆𑀩𑀯𑀼𑀢𑁆𑀢𑀸 𑀯𑀲𑁆𑀲𑀲𑀗𑁆𑀔𑁆𑀬𑀸 𑀲𑀜𑁆𑀜𑀸𑀢𑀸 𑀪𑀯𑀢𑀻𑀢𑀺.

𑀢𑀢𑁆𑀭 𑀩𑁆𑀭𑀳𑁆𑀫𑀼𑀦𑁄 𑀤𑀺𑀦𑀁 𑀦𑀭𑀸𑀦𑀁 𑀉𑀤𑀬𑀓𑀧𑁆𑀧𑁄, 𑀭𑀢𑁆𑀢𑀺 𑀧𑀦 𑀔𑀬𑀓𑀧𑁆𑀧𑁄. 𑀏𑀓𑀲𑁆𑀫𑀺𑀜𑁆𑀘 𑀩𑁆𑀭𑀳𑁆𑀫𑀤𑀺𑀦𑁂 𑀫𑀦𑀼𑀲𑀜𑁆𑀜𑀺𑀢𑀸 𑀘𑀢𑀼𑀤𑁆𑀤𑀲 𑀩𑁆𑀭𑀳𑁆𑀫𑀲𑀼𑀢𑀸 𑀪𑀯𑀦𑁆𑀢𑀺. 𑀢𑀢𑁆𑀭𑁂𑀓𑀲𑁆𑀲 𑀫𑀦𑁆𑀯𑀦𑁆𑀢𑀭𑀲𑁆𑀲 𑀏𑀓𑀲𑀢𑁆𑀢𑀢𑀺𑀤𑀺𑀩𑁆𑀩𑀬𑀼𑀕𑀸𑀦𑀺 𑀧𑀫𑀸𑀡𑀁, 𑀢𑀜𑁆𑀘 𑀫𑀸𑀦𑀼𑀲𑀁 𑀘𑀢𑀼𑀤𑁆𑀤𑀲𑀪𑀺 𑀉𑀢𑁆𑀢𑀭𑀁 [𑀘𑀢𑀼𑀭𑀸𑀲𑀻𑀢𑀺𑀉𑀢𑁆𑀢𑀭𑀁 (?)] 𑀬𑀼𑀕𑀲𑀢𑀤𑁆𑀯𑀬𑀁. 𑀢𑀤𑁂𑀯𑀁 𑀘𑀢𑀼𑀤𑁆𑀤𑀲𑀪𑀺 𑀫𑀦𑁆𑀯𑀦𑁆𑀢𑀭𑁂𑀳𑀺 𑀘𑀢𑀼𑀦𑀯𑀼𑀢𑁆𑀬𑀼𑀢𑁆𑀢𑀭𑀸𑀦𑀺 𑀦𑀯𑀤𑀺𑀩𑁆𑀩𑀬𑀼𑀕𑀲𑀢𑀸𑀦𑀺 𑀪𑀯𑀦𑁆𑀢𑀺. 𑀫𑀸𑀦𑀼𑀲𑀁 𑀢𑀼 𑀘𑀢𑀼𑀯𑀻𑀲𑀢𑀺𑀬𑀼𑀕𑀲𑀳𑀲𑁆𑀲𑀘𑀢𑀼𑀓𑁆𑀓𑀁. 𑀏𑀲𑀜𑁆𑀘 [𑀙𑀲𑀢𑁆𑀢𑀢𑁆𑀬𑀸𑀥𑀺𑀓𑀦𑀯𑀢𑀺𑀁𑀲𑀬𑀼𑀕𑀲𑀢𑀁 (?)] 𑀫𑀦𑁆𑀯𑀦𑁆𑀢𑀭𑀸𑀦𑀁 𑀅𑀝𑁆𑀞𑀯𑀻𑀲𑀲𑀳𑀲𑁆𑀲𑀸𑀥𑀺𑀓𑀲𑀢𑁆𑀢𑀭𑀲𑀫𑀸𑀦𑀼𑀲𑀯𑀲𑁆𑀲𑀮𑀓𑁆𑀔𑀲𑀗𑁆𑀔𑁆𑀬𑀸 𑀯𑀸 𑀓𑀢𑀬𑀼𑀕𑀧𑁆𑀧𑀫𑀸𑀡𑀓𑀸 𑀧𑀜𑁆𑀘 𑀲𑀦𑁆𑀥𑀬𑁄 𑀪𑀯𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀲𑀽𑀭𑀺𑀬𑀲𑀺𑀤𑁆𑀥𑀦𑁆𑀢𑁂 [𑁧.𑁧𑁮-𑁧𑁯] 𑁋

‘‘𑀬𑀼𑀕𑀸𑀦𑀁 𑀲𑀢𑁆𑀢𑀢𑀺 𑀲𑁂𑀓𑀸, 𑀫𑀦𑁆𑀯𑀦𑁆𑀢𑀭’𑀫𑀺𑀳𑁄’𑀘𑁆𑀘𑀢𑁂;

𑀓𑀢𑀲𑁆𑀲 𑀲𑀗𑁆𑀔𑁆𑀬𑀸 𑀢𑀲𑁆𑀲𑀦𑁆𑀢𑁂, 𑀲𑀦𑁆𑀥𑀺 𑀯𑀼𑀢𑁆𑀢𑁄 𑀚𑀮𑀧𑁆𑀮𑀯𑁄.

𑀲𑀲𑀦𑁆𑀥𑀬𑁄 𑀢𑁂 𑀫𑀦𑀯𑁄, 𑀓𑀧𑁆𑀧𑁂 𑀜𑁂𑀬𑁆𑀬𑀸 𑀘𑀢𑀼𑀤𑁆𑀤𑀲;

𑀓𑀢𑀧𑁆𑀧𑀫𑀸𑀡𑀸 𑀓𑀧𑁆𑀧𑀸𑀤𑁄, 𑀲𑀦𑁆𑀥𑀻 𑀧𑀜𑁆𑀘𑀤𑀲𑀝𑁆𑀞𑀺𑀢𑀸’’𑀢𑀺.

𑀓𑀢𑀬𑀼𑀕𑀲𑁆𑀲 𑀘 𑀧𑀸𑀤𑁂𑀦 𑀓𑀮𑀺𑀦𑁄 𑀧𑀫𑀸𑀡𑀁, 𑀧𑀸𑀤𑀤𑁆𑀯𑀬𑁂𑀦 𑀤𑁆𑀯𑀸𑀧𑀭𑀲𑁆𑀲, 𑀧𑀸𑀤𑀢𑁆𑀢𑀬𑁂𑀦 𑀢𑁂𑀢𑀸𑀬. 𑀘𑀢𑀼𑀬𑀼𑀕𑀜𑁆𑀘𑁂𑀢𑀁 𑀘𑀓𑁆𑀓𑀫𑀺𑀯 𑀪𑀫𑀢𑀻𑀢𑀺 𑀧𑀜𑁆𑀘𑀤𑀲𑀳𑀺 𑀲𑀦𑁆𑀥𑀻𑀳𑀺 𑀦𑀭𑀸𑀦𑀁 𑀬𑀼𑀕𑀸𑀦𑀺 𑀘𑀢𑀼𑀯𑀻𑀲𑀢𑀺 𑀪𑀯𑀦𑁆𑀢𑀺. 𑀤𑁂𑀯𑀸𑀦𑀁 ¶ 𑀢𑀼 𑀬𑀼𑀕𑀘𑀓𑁆𑀓𑀁. 𑀏𑀢𑀸𑀦𑀺 𑀘 𑀲𑀲𑀦𑁆𑀥𑀺𑀘𑀢𑀼𑀤𑁆𑀤𑀲𑀫𑀦𑁆𑀯𑀦𑁆𑀢𑀭𑀸𑀦𑁆𑀬𑁂𑀓𑀢𑁄𑀧𑀺 𑀧𑀺𑀡𑁆𑀟𑀺𑀢𑀸𑀦𑀺 𑀤𑁂𑀯𑀸𑀦𑀁 𑀬𑀼𑀕𑀲𑀳𑀲𑁆𑀲𑀁 𑀪𑀯𑀢𑀺, 𑀦𑀭𑀸𑀦𑀁 𑀘𑀢𑀼𑀬𑀼𑀕𑀲𑀳𑀲𑁆𑀲𑀁, 𑀢𑀜𑁆𑀘 𑀩𑁆𑀭𑀳𑁆𑀫𑀼𑀦𑁄 𑀤𑀺𑀦𑀫𑁂𑀓𑀁. 𑀅𑀜𑁆𑀜𑁄 𑀫𑀦𑀼 𑀅𑀲𑁆𑀫𑀺𑀁 𑀫𑀦𑁆𑀯𑀦𑁆𑀢𑀭𑀁, 𑀩𑁆𑀭𑀳𑁆𑀫𑀲𑀼𑀢𑀸 𑀏𑀯 𑀫𑀦𑀯𑁄.

𑁮𑁨. 𑀧𑀜𑁆𑀘𑀓𑀁 𑀔𑀬𑀓𑀧𑁆𑀧𑁂. 𑀓𑀧𑁆𑀧𑀢𑁂 𑀚𑀕𑀢𑀻 𑀯𑀺𑀦𑀲𑁆𑀲𑀢𑁂𑀢𑀺 𑀓𑀧𑁆𑀧𑁄. 𑀔𑀬𑀦𑁆𑀢𑀺 𑀏𑀢𑁆𑀣 𑀔𑀬𑁄. 𑀓𑀧𑁆𑀧𑁄 𑀘 𑀔𑀬𑁄 𑀘𑀸𑀢𑀺 𑀓𑀧𑁆𑀧𑀓𑁆𑀔𑀬𑀸. 𑀲𑀁𑀯𑀢𑁆𑀢𑀢𑁂 𑀉𑀧𑀭𑀫𑀢𑁂, 𑀯𑀺𑀦𑀲𑁆𑀲𑀢𑁂 𑀯𑀸 𑀚𑀕𑀢𑀻 𑀅𑀲𑁆𑀫𑀺𑀦𑁆𑀢𑀺 𑀲𑀁𑀯𑀝𑁆𑀝𑁄. 𑀘𑀢𑀼𑀬𑀼𑀕𑀸𑀦𑀫𑀦𑁆𑀢𑁂 𑀚𑀸𑀢𑁄 𑀬𑀼𑀕𑀦𑁆𑀢𑁄. 𑀧𑀮𑀻𑀬𑀢𑁂 𑀔𑀻𑀬𑀢𑁂 𑀬𑀢𑁆𑀣 𑀮𑁄𑀓𑁄𑀢𑀺 𑀧𑀮𑀬𑁄, 𑀧𑀼𑀫𑁂, 𑀲𑀜𑁆𑀜𑀸𑀬𑀁 𑀡𑁄. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀓𑀧𑁆𑀧𑀓𑁆𑀔𑀬𑁄 𑀢𑀽’’𑀢𑀺 𑀧𑀸𑀞𑀁 𑀯𑀢𑁆𑀯𑀸 𑀤𑁆𑀯𑀺𑀦𑁆𑀦𑀫𑁂𑀓𑀸𑀪𑀺𑀥𑀸𑀦𑀢𑁆𑀢𑀁 𑀓𑀧𑁆𑀧𑁂𑀦𑁆𑀢𑀺, 𑀢𑀁 𑀅𑀫𑀭𑀓𑁄𑀲𑁂𑀦 𑀘 𑀢𑀝𑁆𑀝𑀻𑀓𑀸𑀬 𑀘 𑀦 𑀲𑀫𑁂𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘‘𑀲𑀁𑀯𑀝𑁆𑀝𑁄, 𑀧𑀮𑀬𑁄, 𑀓𑀧𑁆𑀧𑁄, 𑀔𑀬𑁄, 𑀓𑀧𑁆𑀧𑀦𑁆𑀢𑀫𑀺𑀘𑁆𑀘𑀧𑀻’’𑀢𑀺 [𑀅𑀫𑀭 𑁪.𑁨𑁨] 𑀘 ‘‘𑀧𑀜𑁆𑀘𑀓𑀁 𑀔𑀬𑀓𑀧𑁆𑀧𑁂’’𑀢𑀺 𑀘.

𑀤𑁆𑀯𑀬𑀁 𑀓𑀸𑀴𑀓𑀡𑁆𑀡𑀺𑀬𑀁. 𑀦𑀺𑀦𑁆𑀤𑀺𑀢𑀩𑁆𑀩𑀢𑁆𑀢𑀸 𑀦 𑀮𑀓𑁆𑀔𑀻𑀬𑀢𑁂𑀢𑀺 𑀅𑀮𑀓𑁆𑀔𑀻. 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀁 𑀓𑀸𑀴𑀯𑀡𑁆𑀡𑀲𑀤𑀺𑀲𑀁 𑀓𑀭𑁄𑀢𑀺 𑀅𑀧𑁆𑀧𑀓𑀸𑀲𑀓𑀢𑁆𑀢𑀸𑀢𑀺 𑀓𑀸𑀴𑀓𑀡𑁆𑀡𑀻, 𑀓𑀭𑀢𑁄 𑀡𑁄, 𑀭𑀲𑁆𑀲 𑀡𑁄, 𑀈 𑀘. 𑀤𑁆𑀯𑀬𑀁 𑀲𑀺𑀭𑀺𑀬𑀁. 𑀧𑀲𑀁𑀲𑀺𑀢𑀩𑁆𑀩𑀢𑁆𑀢𑀸 𑀮𑀓𑁆𑀔𑀻𑀬𑀢𑁂𑀢𑀺 𑀮𑀓𑁆𑀔𑀻. 𑀓𑀢𑀧𑀼𑀜𑁆𑀜𑁂𑀳𑀺 𑀲𑁂𑀯𑀻𑀬𑀢𑁂, 𑀢𑁂 𑀯𑀸 𑀲𑁂𑀯𑀢𑀻𑀢𑀺 𑀲𑀺𑀭𑀻, 𑀭𑁄, 𑀈 𑀘.

𑁮𑁩. 𑀤𑁆𑀯𑀬𑀁 𑀤𑀸𑀦𑀯𑀸𑀦𑀁 𑀫𑀸𑀢𑀭𑀺. 𑀤𑀸 𑀅𑀯𑀔𑀡𑁆𑀟𑀦𑁂, 𑀤𑀸𑀬𑀢𑀻𑀢𑀺 𑀤𑀦𑀼. 𑀤𑁆𑀯𑀬𑀁 𑀤𑁂𑀯𑀸𑀦𑀁 𑀫𑀸𑀢𑀭𑀺. 𑀤𑀺𑀢𑀻𑀢𑀺 𑀅𑀲𑀼𑀭𑀸𑀦𑀫𑁂𑀯 𑀯𑁂𑀫𑀸𑀢𑀺𑀓𑀸 𑀫𑀸𑀢𑀸, 𑀢𑀲𑁆𑀲𑀸 𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀅𑀤𑀺𑀢𑀺.

𑁮𑁪. 𑀆𑀕𑀼𑀦𑁆𑀢𑀁 ¶ 𑀧𑀸𑀧𑁂. 𑀧𑀸𑀦𑁆𑀢𑀺 𑀭𑀓𑁆𑀔𑀦𑁆𑀢𑀺 𑀅𑀢𑁆𑀢𑀸𑀦𑀫𑀲𑁆𑀫𑀸𑀢𑀺 𑀧𑀸𑀧𑀁, 𑀧𑀓𑀸𑀭𑀯𑀡𑁆𑀡𑀸𑀕𑀫𑁄, 𑀤𑀼𑀕𑁆𑀕𑀢𑀺𑀁 𑀧𑀸𑀧𑀦𑀢𑁄 𑀯𑀸 𑀧𑀸𑀧𑀁. 𑀓𑀺𑀮𑁆𑀬𑀢𑁂 𑀲𑀺𑀣𑀺𑀮𑀻 𑀓𑀭𑀺𑀬𑁆𑀬𑀢𑁂 𑀬𑁂𑀦𑁂𑀢𑀺 𑀓𑀺𑀩𑁆𑀩𑀺𑀲𑀁, 𑀮𑀲𑁆𑀲 𑀯𑁄, 𑀇𑀲𑁄 𑀘, 𑀓𑀭𑁄𑀢𑀺 𑀅𑀦𑀺𑀝𑁆𑀞𑀨𑀮𑀦𑁆𑀢𑀺 𑀯𑀸 𑀓𑀺𑀩𑁆𑀩𑀺𑀲𑀁, 𑀇𑀩𑁆𑀩𑀺𑀲𑁄. 𑀯𑀺𑀭𑀽𑀧𑁂𑀦 𑀕𑀘𑁆𑀙𑀢𑀻𑀢𑀺 𑀯𑁂𑀭𑀁. 𑀦 𑀳𑀦𑁆𑀢𑀺 𑀥𑀜𑁆𑀜𑀦𑁆𑀢𑀺 𑀅𑀖𑀁, 𑀳𑀦𑀲𑁆𑀲 𑀖𑁄, 𑀲𑀸𑀥𑀽𑀳𑀺 𑀅𑀕𑀦𑁆𑀢𑀩𑁆𑀩𑀢𑁆𑀢𑀸 𑀯𑀸 𑀅𑀖𑀁, 𑀳𑀦 𑀕𑀢𑀺𑀬𑀁. 𑀓𑀼𑀘𑁆𑀙𑀺𑀢𑀁 𑀘𑀭𑀺𑀢𑀁 𑀤𑀼𑀘𑁆𑀘𑀭𑀺𑀢𑀁. 𑀤𑀼 𑀦𑀺𑀦𑁆𑀤𑀺𑀢𑀁 𑀓𑀭𑀡𑀫𑀲𑁆𑀲 𑀤𑀼𑀓𑁆𑀓𑀝𑀁. 𑀦 𑀧𑀼𑀦𑀸𑀢𑀻𑀢𑀺 𑀅𑀧𑀼𑀜𑁆𑀜𑀁. 𑀓𑀼𑀲𑀮𑀸𑀦𑀁 𑀧𑀝𑀺𑀧𑀓𑁆𑀔𑀁 𑀅𑀓𑀼𑀲𑀮𑀁. 𑀓𑀁 𑀲𑀼𑀔𑀁 𑀳𑀦𑀢𑀻𑀢𑀺 𑀓𑀡𑁆𑀳𑀁, 𑀯𑀡𑁆𑀡𑀯𑀺𑀧𑀭𑀺𑀬𑀬𑁄. 𑀓𑀮𑁆𑀬𑀢𑁂 𑀅𑀦𑁂𑀦 𑀓𑀮𑀼𑀲𑀁, 𑀉𑀲𑁄, 𑀓𑀁 𑀯𑀸 𑀲𑀼𑀔𑀁 𑀮𑀼𑀦𑀦𑁆𑀢𑁄 𑀲𑁂𑀢𑀻𑀢𑀺 𑀓𑀮𑀼𑀲𑀁. 𑀤𑀼 𑀦𑀺𑀦𑁆𑀤𑀺𑀢𑀁 𑀇𑀢𑀁 𑀕𑀫𑀦𑀫𑀲𑁆𑀲 𑀤𑀼𑀭𑀺𑀢𑀁. 𑀅𑀕𑀦𑁆𑀢𑀩𑁆𑀩𑀁 𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀆𑀕𑀼, 𑀆 𑀧𑀻𑀴𑀬𑀁 𑀕𑀘𑁆𑀙𑀢𑀻𑀢𑀺 𑀯𑀸 𑀆𑀕𑀼, ‘‘𑀆 𑀢𑀼 𑀓𑁄𑀥𑀫𑀼𑀤𑀸𑀝𑁆𑀝𑀻𑀲𑀽’’𑀢𑀺 𑀳𑀺 𑀏𑀓𑀓𑁆𑀔𑀭𑀓𑁄𑀲𑁂 𑀯𑀼𑀢𑁆𑀢𑀁.

𑁮𑁫-𑁮𑁬. 𑀙𑀓𑁆𑀓𑀁 𑀥𑀫𑁆𑀫𑁂. 𑀓𑀼𑀘𑁆𑀙𑀺𑀢𑁂𑀦𑀸𑀓𑀸𑀭𑁂𑀦 𑀲𑀦𑁆𑀢𑀸𑀦𑁂 𑀲𑁂𑀦𑁆𑀢𑀻𑀢𑀺 𑀓𑀼𑀲𑀸, 𑀭𑀸𑀕𑀸𑀤𑀬𑁄, 𑀢𑁂 𑀮𑀼𑀦𑀸𑀢𑀺 𑀙𑀺𑀦𑁆𑀤𑀢𑀻𑀢𑀺 𑀓𑀼𑀲𑀮𑀁. 𑀲𑀼𑀔𑀁 𑀓𑀭𑁄𑀢𑀺, 𑀲𑁄𑀪𑀦𑀁 𑀯𑀸 𑀓𑀭𑀡𑀫𑀲𑁆𑀲 𑀲𑀼𑀓𑀢𑀁. 𑀲𑀼𑀔𑀁 𑀓𑀭𑁄𑀢𑀻𑀢𑀺 𑀲𑀼𑀓𑁆𑀓𑀁. 𑀧𑀼𑀦𑀸𑀢𑀻𑀢𑀺 𑀧𑀼𑀜𑁆𑀜𑀁. 𑀥𑀭𑀢𑀺 𑀲𑀩𑁆𑀩𑀦𑁆𑀢𑀺 𑀥𑀫𑁆𑀫𑀁. 𑀅𑀧𑀭𑁂 𑀧𑀦𑀺𑀤𑀁 ‘‘𑀧𑀼𑀜𑁆𑀜𑀥𑀫𑁆𑀫’’𑀫𑀺𑀢𑁆𑀬𑁂𑀓𑀧𑀤𑀁 𑀯𑀤𑀦𑁆𑀢𑀺, 𑀢𑀁 𑀅𑀫𑀭𑀓𑁄𑀲𑁂𑀦 [𑀅𑀫𑀭 𑁪.𑁨𑁪] 𑀯𑀺𑀭𑀼𑀚𑁆𑀛𑀦𑀢𑁄 𑀦 𑀕𑀳𑁂𑀢𑀩𑁆𑀩𑀁. 𑀲𑀼𑀦𑁆𑀤𑀭𑀁 𑀘𑀭𑀡𑀫𑀲𑁆𑀲 𑀲𑀼𑀘𑀭𑀺𑀢𑀁.

𑀢𑀺𑀓𑀁 ¶ 𑀤𑀺𑀝𑁆𑀞𑀥𑀫𑁆𑀫𑀺𑀓𑁂. 𑀤𑀺𑀝𑁆𑀞𑀥𑀫𑁆𑀫𑁄 𑀦𑀸𑀫 𑀧𑀘𑁆𑀘𑀓𑁆𑀔𑁄 𑀅𑀢𑁆𑀢𑀪𑀸𑀯𑁄, 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀁. 𑀇𑀳𑀮𑁄𑀓𑁂 𑀚𑀸𑀢𑀁 𑀇𑀳𑀮𑁄𑀓𑀺𑀓𑀁. 𑀲𑀦𑁆𑀤𑀺𑀝𑁆𑀞𑁂 𑀧𑀘𑁆𑀘𑀓𑁆𑀔𑁂 𑀅𑀢𑁆𑀢𑀪𑀸𑀯𑁂 𑀚𑀸𑀢𑀁 𑀲𑀦𑁆𑀤𑀺𑀝𑁆𑀞𑀺𑀓𑀁. 𑀤𑁆𑀯𑀬𑀁 𑀲𑀫𑁆𑀧𑀭𑀸𑀬𑀺𑀓𑁂. 𑀢𑀁 𑀯𑀘𑀦𑀢𑁆𑀣𑀢𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑀁.

𑀤𑁆𑀯𑀬𑀁 𑀢𑀓𑁆𑀓𑀸𑀮𑁂. 𑀢𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀚𑀸𑀢𑀁, 𑀦𑀸𑀲𑀦𑁆𑀦𑀓𑀸𑀮𑀸𑀤𑀻𑀲𑀽𑀢𑀺 𑀢𑀓𑁆𑀓𑀸𑀮𑀁. 𑀢𑀤𑀸 𑀢𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀚𑀸𑀢𑀁 𑀢𑀤𑀸𑀢𑁆𑀯𑀁, 𑀢𑁆𑀯𑀁, 𑀢𑀤𑀸𑀢𑁆𑀢𑀦𑁆𑀢𑀺𑀧𑀺 𑀧𑀸𑀞𑁄. 𑀤𑁆𑀯𑀬𑀁 𑀆𑀬𑀢𑀺𑀓𑀸𑀮𑁂. 𑀉𑀢𑁆𑀢𑀭𑀓𑀸𑀮𑁄 𑀧𑀘𑁆𑀙𑀺𑀫𑁄 𑀓𑀸𑀮𑁄. 𑀆𑀕𑀫𑀺𑀲𑁆𑀲𑀢𑀻𑀢𑀺 𑀆𑀬𑀢𑀺, 𑀆𑀧𑀼𑀩𑁆𑀩𑁄 𑀇 𑀕𑀢𑀺𑀫𑁆𑀳𑀺. 𑀏𑀢𑁆𑀣 𑀘 𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀤𑀽𑀭𑀫𑀸𑀲𑀦𑁆𑀦𑀁 𑀯𑀸, 𑀢𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀁. 𑀬𑀁 𑀧𑀦 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀯𑀸 𑀲𑀫𑁆𑀧𑀭𑀸𑀬𑁂 𑀯𑀸 𑀤𑀽𑀭𑀢𑀭𑀁, 𑀢𑀁 𑀆𑀬𑀢𑀺.

𑁮𑁭-𑁮𑁮. 𑀧𑀫𑁄𑀤𑀦𑁆𑀢𑀁 𑀧𑀸𑀫𑁄𑀚𑁆𑀚𑁂. 𑀳𑀲𑀢𑀺 𑀬𑁂𑀦𑀸𑀢𑀺 𑀳𑀸𑀲𑁄. 𑀅𑀢𑁆𑀢𑀸 𑀫𑀦𑁄 𑀬𑀲𑁆𑀲 𑀅𑀢𑁆𑀢𑀫𑀦𑁄. 𑀤𑀼𑀝𑁆𑀞𑀲𑁆𑀲 𑀳𑀺 𑀫𑀦𑁄 𑀅𑀢𑁆𑀢𑀸 𑀦𑀸𑀫 𑀦 𑀳𑁄𑀢𑀺, 𑀢𑀲𑁆𑀲 𑀪𑀸𑀯𑁄 𑀅𑀢𑁆𑀢𑀫𑀦𑀢𑀸, 𑀧𑀸𑀫𑁄𑀚𑁆𑀚𑀁. 𑀧𑀻𑀡𑁂𑀢𑀺 𑀢𑀧𑁆𑀧𑁂𑀢𑀻𑀢𑀺 𑀧𑀻𑀢𑀺. 𑀯𑀺𑀦𑁆𑀤𑀢𑀺 𑀲𑀼𑀔𑀁 𑀏𑀢𑀸𑀬𑀸𑀢𑀺 𑀯𑀺𑀢𑁆𑀢𑀺. 𑀢𑀼𑀲𑁆𑀲𑀦𑁆𑀢𑀺 𑀏𑀢𑀸𑀬𑀸𑀢𑀺 𑀢𑀼𑀝𑁆𑀞𑀺, 𑀢𑀁𑀲𑀳𑀘𑀭𑀡𑀢𑁄 𑀯𑀺𑀢𑁆𑀢𑀺, 𑀢𑀁𑀲𑀳𑀘𑀭𑀡𑀢𑁄 𑀧𑀻𑀢𑀺 𑀘 𑀦𑀸𑀭𑀺𑀬𑀁, 𑀅𑀢𑁆𑀢𑀫𑀦𑀢𑀸 𑀧𑀦 𑀦𑀺𑀤𑁆𑀤𑁂𑀲𑀢𑁄 𑀭𑀽𑀧𑀪𑁂𑀤𑁄. 𑀆 𑀪𑀼𑀲𑁄 𑀦𑀦𑁆𑀤𑀬𑀢𑀻𑀢𑀺 𑀆𑀦𑀦𑁆𑀤𑁄. 𑀫𑀼𑀤 𑀳𑀸𑀲𑁂, 𑀧𑀫𑀼𑀤𑁄, 𑀆𑀫𑁄𑀤𑁄𑀧𑀺. 𑀲𑀦𑁆𑀢𑀼𑀲𑁆𑀲𑀦𑀁 𑀲𑀦𑁆𑀢𑁄𑀲𑁄 ¶ . 𑀦𑀦𑁆𑀤𑀦𑀁 𑀦𑀦𑁆𑀤𑀺. 𑀲𑀫𑁆𑀫𑀤𑁄 𑀲𑀫𑁆𑀫𑀤𑀸𑀧𑀺 [𑀲𑀫𑁆𑀫𑀼𑀤𑁄, 𑀲𑀫𑁆𑀫𑀤𑁄𑀧𑀺 (?)], 𑀉𑀓𑀸𑀭𑀲𑁆𑀲 𑀅. 𑀧𑀫𑁄𑀤𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, 𑀘𑀺𑀢𑁆𑀢𑀲𑁆𑀲 𑀯𑀸 𑀪𑀸𑀯𑁄 𑀧𑀸𑀫𑁄𑀚𑁆𑀚𑀁.

𑀢𑀺𑀓𑀁 𑀲𑀼𑀔𑁂. 𑀲𑀼𑀝𑁆𑀞𑀼 𑀔𑀡𑀢𑀻𑀢𑀺 𑀲𑀼𑀔𑀁, 𑀓𑁆𑀯𑀺. 𑀲𑀸𑀤𑀻𑀬𑀢𑀺 𑀅𑀲𑁆𑀲𑀸𑀤𑀻𑀬𑀢𑀻𑀢𑀺 𑀲𑀸𑀢𑀁. 𑀨𑀲𑁆𑀲𑀢𑀺 𑀲𑀺𑀦𑁂𑀳𑀢𑀻𑀢𑀺 𑀨𑀸𑀲𑀼, 𑀨𑀼𑀲𑀢𑀺 𑀯𑀸 𑀩𑀸𑀥𑀢𑀺 𑀤𑀼𑀓𑁆𑀔𑀦𑁆𑀢𑀺 𑀨𑀸𑀲𑀼. 𑀲𑀢𑁆𑀢𑀓𑀁 𑀓𑀮𑁆𑀬𑀸𑀡𑁂. 𑀪𑀤𑀺 𑀓𑀮𑁆𑀬𑀸𑀡𑁂, 𑀪𑀤𑁆𑀤𑀢𑀻𑀢𑀺 𑀪𑀤𑁆𑀤𑀁. 𑀧𑀲𑀢𑁆𑀣𑀢𑀭𑀢𑁆𑀢𑀸 𑀲𑁂𑀬𑁆𑀬𑁄. 𑀲𑁄𑀪𑀢𑀻𑀢𑀺 𑀲𑁄𑀪𑀁. 𑀔𑀻 𑀔𑀬𑁂, 𑀔𑁂𑀧𑁂𑀢𑀺 𑀅𑀲𑀼𑀔𑀁 𑀔𑁂𑀫𑀁, 𑀫𑁄. 𑀓𑀮𑁆𑀬𑀁 𑀦𑀺𑀭𑁄𑀕𑀁 𑀅𑀡𑀢𑀺 𑀕𑀘𑁆𑀙𑀢𑀺, 𑀓𑀮𑁆𑀬𑀁 𑀯𑀸 𑀳𑀺𑀢𑀁 𑀅𑀡𑀬𑀢𑀺 𑀧𑀸𑀧𑀬𑀢𑀻𑀢𑀺 𑀓𑀮𑁆𑀬𑀸𑀡𑀁, 𑀓𑀫𑁆𑀫𑀦𑀺 𑀡𑁄 [𑀓𑀫𑁆𑀫𑀦𑀺 𑀉𑀧𑀧𑀤𑁂 𑀡𑀧𑀘𑁆𑀘𑀬𑁄𑀢𑀺 𑀅𑀥𑀺𑀧𑁆𑀧𑀸𑀬𑁄]. 𑀫𑀗𑁆𑀕 𑀕𑀢𑁆𑀬𑀢𑁆𑀣𑁄, 𑀫𑀗𑁆𑀕𑀢𑀺 𑀥𑀜𑁆𑀜𑀁 𑀫𑀗𑁆𑀕𑀮𑀁, 𑀅𑀮𑁄. 𑀲𑀫𑁂𑀢𑀺 𑀤𑀼𑀓𑁆𑀔𑀦𑁆𑀢𑀺 𑀲𑀺𑀯𑀁, 𑀯𑁄.

𑁮𑁯. 𑀙𑀓𑁆𑀓𑀁 𑀤𑀼𑀓𑁆𑀔𑁂. 𑀤𑀼𑀓𑁆𑀓𑀭𑀁 𑀔𑀫𑀦𑀫𑁂𑀢𑁆𑀣 𑀤𑀼𑀓𑁆𑀔𑀁. 𑀓𑀲 𑀕𑀫𑀦𑁂, 𑀓𑀲𑀢𑀺 𑀅𑀧𑀼𑀜𑁆𑀜𑀦𑁆𑀢𑀺 𑀓𑀲𑀺𑀭𑀁, 𑀇𑀭𑁄, 𑀓𑀼𑀘𑁆𑀙𑀺𑀢𑁂𑀦𑀸𑀓𑀸𑀭𑁂𑀦 𑀲𑁂𑀢𑀻𑀢𑀺 𑀯𑀸 𑀓𑀲𑀺𑀭𑀁. 𑀓𑀺𑀭 𑀯𑀺𑀓𑁆𑀔𑀺𑀧𑀦𑁂, 𑀓𑀺𑀭𑀢𑀺 𑀲𑀼𑀔𑀦𑁆𑀢𑀺 𑀓𑀺𑀘𑁆𑀙𑀁, 𑀓𑀢𑀸 𑀯𑀸 𑀧𑀼𑀜𑁆𑀜𑀓𑀭𑀡𑀺𑀘𑁆𑀙𑀸 𑀬𑁂𑀦𑀸𑀢𑀺 𑀓𑀺𑀘𑁆𑀙𑀁, ‘‘𑀤𑀼𑀓𑁆𑀔𑀽𑀧𑀦𑀺𑀲𑀸 𑀲𑀤𑁆𑀥𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀦𑀢𑁆𑀣𑀺 𑀅𑀥𑀺𑀕𑀫𑀦𑀢𑁆𑀣𑀁 𑀈𑀳𑀸 𑀏𑀢𑁆𑀣𑀸𑀢𑀺 𑀦𑀻𑀖𑁄, 𑀳𑀲𑁆𑀲 𑀖𑁄, 𑀅𑀣 𑀯𑀸 𑀦𑀺𑀳𑀦𑁆𑀢𑁆𑀬𑀧𑀼𑀜𑁆𑀜𑀁 𑀳𑀺𑀁𑀲𑀢𑀺 𑀕𑀘𑁆𑀙𑀢𑀻𑀢𑀺 𑀯𑀸 𑀦𑀻𑀖𑁄, 𑀧𑀼𑀜𑁆𑀜𑀁 𑀯𑀸 𑀦 𑀳𑀦𑁆𑀢𑀺 𑀦 𑀕𑀘𑁆𑀙𑀢𑀻𑀢𑀺 𑀦𑀻𑀖𑁄. 𑀯𑀺𑀭𑀽𑀧𑀫𑀲𑀢𑀺 𑀬𑁂𑀦𑀸𑀢𑀺 𑀩𑁆𑀬𑀲𑀦𑀁, 𑀯𑀺𑀲𑀺𑀝𑁆𑀞𑀁 𑀯𑀸 𑀅𑀲𑀢𑀺 𑀔𑁂𑀧𑁂𑀢𑀻𑀢𑀺 𑀩𑁆𑀬𑀲𑀦𑀁. 𑀦 𑀳𑀦𑁆𑀢𑀺 𑀥𑀜𑁆𑀜𑀦𑁆𑀢𑀺 𑀅𑀖𑀁. 𑀏𑀢𑁂 𑀧𑀸𑀧𑀸𑀤𑀬𑁄 𑀕𑀼𑀡𑁂 𑀬𑀣𑀸𑀯𑀼𑀢𑁆𑀢𑀮𑀺𑀗𑁆𑀕𑀸. 𑀧𑀸𑀧𑀧𑀼𑀜𑁆𑀜𑀸𑀦𑀺 𑀲𑀼𑀔𑀸𑀤𑀺 𑀘 𑀆𑀓𑀺𑀘𑁆𑀙𑀁 𑀓𑀺𑀘𑁆𑀙𑀦𑁆𑀢𑀁 𑀕𑀼𑀡𑀬𑁄𑀕𑀢𑁄 𑀤𑀩𑁆𑀩𑁂 𑀯𑀺𑀲𑁂𑀲𑁆𑀬𑁂 𑀯𑀢𑁆𑀢𑀫𑀸𑀦𑀸𑀦𑀺 𑀢𑀻𑀲𑀼. 𑀬𑀣𑀸 𑁋

𑀧𑀸𑀧𑀸 𑀉𑀢𑀼𑀫𑀢𑀻 𑀓𑀜𑁆𑀜𑀸, 𑀧𑀸𑀧𑁄 𑀭𑀸𑀚𑀸𑀧𑁆𑀬𑀭𑀓𑁆𑀔𑀓𑁄;

𑀧𑀸𑀧𑀁 𑀩𑁆𑀬𑀸𑀥𑀓𑀼𑀮𑀁 𑀳𑀺𑀁𑀲𑀁, 𑀧𑀸𑀧𑁄 𑀯𑀺𑀧𑁆𑀧𑁄 𑀘 𑀲𑁂𑀯𑀓𑁄;

𑀧𑀼𑀜𑁆𑀜𑀁 𑀢𑀺𑀢𑁆𑀣𑀫𑀺𑀤𑀁 𑀧𑀼𑀜𑁆𑀜𑀸, 𑀦𑀤𑀻 𑀧𑀼𑀜𑁆𑀜𑁄’𑀬’𑀫𑀲𑁆𑀲𑀫𑁄.

𑀲𑀼𑀔𑀁 ¶ 𑀓𑀸𑀫𑀺𑀓𑀼𑀮𑀁 𑀤𑀩𑁆𑀩𑀁 [𑀲𑀩𑁆𑀩𑀁 (?)], 𑀲𑀼𑀔𑁄 𑀯𑀸𑀲𑁄 𑀲𑀳𑀸’𑀫𑁆𑀩𑀬𑀸 [𑀲𑀳𑀸𑀦𑁆𑀯𑀬𑁄 (𑀓.)];

𑀲𑀼𑀔𑀸 𑀬𑀼𑀯𑀢𑀺’𑀭𑀺𑀘𑁆𑀙𑀦𑁆𑀢𑀻, 𑀲𑀼𑀔𑀸 𑀯𑁂 𑀫𑀖𑀯𑀕𑁆𑀕𑀳𑀸 [𑀲𑀼𑀔𑀸 𑀬𑀼𑀯𑀢𑀺𑀓𑀸 𑀕𑀳𑀸 (𑀓.)].

𑀬𑀤𑀸 𑀢𑀼 𑀲𑀓𑀢𑁆𑀣𑀧𑁆𑀧𑀥𑀸𑀦𑀁 𑀲𑀼𑀔𑀸𑀤𑀺𑀓𑀫𑁂𑀯 𑀯𑀺𑀲𑁂𑀲𑁆𑀬𑀢𑁆𑀢𑁂𑀦 𑀯𑀢𑁆𑀢𑀼𑀫𑀺𑀘𑁆𑀙𑀢𑁂, 𑀦 𑀢𑀼 𑀤𑀩𑁆𑀩𑀁 (𑀧𑀼𑀩𑁆𑀩𑀫𑀺𑀯 𑀯𑀺𑀲𑁂𑀲𑀦𑀁,) [( ) 𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸𑀬𑀁 𑀦 𑀤𑀺𑀲𑁆𑀲𑀢𑀺] 𑀢𑀤𑀸 𑀭𑀽𑀧𑀪𑁂𑀤𑁄𑀢𑁆𑀢𑀫𑁂𑀯 𑀮𑀺𑀗𑁆𑀕𑀁. 𑀬𑀣𑀸 𑁋

‘‘𑀤𑀸𑀮𑀺𑀤𑁆𑀤𑁂𑀧𑀺 [𑀯𑀮𑀺𑀢𑁆𑀢𑁂𑀧𑀺 (𑀓.)] 𑀥𑀦𑀺𑀢𑁆𑀢𑁂𑀧𑀺, 𑀯𑀲𑁄 𑀧𑀭𑀺𑀚𑀦𑁄 𑀲𑀼𑀔𑀁;

𑀲𑀼𑀔𑀁 𑀲𑀚𑁆𑀚𑀦𑀯𑀸𑀲𑁄 𑀘, 𑀲𑀼𑀔𑀁 𑀲𑀦𑁆𑀢𑀺 𑀅𑀦𑀼𑀢𑁆𑀢𑀭𑀸’’𑀢𑀺.

𑀦𑀦𑀼 ‘‘𑀤𑀼𑀓𑁆𑀓𑀝𑁄𑀬𑀁 𑀩𑁆𑀬𑀸𑀧𑀸𑀭𑁄, 𑀲𑀼𑀓𑀢𑀁 𑀓𑀫𑁆𑀫𑀁, 𑀓𑀮𑀼𑀲𑁄𑀬𑀁 𑀫𑁂 𑀩𑁆𑀬𑀸𑀧𑀸𑀭𑁄’’𑀢𑀺 𑀅𑀜𑁆𑀜𑁂𑀲𑀫𑁆𑀧𑀺 𑀢𑀻𑀲𑀼 𑀯𑀼𑀢𑁆𑀢𑀺 𑀅𑀢𑁆𑀣𑁂𑀯𑁂𑀢𑀺 𑀓𑀺𑀁 𑀧𑀸𑀧𑀧𑀼𑀜𑁆𑀜𑀸𑀦𑀫𑁂𑀯 𑀕𑀳𑀡𑀁 𑀪𑀯𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 ‘‘𑀤𑀼𑀝𑁆𑀞𑀼 𑀓𑀢𑁄 𑀤𑀼𑀓𑁆𑀓𑀝𑁄, 𑀲𑀼𑀝𑁆𑀞𑀼 𑀓𑀢𑀁 𑀲𑀼𑀓𑀢’’𑀫𑀺𑀘𑁆𑀘𑁂𑀯𑀁 𑀓𑁆𑀭𑀺𑀬𑀸𑀦𑀺𑀩𑀦𑁆𑀥𑀦𑀸𑀧𑀺 𑀢𑀻𑀲𑀼 𑀯𑀼𑀢𑁆𑀢𑀺 𑀲𑀫𑁆𑀪𑀯𑀢𑀺, 𑀦𑀸𑀯𑀲𑁆𑀲𑀁 𑀕𑀼𑀡𑀦𑀺𑀩𑀦𑁆𑀥𑀦𑀸 𑀏𑀯. 𑀓𑀮𑀼𑀲𑀲𑁆𑀲𑀧𑀺 𑀬𑀤𑀸 𑀲𑀺𑀝𑁆𑀞𑀧𑀬𑁄𑀕𑁂𑀲𑀼 𑀯𑀺𑀲𑁂𑀲𑁆𑀬𑀯𑀼𑀢𑁆𑀢𑀺 𑀢𑀺𑀮𑀺𑀗𑁆𑀕𑀢𑀸 𑀉𑀧𑀮𑀩𑁆𑀪𑀢𑁂, 𑀢𑀤𑀸 𑀧𑀸𑀧𑀕𑁆𑀕𑀳𑀡’𑀫𑀢𑁆𑀣𑀧𑁆𑀧𑀥𑀸𑀦𑀁 𑀩𑁆𑀬𑀸𑀔𑁆𑀬𑀸𑀢𑀩𑁆𑀩𑀁.

𑁯𑁦. 𑀧𑀜𑁆𑀘𑀓𑀁 𑀲𑀼𑀪𑀸𑀲𑀼𑀪𑀓𑀫𑁆𑀫𑀫𑀢𑁆𑀢𑁂. 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀧𑀸𑀓𑀪𑀸𑀕𑁄 𑀬𑀢𑁆𑀣 𑀅𑀢𑁆𑀣𑀻𑀢𑀺 𑀪𑀸𑀕𑁆𑀬𑀁. 𑀲𑀼𑀪𑀸𑀲𑀼𑀪𑀨𑀮𑀁 𑀦𑁂𑀢𑀻𑀢𑀺 𑀦𑀺𑀬𑀢𑀺,𑀢𑀺. 𑀲𑀼𑀪𑀸𑀲𑀼𑀪𑀨𑀮𑀁 𑀪𑀸𑀚𑁂𑀢𑀻𑀢𑀺 𑀪𑀸𑀕𑁄. 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀪𑀸𑀕𑀪𑀸𑀕𑁄𑀥𑀻𑀬𑀢𑀺 𑀏𑀢𑁆𑀣𑀸𑀢𑀺 𑀪𑀸𑀕𑀥𑁂𑀬𑁆𑀬𑀁. 𑀲𑀼𑀪𑀸𑀲𑀼𑀪𑀨𑀮𑀁 𑀯𑀺𑀤𑀥𑀸𑀢𑀻𑀢𑀺 𑀯𑀺𑀥𑀺. 𑀅𑀬𑁄, 𑀲𑀼𑀪𑀸𑀯𑀳𑁄, 𑀤𑁂𑀯𑀁, 𑀤𑀺𑀝𑁆𑀞𑀁𑀇𑀘𑁆𑀘𑀸𑀤𑀻𑀦𑀺𑀧𑀺 𑀲𑀼𑀪𑀸𑀲𑀼𑀪𑀓𑀫𑁆𑀫𑀫𑀢𑁆𑀢𑀲𑁆𑀲 𑀦𑀸𑀫𑀸𑀦𑀺. 𑀧𑀜𑁆𑀘𑀓𑀁 𑀚𑀸𑀢𑀺𑀬𑀁. 𑀉𑀧𑁆𑀧𑀚𑁆𑀚𑀦𑀁 𑀉𑀧𑁆𑀧𑀢𑁆𑀢𑀺, 𑀦𑀺𑀧𑁆𑀧𑀚𑁆𑀚𑀦𑀁 𑀦𑀺𑀩𑁆𑀩𑀢𑁆𑀢𑀺, 𑀧𑀤 𑀕𑀢𑀺𑀬𑀁, 𑀦𑀺𑀧𑀼𑀩𑁆𑀩𑁄,𑀢𑀺, 𑀧𑀲𑁆𑀲 𑀩𑁄. 𑀚𑀦𑀦𑀁 𑀚𑀸𑀢𑀺. 𑀚𑀦𑀻𑀬𑀢𑁂 𑀚𑀦𑀦𑀁. 𑀉𑀤𑁆𑀥𑀁 𑀪𑀯𑀦𑀁 𑀉𑀩𑁆𑀪𑀯𑁄.

𑁯𑁧. 𑀧𑀚𑁆𑀚𑀁 ¶ 𑀳𑁂𑀢𑀼𑀫𑁆𑀳𑀺. 𑀅𑀢𑁆𑀢𑀦𑁄 𑀨𑀮𑀁 𑀦𑀺𑀫𑀺𑀦𑀸𑀢𑀻𑀢𑀺 𑀦𑀺𑀫𑀺𑀢𑁆𑀢𑀁, 𑀫𑀸 𑀧𑀭𑀺𑀫𑀸𑀡𑁂, 𑀦𑀺𑀧𑀼𑀩𑁆𑀩𑁄. 𑀓𑀭𑁄𑀢𑀺 𑀨𑀮𑀦𑁆𑀢𑀺 𑀓𑀸𑀭𑀡𑀁. 𑀢𑀺𑀝𑁆𑀞𑀢𑀺 𑀨𑀮𑀫𑁂𑀢𑁆𑀣𑀸𑀢𑀺 𑀞𑀸𑀦𑀁. 𑀧𑀚𑁆𑀚𑀢𑀺 𑀦𑀺𑀧𑀚𑁆𑀚𑀢𑀺 𑀨𑀮𑀫𑁂𑀢𑁂𑀦𑀸𑀢𑀺 𑀧𑀤𑀁, 𑀯𑀺𑀲𑁂𑀲𑁂𑀦 𑀚𑀸𑀬𑀢𑁂𑀢𑀺 𑀩𑀻𑀚𑀁, 𑀭𑀲𑁆𑀲𑀲𑁆𑀲 𑀤𑀻𑀖𑀢𑀸. 𑀦𑀺𑀲𑁆𑀲𑁂𑀲𑁂𑀦 𑀅𑀢𑁆𑀢𑀦𑁄 𑀨𑀮𑀁 𑀩𑀦𑁆𑀥𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀦𑀺𑀩𑀦𑁆𑀥𑀦𑀁. 𑀦𑀺𑀤𑀻𑀬𑀢𑁂 𑀦𑀺𑀘𑁆𑀙𑀻𑀬𑀢𑁂 𑀅𑀦𑁂𑀦𑁂𑀢𑀺 𑀦𑀺𑀤𑀸𑀦𑀁, 𑀬𑀼, 𑀦𑀺𑀤𑀤𑀸𑀢𑀺 𑀨𑀮𑀦𑁆𑀢𑀺 𑀯𑀸 𑀦𑀺𑀤𑀸𑀦𑀁. 𑀧𑀪𑀯𑀢𑀺 𑀨𑀮𑀫𑁂𑀢𑀲𑁆𑀫𑀸𑀢𑀺 𑀧𑀪𑀯𑁄, 𑀳𑀺𑀦𑁄𑀢𑀺 𑀕𑀘𑁆𑀙𑀢𑀺 𑀧𑀭𑀺𑀡𑀫𑀢𑀺 𑀓𑀸𑀭𑀺𑀬𑀭𑀽𑀧𑀢𑀦𑁆𑀢𑀺 𑀳𑁂𑀢𑀼, 𑀢𑀼, 𑀳𑀺𑀦𑁄𑀢𑀺 𑀯𑀸 𑀧𑀢𑀺𑀝𑁆𑀞𑀸𑀢𑀺 𑀨𑀮𑀫𑁂𑀢𑁆𑀣𑀸𑀢𑀺 𑀳𑁂𑀢𑀼, 𑀳𑀺 𑀧𑀢𑀺𑀝𑁆𑀞𑀸𑀬𑀁. 𑀲𑀫𑁆𑀪𑀯𑀢𑀺 𑀬𑁂𑀦 𑀨𑀮𑀦𑁆𑀢𑀺 𑀲𑀫𑁆𑀪𑀯𑁄. 𑀲𑀺𑀦𑁄𑀢𑀺 𑀨𑀮𑀁 𑀩𑀦𑁆𑀥𑀢𑀻𑀢𑀺 𑀲𑁂𑀢𑀼. 𑀧𑀝𑀺𑀘𑁆𑀘 𑀨𑀮𑀫𑁂𑀢𑀲𑁆𑀫𑀸 𑀏𑀢𑀻𑀢𑀺 𑀧𑀘𑁆𑀘𑀬𑁄.

𑁯𑁨. 𑀬𑀁 𑀓𑀸𑀭𑀡𑀁 𑀲𑀫𑀸𑀲𑀦𑁆𑀦𑀁 𑀆𑀲𑀦𑁆𑀦𑀢𑀭𑀁 𑀨𑀮𑁂𑀦, 𑀢𑀁 𑀧𑀤𑀝𑁆𑀞𑀸𑀦𑀦𑁆𑀢𑀺 𑀫𑀢𑀁. 𑀧𑀤𑀸𑀦𑀁 𑀳𑁂𑀢𑀽𑀦𑀁 𑀞𑀸𑀦𑀁 𑀧𑀤𑀝𑁆𑀞𑀸𑀦𑀁, 𑀬𑀣𑀸 ‘‘𑀭𑀸𑀚𑀭𑀸𑀚𑀸’’𑀢𑀺. 𑀢𑀺𑀯𑀺𑀥𑀁 𑀓𑀸𑀭𑀡𑀁 𑀉𑀧𑀸𑀤𑀸𑀦𑀓𑀸𑀭𑀡𑀁 𑀲𑀳𑀓𑀸𑀭𑀻𑀓𑀸𑀭𑀡𑀁 𑀓𑀸𑀭𑀡𑀓𑀸𑀭𑀡𑀦𑁆𑀢𑀺. 𑀬𑀣𑀸 𑀩𑀻𑀚𑀁 𑀅𑀗𑁆𑀓𑀼𑀭𑀲𑁆𑀲 𑀉𑀧𑀸𑀤𑀸𑀦𑀓𑀸𑀭𑀡𑀲𑀗𑁆𑀔𑀸𑀢𑀁 𑀧𑀤𑀝𑁆𑀞𑀸𑀦𑀁, 𑀪𑀽𑀫𑀺𑀚𑀮𑀸𑀤𑀺 𑀲𑀳𑀓𑀸𑀭𑀻𑀓𑀸𑀭𑀡𑀁, ‘‘𑀓𑀫𑁆𑀫𑀲𑁆𑀲 [𑀓𑀫𑁆𑀧𑀲𑁆𑀲 (?)] 𑀓𑀸𑀭𑀡𑀁 𑀚𑀭𑁄, 𑀢𑀲𑁆𑀲 𑀓𑀸𑀭𑀡𑀁 𑀓𑀨𑁄’’𑀢𑀺 𑀓𑀨𑁄 𑀓𑀸𑀭𑀡𑀓𑀸𑀭𑀡𑀁 𑀓𑀫𑁆𑀫𑀲𑁆𑀲 [𑀓𑀫𑁆𑀧𑀲𑁆𑀲 (?)].

𑀢𑀺𑀓𑀁 ¶ 𑀲𑀭𑀻𑀭𑀸𑀥𑀺𑀧𑀢𑀺𑀤𑁂𑀯𑁂. 𑀚𑀻𑀯𑀦𑁆𑀢𑀺 𑀲𑀢𑁆𑀢𑀸 𑀬𑁂𑀦𑀸𑀢𑀺 𑀚𑀻𑀯𑁄. 𑀧𑀽𑀭𑁂𑀢𑀺 𑀦𑀺𑀲𑁆𑀲𑀬𑀲𑁆𑀲𑀸𑀪𑀺𑀮𑀸𑀲𑀦𑁆𑀢𑀺 𑀧𑀼𑀭𑀺𑀲𑁄, 𑀇𑀲𑁄. 𑀅𑀢𑀦𑁆𑀢𑀺 𑀲𑀢𑀢𑀁 𑀕𑀘𑁆𑀙𑀦𑁆𑀢𑀺 𑀲𑀢𑁆𑀢𑀸 𑀬𑁂𑀦𑀸𑀢𑀺 𑀅𑀢𑁆𑀢𑀸. 𑀤𑁆𑀯𑀬𑀁 𑀲𑀢𑁆𑀢𑀭𑀚𑁄𑀢𑀫𑁄𑀲𑀸𑀫𑁆𑀬𑀸𑀯𑀢𑁆𑀣𑀸𑀬𑀁. 𑀧𑀥𑀻𑀬𑀦𑁆𑀢𑁂 𑀧𑀮𑀻𑀬𑀦𑁆𑀢𑁂 𑀅𑀢𑁆𑀭 𑀕𑀼𑀡𑀸 𑀲𑀢𑁆𑀢𑀭𑀚𑁄𑀢𑀫𑁄 𑀭𑀽𑀧𑀸𑀢𑀺 𑀧𑀥𑀸𑀦𑀁, 𑀬𑀼. 𑀧𑀓𑀭𑁄𑀢𑀺 𑀧𑀼𑀭𑀺𑀲𑁄𑀧𑀪𑁄𑀕𑀢𑁆𑀣𑀁 𑀲𑀤𑁆𑀤𑀸𑀤𑀺𑀓𑀸𑀭𑀺𑀬𑀦𑁆𑀢𑀺 𑀧𑀓𑀢𑀺,𑀢𑀺. 𑀫𑁄𑀳𑀭𑀸𑀕𑀤𑁄𑀲𑀸𑀦𑀁 𑀬𑀣𑀸𑀲𑀗𑁆𑀔𑁆𑀬𑀁 𑀲𑀢𑁆𑀢𑀭𑀚𑁄𑀢𑀫𑀸𑀦𑀻𑀢𑀺 𑀲𑀜𑁆𑀜𑀸. 𑀲𑀢𑁄 𑀪𑀸𑀯𑁄 𑀲𑀢𑁆𑀢𑀁, 𑀞𑀺𑀢𑀺𑀧𑀭𑀢𑀸. 𑀭𑀚𑁆𑀚𑀦𑁆𑀢𑁆𑀬𑀢𑁆𑀭𑀸𑀢𑀺 𑀭𑀚𑁄, 𑀲𑀝𑁆𑀞𑀺𑀧𑀭𑀢𑀸. 𑀢𑀫𑀦𑁆𑀢𑁆𑀬𑀢𑁆𑀭𑀸𑀢𑀺 𑀢𑀫𑁄, 𑀧𑀮𑀬𑀧𑀭𑀢𑀸.

𑁯𑁩. 𑀧𑀚𑁆𑀚𑁂𑀦 𑀧𑀸𑀡𑀺𑀦𑁄 𑀦𑀸𑀫𑀸𑀦𑀺. 𑀧𑀡𑀦𑁆𑀢𑀺 𑀚𑀻𑀯𑀦𑁆𑀢𑀺 𑀲𑀢𑁆𑀢𑀸 𑀬𑁂𑀦𑀸𑀢𑀺 𑀧𑀸𑀡𑁄, 𑀲𑁄 𑀬𑀲𑁆𑀲𑀢𑁆𑀣𑀺, 𑀲𑁄 𑀧𑀸𑀡𑁄. 𑀲𑀭𑀻𑀭𑀲𑀗𑁆𑀔𑀸𑀢𑁄 𑀓𑀸𑀬𑁄 𑀬𑀲𑁆𑀲𑀢𑁆𑀣𑀺, 𑀲𑁄 𑀲𑀭𑀻𑀭𑀻. 𑀓𑀫𑁆𑀫𑁂𑀦 𑀪𑀯𑀢𑀻𑀢𑀺 𑀪𑀽𑀢𑀁, 𑀦𑀧𑀼𑀁𑀲𑀓𑁂, 𑀧𑀼𑀫𑁂𑀯𑀸𑀢𑀺 𑀯𑀸𑀲𑀤𑁆𑀤𑀢𑁆𑀣𑁄. 𑀭𑀽𑀧𑀸𑀤𑀻𑀲𑀼 𑀲𑀜𑁆𑀚𑀢𑀻𑀢𑀺 𑀲𑀢𑁆𑀢𑁄, 𑀦𑀺𑀘𑁆𑀙𑀦𑁆𑀤𑀭𑀸𑀕𑀸𑀧𑀺 𑀭𑀽𑀴𑁆𑀳𑀺𑀬𑀸 𑀲𑀢𑁆𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀤𑁂𑀳𑁄 𑀓𑀸𑀬𑁄 𑀬𑀲𑁆𑀲𑀢𑁆𑀣𑀻𑀢𑀺 𑀤𑁂𑀳𑀻. 𑀧𑀽𑀭𑁂𑀢𑀻𑀢𑀺 𑀧𑀽𑀢𑀺, 𑀧𑀽𑀢𑀺𑀲𑀗𑁆𑀔𑀸𑀢𑀁 𑀆𑀳𑀸𑀭𑀁 𑀕𑀺𑀮𑀢𑀺 𑀅𑀤𑀢𑀻𑀢𑀺 𑀧𑀼𑀕𑁆𑀕𑀮𑁄, 𑀢𑀺𑀲𑁆𑀲 𑀮𑁄𑀧𑁄, 𑀲𑀢𑁆𑀢𑀸𑀦𑀁 𑀆𑀬𑀼𑀁 𑀧𑀽𑀭𑁂𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀧𑀼𑀕𑁆𑀕𑁄, 𑀢𑀁 𑀮𑀸𑀢𑀺 𑀪𑀓𑁆𑀔𑀢𑀻𑀢𑀺 𑀧𑀼𑀕𑁆𑀕𑀮𑁄. 𑀚𑀻𑀯𑀦𑁆𑀢𑀺 𑀬𑁂𑀦𑀸𑀢𑀺 𑀚𑀻𑀯𑀁, 𑀢𑀫𑀲𑁆𑀲𑀢𑁆𑀣𑀻𑀢𑀺 𑀚𑀻𑀯𑁄. 𑀬𑀣𑀸𑀯𑀼𑀢𑁆𑀢𑀢𑁆𑀣𑁄 𑀧𑀸𑀡𑁄 𑀬𑀲𑁆𑀲𑀢𑁆𑀣𑀻𑀢𑀺 𑀧𑀸𑀡𑀻. 𑀧𑀓𑀸𑀭𑁂𑀦 𑀚𑀸𑀢𑀢𑁆𑀢𑀸 𑀧𑀚𑀸. 𑀚𑀸𑀬𑀢𑀻𑀢𑀺 𑀚𑀦𑁆𑀢𑀼, 𑀢𑀼. 𑀓𑀼𑀲𑀮𑀸𑀓𑀼𑀲𑀮𑀁 𑀚𑀦𑁂𑀢𑀻𑀢𑀺 𑀚𑀦𑁄. 𑀮𑀼𑀚𑁆𑀚𑀢𑀻𑀢𑀺 𑀮𑁄𑀓𑁄, 𑀮𑀼𑀚 𑀯𑀺𑀦𑀸𑀲𑁂, 𑀚𑀲𑁆𑀲 𑀓𑁄. 𑀬𑀣𑀸 𑀧𑀼𑀭𑀺𑀫𑀓𑀸 𑀲𑀢𑁆𑀢𑀸 𑀚𑀸𑀢𑀺𑀚𑀭𑀸𑀫𑀭𑀡𑀁 𑀕𑀘𑁆𑀙𑀦𑁆𑀢𑀺, 𑀢𑀣𑀸 𑀅𑀬𑀫𑁆𑀧𑀺 𑀕𑀘𑁆𑀙𑀢𑀻𑀢𑀺 𑀢𑀣𑀸𑀕𑀢𑁄.

𑁯𑁪. 𑀭𑀽𑀧𑀸𑀤𑀬𑁄 ¶ 𑀙 𑀘𑀓𑁆𑀔𑀸𑀤𑀺𑀕𑀬𑁆𑀳𑀸 𑀥𑀫𑁆𑀫𑀸 ‘‘𑀕𑁄𑀘𑀭𑀸’’𑀢𑀺 ‘‘𑀆𑀮𑀫𑁆𑀩𑀸’’𑀢𑀺 ‘‘𑀯𑀺𑀲𑀬𑀸’’𑀢𑀺 ‘‘𑀆𑀭𑀫𑁆𑀫𑀡𑀸𑀦𑀻’’𑀢𑀺 ‘‘𑀆𑀮𑀫𑁆𑀩𑀡𑀸𑀦𑀻’’𑀢𑀺 𑀘 𑀯𑀼𑀘𑁆𑀘𑀦𑁆𑀢𑁂. 𑀭𑀽𑀧𑀬𑀢𑀺 𑀧𑀓𑀸𑀲𑁂𑀢𑀺 𑀅𑀢𑁆𑀢𑀦𑁄 𑀲𑀪𑀸𑀯𑀦𑁆𑀢𑀺 𑀭𑀽𑀧𑀁. 𑀲𑀧𑁆𑀧𑀢𑀺 𑀉𑀘𑁆𑀘𑀸𑀭𑀻𑀬𑀢𑀻𑀢𑀺 𑀲𑀤𑁆𑀤𑁄, 𑀲𑀧𑁆𑀧 𑀕𑀢𑀺𑀬𑀁 𑀯𑀸, 𑀲𑀧𑁆𑀧𑀢𑁂 𑀜𑀸𑀬𑀢𑁂 𑀬𑁂𑀦𑁂𑀢𑀺 𑀲𑀤𑁆𑀤𑁄. 𑀕𑀦𑁆𑀥 𑀅𑀤𑁆𑀤𑀦𑁂, 𑀅𑀤𑁆𑀤𑀦𑀁 𑀳𑀺𑀁𑀲𑀦𑀁, 𑀬𑀸𑀘𑀦𑀜𑁆𑀘, 𑀳𑀺𑀁𑀲𑀢𑁂 𑀅𑀪𑀺𑀮𑀲𑀻𑀬𑀢𑁂 𑀯𑀸 𑀕𑀦𑁆𑀥𑁄, 𑀕𑀦𑁆𑀥𑁂𑀢𑀺 𑀯𑀸 𑀅𑀢𑁆𑀢𑀦𑁄 𑀯𑀢𑁆𑀣𑀼𑀁 𑀲𑀽𑀘𑁂𑀢𑀺 𑀧𑀓𑀸𑀲𑁂𑀢𑀺 ‘‘𑀇𑀤𑀫𑁂𑀢𑁆𑀣 𑀅𑀢𑁆𑀣𑀻’’𑀢𑀺 𑀧𑁂𑀲𑀼𑀜𑁆𑀜𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀕𑀦𑁆𑀥𑁄. 𑀭𑀲𑀦𑁆𑀢𑀺 𑀢𑀁 𑀲𑀢𑁆𑀢𑀸 𑀅𑀲𑁆𑀲𑀸𑀤𑁂𑀦𑁆𑀢𑀻𑀢𑀺 𑀭𑀲𑁄. 𑀨𑀼𑀲𑀻𑀬𑀢𑀻𑀢𑀺 𑀨𑀲𑁆𑀲𑁄. 𑀕𑀸𑀯𑁄 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘𑀭𑀦𑁆𑀢𑁆𑀬𑁂𑀢𑁂𑀲𑀼 𑀕𑁄𑀘𑀭𑀸. 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀳𑀺 𑀆𑀮𑀫𑁆𑀩𑀻𑀬𑀦𑁆𑀢𑁂𑀢𑀺 𑀆𑀮𑀫𑁆𑀩𑀸. 𑀲𑀺 𑀩𑀦𑁆𑀥𑀦𑁂 𑀯𑀺𑀧𑀼𑀩𑁆𑀩𑁄, 𑀯𑀺𑀲𑀺𑀦𑁄𑀦𑁆𑀢𑀺 𑀯𑀺𑀩𑀦𑁆𑀥𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀯𑀺𑀲𑀬𑀸. 𑀆𑀕𑀦𑁆𑀢𑁆𑀯𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀭𑀫𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀭𑀫𑁆𑀫𑀡𑀸𑀦𑀺, 𑀬𑀼. 𑀏𑀢𑁂 𑀇𑀦𑁆𑀤𑁆𑀭𑀺𑀬𑀢𑁆𑀣𑀸𑀢𑀺𑀧𑁆𑀬𑀼𑀘𑁆𑀘𑀦𑁆𑀢𑁂, 𑀇𑀦𑁆𑀤𑁆𑀭𑀺𑀬𑁂𑀳𑀺 𑀅𑀢𑁆𑀣𑁆𑀬𑀦𑁆𑀢𑁂 𑀅𑀪𑀺𑀮𑀲𑀻𑀬𑀦𑁆𑀢𑁂𑀢𑀺 𑀓𑀢𑁆𑀯𑀸.

𑁯𑁫. 𑀧𑀚𑁆𑀚𑀤𑁆𑀥𑀁 𑀲𑀼𑀓𑁆𑀓𑁂. 𑀲𑀼𑀘 𑀲𑁄𑀓𑁂, 𑀲𑁄𑀘𑀦𑁆𑀢𑀺 𑀏𑀢𑁂𑀦 𑀢𑀤𑀢𑁆𑀣𑀺𑀓𑀸𑀢𑀺 𑀲𑀼𑀓𑁆𑀓𑁄, 𑀅. 𑀕𑀼 𑀲𑀤𑁆𑀤𑁂, 𑀕𑀼𑀬𑀢𑁂 𑀓𑀺𑀢𑁆𑀢𑀻𑀬𑀢𑁂𑀢𑀺 𑀕𑁄𑀭𑁄, 𑀭𑁄. 𑀲𑀺 𑀲𑁂𑀯𑀸𑀬𑀁, 𑀲𑁂𑀯𑀻𑀬𑀢𑁂𑀢𑀺 𑀲𑀺𑀢𑁄, 𑀲𑀺𑀦𑁄𑀢𑀺 𑀯𑀸 𑀩𑀦𑁆𑀥𑀢𑀺 𑀘𑀺𑀢𑁆𑀢𑀦𑁆𑀢𑀺 𑀲𑀺𑀢𑁄. 𑀅𑀯𑀤𑀸𑀬𑀢𑀺 𑀲𑀩𑁆𑀩𑀯𑀡𑁆𑀡𑁂𑀢𑀺 𑀑𑀤𑀸𑀢𑁄. 𑀤𑀸 𑀅𑀯𑀔𑀡𑁆𑀟𑀦𑁂 𑀅𑀯𑀧𑀼𑀩𑁆𑀩𑁄. 𑀥𑀸𑀯𑀢𑀺 𑀲𑀼𑀚𑁆𑀛𑀢𑁆𑀬𑀦𑁂𑀦𑁂𑀢𑀺 𑀥𑀯𑀮𑁄, 𑀅𑀮𑁄. 𑀲𑀺𑀢 𑀯𑀡𑁆𑀡𑁂, 𑀡𑁄, 𑀲𑁂𑀢𑁄 ¶ . 𑀧𑀟𑀺 𑀕𑀢𑀺𑀬𑀁, 𑀧𑀡𑁆𑀟𑀢𑀺 𑀧𑀓𑀸𑀲𑁂𑀢𑀻𑀢𑀺 𑀧𑀡𑁆𑀟𑀭𑁄, 𑀅𑀭𑁄. 𑀲𑀼𑀘𑀺, 𑀯𑀺𑀲𑀤𑁄, 𑀅𑀚𑁆𑀚𑀼𑀦𑁄𑀢𑀺𑀧𑀺 𑀲𑀼𑀓𑁆𑀓𑀦𑀸𑀫𑀸𑀦𑀺.

𑀙𑀓𑁆𑀓𑀁 𑀭𑀢𑁆𑀢𑁂. 𑀲𑁄𑀡 𑀯𑀡𑁆𑀡𑁂, 𑀡𑁄, 𑀭𑀢𑁆𑀢𑀼𑀧𑁆𑀧𑀮𑀯𑀡𑁆𑀡𑁄, 𑀭𑀼𑀳 𑀚𑀦𑀦𑁂, 𑀇𑀢𑁄, 𑀮𑀢𑁆𑀢𑁂 𑀮𑁄𑀳𑀺𑀢𑁄. 𑀭𑀜𑁆𑀚𑀦𑁆𑀢𑁆𑀬𑀦𑁂𑀦𑁂𑀢𑀺 𑀭𑀢𑁆𑀢𑁄, 𑀭𑀦𑁆𑀚 𑀭𑀗𑁆𑀕𑁂. 𑀢𑀫𑁆𑀩𑁄 𑀉𑀤𑀼𑀫𑁆𑀩𑀭𑀲𑀗𑁆𑀔𑀸𑀢𑁄 𑀮𑁄𑀳𑀯𑀺𑀲𑁂𑀲𑁄, 𑀢𑀩𑁆𑀩𑀡𑁆𑀡𑀢𑀸𑀬 𑀢𑀫𑁆𑀩𑁄. 𑀫𑀜𑁆𑀚𑁂𑀝𑁆𑀞𑀸 𑀦𑀸𑀫 𑀭𑀢𑁆𑀢𑀯𑀮𑁆𑀮𑀺, 𑀬𑀸𑀬 𑀳𑀢𑁆𑀣𑀺𑀤𑀦𑁆𑀢𑀸𑀤𑀺𑀯𑀺𑀓𑀢𑀺𑀬𑁄 𑀭𑀢𑁆𑀢𑀸 𑀪𑀯𑀦𑁆𑀢𑀺, 𑀢𑀩𑁆𑀩𑀡𑁆𑀡𑀢𑀸𑀬 𑀫𑀜𑁆𑀚𑁂𑀝𑁆𑀞𑁄. 𑀭𑁄𑀳𑀺𑀢𑁄 𑀮𑁄𑀳𑀺𑀢𑀲𑀫𑁄, 𑀅𑀮𑀢𑁆𑀢𑀫𑁂𑀯 𑀯𑀺𑀲𑁂𑀲𑁄.

𑁯𑁬. 𑀲𑀸𑀫𑀮𑀦𑁆𑀢𑀁 𑀓𑀡𑁆𑀳𑁂. 𑀦𑀻𑀮 𑀯𑀡𑁆𑀡𑁂, 𑀅. 𑀓𑀲𑁆𑀲𑀢𑁂𑀢𑀺 𑀓𑀡𑁆𑀳𑁄, 𑀓𑀲 𑀯𑀺𑀮𑁂𑀔𑀦𑁂, 𑀡𑁆𑀳𑁄. 𑀦 𑀲𑀺𑀢𑁄 𑀅𑀲𑀺𑀢𑁄. 𑀯𑀡𑁆𑀡𑁂𑀲𑀼 𑀏𑀓𑀓𑁄𑀝𑁆𑀞𑀸𑀲𑀪𑀸𑀯𑁂𑀦 𑀓𑀮𑁆𑀬𑀢𑁂𑀢𑀺 𑀓𑀸𑀮𑁄, 𑀲𑁄 𑀏𑀯 𑀓𑀸𑀴𑁄. 𑀫𑀘, 𑀫𑀘𑀺 𑀓𑀓𑁆𑀓𑀦𑁂, 𑀓𑀓𑁆𑀓𑀦𑀁 𑀧𑀺𑀲𑀦𑀁, 𑀲𑁂𑀢𑀸𑀤𑀺𑀓𑀁 𑀫𑀘𑀢𑀻𑀢𑀺 𑀫𑁂𑀘𑀓𑁄, 𑀡𑁆𑀯𑀼, 𑀅𑀲𑁆𑀲𑁂𑀢𑁆𑀢𑀁. 𑀲𑀸 𑀢𑀦𑀼𑀓𑀭𑀡𑁂, 𑀲𑀸𑀬𑀢𑀺 𑀢𑀦𑀼𑀓𑀭𑀻𑀬𑀢𑀺 𑀧𑀝𑀺𑀧𑀓𑁆𑀔𑀯𑀡𑁆𑀡𑁂𑀳𑀻𑀢𑀺 𑀲𑀸𑀫𑁄. 𑀲𑀸𑀫𑀮𑁄 𑀲𑀸𑀫𑀲𑀤𑀺𑀲𑁄, 𑀫𑀮𑀧𑀘𑁆𑀘𑀬𑁄𑀯 𑀯𑀺𑀲𑁂𑀲𑁄.

𑀧𑀡𑁆𑀟𑀼𑀲𑀤𑁆𑀤𑁄 𑀲𑀺𑀢𑀧𑀻𑀢𑁂 𑀉𑀢𑁆𑀢𑁄, 𑀲𑀺𑀢𑀧𑀻𑀢𑀲𑀫𑁆𑀫𑀺𑀲𑁆𑀲𑀺𑀢𑀯𑀡𑁆𑀡𑁂 𑀧𑀡𑁆𑀟𑀼𑀲𑀤𑁆𑀤𑁄 𑀯𑀼𑀢𑁆𑀢𑁄𑀢𑁆𑀬𑀢𑁆𑀣𑁄. 𑀯𑀼𑀢𑁆𑀢𑀜𑁆𑀘 ‘‘𑀲𑀺𑀢𑀧𑀻𑀢𑀲𑀫𑀸𑀬𑀼𑀢𑁆𑀢𑁄, 𑀧𑀡𑁆𑀟𑀼𑀯𑀡𑁆𑀡𑁄 𑀧𑀓𑀺𑀢𑁆𑀢𑀺𑀢𑁄’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁫.𑁧𑁩]. 𑀧𑀡𑁆𑀟𑀢𑀺 𑀏𑀓𑀕𑀡𑀦𑀁 𑀕𑀘𑁆𑀙𑀢𑀻𑀢𑀺 𑀧𑀡𑁆𑀟𑀼, 𑀧𑀟𑀺 𑀕𑀢𑀺𑀬𑀁, 𑀉. 𑀳𑀭𑀺𑀡𑁄, 𑀧𑀡𑁆𑀟𑀼𑀭𑁄𑀢𑀺𑀧𑀺 𑀧𑀡𑁆𑀟𑀼𑀯𑀡𑁆𑀡𑀦𑀸𑀫𑀸𑀦𑀺. 𑀈𑀲𑀁𑀧𑀡𑁆𑀟𑀼 𑀅𑀩𑁆𑀬𑀢𑁆𑀢𑀧𑀡𑁆𑀟𑀼𑀯𑀡𑁆𑀡𑁄 𑀥𑀽𑀲𑀭𑁄 𑀦𑀸𑀫, 𑀬𑀣𑀸 𑀥𑀽𑀮𑀺𑀯𑀡𑁆𑀡𑁄. 𑀥𑀽𑀲 𑀓𑀦𑁆𑀢𑀺𑀓𑀭𑀡𑁂, 𑀘𑀼𑀭𑀸𑀤𑀺, 𑀅𑀭𑁄.

𑁯𑁭. 𑀓𑀺𑀜𑁆𑀘𑀺𑀭𑀢𑁆𑀢𑁄 ¶ 𑀅𑀩𑁆𑀬𑀢𑁆𑀢𑀭𑀢𑁆𑀢𑀯𑀡𑁆𑀡𑁄 𑀅𑀭𑀼𑀡𑁄 𑀦𑀸𑀫, 𑀬𑀣𑀸 𑀫𑀘𑁆𑀙𑀲𑁆𑀲 𑀘𑀓𑁆𑀔𑀼 [𑀬𑀣𑀸 𑀫𑀤𑀫𑀢𑁆𑀢𑀲𑁆𑀲 𑀘𑀓𑁆𑀔𑀼𑀭𑀸𑀕𑁄 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁫.𑁧𑁫)], 𑀲𑀽𑀭𑀺𑀬𑀸𑀤𑁄 𑀢𑀭𑀼𑀡𑁄 𑀯𑀼𑀢𑁆𑀢𑁄.

𑀲𑁂𑀢𑀮𑁄𑀳𑀺𑀢𑁄 𑀲𑁂𑀢𑀭𑀢𑁆𑀢𑀫𑀺𑀲𑁆𑀲𑁄 𑀯𑀡𑁆𑀡𑁄 𑀧𑀸𑀝𑀮𑁄 𑀦𑀸𑀫, 𑀬𑀣𑀸 𑀧𑀸𑀝𑀮𑀓𑀼𑀲𑀼𑀫𑀁. 𑀧𑀸𑀝𑀬𑀢𑁂𑀢𑀺 𑀧𑀸𑀝𑀮𑁄, 𑀅𑀮𑁄, 𑀧𑀝 𑀯𑀺𑀪𑀸𑀚𑀦𑁂.

𑀤𑁆𑀯𑀺𑀓𑀁 𑀧𑀻𑀢𑁂. 𑀧𑀸 𑀧𑀸𑀦𑁂, 𑀓𑀫𑁆𑀫𑀦𑀺 𑀢𑁄, 𑀈𑀢𑁆𑀢𑀜𑁆𑀘. 𑀳𑀮𑀺𑀤𑁆𑀤𑀺𑀬𑀸 𑀇𑀯 𑀆𑀪𑀸 𑀬𑀲𑁆𑀲 𑀳𑀮𑀺𑀤𑁆𑀬𑀸𑀪𑁄.

𑀢𑀺𑀓𑀁 𑀢𑀺𑀡𑀧𑀢𑁆𑀢𑀸𑀤𑀺𑀕𑀢𑁂 𑀯𑀡𑁆𑀡𑁂. 𑀮𑀲 𑀓𑀦𑁆𑀢𑀺𑀬𑀁, 𑀅𑀢𑀺𑀲𑀬𑁂𑀦 𑀮𑀲𑁆𑀬𑀢𑁂𑀢𑀺 𑀧𑀮𑀸𑀲𑁄. ‘‘𑀧𑀸𑀮𑀸𑀲𑁄’’𑀢𑀺 𑀧𑀸𑀞𑁂 𑀢𑀼 𑀭𑀲𑁆𑀲𑀲𑁆𑀲 𑀤𑀻𑀖𑀢𑀸. 𑀳𑀭 𑀳𑀭𑀡𑁂, 𑀫𑀦𑀁 𑀳𑀭𑀢𑀻𑀢𑀺 𑀳𑀭𑀺𑀢𑁄, 𑀇𑀢𑁄. 𑀇, 𑀳𑀭𑀺.

𑁯𑁮. 𑀦𑀻𑀮𑀧𑀻𑀢𑀲𑀫𑁆𑀫𑀺𑀲𑁆𑀲𑀯𑀡𑁆𑀡𑁂 𑀓𑀴𑀸𑀭𑁄, 𑀓𑀧𑀺𑀮𑁄 𑀘 𑀯𑀢𑁆𑀢𑀦𑁆𑀢𑀺. 𑀓𑀮 𑀲𑀗𑁆𑀔𑁆𑀬𑀸𑀦𑁂. 𑀅𑀭𑁄, 𑀮𑀲𑁆𑀲 𑀴𑁄, 𑀓𑀴𑀸𑀭𑁄. 𑀓𑀩 𑀯𑀡𑁆𑀡𑁂, 𑀇𑀮𑁄, 𑀩𑀲𑁆𑀲 𑀧𑁄, 𑀓𑀧𑀺𑀮𑁄.

𑀭𑁄𑀘𑀦𑀧𑁆𑀧𑀪𑁂 𑀕𑁄𑀭𑁄𑀘𑀦𑀲𑀤𑀺𑀲𑀧𑁆𑀧𑀪𑀸𑀬𑀁 𑀧𑀺𑀗𑁆𑀕𑁄, 𑀧𑀺𑀲𑀗𑁆𑀕𑁄 𑀘 𑀯𑀢𑁆𑀢𑀦𑁆𑀢𑀺. 𑀧𑀪𑀸𑀲𑀤𑁆𑀤𑀲𑁆𑀲 𑀤𑁆𑀯𑀺𑀮𑀺𑀗𑁆𑀕𑀢𑁆𑀢𑀫𑁂𑀯. 𑀧𑀺𑀚𑀺 𑀪𑀸𑀲𑀢𑁆𑀣𑁄, 𑀧𑀺𑀗𑁆𑀕𑁄. 𑀧𑀭𑀢𑁆𑀭 𑀲𑀓𑀸𑀭𑀯𑀡𑁆𑀡𑀸𑀕𑀫𑁄, 𑀧𑀺𑀲𑀗𑁆𑀕𑁄.

𑀓𑀴𑀸𑀭𑀸𑀤𑀻𑀦𑀁 ¶ 𑀘𑀢𑀼𑀦𑁆𑀦𑀁 𑀧𑀺𑀗𑁆𑀕𑀮𑀯𑀺𑀲𑁂𑀲𑀢𑁆𑀣𑀯𑀸𑀘𑀓𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀺𑀗𑁆𑀕𑀮𑀲𑀸𑀫𑀜𑁆𑀜𑀢𑁆𑀣𑀯𑀸𑀘𑀓𑀢𑁆𑀢𑀫𑁆𑀧𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀓𑀴𑀸𑀭𑀸𑀤𑀺’’𑀘𑁆𑀘𑀸𑀤𑀺. 𑀢𑀲𑁆𑀲𑀸𑀬𑀫𑀢𑁆𑀣𑁄 𑁋 𑀦 𑀓𑁂𑀯𑀮𑀁 𑀓𑀴𑀸𑀭𑀸𑀤𑀬𑁄 𑀧𑀺𑀗𑁆𑀕𑀮𑀯𑀺𑀲𑁂𑀲𑀢𑁆𑀣𑁂𑀬𑁂𑀯 𑀧𑀯𑀢𑁆𑀢𑀦𑁆𑀢𑀺, 𑀅𑀣 𑀔𑁄 𑀧𑀺𑀗𑁆𑀕𑀮𑀲𑀸𑀫𑀜𑁆𑀜𑀢𑁆𑀣𑁂𑀧𑀺 𑀯𑀢𑁆𑀢𑀦𑁆𑀢𑀻𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀅𑀫𑀭𑀓𑁄𑀲𑁂 ‘‘𑀓𑀴𑀸𑀭𑁄 𑀓𑀧𑀺𑀮𑁄 𑀧𑀺𑀗𑁆𑀕𑁄, 𑀧𑀺𑀲𑀗𑁆𑀕𑁄 𑀓𑀤𑁆𑀤𑀼 𑀧𑀺𑀗𑁆𑀕𑀮𑁄’’𑀢𑀺 [𑀅𑀫𑀭 𑁫.𑁧𑁬]. 𑀓𑁂𑀘𑀺 𑀧𑀦 𑀓𑀴𑀸𑀭𑀸𑀤𑀬𑁄 𑀧𑀺𑀲𑀗𑁆𑀕𑀧𑀭𑀺𑀬𑀦𑁆𑀢𑀸 𑀘𑀢𑁆𑀢𑀸𑀭𑁄 𑀲𑀤𑁆𑀤𑀸 𑀧𑀺𑀗𑁆𑀕𑀮𑀕𑀼𑀡𑁂 𑀯𑀢𑁆𑀢𑀫𑀸𑀦𑀸 𑀧𑀼𑀫𑁂 𑀯𑀢𑁆𑀢𑀦𑁆𑀢𑀺, 𑀕𑀼𑀡𑀺𑀦𑀺 𑀧𑀦 𑀯𑀸𑀘𑁆𑀘𑀮𑀺𑀗𑁆𑀕𑀸𑀢𑀺 𑀏𑀯𑀁 𑀧𑀘𑁆𑀙𑀺𑀫𑁂𑀦 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀯𑀤𑀦𑁆𑀢𑀺, 𑀢𑀁 𑀅𑀫𑀭𑀓𑁄𑀲𑁂𑀦 𑀯𑀺𑀭𑀼𑀚𑁆𑀛𑀦𑀢𑁄 𑀇𑀥 𑀘 ‘‘𑀲𑀼𑀓𑁆𑀓𑀸𑀤𑀬𑁄’’𑀢𑀺 𑀲𑀩𑁆𑀩𑁂𑀲𑀁𑀬𑁂𑀯 𑀕𑀳𑀡𑀢𑁄 𑀦 𑀕𑀳𑁂𑀢𑀩𑁆𑀩𑀁.

𑁯𑁯. 𑀢𑀺𑀓𑀁 𑀲𑀩𑀮𑁂 𑀓𑁄𑀓𑀺𑀮𑀓𑀡𑁆𑀞𑀲𑀤𑀺𑀲𑁂. 𑀓𑀮𑁆𑀬𑀢𑁂𑀢𑀺 𑀓𑀮𑁄, 𑀫𑀲𑀺 𑀧𑀭𑀺𑀫𑀸𑀡𑁂, 𑀓𑀫𑁆𑀫𑀦𑀺 𑀡𑁄, 𑀓𑀮𑁄 𑀏𑀯 𑀫𑀸𑀲𑁄 𑀓𑀫𑁆𑀫𑀸𑀲𑁄, 𑀮𑀲𑁆𑀲 𑀫𑁄, 𑀓𑀮𑀦𑀁 𑀯𑀸 𑀓𑀮𑁄, 𑀢𑀁 𑀫𑀲𑀢𑀻𑀢𑀺 𑀓𑀫𑁆𑀫𑀸𑀲𑁄, 𑀬𑀣𑀸 ‘‘𑀓𑀼𑀫𑁆𑀪𑀓𑀸𑀭𑁄’’𑀢𑀺. 𑀲𑀩 𑀕𑀢𑀺𑀬𑀁, 𑀲𑀩𑀢𑀻𑀢𑀺 𑀲𑀩𑀮𑁄, 𑀅𑀮𑁄. 𑀘𑀺𑀬𑁆𑀬𑀢𑁂𑀢𑀺 𑀘𑀺𑀢𑁆𑀢𑁄, 𑀢. 𑀢𑁆𑀭𑀡𑀧𑀘𑁆𑀘𑀬𑁂 𑀘𑀺𑀢𑁆𑀭𑁄. 𑀓𑀫𑁆𑀫𑀻𑀭𑁄, 𑀓𑀩𑁆𑀩𑀼𑀭𑁄𑀢𑀺𑀧𑀺 𑀲𑀩𑀮𑀲𑁆𑀲 𑀦𑀸𑀫𑀸𑀦𑀺.

𑀓𑀡𑁆𑀳𑀧𑀻𑀢𑀫𑀺𑀲𑁆𑀲𑁂 𑀲𑀸𑀯𑁄 𑀯𑀼𑀢𑁆𑀢𑁄. 𑀲𑁂 𑀕𑀢𑀺𑀫𑁆𑀳𑀺, 𑀲𑀬𑀢𑀻𑀢𑀺 𑀲𑀸𑀯𑁄, 𑀅𑀯𑁄. 𑀓𑀧𑀺𑀲𑁄𑀢𑀺𑀧𑀺 𑀲𑀸𑀯𑀲𑁆𑀲 𑀦𑀸𑀫𑀁. 𑀓𑀡𑁆𑀳𑀮𑁄𑀳𑀺𑀢𑀫𑀺𑀲𑁆𑀲𑁂 𑀥𑀽𑀫𑀸𑀪𑁂 𑀧𑀦 𑀥𑀽𑀫, 𑀥𑀽𑀫𑀮𑀸 𑀯𑀢𑁆𑀢𑀦𑁆𑀢𑀺. 𑀥𑀽𑀫𑁄 𑀯𑀺𑀬𑀸𑀢𑀺 𑀥𑀽𑀫𑁄. 𑀥𑀽𑀫𑀁 𑀮𑀸𑀢𑀻𑀢𑀺 𑀥𑀽𑀫𑀮𑁄. 𑀏𑀢𑁂 𑀲𑀼𑀓𑁆𑀓𑀸𑀤𑀬𑁄 𑀲𑀸𑀯𑀦𑁆𑀢𑀸 𑀬𑀤𑀸 𑀅𑀪𑁂𑀤𑁄𑀧𑀘𑀸𑀭𑀸 𑀕𑀼𑀡𑀺𑀦𑀺 𑀕𑀼𑀡𑀺𑀫𑁆𑀳𑀺 𑀯𑀢𑁆𑀢𑀦𑁆𑀢𑀺, 𑀢𑀤𑀸 𑀯𑀸𑀘𑁆𑀘𑀮𑀺𑀗𑁆𑀕𑀸, 𑀬𑀣𑀸 𑀲𑀼𑀓𑁆𑀓𑁄 𑀳𑀁𑀲𑁄, 𑀲𑀼𑀓𑁆𑀓𑀸 𑀳𑀁𑀲𑀻 ¶ , 𑀲𑀼𑀓𑁆𑀓𑀁 𑀳𑀁𑀲𑀓𑀼𑀮𑀁𑀇𑀘𑁆𑀘𑀸𑀤𑀺 𑀬𑁄𑀚𑁆𑀚𑀁. 𑀬𑀤𑀸 𑀕𑀼𑀡𑁂 𑀕𑀼𑀡𑀫𑀢𑁆𑀢𑁂 𑀯𑀢𑁆𑀢𑀦𑁆𑀢𑀺, 𑀢𑀤𑀸 𑀧𑀼𑀫𑁂, 𑀬𑀣𑀸 𑀳𑀁𑀲𑀲𑁆𑀲 𑀲𑀼𑀓𑁆𑀓𑁄, 𑀫𑀬𑀽𑀭𑀲𑁆𑀲 𑀘𑀺𑀢𑁆𑀢𑁄 𑀇𑀘𑁆𑀘𑀸𑀤𑀺 𑀬𑁄𑀚𑁆𑀚𑀁.

𑁧𑁦𑁦. 𑀮𑀸𑀲𑀦𑀦𑁆𑀢𑀁 𑀦𑀘𑁆𑀘𑁂. 𑀦𑀢 𑀕𑀢𑁆𑀢𑀯𑀺𑀦𑀸𑀫𑁂, 𑀧𑀩𑁆𑀩𑀚𑁆𑀚𑀸𑀤𑀺𑀢𑁆𑀢𑀸 𑀦𑀘𑁆𑀘𑀸𑀤𑁂𑀲𑁄. 𑀦𑀢𑀦𑀁 𑀦𑀘𑁆𑀘𑀁, 𑀦𑀝𑀦𑀁 𑀯𑀸 𑀦𑀘𑁆𑀘𑀁, 𑀲𑀩𑁆𑀩𑀢𑁆𑀭 𑀪𑀸𑀯𑀲𑀸𑀥𑀦𑀁. 𑀦𑀢𑀻𑀬𑀢𑁂 𑀦𑀢𑁆𑀢𑀦𑀁. 𑀮𑀲𑁆𑀬𑀢𑁂 𑀮𑀸𑀲𑀦𑀁, 𑀮𑀲 𑀓𑀦𑁆𑀢𑀺𑀬𑀁, 𑀮𑀲𑀺𑀢𑀩𑁆𑀩𑀦𑁆𑀢𑀺 𑀯𑀸 𑀮𑀸𑀲𑀦𑀁.

𑀦𑀘𑁆𑀘𑀁, 𑀯𑀸𑀤𑀺𑀢𑀁, 𑀕𑀻𑀢𑀁 𑀇𑀢𑀺 𑀇𑀤𑀁 𑀪𑁄𑀭𑀺𑀬𑀢𑁆𑀢𑀺𑀓𑀁 𑀦𑀸𑀝𑁆𑀬𑀁 𑀦𑀸𑀫𑁂𑀢𑁆𑀬𑀼𑀘𑁆𑀘𑀢𑁂 [𑀅𑀫𑀭 𑁭.𑁧𑁦]. 𑀢𑀼𑀭 𑀢𑀼𑀭𑀡𑀳𑀺𑀁𑀲𑀸𑀲𑀼. 𑀢𑀼𑀭𑀻𑀬𑀦𑁆𑀢𑁂𑀦𑁂𑀦𑁂𑀢𑀺 𑀢𑀽𑀭𑀺𑀬𑀁, 𑀫𑀼𑀭𑀚𑀸𑀤𑀺. 𑀢𑀩𑁆𑀪𑀯𑁄 𑀲𑀤𑁆𑀤𑁄 𑀢𑁄𑀭𑀺𑀬𑁄, 𑀡𑁄. 𑀢𑁂𑀦 𑀮𑀓𑁆𑀔𑀺𑀢𑀁 𑀢𑀺𑀓𑀁 𑀢𑁄𑀭𑀺𑀬𑀢𑁆𑀢𑀺𑀓𑀁. 𑀦𑀝𑀲𑁆𑀲𑁂𑀤𑀁 𑀦𑀸𑀝𑁆𑀬𑀁. 𑀢𑀢𑀺𑀬𑀲𑁆𑀲 𑀢𑁄𑀭𑀺𑀬𑀲𑀸𑀫𑀜𑁆𑀜𑀲𑁆𑀲 𑀢𑀼 𑀧𑀸𑀲𑀗𑁆𑀕𑀸 𑀦𑀸𑀝𑀓𑀸.

𑁧𑁦𑁧. 𑀦𑀘𑁆𑀘𑀝𑁆𑀞𑀸𑀦𑀁 𑀭𑀸𑀚𑀗𑁆𑀕𑀡𑀸𑀤𑀺 𑀭𑀗𑁆𑀕𑁄 𑀦𑀸𑀫 𑀲𑀺𑀬𑀸 ‘‘𑀭𑀫𑀦𑁆𑀢𑀸 𑀕𑀘𑁆𑀙𑀦𑁆𑀢𑀺 𑀏𑀢𑁆𑀣, 𑀭𑀚𑁆𑀚𑀦𑁆𑀢𑀺 𑀏𑀢𑁆𑀣𑀸’’𑀢𑀺 𑀯𑀸 𑀓𑀢𑁆𑀯𑀸. 𑀲𑀽𑀛𑀲𑀽𑀘𑀦𑀁 𑀳𑀢𑁆𑀣𑀸𑀤𑀻𑀳𑀺 𑀲𑀽𑀘𑀺𑀢𑀩𑁆𑀩𑀲𑁆𑀲 𑀧𑀓𑀸𑀲𑁂𑀢𑀩𑁆𑀩𑀲𑁆𑀲 𑀲𑀢𑁆𑀣𑀧𑁆𑀧𑀳𑀸𑀭𑀸𑀤𑀺𑀦𑁄 𑀲𑀽𑀘𑀦𑀁 𑀧𑀓𑀸𑀲𑀦𑀁 𑀅𑀪𑀺𑀦𑀬𑁄 𑀦𑀸𑀫 ‘‘𑀦𑀬𑀦𑀁 𑀦𑀬𑁄, 𑀧𑀲𑁆𑀲𑀦𑁆𑀢𑀸𑀦𑀁 𑀅𑀪𑀺𑀫𑀼𑀔𑀁 𑀦𑀬𑁄’’𑀢𑀺 𑀓𑀢𑁆𑀯𑀸. 𑀩𑁆𑀬𑀜𑁆𑀚𑀓𑁄𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫𑀁.

𑀪𑀭𑀢𑀲𑀢𑁆𑀣𑀯𑀼𑀢𑁆𑀢𑀅𑀝𑁆𑀞𑀼𑀢𑁆𑀢𑀭𑀲𑀢𑀓𑀭𑀡𑀦𑀺𑀧𑁆𑀨𑀦𑁆𑀦𑀣𑀺𑀭𑀳𑀢𑁆𑀣𑀧𑀭𑀺𑀬𑀢𑁆𑀣𑀓𑀸𑀤𑀺𑀦𑀸𑀫𑀓𑁄 𑀤𑁆𑀯𑀢𑁆𑀢𑀺𑀁 𑀲𑀧𑁆𑀧𑀓𑀸𑀭𑁄 [𑀯𑀺𑀢𑁆𑀣𑀸𑀭𑁄 𑀪𑀭𑀢𑀫𑀼𑀦𑀺𑀓𑀢𑁂 𑀦𑀸𑀝𑁆𑀬𑀲𑀢𑁆𑀣𑁂 𑀘𑀢𑀼𑀢𑁆𑀣 𑀅𑀚𑁆𑀛𑀸𑀬𑁂 𑀧𑀲𑁆𑀲𑀺𑀢𑀩𑁆𑀩𑁄] 𑀦𑀘𑁆𑀘𑀯𑀺𑀲𑁂𑀲𑁄 𑀅𑀗𑁆𑀕𑀯𑀺𑀓𑁆𑀔𑁂𑀧𑁄, 𑀅𑀗𑁆𑀕𑀳𑀸𑀭𑁄 𑀦𑀸𑀫 ‘‘𑀅𑀗𑁆𑀕𑀲𑁆𑀲 𑀳𑀸𑀭𑁄, 𑀯𑀺𑀓𑁆𑀔𑁂𑀧𑁄’’𑀢𑀺 𑀓𑀢𑁆𑀯𑀸 ¶ . 𑀢𑀺𑀓𑀁 𑀦𑀝𑁂. 𑀲𑀩𑁆𑀩𑀢𑁆𑀭 𑀓𑀢𑁆𑀢𑀼𑀲𑀸𑀥𑀦𑀁, ‘‘𑀦𑀘𑁆𑀘𑀢𑀻𑀢𑀺 𑀦𑀝𑁆𑀝𑀓𑁄’’𑀢𑁆𑀬𑀸𑀤𑀺𑀦𑀸.

𑁧𑁦𑁨. 𑀲𑀺𑀗𑁆𑀕𑀸𑀭𑀸𑀤𑀬𑁄 𑀦𑀯 𑀭𑀲𑀸 𑀦𑀸𑀝𑁆𑀬𑀭𑀲𑀸 𑀅𑀲𑁆𑀲𑀸𑀤𑀦𑀻𑀬𑀢𑁆𑀢𑀸. 𑀬𑀣𑀸 𑀳𑀺 𑀦𑀸𑀦𑀸𑀩𑁆𑀬𑀜𑁆𑀚𑀦𑀲𑀗𑁆𑀔𑀢𑀫𑀦𑁆𑀦𑀁 𑀪𑀼𑀜𑁆𑀚𑀦𑁆𑀢𑀸 𑀭𑀲𑁂 𑀅𑀲𑁆𑀲𑀸𑀤𑀬𑀦𑁆𑀢𑀺 𑀲𑀼𑀫𑀦𑀸 𑀧𑀼𑀭𑀺𑀲𑀸 𑀳𑀸𑀲𑀁𑀯 𑀅𑀥𑀺𑀕𑀘𑁆𑀙𑀦𑁆𑀢𑀺, 𑀢𑀣𑀸 𑀦𑀸𑀦𑀸𑀪𑀺𑀦𑀬𑀩𑁆𑀬𑀜𑁆𑀚𑀺𑀢𑁂 𑀅𑀗𑁆𑀕𑀲𑀢𑁆𑀢𑁄𑀧𑁂𑀢𑁂 𑀞𑀸𑀬𑀻𑀪𑀸𑀯𑁂 𑀅𑀲𑁆𑀲𑀸𑀤𑀬𑀦𑁆𑀢𑀺 𑀲𑀼𑀫𑀦𑀸𑀢𑀺 [𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑀲𑁆𑀲 𑀫𑀳𑀸𑀲𑀸𑀫𑀺𑀝𑀻𑀓𑀸𑀬 𑁩𑁫𑁨 𑀕𑀸𑀣𑀸𑀯𑀡𑁆𑀡𑀦𑀸𑀬𑀫𑁆𑀧𑀺].

𑁧𑁦𑁩. 𑀢𑁂𑀲𑀼 𑀲𑀺𑀗𑁆𑀕𑀸𑀭𑀲𑁆𑀲𑁂𑀯 𑀲𑀭𑀽𑀧𑀁, 𑀧𑀪𑁂𑀤𑀜𑁆𑀘 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑁄𑀲𑀲𑁆𑀲𑁂’’𑀘𑁆𑀘𑀸𑀤𑀺. 𑀦𑀸𑀭𑀺𑀬𑀁 𑀲𑀗𑁆𑀕𑀫𑀁 𑀧𑀝𑀺𑀘𑁆𑀘 𑀓𑀸𑀭𑀡𑀁 𑀓𑀢𑁆𑀯𑀸 𑀧𑁄𑀲𑀲𑁆𑀲 𑀧𑀼𑀭𑀺𑀲𑀲𑁆𑀲 𑀬𑀸 𑀧𑀺𑀳𑀸 𑀇𑀘𑁆𑀙𑀸 𑀫𑀦𑁄𑀯𑀺𑀓𑀸𑀭𑀯𑀺𑀲𑁂𑀲𑁄 𑀧𑁄𑀲𑁂 𑀘 𑀧𑀼𑀭𑀺𑀲𑁂 𑀲𑀗𑁆𑀕𑀫𑀁 𑀧𑀝𑀺𑀘𑁆𑀘 𑀓𑀸𑀭𑀡𑀁 𑀓𑀢𑁆𑀯𑀸 𑀇𑀢𑁆𑀣𑀺𑀬𑀸 𑀬𑀸 𑀧𑀺𑀳𑀸 𑀇𑀘𑁆𑀙𑀸 𑀫𑀦𑁄𑀯𑀺𑀓𑀸𑀭𑀯𑀺𑀲𑁂𑀲𑁄, 𑀏𑀲𑁄 𑀭𑀢𑀺𑀓𑀻𑀴𑀸𑀤𑀻𑀦𑀁 𑀓𑀸𑀭𑀡𑀪𑀽𑀢𑁄, 𑀭𑀢𑀺𑀓𑀻𑀴𑀸𑀤𑀺𑀓𑀸𑀭𑀡𑀲𑀳𑀺𑀢𑁄 𑀯𑀸 𑀭𑀲𑁄 𑀲𑀺𑀗𑁆𑀕𑀸𑀭𑁄 𑀦𑀸𑀫. 𑀏𑀢𑁆𑀣 𑀘 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀤𑀲𑁆𑀲𑀦𑀲𑀯𑀦𑀨𑀼𑀲𑀦𑀯𑀲𑁂𑀦 𑀯𑀸 𑀯𑀺𑀧𑁆𑀧𑀬𑁄𑀕𑀯𑀲𑁂𑀦 𑀯𑀸 𑀬𑀸 𑀧𑀺𑀳𑀸 𑀲𑀜𑁆𑀚𑀸𑀢𑀸, 𑀲𑁄 𑀭𑀲𑁄 𑀦𑀸𑀫. 𑀬𑀁 𑀧𑀦 𑀢𑀁 𑀓𑀸𑀭𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀁 𑀕𑀻𑀢𑀁, 𑀢𑀫𑁂𑀯 𑀮𑁄𑀓𑀸𑀦𑀁 𑀅𑀲𑁆𑀲𑀸𑀤𑀚𑀦𑀓𑀢𑁆𑀢𑀸 𑀭𑀲𑁄 𑀦𑀸𑀫. 𑀨𑀮𑀽𑀧𑀘𑀸𑀭𑀯𑀲𑁂𑀦 𑀧𑀦 𑀧𑀺𑀳𑀸 𑀭𑀲𑁄𑀢𑀺 𑀯𑀼𑀢𑁆𑀢𑀸, 𑀲𑀩𑁆𑀩𑀢𑁆𑀭𑁂𑀯𑀁.

𑁧𑁦𑁪. 𑀉𑀢𑁆𑀢𑀫𑀸𑀦𑀁 ¶ 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀧𑀓𑀢𑀺 𑀲𑀁𑀬𑁄𑀕𑀯𑀺𑀬𑁄𑀕𑀲𑀪𑀸𑀯𑁄 𑀲𑀸 𑀏𑀢𑁆𑀣 𑀲𑀺𑀗𑁆𑀕𑀸𑀭𑁂 𑀧𑀸𑀬𑁄 𑀩𑀳𑀼𑀮𑀦𑁆𑀢𑀺 𑀉𑀢𑁆𑀢𑀫𑀧𑀓𑀢𑀺𑀧𑁆𑀧𑀸𑀬𑁄, 𑀬𑁂𑀪𑀼𑀬𑁆𑀬𑁂𑀦 𑀉𑀢𑁆𑀢𑀫𑀸𑀦𑀁 𑀲𑀁𑀬𑁄𑀕𑀯𑀺𑀬𑁄𑀕𑀧𑁆𑀧𑀯𑀢𑁆𑀢𑀁 𑀕𑀻𑀢𑀫𑁂𑀯 𑀲𑀺𑀗𑁆𑀕𑀸𑀭𑁄 𑀦𑀸𑀫𑀸𑀢𑁆𑀬𑀢𑁆𑀣𑁄. 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀧𑀺𑀳𑀸 𑀳𑁂𑀢𑀼 𑀏𑀢𑀲𑁆𑀲𑀸𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀳𑁂𑀢𑀼𑀓𑁄. 𑀲𑁄 𑀲𑀺𑀗𑁆𑀕𑀸𑀭𑁄 𑀲𑀫𑁆𑀪𑁄𑀕𑁄, 𑀯𑀺𑀬𑁄𑀕𑁄𑀢𑀺 𑀇𑀫𑀺𑀦𑀸 𑀧𑀪𑁂𑀤𑁂𑀦 𑀤𑀼𑀯𑀺𑀥𑁄 𑀫𑀢𑁄. 𑀢𑀢𑁆𑀭 𑀘 𑁋

𑀯𑀸𑀧𑀺𑀯𑀦𑀕𑁂𑀳𑀼𑀬𑁆𑀬𑀸𑀦-𑀫𑀸𑀮𑀸𑀘𑀦𑁆𑀤𑀦𑀸𑀤𑀬𑁄;

𑀲𑀫𑁆𑀪𑁄𑀕𑀲𑁆𑀲 𑀯𑀺𑀪𑀸𑀯𑀸 𑀢𑁂, 𑀬𑁂 𑀘𑀜𑁆𑀜𑁂 𑀮𑀮𑀺𑀢𑀗𑁆𑀓𑀭𑀸.

𑀯𑀺𑀬𑁄𑀕𑀲𑁆𑀲 𑀢𑀼 𑀧𑀺𑀬𑀸𑀤𑀲𑁆𑀲𑀦𑀁 𑀯𑀺𑀪𑀸𑀯𑁄, 𑀭𑀲𑀚𑀦𑀓𑁄 𑀘 𑀯𑀺𑀪𑀸𑀯𑁄. 𑀯𑀼𑀢𑁆𑀢𑀜𑁆𑀘 𑁋

‘‘𑀚𑀬𑀦𑁆𑀢𑁂 𑀘 𑀭𑀲𑀸 𑀬𑁂𑀦,

𑀲 𑀯𑀺𑀪𑀸𑀯𑁄 𑀧𑀓𑀺𑀢𑁆𑀢𑀺𑀢𑁄;

𑀢𑁂𑀲𑀫𑁂𑀯𑀸’𑀦𑀼𑀪𑀸𑀯𑁄’𑀬𑀁,

𑀔𑁆𑀬𑀸𑀢𑁄 𑀓𑀯𑀻𑀳𑀺 𑀩𑁆𑀬𑀜𑁆𑀚𑀓𑁄’’𑀢𑀺.

𑀲𑀳 𑀪𑀼𑀜𑁆𑀚𑀦𑀫𑀦𑀼𑀪𑀯𑀦𑀁 𑀲𑀫𑁆𑀪𑁄𑀕𑁄. 𑀯𑀺𑀬𑀼𑀚𑁆𑀚𑀦𑀁 𑀦𑀸𑀦𑀸𑀪𑀯𑀦𑀁 𑀯𑀺𑀬𑁄𑀕𑁄. 𑀲𑀺𑀗𑁆𑀕𑀁 𑀦𑀸𑀫𑀥𑀸𑀢𑀼, 𑀯𑀺𑀚𑁆𑀛𑀦𑀝𑁆𑀞𑁂𑀦 𑀲𑀺𑀗𑁆𑀕𑀁, 𑀦𑀸𑀕𑀭𑀺𑀓𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀓𑀺𑀮𑁂𑀲𑀲𑀺𑀗𑁆𑀕𑀲𑁆𑀲𑁂𑀢𑀁 𑀦𑀸𑀫𑀁, 𑀢𑀁 𑀓𑀭𑁄𑀢𑀺, 𑀲𑀺𑀗𑁆𑀕𑀁 𑀯𑀸 𑀧𑀪𑀼𑀢𑁆𑀢𑀁, 𑀢𑀁 𑀓𑀭𑁄𑀢𑀺 𑀭𑀸𑀕𑀻𑀲𑀽𑀢𑀺 𑀲𑀺𑀗𑁆𑀕𑀸𑀭𑁄, 𑀆𑀭𑁄, 𑀓𑀺𑀮𑁂𑀲𑀲𑀺𑀗𑁆𑀕𑀓𑀭𑀡𑀁 𑀯𑀺𑀮𑀸𑀲𑁄𑀢𑀺 𑀯𑀼𑀢𑁆𑀢𑀁. 𑀲𑀼𑀘𑀺, 𑀉𑀚𑁆𑀚𑀮𑁄𑀢𑀺𑀧𑀺 𑀲𑀺𑀗𑁆𑀕𑀸𑀭𑀲𑁆𑀲 𑀦𑀸𑀫𑀸𑀦𑀺.

𑀲𑁄𑀓𑁄𑀧𑀘𑀬𑀲𑀪𑀸𑀯𑁄 ¶ 𑀓𑀭𑀼𑀡𑁄.

𑀇𑀝𑁆𑀞𑀦𑀸𑀲𑀗𑁆𑀕𑀦𑀸𑀲𑀸𑀬 [𑀇𑀝𑁆𑀞𑀦𑀸𑀲𑀥𑀦𑀸𑀧𑀸𑀬 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)],

𑀯𑀥𑀩𑀦𑁆𑀥𑀦𑀢𑀸𑀴𑀦𑀸;

𑀲𑀸𑀧𑀓𑁆𑀮𑁂𑀲𑁄𑀧𑀢𑀸𑀧𑁂𑀳𑀺,

𑀚𑀸𑀬𑀢𑁂 𑀓𑀭𑀼𑀡𑁄 𑀭𑀲𑁄.

𑀉𑀲𑁆𑀲𑀸𑀳𑀯𑀤𑁆𑀥𑀦𑁄 𑀯𑀻𑀭𑁄. 𑀯𑀺𑀪𑀸𑀯𑀸 𑀢𑀲𑁆𑀲 𑀯𑀺𑀦𑀬𑀼𑀧𑀢𑀸𑀧𑀩𑀮𑀯𑀺𑀓𑁆𑀓𑀫𑀸. 𑀲 𑀘𑀸𑀬𑀁 𑀤𑀸𑀦𑀯𑀻𑀭𑁄 𑀥𑀫𑁆𑀫𑀯𑀻𑀭𑁄 𑀬𑀼𑀤𑁆𑀥𑀯𑀻𑀭𑁄𑀢𑀺 𑀢𑀺𑀯𑀺𑀥𑁄.

𑀯𑀺𑀫𑁆𑀳𑀬𑁄𑀧𑀘𑀬𑀲𑀪𑀸𑀯𑁄 𑀅𑀩𑁆𑀪𑀼𑀢𑁄.

𑀧𑀸𑀲𑀸𑀤𑀼𑀬𑁆𑀬𑀸𑀦𑀲𑁂𑀮𑀸𑀤𑀺-𑀕𑀫𑀦𑀸 𑀤𑀺𑀩𑁆𑀩𑀤𑀲𑁆𑀲𑀦𑀸;

𑀲𑀪𑀸𑀯𑀺𑀫𑀸𑀦𑀫𑀸𑀬𑁂𑀦𑁆𑀤-𑀚𑀸𑀮𑀲𑀺𑀧𑁆𑀧𑀸𑀤𑀺𑀤𑀲𑁆𑀲𑀦𑀸 [𑀚𑀸𑀮𑀯𑀺𑀚𑁆𑀚𑀸𑀤𑀺𑀤𑀲𑁆𑀲𑀦𑀸 (𑀓.)];

𑀳𑀤𑀬𑁂𑀘𑁆𑀙𑀺𑀢𑀮𑀸𑀪𑁂𑀳𑀺, 𑀯𑀺𑀪𑀸𑀯𑁂𑀳𑀺𑀲𑁆𑀲 𑀲𑀫𑁆𑀪𑀯𑁄.

𑀳𑀸𑀲𑁄𑀧𑀘𑀬𑀲𑀪𑀸𑀯𑁄 𑀳𑀸𑀲𑁄.

𑀲𑀸𑀩𑀳𑀺𑀢𑁆𑀣𑀸 𑀲𑀯𑀺𑀓𑀢𑀸, 𑀦𑁂𑀧𑀣𑁆𑀬𑀸 𑀩𑁆𑀬𑀗𑁆𑀕𑀤𑀲𑁆𑀲𑀦𑀸;

𑀅𑀲𑀫𑁆𑀩𑀦𑁆𑀥𑀓𑀣𑀸𑀮𑀸𑀧𑀸, 𑀳𑀸𑀲𑁄 𑀲𑁄 𑀓𑀼𑀳𑀓𑀸𑀤𑀺𑀪𑀺.

𑀪𑀬𑁄𑀧𑀘𑀬𑀲𑀪𑀸𑀯𑁄 𑀪𑀬𑀸𑀦𑀓𑁄.

𑀉𑀘𑁆𑀘𑀪𑁂𑀭𑀯𑀲𑀁𑀭𑀸𑀯-𑀬𑀓𑁆𑀔𑀧𑁂𑀢𑀸𑀤𑀺𑀤𑀲𑁆𑀲𑀦𑀸;

𑀲𑀼𑀜𑁆𑀜𑀸𑀕𑀸𑀭𑀫𑀳𑀸𑀭𑀜𑁆𑀜-𑀯𑀥𑀩𑀦𑁆𑀥𑀦𑀤𑀲𑁆𑀲𑀦𑀸.

𑀢𑀸𑀲𑀸𑀬𑀸𑀲𑀗𑁆𑀓𑀢𑁄𑀩𑁆𑀩𑁂𑀕𑁄, 𑀲𑀺𑀯𑁄𑀮𑀽𑀓𑀭𑀼𑀡𑀸𑀤𑀺𑀪𑀺;

𑀯𑀺𑀪𑀸𑀯𑁂𑀳𑀺 𑀘 𑀇𑀢𑁆𑀣𑀻𑀦𑀁, 𑀦𑀻𑀘𑀸𑀦𑀜𑁆𑀘 𑀪𑀬𑀸𑀦𑀓𑁄.

𑀲𑀫𑀡𑁄𑀧𑀘𑀬𑀲𑀪𑀸𑀯𑁄 𑀲𑀦𑁆𑀢𑁄.

𑀤𑀲𑁆𑀲𑀦𑀸 𑀲𑀦𑁆𑀢𑀯𑁂𑀲𑀸𑀦𑀁, 𑀲𑀦𑁆𑀢𑀘𑀺𑀢𑁆𑀢𑀸𑀦 𑀢𑀸𑀤𑀺𑀦𑀁;

𑀲𑀦𑁆𑀢𑀓𑀸𑀭𑀡𑀥𑀫𑁆𑀫𑀸𑀦𑀁, 𑀲𑀦𑁆𑀢𑁄 𑀦𑀸𑀫 𑀭𑀲𑁄 𑀪𑀯𑁂.

𑀚𑀺𑀕𑀼𑀘𑁆𑀙𑁄𑀧𑀘𑀬𑀲𑀪𑀸𑀯𑁄 ¶ 𑀩𑀻𑀪𑀘𑁆𑀙𑁄.

𑀧𑀽𑀢𑀺𑀫𑀁𑀲𑀸𑀤𑀺𑀓𑀸𑀦𑀁 𑀢𑀼, 𑀤𑀲𑁆𑀲𑀦𑀲𑀼𑀢𑀺𑀓𑀺𑀢𑁆𑀢𑀦𑀸;

𑀯𑀺𑀕𑀢𑁂𑀳𑀺 𑀯𑀺𑀪𑀸𑀯𑁂𑀳𑀺, 𑀩𑀻𑀪𑀘𑁆𑀘𑁄 𑀚𑀸𑀬𑀢𑁂 𑀭𑀲𑁄.

𑀓𑁄𑀥𑁄𑀧𑀘𑀬𑀲𑀪𑀸𑀯𑁄 𑀭𑀼𑀤𑁆𑀤𑀁.

𑀢𑀜𑁆𑀘 𑀲𑀗𑁆𑀕𑀸𑀫𑀳𑁂𑀢𑀼𑀓𑀁, 𑀉𑀕𑁆𑀕𑀓𑀫𑁆𑀫𑀉𑀧𑀖𑀸𑀢-;

𑀫𑀼𑀲𑀸𑀯𑀸𑀤𑀸𑀤𑀺𑀨𑀭𑀼𑀲𑀸, 𑀯𑀘𑀦𑀸𑀤𑀻𑀳𑀺 𑀪𑀯𑀢𑀺.

𑀏𑀢𑁂𑀲𑀼 𑀘 𑀩𑀻𑀪𑀘𑁆𑀙𑀭𑀼𑀤𑁆𑀤𑀸𑀦𑀺 𑀦𑀧𑀼𑀁𑀲𑀓𑁂, 𑀅𑀜𑁆𑀜𑁂 𑀢𑀼 𑀧𑀼𑀫𑁂 𑀭𑀽𑀧𑀪𑁂𑀤𑀸. 𑀏𑀢𑁂 𑀘 𑀦𑀯 𑀦𑀸𑀝𑁆𑀬𑀭𑀲𑀸 𑀭𑀢𑀦𑀓𑁄𑀲𑀦𑀬𑁂𑀦 𑀯𑀼𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑁋

‘‘𑀲𑀺𑀗𑁆𑀕𑀸𑀭𑀯𑀻𑀭 𑀩𑀻𑀪𑀘𑁆𑀙-𑀭𑀼𑀤𑁆𑀤 𑀳𑀸𑀲 𑀪𑀬𑀸𑀦𑀓𑀸;

𑀓𑀭𑀼𑀡𑀸’𑀩𑁆𑀪𑀼𑀢 𑀲𑀦𑁆𑀢𑀸𑀘, 𑀦𑀯 𑀦𑀸𑀝𑁆𑀬𑀭𑀲𑀸 𑀇𑀫𑁂’’𑀢𑀺.

𑀅𑀫𑀭𑀓𑁄𑀲𑁂 𑀧𑀦 𑁋

‘‘𑀲𑀺𑀗𑁆𑀕𑀸𑀭𑀯𑀻𑀭 𑀓𑀭𑀼𑀡𑀸-𑀩𑁆𑀪𑀼𑀢 𑀳𑀸𑀲 𑀪𑀬𑀸𑀦𑀓𑀸;

𑀩𑀻𑀪𑀘𑁆𑀙 𑀭𑀼𑀤𑁆𑀤𑀸𑀢𑀺 𑀭𑀲𑀸’’𑀢𑀺 [𑀅𑀫𑀭 𑁭.𑁧𑁭].

𑀅𑀝𑁆𑀞𑁂𑀯 𑀭𑀲𑀸 𑀯𑀼𑀢𑁆𑀢𑀸. 𑀅𑀣𑁂𑀳 𑀦𑀯𑀫𑁄 𑀲𑀦𑁆𑀢𑁄 𑀭𑀲𑁄 𑀓𑀲𑁆𑀫𑀸 𑀦 𑀯𑀼𑀢𑁆𑀢𑁄𑀢𑀺? 𑀯𑀼𑀘𑁆𑀘𑀢𑁂 𑁋

𑀳𑀸𑀲𑁄 𑀭𑀢𑀺 𑀘 𑀓𑀸𑀭𑀼𑀜𑁆𑀜𑀁,

𑀓𑁄𑀥𑀼𑀲𑁆𑀲𑀸𑀳𑀪𑀬𑀁 𑀢𑀣𑀸;

𑀚𑀺𑀕𑀼𑀘𑁆𑀙𑀸 𑀯𑀺𑀫𑁆𑀳𑀬𑁄 𑀘𑁂𑀢𑀺,

𑀞𑀸𑀬𑀻𑀪𑀸𑀯𑀸 𑀧𑀓𑀺𑀢𑁆𑀢𑀺𑀢𑀸.

𑀞𑀸𑀬𑀻 𑀏𑀯 𑀢𑀼 𑀭𑀲𑀻𑀪𑀯𑀢𑀺𑀧𑁆𑀬𑀸𑀕𑀫𑁄, 𑀢𑀲𑁆𑀫𑀸 𑀧𑀓𑀢𑀺𑀬𑀸 𑀅𑀝𑁆𑀞𑀲𑀗𑁆𑀔𑁆𑀬𑀢𑁆𑀢𑀸 𑀅𑀝𑁆𑀞𑁂𑀯 𑀢𑀼 𑀢𑁂 𑀯𑀼𑀢𑁆𑀢𑀸𑀢𑀺 𑀦 𑀯𑀼𑀢𑁆𑀢𑁄. 𑀲𑀦𑁆𑀢𑀭𑀲𑁄 𑀘𑀸𑀬𑀁 𑀥𑀫𑁆𑀫𑀲𑀺𑀗𑁆𑀕𑀸𑀭𑀢𑁆𑀢𑀸 𑀲𑀺𑀗𑁆𑀕𑀸𑀭𑀭𑀲𑁂 𑀏𑀯𑀸𑀦𑀼𑀧𑀯𑀺𑀝𑁆𑀞𑁄. 𑀥𑀫𑁆𑀫𑀬𑀼𑀤𑁆𑀥𑀓𑀸𑀫𑀢𑁆𑀢𑁂𑀦 𑀢𑀺𑀯𑀺𑀥𑁄 𑀳𑀺 𑀲𑀺𑀗𑁆𑀕𑀸𑀭𑁄. 𑀓𑁂𑀘𑀺 𑀧𑀦 𑀧𑀺𑀬𑀲𑀫𑀸𑀕𑀫𑀸𑀤𑀺𑀯𑀺𑀪𑀸𑀯𑀚𑀧𑀭𑀫𑀁 𑀯𑀲𑁆𑀲𑀮𑁆𑀬𑀸𑀔𑁆𑀬𑀁 𑀭𑀲𑀫𑀸𑀳𑀼.

𑀭𑀪𑀲𑁄𑀧𑁆𑀬𑀸𑀳 ¶ 𑁋

‘‘𑀲𑀺𑀗𑁆𑀕𑀸𑀭 𑀯𑀻𑀭 𑀩𑀻𑀪𑀘𑁆𑀙-𑀭𑀼𑀤𑁆𑀤 𑀳𑀸𑀲 𑀪𑀬𑀸𑀦𑀓𑀸;

𑀓𑀭𑀼𑀡𑀸’𑀩𑁆𑀪𑀼𑀢𑀲𑀦𑁆𑀢𑀸 𑀘, 𑀯𑀲𑁆𑀲𑀮𑁆𑀬𑀜𑁆𑀘 𑀭𑀲𑀸 𑀤𑀲𑁂’’𑀢𑀺.

𑀅𑀜𑁆𑀜𑁂 𑀢𑀼 𑁋

‘‘𑀲𑀺𑀗𑁆𑀕𑀸𑀭𑀸𑀦𑀼𑀕𑀢𑁄 𑀳𑀸𑀲𑁄,

𑀓𑀭𑀼𑀡𑁄 𑀭𑀼𑀤𑁆𑀤𑀓𑀫𑁆𑀫𑀚𑁄;

𑀯𑀻𑀭𑀢𑁄 𑀅𑀩𑁆𑀪𑀼𑀢𑁄 𑀚𑀸𑀢𑁄,

𑀩𑀻𑀪𑀘𑁆𑀙𑀸 𑀘 𑀪𑀬𑀸𑀦𑀓𑁄’’𑀢𑀺 𑁋

𑀘𑀢𑁆𑀢𑀸𑀭𑁄 𑀭𑀲𑀸 𑀇𑀘𑁆𑀘𑀸𑀳𑀼.

𑀩𑀻𑀪𑀘𑁆𑀙𑀦𑁆𑀢𑀺 𑀯𑀥 𑀩𑀦𑁆𑀥𑀦𑁂, 𑀙𑁄, 𑀅𑀩𑁆𑀪𑀸𑀲𑀺𑀓𑀸𑀭𑀲𑁆𑀲 𑀤𑀻𑀖𑁄. 𑀯𑀲𑁆𑀲 𑀪𑁄, 𑀥𑀲𑁆𑀲 𑀘𑁄 𑀩𑀻𑀪𑀘𑁆𑀙𑁄. 𑀭𑀼𑀤𑁆𑀤𑁄 𑀤𑁂𑀯𑀢𑀸 𑀅𑀲𑁆𑀲𑁂𑀢𑀺 𑀭𑀼𑀤𑁆𑀤𑀁. 𑀯𑀼𑀢𑁆𑀢𑀜𑁆𑀘 𑁋

‘‘𑀲𑀺𑀗𑁆𑀕𑀸𑀭𑁄 𑀳𑀭𑀺𑀤𑁂𑀯𑁄𑀳𑀺, 𑀳𑀸𑀲𑁄 𑀧𑀫𑀣𑀤𑁂𑀯𑀢𑁄;

𑀓𑀭𑀼𑀡𑁄 𑀬𑀫𑀤𑁂𑀯𑁄 𑀢𑀼, 𑀭𑀼𑀤𑁆𑀤𑁄 𑀭𑀼𑀤𑁆𑀤𑀸𑀥𑀺𑀤𑁂𑀯𑀢𑁄’’𑀢𑀺 [𑀲𑀤𑁆𑀤𑀓𑀧𑁆𑀧𑀤𑁆𑀤𑀼𑀫𑁂 𑀭𑁄𑀤𑁆𑀭𑀧𑀤𑁂𑀧𑀺].

𑀏𑀢𑁆𑀣 𑀘 𑀓𑀸𑀫𑀓𑁄𑀥𑀳𑀸𑀲𑀸𑀤𑀺𑀓𑀢𑁄 𑀘𑀺𑀢𑁆𑀢𑀯𑀺𑀓𑀸𑀭𑁄 𑀪𑀸𑀯𑁄 ‘‘𑀪𑀸𑀯𑀬𑀢𑀺 𑀧𑀓𑀸𑀲𑀬𑀢𑀺 𑀓𑀯𑀺𑀦𑁄 𑀅𑀥𑀺𑀧𑁆𑀧𑀸𑀬’’𑀦𑁆𑀢𑀺 𑀓𑀢𑁆𑀯𑀸. 𑀲𑁄 𑀘 𑀞𑀸𑀬𑀻 𑀩𑁆𑀬𑀪𑀺𑀘𑀸𑀭𑀻 𑀲𑀸𑀢𑁆𑀢𑀺𑀓𑁄 𑀘𑁂𑀢𑀺 𑀢𑀺𑀯𑀺𑀥𑁄. 𑀢𑀢𑁆𑀭 𑁋

𑀳𑀸𑀲𑁄 𑀭𑀢𑀺 𑀘 𑀓𑀸𑀭𑀼𑀜𑁆𑀜𑀁,

𑀓𑁄𑀥𑀼’𑀲𑁆𑀲𑀸𑀳 𑀪𑀬𑀁 𑀢𑀣𑀸;

𑀚𑀺𑀕𑀼𑀘𑁆𑀙𑀸 𑀯𑀺𑀫𑁆𑀳𑀬𑁄 𑀘𑁂𑀢𑀺,

𑀞𑀸𑀬𑀻𑀪𑀸𑀯𑀸 𑀧𑀓𑀺𑀢𑁆𑀢𑀺𑀢𑀸.

𑀩𑁆𑀬𑀪𑀺𑀘𑀸𑀭𑀻 𑀢𑀼 𑀢𑁂𑀢𑁆𑀢𑀺𑀁𑀲𑀧𑁆𑀧𑀪𑁂𑀤𑀸. 𑀬𑀣𑀸 𑁋

𑀲𑀗𑁆𑀓𑀸 𑀕𑀺𑀮𑀸𑀦𑀺 𑀦𑀺𑀩𑁆𑀩𑁂𑀤𑁄,

𑀢𑀣𑀸 𑀇𑀲𑁆𑀲𑀸 𑀫𑀤𑁄 𑀲𑀫𑁄;

𑀆𑀮𑀲𑁆𑀬𑀁 𑀤𑀻𑀦𑀢𑀸 𑀘𑀺𑀦𑁆𑀢𑀸,

𑀫𑁄𑀳𑁄 𑀲𑀢𑀺 𑀫𑀢𑀻 𑀥𑀺𑀢𑀺.

𑀘𑀸𑀧𑀮𑁆𑀬𑀁 ¶ 𑀳𑀭𑀺𑀲𑁄 𑀧𑀻𑀴𑀸,

𑀆𑀯𑁂𑀕𑁄 𑀚𑀴𑀢𑀼’𑀕𑁆𑀕𑀢𑀸;

𑀲𑀼𑀢𑁆𑀢𑀁 𑀯𑀺𑀢𑀓𑁆𑀓𑁄 𑀢𑀸𑀲𑁄 𑀘,

𑀕𑀩𑁆𑀪𑀼’𑀲𑁆𑀲𑀼𑀓𑁆𑀓𑁄 𑀯𑀺𑀲𑀸𑀤𑀢𑀸.

𑀦𑀺𑀤𑁆𑀤𑀸’𑀩𑀳𑀺𑀢𑁆𑀣𑀸’𑀫𑀭𑀺𑀲𑀸,

𑀫𑀭𑀡𑀁 𑀩𑁆𑀬𑀸𑀥𑀺𑀭𑁂𑀯 𑀘;

𑀅𑀧𑀫𑀸𑀭𑁄 𑀘 𑀉𑀫𑁆𑀫𑀸𑀤𑁄,

𑀯𑀺𑀩𑁄𑀥𑁄 𑀢𑀺𑀁𑀲 𑀢𑀼𑀢𑁆𑀢𑀭𑀸.

𑀲𑀸𑀢𑁆𑀢𑀺𑀓𑁄 𑀅𑀝𑁆𑀞𑀯𑀺𑀥𑁄. 𑀬𑀣𑀸 𑁋

𑀣𑀫𑁆𑀪𑁄 𑀲𑁂𑀤𑁄 𑀘 𑀭𑁄𑀫𑀜𑁆𑀘𑁄,

𑀲𑀭𑀪𑁂𑀤𑁄 𑀢𑀼 𑀯𑁂𑀧𑀣𑀼;

𑀯𑁂𑀯𑀡𑁆𑀡’𑀫𑀲𑁆𑀲𑀼𑀧𑀮𑀬𑀸,

𑀇𑀘𑁆𑀘𑁂𑀢𑁂 𑀅𑀝𑁆𑀞 𑀲𑀸𑀢𑁆𑀢𑀺𑀓𑀸𑀢𑀺.

𑀣𑀺𑀭𑀢𑁆𑀢𑀸 𑀏𑀓𑀦𑁆𑀢𑀺𑀓𑀢𑁆𑀢𑀸 𑀞𑀸𑀬𑀻. 𑀩𑁆𑀬𑀪𑀺𑀘𑀸𑀭𑀻 𑀅𑀦𑁂𑀓𑀦𑁆𑀢𑀺𑀓𑀢𑁆𑀢𑀸. 𑀬𑀣𑀸 𑀦𑀸𑀝𑀺𑀓𑀸𑀬 𑀲𑀺𑀗𑁆𑀕𑀸𑀭𑁄 𑀞𑀸𑀬𑀻, 𑀢𑀤𑀼𑀧𑀓𑀸𑀭𑀸 𑀳𑀸𑀲𑀸𑀤𑀬𑁄 𑀩𑁆𑀬𑀪𑀺𑀘𑀸𑀭𑀺𑀦𑁄, 𑀫𑁄𑀳𑀭𑀸𑀕𑀤𑁄𑀲𑀸 𑀏𑀯 𑀲𑀗𑁆𑀔𑁆𑀬𑀪𑀸𑀲𑀸𑀬 𑀲𑀢𑁆𑀢𑀭𑀚𑁄𑀢𑀫𑀸𑀦𑀻𑀢𑁆𑀬𑀼𑀘𑁆𑀘𑀦𑁆𑀢𑁂. 𑀢𑀢𑁆𑀭 𑀲𑀢𑁆𑀢𑁂𑀦 𑀆𑀲𑀬𑁂𑀦 𑀦𑀺𑀩𑁆𑀩𑀢𑁆𑀢𑁄 𑀲𑀸𑀢𑁆𑀢𑀺𑀓𑁄. 𑀪𑀸𑀯𑀲𑁆𑀲 𑀩𑁄𑀥𑀓𑁄 𑀅𑀪𑀺𑀦𑀬𑁄 𑀅𑀦𑀼𑀪𑀸𑀯𑁄 ‘‘𑀅𑀦𑀼 𑀧𑀘𑁆𑀙𑀸 𑀪𑀸𑀯𑀬𑀢𑀺 𑀧𑀓𑀸𑀲𑀬𑀢𑀻’’𑀢𑀺 𑀓𑀢𑁆𑀯𑀸.

𑀢𑀢𑁆𑀭 𑀲𑀫𑁆𑀪𑁄𑀕𑀲𑀪𑀸𑀯𑁄 𑀬𑁄 𑀭𑀢𑁆𑀬𑀸𑀔𑁆𑀬𑁄 𑀪𑀸𑀯𑁄, 𑀢𑀲𑁆𑀲 𑀮𑁄𑀘𑀦𑀘𑀸𑀢𑀼𑀭𑀺𑀬𑀪𑀫𑀼𑀓𑁆𑀔𑁂𑀧𑀫𑀺𑀳𑀺𑀢𑀯𑀺𑀩𑁆𑀪𑀫𑀘𑀺𑀢𑁆𑀢𑀗𑁆𑀕𑀳𑀸𑀭𑀺𑀯𑀸𑀓𑁆𑀬𑀸𑀤𑀺 𑀅𑀦𑀼𑀪𑀸𑀯𑁄. 𑀯𑀼𑀢𑁆𑀢𑀜𑁆𑀘 𑁋

‘‘𑀢𑀲𑁆𑀲 𑀮𑁄𑀘𑀦𑀘𑀸𑀢𑀼𑀭-𑀪𑀫𑀼𑀓𑁆𑀔𑁂𑀧𑀲𑀺𑀢𑀯𑀺𑀩𑁆𑀪𑀫𑁄;

𑀘𑀺𑀢𑁆𑀢𑀗𑁆𑀕𑀳𑀸𑀭𑀺𑀯𑀸𑀓𑁆𑀬𑀸𑀤𑀺, 𑀅𑀦𑀼𑀪𑀸𑀯𑁄 𑀧𑀓𑀺𑀢𑁆𑀢𑀺𑀢𑁄’’𑀢𑀺.

𑀯𑀺𑀬𑁄𑀕𑀲𑁆𑀲 ¶ 𑀢𑀼 𑀅𑀦𑀼𑀪𑀸𑀯𑁄 𑁋

𑀅𑀪𑀺𑀮𑀸𑀧𑁄 𑀢𑀣𑀸 𑀘𑀺𑀦𑁆𑀢𑀸,

𑀢𑀲𑁆𑀲 𑀲𑀭𑀡𑀓𑀺𑀢𑁆𑀢𑀦𑀸;

𑀉𑀩𑁆𑀩𑁂𑀕𑁄 𑀘 𑀯𑀺𑀮𑀸𑀧𑁄 𑀘,

𑀉𑀫𑁆𑀫𑀸𑀤𑁄 𑀩𑁆𑀬𑀸𑀥𑀺𑀭𑁂𑀯 𑀘;

𑀚𑀴𑀢𑀸 𑀫𑀭𑀡𑀜𑁆𑀘𑁂𑀯,

𑀤𑀲𑁂𑀯𑁂𑀢𑁆𑀣 𑀧𑀓𑀺𑀢𑁆𑀢𑀺𑀢𑀸.

𑀳𑀸𑀲𑀲𑁆𑀲 𑀢𑀼 𑀯𑀺𑀓𑀸𑀭𑀓𑀸𑀮𑀸𑀤𑀺 𑀅𑀦𑀼𑀪𑀸𑀯𑁄, 𑀬𑁄 𑀢𑀼 𑀓𑀭𑀼𑀡𑁄.

𑀅𑀲𑁆𑀲𑀼𑀲𑀸𑀲𑁂𑀳𑀺 𑀯𑁂𑀯𑀡𑁆𑀡-

𑀣𑀫𑁆𑀪𑀕𑀢𑁆𑀢𑀲𑀢𑀺𑀓𑁆𑀔𑀬𑀸;

𑀧𑀭𑀺𑀤𑁂𑀯𑀺𑀢𑀲𑁄𑀓𑁂𑀳𑀺,

𑀅𑀪𑀺𑀦𑀬𑁄 𑀲𑀲𑀽𑀭𑀺𑀪𑀺.

𑀓𑀭𑀘𑀭𑀡𑀯𑀤𑀦𑀯𑁂𑀧𑀣𑀼𑀕𑀢𑁆𑀢𑀣𑀫𑁆𑀪𑀳𑀤𑀬𑀓𑀫𑁆𑀧𑀦𑀲𑀼𑀓𑁆𑀔𑁄𑀝𑁆𑀞𑀢𑀸𑀮𑀼𑀓𑀡𑁆𑀞𑁂𑀳𑀺 𑀪𑀬𑀸𑀦𑀓𑁄 𑀦𑀺𑀘𑁆𑀘𑀫𑀪𑀺𑀦𑀬𑁄.

𑀭𑀼𑀤𑁆𑀤𑀲𑁆𑀲 𑀢𑀼 𑀪𑀽𑀓𑀼𑀝𑁆𑀬𑀸𑀤𑀺 𑀅𑀦𑀼𑀪𑀸𑀯𑁄.

𑀯𑀻𑀭𑁄’𑀪𑀺𑀦𑀻𑀬𑀢𑁂 𑀘𑀸𑀕-

𑀯𑁂𑀲𑀸𑀭𑀚𑁆𑀚𑀸𑀤𑀺𑀢𑁄 𑀢𑀣𑀸;

𑀅𑀓𑁆𑀔𑁂𑀧𑀲𑀽𑀘𑀢𑀸𑀤𑀻𑀳𑀺,

𑀣𑁂𑀭𑀲𑁄𑀭𑀸𑀤𑀺𑀢𑁄 𑀪𑀯𑁂.

𑀩𑀻𑀪𑀘𑁆𑀙𑀲𑁆𑀲 𑀢𑀼 𑁋

𑀅𑀬𑀁 𑀧𑀘𑁆𑀙𑀸𑀤𑀦𑀸 𑀩𑁆𑀬𑀢𑁆𑀢-

𑀧𑀸𑀤𑀩𑀸𑀳𑀘𑁆𑀙𑀺𑀓𑀽𑀮𑀦𑀸;

𑀉𑀩𑁆𑀩𑁂𑀚𑀦𑀸𑀤𑀻𑀳𑀺 𑀫𑀢𑁄,

𑀢𑀚𑁆𑀚𑁂𑀳𑀺’𑀪𑀺𑀦𑀬𑁄 𑀲𑀤𑀸.

𑀅𑀩𑁆𑀪𑀼𑀢𑀁 ¶ 𑀧𑀦 𑁋

𑀤𑀦𑁆𑀢𑀮𑁄𑀘𑀦𑀯𑀺𑀢𑁆𑀣𑀸𑀭𑀸,

𑀧𑀲𑀸𑀤𑁄𑀧𑀲𑀫𑀸𑀤𑀺𑀳𑀺;

𑀭𑁄𑀫𑀜𑁆𑀘𑀲𑁂𑀤𑀢𑀸𑀲𑀲𑁆𑀲𑀼,

𑀲𑀸𑀥𑀼𑀯𑀸𑀤𑁂𑀳𑀺 𑀤𑀲𑁆𑀲𑀬𑁂.

𑀲𑀸𑀢𑁆𑀢𑀺𑀓𑀸𑀦𑀁 𑀢𑁆𑀯𑀝𑁆𑀞𑀦𑁆𑀦𑀁 𑀣𑀫𑁆𑀪𑀲𑁂𑀤𑀭𑁄𑀫𑀜𑁆𑀘𑀲𑀭𑀪𑁂𑀤𑀯𑁂𑀧𑀣𑀼𑀯𑁂𑀯𑀡𑁆𑀡𑀫𑀲𑁆𑀲𑀼𑀧𑀮𑀬𑀸𑀦𑀁 𑀬𑀣𑀸𑀓𑁆𑀓𑀫𑀁 𑀦𑀺𑀓𑁆𑀭𑀺𑀬𑀢𑀸, 𑀯𑀸𑀢, 𑀘𑁆𑀘𑀸𑀲𑀻𑀢, 𑀤𑁄𑀪𑀕𑁆𑀕𑀴𑀸’𑀧𑀸𑀗𑁆𑀕𑀧𑀽𑀭𑀡, 𑀫𑀼𑀔𑀘𑁆𑀙𑀸𑀬𑀸𑀯𑀺𑀧𑀮𑁆𑀮𑀸𑀲, 𑀮𑁄𑀘𑀦𑀫𑀚𑁆𑀚𑀦, 𑀫𑀳𑀺𑀧𑀸𑀢𑀸𑀤𑀬𑁄 𑀅𑀪𑀺𑀦𑀬𑀸.

𑀏𑀯𑀁 𑀩𑁆𑀬𑀪𑀺𑀘𑀸𑀭𑀻𑀦𑀫𑁆𑀧𑀺 𑀦𑀺𑀩𑁆𑀩𑁂𑀤, 𑀕𑀺𑀮𑀸𑀦𑀺, 𑀲𑀗𑁆𑀓𑀺’𑀲𑁆𑀲𑀸, 𑀫𑀤, 𑀲𑀫𑀸’𑀮𑀲𑁆𑀬𑀸𑀤𑀻𑀦𑀁 𑀬𑀣𑀸𑀓𑁆𑀓𑀫𑀁 𑀲𑀸𑀲, 𑀲𑀦𑁆𑀢𑀸𑀧, 𑀤𑀺𑀲𑀸𑀯𑀮𑁄𑀓𑀦, 𑀕𑀼𑀡𑀫𑀘𑁆𑀙𑁂𑀭, 𑀪𑀻𑀢, 𑀗𑁆𑀕𑀫𑀤𑁆𑀤𑀦, 𑀲𑀫𑀸𑀤𑀬𑁄 𑀅𑀪𑀺𑀦𑀬𑀸𑀢𑀺.

𑀩𑁆𑀬𑀪𑀺𑀘𑀸𑀭𑀻𑀲𑀼 𑀲𑀗𑁆𑀓𑀸 𑀦𑀸𑀫 𑀆𑀲𑀗𑁆𑀓𑀘𑀺𑀢𑁆𑀢𑀢𑀸. 𑀕𑀺𑀮𑀸𑀦𑀺 𑀕𑁂𑀮𑀜𑁆𑀜𑀢𑀸. 𑀦𑀺𑀩𑁆𑀩𑁂𑀤𑁄 𑀅𑀢𑁆𑀢𑀸𑀯𑀫𑀸𑀦𑀦𑀁. 𑀫𑀤𑁄 𑀧𑀫𑀸𑀤𑀼𑀓𑁆𑀓𑀁𑀲𑁄. 𑀲𑀫𑁄 𑀔𑁂𑀤𑁄. 𑀤𑀻𑀦𑀢𑀸 𑀘𑁂𑀢𑀲𑁄 𑀤𑀼𑀓𑁆𑀔𑀢𑀸. 𑀥𑀺𑀢𑀺 𑀲𑀦𑁆𑀢𑁄𑀲𑁄. 𑀳𑀭𑀺𑀲𑁄 𑀘𑁂𑀢𑁄𑀧𑀲𑀸𑀤𑁄. 𑀧𑀻𑀴𑀸 𑀭𑀼𑀤𑁆𑀤𑀸𑀘𑀸𑀭𑀸𑀤𑀻𑀳𑀺 𑀫𑀼𑀔𑀯𑀺𑀓𑀸𑀭𑁄. 𑀆𑀯𑁂𑀕𑁄 𑀲𑀫𑁆𑀪𑀫𑁄. 𑀚𑀴𑀢𑀸 𑀅𑀧𑁆𑀧𑀝𑀺𑀧𑀢𑁆𑀢𑀺, 𑀉𑀕𑁆𑀕𑀢𑀸 𑀤𑀸𑀭𑀼𑀡𑀢𑁆𑀢𑀁. 𑀲𑀼𑀢𑁆𑀢𑀁 𑀲𑀼𑀧𑀦𑀁. 𑀢𑀸𑀲𑁄 𑀘𑀺𑀢𑁆𑀢𑀓𑁆𑀔𑁄𑀪𑁄. 𑀉𑀲𑁆𑀲𑀸𑀳𑁄 𑀉𑀲𑁆𑀲𑀼𑀓𑁆𑀓𑀁. 𑀯𑀺𑀲𑀸𑀤𑁄 𑀔𑁂𑀤𑁄. 𑀅𑀩𑀳𑀺𑀢𑁆𑀣𑀸 𑀆𑀓𑀸𑀭𑀕𑀼𑀢𑁆𑀢𑀢𑀸. 𑀅𑀫𑀭𑀺𑀲𑁄 𑀅𑀓𑁆𑀔𑀫𑀢𑀸. 𑀯𑀺𑀩𑁄𑀥𑁄 𑀯𑀺𑀦𑀺𑀤𑁆𑀤𑀢𑀸. 𑀲𑁂𑀲𑀸 𑀧𑀧𑀜𑁆𑀘𑀪𑀬𑀸 𑀦 𑀯𑀺𑀢𑁆𑀣𑀸𑀭𑀺𑀢𑀸𑀢𑀺. 𑀭𑀲𑀯𑀡𑁆𑀡𑀦𑀸.

𑁧𑁦𑁫. 𑀲𑀺𑀮𑁄𑀓𑁂𑀦 𑀯𑀘𑀲𑁄 𑀦𑀸𑀫𑀸𑀦𑀺. 𑀪𑀸𑀲𑀺𑀢𑀩𑁆𑀩𑀦𑁆𑀢𑀺 𑀪𑀸𑀲𑀺𑀢𑀁. 𑀮𑀧 𑀯𑀘𑀦𑁂, 𑀮𑀧𑀺𑀢𑀁. 𑀪𑀸𑀲𑀻𑀬𑀢𑁂𑀢𑀺 𑀪𑀸𑀲𑀸. 𑀯𑁄𑀳𑀭𑀻𑀬𑀢𑁂𑀢𑀺 ¶ 𑀯𑁄𑀳𑀸𑀭𑁄, 𑀳𑀭 𑀳𑀭𑀡𑁂 𑀯𑀺𑀧𑀼𑀩𑁆𑀩𑁄, ‘‘𑀯𑁄𑀳𑀸𑀭 𑀯𑀘𑀦𑁂’’𑀢𑀺 𑀯𑀸 𑀥𑀸𑀢𑀼. 𑀯𑀼𑀘𑁆𑀘𑀢𑁂𑀢𑀺 𑀯𑀘𑀦𑀁. 𑀯𑀘𑁄𑀧𑀺, 𑀫𑀦𑁄𑀕𑀡𑁄𑀬𑀁. 𑀉𑀘𑁆𑀘𑀢𑁂𑀢𑀺 𑀉𑀢𑁆𑀢𑀺,𑀢𑀺. 𑀯𑀼𑀘𑁆𑀘𑀢𑁂𑀢𑀺 𑀯𑀸𑀘𑀸, 𑀅. 𑀕𑀺𑀡𑀦𑁆𑀢𑀺 𑀲𑀤𑁆𑀤𑀸𑀬𑀦𑁆𑀢𑀺 𑀢𑀦𑁆𑀢𑀺 𑀕𑀺𑀭𑀸, 𑀕𑁂 𑀲𑀤𑁆𑀤𑁂, 𑀇𑀭𑁄, 𑀕𑀸𑀬𑀺𑀢𑀩𑁆𑀩𑀸𑀢𑀺 𑀯𑀸 𑀕𑀺𑀭𑀸. 𑀯𑀸𑀬𑀢𑁂 𑀲𑀤𑁆𑀤𑀸𑀬𑀢𑁂𑀢𑀺 𑀯𑀸𑀡𑀻, 𑀬𑀼, 𑀈 𑀘, 𑀧𑀭𑁂𑀲𑀁 𑀫𑀫𑁆𑀫𑀯𑀺𑀚𑁆𑀛𑀦𑀝𑁆𑀞𑁂𑀦 𑀯𑀸𑀡𑁄 𑀯𑀺𑀬𑀸𑀢𑀺 𑀯𑀸 𑀯𑀸𑀡𑀻, 𑀈. 𑀪𑀭𑀢𑁄 𑀦𑀸𑀫 𑀲𑀢𑁆𑀣𑀓𑀸𑀭𑁄 𑀇𑀲𑀺, 𑀢𑀲𑁆𑀲𑁂𑀲𑀸 𑀪𑀸𑀭𑀢𑀻. 𑀓𑀣𑀻𑀬𑀢𑁂𑀢𑀺 𑀓𑀣𑀺𑀢𑀸. 𑀯𑀼𑀘𑁆𑀘𑀢𑁂𑀢𑀺 𑀯𑀘𑀻, 𑀈. 𑀩𑁆𑀭𑀳𑁆𑀫𑀻, 𑀲𑀭𑁄𑀯𑀢𑀻𑀢𑀺𑀧𑀺 𑀯𑀘𑀲𑁄 𑀦𑀸𑀫𑀸𑀦𑀺.

𑁧𑁦𑁬. 𑀏𑀓𑀫𑁂𑀯𑀸𑀔𑁆𑀬𑀸𑀢𑀧𑀤𑀁 𑀬𑀢𑁆𑀣 𑀏𑀓𑀸𑀔𑁆𑀬𑀸𑀢𑁄 𑀲𑀯𑀺𑀲𑁂𑀲𑀦𑁂𑀦 𑀓𑀸𑀭𑀓𑀧𑀤𑁂𑀦 𑀲𑀳𑀺𑀢𑀢𑁆𑀢𑀸 𑀲𑀓𑀸𑀭𑀓𑁄 𑀧𑀤𑀘𑀬𑁄 𑀲𑀫𑁆𑀩𑀦𑁆𑀥𑀢𑁆𑀣𑁄 𑀧𑀤𑀲𑀫𑀼𑀤𑀸𑀬𑁄 𑀯𑀸𑀓𑁆𑀬𑀁 𑀦𑀸𑀫 𑀲𑀺𑀬𑀸, 𑀬𑀣𑀸 𑁋 𑀯𑁂𑀲𑁆𑀲𑀦𑁆𑀢𑀭𑁄 𑀭𑀸𑀚𑀸 𑀲𑀼𑀔𑀯𑀺𑀧𑀸𑀓𑀁 𑀓𑀫𑁆𑀫𑀁 𑀓𑀭𑁄𑀢𑀺, 𑀧𑀼𑀭𑀺𑀲𑁄 𑀕𑀘𑁆𑀙𑀢𑀺. 𑀆𑀔𑁆𑀬𑀸𑀢𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀓𑁆𑀭𑀺𑀬𑀸𑀲𑀤𑁆𑀤𑁄𑀧𑀮𑀓𑁆𑀔𑀡𑀁, 𑀢𑁂𑀦 𑀤𑁂𑀯𑀤𑀢𑁆𑀢𑁄 𑀓𑀝𑀁 𑀓𑀢𑀯𑀸 𑀇𑀘𑁆𑀘𑀸𑀤𑀻𑀦𑀺𑀧𑀺 𑀯𑀸𑀓𑁆𑀬𑀁 𑀦𑀸𑀫 𑀲𑀺𑀬𑀸. 𑀅𑀫𑀭𑀓𑁄𑀲𑁂 𑀧𑀦 𑁋 ‘‘𑀢𑀺𑀲𑁆𑀬𑀸𑀤𑁆𑀬𑀦𑁆𑀢𑀘𑀬𑁄 𑀯𑀸𑀓𑁆𑀬𑀁, 𑀓𑁆𑀭𑀺𑀬𑀸 𑀯𑀸 𑀓𑀸𑀭𑀓𑀸𑀦𑁆𑀯𑀺𑀢𑀸’’𑀢𑀺 [𑀅𑀫𑀭 𑁬.𑁨] 𑀤𑁆𑀯𑀻𑀳𑀺 𑀮𑀓𑁆𑀔𑀡𑁂𑀳𑀺 𑀯𑀸𑀓𑁆𑀬𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀢𑀺𑀲𑁆𑀬𑀸𑀤𑁆𑀬𑀦𑁆𑀢𑀘𑀬𑁄 𑀢𑁆𑀬𑀸𑀤𑀺𑀲𑁆𑀬𑀸𑀤𑁆𑀬𑀦𑁆𑀢𑀧𑀤𑀸𑀦𑀁 𑀘𑀬𑁄 𑀲𑀫𑀽𑀳𑁄 𑀲𑀫𑁆𑀩𑀦𑁆𑀥𑀢𑁆𑀣𑁄 𑀯𑀸𑀓𑁆𑀬𑀁, 𑀢𑀁 𑀬𑀣𑀸 𑁋 𑀉𑀘𑁆𑀘𑀁 𑀧𑀞𑀢𑀺, 𑀑𑀤𑀦𑀁 𑀧𑀘𑀢𑀺. 𑀢𑀣𑀸 𑀘 𑀪𑀸𑀯𑀸𑀔𑁆𑀬𑀁 𑀆𑀔𑁆𑀬𑀸𑀢𑀁 𑀲𑀸𑀩𑁆𑀬𑀬𑀓𑀸𑀭𑀓𑀯𑀺𑀲𑁂𑀲𑀦𑀁 𑀯𑀸𑀓𑁆𑀬𑀁, 𑀆𑀔𑁆𑀬𑀸𑀢𑀁 𑀢𑁆𑀬𑀸𑀤𑁆𑀬𑀦𑁆𑀢𑀁 𑀲𑀸𑀩𑁆𑀬𑀬𑀁 𑀯𑀸 𑀲𑀓𑀸𑀭𑀓𑀁 𑀯𑀸 𑀲𑀯𑀺𑀲𑁂𑀲𑀦𑀁 𑀯𑀸 𑀯𑀸𑀓𑁆𑀬𑀫𑀼𑀘𑁆𑀘𑀢𑁂. 𑀢𑁆𑀬𑀸𑀤𑀺𑀕𑁆𑀕𑀳𑀡𑀁 𑀓𑁆𑀭𑀺𑀬𑀸𑀲𑀤𑁆𑀤𑁄𑀧𑀮𑀓𑁆𑀔𑀡𑀁, 𑀢𑁂𑀦 𑀤𑁂𑀯𑀤𑀢𑁆𑀢𑁄 ¶ 𑀓𑀝𑀁 𑀓𑀢𑀯𑀸 𑀇𑀘𑁆𑀘𑀸𑀤𑀻𑀦𑀺𑀧𑀺 𑀯𑀸𑀓𑁆𑀬𑀁. 𑀉𑀧𑀮𑀓𑁆𑀔𑀡𑀦𑀺𑀭𑀧𑁂𑀓𑁆𑀔𑀁 𑀅𑀧𑀭𑀁 𑀯𑀸𑀓𑁆𑀬𑀮𑀓𑁆𑀔𑀡𑀫𑀸𑀳 ‘‘𑀓𑁆𑀭𑀺𑀬𑀸 𑀯𑀸 𑀓𑀸𑀭𑀓𑀸𑀦𑁆𑀯𑀺𑀢𑀸’’𑀢𑀺. 𑀓𑁆𑀭𑀺𑀬𑀸𑀧𑀤𑀁 𑀯𑀸 𑀓𑀸𑀭𑀓𑀲𑀫𑁆𑀩𑀦𑁆𑀥𑀁 𑀯𑀸𑀓𑁆𑀬𑀁, 𑀬𑀣𑀸 𑁋 𑀭𑀸𑀚𑀸 𑀕𑀘𑁆𑀙𑀢𑀺, 𑀭𑀸𑀚𑀸 𑀕𑀢𑁄. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀲𑀸𑀩𑁆𑀬𑀬𑀲𑁆𑀲𑀧𑀺 𑀅𑀦𑀩𑁆𑀬𑀬𑀲𑁆𑀲𑀧𑀺 𑀲𑀩𑁆𑀩𑀲𑁆𑀲 𑀓𑁆𑀭𑀺𑀬𑀸𑀓𑀸𑀭𑀓𑀧𑀤𑀲𑀫𑀽𑀳𑀲𑁆𑀲 𑀯𑀸𑀓𑁆𑀬𑀢𑁆𑀢𑀫𑀸𑀳.

𑀪𑀬𑀸𑀤𑀻𑀳𑀺 𑀬𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸 𑀉𑀤𑀻𑀭𑀡𑀁 𑀓𑀣𑀦𑀁 ‘‘𑀲𑀧𑁆𑀧𑁄 𑀲𑀧𑁆𑀧𑁄, 𑀯𑀺𑀚𑁆𑀛 𑀯𑀺𑀚𑁆𑀛𑀸’’𑀢𑁆𑀬𑀸𑀤𑀺𑀓𑀁, 𑀢𑀁 𑀆𑀫𑁂𑀟𑀺𑀢𑀁 𑀜𑁂𑀬𑁆𑀬𑀁. 𑀫𑁂𑀟𑀺 𑀉𑀫𑁆𑀫𑀸𑀤𑀦𑁂, 𑀆𑀧𑀼𑀩𑁆𑀩𑁄 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀫𑀼𑀘𑁆𑀘𑀸𑀭𑀡𑁂 𑀯𑀢𑁆𑀢𑀢𑀺. 𑀬𑀣𑀸 ‘‘𑀏𑀢𑀤𑁂𑀯 𑀬𑀤𑀸 𑀯𑀸𑀓𑁆𑀬𑀁, 𑀆𑀫𑁂𑀟𑀬𑀢𑀺 𑀯𑀸𑀲𑀯𑁄’’ [‘‘𑀳𑀭𑀺𑀯𑀁𑀲𑁂’’𑀢𑀺 𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸𑀬𑀁 𑀯𑀼𑀢𑁆𑀢𑀁]. ‘‘𑀤𑁂𑀯𑀤𑀢𑁆𑀢𑁂𑀦𑀸𑀫𑁂𑀟𑁄 𑀓𑀢𑁄’’ 𑀇𑀘𑁆𑀘𑀢𑁆𑀭𑀸𑀧𑁆𑀬𑀬𑀫𑁂𑀯𑀢𑁆𑀣𑁄, 𑀲𑁄𑀓𑀸𑀤𑀺𑀦𑀸 𑀳𑀺 ‘‘𑀪𑀸𑀢𑀸 𑀪𑀸𑀢𑀸’’𑀇𑀢𑁆𑀬𑀼𑀘𑁆𑀘𑀸𑀭𑀻𑀬𑀢𑁂, 𑀪𑀸𑀯𑁂 𑀓𑀫𑁆𑀫𑀦𑀺 𑀘 𑀢𑁄. 𑀓𑀫𑁆𑀫𑀜𑁆𑀘 𑀧𑀤𑀁 𑀯𑀸𑀓𑁆𑀬𑀫𑁆𑀳𑀸.

𑁧𑁦𑁭. 𑀆𑀫𑁂𑀟𑀺𑀢𑀲𑁆𑀲 𑀯𑀺𑀲𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀪𑀬𑁂’’𑀘𑁆𑀘𑀸𑀤𑀺. ‘‘𑀲𑀧𑁆𑀧𑁄 𑀲𑀧𑁆𑀧𑁄, 𑀘𑁄𑀭𑁄 𑀘𑁄𑀭𑁄’’𑀢𑁆𑀬𑀸𑀤𑀻𑀲𑀼 𑀪𑀬𑁂. ‘‘𑀯𑀺𑀚𑁆𑀛 𑀯𑀺𑀚𑁆𑀛, 𑀧𑀳𑀭 𑀧𑀳𑀭𑀸’’𑀢𑁆𑀬𑀸𑀤𑀻𑀲𑀼 𑀓𑁄𑀥𑁂. ‘‘𑀲𑀸𑀥𑀼 𑀲𑀸𑀥𑀽’’𑀢𑁆𑀬𑀸𑀤𑀻𑀲𑀼 𑀧𑀲𑀁𑀲𑀸𑀬𑀁. ‘‘𑀕𑀘𑁆𑀙 𑀕𑀘𑁆𑀙, 𑀮𑀼𑀦𑀸𑀳𑀺 𑀮𑀼𑀦𑀸𑀳𑀻’’𑀢𑁆𑀬𑀸𑀤𑀻𑀲𑀼 𑀢𑀼𑀭𑀺𑀢𑁂. ‘‘𑀆𑀕𑀘𑁆𑀙 𑀆𑀕𑀘𑁆𑀙𑀸’’𑀢𑁆𑀬𑀸𑀤𑀻𑀲𑀼 𑀓𑁄𑀢𑀽𑀳𑀮𑁂. ‘‘𑀩𑀼𑀤𑁆𑀥𑁄 𑀩𑀼𑀤𑁆𑀥𑁄𑀢𑀺 𑀘𑀺𑀦𑁆𑀢𑀬𑀦𑁆𑀢𑁄’’𑀢𑁆𑀬𑀸𑀤𑀻𑀲𑀼 𑀅𑀘𑁆𑀙𑀭𑁂. ‘‘𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄 𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄’’𑀢𑁆𑀬𑀸𑀤𑀻𑀲𑀼 𑀳𑀸𑀲𑁂. ‘‘𑀓𑀳𑀁 𑀏𑀓𑀧𑀼𑀢𑁆𑀢𑀓, 𑀓𑀳𑀁 𑀏𑀓𑀧𑀼𑀢𑁆𑀢𑀓𑀸’’𑀢𑁆𑀬𑀸𑀤𑀻𑀲𑀼 𑀲𑁄𑀓𑁂. ‘‘𑀅𑀳𑁄 𑀲𑀼𑀔𑀁 𑀅𑀳𑁄 𑀲𑀼𑀔’’𑀦𑁆𑀢𑁆𑀬𑀸𑀤𑀻𑀲𑀼 𑀧𑀲𑀸𑀤𑁂. 𑀘𑀲𑀤𑁆𑀤𑁄 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄, 𑀢𑁂𑀦 𑀕𑀭𑀳𑀸’𑀲𑀫𑁆𑀫𑀸𑀦𑀸𑀤𑀻𑀦𑀁 𑀲𑀗𑁆𑀕𑀳𑁄 ¶ 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣 ‘‘𑀧𑀸𑀧𑁄 𑀧𑀸𑀧𑁄’’𑀢𑁆𑀬𑀸𑀤𑀻𑀲𑀼 𑀕𑀭𑀳𑀸𑀬𑀁. ‘‘𑀅𑀪𑀺𑀭𑀽𑀧𑀓, 𑀅𑀪𑀺𑀭𑀽𑀧𑀓𑀸’’𑀢𑁆𑀬𑀸𑀤𑀻𑀲𑀼 𑀅𑀲𑀫𑁆𑀫𑀸𑀦𑁂. 𑀏𑀯𑀫𑁂𑀢𑁂𑀲𑀼 𑀦𑀯𑀲𑀼, 𑀅𑀜𑁆𑀜𑁂𑀲𑀼 𑀘 𑀆𑀫𑁂𑀟𑀺𑀢𑀯𑀘𑀦𑀁 𑀩𑀼𑀥𑁄 𑀧𑀡𑁆𑀟𑀺𑀢𑁄 𑀓𑀭𑁂 𑀓𑀭𑁂𑀬𑁆𑀬 𑀬𑁄𑀚𑁂𑀬𑁆𑀬 𑀆𑀫𑁂𑀟𑀦𑀁 𑀧𑀼𑀦𑀧𑁆𑀧𑀼𑀦𑀼𑀘𑁆𑀘𑀸𑀭𑀡𑀁 𑀆𑀫𑁂𑀟𑀺𑀬𑀢𑀺 𑀯𑀸 𑀧𑀼𑀦𑀧𑁆𑀧𑀼𑀦𑀼𑀘𑁆𑀘𑀸𑀭𑀻𑀬𑀢𑀻𑀢𑀺 𑀆𑀫𑁂𑀟𑀺𑀢𑀦𑁆𑀢𑀺 𑀓𑀢𑁆𑀯𑀸.

𑁧𑁦𑁮. 𑀇𑀭𑀼, 𑀬𑀚𑀼, 𑀲𑀸𑀫𑀦𑁆𑀢𑀺 𑀢𑀬𑁄 𑀯𑁂𑀤𑀸 𑀲𑀺𑀬𑀼𑀁, 𑀢𑀢𑁆𑀭 𑀇𑀭𑀼𑀲𑀤𑁆𑀤𑁄 𑀦𑀸𑀭𑀻 𑀇𑀢𑁆𑀣𑀺𑀮𑀺𑀗𑁆𑀕𑁄. 𑀇𑀘 𑀣𑀼𑀢𑀺𑀬𑀁, 𑀇𑀘𑁆𑀘𑀦𑁆𑀢𑁂 𑀤𑁂𑀯𑀸 𑀏𑀢𑀸𑀬𑀸𑀢𑀺 𑀇𑀭𑀼, 𑀉, 𑀘𑀲𑁆𑀲 𑀭𑁄. 𑀬𑀚𑀦𑁆𑀢𑁂 𑀅𑀦𑁂𑀦𑁂𑀢𑀺 𑀬𑀚𑀼, 𑀉. 𑀲𑁄 𑀅𑀦𑁆𑀢𑀓𑀫𑁆𑀫𑀦𑀺, 𑀓𑀭𑀡𑁂 𑀫𑁄, 𑀲𑁄𑀬𑀦𑁆𑀢𑀺 𑀧𑀸𑀧𑀫𑀦𑁂𑀦𑁂𑀢𑀺 𑀲𑀸𑀫𑀁, 𑀑𑀲𑁆𑀲𑀸, ‘‘𑀲𑀸 𑀢𑀦𑀼𑀓𑀭𑀡𑀸𑀯𑀲𑀸𑀦𑁂𑀲𑀽’’𑀢𑀺 𑀯𑀸 𑀥𑀸𑀢𑁆𑀯𑀢𑁆𑀣𑁄. 𑀯𑀺𑀤𑀦𑁆𑀢𑀺 𑀥𑀫𑁆𑀫𑀫𑁂𑀢𑁂𑀳𑀻𑀢𑀺 𑀯𑁂𑀤𑀸.

𑀏𑀢𑁂 𑀏𑀯 𑀢𑀬𑁄 𑀯𑁂𑀤𑀸 𑀢𑀬𑀻 𑀦𑀸𑀫, 𑀢𑀬𑁄 𑀅𑀯𑀬𑀯𑀸 𑀅𑀲𑁆𑀲𑀸𑀢𑀺 𑀢𑀬𑀻. 𑀅𑀬𑀁 𑀢𑀬𑀻𑀲𑀤𑁆𑀤𑁄 𑀦𑀸𑀭𑀻 𑀇𑀢𑁆𑀣𑀺𑀮𑀺𑀗𑁆𑀕𑁄. 𑀢𑀺𑀓𑀁 𑀯𑁂𑀤𑁂. 𑀫𑀼𑀦𑀸𑀢𑀺 𑀚𑀸𑀦𑀸𑀢𑀺 𑀥𑀫𑁆𑀫𑀁 𑀅𑀦𑁂𑀦𑀸𑀢𑀺 𑀫𑀦𑁆𑀢𑁄, 𑀢𑁄, 𑀉𑀲𑁆𑀲 𑀅. 𑀲𑀼𑀬𑁆𑀬𑀢𑁂 𑀥𑀫𑁆𑀫𑀁 𑀏𑀢𑀸𑀬𑀸𑀢𑀺 𑀲𑀼𑀢𑀺. 𑀇𑀢𑁆𑀣𑀺𑀬𑀁 𑀲𑀼𑀢𑀺𑀲𑀤𑁆𑀤𑁄.

𑁧𑁦𑁯. 𑀯𑁂𑀤𑀲𑀢𑁆𑀣𑀓𑀸𑀭𑀓𑁂 𑀤𑀲 𑀇𑀲𑀬𑁄𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀝𑁆𑀞𑀓𑁄’’𑀘𑁆𑀘𑀸𑀤𑀺. 𑀅𑀢𑁆𑀣𑀁 𑀳𑀺𑀢𑀁, 𑀅𑀢𑁆𑀣𑁂 𑀯𑀸 𑀲𑀢𑁆𑀣𑁂 𑀓𑀭𑁄𑀢𑀻𑀢𑀺 𑀅𑀝𑁆𑀞𑀓𑁄. 𑀯𑀸𑀫𑀁 𑀓𑀮𑁆𑀬𑀸𑀡𑀯𑀘𑀦𑀁 𑀓𑀭𑁄𑀢𑀻𑀢𑀺 𑀯𑀸𑀫𑀓𑁄, 𑀭𑀲𑁆𑀲𑀲𑀭𑀻𑀭𑀢𑁆𑀢𑀸 ¶ 𑀯𑀸 𑀯𑀸𑀫𑀦𑁄, 𑀲𑁄 𑀏𑀯 𑀯𑀸𑀫𑀓𑁄, 𑀦𑀲𑁆𑀲 𑀓𑀓𑀸𑀭𑀢𑁆𑀢𑀁 𑀓𑀢𑁆𑀯𑀸. 𑀯𑀸𑀫𑁄 𑀦𑀸𑀫 𑀳𑀭𑁄, 𑀲𑁄 𑀤𑁂𑀯𑁄 𑀅𑀲𑁆𑀲 𑀯𑀸𑀫𑀤𑁂𑀯𑁄.

‘‘𑀯𑀸𑀫𑀁 𑀲𑀩𑁆𑀬𑁂 𑀧𑀢𑀻𑀧𑁂 [𑀧𑀢𑀻𑀧𑁂𑀢𑀺 𑀧𑀝𑀺𑀓𑀽𑀮𑁂] 𑀘, 𑀤𑀯𑀺𑀡𑁂 [𑀤𑀯𑀺𑀡𑁂𑀢𑀺 𑀥𑀦𑁂] 𑀘𑀸𑀢𑀺𑀲𑀼𑀦𑁆𑀤𑀭𑁂;

𑀧𑀬𑁄𑀥𑀭𑁂 𑀳𑀭𑁂 𑀓𑀸𑀫𑁂, 𑀚𑀜𑁆𑀜𑀸 𑀯𑀸𑀫’𑀫𑀧𑀺𑀢𑁆𑀣𑀺𑀬’’𑀦𑁆𑀢𑀺.

𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂.

𑀅𑀗𑁆𑀕𑀺𑀭𑀲𑀲𑁆𑀲 𑀇𑀲𑀺𑀦𑁄 𑀅𑀧𑀘𑁆𑀘𑀁 𑀅𑀗𑁆𑀕𑀺𑀭𑀲𑁄, 𑀘𑀺𑀢𑁆𑀭𑀲𑀺𑀔𑀡𑁆𑀟𑀺𑀦𑁄 𑀅𑀧𑀘𑁆𑀘𑀁 𑀧𑀼𑀢𑁆𑀢𑁄. 𑀅𑀣 𑀯𑀸 𑀅𑀗𑁆𑀕𑀺𑀫𑁆𑀳𑀺 𑀓𑀸𑀬𑁂 𑀭𑀲𑁄 𑀲𑀺𑀤𑁆𑀥𑀺𑀧𑁆𑀧𑀢𑁆𑀢𑁄 𑀧𑀸𑀭𑀤𑁄 𑀬𑀲𑁆𑀲𑀸𑀢𑀺 𑀅𑀗𑁆𑀕𑀺𑀭𑀲𑁄. 𑀢𑁂𑀦𑁂𑀯 𑀢𑀲𑁆𑀲 𑀧𑀼𑀢𑁆𑀢𑀁 𑀲𑀼𑀭𑀸𑀘𑀭𑀺𑀬𑀁 ‘‘𑀚𑀻𑀯𑁄’’𑀢𑀺 𑀯𑀤𑀢𑀺. 𑀚𑀻𑀯𑀬𑀢𑀺 𑀭𑀡𑁂 𑀅𑀲𑀼𑀭𑀦𑀺𑀳𑀢𑁂 𑀤𑁂𑀯𑁂𑀢𑀺 𑀚𑀻𑀯𑁄 [𑀅𑀫𑀭 𑁩.𑁨𑁪 𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑀑𑀮𑁄𑀓𑁂𑀢𑀩𑁆𑀩𑀸]. 𑀪𑀭𑀢𑀻𑀢𑀺 𑀪𑀕𑀼, 𑀪𑀁 𑀯𑀸𑀦𑀓𑁆𑀔𑀢𑁆𑀢𑀁 𑀕𑀘𑁆𑀙𑀢𑀺 𑀚𑀸𑀦𑀸𑀢𑀻𑀢𑀺 𑀪𑀕𑀼, 𑀉. 𑀬𑀫𑀁 𑀲𑀁𑀬𑀫𑀁 𑀤𑀤𑀸𑀢𑀺 𑀧𑀭𑁂𑀲𑀦𑁆𑀢𑀺 𑀬𑀫𑀤𑁄 𑀘 𑀲𑁄 𑀤𑀓𑁆𑀔𑀺𑀡𑁂𑀬𑁆𑀬𑀕𑁆𑀕𑀺𑀢𑁆𑀢𑀸 𑀅𑀕𑁆𑀕𑀺 𑀘𑁂𑀢𑀺 𑀬𑀫𑀤𑀕𑁆𑀕𑀺, 𑀭𑀸𑀫𑀲𑁆𑀲 𑀧𑀺𑀢𑀸 [𑀧𑀭𑀲𑀼𑀭𑀸𑀫𑀲𑁆𑀲 𑀧𑀺𑀢𑀸 (𑀲𑀤𑁆𑀤𑀓𑀧𑁆𑀧𑀤𑁆𑀤𑀼𑀫𑁂)]. 𑀯𑀲𑀺𑀝𑁆𑀞𑀲𑁆𑀲 𑀅𑀧𑀘𑁆𑀘𑀁 𑀯𑀸𑀲𑀺𑀝𑁆𑀞𑁄. 𑀪𑀸𑀭𑀤𑁆𑀯𑀸𑀚𑀲𑁆𑀲 𑀅𑀧𑀘𑁆𑀘𑀁 𑀪𑀸𑀭𑀤𑁆𑀯𑀸𑀚𑁄. 𑀓𑀲𑁆𑀲𑀧𑀲𑁆𑀲 𑀅𑀧𑀘𑁆𑀘𑀁 𑀓𑀲𑁆𑀲𑀧𑁄. 𑀯𑁂𑀲𑁆𑀲𑀸𑀫𑀺𑀢𑁆𑀢𑀲𑁆𑀲 𑀅𑀧𑀘𑁆𑀘𑀁 𑀯𑁂𑀲𑁆𑀲𑀸𑀫𑀺𑀢𑁆𑀢𑁄. 𑀇𑀢𑀺 𑀇𑀫𑁂 𑀤𑀲 𑀇𑀲𑀬𑁄 𑀫𑀦𑁆𑀢𑀸𑀦𑀁 𑀯𑁂𑀤𑀸𑀦𑀁 𑀓𑀢𑁆𑀢𑀸𑀭𑁄 𑀓𑀸𑀭𑀓𑀸.

𑁧𑁧𑁦. 𑀯𑁂𑀤𑁂 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲 𑀙𑀴𑀗𑁆𑀕𑀸𑀦𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀓𑀧𑁆𑀧𑁄’’𑀘𑁆𑀘𑀸𑀤𑀺. 𑀬𑀜𑁆𑀜𑀓𑀫𑁆𑀫𑀸𑀦𑀫𑀼𑀧𑀤𑁂𑀲𑀓𑁄 𑀓𑀧𑁆𑀧𑁄 ‘‘𑀓𑀧𑁆𑀧𑀢𑁂 𑀧𑀪𑀯𑀢𑀻’’𑀢𑀺 𑀓𑀢𑁆𑀯𑀸. 𑀲𑀸𑀥𑀼𑀲𑀤𑁆𑀤𑀸𑀦𑀫𑀦𑁆𑀯𑀸𑀔𑁆𑀬𑀸𑀬𑀓𑀁 𑀩𑁆𑀬𑀸𑀓𑀭𑀡𑀁 𑀯𑀺𑀲𑁂𑀲𑁂𑀦 𑀆𑀓𑀭𑀻𑀬𑀦𑁆𑀢𑁂 𑀧𑀓𑀢𑀺𑀘𑁆𑀘𑀸𑀤𑀺𑀦𑀸 𑀆𑀩𑁆𑀬𑀸𑀧𑀸𑀤𑁆𑀬𑀦𑁆𑀢𑁂 𑀅𑀦𑁂𑀦 ¶ 𑀲𑀤𑁆𑀤𑀸𑀢𑀺, 𑀬𑀼. 𑀚𑁄𑀢𑀺𑀲𑀢𑁆𑀣𑀁 𑀕𑀡𑀦𑀲𑀢𑁆𑀣𑀁 𑀲𑀼𑀪𑀸𑀲𑀼𑀪𑀓𑀫𑁆𑀫𑀨𑀮𑀚𑁄𑀢𑀦𑀓𑀁. 𑀲𑀺𑀓𑁆𑀔𑁆𑀬𑀦𑁆𑀢𑁂 𑀅𑀩𑁆𑀪𑀲𑁆𑀬𑀦𑁆𑀢𑁂 [𑀅𑀚𑁆𑀛𑀬𑀦𑁆𑀢𑁂 (𑀓.)] 𑀏𑀢𑀸𑀬𑀸𑀢𑀺 𑀲𑀺𑀓𑁆𑀔𑀸, 𑀅𑀓𑀸𑀭𑀸𑀤𑀺𑀯𑀡𑁆𑀡𑀸𑀦𑀁 𑀞𑀸𑀦𑀓𑀭𑀡𑀧𑀬𑀢𑀦𑀸𑀦𑀁 𑀧𑀝𑀺𑀧𑀸𑀤𑀺𑀓𑀸. 𑀦𑀺𑀘𑁆𑀙𑀬𑁂𑀦, 𑀦𑀺𑀲𑁆𑀲𑁂𑀲𑀢𑁄 𑀯𑀸 𑀉𑀢𑁆𑀢𑀺 𑀦𑀺𑀭𑀼𑀢𑁆𑀢𑀺, 𑀯𑀡𑁆𑀡𑀸𑀕𑀫𑁄 𑀯𑀡𑁆𑀡𑀯𑀺𑀧𑀭𑀺𑀬𑀬𑁄𑀘𑁆𑀘𑀸𑀤𑀺𑀓𑀸. 𑀙𑀦𑁆𑀤𑀲𑀺 𑀅𑀦𑀼𑀝𑁆𑀞𑀼𑀪𑀸𑀤𑀺𑀯𑀼𑀢𑁆𑀢𑀸𑀦𑀁 𑀧𑀝𑀺𑀧𑀸𑀤𑀺𑀓𑀸 𑀙𑀦𑁆𑀤𑁄𑀯𑀺𑀘𑀺𑀢𑀺, 𑀏𑀢𑀸𑀦𑀺 𑀙 𑀯𑁂𑀤𑀸𑀦𑀁 𑀅𑀗𑁆𑀕𑀸𑀦𑀻𑀢𑀺 𑀯𑀤𑀦𑁆𑀢𑀺.

𑁧𑁧𑁧. 𑀧𑀼𑀭𑀸𑀯𑀼𑀢𑁆𑀢𑀦𑀺𑀩𑀦𑁆𑀥𑀦𑀧𑀸𑀬𑀢𑁆𑀢𑀸 𑀧𑀼𑀭𑀸𑀯𑀼𑀢𑁆𑀢𑀁, 𑀢𑀲𑁆𑀲 𑀧𑀩𑀦𑁆𑀥𑁄 𑀯𑀺𑀢𑁆𑀣𑀸𑀭𑁄, 𑀲𑀦𑁆𑀢𑀸𑀦𑁄 𑀯𑀸 𑀪𑀸𑀭𑀢𑀸𑀤𑀺𑀓𑁄 𑀪𑀸𑀭𑀢𑀬𑀼𑀤𑁆𑀥𑀓𑀣𑀸𑀤𑀺𑀓𑁄 𑀩𑁆𑀬𑀸𑀲𑀸𑀤𑀺𑀧𑀓𑀢𑁄 𑀕𑀦𑁆𑀣𑁄 𑀇𑀢𑀺𑀳𑀸𑀲𑁄 𑀦𑀸𑀫, 𑀇𑀢𑀺𑀳𑀲𑀤𑁆𑀤𑁄 𑀧𑀸𑀭𑀫𑁆𑀧𑀭𑀺𑀬𑁄𑀧𑀤𑁂𑀲𑁂 𑀦𑀺𑀧𑀸𑀢𑁄, 𑀇𑀢𑀺𑀳𑀸’𑀢𑁆𑀣𑀺 𑀅𑀲𑁆𑀫𑀺𑀦𑁆𑀢𑀺 𑀇𑀢𑀺𑀳𑀸𑀲𑁄.

𑀭𑀼𑀓𑁆𑀔𑀸𑀤𑀻𑀦𑀁 𑀦𑀸𑀫𑀧𑀭𑀺𑀬𑀸𑀬𑁂𑀳𑀺 𑀦𑀸𑀫𑀧𑁆𑀧𑀓𑀸𑀲𑀓𑀁 𑀭𑀢𑀦𑀫𑀸𑀮𑀸𑀤𑀺𑀓𑀁 𑀲𑀢𑁆𑀣𑀁 𑀦𑀺𑀖𑀡𑁆𑀝𑀼 𑀦𑀸𑀫, 𑀲𑁄𑀢𑀺𑀫𑀺𑀦𑀸 𑀦𑀺𑀖𑀡𑁆𑀝𑀼𑀲𑀤𑁆𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀁 𑀤𑀻𑀧𑁂𑀢𑀺, 𑀲𑀩𑁆𑀩𑀢𑁆𑀭𑁂𑀯𑀁. 𑀢𑀢𑁆𑀣 𑀢𑀢𑁆𑀣𑀸𑀕𑀢𑀸𑀦𑀺 𑀦𑀸𑀫𑀸𑀦𑀺 𑀦𑀺𑀲𑁆𑀲𑁂𑀲𑀢𑁄 𑀖𑀝𑁂𑀦𑁆𑀢𑀺 𑀭𑀸𑀲𑀻𑀓𑀭𑁄𑀦𑁆𑀢𑀺 𑀏𑀢𑁆𑀣𑀸𑀢𑀺 𑀦𑀺𑀖𑀡𑁆𑀝𑀼, 𑀩𑀺𑀦𑁆𑀤𑀸𑀕𑀫𑁄, 𑀯𑀘𑀦𑀻𑀬𑀯𑀸𑀘𑀓𑀪𑀸𑀯𑁂𑀦 𑀅𑀢𑁆𑀣𑀁 𑀲𑀤𑁆𑀤𑀜𑁆𑀘 𑀦𑀺𑀔𑀡𑁆𑀟𑀢𑀺 𑀪𑀺𑀦𑁆𑀤𑀢𑀺 𑀯𑀺𑀪𑀚𑁆𑀚 𑀤𑀲𑁆𑀲𑁂𑀢𑀻𑀢𑀺 𑀯𑀸 𑀦𑀺𑀔𑀡𑁆𑀝𑀼, 𑀲𑁄 𑀏𑀯 𑀔𑀲𑁆𑀲 𑀖𑀓𑀸𑀭𑀁 𑀓𑀢𑁆𑀯𑀸 𑀦𑀺𑀖𑀡𑁆𑀝𑀽𑀢𑀺 𑀯𑀼𑀢𑁆𑀢𑁄. 𑀭𑀼𑀓𑁆𑀔𑀸𑀤𑀻𑀦𑀁 𑀦𑀸𑀫𑀧𑁆𑀧𑀓𑀸𑀲𑀓𑀦𑁆𑀢𑀺𑀫𑀺𑀦𑀸 𑀏𑀓𑁂𑀓𑀲𑁆𑀲 𑀅𑀢𑁆𑀣𑀲𑁆𑀲 𑀅𑀦𑁂𑀓𑀧𑀭𑀺𑀬𑀸𑀬𑀦𑀸𑀫𑀧𑁆𑀧𑀓𑀸𑀲𑀓𑀢𑁆𑀢𑀁 𑀯𑀼𑀢𑁆𑀢𑀁, 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁, 𑀅𑀦𑁂𑀓𑁂𑀲𑀁 𑀅𑀢𑁆𑀣𑀸𑀦𑀁 𑀏𑀓𑀲𑀤𑁆𑀤𑀯𑀘𑀦𑀻𑀬𑀢𑀸𑀧𑀓𑀸𑀲𑀓𑀯𑀲𑁂𑀦𑀧𑀺 ¶ 𑀢𑀲𑁆𑀲 𑀕𑀦𑁆𑀣𑀲𑁆𑀲 𑀧𑀯𑀢𑁆𑀢𑀢𑁆𑀢𑀸 [𑀤𑀻. 𑀦𑀺. 𑀝𑀻. 𑁧.𑁨𑁫𑁬; 𑀫. 𑀦𑀺. 𑀝𑀻. 𑁧.𑁨𑁨; 𑀅. 𑀦𑀺. 𑀝𑀻. 𑁨.𑁩.𑁫𑁯; 𑀲𑀸𑀭𑀢𑁆𑀣. 𑀝𑀻. 𑁧.𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸].

𑁧𑁧𑁨. 𑀮𑁄𑀓𑁂 𑀬𑀁 𑀯𑀺𑀢𑀡𑁆𑀟𑀯𑀸𑀤𑀻𑀦𑀁 𑀲𑀢𑁆𑀣𑀁, 𑀢𑀁 𑀮𑁄𑀓𑀸𑀬𑀢𑀦𑁆𑀢𑀺 𑀯𑀺𑀜𑁆𑀜𑁂𑀬𑁆𑀬𑀁. 𑀢𑀦𑀼 𑀯𑀺𑀢𑁆𑀣𑀸𑀭𑁂, 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀁, 𑀲𑀕𑁆𑀕𑀫𑁄𑀓𑁆𑀔𑀯𑀺𑀭𑀼𑀤𑁆𑀥𑀁 𑀯𑀸 𑀢𑀦𑁄𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀺𑀢𑀡𑁆𑀟𑁄, 𑀟𑁄, 𑀡𑀢𑁆𑀢𑀁, 𑀯𑀺𑀭𑀼𑀤𑁆𑀥𑁂𑀦 𑀯𑀸 𑀯𑀸𑀤𑀤𑀡𑁆𑀟𑁂𑀦 𑀢𑀸𑀴𑁂𑀦𑁆𑀢𑀺 𑀏𑀢𑁆𑀣 𑀯𑀸𑀤𑀺𑀦𑁄𑀢𑀺 𑀯𑀺𑀢𑀡𑁆𑀟𑁄, 𑀢𑀟𑀺 𑀢𑀸𑀴𑀦𑁂, 𑀅𑀤𑁂𑀲𑀫𑁆𑀧𑀺 𑀳𑀺 𑀬𑀁 𑀦𑀺𑀲𑁆𑀲𑀸𑀬 𑀯𑀸𑀤𑀻𑀦𑀁 𑀯𑀸𑀤𑁄 𑀧𑀯𑀢𑁆𑀢𑁄, 𑀢𑀁 𑀢𑁂𑀲𑀁 𑀤𑁂𑀲𑀢𑁄𑀧𑀺 𑀉𑀧𑀘𑀸𑀭𑀯𑀲𑁂𑀦 𑀯𑀼𑀘𑁆𑀘𑀢𑀺, 𑀬𑀣𑀸 ‘‘𑀘𑀓𑁆𑀔𑀼𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺 [𑀤𑀻. 𑀦𑀺. 𑁨.𑁪𑁦𑁧; 𑀫. 𑀦𑀺. 𑁧.𑁧𑁩𑁪; 𑀯𑀺𑀪. 𑁨𑁦𑁪]. 𑀮𑁄𑀓𑀸𑀢𑀺 𑀩𑀸𑀮𑀮𑁄𑀓𑀸, 𑀢𑁂 𑀏𑀢𑁆𑀣 𑀆𑀬𑀢𑀦𑁆𑀢𑀺 𑀉𑀲𑁆𑀲𑀳𑀦𑁆𑀢𑀺 𑀯𑀸𑀬𑀫𑀦𑁆𑀢𑀺 𑀯𑀸𑀤𑀲𑁆𑀲𑀸𑀤𑁂𑀦𑀸𑀢𑀺 𑀮𑁄𑀓𑀸𑀬𑀢𑀁, 𑀆𑀬𑀢𑀺𑀁 𑀳𑀺𑀢𑀁 𑀢𑁂𑀦 𑀮𑁄𑀓𑁄 𑀦 𑀬𑀢𑀢𑀺 𑀦 𑀈𑀳𑀢𑀻𑀢𑀺 𑀯𑀸 𑀮𑁄𑀓𑀸𑀬𑀢𑀁, 𑀢𑀜𑁆𑀳𑀺 𑀕𑀦𑁆𑀣𑀁 𑀦𑀺𑀲𑁆𑀲𑀸𑀬 𑀲𑀢𑁆𑀢𑀸 𑀧𑀼𑀜𑁆𑀜𑀓𑁆𑀭𑀺𑀬𑀸𑀬 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀦𑁆𑀢𑀺.

