📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀬𑁄 ¶ 𑀧𑀸𑀤𑀦𑀻𑀭𑀚𑀯𑀭𑁄𑀤𑀭𑀭𑀸𑀥𑀺𑀢𑁂𑀦 […𑀭𑀸𑀤𑀺𑀓𑁂𑀦 (𑀓.)],

𑀮𑁄𑀓𑀢𑁆𑀢𑀬𑁂𑀦’𑀯𑀺𑀓𑀮𑁂𑀦 𑀦𑀺𑀭𑀸𑀓𑀼𑀮𑁂𑀦;

𑀯𑀺𑀜𑁆𑀜𑀸𑀧𑀬𑀻 𑀦𑀺𑀭𑀼𑀧𑀫𑁂𑀬𑁆𑀬𑀢𑀫𑀢𑁆𑀢𑀦𑁄 𑀢𑀁,

𑀯𑀦𑁆𑀤𑁂 𑀫𑀼𑀦𑀺𑀦𑁆𑀤𑀫𑀪𑀺𑀯𑀦𑁆𑀤𑀺𑀬 𑀯𑀦𑁆𑀤𑀦𑀻𑀬𑀁.

𑀧𑀢𑁆𑀢𑁄 𑀲𑀧𑀢𑁆𑀢𑀯𑀺𑀚𑀬𑁄 𑀚𑀬𑀩𑁄𑀥𑀺𑀫𑀽𑀮𑁂,

𑀲𑀤𑁆𑀥𑀫𑁆𑀫𑀭𑀸𑀚𑀧𑀤𑀯𑀺𑀁 𑀬𑀤𑀦𑀼𑀕𑁆𑀕𑀳𑁂𑀦;

𑀲𑀢𑁆𑀢𑀸𑀧𑀲𑀢𑁆𑀢 [𑀲𑀢𑁆𑀢𑀧𑁆𑀧𑀲𑀢𑁆𑀣 (𑀓.)] 𑀯𑀺𑀧𑀼𑀮𑀸𑀫𑀮𑀲𑀕𑁆𑀕𑀼𑀡𑀲𑁆𑀲,

𑀲𑀤𑁆𑀥𑀫𑁆𑀫𑀲𑀸𑀭𑀭𑀢𑀦𑀲𑁆𑀲 𑀦𑀫𑀢𑁆𑀣𑀼 𑀢𑀲𑁆𑀲.

𑀬𑁄 𑀪𑀸𑀚𑀦𑀢𑁆𑀢𑀫𑀪𑀺𑀲𑀫𑁆𑀪𑀼𑀡𑀺 𑀲𑀕𑁆𑀕𑀼𑀡𑀲𑁆𑀲,

𑀢𑀲𑁆𑀲𑀸𑀧𑀺 𑀥𑀫𑁆𑀫𑀭𑀢𑀦𑀲𑁆𑀲 𑀫𑀳𑀸𑀭𑀳𑀲𑁆𑀲;

𑀲𑀫𑁆𑀪𑀸𑀯𑀺𑀢𑀁 𑀲𑀲𑀺𑀭𑀲𑀸𑀳𑀺𑀢𑀲𑀦𑁆𑀦𑀢𑁂𑀳𑀺,

𑀲𑀫𑁆𑀪𑀸𑀯𑀬𑀸𑀫𑀺 𑀲𑀺𑀭𑀲𑀸 𑀕𑀡𑀫𑀼𑀢𑁆𑀢𑀫𑀁 𑀢𑀁.

𑀬𑁂’𑀦𑀦𑁆𑀢𑀢𑀦𑁆𑀢𑀭𑀢𑀦𑀸𑀓𑀭𑀫𑀦𑁆𑀣𑀦𑁂𑀦,

𑀫𑀦𑁆𑀣𑀸’𑀘𑀮𑁄𑀮𑁆𑀮𑀲𑀺𑀢𑀜𑀸𑀡𑀯𑀭𑁂𑀦 𑀮𑀤𑁆𑀥𑀸;

𑀲𑀸𑀭𑀸 𑀫𑀢𑀸𑀢𑀺 𑀲𑀼𑀔𑀺𑀢𑀸 𑀲𑀼𑀔𑀬𑀦𑁆𑀢𑀺 𑀘𑀜𑁆𑀜𑁂,

𑀢𑁂 𑀫𑁂 𑀚𑀬𑀦𑁆𑀢𑀺 𑀕𑀼𑀭𑀯𑁄 𑀕𑀼𑀭𑀯𑁄 𑀕𑀼𑀡𑁂𑀳𑀺.

𑁧. 𑀤𑁄𑀲𑀸𑀯𑀩𑁄𑀥 𑀧𑀞𑀫𑀧𑀭𑀺𑀘𑁆𑀙𑁂𑀤

𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑀯𑀡𑁆𑀡𑀦𑀸

𑁧.

𑀫𑀼𑀦𑀺𑀦𑁆𑀤𑀯𑀤𑀦𑀫𑁆𑀪𑁄𑀚-𑀕𑀩𑁆𑀪𑀲𑀫𑁆𑀪𑀯𑀲𑀼𑀦𑁆𑀤𑀭𑀻;

𑀲𑀭𑀡𑀁 𑀧𑀸𑀡𑀺𑀦𑀁 𑀯𑀸𑀡𑀻, 𑀫𑀬𑁆𑀳𑀁 𑀧𑀻𑀡𑀬𑀢𑀁 𑀫𑀦𑀁.

𑁧. 𑀅𑀣𑀸𑀬𑀁 ¶ 𑀕𑀦𑁆𑀣𑀓𑀸𑀭𑁄 𑀕𑀦𑁆𑀣𑀸𑀭𑀫𑁆𑀪𑁂 𑀧𑀼𑀩𑁆𑀩𑀧𑀬𑁄𑀕𑀸𑀦𑀼𑀩𑀦𑁆𑀥𑀲𑀪𑀸𑀯𑀲𑀺𑀤𑁆𑀥𑀺𑀓𑀯𑀺𑀕𑀼𑀡𑁄𑀧𑁂𑀢𑀸𑀦𑀁 𑀬𑀢𑀺𑀧𑁄𑀢𑀸𑀦𑀁 𑀢𑀤𑀼𑀧𑀸𑀬𑀦𑁆𑀢𑀭𑀯𑀺𑀭𑀢𑀸 𑀓𑀫𑀦𑁆𑀢𑀭𑀸𑀧𑁂𑀢𑀧𑀭𑀓𑁆𑀓𑀫𑀲𑀫𑁆𑀪𑀯𑁂𑀦𑀸𑀥𑀺𑀕𑀢𑀩𑁆𑀬𑀲𑀦𑀲𑀢𑀫𑀼𑀧𑀮𑀩𑁆𑀪 𑀤𑀬𑀸𑀲𑀜𑁆𑀚𑀸𑀢𑀭𑀲𑀭𑀲𑀳𑀤𑀬𑀢𑀸𑀬 𑀢𑀤𑀼𑀧𑀸𑀬𑀪𑀽𑀢𑀁 𑀩𑀦𑁆𑀥𑀮𑀓𑁆𑀔𑀡𑀁 𑀯𑀺𑀭𑀘𑀬𑀺𑀢𑀼𑀓𑀸𑀫𑁄𑀪𑀺𑀫𑀢𑀲𑀺𑀤𑁆𑀥𑀺𑀦𑀺𑀫𑀺𑀢𑁆𑀢𑀫𑀢𑁆𑀢𑀦𑁄𑀥𑀺𑀕𑀢𑀲𑀤𑁆𑀥𑀫𑁆𑀫𑀤𑁂𑀯𑀢𑀸𑀦𑀼𑀲𑁆𑀲𑀭𑀡𑀁 𑀢𑀸𑀯 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀫𑀼𑀦𑀺𑀦𑁆𑀤𑁂’’𑀘𑁆𑀘𑀸𑀤𑀺. 𑀦𑀦𑀼 ‘‘𑀩𑀦𑁆𑀥𑀮𑀓𑁆𑀔𑀡𑀁 𑀯𑀺𑀭𑀘𑀬𑀺𑀢𑀼𑀓𑀸𑀫𑁄’’𑀢𑀺 𑀯𑀼𑀢𑁆𑀢𑀁, 𑀓𑀺𑀫𑁂𑀢𑁆𑀣 𑀮𑀓𑁆𑀔𑀡𑀓𑀭𑀡𑁂𑀦 𑀅𑀤𑀺𑀝𑁆𑀞𑀮𑀓𑁆𑀔𑀡𑀸𑀧𑀺 𑀤𑀺𑀲𑁆𑀲𑀦𑁆𑀢𑀺 𑀩𑀦𑁆𑀥𑀦𑁆𑀢𑀸𑀢𑀺? 𑀲𑀘𑁆𑀘𑀁, 𑀢𑀣𑀸𑀧𑀺 𑀢𑁂 𑀖𑀼𑀡𑀓𑁆𑀔𑀭𑀧𑁆𑀧𑀓𑀸𑀲𑀸 𑀢𑀩𑁆𑀩𑀺𑀤𑀽𑀦𑀁 𑀧𑀬𑁄𑀕𑀸𑀦𑀼𑀲𑀸𑀭𑀺𑀦𑁄 𑀯𑀸 𑀲𑀺𑀬𑀼𑀁, 𑀧𑀼𑀩𑁆𑀩𑁂 𑀓𑀢𑀲𑀢𑁆𑀣𑀧𑀭𑀺𑀘𑀬𑀸 𑀯𑀸 𑀲𑀺𑀬𑀼𑀦𑁆𑀢𑀺 𑀯𑀺𑀜𑁆𑀜𑁂𑀬𑁆𑀬𑀁. 𑀯𑀸𑀡𑀻 𑀫𑀬𑁆𑀳𑀁 𑀫𑀦𑀁 𑀧𑀻𑀡𑀬𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀸𑀡𑀻𑀢𑀺 𑀯𑀸 𑀲𑀭𑀲𑁆𑀲𑀢𑁆𑀬𑀧𑀭𑀦𑀸𑀫𑀥𑁂𑀬𑁆𑀬𑀸 𑀓𑀸𑀘𑀺 𑀤𑁂𑀯𑀢𑀸, 𑀲𑀸 𑀲𑀩𑁆𑀩𑀸𑀯𑀤𑀸𑀢𑀸 𑀬𑀣𑀺𑀘𑁆𑀙𑀺𑀢𑀢𑁆𑀣𑀲𑀸𑀥𑀦𑀧𑀼𑀡𑁆𑀟𑀭𑀻𑀓𑀕𑀩𑁆𑀪𑁂 𑀦𑀺𑀲𑀻𑀤𑀢𑀻𑀢𑀺 𑀮𑁄𑀓𑀯𑀸𑀤𑁄. 𑀯𑀸𑀡𑀻𑀢𑀺 𑀧𑀦 𑀧𑀘𑁆𑀘𑀼𑀳𑀯𑀺𑀭𑀳𑁂𑀦𑀸𑀪𑀺𑀫𑀢𑀲𑀺𑀤𑁆𑀥𑀺𑀦𑀺𑀩𑀦𑁆𑀥𑀦𑁂𑀓𑀢𑀸𑀡𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀲𑀺𑀢𑁄 𑀲𑀤𑁆𑀥𑀫𑁆𑀫𑁄, 𑀢𑀢𑁄𑀬𑁂𑀯𑀸𑀬𑀁 𑀤𑁂𑀯𑀢𑀸 𑀭𑀼𑀧𑁆𑀧𑀢𑁂. 𑀢𑀢𑁆𑀣 𑀲𑀭𑀲𑁆𑀲𑀢𑀺𑀬𑀸 𑀬𑀣𑀸’𑀲𑀢𑁆𑀢𑀸 𑀚𑀸𑀢𑀸𑀬 𑀫𑀦𑁄𑀲𑀫𑁆𑀧𑀻𑀡𑀦𑀦𑁆𑀢𑀺 𑀮𑁄𑀓𑁄, 𑀲𑀤𑁆𑀥𑀫𑁆𑀫𑀤𑁂𑀯𑀢𑀸𑀬 𑀢𑀼 𑀫𑀦𑁄𑀧𑀻𑀡𑀦𑀁, 𑀢𑀲𑁆𑀲𑀸 𑀲𑀩𑁆𑀩𑀯𑀚𑁆𑀚𑀭𑀳𑀺𑀢𑀸𑀬𑀘𑁆𑀘𑀦𑁆𑀢𑀦𑀺𑀫𑁆𑀫𑀮𑀸𑀬 𑀦𑀺𑀭𑀦𑁆𑀢𑀭𑀢𑁆𑀣𑀦𑁂𑀓𑀢𑀸𑀡𑀧𑁆𑀧𑀯𑀢𑁆𑀢𑀺𑀬𑀸 𑀫𑀦𑀲𑁄 𑀲𑀫𑁆𑀧𑀻𑀡𑀦𑀁. 𑀢𑁂𑀦 𑀘 𑀧𑀲𑁆𑀲𑀤𑁆𑀥𑀺, 𑀢𑀸𑀬 𑀧𑀦 𑀲𑀼𑀔𑀁, 𑀢𑁂𑀦𑀸𑀧𑀺 𑀲𑀫𑀸𑀥𑀺, 𑀲𑀫𑀸𑀥𑀺𑀲𑀫𑁆𑀪𑀯𑁂𑀦 𑀬𑀣𑀸𑀪𑀽𑀢𑀸𑀯𑀩𑁄𑀥𑀲𑀫𑁆𑀪𑀯𑀢𑁄 𑀯𑀺𑀘𑀺𑀢𑁆𑀢𑀸𑀦𑁂𑀓𑀲𑀤𑁆𑀤𑀢𑁆𑀣𑀯𑀺𑀲𑁂𑀲𑀸 𑀧𑀝𑀺𑀪𑀦𑁆𑀢𑁆𑀬𑀦𑀸𑀬𑀸𑀲𑁂𑀦, 𑀢𑀢𑁄 𑀘 𑀬𑀣𑀺𑀘𑁆𑀙𑀺𑀢𑀲𑀺𑀤𑁆𑀥𑀺𑀦𑀺𑀧𑁆𑀨𑀢𑁆𑀢𑀻𑀢𑀺 𑀯𑀗𑁆𑀓𑀯𑀼𑀢𑁆𑀢𑀺𑀬𑀸 𑀢𑀧𑁆𑀧𑀲𑀸𑀤𑀫𑀸𑀲𑀻𑀲𑀢𑀺.

𑀓𑀺𑀁𑀯𑀺𑀲𑀺𑀝𑁆𑀞𑁄𑀘𑁆𑀘𑀸𑀳 ¶ ‘‘𑀫𑀼𑀦𑀺𑀦𑁆𑀤𑁂’’𑀘𑁆𑀘𑀸𑀤𑀺. 𑀉𑀪𑁄 𑀮𑁄𑀓𑁂 𑀫𑀼𑀦𑀸𑀢𑀺 𑀚𑀸𑀦𑀸𑀢𑀻𑀢𑀺 𑀫𑀼𑀦𑀺, 𑀇𑀦𑁆𑀤𑀢𑀺 𑀧𑀭𑀫𑀺𑀲𑁆𑀲𑀭𑀺𑀬𑀁 𑀧𑀯𑀢𑁆𑀢𑁂𑀢𑀺 𑀲𑀩𑁆𑀩𑀢𑁆𑀣𑀸𑀢𑀺 𑀇𑀦𑁆𑀤𑁄, 𑀫𑀼𑀦𑀺 𑀘 𑀲𑁄 𑀇𑀦𑁆𑀤𑁄 𑀘, 𑀫𑀼𑀦𑀻𑀦𑀁 𑀇𑀦𑁆𑀤𑁄𑀢𑀺 𑀯𑀸 𑀫𑀼𑀦𑀺𑀦𑁆𑀤𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀢𑀢𑁄𑀬𑀁 𑀢𑀲𑁆𑀲 𑀦𑀺𑀫𑀺𑀢𑁆𑀢𑀓𑀲𑀜𑁆𑀜𑀸. 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀧𑀭𑀺𑀬𑀸𑀬𑀲𑀤𑁆𑀤𑁂𑀲𑁆𑀯𑀜𑁆𑀜𑁂𑀲𑀼 𑀓𑀯𑀺𑀓𑀸𑀫𑀺𑀢𑀲𑁆𑀲𑀢𑁆𑀣𑀲𑁆𑀲𑁂𑀓𑀦𑁆𑀢𑀯𑀸𑀘𑀓𑀢𑁆𑀢𑁂𑀦𑁄’ 𑀘𑀺𑀢𑁆𑀬𑀲𑀫𑁆𑀧𑁄𑀲𑀓𑁄𑀬𑀁 𑀫𑀼𑀦𑀺𑀦𑁆𑀤𑀲𑀤𑁆𑀤𑁄, 𑀢𑀣𑀸 𑀳𑀺 𑀬𑁄 𑀉𑀪𑀬𑀮𑁄𑀓𑀚𑀸𑀦𑀦𑁂𑀦 𑀫𑀼𑀦𑀻𑀦𑀁 𑀧𑀭𑀫𑀺𑀲𑁆𑀲𑀭𑀺𑀬𑀧𑀼𑀕𑁆𑀕𑀮𑀸𑀦𑀫𑁆𑀧𑀺 𑀧𑀭𑀫𑀺𑀲𑁆𑀲𑀭𑀺𑀬𑀁 𑀯𑀢𑁆𑀢𑁂𑀢𑀺, 𑀲𑁄 𑀧𑀭𑀁 𑀧𑀻𑀡𑁂𑀢𑀺 𑀳𑁂𑀢𑀼𑀪𑀸𑀯𑁂𑀦’𑀢𑁆𑀭𑁂’𑀢𑁆𑀬𑀼’𑀘𑀺𑀢𑀫𑁂𑀯, 𑀢𑀣𑀸 𑀧𑀤𑀦𑁆𑀢𑀭𑀸𑀦𑀫𑁆𑀧𑀺 𑀑𑀘𑀺𑀢𑁆𑀬𑀁 𑀧𑁄𑀲𑁂𑀢𑀺. 𑀢𑀣𑀸 𑀳𑀺 𑀢𑀸𑀤𑀺𑀲𑀲𑁆𑀲 𑀯𑀤𑀦𑀸𑀭𑀯𑀺𑀦𑁆𑀤𑁄𑀤𑀭𑁂 𑀲𑀫𑁆𑀪𑀯𑀸 𑀲𑀼𑀦𑁆𑀤𑀭𑀻, 𑀢𑀢𑁄𑀬𑁂𑀯 𑀧𑀝𑀺𑀲𑀭𑀡𑀁, 𑀢𑀲𑁆𑀫𑀸 𑀘 𑀫𑀦𑁄 𑀧𑀻𑀡𑁂𑀢𑀻𑀢𑀺. 𑀢𑀲𑁆𑀲 𑀯𑀤𑀦𑀁, 𑀢𑀫𑀺𑀯 𑀫𑀼𑀦𑀺𑀦𑁆𑀤𑀯𑀤𑀦𑀁, 𑀅𑀫𑁆𑀪𑁄𑀚𑀁. 𑀢𑀫𑁂𑀯 𑀯𑀸 𑀮𑀓𑁆𑀔𑀺𑀲𑀁𑀬𑁄𑀕𑀺𑀢𑀸𑀤𑀺𑀲𑀥𑀫𑁆𑀫𑁂𑀦’𑀫𑁆𑀪𑁄𑀚𑀁, 𑀧𑀤𑀼𑀫𑀁. 𑀢𑀲𑁆𑀲 𑀕𑀩𑁆𑀪𑁄. 𑀢𑀢𑁆𑀣 𑀲𑀫𑁆𑀪𑀯𑁂𑀦 𑀧𑀯𑀢𑁆𑀢𑀺𑀬𑀸, 𑀉𑀧𑁆𑀧𑀢𑁆𑀢𑀺𑀬𑀸 𑀯𑀸 𑀲𑀼𑀦𑁆𑀤𑀭𑀻 𑀦𑀺𑀭𑀯𑀚𑁆𑀚𑀸 𑀤𑁂𑀯𑀢𑀸. 𑀯𑀸𑀘𑀸 𑀧𑀦 𑀤𑁄𑀲𑀮𑁂𑀲𑁂𑀦𑀸𑀧’𑀲𑀫𑁆𑀨𑀼𑀝𑁆𑀞𑀸𑀯 𑀦𑀺𑀭𑀯𑀚𑁆𑀚𑀸, 𑀢𑀣𑀸 𑀘 𑀯𑀓𑁆𑀔𑀢𑀺 ‘‘𑀕𑀼𑀡𑀸𑀮𑀗𑁆𑀓𑀸𑀭𑀲𑀁𑀬𑀼𑀢𑁆𑀢𑀸’’ [𑀲𑀼𑀩𑁄𑀥𑀸𑀮𑀗𑁆𑀓𑀸𑀭 𑁧𑁪 𑀕𑀸𑀣𑀸] 𑀇𑀘𑁆𑀘𑀸𑀤𑀺. 𑀢𑀢𑁄𑀯𑀸𑀬𑀁 𑀲𑀭𑀡𑀁 𑀧𑀸𑀡𑀺𑀦𑀁 𑀲𑀢𑁆𑀢𑀸𑀦𑀁 𑀧𑀝𑀺𑀪𑀸𑀦𑀸𑀤𑀺𑀕𑀼𑀡𑀯𑀺𑀲𑁂𑀲𑀸𑀯𑀳𑀢𑁆𑀢𑀫𑀢𑁆𑀢𑁂𑀦 𑀧𑀝𑀺𑀲𑀭𑀡𑀪𑀽𑀢𑀸 𑀤𑁂𑀯𑀢𑀸. 𑀯𑀸𑀘𑀸 𑀧𑀦 𑀲𑀩𑁆𑀩𑀼𑀧𑀤𑁆𑀤𑀯𑀦𑀺𑀯𑀸𑀭𑀡𑁂𑀦 𑀲𑀩𑁆𑀩𑀳𑀺𑀢𑀲𑀼𑀔𑀲𑀫𑁆𑀧𑀤𑀸𑀲𑀫𑁆𑀧𑀸𑀤𑀦𑁂𑀦𑀘𑁆𑀘𑀦𑁆𑀢𑀧𑀝𑀺𑀲𑀭𑀡𑀪𑀽𑀢𑀸. 𑀲𑀪𑀸𑀯𑀦𑀧𑀼𑀁𑀲𑀓𑀢𑁆𑀢𑀸 𑀘𑁂𑀢𑁆𑀣 𑀦 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑀁. 𑀫𑀬𑁆𑀳𑀦𑁆𑀢𑀺 𑀏𑀓𑀯𑀘𑀦𑁂𑀦𑀢𑁆𑀢𑀦𑁄 𑀦𑀺𑀭𑀪𑀺𑀫𑀸𑀦𑀢’𑀫𑀸𑀦𑁂𑀢𑀺 𑀲𑀚𑁆𑀚𑀦𑀫𑀸𑀘𑀸𑀭𑀁. 𑀅𑀪𑀺𑀦𑁆𑀦𑀧𑀤𑀲𑀺𑀮𑁂𑀲𑁄 𑀘𑀸𑀬𑀁, 𑀲𑀩𑁆𑀩𑀢𑁆𑀣𑁂𑀯𑀸𑀯𑀻𑀓𑀢𑀲𑀤𑁆𑀤𑀧𑁆𑀧𑀬𑁄𑀕𑀢𑁄. 𑀲𑀺𑀮𑁂𑀲𑁄 𑀘𑀸𑀬𑀁 𑀯𑀗𑁆𑀓𑀯𑀼𑀢𑁆𑀢𑀺𑀬𑀸 𑀲𑀩𑁆𑀩𑀢𑁆𑀣 𑀲𑀺𑀭𑀺𑀁 𑀧𑁄𑀲𑁂𑀢𑀺. 𑀢𑀣𑀸 𑀘 𑀯𑀓𑁆𑀔𑀢𑀺 ‘‘𑀯𑀗𑁆𑀓𑀯𑀼𑀢𑁆𑀢𑀻𑀲𑀼 𑀧𑁄𑀲𑁂𑀢𑀺, 𑀲𑀺𑀮𑁂𑀲𑁄 𑀢𑀼 𑀲𑀺𑀭𑀺𑀁 𑀧𑀭’’𑀦𑁆𑀢𑀺 [𑀲𑀼𑀩𑁄𑀥𑀸𑀮𑀗𑁆𑀓𑀸𑀭 𑁧𑁭𑁨 𑀕𑀸𑀣𑀸]. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁂𑀦 𑀦𑀬𑁂𑀦 𑀅𑀢𑁆𑀣𑀯𑀡𑁆𑀡𑀦𑀸. 𑀯𑀺𑀢𑁆𑀣𑀸𑀭𑀦𑀬𑁂𑀦 𑀧𑀦 𑀦𑀸𑀦𑀧𑁆𑀧𑀓𑀸𑀭𑁂𑀦𑀢𑁆𑀣𑁄 𑀲𑀁𑀯𑀡𑁆𑀡𑁂𑀢𑀼𑀁 𑀲𑀓𑁆𑀓𑀸. 𑀢𑀣𑀸 𑀲𑀢𑀺 𑀕𑀦𑁆𑀣𑀕𑀸𑀭𑀯𑁄𑀧𑀺 𑀲𑀺𑀬𑀸𑀢𑀺 𑀧𑀓𑀸𑀭𑁄𑀬𑀫𑁂𑀯𑀩𑁆𑀪𑀼𑀧𑀕𑀢𑁄.

𑁧. 𑀲𑀼𑀧𑀭𑀺𑀲𑀼𑀤𑁆𑀥𑀩𑀼𑀤𑁆𑀥𑀺𑀕𑁄𑀘𑀭𑀧𑀭𑀫𑀯𑀺𑀘𑀺𑀢𑁆𑀢𑀕𑀦𑁆𑀣𑀓𑀸𑀭𑀓𑁄𑀬𑀫𑀸𑀘𑀭𑀺𑀬- 𑀲𑀗𑁆𑀖𑀭𑀓𑁆𑀔𑀺𑀢𑀫𑀳𑀸𑀲𑀸𑀫𑀺𑀧𑀸𑀤𑁄 ¶ 𑀲𑀧𑀺𑀝𑀓𑀢𑁆𑀢𑀬𑀲𑀩𑁆𑀩𑀲𑀢𑁆𑀣𑀧𑀸𑀭𑀸𑀯𑀢𑀭𑀡𑁂𑀦 𑀲𑀜𑁆𑀚𑀸𑀢𑀸𑀦𑀧𑁆𑀧𑀓𑀧𑀻𑀢𑀺𑀲𑀼𑀔𑀫𑀦𑀼𑀪𑀯𑀁 𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀲𑀸𑀲𑀦𑀤𑁆𑀯𑀬𑀲𑁆𑀲 𑀧𑀭𑀺𑀬𑀢𑁆𑀢𑀺𑀫𑀽𑀮𑀓𑀢𑁆𑀢𑀸 𑀬𑁂𑀦 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀢𑀲𑁆𑀲𑀸 𑀧𑀭𑀺𑀬𑀢𑁆𑀢𑀺𑀬𑀸 𑀅𑀢𑁆𑀣𑀸𑀯𑀩𑁄𑀥𑁂𑀦 ‘‘𑀅𑀧𑁆𑀧𑁂𑀯 𑀦𑀸𑀫 𑀲𑀸𑀥𑀼𑀚𑀦𑀁 𑀧𑀭𑀺𑀢𑁄𑀲𑁂𑀬𑁆𑀬’’𑀫𑀺𑀢𑀺 𑀢𑀤𑀥𑀺𑀕𑀫𑁄𑀧𑀸𑀬𑀪𑀽𑀢𑀫𑀺𑀤𑀁 𑀧𑀓𑀭𑀡𑀫𑀸𑀭𑀪𑀦𑁆𑀢𑁄 𑀕𑀦𑁆𑀣𑀸𑀭𑀫𑁆𑀪𑁂 𑀇𑀝𑁆𑀞𑀤𑁂𑀯𑀢𑀸𑀬 𑀧𑀡𑀸𑀫𑀓𑀭𑀡𑀁 𑀲𑀢𑀸𑀘𑀸𑀭𑀸𑀦𑀼𑀭𑀓𑁆𑀔𑀡𑀢𑁆𑀣𑀁 [𑀲𑀤𑀸𑀘𑀸𑀭𑀸𑀦𑀼𑀭𑀓𑁆𑀔𑀡𑀢𑁆𑀣𑀁 (𑀓.)], 𑀯𑀺𑀲𑁂𑀲𑀢𑁄 𑀅𑀪𑀺𑀫𑀢𑀕𑀦𑁆𑀣𑀲𑁆𑀲𑀸𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀢𑁆𑀢𑀺𑀬𑀸 𑀘 𑀓𑀸𑀭𑀡𑀫𑀺𑀢𑀺 𑀇𑀝𑁆𑀞𑀤𑁂𑀯𑀢𑀸𑀦𑀼𑀲𑁆𑀲𑀭𑀡𑀁, 𑀕𑀦𑁆𑀣𑀦𑁆𑀢𑀭𑀸𑀭𑀫𑁆𑀪𑀧𑀝𑀺𑀓𑁆𑀔𑁂𑀧𑀓𑀚𑀦𑀧𑀝𑀺𑀩𑀸𑀳𑀦𑀧𑀼𑀩𑁆𑀩𑀓𑀸𑀦𑀺 𑀅𑀪𑀺𑀥𑀸𑀦𑀸𑀪𑀺𑀥𑁂𑀬𑁆𑀬𑀓𑀭𑀡𑀧𑁆𑀧𑀓𑀸𑀭𑀧𑀬𑁄𑀚𑀦𑀸𑀦𑀺 𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀼𑀦𑀺𑀦𑁆𑀤𑀯𑀤𑀦𑀫𑁆𑀪𑁄𑀚…𑀧𑁂… 𑀧𑀭𑀺𑀲𑁆𑀲𑀫𑁄’’𑀢𑀺 𑀕𑀸𑀣𑀢𑁆𑀢𑀬𑀫𑀸𑀳. 𑀏𑀢𑁆𑀣 𑀧𑀞𑀫𑀕𑀸𑀣𑀸𑀬 𑀇𑀝𑁆𑀞𑀤𑁂𑀯𑀢𑀸𑀲𑀗𑁆𑀔𑀸𑀢𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑁄 𑀤𑀲𑁆𑀲𑀺𑀢𑁄, 𑀤𑀼𑀢𑀺𑀬𑀕𑀸𑀣𑀸𑀬 𑀆𑀭𑀫𑁆𑀪𑀧𑀝𑀺𑀓𑁆𑀔𑁂𑀧𑀓𑀚𑀦𑀸 𑀦𑀺𑀲𑁂𑀥𑀺𑀢𑀸, 𑀢𑀢𑀺𑀬𑀕𑀸𑀣𑀸𑀬 𑀅𑀪𑀺𑀥𑀸𑀦𑀸𑀤𑀺𑀓𑀁 𑀤𑀲𑁆𑀲𑀺𑀢𑀁. 𑀢𑀣𑀸 𑀳𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀲𑁆𑀲𑀺𑀢𑀧𑀭𑀺𑀬𑀢𑁆𑀢𑀺𑀲𑀗𑁆𑀔𑀸𑀢𑀲𑀩𑁆𑀩𑀜𑁆𑀜𑀼𑀪𑀸𑀭𑀢𑀺𑀬𑀸 𑀫𑀦𑁄𑀲𑀫𑁆𑀧𑀻𑀡𑀦𑀸𑀲𑀻𑀲𑀦𑀸𑀧𑀤𑁂𑀲𑁂𑀦 𑀅𑀢𑁆𑀢𑀦𑁄 𑀦𑀺𑀲𑁆𑀲𑁂𑀲𑀥𑀫𑁆𑀫𑀭𑀢𑀦𑁂 𑀧𑀲𑀸𑀤𑁄 𑀧𑀓𑀸𑀲𑀺𑀢𑁄. 𑀲𑁄 𑀧𑀦 𑀥𑀫𑁆𑀫𑀧𑁆𑀧𑀲𑀸𑀤𑁄 𑀢𑀤𑀯𑀺𑀦𑀸𑀪𑀸𑀯𑀢𑁄 𑀩𑀼𑀤𑁆𑀥𑀲𑀗𑁆𑀖𑁂𑀲𑀼𑀧𑀺 𑀲𑀺𑀤𑁆𑀥𑁄𑀢𑀺 𑀭𑀢𑀦𑀢𑁆𑀢𑀬𑀯𑀺𑀲𑀬𑀁 𑀧𑀡𑀸𑀫𑀁 𑀯𑀗𑁆𑀓𑀯𑀼𑀢𑁆𑀢𑀺𑀬𑀸 𑀤𑀲𑁆𑀲𑁂𑀢𑀺. 𑀲𑁄 𑀳𑀺 𑀅𑀢𑁆𑀣𑀢𑁄 𑀧𑀡𑀸𑀫𑀓𑁆𑀭𑀺𑀬𑀸𑀪𑀺𑀦𑀺𑀧𑁆𑀨𑀸𑀤𑀺𑀓𑀸 𑀓𑀼𑀲𑀮𑀘𑁂𑀢𑀦𑀸. 𑀏𑀢𑁆𑀣 𑀨𑀮𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀧𑀼𑀦 𑀲𑀦𑁆𑀢𑁂𑀲𑀼 𑀭𑀸𑀫𑀲𑀫𑁆𑀫𑀸𑀤𑁆𑀬𑀮𑀗𑁆𑀓𑀸𑀭𑁂𑀲𑀼 𑀧𑀺𑀝𑁆𑀞𑀧𑀺𑀲𑀦𑀁 𑀯𑀺𑀬 𑀳𑁄𑀢𑀻𑀤𑀁 𑀅𑀮𑀗𑁆𑀓𑀸𑀭𑀓𑀭𑀡𑀦𑁆𑀢𑀺 𑀯𑀤𑀦𑁆𑀢𑀸 𑀯𑀺𑀭𑀼𑀤𑁆𑀥𑀯𑀸𑀤𑀺𑀦𑁄 𑀭𑀸𑀫𑀲𑀫𑁆𑀫𑀸𑀤𑀻𑀦𑀫𑀢𑁆𑀣𑀺𑀪𑀸𑀯𑀁 𑀉𑀩𑁆𑀪𑀸𑀯𑁂𑀢𑁆𑀯𑀸 [𑀅𑀪𑁆𑀬𑀼𑀧𑀕𑀫𑁂𑀢𑁆𑀯𑀸 (𑀓.)] 𑀢𑁂 𑀲𑀼𑀤𑁆𑀥𑀫𑀸𑀕𑀥𑀺𑀓𑀸 𑀦 𑀯𑀴𑀜𑁆𑀚𑁂𑀦𑁆𑀢𑀻𑀢𑀺 𑀇𑀫𑀺𑀦𑀸 𑀧𑀝𑀺𑀲𑀺𑀤𑁆𑀥𑀸. 𑀦𑀺𑀭𑀸𑀓𑀭𑀡𑀨𑀮𑀜𑁆𑀳𑀺 𑀕𑀦𑁆𑀣𑀲𑁆𑀲 𑀦𑀺𑀤𑁆𑀤𑁄𑀲𑀪𑀸𑀯𑁄𑀯. 𑀅𑀧𑀺𑀘 𑀲𑀤𑁆𑀤𑀸𑀮𑀗𑁆𑀓𑀸𑀭𑀅𑀢𑁆𑀣𑀸𑀮𑀗𑁆𑀓𑀸𑀭𑀤𑀻𑀧𑀓𑁂𑀦 𑀅𑀮𑀗𑁆𑀓𑀸𑀭𑀲𑀤𑁆𑀤𑁂𑀦 ¶ 𑀕𑀦𑁆𑀣𑀲𑀭𑀻𑀭𑀲𑀗𑁆𑀔𑀸𑀢𑀲𑀜𑁆𑀜𑀺𑀦𑁄 𑀲𑀜𑁆𑀜𑀸𑀲𑀗𑁆𑀔𑀸𑀢𑀅𑀪𑀺𑀥𑀸𑀦𑀜𑁆𑀘 𑀅𑀮𑀗𑁆𑀓𑀸𑀭𑀲𑀤𑁆𑀤𑀲𑁆𑀲 𑀲𑀤𑁆𑀤𑀸𑀮𑀗𑁆𑀓𑀸𑀭𑀸𑀤𑁆𑀬𑀪𑀺𑀥𑁂𑀬𑁆𑀬𑀜𑁆𑀘 𑀲𑀼𑀤𑁆𑀥𑀫𑀸𑀕𑀥𑀺𑀓𑀢𑁆𑀢𑀁 𑀯𑀢𑁆𑀯𑀸 𑀅𑀮𑀗𑁆𑀓𑀸𑀭𑀲𑀤𑁆𑀤𑀲𑁆𑀲 𑀯𑀺𑀲𑁂𑀲𑀦𑀪𑀽𑀢𑀅𑀦𑀼𑀭𑀽𑀧𑀲𑀤𑁆𑀤𑁄𑀧𑀸𑀤𑀸𑀦𑁂𑀦 𑀩𑀼𑀤𑁆𑀥𑀯𑀘𑀦𑀲𑁆𑀲 𑀉𑀧𑀬𑁄𑀕𑀢𑁆𑀢𑀁 𑀫𑀸𑀕𑀥𑀺𑀓𑀯𑁄𑀳𑀸𑀭𑁂𑀦 𑀪𑀯𑀢𑀻𑀢𑀺 𑀕𑀫𑁆𑀬𑀫𑀸𑀦𑀢𑁆𑀢𑀸 𑀓𑀭𑀡𑀧𑁆𑀧𑀓𑀸𑀭𑀜𑁆𑀘 𑀅𑀮𑀗𑁆𑀓𑀸𑀭𑀕𑀦𑁆𑀣𑀧𑁆𑀧𑀯𑀢𑁆𑀢𑀺𑀬𑀸 𑀅𑀢𑁆𑀣𑀸𑀮𑀗𑁆𑀓𑀸𑀭𑀸𑀤𑀺𑀦𑀺𑀲𑁆𑀲𑀺𑀢𑀢𑁆𑀢𑀸 𑀇𑀫𑀺𑀦𑀸 𑀅𑀮𑀗𑁆𑀓𑀸𑀭𑀲𑀤𑁆𑀤𑁂𑀦𑁂𑀯 𑀅𑀮𑀗𑁆𑀓𑀸𑀭𑀲𑀗𑁆𑀔𑀭𑀡𑀲𑀗𑁆𑀔𑀸𑀢𑀧𑁆𑀧𑀬𑁄𑀚𑀦𑀜𑁆𑀘 𑀤𑀲𑁆𑀲𑁂𑀢𑀺.

𑀲𑀢𑁆𑀣𑀧𑁆𑀧𑀬𑁄𑀚𑀦𑀸𑀦𑀁 𑀲𑀸𑀥𑁆𑀬𑀲𑀸𑀥𑀦𑀮𑀓𑁆𑀔𑀡𑁄 𑀲𑀫𑁆𑀩𑀦𑁆𑀥𑁄 𑀧𑀦 𑀲𑀫𑁆𑀩𑀦𑁆𑀥𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀲𑀢𑁆𑀣𑀧𑁆𑀧𑀬𑁄𑀚𑀦𑀸𑀦𑀁 𑀤𑀲𑁆𑀲𑀦𑁂𑀦𑁂𑀯 𑀢𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀲𑀬𑀫𑁆𑀧𑀺 𑀯𑀼𑀢𑁆𑀢𑁄 𑀳𑁄𑀢𑀺. 𑀯𑀼𑀢𑁆𑀢𑀁 𑀳𑀺𑁋

‘‘𑀲𑀢𑁆𑀣𑀁 𑀧𑀬𑁄𑀚𑀦𑀜𑁆𑀘𑁂𑀯, 𑀉𑀪𑁄 𑀲𑀫𑁆𑀩𑀦𑁆𑀥𑀦𑀺𑀲𑁆𑀲𑀬𑀸;

𑀯𑀼𑀢𑁆𑀢𑀸 𑀢𑀁𑀯𑀼𑀢𑁆𑀢𑀺𑀬𑀸𑀬𑁂𑀯, 𑀯𑀼𑀢𑁆𑀢𑁄 𑀢𑀦𑁆𑀦𑀺𑀲𑁆𑀲𑀺𑀢𑁄𑀧𑀺 𑀲𑁄’’𑀢𑀺.

𑀢𑀲𑁆𑀲𑀢𑁆𑀣𑁄𑁋 𑀲𑀫𑁆𑀩𑀦𑁆𑀥𑀦𑀺𑀲𑁆𑀲𑀬𑀸 𑀲𑀫𑁆𑀩𑀦𑁆𑀥𑀲𑁆𑀲 𑀆𑀥𑀸𑀭𑀪𑀽𑀢𑀸 𑀲𑀢𑁆𑀣𑀁, 𑀧𑀬𑁄𑀚𑀦𑀜𑁆𑀘 𑀉𑀪𑁄 𑀯𑀼𑀢𑁆𑀢𑀸, 𑀢𑀁𑀯𑀼𑀢𑁆𑀢𑀺𑀬𑀸𑀬𑁂𑀯 𑀢𑁂𑀲𑀁 𑀉𑀪𑀺𑀦𑁆𑀦𑀁 𑀓𑀣𑀦𑁂𑀦𑁂𑀯 𑀢𑀦𑁆𑀦𑀺𑀲𑁆𑀲𑀺𑀢𑁄 𑀢𑁂 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑁄 𑀲𑁄𑀧𑀺 𑀲𑀫𑁆𑀩𑀦𑁆𑀥𑁄 𑀯𑀼𑀢𑁆𑀢𑁄 𑀪𑀯𑀢𑀻𑀢𑀺.

𑀏𑀢𑁆𑀣 𑀅𑀪𑀺𑀥𑀸𑀦𑀓𑀣𑀦𑀁 𑀯𑁄𑀳𑀸𑀭𑀲𑀼𑀔𑀢𑁆𑀣𑀁, 𑀅𑀪𑀺𑀥𑁂𑀬𑁆𑀬𑀸𑀤𑀺𑀓𑀣𑀦𑀁 𑀧𑀦 𑀢𑁂𑀳𑀺 𑀬𑀼𑀢𑁆𑀢𑀸𑀦𑀁𑀬𑁂𑀯 𑀕𑀦𑁆𑀣𑀸𑀦𑀁 𑀲𑀼𑀩𑀼𑀤𑁆𑀥𑀺𑀧𑀼𑀩𑁆𑀩𑀓𑀸𑀤𑀻𑀦𑀁 𑀉𑀧𑀸𑀤𑁂𑀬𑁆𑀬𑀢𑁆𑀢𑀜𑁆𑀘 𑀢𑀩𑁆𑀩𑀺𑀧𑀭𑀻𑀢𑀸𑀦𑀁 𑀉𑀫𑁆𑀫𑀢𑁆𑀢𑀓𑀯𑀘𑀦𑀸𑀤𑀻𑀦𑀫𑀺𑀯𑀅𑀦𑀼𑀧𑀸𑀤𑁂𑀬𑁆𑀬𑀢𑁆𑀢𑀜𑁆𑀘 𑀧𑀓𑀸𑀲𑀦𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀲𑀫𑁆𑀩𑀦𑁆𑀥𑀸𑀦𑀼𑀕𑀼𑀡𑁄𑀧𑀸𑀬𑀁 [𑀲𑀫𑁆𑀩𑀦𑁆𑀥𑁆𑀬𑀦𑀼𑀕𑀼𑀡𑁄𑀧𑀸𑀬𑀁 (𑀓.)], 𑀧𑀼𑀭𑀺𑀲𑀢𑁆𑀣𑀸𑀪𑀺𑀥𑀸𑀬𑀓𑀁;

𑀯𑀻𑀫𑀁𑀲𑀸𑀥𑀺𑀕𑀢𑀁 [𑀯𑀻𑀫𑀁𑀲𑀸𑀥𑀺𑀓𑀢𑀁 (𑀲𑀻.)] 𑀯𑀸𑀓𑁆𑀬-𑀫𑀢𑁄𑀦𑀥𑀺𑀕𑀢𑀁 […𑀦𑀥𑀺𑀓𑀢𑀁 (𑀲𑀻.)] 𑀧𑀭’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄𑁋 𑀲𑀫𑁆𑀩𑀦𑁆𑀥𑀸𑀦𑀼𑀕𑀼𑀡𑁄𑀧𑀸𑀬𑀁 𑀲𑀸𑀥𑀺𑀬𑀲𑀸𑀥𑀦𑀮𑀓𑁆𑀔𑀡𑀲𑀫𑁆𑀩𑀦𑁆𑀥𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀯𑀸𑀘𑁆𑀘𑀯𑀸𑀘𑀓𑀸𑀦𑀁 𑀲𑀫𑁆𑀩𑀦𑁆𑀥𑀺𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀸𑀦𑀼𑀭𑀽𑀧𑀕𑀼𑀡𑀧𑀭𑀺𑀚𑀸𑀦𑀦𑁂 𑀓𑀸𑀭𑀡𑀪𑀽𑀢𑀁 𑀧𑀼𑀭𑀺𑀲𑀢𑁆𑀣𑀸𑀪𑀺𑀥𑀸𑀬𑀓𑀁 𑀘𑀢𑀼𑀩𑁆𑀩𑀺𑀥𑀥𑀫𑁆𑀫𑀅𑀢𑁆𑀣𑀓𑀸𑀫𑀫𑁄𑀓𑁆𑀔𑀲𑀗𑁆𑀔𑀸𑀢𑀸𑀦𑀁 𑀧𑀼𑀭𑀺𑀲𑀢𑁆𑀣𑀸𑀦𑀁 𑀯𑀸𑀘𑀓𑀪𑀽𑀢𑀁 ¶ 𑀯𑀸𑀓𑁆𑀬𑀁 ‘‘𑀏𑀓𑀸𑀔𑁆𑀬𑀸𑀢𑁄 𑀧𑀤𑀘𑁆𑀘𑀬𑁄, 𑀲𑀺𑀬𑀸 𑀯𑀸𑀓𑁆𑀬𑀁 𑀲𑀓𑀸𑀭𑀓𑁄’’𑀢𑀺 [𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸 𑁧𑁦𑁬 𑀕𑀸𑀣𑀸] 𑀯𑀼𑀢𑁆𑀢𑀮𑀓𑁆𑀔𑀡𑀫𑀚𑁆𑀛𑀧𑀢𑀺𑀢𑀯𑀸𑀓𑁆𑀬𑀲𑀫𑀼𑀤𑀸𑀬𑁄𑀧𑁂𑀢𑀁 𑀫𑀳𑀸𑀯𑀸𑀓𑁆𑀬𑀲𑀭𑀽𑀧𑀲𑀢𑁆𑀣𑀁 𑀯𑀻𑀫𑀁𑀲𑀸𑀥𑀺𑀕𑀢𑀁 𑀜𑀸𑀡𑀕𑀢𑀺𑀮𑀓𑁆𑀔𑀡𑀉𑀧𑀧𑀭𑀺𑀓𑁆𑀔𑀸𑀬 𑀅𑀥𑀺𑀕𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀅𑀢𑁄 𑀧𑀭𑀁 𑀯𑀼𑀢𑁆𑀢𑀮𑀓𑁆𑀔𑀡𑀲𑀢𑁆𑀣𑀢𑁄 𑀅𑀜𑁆𑀜𑀁 𑀅𑀦𑀥𑀺𑀕𑀢𑀁 𑀦𑀸𑀥𑀺𑀧𑁆𑀧𑁂𑀢𑀦𑁆𑀢𑀺. 𑀇𑀤𑀁 𑀧𑀦𑁂𑀢𑁆𑀣 𑀕𑀸𑀣𑀸𑀦𑀁 𑀦𑀺𑀓𑁆𑀔𑁂𑀧𑀧𑁆𑀧𑀬𑁄𑀚𑀦𑀁.

𑀮𑁄𑀓𑁂 𑀧𑀤𑀼𑀫𑀕𑀩𑁆𑀪𑁂 𑀯𑀲𑀦𑁆𑀢𑀺𑀬𑀸 𑀲𑀩𑁆𑀩𑀗𑁆𑀕𑀥𑀯𑀮𑀸𑀬 𑀬𑀣𑀺𑀘𑁆𑀙𑀺𑀢𑀢𑁆𑀣𑀲𑀸𑀥𑀺𑀓𑀸𑀬 𑀲𑀭𑀲𑁆𑀲𑀢𑀻𑀦𑀸𑀫𑀺𑀓𑀸𑀬 𑀤𑁂𑀯𑀢𑀸𑀬 ‘‘𑀯𑀸𑀡𑀻’’𑀢𑀺 𑀯𑁄𑀳𑀸𑀭𑀢𑁄 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀬𑁄𑀚𑁂𑀢𑁆𑀯𑀸 𑀅𑀪𑀺𑀦𑁆𑀦𑀧𑀤𑀲𑀺𑀮𑁂𑀲𑀸𑀮𑀗𑁆𑀓𑀸𑀭𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀧𑀤𑀢𑁆𑀣𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀫𑀼𑀦𑀺𑀦𑁆𑀤𑀲𑁆𑀲 𑀲𑁄𑀪𑀸𑀲𑀼𑀕𑀦𑁆𑀥𑀸𑀤𑀺𑀕𑀼𑀡𑀬𑁄𑀕𑀢𑁄 𑀫𑀼𑀔𑀲𑀤𑀺𑀲𑀲𑁆𑀲, 𑀦𑁄 𑀘𑁂 𑀫𑀼𑀔𑀲𑀗𑁆𑀔𑀸𑀢𑀅𑀫𑁆𑀪𑁄𑀚𑀲𑁆𑀲 𑀕𑀩𑁆𑀪𑁂 𑀉𑀤𑀭𑁂 𑀲𑀫𑁆𑀪𑀯𑁂𑀦 𑀧𑀯𑀢𑁆𑀢𑀺𑀬𑀸 𑀉𑀧𑁆𑀧𑀢𑁆𑀢𑀺𑀬𑀸 𑀯𑀸 𑀲𑀼𑀦𑁆𑀤𑀭𑀻 𑀦𑀺𑀤𑁆𑀤𑁄𑀲𑀸, 𑀲𑁄𑀪𑀦𑀸 𑀯𑀸 𑀧𑀸𑀡𑀺𑀦𑀁 𑀲𑀭𑀡𑀁 𑀅𑀢𑁄𑀬𑁂𑀯 𑀅𑀳𑀺𑀢𑀸𑀧𑀦𑀬𑀦𑀳𑀺𑀢𑀸𑀯𑀳𑀢𑁆𑀣𑁂𑀦 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀝𑀺𑀲𑁆𑀲𑀭𑀡𑀪𑀽𑀢𑀸 𑀯𑀸𑀡𑀻 𑀬𑀣𑀸𑀯𑀼𑀢𑁆𑀢𑀕𑀼𑀡𑁄𑀧𑁂𑀢𑀸 𑀲𑀭𑀲𑁆𑀲𑀢𑀻𑀤𑁂𑀯𑀢𑀸, 𑀦𑁄 𑀘𑁂 𑀲𑀩𑁆𑀩𑀜𑁆𑀜𑀼𑀪𑀸𑀭𑀢𑀻𑀢𑀺 𑀯𑀼𑀢𑁆𑀢𑀲𑀤𑁆𑀥𑀫𑁆𑀫𑀭𑀢𑀦𑀁 𑀫𑀬𑁆𑀳𑀁 𑀫𑀦𑀁 𑀕𑀦𑁆𑀣𑀯𑀺𑀭𑀘𑀦𑁂 𑀩𑁆𑀬𑀸𑀯𑀝𑀲𑁆𑀲 𑀫𑁂 𑀘𑀺𑀢𑁆𑀢𑀁 𑀧𑀻𑀡𑀬𑀢𑀁 𑀅𑀪𑀺𑀫𑀢𑀢𑁆𑀣𑀲𑀫𑁆𑀧𑀸𑀤𑀦𑁂𑀦 𑀧𑀻𑀡𑀬𑀢𑀽𑀢𑀺.

𑀉𑀪𑀬𑀮𑁄𑀓𑀚𑀸𑀦𑀦𑀢𑁄 𑀫𑀼𑀦𑀺 𑀘 𑀲𑁄 𑀇𑀦𑁆𑀤𑀪𑀸𑀯𑀧𑀯𑀢𑁆𑀢𑀦𑀢𑁄 𑀇𑀦𑁆𑀤𑁄 𑀘𑁂𑀢𑀺 𑀓𑀫𑁆𑀫𑀥𑀸𑀭𑀬𑁂𑀦 𑀯𑀸, 𑀅𑀕𑀸𑀭𑀺𑀬𑀫𑀼𑀦𑀺𑀅𑀦𑀕𑀸𑀭𑀺𑀬𑀫𑀼𑀦𑀺𑀲𑁂𑀔𑀫𑀼𑀦𑀺𑀅𑀲𑁂𑀔𑀫𑀼𑀦𑀻𑀦𑀁 𑀘𑀢𑀼𑀦𑁆𑀦𑀁 𑀧𑀜𑁆𑀘𑀫𑁄 𑀳𑀼𑀢𑁆𑀯𑀸 𑀇𑀦𑁆𑀤𑁄𑀢𑀺 𑀙𑀝𑁆𑀞𑀻𑀢𑀧𑁆𑀧𑀼𑀭𑀺𑀲𑁂𑀦 𑀯𑀸 𑀫𑀼𑀦𑀺𑀦𑁆𑀤𑁄. 𑀤𑁂𑀯𑀢𑀸𑀧𑀓𑁆𑀔𑁂 𑀯𑀤𑀦𑀫𑀺𑀯 𑀯𑀤𑀦𑀦𑁆𑀢𑀺 𑀅𑀫𑁆𑀪𑁄𑀚𑁂, 𑀲𑀤𑁆𑀥𑀫𑁆𑀫𑀧𑀓𑁆𑀔𑁂 𑀅𑀫𑁆𑀪𑁄𑀚𑀫𑀺𑀯 𑀅𑀫𑁆𑀪𑁄𑀚𑀦𑁆𑀢𑀺 𑀯𑀤𑀦𑁂 𑀘 𑀉𑀧𑀘𑀸𑀭𑁂𑀦 𑀕𑀳𑀺𑀢𑁂 𑀓𑀫𑁆𑀫𑀥𑀸𑀭𑀬𑁄. 𑀫𑀼𑀦𑀺𑀦𑁆𑀤𑀲𑁆𑀲 𑀯𑀤𑀦𑀫𑁆𑀪𑁄𑀚𑀫𑀺𑀢𑀺 𑀘, 𑀢𑀲𑁆𑀲 𑀕𑀩𑁆𑀪𑁄𑀢𑀺 𑀘, 𑀢𑀲𑁆𑀫𑀺𑀁 𑀲𑀫𑁆𑀪𑀯𑁄𑀢𑀺 𑀘, 𑀢𑁂𑀦 𑀲𑀼𑀦𑁆𑀤𑀭𑀻𑀢𑀺 𑀘 𑀯𑀸𑀓𑁆𑀬𑀁. 𑀯𑀸𑀡𑀺𑀬𑀸 𑀯𑀺𑀲𑁂𑀲𑀦𑀢𑁆𑀢𑁂𑀧𑀺 𑀏𑀓𑀦𑁆𑀢𑀦𑀧𑀼𑀁𑀲𑀓𑀢𑁆𑀢𑀸 𑀲𑀭𑀡𑀲𑀤𑁆𑀤𑀲𑁆𑀲 𑀦 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑀪𑀸𑀯𑁄. 𑀧𑀸𑀡𑀺𑀦𑀦𑁆𑀢𑀺 𑀭𑀲𑁆𑀲𑀢𑁆𑀢𑀁, 𑀤𑀻𑀖𑀲𑁆𑀲 𑀩𑁆𑀬𑀪𑀺𑀘𑀸𑀭𑀢𑁆𑀢𑀸. 𑀫𑀬𑁆𑀳𑀦𑁆𑀢𑀺 𑀏𑀓𑀯𑀘𑀦𑁂𑀦 𑀅𑀢𑁆𑀢𑀦𑁄 𑀲𑀸𑀥𑀼𑀕𑀼𑀡𑁄𑀤𑀬𑀓𑀸𑀭𑀡𑀁 ¶ 𑀦𑀺𑀭𑀢𑀺𑀫𑀸𑀦𑀢𑀁 𑀤𑀻𑀧𑁂𑀢𑀺. 𑀲𑀦𑁆𑀢𑁂𑀲𑀼𑀧𑀺 𑀅𑀜𑁆𑀜𑁂𑀲𑀼 𑀚𑀺𑀦𑀧𑀭𑀺𑀬𑀸𑀬𑁂𑀲𑀼 𑀫𑀼𑀦𑀺𑀦𑁆𑀤𑀲𑀤𑁆𑀤𑁄 𑀇𑀝𑁆𑀞𑀫𑀦𑁄𑀲𑀫𑁆𑀧𑀻𑀡𑀦𑀅𑀫𑁆𑀪𑁄𑀚𑀢𑀼𑀮𑁆𑀬𑀢𑀸𑀲𑀼𑀦𑁆𑀤𑀭𑀺𑀢𑁆𑀢𑀲𑀭𑀡𑀢𑁆𑀢𑀲𑀗𑁆𑀔𑀸𑀢𑀸𑀦𑀁 𑀅𑀢𑁆𑀣𑀦𑁆𑀢𑀭𑀸𑀦𑀁 𑀑𑀘𑀺𑀢𑁆𑀬𑀁 𑀧𑁄𑀲𑁂𑀢𑀻𑀢𑀺 𑀧𑀬𑀼𑀢𑁆𑀢𑁄. 𑀢𑀣𑀸 𑀳𑀺 𑀢𑀸𑀤𑀺𑀲𑀲𑁆𑀲 𑀫𑀼𑀔𑀁 𑀅𑀫𑁆𑀪𑁄𑀚𑀢𑀼𑀮𑁆𑀬𑀁, 𑀢𑀲𑁆𑀫𑀺𑀁 𑀫𑀼𑀔𑁄𑀤𑀭𑁂 𑀲𑀫𑁆𑀪𑀯𑀸 𑀲𑀼𑀦𑁆𑀤𑀭𑀻, 𑀢𑀢𑁄𑀬𑁂𑀯 𑀧𑀸𑀡𑀺𑀦𑀁 𑀲𑀭𑀡𑀁. 𑀢𑀲𑁆𑀫𑀸𑀬𑁂𑀯 𑀫𑀦𑁄𑀲𑀫𑁆𑀧𑀻𑀡𑀦𑁂 𑀧𑀝𑀼𑀢𑁆𑀢𑀁 𑀲𑀼𑀩𑁆𑀬𑀢𑁆𑀢𑀫𑀺𑀢𑀺 𑀑𑀘𑀺𑀢𑁆𑀬𑀁 𑀳𑁄𑀢𑀺. 𑀮𑁄𑀓𑁂 𑀧𑀢𑁆𑀣𑀝𑀫𑀺𑀤𑀫𑁄𑀘𑀺𑀢𑁆𑀬𑀫𑀸𑀤𑀭𑀡𑀻𑀬𑀁 𑀳𑁄𑀢𑀺. 𑀢𑀲𑁆𑀫𑀺𑀜𑁆𑀳𑀺 𑀉𑀢𑁆𑀢𑀫𑀓𑀯𑀬𑁄𑀬𑁂𑀯 𑀉𑀧𑀤𑁂𑀲𑀓𑀸𑀢𑀺. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀑𑀘𑀺𑀢𑁆𑀬𑀁 𑀦𑀸𑀫 𑀯𑀺𑀜𑁆𑀜𑁂𑀬𑁆𑀬𑀁, 𑀮𑁄𑀓𑁂 𑀯𑀺𑀔𑁆𑀬𑀸𑀢𑀫𑀸𑀤𑀭𑀸;

𑀢𑀢𑁆𑀣𑁄𑀧𑀤𑁂𑀲𑀧𑁆𑀧𑀪𑀯𑀸, 𑀲𑀼𑀚𑀦𑀸 𑀓𑀯𑀺𑀧𑀼𑀗𑁆𑀕𑀯𑀸’’𑀢𑀺 [𑀲𑀼𑀩𑁄𑀥𑀸𑀮𑀗𑁆𑀓𑀸𑀭 𑁧𑁦𑁪 𑀕𑀸𑀣𑀸].

𑀦𑀺𑀫𑀺𑀢𑁆𑀢𑀯𑀡𑁆𑀡𑀦𑀸

𑁨.

𑀭𑀸𑀫𑀲𑀫𑁆𑀫𑀸𑀤𑁆𑀬𑀮𑀗𑁆𑀓𑀸𑀭𑀸, 𑀲𑀦𑁆𑀢𑀺 𑀲𑀦𑁆𑀢𑁄 𑀧𑀼𑀭𑀸𑀢𑀦𑀸;

𑀢𑀣𑀸𑀧𑀺 𑀢𑀼 𑀯𑀴𑀜𑁆𑀚𑁂𑀦𑁆𑀢𑀺, 𑀲𑀼𑀤𑁆𑀥𑀫𑀸𑀕𑀥𑀺𑀓𑀸 𑀦 𑀢𑁂.

𑁨. 𑀅𑀣𑁂𑀯𑀫𑀪𑀺𑀕𑀢𑀸𑀫𑀺𑀢𑀲𑀺𑀤𑁆𑀥𑀺𑀲𑀫𑁆𑀧𑀤𑀸𑀧𑀸𑀤𑀦𑁂𑀓𑀘𑀢𑀼𑀭𑀧𑀭𑀫𑀺𑀝𑁆𑀞𑀤𑁂𑀯𑀢𑀸- 𑀪𑀸𑀯𑀭𑀽𑀧𑀺𑀢𑀲𑀤𑁆𑀥𑀫𑁆𑀫𑀭𑀢𑀦𑀲𑁆𑀲𑁄’ 𑀧𑀤𑀲𑁆𑀲𑀺𑀢𑀦𑀺𑀧𑀘𑁆𑀘𑀓𑀸𑀭𑁂𑀦 𑀇𑀝𑁆𑀞𑀤𑁂𑀯𑀢𑀸𑀧𑀽𑀚𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀦𑀦𑀼 𑀩𑀦𑁆𑀥𑀮𑀓𑁆𑀔𑀡𑀫𑀢𑁆𑀣𑀺𑀬𑁂𑀯 𑀧𑀼𑀩𑁆𑀩𑀓𑀁, 𑀢𑀲𑁆𑀫𑀸 𑀓𑀺𑀫𑀦𑁂𑀦 𑀧𑀺𑀝𑁆𑀞𑀧𑀺𑀲𑀦𑁂𑀦𑁂’’𑀢𑀺 𑀮𑀓𑁆𑀔𑀡𑀦𑁆𑀢𑀭𑀸𑀭𑀫𑁆𑀪𑀧𑀝𑀺𑀓𑁆𑀔𑁂𑀧𑀓𑀚𑀦𑀧𑀝𑀺𑀩𑀸𑀳𑀦𑀧𑀼𑀩𑁆𑀩𑀓𑀫𑀪𑀺𑀥𑁂𑀬𑁆𑀬𑀧𑁆𑀧𑀬𑁄𑀚𑀦- 𑀲𑀫𑁆𑀩𑀦𑁆𑀥𑁂 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀭𑀸𑀫𑀲𑀫𑁆𑀫𑁂’’𑀘𑁆𑀘𑀸𑀤𑀺. 𑀭𑀸𑀫𑀲𑀫𑁆𑀫𑀸𑀤𑀻𑀦𑀁 𑀭𑀸𑀫𑀲𑀫𑁆𑀫𑀧𑀪𑀼𑀢𑀻𑀦𑀁 𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀁, 𑀭𑀸𑀫𑀲𑀫𑁆𑀫𑀸𑀤𑀬𑁄 𑀯𑀸 𑀢𑀁𑀲𑀫𑁆𑀩𑀦𑁆𑀥𑀢𑁄. 𑀪𑀯𑀢𑀺 𑀳𑀺 𑀢𑀁𑀲𑀫𑁆𑀩𑀦𑁆𑀥𑀢𑁄 𑀢𑀩𑁆𑀩𑁄𑀳𑀸𑀭𑁄 𑀬𑀣𑀸 𑀓𑀺𑀜𑁆𑀘𑀺𑀧𑀺 𑀯𑁂𑀚𑁆𑀚𑀲𑀢𑁆𑀣𑀁 ‘‘𑀩𑀺𑀫𑁆𑀩𑀺𑀲𑀸𑀭𑁄’’𑀢𑀺. 𑀅𑀮𑀗𑁆𑀓𑀸𑀭𑀸 𑀪𑀽𑀲𑀸𑀯𑀺𑀲𑁂𑀲𑀸, 𑀩𑀦𑁆𑀥𑀸𑀮𑀗𑁆𑀓𑀸𑀭𑀧𑀝𑀺𑀧𑀸𑀤𑀓𑀢𑁆𑀣𑁂𑀦 𑀅𑀮𑀗𑁆𑀓𑀸𑀭𑀔𑁆𑀬𑀸 𑀕𑀦𑁆𑀣𑀯𑀺𑀲𑁂𑀲𑀸 𑀯𑀸. 𑀲𑀦𑁆𑀢𑁄 𑀲𑁄𑀪𑀦𑀸. 𑀤𑁆𑀯𑁂𑀧𑀺 𑀧𑀼𑀭𑀸 𑀧𑀼𑀩𑁆𑀩𑀓𑀸𑀮𑁂 𑀪𑀯𑀸 𑀧𑀼𑀭𑀸𑀢𑀦𑀸, 𑀧𑁄𑀭𑀸𑀡𑀺𑀓𑀸. 𑀉𑀪𑁄𑀧𑀺 𑀲𑀦𑁆𑀢𑀺. 𑀬𑀚𑁆𑀚𑀧𑀺 𑀲𑀁𑀯𑀺𑀚𑁆𑀚𑀦𑁆𑀢𑀺. 𑀢𑀣𑀸𑀧𑀺 𑀢𑀽𑀢𑀺 𑀦𑀺𑀧𑀸𑀢𑀲𑀫𑀼𑀤𑀸𑀬𑁄𑀬𑀁 ¶ 𑀯𑀺𑀲𑁂𑀲𑀸𑀪𑀺𑀥𑀸𑀦𑀸𑀭𑀫𑁆𑀪𑁂. 𑀏𑀯𑀁 𑀲𑀦𑁆𑀢𑁂𑀧𑀻𑀢𑀺 𑀅𑀢𑁆𑀣𑁄. 𑀲𑀼𑀤𑁆𑀥𑀫𑀸𑀕𑀥𑀺𑀓𑀸𑀢𑀺 𑀫𑀕𑀥𑁂𑀲𑀼 𑀪𑀯𑀸, 𑀢𑀢𑁆𑀣 𑀯𑀺𑀤𑀺𑀢𑀸 𑀯𑀸 𑀫𑀕𑀥𑀸, 𑀲𑀤𑁆𑀤𑀸. 𑀢𑁂 𑀏𑀢𑁂𑀲𑀁 𑀲𑀦𑁆𑀢𑀺, 𑀢𑁂𑀲𑀼 𑀯𑀸 𑀦𑀺𑀬𑀼𑀢𑁆𑀢𑀸𑀢𑀺 𑀫𑀸𑀕𑀥𑀺𑀓𑀸. 𑀲𑀼𑀤𑁆𑀥𑀸 𑀘 𑀲𑀓𑁆𑀓𑀝𑀸𑀤𑀺𑀪𑀸𑀲𑀺𑀢𑀓𑀸𑀮𑀼𑀲𑀺𑀬𑀸𑀪𑀸𑀯𑁂𑀦 𑀯𑀺𑀲𑀼𑀤𑁆𑀥𑀸, 𑀅𑀲𑀫𑁆𑀫𑀺𑀲𑁆𑀲𑀸 𑀯𑀸 𑀅𑀧𑀭𑀺𑀘𑀺𑀢𑀢𑁆𑀢𑀸 𑀢𑁂 𑀫𑀸𑀕𑀥𑀺𑀓𑀸 𑀘𑀸𑀢𑀺 𑀲𑀼𑀤𑁆𑀥𑀫𑀸𑀕𑀥𑀺𑀓𑀸, 𑀬𑀢𑀺𑀧𑁄𑀢𑀸. 𑀢𑁂 𑀬𑀣𑀸𑀯𑀼𑀢𑁆𑀢𑁂 𑀅𑀮𑀗𑁆𑀓𑀸𑀭𑁂 𑀆𑀪𑀭𑀡𑀯𑀺𑀲𑁂𑀲𑁂 𑀦 𑀯𑀴𑀜𑁆𑀚𑁂𑀦𑁆𑀢𑀺, 𑀧𑀲𑀸𑀥𑀦𑀯𑀺𑀲𑁂𑀲𑁂 𑀦𑀸𑀦𑀼𑀪𑀯𑀦𑁆𑀢𑀺. 𑀕𑀦𑁆𑀣𑀯𑀺𑀲𑁂𑀲𑁂 𑀧𑀦 𑀉𑀕𑁆𑀕𑀳𑀡𑀥𑀸𑀭𑀡𑀸𑀤𑀺𑀯𑀲𑁂𑀦 𑀅𑀢𑁆𑀢𑀦𑁄 𑀲𑀼𑀤𑁆𑀥𑀫𑀸𑀕𑀥𑀺𑀓𑀢𑁆𑀢𑀸, 𑀭𑀸𑀫𑀲𑀫𑁆𑀫𑀸𑀤𑀻𑀦𑀜𑁆𑀘 𑀲𑀓𑁆𑀓𑀝𑀸𑀤𑀺𑀪𑀸𑀯𑀢𑁄𑀢𑀺 𑀅𑀬𑀫𑁂𑀢𑁆𑀣 𑀲𑀤𑁆𑀤𑀢𑁆𑀣𑁄. 𑀪𑀸𑀯𑀢𑁆𑀣𑀮𑁂𑀲𑁄𑀧𑁂𑀢𑁆𑀣 𑀧𑀭𑀺𑀧𑀽𑀭𑀢𑀺, 𑀢𑀣𑀸𑀯𑀺𑀥𑀧𑀢𑀻𑀢𑀺𑀬𑁄𑀕𑀢𑁄. 𑀲𑀼𑀤𑁆𑀥𑀫𑀸𑀕𑀥𑀺𑀓𑀸 𑀅𑀢𑁆𑀢𑀦𑁄 𑀧𑀭𑀺𑀲𑀼𑀤𑁆𑀥𑀪𑀸𑀯𑁂𑀦 𑀧𑀼𑀩𑁆𑀩𑁂 𑀲𑁄𑀪𑀦𑀸𑀧𑀺 𑀢𑁂 𑀅𑀮𑀗𑁆𑀓𑀸𑀭𑀸 𑀇𑀤𑀸𑀦𑀺 𑀫𑀮𑀕𑁆𑀕𑀳𑀺𑀢𑀪𑀸𑀯𑀧𑁆𑀧𑀢𑁆𑀢𑀸 ‘‘𑀓𑀺𑀁 𑀢𑁂𑀳𑀺 𑀫𑀮𑀕𑁆𑀕𑀳𑀺𑀢𑁂𑀳𑀺 𑀅𑀫𑁆𑀳𑀸𑀤𑀺𑀲𑀸𑀦𑀁 𑀲𑀼𑀤𑁆𑀥𑀲𑀢𑁆𑀢𑀸𑀦’’𑀦𑁆𑀢𑀺 𑀦 𑀯𑀴𑀜𑁆𑀚𑁂𑀦𑁆𑀢𑀻𑀢𑀺.

‘‘𑀧𑀢𑀻𑀬𑀫𑀸𑀦𑀁 𑀧𑀦 𑀓𑀺𑀜𑁆𑀘𑀺 𑀯𑀢𑁆𑀣𑀼,

𑀅𑀢𑁆𑀣𑁂𑀯 𑀯𑀸𑀡𑀻𑀲𑀼 𑀫𑀳𑀸𑀓𑀯𑀻𑀦𑀁;

𑀬𑀁 𑀢𑀁 𑀧𑀲𑀺𑀤𑁆𑀥𑀸𑀯𑀬𑀯𑀸𑀢𑀺𑀭𑀺𑀢𑁆𑀢-

𑀫𑀸𑀪𑀸𑀢𑀺 𑀮𑀸𑀯𑀡𑁆𑀬𑀫𑀺𑀯𑀗𑁆𑀕𑀦𑀸𑀲𑀽’’𑀢𑀺.

𑀳𑀺 𑀯𑀼𑀢𑁆𑀢𑀁.

𑁨. 𑀲𑀦𑁆𑀢𑁄 𑀯𑀺𑀜𑁆𑀜𑀽𑀳𑀺 𑀧𑀲𑀢𑁆𑀣𑀢𑁆𑀢𑀸 𑀲𑁄𑀪𑀦𑀸 𑀧𑀼𑀭𑀸𑀢𑀦𑀸 𑀧𑀼𑀩𑁆𑀩𑀓𑀸𑀮𑀲𑀫𑁆𑀪𑀽𑀢𑀸 𑀭𑀸𑀫𑀲𑀫𑁆𑀫𑀸𑀤𑁆𑀬𑀮𑀗𑁆𑀓𑀸𑀭𑀸 𑀭𑀸𑀫𑀲𑀫𑁆𑀫𑀸𑀤𑀻𑀳𑀺 𑀆𑀘𑀭𑀺𑀬𑁂𑀳𑀺 𑀯𑀺𑀭𑀘𑀺𑀢𑀢𑁆𑀢𑀸, 𑀢𑁂𑀲𑀁 𑀢𑀁𑀲𑀫𑁆𑀩𑀦𑁆𑀥𑀢𑁄 𑀢𑀩𑁆𑀩𑁄𑀳𑀸𑀭𑀲𑀤𑀺𑀲𑀦𑀸𑀫𑀢𑁆𑀢𑀸 𑀯𑀸 𑀭𑀸𑀫𑀲𑀫𑁆𑀫𑀸𑀤𑀬𑁄 𑀦𑀸𑀫 𑀅𑀮𑀗𑁆𑀓𑀸𑀭𑀸 𑀓𑀺𑀲𑁆𑀫𑀺𑀜𑁆𑀘𑀺 𑀯𑁂𑀚𑁆𑀚𑀲𑀢𑁆𑀣𑁂 ‘‘𑀩𑀺𑀫𑁆𑀩𑀺𑀲𑀸𑀭𑁄’’𑀢𑀺 𑀯𑁄𑀳𑀸𑀭𑁄 𑀯𑀺𑀬. 𑀅𑀮𑀗𑁆𑀓𑀸𑀭𑀸 𑀪𑀽𑀲𑀸𑀯𑀺𑀲𑁂𑀲𑀸, 𑀅𑀮𑀗𑁆𑀓𑀸𑀭𑀢𑁆𑀢𑀧𑀝𑀺𑀧𑀸𑀤𑀦𑀢𑁄 𑀅𑀮𑀗𑁆𑀓𑀸𑀭𑀦𑀸𑀫𑀺𑀓𑀸 𑀕𑀦𑁆𑀣𑀯𑀺𑀲𑁂𑀲𑀸 𑀯𑀸 𑀲𑀦𑁆𑀢𑀺 𑀓𑀺𑀜𑁆𑀘𑀸𑀧𑀺 𑀯𑀺𑀚𑁆𑀚𑀦𑁆𑀢𑀺, 𑀢𑀣𑀸𑀧𑀺 𑀢𑀼 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀼𑀤𑁆𑀥𑀫𑀸𑀕𑀥𑀺𑀓𑀸 𑀲𑀓𑁆𑀓𑀝𑀧𑀸𑀓𑀢𑀸𑀤𑀻𑀲𑀼 𑀅𑀜𑁆𑀜𑀪𑀸𑀲𑀸𑀲𑀼 𑀧𑀭𑀺𑀘𑀬𑀸𑀪𑀸𑀯𑀢𑁄 𑀓𑁂𑀯𑀮𑀫𑀸𑀕𑀥𑀺𑀓𑀸 𑀢𑁂 𑀭𑀸𑀫𑀲𑀫𑁆𑀫𑀸𑀤𑀺𑀓𑁂 𑀅𑀮𑀗𑁆𑀓𑀸𑀭𑁂 𑀦 𑀯𑀴𑀜𑁆𑀚𑁂𑀦𑁆𑀢𑀺 𑀧𑀲𑀸𑀥𑀦𑀯𑀲𑁂𑀦, 𑀉𑀕𑁆𑀕𑀳𑀡𑀥𑀸𑀭𑀡𑀸𑀤𑀺𑀯𑀲𑁂𑀦 ¶ 𑀦 𑀲𑁂𑀯𑀦𑁆𑀢𑀺. 𑀫𑀕𑀥𑁂𑀲𑀼 𑀪𑀯𑀸, 𑀢𑁂𑀲𑀼 𑀯𑀸 𑀯𑀺𑀤𑀺𑀢𑀸 𑀫𑀕𑀥𑀸, 𑀲𑀤𑁆𑀤𑀸. 𑀢𑁂 𑀏𑀢𑁂𑀲𑀁 𑀅𑀢𑁆𑀣𑀺, 𑀢𑁂𑀲𑀼 𑀦𑀺𑀬𑀼𑀢𑁆𑀢𑀸𑀢𑀺 𑀯𑀸 𑀫𑀸𑀕𑀥𑀺𑀓𑀸. 𑀲𑀼𑀤𑁆𑀥𑀲𑀤𑁆𑀤𑁄 𑀫𑀕𑀥𑀯𑀺𑀲𑁂𑀲𑀦𑁄, 𑀫𑀸𑀕𑀥𑀺𑀓𑀯𑀺𑀲𑁂𑀲𑀦𑁄 𑀯𑀸 𑀳𑁄𑀢𑀺. 𑀲𑀤𑁆𑀤𑀸𑀦𑀁 𑀢𑀸𑀤𑀺𑀲𑀧𑀢𑀻𑀢𑀺𑀯𑀺𑀲𑁂𑀲𑀬𑁄𑀕𑀢𑁄 𑀪𑀸𑀯𑀢𑁆𑀣𑀮𑁂𑀲𑁄𑀧𑀺 𑀇𑀥 𑀤𑀺𑀧𑁆𑀧𑀢𑀺. 𑀢𑀣𑀸 𑀳𑀺 𑀲𑀼𑀤𑁆𑀥𑀫𑀸𑀕𑀥𑀺𑀓𑀸 𑀅𑀢𑁆𑀢𑀦𑁄 𑀲𑀼𑀤𑁆𑀥𑀢𑁆𑀢𑀸 𑀢𑁂𑀲𑀁 𑀯𑀺𑀦𑁆𑀬𑀸𑀲𑁂𑀦 𑀲𑁄𑀪𑀦𑀢𑁆𑀢𑁂 𑀲𑀢𑀺𑀧𑀺 𑀪𑀸𑀲𑀸𑀬 𑀧𑀼𑀭𑀸𑀢𑀦𑀢𑁆𑀢𑀸 𑀅𑀧𑀭𑀺𑀲𑀼𑀤𑁆𑀥𑁄𑀢𑀺 𑀅𑀯𑀫𑀜𑁆𑀜𑀫𑀸𑀦𑀸 𑀦 𑀯𑀴𑀜𑁆𑀚𑁂𑀦𑁆𑀢𑀻𑀢𑀺. 𑀯𑀢𑁆𑀢𑀺𑀘𑁆𑀙𑀺𑀢𑀲𑁆𑀲𑀢𑁆𑀣𑀲𑁆𑀲 𑀉𑀧𑀢𑁆𑀣𑀫𑁆𑀪𑀓𑀪𑀽𑀢𑁄 𑀪𑀸𑀯𑀢𑁆𑀣𑀮𑁂𑀲𑁄𑀧𑀺 𑀫𑀳𑀸𑀓𑀯𑀻𑀦𑀁 𑀯𑀘𑀦𑁂𑀲𑀼𑀬𑁂𑀯 𑀮𑀩𑁆𑀪𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀯𑀼𑀢𑁆𑀢𑀁 𑀳𑀺𑁋

‘‘𑀧𑀢𑀻𑀬𑀫𑀸𑀦𑀁 𑀧𑀦 𑀓𑀺𑀜𑁆𑀘𑀺 𑀯𑀢𑁆𑀣𑀼,

𑀅𑀢𑁆𑀣𑁂𑀯 𑀯𑀸𑀡𑀻𑀲𑀼 𑀫𑀳𑀸𑀓𑀯𑀻𑀦𑀁;

𑀬𑀁 𑀢𑀁 𑀧𑀲𑀺𑀤𑁆𑀥𑀸𑀯𑀬𑀯𑀸𑀢𑀺𑀭𑀺𑀢𑁆𑀢-

𑀫𑀸𑀪𑀸𑀢𑀺 𑀮𑀸𑀯𑀡𑁆𑀬𑀫𑀺𑀯𑀗𑁆𑀕𑀦𑀸𑀲𑀽’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀫𑀳𑀸𑀓𑀯𑀻𑀦𑀁 𑀧𑀽𑀚𑀺𑀢𑀓𑀯𑀻𑀦𑀁 𑀯𑀸𑀡𑀻𑀲𑀼 𑀯𑀘𑀦𑀯𑀺𑀲𑁂𑀲𑁂𑀲𑀼 𑀧𑀢𑀻𑀬𑀫𑀸𑀦𑀁 𑀕𑀫𑁆𑀫𑀫𑀸𑀦𑀁 𑀬𑀁 𑀓𑀺𑀜𑁆𑀘𑀺 𑀯𑀢𑁆𑀣𑀼 𑀬𑁄 𑀓𑁄𑀘𑀺 𑀅𑀢𑁆𑀣𑀮𑁂𑀲𑁄 𑀅𑀢𑁆𑀣𑁂𑀯 𑀅𑀢𑁆𑀣𑀺 𑀏𑀯, 𑀢𑀁 𑀯𑀢𑁆𑀣𑀼 𑀅𑀗𑁆𑀕𑀦𑀸𑀲𑀼 𑀯𑀦𑀺𑀢𑀸𑀲𑀼 𑀧𑀲𑀺𑀤𑁆𑀥𑀸𑀯𑀬𑀯𑀸𑀢𑀺𑀭𑀺𑀢𑁆𑀢𑀁 𑀳𑀢𑁆𑀣𑀧𑀸𑀤𑀸𑀤𑀺𑀧𑀸𑀓𑀝𑀲𑀭𑀻𑀭𑀸𑀯𑀬𑀯𑀢𑁄 𑀅𑀥𑀺𑀓𑀁 𑀮𑀸𑀯𑀡𑁆𑀬𑀫𑀺𑀯 𑀫𑀦𑁄𑀕𑁄𑀘𑀭𑀻𑀪𑀽𑀢𑀲𑀼𑀦𑁆𑀤𑀭𑀢𑁆𑀢𑀁 𑀯𑀺𑀬 𑀧𑀲𑀺𑀤𑁆𑀥𑀸𑀯𑀬𑀯𑀸𑀢𑀺𑀭𑀺𑀢𑁆𑀢𑀁 𑀧𑀓𑀸𑀲𑀲𑀤𑁆𑀤𑀸𑀯𑀬𑀯𑀢𑁄 𑀅𑀥𑀺𑀓𑀁 𑀳𑀼𑀢𑁆𑀯𑀸 𑀆𑀪𑀸𑀢𑀺 𑀤𑀺𑀧𑁆𑀧𑀢𑀻𑀢𑀺.

𑀅𑀪𑀺𑀥𑀸𑀦𑀸𑀤𑀺𑀯𑀡𑁆𑀡𑀦𑀸

𑁩.

𑀢𑁂𑀦𑀸𑀧𑀺 𑀦𑀸𑀫 𑀢𑁄𑀲𑁂𑀬𑁆𑀬-𑀫𑁂𑀢𑁂’𑀮𑀗𑁆𑀓𑀸𑀭𑀯𑀚𑁆𑀚𑀺𑀢𑁂;

𑀅𑀦𑀼𑀭𑀽𑀧𑁂𑀦𑀸’𑀮𑀗𑁆𑀓𑀸𑀭𑁂-𑀦𑁂’𑀲𑀫𑁂𑀲𑁄 𑀧𑀭𑀺𑀲𑁆𑀲𑀫𑁄.

𑁩. 𑀢𑁂𑀦𑁂𑀘𑁆𑀘𑀸𑀤𑀺. 𑀬𑁂𑀦 𑀢𑁂 𑀅𑀮𑀗𑁆𑀓𑀸𑀭𑁂 𑀦 𑀯𑀴𑀜𑁆𑀚𑁂𑀦𑁆𑀢𑀺, 𑀢𑁂𑀦 𑀓𑀸𑀭𑀡𑁂𑀦 𑀅𑀮𑀗𑁆𑀓𑀸𑀭𑀯𑀚𑁆𑀚𑀺𑀢𑁂 𑀆𑀪𑀭𑀡𑁂𑀳𑀺, 𑀕𑀦𑁆𑀣𑀯𑀺𑀲𑁂𑀲𑁂𑀳𑀺 𑀯𑀸 𑀭𑀳𑀺𑀢𑁂, 𑀅𑀮𑀗𑁆𑀓𑀸𑀭𑀸 𑀯𑀸 𑀬𑀣𑀸𑀯𑀼𑀢𑁆𑀢𑀯𑀚𑁆𑀚𑀺𑀢𑀸 𑀬𑁂𑀳𑀺 ¶ 𑀢𑁂, 𑀏𑀢𑁂 𑀬𑀢𑀺𑀧𑁄𑀢𑁂 𑀏𑀲𑀁 𑀬𑀢𑀺𑀧𑁄𑀢𑀸𑀦𑀁 𑀅𑀦𑀼𑀭𑀽𑀧𑁂𑀦 𑀇𑀤𑀸𑀦𑀺 𑀯𑀺𑀭𑀘𑀺𑀬𑀫𑀸𑀦𑀢𑁆𑀢𑀸𑀪𑀺𑀦𑀯𑀪𑀸𑀯𑀢𑁄, 𑀤𑀲𑀩𑀮𑀯𑀤𑀦𑀓𑀫𑀮𑀫𑀚𑁆𑀛𑀯𑀸𑀲𑀺𑀢𑀪𑀸𑀲𑀺𑀢𑀯𑀺𑀭𑀘𑀺𑀢𑀪𑀸𑀯𑀢𑁄 𑀘 𑀅𑀦𑀼𑀘𑁆𑀙𑀯𑀺𑀓𑁂𑀦 𑀅𑀮𑀗𑁆𑀓𑀸𑀭𑁂𑀦 𑀆𑀪𑀭𑀡𑁂𑀦, 𑀅𑀮𑀗𑁆𑀓𑀸𑀭𑀲𑀢𑁆𑀣𑁂𑀦 𑀯𑀸 𑀢𑁄𑀲𑁂𑀬𑁆𑀬𑀁 𑀅𑀧𑀺𑀦𑀸𑀫 𑀬𑀣𑀺𑀘𑁆𑀙𑀺𑀢𑀧𑀲𑀸𑀥𑀦𑀯𑀲𑁂𑀦, 𑀲𑀯𑀦𑀥𑀸𑀭𑀡𑀸𑀤𑀺𑀯𑀲𑁂𑀦 𑀯𑀸 𑀯𑀴𑀜𑁆𑀚𑀦𑁂𑀦 𑀲𑀦𑁆𑀢𑀼𑀝𑁆𑀞𑁂 𑀓𑀭𑁂𑀬𑁆𑀬𑀁 𑀅𑀧𑁆𑀧𑁂𑀯 𑀦𑀸𑀫 𑀬𑀦𑁆𑀦𑀽𑀦𑀸𑀢𑀺 𑀏𑀲𑁄 𑀧𑀭𑀺𑀲𑁆𑀲𑀫𑁄 𑀅𑀬𑀁 𑀅𑀫𑁆𑀳𑀸𑀓𑀁 𑀢𑀸𑀤𑀺𑀲𑀲𑀦𑁆𑀢𑀼𑀝𑁆𑀞𑀺𑀚𑀦𑀓𑀸𑀮𑀗𑁆𑀓𑀸𑀭𑀧𑀓𑀭𑀡𑀧𑁆𑀧𑀬𑁄𑀕𑁄.

𑀅𑀮𑀗𑁆𑀓𑀭𑁄𑀦𑁆𑀢𑀺 𑀅𑀢𑁆𑀢𑀪𑀸𑀯𑀫𑀦𑁂𑀦𑀸𑀢𑀺 𑀅𑀮𑀗𑁆𑀓𑀸𑀭𑁄, 𑀆𑀪𑀭𑀡𑀁 𑀳𑀸𑀭𑀓𑁂𑀬𑀽𑀭𑀸𑀤𑀺. 𑀅𑀮𑀗𑁆𑀓𑀭𑁄𑀦𑁆𑀢𑀺 𑀩𑀦𑁆𑀥𑀲𑀭𑀻𑀭𑀫𑀦𑁂𑀦𑀸𑀢𑀺 𑀅𑀮𑀗𑁆𑀓𑀸𑀭𑁄𑀢𑀺𑀫𑀺𑀦𑀸 𑀧𑀦 𑀅𑀮𑀗𑁆𑀓𑀸𑀭𑀲𑀤𑁆𑀤𑁂𑀦 𑀧𑀲𑀸𑀤𑀸𑀤𑀬𑁄 𑀲𑀤𑁆𑀤𑀸𑀮𑀗𑁆𑀓𑀸𑀭𑀸, 𑀲𑀪𑀸𑀯𑀯𑀼𑀢𑁆𑀬𑀸𑀤𑀬𑁄 𑀘 𑀅𑀢𑁆𑀣𑀸𑀮𑀗𑁆𑀓𑀸𑀭𑀸 𑀦𑀸𑀦𑀧𑁆𑀧𑀓𑀸𑀭𑀸 𑀲𑀗𑁆𑀕𑀳𑀺𑀢𑀸, 𑀬𑁂𑀳𑀺 𑀲𑀤𑁆𑀤𑀢𑁆𑀣𑀲𑀗𑁆𑀔𑀸𑀢𑀁 𑀩𑀦𑁆𑀥𑀲𑀭𑀻𑀭𑀁 𑀲𑁄𑀪𑀢𑁂, 𑀬𑀣𑀸 𑀳𑀺 𑀧𑀼𑀭𑀺𑀲𑀲𑀭𑀻𑀭𑁂 𑀳𑀸𑀭𑀓𑁂𑀬𑀽𑀭𑀸𑀤𑁆𑀬𑀮𑀗𑁆𑀓𑀸𑀭𑁄 𑀦𑁆𑀬𑀲𑁆𑀬𑀢𑁂, 𑀬𑁂𑀦 𑀲𑁄𑀪𑀢𑁂, 𑀢𑀣𑀸 𑀩𑀦𑁆𑀥𑀲𑀭𑀻𑀭𑁂𑀧𑀺 𑀲𑀤𑁆𑀤𑀸𑀮𑀗𑁆𑀓𑀸𑀭𑀸, 𑀅𑀢𑁆𑀣𑀸𑀮𑀗𑁆𑀓𑀸𑀭𑀸 𑀘 𑀦𑀺𑀓𑁆𑀔𑀺𑀧𑀻𑀬𑀦𑁆𑀢𑀺, 𑀬𑀢𑁄 𑀲𑁄𑀪𑀢𑁂. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀢𑀁 𑀢𑀼 𑀧𑀸𑀧𑁂𑀦𑁆𑀢𑀼𑀮𑀗𑁆𑀓𑀸𑀭𑀸, 𑀯𑀺𑀦𑁆𑀤𑀦𑀻𑀬𑀢𑀭𑀢𑁆𑀢𑀦’’𑀦𑁆𑀢𑀺 [𑀲𑀼𑀩𑁄𑀥𑀸𑀮𑀗𑁆𑀓𑀸𑀭 𑁯 𑀕𑀸𑀣𑀸] 𑀘, ‘‘𑀅𑀢𑁆𑀣𑀸𑀮𑀗𑁆𑀓𑀸𑀭𑀲𑀳𑀺𑀢𑁂’’𑀘𑁆𑀘𑀸𑀤𑀺𑀓𑀜𑁆𑀘 [𑀲𑀼𑀩𑁄𑀥𑀸𑀮𑀗𑁆𑀓𑀸𑀭 𑁧𑁬𑁪 𑀕𑀸𑀣𑀸].

𑀅𑀮𑀗𑁆𑀓𑀸𑀭𑀯𑀺𑀥𑀸𑀦𑀪𑀸𑀯𑁂𑀦 𑀢𑀼 𑀩𑀦𑁆𑀥𑀲𑀭𑀻𑀭𑀫𑁆𑀧𑀺 𑀢𑀤𑀢𑁆𑀣𑀺𑀬𑀸 𑀅𑀮𑀗𑁆𑀓𑀸𑀭𑁄, 𑀢𑀣𑀸 𑀢𑀧𑁆𑀧𑀝𑀺𑀧𑀸𑀤𑀓𑀁 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑀦𑀸𑀫𑀥𑁂𑀬𑁆𑀬𑀲𑀢𑁆𑀣𑀁 𑀅𑀮𑀗𑁆𑀓𑀢𑀧𑀝𑀺𑀧𑀸𑀤𑀓𑀢𑁆𑀢𑁂𑀦 𑀫𑀗𑁆𑀕𑀮𑀲𑀼𑀢𑁆𑀢𑀦𑁆𑀢𑀺 𑀯𑀺𑀬. 𑀯𑀓𑁆𑀔𑀢𑀺 𑀳𑀺 ‘‘𑀕𑀦𑁆𑀣𑁄𑀧𑀺 𑀓𑀯𑀺𑀯𑀸𑀘𑀸𑀦-𑀫𑀮𑀗𑁆𑀓𑀸𑀭𑀧𑁆𑀧𑀓𑀸𑀲𑀓𑁄’’ [𑀲𑀼𑀩𑁄𑀥𑀸𑀮𑀗𑁆𑀓𑀸𑀭 𑁧𑁨 𑀕𑀸𑀣𑀸] 𑀘𑁆𑀘𑀸𑀤𑀺. 𑀅𑀢𑁆𑀭 𑀉𑀘𑁆𑀘𑀢𑁂 𑁋

‘‘𑀫𑀼𑀔𑁆𑀬𑁄𑀮𑀗𑁆𑀓𑀸𑀭𑀲𑀤𑁆𑀤𑁄𑀬𑀁, 𑀲𑀤𑁆𑀤𑀢𑁆𑀣𑀸𑀮𑀗𑁆𑀓𑀢𑀺𑀲𑁆𑀲𑀺𑀢𑁄;

𑀲𑀸𑀫𑀢𑁆𑀣𑀺𑀬𑀸 𑀢𑁆𑀯𑀥𑀺𑀝𑁆𑀞𑀸𑀦𑁂, 𑀢𑀣𑀸 𑀲𑀢𑁆𑀣𑁂𑀧𑀺 𑀢𑀩𑁆𑀩𑀢𑀻’’𑀢𑀺.

𑀅𑀦𑁂𑀦𑀲𑁆𑀲𑀸𑀪𑀺𑀥𑁂𑀬𑁆𑀬𑀸𑀤𑀻𑀦𑀺 ¶ 𑀯𑀼𑀘𑁆𑀘𑀦𑁆𑀢𑀺. 𑀅𑀪𑀺𑀥𑀻𑀬𑀢𑁂 𑀇𑀢𑀺 𑀅𑀪𑀺𑀥𑁂𑀬𑁆𑀬𑀁, 𑀲𑀫𑀼𑀤𑀺𑀢𑁂𑀦 𑀲𑀢𑁆𑀣𑁂𑀦 𑀯𑀘𑀦𑀻𑀬𑀢𑁆𑀣𑁄. 𑀲𑁄 𑀘 𑀲𑀭𑀻𑀭𑀸𑀮𑀗𑁆𑀓𑀸𑀭𑀯𑀺𑀪𑀸𑀕𑀓𑀧𑁆𑀧𑀦𑀸𑀬 𑀢𑁂𑀲𑀁 𑀧𑀝𑀺𑀧𑀸𑀤𑀦𑀁. 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂𑀦 𑀳𑀺 𑀢𑁂 𑀧𑀝𑀺𑀧𑀸𑀤𑀻𑀬𑀦𑁆𑀢𑀺. 𑀬𑁂𑀦 𑀘 𑀬𑁄 𑀧𑀝𑀺𑀧𑀸𑀤𑀻𑀬𑀢𑀺, 𑀢𑀲𑁆𑀲𑀸𑀬𑀫𑀢𑁆𑀣𑁄 𑀪𑀯𑀢𑀻𑀢𑀺 𑀅𑀪𑀺𑀥𑁂𑀬𑁆𑀬𑀲𑀢𑁆𑀣𑁄𑀧𑀺. 𑀤𑀲𑁆𑀲𑀺𑀢𑀫𑁂𑀯 𑀢𑀼 𑀲𑀭𑀻𑀭𑀸𑀮𑀗𑁆𑀓𑀸𑀭𑀲𑀗𑁆𑀔𑀭𑀡𑀁 𑀧𑀬𑁄𑀚𑀦𑀁, 𑀢𑀁 𑀦𑀺𑀲𑁆𑀲𑀸𑀬 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑀧𑁆𑀧𑀯𑀢𑁆𑀢𑀺𑀢𑁄. 𑀬𑀲𑁆𑀲 𑀳𑀺 𑀬𑀫𑀼𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀺 𑀳𑁄𑀢𑀺, 𑀢𑀁 𑀢𑀲𑁆𑀲 𑀧𑀬𑁄𑀚𑀦𑀁, 𑀢𑀁 𑀧𑀦 𑀓𑀯𑀺𑀢𑁆𑀢𑀓𑀺𑀢𑁆𑀢𑀺𑀧𑀲𑀺𑀤𑁆𑀥𑀸𑀤𑀺𑀮𑀓𑁆𑀔𑀡𑀁, 𑀧𑀭𑀫𑁆𑀧𑀭𑀸𑀬 𑀢𑀤𑀢𑁆𑀣𑀢𑀸𑀬 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑀲𑀗𑁆𑀔𑀭𑀡𑀲𑁆𑀲. 𑀲𑀢𑁆𑀣𑀧𑀬𑁄𑀚𑀦𑀸𑀦𑀁, 𑀲𑀸𑀥𑀺𑀬𑀲𑀸𑀥𑀦𑀮𑀓𑁆𑀔𑀡𑁄 𑀲𑀫𑁆𑀩𑀦𑁆𑀥𑁄 𑀢𑀼 𑀦𑀺𑀲𑁆𑀲𑀬𑀧𑀤𑀲𑁆𑀲𑀺𑀦𑀸 𑀤𑀲𑁆𑀲𑀺𑀢𑁄𑀬𑁂𑀯. 𑀬𑀣𑀸𑀳 𑁋

‘‘𑀲𑀢𑁆𑀣𑀁 𑀧𑀬𑁄𑀚𑀦𑀜𑁆𑀘𑁂𑀯, 𑀉𑀪𑁄 𑀲𑀫𑁆𑀩𑀦𑁆𑀥𑀦𑀺𑀲𑁆𑀲𑀬𑀸;

𑀯𑀼𑀢𑁆𑀢𑀸𑀢𑀁𑀯𑀼𑀢𑁆𑀢𑀺𑀬𑀸𑀬𑁂𑀯, 𑀯𑀼𑀢𑁆𑀢𑁄 𑀢𑀦𑁆𑀦𑀺𑀲𑁆𑀲𑀺𑀢𑁄𑀧𑀺 𑀲𑁄’’𑀢𑀺.

𑀅𑀪𑀺𑀥𑁂𑀬𑁆𑀬𑀸𑀤𑀺𑀓𑀣𑀦𑀜𑁆𑀘 𑀢𑀁𑀲𑀫𑀗𑁆𑀕𑀺𑀲𑁆𑀲𑁂𑀯 𑀘 𑀯𑀻𑀫𑀁𑀲𑀸𑀯𑀺𑀲𑁂𑀲𑀲𑀫𑀗𑁆𑀕𑀻𑀦𑀫𑀼𑀧𑀸𑀤𑀻𑀬𑀫𑀸𑀦𑀢𑁆𑀢𑀸, 𑀅𑀜𑁆𑀜𑀸𑀤𑀺𑀲𑀲𑁆𑀲 𑀧𑀦 𑀉𑀫𑁆𑀫𑀢𑁆𑀢𑀓𑀯𑀘𑀦𑀸𑀤𑀺𑀦𑁄 𑀯𑀺𑀬 𑀳𑁂𑀬𑁆𑀬𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑀫𑁆𑀩𑀦𑁆𑀥𑀸𑀦𑀼𑀕𑀼𑀡𑁄𑀧𑀸𑀬𑀁, 𑀧𑀼𑀭𑀺𑀲𑀢𑁆𑀣𑀸𑀪𑀺𑀥𑀸𑀬𑀓𑀁;

𑀯𑀻𑀫𑀁𑀲𑀸𑀥𑀺𑀕𑀢𑀁 𑀯𑀸𑀓𑁆𑀬-𑀫𑀢𑁄𑀦𑀥𑀺𑀕𑀢𑀁 𑀧𑀭’’𑀦𑁆𑀢𑀺.

𑀯𑀸𑀓𑁆𑀬𑀦𑁆𑀢𑀺 𑀘𑁂𑀢𑁆𑀣 𑀯𑀸𑀓𑁆𑀬𑀮𑀓𑁆𑀔𑀡𑁄𑀧𑁂𑀢𑀫𑀦𑁆𑀢𑀭𑀯𑀸𑀓𑁆𑀬𑀲𑀦𑁆𑀦𑀺𑀘𑀬𑀁 𑀫𑀳𑀸𑀯𑀸𑀓𑁆𑀬𑀲𑀭𑀽𑀧𑀁 𑀲𑀢𑁆𑀣𑀫𑁂𑀯𑀸𑀥𑀺𑀧𑁆𑀧𑁂𑀢𑀁.

𑁩. 𑀬𑁂𑀦 𑀢𑁂 𑀢𑁂 𑀅𑀮𑀗𑁆𑀓𑀸𑀭𑁂𑀦 𑀯𑀴𑀜𑁆𑀚𑁂𑀦𑁆𑀢𑀺, 𑀢𑁂𑀦 𑀓𑀸𑀭𑀡𑁂𑀦 𑀅𑀮𑀗𑁆𑀓𑀸𑀭𑀯𑀚𑁆𑀚𑀺𑀢𑁂 𑀆𑀪𑀭𑀡𑀯𑀺𑀲𑁂𑀲𑁂𑀳𑀺, 𑀕𑀦𑁆𑀣𑀯𑀺𑀲𑁂𑀲𑁂𑀳𑀺 𑀯𑀸 𑀯𑀚𑁆𑀚𑀺𑀢𑁂, 𑀢𑁂 𑀯𑀺𑀭𑀳𑀺𑀢𑁂 𑀬𑁂𑀳𑀺 𑀏𑀢𑁂 𑀲𑀼𑀤𑁆𑀥𑀫𑀸𑀕𑀥𑀺𑀓𑁂 𑀏𑀲𑀁 𑀲𑀼𑀤𑁆𑀥𑀫𑀸𑀕𑀥𑀺𑀓𑀸𑀦𑀁 𑀅𑀦𑀼𑀭𑀽𑀧𑁂𑀦 𑀅𑀪𑀺𑀦𑀯𑀪𑀸𑀯𑀢𑁄 𑀫𑀸𑀕𑀥𑀺𑀓𑀲𑀭𑀽𑀧𑀁 𑀅𑀦𑀼𑀕𑀢𑀭𑀽𑀧𑁂𑀦, 𑀤𑀲𑀩𑀮𑀪𑀸𑀲𑀺𑀢𑀯𑀺𑀭𑀘𑀺𑀢𑀢𑁆𑀢𑀸 𑀯𑀸 𑀅𑀦𑀼𑀓𑀽𑀮𑁂𑀦 𑀅𑀮𑀗𑁆𑀓𑀸𑀭𑁂𑀦 𑀆𑀪𑀭𑀡𑀯𑀺𑀲𑁂𑀲𑁂𑀦, 𑀕𑀦𑁆𑀣𑀯𑀺𑀲𑁂𑀲𑁂𑀦 𑀯𑀸 𑀢𑁄𑀲𑁂𑀬𑁆𑀬𑀁 𑀅𑀮𑀗𑁆𑀓𑀸𑀭𑀯𑀴𑀜𑁆𑀚𑀸𑀧𑀦𑁂𑀦, 𑀕𑀦𑁆𑀣𑀯𑀺𑀲𑁂𑀲𑁂 [𑀕𑀦𑁆𑀣𑀯𑀺𑀲𑀬𑁂 (𑀓.)] 𑀉𑀕𑁆𑀕𑀳𑀡𑀥𑀸𑀭𑀡𑀸𑀤𑀺𑀓𑀸𑀭𑀸𑀧𑀦𑁂𑀦 ¶ 𑀯𑀸 𑀲𑀦𑁆𑀢𑀼𑀝𑁆𑀞𑁂 𑀓𑀭𑁂𑀬𑁆𑀬𑀁 𑀅𑀧𑀺𑀦𑀸𑀫 𑀬𑀁𑀦𑀽𑀦 𑀲𑀼𑀦𑁆𑀤𑀭𑀫𑀺𑀢𑀺, 𑀏𑀲𑁄 𑀧𑀭𑀺𑀲𑁆𑀲𑀫𑁄 𑀅𑀬𑀁 𑀫𑀫 𑀅𑀮𑀗𑁆𑀓𑀸𑀭𑀧𑀓𑀭𑀡𑀧𑁆𑀧𑀬𑁄𑀕𑁄. 𑀅𑀧𑀺𑀦𑀸𑀫𑀸𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑁄 𑀕𑀫𑁆𑀬𑀫𑀸𑀦𑁄.

𑀅𑀮𑀗𑁆𑀓𑀸𑀭𑁂𑀳𑀺 𑀯𑀚𑁆𑀚𑀺𑀢𑀸, 𑀅𑀮𑀗𑁆𑀓𑀸𑀭𑀸 𑀯𑀚𑁆𑀚𑀺𑀢𑀸 𑀬𑁂𑀳𑀺 𑀯𑀸𑀢𑀺 𑀘. 𑀭𑀽𑀧𑀲𑁆𑀲 𑀅𑀦𑀼 𑀅𑀦𑀼𑀭𑀽𑀧𑀁, 𑀭𑀽𑀧𑀁 𑀅𑀦𑀼𑀕𑀢𑀁 𑀅𑀦𑀼𑀭𑀽𑀧𑀁 𑀯𑀸, 𑀢𑁂𑀦 𑀅𑀦𑀼𑀭𑀽𑀧𑁂𑀦. 𑀅𑀮𑀗𑁆𑀓𑀭𑁄𑀦𑁆𑀢𑀺 𑀅𑀢𑁆𑀢𑀪𑀸𑀯𑀫𑀦𑁂𑀦𑁂𑀢𑀺 𑀅𑀮𑀗𑁆𑀓𑀸𑀭𑁄, 𑀳𑀸𑀭𑀓𑁂𑀬𑀽𑀭𑀸𑀤𑀺 𑀆𑀪𑀭𑀡𑀧𑀓𑁆𑀔𑁂, 𑀕𑀦𑁆𑀣𑀧𑀓𑁆𑀔𑁂 𑀢𑀼 𑀅𑀮𑀗𑁆𑀓𑀭𑁄𑀦𑁆𑀢𑀺 𑀩𑀦𑁆𑀥𑀲𑀭𑀻𑀭𑀫𑀦𑁂𑀦𑁂𑀢𑀺 𑀅𑀮𑀗𑁆𑀓𑀸𑀭𑁄. 𑀇𑀫𑀺𑀦𑀸 𑀫𑀼𑀔𑁆𑀬𑀪𑀸𑀯𑁂𑀦 𑀧𑀲𑀸𑀤𑀸𑀤𑀺𑀲𑀤𑁆𑀤𑀸𑀮𑀗𑁆𑀓𑀸𑀭𑀸 𑀘 𑀲𑀪𑀸𑀯𑀯𑀼𑀢𑁆𑀬𑀸𑀤𑀺𑀅𑀢𑁆𑀣𑀸𑀮𑀗𑁆𑀓𑀸𑀭𑀸 𑀘 𑀧𑀯𑀼𑀘𑁆𑀘𑀦𑁆𑀢𑀺. 𑀅𑀫𑀼𑀔𑁆𑀬𑀢𑁄 𑀧𑀦 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀅𑀮𑀗𑁆𑀓𑀸𑀭𑀸𑀦𑀫𑀥𑀺𑀝𑁆𑀞𑀸𑀦𑀪𑀽𑀢𑀩𑀦𑁆𑀥𑀲𑀭𑀻𑀭𑀫𑁆𑀧𑀺, 𑀢𑀣𑀸 𑀫𑀗𑁆𑀕𑀮𑀲𑀼𑀢𑁆𑀢𑀭𑀢𑀦𑀲𑀼𑀢𑁆𑀢𑀸𑀤𑀺𑀯𑁄𑀳𑀸𑀭𑁄 𑀯𑀺𑀬 𑀅𑀮𑀗𑁆𑀓𑀸𑀭𑀧𑀓𑀸𑀲𑀓𑀁 ‘‘𑀲𑀫𑁆𑀫𑀸 𑀩𑀼𑀚𑁆𑀛𑀦𑁆𑀢𑀺 𑀤𑁆𑀯𑀺𑀧𑁆𑀧𑀓𑀸𑀭𑀸 𑀅𑀮𑀗𑁆𑀓𑀸𑀭𑀸 𑀅𑀦𑁂𑀦𑁂’’𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀮𑀤𑁆𑀥𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑀯𑀭𑀦𑀸𑀫𑀥𑁂𑀬𑁆𑀬𑀲𑀢𑁆𑀣𑀫𑁆𑀧𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀫𑀺𑀤𑀫𑁂𑀯 𑁋

‘‘𑀫𑀼𑀔𑁆𑀬𑁄𑀮𑀗𑁆𑀓𑀸𑀭𑀲𑀤𑁆𑀤𑁄𑀬𑀁, 𑀲𑀤𑁆𑀤𑀢𑁆𑀣𑀸𑀮𑀗𑁆𑀓𑀢𑀺𑀲𑁆𑀲𑀺𑀢𑁄;

𑀲𑀸𑀫𑀢𑁆𑀣𑀺𑀬𑀸 𑀢𑁆𑀯𑀥𑀺𑀝𑁆𑀞𑀸𑀦𑁂, 𑀢𑀣𑀸 𑀲𑀢𑁆𑀣𑁂𑀧𑀺 𑀢𑀩𑁆𑀩𑀢𑀻’’𑀢𑀺.

𑀏𑀢𑁆𑀣 𑀲𑀸𑀫𑀢𑁆𑀣𑀺𑀬𑀁 𑀦𑀸𑀫 𑀢𑀤𑀸𑀥𑀸𑀭𑀢𑀧𑁆𑀧𑀝𑀺𑀧𑀸𑀤𑀓𑀢𑁆𑀢𑀯𑁄𑀳𑀸𑀭𑀢𑁄 𑀢𑀤𑀸𑀥𑁂𑀬𑁆𑀬𑀢𑀧𑁆𑀧𑀝𑀺𑀧𑀸𑀤𑀦𑀻𑀬𑀁 𑀦 𑀪𑀯𑀢𑀺 𑀘𑁂, 𑀅𑀜𑁆𑀜𑀁 𑀓𑀺𑀁 𑀪𑀯𑀢𑀻𑀢𑀺 𑀅𑀜𑁆𑀜𑀣𑀸𑀦𑀼𑀧𑀧𑀢𑁆𑀢𑀺𑀮𑀓𑁆𑀔𑀡𑀫𑁂𑀯𑀸𑀢𑀺.

𑁪.

𑀬𑁂𑀲𑀁 𑀦 𑀲𑀜𑁆𑀘𑀺𑀢𑀸 𑀧𑀜𑁆𑀜𑀸-𑀦𑁂𑀓𑀲𑀢𑁆𑀣𑀦𑁆𑀢𑀭𑁄𑀘𑀺𑀢𑀸;

𑀲𑀫𑁆𑀫𑁄𑀳𑀩𑁆𑀪𑀸𑀳𑀢𑀸𑀯𑁂’𑀢𑁂, 𑀦𑀸𑀯𑀩𑀼𑀚𑁆𑀛𑀦𑁆𑀢𑀺 𑀓𑀺𑀜𑁆𑀘𑀺𑀧𑀺.

𑁫.

𑀓𑀺𑀁 𑀢𑁂𑀳𑀺 𑀧𑀸𑀤𑀲𑀼𑀲𑁆𑀲𑀽𑀲𑀸, 𑀬𑁂𑀲𑀁 𑀦𑀢𑁆𑀣𑀺 𑀕𑀼𑀭𑀽𑀦𑀻’𑀳 [𑀕𑀭𑀽𑀦𑀺𑀳 (𑀓.)];

𑀬𑁂 𑀢𑀧𑁆𑀧𑀸𑀤𑀭𑀚𑁄𑀓𑀺𑀡𑁆𑀡𑀸, 𑀢𑁂’𑀯 𑀲𑀸𑀥𑀽𑀯𑀺𑀯𑁂𑀓𑀺𑀦𑁄.

𑁪-𑁫. 𑀏𑀯𑀁 𑀮𑀓𑁆𑀔𑀡𑀸𑀭𑀫𑁆𑀪𑀧𑀝𑀺𑀓𑁆𑀔𑁂𑀧𑀓𑀚𑀦𑀧𑀝𑀺𑀩𑀸𑀳𑀦𑀧𑀼𑀩𑁆𑀩𑀓𑀫𑀪𑀺𑀥𑁂𑀬𑁆𑀬𑀸𑀤𑀺𑀓𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀢𑁆𑀣𑀢𑁄𑀯 𑀲𑀩𑁆𑀩𑀢𑁆𑀣 𑀕𑀼𑀡𑀤𑁄𑀲𑀯𑀺𑀯𑁂𑀘𑀦𑀁. 𑀅𑀢𑁄𑀬𑁂𑀯 𑀯𑀼𑀘𑁆𑀘𑀢𑀺 𑁋

‘‘𑀲𑀩𑁆𑀩𑀢𑁆𑀣 ¶ 𑀲𑀢𑁆𑀣𑀢𑁄𑀬𑁂𑀯, 𑀕𑀼𑀡𑀤𑁄𑀲𑀯𑀺𑀯𑁂𑀘𑀦𑀁;

𑀬𑀁 𑀓𑀭𑁄𑀢𑀺 𑀯𑀺𑀦𑀸 𑀲𑀢𑁆𑀣𑀁, 𑀲𑀸𑀳𑀲𑀁 𑀓𑀺𑀫𑀢𑁄𑀥𑀺𑀓’’𑀦𑁆𑀢𑀺.

𑀢𑀲𑁆𑀫𑀸 𑀕𑀼𑀡𑀤𑁄𑀲𑀯𑀺𑀪𑀸𑀕𑀯𑀺𑀘𑀸𑀭𑀡𑀁 𑀦𑀸𑀫 𑀢𑀩𑁆𑀩𑀺𑀤𑀽𑀦𑀁𑀬𑁂𑀯, 𑀦𑀸𑀲𑀢𑁆𑀣𑀜𑁆𑀜𑀽𑀦𑀁 𑀧𑀼𑀭𑀺𑀲𑀧𑀲𑀽𑀦𑀁. 𑀢𑀣𑀸 𑀘𑀸𑀳 𑁋

‘‘𑀕𑀼𑀡𑀤𑁄𑀲𑀫𑀲𑀢𑁆𑀣𑀜𑁆𑀜𑀽, 𑀚𑀦𑁄 𑀯𑀺𑀪𑀚𑀢𑁂 𑀓𑀣𑀁;

𑀅𑀥𑀺𑀓𑀸𑀭𑁄 𑀓𑀺𑀫𑀦𑁆𑀥𑀲𑁆𑀲, 𑀭𑀽𑀧𑀪𑁂𑀤𑁄𑀧𑀮𑀤𑁆𑀥𑀺𑀬’’𑀦𑁆𑀢𑀺 [𑀓𑀸𑀩𑁆𑀬𑀸𑀤𑀸𑀲 𑁧.𑁮].

𑀬𑁂𑀦𑁂𑀯𑀁, 𑀢𑁂𑀦𑁂𑀢𑁆𑀣 𑀕𑀼𑀡𑀤𑁄𑀲𑀤𑀲𑁆𑀲𑀦𑁂 𑀧𑀲𑀦𑁆𑀦𑀸𑀦𑁂𑀓𑀲𑀢𑁆𑀣𑀘𑀓𑁆𑀔𑀼𑀬𑁂𑀯𑀸𑀥𑀺𑀕𑀢𑁄, 𑀦𑀜𑁆𑀜𑁄 𑀢𑀩𑁆𑀩𑀺𑀧𑀭𑀻𑀢𑁄𑀢𑁆𑀬𑀦𑁆𑀯𑀬𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂𑀲’’𑀦𑁆𑀢𑀺𑀆𑀤𑀺𑀕𑀸𑀣𑀸𑀤𑁆𑀯𑀬𑀫𑀸𑀳. 𑀢𑀢𑁆𑀣 𑀬𑁂𑀲𑀦𑁆𑀢𑀺 𑀅𑀦𑀺𑀬𑀫𑀼𑀤𑁆𑀤𑁂𑀲𑁄, 𑀬𑁂𑀳𑀻𑀢𑀺 𑀅𑀢𑁆𑀣𑁄. 𑀬𑁂𑀳𑀺 𑀦 𑀲𑀜𑁆𑀘𑀺𑀢𑀸 𑀦 𑀭𑀸𑀲𑀺𑀓𑀢𑀸, 𑀦𑀸𑀦𑀸𑀲𑀦𑁆𑀢𑀸𑀦𑀯𑀼𑀢𑁆𑀢𑀺𑀦𑀻𑀧𑀺 𑀏𑀓𑀢𑁆𑀢𑀦𑀬𑁂𑀦 𑀏𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀦 𑀯𑀸𑀲𑀺𑀢𑀸 𑀦𑀧𑀭𑀺𑀪𑀸𑀯𑀺𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸 𑀲𑀸? 𑀧𑀜𑁆𑀜𑀸 𑀳𑁂𑀬𑁆𑀬𑁄𑀧𑀸𑀤𑁂𑀬𑁆𑀬𑀯𑀺𑀯𑁂𑀓𑀭𑀽𑀧𑀸. 𑀓𑀻𑀤𑀺𑀲𑀻𑀢𑀺 𑀆𑀳 ‘‘𑀅𑀦𑁂𑀓𑀲𑀢𑁆𑀣𑀦𑁆𑀢𑀭𑁄𑀘𑀺𑀢𑀸’’𑀢𑀺. 𑀅𑀦𑁂𑀓𑀲𑁆𑀫𑀺𑀁 𑀢𑀺𑀧𑀺𑀝𑀓𑀢𑀓𑁆𑀓𑀩𑁆𑀬𑀸𑀓𑀭𑀡𑀸𑀮𑀗𑁆𑀓𑀸𑀭𑀲𑀢𑁆𑀣𑀸𑀤𑀺𑀓𑁂 𑀲𑀢𑁆𑀣𑀦𑁆𑀢𑀭𑁂 𑀉𑀘𑀺𑀢𑀸 𑀲𑀯𑀦𑀥𑀸𑀭𑀡𑀸𑀤𑀺𑀯𑀲𑁂𑀦 𑀧𑀭𑀺𑀘𑀺𑀢𑀸 𑀲𑀸𑀬𑀁 𑀧𑀜𑁆𑀜𑀸 𑀬𑁂𑀲𑀁 𑀦 𑀲𑀜𑁆𑀘𑀺𑀢𑀸𑀢𑀺 𑀧𑀓𑀢𑀁. 𑀏𑀢𑁂𑀢𑀺 𑀬𑀣𑀸𑀉𑀤𑁆𑀤𑀺𑀝𑁆𑀞𑀸𑀦𑀁 𑀦𑀺𑀬𑀫𑀯𑀘𑀦𑀁. 𑀲𑀫𑁆𑀫𑁄𑀳𑀩𑁆𑀪𑀸𑀳𑀢𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀬𑀸𑀢𑀺𑀲𑀬𑀯𑀢𑀺𑀬𑀸 𑀧𑀜𑁆𑀜𑀸𑀬𑀸𑀪𑀸𑀯𑀢𑁄 𑀩𑀮𑀧𑁆𑀧𑀢𑁆𑀢𑁂𑀦 𑀫𑁄𑀳𑁂𑀦 𑀅𑀩𑁆𑀪𑀸𑀳𑀢𑀸 𑀯𑀺𑀲𑁂𑀲𑁂𑀦 𑀧𑀳𑀢𑀸, 𑀏𑀯𑀲𑀤𑁆𑀤𑀺𑀢𑀸 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀢𑁄 𑀏𑀯𑀁, 𑀢𑀲𑁆𑀫𑀸𑀧𑀺 𑀓𑀺𑀜𑁆𑀘𑀺𑀧𑀺 𑀳𑁂𑀬𑁆𑀬𑁄𑀧𑀸𑀤𑁂𑀬𑁆𑀬𑀭𑀽𑀧𑀁 𑀬𑀁 𑀓𑀺𑀜𑁆𑀘𑀺𑀤𑁂𑀯 𑀅𑀝𑁆𑀞𑀸𑀦𑀸𑀦𑀺𑀬𑁄𑀚𑀓𑀢𑀸𑀤𑀺𑀲𑀕𑀼𑀭𑀼𑀧𑀸𑀤𑀲𑀼𑀲𑁆𑀲𑀽𑀲𑀸𑀦𑀺𑀲𑁆𑀲𑀬𑀧𑀝𑀺𑀮𑀤𑁆𑀥𑀯𑀺𑀯𑁂𑀓𑀧𑀜𑁆𑀜𑀸𑀢𑀺- 𑀲𑀬𑀸𑀮𑀸𑀪𑁂𑀦 𑀦𑀸𑀯𑀩𑀼𑀚𑁆𑀛𑀦𑁆𑀢𑀺, 𑀦 𑀚𑀸𑀦𑀦𑁆𑀢𑀻𑀢𑁆𑀬𑀢𑁆𑀣𑁄. 𑀬𑀢𑁄 𑀆𑀮𑀲𑀺𑀬𑀸𑀤𑀺𑀤𑁄𑀲𑀮𑁂𑀲𑀧𑀭𑀺𑀕𑁆𑀕𑀳𑁄𑀧𑀺 𑀲𑀢𑀢𑀸𑀘𑀭𑀺𑀬𑀲𑁂𑀯𑀦𑀯𑀲𑁂𑀦 𑀲𑀺𑀭𑁄𑀯𑀺𑀓𑀺𑀡𑁆𑀡𑀢𑀸𑀤𑀺𑀲𑀕𑀼𑀭𑀼𑀧𑀸𑀤𑀧𑀗𑁆𑀓𑀚𑀫𑁆𑀩𑀼𑀚𑀧𑀭𑀸𑀬𑀦𑁄 𑀘𑀺𑀭𑁂𑀦𑀧𑀺 𑀓𑀸𑀮𑁂𑀦 𑀦𑀸𑀦𑀸𑀯𑀺𑀥𑀲𑀢𑁆𑀣𑀦𑁆𑀢𑀭𑀓𑀢𑀧𑀭𑀺𑀘𑀬𑀩𑀮𑁂𑀦 𑀧𑀧𑁆𑀧𑁄𑀢𑀺 𑀢𑀸𑀤𑀺𑀲𑀁 𑀧𑀜𑁆𑀜𑀸𑀯𑁂𑀬𑀢𑁆𑀢𑀺𑀬𑀁. 𑀢𑁂𑀦𑁂𑀯𑀸𑀳 𑀪𑀕𑀯𑀸 𑁋

‘‘𑀦𑀺𑀳𑀻𑀬𑀢𑀺 ¶ 𑀧𑀼𑀭𑀺𑀲𑁄 𑀦𑀺𑀳𑀻𑀦𑀲𑁂𑀯𑀻,

𑀦 𑀘 𑀳𑀸𑀬𑁂𑀣 𑀓𑀤𑀸𑀘𑀺 𑀢𑀼𑀮𑁆𑀬𑀲𑁂𑀯𑀻;

𑀲𑁂𑀝𑁆𑀞𑀫𑀼𑀧𑀦𑀫𑀁 𑀉𑀤𑁂𑀢𑀺 𑀔𑀺𑀧𑁆𑀧𑀁,

𑀢𑀲𑁆𑀫𑀸’𑀢𑁆𑀢𑀦𑁄 𑀉𑀢𑁆𑀢𑀭𑀺𑀢𑀭𑀁 𑀪𑀚𑁂𑀣𑀸’’𑀢𑀺 [𑀅. 𑀦𑀺. 𑁩.𑁨𑁬].

𑀢𑀢𑁄 𑀏𑀢𑀸𑀤𑀺𑀲𑁄 𑀧𑀜𑁆𑀜𑀯𑀸𑀬𑁂𑀯𑁂𑀢𑁆𑀣 𑀕𑀼𑀡𑀤𑁄𑀲𑀯𑀺𑀪𑀸𑀕𑀯𑀺𑀯𑁂𑀘𑀦𑁂 𑀅𑀥𑀺𑀓𑀸𑀭𑀻, 𑀦𑀜𑁆𑀜𑁄 𑀢𑀩𑁆𑀩𑀺𑀧𑀭𑀻𑀢𑁄 𑀧𑀼𑀭𑀺𑀲𑀧𑀲𑀽𑀢𑀺 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄. 𑀭𑀼𑀴𑁆𑀳𑁄 𑀅𑀢𑁆𑀣𑀯𑀺𑀲𑁂𑀲𑁄. 𑀢𑁂𑀦𑀸𑀳 ‘‘𑀓𑀺𑀁 𑀢𑁂𑀳𑀺 𑀧𑀸𑀤𑀲𑀼𑀲𑁆𑀲𑀽𑀲𑀸, 𑀬𑁂𑀲𑀁 𑀦𑀢𑁆𑀣𑀺 𑀕𑀼𑀭𑀽𑀦𑀺𑀳𑀸’’𑀢𑀺. 𑀇𑀳𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀬𑁂𑀲𑀁 𑀚𑀦𑀸𑀦𑀁 𑀕𑀼𑀭𑀽𑀦𑀁 𑀓𑀸𑀢𑀩𑁆𑀩𑀸 𑀧𑀸𑀤𑀲𑀼𑀲𑁆𑀲𑀽𑀲𑀸 𑀧𑀸𑀤𑀧𑀭𑀺𑀘𑀭𑀺𑀬𑀸 𑀦𑀢𑁆𑀣𑀺, 𑀢𑁂𑀳𑀺 𑀚𑀦𑁂𑀳𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀧𑀜𑁆𑀜𑀸𑀯𑁂𑀬𑀢𑁆𑀢𑀺𑀬𑀭𑀲𑀸𑀦𑀪𑀺𑀜𑁆𑀜𑁂𑀳𑀺 𑀓𑀺𑀁 𑀧𑀬𑁄𑀚𑀦𑀁, 𑀮𑁂𑀲𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, 𑀅𑀦𑀥𑀺𑀕𑀢𑀸𑀬𑁂𑀯𑁂𑀢𑁆𑀣 𑀏𑀢𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀸𑀦𑀺 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀆𑀳 ‘‘𑀬𑁂’’𑀢𑀺𑀆𑀤𑀺. 𑀬𑁂 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀢𑀸𑀤𑀺𑀲𑀫𑁆𑀧𑀢𑁆𑀢𑀺𑀲𑀫𑁆𑀧𑀦𑁆𑀦𑀸 𑀢𑀧𑁆𑀧𑀸𑀤𑀭𑀚𑁂𑀳𑀺 𑀢𑁂𑀲𑀁 𑀕𑀼𑀭𑀽𑀦𑀁 𑀧𑀸𑀤𑀥𑀽𑀮𑀻𑀳𑀺 𑀑𑀓𑀺𑀡𑁆𑀡𑀸 𑀑𑀦𑀤𑁆𑀥𑀸 𑀕𑀯𑀘𑁆𑀙𑀺𑀢𑀸, 𑀢𑁂𑀯 𑀲𑀸𑀥𑀽 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀧𑀜𑁆𑀜𑀸𑀯𑁂𑀬𑀢𑁆𑀢𑀺𑀬𑁂𑀦 𑀅𑀪𑀺𑀜𑁆𑀜𑀸𑀢𑀸 𑀲𑀚𑁆𑀚𑀦𑀸 𑀏𑀯 𑀯𑀺𑀯𑁂𑀓𑀺𑀦𑁄 𑀳𑁂𑀬𑁆𑀬𑁄𑀧𑀸𑀤𑁂𑀬𑁆𑀬𑀕𑀼𑀡𑀤𑁄𑀲𑀯𑀺𑀪𑀸𑀕𑀦𑀺𑀬𑀫𑀦𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀲𑀫𑀗𑁆𑀕𑀺𑀦𑁄 𑀳𑁄𑀦𑁆𑀢𑀺, 𑀢𑁂𑀬𑁂𑀯𑁂𑀢𑁆𑀣 𑀕𑀼𑀡𑀤𑁄𑀲𑀯𑀺𑀯𑁂𑀘𑀦𑁂 𑀅𑀥𑀺𑀕𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀸 𑀘𑀸𑀬𑀁 𑀕𑀼𑀭𑀼𑀧𑀸𑀤𑀲𑀼𑀲𑁆𑀲𑀽𑀲𑀸 𑀯𑀺𑀲𑀺𑀝𑁆𑀞𑀸𑀤𑀭𑁂𑀦 𑀓𑀭𑀡𑀻𑀬𑀸𑀢𑀺 𑀯𑀗𑁆𑀓𑀯𑀼𑀢𑁆𑀢𑀺𑀬𑀸 𑀢𑀤𑀪𑁆𑀬𑀸𑀲𑁂 𑀲𑀸𑀥𑀼𑀚𑀦𑁂 𑀦𑀺𑀬𑁄𑀚𑁂𑀢𑀺.

𑁪-𑁫. 𑀬𑁂 𑀲𑀓𑀮𑀲𑀢𑁆𑀣𑀧𑀭𑀺𑀘𑀺𑀢𑀜𑁆𑀜𑀸𑀡𑀧𑀸𑀝𑀯𑀸 𑀬𑀤𑀺 𑀤𑁄𑀲𑀫𑀸𑀭𑁄𑀧𑀬𑀦𑁆𑀢𑀺, 𑀢𑁂𑀲𑀁 𑀢𑀤𑁆𑀤𑁄𑀲𑀦𑀺𑀭𑀸𑀓𑀭𑀡𑀁 𑀯𑀺𑀦𑀸 𑀧𑀤𑁂𑀲𑀸𑀯𑀩𑁄𑀥𑀦𑀫𑀢𑁆𑀢𑁂𑀦 𑀧𑀡𑁆𑀟𑀺𑀢𑀫𑀸𑀦𑀻𑀦𑀁 𑀯𑀘𑀦𑀲𑁆𑀲𑀸𑀕𑀼𑀭𑀼𑀓𑀭𑀡𑀁 𑀯𑀗𑁆𑀓𑀯𑀼𑀢𑁆𑀢𑀺𑀬𑀸 𑀤𑀲𑁆𑀲𑁂𑀦𑁆𑀢𑁄 𑀘 𑀢𑀁𑀤𑁆𑀯𑀸𑀭𑁂𑀦𑁂𑀯 𑀅𑀢𑁆𑀢𑀦𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑀕𑀼𑀭𑀼𑀕𑀸𑀭𑀯𑀢𑀁 𑀲𑀸𑀥𑀼𑀚𑀦𑁂𑀳𑀺 𑀧𑀭𑀫𑀸𑀤𑀭𑁂𑀦 𑀲𑀫𑁆𑀧𑀸𑀤𑁂𑀢𑀩𑁆𑀩𑀫𑀺𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑁂𑀲𑀁…𑀧𑁂… 𑀓𑀺𑀦𑁄’’𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳. 𑀅𑀦𑁂𑀓𑀲𑀢𑁆𑀣𑀸𑀦𑀁 ¶ 𑀢𑀺𑀧𑀺𑀝𑀓𑀢𑀓𑁆𑀓𑀩𑁆𑀬𑀸𑀓𑀭𑀡𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀕𑀦𑁆𑀣𑀸𑀦𑀁 𑀅𑀦𑁆𑀢𑀭𑁂 𑀢𑀢𑁆𑀯𑀢𑁆𑀣𑀲𑀗𑁆𑀔𑀸𑀢𑀅𑀩𑁆𑀪𑀦𑁆𑀢𑀭𑁂 𑀉𑀘𑀺𑀢𑀸 𑀲𑀯𑀦𑀉𑀕𑁆𑀕𑀳𑀡𑀥𑀸𑀭𑀡𑀸𑀤𑀺𑀯𑀲𑁂𑀦 𑀧𑀭𑀺𑀘𑀺𑀢𑀸 𑀧𑀜𑁆𑀜𑀸 𑀲𑀼𑀢𑀫𑀬𑀸 𑀧𑀜𑁆𑀜𑀸 𑀬𑁂𑀲𑀁 𑀬𑁂𑀳𑀺 𑀦 𑀲𑀜𑁆𑀘𑀺𑀢𑀸, 𑀤𑁆𑀯𑀺𑀦𑁆𑀦𑀫𑁂𑀓𑀓𑁆𑀔𑀡𑁂 𑀧𑀯𑀢𑁆𑀢𑀺𑀬𑀸𑀪𑀸𑀯𑁂𑀧𑀺 𑀉𑀧𑀘𑀺𑀢𑀲𑀫𑀽𑀳𑀪𑀸𑀯𑀢𑁄, 𑀧𑀼𑀩𑁆𑀩𑀓𑀸𑀮𑀺𑀓𑀧𑀜𑁆𑀜𑀸𑀬 𑀅𑀧𑀭𑀓𑀸𑀮𑀺𑀓𑀧𑀜𑁆𑀜𑀸𑀬 𑀅𑀦𑀦𑁆𑀢𑀭𑀆𑀲𑁂𑀯𑀦𑀸𑀤𑀺𑀧𑀘𑁆𑀘𑀬𑀮𑀸𑀪𑀢𑁄 𑀅𑀯𑀢𑁆𑀣𑀩𑀸𑀳𑀼𑀮𑁆𑀮𑀧𑀯𑀢𑁆𑀢𑀺𑀢𑁄 𑀯𑀸 𑀲𑀜𑁆𑀘𑀺𑀢𑀩𑁆𑀩𑀸𑀧𑀺 𑀦 𑀭𑀸𑀲𑀺𑀓𑀢𑀸. 𑀏𑀢𑁂 𑀈𑀤𑀺𑀲𑀧𑀜𑁆𑀜𑀸𑀧𑀸𑀝𑀯𑀭𑀳𑀺𑀢𑀸 𑀇𑀫𑁂 𑀲𑀫𑁆𑀫𑁄𑀳𑀩𑁆𑀪𑀸𑀳𑀢𑀸 𑀧𑀜𑁆𑀜𑀸𑀧𑀸𑀝𑀯𑀸𑀪𑀸𑀯𑀢𑁄 𑀩𑀮𑀧𑁆𑀧𑀢𑁆𑀢𑁂𑀦 𑀫𑁄𑀳𑁂𑀦 𑀯𑀺𑀲𑁂𑀲𑁂𑀦 𑀧𑀳𑀢𑀸 𑀏𑀯 𑀓𑀺𑀜𑁆𑀘𑀺𑀧𑀺 𑀳𑁂𑀬𑁆𑀬𑁄𑀧𑀸𑀤𑁂𑀬𑁆𑀬𑀁 𑀦𑀸𑀯𑀩𑀼𑀚𑁆𑀛𑀦𑁆𑀢𑀺. 𑀦 𑀏𑀓𑁂 𑀅𑀦𑁂𑀓𑁂𑀢𑀺 𑀘, 𑀢𑁂 𑀘 𑀢𑁂 𑀲𑀢𑁆𑀣𑀸 𑀘𑁂𑀢𑀺 𑀘, 𑀢𑁂𑀲𑀫𑀦𑁆𑀢𑀭𑀫𑀺𑀢𑀺 𑀘, 𑀢𑀲𑁆𑀫𑀺𑀁 𑀉𑀘𑀺𑀢𑀸𑀢𑀺 𑀘 𑀲𑀫𑁆𑀫𑁄𑀳𑁂𑀦 𑀅𑀩𑁆𑀪𑀸𑀳𑀢𑀸𑀢𑀺 𑀘 𑀯𑀺𑀕𑁆𑀕𑀳𑁄. 𑀢𑁂𑀦 𑀯𑀼𑀢𑁆𑀢𑀁𑁋

‘‘𑀕𑀼𑀡𑀤𑁄𑀲𑀫𑀲𑀢𑁆𑀣𑀜𑁆𑀜𑀽, 𑀚𑀦𑁄 𑀯𑀺𑀪𑀚𑀢𑁂 𑀓𑀣𑀁;

𑀅𑀥𑀺𑀓𑀸𑀭𑁄 𑀓𑀺𑀫𑀦𑁆𑀥𑀲𑁆𑀲, 𑀭𑀽𑀧𑀪𑁂𑀤𑁄𑀧𑀮𑀤𑁆𑀥𑀺𑀬’’𑀦𑁆𑀢𑀺 [𑀓𑀸𑀩𑁆𑀬𑀸𑀤𑀸𑀲 𑁧.𑁮].

