𑀅𑀜𑁆𑀜 - 𑀩𑁆𑀬𑀸𑀓𑀭𑀡 𑀕𑀦𑁆𑀣-𑀲𑀗𑁆𑀕𑀳𑁄 - 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑀧𑀸𑀞

MMR Vol 0

Misc. Paragraph

𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁄

𑁧. 𑀤𑁄𑀲𑀸𑀯𑀩𑁄𑀥-𑀧𑀞𑀫𑀧𑀭𑀺𑀘𑁆𑀙𑁂𑀤

𑁨. 𑀤𑁄𑀲𑀧𑀭𑀺𑀳𑀸𑀭𑀸𑀯𑀩𑁄𑀥-𑀤𑀼𑀢𑀺𑀬𑀧𑀭𑀺𑀘𑁆𑀙𑁂𑀤

𑁩. 𑀕𑀼𑀡𑀸𑀯𑀩𑁄𑀥-𑀢𑀢𑀺𑀬𑀧𑀭𑀺𑀘𑁆𑀙𑁂𑀤

𑁪. 𑀅𑀢𑁆𑀣𑀸𑀮𑀗𑁆𑀓𑀸𑀭𑀸𑀯𑀩𑁄𑀥-𑀘𑀢𑀼𑀢𑁆𑀣𑀧𑀭𑀺𑀘𑁆𑀙𑁂𑀤

𑀯𑀗𑁆𑀓𑀯𑀼𑀢𑁆𑀢𑀺 𑀅𑀢𑁆𑀣𑀸𑀮𑀗𑁆𑀓𑀸𑀭

𑁫. 𑀪𑀸𑀯𑀸𑀯𑀩𑁄𑀥-𑀧𑀜𑁆𑀘𑀫𑀧𑀭𑀺𑀘𑁆𑀙𑁂𑀤

𑀞𑀸𑀬𑀻𑀪𑀸𑀯 𑀦𑀺𑀤𑁆𑀤𑁂𑀲 𑀭𑀢𑀺𑀝𑁆𑀞𑀸𑀬𑀻𑀪𑀸𑀯

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑁧. 𑀤𑁄𑀲𑀸𑀯𑀩𑁄𑀥-𑀧𑀞𑀫𑀧𑀭𑀺𑀘𑁆𑀙𑁂𑀤

𑀫𑀼𑀦𑀺𑀦𑁆𑀤𑀯𑀤𑀦𑀫𑁆𑀪𑁄𑀚, 𑀕𑀩𑁆𑀪𑀲𑀫𑁆𑀪𑀯𑀲𑀼𑀦𑁆𑀤𑀭𑀻;

𑀲𑀭𑀡𑀁 𑀧𑀸𑀡𑀺𑀦𑀁 𑀯𑀸𑀡𑀻, 𑀫𑀬𑁆𑀳𑀁 𑀧𑀻𑀡𑀬𑀢𑀁 𑀫𑀦𑀁.

𑀭𑀸𑀫, 𑀲𑀫𑁆𑀫𑀸’𑀤𑁆𑀬’𑀮𑀗𑁆𑀓𑀸𑀭𑀸, 𑀲𑀦𑁆𑀢𑀺 𑀲𑀦𑁆𑀢𑁄 𑀧𑀼𑀭𑀸𑀢𑀦𑀸;

𑀢𑀣𑀸𑀧𑀺 𑀢𑀼 𑀯𑀴𑀜𑁆𑀚𑁂𑀦𑁆𑀢𑀺, 𑀲𑀼𑀤𑁆𑀥𑀫𑀸𑀕𑀥𑀺𑀓𑀸 𑀦 𑀢𑁂.

𑀢𑁂𑀦𑀸’𑀧𑀺 𑀦𑀸𑀫 𑀢𑁄𑀲𑁂𑀬𑁆𑀬, 𑀫𑁂𑀢𑁂 𑀮𑀗𑁆𑀓𑀸𑀭𑀯𑀚𑁆𑀚𑀺𑀢𑁂;

𑀅𑀦𑀼𑀭𑀽𑀧𑁂𑀦𑀸’𑀮𑀗𑁆𑀓𑀸𑀭𑁂, 𑀦𑁂’𑀲 𑀫𑁂𑀲𑁄 𑀧𑀭𑀺𑀲𑁆𑀲𑀫𑁄.

𑀬𑁂𑀲𑀁 𑀦 𑀲𑀜𑁆𑀘𑀺𑀢𑀸 𑀧𑀜𑁆𑀜𑀸, 𑀦𑁂𑀓𑀲𑀢𑁆𑀣𑀦𑁆𑀢𑀭𑁄’𑀘𑀺𑀢𑀸;

𑀲𑀫𑁆𑀫𑁄𑀳’𑀩𑁆𑀪𑀸𑀳𑀢𑀸 𑀯𑁂’𑀢𑁂, 𑀦𑀸𑀯𑀩𑀼𑀚𑁆𑀛𑀦𑁆𑀢𑀺 𑀓𑀺𑀜𑁆𑀘𑀺𑀧𑀺.

𑀓𑀺𑀁 𑀢𑁂𑀳𑀺 𑀧𑀸𑀤𑀲𑀼𑀲𑁆𑀲𑀽𑀲𑀸, 𑀬𑁂𑀲𑀁 𑀦𑀢𑁆𑀣𑀺 𑀕𑀭𑀽𑀦𑀺’𑀳;

𑀬𑁂 𑀢𑀧𑁆𑀧𑀸𑀤𑀭𑀚𑁄𑀓𑀺𑀡𑁆𑀡𑀸, 𑀢𑁂’𑀯 𑀲𑀸𑀥𑀽 𑀯𑀺𑀯𑁂𑀓𑀺𑀦𑁄.

𑀓𑀩𑁆𑀩, 𑀦𑀸𑀝𑀓𑀦𑀺𑀓𑁆𑀔𑀺𑀢𑁆𑀢, 𑀦𑁂𑀢𑁆𑀢𑀘𑀺𑀢𑁆𑀢𑀸 𑀓𑀯𑀺𑀚𑁆𑀚𑀦𑀸;

𑀬𑀁𑀓𑀺𑀜𑁆𑀘𑀺 𑀭𑀘𑀬𑀦𑁆𑀢𑁂’𑀢𑀁, 𑀦 𑀯𑀺𑀫𑁆𑀳𑀬𑀓𑀭𑀁 𑀧𑀭𑀁.

𑀢𑁂𑀬𑁂’𑀯 𑀧𑀝𑀺𑀪𑀸𑀯𑁂𑀦𑁆𑀢𑁄, 𑀲𑁄’𑀯 𑀩𑀦𑁆𑀥𑁄 𑀲𑀯𑀺𑀫𑁆𑀳𑀬𑁄;

𑀬𑁂𑀦 𑀢𑁄𑀲𑁂𑀦𑁆𑀢𑀺 𑀯𑀺𑀜𑁆𑀜𑀽 𑀬𑁂, 𑀢𑀢𑁆𑀣 𑀧𑁆𑀬’𑀯𑀺𑀳𑀺𑀢𑀸’𑀤𑀭𑀸.

𑀩𑀦𑁆𑀥𑁄 ¶ 𑀘 𑀦𑀸𑀫 𑀲𑀤𑁆𑀤,𑀢𑁆𑀣𑀸, 𑀲𑀳𑀺𑀢𑀸 𑀤𑁄𑀲𑀯𑀚𑁆𑀚𑀺𑀢𑀸;

𑀧𑀚𑁆𑀚 𑀕𑀚𑁆𑀚 𑀯𑀺𑀫𑀺𑀲𑁆𑀲𑀸𑀦𑀁, 𑀪𑁂𑀤𑁂𑀦𑀸’𑀬𑀁 𑀢𑀺𑀥𑀸 𑀪𑀯𑁂.

𑀦𑀺𑀩𑀦𑁆𑀥𑁄 𑀘𑀸’𑀦𑀺𑀩𑀦𑁆𑀥𑁄 𑀘, 𑀧𑀼𑀦 𑀤𑁆𑀯𑀺𑀥𑀸 𑀦𑀺𑀭𑀼𑀧𑁆𑀧𑀢𑁂;

𑀢𑀁 𑀢𑀼 𑀧𑀸𑀧𑁂𑀦𑁆𑀢𑁆𑀬’𑀮𑀗𑁆𑀓𑀸𑀭𑀸, 𑀯𑀺𑀦𑁆𑀤𑀦𑀻𑀬𑀢𑀭𑀢𑁆𑀢𑀦𑀁.

𑀅𑀦𑀯𑀚𑁆𑀚𑀁 𑀫𑀼𑀔𑀫𑁆𑀪𑁄𑀚 [‘‘𑀅𑀫𑁆𑀪𑁄𑀚’’𑀦𑁆𑀢𑀺 𑀧𑀤𑀁 𑀧𑀸𑀴𑀺𑀬𑀁 𑀦𑀢𑁆𑀣𑀺, 𑀯𑀸𑀭𑀺𑀚𑀯𑀸𑀘𑀓𑀁, 𑀲𑀓𑁆𑀓𑀝𑀕𑀦𑁆𑀣𑀢𑁄 𑀅𑀦𑀻𑀢𑀁], 𑀫𑀦𑀯𑀚𑁆𑀚𑀸 𑀘 𑀪𑀸𑀭𑀢𑀻;

𑀅𑀮𑀗𑁆𑀓𑀢𑀸’𑀯 𑀲𑁄𑀪𑀦𑁆𑀢𑁂, 𑀓𑀺𑀁 𑀦𑀼 𑀢𑁂 𑀦𑀺𑀭’𑀮𑀗𑁆𑀓𑀢𑀸?

𑀯𑀺𑀦𑀸 𑀕𑀭𑀽𑀧𑀤𑁂𑀲𑀁 𑀢𑀁, 𑀩𑀸𑀮𑁄’𑀮𑀗𑁆𑀓𑀢𑁆𑀢𑀼 𑀫𑀺𑀘𑁆𑀙𑀢𑀺;

𑀲𑀫𑁆𑀧𑀸𑀧𑀼𑀡𑁂 𑀦 𑀯𑀺𑀜𑁆𑀜𑀽𑀳𑀺, 𑀳𑀲𑁆𑀲𑀪𑀸𑀯𑀁 𑀓𑀣𑀁 𑀦𑀼 𑀲𑁄?

𑀕𑀦𑁆𑀣𑁄𑀧𑀺 𑀓𑀯𑀺𑀯𑀸𑀘𑀸𑀦, 𑀫𑀮𑀗𑁆𑀓𑀸𑀭’𑀧𑁆𑀧𑀓𑀸𑀲𑀓𑁄;

𑀬𑀸𑀢𑀺 𑀢𑀩𑁆𑀩𑀘𑀦𑀻𑀬𑀢𑁆𑀢𑀁, 𑀢’𑀩𑁆𑀩𑁄𑀳𑀸𑀭𑀽’𑀧𑀘𑀸𑀭𑀢𑁄.

𑀤𑁆𑀯𑀺𑀧𑁆𑀧𑀓𑀸𑀭𑀸 𑀅𑀮𑀗𑁆𑀓𑀸𑀭𑀸, 𑀢𑀢𑁆𑀣 𑀲𑀤𑁆𑀤, 𑀢𑁆𑀣𑀪𑁂𑀤𑀢𑁄;

𑀲𑀤𑁆𑀤𑀢𑁆𑀣𑀸 𑀩𑀦𑁆𑀥𑀦𑀸𑀫𑀸’𑀯, 𑀢𑀁𑀲𑀚𑁆𑀚𑀺𑀢 𑀢𑀤𑀸𑀯𑀮𑀺.

𑀕𑀼𑀡𑀸𑀮𑀗𑁆𑀓𑀸𑀭𑀲𑀁𑀬𑀼𑀢𑁆𑀢𑀸, 𑀅𑀧𑀺 𑀤𑁄𑀲𑀮𑀯’𑀗𑁆𑀓𑀺𑀢𑀸;

𑀧𑀲𑀁𑀲𑀺𑀬𑀸 𑀦 𑀯𑀺𑀜𑁆𑀜𑀽𑀳𑀺, 𑀲𑀸 𑀓𑀜𑁆𑀜𑀸 𑀯𑀺𑀬 𑀢𑀸𑀤𑀺𑀲𑀻.

𑀢𑁂𑀦 𑀤𑁄𑀲𑀦𑀺𑀭𑀸𑀲𑁄’𑀯, 𑀫𑀳𑀼𑀲𑁆𑀲𑀸𑀳𑁂𑀦 𑀲𑀸𑀥𑀺𑀬𑁄;

𑀦𑀺𑀤𑁆𑀤𑁄𑀲𑀸 𑀲𑀩𑁆𑀩𑀣𑀸 𑀲𑀸’𑀬𑀁, 𑀲𑀕𑀼𑀡𑀸 𑀦 𑀪𑀯𑁂𑀬𑁆𑀬 𑀓𑀺𑀁?

𑀲𑀸’𑀮𑀗𑁆𑀓𑀸𑀭𑀯𑀺𑀬𑀼𑀢𑁆𑀢𑀸’𑀧𑀺, 𑀕𑀼𑀡𑀬𑀼𑀢𑁆𑀢𑀸 𑀫𑀦𑁄𑀳𑀭𑀸;

𑀦𑀺𑀤𑁆𑀤𑁄𑀲𑀸 𑀤𑁄𑀲𑀭𑀳𑀺𑀢𑀸, 𑀕𑀼𑀡𑀬𑀼𑀢𑁆𑀢𑀸 𑀯𑀥𑀽 𑀯𑀺𑀬.

𑀧𑀤𑁂 𑀯𑀸𑀓𑁆𑀬𑁂 𑀢𑀤𑀢𑁆𑀣𑁂 𑀘, 𑀤𑁄𑀲𑀸 𑀬𑁂 𑀯𑀺𑀯𑀺𑀥𑀸 𑀫𑀢𑀸;

𑀲𑁄’𑀤𑀸𑀳𑀭𑀡 𑀫𑁂𑀢𑁂𑀲𑀁, 𑀮𑀓𑁆𑀔𑀡𑀁 𑀓𑀣𑀬𑀸𑀫𑁆𑀬’𑀳𑀁.

𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀸, 𑀛𑀢𑁆𑀣, 𑀓𑀺𑀮𑀺𑀝𑁆𑀞𑀸𑀦𑀺, 𑀯𑀺𑀭𑁄𑀥𑀺 𑀘;

𑀦𑁂𑀬𑁆𑀬𑀁, 𑀯𑀺𑀲𑁂𑀲𑀦𑀸𑀧𑁂𑀓𑁆𑀔𑀁, 𑀳𑀻𑀦𑀢𑁆𑀣𑀓 𑀫𑀦𑀢𑁆𑀣𑀓𑀁.

𑀤𑁄𑀲𑀸 𑀧𑀤𑀸𑀦 𑀯𑀸𑀓𑁆𑀬𑀸𑀦, 𑀫𑁂𑀓𑀢𑁆𑀣𑀁 𑀪𑀕𑁆𑀕𑀭𑀻𑀢𑀺𑀓𑀁;

𑀢𑀣𑀸 𑀩𑁆𑀬𑀸𑀓𑀺𑀡𑁆𑀡 𑀕𑀸𑀫𑁆𑀫𑀸𑀦𑀺, 𑀬𑀢𑀺𑀳𑀻𑀦𑀁 𑀓𑀫𑀘𑁆𑀘𑀼𑀢𑀁;

𑀅𑀢𑀺𑀯𑀼𑀢𑁆𑀢 𑀫𑀧𑁂𑀢𑀢𑁆𑀣𑀁, 𑀲𑀩𑀦𑁆𑀥𑀨𑀭𑀼𑀲𑀁 𑀢𑀣𑀸.

𑀅𑀧𑀓𑁆𑀓𑀫𑁄’ ¶ , 𑀘𑀺𑀢𑁆𑀬𑀳𑀻𑀦𑀁, 𑀪𑀕𑁆𑀕𑀭𑀻𑀢𑀺, 𑀲𑀲𑀁𑀲𑀬𑀁;

𑀕𑀸𑀫𑁆𑀫𑀁 𑀤𑀼𑀝𑁆𑀞𑀸𑀮𑀗𑁆𑀓𑀢𑀻𑀢𑀺, 𑀤𑁄𑀲𑀸 𑀯𑀸𑀓𑁆𑀬𑀢𑁆𑀣𑀦𑀺𑀲𑁆𑀲𑀺𑀢𑀸.

𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀁 𑀢𑀜𑁆𑀳𑀺, 𑀬𑀲𑁆𑀲’𑀜𑁆𑀜𑀢𑁆𑀣𑁄 𑀯𑀺𑀭𑀼𑀚𑁆𑀛𑀢𑀺;

𑀅𑀥𑀺𑀧𑁆𑀧𑁂𑀢𑁂 𑀬𑀣𑀸 𑀫𑁂𑀖𑁄, 𑀯𑀺𑀲𑀤𑁄 𑀲𑀼𑀔𑀬𑁂 𑀚𑀦𑀁.

𑀯𑀺𑀲𑁂𑀲𑁆𑀬 𑀫𑀥𑀺𑀓𑀁 𑀬𑁂𑀦𑀸, 𑀛𑀢𑁆𑀣 𑀫𑁂𑀢𑀁 𑀪𑀯𑁂 𑀬𑀣𑀸;

𑀑𑀪𑀸𑀲𑀺𑀢𑀸’𑀲𑁂𑀲𑀤𑀺𑀲𑁄, 𑀔𑀚𑁆𑀚𑁄𑀢𑁄’𑀬𑀁 𑀯𑀺𑀭𑀸𑀚𑀢𑁂.

𑀬𑀲𑁆𑀲’𑀢𑁆𑀣𑀸’𑀯𑀕𑀫𑁄 𑀤𑀼𑀓𑁆𑀔𑁄, 𑀧𑀓𑀢𑁆𑀬𑀸’𑀤𑀺𑀯𑀺𑀪𑀸𑀕𑀢𑁄;

𑀓𑀺𑀮𑀺𑀝𑁆𑀞𑀁 𑀢𑀁 𑀬𑀣𑀸 𑀢𑀸𑀬, 𑀲𑁄’𑀬 𑀫𑀸𑀮𑀺𑀗𑁆𑀕𑁆𑀬𑀢𑁂 𑀧𑀺𑀬𑀸.

𑀬𑀁 𑀓𑀺𑀮𑀺𑀝𑁆𑀞𑀧𑀤𑀁 𑀫𑀦𑁆𑀤𑀸, 𑀪𑀺𑀥𑁂𑀬𑁆𑀬𑀁 𑀬𑀫𑀓𑀸𑀤𑀺𑀓𑀁;

𑀓𑀺𑀮𑀺𑀝𑁆𑀞𑀧𑀤𑀤𑁄𑀲𑁂’𑀯, 𑀢𑀫𑁆𑀧𑀺 𑀅𑀦𑁆𑀢𑁄 𑀓𑀭𑀻𑀬𑀢𑀺.

𑀧𑀢𑀻𑀢𑀲𑀤𑁆𑀤𑀭𑀘𑀺𑀢𑀁, 𑀲𑀺𑀮𑀺𑀝𑁆𑀞𑀧𑀤𑀲𑀦𑁆𑀥𑀺𑀓𑀁;

𑀧𑀲𑀸𑀤𑀕𑀼𑀡𑀲𑀁𑀬𑀼𑀢𑁆𑀢𑀁, 𑀬𑀫𑀓𑀁 𑀫𑀢 𑀫𑁂𑀤𑀺𑀲𑀁.

𑀅𑀩𑁆𑀬𑀧𑁂𑀢𑀁 𑀩𑁆𑀬𑀧𑁂𑀢’𑀜𑁆𑀜, 𑀫𑀸𑀯𑀼𑀢𑁆𑀢𑀸’𑀦𑁂𑀓𑀯𑀡𑁆𑀡𑀚𑀁;

𑀬𑀫𑀓𑀁 𑀢𑀜𑁆𑀘 𑀧𑀸𑀤𑀸𑀦, 𑀫𑀸𑀤𑀺, 𑀫𑀚𑁆𑀛, 𑀦𑁆𑀢, 𑀕𑁄𑀘𑀭𑀁.

𑀅𑀩𑁆𑀬𑀧𑁂𑀢 𑀧𑀞𑀫𑀧𑀸𑀤𑀸𑀤𑀺 𑀬𑀫𑀓𑀁

𑀲𑀼𑀚𑀦𑀸’𑀲𑀼𑀚𑀦𑀸 𑀲𑀩𑁆𑀩𑁂, 𑀕𑀼𑀡𑁂𑀦𑀸𑀧𑀺 𑀯𑀺𑀯𑁂𑀓𑀺𑀦𑁄;

𑀯𑀺𑀯𑁂𑀓𑀁 𑀦 𑀲𑀫𑀸𑀬𑀦𑁆𑀢𑀺, 𑀅𑀯𑀺𑀯𑁂𑀓𑀺𑀚𑀦𑀦𑁆𑀢𑀺𑀓𑁂.

𑀅𑀩𑁆𑀬𑀧𑁂𑀢 𑀧𑀞𑀫 𑀤𑀼𑀢𑀺𑀬 𑀧𑀸𑀤𑀸𑀤𑀺 𑀬𑀫𑀓𑀁

𑀓𑀼𑀲𑀮𑀸’𑀓𑀼𑀲𑀮𑀸 𑀲𑀩𑁆𑀩𑁂, 𑀧𑀩𑀮𑀸’𑀧𑀩𑀮𑀸 𑀣𑀯𑀸;

𑀦𑁄 𑀬𑀸𑀢𑀸 𑀬𑀸𑀯’𑀳𑁄𑀲𑀺𑀢𑁆𑀢𑀁, 𑀲𑀼𑀔𑀤𑀼𑀓𑁆𑀔𑀧𑁆𑀧𑀤𑀸 𑀲𑀺𑀬𑀼𑀁;

𑀅𑀩𑁆𑀬𑀧𑁂𑀢 𑀧𑀞𑀫 𑀤𑀼𑀢𑀺𑀬 𑀢𑀢𑀺𑀬𑀧𑀸𑀤𑀸𑀤𑀺 𑀬𑀫𑀓𑀁.

𑀲𑀸𑀤𑀭𑀁 𑀲𑀸 𑀤𑀭𑀁 𑀳𑀦𑁆𑀢𑀼, 𑀯𑀺𑀳𑀺𑀢𑀸 𑀯𑀺𑀳𑀺𑀢𑀸 𑀫𑀬𑀸;

𑀯𑀦𑁆𑀤𑀦𑀸 𑀯𑀦𑁆𑀤𑀦𑀸𑀫𑀸𑀦, 𑀪𑀸𑀚𑀦𑁂 𑀭𑀢𑀦𑀢𑁆𑀢𑀬𑁂.

𑀅𑀩𑁆𑀬𑀧𑁂𑀢 𑀘𑀢𑀼𑀓𑁆𑀓𑀧𑀸𑀤𑀸𑀤𑀺 𑀬𑀫𑀓𑀁

𑀓𑀫𑀮𑀁 𑀓’𑀫𑀮𑀁 𑀓𑀢𑁆𑀢𑀼𑀁, 𑀯𑀦𑀤𑁄 𑀯𑀦𑀤𑁄’𑀫𑁆𑀩𑀭𑀁;

𑀲𑀼𑀕𑀢𑁄 𑀲𑀼𑀕𑀢𑁄 𑀮𑁄𑀓𑀁, 𑀲𑀳𑀺𑀢𑀁 𑀲 𑀳𑀺𑀢𑀁 𑀓𑀭𑀁.

𑀅𑀩𑁆𑀬𑀧𑁂𑀢𑀸𑀤𑀺𑀬𑀫𑀓 ¶ , 𑀲𑁆𑀲𑁂𑀲𑁄 𑀮𑁂𑀲𑁄 𑀦𑀺𑀤𑀲𑁆𑀲𑀺𑀢𑁄;

𑀜𑁂𑀬𑁆𑀬𑀸𑀦𑀺’𑀫𑀸𑀬𑁂𑀯 𑀤𑀺𑀲𑀸, 𑀬’𑀜𑁆𑀜𑀸𑀦𑀺 𑀬𑀫𑀓𑀸𑀦𑀺𑀧𑀺.

𑀅𑀘𑁆𑀘𑀦𑁆𑀢𑀩𑀳𑀯𑁄 𑀢𑁂𑀲𑀁, 𑀪𑁂𑀤𑀸 𑀲𑀫𑁆𑀪𑁂𑀤𑀬𑁄𑀦𑀺𑀬𑁄;

𑀢𑀣𑀸𑀧𑀺 𑀓𑁂𑀘𑀺 𑀲𑀼𑀓𑀭𑀸, 𑀓𑁂𑀘𑀺 𑀅𑀘𑁆𑀘𑀦𑁆𑀢𑀤𑀼𑀓𑁆𑀓𑀭𑀸.

𑀬𑀫𑀓𑀁 𑀢𑀁 𑀧𑀳𑁂𑀮𑀻 [𑀧𑀳𑁂𑀴𑀺 (𑀓.)] 𑀘, 𑀦𑁂𑀓𑀦𑁆𑀢𑀫𑀥𑀼𑀭𑀸𑀦𑀺’𑀢𑀺;

𑀉𑀧𑁂𑀓𑁆𑀔𑀺𑀬𑀦𑁆𑀢𑀺 𑀲𑀩𑁆𑀩𑀸𑀦𑀺, 𑀲𑀺𑀲𑁆𑀲𑀔𑁂𑀤𑀪𑀬𑀸 𑀫𑀬𑀸.

𑀤𑁂𑀲𑀓𑀸𑀮𑀓𑀮𑀸𑀮𑁄𑀓, 𑀜𑀸𑀬𑀸𑀕𑀫𑀯𑀺𑀭𑁄𑀥𑀺 𑀬𑀁;

𑀢𑀁 𑀯𑀺𑀭𑁄𑀥𑀺𑀧𑀤𑀁 𑀘𑁂’𑀢, 𑀫𑀼𑀤𑀸𑀳𑀭𑀡𑀢𑁄 𑀨𑀼𑀝𑀁.

𑀬 𑀤𑀧𑁆𑀧𑀢𑀻𑀢 𑀫𑀸𑀦𑀻𑀬, 𑀯𑀢𑁆𑀢𑀩𑁆𑀩𑀁 𑀦𑁂𑀬𑁆𑀬 𑀫𑀸𑀳𑀼 𑀢𑀁;

𑀬𑀣𑀸 𑀲𑀩𑁆𑀩𑀸𑀧𑀺 𑀥𑀯𑀮𑀸, 𑀤𑀺𑀲𑀸 𑀭𑁄𑀘𑀦𑁆𑀢𑀺 𑀭𑀢𑁆𑀢𑀺𑀬𑀁.

𑀦𑁂𑀤𑀺𑀲𑀁 𑀩𑀳𑀼 𑀫𑀜𑁆𑀜𑀦𑁆𑀢𑀺, 𑀲𑀩𑁆𑀩𑁂 𑀲𑀩𑁆𑀩𑀢𑁆𑀣 𑀯𑀺𑀜𑁆𑀜𑀼𑀦𑁄;

𑀤𑀼𑀮𑁆𑀮𑀪𑀸’𑀯𑀕𑀢𑀻 𑀲𑀤𑁆𑀤, 𑀲𑀸𑀫𑀢𑁆𑀣𑀺𑀬𑀯𑀺𑀮𑀗𑁆𑀖𑀺𑀦𑀻.

𑀲𑀺𑀬𑀸 𑀯𑀺𑀲𑁂𑀲𑀦𑀸𑀧𑁂𑀓𑁆𑀔𑀁, 𑀬𑀁 𑀢𑀁 𑀧𑀢𑁆𑀯𑀸 𑀯𑀺𑀲𑁂𑀲𑀦𑀁;

𑀲𑀸𑀢𑁆𑀣𑀓𑀁 𑀢𑀁 𑀬𑀣𑀸 𑀢𑀁 𑀲𑁄, 𑀪𑀺𑀬𑁆𑀬𑁄 𑀧𑀲𑁆𑀲𑀢𑀺 𑀘𑀓𑁆𑀔𑀼𑀦𑀸.

𑀳𑀻𑀦𑀁 𑀓𑀭𑁂 𑀯𑀺𑀲𑁂𑀲𑁆𑀬𑀁 𑀬𑀁, 𑀢𑀁 𑀳𑀻𑀦𑀢𑁆𑀣𑀁 𑀪𑀯𑁂 𑀬𑀣𑀸;

𑀦𑀺𑀧𑁆𑀧𑀪𑀻 𑀓𑀢 𑀔𑀚𑁆𑀚𑁄𑀢𑁄, 𑀲𑀫𑀼𑀤𑁂𑀢𑀺 𑀤𑀺𑀯𑀸𑀓𑀭𑁄.

𑀧𑀸𑀤𑀧𑀽𑀭𑀡𑀫𑀢𑁆𑀢𑀁 𑀬𑀁, 𑀅𑀦𑀢𑁆𑀣𑀫𑀺𑀢𑀺 𑀢𑀁 𑀫𑀢𑀁;

𑀬𑀣𑀸 𑀳𑀺 𑀯𑀦𑁆𑀤𑁂 𑀩𑀼𑀤𑁆𑀥𑀲𑁆𑀲, 𑀧𑀸𑀤𑀧𑀗𑁆𑀓𑁂𑀭𑀼𑀳𑀁 𑀧𑀺 𑀘.

𑀲𑀤𑁆𑀤𑀢𑁄 𑀅𑀢𑁆𑀣𑀢𑁄 𑀯𑀼𑀢𑁆𑀢𑀁, 𑀬𑀢𑁆𑀣 𑀪𑀺𑀬𑁆𑀬𑁄𑀧𑀺 𑀯𑀼𑀘𑁆𑀘𑀢𑀺;

𑀢 𑀫𑁂𑀓𑀢𑁆𑀣𑀁 𑀬𑀣𑀸’𑀪𑀸𑀢𑀺, 𑀯𑀸𑀭𑀺𑀤𑁄 𑀯𑀸𑀭𑀺𑀤𑁄 𑀅𑀬𑀁.

𑀢𑀺𑀢𑁆𑀣𑀺𑀬𑀗𑁆𑀓𑀼𑀭𑀩𑀻𑀚𑀸𑀦𑀺, 𑀚𑀳𑀁 𑀤𑀺𑀝𑁆𑀞𑀺𑀕𑀢𑀸𑀦𑀺’𑀳;

𑀧𑀲𑀸𑀤𑁂𑀢𑀺 𑀧𑀲𑀦𑁆𑀦𑁂’𑀲𑁄, 𑀫𑀳𑀸𑀫𑀼𑀦𑀺 𑀫𑀳𑀸𑀚𑀦𑁂.

𑀆𑀭𑀤𑁆𑀥𑀓𑁆𑀓𑀫𑀯𑀺𑀘𑁆𑀙𑁂𑀤𑀸, 𑀪𑀕𑁆𑀕𑀭𑀻𑀢𑀺 𑀪𑀯𑁂 𑀬𑀣𑀸;

𑀓𑀸𑀧𑀺 𑀧𑀜𑁆𑀜𑀸, 𑀓𑁄𑀧𑀺 𑀧𑀕𑀼𑀡𑁄, 𑀧𑀓𑀢𑀻𑀧𑀺 𑀅𑀳𑁄 𑀢𑀯.