𑀬𑁄 𑀓𑀯𑀻𑀦𑀁 𑀧𑀡𑁆𑀟𑀺𑀢𑀸𑀦𑀁 𑀳𑀺𑀢𑁄 𑀓𑀯𑀺𑀢𑁆𑀢𑀪𑁄𑀕𑀲𑀫𑁆𑀧𑀢𑁆𑀢𑀸𑀤𑀺𑀧𑀬𑁄𑀚𑀦𑀓𑀭𑁄 𑀓𑁆𑀭𑀺𑀬𑀸𑀓𑀧𑁆𑀧𑀯𑀺𑀓𑀧𑁆𑀧𑁄 𑀓𑀯𑀻𑀦𑀁 𑀓𑁆𑀭𑀺𑀬𑀸𑀲𑀗𑁆𑀔𑀸𑀢𑀓𑀧𑁆𑀧𑀩𑀦𑁆𑀥𑀦𑀯𑀺𑀥𑀺𑀯𑀺𑀥𑀸𑀬𑀓𑁄 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑀸𑀤𑀺𑀓𑁄 𑀕𑀦𑁆𑀣𑁄, 𑀲𑁄 𑀓𑁂𑀝𑀼𑀪𑀁 𑀦𑀸𑀫, 𑀓𑀺𑀝𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀓𑁄𑀲𑀮𑁆𑀮𑀁 𑀓𑀯𑀬𑁄 𑀩𑀦𑁆𑀥𑀦𑁂𑀲𑀼 𑀏𑀢𑁂𑀦𑀸𑀢𑀺 𑀓𑁂𑀝𑀼𑀪𑀁, 𑀓𑀺𑀝 𑀕𑀢𑀺𑀬𑀁, 𑀅𑀪𑁄, 𑀅𑀲𑁆𑀲𑀼𑀓𑀸𑀭𑁄, 𑀅𑀣 𑀯𑀸 𑀓𑀺𑀝𑀢𑀺 𑀕𑀫𑁂𑀢𑀺 𑀓𑁆𑀭𑀺𑀬𑀸𑀤𑀺𑀯𑀺𑀪𑀸𑀕𑀁, 𑀢𑀁 𑀯𑀸 𑀅𑀦𑀯𑀲𑁂𑀲𑁂𑀦 𑀧𑀭𑀺𑀬𑀸𑀤𑀸𑀦𑀢𑁄 𑀕𑀫𑁂𑀦𑁆𑀢𑁄 𑀧𑀽𑀭𑁂𑀢𑀻𑀢𑀺 𑀓𑁂𑀝𑀼𑀪𑀁, 𑀉𑀪, 𑀉𑀫𑁆𑀪 𑀧𑀽𑀭𑀡𑁂.

𑀯𑀘𑀻𑀪𑁂𑀤𑀸𑀤𑀺𑀮𑀓𑁆𑀔𑀡𑀸 ¶ 𑀓𑁆𑀭𑀺𑀬𑀸 𑀓𑀧𑁆𑀧𑀻𑀬𑀢𑀺 𑀯𑀺𑀓𑀧𑁆𑀧𑀻𑀬𑀢𑀺 𑀏𑀢𑁂𑀦𑀸𑀢𑀺 𑀓𑁆𑀭𑀺𑀬𑀸𑀓𑀧𑁆𑀧𑁄. 𑀲𑁄 𑀧𑀦 𑀯𑀡𑁆𑀡𑀧𑀤𑀲𑀫𑁆𑀩𑀦𑁆𑀥𑀧𑀤𑀢𑁆𑀣𑀸𑀤𑀺𑀯𑀺𑀪𑀸𑀕𑀢𑁄 𑀅𑀢𑀺𑀩𑀳𑀼 𑀯𑀺𑀓𑀧𑁆𑀧𑁄𑀢𑀺 𑀆𑀳 ‘‘𑀓𑁆𑀭𑀺𑀬𑀸𑀓𑀧𑁆𑀧𑀯𑀺𑀓𑀧𑁆𑀧𑁄’’𑀢𑀺, 𑀇𑀤𑀜𑁆𑀘 𑀫𑀽𑀮𑀓𑁆𑀭𑀺𑀬𑀸𑀓𑀧𑁆𑀧𑀕𑀦𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁄 𑀳𑀺 𑀫𑀳𑀸𑀯𑀺𑀲𑀬𑁄 𑀲𑀢𑀲𑀳𑀲𑁆𑀲𑀧𑀭𑀺𑀫𑀸𑀡𑁄 𑀦𑀬𑀘𑀭𑀺𑀢𑀸𑀤𑀺𑀧𑀓𑀭𑀡𑀁 [𑀦𑀮𑀘𑀭𑀺𑀢𑀸𑀤𑀺𑀧𑀓𑀭𑀡𑀁 (?)].

𑁧𑁧𑁩. 𑀉𑀧𑀮𑀤𑁆𑀥𑁄 𑀓𑁂𑀦𑀧𑁆𑀬𑀢𑁆𑀣𑁄 𑀬𑀲𑁆𑀲𑀁 𑀲𑀸 𑀉𑀧𑀮𑀤𑁆𑀥𑀢𑁆𑀣𑀸, 𑀇𑀢𑀺 𑀆𑀔𑁆𑀬𑀸𑀬𑀺𑀓𑀸𑀢𑁆𑀬𑀼𑀘𑁆𑀘𑀢𑁂 𑀆𑀔𑁆𑀬𑀸𑀬𑀢𑁂 𑀦𑀸𑀬𑀓𑀸𑀦𑀼𑀲𑀸𑀲𑀓𑀘𑀭𑀺𑀢𑀫𑀲𑁆𑀲𑀦𑁆𑀢𑀺, 𑀲𑀜𑁆𑀜𑀸𑀬𑀁 𑀡𑁆𑀯𑀼.

𑀧𑀩𑀦𑁆𑀥𑁂𑀦𑁂𑀯 𑀘 𑀲𑀯𑀺𑀢𑁆𑀣𑀸𑀭𑁂𑀦 𑀓𑀧𑁆𑀧𑀦𑀁 𑀬𑀲𑁆𑀲𑀁 𑀲𑀸 𑀧𑀩𑀦𑁆𑀥𑀓𑀧𑁆𑀧𑀦𑀸, 𑀓𑀸𑀤𑀫𑁆𑀩𑀭𑀻𑀧𑀪𑀼𑀢𑀺. 𑀓𑀣𑀻𑀬𑀢𑀻𑀢𑀺 𑀓𑀣𑀸.

𑀅𑀢𑁆𑀣𑀸 𑀪𑀽𑀫𑀺𑀳𑀺𑀭𑀜𑁆𑀜𑀸𑀤𑀬𑁄, 𑀢𑀢𑁆𑀭 𑀧𑀥𑀸𑀦𑀁 𑀪𑀽𑀫𑀺 𑀇𑀢𑀭𑁂𑀲𑀁 𑀢𑀧𑁆𑀧𑀪𑀯𑀢𑁆𑀢𑀸, 𑀢𑁂𑀲𑀁 𑀅𑀚𑁆𑀚𑀦𑁂 𑀧𑀸𑀮𑀦𑁂 𑀘 𑀉𑀧𑀸𑀬𑀪𑀽𑀢𑀁 𑀲𑀢𑁆𑀣𑀁 𑀅𑀢𑁆𑀣𑀲𑀢𑁆𑀣𑀁, 𑀧𑀬𑀸𑀦𑀓𑁆𑀬𑀸𑀤𑀺𑀧𑀡𑀻𑀢𑀁 [𑀩𑀳𑀲𑁆𑀯𑀢𑀺𑀘𑀸𑀩𑁆𑀩𑀻𑀓𑁆𑀬𑀸𑀤𑀺𑀧𑁆𑀭𑀡𑀻𑀢𑀁 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁬.𑁫)], 𑀢𑀲𑁆𑀫𑀺𑀁 𑀤𑀡𑁆𑀟𑀦𑀻𑀢𑀺𑀲𑀤𑁆𑀤𑁄 𑀧𑀯𑀢𑁆𑀢𑁄. 𑀲𑀸𑀫𑀸𑀤𑀻𑀦𑀁 𑀘𑀢𑀼𑀢𑁆𑀣𑁄𑀧𑀸𑀬𑁄 𑀯𑀥𑀩𑀦𑁆𑀥𑀦𑀸𑀤𑀺𑀮𑀓𑁆𑀔𑀡𑁄 𑀤𑀡𑁆𑀟𑁄, 𑀢𑀲𑁆𑀲 𑀦𑀻𑀢𑀺 𑀧𑀡𑀬𑀦𑀁 𑀤𑀡𑁆𑀟𑀦𑀻𑀢𑀺, 𑀧𑀸𑀬𑁂𑀦 𑀦𑀻𑀢𑀺𑀲𑁆𑀲 𑀤𑀡𑁆𑀟𑁂𑀦 𑀩𑁆𑀬𑀧𑁆𑀧𑀤𑁂𑀲𑁄, 𑀯𑀥𑀤𑁄𑀲𑀩𑀸𑀳𑀼𑀮𑁆𑀬𑁂𑀦 𑀧𑀸𑀬𑀲𑁄 𑀤𑀡𑁆𑀟𑀲𑁆𑀲 𑀧𑀡𑀬𑀦𑀢𑁄, 𑀤𑀡𑁆𑀟𑀦𑀻𑀢𑁆𑀬𑀢𑁆𑀣𑀢𑁆𑀢𑀸 𑀲𑀢𑁆𑀣𑀜𑁆𑀘 𑀤𑀡𑁆𑀟𑀦𑀻𑀢𑀺.

𑀤𑁆𑀯𑀬𑀁 𑀓𑀣𑀸𑀬𑀁. 𑀯𑀼𑀢𑁆𑀢𑁄 𑀅𑀦𑀼𑀯𑀢𑁆𑀢𑀦𑀻𑀬𑁄 𑀅𑀦𑁆𑀢𑁄 𑀧𑀭𑀺𑀲𑀫𑀢𑁆𑀢𑀺 𑀬𑀲𑁆𑀲 𑀅𑀢𑁆𑀢𑀦𑁄 𑀓𑀸𑀭𑀺𑀬𑀪𑀸𑀕𑀲𑁆𑀲 𑀧𑀸𑀧𑀦𑀢𑁄𑀢𑀺 𑀯𑀼𑀢𑁆𑀢𑀦𑁆𑀢𑁄. 𑀧𑀯𑀢𑁆𑀢𑀦𑁆𑀢𑁂 𑀓𑀸𑀭𑀺𑀬𑀸 𑀬𑀲𑁆𑀲𑀁 𑀧𑀯𑀢𑁆𑀢𑀺,𑀢𑀺. 𑀘𑀓𑀸𑀭𑁂𑀦 𑀯𑀼𑀢𑁆𑀢𑀉𑀤𑀦𑁆𑀢𑀸𑀤𑀬𑁄 𑀕𑀳𑀺𑀢𑀸. 𑀓𑀸𑀭𑀺𑀬𑀲𑁆𑀲 𑀯𑀼𑀢𑁆𑀢𑀺 𑀅𑀢𑁆𑀭𑀢𑁆𑀣𑀻𑀢𑀺 𑀅𑀲𑁆𑀲𑀢𑁆𑀣𑁆𑀬𑀢𑁆𑀣𑁂 ¶ 𑀡𑁄. 𑀉𑀕𑁆𑀕𑀢𑁄 𑀅𑀦𑁆𑀢𑁄 𑀧𑀭𑀺𑀲𑀫𑀢𑁆𑀢𑀺 𑀬𑀲𑁆𑀲 𑀉𑀤𑀦𑁆𑀢𑁄.

𑁧𑁧𑁪. 𑀅𑀥𑀺𑀯𑀘𑀦𑀦𑁆𑀢𑀁 𑀦𑀸𑀫𑁂. 𑀲𑀜𑁆𑀚𑀸𑀦𑀦𑁆𑀢𑀺 𑀏𑀢𑀸𑀬𑀸𑀢𑀺 𑀲𑀜𑁆𑀜𑀸, 𑀅. 𑀆𑀔𑁆𑀬𑀸𑀬𑀢𑁂 𑀏𑀢𑀸𑀬𑀸𑀢𑀺 𑀆𑀔𑁆𑀬𑀸. 𑀅𑀳𑁆𑀯𑀬𑀢𑁂 𑀏𑀢𑀸𑀬𑀸𑀢𑀺 𑀅𑀯𑁆𑀳𑀸, 𑀳𑀼 𑀲𑀤𑁆𑀤𑁂, 𑀯𑁆𑀳𑁂 𑀅𑀯𑁆𑀳𑀸𑀦𑁂𑀢𑀺 𑀯𑀸 𑀥𑀸𑀢𑀼, 𑀅. 𑀲𑀫𑁆𑀫𑀸 𑀆𑀚𑀸𑀦𑀸𑀢𑀺, 𑀲𑀫𑀁 𑀯𑀸 𑀚𑀸𑀦𑀸𑀢𑀺 𑀏𑀢𑀸𑀬𑀸𑀢𑀺 𑀲𑀫𑀜𑁆𑀜𑀸. 𑀅𑀪𑀺𑀥𑀻𑀬𑀢𑁂 𑀬𑁂𑀦, 𑀬𑀼. 𑀦𑀫𑁆𑀬𑀢𑁂 𑀅𑀩𑁆𑀪𑀲𑁆𑀲𑀢𑁂 𑀅𑀲𑁆𑀫𑀺𑀦𑁆𑀢𑀺 𑀦𑀸𑀫𑀁, 𑀦𑀫𑀢𑀺 𑀦𑀸𑀫𑀬𑀢𑀻𑀢𑀺 𑀯𑀸 𑀦𑀸𑀫𑀁. 𑀅𑀳𑁆𑀯𑀸𑀬𑀢𑁂𑀢𑀺 𑀅𑀯𑁆𑀳𑀬𑁄, 𑀓𑀫𑁆𑀫𑁂 𑀬𑁄. 𑀦𑀸𑀫𑀫𑁂𑀯 𑀦𑀸𑀫𑀥𑁂𑀬𑁆𑀬𑀁. 𑀦𑀸𑀫𑀭𑀽𑀧𑁂𑀳𑀺 [𑀦𑀸𑀫𑀲𑀤𑁆𑀤𑁂𑀳𑀺 (𑀓.) 𑀪𑀸𑀕𑀭𑀽𑀧𑀦𑀸𑀫𑁂𑀳𑀺 𑀥𑁂𑀬𑁆𑀬𑁄 (𑀧𑀸𑀡𑀺𑀦𑀺 𑁫.𑁪.𑁩𑁬 𑀯𑀸)] 𑀲𑀓𑀢𑁆𑀣𑁂 𑀥𑁂𑀬𑁆𑀬𑁄 𑀬𑀤𑀸𑀤𑀺𑀦𑀸, 𑀢𑀺𑀝𑁆𑀞𑀢𑀺 𑀯𑀸 𑀏𑀢𑁆𑀣 𑀅𑀢𑁆𑀣𑁄𑀢𑀺 𑀥𑁂𑀬𑁆𑀬𑀁, 𑀥𑀭𑀻𑀬𑀢𑁂 𑀉𑀘𑁆𑀘𑀸𑀭𑀺𑀬𑀢𑁂𑀢𑀺 𑀯𑀸 𑀥𑁂𑀬𑁆𑀬𑀁, 𑀦𑀸𑀫𑀫𑁂𑀯 𑀥𑁂𑀬𑁆𑀬𑀁 𑀦𑀸𑀫𑀥𑁂𑀬𑁆𑀬𑀁. 𑀅𑀥𑀻𑀦𑀁 𑀯𑀘𑀦𑀁 𑀅𑀥𑀺𑀯𑀘𑀦𑀁, 𑀓𑁂𑀦 𑀅𑀥𑀻𑀦𑀁? 𑀅𑀢𑁆𑀣𑁂𑀦. 𑀧𑀼𑀝𑁆𑀞𑀲𑁆𑀲 𑀧𑀝𑀺𑀯𑀘𑀦𑀁 𑀧𑀝𑀺𑀯𑀸𑀓𑁆𑀬𑀁. 𑀧𑀝𑀺𑀕𑀢𑀁 𑀧𑀘𑁆𑀙𑀸𑀕𑀢𑀁 𑀯𑀸𑀓𑁆𑀬𑀁 𑀧𑀝𑀺𑀯𑀸𑀓𑁆𑀬𑀁. 𑀉𑀢𑁆𑀢𑀭𑀻𑀬𑀢𑁂 𑀅𑀢𑀺𑀓𑁆𑀓𑀫𑁆𑀬𑀢𑁂 𑀬𑁂𑀦𑀸𑀢𑀺 𑀉𑀢𑁆𑀢𑀭𑀁.

𑁧𑁧𑁫. 𑀢𑀺𑀓𑀁 𑀧𑀼𑀘𑁆𑀙𑀸𑀬𑀁. 𑀧𑀼𑀘𑁆𑀙𑀺𑀢𑀩𑁆𑀩𑁄𑀢𑀺 𑀧𑀜𑁆𑀳𑁄, 𑀜𑀸𑀢𑀼𑀫𑀺𑀘𑁆𑀙𑀺𑀢𑁄 𑀳𑀺 𑀅𑀢𑁆𑀣𑁄 𑀧𑀜𑁆𑀳𑁄 𑀦𑀸𑀫. 𑀧𑀼𑀘𑁆𑀙 𑀧𑀼𑀘𑁆𑀙𑀦𑁂, 𑀘𑀲𑁆𑀲 𑀜𑁄, 𑀙𑀲𑁆𑀲 𑀳𑁄, 𑀉𑀲𑁆𑀲 𑀅, 𑀧𑀜𑁆𑀳 𑀧𑀼𑀘𑁆𑀙𑀦𑁂𑀢𑀺𑀧𑀺 𑀥𑀸𑀢𑀼. 𑀬𑀼𑀚 𑀬𑁄𑀕𑁂, 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑁄 ¶ 𑀧𑀼𑀘𑁆𑀙𑀺𑀢𑀩𑁆𑀩𑁄𑀢𑀺 𑀅𑀦𑀼𑀬𑁄𑀕𑁄. 𑀧𑀼𑀘𑁆𑀙𑀦𑀁, 𑀧𑀼𑀘𑁆𑀙𑀺𑀢𑀩𑁆𑀩𑀸𑀢𑀺 𑀯𑀸 𑀧𑀼𑀘𑁆𑀙𑀸. 𑀏𑀢𑁂𑀦𑁂𑀯 𑀦𑀬𑁂𑀦 𑀤𑁆𑀯𑀻𑀲𑀼𑀧𑀺 𑀪𑀸𑀯𑀲𑀸𑀥𑀦𑀫𑁆𑀧𑀺 𑀓𑀢𑁆𑀢𑀩𑁆𑀩𑀫𑁂𑀯.

𑀘𑀢𑀼𑀓𑁆𑀓𑀁 𑀦𑀺𑀤𑀲𑁆𑀲𑀦𑁂. 𑀧𑀓𑀢𑁂𑀦 𑀲𑀤𑀺𑀲𑀁 𑀦𑀺𑀤𑀲𑁆𑀲𑁂𑀢𑀺 𑀏𑀢𑁂𑀦𑀸𑀢𑀺 𑀦𑀺𑀤𑀲𑁆𑀲𑀦𑀁, 𑀧𑀓𑀢𑀲𑁆𑀲𑁄𑀧𑀧𑀸𑀤𑀦𑀁 𑀯𑀸𑀓𑁆𑀬𑀁. 𑀉𑀧𑁄𑀕𑁆𑀖𑀜𑁆𑀜𑀢𑁂 [𑀉𑀧𑁄𑀳𑀜𑁆𑀜𑀢𑁂 (?)] 𑀧𑀝𑀺𑀧𑀸𑀤𑀻𑀬𑀢𑁂 𑀅𑀦𑁂𑀦𑀸𑀢𑀺 𑀉𑀧𑁄𑀕𑁆𑀖𑀸𑀢𑁄. 𑀉𑀧 𑀉𑀧𑀼𑀩𑁆𑀩𑁄 𑀳𑀦𑀥𑀸𑀢𑀼 𑀧𑀝𑀺𑀧𑀸𑀤𑀦𑀢𑁆𑀣𑁄. 𑀤𑀲𑁆𑀲𑀻𑀬𑀢𑁂 𑀅𑀦𑁂𑀦𑀸𑀢𑀺 𑀤𑀺𑀝𑁆𑀞𑀦𑁆𑀢𑁄, 𑀅𑀦𑁆𑀢𑁄, 𑀤𑀺𑀝𑁆𑀞𑁄 𑀯𑀸 𑀧𑀓𑀢𑀲𑁆𑀲 𑀅𑀦𑁆𑀢𑁄 𑀧𑀭𑀺𑀲𑀫𑀢𑁆𑀢𑀺 𑀬𑁂𑀦𑀸𑀢𑀺 𑀤𑀺𑀝𑁆𑀞𑀦𑁆𑀢𑁄. 𑀲𑀩𑁆𑀩𑀢𑁆𑀭𑀸𑀧𑀺 𑀯𑀸 𑀓𑀫𑁆𑀫𑀲𑀸𑀥𑀦𑀫𑁆𑀧𑀺 𑀓𑀢𑁆𑀢𑀩𑁆𑀩𑀁. 𑀉𑀤𑀸𑀳𑀭𑀻𑀬𑀢𑀺 𑀧𑀓𑀢𑀲𑁆𑀲𑁄𑀧𑀧𑀸𑀤𑀦𑀸𑀬𑀸𑀢𑀺 𑀉𑀤𑀸𑀳𑀭𑀡𑀁.

𑁧𑁧𑁬. 𑀘𑀢𑀼𑀓𑁆𑀓𑀁 𑀲𑀗𑁆𑀔𑁂𑀧𑁂. 𑀲𑀫𑀸𑀢𑀺 𑀢𑀼𑀮𑁆𑀬𑀢𑁆𑀣𑀸. 𑀲𑀗𑁆𑀔𑀺𑀧𑀻𑀬𑀢𑁂 𑀏𑀓𑀤𑁂𑀲𑀢𑁄 𑀓𑀣𑀻𑀬𑀢𑀻𑀢𑀺 𑀲𑀗𑁆𑀔𑁂𑀧𑁄, 𑀔𑀺𑀧 𑀧𑁂𑀭𑀡𑁂. 𑀲𑀁𑀳𑀭𑀻𑀬𑀢𑁂 𑀲𑀗𑁆𑀔𑁂𑀧𑁂𑀦 𑀧𑀘𑁆𑀘𑀸𑀔𑁆𑀬𑀸𑀬𑀢𑁂 𑀏𑀢𑁂𑀦𑀸𑀢𑀺 𑀲𑀁𑀳𑀸𑀭𑁄. 𑀲𑀫𑀲𑁆𑀬𑀢𑁂 𑀲𑀗𑁆𑀔𑀺𑀧𑀻𑀬𑀢𑁂𑀢𑀺 𑀲𑀫𑀸𑀲𑁄, 𑀅𑀲𑀼 𑀔𑁂𑀧𑀦𑁂. 𑀲𑀗𑁆𑀔𑁂𑀧𑁂𑀦 𑀕𑀬𑁆𑀳𑀢𑁂 𑀅𑀦𑁂𑀦𑀸𑀢𑀺 𑀲𑀗𑁆𑀕𑀳𑁄.

‘‘𑀢𑁆𑀯𑀁 𑀲𑀢𑀁 𑀲𑀼𑀯𑀡𑁆𑀡𑀁 𑀥𑀸𑀭𑀬𑀲𑀺’’𑀇𑀢𑁆𑀬𑀸𑀤𑀺𑀓𑀁 𑀢𑀼𑀘𑁆𑀙𑀪𑀸𑀲𑀦𑀁 𑀅𑀪𑀽𑀢𑀪𑀸𑀲𑀦𑀁 𑀅𑀩𑁆𑀪𑀓𑁆𑀔𑀸𑀦𑀁 𑀦𑀸𑀫. 𑀅𑀲𑀘𑁆𑀘𑁂𑀦 𑀅𑀓𑁆𑀔𑀸𑀦𑀁 𑀪𑀸𑀲𑀦𑀁 𑀅𑀩𑁆𑀪𑀓𑁆𑀔𑀸𑀦𑀁.

𑁧𑁧𑁭. 𑀤𑁆𑀯𑀬𑀁 ¶ 𑀯𑀺𑀯𑀸𑀤𑀸𑀬 𑀯𑀺𑀪𑀸𑀕𑀯𑀺𑀲𑀬𑁂 [𑀇𑀡𑀯𑀸𑀤𑀸𑀤𑀺𑀯𑀺𑀲𑀬𑁂 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁬.𑁯)]. 𑀯𑀺𑀭𑀼𑀤𑁆𑀥𑀁 𑀓𑀢𑁆𑀯𑀸 𑀅𑀯𑀳𑀭𑀢𑀺 𑀯𑀤𑀢𑀺 𑀬𑀦𑁆𑀢𑀺 𑀯𑁄𑀳𑀸𑀭𑁄. 𑀯𑀺𑀭𑀼𑀤𑁆𑀥𑀁 𑀓𑀢𑁆𑀯𑀸 𑀯𑀤𑀢𑀺 𑀬𑀦𑁆𑀢𑀺 𑀯𑀺𑀯𑀸𑀤𑁄. 𑀲𑀩𑁆𑀩𑀢𑁆𑀭 𑀪𑀸𑀯𑀲𑀸𑀥𑀦𑀁 𑀯𑀸 𑀬𑀼𑀚𑁆𑀚𑀢𑀺. ‘‘𑀫𑀼𑀲𑀸𑀯𑀸𑀤𑀁 𑀯𑀤𑀦𑁆𑀢𑁄 𑀖𑁄𑀭𑀸𑀦𑀺 𑀢𑁆𑀯𑀁 𑀦𑀭𑀓𑀸𑀦𑀺 𑀬𑀲𑁆𑀲𑀲𑀻’’𑀢𑁆𑀬𑀸𑀤𑀺𑀲𑀭𑀽𑀧𑀁 𑀲𑀧𑀦𑀁. 𑀲𑀧 𑀅𑀓𑁆𑀓𑁄𑀲𑁂, 𑀣𑁄, 𑀲𑀧𑀣𑁄.

𑀢𑀺𑀓𑀁 𑀔𑁆𑀬𑀸𑀢𑁂. 𑀬𑀚𑀢𑀺 𑀏𑀢𑁂𑀦𑀸𑀣𑀺 𑀬𑀲𑁄, 𑀚𑀲𑁆𑀲 𑀲𑁄, 𑀲𑀩𑁆𑀩𑀢𑁆𑀣 𑀬𑀸𑀢𑀻𑀢𑀺 𑀯𑀸 𑀬𑀲𑁄, 𑀲𑁄, 𑀬𑀲𑀢𑀺 𑀧𑀬𑀲𑀢𑀻𑀢𑀺 𑀯𑀸 𑀬𑀲𑁄. 𑀲𑀺𑀮𑁄𑀓𑀢𑀺 𑀧𑀢𑁆𑀣𑀭𑀢𑀻𑀢𑀺 𑀲𑀺𑀮𑁄𑀓𑁄, 𑀲𑀺𑀮𑁄𑀓 𑀲𑀗𑁆𑀖𑀸𑀢𑁂. 𑀓𑀺𑀢𑁆𑀢 𑀲𑀤𑁆𑀤𑀦𑁂, 𑀓𑀺𑀢𑁆𑀢𑀻𑀬𑀢𑁂 𑀓𑀣𑀻𑀬𑀢𑁂𑀢𑀺 𑀓𑀺𑀢𑁆𑀢𑀺, 𑀇. 𑀲𑀫𑀜𑁆𑀜𑀸 𑀘 𑀔𑁆𑀬𑀸𑀢𑁂, 𑀲𑀁 𑀆𑀧𑀼𑀩𑁆𑀩𑁄 𑀚𑀸𑀦𑀸𑀢𑀺 𑀔𑁆𑀬𑀸𑀢𑁂. 𑀢𑀣𑀸 𑀳𑀺 ‘‘𑀜𑀸𑀢𑁄, 𑀅𑀪𑀺𑀜𑁆𑀜𑀸𑀢𑁄, 𑀲𑀗𑁆𑀔𑁆𑀬𑀸𑀢𑁄, 𑀯𑀺𑀲𑁆𑀲𑀼𑀢𑁄, 𑀲𑀫𑀜𑁆𑀜𑀸𑀢𑁄’’𑀢𑀺 𑀭𑀢𑀦𑀓𑁄𑀲𑁂 𑀯𑀼𑀢𑁆𑀢𑀁. 𑀉𑀘𑁆𑀘𑀥𑀦𑀺𑀦𑀸 𑀲𑀤𑁆𑀤𑀦𑀁 𑀖𑁄𑀲𑀦𑀸 𑀦𑀸𑀫, 𑀖𑀼𑀲 𑀲𑀤𑁆𑀤𑁂, 𑀖𑀼𑀲𑀦𑀁 𑀲𑀤𑁆𑀤𑀦𑀁 𑀖𑁄𑀲𑀦𑀸.

𑁧𑁧𑁮-𑁧𑁧𑁯. 𑀤𑁆𑀯𑀬𑀁 𑀧𑀝𑀺𑀲𑀤𑁆𑀤𑁂. 𑀖𑀼𑀲𑀦𑀁 𑀖𑁄𑀲𑁄, 𑀢𑀁 𑀧𑀝𑀺𑀕𑀢𑁄, 𑀤𑀼𑀢𑀺𑀬𑀸𑀲𑀫𑀸𑀲𑁄. 𑀏𑀯𑀁 𑀭𑀯𑀁 𑀧𑀝𑀺𑀕𑀢𑁄 𑀧𑀝𑀺𑀭𑀯𑁄. 𑀅𑀣 ¶ 𑀯𑀸 𑀖𑁄𑀲𑀲𑁆𑀲 𑀧𑀢𑀺𑀭𑀽𑀧𑁄 𑀧𑀝𑀺𑀖𑁄𑀲𑁄. 𑀭𑀯𑀲𑁆𑀲 𑀧𑀢𑀺𑀭𑀽𑀧𑁄 𑀧𑀝𑀺𑀭𑀯𑁄. 𑀧𑀝𑀺𑀲𑀼𑀢𑀺, 𑀧𑀝𑀺𑀤𑁆𑀥𑀦𑀻𑀢𑀺𑀧𑀺 𑀧𑀝𑀺𑀲𑀤𑁆𑀤𑀲𑁆𑀲 𑀦𑀸𑀫𑀸𑀦𑀺, 𑀯𑀘𑀻𑀫𑀼𑀔𑀁 𑀯𑀘𑀦𑁄𑀧𑀓𑁆𑀓𑀫𑁄 𑀉𑀧𑀜𑁆𑀜𑀸𑀲𑁄 𑀦𑀸𑀫, 𑀉𑀧𑀦𑀺𑀧𑀼𑀩𑁆𑀩𑁄 𑀆𑀲 𑀉𑀧𑀯𑁂𑀲𑀦𑁂, 𑀉𑀧 𑀧𑀞𑀫𑀁 𑀧𑀼𑀭𑀺𑀫𑀯𑀘𑀦𑀲𑁆𑀲 𑀲𑀫𑀻𑀧𑀁 𑀯𑀸 𑀦𑁆𑀬𑀸𑀲𑁄 𑀞𑀧𑀦𑀁 𑀉𑀧𑀜𑁆𑀜𑀸𑀲𑁄, 𑀦𑁆𑀬𑀲𑁆𑀲 𑀜𑁄.

𑀲𑀢𑁆𑀢𑀓𑀁 𑀣𑀼𑀢𑀺𑀬𑀁. 𑀓𑀢𑁆𑀣 𑀲𑀺𑀮𑀸𑀖𑀸𑀬𑀁, 𑀬𑀼, 𑀓𑀣𑀦𑀁 𑀯𑀸𑀅𑀲𑀭𑀽𑀧𑀤𑁆𑀯𑀺𑀪𑀸𑀯𑀯𑀲𑁂𑀦 𑀓𑀢𑁆𑀣𑀦𑀸. 𑀲𑀺𑀮𑀸𑀖 𑀓𑀢𑁆𑀣𑀦𑁂, 𑀲𑀺𑀮𑀸𑀖𑀸. 𑀲𑀻𑀮𑀲𑁆𑀲 𑀯𑀸 𑀲𑀪𑀸𑀕𑀕𑀼𑀡𑀲𑁆𑀲 𑀆𑀳𑀦𑀦𑀁 𑀲𑀻𑀮𑀸𑀖𑀸, 𑀲𑀸 𑀏𑀯 𑀭𑀲𑁆𑀲𑀁 𑀓𑀢𑁆𑀯𑀸 𑀲𑀺𑀮𑀸𑀖𑀸. 𑀯𑀡𑁆𑀡 𑀧𑀲𑀁𑀲𑀸𑀬𑀁, 𑀯𑀡𑁆𑀡𑀻𑀬𑀢𑁂𑀢𑀺 𑀯𑀡𑁆𑀡𑀦𑀸. 𑀦𑀼 𑀣𑀼𑀢𑀺𑀬𑀁,𑀢𑀺, 𑀦𑀼𑀢𑀺. 𑀣𑀼 𑀅𑀪𑀺𑀢𑁆𑀣𑀯𑁂,𑀢𑀺, 𑀣𑀼𑀢𑀺. 𑀣𑁄𑀫 𑀲𑀺𑀮𑀸𑀖𑀸𑀬𑀁, 𑀣𑁄𑀫𑀦𑀁. 𑀧𑀧𑀼𑀩𑁆𑀩𑁄 𑀲𑀁𑀲 𑀧𑀲𑀁𑀲𑀦𑁂, 𑀅.

𑀲𑀺𑀔𑀡𑁆𑀟𑀻𑀦𑀁 𑀫𑀬𑀽𑀭𑀸𑀦𑀁 𑀦𑀸𑀤𑁄 𑀦𑀤𑀭𑀯𑁄 𑀓𑁂𑀓𑀸 𑀦𑀸𑀫, 𑀓𑀸 𑀲𑀤𑁆𑀤𑁂, 𑀓𑁂𑀇𑀢𑀺 𑀓𑀸𑀬𑀢𑀻𑀢𑀺 𑀓𑁂𑀓𑀸, 𑀓𑀫𑁆𑀫𑀦𑀺 𑀅, 𑀅𑀣 𑀯𑀸 𑀓𑀸𑀬𑀢𑀺, 𑀓𑀸𑀬𑀦𑀁 𑀯𑀸 𑀓𑀸, 𑀓𑁂 𑀫𑀬𑀽𑀭𑁂 𑀧𑀯𑀢𑁆𑀢𑀸 𑀓𑀸 𑀓𑁂𑀓𑀸, 𑀅𑀮𑀼𑀢𑁆𑀢𑀲𑀫𑀸𑀲𑁄. 𑀕𑀚𑀸𑀦𑀁 𑀦𑀸𑀤𑁄 𑀓𑁄𑀜𑁆𑀘𑀦𑀸𑀤𑁄 𑀦𑀸𑀫, 𑀓𑁄𑀜𑁆𑀘𑀲𑀓𑀼𑀡𑀦𑀸𑀤𑀲𑀤𑀺𑀲𑁄 𑀦𑀸𑀤𑁄 𑀓𑁄𑀜𑁆𑀘𑀦𑀸𑀤𑁄. 𑀳𑀬𑀸𑀦𑀁 𑀅𑀲𑁆𑀲𑀸𑀦𑀁 𑀥𑀦𑀺 𑀲𑀤𑁆𑀤𑁄 𑀳𑁂𑀲𑀸 𑀦𑀸𑀫, 𑀳𑁂𑀲 𑀅𑀩𑁆𑀭𑀢𑁆𑀢𑀲𑀤𑁆𑀤𑁂, 𑀳𑁂𑀲𑀦𑀁 𑀳𑁂𑀲𑀸, 𑀳𑁂 𑀇𑀢𑀺 𑀧𑀯𑀢𑁆𑀢𑀢𑀻𑀢𑀺 𑀯𑀸 𑀳𑁂𑀲𑀸.

𑁧𑁨𑁦-𑁧𑁨𑁧. 𑀤𑁆𑀯𑀬𑀁 𑀧𑀭𑀺𑀬𑀸𑀬𑁂. 𑀧𑀭𑀺𑀩𑁆𑀬𑀢𑁆𑀢𑀫𑀢𑁆𑀣𑀁 𑀅𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀩𑀼𑀚𑁆𑀛𑀦𑁆𑀢𑀺 𑀏𑀢𑁂𑀦𑀸𑀢𑀺 𑀧𑀭𑀺𑀬𑀸𑀬𑁄. 𑀏𑀓𑁄 𑀅𑀢𑁆𑀣𑁄 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀢𑀺 ¶ 𑀬𑁂𑀦𑀸𑀢𑀺 𑀯𑁂𑀯𑀘𑀦𑀁. 𑀤𑁆𑀯𑀬𑀁 𑀲𑀸𑀓𑀘𑁆𑀙𑀸𑀬𑀁. 𑀲𑀳, 𑀲𑀫𑁆𑀫𑀸 𑀯𑀸 𑀅𑀯𑀺𑀭𑁄𑀥𑁂𑀦 𑀓𑀣𑀸 𑀲𑀸𑀓𑀘𑁆𑀙𑀸, 𑀲𑀁𑀓𑀣𑀸 𑀘. 𑀢𑁄, 𑀣𑀲𑁆𑀲 𑀘𑁄, 𑀢𑀲𑁆𑀲 𑀙𑁄.

𑀲𑀸𑀤𑁆𑀥𑀧𑀚𑁆𑀚𑁂𑀦 𑀕𑀭𑀳𑀲𑁆𑀲 𑀦𑀸𑀫𑀸𑀦𑀺. 𑀤𑁄𑀲𑀓𑁆𑀔𑀸𑀦𑁂𑀦 𑀯𑀤𑀦𑀁 𑀉𑀧𑀯𑀸𑀤𑁄. 𑀓𑀼𑀲 𑀅𑀯𑁆𑀳𑀸𑀦𑁂 𑀪𑁂𑀤𑀦𑁂 𑀘, 𑀓𑁆𑀯𑀘𑀺 ‘‘𑀅𑀧𑀓𑁆𑀓𑁄𑀲𑁄’’𑀢𑀺 𑀧𑀸𑀞𑁄, 𑀡𑁄. 𑀯𑀡𑁆𑀡𑁄 𑀣𑀼𑀢𑀺, 𑀢𑀲𑁆𑀲 𑀅𑀯𑀤𑀦𑀁 𑀅𑀯𑀡𑁆𑀡𑀯𑀸𑀤𑁄. 𑀳𑀻𑀴𑀦𑁂𑀦 𑀯𑀤𑀦𑀁 𑀅𑀦𑀼𑀯𑀸𑀤𑁄. 𑀚𑀦𑀸𑀦𑀁 𑀯𑀸𑀤𑁄 𑀕𑀭𑀳𑀡𑀁 𑀚𑀦𑀯𑀸𑀤𑁄. 𑀕𑀭𑀳𑀡𑁂𑀦 𑀯𑀸𑀤𑁄 𑀅𑀧𑀯𑀸𑀤𑁄. 𑀧𑀭𑀺𑀯𑀤𑀦𑀁 𑀧𑀭𑀺𑀯𑀸𑀤𑁄, 𑀭𑀲𑁆𑀲𑀲𑁆𑀲 𑀤𑀻𑀖𑀢𑀸. 𑀏𑀢𑁂 𑀉𑀧𑀯𑀸𑀤𑀸𑀤𑀬𑁄 𑀢𑀼𑀮𑁆𑀬𑀢𑁆𑀣𑀸 𑀲𑀫𑀸𑀦𑀢𑁆𑀣𑀸. 𑀯𑀺𑀲𑀫𑀯𑀼𑀢𑁆𑀢𑀧𑁆𑀧𑀪𑁂𑀤𑁂𑀲𑀼 𑀯𑀢𑁆𑀢𑀫𑀺𑀤𑀁. 𑀔𑀺𑀧 𑀧𑁂𑀭𑀡𑁂, 𑀔𑀺𑀧𑀦𑀁 𑀩𑀳𑀺𑀓𑀭𑀡𑀁 𑀔𑁂𑀧𑁄. 𑀦𑀺𑀤𑀺 𑀓𑀼𑀘𑁆𑀙𑀸𑀬𑀁, 𑀅, 𑀦𑀺𑀦𑁆𑀤𑀸. 𑀬𑀣𑀸 𑀉𑀧𑀯𑀸𑀤𑀸𑀤𑀬𑁄 𑀕𑀭𑀳𑀢𑁆𑀣𑀸, 𑀓𑀼𑀘𑁆𑀙𑀸𑀤𑀬𑁄𑀧𑀺 𑀢𑀣𑀸𑀢𑀺 𑀢𑀣𑀸𑀢𑁆𑀣𑁄. 𑀓𑀼𑀘𑁆𑀙 𑀅𑀯𑀓𑁆𑀔𑁂𑀧𑀦𑁂, 𑀘𑀼𑀭𑀸𑀤𑀺, 𑀓𑀼𑀲 𑀅𑀓𑁆𑀓𑁄𑀲𑁂𑀢𑀺𑀫𑀲𑁆𑀲 𑀯𑀸 𑀧𑀩𑁆𑀩𑀚𑁆𑀚𑀸𑀤𑀺𑀢𑁆𑀢𑀸 ‘‘𑀓𑀼𑀘𑁆𑀙𑀸’’𑀢𑀺 𑀭𑀽𑀧𑀁 𑀦𑀺𑀧𑁆𑀨𑀚𑁆𑀚𑀢𑀺. 𑀕𑀼𑀧, 𑀕𑁄𑀧 𑀓𑀼𑀘𑁆𑀙𑀦𑁂𑀲𑀼, ‘‘𑀢𑀺𑀚𑀕𑀼𑀧𑀓𑀺𑀢𑀫𑀸𑀦𑁂𑀳𑀺 𑀔𑀙𑀲𑀸 𑀯𑀸’’𑀢𑀺 𑀙𑁄. 𑀕𑀭𑀳 𑀓𑀼𑀘𑁆𑀙𑀦𑁂. 𑀢𑀢𑁆𑀣 𑀓𑁂𑀘𑀺 ‘‘𑀉𑀧𑀯𑀸𑀤𑀸𑀤𑀬𑁄 𑀅𑀩𑁆𑀪𑀓𑁆𑀔𑀸𑀦𑀢𑁆𑀣𑀸, 𑀔𑁂𑀧𑀸𑀤𑀬𑁄 𑀦𑀺𑀦𑁆𑀤𑀢𑁆𑀣𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀫𑀭𑀓𑁄𑀲𑁂𑀦 𑀯𑀺𑀭𑀼𑀚𑁆𑀛𑀦𑀢𑁄 𑀅𑀩𑁆𑀪𑀓𑁆𑀔𑀸𑀦𑀢𑁆𑀣𑀲𑁆𑀲 𑀘 𑀯𑀼𑀢𑁆𑀢𑀢𑁆𑀢𑀸 𑀦 𑀕𑀳𑁂𑀢𑀩𑁆𑀩𑀁. 𑀏𑀢𑁂 𑀉𑀧𑀯𑀸𑀤𑀸𑀤𑀬𑁄 𑀲𑀢𑁆𑀢 𑀅𑀩𑁆𑀪𑀓𑁆𑀔𑀸𑀦𑁂𑀧𑀺 𑀯𑀢𑁆𑀢𑀦𑁆𑀢𑀺.

𑀯𑀺𑀯𑀸𑀤𑀓𑀸𑀫𑀲𑁆𑀲 𑀤𑀼𑀩𑁆𑀩𑀸𑀤𑁄 𑀉𑀧𑀸𑀭𑀫𑁆𑀪𑁄, 𑀲𑁄 𑀘 𑀈𑀤𑀺𑀲𑁂 𑀲𑀩𑁆𑀩𑀮𑁄𑀓𑀘𑀽𑀴𑀸𑀫𑀡𑀺𑀪𑀽𑀢𑁂 𑀲𑀓𑁆𑀬𑀓𑀼𑀮𑁂 𑀲𑀫𑁆𑀪𑀽𑀢𑀲𑁆𑀲 𑀪𑀕𑀯𑀢𑁄 𑀓𑀺𑀫𑀺𑀤𑀁 𑀓𑀫𑁆𑀫𑀫𑀼𑀘𑀺𑀢𑀦𑁆𑀢𑀺 𑀕𑀼𑀡𑀸𑀯𑀺𑀓𑀭𑀡𑀧𑀼𑀩𑁆𑀩𑀓𑁄𑀧𑁆𑀬𑀢𑁆𑀣𑀺, 𑀩𑀦𑁆𑀥𑀓𑀻𑀲𑀼𑀢𑀲𑁆𑀲 𑀢𑀯𑁂𑀤𑀫𑀼𑀘𑀺𑀢𑀫𑁂𑀯𑀸𑀢𑀺 𑀦𑀺𑀦𑁆𑀤𑀸𑀧𑀼𑀩𑁆𑀩𑀓𑁄𑀧𑀺 𑀉𑀧𑀸𑀭𑀫𑁆𑀪𑁄. 𑀢𑀢𑁆𑀭 𑀬𑁄 𑀦𑀺𑀦𑁆𑀤𑀸𑀧𑀼𑀩𑁆𑀩𑁄 𑀲𑀦𑀺𑀦𑁆𑀤𑁄 𑀉𑀧𑀸𑀭𑀫𑁆𑀪𑁄, 𑀲𑁄 𑀧𑀭𑀺𑀪𑀸𑀲𑀦𑀫𑀼𑀘𑁆𑀘𑀢𑁂. 𑀉𑀧𑀕𑀦𑁆𑀢𑁆𑀯𑀸 𑀧𑀭𑁂𑀲𑀁 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀪𑀦𑀁 𑀯𑀺𑀓𑁄𑀧𑀦𑀁 𑀉𑀧𑀸𑀭𑀫𑁆𑀪𑁄. 𑀤𑁄𑀲𑀓𑁆𑀔𑀸𑀦𑁂𑀦 𑀪𑀸𑀲𑀦𑀁 𑀧𑀭𑀺𑀪𑀸𑀲𑀦𑀁.

𑁧𑁨𑁨. 𑀅𑀦𑀭𑀺𑀬𑀸𑀦𑀁 ¶ 𑀮𑀸𑀫𑀓𑀸𑀦𑀁 𑀯𑁄𑀳𑀸𑀭𑀢𑁄, 𑀅𑀭𑀺𑀬𑀸𑀦𑀁 𑀉𑀢𑁆𑀢𑀫𑀚𑀦𑀸𑀦𑀁 𑀯𑀸 𑀅𑀯𑁄𑀳𑀸𑀭𑀢𑁄 𑀅𑀦𑀭𑀺𑀬𑀯𑁄𑀳𑀸𑀭𑁄𑀢𑀺 𑀲𑀗𑁆𑀔𑀸𑀢𑀸𑀦𑀁 𑀅𑀤𑀺𑀝𑁆𑀞𑁂 𑀤𑀺𑀝𑁆𑀞𑀯𑀸𑀤𑀸𑀤𑀻𑀦𑀁 𑀅𑀝𑁆𑀞𑀦𑁆𑀦𑀁 𑀯𑁄𑀳𑀸𑀭𑀸𑀦𑀁 𑀯𑀲𑁂𑀦 𑀬𑀸 𑀯𑀸𑀘𑀸 𑀮𑀸𑀫𑀓𑀚𑀦𑁂𑀳𑀺 𑀧𑀯𑀢𑁆𑀢𑀺𑀢𑀸 𑀯𑀼𑀢𑁆𑀢𑀸, 𑀯𑀻𑀢𑀺𑀓𑁆𑀓𑀫𑀤𑀻𑀧𑀦𑀻 𑀅𑀚𑁆𑀛𑀸𑀘𑀸𑀭𑀯𑀻𑀢𑀺𑀓𑁆𑀓𑀫𑀲𑀸𑀥𑀦𑀻 𑀲𑀸 𑀯𑀸𑀘𑀸 𑀅𑀭𑀺𑀬𑀚𑀦𑁂𑀳𑀺 𑀯𑀢𑁆𑀢𑀩𑁆𑀩𑀫𑀭𑀺𑀬𑀸𑀤𑀸𑀢𑀺𑀓𑁆𑀓𑀫𑀢𑁆𑀢𑀸 𑀅𑀪𑀺𑀯𑀸𑀓𑁆𑀬𑀁 𑀦𑀸𑀫 𑀲𑀺𑀬𑀸.

𑁧𑁨𑁩. 𑀫𑀼𑀳𑀼𑀁𑀪𑀸𑀲𑀸 𑀩𑀳𑀼𑀲𑁄 𑀅𑀪𑀺𑀥𑀸𑀦𑀁 𑀅𑀦𑀼𑀮𑀸𑀧𑁄 𑀦𑀸𑀫, 𑀅𑀦𑀼 𑀧𑀼𑀦𑀧𑁆𑀧𑀼𑀦𑀁 𑀮𑀸𑀧𑁄 𑀅𑀦𑀼𑀮𑀸𑀧𑁄. 𑀅𑀦𑀢𑁆𑀣𑀺𑀓𑀸 𑀕𑀺𑀭𑀸 𑀦𑀺𑀧𑁆𑀧𑀬𑁄𑀚𑀦𑀁 𑀉𑀫𑁆𑀫𑀢𑁆𑀢𑀸𑀤𑀺𑀯𑀘𑀦𑀁 𑀧𑀮𑀸𑀧𑁄, 𑀧𑀬𑁄𑀚𑀦𑀭𑀳𑀺𑀢𑁄 𑀮𑀸𑀧𑁄 𑀧𑀮𑀸𑀧𑁄, 𑀧𑀲𑀤𑁆𑀤𑁄 𑀯𑀺𑀬𑁄𑀕𑀢𑁆𑀣𑀚𑁄𑀢𑀓𑁄.

𑀕𑀫𑀦𑀸𑀕𑀫𑀦𑀸𑀤𑀺𑀲𑀫𑀬𑁂 𑀆𑀤𑀺𑀫𑁆𑀳𑀺 𑀪𑀸𑀲𑀦𑀁 𑀧𑀺𑀬𑀯𑀘𑀦𑀁 𑀆𑀮𑀸𑀧𑁄, 𑀆𑀤𑀺𑀫𑁆𑀳𑀺 𑀮𑀸𑀧𑁄 𑀆𑀮𑀸𑀧𑁄, 𑀆𑀧𑀼𑀘𑁆𑀙𑀸𑀲𑀤𑁆𑀤𑁄𑀧𑁆𑀬𑀢𑁆𑀭. 𑀤𑁄𑀲𑁂𑀦 𑀧𑀢𑀺𑀝𑁆𑀞𑀺𑀢𑁄 𑀧𑀭𑀺𑀤𑁆𑀤𑀯𑁄 𑀧𑀭𑀺𑀤𑁂𑀯𑀦𑀁 𑀅𑀦𑀼𑀲𑁄𑀘𑀦𑀁 𑀅𑀢𑀺𑀓𑁆𑀓𑀫𑀮𑀸𑀧𑁄 𑀯𑀺𑀮𑀸𑀧𑁄 𑀦𑀸𑀫, 𑀯𑀺𑀯𑀺𑀥𑁂𑀦, 𑀯𑀺𑀯𑀺𑀥𑀁 𑀯𑀸 𑀮𑀸𑀧𑁄 𑀯𑀺𑀮𑀸𑀧𑁄. 𑀧𑀭𑀺𑀤𑁂𑀯𑀦𑀁 𑀧𑀭𑀺𑀤𑁂𑀯𑁄, 𑀲𑁄 𑀏𑀯 𑀧𑀭𑀺𑀤𑁆𑀤𑀯𑁄, 𑀤𑁂𑀯 𑀧𑀭𑀺𑀤𑁂𑀯𑀦𑁂.

𑁧𑁨𑁪. 𑀯𑀺𑀭𑀼𑀤𑁆𑀥𑀁 ¶ 𑀯𑀘𑀦𑀁 𑀯𑀺𑀭𑁄𑀥𑁄𑀢𑁆𑀢𑀺. 𑀯𑀺𑀭𑀼𑀤𑁆𑀥𑀁 𑀧𑀮𑀸𑀧𑁄 𑀯𑀺𑀧𑁆𑀧𑀮𑀸𑀧𑁄. 𑀲𑀦𑁆𑀤𑀺𑀲𑁆𑀲𑀢𑁂𑀢𑀺 𑀲𑀦𑁆𑀤𑁂𑀲𑁄, 𑀲𑀦𑁆𑀤𑀺𑀲𑁆𑀲𑀫𑀸𑀦𑁄 𑀅𑀢𑁆𑀣𑁄, 𑀢𑀲𑁆𑀲𑁄𑀢𑁆𑀢𑀺. 𑀬𑀸𑀬 𑀲𑀦𑁆𑀤𑀺𑀝𑁆𑀞𑁄 𑀅𑀢𑁆𑀣𑁄 𑀅𑀪𑀺𑀥𑀻𑀬𑀢𑁂, 𑀲𑀸 𑀲𑀦𑁆𑀤𑁂𑀲𑁄𑀢𑁆𑀢𑀺 𑀯𑀸𑀘𑀺𑀓𑀫𑀼𑀘𑁆𑀘𑀢𑁂. 𑀯𑀘 𑀲𑀦𑁆𑀤𑁂𑀲𑁂, 𑀲𑀓𑀢𑁆𑀣𑁂 𑀡𑀺𑀓𑁄, 𑀲𑀦𑁆𑀤𑀺𑀝𑁆𑀞𑀢𑁆𑀣𑀸 𑀯𑀸𑀘𑀸 𑀏𑀯 𑀯𑀸𑀘𑀺𑀓𑀫𑀺𑀘𑁆𑀘𑀢𑁆𑀣𑁄.

𑀫𑀺𑀣𑀼 𑀅𑀜𑁆𑀜𑀫𑀜𑁆𑀜𑀁 𑀯𑀺𑀭𑁄𑀥𑀭𑀳𑀺𑀢𑀁 𑀯𑀘𑀦𑀁 ‘‘𑀲𑀫𑁆𑀪𑀸𑀲𑀦𑀁, 𑀲𑀮𑁆𑀮𑀸𑀧𑁄’’𑀢𑀺 𑀘 𑀯𑀼𑀘𑁆𑀘𑀢𑀺. 𑀬𑀣𑀸 𑀏𑀓𑁄 𑀩𑁆𑀭𑀽𑀢𑁂 ‘‘𑀅𑀚𑁆𑀚 𑀲𑁄𑀪𑀦𑀁 𑀦𑀓𑁆𑀔𑀢𑁆𑀢’’𑀦𑁆𑀢𑀺, 𑀇𑀢𑀭𑁄𑀧𑁆𑀬𑀸𑀳 ‘‘𑀢𑀣𑁂𑀯𑀸’’𑀢𑀺.

𑁧𑁨𑁫. 𑀦𑀺𑀝𑁆𑀞𑀼𑀭𑀁 𑀯𑀸𑀓𑁆𑀬𑀁 𑀓𑀓𑁆𑀓𑀲𑀯𑀘𑀦𑀁 𑀨𑀭𑀼𑀲𑀁 𑀦𑀸𑀫, 𑀧𑀭𑁂 𑀚𑀦𑁂 𑀉𑀲𑁆𑀲𑀸𑀧𑁂𑀢𑀺 𑀤𑀸𑀳𑁂𑀢𑀻𑀢𑀺 𑀧𑀭𑀼𑀲𑀁, 𑀢𑀤𑁂𑀯 𑀧𑀲𑁆𑀲 𑀨𑀓𑀸𑀭𑀁 𑀓𑀢𑁆𑀯𑀸 𑀨𑀭𑀼𑀲𑀁. 𑀅𑀲𑀯𑀦𑀻𑀬𑀢𑁆𑀢𑀸 𑀦 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀦𑀺𑀝𑁆𑀞𑀼𑀭𑀁, 𑀉𑀭𑁄, 𑀬𑀣𑀸 ‘‘𑀦𑀸𑀕𑁄’’𑀢𑀺. 𑀤𑁆𑀯𑀬𑀁 𑀓𑀡𑁆𑀡𑀲𑀼𑀔𑀯𑀘𑀦𑁂. 𑀫𑀦𑀁 𑀆 𑀪𑀼𑀲𑀁 𑀜𑀸𑀧𑁂𑀢𑀺 𑀢𑁄𑀲𑁂𑀢𑀻𑀢𑀺 𑀫𑀦𑀼𑀜𑁆𑀜𑀁, 𑀜𑀸 𑀧𑀭𑀺𑀫𑀸𑀡𑀢𑁄𑀲𑀦𑀦𑀺𑀲𑀸𑀦𑁂𑀲𑀼, 𑀅𑀲𑁆𑀲𑀼𑀓𑀸𑀭𑁄. 𑀳𑀤𑀬𑀁 𑀫𑀦𑀁 𑀕𑀘𑁆𑀙𑀢𑀺 𑀧𑀯𑀺𑀲𑀢𑀻𑀢𑀺 𑀳𑀤𑀬𑀗𑁆𑀕𑀫𑀁.

𑀲𑀁𑀓𑀼𑀮𑀸𑀤𑀺𑀤𑁆𑀯𑀬𑀁 𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑀺𑀦𑀺 𑀧𑀼𑀩𑁆𑀩𑀸𑀧𑀭𑀯𑀺𑀭𑀼𑀤𑁆𑀥𑁂 𑀯𑀸𑀓𑁆𑀬𑁂, 𑀬𑀣𑀸 𑁋

𑀬𑀸𑀯𑀚𑀻𑀯𑀫𑀳𑀁 𑀫𑁄𑀦𑀻, 𑀩𑁆𑀭𑀳𑁆𑀫𑀘𑀸𑀭𑀻 𑀘 𑀫𑁂 𑀧𑀺𑀢𑀸;

𑀫𑀸𑀢𑀸 𑀘 𑀫𑀫 𑀯𑀜𑁆𑀛𑀸𑀲𑀺, 𑀅𑀧𑀼𑀢𑁆𑀢𑁄 𑀘 𑀧𑀺𑀢𑀸𑀫𑀳𑁄.

𑀲𑀁𑀓𑀼𑀮𑀦𑁆𑀢𑀺 𑀚𑀴𑀻𑀪𑀯𑀦𑁆𑀢𑁆𑀬𑀦𑁂𑀦𑀸𑀢𑀺 𑀲𑀁𑀓𑀼𑀮𑀁. 𑀓𑀺𑀮𑀺𑀲𑁆𑀲𑀦𑁆𑀢𑁂 𑀏𑀢𑁆𑀣𑀸𑀢𑀺 𑀓𑀺𑀮𑀺𑀝𑁆𑀞𑀁.

𑁧𑁨𑁬. 𑀲𑀫𑀼𑀤𑀸𑀬𑀢𑁆𑀣𑀭𑀳𑀺𑀢𑀁 ¶ 𑀤𑀲𑀤𑀸𑀴𑀺𑀫𑀸𑀤𑀺𑀯𑀸𑀓𑁆𑀬𑀁 [𑀤𑀲 𑀤𑀸𑀞𑀺𑀫𑀸𑀦𑀺 𑀞𑀴𑀧𑀽𑀧𑀸 𑀓𑀼𑀡𑁆𑀟’ 𑀫𑀚𑀸𑀚𑀺𑀦𑀁 𑀧𑀮𑀸𑀮𑀧𑀺𑀡𑁆𑀟𑀸 (𑀦𑁆𑀬𑀸𑀬𑀪𑀸𑀲𑁆𑀲 𑁫.𑁨.𑁧𑁦 𑀫𑁄𑀕𑁆𑀕𑀮𑁆𑀮𑀸𑀦𑀧𑀜𑁆𑀘𑀺𑀓𑀸𑀝𑀻𑀓𑀸 𑁧.𑁧)] 𑀅𑀲𑀫𑁆𑀩𑀤𑁆𑀥𑀢𑁆𑀢𑀸 𑀅𑀩𑀤𑁆𑀥𑀫𑀺𑀢𑀺 𑀓𑀺𑀢𑁆𑀢𑀺𑀢𑀁 𑀓𑀣𑀺𑀢𑀁, 𑀦 𑀩𑀚𑁆𑀛𑀢𑁂 𑀳𑀤𑀬𑀫𑀢𑁆𑀭𑀸𑀢𑀺 𑀅𑀩𑀤𑁆𑀥𑀁, 𑀢𑁄.

𑀦𑀢𑁆𑀣𑀺 𑀢𑀣𑀁 𑀲𑀘𑁆𑀘𑀫𑀢𑁆𑀭𑀸𑀢𑀺 𑀯𑀺𑀢𑀣𑀁. 𑀨𑀭𑀼𑀲𑀸𑀤𑀬𑁄 𑀯𑀺𑀢𑀣𑀲𑀤𑁆𑀤𑀁 𑀬𑀸𑀯 𑀢𑀺𑀮𑀺𑀗𑁆𑀕𑀺𑀓𑀸.

𑁧𑁨𑁭. 𑀧𑀚𑁆𑀚𑀤𑁆𑀥𑀁 𑀲𑀘𑁆𑀘𑀯𑀘𑀦𑁂. 𑀲𑀫𑁆𑀫𑀸𑀲𑀤𑁆𑀤𑁄𑀬𑀁 𑀅𑀩𑁆𑀬𑀬𑀁, 𑀲𑀩𑁆𑀩𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀯𑀘𑀦𑁂𑀲𑀼 𑀘 𑀲𑀫𑀸𑀦𑁄. 𑀦 𑀯𑀺𑀢𑀣𑀁 𑀅𑀯𑀺𑀢𑀣𑀁. 𑀲𑀦𑁆𑀢𑁂𑀲𑀼 𑀲𑀸𑀥𑀽𑀲𑀼 𑀪𑀯𑀁 𑀲𑀘𑁆𑀘𑀁. 𑀲𑀢 𑀲𑀸𑀢𑀘𑁆𑀙𑁂 𑀯𑀸, 𑀯𑀚𑀸𑀤𑀺𑀦𑀸 𑀬𑁄, 𑀲𑀘𑁆𑀘𑀁. 𑀢𑀣𑀲𑀤𑁆𑀤𑁄 𑀪𑀽𑀢𑀧𑀭𑀺𑀬𑀸𑀬𑁄, ‘‘𑀢𑀣𑁂𑀦 𑀫𑀕𑁆𑀕𑁂𑀦 𑀬𑀣𑀸𑀢𑁆𑀣𑀪𑀸𑀚𑀺𑀦𑀸’’𑀢𑀺 [𑀢𑀣𑀸𑀕𑀢𑀸 𑀚𑀺𑀦𑀸𑀢𑀺 (𑀓.)] 𑀧𑀬𑁄𑀕𑁄. 𑀢𑀣𑁂 𑀲𑀸𑀥𑀼 𑀢𑀘𑁆𑀙𑀁, 𑀲𑀸𑀥𑁆𑀯𑀢𑁆𑀣𑁂 𑀬𑁄. 𑀬𑀣𑀸𑀢𑀣𑀲𑀤𑁆𑀤𑀸𑀧𑀺 𑀘 𑀲𑀘𑁆𑀘𑀢𑁆𑀣𑀸 𑀅𑀮𑀺𑀗𑁆𑀕𑀸. 𑀢𑀩𑁆𑀩𑀦𑁆𑀢𑀸 𑀲𑀘𑁆𑀘𑀯𑀘𑀦𑀯𑀦𑁆𑀢𑀯𑀸𑀘𑀓𑀸 𑀲𑀫𑁆𑀫𑀸 𑀲𑀘𑁆𑀘𑀁 𑀬𑀣𑀸𑀢𑀣𑀁𑀲𑀤𑁆𑀤𑀯𑀚𑁆𑀚𑀺𑀢𑀸 𑀲𑁂𑀲𑀸 𑀅𑀯𑀺𑀢𑀣𑀸𑀤𑀬𑁄 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼 𑀯𑀢𑁆𑀢𑀦𑁆𑀢𑀺. 𑀲𑀘𑁆𑀘𑀁𑀲𑀤𑁆𑀤𑁄 𑀢𑀼 𑀅𑀮𑀺𑀗𑁆𑀕𑁄. 𑀅𑀫𑀭𑀓𑁄𑀲𑁂 𑀧𑀦 𑀲𑀫𑁆𑀫𑀸 𑀲𑀘𑁆𑀘𑀲𑀤𑁆𑀤𑀸𑀦𑀫𑁆𑀧𑀺 𑀢𑀩𑁆𑀩𑀢𑀺 𑀢𑀺𑀮𑀺𑀗𑁆𑀕𑀢𑁆𑀢𑀁 𑀯𑀼𑀢𑁆𑀢𑀁, 𑀬𑀣𑀸 𑁋 𑀲𑀘𑁆𑀘𑀁 𑀢𑀘𑁆𑀙𑀁 𑀭𑀺𑀢𑀁 𑀲𑀫𑁆𑀫𑀸, 𑀅𑀫𑀽𑀦𑀺 𑀢𑀻𑀲𑀼 𑀢𑀩𑁆𑀩𑀢𑀺 [𑀅𑀫𑀭 𑁬.𑁨𑁨]. 𑀬𑀣𑀸 𑁋 𑀲𑀘𑁆𑀘𑁄 𑀩𑁆𑀭𑀸𑀳𑁆𑀫𑀡𑁄, 𑀲𑀘𑁆𑀘𑀸 𑀦𑀸𑀭𑀻, 𑀲𑀘𑁆𑀘𑀁 𑀯𑀺𑀧𑁆𑀧𑀓𑀼𑀮𑀁. 𑀇𑀥 𑀧𑀦 𑀲𑀩𑁆𑀩𑀮𑀺𑀗𑁆𑀕𑀯𑀘𑀦𑀯𑀺𑀪𑀢𑁆𑀢𑀻𑀲𑀼 𑀭𑀽𑀧𑀪𑁂𑀤𑀸𑀪𑀸𑀯𑀸 𑀲𑀫𑁆𑀫𑀸𑀲𑀤𑁆𑀤𑀲𑁆𑀲 𑀅𑀩𑁆𑀬𑀬𑀢𑁆𑀢𑀁, 𑀢𑀺𑀮𑀺𑀗𑁆𑀕𑁂𑀲𑁆𑀯𑀧𑀺 𑀭𑀽𑀧𑀪𑁂𑀤𑀸𑀪𑀸𑀯𑀸 𑀲𑀘𑁆𑀘𑀁𑀲𑀤𑁆𑀤𑀲𑁆𑀲 𑀅𑀮𑀺𑀗𑁆𑀕𑀢𑁆𑀢𑀜𑁆𑀘 𑀯𑀼𑀢𑁆𑀢𑀁. 𑀬𑀣𑀸 𑁋 𑀲𑀫𑁆𑀫𑀸 𑀯𑀸𑀘𑀸, 𑀲𑀫𑁆𑀫𑀸 𑀯𑁄𑀳𑀸𑀭𑁄, 𑀲𑀫𑁆𑀫𑀸 𑀯𑀘𑀦𑀁. 𑀲𑀘𑁆𑀘𑀁 𑀩𑁆𑀭𑀸𑀳𑁆𑀫𑀡𑁄, 𑀲𑀘𑁆𑀘𑀁 𑀦𑀸𑀭𑀻, 𑀲𑀘𑁆𑀘𑀁 𑀯𑀺𑀧𑁆𑀧𑀓𑀼𑀮𑀁. 𑀫𑀺𑀘𑁆𑀙𑀸𑀫𑀼𑀲𑀸𑀲𑀤𑁆𑀤𑀸 𑀧𑀦 𑀲𑀩𑁆𑀩𑀢𑁆𑀭𑀸𑀧𑀺 𑀅𑀩𑁆𑀬𑀬𑀫𑁂𑀯 𑀪𑀯𑀦𑁆𑀢𑀺. 𑀬𑀣𑀸 ¶ 𑁋 𑀫𑀺𑀘𑁆𑀙𑀸 𑀯𑀸𑀘𑀸, 𑀫𑀺𑀘𑁆𑀙𑀸 𑀯𑁄𑀳𑀸𑀭𑁄, 𑀫𑀺𑀘𑁆𑀙𑀸 𑀯𑀘𑀦𑀁. 𑀫𑀼𑀲𑀸 𑀯𑀸𑀘𑀸, 𑀫𑀼𑀲𑀸 𑀯𑁄𑀳𑀸𑀭𑁄, 𑀫𑀼𑀲𑀸 𑀯𑀘𑀦𑀁.

𑁧𑁨𑁮. 𑀲𑁄𑀴𑀲 𑀲𑀤𑁆𑀤𑀫𑀢𑁆𑀢𑀧𑀭𑀺𑀬𑀸𑀬𑁂 𑀤𑀲𑁆𑀲𑁂𑀢𑀼𑀁 𑀉𑀧𑀚𑀸𑀢𑀺𑀁 ‘‘𑀭𑀯𑁄’’𑀇𑀘𑁆𑀘𑀸𑀤𑀺𑀫𑀸𑀳. 𑀭𑀼𑀬𑀢𑁂 𑀲𑀤𑁆𑀤𑀸𑀬𑀢𑁂𑀢𑀺 𑀭𑀯𑁄, 𑀭𑀼 𑀲𑀤𑁆𑀤𑁂. 𑀦𑀤𑀦𑀁 𑀦𑀸𑀤𑁄, 𑀦𑀺𑀭𑀢𑁆𑀣𑁄 𑀦𑀸𑀤𑁄 𑀦𑀺𑀦𑀸𑀤𑁄, 𑀦𑀤 𑀅𑀩𑁆𑀬𑀢𑁆𑀢𑀲𑀤𑁆𑀤𑁂. 𑀏𑀯𑀁 𑀦𑀺𑀦𑀤𑁄, 𑀭𑀲𑁆𑀲𑀢𑁆𑀢𑀫𑁂𑀯 𑀯𑀺𑀲𑁂𑀲𑁄. 𑀲𑀧𑁆𑀧𑀢𑀺 𑀉𑀘𑁆𑀘𑀸𑀭𑀻𑀬𑀢𑀻𑀢𑀺 𑀲𑀤𑁆𑀤𑁄. 𑀖𑀼𑀲 𑀲𑀤𑁆𑀤𑁂, 𑀧𑀸𑀢𑀼𑀪𑀸𑀯𑁄 𑀖𑁄𑀲𑁄 𑀦𑀺𑀕𑁆𑀖𑁄𑀲𑁄. 𑀦𑀤𑀦𑀁 𑀦𑀸𑀤𑁄. 𑀥𑀦 𑀲𑀤𑁆𑀤𑁂, 𑀥𑀦𑀻𑀬𑀢𑀻𑀢𑀺 𑀥𑀦𑀺. 𑀦𑀺𑀕𑁆𑀖𑁄𑀲𑁄 𑀘 𑀦𑀸𑀤𑁄 𑀘 𑀥𑀦𑀺 𑀘 𑀦𑀺𑀕𑁆𑀖𑁄𑀲𑀦𑀸𑀤𑀥𑀦𑀬𑁄. 𑀭𑀯𑁄 𑀏𑀯 𑀭𑀸𑀯𑁄. 𑀆𑀭𑀸𑀯𑁄𑀢𑀺 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀢𑀣𑀸 𑀲𑀁𑀭𑀸𑀯𑀯𑀺𑀭𑀸𑀯𑀆𑀭𑀯𑀸. 𑀖𑀼𑀲𑀦𑀁 𑀖𑁄𑀲𑁄. 𑀆𑀭𑀸𑀯𑁄 𑀘 𑀲𑀁𑀭𑀸𑀯𑁄 𑀘 𑀯𑀺𑀭𑀸𑀯𑁄 𑀘 𑀖𑁄𑀲𑁄 𑀘 𑀆𑀭𑀯𑁄 𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀲𑀼 𑀲𑀯𑀦𑁂, 𑀲𑀼𑀬𑁆𑀬𑀢𑁂𑀢𑀺 𑀲𑀼𑀢𑀺. 𑀲𑀭𑀢𑀺 𑀲𑀼𑀬𑁆𑀬𑀫𑀸𑀦𑀢𑀁 𑀕𑀘𑁆𑀙𑀢𑀻𑀢𑀺 𑀲𑀭𑁄. 𑀦𑀺𑀲𑁆𑀲𑀦𑀢𑀺 𑀏𑀢𑁂𑀦𑀸𑀢𑀺 𑀦𑀺𑀲𑁆𑀲𑀦𑁄, 𑀲𑀦 𑀲𑀫𑁆𑀪𑀢𑁆𑀢𑀺𑀬𑀁 𑀦𑀺𑀧𑀼𑀩𑁆𑀩𑁄. 𑀲𑀭𑁄 𑀘 𑀦𑀺𑀲𑁆𑀲𑀦𑁄 𑀘𑀸𑀢𑀺 𑀤𑁆𑀯𑀦𑁆𑀤𑁄.

𑁧𑁨𑁯. 𑀯𑀺𑀲𑀚𑁆𑀚𑀻𑀬𑀢𑁂 𑀦 𑀮𑀕𑁆𑀕𑀻𑀬𑀢𑁂 𑀲𑁂𑀫𑁆𑀳𑀸𑀤𑀻𑀳𑀻𑀢𑀺 𑀯𑀺𑀲𑀝𑁆𑀞𑁄. 𑀫𑀦𑀺𑀢𑀩𑁆𑀩𑀦𑁆𑀢𑀺 𑀫𑀜𑁆𑀚𑀼, 𑀚𑀼, 𑀫𑀦 𑀜𑀸𑀡𑁂, 𑀲𑀼𑀡𑀦𑁆𑀢𑀸𑀦𑀁 𑀯𑀸 𑀫𑀦𑀁 𑀭𑀜𑁆𑀚𑁂𑀢𑀻𑀢𑀺 𑀫𑀜𑁆𑀚𑀼, 𑀉, 𑀦 𑀭𑀮𑁄𑀧𑁄. 𑀲𑀼𑀔𑁂𑀦𑁂𑀯 𑀯𑀺𑀚𑀸𑀦𑀺𑀢𑀩𑁆𑀩𑀢𑁆𑀢𑀸 𑀯𑀺𑀜𑁆𑀜𑁂𑀬𑁆𑀬𑁄. 𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀢𑁄 𑀲𑁄𑀢𑀩𑁆𑀩𑁄𑀢𑀺 𑀲𑀯𑀦𑀻𑀬𑁄. 𑀩𑀳𑀺𑀤𑁆𑀥𑀸𑀧𑀭𑀺𑀲𑀸 𑀅𑀗𑁆𑀕𑀼𑀮𑀺𑀫𑀢𑁆𑀢𑀫𑁆𑀧𑀺 𑀦 𑀯𑀺𑀲𑀭𑀢𑀺 𑀦 𑀕𑀘𑁆𑀙𑀢𑀻𑀢𑀺 𑀅𑀯𑀺𑀲𑀸𑀭𑀻 ¶ , 𑀢𑀲𑁆𑀲𑀻𑀮𑀢𑁆𑀣𑁂 𑀡𑀻, 𑀯𑀺𑀯𑀺𑀥𑁂𑀦 𑀯𑀸 𑀦 𑀲𑀭𑀢𑀻𑀢𑀺 𑀅𑀯𑀺𑀲𑀸𑀭𑀻, 𑀙𑀺𑀦𑁆𑀦𑀲𑁆𑀲𑀭𑀸𑀦𑀁 𑀯𑀺𑀬 𑀤𑁆𑀯𑁂𑀥𑀸 𑀦 𑀳𑁄𑀢𑀻𑀢𑁆𑀬𑀢𑁆𑀣𑁄. 𑀯𑀺𑀦𑁆𑀤𑁆𑀬𑀢𑁂 𑀮𑀩𑁆𑀪𑀢𑁂𑀢𑀺 𑀩𑀺𑀦𑁆𑀤𑀼, 𑀯𑀲𑁆𑀲 𑀩𑁄, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄, 𑀉 𑀘, 𑀯𑀝𑁆𑀝𑀢𑁆𑀢𑀸 𑀯𑀸 𑀩𑀺𑀦𑁆𑀤𑀼, 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀧𑀩𑁆𑀩𑀚𑁆𑀚𑀸𑀤𑀺𑀦𑀸 𑀭𑀽𑀧𑀲𑀺𑀤𑁆𑀥𑀺. 𑀧𑀜𑁆𑀘𑀦𑁆𑀦𑀁 𑀞𑀸𑀦𑀕𑀢𑀻𑀦𑀁 𑀤𑀽𑀭𑀝𑁆𑀞𑀸𑀦𑀢𑁄 𑀚𑀸𑀢𑀢𑁆𑀢𑀸 𑀕𑀫𑁆𑀪𑀻𑀭𑁄. 𑀧𑀼𑀦𑀧𑁆𑀧𑀼𑀦𑀁 𑀦𑀸𑀤𑁄 𑀦𑀺𑀦𑁆𑀦𑀸𑀤𑁄, 𑀓𑁆𑀭𑀺𑀬𑀸𑀪𑀺𑀓𑁆𑀔𑀜𑁆𑀜𑀢𑁆𑀢𑀸 𑀤𑁆𑀯𑀺𑀢𑁆𑀢𑀁, 𑀅𑀲𑁆𑀲 𑀇, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄, 𑀲𑁄 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀦𑀺𑀦𑁆𑀦𑀸𑀤𑀻. 𑀇𑀘𑁆𑀘𑁂𑀯𑀁 𑀪𑀕𑀯𑀢𑁄 𑀅𑀝𑁆𑀞𑀗𑁆𑀕𑀺𑀓𑁄 𑀲𑀭𑁄 𑀳𑁄𑀢𑀺.

𑁧𑁩𑁦. 𑀔𑀕𑁆𑀕𑀸𑀤𑀻𑀦𑀁 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀭𑀼𑀢𑀁 𑀯𑀲𑁆𑀲𑀺𑀢𑀦𑁆𑀢𑁆𑀬𑀼𑀘𑁆𑀘𑀢𑁂. 𑀭𑀼 𑀲𑀤𑁆𑀤𑁂, 𑀭𑀼𑀢𑀁. 𑀯𑀲𑁆𑀲 𑀲𑀤𑁆𑀤𑁂, 𑀯𑀲𑁆𑀲𑀦𑀁 𑀭𑀯𑀦𑀁 𑀯𑀲𑁆𑀲𑀺𑀢𑀁.

𑀓𑁄𑀮𑀸𑀳𑀮𑀸𑀤𑀺𑀤𑁆𑀯𑀬𑀁 𑀩𑀳𑀽𑀳𑀺 𑀲𑀫𑁆𑀪𑀽𑀬 𑀓𑀢𑁂 𑀅𑀩𑁆𑀬𑀢𑁆𑀢𑀲𑀤𑁆𑀤𑁂. 𑀓𑀼𑀮 𑀲𑀗𑁆𑀖𑀸𑀢𑁂 [𑀲𑀗𑁆𑀔𑁆𑀬𑀸𑀦𑁂 (𑀓.)], 𑀓𑁄𑀮𑀦𑀁 𑀓𑁄𑀮𑁄, 𑀏𑀓𑀻𑀪𑀸𑀯𑁄, 𑀢𑀁 𑀆𑀳𑀮𑀢𑀺 𑀯𑀺𑀦𑁆𑀤𑀢𑀻𑀢𑀺 𑀓𑁄𑀮𑀸𑀳𑀮𑁄. 𑀓𑀭𑁄𑀢𑀺 𑀳𑀺𑀁𑀲𑀢𑀺 𑀫𑀥𑀼𑀭𑀦𑁆𑀢𑀺 𑀓𑀮𑁄, 𑀢𑀁 𑀳𑀮𑀢𑀻𑀢𑀺 𑀓𑀮𑀳𑀮𑁄. 𑀳𑀮 𑀯𑀺𑀮𑁂𑀔𑀦𑁂.

𑀢𑀺𑀓𑀁 𑀕𑀸𑀬𑀦𑁂. 𑀕𑁂 𑀲𑀤𑁆𑀤𑁂, 𑀕𑁂𑀢𑀩𑁆𑀩𑀁 𑀕𑀻𑀢𑀁 𑀕𑀸𑀦𑀁 𑀕𑀻𑀢𑀺𑀓𑀸 𑀘. 𑀲𑀩𑁆𑀩𑀢𑁆𑀭 𑀪𑀸𑀯𑀲𑀸𑀥𑀦𑀁.

𑁧𑁩𑁧. 𑀢𑀦𑁆𑀢𑀺𑀓𑀡𑁆𑀞𑁄𑀝𑁆𑀞𑀺𑀢𑀸 [𑀅𑀫𑀭 𑁭.𑁧] 𑀉𑀲𑀪𑀸𑀤𑀬𑁄 𑀲𑀢𑁆𑀢 𑀲𑀭𑀸. 𑀙𑀚𑁆𑀚𑀸𑀤𑀬𑁄 𑀢𑀬𑁄 𑀕𑀸𑀫𑀸 𑀲𑀫𑀽𑀳𑀸𑀢𑁆𑀬𑀢𑁆𑀣𑁄. 𑀯𑀼𑀢𑁆𑀢𑀜𑁆𑀘 ‘‘𑀕𑀸𑀫𑁄 𑀦𑀸𑀫 𑀲𑀭𑀲𑀫𑀽𑀳𑀲𑁆𑀲 𑀲𑀦𑁆𑀥𑀸𑀦’’𑀦𑁆𑀢𑀺. 𑀫𑀦𑀼𑀲𑁆𑀲𑀮𑁄𑀓𑀯𑀸𑀤𑀦𑀯𑀺𑀥𑀺𑀦𑀸 𑀏𑀓𑁂𑀓𑀲𑁆𑀲 ¶ 𑀲𑀭𑀲𑁆𑀲 𑀯𑀲𑁂𑀦 𑀢𑀬𑁄 𑀢𑀬𑁄 𑀫𑀼𑀘𑁆𑀙𑀦𑀸 𑀓𑀢𑁆𑀯𑀸 𑀏𑀓𑀯𑀻𑀲𑀢𑀺 𑀫𑀼𑀘𑁆𑀙𑀦𑀸, 𑀤𑁂𑀯𑀮𑁄𑀓𑀯𑀸𑀤𑀦𑀯𑀺𑀥𑀺𑀦𑀸 𑀧𑀦 𑀲𑀫𑀧𑀜𑁆𑀜𑀸𑀲 𑀫𑀼𑀘𑁆𑀙𑀦𑀸 𑀯𑀤𑀦𑁆𑀢𑀺. 𑀢𑀢𑁆𑀣 𑀳𑀺 𑀏𑀓𑁂𑀓𑀲𑁆𑀲 𑀲𑀭𑀲𑁆𑀲 𑀯𑀲𑁂𑀦 𑀲𑀢𑁆𑀢 𑀲𑀢𑁆𑀢 𑀫𑀼𑀘𑁆𑀙𑀦𑀸, 𑀅𑀦𑁆𑀢𑀲𑀭𑀲𑁆𑀲 𑀘 𑀏𑀓𑀸𑀢𑀺 𑀲𑀫𑀧𑀜𑁆𑀜𑀸𑀲 𑀫𑀼𑀘𑁆𑀙𑀦𑀸 𑀆𑀕𑀢𑀸, 𑀢𑁂𑀦𑁂𑀯 𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑀲𑀁𑀯𑀡𑁆𑀡𑀦𑀸𑀬𑀁 ‘‘𑀲𑀫𑀧𑀜𑁆𑀜𑀸𑀲 𑀫𑀼𑀘𑁆𑀙𑀦𑀸 𑀫𑀼𑀘𑁆𑀙𑀺𑀢𑁆𑀯𑀸’’𑀢𑀺 [𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁪𑁫] 𑀧𑀜𑁆𑀘𑀲𑀺𑀔𑀲𑁆𑀲 𑀯𑀻𑀡𑀸𑀯𑀸𑀤𑀦𑀁 𑀤𑀲𑁆𑀲𑁂𑀦𑁆𑀢𑁂𑀦 𑀯𑀼𑀢𑁆𑀢𑀁. 𑀫𑀼𑀘𑁆𑀙 𑀫𑁄𑀳𑀲𑀫𑀼𑀲𑁆𑀲𑀬𑁂𑀲𑀼, 𑀬𑀼, 𑀫𑀼𑀘𑁆𑀙𑀦𑀸. 𑀬𑀣𑀸 𑀓𑀫𑁂𑀦 𑀯𑀻𑀡𑀸 𑀯𑀸𑀤𑀺𑀢𑀼𑀁 𑀲𑀓𑁆𑀓𑀸, 𑀏𑀯𑀁 𑀲𑀚𑁆𑀚𑀦𑀸𑀳𑀺 𑀫𑀼𑀘𑁆𑀙𑀦𑀝𑁆𑀞𑀸𑀦𑀸𑀦𑀺 𑀏𑀓𑀽𑀦𑀧𑀜𑁆𑀜𑀸𑀲𑀸𑀢𑁆𑀬𑀢𑁆𑀣𑁄. 𑀏𑀓𑁂𑀓𑀲𑁆𑀲 𑀲𑀭𑀲𑁆𑀲 𑀲𑀢𑁆𑀢 𑀲𑀢𑁆𑀢 𑀞𑀸𑀦𑀸𑀦𑀺. 𑀬𑀢𑁄 𑀲𑀭𑀲𑁆𑀲 𑀫𑀦𑁆𑀤𑀢𑀸𑀭𑀯𑀯𑀢𑁆𑀣𑀸𑀦𑀁 𑀳𑁄𑀢𑀺, 𑀢𑁂𑀦 𑀏𑀓𑀽𑀦𑀧𑀜𑁆𑀜𑀸𑀲 𑀞𑀸𑀦𑀸𑀦𑀺. 𑀇𑀘𑁆𑀘𑁂𑀢𑀁 𑀲𑀭𑀫𑀡𑁆𑀟𑀮𑀁 𑀲𑀭𑀲𑀫𑀽𑀳𑁄.

𑁧𑁩𑁨. 𑀲𑀭𑀸𑀤𑀻𑀦𑀁 𑀦𑀸𑀫𑀲𑀭𑀽𑀧𑀧𑁆𑀧𑀪𑁂𑀤𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀉𑀲𑀪𑁄’’𑀘𑁆𑀘𑀸𑀤𑀺. 𑀇𑀲 𑀕𑀢𑀺𑀬𑀁. 𑀇𑀲𑀢𑀺 𑀘𑀺𑀢𑁆𑀢𑀁 𑀧𑀯𑀺𑀲𑀢𑀻𑀢𑀺 𑀉𑀲𑀪𑁄, 𑀅𑀪𑁄, 𑀇𑀲𑁆𑀲𑀼 𑀘. ‘‘𑀉𑀲 𑀤𑀸𑀳𑁂’’𑀢𑀺 𑀯𑀸 𑀥𑀸𑀢𑁆𑀯𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀲𑁄 𑀲𑀭𑁄 𑀉𑀲𑀪𑁄 𑀯𑀺𑀬 𑀦𑀤𑀢𑀺, 𑀢𑀲𑁆𑀫𑀸 𑀉𑀲𑀪𑁄𑀢𑀺 𑀯𑀼𑀘𑁆𑀘𑀢𑀺. 𑀥𑀻𑀫𑀦𑁆𑀢𑁂𑀳𑀺 𑀕𑀻𑀬𑀢𑁂𑀢𑀺 𑀥𑁂𑀯𑀢𑁄, 𑀯𑀡𑁆𑀡𑀯𑀺𑀓𑀸𑀭𑁄, 𑀯𑀢𑁆𑀢𑀁.

𑀦𑀸𑀲𑀁 𑀓𑀡𑁆𑀞𑀫𑀼𑀭𑁄 𑀢𑀸𑀮𑀼𑀁,

𑀚𑀺𑀯𑁆𑀳𑀁 𑀤𑀦𑁆𑀢𑁂 𑀘 𑀦𑀺𑀲𑁆𑀲𑀺𑀢𑁄;

𑀙𑀥𑀸 𑀲𑀜𑁆𑀚𑀸𑀬𑀢𑁂 𑀬𑀲𑁆𑀫𑀸,

𑀢𑀲𑁆𑀫𑀸 𑀙𑀚𑁆𑀚𑁄 𑀲 𑀉𑀘𑁆𑀘𑀢𑁂 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁭.𑁧].

𑀕𑀦𑁆𑀥𑀁 ¶ 𑀮𑁂𑀲𑀁 𑀅𑀭𑀢𑀻𑀢𑀺 𑀕𑀦𑁆𑀥𑀭𑁄, 𑀭𑀲𑁆𑀲𑀲𑁆𑀲 𑀤𑀻𑀖𑀢𑁆𑀢𑁂 𑀕𑀦𑁆𑀥𑀸𑀭𑁄 𑀘𑁂𑀢𑁆𑀬𑀜𑁆𑀜𑁂 [𑀅𑀜𑁆𑀜𑁂𑀲𑀫𑀧𑀻𑀢𑀺 (𑀧𑀸𑀡𑀺𑀦𑀺 𑁩.𑁧𑁩𑁭) 𑀤𑀻𑀖𑁄 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁭.𑁧)], 𑀕𑀦𑁆𑀥𑀸𑀭𑀸 𑀦𑀸𑀫 𑀚𑀦𑀧𑀤𑀸, 𑀢𑁂𑀳𑁆𑀬𑀬𑀁 𑀕𑀻𑀬𑀢𑁂𑀢𑀺 𑀕𑀦𑁆𑀥𑀸𑀭𑁄, 𑀡𑁄. 𑀫𑀚𑁆𑀛𑁂 𑀮𑀬𑀯𑀺𑀲𑁂𑀲𑁂 𑀪𑀯𑁄 𑀫𑀚𑁆𑀛𑀺𑀫𑁄. 𑀧𑀜𑁆𑀘𑀦𑁆𑀦𑀫𑁆𑀧𑀺 𑀥𑁂𑀯𑀢𑀸𑀤𑀻𑀦𑀁 𑀧𑀽𑀭𑀡𑁄 𑀧𑀜𑁆𑀘𑀫𑁄, (𑀧𑀜𑁆𑀘𑀦𑁆𑀦𑀁 𑀯𑀸 𑀫𑀳𑀸𑀪𑀽𑀢𑀸𑀦𑀁 𑀧𑀽𑀭𑀡𑁄 𑀧𑀜𑁆𑀘𑀫𑁄.) [( ) 𑀏𑀢𑁆𑀣𑀦𑁆𑀢𑀭𑁂 𑀧𑀸𑀞𑁄 𑀅𑀥𑀺𑀓𑁄 𑀯𑀺𑀬 𑀤𑀺𑀲𑁆𑀲𑀢𑀺] 𑀦𑀺𑀲𑁆𑀲𑁂𑀲𑀢𑁄 𑀲𑀻𑀤𑀦𑁆𑀢𑀺 𑀲𑀭𑀸 𑀬𑀲𑁆𑀫𑀺𑀦𑁆𑀢𑀺 [𑀬𑀲𑁆𑀫𑀸𑀢𑀺 (𑀓.) 𑁋 𑀲𑀤𑀢𑁄 𑀅𑀥𑀺𑀓𑀭𑀡𑁂 𑀖𑀉 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁭.𑁧)], 𑀡𑁄. ‘‘𑀦𑀺𑀲𑀻𑀤𑀦𑁆𑀢𑀺 𑀲𑀭𑀸 𑀬𑀲𑁆𑀫𑀺𑀁, 𑀦𑀺𑀲𑀸𑀤𑁄 𑀢𑁂𑀦 𑀳𑁂𑀢𑀼𑀦𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀏𑀢𑁂 𑀲𑀢𑁆𑀢 𑀲𑀭𑀸𑀢𑀺 𑀕𑀤𑀺𑀢𑀸 𑀓𑀣𑀺𑀢𑀸.

𑁧𑁩𑁩-𑁧𑁩𑁫. 𑀉𑀲𑀪𑀸𑀤𑀬𑁄 𑀬𑁂 𑀦𑀤𑀦𑁆𑀢𑀺, 𑀢𑁂 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦𑀤𑀦𑁆𑀢𑀺’’𑀘𑁆𑀘𑀸𑀤𑀺. 𑀉𑀲𑀪𑀁 𑀦𑀸𑀫 𑀲𑀭𑀁 𑀕𑀸𑀯𑁄 𑀦𑀤𑀦𑁆𑀢𑀺. 𑀢𑀣𑀸 𑀥𑁂𑀯𑀢𑀁 𑀢𑀼𑀭𑀗𑁆𑀕𑀸 𑀅𑀲𑁆𑀲𑀸, 𑀙𑀚𑁆𑀚𑀁 𑀫𑀬𑀽𑀭𑀸 𑀲𑀺𑀔𑀡𑁆𑀟𑀺𑀦𑁄, 𑀕𑀦𑁆𑀥𑀸𑀭𑀁 𑀅𑀚𑀸, 𑀫𑀚𑁆𑀛𑀺𑀫𑀁 𑀓𑁄𑀜𑁆𑀘𑀸 𑀲𑀓𑀼𑀡𑀯𑀺𑀲𑁂𑀲𑀸, 𑀧𑀜𑁆𑀘𑀫𑀁 𑀧𑀭𑀧𑀼𑀝𑁆𑀞𑀸𑀤𑀻 𑀓𑁄𑀓𑀺𑀮𑀸𑀤𑀬𑁄, 𑀦𑀺𑀲𑀸𑀤𑀁 𑀯𑀸𑀭𑀡𑀸 𑀳𑀢𑁆𑀣𑀺𑀦𑁄 𑀦𑀤𑀦𑁆𑀢𑀺. 𑀯𑀼𑀢𑁆𑀢𑀜𑁆𑀘 𑀦𑀸𑀭𑀤𑀫𑀼𑀦𑀺𑀦𑀸 𑁋

‘‘𑀙𑀚𑁆𑀚𑀁 ¶ 𑀦𑀤𑀢𑀺 𑀫𑀬𑀽𑀭𑁄, 𑀕𑀸𑀯𑁄 𑀦𑀤𑀦𑁆𑀢𑀺 𑀉𑀲𑀪𑀁;

𑀅𑀚𑁄 𑀭𑁄𑀢𑀺 𑀘 [𑀅𑀚𑀸𑀯𑀺𑀓𑀸 𑀢𑀼 (𑀓.)] 𑀕𑀦𑁆𑀥𑀸𑀭𑀁, 𑀓𑁄𑀜𑁆𑀘𑀸 𑀦𑀤𑀦𑁆𑀢𑀺 𑀫𑀚𑁆𑀛𑀺𑀫𑀁.

𑀧𑀼𑀧𑁆𑀨𑀲𑀸𑀥𑀸𑀭𑀦𑁂 𑀓𑀸𑀮𑁂, 𑀓𑁄𑀓𑀺𑀮𑁄 𑀭𑁄𑀢𑀺 𑀧𑀜𑁆𑀘𑀫𑀁;

𑀅𑀲𑁆𑀲𑁄 𑀢𑀼 𑀥𑁂𑀯𑀢𑀁 𑀭𑁄𑀢𑀺, 𑀦𑀺𑀲𑀸𑀤𑀁 𑀭𑁄𑀢𑀺 𑀓𑀼𑀜𑁆𑀚𑀭𑁄’’𑀢𑀺.

𑀫𑀬𑀽𑀭𑀸𑀤𑀬𑁄𑀧𑀺 𑀲𑀩𑁆𑀩𑁂 𑀇𑀫𑁂 𑀲𑀢𑁆𑀢𑀸 𑀲𑀫𑀤𑀸 [𑀲𑀦𑁆𑀢𑁄 (𑀓.) 𑀏𑀢𑁂 𑀘 𑀲𑀫𑀤𑀸 𑀧𑀜𑁆𑀘𑀫𑀁 𑀕𑀸𑀬𑀦𑁆𑀢𑀺 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁭.𑁧)] 𑀧𑀜𑁆𑀘𑀫𑀁 𑀦𑀤𑀦𑁆𑀢𑀺.

𑀙𑀚𑁆𑀚𑁄 𑀕𑀸𑀫𑁄, 𑀫𑀚𑁆𑀛𑀺𑀫𑁄 𑀕𑀸𑀫𑁄, 𑀲𑀸𑀥𑀸𑀭𑀡𑁄 𑀕𑀸𑀫𑁄𑀢𑀺 𑀢𑀬𑁄 𑀕𑀸𑀫𑀸. 𑀢𑀢𑁆𑀭 𑀯𑀻𑀡𑀸𑀤𑀡𑁆𑀟𑀁 𑀯𑀺𑀪𑀸𑀕𑀁 𑀓𑀢𑁆𑀯𑀸 𑀅𑀥𑁄𑀪𑀸𑀕𑀲𑁆𑀲 ‘‘𑀙𑀚𑁆𑀚𑀕𑀸𑀫𑁄’’𑀢𑀺 𑀲𑀜𑁆𑀜𑀸, 𑀫𑀚𑁆𑀛𑀪𑀸𑀕𑀲𑁆𑀲 ‘‘𑀫𑀚𑁆𑀛𑀺𑀫𑀕𑀸𑀫𑁄’’𑀢𑀺, 𑀉𑀧𑀭𑀺𑀪𑀸𑀕𑀲𑁆𑀲 ‘‘𑀲𑀸𑀥𑀸𑀭𑀡𑀕𑀸𑀫𑁄’’𑀢𑀺 𑀲𑀜𑁆𑀜𑀸. 𑀓𑀺𑀁 𑀧𑀦 𑀕𑀸𑀫𑀪𑁂𑀤𑁂 𑀓𑀸𑀭𑀡𑀁? 𑀬𑀲𑁆𑀫𑀸 𑀏𑀓𑀲𑁆𑀲𑁂𑀯 𑀲𑀭𑀲𑁆𑀲 𑀕𑀸𑀫𑀦𑁆𑀢𑀭𑁂 𑀪𑁂𑀤𑁄, 𑀢𑀁𑀪𑁂𑀤𑁂 𑀕𑀸𑀫𑀸𑀦𑀫𑁆𑀧𑀺𑀪𑁂𑀤𑁄. 𑀫𑀸𑀖𑀝𑀻𑀓𑀸𑀬𑀁 𑀧𑀦 𑀲𑀸𑀥𑀸𑀭𑀡𑀕𑀸𑀫𑀝𑁆𑀞𑀸𑀦𑁂 𑀕𑀦𑁆𑀥𑀸𑀭𑀕𑀸𑀫𑁄 𑀓𑀣𑀺𑀢𑁄, 𑀏𑀓𑁂𑀓𑀲𑁆𑀫𑀺𑀜𑁆𑀘 𑀕𑀸𑀫𑁂 𑀲𑀢𑁆𑀢 𑀲𑀢𑁆𑀢 𑀫𑀼𑀘𑁆𑀙𑀦𑀸. 𑀇𑀥 𑀧𑀦 𑀉𑀲𑀪𑀸𑀤𑀻𑀲𑀼 𑀲𑀢𑁆𑀢𑀲𑀼 𑀲𑀭𑁂𑀲𑀼 𑀧𑀘𑁆𑀘𑁂𑀓𑀁 𑀢𑀺𑀲𑁆𑀲𑁄 𑀢𑀺𑀲𑁆𑀲𑁄 𑀫𑀼𑀘𑁆𑀙𑀦𑀸 𑀓𑀣𑀺𑀢𑀸. 𑀓𑀺𑀁𑀓𑀸𑀭𑀡𑀸? 𑀇𑀥 𑀫𑀦𑀼𑀲𑁆𑀲𑀮𑁄𑀓𑀯𑀸𑀤𑀦𑀯𑀺𑀥𑀺𑀦𑀸, 𑀢𑀢𑁆𑀣 𑀘 𑀤𑁂𑀯𑀮𑁄𑀓𑀯𑀸𑀤𑀦𑀯𑀺𑀥𑀺𑀦𑀸 𑀓𑀣𑀺𑀢𑀢𑁆𑀢𑀸 𑀢𑀣𑁂𑀯 𑀞𑀸𑀦𑀸𑀦𑀺 𑀲𑀢𑁆𑀢 𑀲𑀢𑁆𑀢𑁂𑀯 𑀮𑀩𑁆𑀪𑀭𑁂𑀢𑀺. 𑀬𑀣𑀸 𑀉𑀲𑀪𑀸𑀤𑀻𑀲𑀼 𑀢𑁂𑀲𑀼 𑀬𑀣𑀸𑀯𑀼𑀢𑁆𑀢𑁂𑀲𑀼 𑀲𑀭𑁂𑀲𑀼 𑀧𑀘𑁆𑀘𑁂𑀓𑀁 𑀏𑀓𑁂𑀓𑀲𑁆𑀫𑀺𑀁 𑀲𑀭𑁂 𑀢𑀺𑀲𑁆𑀲𑁄 𑀢𑀺𑀲𑁆𑀲𑁄 𑀫𑀼𑀘𑁆𑀙𑀦𑀸 𑀲𑀺𑀬𑀼𑀁, 𑀢𑀣𑁂𑀯 𑀞𑀸𑀦𑀸𑀦𑀺𑀧𑀺 𑀲𑀢𑁆𑀢 𑀲𑀢𑁆𑀢𑁂𑀯 𑀮𑀩𑁆𑀪𑀭𑁂𑀢𑁆𑀬𑀢𑁆𑀣𑁄.

𑁧𑁩𑁬. 𑀲𑀭𑀸𑀦𑀁 𑀕𑀸𑀫𑁂𑀲𑀼 𑀪𑀺𑀦𑁆𑀦𑀲𑀼𑀢𑀺𑀢𑁆𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑀺𑀲𑁆𑀲𑁄’’𑀇𑀘𑁆𑀘𑀸𑀤𑀺. 𑀉𑀲𑀪𑀲𑁆𑀲 𑀲𑀭𑀲𑁆𑀲 𑀢𑀸𑀭𑀓𑀮𑀫𑀦𑁆𑀤𑀯𑀲𑁂𑀦 𑀢𑀺𑀲𑁆𑀲𑁄 𑀲𑀼𑀢𑀺𑀬𑁄. 𑀥𑁂𑀯𑀢𑀲𑁆𑀲 𑀲𑀭𑀲𑁆𑀲 𑀢𑀸𑀭 𑀫𑀦𑁆𑀤𑀯𑀲𑁂𑀦 ¶ 𑀤𑀼𑀯𑁂. 𑀙𑀚𑁆𑀚𑀲𑁆𑀲 𑀢𑀸𑀭𑀓𑀮 𑀫𑀦𑁆𑀤 𑀓𑀸𑀓𑀮𑀻𑀯𑀲𑁂𑀦 𑀘𑀢𑀲𑁆𑀲𑁄. 𑀕𑀦𑁆𑀥𑀸𑀭𑀲𑁆𑀲 𑀘 𑀢𑀣𑀸. 𑀫𑀚𑁆𑀛𑀺𑀫𑀲𑁆𑀲 𑀢𑀸𑀭𑀓𑀮 𑀓𑀸𑀓𑀮𑀻𑀯𑀲𑁂𑀦 𑀢𑀺𑀲𑁆𑀲𑁄. 𑀧𑀜𑁆𑀘𑀫𑀲𑁆𑀲 𑀓𑀮 𑀓𑀸𑀓𑀮𑀻𑀯𑀲𑁂𑀦 𑀤𑀼𑀯𑁂. 𑀦𑀺𑀲𑀸𑀤𑀲𑁆𑀲 𑀢𑀸𑀭𑀸𑀤𑀺𑀯𑀲𑁂𑀦 𑀘𑀢𑀲𑁆𑀲𑁄 𑀲𑀼𑀢𑀺𑀬𑁄. 𑀇𑀘𑁆𑀘𑁂𑀯𑀁 𑀲𑀢𑁆𑀢𑀲𑀼 𑀲𑀭𑁂𑀲𑀼 𑀓𑀫𑀢𑁄 𑀲𑀫𑁆𑀧𑀺𑀡𑁆𑀟𑀺𑀢𑀸 𑀤𑁆𑀯𑀸𑀯𑀻𑀲𑀢𑀺 𑀲𑀼𑀢𑀺𑀬𑁄 𑀲𑀺𑀬𑀼𑀁. 𑀫𑀸𑀖𑀝𑀻𑀓𑀸𑀬𑀁 𑀧𑀦 𑀅𑀜𑁆𑀜𑀣𑀸 𑀲𑀼𑀢𑀺𑀪𑁂𑀤𑁄 𑀯𑀼𑀢𑁆𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑁋

‘‘𑀘𑀢𑀼𑀲𑁆𑀲𑀼𑀢𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑁄, 𑀫𑀚𑁆𑀛𑀺𑀫𑁄 𑀫𑀚𑁆𑀚𑀺𑀫𑀝𑁆𑀞𑀺𑀢𑁄;

𑀤𑁆𑀯𑀺𑀲𑁆𑀲𑀼𑀢𑀺 𑀘𑀸𑀧𑀺 𑀕𑀦𑁆𑀥𑀸𑀭𑁄, 𑀢𑀺𑀲𑁆𑀲𑀼𑀢𑀺 𑀉𑀲𑀪𑁄 𑀢𑀣𑀸.

𑀙𑀚𑁆𑀚𑁄 𑀘𑀢𑀼𑀲𑁆𑀲𑀼𑀢𑀺 𑀜𑁂𑀬𑁆𑀬𑁄, 𑀦𑀺𑀲𑀸𑀤𑁄 𑀤𑁆𑀯𑀺𑀲𑁆𑀲𑀼𑀢𑀻 𑀢𑀣𑀸;

𑀘𑀢𑀼𑀲𑁆𑀲𑀼𑀢𑀺 𑀥𑁂𑀯𑀢𑁄 𑀢𑀼, 𑀧𑀜𑁆𑀘𑀫𑁄 𑀢𑀺𑀲𑁆𑀲𑀼𑀢𑀻 𑀫𑀢𑁄’’𑀢𑀺.

𑀲𑀩𑁆𑀩𑀫𑁂𑀢𑀁 𑀦𑀸𑀝𑀓𑀲𑀢𑁆𑀣𑀢𑁄 𑀕𑀳𑁂𑀢𑀩𑁆𑀩𑀁.

𑁧𑁩𑁭. ‘‘𑀉𑀘𑁆𑀘𑀢𑀭𑁂’’𑀢𑁆𑀬𑀸𑀤𑀺𑀦𑀸 𑀲𑀼𑀢𑀺𑀪𑁂𑀤𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺. 𑀉𑀘𑁆𑀘𑀢𑀭𑁂 𑀭𑀯𑁂 𑀅𑀢𑁆𑀬𑀼𑀘𑁆𑀘𑀥𑀦𑀺𑀫𑁆𑀳𑀺 𑀢𑀸𑀭𑁄, 𑀢𑀸𑀭𑀬𑀢𑀺 𑀩𑁄𑀥𑀬𑀢𑀻𑀢𑀺 𑀢𑀸𑀭𑁄. 𑀅𑀩𑁆𑀬𑀢𑁆𑀢𑁂 𑀅𑀩𑁆𑀬𑀢𑁆𑀢𑀓𑁆𑀔𑀭𑁂 𑀫𑀥𑀼𑀭𑁂 𑀲𑀼𑀢𑀺𑀲𑀼𑀔𑁂 𑀓𑀮𑁄, 𑀓𑀮 𑀫𑀤𑁂. 𑀕𑀫𑁆𑀪𑀻𑀭𑁂 𑀥𑀦𑀺𑀫𑁆𑀳𑀺 𑀫𑀦𑁆𑀤𑁄. 𑀫𑀤𑀺 𑀣𑀼𑀢𑀺𑀫𑁄𑀤𑀫𑀤𑀫𑁄𑀳𑀲𑀼𑀧𑀦𑀕𑀢𑀻𑀲𑀼. 𑀫𑀦𑁆𑀤𑀬𑀢𑁂 𑀩𑀼𑀚𑁆𑀛𑀢𑁂𑀦𑁂𑀦𑀸𑀢𑀺 𑀫𑀦𑁆𑀤𑁄.

𑀢𑀸𑀭𑀸𑀤𑀬𑁄 𑀢𑀬𑁄 𑀯𑀸𑀘𑁆𑀘𑀮𑀺𑀗𑁆𑀕𑀢𑁆𑀢𑀸 𑀢𑀻𑀲𑀼. 𑀢𑀸𑀭𑁄 𑀥𑀦𑀺, 𑀢𑀸𑀭𑀸 𑀯𑀸𑀡𑀻, 𑀢𑀸𑀭𑀁 𑀭𑀼𑀢𑀁 𑀇𑀘𑁆𑀘𑀸𑀤𑀺. 𑀅𑀩𑁆𑀬𑀢𑁆𑀢𑀫𑀥𑀼𑀭𑀲𑀤𑁆𑀤𑁄 𑀓𑀮𑁄. 𑀢𑀢𑁆𑀭 𑀓𑀮𑁂 𑀲𑀼𑀔𑀼𑀫𑁂 𑀓𑀸𑀓𑀮𑀻𑀲𑀤𑁆𑀤𑁄, 𑀈𑀧𑀘𑁆𑀘𑀬𑀦𑁆𑀢𑁄, 𑀈𑀲𑀁 ¶ 𑀓𑀮𑀸 𑀯𑀸𑀡𑀻 𑀓𑀸𑀓𑀮𑀻 𑀦𑀸𑀫, 𑀓𑀸𑀲𑀤𑁆𑀤𑁄𑀬𑀫𑀻𑀲𑀢𑁆𑀣𑁄. 𑀓𑁆𑀭𑀺𑀬𑀸𑀤𑀺𑀲𑀫𑀢𑀸𑀢𑀺 𑀕𑀻𑀢𑀯𑀸𑀤𑀺𑀢𑀧𑀸𑀤𑀦𑁆𑀬𑀸𑀲𑀸𑀤𑀺𑀓𑁆𑀭𑀺𑀬𑀸𑀦𑀁, 𑀓𑀸𑀮𑀲𑁆𑀲 𑀘 𑀲𑀫𑀢𑁆𑀢𑀁 𑀮𑀬𑁄 𑀦𑀸𑀫, 𑀮𑀬 𑀲𑀸𑀫𑁆𑀬𑀕𑀢𑀻𑀲𑀼, 𑀆𑀥𑀸𑀭𑁂 𑀅𑀧𑀘𑁆𑀘𑀬𑁄, 𑀲𑀩𑁆𑀩𑀸𑀪𑀺𑀦𑀬𑀸𑀦𑀫𑁆𑀧𑀺 𑀲𑀸𑀫𑁆𑀬𑀁 𑀮𑀬𑁄𑀢𑀺 𑀓𑁂𑀘𑀺.

𑁧𑁩𑁮. 𑀤𑁆𑀯𑀬𑀁 𑀯𑀻𑀡𑀸𑀬𑀁. 𑀯𑀺 𑀚𑀦𑀦𑁂, 𑀢𑁄, 𑀈𑀡𑀢𑁆𑀢𑀁, 𑀯𑀻𑀡 𑀯𑁂𑀞𑀦𑁂𑀢𑀺 𑀯𑀸 𑀥𑀸𑀢𑀼, 𑀆, 𑀯𑀻𑀡𑀸. 𑀯𑀮𑁆𑀮 𑀲𑀁𑀯𑀭𑀡𑁂, 𑀯𑀮𑁆𑀮𑀢𑁂 𑀥𑀦𑀺𑀯𑀺𑀲𑁂𑀲𑀁, 𑀡𑁆𑀯𑀼, 𑀯𑀮𑁆𑀮𑀓𑀻, 𑀦𑀤𑀸𑀤𑀺. 𑀯𑀺𑀧𑀜𑁆𑀘𑀻𑀢𑀺𑀧𑀺 𑀯𑀻𑀡𑀸𑀬 𑀦𑀸𑀫𑀁. 𑀯𑀺𑀧𑀜𑁆𑀘𑀬𑀢𑀻𑀢𑀺 𑀯𑀺𑀧𑀜𑁆𑀘𑀻 [𑀯𑀺𑀧𑀜𑁆𑀘𑀬𑀢𑀺 𑀯𑀺𑀢𑁆𑀣𑀸𑀭𑀬𑀢𑀺𑀲𑀤𑁆𑀤𑀁 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁭.𑁩)], 𑀦𑀤𑀸𑀤𑀺.

𑀲𑀸 𑀯𑀻𑀡𑀸 𑀲𑀢𑁆𑀢𑀢𑀦𑁆𑀢𑀻 𑀲𑀢𑁆𑀢𑀳𑀺 𑀢𑀦𑁆𑀢𑀻𑀳𑀺 𑀯𑀺𑀲𑀺𑀝𑁆𑀞𑀸 𑀧𑀭𑀺𑀯𑀸𑀤𑀺𑀦𑀻 𑀦𑀸𑀫, 𑀧𑀭𑀺𑀢𑁄 𑀯𑀤𑀢𑀻𑀢𑀺 𑀧𑀭𑀺𑀯𑀸𑀤𑀺𑀦𑀻, 𑀇𑀦𑀻. 𑀯𑀻𑀡𑀸𑀤𑀬𑁄 𑀘𑀢𑁆𑀢𑀸𑀭𑁄𑀧𑀺 𑀯𑀻𑀡𑀸𑀲𑀸𑀫𑀜𑁆𑀜𑀯𑀸𑀘𑀓𑀸 𑀇𑀘𑁆𑀘𑁂𑀓𑁂, 𑀢𑁂𑀲𑀁 𑀫𑀢𑁂 𑀲𑀸𑀲𑀤𑁆𑀤𑀲𑁆𑀲 𑀘𑀢𑀼𑀦𑁆𑀦𑀫𑁆𑀧𑀺 𑀇𑀢𑁆𑀣𑀺𑀮𑀺𑀗𑁆𑀕𑀢𑁆𑀣𑀤𑀻𑀧𑀓𑀢𑀸 𑀯𑀺𑀜𑁆𑀜𑁂𑀬𑁆𑀬𑀸, 𑀢𑀣𑀸𑀧𑀺 𑀅𑀫𑀭𑀓𑁄𑀲𑁂𑀦 [𑀅𑀫𑀭 𑁭.𑁩] 𑀯𑀺𑀭𑀼𑀚𑁆𑀛𑀦𑀢𑁄 𑀢𑁂𑀲𑀁 𑀫𑀢𑀁 𑀦 𑀕𑀳𑁂𑀢𑀩𑁆𑀩𑀁.

𑀓𑀝𑁆𑀞𑀸𑀤𑀻𑀳𑀺 𑀤𑁄𑀡𑀺𑀲𑀡𑁆𑀞𑀸𑀦𑁂𑀦 𑀓𑀢𑀁 𑀯𑀚𑁆𑀚𑀪𑀡𑁆𑀟𑀁 𑀯𑀻𑀡𑀸𑀬 𑀧𑁄𑀓𑁆𑀔𑀭𑁄 𑀦𑀸𑀫, 𑀧𑁄𑀲𑁂𑀢𑀺 𑀯𑀟𑁆𑀠𑁂𑀢𑀺 𑀲𑀤𑁆𑀤𑁂𑀢𑀺 𑀧𑁄𑀓𑁆𑀔𑀭𑁄, 𑀔𑀭𑁄, 𑀯𑀼𑀤𑁆𑀥𑀺, 𑀯𑀡𑁆𑀡𑀯𑀺𑀓𑀸𑀭𑁄 𑀘. 𑀤𑀼 𑀕𑀫𑀦𑁂, 𑀡𑀺, 𑀤𑁄𑀡𑀺. 𑀓𑀓𑀼𑀪𑁄, 𑀧𑀲𑁂𑀯𑀓𑁄𑀢𑀺𑀧𑀺 𑀧𑁄𑀓𑁆𑀔𑀭𑀲𑁆𑀲 𑀦𑀸𑀫𑀸𑀦𑀺. 𑀓𑀁 𑀯𑀸𑀢𑀁 𑀓𑀼𑀪𑀢𑀺 𑀩𑀦𑁆𑀥𑀢𑀻𑀢𑀺 𑀓𑀓𑀼𑀪𑁄. 𑀧𑀲𑀺𑀩𑁆𑀩𑀦𑁆𑀢𑀺 𑀢𑀫𑀺𑀢𑀺 𑀧𑀲𑁂𑀯𑀓𑁄.

𑀤𑁆𑀯𑀬𑀁 𑀧𑁄𑀓𑁆𑀔𑀭𑀯𑁂𑀞𑀓𑁂 𑀘𑀫𑁆𑀫𑀦𑀺. 𑀯𑀻𑀡𑀸𑀪𑀸𑀯𑀁 𑀉𑀧𑀕𑀘𑁆𑀙𑀢𑀺 𑀬𑁂𑀦𑀸𑀢𑀺 𑀉𑀧𑀯𑀻𑀡𑁄. 𑀯𑁂𑀞𑀢𑀺 𑀧𑁄𑀓𑁆𑀔𑀭𑀦𑁆𑀢𑀺 𑀯𑁂𑀞𑀓𑁄, 𑀡𑁆𑀯𑀼.

𑁧𑁩𑁯. 𑀆𑀢𑀢𑀸𑀤𑀺𑀧𑀜𑁆𑀘𑀓𑀁 ¶ 𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀲𑁆𑀲 𑀦𑀸𑀫𑀸𑀦𑀺.

𑁧𑁪𑁦. 𑀘𑀫𑁆𑀫𑀸𑀯𑀦𑀤𑁆𑀥𑁂𑀲𑀼 𑀘𑀫𑁆𑀫𑁂𑀦 𑀩𑀦𑁆𑀥𑀦𑀻𑀬𑁂𑀲𑀼 𑀪𑁂𑀭𑀺𑀬𑀸𑀤𑀻𑀲𑀼 𑀫𑀚𑁆𑀛𑁂 𑀢𑀮𑁂𑀓𑁂𑀓𑀬𑀼𑀢𑀁 𑀏𑀓𑁂𑀓𑁂𑀦 𑀢𑀮𑁂𑀦 𑀬𑀼𑀢𑁆𑀢𑀁 𑀓𑀼𑀫𑁆𑀪𑀣𑀼𑀡𑀤𑀤𑁆𑀤𑀭𑀺𑀓𑀸𑀤𑀺𑀓𑀁 𑀢𑀽𑀭𑀺𑀬𑀁 𑀆𑀢𑀢𑀁 𑀦𑀸𑀫, 𑀆𑀢𑀦𑁄𑀢𑀻𑀢𑀺 𑀆𑀢𑀢𑀁, 𑀢𑀦𑀼 𑀯𑀺𑀢𑁆𑀣𑀸𑀭𑁂. 𑀫𑀳𑀢𑀻𑀆𑀤𑀺𑀯𑀻𑀡𑀸𑀯𑀺𑀲𑁂𑀲𑁄𑀧𑀺 [‘‘𑀫𑀳𑀢𑀻’’𑀢𑀺 𑀦𑀸𑀭𑀤𑀲𑁆𑀲 𑀯𑀻𑀡𑀸 (𑀲𑀤𑁆𑀤𑀓𑀧𑁆𑀧𑀤𑁆𑀤𑀼𑀫𑁂)] 𑀆𑀢𑀢𑀫𑁂𑀯𑀸𑀢𑀺 ‘‘𑀘𑀫𑁆𑀫𑀸𑀯𑀦𑀤𑁆𑀥𑁂𑀲𑀽’’𑀢𑀺 𑀯𑀺𑀲𑁂𑀲𑀦𑀁 𑀓𑀢𑀁. 𑀓𑀼𑀫𑁆𑀪𑀲𑀡𑁆𑀞𑀸𑀦𑀢𑁆𑀢𑀸 𑀓𑀼𑀫𑁆𑀪𑁄 𑀘 𑀢𑀁 𑀣𑀼𑀦𑀦𑀕𑀭𑀲𑀫𑁆𑀪𑀽𑀢𑀢𑁆𑀢𑀸 𑀣𑀼𑀦𑀜𑁆𑀘𑁂𑀢𑀺 𑀓𑀼𑀫𑁆𑀪𑀣𑀼𑀦𑀁. 𑀢𑀤𑁂𑀯 𑀓𑀼𑀫𑁆𑀪𑀣𑀼𑀡𑀁, 𑀅𑀣 𑀯𑀸 𑀣𑀼 𑀅𑀪𑀺𑀢𑁆𑀣𑀯𑁂, 𑀓𑀫𑁆𑀫𑀦𑀺 𑀡𑁄. 𑀓𑀼𑀫𑁆𑀪𑁄 𑀘 𑀲𑁄 𑀣𑀼𑀡𑁄 𑀘𑁂𑀢𑀺 𑀓𑀼𑀫𑁆𑀪𑀣𑀼𑀡𑁄, 𑀣𑀼𑀡 𑀧𑀽𑀭𑀡𑁂𑀢𑀺 𑀯𑀸 𑀥𑀸𑀢𑁆𑀯𑀢𑁆𑀣𑁄. 𑀤𑀭 𑀯𑀺𑀤𑀸𑀭𑀡𑀤𑀸𑀳𑁂𑀲𑀼, 𑀤𑁆𑀯𑁂𑀪𑀸𑀯𑁄, 𑀓𑀸𑀧𑀼𑀩𑁆𑀩𑀲𑁆𑀲𑀺𑀓𑀸𑀭𑁄 𑀘, 𑀤𑀤𑁆𑀤𑀭𑀲𑀤𑁆𑀤𑀁 𑀓𑀭𑁄𑀢𑀻𑀢𑀺 𑀯𑀸 𑀤𑀤𑁆𑀤𑀭𑀺𑀓𑀸.

𑁧𑁪𑁧. 𑀉𑀪𑀬𑀢𑀮𑀁 𑀫𑀼𑀭𑀚𑀸𑀤𑀺𑀓𑀁 𑀢𑀽𑀭𑀺𑀬𑀁 𑀯𑀺𑀢𑀢𑀁 𑀦𑀸𑀫, 𑀯𑀺𑀲𑁂𑀲𑁂𑀦 𑀲𑀤𑁆𑀤𑀁 𑀢𑀦𑁄𑀢𑀻𑀢𑀺 𑀯𑀺𑀢𑀢𑀁, 𑀲𑀩𑁆𑀩𑀯𑀺𑀦𑀤𑁆𑀥𑀁 𑀲𑀩𑁆𑀩𑀧𑀲𑁆𑀲𑁂𑀲𑀼, 𑀧𑀼𑀩𑁆𑀩𑀧𑀘𑁆𑀙𑀸𑀪𑀸𑀕𑁂𑀲𑀼 𑀘 𑀧𑀭𑀺𑀬𑁄𑀦𑀤𑁆𑀥𑀁 𑀧𑀡𑀯𑀸𑀤𑀺𑀓𑀁, 𑀆𑀤𑀺𑀦𑀸 𑀘𑀢𑀼𑀭𑀲𑁆𑀲𑀆𑀮𑀫𑁆𑀩𑀭𑀕𑁄𑀫𑀼𑀔𑀻𑀆𑀤𑀬𑁄 𑀆𑀢𑀢𑀯𑀺𑀢𑀢𑀁 𑀦𑀸𑀫, ‘‘𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑀁 𑀳𑀼𑀢𑁆𑀯𑀸 𑀢𑀦𑁆𑀢𑀺𑀩𑀤𑁆𑀥𑀁 𑀆𑀢𑀢𑀯𑀺𑀢𑀢’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀧𑀡 𑀩𑁆𑀬𑀯𑀳𑀸𑀭𑀣𑀼𑀢𑀻𑀲𑀼, 𑀧𑀡𑀻𑀬𑀢𑀻𑀢𑀺 𑀧𑀡𑀯𑁄, 𑀅𑀯𑁄.

𑁧𑁪𑁨. 𑀯𑀁𑀲𑀲𑀗𑁆𑀔𑀸𑀤𑀺𑀓𑀁 ¶ 𑀲𑀼𑀲𑀺𑀭𑀁 𑀦𑀸𑀫, 𑀭𑀦𑁆𑀥𑀁 𑀲𑀼𑀲𑀺𑀭𑀁, 𑀢𑀁𑀬𑁄𑀕𑀸 𑀲𑀼𑀲𑀺𑀭𑀁. 𑀯𑀦, 𑀲𑀦 𑀲𑀫𑁆𑀪𑀢𑁆𑀢𑀺𑀬𑀁, 𑀲𑁄, 𑀯𑀁𑀲𑁄. 𑀲𑀫 𑀉𑀧𑀲𑀫𑀔𑁂𑀤𑁂𑀲𑀼, 𑀔𑁄, 𑀲𑀗𑁆𑀔𑁄. 𑀲𑀫𑁆𑀫𑀢𑀸𑀴𑀸𑀤𑀺𑀓𑀁 𑀅𑀘𑁆𑀘𑀦𑁆𑀢𑀁 𑀧𑀻𑀴𑀦𑀢𑁄, 𑀅𑀦𑀮𑀲𑀁𑀬𑁄𑀕𑀢𑁄 𑀯𑀸 𑀤𑁆𑀭𑀯𑀻𑀪𑀽𑀢𑀁 𑀧𑀼𑀦 𑀖𑀦𑀸𑀬𑀢𑁂𑀢𑀺 𑀖𑀦𑀸𑀔𑁆𑀬𑀁. 𑀳𑀦 𑀳𑀺𑀁𑀲𑀸𑀬𑀁, 𑀓𑀫𑁆𑀫𑀦𑀺 𑀡𑁄, 𑀳𑀲𑁆𑀲 𑀖𑁄. 𑀖𑀦𑀪𑀸𑀯𑁂𑀦 𑀲𑀫𑀁 𑀪𑀯𑀢𑀻𑀢𑀺 𑀲𑀫𑁆𑀫𑀁, 𑀤𑀡𑁆𑀟𑀸𑀤𑀻𑀳𑀺 𑀢𑀸𑀴𑀺𑀢𑀩𑁆𑀩𑀢𑁄 𑀢𑀸𑀴𑀁, 𑀢𑀴 𑀢𑀸𑀴𑀦𑁂, 𑀲𑀫𑁆𑀫𑀜𑁆𑀘 𑀢𑀁 𑀢𑀸𑀴𑀜𑁆𑀘𑁂𑀢𑀺 𑀲𑀫𑁆𑀫𑀢𑀸𑀴𑀁. 𑀆𑀤𑀺𑀦𑀸 𑀓𑀁𑀲𑀢𑀸𑀴𑀲𑀺𑀮𑀸𑀢𑀸𑀴𑀸𑀤𑀻𑀦𑀁 𑀕𑀳𑀡𑀁. 𑀢𑀢𑁆𑀣 𑀲𑀫𑁆𑀫𑀢𑀸𑀴𑀁 𑀦𑀸𑀫 𑀓𑀝𑁆𑀞𑀫𑀬𑀢𑀸𑀴𑀁. 𑀓𑀁𑀲𑀢𑀸𑀴𑀁 𑀦𑀸𑀫 𑀮𑁄𑀳𑀫𑀬𑀁. 𑀲𑀺𑀮𑀸𑀬 𑀘 𑀅𑀬𑁄𑀧𑀝𑁆𑀝𑁂𑀦 𑀘 𑀯𑀸𑀤𑀦𑀢𑀸𑀴𑀁 𑀲𑀺𑀮𑀸𑀢𑀸𑀴𑀁.

𑀘𑀢𑀼𑀓𑁆𑀓𑀁 𑀆𑀢𑀢𑀸𑀤𑀻𑀦𑀁 𑀦𑀸𑀫𑀁. 𑀆 𑀲𑀫𑀦𑁆𑀢𑀢𑁄 𑀢𑀼𑀚𑁆𑀚𑀢𑁂 𑀢𑀸𑀴𑀻𑀬𑀢𑁂𑀢𑀺 𑀆𑀢𑁄𑀚𑁆𑀚𑀁. 𑀯𑀁𑀲𑀸𑀤𑀺𑀓𑁂𑀧𑀺 𑀫𑀼𑀔𑀯𑀸𑀬𑀼𑀦𑀸 𑀆𑀢𑁄𑀚𑁆𑀚𑀦𑀫𑀢𑁆𑀣𑁂𑀯. 𑀯𑀸𑀤𑀬𑀦𑁆𑀢𑀺 𑀥𑀦𑀬𑀦𑁆𑀢𑀺 𑀢𑀦𑁆𑀢𑀺 𑀯𑀸𑀤𑀺𑀢𑁆𑀢𑀁 𑀯𑀸𑀤𑀺𑀢𑀜𑁆𑀘, 𑀇𑀢𑁆𑀢𑁄, 𑀢𑁄 𑀘. 𑀯𑀸𑀤𑀬𑀦𑁆𑀢𑀺 𑀢𑀦𑁆𑀢𑀺 𑀯𑀚𑁆𑀚𑀁, 𑀬𑁄.

𑁧𑁪𑁩. 𑀤𑁆𑀯𑀬𑀁 𑀪𑁂𑀭𑀺𑀬𑀁. 𑀪𑀸𑀬𑀦𑁆𑀢𑀺 𑀲𑀢𑁆𑀢𑀼𑀚𑀦𑀸 𑀏𑀢𑁂𑀦𑀸𑀢𑀺 𑀪𑁂𑀭𑀺, 𑀭𑀺. 𑀉𑀪 𑀧𑀽𑀭𑀡𑁂, 𑀉𑀪𑀦𑀁 𑀉𑀪𑀺. ‘‘𑀤𑀼𑀦𑁆𑀤’’𑀇𑀢𑀺 𑀲𑀤𑁆𑀤𑁂𑀦 𑀉𑀪𑀺 𑀬𑀢𑁆𑀭 𑀲 𑀤𑀼𑀦𑁆𑀤𑀼𑀪𑀺. 𑀧𑀼𑀫𑀺𑀢𑁆𑀣𑀺𑀬𑀫𑁂𑀢𑁂 𑀤𑁆𑀯𑁂 [𑀲𑁂𑀭𑀻 𑀣𑀻, 𑀤𑀼𑀦𑁆𑀤𑀼𑀪𑀺 𑀧𑀼𑀫𑀸 (𑀅𑀫𑀭 𑁭.𑁬)]. 𑀤𑁆𑀯𑀬𑀁 𑀫𑀼𑀤𑀺𑀗𑁆𑀕𑁂. 𑀫𑀼𑀤𑀁 𑀫𑁄𑀤𑀁 𑀇𑀗𑁆𑀕𑀢𑀺 𑀕𑀘𑁆𑀙𑀢𑀺 𑀬𑁂𑀦𑀸𑀢𑀺 𑀫𑀼𑀤𑀺𑀗𑁆𑀕𑁄. 𑀫𑀼𑀭𑀸 𑀅𑀲𑀼𑀭𑀸 𑀚𑀸𑀢𑁄 𑀫𑀼𑀭𑀚𑁄.

𑀅𑀲𑁆𑀲 ¶ 𑀫𑀼𑀭𑀚𑀲𑁆𑀲 𑀪𑁂𑀤𑀸 𑀯𑀺𑀲𑁂𑀲𑀸 𑀆𑀮𑀺𑀗𑁆𑀕𑀗𑁆𑀓𑁆𑀬𑁄𑀤𑁆𑀥𑀓𑀸 𑀪𑀯𑀦𑁆𑀢𑀺. 𑀯𑀼𑀢𑁆𑀢𑀜𑁆𑀘 𑁋

‘‘𑀳𑀭𑀺𑀢𑀓𑁆𑀬𑀸𑀓𑀢𑀺 𑀢𑁆𑀯𑀗𑁆𑀓𑁆𑀬𑁄,

𑀬𑀯𑀫𑀚𑁆𑀛𑁄 𑀢𑀣𑁄’𑀤𑁆𑀥𑀓𑁄;

𑀆𑀮𑀺𑀗𑁆𑀕𑁆𑀬𑁄 𑀘𑁂𑀯 𑀕𑁄𑀧𑀼𑀘𑁆𑀙𑁄,

𑀆𑀓𑀢𑁆𑀬𑀸 𑀲𑀫𑁆𑀧𑀓𑀺𑀢𑁆𑀢𑀺𑀢𑁄’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸𑀬𑀫𑁆𑀧𑀺].

𑀆𑀮𑀺𑀗𑁆𑀕𑁆𑀬𑀢𑁂𑀢𑀺 𑀆𑀮𑀺𑀗𑁆𑀕𑁄, 𑀡𑁄. 𑀉𑀘𑁆𑀙𑀗𑁆𑀓𑁂 𑀪𑀯𑁄 𑀅𑀓𑁆𑀬𑁄. 𑀉𑀤𑁆𑀥𑀁 𑀓𑀢𑁆𑀯𑀸 𑀏𑀓𑁂𑀦 𑀫𑀼𑀔𑁂𑀦 𑀯𑀸𑀤𑀦𑀢𑁄 𑀉𑀤𑁆𑀥𑁄 𑀲𑀦𑁆𑀢𑁄 𑀓𑀸𑀬𑀢𑀺 𑀲𑀤𑁆𑀤𑀸𑀬𑀢𑀻𑀢𑀺 𑀉𑀤𑁆𑀥𑀓𑁄, 𑀉𑀤𑁆𑀥𑀲𑀤𑁆𑀤𑁄𑀬𑀁 𑀢𑀺𑀮𑀺𑀗𑁆𑀕𑀺𑀓𑁄. 𑀉𑀕𑁆𑀕𑀘𑁆𑀙𑀢𑀻𑀢𑀺 𑀉𑀤𑁆𑀥𑁄, 𑀢𑁄, 𑀕𑀫𑀺𑀲𑁆𑀲 𑀤𑁄, 𑀦𑁂𑀭𑀼𑀢𑁆𑀢𑁄. 𑀬𑁄 𑀢𑀼 𑀉𑀧𑀭𑀺𑀧𑀭𑀺𑀬𑀸𑀬𑁄 𑀉𑀤𑁆𑀥𑀁𑀲𑀤𑁆𑀤𑁄, 𑀲𑁄 𑀅𑀩𑁆𑀬𑀬𑀫𑁂𑀯.

𑀢𑀺𑀡𑀯𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀧𑀡𑀯𑀲𑁆𑀲 𑀦𑀸𑀫𑀸𑀦𑀺. 𑀢𑀦𑀼 𑀯𑀺𑀢𑁆𑀣𑀸𑀭𑁂, 𑀅𑀯𑁄, 𑀅𑀲𑁆𑀲 𑀇𑀢𑁆𑀢𑀁, 𑀡𑀢𑁆𑀢𑀜𑁆𑀘, 𑀢𑀺𑀡𑀯𑁄. 𑀫𑀸 𑀫𑀸𑀦𑁂 𑀲𑀤𑁆𑀤𑁂 𑀘, ‘‘𑀟𑀺𑀡𑁆𑀟𑀺’’𑀇𑀢𑀺 𑀫𑀸𑀬𑀢𑁂 𑀲𑀤𑁆𑀤𑀸𑀬𑀢𑁂𑀢𑀺 𑀟𑀺𑀡𑁆𑀟𑀺𑀫𑁄, 𑀡𑁄.

𑁧𑁪𑁪. ‘‘𑀆𑀮𑀫𑁆𑀩’’𑀇𑀢𑀺 𑀲𑀤𑁆𑀤𑀸𑀬𑀢𑁂𑀢𑀺 𑀆𑀮𑀫𑁆𑀩𑀭𑁄. ‘‘𑀆𑀮𑀫𑁆𑀩𑀭𑁄 𑀢𑀽𑀭𑀺𑀬𑀭𑀯𑁂, 𑀕𑀚𑁂𑀦𑁆𑀤𑀸𑀦𑀜𑁆𑀘 𑀕𑀚𑁆𑀚𑀺𑀢𑁂’’𑀢𑀺 [𑀅𑀫𑀭 𑁨𑁩.𑁧𑁬𑁭] 𑀳𑀺 𑀅𑀫𑀭𑀓𑁄𑀲 𑀦𑀸𑀦𑀢𑁆𑀣𑀲𑀗𑁆𑀕𑀳𑁂𑀲𑀼.

𑀯𑀻𑀡𑀸𑀤𑀻𑀦𑀁 𑀯𑀸𑀤𑀦𑀓𑀝𑁆𑀞𑀓𑀼𑀝𑀺𑀮𑀸𑀤𑀺𑀓𑀁 𑀓𑁄𑀡𑁄, 𑀓𑀼𑀡𑁆𑀬𑀢𑁂 𑀲𑀤𑁆𑀤𑀸𑀬𑀢𑁂𑀦𑁂𑀦𑀸𑀢𑀺 𑀓𑁄𑀡𑁄, 𑀡𑁄. ‘‘𑀤𑀤𑁆𑀤’’𑀇𑀢𑀺 𑀲𑀤𑁆𑀤𑀁 𑀓𑀭𑁄𑀢𑀻𑀢𑀺 𑀤𑀤𑁆𑀤𑀭𑀺, 𑀤𑀤𑁆𑀤𑀢𑀺 𑀯𑀸 𑀲𑀤𑁆𑀤𑀯𑀺𑀲𑁂𑀲𑁂𑀦 𑀧𑀭𑀺𑀡𑀫𑀢𑀻𑀢𑀺 𑀤𑀤𑁆𑀤𑀭𑀺, 𑀭𑀺. ‘‘𑀧𑀝’’𑀇𑀢𑀺 𑀲𑀤𑁆𑀤𑀁 𑀚𑀳𑀸𑀢𑀻𑀢𑀺 𑀧𑀝𑀳𑁄, 𑀧𑀝𑀁 𑀳𑀦𑁆𑀢𑀻𑀢𑀺 𑀯𑀸 𑀧𑀝𑀳𑁄. 𑀳𑀦 𑀳𑀺𑀁𑀲𑀸𑀕𑀢𑀻𑀲𑀼, 𑀓𑁆𑀯𑀺. 𑀅𑀧𑀭𑁂 𑀫𑀤𑁆𑀤𑀮𑀸𑀤𑀬𑁄 𑀪𑁂𑀭𑀺𑀧𑁆𑀧𑀪𑁂𑀤𑀸 ¶ . ‘‘𑀫𑀤𑁆𑀤’’𑀇𑀢𑀺 𑀲𑀤𑁆𑀤𑀁 𑀮𑀸𑀢𑀻𑀢𑀺 𑀫𑀤𑁆𑀤𑀮𑀸, 𑀮𑀸 𑀆𑀤𑀸𑀦𑁂, 𑀅. ‘‘𑀫𑀦𑁆𑀤𑀮𑀸’’𑀢𑀺𑀧𑀺 𑀧𑀸𑀞𑁄, 𑀫𑀦𑁆𑀤𑀁 𑀲𑀤𑁆𑀤𑀁 𑀮𑀸𑀢𑀻𑀢𑀺 𑀫𑀦𑁆𑀤𑀮𑀸. 𑀆𑀤𑀺𑀦𑀸 𑀟𑀫𑀭𑀼𑀆𑀤𑀬𑁄𑀧𑀺 𑀪𑁂𑀭𑀺𑀧𑁆𑀧𑀪𑁂𑀤𑀸 𑀯𑀺𑀜𑁆𑀜𑁂𑀬𑁆𑀬𑀸.

𑁧𑁪𑁫. 𑀚𑀦𑀧𑁆𑀧𑀺𑀬𑁂 𑀚𑀦𑁂𑀳𑀺 𑀧𑀺𑀬𑀸𑀬𑀺𑀢𑀩𑁆𑀩𑁂 𑀯𑀺𑀫𑀤𑁆𑀤𑁄𑀝𑁆𑀞𑁂 𑀯𑀺𑀮𑁂𑀧𑀦𑀓𑀼𑀗𑁆𑀓𑀼𑀫𑀸𑀤𑀻𑀦𑀁, 𑀦𑀸𑀦𑀸𑀕𑀦𑁆𑀥𑀤𑀩𑁆𑀩𑀸𑀦𑀜𑁆𑀘 𑀯𑀺𑀫𑀤𑁆𑀤𑀦𑁄𑀩𑁆𑀪𑀽𑀢𑁂 𑀧𑀭𑀺𑀫𑀮𑁄 𑀪𑀯𑁂, 𑀧𑀭𑀺𑀫𑀚𑁆𑀚𑀢𑀺 𑀧𑀯𑀢𑁆𑀢𑀬𑀢𑁆𑀬𑀸𑀲𑀬𑀦𑁆𑀢𑀺, 𑀅, 𑀦𑁂𑀭𑀼𑀢𑁆𑀢𑁄, 𑀫𑀮, 𑀫𑀮𑁆𑀮 𑀥𑀸𑀭𑀡𑁂 𑀯𑀸. 𑀧𑀭𑀺𑀫𑀮𑁆𑀬𑀢𑁂 𑀥𑀸𑀭𑀻𑀬𑀢𑁂𑀢𑀺, 𑀡𑁄. 𑀯𑀺𑀫𑀤𑁆𑀤𑀕𑁆𑀕𑀳𑀡𑁂𑀦 𑀯𑀸𑀧𑀺𑀓𑀽𑀧𑀸𑀤𑀺𑀦𑁄 [𑀯𑀺𑀫𑀤𑁆𑀤𑀕𑀦𑁆𑀥𑀸𑀤𑀺𑀦𑁄 (𑀓.)] 𑀦𑀺𑀭𑀸𑀲𑁄, 𑀚𑀦𑀕𑁆𑀕𑀳𑀡𑁂𑀦 𑀫𑀓𑁆𑀔𑀺𑀓𑀸𑀤𑀺𑀦𑁄. 𑀲𑁄 𑀧𑀭𑀺𑀫𑀮𑁄 𑀕𑀦𑁆𑀥𑁄 𑀤𑀽𑀭𑀕𑀸𑀫𑀻 𑀅𑀢𑀺𑀦𑀺𑀳𑀸𑀭𑀻 𑀅𑀢𑀺𑀤𑀽𑀭𑀧𑀸𑀢𑀻 𑀆𑀫𑁄𑀤𑁄 𑀯𑀼𑀘𑁆𑀘𑀢𑁂, 𑀆𑀫𑁄𑀤𑀦𑁆𑀢𑁂 𑀅𑀦𑁂𑀦, 𑀡𑁄. 𑀇𑀢𑁄 𑀧𑀭𑀁 𑀇𑀝𑁆𑀞𑀕𑀦𑁆𑀥𑀸𑀤𑀬𑁄 𑀯𑀺𑀲𑁆𑀲𑀲𑀤𑁆𑀤𑀧𑀭𑀺𑀬𑀦𑁆𑀢𑀸 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼 𑀯𑀢𑁆𑀢𑀦𑁆𑀢𑁂.

𑁧𑁪𑁬. 𑀘𑀢𑀼𑀓𑁆𑀓𑀁 𑀇𑀝𑁆𑀞𑀕𑀦𑁆𑀥𑁂. 𑀇𑀝𑁆𑀞𑁄 𑀕𑀦𑁆𑀥𑁄 𑀇𑀝𑁆𑀞𑀕𑀦𑁆𑀥𑁄, 𑀅𑀣 𑀯𑀸 𑀇𑀝𑁆𑀞𑁄 𑀕𑀦𑁆𑀥𑁄 𑀅𑀲𑁆𑀲 𑀇𑀝𑁆𑀞𑀕𑀦𑁆𑀥𑁄. 𑀲𑀼𑀝𑁆𑀞𑀼 𑀭𑀪𑀦𑁆𑀢𑀺 𑀢𑀼𑀲𑁆𑀲𑀦𑁆𑀢𑁆𑀬𑀦𑁂𑀦𑀸𑀢𑀺 𑀲𑀼𑀭𑀪𑀺, 𑀇. 𑀲𑀼𑀦𑁆𑀤𑀭𑁄 𑀕𑀦𑁆𑀥𑁄 𑀅𑀲𑁆𑀲 𑀲𑀼𑀕𑀦𑁆𑀥𑁄, 𑀲𑀼𑀕𑀦𑁆𑀥𑀺 𑀘, 𑀅𑀦𑁆𑀢𑀲𑁆𑀲𑀺𑀓𑀸𑀭𑀸𑀤𑁂𑀲𑁄.

𑀤𑁆𑀯𑀬𑀁 𑀤𑀼𑀕𑁆𑀕𑀦𑁆𑀥𑁂. 𑀧𑀽𑀢𑀺 𑀕𑀦𑁆𑀥𑁄 𑀅𑀲𑁆𑀲, 𑀧𑀼𑀩𑁆𑀩𑁂 𑀯𑀺𑀬 𑀇𑀓𑀸𑀭𑀸𑀤𑁂𑀲𑁄, 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑀁 𑀅𑀲𑁆𑀲𑀢𑁆𑀣𑁆𑀬𑀢𑁆𑀣𑁂𑀧𑀺 𑀓𑀢𑁆𑀢𑀼𑀫𑀺𑀘𑁆𑀙𑀦𑁆𑀢𑀺, 𑀧𑀓𑁆𑀭𑀺𑀬𑀸𑀮𑀸𑀖𑀯𑀢𑁆𑀣𑀁 𑀩𑀳𑀼𑀩𑁆𑀩𑀻𑀳𑀺𑀬𑁂𑀯 𑀦𑁆𑀬𑀸𑀬𑁄𑀢𑀺. 𑀤𑀼𑀝𑁆𑀞𑀼 𑀕𑀦𑁆𑀥𑁄 𑀅𑀲𑁆𑀲𑀸𑀢𑀺 ¶ 𑀤𑀼𑀕𑁆𑀕𑀦𑁆𑀥𑁄, 𑀢𑁂𑀦 𑀯𑀼𑀢𑁆𑀢𑀁 𑀓𑀘𑁆𑀘𑀸𑀬𑀦𑁂𑀦 𑁋 ‘‘𑀓𑀫𑁆𑀫𑀥𑀸𑀭𑀬𑀫𑀦𑁆𑀢𑀢𑁆𑀣𑀺𑀬𑁂𑀳𑀺 𑀩𑀳𑀼𑀩𑁆𑀩𑀻𑀳𑀺 𑀮𑀖𑀼𑀢𑀭𑁄’’𑀢𑀺. 𑀅𑀜𑁆𑀜𑁂 𑀢𑀼 𑀮𑀸𑀖𑀯’𑀫𑀦𑀸𑀤𑀭𑀫𑀸𑀦𑀸 𑀇𑀘𑁆𑀙𑀦𑁆𑀢𑁂𑀯 𑀫𑀦𑁆𑀢𑀢𑁆𑀣𑀺𑀬𑀁. 𑀤𑀼𑀯𑀺𑀥𑁄 𑀯𑀸 𑀯𑀸𑀘𑁆𑀘𑀥𑀫𑁆𑀫𑁄 𑀮𑀳𑀼 𑀕𑀭𑀼 𑀘, 𑀢𑀢𑁆𑀭 𑀩𑀳𑀼𑀩𑁆𑀩𑀻𑀳𑀺𑀦𑀸 𑀮𑀳𑀼, 𑀓𑀫𑁆𑀫𑀥𑀸𑀭𑀬𑀫𑀦𑁆𑀢𑀢𑁆𑀣𑀺𑀬𑁂𑀦𑀕𑀭𑀼. 𑀓𑀺𑀜𑁆𑀘 𑀩𑀳𑀼𑀩𑁆𑀩𑀻𑀳𑀺𑀦𑀸 𑀅𑀢𑀺𑀲𑀸𑀬𑀦𑀸𑀤𑁆𑀬𑀢𑁆𑀣𑁄 𑀦 𑀕𑀫𑁆𑀬𑀢𑁂𑀢𑀺 𑀅𑀯𑀲𑁆𑀲𑀁 𑀢𑀧𑁆𑀧𑀝𑀺𑀧𑀸𑀤𑀦𑀸𑀬 𑀓𑀫𑁆𑀫𑀥𑀸𑀭𑀬𑀧𑀼𑀩𑁆𑀩𑀓𑁄 𑀫𑀦𑁆𑀢𑀢𑁆𑀣𑀺𑀬𑁂𑀯 𑀤𑀝𑁆𑀞𑀩𑁆𑀩𑁄.

𑀤𑁆𑀯𑀬𑀁 𑀘𑀺𑀢𑀸𑀥𑀽𑀫𑀸𑀤𑀺𑀕𑀦𑁆𑀥𑁂. 𑀯𑀺𑀲 𑀯𑀺𑀧𑁆𑀧𑀬𑁄𑀕𑁂, 𑀲𑁄. 𑀆𑀫𑀲𑁆𑀲 𑀯𑀲𑀸𑀤𑀺𑀯𑀢𑁆𑀣𑀼𑀦𑁄 𑀕𑀦𑁆𑀥𑁄 𑀢𑀁𑀬𑁄𑀕𑀸, 𑀇, 𑀬𑀁𑀲𑀤𑁆𑀤𑁄 𑀢𑀲𑁆𑀲 𑀦𑀧𑀼𑀁𑀲𑀓𑀢𑁆𑀢𑀤𑀻𑀧𑀓𑁄.

𑁧𑁪𑁭. 𑀓𑀼𑀗𑁆𑀓𑀼𑀫𑀸𑀤𑀬𑁄 𑀘𑀢𑁆𑀢𑀸𑀭𑁄 𑀘𑀢𑀼𑀚𑁆𑀚𑀸𑀢𑀺𑀕𑀦𑁆𑀥𑁄 𑀦𑀸𑀫. 𑀓𑀼𑀓, 𑀯𑀓 𑀆𑀤𑀸𑀦𑁂, 𑀉𑀫𑁄, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄 𑀘, 𑀓𑀼𑀗𑁆𑀓𑀼𑀫𑀁, 𑀮𑁄𑀳𑀺𑀢𑀘𑀦𑁆𑀤𑀦𑀁, 𑀬𑀁 ‘‘𑀓𑀲𑁆𑀫𑀻𑀭𑀚’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀓𑀫𑀺𑀲𑁆𑀲 𑀯𑀸 𑀓𑀼𑀗𑁆𑀓𑀸𑀤𑁂𑀲𑁄, 𑀓𑀼𑀗𑁆𑀓𑀼𑀫𑀁. 𑀬𑀼 𑀫𑀺𑀲𑁆𑀲𑀦𑁂, 𑀬𑀼, 𑀬𑀯𑀦𑀁, 𑀢𑀲𑁆𑀲 𑀧𑀼𑀧𑁆𑀨𑀁 𑀬𑀯𑀦𑀧𑀼𑀧𑁆𑀨𑀁, 𑀤𑁂𑀯𑀓𑀼𑀲𑀼𑀫𑀁, 𑀬𑀯𑀦𑀤𑁂𑀲𑁂 𑀚𑀸𑀢𑀁 𑀧𑀼𑀧𑁆𑀨𑀦𑁆𑀢𑀺 𑀯𑀸 𑀬𑀯𑀦𑀧𑀼𑀧𑁆𑀨𑀁. 𑀬𑀁 ‘‘𑀮𑀯𑀗𑁆𑀕’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀬𑀁 𑀧𑀼𑀧𑁆𑀨𑀁 𑀦𑀼𑀳𑀻𑀧𑀼𑀧𑁆𑀨𑀲𑀫𑀸𑀦𑀁. 𑀢𑀕𑀺 𑀕𑀢𑁆𑀬𑀢𑁆𑀣𑁄 𑀤𑀡𑁆𑀟𑀓𑁄 𑀥𑀸𑀢𑀼, 𑀅𑀭𑁄, 𑀢𑀕𑀭𑀁, 𑀓𑀼𑀝𑀺𑀮𑀁. 𑀢𑀭𑀼𑀢𑁄 𑀚𑀸𑀢𑁄 𑀢𑀼𑀭𑀼𑀓𑁆𑀔𑁄, 𑀔𑁄, 𑀉𑀢𑁆𑀢𑀜𑁆𑀘, 𑀲𑀮𑁆𑀮𑀓𑀻𑀤𑀯𑁄 𑀳𑀺 ‘‘𑀢𑀼𑀭𑀼𑀓𑁆𑀔𑁄’’𑀢𑀺 𑀯𑀼𑀢𑁆𑀢𑁄.

𑁧𑁪𑁮. 𑀧𑀚𑁆𑀚𑁂𑀦 𑀙𑀭𑀲𑀸𑀦𑀁 𑀦𑀸𑀫𑀸𑀦𑀺. 𑀓𑀁 𑀧𑀸𑀦𑀻𑀬𑀁 𑀲𑁂𑀯𑀢𑁂𑀢𑀺 𑀓𑀲𑀸𑀯𑁄, 𑀅𑀯𑁄, 𑀅𑀣 𑀯𑀸 𑀓𑀁 𑀲𑀯𑀸𑀧𑁂𑀢𑀻𑀢𑀺 𑀓𑀲𑀸𑀯𑁄 𑀲𑀼 ¶ 𑀲𑀯𑀦𑁂. 𑀢𑀼𑀯𑀭𑁄𑀧𑀺 𑀓𑀲𑀸𑀬𑁄𑀧𑀺 𑀓𑀲𑀸𑀯𑀧𑀭𑀺𑀬𑀸𑀬𑁄. 𑀢𑀺𑀚 𑀦𑀺𑀲𑀸𑀦𑁂, 𑀢𑁄, 𑀢𑀺𑀢𑁆𑀢𑁄, 𑀓𑀝𑀼. 𑀫𑀥𑀼 𑀫𑀸𑀥𑀼𑀭𑀺𑀬𑀁, 𑀢𑀁𑀬𑁄𑀕𑀸 𑀫𑀥𑀼𑀭𑁄. 𑀮𑀼𑀦𑀸𑀢𑀺 𑀚𑀴𑀢𑁆𑀢𑀦𑁆𑀢𑀺 𑀮𑀯𑀡𑁄, 𑀬𑀼. 𑀅𑀫𑁆𑀩𑀲𑀤𑁆𑀤𑁂, 𑀅𑀭𑁄, 𑀇𑀢𑁆𑀢𑀁, 𑀮𑀢𑁆𑀢𑀜𑁆𑀘. 𑀓𑀝 𑀕𑀢𑀺𑀬𑀁, 𑀡𑁆𑀯𑀼, 𑀉𑀢𑁆𑀢𑀁. 𑀇𑀫𑁂 𑀙 𑀭𑀲𑀸 𑀦𑀸𑀫 𑀯𑀼𑀘𑁆𑀘𑀦𑁆𑀢𑀺. 𑀢𑀩𑁆𑀩𑀢𑀺 𑀤𑀩𑁆𑀩𑁂 𑀓𑀲𑀸𑀯𑀸𑀤𑀺𑀲𑀤𑁆𑀤𑀸 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼 𑀯𑀢𑁆𑀢𑀦𑁆𑀢𑀺.

𑁧𑁪𑁯. 𑀤𑁆𑀯𑀬𑀁 𑀨𑁄𑀝𑁆𑀞𑀩𑁆𑀩𑁂. 𑀨𑀼𑀲𑀺𑀢𑀩𑁆𑀩𑁄 𑀨𑀲𑁆𑀲𑁄, 𑀨𑁄𑀝𑁆𑀞𑀩𑁆𑀩𑁄 𑀘, 𑀢𑀩𑁆𑀩𑁄, 𑀲𑀲𑁆𑀲 𑀝𑁄, 𑀢𑀲𑁆𑀲 𑀞𑁄. 𑀢𑀺𑀓𑀁 𑀯𑀺𑀲𑀬𑀺𑀫𑁆𑀳𑀺. 𑀯𑀺𑀲𑀬𑁄 𑀅𑀲𑁆𑀲 𑀕𑀬𑁆𑀳𑀝𑁆𑀞𑁂𑀦𑀸𑀢𑁆𑀣𑀻𑀢𑀺 𑀯𑀺𑀲𑀬𑀺. 𑀉𑀔𑀢𑀺 𑀕𑀘𑁆𑀙𑀢𑀺 𑀯𑀺𑀲𑀬𑁂𑀢𑀺 𑀅𑀓𑁆𑀔𑀁, 𑀉𑀲𑁆𑀲𑀢𑁆𑀢𑀁 𑀤𑁆𑀯𑀺𑀢𑁆𑀢𑀜𑁆𑀘, 𑀦𑀢𑁆𑀣𑀺 𑀔𑀁 𑀯𑁂𑀤𑀦𑀸 𑀏𑀢𑁆𑀣𑀸𑀢𑀺 𑀯𑀸 𑀅𑀓𑁆𑀔𑀁, 𑀦 𑀳𑀺 𑀲𑀼𑀔𑀯𑁂𑀤𑀦𑀸𑀤𑀬𑁄 𑀲𑀫𑁆𑀧𑀬𑁄𑀕𑀯𑀲𑁂𑀦 𑀧𑀜𑁆𑀘𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀚𑀯𑀦𑀸𑀤𑀻𑀲𑀼 𑀏𑀯 𑀧𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀢𑀣𑀸 𑀯𑀼𑀢𑁆𑀢𑀁, 𑀫𑀦𑀺𑀦𑁆𑀤𑁆𑀭𑀺𑀬𑁂 𑀢𑀽𑀧𑀘𑀸𑀭𑀸 [𑀫𑀦𑀺𑀦𑁆𑀤𑁆𑀭𑀺𑀬𑁂𑀲𑀼𑀧𑀘𑀸𑀭𑀸 (𑀓.)] 𑀅𑀓𑁆𑀔𑀁. 𑀇𑀦𑁆𑀤𑁄 𑀅𑀢𑁆𑀢𑀸, 𑀢𑀲𑁆𑀲 𑀮𑀺𑀗𑁆𑀕𑀁 𑀇𑀦𑁆𑀤𑁆𑀭𑀺𑀬𑀁, 𑀇𑀬𑁄. 𑀦𑀸’𑀦𑀦𑁆𑀢𑀭𑁂𑀦 𑀧𑀬𑁄𑀚𑀓𑀁 𑀘𑀓𑁆𑀔𑀸𑀤𑀬𑁄 𑀩𑁆𑀬𑀸𑀧𑀸𑀭𑀬𑀦𑁆𑀢𑁂, 𑀢𑀲𑁆𑀫𑀸 𑀅𑀢𑁆𑀣𑀺 𑀅𑀢𑁆𑀢𑀸 𑀘𑀓𑁆𑀔𑀸𑀤𑀻𑀦𑀁 𑀧𑀬𑁄𑀚𑀓𑁄𑀢𑀺 𑀘𑀓𑁆𑀔𑀸𑀤𑀺𑀓𑀁 𑀮𑀺𑀗𑁆𑀕𑀫𑀢𑁆𑀢𑀦𑁄 𑀪𑀯𑀢𑀻𑀢𑀺 𑀦𑀺𑀓𑀸𑀬𑀦𑁆𑀢𑀭𑀺𑀓𑀸. 𑀲𑀬𑀁 𑀢𑀺𑀓𑁆𑀔𑀫𑀦𑁆𑀤𑀸𑀤𑀺𑀪𑀸𑀯𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀢𑀺𑀓𑁆𑀔𑀫𑀦𑁆𑀤𑀸𑀤𑀺𑀪𑀸𑀯𑀲𑀫𑁆𑀪𑀯𑀢𑁄 𑀢𑁂𑀲𑀼 𑀇𑀦𑁆𑀤𑀢𑀺 𑀧𑀭𑀫𑀺𑀲𑁆𑀲𑀭𑀺𑀬𑀁 𑀓𑀭𑁄𑀢𑀻𑀢𑀺 𑀯𑀸 𑀇𑀦𑁆𑀤𑁆𑀭𑀺𑀬𑀁.

𑀙𑀓𑁆𑀓𑀁 𑀦𑀬𑀦𑁂. 𑀦𑁂𑀢𑀺 𑀅𑀢𑁆𑀢𑀦𑁄 𑀦𑀺𑀲𑁆𑀲𑀺𑀢𑀁 𑀧𑀼𑀕𑁆𑀕𑀮𑀦𑁆𑀢𑀺 𑀦𑀬𑀦𑀁, 𑀬𑀼. 𑀅𑀲𑀼 𑀩𑁆𑀬𑀸𑀧𑀦𑁂, 𑀅𑀲𑀢𑀺 𑀯𑀺𑀲𑀬𑁂𑀲𑀼 𑀩𑁆𑀬𑀸𑀧𑀻 𑀯𑀺𑀬 𑀪𑀯𑀢𑀻𑀢𑀺 𑀅𑀓𑁆𑀔𑀺, 𑀲𑀲𑁆𑀲 𑀓𑁄, 𑀅𑀣 𑀯𑀸 𑀅𑀓𑁆𑀔 𑀩𑁆𑀬𑀸𑀧𑀦𑀤𑀲𑁆𑀲𑀦𑁂𑀲𑀼, 𑀅𑀓𑁆𑀔𑀢𑀺 𑀯𑀺𑀲𑀬𑁂𑀲𑀼 𑀩𑁆𑀬𑀸𑀧𑀻𑀪𑀯𑀢𑀺, 𑀅𑀓𑁆𑀔𑀢𑀺 𑀯𑀸 𑀧𑀲𑁆𑀲𑀢𑀺 𑀏𑀢𑁂𑀦𑀸𑀢𑀺 ¶ 𑀅𑀓𑁆𑀔𑀺. 𑀦𑁂𑀢𑀻𑀢𑀺 𑀦𑁂𑀢𑁆𑀢𑀁. 𑀮𑁄𑀘𑀢𑀺 𑀧𑀲𑁆𑀲𑀢𑀺 𑀏𑀢𑁂𑀦𑀸𑀢𑀺 𑀮𑁄𑀘𑀦𑀁. 𑀅𑀘𑁆𑀙 𑀤𑀲𑁆𑀲𑀦𑀩𑁆𑀬𑀸𑀧𑀦𑁂𑀲𑀼, 𑀇, 𑀅𑀘𑁆𑀙𑀺. 𑀘𑀓𑁆𑀔𑀢𑀺 𑀅𑀲𑁆𑀲𑀸𑀤𑁂𑀢𑀺 𑀭𑀽𑀧𑀦𑁆𑀢𑀺 𑀘𑀓𑁆𑀔𑀼, 𑀉, 𑀘𑀓𑁆𑀔𑀢𑀺 𑀧𑀲𑁆𑀲𑀢𑀻𑀢𑀺 𑀯𑀸 𑀘𑀓𑁆𑀔𑀼.

𑁧𑁫𑁦. 𑀧𑀜𑁆𑀘𑀓𑀁 𑀲𑁄𑀢𑁂. 𑀲𑀼𑀡𑀸𑀢𑀺 𑀏𑀢𑁂𑀦𑀸𑀢𑀺 𑀲𑁄𑀢𑀁. 𑀲𑀤𑁆𑀤𑁄 𑀕𑀬𑁆𑀳𑀢𑁂 𑀅𑀦𑁂𑀦𑀸𑀢𑀺 𑀲𑀤𑁆𑀤𑀕𑁆𑀕𑀳𑁄. 𑀓𑀭 𑀓𑀭𑀡𑁂, 𑀡𑁄, 𑀓𑀡𑁆𑀡𑁄, 𑀓𑀡𑁆𑀡𑀢𑀺 𑀲𑀼𑀡𑀸𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀓𑀡𑁆𑀡𑁄, 𑀓𑀡𑁆𑀡 𑀲𑀯𑀦𑁂. 𑀲𑀼𑀡𑀸𑀢𑀺 𑀬𑁂𑀦𑀸𑀢𑀺 𑀲𑀯𑀦𑀁, 𑀲𑀼𑀢𑀺 𑀘, 𑀬𑀼,𑀢𑀺 𑀘.

𑀘𑀢𑀼𑀓𑁆𑀓𑀁 𑀖𑀸𑀦𑁂. 𑀦𑀲𑀦𑁆𑀢𑀺 𑀏𑀢𑀸𑀬𑀸𑀢𑀺 𑀦𑀢𑁆𑀣𑀼, 𑀣𑀼, 𑀆, 𑀦𑀸𑀲𑀸. 𑀡𑁆𑀯𑀼, 𑀅𑀓 𑀘 𑀇𑀓𑀸𑀭𑁄 𑀘 𑀦𑀸𑀲𑀺𑀓𑀸. 𑀖𑀸 𑀕𑀦𑁆𑀥𑁄𑀧𑀸𑀤𑀸𑀦𑁂, 𑀖𑀸𑀬𑀢𑀺 𑀕𑀦𑁆𑀥𑁄𑀧𑀸𑀤𑀸𑀦𑀁 𑀓𑀭𑁄𑀢𑀻𑀢𑀺 𑀖𑀸𑀦𑀁, 𑀬𑀼, 𑀖𑀸𑀬𑀦𑁆𑀢𑁆𑀬𑀦𑁂𑀦𑀸𑀢𑀺 𑀯𑀸 𑀖𑀸𑀦𑀁.

𑀤𑁆𑀯𑀬𑀁 𑀚𑀺𑀯𑁆𑀳𑀸𑀬𑀁. 𑀚𑀻𑀯𑀢𑀺 𑀏𑀢𑀸𑀬𑀸𑀢𑀺 𑀚𑀺𑀯𑁆𑀳𑀸, 𑀳𑁄, 𑀚𑀻𑀯 𑀧𑀸𑀡𑀥𑀸𑀭𑀡𑁂. 𑀚𑀻𑀯𑀺𑀢𑀦𑀺𑀫𑀺𑀢𑁆𑀢𑀁 𑀭𑀲𑁄 𑀚𑀻𑀯𑀺𑀢𑀁 𑀦𑀸𑀫, 𑀢𑀁 𑀅𑀯𑁆𑀳𑀸𑀬𑀢𑀻𑀢𑀺 𑀯𑀸 𑀚𑀺𑀯𑁆𑀳𑀸, 𑀯𑀡𑁆𑀡𑀮𑁄𑀧𑁄. 𑀭𑀲𑀦𑁆𑀢𑀺 𑀏𑀢𑀸𑀬𑀸𑀢𑀺 𑀭𑀲𑀦𑀸, 𑀭𑀲 𑀅𑀲𑁆𑀲𑀸𑀤𑀦𑁂, 𑀭𑀲𑀁 𑀚𑀸𑀦𑀸𑀢𑀻𑀢𑀺 𑀯𑀸 𑀭𑀲𑀦𑀸, 𑀜𑀸𑀲𑁆𑀲 𑀦𑀸, 𑀦𑀻 𑀦𑀬𑁂 𑀯𑀸, 𑀅.

𑁧𑁫𑁧. 𑀧𑀚𑁆𑀚𑀁 𑀲𑀭𑀻𑀭𑁂. 𑀲𑀭𑀢𑀺 𑀕𑀘𑁆𑀙𑀢𑀺, 𑀲𑀭𑀦𑁆𑀢𑀺 𑀯𑀸 𑀢𑀁 𑀳𑀺𑀁𑀲𑀦𑁆𑀢𑀻𑀢𑀺 𑀲𑀭𑀻𑀭𑀁, 𑀈𑀭𑁄. 𑀯𑀧 𑀩𑀻𑀚𑀲𑀦𑁆𑀢𑀸𑀦𑁂. 𑀯𑀧𑀢𑀺 𑀓𑀼𑀲𑀮𑀸𑀓𑀼𑀲𑀮𑀩𑀻𑀚𑀫𑁂𑀢𑁆𑀣𑀸𑀢𑀺 𑀯𑀧𑀼, 𑀉. 𑀕𑀘𑁆𑀙𑀢𑀺, 𑀕𑀡𑁆𑀳𑀸𑀢𑀺 𑀯𑀸 𑀓𑀼𑀲𑀮𑀸𑀓𑀼𑀲𑀮𑀫𑁂𑀢𑁂𑀦𑀸𑀢𑀺 ¶ 𑀕𑀢𑁆𑀢𑀁, 𑀕𑀫𑀼 𑀕𑀢𑀺𑀬𑀁, 𑀕𑀳 𑀉𑀧𑀸𑀤𑀸𑀦𑁂 𑀯𑀸. ‘‘𑀅𑀢𑁆𑀢𑀸’’𑀢𑀺 𑀅𑀪𑀺𑀥𑀸𑀦𑀁, 𑀩𑀼𑀤𑁆𑀥𑀺 𑀘 𑀪𑀯𑀦𑁆𑀢𑀺 𑀏𑀢𑀲𑁆𑀫𑀸𑀢𑀺 𑀅𑀢𑁆𑀢𑀪𑀸𑀯𑁄. 𑀯𑀼𑀡𑁄𑀢𑀺 𑀲𑀁𑀯𑀭𑀢𑀺 𑀏𑀢𑁆𑀣𑀸𑀢𑀺 𑀩𑁄𑀦𑁆𑀤𑀺, 𑀯𑀼 𑀲𑀁𑀯𑀭𑀡𑁂, 𑀤𑀺, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄. 𑀯𑀺𑀯𑀺𑀥𑀁 𑀕𑀡𑁆𑀳𑀸𑀢𑀺 𑀏𑀢𑁆𑀣𑀸𑀢𑀺 𑀯𑀺𑀕𑁆𑀕𑀳𑁄. 𑀤𑀺𑀳 𑀉𑀧𑀘𑀬𑁂, 𑀤𑀺𑀳𑀢𑀺 𑀯𑀟𑁆𑀠𑀢𑀺 𑀏𑀢𑁆𑀣 𑀓𑀼𑀲𑀮𑀸𑀓𑀼𑀲𑀮𑀦𑁆𑀢𑀺 𑀤𑁂𑀳𑀁. 𑀅𑀬𑀁 𑀤𑁂𑀳𑀲𑀤𑁆𑀤𑁄 𑀧𑀼𑀭𑀺𑀲𑁂 𑀧𑀼𑀮𑁆𑀮𑀺𑀗𑁆𑀕𑁂𑀯𑀢𑁆𑀢𑀢𑀺. 𑀓𑀼𑀘𑁆𑀙𑀺𑀢𑀸𑀦𑀁 𑀆𑀬𑁄 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀓𑀸𑀬𑁄. 𑀢𑀦𑀼 𑀯𑀺𑀢𑁆𑀣𑀸𑀭𑁂, 𑀉, 𑀢𑀦𑀼, 𑀢𑀦𑀼𑀲𑀤𑁆𑀤𑁄𑀬𑀁 𑀇𑀢𑁆𑀣𑀺𑀬𑀁. 𑀏𑀢𑁆𑀣𑀸𑀧𑀺 𑀯𑀸𑀲𑀤𑁆𑀤𑁄 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄. ‘‘𑀅𑀗𑁆𑀕𑁂𑀦𑀸𑀗𑁆𑀕𑀁 𑀢𑀦𑀼 𑀘 𑀢𑀦𑀼𑀦𑀸 𑀕𑀸𑀴𑁆𑀳𑀢𑀢𑁆𑀢𑁂𑀦 𑀢𑀢𑁆𑀢’’𑀦𑁆𑀢𑀺 [𑀉𑀢𑁆𑀢𑀭𑀫𑁂𑀖 𑁪𑁨] 𑀳𑀺 𑀫𑁂𑀖𑀤𑀽𑀢𑁂 𑀯𑀼𑀢𑁆𑀢𑀁. 𑀓𑀴𑁂 𑀭𑁂𑀢𑀲𑀺 𑀯𑀭𑀁 𑀓𑀴𑁂𑀯𑀭𑀁, 𑀅𑀮𑀼𑀢𑁆𑀢𑀲𑀫𑀸𑀲𑁄𑀬𑀁.

𑁧𑁫𑁨-𑁧𑁫𑁪. 𑀙𑀓𑁆𑀓𑀁 𑀘𑀺𑀢𑁆𑀢𑁂. 𑀘𑀺𑀦𑁆𑀢𑁂𑀢𑀻𑀢𑀺 𑀘𑀺𑀢𑁆𑀢𑀁. 𑀘𑁂𑀢𑁄 𑀘, 𑀦𑀮𑁄𑀧𑁄. 𑀫𑀦𑀢𑀺 𑀚𑀸𑀦𑀸𑀢𑀻𑀢𑀺 𑀫𑀦𑁄. 𑀯𑀺𑀚𑀸𑀦𑀸𑀢𑀻𑀢𑀺 𑀯𑀺𑀜𑁆𑀜𑀸𑀡𑀁, 𑀬𑀼. 𑀳𑀭𑀢𑀺 𑀅𑀢𑁆𑀢𑀦𑁄 𑀆𑀥𑀸𑀭𑀦𑁆𑀢𑀺 𑀳𑀤𑀬𑀁, 𑀬𑁄, 𑀭𑀲𑁆𑀲 𑀤𑁄 𑀘. 𑀫𑀦𑁄 𑀏𑀯 𑀫𑀸𑀦𑀲𑀁, 𑀲𑀓𑀢𑁆𑀣𑁂 𑀲𑀡.

𑀘𑀼𑀤𑁆𑀤𑀲 𑀩𑀼𑀤𑁆𑀥𑀸𑀔𑁆𑀬𑀲𑁆𑀲 𑀕𑀼𑀡𑀲𑁆𑀲 𑀦𑀸𑀫𑀸𑀦𑀺. 𑀛𑀸𑀬𑀢𑀻𑀢𑀺 𑀥𑀻, 𑀛𑁂 𑀘𑀺𑀦𑁆𑀢𑀸𑀬𑀁, 𑀛𑀲𑁆𑀲 𑀥𑁄, 𑀦𑀤𑀸𑀤𑀺, 𑀥𑀻, 𑀥𑀸𑀭𑁂𑀢𑀻𑀢𑀺 𑀯𑀸 𑀥𑀻, 𑀓𑁆𑀯𑀺, 𑀦𑀤𑀸𑀤𑀺, 𑀥𑀻 ¶ , 𑀲𑀗𑁆𑀔𑀸𑀭𑁂𑀲𑀼 𑀥𑀻𑀓𑀸𑀭𑁄 𑀚𑀸𑀬𑀢𑀺 𑀏𑀢𑀸𑀬𑀸𑀢𑀺 𑀯𑀸 𑀥𑀻, 𑀦𑀤𑀸𑀤𑀺. 𑀧𑀜𑁆𑀜𑀸𑀬𑀢𑁂 𑀏𑀢𑀸𑀬𑀸𑀢𑀺 𑀧𑀜𑁆𑀜𑀸, 𑀅. 𑀩𑀼𑀚𑁆𑀛𑀢𑁂 𑀢𑀸𑀬𑀸𑀢𑀺 𑀩𑀼𑀤𑁆𑀥𑀺,𑀢𑀺. 𑀫𑁂𑀥 𑀳𑀺𑀁 𑀲𑀸𑀲𑀗𑁆𑀕𑀫𑁂𑀲𑀼, 𑀓𑀭𑀡𑁂 𑀅, 𑀫𑀺 𑀳𑀺𑀁𑀲𑀸𑀬𑀁 𑀯𑀸, 𑀥𑁄, 𑀫𑁂𑀥𑀸. 𑀫𑀦𑀢𑀺 𑀚𑀸𑀦𑀸𑀢𑀻𑀢𑀺 𑀫𑀢𑀺, 𑀫𑀼𑀢𑀺 𑀘, 𑀉𑀢𑁆𑀢𑀁, 𑀫𑀼𑀦𑀸𑀢𑀻𑀢𑀺 𑀯𑀸 𑀫𑀼𑀢𑀺, 𑀫𑀼𑀦 𑀜𑀸𑀡𑁂,𑀢𑀺, 𑀫𑀼𑀢𑀺. 𑀪𑀽 𑀲𑀢𑁆𑀢𑀸𑀬𑀁, 𑀭𑀺, 𑀦𑀤𑀸𑀤𑀺, 𑀪𑀽𑀭𑀻, 𑀪𑀽𑀲𑀗𑁆𑀔𑀸𑀢𑁂 𑀅𑀢𑁆𑀣𑁂 𑀭𑀫𑀢𑀻𑀢𑀺 𑀯𑀸 𑀪𑀽𑀭𑀻, 𑀓𑁆𑀯𑀺, 𑀦𑀤𑀸𑀤𑀺. 𑀫𑀦𑀢𑀺 𑀚𑀸𑀦𑀸𑀢𑀻𑀢𑀺 𑀫𑀦𑁆𑀢𑀸, 𑀅𑀦𑁆𑀢, 𑀆. 𑀯𑀺𑀤𑀢𑀺 𑀚𑀸𑀦𑀸𑀢𑀻𑀢𑀺 𑀯𑀺𑀚𑁆𑀚𑀸, 𑀧𑀩𑁆𑀩𑀚𑁆𑀚𑀸𑀤𑀺𑀦𑀸 𑀲𑀺𑀤𑁆𑀥𑀁. 𑀬𑀼 𑀫𑀺𑀲𑁆𑀲𑀦𑁂. 𑀬𑀫𑀢𑀺 𑀫𑀺𑀲𑁆𑀲𑀻𑀪𑀯𑀢𑀺 𑀜𑁂𑀬𑁆𑀬𑁂𑀲𑀽𑀢𑀺 𑀬𑁄𑀦𑀺. 𑀧𑀝𑀺𑀫𑀼𑀔𑀁 𑀪𑀦𑁆𑀢𑀺 𑀉𑀧𑀝𑁆𑀞𑀳𑀦𑁆𑀢𑀺 𑀜𑁂𑀬𑁆𑀬𑀸 𑀏𑀢𑁂𑀦𑀸𑀢𑀺 𑀧𑀝𑀺𑀪𑀸𑀦𑀁, 𑀬𑀼. 𑀦 𑀫𑀼𑀬𑁆𑀳𑀢𑀺 𑀏𑀢𑁂𑀦𑀸𑀢𑀺 𑀅𑀫𑁄𑀳𑁄. 𑀯𑀻𑀫𑀁𑀲𑀸 𑀯𑀺𑀘𑀬𑁄 𑀲𑀫𑀼𑀧𑁂𑀓𑁆𑀔𑀸 𑀉𑀧𑀮𑀤𑁆𑀥𑀺 𑀧𑀝𑀺𑀧𑀢𑁆𑀢𑀺 𑀉𑀢𑁆𑀢𑀺𑀘𑁂𑀢𑀦𑀸𑀤𑀻𑀦𑀺𑀧𑀺 𑀩𑀼𑀤𑁆𑀥𑀺𑀦𑀸𑀫𑀸𑀦𑀺.

𑀯𑀺𑀧𑀲𑁆𑀲𑀦𑀸𑀤𑀬𑁄 𑀦𑁂𑀧𑀓𑁆𑀓𑀦𑁆𑀢𑀸 𑀧𑀭𑀺𑀬𑀸𑀬𑀸 𑀧𑀜𑁆𑀜𑀸𑀪𑁂𑀤𑀸 𑀧𑀜𑁆𑀜𑀸𑀯𑀺𑀲𑁂𑀲𑀸. 𑀢𑀢𑁆𑀣 𑀯𑀺𑀯𑀺𑀥𑀁 𑀅𑀦𑀺𑀘𑁆𑀘𑀸𑀤𑀺𑀓𑀁 𑀲𑀗𑁆𑀔𑀸𑀭𑁂𑀲𑀼 𑀧𑀲𑁆𑀲𑀢𑀻𑀢𑀺 𑀯𑀺𑀧𑀲𑁆𑀲𑀦𑀸, 𑀬𑀼. 𑀲𑀫𑁆𑀫𑀸𑀤𑀲𑁆𑀲𑀦𑀮𑀓𑁆𑀔𑀡𑀸 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀸 𑀤𑀼𑀯𑀺𑀥𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦. 𑀢𑀢𑁆𑀣 𑀧𑀼𑀭𑀺𑀫𑀸 𑀙𑀩𑁆𑀩𑀺𑀲𑀼𑀤𑁆𑀥𑀺𑀧𑁆𑀧𑀯𑀢𑁆𑀢𑀺𑀓𑀸𑀮𑁂, 𑀇𑀢𑀭𑀸 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀓𑀸𑀮𑁂 𑀮𑀩𑁆𑀪𑀢𑀺. 𑀆𑀤𑀺𑀧𑀭𑀺𑀬𑀸𑀬𑁂𑀦 𑀧𑀪𑀼𑀢𑀺𑀦𑀸 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀸𑀤𑀬𑁄 𑀕𑀳𑀺𑀢𑀸. 𑀢𑀢𑁆𑀣 𑀢𑀢𑁆𑀣 𑀓𑀸𑀭𑀺𑀬𑁂𑀲𑀼 𑀯𑀺𑀘𑀸𑀭𑀡𑀸. 𑀫𑀸𑀦 𑀯𑀻𑀫𑀁𑀲𑀸𑀬𑀁, 𑀲𑁄, 𑀘𑀺𑀢𑁆𑀢𑀸𑀪𑁄𑀕𑀸𑀤𑀺. 𑀯𑀺𑀘𑀸𑀭𑀬𑀢𑁂 𑀏𑀢𑀸𑀬𑀸𑀢𑀺 𑀯𑀺𑀘𑀸𑀭𑀡𑀸, 𑀘𑀭 𑀲𑀜𑁆𑀘𑀬𑁂, 𑀘𑀼𑀭𑀸𑀤𑀺𑀕𑀡𑁄, 𑀬𑀼. 𑀲𑀫𑁆𑀧𑀚𑀸𑀦𑀸𑀢𑀻𑀢𑀺 𑀲𑀫𑁆𑀧𑀚𑀸𑀦𑁄, 𑀧𑀼𑀕𑁆𑀕𑀮𑁄, 𑀥𑀫𑁆𑀫𑀲𑀫𑀽𑀳𑁄 𑀯𑀸, 𑀜𑀸𑀲𑁆𑀲 𑀚𑀸, 𑀢𑀲𑁆𑀲 𑀪𑀸𑀯𑁄 𑀲𑀫𑁆𑀧𑀚𑀜𑁆𑀜𑀁, 𑀦𑁆𑀬𑀲𑁆𑀲 𑀜𑁄, 𑀤𑁆𑀯𑀺𑀢𑁆𑀢𑀁, 𑀢𑀁 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁. 𑀦𑀺𑀲𑁆𑀲𑁂𑀲𑀢𑁄 𑀧𑀸𑀘𑁂𑀢𑀺 𑀓𑀼𑀲𑀮𑀥𑀫𑁆𑀫𑁂𑀢𑀺 𑀦𑀺𑀧𑀓𑁄, 𑀜𑀸𑀡𑀻 𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀪𑀸𑀯𑁄 𑀦𑁂𑀧𑀓𑁆𑀓𑀁. 𑀤𑁆𑀯𑀬𑀁 𑀯𑁂𑀤𑀦𑀸𑀬𑀁. 𑀯𑁂𑀤𑀬𑀢𑀻𑀢𑀺 𑀯𑁂𑀤𑀬𑀺𑀢𑀁, 𑀯𑀺𑀤 𑀅𑀦𑀼𑀪𑀯𑀦𑁂, 𑀘𑀼𑀭𑀸𑀤𑀺𑀢𑁆𑀢𑀸 𑀡𑀬𑁄, 𑀢𑁄, 𑀇𑀓𑀸𑀭𑀸𑀕𑀫𑁄 𑀘. 𑀯𑁂𑀤𑀬𑀢𑀻𑀢𑀺 𑀯𑁂𑀤𑀦𑀸, 𑀬𑀼.

𑁧𑁫𑁫. 𑀧𑀜𑁆𑀘𑀓𑀁 ¶ 𑀯𑀺𑀢𑀓𑁆𑀓𑁂. 𑀢𑀓𑁆𑀓 𑀯𑀺𑀢𑀓𑁆𑀓𑁂. 𑀢𑀓𑁆𑀓𑁂𑀢𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀆𑀭𑀫𑁆𑀫𑀡𑀁 𑀅𑀪𑀺𑀦𑀺𑀭𑁄𑀧𑁂𑀢𑀻𑀢𑀺 𑀢𑀓𑁆𑀓𑁄. 𑀯𑀺𑀢𑀓𑁆𑀓𑁄𑀢𑀺 𑀉𑀧𑀲𑀕𑁆𑀕𑀫𑀢𑁆𑀢𑀫𑁂𑀯 𑀯𑀺𑀲𑁂𑀲𑁄. 𑀲𑀗𑁆𑀓𑀧𑁆𑀧𑀦𑁆𑀢𑀺 𑀧𑀪𑀯𑀦𑁆𑀢𑁆𑀬𑀦𑁂𑀦𑀸𑀢𑀺 𑀲𑀗𑁆𑀓𑀧𑁆𑀧𑁄, 𑀡𑁄, 𑀓𑀧𑁆𑀧 𑀯𑀺𑀢𑀓𑁆𑀓𑁂, 𑀓𑀧𑁆𑀧 𑀲𑀸𑀫𑀢𑁆𑀣𑀺𑀬𑁂 𑀯𑀸, 𑀪𑀽𑀯𑀸𑀤𑀺, 𑀲𑀗𑁆𑀓𑀧𑁆𑀧𑀬𑀦𑁆𑀢𑀺 𑀧𑀪𑀯𑀦𑁆𑀢𑁆𑀬𑀦𑁂𑀦𑀸𑀢𑀺 𑀯𑀸 𑀲𑀗𑁆𑀓𑀧𑁆𑀧𑁄, 𑀓𑀧𑁆𑀧 𑀯𑀺𑀢𑀓𑁆𑀓𑁂, 𑀘𑀼𑀭𑀸𑀤𑀺. 𑀅𑀧 𑀧𑀸𑀧𑀼𑀡𑀦𑁂, 𑀅𑀧𑁆𑀧𑁂𑀢𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀧𑀸𑀧𑁂𑀢𑀺 𑀆𑀭𑀫𑁆𑀫𑀡𑀦𑁆𑀢𑀺 𑀅𑀧𑁆𑀧𑀦𑀸, 𑀬𑀼, 𑀆. 𑀊𑀳 𑀯𑀺𑀢𑀓𑁆𑀓𑁂. 𑀊𑀳𑀦𑁆𑀢𑁆𑀬𑀦𑁂𑀦𑀸𑀢𑀺 𑀊𑀳𑁄. 𑀢𑀓𑁆𑀓𑀊𑀳𑀲𑀤𑁆𑀤𑀸 𑀘𑁂𑀢𑁆𑀣 𑀅𑀚𑁆𑀛𑀸𑀳𑀸𑀭𑀯𑀸𑀘𑀓𑀸𑀧𑀺 𑀪𑀯𑀦𑁆𑀢𑀺, 𑀅𑀚𑁆𑀛𑀸𑀳𑀸𑀭𑀁 𑀦𑀸𑀫 𑀊𑀦𑀧𑀽𑀭𑀡𑀢𑁆𑀣𑀫𑀥𑀺𑀓𑀧𑁆𑀧𑀪𑁂𑀤𑀸𑀳𑀭𑀡𑀁 [𑀫𑀥𑀺𑀓𑁄𑀧𑀸𑀤𑀸𑀦𑀁 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)]. ‘‘𑀅𑀚𑁆𑀛𑀸𑀳𑀸𑀭𑁄 𑀢𑀓𑁆𑀓 𑀊𑀳𑀸’’𑀢𑀺 [𑀅𑀫𑀭 𑁫.𑁩] 𑀳𑀺 𑀅𑀫𑀭𑀓𑁄𑀲𑁂 𑀯𑀼𑀢𑁆𑀢𑀁. 𑀤𑁆𑀯𑀬𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂. 𑀅𑀬𑀇𑀢𑀺 𑀕𑀫𑀦𑀢𑁆𑀣𑁄 𑀤𑀡𑁆𑀟𑀓𑁄 𑀥𑀸𑀢𑀼. 𑀅𑀬𑀢𑀺 𑀅𑀤𑁆𑀥𑀸𑀦𑀁 𑀕𑀘𑁆𑀙𑀢𑀺 𑀬𑁂𑀦𑀸𑀢𑀺 𑀆𑀬𑀼, 𑀡𑀼, 𑀏𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀆𑀬𑀼, 𑀇 𑀕𑀢𑀺𑀫𑁆𑀳𑀺, 𑀡𑀼, 𑀇𑀲𑁆𑀲𑁂, 𑀏 𑀅𑀬. 𑀚𑀻𑀯𑀦𑁆𑀢𑀺 𑀅𑀦𑁂𑀦𑀸𑀢𑀺 𑀚𑀻𑀯𑀺𑀢𑀁, 𑀚𑀻𑀯 𑀧𑀸𑀡𑀥𑀸𑀭𑀡𑁂.