𑀢𑀲𑁆𑀲𑀢𑁆𑀣𑁄 𑁋 𑀅𑀲𑀢𑁆𑀣𑀜𑁆𑀜𑀽 𑀚𑀦𑁄 𑀕𑀼𑀡𑀤𑁄𑀲𑀁 𑀓𑀣𑀁 𑀯𑀺𑀪𑀚𑀢𑁂. 𑀢𑀣𑀸 𑀳𑀺 𑀭𑀽𑀧𑀪𑁂𑀤𑁄𑀧𑀮𑀤𑁆𑀥𑀺𑀬𑀁 𑀦𑀻𑀮𑀧𑀻𑀢𑀸𑀤𑀺𑀭𑀽𑀧𑀯𑀺𑀲𑁂𑀲𑀸𑀯𑀩𑁄𑀥𑀦𑁂 𑀅𑀦𑁆𑀥𑀲𑁆𑀲 𑀅𑀥𑀺𑀓𑀸𑀭𑁄 𑀅𑀪𑀺𑀫𑀼𑀔𑀓𑀭𑀡𑀁 𑀓𑀺𑀁 𑀳𑁄𑀢𑀺, 𑀦 𑀪𑀯𑀢𑁆𑀬𑁂𑀯, 𑀢𑀲𑁆𑀫𑀸 𑀅𑀦𑁂𑀓𑀲𑀢𑁆𑀣𑀦𑁆𑀢𑀭𑀕𑀢𑀲𑀼𑀧𑁆𑀧𑀲𑀦𑁆𑀦𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀏𑀯 𑀕𑀼𑀡𑀤𑁄𑀲𑀯𑀺𑀯𑁂𑀘𑀦𑀁 𑀪𑀯𑀢𑀺, 𑀢𑀤𑀪𑀸𑀯𑁂 𑀦 𑀪𑀯𑀢𑁆𑀬𑁂𑀯. 𑀇𑀤𑀫𑁂𑀯 𑀯𑀼𑀘𑁆𑀘𑀢𑁂𑁋

‘‘𑀲𑀩𑁆𑀩𑀢𑁆𑀣 𑀲𑀢𑁆𑀣𑀢𑁄𑀬𑁂𑀯, 𑀕𑀼𑀡𑀤𑁄𑀲𑀯𑀺𑀯𑁂𑀘𑀦𑀁;

𑀬𑀁 𑀓𑀭𑁄𑀢𑀺 𑀯𑀺𑀦𑀸 𑀲𑀢𑁆𑀣𑀁, 𑀲𑀸𑀳𑀲𑀁 𑀓𑀺𑀫𑀢𑁄𑀥𑀺𑀓’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀲𑀩𑁆𑀩𑀢𑁆𑀣 𑀕𑀼𑀡𑀤𑁄𑀲𑀯𑀺𑀯𑁂𑀘𑀦𑀁 𑀲𑀢𑁆𑀣𑀢𑁄𑀬𑁂𑀯 𑀳𑁄𑀢𑀺, 𑀲𑀢𑁆𑀣𑀁 𑀯𑀺𑀦𑀸 𑀲𑀢𑁆𑀣𑁄𑀘𑀺𑀢𑀢𑀸𑀤𑀺𑀲𑀧𑀜𑁆𑀜𑀁 𑀯𑀺𑀦𑀸 𑀬𑀁 𑀓𑀭𑁄𑀢𑀺 𑀕𑀼𑀡𑀸𑀕𑀼𑀡𑀯𑀺𑀪𑀸𑀕𑀁 𑀓𑀭𑁄𑀢𑀺, 𑀬𑀁 𑀓𑀭𑀡𑀁 𑀅𑀢𑁆𑀣𑀺, 𑀅𑀢𑁄𑀥𑀺𑀓𑀁 𑀲𑀸𑀳𑀲𑀁 𑀓𑀺𑀁 𑀆𑀲𑀼𑀁 𑀓𑀺𑀭𑀺𑀬𑀸 𑀅𑀦𑀼𑀧𑀧𑀭𑀺𑀓𑁆𑀔𑀦𑀓𑀺𑀭𑀺𑀬𑀸 𑀦𑀢𑁆𑀣𑁂𑀯.

𑀇𑀳 ¶ 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀬𑁂𑀲𑀁 𑀅𑀓𑀢𑀧𑀼𑀜𑁆𑀜𑀸𑀦𑀁 𑀚𑀦𑀸𑀦𑀁 𑀕𑀼𑀭𑀽𑀦𑀁

‘‘𑀧𑀺𑀬𑁄 𑀕𑀭𑀼 𑀪𑀸𑀯𑀦𑀻𑀬𑁄,

𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄;

𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸,

𑀦𑁄 𑀘𑀸’𑀝𑁆𑀞𑀸𑀦𑁂 𑀦𑀺𑀬𑁄𑀚𑀓𑁄’’𑀢𑀺 [𑀅. 𑀦𑀺. 𑁭.𑁩𑁭].

𑀦𑀺𑀤𑁆𑀤𑀺𑀝𑁆𑀞𑀕𑀼𑀡𑁄𑀧𑁂𑀢𑀸𑀦𑀁 𑀆𑀘𑀭𑀺𑀬𑀸𑀦𑀁 𑀓𑀸𑀢𑀩𑁆𑀩𑀸 𑀧𑀸𑀤𑀲𑀼𑀲𑁆𑀲𑀽𑀲𑀸 𑀧𑀸𑀤𑀧𑀭𑀺𑀘𑀭𑀺𑀬𑀸 𑀦𑀢𑁆𑀣𑀺, 𑀢𑁂𑀳𑀺 𑀓𑀺𑀁 𑀧𑀬𑁄𑀚𑀦𑀁. 𑀬𑁂 𑀓𑀢𑀧𑀼𑀜𑁆𑀜𑀸 𑀚𑀦𑀸 𑀢𑀧𑁆𑀧𑀸𑀤𑀭𑀚𑁄𑀓𑀺𑀡𑁆𑀡𑀸 𑀢𑁂𑀲𑀁 𑀕𑀼𑀭𑀽𑀦𑀁 𑀧𑀸𑀤𑀭𑀚𑁂𑀳𑀺 𑀕𑀯𑀘𑁆𑀙𑀺𑀢𑀸, 𑀢𑁂𑀯 𑀲𑀸𑀥𑀽 𑀚𑀦𑀸 𑀏𑀯 𑀯𑀺𑀯𑁂𑀓𑀺𑀦𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀕𑀼𑀭𑀼𑀧𑀸𑀲𑀦𑀸𑀳𑀺 𑀅𑀥𑀺𑀕𑀢𑀯𑀺𑀲𑀺𑀝𑁆𑀞𑀯𑀺𑀯𑁂𑀓𑀩𑀼𑀤𑁆𑀥𑀺𑀦𑁄 𑀪𑀯𑀦𑁆𑀢𑀺, 𑀢𑁂 𑀏𑀯 𑀯𑀺𑀯𑁂𑀓𑀁 𑀚𑀸𑀦𑀦𑁆𑀢𑀻𑀢𑀺 𑀪𑀸𑀯𑁄. 𑀲𑁄𑀢𑀼𑀫𑀺𑀘𑁆𑀙𑀸 𑀲𑀼𑀲𑁆𑀲𑀽𑀲𑀸, 𑀢𑀁 𑀦𑀺𑀲𑁆𑀲𑀸𑀬 𑀓𑀢𑁆𑀢𑀩𑁆𑀩𑀧𑀸𑀤𑀧𑀭𑀺𑀘𑀭𑀺𑀬𑀸𑀧𑀺 𑀢𑀤𑀢𑁆𑀣𑀺𑀬𑀸 𑀲𑀼𑀲𑁆𑀲𑀽𑀲𑀸 𑀦𑀸𑀫 𑀳𑁄𑀢𑀺. 𑀧𑀸𑀤𑁂𑀲𑀼 𑀲𑀼𑀲𑁆𑀲𑀽𑀲𑀸𑀢𑀺 𑀘, 𑀢𑁂𑀲𑀁 𑀧𑀸𑀤𑀸𑀢𑀺 𑀘, 𑀢𑁂𑀲𑀼 𑀭𑀚𑀸𑀦𑀻𑀢𑀺 𑀘, 𑀢𑁂𑀳𑀺 𑀑𑀓𑀺𑀡𑁆𑀡𑀸𑀢𑀺 𑀘 𑀯𑀺𑀕𑁆𑀕𑀳𑁄. 𑀲𑀺𑀲𑁆𑀲𑀸𑀦𑀁 𑀲𑀓𑀮𑀸𑀪𑀺𑀩𑀼𑀤𑁆𑀥𑀺𑀬𑀸 𑀕𑀼𑀭𑀼𑀧𑀝𑀺𑀩𑀤𑁆𑀥𑀢𑁆𑀢𑀸 𑀅𑀢𑁆𑀢𑀦𑁄 𑀕𑀼𑀡𑀢𑁄 𑀅𑀥𑀺𑀓𑀢𑀭𑀸𑀬𑁂𑀯 𑀲𑁂𑀯𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑀺 𑀪𑀕𑀯𑀢𑀸 𑁋

‘‘𑀦𑀺𑀳𑀻𑀬𑀢𑀺 𑀧𑀼𑀭𑀺𑀲𑁄 𑀦𑀺𑀳𑀻𑀦𑀲𑁂𑀯𑀻,

𑀦 𑀘 𑀳𑀸𑀬𑁂𑀣 𑀓𑀤𑀸𑀘𑀺 𑀢𑀼𑀮𑁆𑀬𑀲𑁂𑀯𑀻;

𑀲𑁂𑀝𑁆𑀞𑀫𑀼𑀧𑀦𑀫𑀁 𑀉𑀤𑁂𑀢𑀺 𑀔𑀺𑀧𑁆𑀧𑀁,

𑀢𑀲𑁆𑀫𑀸’𑀢𑁆𑀢𑀦𑁄 𑀉𑀢𑁆𑀢𑀭𑀺𑀢𑀭𑀁 𑀪𑀚𑁂𑀣𑀸’’𑀢𑀺 [𑀅. 𑀦𑀺. 𑁩.𑁨𑁬].

𑁬.

𑀓𑀩𑁆𑀩𑀦𑀸𑀝𑀓𑀦𑀺𑀓𑁆𑀔𑀺𑀢𑁆𑀢-𑀦𑁂𑀢𑁆𑀢𑀘𑀺𑀢𑁆𑀢𑀸 𑀓𑀯𑀺𑀚𑁆𑀚𑀦𑀸;

𑀬𑀁𑀓𑀺𑀜𑁆𑀘𑀺 𑀭𑀘𑀬𑀦𑁆𑀢𑁂’𑀢𑀁, 𑀦 𑀯𑀺𑀫𑁆𑀳𑀬𑀓𑀭𑀁 𑀧𑀭𑀁.

𑁭.

𑀢𑁂𑀬𑁂’𑀯 𑀧𑀝𑀺𑀪𑀸𑀯𑀦𑁆𑀢𑁄, 𑀲𑁄’𑀯 𑀩𑀦𑁆𑀥𑁄 𑀲𑀯𑀺𑀫𑁆𑀳𑀬𑁄;

𑀬𑁂𑀦 𑀢𑁄𑀲𑁂𑀦𑁆𑀢𑀺 𑀯𑀺𑀜𑁆𑀜𑀽𑀬𑁂, 𑀢𑀢𑁆𑀣𑀸𑀧𑁆𑀬’𑀯𑀺𑀳𑀺𑀢𑀸𑀤𑀭𑀸.

𑁬-𑁭. 𑀏𑀯𑀫𑁂𑀢𑁆𑀣𑀸𑀦𑁆𑀯𑀬𑀩𑁆𑀬𑀢𑀺𑀭𑁂𑀓𑀯𑀲𑁂𑀦𑀸𑀥𑀺𑀕𑀢𑁂 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀓𑀺𑀁 𑀅𑀫𑁆𑀳𑀸𑀓𑀁 𑀓𑀩𑁆𑀩𑀦𑀸𑀝𑀓𑀧𑀭𑀺𑀘𑀬𑀸𑀪𑀸𑀯𑁂𑀭𑀘𑀦𑀸𑀯𑀺𑀲𑁂𑀲𑀸𑀪𑀺𑀬𑁄𑀕𑁄𑀧𑀚𑀦𑀺𑀢𑀧𑀭𑀺𑀲𑁆𑀲𑀫𑁂𑀦𑀸’’𑀢𑀺 𑀑𑀮𑀻𑀦𑀯𑀼𑀢𑁆𑀢𑀺𑀦𑁄 𑀲𑁄𑀢𑀼𑀚𑀦𑁂 𑀲𑀫𑀼𑀲𑁆𑀲𑀸𑀳𑁂𑀢𑀺 ¶ ‘‘𑀓𑀩𑁆𑀩𑀦𑀸𑀝𑀓𑀸’’𑀢𑀺𑀆𑀤𑀺𑀦𑀸. 𑀓𑀯𑀺𑀧𑁆𑀧𑀬𑁄𑀕𑀲𑀗𑁆𑀔𑀸𑀢𑁄 𑀩𑀦𑁆𑀥𑁄𑀯 𑀓𑀯𑀺𑀦𑁄 𑀇𑀤𑀦𑁆𑀢𑀺 𑀓𑀩𑁆𑀩𑀁. 𑀫𑀼𑀢𑁆𑀢𑀓𑀸𑀤𑀺𑀯𑀸𑀓𑁆𑀬𑀲𑁆𑀯𑀫𑀼𑀢𑁆𑀢𑀺𑀓𑀸𑀤𑁆𑀬𑀯𑀬𑀯𑀲𑀪𑀸𑀯𑀸 𑀅𑀦𑁆𑀢𑀭𑀯𑀸𑀓𑁆𑀬𑀲𑀫𑀼𑀤𑀸𑀬𑀲𑀫𑁆𑀧𑀦𑁆𑀦𑀁 𑀯𑀼𑀢𑁆𑀢𑀚𑀸𑀢𑀺𑀪𑁂𑀤𑀪𑀺𑀦𑁆𑀦𑀁 𑀧𑀚𑁆𑀚𑀫𑀬𑀁 𑀕𑀚𑁆𑀚𑀫𑀬𑀁 𑀧𑀚𑁆𑀚𑀕𑀚𑁆𑀚𑀫𑀬𑀁 𑀘𑀫𑁆𑀧𑀽𑀦𑀸𑀫𑀓𑀜𑁆𑀘, 𑀫𑀳𑀸𑀯𑀸𑀓𑁆𑀬𑀭𑀽𑀧𑀁 𑀫𑀳𑀸𑀓𑀩𑁆𑀩𑀜𑁆𑀘, 𑀢𑀁 𑀧𑀦 𑀫𑀳𑀸𑀓𑀩𑁆𑀩𑀁 𑀲𑀕𑁆𑀕𑁂𑀳𑀺 𑀲𑀕𑁆𑀕𑀦𑀸𑀫𑀓𑁂𑀳𑀺 𑀧𑀭𑀺𑀘𑁆𑀙𑁂𑀤𑀯𑀺𑀲𑁂𑀲𑁂𑀳𑀺 𑀩𑀦𑁆𑀥𑁆𑀬𑀢𑁂 𑀓𑀭𑀻𑀬𑀢𑀻𑀢𑀺 𑀲𑀕𑁆𑀕𑀩𑀦𑁆𑀥𑁄𑀢𑀺 𑀧𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀢𑀼 𑀮𑀓𑁆𑀔𑀡𑀁 ‘‘𑀲𑀕𑁆𑀕𑀩𑀦𑁆𑀥𑀲𑁆𑀲 𑀫𑀼𑀔𑀁 𑀇𑀝𑁆𑀞𑀸𑀲𑀻𑀲𑀦𑀁 𑀲𑀺𑀬𑀸 𑀧𑀡𑀸𑀫𑁄 𑀯𑀸 𑀩𑀦𑁆𑀥𑀲𑀫𑁆𑀩𑀦𑁆𑀥𑀺𑀦𑁄 𑀓𑀲𑁆𑀲𑀘𑀺 𑀅𑀢𑁆𑀣𑀲𑁆𑀲 𑀦𑀺𑀤𑁆𑀤𑁂𑀲𑁄 𑀯𑀸’’𑀢𑀺𑀆𑀤𑀺𑀦𑀸 𑀅𑀦𑁂𑀓𑀥𑀸 𑀯𑀡𑁆𑀡𑁂𑀦𑁆𑀢𑀺. 𑀢𑀁 𑀬𑀣𑀸?

‘‘𑀲𑀕𑁆𑀕𑀩𑀦𑁆𑀥𑁄 𑀫𑀳𑀸𑀓𑀩𑁆𑀩-𑀫𑀼𑀘𑁆𑀘𑀢𑁂 𑀢𑁆𑀯𑀲𑁆𑀲 𑀮𑀓𑁆𑀔𑀡𑀁;

𑀧𑀡𑀸𑀫𑁄 𑀯𑀢𑁆𑀣𑀼𑀦𑀺𑀤𑁆𑀤𑁂𑀲𑁄, 𑀆𑀲𑀻𑀲𑀸𑀧𑀺 𑀘 𑀢𑀫𑁆𑀫𑀼𑀔𑀁.

𑀇𑀢𑀺𑀳𑀸𑀲𑀓𑀣𑀼𑀩𑁆𑀪𑀽𑀢𑀁, 𑀲𑀦𑁆𑀢𑀲𑀦𑁆𑀦𑀺𑀲𑁆𑀲𑀬𑀫𑁆𑀧𑀺 𑀯𑀸;

𑀘𑀢𑀼𑀯𑀕𑁆𑀕𑀨𑀮𑀸𑀬𑀢𑁆𑀢𑀁, 𑀘𑀢𑀼𑀭𑁄𑀤𑀸𑀢𑁆𑀢𑀦𑀸𑀬𑀓𑀁.

𑀧𑀼𑀭𑀡𑁆𑀡𑀯𑀼𑀢𑀼𑀲𑁂𑀮𑀺𑀦𑁆𑀤𑀼-𑀲𑀯𑀺𑀢𑀽𑀤𑀬𑀯𑀡𑁆𑀡𑀦𑀁;

𑀉𑀬𑁆𑀬𑀸𑀦𑀲𑀮𑀺𑀮𑀓𑁆𑀓𑀻𑀴𑀸, 𑀫𑀥𑀼𑀧𑀸𑀦𑀭𑀢𑀼𑀲𑁆𑀲𑀯𑀁.

𑀯𑀺𑀧𑁆𑀧𑀮𑀫𑁆𑀪𑀯𑀺𑀯𑀸𑀳𑁂𑀳𑀺, 𑀓𑀼𑀫𑀸𑀭𑁄𑀤𑀬𑀯𑀟𑁆𑀠𑀺𑀳𑀺;

𑀫𑀦𑁆𑀢𑀤𑀽𑀢𑀧𑁆𑀧𑀬𑀸𑀦𑀸𑀚𑀺-𑀦𑀸𑀬𑀓𑀸𑀪𑁆𑀬𑀽𑀤𑀬𑁂𑀳𑀺𑀧𑀺.

𑀅𑀮𑀗𑁆𑀓𑀢𑀫𑀲𑀁𑀔𑀺𑀢𑁆𑀢-𑀭𑀲𑀪𑀸𑀯𑀦𑀺𑀭𑀦𑁆𑀢𑀭𑀁;

𑀦𑀸𑀢𑀺𑀯𑀺𑀢𑁆𑀣𑀺𑀡𑁆𑀡𑀲𑀕𑁆𑀕𑁂𑀳𑀺, 𑀧𑀺𑀬𑀯𑀼𑀢𑁆𑀢𑀲𑀼𑀲𑀦𑁆𑀥𑀺𑀪𑀺.

𑀲𑀩𑁆𑀩𑀢𑁆𑀣 𑀪𑀺𑀦𑁆𑀦𑀲𑀕𑁆𑀕𑀦𑁆𑀢𑁂-𑀳𑀼𑀧𑁂𑀢𑀁 𑀮𑁄𑀓𑀭𑀜𑁆𑀚𑀓𑀁;

𑀓𑀩𑁆𑀩𑀁 𑀓𑀧𑁆𑀧𑀦𑁆𑀢𑀭𑀝𑁆𑀞𑀸𑀬𑀺, 𑀚𑀸𑀬𑀢𑁂 𑀲𑀸𑀥𑁆𑀯𑀮𑀗𑁆𑀓𑀢𑀻’’𑀢𑀺 [𑀓𑀸𑀩𑁆𑀬𑀸𑀤𑀸𑀲 𑁧.𑁧𑁪 𑁋 𑁧𑁯 𑀕𑀸𑀣𑀸].

𑀢𑀢𑁆𑀣 𑀇𑀢𑀺𑀳𑀸𑀲𑀓𑀣𑀼𑀩𑁆𑀪𑀽𑀢𑀦𑁆𑀢𑀺 𑀧𑀼𑀭𑀸𑀯𑀼𑀢𑁆𑀢𑀓𑀣𑀸𑀲𑀦𑁆𑀦𑀺𑀲𑁆𑀲𑀬𑀁. 𑀲𑀦𑁆𑀢𑀲𑀦𑁆𑀦𑀺𑀲𑁆𑀲𑀬𑀦𑁆𑀢𑀺 𑀇𑀢𑀭𑀲𑁄𑀪𑀦𑀸𑀥𑀺𑀓𑀭𑀡𑀕𑀼𑀡𑀭𑀸𑀚𑀘𑀭𑀺𑀢𑀸𑀤𑀺𑀦𑀺𑀲𑁆𑀲𑀬𑀁 𑀯𑀸. 𑀘𑀢𑀼𑀯𑀕𑁆𑀕𑀨𑀮𑀸𑀬𑀢𑁆𑀢𑀦𑁆𑀢𑀺 𑀥𑀫𑁆𑀫𑀸𑀤𑀺𑀘𑀢𑀼𑀯𑀕𑁆𑀕𑀨𑀮𑀸𑀬𑀢𑁆𑀢𑀁. 𑀥𑀫𑁆𑀫𑁄 ¶ 𑀦𑀸𑀫 𑀅𑀩𑁆𑀪𑀽𑀤𑀬𑀦𑀺𑀩𑁆𑀩𑀸𑀦𑀳𑁂𑀢𑀼𑀓𑁄. 𑀅𑀢𑁆𑀣𑁄 𑀦𑀸𑀫 𑀯𑀺𑀚𑁆𑀚𑀸𑀪𑀼𑀫𑁆𑀬𑀸𑀤𑀻𑀦𑀁 𑀬𑀣𑀸𑀜𑁆𑀜𑀸𑀬𑀫𑀚𑁆𑀚𑀦𑀁, 𑀅𑀚𑁆𑀚𑀺𑀢𑀸𑀦𑀜𑁆𑀘 𑀭𑀓𑁆𑀔𑀡𑀁. 𑀓𑀸𑀫𑁄 𑀦𑀸𑀫 𑀦𑀺𑀭𑀬𑁄 𑀯𑀺𑀲𑀬𑁄 𑀧𑀬𑁄𑀕𑁄. 𑀫𑁄𑀓𑁆𑀔𑁄 𑀦𑀸𑀫 𑀲𑀩𑁆𑀩𑀲𑀁𑀲𑀸𑀭𑀤𑀼𑀓𑁆𑀔𑀦𑀺𑀯𑀢𑁆𑀢𑀺. 𑀘𑀢𑀼𑀭𑁄𑀤𑀸𑀢𑁆𑀢𑀦𑀸𑀬𑀓𑀦𑁆𑀢𑀺 𑀉𑀲𑁆𑀲𑀸𑀳𑀲𑀢𑁆𑀢𑀺𑀫𑀦𑁆𑀢𑀲𑀢𑁆𑀢𑀺𑀧𑀪𑀽𑀲𑀢𑁆𑀢𑀺𑀬𑁄𑀕𑁂𑀦 𑀘𑀢𑀼𑀭𑁄 𑀓𑀼𑀲𑀮𑁄 𑀘𑀸𑀕𑀸𑀢𑀺𑀲𑀬𑀸𑀤𑀺𑀬𑁄𑀕𑁂𑀦 𑀉𑀤𑀸𑀢𑁆𑀢𑁄 𑀉𑀤𑀸𑀭𑁄 𑀦𑀸𑀬𑀓𑁄 𑀯𑀺𑀧𑀓𑁆𑀔𑁄, 𑀧𑀝𑀺𑀧𑀓𑁆𑀔𑁄 𑀘 𑀬𑀢𑁆𑀣, 𑀢𑀁. 𑀫𑀥𑀼 𑀦𑀸𑀫 𑀲𑀼𑀭𑀸. 𑀯𑀺𑀧𑁆𑀧𑀮𑀫𑁆𑀪𑁄 𑀯𑀺𑀭𑀳𑁄. 𑀫𑀦𑁆𑀢𑁄 𑀦𑀻𑀢𑀺𑀯𑁂𑀤𑀻𑀳𑀺 𑀲𑀳 𑀓𑀸𑀭𑀻𑀬𑀦𑀺𑀘𑁆𑀙𑀬𑁄. 𑀤𑀽𑀢𑁄 𑀲𑀦𑁆𑀥𑀸𑀦𑀧𑁆𑀧𑀯𑀢𑁆𑀢𑁄 𑀧𑀼𑀭𑀺𑀲𑁄. 𑀧𑀬𑀸𑀦𑀁 𑀲𑀗𑁆𑀕𑀸𑀫𑀸𑀤𑀺𑀦𑀺𑀫𑀺𑀢𑁆𑀢𑀕𑀫𑀦𑀁. 𑀆𑀚𑀺 𑀲𑀦𑁆𑀥𑁆𑀬𑀸𑀪𑀸𑀯𑁂 𑀯𑀺𑀕𑁆𑀕𑀳𑁄. 𑀅𑀲𑀗𑁆𑀔𑀢𑁆𑀢𑀭𑀲𑀪𑀸𑀯𑀦𑀺𑀭𑀦𑁆𑀢𑀭𑀦𑁆𑀢𑀺 𑀅𑀲𑀁𑀔𑀺𑀢𑁆𑀢𑀸 𑀩𑀳𑀼𑀢𑁆𑀢𑀸 𑀭𑀲𑀸 𑀲𑀺𑀗𑁆𑀕𑀸𑀭𑀯𑀻𑀭𑀸𑀤𑀬𑁄, 𑀪𑀸𑀯𑀸 𑀭𑀢𑀺𑀉𑀲𑁆𑀲𑀸𑀳𑀸𑀤𑀬𑁄, 𑀢𑁂𑀳𑀺 𑀦𑀺𑀭𑀦𑁆𑀢𑀭𑀁 𑀧𑀢𑁆𑀣𑀝𑀁. 𑀧𑀺𑀬𑀯𑀼𑀢𑁆𑀢𑀲𑀼𑀲𑀦𑁆𑀥𑀺𑀪𑀻𑀢𑀺 𑀧𑀺𑀬𑀸𑀦𑀺 𑀲𑀼𑀢𑀺𑀲𑀼𑀪𑀕𑀸𑀦𑀺 𑀯𑀼𑀢𑁆𑀢𑀸𑀦𑀺 𑀇𑀦𑁆𑀤𑀯𑀚𑀺𑀭𑀸𑀤𑀻𑀦𑀺 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀲𑀁𑀲𑀕𑁆𑀕𑀢𑀸𑀬 𑀲𑁄𑀪𑀦𑁄 𑀲𑀦𑁆𑀥𑀺 𑀅𑀜𑁆𑀜𑀫𑀜𑁆𑀜𑀲𑀗𑁆𑀕𑀳𑀸 𑀬𑁂𑀲𑀁 𑀲𑀕𑁆𑀕𑀸𑀦𑀁, 𑀢𑁂𑀳𑀻𑀢𑀺.

𑀧𑀼𑀦𑀧𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀅𑀗𑁆𑀕𑁂𑀲𑀼 𑀦𑀕𑀭𑀯𑀡𑁆𑀡𑀦𑀸𑀤𑀻𑀲𑀼 𑀓𑀺𑀜𑁆𑀘 𑀬𑀣𑀸𑀲𑀫𑁆𑀪𑀯𑀁 𑀫𑀥𑀼𑀧𑀸𑀦𑀸𑀤𑀺𑀭𑀳𑀺𑀢𑀫𑁆𑀧𑀺 𑀢𑀜𑁆𑀜𑀽𑀦𑀁 𑀫𑀦𑁄 𑀭𑀜𑁆𑀚𑁂𑀢𑀺 𑀉𑀧𑀸𑀤𑀺𑀬𑀢𑁂𑀯 𑀲𑀩𑁆𑀪𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳𑁋

‘‘𑀓𑀩𑁆𑀩𑀁 𑀦 𑀤𑀼𑀲𑁆𑀲𑀢𑀗𑁆𑀕𑁂𑀳𑀺, 𑀦𑁆𑀬𑀽𑀦𑀫𑀧𑁆𑀬𑀢𑁆𑀭 𑀓𑁂𑀳𑀺𑀘𑀺;

𑀩𑀦𑁆𑀥𑀗𑁆𑀕𑀲𑀫𑁆𑀧𑀤𑀸 𑀢𑀜𑁆𑀜𑀽, 𑀓𑀸𑀫𑀫𑀸𑀭𑀸𑀥𑀬𑀦𑁆𑀢𑀺 𑀘𑁂’’𑀢𑀺 [𑀓𑀸𑀩𑁆𑀬𑀸𑀤𑀸𑀲 𑁧.𑁨𑁦].

𑀧𑀼𑀦𑀧𑀺 𑁋

‘‘𑀕𑀼𑀡𑀢𑁄 𑀧𑀞𑀫𑀁 𑀯𑀢𑁆𑀯𑀸, 𑀦𑀸𑀬𑀓𑀁 𑀢𑁂𑀦 𑀲𑀢𑁆𑀢𑀼𑀦𑁄;

𑀦𑀺𑀭𑀸𑀓𑀭𑀡𑀫𑀺𑀘𑁆𑀘𑁂𑀲, 𑀫𑀕𑁆𑀕𑁄 𑀧𑀓𑀢𑀺𑀲𑀼𑀦𑁆𑀤𑀭𑁄.

𑀯𑀁𑀲𑀯𑀻𑀭𑀲𑀼𑀢𑀸𑀤𑀻𑀦𑀺, 𑀯𑀡𑁆𑀡𑀬𑀺𑀢𑁆𑀯𑀸 𑀭𑀺𑀧𑀼𑀲𑁆𑀲𑀧𑀺;

𑀢𑀚𑁆𑀚𑀬𑀸 𑀦𑀸𑀬𑀓𑀼𑀓𑁆𑀓𑀁𑀲-𑀓𑀣𑀦𑀜𑁆𑀘 𑀲𑀼𑀔𑁂𑀢𑀺 𑀦𑁄’’𑀢𑀺 [𑀓𑀸𑀩𑁆𑀬𑀸𑀤𑀸𑀲 𑁧.𑁨𑁧 𑁨𑁨 𑀕𑀸𑀣𑀸] 𑀆𑀳𑀼.

𑀲𑀩𑁆𑀩𑀫𑁆𑀧𑁂𑀢𑀁 ¶ 𑀲𑀤𑁆𑀥𑀫𑁆𑀫𑀸𑀫𑀢𑀭𑀲𑀧𑀸𑀦𑀲𑀭𑀲𑀳𑀤𑀬𑀸𑀦𑀁 𑀲𑀫𑁆𑀨𑀧𑁆𑀧𑀮𑀸𑀧𑀯𑀺𑀧𑀼𑀮𑀯𑀺𑀲𑀧𑁆𑀧𑀯𑁂𑀲𑁄𑀧𑀤𑁆𑀤𑀼𑀢𑀓𑀩𑁆𑀩𑀦𑀸𑀝𑀓𑀧𑀭𑀫𑁆𑀫𑀼𑀔𑀸𑀦𑀁 𑀲𑀢𑀢𑀘𑀭𑀺𑀢𑀲𑀜𑁆𑀘𑀭𑀺𑀢𑀭𑀢𑀦𑀪𑀸𑀚𑀦𑀸𑀦𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀓𑀺𑀁 𑀳𑀤𑀬𑀔𑁂𑀤𑁄𑀧𑀚𑀦𑀺𑀢𑀧𑀭𑀺𑀲𑁆𑀲𑀫𑁂𑀦𑁂𑀢𑀺 𑀢𑀤𑀦𑀼𑀭𑀽𑀧𑀫𑁂𑀯𑁄𑀧𑀤𑀲𑁆𑀲𑀺𑀢𑀦𑁆𑀢𑀺.

𑀦𑀸𑀝𑀓𑀁 𑀦𑀸𑀫 𑀪𑀭𑀢𑀸𑀤𑀺𑀦𑀸𑀝𑁆𑀬𑀲𑀢𑁆𑀣𑁂 𑀦𑀸𑀦𑀧𑁆𑀧𑀓𑀸𑀭𑀦𑀺𑀭𑀽𑀧𑀺𑀢𑀭𑀽𑀧𑀁 𑀓𑀧𑁆𑀧𑀁, 𑀢𑀁𑀮𑀓𑁆𑀔𑀡𑁂𑀓𑀤𑁂𑀲𑀪𑀽𑀢𑀮𑀓𑁆𑀔𑀡𑀸𑀦𑀺 𑀧𑀓𑀭𑀡𑀸𑀤𑀻𑀦𑀺 𑀦𑀯 𑀭𑀽𑀧𑀓𑀸𑀦𑀺. 𑀦𑀸𑀝𑀺𑀓𑀸 𑀘 𑀏𑀢𑁆𑀣𑁂𑀯𑀸𑀯𑀭𑀼𑀫𑁆𑀪𑀦𑁆𑀢𑀺. 𑀓𑀩𑁆𑀩𑀜𑁆𑀘 𑀦𑀸𑀝𑀓𑀜𑁆𑀘, 𑀢𑁂𑀲𑀼 𑀦𑀺𑀓𑁆𑀔𑀺𑀢𑁆𑀢𑀁 𑀞𑀧𑀺𑀢𑀁 𑀦𑁂𑀢𑁆𑀢𑀜𑁆𑀘 𑀘𑀺𑀢𑁆𑀢𑀜𑁆𑀘 𑀬𑁂𑀳𑀻𑀢𑀺 𑀯𑀺𑀕𑁆𑀕𑀳𑁄. 𑀓𑁂 𑀢𑁂? 𑀓𑀯𑀺𑀦𑁄. 𑀢𑀢𑁆𑀣 𑀦𑀺𑀓𑁆𑀔𑀺𑀢𑁆𑀢𑀦𑁂𑀢𑁆𑀢𑀘𑀺𑀢𑁆𑀢𑀯𑀘𑀦𑁂𑀦 𑀲𑀼𑀢𑀲𑁆𑀲 𑀘𑀺𑀦𑁆𑀢𑀦𑀜𑁆𑀘 𑀊𑀳𑀸𑀧𑁄𑀳𑀫𑀼𑀔𑁂𑀦 𑀬𑀣𑀼𑀕𑁆𑀕𑀳𑀺𑀢𑀦𑀺𑀬𑀸𑀫𑀁, 𑀅𑀯𑀺𑀧𑀭𑀻𑀢𑀢𑁆𑀣𑀦𑀺𑀘𑁆𑀙𑀬𑀦𑀁, 𑀦𑀺𑀘𑁆𑀙𑀺𑀢𑀲𑁆𑀲 𑀪𑀸𑀯𑀦𑀸, 𑀦𑀺𑀭𑀦𑁆𑀢𑀭𑀸𑀪𑀺𑀬𑁄𑀕𑁄 𑀘 𑀤𑀲𑁆𑀲𑀺𑀢𑁄. 𑀓𑀩𑁆𑀩𑀦𑀸𑀝𑀓𑀯𑀘𑀦𑁂𑀦 𑀲𑀼𑀢𑀁, 𑀘𑀺𑀦𑁆𑀢𑀺𑀢𑀁, 𑀪𑀸𑀯𑀺𑀢𑀜𑁆𑀘 𑀤𑀲𑁆𑀲𑀺𑀢𑀁. 𑀲𑀼𑀢𑁂 𑀤𑀲𑁆𑀲𑀺𑀢𑁂 𑀢𑀦𑁆𑀦𑀺𑀲𑁆𑀲𑀬𑀁 𑀲𑀼𑀢𑀫𑀬𑀜𑀸𑀡𑀫𑁆𑀧𑀺 𑀤𑀲𑁆𑀲𑀺𑀢𑀫𑁂𑀯 𑀲𑀺𑀬𑀸𑀢𑀺. ‘‘𑀓𑀩𑁆𑀩𑀦𑀸𑀝𑀓𑀦𑀺𑀓𑁆𑀔𑀺𑀢𑁆𑀢𑀦𑁂𑀢𑁆𑀢𑀘𑀺𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀲𑀼𑀢𑀘𑀺𑀦𑁆𑀢𑀸𑀪𑀸𑀯𑀦𑀸𑀦𑀼𑀓𑁆𑀓𑀫𑁂𑀦 𑀲𑀫𑁆𑀧𑀸𑀤𑀺𑀢𑀧𑀜𑁆𑀜𑀸𑀧𑀸𑀝𑀯𑀸𑀦𑀁 𑀓𑀩𑁆𑀩𑀭𑀘𑀦𑀸𑀬 𑀲𑀸𑀫𑀢𑁆𑀣𑀺𑀬𑀁 𑀤𑀲𑁆𑀲𑁂𑀢𑀺. 𑀳𑁄𑀢𑀺 𑀳𑀺 𑀢𑀸𑀤𑀺𑀲𑀸𑀦𑀁 𑀢𑀁𑀲𑀼𑀢𑀸𑀤𑀺 𑀩𑀦𑁆𑀥𑀦𑀓𑀸𑀭𑀡𑀁. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀲𑀸𑀪𑀸𑀯𑀺𑀓𑀻 𑀘 𑀧𑀝𑀺𑀪𑀸,

𑀲𑀼𑀢𑀜𑁆𑀘 𑀩𑀳𑀼 𑀦𑀺𑀫𑁆𑀫𑀮𑀁;

𑀅𑀫𑀦𑁆𑀤𑁄 𑀘𑀸𑀪𑀺𑀬𑁄𑀕𑁄𑀬𑀁,

𑀳𑁂𑀢𑀼 𑀳𑁄𑀢𑀺𑀳 𑀩𑀦𑁆𑀥𑀦𑁂’’𑀢𑀺 [𑀓𑀸𑀩𑁆𑀬𑀸𑀤𑀸𑀲 𑁧.𑁧𑁦𑁩 𑀕𑀸𑀣𑀸].

𑀬𑀁𑀓𑀺𑀜𑁆𑀘𑀻𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀸𑀭𑀼𑀴𑁆𑀳𑀁 𑀬𑀁𑀓𑀺𑀜𑁆𑀘𑀺 𑀩𑀦𑁆𑀥𑀚𑀸𑀢𑀁. 𑀇𑀫𑀺𑀦𑀸 𑀧𑀦 𑀅𑀦𑀺𑀬𑀫𑀯𑀘𑀦𑁂𑀦 𑀅𑀢𑁆𑀢𑀦𑁄 𑀢𑀢𑁆𑀣 𑀆𑀤𑀭𑀸𑀪𑀸𑀯𑀁 𑀤𑀻𑀧𑁂𑀢𑀺. 𑀭𑀘𑀬𑀦𑁆𑀢𑀺 𑀓𑀭𑁄𑀦𑁆𑀢𑀺. 𑀏𑀢𑀁 𑀢𑁂𑀳𑀺 𑀭𑀘𑀺𑀢𑀁 𑀩𑀦𑁆𑀥𑀚𑀸𑀢𑀁 𑀧𑀭𑀁 𑀅𑀘𑁆𑀘𑀦𑁆𑀢𑀫𑁂𑀯 𑀯𑀺𑀫𑁆𑀳𑀬𑀓𑀭𑀁 𑀦 𑀳𑁄𑀢𑀺, 𑀢𑀸𑀤𑀺𑀲𑁄𑀧𑀸𑀬𑀲𑀫𑁆𑀧𑀢𑁆𑀢𑀺𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑁂𑀬𑁆𑀬𑀲𑀫𑁆𑀧𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀅𑀦𑀘𑁆𑀙𑀭𑀺𑀬𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀢𑁂𑀲𑀼 𑀓𑀩𑁆𑀩𑀦𑀸𑀝𑀓𑁂𑀲𑀼 𑀭𑀘𑀦𑀸𑀯𑀺𑀲𑁂𑀲𑀏𑀓𑀦𑁆𑀢𑁄𑀧𑀸𑀬𑀪𑀽𑀢𑁂𑀲𑀼 𑀅𑀯𑀺𑀳𑀺𑀢𑀸𑀤𑀭𑀸𑀅𑀧𑀺 𑀲𑀼𑀢𑀸𑀤𑀺𑀯𑀲𑁂𑀦 𑀅𑀓𑀢𑀸𑀤𑀭𑀸𑀧𑀺 ¶ 𑀬𑁂 𑀲𑀧𑁆𑀧𑀼𑀭𑀺𑀲𑀸 𑀧𑀜𑁆𑀜𑀯𑀦𑁆𑀢𑁄 𑀬𑁂𑀦 𑀩𑀦𑁆𑀥𑀯𑀺𑀲𑁂𑀲𑁂𑀦 𑀯𑀺𑀜𑁆𑀜𑀽 𑀕𑀼𑀡𑀤𑁄𑀲𑀯𑀺𑀤𑀼𑀦𑁄 𑀲𑀢𑁆𑀣𑀜𑁆𑀜𑀼𑀦𑁄 𑀧𑀡𑁆𑀟𑀺𑀢𑀚𑀦𑁂 𑀢𑁄𑀲𑁂𑀦𑁆𑀢𑀺 𑀧𑀻𑀡𑁂𑀦𑁆𑀢𑀺. 𑀢𑁄𑀲𑁂𑀦𑁆𑀢𑀺𑀬𑁂𑀯 𑀳𑀺 𑀢𑁂 𑀢𑀸𑀤𑀺𑀲𑁂 𑀲𑀸𑀪𑀸𑀯𑀺𑀓𑀺𑀧𑀝𑀺𑀪𑀸𑀯𑀺𑀭𑀳𑁂𑀧𑀺 𑀏𑀢𑀸𑀤𑀺𑀲𑁂𑀲𑀼 𑀅𑀢𑁆𑀣𑁂𑀲𑀼 𑀲𑀼𑀢𑀘𑀺𑀦𑁆𑀢𑀸𑀪𑀸𑀯𑀦𑀸𑀯𑀲𑁂𑀦 𑀯𑀸𑀬𑀫𑀦𑁆𑀢𑀸. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀦 𑀯𑀺𑀚𑁆𑀚𑀢𑀻 𑀬𑀚𑁆𑀚𑀧𑀺 𑀧𑀼𑀩𑁆𑀩𑀯𑀸𑀲𑀦𑀸-

𑀕𑀼𑀡𑀸𑀦𑀼𑀩𑀦𑁆𑀥𑀺 𑀧𑀝𑀺𑀪𑀸𑀦𑀫𑀩𑁆𑀪𑀼𑀢𑀁;

𑀲𑀼𑀢𑁂𑀦 𑀯𑀸𑀘𑀼’𑀲𑁆𑀲𑀳𑀦𑁂𑀦𑀼𑀧𑀸𑀲𑀺𑀢𑀸,

𑀥𑀼𑀯𑀁 𑀓𑀭𑁄𑀢𑁆𑀬𑁂𑀯 𑀓𑀫𑀧𑁆𑀬𑀦𑀼𑀕𑁆𑀕𑀳’’𑀦𑁆𑀢𑀺 [𑀓𑀸𑀩𑁆𑀬𑀸𑀤𑀸𑀲 𑁧.𑁧𑁦𑁪 𑀕𑀸𑀣𑀸].

𑀧𑀝𑀺𑀪𑀸𑀯𑀦𑁆𑀢𑁄 𑀳𑁂𑀬𑁆𑀬𑁄𑀧𑀸𑀤𑁂𑀬𑁆𑀬𑀧𑀭𑀺𑀘𑁆𑀙𑁂𑀤𑀮𑀓𑁆𑀔𑀡𑀧𑀜𑁆𑀜𑀸𑀬 𑀧𑀜𑁆𑀜𑀯𑀦𑁆𑀢𑁄 𑀦𑀸𑀫, 𑀢𑁂𑀬𑁂𑀯 𑀲𑀧𑁆𑀧𑀼𑀭𑀺𑀲𑀸. 𑀲𑀯𑀺𑀫𑁆𑀳𑀬𑁄 ‘‘𑀓𑀻𑀤𑀺𑀲𑀸𑀬𑀁, 𑀢𑀸𑀤𑀺𑀲𑁄𑀧𑀸𑀬𑀦𑁆𑀢𑀭𑀭𑀳𑀺𑀢𑀸𑀦𑀫𑁆𑀧𑀺 𑀏𑀢𑀸𑀤𑀺𑀲𑁄 𑀩𑀦𑁆𑀥𑁄 𑀲𑀺𑀬𑀸’’𑀢𑀺 𑀯𑀺𑀫𑁆𑀳𑀬𑁂𑀦 𑀲𑀳 𑀯𑀢𑁆𑀢𑀫𑀸𑀦𑁄𑀧𑀺. 𑀲𑁄𑀯 𑀩𑀦𑁆𑀥𑁄 𑀢𑀫𑁂𑀯 𑀩𑀦𑁆𑀥𑀦𑀁 𑀢𑀸𑀤𑀺𑀲𑁄𑀧𑀸𑀬𑀲𑀫𑁆𑀧𑀢𑁆𑀢𑀺𑀯𑀺𑀭𑀳𑁂𑀦𑁄𑀧𑁂𑀬𑁆𑀬𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀪𑀸𑀯𑀢𑁄, 𑀦𑀸𑀜𑁆𑀜𑁄𑀢𑀺.

𑁬-𑁭. 𑀇𑀤𑀸𑀦𑀺 𑀓𑀩𑁆𑀩𑀦𑀸𑀝𑀓𑁂𑀲𑀼 𑀅𑀧𑀭𑀺𑀘𑀺𑀢𑀸𑀦𑀫𑀫𑁆𑀳𑀸𑀓𑀁 𑀕𑀦𑁆𑀣𑀭𑀘𑀦𑀸𑀲𑀪𑀸𑀯𑀸𑀯𑀩𑁄𑀥𑁄𑀯 𑀓𑀼𑀢𑁄𑀢𑀺 𑀑𑀲𑀓𑁆𑀓𑀦𑁆𑀢𑁂 ‘‘𑀓𑀩𑁆𑀩𑀦𑀸𑀝𑀓𑀸’’𑀤𑀺𑀕𑀸𑀣𑀸𑀤𑁆𑀯𑀬𑁂𑀦 𑀲𑀫𑀼𑀲𑁆𑀲𑀸𑀳𑁂𑀢𑀺. 𑀓𑀩𑁆𑀩𑀦𑀸𑀝𑀓𑀦𑀺𑀓𑁆𑀔𑀺𑀢𑁆𑀢𑀦𑁂𑀢𑁆𑀢𑀘𑀺𑀢𑁆𑀢𑀸 𑀓𑀩𑁆𑀩𑀦𑀸𑀝𑀓𑁂𑀲𑀼 𑀲𑀼𑀢𑀸𑀦𑀼𑀮𑁄𑀓𑀦𑀘𑀺𑀦𑁆𑀢𑀸𑀪𑀸𑀯𑀦𑀸𑀯𑀲𑁂𑀦 𑀞𑀧𑀺𑀢𑀦𑁂𑀢𑁆𑀢𑀘𑀺𑀢𑁆𑀢𑀸 𑀓𑀯𑀺𑀚𑁆𑀚𑀦𑀸 𑀓𑀩𑁆𑀩𑀓𑀸𑀭𑀓𑀸 𑀬𑀁 𑀓𑀺𑀜𑁆𑀘𑀺 𑀅𑀢𑁆𑀢𑀦𑁄 𑀅𑀪𑀺𑀫𑀢𑀁 𑀭𑀘𑀬𑀦𑁆𑀢𑀺 𑀓𑀭𑁄𑀦𑁆𑀢𑀺, 𑀏𑀢𑀁 𑀩𑀦𑁆𑀥𑀦𑀁 𑀧𑀭𑀁 𑀅𑀢𑀺𑀲𑀬𑁂𑀦 𑀦 𑀯𑀺𑀫𑁆𑀳𑀬𑀓𑀭𑀁 𑀅𑀘𑁆𑀙𑀭𑀺𑀬𑀓𑀭𑀁 𑀦 𑀳𑁄𑀢𑀺, 𑀦𑀺𑀭𑀦𑁆𑀢𑀭𑀸𑀪𑀺𑀬𑁄𑀕𑀢𑁄 𑀲𑀺𑀤𑁆𑀥𑁄𑀧𑀸𑀬𑀫𑀽𑀮𑀧𑀜𑁆𑀜𑀸𑀲𑀫𑁆𑀧𑀤𑀸𑀬 𑀉𑀧𑁂𑀬𑁆𑀬𑀪𑀽𑀢𑀕𑀦𑁆𑀣𑀲𑀗𑁆𑀔𑀭𑀡𑀁 𑀪𑀯𑀢𑁆𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀯𑀺𑀦𑁄 𑀇𑀤𑀁 𑀓𑀩𑁆𑀩𑀦𑁆𑀢𑀺 𑀘, 𑀦𑀝𑀓𑀲𑁆𑀲 𑀇𑀤𑀁 𑀦𑀸𑀝𑀓𑀁, 𑀦𑀘𑁆𑀘𑀕𑀻𑀢𑀸𑀤𑀺. 𑀇𑀥 𑀧𑀦 𑀢𑀧𑁆𑀧𑀝𑀺𑀧𑀸𑀤𑀓𑀓𑀣𑀸𑀧𑀓𑀸𑀲𑀓𑀕𑀦𑁆𑀣𑁄 𑀦𑀸𑀝𑀓𑀁 𑀦𑀸𑀫. 𑀓𑀩𑁆𑀩𑀜𑁆𑀘 𑀦𑀸𑀝𑀓𑀜𑁆𑀘𑀸𑀢𑀺 𑀘, 𑀓𑀩𑁆𑀩𑀦𑀸𑀝𑀓𑁂𑀲𑀼 𑀦𑀺𑀓𑁆𑀔𑀺𑀢𑁆𑀢𑀁 𑀦𑁂𑀢𑁆𑀢𑀘𑀺𑀢𑁆𑀢𑀁 𑀬𑁂𑀳𑀻𑀢𑀺 𑀘 ¶ 𑀯𑀺𑀕𑁆𑀕𑀳𑁄. 𑀬𑁂 𑀚𑀦𑀸 𑀢𑀢𑁆𑀣 𑀢𑁂𑀲𑀼 𑀓𑀩𑁆𑀩𑀦𑀸𑀝𑀓𑁂𑀲𑀼 𑀅𑀯𑀺𑀳𑀺𑀢𑀸𑀤𑀭𑀸𑀧𑀺 𑀲𑀯𑀦𑀥𑀸𑀭𑀡𑀸𑀤𑀺𑀯𑀲𑁂𑀦 𑀅𑀓𑀢𑀲𑀫𑁆𑀪𑀫𑀸 𑀏𑀯 𑀯𑀺𑀜𑁆𑀜𑀽 𑀬𑁂𑀦 𑀕𑀦𑁆𑀣𑀭𑀘𑀦𑀸𑀯𑀺𑀲𑁂𑀲𑁂𑀦 𑀢𑁄𑀲𑁂𑀦𑁆𑀢𑀺 𑀧𑀻𑀡𑁂𑀦𑁆𑀢𑀺, 𑀢𑁂𑀬𑁂𑀯 𑀧𑀝𑀺𑀪𑀸𑀯𑀦𑁆𑀢𑁄 𑀧𑀝𑀺𑀪𑀸𑀦𑀲𑀗𑁆𑀔𑀸𑀢𑀧𑀜𑁆𑀜𑀯𑀦𑁆𑀢𑁄 𑀪𑀯𑀦𑁆𑀢𑀺. 𑀲𑁄𑀯 𑀩𑀦𑁆𑀥𑁄 𑀲𑀯𑀺𑀫𑁆𑀳𑀬𑁄 𑀅𑀜𑁆𑀜𑁂𑀲𑀁 𑀉𑀧𑁆𑀧𑀚𑁆𑀚𑀫𑀸𑀦𑀯𑀺𑀫𑁆𑀳𑀬𑁂𑀦 𑀲𑀳𑀺𑀢𑁄. 𑀧𑀝𑀺𑀪𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀘, 𑀲𑀳 𑀯𑀺𑀫𑁆𑀳𑀬𑁂𑀦 𑀯𑀢𑁆𑀢𑀢𑀻𑀢𑀺 𑀘, 𑀅𑀯𑀺𑀳𑀺𑀢𑁄 𑀆𑀤𑀭𑁄 𑀬𑁂𑀳𑀻𑀢𑀺 𑀘 𑀯𑀺𑀕𑁆𑀕𑀳𑁄. 𑀩𑀸𑀳𑀺𑀭𑀲𑀢𑁆𑀣𑀸𑀪𑀺𑀬𑁄𑀕𑀸𑀪𑀸𑀯𑁂𑀧𑀺 𑀧𑀼𑀩𑁆𑀩𑀯𑀸𑀲𑀦𑀸𑀪𑀸𑀯𑁂𑀧𑀺 𑀇𑀳 𑀦𑀺𑀭𑀦𑁆𑀢𑀭𑀸𑀪𑀺𑀬𑁄𑀕𑀁 𑀓𑀭𑁄𑀦𑁆𑀢𑁄 𑀢𑀸𑀤𑀺𑀲𑀲𑀸𑀫𑀢𑁆𑀣𑀺𑀬𑀁 𑀲𑀸𑀥𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀦 𑀯𑀺𑀚𑁆𑀚𑀢𑀻 𑀬𑀚𑁆𑀚𑀧𑀺 𑀧𑀼𑀩𑁆𑀩𑀯𑀸𑀲𑀦𑀸-

𑀕𑀼𑀡𑀸𑀦𑀼𑀩𑀦𑁆𑀥𑀺 𑀧𑀝𑀺𑀪𑀸𑀦𑀫𑀩𑁆𑀪𑀼𑀢𑀁;

𑀲𑀼𑀢𑁂𑀦 𑀯𑀸𑀘𑀼’𑀲𑁆𑀲𑀳𑀦𑁂𑀦𑀼𑀧𑀸𑀲𑀺𑀢𑀸,

𑀥𑀼𑀯𑀁 𑀓𑀭𑁄𑀢𑁆𑀬𑁂𑀯 𑀓𑀫𑀧𑁆𑀬𑀦𑀼𑀕𑁆𑀕𑀳’’𑀦𑁆𑀢𑀺 [𑀓𑀸𑀩𑁆𑀬𑀸𑀤𑀸𑀲 𑁧.𑁧𑁦𑁪 𑀕𑀸𑀣𑀸].

𑀢𑀲𑁆𑀲𑀢𑁆𑀣𑁄 𑁋 𑀬𑀤𑀺 𑀧𑀼𑀩𑁆𑀩𑀯𑀸𑀲𑀦𑀸𑀕𑀼𑀡𑀸𑀦𑀼𑀩𑀦𑁆𑀥𑀻 𑀅𑀢𑀻𑀢𑀚𑀸𑀢𑀺𑀬𑀸 𑀧𑀭𑀺𑀘𑀬𑀯𑀸𑀲𑀦𑀸𑀕𑀼𑀡𑀲𑁆𑀲 𑀅𑀦𑀼𑀩𑀮𑀧𑁆𑀧𑀤𑀸𑀦𑀯𑀲𑁂𑀦 𑀅𑀦𑀼𑀩𑀦𑁆𑀥𑁄 𑀬𑀲𑁆𑀲𑀢𑁆𑀣𑀺, 𑀢𑀸𑀤𑀺𑀲𑀁 𑀅𑀩𑁆𑀪𑀼𑀢𑀁 𑀧𑀝𑀺𑀪𑀸𑀦𑀁 𑀦 𑀯𑀺𑀚𑁆𑀚𑀢𑀺𑀧𑀺, 𑀢𑀣𑀸𑀧𑀺 𑀲𑀼𑀢𑁂𑀦 𑀲𑀯𑀦𑁂𑀦 𑀉𑀲𑁆𑀲𑀳𑀦𑁂𑀦 𑀧𑀕𑀼𑀡𑀓𑀭𑀡𑀸𑀤𑀺𑀯𑀸𑀘𑀼𑀲𑁆𑀲𑀳𑀦𑁂𑀦 𑀯𑀸 𑀉𑀧𑀸𑀲𑀺𑀢𑀸 𑀓𑀢𑀕𑀼𑀭𑀼𑀧𑀸𑀲𑀦𑀸 𑀯𑀸𑀘𑀸 𑀓𑀫𑀧𑀺 𑀅𑀦𑀼𑀕𑁆𑀕𑀳𑀁 𑀓𑀺𑀜𑁆𑀘𑀺𑀧𑀺 𑀧𑀜𑁆𑀜𑀸𑀧𑀸𑀝𑀯𑀁 𑀥𑀼𑀯𑀁 𑀏𑀓𑀦𑁆𑀢𑁂𑀦 𑀓𑀭𑁄𑀢𑀺 𑀏𑀯𑀸𑀢𑀺.

𑀏𑀢𑁆𑀣 𑀓𑀩𑁆𑀩𑀁 𑀦𑀸𑀫 𑀫𑀼𑀢𑁆𑀢𑀓𑀓𑀼𑀮𑀓𑀸𑀤𑀺𑀯𑀸𑀓𑁆𑀬𑀯𑀲𑁂𑀦 𑀘 𑀅𑀯𑀬𑀯𑀲𑀪𑀸𑀯𑁂𑀳𑀺 𑀢𑁂𑀲𑀁𑀬𑁂𑀯 𑀅𑀦𑁆𑀢𑀭𑀯𑀸𑀓𑁆𑀬𑀸𑀯𑀬𑀯𑀲𑀫𑀽𑀳𑁂𑀳𑀺 𑀧𑀭𑀺𑀧𑀼𑀡𑁆𑀡𑀁 𑀯𑀼𑀢𑁆𑀢𑀯𑀺𑀲𑁂𑀲𑁂𑀳𑀺 𑀧𑀪𑁂𑀤𑀕𑀢𑀁 𑀓𑁂𑀯𑀮𑀁 𑀧𑀚𑁆𑀚𑀫𑀬𑀁 𑀯𑀸 𑀕𑀚𑁆𑀚𑀫𑀬𑀁 𑀯𑀸 𑀘𑀫𑁆𑀧𑀽𑀢𑀺𑀔𑁆𑀬𑀸𑀢𑀧𑀚𑁆𑀚𑀕𑀚𑁆𑀚𑀫𑀬𑀁 𑀯𑀸𑀢𑀺 𑀫𑀳𑀸𑀯𑀸𑀓𑁆𑀬𑀲𑀪𑀸𑀯𑁂𑀦 𑀘 𑀢𑀺𑀝𑁆𑀞𑀢𑀺. 𑀦𑀸𑀝𑀓𑀁 𑀦𑀸𑀫 𑀪𑀭𑀢𑀸𑀤𑀺𑀦𑀝𑀲𑀢𑁆𑀣𑀕𑀢𑀦𑀸𑀦𑀧𑁆𑀧𑀓𑀸𑀭𑀤𑀲𑁆𑀲𑀺𑀢𑀲𑀪𑀸𑀯𑀁. 𑀓𑀩𑁆𑀩𑀜𑁆𑀘 𑀇𑀥𑁂𑀯 𑀤𑀲𑁆𑀲𑀺𑀢𑀮𑀓𑁆𑀔𑀡𑀢𑁄 𑀏𑀓𑀤𑁂𑀲𑀬𑀼𑀢𑁆𑀢𑀧𑁆𑀧𑀓𑀭𑀡𑀸𑀤𑀺𑀦𑀯𑀭𑀽𑀧𑀓𑀸𑀦𑀺 𑀘 𑀦𑀸𑀝𑀺𑀓𑀸 𑀘 𑀪𑀯𑀦𑁆𑀢𑀺. 𑀓𑀩𑁆𑀩𑀮𑀓𑁆𑀔𑀡𑀁 𑀧𑀦 𑀏𑀯𑀁 𑀤𑀝𑁆𑀞𑀩𑁆𑀩𑀁𑁋

‘‘𑀲𑀕𑁆𑀕𑀩𑀦𑁆𑀥𑁄 ¶ 𑀫𑀳𑀸𑀓𑀩𑁆𑀩-𑀫𑀼𑀘𑁆𑀘𑀢𑁂 𑀢𑁆𑀯𑀲𑁆𑀲 𑀮𑀓𑁆𑀔𑀡𑀁;

𑀧𑀡𑀸𑀫𑁄 𑀯𑀢𑁆𑀣𑀼𑀦𑀺𑀤𑁆𑀤𑁂𑀲𑁄, 𑀆𑀲𑀻𑀲𑀸𑀧𑀺 𑀘 𑀢𑀫𑁆𑀫𑀼𑀔𑀁.

𑀇𑀢𑀺𑀳𑀸𑀲𑀓𑀣𑀼𑀩𑁆𑀪𑀽𑀢𑀁, 𑀲𑀦𑁆𑀢𑀲𑀦𑁆𑀦𑀺𑀲𑁆𑀲𑀬𑀫𑁆𑀧𑀺 𑀯𑀸;

𑀘𑀢𑀼𑀯𑀕𑁆𑀕𑀨𑀮𑀸𑀬𑀢𑁆𑀢𑀁, 𑀘𑀢𑀼𑀭𑁄𑀤𑀸𑀢𑁆𑀢𑀦𑀸𑀬𑀓𑀁.

𑀧𑀼𑀭𑀡𑁆𑀡𑀯𑀼𑀢𑀼𑀲𑁂𑀮𑀺𑀦𑁆𑀤𑀼-𑀲𑀯𑀺𑀢𑀽𑀤𑀬𑀯𑀡𑁆𑀡𑀦𑀁;

𑀉𑀬𑁆𑀬𑀸𑀦𑀲𑀮𑀺𑀮𑀓𑁆𑀓𑀻𑀴𑀸, 𑀫𑀥𑀼𑀧𑀸𑀦𑀭𑀢𑀼𑀲𑁆𑀲𑀯𑀁.

𑀯𑀺𑀧𑁆𑀧𑀮𑀫𑁆𑀪𑀯𑀺𑀯𑀸𑀳𑁂𑀳𑀺, 𑀓𑀼𑀫𑀸𑀭𑁄𑀤𑀬𑀯𑀟𑁆𑀠𑀺𑀳𑀺;

𑀫𑀦𑁆𑀢𑀤𑀽𑀢𑀧𑁆𑀧𑀬𑀸𑀦𑀸𑀚𑀺-𑀦𑀸𑀬𑀓𑀸𑀪𑁆𑀬𑀽𑀤𑀬𑁂𑀳𑀺𑀧𑀺.

𑀅𑀮𑀗𑁆𑀓𑀢𑀫𑀲𑀁𑀔𑀺𑀢𑁆𑀢-𑀭𑀲𑀪𑀸𑀯𑀦𑀺𑀭𑀦𑁆𑀢𑀭𑀁;

𑀦𑀸𑀢𑀺𑀯𑀺𑀢𑁆𑀣𑀺𑀡𑁆𑀡𑀲𑀕𑁆𑀕𑁂𑀳𑀺, 𑀧𑀺𑀬𑀯𑀼𑀢𑁆𑀢𑀲𑀼𑀲𑀦𑁆𑀥𑀺𑀪𑀺.

𑀲𑀩𑁆𑀩𑀢𑁆𑀣 𑀪𑀺𑀦𑁆𑀦𑀲𑀕𑁆𑀕𑀦𑁆𑀢𑁂-𑀳𑀼𑀧𑁂𑀢𑀁 𑀮𑁄𑀓𑀭𑀜𑁆𑀚𑀓𑀁;

𑀓𑀩𑁆𑀩𑀁 𑀓𑀧𑁆𑀧𑀦𑁆𑀢𑀭𑀝𑁆𑀞𑀸𑀬𑀺, 𑀚𑀸𑀬𑀢𑁂 𑀲𑀸𑀥𑁆𑀯𑀮𑀗𑁆𑀓𑀢𑀻’’𑀢𑀺 [𑀓𑀸𑀩𑁆𑀬𑀸𑀤𑀸𑀲 𑁧.𑁧𑁪 𑁋 𑁧𑁯 𑀕𑀸𑀣𑀸].

𑀢𑀲𑁆𑀲𑀢𑁆𑀣𑁄 𑁋 𑀲𑀕𑁆𑀕𑀩𑀦𑁆𑀥𑁄 𑀲𑀕𑁆𑀕𑀲𑀗𑁆𑀔𑀸𑀢𑁂𑀳𑀺 𑀧𑀭𑀺𑀘𑁆𑀙𑁂𑀤𑀯𑀺𑀲𑁂𑀲𑁂𑀳𑀺 𑀩𑀦𑁆𑀥𑁄 ‘‘𑀫𑀳𑀸𑀓𑀩𑁆𑀩’’𑀦𑁆𑀢𑀺 𑀉𑀘𑁆𑀘𑀢𑁂. 𑀅𑀲𑁆𑀲 𑀮𑀓𑁆𑀔𑀡𑀁 𑀢𑀼 𑀯𑀼𑀘𑁆𑀘𑀢𑁂𑀢𑀺 𑀲𑀫𑁆𑀩𑀦𑁆𑀥𑁄 𑀓𑀸𑀓𑀓𑁆𑀔𑀺𑀕𑁄𑀴𑀓𑀦𑀬𑁂𑀦 𑀢𑀫𑁆𑀫𑀼𑀔𑀁 𑀢𑀲𑁆𑀲 𑀓𑀩𑁆𑀩𑀲𑁆𑀲 𑀆𑀤𑀺 𑀧𑀦 𑀧𑀡𑀸𑀫𑁄 𑀤𑁂𑀯𑀢𑀸𑀦𑀫𑀲𑁆𑀲𑀦𑀁 𑀯𑀸, 𑀯𑀢𑁆𑀣𑀼𑀦𑀺𑀤𑁆𑀤𑁂𑀲𑁄 𑁋

‘‘𑀅𑀲𑁆𑀢𑁆𑀬𑀼𑀢𑁆𑀢𑀭𑀲𑁆𑀬𑀸𑀁 𑀤𑀺𑀕𑀺 𑀤𑁂𑀯𑀢𑀸𑀢𑁆𑀫,

𑀳𑀺𑀫𑀸𑀮𑀬𑁄 𑀦𑀸𑀫 𑀦𑀕𑀸𑀥𑀺𑀭𑀸𑀚?;

𑀧𑀽𑀯𑀸𑀧𑀭𑁂𑀗 𑀯𑀸𑀭𑀺𑀦𑀺𑀥𑀻 𑀯𑀺𑀕𑀸𑀳𑁆𑀬,

𑀲𑁆𑀣𑀺𑀢? 𑀧𑀣𑀺𑀛𑀸 𑀇𑀯 𑀫𑀸𑀦𑀤𑀡𑁆𑀟?’’ [𑀓𑀼𑀫𑀸𑀭𑀲𑀫𑁆𑀪𑀯 𑁧.𑁧.].

𑀇𑀘𑁆𑀘𑀸𑀤𑀺𑀩𑀦𑁆𑀥𑀲𑀫𑁆𑀩𑀦𑁆𑀥𑀺𑀦𑁄 𑀓𑀲𑁆𑀲𑀘𑀺 𑀯𑀢𑁆𑀣𑀼𑀦𑁄 𑀤𑀲𑁆𑀲𑀦𑀁, 𑀆𑀲𑀻𑀲𑀸𑀧𑀺 ‘‘𑀫𑀬𑁆𑀳𑀁 𑀧𑀻𑀡𑀬𑀢𑀁 𑀫𑀦’’ 𑀫𑀺𑀘𑁆𑀘𑀸𑀤𑀺𑀇𑀝𑁆𑀞𑀸𑀲𑀻𑀲𑀦𑀁 𑀯𑀸 𑀪𑀯𑀢𑀺.

𑀇𑀢𑀺𑀳𑀸𑀲𑀓𑀣𑀼𑀩𑁆𑀪𑀽𑀢𑀁 𑀧𑀼𑀭𑀸𑀯𑀼𑀢𑁆𑀢𑀓𑀣𑀸𑀲𑀦𑁆𑀦𑀺𑀲𑁆𑀲𑀬𑀁 𑀯𑀸 𑀲𑀦𑁆𑀢𑀲𑀦𑁆𑀦𑀺𑀲𑁆𑀲𑀬𑀫𑁆𑀧𑀺 𑀲𑁄𑀪𑀦𑀸𑀦𑀫𑁆𑀧𑀺 𑀭𑀸𑀚𑀘𑀭𑀺𑀬𑀸𑀤𑀺𑀦𑀺𑀲𑁆𑀲𑀬𑀁 𑀯𑀸 𑀘𑀢𑀼𑀯𑀕𑁆𑀕𑀨𑀮𑀸𑀬𑀢𑁆𑀢𑀁 ¶ 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑀓𑀸𑀭𑀡𑀁 𑀥𑀫𑁆𑀫𑁄, 𑀯𑀺𑀚𑁆𑀚𑀸𑀪𑀽𑀫𑀺𑀆𑀤𑀻𑀦𑀁 𑀲𑀜𑁆𑀘𑀬𑁄, 𑀲𑀜𑁆𑀘𑀺𑀢𑀸𑀦𑀁 𑀭𑀓𑁆𑀔𑀸 𑀘 𑀅𑀢𑁆𑀣𑁄, 𑀅𑀧𑀸𑀬𑀲𑀁𑀯𑀢𑁆𑀢𑀦𑀺𑀓𑀧𑀜𑁆𑀘𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑁄 𑀓𑀸𑀫𑁄, 𑀲𑀩𑁆𑀩𑀤𑀼𑀓𑁆𑀔𑀸 𑀦𑀺𑀯𑀢𑁆𑀢𑀺𑀳𑁂𑀢𑀼 𑀫𑁄𑀓𑁆𑀔𑁄 𑀘𑀸𑀢𑀺 𑀘𑀢𑀼𑀯𑀕𑁆𑀕𑀨𑀮𑀸𑀥𑀻𑀦𑀁 𑀘𑀢𑀼𑀭𑁄𑀤𑀸𑀢𑁆𑀢𑀦𑀸𑀬𑀓𑀁 𑀉𑀲𑁆𑀲𑀸𑀳𑀲𑀢𑁆𑀢𑀺𑀫𑀦𑁆𑀢𑀲𑀢𑁆𑀢𑀺𑀧𑀪𑀽𑀲𑀢𑁆𑀢𑀺𑀬𑁄𑀕𑀢𑁄 𑀘𑀢𑀼𑀭𑁄 𑀤𑀓𑁆𑀔𑁄 𑀘𑀸𑀕𑀸𑀢𑀺𑀲𑀬𑀸𑀤𑀺𑀬𑁄𑀕𑁂𑀦 𑀉𑀤𑀸𑀢𑁆𑀢𑁄 𑀉𑀴𑀸𑀭𑁄 𑀲𑀧𑀓𑁆𑀔𑁄, 𑀯𑀺𑀧𑀓𑁆𑀔𑁄 𑀯𑀸 𑀦𑀸𑀬𑀓𑁄 𑀬𑀢𑁆𑀣, 𑀢𑀁 𑀬𑀣𑀸𑀯𑀼𑀢𑁆𑀢𑀁 𑀧𑀼𑀭𑀡𑁆𑀡𑀯𑀼𑀢𑀼𑀲𑁂𑀮𑀺𑀦𑁆𑀤𑀼-𑀲𑀯𑀺𑀢𑀽𑀤𑀬𑀯𑀡𑁆𑀡𑀦𑀁 𑀧𑀼𑀭𑀁 𑀦𑀕𑀭𑀁, 𑀅𑀡𑁆𑀡𑀯𑀁 𑀲𑀸𑀕𑀭𑀁, 𑀉𑀢𑀼 𑀳𑁂𑀫𑀦𑁆𑀢𑀯𑀲𑀦𑁆𑀢𑀸𑀤𑀺𑀉𑀢𑀼, 𑀲𑁂𑀮𑀁 𑀧𑀩𑁆𑀩𑀢𑁄, 𑀇𑀦𑁆𑀤𑀼𑀲𑀯𑀺𑀢𑀽𑀤𑀬𑁄 𑀘𑀦𑁆𑀤𑀲𑀽𑀭𑀺𑀬𑀸𑀦𑀁 𑀉𑀤𑀬𑁄 𑀘𑀸𑀢𑀺 𑀇𑀫𑁂𑀲𑀁 𑀯𑀡𑁆𑀡𑀦𑀁 𑀬𑀢𑁆𑀣, 𑀢𑀁. 𑀲𑀯𑀺𑀢𑀸𑀢𑀺 𑀏𑀢𑁆𑀣 𑀢𑀼𑀧𑀘𑁆𑀘𑀬𑀦𑁆𑀢𑁄. 𑀉𑀬𑁆𑀬𑀸𑀦𑀲𑀮𑀺𑀮𑀓𑁆𑀓𑀻𑀴𑀸𑀫𑀥𑀼𑀧𑀸𑀦𑀭𑀢𑀼𑀲𑁆𑀲𑀯𑀁 𑀉𑀬𑁆𑀬𑀸𑀦𑀓𑀻𑀴𑀸𑀲𑀼𑀭𑀸𑀧𑀸𑀦𑀭𑀢𑀺𑀓𑀻𑀴𑀸𑀲𑀗𑁆𑀔𑀸𑀢𑁄 𑀉𑀲𑁆𑀲𑀯𑁄 𑀬𑀢𑁆𑀣, 𑀢𑀁 𑀯𑀺𑀧𑁆𑀧𑀮𑀫𑁆𑀪𑀯𑀺𑀯𑀸𑀳𑁂𑀳𑀺 𑀤𑀸𑀭𑀸𑀯𑀺𑀬𑁄𑀕𑀤𑀸𑀭𑀧𑀭𑀺𑀕𑁆𑀕𑀳𑁂𑀳𑀺 𑀘 𑀓𑀼𑀫𑀸𑀭𑁄𑀤𑀬𑀯𑀟𑁆𑀠𑀺𑀳𑀺 𑀓𑀼𑀫𑀸𑀭𑀼𑀧𑁆𑀧𑀢𑁆𑀢𑀺𑀓𑀼𑀫𑀸𑀭𑀯𑀟𑁆𑀠𑀻𑀳𑀺 𑀘 𑀫𑀦𑁆𑀢𑀤𑀽𑀢𑀧𑁆𑀧𑀬𑀸𑀦𑀸𑀚𑀺𑀦𑀸𑀬𑀓𑀸𑀪𑁆𑀬𑀽𑀤𑀬𑁂𑀳𑀺 𑀦𑀻𑀢𑀺𑀚𑀸𑀦𑀦𑀧𑀜𑁆𑀜𑀸 𑀫𑀦𑁆𑀢𑁄, 𑀲𑀦𑁆𑀥𑀸𑀦𑀓𑀸𑀭𑀓𑁄 𑀤𑀽𑀢𑁄, 𑀬𑀼𑀤𑁆𑀥𑀸𑀪𑀺𑀕𑀫𑀦𑀁 𑀧𑀬𑀸𑀦𑀁, 𑀬𑀼𑀤𑁆𑀥𑀲𑀗𑁆𑀔𑀸𑀢𑁄 𑀆𑀚𑀺, 𑀲𑀧𑀓𑁆𑀔𑀦𑀸𑀬𑀓𑀲𑁆𑀲 𑀅𑀪𑀺𑀯𑀟𑁆𑀠𑀺𑀲𑀗𑁆𑀔𑀸𑀢𑁄 𑀅𑀪𑁆𑀬𑀽𑀤𑀬𑁄 𑀘𑀸𑀢𑀺 𑀇𑀫𑁂𑀳𑀺 𑀅𑀮𑀗𑁆𑀓𑀢𑀁 𑀲𑀚𑁆𑀚𑀺𑀢𑀁 𑀅𑀲𑀁𑀔𑀺𑀢𑁆𑀢…𑀧𑁂… 𑀦𑁆𑀢𑀭𑀁 𑀅𑀲𑀁𑀔𑀺𑀢𑁆𑀢𑀸 𑀯𑀺𑀢𑁆𑀣𑀸𑀭𑀸 𑀭𑀲𑀸 𑀲𑀺𑀗𑁆𑀕𑀸𑀭𑀸𑀤𑀬𑁄 𑀅𑀝𑁆𑀞 𑀪𑀸𑀯𑀸 𑀭𑀢𑀺𑀉𑀲𑁆𑀲𑀸𑀳𑀸𑀤𑀬𑁄 𑀘𑀸𑀢𑀺 𑀇𑀫𑁂𑀳𑀺 𑀦𑀺𑀭𑀦𑁆𑀢𑀭𑀁 𑀯𑀺𑀢𑁆𑀣𑀺𑀡𑁆𑀡𑀁 𑀧𑀺𑀬𑀯𑀼𑀢𑁆𑀢𑀲𑀼𑀲𑀦𑁆𑀥𑀺𑀪𑀺 𑀲𑀼𑀢𑀺𑀲𑀼𑀪𑀕𑁂𑀳𑀺 𑀇𑀦𑁆𑀤𑀯𑀚𑀺𑀭𑀸𑀤𑀻𑀳𑀺 𑀯𑀼𑀢𑁆𑀢𑁂𑀳𑀺 𑀧𑀼𑀩𑁆𑀩𑀸𑀧𑀭𑀲𑀫𑁆𑀩𑀦𑁆𑀥𑀧𑀭𑀺𑀘𑁆𑀙𑁂𑀤𑀢𑀸𑀬 𑀲𑁄𑀪𑀦𑀸 𑀲𑀦𑁆𑀥𑀺 𑀬𑁂𑀲𑀁 𑀲𑀕𑁆𑀕𑀸𑀦𑀁, 𑀢𑁂𑀳𑀺 𑀲𑀩𑁆𑀩𑀢𑁆𑀣 𑀲𑀩𑁆𑀩𑀲𑁆𑀫𑀺𑀁 𑀧𑀭𑀺𑀘𑁆𑀙𑁂𑀤𑁂 𑀪𑀺𑀦𑁆𑀦𑀲𑀕𑁆𑀕𑀦𑁆𑀢𑁂𑀳𑀺 𑀪𑀺𑀦𑁆𑀦𑀲𑀕𑁆𑀕𑀸 𑀧𑀭𑀺𑀬𑁄𑀲𑀸𑀦𑀸 𑀬𑁂𑀲𑀁, 𑀢𑁂𑀳𑀺 𑀦𑀸𑀢𑀺𑀯𑀺𑀢𑁆𑀣𑀺𑀡𑁆𑀡𑀲𑀕𑁆𑀕𑁂𑀳𑀺 𑀦𑀸𑀢𑀺𑀯𑀺𑀢𑁆𑀣𑀸𑀭𑀲𑀕𑁆𑀕𑀲𑀗𑁆𑀔𑀸𑀢𑁂𑀳𑀺 𑀧𑀭𑀺𑀘𑁆𑀙𑁂𑀤𑁂𑀳𑀺 𑀉𑀧𑁂𑀢𑀁 𑀬𑀼𑀢𑁆𑀢𑀁 𑀲𑀸𑀥𑁆𑀯𑀮𑀗𑁆𑀓𑀢𑀺 𑀲𑁄𑀪𑀦𑀸𑀮𑀗𑁆𑀓𑀸𑀭𑀯𑀦𑁆𑀢𑀁 𑀓𑀩𑁆𑀩𑀁 𑀮𑁄𑀓𑀭𑀜𑁆𑀚𑀓𑀁 𑀢𑀁 𑀲𑀫𑀸𑀦𑀁 𑀓𑀧𑁆𑀧𑀦𑁆𑀢𑀭𑀝𑁆𑀞𑀸𑀬𑀺 𑀓𑀧𑁆𑀧𑀦𑀺𑀭𑀦𑁆𑀢𑀭𑀝𑁆𑀞𑀸𑀬𑀺 𑀓𑀧𑁆𑀧𑀦𑁆𑀢𑀭𑁂 𑀞𑀸𑀬𑀺 𑀯𑀸 𑀚𑀸𑀬𑀢𑁂. 𑀏𑀢𑁆𑀣 𑀫𑀥𑀼𑀧𑀸𑀦𑀸𑀤𑀺𑀭𑀳𑀺𑀢𑀧𑀼𑀭𑀯𑀡𑁆𑀡𑀦𑀸𑀤𑀬𑁄𑀧𑀺 𑀢𑀜𑁆𑀜𑀽𑀦𑀁 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀺 𑀘𑁂, 𑀢𑀁𑀧𑁆𑀬𑀤𑀼𑀝𑁆𑀞𑀁. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀓𑀩𑁆𑀩𑀁 ¶ 𑀦 𑀤𑀼𑀲𑁆𑀲𑀢𑀗𑁆𑀕𑁂𑀳𑀺, 𑀦𑁆𑀬𑀽𑀦𑀫𑀧𑁆𑀬𑀢𑁆𑀭 𑀓𑁂𑀳𑀺𑀘𑀺;

𑀩𑀦𑁆𑀥𑀗𑁆𑀕𑀲𑀫𑁆𑀧𑀤𑀸 𑀢𑀜𑁆𑀜𑀽, 𑀓𑀸𑀫𑀫𑀸𑀭𑀸𑀥𑀬𑀦𑁆𑀢𑀺 𑀘𑁂’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀢𑁆𑀭 𑀇𑀫𑁂𑀲𑀼 𑀓𑀩𑁆𑀩𑀗𑁆𑀕𑁂𑀲𑀼 𑀫𑀚𑁆𑀛𑁂 𑀓𑁂𑀳𑀺𑀘𑀺 𑀅𑀗𑁆𑀕𑁂𑀳𑀺 𑀓𑁂𑀳𑀺𑀘𑀺 𑀅𑀯𑀬𑀯𑁂𑀳𑀺 𑀦𑁆𑀬𑀽𑀦𑀫𑀧𑀺 𑀊𑀦𑀫𑀧𑀺, 𑀦𑀺𑀲𑀤𑁆𑀤𑁄𑀢𑁆𑀭𑀢𑀩𑁆𑀪𑀸𑀯𑁂. 𑀓𑀩𑁆𑀩𑀁 𑀦 𑀤𑀼𑀲𑁆𑀲𑀢𑀺, 𑀢𑀁 𑀧𑀦 𑀅𑀤𑀼𑀲𑁆𑀲𑀦𑀁 𑀩𑀦𑁆𑀥𑀗𑁆𑀕𑀲𑀫𑁆𑀧𑀤𑀸 𑀭𑀘𑀺𑀢𑀧𑀼𑀭𑀯𑀡𑁆𑀡𑀦𑀸𑀤𑀺𑀅𑀗𑁆𑀕𑀲𑀫𑁆𑀧𑀤𑀸 𑀢𑀜𑁆𑀜𑀽 𑀓𑀩𑁆𑀩𑀜𑁆𑀜𑀽 𑀚𑀦𑁂 𑀓𑀸𑀫𑀁 𑀇𑀘𑁆𑀙𑀸𑀦𑀼𑀭𑀽𑀧𑀁 𑀘𑁂 𑀆𑀭𑀸𑀥𑀬𑀦𑁆𑀢𑀺, 𑀏𑀯𑀁 𑀲𑀦𑁆𑀢𑁂 𑀪𑀯𑀢𑀺. 𑀧𑀼𑀦𑀧𑀺 𑀦𑀸𑀬𑀓𑀯𑀡𑁆𑀡𑀦𑀸𑀲𑀼 𑀲𑀧𑀓𑁆𑀔𑀦𑀸𑀬𑀓𑀁 𑀯𑀡𑁆𑀡𑁂𑀢𑁆𑀯𑀸 𑀢𑁂𑀦 𑀦𑀺𑀭𑀸𑀓𑀭𑀡𑀪𑀸𑀯𑀫𑁆𑀧𑀺. 𑀦𑁄 𑀘𑁂, 𑀧𑀘𑁆𑀘𑀢𑁆𑀣𑀺𑀓𑀁 𑀯𑀡𑁆𑀡𑁂𑀢𑁆𑀯𑀸 𑀅𑀢𑁆𑀢𑀦𑁄 𑀦𑀸𑀬𑀓𑁂𑀦 𑀢𑀲𑁆𑀲𑀸𑀪𑀺𑀪𑀯𑀦𑀫𑁆𑀧𑀺 𑀯𑀡𑁆𑀡𑁂𑀢𑀼𑀁 𑀯𑀝𑁆𑀝𑀢𑀺. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀕𑀼𑀡𑀢𑁄 𑀧𑀞𑀫𑀁 𑀯𑀢𑁆𑀯𑀸, 𑀦𑀸𑀬𑀓𑀁 𑀢𑁂𑀦 𑀲𑀢𑁆𑀢𑀼𑀦𑁄;

𑀦𑀺𑀭𑀸𑀓𑀭𑀡𑀫𑀺𑀘𑁆𑀘𑁂𑀲, 𑀫𑀕𑁆𑀕𑁄 𑀧𑀓𑀢𑀺𑀲𑀼𑀦𑁆𑀤𑀭𑁄.

𑀯𑀁𑀲𑀯𑀻𑀭𑀲𑀼𑀢𑀸𑀤𑀻𑀦𑀺, 𑀯𑀡𑁆𑀡𑀬𑀺𑀢𑁆𑀯𑀸 𑀭𑀺𑀧𑀼𑀲𑁆𑀲𑀧𑀺;

𑀢𑀚𑁆𑀚𑀬𑀸 𑀦𑀸𑀬𑀓𑀼𑀓𑁆𑀓𑀁𑀲-𑀓𑀣𑀦𑀜𑁆𑀘 𑀲𑀼𑀔𑁂𑀢𑀺 𑀦𑁄’’𑀢𑀺.

𑁮.

𑀩𑀦𑁆𑀥𑁄 𑀘 𑀦𑀸𑀫 𑀲𑀤𑁆𑀤𑀢𑁆𑀣𑀸, 𑀲𑀳𑀺𑀢𑀸 𑀤𑁄𑀲𑀯𑀚𑁆𑀚𑀺𑀢𑀸;

𑀧𑀚𑁆𑀚𑀕𑀚𑁆𑀚𑀯𑀺𑀫𑀺𑀲𑁆𑀲𑀸𑀦𑀁, 𑀪𑁂𑀤𑁂𑀦𑀸’𑀬𑀁 𑀢𑀺𑀥𑀸 𑀪𑀯𑁂.

𑁮. 𑀏𑀯𑀫𑁂𑀢𑁂𑀳𑀺 𑀲𑁄𑀢𑀼𑀚𑀦𑀲𑀫𑀼𑀲𑁆𑀲𑀸𑀳𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀢𑁆𑀢𑀼𑀫𑀺𑀘𑁆𑀙𑀺𑀢𑀩𑀦𑁆𑀥𑁄𑀢𑀺 𑀯𑀼𑀢𑁆𑀢𑀁 𑀩𑀦𑁆𑀥𑀲𑁆𑀲 𑀮𑀓𑁆𑀔𑀡𑀁 𑀓𑀢𑁆𑀢𑀼𑀫𑀸𑀭𑀪𑀢𑁂 ‘‘𑀩𑀦𑁆𑀥𑁄 𑀘𑀸’’𑀢𑀺𑀆𑀤𑀺. 𑀤𑁄𑀲𑀯𑀚𑁆𑀚𑀺𑀢𑀸 𑀤𑁄𑀲𑁂𑀳𑀺 𑀲𑀤𑁆𑀤𑀦𑀺𑀲𑁆𑀲𑀺𑀢𑁂𑀳𑀺, 𑀅𑀢𑁆𑀣𑀦𑀺𑀲𑁆𑀲𑀺𑀢𑁂𑀳𑀺 𑀘 𑀯𑀺𑀭𑁄𑀥𑁂𑀳𑀺 𑀯𑀚𑁆𑀚𑀺𑀢𑀸 𑀧𑀭𑀺𑀘𑁆𑀘𑀢𑁆𑀢𑀸, 𑀢𑁂 𑀯𑀸 𑀯𑀚𑁆𑀚𑀺𑀢𑀸 𑀬𑁂𑀳𑀺, 𑀲𑀤𑁆𑀤𑀢𑁆𑀣𑀸 𑀲𑀳𑀺𑀢𑀸 𑀏𑀓𑀻𑀪𑀽𑀢𑀸. 𑀯𑀼𑀢𑁆𑀢𑀮𑀓𑁆𑀔𑀡𑀸 𑀬𑁂𑀳𑀺 𑀢𑁂 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀲𑀳𑀺𑀢𑀸 𑀯𑀼𑀘𑁆𑀘𑀦𑁆𑀢𑀺. 𑀲𑀳𑀺𑀢𑀸𑀦𑀁 𑀪𑀸𑀯𑁄 𑀲𑀳𑀤𑀬𑀳𑀺𑀮𑀸𑀤𑀓𑀸𑀭𑀡𑀁 𑀲𑀸𑀥𑁆𑀬𑀁 𑀲𑀸𑀳𑀺𑀘𑁆𑀘𑀁. 𑀇𑀢𑀺 𑀤𑁄𑀲𑀯𑀚𑁆𑀚𑀺𑀢𑁂 𑀲𑀳𑀺𑀢𑁂 𑀲𑀤𑁆𑀤𑀢𑁆𑀣𑁂 𑀧𑀲𑀺𑀤𑁆𑀥𑀪𑀸𑀯𑁂𑀦 𑀅𑀦𑀼𑀯𑀤𑀺𑀢𑁆𑀯𑀸 𑀩𑀦𑁆𑀥𑁄 𑀦𑀸𑀫 𑀲𑀪𑀸𑀯𑀯𑀼𑀢𑁆𑀢𑀺𑀯𑀗𑁆𑀓𑀯𑀼𑀢𑁆𑀢𑀺𑀅𑀮𑀗𑁆𑀓𑀸𑀭𑀯𑀼𑀢𑁆𑀢𑀺𑀯𑀲𑁂𑀦 𑀢𑀺𑀯𑀺𑀥𑁄𑀧𑀻𑀢𑀺 𑀅𑀧𑁆𑀧𑀲𑀺𑀤𑁆𑀥𑀁 𑀩𑀦𑁆𑀥𑀲𑀭𑀻𑀭𑀁 𑀯𑀺𑀥𑀻𑀬𑀢𑁂 𑀬𑀣𑀸 ‘‘𑀬𑁄 𑀓𑀼𑀡𑁆𑀟𑀮𑀻, 𑀲𑁄 𑀤𑁂𑀯𑀤𑀢𑁆𑀢𑁄’’𑀢𑀺. 𑀘𑀲𑀤𑁆𑀤𑁄𑀯𑀢𑁆𑀢𑀩𑁆𑀩𑀦𑁆𑀢𑀭𑀲𑁆𑀲 𑀲𑀫𑀼𑀘𑁆𑀘𑀬𑁄, 𑀓𑀺𑀜𑁆𑀘𑀻𑀢𑀺 𑀅𑀢𑁆𑀣𑁄.

𑀢𑀢𑁆𑀣 ¶ 𑀚𑀸𑀢𑀺𑀕𑀼𑀡𑀓𑁆𑀭𑀺𑀬𑀸𑀤𑀩𑁆𑀩𑀮𑀓𑁆𑀔𑀡𑁄 𑀲𑀤𑁆𑀤𑀸𑀦𑀫𑀢𑁆𑀣𑁄 𑀫𑀼𑀔𑁆𑀬𑁄 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺. 𑀫𑀼𑀔𑁆𑀬𑀲𑁆𑀲𑀢𑁆𑀣𑀲𑁆𑀲 𑀘𑀢𑀼𑀩𑁆𑀩𑀺𑀥𑀢𑁆𑀢𑀸 𑀢𑀺𑀯𑀺𑀥𑁂𑀲𑀼 𑀲𑀤𑁆𑀤𑁂𑀲𑀼 𑀢𑀩𑁆𑀩𑀸𑀘𑀓𑁄 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺 𑀚𑀸𑀢𑀺𑀲𑀤𑁆𑀤𑁄 𑀕𑀼𑀡𑀲𑀤𑁆𑀤𑁄 𑀓𑁆𑀭𑀺𑀬𑀸𑀲𑀤𑁆𑀤𑁄 𑀤𑀩𑁆𑀩𑀲𑀤𑁆𑀤𑁄𑀢𑀺. 𑀢𑀺𑀯𑀺𑀥𑁄 𑀳𑀺 𑀲𑀤𑁆𑀤𑁄 𑀯𑀸𑀘𑀓𑁄 𑀮𑀓𑁆𑀔𑀡𑀺𑀓𑁄 𑀩𑁆𑀬𑀜𑁆𑀚𑀓𑁄𑀢𑀺 𑀩𑁆𑀬𑀸𑀧𑀸𑀭𑀪𑁂𑀤𑁂𑀦. 𑀩𑁆𑀬𑀸𑀧𑀸𑀭𑁄 𑀘 𑀦𑀸𑀫 𑀲𑀤𑁆𑀤𑀲𑁆𑀲’𑀢𑁆𑀣𑀧𑁆𑀧𑀢𑀻𑀢𑀺𑀓𑀸𑀭𑀺𑀢𑁆𑀢𑀫𑁂𑀯. 𑀲𑁄 𑀳𑀺 𑀢𑀺𑀯𑀺𑀥𑁄 𑀫𑀼𑀔𑁆𑀬𑁄 𑀮𑀓𑁆𑀔𑀡𑁄 𑀩𑁆𑀬𑀜𑁆𑀚𑀦𑀲𑀪𑀸𑀯𑁄 𑀘𑁂𑀢𑀺. 𑀢𑀢𑁆𑀣 𑀚𑀸𑀢𑁆𑀬𑀸𑀤𑀺𑀦𑀺𑀭𑀦𑁆𑀢𑀭𑀢𑁆𑀣𑀯𑀺𑀲𑀬𑁄 𑀲𑀤𑁆𑀤𑀩𑁆𑀬𑀸𑀧𑀸𑀭𑁄 𑀫𑀼𑀔𑁆𑀬𑁄. 𑀲𑁄𑀬𑁂𑀯 𑀅𑀪𑀺𑀥𑀸𑀢𑀺 𑀉𑀘𑁆𑀘𑀢𑁂. 𑀢𑀁𑀩𑁆𑀬𑀸𑀧𑀸𑀭𑀯𑀸 𑀅𑀩𑁆𑀬𑀯𑀳𑀺𑀢𑀚𑀸𑀢𑁆𑀬𑀸𑀤𑀺𑀲𑀓𑁂𑀳𑀺 𑀢𑀫𑀢𑁆𑀣𑀁 𑀫𑀼𑀔𑁆𑀬𑀪𑀸𑀯𑁂𑀦 𑀬𑁄 𑀯𑀤𑀢𑀺 𑀕𑁄𑀆𑀤𑀺𑀓𑁄, 𑀲𑁄 𑀯𑀸𑀘𑀓𑁄. 𑀲𑀤𑁆𑀤𑀦𑁆𑀢𑀭𑀢𑁆𑀣𑀯𑀺𑀲𑀬𑀦𑀺𑀤𑁆𑀤𑀺𑀝𑁆𑀞𑁄 𑀲𑀤𑁆𑀤𑀩𑁆𑀬𑀸𑀧𑀸𑀭𑁄 𑀮𑀓𑁆𑀔𑀡𑁄. 𑀲𑀸 𑀤𑀼𑀯𑀺𑀥𑀸 𑀲𑀼𑀤𑁆𑀥𑀸, 𑀉𑀧𑀘𑀸𑀭𑀫𑀺𑀲𑁆𑀲𑀸 𑀘𑁂𑀢𑀺. 𑀢𑀢𑁆𑀣 𑀲𑀼𑀤𑁆𑀥𑀸 𑀬𑀣𑀸 ‘‘𑀕𑁄 𑀫𑀼𑀘𑁆𑀘𑀢𑀼, 𑀫𑀜𑁆𑀘𑀸 𑀉𑀕𑁆𑀖𑁄𑀲𑁂𑀦𑁆𑀢𑀺, 𑀕𑀗𑁆𑀕𑀸𑀬𑀁 𑀖𑁄𑀲𑁄’’𑀢𑀺. 𑀏𑀢𑁆𑀣 𑀕𑁄𑀲𑀤𑁆𑀤𑁂𑀦 𑀯𑀺𑀲𑁂𑀲𑀦𑀁 𑀕𑁄𑀢𑁆𑀢𑀲𑀸𑀫𑀜𑁆𑀜𑀫𑁂𑀯𑁄𑀘𑁆𑀘𑀢𑁂, 𑀦 𑀢𑀼 𑀕𑁄𑀩𑁆𑀬𑀢𑁆𑀢𑀺. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀯𑀺𑀲𑁂𑀲𑁆𑀬𑀁𑀦𑀸𑀪𑀺𑀥𑀸 𑀕𑀘𑁆𑀙𑁂, 𑀔𑀻𑀡𑀲𑀢𑁆𑀢𑀺 𑀯𑀺𑀲𑁂𑀲𑀦𑁂’’𑀢𑀺 [𑀓𑀸𑀩𑁆𑀬𑀧𑁆𑀧𑀓𑀸𑀲𑁂 𑀤𑀼𑀢𑀺𑀬𑀉𑀮𑁆𑀮𑀸𑀲𑁂 𑀆𑀕𑀢𑀦𑁆𑀬𑀸𑀬𑁄’𑀬𑀁].

𑀲𑀸𑀫𑀜𑁆𑀜𑀲𑁆𑀲 𑀩𑁆𑀬𑀸𑀧𑀓𑀢𑁆𑀢𑀸, 𑀅𑀲𑀭𑀻𑀭𑀢𑁆𑀢𑀸 𑀘. 𑀢𑀢𑁆𑀣 𑀩𑀦𑁆𑀥𑀦𑀫𑁄𑀘𑀦𑀸𑀦𑀺 𑀦 𑀲𑀫𑁆𑀪𑀯𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀪𑀽𑀢𑀸 𑀕𑁄𑀩𑁆𑀬𑀢𑁆𑀢𑀺 𑀆𑀓𑀟𑁆𑀠𑀻𑀬𑀢𑁂, 𑀢𑀣𑀸 𑀫𑀜𑁆𑀘𑀸𑀦𑀫𑀼𑀕𑁆𑀖𑁄𑀲𑀦𑀁 𑀦 𑀲𑀫𑁆𑀪𑀯𑀢𑀻𑀢𑀺 𑀅𑀢𑁆𑀢𑀦𑁄 𑀉𑀕𑁆𑀖𑁄𑀲𑀦𑀓𑁆𑀭𑀺𑀬𑀸𑀲𑀺𑀤𑁆𑀥𑁆𑀬𑀢𑁆𑀣𑀁 𑀫𑀜𑁆𑀘𑀲𑀫𑀗𑁆𑀕𑀺𑀦𑁄 𑀧𑀼𑀭𑀺𑀲𑀸 𑀆𑀓𑀟𑁆𑀠𑀻𑀬𑀦𑁆𑀢𑀺. 𑀢𑀣𑀸 𑀕𑀗𑁆𑀕𑀸𑀲𑀤𑁆𑀤𑀯𑀸𑀘𑁆𑀘𑀲𑁆𑀲 𑀚𑀮𑀧𑁆𑀧𑀯𑀸𑀳𑀲𑁆𑀲 𑀖𑁄𑀲𑀧𑁆𑀧𑀢𑁆𑀬𑀸𑀓𑀭𑀢𑀸 𑀦 𑀲𑀫𑁆𑀪𑀯𑀢𑀻𑀢𑀺 𑀕𑀗𑁆𑀕𑀸𑀲𑀤𑁆𑀤𑁄 𑀅𑀢𑁆𑀢𑀦𑁄𑀪𑀺𑀥𑁂𑀬𑁆𑀬𑀲𑁆𑀲𑁄𑀤𑀓𑀧𑁆𑀧𑀯𑀸𑀳𑀲𑁆𑀲 𑀦𑀺𑀓𑀝𑀁 𑀢𑀝𑀁 𑀮𑀓𑁆𑀔𑁂𑀢𑀺. 𑀉𑀧𑀘𑀸𑀭𑀲𑁆𑀲𑀸𑀦𑁂𑀓𑀧𑁆𑀧𑀓𑀸𑀭𑀢𑁆𑀢𑀸 𑀉𑀧𑀘𑀸𑀭𑀫𑀺𑀲𑁆𑀲𑀸 𑀮𑀓𑁆𑀔𑀡𑀸𑀧𑁆𑀬𑀦𑁂𑀓𑀥𑀸 𑀲𑀺𑀬𑀸. 𑀬𑀣𑀸 𑀓𑀢𑁆𑀣𑀘𑀺 𑀓𑀸𑀭𑀡𑁂 𑀓𑀸𑀭𑀻𑀬𑀫𑀼𑀧𑀘𑀭𑀺𑀬𑀢𑁂, 𑀬𑀣𑀸 ‘‘𑀆𑀬𑀼 𑀖𑀢’’𑀦𑁆𑀢𑀺. 𑀓𑀢𑁆𑀣𑀘𑀺 𑀓𑀸𑀭𑀡𑀓𑀸𑀭𑀺𑀬𑀸𑀦𑀫𑀪𑁂𑀤𑁄 𑀬𑀣𑀸 ‘‘𑀆𑀬𑀼𑀬𑁂𑀯𑁂𑀤’’𑀦𑁆𑀢𑀺. 𑀓𑀢𑁆𑀣𑀘𑀺 ¶ 𑀉𑀧𑀫𑀸𑀦𑁂 𑀉𑀧𑀫𑁂𑀬𑁆𑀬𑀫𑀼𑀧𑀘𑀭𑀻𑀬𑀢𑁂, 𑀬𑀣𑀸 ‘‘𑀕𑁄 𑀩𑀸𑀳𑀺𑀓𑁄’’𑀢𑀺. 𑀓𑀢𑁆𑀣𑀘𑀺 𑀅𑀪𑁂𑀤𑁄 𑀢𑁂𑀲𑀁, 𑀬𑀣𑀸 ‘‘𑀕𑁄𑀬𑁂𑀯𑀸𑀬’’𑀦𑁆𑀢𑀺. 𑀓𑀢𑁆𑀣𑀘𑀺 𑀢𑀤𑀸𑀥𑀸𑀭𑀢𑀸𑀬 [𑀢𑀤𑀢𑁆𑀣𑀢𑀸𑀬 (𑀓.)] 𑀢𑀁𑀩𑁆𑀬𑀧𑀤𑁂𑀲𑁄, 𑀬𑀣𑀸 ‘‘𑀧𑀤𑀻𑀧𑀝𑁆𑀞𑀸 𑀓𑀧𑀮𑁆𑀮𑀺𑀓𑀸 𑀧𑀤𑀻𑀧𑁄’’𑀢𑀺. 𑀓𑀢𑁆𑀣𑀘𑀺 𑀢𑀁𑀓𑀫𑁆𑀫𑀲𑀫𑁆𑀩𑀦𑁆𑀥𑀸 𑀢𑀁𑀩𑁆𑀬𑀧𑀤𑁂𑀲𑁄, 𑀬𑀣𑀸 ‘‘𑀅𑀯𑀟𑁆𑀠𑀓𑀻𑀧𑀺 𑀯𑀟𑁆𑀠𑀓𑀻 𑀅𑀬’’𑀦𑁆𑀢𑀺. 𑀓𑀢𑁆𑀣𑀘𑀺 𑀲𑀁𑀲𑀸𑀫𑀺𑀲𑀫𑁆𑀩𑀦𑁆𑀥𑀸, 𑀬𑀣𑀸 ‘‘𑀭𑀸𑀚𑀲𑀫𑁆𑀩𑀦𑁆𑀥𑀻 𑀧𑀼𑀭𑀺𑀲𑁄 𑀭𑀸𑀚𑀸𑀬’’𑀦𑁆𑀢𑀺. 𑀓𑀢𑁆𑀣𑀘𑀺 𑀅𑀯𑀬𑀯𑁂 𑀲𑀫𑀼𑀤𑀸𑀬𑀩𑁆𑀬𑀧𑀤𑁂𑀲𑁄, 𑀬𑀣𑀸 ‘‘𑀧𑀝𑁂𑀓𑀤𑁂𑀲𑁂 𑀧𑀝𑀲𑀤𑁆𑀤𑁄’’ 𑀇𑀘𑁆𑀘𑀸𑀤𑀺.

𑀮𑀓𑁆𑀔𑀡𑀸𑀬 𑀦𑀺𑀲𑁆𑀲𑀬𑁄 𑀲𑀤𑁆𑀤𑁄 𑀮𑀓𑁆𑀔𑀡𑀺𑀓𑁄. 𑀩𑁆𑀬𑀜𑁆𑀚𑀦𑀲𑀪𑀸𑀯𑁄 𑀧𑀦 𑀧𑀭𑀧𑀭𑀺𑀬𑀸𑀬𑁄 𑀲𑀤𑁆𑀤𑀲𑁆𑀲 𑀢𑀢𑀺𑀬𑁄 𑀩𑁆𑀬𑀸𑀧𑀸𑀭𑁄. 𑀢𑀲𑁆𑀲 𑀦𑀺𑀲𑁆𑀲𑀬𑁄 𑀲𑀤𑁆𑀤𑁄 𑀩𑁆𑀬𑀜𑁆𑀚𑀦𑀓𑁄. 𑀇𑀘𑁆𑀘𑁂𑀢𑀁 𑀢𑀺𑀡𑁆𑀡𑀁 𑀲𑀤𑁆𑀤𑀸𑀦𑀁 𑀯𑀲𑁂𑀦 𑀅𑀢𑁆𑀣𑁄𑀧𑀺 𑀢𑀺𑀯𑀺𑀥𑁄 𑀳𑁄𑀢𑀺 𑀯𑀸𑀘𑁆𑀘𑁄 𑀮𑀓𑁆𑀔𑀡𑀺𑀬𑁄 𑀩𑁆𑀬𑀗𑁆𑀕𑁆𑀬𑁄𑀢𑀺. 𑀢𑀢𑁆𑀣 𑀩𑁆𑀬𑀗𑁆𑀕𑁆𑀬𑁄𑀬𑁂𑀯𑀢𑁆𑀣𑁄 𑀩𑀦𑁆𑀥𑀲𑀢𑁆𑀣𑀸 𑀯𑀼𑀘𑁆𑀘𑀢𑁂. 𑀢𑁂𑀦𑁂𑀯 𑀧𑀥𑀸𑀦𑀩𑁆𑀬𑀗𑁆𑀕𑁆𑀬𑁄 𑀩𑀦𑁆𑀥𑁄 𑀉𑀢𑁆𑀢𑀫𑁄, 𑀅𑀧𑀥𑀸𑀦𑀩𑁆𑀬𑀗𑁆𑀕𑁆𑀬𑁄 𑀫𑀚𑁆𑀛𑀺𑀫𑁄, 𑀅𑀩𑁆𑀬𑀗𑁆𑀕𑁆𑀬𑁄 𑀅𑀥𑀫𑁄, 𑀩𑁆𑀬𑀗𑁆𑀕𑁆𑀬𑁂𑀦 𑀯𑀺𑀦𑀸 𑀩𑀦𑁆𑀥𑁄 𑀦𑀺𑀚𑁆𑀚𑀻𑀯𑁄 𑀲𑀺𑀬𑀸𑀢𑀺 𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀁 𑀧𑀯𑀢𑁆𑀢𑀺, 𑀲𑀪𑀸𑀯𑀯𑀼𑀢𑁆𑀢𑀺 𑀩𑀦𑁆𑀥𑁄𑀧𑀺 𑀢𑀼 𑀦𑀺𑀚𑁆𑀚𑀻𑀯𑁄𑀢𑀺 𑀦𑀸𑀲𑀗𑁆𑀓𑀦𑀻𑀬𑁄. 𑀬𑀲𑁆𑀫𑀸 𑀓𑀯𑀻𑀦𑀁 𑀮𑁄𑀓𑀯𑁄𑀳𑀸𑀭𑀓𑁄𑀲𑀮𑁆𑀮𑀁 𑀲𑀪𑀸𑀯𑀯𑀼𑀢𑁆𑀢𑀺𑀬𑁂𑀯 𑀕𑀫𑁂𑀢𑀺. 𑀬𑁄 𑀳𑀺 𑀲𑀓𑀮𑀮𑁄𑀓𑀝𑁆𑀞𑀺𑀢𑀺𑀁 𑀦 𑀚𑀸𑀦𑀸𑀢𑀺, 𑀲𑁄 𑀓𑀯𑀺𑀬𑁂𑀯 𑀦 𑀳𑁄𑀢𑀻𑀢𑀺.

𑀅𑀣𑁂𑀢𑁆𑀣 𑀢𑀺𑀯𑀺𑀥𑀫𑁆𑀧𑀺 𑀅𑀢𑁆𑀣𑀁 𑀢𑀸𑀤𑀺𑀲𑀚𑀦𑀸𑀯𑀩𑁄𑀥𑀢𑁆𑀣𑀁 𑀲𑀫𑀼𑀤𑀸𑀳𑀭𑀺𑀲𑁆𑀲𑀸𑀫 ‘‘𑀫𑀼𑀦𑀺𑀦𑁆𑀤𑀯𑀤𑀦𑀫𑁆𑀪𑁄𑀚𑁂’’𑀢𑁆𑀬𑀸𑀤𑀺. 𑀏𑀢𑁆𑀣 𑀯𑀸𑀡𑀻𑀲𑀤𑁆𑀤𑀲𑁆𑀲 𑀲𑀤𑁆𑀥𑀫𑁆𑀫𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀯𑀸𑀘𑁆𑀘𑀢𑁆𑀣𑁄. 𑀯𑀸𑀡𑀻 𑀦𑀸𑀫 𑀘𑁂𑀢𑀦𑀸, 𑀢𑀲𑁆𑀲𑀁 𑀬𑀸𑀯 𑀤𑁂𑀯𑀢𑀢𑁆𑀣𑀁 𑀦𑀸𑀭𑁄𑀧𑁆𑀬𑀢𑁂, 𑀢𑀸𑀯 𑀢𑀧𑁆𑀧𑀢𑀻 𑀅𑀢𑁆𑀢𑀦𑁄 𑀫𑀦𑁄𑀲𑀫𑁆𑀧𑀻𑀡𑀦𑀆𑀲𑀻𑀲𑀦𑀸 𑀦 𑀲𑀁𑀕𑀘𑁆𑀙𑀢𑀻𑀢𑀺 𑀯𑀸𑀓𑁆𑀬𑀲𑀸𑀫𑀢𑁆𑀣𑀺𑀬𑀸𑀬𑁂𑀯 𑀯𑀸𑀡𑀺𑀬𑀁 𑀲𑀸𑀬𑀫𑁄𑀘𑀺𑀢𑁆𑀬𑀪𑁂𑀤𑁂𑀦 𑀤𑁂𑀯𑀢𑀸𑀲𑀤𑁆𑀤𑀲𑁆𑀲 𑀆𑀭𑁄𑀧𑀺𑀢𑁄𑀢𑁆𑀣𑁄 𑀮𑀓𑁆𑀔𑀡𑀺𑀬𑁄. 𑀢𑀣𑀸 𑀯𑀤𑀦𑀲𑀤𑁆𑀤𑀲𑁆𑀲𑀸𑀧𑀺 𑀫𑀼𑀔𑀁 𑀯𑀸𑀘𑁆𑀘𑀢𑁆𑀣𑁄. 𑀅𑀫𑁆𑀪𑁄𑀚𑀲𑀤𑁆𑀤𑀲𑁆𑀲 𑀲𑀫𑀸𑀭𑁄𑀧𑀺𑀢𑁄𑀢𑁆𑀣𑁄 𑀮𑀓𑁆𑀔𑀡𑀺𑀬𑁄. 𑀫𑀦𑁄𑀲𑀫𑁆𑀧𑀻𑀡𑀦𑀲𑁆𑀲 𑀢𑀼 𑀅𑀜𑁆𑀜𑀣𑀸 𑀅𑀦𑀼𑀧𑀧𑀢𑁆𑀢𑀺𑀬𑀸 𑀧𑀲𑁆𑀲𑀤𑁆𑀥𑁆𑀬𑀸𑀤𑀺𑀓𑁆𑀓𑀫𑁂𑀦 𑀬𑀣𑀸𑀪𑀽𑀢𑀸𑀯𑀩𑁄𑀥𑀲𑀫𑁆𑀪𑀯𑀸 𑀅𑀦𑀸𑀬𑀸𑀲𑁂𑀦 ¶ 𑀯𑀺𑀘𑀺𑀢𑁆𑀢𑀸𑀦𑁂𑀓𑀲𑀤𑁆𑀤𑀢𑁆𑀣𑀧𑀝𑀺𑀪𑀸𑀦𑁂𑀦 𑀕𑀦𑁆𑀣𑀧𑀭𑀺𑀲𑀫𑀢𑁆𑀢𑀺𑀲𑀗𑁆𑀔𑀸𑀢𑀸 𑀬𑀣𑀺𑀘𑁆𑀙𑀺𑀢𑀢𑁆𑀣𑀦𑀺𑀧𑁆𑀨𑀢𑁆𑀢𑀺 𑀳𑁄𑀢𑁂𑀯, 𑀅𑀬𑀁 𑀩𑁆𑀬𑀗𑁆𑀕𑁆𑀬𑀢𑁆𑀣𑁄. 𑀢𑀩𑁆𑀩𑀸𑀘𑀓𑀸 𑀲𑀤𑁆𑀤𑀸 𑀯𑀸𑀘𑀓𑀮𑀓𑁆𑀔𑀡𑀺𑀓𑀩𑁆𑀬𑀜𑁆𑀚𑀓𑀸 𑀳𑁄𑀦𑁆𑀢𑀻𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀲𑀤𑁆𑀤𑀢𑁆𑀣𑀯𑀺𑀘𑀸𑀭𑁄 𑀕𑀦𑁆𑀢𑀩𑁆𑀩𑁄.

𑀢𑀫𑁂𑀯𑀁 𑀬𑀣𑀸𑀯𑀼𑀢𑁆𑀢𑀩𑀦𑁆𑀥𑀲𑀭𑀻𑀭𑀁 𑀓𑀢𑀺𑀯𑀺𑀥𑀫𑀺𑀘𑁆𑀘𑀸𑀳 ‘‘𑀧𑀚𑁆𑀚𑁂’’𑀘𑁆𑀘𑀸𑀤𑀺. 𑀅𑀬𑀁 𑀬𑀣𑀸𑀯𑀼𑀢𑁆𑀢𑁄 𑀩𑀦𑁆𑀥𑁄 𑀩𑀦𑁆𑀥𑀲𑀭𑀻𑀭𑀁 𑀢𑀺𑀥𑀸 𑀪𑀯𑁂 𑀢𑀺𑀧𑁆𑀧𑀓𑀸𑀭𑁂𑀦 𑀲𑀺𑀬𑀸, 𑀦𑀸𑀥𑀺𑀓𑀁 𑀦𑀸𑀧𑁆𑀬𑀽𑀦𑀁. 𑀓𑀣𑀁? 𑀧𑀚𑁆𑀚𑀕𑀚𑁆𑀚𑀯𑀺𑀫𑀺𑀲𑁆𑀲𑀸𑀦𑀁 𑀪𑁂𑀤𑁂𑀦 𑀧𑀚𑁆𑀚𑀲𑀪𑀸𑀯𑀸𑀤𑀻𑀦𑀁 𑀯𑀺𑀲𑁂𑀲𑁂𑀦 𑀢𑀺𑀥𑀸 𑀪𑀯𑁂𑀢𑀺 𑀧𑀓𑀢𑀁. 𑀢𑀢𑁆𑀣 𑀧𑀚𑁆𑀚𑀁 𑀦𑀸𑀫 𑀅𑀫𑁆𑀳𑁂𑀳𑀺𑀬𑁂𑀯 𑀯𑀺𑀭𑀘𑀺𑀢𑀯𑀼𑀢𑁆𑀢𑁄𑀤𑀬𑀸𑀔𑁆𑀬𑁂 𑀙𑀦𑁆𑀤𑀲𑀺 𑀦𑀺𑀭𑀽𑀧𑀺𑀢𑀸 𑀯𑀼𑀢𑁆𑀢𑀚𑀸𑀢𑀺𑀧𑁆𑀧𑀪𑁂𑀤𑀸 𑀘𑀢𑀼𑀧𑁆𑀧𑀤𑀺𑀓𑀢𑁆𑀣𑀸 𑀦𑀺𑀭𑀽𑀧𑀺𑀢𑁄 𑀫𑀼𑀢𑁆𑀢𑀓𑀸𑀤𑀺𑀧𑀺 𑀯𑀼𑀢𑁆𑀢𑀚𑀸𑀢𑀺𑀧𑁆𑀧𑀓𑀸𑀭𑁄𑀬𑁂𑀯. 𑀢𑁂𑀦𑁂𑀯𑁂𑀢𑁆𑀣 𑀢𑁂𑀲𑀫𑀤𑀲𑁆𑀲𑀦𑀁. 𑀢𑁂𑀲𑀼 𑀏𑀓𑀕𑀸𑀣𑀸 𑀦𑀺𑀝𑁆𑀞𑀺𑀢𑀢𑁆𑀣𑀸 𑀲𑀧𑁆𑀧𑀥𑀸𑀦𑀸 𑀕𑀸𑀣𑀦𑁆𑀢𑀭𑀸𑀦𑀺𑀭𑀧𑁂𑀓𑁆𑀔𑀸 𑀫𑀼𑀢𑁆𑀢𑀓𑀁, 𑀏𑀓𑀓𑁆𑀭𑀺𑀬𑀸𑀤𑀸𑀦𑁂𑀦 𑀅𑀜𑁆𑀜𑀫𑀜𑁆𑀜𑀲𑀸𑀧𑁂𑀓𑁆𑀔𑀸 𑀦𑀺𑀝𑁆𑀞𑀺𑀢𑀢𑁆𑀣𑀸 𑀧𑀘𑁆𑀘𑁂𑀓𑀁 𑀅𑀦𑀺𑀝𑁆𑀞𑀺𑀢𑀢𑁆𑀣𑀸 𑀕𑀸𑀣𑀸 𑀓𑀼𑀮𑀓𑀁, 𑀦𑀸𑀦𑀸𑀪𑀺𑀢𑁆𑀢𑀺𑀬𑁄 𑀪𑀺𑀦𑁆𑀦𑀓𑀺𑀭𑀺𑀬𑁄 𑀲𑀧𑁆𑀧𑀥𑀸𑀦𑀸 𑀕𑀸𑀣𑀸 𑀓𑁄𑀲𑁄 𑀯𑀺𑀬 𑀞𑀧𑀺𑀢𑀸 𑀓𑁄𑀲𑁄, 𑀏𑀓𑀪𑀺𑀢𑁆𑀢𑀺𑀧𑀤𑁄𑀲𑀸𑀤𑀺𑀓𑀁 𑀯𑀡𑁆𑀡𑁂𑀢𑀼𑀁 𑀲𑀫𑀼𑀤𑀸𑀬𑁂𑀦 𑀧𑀯𑀢𑁆𑀢𑀸 𑀪𑀺𑀦𑁆𑀦𑀓𑁆𑀭𑀺𑀬𑀸 𑀕𑀸𑀣𑀸 𑀲𑀗𑁆𑀖𑀸𑀢𑁄, 𑀲𑁄𑀧𑀺 𑀘𑀢𑀼𑀩𑁆𑀩𑀺𑀥𑁄 𑀧𑀚𑁆𑀚𑀧𑁆𑀧𑀓𑀸𑀭𑁄 𑀬𑀣𑀸𑀯𑀼𑀢𑁆𑀢𑀲𑀕𑁆𑀕𑀩𑀦𑁆𑀥𑁄𑀯𑀸𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀁. 𑀕𑀚𑁆𑀚𑀁 𑀦𑀸𑀫 𑀧𑀸𑀤𑀲𑀦𑁆𑀦𑀺𑀝𑁆𑀞𑀸𑀦𑀭𑀳𑀺𑀢𑁄 𑀲𑁆𑀬𑀸𑀤𑁆𑀬𑀦𑁆𑀢𑀢𑁆𑀬𑀸𑀤𑁆𑀬𑀦𑁆𑀢𑀧𑁆𑀧𑀩𑀦𑁆𑀥𑁄. 𑀢𑀲𑁆𑀲 𑀢𑀼 𑀤𑁆𑀯𑁂 𑀧𑀓𑀸𑀭𑀸 𑀆𑀔𑁆𑀬𑀸𑀬𑀺𑀓𑀸, 𑀓𑀣𑀸𑀢𑀺. 𑀯𑀺𑀫𑀺𑀲𑁆𑀲𑀁 𑀧𑀚𑁆𑀚𑀕𑀚𑁆𑀚𑀫𑀬𑀁 𑀦𑀸𑀝𑀓𑀧𑁆𑀧𑀓𑀭𑀡𑀸𑀤𑀺, 𑀘𑀫𑁆𑀧𑀽 𑀚𑀸𑀢𑀓𑀫𑀸𑀮𑀸𑀤𑀺𑀓𑀸 𑀘.

𑁮. 𑀇𑀤𑀸𑀦𑀺 𑀲𑀜𑁆𑀚𑀸𑀦𑀦𑀸𑀪𑀺𑀮𑀸𑀲𑀻𑀦𑀁 𑀅𑀮𑀗𑁆𑀓𑀸𑀭𑀦𑀺𑀲𑁆𑀲𑀺𑀢𑀁 𑀩𑀦𑁆𑀥𑀲𑀭𑀻𑀭𑀁, 𑀲𑁄𑀯 𑀩𑀦𑁆𑀥𑁄𑀢𑀺 𑀅𑀥𑀺𑀓𑀢𑀁, ‘‘𑀬𑁄 𑀓𑀼𑀡𑁆𑀟𑀮𑀻, 𑀲𑁄 𑀤𑁂𑀯𑀤𑀢𑁆𑀢𑁄’’𑀢𑀺 𑀧𑀲𑀺𑀤𑁆𑀥𑀓𑀼𑀡𑁆𑀟𑀮𑀺𑀢𑁆𑀢𑀸𑀦𑀼𑀯𑀸𑀤𑁂𑀦 𑀅𑀧𑁆𑀧𑀲𑀺𑀤𑁆𑀥𑀲𑁆𑀲 𑀤𑁂𑀯𑀤𑀢𑁆𑀢𑀢𑁆𑀢𑀯𑀺𑀥𑀸𑀦𑀁 𑀯𑀺𑀬 𑀤𑀲𑁆𑀲𑁂𑀦𑁆𑀢𑁄 ‘‘𑀩𑀦𑁆𑀥𑁄’’𑀘𑁆𑀘𑀸𑀤𑀺𑀫𑀸𑀳. 𑀢𑀢𑁆𑀣 𑀩𑀦𑁆𑀥𑁄 𑀦𑀸𑀫 𑀘 𑀩𑀦𑁆𑀥𑀦𑀁 𑀧𑀦. 𑀤𑁄𑀲𑀯𑀚𑁆𑀚𑀺𑀢𑀸 𑀲𑀤𑁆𑀤𑀢𑁆𑀣𑀦𑀺𑀲𑁆𑀲𑀺𑀢𑀤𑁄𑀲𑁂𑀳𑀺 𑀧𑀭𑀺𑀘𑁆𑀘𑀢𑁆𑀢𑀸, 𑀢𑁂 𑀯𑀸 𑀯𑀚𑁆𑀚𑀺𑀢𑀸 𑀏𑀢𑁂𑀳𑀺 𑀢𑀸𑀤𑀺𑀲𑀸. 𑀲𑀳𑀺𑀢𑀸 𑀅𑀜𑁆𑀜𑀫𑀜𑁆𑀜𑀸𑀦𑀼𑀭𑀽𑀧𑀢𑁆𑀣𑁂𑀦 𑀲𑀳𑀪𑀸𑀯𑀁 𑀕𑀢𑀸. 𑀲𑀤𑁆𑀤𑀢𑁆𑀣𑀸 𑀲𑀤𑁆𑀤𑁄, ¶ 𑀅𑀢𑁆𑀣𑁄 𑀘. 𑀏𑀯𑀁𑀧𑀓𑀸𑀭𑁂𑀳𑀺 𑀢𑀼 𑀈𑀤𑀺𑀲𑀲𑀤𑁆𑀤𑀢𑁆𑀣𑀸𑀦𑀁 𑀯𑀺𑀜𑁆𑀜𑀽𑀦𑀁 𑀢𑀼𑀝𑁆𑀞𑀺𑀚𑀦𑀓𑀅𑀜𑁆𑀜𑀫𑀜𑁆𑀜𑀸𑀦𑀼𑀭𑀽𑀧𑀕𑀼𑀡𑀲𑀳𑀺𑀢𑀸𑀦𑀁 𑀪𑀸𑀯𑁄𑀢𑀺 𑀯𑀘𑀦𑀢𑁆𑀣𑁂𑀦 ‘‘𑀲𑀸𑀳𑀺𑀘𑁆𑀘’’𑀫𑀺𑀢𑀺 𑀯𑀤𑀦𑁆𑀢𑀺. 𑀲𑀤𑁆𑀤𑀢𑁆𑀣𑀸𑀢𑀺 𑀏𑀢𑁆𑀣 𑀲𑀤𑁆𑀤𑀢𑁆𑀣𑀸𑀦𑀁 𑀓𑀺𑀁 𑀦𑀸𑀦𑀸𑀓𑀭𑀡𑀦𑁆𑀢𑀺? 𑀲𑀤𑁆𑀤𑁄 𑀧𑀦 𑀅𑀢𑁆𑀣𑀧𑁆𑀧𑀢𑀻𑀢𑀺𑀬𑀁 𑀅𑀢𑁆𑀢𑀦𑁄 𑀫𑀼𑀔𑁆𑀬𑀩𑁆𑀬𑀸𑀧𑀸𑀭𑀁 𑀮𑀓𑁆𑀔𑀡𑀩𑁆𑀬𑀸𑀧𑀸𑀭𑀁 𑀩𑁆𑀬𑀜𑁆𑀚𑀦𑀲𑀪𑀸𑀯𑀩𑁆𑀬𑀸𑀧𑀸𑀭𑀜𑁆𑀘𑁂𑀢𑀺 𑀢𑀺𑀯𑀺𑀥𑀁 𑀩𑁆𑀬𑀸𑀧𑀸𑀭𑀪𑁂𑀤𑁂𑀦. 𑀓𑀫𑀢𑁄 𑀯𑀸𑀘𑀓𑁄 𑀮𑀓𑁆𑀔𑀡𑀺𑀓𑁄 𑀩𑁆𑀬𑀜𑁆𑀚𑀦𑀓𑁄 𑀘𑁂𑀢𑀺 𑀢𑀺𑀯𑀺𑀥𑁄. 𑀢𑀣𑀸 𑀅𑀢𑁆𑀣𑁄𑀧𑀺 𑀯𑀸𑀘𑁆𑀘𑁄 𑀮𑀓𑁆𑀔𑀡𑀺𑀬𑁄 𑀩𑁆𑀬𑀗𑁆𑀕𑁆𑀬𑁄 𑀘𑁂𑀪𑀺 𑀢𑀺𑀯𑀺𑀥𑁄. 𑀅𑀢𑁆𑀭 𑀢𑀼 𑀯𑀸𑀘𑀓𑁄 𑀲𑀤𑁆𑀤𑁄 𑀅𑀢𑁆𑀢𑀦𑀸 𑀤𑀻𑀧𑁂𑀢𑀩𑁆𑀩𑀫𑀼𑀔𑁆𑀬𑀢𑁆𑀣𑀲𑁆𑀲 𑀚𑀸𑀢𑀺𑀕𑀼𑀡𑀓𑁆𑀭𑀺𑀬𑀸𑀤𑀩𑁆𑀩𑀪𑁂𑀤𑁂𑀦 𑀘𑀢𑀼𑀩𑁆𑀩𑀺𑀥𑀢𑁆𑀢𑀸 𑀲𑀬𑀫𑁆𑀧𑀺 𑀚𑀸𑀢𑀺𑀕𑀼𑀡𑀓𑁆𑀭𑀺𑀬𑀸𑀤𑀩𑁆𑀩𑀲𑀤𑁆𑀤𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄. 𑀯𑀸𑀘𑀓𑀲𑀤𑁆𑀤𑀲𑁆𑀲 𑀫𑀼𑀔𑁆𑀬𑀩𑁆𑀬𑀸𑀧𑀸𑀭𑁄 ‘‘𑀅𑀪𑀺𑀥𑀸’’𑀢𑀺 𑀘 𑀯𑁄𑀳𑀭𑀻𑀬𑀢𑀺. 𑀲𑁄 𑀫𑀼𑀔𑁆𑀬𑀩𑁆𑀬𑀸𑀧𑀸𑀭𑁄 𑀚𑀸𑀢𑁆𑀬𑀸𑀤𑀻𑀳𑀺 𑀅𑀩𑁆𑀬𑀯𑀳𑀺𑀢𑀢𑁆𑀣𑁂𑀯 𑀯𑀢𑁆𑀢𑀢𑁂. 𑀢𑀣𑀸 𑀳𑀺 ‘‘𑀕𑁄 𑀦𑀻𑀮𑀁 𑀧𑀸𑀘𑀓𑁄 𑀯𑀺𑀲𑀸𑀡𑀺’’𑀘𑁆𑀘𑀸𑀤𑁄 𑀕𑁄𑀆𑀤𑀺𑀲𑀤𑁆𑀤𑀸𑀦𑀁 𑀫𑀼𑀔𑁆𑀬𑀩𑁆𑀬𑀸𑀧𑀸𑀭𑁄 𑀕𑁄𑀧𑀺𑀡𑁆𑀟𑀦𑀻𑀮𑀧𑀝𑀧𑀸𑀘𑀓𑀓𑀢𑁆𑀢𑀼𑀲𑀺𑀗𑁆𑀕𑀻𑀢𑀺 𑀤𑀩𑁆𑀩𑀸𑀦𑀁 𑀯𑀺𑀲𑁂𑀲𑀦𑀪𑀽𑀢𑀚𑀸𑀢𑀺𑀕𑀼𑀡𑀓𑁆𑀭𑀺𑀬𑀸𑀤𑀩𑁆𑀩𑁂𑀲𑁆𑀯𑁂𑀯 𑀧𑀯𑀢𑁆𑀢𑀢𑀺, 𑀦 𑀧𑀦 𑀚𑀸𑀢𑁆𑀬𑀸𑀤𑀻𑀦𑀁 𑀦𑀺𑀲𑁆𑀲𑀬𑀪𑀽𑀢𑀕𑁄𑀧𑀺𑀡𑁆𑀟𑀸𑀤𑀻𑀲𑀽𑀢𑀺. 𑀯𑀼𑀢𑁆𑀢𑀁 𑀳𑀺𑁋

‘‘𑀯𑀺𑀲𑁂𑀲𑁆𑀬𑀁 𑀦𑀸𑀪𑀺𑀥𑀸 𑀕𑀘𑁆𑀙𑁂, 𑀔𑀻𑀡𑀲𑀢𑁆𑀢𑀺 𑀯𑀺𑀲𑁂𑀲𑀦𑁂’’𑀢𑀺 [𑀓𑀸𑀩𑁆𑀬𑀧𑁆𑀧𑀓𑀸𑀲𑁂 𑀤𑀼𑀢𑀺𑀬𑀉𑀮𑁆𑀮𑀸𑀲𑁂 𑀆𑀕𑀢𑀦𑁆𑀬𑀸𑀬𑁄’𑀬𑀁].

𑀢𑀲𑁆𑀲𑀢𑁆𑀣𑁄 𑁋 𑀯𑀺𑀲𑁂𑀲𑀦𑁂 𑀯𑀺𑀲𑁂𑀲𑀦𑀪𑀽𑀢𑀚𑀸𑀢𑁆𑀬𑀸𑀤𑀺𑀫𑁆𑀳𑀺 𑀔𑀻𑀡𑀲𑀢𑁆𑀢𑀺 𑀔𑀻𑀡𑀩𑁆𑀬𑀸𑀧𑀸𑀭𑀯𑀢𑀻 𑀅𑀪𑀺𑀥𑀸 𑀫𑀼𑀔𑁆𑀬𑀩𑁆𑀬𑀸𑀧𑀸𑀭𑁄𑀯 𑀯𑀺𑀲𑁂𑀲𑁆𑀬𑀁 𑀤𑀩𑁆𑀩𑀁 𑀦 𑀕𑀘𑁆𑀙𑁂 𑀦 𑀧𑀸𑀧𑀼𑀡𑀸𑀢𑀻𑀢𑀺.