𑀧𑀤𑀸𑀦𑀁 ¶ 𑀤𑀼𑀩𑁆𑀩𑀺𑀦𑀺𑀓𑁆𑀔𑁂𑀧𑀸, 𑀩𑁆𑀬𑀸𑀫𑁄𑀳𑁄 𑀬𑀢𑁆𑀣 𑀚𑀸𑀬𑀢𑀺;

𑀢𑀁 𑀩𑁆𑀬𑀸𑀓𑀺𑀡𑁆𑀡𑀦𑁆𑀢𑀺 𑀯𑀺𑀜𑁆𑀜𑁂𑀬𑁆𑀬𑀁, 𑀢𑀤𑀼𑀤𑀸𑀳𑀭𑀡𑀁 𑀬𑀣𑀸.

𑀩𑀳𑀼𑀕𑀼𑀡𑁂 𑀧𑀡𑀫𑀢𑀺, 𑀤𑀼𑀚𑁆𑀚𑀦𑀸𑀦𑀁 𑀧𑁆𑀬𑀬𑀁 𑀚𑀦𑁄;

𑀳𑀺𑀢𑀁 𑀧𑀫𑀼𑀤𑀺𑀢𑁄 𑀦𑀺𑀘𑁆𑀘𑀁, 𑀲𑀼𑀕𑀢𑀁 𑀲𑀫𑀦𑀼𑀲𑁆𑀲𑀭𑀁.

𑀯𑀺𑀲𑀺𑀝𑁆𑀞𑀯𑀘𑀦𑀸’𑀧𑁂𑀢𑀁, 𑀕𑀸𑀫𑁆𑀫𑀁’𑀢𑁆𑀬’𑀪𑀺𑀫𑀢𑀁 𑀬𑀣𑀸;

𑀓𑀜𑁆𑀜𑁂 𑀓𑀸𑀫𑀬𑀫𑀸𑀦𑀁 𑀫𑀁, 𑀦 𑀓𑀸𑀫𑀬𑀲𑀺 𑀓𑀺𑀁𑀦𑁆𑀯𑀺’𑀤𑀁?

𑀧𑀤𑀲𑀦𑁆𑀥𑀸𑀦𑀢𑁄 𑀓𑀺𑀜𑁆𑀘𑀺, 𑀤𑀼𑀧𑁆𑀧𑀢𑀻𑀢𑀺𑀓𑀭𑀁 𑀪𑀯𑁂;

𑀢𑀫𑁆𑀧𑀺 𑀕𑀸𑀫𑁆𑀫𑀁 𑀢𑁆𑀬’𑀪𑀺𑀫𑀢𑀁, 𑀬𑀣𑀸 𑀬𑀸𑀪𑀯𑀢𑁄 𑀧𑀺𑀬𑀸.

𑀯𑀼𑀢𑁆𑀢𑁂𑀲𑀼 𑀲𑀽𑀘𑀺𑀢𑁂 𑀝𑁆𑀞𑀸𑀦𑁂, 𑀧𑀤𑀘𑁆𑀙𑁂𑀤𑁄 𑀪𑀯𑁂 𑀬𑀢𑀺;

𑀬𑀁 𑀢𑀸𑀬 𑀳𑀻𑀦𑀁 𑀢𑀁 𑀯𑀼𑀢𑁆𑀢𑀁, 𑀬𑀢𑀺𑀳𑀻𑀦𑀦𑁆𑀢𑀺 𑀲𑀸 𑀧𑀦.

𑀬𑀢𑀺 𑀲𑀩𑁆𑀩𑀢𑁆𑀣𑀧𑀸𑀤𑀦𑁆𑀢𑁂, 𑀯𑀼𑀢𑁆𑀢𑀟𑁆𑀠𑁂 𑀘 𑀯𑀺𑀲𑁂𑀲𑀢𑁄;

𑀧𑀼𑀩𑁆𑀩𑀸𑀧𑀭𑀸𑀦𑁂𑀓𑀯𑀡𑁆𑀡, 𑀧𑀤𑀫𑀚𑁆𑀛𑁂𑀧𑀺 𑀓𑀢𑁆𑀣𑀘𑀺.

𑀢𑀢𑁆𑀣𑁄𑀤𑀸𑀳𑀭𑀡𑀧𑀘𑁆𑀘𑀼𑀤𑀸𑀳𑀭𑀡𑀸𑀦𑀺 𑀬𑀣𑀸

𑀢𑀁 𑀦𑀫𑁂 𑀲𑀺𑀭𑀲𑀸 𑀘𑀸𑀫𑀺, 𑀓𑀭𑀯𑀡𑁆𑀡𑀁 𑀢𑀣𑀸𑀕𑀢𑀁;

𑀲𑀓𑀮𑀸𑀧𑀺 𑀤𑀺𑀲𑀸 𑀲𑀺𑀜𑁆𑀘, 𑀢𑀺𑀯 𑀲𑁄𑀡𑁆𑀡𑀭𑀲𑁂𑀳𑀺 𑀬𑁄.

𑀲𑀭𑁄 𑀲𑀦𑁆𑀥𑀺𑀫𑁆𑀳𑀺 𑀧𑀼𑀩𑁆𑀩𑀦𑁆𑀢𑁄, 𑀯𑀺𑀬 𑀮𑁄𑀧𑁂 𑀯𑀺𑀪𑀢𑁆𑀢𑀺𑀬𑀸;

𑀅𑀜𑁆𑀜𑀣𑀸 𑀢𑁆𑀯’𑀜𑁆𑀜𑀣𑀸 𑀢𑀢𑁆𑀣, 𑀬𑀸’𑀤𑁂𑀲𑀸𑀤𑀺 𑀧𑀭𑀸’𑀤𑀺’𑀯.

𑀘𑀸𑀤𑀻 𑀧𑀼𑀩𑁆𑀩𑀧𑀤𑀦𑁆𑀢𑀸’𑀯, 𑀦𑀺𑀘𑁆𑀘𑀁 𑀧𑀼𑀩𑁆𑀩𑀧𑀤𑀲𑁆𑀲𑀺𑀢𑀸;

𑀧𑀸𑀤𑀬𑁄 𑀦𑀺𑀘𑁆𑀘𑀲𑀫𑁆𑀩𑀦𑁆𑀥𑀸, 𑀧𑀭𑀸𑀤𑀻𑀯 𑀧𑀭𑁂𑀦 𑀢𑀼.

𑀦𑀫𑁂 𑀢𑀁 𑀲𑀺𑀭𑀲𑀸 𑀲𑀩𑁆𑀩𑁄, 𑀧𑀫𑀸’𑀢𑀻𑀢𑀁 𑀢𑀣𑀸𑀕𑀢𑀁;

𑀬𑀲𑁆𑀲 𑀮𑁄𑀓𑀕𑁆𑀕𑀢𑀁 𑀧𑀢𑁆𑀢, 𑀲𑁆𑀲𑁄’𑀧𑀫𑀸 𑀦 𑀳𑀺 𑀬𑀼𑀚𑁆𑀚𑀢𑀺.

𑀫𑀼𑀦𑀺𑀦𑁆𑀤𑀁 𑀢𑀁 𑀲𑀤𑀸 𑀯𑀦𑁆𑀤𑀸, 𑀫𑁆𑀬’𑀦𑀦𑁆𑀢𑀫𑀢𑀺 𑀫𑀼𑀢𑁆𑀢𑀫𑀁;

𑀬𑀲𑁆𑀲 𑀧𑀜𑁆𑀜𑀸 𑀘 𑀫𑁂𑀢𑁆𑀢𑀸 𑀘, 𑀦𑀺𑀲𑁆𑀲𑀻𑀫𑀸𑀢𑀺 𑀯𑀺𑀚𑀫𑁆𑀪𑀢𑀺.

𑀘𑀸𑀤𑀺𑀧𑀸𑀤𑀻𑀲𑀼 𑀧𑀘𑁆𑀘𑀼𑀤𑀸𑀳𑀭𑀡𑀸𑀦𑀺 𑀬𑀣𑀸

𑀫𑀳𑀸𑀫𑁂𑀢𑁆𑀢𑀸 𑀫𑀳𑀸𑀧𑀜𑁆𑀜𑀸, 𑀘 𑀬𑀢𑁆𑀣 𑀧𑀭𑀫𑁄𑀤𑀬𑀸;

𑀧𑀡𑀫𑀸𑀫𑀺 𑀚𑀺𑀦𑀁 𑀢𑀁 𑀧, 𑀯𑀭𑀁 𑀯𑀭𑀕𑀼𑀡𑀸’𑀮𑀬𑀁.

𑀧𑀤𑀢𑁆𑀣𑀓𑁆𑀓𑀫𑀢𑁄 𑀫𑀼𑀢𑁆𑀢𑀁, 𑀓𑀫𑀘𑁆𑀘𑀼𑀢 𑀫𑀺𑀤𑀁 𑀬𑀣𑀸;

𑀔𑁂𑀢𑁆𑀢𑀁 𑀯𑀸 𑀤𑁂𑀳𑀺 𑀕𑀸𑀫𑀁 𑀯𑀸, 𑀤𑁂𑀲𑀁 𑀯𑀸 𑀫𑀫 𑀲𑁄𑀪𑀦𑀁.

𑀮𑁄𑀓𑀺𑀬𑀢𑁆𑀣 ¶ 𑀫𑀢𑀺𑀓𑁆𑀓𑀦𑁆𑀢𑀁, 𑀅𑀢𑀺𑀯𑀼𑀢𑁆𑀢𑀁 𑀫𑀢𑀁 𑀬𑀣𑀸;

𑀅𑀢𑀺𑀲𑀫𑁆𑀩𑀸𑀥 𑀫𑀸𑀓𑀸𑀲, 𑀫𑁂𑀢𑀺𑀲𑁆𑀲𑀸 𑀣𑀦𑀚𑀫𑁆𑀪𑀦𑁂.

𑀲𑀫𑀼𑀤𑀸𑀬𑀢𑁆𑀣𑀢𑁄’𑀧𑁂𑀢𑀁, 𑀢𑀁 𑀅𑀧𑁂𑀢𑀢𑁆𑀣𑀓𑀁 𑀬𑀣𑀸;

𑀕𑀸𑀯𑀺𑀧𑀼𑀢𑁆𑀢𑁄 𑀩𑀮𑀺𑀩𑀤𑁆𑀥𑁄, 𑀢𑀺𑀡𑀁 𑀔𑀸𑀤𑀻 𑀧𑀺𑀯𑀻 𑀚𑀮𑀁.

𑀩𑀦𑁆𑀥𑁂 𑀨𑀭𑀼𑀲𑀢𑀸 𑀬𑀢𑁆𑀣, 𑀢𑀁 𑀩𑀦𑁆𑀥𑀨𑀭𑀼𑀲𑀁 𑀬𑀣𑀸;

𑀔𑀭𑀸 𑀔𑀺𑀮𑀸 𑀧𑀭𑀺𑀓𑁆𑀔𑀻𑀡𑀸, 𑀔𑁂𑀢𑁆𑀢𑁂 𑀔𑀺𑀢𑁆𑀢𑀁 𑀨𑀮𑀢𑁆𑀬’𑀮𑀁.

𑀜𑁂𑀬𑁆𑀬𑀁 𑀮𑀓𑁆𑀔𑀡 𑀫𑀦𑁆𑀯𑀢𑁆𑀣, 𑀯𑀲𑁂𑀦𑀸’𑀧𑀓𑁆𑀓𑀫𑀸𑀤𑀺𑀦𑀁;

𑀉𑀤𑀸𑀳𑀭𑀡 𑀫𑁂𑀢𑁂𑀲𑀁, 𑀤𑀸𑀦𑀺 𑀲𑀦𑁆𑀤𑀲𑁆𑀲𑀬𑀸𑀫𑁆𑀬’𑀳𑀁.

𑀪𑀸𑀯𑀦𑀸, 𑀤𑀸𑀦, 𑀲𑀻𑀮𑀸𑀦𑀺, 𑀲𑀫𑁆𑀫𑀸 𑀲𑀫𑁆𑀧𑀸𑀤𑀺𑀢𑀸𑀦𑀺’𑀳;

𑀪𑁄𑀕, 𑀲𑀕𑁆𑀕𑀸𑀤𑀺, 𑀦𑀺𑀩𑁆𑀩𑀸𑀦, 𑀲𑀸𑀥𑀦𑀸𑀦𑀺 𑀦 𑀲𑀁𑀲𑀬𑁄.

𑀧𑀽𑀚𑀦𑀻𑀬𑀢𑀭𑁄 𑀮𑁄𑀓𑁂, 𑀅𑀳 𑀫𑁂𑀓𑁄 𑀦𑀺𑀭𑀦𑁆𑀢𑀭𑀁;

𑀫𑀬𑁂𑀓𑀲𑁆𑀫𑀺𑀁 𑀕𑀼𑀡𑀸 𑀲𑀩𑁆𑀩𑁂, 𑀬𑀢𑁄 𑀲𑀫𑀼𑀤𑀺𑀢𑀸 𑀅𑀳𑀼𑀁.

𑀬𑀸𑀘𑀺𑀢𑁄’𑀳𑀁 𑀓𑀣𑀁 𑀦𑀸𑀫, 𑀦 𑀤𑀚𑁆𑀚𑀸𑀫𑁆𑀬’𑀧𑀺 𑀚𑀻𑀯𑀺𑀢𑀁;

𑀢𑀣𑀸𑀧𑀺 𑀧𑀼𑀢𑁆𑀢𑀤𑀸𑀦𑁂𑀦, 𑀯𑁂𑀥𑀢𑁂 𑀳𑀤𑀬𑀁 𑀫𑀫.

𑀇𑀢𑁆𑀣𑀻𑀦𑀁 𑀤𑀼𑀚𑁆𑀚𑀦𑀸𑀦𑀜𑁆𑀘, 𑀯𑀺𑀲𑁆𑀲𑀸𑀲𑁄 𑀦𑁄𑀧𑀧𑀚𑁆𑀚𑀢𑁂;

𑀯𑀺𑀲𑁂 𑀲𑀺𑀗𑁆𑀕𑀺𑀫𑁆𑀳𑀺 𑀦𑀤𑀺𑀬𑀁, 𑀭𑁄𑀕𑁂 𑀭𑀸𑀚𑀓𑀼𑀮𑀫𑁆𑀳𑀺 𑀘.

𑀫𑀼𑀦𑀺𑀦𑁆𑀤𑀘𑀦𑁆𑀤𑀺𑀫𑀸 𑀮𑁄𑀓, 𑀲𑀭𑀮𑁄𑀮𑀯𑀺𑀮𑁄𑀘𑀦𑁄;

𑀚𑀦𑁄’ 𑀯𑀓𑁆𑀓𑀦𑁆𑀢𑀧𑀦𑁆𑀣𑁄’𑀯, 𑀕𑁄𑀧𑀤𑀲𑁆𑀲𑀦𑀧𑀻𑀡𑀺𑀢𑁄.

𑀯𑀸𑀓𑁆𑀬𑀢𑁆𑀣𑀢𑁄 𑀤𑀼𑀧𑁆𑀧𑀢𑀻𑀢𑀺, 𑀓𑀭𑀁 𑀕𑀸𑀫𑁆𑀫𑀁 𑀫𑀢𑀁 𑀬𑀣𑀸;

𑀧𑁄𑀲𑁄 𑀯𑀻𑀭𑀺𑀬𑀯𑀸 𑀲𑁄’𑀬𑀁, 𑀧𑀭𑀁 𑀳𑀦𑁆𑀢𑁆𑀯𑀸 𑀦 𑀯𑀺𑀲𑁆𑀲𑀫𑀻.

𑀤𑀼𑀝𑁆𑀞𑀸𑀮𑀗𑁆𑀓𑀭𑀡𑀁 𑀢𑁂𑀢𑀁 [𑀢𑁆𑀯𑁂𑀣𑀁 (?)], 𑀬𑀢𑁆𑀣𑀸’𑀮𑀗𑁆𑀓𑀸𑀭𑀤𑀽𑀲𑀦𑀁;

𑀢𑀲𑁆𑀲𑀸’𑀮𑀗𑁆𑀓𑀸𑀭𑀦𑀺𑀤𑁆𑀤𑁂𑀲𑁂, 𑀭𑀽𑀧 𑀫𑀸𑀯𑀺 𑀪𑀯𑀺𑀲𑁆𑀲𑀢𑀺.

𑀓𑀢𑁄’𑀢𑁆𑀭 ¶ 𑀲𑀗𑁆𑀔𑁂𑀧𑀦𑀬𑀸 𑀫𑀬𑀸’𑀬𑀁,

𑀤𑁄𑀲𑀸𑀦 𑀫𑁂𑀲𑀁 𑀧𑀯𑀭𑁄 𑀯𑀺𑀪𑀸𑀕𑁄;

𑀏𑀲𑁄’𑀯’𑀮𑀁 𑀩𑁄𑀥𑀬𑀺𑀢𑀼𑀁 𑀓𑀯𑀻𑀦𑀁,

𑀢𑀫𑀢𑁆𑀣𑀺 𑀘𑁂 𑀔𑁂𑀤𑀓𑀭𑀁 𑀧𑀭𑀫𑁆𑀧𑀺.

𑀇𑀢𑀺 𑀲𑀗𑁆𑀖𑀭𑀓𑁆𑀔𑀺𑀢𑀫𑀳𑀸𑀲𑀸𑀫𑀺𑀯𑀺𑀭𑀘𑀺𑀢𑁂 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂

𑁨. 𑀤𑁄𑀲𑀧𑀭𑀺𑀳𑀸𑀭𑀸𑀯𑀩𑁄𑀥-𑀤𑀼𑀢𑀺𑀬𑀧𑀭𑀺𑀘𑁆𑀙𑁂𑀤

𑀓𑀤𑀸𑀘𑀺 𑀓𑀯𑀺𑀓𑁄𑀲𑀮𑁆𑀮𑀸, 𑀯𑀺𑀭𑁄𑀥𑁄 𑀲𑀓𑀮𑁄 𑀧𑁆𑀬’𑀬𑀁;

𑀤𑁄𑀲𑀲𑀗𑁆𑀔𑁆𑀬 𑀫𑀢𑀺𑀓𑁆𑀓𑀫𑁆𑀫, 𑀕𑀼𑀡𑀯𑀻𑀣𑀺𑀁 𑀯𑀺𑀕𑀸𑀳𑀢𑁂.

𑀢𑁂𑀦 𑀯𑀼𑀢𑁆𑀢𑀯𑀺𑀭𑁄𑀥𑀸𑀦, 𑀫𑀯𑀺𑀭𑁄𑀥𑁄 𑀬𑀣𑀸 𑀲𑀺𑀬𑀸;

𑀢𑀣𑀸 𑀤𑁄𑀲𑀧𑀭𑀺𑀳𑀸𑀭𑀸, 𑀯𑀩𑁄𑀥𑁄 𑀤𑀸𑀦𑀺 𑀦𑀻𑀬𑀢𑁂.

𑀢𑀢𑁆𑀣 𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀲𑁆𑀲 𑀧𑀭𑀺𑀳𑀸𑀭𑁄 𑀬𑀣𑀸

𑀯𑀺𑀦𑁆𑀤𑀦𑁆𑀢𑀁 𑀧𑀸𑀓𑀲𑀸𑀮𑀻𑀦𑀁, 𑀲𑀸𑀮𑀻𑀦𑀁 𑀤𑀲𑁆𑀲𑀦𑀸 𑀲𑀼𑀔𑀁;

𑀢𑀁 𑀓𑀣𑀁 𑀦𑀸𑀫 𑀫𑁂𑀖𑁄’𑀬𑀁, 𑀯𑀺𑀲𑀤𑁄 𑀲𑀼𑀔𑀬𑁂 𑀚𑀦𑀁?

𑀯𑀺𑀦𑀸𑀬𑀓𑁄𑀧𑀺 𑀦𑀸𑀕𑁄 𑀲𑀺, 𑀕𑁄𑀢𑀫𑁄𑀧𑀺 𑀫𑀳𑀸𑀫𑀢𑀺;

𑀧𑀡𑀻𑀢𑁄𑀧𑀺 𑀭𑀲𑀸’𑀧𑁂𑀢𑁄, 𑀘𑀺𑀢𑁆𑀢𑀸 𑀫𑁂 𑀲𑀸𑀫𑀺 𑀢𑁂 𑀕𑀢𑀺.

𑀓𑀣𑀁 𑀢𑀸𑀤𑀺𑀕𑀼𑀡𑀸𑀪𑀸𑀯𑁂, 𑀮𑁄𑀓𑀁 𑀢𑁄𑀲𑁂𑀢𑀺 𑀤𑀼𑀚𑁆𑀚𑀦𑁄?

𑀑𑀪𑀸𑀲𑀺𑀢𑀸𑀲𑁂𑀲𑀤𑀺𑀲𑁄, 𑀔𑀚𑁆𑀚𑁄𑀢𑁄 𑀦𑀸𑀫 𑀓𑀺𑀁 𑀪𑀯𑁂?

𑀧𑀳𑁂𑀮𑀺𑀓𑀸𑀬 [𑀧𑀳𑁂𑀴𑀺𑀓𑀸𑀬 (𑀓.)] 𑀫𑀸𑀭𑀼𑀴𑁆𑀳𑀸, 𑀦 𑀳𑀺 𑀤𑀼𑀝𑁆𑀞𑀸 𑀓𑀺𑀮𑀺𑀝𑁆𑀞𑀢𑀸;

𑀧𑀺𑀬𑀸 𑀲𑀼𑀔𑀸’𑀮𑀺𑀗𑁆𑀕𑀺𑀢𑀁 𑀓, 𑀫𑀸𑀮𑀺𑀗𑁆𑀕𑀢𑀺 𑀦𑀼 𑀦𑁄 𑀇𑀢𑀺.

𑀬𑀫𑀓𑁂 𑀦𑁄 𑀧𑀬𑁄𑀚𑁂𑀬𑁆𑀬, 𑀓𑀺𑀮𑀺𑀝𑁆𑀞𑀧𑀤 𑀫𑀺𑀘𑁆𑀙𑀺𑀢𑁂;

𑀢𑀢𑁄 𑀬𑀫𑀓 𑀫𑀜𑁆𑀜𑀁 𑀢𑀼, 𑀲𑀩𑁆𑀩 𑀫𑁂𑀢𑀁𑀫𑀬𑀁 𑀯𑀺𑀬.

𑀩𑁄𑀥𑀺𑀲𑀢𑁆𑀢𑀧𑁆𑀧𑀪𑀸𑀯𑁂𑀦 ¶ , 𑀣𑀮𑁂𑀧𑀺 𑀚𑀮𑀚𑀸𑀦𑁆𑀬’𑀳𑀼𑀁;

𑀦𑀼𑀤𑀦𑁆𑀢𑀸𑀦𑀺’𑀯 𑀲𑀼𑀘𑀺𑀭𑀸, 𑀯𑀸𑀲𑀓𑁆𑀮𑁂𑀲𑀁 𑀢𑀳𑀺𑀁 𑀚𑀮𑁂.

𑀫𑀳𑀸𑀦𑀼𑀪𑀸𑀯 𑀧𑀺𑀲𑀼𑀦𑁄, 𑀫𑀼𑀦𑀺𑀦𑁄 𑀫𑀦𑁆𑀤 𑀫𑀸𑀭𑀼𑀢𑁄;

𑀲𑀩𑁆𑀩𑁄𑀢𑀼𑀓𑀫𑀬𑀁 𑀯𑀸𑀬𑀺, 𑀥𑀼𑀦𑀦𑁆𑀢𑁄 𑀓𑀼𑀲𑀼𑀫𑀁 𑀲𑀫𑀁.

𑀦𑀺𑀫𑀼𑀕𑁆𑀕𑀫𑀸𑀦𑀲𑁄 𑀩𑀼𑀤𑁆𑀥, 𑀕𑀼𑀡𑁂 𑀧𑀜𑁆𑀘𑀲𑀺𑀔𑀲𑁆𑀲𑀧𑀺;

𑀢𑀦𑁆𑀢𑀺𑀲𑁆𑀲𑀭 𑀯𑀺𑀭𑁄𑀥𑁄 𑀲𑁄, 𑀦 𑀲𑀫𑁆𑀧𑀻𑀡𑁂𑀢𑀺 𑀓𑀁 𑀚𑀦𑀁?

𑀕𑀡𑀬𑁂 𑀘𑀓𑁆𑀓𑀯𑀸𑀴𑀁 𑀲𑁄, 𑀘𑀦𑁆𑀤𑀦𑀸𑀬𑀧𑀺 𑀲𑀻𑀢𑀮𑀁;

𑀲𑀫𑁆𑀩𑁄𑀥𑀺 𑀲𑀢𑁆𑀢 𑀳𑀤𑀬𑁄, 𑀧𑀤𑀺𑀢𑁆𑀢’𑀗𑁆𑀕𑀸𑀭𑀧𑀽𑀭𑀺𑀢𑀁.

𑀧𑀭𑀺𑀘𑁆𑀘𑀢𑁆𑀢𑀪𑀯𑁄𑀧𑀺 𑀢𑁆𑀯, 𑀫𑀼𑀧𑀦𑀻𑀢𑀪𑀯𑁄 𑀅𑀲𑀺;

𑀅𑀘𑀺𑀦𑁆𑀢𑁆𑀬𑀕𑀼𑀡𑀲𑀸𑀭𑀸𑀬, 𑀦𑀫𑁄 𑀢𑁂 𑀫𑀼𑀦𑀺𑀧𑀼𑀗𑁆𑀕𑀯.

𑀦𑁂𑀯𑀸’𑀮𑀧𑀢𑀺 𑀓𑁂𑀦𑀸’𑀧𑀺, 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀢𑁄 𑀬𑀢𑀺;

𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀸, 𑀨𑀼𑀲𑁂𑀬𑁆𑀬𑀸’𑀧𑀢𑁆𑀢𑀺𑀤𑀼𑀓𑁆𑀓𑀝𑀁.

𑀫𑀭𑀻𑀘𑀺𑀘𑀦𑁆𑀤𑀦𑀸’𑀮𑁂𑀧, 𑀮𑀸𑀪𑀸 𑀲𑀻𑀢𑀫𑀭𑀻𑀘𑀺𑀦𑁄;

𑀇𑀫𑀸 𑀲𑀩𑁆𑀩𑀸𑀧𑀺 𑀥𑀯𑀮𑀸, 𑀤𑀺𑀲𑀸 𑀭𑁄𑀘𑀦𑁆𑀢𑀺 𑀦𑀺𑀩𑁆𑀪𑀭𑀁.

𑀫𑀦𑁄𑀦𑀼𑀭𑀜𑁆𑀚𑀦𑁄 𑀫𑀸𑀭, 𑀗𑁆𑀕𑀦𑀸𑀲𑀺𑀗𑁆𑀕𑀸𑀭𑀯𑀺𑀩𑁆𑀪𑀫𑁄;

𑀚𑀺𑀦𑁂𑀦𑀸’𑀲𑀫𑀦𑀼𑀜𑁆𑀜𑀸𑀢𑁄, 𑀫𑀸𑀭𑀲𑁆𑀲 𑀳𑀤𑀬𑀸’𑀦𑀮𑁄.

𑀅𑀧𑀬𑀸𑀢𑀸’𑀧𑀭𑀸𑀥𑀫𑁆𑀧𑀺, 𑀅𑀬𑀁 𑀯𑁂𑀭𑀻 𑀚𑀦𑀁 𑀚𑀦𑁄;

𑀓𑁄𑀥𑀧𑀸𑀝𑀮𑀪𑀽𑀢𑁂𑀦, 𑀪𑀺𑀬𑁆𑀬𑁄 𑀧𑀲𑁆𑀲𑀢𑀺 𑀘𑀓𑁆𑀔𑀼𑀦𑀸.

𑀅𑀧𑁆𑀧𑀓𑀸𑀦𑀫𑁆𑀧𑀺 𑀧𑀸𑀧𑀸𑀦𑀁, 𑀧𑀪𑀸𑀯𑀁 𑀦𑀸𑀲𑀬𑁂 𑀩𑀼𑀥𑁄;

𑀅𑀧𑀺 𑀦𑀺𑀧𑁆𑀧𑀪𑀸𑀢𑀸’𑀦𑀻𑀢, 𑀔𑀚𑁆𑀚𑁄𑀢𑁄 𑀳𑁄𑀢𑀺 𑀪𑀸𑀡𑀼𑀫𑀸.

𑀦 ¶ 𑀧𑀸𑀤𑀧𑀽𑀭𑀡𑀢𑁆𑀣𑀸𑀬, 𑀧𑀤𑀁 𑀬𑁄𑀚𑁂𑀬𑁆𑀬 𑀓𑀢𑁆𑀣𑀘𑀺,

𑀬𑀣𑀸 𑀯𑀦𑁆𑀤𑁂 𑀫𑀼𑀦𑀺𑀦𑁆𑀤𑀲𑁆𑀲, 𑀧𑀸𑀤𑀧𑀗𑁆𑀓𑁂𑀭𑀼𑀳𑀁 𑀯𑀭𑀁.

𑀪𑀬𑀓𑁄𑀥𑀧𑀲𑀁𑀲𑀸𑀤𑀺, 𑀯𑀺𑀲𑁂𑀲𑁄 𑀢𑀸𑀤𑀺𑀲𑁄 𑀬𑀤𑀺;

𑀯𑀢𑁆𑀢𑀼𑀁 𑀓𑀸𑀫𑀻𑀬𑀢𑁂 𑀤𑁄𑀲𑁄, 𑀦 𑀢𑀢𑁆𑀣𑁂’𑀓𑀢𑁆𑀣𑀢𑀸𑀓𑀢𑁄.

𑀲𑀧𑁆𑀧𑁄 𑀲𑀧𑁆𑀧𑁄! 𑀅𑀬𑀁 𑀳𑀦𑁆𑀤, 𑀦𑀺𑀯𑀢𑁆𑀢𑀢𑀼 𑀪𑀯𑀁 𑀢𑀢𑁄,

𑀬𑀤𑀺 𑀚𑀻𑀯𑀺𑀢𑀼𑀓𑀸𑀫𑁄’𑀲𑀺, 𑀓𑀣𑀁 𑀢 𑀫𑀼𑀧𑀲𑀧𑁆𑀧𑀲𑀺?

𑀬𑁄𑀓𑁄𑀘𑀺 𑀭𑀽𑀧𑀸’𑀢𑀺𑀲𑀬𑁄, 𑀓𑀦𑁆𑀢𑀺 𑀓𑀸𑀧𑀺 𑀫𑀦𑁄𑀳𑀭𑀸;

𑀅𑀩𑁆𑀬𑀸𑀫𑁄𑀳𑀓𑀭𑀁 𑀩𑀦𑁆𑀥𑀁, 𑀅𑀩𑁆𑀬𑀸𑀓𑀺𑀡𑁆𑀡𑀁 𑀫𑀦𑁄𑀳𑀭𑀁;

𑀅𑀤𑀽𑀭𑀧𑀤 𑀯𑀺𑀦𑁆𑀬𑀸𑀲𑀁, 𑀧𑀲𑀁𑀲𑀦𑁆𑀢𑀺 𑀓𑀯𑀺𑀲𑁆𑀲𑀭𑀸.