𑀘𑀢𑀼𑀓𑁆𑀓𑀁 𑀲𑀫𑀸𑀥𑀺𑀫𑁆𑀳𑀺. 𑀦𑀸𑀦𑀸𑀮𑀫𑁆𑀩𑀡𑀯𑀺𑀲𑀸𑀭𑀡𑀸𑀪𑀸𑀯𑀢𑁄 𑀏𑀓𑀁 𑀅𑀕𑁆𑀕𑀁 𑀆𑀭𑀫𑁆𑀫𑀡𑀫𑁂𑀢𑀲𑁆𑀲𑀸𑀢𑀺 𑀏𑀓𑀕𑁆𑀕𑀁, 𑀘𑀺𑀢𑁆𑀢𑀁, ‘‘𑀅𑀕𑁆𑀕𑀲𑀤𑁆𑀤𑁄 𑀘𑁂𑀢𑁆𑀣 𑀆𑀮𑀫𑁆𑀩𑀡𑀯𑀸𑀘𑀓𑁄’’𑀢𑀺 𑀳𑀺 𑀲𑀤𑁆𑀥𑀫𑁆𑀫𑀝𑀻𑀓𑀸𑀬𑀁 𑀯𑀼𑀢𑁆𑀢𑀁, 𑀢𑀲𑁆𑀲 𑀪𑀸𑀯𑁄 𑀏𑀓𑀕𑁆𑀕𑀢𑀸, 𑀏𑀓𑀁 𑀯𑀸 𑀆𑀭𑀫𑁆𑀫𑀡𑀁 𑀅𑀚𑀢𑀺 𑀕𑀘𑁆𑀙𑀢𑀻𑀢𑀺 𑀏𑀓𑀕𑁆𑀕𑀁, 𑀢𑀲𑁆𑀲 𑀪𑀸𑀯𑁄 𑀏𑀓𑀕𑁆𑀕𑀢𑀸. 𑀓𑀸𑀫𑀘𑁆𑀙𑀦𑁆𑀤𑀁 𑀲𑀫𑁂𑀢𑀻𑀢𑀺 𑀲𑀫𑀣𑁄, 𑀣𑁄, 𑀲𑀫𑀼 𑀉𑀧𑀲𑀫𑁂, ‘‘𑀲𑀫𑀸𑀥𑀺 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀝𑀺𑀧𑀓𑁆𑀔𑁄’’𑀢𑀺 [𑀧𑀸𑀭𑀸. 𑀅𑀝𑁆𑀞. 𑁧.𑁧𑁧; 𑀥. 𑀲. 𑀅𑀝𑁆𑀞. 𑁧𑁬𑁦] 𑀳𑀺 𑀯𑀼𑀢𑁆𑀢𑀁. 𑀯𑀺𑀓𑁆𑀔𑀺𑀧𑀦𑀁 𑀦𑀸𑀦𑀸𑀭𑀫𑁆𑀫𑀡𑀧𑁂𑀭𑀡𑀁 𑀯𑀺𑀓𑁆𑀔𑁂𑀧𑁄, 𑀲𑁄 𑀦𑀢𑁆𑀣𑀺 𑀏𑀢𑁆𑀣𑀸𑀢𑀺 𑀅𑀯𑀺𑀓𑁆𑀔𑁂𑀧𑁄. 𑀏𑀓𑀸𑀭𑀫𑁆𑀫𑀡𑁂 𑀲𑀼𑀝𑁆𑀞𑀼 𑀆𑀥𑀸𑀦𑀁 ¶ 𑀲𑀫𑀸𑀥𑀺, 𑀲𑀜𑁆𑀜𑀸𑀬𑀫𑀺, 𑀦𑀸𑀦𑀸𑀮𑀫𑁆𑀩𑀡𑀯𑀺𑀓𑁆𑀔𑁂𑀧𑀯𑀲𑀧𑁆𑀧𑀯𑀢𑁆𑀢𑀁 𑀅𑀥𑀺𑀲𑀗𑁆𑀔𑀸𑀢𑀁 𑀘𑀺𑀢𑁆𑀢𑀩𑁆𑀬𑀥𑀁 𑀲𑀫𑁂𑀢𑀻𑀢𑀺 𑀯𑀸 𑀲𑀫𑀸𑀥𑀺, 𑀦𑁂𑀭𑀼𑀢𑁆𑀢𑁄.

𑁧𑁫𑁬. 𑀧𑀚𑁆𑀚𑁂𑀦 𑀯𑀻𑀭𑀺𑀬𑀲𑁆𑀲 𑀦𑀸𑀫𑀸𑀦𑀺. 𑀉 𑀤𑀼𑀓𑁆𑀔𑀮𑀸𑀪𑀁, 𑀉𑀤𑁆𑀥𑀁 𑀯𑀸 𑀲𑀳𑀢𑀺 𑀔𑀫𑀢𑀻𑀢𑀺 𑀉𑀲𑁆𑀲𑀸𑀳𑁄, 𑀡𑁄. 𑀆 𑀪𑀼𑀲𑁄 𑀓𑀸𑀬𑀁, 𑀘𑀺𑀢𑁆𑀢𑀜𑁆𑀘 𑀢𑀸𑀧𑁂𑀢𑀻𑀢𑀺 𑀆𑀢𑀧𑁆𑀧𑁄 [𑀆𑀢𑀸𑀧𑁄 (?) 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀝𑀻𑀓𑀸 𑁧𑁧𑁩𑁫 𑀕𑀸𑀣𑀸𑀬𑀁 𑀧𑀲𑁆𑀲𑀺𑀢𑀩𑁆𑀩𑀁], 𑀢𑀧 𑀲𑀦𑁆𑀢𑀸𑀧𑁂. 𑀮𑀻𑀦𑀁 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀉𑀓𑁆𑀔𑀺𑀧𑀢𑀻𑀢𑀺 𑀧𑀕𑁆𑀕𑀳𑁄. 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀁 𑀧𑀭𑀫𑀢𑁆𑀣𑀁 𑀕𑀡𑁆𑀳𑀸𑀧𑁂𑀢𑀻𑀢𑀺 𑀯𑀸 𑀧𑀕𑁆𑀕𑀳𑁄. ‘‘𑀧𑀲𑀤𑁆𑀤𑁄 𑀧𑀭𑀫𑀢𑁆𑀣𑁂𑀧𑀻’’𑀢𑀺 𑀳𑀺 𑀏𑀓𑀓𑁆𑀔𑀭𑀓𑁄𑀲𑁂 𑀯𑀼𑀢𑁆𑀢𑀁. 𑀯𑀸𑀬𑀫𑀦𑁆𑀢𑀺 𑀬𑁂𑀦𑀸𑀢𑀺 𑀯𑀸𑀬𑀸𑀫𑁄, 𑀯𑀸𑀬𑀫 𑀉𑀲𑁆𑀲𑀸𑀳𑀦𑁂, 𑀅𑀣 𑀯𑀸 𑀯𑀬 𑀕𑀫𑀦𑀢𑁆𑀣𑁄 𑀤𑀡𑁆𑀟𑀓𑁄 𑀥𑀸𑀢𑀼, 𑀯𑀬𑀢𑀺 𑀲𑀩𑁆𑀩𑀓𑀸𑀮𑀦𑁆𑀢𑀺 𑀯𑀸𑀬𑀸𑀫𑁄, 𑀅𑀫𑁄, 𑀯𑀸𑀬𑁄 𑀯𑀺𑀬 𑀲𑀤𑀸 𑀅𑀫𑀢𑀺 𑀕𑀘𑁆𑀙𑀢𑀻𑀢𑀺 𑀯𑀸 𑀯𑀸𑀬𑀸𑀫𑁄. 𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀢𑀻𑀢𑀺 𑀧𑀭𑀓𑁆𑀓𑀫𑁄, 𑀧𑀭𑀁 𑀧𑀘𑁆𑀘𑀦𑀻𑀓𑀪𑀽𑀢𑀁 𑀓𑁄𑀲𑀚𑁆𑀚𑀁 𑀅𑀓𑁆𑀓𑀫𑀢𑀻𑀢𑀺 𑀯𑀸 𑀧𑀭𑀓𑁆𑀓𑀫𑁄. 𑀧𑀤𑀳𑀢𑀺 𑀬𑁂𑀦𑀸𑀢𑀺 𑀧𑀥𑀸𑀦𑀁, 𑀬𑀼. 𑀤𑀳𑀲𑁆𑀲 𑀥𑁄, 𑀤𑀳 𑀪𑀲𑁆𑀫𑀻𑀓𑀭𑀡𑁂 [𑀧𑀧𑀼𑀩𑁆𑀩𑀥𑀸𑀥𑀸𑀢𑀼𑀦𑀸 𑀲𑀸𑀥𑁂𑀢𑀩𑁆𑀩𑀁 𑀫𑀜𑁆𑀜𑁂]. 𑀯𑀻𑀭𑁂 𑀲𑀸𑀥𑀼, 𑀯𑀻𑀭𑀸𑀦𑀁 𑀯𑀸 𑀓𑀫𑁆𑀫𑀁, 𑀯𑀺𑀥𑀺𑀦𑀸 𑀯𑀸 𑀈𑀭𑀬𑀺𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀯𑀻𑀭𑀺𑀬𑀁, 𑀈𑀭 𑀕𑀢𑀺𑀬𑀁, 𑀈𑀳𑀢𑀺 𑀏𑀢𑀺 𑀯𑀸 𑀬𑀸𑀬 𑀲𑀼𑀪𑀸𑀲𑀼𑀪𑀨𑀮𑀦𑁆𑀢𑀺 𑀈𑀳𑀸, 𑀈𑀳 𑀘𑁂𑀝𑁆𑀞𑀸𑀬𑀁, 𑀇 𑀯𑀸 𑀕𑀢𑀺𑀫𑁆𑀳𑀺, 𑀧𑀘𑁆𑀙𑀺𑀫𑁂 𑀳𑀧𑀘𑁆𑀘𑀬𑁄, 𑀉𑀤𑁆𑀥𑀁 𑀬𑀦𑁆𑀢𑀺 𑀬𑁂𑀦𑀸𑀢𑀺 𑀉𑀬𑁆𑀬𑀸𑀫𑁄, 𑀅𑀫𑁄. 𑀢𑀺𑀝𑁆𑀞𑀢𑀺 𑀏𑀢𑁆𑀣 𑀲𑀼𑀪𑀸𑀲𑀼𑀪𑀨𑀮𑀦𑁆𑀢𑀺 𑀥𑀺𑀢𑀺,𑀢𑀺, 𑀞𑀸 𑀕𑀢𑀺𑀦𑀺𑀯𑀢𑁆𑀢𑀺𑀬𑀁.

𑁧𑁫𑁭. 𑀧𑀚𑁆𑀚𑁂𑀦 𑀯𑀼𑀢𑁆𑀢𑀧𑀭𑀺𑀬𑀸𑀬𑀲𑁆𑀲 𑀯𑀻𑀭𑀺𑀬𑀲𑁆𑀲 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀤𑀲𑁆𑀲𑁂𑀢𑀺. 𑀢𑀘𑀸𑀤𑀻𑀦𑀁 𑀢𑀺𑀡𑁆𑀡𑀁 𑀅𑀯𑀲𑀺𑀲𑁆𑀲𑀦𑀁 𑀅𑀯𑀲𑁂𑀲𑀢𑀸 𑀫𑀁𑀲𑀮𑁄𑀳𑀺𑀢𑁂𑀳𑀺 𑀅𑀯𑀥𑀺𑀪𑀽𑀢𑁂𑀳𑀺, 𑀫𑀁𑀲𑀮𑁄𑀳𑀺𑀢𑀸𑀦𑀁 𑀧𑀦 𑀲𑀼𑀲𑁆𑀲𑀦𑀁 𑀲𑀼𑀓𑁆𑀔𑀢𑀸 ¶ . 𑀏𑀢𑀸𑀦𑀺 𑀘𑀢𑁆𑀢𑀸𑀭𑀺 𑀅𑀥𑀺𑀝𑁆𑀞𑀸𑀦𑀯𑀲𑀧𑁆𑀧𑀯𑀢𑁆𑀢𑀸𑀦𑀺 𑀯𑀻𑀭𑀺𑀬𑀲𑁆𑀲 𑀅𑀗𑁆𑀕𑀸𑀦𑀺 𑀓𑀸𑀭𑀡𑀸𑀦𑀺 𑀳𑁄𑀦𑁆𑀢𑀺. 𑀅𑀗𑁆𑀕 𑀕𑀫𑀦𑀢𑁆𑀣𑁄 𑀤𑀡𑁆𑀟𑀓𑁄 𑀥𑀸𑀢𑀼. 𑀅𑀗𑁆𑀕𑀢𑀺 𑀲𑀺𑀤𑁆𑀥𑀺𑀁 𑀕𑀘𑁆𑀙𑀢𑀺 𑀯𑀻𑀭𑀺𑀬𑀨𑀮𑀫𑁂𑀢𑁂𑀳𑀻𑀢𑀺 𑀅𑀗𑁆𑀕𑀸𑀦𑀺. 𑀢𑀘 𑀧𑀸𑀮𑀦𑁂, 𑀡𑁄, 𑀢𑀘𑁄. 𑀦𑀳 𑀩𑀦𑁆𑀥𑀦𑁂 𑀆𑀭𑀼. 𑀦𑁆𑀳𑀸𑀭𑀽𑀢𑀺𑀧𑀺 𑀧𑀸𑀞𑁄. 𑀢𑀢𑁆𑀣 𑀦𑀦𑁆𑀢𑀲𑁆𑀲 𑀮𑁄𑀧𑁄. 𑀲𑀺𑀲 𑀅𑀲𑀩𑁆𑀩𑀧𑁆𑀧𑀬𑁄𑀕𑁂, 𑀬𑀼, 𑀤𑁆𑀯𑀺𑀢𑁆𑀢𑀁. 𑀅𑀲𑀢𑀺 𑀔𑁂𑀧𑁂𑀢𑀺 𑀅𑀤𑁆𑀥𑀸𑀦𑀦𑁆𑀢𑀺 𑀅𑀝𑁆𑀞𑀺,𑀢𑀺, 𑀦𑀧𑀼𑀁𑀲𑀓𑁂, 𑀦𑁂𑀭𑀼𑀢𑁆𑀢𑁄, 𑀆 𑀪𑀼𑀲𑁄 𑀢𑀺𑀝𑁆𑀞𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀅𑀝𑁆𑀞𑀺, 𑀇. 𑀫𑀦 𑀜𑀸𑀡𑁂, 𑀲𑁄, 𑀦𑀲𑁆𑀲 𑀦𑀺𑀕𑁆𑀕𑀳𑀻𑀢𑀁, 𑀫𑀁𑀲𑀁. 𑀭𑀼𑀳 𑀚𑀦𑀦𑁂, 𑀇𑀢𑁄, 𑀮𑀢𑁆𑀢𑀁, 𑀮𑁄𑀳𑀺𑀢𑀁.

𑁧𑁫𑁮. 𑀅𑀲𑀸𑀛𑀲𑀸𑀥𑀦𑁂𑀧𑀺 𑀬𑀲𑁆𑀲𑀸 𑀯𑀲𑁂𑀦 𑀉𑀬𑁆𑀬𑀸𑀫𑁄, 𑀲𑀸 𑀅𑀥𑀺𑀫𑀢𑁆𑀢𑁂𑀳𑀸 𑀅𑀥𑀺𑀓𑀲𑀢𑁆𑀢𑀺𑀬𑀼𑀢𑁆𑀢𑀸 𑀈𑀳𑀸 𑀉𑀲𑁆𑀲𑁄𑀴𑁆𑀳𑀻 𑀦𑀸𑀫, 𑀉 𑀧𑀩𑀮𑀁 𑀤𑀼𑀓𑁆𑀓𑀭𑀓𑀫𑁆𑀫𑀁 𑀲𑀳𑀢𑀺 𑀬𑀸𑀬𑀸𑀢𑀺 𑀉𑀲𑁆𑀲𑁄𑀴𑀻, 𑀲𑀳𑀲𑁆𑀲 𑀲𑁄𑀴𑁆𑀳𑁄, 𑀦𑀤𑀸𑀤𑀺, 𑀉𑀲𑁆𑀲𑀸𑀳𑀸𑀦𑀁 𑀊𑀳𑀸𑀢𑀺 𑀯𑀸 𑀉𑀲𑁆𑀲𑁄𑀴𑀻, 𑀬𑀣𑀸 ‘‘𑀧𑀤𑀝𑁆𑀞𑀸𑀦’’𑀦𑁆𑀢𑀺, 𑀆𑀓𑀸𑀭𑀲𑁆𑀲𑁄, 𑀳𑀲𑁆𑀲 𑀴𑁄, 𑀊𑀮𑁄𑀧𑁄, 𑀦𑀤𑀸𑀤𑀺, 𑀯𑀸𑀬𑀸𑀫𑀫𑀢𑁆𑀢𑁂𑀧𑀺. 𑀤𑁆𑀯𑀬𑀁 𑀲𑀢𑀺𑀬𑀁. 𑀲𑀭𑀢𑀺, 𑀲𑀭𑀦𑁆𑀢𑀺 𑀯𑀸 𑀢𑀸𑀬, 𑀲𑀭𑀡𑀫𑀢𑁆𑀢𑀫𑁂𑀯 𑀯𑀸 𑀏𑀲𑀸𑀢𑀺 𑀲𑀢𑀺,𑀢𑀺, 𑀧𑀫𑀸𑀤𑀁 𑀯𑀸 𑀲𑀭𑀢𑀺 𑀳𑀺𑀁𑀲𑀢𑀻𑀢𑀺 𑀲𑀢𑀺. 𑀅𑀦𑀼 𑀧𑀼𑀦𑀧𑁆𑀧𑀼𑀦𑀁 𑀲𑀢𑀺 𑀅𑀦𑀼𑀲𑁆𑀲𑀢𑀺, 𑀉𑀧𑀲𑀕𑁆𑀕𑀫𑀢𑁆𑀢𑀫𑁂𑀯 𑀯𑀸 𑀯𑀺𑀲𑁂𑀲𑁄, 𑀤𑁆𑀯𑁂𑀧𑀺 𑀇𑀢𑁆𑀣𑀺𑀬𑀁.

𑀤𑁆𑀯𑀬𑀁 𑀮𑀚𑁆𑀚𑀸𑀬𑀁. 𑀮𑀚𑀺 𑀧𑀻𑀴𑁂, 𑀓𑀸𑀢𑀦𑁆𑀢𑀥𑀸𑀢𑀼. 𑀮𑀚𑁆𑀚 𑀮𑀚𑁆𑀚𑀦𑁂, 𑀫𑁄𑀕𑁆𑀕𑀮𑁆𑀮𑀸𑀦𑀥𑀸𑀢𑀼, 𑀮𑀚𑁆𑀚𑀢𑀺 𑀧𑀸𑀧𑀸𑀢𑀺 𑀮𑀚𑁆𑀚𑀸, 𑀅. 𑀳𑀺𑀭𑀻 𑀮𑀚𑁆𑀚𑀺𑀬𑀁, 𑀇. 𑀳𑀺𑀭𑀺𑀬𑀢𑀺 𑀧𑀸𑀧𑀸𑀢𑀺 𑀳𑀺𑀭𑀻. 𑀲𑀫𑀸𑀦𑀸 𑀢𑀼𑀮𑁆𑀬𑀢𑁆𑀣𑀸 𑀤𑁆𑀯𑁂. 𑀤𑁆𑀯𑀬𑀁 𑀑𑀢𑁆𑀢𑀧𑁆𑀧𑁂. 𑀑𑀢𑁆𑀢𑀧𑁆𑀧𑀢𑀺 𑀪𑀸𑀬𑀢𑀺 𑀧𑀸𑀧𑀢𑁄𑀢𑀺 𑀑𑀢𑁆𑀢𑀧𑁆𑀧𑀁, 𑀢𑀧 𑀪𑀬𑁂 𑀅𑀯𑀧𑀼𑀩𑁆𑀩𑁄. 𑀧𑀸𑀧𑀢𑁄 𑀪𑀸𑀬𑀢𑀺 𑀲𑀻𑀮𑁂𑀦𑀸𑀢𑀺 𑀧𑀸𑀧𑀪𑀻𑀭𑀼, 𑀧𑀼𑀕𑁆𑀕𑀮𑁄, 𑀘𑀺𑀢𑁆𑀢𑀁 𑀯𑀸, 𑀢𑀲𑁆𑀲 𑀪𑀸𑀯𑁄 𑀢𑀣𑀸.

𑁧𑁫𑁯. 𑀧𑀚𑁆𑀚𑀤𑁆𑀥𑁂𑀦 ¶ 𑀉𑀧𑁂𑀓𑁆𑀔𑀸𑀬 𑀯𑁂𑀤𑀦𑀸𑀬 𑀦𑀸𑀫𑀸𑀦𑀺. 𑀫𑀚𑁆𑀛𑀢𑁆𑀢𑁂 𑀫𑀚𑁆𑀛𑀢𑁆𑀢𑀲𑀪𑀸𑀯𑁂 𑀧𑀯𑀢𑁆𑀢𑀸 𑀫𑀚𑁆𑀛𑀢𑁆𑀢𑀺𑀓𑀸. 𑀤𑁆𑀯𑀺𑀦𑁆𑀦𑀁 𑀯𑁂𑀤𑀦𑀸𑀦𑀁 𑀲𑀫𑀻𑀧𑁂 𑀧𑀯𑀢𑁆𑀢𑀸 𑀇𑀓𑁆𑀔𑀸 𑀅𑀦𑀼𑀪𑀯𑀦𑀦𑁆𑀢𑀺 𑀉𑀧𑁂𑀓𑁆𑀔𑀸, 𑀇𑀓𑁆𑀔 𑀤𑀲𑁆𑀲𑀦𑁂. 𑀅𑀤𑀼𑀓𑁆𑀔𑀸 𑀘 𑀲𑀸 𑀅𑀲𑀼𑀔𑀸 𑀘𑁂𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀸, 𑀫𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄.

𑀤𑁆𑀯𑀬𑀁 𑀫𑀦𑀲𑀺𑀓𑀸𑀭𑁂. 𑀪𑀯𑀗𑁆𑀕𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀆𑀪𑀼𑀚𑀦𑀢𑁄 𑀆𑀯𑀝𑁆𑀝𑀸𑀧𑀦𑀢𑁄 𑀘𑀺𑀢𑁆𑀢𑀸𑀪𑁄𑀕𑁄. 𑀧𑀸𑀮𑀦𑀚𑁆𑀛𑁄𑀳𑀸𑀭𑀢𑁆𑀣𑁄 𑀘𑁂𑀢𑁆𑀣 𑀪𑀼𑀚𑀥𑀸𑀢𑀼 𑀆𑀯𑀝𑁆𑀝𑀦𑀢𑁆𑀣𑁄 𑀆𑀧𑀼𑀩𑁆𑀩𑀢𑁆𑀢𑀸, 𑀇𑀤𑀁 𑀧𑀦 𑀯𑀻𑀣𑀺𑀚𑀯𑀦𑀧𑀝𑀺𑀧𑀸𑀤𑀓𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀘𑀺𑀢𑁆𑀢𑀲𑁆𑀲𑀸𑀭𑀫𑁆𑀫𑀡𑁂 𑀆𑀪𑀼𑀚𑀦𑀁 𑀧𑀯𑀢𑁆𑀢𑀦𑀁 𑀯𑀸 𑀘𑀺𑀢𑁆𑀢𑀸𑀪𑁄𑀕𑁄, 𑀇𑀤𑀁 𑀧𑀦 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑀯𑀲𑁂𑀦 𑀯𑀼𑀢𑁆𑀢𑀁. 𑀪𑀯𑀗𑁆𑀕𑀫𑀦𑀢𑁄 𑀯𑀺𑀲𑀤𑀺𑀲𑀁 𑀫𑀦𑀁 𑀓𑀭𑁄𑀢𑀻𑀢𑀺 𑀫𑀦𑀓𑁆𑀓𑀸𑀭𑁄, 𑀓𑀭𑀡𑀁 𑀯𑀸 𑀓𑀸𑀭𑁄, 𑀫𑀦𑀲𑁆𑀫𑀺𑀁 𑀓𑀸𑀭𑁄 𑀫𑀦𑀓𑁆𑀓𑀸𑀭𑁄. 𑀏𑀢𑁆𑀣 𑀘 𑀧𑀞𑀫𑀯𑀺𑀓𑀧𑁆𑀧𑁂𑀦 𑀤𑁆𑀯𑁂 𑀧𑀝𑀺𑀧𑀸𑀤𑀓𑀸 𑀯𑀼𑀢𑁆𑀢𑀸, 𑀧𑀘𑁆𑀙𑀺𑀫𑁂𑀦 𑀢𑀼 𑀇𑀢𑀭𑁄.

𑀤𑁆𑀯𑀬𑀁 𑀅𑀥𑀺𑀫𑁄𑀓𑁆𑀔𑁂. 𑀫𑀼𑀘 𑀫𑁄𑀘𑀦𑁂, 𑀅𑀥𑀺𑀫𑀼𑀘𑁆𑀘𑀦𑀁 ‘‘𑀇𑀤𑀫𑁂𑀯𑀸’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀓𑀭𑀡𑀁 𑀅𑀥𑀺𑀫𑁄𑀓𑁆𑀔𑁄. 𑀦𑀺𑀘𑁆𑀙𑀬𑀦𑀁 𑀦𑀺𑀡𑁆𑀡𑀬𑀦𑀁 𑀦𑀺𑀘𑁆𑀙𑀬𑁄, 𑀘𑀬 𑀕𑀫𑀦𑀢𑁆𑀣𑁄 𑀤𑀡𑁆𑀟𑀓𑁄 𑀥𑀸𑀢𑀼, 𑀘𑀲𑁆𑀲 𑀤𑁆𑀯𑀺𑀢𑁆𑀢𑀁, 𑀙𑀢𑁆𑀢𑀁, 𑀦𑀺 𑀪𑀼𑀲𑀁 𑀙𑁂𑀤𑀦𑀁 𑀯𑀸 𑀦𑀺𑀘𑁆𑀙𑀬𑁄, 𑀙𑀺𑀤𑀺 𑀤𑁆𑀯𑀺𑀥𑀸𑀓𑀭𑀡𑁂, 𑀇𑀲𑁆𑀲𑀢𑁆𑀢𑀁, 𑀤𑀲𑁆𑀲 𑀬𑁄, 𑀅𑀲𑀭𑀽𑀧𑀤𑁆𑀯𑀺𑀢𑁆𑀢𑀁.

𑁧𑁬𑁦. 𑀧𑀚𑁆𑀚𑀤𑁆𑀥𑀁 𑀤𑀬𑀸𑀬𑀁. 𑀤𑀬 𑀤𑀸𑀦𑀕𑀢𑀺𑀳𑀺𑀁𑀲𑀸𑀭𑀓𑁆𑀔𑀡𑁂𑀲𑀼. 𑀤𑀬𑀢𑀺 𑀧𑀭𑀤𑀼𑀓𑁆𑀔𑀁, 𑀅𑀢𑁆𑀢𑀲𑀼𑀔𑀜𑁆𑀘 𑀳𑀺𑀁𑀲𑀢𑀻𑀢𑀺 𑀤𑀬𑀸, 𑀅. 𑀓𑀧𑀺 ¶ 𑀘𑀮𑀦𑁂, 𑀅𑀦𑀼 𑀧𑀼𑀦𑀧𑁆𑀧𑀼𑀦𑀁 𑀓𑀫𑁆𑀧𑁂𑀢𑀺 𑀅𑀢𑁆𑀢𑀸𑀥𑀸𑀭𑀲𑁆𑀲 𑀘𑀺𑀢𑁆𑀢𑀦𑁆𑀢𑀺 𑀅𑀦𑀼𑀓𑀫𑁆𑀧𑀸. 𑀓𑀁 𑀲𑀼𑀔𑀁 𑀭𑀼𑀦𑁆𑀥𑀢𑀻𑀢𑀺 𑀓𑀭𑀼𑀡𑀸, 𑀭𑀼𑀥𑀺 𑀆𑀯𑀭𑀡𑁂, 𑀥𑀲𑁆𑀲 𑀡𑁄, 𑀅𑀣 𑀯𑀸 𑀓𑀭𑁄𑀦𑁆𑀢𑀺 𑀅𑀢𑁆𑀢𑀸𑀦𑀫𑀥𑀻𑀦𑀫𑁂𑀢𑀸𑀬𑀸𑀢𑀺 𑀓𑀭𑀼𑀡𑀸, 𑀬𑀼, 𑀆, 𑀓𑀭𑀼𑀡𑀸, 𑀲𑀸 𑀏𑀯 𑀓𑀸𑀭𑀼𑀜𑁆𑀜𑀁. 𑀅𑀦𑀼𑀤𑁆𑀤𑀬𑀸𑀢𑀺 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁.

𑀧𑀚𑁆𑀚𑀤𑁆𑀥𑀁 𑀯𑀺𑀭𑀢𑀺𑀬𑀁. 𑀭𑀫𑀼 𑀉𑀧𑀭𑀫𑁂 𑀯𑀺𑀧𑀼𑀩𑁆𑀩𑁄, 𑀯𑀺𑀭𑀫𑀡𑀁 𑀯𑁂𑀭𑀫𑀡𑀻, 𑀬𑀼, 𑀦𑀤𑀸𑀤𑀺, 𑀯𑁂𑀭𑀁 𑀫𑀡𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀯𑀸 𑀯𑁂𑀭𑀫𑀡𑀻. 𑀯𑀺𑀭𑀫𑀡𑀁 𑀯𑀺𑀭𑀢𑀺,𑀢𑀺. 𑀤𑀽𑀭𑀢𑁄 𑀯𑀺𑀭𑀫𑀡𑀁 𑀆𑀭𑀢𑀺.

𑁧𑁬𑁧. 𑀘𑀢𑀼𑀓𑁆𑀓𑀁 𑀔𑀦𑁆𑀢𑀺𑀬𑀁. 𑀢𑀺𑀢𑀺𑀓𑁆𑀔𑀦𑀁 𑀔𑀫𑀦𑀁 𑀢𑀺𑀢𑀺𑀓𑁆𑀔𑀸, 𑀢𑀺𑀚 𑀔𑀦𑁆𑀢𑀺𑀬𑀁, 𑀔𑁄, 𑀤𑁆𑀯𑀺𑀢𑁆𑀢𑀁, 𑀓𑀢𑁆𑀢𑀸𑀤𑀺, 𑀆. 𑀔𑀫𑀦𑀁 𑀲𑀳𑀦𑀁 𑀔𑀦𑁆𑀢𑀺,𑀢𑀺. 𑀔𑀫𑀢𑁂 𑀔𑀫𑀦𑀁, 𑀔𑀫𑀸 𑀘, 𑀔𑀫𑀼 𑀲𑀳𑀦𑁂. 𑀤𑁆𑀯𑀬𑀁 𑀫𑁂𑀢𑁆𑀢𑀺𑀬𑀁. 𑀫𑀺𑀤 𑀲𑁆𑀦𑁂𑀳𑁂, 𑀫𑀺𑀚𑁆𑀚𑀢𑀺 𑀲𑀺𑀦𑁂𑀳𑀢𑀻𑀢𑀺 𑀫𑁂𑀢𑁆𑀢𑀸, 𑀢, 𑀆. 𑀫𑁂𑀢𑁆𑀢𑀺,𑀢𑀺. 𑀅𑀣 𑀯𑀸 𑀫𑀺𑀢𑁆𑀢𑁂 𑀪𑀯𑀸 𑀫𑁂𑀢𑁆𑀢𑀸, 𑀫𑁂𑀢𑁆𑀢𑀺 𑀘.

𑀧𑀚𑁆𑀚𑀤𑁆𑀥𑀁 𑀤𑀺𑀝𑁆𑀞𑀺𑀬𑀁. 𑀤𑀲𑁆𑀲𑀻𑀬𑀢𑁂 𑀤𑀲𑁆𑀲𑀦𑀁, 𑀤𑀺𑀲 𑀧𑁂𑀓𑁆𑀔𑀦𑁂, 𑀬𑀼. 𑀤𑀲𑁆𑀲𑀦𑀁 𑀤𑀺𑀝𑁆𑀞𑀺. 𑀮𑀪 𑀮𑀸𑀪𑁂,𑀢𑀺, 𑀮𑀤𑁆𑀥𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀫𑁂𑀯. 𑀲𑁂𑀲𑀸 𑀢𑀼 𑀉𑀪𑀬𑀢𑁆𑀭. 𑀞𑀺𑀢𑀧𑀓𑁆𑀔𑁄 𑀲𑀺𑀤𑁆𑀥𑀦𑁆𑀢𑁄 [𑀞𑀺𑀢𑁄 𑀧𑀓𑁆𑀔𑁄 𑀲𑀺𑀤𑁆𑀥𑀦𑁆𑀢𑁄, 𑀧𑀼𑀩𑁆𑀩𑀧𑀓𑁆𑀔𑀁 𑀦𑀺𑀭𑀲𑁆𑀬 𑀲𑀺𑀤𑁆𑀥𑀧𑀓𑁆𑀔𑀝𑁆𑀞𑀸𑀧𑀦𑁂 𑀇𑀢𑀺 𑀪𑀸𑀯𑁄 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)], 𑀲𑀺𑀤𑁆𑀥𑁄 𑀅𑀦𑁆𑀢𑁄 𑀅𑀦𑁂𑀦𑀸𑀢𑀺 𑀯𑀺𑀕𑁆𑀕𑀳𑁄. 𑀲𑀫𑀦𑁆𑀢𑀢𑁄 𑀅𑀬𑀦𑀁 𑀕𑀢𑀺 𑀲𑀫𑀬𑁄.

𑁧𑁬𑁨. 𑀤𑁄𑀳𑀴𑀦𑁆𑀢𑀁 𑀢𑀡𑁆𑀳𑀸𑀬𑀁. 𑀢𑀲 𑀧𑀺𑀧𑀸𑀲𑀸𑀬𑀁, 𑀬𑀸𑀬 𑀢𑀲𑀦𑁆𑀢𑀺, 𑀲𑀸 𑀢𑀡𑁆𑀳𑀸, 𑀡𑁆𑀳𑁄. 𑀇𑀡𑀫𑁆𑀳𑀺 𑀢𑀲𑀺𑀡𑀸. 𑀏𑀚 𑀓𑀫𑁆𑀧𑀦𑁂, 𑀏𑀚𑀸 ¶ . 𑀲𑀁𑀲𑀸𑀭𑀢𑁄 𑀦𑀺𑀲𑁆𑀲𑀭𑀺𑀢𑀼𑀫𑀧𑁆𑀧𑀤𑀸𑀦𑀯𑀲𑁂𑀦 𑀚𑀸𑀮𑀲𑀤𑀺𑀲𑀢𑁆𑀢𑀸 𑀚𑀸𑀮𑀺𑀦𑀻, 𑀉𑀧𑀫𑀸𑀦𑁂 𑀇𑀦𑀻. 𑀯𑀺𑀲 𑀧𑀯𑁂𑀲𑀦𑁂, 𑀲𑀩𑁆𑀩𑀢𑁆𑀭 𑀯𑀺𑀲𑀢𑀸 𑀧𑀢𑁆𑀣𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀲𑀓𑀢𑁆𑀣𑁂 𑀡𑀺𑀓𑁄. 𑀙𑀦𑁆𑀤 𑀇𑀘𑁆𑀙𑀸𑀬𑀁, 𑀙𑀦𑁆𑀤𑀦𑀁 𑀙𑀦𑁆𑀤𑁄, 𑀓𑀢𑁆𑀢𑀼𑀓𑀫𑁆𑀬𑀢𑀸𑀧𑀺. 𑀢𑁂𑀲𑀼 𑀢𑁂𑀲𑁆𑀯𑀸𑀭𑀫𑁆𑀫𑀡𑁂𑀲𑀼 𑀆𑀓𑀼𑀮𑀻𑀪𑀽𑀢𑀢𑁆𑀢𑀸 𑀚𑀝𑀸 𑀯𑀺𑀬𑀸𑀢𑀺 𑀚𑀝𑀸. 𑀓𑀫𑀼 𑀇𑀘𑁆𑀙𑀸𑀬𑀁,𑀢𑀺, 𑀦𑀺𑀓𑀦𑁆𑀢𑀺. 𑀇𑀲𑀼 𑀇𑀘𑁆𑀙𑀸𑀬𑀁, 𑀅, 𑀇𑀲𑁆𑀲 𑀆, 𑀆𑀲𑀸. 𑀲𑀺𑀯𑀼 𑀢𑀦𑁆𑀢𑀲𑀦𑁆𑀢𑀸𑀦𑁂, 𑀪𑀯𑀸𑀤𑀻𑀳𑀺 𑀪𑀯𑀸𑀤𑀬𑁄 𑀲𑀺𑀩𑁆𑀩𑀢𑀻𑀢𑀺 𑀲𑀺𑀩𑁆𑀩𑀺𑀦𑀻, 𑀅, 𑀇𑀦𑀻. 𑀲𑀢𑁆𑀢𑁂 𑀪𑀯𑀁 𑀦𑁂𑀢𑀻𑀢𑀺 𑀪𑀯𑀦𑁂𑀢𑁆𑀢𑀺,𑀢𑀺.

𑁧𑁬𑁩. 𑀛𑁂𑀘𑀺𑀦𑁆𑀢𑀸𑀬𑀁, 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁 𑀛𑀸𑀬𑀢𑀻𑀢𑀺 𑀅𑀪𑀺𑀚𑁆𑀛𑀸, 𑀆. 𑀯𑀦 𑀲𑀫𑁆𑀪𑀢𑁆𑀢𑀺𑀬𑀁, 𑀯𑀦𑀢𑀺 𑀬𑁂𑀦 𑀲𑁄 𑀯𑀦𑀣𑁄, 𑀣𑁄. 𑀯𑀸 𑀕𑀢𑀺𑀬𑀁, 𑀯𑀸𑀢𑀺 𑀆𑀭𑀫𑁆𑀫𑀡𑀦𑁆𑀢𑀺 𑀯𑀸𑀦𑀁, 𑀬𑀼. 𑀮𑀼𑀪 𑀇𑀘𑁆𑀙𑀸𑀬𑀁, 𑀮𑀼𑀩𑁆𑀪𑀦𑀁 𑀮𑁄𑀪𑁄, 𑀡𑁄. 𑀭𑀦𑁆𑀚 𑀭𑀸𑀕𑁂, 𑀭𑀚𑁆𑀚𑀦𑀁, 𑀭𑀚𑁆𑀚𑀦𑁆𑀢𑀺 𑀯𑀸 𑀬𑁂𑀦 𑀲𑁄 𑀭𑀸𑀕𑁄, 𑀡𑁄. 𑀮𑀬 𑀕𑀢𑀺𑀬𑀁, 𑀆 𑀧𑀼𑀦𑀧𑁆𑀧𑀼𑀦𑀁 𑀮𑀬𑀢𑁆𑀬𑀸𑀭𑀫𑁆𑀫𑀡𑁂𑀲𑀽𑀢𑀺 𑀆𑀮𑀬𑁄, 𑀧𑀼𑀦𑀧𑁆𑀧𑀼𑀦𑀁 𑀮𑀬𑀢𑀺 𑀲𑀁𑀲𑀺𑀮𑁂𑀲𑀢𑀺 𑀬𑁂𑀦𑀸𑀢𑀺 𑀯𑀸 𑀆𑀮𑀬𑁄. ‘‘𑀮𑀬𑁄 𑀯𑀺𑀦𑀸𑀲𑁂 𑀲𑀁𑀲𑀺𑀮𑁂𑀲𑁂, 𑀲𑀸𑀫𑁆𑀬𑁂 𑀢𑁄𑀭𑀺𑀬𑀢𑁆𑀢𑀺𑀓𑀲𑁆𑀲 𑀘𑁂’’𑀢𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂. 𑀧𑀺𑀳 𑀇𑀘𑁆𑀙𑀸𑀬𑀁, 𑀘𑀼𑀭𑀸𑀤𑀺, 𑀅, 𑀧𑀺𑀳𑀬𑀢𑀺 𑀬𑀸𑀬𑀸𑀢𑀺 𑀧𑀺𑀳𑀸. 𑀘𑀺𑀢𑁆𑀢𑀲𑁆𑀲 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀯𑀺𑀩𑁆𑀪𑀫𑀓𑀭𑀡𑀢𑁄 𑀫𑀦𑀲𑁄 𑀭𑀣𑁄 𑀇𑀯 𑀫𑀦𑁄𑀭𑀣𑁄, 𑀫𑀦𑁄 𑀏𑀯 𑀭𑀣𑁄 𑀯𑀺𑀬𑀸𑀢𑀺 𑀯𑀸 𑀫𑀦𑁄𑀭𑀣𑁄. 𑀇𑀲𑀼 𑀇𑀘𑁆𑀙𑀸𑀬𑀁, 𑀅, 𑀲𑀲𑁆𑀲 𑀘𑁆𑀙𑀸𑀤𑁂𑀲𑁄. 𑀮𑀲 𑀓𑀦𑁆𑀢𑀺𑀬𑀁, 𑀅𑀪𑀺𑀫𑀼𑀔𑀁 𑀓𑀢𑁆𑀯𑀸 𑀮𑀲𑀢𑀺 𑀬𑁂𑀦𑀸𑀢𑀺 𑀅𑀪𑀺𑀮𑀸𑀲𑁄, 𑀡𑁄. 𑀓𑀫𑀼 𑀇𑀘𑁆𑀙𑀸𑀬𑀁, 𑀡𑁄, 𑀓𑀸𑀫𑁄 ¶ . 𑀤𑀼𑀳 𑀧𑀧𑀽𑀭𑀡𑁂, 𑀤𑀼𑀳𑀦𑀁 𑀤𑁄𑀳𑁄, 𑀢𑀁 𑀮𑀸𑀢𑀻𑀢𑀺 𑀤𑁄𑀳𑀴𑁄, 𑀤𑀼𑀝𑁆𑀞𑀁 𑀳𑀤𑀬𑀫𑁂𑀢𑁂𑀦𑀸𑀢𑀺 𑀯𑀸 𑀤𑁄𑀳𑀴𑁄, 𑀳𑀤𑀬𑀲𑁆𑀲 𑀳𑀴𑁄, 𑀳𑀮 𑀓𑀫𑁆𑀧𑀦𑁂 𑀤𑁆𑀯𑀺𑀲𑀤𑁆𑀤𑀽𑀧𑀧𑀤𑁄, 𑀤𑁆𑀯𑀻𑀳𑀺 𑀳𑀮𑀢𑀺 𑀓𑀫𑁆𑀧𑀢𑀻𑀢𑀺 𑀯𑀸 𑀤𑁄𑀳𑀴𑁄, 𑀅, 𑀤𑁆𑀯𑀺𑀲𑁆𑀲 𑀤𑁄, 𑀮𑀲𑁆𑀲 𑀴𑁄. 𑀤𑁆𑀯𑁂 𑀳𑀤𑀬𑀸 𑀅𑀲𑁆𑀲 𑀧𑀭𑀫𑀢𑁆𑀣𑀲𑁆𑀲𑀸𑀢𑀺 𑀯𑀸 𑀤𑁄𑀳𑀴𑁄. 𑀅, 𑀤𑁆𑀯𑀺𑀲𑁆𑀲 𑀤𑁄, 𑀳𑀤𑀬𑀲𑁆𑀲 𑀳𑀴𑁄, 𑀤𑀲𑁆𑀲 𑀴𑁄 𑀯𑀸, 𑀬𑀮𑁄𑀧𑁄, 𑀇𑀘𑁆𑀙𑀸𑀯𑀺𑀲𑁂𑀲𑀢𑁆𑀢𑁂𑀧𑀺 𑀤𑁄𑀳𑀴𑀲𑁆𑀲 𑀲𑀸𑀫𑀜𑁆𑀜𑀯𑀢𑁆𑀢𑀺𑀘𑁆𑀙𑀸𑀬 𑀦𑀺𑀤𑁆𑀤𑁂𑀲𑁄.

𑀅𑀢𑀡𑁆𑀳𑀸𑀲𑀪𑀸𑀯𑀫𑁆𑀧𑀺 𑀭𑀼𑀘𑀺𑀁 𑀆𑀮𑀫𑁆𑀩𑀡𑀺𑀘𑁆𑀙𑀸𑀲𑀪𑀸𑀯𑀲𑀸𑀫𑀜𑁆𑀜𑁂𑀦 𑀇𑀥𑁂𑀯 𑀯𑀢𑁆𑀢𑀼𑀫𑀸𑀳 ‘‘𑀆𑀓𑀗𑁆𑀔𑀸𑀢𑀼’’𑀇𑀘𑁆𑀘𑀸𑀤𑀺. 𑀓𑀗𑁆𑀔 𑀇𑀘𑁆𑀙𑀸𑀬𑀁, 𑀅. 𑀭𑀼𑀘 𑀭𑁄𑀘𑀦𑁂, 𑀭𑁄𑀘𑀦𑀁 𑀓𑀢𑁆𑀢𑀼𑀓𑀸𑀫𑀢𑀸, 𑀇, 𑀭𑀼𑀘 𑀤𑀺𑀢𑁆𑀢𑀺𑀬𑀁 𑀯𑀸, 𑀭𑀼𑀘𑀺. 𑀓𑀢𑁆𑀢𑀼𑀓𑀸𑀫𑀢𑁂𑀯. 𑀲𑀸 𑀭𑀼𑀘𑀺 𑀅𑀥𑀺𑀓𑀸 𑀮𑀸𑀮𑀲𑀸 𑀦𑀸𑀫, 𑀮𑀲 𑀓𑀦𑁆𑀢𑀺𑀬𑀁, 𑀧𑀼𑀦𑀧𑁆𑀧𑀼𑀦𑀁, 𑀅𑀢𑀺𑀲𑀬𑀁 𑀯𑀸 𑀮𑀲𑀢𑀻𑀢𑀺 𑀮𑀸𑀮𑀲𑀸, 𑀤𑁆𑀯𑀺𑀢𑁆𑀢𑀁, 𑀅𑀲𑁆𑀲𑀸. ‘‘𑀬𑀸𑀘𑀦𑀸𑀬𑀁 𑀫𑀳𑀺𑀘𑁆𑀙𑀸𑀬𑀁 [𑀢𑀡𑁆𑀳𑀸𑀢𑀺𑀭𑁂𑀓𑁂 𑀬𑀸𑀘𑀦𑀸𑀬𑀁 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁭.𑁨𑁮)], 𑀉𑀲𑁆𑀲𑀼𑀓𑁆𑀓𑁂 𑀮𑀸𑀮𑀲𑀸 𑀤𑁆𑀯𑀺𑀲𑀽’’𑀢𑀺 𑀭𑀼𑀤𑁆𑀤𑁄.

𑁧𑁬𑁪. 𑀢𑀺𑀓𑀁 𑀯𑀺𑀭𑁄𑀥𑁂. 𑀧𑀸𑀬𑁂𑀦 𑀯𑀻𑀭𑁂𑀲𑀼 𑀪𑀯𑀁 𑀯𑁂𑀭𑀁, 𑀧𑀝𑀺𑀖𑀧𑀸𑀧𑁂𑀲𑀼𑀧𑀺. 𑀭𑀼𑀥 𑀧𑀝𑀺𑀖𑀸𑀢𑁂, 𑀯𑀺𑀭𑀼𑀚𑁆𑀛𑀦𑀁 𑀯𑀺𑀭𑁄𑀥𑁄. 𑀤𑀺𑀲 𑀅𑀧𑁆𑀧𑀻𑀢𑀺𑀬𑀁, 𑀯𑀺𑀤𑁆𑀤𑁂𑀲𑀦𑀁 𑀯𑀺𑀤𑁆𑀤𑁂𑀲𑁄.

𑀭𑁄𑀲𑀦𑁆𑀢𑀁 𑀓𑁄𑀥𑁂. 𑀤𑀼𑀲 𑀅𑀧𑁆𑀧𑀻𑀢𑀺𑀬𑀁, 𑀤𑀼𑀲𑁆𑀲𑀦𑀁 𑀤𑁄𑀲𑁄. 𑀆𑀭𑀫𑁆𑀫𑀡𑁂 𑀧𑀝𑀺𑀳𑀜𑁆𑀜𑀢𑀻𑀢𑀺 𑀧𑀝𑀺𑀖𑀁, 𑀳𑀦 𑀳𑀺𑀁𑀲𑀸𑀬𑀁, 𑀧𑀝𑀺𑀖𑀲𑀤𑁆𑀤𑁄𑀬𑀁 𑀧𑀼𑀮𑁆𑀮𑀺𑀗𑁆𑀕𑁂 𑀯𑀸 𑀪𑀯𑀢𑀺. 𑀓𑀼𑀥 𑀓𑁄𑀧𑁂, 𑀓𑀼𑀚𑁆𑀛𑀦𑀁 𑀓𑁄𑀥𑁄. 𑀆𑀕𑀦𑁆𑀢𑁆𑀯𑀸 𑀳𑀜𑁆𑀜𑀢𑀻𑀢𑀺 𑀆𑀖𑀸𑀢𑁄. 𑀓𑀼𑀧 𑀓𑁄𑀧𑁂, 𑀓𑀼𑀧𑁆𑀧𑀢𑀻𑀢𑀺 𑀓𑁄𑀧𑁄, 𑀓𑁄𑀧𑀬𑀢𑀺 𑀯𑀸 𑀘𑀺𑀢𑁆𑀢𑀦𑁆𑀢𑀺 𑀓𑁄𑀧𑁄. 𑀭𑀼𑀲 𑀭𑁄𑀲𑀦𑁂, 𑀭𑀼𑀲𑀦𑀁 𑀤𑀼𑀲𑁆𑀲𑀦𑀁 𑀭𑁄𑀲𑁄.

𑀤𑁆𑀯𑀬𑀁 ¶ 𑀧𑀭𑀸𑀦𑀢𑁆𑀣𑀘𑀺𑀦𑁆𑀢𑀦𑁂. 𑀩𑁆𑀬𑀸𑀧𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺 𑀘𑀺𑀢𑁆𑀢𑀫𑁂𑀢𑁂𑀦𑀸𑀢𑀺 𑀩𑁆𑀬𑀸𑀧𑀸𑀤𑁄, 𑀧𑀝𑀺𑀖𑁂𑀧𑀺. 𑀧𑀤 𑀕𑀢𑀺𑀫𑁆𑀳𑀺. 𑀧𑀭𑀲𑀫𑁆𑀧𑀢𑁆𑀢𑀻𑀲𑀼 𑀦𑀸𑀪𑀺𑀭𑀫𑀢𑀻𑀢𑀺 𑀅𑀦𑀪𑀺𑀭𑀢𑀺, 𑀭𑀫𑀼 𑀭𑀫𑀡𑁂,𑀢𑀺.

𑁧𑁬𑁫. 𑀤𑁆𑀯𑀬𑀁 𑀉𑀧𑀦𑀸𑀳𑁂. 𑀦𑀳 𑀩𑀦𑁆𑀥𑀦𑁂, 𑀧𑀼𑀦𑀧𑁆𑀧𑀼𑀦𑀁, 𑀉𑀧𑀕𑀦𑁆𑀢𑁆𑀯𑀸 𑀯𑀸 𑀦𑀬𑁆𑀳𑀢𑀺 𑀘𑀺𑀢𑁆𑀢𑀦𑁆𑀢𑀺 𑀉𑀧𑀦𑀸𑀳𑁄. 𑀩𑀚𑁆𑀛𑀢𑀺 𑀯𑁂𑀭𑀫𑀦𑁂𑀦𑀸𑀢𑀺 𑀩𑀤𑁆𑀥𑀯𑁂𑀭𑀁. 𑀤𑁆𑀯𑀬𑀁 𑀲𑁄𑀓𑁂. 𑀲𑀼𑀘 𑀲𑁄𑀓𑁂, 𑀡𑁄, 𑀲𑀼𑀘𑀦𑀁 𑀲𑁄𑀓𑁄. 𑀲𑀼𑀘𑀢𑁂 𑀲𑁄𑀘𑀦𑀁.

𑀢𑀺𑀓𑀁 𑀭𑀼𑀤𑀺𑀢𑁂. 𑀭𑀼𑀤𑀺 𑀅𑀲𑁆𑀲𑀼𑀯𑀺𑀫𑁄𑀘𑀦𑁂, 𑀲𑀩𑁆𑀩𑀢𑁆𑀭 𑀪𑀸𑀯𑁂 𑀢𑁄. 𑀓𑀤𑀺 𑀅𑀯𑁆𑀳𑀸𑀦𑁂, 𑀭𑁄𑀤𑀦𑁂 𑀘, 𑀢𑀧𑀘𑁆𑀘𑀬𑀲𑁆𑀲 𑀅𑀡𑁆𑀡𑀸𑀤𑁂𑀲𑁂 𑀭𑀼𑀡𑁆𑀡𑀁. 𑀤𑁆𑀯𑀬𑀁 𑀧𑀭𑀺𑀤𑁂𑀯𑀦𑁂. 𑀤𑁂𑀯𑀦𑀁 𑀲𑁄𑀓𑁂𑀦 𑀯𑀺𑀮𑀸𑀧𑁄, 𑀧𑀼𑀦𑀧𑁆𑀧𑀼𑀦𑀁, 𑀲𑀫𑀦𑁆𑀢𑀢𑁄 𑀯𑀸 𑀤𑁂𑀯𑁄 𑀧𑀭𑀺𑀤𑁂𑀯𑁄, 𑀧𑀭𑀺𑀤𑁆𑀤𑀯𑁄 𑀘.

𑁧𑁬𑁬. 𑀢𑀺𑀓𑀁 𑀪𑀬𑁂 𑀘𑀺𑀢𑁆𑀢𑀼𑀢𑁆𑀭𑀸𑀲𑀲𑀗𑁆𑀔𑀸𑀢𑁂. 𑀲𑀩𑁆𑀩𑀢𑁆𑀭 𑀪𑀸𑀯𑀲𑀸𑀥𑀦𑀁. 𑀪𑀻 𑀪𑀬𑁂, 𑀪𑀸𑀬𑀦𑀁 𑀪𑀻𑀢𑀺,𑀢𑀺. 𑀪𑀬𑀁, 𑀡𑁄. 𑀢𑀲 𑀉𑀩𑁆𑀩𑁂𑀚𑁂, 𑀉𑀢𑁆𑀢𑀲𑀢𑁂 𑀉𑀢𑁆𑀢𑀸𑀲𑁄, 𑀡𑁄. 𑀤𑁆𑀯𑀬𑀁 𑀫𑀳𑀢𑀺 𑀪𑀬𑁂. 𑀪𑀻𑀭𑀼𑀦𑁄 𑀇𑀤𑀁 𑀪𑁂𑀭𑀯𑀁, 𑀡𑁄. 𑀫𑀳𑀦𑁆𑀢𑀜𑁆𑀘 𑀢𑀁 𑀪𑀬𑀚𑀦𑀓𑀢𑁆𑀢𑀸 𑀪𑀬𑀜𑁆𑀘𑀸𑀢𑀺 𑀫𑀳𑀩𑁆𑀪𑀬𑀁. 𑀫𑀳𑀸𑀪𑀬𑀦𑁆𑀢𑀺𑀧𑀺 𑀧𑀸𑀞𑁄.

𑁧𑁬𑁭. 𑀧𑀚𑁆𑀚𑀁 𑀪𑀸𑀬𑀺𑀢𑀩𑁆𑀩𑀲𑀸𑀫𑀜𑁆𑀜𑁂. 𑀪𑁂𑀭𑀯𑀲𑀤𑁆𑀤𑁄𑀬𑀁 𑀲𑀸𑀫𑀜𑁆𑀜𑀯𑀸𑀘𑀓𑁄𑀧𑀺 𑀅𑀢𑁆𑀣𑀻𑀢𑀺 𑀇𑀥 𑀦𑀺𑀤𑁆𑀤𑁂𑀲𑁄. 𑀪𑀸𑀬𑀢𑀺 𑀬𑀲𑁆𑀫𑀸𑀢𑀺 𑀪𑀺𑀁𑀲𑀦𑀁, 𑀲𑁄, 𑀬𑀼, 𑀩𑀺𑀦𑁆𑀤𑀸𑀕𑀫𑁄. 𑀪𑀸𑀬𑀢𑀺 𑀬𑀲𑁆𑀫𑀸𑀢𑀺 𑀪𑀻𑀫𑀁, 𑀫𑁄. 𑀤𑀭 𑀯𑀺𑀤𑀸𑀭𑀡𑁂, 𑀤𑀭𑀻𑀬𑀢𑀻𑀢𑀺 𑀤𑀸𑀭𑀼𑀡𑀁, 𑀉𑀡𑁄. 𑀪𑀸𑀬𑀢𑀺 𑀬𑀲𑁆𑀫𑀸𑀢𑀺 ¶ 𑀪𑀬𑀸𑀦𑀓𑀁, 𑀡𑁆𑀯𑀼, 𑀅𑀦𑀓𑀸𑀤𑁂𑀲𑁄. 𑀖𑀼𑀭 𑀪𑀻𑀫𑁂, 𑀖𑀼𑀭𑀢𑀺 𑀪𑀺𑀁𑀲𑀢𑀻𑀢𑀺 𑀖𑁄𑀭𑀁, 𑀡𑁄. 𑀧𑀝𑀺𑀯𑀢𑁆𑀢𑀢𑀺 𑀪𑀬𑀁 𑀘𑀺𑀢𑁆𑀢𑀼𑀢𑁆𑀭𑀸𑀲𑁄 𑀬𑀲𑁆𑀫𑀸𑀢𑀺 𑀧𑀝𑀺𑀪𑀬𑀁. 𑀪𑀸𑀬𑀢𑀺 𑀬𑀲𑁆𑀫𑀸𑀢𑀺 𑀪𑁂𑀲𑁆𑀫𑀁, 𑀲𑁆𑀫𑀧𑀘𑁆𑀘𑀬𑁄. 𑀪𑀬𑀁 𑀓𑀭𑁄𑀢𑀻𑀢𑀺 𑀪𑀬𑀗𑁆𑀓𑀭𑀁, 𑀅𑀮𑀼𑀢𑁆𑀢𑀲𑀫𑀸𑀲𑁄𑀬𑀁. 𑀇𑀫𑁂 𑀦𑀯 𑀪𑁂𑀭𑀯𑀸𑀤𑀬𑁄 𑀪𑀬𑀪𑁂𑀭𑀯𑀸𑀤𑀺𑀳𑁂𑀢𑀼𑀫𑁆𑀳𑀺 𑀤𑀩𑁆𑀩𑁂 𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀢𑁆𑀢𑀦𑁆𑀢𑁂, 𑀢𑀤𑀸 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼, 𑀲𑀸𑀫𑀜𑁆𑀜𑁂𑀦 𑀢𑀼 𑀦𑀧𑀼𑀁𑀲𑀓𑁂.

𑁧𑁬𑁮. 𑀤𑁆𑀯𑀬𑀁 𑀧𑀭𑀸𑀪𑁆𑀬𑀼𑀤𑀬𑀸𑀲𑀳𑀦𑁂. 𑀇𑀲𑁆𑀲 𑀇𑀲𑁆𑀲𑀢𑁆𑀣𑁂, 𑀇𑀲𑁆𑀲 𑀇𑀲𑁆𑀲𑀸𑀬𑀦𑁆𑀢𑀺 𑀯𑀸 𑀥𑀸𑀢𑁆𑀯𑀢𑁆𑀣𑁄, 𑀇𑀲𑁆𑀲𑀢𑀺 𑀲𑀦𑁆𑀢𑁂𑀲𑀼𑀧𑀺 𑀕𑀼𑀡𑁂𑀲𑀼 𑀯𑀘𑀲𑀸, 𑀫𑀦𑀲𑀸 𑀯𑀸 𑀤𑁄𑀲𑀸𑀭𑁄𑀧𑀦𑀁 𑀓𑀭𑁄𑀢𑀻𑀢𑀺 𑀇𑀲𑁆𑀲𑀸, 𑀅. 𑀉𑀲𑁆𑀲𑀼𑀬 [𑀉𑀲𑀽𑀬 (?)] 𑀤𑁄𑀲𑀸𑀯𑀺𑀓𑀭𑀡𑁂. 𑀢𑀺𑀓𑀁 𑀫𑀘𑁆𑀙𑁂𑀭𑁂. 𑀫𑀲𑀼 𑀆𑀫𑀲𑀦𑁂, 𑀘𑁆𑀙𑁂𑀭𑀘𑁆𑀙𑀭𑀧𑀘𑁆𑀘𑀬𑀸, 𑀫𑀘𑁆𑀙𑀭𑀫𑁂𑀯 𑀫𑀘𑁆𑀙𑀭𑀺𑀬𑀁, 𑀲𑀓𑀢𑁆𑀣𑁂 𑀇𑀬𑁄, 𑀅𑀣 𑀯𑀸 𑀫𑀲𑀼𑀇𑀘𑁆𑀘𑁂𑀢𑀲𑁆𑀲 𑀧𑀸𑀝𑀺𑀧𑀤𑀺𑀓𑀲𑁆𑀲 𑀲𑀼𑀲𑁆𑀲 𑀡𑀫𑁆𑀳𑀺 𑀘𑁆𑀙𑁂𑀭𑀘𑁆𑀙𑀭𑀸, 𑀫𑀲𑀼 𑀫𑀘𑁆𑀙𑁂𑀭𑁂𑀢𑀺𑀧𑀺 𑀥𑀸𑀢𑀼.

𑀢𑀺𑀓𑀁 𑀅𑀜𑁆𑀜𑀸𑀡𑁂. 𑀫𑀽𑀳 𑀯𑁂𑀘𑀺𑀢𑁆𑀢𑁂, 𑀫𑀼𑀬𑁆𑀳𑀦𑁆𑀢𑀺 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸, 𑀲𑀬𑀁 𑀯𑀸 𑀫𑀼𑀬𑁆𑀳𑀢𑀺, 𑀫𑀼𑀬𑁆𑀳𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀫𑁄𑀳𑁄. 𑀯𑀺𑀤 𑀜𑀸𑀡𑁂, 𑀦 𑀯𑀺𑀤𑀢𑀻𑀢𑀺 𑀅𑀯𑀺𑀚𑁆𑀚𑀸. 𑀦 𑀯𑀺𑀚𑀸𑀦𑀸𑀢𑀻𑀢𑀺 𑀅𑀜𑁆𑀜𑀸𑀡𑀁. 𑀢𑀺𑀓𑀁 𑀫𑀸𑀦𑁂. 𑀪𑀽𑀢𑁂𑀦𑀸𑀪𑀽𑀢𑁂𑀦 𑀯𑀸 𑀧𑀭𑀢𑁄 𑀉𑀓𑁆𑀓𑀁𑀲𑀓𑀧𑁆𑀧𑀦𑁂𑀦 𑀘𑁂𑀢𑀲𑁄 𑀉𑀦𑁆𑀦𑀢𑀺 𑀫𑀸𑀦𑁄, 𑀬𑀣𑀸 ‘‘𑀲𑀽𑀭𑁄 𑀅𑀢𑁆𑀣𑀯𑀸𑀳’𑀫𑀲𑁆𑀫𑀺 𑀲𑀻𑀮𑀯𑀸 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁄’’𑀢𑀺 [𑀅𑀯𑁂𑀳𑀺 𑀪𑀮𑀯𑀸 𑀅𑀲𑁆𑀫𑀺, 𑀲𑀻𑀮𑀯𑀸 𑀩𑀼𑀤𑁆𑀥𑀺𑀲𑀁𑀬𑀼𑀢𑁄 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁭.𑁨𑁨)]. 𑀫𑀸𑀦 𑀧𑀽𑀚𑀸𑀬𑀁, 𑀘𑀼𑀭𑀸𑀤𑀺, 𑀅. 𑀥𑀸𑀭𑀡𑀢𑁆𑀣𑁄 𑀥𑀸𑀥𑀸𑀢𑀼, 𑀓𑀭𑁄𑀢𑁆𑀬𑀢𑁆𑀣𑁂 𑀯𑀺𑀧𑀼𑀩𑁆𑀩𑁄, 𑀲𑁂𑀬𑁆𑀬𑀸𑀤𑀺𑀪𑀸𑀯𑁂 𑀅𑀢𑁆𑀢𑀸𑀦𑀁 𑀯𑀺𑀤𑀥𑀸𑀢𑀺 𑀬𑀸𑀬 𑀲𑀸 𑀯𑀺𑀥𑀸, 𑀢𑀻𑀲𑀼. 𑀉𑀤𑁆𑀥𑀁 𑀦𑀫𑀢𑀺 𑀬𑀸𑀬 𑀲𑀸 𑀉𑀦𑁆𑀦𑀢𑀺, 𑀇𑀢𑁆𑀣𑀺𑀬𑀦𑁆𑀢𑀺.

𑁧𑁬𑁯. 𑀤𑁆𑀯𑀬𑀁 ¶ 𑀉𑀤𑁆𑀥𑀘𑁆𑀘𑁂. 𑀳𑀦 𑀕𑀢𑀺𑀬𑀁, 𑀉𑀤𑁆𑀥𑀁 𑀉𑀤𑁆𑀥𑀁 𑀳𑀦𑀢𑀺 𑀕𑀘𑁆𑀙𑀢𑀻𑀢𑀺 𑀉𑀤𑁆𑀥𑀢𑁄, 𑀢𑁄, 𑀳𑀦𑀲𑁆𑀲 𑀥𑁄, 𑀅𑀲𑀭𑀽𑀧𑀤𑁆𑀯𑀺𑀢𑁆𑀢𑀁, 𑀘𑀺𑀢𑁆𑀢𑀁, 𑀉𑀤𑁆𑀥𑀢𑀲𑁆𑀲 𑀪𑀸𑀯𑁄 𑀉𑀤𑁆𑀥𑀘𑁆𑀘𑀁. 𑀥𑀸𑀯 𑀕𑀢𑀺𑀬𑀁, 𑀉𑀤𑁆𑀥𑀁 𑀥𑀸𑀯𑀢𑀺 𑀘𑀺𑀢𑁆𑀢𑀫𑁂𑀢𑁂𑀦𑀸𑀢𑀺 𑀉𑀤𑁆𑀥𑀯𑀁, 𑀅, 𑀭𑀲𑁆𑀲𑁄.

𑀢𑀸𑀧𑀸𑀤𑀺𑀧𑀜𑁆𑀘𑀓𑀁 𑀓𑀼𑀓𑁆𑀓𑀼𑀘𑁆𑀘𑁂. 𑀢𑀧, 𑀥𑀼𑀧 𑀲𑀦𑁆𑀢𑀸𑀧𑁂, 𑀢𑀧𑀢𑀺 𑀘𑀺𑀢𑁆𑀢𑀫𑁂𑀢𑁂𑀦𑀸𑀢𑀺 𑀢𑀸𑀧𑁄, 𑀡𑁄. 𑀓𑀼𑀘𑁆𑀙𑀺𑀢𑀁 𑀓𑀭𑁄𑀢𑀻𑀢𑀺 𑀓𑀼𑀓𑁆𑀓𑀼𑀢𑀁, 𑀘𑀺𑀢𑁆𑀢𑀁, 𑀢𑀁𑀲𑀫𑀗𑁆𑀕𑀻 𑀯𑀸, 𑀢𑀲𑁆𑀲 𑀪𑀸𑀯𑁄 𑀓𑀼𑀓𑁆𑀓𑀼𑀘𑁆𑀘𑀁. 𑀧𑀘𑁆𑀙𑀸 𑀢𑀧𑀢𑀺 𑀏𑀢𑁂𑀦𑀸𑀢𑀺 𑀧𑀘𑁆𑀙𑀸𑀢𑀸𑀧𑁄. 𑀅𑀦𑀼 𑀧𑀘𑁆𑀙𑀸 𑀢𑀧𑀢𑀺 𑀬𑁂𑀦 𑀲𑁄 𑀅𑀦𑀼𑀢𑀸𑀧𑁄. 𑀲𑀭 𑀕𑀢𑀺𑀬𑀁, 𑀯𑀺𑀭𑀽𑀧𑁂𑀦 𑀧𑀢𑀺 𑀧𑀼𑀦𑀧𑁆𑀧𑀼𑀦𑀁 𑀲𑀭𑀢𑀺 𑀘𑀺𑀢𑁆𑀢𑀫𑁂𑀢𑁂𑀦𑀸𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑁄, 𑀢𑀲𑁆𑀲 𑀝𑁄.

𑁧𑁭𑁦. 𑀧𑀚𑁆𑀚𑀁 𑀯𑀺𑀘𑀺𑀓𑀺𑀘𑁆𑀙𑀸𑀬𑀁. 𑀮𑀺𑀔 𑀮𑁂𑀔𑀦𑁂, 𑀫𑀦𑀁 𑀯𑀺𑀮𑁂𑀔𑀢𑀺 𑀤𑁆𑀯𑀺𑀥𑀸𑀓𑀭𑀡𑀯𑀲𑁂𑀦𑀸𑀢𑀺 𑀫𑀦𑁄𑀯𑀺𑀮𑁂𑀔𑁄. 𑀤𑀺𑀳 𑀉𑀧𑀘𑀬𑁂. 𑀇𑀥 𑀧𑀦 𑀲𑀁𑀧𑀼𑀩𑁆𑀩𑀢𑁆𑀢𑀸 𑀲𑀁𑀲𑀬𑁂, 𑀓𑀭𑀡𑁂 𑀡𑁄. 𑀲𑀻 𑀲𑀬𑁂, 𑀇𑀥 𑀲𑀁𑀧𑀼𑀩𑁆𑀩𑀢𑁆𑀢𑀸 𑀓𑀗𑁆𑀔𑀸𑀬𑀁, 𑀲𑀩𑁆𑀩𑀢𑁆𑀭𑁂𑀯𑀁. ‘‘𑀓𑀣𑀫𑀺𑀤’’𑀫𑀺𑀢𑀺 𑀓𑀣𑀬𑀢𑀺 𑀬𑀸𑀬 𑀲𑀸 𑀓𑀣𑀁𑀓𑀣𑀸. 𑀓𑀺𑀢 𑀭𑁄𑀕𑀸𑀧𑀦𑀬𑀦𑁂, 𑀙𑀧𑀘𑁆𑀘𑀬𑁄, 𑀤𑁆𑀯𑀺𑀢𑁆𑀢𑀸𑀤𑀺, 𑀯𑀺𑀕𑀢𑀸 𑀘𑀺𑀓𑀺𑀘𑁆𑀙𑀸 𑀜𑀸𑀡𑀧𑁆𑀧𑀝𑀺𑀓𑀸𑀭𑁄 𑀏𑀢𑀸𑀬𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀇𑀮 𑀕𑀢𑀺𑀓𑀫𑁆𑀧𑀦𑁂𑀲𑀼, 𑀤𑁆𑀯𑀺𑀥𑀸 𑀇𑀮𑀢𑀺 𑀘𑀺𑀢𑁆𑀢𑀫𑁂𑀢𑁂𑀦𑀸𑀢𑀺 𑀤𑁆𑀯𑁂𑀴𑁆𑀳𑀓𑀁, 𑀳𑀧𑀘𑁆𑀘𑀬𑁄, 𑀲𑀓𑀢𑁆𑀣𑁂 𑀓𑁄 𑀘. 𑀓𑀗𑁆𑀔 𑀯𑀺𑀘𑀺𑀓𑀺𑀘𑁆𑀙𑀸𑀬𑀁, 𑀅, 𑀇𑀢𑁆𑀣𑀺𑀬𑀁. 𑀲𑀗𑁆𑀓 𑀲𑀗𑁆𑀓𑀸𑀬𑀁. 𑀯𑀺𑀯𑀺𑀥𑁂𑀦𑀸𑀓𑀸𑀭𑁂𑀦 𑀫𑀜𑁆𑀜𑀢𑀺 𑀬𑀲𑁆𑀫𑀸, 𑀲𑀸 𑀯𑀺𑀫𑀢𑀺. 𑀫𑀦 𑀜𑀸𑀡𑁂, 𑀇𑀢𑁆𑀣𑀺𑀬𑀦𑁆𑀢𑀺.

𑁧𑁭𑁧. 𑀢𑀺𑀓𑀁 ¶ 𑀦𑀻𑀘𑀧𑀓𑀢𑀺𑀤𑁄𑀲𑀲𑀫𑁆𑀪𑀽𑀢𑀭𑀽𑀧𑀺𑀲𑁆𑀲𑀭𑀺𑀬𑀸𑀤𑀺𑀦𑀺𑀫𑀺𑀢𑁆𑀢𑀺𑀓𑁂 𑀫𑀤𑁂, 𑀬𑀲𑁆𑀫𑀺𑀁 𑀲𑀢𑀺 𑀉𑀢𑁆𑀢𑀭𑀤𑀸𑀦𑀲𑀸𑀤𑀭𑁄𑀮𑁄𑀓𑀦𑀸𑀤𑀺𑀯𑀺𑀫𑀼𑀔𑁄 𑀧𑀼𑀭𑀺𑀲𑁄 𑀚𑀸𑀬𑀢𑁂. 𑀫𑀤𑁄𑀧𑁆𑀬𑀢𑁆𑀭 ‘‘𑀓𑀢𑁆𑀣𑀽𑀭𑀻𑀕𑀩𑁆𑀩𑀭𑁂𑀢𑁂𑀲𑀼, 𑀫𑀤𑁄𑀳𑀲𑁆𑀲𑁂𑀪𑀤𑀸𑀦𑁂𑀲𑀽’’𑀢𑀺 [𑀓𑀢𑁆𑀢𑀭𑀺 𑀕𑀩𑁆𑀪𑀭𑁂𑀢𑁂𑀲𑀼, 𑀫𑀤𑁄 𑀧𑀼𑀭𑀺𑀲𑀫𑀸𑀦𑁂𑀲𑀽𑀢𑀺 (𑀦𑀺𑀲𑁆𑀲𑀬)] 𑀭𑀪𑀲𑁄. 𑀕𑀩𑁆𑀩 𑀫𑀸𑀦𑁂, 𑀘𑀼𑀭𑀸𑀤𑀺, 𑀅, 𑀅𑀣 𑀯𑀸 𑀕𑀭 𑀲𑁂𑀘𑀦𑁂, 𑀩𑁄. 𑀫𑀸𑀦 𑀧𑀽𑀚𑀸𑀬𑀁, 𑀯𑀺𑀲𑁂𑀲𑀢𑁄 𑀫𑀸𑀦𑁂𑀢𑀻𑀢𑀺 𑀅𑀪𑀺𑀫𑀸𑀦𑁄. 𑀅𑀳𑀁𑀓𑀸𑀭𑁂 𑀅𑀳𑀁𑀲𑀤𑁆𑀤𑁄 𑀦𑀺𑀧𑀸𑀢𑁄, 𑀅𑀫𑁆𑀳𑀲𑀤𑁆𑀤𑁄𑀧𑁆𑀬𑀢𑁆𑀭, ‘‘𑀅𑀳’’𑀫𑀺𑀢𑀺 𑀅𑀢𑁆𑀢𑀸𑀦𑀁 𑀓𑀭𑁄𑀢𑀺 𑀬𑁂𑀦𑀸𑀢𑀺 𑀅𑀳𑀁𑀓𑀸𑀭𑁄. 𑀤𑁆𑀯𑀬𑀁 𑀘𑀺𑀦𑁆𑀢𑀸𑀬𑀁. 𑀘𑀺𑀦𑁆𑀢 𑀘𑀺𑀦𑁆𑀢𑀸𑀬𑀁, 𑀅. 𑀛𑁂 𑀘𑀺𑀦𑁆𑀢𑀸𑀬𑀁, 𑀛𑀸𑀬𑀢𑁂 𑀛𑀸𑀦𑀁, 𑀤𑁆𑀯𑀻𑀲𑀼𑀧𑀺 𑀪𑀸𑀯𑀲𑀸𑀥𑀦𑀁, 𑀅. 𑀯𑀺𑀢𑀓𑁆𑀓𑀘𑀺𑀦𑁆𑀢𑀸𑀦𑀁 𑀓𑁄 𑀪𑁂𑀤𑁄? 𑀯𑀺𑀢𑀓𑁆𑀓𑁄 𑀢𑀸𑀯 𑀯𑀸𑀘𑀸𑀬 𑀧𑀼𑀩𑁆𑀩𑀪𑀸𑀕𑀧𑁆𑀧𑀯𑀢𑁆𑀢𑁄, ‘‘𑀧𑀼𑀩𑁆𑀩𑁂𑀯 𑀔𑁄, 𑀕𑀳𑀧𑀢𑀺, 𑀯𑀺𑀢𑀓𑁆𑀓𑁂𑀢𑁆𑀯𑀸 𑀯𑀺𑀘𑀸𑀭𑁂𑀢𑁆𑀯𑀸 𑀧𑀘𑁆𑀙𑀸 𑀯𑀸𑀘𑀁 𑀪𑀺𑀦𑁆𑀤𑀢𑀻’’𑀢𑀺 [𑀲𑀁. 𑀦𑀺. 𑁪.𑁩𑁪𑁮] 𑀳𑀺 𑀯𑀼𑀢𑁆𑀢𑀁. 𑀇𑀢𑀭𑀸 𑀧𑀦 𑀢𑀲𑁆𑀲𑀸 𑀅𑀧𑀼𑀩𑁆𑀩𑀪𑀸𑀕𑀧𑁆𑀧𑀯𑀢𑁆𑀢𑀸𑀧𑀻𑀢𑀺 𑀅𑀬𑀫𑁂𑀢𑀸𑀲𑀁 𑀯𑀺𑀲𑁂𑀲𑁄. 𑀅𑀣 𑀯𑀸 𑀯𑀺𑀢𑀓𑁆𑀓𑁄 𑀧𑀓𑀺𑀡𑁆𑀡𑀓𑀧𑀭𑀺𑀬𑀸𑀧𑀦𑁆𑀦𑁄 𑀏𑀓𑁄 𑀘𑁂𑀢𑀲𑀺𑀓𑀥𑀫𑁆𑀫𑁄, 𑀇𑀢𑀭𑀸 𑀧𑀦 𑀲𑀩𑁆𑀩𑀲𑀸𑀥𑀸𑀭𑀡𑀧𑀭𑀺𑀬𑀸𑀧𑀦𑁆𑀦𑁄 𑀫𑀦𑀲𑀺𑀓𑀸𑀭𑀦𑀸𑀫𑀓𑁄 𑀏𑀓𑁄 𑀘𑁂𑀢𑀲𑀺𑀓𑀥𑀫𑁆𑀫𑁄𑀢𑀺 𑀅𑀬𑀫𑁂𑀢𑀸𑀲𑀁 𑀯𑀺𑀲𑁂𑀲𑁄.

𑀤𑁆𑀯𑀬𑀁 𑀦𑀺𑀘𑁆𑀙𑀬𑁂. 𑀦𑀬 𑀕𑀫𑀦𑀢𑁆𑀣𑁄 𑀤𑀡𑁆𑀟𑀓𑁄 𑀥𑀸𑀢𑀼, 𑀆𑀭𑀫𑁆𑀫𑀡𑀁 𑀦𑀺𑀘𑁆𑀙𑀺𑀦𑀦𑁆𑀢𑁄 𑀦𑀬𑀢𑀻𑀢𑀺 𑀦𑀺𑀡𑁆𑀡𑀬𑁄, 𑀦𑀲𑁆𑀲 𑀡𑀢𑁆𑀢𑀁. 𑀅𑀣 𑀅𑀥𑀺𑀫𑁄𑀓𑁆𑀔𑀦𑀺𑀡𑁆𑀡𑀬𑀸𑀦𑀁 𑀓𑁄 𑀪𑁂𑀤𑁄? 𑀅𑀥𑀺𑀫𑁄𑀓𑁆𑀔𑁄 𑀆𑀭𑀫𑁆𑀫𑀡𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀦𑀺𑀡𑁆𑀡𑀬𑁄 𑀯𑀺𑀦𑀺𑀘𑁆𑀙𑀬𑀫𑀢𑁆𑀢𑀫𑁂𑀯𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀅𑀣 𑀯𑀸 𑀅𑀥𑀺𑀫𑁄𑀓𑁆𑀔𑁄 𑀧𑀲𑀸𑀤𑁂𑀧𑀺 𑀲𑀫𑁆𑀪𑀯𑀢𑀺, 𑀇𑀢𑀭𑁄 𑀧𑀦 𑀦 𑀢𑀣𑀸𑀢𑀺 𑀅𑀬𑀁𑀧𑁆𑀬𑁂𑀢𑁂𑀲𑀁 𑀪𑁂𑀤𑁄 ¶ . 𑀢𑀢𑁆𑀭 𑀦𑀺𑀘𑁆𑀙𑀬𑀲𑀤𑁆𑀤𑁄 𑀇𑀥𑀸𑀧𑀺 𑀧𑀯𑀢𑁆𑀢𑀢𑀻𑀢𑀺 𑀤𑁆𑀯𑀻𑀲𑀼𑀧𑀺 𑀯𑀼𑀢𑁆𑀢𑁄.

𑀧𑀸𑀤𑁂𑀦 𑀅𑀪𑁆𑀬𑀼𑀧𑀕𑀫𑀲𑁆𑀲 𑀦𑀸𑀫𑀸𑀦𑀺. 𑀧𑀢𑀺𑀧𑀼𑀩𑁆𑀩𑁄 𑀚𑀸𑀦𑀸𑀢𑀺 𑀅𑀪𑁆𑀬𑀼𑀧𑀕𑀫𑁂, 𑀇𑀢𑁆𑀣𑀺𑀬𑀁 𑀅, 𑀧𑀝𑀺𑀜𑁆𑀜𑀸. 𑀢𑀣𑀸 𑀲𑀼𑀡𑁄𑀢𑀺 𑀘, 𑀅, 𑀧𑀝𑀺𑀲𑁆𑀲𑀯𑁄, 𑀤𑁆𑀯𑀻𑀲𑀼𑀧𑀺 𑀪𑀸𑀯𑀲𑀸𑀥𑀦𑀁. 𑀲𑀁𑀯𑀺𑀤𑀸’𑀕𑀽, 𑀧𑀝𑀺𑀜𑁆𑀜𑀸𑀦𑀁, 𑀦𑀺𑀬𑀫𑁄, 𑀅𑀲𑁆𑀲𑀯𑁄, 𑀲𑀁𑀲𑀯𑁄, 𑀅𑀗𑁆𑀕𑀻𑀓𑀸𑀭𑁄, 𑀅𑀪𑁆𑀬𑀼𑀧𑀕𑀫𑁄, 𑀲𑀫𑀸𑀥𑀺𑀇𑀘𑁆𑀘𑀸𑀤𑀻𑀦𑀺𑀧𑀺 𑀅𑀪𑁆𑀬𑀼𑀧𑀕𑀫𑀲𑁆𑀲 𑀦𑀸𑀫𑀸𑀦𑀺 [𑀅𑀫𑀭 𑁫.𑁫].

𑁧𑁭𑁨. 𑀙𑀳𑀺 𑀧𑀤𑁂𑀳𑀺 𑀅𑀦𑀸𑀤𑀭𑀲𑁆𑀲 𑀦𑀸𑀫𑀸𑀦𑀺. 𑀫𑀸𑀦 𑀧𑀽𑀚𑀸𑀬𑀁, 𑀘𑀼𑀭𑀸𑀤𑀺, 𑀫𑀦 𑀜𑀸𑀡𑁂 𑀯𑀸, 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀚𑀸𑀦𑀦𑀁 𑀅𑀯𑀫𑀸𑀦𑀁, 𑀪𑀸𑀯𑁂 𑀬𑀼. 𑀬𑁄 𑀬𑁂𑀦𑀸𑀦𑀸𑀤𑀭𑀺𑀢𑁄, 𑀲 𑀢𑀢𑁄 𑀅𑀯𑀲𑁆𑀲𑀫𑁂𑀯 𑀓𑀸𑀬𑀯𑀘𑀻𑀫𑀦𑀸𑀦𑀁 𑀅𑀜𑁆𑀜𑀢𑀭𑁂𑀦𑀸𑀯𑀥𑀻𑀬𑀢𑁂𑀢𑀺 𑀅𑀦𑀸𑀤𑀭𑁂𑀧𑀺 𑀩𑁆𑀬𑀯𑀥𑀸𑀦𑀸𑀪𑀺𑀘𑀸𑀭𑀢𑁄 𑀢𑀺𑀭𑀲𑀤𑁆𑀤𑁄 𑀅𑀦𑁆𑀢𑀭𑀥𑀸𑀦𑁂 𑀯𑀢𑁆𑀢𑀫𑀸𑀦𑁄 𑀲𑀫𑁆𑀩𑀚𑁆𑀛𑀢𑁂𑀢𑀺 𑀢𑀺𑀭𑁄𑀥𑀸𑀦𑀓𑀭𑀡𑀁 𑀢𑀺𑀭𑀓𑁆𑀓𑀸𑀭𑁄. 𑀧𑀭𑀺 𑀧𑀭𑀸𑀧𑀼𑀩𑁆𑀩𑁄 𑀪𑀽𑀥𑀸𑀢𑀼 𑀅𑀯𑀜𑁆𑀜𑀸𑀡𑁂, 𑀅𑀯𑀧𑀼𑀩𑁆𑀩𑁄 𑀚𑀸𑀦𑀸𑀢𑀺 𑀘, 𑀲𑀩𑁆𑀩𑀢𑁆𑀭 𑀪𑀸𑀯𑁂 𑀡𑁄, 𑀅 𑀘. 𑀤𑀭 𑀆𑀤𑀭𑁂, 𑀆𑀤𑀭𑁄 𑀲𑀓𑁆𑀓𑀸𑀭𑁄, 𑀢𑀩𑁆𑀩𑀺𑀧𑀭𑀻𑀢𑁄 𑀅𑀦𑀸𑀤𑀭𑁄. 𑀧𑀭𑀸𑀪𑀯𑀦𑀁 𑀧𑀭𑀸𑀪𑀯𑁄. 𑀅𑀯𑀚𑀸𑀦𑀦𑀁 𑀅𑀯𑀜𑁆𑀜𑀸.

𑀤𑁆𑀯𑀬𑀁 𑀉𑀫𑁆𑀫𑀸𑀤𑁂. 𑀘𑀺𑀢𑁆𑀢𑀲𑁆𑀲 𑀯𑀺𑀩𑁆𑀪𑀫𑁄 𑀪𑀦𑁆𑀢𑀺 𑀉𑀫𑁆𑀫𑀸𑀤𑁄. 𑀫𑀤 𑀉𑀫𑁆𑀫𑀸𑀤𑁂, 𑀉𑀕𑁆𑀕𑀢𑁂𑀳𑀺, 𑀉𑀫𑁆𑀫𑀕𑁆𑀕𑀲𑀡𑁆𑀞𑀺𑀢𑁂𑀳𑀺 𑀯𑀸 𑀤𑁄𑀲𑁂𑀳𑀺 𑀫𑀤𑀦𑀁 𑀉𑀫𑁆𑀫𑀸𑀤𑁄.

𑁧𑁭𑁩. 𑀲𑁆𑀦𑁂𑀳𑀦𑁆𑀢𑀁 ¶ 𑀲𑁆𑀦𑁂𑀳𑁂. 𑀧𑀺𑀬𑀲𑁆𑀲 𑀪𑀸𑀯𑁄 𑀧𑁂𑀫𑀁, 𑀇𑀫𑁄, 𑀧𑀺𑀬𑀲𑁆𑀲 𑀧𑀢𑁆𑀢𑀁, 𑀧𑀻𑀦𑀬𑀢𑀻𑀢𑀺 𑀯𑀸𑀧𑀻, 𑀧𑀺𑀦𑁄 𑀪𑀸𑀯𑁄 𑀧𑁂𑀫𑀁, 𑀇𑀫𑁄. 𑀲𑀺𑀦𑀺𑀳, 𑀲𑁆𑀦𑀺𑀳 𑀧𑀻𑀢𑀺𑀬𑀁, 𑀪𑀸𑀯𑁂 𑀡𑁄. 𑀤𑁆𑀯𑀬𑀁 𑀫𑀼𑀘𑁆𑀙𑀸𑀬𑀁. 𑀧𑀻𑀴 𑀯𑀺𑀩𑀸𑀥𑀸𑀬𑀁, 𑀘𑀺𑀢𑁆𑀢𑀲𑁆𑀲 𑀧𑀻𑀴𑀸 𑀘𑀺𑀢𑁆𑀢𑀧𑀻𑀴𑀸, 𑀯𑀺𑀕𑀢𑀸 𑀦𑀻𑀮𑀸𑀤𑀺𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸 𑀲𑀜𑁆𑀜𑀸 𑀏𑀢𑀲𑁆𑀫𑀸𑀢𑀺 𑀯𑀺𑀲𑀜𑁆𑀜𑀻, 𑀢𑀲𑁆𑀲 𑀪𑀸𑀯𑁄 𑀯𑀺𑀲𑀜𑁆𑀜𑀺𑀢𑀸.

𑀤𑁆𑀯𑀬𑀁 𑀧𑀫𑀸𑀤𑁂. 𑀬𑁂𑀦 𑀲𑀓𑁆𑀓𑁄 𑀲𑀫𑀸𑀦𑁄 𑀲𑀬𑀁 𑀓𑀢𑁆𑀢𑀩𑁆𑀩𑀁 𑀦 𑀓𑀭𑁄𑀢𑀺, 𑀲𑁄 𑀧𑀫𑀸𑀤𑁄, 𑀫𑀤 𑀧𑀫𑀸𑀤𑁂 𑀧𑀧𑀼𑀩𑁆𑀩𑁄, 𑀧𑀫𑀚𑁆𑀚𑀦𑀁 𑀧𑀫𑀸𑀤𑁄, 𑀡𑁄. 𑀲𑀚 𑀯𑀺𑀲𑀚𑁆𑀚𑀦𑀸𑀮𑀺𑀗𑁆𑀕𑀦𑀦𑀺𑀫𑁆𑀫𑀸𑀦𑁂𑀲𑀼. 𑀲𑀢𑀺𑀬𑀸 𑀯𑀺𑀲𑀚𑁆𑀚𑀦𑀁 𑀲𑀢𑀺𑀯𑁄𑀲𑀕𑁆𑀕𑁄, 𑀇𑀲𑁆𑀲 𑀑. 𑀅𑀧𑀼𑀩𑁆𑀩𑀯𑀢𑁆𑀣𑀼𑀧𑀭𑀺𑀓𑁆𑀔𑀸𑀢𑀺𑀲𑀬𑁂 𑀓𑁄𑀢𑀽𑀳𑀮𑀸𑀤𑀺𑀤𑁆𑀯𑀬𑀁. 𑀢𑀼𑀚 𑀳𑀺𑀁𑀲𑀸𑀬𑀁, 𑀓𑀼𑀁 𑀧𑀸𑀧𑀁 𑀢𑁄𑀚𑀢𑀻𑀢𑀺 𑀓𑁄𑀢𑀽𑀳𑀮𑀁, 𑀅𑀮𑁄, 𑀯𑀡𑁆𑀡𑀯𑀺𑀓𑀸𑀭𑁄 𑀘. 𑀢𑀼𑀮 𑀦𑀺𑀓𑁆𑀓𑀲𑁂, 𑀓𑀼𑀁 𑀧𑀸𑀧𑀁 𑀢𑀼𑀮𑀬𑀢𑀻𑀢𑀺 𑀓𑀼𑀢𑀽𑀳𑀮𑀁, 𑀅, 𑀳𑀓𑀸𑀭𑀯𑀡𑁆𑀡𑀸𑀕𑀫𑁄. 𑀓𑁄𑀢𑀼𑀓𑀁, 𑀓𑀼𑀢𑀼𑀓𑀜𑁆𑀘 𑀏𑀢𑁂𑀲𑀁 𑀧𑀭𑀺𑀬𑀸𑀬𑀸𑀦𑀺.

𑁧𑁭𑁪. 𑀯𑀺𑀮𑀸𑀲𑀸𑀤𑀬𑁄 𑀓𑁆𑀭𑀺𑀬𑀸 𑀘𑁂𑀝𑁆𑀞𑀸, 𑀓𑀺𑀁𑀯𑀺𑀲𑀺𑀝𑁆𑀞𑀸? 𑀲𑀸 𑀓𑁆𑀭𑀺𑀬𑀸 𑀦𑀸𑀭𑀺𑀲𑀺𑀗𑁆𑀕𑀸𑀭𑀪𑀸𑀯𑀚𑀸 𑀇𑀢𑁆𑀣𑀻𑀦𑀁 𑀭𑀢𑀺𑀪𑀸𑀯𑀚𑀸, 𑀬𑀸 𑀳𑀸𑀯𑀲𑀤𑁆𑀤𑁂𑀦𑁄𑀘𑁆𑀘𑀦𑁆𑀢𑁂. 𑀳𑀼𑀬𑀦𑁆𑀢𑁂 𑀭𑀸𑀕𑀺𑀦𑁄 𑀅𑀢𑁆𑀭𑀸𑀢𑀺 𑀳𑀸𑀯𑁄, 𑀳𑀼 𑀳𑀯𑀦𑁂, 𑀡𑁄. 𑀆𑀤𑀺𑀦𑀸 𑀯𑀺𑀘𑁆𑀙𑀺𑀢𑁆𑀢𑀺𑀧𑀪𑀼𑀢𑀻𑀦𑀁 𑀕𑀳𑀡𑀁, 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀦𑀸𑀝𑀓𑀭𑀢𑀦𑀓𑁄𑀲𑁂 𑁋

‘‘𑀮𑀻𑀮𑀸 ¶ 𑀯𑀺𑀮𑀸𑀲𑁄 𑀯𑀺𑀘𑁆𑀙𑀺𑀢𑁆𑀢𑀺, 𑀯𑀺𑀩𑁆𑀪𑀫𑁄 𑀓𑀺𑀮𑀓𑀺𑀜𑁆𑀘𑀺𑀢𑀁;

𑀫𑁄𑀝𑁆𑀝𑀸𑀬𑀺𑀢𑀁 𑀓𑀼𑀝𑁆𑀝𑀫𑀺𑀢𑀁, 𑀯𑀺𑀩𑁆𑀩𑁄𑀓𑁄 𑀮𑀮𑀺𑀢𑀁 𑀢𑀣𑀸.

𑀯𑀺𑀓𑀢𑀜𑁆𑀘𑁂𑀢𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀤𑀲 𑀣𑀻𑀦𑀁 [𑀣𑀻𑀦𑀁 𑀘𑁂𑀝𑁆𑀞𑀸 (𑀓.)] 𑀲𑀪𑀸𑀯𑀚𑀸;

𑀳𑀸𑀯𑁄 𑀘 𑀳𑁂𑀮𑀸 𑀯𑀺𑀓𑁆𑀔𑁂𑀧-𑀲𑀫𑁆𑀫𑀽𑀴𑁆𑀳𑀫𑀤𑀓𑀧𑀡𑁆𑀬’’𑀦𑁆𑀢𑀺.

𑀢𑀢𑁆𑀭 𑀧𑀺𑀬𑀲𑀫𑀻𑀧𑀕𑀫𑀦𑁂 𑀬𑁄 𑀞𑀸𑀦𑀸𑀲𑀦𑀕𑀫𑀦𑀯𑀺𑀮𑁄𑀓𑀺𑀢𑁂𑀲𑀼 𑀯𑀺𑀓𑀸𑀭𑁄, 𑀅𑀓𑀲𑁆𑀫𑀸 𑀘 𑀓𑁄𑀥𑀫𑀺𑀳𑀺𑀢𑀘𑀫𑀓𑁆𑀓𑀸𑀭𑀫𑀼𑀔𑀯𑀺𑀓𑀽𑀡𑀦𑀁, 𑀲𑁄 𑀯𑀺𑀮𑀸𑀲𑁄, 𑀯𑀺𑀧𑀼𑀩𑁆𑀩𑀸 𑀮𑀲𑀥𑀸𑀢𑀼𑀫𑁆𑀳𑀸 𑀡𑁄. 𑀲𑀼𑀓𑀼𑀫𑀸𑀭𑀯𑀺𑀥𑀸𑀦𑁂𑀦 𑀪𑀫𑀼𑀓𑀦𑁂𑀢𑁆𑀢𑀸𑀤𑀺𑀓𑁆𑀭𑀺𑀬𑀸𑀲𑀘𑀺𑀯𑀓𑀭𑀘𑀭𑀡𑀗𑁆𑀕𑀯𑀺𑀦𑁆𑀬𑀸𑀲𑁄 𑀮𑀮𑀺𑀢𑀁, 𑀮𑀮 𑀯𑀺𑀮𑀸𑀲𑁂, 𑀢𑁄. 𑀅𑀮𑀤𑁆𑀥𑀧𑀺𑀬𑀲𑀫𑀸𑀕𑀫𑁂𑀦 𑀓𑀼𑀘𑀺𑀢𑁆𑀢𑀯𑀺𑀦𑁄𑀤𑀦𑀢𑁆𑀣𑀁 𑀧𑀺𑀬𑀲𑁆𑀲 𑀬𑀸 𑀯𑁂𑀲𑀕𑀢𑀺𑀤𑀺𑀝𑁆𑀞𑀺𑀳𑀲𑀺𑀢𑀪𑀡𑀺𑀢𑁂𑀳𑀸𑀦𑀼𑀓𑀢𑀺 𑀓𑀭𑀻𑀬𑀢𑁂, 𑀲𑀸 𑀮𑀻𑀮𑀸, 𑀮𑀮 𑀯𑀺𑀮𑀸𑀲𑁂, 𑀮𑀮 𑀉𑀧𑀲𑁂𑀯𑀸𑀬𑀦𑁆𑀢𑀺 𑀯𑀸 𑀥𑀸𑀢𑁆𑀯𑀢𑁆𑀣𑁄, 𑀅. 𑀲𑀼𑀭𑀢𑁂 𑀧𑀯𑀟𑁆𑀠𑁂𑀘𑁆𑀙𑀸 𑀳𑁂𑀴𑀸, 𑀳𑁂𑀮𑀸 𑀯𑀸, 𑀳𑀺𑀮 𑀳𑀸𑀯𑀓𑀭𑀡𑁂, 𑀅. 𑀫𑀤𑀭𑀸𑀕𑀳𑀲𑁆𑀲𑀚𑀦𑀺𑀢𑁄 𑀯𑀺𑀧𑀭𑀺𑀬𑀸𑀲𑁄 𑀯𑀺𑀩𑁆𑀪𑀫𑁄. 𑀆𑀪𑀭𑀡𑀯𑀺𑀮𑁂𑀧𑀦𑀸𑀤𑀻𑀦𑀁 𑀓𑀼𑀢𑁄𑀘𑀺 𑀧𑀺𑀬𑀸𑀧𑀭𑀸𑀥𑀢𑁄 𑀇𑀲𑁆𑀲𑀸𑀬𑀸𑀦𑀸𑀤𑀭𑁂𑀦 𑀘𑀢𑁆𑀢𑀸𑀦𑀁 𑀲𑀔𑀻𑀦𑀁 𑀧𑀬𑀢𑀦𑁂𑀦 𑀯𑀸𑀭𑀡𑀁 𑀯𑀺𑀘𑁆𑀙𑀺𑀢𑁆𑀢𑀺, 𑀙𑀺𑀤𑀺 𑀤𑁆𑀯𑁂𑀥𑀸𑀓𑀭𑀡𑁂,𑀢𑀺. 𑀧𑀺𑀬𑁂𑀦 𑀤𑀢𑁆𑀢𑀁 𑀧𑀻𑀢𑀺𑀦𑀺𑀩𑀦𑁆𑀥𑀦𑀁 𑀲𑁆𑀯𑀧𑁆𑀧𑀫𑀧𑀺 𑀪𑀽𑀲𑀦𑀁 𑀯𑀺𑀘𑁆𑀙𑀺𑀢𑁆𑀢𑀻𑀢𑁆𑀬𑀜𑁆𑀜𑁂. 𑀓𑀺𑀮𑀓𑀺𑀜𑁆𑀘𑀺𑀢𑀸𑀤𑀬𑁄 𑀦𑀸𑀝𑀓𑀲𑀢𑁆𑀣𑀸𑀦𑀼𑀲𑀸𑀭𑀢𑁄 [𑀩𑁆𑀬𑀸𑀔𑁆𑀬𑀸𑀲𑀼𑀥𑀸𑀝𑀻𑀓𑀸𑀝𑀻𑀧𑁆𑀧𑀡𑁂] 𑀜𑁂𑀬𑁆𑀬𑀸.

𑁧𑁭𑁫. 𑀢𑀺𑀓𑀁 𑀳𑀲𑀺𑀢𑁂. 𑀳𑀲 𑀳𑀲𑀦𑁂, 𑀲𑀩𑁆𑀩𑀢𑁆𑀭 𑀪𑀸𑀯𑀲𑀸𑀥𑀦𑀁. 𑀲𑁄 𑀳𑀸𑀲𑁄 𑀫𑀦𑁆𑀤𑁄 𑀲𑀫𑀸𑀦𑁄 𑀫𑀺𑀳𑀺𑀢𑀁, 𑀲𑀺𑀢𑀜𑁆𑀘𑀼𑀘𑁆𑀘𑀢𑁂. 𑀫𑀺𑀳 𑀈𑀲𑀁𑀳𑀲𑀦𑁂. 𑀫𑀦𑁆𑀤𑀲𑁆𑀲𑀺𑀢𑀁 𑀫𑁆𑀳𑀺𑀢𑀦𑁆𑀢𑀺𑀧𑀺 𑀧𑀸𑀞𑁄, 𑀫𑁆𑀳𑀺 ¶ 𑀈𑀲𑀁𑀳𑀲𑀦𑁂𑀢𑀺𑀧𑀺 𑀥𑀸𑀢𑀼, 𑀫𑁆𑀳𑀺𑀲𑁆𑀲, 𑀫𑀺𑀳𑀺𑀲𑁆𑀲 𑀯𑀸 𑀲𑁆𑀬𑀸𑀤𑁂𑀲𑁄, 𑀲𑀺𑀢𑀁. 𑀲𑀩𑁆𑀩𑀢𑁆𑀭 𑀪𑀸𑀯𑁂 𑀢𑁄.

𑀈𑀲𑀁𑀨𑀼𑀮𑁆𑀮𑀺𑀢𑀤𑀦𑁆𑀢𑁂𑀳𑀺, 𑀓𑀝𑀸𑀓𑁆𑀔𑁂𑀳𑀺 𑀲𑁄𑀝𑁆𑀞𑀯𑁂𑀳𑀺 𑀘;

𑀅𑀮𑀓𑁆𑀔𑀺𑀢𑀤𑁆𑀯𑀺𑀚𑀤𑁆𑀯𑀸𑀭𑀁, 𑀲𑀺𑀢𑀫𑀺𑀘𑁆𑀙𑀦𑁆𑀢𑀺 𑀲𑀽𑀭𑀬𑁄 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁭.𑁩𑁪].

𑀤𑁆𑀯𑀬𑀁 𑀫𑀳𑀸𑀳𑀲𑀺𑀢𑁂. 𑀅𑀝 𑀕𑀢𑀺𑀬𑀁, 𑀤𑀽𑀭𑀕𑀸𑀫𑀺𑀳𑀸𑀲𑁄 𑀅𑀝𑀳𑀸𑀲𑁄, 𑀅𑀢𑀺𑀓𑁆𑀓𑀦𑁆𑀢𑁄 𑀯𑀸 𑀳𑀸𑀲𑁄 𑀅𑀝𑀳𑀸𑀲𑁄, 𑀢𑀲𑁆𑀲 𑀝𑁄, 𑀇𑀓𑀸𑀭𑀲𑁆𑀲𑀢𑁆𑀢𑀜𑁆𑀘. 𑀲𑀺𑀢𑀸𑀢𑀺𑀳𑀲𑀺𑀢𑀸𑀦𑀁 𑀅𑀦𑁆𑀢𑀭𑀸𑀴𑀺𑀓𑀁 𑀯𑀺𑀳𑀲𑀺𑀢𑀁.

𑀆𑀓𑀼𑀜𑁆𑀘𑀺𑀢𑀓𑀧𑁄𑀮’𑀓𑁆𑀔𑀁, 𑀲𑀲𑁆𑀲𑀦𑀁 𑀦𑀺𑀲𑁆𑀲𑀦𑀁 𑀢𑀣𑀸;

𑀧𑀢𑁆𑀣𑀸𑀯𑁄𑀢𑁆𑀣𑀁 𑀲𑀸𑀦𑀼𑀭𑀸𑀕𑀁, 𑀆𑀳𑀼 𑀯𑀺𑀳𑀲𑀺𑀢𑀁 𑀩𑀼𑀥𑀸 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁭.𑁩𑁫].

𑀤𑁆𑀯𑀬𑀁 𑀮𑁄𑀫𑀼𑀕𑁆𑀕𑀫𑁂. 𑀭𑁄𑀫𑀸𑀦𑀁 𑀅𑀜𑁆𑀘𑀦𑀁 𑀭𑁄𑀫𑀜𑁆𑀘𑁄, 𑀅𑀜𑁆𑀘 𑀕𑀫𑀦𑁂, 𑀡𑁄. 𑀮𑁄𑀫𑀸𑀦𑀁 𑀳𑀁𑀲𑀦𑀁 𑀉𑀤𑁆𑀥𑀕𑁆𑀕𑀪𑀸𑀯𑁄 𑀮𑁄𑀫𑀳𑀁𑀲𑀦𑁄.

𑁧𑁭𑁬. 𑀧𑀭𑀺𑀳𑀸𑀲𑀸𑀤𑀺𑀙𑀓𑁆𑀓𑀁 𑀯𑀮𑁆𑀮𑀪𑀸𑀤𑀻𑀦𑀁 𑀧𑀭𑀺𑀳𑀸𑀲𑁂. 𑀧𑀭𑀺𑀳𑀲𑀦𑁆𑀢𑁆𑀬𑀢𑁆𑀭𑀸𑀢𑀺 𑀧𑀭𑀺𑀳𑀸𑀲𑁄, 𑀡𑁄, 𑀧𑀭𑀺𑀪𑀯𑀺𑀢𑀼𑀓𑀸𑀫𑁂𑀦 𑀳𑀸𑀲𑁄𑀢𑀺 𑀯𑀸 𑀧𑀭𑀺𑀳𑀸𑀲𑁄. 𑀤𑀼 𑀧𑀭𑀺𑀳𑀸𑀲𑁂, 𑀤𑀼 𑀅𑀦𑀸𑀤𑀭𑁂𑀢𑀺 𑀯𑀸 𑀥𑀸𑀢𑀼, 𑀅, 𑀤𑀯 𑀤𑀸𑀳𑁂𑀢𑀺 𑀯𑀸 𑀥𑀸𑀢𑀼. 𑀔𑀺𑀟 𑀓𑀻𑀴𑀸𑀬𑀁, 𑀔𑀺𑀟𑁆𑀟𑀸, 𑀔𑀺𑀤𑁆𑀤𑀸𑀢𑀺𑀧𑀺 𑀧𑀸𑀞𑁄, 𑀅𑀣 𑀯𑀸 𑀔𑀁 𑀢𑀼𑀘𑁆𑀙𑀁 𑀇𑀟𑁆𑀟𑀸 𑀯𑀸𑀘𑀸, 𑀲𑀸 𑀏𑀢𑁆𑀣𑀸𑀢𑀺 𑀔𑀺𑀟𑁆𑀟𑀸. 𑀓𑀻𑀴 𑀧𑀻𑀢𑀺𑀬𑀓𑀻𑀴𑀦𑁂𑀲𑀼, 𑀓𑀻𑀴 𑀯𑀺𑀳𑀸𑀭𑁂𑀢𑀺 𑀯𑀸, 𑀓𑀻𑀴𑀦𑀁 𑀓𑁂𑀴𑀺 𑀓𑀻𑀴𑀸 𑀘 𑀓𑀻𑀴𑀺𑀢𑀜𑁆𑀘. 𑀧𑀭𑀺𑀳𑀸𑀲𑀸𑀤𑀺𑀙𑀓𑁆𑀓𑁂𑀲𑀼𑀧𑀺 𑀅𑀥𑀺𑀓𑀭𑀡𑀲𑀸𑀥𑀦𑀫𑁆𑀧𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺.

𑀢𑀺𑀓𑀁 ¶ 𑀦𑀺𑀤𑁆𑀤𑀸𑀬𑀁. 𑀦𑀺𑀧𑀼𑀩𑁆𑀩𑁄 𑀤𑀸 𑀲𑀼𑀧𑀦𑁂, 𑀅. 𑀲𑀼𑀧 𑀲𑀬𑁂, 𑀇𑀦𑁄, 𑀲𑀼𑀧𑀺𑀦𑀁. 𑀅, 𑀲𑁄𑀧𑁆𑀧𑀁. 𑀅𑀘𑁆𑀘𑀦𑁆𑀢𑀧𑀭𑀺𑀲𑁆𑀲𑀫𑀸𑀤𑀺𑀓𑀸𑀭𑀡𑀸 𑀲𑀩𑁆𑀩𑀗𑁆𑀕𑀦𑀺𑀫𑀻𑀮𑀦𑀁 𑀫𑀺𑀤𑁆𑀥𑀁. 𑀫𑀼𑀘𑁆𑀙𑀸𑀧𑀸𑀬𑀁 𑀫𑀺𑀤𑁆𑀥𑀁. 𑀫𑀺𑀤 𑀓𑀸𑀭𑀺𑀬𑀓𑁆𑀔𑀫𑀦𑁂, 𑀢𑁄. 𑀫𑁂𑀥𑀬𑀢𑀺 𑀯𑀸 𑀫𑀺𑀤𑁆𑀥𑀁, 𑀅𑀓𑀫𑁆𑀫𑀜𑁆𑀜𑀪𑀸𑀯𑁂𑀦 𑀯𑀺𑀳𑀺𑀁 𑀲𑀢𑀻𑀢𑁆𑀬𑀢𑁆𑀣𑁄, 𑀓𑀫𑁆𑀧𑀦𑀢𑁆𑀣𑁄 𑀘𑀮𑀥𑀸𑀢𑀼 𑀫𑀼𑀘𑁆𑀙𑀸𑀧𑀸𑀬𑁂 𑀧𑀧𑀼𑀩𑁆𑀩𑁄. 𑀅𑀓𑁆𑀔𑀺𑀤𑀮𑀸𑀦𑀁 𑀧𑀘𑀮𑀪𑀸𑀯𑁂𑀦 𑀅𑀬𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀘𑀮𑀸𑀬𑀺𑀓𑀸, 𑀡𑁆𑀯𑀼, 𑀅𑀲𑁆𑀲𑀺𑀢𑁆𑀢𑀁.

𑁧𑁭𑁭-𑁧𑁭𑁮. 𑀓𑁂𑀢𑀯𑀦𑁆𑀢𑀁 𑀓𑀽𑀝𑁂. 𑀓𑀭𑀡𑀁 𑀓𑀢𑀺, 𑀦𑀺𑀦𑁆𑀤𑀺𑀢𑀸 𑀓𑀢𑀺 𑀦𑀺𑀓𑀢𑀺. 𑀅𑀝 𑀕𑀫𑀦𑁂, 𑀓𑀼𑀘𑁆𑀙𑀺𑀢𑁂𑀦𑀸𑀓𑀸𑀭𑁂𑀦 𑀅𑀝𑀢𑀻𑀢𑀺 𑀓𑀽𑀝𑀁. 𑀓𑀼𑀝 𑀙𑁂𑀤𑀦𑁂𑀢𑀺 𑀯𑀸 𑀥𑀸𑀢𑀼 [𑀲𑀤𑁆𑀤𑀦𑀻𑀢𑀺𑀥𑀸𑀢𑀼𑀫𑀸𑀮𑀸𑀬𑀁 𑀧𑀦 ‘‘𑀓𑀽𑀝 𑀅𑀧𑁆𑀧𑀲𑀸𑀤𑁂’’𑀢𑀺 𑀥𑀸𑀢𑀼𑀦𑀸 𑀲𑀸𑀥𑀺𑀢𑀁]. 𑀭𑀪𑀺 𑀩𑁆𑀬𑀸𑀚𑁂, 𑀩𑁆𑀬𑀸𑀚𑁄 𑀦𑀸𑀫 𑀓𑁂𑀢𑀯𑀁. 𑀲𑀞 𑀓𑁂𑀢𑀯𑁂, 𑀲𑀞𑀁, 𑀲𑀞𑀬𑀢𑀺 𑀦 𑀲𑀫𑁆𑀫𑀸 𑀪𑀸𑀲𑀢𑀺 𑀬𑁂𑀦𑀸𑀢𑀺 𑀯𑀸 𑀲𑀞𑀁. 𑀓𑀺𑀢𑀯𑀲𑁆𑀲 𑀥𑀫𑁆𑀫𑁄 𑀓𑁂𑀢𑀯𑀁, 𑀓𑀺𑀢𑀯𑁄 𑀦𑀸𑀫 𑀚𑀽𑀢𑀓𑀸𑀭𑁄, 𑀘𑁄𑀭𑁄 𑀯𑀸, 𑀓𑀺𑀢 𑀦𑀺𑀯𑀸𑀲𑁂, 𑀅𑀯𑁄. 𑀓𑀧𑀝𑁄, 𑀩𑁆𑀬𑀸𑀚𑁄, 𑀉𑀧𑀥𑀺, 𑀓𑀼𑀲𑀢𑀺 𑀇𑀘𑁆𑀘𑀸𑀤𑀻𑀦𑀺𑀧𑀺 𑀓𑁂𑀢𑀯𑀲𑁆𑀲 𑀦𑀸𑀫𑀸𑀦𑀺.

𑀲𑀢𑁆𑀢𑀓𑀁 𑀲𑀪𑀸𑀯𑁂. 𑀪𑀯𑀦𑀁 𑀪𑀸𑀯𑁄, 𑀲𑀲𑁆𑀲 𑀅𑀢𑁆𑀢𑀦𑁄, 𑀲𑀦𑁆𑀢𑁄 𑀯𑀸 𑀲𑀁𑀯𑀺𑀚𑁆𑀚𑀫𑀸𑀦𑁄 𑀪𑀸𑀯𑁄 𑀲𑀪𑀸𑀯𑁄. 𑀲𑀚 𑀯𑀺𑀲𑀚𑁆𑀚𑀦𑀸𑀮𑀺𑀗𑁆𑀕𑀦𑀦𑀺𑀫𑁆𑀫𑀸𑀦𑁂𑀲𑀼, 𑀦𑀢𑁆𑀣𑀺 𑀯𑀺𑀲𑀚𑁆𑀚𑀦𑀫𑁂𑀢𑀲𑁆𑀲𑀸𑀢𑀺 𑀦𑀺𑀲𑁆𑀲𑀕𑁆𑀕𑁄. 𑀭𑀽𑀧 𑀧𑀓𑀸𑀲𑀦𑁂, 𑀲𑀁𑀯𑀺𑀚𑁆𑀚𑀫𑀸𑀦𑀁 𑀭𑀽𑀧𑀁 𑀲𑀭𑀽𑀧𑀁. 𑀓𑀭𑀡𑀁 𑀪𑀯𑀦𑀁 𑀓𑀢𑀺, 𑀧𑀞𑀫𑀁 𑀓𑀢𑀺 𑀧𑀓𑀢𑀺. 𑀬𑀣𑀸 𑀧𑀞𑀫𑀓𑀸𑀮𑁂 𑀲𑀫𑁆𑀪𑀽𑀢𑀸, 𑀢𑀣𑁂𑀯 𑀲𑀩𑁆𑀩𑀤𑀸𑀧𑀻𑀢𑁆𑀬𑀢𑁆𑀣𑁄. 𑀲𑀻𑀮 𑀲𑀫𑀸𑀥𑀺𑀫𑁆𑀳𑀺, 𑀲𑀫𑀸𑀥𑀺 𑀦𑀺𑀬𑀫𑁄. 𑀮𑀓𑁆𑀔 𑀤𑀲𑁆𑀲𑀦𑀗𑁆𑀓𑁂𑀲𑀼, 𑀢𑀣𑁂𑀯 𑀮𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀮𑀓𑁆𑀔𑀡𑀁, 𑀬𑀼. 𑀢𑀣𑁂𑀯 𑀪𑀯𑀢𑀻𑀢𑀺 𑀪𑀸𑀯𑁄.

𑀤𑁆𑀯𑀬𑀁 ¶ 𑀉𑀲𑁆𑀲𑀯𑁂. 𑀉𑀲 𑀤𑀸𑀳𑁂. 𑀓𑀁 𑀉𑀲𑀯𑀦𑁆𑀢𑀺 𑀉𑀕𑁆𑀕𑀺𑀭𑀬𑀦𑁆𑀢𑁆𑀬𑀢𑁆𑀭𑀸𑀢𑀺 𑀉𑀲𑁆𑀲𑀯𑁄, 𑀦𑀸𑀦𑀸𑀲𑀫𑀺𑀤𑁆𑀥𑀻𑀳𑀺 𑀲𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀉𑀲𑁆𑀲𑀯𑁄. 𑀙𑀺 𑀙𑁂𑀤𑀦𑁂, 𑀙𑀺𑀦𑁆𑀤𑀢𑀺 𑀲𑁄𑀓𑀫𑁂𑀢𑁆𑀣𑀸𑀢𑀺 𑀙𑀡𑁄. 𑀬𑀼. 𑀇𑀲𑁆𑀲 𑀮𑁄𑀧𑁄. 𑀲𑁄𑀓𑀁, 𑀧𑀸𑀧𑀜𑁆𑀘 𑀙𑀺𑀦𑁆𑀤𑀦𑁆𑀢𑀸 𑀅𑀡𑀦𑁆𑀢𑀺 𑀲𑀤𑁆𑀤𑀸𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀙𑀡𑁄. 𑀙𑀺 𑀙𑁂𑀤𑀦𑁂. 𑀅𑀡 𑀲𑀤𑁆𑀤𑀢𑁆𑀣𑁄 𑀤𑀡𑁆𑀟𑀓𑁄 𑀥𑀸𑀢𑀼.

𑁧𑁭𑁯. 𑀬𑀣𑀸 𑀲𑀲𑁆𑀦𑁂𑀳𑀁 𑀧𑀓𑀢𑀺𑀢𑀺𑀮𑀢𑁂𑀮𑀸𑀤𑀺𑀲𑁆𑀦𑁂𑀳𑀲𑀳𑀺𑀢𑀁 𑀤𑀻𑀧𑀓𑀁 𑀧𑀚𑁆𑀚𑁄𑀢𑀁 𑀥𑀸𑀭𑁂𑀦𑁆𑀢𑁄 𑀚𑀦𑁆𑀢𑀼 𑀦𑀭𑁄 𑀅𑀢𑁆𑀬𑀦𑁆𑀥𑀓𑀸𑀭𑀕𑀩𑁆𑀪𑀸𑀤𑀻𑀲𑁆𑀯𑀧𑀺 𑀞𑀺𑀢𑀸𑀦𑀺 𑀔𑀼𑀤𑁆𑀤𑀓𑀸𑀦𑁆𑀬𑀢𑁆𑀣𑀚𑀸𑀢𑀸𑀦𑀺 𑀅𑀢𑀺𑀲𑀼𑀔𑀼𑀫𑀸𑀦𑀺𑀧𑀺 𑀦𑀸𑀦𑀸𑀤𑀩𑁆𑀩𑀲𑀫𑀽𑀳𑀸𑀦𑀺 𑀲𑀼𑀔𑀁𑀯 𑀲𑀫𑁆𑀧𑀲𑁆𑀲𑀢𑀺, 𑀢𑀣𑀸 𑀲𑀲𑁆𑀦𑁂𑀳𑀁 𑀩𑀼𑀤𑁆𑀥𑀧𑀭𑀺𑀬𑀸𑀬𑀸𑀤𑀺𑀅𑀦𑁂𑀓𑀧𑀭𑀺𑀬𑀸𑀬𑀲𑁆𑀦𑁂𑀳𑀲𑀳𑀺𑀢𑀁 𑀇𑀫𑀁 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀁 𑀕𑀦𑁆𑀣𑀁 𑀉𑀕𑁆𑀕𑀳𑀡𑀥𑀸𑀭𑀡𑀸𑀤𑀺𑀦𑀸 𑀥𑀸𑀭𑁂𑀦𑁆𑀢𑁄 𑀚𑀦𑁆𑀢𑀼 𑀲𑁄𑀢𑀼𑀚𑀦𑁄 𑀔𑀼𑀤𑁆𑀤𑀓𑀸𑀦𑀺 𑀅𑀢𑁆𑀣𑀚𑀸𑀢𑀸𑀦𑀺 𑀦𑀸𑀦𑀸𑀲𑀢𑁆𑀣𑁂𑀲𑀼 𑀆𑀕𑀢𑀸𑀦𑀺 𑀅𑀢𑀺𑀕𑀫𑁆𑀪𑀻𑀭𑀸𑀦𑀺 𑀅𑀢𑁆𑀣𑀚𑀸𑀢𑀸𑀦𑀺 𑀲𑀼𑀔𑀁 𑀲𑀫𑁆𑀧𑀲𑁆𑀲𑀢𑀻𑀢𑀺 𑀬𑁄𑀚𑀦𑀸.

𑀇𑀢𑀺 𑀲𑀓𑀮𑀩𑁆𑀬𑀸𑀓𑀭𑀡𑀫𑀳𑀸𑀯𑀦𑀸𑀲𑀗𑁆𑀕𑀜𑀸𑀡𑀘𑀸𑀭𑀺𑀦𑀸 𑀓𑀯𑀺𑀓𑀼𑀜𑁆𑀚𑀭𑀓𑁂𑀲𑀭𑀺𑀦𑀸 𑀲𑀺𑀭𑀺𑀫𑀳𑀸𑀘𑀢𑀼𑀭𑀗𑁆𑀕𑀩𑀮𑁂𑀦 𑀫𑀳𑀸𑀫𑀘𑁆𑀘𑁂𑀦 𑀯𑀺𑀭𑀘𑀺𑀢𑀸𑀬𑀁 𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸𑀯𑀡𑁆𑀡𑀦𑀸𑀬𑀁 𑀲𑀕𑁆𑀕𑀓𑀡𑁆𑀟𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀲𑀕𑁆𑀕𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀪𑀽𑀓𑀡𑁆𑀟

𑁧. 𑀪𑀽𑀫𑀺𑀯𑀕𑁆𑀕𑀯𑀡𑁆𑀡𑀦𑀸

𑁧𑁮𑁦. 𑀇𑀥 ¶ 𑀪𑀽𑀓𑀡𑁆𑀟𑁂 𑀲𑀸𑀗𑁆𑀕𑁄𑀧𑀸𑀗𑁆𑀕𑁂𑀳𑀺 𑀪𑀽𑀫𑁆𑀬𑀸𑀤𑀻𑀳𑀺 𑀤𑀲𑀳𑀺, 𑀧𑀸𑀢𑀸𑀮𑁂𑀦 𑀘𑀸𑀢𑀺 𑀏𑀓𑀸𑀤𑀲𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀓𑀫𑀢𑁄 𑀯𑀕𑁆𑀕𑀸 𑀪𑀽𑀫𑀺𑀯𑀕𑁆𑀕𑀸𑀤𑀺𑀦𑀸𑀫𑀓𑀸 𑀯𑀕𑁆𑀕𑀸 𑀯𑀼𑀘𑁆𑀘𑀦𑁆𑀢𑁂. 𑀲𑀧𑁆𑀧𑀥𑀸𑀦𑁄𑀧𑀓𑀸𑀭𑀓𑀸𑀦𑀺 𑀅𑀗𑁆𑀕𑀸𑀦𑀺 𑀔𑀸𑀭𑀸𑀤𑀻𑀦𑀺, 𑀅𑀗𑁆𑀕𑀸𑀦𑀁 𑀉𑀧𑀓𑀸𑀭𑀓𑀸𑀦𑀺 𑀘 𑀉𑀧𑀗𑁆𑀕𑀸𑀦𑀺 𑀅𑀤𑁆𑀥𑀸𑀤𑀻𑀦𑀺.

𑁧𑁮𑁧. 𑀲𑀸𑀤𑁆𑀥𑀧𑀚𑁆𑀚𑁂𑀦 𑀪𑀽𑀫𑀺𑀬𑀸 𑀦𑀸𑀫𑀸𑀦𑀺. 𑀯𑀲𑀽𑀦𑀺 𑀭𑀢𑀦𑀸𑀦𑀺 𑀥𑀸𑀭𑀬𑀢𑀻𑀢𑀺 𑀯𑀲𑀼𑀦𑁆𑀥𑀭𑀸. 𑀔𑀫𑀼 𑀲𑀳𑀦𑁂, 𑀔𑀲𑁆𑀲 𑀙𑁄, 𑀙𑀫𑀸, 𑀅𑀣 𑀯𑀸 𑀙𑀺 𑀙𑁂𑀤𑀦𑁂, 𑀲𑀢𑁆𑀢𑀸𑀦𑀫𑀥𑁄𑀧𑀢𑀦𑀁 𑀙𑀺𑀦𑁆𑀤𑀢𑀻𑀢𑀺 𑀙𑀫𑀸, 𑀫𑁄, 𑀇𑀢𑁆𑀣𑀺𑀬𑀫𑀸 𑀘. 𑀪𑀯𑀦𑁆𑀢𑁆𑀬𑀲𑁆𑀲𑀁 𑀪𑀽𑀢𑀸𑀦𑀻𑀢𑀺 𑀪𑀽𑀫𑀺. 𑀪𑀽 𑀲𑀢𑁆𑀢𑀸𑀬𑀁, 𑀫𑀺. 𑀧𑀼𑀣𑀇𑀢𑀺 𑀧𑀸𑀝𑀺𑀧𑀤𑀺𑀓𑁂 𑀞𑀺𑀢𑁂 𑀦𑀤𑀸𑀤𑀺, 𑀈, 𑀧𑀼𑀣𑀲𑁆𑀲 𑀧𑀼𑀣𑀼𑀆𑀤𑁂𑀲𑁂, 𑀯𑀼𑀤𑁆𑀥𑀺𑀫𑁆𑀳𑀺 𑀘 𑀓𑀢𑁂 𑀧𑀼𑀣𑀯𑀻. 𑀉𑀲𑁆𑀲𑀼𑀯𑀸𑀤𑁂𑀲𑁂 𑀧𑀼𑀣𑀼𑀯𑀻. 𑀧𑀣𑀸𑀤𑁂𑀲𑁂 𑀢𑀼 𑀧𑀣𑀯𑀻, 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀅𑀯𑀸𑀕𑀫𑁄, 𑀅𑀣 𑀯𑀸 𑀣𑀯 𑀕𑀢𑀺𑀬𑀁, 𑀧𑀣𑀯𑀢𑀺 𑀏𑀢𑁆𑀣𑀸𑀢𑀺 𑀧𑀣𑀯𑀻, 𑀦𑀤𑀸𑀤𑀺, 𑀲𑀩𑁆𑀩𑀢𑁆𑀣 𑀧𑀢𑁆𑀣𑀭𑀢𑀻𑀢𑀺 𑀯𑀸 𑀧𑀣𑀯𑀻, 𑀣𑀭 𑀲𑀦𑁆𑀣𑀭𑀡𑁂 𑀧𑀧𑀼𑀩𑁆𑀩𑁄, 𑀭𑀲𑁆𑀲 𑀯𑁄, 𑀦𑀤𑀸𑀤𑀺, 𑀧𑀼𑀣𑀯𑀻, 𑀅𑀲𑁆𑀲𑀼.

‘‘𑀫𑀥𑀼𑀦𑁄 𑀓𑁂𑀝𑀪𑀲𑁆𑀲𑀸𑀧𑀺, 𑀫𑁂𑀤𑀫𑀁𑀲𑀧𑀭𑀺𑀧𑁆𑀮𑀼𑀢𑀸;

𑀢𑁂𑀦𑀸𑀬𑀁 𑀫𑁂𑀤𑀺𑀦𑀻 𑀤𑁂𑀯𑀻, 𑀯𑀼𑀘𑁆𑀘𑀢𑁂 𑀩𑁆𑀭𑀳𑁆𑀫𑀯𑀸𑀤𑀺𑀪𑀻’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁧.𑁩]. 𑁋

𑀯𑀘𑀦𑀢𑁄 𑀫𑁂𑀤𑀬𑁄𑀕𑀸 𑀫𑁂𑀤𑀺𑀦𑀻, 𑀈, 𑀇𑀦𑀻 𑀘. 𑀫𑀺𑀤 𑀲𑁆𑀦𑁂𑀳𑀦𑁂 𑀯𑀸, 𑀬𑀼, 𑀦𑀤𑀸𑀤𑀺, 𑀇𑀲𑁆𑀲𑁂𑀢𑁆𑀢𑀜𑁆𑀘. 𑀫𑀳 𑀧𑀽𑀚𑀸𑀬𑀁, 𑀦𑀤𑀸𑀤𑀺. 𑀯𑀺𑀢𑁆𑀣𑀺𑀡𑁆𑀡𑀢𑁆𑀢𑀸 ¶ 𑀉𑀩𑁆𑀩𑀻, 𑀦𑀤𑀸𑀤𑀺, 𑀅𑀯𑀢𑀺 𑀪𑀽𑀢𑀸𑀦𑀻𑀢𑀺 𑀯𑀸 𑀉𑀩𑁆𑀩𑀻, 𑀅𑀲𑁆𑀲𑀼. 𑀯𑀲𑀽𑀦𑀺 𑀲𑀦𑁆𑀢𑁆𑀬𑀲𑁆𑀲𑀁 𑀯𑀲𑀼𑀫𑀢𑀻. 𑀕𑀘𑁆𑀙𑀦𑁆𑀢𑀺 𑀬𑀲𑁆𑀲𑀁 𑀮𑁄𑀓𑀸, 𑀲𑀸 𑀕𑁄, 𑀧𑀼𑀫𑀺𑀢𑁆𑀣𑀺𑀬𑀁. 𑀓𑀸 𑀲𑀤𑁆𑀤𑁂, 𑀓𑀸𑀬𑀢𑀺 𑀏𑀢𑁆𑀣, 𑀓𑀸𑀬𑀢𑀺 𑀫𑀸𑀭𑀯𑀺𑀚𑀬𑀓𑀸𑀮𑁂𑀢𑀺 𑀯𑀸 𑀓𑀼, 𑀉. 𑀯𑀲𑀽𑀦𑀺 𑀥𑀸𑀭𑀬𑀢𑀻𑀢𑀺 𑀯𑀲𑀼𑀥𑀸. 𑀲𑀩𑁆𑀩𑀁 𑀮𑁄𑀓𑀁 𑀥𑀭𑀬𑀢𑀻𑀢𑀺 𑀥𑀭𑀡𑀻, 𑀬𑀼, 𑀦𑀤𑀸𑀤𑀺. 𑀥𑀭𑀢𑀻𑀢𑀺 𑀥𑀭𑀸, 𑀇𑀢𑁆𑀣𑀺𑀬𑀁 𑀆. 𑀕𑀫𑀼 𑀕𑀫𑀦𑁂, 𑀕𑀘𑁆𑀙𑀦𑁆𑀢𑁆𑀬𑀲𑁆𑀲𑀁 𑀚𑀕𑀢𑀻, 𑀅𑀦𑁆𑀢𑀧𑀘𑁆𑀘𑀬𑁄, 𑀕𑀲𑁆𑀲 𑀤𑁆𑀯𑀺𑀢𑁆𑀢𑀁, 𑀚𑀢𑁆𑀢𑀜𑁆𑀘, 𑀦𑀮𑁄𑀧𑁄, 𑀦𑀤𑀸𑀤𑀺. 𑀪𑀽 𑀲𑀢𑁆𑀢𑀸𑀬𑀁, 𑀭𑀺, 𑀦𑀤𑀸𑀤𑀺, 𑀓𑁆𑀯𑀺𑀫𑁆𑀳𑀺 𑀪𑀽. 𑀪𑀽𑀢𑁂 𑀲𑀢𑁆𑀢𑁂 𑀥𑀭𑀢𑀻𑀢𑀺 𑀪𑀽𑀢𑀭𑁄. 𑀅𑀯 𑀭𑀓𑁆𑀔𑀡𑁂, 𑀬𑀼, 𑀦𑀤𑀸𑀤𑀺, 𑀅𑀯𑀦𑀻.

𑁧𑁮𑁨. 𑀔𑀸𑀭𑀸 𑀮𑀯𑀡𑀭𑀲𑀸 𑀫𑀢𑁆𑀢𑀺𑀓𑀸 𑀊𑀲𑁄𑀢𑁆𑀬𑀼𑀘𑁆𑀘𑀢𑁂. 𑀔𑀸𑀤𑀢𑀻𑀢𑀺 𑀔𑀸𑀭𑀸, 𑀤𑀲𑁆𑀲 𑀭𑁄. 𑀧𑀤𑁂𑀲𑀓𑀢𑁆𑀢𑀸 𑀫𑀢𑁆𑀢𑁂𑀦 𑀧𑀫𑀸𑀡𑁂𑀦 𑀬𑀼𑀢𑁆𑀢𑀸 𑀫𑀢𑁆𑀢𑀺𑀓𑀸. 𑀊𑀲 𑀭𑀼𑀚𑀸𑀬𑀁, 𑀊𑀲𑁄. 𑀊𑀲𑀬𑁄𑀕𑀸 𑀊𑀲𑀯𑀸, 𑀯𑀦𑁆𑀢𑀼. 𑀭𑀧𑀘𑁆𑀘𑀬𑁂 𑀊𑀲𑀭𑁄. 𑀤𑁆𑀯𑁂𑀧𑀺 𑀢𑀻𑀲𑀼 𑀯𑀢𑁆𑀢𑀦𑁆𑀢𑁂.

𑀣𑀮 𑀞𑀸𑀦𑁂, 𑀅𑀥𑀺𑀓𑀭𑀡𑁂 𑀅. 𑀓𑀺𑀢𑁆𑀢𑀺𑀫𑀁 𑀣𑀮𑀁, 𑀅𑀓𑀺𑀢𑁆𑀢𑀺𑀫𑀸 𑀣𑀮𑀻, 𑀦𑀤𑀸𑀤𑀺. 𑀣𑀤𑁆𑀥𑀮𑀽𑀔𑀫𑁆𑀳𑀺 𑀪𑀽𑀪𑀸𑀕𑁂 𑀪𑀽𑀫𑀺𑀧𑁆𑀧𑀤𑁂𑀲𑁂 𑀚𑀗𑁆𑀕𑀮𑀲𑀤𑁆𑀤𑁄 𑀯𑀢𑁆𑀢𑀢𑀺. 𑀢𑀢𑁆𑀣 𑀦𑀺𑀚𑁆𑀚𑀮𑀢𑁆𑀢𑀸 𑀓𑀓𑁆𑀔𑀴𑀢𑁆𑀢𑀸 𑀣𑀤𑁆𑀥𑁄. 𑀢𑀺𑀓𑁆𑀔𑀲𑀓𑁆𑀔𑀭𑀸𑀤𑀺𑀯𑀺𑀤𑀸𑀭𑀕𑀯𑀸𑀤𑀺𑀔𑀼𑀭𑀕𑀡𑁆𑀟𑀼𑀧𑁆𑀧𑀸𑀤𑀯𑀘𑁆𑀘𑀸𑀤𑀺𑀲𑀳𑀺𑀢𑀢𑁆𑀢𑀸 𑀮𑀽𑀔𑁄 𑀯𑁂𑀤𑀺𑀢𑀩𑁆𑀩𑁄. 𑀕𑀮 𑀘𑀯𑀦𑀸𑀥𑁄𑀧𑀢𑀦𑀸𑀤𑀦𑁂𑀲𑀼. 𑀚𑀮𑀁 𑀕𑀮𑀢𑀺 𑀏𑀢𑁆𑀣, 𑀚𑀮𑁂𑀦 𑀯𑀸 𑀕𑀮𑀦𑁆𑀢𑀺 𑀏𑀢𑁆𑀣𑀸𑀢𑀺 𑀚𑀗𑁆𑀕𑀮𑁄, 𑀦𑀺𑀚𑁆𑀚𑀮𑁄 𑀤𑁂𑀲𑁄, ‘‘𑀚𑀗𑁆𑀕𑀮𑁄 𑀦𑀺𑀚𑁆𑀚𑀮𑁂 𑀤𑁂𑀲𑁂, 𑀢𑀺𑀮𑀺𑀗𑁆𑀕𑁄 𑀧𑀺𑀲𑀺𑀢𑁂 𑀣𑀺𑀬’’𑀦𑁆𑀢𑀺 [𑀢𑀺𑀓𑀡𑁆𑀟𑀲𑁂𑀲 𑁩.𑁩.𑁩𑁯𑁩] 𑀳𑀺 𑀢𑀺𑀓𑀡𑁆𑀟𑀲𑁂𑀲𑁄, 𑀮𑀲𑁆𑀲 𑀮𑁄𑀧𑁄, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄 𑀘.

𑁧𑁮𑁩. 𑀯𑁂𑀤𑁂𑀦 ¶ 𑀧𑀜𑁆𑀜𑀸𑀬 𑀈𑀳𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑁂𑀤𑁂𑀳𑁄. 𑀲𑁄 𑀏𑀯 𑀯𑀺𑀤𑁂𑀳𑁄, 𑀇𑀫𑀁 𑀤𑀻𑀧𑀫𑀼𑀧𑀸𑀤𑀸𑀬 𑀲𑀺𑀦𑁂𑀭𑀼𑀦𑁄 𑀧𑀼𑀩𑁆𑀩𑀤𑀺𑀲𑀸𑀪𑀸𑀕𑀢𑁆𑀢𑀸 𑀧𑀼𑀩𑁆𑀩𑁄 𑀘 𑀲𑁄 𑀯𑀺𑀤𑁂𑀳𑁄 𑀘𑁂𑀢𑀺 𑀧𑀼𑀩𑁆𑀩𑀯𑀺𑀤𑁂𑀳𑁄. 𑀏𑀯𑀫𑀧𑀭𑀼𑀢𑁆𑀢𑀭𑁂𑀲𑀼. 𑀕𑀯𑁂𑀦 𑀬𑀦𑁆𑀢𑁆𑀬𑁂𑀢𑁆𑀣𑀸𑀢𑀺 𑀕𑁄𑀬𑀸𑀦𑁄. 𑀅𑀧𑀭𑁄 𑀘 𑀲𑁄 𑀕𑁄𑀬𑀸𑀦𑁄 𑀘𑁂𑀢𑀺 𑀅𑀧𑀭𑀕𑁄𑀬𑀸𑀦𑁄. 𑀚𑀫𑁆𑀩𑀼𑀬𑀸 𑀮𑀓𑁆𑀔𑀺𑀢𑁄, 𑀓𑀧𑁆𑀧𑀝𑁆𑀞𑀸𑀬𑀺𑀢𑀸𑀤𑀺𑀧𑁆𑀧𑀪𑀸𑀯𑁂𑀦 𑀯𑀸 𑀢𑀧𑁆𑀧𑀥𑀸𑀦𑁄𑀤𑀻𑀧𑁄𑀢𑀺 𑀚𑀫𑁆𑀩𑀼𑀤𑀻𑀧𑁄. 𑀥𑀫𑁆𑀫𑀢𑀸𑀲𑀺𑀤𑁆𑀥𑀲𑁆𑀲 𑀧𑀜𑁆𑀘𑀲𑀻𑀮𑀲𑁆𑀲 𑀆𑀦𑀼𑀪𑀸𑀯𑁂𑀦 𑀓𑀁 𑀲𑀼𑀔𑀁 𑀉𑀭𑀼 𑀫𑀳𑀦𑁆𑀢𑀫𑁂𑀢𑁆𑀣𑀸𑀢𑀺 𑀓𑀼𑀭𑀼, 𑀓𑀼𑀁 𑀧𑀸𑀧𑀁 𑀭𑀼𑀦𑁆𑀥𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀓𑀼𑀭𑀼, 𑀓𑁆𑀯𑀺. 𑀤𑀻𑀧 𑀤𑀺𑀢𑁆𑀢𑀺𑀧𑁆𑀧𑀓𑀸𑀲𑀦𑁂𑀲𑀼, 𑀚𑀮𑀫𑀚𑁆𑀛𑁂 𑀤𑀺𑀧𑁆𑀧𑀦𑁆𑀢𑀻𑀢𑀺 𑀤𑀻𑀧𑀸, 𑀤𑀺𑀧𑁆𑀧𑀦𑁆𑀢𑀺 𑀏𑀢𑁆𑀣 𑀲𑀤𑁆𑀥𑀫𑁆𑀫𑀸𑀢𑀺 𑀯𑀸 𑀤𑀻𑀧𑀸, 𑀧𑀫𑀸𑀡𑀢𑁄 𑀫𑀳𑀦𑁆𑀢𑀸 𑀤𑀻𑀧𑀸 𑀫𑀳𑀸𑀤𑀻𑀧𑀸.

𑁧𑁮𑁪. 𑀓𑀼𑀭𑀼𑀆𑀤𑀬𑁄 𑀏𑀓𑀯𑀻𑀲𑀢𑀺 𑀚𑀦𑀧𑀤𑀦𑁆𑀢𑀭𑀸 𑀚𑀦𑀧𑀤𑀯𑀺𑀲𑁂𑀲𑀸, 𑀆𑀤𑀺𑀦𑀸 𑀲𑀼𑀭𑀫𑀳𑀧𑀘𑁆𑀘𑀼𑀕𑁆𑀕𑀢𑀸 𑀢𑀮𑀓𑀼𑀝𑀸 𑀅𑀲𑁆𑀫𑀸𑀓𑀸𑀤𑀬𑁄 𑀘 𑀧𑀼𑀫𑁆𑀩𑀳𑀼𑀢𑁆𑀢𑁂 𑀧𑀼𑀮𑁆𑀮𑀺𑀗𑁆𑀕𑁂 𑀩𑀳𑀼𑀢𑁆𑀢𑁂 𑀘 𑀲𑀺𑀬𑀼𑀁. 𑀓𑀼𑀭𑀼 𑀦𑀸𑀫 𑀚𑀸𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀽𑀴𑁆𑀳𑀻𑀲𑀤𑁆𑀤𑁂𑀦 ‘‘𑀓𑀼𑀭𑀽’’𑀢𑀺 𑀩𑀳𑀼𑀯𑀘𑀦𑁂𑀦 𑀯𑀼𑀘𑁆𑀘𑀢𑀺, 𑀏𑀯𑀁 𑀲𑀩𑁆𑀩𑀢𑁆𑀭. 𑀓𑀼𑀁 𑀧𑀸𑀧𑀁 𑀭𑀼𑀦𑁆𑀥𑀢𑀻𑀢𑀺 𑀓𑀼𑀭𑀼, 𑀔𑀢𑁆𑀢𑀺𑀬𑀓𑀼𑀫𑀸𑀭𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀓𑀼𑀭𑀽, 𑀧𑀘𑁆𑀘𑀬𑀮𑁄𑀧𑀢𑁄 𑀦 𑀯𑀼𑀤𑁆𑀥𑀺, 𑀲𑀩𑁆𑀩𑀢𑁆𑀭𑁂𑀯𑀁 [𑀧𑀸𑀡𑀺𑀦𑀺 𑁧.𑁨.𑁫𑁨 𑁪.𑁨.𑁮𑁧 𑀲𑀼𑀢𑁆𑀢𑁂𑀲𑀼 𑀧𑀲𑁆𑀲𑀺𑀢𑀩𑁆𑀩𑀁]. 𑀅𑀭𑀺𑀯𑀺𑀚𑀬𑀮𑁄𑀓𑀫𑀭𑀺𑀬𑀸𑀤𑀸𑀢𑀺𑀓𑁆𑀓𑀫𑀸𑀤𑀻𑀲𑀼 𑀲𑀓𑁆𑀓𑁄𑀦𑁆𑀢𑀻𑀢𑀺 𑀲𑀓𑁆𑀓𑀸. 𑀓𑁄𑀲𑀁 𑀮𑀦𑁆𑀢𑀺 𑀕𑀡𑁆𑀳𑀦𑁆𑀢𑀺, 𑀓𑀼𑀲𑀮𑀁 𑀧𑀼𑀘𑁆𑀙𑀦𑁆𑀢𑀻𑀢𑀺 𑀯𑀸 𑀓𑁄𑀲𑀮𑀸. 𑀫𑀕𑁂𑀦 𑀲𑀤𑁆𑀥𑀺𑀁 𑀥𑀸𑀯𑀦𑁆𑀢𑀻𑀢𑀺 𑀫𑀕𑀥𑀸, 𑀓𑁆𑀯𑀺, 𑀫𑀁𑀲𑁂𑀲𑀼 𑀕𑀺𑀚𑁆𑀛𑀦𑁆𑀢𑀻𑀢𑀺 𑀯𑀸 𑀫𑀕𑀥𑀸. 𑀕𑀺𑀥 𑀅𑀪𑀺𑀓𑀗𑁆𑀔𑀸𑀬𑀁. 𑀲𑁂𑀯𑀦𑁆𑀢𑀺 𑀬𑁂𑀦𑀸𑀢𑀺 𑀲𑀺𑀯𑀺, 𑀲𑀺 𑀲𑁂𑀯𑀸𑀬𑀁, 𑀯𑀺. 𑀲𑀺𑀯𑀁 𑀓𑀭𑁄𑀦𑁆𑀢𑀻𑀢𑀺 𑀯𑀸 𑀲𑀺𑀯𑀻, 𑀅𑀜𑁆𑀜𑀢𑁆𑀣𑁂 𑀇. 𑀓𑀮 𑀲𑀤𑁆𑀤𑁂, 𑀇𑀗𑁆𑀕𑀧𑀘𑁆𑀘𑀬𑁄, 𑀓𑀮𑀺𑀗𑁆𑀕𑀸 ¶ , 𑀢𑁂𑀲𑀁 𑀦𑀺𑀯𑀸𑀲𑁄 𑀓𑀮𑀺𑀗𑁆𑀕𑀸, 𑀉𑀢𑁆𑀢𑀭𑀸𑀧𑀣𑁄 [‘‘𑀚𑀕𑀦𑁆𑀦𑀸𑀣𑀸 𑀧𑀼𑀩𑁆𑀩𑀪𑀸𑀕𑁂 𑀓𑀡𑁆𑀳𑀸𑀢𑀻𑀭𑀦𑁆𑀢𑀭𑀁 𑀲𑀺𑀯𑁂 𑀓𑀮𑀺𑀗𑁆𑀕𑀤𑁂𑀲𑁄 𑀲𑀁𑀯𑀼𑀢𑁆𑀢𑁄’’ 𑀇𑀢𑁆𑀬𑀼𑀢𑁆𑀢𑀤𑁂𑀲𑁂 (𑀣𑁄𑀫𑀦𑀺𑀥𑀺)], 𑀓𑀮𑀺𑀁 𑀕𑀡𑁆𑀳𑀦𑁆𑀢𑀻𑀢𑀺 𑀯𑀸 𑀓𑀮𑀺𑀗𑁆𑀕𑀸, 𑀓𑁆𑀯𑀺, 𑀓𑀮𑀁 𑀫𑀥𑀼𑀭𑀲𑀤𑁆𑀤𑀁 𑀕𑀸𑀬𑀦𑁆𑀢𑀻𑀢𑀺𑀯𑀸 𑀓𑀮𑀺𑀗𑁆𑀕𑀸, 𑀅𑀲𑁆𑀲𑀺𑀢𑁆𑀢𑀁, 𑀓𑁂𑀦 𑀲𑀼𑀔𑁂𑀦 𑀮𑀺𑀗𑁆𑀕𑀦𑁆𑀢𑀻𑀢𑀺 𑀯𑀸 𑀓𑀮𑀺𑀗𑁆𑀕𑀸, 𑀮𑀺𑀗𑁆𑀕 𑀕𑀫𑀦𑀢𑁆𑀣𑁄 𑀤𑀡𑁆𑀟𑀓𑁄 𑀥𑀸𑀢𑀼. 𑀅𑀢𑁆𑀢𑀦𑀸 𑀔𑀸𑀤𑀺𑀢𑀁 𑀮𑀜𑁆𑀚𑀁 𑀧𑀭𑀸𑀚𑀺𑀢𑁂𑀳𑀺 𑀬𑀸𑀘𑀺𑀢𑁂𑀧𑀺 𑀧𑀼𑀦 𑀦 𑀯𑀫𑀦𑁆𑀢𑀻𑀢𑀺 𑀅𑀯𑀦𑁆𑀢𑀻. 𑀧𑀜𑁆𑀘𑀸𑀮𑀲𑁆𑀲 𑀧𑀼𑀢𑁆𑀢𑀸 𑀧𑀜𑁆𑀘𑀸𑀮𑀸. 𑀯𑀚𑁆𑀚𑁂𑀢𑀩𑁆𑀩𑀸𑀢𑀺 𑀯𑀚𑁆𑀚𑀻, ‘‘𑀯𑀚𑁆𑀚𑁂𑀢𑀩𑁆𑀩𑀸 𑀇𑀫𑁂’’𑀢𑁆𑀬𑀸𑀤𑀺𑀦𑀸 𑀧𑀯𑀢𑁆𑀢𑀯𑀘𑀦𑀫𑀼𑀧𑀸𑀤𑀸𑀬 𑀯𑀚𑁆𑀚𑀻𑀢𑀺 𑀮𑀤𑁆𑀥𑀦𑀸𑀫𑀸 𑀭𑀸𑀚𑀸𑀦𑁄. 𑀯𑀚𑁆𑀚𑀻𑀭𑀝𑁆𑀞𑀲𑁆𑀲 𑀯𑀸 𑀭𑀸𑀚𑀸𑀦𑁄 𑀯𑀚𑁆𑀚𑀻. 𑀭𑀝𑁆𑀞𑀲𑁆𑀲 𑀯𑀸 𑀧𑀦 𑀢𑀁𑀲𑀫𑀜𑁆𑀜𑀸 𑀢𑀁𑀦𑀺𑀯𑀸𑀲𑀺𑀭𑀸𑀚𑀓𑀼𑀫𑀸𑀭𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀕𑀁 𑀧𑀣𑀯𑀺𑀁 𑀥𑀸𑀭𑁂𑀦𑁆𑀢𑀻𑀢𑀺 𑀕𑀦𑁆𑀥𑀸𑀭𑀸, 𑀓𑀺𑀢𑁆𑀢𑀺𑀕𑀦𑁆𑀥𑁂𑀦 𑀅𑀭𑀦𑁆𑀢𑀻𑀢𑀺 𑀯𑀸 𑀕𑀦𑁆𑀥𑀸𑀭𑀸. 𑀘𑀺𑀢 𑀉𑀲𑁆𑀲𑀸𑀳𑀦𑁂, 𑀘𑁂𑀢𑀦𑁆𑀢𑀺 𑀉𑀲𑁆𑀲𑀳𑀦𑁆𑀢𑀺 𑀬𑀼𑀤𑁆𑀥𑀓𑀫𑁆𑀫𑀸𑀤𑀻𑀲𑀽𑀢𑀺 𑀘𑁂𑀢𑀬𑁄.

𑁧𑁮𑁫. 𑀯𑀗𑁆𑀕 𑀕𑀫𑀦𑀢𑁆𑀣𑁄 𑀤𑀡𑁆𑀟𑀓𑁄 𑀥𑀸𑀢𑀼. 𑀯𑀺𑀲𑀺𑀝𑁆𑀞𑀸𑀦𑀺 𑀤𑁂𑀳𑀸𑀦𑀺 𑀬𑁂𑀲𑀁 𑀯𑀺𑀤𑁂𑀳𑀸, 𑀧𑀼𑀩𑁆𑀩𑀯𑀺𑀤𑁂𑀳𑀤𑀻𑀧𑀢𑁄 𑀆𑀕𑀢𑀢𑁆𑀢𑀸 𑀯𑀸 𑀯𑀺𑀤𑁂𑀳𑀸. 𑀑𑀚 𑀤𑀺𑀢𑁆𑀢𑀺𑀬𑀁, 𑀓𑀫𑁆𑀩𑀼𑀦𑀸 𑀲𑀫𑁆𑀩𑀼𑀓𑁂𑀦 𑀑𑀚𑀦𑁆𑀢𑀺 𑀢𑀲𑁆𑀲𑀁 𑀯𑁄𑀳𑀸𑀭𑀓𑀭𑀡𑀢𑁄𑀢𑀺 𑀓𑀫𑁆𑀩𑁄𑀚𑀸, 𑀓𑀫𑁆𑀩𑀼𑀓𑀚𑁄 𑀑𑀚𑁄 𑀩𑀮𑀫𑁂𑀢𑁂𑀲𑀦𑁆𑀢𑀺 𑀯𑀸 𑀓𑀫𑁆𑀩𑁄𑀚𑀸. 𑀫𑀤 𑀫𑀤𑁆𑀤𑀦𑁂, 𑀫𑀤𑁆𑀤𑀦𑁆𑀢𑀻𑀢𑀺 𑀯𑀸 𑀫𑀤𑁆𑀤𑀸, 𑀫𑀁 𑀲𑀺𑀯𑀁 𑀤𑀤𑀦𑁆𑀢𑀻𑀢𑀺 𑀯𑀸 𑀫𑀤𑁆𑀤𑀸, 𑀧𑀜𑁆𑀘𑀓𑀸𑀫𑀕𑀼𑀡𑀸𑀤𑀻𑀳𑀺 𑀫𑁄𑀤𑀦𑁆𑀢𑀻𑀢𑀺 𑀯𑀸 𑀫𑀤𑁆𑀤𑀸, 𑀫𑀤 𑀳𑀸𑀲𑁂. 𑀪𑀜𑁆𑀚 𑀅𑀯𑀫𑀤𑁆𑀤𑀦𑁂, 𑀪𑀕𑁆𑀕𑀸. 𑀅𑀗𑁆𑀕 𑀕𑀫𑀦𑀢𑁆𑀣𑁄 𑀤𑀡𑁆𑀟𑀓𑁄 𑀥𑀸𑀢𑀼. 𑀲𑀻𑀳𑀁 𑀮𑀦𑁆𑀢𑀻𑀢𑀺 𑀲𑀻𑀳𑀴𑀸. 𑀓𑀸𑀲 𑀤𑀺𑀢𑁆𑀢𑀺𑀬𑀁, 𑀲𑀫𑁆𑀧𑀢𑁆𑀢𑀺𑀬𑀸 𑀓𑀸𑀲𑀦𑁆𑀢𑀻𑀢𑀺 𑀓𑀲𑁆𑀫𑀻𑀭𑀸, 𑀫𑀻𑀭𑁄. 𑀓𑀸𑀲 𑀤𑀺𑀢𑁆𑀢𑀺𑀬𑀁, 𑀇, 𑀓𑀸𑀲𑀻. 𑀧𑀟𑀺 𑀕𑀢𑀺𑀬𑀁, 𑀧𑀡𑁆𑀟𑀼, 𑀉. 𑀅𑀣 𑀯𑀸 𑀓𑀼𑀁 𑀧𑀸𑀧𑀁 𑀭𑀼𑀦𑁆𑀥𑀢𑀺 𑀏𑀢𑁆𑀣𑀸𑀢𑀺 𑀓𑀼𑀭𑀼, 𑀇𑀢𑀺 𑀏𑀓𑁄𑀧𑀺 𑀚𑀦𑀧𑀤𑁄 𑀦𑀺𑀲𑁆𑀲𑀺𑀢𑀸𑀦𑀁 𑀩𑀳𑀼𑀢𑁆𑀢𑀸 𑀩𑀳𑀼𑀯𑀘𑀦𑁂𑀦 𑀯𑀼𑀘𑁆𑀘𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣.

𑁧𑁮𑁬. 𑀤𑁆𑀯𑀬𑀁 ¶ 𑀪𑀼𑀯𑀦𑁂. 𑀮𑀼𑀚 𑀅𑀤𑀲𑁆𑀲𑀦𑁂, 𑀮𑀼𑀚𑁆𑀚𑀢𑀻𑀢𑀺 𑀮𑁄𑀓𑁄, 𑀕𑀲𑁆𑀲 𑀓𑁄, 𑀚𑀲𑁆𑀲 𑀯𑁄. 𑀪𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀪𑀼𑀯𑀦𑀁, 𑀬𑀼. 𑀚𑀕𑀢𑀺, 𑀯𑀺𑀝𑁆𑀞𑀧𑀸𑀤𑀻𑀦𑀺𑀧𑀺 𑀪𑀼𑀯𑀦𑀧𑀭𑀺𑀬𑀸𑀬𑀸𑀦𑀺. 𑀤𑁆𑀯𑀬𑀁 𑀤𑁂𑀲𑀲𑀸𑀫𑀜𑁆𑀜𑁂. 𑀤𑀺𑀲 𑀅𑀢𑀺𑀲𑀚𑁆𑀚𑀦𑁂, 𑀅𑀢𑀺𑀲𑀚𑁆𑀚𑀦𑀁 𑀧𑀩𑁄𑀥𑀦𑀁, ‘‘𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄’’𑀢𑀺 𑀤𑀺𑀲𑀢𑀺 𑀅𑀧𑀤𑀺𑀲𑀢𑀻𑀢𑀺 𑀤𑁂𑀲𑁄. 𑀲𑀺 𑀲𑁂𑀯𑀸𑀬𑀁, 𑀲𑀜𑁆𑀜𑀸𑀬𑀁 𑀅, 𑀯𑀺𑀲𑀬𑁄.

𑀲𑀺𑀝𑁆𑀞𑀸𑀘𑀸𑀭𑀭𑀳𑀺𑀢𑁄 𑀫𑀺𑀮𑀓𑁆𑀔𑀤𑁂𑀲𑁄 𑀓𑀸𑀫𑀭𑀽𑀧𑀸𑀤𑀺 𑀧𑀘𑁆𑀘𑀦𑁆𑀢𑁄 𑀦𑀸𑀫. 𑀫𑀺𑀮𑀓𑁆𑀔 𑀅𑀩𑁆𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁, 𑀫𑀺𑀮𑀓𑁆𑀔𑀦𑁆𑀢𑀺 𑀅𑀩𑁆𑀬𑀢𑁆𑀢𑀯𑀸𑀘𑀁 𑀪𑀸𑀲𑀦𑁆𑀢𑀻𑀢𑀺 𑀫𑀺𑀮𑀓𑁆𑀔𑀸. 𑀲𑀺𑀝𑁆𑀞𑀸𑀘𑀸𑀭𑀫𑀕𑁆𑀕𑀤𑀲𑁆𑀲𑀦𑀢𑁆𑀣𑀸𑀬 𑀧𑀜𑁆𑀜𑀸𑀘𑀓𑁆𑀔𑀼𑀦𑁄 𑀅𑀪𑀸𑀯𑀸 𑀭𑀸𑀕𑀸𑀤𑀺𑀫𑀮𑀁 𑀅𑀓𑁆𑀔𑀺𑀫𑁆𑀳𑀺 𑀬𑁂𑀲𑀦𑁆𑀢𑀺 𑀯𑀸 𑀫𑀺𑀮𑀓𑁆𑀔𑀸, 𑀅𑀲𑁆𑀲𑀺𑀢𑁆𑀢𑀁, 𑀢𑁂𑀲𑀁 𑀦𑀺𑀯𑀸𑀲𑀝𑁆𑀞𑀸𑀦𑀁 𑀫𑀺𑀮𑀓𑁆𑀔𑀤𑁂𑀲𑁄. 𑀧𑀘𑁆𑀘𑀦𑁆𑀢𑁂 𑀫𑀚𑁆𑀛𑀺𑀫𑀤𑁂𑀲𑀲𑁆𑀲 𑀩𑀳𑀺𑀤𑁆𑀥𑀸𑀪𑀸𑀕𑁂 𑀚𑀸𑀢𑁄 𑀧𑀘𑁆𑀘𑀦𑁆𑀢𑁄.

𑀩𑁆𑀬𑀯𑀢𑁆𑀣𑀸 𑀘𑀢𑀼𑀯𑀡𑁆𑀡𑀸𑀦𑀁, 𑀬𑀲𑁆𑀫𑀺𑀁 𑀤𑁂𑀲𑁂 𑀦 𑀯𑀺𑀚𑁆𑀚𑀢𑁂;

𑀫𑀺𑀮𑀓𑁆𑀔𑀤𑁂𑀲𑁄 𑀲𑁄 𑀯𑀼𑀢𑁆𑀢𑁄, 𑀫𑀚𑁆𑀛𑀪𑀽𑀫𑀺 𑀢𑀢𑁄 𑀧𑀭𑀁 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁧.𑁭].

𑀅𑀭𑀺𑀬𑀸𑀘𑀸𑀭𑀪𑀽𑀫𑀺𑀢𑁆𑀢𑀸 𑀫𑀚𑁆𑀛𑁄 𑀘 𑀲𑁄 𑀤𑁂𑀲𑁄 𑀘𑁂𑀢𑀺 𑀫𑀚𑁆𑀛𑀤𑁂𑀲𑁄, 𑀦𑀯𑀬𑁄𑀚𑀦𑀲𑀢𑀧𑀭𑀺𑀓𑁆𑀔𑁂𑀧𑁄 𑀫𑀚𑁆𑀛𑀺𑀫𑀤𑁂𑀲𑁄.

𑁧𑁮𑁭. 𑀲𑀮𑀺𑀮𑀧𑁆𑀧𑀸𑀬𑁄 𑀩𑀳𑀽𑀤𑀓𑁄 𑀤𑁂𑀲𑁄 𑀅𑀦𑀽𑀧𑁄 𑀦𑀸𑀫, 𑀅𑀦𑀼𑀕𑀢𑀸 𑀆𑀧𑀸 𑀅𑀢𑁆𑀭𑀸𑀢𑀺 𑀅𑀦𑀽𑀧𑁄, 𑀆𑀧𑀲𑁆𑀲 𑀆𑀤𑀺𑀦𑁄 ¶ 𑀉𑀢𑁆𑀢𑀁, 𑀧𑀭𑀮𑁄𑀧𑁄 𑀯𑀸. 𑀓𑀘 𑀩𑀦𑁆𑀥𑀦𑁂, 𑀙𑁄, 𑀓𑀘𑁆𑀙𑀁. 𑀅𑀦𑀽𑀧𑀤𑁂𑀲𑁄 𑀘. 𑀅𑀪𑀺𑀦𑀯𑁄𑀕𑁆𑀕𑀫𑀦𑁂𑀦 𑀢𑀺𑀡𑁂𑀦 𑀮𑀓𑁆𑀔𑀺𑀢𑁂 𑀳𑀭𑀺𑀢𑁂 𑀤𑁂𑀲𑁂 𑀲𑀤𑁆𑀤𑀮𑁄, 𑀤𑀮 𑀤𑀺𑀢𑁆𑀢𑀺𑀬𑀁, 𑀪𑀸𑀯𑁂 𑀅. 𑀯𑀺𑀚𑁆𑀚𑀢𑀺 𑀤𑀮𑁄 𑀬𑀢𑁆𑀣 𑀲𑀤𑁆𑀤𑀮𑁄.

𑁧𑁮𑁮. 𑀦𑀤𑀺𑀬𑀸 𑀆𑀪𑀢𑁂𑀦 𑀅𑀫𑁆𑀩𑀼𑀦𑀸 𑀉𑀤𑀓𑁂𑀦 𑀚𑀻𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀦𑀤𑁆𑀬𑀫𑁆𑀩𑀼𑀚𑀻𑀯𑀦𑁄 𑀤𑁂𑀲𑁄 𑀦𑀤𑀻 𑀫𑀸𑀢𑀸 𑀅𑀲𑁆𑀲𑀸𑀢𑀺 𑀦𑀤𑀻𑀫𑀸𑀢𑀺𑀓𑁄𑀢𑀺 𑀯𑀼𑀘𑁆𑀘𑀢𑀺, 𑀩𑀳𑀼𑀩𑁆𑀩𑀻𑀳𑀺𑀫𑁆𑀳𑀺 𑀓𑁄. 𑀯𑀼𑀝𑁆𑀞𑀺𑀬𑀸 𑀯𑀲𑁆𑀲𑁂𑀦 𑀦𑀺𑀧𑁆𑀨𑀚𑁆𑀚𑀢𑀺 𑀲𑀲𑁆𑀲𑀫𑁂𑀢𑁆𑀣𑀸𑀢𑀺 𑀯𑀼𑀝𑁆𑀞𑀺𑀦𑀺𑀧𑁆𑀨𑀚𑁆𑀚𑀲𑀲𑁆𑀲𑀓𑁄 𑀤𑁂𑀲𑁄 𑀤𑁂𑀯𑁄 𑀫𑀸𑀢𑀸 𑀅𑀲𑁆𑀲𑀸𑀢𑀺 𑀤𑁂𑀯𑀫𑀸𑀢𑀺𑀓𑁄𑀢𑀺 𑀯𑀼𑀘𑁆𑀘𑀢𑀺, 𑀩𑀳𑀼𑀩𑁆𑀩𑀻𑀳𑀺𑀫𑁆𑀳𑀺𑀬𑁂𑀯 𑀓𑁄, 𑀤𑁂𑀯𑀲𑀤𑁆𑀤𑁄 𑀘𑁂𑀢𑁆𑀣 𑀯𑀼𑀝𑁆𑀞𑀺𑀫𑀸𑀳.

𑁧𑁮𑁯. 𑀅𑀦𑀽𑀧𑀸𑀤𑀬𑁄 𑀤𑁂𑀯𑀫𑀸𑀢𑀺𑀓𑀸𑀦𑁆𑀢𑀸 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼. 𑀘𑀦𑁆𑀤𑀲𑀽𑀭𑀸𑀤𑁄 𑀘𑀦𑁆𑀤𑀲𑀽𑀭𑀺𑀬𑀲𑀺𑀦𑁂𑀭𑀼𑀧𑀩𑁆𑀩𑀢𑀸𑀤𑀺𑀫𑁆𑀳𑀺 𑀲𑀲𑁆𑀲𑀢𑀺𑀲𑀤𑁆𑀤𑁄 𑀈𑀭𑀺𑀢𑁄 𑀓𑀣𑀺𑀢𑁄. 𑀲𑀩𑁆𑀩𑀤𑀸 𑀲𑀭𑀦𑁆𑀢𑀺 𑀕𑀘𑁆𑀙𑀦𑁆𑀢𑀻𑀢𑀺 𑀲𑀲𑁆𑀲𑀢𑀺𑀬𑁄, 𑀲𑀭 𑀕𑀢𑀺𑀬𑀁, 𑀲𑀭𑀲𑀤𑁆𑀤𑀲𑁆𑀲 𑀲𑁄,𑀢𑀺.

𑀭𑀞 𑀕𑀢𑀺𑀬𑀁, 𑀭𑀞𑀦𑁆𑀢𑀺 𑀏𑀢𑁆𑀣 𑀦𑀕𑀭𑀸𑀤𑀬𑁄𑀢𑀺 𑀭𑀝𑁆𑀞𑀁, 𑀢𑁄. 𑀦𑀸𑀕𑀭𑁂𑀳𑀺 𑀯𑀺𑀚𑀺𑀦𑀺𑀢𑀩𑁆𑀩𑀦𑁆𑀢𑀺 𑀯𑀺𑀚𑀺𑀢𑀁. 𑀆𑀴𑀺𑀬𑀁 𑀧𑀯𑀢𑁆𑀢𑀫𑀸𑀦𑁄 𑀬𑁄 𑀲𑁂𑀢𑀼, 𑀲𑁄 𑀧𑀼𑀭𑀺𑀲𑁂 𑀧𑀼𑀮𑁆𑀮𑀺𑀗𑁆𑀕𑁂 𑀯𑀢𑁆𑀢𑀢𑀺. 𑀲𑀺 𑀩𑀦𑁆𑀥𑀦𑁂, 𑀢𑀼. 𑀅𑀮 𑀪𑀽𑀲𑀦𑁂, 𑀇, 𑀆𑀴𑀺, 𑀢𑀲𑁆𑀲𑀁 𑀆𑀴𑀺𑀬𑀁.

𑀦𑀕𑀭𑀧𑀩𑁆𑀩𑀢𑀸𑀤𑀺𑀦𑁄 ¶ 𑀉𑀧𑀸𑀦𑁆𑀢𑀪𑀽 𑀲𑀫𑀻𑀧𑀪𑀽𑀫𑀺 𑀧𑀭𑀺𑀲𑀭𑁄 𑀧𑀭𑀺𑀢𑁄 𑀲𑀭𑀦𑁆𑀢𑁆𑀬𑀢𑁆𑀭𑀸𑀢𑀺, 𑀡𑁄.

𑀢𑀺𑀓𑀁 𑀯𑀚𑁂. 𑀕𑀸𑀯𑁄 𑀢𑀺𑀝𑁆𑀞𑀦𑁆𑀢𑁆𑀬𑀢𑁆𑀭𑀸𑀢𑀺 𑀕𑁄𑀝𑁆𑀞𑀁. 𑀓𑀼𑀮 𑀲𑀗𑁆𑀔𑁆𑀬𑀸𑀦𑁂, 𑀕𑀸𑀯𑁄 𑀓𑀼𑀮𑀦𑁆𑀢𑁆𑀬𑁂𑀢𑁆𑀣𑀸𑀢𑀺 𑀕𑁄𑀓𑀼𑀮𑀁, 𑀕𑀼𑀦𑁆𑀦𑀁 𑀓𑀼𑀮𑀁 𑀖𑀭𑀦𑁆𑀢𑀺 𑀯𑀸 𑀕𑁄𑀓𑀼𑀮𑀁. 𑀯𑀚 𑀕𑀢𑀺𑀬𑀁, 𑀯𑀚𑀦𑁆𑀢𑀺 𑀬𑀁 𑀕𑀸𑀯𑁄 𑀦𑀺𑀯𑀸𑀲𑀦𑀢𑁆𑀣𑀸𑀬𑀸𑀢𑀺 𑀯𑀚𑁄. 𑀕𑁄𑀝𑁆𑀞𑀸𑀦𑀓𑀁, 𑀕𑁄𑀝𑁆𑀞𑀸𑀦𑀦𑁆𑀢𑀺𑀧𑀺 𑀯𑀚𑀲𑁆𑀲 𑀦𑀸𑀫𑀸𑀦𑀺.

𑁧𑁯𑁦. 𑀲𑀺𑀮𑁄𑀓𑁂𑀦 𑀫𑀕𑁆𑀕𑀲𑁆𑀲 𑀦𑀸𑀫𑀸𑀦𑀺. 𑀧𑀣𑀺𑀓𑁂𑀳𑀺 𑀫𑀚𑁆𑀚𑀢𑁂 𑀦𑀺𑀢𑁆𑀢𑀺𑀡𑀁 𑀓𑀭𑀻𑀬𑀢𑁂𑀢𑀺 𑀫𑀕𑁆𑀕𑁄, 𑀫𑀚𑁆𑀚 𑀲𑀼𑀤𑁆𑀥𑀺𑀬𑀁, 𑀡𑁄, 𑀚𑀲𑁆𑀲 𑀕𑀢𑁆𑀢𑀁, 𑀧𑀣𑀺𑀓𑁂𑀳𑀺 𑀫𑀕𑁆𑀕𑀻𑀬𑀢𑁂𑀢𑀺 𑀯𑀸 𑀫𑀕𑁆𑀕𑁄, 𑀫𑀕𑁆𑀕 𑀅𑀦𑁆𑀯𑁂𑀲𑀦𑁂, 𑀫𑀁 𑀲𑀺𑀯𑀁 𑀕𑀘𑁆𑀙𑀢𑀺 𑀏𑀢𑁆𑀣, 𑀏𑀢𑁂𑀦𑀸𑀢𑀺 𑀯𑀸 𑀫𑀕𑁆𑀕𑁄, ‘‘𑀫𑁄 𑀲𑀺𑀯𑁂 𑀧𑀭𑀺𑀲𑀸𑀬𑀜𑁆𑀘𑁂’’𑀢𑀺 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂, 𑀲𑀺𑀯𑀁 𑀕𑀫𑀦𑀁 𑀓𑀭𑁄𑀢𑀻𑀢𑁆𑀬𑀢𑁆𑀣𑁄, 𑀓𑁆𑀭𑀺𑀬𑀸𑀯𑀺𑀲𑁂𑀲𑀦𑀫𑁂𑀢𑀁. 𑀧𑀣𑀺 𑀕𑀢𑀺𑀬𑀁, 𑀘𑀼𑀭𑀸𑀤𑀺, 𑀦𑀸𑀕𑀫𑁄. 𑀧𑀦𑁆𑀣𑀬𑀦𑁆𑀢𑀺 𑀬𑀦𑁆𑀢𑁆𑀬𑀦𑁂𑀦𑀸𑀢𑀺 𑀧𑀦𑁆𑀣𑁄, 𑀅, 𑀓𑀸𑀭𑀺𑀢𑀮𑁄𑀧𑁄. 𑀧𑀣𑀢𑀺 𑀬𑀸𑀢𑁆𑀬𑀦𑁂𑀦𑀸𑀢𑀺 𑀧𑀣𑁄. 𑀅𑀤 𑀕𑀫𑀦𑁂, 𑀅𑀤𑀢𑀺 𑀬𑀢𑁆𑀣 𑀲𑀸 𑀅𑀤𑁆𑀥𑀸, 𑀥𑁄, 𑀅𑀤𑁆𑀥𑀸 𑀫𑀕𑁆𑀕𑁄, 𑀅𑀤𑁆𑀥𑀸𑀲𑀤𑁆𑀤𑁄𑀬𑀁 𑀓𑀸𑀮𑁂𑀧𑀺, 𑀲𑀫𑀪𑀸𑀕𑀢𑁆𑀣𑀯𑀘𑀦𑁂 𑀢𑀼 𑀅𑀤𑁆𑀥𑀁, 𑀢𑀲𑁆𑀫𑀸 𑀅𑀤𑁆𑀥𑀲𑀤𑁆𑀤𑁄 𑀧𑀼𑀫𑀦𑀧𑀼𑀁𑀲𑀓𑀯𑀲𑁂𑀦 𑀤𑁆𑀯𑀺𑀮𑀺𑀗𑁆𑀕𑁄, 𑀭𑀸𑀚𑀸𑀤𑀺𑀢𑁆𑀢𑁂 𑀅𑀤𑁆𑀥𑀸, 𑀅𑀭𑀸𑀚𑀸𑀤𑀺𑀢𑁆𑀢𑁂 𑀅𑀤𑁆𑀥𑀁. 𑀅𑀜𑁆𑀚 𑀕𑀢𑀺𑀬𑀁, 𑀅𑀲𑁄. 𑀯𑀚 𑀕𑀢𑀺𑀬𑀁, 𑀉𑀫𑁄, 𑀚𑀲𑁆𑀲 𑀝𑁄. 𑀧𑀤 𑀕𑀢𑀺𑀬𑀁, 𑀅, 𑀤𑀲𑁆𑀲 𑀚𑁄, 𑀤𑁆𑀯𑀺𑀢𑁆𑀢𑀁, 𑀧𑀚𑁆𑀚𑁄. 𑀅𑀬 𑀕𑀢𑀺𑀬𑀁, 𑀬𑀼, 𑀧𑀤 𑀕𑀢𑀺𑀬𑀁, 𑀅𑀯𑁄, 𑀦𑀤𑀸𑀤𑀺. 𑀯𑀢𑁆𑀢 𑀯𑀢𑁆𑀢𑀦𑁂, 𑀯𑀢𑁆𑀢𑀦𑀁 𑀕𑀫𑀦𑀸𑀤𑀺, 𑀅𑀦𑀺, 𑀦𑀤𑀸𑀤𑀺, 𑀯𑀢𑁆𑀢𑀦𑀻. 𑀓𑀦𑁆𑀢𑀦𑀤𑀡𑁆𑀟𑁂 𑀧𑀼𑀦𑁆𑀦𑀧𑀼𑀁𑀲𑀓𑀁. 𑀧𑀣𑀺𑀓𑁂𑀳𑀺 𑀧𑀸𑀤𑁂𑀳𑀺 𑀳𑀜𑁆𑀜𑀢𑁂𑀢𑀺 𑀧𑀤𑁆𑀥𑀢𑀺. 𑀧𑀸𑀤𑀲𑀤𑁆𑀤𑀲𑀫𑀸𑀦𑀢𑁆𑀣𑁂𑀦 𑀧𑀤𑀲𑀤𑁆𑀤𑁂𑀦 𑀦𑀺𑀬𑀢𑀧𑁆𑀧𑀬𑁄𑀕𑀢𑁄 𑀯𑀼𑀢𑁆𑀢𑀺𑀦𑀸 𑀲𑀺𑀤𑁆𑀥𑁄, 𑀧𑀤𑀲𑀤𑁆𑀤𑀽𑀧𑀧𑀤𑁄 𑀳𑀦𑀥𑀸𑀢𑀼,𑀢𑀺, 𑀳𑀦𑀲𑁆𑀲 𑀥𑁄, 𑀅𑀮𑁄𑀧𑁄. 𑀧𑀤𑁆𑀥𑀢𑀺𑀲𑀳𑀘𑀭𑀡𑀢𑁄 𑀯𑀢𑁆𑀢𑀦𑀻, 𑀢𑀁𑀲𑀳𑀘𑀭𑀡𑀢𑁄 𑀧𑀤𑀯𑀻 𑀘 𑀇𑀢𑁆𑀣𑀺𑀬𑀁.

𑁧𑁯𑁧-𑁧𑁯𑁨. 𑀢𑀩𑁆𑀪𑁂𑀤𑀸 ¶ 𑀢𑀲𑁆𑀲 𑀫𑀕𑁆𑀕𑀲𑁆𑀲 𑀯𑀺𑀲𑁂𑀲𑀸 𑀚𑀗𑁆𑀖𑀫𑀕𑁆𑀕𑀸𑀤𑀬𑁄 𑀅𑀧𑀣𑀦𑁆𑀢𑀸. 𑀚𑀗𑁆𑀖𑀸𑀳𑀺 𑀕𑀢𑁄 𑀫𑀕𑁆𑀕𑁄 𑀚𑀗𑁆𑀖𑀫𑀕𑁆𑀕𑁄. 𑀲𑀓𑀝𑁂𑀳𑀺 𑀕𑀢𑁄 𑀫𑀕𑁆𑀕𑁄 𑀲𑀓𑀝𑀫𑀕𑁆𑀕𑁄. 𑀢𑁂 𑀚𑀗𑁆𑀖𑀫𑀕𑁆𑀕𑀲𑀓𑀝𑀫𑀕𑁆𑀕𑀸 𑀫𑀳𑀸𑀫𑀕𑁆𑀕𑁂 𑀯𑀢𑁆𑀢𑀦𑁆𑀢𑀺.

𑀏𑀢𑁆𑀣 𑀘 ‘‘𑀢𑁂𑀣𑀸’’𑀢𑀺 𑀅𑀣𑀲𑀤𑁆𑀤𑁄 𑀦 𑀯𑀢𑁆𑀢𑀩𑁆𑀩𑁄, ‘‘𑀢𑁂 𑀘𑀸’’𑀢𑀺 𑀧𑀦 𑀯𑀢𑁆𑀢𑀩𑁆𑀩𑁄. ‘‘𑀫𑀢𑀸𑀤𑁆𑀥𑀦𑀻’’𑀢𑀺 𑀧𑀸𑀞𑁂 𑀧𑀦 𑀲𑀢𑀺 ‘‘𑀢𑁂𑀣𑀸’’𑀢𑀺 𑀯𑀢𑁆𑀢𑀩𑁆𑀩𑁄𑀬𑁂𑀯, 𑀢𑀤𑀸 𑀏𑀓𑀧𑀤𑀺𑀓𑁂 𑀅𑀤𑁆𑀥𑀦𑀺 𑀫𑀕𑁆𑀕𑁂 𑀏𑀓𑀧𑀤𑀻 𑀫𑀢𑀸𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀕𑀘𑁆𑀙𑀢𑀁 𑀏𑀓𑁄 𑀅𑀲𑀳𑀸𑀬𑁄 𑀧𑀸𑀤𑁄 𑀬𑀲𑁆𑀲𑀁, 𑀦 𑀦𑀺𑀲𑀺𑀦𑁆𑀦𑀲𑁆𑀲𑁂𑀯 𑀬𑀫𑀓𑁄𑀢𑀺 𑀏𑀓𑀧𑀤𑀻, 𑀲𑀫𑀸𑀲𑀦𑁆𑀢𑁂 𑀦𑀺𑀘𑁆𑀘𑀫𑀻𑀧𑀘𑁆𑀘𑀬𑁄, 𑀓𑀧𑀘𑁆𑀘𑀬𑁂 𑀏𑀓𑀧𑀤𑀺𑀓𑁄, 𑀈𑀲𑁆𑀲 𑀭𑀲𑁆𑀲𑀢𑁆𑀢𑀁.

𑀘𑁄𑀭𑀓𑀡𑁆𑀝𑀓𑀸𑀤𑀺𑀤𑁄𑀲𑁂 𑀤𑀼𑀕𑁆𑀕𑀫𑁂 𑀧𑀣𑁂 𑀓𑀦𑁆𑀢𑀸𑀭𑁄, 𑀧𑀼𑀦𑁆𑀦𑀧𑀼𑀁𑀲𑀓𑁂, 𑀓𑁂𑀦 𑀧𑀸𑀦𑀻𑀬𑁂𑀦 𑀢𑀭𑀦𑁆𑀢𑀺 𑀅𑀢𑀺𑀓𑁆𑀓𑀫𑀦𑁆𑀢𑀺 𑀬𑀦𑁆𑀢𑀺 𑀓𑀦𑁆𑀢𑀸𑀭𑁄, 𑀢𑀭 𑀢𑀭𑀡𑁂, 𑀘𑁄𑀭𑀓𑀦𑁆𑀢𑀸𑀭𑀸𑀤𑀻𑀲𑀼 𑀧𑀦𑀸𑀬𑀁 𑀭𑀽𑀴𑁆𑀳𑀺𑀯𑀲𑁂𑀦 𑀯𑀼𑀢𑁆𑀢𑁄, 𑀅𑀣 𑀯𑀸 𑀓𑀢𑀺 𑀙𑁂𑀤𑀦𑁂, 𑀲𑀧𑁆𑀧𑀝𑀺𑀪𑀬𑀢𑁆𑀢𑀸 𑀓𑀦𑁆𑀢𑀢𑀺 𑀦𑀺𑀘𑁆𑀘𑀕𑀫𑀦𑀸𑀕𑀫𑀦𑀫𑁂𑀢𑁆𑀣𑀸𑀢𑀺 𑀓𑀦𑁆𑀢𑀸𑀭𑁄, 𑀆𑀭𑁄, 𑀦𑀸𑀕𑀫𑁄 𑀘. 𑀤𑀼𑀓𑁆𑀔𑁂𑀦 𑀕𑀘𑁆𑀙𑀦𑁆𑀢𑁆𑀬𑁂𑀢𑁆𑀣𑀸𑀢𑀺 𑀤𑀼𑀕𑁆𑀕𑀫𑁄.

𑁧𑁯𑁩. 𑀤𑁆𑀯𑀬𑀁 𑀧𑀝𑀺𑀫𑀕𑁆𑀕𑁂. 𑀧𑀝𑀺 𑀅𑀪𑀺𑀫𑀼𑀔𑁂𑀦 𑀕𑀦𑁆𑀢𑀩𑁆𑀩𑁄 𑀫𑀕𑁆𑀕𑁄, 𑀧𑀣𑁄 𑀘 𑀧𑀝𑀺𑀫𑀕𑁆𑀕𑁄, 𑀧𑀝𑀺𑀧𑀣𑁄 𑀘. 𑀤𑀻𑀖𑀫𑀜𑁆𑀚𑀲𑀁 𑀅𑀢𑀺𑀤𑀽𑀭𑁄 𑀫𑀕𑁆𑀕𑁄 ¶ 𑀅𑀤𑁆𑀥𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑁂. 𑀅𑀤𑁆𑀥𑀸𑀦𑀁 𑀅𑀬𑀦𑀁 𑀅𑀤𑁆𑀥𑀸𑀦𑀁, 𑀅𑀘𑁆𑀘𑀸𑀬𑀢𑁄 𑀫𑀕𑁆𑀕𑁄, 𑀬𑀣𑀸 ‘‘𑀧𑀤𑀝𑁆𑀞𑀸𑀦’’𑀦𑁆𑀢𑀺, 𑀬𑀮𑁄𑀧𑁄.

𑀤𑁆𑀯𑀬𑀁 𑀧𑀲𑀢𑁆𑀣𑁂𑀤𑁆𑀥𑀦𑀺. 𑀲𑁄𑀪𑀦𑁄 𑀧𑀣𑁄, 𑀧𑀦𑁆𑀣𑁄 𑀘𑀸𑀢𑀺 𑀯𑀺𑀕𑁆𑀕𑀳𑁄. 𑀕𑀦𑁆𑀢𑀩𑁆𑀩𑀧𑀣𑀪𑀸𑀯𑀢𑁄 𑀅𑀧𑁂𑀢𑀁 𑀉𑀧𑁆𑀧𑀣𑀁, 𑀅𑀧𑀣𑀜𑁆𑀘, 𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲𑁄, 𑀅𑀲𑀤𑁆𑀤𑁄 𑀅𑀢𑁆𑀭 𑀦𑀺𑀧𑀸𑀢𑁄.

𑁧𑁯𑁪-𑁧𑁯𑁬. 𑀧𑀭𑀫𑀸𑀡𑀽𑀦𑀁 𑀙𑀢𑁆𑀢𑀺𑀁𑀲 𑀏𑀓𑁄 𑀅𑀡𑀼 𑀦𑀸𑀫, 𑀅𑀡𑀼𑀢𑁄𑀧𑀺 𑀅𑀡𑀼𑀢𑀭𑀢𑁆𑀢𑀸 𑀧𑀭𑀫𑁄 𑀅𑀡𑀼, 𑀅𑀡𑀼𑀢𑁄 𑀯𑀸 𑀧𑀭𑀫𑁄𑀢𑀺 𑀧𑀭𑀫𑀸𑀡𑀼, 𑀅𑀡 𑀲𑀤𑁆𑀤𑀢𑁆𑀣𑁄 𑀤𑀡𑁆𑀟𑀓𑁄 𑀥𑀸𑀢𑀼, 𑀉. 𑀢𑁂 𑀅𑀡𑀯𑁄 𑀙𑀢𑁆𑀢𑀺𑀁𑀲 𑀢𑀚𑁆𑀚𑀸𑀭𑀻 𑀦𑀸𑀫, 𑀢𑀁 𑀢𑀁 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀁 𑀫𑀮𑀻𑀦𑀓𑀭𑀡𑀯𑀲𑁂𑀦 𑀚𑀭𑀸𑀧𑁂𑀢𑀻𑀢𑀺 𑀢𑀚𑁆𑀚𑀸𑀭𑀻, 𑀚𑀭 𑀚𑀻𑀭𑀡𑁂, 𑀚𑀭 𑀯𑀬𑁄𑀳𑀸𑀦𑀺𑀫𑁆𑀳𑀺 𑀯𑀸, 𑀅, 𑀦𑀤𑀸𑀤𑀺. 𑀢𑀸𑀧𑀺 𑀢𑀚𑁆𑀚𑀸𑀭𑀺𑀬𑁄 𑀙𑀢𑁆𑀢𑀺𑀁𑀲 𑀭𑀣𑀭𑁂𑀡𑀼 𑀦𑀸𑀫, 𑀭𑀣𑀸𑀦𑀁 𑀲𑀜𑁆𑀘𑀭𑀡𑀯𑀲𑁂𑀦 𑀧𑀯𑀢𑁆𑀢𑁄 𑀭𑁂𑀡𑀼 𑀭𑀣𑀭𑁂𑀡𑀼. 𑀢𑁂 𑀭𑀣𑀭𑁂𑀡𑀯𑁄 𑀙𑀢𑁆𑀢𑀺𑀁𑀲 𑀮𑀺𑀓𑁆𑀔𑀸 𑀦𑀸𑀫. 𑀮𑀓𑁆𑀔 𑀤𑀲𑁆𑀲𑀦𑁂, 𑀧𑀓𑀢𑀺𑀘𑀓𑁆𑀔𑀼𑀦𑀸𑀧𑀺 𑀮𑀓𑁆𑀔𑁆𑀬𑀢𑁂𑀢𑀺 𑀮𑀺𑀓𑁆𑀔𑀸, 𑀅𑀲𑁆𑀲𑀺𑀢𑁆𑀢𑀁.