𑀚𑀸𑀢𑁆𑀬𑀸𑀤𑀻𑀦𑀁 𑀦𑀺𑀲𑁆𑀲𑀬𑀕𑁄𑀧𑀺𑀡𑁆𑀟𑀸𑀤𑀺𑀓𑀁 𑀅𑀪𑀺𑀥𑀸 𑀦 𑀯𑀤𑀢𑀺 𑀘𑁂, 𑀏𑀯𑀜𑁆𑀘 𑀲𑀢𑀺 ‘‘𑀕𑁄 𑀕𑀘𑁆𑀙𑀢𑀺, 𑀦𑀻𑀮𑀁 𑀦𑀺𑀯𑀸𑀲𑁂𑀢𑀺, 𑀧𑀸𑀘𑀓𑁄 𑀆𑀕𑀘𑁆𑀙𑀢𑀺, 𑀲𑀺𑀗𑁆𑀕𑀻 𑀥𑀸𑀯𑀢𑀺’’𑀘𑁆𑀘𑀸𑀤𑀻𑀲𑀼 𑀚𑀸𑀢𑁆𑀬𑀸𑀤𑀺𑀯𑀺𑀲𑀺𑀝𑁆𑀞𑀕𑁄𑀧𑀺𑀡𑁆𑀟𑀸𑀤𑀻𑀦𑀁 𑀕𑁄𑀆𑀤𑀺𑀲𑀤𑁆𑀤𑀲𑁆𑀲 𑀓𑀣𑀁 𑀯𑀸𑀘𑀓𑀢𑁆𑀢𑀁 𑀬𑀼𑀚𑁆𑀚𑀢𑀻𑀢𑀺? 𑀤𑀩𑁆𑀩𑀸𑀥𑀻𑀦𑀚𑀸𑀢𑀺𑀕𑀼𑀡𑀸𑀤𑀻𑀲𑀼 𑀯𑀼𑀢𑁆𑀢𑁂𑀲𑀼 𑀢𑀩𑁆𑀩𑀺𑀲𑀺𑀝𑁆𑀞𑀲𑁆𑀲 𑀤𑀩𑁆𑀩𑀲𑁆𑀲 𑀧𑀭𑀺𑀬𑀸𑀬𑀢𑁄 𑀯𑀸𑀘𑀓𑀢𑁆𑀢𑀸. 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀦 𑀲𑀼𑀤𑁆𑀥𑀮𑀓𑁆𑀔𑀡𑀩𑁆𑀬𑀸𑀧𑀸𑀭𑀲𑁆𑀲𑁂𑀯 𑀯𑀺𑀲𑀬𑁄. 𑀮𑀓𑁆𑀔𑀡𑀩𑁆𑀬𑀸𑀧𑀸𑀭𑁄𑀧𑀺 𑀲𑀼𑀤𑁆𑀥𑁄 𑀉𑀧𑀘𑀸𑀭𑀫𑀺𑀲𑁆𑀲𑁄𑀢𑀺 𑀤𑀼𑀯𑀺𑀥𑁄. ¶ 𑀢𑀢𑁆𑀣 𑀲𑀼𑀤𑁆𑀥𑁄 𑀮𑀓𑁆𑀔𑀡𑀩𑁆𑀬𑀸𑀧𑀸𑀭𑁄 𑀚𑀸𑀢𑁆𑀬𑀸𑀤𑀺𑀯𑀚𑁆𑀚𑀺𑀢𑀢𑁆𑀣𑀯𑀺𑀲𑀬𑁄. 𑀢𑀣𑀸 𑀳𑀺 ‘‘𑀕𑁄 𑀕𑀘𑁆𑀙𑀢𑀺, 𑀦𑀻𑀮𑀁 𑀦𑀺𑀯𑀸𑀲𑁂𑀢𑀺, 𑀧𑀸𑀘𑀓𑁄 𑀆𑀕𑀘𑁆𑀙𑀢𑀺, 𑀲𑀺𑀗𑁆𑀕𑀻 𑀥𑀸𑀯𑀢𑀺, 𑀫𑀜𑁆𑀘𑀸 𑀉𑀕𑁆𑀖𑁄𑀲𑁂𑀦𑁆𑀢𑀺, 𑀕𑀗𑁆𑀕𑀸𑀬𑀁 𑀖𑁄𑀲𑁄’’𑀢𑁆𑀬𑀸𑀤𑀻𑀲𑀼 𑀚𑀸𑀢𑀺𑀕𑀼𑀡𑀓𑁆𑀭𑀺𑀬𑀸𑀲𑀺𑀗𑁆𑀕𑀤𑀩𑁆𑀩𑀫𑀜𑁆𑀘𑀕𑀗𑁆𑀕𑀸𑀤𑀻𑀦𑀁 𑀕𑀫𑀦𑀸𑀤𑀻𑀳𑀺 𑀬𑁄𑀕𑀸𑀲𑀫𑁆𑀪𑀯𑀢𑁄 𑀚𑀸𑀢𑀺𑀕𑀼𑀡𑀸𑀤𑀬𑁄 𑀅𑀢𑀺𑀓𑁆𑀓𑀫𑁆𑀫 𑀬𑀣𑀸𑀓𑁆𑀓𑀫𑀁 𑀕𑀫𑀦𑀦𑀺𑀯𑀸𑀲𑀦𑀆𑀕𑀫𑀦𑀥𑀸𑀯𑀦𑀉𑀕𑁆𑀖𑁄𑀲𑀦𑀖𑁄𑀲𑀸𑀤𑀻𑀦𑀁 𑀦𑀺𑀲𑁆𑀲𑀬𑀪𑀽𑀢𑀕𑁄𑀧𑀺𑀡𑁆𑀟𑀸𑀤𑀬𑁄 𑀧𑀭𑀸𑀫𑀲𑀢𑀺.

𑀫𑀺𑀲𑁆𑀲𑁄 𑀢𑀼 𑀉𑀧𑀘𑀸𑀭𑀪𑁂𑀤𑁂𑀦 𑀩𑀳𑀼𑀯𑀺𑀥𑁄. 𑀢𑀣𑀸 𑀳𑀺 𑀓𑀢𑁆𑀣𑀘𑀺 𑀓𑀸𑀭𑀡𑁂 𑀓𑀸𑀭𑀺𑀬𑀫𑀼𑀧𑀘𑀭𑀻𑀬𑀢𑁂, 𑀬𑀣𑀸 ‘‘𑀆𑀬𑀼𑀖𑀢’’𑀦𑁆𑀢𑀺, 𑀏𑀢𑁆𑀣 𑀆𑀬𑀼𑀯𑀟𑁆𑀠𑀦𑀓𑀸𑀭𑀡𑀪𑀽𑀢𑁂 𑀖𑀢𑁂 𑀓𑀸𑀭𑀺𑀬𑀪𑀽𑀢𑀆𑀬𑀼𑀦𑁄 𑀯𑁄𑀳𑀸𑀭𑁄 𑀆𑀭𑁄𑀧𑀺𑀢𑁄 𑀳𑁄𑀢𑀺. 𑀉𑀧𑀭𑀺𑀧𑀺 𑀉𑀧𑀘𑀸𑀭𑁄 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑀩𑁆𑀩𑁄. 𑀅𑀢𑀁𑀲𑀪𑀸𑀯𑁂 𑀳𑀺 𑀢𑀁𑀲𑀪𑀸𑀯𑀸𑀭𑁄𑀧𑀦𑀁 𑀉𑀧𑀘𑀸𑀭𑁄. 𑀓𑀢𑁆𑀣𑀘𑀺 𑀓𑀸𑀭𑀡𑀓𑀸𑀭𑀺𑀬𑀸𑀦𑀫𑀪𑁂𑀤𑁄, 𑀬𑀣𑀸 ‘‘𑀆𑀬𑀼𑀬𑁂𑀯 𑀖𑀢’’𑀦𑁆𑀢𑀺. 𑀓𑀢𑁆𑀣𑀘𑀺 𑀉𑀧𑀫𑁂𑀬𑁆𑀬𑀉𑀧𑀫𑀸𑀦𑁄𑀧𑀘𑀸𑀭𑁄, 𑀬𑀣𑀸 ‘‘𑀕𑁄 𑀩𑀸𑀳𑀺𑀓𑁄’’𑀢𑀺. 𑀓𑀢𑁆𑀣𑀘𑀺 𑀉𑀧𑀫𑀸𑀦𑀉𑀧𑀫𑁂𑀬𑁆𑀬𑀸𑀦𑀫𑀪𑁂𑀤𑁄, 𑀬𑀣𑀸 ‘‘𑀕𑁄𑀬𑁂𑀯𑀸𑀬𑀁 𑀩𑀸𑀳𑀺𑀓𑁄’’𑀢𑀺. 𑀓𑀢𑁆𑀣𑀘𑀺 𑀢𑀤𑀸𑀥𑀸𑀭𑀢𑀸𑀬 𑀢𑀤𑀽𑀧𑀘𑀸𑀭𑁄, 𑀬𑀣𑀸 ‘‘𑀧𑀤𑀻𑀧𑀝𑁆𑀞𑀸 𑀓𑀧𑀮𑁆𑀮𑀺𑀓𑀸 𑀧𑀤𑀻𑀧𑁄’’𑀢𑀺. 𑀓𑀢𑁆𑀣𑀘𑀺 𑀓𑁆𑀭𑀺𑀬𑀸𑀲𑀫𑁆𑀩𑀦𑁆𑀥𑁂𑀦 𑀢𑀁𑀩𑁆𑀬𑀧𑀤𑁂𑀲𑁄, 𑀬𑀣𑀸 ‘‘𑀅𑀯𑀟𑁆𑀠𑀓𑀻𑀧𑀺 𑀯𑀟𑁆𑀠𑀓𑀻 𑀅𑀬’’𑀦𑁆𑀢𑀺. 𑀓𑀢𑁆𑀣𑀘𑀺 𑀲𑀁𑀲𑀸𑀫𑀺𑀲𑀫𑁆𑀩𑀦𑁆𑀥𑁂𑀦 𑀢𑀁𑀩𑁆𑀬𑀧𑀤𑁂𑀲𑁄, 𑀬𑀣𑀸 ‘‘𑀭𑀸𑀚𑀯𑀮𑁆𑀮𑀪𑁄𑀧𑀺 𑀭𑀸𑀚𑀸 𑀅𑀬’’𑀦𑁆𑀢𑀺. 𑀓𑀢𑁆𑀣𑀘𑀺 𑀅𑀯𑀬𑀯𑁂 𑀲𑀫𑀼𑀤𑀸𑀬𑀩𑁆𑀬𑀧𑀤𑁂𑀲𑁄, 𑀬𑀣𑀸 ‘‘𑀧𑀝𑁄 𑀤𑀟𑁆𑀠𑁄’’𑀢𑀺. 𑀇𑀫𑀺𑀦𑀸 𑀫𑀼𑀔𑁂𑀦 𑀉𑀧𑀘𑀸𑀭𑀪𑁂𑀤𑁄 𑀤𑀝𑁆𑀞𑀩𑁆𑀩𑁄. 𑀩𑁆𑀬𑀜𑁆𑀚𑀦𑀲𑀪𑀸𑀯𑀩𑁆𑀬𑀸𑀧𑀸𑀭𑁄 𑀏𑀯 ‘‘𑀥𑀦’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀢𑀢𑀺𑀬𑀩𑁆𑀬𑀸𑀧𑀸𑀭𑀲𑁆𑀲 𑀯𑀺𑀲𑀬𑁄 𑀢𑀸𑀤𑀺𑀲𑀯𑀸𑀓𑁆𑀬𑀫𑁂𑀯 𑀯𑀸𑀢𑀺 𑀤𑀝𑁆𑀞𑀩𑁆𑀩𑁄.

𑀏𑀢𑁆𑀣 𑀩𑁆𑀬𑀗𑁆𑀕𑁆𑀬𑀢𑁆𑀣𑀁 𑀩𑀦𑁆𑀥𑀲𑁆𑀲 𑀚𑀻𑀯𑀺𑀢𑀫𑀺𑀢𑀺 𑀘, 𑀩𑁆𑀬𑀗𑁆𑀕𑁆𑀬𑀢𑁆𑀣𑀧𑀥𑀸𑀦𑀁 𑀩𑀦𑁆𑀥𑀫𑀼𑀢𑁆𑀢𑀫𑀦𑁆𑀢𑀺 𑀘, 𑀩𑁆𑀬𑀗𑁆𑀕𑁆𑀬𑀢𑁆𑀣𑀧𑀥𑀸𑀦𑀭𑀳𑀺𑀢𑀁 𑀫𑀚𑁆𑀛𑀺𑀫𑀦𑁆𑀢𑀺 𑀘, 𑀅𑀩𑁆𑀬𑀗𑁆𑀕𑁆𑀬𑀩𑀦𑁆𑀥𑀁 𑀅𑀥𑀫𑀫𑀺𑀢𑀺 𑀘 𑀯𑀤𑀦𑁆𑀢𑀺. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

𑀅𑀢𑁆𑀣𑀧𑁆𑀧𑀢𑀻𑀢𑀺𑀬𑀁 𑀲𑀤𑁆𑀤-𑀩𑁆𑀬𑀸𑀧𑀸𑀭𑁄 𑀢𑀺𑀯𑀺𑀥𑁄 𑀪𑀯𑁂;

𑀫𑀼𑀔𑁆𑀬𑁄 𑀮𑀓𑁆𑀔𑀡𑀩𑁆𑀬𑀜𑁆𑀚𑀦-𑀲𑀪𑀸𑀯𑁄 𑀘𑀸𑀢𑀺 𑀏𑀢𑁆𑀣 𑀢𑀼.

𑀅𑀪𑀺𑀥𑀸𑀧𑀭𑀧𑀭𑀺𑀬𑀸𑀬𑁄, ¶ 𑀩𑁆𑀬𑀸𑀧𑀸𑀭𑁄 𑀧𑀞𑀫𑁄 𑀪𑀯𑁂;

𑀥𑀦𑀦𑁆𑀢𑀸𑀧𑀭𑀧𑀭𑀺𑀬𑀸𑀬𑁄, 𑀩𑁆𑀬𑀸𑀧𑀸𑀭𑁄 𑀢𑀢𑀺𑀬𑁄 𑀧𑀼𑀦.

𑀫𑀼𑀔𑁆𑀬𑁄 𑀦𑀺𑀭𑀦𑁆𑀢𑀭𑀢𑁆𑀣𑁂𑀲𑀼, 𑀮𑀓𑁆𑀔𑀡𑀸 𑀢𑀼 𑀢𑀺𑀭𑁄𑀳𑀺𑀢𑁂;

𑀅𑀢𑁆𑀣𑁂’𑀢𑀭𑁄 𑀢𑀼 𑀯𑀸𑀓𑁆𑀬𑀲𑁆𑀲, 𑀅𑀢𑁆𑀣𑁂𑀬𑁂𑀯 𑀧𑀯𑀢𑁆𑀢𑀢𑀺.

𑀩𑁆𑀬𑀸𑀧𑀸𑀭𑀲𑁆𑀲 𑀧𑀪𑁂𑀤𑁂𑀦, 𑀢𑀺𑀥𑀸 𑀲𑀤𑁆𑀤𑁄𑀧𑀺 𑀯𑀸𑀘𑀓𑁄;

𑀮𑀓𑁆𑀔𑀡𑀺𑀓𑁄 𑀩𑁆𑀬𑀜𑁆𑀚𑀓𑁄𑀢𑀺, 𑀢𑀤𑀢𑁆𑀣𑁄𑀧𑀺 𑀢𑀺𑀥𑀸 𑀫𑀢𑁄.

𑀯𑀸𑀘𑁆𑀘𑁄 𑀮𑀓𑁆𑀔𑀡𑀺𑀬𑁄 𑀩𑁆𑀬𑀗𑁆𑀕𑁆𑀬𑁄-𑀘𑁆𑀘𑁂𑀯𑀁 𑀲𑀤𑁆𑀤𑁂𑀲𑀼 𑀯𑀸𑀘𑀓𑁄;

𑀚𑀸𑀢𑀺𑀕𑀼𑀡𑀓𑁆𑀭𑀺𑀬𑀸𑀤𑀩𑁆𑀩-𑀪𑁂𑀤𑁂𑀦 𑀲𑁄 𑀘𑀢𑀼𑀩𑁆𑀩𑀺𑀥𑁄.

𑀯𑀸𑀘𑁆𑀘𑀢𑁆𑀣𑀲𑁆𑀲 𑀘𑀢𑀼𑀤𑁆𑀥𑀸𑀯, 𑀪𑀺𑀦𑁆𑀦𑀢𑁆𑀢𑀸 𑀚𑀸𑀢𑀺𑀆𑀤𑀺𑀢𑁄;

𑀚𑀸𑀢𑁆𑀬𑀸𑀤𑀻𑀦𑀁 𑀧𑀪𑁂𑀤𑁂𑀦, 𑀢𑀣𑀸 𑀮𑀓𑁆𑀔𑀡𑀺𑀓𑁄 𑀫𑀢𑁄.

𑀉𑀧𑀘𑀸𑀭𑀩𑀳𑀼𑀢𑁆𑀢𑁂𑀦, 𑀪𑁂𑀤𑁂 𑀲𑀢𑀺𑀧𑀺 𑀢𑀲𑁆𑀲 𑀢𑀼;

𑀩𑁆𑀬𑀜𑁆𑀚𑀓𑁄 𑀢𑀼 𑀅𑀦𑀜𑁆𑀜𑀢𑁆𑀢𑀸, 𑀯𑀺𑀲𑀼𑀁 𑀢𑁂𑀳𑀺 𑀦 𑀯𑀼𑀘𑁆𑀘𑀢𑀻𑀢𑀺.

𑀮𑀓𑁆𑀔𑀡𑀢𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 ‘‘𑀫𑀼𑀦𑀺𑀦𑁆𑀤𑀯𑀤𑀦𑀫𑁆𑀪𑁄𑀚𑁂’’ 𑀢𑁆𑀬𑀸𑀤𑀺𑀕𑀸𑀣𑀸𑀬𑀁 𑀯𑀤𑀦𑀲𑀤𑁆𑀤𑀲𑁆𑀲 𑀫𑀼𑀔𑀢𑁆𑀣𑁄 𑀯𑀸𑀘𑁆𑀘𑀢𑁆𑀣𑁄, 𑀆𑀭𑁄𑀧𑀺𑀢𑀅𑀫𑁆𑀪𑁄𑀚𑀢𑁆𑀣𑁄 𑀮𑀓𑁆𑀔𑀡𑀺𑀬𑀢𑁆𑀣𑁄. 𑀅𑀫𑁆𑀪𑁄𑀚𑀲𑀤𑁆𑀤𑀲𑁆𑀲 𑀧𑀤𑀼𑀫𑀢𑁆𑀣𑁄 𑀯𑀸𑀘𑁆𑀘𑀢𑁆𑀣𑁄, 𑀉𑀧𑀘𑀭𑀺𑀢𑀫𑀼𑀔𑀢𑁆𑀣𑁄 𑀮𑀓𑁆𑀔𑀡𑀺𑀬𑀢𑁆𑀣𑁄. 𑀯𑀸𑀡𑀺𑀲𑀤𑁆𑀤𑀲𑁆𑀲 𑀲𑀤𑁆𑀥𑀫𑁆𑀫𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀯𑀸𑀘𑁆𑀘𑀢𑁆𑀣𑁄, 𑀆𑀭𑁄𑀧𑀺𑀢𑀤𑁂𑀯𑀢𑀸𑀅𑀢𑁆𑀣𑁄 𑀮𑀓𑁆𑀔𑀡𑀺𑀬𑀢𑁆𑀣𑁄. 𑀏𑀢𑁆𑀣 𑀆𑀲𑀻𑀲𑀦𑀸 𑀦𑀸𑀫 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀧𑀼𑀜𑁆𑀜𑀸𑀢𑀺𑀲𑀬𑀢𑀸, 𑀢𑀢𑁄 𑀇𑀥 𑀅𑀪𑀺𑀫𑀢𑀢𑁆𑀣𑀩𑀸𑀥𑀓𑀸𑀓𑀼𑀲𑀮𑀦𑀺𑀯𑀸𑀭𑀡𑀜𑁆𑀘 𑀓𑀼𑀲𑀮𑀸𑀦𑀫𑀦𑀼𑀩𑀮𑀧𑁆𑀧𑀤𑀸𑀦𑀜𑁆𑀘 𑀢𑀢𑁄 𑀓𑀸𑀬𑀘𑀺𑀢𑁆𑀢𑀧𑀻𑀴𑀸𑀯𑀺𑀕𑀫𑁄 𑀘 𑀢𑀢𑁄 𑀲𑀼𑀔𑀧𑁆𑀧𑀝𑀺𑀮𑀸𑀪𑁄 𑀘 𑀢𑀢𑁄 𑀘𑀺𑀢𑁆𑀢𑀲𑀫𑀸𑀥𑀸𑀦𑀜𑁆𑀘 𑀢𑀢𑁄𑀬𑁂𑀯 𑀅𑀦𑁂𑀓𑀯𑀺𑀥𑀢𑁆𑀣𑀸𑀯𑀩𑁄𑀥𑁄 𑀘 𑀢𑀢𑁄 𑀅𑀪𑀺𑀫𑀢𑀕𑀦𑁆𑀣𑀧𑀭𑀺𑀲𑀫𑀢𑁆𑀢𑀺 𑀘 𑀪𑀯𑀢𑀻𑀢𑁆𑀬𑀬𑀁 𑀯𑀸𑀓𑁆𑀬𑀲𑀸𑀫𑀢𑁆𑀣𑀺𑀬𑀢𑁄 𑀮𑀤𑁆𑀥𑀢𑁆𑀣𑁄 𑀩𑁆𑀬𑀗𑁆𑀕𑁆𑀬𑀢𑁆𑀢𑁄. 𑀢𑀁𑀢𑀁𑀅𑀢𑁆𑀣𑀧𑁆𑀧𑀓𑀸𑀲𑀓𑀸 𑀲𑀤𑁆𑀤𑀸 𑀯𑀸𑀘𑀓𑀮𑀓𑁆𑀔𑀡𑀺𑀓𑀩𑁆𑀬𑀜𑁆𑀚𑀦𑀓𑀸 𑀦𑀸𑀫 𑀪𑀯𑀦𑁆𑀢𑀺. 𑀏𑀯𑀁 𑀲𑀤𑁆𑀤𑀲𑀤𑁆𑀤𑀢𑁆𑀣𑀯𑀺𑀘𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀸𑀦𑀺 ¶ 𑀧𑀓𑀸𑀲𑀺𑀢𑀩𑀦𑁆𑀥𑀲𑁆𑀲 𑀪𑁂𑀤𑀁 𑀯𑀤𑀢𑀺 ‘‘𑀧𑀚𑁆𑀚𑀸’’𑀤𑀺𑀦𑀸. 𑀅𑀬𑀁 𑀯𑀼𑀢𑁆𑀢𑀮𑀓𑁆𑀔𑀡𑁄 𑀩𑀦𑁆𑀥𑁄 𑀧𑀚𑁆𑀚𑀕𑀚𑁆𑀚𑀯𑀺𑀫𑀺𑀲𑁆𑀲𑀸𑀦𑀁 𑀪𑁂𑀤𑁂𑀦 𑀕𑀸𑀣𑀸𑀘𑀼𑀡𑁆𑀡𑀺𑀬𑀢𑀤𑀼𑀪𑀬𑀫𑀺𑀲𑁆𑀲𑀸𑀦𑀁 𑀯𑀲𑁂𑀦 𑀢𑀺𑀥𑀸 𑀪𑀯𑁂. 𑀲𑀤𑁆𑀤𑁄 𑀘 𑀅𑀢𑁆𑀣𑁄 𑀘𑁂𑀢𑀺 𑀘, 𑀲𑀳𑀪𑀸𑀯𑀁 𑀇𑀢𑀸 𑀧𑀢𑁆𑀢𑀸𑀢𑀺 𑀘, 𑀤𑁄𑀲𑁂𑀳𑀺 𑀯𑀚𑁆𑀚𑀺𑀢𑀸, 𑀤𑁄𑀲𑁂 𑀯𑀸 𑀯𑀚𑁆𑀚𑀺𑀢𑀸 𑀬𑁂𑀳𑀻𑀢𑀺 𑀘, 𑀧𑀚𑁆𑀚𑀜𑁆𑀘 𑀕𑀚𑁆𑀚𑀜𑁆𑀘 𑀯𑀺𑀫𑀺𑀲𑁆𑀲𑀜𑁆𑀘𑁂𑀢𑀺 𑀘 𑀯𑀺𑀕𑁆𑀕𑀳𑁄. 𑀇𑀳 𑀧𑀚𑁆𑀚𑀁 𑀦𑀸𑀫 𑀫𑀼𑀢𑁆𑀢𑀓𑀓𑀼𑀮𑀓𑀓𑁄𑀲𑀓𑀲𑀗𑁆𑀖𑀸𑀢𑀯𑀲𑁂𑀦 𑀘𑀢𑀼𑀧𑁆𑀧𑀪𑁂𑀤𑀁 𑀙𑀦𑁆𑀤𑀲𑀺 𑀦𑀺𑀤𑁆𑀤𑀺𑀝𑁆𑀞𑀯𑀼𑀢𑁆𑀢𑀯𑀺𑀲𑁂𑀲𑀯𑀺𑀭𑀘𑀺𑀢𑀁 𑀘𑀢𑀼𑀧𑁆𑀧𑀤𑀺𑀓𑀕𑀸𑀣𑀸𑀩𑀦𑁆𑀥𑀁. 𑀢𑀢𑁆𑀣 𑀫𑀼𑀢𑁆𑀢𑀓𑀁 𑀦𑀸𑀫 𑀦𑀺𑀝𑁆𑀞𑀺𑀢𑀢𑁆𑀣𑀸 𑀲𑀧𑁆𑀧𑀥𑀸𑀦𑀸 𑀏𑀓𑀸 𑀕𑀸𑀣𑀸, 𑀓𑀼𑀮𑀓𑀁 𑀦𑀸𑀫 𑀧𑀘𑁆𑀘𑁂𑀓𑀫𑀦𑀺𑀝𑁆𑀞𑀺𑀢𑀢𑁆𑀣𑀸 𑀅𑀜𑁆𑀜𑀫𑀜𑁆𑀜𑀲𑀸𑀧𑁂𑀓𑁆𑀔𑀸 𑀏𑀓𑀓𑁆𑀭𑀺𑀬𑀸𑀤𑁆𑀯𑀸𑀭𑀺𑀓𑀸 𑀦𑀸𑀦𑀸𑀕𑀸𑀣𑀸, 𑀓𑁄𑀲𑀓𑁄 𑀦𑀸𑀫 𑀦𑀸𑀦𑀸𑀯𑀺𑀥𑀯𑀡𑁆𑀡𑀦𑀸𑀪𑀽𑀫𑀺𑀓𑀸 𑀪𑀺𑀦𑁆𑀦𑀓𑁆𑀭𑀺𑀬𑀸𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀲𑀧𑁆𑀧𑀥𑀸𑀦𑀸 𑀕𑀸𑀣𑀸𑀭𑀸𑀲𑀺, 𑀲𑀗𑁆𑀖𑀸𑀢𑁄 𑀦𑀸𑀫 𑀲𑀜𑁆𑀘𑁆𑀬𑀸𑀓𑀸𑀮𑀸𑀤𑀺𑀏𑀓𑀯𑀡𑁆𑀡𑀦𑀸𑀪𑀽𑀫𑀺𑀦𑀺𑀲𑁆𑀲𑀺𑀢𑀸 𑀪𑀺𑀦𑁆𑀦𑀓𑁆𑀭𑀺𑀬𑀸𑀲𑀫𑀼𑀤𑀸𑀬𑁂𑀦 𑀧𑀯𑀢𑁆𑀢𑀸 𑀕𑀸𑀣𑀸. 𑀕𑀚𑁆𑀚𑀁 𑀦𑀸𑀫 𑀅𑀦𑀺𑀬𑀢𑀧𑀤𑁄 𑀆𑀔𑁆𑀬𑀸𑀬𑀺𑀓𑀸𑀓𑀣𑀸𑀯𑀲𑁂𑀦 𑀤𑁆𑀯𑀺𑀧𑁆𑀧𑀪𑁂𑀤𑁄 𑀲𑁆𑀬𑀸𑀤𑁆𑀬𑀦𑁆𑀢𑀢𑁆𑀬𑀸𑀤𑁆𑀬𑀦𑁆𑀢𑁄 𑀯𑀘𑀦𑀧𑁆𑀧𑀩𑀦𑁆𑀥𑁄. 𑀫𑀺𑀲𑁆𑀲𑁄 𑀧𑀦 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀲𑀁𑀫𑀺𑀲𑁆𑀲𑁄 𑀦𑀸𑀝𑀓𑀧𑀓𑀭𑀡𑀸𑀤𑀺 𑀘 𑀚𑀸𑀢𑀓𑀫𑀸𑀮𑀸𑀤𑀺𑀘𑀫𑁆𑀧𑀽 𑀘.

𑁯.

𑀦𑀺𑀩𑀦𑁆𑀥𑁄 𑀘𑀸’𑀦𑀺𑀩𑀦𑁆𑀥𑁄 𑀘, 𑀧𑀼𑀦 𑀤𑁆𑀯𑀺𑀥𑀸 𑀦𑀺𑀭𑀼𑀧𑁆𑀧𑀢𑁂;

𑀢𑀁 𑀢𑀼 𑀧𑀸𑀧𑁂𑀦𑁆𑀢𑁆𑀬’𑀮𑀗𑁆𑀓𑀸𑀭𑀸, 𑀯𑀺𑀦𑁆𑀤𑀦𑀻𑀬𑀢𑀭𑀢𑁆𑀢𑀦𑀁.

𑁯. 𑀏𑀯𑀁 𑀢𑀺𑀧𑁆𑀧𑀓𑀸𑀭𑀁 𑀩𑀦𑁆𑀥𑀲𑀭𑀻𑀭𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀅𑀜𑁆𑀜𑀣𑀸𑀧𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦𑀺𑀩𑀦𑁆𑀥𑁄𑀘𑀸’𑀦𑀺𑀩𑀦𑁆𑀥𑁄 𑀘, 𑀧𑀼𑀦 𑀤𑁆𑀯𑀺𑀥𑀸 𑀦𑀺𑀭𑀼𑀧𑁆𑀧𑀢𑁂’’ 𑀇𑀢𑀺. 𑀧𑀼𑀦 𑀪𑀺𑀬𑁆𑀬𑁄 𑀬𑀣𑀸𑀯𑀼𑀢𑁆𑀢𑁄 𑀧𑀚𑁆𑀚𑀫𑀬𑀩𑀦𑁆𑀥𑁄 𑀤𑁆𑀯𑀺𑀥𑀸 𑀤𑁆𑀯𑀺𑀧𑁆𑀧𑀓𑀸𑀭𑁂𑀦 𑀦𑀺𑀭𑀼𑀧𑁆𑀧𑀢𑁂 𑀦𑀺𑀘𑁆𑀙𑀻𑀬𑀢𑁂. 𑀓𑀣𑀁? 𑀦𑀺𑀩𑀦𑁆𑀥𑁄 𑀘 𑀢𑀤𑁂𑀓𑀤𑁂𑀲𑀪𑀽𑀢𑁂𑀳𑀺 𑀫𑀼𑀢𑁆𑀢𑀓𑀸𑀤𑀻𑀳𑀺 𑀘𑀢𑀽𑀳𑀺 𑀲𑀕𑁆𑀕𑀩𑀦𑁆𑀥𑀸𑀤𑀺𑀯𑀲𑁂𑀦 𑀩𑀦𑁆𑀥𑁄 𑀘 𑀅𑀦𑀺𑀩𑀦𑁆𑀥𑁄 𑀘 𑀓𑁂𑀯𑀮𑀁 𑀫𑀼𑀢𑁆𑀢𑀓𑀯𑀲𑁂𑀦𑀸𑀢𑀺 𑀏𑀯𑀁 𑀤𑁆𑀯𑀺𑀥𑀸 𑀦𑀺𑀭𑀼𑀧𑁆𑀧𑀢𑁂 𑀇𑀢𑀺 𑀧𑀓𑀢𑀁. 𑀦𑀦𑀼 𑀢𑀲𑁆𑀲𑁂𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀯𑀸𑀢𑀺𑀫𑀬𑀲𑁆𑀲 𑀲𑀓𑁆𑀓𑀝𑀁 𑀧𑀸𑀓𑀢𑀁 𑀅𑀧𑀩𑁆𑀪𑀁𑀲𑁄 𑀧𑁂𑀲𑀸𑀘𑀺𑀓𑀁 𑀫𑀺𑀲𑁆𑀲𑀜𑁆𑀘𑁂𑀢𑀺 𑀧𑀜𑁆𑀘𑀯𑀺𑀥𑀢𑁆𑀢𑀁 𑀯𑀢𑁆𑀯𑀸 ‘‘𑀲𑀓𑁆𑀓𑀝𑀁 𑀦𑀸𑀫 𑀤𑁂𑀯𑀢𑀸𑀪𑀸𑀲𑀸. 𑀧𑀸𑀓𑀢𑀁 𑀘𑀢𑀼𑀩𑁆𑀩𑀺𑀥𑀁 𑀲𑀓𑁆𑀓𑀝𑁂𑀳𑀺 𑀯𑀡𑁆𑀡𑀜𑁆𑀜𑀢𑁆𑀢𑀫𑀢𑁆𑀢𑁂𑀦 𑀉𑀧𑁆𑀧𑀦𑁆𑀦𑀢𑁆𑀢𑀸 ¶ 𑀫𑀳𑀺𑀦𑁆𑀤𑀲𑀺𑀦𑁆𑀥𑀯𑀸𑀤𑀺 𑀢𑀩𑁆𑀪𑀯𑀁, 𑀢𑀲𑁆𑀲𑀫𑀁 𑀳𑀺𑀭𑀺𑀳𑀭𑀓𑀫𑀮𑀸𑀤𑀺, 𑀫𑀳𑀸𑀭𑀝𑁆𑀞𑀸𑀤𑀺𑀤𑁂𑀲𑀧𑀲𑀺𑀤𑁆𑀥𑀁 𑀤𑁂𑀲𑀻𑀬𑀁, 𑀢𑀩𑁆𑀪𑀯𑀸𑀤𑀻𑀳𑀺 𑀲𑀫𑁆𑀫𑀺𑀲𑁆𑀲𑀁 𑀫𑀺𑀲𑁆𑀲𑀁. 𑀆𑀪𑀻𑀭𑀸𑀤𑀻𑀦𑀁 𑀯𑀸𑀘𑀸 𑀅𑀧𑀩𑁆𑀪𑀁𑀲𑁄, 𑀲𑁄 𑀘 𑀧𑀸𑀓𑀢𑀁 𑀯𑀺𑀬 𑀘𑀢𑀼𑀩𑁆𑀩𑀺𑀥𑁄, 𑀢𑀺𑀯𑀺𑀥𑁄 𑀘 𑀦𑀸𑀕𑀭𑀉𑀧𑀦𑀸𑀕𑀭𑀯𑀼𑀤𑁆𑀥𑀪𑁂𑀤𑁂𑀦. 𑀧𑀺𑀲𑀸𑀘𑀸𑀦𑀁 𑀯𑀘𑀦𑀁 𑀧𑁂𑀲𑀸𑀘𑀺𑀓𑀁. 𑀲𑀩𑁆𑀩𑁂𑀲𑀁 𑀯𑀲𑁂𑀦 𑀫𑀺𑀲𑁆𑀲’’𑀦𑁆𑀢𑀺 𑀲𑀓𑁆𑀓𑀝𑀸𑀤𑀻𑀦𑀁 𑀮𑀓𑁆𑀔𑀡𑀁 𑀯𑀼𑀢𑁆𑀢𑀁. 𑀢𑀣𑀸 ‘‘𑀲𑀺𑀗𑁆𑀕𑀸𑀭𑀧𑁆𑀧𑀥𑀸𑀦𑀦𑀘𑁆𑀘𑀲𑀗𑁆𑀔𑀸𑀢𑀮𑀸𑀲𑁆𑀬𑀸𑀤𑀻𑀦𑀁 𑀧𑀝𑀺𑀧𑀸𑀤𑀓𑀢𑁆𑀣𑁂𑀦 𑀮𑀸𑀲𑁆𑀬𑀸𑀤𑀺𑀓𑀫𑀪𑀺𑀦𑀬𑀧𑁆𑀧𑀥𑀸𑀦𑀢𑁆𑀢𑀸 𑀤𑀲𑁆𑀲𑀦𑀻𑀬𑀁, 𑀇𑀢𑀭𑀁 𑀓𑀩𑁆𑀩𑀁 𑀲𑀯𑀦𑀻𑀬’’𑀦𑁆𑀢𑀺 𑀤𑀼𑀯𑀺𑀥𑀁 𑀯𑀼𑀢𑁆𑀢𑀁, 𑀏𑀯𑀁 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀪𑀸𑀲𑀸𑀪𑁂𑀤𑁂𑀦 𑀯𑀼𑀢𑁆𑀢𑀁 𑀧𑀜𑁆𑀘𑀯𑀺𑀥𑀢𑁆𑀢𑀁, 𑀯𑀺𑀦𑀺𑀬𑁄𑀕𑀪𑁂𑀤𑁂𑀦 𑀯𑀼𑀢𑁆𑀢𑀁 𑀤𑀼𑀯𑀺𑀥𑀢𑁆𑀢𑀜𑁆𑀘 𑀇𑀥 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺? 𑀲𑀘𑁆𑀘𑀁, 𑀢𑀣𑀸𑀧𑀺 𑀢𑀤𑁂𑀯𑀫𑀺𑀥𑀸𑀦𑀼𑀧𑀬𑁄𑀕𑀺𑀢𑀸𑀬 𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀫𑀮𑀗𑁆𑀓𑀸𑀭𑀸𑀥𑀺𑀝𑁆𑀞𑀸𑀦𑀪𑀸𑀯𑁂𑀦 𑀧𑀞𑀫𑀁 𑀩𑀦𑁆𑀥𑀲𑀭𑀻𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀳𑀸𑀭𑀓𑁂𑀬𑀽𑀭𑀸𑀤𑀺𑀦𑀸 𑀧𑀼𑀭𑀺𑀲𑀲𑀭𑀻𑀭𑀫𑀺𑀯 𑀩𑀦𑁆𑀥𑀲𑀭𑀻𑀭𑀁 𑀲𑀤𑁆𑀤𑀸𑀮𑀗𑁆𑀓𑀸𑀭𑀅𑀢𑁆𑀣𑀸𑀮𑀗𑁆𑀓𑀸𑀭𑁂𑀳𑀺 𑀯𑀺𑀦𑁆𑀤𑀦𑀻𑀬𑀢𑀭𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀢𑀁 𑀢𑀼’’ 𑀇𑀘𑁆𑀘𑀸𑀤𑀺. 𑀢𑀼𑀲𑀤𑁆𑀤𑁄 𑀯𑀺𑀲𑁂𑀲𑀯𑀘𑀦𑀺𑀘𑁆𑀙𑀸𑀬𑀁. 𑀢𑀁 𑀩𑀦𑁆𑀥𑀲𑀭𑀻𑀭𑀁 𑀢𑀼 𑀅𑀮𑀗𑁆𑀓𑀸𑀭𑀸 𑀅𑀮𑀗𑁆𑀓𑀭𑀺𑀬𑀢𑀺 𑀢𑀁 𑀩𑀦𑁆𑀥𑀲𑀭𑀻𑀭𑀫𑁂𑀢𑁂𑀳𑀻𑀢𑀺 𑀧𑀲𑀸𑀤𑀸𑀤𑀬𑁄 𑀲𑀤𑁆𑀤𑀸𑀮𑀗𑁆𑀓𑀸𑀭𑀸, 𑀲𑀪𑀸𑀯𑀯𑀼𑀢𑁆𑀬𑀸𑀤𑀬𑁄 𑀅𑀢𑁆𑀣𑀸𑀮𑀗𑁆𑀓𑀸𑀭𑀸 𑀘 𑀯𑀺𑀦𑁆𑀤𑀦𑀻𑀬𑀢𑀭𑀢𑁆𑀢𑀦𑀁 𑀅𑀢𑀺𑀲𑀬𑁂𑀦 𑀯𑀺𑀦𑁆𑀤𑀦𑀻𑀬𑀪𑀸𑀯𑀁 𑀅𑀲𑁆𑀲𑀸𑀤𑀦𑀻𑀬𑀪𑀸𑀯𑀁 𑀧𑀸𑀧𑁂𑀦𑁆𑀢𑀺 𑀦𑀬𑀦𑁆𑀢𑀺. 𑀲𑀩𑁆𑀩𑀣𑀸 𑀦𑀺𑀤𑁆𑀤𑁄𑀲𑀪𑀽𑀢𑀸𑀦𑀁 𑀲𑀤𑁆𑀤𑀢𑁆𑀣𑀸𑀦𑀁 𑀅𑀜𑁆𑀜𑀫𑀜𑁆𑀜𑀸𑀦𑀼𑀭𑀽𑀧𑀢𑁄 𑀲𑀳𑀺𑀢𑀪𑀸𑀯𑁂𑀦 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀁 𑀢𑀸𑀤𑀺𑀲𑀧𑀼𑀭𑀺𑀲𑀲𑀭𑀻𑀭𑀫𑀺𑀯 𑀯𑀺𑀦𑁆𑀤𑀦𑀻𑀬𑀫𑁆𑀧𑀺 𑀲𑀫𑀸𑀦𑀁 𑀅𑀮𑀗𑁆𑀓𑀸𑀭𑁂𑀳𑀺 𑀧𑀲𑀸𑀥𑀺𑀢𑁂 𑀲𑀢𑀺 𑀅𑀘𑁆𑀘𑀦𑁆𑀢𑀫𑁂𑀯 𑀯𑀺𑀦𑁆𑀤𑀦𑀻𑀬𑀁 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁯. 𑀧𑀼𑀦𑀧𑀺 𑀢𑀲𑁆𑀲𑁂𑀯 𑀩𑀦𑁆𑀥𑀲𑁆𑀲 𑀪𑁂𑀤𑀁 𑀓𑀣𑁂𑀢𑀼𑀁 ‘‘𑀦𑀺𑀩𑀦𑁆𑀥𑁄 𑀘𑀸’’𑀤𑀺𑀫𑀸𑀳. 𑀧𑀼𑀦 𑀦𑀺𑀩𑀦𑁆𑀥𑁄 𑀘 𑀫𑀼𑀢𑁆𑀢𑀓𑀸𑀤𑀻𑀳𑀺 𑀘𑀢𑀽𑀳𑀺 𑀅𑀯𑀺𑀦𑀸𑀪𑀸𑀯𑀢𑁄 𑀫𑀳𑀸𑀓𑀩𑁆𑀩𑀸𑀤𑀺𑀲𑀪𑀸𑀯𑁂𑀦 𑀦𑀺𑀭𑀦𑁆𑀢𑀭𑀁 𑀓𑀢𑁆𑀯𑀸 𑀩𑀦𑁆𑀥𑁄 𑀘 𑀅𑀦𑀺𑀩𑀦𑁆𑀥𑁄 𑀘 𑀓𑁂𑀯𑀮𑀁 𑀫𑀳𑀸𑀓𑀩𑁆𑀩𑀸𑀤𑀺𑀲𑀪𑀸𑀯𑁂𑀦 𑀫𑀼𑀢𑁆𑀢𑀓𑀢𑁆𑀢𑀸 𑀅𑀦𑀺𑀭𑀦𑁆𑀢𑀭𑀁 𑀓𑀢𑁆𑀯𑀸 𑀩𑀦𑁆𑀥𑁄 𑀘𑀸𑀢𑀺 𑀲𑁄𑀯 𑀩𑀦𑁆𑀥𑁄 𑀤𑁆𑀯𑀺𑀥𑀸 𑀦𑀺𑀭𑀼𑀧𑁆𑀧𑀢𑁂 𑀦𑀺𑀘𑁆𑀙𑀻𑀬𑀢𑁂. ¶ 𑀧𑀼𑀦𑀧𑀺 𑀲𑁄 𑀩𑀦𑁆𑀥𑁄 𑀲𑀓𑁆𑀓𑀝𑀧𑀸𑀓𑀢𑀅𑀧𑀩𑁆𑀪𑀁 𑀲𑀧𑁂𑀲𑀸𑀘𑀺𑀓𑀫𑀺𑀲𑁆𑀲𑀪𑀸𑀲𑀸𑀪𑁂𑀤𑁂𑀦 𑀧𑀜𑁆𑀘𑀯𑀺𑀥𑁄. 𑀲𑀺𑀗𑁆𑀕𑀸𑀭𑀧𑀥𑀸𑀦𑀦𑀘𑁆𑀘𑀲𑀗𑁆𑀔𑀸𑀢𑀮𑀸𑀲𑁆𑀬𑀸𑀤𑀻𑀦𑀁 𑀤𑀲𑁆𑀲𑀦𑀧𑁆𑀧𑀥𑀸𑀦𑀢𑁆𑀢𑀸 𑀢𑀸𑀤𑀺𑀲𑀁 𑀦𑀘𑁆𑀘𑀁𑀤𑀲𑁆𑀲𑀦𑀻𑀬𑀁, 𑀢𑀤𑀜𑁆𑀜𑀁 𑀓𑀩𑁆𑀩𑀁 𑀲𑀯𑀦𑀻𑀬𑀫𑀺𑀢𑀺 𑀯𑀴𑀜𑁆𑀚𑀦𑀪𑁂𑀤𑀢𑁄 𑀤𑀼𑀯𑀺𑀥𑁄 𑀘 𑀳𑁄𑀢𑀺. 𑀲𑁄 𑀲𑀩𑁆𑀩𑁄𑀧𑀺 𑀧𑀬𑁄𑀚𑀦𑀸𑀪𑀸𑀯𑀢𑁄 𑀇𑀳 𑀦 𑀕𑀳𑀺𑀢𑁄. 𑀢𑀢𑁆𑀣 𑀲𑀓𑁆𑀓𑀝𑀁 𑀦𑀸𑀫 𑀤𑁂𑀯𑀢𑀸𑀪𑀸𑀲𑀸. 𑀢𑀢𑁄 𑀓𑁂𑀳𑀺𑀘𑀺 𑀅𑀓𑁆𑀔𑀭𑁂𑀳𑀺 𑀪𑀺𑀦𑁆𑀦𑀁 𑀧𑀸𑀓𑀢𑀁 𑀦𑀸𑀫. 𑀢𑀁 𑀧𑀦 𑀢𑀩𑁆𑀪𑀯𑀢𑀲𑁆𑀲𑀫𑀤𑁂𑀲𑀺𑀬𑀫𑀺𑀲𑁆𑀲𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀲𑀓𑁆𑀓𑀝𑀢𑁄 𑀯𑀡𑁆𑀡𑀜𑁆𑀜𑀢𑁆𑀢𑀫𑀢𑁆𑀢𑁂𑀦 𑀦𑀺𑀩𑁆𑀩𑀢𑁆𑀢𑀁 𑀢𑀩𑁆𑀪𑀯𑀁 𑀦𑀸𑀫, 𑀢𑀁 𑀫𑀳𑀺𑀦𑁆𑀤𑀲𑀺𑀦𑁆𑀥𑀯𑀸𑀤𑀺. 𑀢𑀲𑁆𑀲𑀫𑀁 𑀳𑀺𑀭𑀺𑀳𑀭𑀓𑀫𑀮𑀸𑀤𑀺. 𑀤𑁂𑀲𑁂 𑀧𑀲𑀺𑀤𑁆𑀥𑀁 𑀤𑁂𑀲𑀺𑀬𑀁. 𑀫𑀺𑀲𑁆𑀲𑀁 𑀦𑀸𑀫 𑀢𑀩𑁆𑀪𑀯𑀸𑀤𑀻𑀳𑀺 𑀲𑀫𑁆𑀫𑀺𑀲𑁆𑀲𑀁. 𑀅𑀧𑀩𑁆𑀪𑀁𑀲𑁄 𑀦𑀸𑀫 𑀕𑁄𑀧𑀸𑀮𑀓𑀸𑀤𑀻𑀦𑀁 𑀯𑀸𑀘𑀸, 𑀲𑁄 𑀘 𑀢𑀩𑁆𑀪𑀯𑀸𑀤𑀻𑀳𑀺 𑀘𑀢𑀼𑀩𑁆𑀩𑀺𑀥𑁄, 𑀦𑀸𑀕𑀭𑀉𑀧𑀦𑀸𑀕𑀭𑀯𑀼𑀤𑁆𑀥𑀪𑁂𑀤𑁂𑀦 𑀢𑀺𑀯𑀺𑀥𑁄 𑀘 𑀳𑁄𑀢𑀺. 𑀧𑀺𑀲𑀸𑀘𑀸𑀦𑀁 𑀯𑀘𑀦𑀁 𑀧𑁂𑀲𑀸𑀘𑀺𑀓𑀁. 𑀢𑁂𑀳𑀺 𑀲𑀓𑁆𑀓𑀝𑀸𑀤𑀻𑀳𑀺 𑀲𑀫𑁆𑀫𑀺𑀲𑁆𑀲𑀁 𑀫𑀺𑀲𑁆𑀲𑀁 𑀦𑀸𑀫 𑀳𑁄𑀢𑀺. 𑀇𑀤𑀸𑀦𑀺 𑀈𑀤𑀺𑀲𑀧𑁆𑀧𑀪𑁂𑀤𑀯𑀦𑁆𑀢𑀩𑀦𑁆𑀥𑀲𑁆𑀲 𑀅𑀮𑀗𑁆𑀓𑀸𑀭𑁂𑀦 𑀲𑁄𑀪𑀦𑀢𑁆𑀢𑀁 𑀯𑀢𑁆𑀢𑀼𑀁 ‘‘𑀢𑀁 𑀢𑀼’’𑀘𑁆𑀘𑀸𑀤𑀺𑀫𑀸𑀳. 𑀢𑀁 𑀢𑀼 𑀢𑀁 𑀧𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀩𑀦𑁆𑀥𑀲𑀭𑀻𑀭𑀁 𑀅𑀮𑀗𑁆𑀓𑀸𑀭𑀸 𑀧𑀲𑀸𑀤𑀸𑀤𑀺𑀲𑀤𑁆𑀤𑀸𑀮𑀗𑁆𑀓𑀸𑀭𑀸, 𑀲𑀪𑀸𑀯𑀯𑀼𑀢𑁆𑀬𑀸𑀤𑀺𑀅𑀢𑁆𑀣𑀸𑀮𑀗𑁆𑀓𑀸𑀭𑀸 𑀘 𑀯𑀺𑀦𑁆𑀤𑀦𑀻𑀬𑀢𑀭𑀢𑁆𑀢𑀦𑀁 𑀅𑀢𑀺𑀲𑀬𑀧𑀲𑀸𑀤𑀦𑀻𑀬𑀢𑁆𑀢𑀁 𑀧𑀸𑀧𑁂𑀦𑁆𑀢𑀺. 𑀦𑀺𑀭𑀦𑁆𑀢𑀭𑀁 𑀩𑀦𑁆𑀥𑁄 𑀦𑀺𑀩𑀦𑁆𑀥𑁄𑀢𑀺 𑀘, 𑀦 𑀦𑀺𑀩𑀦𑁆𑀥𑁄 𑀅𑀦𑀺𑀩𑀦𑁆𑀥𑁄𑀢𑀺 𑀘, 𑀅𑀢𑀺𑀲𑀬𑁂𑀦 𑀯𑀺𑀦𑁆𑀤𑀦𑀻𑀬𑁄 𑀯𑀺𑀦𑁆𑀤𑀦𑀻𑀬𑀢𑀭𑁄, 𑀢𑀲𑁆𑀲 𑀪𑀸𑀯𑁄 𑀯𑀺𑀦𑁆𑀤𑀦𑀻𑀬𑀢𑀭𑀢𑁆𑀢𑀦𑀦𑁆𑀢𑀺 𑀘 𑀯𑀺𑀕𑁆𑀕𑀳𑁄.

𑁧𑁦.

𑀅𑀦𑀯𑀚𑁆𑀚𑀁 𑀫𑀼𑀔𑀫𑁆𑀪𑁄𑀚-𑀫𑀦𑀯𑀚𑁆𑀚𑀸 𑀘 𑀪𑀸𑀭𑀢𑀻;

𑀅𑀮𑀗𑁆𑀓𑀢𑀸𑀯 𑀲𑁄𑀪𑀦𑁆𑀢𑁂, 𑀓𑀺𑀁 𑀦𑀼’𑀢𑁂 𑀦𑀺𑀭𑀮𑀗𑁆𑀓𑀢𑀸?

𑁧𑁦. 𑀢𑀫𑁂𑀯 𑀲𑀫𑀢𑁆𑀣𑁂𑀢𑀺 ‘‘𑀅𑀦𑀯𑀚𑁆𑀚’’ 𑀫𑀺𑀘𑁆𑀘𑀸𑀤𑀺𑀦𑀸. 𑀅𑀦𑀯𑀚𑁆𑀚𑀁 𑀅𑀜𑁆𑀜𑀫𑀜𑁆𑀜𑀸𑀦𑀼𑀭𑀽𑀧𑀸𑀥𑀺𑀓𑀢𑀦𑁂𑀢𑁆𑀢𑀓𑀡𑁆𑀡𑀸𑀤𑀺𑀅𑀯𑀬𑀯𑁂𑀦 𑀧𑀺𑀴𑀓𑀢𑀺𑀮𑀓𑀓𑀸𑀴𑀓𑀸𑀤𑁆𑀬𑀦𑀸𑀳𑀢𑀸𑀬 𑀘 𑀲𑀼𑀦𑁆𑀤𑀭𑀪𑀸𑀯𑀢𑁄 𑀅𑀕𑀭𑀳𑀺𑀢𑀁 𑀫𑀼𑀔𑀫𑁆𑀪𑁄𑀚𑀁 𑀯𑀤𑀦𑀸𑀭𑀯𑀺𑀦𑁆𑀤𑀜𑁆𑀘 𑀢𑀣𑀸 𑀅𑀦𑀯𑀚𑁆𑀚𑀸 𑀧𑀤𑀸𑀤𑀺𑀤𑁄𑀲𑀸𑀦𑀪𑀺𑀪𑀽𑀢𑀸𑀬 𑀲𑀼𑀦𑁆𑀤𑀭𑀪𑀸𑀯𑁂𑀦 𑀅𑀕𑀭𑀳𑀺𑀢𑀸 𑀪𑀸𑀭𑀢𑀻 𑀘 𑀯𑀸𑀡𑀻 𑀉𑀧𑀘𑀸𑀭𑀢𑁄 𑀢𑀧𑁆𑀧𑀝𑀺𑀧𑀸𑀤𑀦𑀻𑀬𑁄 𑀅𑀢𑁆𑀣𑁄 𑀘𑀸𑀢𑀺 𑀏𑀢𑁂 𑀅𑀮𑀗𑁆𑀓𑀢𑀸𑀯 ¶ 𑀫𑀼𑀔𑀁 𑀢𑀺𑀮𑀓𑀢𑀸𑀟𑀗𑁆𑀓𑀸𑀤𑀺𑀦𑀸𑀮𑀗𑁆𑀓𑀸𑀭𑁂𑀦, 𑀲𑀤𑁆𑀤𑀢𑁆𑀣𑀸 𑀲𑀤𑁆𑀤𑀸𑀮𑀗𑁆𑀓𑀸𑀭𑀅𑀢𑁆𑀣𑀸𑀮𑀗𑁆𑀓𑀸𑀭𑁂𑀳𑀺 𑀧𑀲𑀸𑀥𑀺𑀢𑀸 𑀲𑀚𑁆𑀚𑀺𑀢𑀸 𑀏𑀯, 𑀦𑀺𑀭𑀮𑀗𑁆𑀓𑀢𑀸 𑀢𑀣𑀸 𑀅𑀧𑀲𑀸𑀥𑀺𑀢𑀸 𑀅𑀲𑀚𑁆𑀚𑀺𑀢𑀸 𑀲𑁄𑀪𑀦𑁆𑀢𑁂 𑀓𑀺𑀁 𑀦𑀼, 𑀦 𑀲𑁄𑀪𑀦𑁆𑀢𑁂𑀯𑀸𑀢𑀺 𑀯𑀺𑀢𑀓𑁆𑀓𑁂𑀫𑀻𑀢𑀺 𑀅𑀢𑁆𑀣𑁄. 𑀦𑀼𑀇𑀢𑀺 𑀯𑀺𑀢𑀓𑁆𑀓𑁂.

𑁧𑁦. 𑀢𑀫𑁂𑀯 ‘‘𑀅𑀦𑀯𑀚𑁆𑀚’’ 𑀫𑀺𑀘𑁆𑀘𑀸𑀤𑀺𑀦𑀸 𑀲𑀫𑀢𑁆𑀣𑁂𑀢𑀺. 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀅𑀯𑀬𑀯𑀲𑀫𑁆𑀧𑀢𑁆𑀢𑀺𑀬𑀸 𑀘 𑀧𑀺𑀴𑀓𑀢𑀺𑀮𑀓𑀓𑀸𑀴𑀓𑀸𑀤𑀺𑀤𑁄𑀲𑀭𑀳𑀺𑀢𑀢𑁆𑀢𑀸 𑀘 𑀅𑀦𑀺𑀦𑁆𑀤𑀺𑀢𑀁 𑀫𑀼𑀔𑀫𑁆𑀪𑁄𑀚𑀜𑁆𑀘 𑀅𑀦𑀯𑀚𑁆𑀚𑀸 𑀧𑀤𑀤𑁄𑀲𑀯𑀸𑀓𑁆𑀬𑀤𑁄𑀲𑀅𑀢𑁆𑀣𑀤𑁄𑀲𑁂𑀳𑀺 𑀅𑀫𑀺𑀲𑁆𑀲𑀢𑁆𑀢𑀸 𑀅𑀕𑀭𑀳𑀺𑀢𑀸 𑀪𑀸𑀭𑀢𑀻 𑀯𑀸𑀡𑀻 𑀘 𑀅𑀪𑁂𑀤𑁄𑀧𑀘𑀸𑀭𑁂𑀦 𑀢𑀧𑁆𑀧𑀝𑀺𑀧𑀸𑀤𑀦𑀻𑀬𑀢𑁆𑀣𑁄 𑀘𑀸𑀢𑀺 𑀇𑀫𑁂 𑀅𑀮𑀗𑁆𑀓𑀢𑀸𑀯 𑀓𑀼𑀡𑁆𑀟𑀮𑀢𑀺𑀮𑀓𑀸𑀤𑀺𑀆𑀪𑀭𑀡𑁂𑀳𑀺 𑀘 𑀲𑀤𑁆𑀤𑀸𑀮𑀗𑁆𑀓𑀸𑀭𑀅𑀢𑁆𑀣𑀸𑀮𑀗𑁆𑀓𑀸𑀭𑁂𑀳𑀺 𑀘 𑀲𑀚𑁆𑀚𑀺𑀢𑀸 𑀏𑀯, 𑀦𑀺𑀭𑀮𑀗𑁆𑀓𑀢𑀸 𑀢𑁂𑀳𑀺 𑀅𑀯𑀺𑀪𑀽𑀲𑀺𑀢𑀸 𑀲𑁄𑀪𑀦𑁆𑀢𑁂 𑀓𑀺𑀁 𑀦𑀼, 𑀦 𑀲𑁄𑀪𑀦𑁆𑀢𑁂𑀢𑀺 𑀫𑀜𑁆𑀜𑁂. 𑀦𑀢𑁆𑀣𑀺 𑀅𑀯𑀚𑁆𑀚𑀫𑀲𑁆𑀲𑀸𑀢𑀺 𑀘, 𑀫𑀼𑀔𑀫𑁂𑀯 𑀅𑀫𑁆𑀪𑁄𑀚𑀫𑀺𑀢𑀺 𑀘 𑀯𑀺𑀕𑁆𑀕𑀳𑁄. 𑀓𑀺𑀫𑀺𑀢𑀺 𑀧𑀝𑀺𑀲𑁂𑀥𑁂, 𑀦𑀼𑀇𑀢𑀺 𑀯𑀺𑀢𑀓𑁆𑀓𑁂𑀢𑀺.

𑁧𑁧.

𑀯𑀺𑀦𑀸 𑀕𑀼𑀭𑀽𑀧𑀤𑁂𑀲𑀁 𑀢𑀁, 𑀩𑀸𑀮𑁄’𑀮𑀗𑁆𑀓𑀢𑁆𑀢𑀼𑀫𑀺𑀘𑁆𑀙𑀢𑀺;

𑀲𑀫𑁆𑀧𑀸𑀧𑀼𑀡𑁂 𑀦 𑀯𑀺𑀜𑁆𑀜𑀽𑀳𑀺, 𑀳𑀲𑁆𑀲𑀪𑀸𑀯𑀁 𑀓𑀣𑀁 𑀦𑀼 𑀲𑁄?

𑁧𑁧. 𑀅𑀮𑀗𑁆𑀓𑀭𑀡𑀜𑁆𑀘 𑀢𑁂𑀲𑀁 𑀯𑀺𑀦𑀸 𑀕𑀼𑀭𑀽𑀧𑀤𑁂𑀲𑁂𑀦 𑀓𑀭𑁄𑀦𑁆𑀢𑁄 𑀯𑀺𑀦𑀸 𑀧𑀳𑀸𑀲𑀁 𑀦𑀸𑀧𑀭𑀁 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀲𑀺𑀮𑁂𑀲𑀸𑀮𑀗𑁆𑀓𑀸𑀭𑀫𑀸𑀳 ‘‘𑀯𑀺𑀦𑀸’’𑀢𑀺𑀆𑀤𑀺. 𑀕𑀼𑀭𑀽𑀦𑀁 𑀧𑀲𑀸𑀥𑀦𑁄𑀧𑀸𑀬𑁄𑀧𑀤𑁂𑀲𑀓𑀸𑀦𑀁, 𑀅𑀮𑀗𑁆𑀓𑀸𑀭𑀓𑀸𑀭𑀡𑁄𑀧𑀸𑀬𑁄𑀧𑀤𑁂𑀲𑀓𑀸𑀦𑀁 𑀯𑀸 𑀉𑀧𑀤𑁂𑀲𑀁 ‘‘𑀏𑀢𑁆𑀣 𑀏𑀯𑀁 𑀓𑀢𑁂 𑀲𑁄𑀪𑁂𑀬𑁆𑀬𑀸’’𑀢𑀺 𑀉𑀧𑀤𑀺𑀲𑀦𑀁 𑀯𑀺𑀦𑀸 𑀧𑀭𑀺𑀘𑁆𑀘𑀚𑁆𑀚 𑀫𑀼𑀔𑀲𑁆𑀲, 𑀩𑀦𑁆𑀥𑀲𑁆𑀲 𑀘 𑀅𑀮𑀗𑁆𑀓𑀭𑀡𑀸𑀦𑀪𑀺𑀜𑁆𑀜𑀢𑀸𑀬 𑀩𑀸𑀮𑁄 𑀅𑀜𑁆𑀜𑀸𑀡𑀓𑁄 𑀬𑁄 𑀓𑁄𑀘𑀺 𑀧𑀼𑀕𑁆𑀕𑀮𑁄 𑀢𑀁 𑀫𑀼𑀔𑀁, 𑀩𑀦𑁆𑀥𑀁 𑀯𑀸 𑀅𑀮𑀗𑁆𑀓𑀢𑁆𑀢𑀼𑀁 𑀅𑀦𑀼𑀭𑀽𑀧𑀯𑀲𑁂𑀦 𑀲𑀚𑁆𑀚𑁂𑀢𑀼𑀁 𑀇𑀘𑁆𑀙𑀢𑀺 𑀅𑀥𑀺𑀧𑁆𑀧𑁂𑀢𑀺, 𑀲𑁄 𑀢𑀸𑀤𑀺𑀲𑁄 𑀅𑀜𑁆𑀜𑀸𑀡𑀧𑀼𑀕𑁆𑀕𑀮𑁄 𑀯𑀺𑀜𑁆𑀜𑀽𑀳𑀺 𑀢𑀩𑁆𑀩𑀺𑀤𑀽𑀳𑀺 𑀧𑀡𑁆𑀟𑀺𑀢𑀚𑀦𑁂𑀳𑀺 𑀳𑀲𑁆𑀲𑀪𑀸𑀯𑀁 𑀅𑀯𑀳𑀸𑀲𑀁 𑀓𑀣𑀁 𑀓𑁂𑀦 ¶ 𑀧𑀓𑀸𑀭𑁂𑀦 𑀦 𑀲𑀫𑁆𑀧𑀸𑀧𑀼𑀡𑁂𑀬𑁆𑀬. ‘‘𑀓𑀺𑀫𑀺𑀤𑀁 𑀅𑀜𑁆𑀜𑀸𑀡𑀧𑀼𑀭𑀺𑀲𑁂𑀦 𑀓𑀭𑀺𑀬𑀢𑀻’’𑀢𑀺 𑀳𑀲𑀦𑁆𑀢𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀼𑀇𑀢𑀺 𑀯𑀺𑀢𑀓𑁆𑀓𑁂.

𑁧𑁧. 𑀇𑀤𑀸𑀦𑀺 𑀧𑀤𑀸𑀤𑀺𑀤𑁄𑀲𑀭𑀳𑀺𑀢𑀩𑀦𑁆𑀥𑀲𑀭𑀻𑀭𑀲𑁆𑀲 𑀅𑀮𑀗𑁆𑀓𑀸𑀭𑁂𑀳𑀺 𑀪𑀽𑀲𑀦𑀫𑀧𑀺 𑀕𑀼𑀭𑀽𑀧𑀤𑁂𑀲𑀲𑀳𑀺𑀢𑀫𑁂𑀯 𑀲𑁂𑀝𑁆𑀞𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀦𑀸 𑀕𑀼𑀭𑀽𑀧𑀤𑁂𑀲’’ 𑀫𑀺𑀘𑁆𑀘𑀸𑀤𑀺𑀲𑀺𑀮𑁂𑀲𑀸𑀮𑀗𑁆𑀓𑀸𑀭𑀫𑀸𑀳. 𑀩𑀸𑀮𑁄 𑀫𑀼𑀔𑀸𑀤𑀺𑀲𑀭𑀻𑀭𑀸𑀮𑀗𑁆𑀓𑀸𑀭𑁂, 𑀩𑀦𑁆𑀥𑀸𑀮𑀗𑁆𑀓𑀸𑀭𑁂 𑀯𑀸 𑀅𑀲𑀫𑀢𑁆𑀣𑁄 𑀬𑁄 𑀓𑁄𑀘𑀺 𑀕𑀼𑀭𑀽𑀧𑀤𑁂𑀲𑀁 𑀯𑀺𑀦𑀸 𑀲𑀭𑀻𑀭𑀸𑀮𑀗𑁆𑀓𑀸𑀭𑀓𑀭𑀡𑀲𑁆𑀲, 𑀩𑀦𑁆𑀥𑀸𑀮𑀗𑁆𑀓𑀸𑀭𑀓𑀭𑀡𑀲𑁆𑀲 𑀯𑀸 𑀅𑀦𑀼𑀭𑀽𑀧𑁄𑀧𑀤𑁂𑀲𑀫𑀦𑁆𑀢𑀭𑁂𑀦 𑀢𑀁 𑀲𑀭𑀻𑀭𑀁, 𑀩𑀦𑁆𑀥𑀁 𑀯𑀸 𑀅𑀮𑀗𑁆𑀓𑀢𑁆𑀢𑀼𑀁 𑀢𑀺𑀮𑀓𑀢𑀸𑀟𑀗𑁆𑀓𑀸𑀤𑀻𑀳𑀺, 𑀲𑀤𑁆𑀤𑀸𑀮𑀗𑁆𑀓𑀸𑀭𑀅𑀢𑁆𑀣𑀸𑀮𑀗𑁆𑀓𑀸𑀭𑁂𑀳𑀺 𑀯𑀸 𑀲𑀚𑁆𑀚𑁂𑀢𑀼𑀁 𑀇𑀘𑁆𑀙𑀢𑀺 𑀘𑁂, 𑀲𑁄 𑀯𑀺𑀜𑁆𑀜𑀽𑀳𑀺 𑀢𑀤𑀼𑀪𑀬𑀜𑁆𑀜𑀽𑀳𑀺 𑀳𑀲𑁆𑀲𑀪𑀸𑀯𑀁 𑀅𑀯𑀳𑀲𑀺𑀢𑀩𑁆𑀩𑀢𑀁 𑀓𑀣𑀁 𑀦 𑀲𑀫𑁆𑀧𑀸𑀧𑀼𑀡𑁂, 𑀧𑀸𑀧𑀼𑀡𑀸𑀢𑁆𑀬𑁂𑀯, 𑀢𑀲𑁆𑀫𑀸 𑀕𑀼𑀭𑀽𑀳𑀺 𑀲𑀸𑀤𑀭𑀢𑁄 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀓𑀢𑁆𑀢𑀩𑁆𑀩𑀦𑁆𑀢𑀺 𑀪𑀸𑀯𑁄.

𑁧𑁨.

𑀕𑀦𑁆𑀣𑁄𑀧𑀺 𑀓𑀯𑀺𑀯𑀸𑀘𑀸𑀦-𑀫𑀮𑀗𑁆𑀓𑀸𑀭𑀧𑁆𑀧𑀓𑀸𑀲𑀓𑁄;

𑀬𑀸𑀢𑀺 𑀢𑀩𑁆𑀩𑀘𑀦𑀻𑀬𑀢𑁆𑀢𑀁, 𑀢𑀩𑁆𑀩𑁄𑀳𑀸𑀭𑀽𑀧𑀘𑀸𑀭𑀢𑁄.

𑁧𑁨. 𑀦𑀦𑀼 𑀲𑀤𑁆𑀤𑀕𑀫𑁆𑀫𑀸, 𑀅𑀢𑁆𑀣𑀕𑀫𑁆𑀫𑀸 𑀘 𑀅𑀮𑀗𑁆𑀓𑀸𑀭𑀸𑀢𑀺 𑀕𑀦𑁆𑀣𑁄 𑀓𑀣𑀦𑁆𑀢𑀺 𑀆𑀳 ‘‘𑀕𑀦𑁆𑀣𑁄𑀧𑀻’’𑀢𑀺𑀆𑀤𑀺. 𑀓𑀯𑀺𑀯𑀸𑀘𑀸𑀦𑀁 𑀓𑀯𑀺𑀧𑁆𑀧𑀬𑁄𑀕𑀸𑀦𑀁 𑀲𑀫𑀼𑀤𑀸𑀬𑀭𑀽𑀧𑀸𑀦𑀁, 𑀧𑀝𑀺𑀧𑀸𑀤𑀦𑀻𑀬𑀢𑀸𑀬 𑀢𑀩𑁆𑀩𑀘𑀦𑀻𑀬𑀸𑀦𑀜𑁆𑀘 𑀅𑀢𑁆𑀣𑀸𑀦𑀁 𑀅𑀮𑀗𑁆𑀓𑀸𑀭𑀧𑁆𑀧𑀓𑀸𑀲𑀓𑁄 𑀅𑀮𑀗𑁆𑀓𑀸𑀭𑀸𑀦𑀁 𑀬𑀣𑀸𑀯𑀼𑀢𑁆𑀢𑀸𑀦𑀁 𑀯𑀺𑀪𑀸𑀯𑀺𑀢𑁄 𑀕𑀦𑁆𑀣𑁄𑀧𑀺 𑀓𑀺𑀭𑀺𑀬𑀸𑀓𑀧𑁆𑀧𑀲𑀗𑁆𑀔𑀸𑀢𑀁 𑀲𑀢𑁆𑀣𑀫𑁆𑀧𑀺 𑀢𑀩𑁆𑀩𑀘𑀦𑀻𑀬𑀢𑁆𑀢𑀁 𑀢𑁂𑀦 𑀅𑀮𑀗𑁆𑀓𑀸𑀭𑀲𑀤𑁆𑀤𑁂𑀦 𑀯𑀸𑀘𑁆𑀘𑀢𑀁 𑀬𑀸𑀢𑀺 𑀉𑀧𑀕𑀘𑁆𑀙𑀢𑀺. 𑀓𑀺𑀦𑁆𑀢𑀺 𑀆𑀳 ‘‘𑀢𑀩𑁆𑀩𑁄𑀳𑀸𑀭𑀽𑀧𑀘𑀸𑀭𑀢𑁄’’𑀢𑀺. 𑀢𑀲𑁆𑀲 𑀓𑀢𑀯𑁄𑀳𑀸𑀭𑀲𑁆𑀲 𑀅𑀮𑀗𑁆𑀓𑀸𑀭𑀲𑀤𑁆𑀤𑀲𑁆𑀲, 𑀢𑀲𑁆𑀫𑀺𑀁 𑀯𑀸 𑀫𑀡𑁆𑀟𑀦𑀯𑀺𑀲𑁂𑀲𑁂 𑀧𑀯𑀢𑁆𑀢𑀲𑁆𑀲 𑀅𑀮𑀗𑁆𑀓𑀸𑀭𑀯𑁄𑀳𑀸𑀭𑀲𑁆𑀲 𑀉𑀧𑀘𑀭𑀡𑀁 𑀲𑁄𑀬𑀫𑀺𑀢𑁆𑀬𑀪𑁂𑀤𑁂𑀦 𑀧𑀭𑀺𑀓𑀧𑁆𑀧𑀦𑀁 𑀉𑀧𑀘𑀸𑀭𑁄. 𑀓𑀲𑁆𑀫𑀸? 𑀧𑀝𑀺𑀧𑀸𑀤𑀦𑀻𑀬𑀧𑀝𑀺𑀧𑀸𑀤𑀓𑀸𑀦𑀁 𑀅𑀪𑁂𑀤𑀯𑀲𑁂𑀦 𑀓𑀸𑀭𑀡𑁂 𑀓𑀸𑀭𑀻𑀬𑀲𑁆𑀲 𑀉𑀧𑀘𑀭𑀺𑀬𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁨. 𑀇𑀤𑀸𑀦𑀺 ¶ 𑀲𑀤𑁆𑀤𑀸𑀮𑀗𑁆𑀓𑀸𑀭𑀅𑀢𑁆𑀣𑀸𑀮𑀗𑁆𑀓𑀸𑀭𑀕𑀦𑁆𑀣𑁄 𑀓𑀣𑀫𑀮𑀗𑁆𑀓𑀸𑀭𑁄𑀢𑀺 𑀆𑀳 ‘‘𑀕𑀦𑁆𑀣𑁄’’𑀘𑁆𑀘𑀸𑀤𑀺. 𑀓𑀯𑀺𑀯𑀸𑀘𑀸𑀦𑀁 𑀓𑀯𑀻𑀳𑀺 𑀯𑀼𑀢𑁆𑀢𑀯𑀸𑀓𑁆𑀬𑀲𑀗𑁆𑀔𑀸𑀢𑀸𑀦𑀁, 𑀉𑀧𑀘𑀸𑀭𑀢𑁄 𑀢𑀧𑁆𑀧𑀝𑀺𑀧𑀸𑀤𑀦𑀻𑀬𑀅𑀢𑁆𑀣𑀲𑀗𑁆𑀔𑀸𑀢𑀸𑀦𑀜𑁆𑀘 𑀓𑀯𑀺𑀧𑁆𑀧𑀬𑁄𑀕𑀸𑀦𑀁 𑀅𑀮𑀗𑁆𑀓𑀸𑀭𑀧𑁆𑀧𑀓𑀸𑀲𑀓𑁄 𑀲𑀤𑁆𑀤𑀢𑁆𑀣𑀸𑀮𑀗𑁆𑀓𑀸𑀭𑀧𑁆𑀧𑀓𑀸𑀲𑀓𑁄 𑀕𑀦𑁆𑀣𑁄𑀅𑀧𑀺 𑀓𑀺𑀭𑀺𑀬𑀸𑀓𑀧𑁆𑀧𑀲𑀗𑁆𑀔𑀸𑀢𑀁 𑀲𑀢𑁆𑀣𑀫𑁆𑀧𑀺 𑀢𑀩𑁆𑀩𑁄𑀳𑀸𑀭𑀽𑀧𑀘𑀸𑀭𑀢𑁄 𑀢𑀲𑁆𑀲 𑀅𑀮𑀗𑁆𑀓𑀸𑀭𑁄𑀢𑀺 𑀓𑀢𑀯𑁄𑀳𑀸𑀭𑀲𑁆𑀲 𑀅𑀮𑀗𑁆𑀓𑀸𑀭𑀲𑀤𑁆𑀤𑀲𑁆𑀲 𑀓𑀸𑀭𑀡𑁂 𑀓𑀸𑀭𑀻𑀬𑀽𑀧𑀘𑀸𑀭𑁂𑀦 𑀢𑀩𑁆𑀩𑀘𑀦𑀻𑀬𑀢𑁆𑀢𑀁 𑀢𑁂𑀦 𑀅𑀮𑀗𑁆𑀓𑀸𑀭𑀲𑀤𑁆𑀤𑁂𑀦 𑀯𑀢𑁆𑀢𑀩𑁆𑀩𑀢𑀁 𑀬𑀸𑀢𑀺. 𑀅𑀧𑀺𑀲𑀤𑁆𑀤𑁄 𑀅𑀮𑀗𑁆𑀓𑀸𑀭𑀫𑀧𑁂𑀓𑁆𑀔𑀢𑀺. 𑀅𑀮𑀗𑁆𑀓𑀸𑀭𑁂 𑀧𑀓𑀸𑀲𑁂𑀢𑀺, 𑀅𑀮𑀗𑁆𑀓𑀸𑀭𑀸𑀦𑀁 𑀯𑀸 𑀧𑀓𑀸𑀲𑀓𑁄𑀢𑀺 𑀘, 𑀢𑁂𑀦 𑀯𑀘𑀦𑀻𑀬𑁄, 𑀢𑀲𑁆𑀲 𑀪𑀸𑀯𑁄𑀢𑀺 𑀘 𑀯𑀺𑀕𑁆𑀕𑀳𑁄. 𑀏𑀢𑁆𑀣 𑀪𑀸𑀯𑁄𑀢𑀺 𑀯𑀸𑀘𑁆𑀘𑀯𑀸𑀘𑀓𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲 𑀲𑀤𑁆𑀤𑀸𑀤𑀺𑀅𑀮𑀗𑁆𑀓𑀸𑀭𑀲𑁆𑀲 𑀯𑁄𑀳𑀸𑀭𑁄𑀢𑀺 𑀘, 𑀢𑀩𑁆𑀩𑁄𑀳𑀸𑀭𑀲𑁆𑀲 𑀅𑀮𑀗𑁆𑀓𑀸𑀭𑀲𑀤𑁆𑀤𑀲𑁆𑀲 𑀉𑀧𑀘𑀸𑀭𑁄𑀢𑀺 𑀘 𑀯𑀸𑀓𑁆𑀬𑀦𑁆𑀢𑀺.

𑁧𑁩.

𑀤𑁆𑀯𑀺𑀧𑁆𑀧𑀓𑀸𑀭𑀸 𑀅𑀮𑀗𑁆𑀓𑀸𑀭𑀸, 𑀢𑀢𑁆𑀣 𑀲𑀤𑁆𑀤𑀢𑁆𑀣𑀪𑁂𑀤𑀢𑁄;

𑀲𑀤𑁆𑀤𑀢𑁆𑀣𑀸 𑀩𑀦𑁆𑀥𑀦𑀸𑀫𑀸𑀯, 𑀢𑀁𑀲𑀚𑁆𑀚𑀺𑀢𑀢𑀤𑀸𑀯𑀮𑀺.

𑁧𑁩. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀅𑀮𑀗𑁆𑀓𑀸𑀭𑀸𑀦𑀁 𑀧𑀪𑁂𑀤𑀁, 𑀢𑀧𑁆𑀧𑀲𑀗𑁆𑀓𑀜𑁆𑀘 𑀢𑀁𑀩𑀦𑁆𑀥𑀲𑀭𑀻𑀭𑀜𑁆𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁆𑀧𑀺 𑀏𑀓𑀢𑁄 𑀲𑀫𑁆𑀩𑀦𑁆𑀥𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀤𑁆𑀯𑀺𑀧𑁆𑀧𑀓𑀸𑀭𑀸’’𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀲𑁆𑀫𑀺𑀁 𑀓𑀺𑀭𑀺𑀬𑀸𑀓𑀧𑁆𑀧𑀲𑀗𑁆𑀔𑀸𑀢𑁂 𑀕𑀦𑁆𑀣𑁂, 𑀢𑀲𑁆𑀫𑀺𑀁 𑀯𑀸 𑀩𑀦𑁆𑀥𑀸𑀮𑀗𑁆𑀓𑀸𑀭𑀸𑀥𑀺𑀓𑀸𑀭𑁂 𑀅𑀮𑀗𑁆𑀓𑀸𑀭𑀸 𑀬𑀣𑀸𑀯𑀼𑀢𑁆𑀢𑀸 𑀤𑁆𑀯𑀺𑀧𑁆𑀧𑀓𑀸𑀭𑀸 𑀳𑁄𑀦𑁆𑀢𑀺. 𑀓𑀣𑀁? 𑀲𑀤𑁆𑀤𑀪𑁂𑀤𑀢𑁄, 𑀅𑀢𑁆𑀣𑀪𑁂𑀤𑀢𑁄 𑀘, 𑀲𑀤𑁆𑀤𑀸𑀮𑀗𑁆𑀓𑀸𑀭𑀸 𑀅𑀢𑁆𑀣𑀸𑀮𑀗𑁆𑀓𑀸𑀭𑀸𑀢𑀺 𑀅𑀮𑀗𑁆𑀓𑀸𑀭𑀸 𑀤𑁆𑀯𑀺𑀧𑁆𑀧𑀓𑀸𑀭𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑁂𑀲𑀁 𑀪𑁂𑀤𑁂𑀦 𑀢𑁂 𑀤𑁆𑀯𑀺𑀧𑁆𑀧𑀓𑀸𑀭𑀸, 𑀢𑁂 𑀲𑀤𑁆𑀤𑀸, 𑀅𑀢𑁆𑀣𑀸 𑀘. ‘‘𑀩𑀦𑁆𑀥𑁄’’ 𑀇𑀢𑀺 𑀯𑀼𑀢𑁆𑀢𑀁 𑀦𑀸𑀫𑀁 𑀬𑀲𑁆𑀲𑀸 𑀆𑀯𑀮𑀺𑀬𑀸 𑀲𑀸 𑀩𑀦𑁆𑀥𑀦𑀸𑀫𑀸 𑀏𑀯. 𑀢𑀁𑀲𑀚𑁆𑀚𑀺𑀢𑀢𑀤𑀸𑀯𑀮𑀺 𑀢𑁂𑀳𑀺 𑀅𑀮𑀗𑁆𑀓𑀸𑀭𑁂𑀳𑀺 𑀲𑀚𑁆𑀚𑀺𑀢𑀸 𑀧𑀓𑀸𑀲𑀺𑀢𑀸 𑀢𑀁𑀲𑀚𑁆𑀚𑀺𑀢𑀸, 𑀢𑁂𑀲𑀁 𑀲𑀤𑁆𑀤𑀢𑁆𑀣𑀸𑀦𑀁 𑀆𑀯𑀮𑀺 𑀲𑀫𑀼𑀤𑀸𑀬𑀸, 𑀫𑀳𑀸𑀯𑀸𑀓𑁆𑀬𑀁, 𑀅𑀦𑁆𑀢𑀭𑀯𑀸𑀓𑁆𑀬𑀁 𑀯𑀸. 𑀧𑀭𑀺𑀧𑀼𑀡𑁆𑀡𑁄 𑀩𑀦𑁆𑀥𑁄 𑀫𑀳𑀸𑀯𑀸𑀓𑁆𑀬𑀁, 𑀫𑀼𑀢𑁆𑀢𑀓𑀸𑀤𑀬𑁄𑀯𑀬𑀯𑀸 𑀅𑀦𑁆𑀢𑀭𑀯𑀸𑀓𑁆𑀬𑀸𑀦𑀺, 𑀢𑀁𑀲𑀚𑁆𑀚𑀺𑀢𑀢𑀤𑀸𑀯𑀮𑀺𑀓𑀁 𑀧𑀲𑀺𑀤𑁆𑀥𑀪𑀸𑀯𑁂𑀦 𑀅𑀦𑀼𑀯𑀤𑀺𑀢𑁆𑀯𑀸 𑀅𑀧𑁆𑀧𑀲𑀺𑀤𑁆𑀥𑀸 𑀲𑀤𑁆𑀤𑀢𑁆𑀣𑀸 𑀯𑀺𑀥𑀻𑀬𑀦𑁆𑀢𑁂.

𑁧𑁩. 𑀇𑀤𑀸𑀦𑀺 ¶ 𑀬𑀣𑀸𑀯𑀼𑀢𑁆𑀢𑀅𑀮𑀗𑁆𑀓𑀸𑀭𑀸𑀦𑀁 𑀅𑀯𑀼𑀢𑁆𑀢𑀪𑁂𑀤𑀜𑁆𑀘 𑀢𑀤𑀸𑀥𑀸𑀭𑀸𑀥𑀺𑀓𑀢𑀁 𑀬𑀣𑀸𑀯𑀼𑀢𑁆𑀢𑀩𑀦𑁆𑀥𑀲𑀭𑀻𑀭𑀜𑁆𑀘 𑀏𑀓𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀤𑁆𑀯𑀺𑀧𑁆𑀧𑀓𑀸𑀭𑁂’’𑀘𑁆𑀘𑀸𑀤𑀺𑀫𑀸𑀳. 𑀢𑀢𑁆𑀣 𑀢𑀲𑁆𑀫𑀺𑀁 𑀓𑀺𑀭𑀺𑀬𑀸𑀓𑀧𑁆𑀧𑀲𑀗𑁆𑀔𑀸𑀢𑁂 𑀅𑀮𑀗𑁆𑀓𑀸𑀭𑀕𑀦𑁆𑀣𑁂, 𑀦𑁄 𑀘𑁂, 𑀅𑀮𑀗𑁆𑀓𑀸𑀭𑀸𑀥𑀺𑀓𑀸𑀭𑁂 𑀯𑀸 𑀅𑀮𑀗𑁆𑀓𑀸𑀭𑀸 𑀯𑀓𑁆𑀔𑀫𑀸𑀦𑀸𑀮𑀗𑁆𑀓𑀸𑀭𑀸 𑀲𑀤𑁆𑀤𑀢𑁆𑀣𑀪𑁂𑀤𑀢𑁄 𑀲𑀤𑁆𑀤𑀸𑀮𑀗𑁆𑀓𑀸𑀭𑀅𑀢𑁆𑀣𑀸𑀮𑀗𑁆𑀓𑀸𑀭𑀪𑁂𑀤𑁂𑀦 𑀤𑁆𑀯𑀺𑀧𑁆𑀧𑀓𑀸𑀭𑀸 𑀳𑁄𑀦𑁆𑀢𑀺, 𑀬𑁂𑀲𑀁 𑀪𑁂𑀤𑁂𑀦 𑀅𑀮𑀗𑁆𑀓𑀸𑀭𑀸 𑀪𑀺𑀦𑁆𑀦𑀸, 𑀢𑁂 𑀲𑀤𑁆𑀤𑀢𑁆𑀣𑀸 𑀩𑀦𑁆𑀥𑀦𑀸𑀫𑀸𑀯. 𑀢𑀁𑀲𑀚𑁆𑀚𑀺𑀢𑀢𑀤𑀸𑀯𑀮𑀺 𑀢𑁂𑀳𑀺 𑀲𑀤𑁆𑀤𑀢𑁆𑀣𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀢𑀸, 𑀢𑁂𑀲𑀁 𑀲𑀤𑁆𑀤𑀢𑁆𑀣𑀸𑀦𑀁 𑀫𑀳𑀸𑀓𑀩𑁆𑀩𑀸𑀤𑀺𑀲𑀫𑀼𑀤𑀸𑀬𑀭𑀽𑀧𑀸 𑀧𑀝𑀺𑀧𑀸𑀝𑀺𑀩𑀦𑁆𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀩𑀦𑁆𑀥𑁄’’ 𑀇𑀢𑀺 𑀦𑀸𑀫𑀁 𑀬𑀲𑁆𑀲𑁂𑀢𑀺 𑀘, 𑀢𑁂𑀳𑀺 𑀲𑀤𑁆𑀤𑀢𑁆𑀣𑀸𑀮𑀗𑁆𑀓𑀸𑀭𑁂𑀳𑀺 𑀲𑀚𑁆𑀚𑀺𑀢𑀸𑀢𑀺 𑀘, 𑀢𑁂𑀲𑀁 𑀲𑀤𑁆𑀤𑀢𑁆𑀣𑀸𑀦𑀁 𑀆𑀯𑀮𑀻𑀢𑀺 𑀘 𑀲𑀫𑀸𑀲𑁄.

𑁧𑁪.

𑀕𑀼𑀡𑀸𑀮𑀗𑁆𑀓𑀸𑀭𑀲𑀁𑀬𑀼𑀢𑁆𑀢𑀸, 𑀅𑀧𑀺 𑀤𑁄𑀲𑀮𑀯𑀗𑁆𑀓𑀺𑀢𑀸;

𑀧𑀲𑀁𑀲𑀺𑀬𑀸 𑀦 𑀯𑀺𑀜𑁆𑀜𑀽𑀳𑀺, 𑀲𑀸 𑀓𑀜𑁆𑀜𑀸 𑀯𑀺𑀬 𑀢𑀸𑀤𑀺𑀲𑀻.

𑁧𑁪. 𑀏𑀯𑀁 𑀕𑀼𑀡𑁂𑀦 𑀅𑀮𑀗𑁆𑀓𑀸𑀭𑁂𑀦 𑀲𑀚𑁆𑀚𑀺𑀢𑀸𑀧𑀺 𑀲𑀸 𑀲𑀤𑁆𑀤𑀢𑁆𑀣𑀸𑀯𑀮𑀺 𑀅𑀧𑁆𑀧𑀓𑁂𑀦𑀧𑀺 𑀤𑁄𑀲𑁂𑀦 𑀲𑀁𑀬𑀼𑀢𑁆𑀢𑀸 𑀲𑀢𑀻 𑀅𑀲𑀫𑁆𑀨𑀼𑀲𑀺𑀢𑀩𑁆𑀩𑀸𑀯 𑀯𑀺𑀜𑁆𑀜𑀽𑀳𑀺 𑀲𑀺𑀬𑀸𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀕𑀼𑀡’’ 𑀇𑀘𑁆𑀘𑀸𑀤𑀺. 𑀲𑀤𑁆𑀤𑀸𑀮𑀗𑁆𑀓𑀸𑀭𑀸𑀔𑁆𑀬𑁂𑀦 𑀕𑀼𑀡𑁂𑀦, 𑀅𑀢𑁆𑀣𑀸𑀮𑀗𑁆𑀓𑀸𑀭𑁂𑀦 𑀘 𑀲𑀁𑀬𑀼𑀢𑁆𑀢𑀸𑀧𑀺 𑀯𑀺𑀲𑁂𑀲𑁂𑀦 𑀲𑀚𑁆𑀚𑀺𑀢𑀸𑀧𑀺 𑀲𑀤𑁆𑀤𑀢𑁆𑀣𑀸𑀯𑀮𑀺 𑀤𑁄𑀲𑀮𑀯𑁂𑀦 𑀤𑁄𑀲𑀮𑁂𑀲𑁂𑀦𑀸𑀧𑀺 𑀅𑀗𑁆𑀓𑀺𑀢𑀸 𑀅𑀪𑀺𑀮𑀜𑁆𑀙𑀺𑀢𑀸 𑀲𑀢𑀻 𑀯𑀺𑀜𑁆𑀜𑀽𑀳𑀺 𑀕𑀼𑀡𑀤𑁄𑀲𑀯𑀺𑀪𑀸𑀕𑀯𑀺𑀤𑀽𑀳𑀺 𑀧𑀡𑁆𑀟𑀺𑀢𑀧𑀼𑀭𑀺𑀲𑁂𑀳𑀺 𑀦 𑀧𑀲𑀁𑀲𑀺𑀬𑀸 𑀦𑁂𑀯 𑀧𑀲𑀁𑀲𑀺𑀢𑀩𑁆𑀩𑀸. 𑀓𑀸𑀯𑀺𑀬𑀸𑀢𑀺 𑀆𑀳 ‘‘𑀓𑀜𑁆𑀜𑀸 𑀯𑀺𑀬𑀢𑀸𑀤𑀺𑀲𑀻’’𑀢𑀺. 𑀬𑀣𑀸 𑀳𑀺 𑀓𑀜𑁆𑀜𑀸 𑀤𑀲𑀯𑀲𑁆𑀲𑀺𑀓𑀸 𑀲𑀦𑁆𑀦𑀤𑁆𑀥𑀬𑁄𑀩𑁆𑀩𑀦𑀸𑀪𑀺𑀫𑀼𑀔𑀪𑀸𑀯𑁂𑀦 𑀚𑀦𑀦𑀬𑀦𑀫𑀦𑁄𑀯𑀺𑀮𑀼𑀩𑁆𑀪𑀺𑀦𑀻𑀕𑀼𑀡𑁂𑀦, 𑀆𑀪𑀭𑀡𑀯𑀺𑀲𑁂𑀲𑁂𑀦 𑀘𑀸𑀮𑀗𑁆𑀓𑀢𑀸 𑀓𑁂𑀦𑀘𑀺 𑀓𑀼𑀝𑁆𑀞𑀤𑁄𑀲𑀮𑁂𑀲𑁂𑀦 𑀅𑀗𑁆𑀓𑀺𑀢𑀸 𑀯𑀺𑀜𑁆𑀜𑀽𑀦𑀁 𑀅𑀲𑀫𑁆𑀨𑀼𑀲𑀦𑀻𑀬𑀸 𑀲𑀺𑀬𑀸, 𑀧𑀕𑁂𑀯𑀸𑀧𑀭𑀸, 𑀏𑀯𑀫𑁂𑀯 𑀲𑀤𑁆𑀤𑀢𑁆𑀣𑀸𑀯𑀮𑀺𑀧𑀺 𑀅𑀧𑁆𑀧𑀓𑁂𑀦𑀧𑀺 𑀲𑀤𑁆𑀤𑀭𑀽𑀧𑁂𑀦, 𑀅𑀢𑁆𑀣𑀮𑀓𑁆𑀔𑀡𑁂𑀦 𑀘 𑀤𑁄𑀲𑁂𑀦 𑀓𑀼𑀝𑁆𑀞𑀓𑀧𑁆𑀧𑁂𑀦 𑀯𑀚𑁆𑀚𑀦𑀻𑀬𑀸 𑀏𑀯 𑀯𑀺𑀜𑁆𑀜𑀽𑀦𑀁, 𑀧𑀕𑁂𑀯 𑀩𑀳𑀼𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁪. 𑀏𑀯𑀁 ¶ 𑀲𑀤𑁆𑀤𑀢𑁆𑀣𑀸𑀦𑀁 𑀕𑀼𑀡𑀻𑀪𑀽𑀢𑁂𑀳𑀺 𑀅𑀮𑀗𑁆𑀓𑀸𑀭𑁂𑀳𑀺 𑀲𑀚𑁆𑀚𑀺𑀢𑀸 𑀲𑀤𑁆𑀤𑀢𑁆𑀣𑀸𑀯𑀮𑀺 𑀓𑁂𑀦𑀘𑀺 𑀧𑀤𑀸𑀤𑀺𑀤𑁄𑀲𑁂𑀦 𑀅𑀪𑀺𑀮𑀓𑁆𑀔𑀺𑀢𑀸 𑀘𑁂, 𑀅𑀧𑁆𑀧𑀲𑀢𑁆𑀣𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀕𑀼𑀡𑀸𑀮𑀗𑁆𑀓𑀸𑀭𑀺’’𑀘𑁆𑀘𑀸𑀤𑀺𑀫𑀸𑀳. 𑀕𑀼𑀡𑀸𑀮𑀗𑁆𑀓𑀸𑀭𑀲𑀁𑀬𑀼𑀢𑁆𑀢𑀸 𑀅𑀧𑀺 𑀲𑀤𑁆𑀤𑀸𑀮𑀗𑁆𑀓𑀸𑀭𑀲𑀗𑁆𑀔𑀸𑀢𑀕𑀼𑀡𑁂𑀦, 𑀅𑀢𑁆𑀣𑀸𑀮𑀗𑁆𑀓𑀸𑀭𑁂𑀦 𑀘 𑀯𑀺𑀲𑁂𑀲𑁂𑀦 𑀬𑀼𑀢𑁆𑀢𑀸𑀧𑀺 𑀲𑀸 𑀲𑀤𑁆𑀤𑀢𑁆𑀣𑀸𑀯𑀮𑀺 𑀤𑁄𑀲𑀮𑀯𑀗𑁆𑀓𑀺𑀢𑀸 𑀧𑀤𑀤𑁄𑀲𑀸𑀤𑀺𑀦𑀸 𑀅𑀡𑀼𑀫𑀢𑁆𑀢𑁂𑀦𑀧𑀺 𑀤𑁄𑀲𑁂𑀦 𑀅𑀗𑁆𑀓𑀺𑀢𑀸 𑀬𑀼𑀢𑁆𑀢𑀸 𑀲𑀳𑀺𑀢𑀸 𑀢𑀸𑀤𑀺𑀲𑀻 𑀕𑀼𑀡𑀸𑀮𑀗𑁆𑀓𑀸𑀭𑀲𑀁𑀬𑀼𑀢𑁆𑀢𑀸𑀧𑀺 𑀤𑁄𑀲𑀮𑀯𑀗𑁆𑀓𑀺𑀢𑀸 𑀓𑀜𑁆𑀜𑀸 𑀯𑀺𑀬 𑀤𑀲𑀯𑀲𑁆𑀲𑀺𑀓𑀸 𑀬𑁄𑀩𑁆𑀩𑀦𑀧𑁆𑀧𑀢𑁆𑀢𑀸 𑀯𑀦𑀺𑀢𑀸𑀯 𑀯𑀺𑀜𑁆𑀜𑀽𑀳𑀺 𑀕𑀼𑀡𑀤𑁄𑀲𑀧𑀭𑀺𑀓𑁆𑀔𑀓𑁂𑀳𑀺 𑀦 𑀧𑀲𑀁𑀲𑀺𑀬𑀸 𑀦 𑀧𑀲𑀁𑀲𑀺𑀢𑀩𑁆𑀩𑀸. 𑀬𑀣𑀸 𑀳𑀺 𑀤𑀲𑀯𑀲𑁆𑀲𑀺𑀓𑀸 𑀇𑀢𑁆𑀣𑀻 𑀧𑀺𑀬𑀲𑀪𑀸𑀯𑀲𑀡𑁆𑀞𑀺𑀢𑀸 𑀫𑀦𑀼𑀜𑁆𑀜𑁂𑀳𑀺 𑀕𑀼𑀡𑁂𑀳𑀺, 𑀲𑁄𑀪𑀦𑀸𑀦𑀼𑀭𑀽𑀧𑀕𑀻𑀯𑁂𑀬𑁆𑀬𑀸𑀤𑀺𑀆𑀪𑀭𑀡𑀯𑀺𑀲𑁂𑀲𑁂𑀳𑀺 𑀬𑀼𑀢𑁆𑀢𑀸𑀧𑀺 𑀤𑀺𑀲𑁆𑀲𑀫𑀸𑀦𑁂𑀦 𑀓𑁂𑀦𑀘𑀺 𑀲𑁂𑀢𑀓𑀼𑀝𑁆𑀞𑀮𑀯𑁂𑀦 𑀬𑀼𑀢𑁆𑀢𑀸 𑀲𑀫𑀸𑀦𑀸 𑀕𑀼𑀡𑀤𑁄𑀲𑀧𑀭𑀺𑀓𑁆𑀔𑀓𑁂𑀳𑀺 𑀤𑀲𑁆𑀲𑀦𑀻𑀬𑀸 𑀦 𑀳𑁄𑀢𑀺, 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀧𑀺 𑀩𑀦𑁆𑀥𑀧𑀤𑁆𑀥𑀢𑀺 𑀓𑀼𑀝𑁆𑀞𑀢𑀼𑀮𑁆𑀬𑁂𑀦 𑀓𑁂𑀦𑀘𑀺 𑀧𑀤𑀸𑀤𑀺𑀤𑁄𑀲𑁂𑀦 𑀬𑀼𑀢𑁆𑀢𑀸 𑀯𑀺𑀜𑁆𑀜𑀽𑀳𑀺 𑀅𑀲𑁆𑀲𑀸𑀤𑀦𑀻𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑁄𑀲𑀸𑀦𑀁 𑀮𑀯𑁄, 𑀢𑁂𑀦 𑀅𑀗𑁆𑀓𑀺𑀢𑀸𑀢𑀺 𑀘, 𑀲𑀸 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺 𑀢𑀸𑀤𑀻𑀲𑀻𑀢𑀺 𑀘 𑀯𑀺𑀕𑁆𑀕𑀳𑁄.

𑁧𑁫.

𑀢𑁂𑀦 𑀤𑁄𑀲𑀦𑀺𑀭𑀸𑀲𑁄𑀯, 𑀫𑀳𑀼𑀲𑁆𑀲𑀸𑀳𑁂𑀦 𑀲𑀸𑀥𑀺𑀬𑁄;

𑀦𑀺𑀤𑁆𑀤𑁄𑀲𑀸 𑀲𑀩𑁆𑀩𑀣𑀸 𑀲𑀸’𑀬𑀁, 𑀲𑀕𑀼𑀡𑀸 𑀦 𑀪𑀯𑁂𑀬𑁆𑀬 𑀓𑀺𑀁.

𑁧𑁫. 𑀬𑀢𑁄 𑀏𑀯𑀁, 𑀢𑁂𑀦 𑀢𑀲𑁆𑀫𑀸 𑀓𑀸𑀭𑀡𑀸 𑀫𑀳𑀼𑀲𑁆𑀲𑀸𑀳𑁂𑀦 𑀫𑀳𑀢𑀸 𑀯𑀸𑀬𑀸𑀫𑁂𑀦 𑀤𑁄𑀲𑀸𑀦𑀁 𑀧𑀤𑀤𑁄𑀲𑀸𑀤𑀻𑀦𑀫𑀦𑀢𑁆𑀣𑀦𑀺𑀫𑀺𑀢𑁆𑀢𑀸𑀦𑀁 𑀦𑀺𑀭𑀸𑀲𑁄𑀯 𑀲𑀢𑁆𑀣𑀤𑀺𑀝𑁆𑀞𑀺𑀬𑀸 𑀲𑀢𑁆𑀣𑀧𑁆𑀧𑀪𑀸𑀯𑀢𑁄 𑀧𑀭𑀺𑀘𑁆𑀘𑀸𑀕𑁄𑀬𑁂𑀯 𑀲𑀸𑀥𑀺𑀬𑁄 𑀲𑀸𑀥𑁂𑀢𑀩𑁆𑀩𑁄, ‘‘𑀯𑀺𑀜𑁆𑀜𑀽𑀳𑀻’’𑀢𑀺 𑀲𑁂𑀲𑁄. 𑀏𑀯𑀁 𑀤𑁄𑀲𑀦𑀺𑀭𑀸𑀲𑁂 𑀓𑁄 𑀕𑀼𑀡𑁄 𑀉𑀧𑀮𑀩𑁆𑀪𑀢𑀻𑀢𑀺 𑀘𑁂. 𑀲𑀩𑁆𑀩𑀣𑀸 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀦𑀺𑀤𑁆𑀤𑁄𑀲𑀸 𑀤𑁄𑀲𑁂𑀳𑀺 𑀦𑀺𑀕𑁆𑀕𑀢𑀸 𑀲𑀸𑀬𑀁 𑀲𑀤𑁆𑀤𑀢𑁆𑀣𑀸𑀯𑀮𑀺 𑀲𑀕𑀼𑀡𑀸 𑀲𑀤𑁆𑀤𑀸𑀮𑀗𑁆𑀓𑀸𑀭𑀲𑀗𑁆𑀔𑀸𑀢𑁂𑀳𑀺 𑀕𑀼𑀡𑁂𑀳𑀺 𑀲𑀳𑀺𑀢𑀸 𑀦 𑀪𑀯𑁂𑀬𑁆𑀬 𑀓𑀺𑀁, 𑀪𑀯𑀢𑁆𑀬𑁂𑀯, 𑀕𑀼𑀡𑀭𑀳𑀺𑀢𑀁 𑀢𑀁𑀅𑀮𑀗𑁆𑀓𑀢𑀫𑀦𑀼𑀧𑀸𑀤𑁂𑀬𑁆𑀬𑀁 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁫. 𑀢𑁂𑀦 ¶ 𑀬𑀢𑁄 𑀤𑁄𑀲𑀬𑀼𑀢𑁆𑀢𑀸 𑀯𑀺𑀜𑁆𑀜𑀽𑀳𑀺 𑀅𑀦𑀼𑀧𑀸𑀤𑁂𑀬𑁆𑀬𑀸, 𑀢𑀲𑁆𑀫𑀸 𑀫𑀳𑀼𑀲𑁆𑀲𑀸𑀳𑁂𑀦 𑀅𑀥𑀺𑀓𑀯𑀸𑀬𑀸𑀫𑁂𑀦 𑀤𑁄𑀲𑀦𑀺𑀭𑀸𑀲𑁄𑀯 𑀧𑀤𑀤𑁄𑀲𑀸𑀤𑀻𑀦𑀁 𑀦𑀺𑀭𑀸𑀓𑀭𑀡𑀫𑁂𑀯 𑀲𑀸𑀥𑀺𑀬𑁄 𑀅𑀦𑁂𑀓𑀲𑀢𑁆𑀣𑀯𑀺𑀲𑀬𑀸𑀬 𑀧𑀜𑁆𑀜𑀸𑀬 𑀯𑀺𑀜𑁆𑀜𑀽𑀳𑀺 𑀲𑀸𑀥𑁂𑀢𑀩𑁆𑀩𑁄, 𑀏𑀯𑀁 𑀲𑀢𑀺 𑀲𑀩𑁆𑀩𑀣𑀸 𑀲𑀩𑁆𑀩𑀸𑀓𑀸𑀭𑁂𑀦 𑀦𑀺𑀤𑁆𑀤𑁄𑀲𑀸 𑀤𑁄𑀲𑀭𑀳𑀺𑀢𑀸 𑀲𑀸 𑀅𑀬𑀁 𑀲𑀤𑁆𑀤𑀢𑁆𑀣𑀸𑀯𑀮𑀺 𑀲𑀕𑀼𑀡𑀸 𑀲𑀤𑁆𑀤𑀸𑀮𑀗𑁆𑀓𑀸𑀭𑀲𑀗𑁆𑀔𑀸𑀢𑁂𑀳𑀺 𑀕𑀼𑀡𑁂𑀳𑀺 𑀬𑀼𑀢𑁆𑀢𑀸 𑀦 𑀪𑀯𑁂𑀬𑁆𑀬 𑀓𑀺𑀁, 𑀕𑀼𑀡𑀬𑀼𑀢𑁆𑀢𑀸 𑀪𑀯𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑁄𑀲𑀸𑀦𑀁 𑀦𑀺𑀭𑀸𑀲𑁄𑀢𑀺 𑀘, 𑀦𑀢𑁆𑀣𑀺 𑀤𑁄𑀲𑀸 𑀏𑀢𑀺𑀲𑁆𑀲𑀸, 𑀦𑀺𑀕𑁆𑀕𑀢𑀸 𑀤𑁄𑀲𑁂𑀳𑀺 𑀯𑀸𑀢𑀺 𑀘, 𑀲𑀳 𑀕𑀼𑀡𑁂𑀳𑀺 𑀯𑀢𑁆𑀢𑀫𑀸𑀦𑀸𑀢𑀺 𑀘 𑀯𑀺𑀕𑁆𑀕𑀳𑁄.

𑁧𑁬.

𑀲𑀸’𑀮𑀗𑁆𑀓𑀸𑀭𑀯𑀺𑀬𑀼𑀢𑁆𑀢𑀸𑀧𑀺, 𑀕𑀼𑀡𑀬𑀼𑀢𑁆𑀢𑀸 𑀫𑀦𑁄𑀳𑀭𑀸;

𑀦𑀺𑀤𑁆𑀤𑁄𑀲𑀸 𑀤𑁄𑀲𑀭𑀳𑀺𑀢𑀸, 𑀕𑀼𑀡𑀬𑀼𑀢𑁆𑀢𑀸 𑀯𑀥𑀽 𑀯𑀺𑀬.

𑁧𑁬. 𑀓𑀺𑀁𑀓𑀸𑀭𑀡𑀫𑁂𑀯𑀁𑀪𑀽𑀢𑁄 𑀤𑁄𑀲𑀧𑀭𑀺𑀘𑁆𑀘𑀸𑀕𑁂𑀦 𑀕𑀼𑀡𑀸𑀤𑀸𑀦𑁂𑀦 𑀩𑀦𑁆𑀥𑁄𑀢𑀺 𑀆𑀳 ‘‘𑀲𑀸’𑀮𑀗𑁆𑀓𑀸𑀭𑁂’’𑀘𑁆𑀘𑀸𑀤𑀺. 𑀲𑀸 𑀲𑀤𑁆𑀤𑀢𑁆𑀣𑀸𑀯𑀮𑀺 𑀅𑀮𑀗𑁆𑀓𑀸𑀭𑁂𑀳𑀺 𑀯𑀺𑀬𑀼𑀢𑁆𑀢𑀸𑀧𑀺 𑀲𑀢𑀻 𑀦𑀺𑀤𑁆𑀤𑁄𑀲𑀸 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀤𑁄𑀲𑁂𑀳𑀺 𑀦𑀺𑀕𑁆𑀕𑀢𑀸 𑀕𑀼𑀡𑁂𑀳𑀺 𑀲𑀤𑁆𑀤𑀸𑀮𑀗𑁆𑀓𑀸𑀭𑀲𑀗𑁆𑀔𑀸𑀢𑁂𑀳𑀺 𑀲𑀁𑀬𑀼𑀢𑁆𑀢𑀸 𑀚𑀦𑀸𑀦𑀫𑀸𑀦𑀦𑁆𑀤𑀲𑀦𑁆𑀤𑁄𑀳𑀸𑀪𑀺𑀲𑀦𑁆𑀤𑀦𑁂𑀓𑀳𑁂𑀢𑀼𑀢𑀸𑀬 𑀫𑀦𑁄 𑀳𑀭𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀫𑀸𑀓𑀟𑁆𑀠𑀢𑀻𑀢𑀺 𑀫𑀦𑁄𑀳𑀭𑀸 𑀳𑁄𑀢𑀻𑀢𑀺. 𑀢𑀢𑁆𑀣𑁄𑀤𑀸𑀳𑀭𑀡𑀫𑀸𑀳 ‘‘𑀤𑁄𑀲𑀭𑀳𑀺𑀢𑀸 𑀕𑀼𑀡𑀬𑀼𑀢𑁆𑀢𑀸 𑀯𑀥𑀽 𑀯𑀺𑀬𑀸’’𑀢𑀺. 𑀬𑀣𑀸 𑀬𑁂𑀦 𑀓𑁂𑀦𑀘𑀺𑀧𑀺 𑀤𑁄𑀲𑁂𑀦 𑀯𑀺𑀭𑀳𑀺𑀢𑀸 𑀯𑀥𑀽 𑀫𑀦𑀸𑀧𑀘𑀸𑀭𑀺𑀢𑀸𑀤𑀻𑀳𑀺 𑀕𑀼𑀡𑀯𑀺𑀲𑁂𑀲𑁂𑀳𑀺 𑀲𑀁𑀬𑀼𑀢𑁆𑀢𑀸 𑀲𑀢𑀻 𑀓𑁂𑀦𑀘𑀺 𑀆𑀪𑀭𑀡𑁂𑀦 𑀅𑀫𑀡𑁆𑀟𑀺𑀢𑀸 𑀅𑀧𑀲𑀸𑀥𑀺𑀢𑀸𑀧𑀺 𑀓𑀺𑀦𑁆𑀦𑀸𑀫 𑀫𑀥𑀼𑀭𑀸 𑀓𑀯𑀻𑀦𑀁 𑀧𑀲𑀸𑀥𑀦𑀁 𑀓𑀺𑀦𑁆𑀦𑀸𑀫 𑀫𑀦𑁄𑀳𑀭𑀸 𑀳𑁄𑀢𑀺, 𑀏𑀯𑀫𑀬𑀁 𑀲𑀤𑁆𑀤𑀢𑁆𑀣𑀸𑀯𑀮𑀺𑀧𑀺 𑀫𑀦𑁄𑀳𑀭𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁧𑁬. 𑀇𑀤𑀸𑀦𑀺 𑀤𑁄𑀲𑀧𑀭𑀺𑀘𑁆𑀘𑀸𑀕𑁂𑀦 𑀕𑀼𑀡𑀸𑀤𑀸𑀦𑁂 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀺 ‘‘𑀲𑀸’𑀮𑀗𑁆𑀓𑀸𑀭𑀯𑀺𑀬𑀼𑀢𑁆𑀢𑁂’’𑀘𑁆𑀘𑀸𑀤𑀺𑀦𑀸. 𑀲𑀸 𑀲𑀤𑁆𑀤𑀢𑁆𑀣𑀸𑀯𑀮𑀺 𑀅𑀮𑀗𑁆𑀓𑀸𑀭𑁂𑀳𑀺 𑀯𑀺𑀬𑀼𑀢𑁆𑀢𑀸 𑀲𑀢𑀻𑀧𑀺 𑀦𑀺𑀤𑁆𑀤𑁄𑀲𑀸 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀤𑁄𑀲𑀭𑀳𑀺𑀢𑀸 𑀕𑀼𑀡𑀬𑀼𑀢𑁆𑀢𑀸 𑀢𑀢𑁄𑀬𑁂𑀯 𑀕𑀼𑀡𑀻𑀪𑀽𑀢𑀸 𑀲𑀤𑁆𑀤𑀸𑀮𑀗𑁆𑀓𑀸𑀭𑁂𑀦 𑀬𑀼𑀢𑁆𑀢𑀸 𑀤𑁄𑀲𑀭𑀳𑀺𑀢𑀸 𑀤𑀼𑀩𑁆𑀩𑀡𑁆𑀡𑀤𑀼𑀲𑁆𑀲𑀡𑁆𑀞𑀸𑀦𑀸𑀤𑀺𑀤𑁄𑀲𑁂𑀳𑀺 ¶ 𑀧𑀭𑀺𑀘𑁆𑀘𑀢𑁆𑀢𑀸 𑀕𑀼𑀡𑀬𑀼𑀢𑁆𑀢𑀸 𑀳𑀤𑀬𑀗𑁆𑀕𑀫𑀕𑀼𑀡𑀬𑀼𑀢𑁆𑀢𑀸 𑀯𑀥𑀽 𑀯𑀺𑀬 𑀅𑀗𑁆𑀕𑀦𑀸 𑀯𑀺𑀬 𑀫𑀦𑁄𑀳𑀭𑀸 𑀲𑀸𑀥𑀼𑀚𑀦𑁂 𑀆𑀭𑀸𑀥𑁂𑀢𑀺.

𑁧𑁭.

𑀧𑀤𑁂 𑀯𑀸𑀓𑁆𑀬𑁂 𑀢𑀤𑀢𑁆𑀣𑁂 𑀘, 𑀤𑁄𑀲𑀸 𑀬𑁂 𑀯𑀺𑀯𑀺𑀥𑀸 𑀫𑀢𑀸;

𑀲𑁄𑀤𑀸𑀳𑀭𑀡𑀫𑁂𑀢𑁂𑀲𑀁, 𑀮𑀓𑁆𑀔𑀡𑀁 𑀓𑀣𑀬𑀸𑀫𑁆𑀬’𑀳𑀁.

𑁧𑁭. 𑀬𑀢𑁄 𑀏𑀯𑀁 𑀕𑀼𑀡𑀸𑀮𑀗𑁆𑀓𑀸𑀭𑀲𑀁𑀬𑀼𑀢𑁆𑀢𑀸𑀬𑀧𑀺 𑀤𑁄𑀲𑀮𑀯𑀗𑁆𑀓𑀺𑀢𑀸𑀬 𑀯𑀺𑀜𑁆𑀜𑀽𑀦𑀫𑀦𑀸𑀤𑀭𑀡𑀻𑀬𑀢𑀸, 𑀅𑀮𑀗𑁆𑀓𑀸𑀭𑀯𑀺𑀬𑀼𑀢𑁆𑀢𑀸𑀧𑀺 𑀤𑁄𑀲𑀸𑀪𑀸𑀯𑁂𑀦 𑀕𑀼𑀡𑀬𑀼𑀢𑁆𑀢𑀸𑀬 𑀫𑀦𑁄𑀳𑀭𑀢𑀸, 𑀏𑀯𑀫𑀦𑀢𑁆𑀣𑀸𑀯𑀳𑀲𑁆𑀲𑀸𑀧𑀺 𑀤𑁄𑀲𑀲𑁆𑀲 𑀧𑀭𑀺𑀳𑀭𑀺𑀢𑀩𑁆𑀩𑀢𑀸 𑀲𑀢𑁆𑀣𑀤𑀺𑀝𑁆𑀞𑀺𑀬𑀸, 𑀢𑀲𑁆𑀫𑀸 𑀢𑁂 𑀤𑁄𑀲𑁂 𑀤𑀲𑁆𑀲𑁂𑀢𑀼𑀁 𑀧𑀝𑀺𑀚𑀸𑀦𑀸𑀢𑀺 ‘‘𑀧𑀤𑁂’’𑀢𑀺𑀆𑀤𑀺𑀦𑀸. 𑀢𑁂𑀲𑀁 𑀧𑀤𑀸𑀦𑀁 𑀯𑀸𑀓𑁆𑀬𑀸𑀦𑀁 𑀅𑀢𑁆𑀣𑁄 𑀢𑀤𑀢𑁆𑀣𑁄, 𑀢𑀲𑁆𑀫𑀺𑀁. 𑀉𑀤𑀸𑀳𑀭𑀻𑀬𑀢𑀺 𑀮𑀓𑁆𑀔𑁆𑀬𑀪𑀸𑀯𑁂𑀦𑀸𑀢𑀺 𑀉𑀤𑀸𑀳𑀭𑀡𑀁, 𑀲𑀳 𑀉𑀤𑀸𑀳𑀭𑀡𑁂𑀳𑀻𑀢𑀺 𑀲𑁄𑀤𑀸𑀳𑀭𑀡𑀁. 𑀮𑀓𑁆𑀔𑀺𑀬𑀢𑀺 𑀮𑀓𑁆𑀔𑀺𑀬𑀫𑀦𑁂𑀦𑀸𑀢𑀺 𑀮𑀓𑁆𑀔𑀡𑀁.

𑁧𑁭. 𑀏𑀯𑀁 𑀅𑀮𑀗𑁆𑀓𑀸𑀭𑀬𑀼𑀢𑁆𑀢𑀸𑀧𑀺 𑀅𑀧𑁆𑀧𑀓𑁂𑀦 𑀤𑁄𑀲𑁂𑀦 𑀬𑀼𑀢𑁆𑀢𑀩𑀦𑁆𑀥𑀲𑁆𑀲 𑀅𑀦𑀼𑀧𑀸𑀤𑁂𑀬𑁆𑀬𑀢𑁆𑀢𑀸, 𑀅𑀮𑀗𑁆𑀓𑀸𑀭𑀅𑀮𑀗𑁆𑀓𑀭𑀡𑁂 𑀅𑀲𑀢𑀺𑀧𑀺 𑀤𑁄𑀲𑀭𑀳𑀺𑀢𑁂 𑀯𑀺𑀜𑁆𑀜𑀽𑀳𑀺 𑀉𑀧𑀸𑀤𑁂𑀬𑁆𑀬𑀢𑁆𑀢𑀸 𑀘 𑀫𑀼𑀔𑁆𑀬𑀲𑁆𑀲 𑀤𑁄𑀲𑀧𑀭𑀺𑀳𑀸𑀭𑀲𑁆𑀲 𑀅𑀯𑀲𑁆𑀲𑀁 𑀓𑀢𑁆𑀢𑀩𑁆𑀩𑀢𑁆𑀢𑀸 𑀇𑀤𑀸𑀦𑀺 𑀅𑀥𑀺𑀕𑀢𑀤𑁄𑀲𑁂 𑀤𑀲𑁆𑀲𑁂𑀢𑀼𑀁 𑀧𑀝𑀺𑀚𑀸𑀦𑀸𑀢𑀺 ‘‘𑀧𑀤𑁂 𑀯𑀸𑀓𑁆𑀬𑁂’’𑀘𑁆𑀘𑀸𑀤𑀺𑀦𑀸. 𑀧𑀤𑁂 𑀦𑀸𑀫𑀸𑀤𑀺𑀘𑀢𑀼𑀩𑁆𑀩𑀺𑀥𑀧𑀤𑁂 𑀘, 𑀯𑀸𑀓𑁆𑀬𑁂 ‘‘𑀲𑁆𑀬𑀸𑀤𑁆𑀬𑀦𑁆𑀢𑀢𑁆𑀬𑀸𑀤𑁆𑀬𑀦𑁆𑀢𑀸𑀦𑀁 𑀘𑀬𑁄 𑀯𑀸𑀓𑁆𑀬𑀁 𑀲𑀓𑀸𑀭𑀓𑀓𑀺𑀭𑀺𑀬𑀸’’𑀢𑀺 𑀯𑀼𑀢𑁆𑀢𑀮𑀓𑁆𑀔𑀡𑁂 𑀯𑀸𑀓𑁆𑀬𑁂 𑀘, 𑀢𑀤𑀢𑁆𑀣𑁂 𑀘 𑀢𑁂𑀲𑀁 𑀧𑀤𑀯𑀸𑀓𑁆𑀬𑀸𑀦𑀁 𑀅𑀢𑁆𑀣𑁂 𑀘 𑀯𑀺𑀯𑀺𑀥𑀸 𑀅𑀦𑁂𑀓𑀧𑁆𑀧𑀓𑀸𑀭𑀸 𑀬𑁂 𑀤𑁄𑀲𑀸 𑀯𑀺𑀜𑁆𑀜𑀽𑀳𑀺 𑀤𑁄𑀲𑀪𑀸𑀯𑁂𑀦 𑀫𑀢𑀸 𑀜𑁂𑀬𑁆𑀬𑀸, 𑀏𑀢𑁂𑀲𑀁 𑀧𑀤𑀸𑀤𑀺𑀤𑁄𑀲𑀸𑀦𑀁 𑀲𑁄𑀤𑀸𑀳𑀭𑀡𑀁 𑀉𑀤𑀸𑀳𑀭𑀡𑀲𑀳𑀺𑀢𑀁 𑀮𑀓𑁆𑀔𑀡𑀁 𑀅𑀳𑀁 𑀓𑀣𑀬𑀸𑀫𑀺. 𑀏𑀢𑁆𑀣 𑀘𑁋

‘‘𑀧𑀤𑀁 𑀘𑀢𑀼𑀩𑁆𑀩𑀺𑀥𑀁 𑀯𑀼𑀢𑁆𑀢𑀁, 𑀦𑀸𑀫𑀸𑀔𑁆𑀬𑀸𑀢𑁄𑀧𑀲𑀕𑁆𑀕𑀺𑀓𑀁;

𑀦𑀺𑀧𑀸𑀢𑀓𑀜𑁆𑀘 𑀢𑀜𑁆𑀜𑀽𑀳𑀺, 𑀅𑀲𑁆𑀲𑁄 𑀔𑀮𑁆𑀯𑀸𑀪𑀺𑀥𑀸𑀯𑀢𑀻’’𑀢𑀺 [𑀭𑀽𑀧𑀪𑀺𑀤𑁆𑀥𑀺𑀝𑀻𑀓𑀸𑀬𑀁 𑀦𑀸𑀫𑀓𑀡𑁆𑀟𑁂].

𑀯𑀼𑀢𑁆𑀢𑀦𑀺𑀬𑀸𑀫𑁂𑀦 𑀧𑀤𑀁 𑀢𑀸𑀯 𑀤𑀝𑁆𑀞𑀩𑁆𑀩𑀁. 𑀉𑀤𑀸𑀳𑀭𑀻𑀬𑀦𑁆𑀢𑀺 𑀮𑀓𑁆𑀔𑀺𑀬𑀪𑀸𑀯𑁂𑀦𑀸𑀢𑀺 𑀉𑀤𑀸𑀳𑀭𑀡𑀸𑀦𑀻𑀢𑀺 𑀘, 𑀲𑀳 𑀉𑀤𑀸𑀳𑀭𑀡𑁂𑀦𑀸𑀢𑀺 𑀲𑁄𑀤𑀸𑀳𑀭𑀡𑀦𑁆𑀢𑀺 ¶ 𑀘, 𑀮𑀓𑁆𑀔𑀻𑀬𑀢𑀺 𑀮𑀓𑁆𑀔𑀺𑀬𑀫𑀦𑁂𑀦𑀸𑀢𑀺 𑀘 𑀯𑀺𑀕𑁆𑀕𑀳𑁄.

𑀧𑀤𑀤𑁄𑀲𑀉𑀤𑁆𑀤𑁂𑀲

𑁧𑁮.

𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀸𑀛𑀢𑁆𑀣-𑀓𑀺𑀮𑀺𑀝𑁆𑀞𑀸𑀦𑀺 𑀯𑀺𑀭𑁄𑀥𑀺 𑀘;

𑀦𑁂𑀬𑁆𑀬𑀁 𑀯𑀺𑀲𑁂𑀲𑀦𑀸𑀧𑁂𑀓𑁆𑀔𑀁, 𑀳𑀻𑀦𑀢𑁆𑀣𑀓𑀫𑀦𑀢𑁆𑀣𑀓𑀁.

𑀯𑀸𑀓𑁆𑀬𑀤𑁄𑀲𑀉𑀤𑁆𑀤𑁂𑀲

𑁧𑁯.

𑀤𑁄𑀲𑀸 𑀧𑀤𑀸𑀦, 𑀯𑀸𑀓𑁆𑀬𑀸𑀦-𑀫𑁂𑀓𑀢𑁆𑀣𑀁 𑀪𑀕𑁆𑀕𑀭𑀻𑀢𑀺𑀓𑀁;

𑀢𑀣𑀸 𑀩𑁆𑀬𑀸𑀓𑀺𑀡𑁆𑀡𑀕𑀸𑀫𑁆𑀫𑀸𑀦𑀺, 𑀬𑀢𑀺𑀳𑀻𑀦𑀁 𑀓𑀫𑀘𑁆𑀘𑀼𑀢𑀁;

𑀅𑀢𑀺𑀯𑀼𑀢𑁆𑀢𑀫𑀧𑁂𑀢𑀢𑁆𑀣𑀁, 𑀲𑀩𑀦𑁆𑀥𑀨𑀭𑀼𑀲𑀁 𑀢𑀣𑀸

𑀯𑀸𑀓𑁆𑀬𑀢𑁆𑀣𑀤𑁄𑀲𑀉𑀤𑁆𑀤𑁂𑀲

𑁨𑁦.

𑀅𑀧𑀓𑁆𑀓𑀫𑁄’𑀘𑀺𑀢𑁆𑀬𑀳𑀻𑀦𑀁, 𑀪𑀕𑁆𑀕𑀭𑀻𑀢𑀺 𑀲𑀲𑀁𑀲𑀬𑀁;

𑀕𑀸𑀫𑁆𑀫𑀁 𑀤𑀼𑀝𑁆𑀞𑀸𑀮𑀗𑁆𑀓𑀢𑀻𑀢𑀺, 𑀤𑁄𑀲𑀸 𑀯𑀸𑀓𑁆𑀬𑀢𑁆𑀣𑀦𑀺𑀲𑁆𑀲𑀺𑀢𑀸.

𑀧𑀤𑀤𑁄𑀲𑀸𑀤𑀺𑀉𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁮-𑁧𑁯-𑁨𑁦. 𑀇𑀤𑀸𑀦𑀺 𑀬𑀣𑀸𑀧𑀝𑀺𑀜𑁆𑀜𑀸𑀢𑁂 𑀤𑁄𑀲𑁂 𑀉𑀤𑁆𑀤𑀺𑀲𑀢𑀺 ‘‘𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭’’ 𑀇𑀘𑁆𑀘𑀸𑀤𑀺𑀦𑀸. 𑀯𑀺𑀭𑀼𑀤𑁆𑀥𑀁 𑀅𑀢𑁆𑀣𑀦𑁆𑀢𑀭𑀁 𑀬𑀲𑁆𑀲 𑀢𑀁 𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀁. 𑀓𑀺𑀁 𑀢𑀁? 𑀧𑀤𑀁. 𑀏𑀯𑀫𑀼𑀧𑀭𑀺𑀧𑀺 𑀬𑀣𑀸𑀬𑁄𑀕𑀁. 𑀅𑀥𑀺𑀓𑁄 𑀅𑀢𑁆𑀣𑁄 𑀯𑀺𑀲𑁂𑀲𑁆𑀬𑀲𑁆𑀲 𑀬𑁂𑀦 𑀢𑀁 𑀅𑀥𑁆𑀬𑀢𑁆𑀣𑀁. 𑀦𑀻𑀬𑀢𑀺 𑀅𑀯𑀼𑀢𑁆𑀢𑁄 𑀳𑁂𑀢𑀼 𑀏𑀢𑁆𑀣 𑀆𑀦𑀻𑀬𑀢𑀻𑀢𑀺 𑀦𑁂𑀬𑁆𑀬𑀁. 𑀤𑁄𑀲𑀸 𑀧𑀤𑀸𑀦𑀦𑁆𑀢𑀺 𑀬𑁂𑀳𑀺 𑀤𑁄𑀲𑁂𑀳𑀺 𑀧𑀤𑀸𑀦𑀺 𑀤𑀼𑀝𑁆𑀞𑀸𑀦𑀺, 𑀢𑁂 𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀢𑀸𑀤𑀬𑁄 𑀧𑀤𑀸𑀦𑀁 𑀤𑁄𑀲𑀸𑀢𑀺 𑀅𑀢𑁆𑀣𑁄. 𑀏𑀯𑀫𑀼𑀧𑀭𑀺𑀧𑀺 𑀬𑀣𑀸𑀬𑁄𑀕𑀁. 𑀯𑀸𑀓𑁆𑀬𑀸𑀦𑀁 𑀤𑁄𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀕𑁆𑀕𑀸 𑀭𑀻𑀢𑀺 𑀓𑀫𑁄 𑀬𑀲𑁆𑀫𑀺𑀁 𑀢𑀁 𑀪𑀕𑁆𑀕𑀭𑀻𑀢𑀺𑀓𑀁, 𑀯𑀸𑀓𑁆𑀬𑀁. 𑀅𑀧𑀓𑁆𑀓𑀫𑀢𑀸𑀤𑀬𑁄 𑀯𑀸𑀓𑁆𑀬𑀢𑁆𑀣𑀤𑁄𑀲𑀸, 𑀯𑀸𑀓𑁆𑀬𑀢𑁆𑀣𑀸𑀦𑀁 𑀤𑁄𑀲𑀢𑁄. 𑀯𑀸𑀓𑁆𑀬𑀁 𑀤𑀼𑀝𑁆𑀞𑀁 𑀲𑀺𑀬𑀸𑀢𑀺 𑀯𑀸𑀓𑁆𑀬𑀫𑁂𑀯 𑀯𑀺𑀲𑁂𑀲𑁆𑀬𑀢𑁂. 𑀢𑁂𑀦 𑀲𑀩𑁆𑀩𑀢𑁆𑀣 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀦 𑀦𑀺𑀤𑁆𑀤𑁂𑀲𑁄.

𑁧𑁮-𑁧𑁯-𑁨𑁦. 𑀇𑀤𑀸𑀦𑀺 𑀓𑀣𑁂𑀢𑀩𑁆𑀩𑀪𑀸𑀯𑁂𑀦 𑀧𑀝𑀺𑀜𑁆𑀜𑀸𑀢𑁂 𑀤𑁄𑀲𑁂 𑀉𑀤𑁆𑀤𑀺𑀲𑀦𑁆𑀢𑁄 ‘‘𑀯𑀺𑀭𑀼𑀤𑁆𑀥…𑀧𑁂… 𑀦𑀺𑀲𑁆𑀲𑀺𑀢𑀸’’𑀢𑀺 𑀆𑀳. 𑀓𑀯𑀻𑀳𑀺 𑀇𑀘𑁆𑀙𑀺𑀢𑀢𑁆𑀣𑀢𑁄 ¶ 𑀯𑀺𑀭𑀼𑀤𑁆𑀥𑁄 𑀅𑀜𑁆𑀜𑀢𑁆𑀣𑁄 𑀬𑀲𑁆𑀲 𑀧𑀤𑀲𑁆𑀲𑀸𑀢𑀺 𑀢𑀁 𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀁 𑀦𑀸𑀫. 𑀯𑀺𑀲𑁂𑀲𑁆𑀬𑀲𑁆𑀲 𑀅𑀥𑀺𑀓𑀢𑁆𑀣𑀪𑀸𑀯𑀓𑀭𑀡𑀢𑁄 𑀅𑀛𑀢𑁆𑀣𑀁 𑀦𑀸𑀫. 𑀓𑀯𑀻𑀳𑀺 𑀇𑀘𑁆𑀙𑀺𑀢𑀢𑁆𑀣𑀲𑁆𑀲𑀸𑀯𑀻𑀓𑀭𑀡𑁂 𑀅𑀯𑀺𑀲𑀤𑀢𑁆𑀢𑀸 𑀓𑀺𑀮𑀺𑀝𑁆𑀞𑀁 𑀦𑀸𑀫. 𑀤𑁂𑀲𑀓𑀸𑀮𑀓𑀮𑀸𑀤𑀻𑀦𑀁 𑀯𑀺𑀭𑀼𑀤𑁆𑀥𑀢𑁆𑀢𑀸 𑀯𑀺𑀭𑁄𑀥𑀺 𑀦𑀸𑀫. 𑀅𑀜𑁆𑀜𑀫𑀸𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀢𑁄 𑀦𑁂𑀬𑁆𑀬𑀁 𑀦𑀸𑀫. 𑀯𑀺𑀲𑁂𑀲𑀦𑀁 𑀧𑀢𑁆𑀯𑀸𑀯 𑀲𑀸𑀢𑁆𑀣𑀓𑀪𑀸𑀯𑀧𑁆𑀧𑀢𑁆𑀢𑀺𑀢𑁄 𑀯𑀺𑀲𑁂𑀲𑀦𑀸𑀧𑁂𑀓𑁆𑀔𑀁 𑀦𑀸𑀫. 𑀯𑀺𑀲𑁂𑀲𑁆𑀬𑀲𑁆𑀲 𑀳𑀻𑀦𑀢𑀸𑀧𑀸𑀤𑀦𑀢𑁄 𑀳𑀻𑀦𑀢𑁆𑀣𑀓𑀁 𑀦𑀸𑀫. 𑀅𑀢𑁆𑀣𑀭𑀳𑀺𑀢𑀢𑁆𑀢𑀸 𑀅𑀦𑀢𑁆𑀣𑀓𑀁 𑀦𑀸𑀫𑀸𑀢𑀺 𑀇𑀫𑁂 𑀅𑀝𑁆𑀞 𑀧𑀤𑀦𑀺𑀲𑁆𑀲𑀺𑀢𑀢𑁆𑀢𑀸 𑀧𑀤𑀤𑁄𑀲𑀸 𑀦𑀸𑀫.

𑀯𑀼𑀢𑁆𑀢𑀢𑁆𑀣𑀲𑁆𑀲𑁂𑀯 𑀧𑀼𑀦 𑀯𑀘𑀦𑀢𑁄 𑀏𑀓𑀢𑁆𑀣𑀁 𑀦𑀸𑀫. 𑀪𑀺𑀦𑁆𑀦𑀓𑁆𑀓𑀫𑀢𑁆𑀢𑀸 𑀪𑀕𑁆𑀕𑀭𑀻𑀢𑀺𑀓𑀁 𑀦𑀸𑀫. 𑀢𑀣𑀸 𑀲𑀫𑁆𑀫𑁄𑀳𑀓𑀸𑀭𑀡𑀢𑁆𑀢𑀸 𑀩𑁆𑀬𑀸𑀓𑀺𑀡𑁆𑀡𑀁 𑀦𑀸𑀫. 𑀯𑀺𑀲𑀺𑀝𑁆𑀞𑀯𑀘𑀦𑀯𑀺𑀭𑀳𑀢𑁄 𑀕𑀸𑀫𑁆𑀫𑀁 𑀦𑀸𑀫. 𑀬𑀢𑀺𑀲𑀫𑁆𑀧𑀢𑁆𑀢𑀺𑀯𑀺𑀭𑀳𑀢𑁄 𑀬𑀢𑀺𑀳𑀻𑀦𑀁 𑀦𑀸𑀫. 𑀧𑀤𑀢𑁆𑀣𑀓𑁆𑀓𑀫𑀢𑁄 𑀘𑀼𑀢𑀢𑁆𑀢𑀸 𑀓𑀫𑀘𑁆𑀘𑀼𑀢𑀁 𑀦𑀸𑀫. 𑀮𑁄𑀓𑀺𑀬𑀁 𑀯𑁄𑀳𑀸𑀭𑀫𑀢𑀺𑀓𑁆𑀓𑀫𑁆𑀫 𑀯𑀼𑀢𑁆𑀢𑀢𑁆𑀢𑀸 𑀅𑀢𑀺𑀯𑀼𑀢𑁆𑀢𑀁 𑀦𑀸𑀫. 𑀲𑀫𑀼𑀤𑀸𑀬𑀢𑁆𑀣𑀢𑁄 𑀅𑀧𑀕𑀢𑀢𑁆𑀢𑀸 𑀅𑀧𑁂𑀢𑀢𑁆𑀣𑀁 𑀦𑀸𑀫. 𑀩𑀦𑁆𑀥𑀨𑀭𑀼𑀲𑀬𑀼𑀢𑁆𑀢𑀢𑁆𑀢𑀸 𑀩𑀦𑁆𑀥𑀨𑀭𑀼𑀲𑀁 𑀦𑀸𑀫, 𑀢𑁂𑀦 𑀲𑀳𑀺𑀢𑀁 𑀲𑀩𑀦𑁆𑀥𑀨𑀭𑀼𑀲𑀦𑁆𑀢𑀺 𑀇𑀫𑁂 𑀦𑀯 𑀯𑀸𑀓𑁆𑀬𑀸𑀦𑀁 𑀢𑀣𑀸 𑀤𑁄𑀲𑀸 𑀦𑀸𑀫. 𑀏𑀢𑁆𑀣 𑀢𑀣𑀸𑀲𑀤𑁆𑀤𑁄 ‘‘𑀤𑁄𑀲𑀸’’𑀢𑀺 𑀧𑀤𑀁 𑀉𑀧𑀲𑀁𑀳𑀭𑀢𑀺.