𑀦𑀻𑀮𑀼𑀧𑁆𑀧𑀮𑀸’𑀪𑀁 𑀦𑀬𑀦𑀁, 𑀩𑀦𑁆𑀥𑀼𑀓𑀭𑀼𑀘𑀺𑀭𑁄’𑀥𑀭𑁄;

𑀦𑀸𑀲𑀸 𑀳𑁂𑀫’𑀗𑁆𑀓𑀼𑀲𑁄 𑀢𑁂𑀦, 𑀚𑀺𑀦𑁄’𑀬𑀁 𑀧𑀺𑀬𑀤𑀲𑁆𑀲𑀦𑁄.

𑀲𑀫𑀢𑀺𑀓𑁆𑀓𑀦𑁆𑀢 𑀕𑀸𑀫𑁆𑀫𑀢𑁆𑀢𑀁, 𑀓𑀦𑁆𑀢 𑀯𑀸𑀘𑀸’𑀪𑀺𑀲𑀗𑁆𑀔𑀢𑀁;

𑀩𑀦𑁆𑀥𑀦𑀁 𑀭𑀲𑀳𑁂𑀢𑀼𑀢𑁆𑀢𑀸, 𑀕𑀸𑀫𑁆𑀫𑀢𑁆𑀢𑀁 𑀅𑀢𑀺𑀯𑀢𑁆𑀢𑀢𑀺.

𑀤𑀼𑀦𑁄𑀢𑀺 𑀓𑀸𑀫𑀘𑀡𑁆𑀟𑀸𑀮𑁄, 𑀲𑁄 𑀫𑀁 𑀲𑀤𑀬 𑀦𑀺𑀤𑁆𑀤𑀬𑁄;

𑀈𑀤𑀺𑀲𑀁 𑀩𑁆𑀬𑀲𑀦𑀸’𑀧𑀦𑁆𑀦𑀁, 𑀲𑀼𑀔𑀻𑀧𑀺 𑀓𑀺 𑀫𑀼𑀧𑁂𑀓𑁆𑀔𑀲𑁂?

𑀬𑀢𑀺𑀳𑀻𑀦𑀧𑀭𑀺𑀳𑀸𑀭𑁄, 𑀦 𑀧𑀼𑀦𑁂’𑀤𑀸𑀦𑀺 𑀦𑀻𑀬𑀢𑁂;

𑀬𑀢𑁄 𑀦 𑀲𑀯𑀦𑀼’𑀩𑁆𑀩𑁂𑀕𑀁, 𑀳𑁂𑀝𑁆𑀞𑀸 𑀬𑁂𑀲𑀁 𑀯𑀺𑀘𑀸𑀭𑀺𑀢𑀁.

𑀉𑀤𑀸𑀭𑀘𑀭𑀺𑀢𑁄’𑀲𑀺 𑀢𑁆𑀯𑀁, 𑀢𑁂𑀦𑁂’𑀯𑀸’𑀭𑀸𑀥𑀦𑀸 𑀢𑁆𑀯𑀬𑀺;

𑀤𑁂𑀲𑀁 𑀯𑀸 𑀤𑁂𑀳𑀺 𑀕𑀸𑀫𑀁 𑀯𑀸, 𑀔𑁂𑀢𑁆𑀢𑀁 𑀯𑀸 𑀫𑀫 𑀲𑁄𑀪𑀦𑀁.

𑀫𑀼𑀦𑀺𑀦𑁆𑀤𑀘𑀦𑁆𑀤𑀲𑀫𑁆𑀪𑀽𑀢, 𑀬𑀲𑁄𑀭𑀸𑀲𑀺𑀫𑀭𑀻𑀘𑀺𑀦𑀁;

𑀲𑀓𑀮𑁄𑀧𑁆𑀬’𑀬 𑀫𑀸𑀓𑀸𑀲𑁄, 𑀦𑀸’𑀯𑀓𑀸𑀲𑁄 𑀯𑀺𑀚𑀫𑁆𑀪𑀦𑁂.

𑀯𑀸𑀓𑁆𑀬𑀁 ¶ 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸𑀦𑀁, 𑀅𑀧𑁂𑀢𑀢𑁆𑀣𑀁 𑀅𑀦𑀺𑀦𑁆𑀤𑀺𑀢𑀁;

𑀢𑁂𑀦𑀼’𑀫𑁆𑀫𑀢𑁆𑀢𑀸𑀤𑀺𑀓𑀸𑀦𑀁 𑀢𑀁, 𑀯𑀘𑀦𑀸’𑀜𑁆𑀜𑀢𑁆𑀭 𑀤𑀼𑀲𑁆𑀲𑀢𑀺.

𑀲𑀫𑀼𑀤𑁆𑀤𑁄 𑀧𑀻𑀬𑀢𑁂 𑀲𑁄’𑀬, 𑀫𑀳’𑀫𑀚𑁆𑀚 𑀚𑀭𑀸𑀢𑀼𑀭𑁄;

𑀇𑀫𑁂 𑀕𑀚𑁆𑀚𑀦𑁆𑀢𑀺 𑀚𑀻𑀫𑀽𑀢𑀸, 𑀲𑀓𑁆𑀓𑀲𑁆𑀲𑁂’𑀭𑀸𑀯𑀡𑁄 𑀧𑀺𑀬𑁄.

𑀲𑀼𑀔𑀼𑀫𑀸𑀮𑀸’𑀯𑀺𑀭𑁄𑀥𑀺𑀢𑁆𑀢, 𑀤𑀺𑀢𑁆𑀢𑀪𑀸𑀯𑀧𑁆𑀧𑀪𑀸𑀯𑀺𑀢𑀁;

𑀩𑀦𑁆𑀥𑀦𑀁 𑀩𑀦𑁆𑀥𑀨𑀭𑀼𑀲, 𑀤𑁄𑀲𑀁 𑀲𑀁𑀤𑀽𑀲𑀬𑁂𑀬𑁆𑀬 𑀢𑀁.

𑀧𑀲𑁆𑀲𑀦𑁆𑀢𑀸 𑀭𑀽𑀧𑀯𑀺𑀪𑀯𑀁, 𑀲𑀼𑀡𑀦𑁆𑀢𑀸 𑀫𑀥𑀼𑀭𑀁 𑀕𑀺𑀭𑀁;

𑀘𑀭𑀦𑁆𑀢𑀺 𑀲𑀸𑀥𑀽 𑀲𑀫𑁆𑀩𑀼𑀤𑁆𑀥, 𑀓𑀸𑀮𑁂 𑀓𑁂𑀴𑀺𑀧𑀭𑀫𑁆𑀫𑀼𑀔𑀸.

𑀪𑀸𑀯𑀦𑀸, 𑀤𑀸𑀦, 𑀲𑀻𑀮𑀸𑀦𑀺, 𑀲𑀫𑁆𑀫𑀸 𑀲𑀫𑁆𑀧𑀸𑀤𑀺𑀢𑀸𑀦𑀺’𑀳;

𑀦𑀺𑀩𑁆𑀩𑀸𑀦, 𑀪𑁄𑀕, 𑀲𑀕𑁆𑀕𑀸𑀤𑀺, 𑀲𑀸𑀥𑀦𑀸𑀦𑀺 𑀦 𑀲𑀁𑀲𑀬𑁄.

𑀉𑀤𑁆𑀤𑀺𑀝𑁆𑀞𑀯𑀺𑀲𑀬𑁄 𑀓𑁄𑀘𑀺, 𑀯𑀺𑀲𑁂𑀲𑁄 𑀢𑀸𑀤𑀺𑀲𑁄 𑀬𑀤𑀺;

𑀅𑀦𑀼’𑀤𑁆𑀤𑀺𑀝𑁆𑀞𑁂𑀲𑀼 𑀦𑁂𑀯’𑀢𑁆𑀣𑀺, 𑀤𑁄𑀲𑁄 𑀓𑀫𑀯𑀺𑀮𑀗𑁆𑀖𑀦𑁂.

𑀓𑀼𑀲𑀮𑀸’𑀓𑀼𑀲𑀮𑀁 𑀅𑀩𑁆𑀬𑀸, 𑀓𑀢’𑀫𑀺𑀘𑁆𑀘𑁂𑀲𑀼 𑀧𑀘𑁆𑀙𑀺𑀫𑀁;

𑀅𑀩𑁆𑀬𑀸𑀓𑀢𑀁 𑀧𑀸𑀓𑀤𑀁 𑀦, 𑀧𑀸𑀓𑀤𑀁 𑀧𑀞𑀫𑀤𑁆𑀯𑀬𑀁.

𑀲𑀕𑀼𑀡𑀸𑀦𑀸’𑀯𑀺𑀓𑀭𑀡𑁂, 𑀓𑀸𑀭𑀡𑁂 𑀲𑀢𑀺 𑀢𑀸𑀤𑀺𑀲𑁂;

𑀑𑀘𑀺𑀢𑁆𑀬𑀳𑀻𑀦𑀢𑀸’𑀧𑀢𑁆𑀢𑀺, 𑀦𑀢𑁆𑀣𑀺 𑀪𑀽𑀢𑀢𑁆𑀣𑀲𑀁𑀲𑀺𑀦𑁄.

𑀑𑀘𑀺𑀢𑁆𑀬𑀁 𑀦𑀸𑀫 𑀯𑀺𑀜𑁆𑀜𑁂𑀬𑁆𑀬𑀁, 𑀮𑁄𑀓𑁂 𑀯𑀺𑀔𑁆𑀬𑀸𑀢 𑀫𑀸𑀤𑀭𑀸;

𑀢𑀢𑁆𑀣𑁄’𑀧𑀤𑁂𑀲𑀧𑀪𑀯𑀸, 𑀲𑀼𑀚𑀦𑀸 𑀓𑀯𑀺𑀧𑀼𑀗𑁆𑀕𑀯𑀸.

𑀯𑀺𑀜𑁆𑀜𑀸𑀢𑁄𑀘𑀺𑀢𑁆𑀬𑀯𑀺𑀪𑀯𑁄, 𑀘𑀺𑀢𑁆𑀬𑀳𑀻𑀦𑀁 𑀧𑀭𑀺𑀳𑀭𑁂;

𑀬𑁄 𑀫𑀸𑀭𑀲𑁂𑀦 𑀫𑀸𑀲𑀦𑁆𑀦, 𑀫𑀸𑀲𑀦𑁆𑀦𑀯𑀺𑀚𑀬𑀼’𑀲𑁆𑀲𑀯𑁄;

𑀢𑀺𑀡𑀸𑀬𑀧𑀺 𑀦 𑀫𑀜𑁆𑀜𑀺𑀢𑁆𑀣, 𑀲𑁄 𑀯𑁄 𑀤𑁂𑀢𑀼 𑀚𑀬𑀁 𑀚𑀺𑀦𑁄.

𑀆𑀭𑀤𑁆𑀥𑀓𑀢𑁆𑀢𑀼𑀓𑀫𑁆𑀫𑀸𑀤𑀺, 𑀓𑀫𑀸’𑀢𑀺𑀓𑁆𑀓𑀫𑀮𑀗𑁆𑀖𑀦𑁂;

𑀪𑀕𑁆𑀕𑀭𑀻𑀢𑀺𑀯𑀺𑀭𑁄𑀥𑁄’𑀬𑀁, 𑀕𑀢𑀺𑀁 𑀦 𑀓𑁆𑀯𑀸’𑀧𑀺 𑀯𑀺𑀦𑁆𑀤𑀢𑀺.

𑀲𑀼𑀚𑀦’𑀜𑁆𑀜𑀸𑀦 𑀫𑀺𑀢𑁆𑀣𑀻𑀦𑀁, ¶ 𑀯𑀺𑀲𑁆𑀲𑀸𑀲𑁄 𑀦𑁄’𑀧𑀧𑀚𑁆𑀚𑀢𑁂;

𑀯𑀺𑀲𑀲𑁆𑀲 𑀲𑀺𑀗𑁆𑀕𑀺𑀦𑁄 𑀭𑁄𑀕, 𑀦𑀤𑀻𑀭𑀸𑀚𑀓𑀼𑀮𑀲𑁆𑀲 𑀘.

𑀪𑁂𑀲𑀚𑁆𑀚𑁂 𑀯𑀺𑀳𑀺𑀢𑁂 𑀲𑀼𑀤𑁆𑀥, 𑀩𑀼𑀤𑁆𑀥𑀸𑀤𑀺𑀭𑀢𑀦𑀢𑁆𑀢𑀬𑁂;

𑀧𑀲𑀸𑀤 𑀫𑀸𑀘𑀭𑁂 𑀦𑀺𑀘𑁆𑀘𑀁, 𑀲𑀚𑁆𑀚𑀦𑁂 𑀲𑀕𑀼𑀡𑁂𑀧𑀺 𑀘.

𑀫𑀼𑀦𑀺𑀦𑁆𑀤𑀘𑀦𑁆𑀤𑀺𑀫𑀸’𑀮𑁄𑀓, 𑀭𑀲 𑀮𑁄𑀮 𑀯𑀺𑀮𑁄𑀘𑀦𑁄;

𑀚𑀦𑁄’𑀯𑀓𑁆𑀓𑀦𑁆𑀢𑀧𑀦𑁆𑀣𑁄’𑀯, 𑀭𑀁𑀲𑀺𑀤𑀲𑁆𑀲𑀦𑀧𑀻𑀡𑀺𑀢𑁄.

𑀲𑀁𑀲𑀬𑀸𑀬𑁂’𑀯 𑀬𑀁𑀓𑀺𑀜𑁆𑀘𑀺, 𑀬𑀤𑀺 𑀓𑀻𑀴𑀸𑀤𑀺𑀳𑁂𑀢𑀼𑀦𑀸;

𑀧𑀬𑀼𑀚𑁆𑀚𑀢𑁂 𑀦 𑀤𑁄𑀲𑁄’𑀯, 𑀲𑀲𑀁𑀲𑀬𑀲𑀫𑀧𑁆𑀧𑀺𑀢𑁄.

𑀬𑀸𑀢𑁂 𑀤𑀼𑀢𑀺𑀬𑀁 𑀦𑀺𑀮𑀬𑀁, 𑀕𑀭𑀼𑀫𑁆𑀳𑀺 𑀲𑀓𑀕𑁂𑀳𑀢𑁄;

𑀧𑀸𑀧𑀼𑀡𑁂𑀬𑁆𑀬𑀸𑀫 𑀦𑀺𑀬𑀢𑀁, 𑀲𑀼𑀔’𑀫𑀚𑁆𑀛𑀬𑀦𑀸’𑀤𑀺𑀦𑀸.

𑀲𑀼𑀪𑀕𑀸 𑀪𑀕𑀺𑀦𑀻 𑀲𑀸’𑀬𑀁, 𑀏𑀢𑀲𑁆𑀲𑀺’𑀘𑁆𑀘𑁂𑀯𑀫𑀸𑀤𑀺𑀓𑀁;

𑀦 ‘𑀕𑀸𑀫𑁆𑀫’𑀫𑀺𑀢𑀺 𑀦𑀺𑀤𑁆𑀤𑀺𑀝𑁆𑀞𑀁, 𑀓𑀯𑀻𑀳𑀺 𑀲𑀓𑀮𑁂𑀳𑀺𑀧𑀺.

𑀤𑀼𑀝𑁆𑀞𑀸’𑀮𑀗𑁆𑀓𑀸𑀭𑀯𑀺𑀕𑀫𑁂, 𑀲𑁄𑀪𑀦𑀸’𑀮𑀗𑁆𑀓𑀢𑀺𑀓𑁆𑀓𑀫𑁄;

𑀅𑀮𑀗𑁆𑀓𑀸𑀭𑀧𑀭𑀺𑀘𑁆𑀙𑁂𑀤𑁂, 𑀆𑀯𑀺𑀪𑀸𑀯𑀁 𑀕𑀫𑀺𑀲𑁆𑀲𑀢𑀺.

𑀤𑁄𑀲𑁂 𑀧𑀭𑀻𑀳𑀭𑀺𑀢𑀼 𑀫𑁂𑀲 𑀯𑀭𑁄’𑀧𑀤𑁂𑀲𑁄,

𑀲𑀢𑁆𑀣𑀦𑁆𑀢𑀭𑀸𑀦𑀼𑀲𑀭𑀡𑁂𑀦 𑀓𑀢𑁄 𑀫𑀬𑁂𑀯𑀁;

𑀯𑀺𑀜𑁆𑀜𑀸𑀬𑀺’𑀫𑀁 𑀕𑀭𑀼𑀯𑀭𑀸𑀦’𑀥𑀺𑀓’𑀧𑁆𑀧𑀲𑀸𑀤𑀸,

𑀤𑁄𑀲𑁂 𑀧𑀭𑀁 𑀧𑀭𑀺𑀳𑀭𑁂𑀬𑁆𑀬 𑀬𑀲𑁄𑀪𑀺𑀮𑀸𑀲𑀻.

𑀇𑀢𑀺 𑀲𑀗𑁆𑀖𑀭𑀓𑁆𑀔𑀺𑀢𑀫𑀳𑀸𑀲𑀸𑀫𑀺𑀯𑀺𑀭𑀘𑀺𑀢𑁂 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂

𑁩. 𑀕𑀼𑀡𑀸𑀯𑀩𑁄𑀥-𑀢𑀢𑀺𑀬𑀧𑀭𑀺𑀘𑁆𑀙𑁂𑀤

𑀲𑀫𑁆𑀪𑀯𑀦𑁆𑀢𑀺 ¶ 𑀕𑀼𑀡𑀸 𑀬𑀲𑁆𑀫𑀸, 𑀤𑁄𑀲𑀸𑀦𑁂’𑀯’𑀫𑀢𑀺𑀓𑁆𑀓𑀫𑁂;

𑀤𑀲𑁆𑀲𑁂𑀲𑁆𑀲𑀁 𑀢𑁂 𑀢𑀢𑁄 𑀤𑀸𑀦𑀺, 𑀲𑀤𑁆𑀤𑁂 𑀲𑀫𑁆𑀪𑀽𑀲𑀬𑀦𑁆𑀢𑀺 𑀬𑁂.

𑀧𑀲𑀸𑀤𑁄’𑀚𑁄, 𑀫𑀥𑀼𑀭𑀢𑀸, 𑀲𑀫𑀢𑀸, 𑀲𑀼𑀔𑀼𑀫𑀸𑀮𑀢𑀸;

𑀲𑀺𑀮𑁂𑀲𑁄’𑀤𑀭𑀢𑀸, 𑀓𑀦𑁆𑀢𑀺, 𑀅𑀢𑁆𑀣𑀩𑁆𑀬𑀢𑁆𑀢𑀺, 𑀲𑀫𑀸𑀥𑀬𑁄.

𑀕𑀼𑀡𑁂𑀳𑁂’𑀢𑁂𑀳𑀺 𑀲𑀫𑁆𑀧𑀦𑁆𑀦𑁄, 𑀩𑀦𑁆𑀥𑁄 𑀓𑀯𑀺𑀫𑀦𑁄𑀳𑀭𑁄;

𑀲𑀫𑁆𑀧𑀸𑀤𑀺𑀬𑀢𑀺 𑀓𑀢𑁆𑀢𑀽𑀦𑀁, 𑀓𑀺𑀢𑁆𑀢𑀺 𑀫𑀘𑁆𑀘𑀦𑁆𑀢𑀦𑀺𑀫𑁆𑀫𑀮𑀁.

𑀅𑀤𑀽𑀭𑀸𑀳𑀺𑀢𑀲𑀫𑁆𑀩𑀦𑁆𑀥, 𑀲𑀼𑀪𑀕𑀸 𑀬𑀸 𑀧𑀤𑀸’𑀯𑀮𑀺;

𑀲𑀼𑀧𑀲𑀺𑀤𑁆𑀥𑀸’𑀪𑀺𑀥𑁂𑀬𑁆𑀬𑀸’𑀬𑀁, 𑀧𑀲𑀸𑀤𑀁 𑀚𑀦𑀬𑁂 𑀬𑀣𑀸.

𑀅𑀮𑀗𑁆𑀓𑀭𑁄𑀦𑁆𑀢𑀸 𑀯𑀤𑀦𑀁, 𑀫𑀼𑀦𑀺𑀦𑁄’𑀥𑀭𑀭𑀁𑀲𑀺𑀬𑁄;

𑀲𑁄𑀪𑀦𑁆𑀢𑁂’𑀭𑀼𑀡𑀭𑀁𑀲𑀻’𑀯, 𑀲𑀫𑁆𑀧𑀢𑀦𑁆𑀢𑀸’𑀫𑁆𑀩𑀼𑀚𑁄’𑀤𑀭𑁂.

𑀑𑀚𑁄 𑀲𑀫𑀸𑀲𑀩𑀸𑀳𑀼𑀮𑁆𑀬, 𑀫𑁂𑀲𑁄 𑀕𑀚𑁆𑀚𑀲𑁆𑀲 𑀚𑀻𑀯𑀺𑀢𑀁;

𑀧𑀚𑁆𑀚𑁂𑀧𑁆𑀬’𑀦𑀸’𑀓𑀼𑀮𑁄 𑀲𑁄’𑀬𑀁,

𑀫𑀼𑀦𑀺𑀦𑁆𑀤 𑀫𑀦𑁆𑀤 𑀲𑀜𑁆𑀚𑀸𑀢, 𑀳𑀸𑀲 𑀘𑀦𑁆𑀤𑀦 𑀮𑀺𑀫𑁆𑀧𑀺𑀢𑀸;

𑀧𑀮𑁆𑀮𑀯𑀸 𑀥𑀯𑀮𑀸 𑀢𑀲𑁆𑀲𑁂, 𑀯𑁂𑀓𑁄 𑀦𑀸’𑀥𑀭𑀧𑀮𑁆𑀮𑀯𑁄.

𑀧𑀤𑀸’𑀪𑀺𑀥𑁂𑀬𑁆𑀬𑀯𑀺𑀲𑀬𑀁, 𑀲𑀫𑀸𑀲 𑀩𑁆𑀬𑀸𑀲 𑀲𑀫𑁆𑀪𑀯𑀁;

𑀬𑀁 𑀧𑀸𑀭𑀺𑀡𑀢𑁆𑀬𑀁 𑀳𑁄𑀢𑀻’𑀳, 𑀲𑁄𑀧𑀺 𑀑𑀚𑁄’𑀯 𑀢𑀁 𑀬𑀣𑀸.

𑀚𑁄𑀢𑀬𑀺𑀢𑁆𑀯𑀸𑀦 𑀲𑀤𑁆𑀥𑀫𑁆𑀫𑀁, 𑀲𑀦𑁆𑀢𑀸𑀭𑁂𑀢𑁆𑀯𑀸 𑀲𑀤𑁂𑀯𑀓𑁂;

𑀚𑀮𑀺𑀢𑁆𑀯𑀸 𑀅𑀕𑁆𑀕𑀺𑀔𑀦𑁆𑀥𑁄’𑀯, 𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑀫𑀢𑁆𑀣𑀓𑀝𑁆𑀞𑀻 𑀫𑀢𑀲𑁆𑀲𑀸’𑀧𑀺, 𑀭𑀚𑁄𑀪𑀸𑀯𑀁 𑀯𑀚𑀦𑁆𑀢𑀼 𑀫𑁂;

𑀬𑀢𑁄 𑀧𑀼𑀜𑁆𑀜𑁂𑀦 𑀢𑁂 𑀲𑁂𑀦𑁆𑀢𑀼, 𑀚𑀺𑀦 𑀧𑀸𑀤’𑀫𑁆𑀩𑀼𑀚𑀤𑁆𑀯𑀬𑁂.

𑀇𑀘𑁆𑀘𑀢𑁆𑀭 ¶ 𑀦𑀺𑀘𑁆𑀘𑀧𑁆𑀧𑀡𑀢𑀺, 𑀕𑁂𑀥𑁄 𑀲𑀸𑀥𑀼 𑀧𑀤𑀺𑀲𑁆𑀲𑀢𑀺;

𑀚𑀸𑀬𑀢𑁂’𑀬𑀁 𑀕𑀼𑀡𑁄 𑀢𑀺𑀓𑁆𑀔, 𑀧𑀜𑁆𑀜𑀸𑀦𑀫𑀪𑀺𑀬𑁄𑀕𑀢𑁄.

𑀫𑀥𑀼𑀭𑀢𑁆𑀢𑀁 𑀧𑀤𑀸𑀲𑀢𑁆𑀢𑀺, 𑀭’𑀦𑀼𑀧𑁆𑀧𑀸𑀲𑀯𑀲𑀸 𑀤𑁆𑀯𑀺𑀥𑀸;

𑀲𑀺𑀬𑀸 𑀲𑀫𑀲𑀼𑀢𑀺 𑀧𑀼𑀩𑁆𑀩𑀸, 𑀯𑀡𑁆𑀡𑀸’𑀯𑀼𑀢𑁆𑀢𑀺 𑀧𑀭𑁄 𑀬𑀣𑀸.

𑀬𑀤𑀸 𑀏𑀲𑁄’𑀪𑀺𑀲𑀫𑁆𑀩𑁄𑀥𑀺𑀁, 𑀲𑀫𑁆𑀧𑀢𑁆𑀢𑁄 𑀫𑀼𑀦𑀺𑀧𑀼𑀗𑁆𑀕𑀯𑁄;

𑀢𑀤𑀸 𑀧𑀪𑀼𑀢𑀺 𑀥𑀫𑁆𑀫𑀲𑁆𑀲, 𑀮𑁄𑀓𑁂 𑀚𑀸𑀢𑁄 𑀫𑀳𑀼’𑀲𑁆𑀲𑀯𑁄.

𑀫𑀼𑀦𑀺𑀦𑁆𑀤𑀫𑀦𑁆𑀤𑀳𑀸𑀲𑀸 𑀢𑁂, 𑀓𑀼𑀦𑁆𑀤 𑀲𑀦𑁆𑀤𑁄𑀳𑀯𑀺𑀩𑁆𑀪𑀫𑀸;

𑀤𑀺𑀲𑀦𑁆𑀢 𑀫𑀦𑀼𑀥𑀸𑀯𑀦𑁆𑀢𑀺, 𑀳𑀲𑀦𑁆𑀢𑀸 𑀘𑀦𑁆𑀤𑀓𑀦𑁆𑀢𑀺𑀬𑁄.

𑀲𑀩𑁆𑀩𑀓𑁄𑀫𑀮𑀯𑀡𑁆𑀡𑁂𑀳𑀺, 𑀦𑀸’𑀦𑀼𑀧𑁆𑀧𑀸𑀲𑁄 𑀧𑀲𑀁𑀲𑀺𑀬𑁄;

𑀬𑀣𑀸’𑀬𑀁 𑀫𑀸𑀮𑀢𑀻𑀫𑀸𑀮𑀸, 𑀮𑀺𑀦 𑀮𑁄𑀮𑀸’𑀮𑀺𑀫𑀸𑀮𑀺𑀦𑀻.

𑀫𑀼𑀤𑀽𑀳𑀺 𑀯𑀸 𑀓𑁂𑀯𑀮𑁂𑀳𑀺, 𑀓𑁂𑀯𑀮𑁂𑀳𑀺 𑀨𑀼𑀝𑁂𑀳𑀺 𑀯𑀸,

𑀫𑀺𑀲𑁆𑀲𑁂𑀳𑀺 𑀯𑀸 𑀢𑀺𑀥𑀸 𑀳𑁄𑀢𑀺, 𑀯𑀡𑁆𑀡𑁂𑀳𑀺 𑀲𑀫𑀢𑀸 𑀬𑀣𑀸.

𑀓𑁄𑀓𑀺𑀮𑀸’𑀮𑀸𑀧𑀲𑀁𑀯𑀸𑀤𑀻, 𑀫𑀼𑀦𑀺𑀦𑁆𑀤𑀸’𑀮𑀸𑀧𑀯𑀺𑀩𑁆𑀪𑀫𑁄;

𑀳𑀤𑀬𑀗𑁆𑀕𑀫𑀢𑀁 𑀬𑀸𑀢𑀺, 𑀲𑀢𑀁 𑀤𑁂𑀢𑀺 𑀘 𑀦𑀺𑀩𑁆𑀩𑀼𑀢𑀺𑀁.

𑀲𑀫𑁆𑀪𑀸𑀯𑀦𑀻𑀬𑀲𑀫𑁆𑀪𑀸𑀯𑀁, 𑀪𑀕𑀯𑀦𑁆𑀢𑀁 𑀪𑀯𑀦𑁆𑀢𑀕𑀼𑀁;

𑀪𑀯𑀦𑁆𑀢𑀲𑀸𑀥𑀦𑀸’𑀓𑀗𑁆𑀔𑀻, 𑀓𑁄 𑀦 𑀲𑀫𑁆𑀪𑀸𑀯𑀬𑁂 𑀯𑀺𑀪𑀼𑀁.

𑀮𑀤𑁆𑀥𑀘𑀦𑁆𑀤𑀦𑀲𑀁𑀲𑀕𑁆𑀕, 𑀲𑀼𑀕𑀦𑁆𑀥𑀺 𑀫𑀮𑀬𑀸’𑀦𑀺𑀮𑁄;

𑀫𑀦𑁆𑀤 𑀫𑀸𑀬𑀸𑀢𑀺 𑀪𑀻𑀢𑁄’𑀯, 𑀫𑀼𑀦𑀺𑀦𑁆𑀤𑀫𑀼𑀔𑀫𑀸𑀭𑀼𑀢𑀸.

𑀅𑀦𑀺𑀝𑁆𑀞𑀼𑀭’𑀓𑁆𑀔𑀭’𑀧𑁆𑀧𑀸𑀬𑀸, 𑀲𑀩𑁆𑀩𑀓𑁄𑀫𑀮 𑀦𑀺𑀲𑁆𑀲𑀝𑀸;

𑀓𑀺𑀘𑁆𑀙𑀫𑀼𑀘𑁆𑀘𑀸𑀭𑀡𑀸’𑀧𑁂𑀢, 𑀩𑁆𑀬𑀜𑁆𑀚𑀦𑀸 𑀲𑀼𑀔𑀼𑀫𑀸𑀮𑀢𑀸.

𑀧𑀲𑁆𑀲𑀦𑁆𑀢𑀸 𑀭𑀽𑀧𑀯𑀺𑀪𑀯𑀁, 𑀲𑀼𑀡𑀦𑁆𑀢𑀸 𑀫𑀥𑀼𑀭𑀁 𑀕𑀺𑀭𑀁;

𑀘𑀭𑀦𑁆𑀢𑀺 𑀲𑀸𑀥𑀽 [𑀲𑀸𑀥𑀼 (𑀲𑀻-𑀙𑀦𑁆𑀥𑀸𑀦𑀼𑀭𑀓𑁆𑀔𑀡𑀢𑁆𑀣𑀁)] 𑀲𑀫𑁆𑀩𑀼𑀤𑁆𑀥, 𑀓𑀸𑀮𑁂 𑀓𑁂𑀴𑀺𑀧𑀭𑀫𑁆𑀫𑀼𑀔𑀸.

𑀅𑀮𑀗𑁆𑀓𑀸𑀭𑀯𑀺𑀳𑀻𑀦𑀸’𑀧𑀺, 𑀲𑀢𑀁 𑀲𑀫𑁆𑀫𑀼𑀔𑀢𑁂’𑀤𑀺𑀲𑀻;

𑀆𑀭𑁄𑀳𑀢𑀺 𑀯𑀺𑀲𑁂𑀲𑁂𑀦, 𑀭𑀫𑀡𑀻𑀬𑀸 𑀢’𑀤𑀼𑀚𑁆𑀚𑀮𑀸.