𑀢𑀸 ¶ 𑀮𑀺𑀓𑁆𑀔𑀸 𑀲𑀢𑁆𑀢 𑀊𑀓𑀸 𑀦𑀸𑀫, 𑀊𑀓𑀸𑀢𑀺 𑀯𑀼𑀘𑁆𑀘𑀢𑀺 𑀲𑀺𑀭𑁄𑀯𑀢𑁆𑀢𑀓𑀺𑀫𑀺, 𑀢𑀧𑁆𑀧𑀫𑀸𑀡𑀢𑁆𑀢𑀸 𑀊𑀓𑀸. 𑀢𑀸 𑀲𑀢𑁆𑀢 𑀊𑀓𑀸 𑀥𑀜𑁆𑀜𑀫𑀸𑀲𑁄 𑀦𑀸𑀫, 𑀥𑀜𑁆𑀜𑁄 𑀯𑀻𑀳𑀺𑀬𑁂𑀯 𑀧𑀭𑀺𑀫𑀸𑀡𑀺𑀢𑀩𑁆𑀩𑀢𑁆𑀢𑀸 𑀫𑀸𑀲𑁄 𑀘𑀸𑀢𑀺 𑀥𑀜𑁆𑀜𑀫𑀸𑀲𑁄, 𑀫𑀲𑀺 𑀧𑀭𑀺𑀫𑀸𑀡𑁂. 𑀢𑁂 𑀲𑀢𑁆𑀢 𑀥𑀜𑁆𑀜𑀫𑀸𑀲𑀸 𑀅𑀗𑁆𑀕𑀼𑀮𑀁 𑀦𑀸𑀫, 𑀅𑀗𑁆𑀕 𑀕𑀫𑀦𑀢𑁆𑀣𑁄, 𑀉𑀮𑁄, 𑀅𑀗𑁆𑀕𑀼𑀮𑀁, 𑀧𑀫𑀸𑀡𑀁, 𑀉𑀮𑀺𑀧𑀘𑁆𑀘𑀬𑁂 𑀅𑀗𑁆𑀕𑀼𑀮𑀺, 𑀓𑀭𑀲𑀸𑀔𑀸. 𑀅𑀫𑀼𑀤𑁆𑀯𑀺𑀘𑁆𑀙𑁂𑀢𑀺 𑀅𑀤𑀼𑀁 𑀤𑁆𑀯𑀸𑀤𑀲𑀗𑁆𑀕𑀼𑀮𑀁 𑀯𑀺𑀤𑀢𑁆𑀣𑀺 𑀦𑀸𑀫, 𑀓𑀡𑀺𑀝𑁆𑀞𑀲𑀳𑀺𑀢𑁂𑀦𑀗𑁆𑀕𑀼𑀝𑁆𑀞𑁂𑀦 𑀯𑀺𑀢𑁆𑀣𑀸𑀭𑀻𑀬𑀢𑁂, 𑀯𑀺𑀥𑀻𑀬𑀢𑁂𑀢𑀺 𑀯𑀸 𑀯𑀺𑀤𑀢𑁆𑀣𑀺, 𑀯𑀺𑀧𑀼𑀩𑁆𑀩𑁄 𑀢𑀦𑀼 𑀯𑀺𑀢𑁆𑀣𑀸𑀭𑁂. 𑀥𑀸 𑀥𑀸𑀭𑀡𑁂, 𑀉𑀪𑀬𑀢𑁆𑀭𑀸𑀧𑀺𑀢𑀺, 𑀧𑀼𑀩𑁆𑀩𑀧𑀓𑁆𑀔𑁂 𑀢𑀲𑁆𑀲 𑀣𑁄, 𑀦𑀲𑁆𑀲 𑀢𑁄, 𑀢𑀲𑁆𑀲 𑀤𑁄. 𑀧𑀘𑁆𑀙𑀺𑀫𑁂 𑀥𑀲𑁆𑀲 𑀤𑁄, 𑀢𑀲𑁆𑀲 𑀣𑁄, 𑀅𑀲𑀭𑀽𑀧𑀤𑁆𑀯𑀺𑀪𑀸𑀯𑁄 𑀘. 𑀢𑀸 𑀤𑀼𑀯𑁂 𑀯𑀺𑀤𑀢𑁆𑀣𑀻 𑀭𑀢𑀦𑀁 𑀲𑀺𑀬𑀼𑀁, 𑀭𑀫𑀼 𑀓𑀻𑀴𑀸𑀬𑀁, 𑀢𑀦𑁄, 𑀫𑀮𑁄𑀧𑁄. 𑀢𑀸𑀦𑀺 𑀲𑀢𑁆𑀢𑁂𑀯 𑀭𑀢𑀦𑀸𑀦𑀺 𑀬𑀝𑁆𑀞𑀺 𑀦𑀸𑀫, 𑀬𑀢 𑀧𑀬𑀢𑀦𑁂,𑀢𑀺, 𑀢𑀲𑁆𑀲 𑀞𑁄, 𑀢𑀲𑁆𑀲 𑀝𑁄. 𑀢𑀸 𑀯𑀻𑀲𑀢𑀺 𑀬𑀝𑁆𑀞𑀺𑀬𑁄 𑀉𑀲𑀪𑀁 𑀦𑀸𑀫, 𑀉𑀲 𑀤𑀸𑀳𑁂, 𑀅𑀪𑁄. 𑀏𑀢𑁆𑀣 𑀧𑀦 𑀉𑀲𑀪𑀦𑀤𑀦𑁆𑀢𑀭𑀁 𑀉𑀲𑀪𑀁. 𑀉𑀲𑀪𑀸𑀦𑀁 𑀅𑀲𑀻𑀢𑀺𑀧𑁆𑀧𑀫𑀸𑀡𑀁 𑀕𑀸𑀯𑀼𑀢𑀁 𑀦𑀸𑀫, 𑀕𑀯𑀁, 𑀕𑀯𑁂𑀳𑀺 𑀯𑀸 𑀬𑀼𑀢𑀁 𑀕𑀸𑀯𑀼𑀢𑀁. 𑀬𑀼𑀚 𑀲𑀫𑀸𑀥𑀺𑀫𑁆𑀳𑀺, 𑀕𑁄𑀦𑀤𑀦𑁆𑀢𑀭𑁂𑀳𑀺 𑀕𑀳𑀺𑀢𑀧𑁆𑀧𑀫𑀸𑀡𑀲𑀫𑀸𑀥𑀸𑀦𑀦𑁆𑀢𑁆𑀬𑀢𑁆𑀣𑁄, 𑀢𑀁 𑀘𑀢𑀼𑀕𑀸𑀯𑀼𑀢𑀁 𑀬𑁄𑀚𑀦𑀁 𑀦𑀸𑀫, 𑀬𑀼𑀚 𑀲𑀫𑀸𑀥𑀺𑀫𑁆𑀳𑀺, 𑀬𑀼, ‘‘𑀏𑀢𑁆𑀢𑀓𑀁 𑀬𑁄𑀚𑀦𑀁 𑀦𑀸𑀫 𑀳𑁄𑀢𑀽’’𑀢𑀺 𑀘𑀢𑀼𑀕𑀸𑀯𑀼𑀢𑁂𑀳𑀺 𑀲𑀫𑀸𑀥𑀸𑀦𑀦𑁆𑀢𑁆𑀬𑀢𑁆𑀣𑁄.

𑁧𑁯𑁭. 𑀆𑀭𑁄𑀧𑀺𑀢𑀸𑀦𑀁 𑀆𑀘𑀭𑀺𑀬𑀥𑀦𑀽𑀦𑀁 𑀧𑀜𑁆𑀘𑀲𑀢𑀁 𑀓𑁄𑀲𑁄 𑀦𑀸𑀫, 𑀅𑀦𑀸𑀭𑁄𑀧𑀺𑀢𑀸𑀦𑀦𑁆𑀢𑁆𑀬𑀧𑀭𑁂. 𑀓𑀼𑀲 𑀅𑀯𑁆𑀳𑀸𑀦𑁂, 𑀡𑁄, 𑀓𑀼𑀲𑀦𑀁 𑀅𑀯𑁆𑀳𑀸𑀦𑀁 𑀓𑁄𑀲𑁄, 𑀇𑀥 𑀧𑀦 𑀓𑁄𑀲𑀧𑁆𑀧𑀫𑀸𑀡𑀢𑁆𑀢𑀸 𑀓𑁄𑀲𑁄, 𑀤𑁆𑀯𑀺𑀲𑀳𑀲𑁆𑀲𑀓𑀭𑀧𑁆𑀧𑀫𑀸𑀡𑁄. 𑀅𑀜𑁆𑀜𑀢𑁆𑀣 𑀧𑀦 𑁋

‘‘𑀘𑀢𑀼𑀓𑁆𑀓𑀸𑀥𑀺𑀯𑀻𑀲𑀢𑀺𑀬𑀸 ¶ , 𑀅𑀗𑁆𑀕𑀼𑀮𑁂𑀳𑀺 𑀓𑀭𑁄 𑀪𑀯𑁂;

𑀔𑁆𑀬𑀸𑀢𑀫𑀝𑁆𑀞𑀲𑀳𑀲𑁆𑀲𑁂𑀳𑀺, 𑀓𑁄𑀲𑀫𑀸𑀦𑀁 𑀯𑀺𑀪𑀸𑀯𑀺𑀦𑀸’’𑀢𑁆𑀬𑀼𑀢𑁆𑀢𑀁.

𑀘𑀢𑀼𑀭𑀫𑁆𑀩𑀡𑀦𑁆𑀢𑀺 𑀘𑀢𑀼𑀭𑀫𑁆𑀩𑀡𑀯𑀻𑀳𑀺𑀩𑀻𑀚𑀚𑀸𑀢𑀭𑁄𑀧𑀦𑀬𑁄𑀕𑁆𑀬𑁄 𑀪𑀽𑀫𑀺𑀧𑁆𑀧𑀤𑁂𑀲𑁄 𑀓𑀭𑀻𑀲𑀁 𑀦𑀸𑀫, 𑀓𑀭𑁄𑀦𑁆𑀢𑀺 𑀏𑀢𑁆𑀣 𑀓𑀲𑀦𑀭𑁄𑀧𑀦𑀸𑀤𑀺𑀓𑀦𑁆𑀢𑀺 𑀓𑀭𑀻𑀲𑀁, 𑀈𑀲𑁄. 𑀘𑀢𑀼𑀭𑀫𑁆𑀩𑀡𑀩𑀻𑀚𑀚𑀸𑀢𑀸𑀦𑀺 𑀭𑁄𑀧𑁂𑀦𑁆𑀢𑁆𑀬𑁂𑀢𑁆𑀣𑀸𑀢𑀺 𑀘𑀢𑀼𑀭𑀫𑁆𑀩𑀡𑀁, 𑀅𑀫𑁆𑀩𑀡𑀁 𑀏𑀓𑀸𑀤𑀲𑀤𑁄𑀡𑀫𑀢𑁆𑀢𑀁, 𑀅𑀜𑁆𑀜𑁂 𑀧𑀦 ‘‘𑀘𑀢𑀼𑀭𑀫𑁆𑀩𑀡𑀁 𑀘𑀢𑀼𑀬𑀝𑁆𑀞𑀺𑀓𑀁 𑀞𑀸𑀦𑀁 𑀓𑀭𑀻𑀲𑀁 𑀦𑀸𑀫𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀓𑀭𑀻𑀲𑀩𑁆𑀪𑀦𑁆𑀢𑀭𑀸𑀦𑀁 𑀧𑀭𑀺𑀬𑀸𑀬𑀪𑀸𑀯𑀧𑁆𑀧𑀲𑀗𑁆𑀕𑀸 𑀦 𑀕𑀳𑁂𑀢𑀩𑁆𑀩𑀁.

𑀧𑀫𑀸𑀡𑀢𑁄 𑀳𑀢𑁆𑀣𑀸𑀦𑀫𑀝𑁆𑀞𑀯𑀻𑀲𑀧𑁆𑀧𑀫𑀸𑀡𑀁 𑀞𑀸𑀦𑀁 𑀅𑀩𑁆𑀪𑀦𑁆𑀢𑀭𑀁 𑀦𑀸𑀫, 𑀅𑀩𑁆𑀪𑀦𑁆𑀢𑀭𑁂 𑀅𑀦𑁆𑀢𑁄𑀓𑁄𑀝𑁆𑀞𑀸𑀲𑁂 𑀚𑀸𑀢𑀁, 𑀦 𑀩𑀳𑀺𑀓𑁄𑀝𑁆𑀞𑀸𑀲𑁂𑀢𑀺 𑀅𑀩𑁆𑀪𑀦𑁆𑀢𑀭𑀁. 𑀬𑀢𑁆𑀣 𑀬𑀢𑁆𑀣 𑀳𑀺 𑀬𑁄 𑀬𑁄 𑀞𑀺𑀢𑁄, 𑀦𑀺𑀲𑀺𑀦𑁆𑀦𑁄 𑀯𑀸, 𑀢𑀢𑁆𑀣 𑀢𑀢𑁆𑀣 𑀲𑀫𑀦𑁆𑀢𑀸 𑀅𑀝𑁆𑀞𑀯𑀻𑀲𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑀁 𑀞𑀸𑀦𑀁 𑀢𑀲𑁆𑀲 𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑀁 𑀞𑀸𑀦𑀁 𑀦𑀸𑀫. 𑀪𑀽𑀫𑁆𑀬𑀸𑀤𑀺𑀢𑁆𑀢𑀸 𑀪𑀽𑀫𑀺𑀯𑀕𑁆𑀕𑁄, 𑀅𑀣 𑀯𑀸 𑀅𑀗𑁆𑀕𑀸𑀧𑁂𑀓𑁆𑀔𑀸𑀬 𑀪𑀽𑀫𑀺𑀬𑁂𑀯 𑀧𑀥𑀸𑀦𑀁, 𑀧𑀥𑀸𑀦𑁂𑀦 𑀘 𑀩𑁆𑀬𑀧𑁆𑀧𑀤𑁂𑀲𑁄 𑀪𑀯𑀢𑀻𑀢𑀺 𑀪𑀽𑀫𑀺𑀯𑀕𑁆𑀕𑀩𑁆𑀬𑀧𑁆𑀧𑀤𑁂𑀲𑁄.

𑀪𑀽𑀫𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀼𑀭𑀯𑀕𑁆𑀕𑀯𑀡𑁆𑀡𑀦𑀸

𑁧𑁯𑁮. 𑀙𑀓𑁆𑀓𑀁 𑀦𑀕𑀭𑁂.

‘‘𑀧𑀝𑁆𑀝𑀦𑀜𑁆𑀘 𑀅𑀥𑀺𑀝𑁆𑀞𑀸𑀦𑀁, 𑀦𑀕𑀭𑀁 𑀧𑀼𑀝𑀪𑁂𑀤𑀦𑀁;

𑀣𑀺𑀬𑁄 𑀧𑀽 𑀦𑀕𑀭𑀻 𑀧𑀽𑀭𑀺𑀬𑁄, 𑀞𑀸𑀦𑀻𑀬𑀁 𑀓𑀩𑁆𑀩𑀝𑀁 𑀧𑀼𑀝’’𑀦𑁆𑀢𑀺.

𑀳𑀺 𑀲𑀺𑀮𑁄𑀓𑀧𑀭𑀺𑀬𑀸𑀬𑁂𑀲𑀼 𑀯𑁄𑀧𑀸𑀮𑀺𑀢𑁄.

‘‘𑀯𑀺𑀘𑀺𑀢𑁆𑀢𑀤𑁂𑀯𑀸𑀬𑀢𑀦𑀁 ¶ , 𑀧𑀸𑀲𑀸𑀤𑀸𑀧𑀡𑀫𑀦𑁆𑀤𑀺𑀭𑀁;

𑀦𑀕𑀭𑀁 𑀤𑀲𑁆𑀲𑀬𑁂 𑀯𑀺𑀤𑁆𑀯𑀸, 𑀭𑀸𑀚𑀫𑀕𑁆𑀕𑁄𑀧𑀲𑁄𑀪𑀺𑀢’’𑀦𑁆𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧.𑁨.𑁧]. 𑁋

𑀦𑀕𑀭𑀮𑀓𑁆𑀔𑀡𑀁. 𑀧𑀼 𑀧𑀸𑀮𑀦𑁂, 𑀧𑀼𑀭 𑀧𑀸𑀮𑀦𑁂𑀢𑀺 𑀘, 𑀧𑀼𑀦𑀸𑀢𑀺 𑀧𑀼𑀭𑁂𑀢𑀺 𑀘 𑀭𑀓𑁆𑀔𑀢𑀺 𑀧𑀭𑀘𑀓𑁆𑀓𑀸 𑀤𑀼𑀕𑁆𑀕𑀢𑀸𑀬𑀸𑀢𑀺 𑀧𑀼𑀭𑀁, 𑀭𑁄, 𑀅 𑀘, 𑀧𑀼𑀭 𑀅𑀕𑁆𑀕𑀕𑀫𑀦𑁂𑀢𑀺𑀧𑀺 𑀥𑀸𑀢𑁆𑀯𑀢𑁆𑀣𑁄. 𑀦𑀕𑀸 𑀧𑀸𑀲𑀸𑀤𑀸𑀤𑀬𑁄 𑀅𑀲𑁆𑀲 𑀲𑀦𑁆𑀢𑀺 𑀦𑀕𑀭𑀁, 𑀭𑁄. 𑀯𑀸𑀓𑀸𑀭𑁂𑀦 𑀦𑀕𑀭𑀲𑀤𑁆𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀁 𑀲𑀫𑀼𑀘𑁆𑀘𑀺𑀦𑁄𑀢𑀺 [𑀦𑀕𑀭𑀺𑀬𑁄 𑀯𑀸 𑀧𑀢𑁆𑀢𑀦𑀁 (𑀅𑀫𑀭 𑁧.𑁨.𑁧) 𑀧𑀓𑁆𑀔𑁂 𑀧𑀢𑁆𑀢𑀦𑀲𑀸𑀳𑀘𑀭𑀺𑀬𑀸 𑀦𑀧𑀼𑀁𑀲𑀓𑀢𑁆𑀢𑀁. (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧.𑁨.𑁧)], 𑀧𑀼𑀭𑀲𑀤𑁆𑀤𑀲𑁆𑀲𑀸𑀧𑀻𑀢𑁆𑀬𑀸𑀘𑀭𑀺𑀬𑀸. 𑀅𑀓𑀼𑀢𑁄𑀪𑀬𑀢𑁆𑀢𑀸 𑀞𑀸𑀦𑀸𑀬 𑀳𑀺𑀢𑀁 𑀞𑀸𑀦𑀻𑀬𑀁, 𑀈𑀬𑁄. 𑀧𑀡𑀺𑀓𑀸𑀦𑀁 𑀧𑀼𑀝𑀸 𑀪𑀺𑀚𑁆𑀚𑀦𑁆𑀢𑁂 𑀅𑀢𑁆𑀭𑀸𑀢𑀺 𑀧𑀼𑀝𑀪𑁂𑀤𑀦𑀁.

𑀦𑀺𑀘𑁆𑀘𑀦𑀺𑀯𑀸𑀲𑀦𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀢𑀭𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀣𑀺𑀬’’𑀫𑀺𑀘𑁆𑀘𑀸𑀤𑀺. 𑀭𑀸𑀚𑀸 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀭𑀸𑀚𑀞𑀸𑀦𑀻, 𑀬𑀼, 𑀦𑀤𑀸𑀤𑀺, 𑀦𑀺𑀘𑁆𑀘𑀦𑀺𑀯𑀸𑀲𑀦𑀝𑁆𑀞𑀸𑀦𑁂𑀧𑀺 ‘‘𑀘𑀢𑀼𑀭𑀸𑀲𑀻𑀢𑀺𑀦𑀕𑀭𑀲𑀳𑀲𑁆𑀲𑀸𑀦𑀺 𑀓𑀼𑀲𑀯𑀢𑀻𑀭𑀸𑀚𑀞𑀸𑀦𑀻𑀧𑀫𑀼𑀔𑀸𑀦𑀻’’𑀢𑁆𑀬𑀸𑀤𑀻𑀲𑀼 [𑀤𑀻. 𑀦𑀺. 𑁨.𑁨𑁬𑁩]. 𑀤𑀸𑀭𑀼𑀓𑁆𑀔𑀦𑁆𑀥𑀸𑀤𑀻𑀳𑀺 𑀆 𑀲𑀫𑀦𑁆𑀢𑀢𑁄 𑀯𑀭𑀦𑁆𑀢𑀺 𑀧𑀭𑀺𑀓𑁆𑀔𑀺𑀧𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀔𑀦𑁆𑀥𑀸𑀯𑀸𑀭𑁄, 𑀧𑀢𑁆𑀣𑀦𑀢𑁆𑀣𑁄 𑀯𑀭𑀥𑀸𑀢𑀼 𑀆𑀧𑀼𑀩𑁆𑀩𑀢𑁆𑀢𑀸 𑀧𑀭𑀺𑀓𑁆𑀔𑀺𑀧𑀦𑀢𑁆𑀣𑁄 𑀳𑁄𑀢𑀺. 𑀧𑀜𑁆𑀘𑀓𑀁 𑀦𑀕𑀭𑁂, ‘‘𑀔𑀦𑁆𑀥𑀸𑀯𑀸𑀭𑁄’’𑀢𑀺 𑀧𑀦 𑀏𑀓𑀫𑁂𑀯 𑀅𑀘𑀺𑀭𑀦𑀺𑀯𑀸𑀲𑀦𑀝𑁆𑀞𑀸𑀦𑀲𑁆𑀲 𑀦𑀸𑀫𑀁.

𑁧𑁯𑁯. 𑀫𑀽𑀮𑀧𑀼𑀭𑀸 𑀅𑀜𑁆𑀜𑀢𑁆𑀭 𑀫𑀽𑀮𑀧𑀼𑀭𑀁 𑀯𑀚𑁆𑀚𑁂𑀢𑁆𑀯𑀸 𑀬𑀁 𑀧𑀼𑀭𑀫𑀢𑁆𑀣𑀺 𑀬𑁄𑀚𑀦𑀯𑀺𑀢𑁆𑀣𑀺𑀡𑁆𑀡𑀧𑀸𑀓𑀸𑀭𑀸𑀤𑀺𑀧𑀭𑀺𑀓𑁆𑀔𑀺𑀢𑁆𑀢𑀁, 𑀢𑀁 𑀫𑀽𑀮𑀧𑀼𑀭𑀲𑁆𑀲 𑀢𑀭𑀼𑀝𑁆𑀞𑀸𑀦𑀺𑀬𑀲𑁆𑀲 𑀲𑀸𑀔𑀸𑀲𑀤𑀺𑀲𑀢𑁆𑀢𑀸 𑀲𑀸𑀔𑀸𑀦𑀕𑀭𑀁 𑀦𑀸𑀫.

𑁨𑁦𑁦-𑁨𑁦𑁧. 𑀲𑀸𑀤𑁆𑀥𑀧𑀚𑁆𑀚𑀤𑁆𑀯𑀬𑁂𑀦 ¶ 𑀫𑀽𑀮𑀧𑀼𑀭𑀲𑁆𑀲 𑀦𑀸𑀫𑀸𑀦𑀺. 𑀯𑀸𑀦𑀭𑀲𑀻𑀲𑀁, 𑀢𑀁𑀲𑀡𑁆𑀞𑀸𑀦𑁄 𑀯𑀸 𑀧𑀸𑀲𑀸𑀡𑁄 𑀏𑀢𑁆𑀣 𑀅𑀢𑁆𑀣𑀻𑀢𑀺 ‘‘𑀯𑀸𑀦𑀭𑀲𑀻𑀲’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀯𑀲𑁆𑀲 𑀩𑀢𑁆𑀢𑀁, 𑀯𑀡𑁆𑀡𑀯𑀺𑀧𑀭𑀺𑀬𑀬𑀁, 𑀤𑀻𑀖𑀁, 𑀡𑀢𑁆𑀢𑀁, 𑀲𑀲𑁆𑀲 𑀮𑁄𑀧𑀜𑁆𑀘 𑀓𑀢𑁆𑀯𑀸 ‘‘𑀩𑀸𑀭𑀸𑀡𑀲𑀻’’𑀢𑀺 𑀯𑀼𑀢𑁆𑀢𑀁. 𑀲𑀯𑀢𑁆𑀣𑀲𑁆𑀲 𑀇𑀲𑀺𑀦𑁄 𑀦𑀺𑀯𑀸𑀲𑀦𑀝𑁆𑀞𑀸𑀦𑀢𑁆𑀢𑀸 𑀲𑀸𑀯𑀢𑁆𑀣𑀺, 𑀲𑀩𑁆𑀩𑀁 𑀥𑀦𑀫𑁂𑀢𑁆𑀣 𑀅𑀢𑁆𑀣𑀻𑀢𑀺 𑀯𑀸 𑀲𑀸𑀯𑀢𑁆𑀣𑀺 [𑀫. 𑀦𑀺. 𑀅𑀝𑁆𑀞. 𑁧.𑁧𑁪], 𑀲𑀩𑁆𑀩𑀲𑁆𑀲 𑀲𑀸𑀯𑁄, 𑀥𑀦𑀯𑀸𑀘𑀓𑁄 𑀅𑀢𑁆𑀣𑀲𑀤𑁆𑀤𑁄, 𑀇. 𑀢𑀺𑀓𑁆𑀔𑀢𑁆𑀢𑀼𑀁 𑀯𑀺𑀲𑀸𑀮𑀻𑀪𑀽𑀢𑀢𑁆𑀢𑀸 𑀯𑁂𑀲𑀸𑀮𑀻, 𑀅𑀲𑁆𑀲𑀢𑁆𑀣𑀼𑀢𑁆𑀣𑁂 𑀈. 𑀫𑀣𑀺 𑀳𑀺𑀁𑀲𑀸𑀬𑀁, 𑀇𑀮𑁄, 𑀅𑀲𑁆𑀲𑀺𑀢𑁆𑀢𑀁, 𑀫𑀺𑀣𑀺𑀮𑀸. 𑀅𑀮𑀁 𑀪𑀽𑀲𑀦𑀫𑁂𑀢𑁆𑀣𑀸𑀢𑀺 𑀆𑀴𑀯𑀻, 𑀯𑀻, 𑀴𑀢𑁆𑀢𑀜𑁆𑀘. 𑀓𑀼𑀲 𑀅𑀯𑁆𑀳𑀸𑀦𑁂, ‘‘𑀔𑀸𑀤𑀣 𑀧𑀺𑀯𑀣𑀸’’𑀢𑁆𑀬𑀸𑀤𑀻𑀳𑀺 𑀤𑀲𑀳𑀺 𑀲𑀤𑁆𑀤𑁂𑀳𑀺 𑀓𑁄𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀓𑁄𑀲𑀫𑁆𑀩𑀻, 𑀩𑁄, 𑀦𑀤𑀸𑀤𑀺, 𑀓𑀼𑀲𑀫𑁆𑀩𑀭𑀼𑀓𑁆𑀔𑀯𑀦𑁆𑀢𑀢𑀸𑀬 𑀯𑀸 𑀓𑁄𑀲𑀫𑁆𑀩𑀻, 𑀓𑀼𑀲𑀫𑁆𑀩𑀲𑁆𑀲 𑀇𑀲𑀺𑀦𑁄 𑀅𑀲𑁆𑀲𑀫𑀢𑁄 𑀅𑀯𑀺𑀤𑀽𑀭𑁂 𑀫𑀸𑀧𑀺𑀢𑀢𑁆𑀢𑀸𑀢𑀺 𑀏𑀓𑁂 [𑀉𑀤𑀸. 𑀅𑀝𑁆𑀞. 𑁩𑁫; 𑀫. 𑀦𑀺. 𑀝𑀻. 𑁧.𑁧𑁪; 𑁨.𑁨𑁮𑁪]. 𑀉𑀕𑁆𑀕𑀁 𑀭𑀺𑀧𑀼𑀁 𑀚𑀬𑀢𑀺 𑀬𑀢𑁆𑀣, 𑀲𑀸 𑀉𑀚𑁆𑀚𑁂𑀦𑀻, 𑀬𑀼, 𑀦𑀤𑀸𑀤𑀺. 𑀢𑀓𑁆𑀓 𑀊𑀳𑁂, 𑀊𑀳𑁄 𑀊𑀦𑀧𑀽𑀭𑀡𑀁, 𑀢𑀓𑁆𑀓𑀦𑀁 𑀢𑀓𑁆𑀓𑁄, 𑀲𑁄 𑀲𑀻𑀮𑀁 𑀲𑀪𑀸𑀯𑁄 𑀬𑀢𑁆𑀣 𑀲𑀸 𑀢𑀓𑁆𑀓𑀲𑀻𑀮𑀸, 𑀬𑁄 𑀳𑀺 𑀧𑀼𑀭𑀺𑀲𑀓𑀸𑀭𑁂𑀦 𑀊𑀦𑁄, 𑀲𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀫𑀽𑀦𑀁 𑀧𑀽𑀭𑁂𑀢𑀻𑀢𑀺. 𑀘𑀫 𑀅𑀤𑀦𑁂, 𑀧𑁄, 𑀘𑀫𑁆𑀧𑀸. 𑀲𑀸𑀦𑀁 𑀥𑀦𑀸𑀦𑀁 𑀆𑀓𑀭𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁 𑀲𑀸𑀓𑀭𑁄, 𑀲𑁄 𑀏𑀯 𑀲𑀸𑀕𑀮𑀁. 𑀲𑀁𑀲𑀼𑀫𑀸𑀭𑀲𑀡𑁆𑀞𑀸𑀦𑁄 𑀕𑀺𑀭𑀺 𑀏𑀢𑁆𑀣𑀸𑀢𑀺 𑀲𑀁𑀲𑀼𑀫𑀸𑀭𑀕𑀺𑀭𑀁, 𑀲𑀁𑀲𑀼𑀫𑀸𑀭𑁄 𑀕𑀸𑀬𑀢𑀺 𑀏𑀢𑀲𑁆𑀲 𑀫𑀸𑀧𑀺𑀢𑀓𑀸𑀮𑁂𑀢𑀺 𑀯𑀸 𑀲𑀁𑀲𑀼𑀫𑀸𑀭𑀕𑀺𑀭𑀁, 𑀕𑁂 𑀲𑀤𑁆𑀤𑁂, 𑀇𑀭𑁄. 𑀭𑀸𑀚𑀽𑀦𑀫𑁂𑀯 𑀆𑀥𑀺𑀧𑀘𑁆𑀘𑀯𑀲𑁂𑀦 𑀧𑀭𑀺𑀕𑁆𑀕𑀳𑀺𑀢𑀩𑁆𑀩𑀢𑁆𑀢𑀸 𑀭𑀸𑀚𑀕𑀳𑀁. 𑀆𑀤𑀺𑀓𑀸𑀮𑁂 𑀓𑀧𑀺𑀮𑀦𑀸𑀫𑀲𑁆𑀲 𑀇𑀲𑀺𑀦𑁄 𑀦𑀺𑀯𑀸𑀲𑀦𑀝𑁆𑀞𑀸𑀦𑀢𑁆𑀢𑀸 𑀓𑀧𑀺𑀮𑀯𑀢𑁆𑀣𑀼, 𑀧𑀼𑀫𑀦𑀧𑀼𑀁𑀲𑀓𑁂.

𑀲𑀸𑀓𑁄 𑀭𑀸𑀚𑀽𑀦𑀁 𑀬𑀼𑀤𑁆𑀥𑀸𑀤𑀻𑀲𑀼 𑀲𑀢𑁆𑀢𑀺 𑀲𑀜𑁆𑀚𑀸𑀢𑀸 𑀏𑀢𑁆𑀣𑀸𑀢𑀺 𑀲𑀸𑀓𑁂𑀢𑀁, ‘‘𑀲𑀸𑀓𑁄 𑀲𑀢𑁆𑀢𑀺𑀫𑁆𑀳𑀺 𑀪𑀽𑀧𑀸𑀮𑁂, 𑀤𑀼𑀫𑀤𑀻𑀧𑀦𑁆𑀢𑀭𑁂𑀲𑀼 𑀘𑁂’’𑀢𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂. 𑀲𑀜𑁆𑀚𑀸𑀢𑀢𑁆𑀣𑁂 𑀇𑀢𑁄, 𑀲𑀸𑀓𑁄 𑀦𑀸𑀫 𑀭𑀸𑀚𑀸, 𑀤𑀼𑀫𑁄 𑀯𑀸 𑀏𑀢𑁆𑀣 𑀆𑀤𑀺𑀓𑀸𑀮𑁂 𑀲𑀜𑁆𑀚𑀸𑀢𑁄𑀢𑀺 𑀯𑀸 𑀲𑀸𑀓𑁂𑀢𑀁. 𑀇𑀦𑁆𑀤𑀁 𑀧𑀭𑀫𑀺𑀲𑁆𑀲𑀭𑀺𑀬𑀪𑀸𑀯𑀁 𑀧𑀸𑀧𑀼𑀡𑀦𑁆𑀢𑀺 𑀏𑀢𑁆𑀣𑀸𑀢𑀺 𑀇𑀦𑁆𑀤𑀧𑀢𑁆𑀢𑀁, 𑀇𑀦𑁆𑀤𑁄 𑀯𑀸 ¶ 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸, 𑀲𑁄 𑀧𑀢𑁆𑀢𑁄 𑀏𑀢𑁆𑀣𑀸𑀢𑀺 𑀇𑀦𑁆𑀤𑀧𑀢𑁆𑀢𑀁. 𑀉𑀓𑁆𑀓𑀁 𑀥𑀸𑀭𑀬𑀢𑀺 𑀏𑀢𑀲𑁆𑀲 𑀫𑀸𑀧𑀺𑀢𑀓𑀸𑀮𑁂𑀢𑀺 𑀉𑀓𑁆𑀓𑀝𑁆𑀞𑀸, 𑀯𑀡𑁆𑀡𑀯𑀺𑀓𑀸𑀭𑁄. 𑀬𑀲𑁆𑀲 𑀫𑀸𑀧𑀺𑀢𑀝𑁆𑀞𑀸𑀦𑁂 𑀧𑀸𑀝𑀮𑀻𑀦𑀸𑀫𑀓𑁄 𑀏𑀓𑁄 𑀢𑀭𑀼𑀡𑀭𑀼𑀓𑁆𑀔𑁄 𑀅𑀢𑁆𑀣𑀻𑀢𑀺 𑀢𑀁 𑀧𑀸𑀝𑀮𑀺𑀧𑀼𑀢𑁆𑀢𑀓𑀁, 𑀅𑀣 𑀯𑀸 𑀧𑀝𑀮𑀺 𑀦𑀸𑀫 𑀏𑀓𑁄 𑀕𑀸𑀫𑀡𑀻, 𑀢𑀲𑁆𑀲 𑀧𑀼𑀢𑁆𑀢𑁄 𑀏𑀢𑁆𑀣 𑀯𑀲𑀢𑀺𑀆𑀤𑀺𑀓𑀸𑀮𑁂𑀢𑀺 𑀧𑀸𑀝𑀮𑀺𑀧𑀼𑀢𑁆𑀢𑀓𑀁. 𑀘𑁂𑀢𑀺𑀬𑀭𑀝𑁆𑀞𑁂 𑀉𑀢𑁆𑀢𑀫𑀢𑁆𑀢𑀸 𑀘𑁂𑀢𑀼𑀢𑁆𑀢𑀭𑀁, ‘‘𑀚𑁂𑀢𑀼𑀢𑁆𑀢𑀭’’𑀦𑁆𑀢𑀺 𑀧𑀸𑀞𑁂 𑀧𑀦 𑀯𑀡𑁆𑀡𑀯𑀺𑀓𑀸𑀭𑁄, 𑀯𑁂𑀭𑀺𑀚𑀬𑀝𑁆𑀞𑀸𑀦𑀢𑁆𑀢𑀸 𑀚𑁂𑀢𑀜𑁆𑀘 𑀢𑀁 𑀉𑀢𑁆𑀢𑀫𑀢𑁆𑀢𑀸 𑀉𑀢𑁆𑀢𑀭𑀜𑁆𑀘𑁂𑀢𑀺 𑀯𑀸 𑀚𑁂𑀢𑀼𑀢𑁆𑀢𑀭𑀁. 𑀬𑀲𑁆𑀲 𑀫𑀸𑀧𑀺𑀢𑀓𑀸𑀮𑁂 𑀤𑀻𑀧𑁄 𑀤𑀺𑀧𑁆𑀧𑀢𑀺, 𑀢𑀁 𑀲𑀗𑁆𑀓𑀲𑁆𑀲𑀁, 𑀓𑀸𑀲 𑀤𑀺𑀢𑁆𑀢𑀺𑀬𑀁, 𑀤𑁆𑀯𑀺𑀢𑁆𑀢𑀁, 𑀲𑀫𑁆𑀫𑀸 𑀓𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀲𑀗𑁆𑀓𑀲𑁆𑀲𑀁, 𑀓𑀲 𑀯𑀺𑀮𑁂𑀔𑀦𑁂, 𑀬𑀲𑁆𑀲 𑀫𑀸𑀧𑀺𑀢𑀓𑀸𑀮𑁂 𑀦𑀺𑀫𑀺𑀢𑁆𑀢𑀫𑁄𑀮𑁄𑀓𑁂𑀦𑁆𑀢𑀸 𑀩𑁆𑀭𑀸𑀳𑁆𑀫𑀡𑀸 𑀓𑀼𑀲𑀳𑀢𑁆𑀣𑀁 𑀦𑀭𑀁 𑀧𑀲𑁆𑀲𑀺𑀢𑁆𑀯𑀸 𑀫𑀸𑀧𑁂𑀦𑁆𑀢𑀺, 𑀢𑀁 𑀓𑀼𑀲𑀺𑀦𑀸𑀭𑀁. 𑀆𑀤𑀺𑀦𑀸 𑀫𑀣𑀼𑀭 [𑀫𑀥𑀼𑀭, 𑀫𑀸𑀥𑀼𑀭 (𑀓.)] 𑀧𑀸𑀲𑀸𑀡𑀧𑀼𑀭𑀲𑁄𑀡𑀺𑀓𑀸𑀤𑀬𑁄𑀧𑁆𑀬𑀦𑁂𑀓𑀧𑀼𑀭𑀯𑀺𑀲𑁂𑀲𑀸 𑀲𑀗𑁆𑀕𑀳𑀺𑀢𑀸.

𑁨𑁦𑁨. 𑀘𑀢𑀼𑀓𑁆𑀓𑀁 𑀅𑀩𑁆𑀪𑀦𑁆𑀢𑀭𑀕𑀸𑀫𑀫𑀕𑁆𑀕𑁂. 𑀭𑀣𑀲𑁆𑀲 𑀳𑀺𑀢𑀸 𑀭𑀘𑁆𑀙𑀸, 𑀧𑀩𑁆𑀩𑀚𑁆𑀚𑀸𑀤𑀺. 𑀯𑀺𑀲𑀬𑀦𑁆𑀢𑁂 𑀧𑀓𑀸𑀲𑀬𑀦𑁆𑀢𑁂 𑀯𑀺𑀓𑁆𑀓𑀬𑁂𑀦 𑀤𑀩𑁆𑀩𑀸𑀦𑀺 𑀬𑀲𑁆𑀲𑀁, 𑀲𑀸 𑀯𑀺𑀲𑀺𑀔𑀸, 𑀯𑀺𑀧𑀼𑀩𑁆𑀩𑁄 𑀲𑀺 𑀲𑁂𑀯𑀸𑀬𑀁, 𑀔𑁄, 𑀯𑀺𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀯𑀺𑀲𑀺𑀔𑀸, 𑀯𑀺𑀲 𑀧𑀯𑁂𑀲𑀦𑁂, 𑀔𑁄. 𑀭𑀣𑀲𑁆𑀲 𑀳𑀺𑀢𑀸 𑀭𑀣𑀺𑀓𑀸, 𑀇𑀓𑁄. 𑀯𑀻 𑀕𑀫𑀦𑁂, 𑀣𑀺, 𑀯𑀻𑀣𑀺.

𑀅𑀦𑀺𑀩𑁆𑀩𑀺𑀤𑁆𑀥𑀸 𑀭𑀘𑁆𑀙𑀦𑁆𑀢𑀭𑁂𑀦 𑀫𑀚𑁆𑀛𑁂 𑀅𑀦𑀺𑀩𑁆𑀩𑀺𑀤𑁆𑀥𑀸 𑀭𑀘𑁆𑀙𑀸 𑀩𑁆𑀬𑀽𑀳𑁄 𑀦𑀸𑀫. 𑀩𑁆𑀬𑀽𑀳𑁂𑀢𑀺 𑀲𑀫𑁆𑀧𑀺𑀡𑁆𑀟𑁂𑀢𑀺 𑀚𑀦𑁂 𑀅𑀜𑁆𑀜𑀢𑁆𑀭 𑀕𑀦𑁆𑀢𑀼𑀫𑀧𑁆𑀧𑀤𑀸𑀦𑀯𑀲𑁂𑀦𑀸𑀢𑀺 𑀩𑁆𑀬𑀽𑀳𑁄, 𑀊𑀳 𑀲𑀫𑁆𑀧𑀺𑀡𑁆𑀟𑀦𑁂 𑀯𑀺𑀧𑀼𑀩𑁆𑀩𑀢𑁆𑀢𑀸. 𑀦 𑀦𑀺𑀩𑁆𑀩𑀺𑀚𑁆𑀛𑀢𑁂 𑀭𑀘𑁆𑀙𑀦𑁆𑀢𑀭𑁂𑀦𑀸𑀢𑀺 𑀅𑀦𑀺𑀩𑁆𑀩𑀺𑀤𑁆𑀥𑁄, 𑀯𑀺𑀥 𑀲𑀫𑁆𑀧𑀳𑀸𑀭𑁂, 𑀅. 𑀦𑀺𑀩𑁆𑀩𑀺𑀤𑁆𑀥𑀸 𑀭𑀘𑁆𑀙𑀦𑁆𑀢𑀭𑁂𑀦 𑀭𑀘𑁆𑀙𑀸 𑀧𑀣𑁄, 𑀅𑀤𑁆𑀥𑀻𑀢𑀺 𑀘 𑀯𑀼𑀘𑁆𑀘𑀢𑀺. 𑀧𑀣 𑀕𑀫𑀦𑁂, 𑀧𑀣𑁄. 𑀅𑀤 𑀕𑀫𑀦𑁂,𑀢𑀺, 𑀅𑀤𑁆𑀥𑀺.

𑁨𑁦𑁩. 𑀘𑀢𑀼𑀓𑁆𑀓𑀁 ¶ 𑀘𑀘𑁆𑀘𑀭𑁂. 𑀘𑀢𑀼𑀦𑁆𑀦𑀁 𑀧𑀣𑀸𑀦𑀁 𑀲𑀫𑀸𑀳𑀸𑀭𑁄 𑀘𑀢𑀼𑀓𑁆𑀓𑀁, 𑀘𑀭 𑀕𑀢𑀺𑀪𑀓𑁆𑀔𑀦𑁂𑀲𑀼, 𑀘𑀭𑁄, 𑀭𑀲𑁆𑀲 𑀘𑁄, 𑀘𑀘𑁆𑀘𑀭𑀁, 𑀅𑀗𑁆𑀕𑀡𑀯𑀸𑀘𑀓𑁄 𑀘𑀸𑀬𑀁. 𑀤𑁆𑀯𑀺𑀦𑁆𑀦𑀁, 𑀘𑀢𑀼𑀦𑁆𑀦𑀁 𑀯𑀸 𑀫𑀕𑁆𑀕𑀸𑀦𑀁 𑀲𑀦𑁆𑀥𑀺 𑀫𑀕𑁆𑀕𑀲𑀦𑁆𑀥𑀺. 𑀲𑀺𑀗𑁆𑀖 𑀖𑀸𑀬𑀦𑁂, 𑀆𑀝𑀓𑁄.

𑀤𑁆𑀯𑀬𑀁 𑀯𑀧𑁆𑀧𑀲𑁆𑀲𑁄𑀧𑀭𑀺 𑀇𑀝𑁆𑀞𑀓𑀸𑀤𑀺𑀭𑀘𑀺𑀢𑁂 𑀯𑁂𑀞𑀦𑁂. 𑀯𑀧𑁆𑀧𑀁 𑀦𑀸𑀫 𑀤𑀼𑀕𑁆𑀕𑀦𑀕𑀭𑁂 𑀧𑀭𑀺𑀔𑀸𑀫𑀢𑁆𑀢𑀺𑀓𑀁 𑀓𑀽𑀝𑀁 [𑀓𑀼𑀝𑀺𑀁 (𑀓.)] 𑀓𑀢𑁆𑀯𑀸 𑀕𑁄𑀳𑀺, 𑀳𑀢𑁆𑀣𑀻𑀳𑀺 𑀘 𑀯𑀺𑀫𑀤𑁆𑀤𑀸𑀧𑁂𑀢𑁆𑀯𑀸 𑀢𑀺𑀁𑀲𑀳𑀢𑁆𑀣𑀧𑁆𑀧𑀫𑀸𑀡𑀁 𑀧𑀸𑀓𑀸𑀭𑀲𑁆𑀲 𑀳𑁂𑀝𑁆𑀞𑀺𑀫𑀢𑀮𑀁, 𑀢𑀣𑀸 𑀳𑀢𑁆𑀣𑀲𑀢𑀁 𑀢𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀧𑀁𑀲𑀼𑀦𑀸 𑀯𑀧𑁆𑀧𑀁 𑀓𑀸𑀭𑀬𑁂, 𑀢𑀲𑁆𑀲𑁄𑀧𑀭𑀺 𑀧𑀸𑀓𑀸𑀭𑀦𑁆𑀢𑀺, 𑀧𑀓𑀼𑀩𑁆𑀩𑀦𑁆𑀢𑀺 𑀢𑀦𑁆𑀢𑀺 𑀧𑀸𑀓𑀸𑀭𑁄, 𑀲𑀫𑀦𑁆𑀢𑀢𑁄 𑀓𑀭𑀻𑀬𑀢𑁂𑀢𑀺 𑀯𑀸 𑀧𑀸𑀓𑀸𑀭𑁄, 𑀅𑀓𑀢𑁆𑀢𑀭𑀺 𑀘 𑀓𑀸𑀭𑀓𑁂 𑀲𑀜𑁆𑀜𑀸𑀬𑀁 𑀡𑁄, 𑀭𑀲𑁆𑀲𑀲𑁆𑀲 𑀤𑀻𑀖𑀢𑀸. 𑀯𑀼 𑀲𑀁𑀯𑀭𑀡𑁂, 𑀯𑀼𑀡𑁄𑀢𑀻𑀢𑀺 𑀯𑀭𑀡𑁄, 𑀬𑀼, 𑀭𑀸𑀕𑀫𑁄 𑀘. ‘‘𑀲𑀸𑀮𑁄’’𑀢𑀺𑀧𑀺 𑀧𑀸𑀓𑀸𑀭𑀲𑁆𑀲 𑀦𑀸𑀫𑀁.

𑀤𑁆𑀯𑀬𑀁 𑀭𑀸𑀚𑀪𑀯𑀦𑀲𑀸𑀫𑀜𑁆𑀜𑁂. 𑀲𑀩𑁆𑀩𑀕𑁂𑀳𑀸𑀦𑀁 𑀯𑀺𑀲𑁂𑀲𑁂𑀦 𑀧𑀓𑀸𑀲𑀦𑀢𑁄 𑀉𑀤𑁆𑀤𑀸𑀧𑁄, 𑀤𑀻𑀧 𑀧𑀓𑀸𑀲𑀦𑁂, 𑀈𑀲𑁆𑀲𑀸𑀓𑀸𑀭𑁄. 𑀲𑀗𑁆𑀕𑀫𑁆𑀫 𑀓𑀭𑁄𑀦𑁆𑀢𑀺 𑀢𑀦𑁆𑀢𑀺 𑀉𑀧𑀓𑀸𑀭𑀺𑀓𑀸, 𑀡𑁆𑀯𑀼. 𑀓𑁂 𑀧𑀘𑁆𑀘𑀬𑁂 𑀣𑀻𑀓𑀢𑀸𑀓𑀸𑀭𑀧𑀭𑁂 𑀧𑀼𑀩𑁆𑀩𑁄 𑀅𑀓𑀸𑀭𑁄 𑀤𑀻𑀖𑀁 [𑀓𑀸𑀢𑀦𑁆𑀢 𑁨.𑁨.𑁬𑁫], 𑀅𑀓𑀸𑀤𑁂𑀲𑁄𑀧𑀺 𑀳𑀺 ‘‘𑀓𑁄’’𑀢𑀺 𑀯𑀼𑀘𑁆𑀘𑀢𑀺, 𑀬𑀣𑀸 𑀤𑁂𑀯𑀤𑀢𑁆𑀢𑁄 ‘‘𑀤𑀢𑁆𑀢𑁄’’𑀢𑀺. 𑀓𑀧𑀘𑁆𑀘𑀬𑁄 𑀯𑀸.

𑁨𑁦𑁪. 𑀤𑁆𑀯𑀬𑀁 𑀕𑁂𑀳𑀸𑀤𑀺𑀦𑁄 𑀫𑀢𑁆𑀢𑀺𑀓𑁂𑀝𑁆𑀞𑀓𑀸𑀤𑀺𑀫𑀬𑀪𑀺𑀢𑁆𑀢𑀺𑀬𑀁. 𑀓𑀼𑀝 𑀙𑁂𑀤𑀦𑁂, 𑀓𑀼𑀝𑀢𑀺 𑀙𑀺𑀦𑁆𑀤𑀢𑀺 𑀫𑀕𑁆𑀕𑀦𑁆𑀢𑀺 𑀓𑀼𑀝𑁆𑀝𑀁. 𑀪𑀺𑀤𑀺 𑀤𑁆𑀯𑀺𑀥𑀸𑀓𑀭𑀡𑁂,𑀢𑀺, ¶ 𑀪𑀺𑀢𑁆𑀢𑀺. 𑀕𑀼𑀦𑁆𑀦𑀁 𑀯𑀸𑀘𑀸𑀦𑀁 𑀧𑀼𑀭𑀁 𑀕𑁄𑀧𑀼𑀭𑀁. 𑀤𑁆𑀯𑀸𑀭𑀲𑀫𑀻𑀧𑁂 𑀓𑀢𑁄 𑀓𑁄𑀝𑁆𑀞𑀓𑁄 𑀤𑁆𑀯𑀸𑀭𑀓𑁄𑀝𑁆𑀞𑀓𑁄, 𑀓𑀼𑀲 𑀅𑀓𑁆𑀓𑁄𑀲𑁂, 𑀞𑀓𑁄, 𑀓𑁄𑀝𑁆𑀞𑀓𑁄𑀢𑀺 𑀕𑁂𑀳𑀯𑀺𑀲𑁂𑀲𑁄.

𑀤𑁆𑀯𑀬𑀁 𑀇𑀦𑁆𑀤𑀔𑀻𑀮𑁂. 𑀇𑀲 𑀇𑀘𑁆𑀙𑀸𑀬𑀁, 𑀏𑀲 𑀕𑀯𑁂𑀲𑀦𑁂 𑀯𑀸, 𑀇𑀓𑁄. 𑀇𑀦𑁆𑀤𑀲𑁆𑀲 𑀲𑀓𑁆𑀓𑀲𑁆𑀲 𑀔𑀻𑀮𑁄 𑀓𑀡𑁆𑀝𑀓𑁄 𑀇𑀦𑁆𑀤𑀔𑀻𑀮𑁄. 𑀤𑁆𑀯𑀬𑀁 𑀤𑁆𑀯𑀸𑀭𑀧𑀲𑁆𑀲𑁄𑀧𑀲𑀸𑀮𑀸𑀬𑀁’𑀳𑀫𑁆𑀬𑀸𑀤𑀺𑀧𑀺𑀝𑁆𑀞𑁂 𑀘 𑀯𑀸𑀢𑀓𑀼𑀝𑀺𑀓𑀸𑀬𑀁. 𑀅𑀟𑁆𑀟 𑀅𑀢𑀺𑀓𑁆𑀓𑀫𑀳𑀺𑀁𑀲𑀸𑀲𑀼, 𑀅. 𑀆𑀮𑀓𑀧𑀘𑁆𑀘𑀬𑁂 𑀅𑀝𑁆𑀝𑀸𑀮𑀓𑁄.

𑁨𑁦𑁫. 𑀉𑀧𑀭𑀺 𑀫𑀸𑀮𑀸𑀤𑀺𑀬𑀼𑀢𑁆𑀢𑀁 𑀲𑁄𑀪𑀦𑀣𑀫𑁆𑀪𑀤𑁆𑀯𑀬𑀫𑀼𑀪𑀬𑀢𑁄 𑀦𑀺𑀔𑀦𑀺𑀢𑁆𑀯𑀸 𑀬𑀁 𑀩𑀳𑀺𑀤𑁆𑀯𑀸𑀭𑀁 𑀓𑀧𑁆𑀧𑀻𑀬𑀢𑁂, 𑀢𑀁 𑀢𑁄𑀭𑀡𑀁. 𑀢𑀼𑀭 𑀯𑀸𑀭𑀡𑁂, 𑀬𑀼, 𑀣𑀯𑀦𑁆𑀢𑀸 𑀯𑀸 𑀭𑀡𑀦𑁆𑀢𑁆𑀬𑀢𑁆𑀭𑀸𑀢𑀺 𑀢𑁄𑀭𑀡𑀁, 𑀢𑀼 𑀅𑀪𑀺𑀢𑁆𑀣𑀯𑁂. 𑀭𑀡 𑀲𑀤𑁆𑀤𑀢𑁆𑀣𑁄, 𑀯𑀡𑁆𑀡𑀯𑀺𑀓𑀸𑀭𑁄. 𑀤𑁆𑀯𑀸𑀭𑀲𑁆𑀲 𑀩𑀳𑀺 𑀩𑀳𑀺𑀤𑁆𑀯𑀸𑀭𑀁. 𑀧𑀭𑀺 𑀲𑀫𑀦𑁆𑀢𑀢𑁄 𑀔𑀜𑁆𑀜𑀢𑁂𑀢𑀺 𑀧𑀭𑀺𑀔𑀸. 𑀤𑀻𑀖𑀪𑀸𑀯𑁂𑀦 𑀬𑀼𑀢𑁆𑀢𑀸 𑀤𑀻𑀖𑀺𑀓𑀸.

𑁨𑁦𑁬-𑁨𑁦𑁭. 𑀲𑀤𑀼𑀫𑀦𑁆𑀢𑀁 𑀕𑁂𑀳𑁂. 𑀫𑀦𑁆𑀤 𑀫𑁄𑀤𑀦𑀣𑀼𑀢𑀺𑀚𑀴𑀢𑁆𑀢𑁂𑀲𑀼, 𑀫𑀦𑁆𑀤𑀦𑁆𑀢𑁂 𑀬𑀢𑁆𑀣𑀸𑀢𑀺 𑀫𑀦𑁆𑀤𑀺𑀭𑀁, 𑀇𑀭𑁄. 𑀲𑀻𑀤𑀦𑁆𑀢𑀺 𑀢𑀢𑁆𑀣𑀸𑀢𑀺 𑀲𑀤𑀦𑀁, 𑀬𑀼. 𑀲𑀤 ¶ 𑀯𑀺𑀲𑀭𑀡𑀕𑀢𑁆𑀬𑀸𑀯𑀲𑀸𑀦𑁂𑀲𑀼. 𑀦 𑀕𑀘𑁆𑀙𑀦𑁆𑀢𑀻𑀢𑀺 𑀅𑀕𑀸, 𑀣𑀫𑁆𑀪𑀸𑀤𑀬𑁄, 𑀢𑁂 𑀭𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀅𑀕𑀸𑀭𑀁. 𑀭𑀲𑁆𑀲𑀲𑁆𑀲 𑀤𑀻𑀖𑀢𑁆𑀢𑁂 𑀆𑀕𑀸𑀭𑀁. 𑀘𑀺 𑀘𑀬𑁂, 𑀦𑀺𑀘𑀻𑀬𑀢𑁂 𑀙𑀸𑀤𑀻𑀬𑀢𑁂𑀢𑀺 𑀦𑀺𑀓𑀸𑀬𑁄, 𑀬𑀫𑁆𑀳𑀺 𑀘𑀺𑀲𑁆𑀲 𑀓𑀸𑀤𑁂𑀲𑁄 𑀦𑀺𑀧𑀸𑀢𑀦𑀸. 𑀮𑀻 𑀲𑀺𑀮𑁂𑀲𑀦𑁂, 𑀡𑁄, 𑀦𑀺𑀮𑀬𑁄, 𑀆𑀮𑀬𑁄 𑀘. 𑀯𑀲 𑀦𑀺𑀯𑀸𑀲𑁂, 𑀆𑀯𑀲𑀦𑁆𑀢𑁆𑀬𑀢𑁆𑀭𑀸𑀢𑀺 𑀆𑀯𑀸𑀲𑁄, 𑀡𑁄. 𑀪𑀽 𑀲𑀢𑁆𑀢𑀸𑀬𑀁, 𑀪𑀯𑀦𑁆𑀢𑁆𑀬𑀢𑁆𑀭𑀸𑀢𑀺 𑀪𑀯𑀦𑀁. 𑀯𑀺𑀲𑀦𑁆𑀢𑀺 𑀢𑀦𑁆𑀢𑀺 𑀯𑁂𑀲𑁆𑀫𑀁, 𑀫𑁄. 𑀓𑀺𑀢 𑀦𑀺𑀯𑀸𑀲𑁂, 𑀅𑀥𑀺𑀓𑀭𑀡𑁂 𑀬𑀼, 𑀦𑀺𑀓𑁂𑀢𑀦𑀁. 𑀦𑀺𑀯𑀺𑀲𑀦𑁆𑀢𑀺, 𑀦𑀺𑀯𑀲𑀦𑁆𑀢𑀺 𑀯𑀸 𑀬𑀢𑁆𑀭, 𑀢𑀁 𑀦𑀺𑀯𑁂𑀲𑀦𑀁. 𑀖𑀭 𑀲𑁂𑀘𑀦𑁂, 𑀖𑀭𑀢𑀺 𑀓𑀺𑀮𑁂𑀲𑀫𑁂𑀢𑁆𑀣𑀸𑀢𑀺 𑀖𑀭𑀁, 𑀕𑀬𑁆𑀳𑀢𑀻𑀢𑀺 𑀯𑀸 𑀖𑀭𑀁, 𑀡𑁄. 𑀕𑀳𑀲𑁆𑀲 𑀖𑀭𑀸𑀤𑁂𑀲𑁄. 𑀕𑀡𑁆𑀳𑀸𑀢𑀺 𑀧𑀼𑀭𑀺𑀲𑁂𑀦 𑀆𑀦𑀻𑀢𑀁 𑀥𑀦𑀦𑁆𑀢𑀺 𑀕𑀳𑀁. 𑀅𑀥𑀺𑀓𑀭𑀡𑁂 𑀣𑁄, 𑀆𑀯𑀲𑀣𑁄. 𑀲𑀭 𑀕𑀢𑀺𑀘𑀺𑀦𑁆𑀢𑀸𑀳𑀺𑀁𑀲𑀸𑀲𑀼, 𑀲𑀭𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑀺 𑀏𑀢𑁆𑀣 𑀲𑀼𑀪𑀸𑀲𑀼𑀪𑀓𑀫𑁆𑀫𑀸𑀦𑀺, 𑀲𑀭𑀢𑀺 𑀯𑀸 𑀲𑀽𑀭𑀺𑀬𑀲𑀦𑁆𑀢𑀸𑀧𑀸𑀤𑀺𑀓𑀦𑁆𑀢𑀺 𑀲𑀭𑀡𑀁. 𑀲𑀺 𑀲𑁂𑀯𑀸𑀬𑀁, 𑀡𑁄, 𑀧𑀢𑀺𑀲𑁆𑀲𑀬𑁄. 𑀉𑀘 𑀲𑀫𑀯𑀸𑀬𑁂, 𑀑𑀓𑀁. 𑀲𑀮 𑀕𑀫𑀦𑁂, ‘‘𑀇𑀢𑁆𑀣𑀺𑀬𑀫𑀢𑀺𑀬𑀯𑁄 𑀯𑀸’’𑀢𑀺 𑀅, 𑀲𑀸𑀮𑀸, 𑀲𑀭𑀥𑀸𑀢𑀼𑀫𑁆𑀳𑀺 𑀲𑀢𑀺 𑀮𑀢𑁆𑀢𑀫𑁂𑀯 𑀯𑀺𑀲𑁂𑀲𑁄. 𑀘𑀺 𑀘𑀬𑁂, 𑀓𑀫𑁆𑀫𑀦𑀺 𑀡𑁄, 𑀘𑀬𑁄. 𑀓𑀼𑀝 𑀙𑁂𑀤𑀦𑁂, 𑀇. 𑀯𑀲 𑀦𑀺𑀯𑀸𑀲𑁂,𑀢𑀺. 𑀉𑀧𑀥𑀲𑁆𑀲 𑀏𑀢𑁆𑀢𑁂 𑀕𑁂𑀳𑀁. 𑀲𑀤𑀥𑀸𑀢𑀼𑀫𑁆𑀳𑀸 𑀉𑀫𑁄, 𑀲𑀤𑀼𑀫𑀁.

𑀤𑁆𑀯𑀬𑀁 𑀫𑀼𑀔𑀭𑀳𑀺𑀢𑀤𑁂𑀯𑀓𑀼𑀮𑀲𑀤𑀺𑀲𑁂 𑀬𑀜𑁆𑀜𑀸𑀬𑀢𑀦𑁂. 𑀘𑀺𑀢 𑀧𑀽𑀚𑀸𑀬𑀁, 𑀓𑀫𑁆𑀫𑀦𑀺 𑀇𑀬𑁄. 𑀬𑀢 𑀬𑀢𑀦𑁂, 𑀆𑀬𑀢𑀦𑁆𑀢𑀺 𑀯𑀸𑀬𑀫𑀦𑁆𑀢𑀺 𑀏𑀢𑁆𑀣 𑀨𑀮𑀓𑀸𑀫𑀸𑀢𑀺 𑀆𑀬𑀢𑀦𑀁, 𑀅𑀣 𑀯𑀸 𑀆𑀬𑀦𑁆𑀢𑀻𑀢𑀺 𑀆𑀬𑀸𑀦𑀺, 𑀢𑀸𑀦𑀺 𑀢𑀦𑁄𑀢𑀻𑀢𑀺 𑀆𑀬𑀢𑀦𑀁, 𑀨𑀮𑀓𑀸𑀭𑀓𑀦𑁆𑀢𑁆𑀬𑀢𑁆𑀣𑁄. 𑀏𑀢𑁆𑀣 𑀢𑀼𑀲𑀤𑁆𑀤𑁄 𑀲𑀫𑀸𑀕𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀧𑀼𑀩𑁆𑀩𑀸𑀧𑀭𑀕𑀫𑀦𑀢𑁆𑀣𑁄. ‘‘𑀘𑁂𑀢𑀺𑀬𑀸𑀬𑀢𑀦𑀸𑀦𑀺 𑀘𑀸’’𑀢𑀺𑀧𑀺 𑀧𑀸𑀞𑁄.

𑁨𑁦𑁮. 𑀤𑁆𑀯𑀬𑀁 𑀤𑁂𑀯𑀸𑀦𑀁, 𑀦𑀭𑀧𑀢𑀻𑀦𑀜𑁆𑀘 𑀇𑀝𑁆𑀞𑀓𑀸𑀤𑀺𑀫𑀬𑁂 𑀪𑀯𑀦𑁂. 𑀅𑀜𑁆𑀜𑀲𑁆𑀲𑀸𑀧𑀺 𑀲𑀸𑀤𑀺𑀲𑁆𑀬𑀸. 𑀧𑀲𑀻𑀤𑀦𑁆𑀢𑀺 𑀦𑀬𑀦𑀫𑀦𑀸𑀦𑁆𑀬𑀢𑁆𑀭𑀸𑀢𑀺 𑀧𑀸𑀲𑀸𑀤𑁄. 𑀬𑀼 ¶ 𑀫𑀺𑀲𑁆𑀲𑀦𑁂, 𑀧𑁄, 𑀤𑀻𑀖𑁄 𑀘, 𑀤𑀻𑀖𑀯𑀺𑀥𑀸𑀦𑀲𑀸𑀫𑀢𑁆𑀣𑀺𑀬𑀸 𑀑𑀢𑁆𑀢𑀸𑀪𑀸𑀯𑁄.

𑀤𑁆𑀯𑀬𑀁 𑀭𑀸𑀚𑀢𑁄 𑀅𑀜𑁆𑀜𑁂𑀲𑀁 𑀥𑀦𑀻𑀦𑀁 𑀩𑁆𑀬𑀯𑀳𑀸𑀭𑀓𑀸𑀤𑀻𑀦𑀁 𑀪𑀯𑀦𑁂. 𑀫𑀼𑀡𑁆𑀟𑁄 𑀙𑀤𑀦𑀫𑁂𑀢𑀲𑁆𑀲, 𑀦 𑀧𑀸𑀲𑀸𑀤𑀲𑁆𑀲 𑀯𑀺𑀬𑀸𑀢𑀺 𑀫𑀼𑀡𑁆𑀟𑀘𑁆𑀙𑀤𑁄, 𑀤𑁆𑀯𑀺𑀢𑁆𑀢𑀁. 𑀳𑀭 𑀳𑀭𑀡𑁂, 𑀬𑁄, 𑀬𑀫𑁆𑀳𑀺 𑀫𑀺𑀆𑀕𑀫𑁄 𑀘.

𑀤𑀼𑀕𑁆𑀕𑀧𑀼𑀭𑀤𑁆𑀯𑀸𑀭𑁂 𑀯𑀸, 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀸 𑀫𑀢𑁆𑀢𑀺𑀓𑀸𑀤𑀺𑀫𑀬𑁂 𑀕𑀚𑀓𑀼𑀫𑁆𑀪𑀫𑁆𑀳𑀺 𑀬𑁄 𑀬𑀽𑀧𑁄 𑀧𑀸𑀲𑀸𑀤𑁄 𑀧𑀢𑀺𑀝𑁆𑀞𑀺𑀢𑁄, 𑀲𑁄 𑀳𑀢𑁆𑀣𑀺𑀦𑀔𑁄 𑀦𑀸𑀫, 𑀳𑀢𑁆𑀣𑀺𑀲𑁆𑀲𑁂𑀯 𑀦𑀔𑁄 𑀬𑀲𑁆𑀲𑀸𑀢𑀺 𑀳𑀢𑁆𑀣𑀺𑀦𑀔𑁄, 𑀦𑀔𑀲𑀤𑁆𑀤𑁂𑀦 𑀯𑀸 𑀦𑀔𑀲𑀳𑀺𑀢𑁄 𑀧𑀸𑀲𑀸𑀤𑁄 𑀕𑀬𑁆𑀳𑀢𑁂.

𑁨𑁦𑁯. 𑀲𑀼𑀧𑀡𑁆𑀡𑀲𑁆𑀲 𑀕𑀭𑀼𑀴𑀲𑁆𑀲 𑀯𑀗𑁆𑀓𑁂𑀦 𑀧𑀓𑁆𑀔𑁂𑀦 𑀲𑀤𑀺𑀲𑀙𑀤𑀦𑀁 𑀕𑁂𑀳𑀁 𑀲𑀼𑀯𑀡𑁆𑀡𑀯𑀗𑁆𑀓𑀘𑁆𑀙𑀤𑀦𑀁. 𑀯𑀗𑁆𑀓 𑀕𑀫𑀦𑁂. 𑀏𑀓𑀧𑀲𑁆𑀲𑁂𑀬𑁂𑀯 𑀙𑀤𑀦𑀢𑁄 𑀅𑀟𑁆𑀠𑀬𑁄𑀕𑁄.

𑀏𑀓𑁂𑀦𑁂𑀯 𑀓𑀽𑀝𑁂𑀦 𑀬𑀼𑀢𑁆𑀢𑁄 𑀅𑀦𑁂𑀓𑀓𑁄𑀡𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄 𑀫𑀸𑀴𑁄 𑀦𑀸𑀫, 𑀯𑀝𑁆𑀝𑀸𑀓𑀸𑀭𑁂𑀦 𑀓𑀢𑀲𑁂𑀦𑀸𑀲𑀦𑀦𑁆𑀢𑀺 𑀓𑁂𑀘𑀺. 𑀫𑀸 𑀫𑀸𑀦𑁂, 𑀴𑁄, 𑀫𑀸𑀴𑁄.

𑀘𑀢𑀼𑀭𑀲𑁆𑀲𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄 𑀧𑀸𑀲𑀸𑀤𑁄 𑀦𑀸𑀫, 𑀆𑀬𑀢𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑁄𑀢𑀺 𑀓𑁂𑀘𑀺.

𑁨𑁧𑁦. 𑀲𑀦𑁆𑀢𑁂𑀳𑀺 𑀪𑀸𑀢𑀺 𑀤𑀺𑀩𑁆𑀩𑀢𑀻𑀢𑀺 𑀲𑀪𑀸𑀬𑀁, 𑀲𑀪𑀸 𑀘, 𑀧𑀼𑀭𑀺𑀫𑁂 𑀬𑀧𑀘𑁆𑀘𑀬𑁄, 𑀲𑀦𑁆𑀢𑀲𑁆𑀲 𑀲𑀸𑀤𑁂𑀲𑁄 𑀢𑀽𑀪𑀬𑀢𑁆𑀭. 𑀫𑀡𑁆𑀟𑀸 𑀭𑀯𑀺𑀭𑀁𑀲𑀬𑁄, 𑀢𑁂 𑀧𑀺𑀯𑀢𑀺 𑀦𑀸𑀲𑀬𑀢𑀻𑀢𑀺 𑀫𑀡𑁆𑀟𑀧𑁄, 𑀯𑀸𑀲𑀤𑁆𑀤𑁂𑀦 𑀫𑀡𑁆𑀟𑀧𑀧𑀤𑀲𑁆𑀲 ¶ 𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀁 𑀲𑀫𑀼𑀘𑁆𑀘𑀺𑀦𑁄𑀢𑀺, 𑀚𑀦𑀸𑀦𑀁 𑀆𑀮𑀬𑁄 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀁 𑀚𑀦𑀸𑀮𑀬𑁄. 𑀆𑀲𑀦𑀢𑁆𑀣𑀸𑀬 𑀓𑀢𑀸 𑀲𑀸𑀮𑀸 𑀆𑀲𑀦𑀲𑀸𑀮𑀸. 𑀧𑀝𑀺𑀓𑁆𑀓𑀫𑀦𑁆𑀢𑀺 𑀏𑀢𑁆𑀣𑀸𑀢𑀺 𑀧𑀝𑀺𑀓𑁆𑀓𑀫𑀦𑀁, 𑀓𑀫𑀼 𑀧𑀤𑀯𑀺𑀓𑁆𑀔𑁂𑀧𑁂, 𑀅𑀥𑀺𑀓𑀭𑀡𑁂 𑀬𑀼.

𑁨𑁧𑁧. 𑀚𑀺𑀦𑀲𑁆𑀲 𑀯𑀸𑀲𑀪𑀽𑀢𑀁 𑀪𑀯𑀦𑀁 𑀕𑀦𑁆𑀥𑀓𑀼𑀝𑀺 𑀦𑀸𑀫, 𑀤𑀺𑀩𑁆𑀩𑀕𑀦𑁆𑀥𑁂𑀳𑀺 𑀧𑀭𑀺𑀪𑀸𑀯𑀺𑀢𑀸 𑀓𑀼𑀝𑀺 𑀕𑀦𑁆𑀥𑀓𑀼𑀝𑀺.

𑀢𑀺𑀓𑀁 𑀧𑀸𑀓𑀝𑁆𑀞𑀸𑀦𑁂. 𑀭𑀲𑀸𑀦𑀺 𑀲𑀦𑁆𑀢𑁆𑀬𑀲𑁆𑀲𑀁 𑀭𑀲𑀯𑀢𑀻, 𑀧𑀘𑀦𑀁 𑀧𑀸𑀓𑁄, 𑀢𑀲𑁆𑀲 𑀞𑀸𑀦𑀁 𑀧𑀸𑀓𑀝𑁆𑀞𑀸𑀦𑀁. 𑀫𑀳𑀦𑁆𑀢𑀸𑀦𑀺 𑀩𑀳𑀽𑀦𑀺 𑀅𑀲𑀺𑀢𑀩𑁆𑀩𑀸𑀦𑀺 𑀲𑀦𑁆𑀢𑁂𑀢𑁆𑀣 𑀫𑀳𑀸𑀦𑀲𑀁, 𑀅𑀲 𑀪𑀓𑁆𑀔𑀦𑁂, 𑀬𑀼, 𑀯𑀡𑁆𑀡𑀯𑀺𑀧𑀭𑀺𑀬𑀬𑁄.

𑁨𑁧𑁨. 𑀲𑀼𑀯𑀡𑁆𑀡𑀓𑀸𑀭𑀸𑀤𑀺𑀲𑀺𑀧𑁆𑀧𑀻𑀦𑀁 𑀓𑀫𑁆𑀫𑀲𑀸𑀮𑀸 𑀆𑀯𑁂𑀲𑀦𑀁. 𑀆𑀯𑀺𑀲𑀦𑁆𑀢𑁆𑀬𑀲𑁆𑀫𑀺𑀁 𑀆𑀯𑁂𑀲𑀦𑀁, 𑀬𑀼. 𑀧𑀸𑀦𑀫𑀦𑁆𑀤𑀺𑀭𑀁 𑀲𑀼𑀭𑀸𑀧𑀸𑀦𑀢𑁆𑀣𑀁 𑀓𑀢𑀫𑀦𑁆𑀤𑀺𑀭𑀁 𑀲𑁄𑀡𑁆𑀟𑀸 𑀦𑀸𑀫, 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑀁 𑀯𑀺𑀘𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀯𑀢𑁆𑀣𑀼𑀓𑀸𑀭𑀡𑀸 𑀲𑀩𑁆𑀩𑀁 𑀤𑁂𑀬𑁆𑀬𑀥𑀫𑁆𑀫𑀁 𑀲𑀦𑁄𑀦𑁆𑀢𑀻𑀢𑀺 𑀲𑁄𑀡𑁆𑀟𑀸, 𑀲𑀦 𑀤𑀸𑀦𑁂, 𑀢𑀦𑀸𑀤𑀺. 𑀟𑁄, 𑀅𑀲𑁆𑀲𑁄𑀢𑁆𑀢𑀁, 𑀯𑀡𑁆𑀡𑀯𑀺𑀓𑀸𑀭𑁄 𑀘, 𑀢𑁂𑀲𑀁 𑀏𑀲𑀸 𑀯𑀲𑀢𑀺 𑀲𑁄𑀡𑁆𑀟𑀸. 𑀧𑀸𑀦𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀸 𑀲𑀼𑀭𑀸𑀲𑁄𑀡𑁆𑀟𑀸𑀬𑁂𑀯𑀺𑀥 𑀕𑀳𑀺𑀢𑀸. 𑀯𑀘𑁆𑀘𑀲𑁆𑀲 𑀕𑀽𑀣𑀲𑁆𑀲 𑀯𑀺𑀲𑀚𑁆𑀚𑀦𑀝𑁆𑀞𑀸𑀦𑀁 𑀯𑀘𑁆𑀘𑀝𑁆𑀞𑀸𑀦𑀁. 𑀯𑀘𑁆𑀘𑀲𑁆𑀲 𑀯𑀺𑀲𑀚𑁆𑀚𑀦𑀝𑁆𑀞𑀸𑀦𑀸 𑀓𑀼𑀝𑀺 𑀯𑀘𑁆𑀘𑀓𑀼𑀝𑀺. 𑀫𑀼𑀦𑀻𑀦𑀁 𑀇𑀲𑀻𑀦𑀁 𑀯𑀲𑀦𑀝𑁆𑀞𑀸𑀦𑀁 𑀅𑀲𑁆𑀲𑀫𑁄 𑀦𑀸𑀫, 𑀆 𑀓𑁄𑀥𑀁 𑀲𑀫𑁂𑀦𑁆𑀢𑀺 𑀏𑀢𑁆𑀣𑀸𑀢𑀺 𑀅𑀲𑁆𑀲𑀫𑁄, 𑀆 𑀪𑀼𑀲𑁄 𑀲𑀫𑁂𑀦𑁆𑀢𑀺 𑀏𑀢𑁆𑀣 𑀭𑀸𑀕𑀸𑀤𑀬𑁄𑀢𑀺 𑀯𑀸 𑀅𑀲𑁆𑀲𑀫𑁄.

𑁨𑁧𑁩. 𑀢𑀺𑀓𑀁 ¶ 𑀧𑀡𑁆𑀬𑀯𑀺𑀓𑁆𑀓𑀬𑀲𑀸𑀮𑀸𑀬𑀁. 𑀧𑀡 𑀩𑁆𑀬𑀯𑀳𑀸𑀭𑁂, 𑀧𑀡𑀺𑀢𑀩𑁆𑀩𑀸𑀢𑀺 𑀧𑀡𑁆𑀬𑀸, 𑀯𑀢𑁆𑀣𑀸𑀤𑀬𑁄, 𑀢𑁂 𑀏𑀢𑁆𑀣 𑀯𑀺𑀓𑁆𑀓𑀺𑀡𑀦𑁆𑀢𑀻𑀢𑀺 𑀧𑀡𑁆𑀬𑀯𑀺𑀓𑁆𑀓𑀬𑁄, 𑀓𑀻 𑀤𑀩𑁆𑀩𑀯𑀺𑀦𑀺𑀫𑀬𑁂, 𑀲𑁄 𑀏𑀯 𑀲𑀸𑀮𑀸 𑀕𑁂𑀳𑀦𑁆𑀢𑀺 𑀧𑀡𑁆𑀬𑀯𑀺𑀓𑁆𑀓𑀬𑀲𑀸𑀮𑀸. 𑀆𑀧𑀡𑀬𑀦𑁆𑀢𑁂 𑀩𑁆𑀬𑀯𑀳𑀭𑀦𑁆𑀢𑁂 𑀅𑀲𑁆𑀫𑀺𑀦𑁆𑀢𑀺 𑀆𑀧𑀡𑁄, 𑀡𑁄. 𑀧𑀡𑁆𑀬𑀸𑀦𑀁 𑀯𑀺𑀓𑁆𑀓𑀬𑀸𑀬 𑀦𑀻𑀬𑀫𑀸𑀦𑀸𑀦𑀁 𑀯𑀻𑀣𑀺 𑀧𑀦𑁆𑀣𑁄 𑀧𑀡𑁆𑀬𑀯𑀻𑀣𑀺𑀓𑀸. 𑀯𑀲 𑀅𑀘𑁆𑀙𑀸𑀤𑀦𑁂, 𑀢𑁄, 𑀉𑀤𑀓𑀁 𑀯𑀲𑀺𑀢𑀁 𑀅𑀘𑁆𑀙𑀸𑀤𑀦𑀁 𑀓𑀢𑀫𑀦𑁂𑀦𑀸𑀢𑀺 𑀉𑀤𑁄𑀲𑀺𑀢𑁄, 𑀯𑀲𑁆𑀲𑁄𑀢𑁆𑀢𑀁, 𑀪𑀡𑁆𑀟𑀝𑁆𑀞𑀧𑀦𑀲𑁆𑀲 𑀲𑀸𑀮𑀸 𑀪𑀡𑁆𑀟𑀲𑀸𑀮𑀸. 𑀓𑀫𑀼 𑀧𑀤𑀯𑀺𑀓𑁆𑀔𑁂𑀧𑁂, 𑀘𑀗𑁆𑀓𑀫𑀢𑁆𑀬𑀢𑁆𑀭𑀸𑀢𑀺 𑀘𑀗𑁆𑀓𑀫𑀦𑀁, 𑀘𑀗𑁆𑀓𑀫𑁄 𑀘, 𑀤𑁆𑀯𑀺𑀢𑁆𑀢𑀸𑀤𑀺.

𑁨𑁧𑁪. 𑀚𑀮𑀦𑁆𑀢𑀺 𑀏𑀢𑁆𑀣𑀸𑀢𑀺 𑀚𑀦𑁆𑀢𑀸, 𑀚𑀮 𑀤𑀺𑀢𑁆𑀢𑀺𑀬𑀁, 𑀅𑀦𑁆𑀢𑁄, ‘‘𑀇𑀢𑁆𑀣𑀺𑀬𑀫𑀢𑀺𑀬𑀯𑁄 𑀯𑀸’’𑀢𑀺 𑀅, 𑀆, 𑀮𑀮𑁄𑀧𑁄, 𑀚𑀦𑁂𑀢𑁆𑀬𑀢𑁆𑀭 𑀅𑀕𑁆𑀕𑀺𑀦𑁆𑀢𑀺 𑀯𑀸 𑀚𑀦𑁆𑀢𑀸, 𑀚𑀦 𑀚𑀦𑀦𑁂, 𑀅𑀦𑁆𑀢𑁄, 𑀲𑀸 𑀏𑀯 𑀖𑀭𑀁 𑀚𑀦𑁆𑀢𑀸𑀖𑀭𑀁. 𑀅𑀕𑁆𑀕𑀺𑀦𑁄 𑀲𑀸𑀮𑀸 𑀅𑀕𑁆𑀕𑀺𑀲𑀸𑀮𑀸. 𑀧𑀸 𑀧𑀺𑀯𑀦𑁂, 𑀧𑀧𑀺𑀯𑀦𑁆𑀢𑁆𑀬𑀲𑁆𑀲𑀦𑁆𑀢𑀺 𑀧𑀧𑀸, 𑀅. 𑀧𑀸𑀦𑀻𑀬𑀝𑁆𑀞𑀸 𑀲𑀸𑀮𑀸 𑀧𑀸𑀦𑀻𑀬𑀲𑀸𑀮𑀸, 𑀲𑀸 𑀏𑀯 𑀧𑀸𑀦𑀻𑀬𑀲𑀸𑀮𑀺𑀓𑀸.

𑀕𑀲 𑀕𑀫𑀦𑁂, 𑀪𑁄, 𑀲𑀲𑁆𑀲 𑀩𑁄. 𑀅𑀯𑀢𑀺 𑀭𑀓𑁆𑀔𑀢𑀻𑀢𑀺 𑀑𑀯𑀭𑀓𑁄, 𑀅𑀭𑁄, 𑀲𑀓𑀢𑁆𑀣𑁂 𑀓𑁄, 𑀅𑀲𑁆𑀲𑁄𑀢𑁆𑀢𑀜𑁆𑀘. 𑀯𑀲𑀦𑀁 𑀯𑀸𑀲𑁄, 𑀢𑀤𑀢𑁆𑀣𑀁 𑀅𑀕𑀸𑀭𑀁 𑀯𑀸𑀲𑀸𑀕𑀸𑀭𑀁. 𑀲𑀬𑀢𑀺 𑀏𑀢𑁆𑀣𑀸𑀢𑀺 𑀲𑀬𑀦𑀻, 𑀬𑀼, 𑀦𑀤𑀸𑀤𑀺, 𑀲𑀸 𑀏𑀯 𑀕𑀳𑀁 𑀲𑀬𑀦𑀺𑀕𑁆𑀕𑀳𑀁.

𑁨𑁧𑁫. 𑀘𑀢𑀼𑀓𑁆𑀓𑀁 ¶ 𑀭𑀸𑀚𑀺𑀢𑁆𑀣𑀸𑀕𑀸𑀭𑁂, 𑀢𑀤𑀢𑁆𑀣𑀺𑀬𑀢𑁄 [𑀢𑀤𑀝𑁆𑀞𑀺𑀬𑀢𑁄 (𑀓.)] 𑀉𑀧𑀘𑀸𑀭𑁂𑀦 𑀭𑀸𑀚𑀺𑀢𑁆𑀣𑀻𑀲𑀼𑀧𑀺. 𑀭𑀸𑀚𑀺𑀢𑁆𑀣𑀻𑀦𑀫𑀕𑀸𑀭𑀁 𑀇𑀢𑁆𑀣𑀸𑀕𑀸𑀭𑀁. 𑀅𑀯𑀭𑀼𑀦𑁆𑀥𑀻𑀬𑀦𑁆𑀢𑁂 𑀭𑀸𑀚𑀺𑀢𑁆𑀣𑀺𑀬𑁄 𑀅𑀦𑁂𑀦𑀸𑀢𑀺 𑀑𑀭𑁄𑀥𑁄, 𑀭𑀼𑀥 𑀆𑀯𑀭𑀡𑁂. 𑀲𑀼𑀤𑁆𑀥𑀸 𑀓𑀸𑀫𑀸𑀧𑀕𑀫𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀸 𑀭𑀓𑁆𑀔𑀓𑀸 𑀅𑀦𑁆𑀢𑁂 𑀲𑀫𑀻𑀧𑁂 𑀬𑀲𑁆𑀲𑀸𑀢𑀺 𑀲𑀼𑀤𑁆𑀥𑀦𑁆𑀢𑁄. 𑀅𑀦𑁆𑀢𑁂 𑀅𑀩𑁆𑀪𑀦𑁆𑀢𑀭𑁂 𑀧𑀼𑀭𑀁 𑀕𑁂𑀳𑀁 𑀅𑀦𑁆𑀢𑁂𑀧𑀼𑀭𑀁, 𑀧𑀼𑀭𑀲𑁆𑀲 𑀅𑀦𑁆𑀢𑁂𑀢𑀺 𑀯𑀸 𑀅𑀦𑁆𑀢𑁂𑀧𑀼𑀭𑀁. ‘‘𑀅𑀦𑁆𑀢𑁄𑀧𑀼𑀭’’𑀦𑁆𑀢𑀺𑀧𑀺 𑀧𑀸𑀞𑁄.

𑀭𑀜𑁆𑀜𑀁 𑀭𑀸𑀚𑀽𑀦𑀁 𑀅𑀲𑀩𑁆𑀩𑀯𑀺𑀲𑀬𑀝𑁆𑀞𑀸𑀦𑀁 𑀲𑀩𑁆𑀩𑁂𑀳𑁆𑀬𑀲𑀸𑀥𑀸𑀭𑀡𑀝𑁆𑀞𑀸𑀦𑀁 ‘‘𑀓𑀘𑁆𑀙𑀦𑁆𑀢𑀭’’𑀦𑁆𑀢𑀺 𑀫𑀢𑀁 𑀓𑀣𑀺𑀢𑀁, 𑀬𑀁 ‘‘𑀧𑀫𑀤𑀯𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀧𑀫𑀤𑀯𑀦𑀁 𑀦𑀸𑀫 𑀉𑀧𑀓𑀸𑀭𑀺𑀓𑀸𑀲𑀦𑁆𑀦𑀺𑀳𑀺𑀢𑀁 𑀯𑀸 𑀧𑀼𑀭𑀲𑀦𑁆𑀦𑀺𑀳𑀺𑀢𑀁 𑀯𑀸 𑀅𑀦𑁆𑀢𑁂𑀧𑀼𑀭𑁄𑀘𑀺𑀢𑀁, 𑀬𑀢𑁆𑀭 𑀅𑀦𑁆𑀢𑁂𑀧𑀼𑀭𑀲𑀳𑀺𑀢𑁄 𑀏𑀯 𑀭𑀸𑀚𑀸 𑀯𑀺𑀳𑀭𑀢𑀺, 𑀦𑀸𑀜𑁆𑀜𑀚𑀦𑀧𑁆𑀧𑀯𑁂𑀲𑁄 [𑀅𑀫𑀭 𑁧𑁪.𑁩]. 𑀧𑀫𑀤𑀸𑀦𑀁 𑀯𑀦𑀁 𑀧𑀫𑀤𑀯𑀦𑀁. 𑀦𑀺𑀧𑀸𑀢𑀦𑀸 𑀬𑀸𑀓𑀸𑀭𑀸𑀦𑀁 [𑀈𑀓𑀸𑀭 𑀆𑀓𑀸𑀭𑀸𑀦𑀦𑁆𑀢𑀺 𑀅𑀢𑁆𑀣𑁄] 𑀇𑀢𑁆𑀣𑀺𑀕𑀢𑀸𑀦𑀁 𑀭𑀲𑁆𑀲𑁄 𑀓𑁆𑀯𑀘𑀻𑀢𑀺𑀭𑀲𑁆𑀲𑁄. 𑀓𑀘𑁆𑀙𑀲𑁆𑀲 𑀧𑀓𑁄𑀝𑁆𑀞𑀲𑁆𑀲 𑀅𑀦𑁆𑀢𑀭𑀁 𑀅𑀩𑁆𑀪𑀦𑁆𑀢𑀭𑀁 𑀓𑀘𑁆𑀙𑀦𑁆𑀢𑀭𑀁. 𑀧𑀓𑁄𑀝𑁆𑀞𑀁 𑀦𑀸𑀫 𑀅𑀩𑁆𑀪𑀦𑁆𑀢𑀭𑀤𑁆𑀯𑀸𑀭𑀁.

𑁨𑁧𑁬. 𑀤𑁆𑀯𑀬𑀁 𑀇𑀝𑁆𑀞𑀓𑀸𑀤𑀺𑀭𑀘𑀺𑀢𑁂 𑀆𑀭𑁄𑀳𑀦𑁂. 𑀉𑀧𑀸𑀦𑁂𑀦 𑀲𑀳 𑀯𑀢𑁆𑀢𑀢𑁂𑀢𑀺 𑀲𑁄𑀧𑀸𑀦𑁄, 𑀲𑁄𑀧𑀸𑀦𑀁 𑀯𑀸 𑀦𑀧𑀼𑀁𑀲𑀓𑁂𑀧𑀺. 𑀆𑀭𑀽𑀬𑁆𑀳𑀢𑁂 𑀬𑁂𑀦 𑀢𑀁 𑀆𑀭𑁄𑀳𑀦𑀁, 𑀬𑀼, 𑀭𑀼𑀳 𑀚𑀦𑀦𑁂.

𑀤𑁆𑀯𑀬𑀁 𑀓𑀝𑁆𑀞𑀸𑀤𑀺𑀭𑀘𑀺𑀢𑀸𑀬𑀁. 𑀦𑀺𑀘𑁆𑀙𑀬𑁂𑀦 𑀲𑀬𑀦𑁆𑀢𑀺 𑀧𑀸𑀓𑀸𑀭𑀸𑀤𑀺𑀓𑀫𑁂𑀢𑀸𑀬𑀸𑀢𑀺 𑀦𑀺𑀲𑁆𑀲𑁂𑀡𑀻, 𑀲𑀺 𑀲𑁂𑀯𑀸𑀬𑀁, 𑀡𑀻, 𑀦𑀤𑀸𑀤𑀺. 𑀉𑀤𑁆𑀥𑀫𑀸𑀭𑁄𑀳𑀢𑁂 𑀏𑀢𑀸𑀬𑀸𑀢𑀺 𑀅𑀥𑀺𑀭𑁄𑀳𑀺𑀡𑀻, 𑀲𑀸𑀲𑀤𑁆𑀤𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀇𑀢𑁆𑀣𑀺𑀮𑀺𑀗𑁆𑀕𑀢𑁆𑀢𑀁 𑀚𑁄𑀢𑁂𑀢𑀺.

𑁨𑁧𑁭. 𑀧𑀜𑁆𑀘𑀓𑀁 ¶ 𑀚𑀸𑀮𑀓𑁂. 𑀯𑀸𑀢𑀁 𑀧𑀺𑀯𑀢𑀻𑀢𑀺 𑀯𑀸𑀢𑀧𑀸𑀦𑀁. 𑀕𑀯𑀁 𑀅𑀓𑁆𑀔𑀺 𑀕𑀯𑀓𑁆𑀔𑁄, 𑀲𑀫𑀸𑀲𑀦𑁆𑀢𑀢𑁆𑀢𑀸 𑀅, 𑀲𑀜𑁆𑀜𑀸𑀲𑀤𑁆𑀤𑀢𑁄 𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀁, 𑀅𑀓𑁆𑀔𑀺 𑀲𑀤𑁆𑀤𑁂 𑀯𑀸, 𑀕𑀯𑀁 𑀅𑀓𑁆𑀔𑀺 𑀕𑀯𑀓𑁆𑀔𑀻𑀢𑀺 𑀯𑀺𑀕𑁆𑀕𑀳𑁄. 𑀚𑀮 𑀤𑀺𑀢𑁆𑀢𑀺𑀬𑀁, 𑀚𑀸𑀮𑀁. 𑀲𑀻𑀳𑀭𑀽𑀧𑀬𑀼𑀢𑁆𑀢𑀁 𑀧𑀜𑁆𑀚𑀭𑀁 𑀲𑀻𑀳𑀧𑀜𑁆𑀚𑀭𑀁. 𑀆𑀮𑁄𑀓𑀸𑀦𑀁 𑀆𑀢𑀧𑀸𑀦𑀁 𑀧𑀯𑀺𑀲𑀦𑀝𑁆𑀞𑀸𑀦𑀁 𑀲𑀦𑁆𑀥𑀺 𑀙𑀺𑀤𑁆𑀤𑀦𑁆𑀢𑀺 𑀆𑀮𑁄𑀓𑀲𑀦𑁆𑀥𑀺, 𑀆𑀮𑁄𑀓𑀻𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀆𑀮𑁄𑀓𑁄, 𑀲𑁄 𑀏𑀯 𑀲𑀦𑁆𑀥𑀻𑀢𑀺 𑀯𑀸 𑀆𑀮𑁄𑀓𑀲𑀦𑁆𑀥𑀺.

𑀤𑁆𑀯𑀬𑀁 𑀮𑀗𑁆𑀕𑀺𑀬𑀁. 𑀮𑀕𑀺 𑀕𑀢𑁆𑀬𑀢𑁆𑀣𑁄, 𑀅, 𑀦𑀤𑀸𑀤𑀺. 𑀧𑀭𑀺 𑀧𑀼𑀦𑀧𑁆𑀧𑀼𑀦𑀁 𑀕𑀫𑀦𑀸𑀕𑀫𑀦𑀯𑀲𑁂𑀦 𑀳𑀦𑁆𑀢𑀻𑀢𑀺 𑀧𑀮𑀺𑀖𑁄, 𑀡𑁄. 𑀓𑀧𑀺𑀭𑀽𑀧𑀫𑀢𑁆𑀣𑀓𑀢𑁆𑀢𑀸 𑀓𑀧𑀺𑀲𑀻𑀲𑁄. 𑀅𑀕𑁆𑀕𑀴𑀁 𑀦𑀸𑀫 𑀓𑀯𑀸𑀝𑀓𑁄 [𑀓𑀯𑀸𑀝𑀨𑀮𑀯𑀺𑀥𑀸𑀭𑀡𑁄 (𑀓.)], 𑀢𑀲𑁆𑀲 𑀣𑀫𑁆𑀪𑁄 𑀅𑀕𑁆𑀕𑀴𑀢𑁆𑀣𑀫𑁆𑀪𑁄, ‘‘𑀅𑀕𑁆𑀕𑀴𑀁 𑀢𑀻𑀲𑀼 𑀓𑀮𑁆𑀮𑁄𑀮𑁂, 𑀤𑀡𑁆𑀟𑁂 𑀘𑀸𑀦𑁆𑀢𑀓𑀯𑀸𑀝𑁂𑀲𑀽’’𑀢𑀺 𑀭𑀪𑀲𑁄, 𑀇𑀢𑁆𑀣𑀺𑀬𑀫𑀢𑁄 𑀆𑀧𑀘𑁆𑀘𑀬𑁄, 𑀅𑀕𑁆𑀕𑀴𑀸. 𑀦𑀺𑀲𑁆𑀲𑁂𑀲𑀢𑁄 𑀅𑀩𑁆𑀩𑀢𑀺 𑀯𑀲𑁆𑀲𑁄𑀤𑀓𑀫𑀦𑁂𑀦𑀸𑀢𑀺 𑀦𑀺𑀩𑁆𑀩𑀁, 𑀅𑀩𑁆𑀩 𑀕𑀢𑀺𑀳𑀺𑀁𑀲𑀸𑀲𑀼. 𑀙𑀤𑁆𑀤𑀲𑁆𑀲 𑀙𑀤𑀦𑀲𑁆𑀲 𑀓𑁄𑀝𑀺 𑀳𑁂𑀝𑁆𑀞𑀺𑀫𑀸𑀯𑀲𑀸𑀦𑀁 𑀙𑀤𑁆𑀤𑀓𑁄𑀝𑀺, 𑀢𑀲𑁆𑀲𑀁.

𑁨𑁧𑁮. 𑀢𑀺𑀓𑀁 𑀕𑁂𑀳𑀘𑁆𑀙𑀤𑀦𑁂. 𑀙𑀸𑀤𑁂𑀢𑀺 𑀏𑀢𑁂𑀦𑀸𑀢𑀺 𑀙𑀤𑀦𑀁, 𑀙𑀤 𑀲𑀁𑀯𑀭𑀡𑁂, 𑀘𑀼𑀭𑀸𑀤𑀺. 𑀧𑀝𑀕𑀫𑀦𑁂, ‘‘𑀧𑀝𑁆𑀬𑀸𑀤𑀻𑀳𑁆𑀬𑀮’’𑀦𑁆𑀢𑀺 𑀅𑀮𑁄. 𑀙𑀸𑀤𑁂𑀢𑀺 𑀏𑀢𑁂𑀦𑀸𑀢𑀺 𑀙𑀤𑁆𑀤𑀁, 𑀤𑁆𑀯𑀺𑀢𑁆𑀢𑀸𑀤𑀺.

𑀢𑀺𑀓𑀁 ¶ 𑀕𑁂𑀳𑀗𑁆𑀕𑀡𑁂. 𑀅𑀚 𑀕𑀢𑀺𑀫𑁆𑀳𑀺, 𑀇𑀭𑁄, 𑀅𑀚𑀺𑀭𑀁. 𑀘𑀭 𑀕𑀢𑀺𑀪𑀓𑁆𑀔𑀦𑁂𑀲𑀼, 𑀘𑀭𑁄. 𑀅𑀗𑁆𑀕 𑀕𑀫𑀦𑁂, 𑀓𑀭𑀡𑀸𑀥𑀺𑀓𑀭𑀡𑁂𑀲𑀼 𑀬𑀼, 𑀯𑀡𑁆𑀡𑀯𑀺𑀓𑀸𑀭𑁄, 𑀡𑀢𑁆𑀢𑀁.

𑀧𑀜𑁆𑀘𑀓𑀁 𑀕𑁂𑀳𑀤𑁆𑀯𑀸𑀭𑀢𑁄 𑀩𑀳𑀺𑀧𑀓𑁄𑀝𑁆𑀞𑀓𑁂, 𑀯𑀻𑀣𑀺𑀬𑀁 𑀤𑁆𑀯𑀸𑀭𑀧𑀺𑀡𑁆𑀟𑀓𑁂 𑀘. 𑀅𑀮𑀺𑀦𑁆𑀤𑁄 𑀢𑁆𑀯𑀜𑁆𑀜𑀧𑀺𑀡𑁆𑀟𑀓𑁂𑀧𑀺𑀘𑁆𑀙𑀢𑁂. 𑀧𑀞𑀫𑀁 𑀳𑀦𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀏𑀢𑁆𑀣𑀸𑀢𑀺 𑀧𑀖𑀸𑀡𑁄, 𑀧𑀖𑀡𑁄 𑀘, 𑀳𑀦𑀲𑁆𑀲 𑀖𑀡𑀸𑀤𑁂𑀲𑁄. 𑀅𑀮𑀺 𑀲𑀔𑀸 𑀇𑀦𑁆𑀤𑁄 𑀏𑀢𑁆𑀣𑀸𑀢𑀺 𑀅𑀮𑀺𑀦𑁆𑀤𑁄, ‘‘𑀕𑁂𑀳𑁂𑀓𑀤𑁂𑀲𑁂 𑀅𑀮𑀺𑀦𑁆𑀤𑁄, 𑀧𑀖𑀸𑀡𑁄 𑀧𑀖𑀡𑁄𑀪𑀯𑁂’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁨.𑁧𑁨] 𑀅𑀫𑀭𑀫𑀸𑀮𑀸𑀬𑀁. 𑀆𑀮𑀺𑀦𑁆𑀤𑁄, 𑀤𑀻𑀖𑀸𑀤𑀺. 𑀧𑀥𑀸𑀦𑀁 𑀫𑀼𑀔𑀁 𑀧𑀫𑀼𑀔𑀁, 𑀕𑁂𑀳𑀲𑁆𑀲 𑀳𑀺 𑀘𑀢𑀽𑀲𑀼 𑀫𑀼𑀔𑁂𑀲𑀼 𑀢𑀤𑁂𑀯 𑀧𑀥𑀸𑀦𑀁, 𑀬𑀢𑁆𑀣 𑀲𑀸𑀥𑀼𑀚𑀦𑀸𑀧𑀺 𑀆𑀕𑀦𑁆𑀢𑀼𑀓𑀸𑀧𑀺 𑀦𑀺𑀲𑀻𑀤𑀦𑁆𑀢𑀺. 𑀤𑁆𑀯𑀸𑀭𑀁 𑀩𑀦𑁆𑀥𑀢𑀺 𑀧𑀺𑀤𑀳𑀢𑀺 𑀏𑀢𑁆𑀣𑀸𑀢𑀺 𑀤𑁆𑀯𑀸𑀭𑀩𑀦𑁆𑀥𑀦𑀁.

𑁨𑁧𑁯. 𑀤𑁆𑀯𑀬𑀁 𑀤𑁆𑀯𑀸𑀭𑀩𑀸𑀳𑀸𑀬𑀁. 𑀧𑀻𑀞𑀸𑀦𑀺 𑀮𑁄𑀳𑀯𑀺𑀓𑀢𑀺𑀆𑀤𑀻𑀳𑀺 𑀲𑀗𑁆𑀖𑀝𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀧𑀻𑀞𑀲𑀗𑁆𑀖𑀸𑀝𑀓𑀁, 𑀧𑀻𑀞𑁂𑀳𑀺 𑀲𑀗𑁆𑀖𑀝𑀻𑀬𑀢𑀻𑀢𑀺 𑀯𑀸 𑀧𑀻𑀞𑀲𑀗𑁆𑀖𑀸𑀝𑀓𑀁, 𑀖𑀝 𑀖𑀝𑀦𑁂. 𑀤𑁆𑀯𑀺𑀪𑀸𑀕𑁂𑀦 𑀩𑀸𑀳𑀸𑀲𑀤𑀺𑀲𑀢𑁆𑀢𑀸 𑀩𑀸𑀳𑀸, 𑀤𑁆𑀯𑀸𑀭𑀲𑁆𑀲 𑀩𑀸𑀳𑀸 𑀤𑁆𑀯𑀸𑀭𑀩𑀸𑀳𑀸. ‘‘𑀓𑀧𑀸𑀝𑀁, 𑀓𑀯𑀸𑀝’’𑀦𑁆𑀢𑀺𑀧𑀺 𑀤𑁆𑀯𑀸𑀭𑀩𑀸𑀳𑀸𑀬 𑀦𑀸𑀫𑀸𑀦𑀺, 𑀓𑀁 𑀯𑀸𑀢𑀁 𑀧𑀸𑀝𑀬𑀢𑀺, 𑀯𑀸𑀝𑀬𑀢𑀺 𑀘𑁂𑀢𑀺 𑀓𑀫𑁆𑀫𑀦𑀺 𑀡𑁄, 𑀇𑀢𑁆𑀣𑀺𑀬𑀁 𑀓𑀧𑀸𑀝𑀻.

𑀤𑁆𑀯𑀬𑀁 𑀕𑁂𑀳𑀸𑀤𑀻𑀦𑀁 𑀓𑀽𑀝𑁂. 𑀓𑀼𑀝 𑀙𑁂𑀤𑀦𑁂, 𑀓𑀫𑁆𑀫𑀦𑀺 𑀡𑁄. 𑀦𑀬 𑀕𑀫𑀦𑀢𑁆𑀣𑁄, 𑀓𑁂 𑀲𑀻𑀲𑁂 𑀦𑀬𑀢𑀻𑀢𑀺 𑀓𑀡𑁆𑀡𑀻𑀓𑀸, 𑀡𑁆𑀯𑀼, 𑀇𑀢𑁆𑀢𑀁, 𑀡𑀢𑁆𑀢𑀜𑁆𑀘.

𑁨𑁨𑁦. 𑀤𑁆𑀯𑀬𑀁 ¶ 𑀤𑁆𑀯𑀸𑀭𑁂. 𑀤𑁆𑀯𑁂 𑀅𑀭𑀦𑁆𑀢𑁆𑀬𑀢𑁆𑀭𑀸𑀢𑀺 𑀤𑁆𑀯𑀸𑀭𑀁, 𑀤𑀼𑀚𑁆𑀚𑀦𑁂 𑀯𑀸𑀭𑀬𑀦𑁆𑀢𑁆𑀬𑀲𑁆𑀫𑀸 𑀭𑀓𑁆𑀔𑀓𑀸𑀢𑀺 𑀯𑀸 𑀤𑁆𑀯𑀸𑀭𑀁, 𑀉𑀮𑁄𑀧𑁄. 𑀧𑀝𑀺𑀳𑀭𑀦𑁆𑀢𑀺 𑀅𑀧𑀦𑁂𑀦𑁆𑀢𑀺 𑀏𑀢𑀲𑁆𑀫𑀸 𑀭𑀓𑁆𑀔𑀓𑀸 𑀅𑀜𑁆𑀜𑀸𑀢𑀦𑁆𑀢𑀺 𑀧𑀝𑀺𑀳𑀭𑁄, 𑀧𑀝𑀺𑀧𑀓𑁆𑀔𑁂 𑀳𑀭𑀢𑀺 𑀏𑀢𑀲𑁆𑀫𑀸𑀢𑀺 𑀯𑀸 𑀧𑀝𑀺𑀳𑀭𑁄, 𑀭𑀲𑁆𑀲𑀲𑁆𑀲 𑀤𑀻𑀖𑀢𑁆𑀢𑁂 𑀧𑀝𑀺𑀳𑀸𑀭𑁄.

𑀘𑀢𑀼𑀓𑁆𑀓𑀁 𑀉𑀫𑁆𑀫𑀸𑀭𑁂, 𑀬𑀁 ‘‘𑀤𑁆𑀯𑀸𑀭𑀧𑀺𑀡𑁆𑀟𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺. 𑀉𑀭 𑀕𑀢𑀺𑀫𑁆𑀳𑀺, 𑀫𑀸𑀭𑁄 𑀓𑀭𑀡𑁂. 𑀤𑁂𑀳𑀁 𑀦𑁂𑀢𑀺 𑀧𑀯𑁂𑀲𑁂𑀦𑀸𑀢𑀺 𑀤𑁂𑀳𑀦𑀻, ‘‘𑀤𑁂𑀳𑀮𑀻’’𑀢𑀺𑀧𑀺 𑀧𑀸𑀞𑁄, 𑀤𑁂𑀳𑀁 𑀮𑀸𑀢𑀺 𑀧𑀯𑁂𑀲𑁂𑀦𑀸𑀢𑀺 𑀤𑁂𑀳𑀮𑀻. 𑀇𑀮 𑀕𑀢𑀺𑀫𑁆𑀳𑀺, 𑀡𑁆𑀯𑀼. 𑀇𑀦𑁆𑀤𑁄 𑀏𑀯 𑀧𑀸𑀤𑀁 𑀔𑀺𑀧𑀢𑀺 𑀏𑀢𑁆𑀣𑀸𑀢𑀺 𑀇𑀦𑁆𑀤𑀔𑀻𑀮𑁄, 𑀔𑀺𑀧 𑀧𑁂𑀭𑀡𑁂. 𑀧𑀲𑁆𑀲 𑀮𑁄𑀧𑁄, 𑀅𑀣 𑀯𑀸 𑀇𑀁 𑀕𑀫𑀦𑀁 𑀤𑀤𑀸𑀢𑀻𑀢𑀺 𑀇𑀦𑁆𑀤𑁄, 𑀤𑁆𑀯𑀸𑀭𑀁, 𑀢𑀢𑁆𑀣 𑀞𑀧𑀺𑀢𑁄 𑀔𑀻𑀮𑁄 𑀓𑀡𑁆𑀝𑀓𑁄𑀢𑀺 𑀇𑀦𑁆𑀤𑀔𑀻𑀮𑁄, 𑀯𑁂𑀕𑀕𑀪𑀺𑀖𑀸𑀢𑀦𑀢𑁄 𑀳𑀺 𑀲𑁄 𑀔𑀻𑀮𑁄 𑀯𑀺𑀬 𑀳𑁄𑀢𑀺.

𑀣𑀫𑁆𑀪 𑀧𑀝𑀺𑀩𑀦𑁆𑀥𑀦𑁂, 𑀣𑀫𑁆𑀪𑁄, 𑀥𑀸𑀭𑁂𑀢𑀻𑀢𑀺 𑀯𑀸 𑀣𑀫𑁆𑀪𑁄, 𑀥𑀭 𑀥𑀭𑀡𑁂, 𑀭𑀫𑁆𑀪𑀧𑀘𑁆𑀘𑀬𑁄, 𑀯𑀡𑁆𑀡𑀯𑀺𑀓𑀸𑀭𑁄 𑀘. 𑀣𑀼 𑀅𑀪𑀺𑀢𑁆𑀣𑀯𑁂, 𑀉𑀡𑁄, 𑀬𑀼 𑀯𑀸, 𑀥𑀸𑀭𑁂𑀢𑀻𑀢𑀺 𑀯𑀸 𑀣𑀽𑀡𑁄, 𑀬𑀼, 𑀭𑀮𑁄𑀧𑁄, 𑀅𑀲𑁆𑀲𑀽.

𑀅𑀟𑁆𑀠𑁂𑀦𑁆𑀤𑀼𑀧𑀸𑀲𑀸𑀡𑁂 𑀅𑀤𑁆𑀥𑀘𑀦𑁆𑀤𑀸𑀓𑀸𑀭𑁂 𑀧𑀸𑀲𑀸𑀡𑁂 𑀧𑀝𑀺𑀓𑀸𑀲𑀤𑁆𑀤𑁄 𑀯𑀢𑁆𑀢𑀢𑀺. 𑀧𑀝 𑀕𑀢𑀺𑀬𑀁, 𑀡𑁆𑀯𑀼. 𑀇𑀢𑁆𑀣𑀺𑀓𑀢𑀸𑀓𑀸𑀭𑀧𑀭𑁂 𑀓𑁂 𑀅𑀲𑁆𑀲𑀺𑀢𑁆𑀢𑀁. 𑀕𑀚𑀺 𑀲𑀤𑁆𑀤𑁂, 𑀡𑁆𑀯𑀼, 𑀅𑀲𑁆𑀲𑀺𑀢𑁆𑀢𑀁, 𑀩𑀺𑀦𑁆𑀤𑀸𑀕𑀫𑁄 𑀘. 𑀇𑀲 𑀇𑀘𑁆𑀙𑀸𑀬𑀁, 𑀞𑀓𑁄.

𑁨𑁨𑁧. 𑀯𑀮𑀪𑀻𑀢𑀺 ¶ 𑀘𑀽𑀴𑀸, ‘‘𑀲𑀺𑀔𑀸𑀬𑀁 𑀯𑀮𑀪𑀻 𑀘𑀽𑀴𑁂’’𑀢𑀺 𑀭𑀼𑀤𑁆𑀤𑁄 [𑀭𑀲𑁆𑀲𑀦𑁆𑀢𑀸 𑀘, 𑀲𑀺𑀔𑀸𑀬𑀁 𑀯𑀴𑀪𑀺𑀬𑀁 𑀘𑀽𑀴𑁂𑀢𑀺 𑀭𑀼𑀤𑁆𑀤𑁄 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁨.𑁧𑁫)]. 𑀢𑀘𑁆𑀙𑀸𑀤𑀦𑁂 𑀤𑀸𑀭𑀼𑀫𑁆𑀳𑀺 𑀓𑀝𑁆𑀞𑁂 𑀕𑁄𑀧𑀸𑀦𑀲𑀻 𑀫𑀢𑀸. 𑀯𑀗𑁆𑀓𑁂𑀢𑀺 𑀤𑀸𑀭𑀼𑀯𑀺𑀲𑁂𑀲𑀦𑀁. 𑀕𑀁 𑀯𑀲𑁆𑀲𑁄𑀤𑀓𑀁, 𑀲𑀽𑀭𑀺𑀬𑀸𑀤𑀺𑀓𑀺𑀭𑀡𑀜𑁆𑀘 𑀧𑀺𑀯𑀦𑁆𑀢𑀺 𑀯𑀺𑀦𑀸𑀲𑀬𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑀫𑀧𑁆𑀧𑀯𑁂𑀲𑀦𑀯𑀲𑁂𑀦𑀸𑀢𑀺 𑀕𑁄𑀧𑀸𑀦𑀸, 𑀇𑀝𑁆𑀞𑀓𑀸𑀤𑀬𑁄, 𑀢𑀸𑀦𑀺 𑀲𑀺𑀦𑁄𑀦𑁆𑀢𑀺 𑀩𑀦𑁆𑀥𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑁄𑀧𑀸𑀦𑀲𑀻.

𑀲𑁄𑀥𑀸𑀤𑀺𑀕𑁂𑀳𑁂𑀲𑀼 𑀙𑁂𑀓𑀧𑀓𑁆𑀔𑀸𑀯𑀸𑀲𑀢𑁆𑀣𑀁 𑀬𑁄 𑀩𑀳𑀺 𑀓𑀭𑀺𑀬 𑀓𑀝𑁆𑀞𑁂𑀓𑀤𑁂𑀲𑁄 𑀞𑀧𑀻𑀬𑀢𑁂, 𑀲𑁄 𑀯𑀺𑀝𑀗𑁆𑀓𑁄. 𑀓𑀧𑁄𑀢𑁂 𑀧𑀸𑀮𑀬𑀢𑀻𑀢𑀺 𑀓𑀧𑁄𑀢𑀧𑀸𑀮𑀺𑀓𑀸, 𑀓𑀫𑁆𑀫𑀦𑀺 𑀡𑁆𑀯𑀼. 𑀝𑀓𑀺 𑀦𑀺𑀯𑀸𑀲𑀕𑀢𑀻𑀲𑀼. 𑀯𑀺𑀦𑁄 𑀧𑀓𑁆𑀔𑀺𑀦𑁄 𑀝𑀗𑁆𑀓𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀺𑀝𑀗𑁆𑀓𑁄. 𑀡𑁄.

𑁨𑁨𑁨. 𑀤𑁆𑀯𑀬𑀁 𑀓𑀼𑀜𑁆𑀘𑀺𑀓𑀸𑀙𑀺𑀤𑁆𑀤𑁂. 𑀓𑀼𑀜𑁆𑀘𑀺𑀓𑀸𑀬 𑀯𑀺𑀯𑀭𑀁 𑀙𑀺𑀤𑁆𑀤𑀁 𑀓𑀼𑀜𑁆𑀘𑀺𑀓𑀸𑀯𑀺𑀯𑀭𑀁. 𑀢𑀸𑀴𑀲𑁆𑀲 𑀧𑀯𑁂𑀲𑀦𑀝𑁆𑀞𑀸𑀦𑀪𑀽𑀢𑁄 𑀙𑀺𑀕𑁆𑀕𑀴𑁄 𑀙𑀺𑀤𑁆𑀤𑀁 𑀢𑀸𑀴𑀘𑁆𑀙𑀺𑀕𑁆𑀕𑀴𑁄.

𑀢𑀺𑀓𑀁 𑀓𑀼𑀜𑁆𑀘𑀺𑀓𑀸𑀬𑀁. 𑀓𑀼𑀜𑁆𑀘 𑀓𑁄𑀝𑀺𑀮𑁆𑀬𑁂, 𑀡𑁆𑀯𑀼. 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀢𑀸𑀮𑁄. 𑀅𑀮𑁄, 𑀢𑀮𑀢𑀺 𑀢𑀺𑀝𑁆𑀞𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀢𑀸𑀮𑁄, 𑀢𑀮 𑀧𑀢𑀺𑀝𑁆𑀞𑀸𑀬𑀁. 𑀅𑀯𑀸𑀧𑀼𑀭𑀢𑀺 𑀯𑀺𑀯𑀭𑀢𑀺 𑀬𑁂𑀦𑀸𑀢𑀺 𑀅𑀯𑀸𑀧𑀼𑀭𑀡𑀁, 𑀯𑀭 𑀲𑀁𑀯𑀭𑀡𑁂, 𑀬𑀼, 𑀯𑀲𑁆𑀲 𑀧𑁄, 𑀉𑀢𑁆𑀢𑀁, 𑀉𑀧𑀲𑀕𑁆𑀕𑀲𑁆𑀲 𑀤𑀻𑀖𑀢𑀸 𑀘, ‘‘𑀅𑀧𑀸𑀭𑀼𑀢𑀸 𑀢𑁂𑀲𑀁 𑀅𑀫𑀢𑀲𑁆𑀲 ¶ 𑀤𑁆𑀯𑀸𑀭𑀸’’𑀢𑀺 [𑀤𑀻. 𑀦𑀺. 𑁨.𑁭𑁧; 𑀫. 𑀦𑀺. 𑁧.𑁨𑁮𑁩] 𑀯𑀘𑀦𑀢𑁄 𑀧𑀼𑀭, 𑀧𑀸𑀭 𑀲𑀁𑀯𑀭𑀡𑁂𑀢𑀺𑀧𑀺 𑀥𑀸𑀢𑁆𑀯𑀢𑁆𑀣𑀁 𑀧𑀞𑀦𑁆𑀢𑀺. 𑀅𑀯𑀧𑀼𑀩𑁆𑀩𑁄 𑀯𑀼 𑀲𑀁𑀯𑀭𑀡𑁂𑀢𑀺𑀧𑀺 𑀥𑀸𑀢𑁆𑀯𑀢𑁆𑀣𑁂 𑀧𑀦 𑀲𑀢𑀺 𑀯𑀲𑁆𑀲 𑀭𑀢𑁆𑀢𑀁, 𑀉𑀧𑀲𑀕𑁆𑀕𑀲𑁆𑀲 𑀤𑀻𑀖𑀢𑀸 𑀘, ‘‘𑀅𑀧𑀸𑀭𑀼𑀢𑀸, 𑀲𑀗𑁆𑀖𑀸𑀝𑀺𑀁 𑀧𑀸𑀭𑀼𑀧𑀺𑀢𑁆𑀯𑀸’’𑀢𑁆𑀬𑀸𑀤𑀻𑀲𑀼 𑀧𑀦 𑀧𑀓𑀸𑀭𑀯𑀡𑁆𑀡𑀸𑀕𑀫𑁂𑀦 𑀲𑀺𑀤𑁆𑀥𑁄. 𑀯𑀺𑀤 𑀮𑀸𑀪𑁂, 𑀇𑀫𑁆𑀳𑀺 𑀯𑁂𑀤𑀺𑀓𑀸, 𑀲𑀓𑀢𑁆𑀣𑁂 𑀓𑁄. 𑀇𑀢𑀭𑀢𑁆𑀣 𑀇𑀬𑁂𑀯.

𑁨𑁨𑁩. 𑀲𑀗𑁆𑀖𑀸𑀝𑀸𑀤𑀬𑁄 𑀫𑀦𑁆𑀤𑀺𑀭𑀗𑁆𑀕𑀸 𑀕𑁂𑀳𑀗𑁆𑀕𑀯𑀺𑀲𑁂𑀲𑀸. 𑀲𑀫𑁆𑀫𑀸 𑀖𑀝𑁂𑀦𑁆𑀢𑀺 𑀏𑀢𑁆𑀣 𑀕𑁄𑀧𑀸𑀦𑀲𑁆𑀬𑀸𑀤𑀬𑁄𑀢𑀺 𑀲𑀗𑁆𑀖𑀸𑀝𑁄, 𑀧𑀼𑀩𑁆𑀩𑀧𑀘𑁆𑀙𑀺𑀫𑀤𑀓𑁆𑀔𑀺𑀡𑀼𑀢𑁆𑀢𑀭𑀸𑀬𑀸𑀫𑀯𑀲𑁂𑀦 𑀣𑀫𑁆𑀪𑀸𑀦𑀫𑀼𑀧𑀭𑀺 𑀞𑀺𑀢𑁄 𑀓𑀝𑁆𑀞𑀯𑀺𑀲𑁂𑀲𑁄, 𑀢𑁂 𑀧𑀦 𑀧𑀼𑀩𑁆𑀩𑀧𑀘𑁆𑀙𑀺𑀫𑀬𑀸𑀫𑀸 𑀢𑀬𑁄 𑀓𑀝𑁆𑀞𑀸, 𑀤𑀓𑁆𑀔𑀺𑀡𑀼𑀢𑁆𑀢𑀭𑀬𑀸𑀫𑀸 𑀧𑀦 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑀢𑁄 𑀢𑀬𑁄 𑀓𑀝𑁆𑀞𑀸, 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀧𑀦 𑀧𑀜𑁆𑀘𑀲𑀢𑁆𑀢𑀦𑀯𑀸𑀤𑀬𑁄𑀧𑀺. 𑀤𑁆𑀯𑀺𑀦𑁆𑀦𑀁 𑀧𑀓𑁆𑀔𑀸𑀦𑀁 𑀅𑀧𑀢𑀦𑀢𑁆𑀣𑀁 𑀩𑀦𑁆𑀥𑀦𑀢𑁄 𑀧𑀸𑀲𑁄 𑀯𑀺𑀬𑀸𑀢𑀺 𑀧𑀓𑁆𑀔𑀧𑀸𑀲𑁄. 𑀢𑀼𑀮𑀢𑀺 𑀲𑀗𑁆𑀖𑀸𑀝𑁂𑀲𑀼 𑀧𑀢𑀺𑀝𑁆𑀞𑀢𑀻𑀢𑀺 𑀢𑀼𑀮𑀸, 𑀢𑀮 𑀧𑀢𑀺𑀝𑁆𑀞𑀸𑀬𑀁, 𑀅𑀲𑁆𑀲𑀼𑀢𑁆𑀢𑀁, 𑀧𑀓𑁆𑀔𑀸𑀦𑀁 𑀯𑀸 𑀲𑀫𑀯𑀸𑀳𑀺𑀢𑀪𑀸𑀯𑀓𑀭𑀡𑀢𑁄 𑀢𑀼𑀮𑀬𑀢𑀺 𑀫𑀺𑀦𑀸𑀢𑀺 𑀏𑀢𑀸𑀬𑀸𑀢𑀺 𑀢𑀼𑀮𑀸, 𑀢𑀼𑀮 𑀉𑀫𑁆𑀫𑀸𑀦𑁂.

𑀢𑀺𑀓𑀁 𑀲𑀫𑁆𑀫𑀚𑁆𑀚𑀦𑀺𑀬𑀁. 𑀫𑀼𑀚𑀺 𑀲𑁄𑀥𑀦𑁂, 𑀬𑀼. 𑀫𑀚𑁆𑀚 𑀲𑀁𑀲𑀼𑀤𑁆𑀥𑀺𑀬𑀁, 𑀬𑀼. 𑀲𑀼𑀥 𑀲𑀼𑀤𑁆𑀥𑀺𑀬𑀁, 𑀲𑀩𑁆𑀩𑀢𑁆𑀭 𑀓𑀭𑀡𑁂 𑀬𑀼.

𑁨𑁨𑁪. 𑀢𑀺𑀓𑀁 𑀲𑀗𑁆𑀓𑀸𑀭𑀙𑀟𑁆𑀟𑀦𑀧𑁆𑀧𑀤𑁂𑀲𑁂. 𑀓𑀝 𑀙𑀟𑁆𑀟𑀦𑀫𑀤𑁆𑀤𑀦𑁂𑀲𑀼, 𑀲𑀗𑁆𑀓𑀝𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀗𑁆𑀓𑀝𑀻𑀭𑀁, 𑀈𑀭𑁄, ‘‘𑀲𑀗𑁆𑀓𑀝𑁄’’𑀢𑀺 𑀯𑀸 𑀲𑀗𑁆𑀓𑀸𑀭𑁄 𑀯𑀼𑀘𑁆𑀘𑀢𑀺, 𑀢𑀁 𑀈𑀭𑀬𑀦𑁆𑀢𑀺 𑀔𑀺𑀧𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀗𑁆𑀓𑀝𑀻𑀭𑀁, 𑀈𑀭 𑀔𑁂𑀧𑁂. 𑀲𑀗𑁆𑀓𑀸𑀭𑀲𑁆𑀲 𑀞𑀸𑀦𑀁 𑀲𑀗𑁆𑀓𑀸𑀭𑀝𑁆𑀞𑀸𑀦𑀁. 𑀲𑀗𑁆𑀓𑀸𑀭𑀁 𑀓𑀝𑀢𑀺 ¶ 𑀙𑀟𑁆𑀟𑁂𑀢𑀺 𑀏𑀢𑁆𑀣𑀸𑀢𑀺 𑀲𑀗𑁆𑀓𑀸𑀭𑀓𑀽𑀝𑀁, 𑀅𑀲𑁆𑀲𑀽, 𑀲𑀓𑀢𑁆𑀣𑁂 𑀓𑁄.

𑀘𑀢𑀼𑀓𑁆𑀓𑀁 𑀲𑀫𑁆𑀫𑀚𑁆𑀚𑀦𑀺𑀬𑀸 𑀦𑀺𑀭𑀸𑀓𑀢𑁂 [𑀦𑀺𑀭𑀲𑁆𑀲𑀢𑁂 (𑀓.)] 𑀣𑀼𑀲𑀸𑀤𑀺𑀫𑁆𑀳𑀺. 𑀦𑀸𑀦𑀸𑀯𑀺𑀥𑁂 𑀲𑀗𑁆𑀓𑀸𑀭𑁂 𑀭𑀸𑀲𑀻𑀓𑀭𑀡𑀯𑀲𑁂𑀦 𑀓𑀘𑀢𑀺 𑀩𑀦𑁆𑀥𑀢𑀺 𑀏𑀢𑁂𑀦𑀸𑀢𑀺 𑀓𑀘𑁄, 𑀲𑁄 𑀏𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀓𑀘𑀯𑀭𑁄, 𑀯𑀭 𑀇𑀘𑁆𑀙𑀸𑀬𑀁. 𑀉𑀘𑁆𑀙𑀺𑀝𑁆𑀞𑁄 𑀓𑀮𑀸𑀧𑁄 𑀲𑀫𑀽𑀳𑁄 𑀉𑀓𑁆𑀮𑀸𑀧𑁄, 𑀓𑀲𑁆𑀲𑀸𑀓𑀸𑀭𑀮𑁄𑀧𑁄. 𑀦𑀸𑀦𑀸𑀯𑀺𑀥𑁂𑀳𑀺 𑀢𑀺𑀡𑀸𑀤𑀻𑀳𑀺 𑀲𑀗𑁆𑀓𑀭𑀻𑀬𑀢𑁂 𑀫𑀺𑀲𑁆𑀲𑀻𑀓𑀭𑀻𑀬𑀢𑁂𑀢𑀺 𑀲𑀗𑁆𑀓𑀸𑀭𑁄, 𑀡𑁄. 𑀅𑀯𑀓𑀭𑁄𑀢𑀺𑀧𑁆𑀬𑀢𑁆𑀭. 𑀅𑀯𑀓𑀭𑀻𑀬𑀢𑁂 𑀦𑀺𑀭𑀲𑁆𑀲𑀢𑁂𑀢𑀺, 𑀅. ‘‘𑀲𑀫𑁆𑀫𑀚𑁆𑀚𑁄 𑀫𑀚𑁆𑀚𑀦𑀻 𑀘𑁂𑀯, 𑀲𑀗𑁆𑀓𑀸𑀭𑁄’𑀯𑀓𑀭𑁄 𑀫𑀢𑁄’’𑀢𑀺 𑀳𑀮𑀸𑀬𑀼𑀥𑁄. 𑀓𑀲 𑀯𑀺𑀮𑁂𑀔𑀦𑁂, 𑀅𑀫𑁆𑀩𑀼.

𑁨𑁨𑁫. 𑀖𑀭𑀸𑀤𑀺𑀪𑀽𑀫𑀺 𑀖𑀭𑀔𑁂𑀢𑁆𑀢𑀯𑀺𑀳𑀸𑀭𑀸𑀤𑀻𑀦𑀁 𑀬𑁄 𑀪𑀽𑀫𑀺𑀧𑁆𑀧𑀤𑁂𑀲𑁄 𑀯𑀢𑁆𑀣𑀼 𑀦𑀸𑀫, 𑀢𑀁 𑀦𑀧𑀼𑀁𑀲𑀓𑁂, 𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀢𑁆𑀣𑀼, 𑀭𑀢𑁆𑀣𑀼. 𑀕𑀲 𑀫𑀤𑀦𑁂, 𑀕𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑀸𑀫𑁄, 𑀫𑁄. 𑀲𑀁𑀯𑀲𑀦𑁆𑀢𑁆𑀬𑀢𑁆𑀭𑀸𑀢𑀺 𑀲𑀁𑀯𑀲𑀣𑁄, 𑀅𑀣𑁄.

𑀧𑀸𑀓𑀝𑁄 𑀔𑁆𑀬𑀸𑀢𑁄 𑀕𑀸𑀫𑁄, 𑀲𑁄 𑀦𑀺𑀕𑀫𑁄 𑀦𑀸𑀫, 𑀅𑀢𑀺𑀭𑁂𑀓𑁄 𑀕𑀸𑀫𑁄 𑀦𑀺𑀕𑀫𑁄, 𑀪𑀼𑀲𑀢𑁆𑀣𑁄 𑀦𑀺, 𑀲𑀜𑁆𑀜𑀸𑀲𑀤𑁆𑀤𑀢𑁆𑀢𑀸 𑀭𑀲𑁆𑀲𑁄.

𑀉𑀧𑀪𑀼𑀜𑁆𑀚𑀺𑀢𑀩𑁆𑀩𑀪𑁄𑀕𑀫𑀦𑀼𑀲𑁆𑀲𑀸𑀤𑀻𑀳𑀺 ( ) [(𑀇𑀪𑁆𑀬𑁄) (?)] 𑀯𑀟𑁆𑀠𑀺𑀢𑁄 𑀅𑀥𑀺𑀓𑁄 𑀕𑀸𑀫𑁄 𑀦𑀺𑀕𑀫𑀢𑁄𑀧𑀺 𑀅𑀥𑀺𑀓𑀢𑀭𑀢𑁆𑀢𑀸 ‘‘𑀅𑀥𑀺𑀪𑀽’’𑀢𑀺 𑀈𑀭𑀺𑀢𑁄 𑀓𑀣𑀺𑀢𑁄, 𑀅𑀥𑀺𑀓𑁄 𑀪𑀯𑀢𑀻𑀢𑀺 𑀅𑀥𑀺𑀪𑀽.

𑁨𑁨𑁬. 𑀤𑁆𑀯𑀬𑀁 ¶ 𑀕𑀸𑀫𑀸𑀤𑀺𑀧𑀭𑀺𑀬𑀦𑁆𑀢𑀪𑀸𑀕𑁂. 𑀲𑀺 𑀩𑀦𑁆𑀥𑀦𑁂, 𑀫𑁄. 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀆𑀤𑀻𑀬𑀢𑁂𑀢𑀺 𑀫𑀭𑀺𑀬𑀸𑀤𑀸, 𑀧𑀲𑁆𑀲 𑀫𑁄.

𑀤𑁆𑀯𑀬𑀁 𑀆𑀪𑀻𑀭𑀓𑀼𑀝𑀺𑀬𑀁 [𑀖𑁄𑀲𑁄 𑀆𑀪𑀻𑀭𑀧𑀮𑁆𑀮𑀻 𑀲𑀺𑀬𑀸 (𑀅𑀫𑀭 𑁧𑁨.𑁨𑁦)]. 𑀖𑀼 𑀲𑀤𑁆𑀤𑁂, 𑀖𑁄𑀲𑀦𑁆𑀢𑁆𑀬𑀢𑁆𑀭𑀸𑀢𑀺 𑀖𑁄𑀲𑁄. 𑀕𑁄𑀧𑀸𑀮𑀸𑀦𑀁 𑀕𑀸𑀫𑁄 𑀕𑁄𑀧𑀸𑀮𑀕𑀸𑀫𑀓𑁄, 𑀲𑀓𑀢𑁆𑀣𑁂 𑀓𑁄.

𑀧𑀼𑀭𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀦𑀭𑀯𑀕𑁆𑀕𑀯𑀡𑁆𑀡𑀦𑀸

𑁨𑁨𑁭-𑁨𑁨𑁮. 𑀧𑁄𑀭𑀺𑀲𑀦𑁆𑀢𑀸𑀦𑀺 𑀫𑀦𑀼𑀲𑁆𑀲𑀚𑀸𑀢𑀺𑀬𑀸 𑀦𑀸𑀫𑀸𑀦𑀺. 𑀫𑀦𑁄 𑀉𑀲𑁆𑀲𑀦𑁆𑀦𑀫𑀲𑁆𑀲𑀸𑀢𑀺 𑀫𑀦𑀼𑀲𑁆𑀲𑁄, 𑀲𑀢𑀺𑀲𑀽𑀭𑀪𑀸𑀯𑀩𑁆𑀭𑀳𑁆𑀫𑀘𑀭𑀺𑀬𑀬𑁄𑀕𑁆𑀬𑀢𑀸𑀤𑀺𑀕𑀼𑀡𑀯𑀲𑁂𑀦 𑀉𑀧𑀘𑀺𑀢𑀫𑀸𑀦𑀲𑀸 𑀉𑀓𑁆𑀓𑀝𑁆𑀞𑀕𑀼𑀡𑀘𑀺𑀢𑁆𑀢𑀸, 𑀓𑁂 𑀧𑀦 𑀢𑁂? 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀲𑀢𑁆𑀢𑀯𑀺𑀲𑁂𑀲𑀸. 𑀢𑁂𑀦𑀸𑀳 𑀪𑀕𑀯𑀸 𑁋 ¶ ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀞𑀸𑀦𑁂𑀳𑀺 𑀚𑀫𑁆𑀩𑀼𑀤𑀻𑀧𑀓𑀸 𑀫𑀦𑀼𑀲𑁆𑀲𑀸 𑀉𑀢𑁆𑀢𑀭𑀓𑀼𑀭𑀼𑀓𑁂 𑀫𑀦𑀼𑀲𑁆𑀲𑁂 𑀅𑀥𑀺𑀕𑁆𑀕𑀡𑁆𑀳𑀦𑁆𑀢𑀺 𑀤𑁂𑀯𑁂 𑀘 𑀢𑀸𑀯𑀢𑀺𑀁𑀲𑁂. 𑀓𑀢𑀫𑁂𑀳𑀺 𑀢𑀻𑀳𑀺, 𑀲𑀽𑀭𑀸 𑀲𑀢𑀺𑀫𑀦𑁆𑀢𑁄 𑀇𑀥 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺 [𑀅. 𑀦𑀺. 𑁯.𑁨𑁧]. 𑀢𑀣𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀅𑀕𑁆𑀕𑀲𑀸𑀯𑀓𑀫𑀳𑀸𑀲𑀸𑀯𑀓𑀘𑀓𑁆𑀓𑀯𑀢𑁆𑀢𑀺𑀦𑁄 𑀘 𑀅𑀜𑁆𑀜𑁂 𑀘 𑀫𑀳𑀸𑀦𑀼𑀪𑀸𑀯𑀸 𑀲𑀢𑁆𑀢𑀸 𑀢𑀢𑁆𑀣𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑀫𑀸𑀦𑀭𑀽𑀧𑀸𑀤𑀺𑀢𑀸𑀬 𑀧𑀦 𑀲𑀤𑁆𑀥𑀺𑀁 𑀧𑀭𑀺𑀢𑁆𑀢𑀤𑀻𑀧𑀯𑀸𑀲𑀻𑀳𑀺 𑀇𑀢𑀭𑀫𑀳𑀸𑀤𑀻𑀧𑀯𑀸𑀲𑀺𑀦𑁄𑀧𑀺 𑀫𑀦𑀼𑀲𑁆𑀲𑀸𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀁𑀲𑀽𑀢𑀺 𑀏𑀓𑁂, 𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 ‘‘𑀮𑁄𑀪𑀸𑀤𑀻𑀳𑀺, 𑀅𑀮𑁄𑀪𑀸𑀤𑀻𑀳𑀺 𑀘 𑀲𑀳𑀺𑀢𑀲𑁆𑀲 𑀫𑀦𑀲𑁆𑀲 𑀉𑀲𑁆𑀲𑀤𑀢𑀸𑀬 𑀫𑀦𑀼𑀲𑁆𑀲𑀸, 𑀬𑁂 𑀳𑀺 𑀲𑀢𑁆𑀢𑀸 𑀫𑀦𑀼𑀲𑁆𑀲𑀚𑀸𑀢𑀺𑀓𑀸, 𑀢𑁂𑀲𑀼 𑀯𑀺𑀲𑁂𑀲𑀢𑁄 𑀮𑁄𑀪𑀸𑀤𑀬𑁄, 𑀅𑀮𑁄𑀪𑀸𑀤𑀬𑁄 𑀘 𑀉𑀲𑁆𑀲𑀤𑀸, 𑀢𑁂 𑀮𑁄𑀪𑀸𑀤𑀻𑀳𑀺 𑀉𑀲𑁆𑀲𑀤𑀢𑀸𑀬 𑀅𑀧𑀸𑀬𑀫𑀕𑁆𑀕𑀁, 𑀅𑀮𑁄𑀪𑀸𑀤𑀻𑀳𑀺 𑀉𑀲𑁆𑀲𑀤𑀢𑀸𑀬 𑀲𑀼𑀕𑀢𑀺𑀫𑀕𑁆𑀕𑀁, 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑀕𑁆𑀕𑀜𑁆𑀘 𑀧𑀽𑀭𑁂𑀦𑁆𑀢𑀺, 𑀢𑀲𑁆𑀫𑀸 𑀮𑁄𑀪𑀸𑀤𑀻𑀳𑀺, 𑀅𑀮𑁄𑀪𑀸𑀤𑀻𑀳𑀺 𑀘 𑀲𑀳𑀺𑀢𑀲𑁆𑀲 𑀫𑀦𑀲𑁆𑀲 𑀉𑀲𑁆𑀲𑀤𑀢𑀸𑀬 𑀧𑀭𑀺𑀢𑁆𑀢𑀤𑀻𑀧𑀯𑀸𑀲𑀻𑀳𑀺 𑀲𑀤𑁆𑀥𑀺𑀁 𑀘𑀢𑀼𑀫𑀳𑀸𑀤𑀻𑀧𑀯𑀸𑀲𑀺𑀦𑁄 𑀲𑀢𑁆𑀢𑀯𑀺𑀲𑁂𑀲𑀸 𑀫𑀦𑀼𑀲𑁆𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺. 𑀮𑁄𑀓𑀺𑀬𑀸 𑀧𑀦 𑀫𑀦𑀼𑀦𑁄 𑀅𑀧𑀘𑁆𑀘𑀪𑀸𑀯𑁂𑀦 𑀫𑀦𑀼𑀲𑁆𑀲𑀸𑀢𑀺 𑀯𑀤𑀦𑁆𑀢𑀺, 𑀫𑀦𑀼 𑀦𑀸𑀫 𑀧𑀞𑀫𑀓𑀧𑁆𑀧𑀺𑀓𑁄 𑀮𑁄𑀓𑀫𑀭𑀺𑀬𑀸𑀤𑀸𑀬 𑀆𑀤𑀺𑀪𑀽𑀢𑁄 𑀳𑀺𑀢𑀸𑀳𑀺𑀢𑀯𑀺𑀥𑀸𑀬𑀓𑁄 𑀲𑀢𑁆𑀢𑀸𑀦𑀁 𑀧𑀺𑀢𑀼𑀝𑁆𑀞𑀸𑀦𑀺𑀬𑁄, 𑀬𑁄 𑀲𑀸𑀲𑀦𑁂 ‘‘𑀫𑀳𑀸𑀲𑀫𑁆𑀫𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀧𑀘𑁆𑀘𑀓𑁆𑀔𑀢𑁄, 𑀧𑀭𑀫𑁆𑀧𑀭𑀢𑀸𑀬 𑀘 𑀢𑀲𑁆𑀲 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀬𑀁 𑀞𑀺𑀢𑀸 𑀢𑀲𑁆𑀲 𑀧𑀼𑀢𑁆𑀢𑀲𑀤𑀺𑀲𑀢𑀸𑀬 𑀫𑀦𑀼𑀲𑁆𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀢𑁄 𑀏𑀯 𑀳𑀺 𑀢𑁂 ‘‘𑀫𑀸𑀦𑀯𑀸, 𑀫𑀦𑀼𑀚𑀸’’𑀢𑀺 𑀘 𑀯𑁄𑀳𑀭𑀻𑀬𑀦𑁆𑀢𑀺, 𑀉𑀲𑁆𑀲𑀧𑀘𑁆𑀘𑀬𑁄. 𑀫𑀦𑀼𑀦𑁄 𑀅𑀧𑀘𑁆𑀘𑀁 𑀫𑀸𑀦𑀼𑀲𑁄, 𑀉𑀲𑁄. 𑀫𑀭 𑀧𑀸𑀡𑀘𑀸𑀕𑁂, 𑀘𑁄, 𑀫𑀘𑁆𑀘𑁄, 𑀧𑀩𑁆𑀩𑀚𑁆𑀚𑀸𑀤𑀺𑀦𑀸 𑀯𑀸 𑀢𑁆𑀬𑀧𑀘𑁆𑀘𑀬𑁄, 𑀥𑀸𑀢𑁆𑀯𑀦𑁆𑀢𑀲𑁆𑀲 𑀮𑁄𑀧𑁄 𑀘. 𑀢𑀢𑁄 ‘‘𑀬𑀯𑀢’’𑀫𑀺𑀘𑁆𑀘𑀸𑀤𑀺𑀦𑀸 𑀘𑁄, 𑀤𑁆𑀯𑀺𑀢𑁆𑀢𑀁. 𑀫𑀦𑀼𑀦𑁄 𑀅𑀧𑀘𑁆𑀘𑀁 𑀫𑀸𑀦𑀯𑁄. 𑀫𑀸𑀡𑀯𑁄𑀧𑁆𑀬𑀢𑁆𑀭, 𑀡𑀯𑁄. 𑀫𑀦𑀼𑀫𑁆𑀳𑀸 𑀚𑀸𑀢𑁄 𑀫𑀦𑀼𑀚𑁄. 𑀦𑀻 𑀦𑀬𑁂, 𑀦𑁂𑀢𑀻𑀢𑀺 𑀦𑀭𑁄, 𑀅𑀭𑁄. 𑀧𑀼𑀲 𑀧𑁄𑀲𑀦𑁂, 𑀡𑁄, 𑀧𑀼𑀭𑁂𑀢𑀻𑀢𑀺 𑀯𑀸 𑀧𑁄𑀲𑁄. 𑀧𑀼𑀭 𑀧𑀽𑀭𑀡𑁂, 𑀲𑁄, 𑀉𑀲𑁆𑀲𑁄𑀢𑁆𑀢𑀁, 𑀭𑀮𑁄𑀧𑁄. 𑀧𑀼𑀦𑀸𑀢𑀻𑀢𑀺 𑀧𑀼𑀫𑀸, 𑀧𑀼 ¶ 𑀧𑀯𑀦𑁂, 𑀫𑁄, 𑀲𑀺𑀲𑁆𑀲𑀸. 𑀧𑀼𑀭𑁂𑀢𑀻𑀢𑀺 𑀧𑀼𑀭𑀺𑀲𑁄, 𑀧𑁄𑀭𑀺𑀲𑁄 𑀘, 𑀇𑀲𑁄, 𑀭𑀲𑁆𑀲𑀲𑁆𑀲 𑀤𑀻𑀖𑀢𑀸𑀬 𑀧𑀽𑀭𑀺𑀲𑁄 𑀘. 𑀏𑀢𑁆𑀣 𑀘 𑀫𑀦𑀼𑀲𑁆𑀲𑀸𑀤𑀺𑀧𑀜𑁆𑀘𑀓𑀁 𑀇𑀢𑁆𑀣𑀺𑀬𑀫𑁆𑀧𑀺 𑀯𑀢𑁆𑀢𑀢𑁂, 𑀦𑀭𑀸𑀤𑀬𑁄 𑀢𑀼 𑀧𑀼𑀫𑁂𑀬𑁂𑀯 𑀯𑀺𑀲𑀺𑀝𑁆𑀞𑀮𑀺𑀗𑁆𑀕𑀢𑁆𑀢𑀸. 𑀢𑀢𑁆𑀭 𑀫𑀦𑀼𑀲𑁆𑀲 𑀫𑀸𑀦𑀼𑀲 𑀫𑀦𑀼𑀚 𑀫𑀸𑀡𑀯𑁂𑀳𑀺 𑀦𑀤𑀸𑀤𑀺𑀢𑁆𑀢𑀸 𑀈𑀧𑀘𑁆𑀘𑀬𑁄, 𑀏𑀓𑀲𑀓𑀸𑀭𑀮𑁄𑀧𑁄, 𑀫𑀦𑀼𑀲𑀻, 𑀫𑀸𑀦𑀼𑀲𑀻, 𑀫𑀦𑀼𑀚𑀻, 𑀫𑀸𑀡𑀯𑀻. 𑀫𑀘𑁆𑀘𑀸, 𑀇𑀢𑁆𑀣𑀺𑀬𑀫𑀢𑁄 𑀆𑀧𑀘𑁆𑀘𑀬𑁄.

𑀯𑀺𑀤𑁆𑀤𑀲𑀼𑀧𑀭𑀺𑀬𑀦𑁆𑀢𑀁 𑀧𑀡𑁆𑀟𑀺𑀢𑁂. 𑀧𑀡𑁆𑀟𑀸 𑀩𑀼𑀤𑁆𑀥𑀺 𑀲𑀜𑁆𑀚𑀸𑀢𑀸 𑀅𑀲𑁆𑀲𑀸𑀢𑀺 𑀧𑀡𑁆𑀟𑀺𑀢𑁄, 𑀢𑀭𑀢𑁆𑀬𑀸𑀤𑀺. 𑀧𑀟𑀺 𑀕𑀢𑀺𑀬𑀁 𑀯𑀸, 𑀢𑁄. 𑀩𑀼𑀚𑁆𑀛𑀢𑀻𑀢𑀺 𑀩𑀼𑀥𑁄. 𑀯𑀺𑀤𑀢𑀺 𑀚𑀸𑀦𑀸𑀢𑀻𑀢𑀺 𑀯𑀺𑀤𑁆𑀯𑀸, 𑀯𑀺𑀤 𑀜𑀸𑀡𑁂, 𑀯𑁄, 𑀲𑀺𑀲𑁆𑀲𑀸. 𑀪𑀽 𑀲𑀢𑁆𑀢𑀸𑀬𑀁, 𑀅𑀢𑁆𑀣𑁂 𑀯𑀺𑀪𑀸𑀯𑁂𑀢𑀺 𑀧𑀓𑀸𑀲𑁂𑀢𑀺 𑀲𑀻𑀮𑁂𑀦𑀸𑀢𑀺 𑀯𑀺𑀪𑀸𑀯𑀻, 𑀡𑀻. 𑀭𑀸𑀕𑀸𑀤𑀬𑁄 𑀲𑀫𑁂𑀢𑀻𑀢𑀺 𑀲𑀦𑁆𑀢𑁄, 𑀢𑁄, 𑀲𑀼𑀦𑁆𑀤𑀭𑁄 𑀅𑀦𑁆𑀢𑁄 𑀅𑀯𑀲𑀸𑀦𑀫𑁂𑀢𑀲𑁆𑀲𑀸𑀢𑀺 𑀯𑀸 𑀲𑀦𑁆𑀢𑁄. 𑀲𑀼𑀦𑁆𑀤𑀭𑀸 𑀧𑀜𑁆𑀜𑀸 𑀬𑀲𑁆𑀲 𑀲𑀧𑁆𑀧𑀜𑁆𑀜𑁄. 𑀓𑀺𑀦𑁆𑀦𑀸𑀫 𑀦 𑀯𑀺𑀦𑁆𑀤𑀢𑀻𑀢𑀺 𑀓𑁄𑀯𑀺𑀤𑁄, 𑀦𑁂𑀭𑀼𑀢𑁆𑀢𑁄, 𑀓𑀼𑀁 𑀧𑀸𑀧𑀁 𑀯𑀺𑀦𑁆𑀤𑀢𑀻𑀢𑀺 𑀯𑀸 𑀓𑁄𑀯𑀺𑀤𑁄. 𑀥𑀻 𑀧𑀜𑁆𑀜𑀸 𑀬𑀲𑁆𑀲𑀢𑁆𑀣𑀻𑀢𑀺 𑀲𑁄 𑀥𑀻𑀫𑀸, 𑀲𑁄𑀪𑀦𑀁 𑀛𑀸𑀬𑀢𑀻𑀢𑀺 𑀲𑀼𑀥𑀻, 𑀛𑁂 𑀘𑀺𑀦𑁆𑀢𑀸𑀬𑀁. 𑀛𑀲𑁆𑀲 𑀥𑁄, 𑀈, 𑀲𑀼𑀦𑁆𑀤𑀭𑀸 𑀥𑀻 𑀬𑀲𑁆𑀲𑀸𑀢𑀺 𑀯𑀸 𑀲𑀼𑀥𑀻. 𑀓𑀯𑀺 𑀯𑀡𑁆𑀡𑁂, 𑀇, 𑀇𑀢𑁆𑀣𑀺𑀬𑀁 𑀓𑀯𑀻 𑀘, 𑀓𑀼 𑀲𑀤𑁆𑀤𑁂 𑀯𑀸, 𑀇, 𑀓𑀯𑀺. 𑀩𑁆𑀬𑀜𑁆𑀚𑀬𑀢𑀻𑀢𑀺 𑀩𑁆𑀬𑀢𑁆𑀢𑁄, 𑀅𑀜𑁆𑀚 𑀕𑀢𑀺𑀬𑀁, 𑀢𑁄. 𑀪𑀼𑀚𑀸𑀤𑀻𑀦𑀫𑀦𑁆𑀢𑁄 𑀦𑁄 𑀤𑁆𑀯𑀺 𑀘. 𑀯𑀺𑀲𑀺𑀝𑁆𑀞𑁄 𑀅𑀢𑁆𑀢𑀸 𑀬𑀲𑁆𑀲𑀸𑀢𑀺 𑀯𑀸 𑀩𑁆𑀬𑀢𑁆𑀢𑁄. 𑀘𑀓𑁆𑀔 𑀤𑀲𑁆𑀲𑀦𑁂, 𑀬𑀼, 𑀯𑀺𑀘𑀓𑁆𑀔𑀡𑁄, 𑀯𑀺𑀘𑀸𑀭𑁂𑀢𑀻𑀢𑀺 𑀯𑀸 𑀯𑀺𑀘𑀓𑁆𑀔𑀡𑁄, 𑀦𑁂𑀭𑀼𑀢𑁆𑀢𑁄. 𑀯𑀺𑀕𑀢𑁄 𑀲𑀸𑀭𑀤𑁄 𑀏𑀢𑀲𑁆𑀫𑀸𑀢𑀺 𑀯𑀺𑀲𑀸𑀭𑀤𑁄.

𑁨𑁨𑁯. 𑀫𑁂𑀥𑀸 𑀥𑀸𑀭𑀡𑀸 𑀫𑀢𑀺 𑀧𑀜𑁆𑀜𑀸 𑀬𑀲𑁆𑀲𑀸𑀢𑀺 𑀫𑁂𑀥𑀸𑀯𑀻, 𑀯𑀻. 𑀅𑀢𑀺𑀲𑀬𑀫𑀢𑀺𑀬𑀼𑀢𑁆𑀢𑀢𑀸𑀬 𑀫𑀢𑀺𑀫𑀸. 𑀧𑀜𑁆𑀜𑀸𑀬 𑀬𑁄𑀕𑀢𑁄 𑀧𑀜𑁆𑀜𑁄. 𑀯𑀺𑀲𑁂𑀲𑀁 𑀚𑀸𑀦𑀸𑀢𑀺 𑀲𑀻𑀮𑁂𑀦𑀸𑀢𑀺 𑀯𑀺𑀜𑁆𑀜𑀽, 𑀭𑀽. 𑀯𑀺𑀤 𑀜𑀸𑀡𑁂, 𑀉𑀭𑁄, 𑀯𑀺𑀤𑀼𑀭𑁄 [𑀯𑀺𑀤𑀽𑀭𑁄 (𑀓.)]. 𑀭𑀽𑀧𑀘𑁆𑀘𑀬𑁂 𑀯𑀺𑀤𑀽. 𑀥𑀻𑀬𑁄𑀕𑀸 𑀥𑀻𑀭𑁄, 𑀭𑁄. 𑀯𑀺𑀲𑀺𑀝𑁆𑀞𑀤𑀲𑁆𑀲𑀦𑀲𑀻𑀮𑀢𑀸𑀬 ¶ 𑀯𑀺𑀧𑀲𑁆𑀲𑀻, 𑀡𑀻. 𑀤𑁄𑀲𑀁 𑀚𑀸𑀦𑀸𑀢𑀻𑀢𑀺 𑀤𑁄𑀲𑀜𑁆𑀜𑀽, 𑀭𑀽. 𑀩𑀼𑀚𑁆𑀛𑀢𑀻𑀢𑀺 𑀩𑀼𑀤𑁆𑀥𑁄, 𑀢𑁄. 𑀤𑀼 𑀕𑀢𑀺𑀬𑀁, 𑀅, 𑀉𑀲𑁆𑀲𑀸𑀯𑁄 [𑀤𑀼 𑀕𑀢𑀺𑀬𑀁 𑀅𑀩𑁆𑀩𑁄 (𑀲𑀽𑀘𑀺)], 𑀤𑀩𑁆𑀩𑁄. 𑀯𑀺𑀤 𑀜𑀸𑀡𑁂, 𑀤𑀲𑀼.

𑁨𑁩𑁦-𑁨𑁩𑁧. 𑀫𑀳𑀺𑀮𑀸𑀦𑁆𑀢𑀁 𑀇𑀢𑁆𑀣𑀺𑀲𑀸𑀫𑀜𑁆𑀜𑁂. 𑀇𑀲𑀼 𑀇𑀘𑁆𑀙𑀸𑀬𑀁, 𑀢𑁄, 𑀦𑀤𑀸𑀤𑀺. 𑀲𑀻𑀫𑀲𑁆𑀲 𑀅𑀦𑁆𑀢𑁄 𑀲𑀻𑀫𑀦𑁆𑀢𑁄, 𑀓𑁂𑀲𑀯𑁂𑀲𑁄, 𑀢𑀁𑀬𑁄𑀕𑀸 𑀲𑀻𑀫𑀦𑁆𑀢𑀺𑀦𑀻, 𑀇𑀦𑀻. 𑀦𑀭𑀲𑁆𑀲𑀸𑀬𑀁 𑀦𑀸𑀭𑀻, 𑀇𑀤𑀫𑀢𑁆𑀣𑁂 𑀡𑁄. 𑀢𑀺𑀝𑁆𑀞𑀢𑀺 𑀕𑀩𑁆𑀪𑁄 𑀬𑀲𑁆𑀲𑀁, 𑀲𑀸 𑀣𑀻. 𑀥𑀸 𑀥𑀸𑀭𑀡𑁂 𑀯𑀸, 𑀯𑀡𑁆𑀡𑀯𑀺𑀓𑀸𑀭𑁄, 𑀈. 𑀩𑀦𑁆𑀥 𑀩𑀦𑁆𑀥𑀦𑁂, 𑀊, 𑀩𑀦𑁆𑀥𑀲𑁆𑀲 𑀯𑀥𑀸𑀤𑁂𑀲𑁄 𑀘 [𑀡𑁆𑀯𑀸𑀤𑀺 𑁩], 𑀯𑀥𑀽𑀲𑀤𑁆𑀤𑁄 𑀲𑀼𑀡𑀺𑀲𑀸𑀪𑀭𑀺𑀬𑀸𑀦𑀫𑁆𑀧𑀺 𑀯𑀸𑀘𑀓𑁄. 𑀯𑀦 𑀲𑀫𑁆𑀪𑀢𑁆𑀢𑀺𑀬𑀁, 𑀢𑁄, 𑀇𑀓𑀸𑀭𑀸𑀕𑀫𑁄 𑀘. 𑀅𑀗𑁆𑀕 𑀕𑀫𑀦𑀢𑁆𑀣𑁄, 𑀬𑀼, 𑀅𑀗𑁆𑀕𑀦𑀸, 𑀯𑀺𑀲𑀺𑀝𑁆𑀞𑀦𑀸𑀭𑀺𑀬𑀫𑁆𑀧𑀺 𑀅𑀗𑁆𑀕𑀦𑀸, 𑀢𑀤𑀸 𑀓𑀮𑁆𑀬𑀸𑀡𑀗𑁆𑀕𑀦𑀸𑀭𑀻𑀮𑀓𑁆𑀔𑀡𑁄𑀧𑁂𑀢𑀁 𑀧𑀲𑀢𑁆𑀣𑀁 𑀳𑀢𑁆𑀣𑀧𑀸𑀤𑀸𑀤𑀺𑀓𑀫𑀗𑁆𑀕𑀫𑀲𑁆𑀲𑀢𑁆𑀣𑀻𑀢𑀺 𑀅𑀲𑁆𑀲𑀢𑁆𑀣𑁆𑀬𑀢𑁆𑀣𑁂 𑀅𑀗𑁆𑀕𑀸 𑀓𑀮𑁆𑀬𑀸𑀡𑁂 𑀦𑀧𑀘𑁆𑀘𑀬𑁄 [𑀫𑁄𑀕𑁆𑀕𑀮𑁆𑀮𑀸𑀦 𑁪.𑁯𑁨]. 𑀯𑀺𑀭𑀽𑀧𑁂𑀲𑀼𑀧𑀺 𑀫𑀤𑁄 𑀭𑀸𑀕𑀫𑀤𑁄 𑀬𑀲𑁆𑀲𑀸 𑀲𑀸 𑀧𑀫𑀤𑀸, 𑀯𑀺𑀲𑀺𑀝𑁆𑀞𑀦𑀸𑀭𑀺𑀬𑀁𑀧𑁆𑀬𑀢𑁆𑀭 𑀧𑀫𑀤𑀸, 𑀢𑀤𑀸 𑀧𑀓𑀝𑁆𑀞𑁄 𑀫𑀤𑁄 𑀭𑀽𑀧𑀲𑁄𑀪𑀕𑁆𑀕𑀚𑀦𑀺𑀢𑁄 𑀘𑁂𑀢𑁄𑀯𑀺𑀓𑀸𑀭𑁄 𑀬𑀲𑁆𑀲𑀸 𑀲𑀸 𑀧𑀫𑀤𑀸. 𑀭𑀽𑀧𑀮𑀸𑀯𑀡𑁆𑀬𑀲𑀫𑁆𑀧𑀦𑁆𑀦𑀢𑀸𑀬 𑀲𑀼𑀦𑁆𑀤𑀭𑀻, 𑀯𑀺𑀲𑀺𑀝𑁆𑀞𑀸𑀬𑀫𑁆𑀧𑀺. 𑀓𑀫𑀦𑀻𑀬𑀯𑀼𑀢𑁆𑀢𑀺𑀢𑀸𑀬 𑀓𑀦𑁆𑀢𑀸, 𑀓𑀫𑀼 𑀓𑀦𑁆𑀢𑀺𑀬𑀁, 𑀢𑁄. 𑀓𑀦𑁆𑀢𑀺𑀬𑁄𑀕𑀸 𑀯𑀸 𑀓𑀦𑁆𑀢𑀸, 𑀯𑀺𑀲𑀺𑀝𑁆𑀞𑀸𑀬𑀫𑁆𑀧𑀺. 𑀭𑀫𑀬𑀢𑀺 𑀯𑀺𑀦𑁄𑀤𑀬𑀢𑀺 𑀦𑀸𑀬𑀓𑀁, 𑀲𑀸 𑀭𑀫𑀡𑀻, 𑀦𑀦𑁆𑀤𑀸𑀤𑀻𑀳𑀺 𑀬𑀼, 𑀦𑀤𑀸𑀤𑀺, 𑀯𑀺𑀲𑀺𑀝𑁆𑀞𑀸𑀬𑀫𑁆𑀧𑀺. 𑀤𑀬 𑀭𑀓𑁆𑀔𑀡𑁂, 𑀓𑀫𑁆𑀫𑀦𑀺 𑀢𑁄. 𑀅𑀧𑁆𑀧𑀁 𑀩𑀮𑀁 𑀬𑀲𑁆𑀲𑀸 𑀲𑀸 𑀅𑀩𑀮𑀸, 𑀅𑀧𑁆𑀧𑀢𑁆𑀣𑁄𑀬𑀁 𑀅𑀓𑀸𑀭𑁄. 𑀫𑀸𑀢𑀼𑀬𑀸 𑀕𑀸𑀫𑁄 𑀯𑀺𑀬 𑀕𑀸𑀫𑁄 𑀬𑀲𑁆𑀲𑀸 ¶ 𑀲𑀸 𑀫𑀸𑀢𑀼𑀕𑀸𑀫𑁄, 𑀫𑀸𑀢𑀸 𑀯𑀺𑀬 𑀕𑀘𑁆𑀙𑀢𑀻𑀢𑀺 𑀯𑀸 𑀫𑀸𑀢𑀼𑀕𑀸𑀫𑁄, 𑀕𑀫𑀼 𑀕𑀫𑀦𑁂, 𑀡𑁄, 𑀫𑀸𑀢𑀸 𑀯𑀺𑀬 𑀕𑀲𑀢𑀻𑀢𑀺 𑀯𑀸 𑀫𑀸𑀢𑀼𑀕𑀸𑀫𑁄, 𑀕𑀲 𑀅𑀤𑀦𑁂, 𑀫𑁄, 𑀫𑀸𑀢𑀸 𑀯𑀺𑀬 𑀕𑀸𑀬𑀢𑀻𑀢𑀺 𑀯𑀸 𑀫𑀸𑀢𑀼𑀕𑀸𑀫𑁄, 𑀕𑀸 𑀲𑀤𑁆𑀤𑁂, 𑀫𑁄. 𑀫𑀳𑀻 𑀯𑀺𑀬 𑀲𑀼𑀘𑀺𑀁 𑀅𑀲𑀼𑀘𑀺𑀫𑁆𑀧𑀺 𑀮𑀸𑀢𑀻𑀢𑀺 𑀫𑀳𑀺𑀮𑀸, 𑀫𑀳𑀦𑁆𑀢𑁂𑀲𑀼 𑀩𑀳𑀽𑀲𑀼𑀧𑀺 𑀭𑀢𑁆𑀢𑀘𑀺𑀢𑁆𑀢𑁂𑀲𑀼 𑀇𑀮𑀢𑀺 𑀕𑀘𑁆𑀙𑀢𑀻𑀢𑀺 𑀯𑀸 𑀫𑀳𑀺𑀮𑀸, 𑀇𑀮 𑀕𑀫𑀦𑁂, 𑀫𑀳 𑀧𑀽𑀚𑀸𑀬𑀁 𑀯𑀸, 𑀇𑀭𑁄, 𑀮𑀢𑁆𑀢𑀁, 𑀆, 𑀫𑀳𑀺𑀮𑀸. 𑀫𑀳𑁂𑀮𑀸𑀧𑁆𑀬𑀢𑁆𑀭.

𑀢𑀺𑀓𑀁 𑀯𑀺𑀲𑀺𑀝𑁆𑀞𑀦𑀸𑀭𑀺𑀬𑀫𑁂𑀯. 𑀮𑀮 𑀯𑀺𑀮𑀸𑀲𑁂, 𑀦𑀦𑁆𑀤𑀸𑀤𑀻𑀳𑀺 𑀬𑀼. 𑀮𑀮 𑀇𑀘𑁆𑀙𑀸𑀬𑀦𑁆𑀢𑀺 𑀘𑀼𑀭𑀸𑀤𑀺𑀕𑀡𑀢𑁄 𑀯𑀸 𑀬𑀼. 𑀪𑀬𑀧𑀓𑀢𑀺 𑀪𑀻𑀭𑀼, 𑀪𑀻 𑀪𑀬𑁂, 𑀭𑀼, ‘‘𑀪𑀻𑀭𑀼 𑀅𑀢𑁆𑀢𑁂 𑀚𑀦𑁂’𑀢𑁆𑀣𑀺𑀬’’𑀦𑁆𑀢𑀺 𑀭𑀪𑀲𑁄. 𑀅𑀢𑀺𑀲𑀬𑀺𑀢𑀓𑀸𑀫𑀸 𑀓𑀸𑀫𑀺𑀦𑀻, 𑀓𑀸𑀫𑁄 𑀲𑀺𑀗𑁆𑀕𑀸𑀭𑀭𑀽𑀧𑁄 𑀫𑀤𑁄 𑀬𑀲𑁆𑀲𑀸𑀢𑁆𑀣𑀻𑀢𑀺 𑀇𑀦𑀻, 𑀲𑀩𑁆𑀩𑀢𑁆𑀭𑁂𑀯𑀁. 𑀯𑀸𑀫𑀮𑁄𑀘𑀦𑀸, 𑀪𑀸𑀯𑀺𑀦𑀻, 𑀦𑀺𑀢𑀫𑁆𑀩𑀺𑀦𑀻, 𑀭𑀸𑀫𑀸𑀇𑀘𑁆𑀘𑀸𑀤𑀻𑀦𑀺𑀧𑀺 𑀯𑀺𑀲𑀺𑀝𑁆𑀞𑀦𑀸𑀭𑀻𑀦𑀸𑀫𑀸𑀦𑀺.

𑀤𑁆𑀯𑀬𑀁 𑀧𑀞𑀫𑀯𑀬𑀲𑀺 𑀯𑀢𑁆𑀢𑀫𑀸𑀦𑀸𑀬𑀁.

𑀅𑀝𑁆𑀞𑀯𑀲𑁆𑀲𑀸 𑀪𑀯𑁂 𑀕𑁄𑀭𑀻, 𑀤𑀲𑀯𑀲𑁆𑀲𑀸 𑀢𑀼 𑀓𑀜𑁆𑀜𑀓𑀸;

𑀲𑀫𑁆𑀧𑀢𑁆𑀢𑁂 𑀤𑁆𑀯𑀸𑀤𑀲𑁂 𑀯𑀲𑁆𑀲𑁂, 𑀓𑀼𑀫𑀸𑀭𑀻𑀢𑁆𑀬’𑀪𑀺𑀥𑀻𑀬𑀢𑁂 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁬.𑁮].

𑀇𑀳 𑀢𑁆𑀯𑀪𑁂𑀤𑁄𑀧𑀘𑀸𑀭𑁂𑀦𑁂𑀓𑀢𑁆𑀢𑀁. 𑀅𑀜𑁆𑀜𑁂 𑀧𑀦𑀸𑀳𑀼 ‘‘𑀓𑀜𑁆𑀜𑀸𑀲𑀤𑁆𑀤𑁄𑀬𑀁 𑀧𑀼𑀫𑀼𑀦𑀸𑀪𑀺𑀲𑀫𑁆𑀩𑀦𑁆𑀥𑀧𑀼𑀩𑁆𑀩𑀓𑁂 𑀲𑀫𑁆𑀧𑀬𑁄𑀕𑁂 𑀦𑀺𑀯𑀢𑁆𑀢𑁂𑀢𑀻’’𑀢𑀺. 𑀓𑀼𑀫𑀸𑀭 𑀓𑀻𑀴𑀸𑀬𑀁, 𑀘𑀼𑀭𑀸𑀤𑀺, 𑀓𑀼𑀫𑀸𑀭𑀬𑀢𑀻𑀢𑀺 𑀓𑀼𑀫𑀸𑀭𑀻, 𑀅, 𑀦𑀤𑀸𑀤𑀺, 𑀲𑀓𑀢𑁆𑀣𑁂 𑀓𑁄, 𑀡𑁆𑀯𑀼𑀦𑀸 𑀯𑀸 𑀲𑀺𑀤𑁆𑀥𑁄. 𑀓𑀫𑀦𑀻𑀬𑀢𑁂𑀢𑀺 𑀓𑀜𑁆𑀜𑀸, 𑀓𑀦 𑀤𑀺𑀢𑁆𑀢𑀺𑀓𑀦𑁆𑀢𑀺𑀕𑀢𑀻𑀲𑀼, 𑀬𑁄, 𑀦𑁆𑀬𑀲𑁆𑀲 𑀜𑀢𑁆𑀢𑀁, 𑀅, 𑀆.

𑀬𑀼𑀯𑀲𑀤𑁆𑀤𑀢𑁄 ¶ 𑀧𑀸𑀝𑀺𑀧𑀤𑀺𑀓𑀢𑁄𑀢𑀺, 𑀬𑀼𑀯𑀢𑀺. 𑀯𑀭𑀺𑀢𑁆𑀣𑀺𑀧𑀭𑀺𑀬𑀸𑀬𑀲𑀸𑀫𑀜𑁆𑀜𑁂𑀧𑀺 𑀬𑀼𑀯𑀢𑀺𑀲𑀤𑁆𑀤𑁄 𑀧𑀓𑀢𑁆𑀬𑀦𑁆𑀢𑀭𑀫𑀢𑁆𑀣𑀻𑀢𑀺. 𑀢𑀭 𑀢𑀭𑀡𑁂, 𑀬𑀼, 𑀉𑀢𑁆𑀢𑀁, 𑀈 𑀘.

𑁨𑁩𑁨. 𑀲𑀸𑀪𑀺𑀲𑁂𑀓𑀸 𑀮𑀤𑁆𑀥𑀸𑀪𑀺𑀲𑁂𑀓𑀸 𑀭𑀸𑀚𑀺𑀢𑁆𑀣𑀻 𑀫𑀳𑁂𑀲𑀻 𑀦𑀸𑀫, 𑀫𑀳 𑀧𑀽𑀚𑀸𑀬𑀁, 𑀓𑀫𑁆𑀫𑀦𑀺 𑀇𑀲𑁄, 𑀇𑀲𑁆𑀲𑁂, 𑀢𑀢𑁄 𑀈, 𑀫𑀳𑀢𑀺𑀬𑁄 𑀭𑀸𑀚𑀺𑀢𑁆𑀣𑀺𑀬𑁄 𑀈𑀲𑀢𑀺 𑀅𑀪𑀺𑀪𑀯𑀢𑀻𑀢𑀺 𑀯𑀸 𑀫𑀳𑁂𑀲𑀻, 𑀈𑀲 𑀇𑀲𑁆𑀲𑀭𑀺𑀬𑁂, 𑀈. 𑀫𑀳𑁂𑀲𑀺𑀢𑁄 𑀅𑀜𑁆𑀜𑀸 𑀭𑀸𑀚𑀦𑀸𑀭𑀺𑀬𑁄 𑀪𑁄𑀕𑀺𑀦𑀺𑀬𑁄 𑀪𑁄𑀕𑀬𑁄𑀕𑀸, 𑀈, 𑀇𑀦𑀻 𑀘. 𑀬𑀸𑀦𑀸𑀭𑀻 𑀧𑀼𑀭𑀺𑀲𑀲𑁆𑀲 𑀲𑀗𑁆𑀓𑁂𑀢𑀁 𑀬𑀸𑀢𑀺, 𑀲𑀸 ‘‘𑀥𑀯𑀢𑁆𑀣𑀺𑀦𑀻, 𑀅𑀪𑀺𑀲𑀸𑀭𑀺𑀓𑀸’’𑀢𑀺 𑀘𑁄𑀘𑁆𑀘𑀢𑁂. 𑀥𑀯𑀁 𑀧𑀢𑀺𑀁 𑀅𑀢𑁆𑀣𑀬𑀢𑀺 𑀇𑀘𑁆𑀙𑀢𑀻𑀢𑀺 𑀥𑀯𑀢𑁆𑀣𑀺𑀦𑀻, 𑀅𑀢𑁆𑀣 𑀬𑀸𑀘𑀦𑀺𑀘𑁆𑀙𑀸𑀲𑀼, 𑀇𑀦𑀻, 𑀅𑀲𑀢𑀻𑀯𑀺𑀲𑁂𑀲𑁄. 𑀲𑀭 𑀕𑀢𑀺𑀬𑀁, 𑀅𑀪𑀺𑀲𑀭𑀢𑀺 𑀲𑀗𑁆𑀓𑁂𑀢𑀦𑁆𑀢𑀺, 𑀡𑁆𑀯𑀼.

𑁨𑁩𑁩. 𑀙𑀓𑁆𑀓𑀁 𑀯𑁂𑀲𑀺𑀬𑀁. 𑀘𑀢𑀼𑀲𑀝𑁆𑀞𑀺𑀓𑀮𑀸𑀓𑀼𑀲𑀮𑀢𑀸𑀬, 𑀲𑀻𑀮𑀭𑀽𑀧𑀸𑀤𑀺𑀫𑀢𑁆𑀢𑀸𑀬 𑀘 𑀕𑀡𑁆𑀬𑀢𑁂 𑀆𑀤𑀻𑀬𑀢𑁂 𑀕𑀡𑀺𑀓𑀸, 𑀕𑀡 𑀲𑀗𑁆𑀔𑁆𑀬𑀸𑀦𑁂, 𑀡𑁆𑀯𑀼. 𑀯𑁂𑀲𑁄 𑀆𑀓𑀧𑁆𑀧𑁄, 𑀢𑁂𑀦𑀸𑀢𑀺𑀲𑁄𑀪𑀢𑁂, 𑀓𑀫𑁆𑀫𑀯𑁂𑀲𑁂𑀳𑀺 𑀯𑀸 𑀇𑀘𑁆𑀙𑀻𑀬𑀢𑁂𑀢𑀺. 𑀅𑀢𑀺𑀲𑁄𑀪𑀦𑁂, 𑀇𑀘𑁆𑀙𑀢𑁆𑀣𑁂 𑀯𑀸 𑀬𑀧𑀘𑁆𑀘𑀬𑁄. 𑀯𑀡𑁆𑀡𑀲𑀫𑁆𑀧𑀦𑁆𑀦𑀸 𑀤𑀸𑀲𑀻 𑀯𑀡𑁆𑀡𑀤𑀸𑀲𑀻, 𑀤𑀸𑀲𑀺𑀫𑁆𑀧𑀺 𑀳𑀺 𑀯𑀡𑁆𑀡𑀲𑀫𑁆𑀧𑀦𑁆𑀦𑀁 𑀓𑁂𑀘𑀺 𑀲𑀸𑀫𑀺𑀓𑀸 𑀥𑀦𑀮𑁄𑀪𑁂𑀦 𑀕𑀡𑀺𑀓𑀁 𑀓𑀭𑁄𑀦𑁆𑀢𑀺. 𑀦𑀕𑀭𑀁 𑀲𑁄𑀪𑁂𑀢𑀻𑀢𑀺 𑀦𑀕𑀭𑀲𑁄𑀪𑀺𑀦𑀻. 𑀭𑀽𑀧𑁂𑀦 𑀉𑀧𑀚𑀻𑀯𑀢𑀻𑀢𑀺 𑀭𑀽𑀧𑀽𑀧𑀚𑀻𑀯𑀺𑀦𑀻. 𑀅𑀢𑀺𑀲𑀬𑀯𑁂𑀲𑀬𑀼𑀢𑁆𑀢𑀢𑀸𑀬 𑀯𑁂𑀲𑀻.

𑀤𑁆𑀯𑀬𑀁 𑀅𑀲𑀢𑀻𑀲𑀸𑀫𑀜𑁆𑀜𑁂. 𑀓𑀼𑀮𑀸𑀦𑀺 𑀅𑀝𑀢𑀺 𑀦𑀸𑀲𑀬𑀢𑀻𑀢𑀺 𑀓𑀼𑀮𑀝𑀸. 𑀩𑀦𑁆𑀥𑀫𑀦𑀼𑀩𑀦𑁆𑀥𑀁 𑀓𑀸𑀬𑀢𑀻𑀢𑀺 𑀩𑀦𑁆𑀥𑀓𑀻, 𑀦𑀤𑀸𑀤𑀺.

𑁨𑁩𑁪. 𑀘𑀢𑀼𑀓𑁆𑀓𑀁 𑀉𑀢𑁆𑀢𑀫𑀦𑀸𑀭𑀺𑀬𑀁. 𑀯𑀭𑁄 𑀆𑀭𑁄𑀳𑁄 𑀲𑁄𑀡𑀺 𑀬𑀲𑁆𑀲𑀸 𑀲𑀸 𑀯𑀭𑀸𑀭𑁄𑀳𑀸. 𑀉𑀢𑁆𑀢𑀫𑀕𑀼𑀡𑀬𑁄𑀕𑀸 𑀉𑀢𑁆𑀢𑀫𑀸. 𑀲𑁄𑀡𑀺𑀕𑀸𑀭𑀯𑁂𑀦 ¶ 𑀫𑀢𑁆𑀢𑀕𑀚𑁄 𑀯𑀺𑀬 𑀩𑀦𑁆𑀥𑀦𑀕𑀸𑀫𑀺𑀦𑀻 𑀫𑀢𑁆𑀢𑀓𑀸𑀲𑀺𑀦𑀻, 𑀓𑀲 𑀕𑀢𑀺𑀬𑀁. 𑀯𑀭𑀯𑀡𑁆𑀡𑀬𑁄𑀕𑀸 𑀯𑀭𑀯𑀡𑁆𑀡𑀺𑀦𑀻, 𑀇𑀦𑀻.

‘‘𑀲𑀻𑀢𑁂 𑀲𑀼𑀔𑁄𑀡𑁆𑀳𑀲𑀩𑁆𑀩𑀗𑁆𑀕𑀻, 𑀕𑀺𑀫𑁆𑀳𑁂 𑀬𑀸 𑀲𑀼𑀔𑀲𑀻𑀢𑀮𑀸;

𑀪𑀢𑁆𑀢𑀼 𑀪𑀢𑁆𑀢𑀸 𑀘 𑀬𑀸 𑀦𑀸𑀭𑀻, 𑀲𑀸 𑀪𑀯𑁂 𑀯𑀭𑀯𑀡𑁆𑀡𑀺𑀦𑀻’’𑀢𑀺. 𑀭𑀼𑀤𑁆𑀤𑁄;

𑀤𑁆𑀯𑀬𑀁 𑀅𑀔𑀡𑁆𑀟𑀺𑀢𑀘𑀭𑀺𑀢𑁆𑀭𑀸𑀬𑀁. 𑀧𑀢𑀺 𑀲𑀸𑀫𑀺𑀓𑁄𑀯 𑀓𑀫𑀦𑀻𑀬𑁄 𑀬𑀲𑁆𑀲𑀸 𑀧𑀢𑀺𑀩𑁆𑀩𑀢𑀸, 𑀧𑀢𑀺𑀫𑁆𑀳𑀺 𑀯𑀢𑀫𑀲𑁆𑀲𑀸𑀢𑀺 𑀯𑀸 𑀧𑀢𑀺𑀩𑁆𑀩𑀢𑀸. 𑀅𑀲 𑀪𑀼𑀯𑀺, 𑀅𑀦𑁆𑀢𑁄, 𑀈, 𑀆𑀤𑀺𑀮𑁄𑀧𑁄. 𑀲𑀫𑁂𑀢𑀻𑀢𑀺 𑀯𑀸 𑀲𑀢𑀻, 𑀲𑀫𑀼 𑀉𑀧𑀲𑀫𑁂, 𑀅𑀦𑁆𑀢𑁄, 𑀈.

𑀤𑁆𑀯𑀬𑀁 𑀓𑀸𑀫𑀭𑀢𑁆𑀢𑀭𑀸𑀚𑀧𑀼𑀢𑁆𑀢𑀸𑀤𑀺𑀦𑁄 𑀓𑀼𑀮𑀲𑁆𑀲 𑀦𑀺𑀬𑀢𑀧𑀢𑀺𑀬𑀁. 𑀓𑀼𑀮𑀸𑀦𑀼𑀭𑀽𑀧𑀸 𑀇𑀢𑁆𑀣𑀻 𑀓𑀼𑀮𑀺𑀢𑁆𑀣𑀻, 𑀓𑀼𑀮𑀁 𑀧𑀸𑀮𑁂𑀢𑀺 𑀭𑀓𑁆𑀔𑀢𑀻𑀢𑀺 𑀓𑀼𑀮𑀧𑀸𑀮𑀺𑀓𑀸, 𑀡𑁆𑀯𑀼.

𑁨𑁩𑁫. 𑀤𑁆𑀯𑀬𑀁 𑀫𑀢𑀪𑀢𑁆𑀢𑀺𑀓𑀸𑀬𑀁. 𑀯𑀺𑀕𑀢𑁄 𑀥𑀯𑁄 𑀪𑀢𑁆𑀢𑀸 𑀬𑀲𑁆𑀲𑀸 𑀯𑀺𑀥𑀯𑀸. 𑀧𑀢𑀺 𑀲𑀼𑀜𑁆𑀜𑁄 𑀦𑀝𑁆𑀞𑁄 𑀬𑀲𑁆𑀲𑀸𑀢𑀺 𑀧𑀢𑀺𑀲𑀼𑀜𑁆𑀜𑀸.

𑀤𑁆𑀯𑀬𑀁 𑀅𑀢𑁆𑀢𑀺𑀘𑁆𑀙𑀸𑀬 𑀧𑀢𑁆𑀬𑀦𑁆𑀯𑁂𑀲𑀺𑀦𑀺𑀬𑀁 𑀓𑀜𑁆𑀜𑀸𑀬𑀁. 𑀧𑀢𑀺𑀁 𑀯𑀭𑀢𑀺 𑀕𑀯𑁂𑀲𑀢𑀻𑀢𑀺 𑀧𑀢𑀺𑀫𑁆𑀩𑀭𑀸, 𑀤𑀼𑀢𑀺𑀬𑀸𑀬𑀸𑀮𑁄𑀧𑁄. 𑀲𑀬𑀫𑁂𑀯 𑀧𑀢𑀺𑀁 𑀯𑀭𑀢𑀻𑀢𑀺 𑀲𑀬𑀫𑁆𑀩𑀭𑀸, 𑀧𑀞𑀫𑀸𑀬𑀸𑀮𑁄𑀧𑁄, 𑀯𑀭 𑀧𑀢𑁆𑀣𑀦𑀸𑀬𑀁.

𑀘𑀢𑀼𑀓𑁆𑀓𑀁 𑀯𑀺𑀚𑀸𑀢𑀸𑀬𑀁. 𑀯𑀺𑀚𑀦𑀻 𑀕𑀩𑁆𑀪𑀯𑀺𑀫𑁄𑀓𑁆𑀔𑀦𑁂, 𑀢𑁄, 𑀯𑀺𑀚𑀸𑀬𑀺𑀢𑁆𑀣𑀸𑀢𑀺 𑀯𑀺𑀚𑀸𑀢𑀸. 𑀲𑀽 𑀅𑀪𑀺𑀲𑀯𑁂, 𑀢𑁄. 𑀚𑀸𑀢𑀁 𑀅𑀧𑀘𑁆𑀘𑀁 𑀧𑀼𑀢𑁆𑀢𑁄 𑀏𑀢𑀺𑀲𑁆𑀲𑀸𑀢𑀺 𑀚𑀸𑀢𑀸𑀧𑀘𑁆𑀘𑀸. 𑀧𑀲𑀽𑀢𑀸𑀯 𑀧𑀲𑀽𑀢𑀺𑀓𑀸, 𑀓𑀧𑀘𑁆𑀘𑀬𑁄, 𑀇𑀢𑁆𑀢𑀜𑁆𑀘.

𑁨𑁩𑁬. 𑀤𑁆𑀯𑀬𑀁 ¶ 𑀤𑀽𑀢𑀺𑀬𑀁. 𑀬𑀸 𑀧𑁂𑀲𑀻𑀬𑀢𑁂, 𑀲𑀸 𑀤𑀽𑀢𑀻, 𑀤𑀼 𑀕𑀫𑀦𑁂,𑀢𑀺, 𑀈𑀫𑁆𑀳𑀺 𑀤𑀽𑀢𑀻. 𑀲𑀜𑁆𑀘𑀸𑀭𑀬𑀢𑀺 𑀬𑀣𑀸𑀪𑀺𑀫𑀢𑀦𑁆𑀢𑀺, 𑀡𑁆𑀯𑀼.

𑀢𑀺𑀓𑀁 𑀤𑀸𑀲𑀺𑀬𑀁. 𑀤𑀼 𑀓𑀼𑀘𑁆𑀙𑀺𑀢𑀁 𑀅𑀲𑀢𑀺 𑀪𑀓𑁆𑀔𑀢𑀻𑀢𑀺 𑀤𑀸𑀲𑀻, 𑀈, 𑀤𑀻𑀬𑀦𑁆𑀢𑁂 𑀢𑀸𑀬𑀸𑀢𑀺 𑀯𑀸 𑀤𑀸𑀲𑀻, 𑀤𑀸 𑀤𑀸𑀦𑁂, 𑀲𑁄, 𑀈 𑀘. 𑀘𑀺𑀝 𑀧𑁂𑀲𑀦𑁂, 𑀓𑀫𑁆𑀫𑀦𑀺 𑀡𑁄, 𑀈. 𑀓𑀼𑀝𑀁 𑀉𑀤𑀓𑀓𑀼𑀫𑁆𑀪𑀁 𑀥𑀸𑀭𑁂𑀢𑀻𑀢𑀺 𑀓𑀼𑀝𑀥𑀸𑀭𑀺𑀓𑀸, 𑀡𑁆𑀯𑀼.

𑀤𑁆𑀯𑀬𑀁 𑀲𑀼𑀪𑀸𑀲𑀼𑀪𑀦𑀺𑀭𑀽𑀧𑀺𑀦𑀺𑀬𑀁 𑀲𑀁𑀯𑀭𑀺𑀓𑀸𑀤𑀺𑀫𑁆𑀳𑀺. 𑀯𑀭 𑀕𑀢𑀺𑀬𑀁, 𑀓𑀢𑁆𑀢𑀭𑀺 𑀇𑀦𑀻. 𑀲𑀼𑀪𑀸𑀲𑀼𑀪𑀲𑁆𑀲 𑀇𑀓𑁆𑀔𑀡𑀁 𑀦𑀺𑀭𑀽𑀧𑀦𑀁 𑀬𑀲𑁆𑀲𑀸𑀢𑁆𑀣𑀻𑀢𑀺, 𑀇, 𑀲𑀓𑀢𑁆𑀣𑁂 𑀓𑁄. 𑀇𑀫𑁂 𑀤𑁆𑀯𑁂 𑀲𑀤𑁆𑀤𑀸 𑀢𑀼𑀮𑁆𑀬𑀢𑁆𑀣𑀸.

𑀬𑀸 𑀲𑀬𑀁 𑀔𑀢𑁆𑀢𑀺𑀬𑀚𑀸𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀪𑀭𑀺𑀬𑀸, 𑀲𑀸 𑀔𑀢𑁆𑀢𑀺𑀬𑀸𑀦𑀻, 𑀔𑀢𑁆𑀢𑀺𑀬𑀸 𑀘. 𑀔𑀢𑁆𑀢𑀺𑀬𑀲𑁆𑀲𑀸𑀧𑀘𑁆𑀘𑀁 𑀔𑀢𑁆𑀢𑀺𑀬𑀸𑀦𑀻, 𑀆𑀦𑁄, 𑀈. 𑀡𑀫𑁆𑀳𑀺 𑀔𑀢𑁆𑀢𑀺𑀬𑀸.