𑀅𑀧𑀕𑀢𑀓𑁆𑀓𑀫𑀢𑁆𑀢𑀸 𑀅𑀧𑀓𑁆𑀓𑀫𑀁 𑀦𑀸𑀫. 𑀉𑀘𑀺𑀢𑀪𑀸𑀯𑀲𑁆𑀲 𑀧𑀭𑀺𑀳𑀻𑀦𑀢𑁆𑀢𑀸 𑀑𑀘𑀺𑀢𑁆𑀬𑀳𑀻𑀦𑀁 𑀦𑀸𑀫. 𑀪𑀺𑀦𑁆𑀦𑀯𑀺𑀪𑀢𑁆𑀢𑀺𑀓𑁆𑀓𑀫𑀢𑁆𑀢𑀸 𑀪𑀕𑁆𑀕𑀭𑀻𑀢𑀺 𑀦𑀸𑀫. 𑀲𑀁𑀲𑀬𑀚𑀦𑀦𑀢𑁄 𑀲𑀲𑀁𑀲𑀬𑀁 𑀦𑀸𑀫. 𑀤𑀼𑀧𑁆𑀧𑀢𑀻𑀢𑀺𑀓𑀭𑀢𑁆𑀢𑀸 𑀕𑀸𑀫𑁆𑀫𑀁 𑀦𑀸𑀫. 𑀤𑀽𑀲𑀺𑀢𑀸𑀮𑀗𑁆𑀓𑀸𑀭𑀢𑁆𑀢𑀸 𑀤𑀼𑀝𑁆𑀞𑀸𑀮𑀗𑁆𑀓𑀢𑀺 𑀦𑀸𑀫𑀸𑀢𑀺𑀫𑁂 𑀙 𑀯𑀸𑀓𑁆𑀬𑀢𑁆𑀣𑀦𑀺𑀲𑁆𑀲𑀺𑀢𑀢𑁆𑀢𑀸 𑀯𑀸𑀓𑁆𑀬𑀢𑁆𑀣𑀤𑁄𑀲𑀸 𑀦𑀸𑀫.

𑀅𑀜𑁆𑀜𑁄 𑀅𑀢𑁆𑀣𑁄 𑀅𑀢𑁆𑀣𑀦𑁆𑀢𑀭𑁄. 𑀯𑀺𑀭𑀼𑀤𑁆𑀥𑁄 𑀅𑀢𑁆𑀣𑀦𑁆𑀢𑀭𑁄 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀤𑁄𑀲𑀧𑀓𑀸𑀲𑀓𑀧𑀤𑀫𑁆𑀧𑀺 𑀤𑁄𑀲𑀢𑁄 𑀅𑀩𑁆𑀬𑀢𑀺𑀭𑀺𑀢𑁆𑀢𑀢𑁆𑀢𑀸 𑀤𑁄𑀲𑁄 𑀦𑀸𑀫. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀫𑀸𑀲𑁂𑀦 𑀧𑀤𑀲𑁆𑀲 𑀕𑀳𑀺𑀢𑀢𑁆𑀢𑀸 𑀦𑀧𑀼𑀁𑀲𑀓𑀁 𑀳𑁄𑀢𑀺. 𑀏𑀲𑁂𑀯𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺. 𑀯𑀺𑀲𑁂𑀲𑁆𑀬𑀲𑁆𑀲 𑀅𑀥𑀺𑀓𑁄 𑀅𑀢𑁆𑀣𑁄 𑀬𑀲𑁆𑀲 𑀢𑀁, 𑀓𑀺𑀮𑀺𑀝𑁆𑀞𑀁 𑀯𑀺𑀬 𑀓𑀺𑀮𑀺𑀝𑁆𑀞𑀁. 𑀬𑀣𑀸 𑀳𑀺 𑀫𑀮𑀕𑁆𑀕𑀳𑀺𑀢𑁄 𑀆𑀤𑀸𑀲𑁄 𑀅𑀢𑁆𑀢𑀦𑁄 𑀓𑀺𑀮𑀺𑀝𑁆𑀞𑀢𑁆𑀢𑀸 ¶ 𑀫𑀼𑀔𑀸𑀤𑀻𑀦𑀁 𑀧𑀓𑀸𑀲𑀦𑁂 𑀅𑀯𑀺𑀲𑀤𑁄 𑀳𑁄𑀢𑀺, 𑀏𑀯𑀫𑀥𑀺𑀧𑁆𑀧𑁂𑀢𑀢𑁆𑀣𑀧𑁆𑀧𑀓𑀸𑀲𑀦𑁂 𑀅𑀲𑀫𑀢𑁆𑀣𑀁 𑀧𑀤𑀁 𑀓𑀺𑀮𑀺𑀝𑁆𑀞𑀁 𑀦𑀸𑀫. 𑀯𑀺𑀭𑁄𑀥𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀯𑀺𑀭𑁄𑀥𑀺. 𑀦𑀻𑀬𑀢𑀺 𑀅𑀯𑀼𑀢𑁆𑀢𑁄 𑀳𑁂𑀢𑀼 𑀏𑀢𑁆𑀣𑀸𑀢𑀺 𑀦𑁂𑀬𑁆𑀬𑀁. 𑀯𑀺𑀲𑁂𑀲𑀦𑁂 𑀅𑀧𑁂𑀓𑁆𑀔𑀸 𑀬𑀲𑁆𑀲 𑀢𑀁. 𑀳𑀻𑀦𑁄 𑀯𑀺𑀲𑁂𑀲𑁆𑀬𑀲𑁆𑀲 𑀅𑀢𑁆𑀣𑁄 𑀬𑁂𑀦 𑀢𑀁. 𑀦𑀢𑁆𑀣𑀺 𑀅𑀢𑁆𑀣𑁄 𑀬𑀲𑁆𑀲 𑀢𑀦𑁆𑀢𑀺 𑀯𑀺𑀕𑁆𑀕𑀳𑁄.

𑀧𑀤𑀤𑁄𑀲𑀸𑀦𑀁 𑀅𑀦𑀜𑁆𑀜𑀢𑁆𑀢𑁂𑀧𑀺 𑀯𑀺𑀓𑀧𑁆𑀧𑀦𑀸𑀪𑁂𑀤𑀢𑁄 ‘‘𑀧𑀤𑀸𑀦𑀁 𑀤𑁄𑀲𑀸’’𑀢𑀺 𑀯𑀼𑀢𑁆𑀢𑀁, 𑀬𑀣𑀸 ‘‘𑀲𑀺𑀮𑀸𑀧𑀼𑀢𑁆𑀢𑀓𑀲𑁆𑀲 𑀲𑀭𑀻𑀭’’𑀦𑁆𑀢𑀺. 𑀯𑀸𑀓𑁆𑀬𑀸𑀦𑀁 𑀤𑁄𑀲𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀏𑀓𑁄 𑀅𑀢𑁆𑀣𑁄 𑀬𑀲𑁆𑀲 𑀢𑀁. 𑀪𑀕𑁆𑀕𑀸𑀭𑀻𑀢𑀺 𑀓𑀫𑁄 𑀬𑀲𑁆𑀲 𑀢𑀁. 𑀯𑀺𑀲𑀼𑀁 𑀯𑀺𑀲𑀼𑀁 𑀆𑀓𑀺𑀡𑁆𑀡𑀁 𑀩𑁆𑀬𑀸𑀓𑀺𑀡𑁆𑀡𑀁. 𑀕𑀸𑀫𑁂 𑀪𑀯𑁄 𑀕𑀸𑀫𑁆𑀫𑁄, 𑀅𑀩𑁆𑀬𑀢𑁆𑀢𑀸𑀦𑀁 𑀯𑁄𑀳𑀸𑀭𑁄. 𑀢𑀧𑁆𑀧𑀓𑀸𑀲𑀓𑀧𑀤𑀫𑁆𑀧𑀺 𑀉𑀧𑀘𑀸𑀭𑀢𑁄 𑀕𑀸𑀫𑁆𑀫𑀁 𑀦𑀸𑀫. 𑀬𑀢𑀺 𑀳𑀻𑀦𑀸 𑀏𑀢𑁆𑀣𑀸𑀢𑀺 𑀬𑀢𑀺𑀳𑀻𑀦𑀁. 𑀓𑀫𑀢𑁄 𑀘𑀼𑀢𑀁 𑀓𑀫𑀘𑁆𑀘𑀼𑀢𑀁. 𑀅𑀢𑀺𑀓𑁆𑀓𑀫𑁆𑀫 𑀯𑀼𑀢𑁆𑀢𑀁 𑀅𑀢𑀺𑀯𑀼𑀢𑁆𑀢𑀁. 𑀅𑀢𑁆𑀣𑀢𑁄 𑀅𑀧𑁂𑀢𑀁 𑀅𑀧𑁂𑀢𑀢𑁆𑀣𑀁. 𑀩𑀦𑁆𑀥𑁂 𑀨𑀭𑀼𑀲𑀁 𑀨𑀭𑀼𑀲𑀢𑀸 𑀬𑀢𑁆𑀣 𑀢𑀁. 𑀅𑀧𑀕𑀢𑁄 𑀓𑀫𑁄 𑀬𑀲𑁆𑀫𑀸 𑀢𑀁. 𑀑𑀘𑀺𑀢𑁆𑀬𑀁 𑀳𑀻𑀦𑀁 𑀬𑀢𑁆𑀣 𑀢𑀁. 𑀪𑀕𑁆𑀕𑀸 𑀭𑀻𑀢𑀺 𑀬𑀢𑁆𑀣 𑀢𑀁. 𑀲𑀳 𑀲𑀁𑀲𑀬𑁂𑀦 𑀯𑀢𑁆𑀢𑀢𑀻𑀢𑀺 𑀢𑀁. 𑀕𑀸𑀫𑁆𑀫𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀤𑀼𑀝𑁆𑀞𑀸 𑀤𑀽𑀲𑀺𑀢𑀸 𑀅𑀮𑀗𑁆𑀓𑀢𑀺 𑀅𑀮𑀗𑁆𑀓𑀸𑀭𑁄 𑀬𑀢𑁆𑀣 𑀢𑀁. 𑀯𑀸𑀓𑁆𑀬𑀸𑀦𑀁 𑀅𑀢𑁆𑀣𑁄, 𑀢𑀦𑁆𑀦𑀺𑀲𑁆𑀲𑀺𑀢𑀸 𑀯𑀸𑀓𑁆𑀬𑀢𑁆𑀣𑀦𑀺𑀲𑁆𑀲𑀺𑀢𑀸𑀢𑀺 𑀯𑀺𑀕𑁆𑀕𑀳𑁄. 𑀏𑀢𑁆𑀣 𑀅𑀦𑀢𑁆𑀣𑀓𑀸𑀧𑁂𑀢𑀢𑁆𑀣𑀤𑁄𑀲𑀤𑁆𑀯𑀬𑀁 𑀧𑀤𑀯𑀸𑀓𑁆𑀬𑀢𑁄 𑀪𑀺𑀦𑁆𑀦𑀁, 𑀅𑀜𑁆𑀜𑀁 𑀪𑀕𑁆𑀕𑀭𑀻𑀢𑀺𑀤𑁄𑀲𑀤𑁆𑀯𑀬𑀁, 𑀕𑀸𑀫𑁆𑀫𑀤𑁆𑀯𑀬𑀁, 𑀓𑀫𑀘𑁆𑀘𑀼𑀢𑀅𑀧𑀓𑁆𑀓𑀫𑀤𑁆𑀯𑀬𑀜𑁆𑀘 𑀯𑀸𑀓𑁆𑀬𑀯𑀸𑀓𑁆𑀬𑀢𑁆𑀣𑀢𑁄 𑀪𑀺𑀦𑁆𑀦𑀁.

𑀧𑀤𑀤𑁄𑀲𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁨𑁧.

𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀁 𑀢𑀜𑁆𑀳𑀺, 𑀬𑀲𑁆𑀲’𑀜𑁆𑀜𑀢𑁆𑀣𑁄 𑀯𑀺𑀭𑀼𑀚𑁆𑀛𑀢𑀺;

𑀅𑀥𑀺𑀧𑁆𑀧𑁂𑀢𑁂 𑀬𑀣𑀸 𑀫𑁂𑀖𑁄, 𑀯𑀺𑀲𑀤𑁄 𑀲𑀼𑀔𑀬𑁂 𑀚𑀦𑀁.

𑁨𑁧. 𑀅𑀣𑁄𑀤𑁆𑀤𑁂𑀲𑀓𑁆𑀓𑀫𑁂𑀦 𑀧𑀤𑀸𑀤𑀺𑀤𑁄𑀲𑁂 𑀉𑀤𑀸𑀳𑀭𑀢𑀺 ‘‘𑀯𑀺𑀭𑀼𑀤𑁆𑀥𑀺’’ 𑀘𑁆𑀘𑀸𑀤𑀺𑀦𑀸. 𑀳𑀺 𑀬𑀲𑁆𑀫𑀸 𑀓𑀸𑀭𑀡𑀸, 𑀧𑀲𑀺𑀤𑁆𑀥𑀺𑀬𑀁 𑀯𑀸 𑀳𑀺𑀲𑀤𑁆𑀤𑁄. 𑀬𑀲𑁆𑀲 𑀧𑀤𑀲𑁆𑀲 𑀅𑀜𑁆𑀜𑁄 𑀅𑀥𑀺𑀧𑁆𑀧𑁂𑀢𑀢𑁄 𑀅𑀧𑀭𑁄 𑀅𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁂 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑁂 𑀅𑀢𑁆𑀣𑁂 𑀯𑀺𑀭𑀼𑀚𑁆𑀛𑀢𑀻𑀢𑀺 𑀅𑀦𑀼𑀯𑀤𑀺𑀢𑁆𑀯𑀸 𑀢𑀲𑁆𑀫𑀸 ¶ 𑀢𑀁 ‘‘𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭’’𑀦𑁆𑀢𑀺 𑀯𑀺𑀥𑀻𑀬𑀢𑁂. ‘‘𑀬𑀣𑁂’’𑀢𑁆𑀬𑀼𑀤𑀸𑀳𑀭𑀢𑀺. 𑀬𑀣𑀸 𑀇𑀤𑀁 𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀁, 𑀢𑀣𑀸 𑀅𑀜𑁆𑀜𑀫𑁆𑀧𑀺 𑀢𑀸𑀤𑀺𑀲𑀁 𑀤𑀝𑁆𑀞𑀩𑁆𑀩𑀁. 𑀦 𑀢𑁆𑀯𑀺𑀤𑀫𑁂𑀯𑁂𑀢𑀺 𑀬𑀣𑀸𑀲𑀤𑁆𑀤𑀲𑁆𑀲 𑀅𑀢𑁆𑀣𑁄. 𑀫𑁂𑀖𑁄 𑀯𑀺𑀲𑀤𑁄 𑀲𑀼𑀔𑀬𑁂 𑀚𑀦𑀦𑁆𑀢𑀺. 𑀯𑀺𑀲𑀁 𑀉𑀤𑀓𑀁, 𑀢𑀁 𑀤𑀤𑀸𑀢𑀻𑀢𑀺 𑀯𑀺𑀲𑀤𑁄 𑀫𑁂𑀖𑁄 𑀯𑀸𑀭𑀺𑀯𑀳𑁄 𑀚𑀦𑀁 𑀮𑁄𑀓𑀁 𑀲𑀼𑀔𑀬𑁂 𑀲𑀼𑀔𑀬𑀢𑀻𑀢𑀺 𑀓𑀯𑀺𑀘𑁆𑀙𑀺𑀢𑀢𑁆𑀣𑁄. 𑀯𑀺𑀲𑀲𑀤𑁆𑀤𑁄 𑀕𑀭𑀴𑀲𑁆𑀲 𑀘 𑀯𑀸𑀘𑀓𑁄 𑀲𑀺𑀬𑀸𑀢𑀺 𑀕𑀭𑀴𑀤𑁄 𑀫𑁂𑀖𑁄 𑀫𑀸𑀭𑀬𑀢𑀺, 𑀦 𑀧𑀦 𑀲𑀼𑀔𑀬𑀢𑀻𑀢𑀺 ‘‘𑀯𑀺𑀲𑀤𑁄’’𑀢𑀺 𑀯𑀺𑀲𑁂𑀲𑀦𑀧𑀤𑀲𑁆𑀲 𑀯𑀺𑀭𑀼𑀤𑁆𑀥𑀢𑀸.

𑁨𑁧. 𑀇𑀤𑀸𑀦𑀺 𑀉𑀤𑁆𑀤𑀺𑀝𑁆𑀞𑀸𑀦𑀼𑀓𑁆𑀓𑀫𑁂𑀦 𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀸𑀤𑀻𑀦𑀁 𑀲𑀮𑀓𑁆𑀔𑀡𑀮𑀓𑁆𑀔𑀺𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀭𑀼𑀤𑁆𑀥𑀺’’𑀘𑁆𑀘𑀸𑀤𑀺𑀫𑀸𑀳. 𑀬𑀲𑁆𑀲 𑀧𑀤𑀲𑁆𑀲 𑀅𑀜𑁆𑀜𑀢𑁆𑀣𑁄 𑀓𑀯𑀺𑀘𑁆𑀙𑀺𑀢𑀢𑁆𑀣𑀢𑁄 𑀅𑀜𑁆𑀜𑁄 𑀅𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁂 𑀇𑀘𑁆𑀙𑀺𑀢𑀢𑁆𑀣𑁂 𑀳𑀺 𑀬𑀲𑁆𑀫𑀸 𑀯𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀢𑀁 𑀧𑀤𑀁 𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀁 𑀦𑀸𑀫. 𑀧𑀲𑀺𑀤𑁆𑀥𑀺𑀬𑀁 𑀯𑀸 𑀳𑀺𑀲𑀤𑁆𑀤𑁄. 𑀢𑀣𑀸 𑀳𑁂𑀲 𑀅𑀧𑁆𑀧𑀲𑀺𑀤𑁆𑀥𑀁 𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀁 ‘‘𑀬𑀲𑁆𑀲 𑀅𑀜𑁆𑀜𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁂 𑀯𑀺𑀭𑀼𑀚𑁆𑀛𑀢𑀻’’𑀢𑀺 𑀧𑀓𑀸𑀲𑁂𑀢𑁆𑀯𑀸 𑀢𑀲𑁆𑀫𑀺𑀁 𑀧𑀓𑀸𑀲𑀺𑀢𑀢𑁆𑀣𑀯𑀺𑀲𑀬𑁂 𑀯𑀢𑁆𑀢𑀢𑀺. ‘‘𑀢𑀁 𑀳𑀻’’𑀢𑀺 𑀬𑁄𑀚𑀺𑀢𑀢𑁆𑀢𑀸 ‘‘𑀬𑀲𑁆𑀲 𑀅𑀜𑁆𑀜𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁂 𑀯𑀺𑀭𑀼𑀚𑁆𑀛𑀢𑀻’’𑀢𑀺 𑀮𑀓𑁆𑀔𑀡𑀁 𑀧𑀲𑀺𑀤𑁆𑀥𑀪𑀸𑀯𑁂𑀦 𑀅𑀦𑀼𑀯𑀤𑀺𑀢𑁆𑀯𑀸 𑀢𑀁 𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀦𑁆𑀢𑀺 𑀅𑀦𑀼𑀯𑀤𑀺𑀢𑀩𑁆𑀩𑀅𑀧𑁆𑀧𑀲𑀺𑀤𑁆𑀥𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀁 𑀯𑀺𑀥𑀻𑀬𑀢𑁂, 𑀬𑀣𑀸 ‘‘𑀬𑁄 𑀓𑀼𑀡𑁆𑀟𑀮𑀻, 𑀲𑁄 𑀤𑁂𑀯𑀤𑀢𑁆𑀢𑁄’’𑀢𑀺. 𑀉𑀧𑀭𑀺 𑀧𑀲𑀺𑀤𑁆𑀥𑀸𑀦𑀼𑀯𑀸𑀤𑁂𑀦 𑀅𑀧𑁆𑀧𑀲𑀺𑀤𑁆𑀥𑀯𑀺𑀥𑀸𑀦𑀫𑁂𑀯 𑀤𑀝𑁆𑀞𑀩𑁆𑀩𑀁. ‘‘𑀬𑀣𑀸…𑀧𑁂… 𑀚𑀦’’𑀦𑁆𑀢𑀺 𑀉𑀤𑀸𑀳𑀭𑀡𑀁 𑀮𑀓𑁆𑀔𑀺𑀬𑀁 𑀤𑀲𑁆𑀲𑁂𑀢𑀺. 𑀬𑀣𑀸 ‘‘𑀫𑁂𑀖𑁄 𑀯𑀺𑀲𑀤𑁄’’𑀘𑁆𑀘𑀸𑀤𑀺 𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀲𑁆𑀲 𑀉𑀤𑀸𑀳𑀭𑀡𑀁, 𑀏𑀯𑀫𑀻𑀤𑀺𑀲𑀫𑀜𑁆𑀜𑀫𑁆𑀧𑀺 𑀇𑀫𑀲𑁆𑀲𑀼𑀤𑀸𑀳𑀭𑀡𑀁, 𑀦 𑀓𑁂𑀯𑀮𑀁 ‘‘𑀫𑁂𑀖𑁄’’𑀘𑁆𑀘𑀸𑀤𑀺𑀫𑁂𑀯 𑀪𑀯𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀲𑀤𑁆𑀤𑁄 𑀘𑁂𑀢𑁆𑀣 𑀇𑀯𑀲𑀤𑁆𑀤𑀧𑀭𑀺𑀬𑀸𑀬𑀢𑁆𑀣𑁂𑀧𑀺 𑀉𑀤𑀸𑀳𑀭𑀡𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀉𑀧𑀭𑀺𑀧𑁆𑀬𑁂𑀯𑀁. 𑀫𑁂𑀖𑁄 𑀅𑀫𑁆𑀩𑀼𑀥𑀭𑁄 𑀯𑀺𑀲𑀤𑁄 𑀯𑀺𑀲𑀲𑀗𑁆𑀔𑀸𑀢𑀁 𑀚𑀮𑀁 𑀤𑀤𑀦𑁆𑀢𑁄 𑀚𑀦𑀁 𑀲𑀼𑀔𑀬𑁂 𑀲𑀼𑀔𑀬𑀢𑀻𑀢𑀺 𑀓𑀯𑀻𑀳𑀺 𑀅𑀥𑀺𑀧𑁆𑀧𑁂𑀢𑀢𑁆𑀣𑁄. 𑀏𑀢𑁆𑀣 𑀯𑀺𑀲𑀲𑀤𑁆𑀤𑀲𑁆𑀲 𑀕𑀭𑀴𑀲𑀗𑁆𑀔𑀸𑀢𑀲𑀧𑁆𑀧𑀯𑀺𑀲𑀯𑀸𑀘𑀓𑀢𑁆𑀢𑀸, ‘‘𑀯𑀺𑀲𑀁 𑀤𑀤𑀸𑀢𑀻𑀢𑀺 𑀯𑀺𑀲𑀤𑁄’’𑀢𑀺 𑀏𑀢𑁆𑀣 𑀯𑀺𑀲𑀲𑁆𑀲 𑀉𑀤𑀓𑀯𑀺𑀲𑀸𑀦𑀁 𑀲𑀸𑀥𑀸𑀭𑀡𑀢𑁆𑀢𑀸 𑀯𑀺𑀲𑀤𑀸𑀬𑀓𑁄 𑀫𑁂𑀖𑁄 𑀦𑀸𑀲𑁂𑀢𑀺𑀬𑁂𑀯, 𑀦 𑀲𑀼𑀔𑀬𑀢𑀻𑀢𑀺 𑀓𑀯𑀺𑀦𑀸 ¶ 𑀅𑀥𑀺𑀧𑁆𑀧𑁂𑀢𑀲𑁆𑀲 𑀲𑀼𑀔𑀓𑀸𑀭𑀡𑀲𑁆𑀲 𑀫𑁂𑀖𑀯𑀺𑀲𑁂𑀲𑀦𑀯𑀺𑀲𑀲𑀤𑁆𑀤𑀲𑁆𑀲 𑀯𑀺𑀭𑀼𑀤𑁆𑀥𑀅𑀜𑁆𑀜𑀢𑁆𑀣𑀢𑀸𑀢𑀺 𑀯𑀺𑀲𑀧𑀤𑀁 𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀤𑁄𑀲𑁂𑀦 𑀤𑀼𑀝𑁆𑀞𑀦𑁆𑀢𑀺.

𑁨𑁨.

𑀯𑀺𑀲𑁂𑀲𑁆𑀬𑀫𑀥𑀺𑀓𑀁 𑀬𑁂𑀦𑀸’-

𑀥𑁆𑀬𑀢𑁆𑀣𑀫𑁂𑀢𑀁 𑀪𑀯𑁂 𑀬𑀣𑀸;

𑀑𑀪𑀸𑀲𑀺𑀢𑀸𑀲𑁂𑀲𑀤𑀺𑀲𑁄,

𑀔𑀚𑁆𑀚𑁄𑀢𑁄’𑀬𑀁 𑀯𑀺𑀭𑀸𑀚𑀢𑁂.

𑁨𑁨. 𑀬𑁂𑀦 𑀧𑀤𑁂𑀦 𑀯𑀺𑀲𑁂𑀲𑁆𑀬𑀁 𑀯𑀺𑀲𑁂𑀲𑀺𑀢𑀩𑁆𑀩𑀁 𑀅𑀧𑀭𑀁 𑀧𑀤𑀁 𑀅𑀢𑁆𑀣𑀯𑀲𑁂𑀦 𑀅𑀥𑀺𑀓𑀁 𑀪𑀯𑀢𑀻𑀢𑁆𑀬𑀦𑀼𑀯𑀤𑀺𑀢𑁆𑀯𑀸 𑀏𑀢𑀁 𑀅𑀛𑀢𑁆𑀣𑀁 𑀪𑀯𑁂𑀢𑀺 𑀯𑀺𑀥𑀻𑀬𑀢𑁂. ‘‘𑀬𑀣𑁂’’𑀢𑁆𑀬𑀼𑀤𑀸𑀳𑀭𑀢𑀺 ‘‘𑀑𑀪𑀸𑀲𑀺𑀢𑁂’’𑀘𑁆𑀘𑀸𑀤𑀺. 𑀏𑀯𑀫𑀼𑀧𑀭𑀺𑀧𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀁. 𑀑𑀪𑀸𑀲𑀺𑀢𑀸 𑀤𑀻𑀧𑀺𑀢𑀸 𑀅𑀲𑁂𑀲𑀸 𑀦𑀺𑀔𑀺𑀮𑀸 𑀤𑀺𑀲𑀸𑀬𑁂𑀦 𑀲𑁄𑀬𑀁 𑀔𑀚𑁆𑀚𑁄𑀢𑁄 𑀯𑀺𑀭𑀸𑀚𑀢𑁂 𑀤𑀺𑀧𑁆𑀧𑀢𑀺. 𑀏𑀢𑁆𑀣 𑀔𑀚𑁆𑀚𑁄𑀢𑀲𑁆𑀲𑀸𑀔𑀺𑀮𑀤𑀺𑀲𑀸𑀪𑀸𑀕𑀸𑀯𑀪𑀸𑀲𑀦𑀫𑀢𑀺𑀯𑀼𑀢𑁆𑀢𑀻𑀢𑀺 𑀅𑀥𑀺𑀓𑀢𑁆𑀣𑀁.

𑁨𑁨. 𑀬𑁂𑀦 𑀯𑀺𑀲𑁂𑀲𑀦𑀧𑀤𑁂𑀦 𑀯𑀺𑀲𑁂𑀲𑁆𑀬𑀁 𑀯𑀺𑀲𑁂𑀲𑀺𑀢𑀩𑁆𑀩𑀁 𑀧𑀤𑀁 𑀅𑀢𑁆𑀣𑀯𑀲𑁂𑀦 𑀅𑀥𑀺𑀓𑀁 𑀳𑁄𑀢𑀺, 𑀏𑀢𑀁 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑁄𑀧𑁂𑀢𑀁 𑀧𑀤𑀁 𑀅𑀛𑀢𑁆𑀣𑀁 𑀪𑀯𑁂 𑀅𑀛𑀢𑁆𑀣𑀁 𑀦𑀸𑀫 𑀧𑀤𑀤𑁄𑀲𑁄 𑀪𑀯𑁂. 𑀬𑀣𑀸 𑀢𑀲𑁆𑀲𑀼𑀤𑀸𑀳𑀭𑀡𑀫𑁂𑀯𑀁. 𑀑𑀪𑀸𑀲𑀺𑀢𑀸𑀲𑁂𑀲𑀤𑀺𑀲𑁄 𑀚𑁄𑀢𑀺𑀢𑀲𑀩𑁆𑀩𑀤𑀺𑀲𑁄 𑀅𑀬𑀁 𑀔𑀚𑁆𑀚𑁄𑀢𑁄 𑀅𑀬𑀁 𑀚𑁄𑀢𑀺𑀭𑀺𑀗𑁆𑀕𑀡𑁄 𑀯𑀺𑀭𑀸𑀚𑀢𑁂 𑀤𑀺𑀧𑁆𑀧𑀢𑀺. 𑀏𑀢𑁆𑀣 𑀯𑀺𑀲𑁂𑀲𑁆𑀬𑀲𑁆𑀲 𑀔𑀚𑁆𑀚𑁄𑀢𑀲𑁆𑀲 𑀲𑀓𑀮𑀤𑀺𑀲𑁄𑀪𑀸𑀲𑀦𑀲𑁆𑀲 𑀅𑀛𑀢𑁆𑀣𑀢𑁆𑀢𑀸 [𑀅𑀢𑁆𑀬𑀼𑀢𑁆𑀢𑀢𑁆𑀢𑀸 (𑀓.)] ‘‘𑀑𑀪𑀸𑀲𑀺𑀢𑀸𑀲𑁂𑀲𑀤𑀺𑀲𑁄’’𑀢𑀺 𑀯𑀺𑀲𑁂𑀲𑀦𑀧𑀤𑀁 𑀅𑀛𑀢𑁆𑀣𑀧𑀤𑀤𑁄𑀲𑁄 𑀦𑀸𑀫. 𑀑𑀪𑀸𑀲𑀺𑀢𑀸 𑀅𑀲𑁂𑀲𑀤𑀺𑀲𑀸 𑀬𑁂𑀦𑀸𑀢𑀺 𑀯𑀺𑀕𑁆𑀕𑀳𑁄.

𑁨𑁩.

𑀬𑀲𑁆𑀲’𑀢𑁆𑀣𑀸𑀯𑀕𑀫𑁄 𑀤𑀼𑀓𑁆𑀔𑁄,

𑀧𑀓𑀢𑁆𑀬𑀸𑀤𑀺𑀯𑀺𑀪𑀸𑀕𑀢𑁄;

𑀓𑀺𑀮𑀺𑀝𑁆𑀞𑀁 𑀢𑀁 𑀬𑀣𑀸 𑀢𑀸𑀬,

𑀲𑁄’𑀬𑀫𑀸𑀮𑀺𑀗𑁆𑀕𑁆𑀬𑀢𑁂 𑀧𑀺𑀬𑀸.

𑁨𑁩. 𑀧𑀓𑀢𑁆𑀬𑀸𑀤𑀺𑀯𑀺𑀪𑀸𑀕𑀢𑁄𑀢𑀺 ¶ 𑀧𑀘𑁆𑀘𑀬𑀸 𑀧𑀞𑀫𑀁 𑀓𑀭𑀻𑀬𑀢𑀻𑀢𑀺 𑀧𑀓𑀢𑀺. 𑀆𑀤𑀺𑀲𑀤𑁆𑀤𑁂𑀦 𑀧𑀘𑁆𑀘𑀬𑀸𑀤𑀻𑀦𑀁 𑀧𑀭𑀺𑀕𑁆𑀕𑀳𑁄. 𑀧𑀓𑀢𑁆𑀬𑀸𑀤𑀻𑀦𑀁𑀯𑀺𑀪𑀸𑀕𑀢𑁄 𑀯𑀺𑀪𑀚𑀦𑀢𑁄, ‘‘𑀅𑀬𑀁 𑀧𑀓𑀢𑀺, 𑀅𑀬𑀁 𑀧𑀘𑁆𑀘𑀬𑁄, 𑀅𑀬𑀫𑀸𑀤𑁂𑀲𑁄’’𑀢𑀺𑀆𑀤𑀺𑀦𑀸 𑀧𑀓𑀢𑀺𑀧𑀘𑁆𑀘𑀬𑀯𑀺𑀪𑀸𑀕𑀓𑀧𑁆𑀧𑀦𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀻𑀡𑁂𑀢𑀻𑀢𑀺 𑀧𑀻, 𑀢𑀸𑀬 𑀧𑀺𑀬𑀸 𑀯𑀮𑁆𑀮𑀪𑀸𑀬 𑀲𑁄𑀬𑀁 𑀲𑀸𑀫𑀻 𑀆𑀮𑀺𑀗𑁆𑀕𑁆𑀬𑀢𑁂 𑀲𑀺𑀮𑀺𑀲𑁆𑀲𑀢𑁂. 𑀏𑀢𑁆𑀣 ‘‘𑀧𑀺𑀬𑀸’’𑀢𑀺 𑀓𑀺𑀮𑀺𑀝𑁆𑀞𑀁.

𑁨𑁩. 𑀬𑀲𑁆𑀲 𑀧𑀤𑀲𑁆𑀲 𑀅𑀢𑁆𑀣𑀸𑀯𑀕𑀫𑁄 𑀅𑀢𑁆𑀣𑀸𑀯𑀩𑁄𑀥𑁄 𑀧𑀓𑀢𑁆𑀬𑀸𑀤𑀺𑀯𑀺𑀪𑀸𑀕𑀢𑁄 ‘‘𑀅𑀬𑀁 𑀧𑀓𑀢𑀺, 𑀅𑀬𑀁 𑀧𑀘𑁆𑀘𑀬𑁄, 𑀅𑀬𑀫𑀸𑀤𑁂𑀲𑁄’’𑀢𑀺𑀆𑀤𑀺𑀦𑀸 𑀧𑀓𑀢𑁆𑀬𑀸𑀤𑀻𑀦𑀁 𑀯𑀺𑀪𑀚𑀦𑀚𑀸𑀦𑀦𑁂𑀦, ‘‘𑀧𑀓𑀢𑁆𑀬𑀸𑀤𑀺 𑀦𑀸𑀫 𑀓𑀺’’𑀦𑁆𑀢𑀺 𑀕𑀯𑁂𑀲𑀦𑀢𑁄 𑀯𑀸 𑀤𑀼𑀓𑁆𑀔𑁄, 𑀢𑀁 𑀓𑀺𑀮𑀺𑀝𑁆𑀞𑀁 𑀦𑀸𑀫. 𑀬𑀣𑀸 𑀢𑀲𑁆𑀲𑀼𑀤𑀸𑀳𑀭𑀡𑀫𑁂𑀯𑀁. 𑀢𑀸𑀬 𑀧𑀺𑀬𑀸 𑀯𑀦𑀺𑀢𑀸𑀬 𑀲𑁄 𑀅𑀬𑀁 𑀯𑀮𑁆𑀮𑀪𑁄 𑀆𑀮𑀺𑀗𑁆𑀕𑁆𑀬𑀢𑁂 𑀲𑀺𑀮𑀺𑀲𑁆𑀲𑀢𑁂. 𑀧𑀘𑁆𑀘𑀬𑀸 𑀧𑀞𑀫𑀁 𑀓𑀭𑀻𑀬𑀢𑀻𑀢𑀺 𑀧𑀓𑀢𑀺. 𑀲𑀸 𑀆𑀤𑀺 𑀬𑁂𑀲𑀁 𑀧𑀘𑁆𑀘𑀬𑀸𑀦𑀁, 𑀢𑁂𑀲𑀁 𑀯𑀺𑀪𑀸𑀕𑁄𑀢𑀺 𑀯𑀸𑀓𑁆𑀬𑀁. 𑀧𑀻𑀡𑁂𑀢𑀻𑀢𑀺 𑀧𑀻, 𑀦𑀸𑀭𑀻. 𑀢𑀸𑀬 𑀧𑀺𑀬𑀸 𑀏𑀢𑁆𑀣 𑀧𑀺𑀬𑀸𑀲𑀗𑁆𑀔𑀸𑀢𑀸𑀬 𑀯𑀮𑁆𑀮𑀪𑀸𑀬 𑀓𑀣𑀦𑁂 𑀧𑀻𑀲𑀤𑁆𑀤𑀲𑁆𑀲 𑀅𑀯𑀺𑀲𑀤𑀢𑁆𑀢𑀸 ‘‘𑀧𑀺𑀬𑀸’’𑀢𑀺 𑀧𑀤𑀁 𑀓𑀺𑀮𑀺𑀝𑁆𑀞𑀁.

𑁨𑁪.

𑀬𑀁 𑀓𑀺𑀮𑀺𑀝𑁆𑀞𑀧𑀤𑀁 𑀫𑀦𑁆𑀤𑀸-𑀪𑀺𑀥𑁂𑀬𑁆𑀬𑀁 𑀬𑀫𑀓𑀸𑀤𑀺𑀓𑀁;

𑀓𑀺𑀮𑀺𑀝𑁆𑀞𑀧𑀤𑀤𑁄𑀲𑁂𑀯, 𑀢𑀫𑁆𑀧𑀺 𑀅𑀦𑁆𑀢𑁄 𑀓𑀭𑀻𑀬𑀢𑀺.

𑁨𑁪. 𑀇𑀤𑀸𑀦𑀺 𑀬𑀫𑀓𑀸𑀤𑀺𑀓𑀫𑀦𑀥𑀺𑀧𑁆𑀧𑁂𑀢𑀫𑁆𑀧𑀺 𑀓𑀺𑀮𑀺𑀝𑁆𑀞𑁂𑀬𑁂𑀯 𑀅𑀦𑁆𑀢𑁄𑀕𑀥𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀬’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀬𑀦𑁆𑀢𑀺 𑀅𑀦𑀺𑀬𑀫𑀯𑀘𑀦𑀁, 𑀢𑀲𑁆𑀲 𑀦𑀺𑀬𑀫𑀯𑀘𑀦𑀁 𑀬𑀫𑀓𑀸𑀤𑀺𑀓𑀦𑁆𑀢𑀺. 𑀬𑀫𑀓𑀫𑀸𑀤𑀺 𑀬𑀲𑁆𑀲 𑀧𑀳𑁂𑀴𑀺𑀓𑀸𑀚𑀸𑀢𑀲𑁆𑀲 𑀢𑀁 𑀬𑀫𑀓𑀸𑀤𑀺𑀓𑀁. 𑀓𑀻𑀤𑀺𑀲𑀦𑁆𑀢𑀺 𑀆𑀳 ‘‘𑀓𑀺𑀮𑀺𑀝𑁆𑀞𑀧𑀤’’𑀦𑁆𑀢𑀺𑀆𑀤𑀺. 𑀓𑀺𑀮𑀺𑀝𑁆𑀞𑀸𑀦𑀺 𑀅𑀧𑁆𑀧𑀢𑀻𑀢𑀤𑁄𑀲𑀲𑀪𑀸𑀯𑁂 𑀞𑀺𑀢𑀢𑀸𑀬 𑀫𑀮𑀺𑀢𑀸𑀦𑁆𑀬𑀯𑀺𑀲𑀤𑀸𑀦𑀺 𑀧𑀤𑀸𑀦𑀺 𑀬𑀲𑁆𑀲 𑀢𑀁 𑀓𑀺𑀮𑀺𑀝𑁆𑀞𑀧𑀤𑀁. 𑀫𑀦𑁆𑀤𑁄 𑀅𑀧𑁆𑀧𑀓𑁄 𑀅𑀪𑀺𑀥𑁂𑀬𑁆𑀬𑁄 𑀅𑀢𑁆𑀣𑁄 𑀬𑀲𑁆𑀲 𑀢𑀁 𑀫𑀦𑁆𑀤𑀸𑀪𑀺𑀥𑁂𑀬𑁆𑀬𑀁, 𑀢𑀸𑀤𑀺𑀲𑀁 𑀢𑀫𑁆𑀧𑀺 𑀬𑀫𑀓𑀸𑀤𑀺𑀓𑀁 𑀓𑀺𑀮𑀺𑀝𑁆𑀞𑀧𑀤𑀤𑁄𑀲𑁂𑀬𑁂𑀯 𑀬𑀣𑀸𑀯𑀼𑀢𑁆𑀢𑁂 𑀅𑀦𑁆𑀢𑁄 𑀅𑀩𑁆𑀪𑀦𑁆𑀢𑀭𑁂 𑀓𑀭𑀻𑀬𑀢𑀺 𑀯𑀺𑀥𑀻𑀬𑀢𑀺 ¶ 𑀢𑀢𑁆𑀣𑁂𑀯 𑀧𑀓𑁆𑀔𑀺𑀧𑀻𑀬𑀢𑀺, 𑀓𑀺𑀮𑀺𑀝𑁆𑀞𑀧𑀤𑀤𑁄𑀲𑀢𑁄 𑀦 𑀩𑁆𑀬𑀢𑀺𑀭𑀺𑀘𑁆𑀘𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨𑁪. 𑀇𑀤𑀸𑀦𑀺 𑀅𑀦𑀥𑀺𑀧𑁆𑀧𑁂𑀢𑀫𑀧𑀺 𑀬𑀫𑀓𑀸𑀤𑀺𑀁 𑀓𑀺𑀮𑀺𑀝𑁆𑀞𑀤𑁄𑀲𑁂𑀬𑁂𑀯 𑀅𑀦𑁆𑀢𑁄𑀓𑀭𑀡𑀩𑁆𑀬𑀸𑀚𑁂𑀦 𑀆𑀯𑀻𑀓𑀭𑁄𑀦𑁆𑀢𑁄 𑀆𑀳 ‘‘𑀬𑀁 𑀓𑀺𑀮𑀺𑀝𑁆𑀞𑁂’’𑀘𑁆𑀘𑀸𑀤𑀺. 𑀓𑀺𑀮𑀺𑀝𑁆𑀞𑀧𑀤𑀁 𑀅𑀧𑁆𑀧𑀢𑀻𑀢𑀤𑁄𑀲𑁂𑀦 𑀫𑀺𑀲𑁆𑀲𑀓𑀢𑁆𑀢𑀸 𑀅𑀯𑀺𑀲𑀤𑀧𑀤𑀁 𑀫𑀦𑁆𑀤𑀸𑀪𑀺𑀥𑁂𑀬𑁆𑀬𑀁 𑀅𑀧𑁆𑀧𑀓𑀸𑀪𑀺𑀥𑁂𑀬𑁆𑀬𑀁 𑀬𑀁 𑀬𑀫𑀓𑀸𑀤𑀺𑀓𑀁 𑀬𑀁 𑀬𑀫𑀓𑀧𑁆𑀧𑀳𑁂𑀴𑀺𑀓𑀸𑀚𑀸𑀢𑀫𑀢𑁆𑀣𑀺, 𑀢𑀫𑁆𑀧𑀺 𑀓𑀺𑀮𑀺𑀝𑁆𑀞𑀧𑀤𑀤𑁄𑀲𑁂𑀬𑁂𑀯 𑀬𑀣𑀸𑀯𑀼𑀢𑁆𑀢𑀓𑀺𑀮𑀺𑀝𑁆𑀞𑀧𑀤𑀤𑁄𑀲𑁂𑀬𑁂𑀯 𑀅𑀦𑁆𑀢𑁄 𑀓𑀭𑀻𑀬𑀢𑀺 𑀅𑀩𑁆𑀪𑀦𑁆𑀢𑀭𑁂 𑀓𑀭𑀻𑀬𑀢𑀺, 𑀓𑀺𑀮𑀺𑀝𑁆𑀞𑀧𑀤𑀤𑁄𑀲𑀢𑁄 𑀅𑀩𑁆𑀬𑀢𑀺𑀭𑀺𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀮𑀺𑀝𑁆𑀞𑀸𑀦𑀺 𑀧𑀤𑀸𑀦𑀺 𑀬𑀲𑁆𑀲, 𑀫𑀦𑁆𑀤𑁄 𑀅𑀪𑀺𑀥𑁂𑀬𑁆𑀬𑁄 𑀬𑀲𑁆𑀲, 𑀬𑀫𑀓𑀁 𑀆𑀤𑀺 𑀬𑀲𑁆𑀲 𑀧𑀳𑁂𑀴𑀺𑀓𑀸𑀚𑀸𑀢𑀲𑁆𑀲, 𑀓𑀺𑀮𑀺𑀝𑁆𑀞𑀧𑀤𑀸𑀦𑀁 𑀤𑁄𑀲𑁄𑀢𑀺 𑀯𑀺𑀕𑁆𑀕𑀳𑁄.

𑁨𑁫.

𑀧𑀢𑀻𑀢𑀲𑀤𑁆𑀤𑀭𑀘𑀺𑀢𑀁, 𑀲𑀺𑀮𑀺𑀝𑁆𑀞𑀧𑀤𑀲𑀦𑁆𑀥𑀺𑀓𑀁;

𑀧𑀲𑀸𑀤𑀕𑀼𑀡𑀲𑀁𑀬𑀼𑀢𑁆𑀢𑀁, 𑀬𑀫𑀓𑀁 𑀫𑀢’𑀫𑁂𑀤𑀺𑀲𑀁.

𑁨𑁫. 𑀳𑁄𑀢𑀼 𑀓𑀸𑀫𑀫𑀦𑀪𑀺𑀫𑀢𑀫𑁂𑀤𑀺𑀲𑀁 𑀬𑀫𑀓𑀸𑀤𑀺𑀓𑀁, 𑀓𑀺𑀜𑁆𑀘𑀭𑀳𑀺 𑀅𑀪𑀺𑀫𑀢𑀦𑁆𑀢𑀺 𑀆𑀳 ‘‘𑀧𑀢𑀻𑀢𑀺’’𑀘𑁆𑀘𑀸𑀤𑀺. 𑀅𑀢𑁆𑀢𑀦𑁄 𑀯𑀘𑀦𑀻𑀬𑀢𑁆𑀣𑀧𑁆𑀧𑀢𑀻𑀢𑀯𑀲𑁂𑀦 𑀯𑀸𑀘𑀓𑀸𑀧𑀺 𑀲𑀤𑁆𑀤𑀸 𑀧𑀢𑀻𑀢𑀸𑀬𑁂𑀯 𑀦𑀸𑀫𑀸𑀢𑀺 𑀧𑀢𑀻𑀢𑁂𑀳𑀺 𑀧𑀲𑀺𑀤𑁆𑀥𑁂𑀳𑀺 𑀲𑀤𑁆𑀤𑁂𑀳𑀺 𑀧𑀸𑀝𑀺𑀧𑀤𑀺𑀓𑁂𑀳𑀺 𑀭𑀘𑀺𑀢𑀁 𑀓𑀢𑀁 𑀧𑀢𑀻𑀢𑀲𑀤𑁆𑀤𑀭𑀘𑀺𑀢𑀁. 𑀲𑀺𑀮𑀺𑀝𑁆𑀞𑀸 𑀅𑀜𑁆𑀜𑀫𑀜𑁆𑀜𑀸𑀮𑀺𑀗𑁆𑀕𑀦𑁂𑀦 𑀫𑀝𑁆𑀞𑀸 𑀧𑀤𑀸𑀦𑀁 𑀲𑁆𑀬𑀸𑀤𑁆𑀬𑀦𑁆𑀢𑀸𑀤𑀻𑀦𑀁 𑀲𑀦𑁆𑀥𑀬𑁄 𑀲𑀦𑁆𑀥𑀦𑀸 𑀬𑀲𑁆𑀲 𑀢𑀁 𑀲𑀺𑀮𑀺𑀝𑁆𑀞𑀧𑀤𑀲𑀦𑁆𑀥𑀺𑀓𑀁. 𑀧𑀢𑀻𑀢𑀲𑀤𑁆𑀤𑀭𑀘𑀺𑀢𑀢𑁆𑀢𑀸𑀬𑁂𑀯 𑀧𑀲𑀸𑀤𑀲𑀗𑁆𑀔𑀸𑀢𑁂𑀦 𑀕𑀼𑀡𑁂𑀦 𑀲𑀤𑁆𑀤𑀸𑀮𑀗𑁆𑀓𑀸𑀭𑁂𑀦 𑀲𑀁𑀬𑀼𑀢𑁆𑀢𑀁 𑀲𑀫𑁆𑀫𑀤𑁂𑀯𑁄𑀧𑁂𑀢𑀁 𑀏𑀤𑀺𑀲𑀁 𑀬𑀣𑀸𑀯𑀼𑀢𑁆𑀢𑀕𑀼𑀡𑀸𑀲𑀬𑀁 𑀭𑀫𑀡𑀻𑀬𑀁 𑀬𑀫𑀓𑀁 𑀫𑀢𑀁 𑀅𑀪𑀺𑀫𑀢𑀦𑁆𑀢𑀺 𑀅𑀢𑁆𑀣𑁄.

𑁨𑁫. 𑀇𑀤𑀸𑀦𑀺 𑀅𑀥𑀺𑀕𑀢𑁂𑀲𑀼 𑀬𑀫𑀓𑁂𑀲𑀼 𑀈𑀤𑀺𑀲𑀁 𑀬𑀫𑀓𑀫𑀺𑀝𑁆𑀞𑀫𑀺𑀢𑀺 𑀲𑀺𑀲𑁆𑀲𑀸𑀦𑀁 𑀉𑀧𑀤𑀺𑀲𑀦𑁆𑀢𑁄 𑀆𑀳 ‘‘𑀧𑀢𑀻𑀢𑁂’’𑀘𑁆𑀘𑀸𑀤𑀺. 𑀧𑀢𑀻𑀢𑀲𑀤𑁆𑀤𑀭𑀘𑀺𑀢𑀁 ‘‘𑀇𑀫𑀲𑁆𑀲𑀢𑁆𑀣𑀲𑁆𑀲𑀸𑀬𑀁 𑀯𑀸𑀘𑀓𑁄’’𑀢𑀺 𑀧𑀢𑀻𑀢𑁂𑀳𑀺 𑀧𑀲𑀺𑀤𑁆𑀥𑁂𑀳𑀺 𑀲𑀤𑁆𑀤𑁂𑀳𑀺 𑀭𑀘𑀺𑀢𑀁 𑀧𑀸𑀝𑀺𑀧𑀤𑀺𑀓𑁂𑀳𑀺 𑀓𑀢𑀁 𑀲𑀺𑀮𑀺𑀝𑁆𑀞𑀧𑀤𑀲𑀦𑁆𑀥𑀺𑀓𑀁 𑀲𑀺𑀮𑀺𑀝𑁆𑀞𑀸 𑀲𑁆𑀬𑀸𑀤𑁆𑀬𑀦𑁆𑀢𑀸𑀤𑀺𑀧𑀤𑀸𑀦𑀁 𑀲𑀦𑁆𑀥𑀬𑁄 𑀬𑀲𑁆𑀲 𑀢𑀁 ¶ 𑀧𑀲𑀸𑀤𑀕𑀼𑀡𑀲𑀁𑀬𑀼𑀢𑁆𑀢𑀁 𑀧𑀢𑀻𑀢𑀲𑀤𑁆𑀤𑀭𑀘𑀺𑀢𑀢𑁆𑀢𑀸𑀬𑁂𑀯 𑀧𑀲𑀸𑀤𑀲𑀗𑁆𑀔𑀸𑀢𑁂𑀦 𑀲𑀤𑁆𑀤𑀸𑀮𑀗𑁆𑀓𑀸𑀭𑀕𑀼𑀡𑁂𑀦 𑀲𑀁𑀬𑀼𑀢𑁆𑀢𑀁 𑀈𑀤𑀺𑀲𑀁 𑀏𑀯𑀁𑀪𑀽𑀢𑀁 𑀕𑀼𑀡𑀸𑀥𑀺𑀓𑀢𑁄 𑀭𑀫𑀡𑀻𑀬𑀁 𑀉𑀧𑀭𑀺 𑀯𑀓𑁆𑀔𑀫𑀸𑀦𑀬𑀫𑀓𑀲𑀤𑀺𑀲𑀁 𑀬𑀫𑀓𑀁 𑀫𑀢𑀁 𑀯𑀺𑀜𑁆𑀜𑀽𑀳𑀺 𑀅𑀪𑀺𑀫𑀢𑀁. 𑀧𑀢𑀻𑀢𑀸 𑀘 𑀢𑁂 𑀲𑀤𑁆𑀤𑀸 𑀘, 𑀢𑁂𑀳𑀺 𑀭𑀘𑀺𑀢𑀁, 𑀲𑀺𑀮𑀺𑀝𑁆𑀞𑀸 𑀧𑀤𑀸𑀦𑀁 𑀲𑀦𑁆𑀥𑀬𑁄 𑀬𑀲𑁆𑀲, 𑀧𑀲𑀸𑀤𑁄𑀢𑀺 𑀕𑀼𑀡𑁄 𑀲𑀤𑁆𑀤𑀸𑀮𑀗𑁆𑀓𑀸𑀭𑁄, 𑀢𑁂𑀦 𑀲𑀁𑀬𑀼𑀢𑁆𑀢𑀦𑁆𑀢𑀺 𑀯𑀺𑀕𑁆𑀕𑀳𑁄.

𑁨𑁬.

𑀅𑀩𑁆𑀬𑀧𑁂𑀢𑀁 𑀩𑁆𑀬𑀧𑁂𑀢’𑀜𑁆𑀜-𑀫𑀸𑀯𑀼𑀢𑁆𑀢𑀸𑀦𑁂𑀓𑀯𑀡𑁆𑀡𑀚𑀁;

𑀬𑀫𑀓𑀁 𑀢𑀜𑁆𑀘 𑀧𑀸𑀤𑀸𑀦-𑀫𑀸𑀤𑀺𑀫𑀚𑁆𑀛𑀦𑁆𑀢𑀕𑁄𑀘𑀭𑀁.

𑁨𑁬. 𑀇𑀤𑀸𑀦𑀺 𑀢𑀁 𑀬𑀣𑀸𑀯𑀼𑀢𑁆𑀢𑀫𑀪𑀺𑀫𑀢𑀁 𑀤𑀲𑁆𑀲𑁂𑀢𑀼𑀫𑀼𑀧𑀓𑁆𑀓𑀫𑀢𑁂 ‘‘𑀅𑀩𑁆𑀬𑀧𑁂𑀢𑁂’’𑀘𑁆𑀘𑀸𑀤𑀺𑀦𑀸. 𑀆𑀯𑀼𑀢𑁆𑀢𑀸 𑀅𑀥𑀺𑀯𑀼𑀢𑁆𑀢𑀸 𑀧𑀼𑀦𑀧𑁆𑀧𑀼𑀦𑀼𑀘𑁆𑀘𑀸𑀭𑀡𑀼𑀧𑁂𑀢𑀸 𑀅𑀦𑁂𑀓𑁂𑀲𑀁 𑀧𑀢𑀺𑀭𑀽𑀧𑀢𑁆𑀢𑀸, 𑀩𑀳𑀼𑀯𑀡𑁆𑀡𑀸 𑀲𑀭𑀩𑁆𑀬𑀜𑁆𑀚𑀦𑀭𑀽𑀧𑀸, 𑀦 𑀏𑀓𑁄 𑀯𑀡𑁆𑀡𑁄 𑀢𑀲𑁆𑀲𑀸𑀦𑀼𑀧𑁆𑀧𑀸𑀲𑀢𑁆𑀢𑀸, 𑀢𑀣𑀸 𑀘 𑀯𑀓𑁆𑀔𑀢𑀺 ‘‘𑀯𑀡𑁆𑀡𑀸𑀯𑀼𑀢𑁆𑀢𑀺 𑀧𑀭𑁄 𑀬𑀣𑀸’’𑀢𑀺 [𑀲𑀼𑀩𑁄𑀥𑀸𑀮𑀗𑁆𑀓𑀸𑀭 𑁧𑁨𑁭 𑀕𑀸𑀣𑀸], 𑀢𑁂𑀳𑀺 𑀚𑀸𑀢𑀁 𑀬𑀫𑀓𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑁂. 𑀓𑀢𑀺𑀯𑀺𑀥𑀁 𑀢𑀁 𑀯𑀺𑀓𑀧𑁆𑀧𑀻𑀬𑀢𑀻𑀢𑀺 𑀆𑀳 ‘‘𑀅𑀩𑁆𑀬𑀧𑁂𑀢𑀁 𑀩𑁆𑀬𑀧𑁂𑀢𑀜𑁆𑀜’’𑀦𑁆𑀢𑀺. 𑀢𑀢𑁆𑀣 𑀬𑀁 𑀯𑀡𑁆𑀡𑀦𑁆𑀢𑀭𑀸𑀩𑁆𑀬𑀯𑀳𑀺𑀢𑀁 𑀯𑀡𑁆𑀡𑀲𑀫𑀼𑀤𑀸𑀬𑁂𑀦 𑀯𑀼𑀢𑁆𑀢𑀁. 𑀢𑀤𑀩𑁆𑀬𑀧𑁂𑀢𑀁 𑀬𑀫𑀓𑀁. 𑀬𑀁 𑀢𑀼 𑀩𑁆𑀬𑀯𑀳𑀺𑀢𑀁, 𑀢𑀁 𑀩𑁆𑀬𑀧𑁂𑀢𑀁. 𑀬𑀁 𑀧𑀦 𑀉𑀪𑀬𑀫𑀺𑀲𑁆𑀲𑀁, 𑀢𑀁 𑀅𑀜𑁆𑀜𑀁 𑀅𑀧𑀭𑀁 𑀅𑀩𑁆𑀬𑀧𑁂𑀢𑀩𑁆𑀬𑀧𑁂𑀢𑀦𑁆𑀢𑀺 𑀢𑀺𑀥𑀸 𑀬𑀫𑀓𑀁 𑀢𑀸𑀯 𑀯𑀺𑀓𑀧𑁆𑀧𑀻𑀬𑀢𑁂. 𑀢𑀫𑁂𑀢𑀁 𑀢𑀺𑀯𑀺𑀥𑀁 𑀬𑀫𑀓𑀁 𑀯𑀺𑀲𑀬𑀯𑀺𑀪𑀸𑀕𑀦𑀺𑀭𑀽𑀧𑀦𑀸𑀬𑀁 𑀆𑀤𑀺 𑀘 𑀫𑀚𑁆𑀛𑁄 𑀘 𑀅𑀦𑁆𑀢𑁄 𑀘 𑀕𑁄𑀘𑀭𑁄 𑀯𑀺𑀲𑀬𑁄 𑀬𑀲𑁆𑀲𑁂𑀢𑀺 𑀆𑀤𑀺𑀫𑀚𑁆𑀛𑀦𑁆𑀢𑀕𑁄𑀘𑀭𑀁 𑀯𑀺𑀜𑁆𑀜𑁂𑀬𑁆𑀬𑀁. 𑀓𑁂𑀲𑀁 𑀧𑀸𑀤𑀸𑀦𑀁? 𑀧𑀘𑁆𑀘𑁂𑀓𑀁 𑀘𑀢𑀼𑀦𑁆𑀦𑀁𑀕𑀸𑀣𑀸𑀯𑀬𑀯𑀸𑀦𑀁. 𑀲𑀸𑀧𑁂𑀓𑁆𑀔𑀢𑁆𑀢𑁂𑀧𑀺 𑀲𑀫𑀸𑀲𑁄 𑀕𑀫𑁆𑀫𑀓𑀢𑁆𑀢𑀸.

𑀢𑀢𑁆𑀣 𑀧𑀸𑀤𑀘𑀢𑀼𑀓𑁆𑀓𑀲𑁆𑀲 𑀆𑀤𑀺𑀫𑀚𑁆𑀛𑀦𑁆𑀢𑀪𑀸𑀯𑀻𑀦𑀁 𑀬𑀫𑀓𑀸𑀦𑀁 𑀬𑀸𑀯𑀦𑁆𑀢𑁄 𑀧𑀓𑀸𑀭𑀸 𑀲𑀫𑁆𑀪𑀯𑀦𑁆𑀢𑀺, 𑀢𑁂 𑀫𑀽𑀮𑀸 𑀲𑀢𑁆𑀢. 𑀓𑀣𑀁? 𑀏𑀓𑀲𑁆𑀫𑀺𑀁𑀬𑁂𑀯 𑀧𑀸𑀤𑁂 𑀓𑁆𑀯𑀘𑀺 𑀆𑀤𑀺𑀬𑀫𑀓𑀁, 𑀓𑁆𑀯𑀘𑀺 𑀫𑀚𑁆𑀛𑀬𑀫𑀓𑀁, 𑀓𑁆𑀯𑀘𑀺 𑀅𑀦𑁆𑀢𑀬𑀫𑀓𑀁, 𑀓𑁆𑀯𑀘𑀺 𑀫𑀚𑁆𑀛𑀦𑁆𑀢𑀬𑀫𑀓𑀁, 𑀓𑁆𑀯𑀘𑀺 𑀫𑀚𑁆𑀛𑀸𑀤𑀺𑀬𑀫𑀓𑀁, 𑀓𑁆𑀯𑀘𑀺 𑀆𑀤𑁆𑀬𑀦𑁆𑀢𑀬𑀫𑀓𑀁, 𑀓𑁆𑀯𑀘𑀺 𑀲𑀩𑁆𑀩𑀬𑀫𑀓𑀦𑁆𑀢𑀺. 𑀏𑀯𑀁 𑀧𑀘𑁆𑀘𑁂𑀓𑀁 𑀫𑀽𑀮𑀪𑀽𑀢𑀸 𑀲𑀢𑁆𑀢𑀸𑀢𑀺 ¶ 𑀘𑀢𑀽𑀲𑀼 𑀅𑀝𑁆𑀞𑀯𑀻𑀲𑀢𑀺 𑀳𑁄𑀦𑁆𑀢𑀺. 𑀧𑀸𑀤𑀸𑀤𑀺𑀬𑀫𑀓𑀜𑁆𑀘 𑀧𑀞𑀫𑀧𑀸𑀤𑀸𑀤𑀺𑀬𑀫𑀓𑀫𑀩𑁆𑀬𑀧𑁂𑀢𑀁 𑀢𑀣𑀸 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀧𑀸𑀤𑀸𑀤𑀺𑀬𑀫𑀓𑀫𑀩𑁆𑀬𑀧𑁂𑀢𑀁 𑀧𑀞𑀫𑀤𑀼𑀢𑀺𑀬𑀧𑀸𑀤𑀸𑀤𑀺𑀬𑀫𑀓𑀫𑀩𑁆𑀬𑀧𑁂𑀢𑀁 𑀧𑀞𑀫𑀢𑀢𑀺𑀬𑀧𑀸𑀤𑀸𑀤𑀺𑀬𑀫𑀓𑀫𑀩𑁆𑀬𑀧𑁂𑀢𑀁 𑀧𑀞𑀫𑀘𑀢𑀼𑀢𑁆𑀣𑀧𑀸𑀤𑀸𑀤𑀺𑀬𑀫𑀓𑀫𑀩𑁆𑀬𑀧𑁂𑀢𑀦𑁆𑀢𑀺𑀆𑀤𑀺𑀦𑀸 𑀅𑀦𑁂𑀓𑀥𑀸 𑀧𑀲𑀁𑀲𑀦𑁆𑀢𑀺. 𑀬𑀤𑀸 𑀘 𑀲𑀩𑁆𑀩𑀢𑁄𑀬𑀫𑀓𑀁, 𑀢𑀤𑀸 𑀫𑀳𑀸𑀬𑀫𑀓𑀸𑀤𑀬𑁄 𑀯𑀺𑀓𑀧𑁆𑀧𑀸 𑀚𑀸𑀬𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁨𑁬. 𑀇𑀤𑀸𑀦𑀺 𑀅𑀪𑀺𑀫𑀢𑀬𑀫𑀓𑀁 𑀤𑀻𑀧𑁂𑀢𑀺 ‘‘𑀅𑀩𑁆𑀬𑀧𑁂𑀢𑁂’’𑀘𑁆𑀘𑀸𑀤𑀺𑀦𑀸. 𑀆𑀯𑀼𑀢𑁆𑀢𑁂𑀳𑀺 𑀧𑀼𑀦𑀧𑁆𑀧𑀼𑀦𑀁 𑀯𑀼𑀢𑁆𑀢𑁂𑀳𑀺 𑀅𑀦𑁂𑀓𑀯𑀡𑁆𑀡𑁂𑀳𑀺 𑀲𑀫𑀼𑀤𑀸𑀬𑀭𑀽𑀧𑀢𑁆𑀢𑀸 𑀅𑀦𑁂𑀓𑁂𑀳𑀺 𑀲𑀭𑀩𑁆𑀬𑀜𑁆𑀚𑀦𑀲𑀭𑀻𑀭𑁂𑀳𑀺 𑀯𑀡𑁆𑀡𑁂𑀳𑀺 𑀚𑀸𑀢𑀁 𑀬𑀫𑀓𑀁 𑀅𑀜𑁆𑀜𑁂𑀳𑀺 𑀯𑀡𑁆𑀡𑁂𑀳𑀺 𑀅𑀩𑁆𑀬𑀯𑀳𑀺𑀢𑀢𑁆𑀢𑀸 𑀅𑀩𑁆𑀬𑀧𑁂𑀢𑀁, 𑀯𑀡𑁆𑀡𑀦𑁆𑀢𑀭𑁂𑀳𑀺 𑀩𑁆𑀬𑀯𑀳𑀺𑀢𑀢𑁆𑀢𑀸 𑀩𑁆𑀬𑀧𑁂𑀢𑀁, 𑀉𑀪𑀬𑀫𑀺𑀲𑁆𑀲𑀓𑀢𑁆𑀢𑀸 𑀢𑁂𑀳𑀺 𑀅𑀜𑁆𑀜𑀁 𑀅𑀩𑁆𑀬𑀧𑁂𑀢𑀩𑁆𑀬𑀧𑁂𑀢𑀜𑁆𑀘𑀸𑀢𑀺 𑀢𑀺𑀯𑀺𑀥𑀁 𑀳𑁄𑀢𑀺. 𑀢𑀜𑁆𑀘 𑀬𑀫𑀓𑀁 𑀯𑀺𑀲𑀬𑀯𑀺𑀪𑀸𑀕𑀦𑀺𑀬𑀫𑁂𑀦 𑀕𑀸𑀣𑀸𑀧𑀸𑀤𑀸𑀦𑀁 𑀆𑀤𑀺𑀕𑁄𑀘𑀭𑀁 𑀫𑀚𑁆𑀛𑀕𑁄𑀘𑀭𑀁 𑀅𑀦𑁆𑀢𑀕𑁄𑀘𑀭𑀫𑀺𑀢𑀺 𑀢𑀺𑀯𑀺𑀥𑀁 𑀳𑁄𑀢𑀺. 𑀏𑀢𑁆𑀣 𑀘𑀲𑀤𑁆𑀤𑁄 𑀯𑀢𑁆𑀢𑀩𑁆𑀩𑀦𑁆𑀢𑀭𑁂 𑀧𑀯𑀢𑁆𑀢𑀢𑀺, 𑀯𑀢𑁆𑀢𑀩𑁆𑀩𑀦𑁆𑀢𑀭𑀁 𑀦𑀸𑀫 𑀬𑀣𑀸𑀯𑀼𑀢𑁆𑀢𑀅𑀩𑁆𑀬𑀧𑁂𑀢𑀸𑀤𑀺𑀪𑁂𑀤𑀢𑁄 𑀅𑀜𑁆𑀜𑀁 𑀯𑀢𑁆𑀢𑀩𑁆𑀩𑀢𑀸𑀬 𑀲𑀫𑀼𑀔𑀻𑀪𑀽𑀢𑀁 𑀧𑀸𑀤𑀸𑀦𑀁 𑀆𑀤𑀺𑀫𑀚𑁆𑀛𑀸𑀯𑀲𑀸𑀦𑀦𑁆𑀢𑀭𑀁, 𑀉𑀧𑀦𑁆𑀬𑀸𑀲𑁄 𑀯𑀸𑀓𑁆𑀬𑀸𑀭𑀫𑁆𑀪𑁄𑀢𑀺 𑀘 𑀏𑀢𑀲𑁆𑀲𑁂𑀯 𑀦𑀸𑀫𑀁. 𑀯𑀺𑀲𑀤𑀺𑀲𑁂𑀦 𑀯𑀡𑁆𑀡𑁂𑀦 𑀅𑀧𑁂𑀢𑀁 𑀩𑁆𑀬𑀧𑁂𑀢𑀁. 𑀢𑀩𑁆𑀩𑀺𑀧𑀭𑀻𑀢𑀫𑀩𑁆𑀬𑀧𑁂𑀢𑀁. 𑀅𑀩𑁆𑀬𑀧𑁂𑀢𑀜𑁆𑀘 𑀩𑁆𑀬𑀧𑁂𑀢𑀜𑁆𑀘 𑀅𑀜𑁆𑀜𑀜𑁆𑀘𑀸𑀢𑀺 𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑁄. 𑀅𑀦𑁂𑀓𑁂 𑀘 𑀢𑁂 𑀯𑀡𑁆𑀡𑀸 𑀘, 𑀆𑀯𑀼𑀢𑁆𑀢𑀸𑀬𑁂𑀯 𑀅𑀦𑁂𑀓𑀯𑀡𑁆𑀡𑀸, 𑀢𑁂𑀳𑀺 𑀚𑀸𑀢𑀁, 𑀆𑀤𑀺 𑀘 𑀫𑀚𑁆𑀛𑁄 𑀘 𑀅𑀦𑁆𑀢𑁄 𑀘, 𑀢𑁂 𑀕𑁄𑀘𑀭𑀸 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄.

𑀢𑀢𑁆𑀣 𑀧𑀸𑀤𑀘𑀢𑀼𑀓𑁆𑀓𑀲𑁆𑀲 𑀆𑀤𑀺𑀫𑀚𑁆𑀛𑀸𑀯𑀲𑀸𑀦𑁂𑀲𑀼 𑀮𑀩𑁆𑀪𑀫𑀸𑀦𑀬𑀫𑀓𑀪𑁂𑀤𑀸 𑀏𑀓𑁂𑀓𑀲𑁆𑀫𑀺𑀁 𑀧𑀸𑀤𑁂 𑀲𑀢𑁆𑀢 𑀲𑀢𑁆𑀢 𑀪𑀯𑀦𑁆𑀢𑀺. 𑀓𑀣𑀁? 𑀧𑀸𑀤𑀸𑀤𑀺𑀬𑀫𑀓𑀁 𑀧𑀸𑀤𑀫𑀚𑁆𑀛𑀬𑀫𑀓𑀁 𑀧𑀸𑀤𑀦𑁆𑀢𑀬𑀫𑀓𑀁 𑀫𑀚𑁆𑀛𑀦𑁆𑀢𑀬𑀫𑀓𑀁 𑀫𑀚𑁆𑀛𑀸𑀤𑀺𑀬𑀫𑀓𑀁 𑀆𑀤𑁆𑀬𑀦𑁆𑀢𑀬𑀫𑀓𑀁 𑀲𑀩𑁆𑀩𑀢𑁄𑀬𑀫𑀓𑀦𑁆𑀢𑀺 𑀏𑀯𑀁 𑀧𑀘𑁆𑀘𑁂𑀓𑀁 𑀲𑀢𑁆𑀢 𑀲𑀢𑁆𑀢 𑀓𑀢𑁆𑀯𑀸 𑀘𑀢𑀽𑀲𑀼 𑀫𑀽𑀮𑀪𑀽𑀢𑀬𑀫𑀓𑀸 𑀅𑀝𑁆𑀞𑀯𑀻𑀲 ¶ 𑀪𑀯𑀦𑁆𑀢𑀺. 𑀏𑀢𑁆𑀣 𑀧𑀸𑀤𑀸𑀤𑀺𑀬𑀫𑀓𑀸𑀤𑀺𑀓𑀫𑁆𑀧𑀺 𑀅𑀩𑁆𑀬𑀧𑁂𑀢𑀧𑀞𑀫𑀧𑀸𑀤𑀸𑀤𑀺𑀬𑀫𑀓𑀁 𑀢𑀣𑀸 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀧𑀸𑀤𑀸𑀤𑀺𑀬𑀫𑀓𑀫𑀺𑀢𑀺 𑀘 𑀅𑀩𑁆𑀬𑀧𑁂𑀢𑀧𑀞𑀫𑀤𑀼𑀢𑀺𑀬𑀧𑀸𑀤𑀸𑀤𑀺𑀬𑀫𑀓𑀁 𑀢𑀣𑀸 𑀧𑀞𑀫𑀢𑀢𑀺𑀬𑀧𑀸𑀤𑀸𑀤𑀺𑀬𑀫𑀓𑀁 𑀧𑀞𑀫𑀘𑀢𑀼𑀢𑁆𑀣𑀧𑀸𑀤𑀸𑀤𑀺𑀬𑀫𑀓𑀫𑀺𑀢𑀺 𑀘 𑀅𑀩𑁆𑀬𑀧𑁂𑀢𑀤𑀼𑀢𑀺𑀬𑀢𑀢𑀺𑀬𑀧𑀸𑀤𑀸𑀤𑀺𑀬𑀫𑀓𑀁 𑀢𑀣𑀸 𑀤𑀼𑀢𑀺𑀬𑀘𑀢𑀼𑀢𑁆𑀣𑀧𑀸𑀤𑀸𑀤𑀺𑀬𑀫𑀓𑀫𑀺𑀢𑀺 𑀘 𑀅𑀩𑁆𑀬𑀧𑁂𑀢𑀢𑀢𑀺𑀬𑀘𑀢𑀼𑀢𑁆𑀣𑀧𑀸𑀤𑀸𑀤𑀺𑀬𑀫𑀓𑀫𑀺𑀢𑀺 𑀘 𑀏𑀯𑀫𑀩𑁆𑀬𑀧𑁂𑀢𑀧𑀸𑀤𑀸𑀤𑀺𑀬𑀫𑀓𑀸 𑀤𑀲 𑀳𑁄𑀦𑁆𑀢𑀺. 𑀢𑀣𑀸 𑀩𑁆𑀬𑀧𑁂𑀢𑀸𑀧𑀺 𑀤𑀲𑀸𑀢𑀺 𑀯𑀻𑀲𑀢𑀺, 𑀅𑀩𑁆𑀬𑀧𑁂𑀢𑀧𑀞𑀫𑀧𑀸𑀤𑀫𑀚𑁆𑀛𑀬𑀫𑀓𑀁 𑀢𑀣𑀸 𑀤𑀼𑀢𑀺𑀬𑀧𑀸𑀤𑀫𑀚𑁆𑀛𑀬𑀫𑀓𑀫𑀺𑀘𑁆𑀘𑀸𑀤𑀺𑀦𑀸 𑀫𑀚𑁆𑀛𑀬𑀫𑀓𑀫𑁆𑀧𑀺 𑀯𑀻𑀲𑀢𑀺𑀯𑀺𑀥𑀁 𑀳𑁄𑀢𑀺. 𑀅𑀩𑁆𑀬𑀧𑁂𑀢𑀧𑀞𑀫𑀧𑀸𑀤𑀦𑁆𑀢𑀬𑀫𑀓𑀁 𑀢𑀣𑀸 𑀤𑀼𑀢𑀺𑀬𑀧𑀸𑀤𑀦𑁆𑀢𑀬𑀫𑀓𑀫𑀺𑀘𑁆𑀘𑀸𑀤𑀺𑀦𑀸 𑀅𑀦𑁆𑀢𑀬𑀫𑀓𑀫𑁆𑀧𑀺 𑀯𑀻𑀲𑀢𑀺𑀯𑀺𑀥𑀁. 𑀲𑀁𑀲𑀕𑁆𑀕𑀪𑁂𑀤𑀢𑁄 𑀧𑀦 𑀅𑀦𑁂𑀓𑀯𑀺𑀥𑀁 𑀳𑁄𑀢𑀺.

𑀅𑀩𑁆𑀬𑀧𑁂𑀢𑀧𑀞𑀫𑀧𑀸𑀤𑀸𑀤𑀺𑀬𑀫𑀓𑀯𑀡𑁆𑀡𑀦𑀸

𑁨𑁭.

𑀲𑀼𑀚𑀦𑀸’𑀲𑀼𑀚𑀦𑀸 𑀲𑀩𑁆𑀩𑁂, 𑀕𑀼𑀡𑁂𑀦𑀸𑀧𑀺 𑀯𑀺𑀯𑁂𑀓𑀺𑀦𑁄;

𑀯𑀺𑀯𑁂𑀓𑀁 𑀦 𑀲𑀫𑀸𑀬𑀦𑁆𑀢𑀺, 𑀅𑀯𑀺𑀯𑁂𑀓𑀺𑀚𑀦𑀦𑁆𑀢𑀺𑀓𑁂.

𑁨𑁭. ‘‘𑀲𑀼𑀚𑀦𑀸’’𑀇𑀘𑁆𑀘𑀸𑀤𑀺. 𑀲𑀼𑀚𑀦𑀸 𑀲𑀚𑁆𑀚𑀦𑀸, 𑀅𑀲𑀼𑀚𑀦𑀸 𑀅𑀲𑀚𑁆𑀚𑀦𑀸𑀢𑀺 𑀏𑀢𑁂 𑀲𑀩𑁆𑀩𑁂 𑀉𑀪𑀬𑀧𑀓𑁆𑀔𑀧𑀸𑀢𑀺𑀦𑁄 𑀯𑀺𑀲𑁂𑀲𑀸 𑀚𑀦𑀸 𑀕𑀼𑀡𑁂𑀦 𑀲𑀻𑀮𑀸𑀤𑀺𑀦𑀸 𑀓𑀭𑀡𑀪𑀽𑀢𑁂𑀦, 𑀳𑁂𑀢𑀼𑀪𑀽𑀢𑁂𑀦 𑀯𑀸 𑀯𑀺𑀯𑁂𑀓𑀺𑀦𑁄𑀧𑀺 𑀲𑀸𑀥𑀽𑀲𑀼 𑀮𑀩𑁆𑀪𑀫𑀸𑀦𑀸𑀦𑀫𑀲𑀸𑀥𑀽𑀲𑁆𑀯𑀦𑀼𑀧𑀮𑀩𑁆𑀪𑀦𑀢𑁄 𑀧𑀼𑀣𑀼𑀪𑀽𑀢𑀸𑀧𑀺 𑀅𑀯𑀺𑀯𑁂𑀓𑀻𑀦𑀁 𑀚𑀦𑀸𑀦𑀁 𑀅𑀦𑁆𑀢𑀺𑀓𑁂 𑀲𑀫𑀻𑀧𑁂 𑀢𑁂𑀲𑀁 𑀲𑀦𑁆𑀦𑀺𑀥𑀸𑀦𑁂 𑀯𑀺𑀯𑁂𑀓𑀁 𑀯𑀺𑀪𑀸𑀕𑀁 𑀦 𑀲𑀫𑀸𑀬𑀦𑁆𑀢𑀺 𑀦𑀧𑀸𑀧𑀼𑀡𑀦𑁆𑀢𑀺, 𑀯𑀺𑀪𑀸𑀕𑀯𑀺𑀚𑀸𑀦𑀦𑀧𑀜𑁆𑀜𑀸𑀯𑁂𑀓𑀮𑁆𑀮𑁂𑀦 𑀘 𑀯𑀺𑀯𑁂𑀓𑀺𑀦𑁄𑀧𑀺 𑀚𑀦𑀸 𑀢𑁂 𑀏𑀓𑀢𑁄 𑀓𑀢𑁆𑀯𑀸 𑀧𑀲𑁆𑀲𑀦𑁆𑀢𑀻𑀢𑀺. 𑀇𑀤𑀁 𑀧𑀞𑀫𑀧𑀸𑀤𑀸𑀤𑀺𑀬𑀫𑀓𑀫𑀩𑁆𑀬𑀧𑁂𑀢𑀁.

𑁨𑁭. 𑀇𑀤𑀸𑀦𑀺 𑀅𑀩𑁆𑀬𑀧𑁂𑀢𑀧𑀞𑀫𑀧𑀸𑀤𑀸𑀤𑀺𑀬𑀫𑀓𑀲𑁆𑀲 𑀫𑀼𑀔𑀫𑀢𑁆𑀢𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀼𑀚𑀦𑀺’’𑀘𑁆𑀘𑀸𑀤𑀺. 𑀲𑀼𑀚𑀦𑀸 𑀲𑀸𑀥𑀼𑀚𑀦𑀸, 𑀅𑀲𑀼𑀚𑀦𑀸 𑀅𑀲𑀸𑀥𑀼𑀚𑀦𑀸 𑀘𑁂𑀢𑀺 𑀲𑀩𑁆𑀩𑁂 𑀉𑀪𑀬𑀧𑀓𑁆𑀔𑀺𑀓𑀸 𑀲𑀻𑀮𑀸𑀤𑀺𑀦𑀸, 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀦𑀸 𑀕𑀼𑀡𑁂𑀦 𑀳𑁂𑀢𑀼𑀦𑀸 𑀯𑀺𑀯𑁂𑀓𑀺𑀦𑁄 𑀅𑀧𑀺 𑀲𑀸𑀥𑀽𑀲𑀼 ¶ 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁, 𑀅𑀲𑀸𑀥𑀽𑀲𑀼 𑀲𑀻𑀮𑀸𑀤𑀻𑀦𑀁 𑀅𑀧𑁆𑀧𑀯𑀢𑁆𑀢𑀺𑀢𑁄 𑀕𑀼𑀡𑁂𑀦 𑀧𑀼𑀣𑀼𑀪𑀽𑀢𑀸𑀧𑀺 𑀅𑀯𑀺𑀯𑁂𑀓𑀺𑀚𑀦𑀦𑁆𑀢𑀺𑀓𑁂 𑀯𑀺𑀯𑁂𑀓𑀜𑀸𑀡𑀭𑀳𑀺𑀢𑀸𑀦𑀁 𑀚𑀦𑀸𑀦𑀁 𑀲𑀦𑁆𑀢𑀺𑀓𑁂 𑀯𑀺𑀯𑁂𑀓𑀁 𑀯𑀺𑀪𑀸𑀕𑀁 𑀦 𑀲𑀫𑀸𑀬𑀦𑁆𑀢𑀺 𑀦 𑀧𑀸𑀧𑀼𑀡𑀦𑁆𑀢𑀺. 𑀯𑀺𑀯𑁂𑀓𑁄 𑀯𑀺𑀦𑀸𑀪𑀯𑀦𑀫𑁂𑀢𑁂𑀲𑀫𑀢𑁆𑀣𑀻𑀢𑀺 𑀯𑀺𑀯𑁂𑀓𑀺𑀦𑁄. 𑀏𑀢𑁆𑀣 𑀯𑀺𑀲𑀬𑁄𑀧𑀘𑀸𑀭𑁂𑀦 𑀯𑀺𑀯𑁂𑀓𑁄𑀢𑀺 𑀧𑀜𑁆𑀜𑀸, 𑀦 𑀯𑀺𑀯𑁂𑀓𑀺𑀦𑁄𑀢𑀺 𑀅𑀯𑀺𑀯𑁂𑀓𑀺𑀦𑁄, 𑀢𑁂𑀬𑁂𑀯 𑀚𑀦𑀸, 𑀢𑁂𑀲𑀁 𑀅𑀦𑁆𑀢𑀺𑀓𑀫𑀺𑀢𑀺 𑀘 𑀯𑀺𑀕𑁆𑀕𑀳𑁄. 𑀇𑀤𑀁 𑀅𑀩𑁆𑀬𑀧𑁂𑀢𑀧𑀞𑀫𑀧𑀸𑀤𑀸𑀤𑀺𑀬𑀫𑀓𑀁.

𑀅𑀩𑁆𑀬𑀧𑁂𑀢𑀧𑀞𑀫𑀤𑀼𑀢𑀺𑀬𑀧𑀸𑀤𑀸𑀤𑀺𑀬𑀫𑀓𑀯𑀡𑁆𑀡𑀦𑀸

𑁨𑁮.

𑀓𑀼𑀲𑀮𑀸’𑀓𑀼𑀲𑀮𑀸 𑀲𑀩𑁆𑀩𑁂, 𑀧𑀩𑀮𑀸’𑀧𑀩𑀮𑀸’𑀣𑀯𑀸;

𑀦𑁄 𑀬𑀸𑀢𑀸 𑀬𑀸𑀯’𑀳𑁄𑀲𑀺𑀢𑁆𑀢𑀁, 𑀲𑀼𑀔𑀤𑀼𑀓𑁆𑀔𑀧𑁆𑀧𑀤𑀸 𑀲𑀺𑀬𑀼𑀁.

𑁨𑁮. ‘‘𑀓𑀼𑀲𑀮𑀸’’𑀇𑀘𑁆𑀘𑀸𑀤𑀺. 𑀧𑀩𑀮𑀸 𑀆𑀲𑁂𑀯𑀦𑀧𑁆𑀧𑀝𑀺𑀮𑀸𑀪𑀯𑀲𑁂𑀦 𑀩𑀮𑀯𑀦𑁆𑀢𑁄 𑀘. 𑀅𑀣𑀸𑀢𑀺 𑀅𑀦𑀦𑁆𑀢𑀭𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀧𑀩𑀮𑀸 𑀢𑀤𑀪𑀸𑀯𑀢𑁄 𑀤𑀼𑀩𑁆𑀩𑀮𑀸 𑀘 𑀲𑀩𑁆𑀩𑁂 𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸 𑀬𑀸𑀯 𑀬𑀢𑁆𑀢𑀓𑀁 𑀓𑀸𑀮𑀁 𑀅𑀳𑁄𑀲𑀺𑀢𑁆𑀢𑀁 𑀯𑀺𑀦𑀸 𑀉𑀧𑁆𑀧𑀢𑁆𑀢𑀺𑀫𑀢𑁆𑀢𑀁 𑀨𑀮𑀤𑀸𑀦𑀸𑀲𑀫𑁆𑀪𑀯𑀢𑁄 𑀓𑁂𑀯𑀮𑀁 ‘‘𑀅𑀳𑁄𑀲𑀻’’𑀢𑀺 𑀯𑀘𑀦𑀻𑀬𑀢𑁆𑀣𑀦𑀺𑀫𑀺𑀢𑁆𑀢𑀫𑀢𑁆𑀢𑀓𑀫𑁆𑀫𑀪𑀸𑀯𑁂𑀦 𑀅𑀳𑁄𑀲𑀺𑀓𑀫𑁆𑀫𑀢𑁆𑀢𑀁 𑀦𑁄 𑀬𑀸𑀢𑀸 𑀦 𑀲𑀫𑁆𑀧𑀢𑁆𑀢𑀸, 𑀢𑀸𑀯 𑀢𑀢𑁆𑀢𑀓𑀁 𑀓𑀸𑀮𑀁 𑀲𑀼𑀔𑀜𑁆𑀘 𑀤𑀼𑀓𑁆𑀔𑀜𑁆𑀘 𑀢𑀁 𑀧𑀤𑀦𑁆𑀢𑀻𑀢𑀺 𑀲𑀼𑀔𑀤𑀼𑀓𑁆𑀔𑀧𑁆𑀧𑀤𑀸 𑀲𑀺𑀬𑀼𑀁. 𑀬𑀸𑀯 𑀲𑀁𑀲𑀸𑀭𑀧𑀯𑀢𑁆𑀢𑀺, 𑀢𑀸𑀯 𑀲𑀼𑀔𑀤𑀼𑀓𑁆𑀔𑀤𑀸𑀬𑀓𑀸 𑀳𑁄𑀦𑁆𑀢𑀻𑀢𑀺. 𑀇𑀤𑀁 𑀧𑀞𑀫𑀤𑀼𑀢𑀺𑀬𑀧𑀸𑀤𑀸𑀤𑀺𑀬𑀫𑀓𑀫𑀩𑁆𑀬𑀧𑁂𑀢𑀁.

𑁨𑁮. 𑀧𑀩𑀮𑀸 𑀆𑀲𑁂𑀯𑀦𑀸𑀤𑀺𑀧𑀘𑁆𑀘𑀬𑀮𑀸𑀪𑁂𑀦 𑀩𑀮𑀯𑀦𑁆𑀢𑁄 𑀯𑀸 𑀅𑀣 𑀅𑀧𑀩𑀮𑀸 𑀢𑀤𑀪𑀸𑀯𑁂𑀦 𑀤𑀼𑀩𑁆𑀩𑀮𑀸 𑀯𑀸 𑀲𑀩𑁆𑀩𑁂 𑀓𑀼𑀲𑀮𑀸𑀓𑀼𑀲𑀮𑀸 𑀅𑀳𑁄𑀲𑀺𑀢𑁆𑀢𑀁 𑀨𑀮𑀤𑀸𑀦𑀸𑀪𑀸𑀯𑀢𑁄 𑀧𑀯𑀢𑁆𑀢𑀺𑀫𑀢𑁆𑀢𑀢𑀁 𑀬𑀸𑀯 𑀬𑀢𑁆𑀢𑀓𑀁 𑀓𑀸𑀮𑀁 𑀦𑁄 𑀬𑀸𑀢𑀸 𑀅𑀧𑁆𑀧𑀢𑁆𑀢𑀸, 𑀢𑀸𑀯 𑀢𑀢𑁆𑀢𑀓𑀁 𑀲𑀼𑀔𑀤𑀼𑀓𑁆𑀔𑀧𑁆𑀧𑀤𑀸 𑀬𑀣𑀸𑀓𑁆𑀓𑀫𑀁 𑀲𑀼𑀔𑀤𑀼𑀓𑁆𑀔𑀧𑀤𑀸𑀬𑀺𑀦𑁄 𑀲𑀺𑀬𑀼𑀁 𑀪𑀯𑀦𑁆𑀢𑀺. 𑀇𑀤𑀁 𑀅𑀩𑁆𑀬𑀧𑁂𑀢𑀧𑀞𑀫𑀤𑀼𑀢𑀺𑀬𑀧𑀸𑀤𑀸𑀤𑀺𑀬𑀫𑀓𑀁. 𑀓𑀼𑀲𑀮𑀧𑀝𑀺𑀧𑀓𑁆𑀔𑀸 𑀅𑀓𑀼𑀲𑀮𑀸. ‘‘𑀅𑀳𑁄𑀲𑀻’’𑀢𑀺 𑀯𑀢𑁆𑀢𑀩𑁆𑀩𑀲𑁆𑀲 𑀪𑀸𑀯𑁄 𑀅𑀳𑁄𑀲𑀺𑀢𑁆𑀢𑀁. ‘‘𑀏𑀳𑀺𑀧𑀲𑁆𑀲𑀺𑀓𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀓𑁆𑀭𑀺𑀬𑀸𑀧𑀤𑀢𑁄𑀧𑀺 𑀡𑀸𑀤𑀺𑀧𑀘𑁆𑀘𑀬𑀸 𑀳𑁄𑀦𑁆𑀢𑀺.

𑀅𑀩𑁆𑀬𑀧𑁂𑀢𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀧𑀸𑀤𑀸𑀤𑀺𑀬𑀫𑀓𑀯𑀡𑁆𑀡𑀦𑀸

𑁨𑁯.

𑀲𑀸𑀤𑀭𑀁 𑀲𑀸 𑀤𑀭𑀁 𑀳𑀦𑁆𑀢𑀼, 𑀯𑀺𑀳𑀺𑀢𑀸 𑀯𑀺𑀳𑀺𑀢𑀸 𑀫𑀬𑀸;

𑀯𑀦𑁆𑀤𑀦𑀸 𑀯𑀦𑁆𑀤𑀦𑀸𑀫𑀸𑀦-𑀪𑀸𑀚𑀦𑁂 𑀭𑀢𑀦𑀢𑁆𑀢𑀬𑁂.

𑁨𑁯. ‘‘𑀲𑀸𑀤𑀭’’𑀫𑀺𑀘𑁆𑀘𑀸𑀤𑀺. ¶ 𑀯𑀦𑁆𑀤𑀦𑀸 𑀤𑁆𑀯𑀸𑀭𑀢𑁆𑀢𑀬𑁄𑀧𑀤𑀲𑁆𑀲𑀺𑀬𑀫𑀸𑀦𑀸 𑀫𑀸𑀦𑁄 𑀘 𑀧𑀽𑀚𑀸, 𑀢𑁂𑀲𑀁 𑀪𑀸𑀚𑀦𑁂 𑀆𑀥𑀸𑀭𑀪𑀽𑀢𑁂 𑀭𑀢𑀺𑀚𑀦𑀦𑀸𑀤𑀺𑀦𑀸 𑀅𑀢𑁆𑀣𑁂𑀦 𑀭𑀢𑀦𑀲𑀗𑁆𑀔𑀸𑀢𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀢𑀬𑁂 𑀲𑀫𑀽𑀳𑀪𑀽𑀢𑁂 𑀭𑀢𑀦𑀢𑁆𑀢𑀬𑁂 𑀲𑀸𑀤𑀭𑀁 𑀆𑀤𑀭𑀲𑀳𑀺𑀢𑀁 𑀓𑀢𑁆𑀯𑀸 𑀫𑀬𑀸 𑀯𑀺𑀳𑀺𑀢𑀸 𑀓𑀢𑀸, 𑀯𑀺𑀳𑀺𑀢𑀸 𑀅𑀮𑀁𑀲𑀁𑀲𑀸𑀭𑀤𑀼𑀓𑁆𑀔𑀯𑀺𑀲𑀝𑀦𑀺𑀭𑀸𑀓𑀭𑀡𑀢𑁄 𑀯𑀺𑀲𑁂𑀲𑁂𑀦 𑀳𑀺𑀢𑀸 𑀧𑀥𑁆𑀬𑀸 𑀲𑀸 𑀯𑀦𑁆𑀤𑀦𑀸 𑀲𑁄 𑀧𑀡𑀸𑀫𑁄 𑀤𑀭𑀁 𑀤𑀭𑀣𑀁 𑀓𑀸𑀬𑀘𑀺𑀢𑁆𑀢𑀧𑀭𑀺𑀴𑀸𑀳𑀁 𑀳𑀦𑁆𑀢𑀼 𑀳𑀺𑀁𑀲𑀢𑀼. 𑀫𑀬𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀫𑁂𑀢𑀺 𑀅𑀢𑁆𑀣𑀢𑁄 𑀯𑀺𑀜𑁆𑀜𑀸𑀬𑀢𑀺. 𑀇𑀤𑀁 𑀧𑀦 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀧𑀸𑀤𑀸𑀤𑀺𑀬𑀫𑀓𑀫𑀩𑁆𑀬𑀧𑁂𑀢𑀁.

𑁨𑁯. 𑀯𑀦𑁆𑀤𑀦𑀸𑀫𑀸𑀦𑀪𑀸𑀚𑀦𑁂 𑀤𑁆𑀯𑀸𑀭𑀢𑁆𑀢𑀬𑁂𑀦 𑀯𑀺𑀥𑀺𑀬𑀫𑀸𑀦𑀧𑀡𑀸𑀫𑀧𑀽𑀚𑀸𑀦𑀁 𑀆𑀥𑀸𑀭𑀪𑀽𑀢𑁂 𑀭𑀢𑀦𑀢𑁆𑀢𑀬𑁂 𑀭𑀢𑀺𑀚𑀦𑀦𑀸𑀤𑀺𑀅𑀢𑁆𑀣𑁂𑀦 𑀭𑀢𑀦𑀲𑀗𑁆𑀔𑀸𑀢𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀢𑀬𑁂 𑀫𑀬𑀸 𑀬𑀸 𑀯𑀦𑁆𑀤𑀦𑀸 𑀲𑀸𑀤𑀭𑀁 𑀆𑀤𑀭𑀲𑀳𑀺𑀢𑀁 𑀯𑀺𑀳𑀺𑀢𑀸 𑀓𑀢𑀸, 𑀯𑀺𑀳𑀺𑀢𑀸 𑀮𑁄𑀓𑀺𑀬 𑀮𑁄𑀓𑀼𑀢𑁆𑀢𑀭 𑀲𑀫𑁆𑀧𑀢𑁆𑀢𑀺𑀲𑀸𑀥𑀦𑀢𑁄 𑀯𑀺𑀲𑁂𑀲𑁂𑀦 𑀳𑀺𑀢𑀸 𑀲𑀸 𑀯𑀦𑁆𑀤𑀦𑀸 𑀤𑀭𑀁 𑀫𑀬𑁆𑀳𑀁 𑀓𑀸𑀬𑀘𑀺𑀢𑁆𑀢𑀤𑀭𑀣𑀁 𑀳𑀦𑁆𑀢𑀼 𑀯𑀺𑀦𑀸𑀲𑁂𑀢𑀼. 𑀇𑀤𑀁 𑀅𑀩𑁆𑀬𑀧𑁂𑀢𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀧𑀸𑀤𑀸𑀤𑀺𑀬𑀫𑀓𑀁. 𑀲𑀳 𑀆𑀤𑀭𑁂𑀦 𑀯𑀢𑁆𑀢𑀫𑀸𑀦𑀁 𑀲𑀸𑀤𑀭𑀁, 𑀓𑁆𑀭𑀺𑀬𑀸𑀯𑀺𑀲𑁂𑀲𑀦𑀁. 𑀏𑀢𑁆𑀣 𑀓𑁆𑀭𑀺𑀬𑀸 𑀦𑀸𑀫 𑀯𑀺𑀳𑀺𑀢𑀸𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀝𑁆𑀞𑀓𑀭𑀡𑀁. 𑀓𑀭𑀡𑀜𑁆𑀳𑀺 𑀯𑀺𑀳𑀺𑀢𑀸𑀲𑀤𑁆𑀤𑀲𑁆𑀲 𑀯𑀼𑀢𑁆𑀢𑀓𑀫𑁆𑀫𑀢𑁆𑀢𑁂𑀧𑀺 𑀅𑀜𑁆𑀜𑀣𑀸𑀦𑀼𑀧𑀧𑀢𑁆𑀢𑀺𑀮𑀓𑁆𑀔𑀡𑀲𑀸𑀫𑀢𑁆𑀣𑀺𑀬𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀯𑀺𑀚𑁆𑀚𑀫𑀸𑀦𑀁 ‘‘𑀅𑀓𑀸𑀲𑀺’’𑀦𑁆𑀢𑀺 𑀓𑁆𑀭𑀺𑀬𑀸𑀬 𑀲𑀫𑁆𑀩𑀦𑁆𑀥𑀫𑀼𑀧𑁂𑀦𑁆𑀢𑀁 𑀓𑀫𑁆𑀫𑀜𑁆𑀘 𑀳𑁄𑀢𑀺, 𑀪𑀸𑀯𑁂 𑀯𑀺𑀳𑀺𑀢𑀲𑁆𑀲 𑀬𑀼𑀧𑀘𑁆𑀘𑀬𑀦𑁆𑀢𑀲𑁆𑀲 𑀦𑀧𑀼𑀁𑀲𑀓𑀢𑁆𑀢𑀸 𑀦𑀧𑀼𑀁𑀲𑀓𑀜𑁆𑀘, 𑀲𑀢𑁆𑀢𑀸𑀬 𑀏𑀓𑀢𑁆𑀢𑀸 𑀏𑀓𑀯𑀘𑀦𑀜𑁆𑀘 𑀢𑀩𑁆𑀩𑀺𑀲𑁂𑀲𑀦𑀢𑁆𑀢𑀸 𑀲𑀸𑀤𑀭𑀲𑀤𑁆𑀤𑁄𑀧𑀺 𑀦𑀧𑀼𑀁𑀲𑀓𑀤𑀼𑀢𑀺𑀬𑁂𑀓𑀯𑀘𑀦𑁄 𑀳𑁄𑀢𑀺.

‘‘𑀯𑀺𑀲𑁂𑀲𑁆𑀬𑁂 ¶ 𑀤𑀺𑀲𑁆𑀲𑀫𑀸𑀦𑀸 𑀬𑀸,

𑀮𑀺𑀗𑁆𑀕𑀲𑀗𑁆𑀔𑁆𑀬𑀸𑀯𑀺𑀪𑀢𑁆𑀢𑀺𑀬𑁄;

𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀪𑀺𑀬𑁆𑀬𑁄,

𑀓𑀸𑀢𑀩𑁆𑀩𑀸 𑀢𑀸 𑀯𑀺𑀲𑁂𑀲𑀦𑁂’’𑀢𑀺 [𑀲𑀫𑁆𑀩𑀦𑁆𑀥𑀘𑀺𑀦𑁆𑀢𑁄 𑁧𑁫 𑀕𑀸𑀣𑀸 𑀪𑁂𑀤𑀘𑀺𑀦𑁆𑀢𑀸 𑁧𑁯𑁪 𑀕𑀸𑀣𑀸].

𑀳𑀺 𑀯𑀼𑀢𑁆𑀢𑀁. 𑀏𑀯𑀁 𑀓𑁆𑀭𑀺𑀬𑀸𑀯𑀺𑀲𑁂𑀲𑀦𑁂 𑀕𑀳𑀺𑀢𑁂 𑀲𑀸𑀫𑀢𑁆𑀣𑀺𑀬𑀢𑁄 ‘‘𑀫𑀬𑀸’’𑀢𑀺 𑀢𑀢𑀺𑀬𑀦𑁆𑀢𑀲𑁆𑀲 𑀧𑀞𑀫𑀦𑁆𑀢𑀢𑁆𑀢𑀁, ‘‘𑀯𑀦𑁆𑀤𑀦𑀸’’𑀢𑀺 𑀧𑀞𑀫𑀦𑁆𑀢𑀲𑁆𑀲 𑀙𑀝𑁆𑀞𑀼𑀦𑁆𑀢𑀜𑁆𑀘 𑀳𑁄𑀢𑀺. 𑀯𑀦𑁆𑀤𑀦𑀸 𑀘 𑀫𑀸𑀦𑁄 𑀘, 𑀢𑁂𑀲𑀁 𑀪𑀸𑀚𑀦𑀁. 𑀢𑀺𑀡𑁆𑀡𑀁 𑀲𑀫𑀽𑀳𑁄 𑀢𑀬𑀁, 𑀭𑀢𑀦𑀸𑀦𑀁 𑀢𑀬𑀦𑁆𑀢𑀺 𑀘 𑀯𑀺𑀕𑁆𑀕𑀳𑁄.

𑀅𑀩𑁆𑀬𑀧𑁂𑀢𑀘𑀢𑀼𑀓𑁆𑀓𑀧𑀸𑀤𑀸𑀤𑀺𑀬𑀫𑀓𑀯𑀡𑁆𑀡𑀦𑀸

𑁩𑁦.

𑀓𑀫𑀮𑀁 𑀓’𑀫𑀮𑀁 𑀓𑀢𑁆𑀢𑀼𑀁-𑀯𑀦𑀤𑁄 𑀯𑀦𑀤𑁄’𑀫𑁆𑀩𑀭𑀁;

𑀲𑀼𑀕𑀢𑁄 𑀲𑀼𑀕𑀢𑁄 𑀮𑁄𑀓𑀁, 𑀲𑀳𑀺𑀢𑀁 𑀲𑀳𑀺𑀢𑀁 𑀓𑀭𑀁.

𑁩𑁦. ‘‘𑀓𑀫𑀮’’𑀫𑀺𑀘𑁆𑀘𑀸𑀤𑀺. 𑀓𑀫𑀮𑀁 𑀅𑀭𑀯𑀺𑀦𑁆𑀤𑀁 𑀓𑀁 𑀚𑀮𑀁 𑀅𑀮𑀗𑁆𑀓𑀢𑁆𑀢𑀼𑀁 𑀲𑀚𑁆𑀚𑀦𑀢𑁆𑀣𑀸𑀬 𑀳𑁄𑀢𑀺, 𑀯𑀺𑀓𑀲𑀺𑀢𑀸𑀭𑀯𑀺𑀦𑁆𑀤𑀲𑀦𑁆𑀤𑁄𑀳𑀲𑀫𑁆𑀪𑀸𑀯𑀺𑀢𑁄𑀤𑀓𑀲𑁆𑀲 𑀯𑀸𑀧𑀸𑀤𑀻𑀲𑀼 𑀢𑀸𑀤𑀺𑀲𑀭𑀫𑀡𑀻𑀬𑀢𑁆𑀢𑀲𑀫𑁆𑀧𑀢𑁆𑀢𑀺𑀲𑀫𑁆𑀪𑀯𑀢𑁄, 𑀅𑀯𑀦𑀁 𑀭𑀓𑁆𑀔𑀁 𑀤𑀤𑀸𑀢𑀺 𑀲𑀲𑁆𑀲𑀲𑀫𑁆𑀧𑀢𑁆𑀬𑀸𑀤𑀺𑀓𑀸𑀭𑀡𑀪𑀸𑀯𑁂𑀦𑀸𑀢𑀺 𑀅𑀯𑀦𑀤𑁄. 𑀯𑀦𑀁 𑀚𑀮𑀁 𑀤𑀤𑀸𑀢𑀺 𑀦 𑀢𑀼𑀘𑁆𑀙𑁄𑀢𑀺 𑀯𑀦𑀤𑁄 𑀫𑁂𑀖𑁄 𑀅𑀫𑁆𑀩𑀭𑀁 𑀆𑀓𑀸𑀲𑀁 𑀚𑀮𑀥𑀸𑀭𑀪𑀸𑀭𑀪𑀭𑀺𑀢𑀫𑁆𑀩𑀭𑀓𑀼𑀳𑀭𑀲𑁆𑀲 𑀤𑀲𑁆𑀲𑀦𑀻𑀬𑀢𑀸𑀕𑀼𑀡𑀬𑁄𑀕𑀢𑁄 𑀅𑀮𑀁𑀓𑀢𑁆𑀢𑀼𑀦𑁆𑀢𑀺 𑀅𑀥𑀺𑀓𑀢𑀁. 𑀲𑀳𑀺𑀢𑀁 𑀲𑀫𑁆𑀧𑀼𑀡𑁆𑀡𑀁 𑀳𑀺𑀢𑀁 𑀅𑀪𑀺𑀯𑀼𑀤𑁆𑀥𑀺𑀁 𑀓𑀭𑀁 𑀓𑀭𑁄𑀦𑁆𑀢𑁄 𑀲𑀼𑀝𑁆𑀞𑀼 𑀕𑀤𑀢𑀻𑀢𑀺 𑀲𑀼𑀕𑀢𑁄 𑀫𑀜𑁆𑀚𑀼𑀪𑀸𑀡𑀻 𑀧𑀼𑀩𑁆𑀩𑀩𑀼𑀤𑁆𑀥𑀸 𑀯𑀺𑀬 𑀦𑁂𑀓𑁆𑀔𑀫𑁆𑀫𑀸𑀤𑀺𑀦𑀸 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀓𑁂 𑀧𑀚𑀳𑀦𑁆𑀢𑁄 𑀕𑀦𑁆𑀢𑁆𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀯𑀸𑀲𑀦𑀲𑀓𑀮𑀓𑀺𑀮𑁂𑀲𑁂 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑁄𑀪𑀦𑀁 𑀦𑀺𑀩𑁆𑀩𑀸𑀦𑀧𑀼𑀭𑀁 𑀕𑀢𑁄𑀢𑀺 𑀯𑀸 𑀲𑀼𑀕𑀢𑁄𑀢𑀺 𑀯𑀼𑀢𑁆𑀢𑁄 𑀲𑁄 𑀫𑀳𑀸𑀫𑀼𑀦𑀺 𑀅𑀢𑁆𑀢𑀦𑁄 𑀅𑀧𑀭𑀺𑀫𑀺𑀢𑀧𑀸𑀭𑀫𑀺𑀢𑀸𑀲𑀺𑀫𑁆𑀧𑀓𑀘𑀕𑀮𑀺𑀢𑀢𑀺𑀮𑀓𑀪𑀸𑀯𑁂𑀦 𑀮𑁄𑀓𑀁 𑀮𑁄𑀓𑀢𑁆𑀢𑀬𑀁, 𑀲𑀳𑀺𑀢𑀁 𑀮𑁄𑀓𑀦𑁆𑀢𑀺 𑀯𑀸 𑀬𑁄𑀚𑀦𑀻𑀬𑀁 𑀅𑀮𑀗𑁆𑀓𑀢𑁆𑀢𑀼𑀁 𑀅𑀮𑀁𑀓𑀭𑀡𑀸𑀬𑀸𑀢𑀺. 𑀇𑀤𑀁 𑀧𑀸𑀤𑀘𑀢𑀼𑀓𑁆𑀓𑀸𑀤𑀺𑀬𑀫𑀓𑀫𑀩𑁆𑀬𑀧𑁂𑀢𑀁.

𑁩𑁦. 𑀓𑀫𑀮𑀁 ¶ 𑀧𑀤𑀼𑀫𑀁 𑀓𑀁 𑀚𑀮𑀁 𑀅𑀮𑀗𑁆𑀓𑀢𑁆𑀢𑀼𑀁 𑀧𑀜𑁆𑀘𑀯𑀺𑀥𑀧𑀤𑀼𑀫𑀲𑀜𑁆𑀙𑀦𑁆𑀦𑀲𑁆𑀲 𑀉𑀤𑀓𑀲𑁆𑀲 𑀭𑀫𑀡𑀻𑀬𑀢𑁆𑀢𑀸 𑀲𑀚𑁆𑀚𑁂𑀢𑀼𑀁 𑀳𑁄𑀢𑀺. 𑀅𑀯𑀦𑀤𑁄 𑀓𑀸𑀮𑁂 𑀯𑀼𑀝𑁆𑀞𑀺𑀲𑀫𑁆𑀧𑀤𑀸𑀬 𑀲𑀲𑁆𑀲𑀲𑀫𑁆𑀧𑀤𑀸𑀤𑀻𑀦𑀁 𑀓𑀸𑀭𑀡𑀢𑁆𑀢𑀸 𑀆𑀭𑀓𑁆𑀔𑀁 𑀤𑁂𑀦𑁆𑀢𑁄 𑀯𑀦𑀤𑁄 𑀫𑁂𑀖𑁄 𑀅𑀫𑁆𑀩𑀭𑀁 𑀆𑀓𑀸𑀲𑀁 𑀅𑀮𑀗𑁆𑀓𑀢𑁆𑀢𑀼𑀁 𑀚𑀮𑀥𑀸𑀭𑀪𑀸𑀭𑀪𑀭𑀺𑀢𑀫𑁆𑀩𑀭𑀓𑀼𑀘𑁆𑀙𑀺𑀬𑀸 𑀤𑀲𑁆𑀲𑀦𑀻𑀬𑀢𑁆𑀢𑀸 𑀲𑀚𑁆𑀚𑁂𑀢𑀼𑀁 𑀳𑁄𑀢𑀺, 𑀲𑀳𑀺𑀢𑀁 𑀲𑀫𑁆𑀧𑀼𑀡𑁆𑀡𑀁 𑀳𑀺𑀢𑀁 𑀅𑀪𑀺𑀯𑀼𑀟𑁆𑀠𑀺𑀁 𑀓𑀭𑀁 𑀓𑀭𑁄𑀦𑁆𑀢𑁄 𑀲𑀼𑀕𑀢𑁄 𑀘𑀺𑀢𑁆𑀭𑀓𑀣𑀻 𑀲𑀼𑀦𑁆𑀤𑀭𑀁 𑀦𑀺𑀩𑁆𑀩𑀸𑀦𑀁 𑀕𑀢𑁄 𑀯𑀸 𑀲𑁄 𑀲𑀼𑀕𑀢𑁄 𑀲𑁄 𑀢𑀣𑀸𑀕𑀢𑁄 𑀮𑁄𑀓𑀁 𑀮𑁄𑀓𑀢𑁆𑀢𑀬𑀁, 𑀲𑀳𑀺𑀢𑀁 𑀮𑁄𑀓𑀁 𑀯𑀸 𑀅𑀮𑀗𑁆𑀓𑀢𑁆𑀢𑀼𑀁 𑀘𑀺𑀢𑁆𑀭𑀓𑀣𑀸𑀤𑀺𑀓𑀸𑀭𑀡𑁂𑀳𑀺 𑀢𑀸𑀤𑀺𑀲𑀲𑁆𑀲 𑀅𑀜𑁆𑀜𑀲𑁆𑀲 𑀘 𑀮𑁄𑀓𑀭𑀸𑀫𑀡𑁂𑀬𑁆𑀬𑀲𑁆𑀲𑀸𑀪𑀸𑀯𑀸 𑀲𑀚𑁆𑀚𑁂𑀢𑀼𑀁 𑀳𑁄𑀢𑀺. 𑀲𑀩𑁆𑀩𑀧𑀤𑀢𑁆𑀣𑀸𑀦𑀁 𑀲𑀢𑁆𑀢𑀸𑀩𑁆𑀬𑀪𑀺𑀘𑀸𑀭𑀺𑀢𑁆𑀢𑀸 𑀳𑁄𑀢𑀻𑀢𑀺 𑀕𑀫𑁆𑀫𑀁. 𑀢𑀢𑁄𑀬𑁂𑀯 𑀲𑀩𑁆𑀩𑁂 𑀧𑀞𑀫𑀦𑁆𑀢𑀪𑀯𑀦𑀓𑁆𑀭𑀺𑀬𑀸𑀬 𑀬𑀼𑀚𑁆𑀚𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀇𑀤𑀁 𑀅𑀩𑁆𑀬𑀧𑁂𑀢𑀘𑀢𑀼𑀓𑁆𑀓𑀧𑀸𑀤𑀸𑀤𑀺𑀬𑀫𑀓𑀁.

𑁩𑁧.

𑀅𑀩𑁆𑀬𑀧𑁂𑀢𑀸𑀤𑀺𑀬𑀫𑀓-𑀲𑁆𑀲𑁂𑀲𑁄 𑀮𑁂𑀲𑁄 𑀦𑀺𑀤𑀲𑁆𑀲𑀺𑀢𑁄;

𑀜𑁂𑀬𑁆𑀬𑀸𑀦𑀺’𑀫𑀸𑀬𑁂𑀯 𑀤𑀺𑀲𑀸-𑀬’𑀜𑁆𑀜𑀸𑀦𑀺 𑀬𑀫𑀓𑀸𑀦𑀺𑀧𑀺.

𑁩𑁧. 𑀇𑀘𑁆𑀘𑁂𑀯𑀫𑀪𑀺𑀫𑀢𑀬𑀫𑀓𑁂 𑀅𑀩𑁆𑀬𑀧𑁂𑀢𑀧𑀸𑀤𑀸𑀤𑀺𑀬𑀫𑀓𑀲𑁆𑀲 𑀤𑀺𑀲𑀸𑀫𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀉𑀧𑀲𑀁𑀳𑀭𑀢𑀺 ‘‘𑀅𑀩𑁆𑀬𑀧𑁂𑀢𑁂’’𑀘𑁆𑀘𑀸𑀤𑀺𑀦𑀸. 𑀅𑀩𑁆𑀬𑀧𑁂𑀢𑀲𑁆𑀲 𑀅𑀩𑁆𑀬𑀯𑀳𑀺𑀢𑀲𑁆𑀲 𑀘𑀢𑀼𑀦𑁆𑀦𑀁 𑀧𑀸𑀤𑀸𑀦𑀁 𑀆𑀤𑁄, 𑀆𑀤𑀺𑀪𑀽𑀢𑀲𑁆𑀲 𑀯𑀸 𑀬𑀫𑀓𑀲𑁆𑀲 𑀏𑀲𑁄 𑀬𑀣𑀸𑀯𑀼𑀢𑁆𑀢𑁄 𑀮𑁂𑀲𑁄 𑀓𑁄𑀘𑀺𑀤𑁂𑀯 𑀪𑁂𑀤𑁄 𑀦𑀺𑀤𑀲𑁆𑀲𑀺𑀢𑁄 𑀯𑀺𑀓𑀧𑁆𑀧𑀺𑀢𑁄. 𑀅𑀧𑀭𑀸𑀦𑀺𑀧𑀺 𑀓𑀺𑀁 𑀦 𑀯𑀺𑀓𑀧𑁆𑀧𑀺𑀬𑀦𑁆𑀢𑀻𑀢𑀺𑀘𑁂𑀢𑀺 𑀆𑀳 ‘‘𑀜𑁂𑀬𑁆𑀬𑀸𑀦𑀺’’𑀘𑁆𑀘𑀸𑀤𑀺. 𑀇𑀫𑀸𑀬 𑀤𑀺𑀲𑀸𑀬 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀫𑀕𑁆𑀕𑁂𑀦𑁂𑀯 𑀅𑀜𑁆𑀜𑀸𑀦𑀺 𑀯𑀼𑀢𑁆𑀢𑀢𑁄 𑀅𑀧𑀭𑀸𑀦𑀺 𑀤𑀼𑀢𑀺𑀬𑀧𑀸𑀤𑀸𑀤𑀺𑀬𑀫𑀓𑀢𑀢𑀺𑀬𑀧𑀸𑀤𑀸𑀤𑀺𑀬𑀫𑀓𑀘𑀢𑀼𑀢𑁆𑀣𑀧𑀸𑀤𑀸𑀤𑀺𑀬𑀫𑀓𑀸𑀤𑀻𑀦𑀺 𑀅𑀩𑁆𑀬𑀧𑁂𑀢𑀸𑀦𑀺𑀧𑀺 𑀧𑀞𑀫𑀤𑀼𑀢𑀺𑀬𑀧𑀸𑀤𑀸𑀤𑀺𑀬𑀫𑀓𑀧𑀞𑀫𑀢𑀢𑀺𑀬𑀧𑀸𑀤𑀸𑀤𑀺𑀬𑀫𑀓𑀸𑀦𑀺𑀧𑀺 𑀩𑁆𑀬𑀧𑁂𑀢𑀸𑀦𑀺, 𑀧𑀞𑀫𑀘𑀢𑀼𑀢𑁆𑀣𑀤𑀼𑀢𑀺𑀬𑀢𑀢𑀺𑀬𑀧𑀸𑀤𑀸𑀤𑀺𑀬𑀫𑀓𑀸𑀤𑀻𑀦𑀺𑀧𑀺 𑀅𑀩𑁆𑀬𑀧𑁂𑀢𑀩𑁆𑀬𑀧𑁂𑀢𑀸𑀦𑀺, 𑀢𑀣𑀸 𑀫𑀚𑁆𑀛𑀦𑁆𑀢𑀧𑀸𑀤𑀬𑀫𑀓𑀸𑀦𑀺 𑀜𑁂𑀬𑁆𑀬𑀸𑀦𑀺 𑀚𑀸𑀦𑀺𑀢𑀩𑁆𑀩𑀸𑀦𑀺, 𑀯𑀺𑀜𑁆𑀜𑀽𑀦𑀁 𑀢𑀸𑀤𑀺𑀲𑀸𑀬 𑀤𑀺𑀲𑀸𑀬 𑀤𑀲𑁆𑀲𑀺𑀢𑀢𑁆𑀢𑀸𑀢𑀺. 𑀢𑀢𑁆𑀣 𑀘 𑁋

‘‘𑀕𑀼𑀡𑀸𑀕𑀼𑀡𑁂𑀦 ¶ 𑀲𑀳 𑀢𑁂, 𑀲𑀸𑀥𑀯𑁄’𑀲𑀸𑀥𑀯𑁄 𑀚𑀦𑀸;

𑀯𑀺𑀕𑀸𑀳𑀦𑁆𑀢𑁂 𑀲𑀫𑀁 𑀦𑀸𑀣, 𑀘𑀺𑀢𑁆𑀢𑀁 𑀘𑀺𑀢𑁆𑀢𑁂 𑀓𑀣𑀁 𑀦𑀼 𑀢𑁂’’.

𑀇𑀘𑁆𑀘𑀸𑀤𑀺𑀦𑀸 𑀤𑀼𑀢𑀺𑀬𑀧𑀸𑀤𑀸𑀤𑀺𑀬𑀫𑀓𑀸𑀤𑀻𑀦𑀺 𑀅𑀩𑁆𑀬𑀧𑁂𑀢𑀸𑀦𑀺,

‘‘𑀧𑀺𑀬𑁂𑀦 𑀯𑀘𑀲𑀸 𑀲𑀩𑁆𑀩𑁂,

𑀧𑀺𑀬𑁂𑀦’𑀧𑁆𑀧𑀺𑀬𑀪𑀸𑀡𑀺𑀦𑁄;

𑀧𑀸𑀤𑀸𑀦𑀢𑁂 𑀚𑀺𑀦𑁄𑀓𑀸𑀲𑀺,

𑀲𑁄 𑀥𑀫𑁆𑀫𑁄 𑀳𑀦𑁆𑀢𑀼 𑀯𑁄’𑀧𑁆𑀧𑀺𑀬𑀁’’.

𑀇𑀘𑁆𑀘𑀸𑀤𑀺𑀦𑀸 𑀧𑀞𑀫𑀤𑀼𑀢𑀺𑀬𑀧𑀸𑀤𑀸𑀤𑀺𑀬𑀫𑀓𑀸𑀤𑀻𑀦𑀺 𑀅𑀩𑁆𑀬𑀧𑁂𑀢𑀸𑀦𑀺,

‘‘𑀲’𑀫𑀮𑀁 𑀲𑀫𑀮𑀁 𑀓𑀢𑁆𑀢𑀼𑀁, 𑀲𑀼𑀘𑀺𑀭𑀁𑀲𑀼𑀘𑀺 𑀭𑀁𑀚𑀬𑁂;

𑀲𑀼𑀘𑀺𑀭𑀁 𑀲𑀼𑀘𑀺𑀭𑀁𑀕𑀁 𑀢𑀁, 𑀲’𑀫𑀮𑀁 𑀲𑀫𑀮𑀁𑀪𑀺 𑀬𑁄’’.

𑀇𑀘𑁆𑀘𑀸𑀤𑀺𑀦𑀸 𑀧𑀞𑀫𑀘𑀢𑀼𑀢𑁆𑀣𑀤𑀼𑀢𑀺𑀬𑀢𑀢𑀺𑀬𑀧𑀸𑀤𑀸𑀤𑀺𑀬𑀫𑀓𑀸𑀤𑀻𑀦𑀺 𑀅𑀩𑁆𑀬𑀧𑁂𑀢𑀩𑁆𑀬𑀧𑁂𑀢𑀸𑀦𑀺,

‘‘𑀫𑀦𑁄𑀳𑀭 𑀳𑀭 𑀓𑁆𑀮𑁂𑀲𑀁, 𑀚𑀺𑀦 𑀘𑁂𑀢𑁄𑀪𑀯𑀁 𑀫𑀫;

𑀦𑀦𑀼 𑀢𑁆𑀯𑀁 𑀧𑀸𑀭𑀫𑀻𑀲𑀸𑀭𑀸-𑀫𑀢𑀪𑀸𑀯𑀺𑀢𑀫𑁄𑀲𑀥𑀁’’.

𑀇𑀘𑁆𑀘𑀸𑀤𑀺𑀦𑀸 𑀫𑀚𑁆𑀛𑀧𑀸𑀤𑀬𑀫𑀓𑀸𑀦𑀺,

‘‘𑀲𑀸𑀥𑀼𑀦𑀸 𑀭𑀁𑀚𑀬 𑀚𑀬-𑀤𑁆𑀥𑀦𑀺𑀦𑀸’𑀧𑀽𑀭𑀬𑀺 𑀫𑀳𑀺𑀁;

𑀬𑁄 𑀢𑀁 𑀚𑀺𑀦𑀯𑀭𑀁 𑀥𑀻𑀭-𑀫𑀢𑁆𑀣𑀓𑀸𑀫𑁄𑀲𑀺 𑀘𑁂 𑀢𑀼𑀯𑀁’’.

𑀇𑀘𑁆𑀘𑀸𑀤𑀺𑀦𑀸 𑀅𑀦𑁆𑀢𑀧𑀸𑀤𑀬𑀫𑀓𑀸𑀦𑀺 𑀚𑀸𑀦𑀺𑀢𑀩𑁆𑀩𑀸𑀦𑀺.

𑁩𑁧. 𑀏𑀯𑀁 𑀅𑀪𑀺𑀫𑀢𑀬𑀫𑀓𑁂𑀦 𑀅𑀩𑁆𑀬𑀧𑁂𑀢𑀬𑀫𑀓𑀸𑀦𑀫𑀼𑀧𑀸𑀬𑀸𑀤𑀻𑀦𑀺 𑀦𑀺𑀕𑀫𑁂𑀦𑁆𑀢𑁄 𑀆𑀳 ‘‘𑀅𑀩𑁆𑀬𑀧𑁂𑀢𑀺’’𑀘𑁆𑀘𑀸𑀤𑀺. 𑀅𑀩𑁆𑀬𑀧𑁂𑀢𑀸𑀤𑀺𑀬𑀫𑀓𑀲𑁆𑀲 𑀯𑀺𑀲𑀤𑀺𑀲𑀯𑀡𑁆𑀡𑁂𑀳𑀺 𑀅𑀩𑁆𑀬𑀯𑀳𑀺𑀢𑀸𑀤𑀺𑀬𑀫𑀓𑀲𑁆𑀲, 𑀅𑀩𑁆𑀬𑀧𑁂𑀢𑀧𑀸𑀤𑀸𑀤𑀺𑀬𑀫𑀓𑀲𑁆𑀲 𑀯𑀸 𑀏𑀲𑁄 𑀮𑁂𑀲𑁄 ‘‘𑀲𑀼𑀚𑀦𑀺’’𑀘𑁆𑀘𑀸𑀤𑀺𑀓𑁄 𑀅𑀧𑁆𑀧𑀓𑁄𑀤𑀸𑀳𑀭𑀡𑀦𑀬𑁄 𑀦𑀺𑀤𑀲𑁆𑀲𑀺𑀢𑁄 𑀦𑀺𑀤𑁆𑀤𑀺𑀝𑁆𑀞𑁄. 𑀅𑀜𑁆𑀜𑀸𑀦𑀺 𑀬𑀫𑀓𑀸𑀦𑀺𑀧𑀺 𑀇𑀫𑀸𑀬𑁂𑀯 𑀤𑀺𑀲𑀸𑀬 𑀇𑀫𑀺𑀦𑀸 𑀦𑀬𑁂𑀦𑁂𑀯 𑀜𑁂𑀬𑁆𑀬𑀸𑀦𑀺 𑀯𑀺𑀜𑁆𑀜𑀽𑀳𑀺 𑀜𑀸𑀢𑀩𑁆𑀩𑀸𑀦𑀺. 𑀆𑀤𑁄 𑀬𑀫𑀓𑀁, 𑀆𑀤𑀺𑀪𑀽𑀢𑀁 𑀯𑀸 𑀬𑀫𑀓𑀁, 𑀅𑀩𑁆𑀬𑀧𑁂𑀢𑀜𑁆𑀘 𑀢𑀁 𑀆𑀤𑀺𑀬𑀫𑀓𑀜𑁆𑀘𑀸𑀢𑀺 𑀯𑀸𑀓𑁆𑀬𑀁. 𑀏𑀯𑀁 𑀤𑀲𑁆𑀲𑀺𑀢𑁂𑀦 ¶ 𑀇𑀫𑀺𑀦𑀸 𑀓𑀫𑁂𑀦 𑀅𑀩𑁆𑀬𑀧𑁂𑀢𑀤𑀼𑀢𑀺𑀬𑀧𑀸𑀤𑀸𑀤𑀺𑀬𑀫𑀓𑀸𑀤𑀬𑁄 𑀜𑀸𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑀢𑁆𑀣 𑀅𑀩𑁆𑀬𑀧𑁂𑀢𑀤𑀼𑀢𑀺𑀬𑀧𑀸𑀤𑀸𑀤𑀺𑀬𑀫𑀓𑀫𑁂𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋

𑀕𑀼𑀡𑀸𑀕𑀼𑀡𑁂𑀦 𑀲𑀳 𑀢𑁂, 𑀲𑀸𑀥𑀯𑁄’𑀲𑀸𑀥𑀯𑁄 𑀚𑀦𑀸;

𑀯𑀺𑀕𑀸𑀳𑀦𑁆𑀢𑁂 𑀲𑀫𑀁 𑀦𑀸𑀣, 𑀘𑀺𑀢𑁆𑀢𑀁 𑀘𑀺𑀢𑁆𑀢𑁂 𑀓𑀣𑀁 𑀦𑀼 𑀢𑁂.

𑀪𑁄 𑀦𑀸𑀣 𑀢𑁂 𑀢𑀼𑀬𑁆𑀳𑀁 𑀘𑀺𑀢𑁆𑀢𑁂 𑀲𑀸𑀥𑀯𑁄 𑀅𑀲𑀸𑀥𑀯𑁄 𑀢𑁂 𑀚𑀦𑀸 𑀕𑀼𑀡𑀸𑀕𑀼𑀡𑁂𑀦 𑀲𑀓𑀲𑀓𑀕𑀼𑀡𑁂𑀦 𑀅𑀕𑀼𑀡𑁂𑀦 𑀘 𑀲𑀳 𑀲𑀫𑀁 𑀏𑀓𑀚𑁆𑀛𑀁 𑀓𑀣𑀁 𑀦𑀼 𑀯𑀺𑀕𑀸𑀳𑀦𑁆𑀢𑁂, 𑀘𑀺𑀢𑁆𑀢𑀁 𑀅𑀘𑁆𑀙𑀭𑀺𑀬𑀁 𑀲𑀼𑀚𑀦𑀤𑀼𑀚𑁆𑀚𑀦𑁂𑀲𑀼 𑀲𑀫𑀫𑁂𑀢𑁆𑀢𑀸 𑀅𑀘𑁆𑀙𑀭𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀩𑁆𑀬𑀧𑁂𑀢𑀧𑀞𑀫𑀤𑀼𑀢𑀺𑀬𑀧𑀸𑀤𑀸𑀤𑀺𑀬𑀫𑀓𑀫𑁂𑀯𑀁 𑀤𑀝𑁆𑀞𑀩𑁆𑀩𑀁 𑁋

𑀧𑀺𑀬𑁂𑀦 𑀯𑀘𑀲𑀸 𑀲𑀩𑁆𑀩𑁂, 𑀧𑀺𑀬𑁂𑀦’𑀧𑁆𑀧𑀺𑀬𑀪𑀸𑀡𑀺𑀦𑁄;

𑀧𑀸𑀤𑀸𑀦𑀢𑁂 𑀚𑀺𑀦𑁄𑀓𑀸𑀲𑀺, 𑀲𑁄 𑀥𑀫𑁆𑀫𑁄 𑀳𑀦𑁆𑀢𑀼 𑀯𑁄’𑀧𑁆𑀧𑀻𑀬𑀁.

𑀚𑀺𑀦𑁄 𑀅𑀧𑁆𑀧𑀺𑀬𑀪𑀸𑀡𑀺𑀦𑁄𑀧𑀺 𑀲𑀩𑁆𑀩𑁂 𑀚𑀦𑁂 𑀧𑀺𑀬𑁂𑀦 𑀬𑁂𑀦 𑀯𑀘𑀲𑀸 𑀧𑀸𑀤𑀸𑀦𑀢𑁂 𑀅𑀓𑀸𑀲𑀺, 𑀲𑁄 𑀥𑀫𑁆𑀫𑁄 𑀯𑁄 𑀅𑀧𑁆𑀧𑀺𑀬𑀁 𑀳𑀦𑁆𑀢𑀼. 𑀏𑀢𑁆𑀣 𑀅𑀧𑀺𑀲𑀤𑁆𑀤𑀧𑀭𑀺𑀬𑀸𑀬𑀲𑁆𑀲 𑀧𑀺𑀲𑀤𑁆𑀤𑀲𑁆𑀲 𑀕𑀳𑀺𑀢𑀢𑁆𑀢𑀸 𑀬𑀢𑀺𑀪𑀗𑁆𑀕𑁄 𑀦𑀢𑁆𑀣𑀺.

𑀧𑀞𑀫𑀘𑀢𑀼𑀢𑁆𑀣𑀤𑀼𑀢𑀺𑀬𑀢𑀢𑀺𑀬𑀧𑀸𑀤𑀸𑀤𑀺𑀅𑀩𑁆𑀬𑀧𑁂𑀢𑀩𑁆𑀬𑀧𑁂𑀢𑀬𑀫𑀓𑀫𑁂𑀯𑀁 𑀤𑀝𑁆𑀞𑀩𑁆𑀩𑀁 𑁋

𑀲’𑀫𑀮𑀁 𑀲𑀫𑀮𑀁 𑀓𑀢𑁆𑀢𑀼𑀁, 𑀲𑀼𑀘𑀺𑀭𑀁𑀲𑀼𑀘𑀺 𑀭𑀁𑀚𑀬𑁂;

𑀲𑀼𑀘𑀺𑀭𑀁 𑀲𑀼𑀘𑀺𑀭𑀁𑀕𑀁 𑀢𑀁, 𑀲’𑀫𑀮𑀁 𑀲𑀫𑀮𑀁𑀪𑀺 𑀬𑁄𑀢𑀺.

𑀏𑀢𑁆𑀣 ‘‘𑀲𑀫𑀮𑀁 𑀲𑀫𑀮𑀁, 𑀲𑀼𑀘𑀺𑀭𑀁 𑀲𑀼𑀘𑀺𑀭’’𑀦𑁆𑀢𑀺 𑀯𑀺𑀲𑀤𑀺𑀲𑀯𑀡𑁆𑀡𑁂𑀳𑀺 𑀅𑀩𑁆𑀬𑀯𑀳𑀺𑀢𑀢𑁆𑀢𑀸 𑀅𑀩𑁆𑀬𑀧𑁂𑀢𑀁, ‘‘𑀲𑀫𑀮𑀁 𑀲𑀫𑀮’’𑀦𑁆𑀢𑀺 𑀧𑀼𑀩𑁆𑀩𑀧𑀭𑀬𑀼𑀕𑀴𑀁 [𑀧𑀼𑀩𑁆𑀩𑀧𑀭𑀬𑀼𑀕𑀴𑀤𑁆𑀯𑀬𑀁 (𑀓.)] ‘‘𑀓𑀢𑁆𑀢𑀼’’𑀫𑀺𑀢𑀺 𑀪𑀺𑀦𑁆𑀦𑀯𑀡𑁆𑀡𑁂𑀳𑀺, ‘‘𑀲𑀼𑀘𑀺𑀭𑀁 𑀲𑀼𑀘𑀺𑀭’’𑀦𑁆𑀢𑀺 𑀧𑀼𑀩𑁆𑀩𑀧𑀭𑀬𑀼𑀕𑀴𑀁 [𑀧𑀼𑀩𑁆𑀩𑀧𑀭𑀬𑀼𑀕𑀴𑀤𑁆𑀯𑀬𑀁 (𑀓.)] ‘‘𑀚𑀬𑁂’’𑀢𑀺 𑀪𑀺𑀦𑁆𑀦𑀯𑀡𑁆𑀡𑁂𑀳𑀺 𑀘 𑀩𑁆𑀬𑀯𑀳𑀺𑀢𑀢𑁆𑀢𑀸 𑀩𑁆𑀬𑀧𑁂𑀢𑀜𑁆𑀘 𑀳𑁄𑀢𑀺. 𑀲𑀼𑀘𑀺𑀭𑀁𑀲𑀼𑀘𑀺 𑀲𑁄𑀪𑀦𑀭𑀁𑀲𑀺𑀦𑀸 𑀉𑀘𑀺 𑀬𑀼𑀢𑁆𑀢𑁄 𑀬𑁄 𑀚𑀺𑀦𑁄 𑀲𑀁 ¶ 𑀲𑀦𑁆𑀢𑀺𑀁 𑀦𑀺𑀩𑁆𑀩𑀸𑀦𑀁 𑀲𑀫𑀮𑀁𑀪𑀺 𑀅𑀮𑀪𑀺, 𑀅𑀮𑀁 𑀅𑀘𑁆𑀘𑀦𑁆𑀢𑀁 𑀅𑀢𑀺𑀲𑀬𑁂𑀦 𑀲𑀼𑀘𑀺𑀭𑀁𑀕𑀁 𑀯𑀺𑀲𑀼𑀤𑁆𑀥𑀤𑁂𑀳𑀁 𑀢𑀁 𑀚𑀺𑀦𑀁 𑀲𑀫𑀮𑀁 𑀚𑀮𑁆𑀮𑀺𑀓𑀸𑀲𑀗𑁆𑀔𑀸𑀢𑁂𑀦, 𑀭𑀸𑀕𑀸𑀤𑀺𑀓𑀼𑀘𑁆𑀙𑀺𑀢𑀲𑀗𑁆𑀔𑀸𑀢𑁂𑀦 𑀯𑀸 𑀫𑀮𑁂𑀦 𑀲𑀳𑀺𑀢𑀁 𑀲𑀁 𑀅𑀢𑁆𑀢𑀸𑀦𑀁 𑀅𑀮𑀁𑀓𑀢𑁆𑀢𑀼𑀁 𑀦𑀺𑀫𑁆𑀫𑀮𑀁 𑀓𑀢𑁆𑀯𑀸 𑀲𑀚𑁆𑀚𑁂𑀢𑀼𑀁 𑀲𑀼𑀘𑀺𑀭𑀁 𑀲𑀼𑀘𑀺𑀭𑀓𑀸𑀮𑀁 𑀭𑀁𑀚𑀬𑁂 𑀅𑀢𑁆𑀢𑀦𑀺 𑀅𑀪𑀺𑀭𑀫𑀸𑀧𑁂𑀬𑁆𑀬.