𑀭𑁄𑀫𑀜𑁆𑀘 ¶ 𑀧𑀺𑀜𑁆𑀙 𑀭𑀘𑀦𑀸, 𑀲𑀸𑀥𑀼 𑀯𑀸𑀤𑀸𑀳𑀺𑀢𑀤𑁆𑀥𑀦𑀻;

𑀮𑀴𑀦𑁆𑀢𑀺’𑀫𑁂 𑀫𑀼𑀦𑀺𑀫𑁂𑀖𑀼, 𑀫𑁆𑀫𑀤𑀸 𑀲𑀸𑀥𑀼 𑀲𑀺𑀔𑀸𑀯𑀮𑀸.

𑀲𑀼𑀔𑀼𑀫𑀸𑀮𑀢𑁆𑀢 𑀫𑀢𑁆𑀣𑁂’𑀯, 𑀧𑀤𑀢𑁆𑀣𑀯𑀺𑀲𑀬𑀫𑁆𑀧𑀺 𑀘;

𑀬𑀣𑀸 𑀫𑀢𑀸𑀤𑀺𑀲𑀤𑁆𑀤𑁂𑀲𑀼, 𑀓𑀺𑀢𑁆𑀢𑀺𑀲𑁂𑀲𑀸𑀤𑀺𑀓𑀺𑀢𑁆𑀢𑀦𑀁.

𑀲𑀺𑀮𑀺𑀝𑁆𑀞 𑀧𑀤 𑀲𑀁𑀲𑀕𑁆𑀕, 𑀭𑀫𑀡𑀻𑀬 𑀕𑀼𑀡𑀸’𑀮𑀬𑁄;

𑀲𑀩𑀦𑁆𑀥𑀕𑀸𑀭𑀯𑁄 𑀲𑁄’𑀬𑀁, 𑀲𑀺𑀮𑁂𑀲𑁄 𑀦𑀸𑀫 𑀢𑀁 𑀬𑀣𑀸.

𑀩𑀸𑀮𑀺’𑀦𑁆𑀤𑀼𑀯𑀺𑀩𑁆𑀪𑀫’𑀘𑁆𑀙𑁂𑀤𑀺, 𑀦𑀔𑀭𑀸’𑀯𑀮𑀺 𑀓𑀦𑁆𑀢𑀺𑀪𑀺;

𑀲𑀸 𑀫𑀼𑀦𑀺𑀦𑁆𑀤𑀧𑀤’𑀫𑁆𑀪𑁄𑀚, 𑀓𑀦𑁆𑀢𑀺 𑀯𑁄 𑀯𑀮𑀺𑀢𑀸’𑀯𑀢𑀁.

𑀉𑀓𑁆𑀓𑀁𑀲𑀯𑀦𑁆𑀢𑁄 𑀬𑁄𑀓𑁄𑀘𑀺, 𑀕𑀼𑀡𑁄 𑀬𑀤𑀺 𑀧𑀢𑀻𑀬𑀢𑁂;

𑀉𑀤𑀸𑀭𑁄’𑀬𑀁 𑀪𑀯𑁂 𑀢𑁂𑀦, 𑀲𑀦𑀸𑀣𑀸 𑀩𑀦𑁆𑀥𑀧𑀤𑁆𑀥𑀢𑀺.

𑀧𑀸𑀤𑀫𑁆𑀪𑁄𑀚 𑀭𑀚𑁄 𑀮𑀺𑀢𑁆𑀢, 𑀕𑀢𑁆𑀢𑀸 𑀬𑁂 𑀢𑀯 𑀕𑁄𑀢𑀫;

𑀅𑀳𑁄! 𑀢𑁂 𑀚𑀦𑁆𑀢𑀯𑁄 𑀬𑀦𑁆𑀢𑀺, 𑀲𑀩𑁆𑀩𑀣𑀸 𑀦𑀺𑀭𑀚𑀢𑁆𑀢𑀦𑀁.

𑀏𑀯𑀁 𑀚𑀺𑀦𑀸’𑀦𑀼𑀪𑀸𑀯𑀲𑁆𑀲, 𑀲𑀫𑀼𑀓𑁆𑀓𑀁𑀲𑁄’𑀢𑁆𑀭 𑀤𑀺𑀲𑁆𑀲𑀢𑀺;

𑀧𑀜𑁆𑀜𑀯𑀸 𑀯𑀺𑀥𑀺𑀦𑀸’𑀦𑁂𑀦, 𑀘𑀺𑀦𑁆𑀢𑀬𑁂 𑀧𑀭 𑀫𑀻𑀤𑀺𑀲𑀁.

𑀉𑀤𑀸𑀭𑁄 𑀲𑁄𑀧𑀺 𑀯𑀺𑀜𑁆𑀜𑁂𑀬𑁆𑀬𑁄, 𑀬𑀁 𑀧𑀲𑀢𑁆𑀣 𑀯𑀺𑀲𑁂𑀲𑀦𑀁;

𑀬𑀣𑀸 𑀓𑀻𑀴𑀸𑀲𑀭𑁄 𑀮𑀻𑀮𑀸, 𑀳𑀸𑀲𑁄 𑀳𑁂𑀫𑀗𑁆𑀕𑀤𑀸’𑀤𑀬𑁄.

𑀮𑁄𑀓𑀺𑀬’𑀢𑁆𑀣𑀸’𑀦’𑀢𑀺𑀓𑁆𑀓𑀦𑁆𑀢𑀸, 𑀓𑀦𑁆𑀢𑀸 𑀲𑀩𑁆𑀩𑀚𑀦𑀸𑀦𑀧𑀺;

𑀓𑀦𑁆𑀢𑀺 𑀦𑀸𑀫𑀸’𑀢𑀺𑀯𑀼𑀢𑁆𑀢𑀲𑁆𑀲, 𑀯𑀼𑀢𑁆𑀢𑀸 𑀲𑀸 𑀧𑀭𑀺𑀳𑀸𑀭𑀢𑁄.

𑀅𑀢𑁆𑀣𑀩𑁆𑀬𑀢𑁆𑀢𑀸’𑀪𑀺𑀥𑁂𑀬𑁆𑀬𑀲𑁆𑀲𑀸,

𑀲𑀸’𑀬𑀁 𑀢𑀤𑀼𑀪𑀬𑀸 𑀦𑁂𑀬𑁆𑀬, 𑀧𑀭𑀺𑀳𑀸𑀭𑁂 𑀧𑀤𑀲𑁆𑀲𑀺𑀢𑀸;

𑀬𑀣𑀸 𑀫𑀭𑀻𑀘𑀺𑀘𑁆𑀘𑀸𑀤𑀺 𑀘, 𑀫𑀦𑁄𑀦𑀼𑀭𑀜𑁆𑀚𑀦𑁄𑀘𑁆𑀘𑀸𑀤𑀺.

𑀲𑀪𑀸𑀯𑀸’𑀫𑀮𑀢𑀸 𑀥𑀻𑀭, 𑀫𑀼𑀥𑀸 𑀧𑀸𑀤𑀦𑀔𑁂𑀲𑀼 𑀢𑁂;

𑀬𑀢𑁄 𑀢𑁂’𑀯𑀦𑀢𑀸’𑀦𑀦𑁆𑀢, 𑀫𑁄𑀴𑀺𑀘𑁆𑀙𑀸𑀬𑀸 𑀚𑀳𑀦𑁆𑀢𑀺 𑀦𑁄.

‘𑀩𑀦𑁆𑀥𑀲𑀸𑀭𑁄’𑀢𑀺 𑀫𑀜𑁆𑀜𑀦𑁆𑀢𑀺, 𑀬𑀁 𑀲𑀫𑀕𑁆𑀕𑀸𑀧𑀺 𑀯𑀺𑀜𑁆𑀜𑀼𑀦𑁄;

𑀤𑀲𑁆𑀲𑀦𑀸’𑀯𑀲𑀭𑀁 𑀧𑀢𑁆𑀢𑁄, 𑀲𑀫𑀸𑀥𑀺 𑀦𑀸𑀫’𑀬𑀁 𑀕𑀼𑀡𑁄.

𑀅𑀜𑁆𑀜𑀥𑀫𑁆𑀫𑁄 𑀢𑀢𑁄’𑀜𑁆𑀜𑀢𑁆𑀣, 𑀮𑁄𑀓𑀲𑀻𑀫𑀸’𑀦𑀼𑀭𑁄𑀥𑀢𑁄;

𑀲𑀫𑁆𑀫𑀸 𑀆𑀥𑀻𑀬𑀢𑁂’𑀘𑁆𑀘𑁂’𑀲𑁄, ‘𑀲𑀫𑀸𑀥𑀻’𑀢𑀺 𑀦𑀺𑀭𑀼𑀘𑁆𑀘𑀢𑀺.

𑀅𑀧𑀸𑀡𑁂 ¶ 𑀧𑀸𑀡𑀻𑀦𑀁 𑀥𑀫𑁆𑀫𑁄, 𑀲𑀫𑁆𑀫𑀸 𑀆𑀥𑀻𑀬𑀢𑁂 𑀓𑁆𑀯𑀘𑀺,;

𑀦𑀺𑀭𑀽𑀧𑁂 𑀭𑀽𑀧𑀬𑀼𑀢𑁆𑀢𑀲𑁆𑀲, 𑀦𑀺𑀭𑀲𑁂 𑀲𑀭𑀲𑀲𑁆𑀲, 𑀘.

𑀅𑀤𑁆𑀭𑀯𑁂 𑀤𑁆𑀭𑀯𑀬𑀼𑀢𑁆𑀢𑀲𑁆𑀲, 𑀅𑀓𑀢𑁆𑀢𑀭𑀺𑀧𑀺 𑀓𑀢𑁆𑀢𑀼𑀢𑀸,;

𑀓𑀞𑀺𑀦𑀲𑁆𑀲𑀸’𑀲𑀭𑀻𑀭𑁂,𑀧𑀺, 𑀭𑀽𑀧𑀁 𑀢𑁂𑀲𑀁 𑀓𑀫𑀸 𑀲𑀺𑀬𑀸.

𑀉𑀡𑁆𑀡𑀸 𑀧𑀼𑀡𑁆𑀡𑀺’𑀦𑁆𑀤𑀼𑀦𑀸 𑀦𑀸𑀣! 𑀤𑀺𑀯𑀸𑀧𑀺 𑀲𑀳 𑀲𑀗𑁆𑀕𑀫𑀸;

𑀯𑀺𑀦𑀺𑀤𑁆𑀤𑀸 𑀲𑀫𑁆𑀧𑀫𑁄𑀤𑀦𑁆𑀢𑀺, 𑀫𑀜𑁆𑀜𑁂 𑀓𑀼𑀫𑀼𑀤𑀺𑀦𑀻 𑀢𑀯.

𑀤𑀬𑀸𑀭𑀲𑁂𑀲𑀼 𑀫𑀼𑀚𑁆𑀚𑀦𑁆𑀢𑀸, 𑀚𑀦𑀸’𑀫𑀢𑀭𑀲𑁂𑀲𑁆𑀯𑀺’𑀯;

𑀲𑀼𑀔𑀺𑀢𑀸 𑀳𑀢𑀤𑁄𑀲𑀸 𑀢𑁂, 𑀦𑀸𑀣! 𑀧𑀸𑀤’𑀫𑁆𑀩𑀼𑀚𑀸’𑀦𑀢𑀸.

𑀫𑀥𑀼𑀭𑁂𑀧𑀺 𑀕𑀼𑀡𑁂 𑀥𑀻𑀭, 𑀦’𑀧𑁆𑀧𑀲𑀻𑀤𑀦𑁆𑀢𑀺 𑀬𑁂 𑀢𑀯;

𑀓𑀻𑀤𑀺𑀲𑀻 𑀫𑀦𑀲𑁄𑀯𑀼𑀢𑁆𑀢𑀺, 𑀢𑁂𑀲𑀁 𑀔𑀸𑀭𑀕𑀼𑀡𑀸𑀦 𑀪𑁄’.

𑀲𑀩𑁆𑀩𑀢𑁆𑀣𑀲𑀺𑀤𑁆𑀥! 𑀘𑀽𑀴𑀓, 𑀧𑀼𑀝𑀧𑁂𑀬𑁆𑀬𑀸 𑀫𑀳𑀸𑀕𑀼𑀡𑀸;

𑀤𑀺𑀲𑀸 𑀲𑀫𑀦𑁆𑀢𑀸 𑀥𑀸𑀯𑀦𑁆𑀢𑀺, 𑀓𑀼𑀦𑁆𑀤𑀲𑁄𑀪𑀸 𑀲 𑀮𑀓𑁆𑀔𑀡𑀸.

𑀫𑀸𑀭𑀸’𑀭𑀺𑀩𑀮𑀯𑀺𑀲𑁆𑀲𑀝𑁆𑀞𑀸, 𑀓𑀼𑀡𑁆𑀞𑀸 𑀦𑀸𑀦𑀸𑀯𑀺𑀥𑀸’𑀬𑀼𑀥𑀸;

𑀮𑀚𑁆𑀚𑀫𑀸𑀦𑀸’𑀜𑁆𑀜𑀯𑁂𑀲𑁂𑀦, 𑀚𑀺𑀦! 𑀧𑀸𑀤𑀸’𑀦𑀢𑀸 𑀢𑀯.

𑀲𑀤𑁆𑀥𑀫𑁆𑀫𑀭𑀁𑀲𑀺𑀦𑀸 𑀪𑀸𑀢𑀺, 𑀪𑀺𑀦𑁆𑀤 𑀫𑀦𑁆𑀤𑀢𑀫𑀁 𑀧𑀭𑀁.

𑀯𑀫𑀦𑀼’𑀕𑁆𑀕𑀺𑀭𑀦𑀸𑀤𑁆𑀬𑁂’𑀢𑀁, 𑀕𑀼𑀡𑀯𑀼𑀢𑁆𑀬’𑀧𑀭𑀺𑀘𑁆𑀘𑀼𑀢𑀁;

𑀅𑀢𑀺𑀲𑀼𑀦𑁆𑀤𑀭 𑀫𑀜𑁆𑀜𑀁 𑀢𑀼, 𑀓𑀸𑀫𑀁 𑀯𑀺𑀦𑁆𑀤𑀢𑀺 𑀕𑀸𑀫𑁆𑀫𑀢𑀁.

𑀓𑀦𑁆𑀢𑀻𑀦𑀁 𑀯𑀫𑀦𑀩𑁆𑀬𑀸𑀚𑀸, 𑀫𑀼𑀦𑀺𑀧𑀸𑀤𑀦𑀔𑀸’𑀯𑀮𑀻;

𑀘𑀦𑁆𑀤𑀓𑀦𑁆𑀢𑀻 𑀧𑀺𑀯𑀦𑁆𑀢𑀻’𑀯, 𑀦𑀺𑀧𑁆𑀧𑀪𑀁 𑀢𑀁 𑀓𑀭𑁄𑀦𑁆𑀢𑀺𑀬𑁄.

𑀅𑀘𑀺𑀢𑁆𑀢𑀓𑀢𑁆𑀢𑀼𑀓𑀁 ¶ 𑀭𑀼𑀘𑁆𑀬 [𑀭𑀼𑀘𑁆𑀘 (𑀲𑀻.)], 𑀫𑀺𑀘𑁆𑀘𑁂𑀯𑀁 𑀕𑀼𑀡𑀓𑀫𑁆𑀫𑀢𑀁;

𑀲𑀘𑀺𑀢𑁆𑀢𑀓𑀢𑁆𑀢𑀼𑀓𑀁 𑀧𑁂’𑀢𑀁, 𑀕𑀼𑀡𑀓𑀫𑁆𑀫𑀁 𑀬𑀤𑀼’𑀢𑁆𑀢𑀫𑀁.

𑀉𑀕𑁆𑀕𑀺𑀭𑀦𑁆𑀢𑁄’𑀯 𑀲𑀲𑁆𑀦𑁂𑀳, 𑀭𑀲𑀁 𑀚𑀺𑀦𑀯𑀭𑁄 𑀚𑀦𑁂;

𑀪𑀸𑀲𑀦𑁆𑀢𑁄 𑀫𑀥𑀼𑀭𑀁 𑀥𑀫𑁆𑀫𑀁, 𑀓𑀁 𑀦 𑀲𑀧𑁆𑀧𑀻𑀡𑀬𑁂 𑀚𑀦𑀁.

𑀬𑁄 𑀲𑀤𑁆𑀤𑀲𑀢𑁆𑀣𑀓𑀼𑀲𑀮𑁄 𑀓𑀼𑀲𑀮𑁄 𑀦𑀺𑀖𑀡𑁆𑀟𑀼,

𑀙𑀦𑁆𑀤𑁄𑀅𑀮𑀗𑁆𑀓𑀢𑀺𑀲𑀼 𑀦𑀺𑀘𑁆𑀘𑀓𑀢𑀸’𑀪𑀺𑀬𑁄𑀕𑁄;

𑀲𑁄’𑀬𑀁 𑀓𑀯𑀺𑀢𑁆𑀢𑀯𑀺𑀓𑀮𑁄𑀧𑀺 𑀓𑀯𑀻𑀲𑀼 𑀲𑀗𑁆𑀔𑁆𑀬,

𑀫𑁄𑀕𑁆𑀕𑀬𑁆𑀳 𑀯𑀺𑀦𑁆𑀤𑀢𑀺 𑀳𑀺 𑀓𑀺𑀢𑁆𑀢𑀺’ 𑀫𑀫𑀦𑁆𑀤𑀭𑀽𑀧𑀁.

𑀇𑀢𑀺 𑀲𑀗𑁆𑀖𑀭𑀓𑁆𑀔𑀺𑀢𑀫𑀳𑀸𑀲𑀸𑀫𑀺𑀯𑀺𑀭𑀘𑀺𑀢𑁂 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂

𑁪. 𑀅𑀢𑁆𑀣𑀸𑀮𑀗𑁆𑀓𑀸𑀭𑀸𑀯𑀩𑁄𑀥-𑀘𑀢𑀼𑀢𑁆𑀣𑀧𑀭𑀺𑀘𑁆𑀙𑁂𑀤

𑀅𑀢𑁆𑀣𑀸𑀮𑀗𑁆𑀓𑀸𑀭𑀲𑀳𑀺𑀢𑀸, 𑀲𑀕𑀼𑀡𑀸 𑀩𑀦𑁆𑀥𑀧𑀤𑁆𑀥𑀢𑀺;

𑀅𑀘𑁆𑀘𑀦𑁆𑀢𑀓𑀦𑁆𑀢𑀸 𑀓𑀦𑁆𑀢𑀸 [𑀬𑀢𑁄 𑀅𑀘𑁆𑀘𑀦𑁆𑀢𑀓𑀦𑁆𑀢𑀸 (𑀓.)] 𑀯 𑀯𑀼𑀘𑁆𑀘𑀦𑁆𑀢𑁂 𑀢𑁂 𑀢𑀢𑁄’𑀥𑀼𑀦𑀸.

𑀲𑀪𑀸𑀯, 𑀯𑀗𑁆𑀓𑀯𑀼𑀢𑁆𑀢𑀻𑀦𑀁, 𑀪𑁂𑀤𑀸 𑀤𑁆𑀯𑀺𑀥𑀸 𑀅𑀮𑀁𑀓𑁆𑀭𑀺𑀬𑀸;

𑀧𑀞𑀫𑀸 𑀢𑀢𑁆𑀣 𑀯𑀢𑁆𑀣𑀽𑀦𑀁, 𑀦𑀸𑀦𑀸𑀯𑀢𑁆𑀣𑀸’𑀯𑀺𑀪𑀸𑀯𑀺𑀦𑀻.

𑀮𑀻𑀮𑀸 𑀯𑀺𑀓𑀦𑁆𑀢𑀺 𑀲𑀼𑀪𑀕𑁄, 𑀤𑀺𑀲𑀸 𑀣𑀺𑀭 𑀯𑀺𑀮𑁄𑀓𑀦𑁄;

𑀩𑁄𑀥𑀺𑀲𑀢𑁆𑀢𑀗𑁆𑀓𑀼𑀭𑁄 𑀪𑀸𑀲𑀁, 𑀯𑀺𑀭𑁄𑀘𑀺 𑀯𑀸𑀘 𑀫𑀸𑀲𑀪𑀺𑀁.

𑀯𑀼𑀢𑁆𑀢𑀺 𑀯𑀢𑁆𑀣𑀼𑀲𑀪𑀸𑀯𑀲𑁆𑀲, 𑀬𑀸’𑀜𑁆𑀜𑀣𑀸 𑀲𑀸’𑀧𑀭𑀸 𑀪𑀯𑁂;

𑀢𑀲𑁆𑀲𑀸’𑀦𑀦𑁆𑀢𑀯𑀺𑀓𑀧𑁆𑀧𑀢𑁆𑀢𑀸, 𑀳𑁄𑀢𑀺 𑀩𑀻𑀚𑁄’𑀧𑀤𑀲𑁆𑀲𑀦𑀁.

𑀯𑀗𑁆𑀓𑀯𑀼𑀢𑁆𑀢𑀺 𑀅𑀢𑁆𑀣𑀸𑀮𑀗𑁆𑀓𑀸𑀭

𑀢𑀢𑁆𑀣𑀸’𑀢𑀺𑀲𑀬, 𑀉𑀧𑀫𑀸, 𑀭𑀽𑀧𑀓𑀸, 𑀯𑀼𑀢𑁆𑀢𑀺, 𑀤𑀻𑀧𑀓𑀁,;

𑀅𑀓𑁆𑀔𑁂𑀧𑁄, 𑀢𑁆𑀣𑀦𑁆𑀢𑀭𑀦𑁆𑀬𑀸𑀲𑁄, 𑀩𑁆𑀬𑀢𑀺𑀭𑁂𑀓𑁄, 𑀯𑀺𑀪𑀸𑀯𑀦𑀸.

𑀳𑁂𑀢𑀼 ¶ , 𑀓𑁆𑀓𑀫𑁄, 𑀧𑀺𑀬𑀢𑀭𑀁, 𑀲𑀫𑀸𑀲, 𑀧𑀭𑀺𑀓𑀧𑁆𑀧𑀦𑀸;

𑀲𑀫𑀸𑀳𑀺𑀢𑀁, 𑀧𑀭𑀺𑀬𑀸𑀬, 𑀯𑀼𑀢𑁆𑀢𑀺, 𑀩𑁆𑀬𑀸𑀚𑁄𑀧𑀯𑀡𑁆𑀡𑀦𑀁.

𑀯𑀺𑀲𑁂𑀲, 𑀭𑀼𑀴𑁆𑀳𑀸𑀳𑀗𑁆𑀓𑀸𑀭𑀸, 𑀲𑀺𑀮𑁂𑀲𑁄, 𑀢𑀼𑀮𑁆𑀬𑀬𑁄𑀕𑀺𑀢𑀸;

𑀦𑀺𑀤𑀲𑁆𑀲𑀦𑀁, 𑀫𑀳𑀦𑁆𑀢𑀢𑁆𑀢𑀁, 𑀯𑀜𑁆𑀘𑀦𑀸, 𑀧𑁆𑀧𑀓𑀢𑀢𑁆𑀣𑀼𑀢𑀺,.

𑀏𑀓𑀸𑀯𑀮𑀺, 𑀅𑀜𑁆𑀜𑀫𑀜𑁆𑀜𑀁, 𑀲𑀳𑀯𑀼𑀢𑁆𑀢𑀺, 𑀯𑀺𑀭𑁄𑀥𑀺𑀢𑀸;

𑀧𑀭𑀺𑀯𑀼𑀢𑁆𑀢𑀺, 𑀩𑁆𑀪𑀫𑁄, 𑀪𑀸𑀯𑁄, 𑀫𑀺𑀲𑁆𑀲, 𑀫𑀸𑀲𑀻, 𑀭𑀲𑀻, 𑀇𑀢𑀺.

𑀏𑀢𑁂 𑀪𑁂𑀤𑀸 𑀲𑀫𑀼𑀤𑁆𑀤𑀺𑀝𑁆𑀞𑀸, 𑀪𑀸𑀯𑁄 𑀚𑀻𑀯𑀺𑀢 𑀫𑀼𑀘𑁆𑀘𑀢𑁂;

𑀯𑀗𑁆𑀓𑀯𑀼𑀢𑁆𑀢𑀻𑀲𑀼 𑀧𑁄𑀲𑁂𑀲𑀺, 𑀲𑀺𑀮𑁂𑀲𑁄 𑀢𑀼 𑀲𑀺𑀭𑀺𑀁 𑀧𑀭𑀁.

𑀧𑀓𑀸𑀲𑀓𑀸 𑀯𑀺𑀲𑁂𑀲𑀲𑁆𑀲, 𑀲𑀺𑀬𑀸’𑀢𑀺𑀲𑀬𑀯𑀼𑀢𑁆𑀢𑀺 𑀬𑀸;

𑀮𑁄𑀓𑀸’𑀢𑀺𑀓𑁆𑀓𑀦𑁆𑀢𑀯𑀺𑀲𑀬𑀸, 𑀮𑁄𑀓𑀺𑀬𑀸,𑀢𑀺 𑀘 𑀲𑀸 𑀤𑁆𑀯𑀺𑀥𑀸.

𑀧𑀝𑀺𑀧𑀸𑀤𑀻𑀬𑀢𑁂 𑀢𑁆𑀯’𑀚𑁆𑀚, 𑀮𑁄𑀓𑀸𑀢𑀺𑀓𑁆𑀓𑀦𑁆𑀢𑀕𑁄𑀘𑀭𑀸.

𑀧𑀺𑀯𑀦𑁆𑀢𑀺 𑀤𑁂𑀳𑀓𑀦𑁆𑀢𑀻 𑀬𑁂, 𑀦𑁂𑀢𑁆𑀢𑀜𑁆𑀚𑀮𑀺𑀧𑀼𑀝𑁂𑀦 𑀢𑁂;

𑀦𑀸’𑀮𑀁 𑀳𑀦𑁆𑀢𑀼𑀁 𑀚𑀺𑀦𑁂’𑀲𑀁 𑀢𑁆𑀯𑀁, 𑀢𑀡𑁆𑀳𑀁 𑀢𑀡𑁆𑀳𑀸𑀳𑀭𑁄𑀧𑀺 𑀓𑀺𑀁?

𑀉𑀧𑀫𑀸𑀦𑁄’𑀧𑀫𑁂𑀬𑁆𑀬𑀸𑀦𑀁, 𑀲𑀥𑀫𑁆𑀫𑀢𑁆𑀢𑀁 𑀲𑀺𑀬𑁄’𑀧𑀫𑀸;

𑀲𑀤𑁆𑀤, 𑀢𑁆𑀣𑀕𑀫𑁆𑀫𑀸, 𑀯𑀸𑀓𑁆𑀬𑀢𑁆𑀣, 𑀯𑀺𑀲𑀬𑀸,𑀢𑀺 𑀘 𑀲𑀸 𑀪𑀺𑀥𑀸.

𑀲𑀫𑀸𑀲, 𑀧𑀘𑁆𑀘𑀬𑁂, 𑀯𑀸’𑀤𑀻, 𑀲𑀤𑁆𑀤𑀸 𑀢𑁂𑀲𑀁 𑀯𑀲𑀸 𑀢𑀺𑀥𑀸;

𑀲𑀤𑁆𑀤𑀕𑀫𑁆𑀫𑀸 𑀲𑀫𑀸𑀲𑁂𑀦, 𑀫𑀼𑀦𑀺𑀦𑁆𑀤𑁄 𑀘𑀦𑁆𑀤𑀺𑀫𑀸’𑀦𑀦𑁄.

𑀆𑀬𑀸𑀤𑀻 𑀧𑀘𑁆𑀘𑀬𑀸 𑀢𑁂𑀳𑀺, 𑀯𑀤𑀦𑀁 𑀧𑀗𑁆𑀓𑀚𑀸𑀬𑀢𑁂;

𑀫𑀼𑀦𑀺𑀦𑁆𑀤𑀦𑀬𑀦 𑀤𑁆𑀯𑀦𑁆𑀤𑀁, 𑀦𑀻𑀮𑀼𑀧𑁆𑀧𑀮𑀤𑀮𑀻𑀬𑀢𑀺.

𑀇𑀯𑀸𑀤𑀻 𑀇𑀯, 𑀯𑀸, 𑀢𑀼𑀮𑁆𑀬, 𑀲𑀫𑀸𑀦, 𑀦𑀺𑀪, 𑀲𑀦𑁆𑀦𑀺𑀪𑀸;

𑀬𑀣𑀸, 𑀲𑀗𑁆𑀓𑀸𑀲, 𑀢𑀼𑀮𑀺𑀢, 𑀧𑁆𑀧𑀓𑀸𑀲, 𑀧𑀢𑀺𑀭𑀽𑀧𑀓𑀸.

𑀲𑀭𑀻, 𑀲𑀭𑀺𑀓𑁆𑀔, 𑀲𑀁𑀯𑀸𑀤𑀻, 𑀯𑀺𑀭𑁄𑀥𑀺, 𑀲𑀤𑀺𑀲𑀸, 𑀯𑀺𑀬;

𑀧𑀝𑀺𑀧𑀓𑁆𑀔, 𑀧𑀘𑁆𑀘𑀦𑀻𑀓𑀸, 𑀲𑀧𑀓𑁆𑀔𑁄, 𑀧𑀫𑀺𑀢𑁄, 𑀧𑀫𑀸.

𑀧𑀝𑀺𑀩𑀺𑀫𑁆𑀩, 𑀧𑀝𑀺𑀘𑁆𑀙𑀦𑁆𑀦, 𑀲𑀭𑀽𑀧, 𑀲𑀫, 𑀲𑀫𑀺𑀢𑀸;

𑀲𑀯𑀡𑁆𑀡𑀸, 𑀪𑀸, 𑀧𑀝𑀺𑀦𑀺𑀥𑀺, 𑀲𑀥𑀫𑁆𑀫𑀸, 𑀤𑀺 𑀲𑀮𑀓𑁆𑀔𑀡𑀸.

𑀚𑀬𑀢𑁆𑀬 ¶ , 𑀓𑁆𑀓𑁄𑀲𑀢𑀺, 𑀳𑀲𑀢𑀺, 𑀧𑀢𑀺𑀕𑀚𑁆𑀚𑀢𑀺, 𑀤𑀽𑀪𑀢𑀺;

𑀉𑀲𑀽𑀬𑀢𑁆𑀬, 𑀯𑀚𑀸𑀦𑀸𑀢𑀺, 𑀦𑀺𑀦𑁆𑀤𑀢𑀺, 𑀲𑁆𑀲𑀢𑀺, 𑀭𑀼𑀦𑁆𑀥𑀢𑀺.

𑀢𑀲𑁆𑀲 𑀘𑁄𑀭𑁂𑀢𑀺 𑀲𑁄𑀪𑀕𑁆𑀕𑀁, 𑀢𑀲𑁆𑀲 𑀓𑀦𑁆𑀢𑀺𑀁 𑀯𑀺𑀮𑀼𑀫𑁆𑀧𑀢𑀺;

𑀢𑁂𑀦 𑀲𑀤𑁆𑀥𑀺𑀁 𑀯𑀺𑀯𑀤𑀢𑀺, 𑀢𑀼𑀮𑁆𑀬𑀁 𑀢𑁂𑀦𑀸’𑀥𑀺𑀭𑁄𑀳𑀢𑀺.