𑁨𑁩𑁭. 𑀧𑀚𑁆𑀚𑀁 𑀅𑀕𑁆𑀕𑀺𑀲𑀓𑁆𑀔𑀺𑀧𑀼𑀩𑁆𑀩𑀓𑀢𑀧𑀸𑀡𑀺𑀕𑀳𑀺𑀢𑀸𑀬𑀁 𑀪𑀭𑀺𑀬𑀸𑀬𑀁, 𑀅𑀜𑁆𑀜𑀢𑁆𑀭 𑀢𑀽𑀧𑀘𑀸𑀭𑀸. 𑀤𑀸𑀭𑀬𑀦𑁆𑀢𑁂 𑀬𑁂𑀦𑀸𑀢𑀺 𑀤𑀸𑀭𑁄, 𑀤𑀭 𑀯𑀺𑀤𑀸𑀭𑀡𑁂, 𑀅𑀓𑀢𑁆𑀢𑀭𑀺 𑀘 𑀓𑀸𑀭𑀓𑁂 𑀲𑀜𑁆𑀜𑀸𑀬𑀁 𑀡𑁄. 𑀚𑀸𑀬𑀢𑀺 𑀧𑀼𑀢𑁆𑀢𑁄 𑀬𑀸𑀬𑀸𑀢𑀺 𑀚𑀸𑀬𑀸, 𑀚𑀦 𑀚𑀦𑀦𑁂, 𑀬𑁄, 𑀚𑀦𑀺𑀲𑁆𑀲 𑀚𑀸 𑀘, 𑀆, 𑀚𑀬𑀢𑀻𑀢𑀺 𑀯𑀸 𑀚𑀸𑀬𑀸, 𑀚𑀺 𑀚𑀬𑁂, 𑀬𑁄, 𑀚𑀺𑀲𑁆𑀲 𑀚𑀸, 𑀆, 𑀚𑀸𑀬𑀸. 𑀓𑀮 𑀲𑀗𑁆𑀔𑁆𑀬𑀸𑀦𑁂, 𑀅𑀢𑁆𑀢𑁄. 𑀖𑀭𑀁 𑀦𑁂𑀢𑀻𑀢𑀺 𑀖𑀭𑀡𑀻, 𑀡𑀢𑁆𑀢𑀁. 𑀪𑀭𑀺𑀢𑀩𑁆𑀩𑀢𑁄 𑀪𑀭𑀺𑀬𑀸, 𑀪𑀭 𑀪𑀭𑀡𑁂, 𑀬𑁄. 𑀧𑀺𑀬𑀸𑀬𑀺𑀢𑀩𑁆𑀩𑀢𑁄 𑀧𑀺𑀬𑀸,𑀧𑀻 𑀢𑀧𑁆𑀧𑀦𑀓𑀦𑁆𑀢𑀻𑀲𑀼, 𑀬𑁄. 𑀧𑀚𑀁 𑀧𑀼𑀢𑁆𑀢𑀁 𑀧𑀸𑀮𑁂𑀢𑀻𑀢𑀺 𑀧𑀚𑀸𑀧𑀢𑀺, 𑀧𑀸 𑀧𑀸𑀮𑀦𑁂,𑀢𑀺, 𑀆𑀢𑁆𑀢𑀁, 𑀭𑀲𑁆𑀲𑀢𑁆𑀢𑀜𑁆𑀘 ¶ . 𑀤𑁆𑀯𑀺𑀦𑁆𑀦𑀁 𑀧𑀽𑀭𑀡𑀻 𑀤𑀼𑀢𑀺𑀬𑀸. 𑀧𑀞𑀫𑁄 𑀪𑀢𑁆𑀢𑀸, 𑀪𑀭𑀺𑀬𑀸 𑀤𑀼𑀢𑀺𑀬𑀸. 𑀲𑀸𑀫𑀺𑀓𑀲𑁆𑀲 𑀧𑀸𑀤𑁂 𑀧𑀭𑀺𑀘𑀭𑀢𑀻𑀢𑀺 𑀧𑀸𑀤𑀧𑀭𑀺𑀘𑀸𑀭𑀺𑀓𑀸, 𑀡𑁆𑀯𑀼. 𑀧𑀢𑀺𑀦𑀻, 𑀧𑀸𑀡𑀺𑀕𑀳𑀺𑀢𑀸, 𑀲𑀳𑀥𑀫𑁆𑀫𑀺𑀦𑀻𑀢𑀺𑀧𑀺 𑀢𑀲𑁆𑀲𑀸𑀬𑁂𑀯 𑀦𑀸𑀫𑀸𑀦𑀺.

𑁨𑁩𑁮. 𑀢𑀺𑀓𑀁 𑀲𑀔𑀺𑀬𑀁. 𑀢𑁂𑀲𑀼 𑀢𑁂𑀲𑀼 𑀓𑀺𑀘𑁆𑀘𑁂𑀲𑀼 𑀲𑀳 𑀔𑀸𑀬𑀢𑀺 𑀧𑀓𑀸𑀲𑀢𑀻𑀢𑀺 𑀲𑀔𑀻, 𑀲𑀳𑀧𑀼𑀩𑁆𑀩𑁄 𑀔𑀸 𑀧𑀓𑀸𑀲𑀦𑀓𑀣𑀦𑁂𑀲𑀼, 𑀈. 𑀅𑀮 𑀪𑀽𑀲𑀦𑁂 𑀆𑀧𑀼𑀩𑁆𑀩𑁄, 𑀇. 𑀯𑀬𑀲𑀸 𑀢𑀼𑀮𑁆𑀬𑀸 𑀯𑀬𑀲𑀸, 𑀢𑀼𑀮𑁆𑀬𑁂 𑀲𑀜𑁆𑀜𑀸𑀬𑀁 𑀲𑁄 [𑀧𑀸𑀡𑀺𑀦𑀺 𑁪.𑁪.𑁯𑁧 𑀲𑀼𑀢𑁆𑀢𑁂 𑀬𑀧𑀘𑁆𑀘𑀬𑁄 𑀤𑀺𑀲𑁆𑀲𑀢𑀺].

𑀚𑀭𑁄𑀯𑀼𑀘𑁆𑀘𑀢𑀺 𑀘𑁄𑀭𑀲𑁆𑀲𑀸𑀫𑀺𑀓𑁄, 𑀢𑀲𑁆𑀲𑀸𑀬𑀁 𑀚𑀸𑀭𑀻, 𑀡𑁄, 𑀈. 𑀲𑀸𑀫𑀺𑀓𑀁 𑀅𑀢𑀺𑀓𑁆𑀓𑀫𑁆𑀫 𑀅𑀜𑁆𑀜𑀢𑁆𑀭 𑀘𑀭𑀢𑀻𑀢𑀺, 𑀇𑀦𑀻.

𑁨𑁩𑁯. 𑀧𑀼𑀫𑁂 𑀢𑀽𑀢𑀺 𑀮𑀺𑀗𑁆𑀕𑀦𑁆𑀢𑁄 𑀢𑀼𑀲𑀤𑁆𑀤𑁄 𑀦 𑀧𑀼𑀩𑁆𑀩𑀁 𑀪𑀚𑀢𑁂. 𑀅𑀭 𑀕𑀫𑀦𑁂, 𑀢𑀼, 𑀅𑀭𑀲𑁆𑀲𑀼𑀢𑁆𑀢𑀁. 𑀭𑀢𑀺𑀬𑀸 𑀚𑀸𑀬𑀢𑀻𑀢𑀺 𑀭𑀚𑁄, 𑀢𑀺𑀮𑁄𑀧𑁄. 𑀧𑀼𑀧𑁆𑀨 𑀯𑀺𑀓𑀲𑀦𑁂, 𑀧𑀼𑀧𑁆𑀨𑀁.

𑀢𑀺𑀓𑀁 𑀭𑀚𑀲𑁆𑀲𑀮𑀸𑀬𑀁. 𑀉𑀢𑀼𑀬𑁄𑀕𑀸𑀉𑀢𑀼𑀦𑀻, 𑀇𑀦𑀻. 𑀭𑀚𑀬𑁄𑀕𑀸 𑀭𑀚𑀲𑁆𑀲𑀮𑀸, 𑀲𑀮𑁄. 𑀧𑀼𑀧𑁆𑀨𑀯𑀦𑁆𑀢𑀢𑀸𑀬 𑀧𑀼𑀧𑁆𑀨𑀯𑀢𑀻. 𑀣𑀻𑀥𑀫𑁆𑀫𑀺𑀦𑀻, 𑀅𑀯𑀻, 𑀅𑀢𑁆𑀢𑁂𑀬𑀻, 𑀫𑀮𑀺𑀦𑀻, 𑀉𑀢𑀼𑀫𑀢𑀻, 𑀉𑀤𑀓𑀻𑀇𑀘𑁆𑀘𑀸𑀤𑀻𑀦𑀺𑀧𑀺 𑀢𑀲𑁆𑀲𑀸 𑀦𑀸𑀫𑀸𑀦𑀺.

𑀢𑀺𑀓𑀁 𑀕𑀩𑁆𑀪𑀺𑀦𑀺𑀬𑀁. 𑀕𑀭𑀼 𑀅𑀮𑀳𑀼𑀓𑁄 𑀕𑀩𑁆𑀪𑁄 𑀓𑀼𑀘𑁆𑀙𑀺 𑀏𑀢𑀺𑀲𑁆𑀲𑀸𑀢𑀺 𑀕𑀭𑀼𑀕𑀩𑁆𑀪𑀸. 𑀆𑀧𑀦𑁆𑀦𑁄 𑀧𑀢𑁆𑀢𑁄 𑀕𑀩𑁆𑀪𑀝𑁆𑀞𑁄 𑀲𑀢𑁆𑀢𑁄 𑀏𑀢𑀸𑀬𑀸𑀢𑀺 𑀆𑀧𑀦𑁆𑀦𑀲𑀢𑁆𑀢𑀸. 𑀕𑀩𑁆𑀪𑀬𑁄𑀕𑀸 𑀕𑀩𑁆𑀪𑀺𑀦𑀻.

𑀢𑀺𑀓𑀁 ¶ 𑀬𑁂𑀦 𑀯𑁂𑀞𑀺𑀢𑁄 𑀕𑀩𑁆𑀪𑁄 𑀓𑀼𑀘𑁆𑀙𑀺𑀬𑀁 𑀢𑀺𑀝𑁆𑀞𑀢𑀺, 𑀢𑀢𑁆𑀭𑀸𑀲𑀬𑁂𑀢𑀺 𑀔𑁆𑀬𑀸𑀢𑁂. 𑀕𑀩𑁆𑀪𑁄 𑀆𑀲𑀬𑀢𑁂 𑀢𑀺𑀝𑁆𑀞𑀢𑁆𑀬𑀢𑁆𑀭𑀸𑀢𑀺, 𑀡𑁄. 𑀚𑀭𑀁 𑀏𑀢𑀻𑀢𑀺 𑀚𑀮𑀸𑀩𑀼. 𑀉, 𑀭𑀲𑁆𑀲 𑀮𑁄, 𑀬𑀲𑁆𑀲 𑀩𑁄, 𑀚𑀭𑀸𑀧𑀼𑀩𑁆𑀩𑁄 𑀇 𑀕𑀢𑀺𑀬𑀁. 𑀓𑀮𑀁 𑀚𑀭𑀢𑀁 𑀮𑀸𑀢𑀻𑀢𑀺 𑀓𑀮𑀮𑁄, 𑀓𑀮 𑀲𑀗𑁆𑀔𑁆𑀬𑀸𑀦𑁂 𑀯𑀸, 𑀅𑀮𑁄.

𑁨𑁪𑁦-𑁨𑁪𑁧. 𑀲𑀢𑁆𑀢𑀓𑀁 𑀪𑀢𑁆𑀢𑀭𑀺. 𑀥𑀽 𑀓𑀫𑁆𑀧𑀦𑁂, 𑀲𑀦𑁆𑀢𑀸𑀲𑀁 𑀥𑀼𑀦𑁄𑀢𑀻𑀢𑀺 𑀥𑀯𑁄, 𑀅. 𑀲𑀁 𑀏𑀢𑀲𑁆𑀲𑀢𑁆𑀣𑀻𑀢𑀺 𑀲𑀸𑀫𑀺𑀓𑁄, 𑀆𑀫𑀺𑀧𑀘𑁆𑀘𑀬𑁄, 𑀲𑀓𑀢𑁆𑀣𑁂 𑀓𑁄, 𑀇𑀧𑀘𑁆𑀘𑀬𑁄 𑀯𑀸, 𑀦𑀺𑀕𑁆𑀕𑀳𑀻𑀢𑀲𑁆𑀲 𑀫𑁄, 𑀅𑀲𑁆𑀲 𑀘 𑀤𑀻𑀖𑁄, 𑀲𑀸𑀫𑀺𑀓𑁄. 𑀪𑀭 𑀪𑀭𑀡𑁂, 𑀪𑀭𑀢𑀻𑀢𑀺 𑀪𑀢𑁆𑀢𑀸, 𑀭𑀺𑀢𑀼. 𑀓𑀫𑀼 𑀇𑀘𑁆𑀙𑀸𑀬𑀁, 𑀢𑁄, ‘‘𑀧𑀓𑁆𑀓𑀫𑀸𑀤𑀻𑀳𑀺 𑀦𑁆𑀢𑁄 𑀘𑀸’’𑀢𑀺 𑀦𑁆𑀢𑀢𑁆𑀢𑀁. 𑀧𑀸 𑀭𑀓𑁆𑀔𑀡𑁂, 𑀅𑀢𑀺, 𑀧𑀢𑀺. 𑀯𑀭 𑀇𑀘𑁆𑀙𑀸𑀬𑀁, 𑀅, 𑀯𑀭𑁄. 𑀧𑀻 𑀢𑀧𑁆𑀧𑀦𑀓𑀦𑁆𑀢𑀻𑀲𑀼, 𑀬𑁄.

𑀭𑀢𑀺𑀓𑀸𑀭𑀡𑀢𑁆𑀢𑀸 𑀧𑀢𑀺𑀦𑁄 𑀉𑀧 𑀉𑀧𑀧𑀢𑀺, 𑀲𑀫𑀸𑀲𑁂 𑀓𑀢𑁂 𑀅𑀪𑀺𑀥𑀸𑀦𑀢𑁄 𑀧𑀼𑀩𑁆𑀩𑀦𑀺𑀧𑀸𑀢𑁄, 𑀅𑀧𑁆𑀧𑀥𑀸𑀦𑀪𑀽𑀢𑁄 𑀯𑀸 𑀧𑀢𑀺 𑀉𑀧𑀧𑀢𑀺. 𑀚𑀭 𑀯𑀬𑁄𑀳𑀸𑀦𑀺𑀫𑁆𑀳𑀺, 𑀚𑀻𑀬𑀦𑁆𑀢𑁂 𑀅𑀦𑁂𑀦𑀸𑀢𑀺 𑀚𑀸𑀭𑁄, 𑀤𑀸𑀭𑁄 𑀘.

𑀲𑀢𑁆𑀢𑀓𑀁 𑀧𑀼𑀢𑁆𑀢𑁂. 𑀦𑀭𑀓𑁂 𑀦 𑀧𑀢𑀦𑁆𑀢𑁆𑀬𑀦𑁂𑀦 𑀚𑀸𑀢𑁂𑀦𑀸𑀢𑀺 𑀅𑀧𑀘𑁆𑀘𑀁, 𑀧𑀢 𑀕𑀢𑀺𑀬𑀁, 𑀬𑁄, 𑀢𑁆𑀬𑀲𑁆𑀲 𑀘𑁄, 𑀦 𑀧𑀢𑀢𑀺 𑀦 𑀯𑀺𑀘𑁆𑀙𑀺𑀦𑁆𑀤𑀢𑀺 𑀯𑀁𑀲𑁄 ¶ 𑀏𑀢𑁂𑀦𑀸𑀢𑀺 𑀯𑀸 𑀅𑀧𑀘𑁆𑀘𑀁, 𑀧𑀼𑀢𑁆𑀢𑁂, 𑀥𑀻𑀢𑀭𑀺 𑀘 𑀦𑀺𑀘𑁆𑀘𑀦𑀧𑀼𑀁𑀲𑀓𑁄𑀬𑀁. 𑀧𑀽 𑀧𑀯𑀦𑁂. 𑀧𑀼𑀦𑀸𑀢𑀺 𑀧𑀺𑀢𑀭𑁄 𑀢𑁂𑀦𑀸𑀢𑀺 𑀧𑀼𑀢𑁆𑀢𑁄. ‘‘𑀙𑀤𑀸𑀤𑀻𑀳𑀺 𑀢𑀢𑁆𑀭𑀡’’𑀢𑀺 𑀢𑁄. 𑀧𑀽𑀭𑁂𑀢𑀻𑀢𑀺 𑀯𑀸 𑀧𑀼𑀢𑁆𑀢𑁄. 𑀅𑀢𑁆𑀢𑀢𑁄 𑀚𑀸𑀢𑁄 𑀅𑀢𑁆𑀭𑀚𑁄, ‘‘𑀅𑀢𑁆𑀢𑀚𑁄’’𑀢𑀺𑀧𑀺 𑀧𑀸𑀞𑁄. 𑀲𑀼𑀬𑀢𑁂𑀢𑀺 𑀲𑀼𑀢𑁄. 𑀲𑀼 𑀅𑀪𑀺𑀲𑀯𑁂, 𑀲𑀼𑀡𑀸𑀢𑀻𑀢𑀺 𑀯𑀸 𑀲𑀼𑀢𑁄, 𑀢𑁄, 𑀲𑀼 𑀲𑀯𑀦𑁂. 𑀢𑀦𑀼𑀫𑁆𑀳𑀸 𑀚𑀸𑀢𑁄 𑀢𑀦𑀼𑀚𑁄, 𑀢𑀦𑀬𑁄 𑀘, 𑀬𑁄, 𑀢𑀦𑁄𑀢𑀺 𑀫𑀼𑀤𑀦𑁆𑀢𑀺 𑀯𑀸 𑀢𑀦𑀬𑁄, 𑀅𑀬𑁄. 𑀲𑀽𑀬𑀢𑁂𑀢𑀺 𑀲𑀽𑀦𑀼, 𑀓𑀫𑁆𑀫𑀦𑀺 𑀦𑀼, 𑀲𑀽 𑀧𑀲𑀯𑁂.

𑀧𑀼𑀢𑁆𑀢𑀸𑀤𑀬𑁄 𑀲𑀽𑀦𑀼𑀧𑀭𑀺𑀬𑀦𑁆𑀢𑀸 𑀥𑀻𑀢𑀭𑀺 𑀯𑀢𑁆𑀢𑀫𑀸𑀦𑀸 𑀇𑀢𑁆𑀣𑀺𑀬𑀁 𑀯𑀢𑁆𑀢𑀦𑁆𑀢𑀺. 𑀤𑀼𑀳𑀺𑀢𑀸, 𑀥𑀻𑀢𑀸 𑀘 𑀲𑀤𑀸 𑀦𑀸𑀭𑀺𑀬𑀫𑁂𑀯. 𑀤𑀼𑀳 𑀧𑀧𑀽𑀭𑀡𑁂, 𑀭𑀸𑀢𑀼, 𑀑𑀢𑁆𑀢𑀸𑀪𑀸𑀯𑁄, 𑀇𑀓𑀸𑀭𑀸𑀕𑀫𑁄 𑀘. 𑀥𑀸 𑀥𑀸𑀭𑀡𑁂, 𑀭𑀸𑀢𑀼, 𑀆𑀲𑁆𑀲𑀻. 𑀧𑀼𑀢𑁆𑀢𑀸𑀤𑀬𑁄 𑀘 𑀢𑁂 𑀲𑀸𑀫𑀜𑁆𑀜𑁂𑀦𑁂𑀯 𑀓𑀼𑀡𑁆𑀟𑀕𑁄𑀮𑀓𑀸𑀤𑀻𑀦𑀁 𑀯𑀸𑀘𑀓𑀸. 𑀲𑀯𑀡𑁆𑀡𑀸𑀬𑀁 𑀢𑀼 𑀊𑀠𑀸𑀬𑀁 𑀲𑀚𑀸𑀢𑁄 𑀲𑀬𑀁 𑀚𑀦𑀺𑀢𑁄 𑀲𑀼𑀢𑁄 𑀑𑀭𑀲𑁄 𑀦𑀸𑀫. 𑀲𑀚𑀸𑀢𑀲𑀤𑁆𑀤𑁂𑀦 𑀓𑀼𑀡𑁆𑀟𑀓𑀕𑁄𑀮𑀓𑀔𑀢𑁆𑀢𑀸𑀤𑀺𑀩𑁆𑀬𑀯𑀘𑁆𑀙𑁂𑀤𑁄. 𑀚𑀻𑀯𑀢𑀺 𑀪𑀢𑁆𑀢𑀭𑀺 𑀚𑀸𑀭𑀚𑁄 𑀲𑀼𑀢𑁄 𑀓𑀼𑀡𑁆𑀟𑀸𑀔𑁆𑀬𑁄. 𑀫𑀢𑁂 𑀪𑀢𑁆𑀢𑀭𑀺 𑀚𑀸𑀭𑀚𑁄 𑀕𑁄𑀮𑀓𑀸𑀔𑁆𑀬𑁄. 𑀅𑀭𑀺𑀬𑀸𑀲𑀼𑀤𑁆𑀤𑀚𑁄 𑀲𑀼𑀢𑁄 𑀔𑀢𑁆𑀢𑀸 𑀦𑀸𑀫 [𑀔𑀢𑁆𑀢𑀸 𑀅𑀭𑀺𑀬𑀸𑀲𑀼𑀤𑁆𑀤𑀸𑀦𑀁 (𑀅𑀫𑀭 𑁨𑁦.𑁩)]. 𑀆𑀤𑀺𑀦𑀸 𑀫𑀸𑀕𑀥𑀸𑀤𑀻𑀦𑀁 𑀕𑀳𑀡𑀁. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀅𑀫𑀢𑁂 𑀚𑀸𑀭𑀚𑁄 𑀓𑀼𑀡𑁆𑀟𑁄,

𑀫𑀢𑁂 𑀪𑀢𑁆𑀢𑀭𑀺 𑀕𑁄𑀮𑀓𑁄’’𑀢𑀺 [𑀅𑀫𑀭 𑁧𑁬.𑁩𑁬].

‘‘𑀫𑀸𑀕𑀥𑁄 𑀲𑀼𑀤𑁆𑀤𑀔𑀢𑁆𑀢𑀸𑀚𑁄’’𑀢𑀺 [𑀅𑀪𑀺𑀥𑀸𑀦𑀼 𑁫𑁦𑁩 𑀕𑀸𑀣𑀸] 𑀘.

𑀉𑀭𑀲𑀸 𑀫𑀦𑀲𑀸 𑀦𑀺𑀫𑁆𑀫𑀺𑀢𑁄, 𑀉𑀭𑀲𑀤𑁆𑀤𑀸 𑀢𑀢𑀺𑀬𑀦𑁆𑀢𑀸 𑀦𑀺𑀫𑁆𑀫𑀺𑀢𑀢𑁆𑀣𑁂 𑀡𑁄, 𑀦𑀺𑀯𑀺𑀝𑁆𑀞𑀢𑁆𑀢𑀸 𑀢𑁂𑀦 𑀦𑀺𑀫𑁆𑀫𑀺𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀉𑀭𑀲𑀺 𑀪𑀯𑁄𑀢𑀺 𑀯𑀸 𑀑𑀭𑀲𑁄.

𑁨𑁪𑁨. 𑀘𑀢𑀼𑀓𑁆𑀓𑀁𑀧𑀢𑀺𑀧𑀢𑀺𑀦𑀻𑀦𑀁 ¶ 𑀬𑀼𑀕𑁂, ‘‘𑀤𑀸𑀭𑀸 𑀧𑀼𑀫𑁂 𑀩𑀳𑀼𑀢𑁆𑀢𑁂 𑀘, 𑀤𑀁 𑀓𑀮𑀢𑁆𑀭𑁂 𑀦𑀧𑀼𑀁𑀲𑀓𑁂’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁬.𑁩𑁮] 𑀅𑀫𑀭𑀫𑀸𑀮𑀸, 𑀚𑀁𑀲𑀤𑁆𑀤𑁄 𑀢𑁆𑀯𑀩𑁆𑀬𑀬𑁄 𑀤𑀸𑀭𑀯𑀘𑀦𑁄. 𑀢𑀲𑁆𑀫𑀸 ‘‘𑀚𑀫𑁆𑀧𑀢𑀺, 𑀤𑀫𑁆𑀧𑀢𑀻’’𑀢𑀺𑀧𑀺 𑀪𑀯𑀺𑀢𑀩𑁆𑀩𑀁, 𑀇𑀥 𑀧𑀦 𑀓𑀘𑁆𑀘𑀸𑀬𑀦𑀫𑀢𑁂𑀦𑁄𑀤𑀸𑀳𑀝𑀸. 𑀚𑀸𑀬𑀸 𑀘 𑀧𑀢𑀺 𑀘 𑀚𑀸𑀬𑀸𑀧𑀢𑀺. 𑀇𑀢𑀭𑀻𑀢𑀭𑀬𑁄𑀕𑀤𑁆𑀯𑀦𑁆𑀤𑁄. 𑀚𑀸𑀬𑀸 𑀘 𑀧𑀢𑀺 𑀘 𑀚𑀸𑀦𑀺𑀧𑀢𑀺, 𑀢𑀣𑀸 𑀚𑀸𑀬𑀫𑁆𑀧𑀢𑀺𑀆𑀤𑀬𑁄, 𑀚𑀸𑀬𑀸𑀲𑀤𑁆𑀤𑀲𑁆𑀲 𑀧𑀢𑀺𑀫𑁆𑀳𑀺 𑀧𑀭𑁂 𑀚𑀸𑀦𑀺, 𑀢𑀼𑀤𑀜𑁆𑀘, 𑀚𑀸𑀬𑀜𑁆𑀘 𑀬𑀤𑀸𑀤𑀺𑀦𑀸.

𑀢𑀺𑀓𑀁 𑀦𑀧𑀼𑀁𑀲𑀓𑁂. 𑀯𑀺𑀕𑀢𑁄 𑀭𑀸𑀕𑀲𑁆𑀲𑀯𑁄 𑀬𑀲𑁆𑀫𑀸 𑀯𑀲𑁆𑀲𑀯𑀭𑁄. 𑀲𑀼 𑀲𑀯𑀦𑁂, 𑀅𑀭𑁄. 𑀧𑀡 𑀩𑁆𑀬𑀯𑀳𑀸𑀭𑁂, 𑀟𑁄, 𑀧𑀟𑀺 𑀮𑀺𑀗𑁆𑀕𑀯𑁂𑀓𑀮𑁆𑀬𑁂 𑀯𑀸, 𑀪𑀽𑀯𑀸𑀤𑀺. 𑀦 𑀇𑀢𑁆𑀣𑀻 𑀦 𑀧𑀼𑀫𑀸 𑀦𑀧𑀼𑀁𑀲𑀓𑀁, 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀇𑀢𑁆𑀣𑀺𑀧𑀼𑀫𑀸𑀦𑀁 𑀧𑀼𑀁𑀲𑀓𑀪𑀸𑀯𑁄, 𑀦𑀲𑁆𑀲 𑀘 𑀧𑀓𑀢𑀺. 𑀢𑀢𑀺𑀬𑀸𑀧𑀓𑀢𑀺, 𑀲𑀡𑁆𑀟𑁄, 𑀓𑀮𑀻𑀩𑀦𑁆𑀢𑀺𑀧𑀺 𑀢𑀲𑁆𑀲 𑀦𑀸𑀫𑀸𑀦𑀺. 𑀢𑀢𑀺𑀬𑀸 𑀧𑀓𑀢𑀺 𑀢𑀢𑀺𑀬𑀧𑁆𑀧𑀓𑀸𑀭𑁄, 𑀲𑀫𑀚𑀸𑀢𑀺𑀓𑁂 𑀇𑀢𑁆𑀣𑀺𑀧𑀼𑀭𑀺𑀲𑁂 𑀅𑀧𑁂𑀓𑁆𑀔𑀺𑀢𑁆𑀯𑀸 𑀢𑀢𑀺𑀬𑀢𑁆𑀢𑀁 𑀧𑀓𑀸𑀭𑀲𑁆𑀲. 𑀧𑀞𑀫𑀸 𑀳𑀺 𑀧𑀓𑀢𑀺 𑀇𑀢𑁆𑀣𑀻, 𑀤𑀼𑀢𑀺𑀬𑀸 𑀧𑀓𑀢𑀺 𑀧𑀼𑀭𑀺𑀲𑁄, 𑀇𑀢𑀭𑀧𑀓𑀢𑀺 𑀢𑀢𑀺𑀬𑀸 𑀧𑀓𑀢𑀺.

𑁨𑁪𑁩. 𑀙𑀓𑁆𑀓𑀁 𑀜𑀸𑀢𑀺𑀫𑀢𑁆𑀢𑁂, 𑀩𑀦𑁆𑀥𑀼𑀬𑁂𑀯 𑀩𑀦𑁆𑀥𑀯𑁄, 𑀅, 𑀉𑀲𑁆𑀲𑀸𑀯𑁄. 𑀩𑀦𑁆𑀥𑀢𑀻𑀢𑀺 𑀩𑀦𑁆𑀥𑀼, 𑀉. 𑀲𑀲𑁆𑀲 𑀅𑀢𑁆𑀢𑀦𑁄 𑀚𑀦𑁄 𑀲𑀚𑀦𑁄. 𑀲𑀫𑀸𑀦𑀁 𑀕𑁄𑀢𑁆𑀢𑀁 𑀓𑀼𑀮𑀁 𑀅𑀲𑁆𑀲𑀸𑀢𑀺 𑀲𑀕𑁄𑀢𑁆𑀢𑁄, 𑀲𑀫𑀸𑀦𑀲𑁆𑀲 𑀲𑀪𑀸𑀯𑁄. 𑀜𑀸 𑀅𑀯𑀩𑁄𑀥𑀦𑁂, 𑀓𑀫𑁆𑀫𑁂𑀢𑀺, 𑀜𑀸𑀢𑀺𑀬𑁂𑀯 𑀜𑀸𑀢𑀓𑁄, 𑀅𑀢𑁆𑀢𑀁, 𑀲𑀓𑀢𑁆𑀣𑁂 𑀓𑁄 𑀘. 𑀲𑀼𑀲𑀤𑁆𑀤𑁄𑀧𑁆𑀬𑀢𑁆𑀭 [𑀲𑁆𑀯 (𑀅𑀫𑀭 𑁧𑁬.𑁩𑁬)].

𑀤𑁆𑀯𑀬𑀁 ¶ 𑀲𑀢𑁆𑀢𑀧𑀼𑀭𑀺𑀲𑀸𑀯𑀥𑀺𑀓𑁂𑀲𑀼 𑀦𑀺𑀓𑀝𑀜𑀸𑀢𑀻𑀲𑀼. 𑀮𑁄𑀳𑀺𑀢𑁂𑀦 𑀲𑀫𑁆𑀩𑀦𑁆𑀥𑁄 𑀲𑀸𑀮𑁄𑀳𑀺𑀢𑁄, 𑀲𑀫𑁆𑀩𑀦𑁆𑀥𑀲𑁆𑀲 𑀲𑀸𑀤𑁂𑀲𑁄, 𑀧𑀼𑀩𑁆𑀩𑀦𑀺𑀧𑀸𑀢𑁄 𑀘, 𑀲𑀫𑀸𑀦𑀁 𑀧𑀺𑀡𑁆𑀟𑀤𑀸𑀦𑀁 𑀬𑀲𑁆𑀲 𑀲𑀧𑀺𑀡𑁆𑀟𑁄, 𑀲𑀦𑀸𑀪𑀬𑁄𑀧𑁆𑀬𑀢𑁆𑀭 [𑀦𑀸𑀪𑀺 𑀲𑀢𑁆𑀢𑀧𑀼𑀭𑀺𑀲𑀸𑀯𑀥𑀺𑀓𑀓𑀼𑀮𑁂 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁬.𑁩𑁩)]. 𑀢𑀺𑀓𑀁 𑀧𑀺𑀢𑀭𑀺. 𑀢𑀸 𑀧𑀸𑀮𑀦𑁂, 𑀢𑁄 𑀓𑀢𑁆𑀢𑀭𑀺. 𑀚𑀦𑀬𑀢𑀻𑀢𑀺 𑀚𑀦𑀓𑁄, 𑀡𑁆𑀯𑀼. 𑀧𑀸 𑀭𑀓𑁆𑀔𑀡𑁂, 𑀭𑀺𑀢𑀼, 𑀅𑀲𑁆𑀲𑀺𑀢𑁆𑀢𑀁.

𑁨𑁪𑁪. 𑀙𑀓𑁆𑀓𑀁 𑀫𑀸𑀢𑀭𑀺. 𑀅𑀫 𑀧𑀽𑀚𑀸𑀬𑀁, 𑀓𑀫𑁆𑀫𑀦𑀺 𑀫𑁄, 𑀩𑁄 𑀘, 𑀅𑀫𑁆𑀫𑀸, 𑀅𑀫𑁆𑀩𑀸. 𑀚𑀦𑀬𑀢𑀻𑀢𑀺 𑀚𑀦𑀦𑀻, 𑀬𑀼, 𑀦𑀤𑀸𑀤𑀺. 𑀫𑀸𑀦 𑀧𑀽𑀚𑀸𑀬𑀁, 𑀧𑀼𑀢𑁆𑀢𑀁 𑀫𑀸𑀦𑁂𑀢𑀻𑀢𑀺 𑀫𑀸𑀢𑀸, 𑀭𑀸𑀢𑀼, 𑀧𑀸𑀢𑀻𑀢𑀺 𑀯𑀸 𑀫𑀸𑀢𑀸, 𑀧𑀸𑀢𑀺𑀲𑁆𑀲 𑀫𑁄. 𑀚𑀦𑁂𑀢𑀻𑀢𑀺 𑀚𑀦𑁂𑀢𑁆𑀢𑀺,𑀢𑀺. 𑀚𑀦𑁂𑀢𑀻𑀢𑀺 𑀚𑀦𑀺𑀓𑀸, 𑀡𑁆𑀯𑀼, 𑀇𑀢𑁆𑀢𑀁.

𑀅𑀧𑁆𑀧𑀥𑀸𑀦𑀪𑀽𑀢𑀸 𑀫𑀸𑀢𑀸 𑀉𑀧𑀫𑀸𑀢𑀸, 𑀓𑀼𑀫𑀸𑀭𑁂 𑀥𑀸𑀭𑁂𑀢𑀻𑀢𑀺 𑀥𑀸𑀢𑀺. 𑀥𑀸 𑀥𑀸𑀭𑀡𑁂,𑀢𑀺. 𑀚𑀸𑀬𑀸𑀬 𑀪𑀭𑀺𑀬𑀸𑀬 𑀪𑀸𑀢𑀺𑀓𑁄 𑀓𑀦𑀺𑀝𑁆𑀞𑁄 𑀘 𑀚𑁂𑀝𑁆𑀞𑁄 𑀘 𑀲𑀸𑀮𑁄 𑀦𑀸𑀫, 𑀲𑀲𑁆𑀲 𑀅𑀢𑁆𑀢𑀦𑁄 𑀏𑀲𑀸 𑀲𑀸, 𑀪𑀭𑀺𑀬𑀸, 𑀢𑀲𑁆𑀲𑀸 𑀪𑀸𑀢𑀸 𑀲𑀸𑀮𑁄, 𑀚𑀸𑀬𑀸𑀬 𑀪𑀸𑀢𑀭𑀺 𑀅𑀮𑁄. 𑀲𑀭 𑀕𑀢𑀺𑀘𑀺𑀦𑁆𑀢𑀸𑀳𑀺𑀁𑀲𑀸𑀲𑀼 𑀯𑀸, 𑀡𑁄, 𑀮𑀢𑁆𑀢𑀁, 𑀲𑀸𑀮 𑀯𑀺𑀢𑀓𑁆𑀓𑁂 𑀯𑀸, 𑀘𑀼𑀭𑀸𑀤𑀺.

𑁨𑁪𑁫. 𑀲𑀸𑀫𑀺𑀦𑁄 𑀪𑀢𑁆𑀢𑀼 𑀪𑀕𑀺𑀦𑀻 𑀦𑀦𑀦𑁆𑀤𑀸 𑀦𑀸𑀫, 𑀦 𑀦𑀦𑁆𑀤𑀢𑀻𑀢𑀺 𑀦𑀦𑀦𑁆𑀤𑀸, 𑀅𑀢𑁆𑀢𑀸𑀪𑀸𑀯𑁄 𑀦𑀲𑁆𑀲 𑀯𑀺𑀪𑀸𑀲𑀸𑀥𑀺𑀓𑀸𑀭𑀸. 𑀦𑀦𑁆𑀤 𑀲𑀫𑀺𑀤𑁆𑀥𑀺𑀬𑀁, 𑀪𑀽𑀯𑀸𑀤𑀺.

𑀤𑁆𑀯𑀬𑀁 ¶ 𑀅𑀬𑁆𑀬𑀺𑀓𑀸𑀬𑀁. 𑀫𑀸𑀢𑀼𑀬𑀸 𑀫𑀸𑀢𑀸 𑀫𑀸𑀢𑀸𑀫𑀳𑀻. 𑀧𑀺𑀢𑀽𑀦𑀁 𑀧𑀺𑀢𑀭𑀺 𑀘 𑀫𑀸𑀢𑀭𑀺 𑀘 𑀆𑀫𑀳𑀁 𑀬𑀤𑀸𑀤𑀺𑀦𑀸, 𑀦𑀤𑀸𑀤𑀺. 𑀅𑀭𑀳 𑀧𑀽𑀚𑀸𑀬𑀁, 𑀡𑁆𑀯𑀼, 𑀭𑀳𑀲𑁆𑀲 𑀬𑁄, 𑀅𑀬 𑀕𑀢𑀺𑀫𑁆𑀳𑀺 𑀯𑀸, 𑀡𑁆𑀯𑀼, 𑀅𑀬𑁆𑀬𑀺𑀓𑀸.

𑀫𑀸𑀢𑀼𑀬𑀸 𑀪𑀸𑀢𑀸 𑀫𑀸𑀢𑀼𑀮𑁄 𑀦𑀸𑀫, 𑀫𑀸𑀢𑀼𑀬𑀸 𑀪𑀸𑀢𑀸 𑀫𑀸𑀢𑀼𑀮𑁄, 𑀫𑀸𑀢𑀼 𑀪𑀸𑀢𑀭𑀺 𑀉𑀮𑀧𑀘𑁆𑀘𑀬𑁄. 𑀅𑀲𑁆𑀲 𑀫𑀸𑀢𑀼𑀮𑀲𑁆𑀲 𑀧𑀚𑀸𑀧𑀢𑀺 𑀚𑀸𑀬𑀸 𑀫𑀸𑀢𑀼𑀮𑀸𑀦𑀻 𑀦𑀸𑀫, 𑀫𑀸𑀢𑀼𑀮𑀲𑁆𑀲 𑀪𑀭𑀺𑀬𑀸 𑀫𑀸𑀢𑀼𑀮𑀸𑀦𑀻, 𑀫𑀸𑀢𑀼𑀮𑀪𑀭𑀺𑀬𑀸𑀬𑀁 𑀆𑀦𑁄, 𑀦𑀤𑀸𑀤𑀺, 𑀅𑀣 𑀯𑀸 𑀫𑀸𑀢𑀼𑀮𑀲𑁆𑀲 𑀏𑀲𑀸 𑀫𑀸𑀢𑀼𑀮𑀸𑀦𑀻, 𑀈, 𑀅𑀲𑁆𑀲 𑀆𑀦𑁄.

𑁨𑁪𑁬. 𑀚𑀸𑀬𑀸𑀧𑀢𑀻𑀦𑀁 𑀤𑁆𑀯𑀺𑀦𑁆𑀦𑀁 𑀚𑀦𑀦𑀻 𑀫𑀸𑀢𑀸 𑀲𑀲𑁆𑀲𑀼 𑀯𑀼𑀢𑁆𑀢𑀸, 𑀲𑀲 𑀕𑀢𑀺𑀳𑀺𑀁𑀲𑀸𑀧𑀸𑀦𑁂𑀲𑀼. 𑀢𑀧𑁆𑀧𑀺𑀢𑀸 𑀢𑁂𑀲𑀁 𑀚𑀸𑀬𑀸𑀧𑀢𑀻𑀦𑀁 𑀧𑀺𑀢𑀸 𑀧𑀦 𑀲𑀲𑀼𑀭𑁄 𑀦𑀸𑀫, 𑀲𑀲𑀥𑀸𑀢𑀼𑀫𑁆𑀳𑀸 𑀉𑀭𑁄. 𑀪𑀕𑀺𑀦𑀺𑀬𑀸 𑀧𑀼𑀢𑁆𑀢𑁄 𑀧𑀦 𑀪𑀸𑀕𑀺𑀦𑁂𑀬𑁆𑀬𑁄 𑀦𑀸𑀫, 𑀪𑀕𑀺𑀦𑀺𑀬𑀸 𑀅𑀧𑀘𑁆𑀘𑀁 𑀪𑀸𑀕𑀺𑀦𑁂𑀬𑁆𑀬𑁄, 𑀡𑁂𑀬𑁆𑀬𑁄.

𑁨𑁪𑁭. 𑀤𑁆𑀯𑀬𑀁 𑀲𑀼𑀢𑀲𑁆𑀲, 𑀲𑀼𑀢𑀸𑀬 𑀘 𑀧𑀼𑀢𑁆𑀢𑁂𑀲𑀼. 𑀦𑀳 𑀩𑀦𑁆𑀥𑀦𑁂, 𑀭𑀺𑀢𑀼, 𑀦𑀻 𑀦𑀬𑁂 𑀯𑀸. 𑀧𑀼𑀢𑁆𑀢𑀲𑁆𑀲 𑀧𑀼𑀢𑁆𑀢𑁄 𑀧𑀧𑀼𑀢𑁆𑀢𑁄, 𑀢𑁆𑀢𑀮𑁄𑀧𑁄, 𑀉𑀲𑁆𑀲𑀢𑁆𑀢𑀜𑁆𑀘. 𑀲𑀸𑀫𑀺𑀪𑀸𑀢𑀸 𑀤𑁂𑀯𑀭𑁄 𑀦𑀸𑀫, 𑀅𑀣 𑀯𑀸 𑀲𑀸𑀫𑀺𑀪𑀸𑀢𑀸 𑀓𑀦𑀺𑀝𑁆𑀞𑁄 𑀲𑀸𑀫𑀺𑀦𑁄 𑀪𑀸𑀢𑀸 𑀤𑁂𑀯𑀭𑁄 𑀦𑀸𑀫. 𑀚𑁂𑀝𑁆𑀞𑁄 𑀢𑀼 𑀲𑀲𑀼𑀭𑁄 𑀏𑀯𑁄𑀘𑁆𑀘𑀢𑁂. 𑀤𑀺𑀯𑀼 𑀓𑀻𑀴𑀸𑀬𑀁, 𑀅𑀭𑁄.

𑀤𑁆𑀯𑀬𑀁 ¶ 𑀥𑀻𑀢𑀼𑀧𑀢𑀺𑀫𑁆𑀳𑀺. 𑀚𑀦 𑀚𑀦𑀦𑁂, 𑀭𑀺𑀢𑀼, 𑀅𑀲𑁆𑀲𑀸𑀢𑁆𑀢𑀁, 𑀦𑀲𑁆𑀲 𑀫𑀸𑀤𑁂𑀲𑁄 𑀘. 𑀤𑁆𑀯𑀬𑀁 𑀧𑀺𑀢𑀼𑀧𑀺𑀢𑀭𑀺. 𑀧𑀺𑀢𑀼𑀦𑁄 𑀧𑀺𑀢𑀸 𑀧𑀺𑀢𑀸𑀫𑀳𑁄.

𑁨𑁪𑁮. 𑀳𑀼𑀲𑀸𑀦𑁆𑀢𑀸𑀦𑀺 𑀧𑀤𑁂𑀦 𑀧𑀤𑁂𑀦 𑀦𑀸𑀫𑀸𑀦𑀺. 𑀫𑀸𑀢𑀼𑀬𑀸 𑀪𑀕𑀺𑀦𑀻 𑀫𑀸𑀢𑀼𑀘𑁆𑀙𑀸, 𑀘𑁆𑀙𑁄. 𑀧𑀺𑀢𑀼𑀦𑁄 𑀪𑀕𑀺𑀦𑀻 𑀧𑀺𑀢𑀼𑀘𑁆𑀙𑀸, 𑀧𑀺𑀢𑀼𑀪𑀕𑀺𑀦𑀻 𑀧𑀺𑀢𑀼𑀘𑁆𑀙𑀸 𑀪𑀯𑁂𑀢𑁆𑀬𑀢𑁆𑀣𑁄.

𑀧𑀺𑀢𑀸𑀫𑀳𑀲𑀤𑁆𑀤𑁄 𑀦 𑀓𑁂𑀯𑀮𑀁 𑀚𑀦𑀓𑀧𑀺𑀢𑀭𑀫𑁂𑀯 𑀯𑀤𑀢𑀺, 𑀅𑀣 𑀔𑁄 𑀚𑀦𑀓𑀧𑀺𑀢𑀼𑀧𑀺𑀢𑀸𑀤𑀬𑁄𑀧𑀻𑀢𑀺 𑀏𑀢𑁆𑀣𑀸𑀧𑀺 ‘‘𑀧𑀧𑀺𑀢𑀸𑀫𑀳𑁄’’ 𑀇𑀘𑁆𑀘𑀼𑀤𑀸𑀳𑀝𑁄. 𑀧𑀺𑀢𑀼𑀦𑁄 𑀅𑀬𑁆𑀬𑀓𑁄 𑀧𑀬𑁆𑀬𑀓𑁄, 𑀢𑀼𑀮𑁄𑀧𑁄. 𑀲𑀼 𑀲𑀯𑀦𑁂, 𑀡𑁆𑀳𑀸. 𑀡𑀺𑀲𑀫𑁆𑀳𑀺 𑀲𑀼𑀡𑀺𑀲𑀸. 𑀲𑀫𑁆𑀳𑀺 𑀳𑀼𑀲𑀸, 𑀳𑀢𑁆𑀢𑀁. 𑀲𑀩𑁆𑀩𑀢𑁆𑀭 ‘‘𑀇𑀢𑁆𑀣𑀺𑀬𑀫𑀢𑁄 𑀆𑀧𑀘𑁆𑀘𑀬𑁄’’𑀢𑀺 𑀆.

𑁨𑁪𑁯. 𑀘𑀢𑀼𑀓𑁆𑀓𑀁 𑀏𑀓𑁄𑀤𑀭𑁂 𑀪𑀸𑀢𑀭𑀺. 𑀲𑀫𑀸𑀦𑁄𑀤𑀭𑁂 𑀞𑀺𑀢𑁄 𑀲𑁄𑀤𑀭𑀺𑀬𑁄, 𑀲𑀫𑀸𑀦𑀲𑁆𑀲 𑀲𑁄. 𑀲𑀫𑀸𑀦𑁄 𑀕𑀩𑁆𑀪𑁄 𑀲𑀕𑀩𑁆𑀪𑁄, 𑀢𑀢𑁆𑀭 𑀪𑀯𑁄 𑀲𑀕𑀩𑁆𑀪𑁄, 𑀡𑁄. 𑀲𑀫𑀸𑀦𑁄𑀤𑀭𑁂 𑀚𑀸𑀢𑁄 𑀲𑁄𑀤𑀭𑁄. 𑀲𑀫𑀸𑀦𑁄𑀤𑀭𑁂 𑀚𑀸𑀢𑁄 𑀲𑀳𑀚𑁄. 𑀲𑀳𑀲𑀤𑁆𑀤𑁄 𑀢𑀼𑀮𑁆𑀬𑀯𑀘𑀦𑁄.

𑀫𑀸𑀢𑀸𑀧𑀺𑀢𑀽 𑀢𑁂 𑀤𑁆𑀯𑁂 𑀚𑀦𑀸 𑀧𑀺𑀢𑀭𑁄 𑀯𑀼𑀘𑁆𑀘𑀦𑁆𑀢𑁂. 𑀉𑀪𑀺𑀦𑁆𑀦𑀫𑁆𑀧𑀺 𑀚𑀦𑀓𑀩𑁆𑀬𑀧𑁆𑀧𑀤𑁂𑀲𑀦𑀺𑀬𑀢𑀢𑁆𑀢𑀸 𑀅𑀪𑁂𑀤𑀯𑀘𑀦𑀺𑀘𑁆𑀙𑀸𑀬𑀁 𑀧𑀺𑀢𑀼𑀢𑁆𑀢𑀫𑀢𑁆𑀣𑁂𑀯. 𑀦𑀦𑁆𑀯𑀪𑁂𑀤𑀸 𑀚𑀸𑀢𑀺, 𑀢𑀲𑁆𑀲𑀸 𑀘𑁄𑀪𑀬𑀢𑁆𑀭 𑀲𑀢𑁆𑀢𑀸𑀤𑁂𑀓𑀢𑁆𑀢𑀁, 𑀦 𑀘 𑀚𑀸𑀢𑀺𑀬𑀸 ¶ 𑀮𑀺𑀗𑁆𑀕𑀲𑀗𑁆𑀔𑁆𑀬𑀸 𑀪𑀯𑀦𑁆𑀢𑀺, 𑀅𑀤𑀩𑁆𑀩𑀢𑁆𑀢𑀸 𑀩𑀳𑀼𑀯𑀘𑀦𑀁 𑀦 𑀲𑀺𑀬𑀸𑀢𑀺? 𑀦𑁂𑀲 𑀤𑁄𑀲𑁄, 𑀦 𑀳𑀺 𑀚𑀸𑀢𑀺𑀧𑀤𑀢𑁆𑀣𑀺𑀓𑀲𑁆𑀲 𑀦 𑀤𑀩𑁆𑀩𑀁, 𑀤𑀩𑁆𑀩𑀧𑀤𑀢𑁆𑀣𑀺𑀓𑀲𑁆𑀲 𑀯𑀸 𑀦 𑀚𑀸𑀢𑀻𑀢𑀺. 𑀓𑀺𑀦𑁆𑀢𑀼𑀪𑀬𑁂𑀲𑀁𑀧𑁆𑀬𑀼𑀪𑀬𑀧𑀤𑀢𑁆𑀣𑁄 𑀇𑀳𑀸𑀢𑁆𑀣𑀯𑀺𑀲𑁂𑀲𑁄. 𑀚𑀸𑀢𑀺𑀧𑀤𑀢𑁆𑀣𑀺𑀓𑀲𑁆𑀲 𑀚𑀸𑀢𑀺 𑀧𑀥𑀸𑀦𑀪𑀽𑀢𑀸 𑀤𑀩𑁆𑀩𑀁 𑀕𑀼𑀡𑀪𑀽𑀢𑀁, 𑀤𑀩𑁆𑀩𑀧𑀤𑀢𑁆𑀣𑀺𑀓𑀲𑁆𑀲 𑀢𑀼 𑀯𑀺𑀧𑀭𑀺𑀬𑀬𑁄, 𑀢𑀢𑁆𑀭 𑀚𑀸𑀢𑀺𑀯𑀘𑀦𑀺𑀘𑁆𑀙𑀸𑀬𑀁 𑀤𑀩𑁆𑀩𑁂 𑀯𑀺𑀬 𑀮𑀺𑀗𑁆𑀕𑀲𑀗𑁆𑀔𑁆𑀬𑀸 𑀯𑀢𑁆𑀢𑀩𑁆𑀩𑀸, 𑀢𑀲𑁆𑀲 𑀘 𑀩𑀳𑀼𑀢𑁆𑀢𑀸 𑀩𑀳𑀼𑀯𑀘𑀦𑀁. 𑀧𑀼𑀩𑁆𑀩𑁂 𑀯𑀺𑀬𑀸𑀪𑁂𑀤𑀯𑀘𑀦𑀺𑀘𑁆𑀙𑀸𑀬𑀁 𑀧𑀼𑀢𑁆𑀢𑁄 𑀘 𑀥𑀻𑀢𑀸 𑀘 𑀧𑀼𑀢𑁆𑀢𑀸 𑀯𑀼𑀘𑁆𑀘𑀦𑁆𑀢𑁂, 𑀚𑀜𑁆𑀜𑀢𑁆𑀢𑀜𑁆𑀳𑀺 𑀧𑀼𑀢𑁆𑀢𑀩𑁆𑀬𑀧𑀤𑁂𑀲𑀦𑀺𑀬𑀢𑀁 𑀥𑀻𑀢𑀭𑀺𑀧𑁆𑀬𑀢𑁆𑀣𑀺, 𑀯𑀺𑀧𑀭𑀺𑀬𑀬𑁂 𑀢𑀼 𑀦 𑀪𑀯𑀢𑁆𑀬𑀦𑀪𑀺𑀥𑀸𑀦𑀢𑁄. 𑀪𑁂𑀤𑀯𑀘𑀦𑀺𑀘𑁆𑀙𑀸𑀬𑀁 𑀧𑀼𑀢𑁆𑀢𑀥𑀻𑀢𑀭𑁄𑀢𑀺 𑀪𑀯𑀢𑀺.

𑁨𑁫𑁦. 𑀲𑀲𑁆𑀲𑀼 𑀘 𑀲𑀲𑀼𑀭𑁄 𑀘 𑀲𑀲𑀼𑀭𑀸𑀢𑀺 𑀯𑀼𑀘𑁆𑀘𑀦𑁆𑀢𑁂. 𑀢𑀤𑀧𑀘𑁆𑀘𑁄𑀳𑀦𑀲𑀫𑁆𑀩𑀦𑁆𑀥𑀺𑀦𑀺𑀩𑀦𑁆𑀥𑀦𑀸 𑀳𑀺 𑀩𑁆𑀬𑀧𑁆𑀧𑀤𑁂𑀲𑁄 𑀲𑀲𑁆𑀲𑀼𑀬𑀫𑁆𑀧𑀺 𑀞𑀺𑀢𑁄. 𑀪𑁂𑀤𑀯𑀘𑀦𑀺𑀘𑁆𑀙𑀸𑀬𑀁 𑀢𑀼 𑀧𑀼𑀩𑁆𑀩𑁂 𑀯𑀺𑀬 𑀧𑀘𑁆𑀘𑀢𑁆𑀣𑀁 𑀲𑀤𑁆𑀤𑀦𑀺𑀯𑁂𑀲𑁄. 𑀪𑀸𑀢𑀸 𑀘 𑀪𑀕𑀺𑀦𑀻 𑀘 𑀪𑀸𑀢𑀭𑁄 𑀯𑀼𑀘𑁆𑀘𑀦𑁆𑀢𑁂. 𑀏𑀓𑀕𑀩𑁆𑀪𑁄𑀲𑀺𑀢𑀢𑁆𑀢𑀁 𑀪𑀸𑀢𑀼𑀩𑁆𑀬𑀧𑁆𑀧𑀤𑁂𑀲𑀦𑀺𑀬𑀢𑀁 𑀪𑀕𑀺𑀦𑀺𑀬𑀁𑀧𑁆𑀬𑀢𑁆𑀣𑀺. 𑀢𑀢𑁄 𑀏𑀓𑀕𑀩𑁆𑀪𑁄𑀲𑀺𑀢𑀢𑁆𑀢𑀲𑁆𑀲𑀸𑀪𑁂𑀤𑀯𑀘𑀦𑀺𑀘𑁆𑀙𑀸𑀬𑀁 𑀉𑀪𑁄 𑀪𑀸𑀢𑀭𑁄 𑀯𑀼𑀘𑁆𑀘𑀦𑁆𑀢𑁂. 𑀏𑀢𑁆𑀣 𑀘 𑀲𑀩𑁆𑀩𑀢𑁆𑀭𑀸𑀧𑀺 𑀯𑀺𑀭𑀽𑀧𑁂𑀓𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀤𑀼𑀯𑀺𑀥𑁄 𑀳𑀺 𑀏𑀓𑀲𑁂𑀲𑁄 𑀲𑀭𑀽𑀧𑀸𑀲𑀭𑀽𑀧𑀯𑀲𑁂𑀦. 𑀢𑀢𑁆𑀭 𑀲𑀭𑀽𑀧𑁂𑀓𑀲𑁂𑀲𑁂 𑀩𑀳𑀼𑀯𑀘𑀦𑀫𑁂𑀯, 𑀇𑀢𑀭𑀢𑁆𑀭 𑀧𑀦 𑀤𑁆𑀯𑀺𑀯𑀘𑀦𑀁, 𑀬𑀣𑀸 𑀧𑀼𑀭𑀺𑀲𑁄 𑀘 𑀧𑀼𑀭𑀺𑀲𑁄 𑀘 𑀧𑀼𑀭𑀺𑀲𑀸, 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀁, 𑀫𑀸𑀢𑀸 𑀘 𑀧𑀺𑀢𑀸 𑀘 𑀧𑀺𑀢𑀭𑁄𑀢𑀺.

𑀩𑀸𑀮𑁆𑀬𑀬𑁄𑀩𑁆𑀩𑀦𑀯𑀼𑀟𑁆𑀠𑀢𑁆𑀢𑀸𑀦𑀺 𑀢𑀻𑀡𑀺 𑀯𑀬𑀸𑀦𑀺. 𑀢𑀢𑁆𑀭 𑀢𑀺𑀓𑀁 𑀩𑀸𑀮𑁆𑀬𑁂. 𑀤𑁆𑀯𑀬𑀁 𑀬𑁄𑀩𑁆𑀩𑀦𑁂. 𑀩𑀸𑀮𑀲𑁆𑀲 𑀪𑀸𑀯𑁄 𑀩𑀸𑀮𑀢𑁆𑀢𑀁, 𑀢𑁆𑀢𑀁. 𑀢𑀸𑀧𑀘𑁆𑀘𑀬𑁂 𑀩𑀸𑀮𑀢𑀸. 𑀡𑁆𑀬𑀫𑁆𑀳𑀺 𑀩𑀸𑀮𑁆𑀬𑀁, 𑀅𑀣 𑀯𑀸 𑀩𑀮 𑀧𑀸𑀡𑀦𑁂, 𑀩𑀮𑀦𑁆𑀢𑀺 𑀅𑀲𑁆𑀲𑀲𑀺𑀢𑀧𑀲𑁆𑀲𑀲𑀺𑀢𑀫𑀢𑁆𑀢𑁂𑀦 ¶ 𑀧𑀡𑀦𑁆𑀢𑀻𑀢𑀺 𑀩𑀸𑀮𑀸, 𑀩𑀮𑁆𑀬𑀦𑁆𑀢𑁂 𑀲𑀁𑀯𑀭𑀻𑀬𑀦𑁆𑀢𑁂𑀢𑀺 𑀯𑀸 𑀩𑀸𑀮𑀸, 𑀩𑀮 𑀲𑀁𑀯𑀭𑀡𑁂. 𑀢𑁂𑀲𑀁 𑀪𑀸𑀯𑁄 𑀩𑀸𑀮𑀢𑁆𑀢𑀸𑀤𑀺. 𑀬𑀼𑀯𑀲𑁆𑀲 𑀪𑀸𑀯𑁄 𑀬𑁄𑀩𑁆𑀩𑀜𑁆𑀜𑀁, 𑀬𑁄𑀩𑁆𑀩𑀦𑀜𑁆𑀘, 𑀪𑀸𑀯𑁂 𑀡𑁆𑀬𑁄, 𑀡𑁄 𑀘, 𑀅𑀣 𑀯𑀸 𑀬𑀼 𑀫𑀺𑀲𑁆𑀲𑀦𑁂, 𑀬𑀼, 𑀉𑀲𑁆𑀲 𑀉𑀯𑀸𑀤𑁂𑀲𑁄, 𑀯𑀼𑀤𑁆𑀥𑀺. 𑀢𑁂𑀲𑀁 𑀪𑀸𑀯𑁄 𑀬𑁄𑀩𑁆𑀩𑀜𑁆𑀜𑀸𑀤𑀺.

𑁨𑁫𑁧. 𑀬𑁂 𑀚𑀭𑀸𑀓𑀢𑀸 𑀲𑀼𑀓𑁆𑀓𑀸 𑀓𑁂𑀲𑀸𑀤𑀬𑁄, 𑀢𑁂 𑀧𑀮𑀺𑀢𑀁 𑀦𑀸𑀫 𑀲𑀺𑀬𑀼𑀁, 𑀢𑁂𑀲𑀁 𑀯𑀸 𑀬𑀁 𑀲𑀼𑀓𑁆𑀓𑀢𑁆𑀢𑀁, 𑀢𑀁 𑀧𑀮𑀺𑀢𑀁 𑀦𑀸𑀫. 𑀧𑀘 𑀧𑀸𑀓𑁂, 𑀇𑀢𑁄, 𑀘𑀲𑁆𑀲 𑀮𑀢𑁆𑀢𑀜𑁆𑀘.

𑀤𑁆𑀯𑀬𑀁 𑀯𑀮𑀺𑀧𑀮𑀺𑀢𑀸𑀤𑀺𑀫𑀢𑀺 𑀓𑀸𑀬𑀧𑀭𑀺𑀧𑀸𑀓𑁂. 𑀚𑀻𑀬𑀦𑁆𑀢𑀺 𑀯𑀼𑀟𑁆𑀠𑀸 𑀪𑀯𑀦𑁆𑀢𑀺 𑀅𑀲𑁆𑀲𑀁 𑀚𑀭𑀸, 𑀚𑀭 𑀯𑀬𑁄𑀳𑀸𑀦𑀺𑀫𑁆𑀳𑀺, 𑀚𑀭𑀸 𑀏𑀯 𑀚𑀭𑀢𑀸, 𑀲𑀓𑀢𑁆𑀣𑁂 𑀢𑀸𑀧𑀘𑁆𑀘𑀬𑁄. 𑀯𑀺𑀲𑁆𑀲𑀲𑀸𑀢𑀺𑀧𑀺 𑀚𑀭𑀸𑀬 𑀦𑀸𑀫𑀁. 𑀯𑀺𑀲𑁂𑀲𑁂𑀦 𑀲𑀁𑀲𑀢𑁂 𑀅𑀥𑁄 𑀧𑀸𑀢𑀬𑀢𑀻𑀢𑀺 𑀯𑀺𑀲𑁆𑀲𑀲𑀸. 𑀲𑀁𑀲𑀢𑀺’𑀭𑀬𑀁 𑀧𑀫𑀸𑀤𑀢𑁆𑀣𑁄, 𑀅𑀯𑀲𑀁𑀲𑀦𑀢𑁆𑀣𑁄 𑀘, 𑀇𑀳 𑀅𑀯𑀲𑀁𑀲𑀦𑀢𑁆𑀣𑁄, 𑀦𑀺𑀕𑁆𑀕𑀳𑀻𑀢𑀮𑁄𑀧𑁄, 𑀤𑁆𑀯𑀺𑀢𑁆𑀢𑀜𑁆𑀘.

𑀩𑀸𑀮𑁆𑀬𑀬𑁄𑀩𑁆𑀩𑀦𑀯𑀼𑀟𑁆𑀠𑀢𑁆𑀢𑀸𑀦𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑀺. 𑀇𑀤𑀸𑀦𑀺 𑀢𑀩𑁆𑀩𑀢𑀺𑀦𑀸𑀫𑀸𑀦𑁆𑀬𑀸𑀳. 𑀢𑀢𑁆𑀭 𑀅𑀤𑁆𑀥𑀁 𑀙𑀸𑀧𑀲𑀸𑀫𑀜𑁆𑀜𑁂. 𑀧𑀼𑀣, 𑀧𑀣 𑀯𑀺𑀢𑁆𑀣𑀸𑀭𑁂, 𑀉𑀓𑁄, 𑀧𑀼𑀣𑀼𑀓𑁄, 𑀧𑀮 𑀕𑀫𑀦𑁂, 𑀡𑁆𑀯𑀼, 𑀅𑀲𑁆𑀲𑀺𑀢𑁆𑀢𑀁, 𑀤𑁆𑀯𑀺𑀢𑁆𑀢𑀜𑁆𑀘, 𑀧𑀺𑀮𑁆𑀮𑀓𑁄. 𑀙𑀼𑀧 𑀲𑀫𑁆𑀨𑀲𑁆𑀲𑁂, 𑀉𑀲𑁆𑀲𑀸𑀢𑁆𑀢𑀁, 𑀙𑀸𑀧𑁄. 𑀓𑀼𑀫𑀸𑀭 𑀓𑀻𑀴𑀸𑀬𑀁, 𑀓𑀼𑀫𑀸𑀭𑁄. 𑀩𑀮 𑀧𑀸𑀡𑀦𑁂, 𑀡𑁄, 𑀩𑀸𑀮𑁄, 𑀧𑀽 𑀧𑀯𑀦𑁂, 𑀢𑁄, 𑀲𑀓𑀢𑁆𑀣𑁂 𑀓𑁄, 𑀧𑁄𑀢𑀓𑁄, 𑀇𑀢𑁆𑀣𑀺𑀬𑀁 𑀧𑁄𑀢𑀓𑀻. 𑀧𑁄𑀢𑁄, 𑀲𑀸𑀯𑁄, 𑀲𑀸𑀯𑀓𑁄, 𑀅𑀩𑁆𑀪𑀓𑁄, 𑀟𑀺𑀫𑁆𑀪𑁄, 𑀲𑀼𑀲𑀼𑀓𑁄, 𑀲𑀼𑀲𑀼𑀇𑀘𑁆𑀘𑀸𑀤𑀻𑀦𑀺𑀧𑀺 𑀙𑀸𑀧𑀲𑀸𑀫𑀜𑁆𑀜𑀢𑁆𑀣𑀸𑀦𑀺.

𑁨𑁫𑁨. 𑀩𑀸𑀮𑀲𑀸𑀫𑀜𑁆𑀜𑀯𑀸𑀘𑀓𑀸𑀦𑀺 ¶ 𑀤𑀲𑁆𑀲𑁂𑀢𑁆𑀯𑀸 𑀯𑀺𑀲𑁂𑀲𑀩𑀸𑀮𑀦𑀸𑀫𑀸𑀦𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀣𑀼’’𑀘𑁆𑀘𑀸𑀤𑀺. 𑀉𑀢𑁆𑀢𑀸𑀦𑁄, 𑀉𑀢𑁆𑀢𑀸𑀦𑀁 𑀯𑀸 𑀲𑀬𑀢𑀻𑀢𑀺 𑀉𑀢𑁆𑀢𑀸𑀦𑀲𑀬𑁄. 𑀓𑀧𑀘𑁆𑀘𑀬𑁂 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁄. 𑀣𑀦𑀁 𑀧𑀺𑀯𑀢𑀻𑀢𑀺 𑀣𑀦𑀧𑁄, 𑀟𑀺𑀫𑁆𑀪𑀲𑀤𑁆𑀤𑁄𑀧𑁆𑀬𑀢𑁆𑀭.

𑁨𑁫𑁩. 𑀲𑀢𑁆𑀢𑀓𑀁 𑀢𑀭𑀼𑀡𑁂.

𑀆𑀲𑁄𑀴𑀲𑀸 𑀪𑀯𑁂 𑀩𑀸𑀮𑁄,

𑀢𑀭𑀼𑀡𑁄 𑀢𑀼 𑀢𑀢𑁄 𑀪𑀯𑁂;

𑀯𑀼𑀤𑁆𑀥𑁄 𑀢𑀼 𑀲𑀢𑁆𑀢𑀢𑁆𑀬𑀸𑀬𑀼𑀫𑁆𑀳𑀸,

𑀢𑀻𑀡𑀺 𑀯𑀬𑀸𑀦𑀺 𑀮𑀓𑁆𑀔𑀬𑁂.

𑀢𑀭 𑀢𑀭𑀡𑁂, 𑀉𑀡𑁄. 𑀯𑀬𑀲𑀺 𑀬𑁄𑀩𑁆𑀩𑀦𑁂 𑀢𑀺𑀝𑁆𑀞𑀢𑀻𑀢𑀺 𑀯𑀬𑀝𑁆𑀞𑁄, 𑀢𑁄, ‘‘𑀯𑀬𑁄 𑀩𑀸𑀮𑁆𑀬𑀸𑀤𑀺 𑀧𑀓𑁆𑀔𑀻 𑀘, 𑀬𑁄𑀩𑁆𑀩𑀦𑀜𑁆𑀘 𑀯𑀬𑁄 𑀓𑁆𑀯𑀘𑀻’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁬.𑁪𑁨] 𑀭𑀼𑀤𑁆𑀤𑁄, 𑀤𑀳 𑀪𑀲𑁆𑀫𑀻𑀓𑀭𑀡𑁂, 𑀅𑀭𑁄, 𑀬𑀼 𑀫𑀺𑀲𑁆𑀲𑀦𑁂, 𑀅, 𑀉𑀯𑀸𑀤𑁂𑀲𑁄, 𑀲𑀺𑀲𑁆𑀲𑀸𑀓𑀸𑀭𑁄. 𑀲𑀲 𑀧𑁆𑀮𑀼𑀢𑀕𑀢𑀺𑀫𑁆𑀳𑀺, 𑀉, 𑀅𑀲𑁆𑀲𑀼𑀢𑁆𑀢𑀁, 𑀲𑀼𑀲𑀼, 𑀢𑀭𑀼𑀡𑀲𑁆𑀲 𑀯𑀸 𑀧𑀸𑀝𑀺𑀧𑀤𑀺𑀓𑀲𑁆𑀲 𑀲𑀼𑀲𑁆𑀯𑀸𑀤𑁂𑀲𑁄. 𑀫𑀦𑀼𑀦𑁄 𑀅𑀧𑀘𑁆𑀘𑀁 𑀫𑀸𑀦𑀯𑁄, 𑀯𑀡𑁆𑀡𑀯𑀺𑀓𑀸𑀭𑁄, 𑀦𑀲𑁆𑀲 𑀡𑀢𑁆𑀢𑀁, 𑀫𑀸𑀡𑀯𑁄. 𑀓𑀼𑀘𑁆𑀙𑀸𑀬𑀁 𑀓𑀧𑀘𑁆𑀘𑀬𑁄, 𑀫𑀸𑀡𑀯𑀓𑁄𑀢𑀺 𑀲𑀺𑀤𑁆𑀥𑀁. 𑀯𑀼𑀢𑁆𑀢𑀜𑁆𑀘 𑁋

‘‘𑀅𑀧𑀘𑁆𑀘𑁂 𑀓𑀼𑀘𑁆𑀙𑀺𑀢𑁂 𑀫𑀽𑀴𑁆𑀳𑁂, 𑀫𑀦𑀼𑀢𑁄𑀲𑁆𑀲𑀕𑁆𑀕𑀺𑀓𑁄 𑀫𑀢𑁄’’𑀢𑀺 [𑀫𑀳𑀸𑀪𑀸𑀲𑁆𑀲 𑁪.𑁧.𑁧𑁬𑁧] 𑀤𑀭 𑀯𑀺𑀤𑀸𑀭𑀡𑁂, 𑀡𑁆𑀯𑀼.

𑀤𑁆𑀯𑀬𑀁 𑀲𑀼𑀔𑀯𑀟𑁆𑀠𑀺𑀢𑁂 𑀓𑀼𑀫𑀸𑀭𑁂, 𑀲𑀼𑀔𑁄 𑀓𑀼𑀫𑀸𑀭𑁄 𑀲𑀼𑀓𑀼𑀫𑀸𑀭𑁄, 𑀔𑀮𑁄𑀧𑁄, 𑀲𑀼𑀔𑁂𑀦 𑀏𑀥𑀢𑀺 𑀯𑀤𑁆𑀥𑀢𑀻𑀢𑀺 𑀲𑀼𑀔𑁂𑀥𑀺𑀢𑁄. ‘‘𑀲𑀼𑀔𑁄𑀘𑀺𑀢𑁄’’𑀢𑀺𑀧𑀺 ¶ 𑀧𑀸𑀞𑁄, 𑀲𑀼𑀔𑀁 𑀉𑀘𑀺𑀢𑀁 𑀲𑀫𑁆𑀧𑀺𑀡𑁆𑀟𑀺𑀢𑀁 𑀏𑀢𑁆𑀣𑀸𑀢𑀺 𑀲𑀼𑀔𑁄𑀘𑀺𑀢𑁄, 𑀉𑀘 𑀲𑀫𑀯𑀸𑀬𑁂.

𑁨𑁫𑁪-𑁨𑁫𑁫. 𑀤𑁆𑀯𑀺𑀧𑀸𑀤𑁂𑀦 𑀯𑀼𑀟𑁆𑀠𑀲𑁆𑀲 𑀦𑀸𑀫𑀸𑀦𑀺. 𑀆𑀬𑀼𑀫𑀳𑀢𑁆𑀢𑀁 𑀮𑀸𑀢𑀻𑀢𑀺 𑀫𑀳𑀮𑁆𑀮𑀓𑁄, 𑀡𑁆𑀯𑀼, 𑀤𑁆𑀯𑀺𑀢𑁆𑀢𑀁. 𑀯𑀟𑁆𑀠 𑀯𑀟𑁆𑀠𑀦𑁂, 𑀓𑀢𑁆𑀢𑀭𑀺 𑀢𑁄, 𑀢𑀲𑁆𑀲 𑀠𑁄, 𑀟𑁆𑀠𑀲𑁆𑀲 𑀟𑁄, 𑀅𑀲𑁆𑀲𑀼𑀢𑁆𑀢𑀁, 𑀥𑀸 𑀕𑀢𑀺𑀦𑀺𑀯𑀢𑁆𑀢𑀺𑀬𑀁, 𑀇𑀭𑁄, 𑀥𑀲𑁆𑀲 𑀣𑀢𑁆𑀢𑀁, 𑀇𑀲𑁆𑀲 𑀏𑀢𑁆𑀢𑀁. 𑀚𑀭 𑀯𑀬𑁄𑀳𑀸𑀦𑀺𑀫𑁆𑀳𑀺, 𑀓𑀢𑁆𑀢𑀭𑀺 𑀢𑁄, 𑀢𑀲𑁆𑀲 𑀇𑀦𑁆𑀦𑀸𑀤𑁂𑀲𑁄, 𑀥𑀸𑀢𑁆𑀯𑀦𑁆𑀢𑀮𑁄𑀧𑁄, 𑀡𑀢𑁆𑀢𑀜𑁆𑀘, 𑀚𑀺𑀡𑁆𑀡𑁄, 𑀲𑀓𑀢𑁆𑀣𑁂 𑀓𑀫𑁆𑀳𑀺 𑀚𑀺𑀡𑁆𑀡𑀓𑁄. 𑀧𑀓𑀢𑀁 𑀯𑀬𑁄 𑀬𑁄𑀩𑁆𑀩𑀦𑀫𑀲𑁆𑀲𑀸𑀢𑀺 𑀧𑀯𑀬𑁄𑀢𑀺𑀧𑀺 𑀯𑀼𑀟𑁆𑀠𑀲𑁆𑀲 𑀦𑀸𑀫𑀁.

𑀯𑀮𑀺𑀦𑀦𑁆𑀢𑀸𑀦𑀺 𑀧𑀸𑀤𑁂𑀦 𑀦𑀸𑀫𑀸𑀦𑀺. 𑀢𑀢𑁆𑀭 𑀢𑀺𑀓𑀁 𑀚𑁂𑀝𑁆𑀞𑀪𑀸𑀢𑀭𑀺. 𑀅𑀕𑁆𑀕𑁂 𑀧𑀼𑀭𑁂 𑀓𑀸𑀮𑁂, 𑀧𑀼𑀩𑁆𑀩𑁂 𑀘 𑀓𑀸𑀮𑁂 𑀚𑀸𑀬𑀢𑀻𑀢𑀺 𑀅𑀕𑁆𑀕𑀚𑁄, 𑀧𑀼𑀩𑁆𑀩𑀚𑁄 𑀘. 𑀅𑀬𑀜𑁆𑀘 𑀯𑀼𑀟𑁆𑀠𑁄 𑀅𑀬𑀜𑁆𑀘 𑀯𑀼𑀟𑁆𑀠𑁄, 𑀅𑀬𑀫𑀺𑀫𑁂𑀲𑀁 𑀯𑀺𑀲𑁂𑀲𑁂𑀦 𑀯𑀼𑀟𑁆𑀠𑁄𑀢𑀺 𑀚𑁂𑀝𑁆𑀞𑁄, 𑀯𑀼𑀟𑁆𑀠𑀲𑀤𑁆𑀤𑀸 𑀇𑀝𑁆𑀞𑀧𑀘𑁆𑀘𑀬𑁄, ‘‘𑀯𑀼𑀟𑁆𑀠𑀲𑁆𑀲 𑀚𑁄 𑀇𑀬𑀺𑀝𑁆𑀞𑁂𑀲𑀽’’𑀢𑀺 𑀯𑀼𑀟𑁆𑀠𑀲𑁆𑀲 𑀚𑁄. 𑀅𑀮𑁄𑀧𑁂 𑀧𑀭𑀲𑁆𑀲𑀸𑀲𑀯𑀡𑁆𑀡𑀢𑁆𑀢𑀁.

𑀢𑀺𑀓𑀁 𑀧𑀘𑁆𑀙𑀸𑀚𑀸𑀢𑁂 𑀪𑀸𑀢𑀭𑀺. 𑀅𑀬𑀜𑁆𑀘 𑀬𑀼𑀯𑀸 𑀅𑀬𑀜𑁆𑀘 𑀬𑀼𑀯𑀸, 𑀅𑀬𑀫𑀺𑀫𑁂𑀲𑀁 𑀯𑀺𑀲𑁂𑀲𑁂𑀦 𑀬𑀼𑀯𑀸𑀢𑀺 𑀓𑀦𑀺𑀝𑁆𑀞𑁄, 𑀓𑀦𑀺𑀬𑁄 [𑀓𑀡𑀺𑀝𑁆𑀞𑁄 𑀓𑀡𑀺𑀬𑁄 (𑀓.)] 𑀘. 𑀇𑀬𑀺𑀝𑁆𑀞𑁂𑀲𑀼 𑀬𑀼𑀯𑀲𑀤𑁆𑀤𑀲𑁆𑀲 𑀓𑀦𑀸𑀤𑁂𑀲𑁄 [𑀓𑀡𑀸𑀤𑁂𑀲𑁄 (𑀓.)]. 𑀅𑀦𑀼 𑀧𑀘𑁆𑀙𑀸𑀓𑀸𑀮𑁂 𑀚𑀸𑀢𑁄 𑀅𑀦𑀼𑀚𑁄. 𑀚𑀖𑀜𑁆𑀜𑁂 𑀧𑀘𑁆𑀙𑀸𑀓𑀸𑀮𑁂 𑀚𑀸𑀢𑁄 𑀚𑀖𑀜𑁆𑀜𑀚𑁄. 𑀅𑀧𑀭𑀲𑁆𑀫𑀺𑀁 𑀧𑀘𑁆𑀙𑀸𑀓𑀸𑀮𑁂 𑀚𑀸𑀢𑁄 𑀅𑀧𑀭𑀚𑁄𑀢𑀺 𑀤𑁆𑀯𑁂𑀧𑁆𑀬𑀢𑁆𑀭.

𑀯𑀮𑀺 ¶ 𑀲𑀺𑀣𑀺𑀮𑀁 𑀢𑀘𑁄 𑀘𑀫𑁆𑀫𑀁 𑀬𑀲𑁆𑀲 𑀯𑀮𑀺𑀢𑁆𑀢𑀘𑁄, 𑀤𑁆𑀯𑀺𑀢𑁆𑀢𑀁. 𑀯𑀮𑀺 𑀘𑀫𑁆𑀫𑀫𑁂𑀢𑀲𑁆𑀲𑀢𑁆𑀣𑀻𑀢𑀺 𑀯𑀮𑀺𑀦𑁄, 𑀇𑀦𑁄. 𑀉𑀢𑁆𑀢𑀸𑀦𑀲𑀬𑀸𑀤𑀬𑁄 𑀯𑀮𑀺𑀦𑀦𑁆𑀢𑀸 𑀯𑀸𑀘𑁆𑀘𑀮𑀺𑀗𑁆𑀕𑀢𑁆𑀢𑀸 𑀢𑀻𑀲𑀼 𑀮𑀺𑀗𑁆𑀕𑁂𑀲𑀼 𑀯𑀢𑁆𑀢𑀦𑁆𑀢𑀺, 𑀬𑀣𑀸 𑁋 𑀉𑀢𑁆𑀢𑀸𑀦𑀲𑀬𑁄 𑀩𑀸𑀮𑁄, 𑀉𑀢𑁆𑀢𑀸𑀦𑀲𑀬𑀸 𑀓𑀼𑀫𑀸𑀭𑀻, 𑀉𑀢𑁆𑀢𑀸𑀦𑀲𑀬𑀁 𑀦𑀧𑀼𑀁𑀲𑀓𑀁.

𑁨𑁫𑁬. 𑀧𑀜𑁆𑀘𑀓𑀁 𑀫𑀢𑁆𑀣𑀓𑁂. 𑀲𑀺 𑀲𑀬𑁂, 𑀲𑁄, 𑀤𑀻𑀖𑁄 𑀘, 𑀅𑀗𑁆𑀕𑁂𑀲𑀼 𑀉𑀢𑁆𑀢𑀫𑀗𑁆𑀕𑀢𑁆𑀢𑀸 𑀉𑀢𑁆𑀢𑀫𑀗𑁆𑀕𑀁, 𑀉𑀢𑁆𑀢𑀫𑁄 𑀘 𑀢𑀁 𑀅𑀗𑁆𑀕𑀜𑁆𑀘𑀸𑀢𑀺𑀧𑀺 𑀉𑀢𑁆𑀢𑀫𑀗𑁆𑀕𑀁. 𑀲𑀻𑀲𑀜𑁆𑀘 𑀉𑀢𑁆𑀢𑀫𑀗𑁆𑀕𑀜𑁆𑀘 𑀲𑀻𑀲𑁄𑀢𑁆𑀢𑀫𑀗𑁆𑀕𑀸𑀦𑀺. 𑀲𑀺 𑀲𑁂𑀯𑀸𑀬𑀁, 𑀭𑁄, 𑀲𑁂𑀯𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀺𑀭𑁄. 𑀫𑀼𑀤 𑀢𑁄𑀲𑁂, 𑀥𑁄. 𑀲𑀺𑀲𑁆𑀲𑀸𑀓𑀸𑀭𑁄. 𑀫𑀲 𑀆𑀫𑀲𑀦𑁂, 𑀢𑁆𑀣𑁄, 𑀲𑀓𑀢𑁆𑀣𑁂 𑀓𑁄 𑀘, 𑀫𑀲𑀺 𑀧𑀭𑀺𑀫𑀸𑀡𑁂 𑀯𑀸.

𑀧𑀚𑁆𑀚𑀤𑁆𑀥𑀁 𑀓𑁂𑀲𑁂. 𑀓𑁂 𑀫𑀢𑁆𑀣𑀓𑁂 𑀲𑁂𑀢𑀺 𑀢𑀺𑀝𑁆𑀞𑀢𑀻𑀢𑀺 𑀓𑁂𑀲𑁄. 𑀲𑀢𑁆𑀢𑀫𑀺𑀬𑀸𑀮𑁄𑀧𑁄, 𑀓𑀢𑀺 𑀙𑁂𑀤𑀦𑁂, 𑀅𑀮𑁄, 𑀅𑀲𑁆𑀲𑀼𑀢𑁆𑀢𑀁. 𑀯𑀮 𑀲𑀁𑀯𑀭𑀡𑁂, 𑀓𑀫𑁆𑀫𑀦𑀺 𑀡𑀧𑀘𑁆𑀘𑀬𑁄, 𑀯𑀸𑀮𑁄. 𑀉𑀢𑁆𑀢𑀫𑀗𑁆𑀕𑁂 𑀲𑀻𑀲𑁂 𑀭𑀼𑀳𑀢𑀻𑀢𑀺 𑀉𑀢𑁆𑀢𑀫𑀗𑁆𑀕𑀭𑀼𑀳𑁄. 𑀫𑀼𑀤𑁆𑀥𑀦𑀺 𑀚𑀸𑀬𑀢𑀻𑀢𑀺 𑀫𑀼𑀤𑁆𑀥𑀚𑁄. 𑀯𑀸𑀮𑁄 𑀘 𑀉𑀢𑁆𑀢𑀫𑀗𑁆𑀕𑀭𑀼𑀳𑁄 𑀘 𑀫𑀼𑀤𑁆𑀥𑀚𑁄 𑀘𑁂𑀢𑀺 𑀇𑀢𑀭𑀻𑀢𑀭𑀬𑁄𑀕𑀤𑁆𑀯𑀦𑁆𑀤𑁄. 𑀘𑀺𑀓𑀼𑀭𑁄, 𑀓𑀘𑁄𑀢𑀺𑀧𑁆𑀬𑀢𑁆𑀭. 𑀘𑀺 𑀘𑀬𑀦𑁂, 𑀓𑀼𑀭 𑀲𑀤𑁆𑀤𑁂, 𑀅𑀦𑁂𑀓𑀢𑁆𑀣𑀢𑁆𑀢𑀸 𑀙𑁂𑀤𑀦𑁂. 𑀯𑀟𑁆𑀠𑀫𑀸𑀦𑁄 𑀘𑀺𑀓𑀭𑀻𑀬𑀢𑁂𑀢𑀺 𑀘𑀺𑀓𑀼𑀭𑁄, 𑀓𑀘 𑀩𑀦𑁆𑀥𑀦𑁂, 𑀅.

𑁨𑁫𑁭. 𑀓𑀼𑀲𑀼𑀫𑀕𑀩𑁆𑀪𑀸 𑀓𑁂𑀲𑀸 𑀓𑁂𑀲𑀘𑀽𑀴𑀸 𑀫𑀼𑀢𑁆𑀢𑀺𑀓𑀸𑀤𑀺𑀦𑀸 𑀩𑀳𑀺 𑀲𑀁𑀬𑀢𑀸 𑀲𑀦𑁆𑀣𑀢𑀸 𑀥𑀫𑁆𑀫𑀺𑀮𑁄 𑀦𑀸𑀫. 𑀏𑀓𑀢𑁄 𑀓𑀢𑁆𑀯𑀸 𑀥𑀭𑀻𑀬𑀢𑀺 ¶ 𑀩𑀦𑁆𑀥𑀻𑀬𑀢𑀻𑀢𑀺 𑀥𑀫𑁆𑀫𑀺𑀮𑁄, 𑀓𑀫𑁆𑀫𑀦𑀺 𑀇𑀮𑁄. 𑀥𑀫𑁆𑀫𑁂𑀦 𑀦𑀸𑀦𑀸𑀤𑁂𑀲𑀺𑀬𑀫𑀦𑀼𑀲𑁆𑀲𑀸𑀦𑀁 𑀲𑀫𑀸𑀘𑀸𑀭𑁂𑀦 𑀇𑀮𑀢𑀻𑀢𑀺 𑀯𑀸 𑀥𑀫𑁆𑀫𑀺𑀮𑁄, 𑀇𑀮 𑀕𑀫𑀦𑁂.

𑀤𑁆𑀯𑀬𑀁 𑀓𑀼𑀫𑀸𑀭𑀸𑀦𑀁 𑀲𑀺𑀔𑀸𑀧𑀜𑁆𑀘𑀓𑁂, 𑀘𑀽𑀴𑀢𑁆𑀢𑀬𑁂𑀢𑀺 𑀓𑁂𑀘𑀺. 𑀓𑀸𑀓𑀸𑀦𑀁 𑀧𑀓𑁆𑀔𑀲𑀡𑁆𑀞𑀸𑀦𑀢𑁆𑀢𑀸 𑀓𑀸𑀓𑀧𑀓𑁆𑀔𑁄. 𑀲𑀺𑀔𑀸 𑀏𑀯 𑀲𑀺𑀔𑀡𑁆𑀟𑀓𑁄, 𑀲𑀓𑀢𑁆𑀣𑁂 𑀓𑁄. 𑀲𑀺𑀔𑀸𑀲𑀺𑀔𑀡𑁆𑀟𑀲𑀤𑁆𑀤𑀸𑀦𑀫𑀪𑁂𑀤𑀢𑁆𑀢𑀸𑀬𑁂𑀯 𑀳𑀺 ‘‘𑀲𑀺𑀔𑀡𑁆𑀟𑀻, 𑀲𑀺𑀔𑀻 𑀘𑀸’’𑀢𑀺 𑀫𑁄𑀭𑁄 𑀯𑀼𑀢𑁆𑀢𑁄.

𑀧𑀸𑀲𑁄, 𑀳𑀢𑁆𑀣𑁄 𑀘 𑀇𑀫𑁂 𑀤𑁆𑀯𑁂 𑀓𑁂𑀲𑀘𑀬𑁂 𑀓𑁂𑀲𑀧𑀭𑀺𑀬𑀸𑀬𑀢𑁄 𑀧𑀭𑁂 𑀳𑀼𑀢𑁆𑀯𑀸 𑀓𑁂𑀲𑀸𑀦𑀁 𑀓𑀮𑀸𑀧𑁂 𑀯𑀢𑁆𑀢𑀦𑁆𑀢𑀺, 𑀦 𑀓𑁂𑀯𑀮𑀸, 𑀬𑀣𑀸 𑁋 𑀓𑁂𑀲𑀧𑀸𑀲𑁄 𑀓𑁂𑀲𑀳𑀢𑁆𑀣𑁄 𑀇𑀘𑁆𑀘𑀸𑀤𑀺. 𑀧𑀸 𑀭𑀓𑁆𑀔𑀡𑁂, 𑀧𑀸𑀢𑀺 𑀭𑀓𑁆𑀔𑀢𑀺 𑀅𑀯𑀬𑀯𑁂𑀢𑀺 𑀧𑀸𑀲𑁄, 𑀲𑁄, 𑀧𑀲 𑀩𑀦𑁆𑀥𑀦𑁂𑀢𑀺 𑀓𑁂𑀘𑀺, 𑀡𑁄. 𑀳𑀦 𑀕𑀢𑀺𑀬𑀁, 𑀅𑀯𑀬𑀯𑀸 𑀦𑀺𑀳𑀦𑀦𑁆𑀢𑀺 𑀏𑀢𑁆𑀣𑀸𑀢𑀺 𑀳𑀢𑁆𑀣𑁄, 𑀣𑁄, 𑀧𑀓𑁆𑀔𑁄𑀧𑁆𑀬𑀢𑁆𑀭.

𑀢𑀸𑀧𑀲𑀸𑀦𑀁 𑀯𑀢𑀻𑀦𑀁 𑀢𑀳𑀺𑀁 𑀓𑁂𑀲𑀘𑀬𑁂 𑀚𑀝𑀸𑀲𑀤𑁆𑀤𑁄 𑀯𑀼𑀘𑁆𑀘𑀢𑀺, 𑀚𑀝 𑀚𑀝𑀦𑁂, 𑀚𑀝 𑀲𑀗𑁆𑀖𑀸𑀢𑁂 𑀯𑀸, ‘‘𑀇𑀢𑁆𑀣𑀺𑀬𑀫𑀢𑀺𑀬𑀯𑁄 𑀯𑀸’’𑀢𑀺 𑀅.

𑁨𑁫𑁮. 𑀧𑁄𑀲𑀺𑀢𑀪𑀢𑁆𑀢𑀸𑀤𑀻𑀳𑀺 𑀬𑀸 𑀩𑀦𑁆𑀛𑀢𑁂, 𑀢𑀢𑁆𑀭 𑀯𑁂𑀡𑀻, 𑀧𑀯𑁂𑀡𑀻 𑀘. 𑀯𑀻 𑀧𑀚𑀦𑁂, 𑀧𑀚𑀦𑀁 𑀕𑀩𑁆𑀪𑀯𑀺𑀫𑁄𑀓𑁆𑀔𑁄, 𑀯𑀻 𑀢𑀦𑁆𑀢𑀲𑀦𑁆𑀢𑀸𑀦𑁂 𑀯𑀸, 𑀡𑀻. 𑀧𑀓𑁆𑀔𑁂 𑀧𑀯𑁂𑀡𑀻.

𑀤𑁆𑀯𑀬𑀁 𑀲𑀻𑀲𑀫𑀚𑁆𑀛𑀝𑁆𑀞𑀘𑀽𑀴𑀸𑀬𑀁. 𑀘𑀽𑀴 𑀲𑀜𑁆𑀘𑁄𑀤𑀦𑁂, 𑀘𑀽𑀴 𑀳𑀸𑀯𑀓𑀭𑀡𑁂 𑀯𑀸, 𑀅. 𑀲𑀺𑀔𑀸 𑀯𑀼𑀢𑁆𑀢𑀸. 𑀓𑁂𑀲𑀧𑀸𑀲𑀻𑀧𑁆𑀬𑀢𑁆𑀭, 𑀦𑀤𑀸𑀤𑀺.

𑀦𑀸𑀭𑀻𑀦𑀁 ¶ 𑀓𑁂𑀲𑀫𑀚𑁆𑀛𑀫𑁆𑀳𑀺 𑀧𑀤𑁆𑀥𑀢𑀺 𑀉𑀚𑀼𑀕𑀢𑀫𑀕𑁆𑀕𑁄 𑀲𑀻𑀫𑀦𑁆𑀢𑁄𑀢𑀺 𑀫𑀢𑁄 𑀓𑀣𑀺𑀢𑁄. 𑀲𑀻𑀫𑀲𑁆𑀲 𑀅𑀦𑁆𑀢𑁄 𑀲𑀻𑀫𑀦𑁆𑀢𑁄, 𑀲𑀻 𑀲𑀬𑁂 𑀯𑀸, 𑀅𑀦𑁆𑀢𑁄, 𑀫𑀚𑁆𑀛𑁂 𑀫𑀓𑀸𑀭𑀯𑀡𑁆𑀡𑀸𑀕𑀫𑁄.

𑁨𑁫𑁯. 𑀢𑀺𑀓𑀁 𑀮𑁄𑀫𑁂. 𑀮𑀽 𑀙𑁂𑀤𑀦𑁂, 𑀯𑀟𑁆𑀠𑀫𑀸𑀦𑀁 𑀮𑀽𑀬𑀢𑁂𑀢𑀺 𑀮𑁄𑀫𑀁, 𑀫𑁄. 𑀢𑀦𑀼𑀫𑁆𑀳𑀺 𑀭𑀼𑀳𑀢𑀻𑀢𑀺 𑀢𑀦𑀼𑀭𑀼𑀳𑀁, 𑀅. 𑀭𑀼𑀳 𑀚𑀦𑀦𑁂, 𑀭𑀽𑀳 𑀧𑀸𑀢𑀼𑀪𑀸𑀯𑁂 𑀯𑀸, 𑀫𑁄, 𑀳𑀮𑁄𑀧𑁄, 𑀑𑀢𑁆𑀢𑀜𑁆𑀘, 𑀮𑀽 𑀙𑁂𑀤𑀦𑁂 𑀯𑀸, 𑀫𑁄, 𑀮𑀲𑁆𑀲 𑀭𑀢𑁆𑀢𑀁, 𑀭𑁄𑀫𑀁. 𑀅𑀓𑁆𑀔𑀺𑀫𑁆𑀳𑀺 𑀚𑀸𑀢𑀁 𑀮𑁄𑀫𑀁 𑀧𑀫𑁆𑀳𑀁, 𑀧𑀔𑀼𑀫𑀜𑁆𑀘𑁄𑀘𑁆𑀘𑀢𑁂. 𑀧𑀫𑀺𑀦𑁄𑀢𑀺 𑀢𑁂𑀦𑀸𑀢𑀺 𑀧𑀫𑁆𑀳𑀁, 𑀧𑀧𑀼𑀩𑁆𑀩𑁄 𑀫𑀸 𑀧𑀭𑀺𑀫𑀸𑀡𑁂, 𑀳𑀧𑀘𑁆𑀘𑀬𑁄. 𑀅𑀓𑁆𑀔𑀺𑀦𑁄 𑀧𑀓𑁆𑀔𑀤𑁆𑀯𑀬𑁂 𑀚𑀸𑀢𑀁 𑀧𑀔𑀼𑀫𑀁, 𑀉𑀫𑁄, 𑀓𑀮𑁄𑀧𑁄 𑀘.

𑀧𑀼𑀫𑀫𑀼𑀔𑁂 𑀧𑀼𑀭𑀺𑀲𑀸𑀦𑀁 𑀫𑀼𑀔𑁂 𑀯𑀼𑀢𑁆𑀢𑀁 [𑀧𑀯𑀼𑀝𑁆𑀞𑀁 (𑀓.)] 𑀮𑁄𑀫𑀁 𑀫𑀲𑁆𑀲𑀼 𑀦𑀸𑀫, 𑀫𑀲 𑀆𑀫𑀲𑀦𑁂, 𑀲𑀼, 𑀫𑀲𑁆𑀲𑀼.

𑀢𑀺𑀓𑀁 𑀪𑀫𑀼𑀫𑁆𑀳𑀺. 𑀪𑀫 𑀅𑀦𑀯𑀝𑁆𑀞𑀸𑀦𑁂, 𑀊, 𑀫𑀮𑁄𑀧𑁄, 𑀪𑀽. 𑀉𑀫𑁆𑀳𑀺 𑀪𑀫𑀼, 𑀓𑀧𑀘𑁆𑀘𑀬𑁂 𑀪𑀫𑀼𑀓𑁄. 𑀪𑀫𑀼𑀓𑀲𑀳𑀘𑀭𑀡𑀢𑁄 𑀪𑀫𑀼 𑀧𑀼𑀮𑁆𑀮𑀺𑀗𑁆𑀕𑁄.

𑁨𑁬𑁦. 𑀢𑀺𑀓𑀁 𑀦𑁂𑀢𑁆𑀢𑁄𑀤𑀓𑁂. 𑀔𑀺𑀧 𑀧𑁂𑀭𑀡𑁂, 𑀧𑁄, 𑀇𑀲𑁆𑀲𑀢𑁆𑀢𑀁. 𑀦𑁂𑀢𑁆𑀢𑁂 𑀚𑀸𑀢𑀁 𑀚𑀮𑀁 𑀦𑁂𑀢𑁆𑀢𑀚𑀮𑀁. 𑀅𑀲 𑀅𑀥𑁄𑀧𑀢𑀦𑁂, 𑀲𑀼, 𑀅𑀲𑁆𑀲𑀼. 𑀦𑁂𑀢𑁆𑀢𑀚𑀮𑀜𑁆𑀘 𑀅𑀲𑁆𑀲𑀼 𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀅𑀲𑁆𑀲𑀼 𑀦𑀧𑀼𑀁𑀲𑀓𑁂.

𑀤𑁆𑀯𑀬𑀁 ¶ 𑀅𑀓𑁆𑀔𑀺𑀧𑀼𑀢𑁆𑀢𑀮𑀺𑀓𑀸𑀬𑀁. 𑀦𑁂𑀢𑁆𑀢𑁂 𑀤𑀺𑀲𑁆𑀲𑀫𑀸𑀦𑀸 𑀢𑀸𑀭𑀸 𑀦𑁂𑀢𑁆𑀢𑀢𑀸𑀭𑀸. 𑀓𑀜𑁆𑀜𑀸𑀲𑀤𑁆𑀤𑀢𑁄 𑀢𑀤𑁆𑀥𑀺𑀢𑁄 𑀅𑀧𑀘𑁆𑀘𑀬𑁄, 𑀓𑀜𑁆𑀜𑀸𑀲𑀤𑁆𑀤𑀲𑁆𑀲 𑀓𑀦𑀻𑀦𑀸𑀤𑁂𑀲𑁄, 𑀇𑀢𑁆𑀣𑀺𑀓𑀢𑀸𑀓𑀸𑀭𑀧𑀭𑁂 𑀓𑁂 𑀧𑀼𑀩𑁆𑀩𑁄 𑀅𑀓𑀸𑀭𑁄 𑀇𑀓𑀸𑀭𑀫𑀸𑀧𑀚𑁆𑀚𑀢𑁂 [𑀓𑀸𑀢𑀦𑁆𑀢 𑁨.𑁨.𑁬𑁫], 𑀓𑀦𑀻𑀦𑀺𑀓𑀸. 𑀢𑀸𑀭𑀓𑀸𑀧𑁆𑀬𑀢𑁆𑀭.

𑀙𑀓𑁆𑀓𑀁 𑀫𑀼𑀔𑀯𑀺𑀯𑀭𑁂, 𑀓𑀯𑀬𑁄 𑀧𑀦 𑀢𑀤𑀼𑀧𑀮𑀓𑁆𑀔𑀺𑀢𑁂𑀧𑀺 𑀲𑀫𑀼𑀤𑀸𑀬𑁂 𑀬𑀼𑀚𑁆𑀚𑀦𑁆𑀢𑁂. 𑀯𑀤 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁, 𑀓𑀭𑀡𑁂 𑀬𑀼. 𑀫𑀼 𑀩𑀦𑁆𑀥𑀦𑁂, 𑀔𑁄, 𑀑𑀢𑁆𑀢𑀸𑀪𑀸𑀯𑁄 𑀦𑀺𑀧𑀸𑀢𑀦𑀸, 𑀫𑀼𑀔𑀁. 𑀲𑀩𑁆𑀩𑀥𑀭𑀓𑀢𑁂 𑀧𑀦 𑀔𑀜𑁆𑀜𑀢𑁂𑀢𑀺 𑀥𑀸𑀢𑀼𑀦𑀸 𑀫𑀼𑀔𑀦𑁆𑀢𑀺 𑀦𑀺𑀧𑀸𑀢𑀺𑀢𑀁, 𑀔𑀦𑀼 𑀅𑀯𑀤𑀸𑀭𑀡𑁂. 𑀢𑀼𑀟𑀺 𑀢𑁄𑀟𑀦𑁂, 𑀅. 𑀢𑀦𑀼 𑀯𑀺𑀢𑁆𑀣𑀸𑀭𑁂 𑀯𑀸, 𑀟𑁄, 𑀅𑀲𑁆𑀲𑀼𑀢𑁆𑀢𑀁. 𑀯𑀤𑀢𑀺 𑀢𑁂𑀦𑀸𑀢𑀺 𑀯𑀢𑁆𑀢𑀁, 𑀢𑁄, 𑀯𑀼𑀘𑁆𑀘𑀢𑁂 𑀅𑀦𑁂𑀦𑀸𑀢𑀺 𑀯𑀸 𑀯𑀢𑁆𑀢𑀁. 𑀯𑀤 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁, 𑀢𑁄. 𑀮𑀧 𑀯𑀘𑀦𑁂, 𑀓𑀭𑀡𑁂 𑀬𑀼. 𑀆𑀦𑀦𑁆𑀢𑀺 𑀅𑀲𑀦𑁆𑀢𑀺 𑀅𑀦𑁂𑀦𑀸𑀢𑀺 𑀆𑀦𑀦𑀁, 𑀅𑀦 𑀧𑀸𑀡𑀦𑁂, 𑀬𑀼. 𑀅𑀲𑁆𑀲𑀁𑀧𑁆𑀬𑀢𑁆𑀭. 𑀅𑀲 𑀪𑀓𑁆𑀔𑀦𑁂. 𑀓𑀭𑀡𑁂 𑀲𑁄.

𑁨𑁬𑁧. 𑀅𑀟𑁆𑀠𑀁 𑀤𑀦𑁆𑀢𑁂. 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀚𑀸𑀬𑀢𑁂𑀢𑀺 𑀤𑁆𑀯𑀺𑀚𑁄. 𑀮𑀧𑀦𑁂 𑀫𑀼𑀔𑁂 𑀚𑀸𑀬𑀢𑀻𑀢𑀺 𑀮𑀧𑀦𑀚𑁄. 𑀤𑀸 𑀅𑀯𑀔𑀡𑁆𑀟𑀦𑁂, 𑀤𑀸𑀬𑀢𑀺 𑀪𑀓𑁆𑀔𑀫𑀦𑁂𑀦𑀸𑀢𑀺 𑀤𑀦𑁆𑀢𑁄, 𑀅𑀦𑁆𑀢𑁄, 𑀤𑀲 𑀅𑀤𑀦𑁂 𑀯𑀸, 𑀤𑀲𑀦𑁆𑀢𑀺 𑀪𑁄𑀚𑁆𑀚𑀫𑀦𑁂𑀦𑀸𑀢𑀺 𑀤𑀦𑁆𑀢𑁄, 𑀅𑀦𑁆𑀢𑁄, 𑀥𑀸𑀢𑁆𑀯𑀦𑁆𑀢𑀮𑁄𑀧𑁄. 𑀤𑀫𑀼 𑀤𑀫𑀦𑁂 𑀯𑀸, 𑀢𑁄. 𑀤𑀁𑀲 𑀤𑀁𑀲𑀦𑁂, 𑀤𑀁𑀲𑀢𑁂 𑀯𑀺𑀮𑀺𑀔𑁆𑀬𑀢𑁂 𑀪𑀓𑁆𑀔𑀫𑀦𑁂𑀦𑀸𑀢𑀺 𑀤𑀁𑀲𑀦𑁄, 𑀬𑀼. 𑀭𑀤 𑀯𑀺𑀮𑁂𑀔𑀦𑁂, 𑀬𑀼, 𑀭𑀤𑀦𑁄. 𑀅𑀫𑁆𑀳𑀺 𑀭𑀤𑁄.

𑀤𑀦𑁆𑀢𑀪𑁂𑀤𑀲𑁆𑀫𑀺𑀁 𑀤𑀦𑁆𑀢𑀯𑀺𑀲𑁂𑀲𑁂 𑀤𑀸𑀞𑀸𑀲𑀤𑁆𑀤𑁄. 𑀇𑀢𑁆𑀣𑀺𑀮𑀺𑀗𑁆𑀕𑁄𑀬𑀁. 𑀤𑀁𑀲𑀥𑀸𑀢𑀼𑀢𑁄 𑀞𑁄, 𑀤𑀁𑀲𑀺𑀲𑁆𑀲 𑀘 𑀤𑀸, 𑀤𑀸𑀞𑀸, 𑀫𑀼𑀤𑁆𑀥𑀚𑀤𑀼𑀢𑀺𑀬𑁄𑀬𑀁. 𑀅𑀓𑁆𑀔𑀺𑀓𑁄𑀝𑀻𑀲𑀼 ¶ 𑀯𑀸𑀫𑀤𑀓𑁆𑀔𑀺𑀡𑀦𑁂𑀢𑁆𑀢𑀸𑀦𑀁 𑀅𑀦𑁆𑀢𑁂𑀲𑀼 𑀅𑀧𑀸𑀗𑁆𑀕𑁄 𑀯𑀢𑁆𑀢𑀢𑀺, 𑀲𑀭𑀻𑀭𑀗𑁆𑀕𑀲𑀗𑁆𑀔𑀸𑀢𑀲𑁆𑀲 𑀓𑀡𑁆𑀡𑀲𑁆𑀲 𑀅𑀧 𑀲𑀫𑀻𑀧𑀁 𑀅𑀧𑀸𑀗𑁆𑀕𑁄.

𑁨𑁬𑁨. 𑀘𑀢𑀼𑀓𑁆𑀓𑀁 𑀑𑀝𑁆𑀞𑁂. 𑀤𑀦𑁆𑀢𑁂 𑀆𑀯𑀭𑀢𑀺 𑀙𑀸𑀤𑀬𑀢𑀻𑀢𑀺 𑀤𑀦𑁆𑀢𑀸𑀯𑀭𑀡𑀁. 𑀉𑀲 𑀤𑀸𑀳𑁂, 𑀢𑁄, ‘‘𑀲𑀸𑀤𑀺𑀲𑀦𑁆𑀢𑀧𑀼𑀘𑁆𑀙𑀪𑀦𑁆𑀚𑀳𑀁𑀲𑀸𑀤𑀻𑀳𑀺 𑀝𑁆𑀞𑁄’’𑀢𑀺 𑀲𑀳𑀸𑀤𑀺𑀩𑁆𑀬𑀜𑁆𑀚𑀦𑁂𑀦 𑀝𑁆𑀞𑁄, 𑀑𑀢𑁆𑀢𑀤𑁆𑀯𑀺𑀢𑁆𑀢𑀸𑀦𑀺, 𑀑𑀝𑁆𑀞𑁄. 𑀕𑀤𑁆𑀭𑀪𑁂𑀧𑁆𑀬𑀬𑀁. 𑀅𑀣 𑀯𑀸 𑀉𑀲 𑀤𑀸𑀳𑁂, 𑀝𑁆𑀞𑁄, 𑀑𑀢𑁆𑀢𑀤𑁆𑀯𑀺𑀢𑁆𑀢𑀸𑀤𑀺, 𑀉𑀪𑀬𑀢𑁆𑀭𑀸𑀧𑀺 𑀫𑀼𑀤𑁆𑀥𑀚𑀤𑀼𑀢𑀺𑀬𑁄, 𑀈𑀲𑀁 𑀓𑀺𑀜𑁆𑀘𑀺 𑀓𑀸𑀮𑀁 𑀥𑀸𑀭𑁂𑀢𑀺 𑀪𑀓𑁆𑀔𑀫𑁂𑀢𑁆𑀣𑀸𑀢𑀺 𑀅𑀥𑀭𑁄, 𑀈𑀲𑀢𑁆𑀣𑁄 𑀳𑁆𑀬𑀢𑁆𑀭 𑀅𑀓𑀸𑀭𑁄.

‘‘𑀅 𑀧𑀼𑀫𑁂 𑀫𑀸𑀥𑀯𑁂 𑀜𑁂𑀬𑁆𑀬𑁄,

𑀧𑀝𑀺𑀲𑁂𑀥𑁂 𑀢𑀤𑀩𑁆𑀬𑀬𑀁;

𑀈𑀲𑀢𑁆𑀣𑁂 𑀘 𑀯𑀺𑀭𑀼𑀤𑁆𑀥𑀢𑁆𑀣𑁂,

𑀲𑀤𑀺𑀲𑀢𑁆𑀣𑁂 𑀧𑀬𑁄𑀕𑀢𑁄’’𑀢𑀺. 𑁋

𑀳𑀺 𑀏𑀓𑀓𑁆𑀔𑀭𑀓𑁄𑀲𑁂 𑀯𑀼𑀢𑁆𑀢𑀁. 𑀤𑀲𑀦𑁂 𑀤𑀦𑁆𑀢𑁂 𑀙𑀸𑀤𑀬𑀢𑀻𑀢𑀺 𑀤𑀲𑀦𑀘𑁆𑀙𑀤𑁄. 𑀏𑀢𑁆𑀣 𑀓𑁂𑀘𑀺 𑀅𑀥𑀭𑀲𑀤𑁆𑀤𑁂𑀦 𑀳𑁂𑀝𑁆𑀞𑀺𑀫𑁄𑀝𑁆𑀞𑀫𑁂𑀯𑀸𑀳𑀼, 𑀢𑁂𑀲𑀁 𑀯𑀘𑀦𑀁 ‘‘𑀦𑁂𑀢𑁆𑀢𑀦𑁆𑀢𑀸𑀥𑀭𑀧𑀸𑀡𑀺𑀧𑀸𑀤𑀬𑀼𑀕𑀮𑁂𑀳𑀺’’𑀘𑁆𑀘𑀸𑀤𑀻𑀳𑀺 𑀫𑀳𑀸𑀓𑀯𑀺𑀧𑀬𑁄𑀕𑁂𑀳𑀺 𑀅𑀲𑀁𑀲𑀦𑁆𑀤𑀦𑀢𑁄 𑀦 𑀕𑀳𑁂𑀢𑀩𑁆𑀩𑀁.

𑀢𑀺𑀓𑀁 𑀓𑀧𑁄𑀮𑁂. 𑀕𑀟𑀺 𑀯𑀤𑀦𑁂𑀓𑀤𑁂𑀲𑁂, 𑀅, 𑀥𑀸𑀢𑀼𑀧𑁆𑀧𑀓𑁆𑀭𑀺𑀬𑀢𑁆𑀣𑀜𑁆𑀳𑀺 𑀥𑀸𑀢𑀼𑀧𑀸𑀞𑀯𑀘𑀦𑀁, 𑀲𑀩𑁆𑀩𑀢𑁆𑀭𑀸𑀧𑁆𑀬𑁂𑀯𑀁. 𑀓𑁂𑀦 𑀚𑀮𑁂𑀦 𑀧𑀽𑀭𑀺𑀬𑀢𑁂𑀢𑀺 𑀓𑀧𑁄𑀮𑁄, 𑀅𑀮𑁄, 𑀓𑀧 𑀅𑀘𑁆𑀙𑀸𑀤𑀦𑁂 𑀯𑀸, 𑀑𑀮𑁄, 𑀓𑀧𑁄𑀮𑁄, 𑀦𑀤𑀸𑀤𑀺. 𑀕𑀡𑁆𑀟𑀻. 𑀅𑀥𑀭𑀸 𑀅𑀥𑁄𑀪𑀸𑀕𑁄 𑀘𑀼𑀩𑀼𑀓𑀁 𑀦𑀸𑀫, 𑀘𑀺𑀩𑀼𑀓𑀁𑀧𑁆𑀬𑀢𑁆𑀭. 𑀘𑀺𑀩𑀼 𑀑𑀮𑀫𑁆𑀩𑀓𑁂, 𑀡𑁆𑀯𑀼, 𑀅𑀲𑁆𑀲𑀼𑀢𑁆𑀢𑀁.

𑁨𑁬𑁩. 𑀤𑁆𑀯𑀬𑀁 ¶ 𑀕𑀻𑀯𑀸𑀬 𑀧𑀼𑀭𑁄𑀪𑀸𑀕𑁂. 𑀕𑀮 𑀅𑀤𑀦𑁂, 𑀓𑀭𑀡𑁂 𑀅, 𑀕𑀺𑀮 𑀕𑀺𑀮𑀦𑁂 𑀯𑀸, 𑀕𑀺𑀮𑀢𑀺 𑀅𑀦𑁂𑀦𑀸𑀢𑀺 𑀕𑀮𑁄, 𑀇𑀲𑁆𑀲𑀢𑁆𑀢𑀁. 𑀓𑀡 𑀲𑀤𑁆𑀤𑀢𑁆𑀣𑁄 𑀤𑀡𑁆𑀟𑀓𑁄 𑀥𑀸𑀢𑀼, 𑀞𑁄, 𑀓𑀡𑁆𑀞𑁄, 𑀫𑀼𑀤𑁆𑀥𑀚𑀤𑀼𑀢𑀺𑀬𑁄𑀬𑀁.

𑀢𑀺𑀓𑀁 𑀏𑀓𑀢𑁆𑀣𑀁. 𑀕𑀸 𑀲𑀤𑁆𑀤𑁂, 𑀈𑀯𑁄. 𑀓𑀁 𑀲𑀻𑀲𑀁 𑀥𑀭𑀢𑀻𑀢𑀺 𑀓𑀦𑁆𑀥𑀭𑀸. 𑀲𑀺𑀭𑀁 𑀥𑀭𑀢𑀻𑀢𑀺 𑀲𑀺𑀭𑁄𑀥𑀭𑀸, 𑀲𑀺𑀭𑁄 𑀥𑀺𑀬𑁆𑀬𑀢𑁂 𑀅𑀲𑁆𑀲𑀦𑁆𑀢𑀺 𑀯𑀸 𑀲𑀺𑀭𑁄𑀥𑀭𑀸, 𑀥𑀸 𑀕𑀢𑀺𑀦𑀺𑀯𑀢𑁆𑀢𑀺𑀬𑀁, 𑀅𑀭𑁄.

𑀲𑀼𑀯𑀡𑁆𑀡𑀫𑀬𑁄 𑀆𑀮𑀺𑀗𑁆𑀕𑁄 𑀫𑀼𑀭𑀚𑀪𑁂𑀤𑁄, 𑀢𑁂𑀦 𑀲𑀦𑁆𑀦𑀺𑀪𑀸 𑀲𑀤𑀺𑀲𑀸 𑀬𑀸 𑀕𑀻𑀯𑀸, 𑀲𑀸 𑀓𑀫𑁆𑀩𑀼𑀕𑀻𑀯𑀸 𑀫𑀢𑀸, 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀫𑁂𑀢𑀁. 𑀅𑀣 𑀯𑀸 𑀬𑀸 𑀕𑀻𑀯𑀸 𑀢𑀻𑀳𑀺 𑀮𑁂𑀔𑀸𑀳𑀺 𑀅𑀗𑁆𑀓𑀺𑀢𑀸 𑀮𑀓𑁆𑀔𑀺𑀢𑀸, 𑀲𑀸 𑀓𑀫𑁆𑀩𑀼𑀕𑀻𑀯𑀸 𑀫𑀢𑀸, 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀫𑁂𑀢𑀜𑁆𑀘. 𑀓𑀫𑁆𑀩𑀼 𑀯𑀼𑀘𑁆𑀘𑀢𑀺 𑀲𑀼𑀯𑀡𑁆𑀡𑀁, 𑀓𑀫𑁆𑀩𑀼𑀫𑀬𑁂𑀦 𑀆𑀮𑀺𑀗𑁆𑀕𑁂𑀦 𑀲𑀦𑁆𑀦𑀺𑀪𑀸 𑀕𑀻𑀯𑀸 𑀓𑀫𑁆𑀩𑀼𑀕𑀻𑀯𑀸, 𑀓𑀫𑁆𑀩 𑀲𑀁𑀯𑀭𑀡𑁂, 𑀉, 𑀓𑀫𑁆𑀩𑀼.

𑁨𑁬𑁪. 𑀢𑀺𑀓𑀁 𑀔𑀦𑁆𑀥𑁂. 𑀅𑀦 𑀕𑀢𑀺𑀬𑀁, 𑀲𑁄. 𑀪𑀼𑀚𑀸𑀦𑀁 𑀲𑀺𑀭𑁄 𑀫𑀢𑁆𑀣𑀓𑀁 𑀪𑀼𑀚𑀲𑀺𑀭𑁄. 𑀓𑀁 𑀫𑀢𑁆𑀣𑀓𑀁 𑀤𑀥𑀸𑀢𑀻𑀢𑀺 𑀓𑀦𑁆𑀥𑁄, 𑀲𑁄 𑀏𑀯 𑀔𑀦𑁆𑀥𑁄 𑀓𑀓𑀸𑀭𑀲𑁆𑀲 𑀔𑀓𑀸𑀭𑀓𑀭𑀡𑀯𑀲𑁂𑀦, 𑀔𑀫𑀢𑀺 𑀪𑀸𑀭𑀦𑁆𑀢𑀺 𑀯𑀸 𑀔𑀦𑁆𑀥𑁄, 𑀔𑀫𑀼 𑀲𑀳𑀦𑁂, 𑀢𑁄, 𑀢𑀲𑁆𑀲 𑀥𑁄, 𑀫𑀲𑁆𑀲 𑀦𑁄, 𑀦𑀺𑀕𑁆𑀕𑀳𑀻𑀢𑀁 𑀯𑀸 ¶ . 𑀢𑀲𑁆𑀲𑀦𑁆𑀥𑀺 𑀢𑀲𑁆𑀲 𑀔𑀦𑁆𑀥𑀲𑁆𑀲 𑀫𑀚𑁆𑀛𑀁 𑀚𑀢𑁆𑀢𑀼 𑀦𑀸𑀫, 𑀬𑀁 𑀔𑀦𑁆𑀥𑀸𑀦𑀁 𑀫𑀚𑁆𑀛𑁂 𑀢𑀺𑀝𑁆𑀞𑀢𑀺. 𑀚𑀦 𑀚𑀦𑀦𑁂, 𑀚𑀭 𑀯𑀬𑁄𑀳𑀸𑀦𑀺𑀫𑁆𑀳𑀺 𑀯𑀸, 𑀢𑀼, 𑀚𑀢𑁆𑀢𑀼, 𑀢𑀁 𑀦𑀧𑀼𑀁𑀲𑀓𑀁.

𑀤𑁆𑀯𑀬𑀁 𑀩𑀸𑀳𑀼𑀫𑀽𑀮𑁂. 𑀩𑀸𑀳𑀽𑀦𑀁 𑀪𑀼𑀚𑀸𑀦𑀁 𑀫𑀽𑀮𑀁 𑀩𑀸𑀳𑀼𑀫𑀽𑀮𑀁. 𑀓𑀘 𑀩𑀦𑁆𑀥𑀦𑁂, 𑀙𑁄. 𑀅𑀲𑁆𑀲 𑀓𑀘𑁆𑀙𑀲𑁆𑀲 𑀅𑀥𑁄𑀪𑀸𑀕𑀝𑁆𑀞𑀸𑀦𑀁 𑀧𑀲𑁆𑀲𑀁 𑀯𑀼𑀘𑁆𑀘𑀢𑀺, 𑀤𑀺𑀲 𑀧𑁂𑀓𑁆𑀔𑀦𑁂, 𑀅𑀧𑀘𑁆𑀘𑀬𑁄, 𑀤𑀺𑀲𑀲𑁆𑀲 𑀧𑀲𑁆𑀲𑀸𑀤𑁂𑀲𑁄.

𑁨𑁬𑁫. 𑀢𑀺𑀓𑀁 𑀩𑀸𑀳𑀼𑀫𑁆𑀳𑀺. 𑀯𑀳𑀢𑀺 𑀅𑀦𑁂𑀦𑀸𑀢𑀺 𑀯𑀸𑀳𑀼, 𑀯𑀸𑀳𑀼 𑀏𑀯 𑀩𑀸𑀳𑀼, 𑀓𑀼 [𑀡𑁆𑀯𑀸𑀤𑀺 𑁬]. 𑀪𑀼𑀜𑁆𑀚𑀢𑁂 𑀅𑀦𑁂𑀦𑀸𑀢𑀺 𑀪𑀼𑀚𑁄. 𑀪𑀼𑀚 𑀧𑀸𑀮𑀦𑀚𑁆𑀛𑁄𑀳𑀸𑀭𑁂𑀲𑀼. 𑀩𑀸𑀳𑀼 𑀘 𑀪𑀼𑀚𑁄 𑀘𑁂𑀢𑀺 𑀤𑁆𑀯𑀦𑁆𑀤𑁄, 𑀏𑀢𑁂 𑀤𑁆𑀯𑁂 𑀤𑁆𑀯𑀻𑀲𑀼, 𑀇𑀢𑁆𑀣𑀺𑀬𑀁 𑀪𑀼𑀚𑀸. 𑀯𑀳𑀢𑀺 𑀬𑀸𑀬𑀸𑀢𑀺 𑀩𑀸𑀳𑀸. 𑀅𑀧𑀭𑁄𑀲𑀤𑁆𑀤𑁄𑀧𑁆𑀬𑀢𑁆𑀭 [𑀅 𑀧𑀸𑀭𑁄𑀲𑀤𑁆𑀤𑁄𑀧𑁆𑀬𑀢𑁆𑀭 (𑀓.), 𑀅 𑀧𑀯𑁂𑀝𑁆𑀞𑀲𑀤𑁆𑀤𑁄𑀧𑁆𑀬𑀢𑁆𑀭 (?)].

𑀢𑀺𑀓𑀁 𑀳𑀢𑁆𑀣𑁂. 𑀳𑀲 𑀳𑀲𑀦𑁂, 𑀣𑁄. 𑀳𑀭 𑀳𑀭𑀡𑁂 𑀯𑀸. 𑀦𑀓𑁆𑀔𑀢𑁆𑀢𑁂𑀧𑁆𑀬𑀬𑀁. 𑀓𑀭 𑀓𑀭𑀡𑁂, 𑀅. 𑀧𑀡 𑀩𑁆𑀬𑀯𑀳𑀸𑀭𑀣𑀼𑀢𑀻𑀲𑀼, 𑀇. 𑀧𑀸 𑀭𑀓𑁆𑀔𑀦𑁂 𑀯𑀸, 𑀡𑀺. 𑀓𑀭𑁄 𑀘 𑀧𑀸𑀡𑀺 𑀘 𑀓𑀭𑀧𑀸𑀡𑀬𑁄. 𑀧𑀜𑁆𑀘𑀲𑀸𑀔𑁄, 𑀲𑀬𑁄𑀧𑁆𑀬𑀢𑁆𑀭.

𑀧𑀓𑁄𑀝𑁆𑀞𑀦𑁆𑀢𑁄 𑀳𑀢𑁆𑀣𑀕𑀡𑁆𑀞𑀺 𑀫𑀡𑀺𑀩𑀦𑁆𑀥𑁄 𑀦𑀸𑀫. 𑀧𑀓𑁄𑀝𑁆𑀞𑁄 𑀦𑀸𑀫 𑀆𑀫𑀡𑀺𑀩𑀦𑁆𑀥𑀁 𑀓𑀧𑁆𑀧𑀭𑀲𑁆𑀲 𑀅𑀥𑁄𑀪𑀸𑀕𑁄. 𑀫𑀡𑀺𑀯𑀺𑀓𑀢𑀺𑀁 𑀩𑀦𑁆𑀥𑀢𑀺 𑀏𑀢𑁆𑀣𑀸𑀢𑀺 𑀫𑀡𑀺𑀩𑀦𑁆𑀥𑁄. 𑀓𑀼𑀲 𑀅𑀓𑁆𑀓𑁄𑀲𑁂, 𑀞𑁄, 𑀧𑀓𑁄𑀝𑁆𑀞𑁄.

𑀤𑁆𑀯𑀬𑀁 𑀪𑀼𑀚𑀫𑀚𑁆𑀛𑀕𑀡𑁆𑀞𑀺𑀫𑁆𑀳𑀺. 𑀓𑀧𑀼 𑀳𑀺𑀁𑀲𑀸𑀬𑀁, 𑀅𑀭𑁄. 𑀓𑀼𑀧𑁆𑀧𑀭𑁄𑀢𑀺𑀧𑀺 𑀧𑀸𑀞𑁄, 𑀢𑀤𑀸 𑀅𑀲𑁆𑀲𑀼𑀢𑁆𑀢𑀁. 𑀓𑀧𑀼 𑀳𑀺𑀁𑀲𑀸𑀬𑀁, 𑀑𑀡𑀺, 𑀓𑀧𑁄𑀡𑀺, 𑀇𑀢𑁆𑀣𑀺𑀬𑀁. 𑀓𑀨𑁄𑀡𑀻𑀧𑁆𑀬𑀢𑁆𑀭, 𑀢𑀢𑁆𑀣 𑀧𑀲𑁆𑀲 𑀨𑀢𑁆𑀢𑀁.

𑁨𑁬𑁬. 𑀧𑀸𑀡𑀺𑀲𑁆𑀲 ¶ 𑀧𑀸𑀡𑀺𑀢𑀮𑀲𑁆𑀲 𑀲𑀫𑁆𑀩𑀦𑁆𑀥𑀻𑀦𑀁 𑀫𑀡𑀺𑀩𑀦𑁆𑀥𑀓𑀦𑀺𑀝𑁆𑀞𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀦𑁆𑀢𑀭𑀁 𑀩𑀳𑀺𑀝𑁆𑀞𑀸𑀦𑀁 𑀓𑀭𑀪𑁄 𑀯𑀼𑀘𑁆𑀘𑀢𑀺, 𑀬𑁂𑀦 𑀓𑀼𑀫𑀸𑀭𑀓𑀸 𑀲𑀢𑁆𑀣𑀁 𑀓𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀧𑀳𑀭𑀦𑁆𑀢𑀺, 𑀓𑀭 𑀳𑀺𑀁𑀲𑀸𑀬𑀁, 𑀅𑀪𑁄, 𑀓𑀭 𑀓𑀭𑀡𑁂 𑀯𑀸.

𑀤𑁆𑀯𑀬𑀁 𑀅𑀗𑁆𑀕𑀼𑀮𑀺𑀫𑀢𑁆𑀢𑁂. 𑀓𑀭𑀲𑁆𑀲 𑀧𑀸𑀡𑀺𑀲𑁆𑀲 𑀲𑀸𑀔𑀸 𑀓𑀭𑀲𑀸𑀔𑀸. 𑀅𑀕𑀺 𑀕𑀢𑁆𑀬𑀢𑁆𑀣𑁄, 𑀅𑀗𑁆𑀕 𑀕𑀫𑀦𑀢𑁆𑀣𑁄 𑀯𑀸, 𑀉𑀮𑀺. 𑀇𑀢𑁆𑀣𑀺𑀮𑀺𑀗𑁆𑀕𑁄𑀬𑀁 [(𑀦𑀤𑀸𑀤𑀺) (𑀓.)], 𑀅𑀗𑁆𑀕𑀼𑀮𑀺.

𑀢𑀸 𑀅𑀗𑁆𑀕𑀼𑀮𑀺𑀬𑁄 𑀧𑀜𑁆𑀘𑀧𑁆𑀧𑀪𑁂𑀤𑀸, 𑀬𑀣𑀸 𑁋 𑀅𑀗𑁆𑀕𑀼𑀝𑁆𑀞𑁄 𑀢𑀚𑁆𑀚𑀦𑀻 𑀫𑀚𑁆𑀛𑀺𑀫𑀸 𑀅𑀦𑀸𑀫𑀺𑀓𑀸 𑀓𑀦𑀺𑀝𑁆𑀞𑀸 𑀘𑁂𑀢𑀺 𑀓𑀫𑀸 𑀲𑀺𑀬𑀼𑀁. 𑀅𑀗𑁆𑀕 𑀕𑀫𑀦𑀢𑁆𑀣𑁄, 𑀅𑀲𑁆𑀲𑀼𑀢𑁆𑀢𑀁, 𑀅𑀕𑁆𑀕𑁂 𑀧𑀼𑀭𑁂 𑀢𑀺𑀝𑁆𑀞𑀢𑀻𑀢𑀺 𑀯𑀸 𑀅𑀗𑁆𑀕𑀼𑀝𑁆𑀞𑁄, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄, 𑀅𑀲𑁆𑀲𑀼𑀢𑁆𑀢𑀜𑁆𑀘. 𑀢𑀚𑁆𑀚 𑀳𑀺𑀁𑀲𑀸𑀬𑀁, 𑀢𑀚𑁆𑀚𑁂𑀢𑀺 𑀬𑀸𑀬, 𑀲𑀸 𑀢𑀚𑁆𑀚𑀦𑀻, 𑀬𑀼, 𑀦𑀤𑀸𑀤𑀺. 𑀫𑀚𑁆𑀛𑁂 𑀢𑀺𑀝𑁆𑀞𑀢𑀻𑀢𑀺 𑀫𑀚𑁆𑀛𑀺𑀫𑀸. 𑀦𑀢𑁆𑀣𑀺 𑀦𑀸𑀫𑀫𑀲𑁆𑀲𑀸𑀢𑀺 𑀅𑀦𑀸𑀫𑀺𑀓𑀸, 𑀲𑀓𑀢𑁆𑀣𑁂 𑀓𑁄. 𑀅𑀢𑀺𑀲𑀬𑁂𑀦 𑀔𑀼𑀤𑁆𑀤𑀓𑀸𑀢𑀺 𑀓𑀦𑀺𑀝𑁆𑀞𑀸. 𑀬𑀼𑀯𑀧𑁆𑀧𑀸𑀦𑀁 𑀓𑀦, 𑀓𑀡 𑀯𑀸 𑀇𑀬𑀺𑀝𑁆𑀞𑁂𑀲𑀼.

𑁨𑁬𑁭. 𑀢𑀚𑁆𑀚𑀦𑁆𑀬𑀸𑀤𑀻𑀳𑀺 𑀬𑀼𑀢𑁂 𑀅𑀗𑁆𑀕𑀼𑀝𑁆𑀞𑁂 𑀢𑀢𑁂 𑀧𑀲𑀸𑀭𑀺𑀢𑁂 𑀲𑀢𑀺 𑀧𑀤𑁂𑀲𑀸𑀤𑀺𑀓𑀸 𑀘𑀢𑀲𑁆𑀲𑁄 𑀲𑀜𑁆𑀜𑀸 𑀓𑀫𑀢𑁄 𑀲𑀺𑀬𑀼𑀁, 𑀬𑀣𑀸 𑁋 𑀢𑀚𑁆𑀚𑀦𑀻𑀬𑀼𑀢𑁂 ¶ 𑀅𑀗𑁆𑀕𑀼𑀝𑁆𑀞𑁂 𑀢𑀢𑁂 𑀧𑀤𑁂𑀲𑁄. 𑀤𑀺𑀲 𑀧𑁂𑀓𑁆𑀔𑀦𑁂. 𑀫𑀚𑁆𑀛𑀺𑀫𑀬𑀼𑀢𑁂 𑀅𑀗𑁆𑀕𑀼𑀝𑁆𑀞𑁂 𑀢𑀢𑁂 𑀢𑀸𑀮𑁄, 𑀢𑀮 𑀧𑀢𑀺𑀝𑁆𑀞𑀸𑀬𑀁. 𑀅𑀦𑀸𑀫𑀺𑀓𑀸𑀲𑀳𑀺𑀢𑁂 𑀅𑀗𑁆𑀕𑀼𑀝𑁆𑀞𑁂 𑀢𑀢𑁂 𑀕𑁄𑀓𑀡𑁆𑀡𑁄, 𑀕𑁄𑀓𑀡𑁆𑀡𑀲𑀤𑀺𑀲𑀢𑁆𑀢𑀸, 𑀢𑀧𑁆𑀧𑀫𑀸𑀡𑀢𑁆𑀢𑀸 𑀯𑀸 𑀕𑁄𑀓𑀡𑁆𑀡𑁄, 𑀅𑀣 𑀯𑀸 𑀕𑁄𑀓𑀡𑁆𑀡𑁄 𑀦𑀸𑀫 𑀏𑀓𑁄 𑀫𑀺𑀕𑀯𑀺𑀲𑁂𑀲𑁄, 𑀢𑀓𑁆𑀓𑀡𑁆𑀡𑀲𑀤𑀺𑀲𑀧𑁆𑀧𑀫𑀸𑀡𑀢𑁆𑀢𑀸 𑀕𑁄𑀓𑀡𑁆𑀡𑁄, 𑀢𑀸𑀮𑁄 𑀘 𑀕𑁄𑀓𑀡𑁆𑀡𑁄 𑀘 𑀢𑀸𑀮𑀕𑁄𑀓𑀡𑁆𑀡𑀸. 𑀮𑀺𑀗𑁆𑀕𑀪𑁂𑀤𑀸 ‘‘𑀢𑀸𑀮𑀕𑁄𑀓𑀡𑁆𑀡𑀯𑀺𑀤𑀢𑁆𑀣𑀻’’𑀢𑀺 𑀦 𑀯𑀼𑀢𑁆𑀢𑀁, 𑀓𑀦𑀺𑀝𑁆𑀞𑀸𑀬𑀼𑀢𑁂 𑀅𑀗𑁆𑀕𑀼𑀝𑁆𑀞𑁂 𑀢𑀢𑁂 𑀯𑀺𑀤𑀢𑁆𑀣𑀺, 𑀯𑀺𑀢𑀦𑁄𑀢𑀻𑀢𑀺 𑀯𑀺𑀢𑀢𑁆𑀣𑀺, 𑀯𑀺𑀢𑀢𑁆𑀣𑀺 𑀏𑀯 𑀯𑀺𑀤𑀢𑁆𑀣𑀺, 𑀢𑀦𑀼 𑀯𑀺𑀢𑁆𑀣𑀸𑀭𑁂,𑀢𑀺, 𑀢𑀲𑁆𑀲 𑀣𑁄. 𑀯𑀺𑀤𑀢𑁆𑀣𑀺. ‘‘𑀓𑀫𑀸 𑀢𑀢𑁄’’𑀢𑀺𑀧𑀺 𑀧𑀸𑀞𑁄.

𑀓𑀼𑀜𑁆𑀘𑀺𑀢𑁄 𑀲𑀗𑁆𑀓𑁄𑀘𑀺𑀢𑁄 𑀧𑀸𑀡𑀺 𑀧𑀲𑀢𑀸𑀔𑁆𑀬𑁄, 𑀧𑀧𑀼𑀩𑁆𑀩𑁄 𑀲𑀭 𑀕𑀢𑀺𑀬𑀁, 𑀢𑁄. 𑀧𑀫𑀸𑀡𑀧𑁆𑀧𑀓𑀭𑀡𑀢𑁄 𑀯𑀺𑀢𑀢𑀜𑁆𑀚𑀮𑀺𑀬𑁂𑀯𑀸𑀬𑀁 𑀓𑀯𑀻𑀳𑀺 𑀇𑀘𑁆𑀙𑀺𑀢𑁄. 𑀲𑀫𑁆𑀧𑀼𑀝𑀜𑁆𑀚𑀮𑀺 𑀧𑀦𑀸𑀬𑀁, 𑀧𑀲𑀸𑀭𑀺𑀢𑀲𑀳𑀺𑀢𑀸 [𑀧𑀲𑀸𑀭𑀺𑀢𑀲𑀳𑀺𑀢𑀢𑁆𑀢𑀸 (𑀓.)] 𑀬𑀲𑁆𑀲 𑀅𑀗𑁆𑀕𑀼𑀮𑀺𑀬𑁄 𑀪𑀯𑀦𑁆𑀢𑀻𑀢𑀺.

𑀓𑀼𑀜𑁆𑀘𑀺𑀢𑁄 𑀘 𑀢𑀢𑀗𑁆𑀕𑀼𑀝𑁆𑀞𑁄, 𑀲𑀧𑀢𑀸𑀓𑁄𑀢𑀺 𑀲𑀫𑁆𑀫𑀢𑁄;

𑀧𑀢𑀸𑀓𑁂𑀳𑀺 𑀢𑀼 𑀳𑀢𑁆𑀣𑁂𑀳𑀺, 𑀲𑀫𑁆𑀧𑀼𑀝𑀜𑁆𑀚𑀮𑀺 𑀇𑀘𑁆𑀙𑀺𑀢𑁄.

𑀤𑁂𑀯𑀢𑀸𑀦𑀁 𑀕𑀭𑀽𑀦𑀜𑁆𑀘, 𑀧𑀺𑀢𑀽𑀦𑀜𑁆𑀘𑁂’𑀘𑁆𑀙𑀺𑀢𑁄 𑀧𑀼𑀭𑁂;

𑀅𑀢𑁆𑀣𑀧𑁆𑀧𑀓𑀭𑀡𑀸𑀤𑀻𑀳𑀺, 𑀪𑁂𑀤𑁄 𑀜𑁂𑀬𑁆𑀬𑁄 𑀢𑀳𑀺𑀁 𑀢𑀳𑀺𑀁.

𑀬𑀣𑀸 𑀚𑀮𑀜𑁆𑀚𑀮𑀺𑀁 𑀤𑀤𑀸𑀢𑀺, 𑀅𑀜𑁆𑀚𑀮𑀺𑀦𑀸 𑀧𑀺𑀯𑀢𑀺, 𑀤𑁂𑀯𑁄𑀬𑀁 𑀓𑀢𑀜𑁆𑀚𑀮𑀺𑀭𑀺𑀢𑀺. 𑀧𑀼𑀝𑀜𑁆𑀚𑀮𑀺𑀲𑁆𑀲 𑀯𑀸 𑀯𑀓𑁆𑀔𑀫𑀸𑀦𑀢𑁆𑀢𑀸 𑀇𑀥 𑀯𑀺𑀢𑀢𑀜𑁆𑀚𑀮𑀺𑀬𑁂𑀯.

𑁨𑁬𑁮. 𑀢𑀺𑀓𑀁 𑀲𑀧𑁆𑀧𑀓𑁄𑀝𑁆𑀞𑁂 𑀯𑀺𑀢𑀢𑀓𑀭𑁂. 𑀭𑀫𑀼 𑀓𑀻𑀴𑀸𑀬𑀁, 𑀢𑀦𑁄, 𑀫𑀮𑁄𑀧𑁄, 𑀭𑀢𑀦𑀁, 𑀫𑀡𑀺𑀩𑀼𑀤𑁆𑀥𑀸𑀤𑀻𑀲𑀼 𑀘. 𑀓𑀼𑀓 𑀆𑀤𑀸𑀦𑁂, 𑀉 ¶ , 𑀤𑁆𑀯𑀺𑀢𑁆𑀢𑀁. 𑀳𑀲 𑀥𑀸𑀢𑀼𑀫𑁆𑀳𑀸 𑀣𑁄, 𑀢𑁄 𑀯𑀸, 𑀳𑀢𑁆𑀣𑁄, 𑀳𑀢𑁆𑀣𑀲𑀳𑀺𑀢𑀢𑁆𑀢𑀸 𑀯𑀸 𑀧𑀓𑁄𑀝𑁆𑀞𑁄 𑀳𑀢𑁆𑀣𑁄.

𑀤𑁆𑀯𑀬𑀁 𑀲𑀫𑁆𑀧𑀼𑀝𑀜𑁆𑀚𑀮𑀺𑀫𑁆𑀳𑀺. 𑀓𑀭𑀫𑀬𑁄 𑀧𑀼𑀝𑁄 𑀓𑀭𑀧𑀼𑀝𑁄, 𑀅𑀜𑁆𑀚 𑀩𑁆𑀬𑀢𑁆𑀢𑀺𑀕𑀢𑀺𑀓𑀦𑁆𑀢𑀻𑀲𑀼, 𑀅𑀮𑀺, 𑀅𑀜𑁆𑀚𑀮𑀺. 𑀓𑀭𑀧𑀼𑀝𑁄 𑀘 𑀅𑀜𑁆𑀚𑀮𑀺 𑀘𑁂𑀢𑀺 𑀓𑀭𑀧𑀼𑀝𑀜𑁆𑀚𑀮𑀻.

𑀤𑁆𑀯𑀬𑀁 𑀦𑀔𑁂. 𑀓𑀭𑁂 𑀚𑀸𑀬𑀢𑀺 𑀭𑀼𑀳𑀢𑀻𑀢𑀺 𑀓𑀭𑀚𑁄. 𑀦𑀢𑁆𑀣𑀺 𑀔𑀁 𑀇𑀦𑁆𑀤𑁆𑀭𑀺𑀬𑀁 𑀏𑀢𑁆𑀣𑀸𑀢𑀺 𑀦𑀔𑁄, 𑀲𑀜𑁆𑀜𑀸𑀲𑀤𑁆𑀤𑀢𑁆𑀢𑀸 𑀦 𑀅𑀢𑁆𑀢𑀁, 𑀅𑀯𑀺𑀲𑀬𑀢𑁆𑀢𑀸 𑀯𑀸. 𑀧𑀼𑀦𑀩𑁆𑀪𑀯𑁄, 𑀓𑀭𑀭𑀼𑀳𑁄, 𑀦𑀔𑀭𑁄𑀢𑀺𑀧𑀺 𑀦𑀔𑀲𑁆𑀲 𑀦𑀸𑀫𑀸𑀦𑀺.

𑀤𑁆𑀯𑀬𑀁 𑀧𑀼𑀝𑀗𑁆𑀕𑀼𑀮𑀺𑀓𑀭𑁂𑀢𑀺𑀔𑁆𑀬𑀸𑀢𑁂 𑀫𑀼𑀝𑁆𑀞𑀺𑀫𑁆𑀳𑀺. 𑀔𑀝 𑀇𑀘𑁆𑀙𑀸𑀬𑀁, 𑀡𑁆𑀯𑀼, 𑀔𑀤 𑀳𑀺𑀁𑀲𑀸𑀬𑀁 𑀯𑀸, 𑀤𑀲𑁆𑀲 𑀝𑁄. 𑀫𑀼 𑀩𑀦𑁆𑀥𑀦𑁂,𑀢𑀺, 𑀢𑀲𑁆𑀲 𑀞𑁄, 𑀤𑁆𑀯𑀺𑀢𑁆𑀢𑀁.

𑁨𑁬𑁯. 𑀧𑀲𑁆𑀲𑀤𑁆𑀯𑀬𑀯𑀺𑀢𑁆𑀣𑀢𑀸 𑀧𑀲𑁆𑀲𑀤𑁆𑀯𑀬𑁂𑀧𑀺 𑀯𑀺𑀢𑀢𑀸 𑀧𑀲𑀸𑀭𑀺𑀢𑀸 𑀲𑀳𑀓𑀭𑀸 𑀲𑀧𑀸𑀡𑀬𑁄 𑀤𑁆𑀯𑁂 𑀩𑀸𑀳𑀽 𑀩𑁆𑀬𑀸𑀫𑁄 𑀦𑀸𑀫, 𑀩𑁆𑀬𑀸𑀫𑀻𑀬𑀢𑁂 𑀅𑀦𑁂𑀦𑀸𑀢𑀺 𑀩𑁆𑀬𑀸𑀫𑁄, 𑀯𑀺𑀧𑀼𑀩𑁆𑀩𑁄 𑀬𑀸𑀫 𑀅𑀜𑁆𑀙𑁂. 𑀉𑀤𑁆𑀥𑀁 𑀉𑀧𑀭𑀺 𑀢𑀢𑀸 𑀯𑀺𑀢𑀢𑀸 𑀪𑀼𑀚𑀸 𑀘 𑀧𑁄𑀲𑁄 𑀘 𑀢𑁂𑀲𑀁 𑀲𑀫𑀼𑀤𑀺𑀢𑀸𑀦𑀁 𑀧𑀫𑀸𑀡𑀲𑀤𑀺𑀲𑀁 𑀧𑀫𑀸𑀡𑀁 𑀬𑀲𑁆𑀲 𑀢𑀲𑁆𑀫𑀺𑀁 𑀉𑀤𑁆𑀥𑀦𑁆𑀢𑀢𑀪𑀼𑀚𑀧𑁄𑀲𑀧𑁆𑀧𑀫𑀸𑀡𑁂 𑀧𑁄𑀭𑀺𑀲𑀲𑀤𑁆𑀤𑁄 𑀯𑀢𑁆𑀢𑀢𑀺. 𑀪𑀼𑀚𑀲𑀤𑁆𑀤𑁂𑀦 𑀲𑀳𑀓𑀭𑀸 𑀪𑀼𑀚𑀸 𑀕𑀬𑁆𑀳𑀢𑁂, 𑀏𑀓𑀲𑁆𑀲 𑀧𑀫𑀸𑀡𑀲𑀤𑁆𑀤𑀲𑁆𑀲 𑀮𑁄𑀧𑁄, 𑀧𑀼𑀭𑀺𑀲𑀲𑁆𑀲 𑀧𑀫𑀸𑀡𑀁 𑀧𑁄𑀭𑀺𑀲𑀁. 𑀧𑀼𑀭𑀺𑀲𑀲𑀤𑁆𑀤𑁄 𑀘𑁂𑀢𑁆𑀣 𑀲𑀓𑀭𑀪𑀼𑀚𑀧𑀼𑀭𑀺𑀲𑀁 𑀯𑀤𑀢𑀺, 𑀢𑀻𑀲𑀼, 𑀬𑀣𑀸 𑁋 𑀧𑁄𑀭𑀺𑀲𑀁 𑀚𑀮𑀁, 𑀧𑁄𑀭𑀺𑀲𑁄 𑀳𑀢𑁆𑀣𑀻, 𑀧𑁄𑀭𑀺𑀲𑀻 𑀬𑀝𑁆𑀞𑀺.

𑁨𑁭𑁦. 𑀤𑁆𑀯𑀬𑀁 𑀉𑀭𑀲𑀺. 𑀉𑀲 𑀤𑀸𑀳𑁂, 𑀭𑁄, 𑀲𑀮𑁄𑀧𑁄, 𑀅𑀭 𑀕𑀢𑀺𑀫𑁆𑀳𑀺 𑀯𑀸, 𑀅𑀲𑁆𑀲𑀼𑀓𑀸𑀭𑁄. 𑀳𑀭 𑀳𑀭𑀡𑁂, 𑀬𑁄, 𑀭𑀲𑁆𑀲 𑀤𑁄. 𑀓𑁄𑀴𑀁 [𑀓𑁄𑀝𑁆𑀞 (𑀓.)] ¶ , 𑀪𑀼𑀚𑀦𑁆𑀢𑀭𑀁, 𑀯𑀓𑁆𑀔𑁄𑀢𑀺𑀧𑀺 𑀉𑀭𑁄𑀦𑀸𑀫𑀸𑀦𑀺. 𑀢𑀺𑀓𑀁 𑀉𑀭𑁄𑀚𑁂. 𑀢𑀦𑀼 𑀯𑀺𑀢𑁆𑀣𑀸𑀭𑁂, 𑀢𑀦𑁄𑀢𑀺 𑀇𑀘𑁆𑀙𑀦𑁆𑀢𑀺 𑀣𑀦𑁄, 𑀢𑀲𑁆𑀲 𑀣𑁄, 𑀣𑀦 𑀤𑁂𑀯𑀲𑀤𑁆𑀤𑁂, 𑀣𑀦 𑀘𑁄𑀭𑀺𑀬𑁂 𑀯𑀸. 𑀓𑀼𑀘 𑀲𑀗𑁆𑀓𑁄𑀘𑀦𑁂, 𑀓𑀼𑀘𑁄. 𑀧𑀬𑁄 𑀔𑀻𑀭𑀁 𑀥𑀸𑀭𑁂𑀢𑀻𑀢𑀺 𑀧𑀬𑁄𑀥𑀭𑁄. 𑀓𑀼𑀘𑁄 𑀘 𑀧𑀬𑁄𑀥𑀭𑁄 𑀘𑀸𑀢𑀺 𑀤𑁆𑀯𑀦𑁆𑀤𑁄.

𑀣𑀦𑀕𑁆𑀕𑀲𑁆𑀫𑀺𑀁 𑀣𑀦𑀲𑁆𑀲 𑀅𑀕𑁆𑀕𑁂 𑀘𑀽𑀘𑀼𑀓𑀁, 𑀦𑀧𑀼𑀁𑀲𑀓𑁂. ‘‘𑀘𑀽𑀘𑀼𑀓𑁄 𑀲𑁄 𑀓𑀼𑀘𑀸𑀦𑀦’’𑀦𑁆𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁬.𑁭𑁭] 𑀢𑀼 𑀭𑀢𑀦𑀓𑁄𑀲𑁄, 𑀘𑀼 𑀘𑀯𑀦𑁂, 𑀉𑀓𑁄, 𑀤𑁆𑀯𑀺𑀢𑁆𑀢𑀁, 𑀤𑀻𑀖𑁄 𑀘, 𑀘𑀽𑀘𑀼𑀓𑀁, 𑀘𑀦𑁆𑀘𑀼 𑀕𑀢𑀺𑀬𑀁 𑀯𑀸, 𑀉𑀓𑁄, 𑀦𑀮𑁄𑀧𑁄, 𑀅𑀲𑁆𑀲𑀽𑀓𑀸𑀭𑁄, 𑀘𑀽𑀘𑀼𑀓𑀁.

𑀤𑁆𑀯𑀬𑀁 𑀧𑀺𑀝𑁆𑀞𑁂 𑀓𑀸𑀬𑀲𑁆𑀲 𑀧𑀘𑁆𑀙𑀸𑀪𑀸𑀕𑁂. 𑀧𑀺𑀝 𑀲𑀤𑁆𑀤𑀲𑀗𑁆𑀖𑀸𑀢𑁂𑀲𑀼, 𑀢𑁄. 𑀇𑀢𑀭𑀢𑁆𑀭 𑀢𑀺, 𑀧𑀺𑀲𑀼 𑀲𑁂𑀘𑀦𑁂 𑀯𑀸.

𑁨𑁭𑁧. 𑀢𑀺𑀓𑀁 𑀢𑀦𑀼𑀫𑀚𑁆𑀛𑁂. 𑀫𑀚𑁆𑀛𑁂 𑀪𑀯𑁄 𑀫𑀚𑁆𑀛𑁄. 𑀮𑀕 𑀲𑀗𑁆𑀕𑁂, 𑀅. 𑀫𑀚𑁆𑀛𑁂 𑀪𑀯𑀁 𑀫𑀚𑁆𑀛𑀺𑀫𑀁. 𑀘𑀢𑀼𑀓𑁆𑀓𑀁 𑀉𑀤𑀭𑁂. 𑀓𑀼𑀲 𑀅𑀓𑁆𑀓𑁄𑀲𑁂, 𑀙𑀺, 𑀲𑀲𑁆𑀲 𑀘𑁄. 𑀕𑀳 𑀉𑀧𑀸𑀤𑀸𑀦𑁂, 𑀅𑀦𑀺, 𑀈𑀫𑁆𑀳𑀺 𑀕𑀳𑀡𑀻, 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺 𑀥𑀸𑀭𑁂𑀢𑀻𑀢𑀺 𑀯𑀸 𑀕𑀳𑀡𑀻, 𑀕𑀩𑁆𑀪𑀸𑀲𑀬𑀲𑀜𑁆𑀜𑀺𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀧𑁆𑀧𑀤𑁂𑀲𑁄, 𑀢𑁂𑀚𑁄𑀥𑀸𑀢𑀼𑀫𑁆𑀳𑀺 𑀧𑀦 𑀬𑀣𑀸𑀪𑀼𑀢𑁆𑀢𑀸𑀳𑀸𑀭𑀲𑁆𑀲 𑀯𑀺𑀧𑀸𑀘𑀦𑀯𑀲𑁂𑀦 𑀕𑀡𑁆𑀳𑀦𑀢𑁄 𑀅𑀙𑀟𑁆𑀟𑀦𑀢𑁄 𑀕𑀳𑀡𑀻. 𑀉𑀧𑀼𑀩𑁆𑀩𑁄 𑀤𑀭 𑀕𑀫𑀦𑁂. 𑀉𑀤𑀭𑀢𑀺 𑀉𑀤𑁆𑀥𑀁 𑀕𑀘𑁆𑀙𑀢𑀺 𑀯𑀸𑀬𑀼 𑀬𑀢𑁆𑀭𑀸𑀢𑀺 𑀉𑀤𑀭𑀁. 𑀕𑀼 𑀲𑀤𑁆𑀤𑁂, 𑀅𑀪𑁄, 𑀤𑁆𑀯𑀺𑀢𑁆𑀢𑀸𑀤𑀺, 𑀕𑀩𑁆𑀪𑁄. 𑀧𑀺𑀘𑀡𑁆𑀟 𑀚𑀞𑀭 𑀢𑀼𑀦𑁆𑀤𑀸𑀧𑁆𑀬𑀢𑁆𑀭.

𑀓𑀼𑀘𑁆𑀙𑀺𑀲𑀫𑁆𑀪𑀯𑁂 𑀓𑀼𑀘𑁆𑀙𑀺𑀝𑁆𑀞𑁂 𑀓𑁄𑀝𑁆𑀞𑁄, 𑀅𑀦𑁆𑀢𑁄 𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀯𑀢𑁆𑀢𑀦𑁆𑀢𑀺, 𑀓𑀼𑀲 𑀅𑀓𑁆𑀓𑁄𑀲𑁂, 𑀢𑁄, 𑀞𑁄 𑀯𑀸. 𑀅𑀫 𑀕𑀫𑀦𑀢𑁆𑀣𑁄, 𑀢𑁄.

𑁨𑁭𑁨. 𑀘𑀢𑀼𑀓𑁆𑀓𑀁 ¶ 𑀓𑀝𑀺𑀬𑀁. 𑀳𑀦𑀥𑀸𑀢𑀼𑀫𑁆𑀳𑀸 𑀬𑀼, 𑀳𑀲𑁆𑀲 𑀤𑁆𑀯𑀺𑀢𑁆𑀢𑀁, 𑀳𑀲𑁆𑀲 𑀚𑁄, 𑀳𑀦𑀲𑁆𑀲 𑀖𑁄 𑀘, 𑀚𑀖𑀦𑀁. 𑀦𑀺𑀘𑁆𑀙𑀬𑁂𑀦 𑀢𑀫𑀢𑀻𑀢𑀺 𑀦𑀺𑀢𑀫𑁆𑀩𑁄, 𑀢𑀫𑀼𑀥𑀸𑀢𑀼𑀫𑁆𑀳𑀸 𑀩𑁄. 𑀲𑀽 𑀧𑀲𑀯𑁂, 𑀡𑀺. 𑀓𑀝 𑀯𑀲𑁆𑀲𑀸𑀯𑀭𑀡𑁂𑀲𑀼, 𑀓𑀝𑁆𑀬𑀢𑁂 𑀆𑀯𑀭𑀻𑀬𑀢𑁂 𑀯𑀢𑁆𑀣𑀸𑀤𑀻𑀳𑀺 𑀓𑀝𑀺, 𑀇, 𑀏𑀢𑁂 𑀤𑁆𑀯𑁂 𑀦𑀸𑀭𑀺𑀬𑀁. 𑀏𑀢𑁆𑀣 𑀘 𑀚𑀖𑀦𑀲𑀤𑁆𑀤𑁂𑀦 𑀇𑀢𑁆𑀣𑀺𑀓𑀝𑀺𑀬𑀸 𑀅𑀕𑁆𑀕𑀪𑀸𑀕𑁄, 𑀦𑀺𑀢𑀫𑁆𑀩𑀲𑀤𑁆𑀤𑁂𑀦 𑀇𑀢𑁆𑀣𑀺𑀓𑀝𑀺𑀬𑀸 𑀧𑀘𑁆𑀙𑀸𑀪𑀸𑀕𑁄, 𑀲𑁂𑀲𑀤𑁆𑀯𑀬𑁂𑀦 𑀓𑀝𑀺𑀲𑀸𑀫𑀜𑁆𑀜𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀯𑀼𑀢𑁆𑀢𑀜𑁆𑀘 ‘‘𑀧𑀘𑁆𑀙𑀸 𑀦𑀺𑀢𑀫𑁆𑀩𑁄 𑀣𑀻𑀓𑀝𑁆𑀬𑀸, 𑀚𑀖𑀦𑀁 𑀢𑀼 𑀧𑀼𑀭𑁄 𑀪𑀯𑁂’’𑀢𑀺 [𑀅𑀫𑀭 𑁧𑁬.𑁭𑁪].

𑁨𑁭𑁩. 𑀮𑀺𑀗𑁆𑀕𑀦𑁆𑀢𑀁 𑀮𑀺𑀗𑁆𑀕𑀲𑀸𑀫𑀜𑁆𑀜𑁂. 𑀅𑀗𑁆𑀕𑁂 𑀲𑀭𑀻𑀭𑁂 𑀚𑀸𑀬𑀢𑀻𑀢𑀺 𑀅𑀗𑁆𑀕𑀚𑀸𑀢𑀁, 𑀅𑀗𑁆𑀕𑀲𑀤𑁆𑀤𑁄 𑀲𑀭𑀻𑀭𑀯𑀸𑀘𑀓𑁄, 𑀅𑀗𑁆𑀕𑀫𑁂𑀢𑀲𑁆𑀲𑀢𑁆𑀣𑀻𑀢𑀺 𑀓𑀢𑁆𑀯𑀸. 𑀭𑀳𑀲𑀺 𑀞𑀸𑀦𑁂 𑀚𑀸𑀢𑀁 𑀅𑀗𑁆𑀕𑀁 𑀭𑀳𑀲𑁆𑀲𑀗𑁆𑀕𑀁, 𑀲𑀢𑁆𑀢𑀫𑀺𑀬𑀸𑀮𑁄𑀧𑁄, 𑀇𑀲𑁆𑀲𑀢𑁆𑀢𑀁, 𑀲𑀲𑁆𑀲 𑀤𑁆𑀯𑀺𑀢𑁆𑀢𑀜𑁆𑀘. 𑀯𑀢𑁆𑀣𑁂𑀦 𑀕𑀼𑀬𑁆𑀳𑀺𑀢𑀩𑁆𑀩𑀦𑁆𑀢𑀺 𑀯𑀢𑁆𑀣𑀕𑀼𑀬𑁆𑀳𑀁. 𑀫𑀺𑀳 𑀲𑁂𑀘𑀦𑁂, 𑀓𑀭𑀡𑁂 𑀬𑀼, 𑀫𑀺𑀳𑀢𑀺 𑀭𑁂𑀢𑁄𑀫𑀼𑀢𑁆𑀢𑀸𑀦𑀺 𑀬𑁂𑀦𑀸𑀢𑀺 𑀫𑁂𑀳𑀦𑀁. 𑀦𑀺𑀧𑀼𑀩𑁆𑀩𑁄 𑀫𑀺𑀳 𑀲𑁂𑀘𑀦𑁂, 𑀢𑁄, 𑀦𑀺𑀫𑀺𑀢𑁆𑀢𑀁. 𑀉𑀢𑁆𑀢𑀫𑀗𑁆𑀕𑀢𑁆𑀢𑀸 𑀯𑀭𑀗𑁆𑀕𑀁. 𑀯𑀚 𑀕𑀢𑀺𑀬𑀁, 𑀅𑀲𑁆𑀲𑀻𑀓𑀸𑀭𑁄, 𑀧𑀘𑁆𑀘𑀬𑁂𑀳𑀺 𑀯𑀺𑀦𑀸 𑀚𑀸𑀬𑀢𑀻𑀢𑀺 𑀯𑀸 𑀩𑀻𑀚𑀁, 𑀯𑀺𑀭𑀳𑀢𑁆𑀢𑀚𑁄𑀢𑀓𑁄 𑀳𑁆𑀬𑁂𑀢𑁆𑀣 𑀯𑀺𑀓𑀸𑀭𑁄. 𑀨𑀮 𑀦𑀺𑀧𑁆𑀨𑀢𑁆𑀢𑀺𑀬𑀁, 𑀨𑀮𑀢𑀺 𑀏𑀢𑁂𑀦 𑀧𑀼𑀢𑁆𑀢𑀦𑁆𑀢𑀺 𑀨𑀮𑀁. 𑀮𑀺𑀗𑁆𑀕𑀢𑀺 ‘‘𑀇𑀢𑁆𑀣𑀻, 𑀧𑀼𑀭𑀺𑀲𑁄’’𑀢𑀺 𑀯𑀺𑀪𑀸𑀕𑀁 𑀕𑀘𑁆𑀙𑀢𑀺 𑀬𑁂𑀦𑀸𑀢𑀺 𑀮𑀺𑀗𑁆𑀕𑀁. 𑀮𑀺𑀗𑁆𑀕 ¶ 𑀕𑀫𑀦𑁂, 𑀮𑀻𑀦𑀁 𑀅𑀧𑀸𑀓𑀝𑀁 𑀅𑀗𑁆𑀕𑀦𑁆𑀢𑀺 𑀯𑀸 𑀮𑀺𑀗𑁆𑀕𑀁. 𑀏𑀢𑁂𑀲𑀼 𑀩𑀻𑀚𑀨𑀮𑀲𑀤𑁆𑀤𑀸 𑀅𑀡𑁆𑀟𑁂𑀧𑀺 𑀯𑀢𑁆𑀢𑀦𑁆𑀢𑀺.

𑀤𑁆𑀯𑀬𑀁 𑀧𑀼𑀭𑀺𑀲𑀮𑀺𑀗𑁆𑀕𑀧𑀲𑀺𑀩𑁆𑀩𑀓𑁂. 𑀅𑀫 𑀕𑀫𑀦𑁂, 𑀟𑁄, 𑀅𑀡𑀲𑀤𑁆𑀤𑀢𑁆𑀣𑁄 𑀯𑀸, 𑀟𑁄, 𑀅𑀟𑀺 𑀅𑀡𑁆𑀟𑀢𑁆𑀣𑁂 𑀯𑀸, 𑀢𑁄. 𑀓𑀼𑀲 𑀅𑀓𑁆𑀓𑁄𑀲𑁂, 𑀡𑁄. 𑀅𑀡𑁆𑀟𑀲𑀤𑁆𑀤𑁄 𑀘𑁂𑀢𑁆𑀣 𑀩𑀻𑀚𑁂𑀧𑀺, 𑀅𑀡𑁆𑀟𑀓𑁄𑀲𑁄𑀢𑀺 𑀲𑀫𑀼𑀤𑀺𑀢𑀫𑁆𑀧𑀺 𑀓𑁄𑀲𑀲𑁆𑀲 𑀦𑀸𑀫𑀁, ‘‘𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑀲𑁆𑀲𑁂𑀯 𑀅𑀡𑁆𑀟𑀓𑁄𑀲𑀫𑁆𑀳𑀸’’𑀢𑀺 [𑀧𑀸𑀭𑀸. 𑁧𑁩, 𑁧𑁪] 𑀳𑀺 𑀯𑀼𑀢𑁆𑀢𑀁, 𑀅𑀫𑀭𑀓𑁄𑀲𑁂𑀧𑀺 [𑀅𑀫𑀭𑀓𑁄𑀲𑁂 𑁧𑁬.𑁭𑁬] 𑀅𑀡𑁆𑀟𑀓𑁄𑀲𑁄𑀢𑀺 𑀲𑀫𑀼𑀤𑀺𑀢𑁂𑀦𑁂𑀯 𑀦𑀸𑀫𑀁 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀅𑀡𑁆𑀟𑀲𑁆𑀲 𑀩𑀻𑀚𑀲𑁆𑀲 𑀓𑁄𑀲𑁄 𑀅𑀡𑁆𑀟𑀓𑁄𑀲𑁄𑀢𑀺 𑀯𑀺𑀕𑁆𑀕𑀳𑁄 𑀓𑀸𑀢𑀩𑁆𑀩𑁄.

𑀤𑁆𑀯𑀬𑀁 𑀇𑀢𑁆𑀣𑀺𑀬𑀸 𑀅𑀗𑁆𑀕𑀚𑀸𑀢𑁂. 𑀬𑀼 𑀫𑀺𑀲𑁆𑀲𑀦𑁂, 𑀅𑀥𑀺𑀓𑀭𑀡𑁂𑀦𑀺, 𑀬𑁄𑀦𑀺, 𑀇𑀢𑁆𑀣𑀺𑀬𑀁 𑀧𑀼𑀫𑁂 𑀘𑀸𑀬𑀁, 𑀇𑀢𑁆𑀣𑀻 𑀘 𑀧𑀼𑀫𑀸 𑀘 𑀇𑀢𑁆𑀣𑀺𑀧𑀼𑀫𑀁, 𑀢𑀲𑁆𑀫𑀺𑀁. 𑀪𑀚𑀦𑁆𑀢𑀺 𑀅𑀲𑁆𑀫𑀺𑀦𑁆𑀢𑀺 𑀪𑀕𑀁. 𑀫𑀸𑀭𑀫𑀦𑁆𑀤𑀺𑀭 𑀫𑀸𑀭𑀓𑀽𑀧𑀸 𑀘𑀸𑀢𑁆𑀭.

𑁨𑁭𑁪-𑁨𑁭𑁫. 𑀢𑀺𑀓𑀁 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀲𑀫𑁆𑀪𑀯𑁂. 𑀲𑀼𑀘𑀺𑀲𑁆𑀲 𑀧𑀝𑀺𑀧𑀓𑁆𑀔𑁄 𑀅𑀲𑀼𑀘𑀺, 𑀇𑀓𑀸𑀭𑀦𑁆𑀢𑁄, 𑀤𑁆𑀯𑀻𑀲𑀼, 𑀲𑀫𑁆𑀪𑀯𑀮𑀺𑀗𑁆𑀕𑁄 𑀯𑀸. 𑀲𑀁𑀧𑀼𑀩𑁆𑀩𑀸 𑀪𑀽𑀥𑀸𑀢𑀼𑀫𑁆𑀳𑀸 𑀅. 𑀲𑀓 𑀲𑀸𑀫𑀢𑁆𑀣𑀺𑀬𑀁, 𑀢𑁄, 𑀢𑀲𑁆𑀲 𑀓𑁄, 𑀅𑀲𑁆𑀲𑀼𑀢𑁆𑀢𑀁, 𑀲𑀼𑀘 𑀲𑁄𑀓𑁂 𑀯𑀸, 𑀓𑁄.

𑀤𑁆𑀯𑀬𑀁 𑀯𑀘𑁆𑀘𑀫𑀕𑁆𑀕𑁂. 𑀧𑀼𑀦𑀦𑁆𑀢𑀺 𑀅𑀦𑁂𑀦𑀸𑀢𑀺 𑀧𑀸𑀬𑀼. 𑀧𑀽 𑀧𑀯𑀦𑁂, 𑀉, 𑀊𑀲𑁆𑀲𑀸𑀬𑁄, 𑀧𑀬 𑀕𑀫𑀦𑀢𑁆𑀣𑁄 𑀯𑀸, 𑀧𑀬𑀢𑀺 𑀯𑀘𑁆𑀘𑀫𑀦𑁂𑀦𑀸𑀢𑀺 𑀧𑀸𑀬𑀼, ¶ 𑀓𑀭𑀡𑁂 𑀉, 𑀅𑀬𑀁 𑀧𑀼𑀭𑀺𑀲𑁂 𑀧𑀼𑀮𑁆𑀮𑀺𑀗𑁆𑀕𑁂 𑀯𑀢𑁆𑀢𑀢𑀺. 𑀕𑀼𑀤 𑀓𑀻𑀴𑀸𑀬𑀁, 𑀅. 𑀅𑀧𑀸𑀦𑀁𑀧𑁆𑀬𑀢𑁆𑀭.

𑀅𑀝𑁆𑀞𑀓𑀁 𑀯𑀘𑁆𑀘𑁂. 𑀕𑀽𑀣 𑀓𑀭𑀻𑀲𑁄𑀲𑁆𑀲𑀕𑁆𑀕𑁂, 𑀕𑀼𑀧 𑀕𑁄𑀧𑀦𑁂 𑀯𑀸, 𑀣𑁄. 𑀓𑀺𑀭 𑀯𑀺𑀓𑀺𑀭𑀡𑁂, 𑀈𑀲𑁄, 𑀓𑀭𑀻𑀲𑀁. 𑀯𑀭 𑀯𑀭𑀡𑀲𑀫𑁆𑀪𑀢𑁆𑀢𑀻𑀲𑀼, 𑀘𑁄, 𑀕𑀽𑀣𑀜𑁆𑀘 𑀓𑀭𑀻𑀲𑀜𑁆𑀘 𑀯𑀘𑁆𑀘𑀜𑁆𑀘𑁂𑀢𑀺 𑀤𑁆𑀯𑀦𑁆𑀤𑁄, 𑀢𑀸𑀦𑀺 𑀯𑀺𑀓𑀧𑁆𑀧𑁂𑀦 𑀧𑀼𑀫𑁂 𑀯𑀢𑁆𑀢𑀦𑁆𑀢𑀺, 𑀦𑀺𑀘𑁆𑀘𑀁 𑀦𑀧𑀼𑀁𑀲𑀓𑁂, 𑀧𑀼𑀮𑁆𑀮𑀺𑀗𑁆𑀕𑀢𑁆𑀢𑀁 𑀢𑁂𑀲𑀁 𑀓𑀢𑁆𑀣𑀘𑀺𑀬𑁂𑀯, 𑀲𑀩𑁆𑀩𑀢𑁆𑀭 𑀦𑀧𑀼𑀁𑀲𑀓𑀢𑁆𑀢𑀫𑁂𑀯 𑀩𑀳𑀼𑀮𑀦𑁆𑀢𑁆𑀬𑀢𑁆𑀣𑁄. 𑀫𑀮 𑀘𑀮𑀦𑁂, 𑀅, 𑀫𑀮 𑀥𑀸𑀭𑀡𑁂 𑀯𑀸. 𑀲𑀓 𑀲𑀢𑁆𑀢𑀺𑀬𑀁, 𑀲𑀲𑁆𑀲 𑀙𑁄. 𑀉𑀘𑁆𑀘𑀸𑀭𑀻𑀬𑀢𑁂 𑀚𑀳𑁆𑀬𑀢𑁂𑀢𑀺 𑀉𑀘𑁆𑀘𑀸𑀭𑁄, 𑀉𑀧𑀼𑀩𑁆𑀩𑁄 𑀘𑀭𑀥𑀸𑀢𑀼 𑀘𑀚𑀦𑁂, 𑀉𑀓𑁆𑀔𑀺𑀧𑀦𑁂 𑀘 𑀯𑀢𑁆𑀢𑀢𑀺. 𑀫𑀺𑀳 𑀲𑁂𑀘𑀦𑁂, 𑀮𑁄, 𑀯𑀡𑁆𑀡𑀯𑀺𑀧𑀭𑀺𑀬𑀬𑁄, 𑀴𑀢𑁆𑀢𑀜𑁆𑀘. 𑀅𑀯𑀓𑀭𑀻𑀬𑀢𑁂𑀢𑀺 𑀉𑀓𑁆𑀓𑀸𑀭𑁄, 𑀅𑀯𑀲𑁆𑀲𑀼𑀢𑁆𑀢𑀁, 𑀓𑀺𑀭 𑀯𑀺𑀓𑁆𑀔𑀺𑀧𑀦𑁂. 𑀲𑀫𑀮𑀁𑀧𑁆𑀬𑀢𑁆𑀭. 𑀲𑀫𑀼 𑀉𑀧𑀲𑀫𑁂, 𑀅𑀮𑁄.

𑀤𑁆𑀯𑀬𑀁 𑀫𑀼𑀢𑁆𑀢𑁂. 𑀲𑀼 𑀲𑀯𑀦𑁂, 𑀲𑀯𑀦𑀁 𑀲𑀦𑁆𑀤𑀦𑀁, 𑀘𑀼𑀭𑀸𑀤𑀺, 𑀡𑁄. 𑀫𑀼𑀘 𑀫𑁄𑀘𑀦𑁂, 𑀢𑁄, 𑀫𑀼𑀢𑁆𑀢 𑀧𑀲𑁆𑀲𑀸𑀯𑁂 𑀯𑀸. 𑀉𑀘𑁆𑀘𑀢𑁂 𑀓𑀣𑀻𑀬𑀢𑁂. 𑀕𑁄𑀫𑀼𑀢𑁆𑀢𑁂 𑀕𑀯𑀁 𑀲𑀫𑁆𑀩𑀦𑁆𑀥𑀺𑀦𑀺 𑀫𑀼𑀢𑁆𑀢𑁂 𑀧𑀽𑀢𑀺𑀫𑀼𑀢𑁆𑀢𑀲𑀤𑁆𑀤𑁄 𑀯𑀢𑁆𑀢𑀢𑀺. 𑀅𑀚𑁆𑀚 𑀧𑀯𑀢𑁆𑀢𑀫𑁆𑀧𑀺 𑀳𑀺 𑀢𑀁 𑀤𑀼𑀕𑁆𑀕𑀦𑁆𑀥𑀪𑀸𑀯𑁂𑀦 𑀧𑀽𑀢𑀺𑀫𑀼𑀢𑁆𑀢𑀦𑁆𑀢𑁆𑀯𑁂𑀯 𑀯𑀼𑀘𑁆𑀘𑀢𑀺, 𑀬𑀣𑀸 ‘‘𑀧𑀽𑀢𑀺𑀓𑀸𑀬𑁄’’𑀢𑀺. 𑀅𑀲𑁆𑀲𑀸𑀤𑀻𑀦𑀁 𑀫𑀮𑁂 𑀙𑀓𑀡𑀲𑀤𑁆𑀤𑁄, 𑀲𑀓 𑀲𑀢𑁆𑀢𑀺𑀬𑀁, 𑀬𑀼, 𑀲𑀲𑁆𑀲 𑀙𑁄.

𑁨𑁭𑁬. 𑀦𑀸𑀪𑀺𑀬𑀸 𑀅𑀥𑁄𑀪𑀸𑀕𑁄 𑀯𑀢𑁆𑀣𑀺 𑀦𑀸𑀫, 𑀲𑁄 𑀤𑁆𑀯𑀻𑀲𑀼. 𑀯𑀢𑁆𑀣𑀺 𑀫𑀼𑀢𑁆𑀢𑀧𑀼𑀝𑀁. ‘‘𑀫𑀼𑀢𑁆𑀢𑀸𑀲𑀬𑀧𑀼𑀝𑁄 𑀯𑀢𑁆𑀣𑀺’’𑀭𑀺𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁬.𑁭𑁩] 𑀭𑀢𑀦𑀫𑀸𑀮𑀸. 𑀯𑀲𑀢𑀺 𑀫𑀼𑀢𑁆𑀢𑀫𑁂𑀢𑁆𑀣𑀸𑀢𑀺 𑀯𑀢𑁆𑀣𑀺, 𑀯𑀲 𑀦𑀺𑀯𑀸𑀲𑁂,𑀢𑀺, 𑀢𑀲𑁆𑀲 𑀣𑁄, 𑀢𑁆𑀣𑀺𑀧𑀘𑁆𑀘𑀬𑁂𑀦 𑀯𑀸 𑀲𑀺𑀤𑁆𑀥𑀁. 𑀉𑀘𑁆𑀙𑀗𑁆𑀕𑀁 𑀅𑀗𑁆𑀓𑀜𑁆𑀘 𑀇𑀫𑁂 𑀤𑁆𑀯𑁂 𑀉𑀪𑁄 𑀲𑀤𑁆𑀤𑀸 ¶ 𑀧𑀼𑀫𑁂 𑀯𑀢𑁆𑀢𑀦𑁆𑀢𑀺. 𑀉𑀲𑁆𑀲𑀚𑁆𑀚𑀢𑀺 𑀏𑀢𑁆𑀣𑀸𑀢𑀺 𑀉𑀘𑁆𑀙𑀗𑁆𑀕𑀁, 𑀲𑀚 𑀲𑀗𑁆𑀕𑁂, 𑀲𑀲𑁆𑀲 𑀙𑁄, 𑀤𑁆𑀯𑀺𑀢𑁆𑀢𑀁. 𑀅𑀗𑁆𑀓 𑀕𑀫𑀦𑀢𑁆𑀣𑁄, 𑀅, 𑀅𑀗𑁆𑀓𑁄, 𑀅𑀣 𑀯𑀸 𑀅𑀗𑁆𑀓 𑀮𑀓𑁆𑀔𑀡𑁂, 𑀅, 𑀅𑀗𑁆𑀓𑁄, ‘‘𑀉𑀘𑁆𑀙𑀗𑁆𑀕𑀘𑀺𑀳𑀦𑁂𑀲𑁆𑀯’𑀗𑁆𑀓𑁄’’𑀢𑀺 𑀅𑀫𑀭𑀓𑁄𑀲𑁂 [𑀅𑀫𑀭 𑀓𑁄𑀲𑁂 𑁨𑁩.𑁪].

𑀤𑁆𑀯𑀬𑀁 𑀚𑀸𑀡𑀽𑀧𑀭𑀺𑀪𑀸𑀕𑁂. 𑀅𑀭 𑀕𑀫𑀦𑁂, 𑀉, 𑀅𑀲𑁆𑀲𑀽𑀓𑀸𑀭𑁄. 𑀲𑀦𑁆𑀚 𑀲𑀗𑁆𑀕𑁂, 𑀆𑀲𑀚𑁆𑀚𑀢𑀺 𑀯𑀢𑁆𑀣𑀫𑀢𑁆𑀭𑀸𑀢𑀺 𑀲𑀢𑁆𑀣𑀺, 𑀣𑀺. 𑀊𑀭𑀼 𑀘 𑀲𑀢𑁆𑀣𑀺 𑀘𑁂𑀢𑀺 𑀤𑁆𑀯𑀦𑁆𑀤𑁄, 𑀦𑀧𑀼𑀁𑀲𑀓𑁂𑀧𑀺.

𑀢𑀺𑀓𑀁 𑀚𑀸𑀡𑀼𑀫𑁆𑀳𑀺, 𑀊𑀭𑀼𑀦𑁄 𑀧𑀩𑁆𑀩𑀁 𑀕𑀡𑁆𑀞𑀺 𑀊𑀭𑀼𑀧𑀩𑁆𑀩𑀁. 𑀚𑀦 𑀚𑀦𑀦𑁂, 𑀡𑀼. 𑀤𑁆𑀯𑀺𑀢𑁆𑀢𑁂 𑀚𑀡𑁆𑀡𑀼.

𑁨𑁭𑁭. 𑀤𑁆𑀯𑀬𑀁 𑀧𑀸𑀤𑀕𑀡𑁆𑀞𑀺𑀫𑁆𑀳𑀺. 𑀕𑀼𑀧 𑀭𑀓𑁆𑀔𑀡𑁂 𑀨𑁄, 𑀲𑀓𑀢𑁆𑀣𑁂 𑀓𑁄. 𑀧𑀸𑀤𑀲𑁆𑀲 𑀕𑀡𑁆𑀞𑀺 𑀧𑀸𑀤𑀕𑀡𑁆𑀞𑀺. 𑀖𑀼𑀝𑀺𑀓𑀸𑀧𑁆𑀬𑀢𑁆𑀭. 𑀖𑀼𑀝 𑀧𑀭𑀺𑀯𑀢𑁆𑀢𑀦𑁂, 𑀖𑀼𑀝𑁆𑀬𑀢𑁂 𑀅𑀦𑁂𑀦𑁂𑀢𑀺 𑀖𑀼𑀝𑀺𑀓𑀸, 𑀡𑁆𑀯𑀼.

𑀤𑁆𑀯𑀬𑀁 𑀧𑀸𑀤𑀲𑁆𑀲 𑀧𑀘𑁆𑀙𑀸𑀪𑀸𑀕𑁂 𑀕𑁄𑀧𑁆𑀨𑀓𑀲𑁆𑀲𑀸𑀥𑁄 𑀪𑀸𑀕𑁂. 𑀧𑀼𑀫𑁂 𑀢𑀽𑀢𑀺 𑀢𑁆𑀯𑀦𑁆𑀢𑀁 𑀮𑀺𑀗𑁆𑀕𑀧𑀤𑀁. 𑀧𑀲 𑀩𑀸𑀥𑀦𑀨𑀼𑀲𑀦𑁂𑀲𑀼,𑀢𑀺, 𑀢𑀲𑁆𑀲 𑀡𑁄, 𑀲𑀲𑁆𑀲 𑀳𑁄, 𑀯𑀡𑁆𑀡𑀯𑀺𑀧𑀭𑀺𑀬𑀬𑁄, 𑀡𑀺𑀧𑀘𑁆𑀘𑀬𑁂𑀦 𑀯𑀸 𑀲𑀺𑀤𑁆𑀥𑀁. 𑀲𑀓𑀸𑀭𑀯𑀡𑁆𑀡𑀸𑀕𑀫𑁂 𑀯𑀼𑀤𑁆𑀥𑀺𑀬𑀜𑁆𑀘 𑀧𑀸𑀲𑀡𑁆𑀳𑀺. 𑀏𑀮𑀺𑀧𑁆𑀬𑀢𑁆𑀭, 𑀇𑀮 𑀕𑀢𑀺𑀬𑀁,𑀢𑀺, 𑀢𑀮𑁄𑀧𑁄.

𑀤𑁆𑀯𑀬𑀁 𑀧𑀸𑀤𑀕𑁆𑀕𑁂. 𑀧𑀸𑀤𑀲𑁆𑀲 𑀅𑀕𑁆𑀕𑀁 𑀧𑀸𑀤𑀕𑁆𑀕𑀁. 𑀧𑀓𑀝𑁆𑀞𑀁 𑀧𑀤𑀁 𑀧𑀧𑀤𑀦𑁆𑀢𑀺 𑀓𑀫𑁆𑀫𑀥𑀸𑀭𑀬𑁄. ‘‘𑀧𑀧𑀤𑁄’’𑀢𑀺𑀧𑀺 𑀧𑀸𑀞𑁄. 𑀢𑀺𑀓𑀁 𑀧𑀸𑀤𑁂. 𑀧𑀤 𑀕𑀢𑀺𑀫𑁆𑀳𑀺, 𑀡𑁄, 𑀧𑀚𑁆𑀚𑀢𑁂𑀢𑀺 𑀧𑀸𑀤𑁄. 𑀧𑀚𑁆𑀚𑀢𑁂 𑀕𑀘𑁆𑀙𑀢𑀻𑀢𑀺, 𑀅. 𑀘𑀭𑀫𑁆𑀳𑀸 𑀓𑀭𑀡𑁂 𑀬𑀼, 𑀘𑀭𑀡𑀁, 𑀇𑀤𑀁 𑀧𑀼𑀫𑁂 𑀯𑀺𑀓𑀧𑁆𑀧𑁂𑀦, 𑀦𑀺𑀘𑁆𑀘𑀁 𑀦𑀧𑀼𑀁𑀲𑀓𑁂. 𑀅𑀗𑁆𑀖𑀺𑀧𑁆𑀬𑀢𑁆𑀭, 𑀅𑀳𑀺 𑀕𑀢𑀺𑀬𑀁. 𑀇, 𑀳𑀲𑁆𑀲 𑀖𑁄.

𑁨𑁭𑁮. 𑀤𑁆𑀯𑀬𑀁 ¶ 𑀳𑀢𑁆𑀣𑀸𑀤𑁆𑀬𑀯𑀬𑀯𑁂. 𑀅𑀗𑁆𑀕𑀺 𑀕𑀢𑁆𑀬𑀢𑁆𑀣𑁄, 𑀅. 𑀅𑀯𑀧𑀼𑀩𑁆𑀩𑁄 𑀬𑀼 𑀫𑀺𑀲𑁆𑀲𑀦𑁂, 𑀅. 𑀧𑀢𑀻𑀓𑁄, 𑀅𑀧𑀖𑀦𑁄𑀧𑁆𑀬𑀢𑁆𑀭. 𑀧𑀢𑀺𑀧𑀼𑀩𑁆𑀩𑀸 𑀇𑀫𑁆𑀳𑀸 𑀓𑁄. 𑀅𑀧𑀧𑀼𑀩𑁆𑀩𑀸 𑀳𑀦𑀺𑀫𑁆𑀳𑀸 𑀅, 𑀖𑀦𑀸𑀤𑁂𑀲𑁄 𑀘.

𑀤𑁆𑀯𑀬𑀁 𑀧𑀲𑁆𑀲𑀝𑁆𑀞𑀺𑀫𑁆𑀳𑀺. 𑀧𑀸 𑀭𑀓𑁆𑀔𑀡𑁂, 𑀲𑀼, 𑀴𑀺𑀓𑀸𑀭𑀯𑀡𑁆𑀡𑀸𑀕𑀫𑁄, 𑀲𑀓𑀢𑁆𑀣𑁂 𑀓𑁄, 𑀧𑀲𑁆𑀲 𑀨𑁄. 𑀅𑀴𑀸𑀕𑀫𑁂 𑀨𑀸𑀲𑀼𑀓𑀸. ‘‘𑀧𑀸𑀲𑀼𑀴𑀺𑀓𑀸, 𑀧𑀸𑀲𑀼𑀓𑀸’’𑀢𑀺𑀧𑀺 𑀧𑀸𑀞𑁄. 𑀨𑀼𑀲 𑀲𑀫𑁆𑀨𑀲𑁆𑀲𑁂𑀢𑀺𑀧𑀺 𑀥𑀸𑀢𑀼, 𑀢𑀤𑀸 𑀉𑀧𑀘𑁆𑀘𑀬𑀸𑀤𑀺.

𑀤𑁆𑀯𑀬𑀁 𑀅𑀝𑁆𑀞𑀺𑀫𑀢𑁆𑀢𑁂. 𑀅𑀲𑀼 𑀔𑁂𑀧𑀦𑁂, 𑀇, 𑀲𑀲𑁆𑀲 𑀝𑁆𑀞𑁄, 𑀅𑀝𑁆𑀞𑀺, 𑀇𑀤𑀁 𑀧𑀡𑁆𑀟𑀓𑁂 𑀦𑀧𑀼𑀁𑀲𑀓𑁂 𑀯𑀢𑁆𑀢𑀢𑀺. 𑀥𑀸 𑀥𑀸𑀭𑀡𑁂, 𑀢𑀼, 𑀇𑀢𑁆𑀣𑀻. 𑀓𑀻𑀓𑀲𑀁, 𑀓𑀼𑀮𑁆𑀮𑀁𑀧𑁆𑀬𑀢𑁆𑀭. 𑀕𑀮𑀲𑁆𑀲 𑀓𑀡𑁆𑀞𑀲𑁆𑀲 𑀳𑁂𑀝𑁆𑀞𑀺𑀫𑀦𑁆𑀢𑁂 𑀚𑀸𑀢𑀫𑀝𑁆𑀞𑀺 𑀕𑀮𑀦𑁆𑀢𑀝𑁆𑀞𑀺. 𑀅𑀓 𑀕𑀫𑀦𑁂, 𑀔𑁄, 𑀲𑀓𑀢𑁆𑀣𑁂 𑀓𑁄.

𑁨𑁭𑁯-𑁨𑁮𑁦. 𑀤𑁆𑀯𑀬𑀁 𑀲𑀺𑀭𑀲𑁄𑀝𑁆𑀞𑀺𑀔𑀡𑁆𑀟𑁂. 𑀲𑀫𑀼𑀤𑀺𑀢𑁂 𑀢𑀼 𑀓𑀭𑁄𑀝𑀺, 𑀇𑀢𑁆𑀣𑀻 [𑀅𑀫𑀭 𑁧𑁬.𑁬𑁯]. 𑀓𑀧𑀼 𑀲𑀸𑀫𑀢𑁆𑀣𑀺𑀬𑁂, 𑀅𑀭𑁄, 𑀓𑀁 𑀲𑀻𑀲𑀁 𑀧𑀸𑀮𑁂𑀢𑀻𑀢𑀺 𑀯𑀸 𑀓𑀧𑁆𑀧𑀭𑁄, 𑀭𑀲𑁆𑀲𑁄, 𑀮𑀲𑁆𑀲 𑀭𑀢𑁆𑀢𑀜𑁆𑀘. 𑀓𑀁 𑀧𑀸𑀮𑀬𑀢𑀻𑀢𑀺 ¶ , 𑀓𑀫𑁆𑀫𑀸𑀤𑀺𑀫𑁆𑀳𑀺 𑀡𑁄. ‘‘𑀲𑀺𑀭𑁄𑀝𑁆𑀞𑀺𑀫𑁆𑀳𑀺 𑀓𑀧𑀸𑀮𑁄’𑀣𑀻, 𑀖𑀝𑀸𑀤𑀺𑀲𑀓𑀮𑁂𑀧𑀺𑀘𑁂’’𑀢𑀺 𑀭𑀼𑀤𑁆𑀤𑁄 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁬.𑁬𑁮]. 𑀓𑀧𑀸𑀮𑁄 𑀅𑀣𑀻𑀢𑀺 [𑀅𑀦𑀺𑀢𑁆𑀣𑀻𑀢𑀺 𑀅𑀢𑁆𑀣𑁄] 𑀙𑁂𑀤𑁄. 𑀓𑀧𑀸𑀮𑀲𑀤𑁆𑀤𑁄 𑀯𑀺𑀓𑀧𑁆𑀧𑁂𑀦 𑀧𑀼𑀮𑁆𑀮𑀺𑀗𑁆𑀕𑁄. 𑀓𑀟𑀺 𑀙𑁂𑀤𑁂, 𑀅𑀭𑁄. 𑀫𑀳𑀢𑀻 𑀲𑀺𑀭𑀸 𑀫𑀳𑀸𑀲𑀺𑀭𑀸, 𑀲𑀺𑀭𑀸𑀢𑀺 𑀘. 𑀲𑀺 𑀩𑀦𑁆𑀥𑀦𑁂, 𑀭𑁄.