𑀧𑀸𑀤𑀫𑀚𑁆𑀛𑀬𑀫𑀓𑀫𑁂𑀯𑀁 𑀤𑀝𑁆𑀞𑀩𑁆𑀩𑀁 𑁋

𑀫𑀦𑁄𑀳𑀭 𑀳𑀭 𑀓𑁆𑀮𑁂𑀲𑀁, 𑀚𑀺𑀦 𑀘𑁂𑀢𑁄𑀪𑀯𑀁 𑀫𑀫;

𑀦𑀦𑀼 𑀢𑁆𑀯𑀁 𑀧𑀸𑀭𑀫𑀻𑀲𑀸𑀭𑀸-𑀫𑀢𑀪𑀸𑀯𑀺𑀢𑀫𑁄𑀲𑀥𑀦𑁆𑀢𑀺.

𑀫𑀦𑁄𑀳𑀭 𑀚𑀺𑀦 𑀫𑀫 𑀘𑁂𑀢𑁄𑀪𑀯𑀁 𑀓𑁆𑀮𑁂𑀲𑀁 𑀲𑀦𑁆𑀢𑀸𑀧𑀁 𑀳𑀭 𑀅𑀧𑀦𑀬, 𑀢𑁆𑀯𑀁 𑀧𑀸𑀭𑀫𑀻𑀲𑀸𑀭𑀸𑀫𑀢𑀪𑀸𑀯𑀺𑀢𑀁 𑀑𑀲𑀥𑀁 𑀤𑀺𑀩𑁆𑀩𑁄𑀲𑀥𑀁 𑀦𑀦𑀼.

𑀧𑀸𑀤𑀦𑁆𑀢𑀬𑀫𑀓𑀫𑁂𑀯𑀁 𑀤𑀝𑁆𑀞𑀩𑁆𑀩𑀁 𑁋

𑀲𑀸𑀥𑀼𑀦𑀸 𑀭𑀁𑀚𑀬 𑀚𑀬-𑀤𑁆𑀥𑀦𑀺𑀦𑀸’𑀧𑀽𑀭𑀬𑀺 𑀫𑀳𑀺𑀁;

𑀬𑁄 𑀢𑀁 𑀚𑀺𑀦𑀯𑀭𑀁 𑀥𑀻𑀭-𑀫𑀢𑁆𑀣𑀓𑀸𑀫𑁄𑀲𑀺 𑀘𑁂 𑀢𑀼𑀯𑀦𑁆𑀢𑀺.

𑀬𑁄 𑀚𑀺𑀦𑀯𑀭𑁄 𑀲𑀸𑀥𑀼𑀦𑀸 𑀚𑀬𑀤𑁆𑀥𑀦𑀺𑀦𑀸 𑀯𑁂𑀦𑁂𑀬𑁆𑀬𑀚𑀬𑀖𑁄𑀲𑁂𑀦 𑀫𑀳𑀺𑀁 𑀆𑀧𑀽𑀭𑀬𑀺, 𑀥𑀻𑀭𑀁 𑀢𑀁 𑀚𑀺𑀦𑀯𑀭𑀁 𑀢𑀼𑀯𑀁 𑀲𑀧𑁆𑀧𑀼𑀭𑀺𑀲 𑀘𑁂 𑀅𑀢𑁆𑀣𑀓𑀸𑀫𑁄 𑀅𑀲𑀺, 𑀭𑀁𑀚𑀬 𑀅𑀪𑀺𑀭𑀫𑀸𑀧𑁂𑀳𑀺. 𑀇𑀫𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀬𑀫𑀓𑁂𑀳𑁂𑀯 𑀅𑀯𑀲𑁂𑀲𑀸 𑀢𑀢𑀺𑀬𑀧𑀸𑀤𑀸𑀤𑀺𑀬𑀫𑀓𑀸𑀤𑀬𑁄 𑀯𑀺𑀜𑁆𑀜𑁂𑀬𑁆𑀬𑀸.

𑁩𑁨.

𑀅𑀘𑁆𑀘𑀦𑁆𑀢𑀩𑀳𑀯𑁄 𑀢𑁂𑀲𑀁,

𑀪𑁂𑀤𑀸 𑀲𑀫𑁆𑀪𑁂𑀤𑀬𑁄𑀦𑀺𑀬𑁄;

𑀢𑀢𑁆𑀣𑀸𑀧𑀺 𑀓𑁂𑀘𑀺 𑀲𑀼𑀓𑀭𑀸,

𑀓𑁂𑀘𑀺 𑀅𑀘𑁆𑀘𑀦𑁆𑀢𑀤𑀼𑀓𑁆𑀓𑀭𑀸.

𑁩𑁨. 𑀓𑀺𑀁 𑀧𑀦 𑀲𑀸𑀓𑀮𑁆𑀮𑁂𑀦 𑀦 𑀯𑀺𑀓𑀧𑁆𑀧𑀺𑀢𑀸𑀦𑀻𑀢𑀺 𑀆𑀳 ‘‘𑀅𑀘𑁆𑀘𑀦𑁆𑀢𑀺’’𑀘𑁆𑀘𑀸𑀤𑀺. 𑀢𑁂𑀲𑀁 𑀯𑀺𑀓𑀧𑁆𑀧𑀸𑀦𑀁 𑀲𑀫𑁆𑀪𑁂𑀤𑁄 𑀲𑀗𑁆𑀓𑀭𑁄 𑀫𑀺𑀲𑁆𑀲𑀢𑁆𑀢𑀫𑀼𑀘𑁆𑀘𑀸𑀭𑀡𑀧𑁆𑀧𑀓𑀸𑀭𑁄 𑀬𑁄𑀦𑀺 𑀧𑀪𑀯𑁄 𑀬𑁂𑀲𑀁 𑀢𑁂 𑀲𑀫𑁆𑀪𑁂𑀤𑀬𑁄𑀦𑀺𑀬𑁄, 𑀪𑁂𑀤𑀸 𑀧𑀓𑀸𑀭𑀸 𑀅𑀘𑁆𑀘𑀦𑁆𑀢𑀩𑀳𑀯𑁄 𑀅𑀢𑀺𑀲𑀬𑁂𑀦 𑀩𑀳𑀼𑀮𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀲𑀫𑁆𑀪𑀯𑀦𑁆𑀢𑀺, 𑀢𑀢𑁆𑀣𑀸𑀧𑀺 𑀢𑁂𑀲𑀼 𑀯𑀺𑀓𑀧𑁆𑀧𑁂𑀲𑀼𑀧𑀺 𑀓𑁂𑀘𑀺 𑀯𑀺𑀓𑀧𑁆𑀧𑀸 𑀲𑀼𑀔𑁂𑀦 𑀓𑀭𑀻𑀬𑀦𑁆𑀢𑀺 𑀧𑀬𑀼𑀚𑁆𑀚𑀦𑁆𑀢𑀻𑀢𑀺 ¶ 𑀲𑀼𑀓𑀭𑀸, 𑀢𑀩𑁆𑀩𑀺𑀧𑀭𑀻𑀢𑁄 𑀘 𑀓𑁂𑀘𑀺 𑀯𑀺𑀓𑀧𑁆𑀧𑀸 𑀅𑀘𑁆𑀘𑀦𑁆𑀢𑀤𑀼𑀓𑁆𑀓𑀭𑀸. 𑀇𑀢𑀺 𑀤𑁆𑀯𑀺𑀥𑀸 𑀲𑀗𑁆𑀕𑀬𑁆𑀳𑀦𑁆𑀢𑀺, 𑀢𑁂𑀲𑀼 𑀲𑀼𑀓𑀭𑀸𑀦𑀁 𑀓𑁂𑀲𑀜𑁆𑀘𑀺 𑀅𑀪𑀺𑀫𑀢𑀬𑀫𑀓𑀸𑀦𑀁 𑀫𑀼𑀔𑀫𑀢𑁆𑀢𑀁 𑀤𑀲𑁆𑀲𑀺𑀢𑀁. 𑀇𑀤𑀸𑀦𑀺 𑀤𑀼𑀓𑁆𑀓𑀭𑀸𑀦𑀁 𑀓𑁂𑀲𑀜𑁆𑀘𑀺 𑀫𑀼𑀔𑀫𑀢𑁆𑀢𑀁 𑀦 𑀲𑀩𑁆𑀩𑀫𑁂𑀯𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀫𑀼𑀦𑁆𑀦𑀢𑁂𑀦 𑀢𑁂 𑀲𑀢𑀸,

𑀓𑀣𑀁 𑀦 𑀢𑁂 𑀦 𑀢𑁂 𑀲𑀺𑀬𑀼𑀁;

𑀬𑀢𑁄 𑀦𑀢𑁂𑀦𑀢𑁂𑀧𑀺’𑀢𑁄,

𑀲𑀺𑀬𑀼𑀁 𑀦 𑀢𑁂 𑀦𑀢𑁂 𑀲𑀼𑀪𑀸.

𑀇𑀤𑀁 𑀧𑀸𑀤𑀘𑀢𑀼𑀓𑁆𑀓𑀫𑀚𑁆𑀛𑀬𑀫𑀓𑀫𑀩𑁆𑀬𑀧𑁂𑀢𑀩𑁆𑀬𑀧𑁂𑀢𑀫𑁂𑀓𑀭𑀽𑀧𑀁 𑀤𑀼𑀓𑁆𑀓𑀭𑀁.

𑀦 𑀪𑀸𑀲𑀼𑀭𑀸 𑀢𑁂𑀧𑀺 𑀲𑀼𑀭𑀸 𑀯𑀺𑀪𑀽𑀲𑀺𑀢𑀸,

𑀢𑀣𑀸𑀲𑀼𑀭𑀸 𑀪𑀽𑀭𑀺 𑀲𑀼𑀭𑀸𑀧𑀭𑀸𑀚𑀺𑀢𑀸;

𑀲𑀪𑀸𑀲𑀼 𑀭𑀸𑀚𑀸𑀧𑀺 𑀢𑀣𑀸 𑀲𑀼𑀭𑀸𑀚𑀺𑀢𑁄,

𑀬𑀣𑀸 𑀲𑀼𑀭𑀸𑀚𑀦𑁆𑀢𑀺 𑀲𑀼𑀭𑀸𑀯𑀺𑀦𑀺𑀲𑁆𑀲𑀝𑀸.

𑀇𑀤𑀁 𑀘𑀢𑀼𑀓𑁆𑀓𑀧𑀸𑀤𑀫𑀚𑁆𑀛𑀬𑀫𑀓𑀫𑁂𑀓𑀭𑀽𑀧𑀩𑁆𑀬𑀧𑁂𑀢𑀁.

𑁩𑁨. 𑀲𑀩𑁆𑀩𑀫𑀺𑀤𑀫𑀦𑀼𑀤𑁆𑀤𑀺𑀲𑀺𑀢𑁆𑀯𑀸 𑀮𑀓𑁆𑀔𑀡𑀸𑀢𑀺𑀤𑁂𑀲𑁂𑀦 𑀦𑀺𑀕𑀫𑀦𑀁 𑀓𑀺𑀫𑀢𑁆𑀣𑀫𑀺𑀘𑁆𑀘𑀸𑀲𑀗𑁆𑀓𑀸𑀬𑀫𑀸𑀳 ‘‘𑀅𑀘𑁆𑀘𑀦𑁆𑀢𑁂’’𑀘𑁆𑀘𑀸𑀤𑀺. 𑀢𑁂𑀲𑀁 𑀬𑀫𑀓𑀸𑀦𑀁 𑀲𑀫𑁆𑀪𑁂𑀤𑀬𑁄𑀦𑀺𑀬𑁄 𑀧𑀪𑁂𑀤𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀪𑀽𑀢𑀸 𑀪𑁂𑀤𑀸 𑀉𑀘𑁆𑀘𑀸𑀯𑀘𑀧𑀓𑀸𑀭𑀸 𑀅𑀘𑁆𑀘𑀦𑁆𑀢𑀩𑀳𑀯𑁄, 𑀢𑀢𑁆𑀣𑀸𑀧𑀺 𑀢𑁂𑀲𑀼𑀧𑀺 𑀓𑁂𑀘𑀺 𑀬𑀫𑀓𑀸 𑀲𑀼𑀓𑀭𑀸 𑀲𑀼𑀲𑀸𑀥𑀺𑀬𑀸, 𑀓𑁂𑀘𑀺 𑀅𑀘𑁆𑀘𑀦𑁆𑀢𑀤𑀼𑀓𑁆𑀓𑀭𑀸 𑀅𑀢𑀺𑀲𑀬𑁂𑀦 𑀤𑀼𑀲𑁆𑀲𑀸𑀥𑀺𑀬𑀸. 𑀲𑀫𑁆𑀪𑁂𑀤𑁄 𑀬𑁄𑀦𑀺 𑀬𑁂𑀲𑀦𑁆𑀢𑀺 𑀯𑀺𑀕𑁆𑀕𑀳𑁄.

𑀇𑀳 𑀲𑀼𑀓𑀭𑀲𑁆𑀲 𑀉𑀧𑀤𑀺𑀲𑀺𑀢𑀢𑁆𑀢𑀸 𑀤𑀼𑀓𑁆𑀓𑀭𑀬𑀫𑀓𑀧𑀯𑁂𑀲𑁄𑀧𑀸𑀬𑀫𑀢𑁆𑀢𑀫𑀼𑀧𑀤𑀺𑀲𑀻𑀬𑀢𑁂 𑁋

‘‘𑀫𑀦𑀁 𑀫𑀦𑀁 𑀲𑀢𑁆𑀣𑀼 𑀤𑀤𑁂𑀬𑁆𑀬 𑀘𑁂 𑀬𑁄,

𑀫𑀦𑀁 𑀫𑀦𑀁 𑀧𑀻𑀡𑀬𑀢’𑀲𑁆𑀲 𑀲𑀢𑁆𑀣𑀼;

𑀫𑀦𑀁 𑀫𑀦𑀁 𑀢𑁂𑀦 𑀤𑀤𑁂𑀬𑁆𑀬 𑀘𑁂 𑀦,

𑀫𑀦𑀁 𑀫𑀦𑀁𑀧’𑀲𑁆𑀲 𑀦 𑀲𑀸𑀥𑀼𑀧𑀼𑀚𑁆𑀚’’𑀦𑁆𑀢𑀺.

𑀇𑀤𑀁 𑀧𑀸𑀤𑀘𑀢𑀼𑀓𑁆𑀓𑀸𑀤𑀺𑀬𑀫𑀓𑀫𑁂𑀓𑀭𑀽𑀧𑀁 𑀅𑀩𑁆𑀬𑀧𑁂𑀢𑀩𑁆𑀬𑀧𑁂𑀢𑀁.

𑀬𑁄 ¶ 𑀧𑀼𑀕𑁆𑀕𑀮𑁄 𑀫𑀦𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀲𑀢𑁆𑀣𑀼 𑀚𑀺𑀦𑀲𑁆𑀲 𑀫𑀦𑀁 𑀔𑀡𑀫𑀢𑁆𑀢𑀫𑁆𑀧𑀺 𑀤𑀤𑁂𑀬𑁆𑀬 𑀘𑁂, 𑀲𑀢𑁆𑀣𑀼 𑀫𑀼𑀦𑀺𑀦𑁆𑀤𑀲𑁆𑀲 𑀫𑀦𑀁 𑀘𑀺𑀢𑁆𑀢𑀁 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑀦𑀁 𑀘𑀺𑀢𑁆𑀢𑀁 𑀧𑀻𑀡𑀬𑀢𑀺 𑀲𑀫𑁆𑀧𑀻𑀡𑁂𑀢𑀺, 𑀢𑁂𑀦 𑀢𑀲𑁆𑀫𑀸 𑀫𑀦𑀁 𑀫𑀦𑀁 𑀘𑀺𑀢𑁆𑀢𑀁 𑀘𑀺𑀢𑁆𑀢𑀁 𑀤𑀤𑁂𑀬𑁆𑀬 𑀘𑁂 𑀦 𑀬𑀤𑀺 𑀦𑁄 𑀤𑀤𑁂𑀬𑁆𑀬, 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑀦𑀁 𑀘𑀺𑀢𑁆𑀢𑀁 𑀫𑀦𑀁𑀧𑀺 𑀫𑀼𑀳𑀼𑀢𑁆𑀢𑀫𑁆𑀧𑀺 𑀲𑀸𑀥𑀼𑀧𑀼𑀚𑁆𑀚𑀁 𑀲𑀸𑀥𑀽𑀳𑀺 𑀧𑀽𑀚𑀺𑀢𑀩𑁆𑀩𑀁 𑀦 𑀪𑀯𑀢𑀺.

‘‘𑀲𑀫𑀼𑀦𑁆𑀦𑀢𑁂𑀦 𑀢𑁂 𑀲𑀢𑀸,

𑀓𑀣𑀁 𑀦 𑀢𑁂 𑀦 𑀢𑁂 𑀲𑀺𑀬𑀼𑀁;

𑀬𑀢𑁄 𑀦𑀢𑁂’𑀦𑀢𑁂𑀧𑀺’𑀢𑁄,

𑀲𑀺𑀬𑀼𑀁 𑀦 𑀢𑁂 𑀦𑀢𑁂 𑀲𑀼𑀪𑀸’’𑀢𑀺.

𑀇𑀤𑀁 𑀧𑀸𑀤𑀘𑀢𑀼𑀓𑁆𑀓𑀫𑀚𑁆𑀛𑀬𑀫𑀓𑀫𑁂𑀓𑀭𑀽𑀧𑀫𑀩𑁆𑀬𑀧𑁂𑀢𑀩𑁆𑀬𑀧𑁂𑀢𑀁.

𑀬𑀢𑁄 𑀬𑁂𑀦 𑀓𑀸𑀭𑀡𑁂𑀦 𑀢𑁂 𑀢𑀼𑀬𑁆𑀳𑀁 𑀲𑀢𑀸 𑀲𑁄𑀪𑀦𑁂𑀦 𑀲𑀫𑀼𑀦𑁆𑀦𑀢𑁂𑀦 𑀲𑀫𑁆𑀫𑀸 𑀉𑀦𑁆𑀦𑀢𑁂𑀦 𑀳𑁂𑀢𑀼𑀦𑀸 𑀦𑀢𑁂𑀧𑀺 𑀅𑀯𑀦𑀢𑁂𑀧𑀺 𑀅𑀦𑀢𑁂𑀧𑀺 𑀅𑀦𑀯𑀦𑀢𑁂𑀧𑀺 𑀢𑁂 𑀢𑁂 𑀲𑀼𑀪𑀸 𑀢𑁂 𑀢𑁂 𑀲𑁄𑀪𑀦𑀸 𑀦 𑀦 𑀲𑀺𑀬𑀼𑀁, 𑀪𑀯𑀦𑁆𑀢𑁂𑀯, 𑀅𑀢𑁄 𑀢𑁂𑀦 𑀓𑀸𑀭𑀡𑁂𑀦 𑀢𑁂 𑀲𑀼𑀪𑀸 𑀢𑁂 𑀲𑁄𑀪𑀦𑀸 𑀦𑀢𑁂 𑀅𑀯𑀦𑀢𑁂 𑀓𑀣𑀁 𑀦 𑀲𑀺𑀬𑀼𑀁, 𑀪𑀯𑀦𑁆𑀢𑁂𑀯.

‘‘𑀚𑀺𑀦𑀁 𑀧𑀡𑀸𑀫𑁄𑀦𑀢𑀲𑀚𑁆𑀚𑀦𑀁 𑀚𑀦𑀁,

𑀕𑀼𑀡𑁂 𑀦𑀺𑀯𑁂𑀲𑁂𑀦𑁆𑀢𑀫𑀲𑀚𑁆𑀚𑀦𑀁’𑀚𑀦𑀁;

𑀯𑁂𑀦𑁂𑀬𑁆𑀬𑀦𑁂𑀢𑁆𑀢𑁂 𑀕𑀼𑀡𑀪𑀸𑀚𑀦𑀁 𑀚𑀦𑀁,

𑀦𑀫𑁂 𑀫𑀫𑁂𑀦𑁆𑀢𑀁 𑀔𑀮𑀼 𑀲𑀚𑁆𑀚𑀦𑀁𑀚𑀦’’𑀦𑁆𑀢𑀺.

𑀇𑀤𑀁 𑀧𑀸𑀤𑀘𑀢𑀼𑀓𑁆𑀓𑀦𑁆𑀢𑀬𑀫𑀓𑀫𑁂𑀓𑀭𑀽𑀧𑀫𑀩𑁆𑀬𑀧𑁂𑀢𑀩𑁆𑀬𑀧𑁂𑀢𑀬𑀫𑀓𑀁 𑀤𑀼𑀓𑁆𑀓𑀭𑀁.

𑀧𑀡𑀸𑀫𑁄𑀦𑀢𑀲𑀚𑁆𑀚𑀦𑀁 𑀧𑀡𑀸𑀫𑀺𑀢𑀼𑀓𑀸𑀫𑁄𑀦𑀢𑀲𑀸𑀥𑀼𑀚𑀦𑀯𑀦𑁆𑀢𑀁 𑀚𑀦𑀁 𑀯𑁂𑀦𑁂𑀬𑁆𑀬𑀚𑀦𑀁 𑀅𑀲𑀚𑁆𑀚 𑀧𑀫𑀸𑀤𑀫𑀓𑀢𑁆𑀯𑀸 𑀕𑀼𑀡𑁂 𑀲𑀻𑀮𑀸𑀤𑀺𑀕𑀼𑀡𑁂 𑀦𑀺𑀯𑁂𑀲𑁂𑀦𑁆𑀢𑀁 𑀦𑀺𑀬𑁄𑀚𑁂𑀦𑁆𑀢𑀁 𑀯𑁂𑀦𑁂𑀬𑁆𑀬𑀦𑁂𑀢𑁆𑀢𑁂 𑀅𑀜𑁆𑀚𑀦𑀁 𑀅𑀜𑁆𑀚𑀦𑀪𑀽𑀢𑀁 𑀕𑀼𑀡𑀪𑀸𑀚𑀦𑀁 𑀕𑀼𑀡𑀸𑀦𑀫𑀸𑀥𑀸𑀭𑀪𑀽𑀢𑀁 𑀲𑀚𑁆𑀚𑀦𑀁𑀚𑀦𑀁 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀲𑀸𑀥𑀼𑀚𑀦𑀸𑀦𑀁 𑀅𑀜𑁆𑀚𑀦𑀪𑀽𑀢𑀁 𑀚𑀦𑀁 𑀲𑀸𑀥𑀼𑀚𑀦𑀁 𑀔𑀮𑀼 𑀏𑀓𑀦𑁆𑀢𑁂𑀦 𑀫𑀫𑁂𑀦𑁆𑀢𑀁 𑀫𑀫𑀸𑀬𑀦𑁆𑀢𑀁 𑀦𑀁 𑀚𑀺𑀦𑀁 𑀦𑀫𑁂 𑀦𑀫𑀸𑀫𑀺.

‘‘𑀲𑀸𑀪𑀸𑀲𑀼 ¶ 𑀲𑀸𑀪𑀸 𑀪𑀼𑀯𑀦𑁂 𑀚𑀺𑀦𑀲𑁆𑀲,

𑀲𑀸𑀪𑀸𑀬 𑀲𑀸 𑀪𑀸𑀲𑀢𑀺𑀬𑁂𑀯 𑀚𑀸𑀢𑀼;

𑀲𑀸𑀪𑀸𑀬 𑀲𑀸 𑀪𑀸𑀢𑀺 𑀦 𑀘𑁂 𑀓𑀣𑀁 𑀦,

𑀲𑀸𑀪𑀸 𑀲𑀲𑀸𑀪𑀸𑀦𑀫𑀢𑀺𑀘𑁆𑀘 𑀪𑀸𑀢𑀻’’𑀢𑀺.

𑀇𑀤𑀁 𑀧𑀸𑀤𑀘𑀢𑀼𑀓𑁆𑀓𑀸𑀤𑀺𑀬𑀫𑀓𑁂𑀓𑀭𑀽𑀧𑀩𑁆𑀬𑀧𑁂𑀢𑀁.

𑀪𑀼𑀯𑀦𑁂 𑀲𑀢𑁆𑀢𑀮𑁄𑀓𑁂 𑀲𑀸𑀪𑀸𑀲𑀼 𑀯𑀺𑀚𑁆𑀚𑀫𑀸𑀦𑀸𑀪𑀸𑀲𑀼 𑀚𑀺𑀦𑀲𑁆𑀲 𑀲𑀸𑀪𑀸 𑀲𑁄𑀪𑀦𑀸 𑀆𑀪𑀸 𑀲𑀸𑀪𑀸𑀬 𑀯𑀺𑀚𑁆𑀚𑀫𑀸𑀦𑀸𑀬, 𑀲𑁄𑀪𑀦𑀸𑀬 𑀯𑀸 𑀆𑀪𑀸𑀬 𑀆𑀪𑀸𑀢𑁄 𑀚𑀸𑀢𑀼 𑀏𑀓𑀦𑁆𑀢𑁂𑀦 𑀪𑀸𑀲𑀢𑀺𑀬𑁂𑀯 𑀤𑀺𑀧𑁆𑀧𑀢𑁂𑀯, 𑀲𑀸 𑀚𑀺𑀦𑀸𑀪𑀸 𑀲𑀸𑀪𑀸𑀬 𑀯𑀺𑀚𑁆𑀚𑀫𑀸𑀦𑀸𑀪𑀸𑀢𑁄 𑀅𑀥𑀺𑀓𑀸 𑀳𑀼𑀢𑁆𑀯𑀸 𑀘𑁂 𑀦 𑀪𑀸𑀢𑀺 𑀬𑀤𑀺 𑀦 𑀪𑀸𑀲𑀢𑀺, 𑀲𑀲𑀸𑀪𑀸𑀦𑀁 𑀯𑀺𑀚𑁆𑀚𑀫𑀸𑀦𑀲𑁄𑀪𑀦𑀸𑀪𑀸𑀦𑀁 𑀩𑁆𑀭𑀳𑁆𑀫𑀸𑀤𑀻𑀦𑀁 𑀲𑀸𑀪𑀸 𑀲𑁄𑀪𑀦𑀸𑀪𑀸𑀬𑁄 𑀅𑀢𑀺𑀘𑁆𑀘 𑀅𑀢𑀺𑀓𑁆𑀓𑀫𑁆𑀫 𑀓𑀣𑀁 𑀦 𑀪𑀸𑀢𑀺, 𑀪𑀸𑀲𑀢𑀺𑀬𑁂𑀯.

‘‘𑀦 𑀪𑀸𑀲𑀼𑀭𑀸 𑀢𑁂𑀧𑀺 𑀲𑀼𑀭𑀸 𑀯𑀺𑀪𑀽𑀲𑀺𑀢𑀸,

𑀢𑀣𑀸𑀲𑀼𑀭𑀸 𑀪𑀽𑀭𑀺 𑀲𑀼𑀭𑀸𑀧𑀭𑀸𑀚𑀺𑀢𑀸;

𑀲𑀪𑀸𑀲𑀼 𑀭𑀸𑀚𑀸𑀧𑀺 𑀢𑀣𑀸 𑀲𑀼𑀭𑀸𑀚𑀺𑀢𑁄,

𑀬𑀣𑀸 𑀲𑀼𑀭𑀸𑀚𑀦𑁆𑀢𑀺 𑀲𑀼𑀭𑀸𑀯𑀺𑀦𑀺𑀲𑁆𑀲𑀝𑀸’’𑀢𑀺.

𑀇𑀤𑀁 𑀧𑀸𑀤𑀘𑀢𑀼𑀓𑁆𑀓𑀫𑀚𑁆𑀛𑀬𑀫𑀓𑁂𑀓𑀭𑀽𑀧𑀩𑁆𑀬𑀧𑁂𑀢𑀁.

𑀲𑀼𑀭𑀸𑀯𑀺𑀦𑀺𑀲𑁆𑀲𑀝𑀸 𑀲𑀼𑀭𑀸𑀧𑀸𑀦𑀢𑁄 𑀅𑀧𑀕𑀢𑀸 𑀚𑀦𑀸 𑀬𑀣𑀸 𑀲𑀼𑀭𑀸𑀚𑀦𑁆𑀢𑀺, 𑀢𑀣𑀸 𑀯𑀺𑀪𑀽𑀲𑀺𑀢𑀸 𑀯𑀺𑀲𑁂𑀲𑁂𑀦 𑀅𑀮𑀗𑁆𑀓𑀢𑀸 𑀢𑁂𑀧𑀺 𑀲𑀼𑀭𑀸 𑀢𑁂 𑀤𑁂𑀯𑀸 𑀅𑀧𑀺 𑀦 𑀪𑀸𑀲𑀼𑀭𑀸 𑀲𑁄𑀪𑀫𑀸𑀦𑀸 𑀦 𑀳𑁄𑀦𑁆𑀢𑀺, 𑀢𑀣𑀸 𑀏𑀯𑀁 𑀲𑀼𑀭𑀸𑀧𑀭𑀸𑀚𑀺𑀢𑀸 𑀲𑀼𑀭𑀸𑀧𑀸𑀦𑀳𑁂𑀢𑀼 𑀧𑀭𑀸𑀚𑀺𑀢𑀪𑀸𑀯𑀁 𑀧𑀢𑁆𑀢𑀸 𑀪𑀽𑀭𑀺 𑀅𑀲𑀼𑀭𑀸 𑀩𑀳𑀯𑁄 𑀯𑁂𑀧𑀘𑀺𑀢𑁆𑀢𑀺𑀆𑀤𑀬𑁄 𑀅𑀲𑀼𑀭𑀸𑀧𑀺 𑀦 𑀪𑀸𑀲𑀼𑀭𑀸 𑀦 𑀲𑁄𑀪𑀦𑁆𑀢𑀺, 𑀢𑀣𑀸 𑀏𑀯𑀁 𑀲𑀼𑀭𑀸𑀚𑀺𑀢𑁄 𑀲𑀼𑀝𑁆𑀞𑀼 𑀅𑀮𑀗𑁆𑀓𑀢𑁄 𑀭𑀸𑀚𑀸𑀧𑀺 𑀲𑀪𑀸𑀲𑀼 𑀦 𑀪𑀸𑀲𑀼𑀭𑁄.

‘‘𑀚𑀺𑀦𑀸𑀡𑀢𑁆𑀢𑀺𑀬𑀁 ¶ 𑀬𑁄’𑀳𑀺𑀢𑀸𑀲𑀸 𑀲𑀺𑀢𑀸𑀲𑀸,

𑀅𑀯𑀲𑁆𑀲𑀁𑀯 𑀢𑁂 𑀳𑁄𑀦𑁆𑀢𑁆𑀬’𑀢𑀸𑀲𑀸 𑀳𑀢𑀸𑀲𑀸;

𑀅𑀢𑁄 𑀲𑀩𑁆𑀩𑀧𑀸𑀧𑁂 𑀲𑀢𑀸𑀲𑀸 𑀯𑀢𑀸𑀲𑀸,

𑀓𑀭𑁄𑀦𑁆𑀢𑁂𑀯 𑀲𑀦𑁆𑀢𑀺𑀲𑁆𑀲𑀺𑀢𑀸 𑀲𑀸𑀫𑀺𑀢𑀸𑀲𑀸’’𑀢𑀺.

𑀇𑀤𑀁 𑀧𑀸𑀤𑀘𑀢𑀼𑀓𑁆𑀓𑀦𑁆𑀢𑀬𑀫𑀓𑀫𑁂𑀓𑀭𑀽𑀧𑀩𑁆𑀬𑀧𑁂𑀢𑀁.

𑀬𑁂 𑀲𑀧𑁆𑀧𑀼𑀭𑀺𑀲𑀸 𑀚𑀺𑀦𑀸𑀡𑀢𑁆𑀢𑀺𑀬𑀁 𑀩𑀼𑀤𑁆𑀥𑀲𑁆𑀲 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀸𑀡𑀢𑁆𑀢𑀺𑀬𑀁 𑀑𑀳𑀺𑀢𑀸𑀲𑀸 𑀅𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀧𑀢𑀺𑀝𑁆𑀞𑀺𑀢𑀆𑀲𑀸 𑀳𑁄𑀦𑁆𑀢𑀺 𑀲𑀺𑀢𑀸𑀲𑀸 𑀧𑀭𑀺𑀲𑀼𑀤𑁆𑀥𑀸𑀲𑀸, 𑀢𑁂 𑀲𑀸𑀥𑀯𑁄 𑀳𑀢𑀸𑀲𑀸 𑀅𑀦𑀼𑀓𑁆𑀓𑀫𑁂𑀦 𑀳𑀢𑀢𑀡𑁆𑀳𑀸 𑀅𑀯𑀲𑁆𑀲𑀁𑀯 𑀏𑀓𑀦𑁆𑀢𑁂𑀦𑁂𑀯 𑀅𑀢𑀸𑀲𑀸 𑀪𑀬𑀭𑀳𑀺𑀢𑀸 𑀬𑀢𑁄 𑀳𑁄𑀦𑁆𑀢𑀺, 𑀅𑀢𑁄 𑀢𑀲𑁆𑀫𑀸 𑀲𑀩𑁆𑀩𑀧𑀸𑀧𑁂 𑀲𑀩𑁆𑀩𑀸𑀓𑀼𑀲𑀮𑁂 𑀲𑀢𑀸𑀲𑀸 𑀪𑀬𑀲𑀳𑀺𑀢𑀸 𑀯𑀢𑀸𑀲𑀸𑀯 𑀦𑀺𑀭𑀯𑀚𑁆𑀚𑀯𑀢𑀸𑀪𑀺𑀮𑀸𑀲𑀯𑀦𑁆𑀢𑁄 𑀲𑀸𑀥𑀼𑀚𑀦𑀸 𑀲𑀦𑁆𑀢𑀺𑀲𑁆𑀲𑀺𑀢𑀸 𑀲𑀦𑁆𑀢𑀺𑀦𑀺𑀲𑁆𑀲𑀺𑀢𑀸𑀬𑁄 𑀲𑀸𑀫𑀺𑀢𑀸𑀲𑀸 𑀲𑀸𑀫𑀺𑀪𑀸𑀯𑀸𑀲𑀸𑀬𑁄 𑀓𑀭𑁄𑀦𑁆𑀢𑁂𑀯.

𑁩𑁩.

𑀬𑀫𑀓𑀁 𑀢𑀁 𑀧𑀳𑁂𑀴𑀻 𑀘, 𑀦𑁂𑀓𑀦𑁆𑀢𑀫𑀥𑀼𑀭𑀸𑀦𑀺’𑀢𑀺;

𑀉𑀧𑁂𑀓𑁆𑀔𑀺𑀬𑀦𑁆𑀢𑀺 𑀲𑀩𑁆𑀩𑀸𑀦𑀺, 𑀲𑀺𑀲𑁆𑀲𑀔𑁂𑀤𑀪𑀬𑀸 𑀫𑀬𑀸.

𑁩𑁩. 𑀦𑀦𑀼 𑀬𑀫𑀓𑀁 𑀦𑀸𑀫 𑀓𑀯𑀻𑀦𑀁 𑀲𑀸𑀫𑀢𑁆𑀣𑀺𑀬𑀯𑀺𑀲𑁂𑀲𑀲𑀽𑀘𑀓𑀦𑁆𑀢𑀺 𑀢𑀢𑁆𑀣 𑀢𑀁 𑀲𑁄𑀧𑀬𑁄𑀕𑀁, 𑀧𑀳𑁂𑀴𑀺𑀓𑀸 𑀘 𑀲𑁄𑀧𑀬𑁄𑀕𑀸 𑀓𑀻𑀴𑀸𑀯𑀺𑀦𑁄𑀤𑀦𑁂 𑀲𑀫𑁆𑀩𑀸𑀥𑀝𑁆𑀞𑀸𑀦𑀫𑀦𑁆𑀢𑀦𑁂 𑀧𑀭𑀩𑁆𑀬𑀸𑀫𑁄𑀳𑀦𑁂 [𑀧𑀭𑀫𑀩𑁆𑀬𑀸𑀫𑁄𑀳𑀦𑁂 (𑀓.), 𑀓𑀸𑀩𑁆𑀬𑀸𑀤𑀸𑀲 𑁩.𑁯𑁭] 𑀘, 𑀢𑀲𑁆𑀫𑀸 𑀢𑀢𑁆𑀣 𑀓𑀣𑀫𑀼𑀧𑁂𑀓𑁆𑀔𑀸 𑀪𑀯𑀢𑁄𑀢𑀺 𑀆𑀳 ‘‘𑀬𑀫𑀓’’𑀦𑁆𑀢𑀺𑀆𑀤𑀺. 𑀢𑀁 𑀬𑀣𑀸𑀯𑀼𑀢𑁆𑀢𑀁 𑀬𑀫𑀓𑀜𑁆𑀘 𑀲𑀼𑀓𑀭𑀤𑀼𑀓𑁆𑀓𑀭𑀧𑁆𑀧𑀪𑁂𑀤𑀁. 𑀧𑀳𑁂𑀴𑀺𑀓𑀸 𑀧𑀦 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀲𑁄𑀴𑀲 𑀦𑀺𑀤𑁆𑀤𑀺𑀝𑁆𑀞𑀸 𑀲𑀫𑀸𑀕𑀢𑀸𑀯𑀜𑁆𑀘𑀺𑀢𑀸𑀤𑀺𑀓𑀸. 𑀢𑀢𑁆𑀣𑀺𑀤𑀁 𑀮𑀓𑁆𑀔𑀡𑀁 𑁋

𑀲𑀫𑀸𑀕𑀢𑀸 𑀦𑀸𑀫 𑀲𑀺𑀬𑀸, 𑀕𑀼𑀴𑁆𑀳𑀢𑁆𑀣𑀸 𑀧𑀤𑀲𑀦𑁆𑀥𑀺𑀦𑀸;

𑀯𑀜𑁆𑀘𑀺𑀢𑀸𑀜𑁆𑀜𑀢𑁆𑀣 𑀭𑀼𑀴𑁆𑀳𑁂𑀦, 𑀬𑀢𑁆𑀣 𑀲𑀤𑁆𑀤𑁂𑀦 𑀯𑀜𑁆𑀘𑀦𑀸.

𑀉𑀓𑁆𑀓𑀦𑁆𑀢𑀸𑀢𑀺𑀩𑁆𑀬𑀯𑀳𑀺𑀢-𑀧𑁆𑀧𑀬𑁄𑀕𑀸 ¶ 𑀫𑁄𑀳𑀓𑀸𑀭𑀺𑀦𑀻;

𑀲𑀺𑀬𑀸 𑀧𑀫𑀼𑀲𑁆𑀲𑀺𑀢𑀸 𑀬𑀲𑁆𑀲𑀸, 𑀤𑀼𑀩𑁆𑀩𑁄𑀥𑀢𑁆𑀣𑀸 𑀧𑀤𑀸𑀯𑀮𑀺.

𑀲𑀫𑀸𑀦𑀭𑀽𑀧𑀸’𑀫𑀼𑀔𑁆𑀬𑀢𑁆𑀣𑀸-𑀭𑁄𑀧𑀸𑀳𑀺𑀢𑀧𑀤𑀸 𑀲𑀺𑀬𑀸;

𑀨𑀭𑀼𑀲𑀸 𑀧𑀘𑁆𑀘𑀬𑀸𑀤𑀻𑀳𑀺, 𑀚𑀸𑀢𑀲𑀤𑁆𑀤𑀸 𑀓𑀣𑀜𑁆𑀘𑀺𑀧𑀺.

𑀲𑀗𑁆𑀔𑁆𑀬𑀸𑀢𑀸 𑀦𑀸𑀫 𑀲𑀗𑁆𑀔𑁆𑀬𑀸𑀦𑀁, 𑀬𑀢𑁆𑀣 𑀩𑁆𑀬𑀸𑀫𑁄𑀳𑀓𑀸𑀭𑀡𑀁;

𑀅𑀜𑁆𑀜𑀣𑀸’𑀪𑀸𑀲𑀢𑁂 𑀬𑀢𑁆𑀣, 𑀯𑀸𑀓𑁆𑀬𑀢𑁆𑀣𑁄 𑀲𑀸 𑀧𑀓𑀧𑁆𑀧𑀺𑀢𑀸.

𑀲𑀸 𑀦𑀸𑀫𑀦𑁆𑀢𑀭𑀺𑀓𑀸 𑀬𑀲𑁆𑀲𑀸, 𑀦𑀸𑀫𑁂 𑀦𑀸𑀦𑀢𑁆𑀣𑀓𑀧𑁆𑀧𑀦𑀸;

𑀦𑀺𑀪𑀽𑀢𑀸’𑀯𑀝𑁆𑀞𑀺𑀢𑀜𑁆𑀜𑀢𑁆𑀣𑀸, 𑀢𑀼𑀮𑁆𑀬𑀢𑁆𑀣𑀲𑀼𑀢𑀺𑀳𑁂𑀢𑀼𑀢𑁄.

𑀲𑀫𑀸𑀦𑀲𑀤𑁆𑀤𑀸 𑀲𑀸 𑀇𑀝𑁆𑀞-𑀲𑀤𑁆𑀤𑀧𑀭𑀺𑀬𑀸𑀬𑀲𑀸𑀥𑀺𑀢𑀸;

𑀲𑀫𑁆𑀫𑀼𑀴𑁆𑀳𑀸 𑀫𑀽𑀴𑁆𑀳𑀢𑀸𑀬𑁂𑀯, 𑀦𑀺𑀤𑁆𑀤𑀺𑀝𑁆𑀞𑀢𑁆𑀣𑀸𑀧𑀺 𑀲𑀸𑀥𑀼𑀓𑀁.

𑀬𑀲𑁆𑀲𑀸 𑀲𑀫𑁆𑀩𑀦𑁆𑀥𑀩𑀸𑀳𑀼𑀮𑁆𑀬𑀸, 𑀦𑀸𑀫𑀁 𑀲𑀸 𑀧𑀸𑀭𑀺𑀳𑀸𑀭𑀺𑀓𑀻;

𑀏𑀓𑀘𑁆𑀙𑀦𑁆𑀦𑀸 𑀪𑀯𑁂 𑀩𑁆𑀬𑀜𑁆𑀚𑀸-𑀥𑁂𑀬𑁆𑀬𑀁 𑀦𑀺𑀲𑁆𑀲𑀬𑀕𑁄𑀧𑀦𑀸.

𑀲𑀸 𑀪𑀯𑁂 𑀉𑀪𑀬𑀘𑁆𑀙𑀦𑁆𑀦𑀸, 𑀬𑀲𑁆𑀲𑀸 𑀉𑀪𑀬𑀕𑁄𑀧𑀦𑀸;

𑀲𑀁𑀓𑀺𑀡𑁆𑀡𑀸 𑀦𑀸𑀫 𑀲𑀸 𑀬𑀲𑁆𑀲𑀸, 𑀦𑀸𑀦𑀸𑀮𑀓𑁆𑀔𑀡𑀲𑀗𑁆𑀓𑀭𑁄𑀢𑀺.

𑀤𑁄𑀲𑀢𑁆𑀢𑁂𑀧𑀺 𑀘𑁂𑀲𑀁 𑀲𑀩𑁆𑀩𑁂𑀲𑀁 𑀉𑀓𑁆𑀓𑀦𑁆𑀢𑀸𑀤𑀻𑀲𑀼 𑀤𑁄𑀲𑀪𑀸𑀯𑁂 𑀦𑀸𑀭𑁄𑀧𑀺𑀢𑀩𑁆𑀩𑀸. 𑀏𑀲𑀸 𑀳𑀺 [𑀫𑀦𑀲𑁄𑀢𑀺 (𑀓.)] ‘‘𑀩𑀳𑀼𑀕𑀼𑀡𑁂 𑀧𑀡𑀫𑀢𑀺’’𑀘𑁆𑀘𑀸𑀤𑀺𑀦𑀸 [𑀲𑀼𑀩𑁄𑀥𑀸𑀮𑀗𑁆𑀓𑀸𑀭 𑁪𑁪 𑀕𑀸𑀣𑀸] 𑀯𑀸𑀓𑁆𑀬𑀲𑀁𑀓𑀺𑀡𑁆𑀡𑀦𑀸𑀫𑁂𑀦 𑀦 𑀯𑀼𑀢𑁆𑀢𑀸, 𑀧𑀓𑀧𑁆𑀧𑀺𑀢𑀸 𑀘 𑀲𑀁𑀲𑀬𑀤𑁄𑀲𑀧𑀭𑀺𑀳𑀸𑀭𑁂𑀦 ‘‘𑀬𑀸𑀢𑁂 𑀤𑀼𑀢𑀺𑀬𑀁 𑀦𑀺𑀮𑀬’’𑀦𑁆𑀢𑀺 [𑀲𑀼𑀩𑁄𑀥𑀸𑀮𑀗𑁆𑀓𑀸𑀭 𑁧𑁧𑁨 𑀕𑀸𑀣𑀸] 𑀆𑀤𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀸.

‘‘𑀧𑀪𑀯𑀸’𑀦𑀢𑀯𑀺𑀢𑁆𑀢𑀺𑀡𑁆𑀡𑀸, 𑀢𑀯𑀸’𑀡𑀸 𑀫𑀳𑀢𑀻 𑀲𑀢𑀺;

𑀘𑀺𑀭𑀸𑀬 𑀚𑀬𑀢𑀁 𑀦𑀸𑀣, 𑀧𑀳𑀼𑀢𑀨𑀮𑀲𑀸𑀥𑀦𑀻’’𑀢𑀺.

𑀅𑀬𑀁 𑀲𑀫𑀸𑀕𑀢𑀸.

‘‘𑀪𑀤𑁆𑀤𑀫𑁂𑀯𑁄’𑀧𑀲𑁂𑀯𑁂𑀬𑁆𑀬, ¶ 𑀯𑀺𑀥𑀽𑀢𑀫𑀤𑀓𑀺𑀩𑁆𑀩𑀺𑀲𑀁;

𑀲𑀫𑁆𑀧𑀸𑀧𑀬𑁂 𑀧𑀼𑀭𑀁 𑀔𑁂𑀫𑀁, 𑀲 𑀤𑀦𑁆𑀢𑁄’𑀢𑁆𑀢𑀦𑀺𑀲𑁂𑀯𑀺𑀦’’𑀦𑁆𑀢𑀺.

𑀅𑀬𑀁 𑀯𑀜𑁆𑀘𑀺𑀢𑀸.

𑀧𑀫𑀼𑀲𑁆𑀲𑀺𑀢𑀸𑀤𑀬𑁄 𑀢𑀼 𑀮𑀓𑁆𑀔𑀡𑀸𑀦𑀼𑀲𑀸𑀭𑁂𑀦, 𑀢𑀢𑁆𑀣𑁄𑀤𑀸𑀳𑀭𑀡𑀸𑀦𑀼𑀲𑀸𑀭𑁂𑀦 𑀘 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀧𑀭𑀺𑀓𑀧𑁆𑀧𑀺𑀢𑀸 𑀧𑀳𑁂𑀴𑀺𑀓𑀸 𑀘𑁂𑀢𑀺 𑀏𑀢𑀸𑀦𑀺 𑀲𑀩𑁆𑀩𑀸𑀦𑀺 𑀏𑀓𑀦𑁆𑀢𑁂𑀦 𑀦𑀺𑀬𑀫𑁂𑀦 𑀦 𑀫𑀥𑀼𑀭𑀸𑀦𑀺 𑀅𑀢𑁆𑀣𑀭𑀲𑀲𑁆𑀲 𑀯𑀸 𑀲𑀤𑁆𑀤𑀭𑀲𑀲𑁆𑀲 𑀯𑀸 𑀓𑀲𑁆𑀲𑀘𑀺 𑀅𑀪𑀸𑀯𑁂𑀦 𑀅𑀲𑁆𑀲𑀸𑀤𑀺𑀢𑀩𑁆𑀩𑀸𑀦𑀺 𑀦 𑀳𑁄𑀦𑁆𑀢𑀻𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀲𑀺𑀲𑁆𑀲𑀸𑀦𑀫𑀼𑀧𑁆𑀧𑀦𑁆𑀦𑁄 𑀔𑁂𑀤𑁄𑀬𑁂𑀯 𑀪𑀬𑀁 𑀢𑀢𑁄 𑀢𑁂𑀲𑀁 𑀔𑁂𑀤𑀢𑁄 𑀯𑀸 𑀉𑀧𑁆𑀧𑀦𑁆𑀦𑀪𑀬𑀢𑁄 𑀫𑀬𑀸 𑀉𑀧𑁂𑀓𑁆𑀔𑀺𑀬𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑀦𑀻𑀬𑀁.

𑁩𑁩. 𑀏𑀯𑀁 𑀲𑀼𑀓𑀭𑀤𑀼𑀓𑁆𑀓𑀭𑀯𑀲𑁂𑀦 𑀤𑀼𑀯𑀺𑀥𑀢𑁆𑀢𑀁 𑀯𑀢𑁆𑀯𑀸 𑀓𑀯𑀻𑀦𑀁 𑀲𑀸𑀫𑀢𑁆𑀣𑀺𑀬𑀧𑁆𑀧𑀓𑀸𑀲𑀦𑁂 𑀲𑀧𑁆𑀧𑀬𑁄𑀚𑀦𑀬𑀫𑀓𑀸𑀦𑀜𑁆𑀘, 𑀓𑀻𑀴𑀸𑀯𑀺𑀦𑁄𑀤𑀦𑁂 𑀲𑀫𑁆𑀩𑀸𑀥𑀝𑁆𑀞𑀸𑀦𑀲𑀫𑁆𑀫𑀦𑁆𑀢𑀦𑁂 𑀧𑀭𑀩𑁆𑀬𑀸𑀫𑁄𑀳𑀦𑁂 𑀘𑀸𑀢𑀺 𑀇𑀫𑁂𑀲𑀼 𑀲𑀧𑁆𑀧𑀬𑁄𑀚𑀦𑀸𑀦𑀜𑁆𑀘 𑀧𑀳𑁂𑀴𑀺𑀓𑀸𑀦𑀫𑀯𑀘𑀦𑁂 𑀓𑀸𑀭𑀡𑀁 𑀦𑀺𑀤𑁆𑀤𑀺𑀲𑀢𑀺 ‘‘𑀬𑀫𑀓’’𑀫𑀺𑀘𑁆𑀘𑀸𑀤𑀺𑀦𑀸. 𑀢𑀁 𑀬𑀫𑀓𑀁 𑀬𑀣𑀸𑀯𑀼𑀢𑁆𑀢𑀁 𑀲𑀼𑀓𑀭𑀤𑀼𑀓𑁆𑀓𑀭𑀸𑀤𑀺𑀪𑁂𑀤𑀁 𑀬𑀫𑀓𑀚𑀸𑀢𑀜𑁆𑀘 𑀧𑀳𑁂𑀴𑀺 𑀘 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀦𑀺𑀤𑁆𑀤𑀺𑀝𑁆𑀞𑀸 𑀲𑀫𑀸𑀕𑀪𑀸𑀤𑀺𑀓𑀸 𑀧𑀳𑁂𑀴𑀺𑀓𑀸 𑀘 𑀇𑀢𑀺 𑀇𑀫𑀸𑀦𑀺 𑀲𑀩𑁆𑀩𑀸𑀦𑀺 𑀏𑀓𑀦𑁆𑀢𑀫𑀥𑀼𑀭𑀸𑀦𑀺 𑀦 𑀇𑀢𑀺 𑀅𑀲𑁆𑀲𑀸𑀤𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀭𑀲𑀲𑁆𑀲, 𑀲𑀤𑁆𑀤𑀭𑀲𑀲𑁆𑀲 𑀯𑀸 𑀦𑀺𑀬𑀫𑀢𑁄 𑀅𑀪𑀸𑀯𑀸 𑀏𑀓𑀦𑁆𑀢𑁂𑀦 𑀅𑀫𑀥𑀼𑀭𑀸𑀦𑀺, 𑀇𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀘 𑀲𑀺𑀲𑁆𑀲𑀔𑁂𑀤𑀪𑀬𑀸 𑀲𑀺𑀲𑁆𑀲𑀸𑀦𑀁 𑀅𑀲𑀳𑀦𑀲𑀗𑁆𑀔𑀸𑀢𑀸𑀬 𑀅𑀲𑀳𑀦𑁂𑀦 𑀚𑀸𑀢𑀸𑀬 𑀯𑀸 𑀪𑀻𑀢𑀺𑀬𑀸 𑀘 𑀫𑀬𑀸 𑀉𑀧𑁂𑀓𑁆𑀔𑀻𑀬𑀦𑁆𑀢𑀺. 𑀲𑀺𑀲𑁆𑀲𑀸𑀦𑀁 𑀔𑁂𑀤𑁄𑀬𑁂𑀯 𑀪𑀬𑀁, 𑀲𑀺𑀲𑁆𑀲𑀔𑁂𑀤𑀢𑁄 𑀉𑀧𑁆𑀧𑀦𑁆𑀦𑀁 𑀯𑀸 𑀪𑀬𑀁, 𑀢𑀢𑁄𑀢𑀺 𑀯𑀺𑀕𑁆𑀕𑀳𑁄.

𑀏𑀢𑁆𑀣 𑀧𑀳𑁂𑀴𑀺𑀓𑀸 𑀏𑀯𑀁 𑀤𑀝𑁆𑀞𑀩𑁆𑀩𑀸 𑁋

𑀲𑀫𑀸𑀕𑀢𑀸 𑀘 𑀯𑀜𑁆𑀘𑀺𑀢𑀼-𑀓𑁆𑀓𑀦𑁆𑀢𑀸 𑀧𑀫𑀼𑀲𑁆𑀲𑀺𑀢𑀸𑀧𑀺 𑀘;

𑀲𑀫𑀸𑀦𑀭𑀽𑀧𑀸 𑀨𑀭𑀼𑀲𑀸, 𑀲𑀗𑁆𑀔𑁆𑀬𑀸𑀢𑀸 𑀘 𑀧𑀓𑀧𑁆𑀧𑀺𑀢𑀸.

𑀅𑀣𑁄𑀧𑀺 ¶ 𑀦𑀸𑀫𑀦𑁆𑀢𑀭𑀺𑀓𑀸, 𑀦𑀺𑀪𑀽𑀢𑀸 𑀘 𑀧𑀳𑁂𑀴𑀺𑀓𑀸;

𑀅𑀣𑁄 𑀲𑀫𑀸𑀦𑀲𑀤𑁆𑀤𑀸 𑀘, 𑀲𑀫𑁆𑀫𑀼𑀴𑁆𑀳𑀸 𑀧𑀸𑀭𑀺𑀳𑀸𑀭𑀺𑀓𑀻;

𑀏𑀓𑀘𑁆𑀙𑀦𑁆𑀦𑁄𑀪𑀬𑀘𑁆𑀙𑀦𑁆𑀦𑀸, 𑀲𑀁𑀓𑀺𑀡𑁆𑀡𑀸𑀢𑀺 𑀘 𑀲𑁄𑀴𑀲𑀸𑀢𑀺.

𑀢𑀢𑁆𑀭𑀺𑀤𑀁 𑀮𑀓𑁆𑀔𑀡𑀁 𑁋

𑀲𑀫𑀸𑀕𑀢𑀸 𑀦𑀸𑀫 𑀲𑀺𑀬𑀸, 𑀕𑀼𑀴𑁆𑀳𑀢𑁆𑀣𑀸 𑀧𑀤𑀲𑀦𑁆𑀥𑀺𑀦𑀸;

𑀯𑀜𑁆𑀘𑀺𑀢𑀸𑀜𑁆𑀜𑀢𑁆𑀣 𑀭𑀼𑀴𑁆𑀳𑁂𑀦, 𑀬𑀢𑁆𑀣 𑀲𑀤𑁆𑀤𑁂𑀦 𑀯𑀜𑁆𑀘𑀦𑀸.

𑀉𑀓𑁆𑀓𑀦𑁆𑀢𑀸𑀢𑀺𑀩𑁆𑀬𑀯𑀳𑀺𑀢-𑀧𑁆𑀧𑀬𑁄𑀕𑀸 𑀫𑁄𑀳𑀓𑀸𑀭𑀺𑀦𑀻;

𑀲𑀺𑀬𑀸 𑀧𑀫𑀼𑀲𑁆𑀲𑀺𑀢𑀸 𑀬𑀲𑁆𑀲𑀸, 𑀤𑀼𑀩𑁆𑀩𑁄𑀥𑀢𑁆𑀣𑀸 𑀧𑀤𑀸𑀯𑀮𑀺.

𑀲𑀫𑀸𑀦𑀭𑀽𑀧𑀸’𑀫𑀼𑀔𑁆𑀬𑀢𑁆𑀣𑀸-𑀭𑁄𑀧𑀸𑀳𑀺𑀢𑀧𑀤𑀸 𑀲𑀺𑀬𑀸;

𑀨𑀭𑀼𑀲𑀸 𑀧𑀘𑁆𑀘𑀬𑀸𑀤𑀻𑀳𑀺, 𑀚𑀸𑀢𑀲𑀤𑁆𑀤𑀸 𑀓𑀣𑀜𑁆𑀘𑀺𑀧𑀺.

𑀲𑀗𑁆𑀔𑁆𑀬𑀸𑀢𑀸 𑀦𑀸𑀫 𑀲𑀗𑁆𑀔𑁆𑀬𑀸𑀦𑀁, 𑀬𑀢𑁆𑀣 𑀩𑁆𑀬𑀸𑀫𑁄𑀳𑀓𑀸𑀭𑀡𑀁;

𑀅𑀜𑁆𑀜𑀣𑀸’𑀪𑀸𑀲𑀢𑁂 𑀬𑀢𑁆𑀣, 𑀯𑀸𑀓𑁆𑀬𑀢𑁆𑀣𑁄 𑀲𑀸 𑀧𑀓𑀧𑁆𑀧𑀺𑀢𑀸.

𑀲𑀸 𑀦𑀸𑀫𑀦𑁆𑀢𑀭𑀺𑀓𑀸 𑀬𑀲𑁆𑀲𑀸, 𑀦𑀸𑀫𑁂 𑀦𑀸𑀦𑀢𑁆𑀣𑀓𑀧𑁆𑀧𑀦𑀸;

𑀦𑀺𑀪𑀽𑀢𑀸’𑀯𑀝𑁆𑀞𑀺𑀢𑀜𑁆𑀜𑀢𑁆𑀣𑀸, 𑀢𑀼𑀮𑁆𑀬𑀢𑁆𑀣𑀲𑀼𑀢𑀺𑀳𑁂𑀢𑀼𑀢𑁄.

𑀲𑀫𑀸𑀦𑀲𑀤𑁆𑀤𑀸 𑀲𑀸 𑀇𑀝𑁆𑀞-𑀲𑀤𑁆𑀤𑀧𑀭𑀺𑀬𑀸𑀬𑀲𑀸𑀥𑀺𑀢𑀸;

𑀲𑀫𑁆𑀫𑀼𑀴𑁆𑀳𑀸 𑀫𑀽𑀴𑁆𑀳𑀢𑀸𑀬𑁂𑀯, 𑀦𑀺𑀤𑁆𑀤𑀺𑀝𑁆𑀞𑀢𑁆𑀣𑀸𑀧𑀺 𑀲𑀸𑀥𑀼𑀓𑀁.

𑀬𑀲𑁆𑀲𑀸 𑀲𑀫𑁆𑀩𑀦𑁆𑀥𑀩𑀸𑀳𑀼𑀮𑁆𑀬𑀸, 𑀦𑀸𑀫𑀁 𑀲𑀸 𑀧𑀸𑀭𑀺𑀳𑀸𑀭𑀺𑀓𑀻;

𑀏𑀓𑀘𑁆𑀙𑀦𑁆𑀦𑀸 𑀪𑀯𑁂 𑀩𑁆𑀬𑀜𑁆𑀚𑀸-𑀥𑁂𑀬𑁆𑀬𑀁 𑀦𑀺𑀲𑁆𑀲𑀬𑀕𑁄𑀧𑀦𑀸.

𑀲𑀸 𑀪𑀯𑁂 𑀉𑀪𑀬𑀘𑁆𑀙𑀦𑁆𑀦𑀸, 𑀬𑀲𑁆𑀲𑀸 𑀉𑀪𑀬𑀕𑁄𑀧𑀦𑀸;

𑀲𑀁𑀓𑀺𑀡𑁆𑀡𑀸 𑀦𑀸𑀫 𑀲𑀸 𑀬𑀲𑁆𑀲𑀸, 𑀦𑀸𑀦𑀸𑀮𑀓𑁆𑀔𑀡𑀲𑀗𑁆𑀓𑀭𑁄𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 𑀧𑀤𑀲𑀦𑁆𑀥𑀺𑀦𑀸 𑀧𑀤𑀸𑀦𑀁 𑀲𑀦𑁆𑀥𑀸𑀦𑀢𑁄 𑀕𑀼𑀴𑁆𑀳𑀢𑁆𑀣𑀸 𑀅𑀧𑀸𑀓𑀝𑀢𑁆𑀣𑀸 𑀲𑀫𑀸𑀕𑀢𑀸 𑀦𑀸𑀫 𑀲𑀺𑀬𑀸. 𑀕𑀼𑀴𑁆𑀳𑀢𑁆𑀣𑀸𑀢𑀺 𑀧𑀲𑀺𑀤𑁆𑀥𑀸𑀦𑀼𑀯𑀸𑀤𑁂𑀦 𑀅𑀧𑀲𑀺𑀤𑁆𑀥𑀸 𑀲𑀫𑀸𑀕𑀢𑀸 𑀯𑀺𑀥𑀻𑀬𑀢𑁂. 𑀇𑀢𑁄 𑀧𑀭𑀫𑁆𑀧𑀺 𑀅𑀦𑀼𑀯𑀸𑀤𑀸𑀦𑀼𑀯𑀸𑀤𑁆𑀬𑀪𑀸𑀯𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄. 𑀬𑀢𑁆𑀣 𑀧𑀳𑁂𑀴𑀺𑀓𑀸𑀬𑀁 𑀅𑀜𑁆𑀜𑀢𑁆𑀣 𑀭𑀼𑀴𑁆𑀳𑁂𑀦 𑀲𑀤𑁆𑀤𑁂𑀦 𑀅𑀜𑁆𑀜𑀲𑁆𑀫𑀺𑀁 𑀅𑀢𑁆𑀣𑁂 𑀧𑀲𑀺𑀤𑁆𑀥𑁂𑀦 𑀭𑀼𑀴𑁆𑀳𑀺𑀲𑀤𑁆𑀤𑁂𑀦 𑀯𑀜𑁆𑀘𑀦𑀸 𑀯𑀜𑁆𑀘𑀺𑀢𑀸 𑀦𑀸𑀫 𑀲𑀺𑀬𑀸.

𑀅𑀢𑀺𑀩𑁆𑀬𑀯𑀳𑀺𑀢𑀧𑁆𑀧𑀬𑁄𑀕𑀸 ¶ 𑀅𑀢𑀺𑀲𑀬𑁂𑀦 𑀅𑀦𑁆𑀢𑀭𑀺𑀢𑀧𑀬𑀼𑀚𑁆𑀚𑀫𑀸𑀦𑀧𑀤𑀬𑀼𑀢𑁆𑀢𑀸 𑀢𑀢𑁄𑀬𑁂𑀯 𑀫𑁄𑀳𑀓𑀸𑀭𑀺𑀦𑀻 𑀲𑀫𑁆𑀫𑁄𑀳𑀓𑀸𑀭𑀺𑀓𑀸 𑀧𑀳𑁂𑀴𑀺𑀓𑀸 𑀉𑀓𑁆𑀓𑀦𑁆𑀢𑀸 𑀦𑀸𑀫. 𑀬𑀲𑁆𑀲𑀸 𑀧𑀳𑁂𑀴𑀺𑀓𑀸𑀬 𑀧𑀤𑀸𑀯𑀮𑀺 𑀧𑀤𑀧𑀦𑁆𑀢𑀺 𑀤𑀼𑀩𑁆𑀩𑁄𑀥𑀢𑁆𑀣𑀸 𑀤𑀼𑀭𑀦𑀼𑀩𑁄𑀥𑀸𑀪𑀺𑀥𑁂𑀬𑁆𑀬𑀸, 𑀲𑀸 𑀧𑀫𑀼𑀲𑁆𑀲𑀺𑀢𑀸 𑀦𑀸𑀫.

𑀅𑀫𑀼𑀔𑁆𑀬𑀢𑁆𑀣𑀸𑀭𑁄𑀧𑀸𑀳𑀺𑀢𑀧𑀤𑀸 𑀅𑀧𑁆𑀧𑀥𑀸𑀦𑀢𑁆𑀣𑁂 𑀫𑀼𑀔𑁆𑀬𑀢𑁆𑀣𑀧𑀓𑀸𑀲𑀓𑀲𑀤𑁆𑀤𑀸𑀦𑀁 𑀓𑀺𑀜𑁆𑀘𑀺 𑀲𑀥𑀫𑁆𑀫𑀁 𑀦𑀺𑀲𑁆𑀲𑀸𑀬 𑀆𑀭𑁄𑀧𑀦𑀢𑁄 𑀉𑀧𑀝𑁆𑀞𑀺𑀢𑀧𑀤𑀬𑀼𑀢𑁆𑀢𑀸 𑀲𑀫𑀸𑀦𑀭𑀽𑀧𑀸 𑀦𑀸𑀫 𑀲𑀺𑀬𑀸. 𑀧𑀘𑁆𑀘𑀬𑀸𑀤𑀻𑀳𑀺 𑀧𑀘𑁆𑀘𑀬𑀸𑀤𑁂𑀲𑀸𑀤𑀻𑀳𑀺 𑀓𑀣𑀜𑁆𑀘𑀺𑀧𑀺 𑀬𑁂𑀦 𑀓𑁂𑀦𑀘𑀺 𑀧𑀓𑀸𑀭𑁂𑀦 𑀚𑀸𑀢𑀲𑀤𑁆𑀤𑀸 𑀦𑀺𑀧𑁆𑀨𑀦𑁆𑀦𑀲𑀤𑁆𑀤𑀸 𑀨𑀭𑀼𑀲𑀸 𑀦𑀸𑀫.

𑀬𑀢𑁆𑀣 𑀬𑀲𑁆𑀲𑀁 𑀧𑀳𑁂𑀴𑀺𑀓𑀸𑀬𑀁 𑀲𑀗𑁆𑀔𑁆𑀬𑀸𑀦𑀁 𑀕𑀡𑀦𑀁 𑀯𑀼𑀢𑁆𑀢𑀫𑀧𑀺 𑀩𑁆𑀬𑀸𑀫𑁄𑀳𑀓𑀸𑀭𑀡𑀁 𑀳𑁄𑀢𑀺, 𑀲𑀸 𑀧𑀳𑁂𑀴𑀺𑀓𑀸 𑀲𑀗𑁆𑀔𑁆𑀬𑀸𑀢𑀸 𑀦𑀸𑀫 𑀲𑀺𑀬𑀸. 𑀬𑀢𑁆𑀣 𑀬𑀲𑁆𑀲𑀁 𑀧𑀳𑁂𑀴𑀺𑀓𑀸𑀬𑀁 𑀯𑀸𑀓𑁆𑀬𑀢𑁆𑀣𑁄 𑀲𑀫𑀼𑀤𑀸𑀬𑀢𑁆𑀣𑁄 𑀅𑀜𑁆𑀜𑀣𑀸 𑀅𑀜𑁆𑀜𑁂𑀦 𑀧𑀓𑀸𑀭𑁂𑀦 𑀆𑀪𑀸𑀲𑀢𑁂 𑀯𑀺𑀜𑁆𑀜𑀸𑀬𑀢𑁂, 𑀲𑀸 𑀧𑀓𑀧𑁆𑀧𑀺𑀢𑀸 𑀦𑀸𑀫.

𑀬𑀲𑁆𑀲𑀸 𑀧𑀳𑁂𑀴𑀺𑀓𑀸𑀬 𑀦𑀸𑀫𑁂 𑀧𑀬𑀼𑀢𑁆𑀢𑀸𑀪𑀺𑀥𑀸𑀦𑁂 𑀦𑀸𑀦𑀢𑁆𑀣𑀓𑀧𑁆𑀧𑀦𑀸 𑀯𑀺𑀯𑀺𑀥𑀸𑀪𑀺𑀥𑁂𑀬𑁆𑀬𑀓𑀧𑁆𑀧𑀦𑀸 𑀲𑀫𑁆𑀪𑀯𑀢𑀺, 𑀲𑀸 𑀧𑀳𑁂𑀴𑀺𑀓𑀸 𑀦𑀸𑀫𑀦𑁆𑀢𑀭𑀺𑀓𑀸 𑀦𑀸𑀫. 𑀢𑀼𑀮𑁆𑀬𑀢𑁆𑀣𑀲𑀼𑀢𑀺𑀳𑁂𑀢𑀼𑀢𑁄 𑀲𑀫𑀸𑀦𑀢𑁆𑀣𑀲𑀤𑁆𑀤𑀸𑀦𑀁 𑀧𑀬𑁄𑀕𑀳𑁂𑀢𑀼𑀬𑀸 𑀅𑀯𑀝𑁆𑀞𑀺𑀢𑀜𑁆𑀜𑀢𑁆𑀣𑀸 𑀧𑀢𑀺𑀝𑁆𑀞𑀺𑀢𑀅𑀜𑁆𑀜𑀢𑁆𑀣𑀸 𑀳𑁄𑀢𑀺, 𑀲𑀸 𑀦𑀺𑀪𑀽𑀢𑀸 𑀦𑀸𑀫.

𑀬𑀸 𑀧𑀳𑁂𑀴𑀺𑀓𑀸 𑀇𑀝𑁆𑀞𑀲𑀤𑁆𑀤𑀧𑀭𑀺𑀬𑀸𑀬𑀲𑀸𑀥𑀺𑀢𑀸 𑀇𑀘𑁆𑀙𑀺𑀢𑀢𑁆𑀣𑀲𑀤𑁆𑀤𑀲𑁆𑀲 𑀯𑁂𑀯𑀘𑀦𑁂𑀳𑀺 𑀦𑀺𑀧𑁆𑀨𑀸𑀤𑀺𑀢𑀸 𑀳𑁄𑀢𑀺, 𑀲𑀸 𑀲𑀫𑀸𑀦𑀲𑀤𑁆𑀤𑀸 𑀦𑀸𑀫. 𑀲𑀸𑀥𑀼𑀓𑀁 𑀦𑀺𑀤𑁆𑀤𑀺𑀝𑁆𑀞𑀢𑁆𑀣𑀸𑀧𑀺 𑀤𑀲𑁆𑀲𑀺𑀢𑀅𑀢𑁆𑀣𑀬𑀼𑀢𑁆𑀢𑀸𑀧𑀺𑀬𑀸 𑀫𑀽𑀴𑁆𑀳𑀢𑀸𑀬𑁂𑀯 𑀲𑀫𑁆𑀫𑁄𑀳𑀪𑀸𑀯𑀢𑁆𑀣𑀁 𑀏𑀯 𑀪𑀯𑀢𑀺, 𑀲𑀸 𑀲𑀫𑁆𑀫𑀼𑀴𑁆𑀳𑀸 𑀦𑀸𑀫.

𑀬𑀲𑁆𑀲𑀸 𑀧𑀳𑁂𑀴𑀺𑀓𑀸𑀬 𑀯𑀺𑀭𑀘𑀦𑁂 𑀦𑀸𑀫𑀁 𑀤𑀲𑁆𑀲𑀺𑀬𑀫𑀸𑀦𑀁 𑀦𑀸𑀫𑀁 𑀲𑀫𑁆𑀩𑀦𑁆𑀥𑀩𑀸𑀳𑀼𑀮𑁆𑀬𑀸 𑀲𑀫𑁆𑀩𑀦𑁆𑀥𑀲𑁆𑀲 𑀩𑀳𑀼𑀮𑀪𑀸𑀯𑀢𑁄 𑀪𑀯𑀢𑀺, 𑀲𑀸 𑀧𑀸𑀭𑀺𑀳𑀸𑀭𑀺𑀓𑀻 𑀦𑀸𑀫. 𑀬𑀲𑁆𑀲𑀸 𑀆𑀥𑁂𑀬𑁆𑀬𑀁 𑀩𑁆𑀬𑀜𑁆𑀚 𑀅𑀪𑀺𑀩𑁆𑀬𑀜𑁆𑀚𑀺𑀬 𑀧𑀓𑀸𑀲𑁂𑀢𑁆𑀯𑀸 ¶ 𑀦𑀺𑀲𑁆𑀲𑀬𑀕𑁄𑀧𑀦𑀸 𑀆𑀥𑀸𑀭𑀕𑀼𑀢𑁆𑀢𑀺 𑀪𑀯𑀢𑀺, 𑀲𑀸 𑀏𑀓𑀘𑁆𑀙𑀦𑁆𑀦𑀸 𑀦𑀸𑀫.

𑀬𑀲𑁆𑀲𑀸 𑀧𑀬𑁄𑀕𑁂 𑀉𑀪𑀬𑀕𑁄𑀧𑀦𑀸 𑀉𑀪𑀺𑀦𑁆𑀦𑀫𑀸𑀥𑀸𑀭𑀸𑀥𑁂𑀬𑁆𑀬𑀸𑀦𑀁 𑀕𑁄𑀧𑀦𑀸 𑀪𑀯𑀢𑀺, 𑀲𑀸 𑀉𑀪𑀬𑀘𑁆𑀙𑀦𑁆𑀦𑀸 𑀦𑀸𑀫. 𑀬𑀲𑁆𑀲𑀸 𑀦𑀸𑀦𑀸𑀮𑀓𑁆𑀔𑀡𑀲𑀗𑁆𑀓𑀭𑁄 𑀲𑀫𑀸𑀕𑀢𑀸𑀤𑀺𑀦𑀸𑀦𑀸𑀯𑀺𑀥𑀮𑀓𑁆𑀔𑀡𑀸𑀦𑀁 𑀲𑀗𑁆𑀓𑀭𑁄 𑀳𑁄𑀢𑀺, 𑀲𑀸 𑀲𑀁𑀓𑀺𑀡𑁆𑀡𑀸 𑀦𑀸𑀫 𑀲𑀺𑀬𑀸.

𑀇𑀤𑀸𑀦𑀺 𑀲𑀫𑀸𑀕𑀢𑀸𑀤𑀻𑀦𑀁 𑀮𑀓𑁆𑀔𑀺𑀬𑀁 𑀓𑀫𑁂𑀦 𑀏𑀯𑀁 𑀜𑀸𑀢𑀩𑁆𑀩𑀁 𑁋

‘‘𑀧𑀪𑀯𑀸’𑀦𑀢𑀯𑀺𑀢𑁆𑀢𑀺𑀡𑁆𑀡𑀸, 𑀢𑀯𑀸’𑀡𑀸 𑀫𑀳𑀢𑀻 𑀲𑀢𑀻;

𑀘𑀺𑀭𑀸𑀬 𑀚𑀬𑀢𑀁 𑀦𑀸𑀣, 𑀧𑀳𑀼𑀢𑀨𑀮𑀲𑀸𑀥𑀺𑀦𑀻’’𑀢𑀺.

𑀅𑀬𑀁 𑀲𑀫𑀸𑀕𑀢𑀸.

𑀦𑀸𑀣 𑀢𑀯 𑀧𑀪𑀯𑀢𑁄 𑀧𑀝𑁆𑀞𑀸𑀬 𑀦𑀢𑀯𑀺𑀢𑁆𑀢𑀺𑀡𑁆𑀡𑀸 𑀑𑀡𑀢𑀯𑀲𑁂𑀦 𑀧𑀢𑁆𑀣𑀝𑀸, 𑀏𑀯𑀁 𑀲𑀢𑀺 𑀦𑀤𑀻 𑀯𑀺𑀬 𑀤𑀺𑀲𑁆𑀲𑀢𑀺. 𑀧𑀪𑀯 𑀧𑀓𑀝𑁆𑀞𑀢𑁆𑀢 𑀲𑁄𑀪𑀸𑀯𑀦𑁆𑀢. 𑀪𑁄 𑀦𑀸𑀣 𑀢𑀯 𑀢𑀼𑀬𑁆𑀳𑀁 𑀫𑀳𑀢𑀻 𑀲𑀢𑀻 𑀫𑀳𑀦𑁆𑀢𑀻 𑀲𑀫𑀸𑀦𑀸 𑀆𑀡𑀸 𑀆𑀦𑀢𑀯𑀺𑀢𑁆𑀢𑀺𑀡𑁆𑀡𑀸 𑀅𑀢𑁆𑀢𑀦𑀺 𑀦𑀢𑁂𑀲𑀼 𑀚𑀦𑁂𑀲𑀼 𑀧𑀢𑁆𑀣𑀝𑀸 𑀧𑀳𑀼𑀢𑀨𑀮𑀲𑀸𑀥𑀺𑀦𑀻 𑀩𑀳𑀼𑀮𑀢𑁆𑀣𑀦𑀺𑀧𑁆𑀨𑀸𑀤𑀦𑀻 𑀘𑀺𑀭𑀸𑀬 𑀘𑀺𑀭𑀓𑀸𑀮𑀁 𑀚𑀬𑀢𑀁 𑀉𑀓𑁆𑀓𑀁𑀲𑀪𑀸𑀯𑁂𑀦 𑀧𑀯𑀢𑁆𑀢𑀢𑀼. 𑀏𑀢𑁆𑀣 𑀧𑀪𑀯𑀆𑀦𑀢𑀇𑀢𑀺𑀲𑀦𑁆𑀥𑀺𑀦𑀸 𑀅𑀢𑁆𑀣𑁄 𑀕𑀼𑀴𑁆𑀳𑁄.

‘‘𑀪𑀤𑁆𑀤𑀫𑁂𑀯𑁄’𑀧𑀲𑁂𑀯𑁂𑀬𑁆𑀬, 𑀯𑀺𑀥𑀽𑀢𑀫𑀤𑀓𑀺𑀩𑁆𑀩𑀺𑀲𑀁;

𑀲𑀫𑁆𑀧𑀸𑀧𑀬𑁂 𑀧𑀼𑀭𑀁 𑀔𑁂𑀫𑀁, 𑀲 𑀤𑀦𑁆𑀢𑁄’𑀢𑁆𑀢𑀦𑀺𑀲𑁂𑀯𑀺𑀢’’𑀦𑁆𑀢𑀺.

𑀅𑀬𑀁 𑀯𑀜𑁆𑀘𑀺𑀢𑀸.

𑀯𑀺𑀥𑀽𑀢𑀫𑀤𑀓𑀺𑀩𑁆𑀩𑀺𑀲𑀁 𑀯𑀺𑀦𑀸𑀲𑀺𑀢𑀫𑀤𑀤𑁄𑀲𑀁 𑀪𑀤𑁆𑀤𑀫𑁂𑀯 𑀫𑀦𑁆𑀤𑀧𑀺𑀬 [𑀧𑀺𑀦𑁆𑀤𑀧𑀺𑀲𑁆𑀲 (𑀓.)] 𑁋 𑀪𑀤𑁆𑀤𑀚𑀸𑀢𑀺𑀓𑁂𑀲𑀼 𑀳𑀢𑁆𑀣𑀻𑀲𑀼 𑀪𑀤𑁆𑀤𑀚𑀸𑀢𑀺𑀓𑀳𑀢𑁆𑀣𑀺𑀫𑁂𑀯 𑀉𑀧𑀲𑁂𑀯𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀪𑀤𑁆𑀤𑀫𑁂𑀯 𑀉𑀢𑁆𑀢𑀫𑀧𑀼𑀭𑀺𑀲𑀫𑁂𑀯 𑀲𑁂𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑁂𑀯𑀦𑀁 𑀓𑀺𑀫𑀢𑁆𑀣𑀦𑁆𑀢𑀺 𑀘𑁂? 𑀳𑀢𑁆𑀣𑀺𑀧𑀓𑁆𑀔𑁂 𑀤𑀦𑁆𑀢𑁄 𑀲𑀺𑀓𑁆𑀔𑀺𑀢𑁄 𑀲𑁄 𑀳𑀢𑁆𑀣𑀺 𑀅𑀢𑁆𑀢𑀦𑀺𑀲𑁂𑀯𑀺𑀢𑀁 𑀅𑀢𑁆𑀢𑀸𑀦𑀁 𑀪𑀚𑀺𑀢𑀁 𑀚𑀦𑀁 𑀔𑁂𑀫𑀁 𑀦𑀺𑀩𑁆𑀪𑀬𑀁 𑀧𑀼𑀭𑀁 𑀦𑀕𑀭𑀁 𑀲𑀫𑁆𑀧𑀸𑀧𑁂𑀢𑀺. 𑀧𑀼𑀭𑀺𑀲𑀧𑀓𑁆𑀔𑁂 𑀧𑀦 ¶ 𑀤𑀦𑁆𑀢𑁄 𑀤𑀫𑀺𑀢𑁄 𑀲𑁄 𑀅𑀭𑀺𑀬𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑀺𑀲𑁂𑀯𑀺𑀢𑀁 𑀅𑀢𑁆𑀢𑀸𑀦𑀫𑀼𑀧𑀲𑁂𑀯𑀺𑀢𑀁 𑀚𑀦𑀁 𑀔𑁂𑀫𑀁 𑀦𑀺𑀤𑁆𑀤𑀼𑀓𑁆𑀔𑀁 𑀧𑀼𑀭𑀁 𑀦𑀺𑀩𑁆𑀩𑀸𑀦𑀧𑀼𑀭𑀁 𑀧𑀸𑀧𑁂𑀢𑀺. 𑀏𑀢𑁆𑀣 𑀓𑀯𑀺𑀘𑁆𑀙𑀺𑀢𑀉𑀢𑁆𑀢𑀫𑀢𑁆𑀣𑀢𑁄 𑀅𑀜𑁆𑀜𑁂𑀦 𑀳𑀢𑁆𑀣𑀺𑀅𑀢𑁆𑀣𑁂 𑀭𑀼𑀴𑁆𑀳𑁂𑀦 𑀲𑀤𑁆𑀤𑁂𑀦 𑀯𑀜𑁆𑀘𑀦𑀸 𑀦𑀸𑀫.

‘‘𑀩𑀳𑀼𑀕𑀼𑀡𑁂 𑀧𑀡𑀫𑀢𑀺, 𑀤𑀼𑀚𑁆𑀚𑀦𑀸𑀦𑀁𑀧𑁆𑀬𑀬𑀁 𑀚𑀦𑁄;

𑀳𑀺𑀢𑀁 𑀧𑀫𑀼𑀤𑀺𑀢𑁄 𑀦𑀺𑀘𑁆𑀘𑀁, 𑀲𑀼𑀕𑀢𑀁 𑀲𑀫𑀦𑀼𑀲𑁆𑀲𑀭’’𑀦𑁆𑀢𑀺.

𑀅𑀬𑀁 𑀉𑀓𑁆𑀓𑀦𑁆𑀢𑀸. 𑀇𑀫𑀲𑁆𑀲𑀢𑁆𑀣𑁄 𑀉𑀧𑀭𑀺 𑀆𑀕𑀫𑀺𑀲𑁆𑀲𑀢𑀺.

𑀩𑁆𑀬𑀸𑀓𑀺𑀡𑁆𑀡𑀤𑁄𑀲𑀢𑁆𑀢𑁂 𑀲𑀢𑀺𑀧𑀺 𑀧𑀳𑁂𑀴𑀺𑀓𑀸𑀭𑀼𑀴𑁆𑀳𑀢𑁆𑀢𑀸 𑀏𑀲𑀸 𑀇𑀝𑁆𑀞𑀸. 𑀯𑀼𑀢𑁆𑀢𑀜𑁆𑀳𑀺 ‘‘𑀧𑀳𑁂𑀴𑀺𑀓𑀸𑀬𑀫𑀸𑀭𑀼𑀴𑁆𑀳𑀸, 𑀦 𑀳𑀺 𑀤𑀼𑀝𑁆𑀞𑀸 𑀓𑀺𑀮𑀺𑀝𑁆𑀞𑀢𑀸’’𑀢𑀺. 𑀇𑀳 𑀲𑀫𑁆𑀩𑀦𑁆𑀥𑀻𑀧𑀤𑀸𑀦𑀁 𑀅𑀝𑁆𑀞𑀸𑀦𑀝𑁆𑀞𑀸𑀧𑀦𑁂𑀦 𑀩𑁆𑀬𑀯𑀳𑀺𑀢𑀢𑁆𑀢𑀁 𑀳𑁄𑀢𑀺.

‘‘𑀫𑀼𑀔𑀨𑀼𑀮𑁆𑀮𑀁 𑀕𑀺𑀗𑁆𑀕𑀫𑀓𑀁, 𑀦𑀺𑀬𑀼𑀭𑀼𑀕𑁆𑀕𑀢𑁆𑀣𑀦𑀼𑀦𑁆𑀦𑀢𑀁;

𑀧𑀝𑀘𑁆𑀘𑀭𑀻 𑀯𑀭𑀁 𑀧𑁄𑀲𑁄, 𑀪𑀻𑀭𑀼𑀬𑀸 𑀥𑀸𑀭𑀬𑀦𑁆𑀢𑀺𑀬𑀸’’𑀢𑀺.

𑀅𑀬𑀁 𑀧𑀫𑀼𑀲𑁆𑀲𑀺𑀢𑀸.

𑀫𑀼𑀔𑀨𑀼𑀮𑁆𑀮𑀁 𑀢𑀺𑀮𑀓𑀸𑀤𑀺𑀁 𑀕𑀺𑀗𑁆𑀕𑀫𑀓𑀁 𑀏𑀯𑀁𑀦𑀸𑀫𑀓𑀁 𑀧𑀲𑀸𑀥𑀦𑀁 𑀦𑀺𑀬𑀼𑀭𑀼𑀕𑁆𑀕𑀢𑁆𑀣𑀦𑀼𑀦𑁆𑀦𑀢𑀁 𑀦𑀺𑀬𑀼𑀭𑀁 𑀯𑀮𑀬𑀁, 𑀉𑀕𑁆𑀕𑀢𑁆𑀣𑀦𑀁 𑀧𑀬𑁄𑀥𑀭𑀧𑀝𑀁, 𑀉𑀦𑁆𑀦𑀢𑀁 𑀦𑀮𑀸𑀝𑀧𑀝𑀸𑀤𑀺𑀓𑀁, 𑀫𑀼𑀔𑀢𑁄 𑀉𑀦𑁆𑀦𑀢𑀸𑀪𑀭𑀡𑀜𑁆𑀘 𑀥𑀸𑀭𑀬𑀦𑁆𑀢𑀺𑀬𑀸 𑀪𑀻𑀭𑀼𑀬𑀸 𑀇𑀢𑁆𑀣𑀺𑀬𑀸 𑀧𑀝𑀘𑁆𑀘𑀭𑀻 𑀚𑀺𑀡𑁆𑀡𑀯𑀢𑁆𑀣𑀦𑀺𑀯𑀸𑀲𑀻 𑀧𑁄𑀲𑁄 𑀧𑀼𑀭𑀺𑀲𑁄 𑀯𑀭𑀁 𑀉𑀢𑁆𑀢𑀫𑁄. 𑀏𑀢𑁆𑀣 𑀩𑀳𑀼𑀧𑀬𑁄𑀕𑀭𑀳𑀺𑀢𑁂𑀳𑀺 𑀲𑀤𑁆𑀤𑁂𑀳𑀺 𑀭𑀘𑀺𑀢𑀢𑁆𑀢𑀸 𑀅𑀢𑁆𑀣𑀲𑁆𑀲 𑀤𑀼𑀭𑀯𑀩𑁄𑀥𑀢𑀸.

‘‘𑀦𑀯’𑀕𑁆𑀕𑀭𑀢𑀦𑀸𑀦’𑀲𑁆𑀫𑀺𑀁, 𑀤𑀺𑀲𑁆𑀲𑀦𑁆𑀢𑀺 𑀭𑀢𑀦𑀸𑀓𑀭𑁂;

𑀧𑀼𑀭𑀺𑀲𑀸𑀦𑁂𑀢𑁆𑀣 𑀅𑀝𑁆𑀞𑀦𑁆𑀦𑀁, 𑀅𑀝𑁆𑀞𑀸’𑀲𑀸𑀥𑀸𑀭𑀡𑀸’𑀧𑀭’’𑀦𑁆𑀢𑀺.

𑀅𑀬𑀁 𑀲𑀫𑀸𑀦𑀭𑀽𑀧𑀸.

𑀅𑀲𑁆𑀫𑀺𑀁 𑀭𑀢𑀦𑀸𑀓𑀭𑁂 𑀅𑀕𑁆𑀕𑀭𑀢𑀦𑀸𑀦𑀺 𑀦𑀯 𑀤𑀺𑀲𑁆𑀲𑀦𑁆𑀢𑀺, 𑀏𑀢𑁆𑀣 𑀇𑀫𑁂𑀲𑀼 𑀭𑀢𑀦𑁂𑀲𑀼 𑀅𑀝𑁆𑀞 𑀭𑀢𑀦𑀸𑀦𑀺 𑀅𑀝𑁆𑀞𑀦𑁆𑀦𑀁 𑀧𑀼𑀭𑀺𑀲𑀸𑀦𑀁 𑀅𑀲𑀸𑀥𑀸𑀭𑀡𑀸𑀦𑀺, 𑀅𑀧𑀭𑀁 𑀭𑀢𑀦𑀁 𑀲𑀸𑀥𑀸𑀭𑀡𑀁. 𑀇𑀫𑀸𑀦𑀺 𑀦𑀯 𑀮𑁄𑀓𑀼𑀢𑁆𑀢𑀭𑀸𑀦𑀺 𑀘𑀺𑀢𑁆𑀢𑀻𑀓𑀢𑀸𑀤𑀺𑀅𑀢𑁆𑀣𑁂𑀦 ‘‘𑀭𑀢𑀦𑀸𑀦𑀻’’𑀢𑀺 𑀘 𑀢𑀧𑁆𑀧𑀪𑀯𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 ¶ ‘‘𑀆𑀓𑀭𑁄’’𑀢𑀺 𑀘 𑀓𑀧𑁆𑀧𑀺𑀢𑁄𑀢𑀺 𑀅𑀫𑀼𑀔𑁆𑀬𑀢𑁆𑀣𑁂𑀲𑀼 𑀭𑀢𑀦𑀸𑀤𑀺𑀲𑀤𑁆𑀤𑀸𑀦𑀫𑀸𑀭𑁄𑀧𑀦𑀁 𑀳𑁄𑀢𑀺.

‘‘𑀯𑀺𑀦𑁆𑀤𑀦𑁆𑀢𑀺 𑀤𑁂𑀯𑀕𑀦𑁆𑀥𑀩𑁆𑀩𑀸, 𑀳𑀺𑀫𑀯𑀦𑁆𑀢𑀫𑀳𑀸𑀢𑀮𑁂;

𑀭𑀲𑀯𑀦𑁆𑀢𑁂 𑀲𑀭𑁂 𑀲𑀢𑁆𑀢, 𑀦 𑀦𑀸𑀕𑀸𑀧𑀺 𑀉𑀧𑁄𑀲𑀣𑀸’’𑀢𑀺.

𑀅𑀬𑀁 𑀨𑀭𑀼𑀲𑀸.

𑀳𑀺𑀫𑀯𑀦𑁆𑀢𑀫𑀳𑀸𑀢𑀮𑁂 𑀳𑀺𑀫𑀸𑀮𑀬𑀲𑁆𑀲 𑀫𑀢𑁆𑀣𑀓𑁂 𑀭𑀲𑀯𑀦𑁆𑀢𑁂 𑀲𑁄𑀤𑀓𑁂 𑀲𑀢𑁆𑀢 𑀲𑀭𑁂 𑀅𑀦𑁄𑀢𑀢𑁆𑀢𑀸𑀤𑀺𑀓𑁂 𑀤𑁂𑀯𑀕𑀦𑁆𑀥𑀩𑁆𑀩𑀸 𑀯𑀺𑀦𑁆𑀤𑀦𑁆𑀢𑀺 𑀲𑁂𑀯𑀦𑁆𑀢𑀺, 𑀉𑀧𑁄𑀲𑀣𑀸 𑀦𑀸𑀕𑀸𑀧𑀺 𑀦 𑀯𑀺𑀦𑁆𑀤𑀦𑁆𑀢𑀺. 𑀅𑀬𑀫𑀧𑀭𑀢𑁆𑀣𑁄. 𑀳𑀺𑀫𑀯𑀦𑁆𑀢𑀫𑀳𑀸𑀢𑀮𑁂 𑀘𑀦𑁆𑀤𑀭𑀁𑀲𑀺𑀬𑀼𑀢𑁆𑀢𑁂 𑀫𑀳𑀸𑀧𑀸𑀲𑀸𑀤𑀢𑀮𑁂 𑀤𑁂𑀯𑀕𑀦𑁆𑀥𑀩𑁆𑀩𑀸 𑀓𑀻𑀴𑀫𑀸𑀦𑀸 𑀕𑀦𑁆𑀥𑀩𑁆𑀩𑀸 𑀭𑀲𑀯𑀦𑁆𑀢𑁂 𑀫𑀥𑀼𑀭𑀕𑀼𑀡𑀬𑀼𑀢𑁆𑀢𑁂 𑀲𑀢𑁆𑀢 𑀲𑀭𑁂 𑀯𑀻𑀡𑀸𑀬 𑀙𑀚𑁆𑀚𑀸𑀤𑀺𑀓𑁂 𑀲𑀢𑁆𑀢 𑀲𑀭𑁂 𑀯𑀺𑀦𑁆𑀤𑀦𑁆𑀢𑀺, 𑀦𑀸𑀕𑀸𑀧𑀺 𑀅𑀭𑀺𑀬𑀸𑀧𑀺 𑀉𑀧𑁄𑀲𑀣𑀸𑀧𑀺 𑀉𑀧𑀯𑀼𑀢𑁆𑀣𑀸𑀧𑀺 𑀦 𑀯𑀺𑀦𑁆𑀤𑀦𑁆𑀢𑀺 𑀦𑀸𑀦𑀼𑀪𑀯𑀦𑁆𑀢𑀺. 𑀏𑀢𑁆𑀣 𑀤𑀺𑀩𑁆𑀩𑀦𑁆𑀢𑀻𑀢𑀺 𑀤𑁂𑀯𑀸. 𑀉𑀧𑁄𑀲𑀣𑁄 𑀏𑀢𑁂𑀲𑀫𑀢𑁆𑀣𑀻𑀢𑀺 𑀉𑀧𑁄𑀲𑀣𑀸𑀢𑀺 𑀯𑀺𑀕𑁆𑀕𑀳𑁄. 𑀮𑀓𑁆𑀔𑀡𑀓𑁆𑀓𑀫𑀢𑁄 𑀧𑀲𑀺𑀤𑁆𑀥𑀧𑀘𑀼𑀭𑀧𑀬𑁄𑀕𑀢𑁄 𑀅𑀜𑁆𑀜𑀤𑀢𑁆𑀣𑀸 𑀬𑁂𑀦 𑀓𑁂𑀦𑀘𑀺 𑀮𑁂𑀲𑁂𑀦 𑀧𑀘𑁆𑀘𑀬𑀸𑀤𑀻𑀦𑀁 𑀚𑀸𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑀺𑀢𑀸.

‘‘𑀕𑀻𑀢𑀲𑀤𑁆𑀤𑁂 𑀲𑀭𑀸 𑀤𑁆𑀯𑁂 𑀤𑁆𑀯𑁂, 𑀤𑁆𑀯𑁂 𑀙𑀚𑁆𑀚𑀜𑁆𑀜𑀢𑁆𑀭 𑀙𑀲𑁆𑀲𑀭𑀸;

𑀧𑀜𑁆𑀘𑀯𑀡𑁆𑀡𑀁 𑀬𑀣𑀸 𑀘𑀓𑁆𑀔𑀼, 𑀙𑀩𑁆𑀩𑀡𑁆𑀡𑀸 𑀦𑀸𑀲𑀺𑀓𑀸 𑀢𑀣𑀸’’𑀢𑀺.

𑀅𑀬𑀁 𑀲𑀗𑁆𑀔𑁆𑀬𑀸𑀢𑀸.

𑀕𑀻𑀢𑀲𑀤𑁆𑀤𑁂 𑀲𑀭𑀸 𑀤𑁆𑀯𑁂 𑀳𑁄𑀦𑁆𑀢𑀺, 𑀙𑀚𑁆𑀚’𑀜𑁆𑀜𑀢𑁆𑀭 𑀙𑀚𑁆𑀚𑀢𑁄 𑀅𑀜𑁆𑀜𑀢𑁆𑀭 𑀙𑀚𑁆𑀚𑀁 𑀯𑀚𑁆𑀚𑁂𑀢𑁆𑀯𑀸 𑀉𑀲𑀪𑁄 𑀕𑀦𑁆𑀥𑀸𑀭𑁄 𑀫𑀚𑁆𑀛𑀺𑀫𑁄 𑀧𑀜𑁆𑀘𑀫𑁄 𑀥𑁂𑀯𑀢𑁄 𑀦𑀺𑀲𑀸𑀤𑁄𑀢𑀺. 𑀏𑀢𑁆𑀣 𑀬𑀼𑀕𑀴𑀢𑁄 𑀤𑁆𑀯𑁂 𑀤𑁆𑀯𑁂 𑀙𑀲𑁆𑀲𑀭𑀸 𑀙𑀲𑀭𑀯𑀦𑁆𑀢𑁄. 𑀬𑀣𑀸 𑀘𑀓𑁆𑀔𑀼 𑀧𑀜𑁆𑀘𑀯𑀡𑁆𑀡𑀁 𑀳𑁄𑀢𑀺, 𑀢𑀣𑀸 𑀏𑀯𑀁 𑀦𑀸𑀲𑀺𑀓𑀸 𑀙𑀩𑁆𑀩𑀡𑁆𑀡𑀸 𑀳𑁄𑀢𑀺, 𑀕𑀻𑀢𑀲𑀤𑁆𑀤𑁂 𑀈𑀓𑀸𑀭𑀅𑀓𑀸𑀭𑀲𑀭𑀤𑁆𑀯𑀬𑀲𑀩𑁆𑀪𑀸𑀯𑀢𑁄 𑀘 𑀙𑀚𑁆𑀚𑀁 𑀞𑀧𑁂𑀢𑁆𑀯𑀸 𑀉𑀲𑀪𑀸𑀤𑀻𑀲𑀼 𑀲𑀭𑀸𑀦𑀁 𑀢𑀺𑀯𑀺𑀥𑀢𑁆𑀢𑀸 𑀘 ‘‘𑀘𑀓𑁆𑀔𑀽’’𑀢𑀺 𑀲𑀭𑀩𑁆𑀬𑀜𑁆𑀚𑀦𑀯𑀲𑁂𑀦 𑀧𑀜𑁆𑀘𑀯𑀡𑁆𑀡𑀸𑀦𑀁 𑀲𑀩𑁆𑀪𑀸𑀯𑀢𑁄 𑀘 ‘‘𑀦𑀸𑀲𑀺𑀓𑀸’’𑀢𑀺 𑀙𑀦𑁆𑀦𑀁 𑀲𑀩𑁆𑀪𑀸𑀯𑀢𑁄 𑀘 𑀏𑀯𑀁 𑀯𑀼𑀢𑁆𑀢𑀁. 𑀏𑀢𑁆𑀣 𑀯𑀼𑀢𑁆𑀢𑀲𑀗𑁆𑀔𑁆𑀬𑀸𑀕𑀻𑀢𑀸𑀤𑀺𑀲𑀤𑁆𑀤𑀲𑀦𑁆𑀦𑀺𑀝𑁆𑀞𑀸𑀦𑀢𑁄 𑀲𑀫𑁆𑀫𑁄𑀳𑀓𑀸𑀭𑀺𑀦𑀻 𑀳𑁄𑀢𑀺.

‘‘𑀧𑀸𑀢𑀼 ¶ 𑀯𑁄 𑀉𑀤𑀺𑀢𑁄 𑀭𑀸𑀚𑀸, 𑀲𑀺𑀭𑀺𑀫𑀸 𑀭𑀢𑁆𑀢𑀫𑀡𑁆𑀟𑀮𑁄;

𑀲𑀓𑀦𑁆𑀢𑀺𑀕𑀳𑀦𑀓𑁆𑀔𑀢𑁆𑀢-𑀲𑀗𑁆𑀖𑀬𑀼𑀢𑁆𑀢𑁄 𑀲𑀼𑀮𑀓𑁆𑀔𑀡𑁄’’𑀢𑀺.

𑀅𑀬𑀁 𑀧𑀓𑀧𑁆𑀧𑀺𑀢𑀸.

𑀲𑀺𑀭𑀺𑀫𑀸 𑀲𑀺𑀭𑀺𑀫𑀦𑁆𑀢𑁄 𑀭𑀢𑁆𑀢𑀫𑀡𑁆𑀟𑀮𑁄 𑀅𑀦𑀼𑀭𑀢𑁆𑀢𑀚𑀦𑀧𑀤𑀫𑀡𑁆𑀟𑀮𑁄, 𑀅𑀦𑀼𑀭𑀢𑁆𑀢𑀅𑀫𑀘𑁆𑀘𑀫𑀡𑁆𑀟𑀮𑁄 𑀯𑀸 𑀲𑀓𑀦𑁆𑀢𑀺𑀕𑀳𑀦𑀓𑁆𑀔𑀢𑁆𑀢𑀲𑀗𑁆𑀖𑀬𑀼𑀢𑁆𑀢𑁄 𑀲𑀓𑀲𑁆𑀲 𑀅𑀢𑁆𑀢𑀦𑁄 𑀅𑀦𑁆𑀢𑁂 𑀲𑀫𑀻𑀧𑁂 𑀕𑀳𑀦𑁂𑀳𑀺 𑀅𑀯𑀺𑀭𑀴𑁂𑀳𑀺 𑀔𑀢𑁆𑀢𑀲𑀗𑁆𑀖𑁂𑀳𑀺 𑀔𑀢𑁆𑀢𑀺𑀬𑀲𑀫𑀽𑀳𑁂𑀳𑀺 𑀬𑀼𑀢𑁆𑀢𑁄 𑀲𑀁𑀬𑀼𑀢𑁆𑀢𑁄 𑀲𑀼𑀮𑀓𑁆𑀔𑀡𑁄 𑀧𑀲𑀢𑁆𑀣𑀧𑀼𑀭𑀺𑀲𑀮𑀓𑁆𑀔𑀡𑁄 𑀉𑀤𑀺𑀢𑁄 𑀧𑀲𑀺𑀤𑁆𑀥𑁄 𑀭𑀸𑀚𑀸 𑀦𑀭𑀺𑀦𑁆𑀤𑁄 𑀯𑁄 𑀢𑀼𑀫𑁆𑀳𑁂 𑀧𑀸𑀢𑀼 𑀭𑀓𑁆𑀔𑀢𑀽𑀢𑀺 𑀅𑀬𑀁 𑀅𑀦𑀥𑀺𑀧𑁆𑀧𑁂𑀢𑀢𑁆𑀣𑁄. 𑀲𑀺𑀭𑀺𑀫𑀸 ‘‘𑀮𑀓𑁆𑀔𑀺𑀬𑀸 𑀯𑀸𑀲𑀝𑁆𑀞𑀸𑀦𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀺𑀭𑀺𑀫𑀦𑁆𑀢𑁄 𑀭𑀢𑁆𑀢𑀫𑀡𑁆𑀟𑀮𑁄 𑀉𑀕𑁆𑀕𑀫𑀦𑁂 𑀭𑀢𑁆𑀢𑀫𑀡𑁆𑀟𑀮𑁄 𑀲𑀓𑀦𑁆𑀢𑀺𑀕𑀳𑀦𑀓𑁆𑀔𑀢𑁆𑀢𑀲𑀗𑁆𑀖𑀬𑀼𑀢𑁆𑀢𑁄 𑀓𑀦𑁆𑀢𑀺𑀲𑀳𑀺𑀢𑁂𑀳𑀺 𑀕𑀳𑀦𑀓𑁆𑀔𑀢𑁆𑀢𑀢𑀸𑀭𑀕𑀡𑁂𑀳𑀺 𑀬𑀼𑀢𑁆𑀢𑁄 𑀲𑀼𑀮𑀓𑁆𑀔𑀡𑁄 𑀲𑀼𑀝𑁆𑀞𑀼 𑀲𑀲𑀮𑀓𑁆𑀔𑀡𑁄 𑀉𑀤𑀺𑀢𑁄 𑀉𑀕𑁆𑀕𑀢𑁄 𑀭𑀸𑀚𑀸 𑀘𑀦𑁆𑀤𑁄 𑀯𑁄 𑀢𑀼𑀫𑁆𑀳𑁂 𑀧𑀸𑀢𑀽𑀢𑀺 𑀉𑀪𑀬𑀧𑀓𑁆𑀔𑀲𑁆𑀲 𑀲𑀸𑀥𑀸𑀭𑀡𑀕𑀼𑀡𑀕𑀼𑀡𑀻𑀧𑀤𑀧𑀭𑀺𑀕𑁆𑀕𑀳𑁂𑀦 𑀇𑀥 𑀯𑀸𑀓𑁆𑀬𑀢𑁆𑀣𑀲𑁆𑀲 𑀅𑀜𑁆𑀜𑀣𑀸 𑀤𑀺𑀲𑁆𑀲𑀫𑀸𑀦𑀢𑀸 𑀳𑁄𑀢𑀺.

‘‘𑀯𑀼𑀘𑁆𑀘𑀢𑀸’𑀤𑁄 𑀇𑀲𑀺𑀢𑁆𑀬𑁂’𑀓𑁄, 𑀲𑀼𑀫𑀳𑀦𑁆𑀢𑁄𑀧𑀓𑀸𑀭𑀯𑀸;

𑀲𑀦𑀸𑀢𑀦𑁄 𑀘 𑀦 𑀇𑀲𑀺, 𑀦 𑀲𑀔𑀸 𑀦 𑀲𑀦𑀸𑀢𑀦𑁄’’𑀢𑀺.

𑀅𑀬𑀁 𑀦𑀸𑀫𑀦𑁆𑀢𑀭𑀺𑀓𑀸.

𑀏𑀓𑁄 𑀆𑀤𑁄 𑀧𑀼𑀩𑁆𑀩𑁂 ‘‘𑀇𑀲𑀻’’𑀢𑀺 𑀯𑀼𑀘𑁆𑀘𑀢𑀺, 𑀲𑀼𑀫𑀳𑀦𑁆𑀢𑁄𑀧𑀓𑀸𑀭𑀯𑀸 𑀅𑀢𑀺𑀫𑀳𑀦𑁆𑀢𑁄𑀧𑀓𑀸𑀭𑀲𑀫𑀦𑁆𑀦𑀸𑀕𑀢𑁄 𑀲𑀦𑀸𑀢𑀦𑁄 𑀘 𑀲𑀲𑁆𑀲𑀢𑁄 𑀘 𑀳𑁄𑀢𑀺, 𑀢𑀣𑀸𑀧𑀺 𑀦 𑀇𑀲𑀺 𑀇𑀲𑀺 𑀦𑀸𑀫 𑀦 𑀳𑁄𑀢𑀺, 𑀦 𑀲𑀔𑀸 𑀫𑀺𑀢𑁆𑀢𑁄𑀧𑀺 𑀦 𑀳𑁄𑀢𑀺, 𑀦 𑀲𑀦𑀸𑀢𑀦𑁄 𑀲𑀲𑁆𑀲𑀢𑁄𑀧𑀺 𑀦 𑀳𑁄𑀢𑀺, 𑀅𑀬𑀁 𑀕𑀫𑁆𑀬𑀫𑀸𑀦𑀢𑁆𑀣𑁄. 𑀲𑀼𑀫𑀳𑀸 𑀅𑀢𑀺𑀫𑀳𑀦𑁆𑀢𑁄 𑀏𑀓𑁄 𑀆𑀤𑁄 𑀦𑀸𑀫𑀸𑀤𑀺𑀫𑁆𑀳𑀺 𑀇𑀲𑀻𑀢𑀺 𑀯𑀼𑀘𑁆𑀘𑀢𑀺, 𑀅𑀦𑁆𑀢𑁄 𑀫𑀚𑁆𑀛𑁂 𑀧𑀓𑀸𑀭𑀯𑀸 𑀧-𑀓𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀲𑀦𑀸𑀢𑀦𑁄 𑀘 𑀲𑀲𑁆𑀲𑀢𑁄 𑀘 𑀳𑁄𑀢𑀺, 𑀇𑀲𑀺𑀧𑀺 𑀦𑀸𑀫 𑀦 𑀳𑁄𑀢𑀺, 𑀫𑀺𑀢𑁆𑀢𑁄𑀧𑀺 𑀦 𑀳𑁄𑀢𑀺, 𑀲𑁄 𑀦𑀸𑀢𑀦𑁄 𑀢𑀦𑀇𑀢𑀺 𑀅𑀓𑁆𑀔𑀭𑀤𑁆𑀯𑀬𑀭𑀳𑀺𑀢𑁄 𑀦 ¶ 𑀳𑁄𑀢𑀺. 𑀆𑀤𑀺𑀫𑀚𑁆𑀛𑀸𑀦𑀁 𑀯𑀼𑀢𑁆𑀢𑀢𑁆𑀢𑀸 𑀅𑀦𑁆𑀢𑁂𑀢𑀺 𑀜𑀸𑀬𑀢𑀺, ‘‘𑀇𑀲𑀺𑀧𑀢𑀦𑀯𑀺𑀳𑀸𑀭𑁄’’𑀢𑀺 𑀕𑀳𑁂𑀢𑀩𑁆𑀩𑀁. 𑀢𑀢𑁆𑀣 𑀇𑀲𑀺𑀧𑀢𑀦𑀦𑀸𑀫𑁂𑀦 𑀇𑀲𑀺𑀆𑀤𑀻𑀦𑀁 𑀕𑀫𑁆𑀬𑀫𑀸𑀦𑀢𑁆𑀣𑀢𑁆𑀢𑀸 𑀦𑀸𑀦𑀢𑁆𑀣𑀓𑀧𑁆𑀧𑀦𑀸 𑀳𑁄𑀢𑀺.

‘‘𑀥𑀸𑀯𑀦𑁆𑀢𑀁 𑀉𑀤𑀬𑀸 𑀅𑀢𑁆𑀣𑀁, 𑀫𑀼𑀳𑀼𑀢𑁆𑀢𑀁 𑀦 𑀦𑀺𑀯𑀢𑁆𑀢𑀢𑀺;

𑀦 𑀘𑀦𑁆𑀤𑀫𑀡𑁆𑀟𑀮𑀁 𑀏𑀢𑀁, 𑀦𑀸𑀧𑀺 𑀆𑀤𑀺𑀘𑁆𑀘𑀫𑀡𑁆𑀟𑀮’’𑀦𑁆𑀢𑀺.

𑀅𑀬𑀁 𑀦𑀺𑀪𑀽𑀢𑀸.

𑀉𑀤𑀬𑀸 𑀉𑀤𑀬𑀢𑁄 𑀧𑀪𑀼𑀢𑀺 𑀅𑀢𑁆𑀣𑀁 𑀬𑀸𑀯 𑀅𑀢𑁆𑀣𑀁 𑀥𑀸𑀯𑀦𑁆𑀢𑀁 𑀚𑀯𑀦𑁆𑀢𑀁 𑀫𑀼𑀳𑀼𑀢𑁆𑀢𑀁 𑀫𑀼𑀳𑀼𑀢𑁆𑀢𑀓𑀸𑀮𑀁 𑀦 𑀦𑀺𑀯𑀢𑁆𑀢𑀢𑀺 𑀦 𑀧𑀼𑀦𑀸𑀯𑀢𑁆𑀢𑀢𑀺. 𑀏𑀢𑀁 𑀘𑀦𑁆𑀤𑀫𑀡𑁆𑀟𑀮𑀫𑁆𑀧𑀺 𑀦 𑀳𑁄𑀢𑀺, 𑀆𑀤𑀺𑀘𑁆𑀘𑀫𑀡𑁆𑀟𑀮𑀫𑁆𑀧𑀺 𑀦 𑀳𑁄𑀢𑀺. 𑀉𑀤𑀬𑀸 𑀧𑀝𑀺𑀲𑀦𑁆𑀥𑀺𑀢𑁄 𑀅𑀢𑁆𑀣𑀁 𑀬𑀸𑀯𑀘𑀼𑀢𑀺. 𑀥𑀸𑀯𑀦𑁆𑀢𑀦𑁆𑀢𑀺 𑀆𑀬𑀼𑀓𑀺𑀘𑁆𑀘𑀢𑁄 𑀆𑀬𑀼𑀘𑀦𑁆𑀤𑀸𑀤𑀻𑀦𑀫𑀢𑁆𑀣𑀸𑀦𑀁, 𑀢𑀧𑁆𑀧𑀓𑀸𑀲𑀓𑀲𑀤𑁆𑀤𑀸𑀦𑀜𑁆𑀘 𑀢𑀼𑀮𑁆𑀬𑀢𑁆𑀢𑀸 𑀏𑀢𑁆𑀣 𑀧𑀢𑀺𑀝𑁆𑀞𑀺𑀢𑀘𑀦𑁆𑀤𑀸𑀤𑀺𑀅𑀢𑁆𑀣𑀦𑁆𑀢𑀭𑀸𑀦𑀁 𑀲𑀫𑁆𑀪𑀯𑁄.

‘‘𑀤𑁂𑀯𑀺𑀁 𑀓𑀺𑀢𑁆𑀢𑀺𑀫𑀳𑀻𑀦𑀸𑀫𑀁, 𑀓𑀴𑀸𑀭𑀢𑁆𑀣𑀯𑁆𑀳𑀬𑀁 𑀧𑀼𑀭𑀺𑀁;

𑀳𑀺𑀢𑁆𑀯𑀸 𑀦 𑀲𑀭𑀺 𑀲𑁄 𑀥𑀻𑀭𑁄, 𑀓𑀭𑁄𑀦𑁆𑀢𑁄𑀧𑁆𑀬𑀼’𑀬𑁆𑀬𑀫𑀯𑁆𑀳𑀬’’𑀦𑁆𑀢𑀺 [𑀓𑀭𑁄𑀦𑁆𑀢𑁄𑀫𑀼𑀢𑁆𑀢𑀫𑀯𑁆𑀳𑀬𑀦𑁆𑀢𑀺 (𑀓.)].

𑀅𑀬𑀁 𑀲𑀫𑀸𑀦𑀲𑀤𑁆𑀤𑀸.

𑀓𑀺𑀢𑁆𑀢𑀺𑀫𑀳𑀻𑀦𑀸𑀫𑀁 𑀓𑀺𑀢𑁆𑀢𑀺𑀫𑀳𑀻𑀦𑀁 𑀤𑁆𑀯𑀺𑀦𑁆𑀦𑀁 𑀦𑀸𑀫𑁂𑀦 𑀲𑀫𑀦𑁆𑀦𑀸𑀕𑀢𑀁 𑀤𑁂𑀯𑀺𑀁 𑀅𑀕𑁆𑀕𑀫𑀳𑁂𑀲𑀺𑀁 𑀓𑀴𑀸𑀭𑀢𑁆𑀣𑀯𑁆𑀳𑀬𑀁 𑀧𑀼𑀭𑀺𑀁 𑀓𑀴𑀸𑀭𑀅𑀢𑁆𑀣𑀸𑀦𑀁 𑀤𑁆𑀯𑀺𑀦𑁆𑀦𑀁 𑀦𑀸𑀫𑁂𑀦 𑀲𑀫𑀦𑁆𑀦𑀸𑀕𑀢𑀁 𑀧𑀼𑀭𑀺𑀁 𑀦𑀕𑀭𑀜𑁆𑀘 𑀲𑁄 𑀥𑀻𑀭𑁄 𑀳𑀺𑀢𑁆𑀯𑀸 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀉𑀬𑁆𑀬𑀫𑀯𑁆𑀳𑀬𑀁 𑀉𑀬𑁆𑀬𑀫𑀦𑀸𑀫𑁂𑀦 𑀲𑀫𑀦𑁆𑀦𑀸𑀕𑀢𑀁 𑀓𑀭𑁄𑀦𑁆𑀢𑁄 𑀅𑀧𑀺 𑀦 𑀲𑀭𑀺 𑀲𑀫𑁆𑀧𑀢𑁆𑀢𑀺𑀁 𑀦𑀸𑀦𑀼𑀲𑀭𑀺, 𑀬𑀲𑁄𑀥𑀭𑀸𑀤𑁂𑀯𑀺𑀜𑁆𑀘 𑀓𑀧𑀺𑀮𑀯𑀢𑁆𑀣𑀼𑀧𑀼𑀭𑀺𑀜𑁆𑀘 𑀳𑀺𑀢𑁆𑀯𑀸 𑀯𑀻𑀭𑀺𑀬𑀲𑀗𑁆𑀔𑀸𑀢𑀧𑀥𑀸𑀦𑀁 𑀓𑀭𑁄𑀦𑁆𑀢𑁄 𑀫𑀳𑀸𑀲𑀢𑁆𑀢𑁄 𑀲𑀫𑁆𑀧𑀢𑁆𑀢𑀺𑀁 𑀦 𑀲𑀭𑀺, 𑀏𑀢𑁆𑀣𑀸𑀪𑀺𑀫𑀢𑀬𑀲𑁄𑀥𑀭𑀸𑀤𑀺𑀲𑀤𑁆𑀤𑀸𑀦𑀁 𑀧𑀭𑀺𑀬𑀸𑀬𑁂𑀳𑀺 𑀓𑀺𑀢𑁆𑀢𑀺𑀫𑀳𑀻𑀲𑀤𑁆𑀤𑀸𑀤𑀻𑀳𑀺 𑀭𑀘𑀺𑀢𑀢𑀸.

‘‘𑀘𑀢𑀼𑀤𑁆𑀤𑀺𑀲𑀸𑀫𑀼𑀔𑀸 𑀩𑀦𑁆𑀥𑀸, 𑀘𑀢𑁆𑀢𑀸𑀭𑁄 𑀲𑀺𑀦𑁆𑀥𑀯𑀸 𑀲𑀬𑀁;

𑀧𑀭𑀺𑀪𑀼𑀜𑁆𑀚𑀦𑁆𑀢𑀺 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀺𑀡𑀁 𑀫𑀚𑁆𑀛𑁂 𑀬𑀣𑀸𑀲𑀼𑀔’’𑀦𑁆𑀢𑀺.

𑀅𑀬𑀁 𑀲𑀫𑁆𑀫𑀼𑀴𑁆𑀳𑀸.

𑀲𑀺𑀦𑁆𑀥𑀯𑀸 ¶ 𑀘𑀢𑁆𑀢𑀸𑀭𑁄 𑀅𑀲𑁆𑀲𑀸 𑀘𑀢𑀼𑀤𑁆𑀤𑀺𑀲𑀸𑀫𑀼𑀔𑀸 𑀬𑀣𑀸 𑀘𑀢𑀼𑀤𑁆𑀤𑀺𑀲𑀸𑀲𑀫𑁆𑀫𑀼𑀔𑀸 𑀳𑁄𑀦𑁆𑀢𑀺, 𑀢𑀣𑀸 𑀩𑀦𑁆𑀥𑀸 𑀫𑀚𑁆𑀛𑁂 𑀦𑀺𑀓𑁆𑀔𑀺𑀢𑁆𑀢𑀁 𑀢𑀺𑀡𑀁 𑀲𑀬𑀁 𑀬𑀣𑀸𑀲𑀼𑀔𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀧𑀺𑀝𑁆𑀞𑀺𑀁 𑀓𑀢𑁆𑀯𑀸 𑀩𑀦𑁆𑀥𑀸 𑀯𑀺𑀬 𑀔𑀸𑀬𑀢𑀺, 𑀢𑁂 𑀧𑀦 𑀲𑀫𑁆𑀫𑀼𑀔𑀁 𑀓𑀢𑁆𑀯𑀸 𑀩𑀦𑁆𑀥𑀸 𑀳𑁄𑀦𑁆𑀢𑀺. 𑀏𑀢𑁆𑀣 ‘‘𑀘𑀢𑀼𑀤𑁆𑀤𑀺𑀲𑀸𑀫𑀼𑀔𑀸𑀩𑀦𑁆𑀥𑀸’’𑀢𑀺 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀧𑀺𑀝𑁆𑀞𑀺𑀁 𑀓𑀢𑁆𑀯𑀸 𑀩𑀦𑁆𑀥𑀸𑀢𑀺 𑀲𑀫𑁆𑀫𑀼𑀴𑁆𑀳𑀢𑀸 𑀳𑁄𑀢𑀺.

‘‘𑀚𑀦𑁄 𑀚𑀻𑀯𑀦𑀚𑀸𑀦𑀦𑁆𑀤-𑀓𑀭𑀩𑀦𑁆𑀥𑀼𑀲𑁆𑀲 𑀪𑀸𑀲𑀺𑀢𑀁;

𑀲𑀓𑁆𑀓𑀭𑁄𑀦𑁆𑀢𑁄𑀯 𑀧𑀧𑁆𑀧𑁄𑀢𑀺, 𑀧𑀼𑀜𑁆𑀜𑀸𑀭𑀺𑀓𑁆𑀔𑀬𑀕𑁄𑀘𑀭𑁂’’𑀢𑀺.

𑀅𑀬𑀁 𑀧𑀸𑀭𑀺𑀳𑀸𑀭𑀺𑀓𑀻.

𑀚𑀻𑀯𑀦𑀚𑀸𑀦𑀦𑁆𑀤𑀓𑀭𑀩𑀦𑁆𑀥𑀼𑀲𑁆𑀲 𑀚𑀻𑀯𑀦𑀢𑁄 𑀉𑀤𑀓𑀢𑁄 𑀚𑀸𑀢𑀸𑀦𑀁 𑀧𑀤𑀼𑀫𑀸𑀦𑀁 𑀆𑀦𑀦𑁆𑀤𑀓𑀭𑀲𑁆𑀲 𑀲𑀽𑀭𑀺𑀬𑀲𑁆𑀲 𑀩𑀦𑁆𑀥𑀼𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀪𑀸𑀲𑀺𑀢𑀁 𑀯𑀘𑀦𑀁 𑀲𑀓𑁆𑀓𑀭𑁄𑀦𑁆𑀢𑁄 𑀧𑀽𑀚𑁂𑀦𑁆𑀢𑁄 𑀚𑀦𑁄 𑀧𑀼𑀜𑁆𑀜𑀸𑀭𑀺𑀓𑁆𑀔𑀬𑀕𑁄𑀘𑀭𑁂 𑀧𑀼𑀜𑁆𑀜𑀸𑀦𑀁 𑀧𑀝𑀺𑀧𑀓𑁆𑀔𑀢𑁆𑀢𑀸 𑀧𑀼𑀜𑁆𑀜𑀸𑀭𑀺𑀲𑀗𑁆𑀔𑀸𑀢𑀸𑀦𑀁 𑀅𑀓𑀼𑀲𑀮𑀸𑀦𑀁 𑀔𑀬𑀲𑁆𑀲 𑀦𑀺𑀫𑀺𑀢𑁆𑀢𑀪𑀽𑀢𑀁 𑀦𑀺𑀩𑁆𑀩𑀸𑀦𑀫𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑁂 𑀫𑀕𑁆𑀕𑀨𑀮𑁂 𑀧𑀧𑁆𑀧𑁄𑀢𑀺 𑀧𑀸𑀧𑀼𑀡𑀸𑀢𑀺. 𑀏𑀢𑁆𑀣 𑀚𑀻𑀯𑀦𑀚𑀸𑀦𑀁 𑀆𑀦𑀦𑁆𑀤𑀓𑀭𑀲𑁆𑀲 𑀩𑀦𑁆𑀥𑀼𑀲𑁆𑀲𑁂𑀢𑀺 𑀘, 𑀧𑀼𑀜𑁆𑀜𑀸𑀭𑀻𑀦𑀁 𑀔𑀬𑀦𑀺𑀫𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑁂𑀢𑀺 𑀘 𑀇𑀫𑀺𑀦𑀸 𑀩𑀼𑀤𑁆𑀥𑁄 𑀫𑀕𑁆𑀕𑀨𑀮𑀸 𑀘 𑀧𑀸𑀭𑀫𑁆𑀧𑀭𑀺𑀬𑁂𑀦 𑀲𑀫𑁆𑀩𑀦𑁆𑀥𑁂𑀦 𑀯𑀼𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑀸𑀦𑀁 𑀩𑀸𑀳𑀼𑀮𑁆𑀮𑀪𑀸𑀯𑁄.

‘‘𑀦 𑀕𑀡𑁆𑀳𑀸𑀢𑀺 𑀫𑀳𑀦𑁆𑀢𑀫𑁆𑀧𑀺, 𑀲𑀤𑁆𑀤𑀁 𑀦 𑀘 𑀯𑀺𑀪𑀽𑀲𑀦𑀁;

𑀘𑀢𑀼𑀧𑁆𑀧𑀤𑀲𑁆𑀲 𑀓𑀲𑁆𑀲𑀸𑀧𑀺, 𑀓𑀡𑁆𑀡𑁄𑀬𑀁 𑀦 𑀓𑀺𑀮𑀸𑀨𑀮𑁄’’𑀢𑀺.

𑀅𑀬𑀁 𑀏𑀓𑀘𑁆𑀙𑀦𑁆𑀦𑀸.

𑀓𑀲𑁆𑀲𑀸𑀧𑀺 𑀘𑀢𑀼𑀧𑁆𑀧𑀤𑀲𑁆𑀲 𑀓𑀡𑁆𑀡𑁄 𑀫𑀳𑀦𑁆𑀢𑀫𑁆𑀧𑀺 𑀲𑀤𑁆𑀤𑀁 𑀦 𑀕𑀡𑁆𑀳𑀸𑀢𑀺, 𑀆𑀭𑀫𑁆𑀫𑀡𑀁 𑀦 𑀓𑀭𑁄𑀢𑀺, 𑀯𑀺𑀪𑀽𑀲𑀦𑀫𑁆𑀧𑀺 𑀦 𑀕𑀡𑁆𑀳𑀸𑀢𑀺. 𑀢𑀣𑀸𑀧𑀺 𑀅𑀬𑀁 𑀓𑀡𑁆𑀡𑁄 𑀅𑀨𑀮𑁄 𑀦 𑀓𑀺𑀮, 𑀲𑀨𑀮𑀢𑁄 𑀦𑀺𑀧𑁆𑀨𑀮𑁄 𑀦 𑀳𑁄𑀢𑀺 𑀓𑀺𑀭. 𑀅𑀲𑁆𑀲𑀓𑀡𑁆𑀡𑁄 𑀭𑀼𑀓𑁆𑀔𑁄. 𑀏𑀢𑁆𑀣 𑀓𑀡𑁆𑀡𑁄𑀢𑀺 𑀆𑀥𑁂𑀬𑁆𑀬𑀁 𑀓𑀢𑁆𑀯𑀸 𑀢𑀤𑀸𑀥𑀸𑀭𑀲𑁆𑀲 𑀅𑀯𑀘𑀦𑀢𑁄 𑀦𑀺𑀲𑁆𑀲𑀬𑀕𑀼𑀢𑁆𑀢𑀺.

‘‘𑀅𑀮𑀗𑁆𑀓𑀭𑁄𑀦𑁆𑀢𑁄 ¶ 𑀪𑀼𑀯𑀦𑀁, 𑀲𑀲𑁆𑀲𑀺𑀭𑀺𑀓𑁄 𑀲𑀤𑁂𑀯𑀓𑀁;

𑀓𑀲𑁆𑀫𑀺𑀁 𑀲𑀜𑁆𑀚𑀸𑀢𑀲𑀁𑀯𑀤𑁆𑀥𑁄, 𑀓𑁄 𑀓𑁂𑀦 𑀦𑀼𑀧𑀮𑀺𑀫𑁆𑀧𑀢𑀻’’𑀢𑀺.

𑀅𑀬𑀁 𑀉𑀪𑀬𑀘𑁆𑀙𑀦𑁆𑀦𑀸.

𑀲𑀲𑁆𑀲𑀺𑀭𑀺𑀓𑁄 𑀲𑀤𑁂𑀯𑀓𑀁 𑀪𑀼𑀯𑀦𑀁 𑀅𑀮𑀗𑁆𑀓𑀭𑁄𑀦𑁆𑀢𑁄𑀢𑀺 𑀩𑀼𑀤𑁆𑀥𑁄 𑀯𑀺𑀬 𑀔𑀸𑀬𑀢𑀺. 𑀪𑀼𑀯𑀦𑀁 𑀪𑀼𑀯𑀦𑀲𑀗𑁆𑀔𑀸𑀢𑀁 𑀓𑀁 𑀚𑀮𑀁 𑀲𑀤𑀸 𑀏𑀯 𑀅𑀮𑀗𑁆𑀓𑀭𑁄𑀦𑁆𑀢𑁄 𑀲𑀲𑁆𑀲𑀺𑀭𑀺𑀓𑁄 𑀮𑀓𑁆𑀔𑀺𑀬𑀲𑀫𑀦𑁆𑀦𑀸𑀕𑀢𑁄 𑀓𑀲𑁆𑀫𑀺𑀁 𑀚𑀮𑁂 𑀲𑀜𑁆𑀚𑀸𑀢𑀲𑀁𑀯𑀤𑁆𑀥𑁄 𑀓𑁄 𑀓𑀢𑀭𑁄 𑀓𑁂𑀦 𑀚𑀮𑁂𑀦 𑀦 𑀉𑀧𑀮𑀺𑀫𑁆𑀧𑀢𑀺 𑀦 𑀮𑀺𑀫𑁆𑀧𑀢𑀺. 𑀧𑀤𑀼𑀫𑁄𑀢𑀺 𑀯𑀺𑀲𑀚𑁆𑀚𑀦𑀁. 𑀧𑀤𑀼𑀫𑁄 𑀳𑀺 𑀧𑀼𑀁𑀦𑀧𑀼𑀁𑀲𑀓𑀮𑀺𑀗𑁆𑀕𑁄. 𑀇𑀳 𑀚𑀮𑀧𑀤𑀼𑀫𑀸𑀦𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀙𑀸𑀤𑀺𑀢𑀢𑁆𑀢𑀸 𑀉𑀪𑀬𑀘𑁆𑀙𑀦𑁆𑀦𑀸 𑀦𑀸𑀫.

‘‘𑀆𑀤𑁄 𑀲𑁄𑀬𑁂𑀯 𑀬𑁄 𑀅𑀦𑁆𑀢𑁂, 𑀫𑀚𑁆𑀛𑀺𑀫𑀲𑁆𑀲𑀸𑀤𑀺 𑀫𑀚𑁆𑀛𑀺𑀫𑁄;

𑀲𑀺𑀤𑁆𑀥𑀦𑁆𑀢𑀸𑀤𑀻𑀲𑀼 𑀯𑀢𑁆𑀢𑀦𑁆𑀢𑀁, 𑀅𑀲𑀗𑁆𑀔𑀢𑀧𑀤𑀁 𑀯𑀤𑀸’’𑀢𑀺.

𑀅𑀬𑀁 𑀲𑀁𑀓𑀺𑀡𑁆𑀡𑀸.

𑀅𑀦𑁆𑀢𑁂 𑀅𑀯𑀲𑀸𑀦𑁂 𑀬𑁄 𑀳𑁄𑀢𑀺, 𑀆𑀤𑁄𑀧𑀺 𑀲𑁄𑀬𑁂𑀯 𑀳𑁄𑀢𑀺, 𑀫𑀚𑁆𑀛𑀺𑀫𑀲𑁆𑀲 𑀆𑀤𑀺𑀪𑀽𑀢𑁄 𑀫𑀚𑁆𑀛𑀺𑀫𑁄 𑀏𑀯 𑀳𑁄𑀢𑀺, 𑀲𑀺𑀤𑁆𑀥𑀁 𑀦𑀺𑀧𑁆𑀨𑀦𑁆𑀦𑀁 𑀢𑀸𑀤𑀻𑀲𑀼 𑀅𑀭𑀺𑀬𑁂𑀲𑀼 𑀯𑀢𑁆𑀢𑀦𑁆𑀢𑀁 𑀅𑀲𑀗𑁆𑀔𑀢𑀧𑀤𑀁 𑀯𑀤 𑀓𑀣𑁂𑀳𑀻𑀢𑀺 𑀅𑀬𑀫𑀧𑀭𑀢𑁆𑀣𑁄. 𑀆𑀤𑁄 𑀆𑀤𑀺𑀫𑁆𑀳𑀺 𑀲𑁄𑀬𑁂𑀯 𑀲𑀓𑀸𑀭𑁄 𑀏𑀯 𑀅𑀦𑁆𑀢𑁂 𑀧𑀭𑀺𑀬𑁄𑀲𑀸𑀦𑁂 𑀬𑁄 𑀬𑀓𑀸𑀭𑁄𑀬𑁂𑀯, 𑀫𑀚𑁆𑀛𑀺𑀫𑁄 𑀫𑀚𑁆𑀛𑀺𑀫𑀯𑀡𑁆𑀡𑁄 𑀫𑀚𑁆𑀛𑀺𑀫𑀲𑁆𑀲 𑀲𑀤𑁆𑀤𑀲𑁆𑀲 𑀆𑀤𑀺 𑀫𑀓𑀸𑀭𑁄, 𑀲𑀺𑀤𑁆𑀥𑀦𑁆𑀢𑀸𑀤𑀻𑀲𑀼 𑀫𑀢𑀲𑀫𑀬𑀓𑀸𑀮𑀸𑀤𑀻𑀲𑀼 𑀯𑀢𑁆𑀢𑀦𑁆𑀢𑀁 𑀯𑀸𑀘𑀓𑀪𑀸𑀯𑁂𑀦 𑀧𑀯𑀢𑁆𑀢𑀦𑁆𑀢𑀁 𑀅𑀲𑀗𑁆𑀔𑀢𑀧𑀤𑀁 𑀲𑀗𑁆𑀔𑀢𑀢𑁄 𑀅𑀜𑁆𑀜𑀢𑁆𑀢𑀸 𑀅𑀲𑀗𑁆𑀔𑀢𑀪𑀽𑀢𑀁 𑀧𑀜𑁆𑀜𑀢𑁆𑀢𑀺𑀁 𑀯𑀤 𑀓𑀣𑁂𑀳𑀻𑀢𑀺. 𑀲𑀫𑀬𑀲𑀤𑁆𑀤𑁄 𑀳𑀺 𑀦𑀸𑀫𑀧𑀜𑁆𑀜𑀢𑁆𑀢𑀺. 𑀏𑀢𑁆𑀣 𑀲𑀺𑀤𑁆𑀥𑀦𑁆𑀢𑀲𑀤𑁆𑀤𑁂𑀦 𑀆𑀤𑀺𑀲𑀤𑁆𑀤𑀲𑁆𑀲 𑀲𑀗𑁆𑀕𑀳𑀺𑀢𑀢𑁆𑀢𑀸 𑀢𑀸𑀤𑀺𑀅𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀅𑀢𑁆𑀣𑀲𑁆𑀲 𑀕𑀼𑀴𑁆𑀳𑀢𑀸𑀬 𑀲𑀫𑀸𑀕𑀢𑀸𑀮𑀓𑁆𑀔𑀡𑁂𑀦 𑀘 ‘‘𑀲𑁄’’𑀢𑀺 ‘‘𑀬𑁄’’𑀢𑀺 ‘‘𑀅𑀲𑀗𑁆𑀔𑀢𑀧𑀤’’𑀦𑁆𑀢𑀺 𑀅𑀜𑁆𑀜𑀢𑁆𑀣𑀭𑀼𑀴𑁆𑀳𑀲𑀤𑁆𑀤𑁂𑀦 𑀯𑀜𑁆𑀘𑀺𑀢𑀢𑁆𑀢𑀸 𑀯𑀜𑁆𑀘𑀺𑀢𑀸𑀮𑀓𑁆𑀔𑀡𑁂𑀦 𑀘 𑀲𑀫𑀬𑀲𑀤𑁆𑀤𑁂 𑀦𑀸𑀦𑀢𑁆𑀣𑀓𑀧𑁆𑀧𑀦𑀢𑁄 𑀦𑀸𑀫𑀦𑁆𑀢𑀭𑀺𑀓𑀸𑀮𑀓𑁆𑀔𑀡𑁂𑀦 𑀘𑀸𑀢𑀺 𑀢𑀻𑀳𑀺𑀧𑀺 𑀮𑀓𑁆𑀔𑀡𑁂𑀳𑀺 𑀫𑀺𑀲𑁆𑀲𑀺𑀢𑁄𑀢𑀺. 𑀲𑁂𑀲𑁂𑀲𑀼𑀧𑀺 𑀲𑀁𑀓𑀺𑀡𑁆𑀡𑀢𑁆𑀢𑀁 𑀏𑀯𑀫𑁂𑀯 ¶ 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀮𑀓𑁆𑀔𑀡𑀸𑀦𑀼𑀲𑀸𑀭𑁂𑀦𑁂𑀯 𑀲𑀫𑀸𑀕𑀢𑀸𑀤𑀻𑀦𑀁 𑀅𑀦𑁆𑀯𑀢𑁆𑀣𑀲𑀜𑁆𑀜𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁩𑁪.