𑀓𑀘𑁆𑀙𑀁 𑀯𑀺𑀕𑀸𑀳𑀢𑁂, 𑀢𑀲𑁆𑀲, 𑀢 𑀫𑀦𑁆𑀯𑁂𑀢𑁆𑀬, 𑀦𑀼𑀩𑀦𑁆𑀥𑀢𑀺;

𑀢𑀁𑀲𑀻𑀮𑀁, 𑀢𑀁𑀦𑀺𑀲𑁂𑀥𑁂𑀢𑀺, 𑀢𑀲𑁆𑀲 𑀘𑀸’𑀦𑀼𑀓𑀭𑁄𑀢𑀺, 𑀫𑁂.

𑀉𑀧𑀫𑀸𑀦𑁄’𑀧𑀫𑁂𑀬𑁆𑀬𑀸𑀦𑀁, 𑀲𑀥𑀫𑁆𑀫𑀢𑁆𑀢𑀁 𑀯𑀺𑀪𑀸𑀯𑀺𑀪𑀺;

𑀇𑀫𑁂𑀳𑀺 𑀉𑀧𑀫𑀸𑀪𑁂𑀤𑀸, 𑀓𑁂𑀘𑀺 𑀦𑀺𑀬𑁆𑀬𑀦𑁆𑀢𑀺 𑀲𑀫𑁆𑀧𑀢𑀺.

𑀯𑀺𑀓𑀸𑀲𑀺𑀧𑀤𑀼𑀫𑀁’𑀯𑀸’𑀢𑀺, 𑀲𑀼𑀦𑁆𑀤𑀭𑀁 𑀲𑀼𑀕𑀢𑀸’𑀦𑀦𑀁;

𑀇𑀢𑀺 𑀥𑀫𑁆𑀫𑁄𑀧𑀫𑀸 𑀦𑀸𑀫, 𑀢𑀼𑀮𑁆𑀬𑀥𑀫𑁆𑀫𑀦𑀺𑀤𑀲𑁆𑀲𑀦𑀸.

𑀥𑀫𑁆𑀫𑀳𑀻𑀦𑀸 ‘‘𑀫𑀼𑀔’𑀫𑁆𑀪𑁄𑀚, 𑀲𑀤𑀺𑀲𑀁 𑀫𑀼𑀦𑀺𑀦𑁄’’𑀇𑀢𑀺;

𑀯𑀺𑀧𑀭𑀻𑀢𑁄’𑀧𑀫𑀸 ‘‘𑀢𑀼𑀮𑁆𑀬, 𑀫𑀸𑀦𑀦𑁂𑀦’𑀫𑁆𑀩𑀼𑀚𑀁 𑀢𑀯’’.

𑀢𑀯𑀸’𑀦𑀦’𑀫𑀺𑀯’𑀫𑁆𑀪𑁄𑀚𑀁, 𑀅𑀫𑁆𑀪𑁄𑀚’𑀫𑀺𑀯 𑀢𑁂 𑀫𑀼𑀔𑀁;

𑀅𑀜𑁆𑀜𑀫𑀜𑁆𑀜𑁄𑀧𑀫𑀸 𑀲𑀸’𑀬𑀁, 𑀅𑀜𑁆𑀜𑀫𑀜𑁆𑀜𑁄𑀧𑀫𑀸𑀦𑀢𑁄.

‘‘𑀬𑀤𑀺 𑀓𑀺𑀜𑁆𑀘𑀺 𑀪𑀯𑁂’𑀫𑁆𑀪𑁄𑀚𑀁, 𑀮𑁄𑀘𑀦’𑀩𑁆𑀪𑀫𑀼𑀯𑀺𑀩𑁆𑀪𑀫𑀁;

𑀥𑀸𑀭𑁂𑀢𑀼𑀁 𑀫𑀼𑀔𑀲𑁄𑀪𑀁 𑀢𑀁, 𑀢𑀯𑁂’’𑀢𑀺 𑀅𑀩𑁆𑀪𑀼𑀢𑁄𑀧𑀫𑀸.

‘‘𑀲𑀼𑀕𑀦𑁆𑀥𑀺 𑀲𑁄𑀪𑀸 𑀲𑀫𑁆𑀩𑀦𑁆𑀥𑀻, 𑀲𑀺𑀲𑀺𑀭𑀁’𑀲𑀼 𑀯𑀺𑀭𑁄𑀥𑀺 𑀘;

𑀫𑀼𑀔𑀁 𑀢𑀯’𑀫𑁆𑀩𑀼𑀚𑀁𑀯𑁂’𑀢𑀺’’, 𑀲𑀸 𑀲𑀺𑀮𑁂𑀲𑁄𑀧𑀫𑀸 𑀫𑀢𑀸.

𑀲𑀭𑀽𑀧𑀲𑀤𑁆𑀤𑀯𑀸𑀘𑁆𑀘𑀢𑁆𑀢𑀸, 𑀲𑀸 𑀲𑀦𑁆𑀢𑀸𑀦𑁄𑀧𑀫𑀸 𑀬𑀣𑀸;

𑀩𑀸𑀮𑀸’𑀯𑀼’𑀬𑁆𑀬𑀸𑀦𑀫𑀸𑀮𑀸’𑀬𑀁, 𑀲𑀸’𑀮𑀓𑀸’𑀦𑀦𑀲𑁄𑀪𑀺𑀦𑀻.

𑀔𑀬𑀻 𑀘𑀦𑁆𑀤𑁄, 𑀩𑀳𑀼𑀭𑀚𑀁, 𑀧𑀤𑀼𑀫𑀁, 𑀢𑁂𑀳𑀺 𑀢𑁂 𑀫𑀼𑀔𑀁;

𑀲𑀫𑀸𑀦𑀫𑁆𑀧𑀺 𑀲𑀫𑀼𑀓𑁆𑀓𑀁𑀲𑀺, 𑀢𑁆𑀬’𑀬𑀁 𑀦𑀺𑀦𑁆𑀤𑁄𑀧𑀫𑀸 𑀫𑀢𑀸.

𑀅𑀲𑀫𑀢𑁆𑀣𑁄 𑀫𑀼𑀔𑁂𑀦𑀺’𑀦𑁆𑀤𑀼, 𑀚𑀺𑀦! 𑀢𑁂 𑀧𑀝𑀺𑀕𑀚𑁆𑀚𑀺𑀢𑀼𑀁;

𑀚𑀴𑁄 𑀓𑀮𑀗𑁆𑀓𑀻’𑀢𑀺 𑀅𑀬𑀁, 𑀧𑀝𑀺𑀲𑁂𑀥𑁄𑀧𑀫𑀸 𑀲𑀺𑀬𑀸.

‘‘𑀓𑀘𑁆𑀙𑀁 𑀘𑀦𑁆𑀤𑀸𑀭𑀯𑀺𑀦𑁆𑀤𑀸𑀦𑀁, 𑀅𑀢𑀺𑀓𑁆𑀓𑀫𑁆𑀫 𑀫𑀼𑀔𑀁 𑀢𑀯;

𑀅𑀢𑁆𑀢𑀦𑀸’𑀯 𑀲𑀫𑀁 𑀚𑀸𑀢’’, 𑀫𑀺𑀢𑁆𑀬’𑀲𑀸𑀥𑀸𑀭𑀡𑁄𑀧𑀫𑀸.

‘‘𑀲𑀩𑁆𑀩’𑀫𑁆𑀪𑁄𑀚’𑀧𑁆𑀧𑀪𑀸𑀲𑀸𑀭𑁄, 𑀭𑀸𑀲𑀺𑀪𑀽𑀢𑁄’𑀯 𑀓𑀢𑁆𑀣𑀘𑀺;

𑀢𑀯𑀸’𑀦𑀦𑀁 𑀯𑀺𑀪𑀸𑀢𑀻’’𑀢𑀺, 𑀳𑁄𑀢𑀸’𑀪𑀽𑀢𑁄𑀧𑀫𑀸 𑀅𑀬𑀁.

𑀧𑀢𑀻𑀬𑀢𑁂’𑀢𑁆𑀣𑀕𑀫𑁆𑀫𑀸 𑀢𑀼, 𑀲𑀤𑁆𑀤𑀲𑀸𑀫𑀢𑁆𑀣𑀺𑀬𑀸 𑀓𑁆𑀯𑀘𑀺;

𑀲𑀫𑀸𑀲, 𑀧𑁆𑀧𑀘𑁆𑀘𑀬𑁂, 𑀯𑀸𑀤𑀺, 𑀲𑀤𑁆𑀤𑀬𑁄𑀕𑀁 𑀯𑀺𑀦𑀸 𑀅𑀧𑀺.

𑀪𑀺𑀗𑁆𑀕𑀸𑀦𑁂’𑀫𑀸𑀦𑀺 ¶ 𑀘𑀓𑁆𑀔𑀽𑀦𑀺, 𑀦𑀸’𑀫𑁆𑀩𑀼𑀚𑀁 𑀫𑀼𑀔’𑀫𑁂𑀯𑀺’𑀤𑀁;

𑀲𑀼𑀩𑁆𑀬𑀢𑁆𑀢𑀲𑀤𑀺𑀲𑀢𑁆𑀢𑁂𑀦, 𑀲𑀸 𑀲𑀭𑀽𑀧𑁄𑀧𑀫𑀸 𑀫𑀢𑀸.

‘‘𑀫𑀬𑁂’𑀯 𑀫𑀼𑀔𑀲𑁄𑀪𑀸’𑀲𑁆𑀲𑁂, 𑀢𑁆𑀬𑀮’𑀫𑀺𑀦𑁆𑀤𑀼! 𑀯𑀺𑀓𑀢𑁆𑀣𑀦𑀸;

𑀬𑀢𑁄’𑀫𑁆𑀩𑀼𑀚𑁂𑀧𑀺 𑀲𑀸’𑀢𑁆𑀣𑀻𑀢𑀺’’, 𑀧𑀭𑀺𑀓𑀧𑁆𑀧𑁄𑀧𑀫𑀸 𑀅𑀬𑀁.

‘‘𑀓𑀺𑀁 𑀯𑀸’𑀫𑁆𑀩𑀼𑀚’𑀦𑁆𑀢𑁄𑀪𑀦𑁆𑀢𑀸𑀮𑀺, 𑀓𑀺𑀁 𑀮𑁄𑀮𑀦𑀬𑀦𑀁 𑀫𑀼𑀔𑀁;

𑀫𑀫 𑀤𑁄𑀮𑀸𑀬𑀢𑁂 𑀘𑀺𑀢𑁆𑀢’’, 𑀫𑀺𑀘𑁆𑀘’𑀬𑀁 𑀲𑀁𑀲𑀬𑁄𑀧𑀫𑀸.

𑀓𑀺𑀜𑁆𑀘𑀺 𑀯𑀢𑁆𑀣𑀼𑀁 𑀧𑀤𑀲𑁆𑀲𑁂𑀢𑁆𑀯𑀸, 𑀲𑀥𑀫𑁆𑀫𑀲𑁆𑀲𑀸’𑀪𑀺𑀥𑀸𑀦𑀢𑁄;

𑀲𑀸𑀫𑁆𑀬𑀧𑁆𑀧𑀢𑀻𑀢𑀺𑀲𑀩𑁆𑀪𑀸𑀯𑀸, 𑀧𑀢𑀺𑀯𑀢𑁆𑀣𑀼𑀧𑀫𑀸 𑀬𑀣𑀸.

𑀚𑀦𑁂𑀲𑀼 𑀚𑀸𑀬𑀫𑀸𑀦𑁂𑀲𑀼, 𑀦𑁂’𑀓𑁄𑀧𑀺 𑀚𑀺𑀦𑀲𑀸𑀤𑀺𑀲𑁄;

𑀤𑀼𑀢𑀺𑀬𑁄 𑀦𑀦𑀼 𑀦𑀢𑁆𑀣𑁂’𑀯, 𑀧𑀸𑀭𑀺𑀚𑀸𑀢𑀲𑁆𑀲 𑀧𑀸𑀤𑀧𑁄.

𑀯𑀸𑀓𑁆𑀬𑀢𑁆𑀣𑁂𑀦𑁂’𑀯 𑀯𑀸𑀓𑁆𑀬𑀢𑁆𑀣𑁄, 𑀬𑀤𑀺 𑀓𑁄𑀘𑀽’𑀧𑀫𑀻𑀬𑀢𑁂;

𑀇𑀯𑀬𑀼𑀢𑁆𑀢𑀸, 𑀯𑀺𑀬𑀼𑀢𑁆𑀢𑀢𑁆𑀢𑀸, 𑀲𑀸 𑀯𑀸𑀓𑁆𑀬𑀢𑁆𑀣𑁄𑀧𑀫𑀸 𑀤𑁆𑀯𑀺𑀥𑀸.

𑀚𑀺𑀦𑁄 𑀲𑀁𑀓𑁆𑀮𑁂𑀲𑀢𑀢𑁆𑀢𑀸𑀦𑀁, 𑀆𑀯𑀺𑀪𑀽𑀢𑁄 𑀚𑀦𑀸𑀦’𑀬𑀁;

𑀖𑀫𑁆𑀫𑀲𑀦𑁆𑀢𑀸𑀧𑀢𑀢𑁆𑀢𑀸𑀦𑀁, 𑀖𑀫𑁆𑀫𑀓𑀸𑀮𑁂’𑀫𑁆𑀩𑀼𑀤𑁄 𑀯𑀺𑀬.

𑀫𑀼𑀦𑀺𑀦𑁆𑀤𑀸𑀦𑀦 𑀫𑀸𑀪𑀸𑀢𑀺, 𑀯𑀺𑀮𑀸𑀲𑁂𑀓𑀫𑀦𑁄𑀳𑀭𑀁;

𑀉𑀤𑁆𑀥𑀁 𑀲𑀫𑀼𑀕𑁆𑀕𑀢𑀲𑁆𑀲𑀸’𑀧𑀺, 𑀓𑀺𑀁 𑀢𑁂 𑀘𑀦𑁆𑀤 𑀯𑀺𑀚𑀫𑁆𑀪𑀦𑀸.

𑀲𑀫𑀼𑀩𑁆𑀩𑁂𑀚𑁂𑀢𑀺 𑀥𑀻𑀫𑀦𑁆𑀢𑀁, 𑀪𑀺𑀦𑁆𑀦𑀮𑀺𑀗𑁆𑀕𑀸𑀤𑀺𑀓𑀁 𑀢𑀼 𑀬𑀁;

𑀉𑀧𑀫𑀸𑀤𑀽𑀲𑀦𑀸𑀬𑀸’𑀮, 𑀫𑁂𑀢𑀁 𑀓𑀢𑁆𑀣𑀘𑀺 𑀢𑀁 𑀬𑀣𑀸.

𑀳𑀁𑀲𑀻’𑀯𑀸’𑀬𑀁 𑀲𑀲𑀻 𑀪𑀺𑀦𑁆𑀦, 𑀮𑀺𑀗𑁆𑀕𑀸, 𑀓𑀸𑀲𑀁 𑀲𑀭𑀸𑀦𑀺’𑀯;

𑀯𑀺𑀚𑀸𑀢𑀺 𑀯𑀘𑀦𑀸, 𑀳𑀻𑀦𑀸, 𑀲𑀸’𑀯 𑀪𑀢𑁆𑀢𑁄 𑀪𑀝𑁄’𑀥𑀺𑀧𑁂.

‘‘𑀔𑀚𑁆𑀚𑁄𑀢𑁄 𑀪𑀸𑀡𑀼𑀫𑀸𑀮𑀻’𑀯, 𑀯𑀺𑀪𑀸𑀢𑀺’’𑀢𑁆𑀬𑀥𑀺𑀓𑁄𑀧𑀫𑀸;

𑀅𑀨𑀼𑀝𑁆𑀞𑀢𑁆𑀣𑀸 ‘‘𑀩𑀮𑀫𑁆𑀩𑁄𑀥𑀺, 𑀲𑀸𑀕𑀭𑁄 𑀯𑀺𑀬 𑀲𑀁𑀔𑀼𑀪𑀺.’’

‘‘𑀘𑀦𑁆𑀤𑁂 𑀓𑀮𑀗𑁆𑀓𑁄 𑀪𑀺𑀗𑁆𑀕𑁄’𑀯𑁂’, 𑀢𑁆𑀬𑀼’𑀧𑀫𑀸𑀧𑁂𑀓𑁆𑀔𑀺𑀦𑀻 𑀅𑀬𑀁;

𑀔𑀡𑁆𑀟𑀺𑀢𑀸 𑀓𑁂𑀭𑀯𑀸’𑀓𑀸𑀭𑁄, 𑀲𑀓𑀮𑀗𑁆𑀓𑁄 𑀦𑀺𑀲𑀸𑀓𑀭𑁄.

𑀇𑀘𑁆𑀘𑁂𑀯𑀫𑀸𑀤𑀺𑀭𑀽𑀧𑁂𑀲𑀼, 𑀪𑀯𑀦𑁆𑀢𑀺 𑀯𑀺𑀕𑀢𑀸’𑀤𑀭𑀸;

𑀓𑀭𑁄𑀦𑁆𑀢𑀺 𑀘𑀸’𑀤𑀭𑀁 𑀥𑀻𑀭𑀸, 𑀧𑀬𑁄𑀕𑁂 𑀓𑁆𑀯𑀘𑀺 𑀤𑁂’𑀯 𑀢𑀼.

𑀇𑀢𑁆𑀣𑀻𑀬𑀁’𑀯𑀸’𑀚𑀦𑁄 𑀬𑀸𑀢𑀺, 𑀯𑀤𑀢𑁆𑀬𑁂’𑀲𑀸 𑀧𑀼𑀫𑀸 𑀯𑀺𑀬;

𑀧𑀺𑀬𑁄 𑀧𑀸𑀡𑀸 𑀇𑀯𑀸’𑀬𑀁 𑀫𑁂, 𑀯𑀺𑀚𑁆𑀚𑀸 𑀥𑀦’𑀫𑀺𑀯’𑀘𑁆𑀘𑀺𑀢𑀸.

𑀪𑀯𑀁 ¶ 𑀯𑀺𑀬 𑀫𑀳𑀻𑀧𑀸𑀮, 𑀤𑁂𑀯𑀭𑀸𑀚𑀸 𑀯𑀺𑀭𑁄𑀘𑀢𑁂;

𑀅𑀮’𑀫𑀁𑀲𑀼𑀫𑀢𑁄 𑀓𑀘𑁆𑀙𑀁, 𑀢𑁂𑀚𑀲𑀸 𑀭𑁄𑀳𑀺𑀢𑀼𑀁 𑀅𑀬𑀁.

𑀉𑀧𑀫𑀸𑀦𑁄’𑀧𑀫𑁂𑀬𑁆𑀬𑀸𑀦𑀁, 𑀅𑀪𑁂𑀤𑀲𑁆𑀲 𑀦𑀺𑀭𑀽𑀧𑀦𑀸;

𑀉𑀧𑀫𑀸’𑀯 𑀢𑀺𑀭𑁄𑀪𑀽𑀢, 𑀪𑁂𑀤𑀸 𑀭𑀽𑀧𑀓 𑀫𑀼𑀘𑁆𑀘𑀢𑁂.

𑀅𑀲𑁂𑀲 𑀯𑀢𑁆𑀣𑀼 𑀯𑀺𑀲𑀬𑀁, 𑀏𑀓𑀤𑁂𑀲 𑀯𑀺𑀯𑀼𑀢𑁆𑀢𑀺 [𑀯𑀺𑀯𑀢𑁆𑀢𑀺 (𑀝𑀻𑀓𑀸)], 𑀘;

𑀢𑀁 𑀤𑁆𑀯𑀺𑀥𑀸 𑀧𑀼𑀦 𑀧𑀘𑁆𑀘𑁂𑀓𑀁, 𑀲𑀫𑀸𑀲𑀸𑀤𑀺𑀯𑀲𑀸 𑀢𑀺𑀥𑀸.

𑀅𑀗𑁆𑀕𑀼𑀮𑀺𑀤𑀮 𑀲𑀁𑀲𑁄𑀪𑀺𑀁, 𑀦𑀔𑀤𑀻𑀥𑀺𑀢𑀺 𑀓𑁂𑀲𑀭𑀁;

𑀲𑀺𑀭𑀲𑀸 𑀦 𑀧𑀺𑀮𑀦𑁆𑀥𑀦𑁆𑀢𑀺, 𑀓𑁂 𑀫𑀼𑀦𑀺𑀦𑁆𑀤 𑀧𑀤’𑀫𑁆𑀩𑀼𑀚𑀁.

𑀭𑀢𑀦𑀸𑀦𑀺 𑀕𑀼𑀡𑀸 𑀪𑀽𑀭𑀻, 𑀓𑀭𑀼𑀡𑀸 𑀲𑀻𑀢𑀮𑀁 𑀚𑀮𑀁;

𑀕𑀫𑁆𑀪𑀻𑀭𑀢𑁆𑀢 𑀫𑀕𑀸𑀥𑀢𑁆𑀢𑀁, 𑀧𑀘𑁆𑀘𑀓𑁆𑀔𑁄’𑀬𑀁 𑀚𑀺𑀦𑁄’𑀫𑁆𑀩𑀼𑀥𑀺.

𑀘𑀦𑁆𑀤𑀺𑀓𑀸 𑀫𑀦𑁆𑀤𑀳𑀸𑀲𑀸 𑀢𑁂, 𑀫𑀼𑀦𑀺𑀦𑁆𑀤! 𑀯𑀤𑀦𑀺’𑀦𑁆𑀤𑀼𑀦𑁄;

𑀧𑀩𑁄𑀥𑀬𑀢𑁆𑀬’𑀬𑀁 𑀲𑀸𑀥𑀼, 𑀫𑀦𑁄 𑀓𑀼𑀫𑀼𑀤 𑀓𑀸𑀦𑀦𑀁.

𑀅𑀲𑁂𑀲𑀯𑀢𑁆𑀣𑀼𑀯𑀺𑀲𑀬𑁂, 𑀧𑀪𑁂𑀤𑁄 𑀭𑀽𑀧𑀓𑁂 𑀅𑀬𑀁;

𑀏𑀓𑀤𑁂𑀲𑀯𑀺𑀯𑀼𑀢𑁆𑀢𑀺𑀫𑁆𑀳𑀺, 𑀪𑁂𑀤𑁄 𑀤𑀸𑀦𑀺 𑀧𑀯𑀼𑀘𑁆𑀘𑀢𑀺.

𑀯𑀺𑀮𑀸𑀲 𑀳𑀸𑀲 𑀓𑀼𑀲𑀼𑀫𑀁, 𑀭𑀼𑀘𑀺𑀭𑀸’𑀥𑀭 𑀧𑀮𑁆𑀮𑀯𑀁;

𑀲𑀼𑀔𑀁 𑀓𑁂 𑀯𑀸 𑀦 𑀯𑀺𑀦𑁆𑀤𑀦𑁆𑀢𑀺, 𑀧𑀲𑁆𑀲𑀦𑁆𑀢𑀸 𑀫𑀼𑀦𑀺𑀦𑁄 𑀫𑀼𑀔𑀁.

𑀧𑀸𑀤𑀤𑁆𑀯𑀦𑁆𑀤𑀁 𑀫𑀼𑀦𑀺𑀦𑁆𑀤𑀲𑁆𑀲, 𑀤𑀤𑀸𑀢𑀼 𑀯𑀺𑀚𑀬𑀁 𑀢𑀯;

𑀦𑀔𑀭𑀁𑀲𑀻 𑀧𑀭𑀁 𑀓𑀦𑁆𑀢𑀸, 𑀬𑀲𑁆𑀲 𑀧𑀸𑀧𑀚𑀬𑀤𑁆𑀥𑀚𑀸.

𑀲𑀼𑀦𑀺𑀫𑁆𑀫𑀮𑀓𑀧𑁄𑀮𑀲𑁆𑀲, 𑀫𑀼𑀦𑀺𑀦𑁆𑀤 𑀯𑀤𑀦𑀺’𑀦𑁆𑀤𑀼𑀦𑁄;

𑀲𑀸𑀥𑀼’𑀧𑁆𑀧𑀩𑀼𑀤𑁆𑀥 𑀳𑀤𑀬𑀁, 𑀚𑀸𑀢𑀁 𑀓𑁂𑀭𑀯 𑀓𑀸𑀦𑀦𑀁.

𑀭𑀽𑀧𑀓𑀸𑀦𑀺 ¶ 𑀩𑀳𑀽𑀦𑁆𑀬𑁂’𑀯 [𑀝𑀻𑀓𑀸𑀬𑀁 𑀉𑀤𑁆𑀥𑀝𑀁 𑀬𑀼𑀢𑁆𑀢𑀭𑀽𑀧𑀓𑀁 𑀲𑀺𑀢𑀧𑀼𑀧𑁆𑀨𑀼𑀚𑀮𑀁 𑀮𑁄𑀮, 𑀦𑁂𑀢𑁆𑀢𑀪𑀺𑀗𑁆𑀕 𑀢𑀯𑀸’𑀦𑀦𑀁; 𑀓𑀲𑁆𑀲 𑀦𑀸𑀫 𑀫𑀦𑁄 𑀥𑀻𑀭, 𑀦𑀸𑀓𑀟𑁆𑀠𑀢𑀺 𑀫𑀦𑁄𑀳𑀭𑀁;], 𑀬𑀼𑀢𑁆𑀢𑀸, 𑀬𑀼𑀢𑁆𑀢𑀸𑀤𑀺𑀪𑁂𑀤𑀢𑁄;

𑀯𑀺𑀲𑀼𑀁 𑀦 𑀢𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀏𑀢𑁆𑀣𑁂’𑀯’𑀦𑁆𑀢𑁄𑀕𑀥𑀸𑀦𑀺’𑀢𑀺.

‘‘𑀘𑀦𑁆𑀤𑀺𑀫𑀸’𑀓𑀸𑀲𑀧𑀤𑀼𑀫’’, 𑀫𑀺𑀘𑁆𑀘𑁂𑀢𑀁 𑀔𑀡𑁆𑀟𑀭𑀽𑀧𑀓𑀁;

𑀤𑀼𑀝𑁆𑀞, ‘‘𑀫𑀫𑁆𑀩𑁄𑀭𑀼𑀳𑀯𑀦𑀁, 𑀦𑁂𑀢𑁆𑀢𑀸𑀦𑀺’𑀘𑁆𑀘𑀸’’𑀤𑀺 𑀲𑀼𑀦𑁆𑀤𑀭𑀁.

𑀧𑀭𑀺𑀬𑀦𑁆𑀢𑁄 𑀯𑀺𑀓𑀧𑁆𑀧𑀸𑀦𑀁, 𑀭𑀽𑀧𑀓𑀲𑁆𑀲𑁄’𑀧𑀫𑀸𑀬 𑀘;

𑀦𑀢𑁆𑀣𑀺 𑀬𑀁 𑀢𑁂𑀦 𑀯𑀺𑀜𑁆𑀜𑁂𑀬𑁆𑀬𑀁, 𑀅𑀯𑀼𑀢𑁆𑀢 𑀫𑀦𑀼𑀫𑀸𑀦𑀢𑁄.

𑀧𑀼𑀦𑀧𑁆𑀧𑀼𑀦 𑀫𑀼𑀘𑁆𑀘𑀸𑀭𑀡𑀁 [𑀧𑀼𑀦𑀧𑁆𑀧𑀼𑀦𑀼𑀘𑁆𑀘𑀸𑀭𑀡𑀁 𑀬𑀁 (𑀲𑀻. 𑀓.)], 𑀬𑀫𑀢𑁆𑀣𑀲𑁆𑀲, 𑀧𑀤𑀲𑁆𑀲 𑀘;

𑀉𑀪𑀬𑁂𑀲𑀜𑁆𑀘 𑀯𑀺𑀜𑁆𑀜𑁂𑀬𑁆𑀬𑀸, 𑀲𑀸’𑀬’𑀫𑀸𑀯𑀼𑀢𑁆𑀢𑀺 𑀦𑀸𑀫𑀢𑁄.

𑀫𑀦𑁄 𑀳𑀭𑀢𑀺 𑀲𑀩𑁆𑀩𑁂𑀲𑀁, 𑀆𑀤𑀤𑀸𑀢𑀺 𑀤𑀺𑀲𑀸 𑀤𑀲;

𑀕𑀡𑁆𑀳𑀸𑀢𑀺 𑀦𑀺𑀫𑁆𑀫𑀮𑀢𑁆𑀢𑀜𑁆𑀘, 𑀬𑀲𑁄𑀭𑀸𑀲𑀺 𑀚𑀺𑀦𑀲𑁆𑀲’𑀬𑀁.

𑀯𑀺𑀪𑀸𑀲𑁂𑀦𑁆𑀢𑀺 𑀤𑀺𑀲𑀸 𑀲𑀩𑁆𑀩𑀸, 𑀫𑀼𑀦𑀺𑀦𑁄 𑀤𑁂𑀳𑀓𑀦𑁆𑀢𑀺𑀬𑁄;

𑀯𑀺𑀪𑀸 𑀲𑁂𑀦𑁆𑀢𑀺 𑀘 𑀲𑀩𑁆𑀩𑀸𑀧𑀺, 𑀘𑀦𑁆𑀤𑀸𑀤𑀻𑀦𑀁 𑀳𑀢𑀸 𑀯𑀺𑀬.

𑀚𑀺𑀢𑁆𑀯𑀸 𑀯𑀺𑀳𑀭𑀢𑀺 𑀓𑁆𑀮𑁂𑀲, 𑀭𑀺𑀧𑀼𑀁 𑀮𑁄𑀓𑁂 𑀚𑀺𑀦𑁄 𑀅𑀬𑀁;

𑀯𑀺𑀳𑀭𑀢𑁆𑀬’𑀭𑀺𑀯𑀕𑁆𑀕𑁄’𑀬𑀁, 𑀭𑀸𑀲𑀺𑀪𑀽𑀢𑁄’𑀯 𑀤𑀼𑀚𑁆𑀚𑀦𑁂.

𑀏𑀓𑀢𑁆𑀣 𑀯𑀢𑁆𑀢𑀫𑀸𑀦𑀫𑁆𑀧𑀺, 𑀲𑀩𑁆𑀩𑀯𑀸𑀓𑁆𑀬𑁄’𑀧𑀓𑀸𑀭𑀓𑀁;

𑀤𑀻𑀧𑀓𑀁 𑀦𑀸𑀫 𑀢𑀁 𑀘𑀸𑀤𑀺, 𑀫𑀚𑁆𑀛, 𑀦𑁆𑀢𑀯𑀺𑀲𑀬𑀁 𑀢𑀺𑀥𑀸.

𑀅𑀓𑀸𑀲𑀺 𑀩𑀼𑀤𑁆𑀥𑁄 𑀯𑁂𑀦𑁂𑀬𑁆𑀬, 𑀩𑀦𑁆𑀥𑀽𑀦 𑀫𑀫𑀺𑀢𑁄’𑀤𑀬𑀁;

𑀲𑀩𑁆𑀩𑀧𑀸𑀧𑁂𑀳𑀺 𑀘 𑀲𑀫𑀁, 𑀦𑁂𑀓𑀢𑀺𑀢𑁆𑀣𑀺𑀬𑀫𑀤𑁆𑀤𑀦𑀁.