𑀢𑀺𑀓𑀁 𑀲𑀼𑀲𑀺𑀭𑀯𑀢𑁆𑀬𑀁 𑀯𑀸𑀬𑀼𑀯𑀳𑀦𑁆𑀢𑀲𑀺𑀭𑀸𑀬𑀁. 𑀢𑀺𑀯𑀺𑀥𑀸 𑀳𑀺 𑀓𑀸𑀬𑀲𑀺𑀭𑀸 𑀏𑀓𑀸 𑀯𑀸𑀬𑀼𑀯𑀳𑀸, 𑀅𑀧𑀭𑀸 𑀲𑀼𑀢𑁆𑀢𑀫𑀺𑀯𑀸𑀝𑁆𑀞𑀺𑀩𑀦𑁆𑀥𑀺𑀦𑀻, 𑀅𑀜𑁆𑀜𑀸 𑀆𑀳𑀸𑀭𑀯𑀸𑀳𑀺𑀦𑀻 𑀅𑀦𑁆𑀢𑀔𑁆𑀬𑀸. 𑀢𑀢𑁆𑀭 𑀢𑀢𑀺𑀬𑁂𑀦 𑀧𑀞𑀫𑀸, 𑀧𑀞𑀫𑀤𑀼𑀢𑀺𑀬𑁂𑀳𑀺 𑀤𑀼𑀢𑀺𑀬𑀸 𑀘 𑀤𑀻𑀧𑀺𑀢𑀸, 𑀢𑀢𑀺𑀬𑀸 𑀧𑀦 𑀧𑀭𑀢𑁄 𑀯𑀓𑁆𑀔𑀢𑀺. 𑀦𑀳 𑀩𑀦𑁆𑀥𑀦𑁂, 𑀅𑀭𑀼. 𑀲𑀺 𑀩𑀦𑁆𑀥𑀦𑁂, 𑀭𑁄. 𑀥𑀫 𑀲𑀤𑁆𑀤𑁂, 𑀬𑀼. 𑀦𑀤𑀸𑀤𑀺, 𑀅𑀦𑀺 𑀯𑀸, 𑀥𑀫𑀦𑀻.

𑀢𑀢𑀺𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀭𑀲𑀕𑁆𑀕𑀲𑀸’’𑀢𑁆𑀬𑀸𑀤𑀺. 𑀭𑀲𑀁 𑀕𑀲𑀢𑀻𑀢𑀺 𑀭𑀲𑀕𑁆𑀕𑀲𑀸, 𑀕𑀲 𑀅𑀤𑀦𑁂. 𑀭𑀲𑀁 𑀳𑀭𑀢𑀺 𑀦𑁂𑀢𑀻𑀢𑀺 𑀭𑀲𑀳𑀭𑀡𑀻, 𑀬𑀼, 𑀦𑀤𑀸𑀤𑀺.

𑀢𑀺𑀓𑀁 𑀫𑀁𑀲𑁂. 𑀫𑀦 𑀜𑀸𑀡𑁂, 𑀲𑁄. 𑀫𑀺𑀲 𑀲𑀤𑁆𑀤𑁂, 𑀆𑀧𑀼𑀩𑁆𑀩𑁄 𑀆𑀫𑀲𑀦𑁂 𑀯𑀸. 𑀧𑀺𑀲 𑀅𑀯𑀬𑀯𑁂, 𑀢𑁄. 𑀧𑀮𑀮𑀁, 𑀓𑀩𑁆𑀩𑀁𑀧𑁆𑀬𑀢𑁆𑀭.

𑀤𑁆𑀯𑀬𑀁 𑀆𑀢𑀧𑀸𑀤𑀺𑀦𑀸 𑀲𑀼𑀓𑁆𑀔𑀫𑀁𑀲𑁂. 𑀢𑀺𑀮𑀺𑀗𑁆𑀕𑀓𑀦𑁆𑀢𑀽𑀢𑀺 𑀢𑁆𑀯𑀦𑁆𑀢𑀁 𑀮𑀺𑀗𑁆𑀕𑀧𑀤𑀁. 𑀯𑀮, 𑀯𑀮𑁆𑀮 𑀲𑀁𑀯𑀭𑀡𑁂, 𑀊𑀭𑁄, 𑀇𑀢𑁆𑀣𑀺𑀬𑀁 ‘‘𑀇𑀢𑁆𑀣𑀺𑀬𑀫𑀢𑁄 𑀆𑀧𑀘𑁆𑀘𑀬𑁄’’𑀢𑀺 𑀆, 𑀯𑀮𑁆𑀮𑀽𑀭𑀸. 𑀉𑀤𑁆𑀥𑀁 𑀢𑀢𑁆𑀢𑀁 𑀉𑀢𑁆𑀢𑀢𑁆𑀢𑀁. 𑀢𑀧 𑀲𑀦𑁆𑀢𑀸𑀧𑁂, 𑀢𑁄.

𑁨𑁮𑁧. 𑀘𑀢𑀼𑀓𑁆𑀓𑀁 𑀮𑁄𑀳𑀺𑀢𑁂. 𑀭𑀼𑀳 𑀚𑀦𑀦𑁂, 𑀢𑁄, 𑀇𑀢𑁄 𑀯𑀸. 𑀭𑀼𑀦𑁆𑀛𑀢𑁂 𑀘𑀫𑁆𑀫𑁂𑀦𑀸𑀢𑀺 𑀭𑀼𑀥𑀺𑀭𑀁, 𑀇𑀭𑁄. 𑀲𑁄𑀡 𑀯𑀡𑁆𑀡𑁂, 𑀢𑁄. 𑀭𑀜𑁆𑀚 𑀭𑀸𑀕𑁂, 𑀢𑁄. 𑀅𑀲𑀁, 𑀔𑀢𑀚𑀁𑀧𑁆𑀬𑀢𑁆𑀭 [𑀔𑀢𑀸 𑀚𑀸𑀬𑀢𑁂 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁬.𑁬𑁪)].

𑀢𑀺𑀓𑀁 ¶ 𑀔𑁂𑀴𑁂. 𑀮𑀸 𑀆𑀤𑀸𑀦𑁂, 𑀅𑀮𑁄, 𑀇𑀢𑁆𑀣𑀺𑀬𑀫𑀸, 𑀮𑀮 𑀇𑀘𑁆𑀙𑀸𑀬𑀁 𑀯𑀸, 𑀇𑀢𑁆𑀣𑀺𑀬𑀫𑀸. 𑀔𑁂𑀮 𑀕𑀢𑀺𑀬𑀁, 𑀅. 𑀔𑀮 𑀘𑀮𑀦𑁂, 𑀲𑀜𑁆𑀘𑀬𑁂 𑀯𑀸, 𑀡𑁄, 𑀴𑀢𑁆𑀢𑀁, 𑀔𑀁 𑀯𑀸 𑀆𑀓𑀸𑀲𑀁 𑀇𑀮𑀢𑀻𑀢𑀺 𑀔𑁂𑀴𑁄. 𑀇𑀮 𑀕𑀢𑀺𑀬𑀁, 𑀓𑀫𑁆𑀫𑀦𑀺 𑀡𑁄, 𑀇𑀮 𑀕𑀢𑀺𑀫𑁆𑀳𑀺 𑀯𑀸, 𑀅, 𑀇𑀲𑁆𑀲𑁂.

𑀤𑁆𑀯𑀬𑀁 𑀧𑀺𑀢𑁆𑀢𑁂. 𑀫𑀸 𑀧𑀭𑀺𑀫𑀸𑀡𑁂, 𑀥𑀼. 𑀫𑀤 𑀉𑀫𑁆𑀫𑀸𑀤𑁂 𑀯𑀸, 𑀡𑀼, 𑀤𑀲𑁆𑀲 𑀥𑁄. 𑀫𑀸𑀬𑀽𑀢𑀺 𑀧𑀸𑀞𑁂 𑀫𑀬 𑀕𑀢𑀺𑀬𑀁, 𑀡𑀼. 𑀫𑀸𑀥𑀼𑀫𑀸𑀬𑀼𑀲𑀤𑁆𑀤𑀸 𑀤𑁆𑀯𑁂 𑀧𑀼𑀭𑀺𑀲𑁂 𑀧𑀼𑀮𑁆𑀮𑀺𑀗𑁆𑀕𑁂. 𑀅𑀧𑀺𑀤𑀥𑀸𑀢𑀻𑀢𑀺 𑀧𑀺𑀢𑁆𑀢𑀁. 𑀅𑀧𑀺𑀧𑀼𑀩𑁆𑀩𑁄 𑀥𑀸 𑀧𑀺𑀥𑀸𑀦𑁂, 𑀢𑁄, 𑀅𑀮𑁄𑀧𑁄, 𑀪𑀼𑀚𑀸𑀤𑀺, 𑀧𑀺𑀢𑁆𑀢𑀁, 𑀦𑀧𑀼𑀁𑀲𑀓𑁂.

𑀤𑁆𑀯𑀬𑀁 𑀲𑁂𑀫𑁆𑀳𑁂. 𑀲𑀺𑀮𑀺𑀲 𑀲𑀺𑀮𑁂𑀲𑀦𑁂, 𑀘𑀼𑀭𑀸𑀤𑀺, 𑀲𑀺𑀮𑀺𑀲𑁆𑀬𑀢𑁂 𑀅𑀢𑁆𑀭𑁂𑀢𑀺 𑀲𑁂𑀫𑁆𑀳𑁄, 𑀫𑀦, 𑀮𑀺𑀲𑀲𑁆𑀲 𑀳𑁄, 𑀯𑀡𑁆𑀡𑀯𑀺𑀧𑀭𑀺𑀬𑀬𑁄. 𑀇𑀢𑀭𑀢𑁆𑀭 𑀉𑀫𑁄, 𑀲𑀺𑀮𑁂𑀲𑀼𑀫𑁄. 𑀓𑀨𑁄𑀧𑁆𑀬𑀢𑁆𑀭, 𑀓𑁂𑀦 𑀢𑁄𑀬𑁂𑀦 𑀨𑀸𑀢𑀺 𑀯𑀼𑀤𑁆𑀥𑀺 𑀬𑀲𑁆𑀲 𑀓𑀨𑁄, 𑀦𑁂𑀭𑀼𑀢𑁆𑀢𑁄.

𑁨𑁮𑁨-𑁨𑁮𑁩. 𑀯𑀺𑀮𑀻𑀦𑁄 𑀯𑀺𑀪𑀽𑀢𑁄 𑀲𑁆𑀦𑁂𑀳𑁄 𑀯𑀲𑀸𑀢𑁆𑀬𑀼𑀘𑁆𑀘𑀢𑁂, 𑀯𑀲 𑀦𑀺𑀯𑀸𑀲𑁂, 𑀆. 𑀤𑁆𑀯𑀬𑀁 𑀅𑀯𑀺𑀮𑀻𑀦𑀲𑁆𑀦𑁂𑀳𑁂. 𑀫𑀺𑀤 𑀲𑁆𑀦𑁂𑀳𑀦𑁂, 𑀡𑁄. 𑀯𑀧 𑀩𑀻𑀚𑀲𑀦𑁆𑀢𑀸𑀦𑁂, 𑀅, 𑀯𑀧𑀸. ‘‘𑀯𑀧𑀸 𑀯𑀺𑀯𑀭𑀫𑁂𑀤𑁂𑀲𑀽’’𑀢𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂, 𑀅𑀫𑀭𑀓𑁄𑀲𑁂 𑀧𑀦 𑀫𑁂𑀤𑀸𑀤𑀻𑀦𑀫𑁂𑀓𑀢𑁆𑀣𑀢𑀸 𑀤𑀻𑀧𑀺𑀢𑀸, 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘‘𑀫𑁂𑀤𑁄 𑀢𑀼 𑀯𑀧𑀸 𑀯𑀲𑀸’’𑀢𑀺 [𑀅𑀫𑀭 𑁧𑁬.𑁬𑁪].

𑀢𑀺𑀓𑀁 𑀘𑀦𑁆𑀤𑀦𑀲𑀼𑀯𑀡𑁆𑀡𑀸𑀤𑁆𑀬𑀮𑀗𑁆𑀓𑀸𑀭𑀓𑀢𑀲𑀭𑀻𑀭𑀲𑁄𑀪𑀸𑀬𑀁. 𑀓𑀧𑀼 𑀲𑀸𑀫𑀢𑁆𑀣𑀺𑀬𑁂, 𑀆𑀓𑀧𑁆𑀧𑀦𑀁 𑀆𑀓𑀧𑁆𑀧𑁄, 𑀡𑁄. ‘‘𑀦𑁂𑀧𑀘𑁆𑀙𑁂 𑀕𑁂𑀳𑀫𑀢𑁆𑀢𑁂 ¶ 𑀘, 𑀯𑁂𑀲𑁄 𑀯𑁂𑀲𑁆𑀬𑀸𑀕𑀳𑁂𑀧𑀺 [𑀯𑁂𑀲𑁆𑀲𑀕𑀳𑁂𑀧𑀺 (𑀓.)] 𑀘𑁂’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁬.𑁯𑁯] 𑀭𑀪𑀲𑁄. 𑀯𑀲 𑀓𑀦𑁆𑀢𑀺𑀬𑀁, 𑀯𑀺𑀲𑀺 𑀩𑁆𑀬𑀸𑀧𑀦𑁂 𑀯𑀸, 𑀡𑁄. 𑀦𑀺𑀲𑁆𑀲𑁂𑀲𑀢𑁄 𑀧𑀣𑀦𑀁 𑀧𑀔𑁆𑀬𑀸𑀦𑀁 𑀦𑁂𑀧𑀘𑁆𑀙𑀁, 𑀧𑀣 𑀧𑀔𑁆𑀬𑀸𑀦𑁂 𑀖𑁆𑀬𑀡. 𑀧𑀝𑀺𑀓𑀫𑁆𑀫𑀁, 𑀧𑀲𑀸𑀥𑀦𑀁𑀧𑁆𑀬𑀢𑁆𑀭.

𑀙𑀓𑁆𑀓𑀁 𑀳𑀸𑀭𑀸𑀤𑁆𑀬𑀸𑀪𑀭𑀡𑁂. 𑀫𑀟𑀺 𑀪𑀽𑀲𑀸𑀬𑀁, 𑀓𑀭𑀡𑁂 𑀬𑀼. 𑀲𑀸𑀥 𑀲𑀁𑀲𑀺𑀤𑁆𑀥𑀺𑀬𑀁, 𑀬𑀼, 𑀲𑀸𑀞 𑀲𑀗𑁆𑀔𑀸𑀭𑀕𑀢𑀻𑀲𑀼 𑀯𑀸, 𑀧𑀲𑀸𑀞𑀦𑀁, 𑀫𑀼𑀤𑁆𑀥𑀚𑀤𑀼𑀢𑀺𑀬𑁄𑀢𑁆𑀭. 𑀪𑀽𑀲 𑀅𑀮𑀗𑁆𑀓𑀸𑀭𑁂, 𑀓𑀭𑀡𑁂𑀬𑁂𑀯 𑀬𑀼. 𑀆𑀪𑀭𑀺𑀬𑁆𑀬𑀢𑁂 𑀢𑀦𑁆𑀢𑀺 𑀆𑀪𑀭𑀡𑀁, 𑀪𑀭 𑀪𑀭𑀡𑁂, 𑀓𑀫𑁆𑀫𑀦𑀺 𑀬𑀼. 𑀅𑀮𑀁 𑀯𑀺𑀪𑀽𑀲𑀦𑀁 𑀓𑀭𑀺𑀬𑁆𑀬𑀢𑁂𑀦𑁂𑀦𑁂𑀢𑀺 𑀅𑀮𑀗𑁆𑀓𑀸𑀭𑁄, 𑀡𑁄. 𑀧𑀺𑀴𑀦𑁆𑀥 𑀪𑀽𑀲𑀦𑁂, 𑀓𑀭𑀡𑁂 𑀬𑀼. 𑀧𑀭𑀺𑀓𑁆𑀔𑀸𑀭𑁄𑀧𑁆𑀬𑀢𑁆𑀭 [𑀧𑀭𑀺𑀓𑀭𑁄𑀧𑁆𑀬𑀢𑁆𑀭 (𑀓.)].

𑀤𑁆𑀯𑀬𑀁 𑀫𑀓𑀼𑀝𑁂. 𑀓𑀺𑀭 𑀯𑀺𑀓𑀺𑀭𑀡𑁂, 𑀈𑀝𑁄. 𑀫𑀓𑀺 𑀫𑀡𑁆𑀟𑀦𑁂, 𑀉𑀝𑁄. 𑀫𑀼𑀓𑀼𑀝𑁄𑀢𑀺𑀧𑀺 𑀧𑀸𑀞𑁄, 𑀏𑀢𑁂 𑀤𑁆𑀯𑁂 𑀅𑀦𑀺𑀢𑁆𑀣𑀻.

𑀤𑁆𑀯𑀬𑀁 𑀫𑀓𑀼𑀝𑀕𑁆𑀕𑀝𑁆𑀞𑁂 𑀦𑀸𑀬𑀓𑀫𑀡𑀺𑀫𑁆𑀳𑀺. 𑀫𑀓𑀼𑀝𑀘𑀽𑀴𑀸𑀬𑀁 𑀘𑀼𑀫𑁆𑀩𑀺𑀢𑀸 𑀫𑀡𑀺 𑀘𑀽𑀴𑀸𑀫𑀡𑀺. 𑀫𑀓𑀼𑀝𑀲𑀺𑀭𑀲𑀺 𑀘𑀼𑀫𑁆𑀩𑀺𑀢𑀸 𑀫𑀡𑀺 𑀲𑀺𑀭𑁄𑀫𑀡𑀺.

𑁨𑁮𑁪. 𑀤𑁆𑀯𑀬𑀁 𑀉𑀡𑁆𑀳𑀻𑀲𑀧𑀝𑁆𑀝𑁂. 𑀲𑀺𑀭𑀲𑁄 𑀯𑁂𑀞𑀦𑀁 𑀲𑀺𑀭𑁄𑀯𑁂𑀞𑀦𑀁. 𑀉𑀧𑀼𑀩𑁆𑀩𑁄 𑀦𑀳 𑀩𑀦𑁆𑀥𑀦𑁂, 𑀈𑀲𑁄, 𑀯𑀡𑁆𑀡𑀯𑀺𑀓𑀸𑀭𑁄. 𑀬𑀁 𑀩𑀳𑀼𑀓𑀸𑀮𑀁 𑀤𑁂𑀩𑁆𑀬𑀸𑀫𑀦𑀼𑀲𑁆𑀲𑁂𑀲𑁆𑀯𑀧𑀺 𑀪𑀯𑀢𑀺, 𑀢𑀢𑁆𑀭 𑀓𑀡𑁆𑀡𑀸𑀪𑀭𑀡𑁂 𑀓𑀼𑀡𑁆𑀟𑀮𑀸𑀤𑀺𑀤𑁆𑀯𑀬𑀁. 𑀓𑀼𑀟𑀺 𑀤𑀸𑀳𑁂, 𑀅𑀮𑁄. 𑀯𑁂𑀞 𑀯𑁂𑀞𑀦𑁂, 𑀓𑀡𑁆𑀡𑀲𑁆𑀲 𑀯𑁂𑀞𑀦𑀁 𑀓𑀡𑁆𑀡𑀯𑁂𑀞𑀦𑀁, 𑀫𑀼𑀤𑁆𑀥𑀚𑀤𑀼𑀢𑀺𑀬𑁄𑀬𑀁.

𑀢𑀺𑀓𑀁 𑀢𑀸𑀴𑀓𑀸𑀔𑁆𑀬𑁂 𑀓𑀡𑁆𑀡𑀸𑀪𑀭𑀡𑁂. 𑀓𑀡𑁆𑀡𑀸𑀦𑀁 𑀪𑀽𑀲𑀦𑀁 𑀓𑀡𑁆𑀡𑀺𑀓𑀸, 𑀓𑀡𑁆𑀡𑀸 𑀪𑀽𑀲𑀦𑁂 𑀩𑀳𑀼𑀮𑀮𑀓𑁆𑀔𑀡𑁂 𑀡𑀺𑀓𑁄. 𑀓𑀡𑁆𑀡𑀘𑁆𑀙𑀤𑀦𑀁 ¶ 𑀧𑀽𑀭𑀢𑀺 𑀬𑁂𑀦 𑀲𑁄 𑀓𑀡𑁆𑀡𑀧𑀽𑀭𑁄. 𑀓𑀡𑁆𑀡𑀲𑁆𑀲 𑀯𑀺𑀪𑀽𑀲𑀦𑀁 𑀓𑀡𑁆𑀡𑀯𑀺𑀪𑀽𑀲𑀦𑀁, 𑀓𑀭𑀡𑁂 𑀬𑀼. 𑀢𑀸𑀮𑀧𑀢𑁆𑀢𑀁𑀧𑁆𑀬𑀢𑁆𑀭.

𑁨𑁮𑁫. 𑀤𑁆𑀯𑀬𑀁 𑀕𑀻𑀯𑀸𑀪𑀭𑀡𑁂. 𑀓𑀡𑁆𑀞𑀲𑁆𑀲 𑀪𑀽𑀲𑀸 𑀓𑀡𑁆𑀞𑀪𑀽𑀲𑀸, 𑀣𑀻. 𑀕𑀻𑀯𑀸𑀬𑀁 𑀪𑀯𑀁 𑀕𑀻𑀯𑁂𑀬𑁆𑀬𑀁, 𑀪𑀯𑀢𑁆𑀣𑁂 𑀏𑀬𑁆𑀬𑁄, 𑀕𑀻𑀯𑀸𑀬 𑀆𑀪𑀭𑀡𑀁 𑀯𑀸 𑀕𑀻𑀯𑁂𑀬𑁆𑀬𑀁, 𑀕𑀻𑀯𑀢𑁄 𑀆𑀪𑀭𑀡𑁂 𑀏𑀬𑁆𑀬𑁄.

𑀤𑁆𑀯𑀬𑀁 𑀫𑀼𑀢𑁆𑀢𑀸𑀯𑀮𑀺𑀬𑀁. 𑀳𑀭𑀻𑀬𑀢𑁂 𑀫𑀦𑁄 𑀬𑁂𑀦 𑀳𑀸𑀭𑁄. 𑀫𑀼𑀢𑁆𑀢𑀸𑀦𑀁 𑀆𑀯𑀮𑀺 𑀧𑀦𑁆𑀢𑀺 𑀫𑀼𑀢𑁆𑀢𑀸𑀯𑀮𑀺. 𑀳𑀸𑀭𑀸𑀲𑀤𑁆𑀤𑁄𑀧𑁆𑀬𑀢𑁆𑀭.

𑀘𑀢𑀼𑀓𑁆𑀓𑀁 𑀧𑀓𑁄𑀝𑁆𑀞𑀸𑀪𑀭𑀡𑁂. 𑀧𑀓𑁄𑀝𑁆𑀞𑁄 𑀦𑀸𑀫 𑀓𑀧𑁆𑀧𑀭𑀲𑁆𑀲𑀸𑀥𑁄𑀪𑀸𑀕𑁄. 𑀦𑀻 𑀦𑀬𑁂, 𑀉𑀭𑁄, 𑀇𑀬𑀸𑀤𑁂𑀲𑁄. 𑀯𑀮 𑀲𑀁𑀯𑀭𑀡𑁂, 𑀅𑀬𑁄, 𑀅𑀦𑀺𑀢𑁆𑀣𑀻, 𑀦𑀺𑀬𑀼𑀭𑁄𑀧𑀺. 𑀓𑀝 𑀯𑀲𑀸𑀯𑀭𑀡𑀕𑀢𑀻𑀲𑀼, 𑀡𑁆𑀯𑀼. 𑀧𑀭𑀺 𑀲𑀫𑀦𑁆𑀢𑀢𑁄 𑀳𑀭𑀢𑀺 𑀘𑀺𑀢𑁆𑀢𑀁 𑀬𑀦𑁆𑀢𑀺 𑀧𑀭𑀺𑀳𑀸𑀭𑀓𑀁, 𑀡𑁆𑀯𑀼. 𑀅𑀯𑀸𑀧𑀓𑁄𑀧𑁆𑀬𑀢𑁆𑀭.

𑁨𑁮𑁬-𑁨𑁮𑁭. 𑀤𑁆𑀯𑀬𑀁 𑀫𑀼𑀢𑁆𑀢𑀸𑀤𑀺𑀖𑀝𑀺𑀢𑀯𑀮𑀬𑀯𑀺𑀓𑀢𑁆𑀬𑀸𑀪𑀭𑀡𑁂. 𑀓𑀸 𑀲𑀤𑁆𑀤𑁂, 𑀓𑀡𑀧𑀘𑁆𑀘𑀬𑁄, 𑀓𑀡 𑀲𑀤𑁆𑀤𑁂 𑀯𑀸, 𑀤𑁆𑀯𑀺𑀢𑁆𑀢𑀁, 𑀓𑀗𑁆𑀓𑀡𑀁, 𑀓𑀓𑀺 𑀕𑀢𑁆𑀬𑀢𑁆𑀣𑁂 ¶ 𑀯𑀸, 𑀬𑀼, 𑀓𑀓𑀺 𑀮𑁄𑀮𑁆𑀬𑁂 𑀯𑀸, 𑀓𑀗𑁆𑀓𑀢𑀺 𑀬𑁂𑀦𑀸𑀢𑀺 𑀓𑀗𑁆𑀓𑀡𑀁, 𑀓𑀭𑀡𑁂 𑀬𑀼. 𑀓𑀭𑀲𑁆𑀲 𑀪𑀽𑀲𑀸 𑀓𑀭𑀪𑀽𑀲𑀸, 𑀣𑀻.

𑀤𑁆𑀯𑀬𑀁 𑀔𑀼𑀤𑁆𑀤𑀖𑀡𑁆𑀝𑀺𑀓𑀸𑀬𑀁. 𑀓𑀺𑀁 𑀓𑀼𑀘𑁆𑀙𑀺𑀢𑀁 𑀓𑀡𑀢𑀻𑀢𑀺 𑀓𑀺𑀗𑁆𑀓𑀡𑀻, 𑀦𑀤𑀸𑀤𑀺. 𑀓𑀺𑀗𑁆𑀓𑀺𑀡𑀻𑀢𑀺𑀧𑀺 𑀧𑀸𑀞𑀦𑁆𑀢𑀭𑀁, 𑀢𑀤𑀸 𑀬𑀤𑀸𑀤𑀺. 𑀔𑀼𑀤𑁆𑀤𑀸 𑀏𑀯 𑀖𑀡𑁆𑀝𑀸 𑀔𑀼𑀤𑁆𑀤𑀖𑀡𑁆𑀝𑀺𑀓𑀸, 𑀲𑀓𑀢𑁆𑀣𑁂 𑀓𑁄, 𑀖𑀝 𑀘𑀮𑀦𑁂.

𑀤𑁆𑀯𑀬𑀁 𑀅𑀗𑁆𑀕𑀼𑀮𑁆𑀬𑀸𑀪𑀭𑀡𑁂. 𑀅𑀗𑁆𑀕𑀼𑀮𑀺𑀬𑀁 𑀪𑀯𑀁 𑀅𑀗𑁆𑀕𑀼𑀮𑀻𑀬𑀓𑀁, 𑀈𑀬𑁄, 𑀲𑀓𑀢𑁆𑀣𑁂 𑀓𑁄, 𑀅𑀗𑁆𑀕𑀼𑀮𑀻𑀦𑀫𑀸𑀪𑀭𑀡𑀁 𑀅𑀗𑁆𑀕𑀼𑀮𑁆𑀬𑀸𑀪𑀭𑀡𑀁. 𑀉𑀫𑁆𑀫𑀺𑀓𑀸𑀧𑁆𑀬𑀢𑁆𑀭. 𑀢𑀫𑁂𑀯𑀸𑀗𑁆𑀕𑀼𑀮𑀻𑀬𑀓𑀁 𑀲𑀸𑀓𑁆𑀔𑀭𑀫𑀓𑁆𑀔𑀭𑀯𑀦𑁆𑀢𑀁 ‘‘𑀫𑀼𑀤𑁆𑀤𑀺𑀓𑀸, 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀸’’𑀢𑀺 𑀘𑁄𑀘𑁆𑀘𑀢𑁂. 𑀫𑀼𑀤 𑀢𑁄𑀲𑁂, 𑀡𑁆𑀯𑀼, 𑀆, 𑀫𑀼𑀤𑁆𑀤𑀺𑀓𑀸, 𑀨𑀮𑀯𑀺𑀲𑁂𑀲𑁂𑀧𑁆𑀬𑀬𑀁. 𑀅𑀗𑁆𑀕𑀼𑀮𑀺𑀬𑀁 𑀪𑀯𑀸 𑀫𑀼𑀤𑁆𑀤𑀸 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀸.

𑀤𑁆𑀯𑀬𑀁 𑀇𑀢𑁆𑀣𑀺𑀓𑀝𑁆𑀬𑀸𑀪𑀭𑀡𑁂. 𑀭𑀲 𑀲𑀤𑁆𑀤𑁂, 𑀓𑀢𑁆𑀢𑀭𑀺 𑀬𑀼, 𑀆, 𑀭𑀲𑀦𑀸. 𑀲𑀸𑀬𑁂𑀯 𑀇𑀦𑀻𑀫𑁆𑀳𑀺 𑀭𑀲𑀦𑀻. ‘‘𑀲𑀸𑀭𑁂 𑀥𑀦𑀺𑀫𑁆𑀳𑀺 𑀭𑀲𑀦𑀁, 𑀚𑀺𑀯𑁆𑀳𑀸𑀬𑀁 𑀭𑀲𑀦𑀸 𑀦 𑀲𑁄’’𑀢𑀺 𑀭𑀼𑀤𑁆𑀤𑁄. 𑀫𑁂𑀳𑀦𑀲𑁆𑀲 𑀔𑀲𑁆𑀲 𑀫𑀸𑀮𑀸 𑀫𑁂𑀔𑀮𑀸𑀢𑀺 𑀦𑀺𑀭𑀼𑀢𑁆𑀢𑀺, 𑀫𑁂𑀳𑀦𑀺𑀦𑁆𑀤𑁆𑀭𑀺𑀬𑀲𑁆𑀲 𑀫𑀸𑀮𑀸𑀢𑁆𑀬𑀢𑁆𑀣𑁄. 𑀓𑀸𑀜𑁆𑀘𑀻 𑀲𑀢𑁆𑀢𑀓𑀻, 𑀲𑀸𑀭𑀲𑀦𑀁𑀧𑁆𑀬𑀢𑁆𑀭.

𑀏𑀓𑀬𑀝𑁆𑀞𑀺 𑀪𑀯𑁂 𑀓𑀸𑀜𑁆𑀘𑀻, 𑀫𑁂𑀔𑀮𑀸 𑀢𑁆𑀯’𑀝𑁆𑀞𑀬𑀝𑁆𑀞𑀺𑀓𑀸;

𑀭𑀲𑀦𑀸 𑀲𑁄𑀴𑀲𑀸 𑀜𑁂𑀬𑁆𑀬𑀸, 𑀓𑀮𑀸𑀧𑀸 𑀧𑀜𑁆𑀘𑀯𑀻𑀲𑀢𑀺 [𑀓𑀮𑀸𑀧𑁄 𑀧𑀜𑁆𑀘𑀯𑀻𑀲𑀓𑁄 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁬.𑁧𑁦𑁮)].

𑀢𑀺𑀓𑀁 𑀲𑁄𑀯𑀡𑁆𑀡𑁂 𑀧𑀕𑀡𑁆𑀟𑀪𑀽𑀲𑀦𑁂. 𑀧𑀕𑀡𑁆𑀟𑁄 𑀦𑀸𑀫 𑀓𑀧𑁆𑀧𑀭𑀲𑁆𑀲𑁄𑀧𑀭𑀺𑀪𑀸𑀕𑁄. 𑀓𑁂 𑀲𑀤𑁆𑀤𑁂, 𑀉𑀭𑁄, 𑀬𑀸𑀕𑀫𑁄. 𑀅𑀗𑁆𑀕 𑀕𑀫𑀦𑁂. 𑀤𑁄. 𑀩𑀸𑀳𑀼𑀫𑀽𑀮𑀲𑁆𑀲, 𑀩𑀸𑀳𑀼𑀫𑀽𑀮𑁂 𑀯𑀸 𑀪𑀯𑀁 𑀯𑀺𑀪𑀽𑀲𑀦𑀁 𑀩𑀸𑀳𑀼𑀫𑀽𑀮𑀯𑀺𑀪𑀽𑀲𑀦𑀁.

𑁨𑁮𑁮. 𑀘𑀢𑀼𑀓𑁆𑀓𑀁 𑀇𑀢𑁆𑀣𑀺𑀘𑀭𑀡𑀯𑀺𑀪𑀽𑀲𑀦𑁂. 𑀅𑀗𑁆𑀕𑀤𑀸𑀓𑀸𑀭𑀁 𑀧𑀸𑀤𑀪𑀽𑀲𑀦𑀁 𑀧𑀸𑀤𑀗𑁆𑀕𑀤𑀁. 𑀫𑀚𑀺 𑀲𑀤𑁆𑀤𑀢𑁆𑀣𑁄, 𑀈𑀭𑁄, 𑀧𑀸𑀤𑁂 𑀓𑀝𑀓𑀁 𑀧𑀸𑀤𑀓𑀝𑀓𑀁. 𑀊𑀦𑀁 𑀧𑀸𑀤𑀁 𑀧𑀽𑀭𑁂𑀢𑀻𑀢𑀺 𑀦𑀽𑀧𑀼𑀭𑁄, 𑀯𑀡𑁆𑀡𑀯𑀺𑀧𑀭𑀺𑀬𑀬𑁄. 𑀧𑀸𑀤𑀓𑀝𑀓𑁄 𑀘 𑀦𑀽𑀧𑀼𑀭𑁄 𑀘𑁂𑀢𑀺 𑀓𑀝𑀓𑀲𑀤𑁆𑀤𑀲𑁆𑀲 𑀧𑀼𑀮𑁆𑀮𑀺𑀗𑁆𑀕𑁂𑀧𑀺 𑀧𑀯𑀢𑁆𑀢𑀦𑀢𑁄 ¶ 𑀤𑁆𑀯𑀦𑁆𑀤𑀲𑀫𑀸𑀲𑁄. 𑀢𑀼𑀮𑀸𑀓𑁄𑀝𑀺, 𑀳𑀁𑀲𑀓𑁄𑀧𑁆𑀬𑀢𑁆𑀭. 𑀢𑀼𑀮 𑀕𑀢𑀺𑀓𑁄𑀝𑀺𑀮𑁆𑀬𑁂. 𑀓𑀼𑀝𑀺𑀮𑀓𑁄𑀝𑀺𑀢𑁆𑀢𑀸 𑀢𑀼𑀮𑀸𑀓𑁄𑀝𑀺, 𑀧𑀼𑀫𑁂. 𑀳𑀁𑀲𑀕𑀢𑀺𑀢𑁆𑀢𑀸 𑀳𑀁𑀲𑀓𑁄.

𑁨𑁮𑁯. 𑀫𑀼𑀔𑀨𑀼𑀮𑁆𑀮𑀸𑀤𑀬𑁄 𑀅𑀮𑀗𑁆𑀓𑀸𑀭𑀧𑁆𑀧𑀪𑁂𑀤𑀸 𑀲𑀺𑀬𑀼𑀁. 𑀫𑀼𑀔𑀨𑀼𑀮𑁆𑀮𑀁 𑀦𑀸𑀫 𑀲𑀼𑀯𑀡𑁆𑀡𑀫𑀬𑁄 𑀫𑀼𑀔𑀸𑀮𑀗𑁆𑀓𑀸𑀭𑁄, 𑀫𑀼𑀔𑁂 𑀨𑀼𑀮𑁆𑀮𑀢𑀻𑀢𑀺 𑀫𑀼𑀔𑀨𑀼𑀮𑁆𑀮𑀁, 𑀨𑀼𑀮𑁆𑀮 𑀯𑀺𑀓𑀲𑀦𑁂, 𑀤𑀦𑁆𑀢𑀸𑀤𑀻𑀲𑀼 𑀲𑀼𑀯𑀡𑁆𑀡𑀫𑀬𑀸𑀮𑀗𑁆𑀓𑀸𑀭𑁄𑀧𑀺 𑀫𑀼𑀔𑀨𑀼𑀮𑁆𑀮𑀫𑁂𑀯. 𑀉𑀡𑁆𑀡𑀢𑀁 𑀲𑀼𑀯𑀡𑁆𑀡𑀸𑀤𑀺𑀭𑀘𑀺𑀢𑀁 𑀦𑀮𑀸𑀝𑀸𑀪𑀭𑀡𑀁, 𑀉𑀧𑀼𑀩𑁆𑀩𑁄 𑀦𑀫𑀼 𑀦𑀫𑀦𑁂. 𑀏𑀢𑁆𑀣 𑀘 𑀫𑀼𑀔𑀨𑀼𑀮𑁆𑀮𑀼𑀡𑁆𑀡𑀢𑀸𑀦𑀁 𑀯𑀺𑀲𑁂𑀲𑀁 𑀯𑀺𑀧𑀭𑀺𑀬𑀬𑁂𑀦𑀸𑀧𑀻𑀢𑀺 𑀯𑀤𑀦𑁆𑀢𑀺. 𑀕𑀸𑀯𑀻𑀦𑀁 𑀣𑀦𑀸𑀓𑀸𑀭𑀢𑁆𑀢𑀸 𑀕𑀢𑁆𑀣𑀦𑀁, 𑀑𑀲𑁆𑀲𑀢𑁆𑀢𑀁, 𑀢𑀫𑁂𑀯 𑀉𑀢𑁆𑀢𑀫𑀢𑁆𑀢𑀸 𑀉𑀕𑁆𑀕𑀢𑁆𑀣𑀦𑀁, 𑀘𑀢𑀼𑀬𑀝𑁆𑀞𑀺𑀓𑁄 𑀳𑀸𑀭𑀪𑁂𑀤𑁄. 𑀕𑀫𑀼 𑀕𑀫𑀦𑁂, 𑀡𑁆𑀯𑀼, 𑀤𑁆𑀯𑀺𑀢𑁆𑀢𑀁, 𑀅𑀲𑁆𑀲𑀺𑀢𑁆𑀢𑀜𑁆𑀘, 𑀕𑀺𑀗𑁆𑀕𑀫𑀓𑀁, 𑀩𑀸𑀢𑁆𑀢𑀺𑀁𑀲𑀬𑀝𑁆𑀞𑀺𑀓𑁄 𑀳𑀸𑀭𑀪𑁂𑀤𑁄𑀯. 𑀆𑀤𑀺𑀦𑀸 𑀅𑀤𑁆𑀥𑀳𑀸𑀭𑁄, 𑀫𑀸𑀡𑀯𑀓𑁄, 𑀏𑀓𑀸𑀯𑀮𑀻, 𑀦𑀓𑁆𑀔𑀢𑁆𑀢𑀫𑀸𑀮𑀸𑀤𑀬𑁄 𑀳𑀸𑀭𑀪𑁂𑀤𑀸 𑀘 𑀲𑀗𑁆𑀕𑀬𑁆𑀳𑀦𑁆𑀢𑀺 [𑀅𑀫𑀭 𑁧𑁬.𑁧𑁦𑁬].

𑁨𑁯𑁦. 𑀧𑀚𑁆𑀚𑀁 𑀯𑀢𑁆𑀣𑀫𑀢𑁆𑀢𑁂. 𑀘𑀺𑀮 𑀯𑀲𑁆𑀲𑀦𑁂, 𑀘𑀺𑀮𑁆𑀬𑀢𑁂 𑀅𑀘𑁆𑀙𑀸𑀤𑀻𑀬𑀢𑁂𑀢𑀺, 𑀡𑁄, 𑀣𑀺𑀬𑀁 𑀘𑁂𑀮𑀻. 𑀙𑀤 𑀲𑀁𑀯𑀭𑀡𑁂, 𑀆𑀧𑀼𑀩𑁆𑀩𑁄 𑀓𑀭𑀡𑁂, 𑀬𑀼. 𑀯𑀲 𑀅𑀘𑁆𑀙𑀸𑀤𑀦𑁂, 𑀯𑀲𑁆𑀬𑀢𑁂 𑀅𑀘𑁆𑀙𑀸𑀤𑀻𑀬𑀢𑁂𑀢𑀺 𑀯𑀢𑁆𑀣𑀁, 𑀣𑁄. 𑀡𑀫𑁆𑀳𑀺 𑀯𑀸𑀲𑁄. 𑀬𑀼𑀫𑁆𑀳𑀺 𑀯𑀲𑀦𑀁. 𑀅𑀫 𑀕𑀫𑀦𑁂, 𑀓𑀭𑀡𑁂 𑀬𑀼, 𑀅𑀁𑀲𑀼𑀓𑀁, 𑀭𑀁𑀲𑀺𑀧𑀭𑀺𑀬𑀸𑀬𑁄𑀧𑁆𑀬𑀬𑀁. 𑀅𑀫𑁆𑀩 𑀲𑀤𑁆𑀤𑁂, 𑀓𑀢𑁆𑀢𑀭𑀺 𑀅𑀭𑁄. 𑀧𑀝 𑀕𑀫𑀦𑁂, 𑀓𑀭𑀡𑁂 𑀅, 𑀲𑁄𑀪𑀦𑀘𑁂𑀮𑁂𑀧𑁆𑀬𑀬𑀁. 𑀤𑀼 𑀕𑀫𑀦𑁂, 𑀓𑀭𑀡𑁂 𑀲𑁄, 𑀤𑁆𑀯𑀺𑀢𑁆𑀢𑀁, 𑀤𑀼𑀭𑀽𑀧𑀁 𑀅𑀲𑀢𑀺 𑀔𑁂𑀧𑀢𑀻𑀢𑀺 𑀯𑀸 𑀤𑀼𑀲𑁆𑀲𑀁, 𑀤𑀼𑀭𑀽𑀧𑀁 𑀅𑀲𑀢𑀺 𑀤𑀻𑀧𑁂𑀢𑀻𑀢𑀺 𑀯𑀸 𑀤𑀼𑀲𑁆𑀲𑀁, 𑀤𑀼𑀧𑀼𑀩𑁆𑀩𑁄 𑀅𑀲 𑀤𑀺𑀢𑁆𑀢𑀺𑀬𑀁 ¶ . 𑀘𑀮 𑀯𑀲𑀦𑁂, 𑀅𑀲𑁆𑀲𑁄𑀢𑁆𑀢𑀁, 𑀴𑀢𑁆𑀢𑀜𑁆𑀘. 𑀲𑀝 𑀭𑀼𑀚𑀸𑀯𑀺𑀲𑀭𑀡𑀕𑀢𑁆𑀬𑀸𑀯𑀲𑀸𑀦𑁂𑀲𑀼, 𑀡𑁆𑀯𑀼.

𑁨𑁯𑁧. 𑀧𑀚𑁆𑀚𑀁 𑀯𑀢𑁆𑀣𑀪𑁂𑀤𑁂. 𑀢𑀢𑁆𑀭𑀸𑀤𑀺𑀤𑁆𑀯𑀬𑀁 𑀤𑀼𑀓𑀽𑀮𑀔𑁆𑀬𑁂 𑀯𑀢𑁆𑀣𑁂. 𑀔𑀼 𑀲𑀤𑁆𑀤𑁂, 𑀫𑁄, 𑀔𑀼𑀫𑀲𑀤𑁆𑀤𑀸 𑀯𑀺𑀓𑀸𑀭𑁂 𑀡𑁄, 𑀔𑀼𑀫𑀸𑀬 𑀯𑀺𑀓𑀸𑀭𑁄 𑀔𑁄𑀫𑀁, 𑀔𑀼𑀫𑀸 𑀦𑀸𑀫 𑀅𑀢𑀲𑀻, 𑀢𑀩𑁆𑀩𑀓𑁆𑀓𑀮𑀲𑀫𑁆𑀪𑀯𑀁 𑀯𑀢𑁆𑀣𑀁, 𑀯𑀸𑀘𑁆𑀘𑀮𑀺𑀗𑁆𑀕𑁄𑀬𑀁. 𑀓𑀽𑀮 𑀆𑀯𑀭𑀡𑁂, 𑀤𑀼𑀓𑁆𑀔𑁂𑀦 𑀓𑀼𑀮𑁆𑀬𑀢𑁂𑀢𑀺 𑀤𑀼𑀓𑀽𑀮𑀁, 𑀤𑀼𑀫𑁂𑀳𑀺 𑀚𑀸𑀢𑀁 𑀓𑀽𑀮𑀦𑁆𑀢𑀺 𑀯𑀸 𑀤𑀼𑀓𑀽𑀮𑀁. 𑀓𑁂𑀘𑀺 𑀧𑀦 ‘‘𑀤𑀼𑀓𑀽𑀮𑀫𑁆𑀧𑀺 𑀏𑀓𑀁 𑀯𑀢𑁆𑀣𑀦𑁆𑀢𑀭𑀁, 𑀦 𑀔𑁄𑀫𑀦𑀸𑀫’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀁 ‘‘𑀔𑁄𑀫’𑀫𑀝𑁆𑀝𑁂 𑀤𑀼𑀓𑀽𑀮𑁂 𑀘, 𑀅𑀢𑀲𑀻𑀯𑀲𑀦𑁂𑀧𑀺 𑀘’’, ‘‘𑀔𑁄𑀫’𑀫𑀝𑁆𑀝𑁂 𑀤𑀼𑀓𑀽𑀮𑁂𑀘𑀸’’𑀢𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑀢𑀺𑀓𑀡𑁆𑀟𑀲𑁂𑀲𑁂𑀲𑀼 [𑀦𑀸𑀦𑀢𑁆𑀣𑀲𑀗𑁆𑀕𑀳 𑁩.𑁩.𑁨𑁯𑁫] 𑀯𑀼𑀢𑁆𑀢𑀢𑁆𑀢𑀸 𑀦 𑀕𑀳𑁂𑀢𑀩𑁆𑀩𑀁. 𑀓𑁄𑀲𑁄 𑀦𑀸𑀫 𑀓𑀺𑀫𑀺𑀕𑀩𑁆𑀪𑁄, 𑀢𑀢𑁄 𑀚𑀸𑀢𑀢𑁆𑀢𑀸 𑀓𑁄𑀲𑁂𑀬𑁆𑀬𑀁, 𑀏𑀬𑁆𑀬𑁄, ‘‘𑀓𑁄𑀲𑁂𑀬𑁆𑀬𑀁 𑀓𑀺𑀫𑀺𑀓𑁄𑀲𑁄𑀢𑁆𑀣’’𑀦𑁆𑀢𑀺 [𑀅𑀫𑀭 𑁧𑁬.𑁧𑁧𑁧] 𑀳𑀺 𑀯𑀼𑀢𑁆𑀢𑀁. 𑀓𑁄𑀲𑁂𑀬𑁆𑀬𑀫𑁂𑀯 𑀥𑁄𑀢𑀁 𑀧𑀝𑁆𑀝𑀼𑀡𑁆𑀡𑀁 𑀦𑀸𑀫, 𑀯𑀼𑀢𑁆𑀢𑀜𑁆𑀘 ‘‘𑀧𑀝𑁆𑀝𑀼𑀡𑁆𑀡𑀁 𑀥𑁄𑀢𑀓𑁄𑀲𑁂𑀬𑁆𑀬’’𑀦𑁆𑀢𑀺 [𑀅𑀫𑀭 𑁧𑁬.𑁧𑁧𑁩]. 𑀧𑀢𑁆𑀢𑀼𑀡𑁆𑀡𑀦𑁆𑀢𑀺𑀧𑀺 𑀧𑀸𑀞𑀦𑁆𑀢𑀭𑀁. 𑀧𑀝𑁆𑀝𑀼𑀡𑁆𑀡𑀭𑀝𑁆𑀞𑁂 𑀚𑀸𑀢𑀢𑁆𑀢𑀸 𑀧𑀝𑁆𑀝𑀼𑀡𑁆𑀡𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀓𑀫𑀼 𑀓𑀦𑁆𑀢𑀺𑀬𑀁, 𑀓𑀫𑀦𑀻𑀬𑀢𑁆𑀢𑀸 𑀓𑀫𑁆𑀩𑀮𑁄, 𑀭𑀗𑁆𑀓𑀼𑀦𑀸𑀫𑀓𑀲𑁆𑀲 𑀳𑀭𑀺𑀡𑀯𑀺𑀲𑁂𑀲𑀲𑁆𑀲 𑀮𑁄𑀫𑁂𑀦𑀲𑀜𑁆𑀚𑀸𑀢𑀯𑀢𑁆𑀣𑀁 [𑀭𑀸𑀗𑁆𑀓𑀯𑀁 𑀯𑀺𑀕𑀭𑁄𑀫𑀚𑀁 (𑀅𑀫𑀭 𑁧𑁬.𑁧𑁧𑁧)], 𑀅𑀮𑁄, 𑀯𑀸𑀕𑀫𑁄 𑀘 𑀫𑀚𑁆𑀛𑁂. 𑀯𑀸𑀲𑀤𑁆𑀤𑁄 𑀓𑀫𑁆𑀩𑀮𑀲𑀤𑁆𑀤𑀲𑁆𑀲 𑀦𑀧𑀼𑀁𑀲𑀓𑀢𑁆𑀢𑀁 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀭𑀮𑁆𑀮𑀓𑁄𑀧𑀺 [𑀅𑀫𑀭 𑁧𑁬.𑁧𑁧𑁬] 𑀓𑀫𑁆𑀩𑀮𑀧𑀭𑀺𑀬𑀸𑀬𑁄. 𑀲𑀡 𑀲𑀤𑁆𑀤𑁂, 𑀓𑀢𑁆𑀢𑀭𑀺 𑀅, 𑀲𑀡𑁄 𑀦𑀸𑀫 𑀣𑀺𑀭𑀢𑁆𑀢𑀘𑁄 𑀏𑀓𑁄 𑀭𑀼𑀓𑁆𑀔𑀬𑁄𑀦𑀺, 𑀬𑀲𑁆𑀲 𑀢𑀘𑁂𑀦 𑀓𑁂𑀯𑀝𑁆𑀝𑀸𑀤𑀬𑁄 𑀚𑀸𑀮𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀲𑀡𑀲𑁆𑀲 𑀯𑀺𑀓𑀸𑀭𑁄 𑀲𑀸𑀡𑀁, 𑀯𑀢𑁆𑀣𑀁. 𑀫𑀺𑀕𑀮𑁄𑀫𑀸𑀦𑀺 𑀓𑁄𑀝𑁆𑀝𑁂𑀢𑁆𑀯𑀸 𑀲𑀼𑀔𑀼𑀫𑀸𑀦𑀺 𑀓𑀢𑁆𑀯𑀸 𑀓𑀢𑀫𑀫𑁆𑀩𑀭𑀁 𑀓𑁄𑀝𑀼𑀫𑁆𑀩𑀭𑀁, 𑀓𑀼𑀝 𑀙𑁂𑀤𑀦𑁂, 𑀉𑀲𑁆𑀲𑁄, 𑀅𑀲𑁆𑀲𑀼, 𑀓𑁄𑀝𑀼𑀫𑁆𑀩𑀭𑀝𑁆𑀞𑁂𑀚𑀸𑀢𑀢𑁆𑀢𑀸 𑀯𑀸 𑀓𑁄𑀝𑀼𑀫𑁆𑀩𑀭𑀁. 𑀪𑀗𑁆𑀕𑀁 𑀦𑀸𑀫 𑀔𑁄𑀫𑀸𑀤𑀻𑀦𑀺 𑀲𑀩𑁆𑀩𑀸𑀦𑀺 ¶ 𑀏𑀓𑀚𑁆𑀛𑀸𑀦𑀺 𑀯𑁄𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀯𑀢𑁆𑀣𑀁, 𑀪𑀦𑁆𑀚 𑀅𑀯𑀫𑀤𑁆𑀤𑀦𑁂, 𑀅𑀣 𑀯𑀸 𑀪𑀗𑁆𑀕𑀁 𑀦𑀸𑀫 𑀲𑀸𑀡𑀨𑀮𑀁, 𑀢𑀩𑁆𑀩𑀺𑀓𑀸𑀭𑀢𑁆𑀢𑀸 𑀯𑀢𑁆𑀣𑀁 𑀪𑀗𑁆𑀕𑀁, 𑀯𑀼𑀢𑁆𑀢𑀜𑁆𑀘 𑀦𑀸𑀦𑀢𑁆𑀣𑀲𑀗𑁆𑀕𑀳𑁂 ‘‘𑀪𑀗𑁆𑀕𑀸 𑀲𑀸𑀡𑀸𑀔𑁆𑀬𑀲𑀲𑁆𑀲𑁂𑀧𑀻’’𑀢𑀺. 𑀲𑀲𑁆𑀲𑀲𑀤𑁆𑀤𑁂𑀦 𑀘𑁂𑀢𑁆𑀣 𑀨𑀮𑀁 𑀯𑀼𑀢𑁆𑀢𑀁, ‘‘𑀭𑀼𑀓𑁆𑀔𑀸𑀤𑀻𑀦𑀁 𑀨𑀮𑀁 𑀲𑀲𑁆𑀲’’𑀦𑁆𑀢𑀺 [𑀅𑀫𑀭 𑁧𑁪.𑁧𑁫] 𑀯𑀘𑀦𑀢𑁄. 𑀪𑀗𑁆𑀕𑀫𑁆𑀧𑀺 𑀯𑀸𑀓𑀫𑀬𑀫𑁂𑀯𑀸𑀢𑀺 𑀓𑁂𑀘𑀺. 𑀯𑀢𑁆𑀣𑀦𑁆𑀢𑀭𑀁 𑀯𑀢𑁆𑀣𑀯𑀺𑀲𑁂𑀲𑁄. 𑀆𑀤𑀺𑀦𑀸 𑀓𑀧𑁆𑀧𑀸𑀲𑀸𑀤𑀬𑁄𑀧𑀺 𑀕𑀳𑀺𑀢𑀸.

𑁨𑁯𑁨-𑁨𑁯𑁩. 𑀘𑀢𑀼𑀓𑁆𑀓𑀁 𑀧𑀭𑀺𑀥𑀸𑀦𑀪𑀽𑀢𑁂 𑀅𑀥𑁄𑀯𑀢𑁆𑀣𑁂. 𑀅𑀥𑁄𑀪𑀸𑀕𑁂 𑀯𑀲𑀻𑀬𑀢𑁂𑀢𑀺 𑀦𑀺𑀯𑀸𑀲𑀦𑀁, 𑀦𑀺𑀲𑀤𑁆𑀤𑁄 𑀅𑀥𑁄𑀪𑀸𑀕𑀲𑁆𑀲 𑀚𑁄𑀢𑀓𑁄. 𑀯𑀲 𑀅𑀘𑁆𑀙𑀸𑀤𑀦𑁂, 𑀓𑀫𑁆𑀫𑀦𑀺 𑀬𑀼. 𑀩𑀸𑀳𑀼𑀮𑁆𑀬𑁂𑀦 𑀅𑀦𑁆𑀢𑀭𑁂 𑀫𑀚𑁆𑀛𑁂 𑀪𑀯𑀁 𑀅𑀦𑁆𑀢𑀭𑀻𑀬𑀁, 𑀈𑀬𑁄. 𑀲𑀫𑀸𑀦𑀮𑀺𑀗𑁆𑀕𑀢𑁆𑀢𑀸 𑀤𑁆𑀯𑀦𑁆𑀤𑁄. 𑀅𑀦𑁆𑀢𑀭𑁂 𑀪𑀯𑀁 𑀅𑀦𑁆𑀢𑀭𑀁, 𑀡𑁄. 𑀅𑀦𑁆𑀢𑀭𑁂 𑀫𑀚𑁆𑀛𑁂 𑀪𑀯𑁄 𑀯𑀸𑀲𑁄 𑀅𑀦𑁆𑀢𑀭𑀯𑀸𑀲𑀓𑁄, 𑀲𑀓𑀢𑁆𑀣𑁂 𑀓𑁄. 𑀉𑀧𑀲𑀁𑀩𑁆𑀬𑀸𑀦𑀁𑀧𑁆𑀬𑀢𑁆𑀭 [𑀅𑀫𑀭 𑁧𑁬.𑁧𑁧𑁭].

𑀧𑀜𑁆𑀘𑀓𑀁 𑀉𑀧𑀭𑀺𑀥𑀸𑀦𑁂. 𑀯𑀭 𑀅𑀘𑁆𑀙𑀸𑀤𑀦𑁂, 𑀧𑀧𑀼𑀩𑁆𑀩𑁄, 𑀓𑀫𑁆𑀫𑀦𑀺 𑀡𑁄, 𑀉𑀪𑀬𑀢𑁆𑀭𑀸𑀧𑀺 𑀯𑀼𑀤𑁆𑀥𑀺, 𑀧𑀸𑀯𑀸𑀭𑁄. 𑀉𑀢𑁆𑀢𑀭𑀲𑁆𑀫𑀺𑀁 𑀤𑁂𑀳𑀪𑀸𑀕𑁂 𑀆𑀲𑀚𑁆𑀚𑀢𑁂𑀢𑀺 𑀉𑀢𑁆𑀢𑀭𑀸𑀲𑀗𑁆𑀕𑁄, 𑀆 𑀧𑀼𑀩𑁆𑀩𑁄 𑀲𑀜𑁆𑀚 𑀲𑀗𑁆𑀕𑁂. 𑀉𑀧𑀭𑀺 𑀲𑀁𑀯𑀻𑀬𑀢𑁂 𑀧𑀺𑀥𑀻𑀬𑀢𑁂 𑀩𑀸𑀳𑀼𑀮𑁆𑀬𑁂𑀦𑀸𑀢𑀺, 𑀬𑀼. 𑀉𑀧𑀲𑀁𑀧𑀼𑀩𑁆𑀩𑁄 𑀯𑀻 𑀢𑀦𑁆𑀢𑀲𑀦𑁆𑀢𑀸𑀦𑁂. 𑀉𑀢𑁆𑀢𑀭𑀲𑁆𑀫𑀺𑀁 𑀤𑁂𑀳𑀪𑀸𑀕𑁂 𑀪𑀯𑀁 𑀯𑀺𑀚𑁆𑀚𑀫𑀸𑀦𑀁 𑀉𑀢𑁆𑀢𑀭𑀁, 𑀉𑀢𑁆𑀢𑀭𑀻𑀬𑀜𑁆𑀘, 𑀡𑁄, 𑀈𑀬𑁄 𑀘. 𑀲𑀁𑀩𑁆𑀬𑀸𑀦𑀁𑀧𑁆𑀬𑀢𑁆𑀭.

𑀦𑀯𑀁 𑀯𑀢𑁆𑀣𑀁 𑀅𑀳𑀢𑀦𑁆𑀢𑀺 𑀫𑀢𑀁 𑀓𑀣𑀺𑀢𑀁, 𑀦 𑀳𑀜𑁆𑀜𑀢𑀺 𑀬𑀁 𑀧𑀸𑀲𑀸𑀡𑀸𑀤𑀻𑀳𑀻𑀢𑀺 𑀅𑀳𑀢𑀁. 𑀢𑀦𑁆𑀢𑀢𑁄 𑀅𑀘𑀺𑀭𑀫𑀸𑀳𑀭𑀺𑀢𑀁 𑀯𑀢𑁆𑀣𑀁. 𑀅𑀦𑀸𑀳𑀢𑀁, 𑀦𑀺𑀧𑁆𑀧𑀯𑀸𑀡𑀺, 𑀢𑀦𑁆𑀢𑀓𑀁𑀧𑁆𑀬𑀢𑁆𑀭. 𑀯𑀼𑀢𑁆𑀢𑀜𑁆𑀘 ‘‘𑀅𑀦𑀸𑀳𑀢𑀁 𑀦𑀺𑀧𑁆𑀧𑀯𑀸𑀡𑀺, 𑀢𑀦𑁆𑀢𑀓𑀜𑁆𑀘 𑀦𑀯𑀫𑁆𑀩𑀭𑁂’’𑀢𑀺 [𑀅𑀫𑀭 𑁧𑁬.𑁧𑁧𑁨].

𑀤𑁆𑀯𑀬𑀁 ¶ 𑀘𑀺𑀭𑀓𑀸𑀮𑀢𑁆𑀢𑀸 𑀦𑀺𑀤𑁆𑀤𑀲𑁂 𑀚𑀺𑀡𑁆𑀡𑀯𑀢𑁆𑀣𑁂. 𑀦𑀢𑁆𑀣𑀺 𑀅𑀦𑁆𑀢𑁄 𑀤𑀲𑀸 𑀬𑀲𑁆𑀲 𑀦𑀦𑁆𑀢𑀓𑀁, 𑀲𑀓𑀢𑁆𑀣𑁂 𑀓𑁄. 𑀓𑀼𑀘𑁆𑀙𑀺𑀢𑁄 𑀧𑀝𑁄 𑀓𑀧𑁆𑀧𑀝𑁄, 𑀓𑀧𑁆𑀧 𑀯𑀺𑀢𑀓𑁆𑀓𑁂 𑀯𑀸, 𑀅𑀝𑁄. 𑀤𑁆𑀯𑀬𑀁 𑀅𑀣𑀺𑀭𑀯𑀢𑁆𑀣𑁂, 𑀚𑀺𑀡𑁆𑀡𑀯𑀲𑀦𑀁 𑀅𑀣𑀺𑀭𑀁 𑀯𑀢𑁆𑀣𑀁. ‘‘𑀧𑀝’’𑀇𑀢𑀺 𑀘𑀭𑀢𑀺 𑀨𑁄𑀝𑀢𑀻𑀢𑀺 𑀧𑀝𑀘𑁆𑀘𑀭𑀁, 𑀧𑀝𑀘𑁆𑀘𑀭𑀫𑁂𑀯 𑀧𑀴𑀘𑁆𑀘𑀭𑀁, 𑀴𑀢𑁆𑀢𑀁.

𑁨𑁯𑁪. 𑀤𑁆𑀯𑀬𑀁 𑀓𑁄𑀝𑀺𑀓𑀸𑀤𑀺𑀲𑀦𑁆𑀦𑀸𑀳𑁂, 𑀘𑁄𑀴𑁂 𑀘. 𑀓𑀘 𑀩𑀦𑁆𑀥𑀦𑁂, 𑀉𑀓𑁄, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄 𑀘. 𑀯𑀸𑀡𑀁 𑀲𑀭𑀁 𑀯𑀸𑀭𑀬𑀢𑀻𑀢𑀺 𑀯𑀸𑀭𑀯𑀸𑀡𑁄, 𑀓𑀫𑁆𑀫𑀦𑀺 𑀡𑁄, 𑀅𑀪𑀺𑀥𑀸𑀦𑀢𑁄 𑀯𑀸𑀭𑀲𑁆𑀲 𑀧𑀼𑀩𑁆𑀩𑀦𑀺𑀧𑀸𑀢𑁄, 𑀅𑀦𑀺𑀢𑁆𑀣𑀺𑀬𑀫𑁂𑀢𑁂. 𑀯𑀢𑁆𑀣𑀲𑁆𑀲 𑀅𑀯𑀬𑀯𑁂 𑀤𑀲𑀸𑀲𑀤𑁆𑀤𑁄 𑀇𑀢𑁆𑀣𑀻. ‘‘𑀤𑀲𑀸 𑀯𑀢𑁆𑀬𑀫𑀯𑀢𑁆𑀣𑀸𑀬𑀁, 𑀯𑀢𑁆𑀣𑀁𑀲𑁂 𑀩𑀳𑀼𑀫𑁆𑀳𑀺 𑀤𑁆𑀯𑀺𑀲𑀽’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁬.𑁧𑁧𑁪] 𑀭𑀪𑀲𑁄. 𑀤𑀸 𑀙𑁂𑀤𑀦𑁂, 𑀓𑀫𑁆𑀫𑀦𑀺 𑀲𑁄, 𑀭𑀲𑁆𑀲𑁄.

𑀉𑀢𑁆𑀢𑀫𑀗𑁆𑀕𑀫𑁆𑀳𑀺 𑀲𑀻𑀲𑁂 𑀬𑁄 𑀓𑀜𑁆𑀘𑀼𑀓𑁄 𑀲𑀼𑀯𑀡𑁆𑀡𑀸𑀤𑀺𑀫𑀬𑁄, 𑀲𑁄 ‘‘𑀦𑀸𑀴𑀺𑀧𑀢𑁆𑀢𑁄’’𑀢𑀺 𑀓𑀣𑀺𑀢𑁄. 𑀦𑀸𑀴𑀺𑀧𑀢𑁆𑀢𑁄 𑀢𑀁𑀲𑀡𑁆𑀞𑀸𑀦𑁄 𑀲𑀼𑀯𑀡𑁆𑀡𑀸𑀤𑀺𑀧𑀝𑁄 𑀦𑀸𑀴𑀺𑀧𑀢𑁆𑀢𑁄. 𑀲𑀻𑀲𑀓𑀁, 𑀲𑀺𑀭𑀺𑀬𑀁, 𑀲𑀺𑀭𑁄𑀳𑀦𑁆𑀢𑀺𑀧𑀺 𑀢𑀲𑁆𑀲 𑀦𑀸𑀫𑀸𑀦𑀺.

𑁨𑁯𑁫. 𑀢𑀺𑀓𑀁 𑀤𑀻𑀖𑀢𑁆𑀢𑁂. 𑀆𑀧𑀼𑀩𑁆𑀩𑁄 𑀬𑀫𑀼 𑀉𑀧𑀭𑀫𑁂, 𑀡𑁄. 𑀆 𑀪𑀼𑀲𑁄 𑀬𑀸𑀢𑀺 𑀕𑀘𑁆𑀙𑀢𑀻𑀢𑀺 𑀯𑀸 𑀆𑀬𑀸𑀫𑁄, 𑀬𑀸 𑀕𑀢𑀺𑀧𑀸𑀧𑀼𑀡𑁂𑀲𑀼, 𑀫𑁄. 𑀤𑀻𑀖𑀲𑁆𑀲 𑀪𑀸𑀯𑁄 𑀤𑀻𑀖𑀢𑀸. 𑀭𑀼𑀳 𑀚𑀦𑀦𑁂, 𑀡𑁄.

𑀤𑁆𑀯𑀬𑀁 ¶ 𑀯𑀺𑀢𑁆𑀣𑀸𑀭𑁂. 𑀯𑀢𑁆𑀣𑀯𑀺𑀲𑀬𑁂 ‘‘𑀑𑀲𑀸𑀭𑁄’’𑀢𑀺 𑀭𑀽𑀴𑁆𑀳𑁂. 𑀲𑀫𑀦𑁆𑀢𑀢𑁄 𑀦𑀬𑁆𑀳𑀢𑀻𑀢𑀺 𑀧𑀭𑀺𑀡𑀸𑀳𑁄, 𑀦𑀳 𑀩𑀦𑁆𑀥𑀦𑁂, 𑀡𑁄. 𑀯𑀺𑀢𑁆𑀣𑀸𑀭𑁂𑀦 𑀲𑀭𑀡𑀁 𑀯𑀺𑀲𑀸𑀭𑁄, 𑀲𑁄 𑀏𑀯 𑀯𑀺𑀲𑀸𑀮𑀢𑀸.

𑁨𑁯𑁬. 𑀘𑀢𑀼𑀓𑁆𑀓𑀁 𑀘𑀻𑀯𑀭𑁂. 𑀅𑀭𑀳𑀢𑀁 𑀥𑀚𑁄 𑀅𑀭𑀳𑀤𑁆𑀥𑀚𑁄, 𑀭𑀽𑀴𑁆𑀳𑀺𑀬𑀸 𑀢𑀤𑀜𑁆𑀜𑀘𑀻𑀯𑀭𑁂𑀲𑀼. 𑀓𑀲𑀸𑀬𑁂𑀦, 𑀓𑀲𑀸𑀯𑁂𑀦 𑀘 𑀭𑀢𑁆𑀢𑀁 𑀓𑀸𑀲𑀸𑀬𑀁, 𑀓𑀸𑀲𑀸𑀯𑀜𑁆𑀘, 𑀲𑀫𑀸𑀦𑀮𑀺𑀗𑁆𑀕𑀢𑁆𑀢𑀸 𑀤𑁆𑀯𑀦𑁆𑀤𑁄. 𑀘𑀺 𑀘𑀬𑁂, 𑀈𑀯𑀭𑁄. 𑀯𑀢𑁆𑀣𑀔𑀦𑁆𑀥𑁂𑀳𑀺 𑀘𑀻𑀬𑀢𑁂𑀢𑀺 𑀘𑀻𑀯𑀭𑀁.

𑀫𑀡𑁆𑀟𑀮𑀸𑀤𑀬𑁄 𑀢𑀤𑀗𑁆𑀕𑀸𑀦𑀺 𑀲𑀫𑀽𑀳𑀪𑀽𑀢𑀲𑁆𑀲 𑀘𑀻𑀯𑀭𑀲𑁆𑀲 𑀅𑀯𑀬𑀯𑀸𑀦𑀺. 𑀫𑀟𑀺 𑀪𑀽𑀲𑀸𑀬𑀁, 𑀅𑀮𑁄, 𑀫𑀡𑁆𑀟𑀮𑀁. 𑀘𑀻𑀯𑀭𑀧𑀭𑀺𑀬𑀦𑁆𑀢𑁄𑀬𑀁 𑀫𑀳𑀸𑀧𑀣𑀯𑀺𑀬𑀸 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑁄 𑀯𑀺𑀬 𑀘𑀻𑀯𑀭𑀲𑁆𑀲 𑀲𑀫𑀦𑁆𑀢𑀢𑁄 𑀢𑀺𑀝𑁆𑀞𑀢𑀺. 𑀯𑀺𑀯𑀝𑁆𑀝𑁄 𑀦𑀸𑀫 𑀘𑀻𑀯𑀭𑀫𑀚𑁆𑀛𑀕𑀢𑀫𑀕𑁆𑀕𑁄, 𑀲𑁄 𑀳𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀝𑁆𑀝𑀢𑀻𑀢𑀺 𑀯𑀺𑀯𑀝𑁆𑀝𑁄𑀢𑀺 𑀯𑀼𑀘𑁆𑀘𑀢𑀺, 𑀯𑀝𑁆𑀝 𑀆𑀯𑀝𑁆𑀝𑀦𑁂. 𑀓𑀼𑀲𑀺 𑀦𑀸𑀫 𑀫𑀕𑁆𑀕𑀸𑀦𑀁 𑀫𑀚𑁆𑀛𑀕𑀢𑀯𑀢𑁆𑀣𑀔𑀡𑁆𑀟𑀁, 𑀓𑀼𑀲 𑀙𑁂𑀤𑀦𑁂, 𑀓𑀫𑁆𑀫𑀦𑀺 𑀇, 𑀓𑀼𑀲𑀺, 𑀧𑀼𑀫𑀺𑀢𑁆𑀣𑀺𑀬𑀁.

𑁨𑁯𑁭. 𑀨𑀮𑀸𑀤𑀻𑀦𑀁 𑀬𑀸𑀦𑀺 𑀘𑀢𑁆𑀢𑀸𑀭𑀺 𑀲𑀦𑁆𑀢𑀺, 𑀏𑀢𑀸 𑀯𑀢𑁆𑀣𑀲𑁆𑀲 𑀬𑁄𑀦𑀺𑀬𑁄 𑀓𑀸𑀭𑀡𑀸𑀦𑀺 𑀢𑀢𑁄 𑀢𑀤𑀼𑀧𑁆𑀧𑀢𑁆𑀢𑀺𑀢𑁄. 𑀓𑀧𑁆𑀧𑀸𑀲𑀺𑀓𑀁 𑀯𑀢𑁆𑀣𑀁 𑀨𑀸𑀮𑀁 𑀦𑀸𑀫 𑀨𑀮𑀯𑀺𑀓𑀸𑀭𑀢𑁆𑀢𑀸, 𑀯𑀺𑀓𑀸𑀭𑁂 𑀡𑁄, 𑀢𑀻𑀲𑀼. 𑀬𑀣𑀸 𑁋 𑀨𑀸𑀮𑁄 𑀧𑀝𑁄, 𑀨𑀸𑀮𑀸 𑀘𑁂𑀮𑀻, 𑀨𑀸𑀮𑀁 𑀯𑀢𑁆𑀣𑀁. 𑀔𑁄𑀫𑀸𑀤𑀬𑁄 𑀧𑀦 𑀧𑀝𑀸 𑀢𑀘𑀩𑁆𑀪𑀯𑀸 𑀢𑀘𑀢𑁄 𑀲𑀜𑁆𑀚𑀸𑀢𑀸.

𑁨𑁯𑁮. 𑀓𑁄𑀲𑁂𑀬𑁆𑀬𑀁 ¶ 𑀯𑀢𑁆𑀣𑀁 𑀓𑀺𑀫𑀺𑀚𑀁 𑀦𑀸𑀫. 𑀫𑀺𑀕𑀮𑁄𑀫𑀫𑀬𑀦𑁆𑀢𑀼 𑀓𑀫𑁆𑀩𑀮𑀁. 𑀤𑁆𑀯𑀬𑀁 𑀩𑁆𑀬𑀯𑀥𑀸𑀬𑀓𑀧𑀝𑁂, 𑀓𑀡𑁆𑀟𑀧𑀝𑁂𑀧𑀻𑀢𑀺 𑀓𑁂𑀘𑀺. 𑀲𑀫𑀸𑀦𑀢𑁆𑀣𑀸 𑀏𑀢𑁂 𑀤𑁆𑀯𑁂 𑀢𑀼𑀮𑁆𑀬𑀢𑁆𑀣𑀸𑀢𑁆𑀬𑀢𑁆𑀣𑁄. 𑀚𑀼 𑀕𑀢𑀺𑀬𑀁, 𑀪𑀽𑀯𑀸𑀤𑀺, 𑀚𑀼 𑀩𑀦𑁆𑀥𑀦𑁂 𑀯𑀸, 𑀬𑀼, 𑀅𑀦𑀓𑀸𑀤𑁂𑀲𑁄, 𑀲𑀸 𑀇𑀢𑁆𑀣𑀻. 𑀢𑀺𑀭𑁄 𑀓𑀭𑀻𑀬𑀢𑀺 𑀧𑀺𑀥𑀻𑀬𑀢𑀺 𑀬𑀸𑀬, 𑀲𑀸 𑀢𑀺𑀭𑁄𑀓𑀭𑀡𑀻, 𑀬𑀼. 𑀧𑀢𑀺𑀲𑀻𑀭𑀸𑀧𑁆𑀬𑀢𑁆𑀭. 𑀧𑀢𑀺𑀧𑀼𑀩𑁆𑀩𑁄 𑀲𑀺 𑀩𑀦𑁆𑀥𑀦𑁂, 𑀭𑁄.

𑁨𑁯𑁯. 𑀤𑁆𑀯𑀬𑀁 𑀉𑀧𑀭𑀺𑀩𑀦𑁆𑀥𑀧𑀝𑁂, 𑀅𑀣𑀲𑀤𑁆𑀤𑁄𑀢𑁆𑀭 𑀮𑀺𑀗𑁆𑀕𑀸𑀤𑀺𑀚𑁄𑀢𑀓𑁄. 𑀉𑀤𑁆𑀥𑀁 𑀮𑁄𑀘𑀢𑁂 𑀩𑀦𑁆𑀥𑀻𑀬𑀢𑁂𑀢𑀺 𑀉𑀮𑁆𑀮𑁄𑀘𑀁, 𑀮𑀼𑀘 𑀤𑀲𑁆𑀲𑀦𑁂. 𑀘𑀦𑁆𑀤𑀸𑀢𑀧𑁂 𑀯𑀺𑀢𑀦𑁆𑀬𑀢𑁂𑀢𑀺 𑀯𑀺𑀢𑀸𑀦𑀁, 𑀢𑀦𑀼 𑀯𑀺𑀢𑁆𑀣𑀸𑀭𑁂, 𑀡𑁄, 𑀘𑀼𑀭𑀸𑀤𑀺. 𑀤𑁆𑀯𑀬𑀫𑁆𑀧𑀺 𑀧𑀼𑀦𑁆𑀦𑀧𑀼𑀁𑀲𑀓𑀦𑁆𑀢𑀺 𑀈𑀭𑀺𑀢𑀁 𑀓𑀣𑀺𑀢𑀁.

𑀤𑁆𑀯𑀬𑀁 𑀲𑀺𑀦𑀸𑀦𑁂. 𑀦𑀳 𑀲𑁄𑀘𑁂, 𑀓𑀭𑀡𑁂 𑀬𑀼, 𑀲𑀺𑀦𑀸 𑀲𑁄𑀘𑁂, 𑀓𑀭𑀡𑁂 𑀬𑀼, ‘‘𑀲𑀺𑀦𑀸𑀦𑁂’’𑀢𑀺 𑀲𑀢𑁆𑀢𑀫𑁆𑀬𑀦𑁆𑀢𑀁 𑀧𑀤𑀁. 𑀤𑁆𑀯𑀬𑀁 𑀓𑀼𑀮𑁆𑀬𑀸𑀤𑀺𑀦𑀸 [𑀓𑀼𑀝𑁆𑀬𑀸𑀤𑀺𑀦𑀸 (𑀓.), 𑀓𑀼𑀚𑁆𑀚𑀦𑀸𑀤𑀺𑀦𑀸 (𑀦𑀺𑀲𑁆𑀲𑀬), 𑀓𑀼𑀗𑁆𑀓𑀼𑀫𑀳𑀮𑀺𑀤𑁆𑀤𑀸𑀤𑀺𑀦𑀸 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁬.𑁧𑁨𑁧)] 𑀅𑀗𑁆𑀕𑀦𑀺𑀫𑁆𑀫𑀮𑀻𑀓𑀭𑀡𑁂. 𑀉𑀩𑁆𑀩𑀢𑁆𑀢𑀻𑀬𑀢𑁂 𑀯𑀺𑀲𑀸𑀭𑀻𑀬𑀢𑁂 𑀫𑀮𑀫𑀦𑁂𑀦𑁂𑀢𑀺 𑀉𑀩𑁆𑀩𑀢𑁆𑀢𑀦𑀁, 𑀯𑀢𑀼 𑀯𑀢𑁆𑀢𑀦𑁂, 𑀪𑀽𑀯𑀸𑀤𑀺. 𑀫𑀚𑁆𑀚 𑀲𑀼𑀤𑁆𑀥𑀺𑀬𑀁, 𑀬𑀼. 𑀲𑀫𑀦𑁆𑀢𑀺 𑀤𑁆𑀯𑀬𑀫𑀺𑀤𑀁 𑀲𑀫𑀸𑀦𑀢𑁆𑀣𑀁.

𑁩𑁦𑁦. 𑀢𑀺𑀓𑀁 𑀦𑀮𑀸𑀝𑀓𑀢𑁂 𑀘𑀺𑀢𑁆𑀢𑀓𑁂. 𑀢𑀺𑀮𑀓𑀸𑀓𑀢𑀺 𑀢𑀺𑀮𑀓𑁄. 𑀘𑀺𑀢𑁆𑀢𑀓𑀸𑀓𑀢𑀺 𑀘𑀺𑀢𑁆𑀢𑀓𑀁. 𑀘𑀓𑀸𑀭𑁂𑀦 𑀢𑀫𑀸𑀮𑀧𑀢𑁆𑀢𑀸𑀓𑀢𑀺 𑀢𑀫𑀸𑀮𑀧𑀢𑁆𑀢𑀁 ¶ . 𑀲𑀸𑀫𑀜𑁆𑀜𑁂𑀦 𑀯𑀺𑀲𑁂𑀲𑀓𑀁, 𑀉𑀪𑁄 𑀯𑀺𑀲𑁂𑀲𑀓𑀢𑀺𑀮𑀓𑀸 𑀅𑀦𑀺𑀢𑁆𑀣𑀻, 𑀲𑁂𑀲𑀤𑁆𑀯𑀬𑀁 𑀦𑀧𑀼𑀁𑀲𑀓𑀁 [𑀅𑀫𑀭 𑁧𑁬.𑁧𑁨𑁩].

𑀢𑀺𑀓𑀁 𑀘𑀦𑁆𑀤𑀦𑁂, 𑀘𑀤𑀺 𑀳𑀺𑀮𑀸𑀤𑀦𑁂, 𑀳𑀺𑀮𑀸𑀤𑀦𑀁 𑀲𑀼𑀔𑀸𑀧𑀦𑀁, 𑀬𑀼. 𑀕𑀦𑁆𑀥𑀸𑀦𑀁 𑀲𑀸𑀭𑁄 𑀉𑀢𑁆𑀢𑀫𑁄 𑀕𑀦𑁆𑀥𑀲𑀸𑀭𑁄, 𑀕𑀦𑁆𑀥𑀬𑀼𑀢𑁆𑀢𑁄 𑀲𑀸𑀭𑁄 𑀣𑀺𑀭𑀁𑀲𑁄 𑀯𑀸 𑀕𑀦𑁆𑀥𑀲𑀸𑀭𑁄. 𑀫𑀮𑀬𑀤𑀻𑀧𑀕𑀺𑀭𑀺𑀫𑁆𑀳𑀺 𑀚𑀸𑀬𑀢𑀻𑀢𑀺 𑀫𑀮𑀬𑀚𑁄. 𑀪𑀤𑁆𑀤𑀲𑀺𑀭𑀻𑀧𑁆𑀬𑀢𑁆𑀭.

𑁩𑁦𑁧. 𑀢𑀺𑀓𑀁 𑀧𑀻𑀢𑀘𑀦𑁆𑀤𑀦𑁂. ‘‘𑀕𑁄𑀲𑀻𑀲’’𑀇𑀢𑀺 𑀧𑀩𑁆𑀩𑀢𑁂 𑀫𑀮𑀬𑁂 𑀤𑁂𑀲𑁂 𑀚𑀸𑀢𑀁 𑀕𑁄𑀲𑀻𑀲𑀁, 𑀕𑁄 𑀯𑀺𑀬 𑀚𑀮𑀁 𑀯𑀺𑀬 𑀲𑀻𑀢𑀦𑁆𑀢𑀺 𑀯𑀸 𑀕𑁄𑀲𑀻𑀢𑀁, 𑀢𑀤𑁂𑀯 𑀢𑀲𑁆𑀲 𑀲𑀓𑀸𑀭𑀁 𑀓𑀢𑁆𑀯𑀸 𑀕𑁄𑀲𑀻𑀲𑀁. 𑀢𑀺𑀮𑀧𑀡𑁆𑀡𑀧𑁆𑀧𑀫𑀸𑀡𑀧𑀡𑁆𑀡𑀬𑀼𑀢𑁆𑀢𑀢𑀸𑀬 𑀢𑁂𑀮𑀧𑀡𑁆𑀡𑀺𑀓𑀁. 𑀫𑀦𑀁 𑀳𑀭𑀢𑀻𑀢𑀺 𑀳𑀭𑀺, 𑀢𑀫𑁂𑀯 𑀘𑀦𑁆𑀤𑀦𑀦𑁆𑀢𑀺 𑀳𑀭𑀺𑀘𑀦𑁆𑀤𑀦𑀁. 𑀧𑀻𑀢𑀲𑀸𑀭𑀼, 𑀲𑀼𑀲𑀻𑀢𑀁𑀧𑁆𑀬𑀢𑁆𑀭. 𑀕𑁄𑀲𑀻𑀲𑀸𑀤𑀬𑁄 𑀢𑀬𑁄 𑀧𑀼𑀫𑁂, 𑀦𑀧𑀼𑀁𑀲𑀓𑁂 𑀘 𑀯𑀢𑁆𑀢𑀦𑁆𑀢𑀺.

𑀘𑀢𑀼𑀓𑁆𑀓𑀁 𑀭𑀢𑁆𑀢𑀘𑀦𑁆𑀤𑀦𑁂. 𑀢𑀺𑀮𑀧𑀡𑁆𑀡𑀧𑁆𑀧𑀫𑀸𑀡𑀧𑀡𑁆𑀡𑀬𑀼𑀢𑁆𑀢𑀢𑀸𑀬 𑀢𑀺𑀮𑀧𑀡𑁆𑀡𑀻. 𑀧𑀼𑀭𑀺𑀫𑁂𑀦 𑀪𑁂𑀤𑀓𑀭𑀡𑀢𑁆𑀣𑀁 𑀦 𑀯𑀼𑀤𑁆𑀥𑀺. 𑀧𑀢𑁆𑀢𑀫𑀗𑁆𑀕𑀫𑀲𑁆𑀲𑁂𑀢𑀺 𑀧𑀢𑁆𑀢𑀗𑁆𑀕𑀁, 𑀔𑀼𑀤𑁆𑀤𑀧𑀡𑁆𑀡𑀢𑀸𑀬 𑀅𑀧𑁆𑀧𑀥𑀸𑀦𑀧𑀢𑁆𑀢𑀫𑀺𑀘𑁆𑀘𑀢𑁆𑀣𑁄. ‘‘𑀅𑀗𑁆𑀕𑀁 𑀕𑀢𑁆𑀢𑀦𑁆𑀢𑀺 𑀓𑁄𑀧𑀸𑀬-𑀧𑀢𑀻𑀓𑁂𑀲𑁆𑀯𑀧𑁆𑀧𑀥𑀸𑀦𑀓𑁂’’𑀢𑀺 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂. 𑀭𑀜𑁆𑀚 𑀭𑀸𑀕𑁂, 𑀳𑁂𑀢𑀼𑀓𑀢𑁆𑀢𑀭𑀺 𑀬𑀼. 𑀭𑀢𑁆𑀢𑀯𑀡𑁆𑀡𑀢𑀸𑀬 𑀭𑀢𑁆𑀢𑀜𑁆𑀘 𑀢𑀁 𑀘𑀦𑁆𑀤𑀦𑀜𑁆𑀘𑁂𑀢𑀺 𑀭𑀢𑁆𑀢𑀘𑀦𑁆𑀤𑀦𑀁, 𑀅𑀫𑀭𑀓𑁄𑀲𑁂 𑀧𑀦 ‘‘𑀕𑁄𑀲𑀻𑀲𑀸𑀤𑀻𑀦𑀺 𑀭𑀢𑁆𑀢𑀘𑀦𑁆𑀤𑀦𑀦𑁆𑀢𑀸𑀦𑀺 𑀯𑀺𑀲𑁂𑀲𑁂 𑀯𑀢𑁆𑀢𑀦𑁆𑀢𑀻’’𑀢𑀺 [𑀅𑀫𑀭 𑁧𑁬.𑁧𑁩𑁧] 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀭 𑀕𑁄𑀲𑀻𑀲𑀲𑁆𑀲 𑀬𑀣𑀸𑀯𑀼𑀢𑁆𑀢𑁄𑀬𑁂𑀯𑀢𑁆𑀣𑁄. 𑀥𑀯𑀮𑀁, 𑀲𑀼𑀲𑀻𑀢𑀮𑀁, 𑀘𑀦𑁆𑀤𑀦𑀁, 𑀢𑁂𑀮𑀧𑀡𑁆𑀡𑀺𑀓𑀁 𑀫𑀮𑀬𑀧𑀩𑁆𑀩𑀢𑀤𑁂𑀲𑀚𑀫𑁂𑀯. 𑀳𑀭𑀺 𑀫𑀡𑁆𑀟𑀽𑀓𑁄, 𑀢𑀤𑀸𑀓𑀸𑀭𑁂 𑀧𑀩𑁆𑀩𑀢𑁂 𑀚𑀸𑀢𑀁 𑀘𑀦𑁆𑀤𑀦𑀁 𑀳𑀭𑀺𑀘𑀦𑁆𑀤𑀦𑀁. 𑀧𑀓𑁆𑀓𑀫𑁆𑀩𑀨𑀮𑀕𑀦𑁆𑀥𑀺 𑀧𑀻𑀢𑀯𑀡𑁆𑀡𑀁. 𑀢𑀺𑀮𑀧𑀡𑁆𑀡𑀻𑀧𑀢𑁆𑀢𑀗𑁆𑀕𑀸𑀦𑀺 𑀭𑀢𑁆𑀢𑀘𑀦𑁆𑀤𑀦𑀲𑀤𑀺𑀲𑀲𑁆𑀲 𑀭𑀢𑁆𑀢𑀲𑀸𑀭𑀲𑁆𑀲 𑀏𑀓𑀲𑁆𑀲 𑀘𑀦𑁆𑀤𑀦𑀲𑁆𑀲 𑀦𑀸𑀫𑀸𑀦𑀺.

𑀤𑁆𑀯𑀬𑀁 ¶ 𑀭𑀢𑁆𑀢𑀘𑀦𑁆𑀤𑀦𑁂. 𑀅𑀣 𑀯𑀸 𑀢𑀺𑀮𑀧𑀡𑁆𑀬𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀮𑁄𑀳𑀺𑀢𑀘𑀦𑁆𑀤𑀦𑀲𑀤𑀺𑀲𑀲𑁆𑀲 𑀭𑀢𑁆𑀢𑀲𑀸𑀭𑀲𑁆𑀲 𑀏𑀓𑀲𑁆𑀲 𑀘𑀦𑁆𑀤𑀦𑀯𑀺𑀲𑁂𑀲𑀲𑁆𑀲 𑀦𑀸𑀫𑀸𑀦𑀺. 𑀓𑀼𑀘𑀦𑁆𑀤𑀦𑀁𑀧𑁆𑀬𑀢𑁆𑀭. ‘‘𑀧𑀢𑁆𑀢𑀗𑁆𑀕𑀁 𑀭𑀜𑁆𑀚𑀦𑀁 𑀭𑀢𑁆𑀢𑀁, 𑀧𑀢𑁆𑀭𑀗𑁆𑀕𑀜𑁆𑀘 𑀓𑀼𑀘𑀦𑁆𑀤𑀦’’𑀦𑁆𑀢𑀺 𑀭𑀢𑀦𑀫𑀸𑀮𑀸𑀬𑀁.

𑁩𑁦𑁨. 𑀤𑁆𑀯𑀬𑀁 𑀯𑀡𑀺𑀚𑀸𑀤𑀻𑀦𑀁 ‘‘𑀓𑀸𑀴𑁂𑀬𑀸’’𑀇𑀢𑀺 𑀭𑀽𑀴𑁆𑀳𑁂𑀧𑀻𑀢𑀓𑀝𑁆𑀞𑁂. 𑀓𑀸𑀴𑀯𑀡𑁆𑀡𑀁 𑀅𑀦𑀼𑀲𑀭𑀢𑀺 𑀲𑀻𑀮𑁂𑀦𑀸𑀢𑀺 𑀓𑀸𑀴𑀸𑀦𑀼𑀲𑀸𑀭𑀻, 𑀓𑀸𑀴𑀯𑀡𑁆𑀡𑀚𑀦𑀓𑁄𑀢𑁆𑀬𑀢𑁆𑀣𑁄. 𑀓𑀸𑀴𑀁 𑀚𑀦𑁂𑀢𑀻𑀢𑀺 𑀓𑀸𑀴𑀺𑀬𑀁, ‘‘𑀓𑀸𑀴𑀻𑀬𑀓𑀦𑁆𑀢𑀼 𑀓𑀸𑀴𑁂𑀬𑀁, 𑀯𑀡𑁆𑀡𑀤𑀁 𑀓𑀦𑁆𑀢𑀺𑀚𑀸𑀲𑀓’’𑀦𑁆𑀢𑀺 [𑀚𑀸𑀲𑀓𑀁 𑀓𑀦𑁆𑀢𑀺𑀤𑀸𑀬𑀓𑀁 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁬.𑁧𑁨𑁬)] 𑀩𑁆𑀬𑀸𑀟𑀺.

𑀢𑀺𑀓𑀁 𑀅𑀕𑀭𑀼𑀲𑀸𑀫𑀜𑁆𑀜𑁂. 𑀮𑀽 𑀙𑁂𑀤𑀦𑁂, 𑀳𑁄. 𑀮𑀳𑀼𑀦𑀸𑀫𑀢𑁆𑀢𑀸 𑀅𑀕𑀭𑀼. 𑀭𑀲𑁆𑀲 𑀮𑀢𑁆𑀢𑁂 𑀅𑀕𑀮𑀼, 𑀤𑁆𑀯𑀬𑀁 𑀧𑀼𑀫𑁂. 𑀯𑀁𑀲𑀺𑀓𑀁, 𑀭𑀸𑀚𑀸𑀭𑀳𑀁, 𑀓𑀺𑀫𑀺𑀚𑀁, 𑀚𑁄𑀗𑁆𑀕𑀓𑀁𑀧𑁆𑀬𑀢𑁆𑀭.

𑀅𑀲𑁆𑀫𑀺𑀁 𑀅𑀕𑀭𑀼𑀫𑁆𑀳𑀺 𑀓𑀸𑀴𑁂 𑀲𑀢𑀺 ‘‘𑀓𑀸𑀴𑀸𑀕𑀭𑀽’’𑀢𑁆𑀬𑀼𑀘𑁆𑀘𑀢𑁂. 𑀫𑀮𑁆𑀮𑀺𑀓𑀸𑀧𑀼𑀧𑁆𑀨𑀕𑀦𑁆𑀥𑀺 𑀅𑀕𑀭𑀼 𑀧𑀦 𑀫𑀗𑁆𑀕𑀮𑁆𑀬𑁄𑀘𑁆𑀘𑀢𑁂.

𑀤𑁆𑀯𑀬𑀁 𑀲𑀮𑁆𑀮𑀓𑀻𑀤𑀯𑁂. 𑀢𑀼𑀭𑀼𑀓𑁆𑀔𑁄 𑀯𑀼𑀢𑁆𑀢𑁄. 𑀧𑀺𑀟𑀺 𑀲𑀗𑁆𑀖𑀸𑀢𑁂, 𑀡𑁆𑀯𑀼. 𑀲𑀺𑀳𑀮𑁄, 𑀬𑀸𑀯𑀡𑁄𑀧𑁆𑀬𑀢𑁆𑀭.

𑁩𑁦𑁩. 𑀤𑁆𑀯𑀬𑀁 𑀫𑀺𑀕𑀦𑀸𑀪𑀺𑀬𑀁. 𑀓𑀢𑁆𑀣 𑀲𑀺𑀮𑀸𑀖𑀸𑀬𑀁, 𑀊𑀭𑁄, 𑀦𑀤𑀸𑀤𑀺, 𑀲𑀓𑀢𑁆𑀣𑁂 𑀓𑁄. 𑀫𑀺𑀕𑀲𑁆𑀲 𑀫𑀤𑁄 𑀫𑀺𑀕𑀫𑀤𑁄, 𑀫𑀺𑀕𑁄 𑀫𑀭𑀢𑀺 𑀬𑁂𑀦𑀸𑀢𑀺 𑀯𑀸 𑀫𑀺𑀕𑀫𑀭𑁄, 𑀲𑁄 𑀏𑀯 𑀫𑀺𑀕𑀫𑀤𑁄.

𑀤𑁆𑀯𑀬𑀁 ¶ 𑀓𑀼𑀝𑁆𑀞𑁂. 𑀓𑀼𑀝 𑀙𑁂𑀤𑀦𑁂, 𑀞𑁄, 𑀢𑁄 𑀯𑀸, ‘‘𑀓𑀼𑀝𑀸𑀤𑀻𑀳𑀺 𑀞𑁄’’𑀢𑀺 𑀞𑁄, 𑀓𑀼𑀝𑁆𑀞𑀁, 𑀭𑁄𑀕𑀪𑁂𑀤𑁂𑀧𑀺. 𑀅𑀢𑁆𑀢𑀦𑁄 𑀙𑀸𑀬𑀽𑀧𑀕𑀢𑁂 𑀅𑀚𑁂 𑀧𑀸𑀮𑁂𑀢𑀻𑀢𑀺 𑀅𑀚𑀧𑀸𑀮𑀓𑀁, 𑀡𑁆𑀯𑀼. 𑀧𑀸𑀭𑀺𑀪𑀸𑀩𑁆𑀬𑀁, 𑀧𑀸𑀓𑀮𑀁 [𑀨𑀸𑀮𑀓𑀻 (𑀓.)], 𑀉𑀧𑁆𑀧𑀮𑀁, 𑀯𑀸𑀧𑁆𑀧𑀁𑀧𑁆𑀬𑀢𑁆𑀭.

𑀤𑁆𑀯𑀬𑀁 𑀧𑀺𑀟𑀗𑁆𑀕𑁂. 𑀭𑁄𑀕𑀁 𑀮𑀼𑀦𑀦𑁆𑀢𑁄 𑀅𑀗𑁆𑀕𑀢𑀺 𑀕𑀘𑁆𑀙𑀢𑀻𑀢𑀺 𑀮𑀯𑀗𑁆𑀕𑁄. 𑀤𑁂𑀯𑀸𑀦𑀁 𑀓𑀼𑀲𑀼𑀫𑀁 𑀧𑀼𑀧𑁆𑀨𑀁 𑀤𑁂𑀯𑀓𑀼𑀲𑀼𑀫𑀁. 𑀲𑀺𑀭𑀺𑀲𑀜𑁆𑀜𑀁𑀧𑁆𑀬𑀢𑁆𑀭.

𑀤𑁆𑀯𑀬𑀁 𑀓𑀼𑀗𑁆𑀓𑀼𑀫𑁂. 𑀓𑀲𑁆𑀫𑀻𑀭𑀭𑀝𑁆𑀞𑁂 𑀚𑀸𑀢𑀁 𑀓𑀲𑁆𑀫𑀻𑀭𑀚𑀁. 𑀅𑀕𑁆𑀕𑀺𑀲𑀺𑀔𑀁, 𑀯𑀭𑀁, 𑀯𑀮𑁆𑀮𑀻𑀓𑀁, 𑀧𑀻𑀢𑀦𑀁, 𑀭𑀢𑁆𑀢𑀲𑀗𑁆𑀓𑁄𑀘𑀁, 𑀧𑀺𑀲𑀼𑀦𑀁, 𑀥𑀻𑀭𑀁 𑀮𑁄𑀳𑀺𑀢𑀘𑀦𑁆𑀤𑀦𑀁𑀧𑁆𑀬𑀢𑁆𑀭.

𑁩𑁦𑁪. 𑀤𑁆𑀯𑀬𑀁 𑀥𑀼𑀦𑀓𑁂. 𑀬𑀓𑁆𑀔𑁂𑀳𑀺 𑀓𑀢𑁄 𑀥𑀽𑀧𑁄 𑀬𑀓𑁆𑀔𑀥𑀽𑀧𑁄, 𑀬𑀓𑁆𑀔𑁄 𑀤𑁂𑀯𑁄. 𑀲𑀚𑁆𑀚𑀭𑀼𑀓𑁆𑀔𑀲𑁆𑀲 𑀲𑀺𑀮𑁂𑀲𑁄 𑀲𑀚𑁆𑀚𑀼𑀮𑀲𑁄. 𑀅𑀲𑁆𑀲𑀼, 𑀲𑀺𑀮𑁄𑀧𑁄, 𑀏𑀲𑁆𑀲𑀢𑁆𑀢𑀜𑁆𑀘, 𑀲𑀚𑁆𑀚𑀲𑁆𑀲 𑀭𑀲𑁄 𑀤𑀯𑁄 𑀲𑀚𑁆𑀚𑀼𑀮𑀲𑁄, 𑀅𑀲𑁆𑀲𑀼, 𑀮𑀢𑁆𑀢𑀜𑁆𑀘. 𑀲𑀚𑁆𑀚𑀭𑀲𑁄𑀢𑀺𑀧𑀺 𑀧𑀸𑀞𑁄. 𑀭𑀸𑀮𑁄, 𑀲𑀩𑁆𑀩𑀭𑀲𑁄, 𑀩𑀳𑀼𑀭𑀽𑀧𑁄𑀧𑁆𑀬𑀢𑁆𑀭.

𑀢𑀺𑀓𑀁 𑀢𑀓𑁆𑀓𑁄𑀮𑁂. 𑀢𑀓𑁆𑀓 𑀯𑀺𑀢𑀓𑁆𑀓𑁂, 𑀑𑀮𑁄. 𑀓𑀼𑀮 𑀲𑀗𑁆𑀔𑁆𑀬𑀸𑀦𑁂, 𑀡𑁆𑀯𑀼. 𑀓𑁄𑀲𑀬𑀼𑀢𑁆𑀢𑀁 𑀨𑀮𑀫𑁂𑀢𑀲𑁆𑀲𑀸𑀢𑀺 𑀓𑁄𑀲𑀨𑀮𑀁. 𑀤𑁆𑀯𑀬𑀁 𑀚𑀸𑀢𑀺𑀨𑀮𑁂. 𑀓𑁄𑀲𑀲𑀳𑀺𑀢𑀁 𑀚𑀸𑀢𑀺𑀨𑀮𑀫𑁂𑀢𑀲𑁆𑀲𑀸𑀢𑀺 𑀚𑀸𑀢𑀺𑀓𑁄𑀲𑀁. 𑀚𑀸𑀢𑀺𑀨𑀮𑀫𑁂𑀢𑀲𑁆𑀲, 𑀦 𑀓𑀺𑀢𑁆𑀢𑀺𑀫𑀦𑁆𑀢𑀺 𑀚𑀸𑀢𑀺𑀨𑀮𑀁.

𑁩𑁦𑁫. 𑀧𑀚𑁆𑀚𑀤𑁆𑀥𑀁 𑀓𑀧𑁆𑀧𑀽𑀭𑁂, 𑀖𑀦𑁄 𑀳𑀼𑀢𑁆𑀯𑀸 𑀲𑀭𑀢𑀻𑀢𑀺 𑀖𑀦𑀲𑀸𑀭𑁄. 𑀅𑀩𑁆𑀪𑀫𑀺𑀯 𑀲𑀺𑀢𑀁 𑀲𑀺𑀢𑀩𑁆𑀪𑁄, 𑀅𑀪𑀺𑀥𑀸𑀦𑀢𑁄 𑀧𑀼𑀩𑁆𑀩𑀦𑀺𑀧𑀸𑀢𑁄, 𑀓𑀧𑁆𑀧 ¶ 𑀲𑀸𑀫𑀢𑁆𑀣𑀺𑀬𑁂, 𑀊𑀭𑁄. 𑀘𑀦𑁆𑀤𑀲𑀜𑁆𑀜𑁄, 𑀳𑀺𑀫𑀯𑀸𑀮𑀼𑀓𑁄, 𑀳𑀺𑀫𑀸𑀯𑁆𑀳𑀬𑁄𑀧𑁆𑀬𑀢𑁆𑀭.

𑀧𑀚𑁆𑀚𑀤𑁆𑀥𑀁 𑀮𑀸𑀔𑀸𑀬𑀁, 𑀆 𑀪𑀼𑀲𑁄 𑀭𑀢𑁆𑀢𑀁 𑀓𑀭𑁄𑀢𑀻𑀢𑀺 𑀅𑀮𑀢𑁆𑀢𑀓𑁄, 𑀮𑀢𑁆𑀢𑀁, 𑀓𑁆𑀯𑀺. 𑀬𑀼 𑀫𑀺𑀲𑁆𑀲𑀦𑁂, 𑀡𑁆𑀯𑀼. 𑀮𑀸𑀔 𑀲𑁄𑀲𑀦𑁂, 𑀅, 𑀮𑀸 𑀆𑀤𑀸𑀦𑁂 𑀯𑀸, 𑀔𑁄. 𑀚𑀦 𑀚𑀦𑀦𑁂, 𑀢𑀼, 𑀦𑀮𑁄𑀧𑁄. 𑀤𑀼𑀫𑀸𑀫𑀬𑁄𑀧𑁆𑀬𑀢𑁆𑀭.

𑁩𑁦𑁬. 𑀤𑁆𑀯𑀬𑀁 𑀲𑀭𑀮𑀤𑁆𑀤𑀯𑁂. 𑀲𑀺𑀭𑀺𑀬𑀸 𑀮𑀓𑁆𑀔𑀺𑀬𑀸 𑀆𑀯𑀸𑀲𑁄 𑀲𑀺𑀭𑀺𑀯𑀸𑀲𑁄. 𑀲𑀭𑀮𑀦𑀸𑀫𑀓𑀲𑁆𑀲 𑀭𑀼𑀓𑁆𑀔𑀲𑁆𑀲 𑀤𑀯𑁄 𑀭𑀲𑁄 𑀲𑀭𑀮𑀤𑁆𑀤𑀯𑁄. 𑀧𑀸𑀬𑀲𑁄, 𑀯𑀓𑀥𑀽𑀧𑁄, 𑀲𑀺𑀭𑀺𑀯𑁂𑀝𑁆𑀞𑁄𑀧𑁆𑀬𑀢𑁆𑀭. ‘‘𑀲𑀺𑀭𑀺𑀯𑀸𑀲𑁂 𑀧𑀭𑀫𑀦𑁆𑀦𑁂 𑀘, 𑀧𑀸𑀬𑀲𑁄 𑀲𑀫𑁆𑀫𑀢𑁄 𑀧𑀼𑀫𑁂’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁬.𑁧𑁨𑁯] 𑀭𑀼𑀤𑁆𑀤𑁄. 𑀤𑁆𑀯𑀬𑀁 𑀅𑀜𑁆𑀚𑀦𑁂. 𑀅𑀜𑁆𑀚𑀼 𑀩𑁆𑀬𑀢𑁆𑀢𑀺𑀫𑀓𑁆𑀔𑀦𑀕𑀢𑀺𑀓𑀦𑁆𑀢𑀻𑀲𑀼, 𑀬𑀼. 𑀓𑀚𑁆𑀚 𑀩𑁆𑀬𑀲𑀦𑁂. 𑀓𑀚𑁆𑀚𑀢𑀺 𑀭𑁄𑀕𑀦𑁆𑀢𑀺 𑀓𑀚𑁆𑀚𑀮𑀁, 𑀅𑀮𑁄.

𑀤𑁆𑀯𑀬𑀁 𑀕𑀦𑁆𑀥𑀕𑀸𑀳𑀸𑀧𑀦𑀘𑀼𑀡𑁆𑀡𑁂, 𑀯𑀲 𑀳𑀺𑀁𑀲𑀢𑁆𑀣𑁄, 𑀯𑀲𑀢𑀺 𑀤𑀼𑀕𑁆𑀕𑀦𑁆𑀥𑀦𑁆𑀢𑀺 𑀯𑀸𑀲𑁄, 𑀡𑁄, 𑀯𑀸𑀲 𑀉𑀧𑀲𑁂𑀯𑀸𑀬𑀁 𑀯𑀸, 𑀯𑀲 𑀦𑀺𑀯𑀸𑀲𑁂 𑀯𑀸. 𑀲𑁄 𑀏𑀯 𑀘𑀼𑀡𑁆𑀡𑀁. 𑀬𑀼𑀚 𑀬𑁄𑀕𑁂, 𑀓𑀫𑁆𑀫𑀦𑀺 𑀡𑁄, 𑀯𑀸𑀲𑁄 𑀏𑀯 𑀬𑁄𑀕𑁄 𑀯𑀸𑀲𑀬𑁄𑀕𑁄. 𑀤𑁆𑀯𑀬𑀁 𑀯𑀺𑀮𑁂𑀧𑀦𑀫𑀢𑁆𑀢𑁂. 𑀯𑀡𑁆𑀡 𑀯𑀡𑁆𑀡𑀓𑁆𑀭𑀺𑀬𑀸𑀯𑀺𑀢𑁆𑀣𑀸𑀭𑀕𑀼𑀡𑀯𑀘𑀦𑁂𑀲𑀼, 𑀘𑀼𑀭𑀸𑀤𑀺. 𑀯𑀡𑁆𑀡𑀬𑀢𑀻𑀢𑀺 𑀯𑀡𑁆𑀡𑀓𑀁. 𑀡𑁆𑀯𑀼. 𑀮𑀺𑀧 𑀉𑀧𑀤𑁂𑀳𑁂. 𑀯𑀺𑀮𑁂𑀧𑀻𑀬𑀢𑁂𑀢𑀺 𑀯𑀺𑀮𑁂𑀧𑀦𑀁, 𑀓𑀫𑁆𑀫𑀦𑀺 𑀬𑀼.

𑁩𑁦𑁭. 𑀬𑁄 𑀕𑀦𑁆𑀥𑀫𑀸𑀮𑁆𑀬𑀥𑀽𑀧𑀸𑀤𑀻𑀳𑀺 𑀯𑀢𑁆𑀣𑀢𑀫𑁆𑀩𑀼𑀮𑀸𑀤𑀻𑀦𑀁 𑀲𑀗𑁆𑀔𑀸𑀭𑁄, 𑀢𑀁 ‘‘𑀯𑀸𑀲𑀦’’𑀫𑀺𑀢𑁆𑀬𑀼𑀘𑁆𑀘𑀢𑁂, 𑀯𑀸𑀲 𑀉𑀧𑀲𑁂𑀯𑀸𑀬𑀁, 𑀯𑀸𑀲𑀻𑀬𑀢𑁂 𑀲𑀗𑁆𑀔𑀭𑀻𑀬𑀢𑁂𑀢𑀺 𑀯𑀸𑀲𑀦𑀁, 𑀬𑀼.

𑀢𑀺𑀓𑀁 ¶ 𑀧𑀼𑀧𑁆𑀨𑀤𑀸𑀫𑁂. 𑀫𑀸 𑀫𑀸𑀦𑁂, 𑀮𑁄, 𑀫𑀮 𑀥𑀸𑀭𑀡𑁂 𑀯𑀸, 𑀅. 𑀫𑀸𑀮𑁄𑀯 𑀫𑀸𑀮𑁆𑀬𑀁. 𑀤𑀫 𑀕𑀢𑀺𑀬𑀁, 𑀧𑀼𑀧𑁆𑀨𑀸𑀦𑀺 𑀤𑀫𑀦𑁆𑀢𑁆𑀬𑀢𑁆𑀭𑁂𑀢𑀺 𑀧𑀼𑀧𑁆𑀨𑀤𑀸𑀫𑀁, 𑀧𑀼𑀧𑁆𑀨𑀸𑀦𑀁 𑀭𑀸𑀲𑀺𑀓𑀭𑀡𑀝𑁆𑀞𑀸𑀦𑀫𑀺𑀘𑁆𑀘𑀢𑁆𑀣𑁄. 𑀤𑀸 𑀮𑀯𑀦𑁂 𑀯𑀸, 𑀫𑁄. 𑀅𑀫𑀭𑀓𑁄𑀲𑁂 𑀧𑀦 ‘‘𑀫𑀸𑀮𑀸𑀫𑀸𑀮𑁆𑀬𑀸𑀦𑀺 𑀫𑀼𑀤𑁆𑀥𑀦𑀺 𑀧𑀯𑀢𑁆𑀢𑀸𑀬 𑀫𑀸𑀮𑀸𑀬 𑀦𑀸𑀫𑀸𑀦𑀻’’𑀢𑀺 [𑀅𑀫𑀭 𑁧𑁬.𑁧𑁩𑁫] 𑀯𑀤𑀢𑀺. 𑀫𑀸𑀮𑀫𑀸𑀮𑁆𑀬𑀲𑀤𑁆𑀤𑀸 𑀧𑀼𑀧𑁆𑀨𑁂𑀧𑀺, ‘‘𑀫𑀸𑀮𑀸 𑀫𑀸𑀮𑁆𑀬𑀁 𑀧𑀲𑀼𑀦𑁂’’𑀢𑀺 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂. 𑀤𑁆𑀯𑀬𑀁 𑀕𑀦𑁆𑀥𑀕𑁆𑀕𑀸𑀳𑀺𑀢𑁂 𑀯𑀢𑁆𑀣𑀸𑀤𑁄. 𑀪𑀽 𑀲𑀢𑁆𑀢𑀸𑀬𑀁, 𑀓𑀫𑁆𑀫𑀦𑀺 𑀢𑁄, 𑀯𑀼𑀤𑁆𑀥𑀸𑀤𑀺. 𑀯𑀸𑀲𑀸𑀧𑁂𑀢𑀺 𑀕𑀦𑁆𑀥𑀁 𑀕𑀸𑀳𑀸𑀧𑁂𑀢𑀺 𑀬𑀦𑁆𑀢𑀺 𑀯𑀸𑀲𑀺𑀢𑀁, 𑀯𑀲 𑀦𑀺𑀯𑀸𑀲𑁂, 𑀓𑀫𑁆𑀫𑁂 𑀢𑁄, 𑀢𑀻𑀲𑀼, 𑀬𑀣𑀸 𑁋 𑀪𑀸𑀯𑀺𑀢𑁄 𑀧𑀝𑁄, 𑀪𑀸𑀯𑀺𑀢𑀸 𑀘𑁂𑀮𑀻, 𑀪𑀸𑀯𑀺𑀢𑀁 𑀯𑀢𑁆𑀣𑀁. 𑀯𑀸𑀲𑀺𑀢𑁄, 𑀯𑀸𑀲𑀺𑀢𑀸, 𑀯𑀸𑀲𑀺𑀢𑀁 𑀯𑀢𑁆𑀣𑀁.

𑁩𑁦𑁮. 𑀧𑀜𑁆𑀘𑀓𑀁 𑀫𑀼𑀤𑁆𑀥𑀫𑀸𑀮𑀸𑀬𑀁. 𑀢𑀲𑀺 𑀅𑀮𑀗𑁆𑀓𑀸𑀭𑁂, 𑀪𑀽𑀯𑀸𑀤𑀺. 𑀉𑀤𑁆𑀥𑀁 𑀢𑀲𑀻𑀬𑀢𑁂𑀢𑀺 𑀉𑀢𑁆𑀢𑀁𑀲𑁄. 𑀲𑀺𑀔𑀸𑀬𑀁 𑀚𑀸𑀢𑁄 𑀲𑁂𑀔𑀭𑁄, 𑀭𑁄. 𑀫𑀼𑀤𑁆𑀥𑀁 𑀅𑀯𑀢𑀺 𑀭𑀓𑁆𑀔𑀢𑀻𑀢𑀺 𑀅𑀯𑁂𑀴𑀸, 𑀅𑀯 𑀭𑀓𑁆𑀔𑀡𑁂, 𑀏𑀮𑁄, 𑀴𑀢𑁆𑀢𑀁. ‘‘𑀆𑀯𑁂𑀴𑀸’’𑀢𑀺𑀧𑀺 𑀧𑀸𑀞𑁄, 𑀤𑀻𑀖𑀢𑁆𑀢𑀁. 𑀲𑁂𑀔𑀭𑁄 𑀘 𑀆𑀯𑁂𑀴𑀸 𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀫𑀼𑀤𑁆𑀥𑀦𑀺 𑀅𑀮𑀗𑁆𑀓𑀢𑀁 𑀫𑀸𑀮𑁆𑀬𑀁 𑀫𑀼𑀤𑁆𑀥𑀫𑀸𑀮𑁆𑀬𑀁, 𑀢𑀲𑁆𑀫𑀺𑀁. 𑀅𑀯𑀧𑀼𑀩𑁆𑀩𑁄 𑀢𑀲𑀺 𑀅𑀮𑀗𑁆𑀓𑀸𑀭𑁂, 𑀉𑀤𑁆𑀥𑀁 𑀢𑀲𑀻𑀬𑀢𑁂𑀢𑀺 𑀅𑀯𑀢𑀁𑀲𑁄, 𑀲𑁄 𑀏𑀯 𑀯𑀝𑀁𑀲𑀓𑁄, 𑀲𑀓𑀢𑁆𑀣𑁂 𑀓𑁄, 𑀢𑀲𑁆𑀲 𑀝𑁄, 𑀅𑀦𑁂𑀓𑀢𑁆𑀣𑀢𑁆𑀢𑀸 𑀉𑀧𑀲𑀕𑁆𑀕𑀦𑀺𑀧𑀸𑀢𑀸𑀦𑀁 𑀉𑀤𑁆𑀥𑀁𑀪𑀸𑀯𑀚𑁄𑀢𑀓𑁄 𑀘𑁂𑀢𑁆𑀣 𑀅𑀯𑀲𑀤𑁆𑀤𑁄𑀢𑀺 𑀢𑀣𑁄𑀢𑁆𑀢𑀁.

𑀢𑀺𑀓𑀁 𑀲𑁂𑀬𑁆𑀬𑀸𑀬𑀁. 𑀲𑀬𑀦𑁆𑀢𑁆𑀬𑀲𑁆𑀲𑀁 𑀲𑁂𑀬𑁆𑀬𑀸, 𑀬𑁄. 𑀲𑀬𑀦𑁆𑀢𑁆𑀬𑀢𑁆𑀭𑁂𑀢𑀺 𑀲𑀬𑀦𑀁, 𑀲𑁂𑀦𑀜𑁆𑀘. 𑀉𑀪𑀬𑀢𑁆𑀭𑀧𑀺 𑀅𑀥𑀺𑀓𑀭𑀡𑁂 𑀬𑀼, 𑀇𑀲𑁆𑀲𑁂, 𑀏 𑀅𑀬, 𑀇𑀢𑀭𑀢𑁆𑀭 𑀏𑀢𑁆𑀢𑀁, ‘‘𑀯𑀸 𑀧𑀭𑁄 𑀅𑀲𑀭𑀽𑀧𑀸’’𑀢𑀺 𑀅𑀮𑁄𑀧𑁄 𑀘, 𑀲𑀬𑀦𑀻𑀧𑁆𑀬𑀢𑁆𑀭.

𑀤𑁆𑀯𑀬𑀁 ¶ 𑀫𑀜𑁆𑀘𑁂. 𑀧𑀭𑀺𑀧𑀼𑀩𑁆𑀩𑁄 𑀅𑀓𑀺 𑀮𑀓𑁆𑀔𑀡𑁂, 𑀡𑁄, 𑀇𑀮𑁄𑀧𑁄, 𑀭𑀲𑁆𑀲 𑀮𑀢𑁆𑀢𑀁. 𑀫𑀘𑀺 𑀥𑀸𑀭𑀡𑁄𑀘𑁆𑀙𑀸𑀬𑀧𑀽𑀚𑀦𑁂𑀲𑀼, 𑀪𑀽𑀯𑀸𑀤𑀺 𑀅, 𑀲𑀓𑀢𑁆𑀣𑁂 𑀓𑁄. 𑀔𑀝𑀸𑀧𑁆𑀬𑀢𑁆𑀭, 𑀔𑀝𑁆𑀬𑀢𑁂 𑀆𑀓𑀗𑁆𑀔𑀢𑁂 𑀲𑀬𑀦𑀢𑁆𑀣𑀺𑀓𑁂𑀳𑀻𑀢𑀺 𑀔𑀝𑀸, 𑀔𑀝 𑀆𑀓𑀗𑁆𑀔𑀸𑀬𑀁.

𑁩𑁦𑁯. 𑀤𑁆𑀯𑀬𑀁 𑀫𑀜𑁆𑀘𑀸𑀥𑀸𑀭𑁂. 𑀫𑀜𑁆𑀘𑀲𑁆𑀲 𑀆𑀥𑀸𑀭𑁄 𑀫𑀜𑁆𑀘𑀸𑀥𑀸𑀭𑁄. 𑀧𑀝𑀺𑀧𑀚𑁆𑀚𑀢𑀺 𑀧𑀯𑀢𑁆𑀢𑀢𑀺 𑀲𑁂𑀬𑁆𑀬𑀸 𑀬𑁂𑀦, 𑀲𑁄 𑀧𑀝𑀺𑀧𑀸𑀤𑁄. 𑀫𑀜𑁆𑀘𑀗𑁆𑀕𑁂 𑀫𑀜𑁆𑀘𑀸𑀯𑀬𑀯𑁂 𑀅𑀝𑀦𑀺𑀲𑀤𑁆𑀤𑁄 𑀇𑀢𑁆𑀣𑀺𑀬𑀁, 𑀅𑀝 𑀕𑀫𑀦𑀢𑁆𑀣𑁄, 𑀅𑀦𑀺, 𑀬𑀼 𑀯𑀸, 𑀦𑀤𑀸𑀤𑀺, 𑀭𑀲𑁆𑀲𑁄.

𑁩𑁧𑁦. 𑀓𑀼𑀴𑀻𑀭𑀧𑀸𑀤𑀸𑀤𑀬𑁄 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀜𑁆𑀘𑀦𑁆𑀢𑀭𑀸 𑀫𑀜𑁆𑀘𑀪𑁂𑀤𑀸 𑀲𑀺𑀬𑀼𑀁. 𑀢𑀢𑁆𑀣 𑀓𑀼𑀴𑀻𑀭𑁄 𑀓𑀓𑁆𑀓𑀝𑀓𑁄 𑀢𑀲𑁆𑀲 𑀲𑀡𑁆𑀞𑀸𑀦𑀧𑀸𑀤𑀢𑁆𑀢𑀸 𑀓𑀼𑀴𑀻𑀭𑀧𑀸𑀤𑁄. 𑀅𑀝𑀦𑀺𑀬𑀁 𑀆𑀳𑀘𑁆𑀘𑁄, 𑀆𑀳𑀘𑁆𑀘 𑀯𑀸 𑀧𑀸𑀤𑁄 𑀢𑀺𑀝𑁆𑀞𑀢𑀺 𑀬𑀲𑁆𑀲𑀸𑀢𑀺 𑀆𑀳𑀘𑁆𑀘𑀧𑀸𑀤𑁄, 𑀧𑀼𑀩𑁆𑀩𑀧𑀓𑁆𑀔𑁂 ‘‘𑀭𑀺𑀘𑁆𑀘𑀸’’𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀭𑀺𑀘𑁆𑀘𑀧𑀘𑁆𑀘𑀬𑀦𑁆𑀢𑁄 𑀆𑀳𑀘𑁆𑀘𑀲𑀤𑁆𑀤𑁄, 𑀧𑀭𑀧𑀓𑁆𑀔𑁂 𑀢𑀼 𑀢𑁆𑀯𑀸𑀧𑀘𑁆𑀘𑀬𑀦𑁆𑀢𑁄, 𑀬𑀲𑁆𑀲 𑀅𑀝𑀦𑀺𑀙𑀺𑀤𑁆𑀤𑁂 𑀧𑀸𑀤𑁄 𑀧𑀯𑀺𑀲𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀲𑁄 𑀆𑀳𑀘𑁆𑀘𑀧𑀸𑀤𑁄. 𑀫𑀲 𑀆𑀫𑀲𑀦𑁂, 𑀆𑀭𑁄, 𑀲𑀓𑀢𑁆𑀣𑁂 𑀓𑁄. 𑀬𑀲𑁆𑀲 𑀧𑀸𑀤𑀘𑁆𑀙𑀺𑀤𑁆𑀤𑁂 𑀅𑀝𑀦𑀺 𑀧𑀯𑀺𑀲𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀲𑁄 𑀫𑀲𑀸𑀭𑀓𑁄. 𑀩𑀼𑀦𑁆𑀤𑁂𑀦 𑀧𑀸𑀤𑁂𑀦 𑀲𑀳 𑀏𑀓𑀸𑀩𑀤𑁆𑀥𑀸 𑀅𑀝𑀦𑀺 𑀬𑀲𑁆𑀲 𑀲𑁄 𑀩𑀼𑀦𑁆𑀤𑀺𑀓𑀸𑀩𑀤𑁆𑀥𑁄, 𑀏𑀓𑀸𑀭𑀲𑁆𑀲𑀺𑀢𑁆𑀢𑀁. 𑀏𑀢𑁆𑀣 𑀘 𑀫𑀚𑁆𑀛𑁂 𑀤𑁆𑀯𑀺𑀦𑁆𑀦𑀁 𑀫𑀜𑁆𑀘𑀸𑀦𑀁 𑀮𑀓𑁆𑀔𑀡𑀁 𑀯𑀺𑀧𑀭𑀺𑀬𑀬𑁂𑀦𑀸𑀧𑀺 𑀯𑀤𑀦𑁆𑀢𑀺.

𑁩𑁧𑁧. 𑀤𑁆𑀯𑀬𑀁 𑀲𑀻𑀲𑀸𑀥𑀸𑀭𑁂. 𑀯𑀺𑀲𑁂𑀲𑁂𑀦 𑀲𑀻𑀲𑀁 𑀯𑀳𑀢𑀻𑀢𑀺 𑀩𑀺𑀩𑁆𑀩𑁄𑀳𑀦𑀁, 𑀬𑀼, 𑀩𑀢𑁆𑀢𑀁, 𑀅𑀲𑁆𑀲𑁄𑀢𑁆𑀢𑀜𑁆𑀘. 𑀉𑀧𑀥𑀻𑀬𑀢𑁂 𑀲𑀻𑀲𑀸𑀲𑀦𑀁 𑀓𑀭𑀻𑀬𑀢𑁂𑀢𑀺 𑀉𑀧𑀥𑀸𑀦𑀁, 𑀬𑀼, 𑀥𑀸 𑀥𑀸𑀭𑀡𑁂.

𑀢𑀺𑀓𑀁 ¶ 𑀲𑀸𑀫𑀜𑁆𑀜𑀧𑀻𑀞𑁂. 𑀧𑀻𑀞 𑀳𑀺𑀁𑀲𑀸𑀲𑀁𑀓𑀺𑀮𑁂𑀲𑁂𑀲𑀼, 𑀪𑀽𑀯𑀸𑀤𑀺, 𑀡𑁆𑀯𑀼, 𑀆. 𑀬𑀤𑀸𑀤𑀺𑀦𑀸 𑀓𑁂 𑀧𑀘𑁆𑀘𑀬𑁂 𑀇𑀢𑁆𑀣𑀺𑀓𑀢𑀸𑀓𑀸𑀭𑁂 𑀧𑀭𑁂 𑀧𑀼𑀩𑁆𑀩𑁄 𑀅𑀓𑀸𑀭𑁄 𑀇𑀓𑀸𑀭𑀫𑀸𑀧𑀚𑁆𑀚𑀢𑁂, ‘‘𑀓𑁂’’𑀢𑀺 𑀓𑀺𑀁? 𑀘𑁂𑀢𑀦𑀸. ‘‘𑀧𑀘𑁆𑀘𑀬𑁂’’𑀢𑀺 𑀓𑀺𑀁? 𑀩𑀓𑀸. ‘‘𑀇𑀢𑁆𑀣𑀻’’𑀢𑀺 𑀓𑀺𑀁? 𑀧𑀸𑀘𑀓𑀸. ‘‘𑀓𑀢’’𑀇𑀢𑀺 𑀓𑀺𑀁? 𑀯𑀼𑀢𑁆𑀢𑀓𑀫𑁆𑀫𑀸, 𑀓𑀫𑁆𑀫𑀧𑀘𑁆𑀘𑀬𑁄𑀬𑀁, 𑀢𑀧𑀘𑁆𑀘𑀬𑁂 𑀧𑀻𑀞𑀁 [𑀫𑁄𑀕𑁆𑀕𑀮𑁆𑀮𑀸𑀦 𑁪.𑁧𑁪𑁨 𑀲𑀼𑀢𑁆𑀢𑀫𑁆𑀧𑀺 𑀧𑀲𑁆𑀲𑀺𑀢𑀩𑁆𑀩𑀁]. 𑀆𑀲𑀢𑁂 𑀅𑀲𑁆𑀫𑀺𑀦𑁆𑀢𑀺 𑀆𑀲𑀦𑀁.

𑀤𑁆𑀯𑀬𑀁 𑀉𑀢𑁆𑀢𑀫𑀸𑀭𑀳𑀧𑀻𑀞𑁂. 𑀓𑀼𑀘 𑀲𑀁𑀧𑀘𑁆𑀘𑀦𑀓𑁄𑀝𑀺𑀮𑁆𑀬𑀧𑀢𑀺𑀣𑀫𑁆𑀪𑀯𑀺𑀮𑁂𑀔𑀦𑁂𑀲𑀼, 𑀙𑁄. 𑀪𑀤𑁆𑀤𑀁 𑀓𑀮𑁆𑀬𑀸𑀡𑀁 𑀧𑀻𑀞𑀁 𑀪𑀤𑁆𑀤𑀧𑀻𑀞𑀁. 𑀕𑀚𑀤𑀦𑁆𑀢𑀸𑀤𑀺𑀫𑀬𑀓𑁂𑀲𑀫𑀚𑁆𑀚𑀦𑀺𑀬𑀫𑁆𑀧𑀺 𑀤𑁆𑀯𑀬𑀫𑀺𑀤𑀫𑀸𑀳𑀼. 𑀢𑀤𑀸 𑀧𑀲𑀸𑀥𑀦𑀻, 𑀓𑀗𑁆𑀓𑀢𑀺𑀓𑀸𑀧𑁆𑀬𑀢𑁆𑀭. 𑀧𑀻𑀞𑀦𑁆𑀢𑀭𑁂 𑀤𑀻𑀖𑀧𑀻𑀞𑁂 𑀆𑀲𑀦𑁆𑀤𑀻 𑀫𑀢𑀸. 𑀲𑀤 𑀯𑀺𑀲𑀭𑀡𑀕𑀢𑁆𑀬𑀸𑀯𑀲𑀸𑀦𑁂𑀲𑀼, 𑀦𑀤𑀸𑀤𑀺, 𑀩𑀺𑀦𑁆𑀤𑀸𑀕𑀫𑁄 𑀘.

𑁩𑁧𑁨. 𑀆𑀬𑀸𑀫𑀯𑀺𑀢𑁆𑀣𑀸𑀭𑀯𑀲𑁂𑀦 𑀫𑀳𑀦𑁆𑀢𑁄 𑀆𑀲𑀦𑀧𑁆𑀧𑀪𑁂𑀤𑁄 ‘‘𑀓𑁄𑀚𑀯𑁄’’𑀢𑀺 𑀫𑀢𑁄, 𑀓𑀼𑀚𑀼 𑀣𑁂𑀬𑁆𑀬𑀓𑀭𑀡𑁂, 𑀡𑁄, 𑀓𑀼𑀬𑀁 𑀧𑀣𑀯𑀺𑀬𑀁 𑀚𑀯𑀢𑀻𑀢𑀺 𑀯𑀸 𑀓𑁄𑀚𑀯𑁄, 𑀚𑀼 𑀕𑀢𑀺𑀬𑀁. 𑀤𑀻𑀖𑁂𑀦 𑀮𑁄𑀫𑁂𑀦 𑀬𑀼𑀢𑁆𑀢𑁄 𑀆𑀲𑀦𑀧𑁆𑀧𑀪𑁂𑀤𑁄 ‘‘𑀕𑁄𑀦𑀓𑁄’’𑀢𑀺 𑀫𑀢𑁄, 𑀕𑀼 𑀲𑀤𑁆𑀤𑁂, 𑀬𑀼, 𑀲𑀓𑀢𑁆𑀣𑁂 𑀓𑁄, 𑀉𑀲𑁆𑀲𑁄𑀢𑁆𑀢𑀁.

𑀤𑁆𑀯𑀬𑀁 𑀅𑀢𑁆𑀣𑀭𑀡𑁂. 𑀫𑀺𑀕𑀮𑁄𑀫𑀧𑀼𑀡𑁆𑀡𑀢𑀸𑀬 𑀚𑀸𑀢𑀁 𑀉𑀡𑁆𑀡𑀸𑀫𑀬𑀁. 𑀣𑀭 𑀲𑀦𑁆𑀣𑀭𑀡𑁂, 𑀧𑀸𑀤𑀺𑀧𑀼𑀩𑁆𑀩𑁄𑀯, 𑀦 𑀓𑀤𑀸𑀘𑀺𑀧𑀺 𑀧𑀸𑀤𑀺𑀭𑀳𑀺𑀢𑁄, 𑀆 𑀪𑀼𑀲𑁄 𑀣𑀭𑀻𑀬𑀢𑁂𑀢𑀺 𑀅𑀢𑁆𑀣𑀭𑀡𑀁, 𑀬𑀼.

𑀤𑁆𑀯𑀬𑀁 𑀲𑀁𑀲𑀺𑀩𑁆𑀩𑀦𑀘𑀺𑀢𑁆𑀢𑀓𑁂. 𑀘𑀺𑀢𑁆𑀢𑀭𑀽𑀧𑀫𑀲𑁆𑀲𑀢𑁆𑀣𑀻𑀢𑀺 𑀘𑀺𑀢𑁆𑀢𑀓𑀁. 𑀩𑀸𑀳𑀼𑀮𑁆𑀬𑁂𑀦 𑀦 𑀇𑀓𑀸𑀭𑀸𑀕𑀫𑁄. 𑀯𑀸𑀦𑁂𑀦 𑀲𑀁𑀲𑀺𑀩𑁆𑀩𑀦𑁂𑀦 𑀲𑀜𑁆𑀚𑀸𑀢𑀁 𑀘𑀺𑀢𑁆𑀢𑀭𑀽𑀧𑀫𑀲𑁆𑀲𑀸𑀢𑀺 𑀯𑀸𑀦𑀘𑀺𑀢𑁆𑀢𑀓𑀁, 𑀲𑀓𑀢𑁆𑀣𑁂 𑀓𑁄.

𑁩𑁧𑁩. 𑀤𑁆𑀯𑀬𑀁 ¶ 𑀦𑀺𑀭𑀦𑁆𑀢𑀭𑀧𑀼𑀧𑁆𑀨𑀧𑀝𑁂. 𑀖𑀦𑀁 𑀲𑀦𑁆𑀥𑀺𑀪𑀽𑀢𑀁 𑀧𑀼𑀧𑁆𑀨𑀭𑀽𑀧𑀫𑁂𑀢𑁆𑀣𑀸𑀢𑀺 𑀖𑀦𑀧𑀼𑀧𑁆𑀨𑀁. 𑀧𑀝𑀮𑀫𑁂𑀢𑀺𑀲𑁆𑀲𑀸𑀢𑁆𑀣𑀻𑀢𑀺 𑀧𑀝𑀮𑀺𑀓𑀸, 𑀇𑀓𑁄. 𑀤𑁆𑀯𑀬𑀁 𑀩𑀳𑀼𑀫𑀼𑀤𑀼𑀮𑁄𑀫𑁂 𑀲𑁂𑀢𑀯𑀢𑁆𑀣𑁂. 𑀲𑀺 𑀲𑁂𑀯𑀸𑀬𑀁, 𑀲𑀺𑀯𑀢𑁆𑀣𑀺𑀓𑁂𑀳𑀺 𑀲𑁂𑀯𑀻𑀬𑀢𑁂𑀢𑀺 𑀲𑁂𑀢𑁄, 𑀢𑁄. 𑀧𑀝 𑀕𑀫𑀦𑁂, 𑀡𑁆𑀯𑀼, 𑀧𑀝𑀺𑀓𑀸, 𑀅𑀤𑁆𑀥𑁂𑀦𑁆𑀤𑀼𑀧𑀸𑀲𑀸𑀡𑁂𑀧𑀺.

𑀤𑁆𑀯𑀻𑀲𑀼𑀧𑀺 𑀧𑀭𑀺𑀬𑀦𑁆𑀢𑁂𑀲𑀼 𑀬𑀲𑁆𑀲𑀸 𑀤𑀲𑀸 𑀲𑀦𑁆𑀢𑀺, 𑀲𑀸 𑀉𑀤𑁆𑀤𑀮𑁄𑀫𑀻, 𑀉𑀤𑀺𑀢𑀁 𑀤𑁆𑀯𑀻𑀲𑀼 𑀮𑁄𑀫𑀁 𑀤𑀲𑀸 𑀬𑀲𑁆𑀲𑀸 𑀲𑀸 𑀉𑀤𑁆𑀤𑀮𑁄𑀫𑀻, 𑀇𑀲𑁆𑀲𑀢𑁆𑀢𑀁, 𑀤𑁆𑀯𑀺𑀢𑁆𑀢𑀜𑁆𑀘. 𑀏𑀓𑀲𑁆𑀫𑀺𑀁 𑀧𑀭𑀺𑀬𑀦𑁆𑀢𑁂𑀬𑁂𑀯 𑀤𑀲𑀸 𑀬𑀲𑁆𑀲𑀸 𑀏𑀓𑀦𑁆𑀢𑀮𑁄𑀫𑀻, 𑀏𑀓𑀲𑁆𑀫𑀺𑀁 𑀅𑀦𑁆𑀢𑁂 𑀧𑀭𑀺𑀬𑀦𑁆𑀢𑁂 𑀮𑁄𑀫𑀁 𑀤𑀲𑀸 𑀬𑀲𑁆𑀲𑀸𑀢𑁆𑀣𑀻𑀢𑀺 𑀏𑀓𑀦𑁆𑀢𑀮𑁄𑀫𑀻, 𑀉𑀤𑁆𑀤𑀮𑁄𑀫𑀻 𑀘 𑀏𑀓𑀦𑁆𑀢𑀮𑁄𑀫𑀻 𑀘𑁂𑀢𑀺 𑀉𑀤𑁆𑀤𑀮𑁄𑀫𑀺𑀏𑀓𑀦𑁆𑀢𑀮𑁄𑀫𑀺𑀦𑁄, ‘‘𑀧𑀤𑀸𑀦𑀁 𑀲𑀦𑁆𑀥𑀺 𑀯𑀢𑁆𑀢𑀺𑀘𑁆𑀙𑀸𑀢𑁄, 𑀦 𑀲𑀫𑀸𑀲𑀦𑁆𑀢𑀭𑀕𑁂𑀲𑀽’’𑀢𑀺 𑀯𑀼𑀢𑁆𑀢𑁂𑀧𑀺 𑀕𑀸𑀣𑀸𑀪𑀸𑀯𑀢𑁄 𑀙𑀦𑁆𑀤𑁄𑀳𑀸𑀦𑀺𑀪𑀬𑀸 𑀯𑀺𑀲𑀦𑁆𑀥𑀺. 𑀬𑀢𑁆𑀣 𑀧𑀦 𑀕𑀸𑀣𑀸𑀬𑀫𑁆𑀧𑀺 [𑀅𑀕𑀸𑀣𑀸𑀬𑀫𑁆𑀧𑀺 (?)] 𑀯𑀺𑀲𑀦𑁆𑀥𑀺 ‘‘𑀥𑀫𑁆𑀫𑀲𑀁𑀯𑀡𑁆𑀡𑀦𑀸𑀬’𑀦𑁆𑀢𑀺𑀆𑀤𑀺𑀫𑀸𑀳𑀸’’𑀢𑁆𑀬𑀸𑀤𑀻𑀲𑀼, 𑀢𑀢𑁆𑀣 𑀓𑀣𑀦𑁆𑀢𑀺? ‘‘𑀦 𑀲𑀫𑀸𑀲𑀦𑁆𑀢𑀭𑀗𑁆𑀕𑁂𑀲𑀽’’𑀢𑀺 𑀇𑀫𑀲𑁆𑀲𑀸𑀦𑀺𑀘𑁆𑀘𑀢𑁆𑀢𑀸 𑀢𑀢𑁆𑀣𑀸𑀧𑀺 𑀦 𑀤𑁄𑀲𑁄, ‘‘𑀦𑁂𑀦 𑀦𑀺𑀤𑁆𑀤𑀺𑀝𑁆𑀞𑀫𑀦𑀺𑀘𑁆𑀘’’𑀦𑁆𑀢𑀺 𑀳𑀺 𑀧𑀭𑀺𑀪𑀸𑀲𑀺𑀢𑀁 [𑀦𑀖𑀝𑀺𑀢𑀁 𑀅𑀦𑀺𑀘𑁆𑀘𑀁 (𑀧𑀭𑀺𑀪𑀸𑀲𑁂𑀦𑁆𑀤𑀼𑀲𑁂𑀔𑀭 𑁯𑁭)].

𑁩𑁧𑁪. 𑀢𑀤𑁂𑀯 𑀬𑀣𑀸𑀯𑀼𑀢𑁆𑀢𑀤𑁆𑀯𑀬𑀫𑁂𑀯 𑀲𑁄𑀴𑀲𑀦𑁆𑀦𑀁 𑀇𑀢𑁆𑀣𑀻𑀦𑀁 𑀦𑀘𑁆𑀘𑀬𑁄𑀕𑁆𑀕𑀁 𑀦𑀘𑁆𑀘𑀲𑁆𑀲 𑀬𑁄𑀕𑁆𑀬𑀝𑁆𑀞𑀸𑀦𑀪𑀽𑀢𑀁 ‘‘𑀓𑀼𑀢𑁆𑀢𑀓’’𑀫𑀺𑀢𑁆𑀬𑀼𑀘𑁆𑀘𑀢𑁂. 𑀳𑀺 𑀧𑀤𑀧𑀽𑀭𑀡𑁂. ‘‘𑀦𑀘𑁆𑀘𑀬𑁄𑀕𑁆𑀬𑀫𑁆𑀳𑀻’’𑀢𑀺𑀧𑀺 𑀧𑀸𑀞𑁄, 𑀢𑀤𑀸 𑀪𑀸𑀯𑀲𑀢𑁆𑀢𑀫𑀻. 𑀓𑀭𑁄𑀦𑁆𑀢𑀺 ¶ 𑀏𑀢𑁆𑀣 𑀦𑀘𑁆𑀘𑀦𑁆𑀢𑀺 𑀓𑀼𑀢𑁆𑀢𑀓𑀁, 𑀓𑀭 𑀓𑀭𑀡𑁂, 𑀢𑁄, 𑀅𑀲𑁆𑀲𑀼, 𑀪𑀼𑀚𑀸𑀤𑀺, 𑀲𑀓𑀢𑁆𑀣𑁂 𑀓𑁄.

𑀲𑀻𑀳𑀸𑀤𑀺𑀭𑀽𑀧𑁂𑀳𑀺 𑀯𑀺𑀘𑀺𑀢𑁆𑀢𑀭𑀽𑀧𑀁 𑀯𑀢𑁆𑀣𑀁, 𑀆𑀲𑀦𑀁 𑀯𑀸 𑀯𑀺𑀓𑀢𑀺𑀓𑀸 𑀦𑀸𑀫 𑀪𑀯𑁂, 𑀏𑀓𑀲𑁆𑀲𑁂𑀯 𑀳𑀺 𑀓𑀢𑁆𑀢𑀼𑀦𑁄 𑀧𑀓𑀢𑀺𑀯𑀺𑀓𑀢𑀺𑀲𑀗𑁆𑀔𑀸𑀢𑀸𑀯𑀢𑁆𑀣𑀸𑀯𑀲𑁂𑀦 𑀤𑁆𑀯𑀺𑀢𑁆𑀢𑀁, 𑀯𑀢𑁆𑀢𑀺𑀘𑁆𑀙𑀸𑀯𑀲𑁂𑀦 𑀮𑀺𑀗𑁆𑀕𑀲𑀗𑁆𑀔𑁆𑀬𑀸𑀯𑀺𑀪𑀢𑁆𑀢𑀺𑀪𑁂𑀤𑀜𑁆𑀘 𑀳𑁄𑀢𑀺, 𑀬𑀣𑀸 𑁋 𑀫𑀦𑀼𑀲𑁆𑀲𑀸 𑀬𑀓𑁆𑀔𑀪𑀢𑁆𑀢𑀁 𑀅𑀳𑁂𑀲𑀼𑀁, 𑀲𑀢𑁆𑀢𑀧𑁆𑀧𑀓𑀭𑀡𑀸𑀦𑀺 𑀅𑀪𑀺𑀥𑀫𑁆𑀫𑁄 𑀦𑀸𑀫 𑀪𑀯𑀦𑁆𑀢𑀺, 𑀤𑁂𑀯𑀤𑀢𑁆𑀢𑁄 𑀭𑀚𑁆𑀚𑀁 𑀧𑀸𑀧𑀼𑀡𑀸𑀢𑀻𑀢𑀺. 𑀬𑀢𑁆𑀭 𑀳𑀺 𑀧𑀓𑀢𑀺𑀬𑀸 𑀯𑀸 𑀯𑀺𑀓𑀢𑀺𑀬𑀸 𑀯𑀸𑀢𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀼𑀢𑁆𑀢𑀢𑀸 𑀲𑀺𑀬𑀸, 𑀢𑀢𑁆𑀭 𑀯𑀸𑀘𑀓𑁄 𑀧𑀓𑀢𑀺𑀬𑀸𑀬𑁂𑀯 𑀲𑀗𑁆𑀔𑁆𑀬𑀁 𑀕𑀡𑁆𑀳𑀸𑀢𑀺, 𑀦𑁂𑀢𑀭𑀲𑁆𑀲 𑀢𑀦𑁆𑀦𑀺𑀲𑁆𑀲𑀺𑀢𑀪𑀸𑀯𑁂𑀦𑀸𑀧𑁆𑀧𑀥𑀸𑀦𑀢𑁄 [𑀓𑀘𑁆𑀘𑀸𑀬𑀦𑀲𑀸𑀭𑁂 𑁬-𑁭 𑀕𑀸𑀣𑀸𑀲𑀼 𑀧𑀲𑁆𑀲𑀺𑀢𑀩𑁆𑀩𑀁]. 𑀬𑀤𑀸 𑀧𑀦 𑀧𑀓𑀢𑀺𑀬𑀸 𑀲𑀫𑁆𑀩𑀦𑁆𑀥𑀸𑀤𑀺𑀪𑀸𑀯𑀁 𑀯𑀢𑁆𑀢𑀼𑀫𑀺𑀘𑁆𑀙𑀢𑀺, 𑀢𑀤𑀸 𑀅𑀢𑁆𑀢𑀦𑀸 𑀯𑀢𑁆𑀢𑀩𑁆𑀩𑀲𑁆𑀲 𑀅𑀜𑁆𑀜𑀢𑁆𑀣𑀲𑁆𑀲𑀸𑀪𑀸𑀯𑀸 𑀯𑀺𑀓𑀢𑀺𑀧𑁆𑀬𑀼𑀘𑁆𑀘𑀢𑁂 𑀯𑀸𑀘𑀓𑁂𑀦, 𑀬𑀣𑀸 𑁋 𑀤𑁂𑀯𑀤𑀢𑁆𑀢𑀲𑁆𑀲 𑀭𑀚𑁆𑀚𑀁 𑀧𑀸𑀧𑀼𑀡𑀸𑀢𑀺, 𑀇𑀥 𑀧𑀦 𑀮𑀺𑀗𑁆𑀕𑀪𑁂𑀤𑁂𑀦𑁂𑀯 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀁 𑀯𑀺𑀓𑀢𑀺𑀓𑀸 𑀪𑀯𑁂’’𑀢𑀺. 𑀯𑀺𑀓𑀭𑀻𑀬𑀢𑁂𑀢𑀺 𑀯𑀺𑀓𑀢𑀺.

𑁩𑁧𑁫. 𑀓𑀝𑁆𑀝𑀺𑀲𑁆𑀲𑀓𑁄𑀲𑁂𑀬𑁆𑀬𑀲𑀗𑁆𑀔𑀸𑀢𑀸𑀦𑀁 𑀤𑁆𑀯𑀺𑀦𑁆𑀦𑀫𑀢𑁆𑀣𑀭𑀡𑀸𑀦𑀁 𑀓𑀭𑀡𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 𑀅𑀭𑀺𑀬𑀸𑀲𑀸𑀫𑀜𑁆𑀜𑀫𑀸𑀳 ‘‘𑀓𑀝𑁆𑀝𑀺𑀲𑁆𑀲’’𑀫𑀺𑀘𑁆𑀘𑀸𑀤𑀺. 𑀓𑁄𑀲𑀺𑀬𑀓𑀝𑁆𑀝𑀺𑀲𑁆𑀲𑀫𑀬𑀁 𑀓𑁄𑀲𑀺𑀬𑀲𑀼𑀢𑁆𑀢𑀓𑀝𑁆𑀝𑀺𑀲𑁆𑀲𑀯𑀸𑀓𑁂𑀳𑀺 𑀧𑀓𑀢𑀫𑀢𑁆𑀣𑀭𑀡𑀁 𑀓𑀝𑁆𑀝𑀺𑀲𑁆𑀲𑀁 𑀦𑀸𑀫, 𑀯𑀺𑀭𑀽𑀧𑁂𑀓𑀲𑁂𑀲𑀯𑀲𑁂𑀦 𑀓𑁄𑀲𑀺𑀬𑀜𑁆𑀘 𑀓𑀝𑁆𑀝𑀺𑀲𑁆𑀲𑀜𑁆𑀘 𑀓𑀝𑁆𑀝𑀺𑀲𑁆𑀲𑀸𑀦𑀺, 𑀢𑁂𑀳𑀺 𑀧𑀓𑀢𑀁 𑀅𑀢𑁆𑀣𑀭𑀡𑀁 𑀓𑀝𑁆𑀝𑀺𑀲𑁆𑀲𑀁. 𑀓𑁄𑀲𑀺𑀬𑀲𑀼𑀢𑁆𑀢𑁂𑀦 𑀧𑀓𑀢𑀦𑁆𑀢𑀼 𑀅𑀢𑁆𑀣𑀭𑀡𑀁 𑀓𑁄𑀲𑁂𑀬𑁆𑀬𑀁 𑀦𑀸𑀫. 𑀭𑀢𑀦𑀧𑀢𑀺𑀲𑀺𑀩𑁆𑀩𑀺𑀢𑀦𑁆𑀢𑀺 𑀇𑀤𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀺𑀲𑁂𑀲𑀦𑀁, 𑀅𑀢𑁆𑀣𑀭𑀡𑀜𑁆𑀘 𑀇𑀢𑀺 𑀓𑀫𑀸 𑀓𑀫𑀢𑁄 ‘‘𑀪𑀯𑁂’’𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁. 𑀅𑀢𑁆𑀣𑀭𑀡𑀲𑀤𑁆𑀤𑀲𑁆𑀲𑀸𑀦𑀼𑀡𑁆𑀡𑀸𑀫𑀬𑁂𑀲𑁆𑀯𑀧𑀺 𑀧𑀯𑀢𑁆𑀢𑀦𑀢𑁄 𑀏𑀢𑁆𑀣𑀸𑀧𑀺 ‘‘𑀅𑀢𑁆𑀣𑀭𑀡’’𑀦𑁆𑀢𑀺 ¶ 𑀯𑀼𑀢𑁆𑀢𑀁, 𑀬𑀣𑀸 𑁋 𑀲𑀼𑀢𑁆𑀢𑀁 𑀓𑀫𑁆𑀫𑀦𑁆𑀢𑀺. 𑀏𑀢𑁆𑀣 𑀘 𑀘𑀓𑀸𑀭𑁄 𑀧𑀸𑀤𑀦𑁆𑀢𑀢𑁆𑀢𑀸 𑀕𑀭𑀽𑀲𑀼 𑀕𑀡𑁆𑀳𑀺𑀢𑀩𑁆𑀩𑁄, 𑀢𑁂𑀦𑁂𑀯 𑀳𑀺 𑀲𑀢𑁆𑀢𑀧𑀜𑁆𑀜𑀸𑀲𑀫𑀢𑁆𑀢𑀸 𑀧𑀭𑀺𑀧𑀼𑀡𑁆𑀡𑀸 𑀳𑁄𑀦𑁆𑀢𑀺, 𑀅𑀭𑀺𑀬𑀸𑀬 𑀳𑀺 𑀧𑀞𑀫𑀧𑀸𑀤𑁂 𑀤𑁆𑀯𑀸𑀤𑀲𑀫𑀢𑁆𑀢𑀸, 𑀢𑀣𑀸 𑀢𑀢𑀺𑀬𑁂, 𑀤𑀼𑀢𑀺𑀬𑁂 𑀅𑀝𑁆𑀞𑀸𑀭𑀲, 𑀘𑀢𑀼𑀢𑁆𑀣𑁂 𑀧𑀦𑁆𑀦𑀭𑀲𑀫𑀢𑁆𑀢𑀸𑀢𑀺 𑀲𑀫𑁆𑀧𑀺𑀡𑁆𑀟𑀺𑀢𑀸 𑀲𑀢𑁆𑀢𑀧𑀜𑁆𑀜𑀸𑀲𑀫𑀢𑁆𑀢𑀸 𑀳𑁄𑀦𑁆𑀢𑀺.

𑁩𑁧𑁬. 𑀢𑀺𑀓𑀁 𑀤𑀻𑀧𑁂. 𑀤𑀻𑀧 𑀤𑀺𑀢𑁆𑀢𑀺𑀬𑀁, 𑀤𑀺𑀯𑀸𑀤𑀺. 𑀤𑀺𑀧𑁆𑀧𑀢𑀻𑀢𑀺 𑀤𑀻𑀧𑁄, 𑀡𑁄. ‘‘𑀧𑀤𑀻𑀧𑁄’’𑀢𑀺 𑀅𑀜𑁆𑀜𑀧𑀤𑀦𑀺𑀯𑀢𑁆𑀢𑀦𑀢𑁆𑀣𑀁 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑀺𑀢𑀁. 𑀚𑀼𑀢𑀺 𑀤𑀺𑀢𑁆𑀢𑀺𑀬𑀁, 𑀪𑀽𑀯𑀸𑀤𑀺, 𑀡𑁄.

𑀤𑁆𑀯𑀬𑀁 𑀆𑀤𑀸𑀲𑁂. ‘‘𑀧𑀼𑀫𑁂 𑀢𑀽’’𑀢𑀺 𑀢𑁆𑀯𑀦𑁆𑀢𑀁 𑀮𑀺𑀗𑁆𑀕𑀧𑀤𑀁. 𑀆𑀤𑀺𑀲𑁆𑀲𑀢𑁂 𑀅𑀲𑁆𑀫𑀺𑀦𑁆𑀢𑀺 𑀆𑀤𑀸𑀲𑁄, 𑀡𑁄, 𑀆𑀧𑀼𑀩𑁆𑀩𑁄 𑀤𑀺𑀲 𑀧𑁂𑀓𑁆𑀔𑀦𑁂, 𑀇𑀲𑁆𑀲𑀸. 𑀤𑀺𑀧𑁆𑀧𑀢𑀺 𑀏𑀢𑁆𑀣𑀸𑀢𑀺 𑀤𑀧𑁆𑀧𑀡𑁄, 𑀬𑀼, 𑀇𑀲𑁆𑀲𑀢𑁆𑀢𑀁. 𑀫𑀓𑀼𑀭𑁄𑀧𑁆𑀬𑀢𑁆𑀭.

𑀤𑁆𑀯𑀬𑀁 𑀘𑀫𑁆𑀫𑀫𑀬𑀓𑀻𑀴𑀸𑀕𑀼𑀴𑀓𑁂. 𑀯𑀸𑀲𑀪𑀯𑀦𑁂𑀳𑀺 𑀬𑀼𑀯𑀢𑀻𑀳𑀺 𑀲𑀳 𑀓𑀻𑀴𑀸𑀲𑀫𑁆𑀪𑀯𑀸 𑀜𑁂𑀬𑁆𑀬𑀸, 𑀢𑀧𑁆𑀧𑀓𑁆𑀓𑀫𑁂𑀦𑀲𑁆𑀲𑀸𑀪𑀺𑀥𑀸𑀦𑀁. 𑀕𑀼𑀟𑀺 𑀯𑁂𑀥𑀦𑁂, 𑀡𑀼𑀓𑁄, 𑀉𑀲𑁆𑀲𑁂, 𑀕𑀼𑀤𑁆𑀤 𑀓𑀻𑀴𑀸𑀬𑀫𑁂𑀯 𑀯𑀸, 𑀢𑀤𑀸 𑀤𑀲𑁆𑀲 𑀡𑁆𑀟𑁄. 𑀓𑀤𑀺 𑀅𑀯𑁆𑀳𑀸𑀦𑁂 𑀭𑁄𑀤𑀦𑁂 𑀘, 𑀡𑀼𑀓𑁄, 𑀓𑀼𑀤𑁆𑀤 𑀓𑀻𑀴𑀸𑀬𑀫𑁂𑀯 𑀯𑀸, 𑀉𑀲𑁆𑀲𑀢𑁆𑀢𑀁, 𑀧𑀼𑀩𑁆𑀩𑀤𑀲𑁆𑀲 𑀦𑁄.

𑀤𑁆𑀯𑀬𑀁 𑀩𑀻𑀚𑀦𑀻𑀫𑀢𑁆𑀢𑁂. 𑀯𑀝𑀺 𑀯𑀺𑀪𑀸𑀚𑀦𑁂, 𑀢𑀸𑀮𑀯𑀡𑁆𑀝𑁂𑀳𑀺 𑀓𑀢𑀢𑁆𑀢𑀸 𑀢𑀸𑀮𑀯𑀡𑁆𑀝𑀁. 𑀯𑀡𑁆𑀝𑀁 𑀦𑀸𑀫 𑀩𑀻𑀚𑀦𑀸𑀤𑀺𑀓𑀭𑀡𑀢𑁆𑀣𑀁 𑀯𑀺𑀲𑀼𑀁 𑀪𑀸𑀚𑀺𑀢𑁄 𑀢𑀸𑀮𑀧𑀢𑁆𑀢𑀸𑀯𑀬𑀯𑁄, 𑀢𑀸𑀮𑀯𑀡𑁆𑀝𑀲𑀤𑁆𑀤𑀲𑁆𑀲 𑀬𑀣𑀸𑀯𑀼𑀢𑁆𑀢𑀯𑀘𑀦𑀢𑁆𑀣𑀬𑁄𑀕𑁂𑀧𑀺 𑀲𑀢𑀺 𑀲𑀜𑁆𑀜𑀸𑀲𑀤𑁆𑀤𑀢𑁆𑀢𑀸 𑀩𑀻𑀚𑀦𑀻𑀲𑀸𑀫𑀜𑁆𑀜𑁂 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀤𑀸 𑀧𑀦 𑀢𑀸𑀮𑀯𑀡𑁆𑀝𑁂𑀳𑀺 𑀓𑀢𑀩𑀻𑀚𑀦𑀺𑀫𑁂𑀯 𑀯𑀢𑁆𑀢𑀼𑀫𑀺𑀘𑁆𑀙𑀢𑀺, 𑀢𑀤𑀸 𑀏𑀓𑁂𑀦 𑀢𑀸𑀮𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 ‘‘𑀢𑀸𑀮𑀢𑀸𑀮𑀯𑀡𑁆𑀝’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀬𑀣𑀸 𑁋 𑀢𑀺𑀮𑀲𑁆𑀲 𑀢𑁂𑀮𑀁, 𑀲𑀼𑀕𑀢𑀲𑁆𑀲 𑀲𑀼𑀕𑀢𑀘𑀻𑀯𑀭𑀦𑁆𑀢𑀺. 𑀩𑀺𑀚𑀦𑁆𑀢𑀺 𑀯𑀸𑀬𑀼𑀦𑀸 𑀬𑁄𑀚𑀬𑀦𑁆𑀢𑀺 𑀬𑀸𑀬 ¶ , 𑀲𑀸 𑀩𑀻𑀚𑀦𑀻, 𑀬𑀼, 𑀦𑀤𑀸𑀤𑀺, 𑀬𑀼𑀚 𑀬𑁄𑀕𑁂, 𑀬𑀲𑁆𑀲 𑀯𑁄, 𑀉𑀲𑁆𑀲𑀻, 𑀯𑀚 𑀕𑀢𑀺𑀬𑀁 𑀯𑀸 𑀅𑀲𑁆𑀲𑀻. 𑀩𑁆𑀬𑀚𑀦𑀁𑀧𑁆𑀬𑀢𑁆𑀭.

𑁩𑁧𑁭. 𑀤𑁆𑀯𑀬𑀁 𑀘𑀗𑁆𑀓𑁄𑀝𑀓𑁂. 𑀓𑀼𑀝 𑀙𑁂𑀤𑀦𑁂, 𑀲𑀓𑀢𑁆𑀣𑁂 𑀓𑁄. 𑀓𑀭𑀟𑀺 𑀪𑀸𑀚𑀦𑀢𑁆𑀣𑁂, 𑀓𑁄. 𑀤𑁆𑀯𑀬𑀁 𑀓𑀧𑁆𑀧𑀽𑀭𑀸𑀤𑀺𑀲𑀫𑁆𑀧𑀼𑀝𑁂 [𑀲𑀭𑀽𑀧𑀓𑀸𑀤𑀺𑀲𑀫𑁆𑀧𑀼𑀝𑁂 (𑀓.)]. 𑀲𑀫𑀼𑀕𑁆𑀕𑀘𑁆𑀙𑀢𑀻𑀢𑀺 𑀲𑀫𑀼𑀕𑁆𑀕𑁄, 𑀓𑁆𑀯𑀺. 𑀧𑀼𑀝 𑀲𑀁𑀲𑀺𑀮𑁂𑀲𑀦𑁂, 𑀪𑀽𑀯𑀸𑀤𑀺, 𑀅.

𑀧𑀚𑁆𑀚𑀤𑁆𑀥𑀁 𑀫𑁂𑀣𑀼𑀦𑁂. 𑀕𑀸𑀫𑀯𑀸𑀲𑀻𑀦𑀁 𑀥𑀫𑁆𑀫𑁄 𑀆𑀘𑀸𑀭𑁄 𑀕𑀸𑀫𑀥𑀫𑁆𑀫𑁄, 𑀕𑀸𑀫𑀲𑀤𑁆𑀤𑁂𑀦 𑀘𑁂𑀢𑁆𑀣 𑀕𑀸𑀫𑀯𑀸𑀲𑀺𑀦𑁄 𑀯𑀼𑀢𑁆𑀢𑀸, 𑀬𑀣𑀸 ‘‘𑀕𑀸𑀫𑁄 𑀆𑀕𑀢𑁄’’𑀢𑀺. 𑀅𑀲𑀢𑀁 𑀅𑀲𑀧𑁆𑀧𑀼𑀭𑀺𑀲𑀸𑀦𑀁 𑀥𑀫𑁆𑀫𑁄, 𑀲𑀤𑁆𑀥𑀫𑁆𑀫𑀧𑀝𑀺𑀧𑀓𑁆𑀔𑀢𑁆𑀢𑀸 𑀯𑀸 𑀅𑀲𑀤𑁆𑀥𑀫𑁆𑀫𑁄. 𑀩𑁆𑀬𑀬 𑀔𑀬𑁂, 𑀩𑁆𑀬𑀬𑀢𑀺 𑀩𑀮𑀫𑁂𑀢𑁂𑀦𑀸𑀢𑀺 𑀩𑁆𑀬𑀯𑀸𑀬𑁄, 𑀫𑀚𑁆𑀛𑁂 𑀯𑀸𑀕𑀫𑁄, 𑀅𑀣 𑀯𑀸 𑀯𑀺𑀕𑀢𑁄 𑀅𑀬𑁄 𑀯𑀼𑀟𑁆𑀠𑀺 𑀢𑀲𑁆𑀫𑀸𑀢𑀺 𑀅𑀯𑀸𑀬𑁄, 𑀅𑀢𑀺𑀲𑀬𑁄 𑀅𑀯𑀸𑀬𑁄 𑀩𑁆𑀬𑀯𑀸𑀬𑁄. 𑀫𑀺𑀣𑀼𑀦𑀸𑀦𑀁 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀲𑀫𑀸𑀦𑀘𑁆𑀙𑀦𑁆𑀤𑀸𑀦𑀁 𑀆𑀘𑀸𑀭𑁄 𑀫𑁂𑀣𑀼𑀦𑀁, 𑀢𑀤𑀜𑁆𑀜𑁂𑀲𑀼 𑀉𑀧𑀘𑀸𑀭𑁄, 𑀭𑀫𑀼 𑀭𑀫𑀦𑁂, 𑀪𑀸𑀯𑁂, 𑀓𑀭𑀡𑁂 𑀯𑀸𑀢𑀺.

𑁩𑁧𑁮. 𑀘𑀢𑀼𑀓𑁆𑀓𑀁 𑀯𑀺𑀯𑀸𑀳𑁂. 𑀯𑀳 𑀧𑀸𑀧𑀼𑀡𑁂, 𑀡𑁄. 𑀉𑀧𑀧𑀼𑀩𑁆𑀩𑁄 𑀬𑀫𑀼 𑀉𑀧𑀭𑀫𑁂, 𑀅. 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀸𑀡𑀺𑀦𑁄 𑀕𑀳𑀡𑀁 𑀧𑀸𑀡𑀺𑀕𑁆𑀕𑀳𑁄. 𑀦𑀻 𑀦𑀬𑁂, 𑀅. 𑀉𑀩𑁆𑀩𑀸𑀳𑁄, 𑀧𑀸𑀡𑀺𑀧𑀻𑀴𑀦𑀁𑀧𑁆𑀬𑀢𑁆𑀭.

𑀥𑀫𑁆𑀫𑀓𑀸𑀫𑀢𑁆𑀣𑀸 𑀢𑀬𑁄 𑀯𑀕𑁆𑀕𑀸 𑀯𑀼𑀘𑁆𑀘𑀦𑁆𑀢𑁂. 𑀆𑀕𑀫𑀦𑀺𑀤𑁆𑀤𑀺𑀝𑁆𑀞𑁄 𑀲𑀫𑀸𑀘𑀸𑀭𑁄 𑀥𑀫𑁆𑀫𑁄. 𑀯𑀺𑀲𑀬𑀯𑀺𑀲𑀬𑀺𑀲𑀦𑁆𑀦𑀺𑀧𑀸𑀢𑀚𑀁 𑀲𑀼𑀔𑀁 𑀓𑀸𑀫𑁄. 𑀲𑀩𑁆𑀩𑁄𑀧𑀓𑀭𑀡𑀁 ¶ 𑀅𑀢𑁆𑀣𑁄. 𑀲𑀫𑁄𑀓𑁆𑀔𑀓𑀸 𑀫𑁄𑀓𑁆𑀔𑀲𑀳𑀺𑀢𑀸 𑀥𑀫𑁆𑀫𑀓𑀸𑀫𑀢𑁆𑀣𑀸 𑀘𑀢𑀼𑀩𑁆𑀩𑀕𑁆𑀕𑁄 𑀯𑀼𑀘𑁆𑀘𑀦𑁆𑀢𑁂. 𑀢𑀺𑀯𑀕𑁆𑀕𑁂𑀦 𑀯𑀺𑀲𑀁𑀬𑀼𑀢𑁆𑀢𑁄 𑀫𑁄𑀓𑁆𑀔𑁄 𑀦𑀺𑀩𑁆𑀩𑀸𑀦𑀁. 𑀢𑀼𑀮𑁆𑀬𑀩𑀮𑁂𑀳𑀺 𑀧𑀦 𑀥𑀫𑁆𑀫𑀸𑀤𑀻𑀳𑀺 𑀘𑀢𑀽𑀳𑀺 𑀧𑀥𑀸𑀦𑁂𑀳𑀺 𑀘𑀢𑀼𑀪𑀤𑁆𑀭 [𑀅𑀫𑀭 𑁧𑁭.𑁫𑁭] 𑀫𑀼𑀘𑁆𑀘𑀢𑁂.

𑁩𑁧𑁯-𑁩𑁨𑁦. 𑀤𑁆𑀯𑀬𑀁 𑀔𑀼𑀚𑁆𑀚𑁂. 𑀓𑀼𑀘𑁆𑀙𑀺𑀢𑀁 𑀯𑀚𑁆𑀚𑀢𑀻𑀢𑀺 𑀔𑀼𑀚𑁆𑀚𑁄, 𑀓𑀲𑁆𑀲 𑀔𑁄, 𑀯𑀮𑁄𑀧𑁄, 𑀡𑁄. 𑀕𑀟𑀺 𑀦𑀺𑀦𑁆𑀤𑀸𑀬𑀁, 𑀉𑀮𑁄.

𑀢𑀺𑀓𑀁 𑀭𑀲𑁆𑀲𑀲𑀭𑀻𑀭𑁂 𑀧𑀼𑀕𑁆𑀕𑀮𑁂. 𑀭𑀲 𑀲𑀤𑁆𑀤𑁂, 𑀲𑁄. 𑀩𑁆𑀬𑀸𑀫𑀧𑁆𑀧𑀫𑀸𑀡𑀁 𑀦 𑀮𑀸𑀢𑀻𑀢𑀺 𑀯𑀸𑀫𑀦𑁄, 𑀦𑁂𑀭𑀼𑀢𑁆𑀢𑁄. 𑀭𑀲𑁆𑀲𑁄 𑀘 𑀯𑀸𑀫𑀦𑁄 𑀘𑁂𑀢𑀺 𑀤𑁆𑀯𑀦𑁆𑀤𑁄. 𑀮𑀓𑀼𑀟𑀺 𑀯𑀸𑀫𑀦𑀢𑁆𑀣𑁂, 𑀅, 𑀲𑀓𑀢𑁆𑀣𑁂 𑀓𑁄, 𑀮𑀓𑀼 𑀯𑀺𑀬 𑀖𑀝𑀺𑀓𑀸 𑀯𑀺𑀬 𑀟𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀯𑀸 𑀮𑀓𑀼𑀡𑁆𑀟𑀓𑁄.

𑀧𑀜𑁆𑀘𑀓𑀁 𑀧𑀗𑁆𑀕𑀼𑀴𑀚𑀦𑁂. 𑀧𑀭𑁂𑀦 𑀅𑀗𑁆𑀕𑀢𑀻𑀢𑀺 𑀧𑀗𑁆𑀕𑀼𑀴𑁄, 𑀉𑀮𑁄. 𑀧𑀻𑀞𑁂𑀦 𑀲𑀧𑁆𑀧𑀢𑀺 𑀲𑀻𑀮𑁂𑀦𑀸𑀢𑀺 𑀧𑀻𑀞𑀲𑀧𑁆𑀧𑀻, 𑀲𑀧𑁆𑀧 𑀕𑀫𑀦𑁂, 𑀉𑀧𑀘𑁆𑀘𑀬𑁂 𑀧𑀗𑁆𑀕𑀼, 𑀤𑁆𑀯𑀻𑀲𑀼. 𑀙𑀺𑀦𑁆𑀦𑁄 𑀕𑀫𑀦𑀸𑀤𑀺𑀇𑀭𑀺𑀬𑀸𑀧𑀣𑁄 𑀬𑀲𑁆𑀲𑀸𑀢𑀺 𑀲𑁄 𑀙𑀺𑀦𑁆𑀦𑀺𑀭𑀺𑀬𑀸𑀧𑀣𑁄. 𑀯𑀺𑀕𑀢𑀸 𑀅𑀓𑁆𑀔𑀲𑀤𑀺𑀲𑀸 𑀚𑀗𑁆𑀖𑀸 𑀬𑀲𑁆𑀲𑀸𑀢𑀺 𑀧𑀓𑁆𑀔𑁄, 𑀬𑀣𑀸 𑀳𑀺 𑀭𑀣𑀲𑁆𑀲 𑀅𑀓𑁆𑀔𑁂 𑀪𑀺𑀦𑁆𑀦𑁂 𑀕𑀫𑀦𑀁 𑀦 𑀲𑀺𑀚𑁆𑀛𑀢𑀺, 𑀢𑀣𑁂𑀯 𑀢𑀲𑁆𑀲𑀸𑀧𑀺 𑀅𑀓𑁆𑀔𑀚𑀗𑁆𑀖𑀸𑀬 𑀪𑀺𑀦𑁆𑀦𑀸𑀬𑀸𑀢𑀺 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁.

𑀤𑁆𑀯𑀬𑀁 𑀔𑀜𑁆𑀚𑁂. 𑀔𑀚𑀺 𑀕𑀢𑀺𑀯𑁂𑀓𑀮𑁆𑀬𑁂, 𑀪𑀽𑀯𑀸𑀤𑀺, 𑀔𑀜𑁆𑀚𑀢𑀻𑀢𑀺, 𑀅. 𑀔𑁄𑀟𑀺 𑀕𑀢𑀺𑀧𑀝𑀺𑀖𑀸𑀢𑁂, 𑀓𑁄.

𑀤𑁆𑀯𑀬𑀁 ¶ 𑀅𑀯𑀸𑀓𑁆𑀬𑁂. 𑀯𑀢𑁆𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀫𑀺𑀕𑀲𑀤𑀺𑀲𑁄𑀢𑀺 𑀫𑀽𑀕𑁄, 𑀇𑀲𑁆𑀲𑀽. 𑀲𑀼𑀜𑁆𑀜𑀁 𑀯𑀘𑁄 𑀬𑀲𑁆𑀲𑀸𑀢𑀺 𑀲𑁄 𑀲𑀼𑀜𑁆𑀜𑀯𑀘𑁄.

𑀳𑀢𑁆𑀣𑀸𑀤𑀺𑀯𑀗𑁆𑀓𑁄 𑀧𑀼𑀭𑀺𑀲𑁄 ‘‘𑀓𑀼𑀡𑀻’’𑀢𑁆𑀬𑀼𑀘𑁆𑀘𑀢𑁂. 𑀓𑀼𑀡𑀦𑀁 𑀓𑀼𑀡𑁄 𑀳𑀢𑁆𑀣𑀸𑀤𑀺𑀯𑁂𑀓𑀮𑁆𑀬𑀁, 𑀢𑀫𑁂𑀢𑀲𑁆𑀲𑀢𑁆𑀣𑀻𑀢𑀺 𑀓𑀼𑀡𑀻, 𑀅𑀣 𑀯𑀸 𑀓𑀼𑀡 𑀲𑀗𑁆𑀓𑁄𑀘𑀦𑁂, 𑀈, 𑀓𑀼𑀘𑁆𑀙𑀺𑀢𑀁 𑀦𑀬𑀢𑀻𑀢𑀺 𑀯𑀸 𑀓𑀼𑀡𑀻, 𑀡𑀢𑁆𑀢𑀁, ‘‘𑀳𑀢𑁆𑀣𑁂𑀦 𑀓𑀼𑀡𑀻, 𑀧𑀸𑀤𑁂𑀦 𑀓𑀼𑀡𑀻’’𑀇𑀘𑁆𑀘𑀸𑀤𑀺𑀧𑀬𑁄𑀕𑀸. 𑀤𑁆𑀯𑀬𑀁 𑀅𑀧𑀸𑀗𑁆𑀕𑀤𑀲𑁆𑀲𑀦𑁂 𑀚𑀦𑁂. 𑀯𑀮 𑀲𑀁𑀯𑀭𑀡𑁂, 𑀇𑀭𑁄. 𑀓𑀼𑀘𑁆𑀙𑀺𑀢𑀁 𑀓𑀭𑁄𑀢𑀻𑀢𑀺 𑀓𑁂𑀓𑀭𑁄, 𑀉𑀲𑁆𑀲𑁂.

𑁩𑁨𑁧. 𑀤𑁆𑀯𑀬𑀁 𑀦𑀺𑀓𑁆𑀓𑁂𑀲𑀲𑀻𑀲𑁂. 𑀦𑀺𑀓𑁆𑀓𑁂𑀲𑀁 𑀲𑀻𑀲𑀫𑁂𑀢𑀲𑁆𑀲, 𑀔𑀮 𑀔𑀮𑀦𑁂, 𑀲𑀜𑁆𑀘𑀬𑁂 𑀘, 𑀆𑀝𑁄, 𑀦𑀺𑀓𑁆𑀓𑁂𑀲𑀢𑁆𑀢𑀸 𑀔𑀁 𑀢𑀼𑀘𑁆𑀙𑀁 𑀲𑀻𑀲𑀁 𑀮𑀸𑀢𑀻𑀢𑀺 𑀔𑀮𑁆𑀮𑀸𑀝𑁄, 𑀝𑁄.

𑀢𑀺𑀓𑀁 𑀔𑀼𑀭𑀫𑀼𑀡𑁆𑀟𑀲𑀻𑀲𑁂. 𑀫𑀼𑀡𑁆𑀟 𑀔𑀡𑁆𑀟𑀦𑁂, 𑀪𑀽𑀯𑀸𑀤𑀺, 𑀅. 𑀪𑀡𑁆𑀟 𑀧𑀭𑀺𑀪𑀸𑀲𑀦𑁂, 𑀉, 𑀲𑀓𑀢𑁆𑀣𑁂 𑀓𑁄, 𑀫𑀼𑀡𑁆𑀟𑀓𑁄, 𑀫𑀼𑀡𑁆𑀟𑀺𑀓𑁄𑀧𑁆𑀬𑀢𑁆𑀭.

𑀅𑀓𑁆𑀔𑀻𑀦𑀁 𑀫𑀚𑁆𑀛𑁂 𑀏𑀓𑁂𑀦𑀸𑀓𑁆𑀔𑀺𑀦𑀸 𑀲𑀼𑀜𑁆𑀜𑁄 𑀓𑀸𑀡𑁄 𑀦𑀸𑀫, 𑀓𑀡 𑀲𑀤𑁆𑀤𑀕𑀢𑀺𑀦𑀺𑀫𑀻𑀮𑀦𑁂𑀲𑀼, 𑀡𑁄, 𑀓𑀡𑀢𑀺 𑀦𑀺𑀫𑀻𑀮𑀢𑀻𑀢𑀺 𑀓𑀸𑀡𑁄, 𑀢𑀁 𑀧𑀦𑀲𑁆𑀲 𑀦𑀺𑀫𑀻𑀮𑀦𑀁 𑀏𑀓𑁂𑀦𑁂𑀯𑀓𑁆𑀔𑀺𑀦𑀸. 𑀅𑀝𑁆𑀞𑀓𑀣𑀸𑀤𑀻𑀲𑀼 𑀧𑀦 ‘‘𑀓𑀸𑀡𑁄𑀢𑀺 𑀏𑀓𑀘𑁆𑀙𑀺𑀓𑀸𑀡𑁄, 𑀉𑀪𑀬𑀘𑁆𑀙𑀺𑀓𑀸𑀡𑁄 𑀯𑀸’’𑀢𑀺 [𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁧𑁩𑁨] 𑀯𑀼𑀢𑁆𑀢𑀁. 𑀤𑁆𑀯𑀬𑁂𑀦 𑀅𑀓𑁆𑀔𑀺𑀤𑁆𑀯𑀬𑁂𑀦 𑀲𑀼𑀜𑁆𑀜𑁄 𑀅𑀦𑁆𑀥𑁄 𑀦𑀸𑀫, 𑀅𑀦𑁆𑀥 𑀤𑀲𑁆𑀲𑀦𑀽𑀧𑀲𑀁𑀳𑀸𑀭𑁂, 𑀅.

𑁩𑁨𑁨. 𑀤𑁆𑀯𑀬𑀁 ¶ 𑀦𑀝𑁆𑀞𑀲𑁄𑀢𑀧𑁆𑀧𑀲𑀸𑀤𑁂. 𑀩𑀦𑁆𑀥 𑀩𑀦𑁆𑀥𑀦𑁂, 𑀇𑀭𑁄. 𑀦𑀮𑁄𑀧𑁄. 𑀲𑀼𑀢𑀺 𑀓𑀡𑁆𑀡𑁄 𑀳𑀻𑀦𑁄 𑀯𑀺𑀓𑀮𑁄 𑀬𑀲𑁆𑀲𑀸𑀢𑀺 𑀲𑀼𑀢𑀺𑀳𑀻𑀦𑁄. 𑀏𑀴𑁄𑀧𑁆𑀬𑀢𑁆𑀭.

𑀢𑀺𑀓𑀁 𑀕𑀺𑀮𑀸𑀦𑀲𑀸𑀫𑀜𑁆𑀜𑁂. 𑀕𑀺𑀮 𑀳𑀸𑀲𑀓𑁆𑀔𑀬𑁂, 𑀬𑀼, 𑀩𑁆𑀬𑀸𑀥𑀺𑀭𑁄𑀕𑁄𑀲𑀜𑁆𑀚𑀸𑀢𑁄 𑀬𑀲𑁆𑀲 𑀩𑁆𑀬𑀸𑀥𑀺𑀢𑁄. 𑀅𑀢 𑀲𑀸𑀢𑀘𑁆𑀘𑀕𑀫𑀦𑁂, 𑀅𑀥𑀺𑀓𑀭𑀡𑁂, 𑀓𑀢𑁆𑀢𑀭𑀺 𑀯𑀸 𑀉𑀭𑁄, 𑀆𑀢𑀼𑀭𑁄, 𑀤𑀻𑀖𑀸𑀤𑀺. 𑀆𑀫𑀬𑀸𑀯𑀻, 𑀯𑀺𑀓𑀢𑁄, 𑀅𑀧𑀝𑀼, 𑀅𑀩𑁆𑀪𑀫𑀺𑀢𑁄, 𑀅𑀩𑁆𑀪𑀸𑀦𑁆𑀢𑁄𑀧𑁆𑀬𑀢𑁆𑀭.

𑀉𑀫𑁆𑀫𑀸𑀤𑁄 𑀯𑀸𑀢𑀸𑀤𑀺𑀧𑀓𑁄𑀧𑁄 𑀭𑁄𑀕𑀯𑀺𑀲𑁂𑀲𑁄, 𑀢𑀩𑁆𑀩𑀢𑀺 𑀉𑀫𑁆𑀫𑀢𑁆𑀢𑁄, 𑀫𑀤 𑀉𑀫𑁆𑀫𑀸𑀤𑁂, 𑀉𑀕𑁆𑀕𑀢𑁂𑀳𑀺 𑀯𑀸𑀢𑀸𑀤𑀺𑀤𑁄𑀲𑁂𑀳𑀺 𑀫𑀤𑀬𑀢𑀻𑀢𑀺 𑀉𑀫𑁆𑀫𑀸𑀤𑁄, 𑀡𑁄. 𑀔𑀼𑀚𑁆𑀚𑀸𑀤𑀬𑁄 𑀉𑀫𑁆𑀫𑀢𑁆𑀢𑀦𑁆𑀢𑀸 𑀯𑀸𑀘𑁆𑀘𑀮𑀺𑀗𑁆𑀕𑁂 𑀬𑀼𑀢𑁆𑀢𑀢𑀸𑀬 𑀯𑀸𑀘𑁆𑀘𑀮𑀺𑀗𑁆𑀕𑀺𑀓𑀸, 𑀬𑀣𑀸 𑁋 𑀔𑀼𑀚𑁆𑀚𑁄 𑀧𑀼𑀭𑀺𑀲𑁄, 𑀔𑀼𑀚𑁆𑀚𑀸 𑀇𑀢𑁆𑀣𑀻, 𑀔𑀼𑀚𑁆𑀚𑀁 𑀦𑀧𑀼𑀁𑀲𑀓𑀁. 𑀉𑀫𑁆𑀫𑀢𑁆𑀢𑁄 𑀧𑀼𑀭𑀺𑀲𑁄, 𑀉𑀫𑁆𑀫𑀢𑁆𑀢𑀸 𑀇𑀢𑁆𑀣𑀻, 𑀉𑀫𑁆𑀫𑀢𑁆𑀢𑀁 𑀦𑀧𑀼𑀁𑀲𑀓𑀁.

𑁩𑁨𑁩. 𑀦𑀯𑀓𑀁 𑀭𑁄𑀕𑀫𑀢𑁆𑀢𑁂. 𑀢𑀓𑀺 𑀓𑀺𑀘𑁆𑀙𑀚𑀻𑀯𑀦𑁂, 𑀪𑀽𑀯𑀸𑀤𑀺, 𑀆 𑀪𑀼𑀲𑁄 𑀢𑀗𑁆𑀓𑀢𑀻𑀢𑀺 𑀆𑀢𑀗𑁆𑀓𑁄, 𑀅. 𑀅𑀫 𑀭𑁄𑀕𑁂, 𑀬𑁄, 𑀫𑀬 𑀕𑀢𑀺𑀫𑁆𑀳𑀺 𑀯𑀸, 𑀅𑀣 𑀯𑀸 𑀅𑀫 𑀭𑁄𑀕𑁂, 𑀘𑀼𑀭𑀸𑀤𑀺, 𑀆𑀫𑀬𑀢𑀺 𑀭𑀼𑀚𑁆𑀚𑀢𑀻𑀢𑀺 𑀆𑀫𑀬𑁄, 𑀅, 𑀓𑀸𑀭𑀺𑀢𑀮𑁄𑀧𑀸𑀪𑀸𑀯𑁄. 𑀯𑀺𑀥 𑀯𑀺𑀚𑁆𑀛𑀦𑁂, 𑀯𑀺𑀚𑁆𑀛𑀢𑀻𑀢𑀺 𑀩𑁆𑀬𑀸𑀥𑀺, 𑀇, 𑀅𑀓𑀸𑀭𑀯𑀡𑁆𑀡𑀸𑀕𑀫𑁄, 𑀩𑀸𑀥 𑀯𑀺𑀩𑀸𑀥𑀸𑀬𑀁 𑀯𑀸, 𑀢𑀤𑀸 𑀬𑀸𑀕𑀫𑁄, 𑀯𑀺𑀯𑀺𑀥𑀸 𑀯𑀸 𑀆𑀥𑀬𑁄 𑀫𑀦𑁄𑀧𑀻𑀴𑀸 𑀬𑀲𑁆𑀫𑀺𑀁𑀲 ¶ 𑀩𑁆𑀬𑀸𑀥𑀺, ‘‘𑀧𑀼𑀫𑁂 𑀆𑀥𑀺 𑀫𑀸𑀦𑀲𑀻 𑀩𑁆𑀬𑀣𑀸’’𑀢𑀺 [𑀅𑀫𑀭 𑁮.𑁨𑁮] 𑀳𑀺 𑀅𑀫𑀭𑀓𑁄𑀲𑁂 𑀯𑀼𑀢𑁆𑀢𑀁. 𑀭𑁄𑀕𑁂𑀕𑀤𑁄, 𑀓𑀼𑀯𑁂𑀭𑀸𑀬𑀼𑀥𑁂 𑀕𑀤𑀸, 𑀕𑀤𑁄 𑀪𑀸𑀣𑀭𑀺𑀓𑀡𑁆𑀳𑀲𑁆𑀲, ‘‘𑀆𑀫𑀬𑁂 𑀘𑀸𑀬𑀼𑀥𑁂 𑀕𑀤𑀸’’𑀢𑀺 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂. 𑀭𑀼𑀚 𑀭𑁄𑀕𑁂, 𑀓𑀢𑁆𑀢𑀭𑀺 𑀡𑁄, 𑀭𑀼𑀚𑀸 𑀇𑀢𑁆𑀣𑀻. 𑀕𑀺𑀮𑀸𑀦𑀲𑁆𑀲 𑀪𑀸𑀯𑁄 𑀕𑁂𑀮𑀜𑁆𑀜𑀁. 𑀓𑀮 𑀕𑀢𑀺𑀲𑀗𑁆𑀔𑁆𑀬𑀸𑀦𑁂𑀲𑀼, 𑀦 𑀓𑀮𑀢𑀺 𑀬𑁂𑀦 𑀢𑀁 𑀅𑀓𑀮𑀁, 𑀢𑀫𑁂𑀯 𑀅𑀓𑀮𑁆𑀮𑀁, 𑀮𑁄. 𑀩𑀸𑀥 𑀯𑀺𑀩𑀸𑀥𑀸𑀬𑀁, 𑀪𑀽𑀯𑀸𑀤𑀺, 𑀅. 𑀉𑀧𑀢𑀸𑀧𑁄𑀧𑁆𑀬𑀢𑁆𑀭.

𑀤𑁆𑀯𑀬𑀁 𑀔𑀬𑀭𑁄𑀕𑁂, 𑀭𑀲𑀸𑀤𑀺𑀲𑀢𑁆𑀢𑀥𑀸𑀢𑀼𑀬𑁄 𑀲𑁄𑀲𑀬𑀢𑀻𑀢𑀺 𑀲𑁄𑀲𑁄, 𑀲𑀼𑀲 𑀲𑁄𑀲𑀦𑁂, 𑀤𑀺𑀯𑀸𑀤𑀺, 𑀡𑁄. 𑀔𑀺 𑀔𑀬𑁂, 𑀔𑀬𑀢𑀻𑀢𑀺, 𑀅. 𑀬𑀓𑁆𑀔𑀸, 𑀭𑀸𑀚𑀬𑀓𑁆𑀔𑀸𑀧𑁆𑀬𑀢𑁆𑀭. 𑀬𑀓𑁆𑀔 𑀧𑀽𑀚𑀸𑀬𑀁, 𑀘𑀼𑀭𑀸𑀤𑀺.