𑀤𑁂𑀲𑀓𑀸𑀮𑀓𑀮𑀸𑀮𑁄𑀓-𑀜𑀸𑀬𑀸𑀕𑀫𑀯𑀺𑀭𑁄𑀥𑀺 𑀬𑀁;

𑀢𑀁 𑀯𑀺𑀭𑁄𑀥𑀺𑀧𑀤𑀁 𑀘𑁂’𑀢-𑀫𑀼𑀤𑀸𑀳𑀭𑀡𑀢𑁄 𑀨𑀼𑀝𑀁.

𑁩𑁪. ‘‘𑀤𑁂𑀲𑀺’’𑀘𑁆𑀘𑀸𑀤𑀺. 𑀤𑁂𑀲𑁄 𑀣𑀮𑀚𑀮𑀤𑁂𑀲𑀸𑀤𑀺. 𑀓𑀸𑀮𑁄 𑀭𑀢𑁆𑀢𑀺𑀦𑁆𑀤𑀺𑀯𑁄. 𑀓𑀮𑀸 𑀦𑀘𑁆𑀘𑀕𑀻𑀢𑀸𑀤𑀬𑁄. 𑀮𑁄𑀓𑁄 𑀘𑀭𑀸𑀘𑀭𑀪𑀽𑀢𑀧𑁆𑀧𑀯𑀢𑁆𑀢𑀺. 𑀜𑀸𑀬𑁄 𑀬𑀼𑀢𑁆𑀢𑀺. 𑀆𑀕𑀫𑁄 𑀇𑀥 𑀩𑀼𑀤𑁆𑀥𑀯𑀘𑀦𑀁. 𑀅𑀜𑁆𑀜𑀢𑁆𑀣 𑀢𑀼 𑀲𑀼𑀢𑀺𑀥𑀫𑁆𑀫𑀲𑀁𑀳𑀺𑀢𑀸, 𑀢𑁂 𑀘. 𑀢𑁂𑀳𑀺 𑀯𑀺𑀭𑁄𑀥𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀤𑁂𑀲…𑀧𑁂… 𑀯𑀺𑀭𑁄𑀥𑀺. 𑀬𑀦𑁆𑀢𑀺 𑀅𑀦𑀼𑀯𑀤𑀺𑀢𑁆𑀯𑀸. 𑀢𑀁 𑀯𑀺𑀭𑁄𑀥𑀺𑀧𑀤𑀦𑁆𑀢𑀺 𑀯𑀺𑀥𑀻𑀬𑀢𑁂. 𑀏𑀢𑀜𑁆𑀘 𑀧𑀤𑀁 𑀉𑀤𑀸𑀳𑀭𑀡𑀢𑁄 𑀮𑀓𑁆𑀔𑀺𑀬𑀢𑁄 𑀨𑀼𑀝𑀁 𑀧𑀸𑀓𑀝𑀁. 𑀬𑀢𑁄 𑀚𑀮𑀚𑀸𑀤𑀻𑀦𑀁 𑀣𑀮𑀸𑀤𑀻𑀲𑀼 𑀧𑀸𑀢𑀼𑀪𑀸𑀯𑀸𑀤𑀺, 𑀭𑀢𑁆𑀬𑀸𑀤𑀻𑀲𑀼 𑀲𑀫𑁆𑀪𑀯𑀦𑁆𑀢𑀸𑀦𑀁 𑀓𑀼𑀲𑀼𑀫𑀸𑀤𑀻𑀦𑀁 𑀤𑀺𑀯𑀸𑀤𑀻𑀲𑀼 𑀲𑀫𑁆𑀪𑀯𑁄 𑀘, ‘‘𑀦𑀘𑁆𑀘𑀕𑀻𑀢𑀸𑀤𑀺𑀘𑀢𑀼𑀲𑀝𑁆𑀞𑀺𑀬𑀸 𑀓𑀮𑀸𑀲𑀼 𑀪𑀺𑀦𑁆𑀦𑀙𑀚𑁆𑀚𑁄 𑀦𑀸𑀫 𑀲𑀢𑁆𑀢𑀲𑀭𑁄’’𑀢𑀺𑀆𑀤𑀺𑀦𑀸 𑀓𑀮𑀸𑀲𑀢𑁆𑀣𑀸𑀪𑀺𑀳𑀺𑀢𑀮𑀓𑁆𑀔𑀡𑀸𑀢𑀺𑀓𑁆𑀓𑀫𑀯𑀺𑀭𑁄𑀥𑁄 𑀘, ‘‘𑀅𑀕𑁆𑀕𑀺𑀲𑀻𑀢𑀮𑁄, 𑀦𑀺𑀲𑁆𑀲𑀸𑀭𑁄 𑀔𑀤𑀺𑀭𑁄’’𑀢𑀺𑀆𑀤𑀺𑀦𑀸 𑀮𑁄𑀓𑀲𑀻𑀫𑀸𑀢𑀺𑀓𑁆𑀓𑀫𑁄 𑀘, 𑀯𑀼𑀢𑁆𑀢𑀸𑀬𑀧𑀸’𑀦𑀭𑀼𑀧𑁆𑀧𑀢𑁆𑀢𑀲𑀫𑀼𑀧𑁆𑀧𑀢𑁆𑀢𑀺𑀬𑀸 𑀫𑀺𑀤𑁆𑀥𑀲𑁆𑀲 𑀭𑀽𑀧𑀪𑀸𑀯𑀸𑀧𑀸𑀤𑀦𑀸𑀤𑀺𑀜𑀸𑀬𑀯𑀺𑀭𑁄𑀥𑁄 𑀘, 𑀬𑀣𑀸𑀲𑀓𑀫𑀸𑀕𑀫𑁂𑀦 𑀯𑀺𑀭𑁄𑀥𑁄 𑀘 𑀲𑀼𑀔𑁂𑀦 𑀘 𑀲𑀓𑁆𑀓𑀸 𑀧𑀸𑀓𑀝𑀢𑁆𑀢𑀸 𑀯𑀺𑀜𑁆𑀜𑀸𑀢𑀼𑀁, 𑀢𑀢𑁄 𑀲𑀩𑁆𑀩𑀫𑁂𑀢𑀁 𑀦𑁄𑀤𑀸𑀳𑀝𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁪. 𑀏𑀯𑀁 𑀬𑀫𑀓𑀧𑀳𑁂𑀴𑀺𑀓𑀸𑀦𑀫𑀤𑀲𑁆𑀲𑀦𑁂 𑀓𑀸𑀭𑀡𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀉𑀤𑁆𑀤𑁂𑀲𑀓𑁆𑀓𑀫𑁂𑀦 𑀲𑀫𑁆𑀧𑀢𑁆𑀢𑀯𑀺𑀭𑁄𑀥𑀺𑀤𑁄𑀲𑀁 ‘‘𑀤𑁂𑀲𑀓𑀸𑀮𑀺’’𑀘𑁆𑀘𑀸𑀤𑀺𑀦𑀸 𑀯𑀤𑀢𑀺. 𑀬𑀁 𑀧𑀤𑀁 𑀤𑁂𑀲𑁄 𑀣𑀮𑀚𑀮𑀧𑀩𑁆𑀩𑀢𑀸𑀤𑀺. 𑀓𑀸𑀮𑁄 𑀭𑀢𑁆𑀢𑀺𑀦𑁆𑀤𑀺𑀯𑁄 𑀳𑁂𑀫𑀦𑁆𑀢𑀸𑀤𑀺𑀯𑀲𑁂𑀦 𑀢𑀺𑀯𑀺𑀥𑁄, 𑀯𑀲𑀦𑁆𑀢𑀸𑀤𑀺𑀯𑀲𑁂𑀦 𑀙𑀩𑁆𑀩𑀺𑀥𑁄. 𑀓𑀮𑀸 𑀦𑀘𑁆𑀘𑀕𑀻𑀢𑀸𑀤𑀺𑀘𑀢𑀼𑀲𑀝𑁆𑀞𑀺. 𑀮𑁄𑀓𑁄 𑀣𑀸𑀯𑀭𑀚𑀗𑁆𑀕𑀫𑀪𑀽𑀢𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑁄. 𑀜𑀸𑀬𑁄 𑀬𑀼𑀢𑁆𑀢𑀺. 𑀆𑀕𑀫𑁄 𑀇𑀳 𑀩𑀼𑀤𑁆𑀥𑀯𑀘𑀦𑀁, 𑀅𑀜𑁆𑀜𑀢𑁆𑀣 𑀧𑀦 𑀲𑀼𑀢𑀺𑀥𑀫𑁆𑀫𑀲𑀁𑀳𑀺𑀢𑁄 𑀘. 𑀢𑁂𑀳𑀺 𑀯𑀺𑀭𑁄𑀥𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀤𑁂𑀲…𑀧𑁂… 𑀯𑀺𑀭𑁄𑀥𑀺. 𑀢𑀁 𑀯𑀺𑀭𑁄𑀥𑀺𑀧𑀤𑀁 𑀦𑀸𑀫. ¶ 𑀏𑀢𑀁 𑀯𑀺𑀭𑁄𑀥𑀺𑀧𑀤𑀁 𑀉𑀤𑀸𑀳𑀭𑀡𑀢𑁄 𑀮𑀓𑁆𑀔𑀺𑀬𑀢𑁄 𑀨𑀼𑀝𑀁 𑀧𑀭𑀺𑀩𑁆𑀬𑀢𑁆𑀢𑀁. 𑀯𑀲𑁆𑀲𑀺𑀓𑀚𑀸𑀢𑀺𑀲𑀼𑀫𑀦𑀸𑀤𑀻𑀦𑀁 𑀚𑀮𑀚𑀸𑀤𑀺𑀪𑀸𑀯𑁄 𑀘, 𑀧𑀤𑀼𑀫𑀓𑀼𑀫𑀼𑀤𑀸𑀤𑀻𑀦𑀁 𑀣𑀮𑀚𑀸𑀤𑀺𑀪𑀸𑀯𑁄 𑀘, 𑀭𑀢𑁆𑀢𑀺𑀆𑀤𑀻𑀲𑀼 𑀮𑀩𑁆𑀪𑀫𑀸𑀦𑀸𑀦𑀁 𑀓𑀼𑀫𑀼𑀤𑀸𑀤𑀻𑀦𑀁 𑀤𑀺𑀯𑀸𑀤𑀻𑀲𑀼 𑀲𑀫𑁆𑀪𑀯𑁄 𑀘, 𑀦𑀘𑁆𑀘𑀕𑀻𑀢𑀸𑀤𑀺𑀘𑀢𑀼𑀲𑀝𑁆𑀞𑀺𑀬𑀸 𑀓𑀮𑀸𑀲𑀼 ‘‘𑀙𑀚𑁆𑀚𑁄 𑀉𑀲𑀪𑁄 𑀕𑀦𑁆𑀥𑀸𑀭𑁄 𑀫𑀚𑁆𑀛𑀺𑀫𑁄 𑀧𑀜𑁆𑀘𑀫𑁄 𑀥𑁂𑀯𑀢𑁄 𑀦𑀺𑀲𑀸𑀤𑁄’’𑀢𑀺 𑀤𑀲𑁆𑀲𑀺𑀢𑀲𑀢𑁆𑀢𑀲𑀭𑀸𑀦𑀫𑁂𑀓𑀤𑁂𑀲𑀲𑁆𑀲 𑀙𑀚𑁆𑀚𑀲𑁆𑀲 𑀪𑀺𑀦𑁆𑀦𑀲𑀢𑁆𑀢𑀲𑀭𑁄 𑀙𑀚𑁆𑀚𑁄 𑀦𑀸𑀫𑀸𑀢𑀺 𑀲𑀫𑀼𑀤𑀸𑀬𑀯𑀲𑁂𑀦 𑀯𑁄𑀳𑀸𑀭𑀓𑀭𑀡𑀸𑀤𑀻𑀳𑀺 𑀲𑀢𑁆𑀣𑀸𑀕𑀢𑀢𑀁, 𑀮𑀓𑁆𑀔𑀡𑀸𑀢𑀺𑀓𑁆𑀓𑀫𑀜𑁆𑀘, ‘‘𑀅𑀕𑁆𑀕𑀺 𑀲𑀻𑀢𑀮𑁄, 𑀘𑀦𑁆𑀤𑀦𑀁 𑀉𑀡𑁆𑀳𑀁, 𑀔𑀤𑀺𑀭𑀭𑀼𑀓𑁆𑀔𑁄 𑀦𑀺𑀲𑁆𑀲𑀸𑀭𑁄, 𑀏𑀭𑀡𑁆𑀟𑁄 𑀲𑀲𑀸𑀭𑁄’’ 𑀇𑀘𑁆𑀘𑀸𑀤𑀺𑀦𑀸 𑀮𑁄𑀓𑀫𑀭𑀺𑀬𑀸𑀤𑀸𑀢𑀺𑀓𑁆𑀓𑀫𑁄 𑀘, 𑀫𑀺𑀤𑁆𑀥𑀲𑁆𑀲 𑀅𑀭𑀽𑀧𑀪𑀸𑀯𑀼𑀧𑀧𑀢𑁆𑀢𑀺𑀬𑀸 𑀯𑀼𑀢𑁆𑀢𑀸𑀬𑀧𑀺 𑀭𑀽𑀧𑀪𑀸𑀯𑀲𑀸𑀥𑀦𑀲𑀤𑀺𑀲𑀬𑀼𑀢𑁆𑀢𑀺𑀯𑀺𑀭𑁄𑀥𑀺𑀓𑀣𑀦𑀜𑁆𑀘, 𑀬𑀣𑀸𑀲𑀓𑀫𑀸𑀕𑀫𑀫𑀢𑀺𑀓𑁆𑀓𑀫𑁆𑀫 𑀓𑀣𑀦𑀜𑁆𑀘𑀸𑀢𑀺 𑀲𑀩𑁆𑀩𑁂𑀲𑀁 𑀯𑀺𑀭𑀼𑀤𑁆𑀥𑀲𑀪𑀸𑀯𑀲𑁆𑀲 𑀧𑀸𑀓𑀝𑀢𑁆𑀢𑀸 𑀉𑀤𑀸𑀳𑀭𑀡𑀁 𑀦 𑀤𑀲𑁆𑀲𑀬𑀺𑀲𑁆𑀲𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀫𑁂𑀲𑀫𑁂𑀯 𑀤𑁂𑀲𑀸𑀤𑀺𑀯𑀺𑀭𑁄𑀥𑀻𑀦𑀫𑀯𑀺𑀭𑀼𑀤𑁆𑀥𑀢𑁆𑀢𑀁 𑀏𑀢𑁆𑀣𑁂𑀯 𑀯𑀺𑀭𑁄𑀥𑀺𑀧𑀤𑀤𑁄𑀲𑀧𑀭𑀺𑀳𑀸𑀭𑁂 ‘‘𑀩𑁄𑀥𑀺𑀲𑀢𑁆𑀢𑀧𑁆𑀧𑀪𑀸𑀯𑁂𑀦𑀸’’𑀢𑀺𑀘𑁆𑀘𑀸𑀤𑀺𑀦𑀸 𑀤𑀺𑀲𑁆𑀲𑀢𑀺. 𑀤𑁂𑀲…𑀧𑁂… 𑀕𑀫𑁂𑀳𑀺 𑀯𑀺𑀭𑁄𑀥𑁄, 𑀲𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀤𑁂𑀲…𑀧𑁂… 𑀯𑀺𑀭𑁄𑀥𑀺. 𑀦𑀺𑀦𑁆𑀤𑀸𑀬𑀁 𑀅𑀬𑀫𑀲𑁆𑀲𑀢𑁆𑀣𑀻𑀢𑀺 𑀯𑀺𑀯𑀘𑁆𑀙𑀺𑀢𑀸.

𑁩𑁫.

𑀬’𑀤𑀧𑁆𑀧𑀢𑀻𑀢’𑀫𑀸𑀦𑀻𑀬, 𑀯𑀢𑁆𑀢𑀩𑁆𑀩𑀁 𑀦𑁂𑀬𑁆𑀬𑀫𑀸𑀳𑀼 𑀢𑀁;

𑀬𑀣𑀸 𑀲𑀩𑁆𑀩𑀸𑀧𑀺 𑀥𑀯𑀮𑀸, 𑀤𑀺𑀲𑀸 𑀭𑁄𑀘𑀦𑁆𑀢𑀺 𑀭𑀢𑁆𑀢𑀺𑀬𑀁.

𑁩𑁫. ‘‘𑀬’’𑀫𑀺𑀘𑁆𑀘𑀸𑀤𑀺. 𑀅𑀧𑁆𑀧𑀢𑀻𑀢𑀁 𑀲𑀤𑁆𑀤𑀢𑁄, 𑀅𑀢𑁆𑀣𑀢𑁄 𑀯𑀸 𑀅𑀦𑀥𑀺𑀕𑀢𑀁 𑀦𑀳𑁆𑀬𑀜𑁆𑀜𑀣𑀸𑀯𑀕𑀫𑁄 𑀕𑀦𑁆𑀣𑀦𑁆𑀢𑀭𑀸𑀪𑀸𑀯𑀢𑁄. 𑀯𑀓𑁆𑀔𑀢𑀺 𑀳𑀺 ‘‘𑀤𑀼𑀮𑁆𑀮𑀪𑀸𑀯𑀕𑀢𑀻 𑀲𑀤𑁆𑀤-𑀲𑀸𑀫𑀢𑁆𑀣𑀺𑀬𑀯𑀺𑀮𑀗𑁆𑀖𑀺𑀦𑀻’’𑀢𑀺. 𑀬𑀁 𑀓𑀺𑀜𑁆𑀘𑀺 𑀧𑀤𑀁 𑀲𑀫𑀸𑀦𑀻𑀬 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀁, 𑀢𑀁 𑀦𑁂𑀬𑁆𑀬𑀫𑀸𑀳𑀼. 𑀬𑀣𑁂𑀢𑁆𑀬𑀼𑀤𑀸𑀳𑀭𑀢𑀺. 𑀲𑀩𑁆𑀩𑀸𑀧𑀺 𑀲𑀓𑀮𑀸𑀧𑀺 𑀤𑀺𑀲𑀸 𑀧𑀼𑀩𑁆𑀩𑀤𑀺𑀲𑀸𑀤𑀬𑁄 𑀤𑀲 𑀤𑀺𑀲𑀸 𑀭𑀢𑁆𑀢𑀺𑀬𑀁 𑀭𑀚𑀦𑁆𑀬𑀁 𑀥𑀯𑀮𑀸 𑀉𑀚𑁆𑀚𑀮𑀸 𑀭𑁄𑀘𑀦𑁆𑀢𑀺 𑀤𑀺𑀧𑁆𑀧𑀦𑁆𑀢𑀻𑀢𑀺 𑀏𑀢𑁆𑀢𑀓𑁂 𑀦𑀺𑀤𑁆𑀤𑀺𑀝𑁆𑀞𑁂 𑀘𑀦𑁆𑀤𑀫𑀭𑀻𑀘𑀺𑀦𑁄 𑀏𑀢𑁆𑀣 𑀦𑁂𑀬𑁆𑀬𑀢𑁆𑀢𑀁.

𑁩𑁫. 𑀇𑀤𑀸𑀦𑀺 𑀦𑁂𑀬𑁆𑀬𑀤𑁄𑀲𑀫𑀼𑀤𑀸𑀳𑀭𑀢𑀺 ‘‘𑀬’’𑀫𑀺𑀘𑁆𑀘𑀸𑀤𑀺𑀦𑀸. 𑀬𑀁 𑀧𑀤𑀁 𑀅𑀧𑁆𑀧𑀢𑀻𑀢𑀁 𑀧𑀤𑀦𑁆𑀢𑀭𑁂𑀦, 𑀢𑁂𑀦𑀸𑀪𑀺𑀳𑀺𑀢𑀢𑁆𑀣𑁂𑀦 𑀯𑀸 ‘‘𑀇𑀫𑀲𑁆𑀲𑀢𑁆𑀣𑁄𑀬’’𑀫𑀺𑀢𑀺 ¶ 𑀅𑀯𑀺𑀜𑁆𑀜𑀸𑀢𑀁 𑀆𑀦𑀻𑀬 𑀯𑀢𑁆𑀢𑀩𑁆𑀩𑀁, 𑀢𑀢𑁄𑀬𑁂𑀯 𑀧𑀤𑀦𑁆𑀢𑀭𑀫𑀸𑀦𑀻𑀬 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺, 𑀢𑀁 𑀦𑁂𑀬𑁆𑀬𑀫𑀸𑀳𑀼 ‘‘𑀦𑁂𑀬𑁆𑀬𑀤𑁄𑀲𑁄’’𑀢𑀺 𑀧𑁄𑀭𑀸𑀡𑀸 𑀆𑀳𑀼. 𑀬𑀣𑀸 𑀢𑀢𑁆𑀣𑁄𑀤𑀸𑀳𑀭𑀡𑀫𑀻𑀤𑀺𑀲𑀁 ‘‘𑀲𑀩𑁆𑀩𑀸𑀧𑀺 𑀥𑀯𑀮𑀸 𑀤𑀺𑀲𑀸 𑀭𑁄𑀘𑀦𑁆𑀢𑀺 𑀭𑀢𑁆𑀢𑀺𑀬’’𑀦𑁆𑀢𑀺. 𑀲𑀩𑁆𑀩𑀸𑀧𑀺 𑀤𑀺𑀲𑀸 𑀧𑀼𑀩𑁆𑀩𑀤𑀓𑁆𑀔𑀺𑀡𑀸𑀤𑀬𑁄 𑀤𑀲 𑀤𑀺𑀲𑀸 𑀥𑀯𑀮𑀸 𑀲𑁂𑀢𑀸 𑀭𑀢𑁆𑀢𑀺𑀬𑀁 𑀭𑀚𑀦𑁆𑀬𑀁 𑀭𑁄𑀘𑀦𑁆𑀢𑀺 𑀤𑀺𑀧𑁆𑀧𑀦𑁆𑀢𑀺. 𑀏𑀢𑁆𑀣 𑀤𑀺𑀲𑀸𑀬 𑀯𑀺𑀲𑁂𑀲𑀦𑀁 𑀥𑀯𑀮𑀕𑀼𑀡𑀁 𑀓𑁂𑀮𑀸𑀲𑀓𑀽𑀝𑀲𑀼𑀥𑀸𑀪𑀺𑀢𑁆𑀢𑀺𑀘𑀦𑁆𑀤𑀭𑀁𑀲𑀺𑀆𑀤𑀻𑀲𑀼 𑀓𑀼𑀢𑁄 𑀲𑀜𑁆𑀚𑀸𑀢𑀫𑀺𑀢𑀺 𑀅𑀦𑀺𑀘𑁆𑀙𑀺𑀢𑀢𑁆𑀢𑀸 𑀅𑀜𑁆𑀜𑀦𑀺𑀯𑀢𑁆𑀢𑀦𑀢𑁆𑀣𑀁 𑀘𑀦𑁆𑀤𑀓𑀺𑀭𑀡𑀸𑀤𑀺𑀯𑀸𑀘𑀓𑀧𑀤𑀁 𑀆𑀦𑁂𑀢𑁆𑀯𑀸 𑀥𑀯𑀮𑀢𑀸 𑀇𑀫𑀺𑀦𑁂𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸 𑀥𑀯𑀮 𑀧𑀤𑀁 𑀦𑁂𑀬𑁆𑀬𑀤𑁄𑀲𑁂𑀦 𑀤𑀼𑀝𑁆𑀞𑀁 𑀳𑁄𑀢𑀺. 𑀧𑀢𑀻𑀢𑀁 𑀯𑀺𑀜𑁆𑀜𑀸𑀢𑀁, 𑀦 𑀧𑀢𑀻𑀢𑀁 𑀅𑀧𑁆𑀧𑀢𑀻𑀢𑀁. 𑀏𑀢𑁆𑀣 𑀅𑀓𑀸𑀭𑁄 𑀧𑀲𑀚𑁆𑀚𑀧𑀝𑀺𑀲𑁂𑀥𑁂.

𑁩𑁬.

𑀦𑁂𑀤𑀺𑀲𑀁 𑀩𑀳𑀼 𑀫𑀜𑁆𑀜𑀦𑁆𑀢𑀺, 𑀲𑀩𑁆𑀩𑁂 𑀲𑀩𑁆𑀩𑀢𑁆𑀣 𑀯𑀺𑀜𑁆𑀜𑀼𑀦𑁄;

𑀤𑀼𑀮𑁆𑀮𑀪𑀸’𑀯𑀕𑀢𑀻 𑀲𑀤𑁆𑀤-𑀲𑀸𑀫𑀢𑁆𑀣𑀺𑀬𑀯𑀺𑀮𑀗𑁆𑀖𑀺𑀦𑀻.

𑁩𑁬. 𑀅𑀧𑁆𑀧𑀢𑀻𑀢𑀁 𑀦𑀺𑀘𑁆𑀙𑀦𑁆𑀢𑀺 𑀯𑀺𑀜𑁆𑀜𑀽𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀦𑁂’’𑀢𑀺𑀆𑀤𑀺. 𑀈𑀤𑀺𑀲𑀁 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀦𑁂𑀬𑁆𑀬𑀁 𑀲𑀩𑁆𑀩𑁂𑀧𑀺 𑀯𑀺𑀜𑁆𑀜𑀼𑀦𑁄 𑀜𑁂𑀬𑁆𑀬𑀯𑀺𑀤𑀽 𑀲𑀩𑁆𑀩𑀢𑁆𑀣 𑀕𑀚𑁆𑀚𑀸𑀤𑀺𑀓𑁂 𑀦 𑀩𑀳𑀼 𑀫𑀜𑁆𑀜𑀦𑁆𑀢𑀺 𑀦 𑀲𑀫𑁆𑀪𑀸𑀯𑁂𑀦𑁆𑀢𑀺 𑀦𑀧𑁆𑀧𑀬𑀼𑀚𑁆𑀚𑀦𑁆𑀢𑀺. 𑀓𑀺𑀁 𑀦 𑀩𑀳𑀼𑀫𑀜𑁆𑀜𑀦𑁆𑀢𑀻𑀢𑀺 𑀘𑁂 𑀆𑀳 ‘‘𑀤𑀼𑀮𑁆𑀮𑀪𑀸’’𑀢𑀺𑀆𑀤𑀺. 𑀢𑀣𑀸 𑀳𑀺 𑀅𑀯𑀕𑀢𑀻 𑀅𑀢𑁆𑀣𑀸𑀯𑀕𑀫𑁄 𑀲𑀤𑁆𑀤𑀁 𑀯𑀸𑀘𑀓𑀁, 𑀲𑀸𑀫𑀢𑁆𑀣𑀺𑀬𑀜𑁆𑀘 𑀜𑀸𑀬𑀁 𑀯𑀺𑀮𑀗𑁆𑀖𑀬𑀢𑀺 𑀘𑀚𑀢𑀺 𑀅𑀦𑀼𑀧𑀤𑀲𑁆𑀲𑀦𑀢𑁄𑀢𑀺 𑀲𑀤𑁆𑀤𑀲𑀸𑀫𑀢𑁆𑀣𑀺𑀬𑀯𑀺𑀮𑀗𑁆𑀖𑀺𑀦𑀻 𑀤𑀼𑀮𑁆𑀮𑀪𑀸 𑀦 𑀮𑀪𑁆𑀬𑀢𑁂. 𑀜𑀸𑀬𑁄𑀧𑀢𑁆𑀣𑁄 𑀯𑀸 𑀲𑀤𑁆𑀤𑁄𑀧𑀢𑁆𑀣𑁄 𑀯𑀸 𑀬𑁄𑀢𑁆𑀣𑁄 𑀦 𑀳𑁄𑀢𑀺. 𑀲𑁄 𑀦𑀧𑁆𑀧𑀢𑀻𑀬𑀢𑁂 𑀬𑀣𑀸 𑀫𑀦𑀲𑀺 𑀅𑀯𑀝𑁆𑀞𑀺𑀢𑀫𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀲𑀤𑁆𑀤𑀢𑁄, 𑀅𑀢𑁆𑀣𑀢𑁄 𑀯𑀸 𑀧𑀢𑀻𑀢𑀩𑁆𑀩𑀫𑀦𑁂𑀬𑁆𑀬𑀁, 𑀢𑀩𑁆𑀩𑀺𑀧𑀭𑀻𑀢𑀁 𑀦𑁂𑀬𑁆𑀬𑀦𑁆𑀢𑀺 𑀯𑀺𑀜𑁆𑀜𑁂𑀬𑁆𑀬𑀁.

𑁩𑁬. 𑀇𑀫𑀁 𑀅𑀧𑁆𑀧𑀢𑀻𑀢𑀧𑀤𑀁 𑀯𑀺𑀜𑁆𑀜𑀽𑀳𑀺 𑀦𑀸𑀪𑀺𑀫𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑁂𑀤𑀺𑀲’’𑀫𑀺𑀘𑁆𑀘𑀸𑀤𑀺. 𑀈𑀤𑀺𑀲𑀁 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀦𑁂𑀬𑁆𑀬𑀁 𑀲𑀩𑁆𑀩𑁂 𑀯𑀺𑀜𑁆𑀜𑀼𑀦𑁄 𑀲𑀩𑁆𑀩𑀢𑁆𑀣 𑀕𑀚𑁆𑀚𑀧𑀚𑁆𑀚𑀸𑀤𑀺𑀓𑁂 𑀦 𑀩𑀳𑀼 𑀫𑀜𑁆𑀜𑀦𑁆𑀢𑀺 𑀦 𑀲𑀫𑁆𑀪𑀸𑀯𑁂𑀦𑁆𑀢𑀺 𑀦𑀧𑁆𑀧𑀬𑁄𑀚𑁂𑀦𑁆𑀢𑀺. 𑀅𑀯𑀕𑀢𑀻 𑀅𑀢𑁆𑀣𑀸𑀯𑀩𑁄𑀥𑁄 𑀲𑀤𑁆𑀤𑀲𑀸𑀫𑀢𑁆𑀣𑀺𑀬𑀯𑀺𑀮𑀗𑁆𑀖𑀺𑀦𑀻 ¶ 𑀲𑀤𑁆𑀤𑀲𑀗𑁆𑀔𑀸𑀢𑀯𑀸𑀘𑀓𑀜𑁆𑀘 𑀲𑀸𑀫𑀢𑁆𑀣𑀺𑀬𑀲𑀗𑁆𑀔𑀸𑀢𑀜𑀸𑀬𑀜𑁆𑀘 𑀅𑀢𑀺𑀓𑁆𑀓𑀫𑁆𑀫 𑀧𑀯𑀢𑁆𑀢𑀺𑀦𑀻 𑀤𑀼𑀮𑁆𑀮𑀪𑀸 𑀢𑀸𑀤𑀺𑀲𑀧𑀬𑁄𑀕𑀸𑀪𑀸𑀯𑀢𑁄 𑀤𑀼𑀮𑁆𑀮𑀪𑀸 𑀳𑁄𑀢𑀺. 𑀬𑁄 𑀅𑀢𑁆𑀣𑁄 𑀲𑀤𑁆𑀤𑀸𑀕𑀢𑁄, 𑀜𑀸𑀬𑀸𑀕𑀢𑁄 𑀯𑀸 𑀦 𑀳𑁄𑀢𑀺, 𑀲𑁄 𑀓𑀢𑁆𑀢𑀼𑀦𑁄 𑀫𑀦𑀲𑀺 𑀧𑀢𑀺𑀝𑁆𑀞𑀺𑀢𑀫𑀢𑁆𑀢𑁂𑀦 𑀧𑀢𑀻𑀢𑁄 𑀦 𑀳𑁄𑀢𑀻𑀢𑀺 𑀢𑀁 𑀧𑀤𑀁 𑀦𑁂𑀬𑁆𑀬𑀤𑁄𑀲𑀫𑀺𑀢𑀺 𑀲𑀩𑁆𑀩𑁂 𑀓𑀯𑀺𑀦𑁄 𑀧𑀭𑀺𑀳𑀭𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀩𑀳𑀼𑀫𑀸𑀦𑀁 𑀓𑀭𑁄𑀦𑁆𑀢𑀻𑀢𑀺 𑀯𑀸𑀓𑁆𑀬𑁂 𑀩𑀳𑀼𑀫𑀜𑁆𑀜𑀦𑁆𑀢𑀻𑀢𑀺 𑀦𑀸𑀫𑀥𑀸𑀢𑀼. 𑀲𑀤𑁆𑀤𑀲𑀸𑀫𑀢𑁆𑀣𑀺𑀬𑀁 𑀯𑀺𑀮𑀗𑁆𑀖𑀬𑀢𑀺 𑀲𑀻𑀮𑁂𑀦𑀸𑀢𑀺 𑀲𑀤𑁆𑀤𑀲𑀸𑀫𑀢𑁆𑀣𑀺𑀬𑀯𑀺𑀮𑀗𑁆𑀖𑀺𑀦𑀻.

𑁩𑁭.

𑀲𑀺𑀬𑀸 𑀯𑀺𑀲𑁂𑀲𑀦𑀸𑀧𑁂𑀓𑁆𑀔𑀁,

𑀬𑀁 𑀢𑀁 𑀧𑀢𑁆𑀯𑀸 𑀯𑀺𑀲𑁂𑀲𑀦𑀁;

𑀲𑀸𑀢𑁆𑀣𑀓𑀁 𑀢𑀁 𑀬𑀣𑀸 𑀢𑀁 𑀲𑁄,

𑀪𑀺𑀬𑁆𑀬𑁄 𑀧𑀲𑁆𑀲𑀢𑀺 𑀘𑀓𑁆𑀔𑀼𑀦𑀸.

𑁩𑁭. ‘‘𑀲𑀺𑀬𑀸’’𑀇𑀘𑁆𑀘𑀸𑀤𑀺. 𑀬𑀁 𑀧𑀤𑀁 𑀯𑀺𑀲𑁂𑀲𑀦𑀁 𑀧𑀢𑁆𑀯𑀸 𑀅𑀢𑁆𑀣𑁂𑀦 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀸𑀢𑁆𑀣𑀓𑀁. 𑀦𑀺𑀩𑁆𑀩𑀺𑀲𑁂𑀲𑀦𑀦𑁆𑀢𑀼 𑀯𑀼𑀢𑁆𑀢𑀢𑁆𑀣𑀫𑁂𑀯 𑀳𑁄𑀢𑀺. 𑀢𑀁 𑀯𑀺𑀲𑁂𑀲𑀦𑀸𑀧𑁂𑀓𑁆𑀔𑀁 𑀲𑀺𑀬𑀸. ‘‘𑀢𑀁 𑀬𑀣𑁂’’𑀢𑁆𑀬𑀸𑀤𑀺𑀦𑀸 𑀉𑀤𑀸𑀳𑀭𑀢𑀺. ‘‘𑀧𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀘𑀓𑁆𑀔𑀼𑀦𑀸’’𑀢𑀺 𑀮𑀩𑁆𑀪𑀢𑁂𑀯.

𑁩𑁭. ‘‘𑀲𑀺𑀬𑀸’’𑀫𑀺𑀘𑁆𑀘𑀸𑀤𑀺. 𑀬𑀁 𑀧𑀤𑀁 𑀯𑀺𑀲𑁂𑀲𑀦𑀁 𑀧𑀢𑁆𑀯𑀸 𑀲𑀸𑀢𑁆𑀣𑀓𑀁 𑀅𑀢𑁆𑀣𑀲𑀳𑀺𑀢𑀁, 𑀢𑀤𑀪𑀸𑀯𑁂 𑀦𑀺𑀭𑀢𑁆𑀣𑀓𑀁 𑀳𑁄𑀢𑀺, 𑀢𑀁 𑀯𑀺𑀲𑁂𑀲𑀦𑀸𑀧𑁂𑀓𑁆𑀔𑀁 𑀦𑀸𑀫 𑀲𑀺𑀬𑀸. 𑀢𑀁 𑀬𑀣𑀸 𑀢𑀲𑁆𑀲𑁄𑀤𑀸𑀳𑀭𑀡𑀫𑁂𑀯𑀁 ‘‘𑀢𑀁 𑀲𑁄 𑀪𑀺𑀬𑁆𑀬𑁄 𑀧𑀲𑁆𑀲𑀢𑀺 𑀘𑀓𑁆𑀔𑀼𑀦𑀸’’𑀢𑀺. 𑀲𑁄 𑀧𑀼𑀭𑀺𑀲𑁄 𑀢𑀁 𑀧𑀼𑀭𑀺𑀲𑀁 𑀪𑀺𑀬𑁆𑀬𑁄 𑀬𑁂𑀪𑀼𑀬𑁆𑀬𑀲𑀸 𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀺. 𑀏𑀢𑁆𑀣 ‘‘𑀧𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁂𑀬𑁂𑀯 ‘‘𑀘𑀓𑁆𑀔𑀼𑀦𑀸’’𑀢𑀺 𑀜𑀸𑀬𑀢𑀺. 𑀘𑀓𑁆𑀔𑀼𑀦𑀸𑀢𑀺 𑀯𑀺𑀲𑁂𑀲𑁆𑀬𑀧𑀤𑀁 𑀯𑀺𑀲𑁂𑀲𑀦𑀁 𑀮𑀤𑁆𑀥𑀸𑀯 𑀲𑀸𑀢𑁆𑀣𑀓𑀁 𑀳𑁄𑀢𑀺. 𑀯𑀺𑀲𑁂𑀲𑀦𑁂 𑀅𑀧𑁂𑀓𑁆𑀔𑀸 𑀅𑀲𑁆𑀲𑀸𑀢𑀺 𑀘, 𑀲𑀳 𑀅𑀢𑁆𑀣𑁂𑀦 𑀯𑀢𑁆𑀢𑀫𑀸𑀦𑀁 𑀲𑀸𑀢𑁆𑀣𑀓𑀫𑀺𑀢𑀺 𑀘 𑀲𑀫𑀸𑀲𑁄.

𑁩𑁮.

𑀳𑀻𑀦𑀁 𑀓𑀭𑁂 𑀯𑀺𑀲𑁂𑀲𑁆𑀬𑀁 𑀬𑀁, 𑀢𑀁 𑀳𑀻𑀦𑀢𑁆𑀣𑀁 𑀪𑀯𑁂 𑀬𑀣𑀸;

𑀦𑀺𑀧𑁆𑀧𑀪𑀻𑀓𑀢𑀔𑀚𑁆𑀚𑁄𑀢𑁄, 𑀲𑀫𑀼𑀤𑁂𑀢𑀺 𑀤𑀺𑀯𑀸𑀓𑀭𑁄.

𑁩𑁮. ‘‘𑀳𑀻𑀦’’𑀫𑀺𑀘𑁆𑀘𑀸𑀤𑀺 ¶ . 𑀬𑀁 𑀯𑀺𑀲𑁂𑀲𑀦𑀧𑀤𑀁 𑀯𑀺𑀲𑁂𑀲𑁆𑀬𑀁 𑀯𑀺𑀲𑁂𑀲𑀺𑀢𑀩𑁆𑀩𑀁 𑀳𑀻𑀦𑀁 𑀮𑀸𑀫𑀓𑀁 𑀓𑀭𑁂 𑀓𑀭𑁂𑀬𑁆𑀬, 𑀢𑀁 𑀯𑀺𑀲𑁂𑀲𑀦𑀧𑀤𑀁 𑀳𑀻𑀦𑀢𑁆𑀣𑀁 𑀳𑀻𑀦𑁄 𑀅𑀢𑁆𑀣𑁄 𑀬𑀲𑁆𑀲 𑀢𑀁 𑀳𑀻𑀦𑀢𑁆𑀣𑀁 𑀦𑀸𑀫 𑀪𑀯𑁂𑀬𑁆𑀬. ‘‘𑀬𑀣𑀸’’𑀇𑀢𑁆𑀬𑀸𑀤𑀺𑀦𑀸 𑀉𑀤𑀸𑀳𑀭𑀢𑀺. 𑀦𑀺𑀧𑁆𑀧𑀪𑀻𑀓𑀢𑁄 𑀔𑀚𑁆𑀚𑁄𑀢𑁄 𑀬𑁂𑀦 𑀲𑁄 𑀤𑀺𑀯𑀸𑀓𑀭𑁄 𑀧𑀪𑀸𑀓𑀭𑁄 𑀲𑀫𑀼𑀤𑁂𑀢𑀺 𑀉𑀧𑀕𑀘𑁆𑀙𑀢𑀻𑀢𑀺. 𑀏𑀢𑁆𑀣 𑀔𑀚𑁆𑀚𑁄𑀢𑀧𑁆𑀧𑀪𑀸𑀧𑀳𑀭𑀡𑁂 𑀦 𑀣𑀼𑀢𑀺 𑀤𑀺𑀯𑀸𑀓𑀭𑀲𑁆𑀲𑀸𑀢𑀺.

𑁩𑁮. ‘‘𑀳𑀻𑀦𑀁 𑀓𑀭𑁂’’𑀘𑁆𑀘𑀸𑀤𑀺. 𑀬𑀁 𑀧𑀤𑀁 𑀯𑀺𑀲𑁂𑀲𑁆𑀬𑀁 𑀳𑀻𑀦𑀁 𑀓𑀭𑁄𑀢𑀺, 𑀢𑀁 𑀳𑀻𑀦𑀢𑁆𑀣𑀁 𑀪𑀯𑁂. 𑀬𑀣𑀸 𑀢𑀢𑁆𑀣𑁄𑀤𑀸𑀳𑀭𑀡𑀫𑁂𑀯𑀁 ‘‘𑀦𑀺𑀧𑁆𑀧𑀪𑀻𑀓𑀢𑀔𑀚𑁆𑀚𑁄𑀢𑁄, 𑀲𑀫𑀼𑀤𑁂𑀢𑀺 𑀤𑀺𑀯𑀸𑀓𑀭𑁄’’𑀢𑀺. 𑀧𑀪𑀸𑀭𑀳𑀺𑀢𑀓𑀢𑀸 𑀔𑀚𑁆𑀚𑁄𑀢𑀸 𑀬𑁂𑀦 𑀲𑁄 𑀤𑀺𑀯𑀸𑀓𑀭𑁄 𑀲𑀽𑀭𑀺𑀬𑁄 𑀲𑀫𑀼𑀤𑁂𑀢𑀺 𑀉𑀕𑁆𑀕𑀘𑁆𑀙𑀢𑀺. ‘‘𑀦𑀺𑀧𑁆𑀧𑀪𑀻𑀓𑀢𑀔𑀚𑁆𑀚𑁄𑀢𑁄’’𑀢𑀺 𑀇𑀫𑀺𑀦𑀸 𑀯𑀺𑀲𑁂𑀲𑀦𑁂𑀦 𑀮𑀸𑀫𑀓𑀸𑀮𑁄𑀓𑀮𑀤𑁆𑀥𑀬𑀼𑀢𑁆𑀢𑀲𑁆𑀲 𑀔𑀚𑁆𑀚𑁄𑀧𑀦𑀓𑀲𑁆𑀲 𑀅𑀪𑀺𑀪𑀯𑀦𑀧𑁆𑀧𑀓𑀸𑀲𑀦𑀁 𑀲𑀳𑀲𑁆𑀲𑀭𑀁𑀲𑀺𑀦𑁄 𑀦𑀺𑀦𑁆𑀤𑀸𑀬𑁂𑀯, 𑀦 𑀣𑀼𑀢𑀻𑀢𑀺 𑀯𑀺𑀲𑁂𑀲𑁆𑀬𑀁 𑀳𑀻𑀦𑀢𑁆𑀣𑀁 𑀳𑁄𑀢𑀺. 𑀳𑀻𑀦𑁄 𑀅𑀢𑁆𑀣𑁄 𑀬𑀲𑁆𑀲𑁂𑀢𑀺 𑀘, 𑀦𑀢𑁆𑀣𑀺 𑀧𑀪𑀸 𑀏𑀢𑁂𑀲𑀦𑁆𑀢𑀺 𑀘, 𑀦𑀺𑀧𑁆𑀧𑀪𑀸 𑀓𑀢𑀸𑀢𑀺 𑀘, 𑀦𑀺𑀧𑁆𑀧𑀪𑀻𑀓𑀢𑀸 𑀔𑀚𑁆𑀚𑁄𑀢𑀸 𑀬𑁂𑀦𑀸𑀢𑀺 𑀘 𑀯𑀺𑀕𑁆𑀕𑀳𑁄.

𑁩𑁯.

𑀧𑀸𑀤𑀧𑀽𑀭𑀡𑀫𑀢𑁆𑀢𑀁 𑀬𑀁, 𑀅𑀦𑀢𑁆𑀣𑀫𑀺𑀢𑀺 𑀢𑀁 𑀫𑀢𑀁;

𑀬𑀣𑀸 𑀳𑀺 𑀯𑀦𑁆𑀤𑁂 𑀩𑀼𑀤𑁆𑀥𑀲𑁆𑀲, 𑀧𑀸𑀤𑀧𑀗𑁆𑀓𑁂𑀭𑀼𑀳𑀫𑁆𑀧𑀺𑀘.

𑁩𑁯. 𑀳𑀺 𑀅𑀧𑀺 𑀘𑀲𑀤𑁆𑀤𑀸𑀦𑀁 𑀧𑀸𑀤𑀧𑀽𑀭𑀡𑀫𑀢𑁆𑀢𑀢𑁆𑀢𑀸 𑀅𑀦𑀢𑁆𑀣𑀓𑀢𑁆𑀢𑀁. 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀬𑀧𑀤𑀤𑁄𑀲𑁄.

𑁩𑁯. ‘‘𑀧𑀸𑀤𑀧𑀽𑀭𑀡𑀺’’𑀘𑁆𑀘𑀸𑀤𑀺. 𑀬𑀁 𑀧𑀤𑀁 𑀧𑀸𑀤𑀧𑀽𑀭𑀡𑀫𑀢𑁆𑀢𑀁 𑀘𑀢𑀼𑀢𑁆𑀣𑀁𑀲𑀲𑀗𑁆𑀔𑀸𑀢𑀲𑁆𑀲 𑀧𑀸𑀤𑀲𑁆𑀲 𑀧𑀽𑀭𑀡𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀢𑀁 𑀅𑀦𑀢𑁆𑀣𑀫𑀺𑀢𑀺 𑀫𑀢𑀁 𑀜𑀸𑀢𑀁. 𑀬𑀣𑀸𑀲𑀤𑁆𑀤𑁄 𑀯𑀼𑀢𑁆𑀢𑀢𑁆𑀣𑁄. 𑀩𑀼𑀤𑁆𑀥𑀲𑁆𑀲 𑀧𑀸𑀤𑀧𑀗𑁆𑀓𑁂𑀭𑀼𑀳𑀁 𑀧𑀸𑀤𑀫𑁆𑀩𑀼𑀚𑀁 𑀯𑀦𑁆𑀤𑁂𑀢𑀺. 𑀏𑀢𑁆𑀣 𑀳𑀺 𑀅𑀧𑀺𑀘𑀸𑀢𑀺 𑀇𑀫𑁂𑀲𑀁 𑀲𑀫𑀢𑁆𑀢𑀦𑀸𑀤𑀺𑀅𑀢𑁆𑀣𑁂𑀲𑀼 𑀅𑀧𑁆𑀧𑀯𑀢𑁆𑀢𑀺𑀢𑁄 𑀓𑁂𑀯𑀮𑀁 𑀧𑀸𑀤𑀧𑀽𑀭𑀡𑀫𑀢𑁆𑀢𑀢𑁄 𑀅𑀦𑀢𑁆𑀣𑀓𑀢𑁆𑀢𑀁. 𑀫𑀢𑁆𑀢𑀲𑀤𑁆𑀤𑁄 𑀅𑀯𑀥𑀸𑀭𑀡𑁂. 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀬𑀧𑀤𑀤𑁄𑀲𑁄.

𑀧𑀤𑀤𑁄𑀲𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀸𑀓𑁆𑀬𑀤𑁄𑀲𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪𑁦.

𑀲𑀤𑁆𑀤𑀢𑁄 𑀅𑀢𑁆𑀣𑀢𑁄 𑀯𑀼𑀢𑁆𑀢𑀁, 𑀬𑀢𑁆𑀣 𑀪𑀺𑀬𑁆𑀬𑁄𑀧𑀺 𑀯𑀼𑀘𑁆𑀘𑀢𑀺;

𑀢𑀫𑁂𑀓𑀢𑁆𑀣𑀁 𑀬𑀣𑀸’𑀪𑀸𑀢𑀺, 𑀯𑀸𑀭𑀺𑀤𑁄𑀯𑀸𑀭𑀺𑀤𑁄 𑀅𑀬𑀁.

𑁪𑁦. ‘‘𑀲𑀤𑁆𑀤𑀢𑁄’’𑀇𑀘𑁆𑀘𑀸𑀤𑀺. 𑀲𑀤𑁆𑀤𑀢𑁄 𑀯𑀸𑀘𑀓𑁂𑀦 𑀢𑀲𑁆𑀫𑀺𑀁𑀬𑁂𑀯𑀢𑁆𑀣𑁂 𑀢𑀲𑁆𑀲𑁂𑀯 𑀲𑀤𑁆𑀤𑀲𑁆𑀲 𑀧𑀼𑀦 𑀧𑀬𑁄𑀕𑀢𑁄 𑀅𑀢𑁆𑀣𑀢𑁄 𑀅𑀪𑀺𑀥𑁂𑀬𑁆𑀬𑁂𑀦 𑀧𑀼𑀩𑁆𑀩𑀧𑀝𑀺𑀧𑀸𑀤𑀺𑀓𑀲𑁆𑀲𑁂𑀯 𑀯𑀢𑁆𑀣𑀼𑀲𑁆𑀲𑀸𑀯𑀺𑀲𑁂𑀲𑁂𑀦 𑀧𑀼𑀦 𑀧𑀝𑀺𑀧𑀸𑀤𑀦𑀢𑁄 𑀯𑀼𑀢𑁆𑀢𑀁 𑀧𑀬𑀼𑀢𑁆𑀢𑀁 𑀬𑀁 𑀧𑀤𑀢𑁆𑀣𑀭𑀽𑀧𑀁 𑀬𑀢𑁆𑀣 𑀬𑀲𑁆𑀫𑀺𑀁 𑀯𑀸𑀓𑁆𑀬𑁂 𑀪𑀺𑀬𑁆𑀬𑁄𑀧𑀺 𑀯𑀼𑀘𑁆𑀘𑀢𑀺 𑀧𑀼𑀦𑀧𑀺 𑀧𑀬𑀼𑀚𑁆𑀚𑀢𑁂, 𑀢𑀫𑁂𑀓𑀢𑁆𑀣𑀦𑁆𑀢𑀺 𑀅𑀦𑀼𑀯𑀤𑀺𑀢𑁆𑀯𑀸 ‘‘𑀬𑀣𑁂’’𑀘𑁆𑀘𑀸𑀤𑀺𑀦𑀸 𑀯𑀺𑀥𑀻𑀬𑀢𑁂. 𑀯𑀸𑀭𑀺𑀁 𑀤𑀤𑀸𑀢𑀻𑀢𑀺 𑀯𑀸𑀭𑀺𑀤𑁄. 𑀅𑀬𑀁 𑀯𑀸𑀭𑀺𑀤𑁄 𑀫𑁂𑀖𑁄 𑀆𑀪𑀸𑀢𑀺 𑀤𑀺𑀧𑁆𑀧𑀢𑀻𑀢𑀺. 𑀚𑀮𑀤𑀸𑀦𑀫𑀢𑁆𑀢𑀸𑀧𑁂𑀓𑁆𑀔𑀸𑀬 𑀇𑀤𑀁 𑀲𑀤𑁆𑀤𑀢𑁄 𑀏𑀓𑀢𑁆𑀣𑀁.

𑁪𑁦. 𑀇𑀤𑀸𑀦𑀺 𑀉𑀤𑁆𑀤𑀺𑀝𑁆𑀞𑀓𑁆𑀓𑀫𑁂𑀦 𑀯𑀸𑀓𑁆𑀬𑀤𑁄𑀲𑀁 𑀦𑀺𑀤𑁆𑀤𑀺𑀲𑀢𑀺 ‘‘𑀲𑀤𑁆𑀤𑀢𑁄’’𑀘𑁆𑀘𑀸𑀤𑀺𑀦𑀸. 𑀲𑀤𑁆𑀤𑀢𑁄 𑀯𑀸𑀘𑀓𑁂𑀦 𑀅𑀢𑁆𑀣𑀢𑁄 𑀅𑀪𑀺𑀥𑁂𑀬𑁆𑀬𑁂𑀦 𑀯𑀼𑀢𑁆𑀢𑀁 𑀧𑀬𑀼𑀢𑁆𑀢𑀁 𑀬𑀁 𑀧𑀤𑀢𑁆𑀣𑀭𑀽𑀧𑀁 𑀬𑀢𑁆𑀣 𑀬𑀲𑁆𑀫𑀺𑀁 𑀯𑀸𑀓𑁆𑀬𑁂 𑀪𑀺𑀬𑁆𑀬𑁄𑀧𑀺 𑀧𑀼𑀦𑀧𑀺 𑀯𑀼𑀘𑁆𑀘𑀢𑀺 𑀬𑀼𑀚𑁆𑀚𑀢𑁂, 𑀢𑀁 𑀯𑀸𑀓𑁆𑀬𑀁 𑀏𑀓𑀢𑁆𑀣𑀁 𑀦𑀸𑀫 𑀤𑁄𑀲𑁄. 𑀉𑀤𑀸𑀳𑀭𑀡𑀁 ‘‘𑀬𑀣𑀺’’𑀘𑁆𑀘𑀸𑀤𑀺. 𑀯𑀸𑀭𑀺𑀤𑁄 𑀚𑀮𑀤𑀸𑀬𑀓𑁄 𑀅𑀬𑀁 𑀯𑀸𑀭𑀺𑀤𑁄 𑀫𑁂𑀖𑁄 𑀆𑀪𑀸𑀢𑀺 𑀤𑀺𑀧𑁆𑀧𑀢𑀺. 𑀲𑀫𑁆𑀧𑀢𑁆𑀢𑀺𑀲𑀸𑀥𑀓𑀁 ‘‘𑀚𑀮𑀤𑀸𑀬𑀓𑁄’’𑀘𑁆𑀘𑀸𑀤𑀺𑀯𑀺𑀲𑁂𑀲𑀦𑀁 𑀯𑀺𑀦𑀸 𑀚𑀮𑀤𑀸𑀦𑀫𑀢𑁆𑀢𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀲𑀤𑁆𑀤𑀢𑁄 𑀏𑀓𑀢𑁆𑀣𑀁 𑀦𑀸𑀫 𑀳𑁄𑀢𑀺.

𑀬𑀣𑀸 𑀘

𑁪𑁧.

𑀢𑀺𑀢𑁆𑀣𑀺𑀬𑀗𑁆𑀓𑀼𑀭𑀩𑀻𑀚𑀸𑀦𑀺, 𑀚𑀳𑀁 𑀤𑀺𑀝𑁆𑀞𑀺𑀕𑀢𑀸𑀦𑀺’𑀳;

𑀧𑀲𑀸𑀤𑁂𑀢𑀺 𑀧𑀲𑀦𑁆𑀦𑁂 𑀲𑁄, 𑀫𑀳𑀸𑀫𑀼𑀦𑀺 𑀫𑀳𑀸𑀚𑀦𑁂.

𑁪𑁧. 𑀢𑀺𑀢𑁆𑀣𑀺𑀬𑀲𑀗𑁆𑀔𑀸𑀢𑀸𑀦𑀁 𑀅𑀗𑁆𑀓𑀼𑀭𑀸𑀦𑀁 𑀩𑀻𑀚𑀸𑀦𑀺 𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀚𑀳𑀁 𑀚𑀳𑀦𑁆𑀢𑁄 𑀤𑀽𑀭𑀻𑀓𑀭𑁄𑀦𑁆𑀢𑁄 𑀲𑁄 𑀫𑀳𑀸𑀫𑀼𑀦𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀇𑀳 𑀮𑁄𑀓𑁂 𑀅𑀢𑁆𑀢𑀦𑀺 𑀧𑀲𑀦𑁆𑀦𑁂 𑀧𑀲𑀸𑀤𑀩𑀳𑀼𑀮𑁂 𑀫𑀳𑀸𑀚𑀦𑁂 𑀧𑀲𑀸𑀤𑁂𑀢𑀻𑀢𑀺 𑀅𑀧𑀭𑀫𑀼𑀤𑀸𑀳𑀭𑀡𑀁. ¶ 𑀧𑀲𑀸𑀤𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 ‘‘𑀧𑀲𑀦𑁆𑀦𑁂 𑀧𑀲𑀸𑀤𑁂𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀇𑀤𑀫𑀢𑁆𑀣𑀢𑁄 𑀏𑀓𑀢𑁆𑀣𑀁.

𑁪𑁧. ‘‘𑀢𑀺𑀢𑁆𑀣𑀺𑀬𑀺’’𑀘𑁆𑀘𑀸𑀤𑀺. 𑀲𑁄 𑀫𑀳𑀸𑀫𑀼𑀦𑀺 𑀢𑀺𑀢𑁆𑀣𑀺𑀬𑀗𑁆𑀓𑀼𑀭𑀩𑀻𑀚𑀸𑀦𑀺 𑀢𑀺𑀢𑁆𑀣𑀺𑀬𑀲𑀗𑁆𑀔𑀸𑀢𑀸𑀦𑀁 𑀅𑀗𑁆𑀓𑀼𑀭𑀸𑀦𑀁 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀪𑀽𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀲𑀲𑁆𑀲𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀸 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀬𑁄 𑀚𑀳𑀁 𑀚𑀳𑀦𑁆𑀢𑁄 𑀅𑀧𑀦𑁂𑀦𑁆𑀢𑁄 𑀇𑀳 𑀮𑁄𑀓𑁂 𑀧𑀲𑀦𑁆𑀦𑁂 𑀅𑀢𑁆𑀢𑀦𑀺 𑀧𑀲𑀦𑁆𑀦𑁂 𑀫𑀳𑀸𑀚𑀦𑁂 𑀧𑀲𑀸𑀤𑁂𑀢𑀺. 𑀧𑀲𑀦𑁆𑀦𑀲𑀤𑁆𑀤𑁂𑀦 𑀯𑀼𑀢𑁆𑀢𑀧𑁆𑀧𑀲𑀸𑀤𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀲𑀸𑀤𑁂𑀢𑀻𑀢𑀺 𑀓𑁆𑀭𑀺𑀬𑀸𑀧𑀤𑁂𑀦𑀧𑀺 𑀯𑀼𑀢𑁆𑀢𑀢𑁆𑀢𑀸 𑀲𑀤𑁆𑀤𑁂 𑀪𑀺𑀦𑁆𑀦𑁂𑀧𑀺 𑀅𑀢𑁆𑀣𑀢𑁄 𑀏𑀓𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓𑀢𑁆𑀣𑀲𑁆𑀲𑀼𑀤𑀸𑀳𑀭𑀡𑀁. 𑀢𑀺𑀢𑁆𑀣𑀺𑀬𑀸 𑀏𑀯 𑀅𑀗𑁆𑀓𑀼𑀭𑀸𑀦𑀺, 𑀢𑁂𑀲𑀁 𑀩𑀻𑀚𑀸𑀦𑀺, 𑀤𑀺𑀝𑁆𑀞𑀻𑀲𑀼 𑀕𑀢𑀸𑀦𑀺, 𑀤𑀺𑀝𑁆𑀞𑀺𑀬𑁄 𑀏𑀯 𑀕𑀢𑀸𑀦𑀻𑀢𑀺 𑀯𑀸 𑀯𑀺𑀕𑁆𑀕𑀳𑁄.

𑁪𑁨.

𑀆𑀭𑀤𑁆𑀥𑀓𑁆𑀓𑀫𑀯𑀺𑀘𑁆𑀙𑁂𑀤𑀸, 𑀪𑀕𑁆𑀕𑀭𑀻𑀢𑀺 𑀪𑀯𑁂 𑀬𑀣𑀸;

𑀓𑀸𑀧𑀺 𑀧𑀜𑁆𑀜𑀸, 𑀓𑁄𑀧𑀺 𑀕𑀼𑀡𑁄, 𑀧𑀓𑀢𑀻𑀧𑀺 𑀅𑀳𑁄 𑀢𑀯.

𑁪𑁨. 𑀆𑀭𑀤𑁆𑀥𑁄 𑀯𑀢𑁆𑀢𑀼𑀫𑀼𑀧𑀓𑁆𑀓𑀫𑀦𑁆𑀢𑁄, 𑀓𑀫𑁄 𑀯𑀘𑀦𑀧𑀝𑀺𑀧𑀸𑀝𑀺. 𑀢𑀲𑁆𑀲 𑀯𑀺𑀘𑁆𑀙𑁂𑀤𑁄 𑀪𑀗𑁆𑀕𑁄, 𑀢𑀢𑁄. ‘‘𑀬𑀣𑁂’’𑀢𑀺𑀆𑀤𑀺𑀦𑀸 𑀉𑀤𑀸𑀳𑀭𑀢𑀺. 𑀅𑀯𑀼𑀢𑁆𑀢𑀲𑁆𑀲𑀧𑀺 𑀧𑀲𑀸𑀤𑀯𑀲𑀸 𑀅𑀚𑁆𑀛𑀸𑀳𑀸𑀭𑁄𑀢𑀺. 𑀫𑀳𑀸𑀫𑀼𑀦𑀺 𑀢𑀯 𑀢𑁂 𑀧𑀜𑁆𑀜𑀸 𑀓𑀸𑀧𑀺 𑀲𑀸𑀢𑀺𑀲𑀬𑀢𑁆𑀢𑀸 𑀅𑀦𑀺𑀤𑁆𑀥𑀸𑀭𑀺𑀢𑀁 𑀲𑀪𑀸𑀯𑀯𑀺𑀲𑁂𑀲𑀸 𑀓𑀸𑀘𑀺𑀬𑁂𑀯, 𑀅𑀳𑁄 𑀧𑀯𑀢𑁆𑀢𑀫𑀸𑀦𑀸𑀬𑀧𑀺 𑀯𑀲𑀪𑀸𑀯𑀲𑁆𑀲𑀸𑀦𑀺𑀤𑁆𑀥𑀸𑀭𑀺𑀢𑀢𑁆𑀢𑀸 𑀅𑀘𑁆𑀙𑀭𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀓𑀸𑀧𑀺 𑀓𑁄𑀧𑀻𑀢𑀺 𑀲𑀩𑁆𑀩𑀦𑀸𑀫𑀧𑀤𑀓𑁆𑀓𑀫𑀲𑁆𑀲 𑀧𑀓𑀢𑀻𑀢𑀺 𑀏𑀢𑁆𑀣 𑀯𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀪𑀕𑁆𑀕𑀭𑀻𑀢𑀺.

𑁪𑁨. ‘‘𑀆𑀭𑀤𑁆𑀥𑀓𑁆𑀓𑀫𑀺’’𑀘𑁆𑀘𑀸𑀤𑀺. 𑀆𑀭𑀤𑁆𑀥𑀓𑁆𑀓𑀫𑀯𑀺𑀘𑁆𑀙𑁂𑀤𑀸 𑀯𑀢𑁆𑀣𑀼𑀫𑀸𑀭𑀤𑁆𑀥𑀧𑀤𑀓𑁆𑀓𑀫𑀲𑁆𑀲 𑀯𑀺𑀘𑁆𑀙𑁂𑀤𑀳𑁂𑀢𑀼 𑀪𑀕𑁆𑀕𑀭𑀻𑀢𑀺 𑀪𑀯𑁂 𑀪𑀕𑁆𑀕𑀭𑀻𑀢𑀺𑀯𑀸𑀓𑁆𑀬𑀤𑁄𑀲𑁄 𑀪𑀯𑀢𑀺. 𑀉𑀤𑀸𑀳𑀭𑀢𑀺 ‘‘𑀬𑀣𑀺’’𑀘𑁆𑀘𑀸𑀤𑀺. 𑀫𑀳𑀸𑀫𑀼𑀦𑀺 𑀢𑀯 𑀢𑀼𑀬𑁆𑀳𑀁 𑀧𑀜𑁆𑀜𑀸 𑀲𑀸𑀢𑀺𑀲𑀬𑀪𑀽𑀢𑀸 𑀧𑀜𑁆𑀜𑀸 𑀓𑀸𑀧𑀺 𑀯𑀘𑀦𑀯𑀺𑀲𑀬𑀸𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀓𑀸𑀧𑀺𑀬𑁂𑀯. 𑀕𑀼𑀡𑁄 𑀲𑀻𑀮𑀲𑀫𑀸𑀥𑀺𑀆𑀤𑀺𑀅𑀦𑀜𑁆𑀜𑀲𑀸𑀥𑀸𑀭𑀡𑀕𑀼𑀡𑀲𑀫𑀽𑀳𑁄 𑀓𑁄𑀧𑀺 𑀧𑀫𑀸𑀡𑀧𑀭𑀺𑀕𑁆𑀕𑀳𑀲𑁆𑀲 𑀓𑁂𑀦𑀘𑀺 ¶ 𑀮𑁂𑀲𑁂𑀦𑀧𑀺 𑀓𑀢𑁆𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀓𑁄𑀧𑀺𑀬𑁂𑀯. 𑀧𑀓𑀢𑀻𑀧𑀺 𑀅𑀘𑀺𑀦𑁆𑀢𑁂𑀬𑁆𑀬𑀪𑀽𑀢𑀸 𑀧𑀓𑀢𑀻𑀧𑀺 𑀏𑀯𑀫𑁂𑀯 𑀅𑀳𑁄 𑀯𑀺𑀚𑁆𑀚𑀫𑀸𑀦𑀸𑀦𑀁𑀬𑁂𑀯 𑀧𑀜𑁆𑀜𑀸𑀤𑀻𑀦𑀁 𑀲𑀪𑀸𑀯𑀸𑀯𑀩𑁄𑀥𑀲𑁆𑀲 𑀤𑀼𑀓𑁆𑀓𑀭𑀢𑀸 𑀅𑀘𑁆𑀙𑀭𑀺𑀬𑀸. 𑀓𑀸𑀧𑀺 𑀓𑁄𑀧𑀻𑀢𑀺 𑀧𑀤𑀓𑁆𑀓𑀫𑀲𑁆𑀲 ‘‘𑀧𑀓𑀢𑀻’’𑀢𑀺 𑀏𑀢𑁆𑀣 𑀲𑀼𑀜𑁆𑀜𑀢𑁆𑀢𑀸 𑀭𑀻𑀢𑀺𑀪𑀗𑁆𑀕𑁄. 𑀆𑀭𑀤𑁆𑀥𑁄𑀬𑁂𑀯 𑀓𑀫𑁄, 𑀢𑀲𑁆𑀲 𑀯𑀺𑀘𑁆𑀙𑁂𑀤𑁄, 𑀪𑀕𑁆𑀕𑀸 𑀭𑀻𑀢𑀺 𑀅𑀲𑁆𑀲, 𑀏𑀢𑁆𑀣 𑀯𑀸𑀢𑀺 𑀯𑀺𑀕𑁆𑀕𑀳𑁄.

𑁪𑁩.

𑀧𑀤𑀸𑀦𑀁 𑀤𑀼𑀩𑁆𑀩𑀺𑀦𑀺𑀓𑁆𑀔𑁂𑀧𑀸, 𑀩𑁆𑀬𑀸𑀫𑁄𑀳𑁄 𑀬𑀢𑁆𑀣 𑀚𑀸𑀬𑀢𑀺;

𑀢𑀁 𑀩𑁆𑀬𑀸𑀓𑀺𑀡𑁆𑀡𑀦𑁆𑀢𑀺 𑀯𑀺𑀜𑁆𑀜𑁂𑀬𑁆𑀬𑀁, 𑀢𑀤𑀼𑀤𑀸𑀳𑀭𑀡𑀁 𑀬𑀣𑀸.

𑁪𑁩. ‘‘𑀧𑀤𑀸𑀦’’𑀫𑀺𑀘𑁆𑀘𑀸𑀤𑀺. 𑀬𑀢𑁆𑀣 𑀬𑀲𑁆𑀫𑀺𑀁 𑀯𑀸𑀓𑁆𑀬𑁂 𑀧𑀤𑀸𑀦𑀁 𑀲𑁆𑀬𑀸𑀤𑁆𑀬𑀦𑁆𑀢𑀸𑀔𑁆𑀬𑀸𑀢𑀺𑀓𑀸𑀦𑀁 𑀤𑀼𑀩𑁆𑀩𑀺𑀦𑀺𑀓𑁆𑀔𑁂𑀧𑀸 𑀤𑀼𑀝𑁆𑀞𑀧𑀦𑀢𑁄 𑀩𑁆𑀬𑀸𑀫𑁄𑀳𑁄 𑀲𑀁𑀫𑀼𑀴𑁆𑀳𑀢𑀸 𑀚𑀸𑀬𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀯𑀸𑀓𑁆𑀬𑀁 𑀩𑁆𑀬𑀸𑀓𑀺𑀡𑁆𑀡𑀦𑁆𑀢𑀺 𑀯𑀺𑀜𑁆𑀜𑁂𑀬𑁆𑀬𑀁 𑀜𑀸𑀢𑀩𑁆𑀩𑀁. 𑀢𑀲𑁆𑀲 𑀩𑁆𑀬𑀸𑀓𑀺𑀡𑁆𑀡𑀲𑁆𑀲 𑀉𑀤𑀸𑀳𑀭𑀡𑀁 𑀮𑀓𑁆𑀔𑀺𑀬𑀁 ‘‘𑀬𑀣𑁂’’𑀢𑀺 𑀤𑀲𑁆𑀲𑁂𑀢𑀺. 𑀬𑀣𑀸 𑀇𑀤𑀁, 𑀢𑀣𑀸 𑀅𑀜𑁆𑀜𑀫𑁆𑀧𑀻𑀢𑀺 𑀅𑀢𑁆𑀣𑁄.

𑁪𑁩. ‘‘𑀧𑀤𑀸𑀦𑀺’’𑀘𑁆𑀘𑀸𑀤𑀺. 𑀧𑀤𑀸𑀦𑀁 𑀲𑁆𑀬𑀸𑀤𑁆𑀬𑀦𑁆𑀢𑀢𑁆𑀬𑀸𑀤𑁆𑀬𑀦𑁆𑀢𑀧𑀤𑀸𑀦𑀁 𑀤𑀼𑀩𑁆𑀩𑀺𑀦𑀺𑀓𑁆𑀔𑁂𑀧𑀸 𑀤𑀼𑀝𑁆𑀞𑀧𑀦𑀢𑁄 𑀬𑀢𑁆𑀣 𑀯𑀸𑀓𑁆𑀬𑁂 𑀩𑁆𑀬𑀸𑀫𑁄𑀳𑁄 𑀲𑀁𑀫𑁄𑀳𑁄 𑀚𑀸𑀬𑀢𑀺, 𑀢𑀁 𑀩𑁆𑀬𑀸𑀓𑀺𑀡𑁆𑀡𑀤𑁄𑀲𑁄𑀢𑀺 𑀯𑀺𑀜𑁆𑀜𑁂𑀬𑁆𑀬𑀁. 𑀢𑀤𑀼𑀤𑀸𑀳𑀭𑀡𑀁 𑀢𑀲𑁆𑀲 𑀩𑁆𑀬𑀸𑀓𑀺𑀡𑁆𑀡𑀤𑁄𑀲𑀲𑁆𑀲 𑀮𑀓𑁆𑀔𑀺𑀬𑀁 𑀬𑀣𑀸 𑀇𑀫𑀺𑀦𑀸 𑀯𑀓𑁆𑀔𑀫𑀸𑀦𑀦𑀬𑁂𑀦.

𑁪𑁪.

𑀩𑀳𑀼𑀕𑀼𑀡𑁂 𑀧𑀡𑀫𑀢𑀺, 𑀤𑀼𑀚𑁆𑀚𑀦𑀸𑀦𑀁 𑀧𑁆𑀬𑀬𑀁 𑀚𑀦𑁄;

𑀳𑀺𑀢𑀁 𑀧𑀫𑀼𑀤𑀺𑀢𑁄 𑀦𑀺𑀘𑁆𑀘𑀁, 𑀲𑀼𑀕𑀢𑀁 𑀲𑀫𑀦𑀼𑀲𑁆𑀲𑀭𑀁.

𑁪𑁪. 𑀩𑀳𑀼𑀅𑀦𑀦𑁆𑀢𑀢𑁆𑀢𑀸 𑀩𑀳𑀼𑀪𑀽𑀢𑁂 𑀕𑀼𑀡𑁂 𑀲𑀻𑀮𑀸𑀤𑀺𑀓𑁂 𑀲𑀫𑀦𑀼𑀲𑁆𑀲𑀭𑀁 𑀲𑀫𑁆𑀫𑀤𑁂𑀯 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀅𑀦𑀼𑀲𑁆𑀲𑀭𑀦𑁆𑀢𑁄 𑀕𑀼𑀡𑀯𑀺𑀲𑀬𑀲𑀢𑀺𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀦𑁆𑀢𑁄 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀧𑀫𑀼𑀤𑀺𑀢𑁄 𑀳𑀝𑁆𑀞𑀧𑀳𑀝𑁆𑀞𑁄 𑀅𑀬𑀁 𑀚𑀦𑁄 𑀲𑀩𑁆𑀩𑁄𑀧𑀺 𑀮𑁄𑀓𑁄 𑀤𑀼𑀚𑁆𑀚𑀦𑀸𑀦𑀁 𑀲𑀼𑀚𑀦𑁂𑀢𑀭𑀸𑀦𑀫𑁆𑀧𑀺 𑀤𑁂𑀯𑀤𑀢𑁆𑀢𑀸𑀤𑀻𑀦𑀁 𑀦𑀺𑀘𑁆𑀘𑀁 𑀓𑀸𑀮𑀁 𑀳𑀺𑀢𑀁 𑀲𑀼𑀕𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀧𑀡𑀫𑀢𑀺 𑀦𑀫𑀲𑁆𑀲𑀢𑀻𑀢𑀺 𑀅𑀬𑀁 𑀅𑀢𑁆𑀣𑁄 𑀓𑀯𑀺𑀯𑀜𑁆𑀘𑀺𑀢𑁄. 𑀢𑀢𑁆𑀣 ‘‘𑀩𑀳𑀼𑀕𑀼𑀡𑁂 𑀧𑀡𑀫𑀢𑀻’’𑀢𑁆𑀬𑀸𑀤𑀺 𑀩𑁆𑀬𑀯𑀳𑀺𑀢𑀧𑀤𑀧𑁆𑀧𑀬𑁄𑀕𑀸 𑀫𑁄𑀳𑁄 𑀚𑀸𑀬𑀢𑀻𑀢𑀺 𑀩𑁆𑀬𑀸𑀓𑀺𑀡𑁆𑀡𑀁.

𑁪𑁪. ‘‘𑀩𑀳𑀼𑀕𑀼𑀡𑁂’’𑀘𑁆𑀘𑀸𑀤𑀺. ¶ 𑀩𑀳𑀼𑀕𑀼𑀡𑁂 𑀅𑀦𑀦𑁆𑀢𑀢𑁆𑀢𑀸 𑀩𑀳𑀼𑀪𑀽𑀢𑁂 𑀲𑀻𑀮𑀲𑀫𑀸𑀥𑀺𑀆𑀤𑀺𑀕𑀼𑀡𑁂 𑀲𑀫𑀦𑀼𑀲𑁆𑀲𑀭𑀁 𑀯𑀺𑀲𑁂𑀲𑀢𑁄 𑀅𑀦𑀼𑀲𑁆𑀲𑀭𑀦𑁆𑀢𑁄 𑀧𑀫𑀼𑀤𑀺𑀢𑁄 𑀢𑀢𑁄𑀬𑁂𑀯 𑀧𑀳𑀝𑁆𑀞𑁄 𑀅𑀬𑀁 𑀚𑀦𑁄 𑀲𑀢𑁆𑀢𑀦𑀺𑀓𑀸𑀬𑁄 𑀤𑀼𑀚𑁆𑀚𑀦𑀸𑀦𑀫𑁆𑀧𑀺 𑀅𑀲𑀧𑁆𑀧𑀼𑀭𑀺𑀲𑀸𑀦𑀫𑁆𑀧𑀺 𑀦𑀺𑀘𑁆𑀘𑀁 𑀲𑀢𑀢𑀁 𑀳𑀺𑀢𑀁 𑀫𑀺𑀢𑁆𑀢𑀪𑀽𑀢𑀁 𑀲𑀼𑀕𑀢𑀁 𑀲𑀩𑁆𑀩𑀜𑁆𑀜𑀼𑀁 𑀧𑀡𑀫𑀢𑀺 𑀯𑀦𑁆𑀤𑀢𑀺. 𑀏𑀢𑁆𑀣 𑀧𑀤𑀸𑀦𑀁 𑀅𑀝𑁆𑀞𑀸𑀦𑀧𑀬𑁄𑀕𑀢𑁄 𑀩𑁆𑀬𑀸𑀓𑀺𑀡𑁆𑀡𑀢𑁆𑀢𑀁 𑀧𑀤𑀢𑁆𑀣𑀸𑀦𑀼𑀲𑀸𑀭𑁂𑀦𑁂𑀯 𑀕𑀫𑁆𑀬𑀢𑁂.

𑁪𑁫.

𑀯𑀺𑀲𑀺𑀝𑁆𑀞𑀯𑀘𑀦𑀸’𑀧𑁂𑀢𑀁, 𑀕𑀸𑀫𑁆𑀫𑀁’𑀢𑁆𑀬’𑀪𑀺𑀫𑀢𑀁 𑀬𑀣𑀸;

𑀓𑀜𑁆𑀜𑁂 𑀓𑀸𑀫𑀬𑀫𑀸𑀦𑀁 𑀫𑀁, 𑀦 𑀓𑀸𑀫𑀬𑀲𑀺 𑀓𑀺𑀁 𑀦𑁆𑀯𑀺’𑀤𑀁.

𑁪𑁫. 𑀯𑀺𑀲𑀺𑀝𑁆𑀞𑀲𑁆𑀲 𑀓𑀲𑁆𑀲𑀘𑀺 𑀅𑀢𑁆𑀣𑀲𑁆𑀲 𑀯𑀘𑀦𑀢𑁄 𑀓𑀣𑀦𑀢𑁄 𑀅𑀧𑁂𑀢𑀁 𑀧𑀭𑀺𑀘𑁆𑀘𑀢𑁆𑀢𑀁. 𑀓𑀜𑁆𑀜𑁂𑀇𑀢𑁆𑀬𑀸𑀫𑀦𑁆𑀢𑀦𑀁. 𑀅𑀳𑀁 𑀢𑀁 𑀇𑀘𑁆𑀙𑀸𑀫𑀺, 𑀢𑀸𑀤𑀺𑀲𑀁 𑀫𑀁 𑀢𑁆𑀯𑀁 𑀓𑀲𑁆𑀫𑀸 𑀦𑀺𑀘𑁆𑀙𑀲𑀺, 𑀇𑀤𑀁 𑀓𑀺𑀁 𑀦𑀼 𑀇𑀢𑀺 𑀕𑀸𑀫𑀺𑀓𑀚𑀦𑀯𑀘𑀦𑀢𑁆𑀢𑀸 ‘‘𑀓𑀜𑁆𑀜𑀺’’𑀘𑁆𑀘𑀸𑀤𑀺𑀓𑀁 𑀕𑀸𑀫𑁆𑀫𑀁.

𑁪𑁫. ‘‘𑀯𑀺𑀲𑀺𑀝𑁆𑀞𑁂’’𑀘𑁆𑀘𑀸𑀤𑀺. 𑀯𑀺𑀲𑀺𑀝𑁆𑀞𑀯𑀘𑀦𑀸𑀧𑁂𑀢𑀁 𑀧𑀺𑀬𑀪𑀽𑀢𑁂𑀦 𑀉𑀢𑁆𑀢𑀺𑀯𑀺𑀲𑁂𑀲𑁂𑀦 𑀯𑀺𑀲𑁂𑀲𑀺𑀢𑀩𑁆𑀩𑀲𑁆𑀲 𑀓𑀣𑀦𑀢𑁄 𑀧𑀭𑀺𑀳𑀻𑀦𑀁 𑀯𑀸𑀓𑁆𑀬𑀁 ‘‘𑀕𑀸𑀫𑁆𑀫𑀤𑁄𑀲’’𑀦𑁆𑀢𑀺 𑀓𑀯𑀻𑀳𑀺 𑀅𑀪𑀺𑀫𑀢𑀁. 𑀉𑀤𑀸𑀳𑀭𑀢𑀺 ‘‘𑀬𑀣𑀺’’𑀘𑁆𑀘𑀸𑀤𑀺. 𑀓𑀜𑁆𑀜𑁂 𑀳𑁂 𑀓𑀜𑁆𑀜𑁂 𑀓𑀸𑀫𑀬𑀫𑀸𑀦𑀁 𑀫𑀁 𑀢𑀼𑀯𑀁 𑀇𑀘𑁆𑀙𑀬𑀫𑀸𑀦𑀁 𑀫𑀁 𑀦 𑀓𑀸𑀫𑀬𑀲𑀺 𑀢𑁆𑀯𑀁 𑀦 𑀇𑀘𑁆𑀙𑀲𑀺, 𑀇𑀤𑀁 𑀓𑀺𑀁 𑀦𑀼. 𑀈𑀤𑀺𑀲𑁂 𑀇𑀘𑁆𑀙𑀸𑀯𑀺𑀖𑀸𑀢𑁂 𑀯𑀼𑀘𑁆𑀘𑀫𑀸𑀦𑁂 𑀏𑀯𑀁𑁋

‘‘𑀬𑀸𑀘𑀦𑀸 𑀫𑀤𑀻𑀬𑀸 𑀢𑀯 𑀓𑀸𑀭𑀡𑀸𑀬𑀁,

𑀤𑀺𑀦𑁂 𑀤𑀺𑀦𑁂 𑀦𑀺𑀧𑁆𑀨𑀮𑀢𑀁 𑀉𑀧𑁂𑀢𑀺;

𑀤𑀓𑁆𑀔𑁄 𑀲𑀤𑀸 𑀫𑀸𑀦𑀺𑀦𑀺𑀫𑀸𑀦𑀪𑀗𑁆𑀕𑁂,

𑀲 𑀫𑀦𑁆𑀫𑀣𑁄𑀦𑁆𑀬𑀢𑁆𑀭 𑀕𑀢𑁄 𑀫𑀢𑁄 𑀦𑀼’’𑀇𑀢𑀺 𑀯𑀺𑀬.

𑀧𑀺𑀬𑀢𑁆𑀣𑀲𑁆𑀲 𑀓𑀣𑀦𑀸𑀪𑀸𑀯𑀢𑁄 ‘‘𑀓𑀜𑁆𑀜𑁂’’𑀢𑁆𑀬𑀸𑀤𑀺𑀓𑀁 𑀯𑀘𑀦𑀁 𑀫𑀺𑀮𑀓𑁆𑀔𑀼𑀓𑀸𑀦𑀁 𑀯𑀘𑀦𑀢𑁆𑀢𑀸 𑀕𑀸𑀫𑁆𑀫𑀁. 𑀏𑀢𑁆𑀣 𑀓𑀜𑁆𑀜𑀸𑀲𑀤𑁆𑀤𑁄 𑀤𑀲𑀯𑀲𑁆𑀲𑀺𑀓𑀸𑀬 𑀯𑀢𑁆𑀢𑀢𑀻𑀢𑀺 𑀦𑀺𑀬𑀫𑁄 𑀦𑀢𑁆𑀣𑀺. 𑀯𑀺𑀲𑀺𑀝𑁆𑀞𑀲𑁆𑀲 𑀅𑀢𑁆𑀣𑀲𑁆𑀲 𑀯𑀘𑀦𑀢𑁄 𑀅𑀧𑁂𑀢𑀦𑁆𑀢𑀺 𑀯𑀸𑀓𑁆𑀬𑀁.

𑁪𑁬.

𑀧𑀤𑀲𑀦𑁆𑀥𑀸𑀦𑀢𑁄 𑀓𑀺𑀜𑁆𑀘𑀺, 𑀤𑀼𑀧𑁆𑀧𑀢𑀻𑀢𑀺𑀓𑀭𑀁 𑀪𑀯𑁂;

𑀢𑀫𑁆𑀧𑀺 𑀕𑀸𑀫𑁆𑀫𑀁𑀢𑁆𑀬’𑀪𑀺𑀫𑀢𑀁, 𑀬𑀣𑀸 𑀬𑀸𑀪𑀯𑀢𑁄 𑀧𑀺𑀬𑀸.

𑁪𑁬. ‘‘𑀧𑀤𑁂’’𑀘𑁆𑀘𑀸𑀤𑀺. 𑀧𑀤𑀲𑀦𑁆𑀥𑀸𑀦𑀢𑁄 𑀧𑀼𑀩𑁆𑀩𑀸𑀧𑀭𑀸𑀦𑀁 𑀧𑀤𑀸𑀦𑀁 𑀲𑀦𑁆𑀥𑀺𑀯𑀲𑁂𑀦 𑀬𑀁 𑀓𑀺𑀜𑁆𑀘𑀺 𑀯𑀸𑀓𑁆𑀬𑀁 𑀤𑀼𑀝𑁆𑀞𑀼 𑀅𑀲𑀼𑀢𑀺𑀲𑀼𑀪𑀕𑀁 𑀧𑀢𑀻𑀢𑀺𑀫𑀯𑀩𑁄𑀥𑀁 𑀓𑀭𑁄𑀢𑀻𑀢𑀺 𑀓𑀭𑀁 𑀪𑀯𑁂, 𑀢𑀫𑁆𑀧𑀺 𑀬𑀣𑀸𑀯𑀼𑀢𑁆𑀢𑀁 𑀕𑀸𑀫𑁆𑀫𑀦𑁆𑀢𑁆𑀬𑀪𑀺𑀫𑀢𑀁. 𑀬𑀣𑀸𑀢𑁆𑀬𑀼𑀤𑀸𑀳𑀭𑀢𑀺. 𑀪𑀯𑀢𑁄 𑀬𑀸 𑀓𑀸𑀘𑀺 𑀯𑀦𑀺𑀢𑀸 𑀧𑀺𑀬𑀸 𑀳𑁄𑀢𑀻𑀢𑀺 𑀏𑀓𑁄𑀢𑁆𑀣𑁄. 𑀬𑀪 𑀫𑁂𑀣𑀼𑀦𑁂. 𑀬𑀪𑀦𑀁 𑀬𑀸𑀪𑁄. 𑀲𑁄 𑀯𑀺𑀚𑁆𑀚𑀢𑁂 𑀬𑀲𑁆𑀲 𑀲𑁄 𑀬𑀸𑀪𑀯𑀸. 𑀢𑀲𑁆𑀲 𑀬𑀸𑀪𑀯𑀢𑁄 𑀧𑀺𑀬𑀸𑀇𑀢𑁆𑀬𑀧𑀺 𑀪𑀯𑀢𑀺.

𑁪𑁬. ‘‘𑀧𑀤𑀲𑀦𑁆𑀥𑀸𑀦𑀺’’𑀘𑁆𑀘𑀸𑀤𑀺. 𑀓𑀺𑀜𑁆𑀘𑀺 𑀯𑀸𑀓𑁆𑀬𑀁 𑀧𑀤𑀲𑀦𑁆𑀥𑀸𑀦𑀢𑁄 𑀧𑀼𑀩𑁆𑀩𑀸𑀧𑀭𑀧𑀤𑀸𑀦𑀁 𑀖𑀝𑀦𑀢𑁄 𑀤𑀼𑀧𑁆𑀧𑀢𑀻𑀢𑀺𑀓𑀭𑀁 𑀪𑀯𑁂 𑀅𑀲𑀩𑁆𑀪𑀪𑀽𑀢𑀤𑀼𑀝𑁆𑀞𑀢𑁆𑀣𑀲𑁆𑀲 𑀧𑀓𑀸𑀲𑀓𑁄 𑀳𑁄𑀢𑀺, 𑀢𑀫𑁆𑀧𑀺 𑀕𑀸𑀫𑁆𑀫𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀕𑀸𑀫𑁆𑀫𑀤𑁄𑀲𑁂𑀦 𑀤𑀽𑀲𑀺𑀢𑀦𑁆𑀢𑀺 [𑀤𑀼𑀧𑁆𑀧𑀲𑀺𑀢𑀦𑁆𑀢𑀺 (𑀓.)] 𑀲𑀩𑁆𑀩𑁂𑀳𑀺 𑀓𑀯𑀻𑀳𑀺 𑀅𑀪𑀺𑀫𑀢𑀁 𑀜𑀸𑀢𑀁. 𑀬𑀣𑀸𑀢𑀺 𑀉𑀤𑀸𑀳𑀭𑀢𑀺. 𑀪𑀯𑀢𑁄 𑀪𑀯𑀦𑁆𑀢𑀲𑁆𑀲 𑀬𑀸 𑀓𑀸𑀘𑀺 𑀇𑀢𑁆𑀣𑀻 𑀧𑀺𑀬𑀸 𑀪𑀯𑀢𑀻𑀢𑀺 𑀅𑀬𑀁 𑀓𑀯𑀺𑀦𑀸 𑀇𑀘𑁆𑀙𑀺𑀢𑀢𑁆𑀣𑁄. 𑀬𑀸𑀪𑀯𑀢𑁄 𑀫𑁂𑀣𑀼𑀦𑀯𑀦𑁆𑀢𑀲𑁆𑀲 𑀧𑀺𑀬𑀸𑀢𑀺𑀧𑀺 𑀅𑀢𑁆𑀣𑁄. ‘‘𑀬𑀪 𑀫𑁂𑀣𑀼𑀦𑁂’’𑀢𑀺 𑀳𑀺 𑀥𑀸𑀢𑀼. 𑀬𑀪𑀦𑀁 𑀬𑀸𑀪𑁄, 𑀲𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀬𑀸𑀪𑀯𑀸, 𑀢𑀲𑁆𑀲 𑀬𑀸𑀪𑀯𑀢𑁄𑀢𑀺 𑀕𑀳𑀺𑀢𑁂 𑀅𑀲𑁄𑀢𑀩𑁆𑀩𑀢𑁆𑀢𑀸 𑀤𑀼𑀧𑁆𑀧𑀢𑀻𑀢𑀺𑀓𑀭𑀢𑀸. 𑀤𑀼𑀝𑁆𑀞𑀸𑀬𑁂𑀯 𑀧𑀢𑀻𑀢𑀺 𑀅𑀯𑀩𑁄𑀥𑁄, 𑀢𑀁 𑀓𑀭𑁄𑀢𑀻𑀢𑀺 𑀯𑀺𑀕𑁆𑀕𑀳𑁄.

𑁪𑁭.

𑀯𑀼𑀢𑁆𑀢𑁂𑀲𑀼 𑀲𑀽𑀘𑀺𑀢𑁂 𑀞𑀸𑀦𑁂, 𑀧𑀤𑀘𑁆𑀙𑁂𑀤𑁄 𑀪𑀯𑁂 𑀬𑀢𑀺;

𑀬𑀁 𑀢𑀸𑀬 𑀳𑀻𑀦𑀁 𑀢𑀁 𑀯𑀼𑀢𑁆𑀢𑀁, 𑀬𑀢𑀺𑀳𑀻𑀦𑀦𑁆𑀢𑀺 𑀲𑀸 𑀧𑀦.

𑁪𑁭. ‘‘𑀯𑀼𑀢𑁆𑀢𑁂𑀲𑁆𑀯𑀺’’𑀘𑁆𑀘𑀸𑀤𑀺. 𑀯𑀼𑀢𑁆𑀢𑁂𑀲𑀼 𑀙𑀦𑁆𑀤𑁄𑀲𑀢𑁆𑀣𑀧𑀭𑀺𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀅𑀦𑀼𑀝𑁆𑀞𑀼𑀪𑀸𑀤𑀻𑀲𑀼 𑀲𑀽𑀘𑀺𑀢𑁂 𑀞𑀸𑀦𑁂 ‘‘𑀏𑀢𑁆𑀣𑀬𑀢𑀻’’𑀢𑀺 𑀙𑀦𑁆𑀤𑁄𑀯𑀺𑀘𑀺𑀢𑀺𑀬𑀸 𑀧𑀓𑀸𑀲𑀺𑀢𑀝𑁆𑀞𑀸𑀦𑁂 𑀧𑀤𑀸𑀦𑀁 𑀲𑁆𑀬𑀸𑀤𑁆𑀬𑀦𑁆𑀢𑀸𑀦𑀁 𑀙𑁂𑀤𑁄 𑀯𑀺𑀘𑁆𑀙𑀺𑀢𑀺 𑀯𑀺𑀪𑀸𑀕𑁄 𑀅𑀦𑀼𑀯𑀸𑀤𑁄 𑀬𑀁 𑀬𑀢𑀺 𑀪𑀯𑁂𑀢𑀺 𑀯𑀺𑀥𑀻𑀬𑀢𑀺. 𑀢𑀸𑀬 ¶ 𑀬𑀢𑀺𑀬𑀸 𑀳𑀻𑀦𑀁 𑀧𑀭𑀺𑀳𑀻𑀦𑀁 𑀯𑀺𑀭𑀼𑀤𑁆𑀥𑀁 𑀬𑀁 𑀯𑀸𑀓𑁆𑀬𑀁, 𑀢𑀁 𑀬𑀢𑀺𑀳𑀻𑀦𑀦𑁆𑀢𑀺 𑀯𑀼𑀢𑁆𑀢𑀁, ‘‘𑀬𑀫𑀦𑀁 𑀯𑀺𑀭𑀸𑀫𑁄 𑀬𑀢𑀺, 𑀲𑀸 𑀳𑀻𑀦𑀸 𑀏𑀢𑁆𑀣𑀸’’𑀢𑀺 𑀓𑀢𑁆𑀯𑀸. 𑀧𑀦𑀸𑀢𑀺 𑀯𑀺𑀲𑁂𑀲𑁂, 𑀲𑀸 𑀬𑀢𑀺 𑀧𑀦𑀸𑀢𑀺 𑀲𑀫𑁆𑀩𑀦𑁆𑀥𑁄.

𑁪𑁭. ‘‘𑀯𑀼𑀢𑁆𑀢𑁂𑀲𑁆𑀯’’𑀘𑁆𑀘𑀸𑀤𑀺. 𑀯𑀼𑀢𑁆𑀢𑁂𑀲𑀼 𑀙𑀦𑁆𑀤𑁄𑀲𑀢𑁆𑀣𑁂 𑀦𑀺𑀤𑁆𑀤𑀺𑀝𑁆𑀞𑀅𑀦𑀼𑀝𑁆𑀞𑀼𑀪𑀸𑀤𑀻𑀲𑀼 𑀲𑀽𑀘𑀺𑀢𑁂 𑀞𑀸𑀦𑁂 ‘‘𑀅𑀬𑀫𑁂𑀢𑁆𑀣 𑀬𑀢𑀻’’𑀢𑀺 𑀧𑀓𑀸𑀲𑀺𑀢𑁂 𑀞𑀸𑀦𑁂 𑀧𑀤𑀘𑁆𑀙𑁂𑀤𑁄 𑀲𑁆𑀬𑀸𑀤𑁆𑀬𑀦𑁆𑀢𑀢𑁆𑀬𑀸𑀤𑁆𑀬𑀦𑁆𑀢𑀸𑀤𑀻𑀦𑀁 𑀧𑀤𑀸𑀦𑀁 𑀯𑀺𑀘𑁆𑀙𑁂𑀤𑁄 𑀬𑀢𑀺 𑀦𑀸𑀫 𑀪𑀯𑁂, 𑀢𑀸𑀬 𑀬𑀢𑀺𑀬𑀸 𑀬𑀁 𑀯𑀸𑀓𑁆𑀬𑀁 𑀳𑀻𑀦𑀁 𑀅𑀪𑀺𑀫𑀢𑀝𑁆𑀞𑀸𑀦𑁂 𑀯𑀡𑁆𑀡𑀯𑀺𑀘𑁆𑀙𑁂𑀤𑁂𑀦 𑀧𑀭𑀺𑀳𑀻𑀦𑀁, 𑀢𑀁 𑀯𑀸𑀓𑁆𑀬𑀁 𑀬𑀢𑀺𑀳𑀻𑀦𑀦𑁆𑀢𑀺 𑀬𑀢𑀺𑀳𑀻𑀦𑀤𑁄𑀲𑁂𑀦 𑀤𑀼𑀝𑁆𑀞𑀦𑁆𑀢𑀺 𑀯𑀺𑀜𑁆𑀜𑀽𑀳𑀺 𑀯𑀼𑀢𑁆𑀢𑀁.

𑁪𑁮.

𑀬𑀢𑀺 𑀲𑀩𑁆𑀩𑀢𑁆𑀣 𑀧𑀸𑀤𑀦𑁆𑀢𑁂, 𑀯𑀼𑀢𑁆𑀢𑀟𑁆𑀠𑁂 𑀘 𑀯𑀺𑀲𑁂𑀲𑀢𑁄;

𑀧𑀼𑀩𑁆𑀩𑀸𑀧𑀭𑀸𑀦𑁂𑀓𑀯𑀡𑁆𑀡-𑀧𑀤𑀫𑀚𑁆𑀛𑁂𑀧𑀺 𑀓𑀢𑁆𑀣𑀘𑀺.

𑁪𑁮. ‘‘𑀬𑀢𑀺’’𑀘𑁆𑀘𑀸𑀤𑀺. 𑀲𑀩𑁆𑀩𑀢𑁆𑀣 𑀧𑀸𑀤𑀦𑁆𑀢𑁂 𑀲𑀩𑁆𑀩𑀲𑁆𑀫𑀺𑀁 𑀘𑀢𑀼𑀢𑁆𑀣𑀁𑀲𑀲𑀗𑁆𑀔𑀸𑀢𑀸𑀦𑀁 𑀕𑀸𑀣𑀸𑀧𑀸𑀤𑀸𑀦𑀁 𑀅𑀦𑁆𑀢𑁂 𑀅𑀯𑀲𑀸𑀦𑁂 𑀘 𑀯𑀺𑀲𑁂𑀲𑀢𑁄 𑀯𑀺𑀲𑁂𑀲𑁂𑀦 𑀏𑀓𑀦𑁆𑀢𑁂𑀦 𑀯𑀼𑀢𑁆𑀢𑀟𑁆𑀠𑁂 𑀘 𑀯𑀼𑀢𑁆𑀢𑀸𑀦𑀁 𑀧𑀸𑀤𑀤𑁆𑀯𑀬𑀲𑀗𑁆𑀔𑀸𑀢𑁂 𑀅𑀟𑁆𑀠𑁂 𑀘, 𑀢𑀤𑀯𑀲𑀸𑀦𑁂 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑀺𑀬𑀸’’𑀢𑀺 𑀲𑁂𑀲𑁄. 𑀦𑀦𑀼 ‘‘𑀧𑀤𑀘𑁆𑀙𑁂𑀤𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀤𑀫𑀚𑁆𑀛𑁂 𑀬𑀢𑀺 𑀦 𑀳𑁄𑀢𑁂𑀯𑀸𑀢𑀺 𑀘𑁂𑀢𑀺 𑀆𑀳 ‘‘𑀧𑀼𑀩𑁆𑀩’’𑀇𑀘𑁆𑀘𑀸𑀤𑀺. 𑀓𑀢𑁆𑀣𑀘𑀺 𑀓𑀺𑀲𑁆𑀫𑀺𑀜𑁆𑀘𑀺 𑀞𑀸𑀦𑁂, 𑀦 𑀲𑀩𑁆𑀩𑀢𑁆𑀣. 𑀧𑀼𑀩𑁆𑀩𑀸𑀧𑀭𑀸𑀦𑁂𑀓𑀯𑀡𑁆𑀡𑀧𑀤𑀫𑀚𑁆𑀛𑁂𑀧𑀺 𑀬𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀩𑁆𑀩𑁂 𑀘 𑀅𑀧𑀭𑁂 𑀘 𑀧𑀼𑀩𑁆𑀩𑀸𑀧𑀭𑁂. 𑀅𑀦𑁂𑀓𑁂 𑀯𑀡𑁆𑀡𑀸 𑀅𑀦𑁂𑀓𑀯𑀡𑁆𑀡𑀸. 𑀧𑀼𑀩𑁆𑀩𑀸𑀧𑀭𑁂 𑀅𑀦𑁂𑀓𑀯𑀡𑁆𑀡𑀸 𑀬𑀲𑁆𑀲 𑀢𑀁 𑀢𑀣𑀸. 𑀢𑀜𑁆𑀘 𑀢𑀁 𑀧𑀤𑀜𑁆𑀘, 𑀢𑀲𑁆𑀲 𑀫𑀚𑁆𑀛𑁂𑀧𑀺.

𑁪𑁮. 𑀇𑀤𑀸𑀦𑀺 𑀬𑀢𑀺𑀫𑁆𑀳𑀺 𑀮𑀩𑁆𑀪𑀫𑀸𑀦𑀁 𑀲𑀩𑁆𑀩𑀯𑀺𑀲𑀬𑀁 𑀤𑀲𑁆𑀲𑁂𑀢𑀺 ‘‘𑀬𑀢𑀺’’𑀘𑁆𑀘𑀸𑀤𑀺𑀦𑀸. 𑀲𑀸 𑀧𑀦 𑀬𑀢𑀺 𑀲𑀩𑁆𑀩𑀢𑁆𑀣 𑀧𑀸𑀤𑀦𑁆𑀢𑁂 𑀘𑀢𑀼𑀢𑁆𑀣𑀁𑀲𑀲𑀗𑁆𑀔𑀸𑀢𑀕𑀸𑀣𑀸𑀧𑀸𑀤𑀸𑀦𑀁 𑀅𑀦𑁆𑀢𑁂 𑀘 𑀯𑀺𑀲𑁂𑀲𑀢𑁄 𑀦𑀺𑀬𑀫𑀢𑁄 𑀯𑀼𑀢𑁆𑀢𑀟𑁆𑀠𑁂 𑀘 𑀯𑀼𑀢𑁆𑀢𑀸𑀦𑀁 𑀧𑀸𑀤𑀤𑁆𑀯𑀬𑀲𑀗𑁆𑀔𑀸𑀢𑁂 𑀅𑀟𑁆𑀠𑁂 𑀘, 𑀢𑀤𑀯𑀲𑀸𑀦𑁂 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀢𑁆𑀣𑀘𑀺 𑀓𑀺𑀲𑁆𑀫𑀺𑀜𑁆𑀘𑀺 𑀞𑀸𑀦𑁂 𑀧𑀼𑀩𑁆𑀩𑀸𑀧𑀭𑀸𑀦𑁂𑀓𑀯𑀡𑁆𑀡𑀧𑀤𑀫𑀚𑁆𑀛𑁂𑀧𑀺 𑀧𑀼𑀩𑁆𑀩𑀸𑀧𑀭𑀪𑀽𑀢𑀅𑀦𑁂𑀓𑀯𑀡𑁆𑀡𑀲𑀫𑀦𑁆𑀦𑀸𑀕𑀢𑀧𑀤𑀸𑀦𑀁 𑀫𑀚𑁆𑀛𑁂 ¶ 𑀘 𑀲𑀺𑀬𑀸. 𑀧𑀤𑀘𑁆𑀙𑁂𑀤𑀲𑁆𑀲 ‘‘𑀬𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀤𑀫𑀚𑁆𑀛𑁂 𑀦 𑀳𑁄𑀢𑀻𑀢𑀺 𑀲𑀗𑁆𑀓𑀸𑀧𑀭𑀺𑀳𑀭𑀡𑀢𑁆𑀣𑀁 ‘‘𑀧𑀼𑀩𑁆𑀩𑀸𑀧𑀭𑀸𑀦𑁂𑀓𑀯𑀡𑁆𑀡𑀧𑀤𑀫𑀚𑁆𑀛𑁂’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀧𑀸𑀤𑀦𑁆𑀢𑁄, 𑀯𑀼𑀢𑁆𑀢𑀟𑁆𑀠𑁄, 𑀧𑀤𑀫𑀚𑁆𑀛𑀜𑁆𑀘 𑀬𑀢𑀺𑀝𑁆𑀞𑀸𑀦𑀦𑁆𑀢𑀺. 𑀧𑀤𑀫𑀚𑁆𑀛𑁂𑀬𑁂𑀯 𑀮𑀩𑁆𑀪𑀫𑀸𑀦𑀸 𑀬𑀢𑀺 𑀓𑀢𑁆𑀣𑀘𑀺 𑀳𑁄𑀢𑀺, 𑀤𑁆𑀯𑀓𑁆𑀔𑀭𑀢𑁆𑀬𑀓𑁆𑀔𑀭𑀧𑀤𑀫𑀚𑁆𑀛𑁂 𑀧𑀦 𑀦 𑀳𑁄𑀢𑀺.

𑀢𑀢𑁆𑀣𑁄𑀤𑀸𑀳𑀭𑀡𑀧𑀘𑁆𑀘𑀼𑀤𑀸𑀳𑀭𑀡𑀸𑀦𑀺 𑀬𑀣𑀸 𑁋

𑁪𑁯.

𑀢𑀁 𑀦𑀫𑁂 𑀲𑀺𑀭𑀲𑀸 𑀘𑀸𑀫𑀻-𑀓𑀭𑀯𑀡𑁆𑀡𑀁 𑀢𑀣𑀸𑀕𑀢𑀁;

𑀲𑀓𑀮𑀸𑀧𑀺 𑀤𑀺𑀲𑀸 𑀲𑀺𑀜𑁆𑀘-𑀢𑀻𑀯 𑀲𑁄𑀡𑁆𑀡𑀭𑀲𑁂𑀳𑀺𑀬𑁄.

𑁪𑁯. 𑀉𑀤𑀸𑀳𑀭𑀻𑀬𑀢𑀻𑀢𑀺 𑀉𑀤𑀸𑀳𑀭𑀡𑀁. 𑀧𑀝𑀺𑀧𑀓𑁆𑀔𑀫𑀼𑀤𑀸𑀳𑀭𑀡𑀁 𑀧𑀘𑁆𑀘𑀼𑀤𑀸𑀳𑀭𑀡𑀁. 𑀘𑀸𑀫𑀻𑀓𑀭𑀲𑁆𑀲𑁂𑀯 𑀲𑀼𑀯𑀡𑁆𑀡𑀲𑁆𑀲 𑀯𑀺𑀬 𑀯𑀡𑁆𑀡𑁄 𑀬𑀲𑁆𑀲 𑀢𑀁 𑀢𑀣𑀸𑀕𑀢𑀁 𑀲𑀺𑀭𑀲𑀸 𑀦𑀫𑀸𑀫𑀺. 𑀓𑀻𑀤𑀺𑀲𑀁? 𑀬𑁄 𑀢𑀣𑀸𑀕𑀢𑁄 𑀲𑀓𑀮𑀸𑀧𑀺 𑀤𑀺𑀲𑀸 𑀲𑀩𑁆𑀩𑀸𑀬𑁂𑀯 𑀤𑀲 𑀤𑀺𑀲𑀸 𑀲𑁄𑀡𑁆𑀡𑀭𑀲𑁂𑀳𑀺 𑀘𑀸𑀫𑀻𑀓𑀭𑀯𑀡𑁆𑀡𑀢𑁆𑀢𑀸 𑀭𑀲𑁂𑀳𑀺 𑀲𑀼𑀯𑀡𑁆𑀡𑀭𑀲𑁂𑀳𑀺 𑀲𑀺𑀜𑁆𑀘𑀢𑀻𑀯 𑀲𑀺𑀜𑁆𑀘𑀢𑀻𑀢𑀺 𑀫𑀜𑁆𑀜𑁂, 𑀢𑀁 𑀢𑀣𑀸𑀕𑀢𑀦𑁆𑀢𑀺 𑀅𑀧𑁂𑀓𑁆𑀔𑀢𑁂. 𑀏𑀢𑁆𑀣 𑀧𑀼𑀩𑁆𑀩𑀧𑀸𑀤𑀦𑁆𑀢𑁂 𑀯𑀼𑀢𑁆𑀢𑀟𑁆𑀠𑁂 𑀘 𑀦𑀺𑀬𑀢𑀸 𑀬𑀢𑀺. 𑀘𑀸𑀫𑀻𑀓𑀭𑀲𑀤𑁆𑀤𑁄 𑀘𑁂𑀢𑁆𑀣 𑀘𑀢𑀼𑀭𑀓𑁆𑀔𑀭𑁄. 𑀢𑀢𑁆𑀣 𑀘𑀸𑀫𑀻𑀇𑀢𑀺 𑀧𑀼𑀩𑁆𑀩𑀪𑀸𑀕𑁄, 𑀓𑀭𑀇𑀢𑀺 𑀧𑀭𑁄. 𑀏𑀢𑁆𑀣 𑀧𑀼𑀩𑁆𑀩𑀸𑀧𑀭𑀸𑀦𑁂𑀓𑀯𑀡𑁆𑀡𑀧𑀤𑀫𑀚𑁆𑀛𑁂 𑀬𑀢𑀺. 𑀲𑀺𑀜𑁆𑀘𑀢𑀻𑀢𑀺 𑀏𑀢𑁆𑀣 𑀧𑀦 𑀧𑀼𑀩𑁆𑀩𑀸𑀧𑀭𑀸𑀦𑁂𑀓𑀯𑀡𑁆𑀡𑀧𑀤𑀫𑀚𑁆𑀛𑀢𑁆𑀢𑀸𑀪𑀸𑀯𑀸 𑀲𑀺𑀜𑁆𑀘𑀇𑀢𑁆𑀬𑀢𑁆𑀭 𑀬𑀢𑀺 𑀤𑀼𑀝𑁆𑀞𑀸𑀢𑀺. 𑀇𑀤𑀁 𑀧𑀘𑁆𑀘𑀼𑀤𑀸𑀳𑀭𑀡𑀁.

𑁪𑁯. 𑀢𑀢𑁆𑀣 𑀧𑀸𑀤𑀦𑁆𑀢𑀯𑀼𑀢𑁆𑀢𑀟𑁆𑀠𑁂𑀲𑀼 𑀬𑀢𑀺𑀬𑀸 𑀧𑀸𑀓𑀝𑀢𑁆𑀢𑀸 𑀢𑀲𑁆𑀫𑀺𑀁 𑀧𑀤𑀫𑀚𑁆𑀛𑁂 𑀬𑀢𑀺𑀬𑀸 𑀉𑀤𑀸𑀳𑀭𑀡𑀧𑀘𑁆𑀘𑀼𑀤𑀸𑀳𑀭𑀡𑀸𑀦𑀺 𑀇𑀝𑁆𑀞𑁄𑀤𑀸𑀳𑀭𑀡𑀧𑀝𑀺𑀧𑀓𑁆𑀔𑁄𑀤𑀸𑀳𑀭𑀡𑀸𑀦𑀺 𑀬𑀣𑀸. ‘‘𑀢𑀁 𑀦𑀫𑁂’’𑀘𑁆𑀘𑀸𑀤𑀺. 𑀬𑁄 𑀢𑀣𑀸𑀕𑀢𑁄 𑀲𑀓𑀮𑀸𑀧𑀺 𑀤𑀺𑀲𑀸 𑀲𑁄𑀡𑁆𑀡𑀭𑀲𑁂𑀳𑀺 𑀲𑀼𑀯𑀡𑁆𑀡𑀭𑀲𑀥𑀸𑀭𑀸𑀳𑀺 𑀲𑀺𑀜𑁆𑀘𑀢𑀻𑀯 𑀲𑀺𑀜𑁆𑀘𑀢𑀺 𑀫𑀜𑁆𑀜𑁂, 𑀇𑀯𑀲𑀤𑁆𑀤𑁄 𑀯𑀺𑀢𑀓𑁆𑀓𑁂. 𑀘𑀸𑀫𑀻𑀓𑀭𑀯𑀡𑁆𑀡𑀁 𑀲𑀼𑀯𑀡𑁆𑀡𑀯𑀡𑁆𑀡𑀲𑀤𑀺𑀲𑀙𑀯𑀺𑀯𑀡𑁆𑀡𑀁 𑀢𑀁 𑀢𑀣𑀸𑀕𑀢𑀁 𑀲𑀺𑀭𑀲𑀸 𑀦𑀫𑁂. 𑀏𑀢𑁆𑀣 ‘‘𑀘𑀸𑀫𑀻𑀓𑀭𑀯𑀡𑁆𑀡’’𑀦𑁆𑀢𑀺 𑀬𑀢𑀺𑀬𑀸 𑀘𑀸𑀫𑀻𑀢𑀺 𑀅𑀓𑁆𑀔𑀭𑀤𑁆𑀯𑀬𑀫𑀢𑀺𑀓𑁆𑀓𑀫𑁆𑀫 𑀞𑀺𑀢𑀢𑁆𑀢𑀸 𑀅𑀦𑁆𑀢𑁂𑀧𑀺 𑀓𑀭𑀇𑀢𑀺 𑀅𑀓𑁆𑀔𑀭𑀤𑁆𑀯𑀬𑁂𑀦𑀸𑀦𑀽𑀦𑀢𑁆𑀢𑀸 ¶ 𑀧𑀤𑀘𑁆𑀙𑁂𑀤𑀲𑁆𑀲 𑀧𑀼𑀩𑁆𑀩𑀸𑀧𑀭𑀯𑀡𑁆𑀡𑀸𑀦𑀫𑀦𑁂𑀓𑀢𑁆𑀢𑀫𑀺𑀢𑀺𑀝𑁆𑀞𑁄𑀤𑀸𑀳𑀭𑀡𑀁. 𑀲𑀺𑀜𑁆𑀘𑀢𑀻𑀢𑀺 𑀧𑀤𑁂 𑀲𑀺𑀜𑁆𑀘𑀸𑀢𑀺 𑀯𑀡𑁆𑀡𑀤𑁆𑀯𑀬𑀫𑀢𑀺𑀓𑁆𑀓𑀫𑁆𑀫 𑀬𑀢𑀺𑀬𑀸 𑀤𑀺𑀲𑁆𑀲𑀫𑀸𑀦𑀢𑁆𑀢𑁂𑀧𑀺 𑀢𑀺𑀇𑀢𑀺 𑀧𑀭𑀪𑀸𑀕𑁂 𑀏𑀓𑀯𑀡𑁆𑀡𑀢𑁆𑀢𑀸 𑀅𑀦𑁂𑀓𑀯𑀡𑁆𑀡𑀸𑀪𑀸𑀯𑁄𑀢𑀺 𑀧𑀘𑁆𑀘𑀼𑀤𑀸𑀳𑀭𑀡𑀁. 𑀏𑀢𑁆𑀣 𑀅𑀦𑁂𑀓𑀯𑀡𑁆𑀡𑀢𑁆𑀢𑀁 𑀧𑀤𑀯𑀲𑁂𑀦𑁂𑀯 𑀜𑀸𑀢𑀩𑁆𑀩𑀁. 𑀘𑀸𑀫𑀻𑀓𑀭𑀲𑁆𑀲 𑀯𑀡𑁆𑀡𑁄 𑀯𑀺𑀬 𑀯𑀡𑁆𑀡𑁄 𑀬𑀲𑁆𑀲 𑀲𑁄𑀢𑀺 𑀯𑀺𑀕𑁆𑀕𑀳𑁄.

𑁫𑁦.

𑀲𑀭𑁄 𑀲𑀦𑁆𑀥𑀺𑀫𑁆𑀳𑀺 𑀧𑀼𑀩𑁆𑀩𑀦𑁆𑀢𑁄, 𑀯𑀺𑀬 𑀮𑁄𑀧𑁂 𑀯𑀺𑀪𑀢𑁆𑀢𑀺𑀬𑀸;

𑀅𑀜𑁆𑀜𑀣𑀸 𑀢𑁆𑀯’𑀜𑁆𑀜𑀣𑀸 𑀢𑀢𑁆𑀣, 𑀬𑀸𑀤𑁂𑀲𑀸𑀤𑀺 𑀧𑀭𑀸𑀤𑀺’𑀯.

𑁫𑁦. ‘‘𑀲𑀭𑁄’’𑀘𑁆𑀘𑀸𑀤𑀺. 𑀯𑀺𑀪𑀢𑁆𑀢𑀺𑀬𑀸 𑀮𑁄𑀧𑁂 𑀲𑀢𑀺 𑀲𑀦𑁆𑀥𑀺𑀫𑁆𑀳𑀺 𑀲𑀁𑀳𑀺𑀢𑀸𑀬𑀁 𑀓𑀢𑀸𑀬𑀁 𑀲𑀭𑁄 𑀧𑀭𑀧𑀤𑀸𑀤𑀺𑀪𑀽𑀢𑁄 𑀧𑀼𑀩𑁆𑀩𑀦𑁆𑀢𑁄 𑀯𑀺𑀬 𑀧𑀼𑀩𑁆𑀩𑀧𑀤𑀲𑁆𑀲 𑀅𑀦𑁆𑀢𑀪𑀽𑀢𑁄 𑀬𑁄 𑀲𑀭𑁄, 𑀲𑁄 𑀯𑀺𑀬 𑀳𑁄𑀢𑀺, 𑀅𑀦𑁂𑀓𑀯𑀡𑁆𑀡𑀢𑁆𑀢𑀸𑀪𑀸𑀯𑁂𑀧𑀺 𑀢𑀢𑁄 𑀯𑀺𑀳𑀺𑀢𑀬𑀢𑀺𑀬𑀸 𑀦𑁂𑀯𑀢𑁆𑀣𑀺 𑀪𑀗𑁆𑀕𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑀣𑀸 𑀢𑀼 𑀯𑀺𑀪𑀢𑁆𑀢𑀺𑀬𑀸 𑀅𑀮𑁄𑀧𑁂 𑀢𑀼 𑀲𑀢𑀺 𑀲𑀁𑀳𑀺𑀢𑀸𑀬𑀁 𑀓𑀢𑀸𑀬𑀁 𑀧𑀼𑀩𑁆𑀩𑀧𑀤𑀦𑁆𑀢𑀪𑀽𑀢𑁄 𑀲𑀭𑁄 𑀘𑁂, 𑀅𑀜𑁆𑀜𑀣𑀸 𑀅𑀜𑁆𑀜𑁂𑀦 𑀧𑀓𑀸𑀭𑁂𑀦 𑀳𑁄𑀢𑀺, 𑀧𑀭𑀧𑀤𑀲𑁆𑀲𑀸𑀤𑀺𑀲𑀭𑁄 𑀯𑀺𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀁 𑀯𑀺𑀪𑀢𑁆𑀢𑀺𑀬𑀸 𑀲𑀤𑁆𑀥𑀺𑀁 𑀯𑀺𑀳𑀸𑀬 𑀓𑀢𑀬𑀢𑀺𑀬𑀸 𑀦𑀢𑁆𑀣𑀺 𑀪𑀗𑁆𑀕𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀢𑀲𑁆𑀲𑀁 𑀬𑀢𑀺𑀬𑀁 𑀬𑀸𑀤𑁂𑀲𑀸𑀤𑀺 𑀇𑀯𑀡𑁆𑀡𑀸𑀤𑀻𑀦𑀁 𑀓𑀸𑀢𑀩𑁆𑀩𑁄 𑀬𑀓𑀸𑀭𑀸𑀤𑁂𑀲𑀸𑀤𑀺 𑀧𑀭𑀸𑀤𑀺𑀯 𑀧𑀭𑀧𑀤𑀲𑁆𑀲 𑀆𑀤𑀺𑀲𑀭𑁄 𑀯𑀺𑀬 𑀳𑁄𑀢𑀺. 𑀓𑀢𑀬𑀸𑀤𑁂𑀲𑀸𑀤𑀺𑀲𑀳𑀺𑀢𑀁 𑀩𑁆𑀬𑀜𑁆𑀚𑀦𑀁 𑀯𑀺𑀳𑀸𑀬 𑀓𑀢𑀸𑀬 𑀬𑀢𑀺𑀬𑀸 𑀦𑀢𑁆𑀣𑀺 𑀪𑀗𑁆𑀕𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁫𑁦. 𑀇𑀤𑀸𑀦𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀲𑁆𑀲 𑀯𑀺𑀭𑀼𑀤𑁆𑀥𑀢𑁆𑀢𑁂𑀧𑀺 𑀬𑀢𑀺𑀪𑀗𑁆𑀕𑀸𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀭𑁄’’𑀘𑁆𑀘𑀸𑀤𑀺. 𑀯𑀺𑀪𑀢𑁆𑀢𑀺𑀬𑀸 𑀮𑁄𑀧𑁂 𑀲𑀦𑁆𑀥𑀺𑀫𑁆𑀳𑀺 𑀲𑀢𑀺 𑀲𑀭𑁄 𑀲𑀦𑁆𑀥𑀺𑀲𑀭𑁄 𑀧𑀼𑀩𑁆𑀩𑀦𑁆𑀢𑁄 𑀯𑀺𑀬 𑀧𑀼𑀩𑁆𑀩𑀧𑀤𑀲𑁆𑀲 𑀅𑀦𑁆𑀢𑁄 𑀯𑀺𑀬 𑀳𑁄𑀢𑀺, 𑀅𑀜𑁆𑀜𑀣𑀸 𑀢𑀼 𑀯𑀺𑀪𑀢𑁆𑀢𑀺𑀬𑀸 𑀅𑀮𑁄𑀧𑁂 𑀲𑀁𑀳𑀺𑀢𑀸𑀬𑀁 𑀓𑀢𑀸𑀬𑀁 𑀅𑀜𑁆𑀜𑀣𑀸 𑀳𑁄𑀢𑀺, 𑀧𑀼𑀩𑁆𑀩𑀧𑀤𑀦𑁆𑀢𑀪𑀽𑀢𑁄 𑀲𑀭𑁄 𑀧𑀭𑀧𑀤𑀲𑁆𑀲 𑀆𑀤𑀺𑀲𑀭𑁄 𑀯𑀺𑀬 𑀳𑁄𑀢𑀺. 𑀢𑀢𑁆𑀣 𑀬𑀢𑀺𑀬𑀁 𑀬𑀸𑀤𑁂𑀲𑀸𑀤𑀺 ¶ 𑀇𑀯𑀡𑁆𑀡𑀸𑀤𑀻𑀦𑀁 𑀓𑀢𑁆𑀢𑀩𑁆𑀩𑀬𑀓𑀸𑀭𑀸𑀤𑁂𑀲𑀸𑀤𑀺 𑀧𑀭𑀸𑀤𑀺𑀯 𑀧𑀭𑀧𑀤𑀲𑁆𑀲 𑀆𑀤𑀺𑀲𑀭𑁄 𑀯𑀺𑀬 𑀳𑁄𑀢𑀺, 𑀧𑀼𑀩𑁆𑀩𑀦𑁆𑀢𑀲𑀤𑀺𑀲𑀲𑀭𑀫𑀢𑀺𑀓𑁆𑀓𑀫𑀺𑀢𑁆𑀯𑀸𑀧𑀺 𑀧𑀭𑀧𑀤𑀸𑀤𑀺𑀲𑀭𑀲𑀤𑀺𑀲𑀯𑀡𑁆𑀡𑀫𑀸𑀕𑀫𑁆𑀫 𑀢𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸𑀧𑀺 𑀧𑀭𑀧𑀤𑀸𑀤𑀺𑀲𑀭𑀲𑀤𑀺𑀲𑀬𑀸𑀤𑁂𑀲𑀸𑀤𑀺𑀫𑀢𑀺𑀓𑁆𑀓𑀫𑀺𑀢𑁆𑀯𑀸𑀧𑀺 𑀬𑀢𑀺𑀬𑀸 𑀧𑀬𑀼𑀢𑁆𑀢𑀸𑀬 𑀲𑀢𑀺 𑀅𑀦𑁂𑀓𑀯𑀡𑁆𑀡𑀢𑁆𑀢𑀸𑀪𑀸𑀯𑁂𑀧𑀺 𑀬𑀢𑀺𑀪𑀗𑁆𑀕𑁄 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀩𑁆𑀩𑀲𑁆𑀲 𑀅𑀦𑁆𑀢𑁄𑀢𑀺 𑀘, 𑀬𑁄 𑀘 𑀲𑁄 𑀆𑀤𑁂𑀲𑁄 𑀘, 𑀲𑁄 𑀆𑀤𑀺 𑀬𑀲𑁆𑀲 𑀫𑀓𑀸𑀭𑀸𑀤𑀺𑀦𑁄𑀢𑀺 𑀘, 𑀧𑀭𑀲𑁆𑀲 𑀆𑀤𑀻𑀢𑀺 𑀘 𑀯𑀸𑀓𑁆𑀬𑀁.

𑁫𑁧.

𑀘𑀸𑀤𑀻 𑀧𑀼𑀩𑁆𑀩𑀧𑀤𑀦𑁆𑀢𑀸𑀯, 𑀦𑀺𑀘𑁆𑀘𑀁 𑀧𑀼𑀩𑁆𑀩𑀧𑀤𑀲𑁆𑀲𑀺𑀢𑀸;

𑀧𑀸𑀤𑀬𑁄 𑀦𑀺𑀘𑁆𑀘𑀲𑀫𑁆𑀩𑀦𑁆𑀥𑀸, 𑀧𑀭𑀸𑀤𑀻𑀯 𑀧𑀭𑁂𑀦 𑀢𑀼.

𑁫𑁧. 𑀦𑀺𑀘𑁆𑀘𑀁 𑀅𑀦𑀯𑀭𑀢𑀁 𑀧𑀼𑀩𑁆𑀩𑀧𑀤𑀁 𑀲𑀺𑀢𑀸 𑀦𑀺𑀲𑁆𑀲𑀺𑀢𑀸 𑀘𑀸𑀤𑀻 𑀘𑀓𑀸𑀭𑀸𑀤𑀬𑁄 𑀦𑀺𑀧𑀸𑀢𑀸 𑀧𑀼𑀩𑁆𑀩𑀲𑁆𑀲 𑀧𑀤𑀲𑁆𑀲 𑀅𑀦𑁆𑀢𑀸 𑀅𑀯𑀬𑀯𑀸 𑀯𑀺𑀬 𑀳𑁄𑀦𑁆𑀢𑀺, 𑀢𑁂 𑀅𑀦𑁆𑀢𑁄 𑀓𑀢𑁆𑀯𑀸 𑀬𑀢𑀺 𑀓𑀸𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑁂𑀦 𑀧𑀭𑀧𑀤𑁂𑀦 𑀦𑀺𑀘𑁆𑀘𑀲𑀫𑁆𑀩𑀦𑁆𑀥𑀸 𑀲𑀢𑀢𑀬𑁄𑀕𑀺𑀦𑁄, 𑀢𑀼𑀲𑀤𑁆𑀤𑁄 𑀅𑀝𑁆𑀞𑀸𑀦𑀧𑁆𑀧𑀬𑀼𑀢𑁆𑀢𑁄, 𑀧𑀸𑀤𑀬𑁄 𑀢𑀼 𑀧𑀭𑀸𑀤𑀻𑀯 𑀧𑀭𑀧𑀤𑀲𑁆𑀲 𑀆𑀤𑀻 𑀅𑀯𑀬𑀯𑀸 𑀯𑀺𑀬 𑀳𑁄𑀦𑁆𑀢𑀺, 𑀢𑀁 𑀯𑀺𑀳𑀸𑀬 𑀧𑀼𑀩𑁆𑀩𑀧𑀤𑀦𑁆𑀢𑁂 𑀬𑀢𑀺 𑀓𑀸𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁫𑁧. ‘‘𑀘𑀸𑀤𑀺’’𑀘𑁆𑀘𑀸𑀤𑀺. 𑀦𑀺𑀘𑁆𑀘𑀁 𑀲𑀢𑀢𑀁 𑀧𑀼𑀩𑁆𑀩𑀧𑀤𑀲𑁆𑀲𑀺𑀢𑀸 𑀧𑀼𑀩𑁆𑀩𑀧𑀤𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀸 𑀘𑀸𑀤𑀻 𑀘𑀓𑀸𑀭𑀸𑀤𑀺𑀦𑀺𑀧𑀸𑀢𑀸 𑀧𑀼𑀩𑁆𑀩𑀧𑀤𑀦𑁆𑀢𑀸𑀯 𑀧𑀼𑀩𑁆𑀩𑀧𑀤𑀲𑁆𑀲 𑀅𑀦𑁆𑀢𑀸 𑀅𑀯𑀬𑀯𑀸 𑀯𑀺𑀬 𑀳𑁄𑀦𑁆𑀢𑀺, 𑀧𑀭𑁂𑀦 𑀧𑀭𑀧𑀤𑁂𑀦 𑀦𑀺𑀘𑁆𑀘𑀲𑀫𑁆𑀩𑀦𑁆𑀥𑀸 𑀦𑀺𑀭𑀦𑁆𑀢𑀭𑀬𑁄𑀕𑀺𑀦𑁄 𑀧𑀸𑀤𑀬𑁄 𑀢𑀼 𑀧𑀸𑀤𑀺𑀉𑀧𑀲𑀕𑁆𑀕𑀸 𑀧𑀦 𑀧𑀭𑀸𑀤𑀻𑀯 𑀧𑀭𑀧𑀤𑀲𑁆𑀲 𑀆𑀤𑀻 𑀅𑀯𑀬𑀯𑀸𑀯𑀺𑀬 𑀳𑁄𑀦𑁆𑀢𑀺. 𑀘𑀸𑀤𑀬𑁄 𑀆𑀕𑀫𑁆𑀫 𑀢𑁂 𑀩𑀳𑀺 𑀓𑀢𑁆𑀯𑀸𑀧𑀺 𑀧𑀸𑀤𑀬𑁄 𑀆𑀕𑀫𑁆𑀫 𑀢𑁂 𑀅𑀦𑁆𑀢𑁄 𑀓𑀢𑁆𑀯𑀸𑀧𑀺 𑀧𑀯𑀢𑁆𑀢𑁄 𑀯𑀺𑀭𑀸𑀫𑁄 𑀬𑀢𑀺𑀪𑀗𑁆𑀕𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑁄𑀆𑀤𑀺 𑀬𑁂𑀲𑀦𑁆𑀢𑀺 𑀘, 𑀧𑀼𑀩𑁆𑀩𑀧𑀤𑀁 𑀲𑀺𑀢𑀸𑀢𑀺 𑀘, 𑀧𑁄 𑀆𑀤𑀺 𑀬𑁂𑀲𑀦𑁆𑀢𑀺 𑀘, 𑀦𑀺𑀘𑁆𑀘𑀁 𑀲𑀫𑁆𑀩𑀦𑁆𑀥𑀸𑀢𑀺 𑀘 𑀯𑀺𑀕𑁆𑀕𑀳𑁄. 𑀏𑀢𑁆𑀣 𑀘 𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑀢𑁆𑀢𑀸 𑀘𑀓𑀸𑀭𑀧𑀓𑀸𑀭𑀸𑀤𑀻𑀦𑀫𑁆𑀧𑀺 𑀧𑀭𑀺𑀕𑁆𑀕𑀳𑁄.

𑀲𑀩𑁆𑀩𑀢𑁆𑀣𑁄𑀤𑀸𑀳𑀭𑀡𑀸𑀦𑀺 𑀬𑀣𑀸

𑁫𑁨.

𑀦𑀫𑁂 𑀢𑀁 𑀲𑀺𑀭𑀲𑀸 𑀲𑀩𑁆𑀩𑁄-𑀧𑀫𑀸𑀢𑀻𑀢𑀁 𑀢𑀣𑀸𑀕𑀢𑀁;

𑀬𑀲𑁆𑀲 𑀮𑁄𑀓𑀕𑁆𑀕𑀢𑀁 𑀧𑀢𑁆𑀢-𑀲𑁆𑀲𑁄’𑀧𑀫𑀸 𑀦 𑀳𑀺 𑀬𑀼𑀚𑁆𑀚𑀢𑀺.

𑁫𑁩.

𑀫𑀼𑀦𑀺𑀦𑁆𑀤𑀁 𑀢𑀁 𑀲𑀤𑀸 𑀯𑀦𑁆𑀤𑀸-𑀫𑁆𑀬’𑀦𑀦𑁆𑀢𑀫𑀢𑀺’𑀫𑀼𑀢𑁆𑀢𑀫𑀁;

𑀬𑀲𑁆𑀲 𑀧𑀜𑁆𑀜𑀸 𑀘 𑀫𑁂𑀢𑁆𑀢𑀸 𑀘, 𑀦𑀺𑀲𑁆𑀲𑀻𑀫𑀸𑀢𑀺 𑀯𑀺𑀚𑀫𑁆𑀪𑀢𑀺.