𑀤𑀲𑁆𑀲𑀦𑀁 𑀫𑀼𑀦𑀺𑀦𑁄 𑀲𑀸𑀥𑀼, 𑀚𑀦𑀸𑀦𑀁 𑀚𑀸𑀬𑀢𑁂’𑀫𑀢𑀁;

𑀢𑀤’𑀜𑁆𑀜𑁂𑀲𑀁 𑀢𑀼 𑀚𑀦𑁆𑀢𑀽𑀦𑀁, 𑀯𑀺𑀲𑀁 𑀦𑀺𑀘𑁆𑀘𑁄’𑀧𑀢𑀸𑀧𑀦𑀁.

𑀅𑀘𑁆𑀘𑀦𑁆𑀢 ¶ 𑀓𑀦𑁆𑀢 𑀮𑀸𑀯𑀡𑁆𑀬, 𑀘𑀦𑁆𑀤𑀸’𑀢𑀧 𑀫𑀦𑁄𑀳𑀭𑁄;

𑀚𑀺𑀦𑀸’𑀦𑀦𑀺’𑀦𑁆𑀤𑀼 𑀇𑀦𑁆𑀤𑀼 𑀘, 𑀓𑀲𑁆𑀲 𑀦𑀸’𑀦𑀦𑁆𑀤𑀓𑁄 𑀪𑀯𑁂.

𑀳𑁄𑀢𑀸’𑀯𑀺𑀧𑁆𑀧𑀝𑀺𑀲𑀸𑀭𑀸𑀬, 𑀲𑀻𑀮𑀁, 𑀧𑀸𑀫𑁄𑀚𑁆𑀚𑀳𑁂𑀢𑀼 𑀲𑁄;

𑀢𑀁 𑀧𑀻𑀢𑀺𑀳𑁂𑀢𑀼, 𑀲𑀸 𑀘𑀸’𑀬𑀁, 𑀧𑀲𑁆𑀲𑀤𑁆𑀥𑁆𑀬𑀸’𑀤𑀺 𑀧𑀲𑀺𑀤𑁆𑀥𑀺𑀬𑀸.

𑀇𑀘𑁆𑀘𑀸’𑀤𑀺𑀤𑀻𑀧𑀓𑀢𑁆𑀢𑁂𑀧𑀺, 𑀧𑀼𑀩𑁆𑀩𑀁 𑀧𑀼𑀩𑁆𑀩 𑀫𑀧𑁂𑀓𑁆𑀔𑀺𑀦𑀻;

𑀯𑀸𑀓𑁆𑀬𑀫𑀸𑀮𑀸 𑀧𑀯𑀢𑁆𑀢𑀸𑀢𑀺, 𑀢𑀁 𑀫𑀸𑀮𑀸𑀤𑀻𑀧𑀓𑀁 𑀫𑀢𑀁.

𑀅𑀦𑁂𑀦𑁂’𑀯’𑀧𑁆𑀧𑀓𑀸𑀭𑁂𑀦, 𑀲𑁂𑀲𑀸𑀦 𑀫𑀧𑀺 𑀤𑀻𑀧𑀓𑁂;

𑀯𑀺𑀓𑀧𑁆𑀧𑀸𑀦𑀁 𑀯𑀺𑀥𑀸𑀢𑀩𑁆𑀩𑀸, 𑀦𑀼𑀕𑀢𑀺 𑀲𑀼𑀤𑁆𑀥𑀩𑀼𑀤𑁆𑀥𑀺𑀪𑀺.

𑀯𑀺𑀲𑁂𑀲 𑀯𑀘𑀦𑀺’𑀘𑁆𑀙𑀸𑀬𑀁, 𑀦𑀺𑀲𑁂𑀥𑀯𑀘𑀦𑀁 𑀢𑀼 𑀬𑀁;

𑀅𑀓𑁆𑀔𑁂𑀧𑁄 𑀦𑀸𑀫 𑀲𑁄𑀬𑀜𑁆𑀘, 𑀢𑀺𑀥𑀸 𑀓𑀸𑀮𑀧𑁆𑀧𑀪𑁂𑀤𑀢𑁄.

𑀏𑀓𑀸𑀓𑀻’ 𑀦𑁂𑀓𑀲𑁂𑀦𑀁 𑀢𑀁, 𑀫𑀸𑀭𑀁 𑀲 𑀯𑀺𑀚𑀬𑀻 𑀚𑀺𑀦𑁄;

𑀓𑀣𑀁 𑀢 𑀫𑀣𑀯𑀸 𑀢𑀲𑁆𑀲, 𑀧𑀸𑀭𑀫𑀻𑀩𑀮 𑀫𑀻𑀤𑀺𑀲𑀁.

𑀓𑀺𑀁 𑀘𑀺𑀢𑁆𑀢𑁂’𑀚𑀸𑀲𑀫𑀼𑀕𑁆𑀖𑀸𑀢𑀁, 𑀅𑀧𑀢𑁆𑀢𑁄’𑀲𑁆𑀫𑀻𑀢𑀺 𑀔𑀺𑀚𑁆𑀚𑀲𑁂;

𑀧𑀡𑀸𑀫𑁄 𑀦𑀦𑀼 𑀲𑁄 𑀬𑁂’𑀯, 𑀲𑀓𑀺𑀫𑁆𑀧𑀺 𑀲𑀼𑀕𑀢𑁂 𑀕𑀢𑁄.

𑀲𑀘𑁆𑀘𑀁 𑀦 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺, 𑀲𑀺𑀯𑀁 𑀲𑀼𑀚𑀦𑀕𑁄𑀘𑀭𑀁;

𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀭𑀺𑀓𑁆𑀓𑀦𑁆𑀢 [𑀧𑀭𑀺𑀓𑀦𑁆𑀢 (𑀓.)], 𑀫𑀸𑀦𑀲𑀸 𑀬𑁂 𑀲𑀼𑀤𑀼𑀚𑁆𑀚𑀦𑀸.

𑀜𑁂𑀬𑁆𑀬𑁄 𑀅𑀢𑁆𑀣𑀦𑁆𑀢𑀭𑀦𑁆𑀬𑀸𑀲𑁄, 𑀬𑁄, 𑀜𑁆𑀜𑀯𑀸𑀓𑁆𑀬𑀢𑁆𑀣𑀲𑀸𑀥𑀦𑁄;

𑀲𑀩𑁆𑀩𑀩𑁆𑀬𑀸𑀧𑀻 𑀯𑀺𑀲𑁂𑀲𑀝𑁆𑀞𑁄, 𑀳𑀺𑀯𑀺𑀲𑀺𑀝𑁆𑀞’𑀲𑁆𑀲 𑀪𑁂𑀤𑀢𑁄.

𑀢𑁂𑀧𑀺 𑀮𑁄𑀓𑀳𑀺𑀢𑀸 𑀲𑀢𑁆𑀢𑀸, 𑀲𑀽𑀭𑀺𑀬𑁄 𑀘𑀦𑁆𑀤𑀺𑀫𑀸 𑀅𑀧𑀺;

𑀅𑀢𑁆𑀣𑀁 𑀧𑀲𑁆𑀲 𑀕𑀫𑀺𑀲𑁆𑀲𑀦𑁆𑀢𑀺, 𑀦𑀺𑀬𑀫𑁄 𑀓𑁂𑀦 𑀮𑀗𑁆𑀖𑁆𑀬𑀢𑁂.

𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀯𑀲𑀻 𑀲𑁄𑀧𑀺 𑀫𑀼𑀦𑀺𑀲𑁆𑀲𑀭𑁄;

𑀕𑀢𑁄’𑀯 𑀦𑀺𑀩𑁆𑀩𑀼𑀢𑀺𑀁 𑀲𑀩𑁆𑀩𑁂, 𑀲𑀗𑁆𑀔𑀸𑀭𑀸 𑀦 𑀳𑀺 𑀲𑀲𑁆𑀲𑀢𑀸.

𑀚𑀺𑀦𑁄 ¶ 𑀲𑀁𑀲𑀸𑀭𑀓𑀦𑁆𑀢𑀸𑀭𑀸, 𑀚𑀦𑀁 𑀧𑀸𑀧𑁂𑀢𑀺 [𑀧𑀸𑀧𑁂𑀲𑀺 (𑀓.)] 𑀦𑀺𑀩𑁆𑀩𑀼𑀢𑀺𑀁;

𑀦𑀦𑀼 𑀬𑀼𑀢𑁆𑀢𑀸 𑀕𑀢𑀺 𑀲𑀸’𑀬𑀁, 𑀯𑁂𑀲𑀸𑀭𑀚𑁆𑀚 𑀲𑀫𑀗𑁆𑀕𑀺𑀦𑀁.

𑀲𑀼𑀭𑀢𑁆𑀢𑀁 𑀢𑁂’𑀥𑀭𑀨𑀼𑀝𑀁, 𑀚𑀺𑀦! 𑀭𑀜𑁆𑀚𑁂𑀢𑀺 𑀫𑀸𑀦𑀲𑀁;

𑀲𑀬𑀁 𑀭𑀸𑀕𑀧𑀭𑀻𑀢𑀸 𑀳𑀺, 𑀧𑀭𑁂 𑀭𑀜𑁆𑀚𑁂𑀦𑁆𑀢𑀺 𑀲𑀗𑁆𑀕𑀢𑁂.

𑀯𑀸𑀘𑁆𑀘𑁂 𑀕𑀫𑁆𑀫𑁂 𑀣 𑀯𑀢𑁆𑀣𑀽𑀦𑀁, 𑀲𑀤𑀺𑀲𑀢𑁆𑀢𑁂 𑀧𑀪𑁂𑀤𑀦𑀁;

𑀩𑁆𑀬𑀢𑀺𑀭𑁂𑀓𑁄’𑀬’𑀫𑀧𑁆𑀬𑁂’𑀓𑁄, 𑀪𑀬𑀪𑁂𑀤𑀸 𑀘𑀢𑀼𑀩𑁆𑀩𑀺𑀥𑁄.

𑀕𑀫𑁆𑀪𑀻𑀭𑀢𑁆𑀢 𑀫𑀳𑀢𑁆𑀢𑀸𑀤𑀺, 𑀕𑀼𑀡𑀸 𑀚𑀮𑀥𑀺𑀦𑀸 𑀚𑀺𑀦!;

𑀢𑀼𑀮𑁆𑀬𑁄 𑀢𑁆𑀯 𑀫𑀲𑀺 𑀪𑁂𑀤𑁄 𑀢𑀼, 𑀲𑀭𑀻𑀭𑁂𑀦𑁂’𑀤𑀺𑀲𑁂𑀦 𑀢𑁂.

𑀫𑀳𑀸𑀲𑀢𑁆𑀢𑀸’𑀢𑀺𑀕𑀫𑁆𑀪𑀻𑀭𑀸, 𑀲𑀸𑀕𑀭𑁄 𑀲𑀼𑀕𑀢𑁄𑀧𑀺 𑀘;

𑀲𑀸𑀕𑀭𑁄’𑀜𑁆𑀚𑀦𑀲𑀗𑁆𑀓𑀸𑀲𑁄, 𑀚𑀺𑀦𑁄 𑀘𑀸𑀫𑀻𑀓𑀭𑀚𑁆𑀚𑀼𑀢𑀺.

𑀦 𑀲𑀦𑁆𑀢𑀸𑀧𑀸𑀧𑀳𑀁 𑀦𑁂𑀯𑀺, 𑀘𑁆𑀙𑀺𑀢𑀤𑀁 𑀫𑀺𑀕𑀮𑁄𑀘𑀦𑀁;

𑀫𑀼𑀦𑀺𑀦𑁆𑀤! 𑀦𑀬𑀦𑀤𑁆𑀯𑀦𑁆𑀤𑀁, 𑀢𑀯 𑀢𑀕𑁆𑀕𑀼𑀡 𑀪𑀽𑀲𑀺𑀢𑀁.

𑀫𑀼𑀦𑀺𑀦𑁆𑀤𑀸𑀦𑀦 𑀫𑀫𑁆𑀪𑁄𑀚, 𑀫𑁂𑀲𑀁 𑀦𑀸𑀦𑀢𑁆𑀢 𑀫𑀻𑀤𑀺𑀲𑀁;

𑀲𑀼𑀯𑀼𑀢𑁆𑀢𑀸’𑀫𑀢𑀲𑀦𑁆𑀤𑀸𑀬𑀻, 𑀯𑀤𑀦𑀁 𑀦𑁂’𑀤𑀺𑀲’𑀫𑁆𑀩𑀼𑀚𑀁.

𑀧𑀲𑀺𑀤𑁆𑀥𑀁 𑀓𑀸𑀭𑀡𑀁 𑀬𑀢𑁆𑀣, 𑀦𑀺𑀯𑀢𑁆𑀢𑁂𑀢𑁆𑀯𑀸’ 𑀜𑀸𑀓𑀸𑀭𑀡𑀁;

𑀲𑀸𑀪𑀸𑀯𑀺𑀓𑀢𑁆𑀢 𑀫𑀣𑀯𑀸, 𑀯𑀺𑀪𑀸𑀩𑁆𑀬𑀁 𑀲𑀸 𑀯𑀺𑀪𑀸𑀯𑀦𑀸.

𑀅𑀦𑀜𑁆𑀚𑀺𑀢𑀸’𑀲𑀺𑀢𑀁 𑀦𑁂𑀢𑁆𑀢𑀁, 𑀅𑀥𑀭𑁄 𑀭𑀜𑁆𑀚𑀺𑀢𑀸’𑀭𑀼𑀡𑁄;

𑀲𑀫𑀸𑀦𑀢𑀸 𑀪𑀫𑀼 𑀘𑀸’𑀬𑀁, 𑀚𑀺𑀦𑀸’𑀦𑀸𑀯𑀜𑁆𑀘𑀺𑀢𑀸 𑀢𑀯.

𑀦 𑀳𑁄𑀢𑀺 𑀔𑀮𑀼 𑀤𑀼𑀚𑁆𑀚𑀦𑁆𑀬, 𑀫𑀧𑀺 𑀤𑀼𑀚𑁆𑀚𑀦𑀲𑀗𑁆𑀕𑀫𑁂;

𑀲𑀪𑀸𑀯𑀦𑀺𑀫𑁆𑀫𑀮𑀢𑀭𑁂, 𑀲𑀸𑀥𑀼𑀚𑀦𑁆𑀢𑀽𑀦 𑀘𑁂𑀢𑀲𑀺.

𑀚𑀦𑀓𑁄 ¶ , 𑀜𑀸𑀧𑀓𑁄 𑀘𑁂𑀢𑀺, 𑀤𑀼𑀯𑀺𑀥𑀸 𑀳𑁂𑀢𑀯𑁄 𑀲𑀺𑀬𑀼𑀁;

𑀧𑀝𑀺𑀲𑀗𑁆𑀔𑀭𑀡𑀁 𑀢𑁂𑀲𑀁, 𑀅𑀮𑀗𑁆𑀓𑀸𑀭𑀢𑀸𑀬𑁄’𑀤𑀺𑀢𑀁.

𑀪𑀸𑀯𑀸’𑀪𑀸𑀯 𑀓𑀺𑀘𑁆𑀘𑀯𑀲𑀸, 𑀘𑀺𑀢𑁆𑀢𑀳𑁂𑀢𑀼𑀯𑀲𑀸𑀧𑀺 𑀘;

𑀪𑁂𑀤𑀸’𑀦𑀦𑁆𑀢𑀸 𑀇𑀤𑀁 𑀢𑁂𑀲𑀁, 𑀫𑀼𑀔𑀫𑀢𑁆𑀢 𑀦𑀺𑀤𑀲𑁆𑀲𑀦𑀁.

𑀧𑀭𑀫𑀢𑁆𑀣𑀧𑀓𑀸𑀲𑁂’𑀓, 𑀭𑀲𑀸 𑀲𑀩𑁆𑀩𑀫𑀦𑁄𑀳𑀭𑀸;

𑀫𑀼𑀦𑀺𑀦𑁄 𑀤𑁂𑀲𑀦𑀸’𑀬𑀁 𑀫𑁂, 𑀓𑀸𑀫𑀁 𑀢𑁄𑀲𑁂𑀢𑀺 𑀫𑀸𑀦𑀲𑀁.

𑀥𑀻𑀭𑁂𑀳𑀺 𑀲𑀳 𑀲𑀁𑀯𑀸𑀲𑀸, 𑀲𑀤𑁆𑀥𑀫𑁆𑀫𑀲𑁆𑀲𑀸’𑀪𑀺𑀬𑁄𑀕𑀢𑁄;

𑀦𑀺𑀕𑁆𑀕𑀳𑁂𑀦𑀺’𑀦𑁆𑀤𑁆𑀭𑀺𑀬𑀸𑀦𑀜𑁆𑀘, 𑀤𑀼𑀓𑁆𑀔𑀲𑁆𑀲𑀼’𑀧𑀲𑀫𑁄 𑀲𑀺𑀬𑀸.

𑀫𑀼𑀦𑀺𑀦𑁆𑀤’𑀘𑀦𑁆𑀤 𑀲𑀁𑀯𑀸𑀤𑀺, 𑀓𑀦𑁆𑀢𑀪𑀸𑀯𑁄’𑀧𑀲𑁄𑀪𑀺𑀦𑀸;

𑀫𑀼𑀔𑁂𑀦𑁂’𑀯 𑀲𑀼𑀩𑁄𑀥𑀁 𑀢𑁂, 𑀫𑀦𑀁 𑀧𑀸𑀧𑀸’𑀪𑀺𑀦𑀺𑀲𑁆𑀲𑀝𑀁.

𑀲𑀸𑀥𑀼𑀳𑀢𑁆𑀣𑀸’𑀭𑀯𑀺𑀦𑁆𑀤𑀸𑀦𑀺, 𑀲𑀗𑁆𑀓𑁄𑀘𑀬𑀢𑀺 𑀢𑁂 𑀓𑀣𑀁;

𑀫𑀼𑀦𑀺𑀦𑁆𑀤! 𑀘𑀭𑀡𑀤𑁆𑀯𑀦𑁆𑀤, 𑀭𑀸𑀕𑀩𑀸𑀮𑀸’𑀢𑀧𑁄 𑀨𑀼𑀲𑀁?

𑀲𑀗𑁆𑀓𑁄𑀘𑀬𑀦𑁆𑀢𑀺 𑀚𑀦𑁆𑀢𑀽𑀦𑀁, 𑀧𑀸𑀡𑀺𑀧𑀗𑁆𑀓𑁂𑀭𑀼𑀳𑀸𑀦𑀺’𑀳;

𑀫𑀼𑀦𑀺𑀦𑁆𑀤! 𑀘𑀭𑀡𑀤𑁆𑀯𑀦𑁆𑀤, 𑀦𑀔 𑀘𑀦𑁆𑀤𑀸𑀦’ 𑀫𑀁𑀲𑀯𑁄.

𑀉𑀤𑁆𑀤𑀺𑀝𑁆𑀞𑀸𑀦𑀁 𑀧𑀤𑀢𑁆𑀣𑀸𑀦𑀁, 𑀅𑀦𑀼𑀤𑁆𑀤𑁂𑀲𑁄 𑀬𑀣𑀸𑀓𑁆𑀓𑀫𑀁;

‘𑀲𑀗𑁆𑀔𑁆𑀬𑀸𑀦’𑀫𑀺𑀢𑀺 𑀦𑀺𑀤𑁆𑀤𑀺𑀝𑁆𑀞𑀁, 𑀬𑀣𑀸𑀲𑀗𑁆𑀔𑁆𑀬𑀁 𑀓𑀫𑁄𑀧𑀺 𑀘.

𑀆𑀮𑀸𑀧 𑀳𑀸𑀲 𑀮𑀻𑀴𑀸𑀳𑀺, 𑀫𑀼𑀦𑀺𑀦𑁆𑀤! 𑀯𑀺𑀚𑀬𑀸 𑀢𑀯;

𑀓𑁄𑀓𑀺𑀮𑀸 𑀓𑀼𑀫𑀼𑀤𑀸𑀦𑀺 𑀘𑁄, 𑀧𑀲𑁂𑀯𑀦𑁆𑀢𑁂 𑀯𑀦𑀁 𑀚𑀮𑀁.

𑀲𑀺𑀬𑀸 𑀧𑀺𑀬𑀢𑀭𑀁 𑀦𑀸𑀫, 𑀅𑀢𑁆𑀣𑀭𑀽𑀧𑀲𑁆𑀲 𑀓𑀲𑁆𑀲𑀘𑀺;

𑀧𑀺𑀬𑀲𑁆𑀲𑀸’𑀢𑀺𑀲𑀬𑁂𑀦𑁂’𑀢𑀁, 𑀬𑀁 𑀳𑁄𑀢𑀺 𑀧𑀝𑀺𑀧𑀸𑀤𑀦𑀁.

𑀧𑀻𑀢𑀺𑀬𑀸 𑀫𑁂 𑀲𑀫𑀼𑀧𑁆𑀧𑀦𑁆𑀦𑀸, 𑀲𑀦𑁆𑀢! 𑀲𑀦𑁆𑀤𑀲𑁆𑀲𑀦𑀸 𑀢𑀯;

𑀓𑀸𑀮𑁂𑀦𑀸’𑀬𑀁 𑀪𑀯𑁂 𑀧𑀻𑀢𑀺, 𑀢𑀯𑁂’𑀯 𑀧𑀼𑀦 𑀤𑀲𑁆𑀲𑀦𑀸.

𑀯𑀡𑁆𑀡𑀺𑀢𑁂𑀦𑁄’𑀧𑀫𑀸𑀦𑁂𑀦, 𑀯𑀼𑀢𑁆𑀬𑀸’𑀥𑀺𑀧𑁆𑀧𑁂𑀢 𑀯𑀢𑁆𑀣𑀼𑀦𑁄;

𑀲𑀫𑀸𑀲𑀯𑀼𑀢𑁆𑀢𑀺 𑀦𑀸𑀫𑀸’𑀬𑀁, 𑀅𑀢𑁆𑀣 𑀲𑀗𑁆𑀔𑁂𑀧 𑀭𑀽𑀧𑀢𑁄.

𑀲𑀸’𑀬𑀁 ¶ 𑀯𑀺𑀲𑁂𑀲𑁆𑀬𑀫𑀢𑁆𑀢𑁂𑀦, 𑀪𑀺𑀦𑁆𑀦𑀸’𑀪𑀺𑀦𑁆𑀦𑀯𑀺𑀲𑁂𑀲𑀦𑀸;

𑀅𑀢𑁆𑀣𑁂’𑀯 𑀅𑀧𑀭𑀸 𑀧𑁆𑀬’𑀢𑁆𑀣𑀺, 𑀪𑀺𑀦𑁆𑀦𑀸’𑀪𑀺𑀦𑁆𑀦𑀯𑀺𑀲𑁂𑀲𑀦𑀸.

𑀯𑀺𑀲𑀼𑀤𑁆𑀥𑀸’𑀫𑀢𑀲𑀦𑁆𑀤𑀸𑀬𑀻, 𑀧𑀲𑀢𑁆𑀣𑀭𑀢𑀦𑀸’𑀮𑀬𑁄;

𑀕𑀫𑁆𑀪𑀻𑀭𑁄 𑀘𑀸’𑀬’ 𑀫𑀫𑁆𑀩𑁄𑀥𑀺, 𑀧𑀼𑀜𑁆𑀜𑁂𑀦𑀸’𑀧𑀸𑀤𑀺𑀢𑁄 𑀫𑀬𑀸.

𑀇𑀘𑁆𑀙𑀺𑀢’𑀢𑁆𑀣𑀧𑀤𑁄 𑀲𑀸𑀭𑁄, 𑀨𑀮𑀧𑀼𑀧𑁆𑀨𑁄’𑀧𑀲𑁄𑀪𑀺𑀢𑁄;

𑀲𑀘𑁆𑀙𑀸𑀬𑁄’𑀬’𑀫𑀧𑀼𑀩𑁆𑀩𑁄𑀯 𑀓𑀧𑁆𑀧𑀭𑀼𑀓𑁆𑀔𑁄 𑀲𑀫𑀼𑀝𑁆𑀞𑀺𑀢𑁄.

𑀲𑀸𑀕𑀭𑀢𑁆𑀢𑁂𑀦 𑀲𑀤𑁆𑀥𑀫𑁆𑀫𑁄, 𑀭𑀼𑀓𑁆𑀔𑀢𑁆𑀢𑁂𑀦𑁄’𑀤𑀺𑀢𑁄 𑀚𑀺𑀦𑁄;

𑀲𑀩𑁆𑀩𑁂 𑀲𑀸𑀥𑀸𑀭𑀡𑀸 𑀥𑀫𑁆𑀫𑀸, 𑀧𑀼𑀩𑁆𑀩𑀢𑁆𑀭𑀸’𑀜𑁆𑀜𑀢𑁆𑀭 𑀢𑀼’𑀢𑁆𑀢𑀬𑀁.

𑀯𑀢𑁆𑀣𑀼𑀦𑁄’𑀜𑁆𑀜𑀧𑁆𑀧𑀓𑀸𑀭𑁂𑀦, 𑀞𑀺𑀢𑀸 𑀯𑀼𑀢𑁆𑀢𑀺 𑀢𑀤’𑀜𑁆𑀜𑀣𑀸;

𑀧𑀭𑀺𑀓𑀧𑁆𑀧𑀻𑀬𑀢𑁂 𑀬𑀢𑁆𑀣, 𑀲𑀸 𑀳𑁄𑀢𑀺 𑀧𑀭𑀺𑀓𑀧𑁆𑀧𑀦𑀸.

𑀉𑀧𑀫𑀸’𑀩𑁆𑀪𑀦𑁆𑀢𑀭𑀢𑁆𑀢𑁂𑀦, 𑀓𑀺𑀭𑀺𑀬𑀸𑀤𑀺𑀯𑀲𑁂𑀦 𑀘;

𑀓𑀫𑁂𑀦𑁄’𑀤𑀸𑀳𑀭𑀺𑀲𑁆𑀲𑀸𑀫𑀺, 𑀯𑀺𑀯𑀺𑀥𑀸 𑀧𑀭𑀺𑀓𑀧𑁆𑀧𑀦𑀸.

𑀉𑀧𑀫𑀸𑀩𑁆𑀪𑀦𑁆𑀢𑀭𑀧𑀭𑀺𑀓𑀧𑁆𑀧𑀦𑀸

𑀇𑀘𑁆𑀙𑀸𑀪𑀗𑁆𑀕𑀸’𑀢𑀼𑀭𑀸’𑀲𑀻𑀦𑀸, 𑀢𑀸’𑀢𑀺𑀦𑀺𑀘𑁆𑀘𑀮 𑀫𑀘𑁆𑀙𑀭𑀸;

𑀯𑀲𑀁 𑀦𑁂𑀦𑁆𑀢𑀺’𑀯 𑀥𑀻𑀭𑀁 𑀢𑀁, 𑀢𑀤𑀸 𑀬𑁄𑀕𑀸’𑀪𑀺𑀬𑁄𑀕𑀢𑁄.

𑀕𑀚𑀁 𑀫𑀸𑀭𑁄 𑀲𑀫𑀸𑀭𑀼𑀴𑁆𑀳𑁄, 𑀬𑀼𑀤𑁆𑀥𑀸𑀬’𑀘𑁆𑀘𑀦𑁆𑀢’𑀫𑀼𑀦𑁆𑀦𑀢𑀁;

𑀫𑀕𑁆𑀕 𑀫𑀦𑁆𑀯𑁂𑀲𑀢𑀻 𑀦𑀽𑀦, 𑀚𑀺𑀦𑀪𑀻𑀢𑁄 𑀧𑀮𑀸𑀬𑀺𑀢𑀼𑀁.

𑀫𑀼𑀦𑀺𑀦𑁆𑀤! 𑀧𑀸𑀤𑀤𑁆𑀯𑀦𑁆𑀤𑁂 𑀢𑁂, 𑀘𑀸𑀭𑀼 𑀭𑀸𑀚𑀺𑀯 𑀲𑀼𑀦𑁆𑀤𑀭𑁂;

𑀫𑀜𑁆𑀜𑁂 𑀧𑀸𑀧𑀸’𑀪𑀺’𑀲𑀫𑁆𑀫𑀤𑁆𑀤, 𑀚𑀸𑀢𑀲𑁄𑀡𑁂𑀦 𑀲𑁄𑀡𑀺𑀫𑀸.

𑀫𑀜𑁆𑀜𑁂, 𑀲𑀗𑁆𑀓𑁂, 𑀥𑀼𑀯𑀁, 𑀦𑀽𑀦, 𑀫𑀺𑀯, 𑀫𑀺𑀘𑁆𑀘𑁂𑀯 𑀫𑀸𑀤𑀺𑀳𑀺;

𑀲𑀸’𑀬𑀁 𑀩𑁆𑀬𑀜𑁆𑀚𑀻𑀬𑀢𑁂 𑀓𑁆𑀯𑀸’𑀧𑀺, 𑀓𑁆𑀯𑀸’𑀧𑀺 𑀯𑀸𑀓𑁆𑀬𑁂𑀦 𑀕𑀫𑁆𑀬𑀢𑁂.

𑀤𑀬𑀸 𑀲𑀜𑁆𑀚𑀸𑀢 𑀲𑀭𑀲𑀸, 𑀤𑁂𑀳𑀸 𑀦𑀺𑀓𑁆𑀔𑀦𑁆𑀢𑀓𑀦𑁆𑀢𑀺𑀬𑁄;

𑀧𑀻𑀡𑁂𑀦𑁆𑀢𑀸 𑀚𑀺𑀦! 𑀢𑁂 𑀲𑀸𑀥𑀼, 𑀚𑀦𑀁 𑀲𑀭𑀲𑀢𑀁 𑀦𑀬𑀼𑀁.

𑀆𑀭𑀩𑁆𑀪𑀦𑁆𑀢𑀲𑁆𑀲 ¶ 𑀬𑀁𑀓𑀺𑀜𑁆𑀘𑀺, 𑀓𑀢𑁆𑀢𑀼𑀁 𑀧𑀼𑀜𑁆𑀜𑀯𑀲𑀸 𑀧𑀼𑀦;

𑀲𑀸𑀥𑀦’𑀦𑁆𑀢𑀭𑀮𑀸𑀪𑁄 𑀬𑁄, 𑀢𑀁 𑀯𑀤𑀦𑁆𑀢𑀺 𑀲𑀫𑀸𑀳𑀺𑀢𑀁.

𑀫𑀸𑀭𑀸’𑀭𑀺𑀪𑀗𑁆𑀕𑀸’𑀪𑀺𑀫𑀼𑀔, 𑀫𑀸𑀦𑀲𑁄 𑀢𑀲𑁆𑀲 𑀲𑀢𑁆𑀣𑀼𑀦𑁄;

𑀫𑀳𑀸𑀫𑀳𑀻 𑀫𑀳𑀸𑀭𑀯𑀁, 𑀭𑀯𑀻’𑀬’𑀫𑀼𑀧𑀓𑀸𑀭𑀺𑀓𑀸.