𑁩𑁨𑁪. 𑀤𑁆𑀯𑀬𑀁 𑀦𑀸𑀲𑀭𑁄𑀕𑁂. 𑀅𑀧𑀺𑀳𑀺𑀢𑀸 𑀦𑀸𑀲𑀸 𑀅𑀦𑁂𑀦𑀸𑀢𑀺 𑀧𑀻𑀦𑀸𑀲𑁄, 𑀧𑀻𑀦𑀲𑁄𑀧𑀺. 𑀉𑀧𑀲𑀕𑁆𑀕𑀢𑁄 𑀦𑀸𑀲𑀸𑀬 𑀩𑀳𑀼𑀩𑁆𑀩𑀻𑀳𑀺𑀫𑁆𑀳𑀺 𑀦𑀲𑀸𑀤𑁂𑀲𑀁 𑀓𑀼𑀩𑁆𑀩𑀦𑁆𑀢𑀺 [𑀧𑀸𑀡𑀺𑀦𑀺 𑁫.𑁪.𑁧𑁧𑁯], 𑀅𑀧𑀺𑀲𑁆𑀲𑀸𑀓𑀸𑀭𑀮𑁄𑀧𑁄 𑀯𑀡𑁆𑀡𑀦𑀸𑀲𑁄, 𑀭𑀲𑁆𑀲𑀲𑁆𑀲 𑀤𑀻𑀖𑀢𑀸. ‘‘𑀲𑁄𑀲𑁄 𑀬𑀓𑁆𑀔𑀸 𑀭𑀸𑀚𑀬𑀓𑁆𑀔𑀸, 𑀧𑀢𑀻𑀲𑁆𑀲𑀸𑀬𑁄 𑀢𑀼 𑀧𑀻𑀦𑀲𑁄, 𑀆𑀧𑀻𑀦𑀲𑁄 𑀧𑀢𑀺𑀲𑁆𑀲𑀸𑀬𑁄’’𑀢𑀺 𑀭𑀪𑀲𑁄. 𑀧𑀢𑀺𑀲𑁆𑀲𑀬𑁄𑀧𑁆𑀬𑀢𑁆𑀭. 𑀯𑁂𑀚𑁆𑀚𑀕𑀦𑁆𑀣𑁂 𑀇𑀫𑁂𑀲𑀁 𑀧𑀻𑀦𑀲𑀧𑀢𑀺𑀲𑁆𑀲𑀸𑀬𑀸𑀦𑀁 𑀪𑁂𑀤𑁄 𑀅𑀪𑀺𑀳𑀺𑀢𑁄 𑁋

𑀆𑀦𑀳𑁆𑀬𑀢𑁂 𑀬𑀲𑁆𑀲 𑀯𑀺𑀲𑀼𑀲𑁆𑀲𑀢𑁂 𑀘,

𑀓𑀺𑀮𑀺𑀤𑁆𑀬𑀢𑁂 𑀥𑀽𑀧𑀢𑀺 𑀘𑁂𑀯 𑀦𑀸𑀲𑀸;

𑀦 𑀜𑀸𑀬𑀢𑁂 𑀕𑀦𑁆𑀥𑀭𑀲𑁂 𑀘 𑀚𑀦𑁆𑀢𑀼,

𑀤𑀼𑀝𑁆𑀞𑀁 𑀯𑀺𑀚𑀜𑁆𑀜𑀸 𑀢𑀫𑀧𑀻𑀦𑀲𑁂𑀦𑀸𑀢𑀺.

𑀆𑀦𑀤𑁆𑀥𑀸 ¶ 𑀧𑀺𑀳𑀺𑀢𑀸 𑀦𑀸𑀲𑀸,

𑀢𑀦𑀼𑀲𑀸𑀯𑀧𑁆𑀧𑀲𑁂𑀓𑀺𑀦𑀻;

𑀕𑀮𑀢𑀸𑀮𑁄𑀝𑁆𑀞𑀲𑁄𑀲𑁄 𑀘,

𑀦𑀺𑀢𑁆𑀢𑁄𑀤𑁄 𑀲𑀗𑁆𑀔𑀓𑀤𑁆𑀯𑀬𑁂;

𑀪𑀯𑁂 𑀲𑀭𑁄 𑀧𑀖𑀸𑀢𑁄 𑀘,

𑀧𑀢𑀺𑀲𑁆𑀲𑀸𑀬𑁄𑀢𑀺 𑀮𑀓𑁆𑀔𑀺𑀢𑁄𑀢𑀺.

𑀇𑀳 𑀢𑁆𑀯𑀪𑁂𑀤𑁂𑀦𑁄𑀢𑁆𑀢𑀁. 𑀧𑀢𑀺𑀧𑀼𑀩𑁆𑀩𑁄 𑀲𑀺𑀥𑀸𑀢𑀼 𑀭𑀼𑀚𑀢𑁆𑀬𑀢𑁆𑀣𑁄. 𑀦𑀸𑀲𑀺𑀓𑀸𑀬 𑀚𑀸𑀢𑁄 𑀭𑁄𑀕𑁄 𑀦𑀸𑀲𑀺𑀓𑀸𑀭𑁄𑀕𑁄.

𑀖𑀸𑀦𑁂 𑀧𑀯𑀢𑁆𑀢𑁄 𑀅𑀲𑁆𑀲𑀯𑁄 𑀲𑀺𑀗𑁆𑀖𑀸𑀦𑀺𑀓𑀸 𑀦𑀸𑀫, 𑀲𑀺𑀗𑁆𑀖 𑀆𑀖𑀸𑀦𑁂, 𑀪𑀽𑀯𑀸𑀤𑀺, 𑀲𑀺𑀗𑁆𑀖𑀢𑀻𑀢𑀺 𑀲𑀺𑀗𑁆𑀖𑀸𑀦𑀁, 𑀬𑀼, 𑀢𑀢𑁆𑀣 𑀚𑀸𑀢𑀸 𑀲𑀺𑀗𑁆𑀖𑀸𑀦𑀺𑀓𑀸. 𑀆 𑀧𑀼𑀦𑀧𑁆𑀧𑀼𑀦𑀁 𑀲𑀯𑀢𑀺 𑀲𑀦𑁆𑀤𑀢𑀻𑀢𑀺 𑀅𑀲𑁆𑀲𑀯𑁄, 𑀲𑀽 𑀅𑀪𑀺𑀲𑀯𑁂. 𑀤𑁆𑀯𑀬𑀁 𑀯𑀡𑀫𑀢𑁆𑀢𑁂. 𑀅𑀭 𑀕𑀫𑀦𑁂, 𑀉, 𑀅𑀭𑀼, 𑀦𑀧𑀼𑀁𑀲𑀓𑁂𑀬𑁂𑀯. 𑀯𑀡 𑀕𑀢𑁆𑀢𑀯𑀺𑀘𑀼𑀡𑁆𑀡𑀦𑁂, 𑀘𑀼𑀭𑀸𑀤𑀺, 𑀅, 𑀯𑀡𑁄, 𑀅𑀦𑀺𑀢𑁆𑀣𑀻. 𑀤𑁆𑀯𑀬𑀁 𑀨𑁄𑀝𑁂. 𑀨𑀼𑀝 𑀲𑀁𑀲𑀺𑀮𑁂𑀲𑀦𑁂, 𑀪𑀽𑀯𑀸𑀤𑀺, 𑀨𑁄𑀝𑁄, 𑀡𑁄. 𑀧𑀻𑀴 𑀯𑀺𑀩𑀸𑀥𑀸𑀬𑀁, 𑀘𑀼𑀭𑀸𑀤𑀺, 𑀡𑁆𑀯𑀼, ‘‘𑀇𑀢𑁆𑀣𑀺𑀬𑀫𑀢𑁄 𑀆𑀧𑀘𑁆𑀘𑀬𑁄’’𑀢𑀺 𑀆, 𑀧𑀻𑀴𑀓𑁄, 𑀧𑀻𑀴𑀓𑀸, 𑀧𑀻𑀴𑀓𑀁, 𑀢𑀻𑀲𑁆𑀯𑀧𑀺, 𑀢𑀣𑀸 𑀨𑁄𑀝𑁄.

𑁩𑁨𑁫. 𑀤𑁆𑀯𑀬𑀁 𑀧𑀓𑁆𑀓𑀯𑀡𑀸𑀤𑀻𑀲𑀼 𑀲𑀜𑁆𑀚𑀸𑀢𑀤𑀼𑀕𑁆𑀕𑀦𑁆𑀥𑀯𑀺𑀲𑁂𑀲𑁂. 𑀧𑀼𑀩𑁆𑀩 𑀧𑀽𑀭𑀡𑁂, 𑀪𑀽𑀯𑀸𑀤𑀺, 𑀅. 𑀧𑀽𑀬 𑀯𑀺𑀲𑀭𑀡𑁂, 𑀤𑀼𑀕𑁆𑀕𑀦𑁆𑀥𑁂 𑀘, 𑀪𑀽𑀯𑀸𑀤𑀺.

𑀤𑁆𑀯𑀬𑀁 𑀮𑁄𑀳𑀺𑀢𑀦𑀺𑀲𑁆𑀲𑀭𑀡𑀭𑁄𑀕𑁂. 𑀭𑀢𑁆𑀢𑀲𑁆𑀲 𑀮𑁄𑀳𑀺𑀢𑀲𑁆𑀲 𑀲𑀡𑁆𑀞𑀸𑀦𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀭𑀡𑀁 𑀕𑀫𑀦𑀁 𑀭𑀢𑁆𑀢𑀸𑀢𑀺𑀲𑀸𑀭𑁄. 𑀧𑀓𑁆𑀔𑀦𑁆𑀤𑀢𑀺 𑀦𑀺𑀲𑁆𑀲𑀭𑀢𑀻𑀢𑀺 𑀧𑀓𑁆𑀔𑀦𑁆𑀤𑀺𑀓𑀸. 𑀓𑀫𑀼 𑀧𑀤𑀯𑀺𑀓𑁆𑀔𑁂𑀧𑁂. ‘‘𑀇𑀢𑁆𑀣𑀺𑀬𑀫𑀢𑀺𑀬𑀯𑁄 𑀯𑀸’’𑀢𑀺𑀢𑀺. ‘‘𑀧𑀓𑁆𑀓𑀫𑀸𑀤𑀻𑀳𑀺𑀦𑁆𑀢𑁄 𑀘𑁂’’𑀢𑀺 𑀏𑀢𑁆𑀣 𑀘𑀓𑀸𑀭𑁂𑀦 𑀢𑀺𑀲𑁆𑀲𑀦𑁆𑀢𑀺, 𑀥𑀸𑀢𑁆𑀯𑀦𑁆𑀢𑀮𑁄𑀧𑁄 𑀘, 𑀲𑀓𑀢𑁆𑀣𑁂 𑀓𑁄. 𑀤𑁆𑀯𑀺𑀢𑁆𑀢𑁂. 𑀬𑀤𑀸𑀤𑀺𑀦𑀸 𑀧𑀭𑀓𑀓𑀸𑀭𑀲𑁆𑀲 𑀔𑁄, 𑀧𑀓𑁆𑀔𑀦𑁆𑀤𑀺𑀓𑀸.

𑀤𑁆𑀯𑀬𑀁 ¶ 𑀅𑀧𑀫𑀸𑀭𑁂. 𑀲𑀭𑀡𑀁 𑀲𑀸𑀭𑁄, 𑀅𑀧𑀕𑀢𑁄 𑀲𑀸𑀭𑁄 𑀬𑁂𑀦 𑀅𑀧𑀫𑀸𑀭𑁄, 𑀲𑀲𑁆𑀲 𑀫𑁄. 𑀇𑀢𑀭𑀢𑁆𑀭 𑀫𑀓𑀸𑀭𑀸𑀕𑀫𑁄. 𑀤𑁆𑀯𑀬𑀁 𑀧𑀸𑀤𑀪𑁂𑀤𑁂. 𑀧𑀸𑀤𑀲𑁆𑀲 𑀨𑁄𑀝𑁄 𑀪𑁂𑀤𑀦𑀁 𑀤𑀭𑀡𑀁 𑀧𑀸𑀤𑀨𑁄𑀝𑁄, 𑀨𑀼𑀝 𑀪𑁂𑀤𑁂. 𑀯𑀺𑀭𑀽𑀧𑁄 𑀧𑀸𑀤𑁄 𑀏𑀢𑀸𑀬 𑀳𑁂𑀢𑀼𑀪𑀽𑀢𑀸𑀬𑀸𑀢𑀺 𑀯𑀺𑀧𑀸𑀤𑀺𑀓𑀸. 𑀲𑀫𑀸𑀲𑀦𑁆𑀢𑁂 𑀓𑁄, 𑀧𑀼𑀩𑁆𑀩𑀸𑀓𑀸𑀭𑀲𑁆𑀲𑀺𑀢𑁆𑀢𑀁, 𑀯𑀺𑀤𑀸𑀭𑀻𑀬𑀫𑀸𑀦𑀢𑁆𑀢𑀸 𑀯𑀺𑀧𑀚𑁆𑀚𑀫𑀸𑀦𑁄 𑀧𑀸𑀤𑁄 𑀅𑀲𑁆𑀲𑀦𑁆𑀢𑀺 𑀯𑀸 𑀯𑀺𑀧𑀸𑀤𑀺𑀓𑀸.

𑁩𑁨𑁬. 𑀤𑁆𑀯𑀬𑀁 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀡𑁆𑀟𑀓𑁄𑀲𑀭𑁄𑀕𑁂. 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁄 𑀭𑁄𑀕𑁄 𑀯𑀼𑀟𑁆𑀠𑀺𑀭𑁄𑀕𑁄. 𑀯𑀸𑀢𑀧𑀽𑀭𑀺𑀢𑀁 𑀅𑀡𑁆𑀟𑀁 𑀓𑁄𑀲𑁄 𑀯𑀸𑀢𑀡𑁆𑀟𑀁. 𑀤𑁆𑀯𑀬𑀁 𑀣𑀽𑀮𑀧𑀸𑀤𑀭𑁄𑀕𑁂. 𑀖𑀦𑀸𑀪𑀸𑀯𑀢𑁄 𑀲𑀺𑀣𑀺𑀮𑀁 𑀧𑀤𑀁 𑀲𑀻𑀧𑀤𑀁, 𑀯𑀡𑁆𑀡𑀦𑀸𑀲𑁄, 𑀤𑀻𑀖𑀸𑀤𑀺. 𑀪𑀸𑀭𑁄 𑀧𑀸𑀤𑁄 𑀬𑀲𑁆𑀲, 𑀢𑀲𑁆𑀲 𑀪𑀸𑀯𑁄 𑀪𑀸𑀭𑀧𑀸𑀤𑀢𑀸.

𑀧𑀜𑁆𑀘𑀓𑀁 𑀓𑀡𑁆𑀟𑀼𑀬𑀁. 𑀓𑀡𑁆𑀟 𑀪𑁂𑀤𑀦𑁂, 𑀉, 𑀤𑀻𑀖𑁂 𑀓𑀡𑁆𑀟𑀽, 𑀯𑀥𑀽𑀲𑀤𑁆𑀤𑁄𑀯. 𑀢𑀺𑀫𑁆𑀳𑀺 𑀓𑀡𑁆𑀟𑀽𑀢𑀺, 𑀅𑀲𑁆𑀲𑀽, 𑀘𑀼𑀭𑀸𑀤𑀺𑀢𑁆𑀢𑀸 𑀬𑀫𑁆𑀳𑀺 𑀓𑀡𑁆𑀟𑀽𑀬𑀸, 𑀬𑀮𑁄𑀧𑀸𑀪𑀸𑀯𑁄. 𑀔𑀚𑁆𑀚 𑀣𑁂𑀬𑁆𑀬𑀓𑀭𑀡𑀩𑁆𑀬𑀣𑀦𑁂𑀲𑀼, 𑀪𑀽𑀯𑀸𑀤𑀺, 𑀉. 𑀬𑀼𑀫𑁆𑀳𑀺 𑀓𑀡𑁆𑀟𑀽𑀯𑀦𑀁, 𑀅𑀲𑁆𑀲𑀽. 𑀉𑀯𑀸𑀤𑁂𑀲𑁄, 𑀤𑀻𑀖𑁄 𑀘.

𑁩𑁨𑁭. 𑀢𑀺𑀓𑀁 𑀓𑀘𑁆𑀙𑀼𑀬𑀁. 𑀬𑀸 ‘‘𑀔𑀲𑀼𑀭𑁄𑀕𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀸𑀢𑁆𑀬𑀢𑁆𑀢𑀸𑀦𑀦𑁆𑀢𑀺 𑀧𑀸𑀫𑀁, 𑀫𑀦, 𑀧𑀸𑀫𑀸𑀧𑁆𑀬𑀢𑁆𑀣𑀺, 𑀧𑀼𑀮𑁆𑀮𑀺𑀗𑁆𑀕𑁄, 𑀭𑀸𑀚𑀸𑀤𑀺, 𑀯𑀺𑀲𑁂𑀲𑁂𑀦 𑀢𑀘𑁆𑀙𑀢𑀺 𑀓𑀸𑀲𑀦𑁆𑀢𑀺 𑀯𑀺𑀢𑀘𑁆𑀙𑀺𑀓𑀸, 𑀢𑀘𑁆𑀙 𑀢𑀦𑀼𑀓𑀭𑀡𑁂, 𑀡𑁆𑀯𑀼 ¶ , ‘‘𑀯𑀺𑀯𑀘𑁆𑀙𑀺𑀓𑀸’’ [𑀯𑀺𑀘𑁆𑀘𑀘𑁆𑀘𑀺𑀓𑀸 (𑀅𑀫𑀭 𑁧𑁬.𑁫𑁩)] 𑀢𑀺𑀧𑀺 𑀧𑀸𑀞𑁄. 𑀯𑀘𑁆𑀙 𑀧𑀭𑀺𑀪𑀸𑀲𑀦𑀢𑀚𑁆𑀚𑀦𑁂𑀲𑀼, 𑀪𑀽𑀯𑀸𑀤𑀺. 𑀓𑀘 𑀩𑀦𑁆𑀥𑀦𑁂, 𑀉, 𑀘𑀲𑁆𑀲 𑀙𑀢𑁆𑀢𑀁, 𑀤𑁆𑀯𑀺𑀢𑁆𑀢𑀸𑀤𑀺. 𑀢𑀺𑀮𑀓𑀸𑀴𑀓𑀦𑁆𑀢𑀁 𑀤𑁆𑀯𑀬𑀁 𑀤𑁆𑀯𑀬𑀁 𑀲𑀫𑀢𑁆𑀣𑀁. 𑀢𑀢𑁆𑀭 𑀤𑁆𑀯𑀬𑀁 𑀲𑁄𑀣𑁂. 𑀲𑀼 𑀕𑀢𑀺𑀯𑀼𑀟𑁆𑀠𑀻𑀲𑀼, 𑀪𑀽𑀯𑀸𑀤𑀺, 𑀣𑁄. 𑀣𑀼𑀧𑀘𑁆𑀘𑀬𑁂 𑀲𑀬𑀣𑀼, 𑀉𑀲𑁆𑀲𑀢𑁆𑀢𑀁, 𑀬𑀸𑀕𑀫𑁄 𑀘. 𑀲𑁄𑀨𑁄𑀧𑁆𑀬𑀢𑁆𑀭. 𑀲𑁄𑀓𑀁 𑀨𑀸𑀬𑀢𑀺 𑀩𑀳𑀼𑀮𑀁 𑀓𑀭𑁄𑀢𑀻𑀢𑀺 𑀲𑁄𑀨𑁄, 𑀨𑀸𑀬 𑀯𑀼𑀟𑁆𑀠𑀺𑀬𑀁, 𑀨𑀸𑀬𑀲𑁆𑀲 𑀨𑁄, 𑀦𑁂𑀭𑀼𑀢𑁆𑀢𑁄.

𑀤𑁆𑀯𑀬𑀁 𑀅𑀭𑀺𑀲𑀭𑁄𑀕𑁂. 𑀅𑀫𑀗𑁆𑀕𑀮𑀢𑀸𑀬 𑀤𑀼 𑀦𑀺𑀦𑁆𑀤𑀺𑀢𑀁 𑀦𑀸𑀫𑀫𑀲𑁆𑀲 𑀤𑀼𑀦𑁆𑀦𑀸𑀫𑀁, 𑀲𑀓𑀢𑁆𑀣𑁂, 𑀓𑀼𑀘𑁆𑀙𑀸𑀬𑀁 𑀯𑀸 𑀓𑁄, 𑀤𑀻𑀖𑀓𑁄𑀲𑀺𑀓𑀸𑀬𑀁 𑀤𑀼𑀦𑁆𑀦𑀸𑀫𑀸, 𑀇𑀢𑁆𑀣𑀻. 𑀅𑀭𑀺 𑀯𑀺𑀬 𑀲𑀲𑀢𑀺 𑀳𑀺𑀁 𑀲𑀢𑀻𑀢𑀺 𑀅𑀭𑀺𑀲𑀁, 𑀲𑀲 𑀳𑀺𑀁𑀲𑀸𑀬𑀁, 𑀓𑁆𑀯𑀺, 𑀅𑀭 𑀕𑀫𑀦𑁂 𑀯𑀸, 𑀇𑀲𑁄. 𑀤𑁆𑀯𑀬𑀁 𑀯𑀫𑀦𑀭𑁄𑀕𑁂. 𑀙𑀤𑁆𑀤 𑀯𑀫𑀦𑁂, 𑀘𑀼𑀭𑀸𑀤𑀺, 𑀡𑁆𑀯𑀼. 𑀯𑀫𑀼 𑀉𑀕𑁆𑀕𑀺𑀭𑀡𑁂, 𑀣𑀼. 𑀯𑀫𑀺𑀥𑀼𑀧𑁆𑀬𑀢𑁆𑀭. 𑀙𑀤𑁆𑀤𑀺𑀓𑀸, 𑀯𑀫𑀺 𑀇𑀢𑁆𑀣𑀺𑀬𑀁, 𑀯𑀫𑀣𑀼 𑀧𑀼𑀫𑁂.

𑁩𑁨𑁮-𑁩𑁨𑁯. 𑀤𑁆𑀯𑀬𑀁 𑀧𑀭𑀺𑀢𑀸𑀧𑁂. 𑀤𑀼 𑀧𑀭𑀺𑀢𑀸𑀧𑁂, 𑀢𑀦𑀸𑀤𑀺, 𑀣𑀼. 𑀧𑀭𑀺𑀢𑀧𑀦𑀁 𑀲𑀦𑁆𑀢𑀸𑀧𑀦𑀁 𑀧𑀭𑀺𑀢𑀸𑀧𑁄. 𑀤𑁆𑀯𑀬𑀁 𑀢𑀺𑀮𑀓𑀸𑀴𑀓𑁂. 𑀢𑀺𑀮𑀲𑀡𑁆𑀞𑀸𑀦𑀁 𑀯𑀺𑀬 𑀚𑀸𑀬𑀢𑀻𑀢𑀺 𑀢𑀺𑀮𑀓𑁄. 𑀢𑀺𑀮𑀁 𑀯𑀺𑀬 𑀓𑀸𑀴𑁄 𑀳𑀼𑀢𑁆𑀯𑀸 𑀚𑀸𑀬𑀢𑀻𑀢𑀺 𑀢𑀺𑀮𑀓𑀸𑀴𑀓𑁄.

𑀫𑀳𑀸𑀯𑀺𑀭𑁂𑀓𑁄 ‘‘𑀯𑀺𑀲𑀽𑀘𑀺𑀓𑀸’’𑀢𑁆𑀬𑀼𑀘𑁆𑀘𑀢𑁂. 𑀦𑀺𑀲𑁆𑀲𑁂𑀲𑀢𑁄 𑀲𑀼𑀘𑀢𑀺 𑀕𑀘𑁆𑀙𑀢𑀻𑀢𑀺 𑀲𑀽𑀘𑀺𑀓𑀸. 𑀲𑀼𑀘𑀺, 𑀲𑀼𑀘 𑀕𑀢𑀺𑀬𑀁, 𑀪𑀽𑀯𑀸𑀤𑀺. 𑀲𑀼𑀘 𑀲𑁄𑀘𑁂𑀬𑁆𑀬𑁂 ¶ 𑀯𑀸, 𑀦𑀺𑀲𑁆𑀲𑁂𑀲𑀢𑁄 𑀲𑁄𑀘𑁂𑀢𑀻𑀢𑀺 𑀯𑀺𑀲𑀽𑀘𑀺𑀓𑀸, 𑀯𑀺𑀲𑁂𑀲𑁂𑀦 𑀲𑀽𑀘𑀺 𑀯𑀺𑀬 𑀯𑀺𑀚𑁆𑀛𑀢𑀻𑀢𑀺 𑀯𑀸 𑀯𑀺𑀲𑀽𑀘𑀺𑀓𑀸. 𑀩𑀳𑀼𑀫𑁄𑀲𑀭𑀡𑀢𑁆𑀢𑀸 𑀫𑀳𑀦𑁆𑀢𑁄 𑀯𑀺𑀭𑁂𑀓𑁄 𑀫𑀳𑀸𑀯𑀺𑀭𑁂𑀓𑁄, 𑀭𑀺𑀘 𑀯𑀺𑀬𑁄𑀚𑀦𑀲𑀫𑁆𑀧𑀼𑀘𑁆𑀙𑀦𑁂𑀲𑀼, 𑀡𑁄.

𑀪𑀕𑀦𑁆𑀤𑀮𑀸𑀤𑀬𑁄 𑀲𑀢𑁆𑀢 𑀆𑀫𑀬𑀦𑁆𑀢𑀭𑀸 𑀭𑁄𑀕𑀪𑁂𑀤𑀸 𑀪𑀯𑀦𑁆𑀢𑀺. 𑀢𑀢𑁆𑀭 𑀕𑀼𑀤𑀲𑀫𑀻𑀧𑀚𑁄 𑀯𑀡𑀯𑀺𑀲𑁂𑀲𑁄 𑀪𑀕𑀦𑁆𑀤𑀮𑀸, 𑀇𑀢𑁆𑀣𑀻. 𑀪𑀕𑀁 𑀬𑁄𑀦𑀺, 𑀢𑀁 𑀤𑀸𑀭𑀬𑀢𑀻𑀢𑀺 𑀭𑀽𑀴𑁆𑀳𑀻𑀢𑁄 𑀅𑀧𑀘𑁆𑀘𑀬𑀦𑁆𑀢𑁄 𑀦𑀺𑀧𑀸𑀢𑀺𑀢𑁄. 𑀤𑀭 𑀯𑀺𑀤𑀸𑀭𑀡𑁂, 𑀪𑀽𑀯𑀸𑀤𑀺, 𑀮𑀢𑁆𑀢𑁂 𑀪𑀕𑀦𑁆𑀤𑀮𑀸. 𑀪𑀕𑀦𑁆𑀤𑀭𑁄𑀧𑁆𑀬𑀢𑁆𑀭. 𑀫𑁂𑀳𑁄 𑀫𑀼𑀢𑁆𑀢𑀫𑁂𑀳𑁄, 𑀲𑁄 𑀘 𑀩𑀳𑀼𑀫𑀼𑀢𑁆𑀢𑀢𑀸𑀬 𑀫𑀥𑀼𑀫𑁂𑀳𑁄, 𑀭𑀢𑁆𑀢𑀫𑁂𑀳𑁄, 𑀲𑀼𑀓𑁆𑀓𑀫𑁂𑀳𑁄𑀢𑁆𑀬𑀦𑁂𑀓𑀯𑀺𑀥𑁄. 𑀫𑀺𑀳 𑀲𑁂𑀘𑀦𑁂, 𑀪𑀽𑀯𑀸𑀤𑀺, 𑀫𑀺𑀳𑀢𑀺 𑀫𑀼𑀢𑁆𑀢𑀦𑁆𑀢𑀺 𑀫𑁂𑀳𑁄, 𑀡𑁄. 𑀚𑀭 𑀭𑁄𑀕𑁂. 𑀪𑀽𑀯𑀸𑀤𑀺, 𑀚𑀭𑀢𑀻𑀢𑀺, 𑀅. 𑀚𑀭𑁄 𑀧𑀲𑀺𑀤𑁆𑀥𑁄. 𑀓𑀸𑀲 𑀲𑀤𑁆𑀤𑀓𑀼𑀘𑁆𑀙𑀸𑀬𑀁, 𑀤𑀺𑀢𑁆𑀢𑀺𑀬𑀜𑁆𑀘, 𑀪𑀽𑀯𑀸𑀤𑀺, 𑀓𑀸𑀲𑀢𑀻𑀢𑀺 𑀓𑀸𑀲𑁄, 𑀡𑁄, 𑀓𑀼𑀘𑁆𑀙𑀺𑀢𑀁 𑀅𑀲𑀢𑀻𑀢𑀺 𑀯𑀸 𑀓𑀸𑀲𑁄, 𑀓𑀼𑀆𑀧𑀼𑀩𑁆𑀩𑁄. 𑀲𑀲 𑀧𑀸𑀡𑀦𑁂, 𑀲𑀲𑀦𑀁 𑀲𑀸𑀲𑁄, 𑀪𑀼𑀲𑀁 𑀲𑀲𑀦𑀫𑁂𑀢𑀲𑁆𑀲𑀢𑁆𑀣𑀻𑀢𑀺 𑀯𑀸 𑀲𑀸𑀲𑁄, 𑀓𑀼𑀝 𑀙𑁂𑀤𑀦𑁂, 𑀞𑁄, 𑀓𑀼𑀝𑁆𑀞𑀁. 𑀲𑀸𑀫𑀜𑁆𑀜𑁂𑀦 𑀢𑀘𑁄𑀯𑀺𑀓𑀸𑀭𑁂. 𑀲𑀼𑀓𑁆𑀓𑁂 𑀢𑀼 𑀲𑀺𑀢𑁆𑀢𑀁. 𑀲𑀽𑀮 𑀭𑀼𑀚𑀸𑀬𑀁, 𑀪𑀽𑀯𑀸𑀤𑀺, 𑀲𑀽𑀮𑀁. 𑀯𑀺𑀤𑁆𑀤𑀥𑀺, 𑀅𑀲𑁆𑀫𑀭𑀻, 𑀫𑀼𑀢𑁆𑀢𑀓𑀺𑀘𑁆𑀙𑀸𑀤𑀬𑁄𑀧𑁆𑀬𑀦𑁂𑀓𑀸 𑀭𑁄𑀕𑀪𑁂𑀤𑀸.

𑀧𑀚𑁆𑀚𑀤𑁆𑀥𑀁 𑀯𑁂𑀚𑁆𑀚𑁂. 𑀆𑀬𑀼𑀩𑁆𑀩𑁂𑀤𑀲𑀗𑁆𑀔𑀸𑀢𑀁 𑀯𑀺𑀚𑁆𑀚𑀁 𑀚𑀸𑀦𑀸𑀢𑀻𑀢𑀺 𑀯𑁂𑀚𑁆𑀚𑁄, ‘‘𑀡 𑀭𑀸𑀕𑀸 𑀢𑀲𑁆𑀲𑁂𑀤𑀫𑀜𑁆𑀜𑀢𑁆𑀣𑁂𑀲𑀼 𑀘𑀸’’𑀢𑀺 𑀡𑁄, 𑀯𑀺𑀤 𑀜𑀸𑀡𑁂 𑀯𑀸, 𑀯𑀺𑀦𑁆𑀤𑀢𑀻𑀢𑀺 𑀯𑁂𑀚𑁆𑀚𑁄, 𑀡𑁆𑀬𑁄, 𑀤𑁆𑀬𑀲𑁆𑀲 𑀚𑁄. 𑀪𑀺𑀲𑀚𑁆𑀚𑀢𑀺 𑀘𑀺𑀓𑀺𑀘𑁆𑀙𑀢𑀻𑀢𑀺 𑀪𑀺𑀲𑀓𑁆𑀓𑁄, 𑀅, 𑀚𑀲𑁆𑀲 𑀓𑁄. 𑀭𑁄𑀕𑀁 𑀳𑀭𑀢𑀺 𑀲𑀻𑀮𑁂𑀦𑀸𑀢𑀺 𑀭𑁄𑀕𑀳𑀸𑀭𑀻, 𑀡𑀻. 𑀳𑀭𑀲𑀤𑁆𑀤𑁄𑀬𑀁 𑀓𑁂𑀯𑀮𑁄𑀧𑀺 𑀆𑀦𑀬𑀦𑀸𑀧𑀦𑀬𑀦𑁂𑀲𑀼 𑀯𑀢𑁆𑀢𑀢𑀺 ‘‘𑀫𑀦𑁄𑀳𑀭𑁄, 𑀤𑀼𑀓𑁆𑀔𑀳𑀭𑁄’’𑀇𑀘𑁆𑀘𑀸𑀤𑀻𑀲𑀼, 𑀇𑀥 𑀅𑀧𑀦𑀬𑀦𑁂. 𑀓𑀺𑀢 𑀭𑁄𑀕𑀸𑀧𑀦𑀬𑀦𑁂, 𑀪𑀽𑀯𑀸𑀤𑀺. 𑀢𑀺𑀓𑀺𑀘𑁆𑀙𑀢𑀻𑀢𑀺 𑀢𑀺𑀓𑀺𑀘𑁆𑀙𑀓𑁄, 𑀙𑀧𑀘𑁆𑀘𑀬𑁄, 𑀡𑁆𑀯𑀼, 𑀤𑁆𑀯𑀺𑀢𑁆𑀢𑀸𑀤𑀺. 𑀅𑀕𑀤𑀓𑀭𑁄𑀧𑁆𑀬𑀢𑁆𑀭, 𑀅𑀕𑀤𑀁 𑀅𑀭𑁄𑀕𑀁 𑀧𑀸𑀡𑀻𑀦𑀁 𑀓𑀭𑁄𑀢𑀻𑀢𑀺 𑀅𑀕𑀤𑀓𑀭𑁄, 𑀓𑀫𑁆𑀫𑀸𑀤𑀺𑀫𑁆𑀳𑀺 𑀡𑁄.

𑁩𑁩𑁦. 𑀤𑁆𑀯𑀬𑀁 ¶ 𑀲𑀮𑁆𑀮𑀦𑀻𑀳𑀭𑀡𑁂 𑀯𑁂𑀚𑁆𑀚𑁂. 𑀓𑀸𑀬𑁂 𑀧𑀯𑀺𑀝𑁆𑀞𑀲𑀭𑀸𑀤𑀺𑀲𑀮𑁆𑀮𑀲𑁆𑀲 𑀦𑀻𑀳𑀭𑀡𑁄 𑀯𑁂𑀚𑁆𑀚𑁄 𑀲𑀮𑁆𑀮𑀯𑁂𑀚𑁆𑀚𑁄. 𑀬𑀣𑀸𑀯𑀼𑀢𑁆𑀢𑀁 𑀲𑀮𑁆𑀮𑀁 𑀦𑀻𑀳𑀭𑀡𑀯𑀲𑁂𑀦 𑀓𑀦𑁆𑀢𑀢𑀺 𑀙𑀺𑀦𑁆𑀤𑀢𑀻𑀢𑀺 𑀲𑀮𑁆𑀮𑀓𑀢𑁆𑀢𑁄, 𑀓𑀢𑀺 𑀙𑁂𑀤𑀦𑁂, 𑀢𑁄. 𑀤𑁆𑀯𑀬𑀁 𑀧𑀝𑀺𑀓𑀸𑀭𑁂. 𑀢𑀺𑀓𑀺𑀘𑁆𑀙𑀦𑀁 𑀢𑀺𑀓𑀺𑀘𑁆𑀙𑀸, 𑀪𑀸𑀯𑁂 𑀅. 𑀧𑀢𑀺𑀧𑀼𑀩𑁆𑀩𑁄 𑀓𑀭𑁄𑀢𑀺 𑀢𑀺𑀓𑀺𑀘𑁆𑀙𑀸𑀬𑀁, 𑀓𑀭𑀢𑁄 𑀭𑀺𑀭𑀺𑀬𑀸.

𑀘𑀢𑀼𑀓𑁆𑀓𑀁 𑀑𑀲𑀥𑁂. 𑀪𑀺𑀲𑀚𑀸𑀦𑀫𑀺𑀤𑀁 𑀪𑁂𑀲𑀚𑁆𑀚𑀁, 𑀡𑁆𑀬. 𑀦 𑀯𑀺𑀚𑁆𑀚𑀢𑁂 𑀕𑀤𑁄 𑀬𑀲𑁆𑀫𑀺𑀦𑁆𑀢𑀺 𑀅𑀕𑀤𑁄. 𑀪𑀺𑀲𑀚𑀸𑀦𑀫𑀺𑀤𑀁 𑀪𑁂𑀲𑀚𑀁, 𑀡𑁄. 𑀉𑀲 𑀤𑀸𑀳𑁂. 𑀭𑁄𑀕𑀫𑁄𑀲𑀸𑀧𑁂𑀢𑀻𑀢𑀺 𑀑𑀲𑀥𑀁, 𑀥𑁄, 𑀅𑀣 𑀯𑀸 𑀑𑀲𑀥𑀻 𑀦𑀸𑀫 𑀅𑀲𑀁𑀬𑁄𑀕𑀤𑀩𑁆𑀩𑀁, 𑀢𑁂𑀳𑀺 𑀲𑀁𑀬𑁄𑀚𑀺𑀢𑀁 𑀑𑀲𑀥𑀁. 𑀚𑀸𑀬𑀼𑀧𑁆𑀬𑀢𑁆𑀭. 𑀚𑀺 𑀚𑀬𑁂, 𑀡𑀼.

𑁩𑁩𑁧. 𑀢𑀺𑀓𑀁 𑀆𑀭𑁄𑀕𑁆𑀬𑁂. 𑀅𑀦𑀢𑁆𑀣𑀓𑀸𑀭𑀓𑀢𑁆𑀢𑀸 𑀓𑀼𑀘𑁆𑀙𑀺𑀢𑀸𑀓𑀸𑀭𑁂𑀦 𑀲𑀭𑀻𑀭𑁂 𑀲𑁂𑀦𑁆𑀢𑀻𑀢𑀺 𑀓𑀼𑀲𑀸, 𑀭𑁄𑀕𑀸, 𑀢𑁂 𑀮𑀼𑀦𑀸𑀢𑀺 𑀙𑀺𑀦𑁆𑀤𑀢𑀻𑀢𑀺 𑀓𑀼𑀲𑀮𑀁. 𑀆𑀫𑀬𑀲𑁆𑀲𑀸𑀪𑀸𑀯𑁄 𑀅𑀦𑀸𑀫𑀬𑀁, 𑀅𑀩𑁆𑀬𑀬𑀻𑀪𑀸𑀯𑁄. 𑀅𑀭𑁄𑀕𑀲𑁆𑀲 𑀪𑀸𑀯𑁄 𑀆𑀭𑁄𑀕𑁆𑀬𑀁. 𑀓𑀼𑀲𑀮𑀸𑀦𑀸𑀫𑀬𑀸𑀭𑁄𑀕𑁆𑀬𑀦𑁆𑀢𑀺 𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑁄. 𑀤𑁆𑀯𑀬𑀁 𑀅𑀦𑀸𑀫𑀬𑀚𑀦𑁂. 𑀓𑀮 𑀕𑀢𑀺𑀲𑀗𑁆𑀔𑁆𑀬𑀸𑀦𑁂𑀲𑀼. 𑀓𑀮𑀢𑀺 𑀬𑀣𑀸𑀲𑀼𑀔𑀁 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀽𑀢𑀺 𑀓𑀮𑁆𑀮𑁄, 𑀮𑁄. ‘‘𑀓𑀸𑀮𑀁 𑀔𑀫𑀢𑀻𑀢𑀺 𑀓𑀮𑁆𑀬𑀁, 𑀅𑀭𑁄𑀕𑀢𑀸, 𑀢𑀲𑁆𑀲𑀁 𑀦𑀺𑀬𑀼𑀢𑁆𑀢𑁄 𑀓𑀮𑁆𑀬𑁄’’𑀢𑀺 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑀝𑀻𑀓𑀸𑀬𑀁. 𑀦𑀢𑁆𑀣𑀺 𑀆𑀫𑀬𑁄 𑀬𑀲𑁆𑀫𑀺𑀁 𑀦𑀺𑀭𑀸𑀫𑀬𑁄. 𑀯𑀼𑀢𑁆𑀢𑁄𑀧𑁆𑀬𑀢𑁆𑀭. 𑀯𑀼𑀢𑁆𑀢𑀺 𑀚𑀻𑀯𑀺𑀢𑀯𑀼𑀢𑁆𑀢𑀺 𑀧𑀲𑀢𑁆𑀣𑀸 𑀅𑀲𑁆𑀲𑀢𑁆𑀣𑀻𑀢𑀺 𑀯𑀼𑀢𑁆𑀢𑁄. 𑀭𑁄𑀕𑀢𑁄 𑀦𑀺𑀕𑁆𑀕𑀢𑀚𑀦𑁂 𑀧𑀦 𑀉𑀮𑁆𑀮𑀸𑀖𑁄, 𑀮𑀸𑀖 𑀲𑀸𑀫𑀢𑁆𑀣𑀺𑀬𑁂, 𑀉𑀲𑀤𑁆𑀤𑁄𑀬𑀁 𑀭𑁄𑀕𑀯𑀺𑀫𑀼𑀢𑁆𑀬𑀢𑁆𑀣𑁄. 𑀦𑀭𑀸𑀤𑀺𑀢𑁆𑀢𑀸, 𑀦𑀭𑀧𑁆𑀧𑀥𑀸𑀦𑀢𑁆𑀢𑀸 𑀘 𑀦𑀭𑀯𑀕𑁆𑀕𑁄.

𑀦𑀭𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀩𑁆𑀩𑀡𑁆𑀡𑀯𑀕𑁆𑀕𑀯𑀡𑁆𑀡𑀦𑀸

𑁩𑁩𑁨. 𑀲𑀦𑁆𑀢𑀢𑀺𑀧𑀭𑀺𑀬𑀦𑁆𑀢𑀁 𑀯𑀁𑀲𑁂. 𑀓𑀼𑀮 𑀲𑀦𑁆𑀢𑀸𑀦𑀩𑀦𑁆𑀥𑀽𑀲𑀼, 𑀪𑀽𑀯𑀸𑀤𑀺, 𑀡𑁄, 𑀓𑀼𑀮𑀁, 𑀯𑀦 𑀲𑀫𑁆𑀪𑀢𑁆𑀢𑀺𑀬𑀁, 𑀲𑁄. 𑀲𑀁𑀢𑀦𑀼 𑀯𑀺𑀢𑁆𑀣𑀸𑀭𑁂, 𑀡𑁄. 𑀅𑀪𑀺𑀫𑀼𑀔𑀁 𑀚𑀦𑁂𑀢𑀻𑀢𑀺 𑀅𑀪𑀺𑀚𑀦𑁄, 𑀡𑁄. 𑀕𑁄 𑀯𑀼𑀘𑁆𑀘𑀢𑀺 𑀅𑀪𑀺𑀥𑀸𑀦𑀁, 𑀩𑀼𑀤𑁆𑀥𑀺 𑀘, 𑀢𑁂 𑀢𑀸𑀬𑀢𑀻𑀢𑀺 𑀕𑁄𑀢𑁆𑀢𑀁. 𑀕𑁄𑀢𑁆𑀭𑀫𑁆𑀧𑀺. 𑀕𑀯𑀁 𑀲𑀤𑁆𑀤𑀁 𑀢𑀸𑀬𑀢𑀻𑀢𑀺 𑀯𑀸 𑀕𑁄𑀢𑁆𑀢𑀁, 𑀢𑀸 𑀧𑀸𑀮𑀦𑁂. 𑀅𑀦𑀼𑀧𑀼𑀩𑁆𑀩𑁄 𑀇 𑀕𑀢𑀺𑀬𑀁, 𑀓𑀭𑀡𑁂 𑀅. 𑀢𑀦𑁄𑀢𑀺𑀲𑁆𑀫𑀸𑀢𑀺, 𑀲𑀦𑁆𑀢𑀢𑀺, 𑀦𑀮𑁄𑀧𑁄, 𑀇𑀢𑁆𑀣𑀺𑀬𑀁.

𑀲𑀦𑁆𑀢𑀢𑀺 𑀧𑀦𑁆𑀢𑀺𑀯𑀺𑀢𑁆𑀣𑀸𑀭-𑀕𑁄𑀢𑁆𑀢𑁂𑀲𑀼 𑀓𑀯𑀺𑀪𑀻 𑀫𑀢𑀸;

𑀧𑀭𑀫𑁆𑀧𑀭𑀸 𑀪𑀯𑁂 𑀘𑀸𑀧𑀺, 𑀧𑀼𑀢𑁆𑀢𑀓𑀜𑁆𑀜𑀸𑀲𑀼 𑀲𑀦𑁆𑀢𑀢𑀺.

𑀔𑀢𑁆𑀢𑀺𑀬𑀸𑀤𑀬𑁄 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀯𑁂𑀲𑁆𑀲𑀲𑀼𑀤𑁆𑀤𑀸 𑀘𑀢𑁆𑀢𑀸𑀭𑁄 𑀯𑀡𑁆𑀡𑀸 𑀓𑀼𑀮𑀸𑀦𑀺 𑀪𑀯𑀦𑁆𑀢𑀺, 𑀏𑀢𑁂 𑀳𑀺 𑀅𑀜𑁆𑀜𑀫𑀜𑁆𑀜𑀫𑀲𑀗𑁆𑀓𑀭𑀢𑁄 𑀯𑀡𑁆𑀡𑁂𑀢𑀩𑁆𑀩𑀢𑁄 𑀞𑀧𑁂𑀢𑀩𑁆𑀩𑀢𑁄 𑀯𑀡𑁆𑀡𑀸𑀢𑀺 𑀯𑀼𑀘𑁆𑀘𑀦𑁆𑀢𑁂. 𑀯𑀡𑁆𑀡 𑀞𑀧𑀦𑁂.

𑁩𑁩𑁩-𑁩𑁩𑁪. 𑀙𑀓𑁆𑀓𑀁 ¶ 𑀓𑀼𑀮𑀻𑀦𑁂. 𑀓𑀼𑀮𑀲𑁆𑀲𑀸𑀧𑀘𑁆𑀘𑀁 𑀓𑀼𑀮𑀺𑀦𑁄, 𑀇𑀦𑁄 𑀅𑀧𑀘𑁆𑀘𑁂. 𑀲𑁄𑀪𑀦𑁄 𑀚𑀦𑁄 𑀲𑀚𑁆𑀚𑀦𑁄. 𑀲𑀧𑀭𑀢𑁆𑀣𑀁 𑀲𑀸𑀥𑁂𑀢𑀻𑀢𑀺 𑀲𑀸𑀥𑀼, 𑀲𑀸𑀥 𑀲𑀁𑀲𑀺𑀤𑁆𑀥𑀺𑀫𑁆𑀳𑀺, 𑀉. 𑀲𑀪𑀸𑀬𑀁 𑀲𑀸𑀥𑀼 𑀲𑀪𑁆𑀬𑁄. 𑀲𑀸𑀥𑁆𑀯𑀢𑁆𑀣𑁂 𑀬𑁄. 𑀅𑀬 𑀕𑀢𑀺𑀬𑀁. 𑀅𑀬𑀺𑀢𑀩𑁆𑀩𑁄 𑀉𑀧𑀕𑀦𑁆𑀢𑀩𑁆𑀩𑁄𑀢𑀺 𑀅𑀬𑁆𑀬𑁄, 𑀓𑀫𑁆𑀫𑀦𑀺 𑀬𑁄. 𑀫𑀳𑀸𑀓𑀼𑀮𑀲𑁆𑀲𑀸𑀧𑀘𑁆𑀘𑀁 𑀫𑀳𑀸𑀓𑀼𑀮𑁄, 𑀡𑁄.

𑀪𑀽𑀪𑀼𑀚𑀦𑁆𑀢𑀁 𑀭𑀸𑀚𑀲𑀸𑀫𑀜𑁆𑀜𑁂. 𑀅𑀢𑀺𑀢𑁂𑀚𑀯𑀦𑁆𑀢𑀢𑀸𑀬 𑀯𑀺𑀲𑁂𑀲𑁂𑀦 𑀭𑀸𑀚𑀢𑁂 𑀤𑀺𑀩𑁆𑀩𑀢𑁂𑀢𑀺 𑀭𑀸𑀚𑀸, 𑀭𑀸𑀚 𑀤𑀺𑀢𑁆𑀢𑀺𑀬𑀁. 𑀪𑀼𑀬𑀸 𑀪𑀽𑀫𑀺𑀬𑀸 𑀧𑀢𑀺 𑀪𑀽𑀧𑀢𑀺, 𑀪𑀼𑀁 𑀧𑀸𑀮𑁂𑀢𑀻𑀢𑀺 𑀯𑀸 𑀪𑀽𑀧𑀢𑀺, 𑀧𑀸 𑀭𑀓𑁆𑀔𑀡𑁂,𑀢𑀺, 𑀭𑀲𑁆𑀲𑁄. 𑀧𑀣𑀯𑀺𑀬𑀸 𑀇𑀲𑁆𑀲𑀭𑁄 𑀧𑀢𑁆𑀣𑀺𑀯𑁄, 𑀡𑁄, 𑀤𑁆𑀯𑀺𑀢𑁆𑀢𑀁, 𑀇𑀢𑁆𑀢𑀜𑁆𑀘. 𑀚𑀕𑀢𑀺𑀁 𑀪𑀽𑀫𑀺𑀁 𑀧𑀸𑀮𑁂𑀢𑀻𑀢𑀺 𑀚𑀕𑀢𑀺𑀧𑀸𑀮𑁄, 𑀓𑀫𑁆𑀫𑀦𑀺 𑀡𑁄. 𑀤𑀺𑀲𑀸𑀦𑀁 𑀧𑀢𑀺 𑀤𑀺𑀲𑀫𑁆𑀧𑀢𑀺, 𑀤𑀺𑀲𑀸, 𑀤𑀺𑀲𑀝𑁆𑀞𑁂 𑀯𑀸 𑀧𑀸𑀮𑁂𑀢𑀻𑀢𑀺 𑀤𑀺𑀲𑀫𑁆𑀧𑀢𑀺, 𑀭𑀲𑁆𑀲𑀢𑁆𑀢𑀁, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄 𑀘. 𑀪𑀼𑀁 𑀪𑀽𑀫𑀺𑀁 𑀪𑀼𑀜𑁆𑀚𑀢𑀻𑀢𑀺 𑀪𑀽𑀪𑀼𑀚𑁄, 𑀪𑀼𑀚 𑀧𑀸𑀮𑀦𑀚𑁆𑀛𑁄𑀳𑀭𑀡𑁂𑀲𑀼, 𑀇𑀥 𑀧𑀸𑀮𑀦𑁂, 𑀭𑀼𑀥𑀸𑀤𑀺. 𑀫𑀳𑀺𑀔𑀺𑀢𑁄𑀧𑁆𑀬𑀢𑁆𑀭. 𑀔𑀺 𑀦𑀺𑀯𑀸𑀲𑀕𑀢𑀻𑀲𑀼, 𑀫𑀳𑀺𑀁 𑀅𑀔𑀺 𑀕𑀢𑀯𑀸 𑀫𑀳𑀻𑀔𑀺𑀢𑁄.

𑁩𑁩𑁫. 𑀧𑀚𑁆𑀚𑀤𑁆𑀥𑀁 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑁂 𑀚𑀸𑀢𑀺𑀔𑀢𑁆𑀢𑀺𑀬𑁂, ‘‘𑀭𑀸𑀚𑀚𑀘𑁆𑀘𑁂 𑀘 𑀔𑀢𑁆𑀢𑀺𑀬𑁂’’𑀢𑀺 𑀯𑀘𑀦𑀢𑁄. 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲𑀸𑀧𑀘𑁆𑀘𑀁 𑀭𑀸𑀚𑀜𑁆𑀜𑁄, 𑀜𑁆𑀜𑁄 ¶ 𑀅𑀧𑀘𑁆𑀘𑁂. ‘‘𑀔𑀢𑁆𑀢𑀺𑀬𑁄 𑀢𑀼 𑀯𑀺𑀭𑀸 𑀔𑀢𑁆𑀢𑀁, 𑀭𑀸𑀚𑀜𑁆𑀜𑀤𑁆𑀯𑀺𑀚𑀮𑀺𑀗𑁆𑀕𑀦𑁄’’𑀢𑀺 𑀭𑀪𑀲, 𑀭𑀢𑀦𑀓𑁄𑀲𑁂𑀲𑀼 𑀧𑀭𑀺𑀬𑀸𑀬𑀸. 𑀔𑀢𑁆𑀢𑀲𑁆𑀲𑀸𑀧𑀘𑁆𑀘𑀁 𑀔𑀢𑁆𑀢𑀺𑀬𑁄, 𑀅𑀧𑀘𑁆𑀘𑁂 𑀇𑀬𑀧𑀘𑁆𑀘𑀬𑁄 𑀤𑀺𑀲𑁆𑀲𑀢𑁂, 𑀔𑁂𑀢𑁆𑀢𑀸𑀦𑀁 𑀅𑀥𑀺𑀧𑀢𑀺𑀪𑀽𑀢𑀢𑁆𑀢𑀸 𑀯𑀸 𑀔𑀢𑁆𑀢𑀺𑀬𑁄𑀢𑀺𑀆𑀤𑀺𑀓𑀧𑁆𑀧𑀺𑀓𑀭𑀸𑀚𑀸 𑀯𑀼𑀘𑁆𑀘𑀢𑀺, 𑀢𑀧𑁆𑀧𑀪𑀯𑀢𑁆𑀢𑀸 𑀧𑀦 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑁂𑀲𑁆𑀯𑀧𑀺 𑀢𑀁𑀲𑀫𑀜𑁆𑀜𑀸, 𑀏𑀲𑁆𑀲𑀢𑁆𑀢𑀁. 𑀔𑀢𑁆𑀢𑀲𑁆𑀲𑀸𑀧𑀘𑁆𑀘𑀁 𑀔𑀢𑁆𑀢𑀁, 𑀡𑁄. 𑀭𑀚𑁆𑀚𑀸𑀭𑁄𑀧𑀦𑀲𑀫𑀬𑁂 𑀤𑀓𑁆𑀔𑀺𑀡𑀸𑀯𑀝𑁆𑀝𑀲𑀗𑁆𑀔𑁄𑀤𑀓𑁂𑀦 𑀕𑀗𑁆𑀕𑀸𑀦𑀻𑀢𑁂𑀦 𑀫𑀼𑀤𑁆𑀥𑀦𑀺 𑀔𑀢𑁆𑀢𑀺𑀬𑀓𑀜𑁆𑀜𑀸𑀤𑀻𑀳𑀺 𑀅𑀪𑀺𑀲𑀺𑀢𑁆𑀢𑀢𑁆𑀢𑀸 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑁄, 𑀧𑀞𑀫𑀔𑀢𑁆𑀢𑀺𑀬𑁄. 𑀢𑀧𑁆𑀧𑀪𑀯𑀢𑀸𑀬 𑀧𑀦 𑀅𑀦𑀪𑀺𑀲𑀺𑀢𑁆𑀢𑀸 𑀘 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑀸𑀔𑁆𑀬𑀸, 𑀬𑀣𑀸 𑁋 𑀩𑁆𑀭𑀳𑁆𑀫𑀩𑀸𑀳𑀼𑀚𑀲𑁆𑀲 𑀯𑀁𑀲𑁂 𑀚𑀸𑀢𑀲𑁆𑀲𑀸𑀧𑀺 𑀩𑁆𑀭𑀳𑁆𑀫𑀩𑀸𑀳𑀼𑀚𑁄. 𑀩𑁆𑀭𑀳𑁆𑀫𑀩𑀸𑀳𑀼𑀢𑁄 𑀚𑀸𑀢𑀢𑁆𑀢𑀸 𑀩𑀸𑀳𑀼𑀚𑁄𑀢𑀺 𑀳𑀺 𑀦𑀺𑀓𑀸𑀬𑀦𑁆𑀢𑀭𑀺𑀓𑀸𑀦𑀁 𑀮𑀤𑁆𑀥𑀺. 𑀬𑀲𑁆𑀫𑀺𑀁 𑀧𑀦 𑀭𑀸𑀚𑀺𑀦𑀺 𑀅𑀲𑁂𑀲𑀸 𑀲𑀸𑀫𑀦𑁆𑀢𑀸 𑀧𑀡𑀫𑀦𑁆𑀢𑀺, 𑀲𑁄 𑀅𑀥𑀺𑀲𑁆𑀲𑀭𑀸𑀔𑁆𑀬𑁄 [𑀅𑀫𑀭 𑁧𑁮.𑁨]. 𑀲𑀁 𑀲𑀢𑁆𑀢𑁄 𑀮𑀕𑁆𑀕𑁄 𑀅𑀦𑁆𑀢𑁄 𑀬𑀲𑁆𑀲𑀸 𑀲𑀸 𑀲𑀫𑀦𑁆𑀢𑀸, 𑀲𑀯𑀺𑀲𑀬𑀸𑀦𑀦𑁆𑀢𑀭𑀸 𑀪𑀽𑀫𑀺, 𑀲𑀫𑀦𑁆𑀢𑀸𑀬 𑀇𑀫𑁂 𑀲𑀸𑀫𑀦𑁆𑀢𑀸, 𑀅𑀦𑀦𑁆𑀢𑀭𑀭𑀸𑀚𑀸𑀦𑁄.

𑀤𑁆𑀯𑀬𑀁 𑀘𑀓𑁆𑀓𑀯𑀢𑁆𑀢𑀺𑀦𑀺. 𑀲𑀩𑁆𑀩𑀪𑀽𑀫𑀺𑀬𑀸 𑀇𑀲𑁆𑀲𑀭𑁄 𑀲𑀩𑁆𑀩𑀪𑀼𑀫𑁆𑀫𑁄, 𑀡𑁆𑀬𑁄. 𑀧𑀼𑀜𑁆𑀜𑁄𑀧𑀦𑀻𑀢𑁂𑀦 𑀘𑀓𑁆𑀓𑀭𑀢𑀦𑁂𑀦 𑀯𑀢𑁆𑀢𑀢𑁂 𑀅𑀲𑀸𑀥𑀼𑀤𑀫𑀦𑀺𑀓𑀸𑀤𑀺𑀭𑀸𑀚𑀯𑀢𑁆𑀢𑀁 𑀅𑀦𑀼𑀢𑀺𑀝𑁆𑀞𑀢𑀻𑀢𑀺 𑀘𑀓𑁆𑀓𑀯𑀢𑁆𑀢𑀻, 𑀡𑀻, 𑀘𑀓𑁆𑀓𑀭𑀢𑀦𑀁 𑀯𑀢𑁆𑀢𑁂𑀢𑀺 𑀆𑀓𑀸𑀲𑁂 𑀅𑀢𑁆𑀢𑀦𑁄 𑀧𑀼𑀭𑀢𑁄 𑀕𑀫𑀬𑀢𑀻𑀢𑀺 𑀯𑀸 𑀘𑀓𑁆𑀓𑀯𑀢𑁆𑀢𑀻, 𑀧𑀼𑀜𑁆𑀜𑀘𑀓𑁆𑀓𑀁, 𑀘𑀢𑀼𑀘𑀓𑁆𑀓𑀁 𑀯𑀸 𑀲𑀢𑁆𑀢𑁂𑀲𑀼 𑀯𑀢𑁆𑀢𑁂𑀢𑀺, 𑀢𑁂 𑀯𑀸 𑀅𑀲𑁆𑀫𑀺𑀁 𑀯𑀢𑁆𑀢𑁂𑀢𑀻𑀢𑀺 𑀘𑀓𑁆𑀓𑀯𑀢𑁆𑀢𑀻, 𑀘𑀓𑁆𑀓𑀭𑀢𑀦𑀼𑀧𑁆𑀧𑀸𑀤𑀦𑀢𑁆𑀣𑀁 𑀤𑁆𑀯𑀸𑀤𑀲𑀯𑀲𑁆𑀲𑀘𑀭𑀺𑀢𑀁 𑀤𑀲𑀭𑀸𑀚𑀥𑀫𑁆𑀫𑀁 𑀯𑀢𑁆𑀢𑀫𑁂𑀢𑀲𑁆𑀲𑀢𑁆𑀣𑀻𑀢𑀺 𑀯𑀸 𑀘𑀓𑁆𑀓𑀯𑀢𑁆𑀢𑀻. 𑀢𑀢𑁆𑀣 𑀅𑀦𑁆𑀢𑁄𑀚𑀦𑀲𑁆𑀫𑀺𑀁 𑀩𑀮𑀓𑀸𑀬𑁂 𑀥𑀫𑁆𑀫𑀺𑀓𑀸𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀬𑀸 𑀲𑀁𑀯𑀺𑀥𑀸𑀦𑀁, 𑀔𑀢𑁆𑀢𑀺𑀬𑁂𑀲𑀼, 𑀅𑀦𑀼𑀬𑀼𑀢𑁆𑀢𑁂𑀲𑀼, 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀲𑀼, 𑀦𑁂𑀕𑀫𑀚𑀸𑀦𑀧𑀤𑁂𑀲𑀼, 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼, 𑀫𑀺𑀕𑀧𑀓𑁆𑀔𑀻𑀲𑀼, 𑀅𑀥𑀫𑁆𑀫𑀓𑀸𑀭𑀧𑀝𑀺𑀓𑁆𑀔𑁂𑀧𑁄, 𑀅𑀥𑀦𑀸𑀦𑀁 𑀥𑀦𑀼𑀧𑁆𑀧𑀸𑀤𑀦𑀁, 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀧𑀼𑀘𑁆𑀙𑀦𑀦𑁆𑀢𑀺 𑀇𑀤𑀁 𑀤𑀲𑀯𑀺𑀥𑀁 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀁, 𑀇𑀤𑀫𑁂𑀯 𑀘 𑀕𑀳𑀧𑀢𑀺𑀓𑁂, 𑀧𑀓𑁆𑀔𑀺𑀚𑀸𑀢𑁂 𑀘 𑀯𑀺𑀲𑀼𑀁 𑀓𑀢𑁆𑀯𑀸 𑀕𑀳𑀡𑀯𑀲𑁂𑀦 𑀤𑁆𑀯𑀸𑀤𑀲𑀯𑀺𑀥𑀫𑁆𑀧𑀺 𑀤𑀻𑀧𑁂𑀲𑀼. 𑀘𑀢𑀽𑀲𑁆𑀯𑀧𑀺 𑀤𑀻𑀧𑁂𑀲𑀼 𑀆𑀡𑀸𑀥𑀫𑁆𑀫𑀘𑀓𑁆𑀓𑀸𑀦𑀺 𑀲𑀢𑁆𑀢𑁂𑀲𑀼 ¶ 𑀧𑀯𑀢𑁆𑀢𑁂𑀢𑀻𑀢𑀺 𑀯𑀸 𑀘𑀓𑁆𑀓𑀯𑀢𑁆𑀢𑀻. 𑀅𑀜𑁆𑀜𑁄 𑀅𑀲𑀩𑁆𑀩𑀪𑀼𑀫𑁆𑀫𑁄 𑀅𑀦𑀯𑀓𑀸𑀲𑁄 𑀲𑀸𑀫𑀦𑁆𑀢𑁄 𑀪𑀽𑀧𑁄 𑀫𑀡𑁆𑀟𑀮𑀺𑀲𑁆𑀲𑀭𑁄 𑀦𑀸𑀫. 𑀲𑀬𑀫𑀸𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑀯𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀲𑁆𑀲𑁂𑀯 𑀫𑀡𑁆𑀟𑀮𑀲𑁆𑀲 𑀇𑀲𑁆𑀲𑀭𑁄, 𑀦 𑀲𑀩𑁆𑀩𑀫𑀡𑁆𑀟𑀮𑀲𑁆𑀲𑀸𑀢𑀺 𑀫𑀡𑁆𑀟𑀮𑀺𑀲𑁆𑀲𑀭𑁄𑀢𑀺𑀧𑀺. 𑀏𑀢𑁆𑀣 𑀘 ‘‘𑀲𑀩𑁆𑀩𑀪𑀼𑀫𑁆𑀫𑁄, 𑀘𑀓𑁆𑀓𑀯𑀢𑁆𑀢𑀻’’𑀢𑀺 𑀤𑁆𑀯𑀻𑀳𑀺 𑀦𑀸𑀫𑁂𑀳𑀺 𑀘𑀢𑀼𑀤𑀻𑀧𑀺𑀲𑁆𑀲𑀭𑁄 𑀭𑀸𑀚𑀸 𑀤𑀻𑀧𑀺𑀢𑁄, 𑀇𑀥𑀸𑀦𑀸𑀕𑀢𑁂𑀧𑀺 𑀲𑀗𑁆𑀕𑀳𑁂𑀢𑁆𑀯𑀸 𑀓𑀣𑀺𑀢𑁂𑀦 𑀅𑀥𑀺𑀲𑁆𑀲𑀭𑀧𑀤𑁂𑀦 𑀏𑀓𑀤𑀻𑀧𑀺𑀲𑁆𑀲𑀭𑁄 𑀭𑀸𑀚𑀸, 𑀫𑀡𑁆𑀟𑀮𑀺𑀲𑁆𑀲𑀭𑀧𑀤𑁂𑀦 𑀧𑀤𑁂𑀲𑀺𑀲𑁆𑀲𑀭𑁄 𑀭𑀸𑀚𑀸 𑀤𑀻𑀧𑀺𑀢𑁄. 𑀅𑀣 𑀯𑀸 𑀫𑀡𑁆𑀟𑀮𑀺𑀲𑁆𑀲𑀭𑀧𑀤𑁂𑀦 𑀏𑀓𑀤𑀻𑀧𑀺𑀲𑁆𑀲𑀭𑁄 𑀭𑀸𑀚𑀸, 𑀲𑁂𑀲𑁂𑀳𑀺 𑀭𑀸𑀚𑀭𑀸𑀚𑀜𑁆𑀜𑀸𑀤𑀻𑀳𑀺 𑀩𑀸𑀳𑀼𑀚𑀧𑀭𑀺𑀬𑀦𑁆𑀢𑁂𑀳𑀺 𑀧𑀤𑁂𑀲𑀺𑀲𑁆𑀲𑀭𑁄 𑀤𑀻𑀧𑀺𑀢𑁄.

𑁩𑁩𑁬. 𑀤𑁆𑀯𑀬𑀁 𑀭𑀸𑀚𑀪𑁂𑀤𑁂. 𑀲𑀼𑀔𑀼𑀫𑀢𑀸𑀬 𑀮𑀻𑀦𑀸 𑀅𑀧𑀸𑀓𑀝𑀸 𑀙𑀯𑀺𑀬𑁄 𑀬𑁂𑀲𑀁 𑀢𑁂 𑀮𑀺𑀘𑁆𑀙𑀯𑀺𑀦𑁄. 𑀮𑀺𑀘𑁆𑀙𑀯𑀻 𑀘 𑀯𑀚𑁆𑀚𑀻 𑀘𑀸𑀢𑀺 𑀤𑁆𑀯𑀦𑁆𑀤𑁄. 𑀤𑁆𑀯𑀬𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀼𑀮𑁂 𑀭𑀸𑀚𑀺𑀦𑀺. 𑀧𑀼𑀭𑀺𑀫𑀢𑀭𑀲𑀫𑁆𑀪𑀽𑀢𑁂 𑀲𑀓𑁆𑀬𑀓𑀼𑀮𑁂 𑀲𑀜𑁆𑀚𑀸𑀢𑀢𑁆𑀢𑀸 𑀲𑀓𑁆𑀬𑁄, 𑀡𑁄. 𑀲𑀓𑁆𑀓𑁄𑀧𑀺. 𑀲𑀓𑁆𑀬𑁂 𑀪𑀯𑁄 𑀲𑀸𑀓𑀺𑀬𑁄, 𑀇𑀬𑁄, 𑀬𑀮𑁄𑀧𑁄, 𑀤𑀻𑀖𑁄 𑀘.

𑀧𑀜𑁆𑀘𑀓𑀁 𑀩𑀼𑀤𑁆𑀥𑀧𑀼𑀢𑁆𑀢𑀲𑁆𑀲𑀸𑀬𑀲𑁆𑀫𑀢𑁄 𑀭𑀸𑀳𑀼𑀮𑀲𑁆𑀲 𑀫𑀸𑀢𑀭𑀺. 𑀪𑀤𑁆𑀤 𑀓𑀮𑁆𑀬𑀸𑀡𑁂, 𑀲𑁄𑀔𑁆𑀬𑁂 𑀘. 𑀓𑀼𑀮𑀸𑀘𑀸𑀭𑀭𑀽𑀧𑀸𑀤𑀺𑀯𑀲𑁂𑀦 𑀓𑀮𑁆𑀬𑀸𑀡𑀢𑁆𑀢𑀸 𑀪𑀤𑁆𑀤𑀸. 𑀓𑀘𑁆𑀘𑀲𑁆𑀲𑀸𑀧𑀘𑁆𑀘𑀁 𑀓𑀘𑁆𑀘𑀸𑀦𑀸, 𑀅𑀧𑀘𑁆𑀘𑀲𑀤𑁆𑀤𑁄𑀬𑀁 𑀦𑀺𑀘𑁆𑀘𑀁 𑀦𑀧𑀼𑀁𑀲𑀓𑁂 𑀧𑀼𑀢𑁆𑀢𑁂, 𑀧𑀼𑀢𑁆𑀢𑀺𑀬𑀜𑁆𑀘 𑀪𑀯𑀢𑀻𑀢𑀺. ‘‘𑀭𑀸𑀳𑀼 𑀯𑀺𑀬 𑀘𑀦𑁆𑀤𑀁 𑀫𑀫 𑀦𑀺𑀓𑁆𑀔𑀫𑀦𑀁 𑀮𑀸𑀢𑀼𑀓𑀸𑀫𑁄 𑀘𑀸𑀬𑀁 𑀫𑁂 𑀧𑀼𑀢𑁆𑀢𑁄𑀢𑀺 𑀭𑀸𑀳𑀼𑀮𑁄𑀢𑀺 𑀦𑀸𑀫𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀫𑀦𑀲𑀺 𑀓𑀢𑁆𑀯𑀸 ‘‘𑀭𑀸𑀳𑀼 𑀚𑀸𑀢𑁄, 𑀩𑀦𑁆𑀥𑀦𑀁 𑀚𑀸𑀢’’𑀦𑁆𑀢𑀺 𑀧𑀺𑀢𑀭𑀸 𑀯𑀼𑀢𑁆𑀢𑁄 𑀲𑀺𑀓𑁆𑀔𑀸𑀓𑀸𑀫𑁄 𑀆𑀬𑀲𑁆𑀫𑀸 𑀭𑀸𑀳𑀼𑀮𑁄𑀬𑁂𑀯𑁂𑀢𑁆𑀣 𑀭𑀸𑀳𑀼𑀮𑁄, 𑀢𑀲𑁆𑀲 𑀫𑀸𑀢𑀸 𑀭𑀸𑀳𑀼𑀮𑀫𑀸𑀢𑀸, 𑀩𑀺𑀫𑁆𑀩𑀁 𑀯𑀼𑀘𑁆𑀘𑀢𑀺 𑀲𑀭𑀻𑀭𑀁, 𑀅𑀢𑀺𑀲𑀬𑀯𑀡𑁆𑀡𑀲𑀭𑀻𑀭𑀬𑀼𑀢𑁆𑀢𑀢𑀸𑀬 𑀩𑀺𑀫𑁆𑀩𑀸, 𑀯𑀫𑀺𑀥𑀸𑀢𑀼𑀫𑁆𑀳𑀸 𑀯𑀸 ¶ 𑀩𑁄, 𑀯𑀲𑁆𑀲 𑀩𑀢𑁆𑀢𑀁. 𑀬𑀲𑁄 𑀯𑀼𑀘𑁆𑀘𑀢𑀺 𑀧𑀭𑀺𑀯𑀸𑀭𑁄, 𑀓𑀺𑀢𑁆𑀢𑀺 𑀘, 𑀢𑁂 𑀥𑀸𑀭𑁂𑀢𑀻𑀢𑀺 𑀬𑀲𑁄𑀥𑀭𑀸, 𑀫𑀦𑀸𑀤𑀺𑀢𑁆𑀢𑀸 𑀅𑀲𑁆𑀲𑁄.

𑁩𑁩𑁭-𑁩𑁩𑁯. 𑀬𑁂𑀲𑀁 𑀔𑀢𑁆𑀢𑀺𑀬𑀸𑀦𑀁 𑀥𑀦𑀁 𑀲𑀢𑀁 𑀳𑁄𑀢𑀺, 𑀓𑀻𑀤𑀺𑀲𑀁 𑀢𑀁 𑀥𑀦𑀁? 𑀦𑀺𑀥𑀸𑀦𑀕𑀁 𑀧𑀣𑀯𑀸𑀤𑀻𑀲𑀼 𑀦𑀺𑀥𑀸𑀦𑀯𑀲𑁂𑀦 𑀕𑀢𑀁 𑀧𑀯𑀢𑁆𑀢𑀁, 𑀢𑁂𑀲𑀁 𑀥𑀦𑀸𑀦𑀁 𑀲𑀢𑀁 𑀓𑀳𑀸𑀧𑀡𑀸𑀦𑀁, 𑀓𑀺𑀢𑁆𑀢𑀓𑀧𑁆𑀧𑀫𑀸𑀡𑀸𑀦𑀁? 𑀓𑁄𑀝𑀻𑀦𑀁 𑀲𑀢𑀁. 𑀓𑁂𑀦 𑀧𑀭𑀺𑀘𑁆𑀙𑁂𑀤𑁂𑀦? 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀳𑁂𑀝𑁆𑀞𑀺𑀫𑀓𑁄𑀝𑁆𑀞𑀸𑀲𑁂𑀦, 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀯𑀸 𑀓𑁄𑀝𑀻𑀦𑀁 𑀲𑀢𑀁 𑀳𑁄𑀢𑀺. 𑀤𑀺𑀯𑀲𑀯𑀴𑀜𑁆𑀚𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀯𑀴𑀜𑁆𑀚𑀺𑀢𑀩𑁆𑀩𑁄 𑀧𑀦 𑀓𑀳𑀸𑀧𑀡𑁄 𑀯𑀻𑀲𑀢𑀫𑁆𑀩𑀡𑀫𑀢𑁆𑀢𑀁 𑀳𑁄𑀢𑀺, 𑀢𑁂 𑀔𑀢𑁆𑀢𑀺𑀬𑀸 ‘‘𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸’’𑀢𑁆𑀬𑀼𑀘𑁆𑀘𑀦𑁆𑀢𑁂. 𑀫𑀳𑀦𑁆𑀢𑁄 𑀥𑀦𑀲𑀸𑀭𑁄 𑀬𑁂𑀲𑀦𑁆𑀢𑁂 𑀫𑀳𑀸𑀲𑀸𑀮𑀸, 𑀮𑀢𑁆𑀢𑀁, 𑀅𑀫𑁆𑀩𑀡𑀫𑀢𑁆𑀭 𑀏𑀓𑀸𑀤𑀲𑀤𑁄𑀡𑀫𑀢𑁆𑀢𑀁.

𑀬𑁂𑀲𑀁 𑀤𑁆𑀯𑀺𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀦𑀺𑀥𑀸𑀦𑀕𑀸𑀦𑀺 𑀦𑀺𑀥𑀸𑀦𑀯𑀲𑁂𑀦 𑀧𑀯𑀢𑁆𑀢𑀸𑀦𑀺 𑀅𑀲𑀻𑀢𑀺𑀓𑁄𑀝𑀺𑀥𑀦𑀸𑀦𑀺 𑀳𑁄𑀦𑁆𑀢𑀺, 𑀤𑀺𑀯𑀲𑀯𑀴𑀜𑁆𑀚𑁄 𑀧𑀦 𑀓𑀳𑀸𑀧𑀡𑁄 𑀤𑀲𑀫𑁆𑀩𑀡𑀫𑀢𑁆𑀢𑀁 𑀳𑁄𑀢𑀺, 𑀢𑁂 𑀤𑁆𑀯𑀺𑀚𑀸 ‘‘𑀤𑁆𑀯𑀺𑀚𑀫𑀳𑀸𑀲𑀸𑀮𑀸’’𑀢𑁆𑀬𑀼𑀘𑁆𑀘𑀦𑁆𑀢𑁂.

𑀦𑀺𑀥𑀸𑀦𑀕𑁂, 𑀯𑀴𑀜𑁆𑀚𑁂 𑀘 𑀥𑀦𑁂 𑀢𑀤𑀼𑀧𑀟𑁆𑀠𑁂 𑀢𑁂𑀲𑀁 𑀤𑁆𑀯𑀺𑀚𑀫𑀳𑀸𑀲𑀸𑀮𑀸𑀦𑀁 𑀥𑀦𑀲𑁆𑀲 𑀉𑀧𑀟𑁆𑀠𑀪𑀸𑀕𑁂 𑀲𑀢𑀺 𑀕𑀳𑀧𑀢𑀺𑀫𑀳𑀸𑀲𑀸𑀮𑀸 𑀦𑀸𑀫 𑀲𑀺𑀬𑀼𑀁, 𑀉𑀪𑀬𑀢𑁆𑀭𑀸𑀧𑀺 𑀳𑁂𑀝𑁆𑀞𑀺𑀫𑀦𑁆𑀢𑁂𑀦𑁂𑀯 𑀥𑀦𑀧𑀭𑀺𑀘𑁆𑀙𑁂𑀤𑁄.

𑁩𑁪𑁦. 𑀬𑁄 ¶ 𑀦 𑀳𑀻𑀦𑁄, 𑀦 𑀘𑀼𑀓𑁆𑀓𑀝𑁆𑀞𑁄, 𑀫𑀚𑁆𑀛𑀺𑀫𑀸𑀥𑀺𑀓𑀸𑀭𑀩𑁆𑀬𑀯𑀝𑁆𑀞𑀺𑀢𑁄 𑀭𑀸𑀚𑀧𑀼𑀢𑁆𑀢𑀲𑁂𑀦𑀸𑀧𑀢𑀺𑀫𑀳𑀸𑀓𑀡𑀺𑀢𑁆𑀣𑀭𑀸𑀤𑀺, 𑀲𑁄 𑀫𑀳𑀸𑀫𑀢𑁆𑀢𑁄. 𑀫𑀳𑀢𑀻 𑀫𑀢𑁆𑀢𑀸 𑀧𑀭𑀺𑀘𑁆𑀙𑁂𑀤𑁄 𑀬𑀲𑁆𑀲 𑀫𑀳𑀸𑀫𑀢𑁆𑀢𑁄, 𑀭𑀽𑀧𑀪𑁂𑀤𑁂𑀦 𑀧𑀝𑁆𑀞𑀸𑀦𑀁 𑀓𑁆𑀮𑀻𑀯𑀁.

‘‘𑀧𑀓𑀢𑀺𑀬𑀁 𑀫𑀳𑀸𑀫𑀢𑁆𑀢𑁂, 𑀧𑀜𑁆𑀜𑀸𑀬𑀁 𑀧𑀭𑀫𑀢𑁆𑀢𑀦𑀺;

𑀦𑀧𑀼𑀁𑀲𑀓𑀁 𑀧𑀥𑀸𑀦𑀁 𑀢𑀁, 𑀏𑀓𑀢𑁆𑀢𑁂 𑀢𑀼’𑀢𑁆𑀢𑀫𑁂 𑀲𑀤𑀸’’𑀢𑀺.

𑀭𑀪𑀲𑁄 𑀘. ‘‘𑀫𑀳𑀸𑀫𑀢𑁆𑀢𑁄, 𑀧𑀝𑁆𑀞𑀸𑀦𑁄 𑀘𑀸’’𑀢𑀺 𑀢𑀼 𑀧𑀼𑀁𑀲𑀓𑀡𑁆𑀟𑁂 𑀯𑁄𑀧𑀸𑀮𑀺𑀢𑁄. 𑀧𑀓𑀝𑁆𑀞𑁂 𑀢𑀺𑀝𑁆𑀞𑀢𑀻𑀢𑀺 𑀧𑀝𑁆𑀞𑀸𑀦𑀁, 𑀬𑀼 [𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸 𑀝𑀻𑀓𑀸 𑁯𑁮𑁩, 𑁧𑁧𑁨𑁩 𑀕𑀸𑀣𑀸𑀲𑀼𑀧𑀺 𑀧𑀲𑁆𑀲𑀺𑀢𑀩𑁆𑀩𑀁].

𑀧𑀜𑁆𑀘𑀓𑀁 𑀫𑀦𑁆𑀢𑀺𑀦𑀺𑀫𑁆𑀳𑀺. 𑀫𑀢𑀺𑀧𑁆𑀧𑀥𑀸𑀦𑁄 𑀲𑀘𑀺𑀯𑁄 𑀲𑀳𑀸𑀬𑁄. 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀯𑀥𑀸𑀭𑀡𑀁 𑀫𑀦𑁆𑀢𑁄, 𑀢𑀁𑀬𑁄𑀕𑀸 𑀫𑀦𑁆𑀢𑀺𑀦𑀻. 𑀅𑀲𑁆𑀲𑀢𑁆𑀣𑁆𑀬𑀢𑁆𑀣𑁂 𑀇𑀦𑀻, 𑀅𑀣 𑀯𑀸 𑀫𑀦𑁆𑀢𑁂𑀦 𑀦𑀬𑀢𑀻𑀢𑀺 𑀫𑀦𑁆𑀢𑀺𑀦𑀻, 𑀅𑀣 𑀯𑀸 𑀫𑀦𑁆𑀢𑀬𑁄𑀕𑀸 𑀫𑀦𑁆𑀢𑀺, 𑀦𑁂𑀢𑀻𑀢𑀺 𑀦𑀻, 𑀫𑀦𑁆𑀢𑀺 𑀘 𑀦𑀻 𑀘𑀸𑀢𑀺 𑀫𑀦𑁆𑀢𑀺𑀦𑀻. ‘‘𑀫𑀢𑀺𑀲𑀘𑀺𑀯𑀫𑀦𑁆𑀢𑀺𑀦𑀻’’𑀢𑀺𑀧𑀺 𑀧𑀸𑀞𑁄, 𑀢𑀤𑀸 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀯𑀸 𑀤𑁆𑀯𑀦𑁆𑀤𑁄. 𑀭𑀜𑁆𑀜𑀸 𑀲𑀳 𑀚𑀻𑀯𑀢𑀻𑀢𑀺 𑀲𑀚𑀻𑀯𑁄. 𑀲𑀘𑀢𑁂 𑀲𑀫𑀯𑁂𑀢𑁄 𑀪𑀯𑀢𑀻𑀢𑀺 𑀲𑀘𑀺𑀯𑁄. 𑀲𑀘 𑀲𑀫𑀯𑀸𑀬𑁂, 𑀯𑁄, 𑀇𑀓𑀸𑀭𑀸𑀕𑀫𑁄 𑀘. 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀭𑀜𑁆𑀜𑀸 𑀫𑀦𑁆𑀢𑁂𑀦 𑀅𑀫𑀸 𑀲𑀳 𑀪𑀯𑀢𑀻𑀢𑀺 𑀅𑀫𑀘𑁆𑀘𑁄, 𑀅𑀫𑀸𑀲𑀤𑁆𑀤𑁄𑀬𑀁 𑀦𑀺𑀧𑀸𑀢𑁄 𑀲𑀳𑀢𑁆𑀣𑁂 𑀘𑁆𑀘𑀧𑀘𑁆𑀘𑀬𑁄. 𑀲𑀚𑀻𑀯𑀫𑀢𑁆𑀢𑁂 𑀘𑀸𑀫𑀘𑁆𑀘𑀲𑀤𑁆𑀤𑁄 𑀯𑀢𑁆𑀢𑀢𑀺. 𑀤𑁆𑀯𑀬𑀁 𑀲𑁂𑀦𑀸𑀧𑀢𑀺𑀫𑁆𑀳𑀺. 𑀲𑁂𑀦𑀁 𑀦𑀬𑀢𑀻𑀢𑀺 𑀲𑁂𑀦𑀸𑀦𑀻. 𑀘𑀫𑀽𑀦𑀁 𑀲𑁂𑀦𑀸𑀦𑀁 𑀧𑀢𑀺 𑀘𑀫𑀽𑀧𑀢𑀺.

𑁩𑁪𑁧. 𑀦𑁆𑀬𑀸𑀲𑀸𑀤𑀻𑀦𑀁 ¶ 𑀇𑀡𑀸𑀤𑀸𑀦𑀤𑀸𑀬𑀯𑀺𑀪𑀸𑀕𑀸𑀤𑀻𑀦𑀁 𑀯𑀺𑀯𑀸𑀤𑀸𑀦𑀁 𑀯𑁄𑀳𑀸𑀭𑀸𑀦𑀁 𑀉𑀧𑀤𑀝𑁆𑀞𑀭𑀺 𑀉𑀧𑀤𑀲𑁆𑀲𑀺𑀢𑁂 𑀅𑀓𑁆𑀔𑀤𑀲𑁆𑀲𑁄, 𑀅𑀓𑁆𑀔𑁂 𑀯𑁄𑀳𑀸𑀭𑁂 𑀧𑀲𑁆𑀲𑀢𑀻𑀢𑀺 𑀅𑀓𑁆𑀔𑀤𑀲𑁆𑀲𑁄, 𑀡𑁄, 𑀥𑀫𑁆𑀫𑀸𑀥𑀺𑀓𑀭𑀡𑀺𑀬𑁄. 𑀧𑀼𑀘𑁆𑀙𑀸𑀯𑀺𑀯𑀸𑀓𑁄, 𑀧𑀜𑁆𑀳𑀯𑀺𑀯𑀸𑀓𑁄𑀧𑁆𑀬𑀢𑁆𑀭.

𑀧𑀚𑁆𑀚𑀟𑁆𑀠𑀁 𑀧𑀝𑀺𑀳𑀸𑀭𑁂. 𑀤𑁆𑀯𑀸𑀭𑁂 𑀦𑀺𑀬𑀼𑀢𑁆𑀢𑁄 𑀤𑁄𑀯𑀸𑀭𑀺𑀓𑁄, 𑀡𑀺𑀓𑁄, 𑀑𑀓𑀸𑀭𑀸𑀕𑀫𑁄. 𑀧𑀝𑀺𑀳𑀭𑀢𑀺 𑀯𑀺𑀜𑁆𑀜𑀸𑀬𑀢𑀺 𑀢𑁂𑀦𑀸𑀢𑀺 𑀧𑀝𑀺𑀳𑀸𑀭𑁄, 𑀡𑁄. 𑀤𑁆𑀯𑀸𑀭𑁂 𑀢𑀺𑀝𑁆𑀞𑀢𑀻𑀢𑀺 𑀤𑁆𑀯𑀸𑀭𑀝𑁆𑀞𑁄, 𑀲𑀓𑀢𑁆𑀣𑁂 𑀓𑁄. 𑀤𑁆𑀯𑀸𑀭𑀧𑀸𑀮𑀓𑁄. 𑀤𑁆𑀯𑀸𑀭𑀝𑁆𑀞𑀺𑀢𑁄, 𑀤𑀲𑁆𑀲𑀓𑁄𑀧𑁆𑀬𑀢𑁆𑀭.

𑁩𑁪𑁨. 𑀭𑀸𑀚𑀽𑀦𑀁 𑀅𑀗𑁆𑀕𑀭𑀓𑁆𑀔𑀕𑀡𑁄 𑀅𑀦𑀻𑀓𑀝𑁆𑀞𑁄𑀢𑀺 𑀫𑀢𑁄. ‘‘𑀭𑀓𑁆𑀔𑀺𑀯𑀕𑁆𑀕𑁄 𑀢𑀼 𑀬𑁄 𑀭𑀜𑁆𑀜𑀁, 𑀲𑁄’𑀦𑀻𑀓𑀝𑁆𑀞𑁄’𑀪𑀺𑀥𑀻𑀬𑀢𑁂’’𑀢𑀺 𑀅𑀫𑀭𑀫𑀸𑀮𑀸𑀬𑀜𑁆𑀘, 𑀅𑀦𑀻𑀓𑁂𑀦 𑀲𑀫𑀽𑀳𑁂𑀦 𑀢𑀺𑀝𑁆𑀞𑀢𑀻𑀢𑀺 𑀅𑀦𑀻𑀓𑀝𑁆𑀞𑁄, 𑀡𑁄.

𑀤𑁆𑀯𑀬𑀁 𑀫𑀳𑀮𑁆𑀮𑀓𑁂. 𑀓𑀜𑁆𑀘𑀼𑀓𑀁 𑀘𑁄𑀴𑀁, 𑀢𑀁𑀬𑁄𑀕𑀸 𑀓𑀜𑁆𑀘𑀼𑀓𑀻. 𑀲𑁄𑀓𑀁 𑀯𑀺𑀦𑁆𑀤𑀢𑀻𑀢𑀺 𑀲𑁄𑀯𑀺𑀤𑀮𑁆𑀮𑁄. 𑀯𑀺𑀤 𑀮𑁄𑀪𑁂, 𑀮𑁄, 𑀓𑀮𑁄𑀧𑁄. 𑀣𑀸𑀧𑀢𑀺, 𑀲𑁄𑀯𑀺𑀤𑁄𑀧𑁆𑀬𑀢𑁆𑀭. 𑀤𑁆𑀯𑀬𑀁 𑀲𑁂𑀯𑀓𑁂. 𑀧𑀪𑀼𑀦𑁄 𑀧𑀘𑁆𑀙𑀸 𑀚𑀻𑀯𑀢𑀻𑀢𑀺 𑀅𑀦𑀼𑀚𑀻𑀯𑀻, 𑀡𑀻. 𑀲𑁂𑀯 𑀲𑁂𑀯𑀦𑁂, 𑀪𑀽, 𑀡𑁆𑀯𑀼. 𑀅𑀢𑁆𑀣𑀻𑀧𑁆𑀬𑀢𑁆𑀭. 𑀅𑀢𑁆𑀣 𑀬𑀸𑀘𑀦𑀸𑀬𑀁. 𑀅𑀢𑁆𑀣𑀦𑀫𑀢𑁆𑀣𑁄, 𑀆𑀲𑀻𑀲𑁄, 𑀢𑀁𑀬𑁄𑀕𑀸 𑀅𑀢𑁆𑀣𑀻.

𑁩𑁪𑁩. 𑀤𑁆𑀯𑀬𑀁 ¶ 𑀅𑀥𑀺𑀓𑀫𑀢𑁆𑀢𑁂. 𑀕𑀸𑀫𑁂𑀲𑀼 𑀅𑀥𑀺𑀓𑀢𑁆𑀢𑀸 𑀅𑀥𑀺𑀓𑀸 𑀇𑀓𑁆𑀔𑀸 𑀅𑀦𑀼𑀪𑀯𑀦𑀫𑁂𑀢𑀲𑁆𑀲 𑀅𑀚𑁆𑀛𑀓𑁆𑀔𑁄, 𑀇𑀲𑁆𑀲𑀢𑁆𑀢𑀁. 𑀅𑀥𑀺𑀓𑀁 𑀓𑀭𑁄𑀢𑀻𑀢𑀺 𑀅𑀥𑀺𑀓𑀢𑁄. 𑀇𑀤𑀁 𑀤𑁆𑀯𑀬𑀁 𑀣𑀸𑀬𑀼𑀓𑀕𑁄𑀧𑀸𑀦𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀦𑀸𑀫𑀁. 𑀢𑀢𑁆𑀭 𑀏𑀓𑀕𑀸𑀫𑁂 𑀅𑀥𑀺𑀓𑀢𑁄 𑀣𑀸𑀬𑀼𑀓𑁄, 𑀩𑀳𑀽𑀲𑀼 𑀕𑀸𑀫𑁂𑀲𑁆𑀯𑀥𑀺𑀓𑀢𑁄 𑀕𑁄𑀧𑁄. 𑀯𑀼𑀢𑁆𑀢𑀜𑁆𑀘𑀸𑀫𑀭𑀓𑁄𑀲𑁂 ‘‘𑀣𑀸𑀬𑀼𑀓𑁄𑀥𑀺𑀓𑀢𑁄 𑀕𑀸𑀫𑁂, 𑀕𑁄𑀧𑁄 𑀕𑀸𑀫𑁂𑀲𑀼 𑀪𑀽𑀭𑀺𑀲𑀽’’𑀢𑀺. [𑀅𑀫𑀭 𑁧𑁮.𑁭] 𑀭𑀼𑀤𑁆𑀤𑁂𑀦𑀸𑀧𑀺 𑀯𑀼𑀢𑁆𑀢𑀁 ‘‘𑀕𑀸𑀫𑁂𑀲𑁆𑀯𑀥𑀺𑀓𑀢𑁂 𑀕𑁄𑀧𑁄, 𑀕𑁄𑀝𑁆𑀞𑀚𑁆𑀛𑀓𑁆𑀔𑁂𑀧𑀺 𑀯𑀮𑁆𑀮𑀪𑁄’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁮.𑁭].

𑀤𑁆𑀯𑀬𑀁 𑀲𑀼𑀯𑀡𑁆𑀡𑀭𑀚𑀢𑀚𑁆𑀛𑀓𑁆𑀔𑀸𑀦𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀦𑀸𑀫𑀁. 𑀳𑀺𑀭𑀜𑁆𑀜𑀁 𑀯𑀼𑀘𑁆𑀘𑀢𑀺 𑀅𑀓𑀢𑀲𑀼𑀯𑀡𑁆𑀡𑀸𑀤𑀺, 𑀢𑀢𑁆𑀭 𑀦𑀺𑀬𑀼𑀢𑁆𑀢𑁄 𑀳𑁂𑀭𑀜𑁆𑀜𑀺𑀓𑁄. 𑀓𑀦 𑀤𑀺𑀢𑁆𑀢𑀺𑀕𑀢𑀺𑀓𑀦𑁆𑀢𑀻𑀲𑀼, 𑀦𑀺𑀧𑀼𑀩𑁆𑀩𑁄, 𑀔𑁄, 𑀦𑀺𑀓𑁆𑀔𑁄, 𑀲𑀼𑀯𑀡𑁆𑀡𑀸𑀤𑀺𑀯𑀺𑀓𑀸𑀭𑁄, 𑀢𑀢𑁆𑀭 𑀦𑀺𑀬𑁄𑀕𑁄 𑀦𑀺𑀓𑁆𑀔𑀺𑀓𑁄. 𑀯𑀺𑀲𑁂𑀲𑀢𑁄 𑀧𑀦 𑀲𑀼𑀯𑀡𑁆𑀡𑀚𑁆𑀛𑀓𑁆𑀔𑁂 𑀪𑁄𑀭𑀺𑀓𑁄. 𑀪𑀽𑀭𑀺𑀲𑀤𑁆𑀤𑁄 𑀲𑀼𑀯𑀡𑁆𑀡𑁂, 𑀢𑀁𑀬𑁄𑀕𑀸 𑀪𑁄𑀭𑀺𑀓𑁄. 𑀭𑀽𑀧𑁆𑀬𑀸𑀚𑁆𑀛𑀓𑁆𑀔𑁂𑀦𑀺𑀓𑁆𑀔𑀺𑀓𑁄, 𑀢𑀲𑁆𑀫𑀸’𑀬’𑀫𑀼𑀪𑀬𑀢𑁆𑀭𑀸𑀧𑀺 𑀳𑁂𑀭𑀜𑁆𑀜𑀺𑀓𑁄𑀢𑀺 𑀲𑀸𑀫𑀜𑁆𑀜𑀲𑁆𑀫𑀺𑀁𑀬𑁂𑀯. 𑀯𑀼𑀢𑁆𑀢𑀜𑁆𑀘 𑁋

‘‘𑀪𑁄𑀭𑀺𑀓𑁄 𑀓𑀦𑀓𑀸𑀚𑁆𑀛𑀓𑁆𑀔𑁄,

𑀭𑀽𑀧𑁆𑀬𑀸’𑀚𑁆𑀛𑀓𑁆𑀔𑁄 𑀢𑀼 𑀦𑀺𑀓𑁆𑀔𑀺𑀓𑁄’’𑀢𑀺 [𑀅𑀫𑀭 𑁧𑁮.𑁭].

𑀲𑀲𑁆𑀲 𑀅𑀢𑁆𑀢𑀦𑁄 𑀯𑀺𑀚𑀺𑀕𑀻𑀲𑀪𑀽𑀢𑀲𑁆𑀲 𑀤𑁂𑀲𑀸𑀦𑀦𑁆𑀢𑀭𑁄 𑀲𑀫𑀦𑁆𑀢𑀢𑁄 𑀫𑀡𑁆𑀟𑀮𑀻𑀪𑀽𑀢𑁄 𑀭𑀸𑀚𑀸 𑀲𑀢𑁆𑀢𑀼𑀭𑀼𑀘𑁆𑀘𑀢𑁂 𑀏𑀓𑀢𑁆𑀣𑀸𑀪𑀺𑀦𑀺𑀯𑁂𑀲𑀺𑀢𑀢𑁆𑀢𑀸. 𑀢𑀢𑁄 𑀧𑀭𑀁 𑀯𑀺𑀚𑀺𑀕𑀻𑀲𑀪𑀽𑀫𑁆𑀬𑁂𑀓𑀦𑁆𑀢𑀭𑀺𑀓𑁄 𑀫𑀺𑀢𑁆𑀢𑁄 𑀏𑀓𑀢𑁆𑀣𑀓𑀸𑀭𑀺𑀢𑁆𑀢𑀦𑁄𑀧𑀓𑀸𑀭𑀢𑁆𑀢𑀸. 𑀅𑀭𑀺𑀯𑀺𑀚𑀺𑀕𑀻𑀲𑀫𑀺𑀢𑁆𑀢𑀸𑀦𑀁 𑀧𑀦 𑀫𑀡𑁆𑀟𑀮𑀸𑀦𑀁 𑀩𑀳𑀺𑀪𑀽𑀢𑁄 𑀤𑀽𑀭𑀫𑀡𑁆𑀟𑀮𑀝𑁆𑀞𑁄 𑀯𑀺𑀚𑀺𑀕𑀻𑀲𑀪𑀽𑀫𑀺𑀬𑀸 𑀅𑀘𑁆𑀘𑀦𑁆𑀢𑀩𑁆𑀬𑀯𑀳𑀺𑀢𑁄 𑀩𑀮𑀸𑀥𑀺𑀓𑁄𑀧𑀺 𑀬𑁄 𑀦𑀸𑀧𑀓𑀭𑁄𑀢𑁆𑀬𑀼𑀧𑀓𑀸𑀭𑁄𑀢𑀺 𑀯𑀸, 𑀲 𑀉𑀤𑀸𑀲𑀻𑀦𑁄 𑀤𑀽𑀭𑀫𑀡𑁆𑀟𑀮𑀢𑁆𑀢𑁂𑀦𑁄𑀧𑀓𑀸𑀭𑀢𑁆𑀢𑀸. 𑀤𑀽𑀭𑀫𑀡𑁆𑀟𑀮𑁂 ¶ 𑀆𑀲𑀢𑀻𑀢𑀺 𑀉𑀤𑀸𑀲𑀻𑀦𑁄, 𑀉𑀧𑀼𑀩𑁆𑀩𑁄 𑀆𑀲 𑀉𑀧𑀲𑁂𑀯𑀦𑁂, 𑀬𑀼, 𑀅𑀲𑁆𑀲𑀺, 𑀤𑀸𑀕𑀫𑁄 𑀘. 𑀲𑀢𑁆𑀢𑀼𑀫𑀪𑀺𑀬𑀼𑀜𑁆𑀚𑀫𑀸𑀦𑀲𑁆𑀲 𑀯𑀺𑀚𑀺𑀕𑀻𑀲𑀲𑁆𑀲 𑀲𑀢𑁆𑀢𑀼𑀳𑀺𑀢𑀸𑀬 𑀬𑁄 𑀧𑀡𑁆𑀳𑀺𑀁 𑀕𑀡𑁆𑀳𑀢𑀺 𑀧𑀺𑀝𑁆𑀞𑀺𑀢𑁄 𑀯𑀢𑁆𑀢𑀢𑀺, 𑀲𑁄 𑀧𑀡𑁆𑀳𑀺𑀕𑁆𑀕𑀸𑀳𑁄. ‘‘𑀧𑀡𑁆𑀳𑀺 𑀧𑀘𑁆𑀙𑀸 𑀧𑀤𑀁 𑀯𑀺𑀚𑀺𑀕𑀻𑀲𑀲𑁆𑀲𑀸’’𑀢𑀺 𑀭𑀢𑀦𑀓𑁄𑀲𑁂. ‘‘𑀧𑀡𑁆𑀳𑀺𑀧𑀸𑀤𑁂 𑀩𑁆𑀬𑀽𑀳𑀧𑀺𑀝𑁆𑀞𑁂’’𑀢𑀺 [𑀢𑀺𑀓𑀡𑁆𑀟𑀲𑁂𑀲 𑁩.𑁩.𑁧𑁩𑁪] 𑀢𑀺𑀓𑀡𑁆𑀟𑀲𑁂𑀲𑁄. ‘‘𑀧𑀡𑁆𑀳𑀺 𑀧𑀘𑁆𑀙𑀺𑀫𑀪𑀸𑀕𑁂 𑀘, 𑀧𑀸𑀤𑀫𑀽𑀮𑁄𑀫𑀤𑀺𑀝𑁆𑀞𑀺𑀲𑀼. 𑀲𑁂𑀦𑀸𑀧𑀺𑀝𑁆𑀞𑁂 𑀓𑀼𑀫𑁆𑀪𑀺𑀬𑀜𑁆𑀘𑁂’’𑀢𑀺 𑀢𑀼 𑀦𑀸𑀦𑀢𑁆𑀣𑀲𑀗𑁆𑀕𑀳𑁂.

𑁩𑁪𑁪-𑁩𑁪𑁫. 𑀤𑀺𑀝𑁆𑀞𑀦𑁆𑀢𑀁 𑀭𑀺𑀧𑀼𑀫𑁆𑀳𑀺. 𑀫𑀺𑀢𑁆𑀢𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀫𑀺𑀢𑁆𑀢𑁄, 𑀭𑀧𑀢𑁆𑀬𑀯𑀡𑁆𑀡𑀁 𑀭𑀚𑀢𑁂𑀢𑀺 𑀭𑀺𑀧𑀼, 𑀉, 𑀇𑀢𑁆𑀢𑀁, 𑀭𑀧, 𑀮𑀧, 𑀚𑀧, 𑀚𑀧𑁆𑀧 𑀯𑀘𑀦𑁂 𑀯𑀸. 𑀯𑁂𑀭𑀁 𑀯𑀺𑀭𑁄𑀥𑁄 𑀬𑀲𑁆𑀲𑀢𑁆𑀣𑀻𑀢𑀺 𑀯𑁂𑀭𑀻, 𑀈, 𑀤𑀼𑀓𑁆𑀔𑀳𑁂𑀢𑀼𑀢𑁆𑀢𑀸 𑀲𑀧𑀢𑁆𑀢𑀺 𑀇𑀯 𑀲𑀧𑀢𑁆𑀢𑁄, 𑀇𑀯𑀢𑁆𑀣𑁂 𑀅𑀓𑀸𑀭𑀧𑀘𑁆𑀘𑀬𑁄. 𑀅𑀭 𑀕𑀫𑀦𑁂,𑀢𑀺, 𑀪𑀽𑀯𑀸𑀤𑀺𑀢𑁆𑀢𑀸 𑀆𑀕𑀫𑁄. 𑀲𑀤 𑀲𑀸𑀤𑀦𑁂, 𑀢𑀼, 𑀪𑀽𑀯𑀸𑀤𑀺, 𑀲𑀢𑁆𑀢𑀼, 𑀬𑀯𑀸𑀤𑀺𑀘𑀼𑀡𑁆𑀡𑁂𑀧𑀺. 𑀅𑀭 𑀕𑀫𑀦𑁂, 𑀯𑁂𑀭𑀫𑀭𑀢𑀻𑀢𑀺 𑀅𑀭𑀺, 𑀭𑀲𑁆𑀲𑀦𑁆𑀢𑁄 𑀇. 𑀲𑀧𑀢𑁆𑀢𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀤𑁆𑀯𑀦𑁆𑀤𑁄, ‘‘𑀩𑁆𑀬𑀜𑁆𑀚𑀦𑁄 𑀘 𑀯𑀺𑀲𑀁𑀬𑁄𑀕𑁄’’𑀢𑀺 𑀲𑀼𑀢𑁆𑀢𑁂 𑀘𑀕𑁆𑀕𑀳𑀡𑁂𑀦 𑀏𑀓𑀢𑀓𑀸𑀭𑀲𑁆𑀲 𑀮𑁄𑀧𑁄 𑀘. 𑀧𑀢𑀺𑀬𑀫𑀢𑁆𑀣𑀦𑀁 𑀧𑀘𑁆𑀘𑀢𑁆𑀣𑁄, 𑀢𑀁𑀬𑁄𑀕𑀸 𑀧𑀘𑁆𑀘𑀢𑁆𑀣𑀺𑀓𑁄, 𑀧𑀢𑀺𑀬𑀁 𑀯𑀺𑀧𑀭𑀻𑀢𑀕𑀫𑀦𑀁. 𑀧𑀦𑁆𑀣 𑀕𑀢𑀺𑀬𑀁, 𑀘𑀼𑀭𑀸𑀤𑀺. 𑀧𑀭𑀺𑀧𑀦𑁆𑀣𑁄 𑀧𑀭𑀺𑀲𑁆𑀲𑀯𑀝𑁆𑀞𑀸𑀦𑀁, 𑀢𑀁𑀬𑁄𑀕𑀸 𑀧𑀭𑀺𑀧𑀦𑁆𑀣𑀻. 𑀧𑀝𑀺𑀯𑀺𑀭𑀼𑀤𑁆𑀥𑁄 𑀧𑀓𑁆𑀔𑁄 𑀲𑀳𑀸𑀬𑁄 𑀧𑀝𑀺𑀧𑀓𑁆𑀔𑁄, 𑀢𑀣𑀸 𑀯𑀺𑀧𑀓𑁆𑀔𑁄. 𑀦 𑀳𑀺𑀢𑁄 𑀅𑀳𑀺𑀢𑁄. 𑀳𑀺𑀁𑀲𑀸𑀬𑀁 𑀭𑀫𑀢𑀻𑀢𑀺 [𑀧𑀭𑀢𑀻𑀢𑀺 (?)] 𑀧𑀭𑁄, 𑀓𑁆𑀯𑀺. 𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀅𑀫𑀢𑀺 𑀕𑀘𑁆𑀙𑀢𑀻𑀢𑀺 𑀧𑀘𑁆𑀘𑀸𑀫𑀺𑀢𑁆𑀢𑁄, 𑀅𑀫 𑀕𑀫𑀦𑁂, 𑀢𑁄, 𑀤𑁆𑀯𑀺𑀢𑁆𑀢𑀁. 𑀦𑀢𑁆𑀣𑀺 𑀏𑀢𑀲𑁆𑀫𑀸 𑀈𑀢𑀺 𑀉𑀧𑀤𑁆𑀤𑀯𑁄𑀢𑀺 𑀅𑀦𑀻𑀢𑁄 ¶ , 𑀫𑀺𑀢𑁆𑀢𑁄, 𑀢𑀧𑁆𑀧𑀝𑀺𑀧𑀓𑁆𑀔𑁄 𑀧𑀘𑁆𑀘𑀦𑀻𑀢𑁄, 𑀲𑁄 𑀏𑀯 𑀧𑀘𑁆𑀘𑀦𑀻𑀓𑁄, 𑀢𑀲𑁆𑀲 𑀓𑁄, 𑀬𑀣𑀸 𑀦𑀺𑀬𑀓𑁄. 𑀯𑀺𑀭𑁄𑀥𑁄𑀲𑁆𑀲𑀢𑁆𑀣𑀻𑀢𑀺 𑀯𑀺𑀭𑁄𑀥𑀻, 𑀈. 𑀤𑀺𑀲, 𑀤𑀼𑀲 𑀅𑀧𑁆𑀧𑀻𑀢𑀺𑀬𑀁, 𑀤𑀺𑀯𑀸𑀤𑀺. 𑀯𑀺𑀤𑀼𑀲𑁆𑀲𑀦𑀲𑀻𑀮𑀢𑀸𑀬 𑀯𑀺𑀤𑁆𑀤𑁂𑀲𑀻, 𑀤𑁆𑀯𑀺𑀢𑁆𑀢𑀁, 𑀇𑀲𑁆𑀲𑁂𑀢𑁆𑀢𑀁. 𑀤𑀼𑀲𑁆𑀲𑀢𑀻𑀢𑀺 𑀤𑀺𑀲𑁄, 𑀅. 𑀢𑀧𑀘𑁆𑀘𑀬𑁂 𑀤𑀺𑀝𑁆𑀞𑁄, 𑀥𑀸𑀢𑁆𑀯𑀦𑁆𑀢𑁂𑀦 𑀲𑀳 𑀝𑁆𑀞𑀸𑀤𑁂𑀲𑁄. 𑀤𑁆𑀯𑁂𑀲𑀡𑁄, 𑀤𑀼𑀳𑀤𑀬𑁄, 𑀤𑀲𑁆𑀲𑀼, 𑀲𑀸𑀢𑁆𑀢𑀯𑁄, 𑀅𑀪𑀺𑀖𑀸𑀢𑀻𑀧𑁆𑀬𑀢𑁆𑀭.

𑀤𑁆𑀯𑀬𑀁 𑀅𑀦𑀼𑀓𑀽𑀮𑀦𑁂. 𑀅𑀦𑀼𑀭𑁄𑀥𑀦𑀁 𑀅𑀦𑀼𑀭𑁄𑀥𑁄, 𑀡𑁄. 𑀭𑀼𑀥 𑀆𑀯𑀭𑀡𑁂. 𑀅𑀦𑀼𑀭𑀽𑀧𑀁 𑀧𑀯𑀢𑁆𑀢𑀦𑀁 𑀅𑀦𑀼𑀯𑀢𑁆𑀢𑀦𑀁, 𑀯𑀢𑀼 𑀯𑀢𑁆𑀢𑀦𑁂, 𑀪𑀽, 𑀬𑀼.

𑁩𑁪𑁬. 𑀧𑀜𑁆𑀘𑀓𑀁 𑀫𑀺𑀢𑁆𑀢𑀲𑀸𑀫𑀜𑁆𑀜𑁂. 𑀫𑀺𑀤 𑀲𑁆𑀦𑁂𑀳𑁂, 𑀪𑀽𑀯𑀸𑀤𑀺, 𑀢𑁄, 𑀯𑀬𑀲𑀸 𑀢𑀼𑀮𑁆𑀬𑁄 𑀯𑀬𑀲𑁄, 𑀫𑀽𑀮𑀯𑀬𑁄𑀲𑀤𑁆𑀤𑁂𑀳𑀺 𑀲𑀜𑁆𑀜𑀸𑀬𑀁 𑀲𑀧𑀘𑁆𑀘𑀬𑁄 [𑀬𑀧𑀘𑁆𑀘𑀬𑁄 (?) 𑀧𑀸𑀡𑀺𑀦𑀺 𑁪.𑁪.𑁯𑁧 𑀲𑀼𑀢𑁆𑀢𑀁 𑀧𑀲𑁆𑀲𑀺𑀢𑀩𑁆𑀩𑀁], 𑀲𑀩𑁆𑀩𑀓𑀸𑀭𑀺𑀬𑁂𑀲𑀼 𑀲𑀳 𑀯𑀬𑀢𑀻𑀢𑀺 𑀯𑀸 𑀯𑀬𑀲𑁄, 𑀯𑀬 𑀕𑀫𑀦𑁂, 𑀲𑀳𑀲𑁆𑀲 𑀲𑁄 𑀯𑀡𑁆𑀡𑀯𑀺𑀧𑀭𑀺𑀬𑀬𑁄. 𑀲𑀳 𑀅𑀬𑀢𑀺 𑀓𑀺𑀘𑁆𑀘𑁂𑀲𑀽𑀢𑀺 𑀲𑀳𑀸𑀬𑁄, 𑀅𑀬 𑀕𑀫𑀦𑁂, 𑀲𑀳𑀲𑁆𑀲 𑀲𑀸𑀪𑀸𑀯𑁄, 𑀬𑀣𑀸 𑀲𑀳𑀥𑀫𑁆𑀫𑀺𑀓𑁄. 𑀲𑀳 𑀯𑀸 𑀳𑀸𑀦𑀺, 𑀅𑀬𑁄 𑀯𑀸 𑀯𑀼𑀟𑁆𑀠𑀺 𑀬𑀲𑁆𑀲 𑀲𑀳𑀸𑀬𑁄, 𑀢𑀺𑀧𑀤𑀩𑀳𑀼𑀩𑁆𑀩𑀻𑀳𑀺, 𑀬𑀣𑀸 𑀧𑀭𑀓𑁆𑀓𑀫𑀸𑀥𑀺𑀕𑀢𑀲𑀫𑁆𑀧𑀤𑀸. 𑀅𑀣 𑀯𑀸 𑀳𑀸𑀦𑀺 𑀘 𑀆𑀬𑁄 𑀘 𑀳𑀸𑀬𑀸, 𑀦𑀺𑀮𑁄𑀧𑁄, 𑀢𑁂 𑀬𑀲𑁆𑀲 𑀅𑀢𑁆𑀣𑀺, 𑀲𑁄 𑀲𑀳𑀸𑀬𑁄, ‘‘𑀲𑀧𑀓𑁆𑀔𑀓𑁄, 𑀲𑀮𑁄𑀫𑀓𑁄’’𑀢𑁆𑀬𑀸𑀤𑀻𑀲𑀼 𑀯𑀺𑀬 𑀲𑀲𑀤𑁆𑀤𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀣𑀢𑁆𑀢𑀸. 𑀲𑀼𑀦𑁆𑀤𑀭𑀁 𑀳𑀤𑀬𑀫𑁂𑀢𑀲𑁆𑀲𑀸𑀢𑀺 𑀲𑀼𑀳𑀤𑀬𑁄, 𑀅𑀮𑁄𑀧𑁄, 𑀤𑁆𑀬𑀲𑁆𑀲 𑀚𑁄, 𑀲𑁄𑀯 𑀲𑀼𑀳𑀚𑁆𑀚𑁄. 𑀲𑀳 𑀧𑀭𑀺𑀲𑀳𑀦𑁂. 𑀧𑀭𑀺𑀲𑀳𑀦𑀁 𑀅𑀤𑀼𑀲𑁆𑀲𑀦𑀁, 𑀔𑁄, 𑀳𑀮𑁄𑀧𑁄, 𑀲𑀔𑀸, 𑀭𑀸𑀚𑀸𑀤𑀺, 𑀲𑀫𑀸𑀦𑁄 𑀔𑁆𑀬𑀸𑀢𑁄 𑀧𑀢𑀻𑀢𑁄 𑀯𑀸 𑀲𑀔𑀸, 𑀬𑀮𑁄𑀧𑁄, 𑀲𑀫𑀸𑀦𑀲𑁆𑀲 ¶ 𑀘 𑀲𑀪𑀸𑀯𑁄. 𑀲𑀺𑀦𑀺𑀤𑁆𑀥𑁄, 𑀲𑁆𑀦𑀺𑀤𑁆𑀥𑁄, 𑀲𑀯𑀬𑁄𑀧𑁆𑀬𑀢𑁆𑀭. 𑀲𑀔𑁆𑀬𑀲𑀢𑁆𑀢𑀧𑀤𑀺𑀦𑀸 𑀧𑀦 𑀫𑁂𑀢𑁆𑀢𑀺𑀬𑀁 𑀯𑀢𑁆𑀢𑀦𑁆𑀢𑀺. 𑀲𑀔𑀺𑀫𑁆𑀳𑀺 𑀪𑀯𑀁 𑀲𑀔𑁆𑀬𑀁. 𑀲𑀢𑁆𑀢𑀳𑀺 𑀧𑀤𑁂𑀳𑀺 𑀅𑀯𑀕𑀫𑁆𑀬𑀢𑁂𑀢𑀺 𑀲𑀢𑁆𑀢𑀧𑀤𑀺𑀦𑀁 [𑀲𑀢𑁆𑀢𑀧𑀤𑀻𑀦 (𑀅𑀫𑀭 𑁧𑁮.𑁧𑁨)], 𑀇𑀦𑁄.

𑀤𑁆𑀯𑀬𑀁 𑀅𑀪𑁂𑀚𑁆𑀚𑀫𑀺𑀢𑁆𑀢𑁂. 𑀲𑀩𑁆𑀩𑀓𑀸𑀮𑀁 𑀪𑀚𑀢𑀻𑀢𑀺 𑀲𑀫𑁆𑀪𑀢𑁆𑀢𑁄, 𑀪𑀚 𑀲𑁂𑀯𑀸𑀬𑀁, 𑀪𑀽𑀯𑀸𑀤𑀺. 𑀤𑀴𑁆𑀳𑁄 𑀣𑀺𑀭𑁄 𑀫𑀺𑀢𑁆𑀢𑁄 𑀤𑀴𑁆𑀳𑀫𑀺𑀢𑁆𑀢𑁄. 𑀤𑁆𑀯𑀬𑀁 𑀤𑀺𑀝𑁆𑀞𑀫𑀢𑁆𑀢𑀫𑀺𑀢𑁆𑀢𑁂. 𑀓𑀺𑀜𑁆𑀘𑀺 𑀓𑀸𑀮𑀁 𑀧𑀲𑁆𑀲𑀺𑀢𑀩𑁆𑀩𑁄𑀢𑀺 𑀲𑀦𑁆𑀤𑀺𑀝𑁆𑀞𑁄. 𑀲𑀁𑀲𑀤𑁆𑀤𑁄𑀬𑀫𑀧𑁆𑀧𑀢𑁆𑀣𑁄. 𑀤𑀺𑀲 𑀧𑁂𑀓𑁆𑀔𑀦𑁂, 𑀤𑀲𑁆𑀲𑀦𑀁 𑀤𑀺𑀝𑁆𑀞𑀁, 𑀢𑀁 𑀫𑀢𑁆𑀢𑀸 𑀧𑀫𑀸𑀡𑀫𑁂𑀢𑀲𑁆𑀲 𑀤𑀺𑀝𑁆𑀞𑀫𑀢𑁆𑀢𑀓𑁄, 𑀲𑀓𑀢𑁆𑀣𑁂 𑀓𑁄.

𑁩𑁪𑁭. 𑀤𑁆𑀯𑀬𑀁 𑀘𑀭𑀧𑀼𑀭𑀺𑀲𑁂 𑀢𑀸𑀧𑀲𑀸𑀤𑀺𑀭𑀽𑀧𑁂𑀦 𑀘𑀭𑀫𑀢𑁆𑀢𑁂. 𑀘𑀭𑀢𑀺 𑀚𑀸𑀦𑀸𑀢𑀺 𑀧𑀭𑀘𑀓𑁆𑀓𑀦𑁆𑀢𑀺 𑀘𑀭𑁄, 𑀅, 𑀘𑀸𑀭𑁄𑀧𑀺, 𑀡𑁄. 𑀕𑀼𑀴𑁆𑀳𑀧𑀼𑀭𑀺𑀲𑁄 𑀕𑀼𑀢𑁆𑀢𑀧𑀼𑀭𑀺𑀲𑁄. 𑀬𑀣𑀸𑀭𑀳𑀯𑀡𑁆𑀡𑁄, 𑀧𑀡𑀺𑀥𑀺, 𑀅𑀧𑁆𑀧𑀲𑀧𑁄, 𑀨𑀲𑁆𑀲𑁄𑀧𑁆𑀬𑀢𑁆𑀭. 𑀢𑀢𑁆𑀭𑀸𑀤𑀺𑀤𑁆𑀯𑀬𑀁 𑀯𑀸𑀡𑀺𑀚𑀓𑀲𑀺𑀩𑀮𑀮𑀺𑀗𑁆𑀕𑀪𑀺𑀓𑁆𑀔𑀼𑀓𑀘𑁆𑀘𑀸𑀬𑀦𑀸𑀤𑀺𑀮𑁂𑀲𑁂𑀦 𑀣𑀸𑀬𑀺𑀦𑀺𑀘𑀭𑁂. 𑀇𑀢𑀭𑁂 𑀇𑀥𑀸𑀕𑀢𑀲𑀤𑀺𑀲𑀢𑁆𑀣𑁂. 𑀯𑀡𑁆𑀡𑁄 𑀧𑀓𑀸𑀭𑁄, 𑀬𑀣𑀸𑀭𑀳𑀯𑀡𑁆𑀡𑁄 𑀬𑀣𑀸𑀭𑀳𑀧𑁆𑀧𑀓𑀸𑀭𑁄. 𑀬𑁂𑀦 𑀧𑀭𑀘𑀓𑁆𑀓𑀁 𑀲𑀓𑁆𑀓𑀸 𑀜𑀸𑀢𑀼𑀁 𑀢𑀧𑁆𑀧𑀓𑀸𑀭𑀯𑀸 𑀇𑀘𑁆𑀘𑀢𑁆𑀣𑁄. 𑀧𑀡𑀺𑀥𑀺𑀬𑁆𑀬𑀢𑁂 𑀜𑁂𑀬𑁆𑀬𑀫𑀲𑁆𑀫𑀺𑀁 𑀧𑀡𑀺𑀥𑀺, 𑀇. 𑀅𑀧𑀓𑀝𑁆𑀞𑀁 𑀲𑀧𑁆𑀧𑀢𑀺 𑀘𑀭𑀢𑀻𑀢𑀺 𑀅𑀧𑀲𑀧𑁆𑀧𑁄, 𑀅. 𑀨𑀼𑀲 𑀩𑀸𑀥𑀦𑀨𑀼𑀲𑀦𑁂𑀲𑀼, 𑀅, 𑀨𑀲𑁆𑀲𑁄.

𑀢𑀺𑀓𑀁 𑀧𑀣𑀺𑀓𑁂. 𑀧𑀣𑁂 𑀕𑀘𑁆𑀙𑀢𑀻𑀢𑀺 𑀧𑀣𑀸𑀯𑀻, 𑀯𑀻, 𑀤𑀻𑀖𑁄. 𑀇𑀓𑁄, 𑀧𑀣𑀺𑀓𑁄. 𑀅𑀤𑁆𑀥𑀦𑀺 𑀫𑀕𑁆𑀕𑁂 𑀕𑀘𑁆𑀙𑀢𑀺 𑀲𑀻𑀮𑁂𑀦𑀸𑀢𑀺 𑀅𑀤𑁆𑀥𑀕𑀽. 𑀅𑀤𑁆𑀥𑀕𑁄𑀧𑁆𑀬𑀢𑁆𑀭.

𑀤𑁆𑀯𑀬𑀁 𑀤𑀽𑀢𑁂. 𑀤𑀼 𑀧𑀭𑀺𑀢𑀸𑀧𑁂, 𑀢𑁄. 𑀲𑀦𑁆𑀤𑁂𑀲𑀁 𑀯𑀸𑀘𑀺𑀓𑀁 𑀳𑀭𑀢𑁆𑀬𑀦𑁂𑀦𑁂𑀢𑀺 [𑀳𑀭𑀢𑀻𑀢𑀺 (?)].

𑀤𑁆𑀯𑀬𑀁 ¶ 𑀚𑁄𑀢𑀺𑀲𑀺𑀓𑁂. 𑀕𑀡𑀬𑀢𑀻𑀢𑀺 𑀕𑀡𑀓𑁄, 𑀡𑁆𑀯𑀼. 𑀫𑀼𑀳𑀼𑀢𑁆𑀢𑀁 𑀓𑀸𑀮𑀯𑀺𑀲𑁂𑀲𑀁 𑀚𑀸𑀦𑀸𑀢𑀻𑀢𑀺 𑀫𑀼𑀳𑀼𑀢𑁆𑀢𑀺𑀓𑁄, 𑀯𑀸𑀕𑁆𑀕𑀳𑀡𑁂𑀦 𑀦 𑀯𑀼𑀤𑁆𑀥𑀺. 𑀲𑀁𑀯𑀘𑁆𑀙𑀭𑁄, 𑀚𑁄𑀢𑀺𑀲𑀺𑀓𑁄, 𑀤𑁂𑀯𑀜𑁆𑀜𑀽, 𑀫𑁄𑀳𑀼𑀢𑁆𑀢𑁄, 𑀜𑀸𑀡𑀺𑀓𑁄, 𑀓𑀸𑀢𑀦𑁆𑀢𑀺𑀓𑁄𑀧𑁆𑀬𑀢𑁆𑀭. 𑀓𑀢𑀦𑁆𑀢𑁄 𑀤𑁂𑀯𑀫𑀢𑁆𑀢𑀁, 𑀢𑀁 𑀚𑀸𑀦𑀸𑀢𑀻𑀢𑀺 𑀓𑀸𑀢𑀦𑁆𑀢𑀺𑀓𑁄.

𑁩𑁪𑁮. 𑀤𑁆𑀯𑀬𑀁 𑀮𑁂𑀔𑀓𑁂. 𑀮𑀺𑀔 𑀮𑁂𑀔𑀦𑁂, 𑀪𑀽, 𑀡𑁆𑀯𑀼. 𑀮𑀺𑀧𑁂𑀦 𑀫𑀲𑁆𑀬𑁄𑀧𑀤𑁂𑀲𑁂𑀦 𑀪𑀯𑀢𑀻𑀢𑀺 𑀮𑀺𑀧𑀺, 𑀇, 𑀯𑀡𑁆𑀡𑀲𑀡𑁆𑀞𑀸𑀦𑁄, 𑀢𑀁 𑀓𑀭𑁄𑀢𑀻𑀢𑀺 𑀮𑀺𑀧𑀺𑀓𑀸𑀭𑁄. 𑀅𑀓𑁆𑀔𑀭𑀘𑀡𑁄, 𑀅𑀓𑁆𑀔𑀭𑀘𑀼𑀜𑁆𑀘𑀼𑀧𑁆𑀬𑀢𑁆𑀭. 𑀘𑀦 𑀤𑀸𑀦𑁂, 𑀪𑀽. 𑀘𑀜𑁆𑀘𑀼 𑀕𑀢𑀺𑀬𑀁.

𑀫𑁂𑀮𑀸𑀦𑀦𑁆𑀤𑀸 𑀫𑀲𑀺𑀫𑀡𑀺, 𑀫𑁂𑀮𑀦𑁆𑀥𑀼 𑀯𑀡𑁆𑀡𑀓𑀽𑀧𑀺𑀓𑀸;

𑀫𑀲𑀺𑀚𑀮𑀦𑁆𑀢𑀼 𑀫𑁂𑀮𑀸 𑀘, 𑀧𑀢𑁆𑀢𑀜𑁆𑀚𑀦𑀁 𑀫𑀲𑀺 𑀤𑁆𑀯𑀺𑀲𑀼.

𑀮𑁂𑀔𑀦𑀻 𑀯𑀡𑁆𑀡𑀢𑀽𑀮𑀻 𑀘, 𑀯𑀡𑁆𑀡𑀓𑀓𑁆𑀔𑀭𑀢𑀽𑀮𑀺𑀓𑀸;

𑀯𑀡𑁆𑀡𑀤𑀽𑀢𑁄 𑀲𑁄𑀢𑁆𑀣𑀺𑀫𑀼𑀔𑁄, 𑀮𑁂𑀔𑁄 𑀯𑀸𑀘𑀺𑀓𑀳𑀸𑀭𑀓𑁄.

𑀓𑀸𑀘𑀦𑀓𑀺𑀢𑀮𑀺𑀓𑁄 𑀘, 𑀓𑀸𑀘𑀦𑀁 𑀢𑀦𑁆𑀦𑀺𑀩𑀦𑁆𑀥𑀦𑀁;

𑀮𑁂𑀔𑁆𑀬𑀝𑁆𑀞𑀸𑀦𑀁 𑀕𑀦𑁆𑀣𑀓𑀼𑀝𑀺, 𑀫𑀼𑀤𑁆𑀤𑀸 𑀧𑀘𑁆𑀘𑀬𑀓𑀸𑀭𑀺𑀦𑀻 [𑀢𑀺𑀓𑀡𑁆𑀟𑀲𑁂𑀲 𑁨.𑁮.𑁨𑁭, 𑁨𑁮, 𑁨𑁯].

𑀤𑁆𑀯𑀬𑀁 𑀯𑀡𑁆𑀡𑁂. 𑀯𑀡𑁆𑀡𑀻𑀬𑀢𑀺 𑀧𑀓𑀸𑀲𑀻𑀬𑀢𑀺 𑀅𑀢𑁆𑀣𑁄 𑀬𑁂𑀦, 𑀲𑁄 𑀯𑀡𑁆𑀡𑁄, 𑀯𑀡𑁆𑀡 𑀧𑀓𑀸𑀲𑀦𑁂. 𑀦 𑀔𑀭𑀢𑀺 𑀦 𑀔𑀻𑀬𑀢𑀻𑀢𑀺 𑀅𑀓𑁆𑀔𑀭𑁄, 𑀔𑀭 𑀯𑀺𑀦𑀸𑀲𑁂, 𑀔𑀺 𑀔𑀬𑁂 𑀯𑀸, 𑀢𑀤𑀸 𑀅𑀭𑁄. 𑀮𑀺𑀔𑀦𑀁, 𑀮𑀺𑀧𑀺, 𑀮𑀺𑀔𑀺 𑀇𑀫𑁂 𑀯𑀡𑁆𑀡𑀲𑀡𑁆𑀞𑀸𑀦𑁂 𑀯𑀢𑁆𑀢𑀦𑁆𑀢𑀺. 𑀮𑀺𑀧𑀺𑀮𑀺𑀔𑀺𑀬𑁄 𑀇𑀢𑁆𑀣𑀺𑀬𑀁.

𑀪𑁂𑀤𑀸𑀤𑀬𑁄 𑀇𑀫𑁂 𑀘𑀢𑀼𑀭𑁄 𑀉𑀧𑀸𑀬𑀸 𑀲𑀢𑁆𑀢𑀼𑀯𑀺𑀚𑀬𑀓𑀸𑀭𑀡𑀸𑀦𑀺. 𑀲𑀢𑁆𑀢𑀼𑀯𑀺𑀚𑀬𑀫𑀼𑀧𑀕𑀘𑁆𑀙𑀦𑁆𑀢𑀺 𑀏𑀢𑁂𑀳𑀻𑀢𑀺 𑀉𑀧𑀸𑀬𑀸. 𑀧𑀭𑀲𑁆𑀫𑀸 𑀯𑀺𑀲𑀺𑀮𑁂𑀲𑀦𑀁 𑀪𑁂𑀤𑁄.

𑀲𑁆𑀦𑁂𑀳𑀭𑀸𑀕𑀸𑀧𑀦𑀬𑀦𑀁 ¶ , 𑀲𑀁𑀳𑀸𑀲𑁄𑀧𑁆𑀧𑀸𑀤𑀦𑀁 𑀢𑀣𑀸;

𑀲𑀦𑁆𑀢𑀚𑁆𑀚𑀦𑀜𑁆𑀘 𑀪𑁂𑀤𑁄𑀬𑀁, 𑀯𑀺𑀜𑁆𑀜𑀽𑀳𑀺 𑀢𑀺𑀯𑀺𑀥𑁄 𑀫𑀢𑁄 [𑀓𑀸𑀫𑀦𑁆𑀤𑀓𑀻𑀬𑀦𑀻𑀢𑀺𑀲𑀸𑀭 𑁧𑁭.𑁮].

𑀢𑀢𑁆𑀭𑀸𑀬𑀁 𑀢𑀯𑀸𑀦𑀼𑀕𑁆𑀕𑀢𑁂𑀦 𑀧𑀯𑀼𑀤𑁆𑀥𑁄 𑀧𑀸𑀲𑀸𑀤𑀢𑀭𑀯𑁄 𑀯𑀺𑀬 𑀅𑀢𑁆𑀢𑀸𑀦𑀜𑁆𑀘𑁄𑀘𑁆𑀙𑀺𑀦𑁆𑀤𑀺𑀲𑁆𑀲𑀢𑀻𑀢𑀺 𑀲𑀗𑁆𑀓𑀸𑀬𑀁 𑀚𑀦𑀺𑀢𑀸𑀬𑀁 𑀲𑁆𑀦𑁂𑀳𑀪𑀢𑁆𑀢𑀺𑀜𑁆𑀘𑀸𑀧𑀦𑀬𑀢𑀺. 𑀅𑀪𑀺𑀪𑀯𑀦𑀜𑁆𑀘𑁄𑀧𑀸𑀤𑀬𑀢𑀺 [𑀧𑀤𑁆𑀥𑀜𑁆𑀘𑁄𑀧𑀸𑀤𑀬𑀢𑀺 (𑀓.)]. 𑀅𑀜𑁆𑀜𑀲𑁆𑀲 𑀘 𑀧𑀭𑀺𑀬𑀧𑀘𑁆𑀘𑀸𑀫𑀺𑀢𑁆𑀢𑀸𑀦𑀼𑀕𑁆𑀕𑀳𑀡𑀲𑁆𑀲 𑀫𑀭𑀡𑀫𑁂𑀯𑀦𑁆𑀢𑁄 𑀪𑀯𑀺𑀲𑁆𑀲𑀢𑀻𑀢𑁆𑀬𑁂𑀯𑀁𑀧𑀓𑀸𑀭𑀫𑀪𑀺𑀪𑀬𑀦𑀁 𑀲𑀦𑁆𑀢𑀚𑁆𑀚𑀦𑀁.

𑀯𑀥𑁄𑀢𑁆𑀣𑀕𑁆𑀕𑀳𑀡𑀜𑁆𑀘𑁂𑀯, 𑀧𑀭𑀺𑀓𑁆𑀮𑁂𑀲𑁄 𑀢𑀣𑁂𑀯 𑀘;

𑀇𑀢𑀺 𑀤𑀡𑁆𑀟𑀯𑀺𑀥𑀜𑁆𑀜𑀽𑀳𑀺, 𑀤𑀡𑁆𑀟𑁄𑀧𑀺 𑀢𑀺𑀯𑀺𑀥𑁄 𑀫𑀢𑁄 [𑀓𑀸𑀫𑀦𑁆𑀤𑀓𑀻𑀬𑀦𑀻𑀢𑀺𑀲𑀸𑀭 𑁧𑁭.𑁯].

𑀧𑀭𑀺𑀓𑁆𑀮𑁂𑀲𑁄 𑀩𑀦𑁆𑀥𑀦𑀢𑀸𑀴𑀦𑀸𑀤𑀺.

𑀅𑀜𑁆𑀜𑀫𑀜𑁆𑀜𑁄𑀧𑀓𑀸𑀭𑀸𑀦𑀁, 𑀤𑀲𑁆𑀲𑀦𑀁 𑀕𑀼𑀡𑀓𑀺𑀢𑁆𑀢𑀦𑀁;

𑀲𑀫𑁆𑀩𑀦𑁆𑀥𑀲𑁆𑀲 𑀲𑀫𑀓𑁆𑀔𑀸𑀦𑀁, 𑀆𑀬𑀢𑀺𑀁 𑀲𑀫𑁆𑀧𑀓𑀸𑀲𑀦𑀁.

𑀯𑀸𑀘𑀸 𑀧𑁂𑀲𑀮𑀬𑀸 𑀲𑀸𑀥𑀼, 𑀢𑀯𑀸𑀳𑀫𑀺𑀢𑀺 𑀘𑀧𑁆𑀧𑀡𑀁;

𑀇𑀢𑀺 𑀲𑀸𑀫𑀯𑀺𑀥𑀜𑁆𑀜𑀽𑀳𑀺, 𑀲𑀸𑀫𑀁 𑀧𑀜𑁆𑀘𑀯𑀺𑀥𑀁 𑀫𑀢𑀁 [𑀓𑀸𑀫𑀦𑁆𑀤𑀓𑀻𑀬𑀦𑀻𑀢𑀺𑀲𑀸𑀭 𑁧𑁭.𑁪-𑁫].

‘‘𑀅𑀲𑁆𑀫𑀺𑀁 𑀏𑀯𑀁 𑀓𑀢𑁂 𑀇𑀤𑀁 𑀅𑀫𑁆𑀳𑀸𑀓𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀲𑀸𑀤𑀲𑁆𑀲𑀦𑀁 𑀆𑀬𑀢𑀺𑀲𑀫𑁆𑀧𑀓𑀸𑀲𑀦𑀁. 𑀅𑀧𑁆𑀧𑀡𑀫𑀺𑀢𑁆𑀬𑀗𑁆𑀕𑀲𑁆𑀲 𑀤𑀸𑀦𑀁.

𑀤𑀸𑀦𑀜𑁆𑀘 𑀧𑀜𑁆𑀘𑀥𑀸 𑀲𑀸𑀭𑀲𑁆𑀲𑀸𑀲𑀸𑀭𑀲𑁆𑀲 𑀘 𑀤𑀩𑁆𑀩𑀲𑁆𑀲 𑀕𑀳𑀺𑀢𑀲𑁆𑀲 𑀲𑀫𑀧𑁆𑀧𑀡𑀁, 𑀢𑀣𑀸𑀕𑀳𑀺𑀢𑀲𑁆𑀲𑀸𑀦𑀼𑀫𑁄𑀤𑀦𑀁, 𑀢𑀣𑀸 𑀅𑀧𑀼𑀩𑁆𑀩𑀤𑀸𑀦𑀁, 𑀢𑀣𑀸 ‘‘𑀅𑀫𑀼𑀲𑁆𑀲 𑀤𑀩𑁆𑀩𑀁 𑀕𑀡𑁆𑀳𑀸𑀳𑀺, 𑀢𑀣𑁂𑀯 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀭𑀲𑁂𑀲𑀼 𑀲𑀬𑀁 𑀕𑀸𑀳𑀧𑁆𑀧𑀯𑀢𑁆𑀢𑀦𑀁, 𑀢𑀣𑀸 𑀇𑀡𑀧𑁆𑀧𑀫𑁄𑀘𑀦𑀜𑁆𑀘𑁂𑀢𑀺. 𑀬𑀣𑀸𑀳 𑁋

‘‘𑀬𑁄 𑀲𑀫𑁆𑀧𑀢𑁆𑀢𑀥𑀦𑁄𑀲𑁆𑀲𑀕𑁆𑀕𑁄, 𑀉𑀢𑁆𑀢𑀫𑀫𑀚𑁆𑀛𑀺𑀫𑀸𑀥𑀫𑁄;

𑀧𑀢𑀺𑀤𑀸𑀦𑀁 𑀢𑀣𑀸 𑀢𑀲𑁆𑀲, 𑀕𑀳𑀺𑀢𑀲𑁆𑀲𑀸𑀦𑀼𑀫𑁄𑀤𑀦𑀁.

𑀤𑀩𑁆𑀩𑀤𑀸𑀦’𑀫𑀧𑀼𑀩𑁆𑀩𑀜𑁆𑀘 ¶ , 𑀲𑀬𑀁 𑀕𑀸𑀳𑀧𑁆𑀧𑀯𑀢𑁆𑀢𑀦𑀁;

𑀤𑁂𑀬𑁆𑀬𑀲𑁆𑀲 𑀧𑀝𑀺𑀫𑁄𑀓𑁆𑀔𑁄 𑀘, 𑀤𑀸𑀦𑀁 𑀧𑀜𑁆𑀘𑀯𑀺𑀥𑀁 𑀫𑀢’’𑀦𑁆𑀢𑀺 [𑀓𑀸𑀫𑀦𑁆𑀤𑀓𑀻𑀬𑀦𑀻𑀢𑀺𑀲𑀸𑀭 𑁧𑁭.𑁬-𑁭].

𑀏𑀢𑁂 𑀘𑀢𑁆𑀢𑀸𑀭𑁄 𑀉𑀧𑀸𑀬𑀸 𑀫𑀸𑀬𑀸𑀤𑀻𑀲𑁆𑀯𑁂𑀯𑀦𑁆𑀢𑁄𑀕𑀥𑀸, 𑀢𑀣𑀸 𑀳𑀺 𑀫𑀸𑀬𑁄𑀧𑁂𑀓𑁆𑀔𑀸 𑀘 𑀤𑀡𑁆𑀟𑀦𑁆𑀢𑁄𑀕𑀥𑀸. 𑀇𑀦𑁆𑀤𑀚𑀸𑀮𑀜𑁆𑀘 𑀪𑁂𑀤𑁂 𑀅𑀦𑁆𑀢𑁄𑀕𑀥𑀁. 𑀓𑁂𑀘𑀺 𑀧𑀦𑀸𑀳𑀼

‘‘𑀲𑀸𑀫𑀁 𑀤𑀸𑀦𑀜𑁆𑀘 𑀪𑁂𑀤𑁄 𑀘, 𑀤𑀡𑁆𑀟𑁄 𑀘𑁂𑀢𑀺 𑀘𑀢𑀼𑀓𑁆𑀓𑀓𑀁;

𑀫𑀸𑀬𑁄𑀧𑁂𑀓𑁆𑀔𑀺𑀦𑁆𑀤𑀚𑀸𑀮𑀜𑁆𑀘, 𑀲𑀢𑁆𑀢𑁄𑀧𑀸𑀬𑀸 𑀧𑀓𑀺𑀢𑁆𑀢𑀺𑀢𑀸’’𑀢𑀺 [𑀓𑀸𑀫𑀦𑁆𑀤𑀓𑀻𑀬𑀦𑀻𑀢𑀺𑀲𑀸𑀭 𑁧𑁭.𑁩].

𑁩𑁪𑁯. 𑀦𑀸𑀫𑀫𑀢𑁆𑀢𑁂𑀦 𑀯𑀼𑀢𑁆𑀢𑀸𑀦𑀁 𑀪𑁂𑀤𑀸𑀤𑀻𑀦𑀫𑀺𑀤𑀸𑀦𑀺 𑀧𑀭𑀺𑀬𑀸𑀬𑀸𑀦𑁆𑀬𑀸𑀳. 𑀢𑀢𑁆𑀭 𑀤𑁆𑀯𑀬𑀁 𑀪𑁂𑀤𑁂. 𑀚𑀧 𑀫𑀸𑀦𑀲𑁂 𑀘 [𑀚𑀧𑁄 𑀘𑀺𑀦𑁆𑀢𑀦𑀯𑀸𑀘𑀸𑀲𑀼 (𑀥𑀸𑀢𑁆𑀯𑀢𑁆𑀣𑀲𑀗𑁆𑀕𑀳, 𑁧𑁩𑁫 𑀕𑀸𑀣𑀸)], 𑀪𑀽, 𑀡𑁄. 𑀪𑀺𑀤𑀺 𑀤𑁆𑀯𑀺𑀥𑀸𑀓𑀭𑀡𑁂, 𑀡𑁄.

𑀢𑀺𑀓𑀁 𑀤𑀡𑁆𑀟𑁂. 𑀤𑀡𑁆𑀟 𑀦𑀺𑀧𑀸𑀢𑀦𑁂, 𑀘𑀼𑀭𑀸𑀤𑀺. 𑀲𑀳𑁄 𑀯𑀼𑀘𑁆𑀘𑀢𑀺 𑀩𑀮𑀁, 𑀢𑀩𑁆𑀪𑀯𑀁 𑀲𑀸𑀳𑀲𑀁. 𑀤𑀫𑀦𑀁 𑀤𑀫𑁄, 𑀤𑀻𑀖𑀧𑀝𑀺𑀲𑁂𑀥𑁄.

𑁩𑁫𑁦. 𑀲𑀸𑀫𑀁 𑀲𑀼𑀤𑁆𑀤𑀯𑀕𑁆𑀕𑁂, 𑀤𑀸𑀦𑀜𑁆𑀘 𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁂 𑀓𑀣𑁂𑀲𑁆𑀲𑀢𑀺. 𑀲𑀸𑀫𑁆𑀬𑀸𑀤𑀬𑁄 𑀲𑀢𑁆𑀢𑀭𑁂𑀯𑀸𑀘𑀭𑀺𑀬𑀫𑀢𑁂. 𑀧𑀭𑀫𑁆𑀧𑀭𑁄𑀧𑀓𑀸𑀭𑀺𑀢𑁆𑀢𑀸 𑀭𑀚𑁆𑀚𑀲𑁆𑀲𑀗𑁆𑀕𑀸𑀦𑀺. 𑀧𑀓𑀝𑁆𑀞𑀫𑀼𑀧𑀓𑀼𑀩𑁆𑀩𑀦𑁆𑀢𑀺 𑀭𑀚𑁆𑀚𑀦𑁆𑀢𑀺 𑀧𑀓𑀢𑀺𑀬𑁄𑀢𑀺 𑀘𑁄𑀘𑁆𑀘𑀦𑁆𑀢𑁂. 𑀯𑀼𑀢𑁆𑀢𑀜𑁆𑀘 𑀓𑀸𑀫𑀦𑁆𑀤𑀓𑀻𑀬𑁂 𑁋

‘‘𑀲𑀸𑀫𑁆𑀬’𑀫𑀘𑁆𑀘𑀜𑁆𑀘 𑀭𑀝𑁆𑀞𑀜𑁆𑀘, 𑀤𑀼𑀕𑁆𑀕𑀁 𑀓𑁄𑀲𑁄 𑀩𑀮𑀁 𑀲𑀔𑀸;

𑀧𑀭𑀫𑁆𑀧𑀭𑁄𑀧𑀓𑀸𑀭𑀻𑀤𑀁, 𑀲𑀢𑁆𑀢𑀗𑁆𑀕𑀁 𑀭𑀚𑁆𑀚𑀫𑀼𑀘𑁆𑀘𑀢𑁂 [𑀓𑀸𑀫𑀦𑁆𑀤𑀓𑀻𑀬𑀦𑀻𑀢𑀺𑀲𑀸𑀭 𑁪.𑁧].

𑀅𑀫𑀘𑁆𑀘𑀭𑀝𑁆𑀞𑀤𑀼𑀕𑁆𑀕𑀸𑀦𑀺 ¶ , 𑀓𑁄𑀲𑁄 𑀤𑀡𑁆𑀟𑁄 𑀘 𑀧𑀜𑁆𑀘𑀫𑁄;

𑀏𑀢𑀸 𑀧𑀓𑀢𑀺𑀬𑁄 𑀯𑀼𑀢𑁆𑀢𑀸, 𑀯𑀺𑀚𑀺𑀕𑀻𑀲𑀲𑁆𑀲 𑀭𑀸𑀚𑀺𑀦𑁄.

𑀏𑀢𑀸 𑀧𑀜𑁆𑀘 𑀢𑀣𑀸 𑀫𑀺𑀢𑁆𑀢𑀁, 𑀲𑀢𑁆𑀢𑀫𑁄 𑀧𑀣𑀯𑀻𑀧𑀢𑀺;

𑀲𑀢𑁆𑀢𑀧𑁆𑀧𑀓𑀢𑀺𑀓𑀁 𑀭𑀚𑁆𑀚𑀁, 𑀇𑀘𑁆𑀘𑀸𑀳 𑀲𑀽𑀭𑀧𑀽𑀚𑀺𑀢𑁄’’𑀢𑀺.

𑀢𑀢𑁆𑀭 𑀧𑁄𑀭𑀲𑁂𑀡𑀻𑀦𑀁 𑀧𑀥𑀸𑀦𑀪𑀸𑀯𑁂𑀧𑀺 𑀲𑀢𑀺 𑀭𑀝𑁆𑀞𑀕𑁆𑀕𑀳𑀡𑁂𑀦, 𑀩𑀮𑀕𑁆𑀕𑀳𑀡𑁂𑀦 𑀯𑀸 𑀕𑀳𑀡𑀲𑀺𑀤𑁆𑀥𑀦𑁆𑀢𑀺 𑀦𑁂𑀳 𑀯𑀺𑀲𑀼𑀁 𑀕𑀳𑀡𑀁 𑀓𑀢𑀁, 𑀅𑀫𑀭𑀓𑁄𑀲𑁂 𑀧𑀦 𑀤𑁆𑀯𑀻𑀳𑀺 𑀕𑀳𑀡𑁂 𑀲𑀺𑀤𑁆𑀥𑁂𑀧𑀺 𑀧𑀥𑀸𑀦𑀢𑁆𑀢𑀸𑀔𑁆𑀬𑀸𑀧𑀦𑀢𑁆𑀣𑀁 𑀯𑀺𑀲𑀼𑀁 𑀕𑀳𑀺𑀢𑀸. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀭 𑁋

‘‘𑀲𑀸𑀫𑁆𑀬’𑀫𑀘𑁆𑀘𑁄 𑀲𑀔𑀸 𑀓𑁄𑀲𑁄, 𑀭𑀚𑁆𑀚𑀤𑀼𑀕𑁆𑀕𑀩𑀮𑀸𑀦𑀺 𑀘;

𑀭𑀚𑁆𑀚𑀗𑁆𑀕𑀸𑀦𑀺 𑀧𑀓𑀢𑀬𑁄, 𑀧𑁄𑀭𑀸𑀦𑀁 𑀲𑁂𑀡𑀺𑀬𑁄𑀧𑀺 𑀘𑁂’’𑀢𑀺 [𑀅𑀫𑀭 𑁧𑁮.𑁧𑁭].

𑀏𑀲𑀜𑁆𑀘 𑀲𑀸𑀫𑁆𑀬𑀫𑀘𑁆𑀘𑀭𑀝𑁆𑀞𑀤𑀼𑀕𑁆𑀕𑀓𑁄𑀲𑀩𑀮𑀲𑀔𑀻𑀦𑀁 𑀧𑀼𑀩𑁆𑀩𑀢𑀭𑀲𑁆𑀲 𑀕𑀭𑀼𑀢𑁆𑀢𑀁 𑀯𑀺𑀜𑁆𑀜𑁂𑀬𑁆𑀬𑀁, 𑀇𑀳 𑀢𑀼 𑀦𑀸𑀫𑀮𑀺𑀗𑁆𑀕𑀸𑀦𑀼𑀲𑀸𑀲𑀦𑁂 𑀅𑀪𑀺𑀥𑀸𑀦𑀲𑀢𑁆𑀣𑁂 𑀅𑀦𑀼𑀧𑀬𑁄𑀕𑀢𑁄 𑀬𑀣𑀸𑀓𑁆𑀓𑀫𑀁 𑀕𑀭𑀼𑀢𑁆𑀢𑀁 𑀦 𑀯𑀢𑁆𑀢𑀼𑀫𑀺𑀘𑁆𑀙𑀢𑀻𑀢𑀺 𑀩𑁆𑀬𑀢𑀺𑀓𑁆𑀓𑀫𑁂𑀦𑁄𑀧𑀜𑁆𑀜𑀸𑀲𑁄 𑀓𑀢𑁄.

𑀲𑀼𑀯𑀡𑁆𑀡𑀸𑀤𑀺𑀫𑀬𑀪𑀡𑁆𑀟𑀸𑀕𑀸𑀭𑀁 𑀓𑁄𑀲𑁄, 𑀧𑀩𑁆𑀩𑀢𑁄𑀤𑀓𑀭𑀼𑀓𑁆𑀔𑀸𑀤𑀻𑀳𑀺 𑀤𑀼𑀕𑁆𑀕𑀫𑀁 𑀧𑀼𑀭𑀁 𑀤𑀼𑀕𑁆𑀕𑀁, 𑀯𑀺𑀚𑀺𑀢𑀁 𑀚𑀦𑀧𑀤𑀯𑀢𑀻 𑀪𑀽𑀫𑀺, 𑀩𑀮𑀁 𑀘𑀓𑁆𑀓𑀁, 𑀢𑀜𑁆𑀘 𑀫𑁄𑀮𑀪𑀢𑀲𑁂𑀡𑀺𑀲𑀳𑀸𑀬𑀸𑀫𑀺𑀢𑁆𑀢𑀸𑀝𑀯𑀺𑀓𑀪𑁂𑀤𑁂𑀦 𑀙𑀩𑁆𑀩𑀺𑀥𑀁. 𑀢𑀢𑁆𑀭 𑀓𑀫𑀸𑀕𑀢𑀁 𑀫𑁄𑀮𑀁, 𑀯𑁂𑀢𑀦𑀲𑀫𑁆𑀩𑀦𑁆𑀥𑀁 𑀪𑀢𑀁, 𑀧𑁄𑀭𑀁 𑀩𑀮𑀁 𑀲𑁂𑀡𑀻, 𑀲𑀳𑀸𑀬𑀪𑀽𑀢𑀁 𑀲𑀳𑀸𑀬𑁄, 𑀅𑀫𑀺𑀢𑁆𑀢𑀪𑀽𑀢𑀁 𑀅𑀫𑀺𑀢𑁆𑀢𑀁, 𑀅𑀝𑀯𑀺𑀓𑀁 𑀅𑀝𑀯𑀺𑀲𑀳𑀸𑀬𑁄 𑀫𑀺𑀢𑁆𑀢𑀁. 𑀢𑀤𑀧𑀺 𑀲𑀳𑀚𑁆𑀚𑀁, 𑀧𑀸𑀓𑀢𑀁, 𑀓𑀺𑀢𑁆𑀢𑀺𑀫𑀜𑁆𑀘𑁂𑀢𑀺 𑀢𑀺𑀯𑀺𑀥𑀁. ‘‘𑀮𑀺𑀗𑁆𑀕𑁂 𑀲𑀪𑀸𑀯𑁂 𑀧𑀓𑀢𑀺, 𑀧𑁄𑀭𑀸𑀫𑀘𑁆𑀘𑀸𑀤𑀺𑀬𑁄𑀦𑀺𑀲𑀼. 𑀢𑀺𑀮𑀺𑀗𑁆𑀕𑀁 𑀕𑀼𑀡𑀲𑀸𑀫𑁆𑀬𑁂𑀧𑀻’’𑀢𑀺 [𑀩𑁆𑀬𑀸𑀔𑁆𑀬𑀸𑀲𑀼𑀥𑀸 𑁧.𑁪.𑁨𑁯] 𑀭𑀼𑀤𑁆𑀤𑁄.

𑁩𑁫𑁧. 𑀧𑀪𑀸𑀯𑀸𑀤𑀻𑀦𑀁 ¶ 𑀯𑀲𑀸 𑀲𑀢𑁆𑀢𑀺𑀬𑁄 𑀦𑀸𑀫 𑀢𑀺𑀲𑁆𑀲𑁄 𑀪𑀯𑀦𑁆𑀢𑀺. 𑀲𑀓 𑀲𑀢𑁆𑀢𑀺𑀬𑀁,𑀢𑀺. 𑀢𑀢𑁆𑀭 𑀬𑀁 𑀲𑀦𑁆𑀥𑀸𑀤𑀻𑀦𑀁, 𑀪𑁂𑀤𑀸𑀤𑀻𑀦𑀜𑁆𑀘 𑀬𑀸𑀣𑀸𑀯𑀢𑁄 𑀅𑀯𑀝𑁆𑀞𑀸𑀧𑀦𑀁, 𑀢𑀁 𑀜𑀸𑀡𑀩𑀮𑀁 𑀫𑀦𑁆𑀢𑀲𑀢𑁆𑀢𑀺, 𑀲𑀓𑀲𑀫𑁆𑀧𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀁 𑀓𑁄𑀲𑀤𑀡𑁆𑀟𑀸 𑀧𑀪𑀽𑀲𑀢𑁆𑀢𑀺, 𑀢𑁂𑀲𑀁𑀬𑁂𑀯 𑀧𑀪𑀼𑀢𑁆𑀢𑀲𑀫𑁆𑀧𑀸𑀤𑀦𑁂 𑀲𑀸𑀫𑀢𑁆𑀣𑀺𑀬𑀢𑁄. 𑀯𑀼𑀢𑁆𑀢𑀜𑁆𑀘 ‘‘𑀓𑁄𑀲𑀤𑀡𑁆𑀟𑀩𑀮𑀁 𑀧𑀪𑀽𑀲𑀢𑁆𑀢𑀺’’𑀭𑀺𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸𑀬𑀫𑁆𑀧𑀺]. 𑀩𑀮𑀯𑀢𑀻 𑀉𑀲𑁆𑀲𑀸𑀳𑀘𑁂𑀝𑁆𑀞𑀸 𑀉𑀲𑁆𑀲𑀸𑀳𑀲𑀢𑁆𑀢𑀺. 𑀯𑀼𑀢𑁆𑀢𑀜𑁆𑀘 ‘‘𑀯𑀺𑀓𑁆𑀓𑀫𑀩𑀮𑀫𑀼𑀲𑁆𑀲𑀸𑀳𑀲𑀢𑁆𑀢𑀺’’𑀭𑀺𑀢𑀺 [𑀩𑁆𑀬𑀸𑀔𑁆𑀬𑀸𑀲𑀼𑀥𑀸 𑁨.𑁮.𑁧𑁯 𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸𑀬𑀫𑁆𑀧𑀺].

𑀧𑀪𑀸𑀯𑀸𑀤𑀻𑀦𑀁 𑀲𑀓𑀸𑀭𑀡𑀁 𑀲𑀭𑀽𑀧𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀧𑀪𑀸𑀯𑁄’’𑀘𑁆𑀘𑀸𑀤𑀺. 𑀤𑀫𑀦𑀁 𑀤𑀡𑁆𑀟𑁄, 𑀢𑀤𑀢𑁆𑀣𑀺𑀬𑀸 𑀩𑀮𑀫𑁆𑀧𑀺 𑀤𑀡𑁆𑀟𑁄. 𑀢𑀢𑁄 𑀚𑀸𑀢𑀁 𑀬𑀁 𑀢𑁂𑀚𑁄, 𑀢𑀁 𑀧𑀪𑀸𑀯𑁄. 𑀢𑀢𑁄 𑀚𑀸𑀢𑁄 𑀬𑁄 𑀢𑁂𑀚𑁄, 𑀲𑁄 ‘‘𑀧𑀪𑀸𑀯𑁄’’𑀢𑀺𑀧𑀺 𑀧𑀼𑀮𑁆𑀮𑀺𑀗𑁆𑀕𑁂𑀦 𑀬𑁄𑀚𑀦𑀻𑀬𑀁. 𑀧𑀪𑀯𑀦𑁆𑀢𑀺 𑀢𑁂𑀚𑀲𑁆𑀲𑀺𑀦𑁄 𑀅𑀦𑁂𑀦𑁂𑀢𑀺 𑀧𑀪𑀸𑀯𑁄, 𑀡𑁄. 𑀧𑀓𑀝𑁆𑀞𑁄 𑀯𑀸 𑀪𑀸𑀯𑁄 𑀧𑀪𑀸𑀯𑁄. 𑀓𑁄𑀲𑁄 𑀥𑀦𑀁, 𑀢𑀢𑁄 𑀚𑀸𑀢𑁄 𑀬𑁄 𑀢𑁂𑀚𑁄, 𑀲𑁄 𑀧𑀪𑀸𑀯𑁄 𑀦𑀸𑀫. 𑀢𑀣𑀸 𑀓𑁄𑀲𑀚𑁄 𑀢𑁂𑀚𑁄 𑀥𑀦𑁂𑀦 𑀲𑀢𑁆𑀢𑀽𑀦𑀫𑀼𑀧𑀓𑀭𑀡𑀁. 𑀧𑀢𑀧𑀦𑁆𑀢𑀺 𑀢𑁂𑀚𑀲𑁆𑀲𑀺𑀦𑁄 𑀪𑀯𑀦𑁆𑀢𑁆𑀬𑀦𑁂𑀦𑁂𑀢𑀺 𑀧𑀢𑀸𑀧𑁄, 𑀡𑁄.

𑁩𑁫𑁨. 𑀤𑁆𑀯𑀬𑀁 𑀫𑀦𑁆𑀢𑁂. 𑀫𑀦𑁆𑀢𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀲𑀸 𑀏𑀢𑀲𑁆𑀫𑀺𑀁 𑀯𑀺𑀚𑁆𑀚𑀢𑀺 𑀢𑀸𑀬 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀢𑁆𑀢𑀸𑀢𑀺 𑀫𑀦𑁆𑀢𑁄, 𑀅𑀣 𑀯𑀸 𑀫𑀦𑁆𑀢 𑀕𑀼𑀢𑁆𑀢𑀪𑀸𑀲𑀦𑁂, 𑀪𑀸𑀯𑁂 𑀡𑁄. 𑀇𑀢𑀭𑀢𑁆𑀭 𑀪𑀸𑀯𑁂 𑀬𑀼.

𑀲𑁄 ¶ 𑀫𑀦𑁆𑀢𑁄 𑀤𑁆𑀯𑀺𑀕𑁄𑀘𑀭𑁄 𑀤𑁆𑀯𑀺𑀦𑁆𑀦𑀁 𑀚𑀦𑀸𑀦𑀁 𑀯𑀺𑀲𑀬𑀪𑀽𑀢𑁄 𑀘𑀢𑀼𑀓𑁆𑀓𑀡𑁆𑀡𑁄 𑀦𑀸𑀫. 𑀘𑀢𑁆𑀢𑀸𑀭𑁄 𑀓𑀡𑁆𑀡𑀸 𑀏𑀢𑁆𑀣 𑀘𑀢𑀼𑀓𑁆𑀓𑀡𑁆𑀡𑁄. 𑀲𑁄 𑀫𑀦𑁆𑀢𑁄 𑀢𑀺𑀕𑁄𑀘𑀭𑁄 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀯𑀺𑀲𑀬𑀪𑀽𑀢𑁄 𑀙𑀓𑁆𑀓𑀡𑁆𑀡𑁄 𑀦𑀸𑀫. 𑀫𑀦𑁆𑀢𑁄 𑀦𑀸𑀫 𑀘𑀢𑀼𑀓𑁆𑀓𑀡𑁆𑀡𑁄 𑀯𑀸 𑀙𑀓𑁆𑀓𑀡𑁆𑀡𑁄 𑀯𑀸 𑀓𑀢𑁆𑀢𑀩𑁆𑀩𑁄, 𑀦 𑀢𑀢𑁄 𑀧𑀭𑀦𑁆𑀢𑀺 𑀤𑁆𑀯𑀺𑀦𑁆𑀦𑀫𑁂𑀯𑁂𑀢𑁆𑀣 𑀕𑀳𑀡𑀁. 𑀅𑀫𑀭𑀓𑁄𑀲𑁂 𑀧𑀦 𑀙𑀓𑁆𑀓𑀡𑁆𑀡𑁄𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘‘𑀅𑀙𑀓𑁆𑀓𑀡𑁆𑀡𑁄, 𑀬𑁄 𑀢𑀢𑀺𑀬𑀸𑀤𑁆𑀬𑀕𑁄𑀘𑀭𑁄’’𑀢𑀺 [𑀅𑀫𑀭 𑁧𑁮.𑁨𑁨].

𑀲𑀩𑁆𑀩𑀧𑀸𑀭𑀺𑀲𑀤𑀢𑁆𑀢𑀸 [𑀲𑀩𑁆𑀩𑀧𑀸𑀞𑀺𑀧𑀤𑀢𑁆𑀢𑀸 (𑀓.)] 𑀩𑁆𑀬𑀸𑀓𑀭𑀡𑀲𑁆𑀲 𑀲𑁄𑀢𑀽𑀦𑀁 𑀲𑀫𑀬𑀦𑁆𑀢𑀭𑁂𑀲𑁆𑀯𑀧𑀺 𑀧𑀝𑀼𑀪𑀸𑀯𑀚𑀦𑀦𑀢𑁆𑀣𑀁 𑀇𑀥𑀸𑀦𑀸𑀕𑀢𑀸𑀧𑀺 𑀙𑀕𑁆𑀕𑀼𑀡𑀸𑀤𑀬𑁄 𑀆𑀦𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀲𑀩𑁆𑀩𑀧𑀸𑀭𑀺𑀲𑀤𑀁 [𑀲𑀩𑁆𑀩𑀧𑀸𑀝𑀺𑀧𑀤𑀁 (𑀓.)] 𑀳𑀺𑀤𑀁, 𑀲𑀩𑁆𑀩𑀲𑀢𑁆𑀣’𑀫𑀢𑁄 𑀫𑀢𑀁;

𑀦𑀺𑀲𑁆𑀲𑀻𑀬𑀢𑁂 𑀓𑁆𑀯𑀘𑀺 𑀓𑀺𑀜𑁆𑀘𑀺, 𑀲𑀩𑁆𑀩𑁂𑀲’𑀫𑀢𑁆𑀭 𑀯𑀸𑀤𑀺𑀦’’𑀦𑁆𑀢𑀺.

𑀬𑀣𑀸 𑀙𑀕𑁆𑀕𑀼𑀡𑀸 𑀲𑀦𑁆𑀥𑀺 𑀯𑀺𑀕𑁆𑀕𑀳𑀬𑀸𑀦𑀸𑀲𑀦𑀤𑁆𑀯𑁂𑀥𑀸𑀲𑀬𑀸 [𑀅𑀫𑀭 𑁧𑁮.𑁧𑁮-𑁯]. 𑀢𑀢𑁆𑀭 𑀲𑀦𑁆𑀥𑀺 𑀉𑀧𑀳𑀸𑀭𑀮𑀓𑁆𑀔𑀡𑁄 𑀢𑀺𑀯𑀺𑀥𑁄 𑀓𑁄𑀲𑀤𑀡𑁆𑀟𑀪𑀽𑀫𑀺𑀧𑁆𑀧𑀤𑀸𑀦𑀳𑁂𑀢𑀼𑀓𑁄. 𑀅𑀧𑀳𑀸𑀭𑀮𑀓𑁆𑀔𑀡𑁄 𑀯𑀺𑀕𑁆𑀕𑀳𑁄, 𑀲𑁄𑀧𑀺 𑀢𑀺𑀯𑀺𑀥𑁄 𑀧𑀓𑀸𑀲𑀬𑀼𑀤𑁆𑀥𑀁 𑀓𑀽𑀝𑀬𑀼𑀤𑁆𑀥𑀁 𑀢𑀼𑀡𑁆𑀳𑀺𑀬𑀼𑀤𑁆𑀥𑀦𑁆𑀢𑀺.

𑀧𑀭𑀩𑁆𑀬𑀲𑀦𑀢𑀸𑀲𑀧𑀢𑁆𑀢𑀺𑀤𑁂𑀲𑀓𑀸𑀮𑀸𑀢𑁆𑀬𑀼𑀤𑀬𑀸𑀯𑀸𑀧𑀬𑀸𑀦𑀫𑀢𑁆𑀢𑁂𑀦 𑀲𑀸𑀤𑁆𑀥𑁂 𑀧𑀭𑀲𑁆𑀫𑀺𑀁 𑀓𑀢𑀸𑀘𑀭𑀲𑁆𑀲 𑀕𑀼𑀡𑀸𑀦𑀼𑀭𑀢𑁆𑀢𑀧𑀓𑀢𑀺𑀲𑁆𑀲 𑀯𑀺𑀚𑀺𑀕𑀻𑀲𑀲𑁆𑀲 𑀬𑀸𑀢𑁆𑀭𑀸 𑀬𑀸𑀦𑀁 [𑀓𑀸𑀫𑀦𑁆𑀤𑀓𑀻𑀬𑀦𑀻𑀢𑀺𑀲𑀸𑀭𑁂 𑁧𑁧 𑀲𑀕𑁆𑀕𑁂 𑀧𑀲𑁆𑀲𑀺𑀢𑀩𑁆𑀩𑀁], 𑀢𑀜𑁆𑀘 𑀯𑀺𑀕𑁆𑀕𑀬𑁆𑀳𑀬𑀸𑀦𑀁 𑀲𑀦𑁆𑀥𑀸𑀬𑀬𑀸𑀦𑀁 𑀲𑀫𑁆𑀪𑀽𑀬𑀬𑀸𑀦𑀁 𑀧𑀲𑀗𑁆𑀕𑀬𑀸𑀦𑀁 𑀉𑀧𑁂𑀓𑁆𑀔𑀺𑀬𑀬𑀸𑀦𑀫𑀺𑀢𑀺 𑀧𑀜𑁆𑀘𑀯𑀺𑀥𑀁. 𑀧𑀢𑀺𑀕𑁆𑀕𑀸𑀳𑀻𑀦𑀁 𑀦𑀺𑀕𑁆𑀕𑀬𑁆𑀳, 𑀲𑀦𑁆𑀥𑀸𑀬, 𑀉𑀧𑁂𑀓𑁆𑀔𑀺𑀬 𑀯𑀸 𑀬𑀁 𑀬𑀸𑀦𑀁, 𑀢𑀁 𑀯𑀺𑀕𑁆𑀕𑀬𑁆𑀳𑀬𑀸𑀦𑀸𑀤𑀺. 𑀬𑀤𑀸 𑀦 𑀲𑀓𑁆𑀓𑁄𑀢𑀺, 𑀢𑀤𑀸 𑀲𑀸𑀫𑀦𑁆𑀢𑁂𑀳𑀺 𑀲𑀳𑁂𑀓𑀻𑀪𑀽𑀬 𑀬𑀸𑀦𑀁 𑀲𑀫𑁆𑀪𑀽𑀬𑀬𑀸𑀦𑀁. 𑀅𑀜𑁆𑀜𑀢𑁆𑀭 𑀕𑀦𑁆𑀢𑀩𑁆𑀩𑁂 𑀅𑀜𑁆𑀜𑀲𑁆𑀫𑀺𑀁 𑀧𑀲𑀗𑁆𑀕𑀢𑁄 𑀕𑀫𑀦𑀁 𑀧𑀲𑀗𑁆𑀕𑀬𑀸𑀦𑀁.

‘‘𑀦 𑀫𑀁 𑀧𑀭𑁄 𑀳𑀦𑁆𑀢𑀼𑀁 𑀲𑀫𑀢𑁆𑀣𑁄, 𑀦𑀸𑀳𑀫𑁆𑀧𑀺 𑀧𑀭’’𑀫𑀺𑀢𑀺 𑀓𑀸𑀮𑀸𑀤𑀺𑀓𑁂 𑀧𑀭𑀺𑀓𑁆𑀔𑀺𑀢𑁆𑀯𑀸 𑀯𑀺𑀚𑀺𑀕𑀻𑀲𑀲𑁆𑀲 𑀤𑀼𑀕𑁆𑀕𑀸𑀤𑀻𑀦𑀺 𑀯𑀟𑁆𑀠𑀬𑀢𑁄 𑀞𑀺𑀢𑀺 𑀆𑀲𑀦𑀁, 𑀢𑀤𑀧𑀺 𑀯𑀺𑀕𑁆𑀕𑀬𑁆𑀳𑀸𑀲𑀦𑀲𑀦𑁆𑀥𑀸𑀬𑀸𑀲𑀦𑀸𑀤𑀺𑀪𑁂𑀤𑁂𑀦 𑀧𑀜𑁆𑀘𑀯𑀺𑀥𑀁. 𑀩𑀮𑀻𑀦𑀁 ¶ 𑀲𑀢𑁆𑀢𑀽𑀦𑀁 𑀫𑀚𑁆𑀛𑁂 𑀓𑀸𑀓𑀓𑁆𑀔𑀺𑀯𑀸’𑀮𑀓𑁆𑀔𑀺𑀢𑀲𑁆𑀲𑁄’𑀪𑀬𑀢𑁆𑀭 𑀯𑀘𑀦𑁂𑀦𑀢𑁆𑀢𑀦𑁄 𑀲𑀫𑀧𑁆𑀧𑀡𑀁 𑀤𑁆𑀯𑁂𑀥𑀁. 𑀅𑀜𑁆𑀜𑀢𑀭𑁂𑀦 𑀯𑀸 𑀩𑀮𑀯𑀢𑀭𑁂𑀦 𑀲𑀦𑁆𑀥𑀺, 𑀅𑀜𑁆𑀜𑀢𑀭𑁂𑀦 𑀅𑀩𑀮𑁂𑀦 𑀯𑀺𑀕𑁆𑀕𑀳𑁄 𑀤𑁆𑀯𑁂𑀥𑀁. 𑀲𑀢𑁆𑀢𑀼𑀦𑁄 𑀯𑀸 𑀧𑀓𑀢𑀻𑀳𑀺 𑀲𑀦𑁆𑀥𑀸𑀬 𑀬𑁄 𑀢𑁂𑀦 𑀯𑀺𑀕𑁆𑀕𑀳𑁄, 𑀲𑀢𑁆𑀢𑀼𑀦𑁂𑀯 𑀯𑀸 𑀬𑁄 𑀲𑀦𑁆𑀥𑀺𑀯𑀺𑀕𑁆𑀕𑀳𑀲𑀫𑀼𑀤𑀸𑀬𑀳𑁂𑀢𑀼𑀓𑁄 [𑀲𑀢𑁆𑀢𑀼𑀦𑁄𑀯 𑀯𑀸 𑀲𑀦𑁆𑀥𑀺𑀯𑀺𑀕𑁆𑀕𑀳𑀲𑀫𑀼𑀤𑀸𑀬𑀳𑁂𑀢𑀼𑀦𑁄 (𑀩𑁆𑀬𑀸𑀔𑁆𑀬𑀸𑀲𑀼𑀥𑀸 𑁧.𑁮.𑁧𑁮)] 𑀤𑀼𑀕𑁆𑀕𑀸𑀲𑀬𑀲𑁆𑀲 𑀩𑁆𑀬𑀸𑀧𑀸𑀭𑁄, 𑀲𑁄𑀧𑀺 𑀤𑁆𑀯𑁂𑀥𑀁. 𑀧𑀭𑀲𑀦𑁆𑀢𑀸𑀦𑀫𑀧𑁆𑀬𑁄𑀪𑀬𑀯𑁂𑀤𑀦𑀸𑀦𑀁 𑀉𑀪𑀬𑀢𑁄 𑀯𑀼𑀢𑁆𑀢𑀺 𑀤𑁆𑀯𑁂𑀥𑀫𑀼𑀘𑁆𑀘𑀢𑁂.

‘‘𑀉𑀘𑁆𑀙𑀺𑀚𑁆𑀚𑀫𑀸𑀦𑁄 𑀭𑀺𑀧𑀼𑀦𑀸 𑀦𑀺𑀭𑀼𑀧𑀸𑀬 𑀧𑀢𑀺𑀓𑁆𑀭𑀺𑀬𑁄. 𑀲𑀢𑁆𑀢𑀺𑀳𑀻𑀦𑁄 𑀲𑀫𑀸𑀲𑀺𑀬𑀢𑁂’’𑀢𑀺 [𑀩𑁆𑀬𑀸𑀔𑁆𑀬𑀸𑀲𑀼𑀥𑀸 𑁧.𑁮.𑁧𑁮] 𑀳𑀻𑀦𑁂𑀦𑀸𑀜𑁆𑀜𑀲𑁆𑀲 𑀩𑀮𑀯𑀢𑀭𑀲𑁆𑀲 𑀥𑀫𑁆𑀫𑀯𑀺𑀚𑀬𑀺𑀦𑁄 𑀲𑀫𑀸𑀲𑀬𑀦𑀁 [𑀩𑀮𑀯𑀢𑀸 𑀅𑀭𑀺𑀦𑀸 𑀉𑀘𑁆𑀙𑀺𑀚𑁆𑀚𑀫𑀸𑀦𑀲𑁆𑀲 𑀳𑀻𑀦𑀲𑀢𑁆𑀢𑀺𑀦𑁄 𑀬𑀁 𑀩𑀮𑀯𑀥𑀫𑁆𑀫𑀯𑀺𑀚𑀬𑀺𑀲𑀫𑀸𑀲𑀬𑀦𑀁 (𑀩𑁆𑀬𑀸𑀔𑁆𑀬𑀸𑀲𑀼𑀥𑀸 𑁧.𑁮.𑁧𑁮)], 𑀢𑀲𑁆𑀲𑁂𑀯 𑀯𑀸 𑀩𑀮𑀺𑀦𑁄 𑀲𑀢𑁆𑀢𑀼𑀦𑁄 𑀓𑁄𑀲𑀸𑀤𑀺𑀧𑁆𑀧𑀤𑀸𑀦𑁂𑀦 𑀆𑀲𑀬𑀦𑀁 𑀆𑀲𑀬𑁄 𑀯𑀼𑀘𑁆𑀘𑀢𑁂. 𑀏𑀢𑁂 𑀙𑀕𑁆𑀕𑀼𑀡𑀸.

𑀬𑀲𑁆𑀫𑀺𑀜𑁆𑀘 𑀕𑀼𑀡𑁂 𑀞𑀺𑀢𑁄 𑀯𑀺𑀚𑀺𑀕𑀻𑀲𑁄 𑀲𑀓𑁆𑀓𑁄𑀢𑁆𑀬𑀢𑁆𑀢𑀦𑁄 𑀅𑀝𑁆𑀞𑀯𑀕𑁆𑀕𑀺𑀬𑀓𑀫𑁆𑀫𑀸𑀦𑀺 𑀧𑀯𑀢𑁆𑀢𑀬𑀺𑀢𑀼𑀁, 𑀧𑀭𑀲𑁆𑀲 𑀘𑁂𑀢𑀸𑀦𑁆𑀬𑀼𑀧𑀳𑀦𑁆𑀢𑀼𑀁, 𑀕𑀼𑀡𑀫𑀸𑀥𑀺𑀝𑁆𑀞𑁂𑀬𑁆𑀬, 𑀲𑀸 𑀯𑀼𑀟𑁆𑀠𑀺.

𑀓𑀲𑀺 𑀯𑀡𑀺𑀚𑁆𑀚𑀁 𑀧𑀣𑁄 𑀤𑀼𑀕𑁆𑀕𑀁, 𑀲𑁂𑀢𑀼 𑀓𑀼𑀜𑁆𑀚𑀭𑀩𑀦𑁆𑀥𑀦𑀁;

𑀔𑀦𑁆𑀬𑀸𑀓𑀭𑀥𑀦𑀸𑀤𑀸𑀦𑀁, 𑀲𑀼𑀜𑁆𑀜𑀸𑀦𑀜𑁆𑀘 𑀦𑀺𑀯𑁂𑀲𑀦𑀁 [𑀓𑀸𑀫𑀦𑁆𑀤𑀓𑀻𑀬𑀦𑀻𑀢𑀺𑀲𑀸𑀭 𑁫.𑁭𑁮].

𑀇𑀢𑁆𑀬𑁂𑀲𑁄 𑀅𑀝𑁆𑀞𑀯𑀕𑁆𑀕𑁄.

𑀬𑀲𑁆𑀫𑀺𑀁 𑀯𑀸 𑀕𑀼𑀡𑁂 𑀞𑀺𑀢𑁄 𑀲𑀓𑀫𑁆𑀫𑀸𑀦𑀁 𑀯𑀼𑀟𑁆𑀠𑀺, 𑀔𑀬𑀁 𑀯𑀸 𑀦𑀸𑀪𑀺𑀧𑀲𑁆𑀲𑀢𑀺, 𑀢𑀁 𑀞𑀸𑀦𑀁, 𑀬𑀲𑁆𑀫𑀺𑀁 𑀯𑀸 𑀕𑀼𑀡𑁂 𑀞𑀺𑀢𑁄 𑀲𑀓𑀫𑁆𑀫𑀸𑀦𑀫𑀼𑀧𑀖𑀸𑀢𑀁 𑀧𑀲𑁆𑀲𑀢𑀺, 𑀢𑀲𑁆𑀫𑀺𑀁 𑀦 𑀢𑀺𑀝𑁆𑀞𑁂𑀬𑁆𑀬, 𑀲𑁄 𑀔𑀬𑁄, 𑀅𑀬𑀁 𑀦𑀻𑀢𑀺𑀯𑁂𑀤𑀻𑀦𑀁 𑀢𑀺𑀯𑀕𑁆𑀕𑁄 [𑀅𑀫𑀭 𑁧𑁮.𑁧𑁯]. 𑀇𑀢𑀭𑁂𑀲𑀁 𑀥𑀫𑁆𑀫𑀢𑁆𑀣𑀓𑀸𑀫𑀸 𑀢𑀺𑀯𑀕𑁆𑀕𑁄.

𑀤𑁆𑀯𑀬𑀁 ¶ 𑀕𑀼𑀬𑁆𑀳𑁂. 𑀭𑀳𑀲𑀺 𑀪𑀯𑀁 𑀭𑀳𑀲𑁆𑀲𑀁, 𑀲𑁄, 𑀭𑀳𑁂 𑀯𑀸 𑀪𑀯𑀁 𑀭𑀳𑀲𑁆𑀲𑀁. 𑀕𑀼𑀳 𑀲𑀁𑀯𑀭𑀡𑁂, 𑀓𑀫𑁆𑀫𑀦𑀺 𑀬𑁄. 𑀇𑀤𑀁 𑀤𑁆𑀯𑀬𑀁 𑀢𑀻𑀲𑀼. 𑀭𑀳𑀲𑁆𑀲𑁄 𑀫𑀦𑁆𑀢𑁄, 𑀭𑀳𑀲𑁆𑀲𑀸 𑀯𑀸𑀘𑀸, 𑀭𑀳𑀲𑁆𑀲𑀁 𑀫𑀦𑁆𑀢𑀦𑀁.

𑁩𑁫𑁩. 𑀧𑀜𑁆𑀘𑀓𑀁 𑀯𑀺𑀚𑀦𑁂. 𑀯𑀺𑀚𑀺 𑀧𑀼𑀣𑀪𑀸𑀯𑁂, 𑀪𑀽, 𑀢𑁄 𑀘. 𑀯𑀺𑀘𑀺 𑀯𑀺𑀯𑁂𑀘𑀦𑁂, 𑀧𑀼𑀣𑀼𑀪𑀸𑀯𑁂 𑀘 𑀯𑀸. ‘‘𑀯𑀺𑀯𑀺𑀢𑁆𑀢𑀁 𑀢𑀻𑀲𑀼 𑀯𑀺𑀚𑀦𑁂, 𑀅𑀲𑀁𑀧𑀓𑁆𑀓𑀧𑀯𑀺𑀢𑁆𑀢𑁂𑀲𑀽’’𑀢𑀺 𑀭𑀼𑀤𑁆𑀤𑁄. 𑀯𑀺𑀕𑀢𑁄 𑀚𑀦𑁄 𑀅𑀲𑁆𑀫𑀸𑀢𑀺 𑀯𑀺𑀚𑀦𑁄. 𑀙𑀸𑀤𑁂𑀢𑀻𑀢𑀺 𑀙𑀦𑁆𑀦𑁄. 𑀙𑀤 𑀲𑀁𑀯𑀭𑀡𑁂. 𑀯𑀺𑀢𑁆𑀢𑀫𑀭𑀳𑀢𑀻𑀢𑀺 𑀭𑀳𑁄, 𑀭𑀳 𑀘𑀸𑀕𑁂, 𑀭𑀫𑀦𑁆𑀢𑁂 𑀅𑀲𑁆𑀫𑀺𑀦𑁆𑀢𑀺 𑀯𑀸 𑀭𑀳𑁄, 𑀯𑀡𑁆𑀡𑀯𑀺𑀓𑀸𑀭𑁄. ‘‘𑀭𑀳𑁄 𑀦𑀺𑀥𑀼𑀯𑀦𑁂 𑀘𑀸𑀧𑀺, 𑀭𑀳𑁄 𑀕𑀼𑀬𑁆𑀳𑁂 𑀦𑀧𑀼𑀁𑀲𑀓’’𑀦𑁆𑀢𑀺 [𑀩𑁆𑀬𑀸𑀔𑁆𑀬𑀸𑀲𑀼𑀥𑀸 𑁨.𑁮.𑁨𑁨] 𑀭𑀪𑀲𑁄. 𑀤𑀼𑀢𑀺𑀬𑁄 𑀭𑀳𑁄𑀲𑀤𑁆𑀤𑁄 𑀅𑀩𑁆𑀬𑀬𑀁. 𑀦𑀺𑀲𑁆𑀲𑀮𑀸𑀓𑀸, 𑀉𑀧𑀸𑀲𑀼𑀧𑁆𑀬𑀢𑁆𑀭. 𑀦𑀺𑀲𑁆𑀲𑀮𑀸𑀓𑀸 𑀣𑀻, 𑀉𑀧𑀸𑀲𑀼 𑀅𑀩𑁆𑀬𑀬𑀁.

𑀤𑁆𑀯𑀬𑀁 𑀯𑀺𑀲𑁆𑀲𑀸𑀲𑁂. 𑀲𑀲 𑀧𑀸𑀮𑀦𑁂, 𑀡𑁄. 𑀲𑀫𑁆𑀪 𑀯𑀺𑀲𑁆𑀲𑀸𑀲𑁂. ‘‘𑀯𑀺𑀲𑁆𑀲𑀫𑁆𑀪𑁄 𑀓𑁂𑀮𑀺𑀓𑀮𑀳𑁂, 𑀯𑀺𑀲𑁆𑀲𑀸𑀲𑁂’𑀧𑀡𑀬𑁂𑀧𑀺 𑀘𑁂’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸𑀬𑀫𑁆𑀧𑀺] 𑀭𑀼𑀤𑁆𑀤𑁄.

𑀤𑁆𑀯𑀬𑀁 𑀦𑁆𑀬𑀸𑀬𑁂. 𑀬𑀼𑀚 𑀲𑀫𑀸𑀥𑀺𑀫𑁆𑀳𑀺, 𑀲𑀫𑀸𑀥𑀺 𑀅𑀪𑁆𑀬𑀼𑀧𑀕𑀫𑁄, 𑀢𑁄. 𑀉𑀧𑀕𑀦𑁆𑀢𑀩𑁆𑀩𑀢𑁆𑀢𑀸 𑀉𑀧𑀸𑀬𑀺𑀓𑀁. 𑀉𑀧𑀸𑀬𑀸 𑀲𑀓𑀢𑁆𑀣𑁂 𑀇𑀓𑁄, 𑀑𑀧𑀸𑀬𑀺𑀓𑀁, 𑀑𑀧𑀬𑀺𑀓𑀫𑁆𑀧𑀺 [𑀧𑀸𑀡𑀺𑀦𑀺 𑁫.𑁪.𑁩𑁪 (𑀕𑀡)], 𑀮𑀩𑁆𑀪𑀁, 𑀪𑀚𑀫𑀸𑀦𑀁, 𑀅𑀪𑀺𑀦𑀻𑀢𑀁, 𑀦𑁆𑀬𑀸𑀬𑀁, 𑀜𑀸𑀬𑀁𑀧𑁆𑀬𑀢𑁆𑀭.

𑁩𑁫𑁪. 𑀲𑀺𑀮𑁄𑀓𑀁 𑀑𑀯𑀸𑀤𑁂. 𑀅𑀯𑀧𑀼𑀩𑁆𑀩𑁄 𑀯𑀤 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁, 𑀪𑀸𑀯𑁂 𑀡𑁄. 𑀲𑀸𑀲 𑀅𑀦𑀼𑀲𑀺𑀝𑁆𑀞𑀺𑀫𑁆𑀳𑀺,𑀢𑀺, 𑀆𑀲𑁆𑀲𑀺, 𑀅𑀦𑀼𑀲𑀺𑀝𑁆𑀞𑀺 ¶ . 𑀅𑀦𑀼𑀲𑀸𑀲𑀢𑁂 𑀅𑀦𑀼𑀲𑀸𑀲𑀦𑀁. 𑀧𑀼𑀫𑀯𑀚𑁆𑀚𑁂 𑀇𑀢𑁆𑀣𑀺𑀬𑀁, 𑀦𑀧𑀼𑀁𑀲𑀓𑁂 𑀘. 𑀏𑀢𑁆𑀣 𑀘 𑀏𑀓𑀲𑁆𑀲𑁂𑀯𑀢𑁆𑀣𑀲𑁆𑀲 𑀪𑀺𑀦𑁆𑀦𑀮𑀺𑀗𑁆𑀕𑁂𑀳𑀺 𑀢𑀻𑀳𑀺 𑀦𑀸𑀫𑁂𑀳𑀺 𑀓𑀣𑀦𑀁 𑀦 𑀓𑁂𑀯𑀮𑀁 𑀯𑀸𑀘𑁆𑀘𑀮𑀺𑀗𑁆𑀕𑁄𑀬𑁂𑀯 𑀲𑀤𑁆𑀤𑁄, 𑀅𑀣 𑀔𑁄 𑀯𑀸𑀘𑀓𑀮𑀺𑀗𑁆𑀕𑁄𑀧𑁆𑀬𑀢𑁆𑀣𑀻𑀢𑀺 𑀤𑀻𑀧𑀦𑀢𑁆𑀣𑀁.

𑀤𑁆𑀯𑀬𑀁 𑀆𑀡𑀸𑀬𑀁. 𑀆𑀡 𑀧𑁂𑀲𑀦𑁂, 𑀪𑀸𑀯𑁂 𑀅, 𑀆𑀡𑀸, 𑀇𑀢𑁆𑀣𑀻. 𑀅𑀯𑀯𑀸𑀤𑁄, 𑀦𑀺𑀤𑁆𑀤𑁂𑀲𑁄, 𑀲𑀺𑀝𑁆𑀞𑀺𑀧𑁆𑀬𑀢𑁆𑀭. 𑀤𑁆𑀯𑀬𑀁 𑀩𑀦𑁆𑀥𑀦𑁂. 𑀤𑀸 𑀤𑀸𑀦𑁂, 𑀪𑀸𑀯𑁂 𑀬𑀼, 𑀤𑀸 𑀅𑀯𑀔𑀡𑁆𑀟𑀦𑁂 𑀯𑀸, 𑀯𑀺𑀬𑁄𑀕𑀤𑀸𑀦𑀢𑁄 𑀉𑀤𑁆𑀤𑀸𑀦𑀁.