𑁫𑁨-𑁫𑁩. 𑀲𑀩𑁆𑀩𑀢𑁆𑀣𑀸𑀢𑀺 ¶ 𑀧𑀼𑀩𑁆𑀩𑀦𑁆𑀢𑀲𑀤𑀺𑀲𑀸𑀤𑀻𑀲𑀼. ‘‘𑀦𑀫𑁂𑀢’’𑀦𑁆𑀢𑀺𑀆𑀤𑀺𑀕𑀸𑀣𑀸𑀤𑁆𑀯𑀬𑁂 𑀧𑀤𑀢𑁆𑀣𑁄 𑀧𑀸𑀓𑀝𑁄, 𑀅𑀥𑀺𑀧𑁆𑀧𑀸𑀬𑁄 𑀢𑀼 𑀬𑀢𑁄 𑀮𑁄𑀓𑀕𑁆𑀕𑀢𑀁 𑀧𑀢𑁆𑀢𑁄, 𑀢𑀢𑁄 𑀲𑀩𑁆𑀩𑁄𑀧𑀫𑀸𑀢𑀻𑀢𑁄, 𑀬𑀢𑁄 𑀧𑀜𑁆𑀜𑀸𑀫𑁂𑀢𑁆𑀢𑀸 𑀮𑁄𑀓𑁂 𑀦𑀺𑀭𑀦𑁆𑀢𑀭𑀫𑀺𑀯 𑀯𑀢𑁆𑀢𑀦𑁆𑀢𑀺, 𑀢𑀢𑁄 𑀅𑀦𑀦𑁆𑀢𑀫𑀢𑀺, 𑀉𑀢𑁆𑀢𑀫𑁄 𑀘𑀸𑀢𑀺. 𑀏𑀢𑁆𑀣 ‘‘𑀲𑀩𑁆𑀩𑀸 𑀉𑀧𑀫𑀸’’𑀢𑀺 𑀲𑀫𑀸𑀲𑀁 𑀓𑀢𑁆𑀯𑀸 𑀯𑀺𑀪𑀢𑁆𑀢𑀺𑀮𑁄𑀧𑁂 𑀲𑀁𑀳𑀺𑀢𑀸𑀬𑀜𑁆𑀘 𑀓𑀢𑀸𑀬𑀁 𑀧𑀭𑀧𑀤𑀸𑀤𑀺𑀉𑀓𑀸𑀭𑁄 𑀧𑀼𑀩𑁆𑀩𑀧𑀤𑀦𑁆𑀢𑀩𑁆𑀩𑀓𑀸𑀭𑀝𑁆𑀞𑀅𑀓𑀸𑀭𑁄 𑀯𑀺𑀬 𑀳𑁄𑀢𑀻𑀢𑀺 𑀲𑀩𑁆𑀩𑁄 𑀇𑀘𑁆𑀘𑀢𑁆𑀭 𑀧𑀸𑀤𑀦𑁆𑀢𑀬𑀢𑀺. 𑀧𑀢𑁆𑀢𑀲𑁆𑀲𑁄𑀧𑀫𑀸 𑀇𑀘𑁆𑀘𑀢𑁆𑀭 𑀬𑀓𑀸𑀭𑀸𑀤𑁂𑀲𑀲𑁆𑀲 𑀧𑀭𑀸𑀤𑀺𑀲𑀤𑀺𑀲𑀪𑀸𑀯𑁄 𑀯𑀺𑀬 𑀳𑁄𑀢𑀺, 𑀯𑀺𑀪𑀢𑁆𑀢𑀺𑀬𑀸 𑀅𑀮𑁄𑀧𑁂 𑀲𑀁𑀳𑀺𑀢𑀸𑀬𑀁 𑀓𑀢𑀸𑀬𑀁 𑀲𑀯𑀺𑀪𑀢𑁆𑀢𑀺𑀬𑀸 𑀅𑀓𑀸𑀭𑁄 𑀧𑀭𑀧𑀤𑀸𑀤𑀺 𑀉𑀓𑀸𑀭𑁄 𑀯𑀺𑀬 𑀳𑁄𑀢𑀻𑀢𑀺 𑀢𑀁𑀯𑀺𑀪𑀢𑁆𑀢𑀺𑀬𑀸 𑀧𑀲𑀺𑀤𑁆𑀥𑀁 𑀯𑀺𑀳𑀸𑀬 𑀧𑀢𑁆𑀢𑀇𑀘𑁆𑀘𑀢𑁆𑀭 𑀧𑀸𑀤𑀦𑁆𑀢𑀬𑀢𑀺. 𑀢𑀣𑀸 𑀯𑀦𑁆𑀤𑀸𑀫𑁆𑀬𑀦𑀦𑁆𑀢𑀇𑀘𑁆𑀘𑀢𑁆𑀭 𑀬𑀓𑀸𑀭𑀸𑀤𑁂𑀲𑀲𑁆𑀲 𑀧𑀭𑀸𑀤𑀺𑀲𑀤𑀺𑀲𑀪𑀸𑀯𑁄 𑀯𑀺𑀳𑀺𑀢𑁄𑀢𑀺 𑀫𑁆𑀬𑀲𑀤𑁆𑀤𑀁 𑀯𑀚𑁆𑀚𑁂𑀢𑁆𑀯𑀸 𑀯𑀦𑁆𑀤𑀸𑀇𑀘𑁆𑀘𑀢𑁆𑀭 𑀧𑀸𑀤𑀦𑁆𑀢𑀬𑀢𑀺. 𑀧𑀼𑀩𑁆𑀩𑀧𑀤𑀲𑁆𑀲𑀺𑀢𑀸𑀦𑀁 𑀘𑀸𑀤𑀻𑀦𑀁 𑀧𑀼𑀩𑁆𑀩𑀧𑀤𑀦𑁆𑀢𑀲𑀤𑀺𑀲𑀢𑀸 𑀯𑀼𑀢𑁆𑀢𑀸𑀢𑀺 𑀫𑁂𑀢𑁆𑀢𑀸 𑀘𑀸𑀢𑀺 𑀘𑀲𑀤𑁆𑀤𑀢𑁄 𑀬𑀢𑀺, 𑀅𑀧𑀭𑀧𑀤𑀲𑀫𑁆𑀩𑀦𑁆𑀥𑀸 𑀧𑀸𑀤𑀬𑁄 𑀧𑀭𑀧𑀤𑀸𑀤𑀺𑀲𑀤𑀺𑀲𑀸 𑀳𑁄𑀦𑁆𑀢𑀻𑀢𑀺 𑀦𑀺𑀲𑁆𑀲𑀻𑀫𑀸𑀢𑀺 𑀏𑀢𑁆𑀣 𑀦𑀺𑀲𑀤𑁆𑀤𑀁 𑀯𑀺𑀳𑀸𑀬 𑀢𑀢𑁄 𑀆𑀤𑀺𑀫𑁆𑀳𑀺 𑀬𑀢𑀺.

𑁫𑁨-𑁫𑁩. 𑀲𑀩𑁆𑀩𑀢𑁆𑀣 𑀬𑀣𑀸𑀯𑀼𑀢𑁆𑀢𑀧𑀼𑀩𑁆𑀩𑀦𑁆𑀢𑀲𑀤𑀺𑀲𑀲𑀭𑀸𑀤𑀻𑀲𑀼 𑀧𑀜𑁆𑀘𑀲𑀼 𑀉𑀤𑀸𑀳𑀭𑀡𑀸𑀦𑀺𑀬𑀣𑀸. ‘‘𑀦𑀫𑁂 𑀢’’𑀫𑀺𑀘𑁆𑀘𑀸𑀤𑀺, 𑀮𑁄𑀓𑀕𑁆𑀕𑀢𑀁 𑀧𑀢𑁆𑀢𑀲𑁆𑀲 𑀬𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑀫𑀸 𑀦 𑀳𑀺 𑀬𑀼𑀚𑁆𑀚𑀢𑀺 𑀲𑀓𑀮𑀧𑀤𑀢𑁆𑀣𑀸𑀦𑀁 𑀅𑀢𑀺𑀓𑁆𑀓𑀫𑁆𑀫 𑀞𑀺𑀢𑀢𑁆𑀢𑀸 𑀦 𑀳𑀺 𑀬𑀼𑀚𑁆𑀚𑀢𑀺. 𑀲𑀩𑁆𑀩𑁄𑀧𑀫𑀸𑀢𑀻𑀢𑀁 𑀢𑀁 𑀢𑀣𑀸𑀕𑀢𑀁 𑀲𑀺𑀭𑀲𑀸 𑀦𑀫𑁂 𑀦𑀫𑀸𑀫𑀺. 𑀲𑀩𑁆𑀩𑁄𑀢𑀺 𑀏𑀢𑁆𑀣 𑀑𑀓𑀸𑀭𑀲𑁆𑀲 𑀧𑀼𑀩𑁆𑀩𑀧𑀤𑀦𑁆𑀢𑀲𑀭𑀲𑀤𑀺𑀲𑀢𑁆𑀢𑀸 𑀢𑀢𑁄 𑀧𑀭𑀸𑀬 𑀬𑀢𑀺𑀬𑀸 𑀘 𑀲𑁆𑀲𑁄𑀧𑀫𑀸𑀢𑀺 𑀧𑀭𑀧𑀤𑀸𑀤𑀺𑀲𑀤𑀺𑀲𑀁 ¶ 𑀯𑀡𑁆𑀡𑀫𑀦𑀢𑀺𑀓𑁆𑀓𑀫𑁆𑀫 𑀞𑀺𑀢𑀸𑀬 𑀬𑀢𑀺𑀬𑀸 𑀘 𑀉𑀤𑀸𑀳𑀭𑀡𑀁.

‘‘𑀫𑀼𑀦𑀺𑀦𑁆𑀤𑁂’’𑀘𑁆𑀘𑀸𑀤𑀺. 𑀬𑀲𑁆𑀲 𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀜𑁆𑀜𑀸 𑀘 𑀫𑁂𑀢𑁆𑀢𑀸 𑀘𑀦𑀺𑀲𑁆𑀲𑀻𑀫𑀸 𑀅𑀦𑀦𑁆𑀢𑀲𑀢𑁆𑀢𑀅𑀦𑀦𑁆𑀢𑀜𑁂𑀬𑁆𑀬𑀯𑀺𑀲𑀬𑀓𑀭𑀡𑀢𑁄 𑀲𑀻𑀫𑀸𑀭𑀳𑀺𑀢𑀸 𑀅𑀢𑀺𑀯𑀺𑀚𑀫𑁆𑀪𑀢𑀺. 𑀅𑀦𑀦𑁆𑀢𑀫𑀢𑀺𑀁 𑀉𑀤𑀬𑀩𑁆𑀩𑀬𑀲𑀫𑁆𑀪𑀯𑁂𑀧𑀺 𑀜𑁂𑀬𑁆𑀬𑀲𑁆𑀲𑀸𑀦𑀦𑁆𑀢𑀢𑁆𑀢𑀸 𑀯𑀺𑀲𑀬𑀺𑀫𑁆𑀳𑀺 𑀯𑀺𑀲𑀬𑀯𑁄𑀳𑀸𑀭𑁂𑀦 𑀅𑀦𑀦𑁆𑀢𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀁 𑀉𑀢𑁆𑀢𑀫𑀁 𑀢𑀢𑁄 𑀏𑀯 𑀧𑀯𑀭𑀁 𑀢𑀁 𑀫𑀼𑀦𑀺𑀦𑁆𑀤𑀁 𑀲𑀤𑀸 𑀯𑀦𑁆𑀤𑀸𑀫𑀺, 𑀬𑀸𑀤𑁂𑀲𑀲𑁆𑀲 𑀧𑀭𑀸𑀤𑀺𑀲𑀤𑀺𑀲𑀢𑁆𑀢𑀸 𑀢𑀫𑀦𑀸𑀕𑀫𑁆𑀫 𑀬𑀢𑀺 𑀪𑀯𑀢𑀺. 𑀫𑁂𑀢𑁆𑀢𑀸𑀘𑀦𑀺𑀲𑁆𑀲𑀻𑀫𑀸𑀢𑀺 𑀏𑀢𑁆𑀣 𑀘𑀸𑀤𑀻𑀦𑀁 𑀧𑀼𑀩𑁆𑀩𑀧𑀤𑀦𑁆𑀢𑀲𑀤𑀺𑀲𑀢𑁆𑀢𑀸𑀘 𑀧𑀸𑀤𑀻𑀦𑀁 𑀧𑀭𑀧𑀤𑀸𑀤𑀺𑀲𑀤𑀺𑀲𑀢𑁆𑀢𑀸 𑀘 ‘‘𑀘𑀸’’𑀢𑀺 ‘‘𑀦𑀻’’𑀢𑀺 𑀇𑀫𑁂𑀲𑀫𑁆𑀧𑀺 𑀬𑀢𑀺 𑀪𑀯𑀢𑀺.

𑀘𑀸𑀤𑀺𑀧𑀸𑀤𑀻𑀲𑀼 𑀧𑀘𑁆𑀘𑀼𑀤𑀸𑀳𑀭𑀡𑀸𑀦𑀺 𑀬𑀣𑀸

𑁫𑁪.

𑀫𑀳𑀸𑀫𑁂𑀢𑁆𑀢𑀸 𑀫𑀳𑀸𑀧𑀜𑁆𑀜𑀸, 𑀘 𑀬𑀢𑁆𑀣 𑀧𑀭𑀫𑁄𑀤𑀬𑀸;

𑀧𑀡𑀫𑀸𑀫𑀺 𑀚𑀺𑀦𑀁 𑀢𑀁 𑀧-𑀯𑀭𑀁 𑀯𑀭𑀕𑀼𑀡𑀸𑀮𑀬𑀁.

𑁫𑁪. ‘‘𑀫𑀳𑀸’’𑀇𑀘𑁆𑀘𑀸𑀤𑀺. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀚𑀺𑀦𑁂. 𑀧𑀭𑀫𑁄𑀤𑀬𑀸𑀢𑀺 𑀫𑀳𑀸𑀫𑁂𑀢𑁆𑀢𑀸𑀤𑀬𑁄 𑀉𑀓𑁆𑀓𑀝𑁆𑀞𑀸𑀪𑀺𑀯𑀼𑀟𑁆𑀠𑀺𑀬𑁄. 𑀢𑀢𑁄𑀬𑁂𑀯 𑀯𑀭𑀕𑀼𑀡𑀸𑀮𑀬𑀁, 𑀢𑁂𑀦𑁂𑀯 𑀧𑀯𑀭𑀁 𑀉𑀢𑁆𑀢𑀫𑀁 𑀢𑀁 𑀚𑀺𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣 𑀧𑀼𑀩𑁆𑀩𑀧𑀤𑀦𑀺𑀲𑁆𑀲𑀺𑀢𑀁 𑀘𑀓𑀸𑀭𑀁 𑀧𑀭𑀧𑀤𑀸𑀤𑀺𑀪𑀽𑀢𑀁 𑀓𑀢𑁆𑀯𑀸 𑀢𑀢𑁄 𑀧𑀼𑀩𑁆𑀩𑁂 𑀓𑀢𑀸 𑀬𑀢𑀺 𑀘, 𑀧𑀭𑀧𑀤𑀸𑀤𑀺𑀲𑀫𑁆𑀩𑀦𑁆𑀥𑀧𑀓𑀸𑀭𑀁 𑀧𑀼𑀩𑁆𑀩𑀧𑀤𑀦𑁆𑀢𑀪𑀽𑀢𑀁 𑀓𑀢𑁆𑀯𑀸 𑀧𑀓𑀸𑀭𑀢𑁄 𑀧𑀭𑀁 𑀓𑀢𑀸 𑀬𑀢𑀺 𑀘 𑀯𑀺𑀭𑀼𑀤𑁆𑀥𑀸𑀢𑀺 𑀉𑀪𑀬𑀢𑁆𑀣 𑀧𑀘𑁆𑀘𑀼𑀤𑀸𑀳𑀭𑀡𑀁.

𑁫𑁪. 𑀘𑀸𑀤𑀺𑀧𑀸𑀤𑀻𑀲𑀼 𑀯𑀺𑀲𑀬𑀪𑀽𑀢𑁂𑀲𑀼 𑀧𑀘𑁆𑀘𑀼𑀤𑀸𑀳𑀭𑀡𑀁 𑀬𑀣𑀸. ‘‘𑀫𑀳𑀸𑀫𑁂𑀢𑁆𑀢𑀺’’𑀘𑁆𑀘𑀸𑀤𑀺. 𑀬𑀢𑁆𑀣 𑀬𑀲𑁆𑀫𑀺𑀁 𑀚𑀺𑀦𑁂 𑀫𑀳𑀸𑀫𑁂𑀢𑁆𑀢𑀸 𑀘 𑀫𑀳𑀸𑀧𑀜𑁆𑀜𑀸 𑀘 𑀇𑀫𑀸 𑀧𑀭𑀫𑁄𑀤𑀬𑀸 𑀉𑀓𑁆𑀓𑀝𑁆𑀞𑀸𑀪𑀺𑀯𑀼𑀟𑁆𑀠𑀺𑀬𑁄 𑀳𑁄𑀦𑁆𑀢𑀺. 𑀯𑀭𑀕𑀼𑀡𑀸𑀮𑀬𑀁 𑀉𑀢𑁆𑀢𑀫𑀕𑀼𑀡𑀸𑀓𑀭𑀁 𑀧𑀯𑀭𑀁 𑀢𑀢𑁄𑀬𑁂𑀯 𑀉𑀢𑁆𑀢𑀫𑀁 𑀢𑀁 𑀚𑀺𑀦𑀁 𑀧𑀡𑀫𑀸𑀫𑀺. 𑀏𑀢𑁆𑀣 𑀘𑀓𑀸𑀭𑀁 𑀧𑀭𑀧𑀤𑀸𑀤𑀺𑀁 𑀓𑀢𑁆𑀯𑀸 𑀧𑀓𑀸𑀭𑀁 𑀧𑀼𑀩𑁆𑀩𑀧𑀤𑀦𑁆𑀢𑀁 𑀓𑀢𑁆𑀯𑀸 𑀬𑀢𑀺𑀬𑀸 𑀧𑀯𑀢𑁆𑀢𑀢𑁆𑀢𑀸 ‘‘𑀘 𑀬𑀢𑁆𑀣, 𑀢𑀁 𑀧𑀸’’𑀢𑀺𑀤𑁆𑀯𑀬𑀫𑀧𑀺 𑀧𑀘𑁆𑀘𑀼𑀤𑀸𑀳𑀭𑀡𑀁.

𑁫𑁫.

𑀧𑀤𑀢𑁆𑀣𑀓𑁆𑀓𑀫𑀢𑁄 ¶ 𑀫𑀼𑀢𑁆𑀢𑀁, 𑀓𑀫𑀘𑁆𑀘𑀼𑀢𑀫𑀺𑀤𑀁 𑀬𑀣𑀸;

𑀔𑁂𑀢𑁆𑀢𑀁 𑀯𑀸 𑀤𑁂𑀳𑀺 𑀕𑀸𑀫𑀁 𑀯𑀸, 𑀤𑁂𑀲𑀁 𑀯𑀸 𑀫𑀫 𑀲𑁄𑀪𑀦𑀁.

𑁫𑁫. ‘‘𑀧𑀤’’𑀇𑀘𑁆𑀘𑀸𑀤𑀺. 𑀧𑀤𑀸𑀦𑀁 𑀅𑀢𑁆𑀣𑀓𑁆𑀓𑀫𑀢𑁄 𑀫𑀼𑀢𑁆𑀢𑀁 𑀕𑀴𑀺𑀢𑀁 𑀓𑀫𑀘𑁆𑀘𑀼𑀢𑀫𑀺𑀤𑀦𑁆𑀢𑀺 𑀯𑀺𑀥𑀻𑀬𑀢𑁂. 𑀔𑁂𑀢𑁆𑀢𑀁 𑀯𑀸 𑀇𑀘𑁆𑀘𑀸𑀤𑀺𑀦𑀸 𑀅𑀭𑀼𑀘𑀺𑀢𑁄𑀬𑀁 𑀬𑀸𑀘𑀦𑀓𑁆𑀓𑀫𑁄 𑀯𑀢𑁆𑀢𑀼𑀦𑁄 𑀅𑀯𑀺𑀜𑁆𑀜𑀼𑀢𑀁 𑀕𑀫𑁂𑀢𑀺. 𑀬𑁄 𑀳𑀺 𑀔𑁂𑀢𑁆𑀢𑀫𑁆𑀧𑀺 𑀤𑀸𑀢𑀼𑀁 𑀦𑀺𑀘𑁆𑀙𑀢𑀺, 𑀓𑀣𑀁 𑀲𑁄 𑀕𑀸𑀫𑀸𑀤𑀺𑀓𑀁 𑀤𑀲𑁆𑀲𑀢𑀻𑀢𑀺.

𑁫𑁫. ‘‘𑀧𑀤𑀢𑁆𑀣𑀺’’𑀘𑁆𑀘𑀸𑀤𑀺. 𑀧𑀤𑀢𑁆𑀣𑀓𑁆𑀓𑀫𑀢𑁄 𑀧𑀤𑀸𑀦𑀁 𑀅𑀢𑁆𑀣𑀓𑁆𑀓𑀫𑀢𑁄 𑀫𑀼𑀢𑁆𑀢𑀁 𑀕𑀴𑀺𑀢𑀁 𑀇𑀤𑀁 𑀯𑀸𑀓𑁆𑀬𑀁 𑀓𑀫𑀘𑁆𑀘𑀼𑀢𑀁 𑀦𑀸𑀫. 𑀉𑀤𑀸𑀳𑀭𑀢𑀺 ‘‘𑀬𑀣𑀺’’𑀘𑁆𑀘𑀸𑀤𑀺. 𑀫𑀫 𑀲𑁄𑀪𑀦𑀁 𑀔𑁂𑀢𑁆𑀢𑀁 𑀯𑀸 𑀕𑀸𑀫𑀁 𑀯𑀸 𑀤𑁂𑀲𑀁 𑀯𑀸 𑀚𑀦𑀧𑀤𑀁 𑀯𑀸 𑀤𑁂𑀳𑀺. 𑀏𑀢𑁆𑀣 𑀔𑁂𑀢𑁆𑀢𑀫𑀺𑀘𑁆𑀘𑀸𑀤𑀺 𑀬𑀸𑀘𑀦𑀓𑁆𑀓𑀫𑁄 𑀯𑀢𑁆𑀢𑀼𑀦𑁄 𑀅𑀯𑀺𑀜𑁆𑀜𑀼𑀪𑀸𑀯𑀁 𑀯𑀺𑀦𑀸 𑀉𑀘𑀺𑀢𑀧𑀤𑀢𑁆𑀣𑀓𑁆𑀓𑀫𑀁 𑀦𑀧𑁆𑀧𑀓𑀸𑀲𑁂𑀢𑀺, 𑀢𑀣𑀸 𑀳𑀺 𑀔𑁂𑀢𑁆𑀢𑀫𑀧𑀺 𑀤𑀸𑀢𑀼𑀫𑀦𑀺𑀘𑁆𑀙𑀦𑁆𑀢𑁄 𑀕𑀸𑀫𑀦𑀺𑀕𑀫𑀚𑀦𑀧𑀤𑀸𑀤𑀺𑀁 𑀓𑀣𑀁 𑀤𑀲𑁆𑀲𑀢𑀻𑀢𑀺 𑀓𑀫𑀳𑀸𑀦𑀺.

𑁫𑁬.

𑀮𑁄𑀓𑀺𑀬𑀢𑁆𑀣’𑀫𑀢𑀺𑀓𑁆𑀓𑀦𑁆𑀢𑀁, 𑀅𑀢𑀺𑀯𑀼𑀢𑁆𑀢𑀁 𑀫𑀢𑀁 𑀬𑀣𑀸;

𑀅𑀢𑀺𑀲𑀫𑁆𑀩𑀸𑀥’𑀫𑀸𑀓𑀸𑀲-𑀫𑁂𑀢𑀺𑀲𑁆𑀲𑀸 𑀣𑀦𑀚𑀫𑁆𑀪𑀦𑁂 [𑀣𑀦𑀚𑀼𑀫𑁆𑀪𑀦𑁂 (𑀲𑀻.)].

𑁫𑁬. ‘‘𑀮𑁄𑀓𑀺’’𑀘𑁆𑀘𑀸𑀤𑀺. 𑀮𑁄𑀓𑁂 𑀯𑀺𑀤𑀺𑀢𑁄 𑀮𑁄𑀓𑀺𑀬𑁄, 𑀢𑀁 𑀮𑁄𑀓𑀺𑀬𑀢𑁆𑀣𑀫𑀪𑀺𑀥𑁂𑀬𑁆𑀬𑀁 𑀅𑀢𑀺𑀓𑁆𑀓𑀦𑁆𑀢𑀁 𑀅𑀦𑀦𑀼𑀯𑀼𑀢𑁆𑀢𑀁 𑀬𑀁 𑀢𑀁 𑀅𑀢𑀺𑀯𑀼𑀢𑁆𑀢𑀁 𑀫𑀢𑀦𑁆𑀢𑀺 𑀯𑀺𑀥𑀻𑀬𑀢𑁂. 𑀬𑀣𑁂𑀢𑁆𑀬𑀸𑀤𑀺𑀦𑀸 𑀉𑀤𑀸𑀳𑀭𑀢𑀺. 𑀏𑀢𑀺𑀲𑁆𑀲𑀸 𑀯𑀦𑀺𑀢𑀸𑀬 𑀣𑀦𑀸𑀦𑀁 𑀧𑀬𑁄𑀥𑀭𑀸𑀦𑀁 𑀚𑀫𑁆𑀪𑀦𑁂 𑀩𑁆𑀬𑀸𑀧𑀦𑁂 𑀆𑀓𑀸𑀲𑀁 𑀕𑀕𑀦𑀁 𑀅𑀢𑀺𑀲𑀫𑁆𑀩𑀸𑀥𑀁 𑀅𑀘𑁆𑀘𑀦𑁆𑀢𑀧𑁆𑀧𑀓𑀁.

𑁫𑁬. ‘‘𑀮𑁄𑀓𑀺𑀬𑀢𑁆𑀣𑀺’’𑀘𑁆𑀘𑀸𑀤𑀺. 𑀮𑁄𑀓𑀺𑀬𑀢𑁆𑀣𑀁 𑀮𑁄𑀓𑁂 𑀧𑀲𑀺𑀤𑁆𑀥𑀫𑀪𑀺𑀥𑁂𑀬𑁆𑀬𑀁 𑀅𑀢𑀺𑀓𑁆𑀓𑀦𑁆𑀢𑀁 𑀓𑀣𑀦𑀸𑀓𑀸𑀭𑁂𑀦 𑀅𑀢𑀺𑀓𑁆𑀓𑀫𑀺𑀢𑀁 𑀯𑀸𑀓𑁆𑀬𑀁 𑀅𑀢𑀺𑀯𑀼𑀢𑁆𑀢𑀫𑀺𑀢𑀺 𑀫𑀢𑀁. 𑀉𑀤𑀸𑀳𑀭𑀢𑀺 ‘‘𑀬𑀣𑀺’’𑀘𑁆𑀘𑀸𑀤𑀺. 𑀏𑀢𑀺𑀲𑁆𑀲𑀸 𑀣𑀦𑀚𑀫𑁆𑀪𑀦𑁂 𑀣𑀦𑀸𑀦𑀁 𑀯𑀺𑀚𑀫𑁆𑀪𑀦𑁂 𑀆𑀓𑀸𑀲𑀁 𑀅𑀢𑀺𑀲𑀫𑁆𑀩𑀸𑀥𑀁 𑀅𑀦𑁄𑀓𑀸𑀲𑀁. 𑀏𑀢𑁆𑀣 𑀧𑀬𑁄𑀥𑀭𑀸𑀦𑀁 𑀫𑀳𑀦𑁆𑀢𑀢𑁆𑀢𑀁 𑀯𑀤𑀸𑀫𑀸𑀢𑀺 𑀮𑁄𑀓𑁂 𑀫𑀳𑀦𑁆𑀢𑀦𑁆𑀢𑀺 ¶ 𑀧𑀲𑀺𑀤𑁆𑀥𑀁 𑀕𑀕𑀦𑀫𑀧𑀺 𑀅𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀯𑀸𑀓𑁆𑀬𑀫𑀢𑀺𑀯𑀼𑀢𑁆𑀢𑀤𑁄𑀲𑁂𑀦 𑀤𑀽𑀲𑀺𑀢𑀁.

𑁫𑁭.

𑀲𑀫𑀼𑀤𑀸𑀬𑀢𑁆𑀣𑀢𑁄’𑀧𑁂𑀢𑀁, 𑀢𑀁 𑀅𑀧𑁂𑀢𑀢𑁆𑀣𑀓𑀁 𑀬𑀣𑀸;

𑀕𑀸𑀯𑀺𑀧𑀼𑀢𑁆𑀢𑁄 𑀩𑀮𑀻𑀩𑀤𑁆𑀥𑁄, 𑀢𑀺𑀡𑀁 𑀔𑀸𑀤𑀻 𑀧𑀺𑀯𑀻 𑀚𑀮𑀁.

𑁫𑁭. ‘‘𑀲𑀫𑀼𑀤𑀸𑀬𑀺’’𑀘𑁆𑀘𑀸𑀤𑀺. 𑀲𑀫𑀼𑀤𑀸𑀬𑀲𑁆𑀲 𑀧𑀓𑀭𑀡𑀢𑁄 𑀧𑀤𑀲𑀦𑁆𑀥𑀺𑀦𑁄 𑀯𑀸𑀓𑁆𑀬𑀲𑁆𑀲 𑀅𑀢𑁆𑀣𑁄 𑀅𑀪𑀺𑀥𑁂𑀬𑁆𑀬𑀁 𑀅𑀗𑁆𑀕𑀗𑁆𑀕𑀺𑀪𑀽𑀢𑀁 𑀓𑁆𑀭𑀺𑀬𑀸𑀓𑀸𑀭𑀓𑀲𑀫𑁆𑀩𑀦𑁆𑀥𑀻𑀯𑀺𑀲𑁂𑀲𑀮𑀓𑁆𑀔𑀡𑀁 𑀲𑀁𑀯𑁄𑀳𑀸𑀭𑀺𑀓𑀁, 𑀢𑀢𑁄 𑀅𑀧𑁂𑀢𑀁 𑀅𑀧𑀕𑀢𑀁 𑀲𑀼𑀜𑁆𑀜𑀁, 𑀯𑀺𑀦𑀸 [𑀦 (𑀓.)] 𑀧𑀤𑀢𑁆𑀣𑀫𑀢𑁆𑀢𑁂𑀦 𑀢𑀲𑁆𑀲 𑀓𑀢𑁆𑀣𑀘𑀺 𑀩𑁆𑀬𑀪𑀺𑀘𑀸𑀭𑀸𑀪𑀸𑀯𑀢𑁄 𑀏𑀢𑀸𑀤𑀺𑀲𑀁 𑀬𑀁 𑀢𑀫𑀧𑁂𑀢𑀢𑁆𑀣𑀓𑀦𑁆𑀢𑀺 𑀯𑀺𑀥𑀺. 𑀦 𑀳𑀺 ‘‘𑀕𑀸𑀯𑀺𑀧𑀼𑀢𑁆𑀢𑁄’’𑀘𑁆𑀘𑀸𑀤𑀻𑀲𑀼 𑀲𑀫𑀼𑀤𑀸𑀬𑀢𑁆𑀣𑁄 𑀲𑀫𑁆𑀪𑀯𑀢𑀺.

𑁫𑁭. ‘‘𑀲𑀫𑀼𑀤𑀸𑀬𑀺’’𑀘𑁆𑀘𑀸𑀤𑀺. 𑀲𑀫𑀼𑀤𑀸𑀬𑀢𑁆𑀣𑀢𑁄 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀬𑀪𑀽𑀢𑀓𑁆𑀭𑀺𑀬𑀸𑀓𑀸𑀭𑀓𑀲𑀫𑁆𑀩𑀦𑁆𑀥𑁂𑀳𑀺 𑀬𑀼𑀢𑁆𑀢𑀯𑀸𑀓𑁆𑀬𑀲𑀗𑁆𑀔𑀸𑀢𑀧𑀤𑀲𑀫𑀼𑀤𑀸𑀬𑀲𑁆𑀲 𑀲𑀫𑁆𑀩𑀦𑁆𑀥𑀧𑀤𑀢𑁆𑀢𑀸 𑀯𑁄𑀳𑀸𑀭𑀸𑀦𑀼𑀭𑀽𑀧𑀅𑀢𑁆𑀣𑀢𑁄 𑀅𑀧𑁂𑀢𑀁 𑀅𑀧𑀕𑀢𑀁, 𑀅𑀯𑀬𑀯𑀢𑁆𑀣𑀫𑀢𑁆𑀢𑀲𑁆𑀲 𑀯𑀸 𑀲𑀩𑁆𑀩𑀢𑁆𑀣 𑀮𑀩𑁆𑀪𑀫𑀸𑀦𑀢𑁆𑀢𑀸 𑀲𑀫𑀼𑀤𑀸𑀬𑀢𑁆𑀣𑀢𑁄 𑀲𑀼𑀜𑁆𑀜𑀁, 𑀢𑀁 𑀯𑀸𑀓𑁆𑀬𑀁 𑀅𑀧𑁂𑀢𑀢𑁆𑀣𑀓𑀁 𑀦𑀸𑀫. 𑀬𑀣𑀺𑀘𑁆𑀘𑀸𑀤𑀺𑀦𑀸 𑀉𑀤𑀸𑀳𑀭𑀢𑀺 ‘‘𑀕𑀸𑀯𑀺𑀧𑀼𑀢𑁆𑀢𑁄 𑀩𑀮𑀻𑀩𑀤𑁆𑀥𑁄 𑀉𑀲𑀪𑁄 𑀢𑀺𑀡𑀁 𑀔𑀸𑀤𑀺, 𑀚𑀮𑀁 𑀧𑀺𑀯𑀻’’𑀢𑀺. 𑀏𑀢𑁆𑀣 𑀅𑀯𑀬𑀯𑀢𑁆𑀣𑀫𑀢𑁆𑀢𑁂𑀦 𑀯𑀺𑀦𑀸 𑀲𑀫𑀼𑀤𑀸𑀬𑁂𑀦 𑀕𑀫𑁆𑀬𑀫𑀸𑀦𑀲𑁆𑀲 𑀓𑀲𑁆𑀲𑀘𑀺 𑀯𑀺𑀲𑁂𑀲𑀢𑁆𑀣𑀲𑁆𑀲 𑀅𑀪𑀸𑀯𑀸 𑀲𑀫𑀼𑀤𑀸𑀬𑀢𑁆𑀣𑀢𑁄 𑀅𑀧𑀕𑀢𑀁 𑀦𑀸𑀫 𑀳𑁄𑀢𑀺.

𑁫𑁮.

𑀩𑀦𑁆𑀥𑁂 𑀨𑀭𑀼𑀲𑀢𑀸 𑀬𑀢𑁆𑀣, 𑀢𑀁 𑀩𑀦𑁆𑀥𑀨𑀭𑀼𑀲𑀁 𑀬𑀣𑀸;

𑀔𑀭𑀸 𑀔𑀺𑀮𑀸 𑀧𑀭𑀺𑀓𑁆𑀔𑀻𑀡𑀸, 𑀔𑁂𑀢𑁆𑀢𑁂 𑀔𑀺𑀢𑁆𑀢𑀁 𑀨𑀮𑀢𑁆𑀬’𑀮𑀁.

𑁫𑁮. ‘‘𑀩𑀦𑁆𑀥𑁂’’𑀘𑁆𑀘𑀸𑀤𑀺. ¶ 𑀔𑀭𑀸𑀇𑀘𑁆𑀘𑀸𑀤𑀺𑀓𑀁 𑀩𑀦𑁆𑀥𑀨𑀭𑀼𑀲𑀁 𑀲𑀼𑀢𑀺𑀲𑀼𑀪𑀕𑀢𑁆𑀢𑀸𑀪𑀸𑀯𑀢𑁄 𑀔𑀭𑀸 𑀓𑀓𑁆𑀓𑀲𑀸 𑀔𑀺𑀮𑀸 𑀔𑀸𑀡𑀼𑀓𑀸𑀤𑀬𑁄 𑀧𑀭𑀺𑀓𑁆𑀔𑀻𑀡𑀸 𑀔𑀬𑀁 𑀧𑀢𑁆𑀢𑀸 𑀬𑀢𑁄, 𑀢𑀲𑁆𑀫𑀸 𑀔𑁂𑀢𑁆𑀢𑁂 𑀓𑁂𑀤𑀸𑀭𑁂 𑀔𑀺𑀢𑁆𑀢𑀁 𑀯𑀼𑀢𑁆𑀢𑀁 𑀅𑀮𑀫𑀘𑁆𑀘𑀦𑁆𑀢𑀁 𑀨𑀮𑀢𑀺 𑀦𑀺𑀧𑁆𑀨𑀚𑁆𑀚𑀢𑀺. 𑀯𑀸𑀓𑁆𑀬𑀤𑁄𑀲𑁄.

𑁫𑁮. ‘‘𑀩𑀦𑁆𑀥𑁂’’𑀘𑁆𑀘𑀸𑀤𑀺. 𑀩𑀦𑁆𑀥𑁂 𑀩𑀦𑁆𑀥𑀲𑀭𑀻𑀭𑁂 𑀨𑀭𑀼𑀲𑀢𑀸 𑀲𑀼𑀢𑀺𑀲𑀼𑀔𑀢𑀸𑀪𑀸𑀯𑀢𑁄 𑀨𑀭𑀼𑀲𑀪𑀸𑀯𑁄 𑀬𑀢𑁆𑀣 𑀯𑀸𑀓𑁆𑀬𑁂 𑀪𑀯𑀢𑀺, 𑀢𑀁 𑀯𑀸𑀓𑁆𑀬𑀁 𑀩𑀦𑁆𑀥𑀨𑀭𑀼𑀲𑀁 𑀦𑀸𑀫 𑀳𑁄𑀢𑀺. 𑀬𑀣𑀸𑀢𑀺 𑀉𑀤𑀸𑀳𑀭𑀢𑀺. 𑀔𑀭𑀸 𑀓𑀓𑁆𑀓𑀲𑀸 𑀔𑀺𑀮𑀸 𑀔𑀸𑀡𑀼𑀓𑀸𑀤𑀬𑁄 𑀧𑀭𑀺𑀓𑁆𑀔𑀻𑀡𑀸 𑀬𑀲𑁆𑀫𑀸 𑀔𑀻𑀡𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀔𑁂𑀢𑁆𑀢𑁂 𑀔𑀺𑀢𑁆𑀢𑀁 𑀯𑀼𑀢𑁆𑀢𑀁 𑀩𑀻𑀚𑀁 𑀅𑀮𑀁 𑀅𑀢𑀺𑀲𑀬𑁂𑀦 𑀨𑀮𑀢𑀺 𑀦𑀺𑀧𑁆𑀨𑀚𑁆𑀚𑀢𑀺.

𑀯𑀸𑀓𑁆𑀬𑀤𑁄𑀲𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀸𑀓𑁆𑀬𑀢𑁆𑀣𑀤𑁄𑀲𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁯.

𑀜𑁂𑀬𑁆𑀬𑀁 𑀮𑀓𑁆𑀔𑀡𑀫𑀦𑁆𑀯𑀢𑁆𑀣-𑀯𑀲𑁂𑀦𑀸’𑀧𑀓𑁆𑀓𑀫𑀸𑀤𑀺𑀦𑀁;

𑀉𑀤𑀸𑀳𑀭𑀡𑀫𑁂𑀢𑁂𑀲𑀁, 𑀤𑀸𑀦𑀺 𑀲𑀦𑁆𑀤𑀲𑁆𑀲𑀬𑀸𑀫𑁆𑀬’𑀳𑀁.

𑁫𑁯. ‘‘𑀜𑁂𑀬𑁆𑀬’’𑀫𑀺𑀘𑁆𑀘𑀸𑀤𑀺. 𑀅𑀧𑀓𑁆𑀓𑀫𑀸𑀤𑀻𑀦𑀁 𑀬𑀣𑀸𑀉𑀤𑁆𑀤𑀺𑀝𑁆𑀞𑀸𑀦𑀁 𑀮𑀓𑁆𑀔𑀻𑀬𑀢𑀺 𑀉𑀤𑀸𑀳𑀭𑀡𑀫𑀦𑁂𑀦𑀸𑀢𑀺 𑀅𑀢𑁆𑀣𑁂𑀦 𑀮𑀓𑁆𑀔𑀡𑀁 𑀅𑀦𑁆𑀯𑀢𑁆𑀣𑀯𑀲𑁂𑀦 𑀅𑀧𑀕𑀢𑁄 𑀓𑀫𑁄 𑀬𑀢𑁆𑀣 𑀢𑀁 𑀅𑀧𑀓𑁆𑀓𑀫𑀦𑁆𑀢𑀺𑀆𑀤𑀺𑀦𑀸 𑀅𑀢𑁆𑀣𑀸𑀦𑀼𑀕𑀫𑀦𑀯𑀲𑁂𑀦 𑀜𑁂𑀬𑁆𑀬𑀁 𑀯𑀺𑀜𑁆𑀜𑀸𑀢𑀩𑁆𑀩𑀁. 𑀇𑀤𑀸𑀦𑀺 𑀯𑀸𑀓𑁆𑀬𑀤𑁄𑀲𑁂 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀅𑀯𑀲𑀭𑀧𑁆𑀧𑀢𑁆𑀢𑁂 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀏𑀢𑁂𑀲𑀁 𑀅𑀧𑀓𑁆𑀓𑀫𑀸𑀤𑀻𑀦𑀁 𑀉𑀤𑀸𑀳𑀭𑀡𑀁 𑀮𑀓𑁆𑀔𑀺𑀬𑀁 𑀅𑀳𑀁 𑀲𑀦𑁆𑀤𑀲𑁆𑀲𑀬𑀸𑀫𑀺 𑀧𑀓𑀸𑀲𑁂𑀲𑁆𑀲𑀸𑀫𑀺.

𑁫𑁯. 𑀇𑀤𑀸𑀦𑀺 𑀉𑀤𑁆𑀤𑀺𑀝𑁆𑀞𑀸𑀦𑀼𑀓𑁆𑀓𑀫𑁂𑀦 𑀅𑀧𑀓𑁆𑀓𑀫𑀸𑀤𑀺𑀅𑀢𑁆𑀣𑀤𑁄𑀲𑀸𑀦𑀺 𑀯𑀺𑀪𑀸𑀯𑁂𑀢𑀺 ‘‘𑀜𑁂𑀬𑁆𑀬’’𑀫𑀺𑀘𑁆𑀘𑀸𑀤𑀺𑀦𑀸. 𑀅𑀧𑀓𑁆𑀓𑀫𑀸𑀤𑀻𑀦𑀁 𑀅𑀧𑀓𑁆𑀓𑀫𑁄𑀘𑀺𑀢𑁆𑀬𑀳𑀻𑀦𑀸𑀤𑀻𑀦𑀁 𑀮𑀓𑁆𑀔𑀡𑀁 𑀅𑀧𑀓𑁆𑀓𑀫𑀸𑀤𑀺𑀯𑀺𑀲𑀬𑀩𑀼𑀤𑁆𑀥𑀺𑀬𑀸 𑀅𑀯𑀺𑀧𑀭𑀻𑀢𑀯𑀼𑀢𑁆𑀢𑀺𑀬𑀸 𑀧𑀯𑀢𑁆𑀢𑀺𑀓𑀸𑀭𑀡𑀁 𑀅𑀦𑁆𑀯𑀢𑁆𑀣𑀯𑀲𑁂𑀦 𑀅𑀧𑀕𑀢𑁄 𑀓𑀫𑁄 𑀬𑀢𑁆𑀣𑀺𑀘𑁆𑀘𑀸𑀤𑀺𑀯𑀘𑀦𑀢𑁆𑀣𑀸𑀦𑀼𑀕𑀢𑀜𑀸𑀡𑀯𑀲𑁂𑀦 𑀜𑁂𑀬𑁆𑀬𑀁 𑀜𑀸𑀢𑀩𑁆𑀩𑀁, 𑀯𑀺𑀲𑀼𑀁 𑀮𑀓𑁆𑀔𑀡𑀁 𑀦 𑀯𑀤𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀸𑀦𑀺 𑀅𑀳𑀁 𑀏𑀢𑁂𑀲𑀁 𑀅𑀧𑀓𑁆𑀓𑀫𑀸𑀤𑀻𑀦𑀁 𑀉𑀤𑀸𑀳𑀭𑀡𑀁 𑀮𑀓𑁆𑀔𑀺𑀬𑀁 𑀲𑀦𑁆𑀤𑀲𑁆𑀲𑀬𑀸𑀫𑀺. 𑀅𑀢𑁆𑀣𑀸𑀦𑀼𑀕𑀢𑀫𑀦𑁆𑀯𑀢𑁆𑀣𑀁 𑀅𑀦𑁆𑀯𑀢𑁆𑀣𑀲𑁆𑀲 𑀜𑀸𑀡𑀲𑁆𑀲 𑀯𑀲𑁄𑀢𑀺 𑀯𑀺𑀕𑁆𑀕𑀳𑁄.

𑀢𑀢𑁆𑀣𑀸𑀧𑀓𑁆𑀓𑀫𑀁 𑀬𑀣𑀸

𑁬𑁦.

𑀪𑀸𑀯𑀦𑀸𑀤𑀸𑀦𑀲𑀻𑀮𑀸𑀦𑀺, 𑀲𑀫𑁆𑀫𑀸 𑀲𑀫𑁆𑀧𑀸𑀤𑀺𑀢𑀸𑀦𑀺’𑀳;

𑀪𑁄𑀕𑀲𑀕𑁆𑀕𑀸𑀤𑀺𑀦𑀺𑀩𑁆𑀩𑀸𑀦-𑀲𑀸𑀥𑀦𑀸𑀦𑀺 𑀦 𑀲𑀁𑀲𑀬𑁄.

𑁬𑁦. ‘‘𑀪𑀸𑀯𑀦𑀸’’𑀇𑀘𑁆𑀘𑀸𑀤𑀺. ¶ 𑀲𑀫𑁆𑀫𑀸 𑀅𑀮𑁄𑀪𑀸𑀤𑀺𑀳𑁂𑀢𑀼𑀲𑀫𑁆𑀧𑀢𑁆𑀢𑀺𑀬𑀸 𑀲𑀓𑁆𑀓𑀘𑁆𑀘𑀁 𑀲𑀫𑁆𑀧𑀸𑀤𑀺𑀢𑀸𑀦𑀺 𑀦𑀺𑀧𑁆𑀨𑀸𑀤𑀺𑀢𑀸𑀦𑀺. 𑀏𑀢𑁆𑀣 𑀪𑁄𑀕𑀲𑀕𑁆𑀕𑀸𑀤𑀺𑀦𑀺𑀩𑁆𑀩𑀸𑀦𑀸𑀦𑀁 𑀳𑁂𑀢𑀯𑁄 𑀬𑀣𑀸𑀓𑁆𑀓𑀫𑀁 𑀤𑀸𑀦𑀲𑀻𑀮𑀪𑀸𑀯𑀦𑀸𑀬𑁄, 𑀦 𑀢𑀼 𑀪𑀸𑀯𑀦𑀸𑀤𑀸𑀦𑀲𑀻𑀮𑀸𑀦𑀺.

𑁬𑁦. 𑀢𑀢𑁆𑀣 𑀢𑁂𑀲𑀼 𑀅𑀧𑀓𑁆𑀓𑀫𑀸𑀤𑀻𑀲𑀼 𑀅𑀧𑀓𑁆𑀓𑀫𑀁 𑀬𑀣𑀸 𑀅𑀧𑀓𑁆𑀓𑀫𑀲𑁆𑀲𑁄𑀤𑀸𑀳𑀭𑀡𑀫𑁂𑀯𑀁. 𑀑𑀘𑀺𑀢𑁆𑀬𑀳𑀻𑀦𑀁 𑀬𑀣𑀸𑀢𑁆𑀬𑀸𑀤𑀻𑀲𑀼𑀧𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀪𑀸𑀯𑀦𑀺’’𑀘𑁆𑀘𑀸𑀤𑀺. 𑀇𑀳 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀲𑀫𑁆𑀫𑀸 𑀲𑀫𑁆𑀧𑀸𑀤𑀺𑀢𑀸𑀦𑀺 𑀅𑀮𑁄𑀪𑀸𑀤𑀺𑀳𑁂𑀢𑀼𑀲𑀫𑁆𑀧𑀢𑁆𑀢𑀺𑀬𑀸 𑀲𑀓𑁆𑀓𑀘𑁆𑀘𑀁 𑀲𑀫𑁆𑀧𑀸𑀤𑀺𑀢𑀸𑀦𑀺 𑀭𑀸𑀲𑀺𑀓𑀢𑀸𑀦𑀺 𑀪𑀸𑀯𑀦𑀸𑀤𑀸𑀦𑀲𑀻𑀮𑀸𑀦𑀺 𑀪𑁄𑀕𑀲𑀕𑁆𑀕𑀸𑀤𑀺𑀦𑀺𑀩𑁆𑀩𑀸𑀦𑀲𑀸𑀥𑀦𑀸𑀦𑀺 𑀉𑀧𑀪𑁄𑀕𑀧𑀭𑀺𑀪𑁄𑀕𑀸𑀦𑀺, 𑀲𑀕𑁆𑀕𑀼𑀧𑁆𑀧𑀢𑁆𑀢𑀺𑀆𑀬𑀼𑀆𑀭𑁄𑀕𑁆𑀬𑀸𑀤𑀻𑀦𑀺, 𑀦𑀺𑀩𑁆𑀩𑀸𑀦𑀜𑁆𑀘𑁂𑀢𑀺 𑀏𑀢𑁂𑀲𑀁 𑀲𑀸𑀥𑀓𑀸𑀦𑀺. 𑀦 𑀲𑀁𑀲𑀬𑁄 𑀲𑀤𑀺𑀲𑀯𑀺𑀲𑀤𑀺𑀲𑀯𑀺𑀧𑀸𑀓𑀤𑀸𑀦𑁂 𑀲𑀁𑀲𑀬𑁄 𑀦𑀸𑀫 𑀦𑀢𑁆𑀣𑀺. 𑀏𑀢𑁆𑀣 𑀪𑁄𑀕𑀲𑀕𑁆𑀕𑀦𑀺𑀩𑁆𑀩𑀸𑀦𑀸𑀦𑀁 𑀳𑁂𑀢𑀼𑀪𑀽𑀢𑀸 𑀧𑀦 𑀓𑀫𑀢𑁄 𑀤𑀸𑀦𑀲𑀻𑀮𑀪𑀸𑀯𑀦𑀸𑀬𑁄 𑀪𑀯𑀦𑁆𑀢𑀻𑀢𑀺 𑀨𑀮𑀓𑁆𑀓𑀫𑀲𑁆𑀲 𑀳𑁂𑀢𑀼𑀓𑁆𑀓𑀫𑀁 𑀯𑀺𑀭𑀼𑀤𑁆𑀥𑀫𑀺𑀢𑀺 𑀓𑀫𑀸𑀧𑁂𑀢𑀁 𑀦𑀸𑀫 𑀳𑁄𑀢𑀺.

𑀑𑀘𑀺𑀢𑁆𑀬𑀳𑀻𑀦𑀁 𑀬𑀣𑀸

𑁬𑁧. 𑀧𑀽𑀚𑀦𑀻𑀬𑀢𑀭𑁄 𑀮𑁄𑀓𑁂, 𑀅𑀳’𑀫𑁂𑀓𑁄 𑀦𑀺𑀭𑀦𑁆𑀢𑀭𑀁.

𑀫𑀬𑁂𑀓𑀲𑁆𑀫𑀺𑀁 𑀕𑀼𑀡𑀸 𑀲𑀩𑁆𑀩𑁂, 𑀬𑀢𑁄 𑀲𑀫𑀼𑀤𑀺𑀢𑀸 𑀅𑀳𑀼𑀁.

𑁬𑁧. ‘‘𑀧𑀽𑀚𑀦𑀻𑀬𑀺’’𑀘𑁆𑀘𑀸𑀤𑀺. 𑀬𑀢𑁄 𑀬𑀲𑁆𑀫𑀸 𑀓𑀸𑀭𑀡𑀸 𑀲𑀩𑁆𑀩𑁂 𑀕𑀼𑀡𑀸 𑀲𑀻𑀮𑀸𑀤𑀬𑁄 𑀏𑀓𑀲𑁆𑀫𑀺𑀁 𑀓𑁂𑀯𑀮𑁂 𑀫𑀬𑀺 𑀏𑀯 𑀲𑀫𑀼𑀤𑀺𑀢𑀸 𑀭𑀸𑀲𑀺𑀪𑀽𑀢𑀸 𑀅𑀳𑀼𑀁 𑀅𑀳𑁂𑀲𑀼𑀁, 𑀢𑀲𑁆𑀫𑀸 𑀓𑀸𑀭𑀡𑀸 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂 𑀏𑀓𑁄 𑀓𑁂𑀯𑀮𑁄 𑀅𑀳𑀫𑁂𑀯 𑀦𑀺𑀭𑀦𑁆𑀢𑀭𑀁 𑀲𑀢𑀢𑀁 𑀧𑀽𑀚𑀦𑀻𑀬𑀢𑀭𑁄 𑀅𑀢𑀺𑀲𑀬𑁂𑀦 𑀧𑀼𑀚𑁆𑀚𑁄𑀢𑀺. 𑀏𑀯𑀫𑀢𑁆𑀢𑀧𑀲𑀁𑀲𑀦𑀫𑀭𑀼𑀘𑀺𑀢𑀁 𑀲𑀧𑁆𑀧𑀼𑀭𑀺𑀲𑀲𑁆𑀲.

𑁬𑁧. ‘‘𑀧𑀽𑀚𑀦𑀻𑀬𑀢𑀭𑁂’’𑀘𑁆𑀘𑀸𑀤𑀺. ¶ 𑀬𑀢𑁄 𑀬𑀲𑁆𑀫𑀸 𑀲𑀩𑁆𑀩𑁂 𑀕𑀼𑀡𑀸 𑀲𑀻𑀮𑀸𑀤𑀬𑁄 𑀏𑀓𑀲𑁆𑀫𑀺𑀁 𑀫𑀬𑀺 𑀅𑀤𑀼𑀢𑀺𑀬𑁂 𑀫𑀬𑀺 𑀏𑀯 𑀲𑀫𑀼𑀤𑀺𑀢𑀸 𑀭𑀸𑀲𑀺𑀪𑀽𑀢𑀸 𑀅𑀳𑀼𑀁 𑀅𑀳𑁂𑀲𑀼𑀁, 𑀢𑀲𑁆𑀫𑀸 𑀮𑁄𑀓𑁂 𑀲𑀢𑁆𑀢𑀮𑁄𑀓𑁂 𑀏𑀓𑁄 𑀅𑀤𑀼𑀢𑀺𑀬𑁄 𑀅𑀳𑀫𑁂𑀯 𑀦𑀺𑀭𑀦𑁆𑀢𑀭𑀁 𑀲𑀢𑀢𑀁 𑀧𑀽𑀚𑀦𑀻𑀬𑀢𑀭𑁄 𑀅𑀢𑀺𑀲𑀬𑁂𑀦 𑀧𑀽𑀚𑀦𑀻𑀬𑁄. 𑀏𑀯𑀁 𑀅𑀢𑁆𑀢𑀧𑁆𑀧𑀲𑀁𑀲𑀦𑀢𑁄 𑀉𑀘𑀺𑀢𑀢𑀸𑀬 𑀧𑀭𑀺𑀳𑀸𑀦𑀻𑀢𑀺 𑀑𑀘𑀺𑀢𑁆𑀬𑀳𑀻𑀦𑀁 𑀦𑀸𑀫.

𑀬𑀣𑀸 𑀘

𑁬𑁨.

𑀬𑀸𑀘𑀺𑀢𑁄𑀳𑀁 𑀓𑀣𑀁 𑀦𑀸𑀫, 𑀦 𑀤𑀚𑁆𑀚𑀸𑀫𑁆𑀬𑀧𑀺 𑀚𑀻𑀯𑀺𑀢𑀁;

𑀢𑀣𑀸𑀧𑀺 𑀧𑀼𑀢𑁆𑀢𑀤𑀸𑀦𑁂𑀦, 𑀯𑁂𑀥𑀢𑁂 𑀳𑀤𑀬𑀁 𑀫𑀫.

𑁬𑁨. ‘‘𑀬𑀸𑀘𑀺𑀢𑁄’’𑀇𑀘𑁆𑀘𑀸𑀤𑀺. 𑀏𑀢𑁆𑀣 ‘‘𑀬𑀤𑀺 𑀬𑀸𑀘𑀺𑀁𑀲𑀼, 𑀚𑀻𑀯𑀺𑀢𑀫𑁆𑀧𑀺 𑀬𑀸𑀘𑀓𑀸𑀦𑀁 𑀤𑀚𑁆𑀚𑀸𑀫𑀻’’𑀢𑀺 𑀤𑀲𑁆𑀲𑀺𑀢𑁄𑀤𑀸𑀭𑀢𑀸𑀬𑀸𑀦𑀼𑀘𑀺𑀢𑀁 𑀧𑀼𑀢𑁆𑀢𑀤𑀸𑀦𑁂 𑀳𑀤𑀬𑀧𑀯𑁂𑀥𑀦𑀓𑀣𑀦𑀁 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀬𑀚𑁆𑀚𑁂𑀯𑀫𑀯𑁄𑀘.

𑁬𑁨. 𑀬𑀣𑀸 𑀘, 𑀏𑀯𑀫𑁆𑀧𑀺 𑀑𑀘𑀺𑀢𑁆𑀬𑀳𑀻𑀦𑀲𑁆𑀲 𑀉𑀤𑀸𑀳𑀭𑀡𑀁 𑀤𑀝𑁆𑀞𑀩𑁆𑀩𑀁 ‘‘𑀬𑀸𑀘𑀺𑀢𑁄’’𑀘𑁆𑀘𑀸𑀤𑀺. 𑀬𑀸𑀘𑀺𑀢𑁄 𑀬𑀸𑀘𑀓𑁂𑀳𑀺 𑀬𑀸𑀘𑀺𑀢𑁄 𑀅𑀳𑀁 𑀚𑀻𑀯𑀺𑀢𑀫𑀧𑀺 𑀓𑀣𑀁 𑀦𑀸𑀫 𑀦 𑀤𑀚𑁆𑀚𑀸𑀫𑀺, 𑀢𑀣𑀸𑀧𑀺 𑀏𑀯𑀁 𑀤𑀸𑀦𑀚𑁆𑀛𑀸𑀲𑀬𑁂 𑀲𑀢𑀺𑀧𑀺 𑀧𑀼𑀢𑁆𑀢𑀤𑀸𑀦𑁂𑀦 𑀫𑀫 𑀳𑀤𑀬𑀁 𑀯𑁂𑀥𑀢𑁂 𑀓𑀫𑁆𑀧𑀢𑁂. 𑀏𑀢𑁆𑀣 𑀯𑁂𑀲𑁆𑀲𑀦𑁆𑀢𑀭𑀲𑁆𑀲 ‘‘𑀬𑀤𑀺 𑀬𑀸𑀘𑁂𑀬𑁆𑀬𑀼𑀁, 𑀚𑀻𑀯𑀺𑀢𑀫𑀧𑀺 𑀬𑀸𑀘𑀓𑀸𑀦𑀁 𑀤𑀚𑁆𑀚𑀸𑀫𑀻’’𑀢𑀺 𑀓𑀢𑀧𑀝𑀺𑀜𑁆𑀜𑀸𑀬 𑀧𑀼𑀢𑁆𑀢𑀤𑀸𑀦𑁂𑀦 𑀳𑀤𑀬𑀓𑀫𑁆𑀧𑀦𑀲𑁆𑀲 𑀓𑀣𑀦𑀁 𑀘𑀸𑀕𑀸𑀢𑀺𑀲𑀬𑀬𑁄𑀕𑀲𑀗𑁆𑀔𑀸𑀢𑀉𑀤𑀸𑀭𑀕𑀼𑀡𑀲𑁆𑀲 𑀅𑀦𑀦𑀼𑀘𑁆𑀙𑀯𑀺𑀓𑀦𑁆𑀢𑀺 𑀑𑀘𑀺𑀢𑁆𑀬𑀳𑀻𑀦𑀁.

𑀪𑀕𑁆𑀕𑀭𑀻𑀢𑀺 𑀬𑀣𑀸

𑁬𑁩.

𑀇𑀢𑁆𑀣𑀻𑀦𑀁 𑀤𑀼𑀚𑁆𑀚𑀦𑀸𑀦𑀜𑁆𑀘, 𑀯𑀺𑀲𑁆𑀲𑀸𑀲𑁄 𑀦𑁄𑀧𑀧𑀚𑁆𑀚𑀢𑁂;

𑀯𑀺𑀲𑁂 𑀲𑀺𑀗𑁆𑀕𑀺𑀫𑁆𑀳𑀺 𑀦𑀤𑀺𑀬𑀁, 𑀭𑁄𑀕𑁂 𑀭𑀸𑀚𑀓𑀼𑀮𑀫𑁆𑀳𑀻 𑀘.

𑁬𑁩. ‘‘𑀇𑀢𑁆𑀣𑀻𑀦’’𑀫𑀺𑀘𑁆𑀘𑀸𑀤𑀺. 𑀦𑁄𑀧𑀧𑀚𑁆𑀚𑀢𑁂 𑀦 𑀬𑀼𑀚𑁆𑀚𑀢𑀺. 𑀏𑀢𑁆𑀣 𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀺𑀬𑀸 𑀧𑀭𑀺𑀘𑁆𑀘𑀸𑀕𑁂𑀦 𑀯𑀺𑀲𑁂𑀇𑀘𑁆𑀘𑀸𑀤𑀺𑀦𑀸 𑀆𑀥𑀸𑀭𑁂 𑀲𑀢𑁆𑀢𑀫𑀻𑀦𑀺𑀤𑁆𑀤𑁂𑀲𑁄 ¶ 𑀅𑀢𑁆𑀣𑀭𑀻𑀢𑀺𑀬𑀸 𑀪𑀗𑁆𑀕𑁄. 𑀆𑀤𑁄 𑀫𑀚𑁆𑀛𑁂 𑀘 𑀘𑀓𑀸𑀭𑀧𑀭𑀺𑀘𑁆𑀘𑀸𑀕𑀸 𑀲𑀤𑁆𑀤𑀭𑀻𑀢𑀺𑀬𑀸 𑀪𑀗𑁆𑀕𑁄, 𑀭𑀻𑀢𑀻𑀦𑀁 𑀅𑀦𑀦𑁆𑀢𑀢𑁆𑀢𑀸 𑀪𑀗𑁆𑀕𑀸𑀧𑁆𑀬𑀦𑀦𑁆𑀢𑀸. 𑀉𑀤𑀸𑀳𑀭𑀡𑀁 𑀢𑀼 𑀤𑀺𑀲𑀸𑀫𑀢𑁆𑀢𑀁.

𑁬𑁩. ‘‘𑀇𑀢𑁆𑀣𑀻𑀦’’𑀫𑀺𑀘𑁆𑀘𑀸𑀤𑀺. 𑀇𑀢𑁆𑀣𑀻𑀦𑀜𑁆𑀘 𑀤𑀼𑀚𑁆𑀚𑀦𑀸𑀦𑀜𑁆𑀘 𑀯𑀺𑀲𑁆𑀲𑀸𑀲𑁄 𑀲𑀳𑀯𑀸𑀲𑀸𑀤𑀻𑀳𑀺 𑀯𑀺𑀲𑁆𑀲𑀸𑀲𑁄 𑀦𑁄𑀧𑀧𑀚𑁆𑀚𑀢𑁂 𑀅𑀦𑀢𑁆𑀣𑀲𑀁𑀲𑀬𑀸𑀦𑀺𑀯𑀢𑁆𑀢𑀺𑀓𑀸𑀭𑀡𑀢𑁆𑀢𑀸 𑀦 𑀬𑀼𑀚𑁆𑀚𑀢𑀺. 𑀯𑀺𑀲𑁂 𑀕𑀭𑀴𑁂 𑀘 𑀲𑀺𑀗𑁆𑀕𑀺𑀫𑁆𑀳𑀺 𑀲𑀺𑀗𑁆𑀕𑀯𑀢𑀺 𑀫𑀳𑀺𑀁 𑀲𑀸𑀤𑁄 𑀘 𑀦𑀤𑀺𑀬𑀜𑁆𑀘 𑀭𑁄𑀕𑁂 𑀯𑀟𑁆𑀠𑀫𑀸𑀦𑀓𑁂 𑀭𑁄𑀕𑁂 𑀘 𑀭𑀸𑀚𑀓𑀼𑀮𑀫𑁆𑀳𑀺 𑀘 𑀯𑀥𑀩𑀦𑁆𑀥𑀦𑀸𑀤𑀺𑀓𑀸𑀭𑀓𑁂 𑀭𑀸𑀚𑀓𑀼𑀮𑁂 𑀘 𑀯𑀺𑀲𑁆𑀲𑀸𑀲𑁄 𑀦𑁄𑀧𑀧𑀚𑁆𑀚𑀢𑁂. 𑀏𑀢𑁆𑀣 𑀆𑀤𑁄 𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀺𑀬𑀸 𑀆𑀭𑀪𑀺𑀢𑁆𑀯𑀸 𑀢𑀁 𑀧𑀳𑀸𑀬 𑀲𑀢𑁆𑀢𑀫𑀺𑀬𑀸 𑀯𑀼𑀢𑁆𑀢𑀢𑁆𑀢𑀸 𑀅𑀢𑁆𑀣𑀭𑀻𑀢𑀺 𑀘, 𑀆𑀤𑀺𑀫𑀚𑁆𑀛𑁂𑀲𑀼 𑀘𑀲𑀤𑁆𑀤𑀧𑀭𑀺𑀘𑁆𑀘𑀸𑀕𑀢𑁄 𑀲𑀤𑁆𑀤𑀭𑀻𑀢𑀺 𑀘 𑀪𑀺𑀦𑁆𑀦𑀸. 𑀘𑀲𑀤𑁆𑀤𑀁 𑀧𑀬𑀼𑀜𑁆𑀚𑀦𑁆𑀢𑁂𑀦 𑀆𑀤𑁄 𑀏𑀯 𑀯𑀸 𑀅𑀦𑁆𑀢𑁂 𑀏𑀯 𑀯𑀸 𑀧𑀘𑁆𑀘𑁂𑀓𑀁 𑀯𑀸 𑀬𑁄𑀚𑁂𑀢𑀩𑁆𑀩𑀁 𑀳𑁄𑀢𑀺. 𑀈𑀤𑀺𑀲𑁄 𑀧𑀬𑁄𑀕𑁄 𑀭𑀻𑀢𑀺𑀪𑀗𑁆𑀕𑁄 𑀦𑀸𑀫 𑀳𑁄𑀢𑀺. 𑀭𑀻𑀢𑀻𑀦𑀁 𑀩𑀳𑀼𑀢𑁆𑀢𑀸 𑀭𑀻𑀢𑀺𑀪𑀗𑁆𑀕𑀤𑁄𑀲𑀸𑀧𑀺 𑀩𑀳𑀼𑀯𑀺𑀥𑀸. 𑀇𑀤𑀁 𑀧𑀦 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀁.

𑀲𑀲𑀁𑀲𑀬𑀁 𑀬𑀣𑀸

𑁬𑁪.

𑀫𑀼𑀦𑀺𑀦𑁆𑀤𑀘𑀦𑁆𑀤𑀺𑀫𑀸𑀮𑁄𑀓-𑀭𑀲𑀮𑁄𑀮𑀯𑀺𑀮𑁄𑀘𑀦𑁄;

𑀚𑀦𑁄’𑀯𑀓𑁆𑀓𑀦𑁆𑀢𑀧𑀦𑁆𑀣𑁄’𑀯, 𑀕𑁄𑀧𑀤𑀲𑁆𑀲𑀦𑀧𑀻𑀡𑀺𑀢𑁄.

𑁬𑁪. ‘‘𑀫𑀼𑀦𑀺𑀦𑁆𑀤𑀺’’𑀘𑁆𑀘𑀸𑀤𑀺. ¶ 𑀘𑀦𑁆𑀤𑀺𑀫𑀸 𑀯𑀺𑀬 𑀘𑀦𑁆𑀤𑀺𑀫𑀸, 𑀫𑀼𑀦𑀺𑀦𑁆𑀤𑁄𑀬𑁂𑀯 𑀘𑀦𑁆𑀤𑀺𑀫𑀸, 𑀢𑀲𑁆𑀲 𑀆𑀮𑁄𑀓𑀦𑀁 𑀤𑀲𑁆𑀲𑀦𑀁, 𑀆𑀮𑁄𑀓𑁄 𑀧𑀓𑀸𑀲𑁄 𑀯𑀸, 𑀢𑀲𑁆𑀫𑀺𑀁 𑀭𑀲𑁄 𑀅𑀦𑀼𑀭𑀸𑀕𑁄, 𑀢𑁂𑀦 𑀮𑁄𑀮𑀸𑀦𑀺 𑀘𑀧𑀮𑀸𑀦𑀺 𑀮𑁄𑀘𑀦𑀸𑀦𑀺 𑀅𑀓𑁆𑀔𑀻𑀦𑀺 𑀬𑀲𑁆𑀲 𑀲𑁄 𑀚𑀦𑁄 𑀅𑀯𑀓𑁆𑀓𑀦𑁆𑀢𑁄 𑀑𑀓𑁆𑀓𑀦𑁆𑀢𑁄 𑀧𑀯𑀺𑀝𑁆𑀞𑁄 𑀧𑀦𑁆𑀣𑁄 𑀫𑀕𑁆𑀕𑁄 𑀬𑁂𑀦 𑀅𑀯𑀓𑁆𑀓𑀦𑁆𑀢𑀧𑀦𑁆𑀣𑁄 𑀏𑀯 𑀕𑀼𑀦𑁆𑀦𑀁 𑀭𑀁𑀲𑀻𑀦𑀁, 𑀇𑀝𑁆𑀞𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀲𑀽𑀘𑀓𑀪𑀸𑀯𑁂𑀦 𑀕𑁄𑀧𑀤𑀢𑁆𑀣𑀲𑁆𑀲 𑀯𑀸 𑀧𑀤𑀲𑁆𑀲𑀦𑁂𑀦 𑀧𑀻𑀡𑀺𑀢𑁄 𑀫𑀼𑀤𑀺𑀢𑁄𑀢𑀺 𑀏𑀢𑁆𑀣 𑀕𑁄𑀭𑀽𑀧𑀲𑁆𑀲 𑀧𑀤𑀲𑁆𑀲𑀦𑁂𑀦𑀸𑀢𑀺𑀧𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀲𑀦𑁆𑀤𑁂𑀳𑁄.

𑁬𑁪. ‘‘𑀫𑀼𑀦𑀺𑀦𑁆𑀤𑀺’’𑀘𑁆𑀘𑀸𑀤𑀺. 𑀫𑀼𑀦𑀺𑀦𑁆𑀤𑀘𑀦𑁆𑀤𑀺𑀫𑀸𑀮𑁄𑀓𑀭𑀲𑀮𑁄𑀮𑀯𑀺𑀮𑁄𑀘𑀦𑁄 𑀫𑀼𑀦𑀺𑀦𑁆𑀤𑀲𑀗𑁆𑀔𑀸𑀢𑀲𑁆𑀲 𑀘𑀦𑁆𑀤𑀺𑀫𑀲𑁆𑀲 𑀆𑀮𑁄𑀓𑁂 𑀤𑀲𑁆𑀲𑀦𑁂 𑀧𑀸𑀢𑀼𑀪𑀸𑀯𑁂 𑀯𑀸 𑀭𑀲𑁂𑀦 𑀆𑀮𑀬𑁂𑀦 𑀘𑀜𑁆𑀘𑀮𑀦𑁂𑀢𑁆𑀢𑁄 𑀚𑀦𑁄 𑀅𑀯𑀓𑁆𑀓𑀦𑁆𑀢𑀧𑀦𑁆𑀣𑁄𑀯 𑀑𑀢𑀺𑀡𑁆𑀡𑀫𑀕𑁆𑀕𑁄𑀯 𑀩𑀼𑀤𑁆𑀥𑀲𑁆𑀲 𑀤𑀲𑁆𑀲𑀦𑀢𑁆𑀣𑀸𑀬 𑀫𑀕𑁆𑀕𑀫𑁄𑀢𑀺𑀡𑁆𑀡𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑁄𑀧𑀤𑀲𑁆𑀲𑀦𑀧𑀻𑀡𑀺𑀢𑁄 𑀕𑁄𑀲𑀗𑁆𑀔𑀸𑀢𑀭𑀁𑀲𑀺𑀧𑀤𑀲𑁆𑀲𑀦𑁂𑀦, 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀕𑁄𑀧𑀤𑀲𑁆𑀲𑀦𑁂𑀦 𑀯𑀸 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺. 𑀏𑀢𑁆𑀣 𑀕𑁄𑀧𑀤𑀲𑁆𑀲𑀦𑁂𑀦𑀸𑀢𑀺 𑀘 𑀅𑀢𑁆𑀣𑀲𑁆𑀲 𑀕𑀫𑁆𑀬𑀫𑀸𑀦𑀢𑁆𑀢𑀸 𑀯𑀺𑀜𑁆𑀜𑀸𑀢𑀼𑀁 𑀲𑀁𑀲𑀬𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀲𑀁𑀲𑀬𑀁 𑀦𑀸𑀫. 𑀅𑀯𑀓𑁆𑀓𑀦𑁆𑀢𑁄 𑀧𑀦𑁆𑀣𑁄 𑀬𑁂𑀦𑀸𑀢𑀺 𑀘, 𑀕𑀼𑀦𑁆𑀦𑀁 𑀭𑀁𑀲𑀻𑀦𑀁, 𑀕𑀸𑀯𑀲𑁆𑀲 𑀯𑀸 𑀧𑀤𑀲𑁆𑀲𑀦𑀦𑁆𑀢𑀺 𑀘, 𑀕𑁄𑀧𑀤𑀲𑁆𑀲𑀦𑁂𑀦 𑀧𑀻𑀡𑀺𑀢𑁄𑀢𑀺 𑀘 𑀯𑀺𑀕𑁆𑀕𑀳𑁄.

𑁬𑁫.

𑀯𑀸𑀓𑁆𑀬𑀢𑁆𑀣𑀢𑁄 𑀤𑀼𑀧𑁆𑀧𑀢𑀻𑀢𑀺-𑀓𑀭𑀁 𑀕𑀸𑀫𑁆𑀫𑀁 𑀫𑀢𑀁 𑀬𑀣𑀸;

𑀧𑁄𑀲𑁄 𑀯𑀻𑀭𑀺𑀬𑀯𑀸𑀲𑁄’𑀬𑀁, 𑀧𑀭𑀁 𑀳𑀦𑁆𑀢𑁆𑀯𑀸𑀦 𑀯𑀺𑀲𑁆𑀲𑀫𑀺.

𑁬𑁫. ‘‘𑀯𑀸𑀓𑁆𑀬’’𑀇𑀘𑁆𑀘𑀸𑀤𑀺. 𑀧𑀭𑀁 𑀲𑀢𑁆𑀢𑀼𑀁 𑀳𑀦𑁆𑀢𑁆𑀯𑀸𑀦 𑀧𑀳𑀭𑀺𑀢𑁆𑀯𑀸 𑀯𑀻𑀭𑀺𑀬𑀯𑀸 𑀲𑀽𑀭𑁄 𑀲𑁄𑀬𑀁 𑀧𑁄𑀲𑁄 𑀧𑀼𑀭𑀺𑀲𑁄 𑀯𑀺𑀲𑁆𑀲𑀫𑀺 𑀯𑀺𑀲𑁆𑀲𑀢𑁆𑀣𑁄. 𑀅𑀬𑀫𑀢𑁆𑀣𑁄 𑀢𑀸𑀯 𑀦 𑀤𑀼𑀧𑁆𑀧𑀢𑀻𑀢𑁄. 𑀧𑀭𑀁 𑀅𑀘𑁆𑀘𑀦𑁆𑀢𑀁 𑀳𑀦𑁆𑀢𑁆𑀯𑀸𑀦 𑀯𑀻𑀭𑀺𑀬𑀯𑀸 𑀉𑀘𑀺𑀢𑀲𑀫𑁆𑀪𑀯𑁄 𑀲𑁄𑀬𑀁 𑀧𑁄𑀲𑁄 𑀯𑀺𑀲𑁆𑀲𑀫𑀻𑀢𑀺 𑀤𑀼𑀧𑁆𑀧𑀢𑀻𑀢𑁄𑀬𑀫𑀢𑁆𑀣𑁄.

𑁬𑁫. 𑀅𑀦𑁆𑀯𑀢𑁆𑀣𑀯𑀲𑁂𑀦 𑀮𑀓𑁆𑀔𑀡𑀲𑁆𑀲 𑀅𑀧𑀸𑀓𑀝𑀢𑁆𑀢𑀸 𑀲𑀮𑀓𑁆𑀔𑀡𑀁 𑀮𑀓𑁆𑀔𑀺𑀬𑀫𑀼𑀤𑀸𑀳𑀭𑀢𑀺 ‘‘𑀯𑀸𑀓𑁆𑀬𑀢𑁆𑀣𑀢𑁄’’𑀘𑁆𑀘𑀸𑀤𑀺𑀦𑀸. 𑀯𑀸𑀓𑁆𑀬𑀢𑁆𑀣𑀢𑁄 𑀤𑀼𑀧𑁆𑀧𑀢𑀻𑀢𑀺𑀓𑀭𑀁 𑀯𑀺𑀭𑀼𑀤𑁆𑀥𑀧𑁆𑀧𑀓𑀸𑀲𑀓𑀁 𑀕𑀸𑀫𑁆𑀫𑀦𑁆𑀢𑀺 𑀫𑀢𑀁. 𑀬𑀣𑀸𑀢𑀺 𑀉𑀤𑀸𑀳𑀭𑀢𑀺. 𑀧𑀭𑀁 𑀲𑀢𑁆𑀢𑀼𑀁 𑀳𑀦𑁆𑀢𑁆𑀯𑀸𑀦 𑀫𑀸𑀭𑁂𑀢𑁆𑀯𑀸𑀦 𑀯𑀻𑀭𑀺𑀬𑀯𑀸 𑀲𑀽𑀭𑁄 𑀲𑁄 𑀅𑀬𑀁 𑀧𑁄𑀲𑁄 𑀯𑀺𑀲𑁆𑀲𑀫𑀺 𑀯𑀺𑀕𑀢𑀧𑀭𑀺𑀲𑁆𑀲𑀫𑁄 𑀅𑀳𑁄𑀲𑀺, 𑀅𑀬𑀫𑀢𑁆𑀣𑁄 𑀇𑀝𑁆𑀞𑁄. 𑀧𑀭𑀁 𑀅𑀢𑀺𑀲𑀬𑁂𑀦 𑀳𑀦𑁆𑀢𑁆𑀯𑀸𑀦 𑀯𑀻𑀢𑀺𑀓𑁆𑀓𑀫𑀁 𑀓𑀢𑁆𑀯𑀸 𑀯𑀻𑀭𑀺𑀬𑀯𑀸 𑀉𑀧𑀘𑀺𑀢𑀲𑀫𑁆𑀪𑀯𑁄 𑀉𑀧𑀘𑀺𑀢𑀲𑀼𑀓𑁆𑀓𑁄 𑀲𑁄 𑀅𑀬𑀁 𑀧𑀼𑀭𑀺𑀲𑁄 𑀯𑀸𑀬𑀸𑀫𑁂𑀦 𑀯𑀺𑀲𑁆𑀲𑀫𑀺 𑀯𑀺𑀕𑀢𑀯𑀸𑀬𑀸𑀫𑁄 𑀅𑀳𑁄𑀲𑀻𑀢𑀺. 𑀇𑀫𑀲𑁆𑀲𑀢𑁆𑀣𑀲𑁆𑀲 𑀅𑀲𑀩𑁆𑀪𑀸𑀭𑀳𑀢𑁆𑀢𑀸 𑀕𑀸𑀫𑁆𑀫𑀢𑁆𑀢𑀁. 𑀯𑀻𑀭𑀺𑀬𑀁 𑀉𑀲𑁆𑀲𑀸𑀳𑁄 𑀲𑀫𑁆𑀪𑀯𑁄 𑀯𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀯𑀺𑀕𑁆𑀕𑀳𑁄.

𑁬𑁬.

𑀤𑀼𑀝𑁆𑀞𑀸𑀮𑀗𑁆𑀓𑀭𑀡𑀁 ¶ 𑀢𑁂𑀢𑀁, 𑀬𑀢𑁆𑀣𑀸𑀮𑀗𑁆𑀓𑀸𑀭𑀤𑀽𑀲𑀦𑀁;

𑀢𑀲𑁆𑀲𑀸𑀮𑀗𑁆𑀓𑀸𑀭𑀦𑀺𑀤𑁆𑀤𑁂𑀲𑁂, 𑀭𑀽𑀧𑀫𑀸𑀯𑀻𑀪𑀯𑀺𑀲𑁆𑀲𑀢𑀺.

𑁬𑁬. ‘‘𑀤𑀼𑀝𑁆𑀞𑀸’’𑀇𑀘𑁆𑀘𑀸𑀤𑀺. 𑀬𑀢𑁆𑀣 𑀬𑀲𑁆𑀫𑀺𑀁 𑀯𑀸𑀓𑁆𑀬𑁂 𑀅𑀮𑀗𑁆𑀓𑀸𑀭𑀸𑀦𑀁 𑀤𑀽𑀲𑀦𑀁 𑀯𑀺𑀓𑀝𑀢𑀸, 𑀏𑀢𑀦𑁆𑀢𑀼 𑀤𑀼𑀝𑁆𑀞𑀸𑀮𑀗𑁆𑀓𑀭𑀡𑀁 𑀤𑀼𑀝𑁆𑀞𑀸𑀮𑀗𑁆𑀓𑀭𑀡𑀁 𑀦𑀸𑀫, 𑀢𑀲𑁆𑀲 𑀤𑀼𑀝𑁆𑀞𑀸𑀮𑀗𑁆𑀓𑀸𑀭𑀲𑁆𑀲 𑀭𑀽𑀧𑀁 𑀲𑀭𑀽𑀧𑀁 𑀅𑀮𑀗𑁆𑀓𑀸𑀭𑀦𑀺𑀤𑁆𑀤𑁂𑀲𑁂 𑀢𑀁𑀦𑀸𑀫𑀓𑁂 𑀧𑀭𑀺𑀘𑁆𑀙𑁂𑀤𑁂 𑀆𑀯𑀻𑀪𑀯𑀺𑀲𑁆𑀲𑀢𑀺 𑀧𑀓𑀸𑀲𑀺𑀲𑁆𑀲𑀢𑀺, 𑀢𑀢𑁆𑀣𑁂𑀯 𑀢𑀁 𑀤𑀲𑁆𑀲𑀬𑀺𑀲𑁆𑀲𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁬. ‘‘𑀤𑀼𑀝𑁆𑀞𑀸𑀮𑀗𑁆𑀓𑀭𑀺’’𑀘𑁆𑀘𑀸𑀤𑀺. 𑀬𑀢𑁆𑀣 𑀯𑀸𑀓𑁆𑀬𑁂 𑀅𑀮𑀗𑁆𑀓𑀸𑀭𑀤𑀽𑀲𑀦𑀁 𑀅𑀮𑀗𑁆𑀓𑀸𑀭𑀸𑀦𑀁 𑀯𑀺𑀭𑁄𑀥𑁄 𑀳𑁄𑀢𑀺, 𑀏𑀢𑀁 𑀯𑀸𑀓𑁆𑀬𑀢𑁆𑀣𑀦𑀺𑀲𑁆𑀲𑀺𑀢𑀁 𑀏𑀢𑀁 𑀯𑀸𑀓𑁆𑀬𑀁 𑀤𑀼𑀝𑁆𑀞𑀸𑀮𑀗𑁆𑀓𑀭𑀡𑀁 𑀤𑀼𑀝𑁆𑀞𑀸𑀮𑀗𑁆𑀓𑀸𑀭𑁄 𑀦𑀸𑀫, 𑀢𑀲𑁆𑀲 𑀤𑀼𑀝𑁆𑀞𑀸𑀮𑀗𑁆𑀓𑀭𑀡𑀤𑁄𑀲𑁄𑀧𑀮𑀓𑁆𑀔𑀺𑀢𑀯𑀸𑀓𑁆𑀬𑀲𑁆𑀲 𑀭𑀽𑀧𑀁 𑀲𑀭𑀽𑀧𑀁 𑀮𑀓𑁆𑀔𑀺𑀬𑀁 𑀅𑀮𑀗𑁆𑀓𑀸𑀭𑀦𑀺𑀤𑁆𑀤𑁂𑀲𑁂 𑀅𑀮𑀗𑁆𑀓𑀸𑀭𑀸𑀦𑀁 𑀦𑀺𑀤𑀲𑁆𑀲𑀦𑀝𑁆𑀞𑀸𑀦𑀪𑀽𑀢𑁂 𑀧𑀭𑀺𑀘𑁆𑀙𑁂𑀤𑁂 𑀆𑀯𑀻𑀪𑀯𑀺𑀲𑁆𑀲𑀢𑀺. 𑀏𑀢𑁆𑀣 𑀯𑀼𑀢𑁆𑀢𑁂𑀧𑀺 𑀧𑀼𑀦 𑀢𑀢𑁆𑀣𑀸𑀧𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀤𑁆𑀤𑁂𑀲𑁂 ‘‘𑀤𑀼𑀝𑁆𑀞𑀸𑀮𑀗𑁆𑀓𑀢𑀻’’𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 ‘‘𑀤𑀼𑀝𑁆𑀞𑀸𑀮𑀗𑁆𑀓𑀭𑀡’’𑀦𑁆𑀢𑀺 𑀯𑀘𑀦𑀁 𑀅𑀮𑀗𑁆𑀓𑀢𑀺 𑀅𑀮𑀗𑁆𑀓𑀭𑀡𑀅𑀮𑀗𑁆𑀓𑀸𑀭𑀲𑀤𑁆𑀤𑀸𑀦𑀁 𑀢𑀼𑀮𑁆𑀬𑀢𑁆𑀣𑀢𑁆𑀢𑀸 𑀦 𑀯𑀺𑀭𑀼𑀚𑁆𑀛𑀢𑀺.

𑁬𑁭.

𑀓𑀢𑁄’𑀢𑁆𑀭 𑀲𑀗𑁆𑀔𑁂𑀧𑀦𑀬𑀸 𑀫𑀬𑀸’𑀬𑀁,

𑀤𑁄𑀲𑀸𑀦𑀫𑁂𑀲𑀁 𑀧𑀯𑀭𑁄 𑀯𑀺𑀪𑀸𑀕𑁄;

𑀏𑀲𑁄’𑀯’𑀮𑀁 𑀩𑁄𑀥𑀬𑀺𑀢𑀼𑀁 𑀓𑀯𑀻𑀦𑀁,

𑀢𑀫𑀢𑁆𑀣𑀺 𑀘𑁂 𑀔𑁂𑀤𑀓𑀭𑀁 𑀧𑀭𑀫𑁆𑀧𑀺.

𑀇𑀢𑀺 𑀲𑀗𑁆𑀖𑀭𑀓𑁆𑀔𑀺𑀢𑀫𑀳𑀸𑀲𑀸𑀫𑀺𑀧𑀸𑀤𑀯𑀺𑀭𑀘𑀺𑀢𑁂 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂

𑀤𑁄𑀲𑀸𑀯𑀩𑁄𑀥𑁄 𑀦𑀸𑀫

𑀧𑀞𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁬𑁭. 𑀏𑀯𑀁 ‘‘𑀲𑁄𑀤𑀸𑀳𑀭𑀡𑀫𑁂𑀢𑁂𑀲𑀁, 𑀮𑀓𑁆𑀔𑀡𑀁 𑀓𑀣𑀬𑀸𑀫𑁆𑀬𑀳’’𑀦𑁆𑀢𑀺 𑀓𑀢𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀧𑀝𑀺𑀧𑀚𑁆𑀚 𑀤𑀸𑀦𑀺 ‘‘𑀓𑀢𑁄𑀢𑁆𑀭𑀺’’𑀘𑁆𑀘𑀸𑀤𑀺𑀦𑀸 𑀦𑀺𑀓𑁆𑀔𑀺𑀧𑀦𑀦𑀬𑀁 𑀲𑀗𑁆𑀔𑀺𑀧𑀢𑀺. 𑀅𑀢𑁆𑀭 𑀇𑀫𑀲𑁆𑀫𑀺𑀁 𑀅𑀥𑀺𑀓𑀸𑀭𑁂, 𑀧𑀭𑀺𑀘𑁆𑀙𑁂𑀤𑁂 ¶ 𑀯𑀸 𑀏𑀲𑀁 𑀬𑀣𑀸𑀯𑀼𑀢𑁆𑀢𑀸𑀦𑀁 𑀤𑁄𑀲𑀸𑀦𑀁 𑀧𑀤𑀤𑁄𑀲𑀸𑀤𑀻𑀦𑀁 𑀧𑀯𑀭𑁄 𑀉𑀢𑁆𑀢𑀫𑁄 𑀯𑀺𑀪𑀸𑀕𑁄 𑀯𑀺𑀪𑀚𑀦𑀁 𑀲𑀗𑁆𑀔𑁂𑀧𑀦𑀬𑀸 𑀲𑀗𑁆𑀔𑁂𑀧𑀓𑁆𑀓𑀫𑁂𑀦, 𑀦 𑀯𑀺𑀢𑁆𑀣𑀸𑀭𑀢𑁄, 𑀬𑀢𑁄 𑀅𑀧𑀭𑀺𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀦𑀢𑁆𑀣𑀺 𑀧𑀭𑀺𑀬𑀦𑁆𑀢𑁄 𑀫𑀬𑀸 𑀓𑀢𑁄 𑀦𑀺𑀝𑁆𑀞𑀸𑀧𑀺𑀢𑁄. 𑀦𑀦𑀼 ‘‘𑀲𑀗𑁆𑀔𑁂𑀧𑀦𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀼𑀭𑀸𑀢𑀦𑁂𑀳𑀺 [𑀧𑀼𑀭𑀸𑀢𑀭𑁂𑀳𑀺 (𑀓.)] 𑀤𑀻𑀧𑀺𑀢𑀸 𑀲𑀦𑁆𑀢𑀺 𑀩𑀳𑀽 𑀤𑁄𑀲𑀸, 𑀢𑁂 𑀧𑀭𑀺𑀘𑁆𑀘𑀢𑁆𑀢𑀸 𑀲𑀺𑀬𑀼𑀦𑁆𑀢𑀺? 𑀏𑀢𑁆𑀣 𑀯𑀼𑀘𑁆𑀘𑀢𑁂, 𑀯𑀺𑀢𑁆𑀣𑀸𑀭𑀓𑁆𑀓𑀫𑀲𑁆𑀲 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀲𑀗𑁆𑀔𑁂𑀧𑀦𑀬𑀸’’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀲𑀩𑁆𑀩𑀣𑀸 𑀧𑀭𑀺𑀘𑁆𑀘𑀸𑀕𑁂𑀦. 𑀢𑀣𑀸 𑀳𑀺𑁋

‘‘𑀦𑀺𑀳𑀦𑁆𑀢𑀼 𑀲𑁄𑀬𑀁 𑀚𑀮𑀺𑀢𑀁, 𑀧𑀢𑀗𑁆𑀕𑁄 𑀅𑀭𑀺𑀧𑀸𑀯𑀓’’𑀦𑁆𑀢𑀺𑀆𑀤𑀻𑀦𑀁

𑀅𑀓𑁆𑀔𑀫𑀢𑁆𑀣𑀦𑁆𑀢𑀭𑀸𑀤𑀺𑀓𑀁 𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀸𑀦𑀼𑀕𑀢𑀦𑁆𑀢𑀺 𑀘. 𑀏𑀢𑁆𑀣 𑀳𑀺 𑀧𑀢𑀗𑁆𑀕𑀲𑀤𑁆𑀤𑁂𑀦 𑀚𑁄𑀢𑀺𑀭𑀺𑀗𑁆𑀕𑀡𑀲𑀗𑁆𑀔𑀸𑀢𑀫𑀢𑁆𑀣𑀦𑁆𑀢𑀭𑀫𑀲𑀫𑀢𑁆𑀣𑀫𑀺𑀘𑁆𑀙𑀺𑀢𑀢𑁆𑀣𑁂 ‘‘𑀯𑀘𑀦𑁆𑀢𑀺 𑀕𑀡𑁆𑀟𑀸’’𑀢𑁆𑀬𑁂𑀯𑀫𑀸𑀤𑀺𑀓𑀁 𑀅𑀫𑀗𑁆𑀕𑀮𑀅𑀧𑀬𑀼𑀢𑁆𑀢𑀧𑀤𑀸𑀤𑀺𑀓𑀁 𑀓𑀺𑀮𑀺𑀝𑁆𑀞𑁂 𑀅𑀦𑁆𑀢𑁄𑀕𑀥𑀦𑁆𑀢𑀺 𑀘.

𑀕𑀚𑀳𑁂𑀲𑀸𑀤𑀺 𑀲𑀫𑁆𑀩𑀦𑁆𑀥𑀤𑀽𑀲𑀺𑀢𑀁 𑀮𑁄𑀓𑀯𑀺𑀭𑁄𑀥𑀺, 𑀲𑁄𑀕𑀢𑀸𑀕𑀫𑀸𑀤𑀻𑀲𑀼 𑀧𑀲𑀺𑀤𑁆𑀥𑀁 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀓𑀫𑀜𑁆𑀜𑀢𑁆𑀭 𑀯𑀼𑀢𑁆𑀢𑀁 𑀅𑀧𑁆𑀧𑀢𑀻𑀢𑀁 𑀦𑀸𑀫. 𑀇𑀤𑀁 𑀆𑀕𑀫𑀯𑀺𑀭𑁄𑀥𑀺𑀇𑀢𑀺, 𑀲𑀫𑁆𑀩𑀦𑁆𑀥𑀤𑀽𑀲𑀺𑀢𑀧𑁆𑀧𑀢𑀻𑀢𑀸𑀤𑀺𑀓𑀁 𑀯𑀺𑀭𑁄𑀥𑀺𑀫𑁆𑀳𑀺 𑀧𑀯𑀺𑀝𑁆𑀞𑀦𑁆𑀢𑀺 𑀘, 𑀆𑀦𑁂𑀢𑀩𑁆𑀩𑀳𑁂𑀢𑀼𑀢𑁆𑀢𑀸 𑀳𑁂𑀢𑁆𑀯𑀧𑁂𑀓𑁆𑀔𑀁 𑀦𑁂𑀬𑁆𑀬𑀢𑁄 𑀦 𑀩𑁆𑀬𑀢𑀺𑀭𑀺𑀘𑁆𑀘𑀢𑀻𑀢𑀺 𑀘.

‘‘𑀤𑁂𑀯𑁄 𑀯𑁄𑀳𑀭𑀢𑀼 𑀓𑁆𑀮𑁂𑀲𑀁, 𑀭𑀸𑀳𑀼𑀔𑀺𑀦𑁆𑀦𑁄 𑀤𑀺𑀯𑀸𑀓𑀭𑁄’’

𑀇𑀘𑁆𑀘𑀸𑀤𑀺𑀓𑀁 𑀅𑀲𑀸𑀫𑀢𑁆𑀣𑁆𑀬𑀸𑀪𑀺𑀥𑁂𑀬𑁆𑀬𑀸𑀤𑀺𑀓𑀁 𑀑𑀘𑀺𑀢𑁆𑀬𑀳𑀻𑀦𑁂 𑀲𑀗𑁆𑀕𑀳𑀺𑀢𑀦𑁆𑀢𑀺 𑀘. 𑀚𑀺𑀕𑀼𑀘𑁆𑀙𑀅𑀲𑀩𑁆𑀪𑀲𑀁𑀲𑀽𑀘𑀓𑀅𑀢𑁆𑀣𑀦𑁆𑀢𑀭𑀓𑀜𑁆𑀘 𑀕𑀸𑀫𑁆𑀫𑀁 𑀤𑀼𑀧𑁆𑀧𑀢𑀻𑀢𑀺𑀓𑀭𑁂 𑀲𑀗𑁆𑀕𑀬𑁆𑀳𑀢𑀻𑀢𑀺 𑀘. ( ) [(𑀤𑀼𑀭𑀼𑀘𑁆𑀘𑀸𑀭𑀡𑀁)?] 𑀲𑀩𑀦𑁆𑀥𑀨𑀭𑀼𑀲𑀫𑁂𑀯𑁂𑀢𑀺 𑀘.

𑀏𑀢𑁆𑀣 𑀧𑀦 𑀑𑀘𑀺𑀢𑁆𑀬𑀳𑀻𑀦𑀤𑀼𑀧𑁆𑀧𑀢𑀻𑀢𑀺𑀓𑀭𑀸𑀦𑀁 𑀯𑀸𑀓𑁆𑀬𑀢𑁆𑀣𑀤𑁄𑀲𑀢𑁆𑀢𑁂𑀧𑀺 𑀨𑀦𑁆𑀥𑀨𑀭𑀼𑀲𑀲𑁆𑀲 𑀘 𑀯𑀸𑀓𑁆𑀬𑀤𑁄𑀲𑀢𑁆𑀢𑁂 𑀧𑀤𑀧𑀤𑀢𑁆𑀣𑀸𑀦𑀁 𑀤𑁄𑀲𑀢𑁄 𑀯𑀸𑀓𑁆𑀬𑀫𑁂𑀯 𑀤𑀼𑀝𑁆𑀞𑀁 𑀲𑀺𑀬𑀸, 𑀯𑀸𑀓𑁆𑀬𑀜𑁆𑀘 𑀧𑀤𑁂𑀳𑀺 𑀯𑀺𑀭𑀺𑀘𑁆𑀘𑀢𑁂, 𑀧𑀤𑁂 𑀤𑀼𑀝𑁆𑀞𑁂 𑀯𑀸𑀓𑁆𑀬𑀢𑁆𑀣𑁄 𑀘 𑀤𑀼𑀝𑁆𑀞𑁄 𑀲𑀺𑀬𑀸. 𑀧𑀤𑀤𑁄𑀲𑀢𑁄 𑀯𑀸𑀓𑁆𑀬𑀯𑀸𑀓𑁆𑀬𑀢𑁆𑀣𑀸𑀦𑀁 𑀦𑀸𑀦𑀸𑀪𑀸𑀯𑀸𑀪𑀸𑀯𑀜𑀸𑀧𑀦𑀢𑁆𑀣𑀁 𑀅𑀲𑀸𑀫𑀢𑁆𑀣𑀺𑀬𑀸𑀪𑀺𑀥𑁂𑀬𑁆𑀬𑀸𑀤𑀺𑀓𑀁 𑀧𑀤𑀁 𑀑𑀘𑀺𑀢𑁆𑀬𑀳𑀻𑀦𑀸𑀤𑀺𑀯𑀸𑀓𑁆𑀬𑀢𑁆𑀣𑀤𑁄𑀲𑀸𑀤𑀻𑀲𑀼 ¶ 𑀅𑀦𑁆𑀢𑁄 𑀓𑀣𑀺𑀢𑀁. 𑀢𑀣𑀸 𑀳𑀺 𑀧𑀼𑀭𑀸𑀢𑀦𑁂𑀳𑀺 𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀸𑀤𑀻𑀳𑀺 𑀧𑀤𑁂𑀳𑀺 𑀯𑀺𑀭𑀘𑀺𑀢𑀁 𑀯𑀸𑀓𑁆𑀬𑀁 𑀯𑀺𑀭𑀼𑀤𑁆𑀥𑀦𑁆𑀢𑀺𑀆𑀤𑀺𑀦𑀸 𑀩𑀳𑀽𑀦𑀺 𑀤𑀼𑀝𑁆𑀞𑀸𑀦𑀺 𑀯𑀸𑀓𑁆𑀬𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. ‘‘𑀳𑀭𑀺𑀲𑀫𑀸𑀦𑀬𑀻’’𑀢𑀺 𑀏𑀢𑁆𑀣 𑀳𑀧𑀼𑀩𑁆𑀩𑀁 𑀭𑀺𑀲’𑀫𑀸𑀦𑀬𑀻𑀢𑀺 𑀇𑀘𑁆𑀙𑀺𑀢𑀢𑁆𑀣𑀸 𑀧𑀭𑀺 𑀪𑀝𑁆𑀞𑀁 𑀪𑀝𑁆𑀞𑀁. 𑀦𑀸𑀦𑀢𑁆𑀣𑀫𑀧𑁆𑀧𑀲𑀺𑀤𑁆𑀥𑁂𑀳𑀺 𑀬𑀼𑀢𑁆𑀢𑀁 𑀕𑀼𑀴𑁆𑀳𑀁, 𑀬𑀣𑀸 ‘‘𑀲𑀓𑁆𑀓𑁄 𑀲𑀳𑀲𑁆𑀲𑀕𑀽’’𑀢𑀺. 𑀇𑀢𑀺 𑀪𑀝𑁆𑀞𑀕𑀼𑀴𑁆𑀳𑀢𑁆𑀣𑀸𑀤𑀬𑁄 𑀧𑀲𑀸𑀤𑀸𑀮𑀗𑁆𑀓𑀸𑀭𑀯𑀺𑀭𑀼𑀤𑁆𑀥𑀸𑀢𑀺 𑀘.

𑀯𑀸𑀓𑁆𑀬𑁂𑀧𑀺 𑀯𑀺𑀲𑀦𑁆𑀥𑀺𑀓𑀫𑀺𑀳𑀸𑀦𑀼𑀧𑀬𑁄𑀕𑀻𑀢𑀺 𑀘, 𑀯𑀸𑀓𑁆𑀬𑀦𑁆𑀢𑀭𑁄𑀧𑀕𑀢𑀁 𑀯𑀸𑀓𑁆𑀬𑀁 𑀯𑀸𑀓𑁆𑀬𑀕𑀩𑁆𑀪𑀁, 𑀯𑀸𑀓𑁆𑀬𑀦𑁆𑀢𑀭𑀧𑀤𑀲𑀫𑁆𑀫𑀺𑀲𑁆𑀲𑀁 ‘‘𑀅𑀧𑀸𑀣𑁆𑀬𑀫𑁂𑀲𑁄 𑀤𑀺𑀲𑁆𑀲𑀢𑀺, 𑀯𑁂𑀚𑁆𑀚𑀁 𑀔𑀸𑀤𑀢𑁆𑀬𑀦𑀸𑀭𑀢’’𑀫𑀺𑀘𑁆𑀘𑀸𑀤𑀺𑀓𑀁 𑀯𑀸𑀓𑁆𑀬𑀲𑀁𑀓𑀺𑀡𑁆𑀡𑀜𑁆𑀘 𑀩𑁆𑀬𑀸𑀓𑀺𑀡𑁆𑀡𑁂 𑀲𑀫𑁄𑀳𑀺𑀢𑀦𑁆𑀢𑀺 𑀘.

‘‘𑀓𑀸𑀘𑀼𑀬𑁆𑀬𑀸𑀦𑁂 𑀫𑀬𑀸 𑀤𑀺𑀝𑁆𑀞𑀸, 𑀯𑀮𑁆𑀮𑀭𑀻 𑀧𑀜𑁆𑀘𑀧𑀮𑁆𑀮𑀯𑀸;

𑀧𑀮𑁆𑀮𑀯𑁂 𑀧𑀮𑁆𑀮𑀯𑁂 𑀫𑀼𑀥𑀸, 𑀬𑀲𑁆𑀲𑀸 𑀓𑀼𑀲𑀼𑀫𑀫𑀜𑁆𑀘𑀭𑀻’’𑀢𑀺.

𑀇𑀤𑀫𑀯𑀸𑀘𑀓𑀁 𑀧𑀳𑁂𑀴𑀺𑀓𑀸𑀬 𑀧𑀫𑀼𑀲𑁆𑀲𑀺𑀢𑀸𑀲𑀦𑁆𑀦𑀺𑀲𑁆𑀲𑀺𑀢𑀦𑁆𑀢𑀺 𑀘, 𑀢𑀢𑁆𑀣 𑀘 𑀓𑀯𑀺𑀦𑀸 𑀉𑀬𑁆𑀬𑀸𑀦𑀲𑀤𑁆𑀤𑁂𑀦 𑀕𑁂𑀳𑀁, 𑀮𑀢𑀸𑀯𑀸𑀘𑀺𑀦𑀸 𑀯𑀮𑁆𑀮𑀭𑀻𑀲𑀤𑁆𑀤𑁂𑀦 𑀅𑀗𑁆𑀕𑀦𑀸, 𑀧𑀮𑁆𑀮𑀯𑀲𑀤𑁆𑀤𑁂𑀦 𑀓𑀭𑀘𑀭𑀡𑀤𑀲𑀦𑀘𑁆𑀙𑀤𑀸, 𑀫𑀜𑁆𑀘𑀭𑀻𑀲𑀤𑁆𑀤𑁂𑀦 𑀦𑀔𑀲𑁄𑀪𑀸 𑀤𑀦𑁆𑀢𑀓𑀦𑁆𑀢𑀺𑀬𑁄 𑀘 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀸, 𑀯𑀸𑀓𑁆𑀬𑀢𑁆𑀣𑁂𑀧𑀺 𑀧𑀤𑀼𑀫𑀺𑀦𑀻𑀦𑀁 𑀭𑀢𑁆𑀢𑀺𑀬𑀫𑀼𑀦𑁆𑀦𑀺𑀤𑁆𑀤𑀢𑀸𑀤𑀺𑀓𑀁 𑀯𑀺𑀭𑀼𑀤𑁆𑀥𑀁 𑀯𑀺𑀭𑁄𑀥𑀺𑀦𑀺𑀮𑀻𑀦𑀦𑁆𑀢𑀺 𑀘 𑀦𑀸𑀢𑁆𑀬𑀦𑀼𑀜𑁆𑀜𑀸𑀢𑀸, 𑀦 𑀢𑀼 𑀲𑀩𑁆𑀩𑀣𑀸 𑀧𑀭𑀺𑀘𑁆𑀘𑀸𑀕𑁂𑀦. 𑀏𑀲𑁄𑀯 𑀏𑀯𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀦𑀺𑀝𑁆𑀞𑀸𑀧𑀺𑀢𑁄 𑀅𑀬𑀁 𑀲𑀗𑁆𑀔𑁂𑀧𑀦𑀬𑁄 𑀏𑀯 𑀓𑀯𑀻𑀦𑀁 𑀧𑀡𑁆𑀟𑀺𑀢𑀚𑀦𑀸𑀦𑀁 𑀔𑁂𑀤𑀓𑀭𑀁 ‘‘𑀓𑀣𑀁 𑀦𑀸𑀫 𑀩𑀦𑁆𑀥𑁂𑀧𑀻𑀤𑀺𑀲𑀁 𑀲𑀢𑀺 𑀲𑀦𑁆𑀢𑀻’’𑀢𑀺 𑀏𑀯𑀫𑀸𑀲𑀼𑀳𑀦𑁄𑀧𑀚𑀦𑀁 𑀧𑀭𑀁 𑀧𑀤𑀤𑁄𑀲𑁂 𑀅𑀲𑀸𑀥𑀼𑀲𑀦𑁆𑀤𑀺𑀤𑁆𑀥𑀧𑀭𑀺𑀬𑀸𑀬 𑀜𑁂𑀬𑁆𑀬𑀅𑀧𑁆𑀧𑀢𑀻𑀢𑀢𑁆𑀣𑀅𑀧𑁆𑀧𑀬𑁄𑀚𑀓 𑀤𑀼𑀩𑁆𑀩𑁄𑀥𑀤𑁂𑀲𑀺𑀬𑀸𑀤𑀺𑀓𑀁, 𑀯𑀸𑀓𑁆𑀬𑀤𑁄𑀲𑁂 𑀅𑀥𑀺𑀓𑀊𑀦𑀪𑀕𑁆𑀕𑀘𑁆𑀙𑀦𑁆𑀤𑀸𑀤𑀺𑀓𑀁, 𑀯𑀸𑀓𑁆𑀬𑀢𑁆𑀣𑀤𑁄𑀲𑁂 𑀉𑀧𑀓𑁆𑀓𑀫𑁄𑀧𑀲𑀁𑀳𑀸𑀭𑀯𑀺𑀲𑀫𑀜𑁆𑀘𑁂𑀢𑀺 𑀇𑀘𑁆𑀘𑁂𑀯𑀫𑀸𑀤𑀺𑀓𑀫𑀧𑀭𑀫𑁆𑀧𑀺 𑀤𑀽𑀲𑀦𑀁 𑀅𑀢𑁆𑀣𑀺 𑀘𑁂 𑀬𑀤𑀺 𑀪𑀯𑁂𑀬𑁆𑀬, 𑀢𑀫𑁆𑀧𑀺 𑀩𑁄𑀥𑀬𑀺𑀢𑀼𑀫𑀯𑀕𑀫𑁂𑀢𑀼𑀁 𑀅𑀮𑀁 𑀲𑀫𑀢𑁆𑀣𑀁 𑀬𑀣𑀸𑀯𑀼𑀢𑁆𑀢𑀤𑁄𑀲𑀸𑀦𑀼𑀲𑀸𑀭𑁂𑀦 𑀩𑀼𑀤𑁆𑀥𑀺𑀫𑀦𑁆𑀢𑁂𑀳𑀺 𑀲𑀓𑁆𑀓𑀸 𑀊𑀳𑀺𑀢𑀼𑀦𑁆𑀢𑀺.

𑀏𑀯𑀁 ¶ 𑀯𑀤𑀢𑁄 𑀘 𑀕𑀦𑁆𑀣𑀓𑀸𑀭𑀲𑁆𑀲𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑁂 𑀤𑁄𑀲𑀸 𑀯𑀺𑀪𑀸𑀕𑀲𑁄 𑀦 𑀯𑀼𑀢𑁆𑀢𑀸, 𑀢𑁂 𑀫𑀬𑀸 𑀕𑀦𑁆𑀣𑀕𑀸𑀭𑀯𑀪𑀬𑀸 𑀲𑀗𑁆𑀔𑁂𑀧𑀺𑀢𑀸, 𑀮𑀓𑁆𑀔𑀡𑀢𑁄 𑀢𑀼 𑀲𑀗𑁆𑀕𑀳𑀺𑀢𑀸. 𑀦 𑀳𑀺 𑀢𑁂𑀲𑀫𑀦𑁆𑀢𑀁 𑀓𑁄 𑀚𑀳𑀸𑀧𑁂𑀢𑀺.

𑀢𑀢𑁆𑀣 𑀲𑀤𑁆𑀤𑀲𑀢𑁆𑀣𑀯𑀺𑀭𑀼𑀤𑁆𑀥𑀫𑀲𑀸𑀥𑀼. 𑀬𑀁 𑀓𑁆𑀭𑀺𑀬𑀸𑀤𑀺𑀦𑀺𑀫𑀺𑀢𑁆𑀢𑀫𑀼𑀧𑀸𑀤𑀸𑀬 𑀅𑀢𑁆𑀣𑀦𑁆𑀢𑀭𑁂𑀧𑀺 𑀯𑀢𑁆𑀢𑀢𑁂, 𑀢𑀁 𑀲𑀜𑁆𑀜𑀸𑀪𑀸𑀯𑁂𑀦𑁂𑀯 𑀧𑀬𑀼𑀢𑁆𑀢𑀁 𑀲𑀦𑁆𑀤𑀺𑀤𑁆𑀥𑀁, 𑀬𑀣𑀸 ‘‘𑀭𑀯𑀺𑀫𑁆𑀳𑀺𑀳𑀺𑀫𑀳𑀸’’𑀢𑀺, 𑀇𑀤𑀁 𑀧𑀦 𑀯𑀺𑀲𑁂𑀲𑀦𑀢𑁆𑀣𑁂 𑀲𑀸𑀥𑀼 𑀳𑁄𑀢𑀺. 𑀧𑀲𑀺𑀤𑁆𑀥𑀲𑀜𑁆𑀜𑀸𑀲𑀤𑁆𑀤𑀲𑁆𑀲 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀧𑀭𑀺𑀓𑀧𑁆𑀧𑀺𑀢𑀧𑀤𑀁 𑀧𑀭𑀺𑀬𑀸𑀬𑀜𑁂𑀬𑁆𑀬𑀁, 𑀬𑀣𑀸 ‘‘𑀯𑀴𑀯𑀸𑀫𑀼𑀔𑁂𑀦𑁂’’𑀢𑀺 𑀏𑀢𑁆𑀣 ‘‘𑀅𑀲𑁆𑀲𑀯𑀦𑀺𑀢𑀸𑀦𑀦𑁂𑀦’’ 𑀇𑀢𑀺. 𑀬𑀁 𑀅𑀘𑁆𑀘𑀦𑁆𑀢𑀸𑀩𑁆𑀬𑀪𑀺𑀘𑀸𑀭𑀻𑀪𑀸𑀯𑁂𑀦 𑀯𑀺𑀲𑁂𑀲𑁆𑀬𑀲𑁆𑀲 𑀕𑀼𑀡𑀁 𑀯𑀤𑀢𑀺, 𑀢𑀁 𑀅𑀧𑁆𑀧𑀢𑀻𑀢𑀢𑁆𑀣𑀁, 𑀬𑀣𑀸 ‘‘𑀓𑀡𑁆𑀳𑀫𑀲𑀻’’𑀢𑀺. 𑀅𑀥𑀺𑀕𑀢𑀢𑁆𑀣𑀸𑀦𑀼𑀧𑀬𑁄𑀕𑀁 𑀅𑀧𑁆𑀧𑀬𑁄𑀚𑀓𑀁, 𑀬𑀣𑀸 ‘‘𑀅𑀢𑀺𑀨𑁂𑀦𑀺𑀮𑀁 𑀲𑀸𑀕𑀭𑀫𑀮𑀗𑁆𑀖𑀻’’𑀢𑀺. ‘‘𑀫𑀦𑀼𑀜𑁆𑀜𑀤𑁆𑀥𑀦𑀬𑁄 𑀧𑀸𑀤𑁂, 𑀔𑀸𑀤𑀬𑁄 𑀓𑀦𑀺 𑀪𑀦𑁆𑀢𑀺 𑀢𑁂’’ 𑀇𑀘𑁆𑀘𑀸𑀤𑀺𑀓𑁄 𑀤𑀼𑀩𑁆𑀩𑁄𑀥𑁄, 𑀓𑀦𑀺 𑀓𑀜𑁆𑀜𑁂 𑀔𑀸𑀤𑀬𑁄 𑀕𑀕𑁆𑀖𑀭𑀺𑀓𑀸. ‘‘𑀇𑀫𑁂 𑀮𑀸𑀯𑀡𑁆𑀬𑀢𑀮𑁆𑀮𑀸 𑀢𑁂, 𑀕𑀮𑁆𑀮𑀸 𑀮𑁄𑀮𑀯𑀺𑀮𑁄𑀘𑀦𑁂’’𑀇𑀘𑁆𑀘𑀸𑀤𑀺𑀓𑁄 𑀤𑁂𑀲𑀺𑀬𑁄, 𑀢𑀮𑁆𑀮𑁄 𑀚𑀮𑀸𑀲𑀬𑀯𑀺𑀲𑁂𑀲𑁄, 𑀕𑀮𑁆𑀮𑁄 𑀓𑀧𑁄𑀮𑁄. ‘‘𑀲𑀕𑁆𑀕𑀲𑁂𑀯𑀻𑀦𑀁 𑀭𑀺𑀧𑀽𑀦𑀫𑀺𑀢𑁆𑀣𑀻𑀦𑀫𑀓𑀗𑁆𑀓𑀡𑁄 𑀧𑀸𑀡𑀺. 𑀦𑁂𑀢𑁆𑀢𑀫𑀦𑀜𑁆𑀚𑀦’’𑀦𑁆𑀢𑀺𑀆𑀤𑀺𑀓𑀁 𑀅𑀥𑀺𑀓𑀁. ‘‘𑀅𑀓𑀗𑁆𑀓𑀡𑁄 𑀧𑀸𑀡𑀻’’𑀢𑀺𑀆𑀤𑀺𑀦𑀸 𑀯𑁂𑀥𑀩𑁆𑀬𑀲𑁆𑀲 𑀕𑀫𑁆𑀫𑀫𑀸𑀦𑀢𑁆𑀢𑀸 ‘‘𑀲𑀕𑁆𑀕𑀲𑁂𑀯𑀻𑀦’’𑀦𑁆𑀢𑀺 𑀅𑀥𑀺𑀓𑀦𑁆𑀢𑀺. 𑀬𑀢𑁆𑀣 𑀯𑀢𑁆𑀢𑀩𑁆𑀩𑀲𑁆𑀲 𑀊𑀦𑀢𑀸, 𑀢𑀁 𑀊𑀦𑀁, 𑀬𑀣𑀸 ‘‘𑀢𑀺𑀮𑁄𑀓𑀢𑀺𑀮𑀓𑀁 𑀫𑀼𑀦𑀺’’𑀦𑁆𑀢𑀺𑀆𑀤𑀺. 𑀏𑀢𑁆𑀣 ‘‘𑀯𑀦𑁆𑀤𑀸𑀫𑀻’’𑀢𑀺 𑀊𑀦𑀁, 𑀙𑀦𑁆𑀤𑁄𑀪𑀗𑁆𑀕𑀸𑀦𑁆𑀯𑀺𑀢𑀁 𑀯𑀘𑁄 𑀪𑀕𑁆𑀕𑀘𑁆𑀙𑀦𑁆𑀤𑀁 𑀧𑀸𑀓𑀝𑀁. 𑀆𑀭𑀫𑁆𑀪𑀸𑀯𑀲𑀸𑀦𑁂𑀦 𑀯𑀺𑀲𑀫𑀁 𑀉𑀧𑀓𑁆𑀓𑀫𑁄𑀧𑀲𑀁𑀳𑀸𑀭𑀯𑀺𑀲𑀫𑀁, 𑀢𑀁 𑀧𑀦 𑀆𑀭𑀤𑁆𑀥𑀓𑁆𑀓𑀫𑀧𑀭𑀺𑀘𑁆𑀘𑀸𑀕𑁂𑀦𑀸𑀧𑀭𑁂𑀦 𑀦𑀺𑀓𑁆𑀔𑀺𑀧𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀇𑀢𑀺 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂 𑀫𑀳𑀸𑀲𑀸𑀫𑀺𑀦𑀸𑀫𑀺𑀓𑀸𑀝𑀻𑀓𑀸𑀬𑀁

𑀤𑁄𑀲𑀸𑀯𑀩𑁄𑀥𑀧𑀭𑀺𑀘𑁆𑀙𑁂𑀤𑁄.

𑁬𑁭. 𑀏𑀯𑀁 ‘‘𑀲𑁄𑀤𑀸𑀳𑀭𑀡𑀫𑁂𑀢𑁂𑀲𑀁, 𑀮𑀓𑁆𑀔𑀡𑀁 𑀓𑀣𑀬𑀸𑀫𑁆𑀬𑀳’’𑀦𑁆𑀢𑀺 𑀓𑀢𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀓𑀢𑁄𑀢𑁆𑀭𑁂’’𑀘𑁆𑀘𑀸𑀤𑀺𑀦𑀸 𑀦𑀺𑀕𑀫𑁂𑀦𑁆𑀢𑁄 𑀤𑁄𑀲𑁂 𑀲𑀗𑁆𑀔𑀺𑀧𑀢𑀺. 𑀅𑀢𑁆𑀭 𑀇𑀫𑀲𑁆𑀫𑀺𑀁 𑀅𑀥𑀺𑀓𑀸𑀭𑁂, ¶ 𑀧𑀭𑀺𑀘𑁆𑀙𑁂𑀤𑁂 𑀯𑀸 𑀏𑀲𑀁 𑀤𑁄𑀲𑀸𑀦𑀁 𑀬𑀣𑀸𑀯𑀼𑀢𑁆𑀢𑀧𑀤𑀤𑁄𑀲𑀸𑀤𑀻𑀦𑀁 𑀧𑀯𑀭𑁄 𑀮𑀓𑁆𑀔𑀡𑀸𑀯𑀺𑀭𑁄𑀥𑀮𑀓𑁆𑀔𑀺𑀬𑀢𑁄 𑀉𑀢𑁆𑀢𑀫𑁄 𑀯𑀺𑀪𑀸𑀕𑁄 𑀅𑀲𑀗𑁆𑀓𑀭𑀢𑁄 𑀯𑀺𑀪𑀚𑀦𑀁 𑀲𑀗𑁆𑀔𑁂𑀧𑀦𑀬𑀸 𑀯𑀺𑀢𑁆𑀣𑀸𑀭𑀸𑀧𑀦𑀺𑀬𑀲𑀗𑁆𑀔𑁂𑀧𑀓𑁆𑀓𑀫𑁂𑀦 𑀫𑀬𑀸 𑀓𑀢𑁄 𑀯𑀼𑀢𑁆𑀢𑁄 𑀏𑀲𑁄𑀯 𑀬𑀣𑀸𑀯𑀼𑀢𑁆𑀢𑁄 𑀏𑀲𑁄 𑀲𑀗𑁆𑀔𑁂𑀧𑀓𑁆𑀓𑀫𑁄 𑀏𑀯 𑀓𑀯𑀻𑀦𑀁 𑀯𑀺𑀭𑀘𑀬𑀦𑁆𑀢𑀸𑀦𑀁 𑀔𑁂𑀤𑀓𑀭𑀁 𑀩𑀦𑁆𑀥𑀲𑀭𑀻𑀭𑁂 𑀈𑀤𑀺𑀲𑀁 𑀈𑀤𑀺𑀲𑀧𑁆𑀧𑀬𑁄𑀕𑀁 𑀓𑀣𑀁 𑀦𑀸𑀫 𑀓𑀭𑁄𑀫𑀻𑀢𑀺 𑀏𑀯𑀁 𑀧𑀯𑀢𑁆𑀢𑀔𑁂𑀤𑀫𑀼𑀧𑁆𑀧𑀸𑀤𑀬𑀦𑁆𑀢𑀁 𑀧𑀭𑀫𑁆𑀧𑀺 𑀅𑀲𑀸𑀥𑀼𑀲𑀦𑁆𑀤𑀺𑀤𑁆𑀥𑀸𑀤𑀺 𑀅𑀜𑁆𑀜𑀫𑁆𑀧𑀺 𑀤𑀽𑀲𑀦𑀫𑀢𑁆𑀣𑀺 𑀘𑁂, 𑀢𑀁 𑀲𑀩𑁆𑀩𑀁 𑀩𑁄𑀥𑀬𑀺𑀢𑀼𑀁 𑀩𑁄𑀥𑁂𑀢𑀼𑀁 𑀅𑀮𑀁 𑀲𑀫𑀢𑁆𑀣𑁄 𑀳𑁄𑀢𑀺. 𑀦𑀺𑀬𑀢𑀺 𑀅𑀯𑀼𑀢𑁆𑀢𑁄𑀧𑀺 𑀅𑀢𑁆𑀣𑁄 𑀏𑀢𑁂𑀦𑀸𑀢𑀺 𑀘, 𑀲𑀗𑁆𑀔𑁂𑀧𑁄 𑀘 𑀲𑁄 𑀦𑀬𑁄 𑀘𑀸𑀢𑀺 𑀯𑀺𑀕𑁆𑀕𑀳𑁄.

𑀇𑀳𑀸𑀦𑀺𑀤𑁆𑀤𑀺𑀝𑁆𑀞𑀁

‘‘𑀦𑀺𑀳𑀦𑁆𑀢𑀼 𑀲𑁄𑀬𑀁 𑀚𑀮𑀺𑀢𑀁, 𑀧𑀢𑀗𑁆𑀕𑁄 𑀅𑀭𑀺𑀧𑀸𑀯𑀓’’𑀦𑁆𑀢𑀺𑀆𑀤𑀺𑀓𑀁

𑀅𑀓𑁆𑀔𑀫𑀢𑁆𑀣𑀦𑁆𑀢𑀭𑀸𑀤𑀺𑀓𑀁 𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑁂 𑀅𑀦𑀼𑀧𑀢𑀢𑁆𑀢𑀸 𑀦 𑀯𑀼𑀢𑁆𑀢𑀁, 𑀏𑀢𑁆𑀣 𑀲𑀽𑀭𑀺𑀬𑀯𑀸𑀘𑀓𑁄 𑀧𑀢𑀗𑁆𑀕𑀲𑀤𑁆𑀤𑁄 𑀚𑁄𑀢𑀺𑀭𑀺𑀗𑁆𑀕𑀡𑀯𑀸𑀘𑀓𑁄𑀧𑀺 𑀳𑁄𑀢𑀻𑀢𑀺 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀅𑀫𑀺𑀢𑁆𑀢𑀕𑁆𑀕𑀺𑀯𑀺𑀦𑀸𑀲𑁂 𑀅𑀲𑀫𑀢𑁆𑀣𑀜𑁆𑀜𑀢𑁆𑀣𑁄 𑀳𑁄𑀢𑀺.

‘‘𑀯𑀘𑀦𑁆𑀢𑀺 𑀕𑀡𑁆𑀟𑀺’’𑀘𑁆𑀘𑀸𑀤𑀺𑀓𑀁 𑀆𑀕𑀫𑁂 𑀅𑀧𑁆𑀧𑀲𑀺𑀤𑁆𑀥𑀁 𑀮𑀓𑁆𑀔𑀡𑀫𑀢𑁆𑀢𑁂𑀦 𑀲𑀸𑀥𑀺𑀬𑀁. 𑀅𑀧𑁆𑀧𑀬𑀼𑀢𑁆𑀢𑀧𑀤𑀸𑀤𑀺𑀤𑁄𑀲𑁄 𑀓𑀺𑀮𑀺𑀝𑁆𑀞𑀧𑀤𑀤𑁄𑀲𑁂 𑀅𑀦𑁆𑀢𑁄𑀕𑀥𑁄 𑀳𑁄𑀢𑀻𑀢𑀺 𑀦 𑀯𑀼𑀢𑁆𑀢𑁄.

𑀕𑀚𑀳𑁂𑀲𑀸𑀢𑀼𑀭𑀗𑁆𑀕𑀓𑁄𑀜𑁆𑀘𑀦𑀸𑀤𑀸𑀤𑀺𑀲𑀫𑁆𑀩𑀦𑁆𑀥𑀤𑀽𑀲𑀺𑀢𑀜𑁆𑀘. 𑀚𑀺𑀦𑀸𑀕𑀫𑀸𑀤𑀻𑀲𑀼 𑀧𑀲𑀺𑀤𑁆𑀥𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀓𑀫𑀜𑁆𑀜𑀢𑁆𑀭 𑀧𑀬𑀼𑀢𑁆𑀢𑀫𑀧𑁆𑀧𑀢𑀻𑀢𑀦𑁆𑀦𑀸𑀫𑀸𑀢𑀻𑀤𑀁 𑀤𑁆𑀯𑀬𑀁 𑀬𑀣𑀸𑀓𑁆𑀓𑀫𑀁 𑀮𑁄𑀓𑀯𑀺𑀭𑁄𑀥𑀫𑀸𑀕𑀫𑀯𑀺𑀭𑁄𑀥𑀜𑁆𑀘 𑀳𑁄𑀢𑀻𑀢𑀺 𑀯𑀺𑀭𑁄𑀥𑀺𑀧𑀤𑁂 𑀅𑀦𑁆𑀢𑁄𑀕𑀥𑀁 𑀳𑁄𑀢𑀺. 𑀳𑁂𑀢𑁆𑀯𑀧𑁂𑀓𑁆𑀔𑀁 𑀆𑀦𑁂𑀢𑀩𑁆𑀩𑀳𑁂𑀢𑀼𑀢𑁆𑀢𑀸 𑀦𑁂𑀬𑁆𑀬𑁂 𑀅𑀦𑁆𑀢𑁄𑀕𑀥𑀦𑁆𑀢𑀺 𑀦 𑀯𑀼𑀢𑁆𑀢𑀁.

‘‘𑀤𑁂𑀯𑁄 𑀯𑁄𑀳𑀭𑀢𑀼 𑀓𑁆𑀮𑁂𑀲𑀁, 𑀭𑀸𑀳𑀼𑀔𑀺𑀦𑁆𑀦𑁄 𑀤𑀺𑀯𑀸𑀓𑀭𑁄’’

𑀇𑀘𑁆𑀘𑀸𑀤𑀺𑀓𑀁 𑀅𑀲𑀫𑀢𑁆𑀣𑀸𑀪𑀺𑀥𑀸𑀬𑀺𑀘𑁆𑀘𑀸𑀤𑀺 𑀑𑀘𑀺𑀢𑁆𑀬𑀳𑀻𑀦𑁂 𑀅𑀦𑁆𑀢𑁄𑀕𑀥𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀏𑀢𑁆𑀣 𑀤𑀺𑀯𑀸𑀓𑀭𑁄 𑀲𑀬𑀁 𑀭𑀸𑀳𑀼𑀕𑀳𑀺𑀢𑁄 𑀅𑀜𑁆𑀜𑁂𑀲𑀁 𑀓𑀺𑀮𑁂𑀲𑀸𑀧𑀦𑀬𑀦𑁂 ¶ 𑀅𑀲𑀫𑀢𑁆𑀣𑁄𑀢𑀺 𑀢𑀫𑀲𑀸𑀫𑀢𑁆𑀣𑀺𑀬𑀁 𑀯𑀺𑀲𑁂𑀲𑀦𑀪𑀽𑀢𑁂𑀦 ‘‘𑀭𑀸𑀳𑀼𑀔𑀺𑀦𑁆𑀦𑁄’’𑀢𑀺 𑀧𑀤𑁂𑀦 𑀜𑀸𑀬𑀢𑀺.

𑀚𑀺𑀕𑀼𑀘𑁆𑀙𑀸𑀯𑀫𑀗𑁆𑀕𑀮𑀅𑀲𑀩𑁆𑀪𑀸𑀦𑀁 𑀢𑀺𑀡𑁆𑀡𑀫𑀜𑁆𑀜𑀢𑁆𑀭𑀲𑁆𑀲 𑀚𑁄𑀢𑀓𑀁 𑀯𑀸𑀘𑀓𑀁 𑀯𑀸 𑀅𑀢𑁆𑀣𑀦𑁆𑀢𑀭𑀁 𑀯𑀸 𑀕𑀸𑀫𑁆𑀫𑀁 𑀤𑀼𑀧𑁆𑀧𑀢𑀻𑀢𑀺𑀓𑀭𑀢𑁆𑀢𑀸 𑀯𑀸𑀓𑁆𑀬𑀢𑁆𑀣𑀕𑀸𑀫𑁆𑀫𑀤𑁄𑀲𑁂𑀬𑁂𑀯 𑀅𑀦𑁆𑀢𑁄𑀕𑀥𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀤𑀼𑀭𑀼𑀘𑁆𑀘𑀸𑀭𑀡𑀪𑀽𑀢𑀮𑀓𑁆𑀔𑀡𑀁 𑀓𑀝𑁆𑀞𑀁 𑀩𑀦𑁆𑀥𑀨𑀭𑀼𑀲𑀢𑁄 𑀅𑀩𑁆𑀬𑀢𑀺𑀭𑀺𑀢𑁆𑀢𑀦𑁆𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺. ‘‘𑀳𑀭𑀺𑀲𑀫𑀸𑀦𑀬𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀳𑀧𑀼𑀩𑁆𑀩𑀁 𑀭𑀺𑀲’𑀫𑀸𑀦𑀬𑀺𑀇𑀘𑁆𑀘𑀸𑀤𑀺𑀓𑀁 𑀇𑀘𑁆𑀙𑀺𑀢𑀢𑁆𑀣𑀢𑁄 𑀧𑀭𑀺𑀪𑀝𑁆𑀞𑀢𑁆𑀢𑀸 𑀪𑀝𑁆𑀞𑀜𑁆𑀘 ‘‘𑀲𑀓𑁆𑀓𑁄 𑀲𑀳𑀲𑁆𑀲𑀕𑀽’’𑀇𑀘𑁆𑀘𑀸𑀤𑀺𑀓𑀁 𑀅𑀧𑀲𑀺𑀤𑁆𑀥𑀯𑀺𑀲𑀬𑁂 𑀧𑀭𑀺𑀬𑀼𑀢𑁆𑀢𑀕𑀼𑀴𑁆𑀳𑀜𑁆𑀘𑁂𑀢𑀺 𑀇𑀫𑁂 𑀅𑀢𑁆𑀣𑀕𑀼𑀴𑁆𑀳𑀸𑀤𑀬𑁄 𑀧𑀲𑀸𑀤𑀸𑀮𑀗𑁆𑀓𑀸𑀭𑀯𑀺𑀭𑀼𑀤𑁆𑀥𑀢𑁆𑀢𑀸 𑀧𑀲𑀸𑀤𑀕𑀼𑀡𑀸𑀤𑀸𑀦𑁂𑀦𑁂𑀯 𑀧𑀭𑀺𑀘𑁆𑀘𑀢𑁆𑀢𑀸𑀢𑀺 𑀦 𑀯𑀼𑀢𑁆𑀢𑀁. 𑀏𑀢𑁆𑀣 𑀳𑀺 𑀲𑀳𑀲𑁆𑀲𑀁 𑀕𑀸𑀯𑁄 𑀘𑀓𑁆𑀔𑀽𑀦𑀺 𑀅𑀲𑁆𑀲𑀸𑀢𑀺 𑀲𑀳𑀲𑁆𑀲𑀕𑀽𑀢𑀺 𑀲𑀓𑁆𑀓𑀲𑁆𑀲 𑀦𑀸𑀫𑀁 𑀕𑀼𑀴𑁆𑀳𑀁 𑀦𑀸𑀫 𑀳𑁄𑀢𑀺.

𑀯𑀸𑀓𑁆𑀬𑀤𑁄𑀲𑁂𑀧𑀺 𑀯𑀺𑀲𑀦𑁆𑀥𑀺𑀯𑀸𑀓𑁆𑀬𑀁 𑀇𑀥 𑀅𑀦𑀼𑀧𑀬𑁄𑀕𑀺𑀢𑁆𑀢𑀸 𑀦 𑀯𑀼𑀢𑁆𑀢𑀁. 𑀯𑀸𑀓𑁆𑀬𑀫𑀚𑁆𑀛𑀧𑀢𑀺𑀢𑀯𑀸𑀓𑁆𑀬𑀬𑀼𑀢𑁆𑀢𑀁 𑀯𑀸𑀓𑁆𑀬𑀕𑀩𑁆𑀪𑀜𑁆𑀘, 𑀯𑀸𑀓𑁆𑀬𑀦𑁆𑀢𑀭𑀧𑀤𑀲𑀫𑁆𑀫𑀺𑀲𑁆𑀲𑀁.

‘‘𑀅𑀧𑀸𑀣𑁆𑀬𑀫𑁂𑀲𑁄 𑀤𑀺𑀲𑁆𑀲𑀢𑀺, 𑀯𑁂𑀚𑁆𑀚𑀁 𑀔𑀸𑀤𑀢𑁆𑀬𑀦𑀸𑀭𑀢𑀁’’

𑀇𑀘𑁆𑀘𑀸𑀤𑀺𑀓𑀁 𑀯𑀸𑀓𑁆𑀬𑀲𑀁𑀓𑀺𑀡𑁆𑀡𑀜𑁆𑀘 𑀩𑁆𑀬𑀸𑀓𑀺𑀡𑁆𑀡𑁂 𑀅𑀦𑁆𑀢𑁄𑀕𑀥𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀏𑀢𑁆𑀣 𑀏𑀲𑁄 𑀪𑀺𑀲𑀓𑁆𑀓𑁄 𑀅𑀦𑀸𑀭𑀢𑀁 𑀦𑀺𑀘𑁆𑀘𑀁 𑀅𑀧𑀸𑀣𑁆𑀬𑀁 𑀭𑁄𑀕𑀲𑁆𑀲 𑀅𑀳𑀺𑀢𑀁 𑀤𑀺𑀲𑁆𑀲𑀢𑀺 𑀯𑀤𑀢𑀺. 𑀏𑀲𑁄 𑀭𑁄𑀕𑀻 𑀅𑀦𑀸𑀭𑀢𑀁 𑀲𑀢𑀢𑀁 𑀅𑀧𑀸𑀣𑁆𑀬𑀁 𑀅𑀳𑀺𑀢𑀁 𑀔𑀸𑀤𑀢𑀺. 𑀯𑁂𑀚𑁆𑀚𑀁 𑀪𑀺𑀲𑀓𑁆𑀓𑀁 𑀤𑀺𑀲𑁆𑀲𑀢𑀺 𑀓𑀼𑀚𑁆𑀛𑀢𑀺. 𑀏𑀯𑀁 𑀅𑀦𑁂𑀓𑀯𑀸𑀓𑁆𑀬𑁂𑀳𑀺𑀧𑀺 𑀲𑀦𑁆𑀥𑀺𑀯𑀸𑀓𑁆𑀬𑀁 𑀲𑀁𑀓𑀺𑀡𑁆𑀡𑀁 𑀦𑀸𑀫.