𑀅𑀯𑀢𑁆𑀯𑀸’𑀪𑀺𑀫𑀢𑀁 𑀢𑀲𑁆𑀲, 𑀲𑀺𑀤𑁆𑀥𑀺𑀬𑀸 𑀤𑀲𑁆𑀲𑀦’𑀜𑁆𑀜𑀣𑀸;

𑀯𑀤𑀦𑁆𑀢𑀺 𑀢𑀁 ‘𑀧𑀭𑀺𑀬𑀸𑀬, 𑀯𑀼𑀢𑁆𑀢𑀻’𑀢𑀺 𑀲𑀼𑀘𑀺𑀩𑀼𑀤𑁆𑀥𑀬𑁄.

𑀯𑀺𑀯𑀝’𑀗𑁆𑀕𑀡𑀦𑀺𑀓𑁆𑀔𑀺𑀢𑁆𑀢𑀁, 𑀥𑀦’𑀫𑀸𑀭𑀓𑁆𑀔 𑀯𑀚𑁆𑀚𑀺𑀢𑀁;

𑀥𑀦𑀓𑀸𑀫! 𑀬𑀣𑀸𑀓𑀸𑀫𑀁, 𑀢𑀼𑀯𑀁 𑀕𑀘𑁆𑀙 𑀬𑀤𑀺𑀘𑁆𑀙𑀲𑀺.

𑀣𑀼𑀢𑀺𑀁 𑀓𑀭𑁄𑀢𑀺 𑀦𑀺𑀦𑁆𑀤𑀦𑁆𑀢𑁄, 𑀯𑀺𑀬 𑀢𑀁 𑀩𑁆𑀬𑀸𑀚𑀯𑀡𑁆𑀡𑀦𑀁;

𑀤𑁄𑀲𑀸’𑀪𑀸𑀲𑀸 𑀕𑀼𑀡𑀸 𑀏𑀯, 𑀬𑀦𑁆𑀢𑀺 𑀲𑀦𑁆𑀦𑀺𑀥𑀺 𑀫𑀢𑁆𑀭 𑀳𑀺.

𑀲𑀜𑁆𑀘𑀸𑀮𑁂𑀢𑀼 𑀫𑀮𑀁 𑀢𑁆𑀯𑀁’𑀲𑀺, 𑀪𑀼𑀲𑀁 𑀓𑀼𑀯𑀮𑀬𑀸’𑀔𑀺𑀮𑀁;

𑀯𑀺𑀲𑁂𑀲𑀁 𑀢𑀸𑀯𑀢𑀸 𑀦𑀸𑀣!, 𑀕𑀼𑀡𑀸𑀦𑀁 𑀢𑁂 𑀯𑀤𑀸𑀫 𑀓𑀺𑀁?

𑀯𑀺𑀲𑁂𑀲𑀺’𑀘𑁆𑀙𑀸𑀬𑀁 𑀤𑀩𑁆𑀩𑀲𑁆𑀲, 𑀓𑁆𑀭𑀺𑀬𑀸, 𑀚𑀸𑀢𑀺, 𑀕𑀼𑀡𑀲𑁆𑀲 𑀘;

𑀯𑁂𑀓𑀮𑁆𑀮𑀤𑀲𑁆𑀲𑀦𑀁 𑀬𑀢𑁆𑀭, 𑀯𑀺𑀲𑁂𑀲𑁄 𑀦𑀸𑀫 𑀬𑀁 𑀪𑀯𑁂.

𑀦 𑀭𑀣𑀸, 𑀦 𑀘 𑀫𑀸𑀢𑀗𑁆𑀕𑀸, 𑀦 𑀳𑀬𑀸, 𑀦 𑀧𑀤𑀸𑀢𑀬𑁄;

𑀚𑀺𑀢𑁄 𑀫𑀸𑀭𑀸𑀭𑀺 𑀫𑀼𑀦𑀺𑀦𑀸, 𑀲𑀫𑁆𑀪𑀸𑀭𑀸𑀯𑀚𑁆𑀚𑀦𑁂𑀦 𑀳𑀺.

𑀦 𑀩𑀤𑁆𑀥𑀸 𑀪𑀽𑀓𑀼𑀝𑀺, 𑀦𑁂𑀯, 𑀨𑀼𑀭𑀺𑀢𑁄 𑀤𑀲𑀦𑀘𑁆𑀙𑀤𑁄;

𑀫𑀸𑀭𑀸𑀭𑀺𑀪𑀗𑁆𑀕𑀁 𑀘𑀸’𑀓𑀸𑀲𑀺, 𑀫𑀼𑀦𑀺 𑀯𑀻𑀭𑁄 𑀯𑀭𑁄 𑀲𑀬𑀁.

𑀦 𑀤𑀺𑀲𑀸𑀲𑀼 𑀩𑁆𑀬𑀸𑀢𑁆𑀢𑀸 [𑀢𑀢𑀸 (𑀓.)] 𑀭𑀁𑀲𑀺,

𑀢𑀣𑀸𑀧𑁆𑀬’𑀦𑁆𑀥𑀢𑀫𑀳𑀭𑀁, 𑀧𑀭𑀁 𑀲𑀸𑀥𑀼𑀲𑀼𑀪𑀸𑀲𑀺𑀢𑀁.

𑀦 𑀔𑀭𑀁, 𑀦 𑀳𑀺 𑀯𑀸 𑀣𑀤𑁆𑀥𑀁, 𑀫𑀼𑀦𑀺𑀦𑁆𑀤! 𑀯𑀘𑀦𑀁 𑀢𑀯;

𑀢𑀣𑀸𑀧𑀺 𑀕𑀸𑀴𑁆𑀳𑀁 𑀔𑀡𑀢𑀺, 𑀦𑀺𑀫𑁆𑀫𑀽𑀮𑀁 𑀚𑀦𑀢𑀸𑀫𑀤𑀁.

𑀤𑀲𑁆𑀲𑀻𑀬𑀢𑁂’𑀢𑀺𑀭𑀺𑀢𑁆𑀢𑀁 ¶ 𑀢𑀼, 𑀲𑀽𑀭𑀯𑀻𑀭𑀢𑁆𑀢𑀦𑀁 𑀬𑀳𑀺𑀁;

𑀯𑀤𑀦𑁆𑀢𑀺 𑀯𑀺𑀜𑁆𑀜𑀽𑀯𑀘𑀦𑀁, 𑀭𑀼𑀴𑁆𑀳𑀸𑀳𑀗𑁆𑀓𑀸𑀭 𑀫𑀻𑀤𑀺𑀲𑀁.

𑀤𑀫𑁂 𑀦𑀦𑁆𑀤𑁄𑀧𑀦𑀦𑁆𑀤𑀲𑁆𑀲, 𑀓𑀺𑀁 𑀫𑁂 𑀩𑁆𑀬𑀸𑀧𑀸𑀭𑀤𑀲𑁆𑀲𑀦𑀸?

𑀧𑀼𑀢𑁆𑀢𑀸 𑀫𑁂 𑀧𑀸𑀤𑀲𑀫𑁆𑀪𑀢𑁆𑀢𑀸, 𑀲𑀚𑁆𑀚𑀸 𑀲𑀦𑁆𑀢𑁂’𑀯 𑀢𑀸𑀤𑀺𑀲𑁂.

𑀲𑀺𑀮𑁂𑀲𑁄 𑀯𑀘𑀦𑀸’𑀦𑁂𑀓𑀸, 𑀪𑀺𑀥𑁂𑀬𑁆𑀬𑁂’𑀓𑀧𑀤𑀸𑀬𑀼𑀢𑀁;

𑀅𑀪𑀺𑀦𑁆𑀦𑀧𑀤𑀯𑀸𑀓𑁆𑀬𑀸𑀤𑀺, 𑀯𑀲𑀸 𑀢𑁂𑀥𑀸’𑀬 𑀫𑀻𑀭𑀺𑀢𑁄.

𑀅𑀦𑁆𑀥𑀢𑀫𑀳𑀭𑁄 𑀳𑀸𑀭𑀻, 𑀲𑀫𑀸𑀭𑀼𑀴𑁆𑀳𑁄 𑀫𑀳𑁄𑀤𑀬𑀁;

𑀭𑀸𑀚𑀢𑁂 𑀭𑀁𑀲𑀺𑀫𑀸𑀮𑀻’𑀬𑀁, 𑀪𑀕𑀯𑀸 𑀩𑁄𑀥𑀬𑀁 𑀚𑀦𑁂.

𑀲𑀸𑀭𑀤𑀸’𑀫𑀮𑀓𑀸’𑀪𑀸𑀲𑁄, 𑀲𑀫𑀸𑀦𑀻𑀢 𑀧𑀭𑀺𑀓𑁆𑀔𑀬𑁄;

𑀓𑀼𑀫𑀼𑀤𑀸’𑀓𑀭𑀲𑀫𑁆𑀩𑁄𑀥𑁄, 𑀧𑀻𑀡𑁂𑀢𑀺 𑀚𑀦𑀢𑀁 𑀲𑀼𑀥𑀻.

𑀲𑀫𑀸𑀳𑀺𑀢’𑀢𑁆𑀢𑀯𑀺𑀦𑀬𑁄, 𑀅𑀳𑀻𑀦 𑀫𑀤 𑀫𑀤𑁆𑀤𑀦𑁄;

𑀲𑀼𑀕𑀢𑁄 𑀯𑀺𑀲𑀤𑀁 𑀧𑀸𑀢𑀼, 𑀧𑀸𑀡𑀺𑀦𑀁 𑀲𑁄 𑀯𑀺𑀦𑀸𑀬𑀓𑁄.

𑀪𑀺𑀦𑁆𑀦𑀸𑀪𑀺𑀦𑁆𑀦𑀧𑀤𑀯𑀸𑀓𑁆𑀬𑀲𑀺𑀮𑁂𑀲𑁄.

𑀯𑀺𑀭𑀼𑀤𑁆𑀥𑀸, 𑀯𑀺𑀭𑀼𑀤𑁆𑀥𑀸, 𑀪𑀺𑀦𑁆𑀦, 𑀓𑀫𑁆𑀫𑀸, 𑀦𑀺𑀬𑀫𑀯𑀸, 𑀧𑀭𑁄;

𑀦𑀺𑀬𑀫’𑀓𑁆𑀔𑁂𑀧𑀯𑀘𑀦𑁄, 𑀅𑀯𑀺𑀭𑁄𑀥𑀺, 𑀯𑀺𑀭𑁄𑀥𑁆𑀬’𑀧𑀺.

𑀑𑀘𑀺𑀢𑁆𑀬 𑀲𑀫𑁆𑀧𑁄𑀲𑀓𑀸𑀤𑀺, 𑀲𑀺𑀮𑁂𑀲𑁄, 𑀧𑀤𑀚𑀸’𑀤𑀺 [𑀧𑀤𑀚𑀸𑀢𑀺 (𑀓.)] 𑀧𑀺;

𑀏𑀲𑀁 𑀦𑀺𑀤𑀲𑁆𑀲𑀦𑁂𑀲𑁆𑀯𑁂’𑀯, 𑀭𑀽𑀧 𑀫𑀸𑀯𑀺 𑀪𑀯𑀺𑀲𑁆𑀲𑀢𑀺.

𑀲𑀯𑀲𑁂 𑀯𑀢𑁆𑀢𑀬𑀁 𑀮𑁄𑀓𑀁, 𑀅𑀔𑀺𑀮𑀁 𑀓𑀮𑁆𑀮𑀯𑀺𑀕𑁆𑀕𑀳𑁄;

𑀧𑀭𑀸𑀪𑀯𑀢𑀺 𑀫𑀸𑀭𑀸𑀭𑀺, 𑀥𑀫𑁆𑀫𑀭𑀸𑀚𑀸 𑀯𑀺𑀚𑀫𑁆𑀪𑀢𑁂.

𑀲𑀪𑀸𑀯𑀫𑀥𑀼𑀭𑀁 𑀧𑀼𑀜𑁆𑀜 𑀯𑀺𑀲𑁂𑀲𑁄’𑀤𑀬 𑀲𑀫𑁆𑀪𑀯𑀁;

𑀲𑀼𑀡𑀦𑁆𑀢𑀺 𑀯𑀸𑀘𑀁 𑀫𑀼𑀦𑀺𑀦𑁄, 𑀚𑀦𑀸 𑀧𑀲𑁆𑀲𑀦𑁆𑀢𑀺 𑀘𑀸’𑀫𑀢𑀁.

𑀅𑀦𑁆𑀥𑀓𑀸𑀭𑀸’𑀧𑀳𑀸𑀭𑀸𑀬 ¶ , 𑀲𑀪𑀸𑀯 𑀫𑀥𑀼𑀭𑀸𑀬 𑀘;

𑀫𑀦𑁄 𑀧𑀻𑀡𑁂𑀢𑀺 𑀚𑀦𑁆𑀢𑀽𑀦𑀁, 𑀚𑀺𑀦𑁄 𑀯𑀸𑀘𑀸𑀬 𑀪𑀸𑀬 𑀘.

𑀓𑁂𑀲’𑀓𑁆𑀔𑀻𑀦𑀁’𑀯 𑀓𑀡𑁆𑀳𑀢𑁆𑀢𑀁, 𑀪𑀫𑀽𑀦𑀁𑀬𑁂𑀯 𑀯𑀗𑁆𑀓𑀢𑀸;

𑀧𑀸𑀡𑀺𑀧𑀸𑀤𑀸’𑀥𑀭𑀸𑀦𑀁’𑀯, 𑀫𑀼𑀦𑀺𑀦𑁆𑀤𑀲𑁆𑀲𑀸’𑀪𑀺𑀭𑀢𑁆𑀢𑀢𑀸.

𑀧𑀸𑀡𑀺𑀧𑀸𑀤𑀸’𑀥𑀭𑁂𑀲𑁆𑀯𑁂’𑀯, 𑀲𑀸𑀭𑀸𑀕𑁄 𑀢𑀯 𑀤𑀺𑀲𑁆𑀲𑀢𑀺;

𑀤𑀺𑀲𑁆𑀲𑀢𑁂 𑀲𑁄’𑀬 𑀫𑀣𑀯𑀸, 𑀦𑀸𑀣! 𑀲𑀸𑀥𑀼𑀕𑀼𑀡𑁂𑀲𑁆𑀯’𑀧𑀺.

𑀲𑀮𑀓𑁆𑀔𑀡𑁄’𑀢𑀺𑀲𑀼𑀪𑀕𑁄, 𑀢𑁂𑀚𑀲𑁆𑀲𑀻 𑀦𑀺𑀬𑀢𑁄’𑀤𑀬𑁄;

𑀲𑀤𑀬𑁄 𑀧𑁆𑀬’𑀤𑀬𑁄 𑀧𑀸𑀧𑁂, 𑀘𑀺𑀢𑁆𑀢𑀸’𑀬𑀁 𑀫𑀼𑀦𑀺𑀦𑁄 𑀕𑀢𑀺.

𑀑𑀘𑀺𑀢𑁆𑀬𑀲𑀫𑁆𑀧𑁄𑀲𑀓𑀧𑀤𑀲𑀺𑀮𑁂𑀲

𑀲𑀁𑀲𑀸𑀭𑀤𑀼𑀓𑁆𑀔𑁄’𑀧𑀳𑀢𑀸, 𑀯𑀦𑀢𑀸 𑀚𑀦𑀢𑀸 𑀢𑁆𑀯𑀬𑀺;

𑀲𑀼𑀔 𑀫𑀺𑀘𑁆𑀙𑀺𑀢 𑀫𑀘𑁆𑀘𑀦𑁆𑀢𑀁, 𑀅𑀫𑀢𑀦𑁆𑀤𑀤! 𑀯𑀺𑀦𑁆𑀤𑀢𑀺.

𑀕𑀼𑀡𑀬𑀼𑀢𑁆𑀢𑁂𑀳𑀺 𑀯𑀢𑁆𑀣𑀽𑀳𑀺, 𑀲𑀫𑀁 𑀓𑀢𑁆𑀯𑀸𑀦 𑀓𑀲𑁆𑀲𑀘𑀺;

𑀲𑀁𑀓𑀺𑀢𑁆𑀢𑀦𑀁 𑀪𑀯𑀢𑀺 𑀬𑀁, 𑀲𑀸 𑀫𑀢𑀸 𑀢𑀼𑀮𑁆𑀬𑀬𑁄𑀕𑀺𑀢𑀸.

𑀲𑀫𑁆𑀧𑀢𑁆𑀢𑀲𑀫𑁆𑀫𑀤𑁄 𑀮𑁄𑀓𑁄, 𑀲𑀫𑁆𑀧𑀢𑁆𑀢𑀸’𑀮𑁄𑀓𑀲𑀫𑁆𑀧𑀤𑁄;

𑀉𑀪𑁄𑀳𑀺 𑀭𑀁𑀲𑀺𑀫𑀸𑀮𑀻 𑀘, 𑀪𑀕𑀯𑀸 𑀘 𑀢𑀫𑁄𑀦𑀼𑀤𑁄.

𑀅𑀢𑁆𑀣𑀦𑁆𑀢𑀭𑀁 𑀲𑀸𑀥𑀬𑀢𑀸, 𑀓𑀺𑀜𑁆𑀘𑀺 𑀢𑀁 𑀲𑀤𑀺𑀲𑀁 𑀨𑀮𑀁;

𑀤𑀲𑁆𑀲𑀻𑀬𑀢𑁂 𑀅𑀲𑀦𑁆𑀢𑀁 𑀯𑀸, 𑀲𑀦𑁆𑀢𑀁 𑀯𑀸 𑀢𑀁 𑀦𑀺𑀤𑀲𑁆𑀲𑀦𑀁.

𑀉𑀤𑀬𑀸 ¶ 𑀲𑀫𑀡𑀺𑀦𑁆𑀤𑀲𑁆𑀲, 𑀬𑀦𑁆𑀢𑀺 𑀧𑀸𑀧𑀸 𑀧𑀭𑀸𑀪𑀯𑀁;

𑀥𑀫𑁆𑀫𑀭𑀸𑀚𑀯𑀺𑀭𑀼𑀤𑁆𑀥𑀸𑀦𑀁, 𑀲𑀽𑀘𑀬𑀦𑁆𑀢𑀸 𑀤𑀼𑀭’𑀦𑁆𑀢𑀢𑀁.

𑀲𑀺𑀭𑁄 𑀦𑀺𑀓𑁆𑀔𑀺𑀢𑁆𑀢 𑀘𑀭𑀡𑁄, 𑀘𑁆𑀙𑀭𑀺𑀬𑀸𑀦’𑀫𑁆𑀩𑀼𑀚𑀸𑀦’𑀬𑀁;

𑀧𑀭𑀫’𑀩𑁆𑀪𑀼𑀢𑀢𑀁 𑀮𑁄𑀓𑁂, 𑀯𑀺𑀜𑁆𑀜𑀸𑀧𑁂𑀢’𑀢𑁆𑀢𑀦𑁄 𑀚𑀺𑀦𑁄.

𑀯𑀺𑀪𑀽𑀢𑀺𑀬𑀸 𑀫𑀳𑀦𑁆𑀢𑀢𑁆𑀢𑀁, 𑀅𑀥𑀺𑀧𑁆𑀧𑀸𑀬𑀲𑁆𑀲 𑀯𑀸 𑀲𑀺𑀬𑀸;

𑀧𑀭𑀫𑀼𑀓𑁆𑀓𑀁𑀲𑀢𑀁 𑀬𑀸𑀢𑀁, 𑀢𑀁 𑀫𑀳𑀦𑁆𑀢𑀢𑁆𑀢 𑀫𑀻𑀭𑀺𑀢𑀁.

𑀓𑀺𑀭𑀻𑀝 𑀭𑀢𑀦’𑀘𑁆𑀙𑀸𑀬𑀸, 𑀦𑀼𑀯𑀺𑀤𑁆𑀥𑀸’𑀢𑀧 𑀯𑀸𑀭𑀡𑁄;

𑀧𑀼𑀭𑀸 𑀧𑀭𑀁 𑀲𑀺𑀭𑀺𑀁 𑀯𑀺𑀦𑁆𑀤𑀺, 𑀩𑁄𑀥𑀺𑀲𑀢𑁆𑀢𑁄’ 𑀪𑀺𑀦𑀺𑀓𑁆𑀔𑀫𑀸.

𑀲𑀢𑁆𑀢𑁄 𑀲𑀫𑁆𑀩𑁄𑀥𑀺𑀬𑀁 𑀩𑁄𑀥𑀺, 𑀲𑀢𑁆𑀢𑁄 𑀲𑀢𑁆𑀢𑀳𑀺𑀢𑀸𑀬 𑀲𑁄;

𑀳𑀺𑀢𑁆𑀯𑀸 𑀲𑁆𑀦𑁂𑀳𑀭𑀲𑀸𑀩𑀦𑁆𑀥, 𑀫𑀧𑀺 𑀭𑀸𑀳𑀼𑀮𑀫𑀸𑀢𑀭𑀁.

𑀕𑁄𑀧𑁂𑀢𑁆𑀯𑀸 𑀯𑀡𑁆𑀡𑀦𑀻𑀬𑀁 𑀬𑀁, 𑀓𑀺𑀜𑁆𑀘𑀺 𑀤𑀲𑁆𑀲𑀻𑀬𑀢𑁂 𑀧𑀭𑀁;

𑀅𑀲𑀫𑀁 𑀯𑀸 𑀲𑀫𑀁 𑀢𑀲𑁆𑀲, 𑀬𑀤𑀺 𑀲𑀸 𑀯𑀜𑁆𑀘𑀦𑀸 𑀫𑀢𑀸.

𑀧𑀼𑀭𑀢𑁄 𑀦 𑀲𑀳𑀲𑁆𑀲𑁂𑀲𑀼, 𑀦 𑀧𑀜𑁆𑀘𑁂𑀲𑀼 𑀘 𑀢𑀸𑀤𑀺𑀦𑁄;

𑀫𑀸𑀭𑁄 𑀧𑀭𑁂𑀲𑀼 𑀢𑀲𑁆𑀲𑁂’𑀲𑀁, 𑀲𑀳𑀲𑁆𑀲𑀁 𑀤𑀲𑀯𑀟𑁆𑀠𑀺𑀢𑀁.

𑀯𑀺𑀯𑀸𑀤 𑀫𑀦𑀼𑀬𑀼𑀜𑁆𑀚𑀦𑁆𑀢𑁄, 𑀫𑀼𑀦𑀺𑀦𑁆𑀤𑀯𑀤𑀦𑀺’𑀦𑁆𑀤𑀼𑀦𑀸;

𑀲𑀫𑁆𑀧𑀼𑀡𑁆𑀡𑁄 𑀘𑀦𑁆𑀤𑀺𑀫𑀸 𑀦𑀸’𑀬𑀁, 𑀙𑀢𑁆𑀢 𑀫𑁂𑀢𑀁 𑀫𑀦𑁄𑀪𑀼𑀦𑁄.

𑀧𑀭𑀸𑀦𑀼𑀯𑀢𑁆𑀢𑀦𑀸𑀤𑀻𑀳𑀺, 𑀦𑀺𑀩𑁆𑀩𑀺𑀦𑁆𑀤𑁂𑀦𑀺’𑀳 𑀬𑀸 𑀓𑀢𑀸;

𑀣𑀼𑀢𑀺 𑀭’𑀧𑁆𑀧𑀓𑀢𑁂 𑀲𑀸’𑀬𑀁, 𑀲𑀺𑀬𑀸 𑀅𑀧𑁆𑀧𑀓𑀢𑀢𑁆𑀣𑀼𑀢𑀺.

𑀲𑀼𑀔𑀁 𑀚𑀻𑀯𑀦𑁆𑀢𑀺 𑀳𑀭𑀺𑀡𑀸, 𑀯𑀦𑁂𑀲𑁆𑀯’𑀧𑀭𑀲𑁂𑀯𑀺𑀦𑁄;

𑀅𑀦𑀸𑀬𑀸𑀲𑁄 𑀧𑀮𑀸𑀪𑁂𑀳𑀺, 𑀚𑀮𑀤𑀩𑁆𑀪𑀗𑁆𑀓𑀼𑀭𑀸𑀤𑀺𑀪𑀺.

𑀉𑀢𑁆𑀢𑀭𑀁 𑀉𑀢𑁆𑀢𑀭𑀁 𑀬𑀢𑁆𑀣, 𑀧𑀼𑀩𑁆𑀩𑀧𑀼𑀩𑁆𑀩𑀯𑀺𑀲𑁂𑀲𑀦𑀁;

𑀲𑀺𑀬𑀸 𑀏𑀓𑀸𑀯𑀮𑀺 𑀲𑀸’𑀬𑀁, 𑀤𑁆𑀯𑀺𑀥𑀸 𑀯𑀺𑀥𑀺, 𑀦𑀺𑀲𑁂𑀥𑀢𑁄.

𑀧𑀸𑀤𑀸 ¶ 𑀦𑀔𑀸𑀮𑀺 𑀭𑀼𑀘𑀺𑀭𑀸, 𑀦𑀔𑀸𑀮𑀺 𑀭𑀁𑀲𑀺 𑀪𑀸𑀲𑀼𑀭𑀸;

𑀭𑀁𑀲𑀻𑀢𑀫𑁄𑀧𑀳𑀸𑀦𑁂’𑀓, 𑀭𑀲𑀸 𑀲𑁄𑀪𑀦𑁆𑀢𑀺 𑀲𑀢𑁆𑀣𑀼𑀦𑁄.

𑀦𑀸’𑀮𑀬𑁄 𑀬𑁄 𑀲 𑀚𑀦𑁆𑀢𑀽𑀦𑀁, 𑀦𑀸’𑀦𑀦𑁆𑀢 𑀩𑁆𑀬𑀲𑀦𑀸 𑀯𑀳𑁄.

𑀬𑀳𑀺𑀁 𑀪𑀽𑀲𑀺𑀬 𑀪𑀽𑀲𑀢𑁆𑀢𑀁, 𑀅𑀜𑁆𑀜𑀫𑀜𑁆𑀜𑀁 𑀢𑀼 𑀯𑀢𑁆𑀣𑀼𑀦𑀁;

𑀯𑀺𑀦𑀸’𑀯 𑀲𑀤𑀺𑀲𑀢𑁆𑀢𑀁 𑀢𑀁, 𑀅𑀜𑁆𑀜𑀫𑀜𑁆𑀜𑀯𑀺𑀪𑀽𑀲𑀦𑀁.

𑀩𑁆𑀬𑀸𑀫𑀁’𑀲𑀼 𑀫𑀡𑁆𑀟𑀮𑀁 𑀢𑁂𑀦, 𑀫𑀼𑀦𑀺𑀦𑀸 𑀮𑁄𑀓𑀩𑀦𑁆𑀥𑀼𑀦𑀸;

𑀫𑀳𑀦𑁆𑀢𑀺𑀁 𑀯𑀺𑀦𑁆𑀤𑀢𑀻 𑀓𑀦𑁆𑀢𑀺𑀁, 𑀲𑁄𑀧𑀺 𑀢𑁂𑀦𑁂𑀯 𑀢𑀸𑀤𑀺𑀲𑀺𑀁.

𑀓𑀣𑀦𑀁 𑀲𑀳𑀪𑀸𑀯𑀲𑁆𑀲, 𑀓𑁆𑀭𑀺𑀬𑀸𑀬 𑀘, 𑀕𑀼𑀡𑀲𑁆𑀲 𑀘;

‘𑀲𑀳𑀯𑀼𑀢𑁆𑀢𑀻’𑀢𑀺 𑀯𑀺𑀜𑁆𑀜𑁂𑀬𑁆𑀬𑀁, 𑀢’𑀤𑀼𑀤𑀸𑀳𑀭𑀡𑀁 𑀬𑀣𑀸.

𑀚𑀮𑀦𑁆𑀢𑀺 𑀘𑀦𑁆𑀤𑀭𑀁𑀲𑀻𑀳𑀺, 𑀲𑀫𑀁 𑀲𑀢𑁆𑀣𑀼 𑀦𑀔𑀁 𑀲𑀯𑁄;

𑀯𑀺𑀚𑀫𑁆𑀪𑀢𑀺 𑀘 𑀘𑀦𑁆𑀤𑁂𑀦, 𑀲𑀫𑀁 𑀢𑀫𑁆𑀫𑀼𑀔𑀘𑀦𑁆𑀤𑀺𑀫𑀸.

𑀚𑀺𑀦𑁄’𑀤𑀬𑁂𑀦 𑀫𑀮𑀻𑀦𑀁, 𑀲𑀳 𑀤𑀼𑀚𑁆𑀚𑀦 𑀘𑁂𑀢𑀲𑀸;

𑀧𑀸𑀧𑀁 𑀤𑀺𑀲𑀸 𑀲𑀼𑀯𑀺𑀫𑀮𑀸, 𑀲𑀳 𑀲𑀚𑁆𑀚𑀦 𑀘𑁂𑀢𑀲𑀸.

𑀯𑀺𑀭𑁄𑀥𑀻𑀦𑀁 𑀧𑀤’𑀢𑁆𑀣𑀸𑀦𑀁, 𑀬𑀢𑁆𑀣 𑀲𑀁𑀲𑀕𑁆𑀕𑀤𑀲𑁆𑀲𑀦𑀁;

𑀲𑀫𑀼𑀓𑁆𑀓𑀁𑀲𑀸’𑀪𑀺𑀥𑀸𑀦𑀢𑁆𑀣𑀁, 𑀫𑀢𑀸 𑀲𑀸’𑀬𑀁 𑀯𑀺𑀭𑁄𑀥𑀺𑀢𑀸.

𑀕𑀼𑀡𑀸 𑀲𑀪𑀸𑀯 𑀫𑀥𑀼𑀭𑀸, 𑀅𑀧𑀺 𑀮𑁄𑀓𑁂’𑀓 𑀩𑀦𑁆𑀥𑀼𑀦𑁄;

𑀲𑁂𑀯𑀺𑀢𑀸 𑀧𑀸𑀧 𑀲𑁂𑀯𑀻𑀦𑀁, 𑀲𑀫𑁆𑀧𑀤𑀽𑀲𑁂𑀦𑁆𑀢𑀺 𑀫𑀸𑀦𑀲𑀁.

𑀬𑀲𑁆𑀲 𑀓𑀲𑁆𑀲 𑀘𑀺 𑀤𑀸𑀦𑁂𑀦, 𑀬𑀲𑁆𑀲 𑀓𑀲𑁆𑀲 𑀘𑀺 𑀯𑀢𑁆𑀣𑀼𑀦𑁄;

𑀯𑀺𑀲𑀺𑀝𑁆𑀞𑀲𑁆𑀲 𑀬 𑀫𑀸𑀤𑀸𑀦𑀁, ‘𑀧𑀭𑀺𑀯𑀼𑀢𑁆𑀢𑀻’𑀢𑀺 𑀲𑀸 𑀫𑀢𑀸.