𑁩𑁫𑁫-𑁩𑁫𑁬. 𑀤𑁆𑀯𑀬𑀁 𑀅𑀧𑀭𑀸𑀥𑁂. 𑀅𑀧𑀕𑀘𑁆𑀙𑀦𑁆𑀢𑁆𑀬𑀦𑁂𑀦𑀸𑀢𑀺 𑀆𑀕𑀼, 𑀡𑀼, 𑀧𑀮𑁄𑀧𑁄, 𑀭𑀲𑁆𑀲𑀲𑁆𑀲 𑀤𑀻𑀖𑀢𑀸, 𑀦𑀧𑀼𑀁𑀲𑀓𑁂 𑀆𑀕𑀼. 𑀅𑀧𑀕𑀢𑁄 𑀭𑀸𑀥𑁄 𑀬𑁂𑀦 𑀅𑀧𑀭𑀸𑀥𑁄, 𑀭𑀸𑀥 𑀲𑀁𑀲𑀺𑀤𑁆𑀥𑀺𑀫𑁆𑀳𑀺. 𑀤𑁆𑀯𑀬𑀁 𑀭𑀸𑀚𑀕𑀬𑁆𑀳𑁂. 𑀓𑀺𑀭 𑀯𑀺𑀓𑀺𑀭𑀡𑁂, 𑀓𑀢𑁆𑀢𑀭𑀺 𑀅, 𑀅𑀢𑁆𑀢𑀁. 𑀩𑀮 𑀧𑀸𑀡𑀦𑁂, 𑀇. 𑀓𑀭𑀲𑀸𑀳𑀘𑀭𑀺𑀬𑀢𑁄 𑀩𑀮𑀺 𑀧𑀼𑀮𑁆𑀮𑀺𑀗𑁆𑀕𑁂. 𑀪𑀸𑀕𑀥𑁂𑀬𑁆𑀬𑁄𑀧𑁆𑀬𑀢𑁆𑀭. 𑀪𑀸𑀕𑀸𑀲𑀓𑀢𑁆𑀣𑁂 𑀥𑁂𑀬𑁆𑀬𑁄 [𑀧𑀸𑀡𑀺𑀦𑀺 𑁫.𑁪.𑁩𑁬 (𑀯𑀸.)], 𑀪𑀸𑀕𑀢𑁆𑀢𑁂𑀦 𑀢𑀺𑀝𑁆𑀞𑀢𑀻𑀢𑀺 𑀯𑀸 𑀪𑀸𑀕𑀥𑁂𑀬𑁆𑀬𑁄, 𑀇𑀬𑁄.

𑀤𑁆𑀯𑀬𑀁 𑀢𑀼𑀝𑁆𑀞𑀺𑀤𑀸𑀬𑁂. 𑀫𑀦𑁄𑀭𑀣𑀧𑀼𑀡𑁆𑀡𑀢𑁆𑀢𑀸 𑀧𑀢𑁆𑀢𑀩𑁆𑀩𑁄 𑀪𑀸𑀕𑁄 𑀧𑀼𑀡𑁆𑀡𑀧𑀢𑁆𑀢𑁄. 𑀢𑀼𑀲𑁆𑀲𑀦𑀁 𑀢𑀼𑀝𑁆𑀞𑁄, 𑀲𑁄𑀲𑁆𑀲𑀢𑁆𑀣𑀻𑀢𑀺 𑀢𑀼𑀝𑁆𑀞𑀻, 𑀢𑁂𑀦 𑀤𑀸𑀢𑀩𑁆𑀩𑁄 𑀤𑀸𑀬𑁄 𑀢𑀼𑀝𑁆𑀞𑀺𑀤𑀸𑀬𑁄, 𑀆𑀓𑀸𑀭𑀦𑁆𑀢𑀸𑀦𑀫𑀸𑀬𑁄.

𑀙𑀓𑁆𑀓𑀁 ¶ 𑀧𑀸𑀪𑀢𑁂. 𑀢𑀣𑀸 𑀳𑀺 𑁋

‘‘𑀳𑁂𑀫𑀁 𑀲𑀻𑀳𑀸𑀲𑀦𑀁 𑀯𑁂𑀲𑀁, 𑀯𑀼𑀢𑁆𑀢𑀁 𑀪𑀤𑁆𑀤𑀸𑀲𑀦𑀁 𑀢𑀣𑀸;

𑀉𑀧𑀸𑀬𑀦’𑀫𑀼𑀧𑀕𑁆𑀕𑀬𑁆𑀳𑀁, 𑀧𑀸𑀪𑀢𑀜𑁆𑀘𑁄’𑀧𑀤𑀸 𑀣𑀺𑀬’’𑀦𑁆𑀢𑀺.

𑀲𑀺𑀮𑁄𑀓𑀸𑀤𑁆𑀥𑀁 𑀦𑀸𑀫 𑀅𑀫𑀭𑀫𑀸𑀮𑀸.

𑀉𑀧𑀕𑀦𑁆𑀢𑁆𑀯𑀸𑀤𑀸𑀢𑀩𑁆𑀩𑀸𑀢𑀺 𑀉𑀧𑀤𑀸, 𑀅, 𑀇𑀢𑁆𑀣𑀻, 𑀢𑀁 𑀢𑀫𑀢𑁆𑀣𑀁 𑀧𑀢𑁆𑀣𑁂𑀦𑁆𑀢𑁂𑀳𑀺 𑀆𑀪𑀭𑀻𑀬𑀢𑁂 𑀆𑀦𑀻𑀬𑀢𑁂𑀢𑀺 𑀧𑀸𑀪𑀢𑀁, 𑀧𑀢𑁆𑀣𑀦𑀢𑁆𑀣𑀚𑁄𑀢𑀓𑁄𑀬𑀁 𑀧𑀲𑀤𑁆𑀤𑁄. 𑀉𑀧𑁂𑀬𑁆𑀬𑀢𑁂𑀢𑀺 𑀉𑀧𑀸𑀬𑀦𑀁, 𑀇𑀢𑁄 𑀬𑀼, 𑀉𑀧𑀕𑀘𑁆𑀙𑀢𑀺 𑀬𑁂𑀦𑀸𑀢𑀺 𑀯𑀸 𑀉𑀧𑀸𑀬𑀦𑀁. 𑀓𑀼𑀘 𑀲𑀗𑁆𑀓𑁄𑀘𑀦𑁂, 𑀡𑁄, 𑀯𑀺𑀕𑀢𑁄 𑀓𑁄𑀘𑁄 𑀬𑁂𑀦 𑀉𑀓𑁆𑀓𑁄𑀘𑁄. 𑀧𑀡𑁆𑀡𑁂𑀦 𑀲𑀢𑁆𑀣𑀧𑀡𑁆𑀡𑁂𑀦 𑀲𑀤𑁆𑀥𑀺𑀁 𑀆𑀓𑀭𑀻𑀬𑀢𑁂 𑀆𑀦𑀻𑀬𑀢𑁂𑀢𑀺 𑀧𑀡𑁆𑀡𑀸𑀓𑀸𑀭𑁄, 𑀅𑀜𑁆𑀜𑀢𑁆𑀭 𑀉𑀧𑀘𑀸𑀭𑀸. 𑀧𑀳𑀺𑀡𑀦𑁆𑀢𑁆𑀬𑀦𑁂𑀦𑁂𑀢𑀺 𑀧𑀳𑁂𑀡𑀓𑀁, 𑀳𑀺 𑀕𑀢𑀺𑀬𑀁, 𑀬𑀼, 𑀲𑀓𑀢𑁆𑀣𑁂 𑀓𑁄. 𑀧𑀤𑁂𑀲𑀦𑀁, 𑀉𑀧𑀕𑁆𑀕𑀬𑁆𑀳𑀁, 𑀉𑀧𑀳𑀸𑀭𑁄𑀧𑁆𑀬𑀢𑁆𑀭.

𑀕𑀼𑀫𑁆𑀩𑀸𑀤𑀺𑀤𑁂𑀬𑁆𑀬𑁄 𑀕𑀼𑀫𑁆𑀩𑀖𑀝𑀸𑀤𑀺𑀓𑁄 [𑀕𑀼𑀫𑁆𑀩𑀖𑀝𑀸𑀤𑀺𑀢𑁄 (?)] 𑀤𑁂𑀬𑁆𑀬𑁄𑀲𑀼𑀗𑁆𑀓𑀁, 𑀅𑀦𑀺𑀢𑁆𑀣𑀻, 𑀕𑀼𑀫𑁆𑀩𑁄 𑀦𑀸𑀫 𑀚𑀮𑀣𑀮𑀫𑀕𑁆𑀕𑀸𑀤𑀻𑀲𑀼 𑀮𑀤𑁆𑀥𑀩𑁆𑀩𑀪𑀸𑀕𑁄, 𑀢𑀣𑀸 𑀖𑀝𑁆𑀝𑁄𑀧𑀺, 𑀲𑀫𑀸𑀦𑀢𑁆𑀣𑀸 𑀳𑁂𑀢𑁂. 𑀆𑀤𑀺𑀦𑀸 𑀧𑀸𑀪𑀢𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀼𑀗𑁆𑀓 𑀕𑀫𑀦𑁂, 𑀲𑀼𑀗𑁆𑀓𑀢𑀺 𑀬𑁂𑀦, 𑀢𑀁 𑀲𑀼𑀗𑁆𑀓𑀁. 𑀕𑀫𑀼 𑀕𑀫𑀦𑁂, 𑀩𑁄, 𑀅𑀲𑁆𑀲𑀼, 𑀕𑀼𑀫𑁆𑀩𑁄. 𑀤𑁆𑀯𑀬𑀁 𑀕𑀸𑀫𑀚𑀦𑀧𑀤𑀸𑀤𑀺𑀢𑁄 𑀮𑀤𑁆𑀥𑀩𑁆𑀩𑀪𑀸𑀕𑁂. 𑀅𑀬 𑀕𑀫𑀦𑁂, 𑀡𑁄, 𑀆𑀬𑁄. 𑀅𑀧𑀘𑁆𑀘𑀬𑁂 𑀅𑀬𑁄. 𑀥𑀦𑀸𑀦𑀁 𑀲𑀫𑁆𑀧𑀢𑁆𑀢𑀓𑀸𑀮𑁂 𑀆𑀕𑀫𑁄 𑀥𑀦𑀸𑀕𑀫𑁄.

𑁩𑁫𑁭. 𑀤𑁆𑀯𑀬𑀁 𑀙𑀢𑁆𑀢𑀲𑀸𑀫𑀜𑁆𑀜𑁂. 𑀆𑀢𑀧𑀢𑁄 𑀲𑀽𑀭𑀺𑀬𑀸𑀮𑁄𑀓𑀢𑁄 𑀢𑀸𑀬𑀢𑀻𑀢𑀺 𑀆𑀢𑀧𑀢𑁆𑀢𑀁, 𑀢𑁄. 𑀙𑀸𑀤𑀬𑀢𑀻𑀢𑀺 𑀙𑀢𑁆𑀢𑀁, 𑀙𑀤 ¶ 𑀅𑀧𑀯𑀸𑀭𑀡𑁂, 𑀢𑁄, 𑀢𑁆𑀭𑀡𑀧𑀘𑁆𑀘𑀬𑁂 𑀙𑀢𑁆𑀭𑀁, 𑀳𑁂𑀫𑀁 𑀲𑀼𑀯𑀡𑁆𑀡𑀔𑀘𑀺𑀢𑀁 𑀭𑀜𑁆𑀜𑀁 𑀭𑀸𑀚𑀽𑀦𑀁 𑀆𑀲𑀦𑀁 𑀲𑀻𑀳𑀸𑀲𑀦𑀸𑀔𑁆𑀬𑀁. 𑀲𑀻𑀳𑀸𑀓𑀢𑀺𑀧𑁆𑀧𑀥𑀸𑀦𑀢𑁆𑀢𑀸 𑀲𑀻𑀳𑀸𑀓𑀢𑀺𑀧𑁆𑀧𑀥𑀸𑀦𑀁 𑀆𑀲𑀦𑀦𑁆𑀢𑀺 𑀯𑀺𑀕𑁆𑀕𑀳𑁄.

𑀤𑁆𑀯𑀬𑀁 𑀘𑀸𑀫𑀭𑁂. 𑀯𑀸𑀮𑁂𑀦 𑀓𑀢𑀸 𑀩𑀻𑀚𑀦𑀻 𑀯𑀸𑀮𑀩𑀻𑀚𑀦𑀻. 𑀘𑀫𑀭𑁄 𑀫𑀺𑀕𑁄 𑀢𑀲𑁆𑀲𑁂𑀤𑀁 𑀘𑀸𑀫𑀭𑀻. ‘‘𑀘𑀸𑀫𑀭𑀸 𑀘𑀸𑀫𑀭𑀁 𑀭𑁄𑀫𑀁, 𑀕𑀼𑀘𑁆𑀙𑀓𑀜𑁆𑀘𑀸𑀯𑀘𑀽𑀮𑀓’’𑀦𑁆𑀢𑀺 [𑀢𑀺𑀓𑀡𑁆𑀟𑀲𑁂𑀲 𑁨.𑁮.𑁪𑁦𑁬] 𑀢𑀺𑀓𑀡𑁆𑀟𑀲𑁂𑀲𑁄. 𑀧𑀓𑀺𑀡𑁆𑀡𑀓𑀁𑀧𑁆𑀬𑀢𑁆𑀭. 𑀧𑀓𑀭𑀻𑀬𑀢𑁂 𑀯𑀺𑀓𑁆𑀔𑀺𑀧𑀢𑁂 𑀧𑀓𑀺𑀡𑁆𑀡𑀓𑀁, 𑀲𑀓𑀢𑁆𑀣𑁂 𑀓𑁄.

𑁩𑁫𑁮. 𑀔𑀕𑁆𑀕𑀸𑀤𑀬𑁄 𑀇𑀫𑁂 𑀧𑀜𑁆𑀘 𑀭𑀸𑀚𑀽𑀦𑀁 𑀓𑀓𑀼𑀥𑀪𑀡𑁆𑀟𑀸𑀦𑀺 𑀪𑀯𑀦𑁆𑀢𑀺. 𑀓𑀼𑀓 𑀆𑀤𑀸𑀦𑁂, 𑀥𑁄, 𑀯𑀡𑁆𑀡𑀯𑀺𑀧𑀭𑀺𑀬𑀬𑁄. 𑀭𑀜𑁆𑀜𑁄 𑀕𑀫𑀦𑀓𑀸𑀮𑁂 𑀲𑀤𑀸 𑀆𑀤𑀸𑀢𑀩𑁆𑀩𑀢𑁄 𑀓𑀓𑀼𑀥𑀸𑀦𑀺 𑀘 𑀢𑀸𑀦𑀺 𑀭𑀸𑀚𑀥𑀦𑀢𑁆𑀢𑀸 𑀪𑀡𑁆𑀟𑀸𑀦𑀺 𑀘𑁂𑀢𑀺 𑀓𑀓𑀼𑀥𑀪𑀡𑁆𑀟𑀸𑀦𑀺.

𑁩𑁫𑁯. 𑀤𑁆𑀯𑀬𑀁 𑀧𑀼𑀡𑁆𑀡𑀖𑀝𑁂. 𑀚𑀮𑀧𑀼𑀡𑁆𑀡𑀢𑁆𑀢𑀸 𑀪𑀤𑁆𑀤𑁄 𑀓𑀮𑁆𑀬𑀸𑀡𑁄 𑀓𑀼𑀫𑁆𑀪𑁄 𑀪𑀤𑁆𑀤𑀓𑀼𑀫𑁆𑀪𑁄. 𑀤𑁆𑀯𑀬𑀁 𑀳𑁂𑀫𑀪𑀸𑀚𑀦𑁂. 𑀪𑀭 𑀪𑀭𑀡𑁂, 𑀪𑀭𑀡𑀁 𑀥𑀸𑀭𑀡𑀁 𑀧𑁄𑀲𑀦𑀜𑁆𑀘, 𑀥𑀸𑀭𑀡𑀢𑁆𑀣𑀲𑁆𑀲 𑀪𑀭𑀢𑀺𑀲𑁆𑀲 𑀪𑀺𑀗𑁆𑀕𑀸𑀤𑁂𑀲𑁄, 𑀪𑀭𑀢𑀺 𑀤𑀥𑀸𑀢𑀺 𑀉𑀤𑀓𑀦𑁆𑀢𑀺 𑀪𑀺𑀗𑁆𑀕𑀸𑀭𑁄, 𑀆𑀭𑁄. 𑀓𑀭𑀓𑁄, 𑀓𑀼𑀡𑁆𑀟𑀺𑀓𑀸𑀧𑁆𑀬𑀢𑁆𑀭.

𑀳𑀢𑁆𑀣𑀻 ¶ 𑀘 𑀅𑀲𑁆𑀲𑁄 𑀘 𑀭𑀣𑁄 𑀘 𑀧𑀢𑁆𑀢𑀺 𑀘, 𑀢𑁂𑀲𑀁 𑀲𑀫𑀽𑀳𑁄 𑀳𑀢𑁆𑀣𑀺𑀲𑁆𑀲𑀭𑀣𑀧𑀢𑁆𑀢𑀺 𑀘𑀢𑀼𑀭𑀗𑁆𑀕𑀺𑀦𑀻 𑀲𑁂𑀦𑀸𑀢𑁆𑀬𑀼𑀘𑁆𑀘𑀢𑁂, 𑀲𑁂𑀦𑀗𑁆𑀕𑀢𑁆𑀢𑀸 𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑁄𑀬𑀁. 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀬𑀲𑁆𑀲𑀁 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀲𑀸 𑀘𑀢𑀼𑀭𑀗𑁆𑀕𑀺𑀦𑀻, 𑀈, 𑀇𑀦𑀻.

𑁩𑁬𑁦. 𑀤𑀦𑁆𑀢𑁆𑀬𑀦𑁆𑀢𑀁 𑀳𑀢𑁆𑀣𑀺𑀦𑀺. 𑀓𑀼𑀜𑁆𑀚𑁄 𑀳𑀦𑀼, 𑀤𑀦𑁆𑀢𑁄 𑀘, 𑀢𑀁𑀬𑁄𑀕𑀸 𑀓𑀼𑀜𑁆𑀚𑀭𑁄, 𑀅𑀢𑀺𑀲𑀬𑁂 𑀭𑁄, 𑀓𑀼𑀁 𑀧𑀣𑀯𑀺𑀁 𑀚𑀭𑀸𑀧𑁂𑀢𑀻𑀢𑀺 𑀯𑀸 𑀓𑀼𑀜𑁆𑀚𑀭𑁄, 𑀅𑀮𑀼𑀢𑁆𑀢𑀲𑀫𑀸𑀲𑁄, 𑀓𑀼𑀜𑁆𑀚𑁂 𑀯𑀸 𑀕𑀺𑀭𑀺𑀓𑀽𑀝𑁂 𑀭𑀫𑀢𑀺, 𑀓𑁄𑀜𑁆𑀘𑀦𑀸𑀤𑀁 𑀦𑀤𑀦𑁆𑀢𑁄 𑀯𑀸 𑀘𑀭𑀢𑀺, 𑀓𑀼𑀁 𑀯𑀸 𑀧𑀣𑀯𑀺𑀁 𑀢𑀤𑀸𑀖𑀸𑀢𑁂𑀦 𑀚𑀭𑀬𑀢𑀻𑀢𑀺 𑀓𑀼𑀜𑁆𑀚𑀭𑁄. 𑀯𑀸𑀭𑀬𑀢𑀺 𑀧𑀭𑀩𑀮𑀁 𑀯𑀸𑀭𑀡𑁄, 𑀦𑀦𑁆𑀤𑀸𑀤𑀻𑀳𑀺 𑀬𑀼. 𑀳𑀢𑁆𑀣𑀬𑁄𑀕𑀸 𑀳𑀢𑁆𑀣𑀻. 𑀫𑀢𑀗𑁆𑀕𑀲𑁆𑀲 𑀇𑀲𑀺𑀦𑁄 𑀅𑀧𑀘𑁆𑀘𑀁 𑀫𑀸𑀢𑀗𑁆𑀕𑁄, 𑀫𑀳𑀦𑁆𑀢𑀁 𑀅𑀗𑁆𑀕𑀁 𑀲𑀭𑀻𑀭𑀫𑁂𑀢𑀲𑁆𑀲𑀸𑀢𑀺 𑀯𑀸 𑀫𑀸𑀢𑀗𑁆𑀕𑁄, 𑀳 𑀦𑀮𑁄𑀧𑁄, 𑀅𑀲𑁆𑀲𑀸𑀓𑀸𑀭𑁄 𑀘. 𑀤𑁆𑀯𑁂 𑀭𑀤𑀸 𑀤𑀦𑁆𑀢𑀸 𑀬𑀲𑁆𑀲 𑀤𑁆𑀯𑀺𑀭𑀤𑁄, ‘‘𑀭𑀤 𑀯𑀺𑀮𑁂𑀔𑀦𑁂 𑀤𑀦𑁆𑀢𑁂’’𑀢𑀺 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂. 𑀕𑀚 𑀲𑀤𑁆𑀤𑁂, 𑀕𑀚𑀢𑀻𑀢𑀺, 𑀅. 𑀦𑀕𑁄 𑀧𑀩𑁆𑀩𑀢𑁄, 𑀲𑁄 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺 𑀦𑀸𑀕𑁄, 𑀡𑁄. 𑀓𑀭𑁂𑀦, 𑀫𑀼𑀔𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀧𑀺𑀯𑀢𑀻𑀢𑀺 𑀤𑁆𑀯𑀺𑀧𑁄. 𑀇 𑀕𑀫𑀦𑁂, 𑀪𑁄. 𑀤𑀦𑁆𑀢𑀬𑁄𑀕𑀸 𑀤𑀦𑁆𑀢𑀻. 𑀲𑀝𑁆𑀞𑀺𑀳𑀸𑀬𑀦𑁄, 𑀤𑀦𑁆𑀢𑀸𑀯𑀮𑁄, 𑀅𑀦𑁂𑀓𑀧𑁄, 𑀫𑀢𑀗𑁆𑀕𑀚𑁄, 𑀓𑀭𑀻, 𑀣𑀫𑁆𑀪𑁂𑀭𑀫𑁄, 𑀧𑀤𑁆𑀫𑀻, 𑀫𑀳𑀸𑀫𑀺𑀕𑁄, 𑀧𑀻𑀮𑀼, 𑀲𑀺𑀦𑁆𑀥𑀼𑀭𑁄, 𑀤𑀻𑀖𑀫𑀸𑀭𑀼𑀢𑁄, 𑀭𑀸𑀚𑀻𑀯𑁄, 𑀚𑀮𑀓𑀓𑁆𑀔𑁄, 𑀦𑀺𑀮𑁆𑀮𑀼𑀭𑁄, 𑀓𑀭𑀝𑀻, 𑀯𑀭𑀗𑁆𑀕𑁄, 𑀲𑀼𑀧𑁆𑀧𑀓𑀡𑁆𑀡𑁄 𑀇𑀘𑁆𑀘𑀸𑀤𑀻𑀦𑀺𑀧𑀺 𑀳𑀢𑁆𑀣𑀺𑀦𑁄 𑀦𑀸𑀫𑀸𑀦𑀺. 𑀲𑀝𑁆𑀞𑀺𑀯𑀲𑁆𑀲𑀺𑀓𑀢𑁆𑀢𑀸, 𑀚𑀸𑀢𑀺𑀬𑀸 𑀲𑀝𑁆𑀞𑀺𑀯𑀲𑁆𑀲𑀓𑀸𑀮𑁂 𑀣𑀸𑀫𑁂𑀦 𑀳𑀸𑀬𑀦𑀢𑁄 𑀯𑀸 𑀲𑀝𑁆𑀞𑀺𑀳𑀸𑀬𑀦𑁄.

𑀯𑀦𑀓𑀭𑀻𑀦𑀁 𑀬𑁄 𑀬𑀽𑀣𑀚𑁂𑀝𑁆𑀞𑁄, 𑀲𑁄 𑀲𑀬𑀽𑀣𑀸𑀦𑀁 𑀚𑁂𑀝𑁆𑀞𑀢𑁆𑀢𑀸 𑀬𑀽𑀣𑀚𑁂𑀝𑁆𑀞𑁄. 𑀲𑀬𑀽𑀣𑁂 𑀧𑀸𑀢𑀺 𑀭𑀓𑁆𑀔𑀢𑀻𑀢𑀺 𑀬𑀽𑀣𑀧𑁄𑀢𑀺 𑀘𑁄𑀘𑁆𑀘𑀢𑁂.

𑁩𑁬𑁧. 𑀓𑀸𑀴𑀸𑀯𑀓𑀸𑀤𑀻𑀦𑀺 ¶ 𑀏𑀢𑀸𑀦𑀺 𑀳𑀢𑁆𑀣𑀺𑀭𑀸𑀚𑀸𑀦𑀁 𑀓𑀼𑀮𑀸𑀦𑀺. 𑀓𑀮𑀫𑁆𑀩𑀢𑁂 𑀲𑀤𑁆𑀤𑀸𑀬𑀢𑁂𑀢𑀺 𑀓𑀸𑀴𑀸𑀯𑀓𑁄, 𑀡𑁆𑀯𑀼, 𑀫𑀮𑁄𑀧𑁄. 𑀕𑀗𑁆𑀕𑀸𑀬𑀁 𑀚𑀸𑀢𑁄 𑀕𑀗𑁆𑀕𑁂𑀬𑁆𑀬𑁄, 𑀞𑀸𑀦𑀯𑀲𑁂𑀦 𑀲𑀸 𑀲𑀜𑁆𑀜𑀸. 𑀧𑀡𑁆𑀟𑀭𑀯𑀡𑁆𑀡𑀢𑀸𑀬 𑀧𑀡𑁆𑀟𑀭𑁄. 𑀯𑀡𑁆𑀡𑀯𑀲𑁂𑀦 𑀢𑀫𑁆𑀩𑀯𑀡𑁆𑀡𑀢𑀸𑀬 𑀢𑀫𑁆𑀩𑁄. 𑀧𑀺𑀗𑁆𑀕𑀮𑀯𑀡𑁆𑀡𑀢𑀸𑀬 𑀧𑀺𑀗𑁆𑀕𑀮𑁄. 𑀕𑀦𑁆𑀥𑀬𑀼𑀢𑁆𑀢𑀢𑀸𑀬 𑀕𑀦𑁆𑀥𑁄. 𑀫𑀗𑁆𑀕 𑀕𑀫𑀦𑀢𑁆𑀣𑁄, 𑀲𑁄𑀪𑀦𑀕𑀫𑀦𑀬𑀼𑀢𑁆𑀢𑀢𑀸𑀬 𑀫𑀗𑁆𑀕𑀮𑁄, 𑀅𑀢𑀺𑀲𑀸𑀬𑀦𑁂, 𑀧𑀲𑀁𑀲𑀸𑀬𑀁 𑀯𑀸 𑀮𑁄. 𑀳𑁂𑀫𑀯𑀡𑁆𑀡𑀢𑀸𑀬 𑀳𑁂𑀫𑁄. 𑀉𑀧𑁄𑀲𑀣𑀓𑀼𑀮𑁂 𑀚𑀸𑀢𑀢𑁆𑀢𑀸 𑀉𑀧𑁄𑀲𑀣𑁄, 𑀉𑀧𑀕𑀦𑁆𑀢𑁆𑀯𑀸 𑀅𑀭𑀬𑁄 𑀉𑀲𑀢𑀻𑀢𑀺 𑀯𑀸 𑀉𑀧𑁄𑀲𑀣𑁄, 𑀣𑁄, 𑀉𑀲 𑀤𑀸𑀳𑁂, 𑀉𑀧𑀧𑀼𑀩𑁆𑀩𑁄 𑀯𑀲 𑀦𑀺𑀯𑀸𑀲𑁂 𑀯𑀸, 𑀯𑀲𑁆𑀲𑁄, 𑀉𑀧𑁄𑀲𑀣𑁄, 𑀢𑀺𑀣𑀻𑀯𑀺𑀲𑁂𑀲𑁄 𑀘. 𑀙𑀩𑁆𑀩𑀡𑁆𑀡𑀤𑀦𑁆𑀢𑀢𑀸𑀬 𑀙𑀤𑁆𑀤𑀦𑁆𑀢𑁄. 𑀏𑀢𑁂𑀲𑀜𑁆𑀘 𑀓𑀸𑀴𑀸𑀯𑀓𑁄 𑀤𑀲𑀦𑁆𑀦𑀁 𑀧𑀼𑀭𑀺𑀲𑀸𑀦𑀁 𑀩𑀮𑀁 𑀥𑀸𑀭𑁂𑀢𑀺, 𑀕𑀗𑁆𑀕𑁂𑀬𑁆𑀬𑁄 𑀤𑀲𑀦𑁆𑀦𑀁 𑀓𑀸𑀴𑀸𑀯𑀓𑀸𑀦𑀁, 𑀏𑀯𑀁 𑀬𑀸𑀯𑀙𑀤𑁆𑀤𑀦𑁆𑀢𑀸 𑀦𑁂𑀢𑀩𑁆𑀩𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀤𑀲𑀦𑁆𑀦𑀁 𑀙𑀤𑁆𑀤𑀦𑁆𑀢𑀸𑀦𑀁 𑀩𑀮𑀁 𑀥𑀸𑀭𑁂𑀢𑀺, 𑀢𑁂𑀦𑁂𑀯 𑀪𑀕𑀯𑀸 𑀓𑀸𑀴𑀸𑀯𑀓𑀳𑀢𑁆𑀣𑀺𑀕𑀡𑀦𑀸𑀬 𑀓𑁄𑀝𑀺𑀲𑀳𑀲𑁆𑀲𑀩𑀮𑀁 𑀥𑀸𑀭𑁂𑀢𑀺, 𑀧𑀼𑀭𑀺𑀲𑀕𑀡𑀦𑀸𑀬 𑀤𑀲𑀦𑁆𑀦𑀁 𑀧𑀼𑀭𑀺𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀩𑀮𑀁.

𑁩𑁬𑁨. 𑀧𑀸𑀤𑁄 𑀓𑀭𑀺𑀧𑁄𑀢𑁂. 𑀧𑀜𑁆𑀘𑀯𑀲𑁆𑀲𑀸𑀦𑀺 𑀬𑀸𑀯 𑀓𑀮𑀪𑁄, 𑀓𑀮 𑀲𑀗𑁆𑀔𑁆𑀬𑀸𑀦𑁂, 𑀅𑀪𑁄, 𑀓𑀮𑀪𑁄, 𑀴𑀢𑁆𑀢𑁂 𑀓𑀴𑀪𑁄, 𑀫𑀸𑀢𑀸𑀧𑀺𑀢𑀽𑀳𑀺 ¶ 𑀪𑀭𑀺𑀢𑀩𑁆𑀩𑀢𑁆𑀢𑀸 𑀪𑀺𑀗𑁆𑀓𑁄, 𑀪𑀭𑀢𑀺𑀲𑁆𑀲 𑀪𑀺𑀗𑁆𑀓𑁄. 𑀓𑀭𑀺𑀲𑀸𑀯𑀓𑁄𑀧𑁆𑀬𑀢𑁆𑀭. 𑀧𑀸𑀤𑁄 𑀫𑀢𑁆𑀢𑀫𑀸𑀢𑀗𑁆𑀕𑁂. 𑀤𑀸𑀦𑀁 𑀧𑀪𑀺𑀦𑁆𑀦𑁄 𑀬𑀲𑁆𑀲 𑀧𑀪𑀺𑀦𑁆𑀦𑁄. 𑀫𑀚𑁆𑀚𑀢𑀻𑀢𑀺 𑀫𑀢𑁆𑀢𑁄, 𑀫𑀤 𑀉𑀫𑁆𑀫𑀸𑀤𑁂. 𑀕𑀚𑁂 𑀚𑀸𑀬𑀢𑀻𑀢𑀺 𑀕𑀚𑁆𑀚𑁄, 𑀡𑁆𑀬𑁄, 𑀫𑀤𑁄. 𑀲𑁄 𑀲𑀜𑁆𑀚𑀸𑀢𑁄 𑀬𑀲𑁆𑀲 𑀕𑀚𑁆𑀚𑀺𑀢𑁄.

𑀤𑁆𑀯𑀬𑀁 𑀳𑀢𑁆𑀣𑀺𑀲𑀫𑀽𑀳𑁂. 𑀳𑀢𑁆𑀣𑀻𑀦𑀁 𑀲𑀫𑀽𑀳𑁄 𑀳𑀢𑁆𑀣𑀺𑀖𑀝𑀸. 𑀕𑀚𑀸𑀦𑀁 𑀲𑀫𑀽𑀳𑁄 𑀕𑀚𑀢𑀸, 𑀕𑀸𑀫𑀚𑀦𑀩𑀦𑁆𑀥𑀼𑀲𑀳𑀸𑀬𑀸𑀤𑀻𑀳𑀺 𑀢𑀸. 𑀧𑀸𑀤𑁄 𑀳𑀢𑁆𑀣𑀺𑀦𑀺𑀬𑀁. 𑀳𑀢𑁆𑀣𑀬𑁄𑀕𑀸 𑀳𑀢𑁆𑀣𑀺𑀦𑀻, 𑀈, 𑀇𑀦𑀻. 𑀓𑀡 𑀲𑀤𑁆𑀤𑁂, 𑀇𑀭𑀼, 𑀲𑀓𑀢𑁆𑀣𑁂 𑀓𑁄. 𑀓𑀭𑁂𑀡𑀼𑀓𑀸𑀢𑀺𑀧𑀺, 𑀢𑀤𑀸 𑀓𑀭𑀬𑁄𑀕𑀸 𑀓𑀭𑁂𑀡𑀼𑀓𑀸, 𑀇𑀡𑀼. 𑀓𑀭𑀺𑀡𑀻, 𑀥𑁂𑀦𑀼𑀓𑀸, 𑀯𑀲𑀸, 𑀓𑀭𑁂𑀡𑀼𑀧𑁆𑀬𑀢𑁆𑀭.

𑁩𑁬𑁩. 𑀳𑀢𑁆𑀣𑀺𑀲𑀺𑀭𑁄𑀧𑀺𑀡𑁆𑀟𑀸 𑀳𑀢𑁆𑀣𑀺𑀦𑁄 𑀲𑀺𑀭𑀲𑀺 𑀤𑁆𑀯𑁂 𑀧𑀺𑀡𑁆𑀟𑀸 𑀓𑀼𑀫𑁆𑀪𑀸𑀔𑁆𑀬𑀸. 𑀓𑁂 𑀲𑀺𑀭𑀲𑀺 𑀪𑀯𑀢𑀻𑀢𑀺 𑀓𑀼𑀫𑁆𑀪𑁄, 𑀅𑀲𑁆𑀲𑀼, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄 𑀘. 𑀤𑁆𑀯𑀺𑀦𑁆𑀦𑀁 𑀧𑀦 𑀓𑀼𑀫𑁆𑀪𑀸𑀦𑀁 𑀫𑀚𑁆𑀛𑀺𑀫𑀁 𑀯𑀺𑀤𑀼 𑀦𑀸𑀫 [𑀅𑀫𑀭 𑁧𑁮.𑁩𑁭]. 𑀅𑀗𑁆𑀓𑀼𑀲𑀲𑀗𑁆𑀖𑀸𑀢𑀁 𑀯𑀺𑀦𑁆𑀤𑀢𑁆𑀬𑀲𑁆𑀫𑀺𑀦𑁆𑀢𑀺 𑀯𑀺𑀤𑀼, 𑀧𑀼𑀫𑁂, 𑀉. 𑀤𑁆𑀯𑀬𑀁 𑀓𑀡𑁆𑀡𑀫𑀽𑀮𑁂. 𑀘𑀽𑀴 𑀦𑀺𑀫𑀚𑁆𑀚𑀦𑁂, 𑀡𑁆𑀯𑀼, 𑀘𑀽𑀴𑀺𑀓𑀸, 𑀘𑀼𑀤 𑀲𑀜𑁆𑀘𑁄𑀤𑀦𑁂 𑀯𑀸, 𑀘𑁄𑀤𑁂𑀦𑁆𑀢𑀺 𑀏𑀢𑁆𑀣 𑀅𑀗𑁆𑀓𑀼𑀲𑀸𑀤𑀻𑀳𑀺 𑀅𑀤𑀦𑁆𑀢𑀦𑁆𑀢𑀺 𑀘𑀽𑀴𑀺𑀓𑀸, 𑀤𑀲𑁆𑀲 𑀴𑁄, 𑀡𑁆𑀯𑀼.

𑀆𑀲𑀢𑁂 𑀅𑀲𑁆𑀫𑀺𑀦𑁆𑀢𑀺 𑀆𑀲𑀦𑀁, 𑀔𑀦𑁆𑀥𑀤𑁂𑀲𑁄. 𑀔𑀦𑁆𑀥𑁄 𑀏𑀯 𑀤𑁂𑀲𑁄 𑀔𑀦𑁆𑀥𑀤𑁂𑀲𑁄, 𑀢𑀲𑁆𑀫𑀺𑀁. 𑀤𑁆𑀯𑀬𑀁 𑀧𑀼𑀘𑁆𑀙𑀫𑀽𑀮𑁂. 𑀧𑀼𑀘𑁆𑀙𑀲𑁆𑀲 𑀫𑀽𑀮𑀁 𑀳𑁂𑀝𑁆𑀞𑀺𑀫𑀪𑀸𑀕𑁄.

𑁩𑁬𑁪. 𑀢𑀺𑀓𑀁 𑀕𑀚𑀩𑀦𑁆𑀥𑀦𑀣𑀫𑁆𑀪𑁂. 𑀆𑀮𑀦𑁆𑀢𑁆𑀬𑀲𑁆𑀫𑀺𑀁, 𑀅𑀦𑁂𑀦 𑀯𑀸 𑀩𑀦𑁆𑀥𑀦𑁆𑀢𑀺 𑀆𑀮𑀸𑀦𑀁, 𑀬𑀼. 𑀆𑀧𑀼𑀩𑁆𑀩𑁄 𑀩𑀦𑁆𑀥𑀦𑀢𑁆𑀣𑁄 𑀮𑀸𑀥𑀸𑀢𑀼. 𑀆𑀳𑀦𑀦𑁆𑀢𑀺 ¶ 𑀩𑀦𑁆𑀥𑀦𑁆𑀢𑁆𑀬𑀲𑁆𑀫𑀺𑀁, 𑀅𑀦𑁂𑀦 𑀯𑀸 𑀆𑀴𑁆𑀳𑀓𑁄, 𑀳𑀦𑀥𑀸𑀢𑀼, 𑀦𑀲𑁆𑀲 𑀴𑁄, 𑀯𑀡𑁆𑀡𑀯𑀺𑀧𑀭𑀺𑀬𑀬𑁄 𑀘, 𑀡𑁆𑀯𑀼. 𑀣𑀫𑁆𑀪 𑀧𑀝𑀺𑀩𑀦𑁆𑀥𑀦𑁂. 𑀩𑀦𑁆𑀥𑁄𑀧𑁆𑀬𑀢𑁆𑀭.

𑀢𑀺𑀓𑀁 𑀲𑀗𑁆𑀔𑀮𑁂. 𑀅𑀦𑀺𑀢𑁆𑀣𑀻 𑀢𑀽𑀢𑀺 𑀢𑁆𑀯𑀦𑁆𑀢𑀁 𑀮𑀺𑀗𑁆𑀕𑀧𑀤𑀁. 𑀕𑀮 𑀲𑁂𑀘𑀦𑁂. 𑀦𑀺𑀕𑀴𑀢𑀺 𑀩𑀦𑁆𑀥𑀢𑀺 𑀬𑁂𑀦𑀸𑀢𑀺 𑀦𑀺𑀕𑀴𑁄, 𑀅, 𑀓𑀢𑁆𑀢𑀼𑀲𑀸𑀥𑀦𑀁 𑀯𑀸. 𑀅𑀤𑀺 𑀩𑀦𑁆𑀥𑀦𑁂, 𑀅𑀦𑁆𑀤𑀢𑀻𑀢𑀺 𑀅𑀦𑁆𑀤𑀼𑀓𑁄. 𑀡𑁆𑀯𑀼, 𑀅𑀲𑁆𑀲𑀼. 𑀪𑀼𑀲𑀁 𑀔𑀮𑀢𑁆𑀬𑀦𑁂𑀦 𑀲𑀗𑁆𑀔𑀮𑀁, 𑀓𑀝𑀺 𑀯𑀢𑁆𑀣𑀩𑀦𑁆𑀥𑀦𑁂𑀧𑀺, ‘‘𑀣𑀻𑀓𑀝𑀻𑀯𑀢𑁆𑀣𑀩𑀦𑁆𑀥𑁂𑀧𑀺, 𑀦𑀺𑀕𑀴𑁂 𑀲𑀗𑁆𑀔𑀮𑀁 𑀢𑀺𑀲𑀽’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁮.𑁪𑁧] 𑀭𑀪𑀲𑁄. 𑀲𑀗𑁆𑀔𑀮𑀺𑀓𑀸𑀧𑁆𑀬𑀢𑁆𑀭.

𑀤𑁆𑀯𑀬𑀁 𑀕𑀚𑀕𑀡𑁆𑀟𑁂. 𑀕𑀡𑁆𑀟 𑀯𑀤𑀦𑁂𑀓𑀤𑁂𑀲𑁂, 𑀅𑀥𑀸𑀢𑀽𑀦𑀫𑁆𑀧𑀺 𑀥𑀸𑀢𑀽𑀲𑀼 𑀧𑀸𑀞𑁄, 𑀥𑀸𑀢𑀼 𑀳𑀺 𑀓𑁆𑀭𑀺𑀬𑀢𑁆𑀣𑁄. 𑀕𑀡𑁆𑀟𑁄 𑀓𑀧𑁄𑀮𑀲𑀸𑀫𑀜𑁆𑀜𑁂𑀧𑀺. 𑀓𑀝 𑀯𑀲𑁆𑀲𑀸𑀯𑀭𑀡𑁂𑀲𑀼, 𑀅. 𑀤𑁆𑀯𑀬𑀁 𑀓𑀭𑀺𑀫𑀤𑀚𑀮𑁂. 𑀤𑀻𑀬𑀢𑁂𑀢𑀺 𑀤𑀸𑀦𑀁. 𑀫𑀤 𑀉𑀫𑁆𑀫𑀸𑀤𑁂, 𑀓𑀭𑀡𑁂 𑀅.

𑁩𑁬𑁫. 𑀤𑁆𑀯𑀬𑀁 𑀳𑀢𑁆𑀣𑀺𑀓𑀭𑁂. 𑀲𑁄𑀡 𑀯𑀡𑁆𑀡𑀕𑀢𑀻𑀲𑀼, 𑀟𑁄, 𑀲𑁄𑀟 𑀕𑀩𑁆𑀩𑁂 𑀯𑀸, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄, 𑀡𑁄 𑀘. 𑀤𑁆𑀯𑀻𑀲𑀼 𑀤𑁆𑀯𑁂𑀧𑀺.

𑀤𑁆𑀯𑀬𑀁 𑀲𑁄𑀡𑁆𑀟𑀕𑁆𑀕𑁂. 𑀓𑀭𑀲𑁆𑀲 𑀲𑁄𑀡𑁆𑀟𑀲𑁆𑀲 𑀅𑀕𑁆𑀕𑀁. 𑀧𑀼𑀲 𑀧𑁄𑀲𑀦𑁂. 𑀔𑀭𑁄, 𑀲𑀲𑁆𑀲 𑀓𑁄, 𑀉𑀲𑁆𑀲𑁄𑀢𑁆𑀢𑀁, 𑀧𑀼𑀲 𑀯𑀼𑀟𑁆𑀠𑀺𑀫𑁆𑀳𑀺 𑀯𑀸, 𑀪𑀽, 𑀧𑀼𑀲 𑀲𑁆𑀦𑁂𑀳𑀲𑁂𑀘𑀦𑀧𑀽𑀭𑀡𑁂𑀲𑀼 𑀯𑀸, 𑀓𑀺𑀬𑀸𑀤𑀺, 𑀧𑀼𑀲 𑀥𑀸𑀭𑀡𑁂 𑀯𑀸, 𑀘𑀼𑀭𑀸𑀤𑀺.

𑀳𑀢𑁆𑀣𑀺𑀲𑁆𑀲 𑀓𑀸𑀬𑀫𑀚𑁆𑀛𑀫𑁆𑀳𑀺 𑀩𑀦𑁆𑀥𑀦𑀭𑀚𑁆𑀚𑀼 𑀓𑀘𑁆𑀙𑀸 𑀦𑀸𑀫. 𑀓𑀘 𑀩𑀦𑁆𑀥𑀦𑁂, 𑀙𑁄. 𑀤𑀽𑀲𑀸, 𑀯𑀭𑀢𑁆𑀭𑀸𑀧𑁆𑀬𑀢𑁆𑀭. 𑀓𑀼𑀣𑁄 𑀦𑀸𑀫 𑀳𑀢𑁆𑀣𑀺𑀧𑀺𑀝𑁆𑀞𑀢𑁆𑀣𑀭𑀺𑀢𑀘𑀺𑀢𑁆𑀭𑀓𑀫𑁆𑀩𑀮𑀁, 𑀲𑁄 𑀆𑀤𑀺 𑀬𑁂𑀲𑀦𑁆𑀢𑁂 𑀓𑀼𑀣𑀸𑀤𑀬𑁄. 𑀓𑀼𑀣𑀸𑀤𑀬𑁄 𑀏𑀯 𑀓𑀧𑁆𑀧𑀦𑁄 𑀦𑀸𑀫 𑀪𑀯𑀦𑁆𑀢𑀺. 𑀓𑀧𑁆𑀧 𑀲𑀸𑀫𑀢𑁆𑀣𑀺𑀬𑁂, 𑀲𑀚𑁆𑀚𑀦𑀸𑀬𑀜𑁆𑀘 ¶ , 𑀓𑀭𑀡𑁂 𑀬𑀼. 𑀓𑀧𑁆𑀧𑀦𑀸𑀧𑀺. 𑀓𑀘 𑀲𑀚𑁆𑀚𑀦𑀸𑀬𑀁, 𑀣𑁄, 𑀓𑀼𑀣𑁄, 𑀢𑀻𑀲𑀼. ‘‘𑀦𑀧𑀼𑀁𑀲𑀓𑀫𑀢𑁆𑀣𑀭𑀡𑀁, 𑀣𑀻 𑀧𑀯𑁂𑀡𑀻 𑀓𑀼𑀣𑀁 𑀢𑀺𑀲𑀽’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁮.𑁪𑁨] 𑀳𑀺 𑀯𑁄𑀧𑀸𑀮𑀺𑀢𑁄. 𑀧𑀯𑁂𑀡𑀻, 𑀅𑀢𑁆𑀣𑀭𑀡𑀁, 𑀯𑀡𑁆𑀡𑁄, 𑀧𑀭𑀺𑀢𑁆𑀣𑁄𑀫𑁄𑀢𑀺 𑀏𑀢𑁂 𑀓𑀼𑀣𑀧𑀭𑀺𑀬𑀸𑀬𑀸.

𑁩𑁬𑁬. 𑀤𑁆𑀯𑀬𑀁 𑀭𑀸𑀚𑀸𑀭𑀳𑁂 𑀳𑀢𑁆𑀣𑀺𑀦𑀺. 𑀭𑀸𑀚𑀸𑀦𑀫𑀼𑀧𑀕𑀦𑁆𑀢𑁆𑀯𑀸 𑀯𑀳𑀺𑀢𑀼𑀫𑀭𑀳𑀢𑀻𑀢𑀺 𑀑𑀧𑀯𑀬𑁆𑀳𑁄, 𑀅𑀭𑀳𑀢𑁆𑀣𑁂 𑀡𑁆𑀬𑁄. 𑀭𑀸𑀚𑀸𑀦𑀁 𑀯𑀳𑀺𑀢𑀼𑀁 𑀅𑀭𑀳𑀢𑀻𑀢𑀺 𑀭𑀸𑀚𑀯𑀬𑁆𑀳𑁄, 𑀡𑁆𑀬𑁄. 𑀤𑁆𑀯𑀬𑀁 𑀓𑀧𑁆𑀧𑀺𑀢𑀳𑀢𑁆𑀣𑀺𑀦𑀺. 𑀲𑀚𑁆𑀚𑀸 𑀲𑀚𑁆𑀚𑀦𑀸 𑀲𑀜𑁆𑀚𑀸𑀢𑀸 𑀬𑀲𑁆𑀫𑀺𑀁 𑀲𑀚𑁆𑀚𑀺𑀢𑁄. 𑀓𑀧𑁆𑀧𑀸 𑀓𑀧𑁆𑀧𑀦𑀸 𑀲𑀜𑁆𑀚𑀸𑀢𑀸 𑀬𑀲𑁆𑀫𑀺𑀁 𑀓𑀧𑁆𑀧𑀺𑀢𑁄. 𑀏𑀢𑀲𑁆𑀫𑀸𑀬𑁂𑀯 𑀧𑀸𑀞𑀸 𑀲𑀚𑁆𑀚𑀓𑀧𑁆𑀧𑀸 𑀲𑀚𑁆𑀚𑀦𑀸𑀓𑀧𑁆𑀧𑀦𑀸𑀦𑀁 𑀧𑀭𑀺𑀬𑀸𑀬𑀸𑀢𑀺 𑀜𑁂𑀬𑁆𑀬𑀸.

𑀳𑀢𑁆𑀣𑀺𑀦𑁄 𑀧𑀸𑀤𑁂 𑀯𑀺𑀚𑁆𑀛𑀦𑀓𑀡𑁆𑀝𑀓𑁄 ‘‘𑀢𑁄𑀫𑀭𑁄’’𑀢𑁆𑀬𑀼𑀘𑁆𑀘𑀢𑁂. 𑀢𑀼𑀚𑁆𑀚𑀢𑁂𑀦𑁂𑀦𑁂𑀢𑀺 𑀢𑁄𑀫𑀭𑁄, 𑀢𑀼𑀤 𑀩𑁆𑀬𑀣𑀦𑁂, 𑀅𑀭𑁄, 𑀤𑀲𑁆𑀲 𑀫𑁄, 𑀑𑀢𑁆𑀢𑀁. 𑀯𑁂𑀡𑀼𑀓𑀁𑀧𑁆𑀬𑀢𑁆𑀭 [𑀓𑁄𑀢𑁆𑀭𑀁 𑀯𑁂𑀡𑀼𑀓𑀫𑀸𑀮𑀸𑀦𑀁 (𑀅𑀫𑀭 𑁧𑁮.𑁪𑁧)], 𑀓𑁆𑀯𑀘𑀺 𑀯𑁂𑀴𑀼𑀓𑀦𑁆𑀢𑀺𑀧𑀺 𑀧𑀸𑀞𑁄.

𑁩𑁬𑁭. 𑀳𑀢𑁆𑀣𑀺𑀦𑁄 𑀓𑀡𑁆𑀡𑀫𑀽𑀮𑀫𑁆𑀳𑀺 𑀯𑀺𑀚𑁆𑀛𑀦𑀓𑀡𑁆𑀝𑀓𑁄 ‘‘𑀢𑀼𑀢𑁆𑀢’’𑀫𑀺𑀢𑁆𑀬𑀼𑀘𑁆𑀘𑀢𑁂. 𑀢𑀼𑀚𑁆𑀚𑀢𑁂𑀦𑁂𑀦𑁂𑀢𑀺 𑀢𑀼𑀢𑁆𑀢𑀁, 𑀢𑁄. 𑀳𑀢𑁆𑀣𑀺𑀦𑁄 𑀫𑀢𑁆𑀣𑀓𑀫𑁆𑀳𑀺 𑀯𑀺𑀚𑁆𑀛𑀦𑀓𑀡𑁆𑀝𑀓𑁄 ‘‘𑀅𑀗𑁆𑀓𑀼𑀲𑁄’’𑀢𑁆𑀬𑀼𑀘𑁆𑀘𑀢𑁂. 𑀅𑀗𑁆𑀓𑀢𑁂 𑀅𑀦𑁂𑀦𑁂𑀢𑀺 𑀅𑀗𑁆𑀓𑀼𑀲𑁄, 𑀅𑀗𑁆𑀓 𑀮𑀓𑁆𑀔𑀡𑁂, 𑀲𑁄, 𑀅𑀲𑁆𑀲𑀼.

𑀧𑀚𑁆𑀚𑀤𑁆𑀥𑀁 ¶ 𑀳𑀢𑁆𑀣𑀸𑀭𑁄𑀳𑁂. 𑀫𑀟𑀺 𑀪𑀽𑀲𑀸𑀬𑀁, 𑀳𑀢𑁆𑀣𑀺𑀁 𑀫𑀡𑁆𑀟𑀬𑀢𑀺 𑀭𑀓𑁆𑀔𑀢𑀻𑀢𑀺 𑀳𑀢𑁆𑀣𑀺𑀫𑀡𑁆𑀟𑁄, 𑀲𑁄𑀯 𑀳𑀢𑁆𑀣𑀺𑀫𑁂𑀡𑁆𑀟𑁄, 𑀫𑀺 𑀳𑀺𑀁𑀲𑀸𑀬𑀁 𑀯𑀸, 𑀟𑁄, 𑀦𑀺𑀕𑁆𑀕𑀳𑀻𑀢𑀸𑀕𑀫𑁄. 𑀳𑀢𑁆𑀣𑀺𑀁 𑀧𑀸𑀢𑀺 𑀭𑀓𑁆𑀔𑀢𑀻𑀢𑀺 𑀳𑀢𑁆𑀣𑀺𑀧𑁄, 𑀓𑀫𑁆𑀫𑀦𑀺 𑀡𑁄. 𑀳𑀢𑁆𑀣𑀺𑀁 𑀕𑁄𑀧𑀬𑀢𑀺 𑀭𑀓𑁆𑀔𑀢𑀻𑀢𑀺 𑀳𑀢𑁆𑀣𑀺𑀕𑁄𑀧𑀓𑁄. 𑀕𑀼𑀧 𑀭𑀓𑁆𑀔𑀡𑁂, 𑀲𑀓𑀢𑁆𑀣𑁂 𑀓𑁄. 𑀆𑀥𑁄𑀭𑀡𑁄, 𑀦𑀺𑀲𑀸𑀤𑀺𑀦𑁄𑀧𑁆𑀬𑀢𑁆𑀭.

𑁩𑁬𑁮. 𑀫𑀸𑀢𑀗𑁆𑀕𑀳𑀬𑀸𑀤𑀻𑀦𑀁 𑀕𑀫𑀦𑀸𑀤𑀺𑀓𑁆𑀭𑀺𑀬𑀸𑀲𑀺𑀓𑁆𑀔𑀸𑀧𑀓𑁄 𑀆𑀘𑀭𑀺𑀬𑁄 ‘‘𑀕𑀸𑀫𑀡𑀻𑀬𑁄’’𑀢𑁆𑀬𑀼𑀘𑁆𑀘𑀢𑁂. 𑀕𑀫𑀦𑀁 𑀕𑀸𑀫𑁄, 𑀪𑀸𑀯𑁂 𑀡𑁄. 𑀳𑀢𑁆𑀣𑀸𑀤𑀻𑀦𑀁 𑀕𑀫𑀦𑀓𑁆𑀭𑀺𑀬𑀸 𑀕𑀸𑀫𑁄, 𑀢𑀁 𑀦𑁂𑀢𑀺 𑀲𑀺𑀓𑁆𑀔𑀸𑀧𑁂𑀢𑀻𑀢𑀺 𑀕𑀸𑀫𑀡𑀻𑀬𑁄, 𑀅𑀜𑁆𑀜𑀓𑁆𑀭𑀺𑀬𑀸𑀲𑀺𑀓𑁆𑀔𑀸𑀧𑀦𑁂𑀢𑀽𑀧𑀘𑀸𑀭𑀸, 𑀕𑀸𑀫𑀁 𑀯𑀸 𑀳𑀢𑁆𑀣𑀸𑀤𑀺𑀲𑀫𑀽𑀳𑀁 𑀦𑁂𑀢𑀻𑀢𑀺 𑀕𑀸𑀫𑀡𑀻𑀬𑁄, 𑀕𑀫𑀦𑀁 𑀯𑀸 𑀲𑀺𑀓𑁆𑀔𑀸𑀧𑁂𑀢𑀻𑀢𑀺 𑀕𑀸𑀫𑀡𑀻𑀬𑁄, 𑀲𑀩𑁆𑀩𑀢𑁆𑀭 𑀦𑀲𑁆𑀲 𑀡𑀢𑁆𑀢𑀁.

𑀧𑀸𑀤𑀤𑁆𑀯𑀬𑀁 𑀅𑀲𑁆𑀲𑁂. 𑀳𑀬 𑀕𑀢𑀺𑀬𑀁, 𑀅. 𑀢𑀼𑀭𑀁 𑀲𑀻𑀖𑀁 𑀕𑀘𑁆𑀙𑀢𑀻𑀢𑀺 𑀢𑀼𑀭𑀗𑁆𑀕𑁄, 𑀓𑁆𑀯𑀺, 𑀩𑀺𑀦𑁆𑀤𑀸𑀮𑁄𑀧𑁄, 𑀮𑁄𑀧𑁂 𑀲𑀢𑀺 𑀢𑀼𑀭𑀕𑁄. 𑀯𑀸𑀳 𑀧𑀬𑀢𑀦𑁂, 𑀅. 𑀅𑀲 𑀪𑀓𑁆𑀔𑀦𑁂, 𑀅. 𑀲𑀺𑀦𑁆𑀥𑀽𑀦𑀫𑀤𑀽𑀭𑀪𑀯𑁄 𑀚𑀦𑀧𑀤𑁄𑀧𑀺 𑀲𑀺𑀦𑁆𑀥𑀯𑁄, 𑀢𑀢𑁆𑀭 𑀪𑀯𑁄 𑀲𑀺𑀦𑁆𑀥𑀯𑁄, 𑀲𑀁𑀬𑁄𑀕𑀦𑁆𑀢𑀢𑁆𑀢𑀸 𑀦 𑀯𑀼𑀤𑁆𑀥𑀺. 𑀖𑁄𑀝𑀓𑁄, 𑀧𑀻𑀢𑀺, 𑀢𑀼𑀭𑀗𑁆𑀕𑀫𑁄, 𑀯𑀸𑀚𑀻, 𑀕𑀦𑁆𑀥𑀩𑁆𑀩𑁄, 𑀲𑀢𑁆𑀢𑀺𑀭𑀺𑀘𑁆𑀘𑀸𑀤𑀻𑀦𑀺𑀧𑀺 𑀅𑀲𑁆𑀲𑁂. 𑀖𑀼𑀝 𑀧𑀭𑀺𑀯𑀢𑁆𑀢𑀦𑁂, 𑀡𑁆𑀯𑀼. 𑀧𑀸 𑀧𑀸𑀦𑁂,𑀢𑀺. ‘‘𑀧𑀸𑀦𑁂 𑀣𑀻 𑀧𑀻𑀢𑀺 𑀅𑀲𑁆𑀲𑁂 𑀲𑁄’’𑀢𑀺 𑀭𑀼𑀤𑁆𑀤𑁄. 𑀯𑀸𑀚𑀬𑁄𑀕𑀸 𑀯𑀸𑀚𑀻, 𑀈. ‘‘𑀏𑀲𑀜𑁆𑀘 𑀧𑀼𑀩𑁆𑀩𑀁 𑀧𑀓𑁆𑀔𑁄 𑀆𑀲𑀺, 𑀲 𑀢𑀼 𑀤𑁂𑀯𑁂𑀢𑁆𑀬𑀢𑁆𑀬𑀢𑁆𑀣𑀺𑀢𑁂𑀦 𑀲𑀸𑀮𑀻𑀪𑀽𑀢𑀫𑀼𑀦𑀺𑀦𑀸 𑀲𑀓𑁆𑀓𑀁 𑀧𑀬𑁄𑀚𑁂𑀢𑁆𑀯𑀸 𑀯𑀚𑀺𑀭𑀙𑁂𑀤𑀺𑀢𑁄’’𑀢𑀺 𑀦𑀺𑀓𑀸𑀬𑀦𑁆𑀢𑀭𑀺𑀬𑀸. 𑀲𑀧 𑀲𑀫𑀯𑀸𑀬𑁂,𑀢𑀺, 𑀲𑀢𑁆𑀢𑀺, 𑀲𑀸𑀫𑀢𑁆𑀣𑀺𑀬𑁂𑀧𑀺.

𑁩𑁬𑁯. 𑀢𑀲𑁆𑀲 ¶ 𑀅𑀲𑁆𑀲𑀲𑁆𑀲 𑀪𑁂𑀤𑁄 𑀯𑀺𑀲𑁂𑀲𑁄 𑀅𑀲𑁆𑀲𑀢𑀭𑁄, 𑀅𑀲𑁆𑀲𑀁 𑀢𑀭𑀢𑀻𑀢𑀺 𑀅𑀲𑁆𑀲𑀢𑀭𑁄, 𑀢𑀭 𑀅𑀢𑀺𑀓𑁆𑀓𑀫𑀦𑁂, 𑀢𑀭𑀧𑀘𑁆𑀘𑀬𑁂𑀦𑀸𑀧𑀺 𑀲𑀺𑀤𑁆𑀥𑀁. 𑀧𑀥𑀸𑀦𑀲𑁆𑀲𑀪𑀽𑀫𑀺𑀪𑀯𑁄 𑀲𑀼𑀚𑀸𑀢𑀺𑀓𑁄 𑀅𑀯𑀺𑀓𑀸𑀭𑀻 𑀓𑀼𑀮𑀻𑀦𑀓𑁄 𑀅𑀲𑁆𑀲𑁄 𑀆𑀚𑀸𑀦𑀻𑀬𑁄 𑀦𑀸𑀫, 𑀆 𑀪𑀼𑀲𑁄 𑀓𑀸𑀭𑀡𑀸𑀓𑀸𑀭𑀡𑀁 𑀚𑀸𑀦𑀸𑀢𑀻𑀢𑀺 𑀆𑀚𑀸𑀦𑀻𑀬𑁄, 𑀅𑀦𑀻𑀬𑁄, 𑀡𑁆𑀬𑀧𑀘𑁆𑀘𑀬𑁂𑀦 𑀯𑀸 𑀲𑀺𑀤𑁆𑀥𑀁, 𑀢𑀤𑀸 ‘‘𑀓𑀺𑀬𑀸𑀤𑀺𑀢𑁄 𑀦𑀸’’𑀢𑀺 𑀦𑀸𑀕𑀫𑁄, 𑀈𑀓𑀸𑀭𑀸𑀕𑀫𑁄 𑀘 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁮.𑁪𑁪 𑀕𑀸𑀣𑀸𑀬𑀫𑁆𑀧𑀺 𑀧𑀲𑁆𑀲𑀺𑀢𑀩𑁆𑀩𑀁]. 𑀓𑀼𑀮𑁂 𑀲𑀫𑁆𑀪𑀽𑀢𑁄 𑀓𑀼𑀮𑀻𑀦𑀓𑁄, 𑀈𑀦𑁄, 𑀲𑀓𑀢𑁆𑀣𑁂 𑀓𑁄. 𑀲𑀗𑁆𑀕𑀸𑀫𑁂 𑀕𑀭𑀼𑀲𑀢𑁆𑀣𑀧𑁆𑀧𑀳𑀸𑀭𑁂𑀦 𑀦𑀺𑀳𑀢𑁄 𑀲𑀦𑁆𑀢𑁄 𑀧𑀺𑀬𑁄 𑀲𑀸𑀫𑀺𑀓𑀁 𑀦 𑀚𑀳𑀢𑀺 𑀲𑀼𑀔𑀁 𑀯𑀳𑀦𑀲𑀻𑀮𑁄 𑀬𑁄 𑀅𑀲𑁆𑀲𑁄, 𑀲𑁄 𑀯𑀺𑀦𑀻𑀢𑀲𑀤𑁆𑀤𑁂𑀦𑁄𑀘𑁆𑀘𑀢𑁂. 𑀯𑀺𑀲𑁂𑀲𑁂𑀦 𑀤𑀫𑁆𑀫𑀢𑀁 𑀦𑁂𑀢𑀺 𑀬𑀦𑁆𑀢𑀺 𑀯𑀺𑀦𑀻𑀢𑁄.

𑀤𑁆𑀯𑀬𑀁 𑀅𑀲𑁆𑀲𑀧𑁄𑀢𑁂. 𑀓𑀲 𑀕𑀫𑀦𑁂, 𑀑𑀭𑁄, 𑀅𑀲𑁆𑀲𑀺, 𑀓𑀺𑀜𑁆𑀘𑀺 𑀲𑀭𑀢𑀻𑀢𑀺 𑀯𑀸 𑀓𑀺𑀲𑁄𑀭𑁄, 𑀩𑀺𑀦𑁆𑀤𑀼𑀮𑁄𑀧𑁄, 𑀅𑀲𑁆𑀲𑁄 𑀘, 𑀳𑀬𑁄 𑀏𑀯 𑀩𑀸𑀮𑀢𑁆𑀢𑀸 𑀳𑀬𑀧𑁄𑀢𑀓𑁄, 𑀅𑀧𑁆𑀧𑀢𑁆𑀣𑁂 𑀓𑁄.

𑁩𑁭𑁦. 𑀤𑁆𑀯𑀬𑀁 𑀅𑀣𑀸𑀫𑀲𑁆𑀲𑁂. 𑀖𑀼𑀝 𑀧𑀭𑀺𑀯𑀢𑁆𑀢𑀦𑁂, 𑀡𑁆𑀯𑀼, 𑀖𑁄𑀝𑀓𑁄, 𑀅𑀲𑁆𑀲𑀲𑀸𑀫𑀜𑁆𑀜𑁂𑀧𑁆𑀬𑀬𑀁, 𑀔𑀭𑀁 𑀕𑀘𑁆𑀙𑀢𑀻𑀢𑀺 𑀔𑀮𑀼𑀗𑁆𑀕𑁄, 𑀲𑁄 𑀏𑀯 𑀔𑀴𑀼𑀗𑁆𑀓𑁄, 𑀕𑀓𑀸𑀭𑀲𑁆𑀲 𑀓𑀓𑀸𑀭𑀁 𑀓𑀢𑁆𑀯𑀸, 𑀭𑀲𑁆𑀲 𑀮𑁄, 𑀴𑀢𑁆𑀢𑀫𑀼𑀢𑁆𑀢𑀜𑁆𑀘, 𑀔𑀴𑀼𑀓𑁄𑀢𑀺𑀧𑀺. 𑀚𑀯𑁂𑀦 𑀲𑀩𑁆𑀩𑁂𑀲𑀫𑀥𑀺𑀓𑁄 𑀅𑀲𑁆𑀲𑁄 𑀚𑀯𑀦𑁄, 𑀬𑀼.

𑀤𑁆𑀯𑀬𑀁 ¶ 𑀓𑀯𑀻𑀢𑀺𑀔𑁆𑀬𑀸𑀢𑁂 𑀫𑀼𑀔𑀩𑀦𑁆𑀥𑀦𑁂. 𑀫𑀼𑀔𑀫𑀸𑀢𑀺𑀝𑁆𑀞𑀢𑀻𑀢𑀺 𑀫𑀼𑀔𑀸𑀞𑀸𑀦𑀁. 𑀔𑁂 𑀫𑀼𑀔𑀯𑀺𑀯𑀭𑁂 𑀮𑀻𑀦𑁄 𑀔𑀮𑀻𑀦𑁄. ‘‘𑀓𑀯𑀺𑀓𑀸 𑀢𑀼 𑀔𑀮𑀻𑀦𑁄𑀢𑀺 [𑀔𑀮𑀻𑀦𑁂 𑀣𑀻 (?)], 𑀓𑀯𑀺𑀬𑀁 𑀓𑀣𑀦𑀁𑀢𑁆𑀬𑀧𑀻’’𑀢𑀺 𑀭𑀪𑀲𑁄. 𑀓𑀯𑀺, 𑀓𑀯𑀺𑀓𑀸𑀧𑁆𑀬𑀢𑁆𑀭. 𑀓𑀼 𑀲𑀤𑁆𑀤𑁂. 𑀇, 𑀈 𑀘, 𑀲𑀓𑀢𑁆𑀣𑁂 𑀓𑁄. 𑀯𑀸𑀲𑀤𑁆𑀤𑁂𑀦 𑀦𑀧𑀼𑀁𑀲𑀓𑀢𑁆𑀢𑀁 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀯𑀼𑀢𑁆𑀢𑀜𑁆𑀘 𑀅𑀫𑀭𑀓𑁄𑀲𑁂 ‘‘𑀓𑀯𑀺𑀓𑀸 𑀢𑀼 𑀔𑀮𑀻𑀦𑁄’𑀦𑀺𑀢𑁆𑀣𑀻’’𑀢𑀺 [𑀅𑀫𑀭 𑁧𑁮.𑁪𑁯].

𑀅𑀲𑁆𑀲𑀸𑀪𑀺𑀢𑀸𑀴𑀺𑀦𑀻 𑀯𑁂𑀢𑁆𑀢𑀯𑀺𑀓𑀢𑀸𑀤𑀺 𑀓𑀲𑀸 𑀦𑀸𑀫. 𑀓𑀲 𑀕𑀫𑀦𑁂, 𑀅, 𑀓𑀭𑀡𑀲𑀸𑀥𑀦𑀁.

𑁩𑁭𑁧. 𑀅𑀲𑁆𑀲𑀲𑁆𑀲 𑀦𑀸𑀲𑀸𑀕𑀢𑀭𑀚𑁆𑀚𑀼𑀫𑁆𑀳𑀺 𑀓𑀼𑀲𑀸, 𑀓𑀼𑀲 𑀲𑀺𑀮𑁂𑀲𑀦𑁂. 𑀤𑁆𑀯𑀬𑀁 𑀅𑀲𑁆𑀲𑀸𑀬𑀁. 𑀯𑀮 𑀲𑀁𑀯𑀭𑀡𑁂, 𑀯𑁄, 𑀴𑀢𑁆𑀢𑀁, 𑀆, 𑀯𑀴𑀯𑀸. 𑀅𑀲𑀢𑀻𑀢𑀺 𑀅𑀲𑁆𑀲𑀸, ‘‘𑀇𑀢𑁆𑀣𑀺𑀬𑀫𑀢𑀺𑀬𑀯𑁄 𑀯𑀸’’𑀢𑀺 𑀅, 𑀆 𑀘, 𑀅𑀲𑁆𑀲𑀸. 𑀯𑀸𑀫𑀻𑀧𑁆𑀬𑀢𑁆𑀭. 𑀤𑁆𑀯𑀬𑀁 𑀔𑀼𑀭𑁂. 𑀔𑀼𑀭 𑀙𑁂𑀤𑀦𑁂. 𑀲𑀁 𑀲𑀼𑀔𑀁 𑀨𑀭𑀢𑁆𑀬𑀦𑁂𑀦 𑀲𑀨𑀁, 𑀦𑁂𑀭𑀼𑀢𑁆𑀢𑁄. ‘‘𑀲𑀨𑀁 𑀓𑁆𑀮𑀻𑀯𑁂 𑀔𑀼𑀭𑁄 𑀧𑀼𑀫𑀸’’𑀢𑀺 [𑀅𑀫𑀭 𑁧𑁮.𑁪𑁯] 𑀅𑀫𑀭𑀓𑁄𑀲𑁄.

𑀤𑁆𑀯𑀬𑀁 𑀧𑀼𑀘𑁆𑀙𑀫𑀢𑁆𑀢𑁂. 𑀧𑀼𑀘𑁆𑀙 𑀧𑀫𑀸𑀤𑁂. 𑀦 𑀕𑀘𑁆𑀙𑀢𑀻𑀢𑀺 𑀦𑀗𑁆𑀕𑀼𑀝𑁆𑀞𑁄, 𑀅𑀗𑁆𑀕 𑀕𑀫𑀦𑁂, 𑀞𑁄, 𑀅𑀲𑁆𑀲𑀼, 𑀤𑁆𑀯𑁂𑀧𑀺 𑀅𑀦𑀺𑀢𑁆𑀣𑀺𑀬𑀁. 𑀮𑀽𑀫𑀁𑀧𑁆𑀬𑀢𑁆𑀭. 𑀤𑁆𑀯𑀬𑀁 𑀓𑁂𑀲𑀯𑀢𑀺 𑀦𑀗𑁆𑀕𑀼𑀝𑁆𑀞𑀫𑀢𑁆𑀢𑁂, 𑀦 𑀢𑀼 𑀳𑀢𑁆𑀣𑀺𑀦𑁄 𑀏𑀯. 𑀯𑀸𑀮𑀲𑀫𑀽𑀳𑀬𑁄𑀕𑀸 𑀯𑀸𑀮𑀳𑀢𑁆𑀣𑁄, 𑀬𑀣𑀸 𑀓𑁂𑀲𑀳𑀢𑁆𑀣𑁄 𑀘𑀬𑁂, 𑀢𑀣𑀸𑀢𑁆𑀭𑀸𑀧𑀺. 𑀯𑀸𑀮𑁄 𑀥𑀺𑀬𑁆𑀬𑀢𑁂 𑀅𑀲𑁆𑀫𑀺𑀦𑁆𑀢𑀺 𑀯𑀸𑀮𑀥𑀺, 𑀇.

𑀏𑀢𑁆𑀣𑀸𑀦𑀸𑀕𑀢𑀸𑀧𑀺 𑀅𑀲𑁆𑀲𑀲𑁆𑀲 𑀥𑀸𑀭𑀸𑀔𑁆𑀬𑀸 [𑀥𑀸𑀯𑀸𑀔𑁆𑀬𑀸 (𑀓.)] 𑀧𑀜𑁆𑀘 𑀕𑀢𑀺𑀬𑁄 𑀓𑀣𑁂𑀢𑀩𑁆𑀩𑀸. 𑀬𑀣𑀸 𑁋

𑀅𑀓𑁆𑀓𑀦𑁆𑀤𑀺𑀢𑀁 ¶ 𑀥𑁄𑀭𑀺𑀢𑀓𑀁, 𑀭𑁂𑀘𑀺𑀢𑀁 𑀯𑀕𑁆𑀕𑀺𑀢𑀁 𑀧𑁆𑀮𑀼𑀢𑀁;

𑀕𑀢𑀺𑀬𑁄𑀫𑁂 𑀧𑀜𑁆𑀘 𑀥𑀸𑀭𑀸 [𑀥𑀸𑀯𑀸 (𑀓.)], 𑀅𑀲𑁆𑀲𑀸𑀦𑀁 𑀯𑀺𑀜𑁆𑀜𑀼𑀦𑀸 𑀫𑀢𑀸 [𑀅𑀫𑀭 𑁧𑁮.𑁪𑁮-𑁯].

𑀢𑀢𑁆𑀣 𑀯𑀺𑀢𑁆𑀣𑀫𑁆𑀪𑀸 𑀲𑀫𑀸𑀯𑀕𑀢𑀺 𑀅𑀓𑁆𑀓𑀦𑁆𑀤𑀺𑀢𑀁, 𑀓𑀦𑁆𑀤𑀺 𑀕𑀢𑀺𑀲𑁄𑀲𑀦𑁂𑀲𑀼, 𑀢𑁄. 𑀢𑀢𑁄 𑀅𑀥𑀺𑀓𑀸 𑀘𑀢𑀼𑀭𑀸𑀕𑀢𑀺 𑀥𑁄𑀭𑀺𑀢𑀓𑀁, 𑀥𑁄𑀭 𑀕𑀢𑀺𑀘𑀸𑀢𑀼𑀭𑀺𑀬𑁂, 𑀢𑁄, 𑀲𑀓𑀢𑁆𑀣𑁂 𑀓𑁄. 𑀫𑀡𑁆𑀟𑀮𑀺𑀓𑀸𑀬𑀸𑀦𑁂𑀦 𑀕𑀫𑀦𑀁 𑀭𑁂𑀘𑀺𑀢𑀁, 𑀭𑀺𑀘 𑀯𑀺𑀬𑁄𑀚𑀦𑀲𑀫𑁆𑀩𑀚𑁆𑀛𑀦𑁂𑀲𑀼, 𑀲𑀫𑁆𑀩𑀚𑁆𑀛𑀦𑀁 𑀫𑀺𑀲𑁆𑀲𑀦𑀁. 𑀯𑁂𑀕𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑁄 𑀧𑀭𑀺𑀘𑀭𑀡𑀁 𑀯𑀕𑁆𑀕𑀺𑀢𑀁, 𑀯𑀕𑁆𑀕 𑀕𑀫𑀦𑀢𑁆𑀣𑁄. 𑀢𑀼𑀭𑀁 𑀲𑀫𑁂𑀦 𑀕𑀫𑀦𑀁 𑀧𑁆𑀮𑀼𑀢𑀁, 𑀧𑁆𑀮𑀼 𑀕𑀢𑀺𑀬𑀁. 𑀢’𑀤𑀼𑀢𑁆𑀢’𑀫𑀲𑁆𑀲𑀲𑀢𑁆𑀣𑁂 ‘‘𑀲𑀫𑁄’𑀥𑀺𑀓𑁄 𑀮𑀬𑁄 𑀯𑁂𑀕𑀻, 𑀢𑀼𑀭𑀺𑀢𑀲𑁆𑀲𑁄 𑀪𑀯𑁂 𑀓𑀫𑀸’’𑀢𑀺.

𑁩𑁭𑁨. 𑀤𑁆𑀯𑀬𑀁 𑀬𑀼𑀤𑁆𑀥𑀢𑁆𑀣𑁂 𑀘𑀓𑁆𑀓𑀬𑀼𑀢𑁆𑀢𑀬𑀸𑀦𑁂. 𑀲𑀦𑁆𑀤 𑀕𑀫𑀦𑁂, 𑀲𑀦𑁆𑀤𑀢𑁂 𑀕𑀫𑁆𑀬𑀢𑁂𑀦𑁂𑀦𑁂𑀢𑀺 𑀲𑀦𑁆𑀤𑀦𑁄, 𑀬𑀼. 𑀭𑀫𑀢𑁂𑀦𑁂𑀦𑁂𑀢𑀺 𑀭𑀣𑁄, 𑀣𑁄, 𑀫𑀮𑁄𑀧𑁄. 𑀲𑀢𑀗𑁆𑀕𑁄𑀧𑁆𑀬𑀢𑁆𑀭. 𑀲𑀢𑀫𑀗𑁆𑀕𑀸𑀦𑁆𑀬𑀲𑁆𑀲.

𑀬𑀁 𑀦 𑀭𑀡𑀸𑀬 𑀬𑀼𑀤𑁆𑀥𑀢𑁆𑀣𑀁 𑀘𑀓𑁆𑀓𑀬𑀼𑀢𑁆𑀢𑀁 𑀬𑀸𑀦𑀁, 𑀅𑀧𑀺 𑀢𑀼 𑀓𑀻𑀴𑀸𑀪𑀫𑀦𑀸𑀤𑁆𑀬𑀢𑁆𑀣𑀁, 𑀲𑁄 𑀧𑀼𑀲𑁆𑀲𑀭𑀣𑁄. 𑀯𑀼𑀢𑁆𑀢𑀜𑁆𑀘 𑀅𑀫𑀭𑀓𑁄𑀲𑁂 ‘‘𑀅𑀬𑀁 𑀧𑀼𑀲𑁆𑀲𑀭𑀣𑁄 𑀘𑀓𑁆𑀓-𑀬𑀸𑀦𑀁 𑀦 𑀲𑀫𑀭𑀸𑀬 𑀬’’𑀦𑁆𑀢𑀺 [𑀅𑀫𑀭 𑁧𑁮.𑁫𑁧]. 𑀧𑀼𑀲 𑀧𑀸𑀲𑀦𑁂, 𑀲𑁄, 𑀧𑀼𑀲𑀦𑀸𑀫𑀓𑁂𑀦 𑀨𑀮𑀯𑀺𑀲𑁂𑀲𑁂𑀦 𑀬𑀼𑀢𑁆𑀢𑁄 𑀭𑀣𑁄 𑀧𑀼𑀲𑁆𑀲𑀭𑀣𑁄, 𑀧𑀼𑀲𑁆𑀲𑀦𑀓𑁆𑀔𑀢𑁆𑀢𑁂𑀦 𑀓𑀢𑁄, 𑀲𑀚𑁆𑀚𑀺𑀢𑁄 𑀯𑀸 𑀭𑀣𑁄𑀢𑀺 𑀧𑀼𑀲𑁆𑀲𑀭𑀣𑁄.

𑀩𑁆𑀬𑀕𑁆𑀖𑀲𑁆𑀲 𑀘𑀫𑁆𑀫𑀸𑀯𑀼𑀢𑁄 𑀧𑀭𑀺𑀓𑁆𑀔𑀺𑀢𑁆𑀢𑁄 𑀭𑀣𑁄 𑀯𑁂𑀬𑁆𑀬𑀕𑁆𑀖𑁄 𑀦𑀸𑀫, 𑀩𑁆𑀬𑀕𑁆𑀖𑀲𑁆𑀲 𑀯𑀺𑀓𑀸𑀭𑁄 𑀘𑀫𑁆𑀫𑀁 𑀯𑁂𑀬𑁆𑀬𑀕𑁆𑀖𑀁, 𑀡𑁄, 𑀢𑁂𑀦 𑀧𑀭𑀺𑀯𑀼𑀢𑁄 𑀭𑀣𑁄 𑀯𑁂𑀬𑁆𑀬𑀕𑁆𑀖𑁄, 𑀡𑁄, 𑀉𑀪𑀬𑀢𑁆𑀭𑀸𑀧𑀺 𑀯𑀼𑀟𑁆𑀠𑀸𑀕𑀫𑁄. ‘‘𑀧𑀘𑁆𑀘𑀢𑁆𑀢𑀁 [𑀧𑀘𑁆𑀘𑀢𑁆𑀣𑀁 (𑀓.)] 𑀅𑀬𑀦𑁆𑀢𑀺 ¶ 𑀕𑀘𑁆𑀙𑀦𑁆𑀢𑀻𑀢𑀺 𑀧𑀘𑁆𑀘𑀬𑀸’’𑀢𑀺 𑀯𑀘𑀦𑀢𑁆𑀣𑀢𑁄 𑀧𑀘𑁆𑀘𑀢𑁆𑀢𑀫𑁂𑀯 [𑀧𑀘𑁆𑀘𑀢𑁆𑀣𑀫𑁂𑀯 (?)] 𑀧𑀘𑁆𑀘𑀬𑀸 𑀪𑀯𑀦𑁆𑀢𑀺, 𑀬𑀣𑀸 𑀓𑀸𑀭𑀺𑀢𑀦𑁆𑀢𑀲𑁆𑀫𑀸𑀧𑀺 𑀧𑀬𑁄𑀚𑀓𑀯𑀲𑁂𑀦 𑀅𑀦𑁂𑀓𑀓𑀸𑀭𑀺𑀢𑀧𑀘𑁆𑀘𑀬𑀸. 𑀤𑀻𑀧𑀺𑀦𑁄 𑀘𑀫𑁆𑀫𑀸𑀯𑀼𑀢𑁄 𑀭𑀣𑁄 𑀤𑀻𑀧𑁄 𑀦𑀸𑀫, 𑀤𑀻𑀧𑀺𑀦𑁄 𑀯𑀺𑀓𑀸𑀭𑁄 𑀘𑀫𑁆𑀫𑀁 𑀤𑀻𑀧𑀁, 𑀡𑁄, 𑀢𑁂𑀦 𑀧𑀭𑀺𑀯𑀼𑀢𑁄 𑀭𑀣𑁄 𑀤𑀻𑀧𑁄, 𑀡𑁄.

𑁩𑁭𑁩. 𑀤𑁆𑀯𑀬𑀁 𑀧𑀼𑀭𑀺𑀲𑀬𑀼𑀢𑁆𑀢𑀬𑀸𑀦𑁂. 𑀲𑀺 𑀲𑁂𑀯𑀸𑀬𑀁. 𑀲𑀼𑀔𑀢𑁆𑀣𑀺𑀓𑁂𑀳𑀺 𑀲𑁂𑀯𑀻𑀬𑀢𑁂𑀢𑀺 𑀲𑀺𑀯𑀺𑀓𑀸, 𑀡𑁆𑀯𑀼, 𑀯𑀸𑀕𑀫𑁄, 𑀇𑀢𑁆𑀢𑀁, 𑀓𑀺𑀢𑀧𑀘𑁆𑀘𑀬𑀸 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀓𑀫𑁆𑀫𑀸𑀤𑀻𑀲𑀼𑀧𑀺 𑀯𑀢𑁆𑀢𑀦𑁆𑀢𑀺, 𑀓𑀺𑀘𑁆𑀘𑀧𑀘𑁆𑀘𑀬𑀸 𑀘 𑀓𑀢𑁆𑀢𑀭𑀺𑀧𑀺, 𑀬𑀣𑀸 ‘‘𑀯𑀺𑀦𑀬𑁄, 𑀦𑀺𑀲𑁆𑀲𑀬𑁄, 𑀢𑀧𑀦𑀻𑀬𑀸 𑀥𑀫𑁆𑀫𑀸’’𑀢𑁆𑀬𑀸𑀤𑀻𑀲𑀼, 𑀫𑀳𑀸𑀧𑀤𑁂𑀲𑁂𑀦 𑀯𑀸 𑀓𑀺𑀢𑀓𑀺𑀘𑁆𑀘𑀧𑀘𑁆𑀘𑀬𑀸𑀦𑀁 𑀓𑀢𑁆𑀢𑀼𑀓𑀫𑁆𑀫𑀸𑀤𑀻𑀲𑁆𑀯𑀧𑀺 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀲𑀺𑀯𑀁 𑀓𑀭𑁄𑀢𑀻𑀢𑀺 𑀯𑀸 𑀲𑀺𑀯𑀺𑀓𑀸, 𑀇𑀓𑁄. 𑀬𑀸𑀧𑁆𑀬𑁂𑀳𑀺 𑀅𑀥𑀫𑁂𑀳𑀺 𑀬𑀸𑀬𑀢𑁂 𑀦𑀺𑀬𑁆𑀬𑀢𑁂𑀢𑀺 𑀬𑀸𑀧𑁆𑀬𑀬𑀸𑀦𑀁. ‘‘𑀬𑀸𑀧𑁆𑀬 𑀧𑀸𑀦𑀻𑀬𑀓𑁂 𑀦𑀺𑀦𑁆𑀤𑁆𑀬𑁂’’𑀢𑀺 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂.

𑀤𑁆𑀯𑀬𑀁 𑀲𑀓𑀝𑁂. 𑀅𑀦𑀺𑀢𑁆𑀣𑀻 𑀢𑀽𑀢𑀺 𑀢𑁆𑀯𑀦𑁆𑀢𑀁 𑀮𑀺𑀗𑁆𑀕𑀧𑀤𑀁. 𑀲𑀓 𑀲𑀢𑁆𑀢𑀺𑀬𑀁, 𑀅𑀝𑁄. 𑀅𑀦 𑀧𑀸𑀡𑀦𑁂, 𑀓𑀭𑀡𑀲𑀸𑀥𑀦𑀁, 𑀦𑀢𑁆𑀣𑀺 𑀦𑀸𑀲𑀸 𑀬𑀲𑁆𑀲𑀸𑀢𑀺 𑀯𑀸 𑀅𑀦𑀁, 𑀲𑀸𑀮𑁄𑀧𑁄, 𑀭𑀲𑁆𑀲𑁄 𑀘. 𑀓𑁆𑀮𑀻𑀯𑁂’𑀦𑀁, 𑀲𑀓𑀝𑁄, 𑀦𑀺𑀢𑁆𑀣𑀻𑀢𑁆𑀬𑀫𑀭𑀓𑁄𑀲𑁄 [𑀅𑀫𑀭 𑁧𑁮.𑁫𑁨].

𑀤𑁆𑀯𑀬𑀁 𑀘𑀓𑁆𑀓𑁂. 𑀓𑀭𑁄𑀢𑀺 𑀕𑀫𑀦𑀫𑀦𑁂𑀦𑁂𑀢𑀺 𑀘𑀓𑁆𑀓𑀁, 𑀤𑁆𑀯𑀺𑀢𑁆𑀢𑀁, 𑀘𑀓𑁆𑀓𑀸𑀤𑀺. 𑀭𑀣𑀲𑁆𑀲 𑀅𑀗𑁆𑀕𑀁 𑀭𑀣𑀗𑁆𑀕𑀁. 𑀢𑀲𑁆𑀲 𑀘𑀓𑁆𑀓𑀲𑁆𑀲 𑀅𑀦𑁆𑀢𑁄 𑀅𑀯𑀲𑀸𑀦𑀁 𑀦𑁂𑀫𑀺, 𑀲𑀸 𑀦𑀸𑀭𑀺𑀬𑀁 𑀇𑀢𑁆𑀣𑀺𑀬𑀁. 𑀦𑀬𑀢𑀺 𑀘𑀓𑁆𑀓𑀁 𑀦𑁂𑀫𑀺. 𑀬𑀸 𑀪𑀽𑀫𑀺𑀁 𑀨𑀼𑀲𑀢𑀺, 𑀦𑀻 𑀦𑀬𑁂, 𑀫𑀺, 𑀈𑀧𑀘𑁆𑀘𑀬𑁂 𑀦𑁂𑀫𑀻 𑀘. 𑀧𑀥𑀺𑀧𑁆𑀬𑀢𑁆𑀭.

𑁩𑁭𑁪. 𑀢𑀫𑁆𑀫𑀚𑁆𑀛𑁂 ¶ 𑀢𑀲𑁆𑀲 𑀭𑀣𑀲𑁆𑀲, 𑀘𑀓𑁆𑀓𑀲𑁆𑀲 𑀯𑀸 𑀫𑀚𑁆𑀛𑁂 𑀘𑀓𑁆𑀓𑀸𑀓𑀸𑀭𑁄 𑀧𑀺𑀡𑁆𑀟𑀺𑀓𑀸, 𑀬𑀲𑁆𑀲𑀁 𑀲𑀩𑁆𑀩𑀸𑀦𑀺 𑀓𑀝𑁆𑀞𑀸𑀦𑀺 𑀆𑀲𑀚𑁆𑀚𑀦𑁆𑀢𑁂. 𑀧𑀺𑀡𑁆𑀟𑀺𑀓𑀸𑀲𑀸𑀳𑀘𑀭𑀺𑀬𑀸 𑀦𑀸𑀪𑀺 𑀇𑀢𑁆𑀣𑀻, 𑀈𑀧𑀘𑁆𑀘𑀬𑁂 𑀦𑀸𑀪𑀻 𑀘. 𑀲𑀩𑁆𑀩𑀸𑀦𑀺 𑀓𑀝𑁆𑀞𑀸𑀦𑀺 𑀧𑀺𑀡𑁆𑀟𑁂𑀢𑀻𑀢𑀺 𑀧𑀺𑀡𑁆𑀟𑀺𑀓𑀸, 𑀧𑀺𑀡𑁆𑀟 𑀲𑀗𑁆𑀖𑀸𑀢𑁂, 𑀅, 𑀲𑀓𑀢𑁆𑀣𑁂 𑀓𑁄. 𑀧𑀺𑀡𑁆𑀟𑀻𑀧𑀺, 𑀦𑀸𑀪𑀺 𑀯𑀺𑀬𑀸𑀢𑀺 𑀦𑀸𑀪𑀺.

𑀭𑀣𑀲𑁆𑀲 𑀬𑀼𑀕𑀓𑀝𑁆𑀞𑀁 𑀬𑀢𑁆𑀭 𑀆𑀲𑀚𑁆𑀚𑀢𑁂, 𑀲 𑀬𑀼𑀕𑀦𑁆𑀥𑀭𑁄. 𑀓𑀼𑀁 𑀧𑀣𑀯𑀺𑀁 𑀯𑀼𑀡𑁄𑀢𑀺 𑀅𑀘𑁆𑀙𑀸𑀤𑀬𑀢𑀻𑀢𑀺 𑀓𑀼𑀩𑁆𑀩𑀭𑁄, 𑀯𑀼 𑀲𑀁𑀯𑀭𑀡𑁂, 𑀭𑁄, 𑀉𑀲𑁆𑀲𑀢𑁆𑀢𑀁. 𑀬𑀼𑀕𑀁 𑀥𑀸𑀭𑁂𑀢𑀻𑀢𑀺 𑀬𑀼𑀕𑀦𑁆𑀥𑀭𑁄, 𑀲𑀜𑁆𑀜𑀸𑀬𑀁 𑀅, 𑀅𑀪𑀺𑀥𑀸𑀦𑀸 𑀭𑀲𑁆𑀲𑁄.

𑀅𑀓𑁆𑀔𑁄 𑀲𑀓𑀝𑀁, 𑀢𑀤𑀯𑀬𑀯𑁄 𑀯𑀸, 𑀢𑀣𑀸 𑀘𑀸𑀳𑀸𑀚𑀬𑀸𑀘𑀭𑀺𑀬𑁄 𑁋

‘‘𑀅𑀓𑁆𑀔𑁄 𑀯𑀺𑀪𑀻𑀝𑀓𑁂 𑀦𑀺𑀫𑁆𑀩𑁂, 𑀲𑀓𑀝𑁂 𑀘 𑀩𑁆𑀬𑀯𑀳𑀸𑀭𑁂;

𑀭𑀣𑀲𑁆𑀲𑀸𑀯𑀬𑀯𑁂 𑀓𑀲𑁆𑀲𑁂, 𑀧𑀸𑀲𑀓𑁂𑀧𑁆𑀬’𑀓𑁆𑀔’𑀫𑀺𑀦𑁆𑀤𑁆𑀭𑀺𑀬𑁂’’𑀢𑀺.

𑀢𑀲𑁆𑀲𑀕𑁆𑀕𑀕𑀢𑁂 𑀓𑀻𑀮𑁂 𑀆𑀡𑀻, 𑀇𑀢𑁆𑀣𑀻. 𑀅𑀡𑀺𑀧𑀺, ‘‘𑀲𑀻𑀫𑀸𑀲𑁆𑀲𑀺𑀓𑁆𑀔𑀕𑁆𑀕𑀓𑀻𑀮𑁂𑀲𑀼, 𑀅𑀡𑀻 𑀆𑀡𑀻 𑀇𑀫𑁂 𑀤𑁆𑀯𑀺𑀲𑀽’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁮.𑁫𑁬] 𑀳𑀺 𑀭𑀼𑀤𑁆𑀤𑁄 𑀤𑁆𑀯𑀺𑀥𑀸 𑀧𑀞𑀢𑀺. ‘‘𑀅𑀡𑀻 𑀆𑀡𑀻 𑀘 𑀅𑀓𑁆𑀔𑀕𑁆𑀕𑀓𑀻𑀮𑁂 𑀲𑀻𑀫𑀸𑀲𑁆𑀲𑀺𑀲𑀼 𑀫𑀢𑀸’’𑀢𑀺 𑀘 𑀦𑀸𑀦𑀢𑁆𑀣𑀲𑀗𑁆𑀕𑀳𑁄𑀧𑀺. 𑀅𑀲𑁆𑀲𑀺 𑀓𑁄𑀡𑁄. 𑀅𑀡 𑀲𑀤𑁆𑀤𑁂, 𑀡𑀺. 𑀧𑀼𑀩𑁆𑀩𑀧𑀓𑁆𑀔𑁂 𑀦 𑀯𑀼𑀟𑁆𑀠𑀺, 𑀅𑀦 𑀧𑀸𑀡𑀦𑁂 𑀯𑀸, 𑀡𑀢𑁆𑀢𑀁. 𑀓𑀡𑁆𑀟𑀓𑀸𑀤𑀺𑀲𑀢𑁆𑀣𑁂𑀳𑀺 𑀧𑀭𑀺𑀭𑀓𑁆𑀔𑀡𑀢𑁆𑀣𑀁 𑀓𑀢𑁄 𑀭𑀣𑀸𑀯𑀭𑀡𑁄 𑀯𑀭𑀼𑀣𑁄, 𑀬𑁄 ‘‘𑀭𑀣𑀕𑀼𑀢𑁆𑀢𑀻’’𑀢𑀺 𑀔𑁆𑀬𑀸𑀢𑁄. 𑀯𑀭 𑀯𑀭𑀡𑁂, 𑀯𑀭𑀡𑀫𑁂𑀢𑁆𑀣𑀸𑀯𑀭𑀡𑀁, 𑀬𑀣𑀸 𑀭𑀣𑀁 𑀣𑀺𑀭𑀢𑁆𑀣𑀁 𑀢𑀝𑁆𑀞𑀜𑁆𑀘 𑀕𑁄𑀧𑀢𑀻𑀢𑀺 𑀭𑀣𑀕𑀼𑀢𑁆𑀢𑀺, 𑀇𑀢𑁆𑀣𑀻, ‘‘𑀕𑀼𑀢𑁆𑀢𑀺 𑀓𑀸𑀭𑀸𑀕𑀸𑀭𑁂 𑀯𑀼𑀢𑁆𑀢𑀸, 𑀪𑀽𑀕𑀢𑁂 𑀭𑀓𑁆𑀔𑀡𑁂 𑀬𑀫𑁂’’𑀢𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂.

𑁩𑁭𑁫. 𑀭𑀣𑀸𑀤𑀻𑀦𑀁 ¶ 𑀧𑀼𑀭𑁄𑀪𑀸𑀕𑀲𑀗𑁆𑀔𑀸𑀢𑁂 𑀫𑀼𑀔𑁂 𑀥𑀼𑀭𑁄. 𑀥𑀭 𑀥𑀸𑀭𑀡𑁂, 𑀅𑀲𑁆𑀲𑀼, 𑀬𑀸𑀦𑀫𑀼𑀔𑀁𑀧𑁆𑀬𑀢𑁆𑀭. 𑀅𑀓𑁆𑀔𑁄𑀧𑀓𑁆𑀔𑀭𑀸𑀤𑀬𑁄 𑀭𑀣𑀲𑁆𑀲 𑀅𑀗𑁆𑀕𑀸 𑀦𑀸𑀫. 𑀅𑀓 𑀕𑀫𑀦𑁂, 𑀔𑁄, 𑀅𑀓𑁆𑀔𑁄, 𑀤𑁆𑀯𑀺𑀦𑁆𑀦𑀁 𑀭𑀣𑀘𑀓𑁆𑀓𑀸𑀦𑀁 𑀅𑀦𑁆𑀢𑀭𑀕𑀢𑁄 𑀓𑀝𑁆𑀞𑀯𑀺𑀲𑁂𑀲𑁄. 𑀉𑀧𑀭𑀺 𑀓𑀭𑀻𑀬𑀢𑁂𑀢𑀺 𑀉𑀧𑀓𑁆𑀔𑀭𑁄, 𑀅𑀓𑁆𑀔𑀲𑁆𑀲𑁄𑀧𑀭𑀺 𑀓𑀝𑁆𑀞𑀯𑀺𑀲𑁂𑀲𑁄. 𑀅𑀫𑀭𑀓𑁄𑀲𑁂 𑀧𑀦 𑀉𑀧𑀓𑁆𑀔𑀭𑀲𑀤𑁆𑀤𑀲𑁆𑀲 𑀲𑀩𑁆𑀩𑀭𑀣𑀸𑀯𑀬𑀯𑀯𑀸𑀘𑀓𑀢𑁆𑀢𑀁 𑀯𑀼𑀢𑁆𑀢𑀁 ‘‘𑀭𑀣𑀗𑁆𑀕𑀦𑁆𑀢𑀼 𑀉𑀧𑀓𑁆𑀔𑀭𑁄’’𑀢𑀺 [𑀅𑀫𑀭 𑁧𑁮.𑁫𑁫]. ‘‘𑀅𑀧𑀓𑁆𑀔𑀭𑁄’’𑀢𑀺𑀧𑀺 𑀧𑀸𑀞𑁄.

𑀲𑀩𑁆𑀩𑀲𑁆𑀫𑀺𑀁 𑀳𑀢𑁆𑀣𑀸𑀤𑀺𑀓𑁂 𑀯𑀸𑀳𑀦𑁂 𑀬𑀸𑀦𑀸𑀤𑀺𑀢𑁆𑀢𑀬𑀁, 𑀲𑀩𑁆𑀩𑀢𑁆𑀭 𑀓𑀭𑀡𑀲𑀸𑀥𑀦𑀁. 𑀬𑁄𑀚𑀦𑀻𑀬𑀁 𑀬𑀼𑀚𑁆𑀚𑀢𑁂𑀦𑁂𑀦𑀸𑀢𑀺 𑀬𑁄𑀕𑁆𑀕𑀁, 𑀡𑁆𑀬𑁄. 𑀧𑀢𑁆𑀢𑀁 𑀥𑁄𑀭𑀡𑀜𑁆𑀘𑀸𑀢𑁆𑀭. 𑀧𑀢 𑀕𑀢𑀺𑀬𑀁. 𑀥𑁄𑀭 𑀕𑀢𑀺𑀘𑀸𑀢𑀼𑀭𑀺𑀬𑁂, 𑀏𑀢𑁆𑀣𑀸𑀧𑀺 𑀓𑀭𑀡𑀲𑀸𑀥𑀦𑀁.

𑁩𑁭𑁬. 𑀘𑀢𑀼𑀓𑁆𑀓𑀁 𑀲𑀸𑀭𑀣𑀺𑀫𑁆𑀳𑀺. 𑀭𑀣𑁂𑀦 𑀘𑀭𑀢𑀺 𑀲𑀻𑀮𑁂𑀦𑀸𑀢𑀺 𑀭𑀣𑀘𑀸𑀭𑀻. 𑀲𑀯𑀢𑀺 𑀧𑁂𑀭𑀬𑀢𑀻𑀢𑀺 𑀲𑀽𑀢𑁄, 𑀲𑀽 𑀧𑁂𑀭𑀡𑁂, 𑀢𑁄. 𑀅𑀚 𑀕𑀫𑀦𑁂. 𑀧𑀸𑀚𑁂𑀢𑀻𑀢𑀺 𑀧𑀸𑀚𑀺𑀢𑀸, 𑀭𑀺𑀢𑀼, 𑀤𑀻𑀖𑀸𑀤𑀺. 𑀲𑀭 𑀕𑀢𑀺𑀬𑀁, 𑀣𑀺, 𑀭𑀣𑁂𑀦 𑀲𑀳 𑀕𑀘𑁆𑀙𑀢𑀻𑀢𑀺 𑀯𑀸 𑀲𑀸𑀭𑀣𑀺, 𑀇𑀡, 𑀅𑀜𑁆𑀜𑀢𑁆𑀭𑁄𑀧𑀘𑀸𑀭𑀸. 𑀦𑀺𑀬𑀦𑁆𑀢𑀸, 𑀬𑀦𑁆𑀢𑀸, 𑀔𑀢𑁆𑀢𑀸, 𑀲𑀩𑁆𑀬𑀝𑁆𑀞𑁄, 𑀤𑀓𑁆𑀔𑀺𑀡𑀢𑁆𑀣𑁄, 𑀭𑀣𑀓𑀼𑀝𑀼𑀫𑁆𑀩𑀻𑀧𑁆𑀬𑀢𑁆𑀭.

‘‘𑀦𑀺𑀬𑀦𑁆𑀢𑀸 𑀧𑀸𑀚𑀺𑀢𑀸 𑀬𑀦𑁆𑀢𑀸, 𑀲𑀽𑀢𑁄 𑀔𑀢𑁆𑀢𑀸 𑀘 𑀲𑀸𑀭𑀣𑀺;

𑀲𑀩𑁆𑀬𑀝𑁆𑀞𑁄 𑀤𑀓𑁆𑀔𑀺𑀡𑀢𑁆𑀣𑁄 𑀘, 𑀲𑀜𑁆𑀜𑀸 𑀭𑀣𑀓𑀼𑀝𑀼𑀫𑁆𑀩𑀺𑀦𑁄’’𑀢𑀺 [𑀅𑀫𑀭 𑁧𑁮.𑁫𑁬-𑁬𑁦]. 𑁋

𑀯𑀼𑀢𑁆𑀢𑀁 ¶ . 𑀅𑀢𑁆𑀣𑀢𑁄 𑀲𑀸𑀭𑀣𑀺𑀦𑁄 𑀭𑀣𑀓𑀼𑀝𑀼𑀫𑁆𑀩𑀻 𑀘 𑀦𑀸𑀫𑀁. 𑀭𑀣𑀦𑀸𑀬𑀓𑁂 𑀢𑀼 ‘‘𑀭𑀣𑀸𑀭𑁄𑀳𑁄 𑀘 𑀭𑀣𑀺𑀓𑁄 𑀭𑀣𑀻’’𑀢𑀺 𑀧𑀘𑁆𑀙𑀸 𑀯𑀓𑁆𑀔𑀢𑀺. 𑀔𑀼𑀤𑀺 𑀲𑀁𑀧𑁂𑀲𑀦𑁂, 𑀢𑀼, 𑀤𑀲𑁆𑀲 𑀢𑁄, 𑀉𑀲𑁆𑀲𑀢𑁆𑀢𑀜𑁆𑀘, 𑀔𑀢𑁆𑀢𑀸.

𑀢𑀺𑀓𑀁 𑀭𑀣𑁂 𑀧𑀸𑀚𑀺𑀢𑀢𑀭𑀸 𑀅𑀜𑁆𑀜𑁂 𑀬𑁄𑀥𑀸, 𑀅𑀢𑁆𑀭 𑀬𑁂 ‘‘𑀭𑀣𑀦𑀸𑀬𑀓𑀸’’𑀢𑀺𑀧𑁆𑀬𑀼𑀘𑁆𑀘𑀦𑁆𑀢𑁂. 𑀭𑀣𑀫𑀸𑀭𑁄𑀳𑀢𑀻𑀢𑀺 𑀭𑀣𑀺𑀓𑁄, 𑀭𑀣𑀻 𑀘. 𑀭𑀣𑁂𑀦 𑀬𑀼𑀚𑁆𑀚𑀢𑀻𑀢𑀺 𑀯𑀸 𑀭𑀣𑀺𑀓𑁄, 𑀭𑀣𑀻 𑀘. 𑀭𑀣𑀺𑀦𑁄, 𑀲𑀦𑁆𑀤𑀦𑀸𑀭𑁄𑀳𑁄𑀧𑁆𑀬𑀢𑁆𑀭. 𑀤𑁆𑀯𑀬𑀁 𑀬𑁄𑀥𑁂. 𑀬𑀼𑀥 𑀲𑀫𑁆𑀧𑀳𑀸𑀭𑁂, 𑀡𑁄. 𑀪𑀝𑀢𑀺 𑀬𑀼𑀚𑁆𑀚𑀢𑀻𑀢𑀺 𑀪𑀝𑁄, 𑀅. 𑀓𑁆𑀯𑀘𑀺 𑀬𑁄𑀤𑁆𑀥𑁄𑀧𑀺.

𑁩𑁭𑁭-𑁩𑁭𑁯. 𑀘𑀢𑀼𑀓𑁆𑀓𑀁 𑀧𑀤𑀸𑀢𑀺𑀓𑁂. 𑀧𑀤𑁂𑀳𑀺 𑀅𑀢𑀢𑀺 𑀅𑀚𑀢𑀻𑀢𑀺 𑀧𑀤𑀸𑀢𑀺, 𑀅𑀢 𑀲𑀸𑀢𑀘𑁆𑀘𑀕𑀫𑀦𑁂, 𑀇. 𑀧𑀤 𑀕𑀫𑀦𑁂. 𑀧𑀤𑀢𑀻𑀢𑀺 𑀧𑀢𑁆𑀢𑀺, 𑀇, 𑀤𑁆𑀯𑀺𑀢𑁆𑀢𑀁. 𑀧𑀤𑁂𑀦 𑀅𑀤𑀢𑀻𑀢𑀺 𑀯𑀸 𑀧𑀢𑁆𑀢𑀺, 𑀅𑀮𑁄𑀧𑁄, 𑀤𑀲𑁆𑀲 𑀢𑁄, 𑀇𑀫𑁂 𑀤𑁆𑀯𑁂, 𑀯𑀓𑁆𑀔𑀫𑀸𑀦𑀸 𑀤𑁆𑀯𑁂 𑀘 𑀧𑀼𑀫𑁂. 𑀧𑀤𑁂𑀳𑀺 𑀕𑀘𑁆𑀙𑀢𑀻𑀢𑀺 𑀧𑀤𑀕𑁄, 𑀧𑀤𑀺𑀓𑁄. 𑀧𑀸𑀤𑀸𑀢𑀺𑀓𑁄, 𑀧𑀤𑀸𑀚𑀬𑁄𑀧𑁆𑀬𑀢𑁆𑀭 [𑀧𑀸𑀤𑁂𑀳𑀺 𑀅𑀚𑀢𑀺 𑀈, 𑀭𑀲𑁆𑀲𑁄 𑀘 𑀧𑀤𑀸𑀚𑀺𑀁 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁮.𑁬𑁬)].

𑀙𑀓𑁆𑀓𑀁 ¶ 𑀓𑀯𑀘𑁂. 𑀦𑀳 𑀩𑀦𑁆𑀥𑀦𑁂, 𑀓𑀭𑀡𑁂 𑀡𑁄. 𑀓𑀗𑁆𑀓 𑀕𑀢𑁆𑀬𑀢𑁆𑀣𑁄, 𑀅𑀝𑁄. 𑀯𑀭𑀻𑀬𑀢𑁂 𑀢𑀦𑁆𑀢𑀺 𑀯𑀫𑁆𑀫𑀁, 𑀯𑀭 𑀯𑀭𑀡𑁂, 𑀯𑀭 𑀇𑀘𑁆𑀙𑀸𑀬𑀁 𑀯𑀸, 𑀫𑁄, 𑀭𑀲𑁆𑀲 𑀫𑁄. 𑀓𑀘 𑀩𑀦𑁆𑀥𑀦𑁂, 𑀅, 𑀯𑀓𑀸𑀭𑀯𑀡𑁆𑀡𑀸𑀕𑀫𑁄. 𑀉𑀭𑁄 𑀙𑀸𑀤𑀬𑀦𑁆𑀢𑁆𑀬𑀦𑁂𑀦𑀸𑀢𑀺 𑀉𑀭𑀘𑁆𑀙𑀤𑁄. 𑀯𑀸𑀲𑀤𑁆𑀤𑁄 𑀤𑁆𑀯𑀺𑀦𑁆𑀦𑀁 𑀧𑀼𑀦𑁆𑀦𑀧𑀼𑀁𑀲𑀓𑀢𑁆𑀢𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀚𑀮 𑀤𑀺𑀢𑁆𑀢𑀺𑀬𑀁, 𑀡𑁆𑀯𑀼. 𑀢𑀦𑀼𑀢𑁆𑀢𑀁, 𑀤𑀁𑀲𑀦𑀁, 𑀚𑀕𑀭𑁄𑀧𑁆𑀬𑀢𑁆𑀭. ‘‘𑀚𑀕𑀭𑁄 𑀓𑀗𑁆𑀓𑀝𑁄 𑀬𑁄𑀕𑁄, 𑀲𑀦𑁆𑀦𑀸𑀳𑁄 𑀘 𑀉𑀭𑀘𑁆𑀙𑀤𑁄’’𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁮.𑁬𑁪 𑀩𑁆𑀬𑀸𑀔𑁆𑀬𑀸𑀲𑀼𑀥𑀸 𑁨.𑁮.𑁬𑁪] 𑀯𑁄𑀧𑀸𑀮𑀺𑀢𑁄.

𑀢𑀺𑀓𑀁 𑀓𑀢𑀲𑀦𑁆𑀦𑀸𑀳𑁂. 𑀘𑀫𑁆𑀫𑁂𑀦 𑀲𑀫𑁆𑀫𑀸 𑀦𑀤𑁆𑀥𑀯𑀸𑀢𑀺 𑀲𑀦𑁆𑀦𑀤𑁆𑀥𑁄, 𑀥𑁄. 𑀲𑀚𑁆𑀚𑀼 𑀕𑀢𑀺𑀬𑀁, 𑀅. 𑀯𑀫𑁆𑀫𑁂𑀦 𑀦𑀤𑁆𑀥𑀯𑀸 𑀯𑀫𑁆𑀫𑀺𑀓𑁄. 𑀤𑀁𑀲𑀺𑀢𑁄, 𑀉𑀭𑀘𑁆𑀙𑀤𑀺𑀓𑁄, 𑀩𑁆𑀬𑀽𑀴𑁆𑀳𑀓𑀗𑁆𑀓𑀝𑁄, 𑀚𑀕𑀭𑀺𑀓𑁄𑀧𑁆𑀬𑀢𑁆𑀭.

𑀤𑁆𑀯𑀬𑀁 𑀧𑀭𑀺𑀤𑀳𑀺𑀢𑁂 𑀯𑀢𑁆𑀣𑀸𑀤𑁄. 𑀆𑀧𑀢𑀺𑀧𑀼𑀩𑁆𑀩𑁄 𑀫𑀼𑀘𑀥𑀸𑀢𑀼 𑀧𑀭𑀺𑀤𑀳𑀦𑁂, 𑀉𑀪𑀬𑀢𑁆𑀣 𑀢𑁄, 𑀪𑀽𑀚𑀸𑀤𑀺. 𑀧𑀓𑁆𑀔𑁂 ‘‘𑀲𑀼𑀲𑀧𑀘𑀲𑀓𑀢𑁄 𑀓𑁆𑀔𑀓𑁆𑀓𑀸 𑀘𑁂’’𑀢𑀺 𑀲𑀼𑀢𑁆𑀢𑁂 𑀘𑀓𑀸𑀭𑁂𑀦 𑀢𑀧𑀘𑁆𑀘𑀬𑀲𑁆𑀲 𑀓𑁆𑀓𑁄, 𑀥𑀸𑀢𑁆𑀯𑀦𑁆𑀢𑀮𑁄𑀧𑁄 𑀘. 𑀧𑀺𑀦𑀤𑁆𑀥𑁄, 𑀅𑀧𑀺𑀦𑀤𑁆𑀥𑁄𑀧𑁆𑀬𑀢𑁆𑀭. 𑀧𑀼𑀩𑁆𑀩𑀧𑀓𑁆𑀔𑁂 𑀅𑀧𑀺𑀲𑁆𑀲𑀸𑀓𑀸𑀭𑀮𑁄𑀧𑁄.

𑀘𑀢𑀼𑀓𑁆𑀓𑀁 𑀅𑀪𑀺𑀘𑀸𑀭𑀧𑀤𑀸𑀢𑀺𑀫𑁆𑀳𑀺. 𑀧𑀼𑀭𑁂 𑀘𑀭𑀡𑀲𑀻𑀮𑁄, 𑀲𑀢𑁆𑀢𑀫𑀺𑀬𑀸 𑀅𑀮𑁄𑀧𑁄 𑀉𑀪𑀬𑀢𑁆𑀭𑀸𑀧𑀺. 𑀧𑀼𑀩𑁆𑀩𑁂 𑀡𑀻. 𑀧𑀭𑀧𑀓𑁆𑀔𑁂 𑀅, 𑀧𑀼𑀩𑁆𑀩𑀁, 𑀧𑀼𑀩𑁆𑀩𑁂 𑀯𑀸 𑀕𑀘𑁆𑀙𑀢𑀻𑀢𑀺 𑀧𑀼𑀩𑁆𑀩𑀗𑁆𑀕𑀫𑁄, 𑀤𑀼𑀢𑀺𑀬𑀸𑀬𑀸𑀮𑁄𑀧𑁄. 𑀧𑀼𑀭𑁄𑀕𑁄, 𑀅𑀕𑁆𑀕𑁂𑀲𑀭𑁄, 𑀧𑀝𑁆𑀞𑁄, 𑀅𑀕𑁆𑀕𑀢𑁄𑀲𑀭𑁄, 𑀧𑀼𑀭𑀲𑁆𑀲𑀭𑁄, 𑀧𑀼𑀭𑁄𑀕𑀫𑁄𑀧𑁆𑀬𑀢𑁆𑀭.

𑀤𑁆𑀯𑀬𑀁 𑀅𑀲𑀻𑀖𑀕𑀸𑀫𑀺𑀦𑀺. 𑀫𑀦𑁆𑀤𑀁 𑀕𑀘𑁆𑀙𑀢𑀺 𑀲𑀻𑀮𑁂𑀦𑀸𑀢𑀺 𑀫𑀦𑁆𑀤𑀕𑀸𑀫𑀻, 𑀡𑀻. 𑀫𑀦𑁆𑀣 𑀯𑀺𑀮𑁄𑀴𑀦𑁂, 𑀅𑀦𑁂𑀓𑀢𑁆𑀣𑀢𑁆𑀢𑀸 𑀲𑀁𑀓𑀺𑀮𑁂𑀲𑁂 𑀘. 𑀲𑀁𑀓𑀺𑀮𑀺𑀲𑁆𑀲𑀢𑁂𑀢𑀺 𑀫𑀦𑁆𑀣𑀭𑁄, 𑀅𑀭𑁄.

𑀢𑀺𑀓𑀁 𑀯𑁂𑀕𑀺𑀦𑀺. 𑀢𑀼𑀭𑀫𑁂𑀢𑀺 𑀕𑀘𑁆𑀙𑀢𑀻𑀢𑀺 𑀢𑀼𑀭𑀺𑀢𑁄, 𑀇 𑀕𑀢𑀺𑀬𑀁, 𑀢𑁄. 𑀢𑀼𑀭𑀲𑁆𑀲𑀺, 𑀧𑀚𑀯𑀻, 𑀚𑀯𑁄𑀧𑁆𑀬𑀢𑁆𑀭. 𑀤𑁆𑀯𑀬𑀁 𑀚𑁂𑀢𑀼𑀬𑁄𑀕𑁆𑀕𑀢𑀸𑀫𑀢𑁆𑀢𑁂. 𑀚𑀺 𑀚𑀬𑁂, 𑀢𑀩𑁆𑀩𑁄, 𑀚𑁂𑀢𑀩𑁆𑀩𑀁, 𑀡𑁆𑀬𑀧𑀘𑁆𑀘𑀬𑁂 𑀚𑁂𑀬𑁆𑀬𑀁.

𑁩𑁮𑁦. 𑀢𑀺𑀓𑀁 ¶ 𑀲𑀽𑀭𑁂. 𑀲𑀼𑀭 𑀯𑀻𑀭 𑀯𑀺𑀓𑁆𑀓𑀦𑁆𑀢𑁂𑀢𑀺 𑀘𑀼𑀭𑀸𑀤𑀺𑀥𑀸𑀢𑀼. 𑀲𑀼𑀭𑀬𑀢𑀺, 𑀯𑀻𑀭𑀬𑀢𑀻𑀢𑀺 𑀲𑀽𑀭𑁄, 𑀯𑀻𑀭𑁄 𑀘, 𑀅, 𑀤𑀻𑀖𑀸𑀤𑀺, 𑀓𑀦𑁆𑀢 𑀙𑁂𑀤𑀦𑁂. 𑀯𑀺𑀓𑁆𑀓𑀦𑁆𑀢𑁄. 𑀤𑁆𑀯𑀬𑀁 𑀲𑀳𑀸𑀬𑀫𑀢𑁆𑀢𑁂. 𑀲𑀳 𑀏𑀢𑀺 𑀕𑀘𑁆𑀙𑀢𑀻𑀢𑀺 𑀲𑀳𑀸𑀬𑁄, 𑀲𑀩𑁆𑀩𑀢𑁆𑀭 𑀓𑀢𑁆𑀢𑀭𑀺 𑀘 𑀅. 𑀅𑀦𑀼𑀲𑀤𑁆𑀤𑁄 𑀧𑀘𑁆𑀙𑀸𑀢𑁆𑀣𑁄. 𑀲𑀫𑀸𑀢𑀺 𑀏𑀢𑁂 𑀤𑁆𑀯𑁂 𑀢𑀼𑀮𑁆𑀬𑀢𑁆𑀣𑀸. 𑀅𑀦𑀼𑀧𑁆𑀮𑀧𑁄, 𑀅𑀪𑀺𑀲𑀭𑁄𑀧𑀺. 𑀲𑀦𑁆𑀦𑀤𑁆𑀥𑀧𑁆𑀧𑀪𑀼𑀢𑀻 𑀲𑀦𑁆𑀦𑀤𑁆𑀥𑀲𑀤𑁆𑀤𑀸𑀤𑀬𑁄 𑀅𑀦𑀼𑀘𑀭𑀦𑁆𑀢𑀸 𑀢𑀻𑀲𑀼.

𑀧𑀸𑀣𑁂𑀬𑁆𑀬𑀁 𑀦𑀸𑀫 𑀭𑀸𑀚𑀸𑀤𑀻𑀦𑀁 𑀬𑀸𑀢𑁆𑀭𑀸𑀲𑁆𑀯𑁂𑀯 𑀩𑀳𑀼𑀮𑀁 𑀧𑀯𑀢𑁆𑀢𑀢𑀻𑀢𑀺 𑀇𑀥 𑀢𑀁 𑀯𑀼𑀢𑁆𑀢𑀁, 𑀧𑀣𑁂 𑀳𑀺𑀢𑀁 𑀧𑀸𑀣𑁂𑀬𑁆𑀬𑀁, 𑀏𑀬𑁆𑀬𑁄. 𑀲𑀫𑁆𑀩 𑀫𑀡𑁆𑀟𑀮𑁂, 𑀅𑀮𑁄, 𑀲𑀫𑁂𑀢𑀺 𑀅𑀤𑁆𑀥𑀸𑀦𑀧𑀭𑀺𑀲𑁆𑀲𑀫𑀫𑁂𑀢𑁂𑀦𑀸𑀢𑀺 𑀯𑀸 𑀲𑀫𑁆𑀩𑀮𑀁, 𑀅𑀮𑁄, 𑀩𑀸𑀕𑀫𑁄 𑀘.

𑁩𑁮𑁧. 𑀘𑀢𑀼𑀓𑁆𑀓𑀁 𑀲𑁂𑀦𑀸𑀬𑀁. 𑀯𑀸𑀳𑀬𑁄𑀕𑀸 𑀯𑀸𑀳𑀺𑀦𑀻. 𑀥𑀚𑀬𑁄𑀕𑀸 𑀥𑀚𑀺𑀦𑀻. 𑀲𑀺 𑀩𑀦𑁆𑀥𑀦𑁂, 𑀦𑁄, 𑀲𑁂𑀦𑀸. 𑀘𑀫𑀼 𑀅𑀤𑀦𑁂, 𑀊. 𑀘𑀫𑀢𑀺 𑀪𑀻𑀭𑀼𑀦𑁆𑀢𑀺 𑀘𑀫𑀽. 𑀧𑀼𑀢𑀦𑀸, 𑀅𑀦𑀻𑀓𑀺𑀦𑀻, 𑀯𑀭𑀽𑀣𑀺𑀦𑀻𑀧𑁆𑀬𑀢𑁆𑀭. 𑀏𑀢𑁆𑀣 𑀘 𑀧𑀼𑀢𑀦𑀸 𑀅𑀦𑀻𑀓𑀺𑀦𑀻 𑀯𑀸𑀳𑀺𑀦𑀻 𑀘𑀫𑀽 𑀲𑁂𑀦𑀸𑀪𑁂𑀤𑁂𑀧𑀺. ‘‘𑀧𑀼𑀢𑀦𑀸’𑀦𑀻𑀓𑀺𑀦𑀻 𑀘𑀫𑀽, 𑀲𑁂𑀦𑀸 𑀲𑁂𑀦𑀸𑀦𑁆𑀢𑀭𑁂𑀧𑀺 𑀘𑁂’’𑀢𑀺 𑀭𑀼𑀤𑁆𑀤𑁄, ‘‘𑀲𑁂𑀦𑀸𑀧𑀪𑁂𑀤𑁂 𑀲𑁂𑀦𑀸𑀬𑀁, 𑀲𑀯𑀦𑁆𑀢𑁆𑀬𑀫𑀧𑀺 𑀯𑀸𑀳𑀺𑀦𑀻’’𑀢𑀺 𑀭𑀪𑀲𑁄 𑀘. 𑀘𑀓𑁆𑀓𑀸𑀤𑀺𑀢𑀺𑀓𑀁 𑀲𑀸𑀫𑀜𑁆𑀜𑁂𑀦 𑀲𑁂𑀦𑀸𑀬𑀁, 𑀲𑁂𑀦𑀗𑁆𑀕𑁂 𑀘. 𑀘𑀸𑀡𑀓𑁆𑀬𑁂 𑀢𑀼 𑀲𑁂𑀦𑀸𑀯𑀺𑀲𑁂𑀲𑁂 𑀅𑀦𑀻𑀓𑁄 𑀯𑀼𑀢𑁆𑀢𑁄 ‘‘𑀢𑀻𑀡𑀺 𑀢𑀺𑀓𑀸𑀦𑁆𑀬𑀦𑀻𑀓’’𑀦𑁆𑀢𑀺.

𑀅𑀲𑁆𑀲𑁂𑀯 ¶ 𑀓𑀸𑀫𑀦𑁆𑀤𑀓𑀻𑀬𑁂 𑀯𑀺𑀯𑀭𑀡𑀁, 𑀬𑀣𑀸 𑁋

‘‘𑀅𑀲𑁆𑀲𑀲𑁆𑀲 𑀧𑀢𑁆𑀢𑀺𑀬𑁄𑀥𑀸 𑀬𑁂, 𑀪𑀯𑁂𑀬𑁆𑀬𑀼𑀁 𑀧𑀼𑀭𑀺𑀲𑀸 𑀢𑀬𑁄;

𑀇𑀢𑀺 𑀓𑀧𑁆𑀧𑀸 𑀢𑀼 𑀧𑀜𑁆𑀘𑀲𑁆𑀲𑀸, 𑀯𑀺𑀥𑁂𑀬𑁆𑀬𑀸 𑀓𑀼𑀜𑁆𑀚𑀭𑀲𑁆𑀲 𑀢𑀼;

𑀧𑀸𑀤𑀗𑁆𑀕𑁄 𑀧𑀸𑀚𑀺𑀢𑀸𑀯𑀦𑁆𑀢𑁄, 𑀧𑀼𑀭𑀺𑀲𑀸 𑀤𑀲 𑀧𑀜𑁆𑀘 𑀘;

𑀯𑀺𑀥𑀸𑀦𑀫𑀺𑀢𑀺 𑀦𑀸𑀕𑀲𑁆𑀲, 𑀘𑀢𑀼𑀓𑁆𑀓𑀁 𑀲𑀦𑁆𑀤𑀦𑀲𑁆𑀲 𑀘;

𑀅𑀦𑀻𑀓𑀫𑀺𑀢𑀺 𑀯𑀺𑀜𑁆𑀜𑁂𑀬𑁆𑀬-𑀫𑀺𑀢𑀺 𑀓𑀧𑁆𑀧𑀸 𑀦𑀯 𑀤𑁆𑀯𑀺𑀧𑀸’’𑀢𑀺.

𑀓𑀭𑀻𑀬𑀢𑁂 𑀯𑀺𑀕𑁆𑀕𑀳𑁄 𑀬𑁂𑀦𑁂𑀢𑀺 𑀘𑀓𑁆𑀓𑀁. 𑀩𑀮 𑀲𑀁𑀯𑀭𑀡𑁂, 𑀅. 𑀅𑀡 𑀲𑀤𑁆𑀤𑁂, 𑀇𑀓𑁄. 𑀯𑀸𑀓𑀸𑀭𑁄 𑀦𑀧𑀼𑀁𑀲𑀓𑀢𑁆𑀢𑀁 𑀲𑀫𑀼𑀘𑁆𑀘𑀺𑀦𑁄𑀢𑀺.

𑀘𑀢𑀼𑀭𑀗𑁆𑀕𑀩𑀮𑀸𑀬 𑀲𑀼𑀲𑀦𑁆𑀦𑀤𑁆𑀥𑀸𑀬 𑀲𑁂𑀦𑀸𑀬 𑀬𑀼𑀤𑁆𑀥𑀢𑁆𑀣𑀁 𑀤𑁂𑀲𑀯𑀺𑀤𑁂𑀲𑁂 𑀯𑀺𑀦𑁆𑀬𑀸𑀲𑁄 𑀯𑀺𑀪𑀚𑀺𑀢𑁆𑀯𑀸 𑀦𑁆𑀬𑀲𑀦𑀁 𑀞𑀧𑀦𑀁 𑀩𑁆𑀬𑀽𑀳𑁄 𑀓𑀣𑁆𑀬𑀢𑁂. 𑀯𑀺𑀪𑀚𑀺𑀢𑁆𑀯𑀸 𑀊𑀳𑀦𑀁 𑀞𑀧𑀦𑀁 𑀩𑁆𑀬𑀽𑀳𑁄. 𑀢𑀩𑁆𑀪𑁂𑀤𑀸 𑀤𑀡𑁆𑀟𑀪𑁄𑀕𑀫𑀡𑁆𑀟𑀮𑀸𑀲𑀁𑀳𑀢𑀸 𑀘𑀢𑁆𑀢𑀸𑀭𑁄 𑀧𑀓𑀢𑀺𑀩𑁆𑀬𑀽𑀳𑀸. 𑀢𑀢𑁆𑀭 𑀅𑀦𑀻𑀓𑀸𑀦𑀁 𑀢𑀺𑀭𑀺𑀬𑀢𑁄 𑀯𑀼𑀢𑁆𑀢𑀺 𑀤𑀡𑁆𑀟𑁄. 𑀲𑀫𑀢𑁆𑀣𑀸𑀦𑀫𑀦𑀻𑀓𑀸𑀦𑀫𑀦𑁆𑀯𑀸𑀯𑀼𑀢𑁆𑀢𑀺 𑀅𑀜𑁆𑀜𑁄𑀜𑁆𑀜𑀢𑁄 𑀯𑀼𑀢𑁆𑀢𑀺 𑀪𑁄𑀕𑁄. 𑀫𑀡𑁆𑀟𑀮𑀭𑀘𑀦𑀸𑀬 𑀲𑀭𑀦𑁆𑀢𑀸𑀦𑀫𑀦𑀻𑀓𑀸𑀦𑀁 𑀲𑀩𑁆𑀩𑀢𑁄 𑀯𑀼𑀢𑁆𑀢𑀺 𑀲𑀧𑁆𑀧𑀲𑀭𑀻𑀭𑀫𑀺𑀯 𑀫𑀡𑁆𑀟𑀮𑁄. 𑀞𑀺𑀢𑀸𑀦𑀫𑀺𑀢𑀭𑁂𑀢𑀭𑀸𑀲𑀁 𑀳𑀢𑀸𑀦𑀁 𑀯𑀺𑀲𑀺𑀮𑀺𑀝𑁆𑀞𑀢𑀭𑀸𑀦𑀁 𑀅𑀦𑀻𑀓𑀸𑀦𑀁 𑀧𑀼𑀣𑀼𑀯𑀼𑀢𑁆𑀢𑀺 𑀅𑀲𑀁𑀳𑀢𑁄. 𑀢𑀤𑀼𑀢𑁆𑀢𑀁 𑀓𑀸𑀫𑀦𑁆𑀤𑀓𑁂𑀦 𑁋

‘‘𑀢𑀺𑀭𑀺𑀬𑀢𑁄 𑀯𑀼𑀢𑁆𑀢𑀺 𑀤𑀡𑁆𑀟𑀸𑀔𑁆𑀬𑀸, 𑀪𑁄𑀕𑁄𑀦𑁆𑀯𑀸𑀯𑀼𑀢𑁆𑀢𑀺𑀭𑁂𑀯 𑀘;

𑀫𑀡𑁆𑀟𑀮𑁄 𑀲𑀩𑁆𑀩𑀢𑁄𑀯𑀼𑀢𑁆𑀢𑀺, 𑀧𑀼𑀣𑀼𑀯𑀼𑀢𑁆𑀢𑀺 𑀅𑀲𑀁𑀳𑀢𑁄’’𑀢𑀺.

𑀩𑁆𑀬𑀽𑀳𑀲𑀫𑀯𑁂𑀢𑁄 𑀏𑀯 𑀩𑁆𑀬𑀽𑀳𑀲𑁆𑀲𑁂𑀓𑀤𑁂𑀲𑁄 𑀧𑀘𑁆𑀙𑀸𑀪𑀸𑀕𑁄 𑀩𑁆𑀬𑀽𑀳𑀧𑀡𑁆𑀳𑀺, 𑀩𑁆𑀬𑀽𑀳𑀲𑁆𑀲 𑀧𑀘𑁆𑀙𑀸, 𑀩𑁆𑀬𑀽𑀳𑀦𑁆𑀢𑀭𑀫𑁂𑀯 𑀯𑀸. 𑀬𑀢𑁆𑀭 𑀞𑀺𑀢𑁄 𑀭𑀸𑀚𑀸 𑀲𑀲𑁂𑀦𑀁 𑀧𑀝𑀺𑀕𑁆𑀕𑀡𑁆𑀳𑀢𑀺, 𑀢𑀁 𑀲𑁂𑀦𑀸𑀬 𑀧𑀘𑁆𑀙𑀸 𑀥𑀦𑀼𑀲𑀢𑀤𑁆𑀯𑀬𑀦𑁆𑀢𑀭𑁂𑀦 𑀞𑀺𑀢𑀧𑀭𑀺𑀲𑀲𑀳𑀺𑀢𑀁 𑀅𑀦𑀻𑀓𑀁 ‘‘𑀧𑀝𑀺𑀕𑁆𑀕𑀳𑁄’’𑀢𑁆𑀬𑀼𑀘𑁆𑀘𑀢𑁂.

𑁩𑁮𑁨-𑁩𑁮𑁩. 𑀏𑀓𑁄 ¶ 𑀳𑀢𑁆𑀣𑀻 𑀤𑁆𑀯𑀸𑀤𑀲𑀧𑀼𑀭𑀺𑀲𑀲𑀳𑀺𑀢𑁄 ‘‘𑀏𑀓𑁄 𑀳𑀢𑁆𑀣𑀻’’𑀢𑁆𑀬𑀼𑀘𑁆𑀘𑀢𑁂, 𑀏𑀢𑁂𑀦 𑀮𑀓𑁆𑀔𑀡𑁂𑀦 𑀅𑀥𑀫𑀦𑁆𑀢𑀢𑁄 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀢𑀬𑁄 𑀳𑀢𑁆𑀣𑀺𑀦𑁄 𑀳𑀢𑁆𑀣𑀸𑀦𑀻𑀓𑀁 𑀦𑀸𑀫, 𑀢𑀣𑀸 𑀏𑀓𑁄 𑀢𑀼𑀭𑀗𑁆𑀕𑁄 𑀢𑀺𑀧𑀼𑀭𑀺𑀲𑀲𑀳𑀺𑀢𑁄, 𑀏𑀓𑁄 𑀘 𑀭𑀣𑁄 𑀘𑀢𑀼𑀧𑀼𑀭𑀺𑀲𑀲𑀳𑀺𑀢𑁄 𑀏𑀓𑁄 𑀳𑀬𑁄, 𑀏𑀓𑁄 𑀭𑀣𑁄𑀢𑀺 𑀏𑀢𑁂𑀦 𑀮𑀓𑁆𑀔𑀡𑁂𑀦 𑀅𑀥𑀫𑀦𑁆𑀢𑀢𑁄 𑀢𑀬𑁄 𑀳𑀬𑀸 𑀘 𑀢𑀬𑁄 𑀭𑀣𑀸 𑀘 𑀳𑀬𑀸𑀦𑀻𑀓𑀁, 𑀭𑀣𑀸𑀦𑀻𑀓𑀁 𑀦𑀸𑀫, 𑀢𑁂𑀦𑀸𑀳 ‘‘𑀢𑀬𑁄 𑀢𑀬𑁄 𑀕𑀚𑀸𑀤𑀬𑁄’’𑀢𑀺. 𑀲𑀲𑀢𑁆𑀣𑀸 𑀔𑀕𑁆𑀕𑀸𑀤𑀺𑀲𑀢𑁆𑀣𑀳𑀢𑁆𑀣𑀸 𑀘𑀢𑀼𑀚𑁆𑀚𑀦𑀸 𑀘𑀢𑁆𑀢𑀸𑀭𑁄 𑀧𑀼𑀭𑀺𑀲𑀸 𑀧𑀢𑁆𑀢𑀸𑀦𑀻𑀓𑀁 𑀦𑀸𑀫 𑀯𑀼𑀢𑁆𑀢𑀸. 𑀳𑁂𑀝𑁆𑀞𑀺𑀫𑀦𑁆𑀢𑀢𑁄𑀬𑁂𑀯𑁂𑀢𑁆𑀣𑀸𑀧𑀺 𑀧𑀭𑀺𑀘𑁆𑀙𑁂𑀤𑁄. 𑀅𑀫𑀭𑀓𑁄𑀲𑁂 𑀢𑁆𑀯𑀜𑁆𑀜𑀣𑀸 𑀓𑀣𑀺𑀢𑀸 𑁋

‘‘𑀏𑀓𑀓𑁂𑀪𑀭𑀣𑀸 𑀢𑁆𑀬𑀲𑁆𑀲𑀸, 𑀧𑀢𑁆𑀢𑀺 𑀧𑀜𑁆𑀘𑀧𑀤𑀸𑀢𑀺𑀓𑀸;

𑀧𑀢𑁆𑀬𑀗𑁆𑀕𑁂𑀳𑀺 𑀢𑀺𑀕𑀼𑀡𑁂𑀳𑀺, 𑀓𑀫𑀸 𑀲𑀜𑁆𑀜𑀸 𑀬𑀣𑁄𑀢𑁆𑀢𑀭𑀁.

𑀲𑁂𑀦𑀸𑀫𑀼𑀔𑀁 𑀕𑀼𑀫𑁆𑀩𑀕𑀡𑀸, 𑀯𑀸𑀳𑀺𑀦𑀻 𑀧𑀼𑀢𑀦𑀸 𑀘𑀫𑀽;

𑀅𑀦𑀻𑀓𑀺𑀦𑀻 𑀘 𑀢𑀸𑀲𑀦𑁆𑀢𑀼, 𑀤𑀲 𑀅𑀓𑁆𑀔𑁄𑀪𑀺𑀦𑀻 𑀫𑀢’’𑀦𑁆𑀢𑀺 [𑀅𑀫𑀭 𑁧𑁮.𑁮𑁦-𑁧].

𑀢𑀲𑁆𑀲𑀢𑁆𑀣𑁄 𑁋 𑀢𑀻𑀳𑀺 𑀅𑀲𑁆𑀲𑁂𑀳𑀺 𑀕𑀚𑁂𑀦𑁂𑀓𑁂𑀦 𑀭𑀣𑁂𑀦 𑀘 𑀧𑀤𑀸𑀢𑀻𑀪𑀺 𑀘 𑀧𑀜𑁆𑀘𑀳𑀺 𑀧𑀢𑁆𑀢𑀺 𑀦𑀸𑀫 𑀲𑁂𑀦𑀦𑁆𑀢𑀭𑀁. 𑀧𑀢𑁆𑀬𑀗𑁆𑀕𑁂𑀳𑀺 𑀲𑀩𑁆𑀩𑁂𑀳𑀺 𑀕𑀚𑀸𑀤𑀻𑀳𑀺 ¶ 𑀬𑀣𑀸𑀧𑀼𑀩𑁆𑀩𑀁 𑀕𑀼𑀡𑁂𑀳𑀺 𑀬𑀣𑁄𑀢𑁆𑀢𑀭𑀁 𑀓𑀫𑁂𑀦 𑀲𑁂𑀦𑀸𑀫𑀼𑀔𑀸𑀤𑀺𑀓𑀸 𑀲𑀜𑁆𑀜𑀸 𑀪𑀯𑀢𑀺. 𑀬𑀣𑁄𑀢𑁆𑀢𑀭𑀦𑁆𑀢𑀺 𑀯𑀘𑀦𑁂𑀦 𑀬𑀣𑀸𑀧𑀼𑀩𑁆𑀩𑀫𑀺𑀢𑁆𑀬𑀢𑁆𑀣𑀫𑀸𑀳, 𑀢𑁂𑀦𑁂𑀤𑀁 𑀯𑀼𑀢𑁆𑀢𑀁 ‘‘𑀪𑀯𑀢𑀺 𑀢𑀬𑁄 𑀧𑀢𑁆𑀢𑀺𑀦𑁄 𑀲𑁂𑀦𑀸𑀫𑀼𑀔𑀁. 𑀢𑀻𑀳𑀺 𑀲𑁂𑀦𑀸𑀫𑀼𑀔𑁂𑀳𑀺 𑀕𑀼𑀫𑁆𑀩𑁄. 𑀕𑀼𑀫𑁆𑀩𑀢𑁆𑀢𑀬𑁂𑀦 𑀕𑀡𑁄. 𑀕𑀡𑀢𑁆𑀢𑀬𑀁 𑀯𑀸𑀳𑀺𑀦𑀻. 𑀯𑀸𑀳𑀺𑀦𑀺𑀢𑁆𑀢𑀬𑀁 𑀧𑀼𑀢𑀦𑀸. 𑀧𑀼𑀢𑀦𑀢𑁆𑀢𑀬𑀁 𑀘𑀫𑀽. 𑀘𑀫𑀼𑀢𑁆𑀢𑀬𑀁 𑀅𑀦𑀻𑀓𑀺𑀦𑀻. 𑀢𑀸𑀲𑀁 𑀅𑀦𑀻𑀓𑀺𑀦𑀻𑀦𑀁 𑀤𑀲 𑀅𑀓𑁆𑀔𑁄𑀪𑀺𑀦𑀻’’𑀢𑀺.

𑀢𑀢𑁆𑀭 𑀭𑀣𑀸𑀦𑀁 𑀲𑀗𑁆𑀔𑁆𑀬𑀸 𑀲𑀢𑁆𑀢𑀢𑀺𑀲𑀳𑀺𑀢𑁂𑀳𑀺 𑀅𑀝𑁆𑀞𑀲𑀢𑁂𑀳𑀸𑀥𑀺𑀓𑀸𑀦𑁆𑀬𑁂𑀓𑀯𑀻𑀲𑀢𑀺𑀲𑀳𑀲𑁆𑀲𑀸𑀦𑀺, 𑀏𑀯𑀫𑁂𑀯 𑀕𑀚𑀸𑀦𑀫𑁆𑀧𑀺 𑀲𑀗𑁆𑀔𑁆𑀬𑀸, 𑀢𑀣𑀸 𑀘 𑁋

𑀧𑀜𑁆𑀘𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀺, 𑀙𑀲𑀢𑀸𑀦𑀺 𑀤𑀲𑁂𑀯 𑀢𑀼;

𑀲𑀗𑁆𑀔𑁆𑀬𑀸 𑀢𑀸 𑀢𑀼𑀭𑀗𑁆𑀕𑀸𑀦𑀜𑁆𑀳𑀺, 𑀯𑀺𑀦𑀸 𑀭𑀣𑁂 𑀢𑀼𑀭𑀗𑁆𑀕𑀫𑁂.

𑀦𑀭𑀸𑀦𑀁 𑀲𑀢𑀲𑀳𑀲𑁆𑀲𑀁, 𑀲𑀳𑀲𑁆𑀲𑀸𑀦𑀺 𑀦𑀯𑁂𑀯 𑀘;

𑀲𑀢𑀸𑀦𑀺 𑀢𑀻𑀡𑀺 𑀘’𑀜𑁆𑀜𑀸𑀦𑀺, 𑀧𑀜𑁆𑀜𑀸𑀲𑀜𑁆𑀘 𑀧𑀤𑀸𑀢𑀬𑁄𑀢𑀺 [𑀩𑁆𑀬𑀸𑀔𑁆𑀬𑀸𑀲𑀼𑀥𑀸 𑁨.𑁮.𑁮𑁦].

𑁩𑁮𑁪. 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀲𑁂𑀦𑀁 𑀤𑀲𑁆𑀲𑁂𑀢𑁆𑀯𑀸 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀝𑁆𑀞𑀺…𑀧𑁂… 𑀬𑀦𑁆𑀢𑀺’’𑀘𑁆𑀘𑀸𑀤𑀺. 𑀬𑀦𑁆𑀢𑀺𑀬𑀸 𑀬𑀸𑀦𑀁 𑀓𑀼𑀩𑁆𑀩𑀦𑁆𑀢𑀺𑀬𑀸 𑀲𑁂𑀦𑀸𑀬 𑀓𑀢𑁆𑀢𑀼𑀪𑀽𑀢𑀸𑀬 𑀥𑀽𑀮𑀻𑀓𑀢𑁂𑀲𑀼 𑀲𑀦𑁆𑀢𑁂𑀲𑀼. 𑀓𑁂𑀲𑀼? 𑀲𑀝𑁆𑀞𑀺𑀯𑀁𑀲𑀓𑀮𑀸𑀧𑁂𑀲𑀼. 𑀓𑀺𑀢𑁆𑀢𑀓𑀧𑁆𑀧𑀫𑀸𑀡𑁂𑀲𑀼? 𑀧𑀘𑁆𑀘𑁂𑀓𑀁 𑀲𑀝𑁆𑀞𑀺𑀤𑀡𑁆𑀟𑀯𑀦𑁆𑀢𑁂𑀲𑀼, 𑀏𑀲𑀸 𑀅𑀓𑁆𑀔𑁄𑀪𑀺𑀦𑀻 𑀦𑀸𑀫 𑀲𑁂𑀦𑀸 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦. 𑀓𑁂𑀦𑀘𑀺 𑀔𑁄𑀪𑁂𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀓𑁆𑀔𑁄𑀪𑀺𑀦𑀻, 𑀬𑀼, 𑀦𑀤𑀸𑀤𑀺. 𑀔𑀼𑀪 𑀘𑀮𑀦𑁂.

𑁩𑁮𑁫. 𑀘𑀢𑀼𑀓𑁆𑀓𑀁 ¶ 𑀲𑀫𑁆𑀧𑀢𑁆𑀢𑀺𑀬𑀁. 𑀥𑀦𑀼𑀓𑁆𑀓𑀁𑀲𑁄 𑀲𑀫𑁆𑀧𑀢𑁆𑀢𑀺. 𑀧𑀤 𑀕𑀫𑀦𑁂, 𑀪𑀸𑀯𑁂𑀢𑀺. 𑀬𑀼𑀧𑀓𑁆𑀔𑁂 ‘‘𑀇𑀢𑁆𑀣𑀺𑀬𑀫𑀢𑀺𑀬𑀯𑁄 𑀯𑀸’’𑀢𑀺 𑀅. 𑀮𑀓𑁆𑀔 𑀤𑀲𑁆𑀲𑀦𑀗𑁆𑀓𑁂𑀲𑀼, 𑀈, 𑀮𑀓𑁆𑀔𑀻, 𑀲𑀺𑀭𑀻 𑀘 𑀧𑀼𑀩𑁆𑀩𑁂 𑀤𑁂𑀯𑀢𑀸𑀯𑀲𑁂𑀦 𑀯𑀼𑀢𑁆𑀢𑀸, 𑀇𑀥 𑀥𑀦𑀼𑀓𑁆𑀓𑀁𑀲𑀯𑀲𑁂𑀦.

𑀤𑁆𑀯𑀬𑀁 𑀲𑀫𑁆𑀧𑀢𑁆𑀢𑀺𑀯𑀺𑀧𑀭𑀻𑀢𑀸𑀬𑀁. 𑀯𑀺𑀭𑀽𑀧𑀁 𑀧𑀚𑁆𑀚𑀢𑀻𑀢𑀺 𑀯𑀺𑀧𑀢𑁆𑀢𑀺, 𑀧𑀤𑀺𑀫𑁆𑀳𑀸 𑀓𑀢𑁆𑀢𑀭𑀺𑀢𑀺. 𑀯𑀺𑀭𑀽𑀧𑀁 𑀧𑀚𑁆𑀚𑀦𑀁 𑀯𑀸 𑀯𑀺𑀧𑀢𑁆𑀢𑀺, 𑀪𑀸𑀯𑁂𑀢𑀺. 𑀆𑀧𑀤𑀸𑀲𑀳𑀘𑀭𑀡𑀢𑁄 𑀯𑀺𑀧𑀢𑁆𑀢𑀺 𑀣𑀺𑀬𑀁.

𑀘𑀢𑀼𑀓𑁆𑀓𑀁 𑀲𑀢𑁆𑀣𑀫𑀢𑁆𑀢𑁂. 𑀆𑀤𑀸𑀬 𑀬𑀼𑀚𑁆𑀛𑀦𑁆𑀢𑁂 𑀬𑀦𑁆𑀢𑀺 𑀆𑀯𑀼𑀥𑀁, 𑀬𑀲𑁆𑀲 𑀯𑁄. 𑀆𑀬𑀼𑀥𑀁 𑀯𑀸. 𑀳𑀭 𑀳𑀭𑀡𑁂. 𑀳𑀭𑀢𑀺 𑀚𑀻𑀯𑀺𑀢𑀦𑁆𑀢𑀺 𑀳𑁂𑀢𑀺,𑀢𑀺, 𑀅𑀲𑁆𑀲𑁂, 𑀭𑀮𑁄𑀧𑁄, 𑀳𑀦𑀢𑀺𑀯𑀲𑁂𑀦 𑀯𑀸 𑀲𑀺𑀤𑁆𑀥𑀁. 𑀲𑀲 𑀳𑀺𑀁𑀲𑀸𑀬𑀁, 𑀣𑁄. 𑀅𑀢𑁆𑀣𑀁𑀧𑁆𑀬𑀢𑁆𑀭. 𑀅𑀲𑀼 𑀔𑁂𑀧𑀦𑁂.

𑁩𑁮𑁬-𑁩𑁮𑁭. 𑀲𑀗𑁆𑀔𑁂𑀧𑁂𑀦𑀸𑀬𑀼𑀥𑀁 𑀤𑀲𑁆𑀲𑁂𑀢𑀼𑀫𑀸𑀳. 𑀫𑀼𑀢𑁆𑀢𑀸𑀫𑀼𑀢𑁆𑀢𑀜𑁆𑀘 𑀅𑀫𑀼𑀢𑁆𑀢𑀜𑁆𑀘 𑀧𑀸𑀡𑀺𑀢𑁄 𑀫𑀼𑀢𑁆𑀢𑀜𑁆𑀘 𑀬𑀦𑁆𑀢𑀫𑀼𑀢𑁆𑀢𑀜𑁆𑀘𑁂𑀢𑀺 𑀲𑀓𑀮𑀁 𑀢𑀁 𑀆𑀬𑀼𑀥𑀁 𑀘𑀢𑀼𑀩𑁆𑀩𑀺𑀥𑀁 𑀩𑀳𑀽𑀦𑀫𑁆𑀧𑀺 𑀢𑀩𑁆𑀪𑁂𑀤𑀸𑀦𑀢𑀺𑀯𑀢𑁆𑀢𑀦𑀢𑁄.

𑀘𑀢𑀼𑀦𑁆𑀦𑀁 𑀲𑀭𑀽𑀧𑀫𑀸𑀳 ‘‘𑀫𑀼𑀢𑁆𑀢𑀸𑀫𑀼𑀢𑁆𑀢𑀜𑁆𑀘𑀸’’𑀤𑀺. 𑀬𑀝𑁆𑀞𑀺 𑀦𑀸𑀫 𑀲𑀢𑁆𑀣𑀯𑀺𑀲𑁂𑀲𑁄, 𑀦 𑀓𑀢𑁆𑀢𑀭𑀤𑀡𑁆𑀟𑁄.

‘‘𑀬𑀝𑁆𑀞𑀺 𑀳𑀸𑀭𑀮𑀢𑀸𑀲𑀢𑁆𑀣-𑀪𑁂𑀤𑁂𑀲𑀼 𑀥𑀦𑀼𑀤𑀡𑁆𑀟𑀓𑁂’’𑀢𑀺 𑀳𑀺 𑀦𑀸𑀦𑀢𑁆𑀣𑀲𑀗𑁆𑀕𑀳𑁂.

𑀢𑀤𑀸𑀤𑀺 ¶ 𑀆𑀬𑀼𑀥𑀁 𑀫𑀼𑀢𑁆𑀢𑀜𑁆𑀘 𑀢𑀁 𑀅𑀫𑀼𑀢𑁆𑀢𑀜𑁆𑀘𑁂𑀢𑀺 𑀫𑀼𑀢𑁆𑀢𑀸𑀫𑀼𑀢𑁆𑀢𑀁, 𑀓𑀫𑁆𑀫𑀥𑀸𑀭𑀬𑁄, 𑀬𑀣𑀸 𑀓𑀢𑀸𑀓𑀢𑀁. 𑀙𑀼𑀭𑀺𑀓𑀸 𑀅𑀲𑀺𑀧𑀼𑀢𑁆𑀢𑀺, 𑀢𑀤𑀸𑀤𑀺𑀓𑀁 𑀅𑀫𑀼𑀢𑁆𑀢𑀁. 𑀬𑀦𑁆𑀢 𑀲𑀗𑁆𑀓𑁄𑀘𑀦𑁂, 𑀬𑀦𑁆𑀢𑀁, 𑀥𑀦𑁆𑀯𑀸𑀤𑀺.

𑁩𑁮𑁮-𑁩𑁮𑁯. 𑀧𑀜𑁆𑀘𑀓𑀁 𑀥𑀦𑀼𑀫𑁆𑀳𑀺. 𑀉𑀲𑀼𑀁 𑀅𑀲𑀢𑀺 𑀔𑀺𑀧𑀢𑀻𑀢𑀺, 𑀓𑀫𑁆𑀫𑀦𑀺 𑀡𑁄, 𑀉𑀲𑁆𑀲𑀺. 𑀥𑀦 𑀥𑀜𑁆𑀜𑁂, 𑀉, 𑀳𑀦 𑀳𑀺𑀁𑀲𑀸𑀬𑀁 𑀯𑀸, 𑀉, 𑀳𑀲𑁆𑀲 𑀥𑁄, 𑀥𑀦𑀼. ‘‘𑀥𑀦𑀼 𑀯𑀁𑀲𑀯𑀺𑀲𑀼𑀤𑁆𑀥𑁄𑀧𑀺, 𑀦𑀺𑀕𑁆𑀕𑀼𑀡𑁄 𑀓𑀺𑀁 𑀓𑀭𑀺𑀲𑁆𑀲𑀢𑀻’’𑀢𑀺 [𑀳𑀺𑀢𑁄𑀧𑀤𑁂𑀲 𑀓𑀣𑀸𑀫𑀼𑀔 𑁨𑁩] 𑀧𑀼𑀫𑁂 𑀧𑀬𑁄𑀕𑁄. ‘‘𑀲𑀭𑀸 𑀯𑀸𑀧𑁄 𑀥𑀦𑀼 𑀇𑀢𑁆𑀣𑀻, 𑀢𑀼𑀡𑀢𑀸 𑀢𑀺𑀡𑀢𑀸𑀧𑀺𑀘𑁂’’𑀢𑀺 [𑀢𑀺𑀓𑀡𑁆𑀟𑀲𑁂𑀲 𑁨.𑁮.𑁫𑁧] 𑀢𑀺𑀓𑀡𑁆𑀟𑀲𑁂𑀲𑁄. 𑀓𑀺𑀁 𑀦𑀸𑀫𑁂𑀦 𑀤𑀡𑁆𑀟𑀬𑀢𑀻𑀢𑀺 𑀓𑁄𑀤𑀡𑁆𑀟𑀁, 𑀤𑀡𑁆𑀟 𑀦𑀺𑀧𑀸𑀢𑀦𑁂, 𑀓𑀺𑀁 𑀦𑀸𑀫𑁂𑀦 𑀤𑀫𑁆𑀬𑀢𑀻𑀢𑀺 𑀯𑀸 𑀓𑁄𑀤𑀡𑁆𑀟𑀁, 𑀤𑀫𑀼𑀥𑀸𑀢𑀼𑀫𑁆𑀳𑀸 𑀟𑁄, 𑀓𑀺𑀁 𑀦𑀸𑀫𑁂𑀦 𑀤𑀼𑀦𑁄𑀢𑀻𑀢𑀺 𑀯𑀸 𑀓𑁄𑀤𑀡𑁆𑀟𑀁, 𑀤𑀼 𑀧𑀭𑀺𑀢𑀸𑀧𑁂, 𑀟𑁄 𑀦𑀺𑀧𑀸𑀢𑀺𑀢𑁄, 𑀓𑀼𑀝𑀺𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑁄 𑀤𑀡𑁆𑀟𑁄 𑀬𑀲𑁆𑀲𑀢𑁆𑀣𑀻𑀢𑀺 𑀓𑁄𑀤𑀡𑁆𑀟𑀁. 𑀘𑀧 𑀲𑀦𑁆𑀢𑀸𑀧𑁂, 𑀅, 𑀘𑀧𑁄, 𑀯𑀁𑀲𑀪𑁂𑀤𑁄, 𑀢𑀩𑁆𑀩𑀺𑀓𑀸𑀭𑁄 𑀘𑀸𑀧𑁄, 𑀡𑁄. 𑀲𑀭𑀫𑀲𑀢𑀺 𑀔𑀺𑀧𑀢𑀻𑀢𑀺 𑀲𑀭𑀸𑀲𑀦𑀁. 𑀓𑀫𑁆𑀫𑀼𑀓𑀫𑁆𑀧𑀺. 𑀓𑀫𑁆𑀫𑀸𑀬 𑀧𑀪𑀯𑀢𑀻𑀢𑀺 𑀓𑀫𑁆𑀫𑀼𑀓𑀁.

𑀢𑀺𑀓𑀁 𑀕𑀼𑀡𑁂. 𑀕𑀘𑁆𑀙𑀢𑀺 𑀲𑀭𑁄 𑀬𑁂𑀦𑀸𑀢𑀺 𑀕𑀼𑀡𑁄, 𑀫𑀲𑁆𑀲 𑀡𑁄, 𑀅𑀲𑁆𑀲𑀼, 𑀕𑀼 𑀲𑀤𑁆𑀤𑁂 𑀯𑀸, 𑀕𑀯𑀢𑀺 𑀏𑀢𑁂𑀦𑀸𑀢𑀺 𑀕𑀼𑀡𑁄, 𑀬𑀼, 𑀡𑀢𑁆𑀢𑀁. 𑀚𑀭 𑀯𑀬𑁄𑀳𑀸𑀦𑀺𑀫𑁆𑀳𑀺, 𑀅, 𑀚𑀺𑀬𑀸𑀤𑁂𑀲𑁄. 𑀧𑀓𑁆𑀔𑁂 𑀇𑀓𑀸𑀭𑀮𑁄𑀧𑁄, 𑀚𑀬𑀸. ‘‘𑀚𑀺𑀬𑀸 𑀘𑀸𑀣𑀸’’𑀢𑀺𑀧𑀺 𑀧𑀸𑀞𑁄, 𑀢𑀤𑀸 𑀤𑁆𑀯𑀬𑀁 ¶ 𑀕𑀼𑀡𑁂. 𑀫𑀼𑀩𑁆𑀩𑀻, 𑀲𑀺𑀜𑁆𑀚𑀺𑀦𑀻𑀧𑁆𑀬𑀢𑁆𑀭. 𑀫𑀼𑀩𑁆𑀩𑀯𑀺𑀓𑀸𑀭𑁄 𑀫𑀼𑀩𑁆𑀩𑀻. 𑀲𑀺𑀜𑁆𑀚 𑀅𑀩𑁆𑀬𑀢𑁆𑀢𑀲𑀤𑁆𑀤𑁂, 𑀇𑀦𑀻.

𑀢𑀺𑀧𑀸𑀤𑁄 𑀓𑀡𑁆𑀟𑁂. 𑀲𑀭 𑀳𑀺𑀁𑀲𑀸𑀬𑀁. 𑀲𑀭𑀦𑁆𑀢𑁆𑀬𑀦𑁂𑀦𑀸𑀢𑀺, 𑀧𑀼𑀫𑁂, 𑀲𑀜𑁆𑀜𑀸𑀬𑀁 𑀡𑁄. 𑀧𑀢𑁆𑀢𑀁 𑀯𑀸𑀚𑁄, 𑀢𑀁𑀬𑁄𑀕𑀸 𑀧𑀢𑁆𑀢𑀻, 𑀈. 𑀲𑀸 𑀢𑀦𑀼𑀓𑀭𑀡𑀸𑀯𑀲𑀸𑀦𑁂𑀲𑀼, 𑀤𑀺𑀯𑀸𑀤𑀺, 𑀡𑁆𑀯𑀼, 𑀬𑀲𑁆𑀲𑀸𑀮𑁄𑀧𑁄. 𑀯𑀡𑁆𑀬𑀢𑁂 𑀲𑀤𑁆𑀤𑀸𑀬𑀢𑁂𑀦𑁂𑀦𑁂𑀢𑀺 𑀯𑀸𑀡𑁄, 𑀡𑁄, 𑀯𑀡 𑀲𑀤𑁆𑀤𑁂. 𑀓𑀡𑁆𑀬𑀢𑁂𑀦𑁂𑀦𑁂𑀢𑀺 𑀓𑀡𑁆𑀟𑀁, 𑀓𑀡 𑀲𑀤𑁆𑀤𑁂, 𑀟𑁄, 𑀓𑀡𑁆𑀟 𑀪𑁂𑀤𑁂 𑀯𑀸. 𑀇𑀲 𑀕𑀫𑀦𑁂, 𑀉, 𑀇𑀲𑁆𑀲𑀼, 𑀉𑀲 𑀤𑀸𑀳𑁂 𑀯𑀸. 𑀔𑀼𑀭 𑀙𑁂𑀤𑀦𑁂, 𑀅𑀧𑁄, 𑀅𑀣 𑀯𑀸 𑀔𑁂 𑀅𑀭𑀢𑀺 𑀕𑀘𑁆𑀙𑀢𑀻𑀢𑀺 𑀔𑀼𑀭𑁄, 𑀅𑀲𑁆𑀲𑀼, 𑀢𑀁 𑀧𑀸𑀢𑀻𑀢𑀺 𑀔𑀼𑀭𑀧𑁆𑀧𑁄. 𑀢𑀺𑀚 𑀦𑀺𑀲𑀸𑀦𑁂, 𑀬𑀼. 𑀅𑀲 𑀔𑀺𑀧𑀦𑁂, 𑀓𑀫𑁆𑀫𑁂 𑀬𑀼. 𑀯𑀺𑀲𑀺𑀔𑁄, 𑀅𑀚𑀺𑀫𑁆𑀳𑀕𑁄, 𑀔𑀕𑁄, 𑀆𑀲𑀼𑀕𑁄, 𑀓𑀮𑀫𑁆𑀩𑁄, 𑀫𑀕𑁆𑀕𑀡𑁄, 𑀭𑁄𑀧𑁄𑀧𑁆𑀬𑀢𑁆𑀭. 𑀯𑀺𑀲𑀦𑁆𑀢𑁄 𑀔𑀡𑀢𑀻𑀢𑀺 𑀯𑀺𑀲𑀺𑀔𑁄. 𑀓𑀮 𑀫𑀤𑁂, 𑀅𑀫𑁆𑀩𑁄. 𑀫𑀕𑁆𑀕 𑀅𑀦𑁆𑀯𑁂𑀲𑀦𑁂, 𑀬𑀼. 𑀭𑀼𑀧 𑀯𑀺𑀫𑁄𑀳𑀦𑁂, 𑀤𑀺𑀯𑀸𑀤𑀺, 𑀅, 𑀭𑁄𑀧𑁄. ‘‘𑀣𑀽𑀮𑀔𑁂𑀟𑁄 𑀯𑀺𑀧𑀸𑀝𑁄 𑀘, 𑀘𑀺𑀢𑁆𑀭𑀧𑀼𑀗𑁆𑀔𑁄 𑀲𑀭𑁄𑀧𑀺 𑀘𑁂’’𑀢𑀺 [𑀢𑀺𑀓𑀡𑁆𑀟𑀲𑁂𑀲 𑁨.𑁮.𑁫𑁨] 𑀢𑀺𑀓𑀡𑁆𑀟𑀲𑁂𑀲𑁂.

𑀧𑀜𑁆𑀘𑀓𑀁 𑀓𑀮𑀸𑀧𑁂. 𑀢𑀽𑀡 𑀧𑀽𑀭𑀡𑁂, 𑀘𑀼𑀭𑀸𑀤𑀺, 𑀦𑀤𑀸𑀤𑀺. ‘‘𑀢𑀽𑀡𑁄 𑀦𑀺𑀲𑀗𑁆𑀕𑁄 𑀢𑀽𑀡𑀺𑀭𑁄, 𑀉𑀧𑀸𑀲𑀗𑁆𑀕𑁄 𑀘 𑀯𑀸𑀡𑀥𑀺’’𑀭𑀺𑀢𑀺 [𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸 𑁧𑁮.𑁮𑁮] 𑀅𑀫𑀭𑀫𑀸𑀮𑀸𑀬𑀁 𑀧𑀼𑀁𑀲𑀓𑀡𑁆𑀟𑁂. ‘‘𑀢𑀽𑀡𑀸’’𑀢𑀺𑀧𑀺 𑀇𑀢𑁆𑀣𑀺𑀮𑀺𑀗𑁆𑀕𑀧𑁆𑀧𑀓𑀭𑀡𑁂 𑀯𑀼𑀢𑁆𑀢𑁄, 𑀇𑀥 𑀧𑀦 ‘‘𑀢𑀼𑀡𑀻, 𑀢𑀽𑀡𑁄’’𑀢𑀺 𑀤𑁆𑀯𑀻𑀲𑀼, 𑀲𑀭𑀲𑀫𑀽𑀳𑀸𑀦𑀁 𑀞𑀸𑀦𑀢𑁆𑀢𑀸 𑀓𑀮𑀸𑀧𑁄. 𑀇𑀭𑀧𑀘𑁆𑀘𑀬𑁂 𑀢𑀽𑀡𑀺𑀭𑁄. 𑀯𑀸𑀡𑀸 𑀲𑀭𑀸 𑀥𑀺𑀬𑀦𑁆𑀢𑁂𑀢𑁆𑀭𑁂𑀢𑀺 𑀯𑀸𑀡𑀥𑀺. ‘‘𑀢𑀽𑀡𑁄 𑀧𑀲𑀗𑁆𑀕 𑀢𑀽𑀡𑀺𑀭-𑀦𑀺𑀲𑀗𑁆𑀕𑀸 𑀯𑀸𑀡𑀥𑀺 𑀤𑁆𑀯𑀺𑀲𑀽’’𑀢𑁆𑀬𑀫𑀭𑀲𑀻𑀳𑁂.

𑁩𑁯𑁦. 𑀤𑁆𑀯𑀬𑀁 𑀯𑀸𑀚𑁂, 𑀬𑀁 ‘‘𑀓𑀡𑁆𑀟𑀧𑀢𑁆𑀢’’𑀫𑀺𑀢𑁆𑀬𑀼𑀘𑁆𑀘𑀢𑁂. 𑀧𑀢 𑀕𑀫𑀦𑁂, 𑀓𑀭𑀡𑁂 𑀔𑁄, 𑀢𑀲𑁆𑀲 𑀓𑁄, 𑀧𑀓𑁆𑀔𑁂𑀦 𑀓𑀢𑀢𑁆𑀢𑀸 𑀯𑀸 𑀧𑀓𑁆𑀔𑁄 ¶ . 𑀯𑀚𑀢𑁆𑀬𑀦𑁂𑀦𑀸𑀢𑀺 𑀯𑀸𑀚𑁄, 𑀡𑁄. 𑀯𑀺𑀲𑀫𑀧𑀺𑀯𑀺𑀢𑁆𑀣𑀸𑀢𑀺 𑀯𑀺𑀲𑀧𑁆𑀧𑀻𑀢𑁄 𑀲𑀭𑁄 𑀤𑀺𑀤𑁆𑀥𑁄 𑀦𑀸𑀫. 𑀤𑀺𑀲 𑀅𑀧𑁆𑀧𑀻𑀢𑀺𑀬𑀁, 𑀢𑁄. 𑀮𑀺𑀢𑁆𑀢𑁄𑀧𑁆𑀬𑀢𑁆𑀭.

𑀢𑀺𑀓𑀁 𑀯𑀺𑀚𑁆𑀛𑀺𑀢𑀩𑁆𑀩𑁂. 𑀯𑀺𑀚𑁆𑀛𑀦𑀢𑁆𑀣𑀁 𑀮𑀓𑁆𑀔𑁆𑀬𑀢𑁂𑀢𑀺 𑀮𑀓𑁆𑀔𑀁. 𑀯𑀺𑀚𑁆𑀛𑀺𑀢𑀩𑁆𑀩𑀦𑁆𑀢𑀺 𑀯𑁂𑀚𑁆𑀛𑀁, 𑀡𑁆𑀬𑁄, 𑀛𑀲𑁆𑀲 𑀚𑁆𑀛𑁄, 𑀇𑀲𑁆𑀲𑁂. 𑀲𑀭𑁄 𑀯𑀬𑀢𑀺 𑀕𑀘𑁆𑀙𑀢𑀺 𑀬𑀲𑁆𑀫𑀺𑀁 𑀲𑀭𑀩𑁆𑀬𑀁, 𑀯𑀲𑁆𑀲𑀸𑀓𑀸𑀭𑀮𑁄𑀧𑁄. 𑀦𑀺𑀘𑁆𑀘𑀁 𑀲𑀭𑀸𑀦𑀫𑀪𑁆𑀬𑀸𑀲𑀦𑀁 𑀯𑀲𑀻𑀓𑀭𑀡𑀁 𑀲𑀭𑀸𑀪𑁆𑀬𑀸𑀲𑁄. ‘‘𑀩𑁆𑀬𑀸𑀥𑁂𑀧𑁆𑀬𑀼𑀧𑀸𑀲𑀦𑀸𑀬𑀜𑁆𑀘, 𑀯𑀸𑀡𑀸𑀪𑁆𑀬𑀸𑀲𑁂𑀧𑁆𑀬𑀼𑀧𑀸𑀲𑀦’’𑀦𑁆𑀢𑀺 𑀭𑀼𑀤𑁆𑀤𑁄. 𑀮𑀓𑁆𑀔𑀫𑀼𑀧𑀕𑀦𑁆𑀢𑁆𑀯𑀸 𑀅𑀲𑀦𑀁 𑀔𑀺𑀧𑀦𑀁 𑀉𑀧𑀸𑀲𑀦𑀁.

𑁩𑁯𑁧. 𑀧𑀜𑁆𑀘𑀓𑀁 𑀔𑀕𑁆𑀕𑁂. 𑀫𑀡𑁆𑀟𑀮𑀁 𑀅𑀕𑁆𑀕𑀁 𑀬𑀲𑁆𑀲. 𑀦𑀺𑀕𑁆𑀕𑀢𑁄 𑀢𑀺𑀁𑀲𑀢𑁄’𑀗𑁆𑀕𑀼𑀮𑀺𑀢𑁄 𑀦𑁂𑀢𑁆𑀢𑀺𑀁𑀲𑁄. 𑀅𑀲 𑀔𑁂𑀧𑀦𑁂, 𑀅𑀲𑀢𑁂 𑀔𑀺𑀧𑁆𑀧𑀢𑁂𑀢𑀺 𑀅𑀲𑀺, 𑀇. 𑀔𑀕𑁆𑀕 𑀔𑀡𑁆𑀟𑀪𑁂𑀤𑁂. 𑀲𑀸𑀬𑀓𑁄 𑀲𑀭𑁂𑀧𑀺. 𑀘𑀦𑁆𑀤𑀳𑀸𑀲𑁄, 𑀭𑀺𑀝𑁆𑀞𑀺, 𑀓𑀓𑁆𑀔𑀮𑀓𑁄, 𑀓𑀭𑀯𑀸𑀮𑁄𑀧𑁆𑀬𑀢𑁆𑀭. 𑀢𑀲𑁆𑀲 𑀔𑀕𑁆𑀕𑀲𑁆𑀲 𑀧𑀺𑀥𑀸𑀦𑁂 𑀓𑁄𑀲𑀺, 𑀇𑀢𑁆𑀣𑀻. 𑀓𑀼𑀲 𑀲𑀺𑀮𑁂𑀲𑀦𑁂, 𑀇, 𑀓𑁄𑀲𑀺, 𑀭𑀲𑁆𑀲𑀦𑁆𑀢𑁄. 𑀔𑀕𑁆𑀕𑀙𑀼𑀭𑀺𑀓𑀸𑀤𑀻𑀦𑀁 𑀫𑀼𑀝𑁆𑀞𑀺𑀬𑀁 𑀣𑀭𑀼𑀲𑀤𑁆𑀤𑁄. 𑀣𑀭 𑀲𑀢𑁆𑀣𑀕𑀢𑀺𑀬𑀁, 𑀉.

𑁩𑁯𑁨. 𑀢𑀺𑀓𑀁 𑀔𑀕𑁆𑀕𑀸𑀤𑀻𑀦𑀁 𑀲𑀢𑁆𑀣𑀸𑀦𑀁 𑀯𑀸𑀭𑀡𑀨𑀮𑀓𑁂. 𑀔𑁂𑀝 𑀪𑀓𑁆𑀔𑀦𑁂, 𑀡𑁆𑀯𑀼. 𑀨𑀮 𑀯𑀺𑀲𑀸𑀭𑀡𑁂, 𑀡𑁆𑀯𑀼. 𑀨𑀮𑀢𑀻𑀢𑀺 𑀨𑀮𑀓𑀁, 𑀅𑀦𑀺𑀢𑁆𑀣𑀻. 𑀘𑀭 𑀕𑀢𑀺𑀪𑀓𑁆𑀔𑀦𑁂𑀲𑀼, 𑀫𑁄, 𑀘𑀫𑀼 𑀅𑀤𑀦𑁂 𑀯𑀸, 𑀅. 𑀨𑀮𑀫𑁆𑀧𑀺.

𑀯𑀡𑁆𑀝𑀸𑀦𑀺𑀳𑀸𑀭𑀲𑁆𑀲𑀸𑀔𑀕𑁆𑀕𑀸𑀓𑀢𑀺 ¶ 𑀳𑀢𑁆𑀣𑀓𑀼𑀡𑁆𑀟𑀸𑀤𑀺 𑀇𑀮𑁆𑀮𑀻, 𑀇𑀮𑀻𑀧𑀺, 𑀇𑀮 𑀕𑀢𑀺𑀬𑀁, 𑀦𑀤𑀸𑀤𑀺. 𑀓𑀭𑀁 𑀧𑀸𑀮𑀬𑀢𑀻𑀢𑀺 𑀓𑀭𑀧𑀸𑀮𑀺𑀓𑀸, 𑀡𑁆𑀯𑀼.

𑀤𑁆𑀯𑀬𑀁 𑀅𑀲𑀺𑀧𑀼𑀢𑁆𑀢𑀺𑀬𑀁. 𑀙𑀼𑀭 𑀙𑁂𑀤𑀦𑁂, 𑀡𑁆𑀯𑀼. 𑀲𑀲𑀼 𑀳𑀺𑀁𑀲𑀸𑀬𑀁,𑀢𑀺, 𑀦𑀤𑀸𑀤𑀺. 𑀅𑀲𑀺𑀦𑁄 𑀧𑀼𑀢𑁆𑀢𑀻, 𑀅𑀲𑀺𑀥𑁂𑀦𑀼𑀓𑀸𑀧𑀺.

𑀤𑁆𑀯𑀬𑀁 𑀯𑀟𑁆𑀠𑀓𑀻𑀦𑀁 𑀫𑀼𑀕𑁆𑀕𑀭𑁂𑀳𑀺 𑀲𑀫𑀸𑀦𑀸𑀓𑀸𑀭𑀸𑀬𑀼𑀥𑀪𑁂𑀤𑁂. 𑀮𑀕 𑀲𑀗𑁆𑀕𑁂, 𑀅𑀮𑁄, 𑀅𑀲𑁆𑀲𑀼, 𑀴𑀢𑁆𑀢𑀜𑁆𑀘. 𑀫𑀼𑀭𑀁 𑀕𑀺𑀭𑀢𑀻𑀢𑀺 𑀫𑀼𑀕𑁆𑀕𑀭𑁄, 𑀭𑀲𑁆𑀲 𑀕𑁄, 𑀕𑀺𑀭 𑀦𑀺𑀕𑁆𑀕𑀺𑀭𑀡𑁂, 𑀫𑀼𑀘𑁆𑀘𑀢𑀻𑀢𑀺 𑀯𑀸 𑀫𑀼𑀕𑁆𑀕𑀭𑁄, 𑀅𑀭𑁄. 𑀤𑀼𑀖𑀡𑁄, 𑀖𑀦𑁄𑀧𑀺.

𑁩𑁯𑁩. 𑀤𑁆𑀯𑀬𑀁 𑀲𑀮𑁆𑀮𑁂. 𑀲𑀮 𑀆𑀲𑀼𑀕𑀢𑀺𑀬𑀁, 𑀅, 𑀲𑀭 𑀳𑀺𑀁𑀲𑀸𑀬𑀁 𑀯𑀸, 𑀮𑁄, 𑀭𑀲𑁆𑀲 𑀮𑁄. 𑀲𑀗𑁆𑀓 𑀲𑀗𑁆𑀓𑀸𑀬𑀁, 𑀉. 𑀲𑀽𑀮𑀫𑁆𑀧𑀺. 𑀲𑀽𑀮 𑀭𑀼𑀚𑀸𑀬𑀁.

𑀤𑁆𑀯𑀬𑀁 𑀯𑀸𑀲𑀺𑀬𑀁. 𑀯𑀲 𑀙𑁂𑀤𑀦𑀲𑁆𑀦𑁂𑀳𑀸𑀯𑀳𑀸𑀭𑀡𑁂𑀲𑀼, 𑀡𑀻. 𑀢𑀘𑁆𑀙 𑀢𑀦𑀼𑀓𑀭𑀡𑁂, 𑀬𑀼, 𑀦𑀤𑀸𑀤𑀺.

𑀤𑁆𑀯𑀬𑀁 𑀨𑀭𑀲𑀼𑀫𑁆𑀳𑀺. 𑀙𑁂𑀤𑀓𑀢𑁆𑀢𑀸 𑀓𑀼𑀘𑁆𑀙𑀺𑀢𑀸 𑀥𑀸𑀭𑀸 𑀬𑀲𑁆𑀲𑀸𑀢𑀺 𑀓𑀼𑀥𑀸𑀭𑀻. 𑀓𑀼𑀥𑀸𑀭𑁄𑀧𑀺. 𑀧𑀭𑀁 𑀲𑀲𑀢𑀺 𑀳𑀺𑀁𑀲𑀢𑀻𑀢𑀺 𑀨𑀭𑀲𑀼. 𑀉, 𑀧𑀲𑁆𑀲 𑀨𑁄, 𑀲𑀮𑁄𑀧𑁄 𑀘. 𑀧𑀭𑀲𑀼𑀧𑀺, 𑀲𑁄 𑀧𑀭𑀲𑀼𑀲𑀤𑁆𑀤𑁄 𑀦𑀧𑀼𑀁𑀲𑀓𑁄. 𑀧𑀭𑀲𑀼𑀥𑁄𑀧𑁆𑀬𑀢𑁆𑀭.

𑀤𑁆𑀯𑀬𑀁 𑀧𑀸𑀲𑀸𑀡𑀯𑀺𑀤𑀸𑀭𑀡𑁂. 𑀝𑀗𑁆𑀓 𑀩𑀦𑁆𑀥𑀦𑁂. 𑀤𑀭 𑀯𑀺𑀤𑀸𑀭𑀡𑁂. 𑀧𑀸𑀲𑀸𑀡𑀁 𑀤𑀸𑀭𑀬𑀢𑀻𑀢𑀺 𑀧𑀸𑀲𑀸𑀡𑀤𑀸𑀭𑀡𑁄, 𑀬𑀼. 𑀧𑀸𑀲𑀸𑀡𑀤𑀸𑀭𑀓𑁄𑀧𑀺.

𑁩𑁯𑁪. 𑀤𑁆𑀯𑀬𑀁 ¶ 𑀳𑀢𑁆𑀣𑀧𑁆𑀧𑀫𑀸𑀡𑁂 𑀓𑀡𑀬𑁂 [𑀓𑀡𑁆𑀟𑁂 (𑀘𑀺𑀦𑁆𑀢𑀸𑀫𑀡𑀺𑀝𑀻𑀓𑀸)]. 𑀘𑀓𑁆𑀓𑀧𑀽𑀭𑀡𑀸𑀤𑀺𑀯𑀸𑀬𑀼𑀯𑀲𑁂𑀦 𑀔𑀺𑀧𑁆𑀧𑀢𑁂. 𑀓𑀡 𑀲𑀤𑁆𑀤𑁂, 𑀅𑀬𑁄. 𑀪𑀺𑀦𑁆𑀤𑀦𑀲𑀻𑀮𑀢𑀸𑀬 𑀪𑀺𑀦𑁆𑀤𑀻, 𑀯𑀸𑀢𑀺 𑀕𑀘𑁆𑀙𑀢𑀺 𑀢𑁂𑀦𑀸𑀢𑀺 𑀯𑀸𑀮𑁄, 𑀅𑀮𑁄, 𑀪𑀺𑀦𑁆𑀤𑀻 𑀘 𑀲𑁄 𑀯𑀸𑀮𑁄 𑀘𑀸𑀢𑀺 𑀪𑀺𑀦𑁆𑀤𑀺𑀯𑀸𑀮𑁄, 𑀴𑀢𑁆𑀢𑁂 𑀪𑀺𑀦𑁆𑀤𑀺𑀯𑀸𑀴𑁄, 𑀭𑀲𑁆𑀲𑁄.

𑀘𑀓𑁆𑀓𑀸𑀤𑀬𑁄 𑀲𑀢𑁆𑀣𑀪𑁂𑀤𑀸. 𑀢𑀢𑁆𑀭 𑀘𑀓𑁆𑀓𑀸𑀓𑀸𑀭𑁄 𑀆𑀬𑀼𑀥𑀯𑀺𑀲𑁂𑀲𑁄 𑀘𑀓𑁆𑀓𑀁. 𑀓𑀦𑁆𑀢 𑀙𑁂𑀤𑀦𑁂, 𑀅𑀲𑁆𑀲𑀼, 𑀓𑀼𑀦𑁆𑀢𑁄 𑀤𑀻𑀖𑀤𑀡𑁆𑀟𑁄. 𑀕𑀤𑀸, 𑀲𑀢𑁆𑀢𑀺 𑀘 𑀧𑀲𑀺𑀤𑁆𑀥𑀸.

𑀢𑀺𑀓𑀁 𑀓𑁄𑀡𑀪𑀸𑀕𑁂. 𑀓𑀼𑀡 𑀲𑀤𑁆𑀤𑁄𑀧𑀓𑀭𑀡𑁂𑀲𑀼, 𑀓𑀼𑀡 𑀲𑀗𑁆𑀓𑁄𑀘𑀦𑁂 𑀯𑀸, 𑀡𑁄. 𑀲𑀺 𑀲𑁂𑀯𑀸𑀬𑀁, 𑀅, 𑀭𑀲𑁆𑀲𑁄, 𑀅𑀲𑁆𑀲𑁄. 𑀓𑀼𑀝 𑀓𑁄𑀝𑀺𑀮𑁆𑀮𑁂, 𑀇𑀡.

𑁩𑁯𑁫. 𑀤𑁆𑀯𑀺𑀧𑀸𑀤𑀁 𑀯𑀺𑀚𑀺𑀕𑀻𑀲𑀲𑁆𑀲 𑀬𑀸𑀢𑁆𑀭𑀸𑀬𑀁, 𑀲𑀩𑁆𑀩𑀢𑁆𑀭 𑀪𑀸𑀯𑀲𑀸𑀥𑀦𑀁. 𑀬𑀸 𑀧𑀸𑀧𑀼𑀡𑁂, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑀸𑀬𑀢𑁂 𑀦𑀺𑀬𑁆𑀬𑀸𑀦𑀁, 𑀬𑀼. ‘‘𑀙𑀤𑀸𑀤𑀻𑀳𑀺 𑀢𑀢𑁆𑀭𑀡’’𑀢𑀺 𑀢𑁆𑀭𑀡. 𑀬𑀸𑀢𑁆𑀭𑀸, 𑀆. 𑀦𑀤𑀸𑀤𑀺𑀦𑁄 𑀆𑀓𑀢𑀺𑀕𑀡𑀢𑁆𑀢𑀸 𑀈𑀧𑀘𑁆𑀘𑀬𑀸𑀪𑀸𑀯𑁄. 𑀞𑀸 𑀕𑀢𑀺𑀦𑀺𑀯𑀢𑁆𑀢𑀺𑀬𑀁, 𑀧𑀧𑀼𑀩𑁆𑀩𑁄 𑀬𑀸𑀦𑁂, 𑀬𑀼, 𑀧𑀢𑀺𑀝𑁆𑀞𑀻𑀬𑀢𑁂 𑀧𑀝𑁆𑀞𑀸𑀦𑀁, 𑀧𑀼𑀭𑁂𑀘𑀸𑀭𑀺𑀫𑁆𑀳𑀺 𑀧𑀝𑁆𑀞𑁄.

𑀧𑀜𑁆𑀘𑀓𑀁 𑀥𑀽𑀮𑀻𑀫𑀢𑁆𑀢𑁂. 𑀢𑀣𑀸 𑀘 ‘‘𑀧𑀁𑀲𑀼 𑀔𑁄𑀤𑁄 𑀫𑀢𑁄 𑀭𑁂𑀡𑀼, 𑀘𑀼𑀡𑁆𑀡𑁄 𑀥𑀽𑀮𑀺’𑀢𑁆𑀣𑀺𑀬𑀁 𑀪𑀯𑁂’’𑀢𑁆𑀬𑀫𑀭𑀫𑀸𑀮𑀸. 𑀘𑀼𑀡𑁆𑀡 𑀧𑀺𑀲𑀦𑁂, 𑀘𑀼𑀡𑁆𑀡 𑀲𑀜𑁆𑀘𑀼𑀡𑁆𑀡𑀦𑁂 𑀯𑀸. 𑀧𑀁𑀲 𑀦𑀸𑀲𑀦𑁂, 𑀉. 𑀭𑀦𑁆𑀚 𑀭𑀸𑀕𑁂, 𑀭𑀚𑁄, 𑀫𑀦𑁄𑀕𑀡𑁄𑀧𑀺 𑀦𑀧𑀼𑀁𑀲𑀓𑁂, 𑀢𑀁𑀲𑀳𑀘𑀭𑀡𑀢𑁄 𑀧𑀁𑀲𑀼𑀧𑀺. ‘‘𑀓𑁆𑀮𑀺𑀯𑀁’𑀧𑀭𑀸𑀥𑁂 𑀭𑁂𑀡𑀼𑀫𑁆𑀳𑀻’’𑀢𑀺 ¶ 𑀭𑀪𑀲𑁄. 𑀅𑀣 𑀯𑀸 𑀘𑀼𑀡𑁆𑀡𑀭𑀚𑁄𑀲𑀳𑀘𑀭𑀡𑀢𑁄 𑀧𑀁𑀲𑀼 𑀦𑀧𑀼𑀁𑀲𑀓𑁂. 𑀥𑀽 𑀯𑀺𑀥𑀼𑀦𑀦𑁂, 𑀥𑀽 𑀓𑀫𑁆𑀧𑀦𑁂 𑀯𑀸, 𑀮𑀺, 𑀦𑀤𑀸𑀤𑀺. 𑀭𑀺 𑀕𑀢𑀺𑀬𑀁, 𑀡𑀼, 𑀇𑀲𑁆𑀲𑁂.

𑁩𑁯𑁬. 𑀯𑀁𑀲𑀓𑁆𑀓𑀫𑀯𑁂𑀤𑀻𑀯𑀁𑀲𑀣𑀼𑀢𑀺𑀁 𑀬𑁄 𑀓𑀼𑀩𑁆𑀩𑀢𑀺, 𑀲𑁄 𑀫𑀸𑀕𑀥𑁄. 𑀢𑀲𑁆𑀫𑀺𑀁 𑀫𑀥𑀼𑀓𑁄 𑀯𑀼𑀢𑁆𑀢𑁄. 𑀲𑁄 𑀘 𑀔𑀢𑁆𑀢𑀺𑀬𑀸𑀯𑁂𑀲𑁆𑀲𑀲𑀫𑁆𑀪𑀯𑁄 𑀪𑀯𑀢𑀺, 𑀯𑀁𑀲𑀫𑀕𑁆𑀕𑀁 𑀣𑀯𑀢𑀻𑀢𑀺 𑀫𑀸𑀕𑀥𑁄, 𑀣𑀲𑁆𑀲 𑀥𑁄. 𑀫𑀕𑁆𑀕𑀁 𑀥𑀯𑀢𑀻𑀢𑀺 𑀫𑀥𑀼𑀓𑁄, 𑀡𑁆𑀯𑀼, 𑀕𑁆𑀕𑀮𑁄𑀧𑁄.