𑀧𑀼𑀭𑀸 𑀧𑀭𑁂𑀲𑀁 𑀤𑀢𑁆𑀯𑀸𑀦, 𑀫𑀦𑀼𑀜𑁆𑀜𑀁 𑀦𑀬𑀦𑀸𑀤𑀺𑀓𑀁;

𑀫𑀼𑀦𑀺𑀦𑀸 𑀲𑀫𑀦𑀼𑀧𑁆𑀧𑀢𑁆𑀢𑀸, 𑀤𑀸𑀦𑀺 𑀲𑀩𑁆𑀩𑀜𑁆𑀜𑀼𑀢𑀸𑀲𑀺𑀭𑀻 [𑀫𑀼𑀦𑀺𑀦𑁆𑀤! 𑀲𑀫𑀦𑀼𑀧𑁆𑀧𑀢𑁆𑀢𑁄, 𑀤𑀸𑀦𑀺 𑀲𑀩𑁆𑀩𑀜𑁆𑀜𑀼𑀢𑀸𑀲𑀺𑀭𑀺𑀁 (𑀓.)].

𑀓𑀺𑀜𑁆𑀘𑀺 ¶ 𑀤𑀺𑀲𑁆𑀯𑀸𑀦 𑀯𑀺𑀜𑁆𑀜𑀸𑀢𑀸, 𑀧𑀝𑀺𑀧𑀚𑁆𑀚𑀢𑀺 𑀢𑀁𑀲𑀫𑀁;

𑀲𑀁𑀲𑀬𑀸’𑀧𑀕𑀢𑀁 𑀯𑀢𑁆𑀣𑀼𑀁, 𑀬𑀢𑁆𑀣 𑀲𑁄’𑀬𑀁 𑀪𑀫𑁄 𑀫𑀢𑁄.

𑀲𑀫𑀁 𑀤𑀺𑀲𑀸𑀲𑀼’𑀚𑁆𑀚𑀮𑀸𑀲𑀼, 𑀚𑀺𑀦 𑀧𑀸𑀤 𑀦𑀔𑀁’𑀲𑀼𑀦𑀸;

𑀧𑀲𑁆𑀲𑀦𑁆𑀢𑀸 𑀅𑀪𑀺𑀦𑀦𑁆𑀤𑀦𑁆𑀢𑀺, 𑀘𑀦𑁆𑀤𑀸’𑀢𑀧 𑀫𑀦𑀸 𑀚𑀦𑀸.

𑀧𑀯𑀼𑀘𑁆𑀘𑀢𑁂 𑀬𑀁 𑀦𑀸𑀫𑀸𑀤𑀺, 𑀓𑀯𑀻𑀦𑀁 𑀪𑀸𑀯𑀩𑁄𑀥𑀦𑀁;

𑀬𑁂𑀦 𑀓𑁂𑀦𑀘𑀺 𑀯𑀡𑁆𑀡𑁂𑀦, 𑀪𑀸𑀯𑁄 𑀦𑀸𑀫𑀸’𑀬 𑀫𑀻𑀭𑀺𑀢𑁄.

𑀦𑀦𑀼 𑀢𑁂𑀬𑁂’𑀯 𑀲𑀦𑁆𑀢𑀸𑀦𑁄, 𑀲𑀸𑀕𑀭𑀸 𑀦 𑀓𑀼𑀮𑀸𑀘𑀮𑀸;

𑀫𑀦𑀫𑁆𑀧𑀺 𑀫𑀭𑀺𑀬𑀸𑀤𑀁 𑀬𑁂, 𑀲𑀁𑀯𑀝𑁆𑀝𑁂𑀧𑀺 𑀚𑀳𑀦𑁆𑀢𑀺 𑀦𑁄.

𑀅𑀗𑁆𑀕𑀗𑁆𑀕𑀺 𑀪𑀸𑀯𑀸 𑀲𑀤𑀺𑀲, 𑀩𑀮𑀪𑀸𑀯𑀸 𑀘 𑀩𑀦𑁆𑀥𑀦𑁂;

𑀲𑀁𑀲𑀕𑁆𑀕𑁄’𑀮𑀗𑁆𑀓𑀢𑀻𑀦𑀁 𑀬𑁄, 𑀢𑀁 ‘𑀫𑀺𑀲𑁆𑀲’𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑀧𑀲𑀢𑁆𑀣𑀸 𑀫𑀼𑀦𑀺𑀦𑁄 𑀧𑀸𑀤, 𑀦𑀔 𑀭𑀁𑀲𑀺 𑀫𑀳𑀸𑀦𑀤𑀻;

𑀅𑀳𑁄! 𑀕𑀸𑀴𑁆𑀳𑀁 𑀦𑀺𑀫𑀼𑀕𑁆𑀕𑁂𑀧𑀺, 𑀲𑀼𑀔𑀬𑀢𑁆𑀬𑁂’𑀯 𑀢𑁂 𑀚𑀦𑁂.

𑀯𑁂𑀲𑁄 𑀲𑀪𑀸𑀯 𑀫𑀥𑀼𑀭𑁄, 𑀭𑀽𑀧𑀁 𑀦𑁂𑀢𑁆𑀢 𑀭𑀲𑀸𑀬𑀦𑀁;

𑀫𑀥𑀽’𑀯 𑀫𑀼𑀦𑀺𑀦𑁄 𑀯𑀸𑀘𑀸, 𑀦 𑀲𑀫𑁆𑀧𑀻𑀡𑁂𑀢𑀺 𑀓𑀁 𑀚𑀦𑀁.

𑀆𑀲𑀻 𑀦𑀸𑀫 𑀲𑀺𑀬𑀸’𑀢𑁆𑀣𑀲𑁆𑀲, 𑀇𑀝𑁆𑀞𑀲𑁆𑀲𑀸’𑀲𑀻𑀲𑀦𑀁 𑀬𑀣𑀸;

𑀭𑀲’𑀧𑁆𑀧𑀢𑀻𑀢𑀺 𑀚𑀦𑀓𑀁, 𑀚𑀸𑀬𑀢𑁂 𑀬𑀁 𑀯𑀺𑀪𑀽𑀲𑀦𑀁;

‘𑀭𑀲𑀯𑀦𑁆𑀢’𑀦𑁆𑀢𑀺 𑀢𑀁 𑀜𑁂𑀬𑁆𑀬𑀁, 𑀭𑀲𑀯𑀦𑁆𑀢 𑀯𑀺𑀥𑀸𑀦𑀢𑁄.

𑀭𑀸𑀕𑀸’𑀦𑀢’𑀩𑁆𑀪𑀼𑀢 𑀲𑀭𑁄𑀚 𑀫𑀼𑀔𑀁 𑀥𑀭𑀸𑀬,

𑀧𑀸𑀤𑀸 𑀢𑀺𑀮𑁄𑀓𑀕𑀭𑀼𑀦𑁄’𑀥𑀺𑀓 𑀩𑀦𑁆𑀥𑀭𑀸𑀕𑀸;

𑀆𑀤𑀸𑀬 𑀦𑀺𑀘𑁆𑀘𑀲𑀭𑀲𑁂𑀦 𑀓𑀭𑁂𑀦 𑀕𑀸𑀴𑁆𑀳𑀁,

𑀲𑀜𑁆𑀘𑀼𑀫𑁆𑀩𑀬𑀦𑁆𑀢𑀺 𑀲𑀢𑀢𑀸’𑀳𑀺𑀢 𑀲𑀫𑁆𑀪𑀫𑁂𑀦.

𑀇𑀘𑁆𑀘𑀸’𑀦𑀼𑀕𑀫𑁆𑀫 ¶ 𑀧𑀼𑀭𑀺𑀫𑀸𑀘𑀭𑀺𑀬𑀸’𑀦𑀼𑀪𑀸𑀯𑀁,

𑀲𑀗𑁆𑀔𑁂𑀧𑀢𑁄 𑀦𑀺𑀕𑀤𑀺𑀢𑁄’𑀬 𑀫𑀮𑀗𑁆𑀓𑀢𑀻𑀦𑀁;

𑀪𑁂𑀤𑁄’𑀧𑀭𑀽𑀧𑀭𑀺 𑀓𑀯𑀻𑀳𑀺 𑀯𑀺𑀓𑀧𑁆𑀧𑀺𑀬𑀸𑀦𑀁,

𑀓𑁄 𑀦𑀸𑀫 𑀧𑀲𑁆𑀲𑀺𑀢𑀼 𑀫𑀮𑀁 𑀔𑀮𑀼 𑀢𑀸𑀲 𑀫𑀦𑁆𑀢𑀁.

𑀇𑀢𑀺 𑀲𑀗𑁆𑀖𑀭𑀓𑁆𑀔𑀺𑀢𑀫𑀳𑀸𑀲𑀸𑀫𑀺 𑀯𑀺𑀭𑀘𑀺𑀢𑁂 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂

𑀅𑀢𑁆𑀣𑀸𑀮𑀗𑁆𑀓𑀸𑀭𑀸𑀯𑀩𑁄𑀥𑁄 𑀦𑀸𑀫

𑁫. 𑀪𑀸𑀯𑀸𑀯𑀩𑁄𑀥-𑀧𑀜𑁆𑀘𑀫𑀧𑀭𑀺𑀘𑁆𑀙𑁂𑀤

𑀧𑀝𑀺𑀪𑀸𑀦𑀯𑀢𑀸 𑀮𑁄𑀓, 𑀯𑁄𑀳𑀸𑀭’𑀫𑀦𑀼𑀲𑀸𑀭𑀺𑀦𑀸;

𑀢𑀢𑁄’𑀘𑀺𑀢𑁆𑀬 𑀲𑀫𑀼𑀮𑁆𑀮𑀸𑀲, 𑀯𑁂𑀤𑀺𑀦𑀸 𑀓𑀯𑀺𑀦𑀸 𑀧𑀭𑀁.

𑀞𑀸𑀬𑀺𑀲𑀫𑁆𑀩𑀦𑁆𑀥𑀺𑀦𑁄 𑀪𑀸𑀯, 𑀯𑀺𑀪𑀸𑀯𑀸 𑀲𑀸’𑀦𑀼𑀪𑀸𑀯𑀓𑀸;

𑀲𑀫𑁆𑀩𑀚𑁆𑀛𑀦𑁆𑀢𑀺 𑀦𑀺𑀩𑀦𑁆𑀥𑀸 𑀢𑁂, 𑀭𑀲’𑀲𑁆𑀲𑀸𑀤𑀸𑀬 𑀲𑀸𑀥𑀼𑀦𑀁.

𑀘𑀺𑀢𑁆𑀢 𑀯𑀼𑀢𑁆𑀢𑀺 𑀯𑀺𑀲𑁂𑀲𑀸 𑀢𑀼, 𑀪𑀸𑀯𑀬𑀦𑁆𑀢𑀺 𑀭𑀲𑁂 𑀬𑀢𑁄;

𑀭𑀢𑁆𑀬𑀸𑀤𑀬𑁄 𑀢𑀢𑁄 𑀪𑀸𑀯, 𑀲𑀤𑁆𑀤𑁂𑀦 𑀧𑀭𑀺𑀓𑀺𑀢𑁆𑀢𑀺𑀢𑀸.

𑀯𑀺𑀭𑁄𑀥𑀺𑀦𑀸’𑀜𑁆𑀜𑀪𑀸𑀯𑁂𑀦, 𑀬𑁄 𑀪𑀸𑀯𑁄 𑀦 𑀢𑀺𑀭𑁄𑀳𑀺𑀢𑁄;

𑀲𑀻𑀮𑁂𑀦 𑀢𑀺𑀝𑁆𑀞𑀢𑀺’𑀘𑁆𑀘𑁂𑀲𑁄, ‘𑀞𑀸𑀬𑀻𑀪𑀸𑀯𑁄’𑀢𑀺 𑀲𑀤𑁆𑀤𑀺𑀢𑁄.

𑀚𑀺𑀕𑀼𑀘𑁆𑀙𑀸, 𑀯𑀺𑀫𑁆𑀳𑀬𑁄, 𑀘𑁂𑀯, 𑀲𑀫𑁄 𑀘 𑀦𑀯 𑀞𑀸𑀬𑀺𑀦𑁄.

𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑀅𑀥𑀺𑀧𑁆𑀧𑀸𑀬

𑀢𑀺𑀭𑁄𑀪𑀸𑀯𑀸, 𑀯𑀺𑀪𑀸𑀯𑀸’𑀤𑀺, 𑀯𑀺𑀲𑁂𑀲𑀦𑀸’𑀪𑀺𑀫𑀼𑀔𑁆𑀬𑀢𑁄;

𑀬𑁂 𑀢𑁂 𑀘𑀭𑀦𑁆𑀢𑀺 𑀲𑀻𑀮𑁂𑀦, 𑀢𑁂 𑀳𑁄𑀦𑁆𑀢𑀺 𑀩𑁆𑀬𑀪𑀺𑀘𑀸𑀭𑀺𑀦𑁄.

𑀦𑀺𑀩𑁆𑀩𑁂𑀤𑁄 ¶ , 𑀢𑀓𑁆𑀓, 𑀲𑀗𑁆𑀓𑀸, 𑀲𑀫,

𑀥𑀺𑀢𑀺, 𑀚𑀴𑀢𑀸, 𑀤𑀻𑀦𑀢𑀼, 𑀕𑁆𑀕𑀸, 𑀮𑀲𑀢𑁆𑀢𑀁,

𑀲𑀼𑀢𑁆𑀢𑀁, 𑀢𑀸𑀲𑁄, 𑀕𑀺𑀮𑀸𑀦𑀼, 𑀲𑁆𑀲𑀼𑀓, 𑀳𑀭𑀺𑀲,

𑀲𑀢𑀺, 𑀲𑁆𑀲𑀸, 𑀯𑀺𑀲𑀸𑀤𑀸, 𑀩𑀳𑀺𑀢𑁆𑀣𑀸 [𑀩𑀳𑀺𑀤𑁆𑀥𑀸 (𑀓.)];

𑀘𑀺𑀦𑁆𑀢𑀸, 𑀕𑀩𑁆𑀩𑀸, 𑀧𑀫𑀸𑀭𑁄, 𑀫𑀭𑀺𑀲, 𑀫𑀤,

𑀘𑀧𑀮𑀢𑀸 [𑀲𑀘𑀧𑀮𑀸 (𑀓.)], 𑀩𑁆𑀬𑀸𑀥𑀺, 𑀢𑁂𑀢𑁆𑀢𑀺𑀁𑀲 𑀫𑁂𑀢𑁂.

𑀲𑀫𑀸𑀳𑀺𑀢’𑀢𑁆𑀢’𑀧𑁆𑀧𑀪𑀯𑀁, 𑀲𑀢𑁆𑀢𑀁 [𑀲𑀢𑁆𑀯𑀁 (𑀓.)] 𑀢𑁂𑀦𑁄’𑀧𑀧𑀸𑀤𑀺𑀢𑀸;

𑀲𑀢𑁆𑀢𑀺𑀓𑀸 [𑀲𑀸𑀢𑁆𑀯𑀺𑀓𑀸 (𑀓.)] 𑀧𑁆𑀬’𑀦𑀼𑀪𑀸𑀯𑀢𑁆𑀢𑁂, 𑀯𑀺𑀲𑀼𑀁 𑀪𑀸𑀯𑀸 𑀪𑀯𑀦𑁆𑀢𑀺 𑀢𑁂.

𑀣𑀫𑁆𑀪𑁄, 𑀧𑀴𑀬, 𑀭𑁄𑀫𑀜𑁆𑀘𑀸, 𑀢𑀣𑀸 𑀲𑁂𑀤, 𑀲𑁆𑀲𑀼, 𑀯𑁂𑀧𑀣𑀼;

𑀯𑁂𑀯𑀡𑁆𑀡𑀺𑀬𑀁, 𑀯𑀺𑀲𑀭𑀢𑀸, 𑀪𑀸𑀯𑀸’𑀝𑁆𑀞𑁂’𑀢𑁂 𑀢𑀼 𑀲𑀢𑁆𑀢𑀺𑀓𑀸.

𑀬𑀤𑀸 𑀭𑀢𑁆𑀬𑀸𑀤𑀬𑁄 𑀪𑀸𑀯𑀸, 𑀞𑀺𑀢𑀺𑀲𑀻𑀮𑀸 𑀦 𑀳𑁄𑀦𑁆𑀢𑀺 𑀘𑁂;

𑀢𑀤𑀸 𑀲𑀩𑁆𑀩𑁂𑀧𑀺 𑀢𑁂 𑀪𑀸𑀯𑀸, 𑀪𑀯𑀦𑁆𑀢𑀺 𑀩𑁆𑀬𑀪𑀺𑀘𑀸𑀭𑀺𑀦𑁄.

𑀯𑀺𑀪𑀸𑀯𑁄 𑀓𑀸𑀭𑀡𑀁 𑀢𑁂𑀲𑀼, 𑀧𑁆𑀧𑀢𑁆𑀢𑀺𑀬𑀼’𑀤𑁆𑀤𑀻𑀧𑀦𑁂 𑀢𑀣𑀸;

𑀦𑁂𑀓𑀳𑁂𑀢𑀼𑀁 𑀫𑀦𑁄𑀯𑀼𑀢𑁆𑀢𑀺, 𑀯𑀺𑀲𑁂𑀲𑀜𑁆𑀘 𑀯𑀺𑀪𑀸𑀯𑀺𑀢𑀼𑀁;

𑀪𑀸𑀯𑀁 𑀯𑀺𑀪𑀸𑀯𑀸’𑀦𑀼𑀪𑀸𑀯𑀸, 𑀯𑀡𑁆𑀡𑀺𑀬𑀸 𑀩𑀦𑁆𑀥𑀦𑁂 𑀨𑀼𑀝𑀁.

𑀲𑀯𑀺𑀪𑀸𑀯𑀸’𑀦𑀼𑀪𑀸𑀯𑁂𑀳𑀺, 𑀪𑀸𑀯𑀸 𑀢𑁂 𑀢𑁂 𑀬𑀣𑀸𑀭𑀳𑀁;

𑀯𑀡𑁆𑀡𑀦𑀻𑀬𑀸 𑀬𑀣𑁄’𑀘𑀺𑀢𑁆𑀬𑀁, 𑀮𑁄𑀓𑀭𑀽𑀧𑀸’𑀦𑀼𑀕𑀸𑀫𑀺𑀦𑀸.

𑀘𑀺𑀢𑁆𑀢 ¶ 𑀯𑀼𑀢𑁆𑀢𑀺 𑀯𑀺𑀲𑁂𑀲𑀢𑁆𑀢𑀸, 𑀫𑀸𑀦𑀲𑀸 𑀲𑀢𑁆𑀢𑀺𑀓𑀸’𑀗𑁆𑀕𑀢𑁄;

𑀩𑀳𑀺 𑀦𑀺𑀲𑁆𑀲𑀝 𑀲𑁂𑀤𑀸𑀤𑀺, 𑀅𑀦𑀼𑀪𑀸𑀯𑁂𑀳𑀺 𑀯𑀡𑁆𑀡𑀺𑀬𑀸.

𑀲𑀸𑀫𑀸𑀚𑀺𑀓𑀸𑀦 𑀫𑀸𑀦𑀦𑁆𑀤𑁄, 𑀬𑁄 𑀩𑀦𑁆𑀥𑀢𑁆𑀣𑀸’𑀦𑀼𑀲𑀸𑀭𑀺𑀦𑀁;

𑀭𑀲𑀻𑀬𑀢𑀻𑀢𑀺 𑀢𑀜𑁆𑀜𑀽𑀳𑀺, 𑀭𑀲𑁄 𑀦𑀸𑀫𑀸’𑀬’𑀫𑀻𑀭𑀺𑀢𑁄.

𑀲𑀯𑀺𑀪𑀸𑀯𑀸, 𑀦𑀼𑀪𑀸𑀯𑁂𑀳𑀺, 𑀲𑀢𑁆𑀢𑀺𑀓,𑀩𑁆𑀬𑀪𑀺𑀘𑀸𑀭𑀺𑀪𑀺;

𑀅𑀲𑁆𑀲𑀸𑀤𑀺𑀬𑀢𑁆𑀢 𑀫𑀸𑀦𑀻𑀬, 𑀫𑀸𑀦𑁄 𑀞𑀸𑀬𑁂’𑀯 𑀲𑁄 𑀭𑀲𑁄.

𑀲𑀺𑀗𑁆𑀕𑀸𑀭,𑀳𑀲𑁆𑀲,𑀓𑀭𑀼𑀡𑀸, 𑀭𑀼𑀤𑁆𑀤,𑀯𑀻𑀭,𑀪𑀬𑀸𑀦𑀓𑀸;

𑀩𑀻𑀪𑀘𑁆𑀙,𑀩𑁆𑀪𑀼𑀢,𑀲𑀦𑁆𑀢𑀸, 𑀘, 𑀭𑀲𑀸 𑀞𑀸𑀬𑀻𑀦 𑀦𑀼𑀓𑁆𑀓𑀫𑀸.

𑀤𑀼𑀓𑁆𑀔𑀭𑀽𑀧𑁂’𑀬’ 𑀫𑀸𑀦𑀦𑁆𑀤𑁄, 𑀓𑀣𑀁 𑀦𑀼 𑀓𑀭𑀼𑀡𑀸𑀤𑀺𑀓𑁂?

𑀞𑀸𑀬𑀻𑀪𑀸𑀯 𑀦𑀺𑀤𑁆𑀤𑁂𑀲 𑀭𑀢𑀺𑀝𑁆𑀞𑀸𑀬𑀻𑀪𑀸𑀯

𑀭𑀫𑁆𑀫,𑀤𑁂𑀲, 𑀓𑀮𑀸, 𑀓𑀸𑀮, 𑀯𑁂𑀲𑀸𑀤𑀺, 𑀧𑀝𑀺𑀲𑁂𑀯𑀦𑀸;

𑀬𑀼𑀯𑀸𑀦’𑀜𑁆𑀜𑁄𑀜𑁆𑀜𑀭𑀢𑁆𑀢𑀸𑀦𑀁, 𑀧𑀫𑁄𑀤𑁄 𑀭𑀢𑀺 𑀭𑀼𑀘𑁆𑀘𑀢𑁂.

𑀬𑀼𑀢𑁆𑀬𑀸 𑀪𑀸𑀯𑀸𑀦𑀼𑀪𑀸𑀯𑀸 𑀢𑁂, 𑀦𑀺𑀩𑀦𑁆𑀥𑀸 𑀧𑁄𑀲𑀬𑀦𑁆𑀢𑀺 𑀦𑀁;

𑀲𑁄𑀧𑁆𑀬’𑀬𑁄𑀕, 𑀯𑀺𑀧𑁆𑀧𑀬𑁄𑀕, 𑀲𑀫𑁆𑀪𑁄𑀕𑀸𑀦𑀁 𑀯𑀲𑀸 𑀢𑀺𑀥𑀸.

𑀯𑀺𑀓𑀸𑀭𑀸’𑀓𑀢𑀺𑀆𑀤𑀻𑀳𑀺, 𑀅𑀢𑁆𑀢𑀦𑁄 𑀣 𑀧𑀭𑀲𑁆𑀲 𑀯𑀸;

𑀳𑀲𑁆𑀲𑁄 𑀦𑀺𑀤𑁆𑀤𑀸, 𑀲𑀫𑀸’𑀮𑀲𑁆𑀬, 𑀫𑀼𑀘𑁆𑀙𑀸𑀤𑀺,𑀩𑁆𑀬𑀪𑀺𑀘𑀸𑀭𑀺𑀪𑀺;

𑀧𑀭𑀺𑀧𑁄𑀲𑁂 𑀲𑀺𑀬𑀸 𑀳𑀲𑁆𑀲𑁄, 𑀪𑀺𑀬𑁆𑀬𑁄’𑀢𑁆𑀣𑀺𑀧𑀪𑀼𑀢𑀻𑀦𑀁 𑀲𑁄.

𑀓𑀺𑀜𑁆𑀘𑀸’𑀮𑀓𑁆𑀔𑀺𑀬 𑀤𑀺𑀚𑀁 𑀢𑀼 𑀢𑀁 𑀳𑀲𑀺𑀢𑀁;

𑀫𑀥𑀼𑀭𑀲𑁆𑀲𑀭𑀁 𑀯𑀺𑀳𑀲𑀺𑀢𑀁, 𑀅𑀁𑀲𑀲𑀺𑀭𑁄𑀓𑀫𑁆𑀧𑀫𑀼𑀧𑀳𑀲𑀺𑀢𑀁.

𑀅𑀧𑀳𑀲𑀺𑀢𑀁 ¶ 𑀲𑀚𑀮’𑀓𑁆𑀔𑀺, 𑀯𑀺𑀓𑁆𑀔𑀺𑀢𑁆𑀢𑀗𑁆𑀕𑀁 𑀪𑀯𑀢𑁆𑀬’𑀢𑀺𑀳𑀲𑀺𑀢𑀁;

𑀚𑁂𑀝𑁆𑀞𑁂 [𑀫𑀚𑁆𑀛𑁂’𑀥𑀫𑁂𑀢𑀺 𑀏𑀢𑁆𑀣 𑀫𑀚𑁆𑀛𑁂 𑀅𑀥𑀫𑁂𑀢𑀺 𑀧𑀤𑀘𑁆𑀙𑁂𑀤𑁄] 𑀫𑀚𑁆𑀛𑁂’𑀥𑀫𑁂 𑀘 𑀓𑀫𑀲𑁄.

𑀲𑁄𑀓𑀭𑀽𑀧𑁄 𑀢𑀼 𑀓𑀭𑀼𑀡𑁄, 𑀦𑀺𑀝𑁆𑀞𑀧𑁆𑀧𑀢𑁆𑀢𑀺’𑀝𑁆𑀞 𑀦𑀸𑀲𑀢𑁄;

𑀢𑀢𑁆𑀣𑀸’𑀦𑀼𑀪𑀸𑀯𑀸 𑀭𑀼𑀤𑀺𑀢, 𑀧𑀴𑀬,𑀢𑁆𑀣𑀫𑁆𑀪𑀓𑀸𑀤𑀬𑁄;

𑀯𑀺𑀲𑀸𑀤𑀸,𑀮𑀲𑁆𑀬,𑀫𑀭𑀡, 𑀘𑀺𑀦𑁆𑀢𑀸’𑀤𑀻 𑀩𑁆𑀬𑀪𑀺𑀘𑀸𑀭𑀺𑀦𑁄.

𑀓𑁄𑀥𑁄 𑀫𑀘𑁆𑀙𑀭𑀺𑀬𑀸’𑀤𑀻𑀳𑀺, 𑀧𑁄𑀲𑁂 𑀢𑀸𑀲, 𑀫𑀤𑀸𑀤𑀺𑀪𑀺;

𑀦𑀬𑀦𑀸’𑀭𑀼𑀡𑀢𑀸𑀤𑀻𑀳𑀺, 𑀭𑀼𑀤𑁆𑀤𑁄 𑀦𑀸𑀫 𑀭𑀲𑁄 𑀪𑀯𑁂.

𑀧𑀢𑀸𑀧, 𑀯𑀺𑀓𑁆𑀓𑀫𑀸’𑀤𑀻𑀳𑀼, 𑀲𑁆𑀲𑀸𑀳𑁄 ‘𑀯𑀻𑀭𑁄’𑀢𑀺 𑀲𑀜𑁆𑀜𑀺𑀢𑁄;

𑀭𑀡,𑀤𑀸𑀦,𑀤𑀬𑀸𑀬𑁄𑀕𑀸, 𑀯𑀻𑀭𑁄’𑀬𑀁 𑀢𑀺𑀯𑀺𑀥𑁄 𑀪𑀯𑁂;

𑀢𑁂𑀯𑀸’𑀦𑀼𑀪𑀸𑀯𑀸 𑀥𑀺𑀢𑀺,𑀫, 𑀢𑁆𑀬𑀸’𑀤𑀬𑁄 𑀩𑁆𑀬𑀪𑀺𑀘𑀸𑀭𑀺𑀦𑁄.

𑀯𑀺𑀓𑀸𑀭𑀸,𑀲𑀦𑀺,𑀲𑀢𑁆𑀢𑀸’𑀤𑀺, 𑀪𑀬𑀼’𑀓𑁆𑀓𑀁𑀲𑁄 𑀪𑀬𑀸𑀦𑀓𑁄;

𑀲𑁂𑀤𑀸’𑀤𑀬𑁄 𑀦𑀼𑀪𑀸𑀯𑁂’𑀢𑁆𑀣, 𑀢𑀸𑀲𑀸’𑀤𑀻 𑀩𑁆𑀬𑀪𑀺𑀘𑀸𑀭𑀺𑀦𑁄.

𑀚𑀺𑀕𑀼𑀘𑁆𑀙𑀸 𑀭𑀼𑀥𑀺𑀭𑀸’𑀤𑀻𑀳𑀺, 𑀧𑀽𑀢𑁆𑀬𑀸’𑀤𑀻𑀳𑀺 𑀯𑀺𑀭𑀸𑀕𑀢𑁄;

𑀩𑀻𑀪𑀘𑁆𑀙𑁄 𑀔𑁄𑀪𑀦𑀼’𑀩𑁆𑀩𑁂𑀕𑀻, 𑀓𑀫𑁂𑀦 𑀓𑀭𑀼𑀡𑀸𑀬𑀼𑀢𑁄;

𑀦𑀸𑀲𑀸 𑀯𑀺𑀓𑀽𑀡𑀦𑀸𑀤𑀻𑀳𑀺, 𑀲𑀗𑁆𑀓𑀸𑀤𑀻𑀳𑀺’𑀲𑁆𑀲 𑀧𑁄𑀲𑀦𑀁.

𑀅𑀢𑀺 𑀮𑁄𑀓 𑀧𑀤𑀢𑁆𑀣𑁂𑀳𑀺, 𑀯𑀺𑀫𑁆𑀳𑀬𑁄’𑀬𑀁 𑀭𑀲𑁄’𑀩𑁆𑀪𑀼𑀢𑁄;

𑀢𑀲𑁆𑀲𑀸’𑀦𑀼𑀪𑀸𑀯𑀸 𑀲𑁂𑀤,𑀲𑁆𑀲𑀼, 𑀲𑀸𑀥𑀼𑀯𑀸𑀤𑀸’𑀤𑀬𑁄 𑀲𑀺𑀬𑀼𑀁;

𑀢𑀸𑀲𑀸,𑀯𑁂𑀕,𑀥𑀺𑀢𑀺,𑀧𑁆𑀧𑀜𑁆𑀜𑀸, 𑀳𑁄𑀦𑁆𑀢𑁂’𑀢𑁆𑀣 𑀩𑁆𑀬𑀪𑀺𑀘𑀸𑀭𑀺𑀦𑁄.

𑀞𑀸𑀬𑀻𑀪𑀸𑀯𑁄 𑀲𑀫𑁄 𑀫𑁂𑀢𑁆𑀢𑀸, 𑀤𑀬𑀸,𑀫𑁄𑀤𑀸’𑀤𑀺 𑀲𑀫𑁆𑀪𑀯𑁄;

𑀪𑀸𑀯𑀸𑀤𑀻𑀳𑀺 𑀢’𑀤𑀼𑀓𑁆𑀓𑀁𑀲𑁄, 𑀲𑀦𑁆𑀢𑁄 𑀲𑀦𑁆𑀢 𑀦𑀺𑀲𑁂𑀯𑀺𑀢𑁄.

𑀇𑀢𑀺 𑀲𑀗𑁆𑀖𑀭𑀓𑁆𑀔𑀺𑀢 𑀫𑀳𑀸𑀲𑀸𑀫𑀺𑀯𑀺𑀭𑀘𑀺𑀢𑁂 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