‘‘𑀓𑀸𑀘𑀼𑀬𑁆𑀬𑀸𑀦𑁂 𑀫𑀬𑀸 𑀤𑀺𑀝𑁆𑀞𑀸, 𑀯𑀮𑁆𑀮𑀭𑀻 𑀧𑀜𑁆𑀘𑀧𑀮𑁆𑀮𑀯𑀸;

𑀧𑀮𑁆𑀮𑀯𑁂 𑀧𑀮𑁆𑀮𑀯𑁂 𑀫𑀼𑀥𑀸, 𑀬𑀲𑁆𑀲𑀸 𑀓𑀼𑀲𑀼𑀫𑀫𑀜𑁆𑀘𑀭𑀻’’𑀢𑀺.

𑀇𑀤𑀫𑀯𑀸𑀘𑀓𑀁 𑀧𑀳𑁂𑀴𑀺𑀓𑀸𑀲𑀼 𑀧𑀫𑀼𑀲𑁆𑀲𑀺𑀢𑀸𑀲𑀦𑁆𑀦𑀺𑀲𑁆𑀲𑀺𑀢𑀫𑀺𑀢𑀺 𑀦 𑀯𑀼𑀢𑁆𑀢𑀁. 𑀦𑀦𑀼 𑀘𑁂𑀢𑁆𑀣 𑀅𑀢𑁆𑀢𑀦𑀸 𑀧𑀳𑁂𑀴𑀺𑀓𑀸𑀬 𑀅𑀤𑀲𑁆𑀲𑀺𑀢𑀢𑁆𑀢𑀸 𑀅𑀯𑀸𑀘𑀓𑀲𑁆𑀲 𑀧𑀫𑀼𑀲𑁆𑀲𑀺𑀢𑀸𑀬 𑀅𑀦𑁆𑀢𑁄𑀕𑀥𑀓𑀭𑀡𑀁 𑀅𑀲𑀺𑀤𑁆𑀥𑁂𑀦 𑀅𑀲𑀺𑀤𑁆𑀥𑀲𑀸𑀥𑀦𑀦𑁆𑀢𑀺? 𑀦𑀬𑀺𑀤𑀫𑁂𑀯𑀁, ‘‘𑀉𑀧𑁂𑀓𑁆𑀔𑀺𑀬𑀦𑁆𑀢𑀺 𑀲𑀩𑁆𑀩𑀸𑀦𑀺, 𑀲𑀺𑀲𑁆𑀲𑀔𑁂𑀤𑀪𑀬𑀸 𑀫𑀬𑀸’’𑀢𑀺 𑀘 𑀉𑀧𑀭𑀺 𑀓𑀺𑀮𑀺𑀝𑁆𑀞𑀧𑀤𑀤𑁄𑀲𑀧𑀭𑀺𑀳𑀸𑀭𑁂 ‘‘𑀧𑀳𑁂𑀴𑀺𑀓𑀸𑀬𑀫𑀸𑀭𑀼𑀴𑁆𑀳𑀸, 𑀦 𑀳𑀺 𑀤𑀼𑀝𑁆𑀞𑀸 𑀓𑀺𑀮𑀺𑀝𑁆𑀞𑀢𑀸’’𑀢𑀺 𑀘𑁂𑀢𑀺 𑀇𑀫𑀺𑀦𑀸 ¶ 𑀧𑀼𑀭𑀸𑀢𑀦𑁂𑀳𑀺 𑀦𑀺𑀤𑁆𑀤𑀺𑀝𑁆𑀞𑀲𑁄𑀴𑀲𑀧𑀳𑁂𑀴𑀺𑀓𑀸𑀬𑁄𑀧𑀺 𑀤𑀲𑁆𑀲𑀺𑀢𑀸𑀢𑀺 𑀲𑀺𑀤𑁆𑀥𑁂𑀦 𑀅𑀲𑀺𑀤𑁆𑀥𑀲𑀸𑀥𑀦𑀁 𑀳𑁄𑀢𑀺. 𑀢𑀢𑁆𑀣 𑀓𑀯𑀺𑀦𑀸 𑀉𑀬𑁆𑀬𑀸𑀦𑀲𑀤𑁆𑀤𑁂𑀦 𑀕𑁂𑀳𑀜𑁆𑀘 𑀮𑀢𑀸𑀧𑀭𑀺𑀬𑀸𑀬𑀯𑀮𑁆𑀮𑀭𑀻𑀲𑀤𑁆𑀤𑁂𑀦 𑀅𑀗𑁆𑀕𑀦𑀸 𑀘 𑀧𑀮𑁆𑀮𑀯𑀲𑀤𑁆𑀤𑁂𑀦 𑀓𑀭𑀘𑀭𑀡𑀸𑀥𑀭𑀸 𑀘 𑀫𑀜𑁆𑀘𑀭𑀻𑀲𑀤𑁆𑀤𑁂𑀦 𑀦𑀔𑀤𑀦𑁆𑀢𑀓𑀦𑁆𑀢𑀺𑀬𑁄 𑀘 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀸.

𑀯𑀸𑀓𑁆𑀬𑀢𑁆𑀣𑀤𑁄𑀲𑁂𑀧𑀺 𑀧𑀤𑀼𑀫𑀺𑀦𑀻𑀦𑀁 𑀭𑀢𑁆𑀢𑀺𑀬𑀁 𑀧𑀩𑀼𑀚𑁆𑀛𑀦𑀸𑀤𑀺𑀓𑀁 𑀯𑀺𑀭𑀼𑀤𑁆𑀥𑀁 𑀯𑀺𑀭𑁄𑀥𑀺𑀧𑀤𑁂𑀬𑁂𑀯 𑀅𑀦𑁆𑀢𑁄𑀕𑀥𑀢𑁆𑀢𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀢𑁄𑀢𑁆𑀭 𑀲𑀗𑁆𑀔𑁂𑀧𑀦𑀬𑀸’’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀢𑁂𑀲𑀁 𑀲𑀩𑁆𑀩𑀣𑀸 𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸𑀢𑀺. 𑀏𑀢𑁆𑀣 𑀑𑀘𑀺𑀢𑁆𑀬𑀳𑀻𑀦𑀤𑀼𑀧𑁆𑀧𑀢𑀻𑀢𑀺𑀓𑀭𑀸𑀦𑀁 𑀤𑁆𑀯𑀺𑀦𑁆𑀦𑀁 𑀯𑀸𑀓𑁆𑀬𑀢𑁆𑀣𑀤𑁄𑀲𑀢𑁆𑀢𑁂 𑀲𑀢𑀺 𑀩𑀦𑁆𑀥𑀨𑀭𑀼𑀲𑀲𑁆𑀲 𑀯𑀸𑀓𑁆𑀬𑀤𑁄𑀲𑀢𑁆𑀢𑁂 𑀲𑀢𑀺 𑀯𑀺𑀭𑁄𑀥𑀺𑀦𑁄 𑀧𑀤𑀤𑁄𑀲𑀢𑁆𑀢𑁂 𑀲𑀢𑀺 ‘‘𑀅𑀲𑀫𑀢𑁆𑀣𑀸𑀪𑀺𑀥𑀸𑀬𑀺’’𑀆𑀤𑀺𑀧𑀤𑀁, ‘‘𑀚𑀺𑀕𑀼𑀘𑁆𑀙𑀸𑀤𑀺𑀢𑁆𑀢𑀬𑀧𑀓𑀸𑀲𑀓𑀸’’𑀤𑀺𑀧𑀤𑀁, 𑀓𑀝𑁆𑀞𑀧𑀤𑀁, 𑀧𑀤𑀼𑀫𑀺𑀦𑀻𑀦𑀁 𑀭𑀢𑁆𑀢𑀺𑀬𑀁 𑀨𑀼𑀮𑁆𑀮𑀢𑀸𑀤𑀺 [𑀤𑀼𑀦𑁆𑀦𑀺𑀤𑁆𑀤𑀢𑀸𑀤𑀺 (𑀓.)] 𑀯𑀸𑀓𑁆𑀬𑀢𑁆𑀣𑀜𑁆𑀘𑁂𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀤𑁄𑀲𑀸 𑀪𑀺𑀦𑁆𑀦𑀚𑀸𑀢𑀺𑀓𑁂𑀲𑀼 𑀑𑀘𑀺𑀢𑁆𑀬𑀸𑀤𑀻𑀲𑀼 𑀓𑀣𑀁 𑀲𑀗𑁆𑀕𑀳𑀺𑀢𑀸𑀢𑀺? 𑀲𑀘𑁆𑀘𑀁, 𑀢𑀣𑀸𑀧𑀺 𑀧𑀤𑀸𑀦𑀁 𑀤𑀼𑀝𑁆𑀞𑀢𑁆𑀢𑁂 𑀲𑀢𑀺 𑀯𑀸𑀓𑁆𑀬𑀯𑀸𑀓𑁆𑀬𑀢𑁆𑀣𑀸𑀦𑀫𑀤𑀼𑀝𑁆𑀞𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀧𑀤𑀤𑁄𑀲𑁂𑀦 𑀲𑀦𑁆𑀥𑀺𑀯𑀸𑀓𑁆𑀬𑀯𑀸𑀓𑁆𑀬𑀢𑁆𑀣𑀤𑁄𑀲𑀸𑀦𑀫𑀦𑀜𑁆𑀜𑀢𑁆𑀢𑀁 𑀲𑀺𑀲𑁆𑀲𑀸𑀦𑀁 𑀜𑀸𑀧𑀦𑀢𑁆𑀣𑀁 𑀧𑀤𑀤𑁄𑀲𑀸𑀤𑀺𑀓𑀁 𑀯𑀸𑀓𑁆𑀬𑀢𑁆𑀣𑀤𑁄𑀲𑀸𑀤𑀻𑀲𑀼 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀺𑀦𑀸𑀬𑁂𑀯 𑀧𑀼𑀭𑀸𑀢𑀦𑁂𑀳𑀺 𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀸𑀤𑀺𑀧𑀤𑁂𑀳𑀺 𑀯𑀺𑀘𑀭𑀺𑀢𑀁 𑀯𑀸𑀓𑁆𑀬𑀁 𑀯𑀺𑀭𑀼𑀤𑁆𑀥𑀦𑁆𑀢𑀺𑀆𑀤𑀺𑀦𑀸 𑀤𑀼𑀝𑁆𑀞𑀸𑀦𑀺 𑀩𑀳𑀽𑀦𑀺 𑀯𑀸𑀓𑁆𑀬𑀸𑀦𑀺 𑀤𑀲𑁆𑀲𑀺𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀫𑀸𑀬𑁂𑀯 [𑀇𑀫𑀺𑀲𑁆𑀲𑀸𑀬𑁂𑀯 (𑀓.)] 𑀕𑀸𑀣𑀸𑀬 ‘‘𑀢𑀫𑀢𑁆𑀣𑀺 𑀘𑁂 𑀔𑁂𑀤𑀓𑀭𑀁 𑀧𑀭𑀫𑁆𑀧𑀻’’𑀢𑀺 𑀏𑀢𑁆𑀣 𑀧𑀭𑀲𑀤𑁆𑀤𑁂𑀦𑀅𑀲𑀸𑀥𑀼𑀲𑀦𑁆𑀤𑀺𑀤𑁆𑀥𑀧𑀭𑀺𑀬𑀸𑀬𑀜𑁂𑀬𑁆𑀬𑀸𑀧𑁆𑀧𑀢𑀻𑀢𑀢𑁆𑀣𑀅𑀧𑁆𑀧𑀬𑁄𑀚𑀓- 𑀤𑀼𑀩𑁆𑀩𑁄𑀥𑀤𑁂𑀲𑀺𑀬𑀸𑀤𑀺𑀧𑀤𑀤𑁄𑀲𑁂 𑀘 𑀅𑀥𑀺𑀓𑀊𑀦𑀪𑀕𑁆𑀕𑀘𑁆𑀙𑀦𑁆𑀤𑀸𑀤𑀺𑀯𑀸𑀓𑁆𑀬𑀤𑁄𑀲𑁂 𑀘 𑀉𑀧𑀓𑁆𑀓𑀫𑁄𑀧𑀲𑀁𑀳𑀸𑀭𑀯𑀺𑀲𑀫𑀲𑀗𑁆𑀔𑀸𑀢𑁂 𑀯𑀸𑀓𑁆𑀬𑀢𑁆𑀣𑀤𑁄𑀲𑁂 𑀘 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀏𑀢𑁆𑀣 𑀲𑀤𑁆𑀤𑀲𑀢𑁆𑀣𑀯𑀺𑀭𑀼𑀤𑁆𑀥𑀫𑀲𑀸𑀥𑀼 𑀦𑀸𑀫. 𑀓𑁆𑀭𑀺𑀬𑀸𑀦𑀺𑀧𑁆𑀨𑀢𑁆𑀢𑀺𑀓𑀸𑀭𑀡𑀫𑀼𑀧𑀸𑀤𑀸𑀬 𑀅𑀢𑁆𑀣𑀦𑁆𑀢𑀭𑁂 𑀧𑀯𑀢𑁆𑀢𑀦𑀸𑀫𑀁 𑀯𑀺𑀲𑁂𑀲𑀦𑀢𑁆𑀣𑁂𑀦 𑀯𑀺𑀦𑀸 𑀲𑀜𑁆𑀜𑀸𑀪𑀸𑀚𑀦𑁂 𑀧𑀬𑀼𑀢𑁆𑀢𑀁 𑀲𑀦𑁆𑀤𑀺𑀤𑁆𑀥𑀁 𑀦𑀸𑀫, 𑀬𑀣𑀸 ‘‘𑀭𑀯𑀺𑀫𑁆𑀳𑀺 𑀳𑀺𑀫𑀳𑀸’’𑀢𑀺. 𑀏𑀢𑁆𑀣 𑀳𑀺𑀫𑀳𑀸 𑀭𑀯𑀻𑀢𑀺 𑀯𑀺𑀲𑁂𑀲𑀦𑁂 𑀓𑀢𑁂 𑀤𑁄𑀲𑁄 ¶ 𑀦𑀢𑁆𑀣𑀺. 𑀧𑀲𑀺𑀤𑁆𑀥𑀲𑀜𑁆𑀜𑀸𑀲𑀤𑁆𑀤𑀲𑁆𑀲 𑀧𑀭𑀺𑀬𑀸𑀬𑀦𑀸𑀫𑁂𑀦 𑀓𑀧𑁆𑀧𑀺𑀢𑀧𑀤𑀁 𑀧𑀭𑀺𑀬𑀸𑀬𑀜𑁂𑀬𑁆𑀬𑀁 𑀦𑀸𑀫, 𑀬𑀣𑀸 ‘‘𑀯𑀴𑀯𑀸𑀫𑀼𑀔𑀲𑁆𑀲 𑀅𑀲𑁆𑀲𑀯𑀦𑀺𑀢𑀸𑀦𑀦’’𑀦𑁆𑀢𑀺. 𑀅𑀢𑀺𑀲𑀬𑀸 𑀯𑀺𑀦𑀸 𑀪𑀸𑀯𑀺𑀢𑀢𑁆𑀣𑁂𑀦 𑀯𑀺𑀲𑁂𑀲𑁆𑀬𑀲𑁆𑀲 𑀕𑀼𑀡𑀯𑀸𑀘𑀓𑀁 𑀧𑀤𑀁 𑀅𑀧𑁆𑀧𑀢𑀻𑀢𑀢𑁆𑀣𑀁 𑀦𑀸𑀫, 𑀬𑀣𑀸 ‘‘𑀓𑀡𑁆𑀳𑀫𑀲𑀻’’𑀢𑀺. 𑀅𑀥𑀺𑀕𑀢𑀢𑁆𑀢𑀸𑀦𑀼𑀧𑀬𑁄𑀕𑀺𑀧𑀤𑀁 𑀅𑀧𑁆𑀧𑀬𑁄𑀚𑀓𑀁 𑀦𑀸𑀫, 𑀬𑀣𑀸 ‘‘𑀅𑀢𑀺𑀨𑁂𑀦𑀺𑀮𑀁 𑀲𑀸𑀕𑀭𑀫𑀮𑀗𑁆𑀖𑀻’’𑀢𑀺. 𑀅𑀧𑁆𑀧𑀲𑀺𑀤𑁆𑀥𑀯𑀘𑀦𑀁 𑀤𑀼𑀩𑁆𑀩𑁄𑀥𑀁 𑀦𑀸𑀫, 𑀬𑀣𑀸𑁋

‘‘𑀫𑀦𑀼𑀜𑁆𑀜𑀤𑁆𑀥𑀦𑀬𑁄 𑀧𑀸𑀤𑁂, 𑀔𑀸𑀤𑀬𑁄 𑀓𑀦𑀺 𑀪𑀦𑁆𑀢𑀺 𑀢𑁂’’𑀢𑀺.

𑀓𑀦𑀺 𑀳𑁂 𑀓𑀜𑁆𑀜𑁂 𑀢𑁂 𑀢𑀯𑀧𑀸𑀤𑁂 𑀫𑀦𑀼𑀜𑁆𑀜𑀤𑁆𑀥𑀦𑀬𑁄 𑀫𑀦𑁄𑀳𑀭𑀲𑀤𑁆𑀤𑀲𑀫𑀦𑁆𑀦𑀸𑀕𑀢𑀸 𑀔𑀸𑀤𑀬𑁄 𑀕𑀕𑁆𑀖𑀭𑀺𑀓𑀸 𑀪𑀦𑁆𑀢𑀺 𑀤𑀺𑀩𑁆𑀩𑀦𑁆𑀢𑀻𑀢𑀺. 𑀓𑀺𑀲𑁆𑀫𑀺𑀜𑁆𑀘𑀺 𑀤𑁂𑀲𑁂𑀬𑁂𑀯 𑀲𑀺𑀤𑁆𑀥𑀦𑀸𑀫𑀁 𑀤𑁂𑀲𑀺𑀬𑀁 𑀦𑀸𑀫. 𑀬𑀣𑀸𑁋

‘‘𑀇𑀫𑁂 𑀮𑀸𑀯𑀡𑁆𑀬𑀢𑀮𑁆𑀮𑀸 𑀢𑁂, 𑀕𑀮𑁆𑀮𑀸 𑀮𑁄𑀮𑀯𑀺𑀮𑁄𑀘𑀦𑁂’’𑀢𑀺.

𑀳𑁂 𑀮𑁄𑀮𑀯𑀺𑀮𑁄𑀘𑀦𑁂 𑀢𑁂 𑀢𑀯 𑀇𑀫𑁂 𑀕𑀮𑁆𑀮𑀸 𑀓𑀧𑁄𑀮𑀸 𑀮𑀸𑀯𑀡𑁆𑀬𑀢𑀮𑁆𑀮𑀸 𑀫𑀦𑀼𑀜𑁆𑀜𑀢𑀮𑁆𑀮𑀸 𑀚𑀮𑀸𑀲𑀬𑀯𑀺𑀲𑁂𑀲𑀸 𑀪𑀯𑀦𑁆𑀢𑀺. 𑀓𑁂𑀦𑀘𑀺 𑀮𑁂𑀲𑁂𑀦 𑀧𑀓𑀸𑀲𑀺𑀢𑀫𑀢𑁆𑀣𑀫𑀼𑀧𑀸𑀤𑀸𑀬 𑀧𑀬𑀼𑀢𑁆𑀢𑀫𑀥𑀺𑀓𑀁 𑀦𑀸𑀫. 𑀬𑀣𑀸𑁋

‘‘𑀢𑁆𑀯𑀬𑀺 𑀭𑀸𑀚𑀢𑀺 𑀭𑀸𑀚𑀺𑀦𑁆𑀤, 𑀭𑀺𑀧𑀽𑀦𑀁 𑀲𑀕𑁆𑀕𑀲𑁂𑀯𑀺𑀦𑀁;

𑀣𑀻𑀦𑀁 𑀅𑀓𑀗𑁆𑀓𑀡𑁄 𑀧𑀸𑀡𑀺, 𑀲𑀺𑀬𑀸 𑀦𑁂𑀢𑁆𑀢𑀫𑀦𑀜𑁆𑀚𑀦’’𑀦𑁆𑀢𑀺.

𑀏𑀢𑁆𑀣 ‘‘𑀅𑀓𑀗𑁆𑀓𑀡𑁄 𑀧𑀸𑀡𑀺, 𑀦𑁂𑀢𑁆𑀢𑀫𑀦𑀜𑁆𑀚𑀦’’𑀦𑁆𑀢𑀺 𑀇𑀫𑀺𑀦𑀸𑀬𑁂𑀯𑀣𑀻𑀦𑀁 𑀯𑀺𑀥𑀯𑀢𑁆𑀢𑀁 𑀕𑀫𑁆𑀬𑀫𑀸𑀦𑀁 𑀳𑁄𑀢𑀻𑀢𑀺 𑀢𑀧𑁆𑀧𑀓𑀸𑀲𑀦𑀢𑁆𑀣𑀁 𑀧𑀬𑀼𑀢𑁆𑀢𑀁 ‘‘𑀲𑀕𑁆𑀕𑀲𑁂𑀯𑀺𑀦’’𑀦𑁆𑀢𑀺 𑀇𑀤𑀁 𑀅𑀥𑀺𑀓𑀁 𑀦𑀸𑀫. 𑀯𑀢𑁆𑀢𑀩𑁆𑀩𑀬𑀼𑀢𑁆𑀢𑀢𑁄 𑀊𑀦𑀁 𑀯𑀸𑀓𑁆𑀬𑀁 𑀊𑀦𑀁 𑀦𑀸𑀫. ‘‘𑀢𑀺𑀮𑁄𑀓𑀢𑀺𑀮𑀓𑀁 𑀫𑀼𑀦𑀺’’𑀦𑁆𑀢𑀺 𑀏𑀢𑁆𑀣 ‘‘𑀯𑀦𑁆𑀤𑀸𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸 𑀊𑀦𑀁. 𑀙𑀦𑁆𑀤𑁄𑀳𑀸𑀦𑀺𑀲𑀁𑀬𑀼𑀢𑁆𑀢𑀁 𑀪𑀕𑁆𑀕𑀘𑁆𑀙𑀦𑁆𑀤𑀁 𑀦𑀸𑀫. 𑀇𑀤𑀁 𑀢𑁂𑀲𑀁 𑀢𑁂𑀲𑀁 𑀙𑀦𑁆𑀤𑀸𑀦𑀁 𑀅𑀓𑁆𑀔𑀭𑀕𑀡𑀦𑀢𑁄 𑀊𑀦𑀸𑀥𑀺𑀓𑀯𑀲𑁂𑀦 𑀧𑀸𑀓𑀝𑀁 𑀳𑁄𑀢𑀺. 𑀆𑀤𑁆𑀬𑀦𑁆𑀢𑀢𑁄 𑀯𑀺𑀲𑀫𑀁 𑀉𑀧𑀓𑁆𑀓𑀫𑁄𑀧𑀲𑀁𑀳𑀸𑀭𑀯𑀺𑀲𑀫𑀁 𑀦𑀸𑀫. 𑀇𑀤𑀁 𑀆𑀭𑀤𑁆𑀥𑀓𑁆𑀓𑀫𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀓𑀫𑀦𑁆𑀢𑀭𑁂𑀦 𑀦𑀺𑀬𑀫𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀢𑀺 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑀦𑀺𑀲𑁆𑀲𑀬𑁂

𑀧𑀞𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁨. 𑀤𑁄𑀲𑀧𑀭𑀺𑀳𑀸𑀭𑀸𑀯𑀩𑁄𑀥𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸

𑁬𑁮.

𑀓𑀤𑀸𑀘𑀺 𑀓𑀯𑀺𑀓𑁄𑀲𑀮𑁆𑀮𑀸, 𑀯𑀺𑀭𑁄𑀥𑁄 𑀲𑀓𑀮𑁄𑀧𑁆𑀬’𑀬𑀁;

𑀤𑁄𑀲𑀲𑀗𑁆𑀔𑁆𑀬𑀫𑀢𑀺𑀓𑁆𑀓𑀫𑁆𑀫, 𑀕𑀼𑀡𑀯𑀻𑀣𑀺𑀁 𑀯𑀺𑀕𑀸𑀳𑀢𑁂.

𑁬𑁯.

𑀢𑁂𑀦 𑀯𑀼𑀢𑁆𑀢𑀯𑀺𑀭𑁄𑀥𑀸𑀦-𑀫𑀯𑀺𑀭𑁄𑀥𑁄 𑀬𑀣𑀸 𑀲𑀺𑀬𑀸;

𑀢𑀣𑀸 𑀤𑁄𑀲𑀧𑀭𑀺𑀳𑀸𑀭𑀸-𑀯𑀩𑁄𑀥𑁄 𑀤𑀸𑀦𑀺 𑀦𑀻𑀬𑀢𑁂.

𑁬𑁮-𑁬𑁯. 𑀇𑀘𑁆𑀘𑁂𑀯𑀁 ¶ 𑀤𑁄𑀲𑀯𑀺𑀪𑀸𑀕𑀁 𑀧𑀭𑀺𑀘𑁆𑀙𑀺𑀚𑁆𑀚 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀤𑁄𑀲𑀧𑀭𑀺𑀳𑀸𑀭𑀓𑁆𑀓𑀫𑀫𑀼𑀧𑀤𑀺𑀲𑀺𑀢𑀼𑀫𑀸𑀳 ‘‘𑀓𑀤𑀸𑀘𑀻’’𑀢𑁆𑀬𑀸𑀤𑀺. 𑀲𑀓𑀮𑁄𑀧𑀺 𑀅𑀬𑀁 𑀯𑀺𑀭𑁄𑀥𑁄 𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀸𑀤𑀺𑀓𑀢𑁄 𑀦 𑀓𑁄𑀘𑀺 𑀏𑀓𑁄 𑀏𑀯 𑀤𑁄𑀲𑁂𑀲𑀼, 𑀤𑁄𑀲𑀸𑀦𑀁 𑀯𑀸 𑀲𑀗𑁆𑀔𑁆𑀬𑀁 𑀕𑀡𑀦𑀁 𑀤𑁄𑀲𑀪𑀸𑀯𑀁 𑀅𑀢𑀺𑀓𑁆𑀓𑀫𑁆𑀫 𑀧𑀭𑀺𑀘𑁆𑀙𑀺𑀚𑁆𑀚 𑀕𑀼𑀡𑀸𑀦𑀁 𑀯𑀻𑀣𑀺𑀁 𑀧𑀤𑀯𑀺𑀁 𑀕𑀼𑀡𑀲𑀪𑀸𑀯𑀢𑀁 𑀯𑀺𑀕𑀸𑀳𑀢𑁂 𑀅𑀩𑁆𑀪𑀼𑀧𑀕𑀘𑁆𑀙𑀢𑀺 𑀓𑀤𑀸𑀘𑀺, 𑀦 𑀲𑀩𑁆𑀩𑀤𑀸. 𑀓𑀯𑀺𑀦𑁄 𑀧𑀬𑀼𑀚𑁆𑀚𑀓𑀲𑁆𑀲 𑀓𑁄𑀲𑀮𑁆𑀮𑀸 𑀢𑀸𑀤𑀺𑀲𑀯𑀺𑀲𑀬𑀧𑀭𑀺𑀕𑁆𑀕𑀳𑀮𑀓𑁆𑀔𑀡𑀦𑁂𑀧𑀼𑀜𑁆𑀜𑀓𑀸𑀭𑀡𑀸, 𑀦 𑀢𑀼 𑀬𑀣𑀸 𑀢𑀣𑀸 𑀘𑁂𑀢𑀺. ‘‘𑀢𑁂𑀦𑁂’’𑀘𑁆𑀘𑀸𑀤𑀺. 𑀬𑁂𑀦𑁂𑀯𑀁, 𑀢𑁂𑀦 𑀓𑀸𑀭𑀡𑁂𑀦 𑀯𑀼𑀢𑁆𑀢𑀸𑀦𑀁 𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀸𑀤𑀻𑀦𑀁 𑀯𑀺𑀭𑁄𑀥𑀸𑀦𑀁 𑀬𑀣𑀸 𑀬𑁂𑀦 𑀧𑀓𑀸𑀭𑁂𑀦 𑀅𑀯𑀺𑀭𑁄𑀥𑁄 𑀦𑀺𑀤𑁆𑀤𑁄𑀲𑀢𑀸 𑀲𑀺𑀬𑀸 𑀪𑀯𑁂𑀬𑁆𑀬, 𑀢𑀣𑀸 𑀢𑁂𑀦 𑀧𑀓𑀸𑀭𑁂𑀦 𑀤𑁄𑀲𑀸𑀦𑀁 𑀧𑀭𑀺𑀳𑀸𑀭𑁄 𑀤𑀽𑀭𑀻𑀓𑀭𑀡𑀁 𑀅𑀯𑀩𑀼𑀚𑁆𑀛𑀢𑀺 𑀜𑀸𑀬𑀢𑀺 𑀏𑀢𑁂𑀦𑀸𑀢𑀺 𑀅𑀯𑀩𑁄𑀥𑁄, 𑀢𑀲𑁆𑀲 𑀅𑀯𑀩𑁄𑀥𑁄, 𑀢𑀦𑁆𑀦𑀸𑀫𑀺𑀓𑁄 𑀧𑀭𑀺𑀘𑁆𑀙𑁂𑀤𑁄 𑀇𑀤𑀸𑀦𑀺 𑀦𑀻𑀬𑀢𑁂 𑀆𑀦𑀻𑀬𑀢𑁂 𑀯𑀼𑀘𑁆𑀘𑀢𑁂𑀢𑀺 𑀅𑀢𑁆𑀣𑁄.

𑁬𑁮-𑁬𑁯. 𑀏𑀯𑀁 𑀤𑁄𑀲𑀯𑀺𑀪𑀸𑀕𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀤𑁄𑀲𑀸𑀦𑀁 𑀧𑀭𑀺𑀳𑀸𑀭𑀢𑁆𑀣𑀫𑀸𑀭𑀪𑀦𑁆𑀢𑁄 ‘‘𑀓𑀤𑀸𑀘𑀻’’𑀢𑁆𑀬𑀸𑀤𑀺𑀫𑀸𑀳. 𑀲𑀓𑀮𑁄𑀧𑀺 𑀅𑀬𑀁 𑀯𑀺𑀭𑁄𑀥𑁄 𑀧𑀤𑀤𑁄𑀲𑀸𑀤𑀺𑀓𑁄 𑀤𑁄𑀲𑀲𑀗𑁆𑀔𑁆𑀬𑀁 𑀤𑁄𑀲𑀸𑀦𑀁, 𑀤𑁄𑀲𑁂𑀲𑀼 𑀯𑀸 𑀕𑀡𑀦𑀁 𑀤𑁄𑀲𑀪𑀸𑀯𑀁 𑀅𑀢𑀺𑀓𑁆𑀓𑀫𑁆𑀫 𑀓𑀤𑀸𑀘𑀺 𑀓𑀯𑀺𑀓𑁄𑀲𑀮𑁆𑀮𑀸 𑀓𑀯𑀺𑀦𑁄 𑀩𑁆𑀬𑀸𑀓𑀭𑀡𑀸𑀪𑀺𑀥𑀸𑀦𑀙𑀦𑁆𑀤𑁄𑀅𑀮𑀗𑁆𑀓𑀢𑀺𑀆𑀤𑀻𑀲𑀼 𑀧𑀭𑀺𑀘𑀬𑀮𑀓𑁆𑀔𑀡𑁂𑀦 𑀧𑀜𑁆𑀜𑀸𑀧𑀸𑀝𑀯𑁂𑀦 𑀬𑀢𑁄 𑀕𑀼𑀡𑀯𑀻𑀣𑀺𑀁 𑀕𑀼𑀡𑀧𑀤𑀯𑀺𑀁 𑀓𑁂𑀯𑀮𑀁 𑀕𑀼𑀡𑀲𑀪𑀸𑀯𑀁 𑀯𑀺𑀕𑀸𑀳𑀢𑁂 𑀅𑀩𑁆𑀪𑀼𑀧𑀕𑀘𑁆𑀙𑀢𑀺, 𑀢𑁂𑀦 𑀓𑀸𑀭𑀡𑁂𑀦 𑀯𑀼𑀢𑁆𑀢𑀯𑀺𑀭𑁄𑀥𑀸𑀦𑀁 𑀬𑀣𑀸𑀯𑀼𑀢𑁆𑀢𑀧𑀤𑀤𑁄𑀲𑀸𑀤𑀺𑀯𑀺𑀭𑁄𑀥𑀸𑀦𑀁 𑀅𑀯𑀺𑀭𑁄𑀥𑁄 𑀅𑀯𑀺𑀭𑀼𑀤𑁆𑀥𑀢𑀸 𑀬𑀣𑀸 ¶ 𑀲𑀺𑀬𑀸 𑀬𑁂𑀦 𑀧𑀓𑀸𑀭𑁂𑀦 𑀪𑀯𑁂𑀬𑁆𑀬, 𑀢𑀣𑀸 𑀢𑁂𑀦 𑀧𑀓𑀸𑀭𑁂𑀦 𑀤𑁄𑀲𑀧𑀭𑀺𑀳𑀸𑀭𑀸𑀯𑀩𑁄𑀥𑁄 𑀬𑀣𑀸𑀯𑀼𑀢𑁆𑀢𑀧𑀤𑀤𑁄𑀲𑀸𑀤𑀺𑀲𑀫𑁆𑀩𑀦𑁆𑀥𑀺𑀦𑁄 𑀧𑀭𑀺𑀳𑀭𑀡𑀓𑁆𑀓𑀫𑀲𑁆𑀲 𑀅𑀯𑀩𑁄𑀥𑀓𑀸𑀭𑀡𑀢𑁆𑀢𑀸 𑀢𑀦𑁆𑀦𑀸𑀫𑀺𑀓𑀧𑀭𑀺𑀘𑁆𑀙𑁂𑀤𑁄 𑀇𑀤𑀸𑀦𑀺 𑀮𑀤𑁆𑀥𑀸𑀯𑀲𑀭𑁂 𑀦𑀻𑀬𑀢𑁂 𑀯𑀼𑀘𑁆𑀘𑀢𑁂. 𑀬𑀣𑀸𑀯𑀼𑀢𑁆𑀢𑀤𑁄𑀲𑀸 𑀓𑀯𑀺𑀲𑀸𑀫𑀢𑁆𑀣𑀺𑀬𑁂𑀦 𑀦𑀺𑀤𑁆𑀤𑁄𑀲𑀢𑁆𑀢𑀁 𑀪𑀚𑀦𑁆𑀢𑀺, 𑀢𑀲𑁆𑀲 𑀲𑀸𑀫𑀢𑁆𑀣𑀺𑀬𑀲𑁆𑀲 𑀉𑀧𑀤𑁂𑀲𑀁 𑀤𑀲𑁆𑀲𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀤𑀤𑁄𑀲𑀧𑀭𑀺𑀳𑀸𑀭𑀯𑀡𑁆𑀡𑀦𑀸

𑀢𑀢𑁆𑀣 𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀲𑁆𑀲 𑀧𑀭𑀺𑀳𑀸𑀭𑁄 𑀬𑀣𑀸 𑁋

𑁭𑁦.

𑀯𑀺𑀦𑁆𑀤𑀦𑁆𑀢𑀁 𑀧𑀸𑀓𑀲𑀸𑀮𑀻𑀦𑀁, 𑀲𑀸𑀮𑀻𑀦𑀁 𑀤𑀲𑁆𑀲𑀦𑀸 𑀲𑀼𑀔𑀁;

𑀢𑀁 𑀓𑀣𑀁 𑀦𑀸𑀫 𑀫𑁂𑀖𑁄’𑀬𑀁, 𑀯𑀺𑀲𑀤𑁄 𑀲𑀼𑀔𑀬𑁂 𑀚𑀦𑀁.

𑁭𑁦. ‘‘𑀯𑀺𑀦𑁆𑀤𑀦𑁆𑀢’’𑀫𑀺𑀘𑁆𑀘𑀸𑀤𑀺. 𑀧𑀸𑀓𑁂𑀦 𑀧𑀭𑀺𑀡𑀢𑀪𑀸𑀯𑁂𑀦 𑀲𑀸𑀮𑀻𑀦𑀁 𑀬𑀼𑀢𑁆𑀢𑀸𑀦𑀁, 𑀫𑀦𑀼𑀜𑁆𑀜𑀸𑀦𑀁 𑀯𑀸 𑀲𑀸𑀮𑀻𑀦𑀁 𑀭𑀢𑁆𑀢𑀲𑀸𑀮𑀺𑀆𑀤𑀻𑀦𑀁 𑀲𑀸𑀮𑀺𑀚𑀸𑀢𑀻𑀦𑀁 𑀤𑀲𑁆𑀲𑀦𑀸 𑀲𑀼𑀔𑀁 𑀘𑁂𑀢𑀲𑀺𑀓𑀁 𑀲𑁄𑀫𑀦𑀲𑁆𑀲𑀁 𑀯𑀺𑀦𑁆𑀤𑀦𑁆𑀢𑀁 𑀢𑀁 𑀚𑀦𑀁 𑀯𑀺𑀲𑀤𑁄 𑀅𑀬𑀁 𑀫𑁂𑀖𑁄 𑀅𑀫𑁆𑀩𑀼𑀤𑁄 𑀓𑀣𑀁 𑀦𑀸𑀫 𑀲𑀼𑀔𑀬𑁂𑀢𑀺. 𑀏𑀢𑁆𑀣 𑀢𑀸𑀤𑀺𑀲𑀲𑁆𑀲 𑀚𑀦𑀲𑁆𑀲 𑀅𑀲𑀼𑀔𑀧𑁆𑀧𑀤𑀸𑀦𑀁 𑀕𑀭𑀴𑀲𑁆𑀲 𑀫𑁂𑀖𑀲𑁆𑀲𑀸𑀦𑀼𑀭𑀽𑀧𑀦𑁆𑀢𑀺 𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀢𑀸 𑀧𑀭𑀺𑀳𑀝𑀸.

𑁭𑁦. 𑀢𑀢𑁆𑀣 𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀲𑁆𑀲 𑀧𑀭𑀺𑀳𑀸𑀭𑁄 𑀬𑀣𑀸 𑀏𑀯𑀁. ‘‘𑀯𑀺𑀦𑁆𑀤𑀦𑁆𑀢𑀺’’𑀘𑁆𑀘𑀸𑀤𑀺. 𑀧𑀸𑀓𑀲𑀸𑀮𑀻𑀦𑀁 𑀧𑀭𑀺𑀡𑀸𑀫𑁂𑀦 𑀬𑀼𑀢𑁆𑀢𑀸𑀦𑀁, 𑀫𑀦𑀼𑀜𑁆𑀜𑀸𑀦𑀁 𑀯𑀸 𑀲𑀸𑀮𑀻𑀦𑀁 𑀭𑀢𑁆𑀢𑀲𑀸𑀮𑀺𑀆𑀤𑀻𑀦𑀁 𑀤𑀲𑁆𑀲𑀦𑀸 𑀤𑀲𑁆𑀲𑀦𑀳𑁂𑀢𑀼 𑀲𑀼𑀔𑀁 𑀘𑁂𑀢𑀲𑀺𑀓𑀲𑁄𑀫𑀦𑀲𑁆𑀲𑀁 𑀯𑀺𑀦𑁆𑀤𑀦𑁆𑀢𑀁 𑀅𑀦𑀼𑀪𑁄𑀦𑁆𑀢𑀁 𑀢𑀁 𑀚𑀦𑀁 𑀢𑀁 𑀓𑀲𑁆𑀲𑀓𑀚𑀦𑀁 𑀯𑀺𑀲𑀤𑁄 𑀚𑀮𑀤𑀸𑀬𑀓𑁄 𑀅𑀬𑀁 𑀫𑁂𑀖𑁄 𑀓𑀣𑀁 𑀦𑀸𑀫 𑀲𑀼𑀔𑀬𑁂, 𑀦 𑀲𑀼𑀔𑀬𑀢𑁂𑀯. 𑀢𑀸𑀤𑀺𑀲𑀲𑁆𑀲 𑀚𑀦𑀲𑁆𑀲 𑀤𑀼𑀓𑁆𑀔𑀤𑀸𑀦𑀁 𑀕𑀭𑀴𑀤𑀸𑀬𑀓𑀲𑁆𑀲 𑀫𑁂𑀖𑀲𑁆𑀲𑀸𑀧𑀺 𑀅𑀦𑀼𑀭𑀽𑀧𑀫𑀺𑀢𑀺 𑀯𑀺𑀭𑀼𑀤𑁆𑀥𑀜𑁆𑀜𑀢𑁆𑀣𑁄 𑀅𑀧𑀦𑀻𑀢𑁄 𑀳𑁄𑀢𑀺. 𑀧𑀸𑀓𑁂𑀦 𑀲𑀸𑀮𑀺𑀦𑁄𑀢𑀺 𑀯𑀺𑀕𑁆𑀕𑀳𑁄. 𑀲𑀼𑀔𑀁 𑀓𑀭𑁄𑀢𑀻𑀢𑀺 𑀲𑀼𑀔𑀬𑁂𑀢𑀺 𑀦𑀸𑀫𑀥𑀸𑀢𑀼.

𑀬𑀣𑀸 𑀯𑀸 𑁋

𑁭𑁧.

𑀯𑀺𑀦𑀸𑀬𑀓𑁄𑀧𑀺 ¶ 𑀦𑀸𑀕𑁄𑀲𑀺,

𑀕𑁄𑀢𑀫𑁄𑀧𑀺 𑀫𑀳𑀸𑀫𑀢𑀺;

𑀧𑀡𑀻𑀢𑁄𑀧𑀺 𑀭𑀲𑀸𑀧𑁂𑀢𑁄,

𑀘𑀺𑀢𑁆𑀢𑀸 𑀫𑁂 𑀲𑀸𑀫𑀺 𑀢𑁂 𑀕𑀢𑀺.

𑁭𑁧. ‘‘𑀯𑀺𑀦𑀸𑀬𑀓𑁄𑀧𑀺’’𑀘𑁆𑀘𑀸𑀤𑀺. 𑀯𑀻𑀦𑀁 𑀧𑀓𑁆𑀔𑀻𑀦𑀁 𑀦𑀸𑀬𑀓𑁄, 𑀕𑀭𑀼𑀴𑁄, 𑀲𑀢𑁆𑀢𑁂 𑀯𑀺𑀦𑁂𑀢𑀻𑀢𑀺 𑀯𑀺𑀦𑀸𑀬𑀓𑁄, 𑀯𑀼𑀤𑁆𑀥𑁄, 𑀪𑀕𑀯𑀸 𑀘. 𑀢𑀢𑁆𑀣 𑀬𑀤𑀸 𑀯𑀺𑀦𑀸𑀬𑀓𑁄 𑀕𑀭𑀼𑀴𑁄, 𑀢𑀤𑀸 𑀢𑀼 𑀦𑀸𑀕𑁄 𑀧𑀦𑁆𑀦𑀕𑁄𑀲𑀻𑀢𑀺 𑀯𑀺𑀭𑀼𑀤𑁆𑀥𑀁, 𑀧𑀓𑁆𑀔𑀦𑁆𑀢𑀭𑁂 𑀢𑁆𑀯𑀯𑀺𑀭𑀼𑀤𑁆𑀥𑀁 𑀪𑀕𑀯𑀢𑁄 𑀆𑀕𑀼𑀲𑁆𑀲 𑀭𑀸𑀕𑀸𑀤𑀺𑀦𑁄 𑀅𑀪𑀸𑀯𑀢𑁄. 𑀇𑀫𑁂𑀲𑀁 𑀕𑀼𑀦𑁆𑀦𑀁 𑀅𑀢𑀺𑀲𑀬𑁂𑀦 𑀕𑁄 𑀕𑁄𑀢𑀫𑁄 𑀳𑀻𑀦𑀧𑀲𑀼, 𑀕𑁄𑀢𑀫𑀯𑀁𑀲𑀸𑀯𑀢𑀺𑀡𑁆𑀡𑀢𑁆𑀢𑀸 𑀕𑁄𑀢𑀫𑁄 𑀪𑀕𑀯𑀸 𑀘. 𑀳𑀻𑀦𑀧𑀲𑀼 𑀘 𑀢𑁆𑀯𑀁 𑀫𑀳𑀸𑀫𑀢𑀺 𑀅𑀲𑀻𑀢𑀺 𑀯𑀺𑀭𑀼𑀤𑁆𑀥𑀁 𑀅𑀘𑁆𑀘𑀦𑁆𑀢𑀳𑀻𑀦𑀧𑀲𑀼𑀦𑁄 𑀫𑀳𑀢𑀺𑀬𑀸 𑀧𑀜𑁆𑀜𑀸𑀬 𑀅𑀪𑀸𑀯𑀢𑁄. 𑀧𑀓𑁆𑀔𑀦𑁆𑀢𑀭𑁂 𑀢𑀼 𑀦 𑀩𑁆𑀬𑀸𑀖𑀸𑀢𑁄. 𑀧𑀡𑀻𑀢𑁄 𑀫𑀥𑀼𑀭𑁄 𑀭𑀲𑁄, 𑀉𑀢𑁆𑀢𑀫𑁄 𑀘 𑀲𑀼𑀕𑀢𑁄. 𑀢𑀢𑁆𑀣 𑀫𑀥𑀼𑀭𑀭𑀲𑀢𑁄 𑀅𑀧𑁂𑀢𑁄 𑀅𑀧𑀕𑀢𑁄𑀲𑀻𑀢𑀺 𑀯𑀺𑀭𑀼𑀚𑁆𑀛𑀢𑀺, 𑀪𑀕𑀯𑀢𑁄 𑀢𑀼 𑀭𑀲𑁂𑀳𑀺 𑀲𑀺𑀗𑁆𑀕𑀸𑀭𑀸𑀤𑀻𑀳𑀺 𑀅𑀧𑁂𑀢𑁄𑀢𑀺 𑀬𑀼𑀚𑁆𑀚𑀢𑀺. 𑀫𑁂 𑀫𑀫. 𑀲𑀸𑀫𑀻𑀢𑀺 𑀆𑀫𑀦𑁆𑀢𑀦𑀁. 𑀢𑁂 𑀢𑀯 𑀕𑀢𑀺 𑀧𑀯𑀢𑁆𑀢𑀺 𑀘𑀺𑀢𑁆𑀢𑀸 𑀅𑀩𑁆𑀪𑀼𑀢𑀸𑀢𑀺. 𑀏𑀢𑁆𑀣 𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀁 𑀯𑀺𑀭𑁄𑀥𑀸𑀮𑀗𑁆𑀓𑀸𑀭𑀁 𑀲𑀺𑀮𑀸𑀖𑀦𑀻𑀬𑀦𑁆𑀢𑀺 𑀢𑁂𑀦 𑀢𑀁 𑀧𑀭𑀺𑀳𑀝𑀁.

𑁭𑁧. 𑀬𑀣𑀸 𑀯𑀸 𑀉𑀢𑁆𑀢𑀤𑁄𑀲𑀲𑁆𑀲 𑀧𑀭𑀺𑀳𑀸𑀭𑁄 𑀈𑀤𑀺𑀲𑁄 𑀯𑀸. ‘‘𑀯𑀺𑀦𑀸𑀬𑀓𑁄’’𑀘𑁆𑀘𑀸𑀤𑀺. 𑀳𑁂 𑀲𑀸𑀫𑀺 𑀢𑁆𑀯𑀁 𑀯𑀺𑀦𑀸𑀬𑀓𑁄𑀧𑀺 𑀕𑀭𑀼𑀴𑁄𑀧𑀺 𑀦𑀸𑀕𑁄𑀲𑀺 𑀧𑀦𑁆𑀦𑀕𑁄 𑀅𑀲𑀺. 𑀦𑁄 𑀘𑁂, 𑀯𑀺𑀦𑀸𑀬𑀓𑁄𑀧𑀺 𑀲𑀢𑁆𑀢𑁂 𑀯𑀺𑀦𑁂𑀦𑁆𑀢𑁄 𑀏𑀯 𑀦𑀸𑀕𑁄𑀲𑀺 𑀦𑀺𑀓𑁆𑀓𑀺𑀮𑁂𑀲𑁄 𑀅𑀲𑀺. 𑀕𑁄𑀢𑀫𑁄𑀧𑀺 𑀧𑀲𑀼𑀢𑀫𑁄𑀧𑀺 𑀫𑀳𑀸𑀫𑀢𑀺 𑀫𑀳𑀸𑀧𑀜𑁆𑀜𑀯𑀸𑀲𑀺. 𑀦𑁄 𑀘𑁂, 𑀕𑁄𑀢𑀫𑁄𑀧𑀺 𑀕𑁄𑀢𑁆𑀢𑀢𑁄 𑀕𑁄𑀢𑀫𑁄𑀬𑁂𑀯 𑀫𑀳𑀸𑀫𑀢𑀺 𑀫𑀳𑀸𑀧𑀜𑁆𑀜𑀯𑀸𑀲𑀺. 𑀧𑀡𑀻𑀢𑁄𑀧𑀺 𑀫𑀥𑀼𑀭𑁄𑀧𑀺 𑀭𑀲𑀸𑀧𑁂𑀢𑁄 𑀫𑀥𑀼𑀭𑀭𑀲𑀢𑁄 𑀅𑀧𑀕𑀢𑁄𑀲𑀺. 𑀦𑁄 𑀘𑁂, 𑀧𑀡𑀻𑀢𑁄𑀧𑀺 𑀉𑀢𑁆𑀢𑀫𑁄 𑀏𑀯 𑀭𑀲𑀸𑀧𑁂𑀢𑁄 𑀲𑀺𑀗𑁆𑀕𑀸𑀭𑀸𑀤𑀺𑀭𑀲𑀢𑁄 𑀅𑀧𑀕𑀢𑁄𑀲𑀺. 𑀢𑁂 𑀢𑀼𑀬𑁆𑀳𑀁 𑀕𑀢𑀺 𑀧𑀯𑀢𑁆𑀢𑀺 𑀫𑁂 𑀫𑀬𑁆𑀳𑀁 𑀘𑀺𑀢𑁆𑀢𑀸 𑀅𑀘𑁆𑀙𑀭𑀺𑀬𑀸. ¶ 𑀏𑀢𑁆𑀣 𑀕𑀭𑀼𑀴𑀲𑁆𑀲 𑀦𑀸𑀕𑀢𑁆𑀢𑀜𑁆𑀘 𑀧𑀲𑀼𑀢𑀫𑀲𑁆𑀲 𑀧𑀜𑁆𑀜𑀯𑀦𑁆𑀢𑀢𑁆𑀢𑀜𑁆𑀘 𑀧𑀡𑀻𑀢𑀲𑁆𑀲 𑀦𑀺𑀭𑀲𑀢𑁆𑀢𑀜𑁆𑀘 𑀯𑀺𑀭𑀼𑀤𑁆𑀥𑀁, 𑀢𑀣𑀸𑀧𑀺 𑀅𑀜𑁆𑀜𑀧𑀓𑁆𑀔𑀲𑁆𑀲 𑀅𑀯𑀺𑀭𑀼𑀤𑁆𑀥𑀢𑁆𑀢𑀸 𑀯𑀺𑀭𑀼𑀤𑁆𑀥𑀢𑁆𑀣𑀦𑁆𑀢𑀭𑀤𑁄𑀲𑁄 𑀧𑀲𑀢𑁆𑀣𑁂𑀦 𑀯𑀺𑀭𑀼𑀤𑁆𑀥𑀸𑀮𑀗𑁆𑀓𑀸𑀭𑁂𑀦 𑀦𑀺𑀭𑀸𑀓𑀢𑁄. 𑀯𑀻𑀦𑀁 𑀧𑀓𑁆𑀔𑀻𑀦𑀁 𑀦𑀸𑀬𑀓𑁄, 𑀕𑀭𑀼𑀴𑁄. 𑀲𑀢𑁆𑀢𑁂 𑀯𑀺𑀦𑁂𑀢𑀻𑀢𑀺 𑀯𑀺𑀦𑀸𑀬𑀓𑁄, 𑀩𑀼𑀤𑁆𑀥𑁄. 𑀦𑀢𑁆𑀣𑀺 𑀆𑀕𑀼 [𑀅𑀕𑁄 (𑀓.)] 𑀏𑀢𑀲𑁆𑀲𑀸𑀢𑀺 𑀦𑀸𑀕𑁄, 𑀩𑀼𑀤𑁆𑀥𑁄. 𑀕𑀼𑀦𑁆𑀦𑀫𑀢𑀺𑀲𑀬𑁂𑀦 𑀕𑁄𑀢𑀫𑁄, 𑀧𑀲𑀼. 𑀫𑀳𑀢𑀻 𑀫𑀢𑀺 𑀅𑀲𑁆𑀲𑀸𑀢𑀺 𑀫𑀳𑀸𑀫𑀢𑀺, 𑀩𑀼𑀤𑁆𑀥𑁄. 𑀧𑀥𑀸𑀦𑀢𑁆𑀢𑀁 𑀦𑀻𑀢𑁄 𑀧𑀡𑀻𑀢𑁄, 𑀫𑀥𑀼𑀭𑁄 𑀭𑀲𑁄. 𑀭𑀲𑀢𑁄 𑀅𑀧𑁂𑀢𑁄𑀢𑀺 𑀭𑀲𑀸𑀧𑁂𑀢𑁄, 𑀩𑀼𑀤𑁆𑀥𑁄𑀢𑀺 𑀯𑀺𑀕𑁆𑀕𑀳𑁄.

𑀅𑀛𑀢𑁆𑀣𑀲𑁆𑀲 𑀬𑀣𑀸 𑁋

𑁭𑁨.

𑀓𑀣𑀁 𑀢𑀸𑀤𑀺𑀕𑀼𑀡𑀸𑀪𑀸𑀯𑁂,

𑀮𑁄𑀓𑀁 𑀢𑁄𑀲𑁂𑀢𑀺 𑀤𑀼𑀚𑁆𑀚𑀦𑁄;

𑀑𑀪𑀸𑀲𑀺𑀢𑀸𑀲𑁂𑀲𑀤𑀺𑀲𑁄,

𑀔𑀚𑁆𑀚𑁄𑀢𑁄 𑀦𑀸𑀫 𑀓𑀺𑀁 𑀪𑀯𑁂.

𑁭𑁨. ‘‘𑀓𑀣’’𑀫𑀺𑀘𑁆𑀘𑀸𑀤𑀺. 𑀤𑀼𑀚𑁆𑀚𑀦𑁄 𑀢𑀸𑀤𑀺𑀦𑁄 𑀕𑀼𑀡𑀸 𑀮𑁄𑀓𑀁 𑀢𑁄𑀲𑁂𑀦𑁆𑀢𑀺, 𑀢𑀸𑀤𑀻𑀦𑀁 𑀕𑀼𑀡𑀸𑀦𑀁 𑀅𑀢𑁆𑀢𑀦𑀺 𑀅𑀪𑀸𑀯𑁂 𑀲𑀢𑀺 𑀮𑁄𑀓𑀁 𑀲𑀢𑁆𑀢𑀮𑁄𑀓𑀁 𑀓𑀣𑀁 𑀢𑁄𑀲𑁂𑀢𑀺, 𑀦 𑀢𑁄𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀫𑁂𑀯𑀢𑁆𑀣𑀦𑁆𑀢𑀭𑁂𑀦 𑀲𑀸𑀥𑁂𑀢𑀺 ‘‘𑀔𑀚𑁆𑀚𑁄𑀢𑁄 𑀦𑀸𑀫 𑀑𑀪𑀸𑀲𑀺𑀢𑀸 𑀤𑀻𑀧𑀺𑀢𑀸 𑀅𑀲𑁂𑀲𑀤𑀺𑀲𑀸 𑀬𑁂𑀦 𑀢𑀣𑀸𑀯𑀺𑀥𑁄 𑀓𑀺𑀁 𑀪𑀯𑁂, 𑀦 𑀪𑀯𑁂𑀬𑁆𑀬 𑀢𑀸𑀤𑀺𑀦𑁄 𑀕𑀼𑀡𑀲𑁆𑀲 𑀅𑀪𑀸𑀯𑀢𑁄’’𑀢𑀺. 𑀏𑀢𑁆𑀣 𑀔𑀚𑁆𑀚𑁄𑀢𑀲𑁆𑀲 𑀅𑀥𑀺𑀓𑀢𑁆𑀣𑀪𑀸𑀯𑁂𑀦 𑀲𑀺𑀢𑁄 𑀑𑀪𑀸𑀲𑀺𑀢𑀸𑀲𑁂𑀲𑀤𑀺𑀲𑀢𑁆𑀢𑀤𑁄𑀲𑁄 ‘‘𑀓𑀣𑀁 𑀢𑀸𑀤𑀺𑀕𑀼𑀡𑀸𑀪𑀸𑀯𑁂’’𑀢𑀺𑀆𑀤𑀺𑀯𑀘𑁄𑀪𑀗𑁆𑀕𑀺𑀬𑀸 𑀧𑀭𑀺𑀳𑀝𑁄.

𑁭𑁨. 𑀅𑀛𑀢𑁆𑀣𑀲𑁆𑀲 𑀬𑀣𑀸𑀢𑀺 𑀏𑀢𑁆𑀣 𑀧𑀭𑀺𑀳𑀸𑀭𑁄 𑀅𑀚𑁆𑀛𑀸𑀳𑀸𑀭𑁄, 𑀏𑀯𑀫𑀼𑀧𑀭𑀺𑀧𑀺. ‘‘𑀓𑀣𑀺’’𑀘𑁆𑀘𑀸𑀤𑀺. 𑀤𑀼𑀚𑁆𑀚𑀦𑁄 𑀕𑀼𑀡𑀳𑀻𑀦𑀚𑀦𑁄 𑀢𑀸𑀤𑀺𑀕𑀼𑀡𑀸𑀪𑀸𑀯𑁂 𑀲𑀦𑁆𑀢𑁄𑀲𑀚𑀦𑀦𑀓𑀸𑀭𑀡𑀸𑀦𑀁 𑀢𑀸𑀤𑀺𑀲𑀸𑀦𑀁 𑀲𑀻𑀮𑀸𑀤𑀺𑀕𑀼𑀡𑀸𑀦𑀁 ¶ 𑀅𑀢𑁆𑀢𑀦𑀺 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑁂 𑀲𑀢𑀺 𑀮𑁄𑀓𑀁 𑀲𑀢𑁆𑀢𑀮𑁄𑀓𑀁 𑀓𑀣𑀁 𑀢𑁄𑀲𑁂𑀢𑀺, 𑀦 𑀢𑁄𑀲𑁂𑀢𑀺𑀬𑁂𑀯, 𑀢𑀣𑀸 𑀳𑀺 𑀔𑀚𑁆𑀚𑁄𑀢𑁄 𑀦𑀸𑀫 𑀑𑀪𑀸𑀲𑀺𑀢𑀸𑀲𑁂𑀲𑀤𑀺𑀲𑁄 𑀓𑀺𑀁 𑀪𑀯𑁂, 𑀦 𑀪𑀯𑀢𑁆𑀬𑁂𑀯. 𑀏𑀢𑁆𑀣 𑀔𑀚𑁆𑀚𑁄𑀢𑀲𑁆𑀲 𑀲𑀓𑀮𑀤𑀺𑀲𑁄𑀪𑀸𑀲𑀦𑀲𑀗𑁆𑀔𑀸𑀢𑀫𑀥𑀺𑀓𑀢𑁆𑀣𑀤𑁄𑀲𑁄 ‘‘𑀓𑀣𑀁 𑀢𑀸𑀤𑀺𑀕𑀼𑀡𑀸𑀪𑀸𑀯𑁂’’𑀘𑁆𑀘𑀸𑀤𑀺𑀯𑀸𑀓𑁆𑀬𑀮𑀻𑀮𑀸𑀬 𑀦𑀺𑀭𑀸𑀓𑀢𑁄. 𑀢𑀸𑀤𑀻 𑀘 𑀢𑁂 𑀕𑀼𑀡𑀸 𑀘𑁂𑀢𑀺 𑀯𑀺𑀕𑁆𑀕𑀳𑁄.

𑁭𑁩.

𑀧𑀳𑁂𑀴𑀺𑀓𑀸𑀬𑀫𑀸𑀭𑀼𑀴𑁆𑀳𑀸, 𑀦 𑀳𑀺 𑀤𑀼𑀝𑁆𑀞𑀸 𑀓𑀺𑀮𑀺𑀝𑁆𑀞𑀢𑀸;

𑀧𑀺𑀬𑀸 𑀲𑀼𑀔𑀸’𑀮𑀺𑀗𑁆𑀕𑀺𑀢𑀁 𑀓-𑀫𑀸𑀮𑀺𑀗𑁆𑀕𑀢𑀺 𑀦𑀼 𑀦𑁄 𑀇𑀢𑀺.

𑁭𑁩. ‘‘𑀧𑀳𑁂𑀴𑀺𑀓𑀸𑀬𑀁’’𑀇𑀘𑁆𑀘𑀸𑀤𑀺. 𑀓𑀺𑀮𑀺𑀝𑁆𑀞𑀢𑀸 𑀓𑀺𑀮𑀺𑀝𑁆𑀞𑀧𑀤𑀤𑁄𑀲𑁄 𑀧𑀳𑁂𑀴𑀺𑀓𑀸𑀬 𑀯𑀺𑀲𑀬𑁂 𑀆𑀭𑀼𑀴𑁆𑀳𑀸 𑀲𑀳𑀻 𑀦 𑀳𑀺 𑀦𑁄 𑀤𑀼𑀝𑁆𑀞𑁄 𑀲𑀺𑀬𑀸. 𑀓𑀻𑀤𑀺𑀲𑀻𑀢𑀺 𑀆𑀳 ‘‘𑀧𑀺𑀬𑁂’’𑀘𑁆𑀘𑀸𑀤𑀺. 𑀇𑀢𑀻𑀢𑀺 𑀦𑀺𑀤𑀲𑁆𑀲𑀦𑁂. 𑀧𑀺𑀬𑀸 𑀯𑀮𑁆𑀮𑀪𑀸𑀬 𑀆𑀮𑀺𑀗𑁆𑀕𑀺𑀢𑀁 𑀓𑀁 𑀚𑀦𑀁 𑀲𑀼𑀔𑀁 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀜𑁆𑀘 𑀦𑁄 𑀆𑀮𑀺𑀗𑁆𑀕𑀢𑀺 𑀦 𑀲𑀁𑀬𑀼𑀚𑁆𑀚𑀢𑀺 𑀦𑀼. 𑀦𑀼𑀇𑀢𑀺 𑀧𑀭𑀺𑀯𑀺𑀢𑀓𑁆𑀓𑁂 𑀦𑀺𑀧𑀸𑀢𑁄. 𑀏𑀢𑁆𑀣 𑀧𑀺𑀬𑀸𑀢𑀺 𑀓𑀺𑀮𑀺𑀝𑁆𑀞𑀁 𑀧𑀳𑁂𑀴𑀺𑀓𑀸𑀬 𑀲𑀫𑀸𑀭𑁄𑀧𑁂𑀦 𑀧𑀭𑀺𑀳𑀝𑀁.

𑁭𑁩. ‘‘𑀧𑀳𑁂𑀴𑀺𑀓𑁂’’𑀘𑁆𑀘𑀸𑀤𑀺. 𑀓𑀺𑀮𑀺𑀝𑁆𑀞𑀢𑀸 𑀓𑀺𑀮𑀺𑀝𑁆𑀞𑀧𑀤𑀤𑁄𑀲𑀲𑀗𑁆𑀔𑀸𑀢𑀸 𑀧𑀳𑁂𑀴𑀺𑀓𑀸𑀬𑀁 𑀯𑀺𑀲𑀬𑁂 𑀆𑀭𑀼𑀴𑁆𑀳𑀸 𑀘𑁂, 𑀦 𑀳𑀺 𑀤𑀼𑀝𑁆𑀞𑀸 𑀤𑀼𑀝𑁆𑀞𑀸 𑀦 𑀳𑁄𑀢𑀺. 𑀓𑀺𑀫𑀼𑀤𑀸𑀳𑀭𑀡𑀁? 𑀧𑀺𑀬𑀸 𑀲𑀼𑀔𑀸𑀮𑀺𑀗𑁆𑀕𑀺𑀢𑀁 𑀓𑀫𑀸𑀮𑀺𑀗𑁆𑀕𑀢𑀺 𑀦𑀼 𑀦𑁄 𑀇𑀢𑀺, 𑀇𑀢𑀺𑀲𑀤𑁆𑀤𑀲𑁆𑀲 𑀦𑀺𑀤𑀲𑁆𑀲𑀦𑀢𑁆𑀣𑀢𑁆𑀢𑀸 𑀲𑁂𑀲𑀉𑀤𑀸𑀳𑀭𑀡𑀸𑀦𑀫𑁂𑀢𑀫𑀼𑀧𑀮𑀓𑁆𑀔𑀡𑀦𑁆𑀢𑀺 𑀜𑀸𑀢𑀩𑁆𑀩𑀁. 𑀦𑁄 𑀘𑁂, 𑀏𑀯𑀁𑀧𑀓𑀸𑀭𑀸𑀦𑀫𑀼𑀤𑀸𑀳𑀭𑀡𑀸𑀦𑀫𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀢𑁆𑀢𑀸 𑀇𑀢𑀺𑀲𑀤𑁆𑀤𑁄 𑀧𑀓𑀸𑀭𑀢𑁆𑀣𑁄𑀢𑀺. 𑀧𑀺𑀬𑀸 𑀯𑀮𑁆𑀮𑀪𑀸𑀬 𑀆𑀮𑀺𑀗𑁆𑀕𑀺𑀢𑀁 𑀉𑀧𑀕𑀼𑀳𑀺𑀢𑀁 𑀓𑀁 𑀦𑀸𑀫 𑀚𑀦𑀁 𑀲𑀼𑀔𑀁 𑀓𑀸𑀬𑀺𑀓𑀫𑀸𑀦𑀲𑀺𑀓𑀁 𑀦𑁄 𑀆𑀮𑀺𑀗𑁆𑀕𑀢𑀺 𑀦𑀼, 𑀆𑀮𑀺𑀗𑁆𑀕𑀢𑁂𑀯𑀸𑀢𑀺. 𑀏𑀢𑁆𑀣 𑀧𑀺𑀬𑀸𑀢𑀺 𑀓𑀺𑀮𑀺𑀝𑁆𑀞𑀧𑀤𑀁 𑀧𑀳𑁂𑀴𑀺𑀓𑀸𑀬𑀫𑀸𑀭𑁄𑀧𑀦𑁂𑀦 𑀦𑀺𑀭𑀸𑀓𑀢𑀁 𑀳𑁄𑀢𑀺.

𑁭𑁪.

𑀬𑀫𑀓𑁂 𑀦𑁄 𑀧𑀬𑁄𑀚𑁂𑀬𑁆𑀬, 𑀓𑀺𑀮𑀺𑀝𑁆𑀞𑀧𑀤’𑀫𑀺𑀘𑁆𑀙𑀺𑀢𑁂;

𑀢𑀢𑁄 𑀬𑀫𑀓’𑀫𑀜𑁆𑀜𑀁 𑀢𑀼, 𑀲𑀩𑁆𑀩𑀫𑁂𑀢𑀁𑀫𑀬𑀁 𑀯𑀺𑀬.

𑁭𑁪. ‘‘𑀬𑀫𑀓𑁂’’𑀘𑁆𑀘𑀸𑀤𑀺. ¶ 𑀢𑀢𑁄 𑀅𑀜𑁆𑀜𑀦𑁆𑀢𑀺 𑀇𑀘𑁆𑀙𑀺𑀢𑀬𑀫𑀓𑀢𑁄 𑀅𑀜𑁆𑀜𑀁. 𑀢𑀼𑀇𑀢𑀺 𑀯𑀺𑀲𑁂𑀲𑀚𑁄𑀢𑀓𑁄. 𑀏𑀢𑀁𑀫𑀬𑀁 𑀯𑀺𑀬𑀸𑀢𑀺 𑀏𑀢𑁂𑀦 𑀓𑀺𑀮𑀺𑀝𑁆𑀞𑀧𑀤𑁂𑀦 𑀦𑀺𑀩𑁆𑀩𑀢𑁆𑀢𑀁 𑀯𑀺𑀬.

𑁭𑁪. ‘‘𑀬𑀫𑀓𑁂’’𑀘𑁆𑀘𑀸𑀤𑀺. 𑀓𑀺𑀮𑀺𑀝𑁆𑀞𑀧𑀤𑀁 𑀇𑀘𑁆𑀙𑀺𑀢𑁂 𑀬𑀫𑀓𑁂 𑀇𑀝𑁆𑀞𑀬𑀫𑀓𑁂 𑀦𑁄 𑀧𑀬𑁄𑀚𑁂𑀬𑁆𑀬 𑀦𑀧𑁆𑀧𑀬𑀼𑀚𑁆𑀚𑁂𑀬𑁆𑀬, 𑀢𑀢𑁄 𑀇𑀝𑁆𑀞𑀬𑀫𑀓𑀢𑁄 𑀅𑀜𑁆𑀜𑀁 𑀲𑀩𑁆𑀩𑀁 𑀬𑀫𑀓𑀁 𑀧𑀦 𑀏𑀢𑀁𑀫𑀬𑀁 𑀯𑀺𑀬 𑀇𑀫𑀺𑀦𑀸 𑀓𑀺𑀮𑀺𑀝𑁆𑀞𑀧𑀤𑀤𑁄𑀲𑁂𑀦 𑀓𑀢𑀁 𑀯𑀺𑀬 𑀳𑁄𑀢𑀺. 𑀏𑀢𑁆𑀣 𑀇𑀝𑁆𑀞𑀬𑀫𑀓𑀁 𑀯𑀼𑀢𑁆𑀢𑀦𑀬𑁂𑀦 𑀜𑀸𑀢𑀩𑁆𑀩𑀁, 𑀏𑀢𑁂𑀦 𑀦𑀺𑀩𑁆𑀩𑀢𑁆𑀢𑀁 𑀏𑀢𑀁𑀫𑀬𑀦𑁆𑀢𑀺 𑀯𑀺𑀕𑁆𑀕𑀳𑁄.

𑀤𑁂𑀲𑀯𑀺𑀭𑁄𑀥𑀺𑀦𑁄 𑀬𑀣𑀸 𑁋

𑁭𑁫.

𑀩𑁄𑀥𑀺𑀲𑀢𑁆𑀢𑀧𑁆𑀧𑀪𑀸𑀯𑁂𑀦, 𑀣𑀮𑁂𑀧𑀺 𑀚𑀮𑀚𑀸𑀦𑁆𑀬’𑀳𑀼𑀁;

𑀦𑀼𑀤𑀦𑁆𑀢𑀸𑀦𑀺’𑀯 𑀲𑀼𑀘𑀺𑀭𑀸-𑀯𑀸𑀲𑀓𑁆𑀮𑁂𑀲𑀁 𑀢𑀳𑀺𑀁 𑀚𑀮𑁂.

𑁭𑁫. ‘‘𑀩𑁄𑀥𑀺𑀲𑀢𑁆𑀢𑁂’’𑀘𑁆𑀘𑀸𑀤𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀬𑀸𑀤𑁂𑀯𑀺𑀬𑀸 𑀲𑀼𑀢𑀲𑁆𑀲 𑀯𑀓𑁆𑀔𑀫𑀸𑀦𑀲𑁆𑀲 𑀯𑀺𑀲𑁂𑀲𑀲𑁆𑀲 𑀢𑀤𑀼𑀧𑁆𑀧𑀦𑁆𑀦𑀤𑀺𑀦𑁂 𑀲𑀫𑁆𑀪𑀯𑀸 𑀧𑀪𑀸𑀯𑁂𑀦 𑀧𑀼𑀜𑁆𑀜𑀧𑁆𑀧𑀪𑀸𑀯𑀢𑁄 𑀚𑀮𑀚𑀸𑀦𑀺 𑀅𑀫𑁆𑀩𑀼𑀚𑀸𑀦𑀺 𑀣𑀮𑁂𑀧𑀺 𑀅𑀳𑀼𑀁 𑀅𑀳𑁂𑀲𑀼𑀁 𑀅𑀘𑀺𑀦𑁆𑀢𑀦𑀻𑀬𑀢𑁆𑀢𑀸 𑀧𑀼𑀜𑁆𑀜𑀧𑁆𑀧𑀪𑀸𑀯𑀲𑁆𑀲. 𑀓𑀺𑀁 𑀧𑀦 𑀯𑀸𑀧𑁆𑀬𑀸𑀤𑀻𑀲𑀼 𑀓𑀺𑀁 𑀓𑀭𑁄𑀦𑁆𑀢𑀸𑀯 𑀢𑀳𑀺𑀁 𑀢𑀲𑁆𑀫𑀺𑀜𑁆𑀘 𑀚𑀮𑁂 𑀲𑀼𑀘𑀺𑀭𑀁 𑀲𑀩𑁆𑀩𑀤𑀸𑀯 𑀆𑀯𑀲𑀦𑀫𑀸𑀯𑀸𑀲𑁄 𑀢𑁂𑀦 𑀚𑀸𑀢𑁄 𑀓𑁆𑀮𑁂𑀲𑁄 𑀢𑀁 𑀦𑀼𑀤𑀦𑁆𑀢𑀸𑀦𑀺𑀯 𑀤𑀽𑀭𑀢𑁄 𑀚𑀳𑀦𑁆𑀢𑀸𑀦𑀺𑀯𑁂𑀢𑀺. 𑀅𑀘𑀺𑀦𑁆𑀢𑀦𑀻𑀬𑀢𑁆𑀢𑀸 𑀧𑀼𑀜𑁆𑀜𑀧𑁆𑀧𑀪𑀸𑀯𑀲𑁆𑀲 𑀈𑀤𑀺𑀲𑀫𑁆𑀧𑀺 𑀅𑀘𑁆𑀙𑀭𑀺𑀬𑀫𑀳𑁄𑀲𑀻𑀢𑀺 𑀦 𑀤𑁂𑀲𑀯𑀺𑀭𑁄𑀥𑁄.

𑁭𑁫. 𑀩𑁄𑀥𑀺𑀲𑀢𑁆𑀢𑀧𑁆𑀧𑀪𑀸𑀯𑁂𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑁂𑀦 𑀚𑀮𑀚𑀸𑀦𑀺 𑀚𑀮𑀚𑀲𑀤𑀺𑀲𑀢𑁆𑀢𑀸 𑀢𑀦𑁆𑀦𑀸𑀫𑀓𑀸𑀦𑀺 𑀧𑀤𑀼𑀫𑀓𑁂𑀭𑀯𑀸𑀤𑀻𑀦𑀺 𑀢𑀳𑀺𑀁 𑀚𑀮𑁂 𑀯𑀺𑀲𑀬𑀢𑁆𑀢𑁂𑀦 𑀧𑀲𑀺𑀤𑁆𑀥𑁂 𑀢𑀲𑁆𑀫𑀺𑀁 𑀉𑀤𑀓𑁂 𑀲𑀼𑀘𑀺𑀭𑀸𑀯𑀸𑀲𑀓𑁆𑀮𑁂𑀲𑀁 𑀅𑀢𑀺𑀘𑀺𑀭𑀁 𑀦𑀺𑀯𑀸𑀲𑀢𑁄 𑀚𑀸𑀢𑀆𑀬𑀸𑀲𑀁 𑀦𑀼𑀤𑀦𑁆𑀢𑀸𑀦𑀺 𑀇𑀯 𑀘𑀚𑀦𑁆𑀢𑀸𑀦𑀺 𑀇𑀯 𑀣𑀮𑁂𑀧𑀺 𑀅𑀳𑀼𑀁 𑀅𑀳𑁂𑀲𑀼𑀁, 𑀯𑀸𑀧𑀺𑀆𑀤𑀻𑀲𑀼 𑀓𑀸 𑀓𑀣𑀸. 𑀏𑀢𑁆𑀣 𑀚𑀮𑀚𑀸𑀦𑀁 𑀣𑀮𑀼𑀧𑁆𑀧𑀢𑁆𑀢𑀺𑀓𑀣𑀦𑀲𑀗𑁆𑀔𑀸𑀢𑀁 𑀤𑁂𑀲𑀯𑀺𑀭𑁄𑀥𑀁 𑀅𑀘𑀺𑀦𑁆𑀢𑁂𑀬𑁆𑀬𑀧𑀼𑀜𑁆𑀜𑀧𑁆𑀧𑀪𑀸𑀯𑁂𑀦 𑀈𑀤𑀺𑀲𑀸𑀦𑀁 ¶ 𑀅𑀘𑁆𑀙𑀭𑀺𑀬𑀸𑀦𑀁 𑀧𑀸𑀢𑀼𑀪𑀸𑀯𑀢𑁄 ‘‘𑀩𑁄𑀥𑀺𑀲𑀢𑁆𑀢𑀧𑁆𑀧𑀪𑀸𑀯𑁂𑀦𑀸’’𑀢𑀺 𑀇𑀫𑀺𑀦𑀸 𑀦𑀺𑀭𑀸𑀓𑀭𑁄𑀢𑀺. 𑀩𑁄𑀥𑀺𑀬𑀁 𑀘𑀢𑀼𑀫𑀕𑁆𑀕𑀧𑀜𑁆𑀜𑀸𑀬𑀁 𑀲𑀢𑁆𑀢𑁄𑀢𑀺 𑀘, 𑀢𑀲𑁆𑀲 𑀧𑀪𑀸𑀯𑁄𑀢𑀺 𑀘, 𑀲𑀼𑀘𑀺𑀭𑀁 𑀆𑀯𑀸𑀲𑁄𑀢𑀺 𑀘, 𑀢𑁂𑀦 𑀪𑀽𑀢𑁄 𑀓𑁆𑀮𑁂𑀲𑁄𑀢𑀺 𑀘 𑀯𑀸𑀓𑁆𑀬𑀁.

𑀓𑀸𑀮𑀯𑀺𑀭𑁄𑀥𑀺𑀦𑁄 𑀬𑀣𑀸 𑁋

𑁭𑁬.

𑀫𑀳𑀸𑀦𑀼𑀪𑀸𑀯𑀧𑀺𑀲𑀼𑀦𑁄, 𑀫𑀼𑀦𑀺𑀦𑁄 𑀫𑀦𑁆𑀤𑀫𑀸𑀭𑀼𑀢𑁄;

𑀲𑀩𑁆𑀩𑁄𑀢𑀼𑀓𑀫𑀬𑀁 𑀯𑀸𑀬𑀺, 𑀥𑀼𑀦𑀦𑁆𑀢𑁄 𑀓𑀼𑀲𑀼𑀫𑀁 𑀲𑀫𑀁.

𑁭𑁬. ‘‘𑀫𑀳𑀸’’𑀇𑀘𑁆𑀘𑀸𑀤𑀺. 𑀫𑀦𑁆𑀤𑁄 𑀫𑀼𑀤𑀼𑀪𑀽𑀢𑁄 𑀫𑀸𑀭𑀼𑀢𑁄 𑀅𑀬𑀁 𑀲𑀩𑁆𑀩𑁄𑀢𑀼𑀓𑀁 𑀲𑀩𑁆𑀩𑁂𑀲𑀼 𑀉𑀢𑀽𑀲𑀼 𑀧𑀼𑀧𑁆𑀨𑀦𑀓𑀁 𑀓𑀼𑀲𑀼𑀫𑀁 𑀧𑀼𑀧𑁆𑀨𑀁 𑀲𑀫𑀁 𑀏𑀓𑀢𑁄 𑀓𑀢𑁆𑀯𑀸 𑀥𑀼𑀦𑀦𑁆𑀢𑁄 𑀯𑀺𑀓𑀺𑀭𑀦𑁆𑀢𑁄 𑀫𑀼𑀦𑀺𑀦𑁄 𑀫𑀼𑀦𑀺𑀲𑀤𑀺𑀲𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀫𑀼𑀦𑀺𑀪𑀸𑀯𑁂𑀦 𑀘 𑀩𑁄𑀥𑀺𑀲𑀢𑁆𑀢𑀲𑁆𑀲, 𑀫𑀼𑀦𑀺𑀦𑁄𑀬𑁂𑀯 𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀲𑀫𑀥𑀺𑀕𑀫𑀲𑀫𑀬𑁂 𑀫𑀳𑀸𑀦𑀼𑀪𑀸𑀯𑀲𑁆𑀲 𑀧𑀺𑀲𑀼𑀦𑁄 𑀲𑀽𑀘𑀓𑁄 𑀯𑀸𑀬𑀺 𑀧𑀯𑀸𑀬𑀢𑀻𑀢𑀺. 𑀏𑀢𑁆𑀣 𑀬𑀤𑁆𑀬𑀧𑁂𑀓𑀤𑀸 𑀲𑀩𑁆𑀩𑁄𑀢𑀼𑀓𑀸𑀲𑀫𑁆𑀪𑀯𑁄 𑀦𑀸𑀦𑀸𑀉𑀢𑀽𑀲𑀼 𑀦𑀸𑀦𑀸𑀓𑀼𑀲𑀼𑀫𑀲𑁆𑀲 𑀲𑀫𑁆𑀪𑀯𑀸, 𑀢𑀣𑀸𑀧𑀺 𑀪𑀕𑀯𑀢𑁄 𑀫𑀳𑀸𑀦𑀼𑀪𑀸𑀯𑀧𑀺𑀲𑀼𑀦𑀫𑀻𑀤𑀺𑀲𑀫𑁂𑀓𑀧𑀤𑀺𑀓𑀁 𑀲𑀫𑁆𑀪𑀯𑀢𑀻𑀢𑀺 𑀓𑀸𑀮𑀯𑀺𑀭𑁄𑀥𑁄 𑀇𑀫𑀺𑀦𑀸 𑀧𑀭𑀺𑀳𑀝𑁄.

𑁭𑁬. ‘‘𑀫𑀳𑀸𑀦𑀼𑀪𑀸𑀯𑁂’’𑀘𑁆𑀘𑀸𑀤𑀺. 𑀅𑀬𑀁 𑀫𑀦𑁆𑀤𑀫𑀸𑀭𑀼𑀢𑁄 𑀅𑀘𑀡𑁆𑀟𑀲𑀫𑀻𑀭𑀡𑁄 𑀲𑀩𑁆𑀩𑁄𑀢𑀼𑀓𑀁 𑀯𑀲𑀦𑁆𑀢𑀸𑀤𑀻𑀲𑀼 𑀲𑀩𑁆𑀩𑀉𑀢𑀽𑀲𑀼 𑀯𑀺𑀓𑀲𑀦𑁆𑀢𑀁 𑀓𑀼𑀲𑀼𑀫𑀁 𑀧𑀼𑀧𑁆𑀨𑀚𑀸𑀢𑀁 𑀲𑀫𑀁 𑀏𑀓𑀢𑁄 𑀓𑀢𑁆𑀯𑀸 𑀥𑀼𑀦𑀦𑁆𑀢𑁄 𑀓𑀫𑁆𑀧𑁂𑀦𑁆𑀢𑁄 𑀫𑀼𑀦𑀺𑀦𑁄 𑀏𑀓𑀦𑁆𑀢𑀪𑀸𑀯𑀺𑀢𑁆𑀢𑀸 𑀫𑀼𑀦𑀺𑀲𑀗𑁆𑀔𑀸𑀢𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲, 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀲𑀫𑀥𑀺𑀕𑀫𑀲𑀫𑀬𑁂 𑀪𑀽𑀢𑀢𑁆𑀢𑀸 𑀫𑀼𑀦𑀺𑀦𑁄 𑀲𑀩𑁆𑀩𑀜𑁆𑀜𑀼𑀦𑁄 𑀯𑀸 𑀫𑀳𑀸𑀦𑀼𑀪𑀸𑀯𑀧𑀺𑀲𑀼𑀦𑁄 𑀫𑀳𑀦𑁆𑀢𑀁 𑀧𑀼𑀜𑁆𑀜𑀧𑁆𑀧𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀯𑀸𑀬𑀺 𑀲𑀫𑁆𑀧𑀯𑀸𑀬𑀻𑀢𑀺. 𑀏𑀢𑁆𑀣 𑀦𑀸𑀦𑀸𑀓𑀸𑀮𑁂 𑀲𑀫𑁆𑀪𑀯𑀦𑁆𑀢𑀸𑀦𑀫𑁆𑀧𑀺 𑀓𑀼𑀲𑀼𑀫𑀸𑀦𑀁 𑀏𑀓𑀓𑀸𑀮𑁂 𑀲𑀫𑁆𑀪𑀯𑀲𑁆𑀲 𑀓𑀸𑀮𑀯𑀺𑀭𑁄𑀥𑀢𑁆𑀢𑁂𑀧𑀺 𑀪𑀕𑀯𑀢𑁄 𑀧𑀼𑀜𑁆𑀜𑀸𑀦𑀼𑀪𑀸𑀯𑁄 𑀢𑀸𑀤𑀺𑀲𑀫𑀘𑁆𑀙𑀭𑀺𑀬𑀫𑁂𑀓𑀓𑁆𑀔𑀡𑁂 𑀚𑀦𑁂𑀢𑀼𑀁 𑀲𑀫𑀢𑁆𑀣𑁄𑀢𑀺 𑀓𑀸𑀮𑀯𑀺𑀭𑁄𑀥𑀁 ‘‘𑀫𑀳𑀸𑀦𑀼𑀪𑀸𑀯𑀧𑀺𑀲𑀼𑀦𑁄’’𑀢𑀺 𑀇𑀫𑀺𑀦𑀸 𑀦𑀺𑀭𑀸𑀓𑀭𑁄𑀢𑀺. 𑀫𑀳𑀸𑀦𑀼𑀪𑀸𑀯𑀲𑁆𑀲, 𑀫𑀳𑀸𑀦𑀼𑀪𑀸𑀯𑀁 𑀯𑀸 𑀧𑀺𑀲𑀼𑀦𑁄𑀢𑀺 𑀯𑀸𑀓𑁆𑀬𑀁.

𑀓𑀮𑀸𑀯𑀺𑀭𑁄𑀥𑀺𑀦𑁄 𑀬𑀣𑀸 𑁋

𑁭𑁭.

𑀦𑀺𑀫𑀼𑀕𑁆𑀕𑀫𑀦𑀲𑁄 ¶ 𑀩𑀼𑀤𑁆𑀥-𑀕𑀼𑀡𑁂 𑀧𑀜𑁆𑀘𑀲𑀺𑀔𑀲𑁆𑀲𑀧𑀺;

𑀢𑀦𑁆𑀢𑀺𑀲𑁆𑀲𑀭𑀯𑀺𑀭𑁄𑀥𑁄 𑀲𑁄, 𑀦 𑀲𑀫𑁆𑀧𑀻𑀡𑁂𑀢𑀺 𑀓𑀁 𑀚𑀦𑀁.

𑁭𑁭. ‘‘𑀦𑀺𑀫𑀼𑀕𑁆𑀕𑀺’’𑀘𑁆𑀘𑀸𑀤𑀺. 𑀩𑀼𑀤𑁆𑀥𑀲𑁆𑀲 𑀕𑀼𑀡𑁂 𑀲𑀻𑀮𑀸𑀤𑀺𑀓𑁂 𑀅𑀧𑀭𑀺𑀫𑀸𑀡𑁂 𑀦𑀺𑀫𑀼𑀕𑁆𑀕𑀁 𑀑𑀕𑀸𑀴𑁆𑀳𑀁 𑀫𑀦𑀁 𑀘𑀺𑀢𑁆𑀢𑀁 𑀬𑀲𑁆𑀲 𑀢𑀲𑁆𑀲 𑀧𑀜𑁆𑀘𑀲𑀺𑀔𑀲𑁆𑀲 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑀲𑁆𑀲𑀧𑀺 𑀯𑀻𑀡𑀸𑀬 𑀢𑀦𑁆𑀢𑀺𑀬𑀸 𑀲𑀭𑁄 𑀓𑀺𑀭𑀺𑀬𑀸𑀓𑀸𑀮𑀫𑀸𑀦𑀮𑀓𑁆𑀔𑀡𑀯𑀺𑀮𑀫𑁆𑀩𑀺𑀢𑀤𑀼𑀢𑀫𑀚𑁆𑀛𑀪𑁂𑀤𑀪𑀺𑀦𑁆𑀦𑁄 𑀙𑀚𑁆𑀚𑀸𑀤𑀺𑀓𑁄 𑀢𑀲𑁆𑀲 𑀯𑀺𑀭𑁄𑀥𑁄 𑀓𑀮𑀸𑀲𑀢𑁆𑀣𑀧𑀭𑀺𑀦𑀺𑀤𑁆𑀤𑀺𑀝𑁆𑀞𑀓𑀫𑀯𑁂𑀲𑀫𑀁 𑀓𑀁 𑀚𑀦𑀁 𑀦 𑀲𑀫𑁆𑀧𑀻𑀡𑁂𑀢𑀺, 𑀧𑀻𑀡𑁂𑀢𑀺𑀬𑁂𑀯. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀮𑁄𑀓𑀺𑀬𑀕𑀼𑀡𑀸𑀦𑀼𑀩𑀦𑁆𑀥𑀩𑀼𑀤𑁆𑀥𑀻𑀦𑀁 𑀯𑀺𑀓𑁆𑀔𑁂𑀧𑀧𑁆𑀧𑀯𑀢𑁆𑀢𑀺𑀧𑀺 𑀢𑀣𑀸𑀯𑀺𑀥𑀁 𑀧𑀻𑀡𑁂𑀢𑀻𑀢𑀺. ‘‘𑀩𑀼𑀤𑁆𑀥𑀕𑀼𑀡𑁂 𑀦𑀺𑀫𑀼𑀕𑁆𑀕𑀫𑀦𑀲𑁄’’𑀢𑀺 𑀇𑀫𑀺𑀦𑀸 𑀓𑀮𑀸𑀯𑀺𑀭𑁄𑀥𑁄 𑀧𑀭𑀺𑀳𑀝𑁄.

𑁭𑁭. ‘‘𑀦𑀺𑀫𑀼𑀕𑁆𑀕𑀺’’𑀘𑁆𑀘𑀸𑀤𑀺. 𑀩𑀼𑀤𑁆𑀥𑀕𑀼𑀡𑁂 𑀲𑀩𑁆𑀩𑀜𑁆𑀜𑀼𑀦𑁄 𑀯𑀺𑀫𑁆𑀳𑀬𑀚𑀦𑀓𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀪𑀸𑀭𑁂 𑀦𑀺𑀫𑀼𑀕𑁆𑀕𑀫𑀦𑀲𑁄 𑀑𑀢𑀺𑀡𑁆𑀡𑀘𑀺𑀢𑁆𑀢𑀲𑁆𑀲 𑀧𑀜𑁆𑀘𑀲𑀺𑀔𑀲𑁆𑀲𑀧𑀺 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑀲𑁆𑀲𑀸𑀧𑀺 𑀲𑁄 𑀢𑀦𑁆𑀢𑀺𑀲𑁆𑀲𑀭𑀯𑀺𑀭𑁄𑀥𑁄 𑀯𑀻𑀡𑀸𑀬 𑀢𑀦𑁆𑀢𑀺𑀬𑀸 𑀖𑀝𑁆𑀝𑀦𑀓𑀺𑀭𑀺𑀬𑀸, 𑀅𑀤𑁆𑀥𑀫𑀢𑁆𑀢𑀺𑀓𑀸𑀤𑀺𑀓𑀸𑀮𑁄, 𑀳𑀢𑁆𑀣𑀸𑀤𑀻𑀦𑀁 𑀲𑀦𑁆𑀦𑀺𑀯𑁂𑀲𑀮𑀓𑁆𑀔𑀡𑁄 𑀫𑀸𑀦𑁄𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀮𑀓𑁆𑀔𑀡𑁂𑀳𑀺 𑀬𑀼𑀢𑁆𑀢𑀲𑁆𑀲 𑀫𑀦𑁆𑀤𑀲𑀻𑀖𑀫𑀚𑁆𑀛𑀺𑀫𑀧𑁆𑀧𑀫𑀸𑀡𑁂𑀳𑀺 𑀪𑀺𑀦𑁆𑀦𑀲𑁆𑀲 𑀙𑀚𑁆𑀚𑀸𑀤𑀺𑀲𑀢𑁆𑀢𑀲𑀭𑀲𑁆𑀲 𑀓𑀮𑀸𑀲𑀢𑁆𑀣𑀸𑀕𑀢𑀓𑁆𑀓𑀫𑀲𑁆𑀲 𑀯𑀺𑀦𑀸𑀲𑀲𑀗𑁆𑀔𑀸𑀢𑁄 𑀯𑀺𑀭𑁄𑀥𑁄 𑀓𑀁 𑀚𑀦𑀁 𑀦 𑀲𑀫𑁆𑀧𑀻𑀡𑁂𑀢𑀺, 𑀲𑀫𑁆𑀧𑀻𑀡𑁂𑀢𑀺 𑀏𑀯. 𑀏𑀢𑁆𑀣 𑀅𑀓𑀦𑁆𑀢𑀺𑀬𑀸 𑀓𑀸𑀭𑀡𑀪𑀽𑀢𑁄 𑀓𑀮𑀸𑀲𑀢𑁆𑀣𑀸𑀕𑀢𑀓𑁆𑀓𑀫𑀪𑀗𑁆𑀕𑁄 𑀮𑁄𑀓𑀼𑀢𑁆𑀢𑀭𑀩𑀼𑀤𑁆𑀥𑀕𑀼𑀡𑀸𑀦𑀼𑀕𑀢𑀩𑀼𑀤𑁆𑀥𑀺𑀬𑀸 𑀚𑀸𑀢𑁄𑀢𑀺 𑀲𑁄 𑀪𑀗𑁆𑀕𑁄 ‘‘𑀦𑀺𑀫𑀼𑀕𑁆𑀕𑀫𑀦𑀲𑁄 𑀩𑀼𑀤𑁆𑀥𑀕𑀼𑀡𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀻𑀢𑀺𑀬𑀸 𑀓𑀸𑀭𑀡𑀫𑁂𑀯𑁂𑀢𑀺 𑀦 𑀯𑀺𑀭𑁄𑀥𑁄. 𑀦𑀺𑀫𑀼𑀕𑁆𑀕𑁄 𑀫𑀦𑁄 𑀅𑀲𑁆𑀲𑀸𑀢𑀺 𑀘, 𑀢𑀦𑁆𑀢𑀺𑀬𑀸 𑀲𑀭𑁄𑀢𑀺 𑀘, 𑀢𑁂𑀲𑀁 𑀯𑀺𑀭𑁄𑀥𑁄𑀢𑀺 𑀘 𑀯𑀸𑀓𑁆𑀬𑀁.

𑀮𑁄𑀓𑀯𑀺𑀭𑁄𑀥𑀺𑀦𑁄 𑀬𑀣𑀸 𑁋

𑁭𑁮.

𑀕𑀡𑀬𑁂 ¶ 𑀘𑀓𑁆𑀓𑀯𑀸𑀴𑀁 𑀲𑁄, 𑀘𑀦𑁆𑀤𑀦𑀸𑀬𑀧𑀺 𑀲𑀻𑀢𑀮𑀁;

𑀲𑀫𑁆𑀩𑁄𑀥𑀺𑀲𑀢𑁆𑀢𑀳𑀤𑀬𑁄, 𑀧𑀤𑀺𑀢𑁆𑀢𑀗𑁆𑀕𑀸𑀭𑀧𑀽𑀭𑀺𑀢𑀁.

𑁭𑁮. ‘‘𑀕𑀡𑀬𑁂’’𑀘𑁆𑀘𑀸𑀤𑀺. 𑀘𑀦𑁆𑀤𑀦𑀸𑀬 𑀅𑀧𑀺 𑀲𑀻𑀢𑀮𑀁 𑀕𑀡𑀬𑁂 𑀘𑀺𑀦𑁆𑀢𑁂𑀲𑀺. 𑀓𑀺𑀦𑁆𑀢𑀁? 𑀧𑀤𑀺𑀢𑁆𑀢𑀗𑁆𑀕𑀸𑀭𑀧𑀽𑀭𑀺𑀢𑀁 𑀘𑀓𑁆𑀓𑀯𑀸𑀴𑀁. 𑀓𑁄 𑀲𑁄? 𑀲𑀫𑁆𑀩𑁄𑀥𑀺𑀬𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂 𑀲𑀢𑁆𑀢𑀁 𑀧𑀭𑀺𑀩𑀤𑁆𑀥𑀁 𑀳𑀤𑀬𑀁 𑀘𑀺𑀢𑁆𑀢𑀁 𑀬𑀲𑁆𑀲 𑀲𑁄. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀦𑀼𑀩𑀦𑁆𑀥𑀩𑀼𑀤𑁆𑀥𑀺𑀦𑁄 𑀳𑀺 𑀢𑀸𑀤𑀺𑀲𑁄 𑀫𑀦𑁄𑀩𑀦𑁆𑀥𑁄𑀢𑀺 𑀦 𑀮𑁄𑀓𑀯𑀺𑀭𑁄𑀥𑁄.

𑁭𑁮. ‘‘𑀕𑀡𑀬𑁂’’𑀘𑁆𑀘𑀸𑀤𑀺. 𑀲𑀫𑁆𑀩𑁄𑀥𑀺𑀲𑀢𑁆𑀢𑀳𑀤𑀬𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂 𑀆𑀲𑀢𑁆𑀢𑀘𑀺𑀢𑁆𑀢𑁄 𑀲𑁄 𑀩𑁄𑀥𑀺𑀲𑀢𑁆𑀢𑁄 𑀧𑀤𑀺𑀢𑁆𑀢𑀗𑁆𑀕𑀸𑀭𑀧𑀽𑀭𑀺𑀢𑀁 𑀆𑀤𑀺𑀢𑁆𑀢𑀗𑁆𑀕𑀸𑀭𑁂𑀳𑀺 𑀧𑀭𑀺𑀧𑀼𑀡𑁆𑀡𑀁 𑀘𑀓𑁆𑀓𑀯𑀸𑀴𑀁 𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀘𑀦𑁆𑀤𑀦𑀸𑀬𑀧𑀺 𑀘𑀦𑁆𑀤𑀦𑀢𑁄 𑀅𑀧𑀺 𑀲𑀻𑀢𑀮𑀁 𑀅𑀢𑀺𑀲𑀻𑀢𑀮𑀁 𑀓𑀢𑁆𑀯𑀸 𑀕𑀡𑀬𑁂 𑀘𑀺𑀦𑁆𑀢𑁂𑀬𑁆𑀬𑀸𑀢𑀺. 𑀇𑀝𑁆𑀞𑀢𑁆𑀣𑀮𑀼𑀤𑁆𑀥𑀲𑁆𑀲 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀈𑀤𑀺𑀲𑀢𑁆𑀢𑀸 𑀅𑀕𑁆𑀕𑀺𑀦𑁄 𑀘𑀦𑁆𑀤𑀦𑀢𑁄𑀧𑀺 𑀅𑀥𑀺𑀓𑀲𑀻𑀢𑀢𑁆𑀢𑀓𑀧𑁆𑀧𑀦𑀸 ‘‘𑀘𑀦𑁆𑀤𑀦𑀁 𑀲𑀻𑀢𑀮𑀁, 𑀅𑀕𑁆𑀕𑀺 𑀉𑀡𑁆𑀳𑁄’’𑀢𑀺 𑀧𑀯𑀢𑁆𑀢𑀮𑁄𑀓𑀲𑀻𑀫𑀸𑀬 𑀯𑀺𑀭𑀼𑀤𑁆𑀥𑀸 𑀦 𑀳𑁄𑀢𑀺. 𑀲𑀫𑁆𑀩𑁄𑀥𑀺𑀬𑀁 𑀲𑀢𑁆𑀢𑀳𑀤𑀬𑀁 𑀬𑀲𑁆𑀲𑁂𑀢𑀺 𑀘, 𑀧𑀤𑀺𑀢𑁆𑀢𑀸𑀦𑀺 𑀅𑀗𑁆𑀕𑀸𑀭𑀸𑀦𑀻𑀢𑀺 𑀘, 𑀢𑁂𑀳𑀺 𑀧𑀽𑀭𑀺𑀢𑀦𑁆𑀢𑀺 𑀘 𑀯𑀺𑀕𑁆𑀕𑀳𑁄.

𑀜𑀸𑀬𑀯𑀺𑀭𑁄𑀥𑀺𑀦𑁄 𑀬𑀣𑀸 𑁋

𑁭𑁯.

𑀧𑀭𑀺𑀘𑁆𑀘𑀢𑁆𑀢𑀪𑀯𑁄𑀧𑀺 𑀢𑁆𑀯-𑀫𑀼𑀧𑀦𑀻𑀢𑀪𑀯𑁄 𑀅𑀲𑀺;

𑀅𑀘𑀺𑀦𑁆𑀢𑁆𑀬𑀕𑀼𑀡𑀲𑀸𑀭𑀸𑀬, 𑀦𑀫𑁄 𑀢𑁂 𑀫𑀼𑀦𑀺𑀧𑀼𑀗𑁆𑀕𑀯.

𑁭𑁯. ‘‘𑀧𑀭𑀺𑀘𑁆𑀘𑀢𑁆𑀢𑁂’’𑀘𑁆𑀘𑀸𑀤𑀺. 𑀫𑀼𑀦𑀺𑀧𑀼𑀗𑁆𑀕𑀯 𑀫𑀼𑀦𑀻𑀦𑀁 𑀉𑀢𑁆𑀢𑀫 𑀧𑀭𑀺𑀘𑁆𑀘𑀢𑁆𑀢𑁄 𑀯𑀺𑀲𑀝𑁆𑀞𑁄 𑀪𑀯𑁄 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀲𑀗𑁆𑀔𑀸𑀢𑁄 𑀬𑁂𑀦𑀸𑀢𑀺 𑀧𑀭𑀺𑀘𑁆𑀘𑀢𑁆𑀢𑀪𑀯𑁄𑀧𑀺 𑀢𑁆𑀯𑀁 𑀉𑀧𑀦𑀻𑀢𑁄 𑀆𑀦𑀻𑀢𑁄 𑀧𑀯𑀢𑁆𑀢𑀺𑀢𑁄 𑀪𑀯𑁄 𑀯𑀼𑀟𑁆𑀠𑀺 𑀬𑁂𑀦𑀸𑀢𑀺 𑀉𑀧𑀦𑀻𑀢𑀪𑀯𑁄 𑀅𑀲𑀺. 𑀢𑀲𑁆𑀫𑀸 𑀓𑀸𑀭𑀡𑀸 𑀅𑀘𑀺𑀦𑁆𑀢𑁆𑀬𑀕𑀼𑀡𑀲𑀸𑀭𑀸𑀬 𑀢𑁂 𑀦𑀫𑁄 𑀅𑀢𑁆𑀣𑀽𑀢𑀺 𑀲𑁂𑀲𑁄. 𑀈𑀤𑀺𑀲𑀁 𑀦 𑀜𑀸𑀬𑀯𑀺𑀭𑀼𑀤𑁆𑀥𑀫𑁂𑀯𑀁𑀯𑀺𑀥𑀢𑁆𑀢𑀸 𑀫𑀼𑀦𑀺𑀧𑀼𑀗𑁆𑀕𑀯𑀲𑁆𑀲.

𑁭𑁯. ‘‘𑀧𑀭𑀺𑀘𑁆𑀘𑀢𑁆𑀢𑁂’’𑀘𑁆𑀘𑀸𑀤𑀺. 𑀫𑀼𑀦𑀺𑀧𑀼𑀗𑁆𑀕𑀯 𑀫𑀼𑀦𑀺𑀲𑁂𑀝𑁆𑀞 𑀢𑁆𑀯𑀁 𑀧𑀭𑀺𑀘𑁆𑀘𑀢𑁆𑀢𑀪𑀯𑁄𑀧𑀺 𑀅𑀧𑀦𑀻𑀢𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀪𑀯𑁄𑀧𑀺 𑀉𑀧𑀦𑀻𑀢𑀪𑀯𑁄 𑀮𑁄𑀓𑀲𑁆𑀲𑀸𑀦𑀻𑀢𑀅𑀪𑀺𑀯𑀼𑀤𑁆𑀥𑀺𑀓𑁄 𑀅𑀲𑀺 𑀪𑀯𑀲𑀺, 𑀅𑀘𑀺𑀦𑁆𑀢𑁆𑀬𑀕𑀼𑀡𑀲𑀸𑀭𑀸𑀬 𑀢𑀢𑁄 𑀏𑀯 𑀘𑀺𑀦𑁆𑀢𑀸𑀯𑀺𑀲𑀬𑀸𑀢𑀺𑀓𑁆𑀓𑀦𑁆𑀢𑀲𑀸𑀭𑀕𑀼𑀡𑀲𑁆𑀲 𑀢𑁂 𑀢𑀼𑀬𑁆𑀳𑀁 𑀦𑀫𑁄 𑀅𑀢𑁆𑀣𑀽𑀢𑀺 𑀲𑀩𑁆𑀩𑀸𑀓𑀸𑀭𑀢𑁄 𑀪𑀯𑀲𑁆𑀲 𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀅𑀢𑁆𑀢𑀦𑀺 𑀅𑀯𑀺𑀚𑁆𑀚𑀫𑀸𑀦𑀁 ¶ 𑀲𑀼𑀕𑀢𑀺𑀪𑀯𑀁 𑀮𑁄𑀓𑀲𑁆𑀲 𑀤𑁂𑀢𑀻𑀢𑀺 𑀏𑀢𑀁 𑀜𑀸𑀬𑀸𑀕𑀢𑀁 𑀦 𑀳𑁄𑀢𑀻𑀢𑀺 𑀧𑀝𑀺𑀪𑀸𑀢𑀺, 𑀢𑀣𑀸𑀧𑀺 𑀘 𑀲𑀩𑁆𑀩𑀜𑁆𑀜𑀽𑀦𑀁 𑀧𑀯𑀢𑁆𑀢𑀺 𑀈𑀤𑀺𑀲𑀸𑀬𑁂𑀯𑀸𑀢𑀺 𑀜𑀸𑀬𑀯𑀺𑀭𑁄𑀥𑁄 𑀦𑀺𑀭𑀸𑀓𑀢𑁄. 𑀅𑀘𑀺𑀦𑁆𑀢𑁆𑀬𑀸 𑀕𑀼𑀡𑀲𑀸𑀭𑀸 𑀬𑀲𑁆𑀫𑀺𑀦𑁆𑀢𑀺 𑀯𑀺𑀕𑁆𑀕𑀳𑁄.

𑀆𑀕𑀫𑀯𑀺𑀭𑁄𑀥𑀺𑀦𑁄 𑀬𑀣𑀸 𑁋

𑁮𑁦.

𑀦𑁂𑀯𑀸𑀮𑀧𑀢𑀺 𑀓𑁂𑀦𑀸𑀧𑀺, 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀢𑁄 𑀬𑀢𑀺;

𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀸, 𑀨𑀼𑀲𑁂𑀬𑁆𑀬𑀸𑀧𑀢𑁆𑀢𑀺𑀤𑀼𑀓𑁆𑀓𑀝𑀁.

𑁮𑁦. ‘‘𑀦𑁂𑀯𑁂’’𑀢𑀺𑀆𑀤𑀺. 𑀬𑀢𑀻𑀢𑀺 𑀪𑀺𑀓𑁆𑀔𑀼 𑀓𑁂𑀦𑀸𑀧𑀺 𑀲𑀳 𑀦𑁂𑀯𑀸𑀮𑀧𑀢𑀺 𑀦 𑀯𑀤𑀢𑁆𑀬𑁂𑀯, 𑀢𑀣𑀸𑀧𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀢𑁄 𑀘𑁄𑀧𑀦𑀯𑀸𑀘𑀸𑀲𑀗𑁆𑀔𑀸𑀢𑁂𑀦 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀳𑁂𑀢𑀼𑀦𑀸 𑀧𑀯𑀢𑁆𑀢𑀺𑀢𑁄 𑀲𑀫𑁆𑀧𑀚𑀸𑀦𑀦𑁆𑀢𑀲𑁆𑀲 𑀫𑀼𑀲𑀸𑀯𑀸𑀤𑀢𑁄 𑀓𑀸𑀭𑀡𑀸 𑀆𑀧𑀢𑁆𑀢𑀺𑀤𑀼𑀓𑁆𑀓𑀝𑀁 ‘‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀲𑁆𑀲 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀨𑀼𑀲𑁂𑀬𑁆𑀬 𑀆𑀧𑀚𑁆𑀚𑀢𑀻𑀢𑀺. 𑀏𑀢𑁆𑀣 𑀅𑀦𑀸𑀮𑀧𑀢𑁄 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑀸 𑀓𑀣𑀁 𑀫𑀼𑀲𑀸𑀯𑀸𑀤𑁄𑀢𑀺 𑀅𑀪𑀺𑀥𑀫𑁆𑀫𑀸𑀧𑀦𑁆𑀦𑀯𑀺𑀭𑁄𑀥𑁄 𑀦𑀢𑁆𑀣𑀺, 𑀅𑀧𑀭𑀯𑀘𑀦𑀢𑁆𑀣𑁂 𑀢𑁆𑀯𑀻𑀤𑀺𑀲𑁄 𑀯𑀺𑀭𑀼𑀚𑁆𑀛𑀢𑀻𑀢𑀺.

𑁮𑁦. ‘‘𑀦𑁂𑀯𑀺’’𑀘𑁆𑀘𑀸𑀤𑀺. 𑀬𑀢𑀺 𑀲𑀫𑀡𑁄 𑀓𑁂𑀦𑀸𑀧𑀺 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀦𑁂𑀯𑀸𑀮𑀧𑀢𑀺 𑀦𑁄 𑀪𑀸𑀲𑀢𑀺, 𑀢𑀣𑀸𑀧𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀢𑁄 𑀘𑁄𑀧𑀦𑀯𑀸𑀘𑀸𑀲𑀗𑁆𑀔𑀸𑀢𑀯𑀺𑀜𑁆𑀜𑀢𑁆𑀢𑀺𑀓𑀸𑀭𑀡𑀸 𑀧𑀯𑀢𑁆𑀢𑀦𑀢𑁄 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀸 𑀲𑀫𑁆𑀧𑀚𑀸𑀦𑀦𑁆𑀢𑀲𑁆𑀲 𑀫𑀼𑀲𑀸𑀪𑀡𑀦𑀢𑁄 𑀆𑀧𑀢𑁆𑀢𑀺𑀤𑀼𑀓𑁆𑀓𑀝𑀁 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀁 𑀨𑀼𑀲𑁂𑀬𑁆𑀬 𑀆𑀧𑀚𑁆𑀚𑁂𑀬𑁆𑀬𑀸𑀢𑀺. 𑀏𑀢𑁆𑀣 𑀅𑀦𑀸𑀮𑀧𑀦𑁆𑀢𑀲𑁆𑀲 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀢𑁄 𑀫𑀼𑀲𑀸𑀯𑀸𑀤𑁄 𑀓𑀣𑀁 𑀲𑀫𑁆𑀪𑀯𑀢𑀻𑀢𑀺 𑀅𑀪𑀺𑀥𑀫𑁆𑀫𑀸𑀧𑀦𑁆𑀦𑀯𑀺𑀭𑁄𑀥𑁄, ‘‘𑀲𑀦𑁆𑀢𑀺𑀁 𑀆𑀧𑀢𑁆𑀢𑀺𑀁 𑀦𑀸𑀯𑀺𑀓𑀭𑁂𑀬𑁆𑀬, 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤’𑀲𑁆𑀲 𑀳𑁄𑀢𑀻’’𑀢𑀺 𑀦𑀺𑀤𑀸𑀦𑀼𑀤𑁆𑀤𑁂𑀲𑁂 𑀦𑀺𑀤𑁆𑀤𑀺𑀝𑁆𑀞𑀯𑀘𑀻𑀤𑁆𑀯𑀸𑀭𑁂 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀆𑀕𑀫𑀯𑀺𑀭𑁄𑀥𑁄 𑀦𑀺𑀭𑀸𑀓𑀢𑁄. 𑀫𑀼𑀲𑀸𑀪𑀡𑀦𑀁 𑀯𑀺𑀦𑀸 𑀆𑀧𑀢𑁆𑀢𑀺 𑀓𑀣𑀁 𑀪𑀯𑀢𑀻𑀢𑀺? 𑀬𑀣𑀸 𑀓𑀸𑀮𑁂 𑀅𑀯𑀲𑁆𑀲𑀫𑀸𑀦𑀫𑁂𑀖𑀢𑁄 𑀲𑀜𑁆𑀚𑀸𑀢𑀤𑀼𑀩𑁆𑀪𑀺𑀓𑁆𑀔𑀁 ‘‘𑀫𑁂𑀖𑀓𑀢𑀁 𑀤𑀼𑀩𑁆𑀪𑀺𑀓𑁆𑀔’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺, 𑀏𑀯𑀁 𑀓𑀣𑁂𑀢𑀩𑁆𑀩𑀓𑀸𑀮𑁂 𑀅𑀓𑀣𑀦𑀢𑁄 𑀲𑀜𑁆𑀚𑀸𑀢𑀸 𑀯𑀘𑀻𑀤𑁆𑀯𑀸𑀭𑁂 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀸 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀧𑀺 ¶ 𑀢𑀢𑁄 𑀲𑀜𑁆𑀚𑀸𑀢𑀸𑀢𑀺 𑀯𑀢𑁆𑀢𑀩𑁆𑀩𑀸 𑀳𑁄𑀢𑀺. 𑀲𑀫𑁆𑀧𑀚𑀸𑀦𑀦𑁆𑀢𑀲𑁆𑀲 𑀫𑀼𑀲𑀸𑀯𑀸𑀤𑁄𑀢𑀺 𑀘, 𑀆𑀧𑀢𑁆𑀢𑀺𑀬𑁂𑀯 𑀤𑀼𑀓𑁆𑀓𑀝𑀦𑁆𑀢𑀺 𑀘 𑀯𑀸𑀓𑁆𑀬𑀁.

𑀦𑁂𑀬𑁆𑀬𑀲𑁆𑀲 𑀬𑀣𑀸 𑁋

𑁮𑁧.

𑀫𑀭𑀻𑀘𑀺𑀘𑀦𑁆𑀤𑀦𑀸𑀮𑁂𑀧-𑀮𑀸𑀪𑀸 𑀲𑀻𑀢𑀫𑀭𑀻𑀘𑀺𑀦𑁄 [𑀲𑀺𑀢𑀫𑀭𑀻𑀘𑀺𑀦𑁄 (𑀲𑀻.)];

𑀇𑀫𑀸 𑀲𑀩𑁆𑀩𑀸𑀧𑀺 𑀥𑀯𑀮𑀸, 𑀤𑀺𑀲𑀸 𑀭𑁄𑀘𑀦𑁆𑀢𑀺 𑀦𑀺𑀩𑁆𑀪𑀭𑀁.

𑁮𑁧. ‘‘𑀫𑀭𑀻𑀘𑀻’’𑀢𑁆𑀬𑀸𑀤𑀺. 𑀲𑀻𑀢𑀫𑀭𑀻𑀘𑀺𑀦𑁄 𑀘𑀦𑁆𑀤𑀲𑁆𑀲 𑀫𑀭𑀻𑀘𑀺𑀬𑁄 𑀤𑀻𑀥𑀺𑀢𑀺𑀬𑁄 𑀏𑀯 𑀘𑀦𑁆𑀤𑀦𑀁, 𑀢𑀲𑁆𑀲 𑀆𑀮𑁂𑀧𑁄 𑀉𑀧𑀤𑁂𑀳𑁄, 𑀢𑀲𑁆𑀲 𑀮𑀸𑀪𑁂𑀦 𑀇𑀫𑀸 𑀲𑀩𑁆𑀩𑀸𑀧𑀺 𑀤𑀺𑀲𑀸 𑀦𑀺𑀩𑁆𑀪𑀭𑀫𑀢𑀺𑀲𑀬𑀁 𑀥𑀯𑀮𑀸 𑀲𑁂𑀢𑀸 𑀭𑁄𑀘𑀦𑁆𑀢𑀻𑀢𑀺 𑀦𑀢𑁆𑀣𑁂𑀢𑁆𑀣 𑀦𑁂𑀬𑁆𑀬𑀢𑀸 𑀫𑀭𑀻𑀘𑀺𑀬𑀸 𑀲𑀤𑁆𑀤𑁄𑀧𑀸𑀢𑁆𑀢𑀢𑁆𑀣𑀸𑀬 𑀢𑀼.

𑁮𑁧. ‘‘𑀫𑀭𑀻𑀘𑀺’’𑀘𑁆𑀘𑀸𑀤𑀺. 𑀲𑀻𑀢𑀫𑀭𑀻𑀘𑀺𑀦𑁄 𑀘𑀦𑁆𑀤𑀲𑁆𑀲 𑀫𑀭𑀻𑀘𑀺𑀘𑀦𑁆𑀤𑀦𑀸𑀮𑁂𑀧𑀮𑀸𑀪𑀸 𑀫𑀭𑀻𑀘𑀺𑀲𑀗𑁆𑀔𑀸𑀢𑀘𑀦𑁆𑀤𑀦𑀸𑀮𑁂𑀧𑀲𑁆𑀲 𑀧𑀝𑀺𑀮𑀸𑀪𑀢𑁄 𑀇𑀫𑀸 𑀲𑀩𑁆𑀩𑀸𑀧𑀺 𑀤𑀺𑀲𑀸 𑀦𑀺𑀩𑁆𑀪𑀭𑀫𑀢𑀺𑀲𑀬𑀁 𑀥𑀯𑀮𑀸 𑀲𑁂𑀢𑀸 𑀭𑁄𑀘𑀦𑁆𑀢𑀺 𑀤𑀺𑀩𑁆𑀩𑀦𑁆𑀢𑀻𑀢𑀺. 𑀤𑀺𑀲𑀸𑀦𑀁 𑀥𑀯𑀮𑀓𑀸𑀭𑀡𑀲𑁆𑀲 ‘‘𑀫𑀭𑀻𑀘𑀺𑀘𑀦𑁆𑀤𑀦𑀸𑀮𑁂𑀧𑀮𑀸𑀪𑀸 𑀲𑀻𑀢𑀫𑀭𑀻𑀘𑀺𑀦𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦𑁂𑀬𑁆𑀬𑀤𑁄𑀲𑁄 𑀦 𑀧𑀢𑀺𑀝𑁆𑀞𑀸𑀢𑀺, 𑀘𑀦𑁆𑀤𑀦𑀫𑀺𑀯 𑀘𑀦𑁆𑀤𑀦𑀁, 𑀫𑀭𑀻𑀘𑀺𑀬𑁄𑀬𑁂𑀯 𑀘𑀦𑁆𑀤𑀦𑀫𑀺𑀢𑀺 𑀘, 𑀢𑀲𑁆𑀲 𑀆𑀮𑁂𑀧𑁄𑀢𑀺 𑀘, 𑀢𑀲𑁆𑀲 𑀮𑀸𑀪𑁄𑀢𑀺 𑀘 𑀯𑀺𑀕𑁆𑀕𑀳𑁄.

𑀬𑀣𑀸 𑀯𑀸 𑁋

𑁮𑁧.

𑀫𑀦𑁄𑀦𑀼𑀭𑀜𑁆𑀚𑀦𑁄 𑀫𑀸𑀭-𑀗𑁆𑀕𑀦𑀸𑀲𑀺𑀗𑁆𑀕𑀸𑀭𑀯𑀺𑀩𑁆𑀪𑀫𑁄;

𑀚𑀺𑀦𑁂𑀦𑀸’𑀲𑀫𑀦𑀼𑀜𑁆𑀜𑀸𑀢𑁄, 𑀫𑀸𑀭𑀲𑁆𑀲 𑀳𑀤𑀬𑀸𑀦𑀮𑁄.

𑁮𑁨. ‘‘𑀫𑀦𑁄’’𑀘𑁆𑀘𑀸𑀤𑀺. 𑀫𑀦𑀁 𑀧𑀲𑁆𑀲𑀦𑁆𑀢𑀸𑀦𑀫𑀦𑀼𑀲𑁆𑀲𑀭𑀦𑁆𑀢𑀸𑀦𑀜𑁆𑀘 𑀘𑀺𑀢𑁆𑀢𑀁 𑀅𑀦𑀼𑀭𑀜𑁆𑀚𑁂𑀢𑀻𑀢𑀺 𑀫𑀦𑁄𑀦𑀼𑀭𑀜𑁆𑀚𑀦𑁄, 𑀫𑀸𑀭𑀗𑁆𑀕𑀦𑀸𑀦𑀁 𑀲𑀺𑀗𑁆𑀕𑀸𑀭𑀓𑀢𑁄 𑀯𑀺𑀩𑁆𑀪𑀫𑁄 𑀯𑀺𑀮𑀸𑀲𑁄 𑀚𑀺𑀦𑁂𑀦 𑀅𑀲𑀫𑀦𑀼𑀜𑁆𑀜𑀸𑀢𑁄 𑀅𑀩𑁆𑀪𑀼𑀧𑀕𑀢𑁄 𑀫𑀸𑀭𑀲𑁆𑀲 𑀯𑀲𑀯𑀢𑁆𑀢𑀺𑀦𑁄 𑀳𑀤𑀬𑀸𑀦𑀮𑁄 𑀳𑀤𑀬𑀕𑁆𑀕𑀺 𑀚𑀸𑀢𑁄. 𑀲𑁄𑀓𑁄 𑀘𑁂𑀢𑁆𑀣 𑀅𑀦𑀮𑀢𑁆𑀣𑁂 𑀦𑀺𑀭𑀼𑀧𑁆𑀧𑀺𑀢𑁄 𑀢𑀲𑁆𑀲 ¶ 𑀢𑀸𑀤𑀺𑀲𑀢𑁆𑀣𑀸𑀦𑀢𑀺𑀯𑀢𑁆𑀢𑀦𑀢𑁄, 𑀓𑀸𑀭𑀡𑀦𑁆𑀢𑀼𑀧𑀘𑀸𑀭𑁂𑀦𑀸𑀢𑀺. 𑀏𑀢𑁆𑀣 𑀬𑀚𑁆𑀚𑀧𑀺 𑀫𑀸𑀭𑀗𑁆𑀕𑀦𑀸𑀧𑀭𑀸𑀚𑀬𑁄 𑀦 𑀲𑀤𑁆𑀤𑁄𑀧𑀸𑀢𑁆𑀢𑀢𑁆𑀣𑁄, 𑀢𑀣𑀸𑀧𑀺 ‘‘𑀲𑀺𑀗𑁆𑀕𑀸𑀭𑀯𑀺𑀩𑁆𑀪𑀫𑁄 𑀫𑀸𑀭𑀲𑁆𑀲 𑀳𑀤𑀬𑀕𑁆𑀕𑀻’’𑀢𑀺 𑀯𑀼𑀢𑁆𑀢𑁂 𑀲𑀸𑀫𑀢𑁆𑀣𑀺𑀬𑀸 𑀫𑀸𑀭𑀗𑁆𑀕𑀦𑀸𑀧𑀭𑀸𑀚𑀬𑁄 𑀕𑀫𑁆𑀬𑀢𑁂, 𑀢𑀣𑀸𑀯𑀺𑀥𑀲𑁆𑀲 𑀫𑀸𑀭𑀲𑁄𑀓𑀲𑁆𑀲 𑀫𑀸𑀭𑀗𑁆𑀕𑀦𑀸𑀧𑀭𑀸𑀚𑀬𑀸𑀩𑁆𑀬𑀪𑀺𑀘𑀸𑀭𑀢𑁄. 𑀦𑁂𑀯𑁂𑀤𑀺𑀲𑀲𑁆𑀲 𑀦𑁂𑀬𑁆𑀬𑀢𑀸, 𑀯𑀗𑁆𑀓𑀯𑀼𑀢𑁆𑀢𑀻𑀤𑀺𑀲𑀻 𑀕𑀼𑀡𑁄𑀬𑁂𑀯 𑀩𑀦𑁆𑀥𑀲𑁆𑀲.

𑁮𑁨. 𑀯𑀢𑁆𑀢𑀩𑁆𑀩𑀲𑁆𑀲 𑀜𑀸𑀬𑁄𑀧𑀸𑀢𑁆𑀢𑀢𑁆𑀢𑀸 𑀦𑁂𑀬𑁆𑀬𑀤𑁄𑀲𑀧𑀭𑀺𑀳𑀸𑀭𑀢𑁆𑀣𑀫𑀼𑀤𑀸𑀳𑀭𑀢𑀺 ‘‘𑀫𑀦𑁄’’𑀘𑁆𑀘𑀸𑀤𑀺. 𑀫𑀦𑁄𑀦𑀼𑀭𑀜𑁆𑀚𑀦𑁄 𑀤𑀲𑁆𑀲𑀦𑀲𑀯𑀦𑀸𑀦𑀼𑀲𑁆𑀲𑀭𑀡𑀁 𑀓𑀭𑁄𑀦𑁆𑀢𑀸𑀦𑀁 𑀚𑀦𑀸𑀦𑀁 𑀘𑀺𑀢𑁆𑀢𑀫𑀢𑁆𑀢𑀦𑀺 𑀅𑀦𑀼𑀭𑀜𑁆𑀚𑀦𑁆𑀢𑁄 𑀫𑀸𑀭𑀗𑁆𑀕𑀦𑀸𑀲𑀺𑀗𑁆𑀕𑀸𑀭𑀯𑀺𑀩𑁆𑀪𑀫𑁄 𑀫𑀸𑀭𑀯𑀥𑀽𑀦𑀁 𑀭𑀢𑀺𑀓𑀻𑀴𑀸𑀳𑁂𑀢𑀼𑀪𑀽𑀢𑀓𑀸𑀫𑀧𑀢𑁆𑀣𑀦𑀸𑀲𑀗𑁆𑀔𑀸𑀢𑀲𑀺𑀗𑁆𑀕𑀸𑀭𑁂𑀦 𑀓𑀢𑀮𑀻𑀮𑀸 𑀚𑀺𑀦𑁂𑀦 𑀚𑀺𑀢𑀧𑀜𑁆𑀘𑀫𑀸𑀭𑁂𑀦 𑀲𑀢𑁆𑀣𑀼𑀦𑀸 𑀅𑀲𑀫𑀦𑀼𑀜𑁆𑀜𑀸𑀢𑁄 𑀅𑀦𑀩𑁆𑀪𑀼𑀧𑀕𑀢𑁄 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑁄 𑀫𑀸𑀭𑀲𑁆𑀲 𑀯𑀲𑀯𑀢𑁆𑀢𑀺𑀦𑁄 𑀳𑀤𑀬𑀸𑀦𑀮𑁄 𑀳𑀤𑀬𑀕𑁆𑀕𑀺 𑀅𑀳𑁄𑀲𑀻𑀢𑀺. 𑀅𑀦𑀮𑀢𑁆𑀢𑁂𑀦 𑀓𑀧𑁆𑀧𑀺𑀢𑀓𑀸𑀭𑀺𑀬𑀪𑀽𑀢𑁄 𑀲𑁄𑀓𑁄 𑀫𑀸𑀭𑀗𑁆𑀕𑀦𑀸𑀲𑀺𑀗𑁆𑀕𑀸𑀭𑀯𑀺𑀩𑁆𑀪𑀫𑀲𑀗𑁆𑀔𑀸𑀢𑀓𑀸𑀭𑀡𑁂𑀦 𑀲𑀤𑁆𑀥𑀺𑀁 𑀅𑀪𑁂𑀤𑀓𑀧𑁆𑀧𑀦𑀸𑀬 [𑀅𑀦𑀮𑀢𑁆𑀢𑀓𑀧𑁆𑀧𑀦𑀸𑀬 (𑀓.)] ‘‘𑀕𑀼𑀴𑁄 𑀲𑁂𑀫𑁆𑀳𑀁, 𑀢𑀺𑀧𑀼𑀲𑀁 𑀚𑀭𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀢𑀼𑀮𑁆𑀬𑀸𑀥𑀺𑀓𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑁄 𑀳𑁄𑀢𑀺. 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀫𑀸𑀭𑀗𑁆𑀕𑀦𑀸𑀦𑀁 𑀧𑀭𑀸𑀚𑀬𑀯𑀸𑀘𑀓𑁄 𑀲𑀤𑁆𑀤𑁄 𑀦𑀢𑁆𑀣𑀺, 𑀢𑀣𑀸𑀧𑀺 ‘‘𑀲𑀺𑀗𑁆𑀕𑀸𑀭𑀯𑀺𑀩𑁆𑀪𑀫𑁄 𑀫𑀸𑀭𑀲𑁆𑀲 𑀳𑀤𑀬𑀸𑀦𑀮𑁄’’𑀢𑀺 𑀯𑀼𑀢𑁆𑀢𑁂 𑀫𑀸𑀭𑀗𑁆𑀕𑀦𑀸𑀧𑀭𑀸𑀚𑀬𑀁 𑀯𑀺𑀦𑀸 𑀢𑀸𑀤𑀺𑀲𑀲𑁄𑀓𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀲𑁆𑀲 𑀅𑀦𑀥𑀺𑀕𑀢𑀢𑁆𑀢𑀸 𑀅𑀜𑁆𑀜𑀣𑀸𑀦𑀼𑀧𑀧𑀢𑁆𑀢𑀺𑀮𑀓𑁆𑀔𑀡𑀲𑀸𑀫𑀢𑁆𑀣𑀺𑀬𑁂𑀦 𑀢𑀸𑀲𑀁 𑀧𑀭𑀸𑀚𑀬𑁄 𑀧𑀓𑀸𑀲𑀺𑀢𑁄 𑀳𑁄𑀢𑀻𑀢𑀺 𑀈𑀤𑀺𑀲𑀯𑀗𑁆𑀓𑀯𑀼𑀢𑁆𑀢𑀺𑀬𑀸 𑀩𑀦𑁆𑀥𑀕𑀼𑀡𑀢𑁆𑀢𑀸 𑀦𑁂𑀬𑁆𑀬𑀤𑁄𑀲𑁄 𑀦𑀺𑀭𑀸𑀓𑀢𑁄 𑀳𑁄𑀢𑀻𑀢𑀺. 𑀫𑀦𑁄 𑀅𑀦𑀼𑀭𑀜𑁆𑀚𑁂𑀢𑀻𑀢𑀺 𑀘, 𑀫𑀸𑀭𑀗𑁆𑀕𑀦𑀸𑀦𑀁 𑀲𑀺𑀗𑁆𑀕𑀸𑀭𑁄𑀢𑀺 𑀘, 𑀢𑁂𑀦 𑀓𑀢𑁄 𑀯𑀺𑀩𑁆𑀪𑀫𑁄𑀢𑀺 𑀘 𑀯𑀸𑀓𑁆𑀬𑀁.

𑀯𑀺𑀲𑁂𑀲𑀦𑀸𑀧𑁂𑀓𑁆𑀔𑀲𑁆𑀲 𑀬𑀣𑀸 𑁋

𑁮𑁩.

𑀅𑀧𑀬𑀸𑀢𑀸𑀧𑀭𑀸𑀥𑀫𑁆𑀧𑀺, 𑀅𑀬𑀁 𑀯𑁂𑀭𑀻 𑀚𑀦𑀁 𑀚𑀦𑁄;

𑀓𑁄𑀥𑀧𑀸𑀝𑀮𑀪𑀽𑀢𑁂𑀦, 𑀪𑀺𑀬𑁆𑀬𑁄 𑀧𑀲𑁆𑀲𑀢𑀺 𑀘𑀓𑁆𑀔𑀼𑀦𑀸.

𑁮𑁩. ‘‘𑀅𑀧𑀬𑀸𑀢𑁂’’𑀘𑁆𑀘𑀸𑀤𑀺. ¶ 𑀅𑀬𑀁 𑀯𑁂𑀭𑀻 𑀚𑀦𑁄 𑀅𑀧𑀬𑀸𑀢𑀸𑀧𑀭𑀸𑀥𑀫𑁆𑀧𑀺 𑀚𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀧𑀬𑀸𑀢𑁄 𑀅𑀧𑀕𑀢𑁄 𑀅𑀧𑀭𑀸𑀥𑁄 𑀬𑀲𑁆𑀲 𑀢𑀁, 𑀓𑁄𑀥𑁂𑀦 𑀧𑀸𑀝𑀮𑀪𑀽𑀢𑁂𑀦 𑀲𑁂𑀢𑀭𑀢𑁆𑀢𑁂𑀦. 𑀇𑀫𑀺𑀦𑀸 𑀯𑀺𑀲𑁂𑀲𑀦𑀸𑀧𑁂𑀓𑁆𑀔𑀤𑁄𑀲𑁄 𑀧𑀭𑀺𑀳𑀝𑁄.

𑁮𑁩. ‘‘𑀅𑀧𑀬𑀸𑀢𑀺’’𑀘𑁆𑀘𑀸𑀤𑀺. 𑀅𑀬𑀁 𑀯𑁂𑀭𑀻 𑀚𑀦𑁄 𑀅𑀧𑀬𑀸𑀢𑀸𑀧𑀭𑀸𑀥𑀫𑁆𑀧𑀺 𑀅𑀧𑀕𑀢𑀸𑀧𑀭𑀸𑀥𑀫𑁆𑀧𑀺 𑀚𑀦𑀁 𑀓𑁄𑀥𑀧𑀸𑀝𑀮𑀪𑀽𑀢𑁂𑀦 𑀓𑁄𑀥𑁂𑀦 𑀪𑀽𑀢𑀲𑁂𑀢𑀮𑁄𑀳𑀺𑀢𑀯𑀡𑁆𑀡𑀬𑀼𑀢𑁆𑀢𑁂𑀦 𑀘𑀓𑁆𑀔𑀼𑀦𑀸 𑀪𑀺𑀬𑁆𑀬𑁄 𑀬𑁂𑀪𑀼𑀬𑁆𑀬𑁂𑀦 𑀧𑀲𑁆𑀲𑀢𑀻𑀢𑀺. ‘‘𑀧𑀲𑁆𑀲𑀢𑀻’’𑀢𑀺 𑀯𑀘𑀦𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑁂𑀧𑀺 ‘‘𑀘𑀓𑁆𑀔𑀼𑀦𑀸’’𑀢𑀺 𑀯𑀺𑀲𑁂𑀲𑁆𑀬𑀯𑀘𑀦𑀁 ‘‘𑀓𑁄𑀥𑀧𑀸𑀝𑀮𑀪𑀽𑀢𑁂𑀦𑀸’’𑀢𑀺 𑀯𑀺𑀲𑁂𑀲𑀦𑀲𑁆𑀲 𑀮𑀩𑁆𑀪𑀫𑀸𑀦𑀢𑁆𑀢𑀸 𑀲𑀸𑀢𑁆𑀣𑀓𑀁 𑀳𑁄𑀢𑀻𑀢𑀺 𑀯𑀺𑀲𑁂𑀲𑀦𑀸𑀧𑁂𑀓𑁆𑀔𑀤𑁄𑀲𑁄 𑀦𑀺𑀭𑀸𑀓𑀢𑁄𑀢𑀺. 𑀅𑀧𑀬𑀸𑀢𑁄 𑀅𑀧𑀕𑀢𑁄 𑀅𑀧𑀭𑀸𑀥𑁄 𑀅𑀲𑁆𑀫𑀸𑀢𑀺 𑀘, 𑀓𑁄𑀥𑁂𑀦 𑀧𑀸𑀝𑀮𑀪𑀽𑀢𑀦𑁆𑀢𑀺 𑀘 𑀯𑀺𑀕𑁆𑀕𑀳𑁄.

𑀳𑀻𑀦𑀢𑁆𑀣𑀲𑁆𑀲 𑀬𑀣𑀸 𑁋

𑁮𑁪.

𑀅𑀧𑁆𑀧𑀓𑀸𑀦𑀫𑁆𑀧𑀺 𑀧𑀸𑀧𑀸𑀦𑀁,

𑀧𑀪𑀸𑀯𑀁 𑀦𑀸𑀲𑀬𑁂 𑀩𑀼𑀥𑁄;

𑀅𑀧𑀺 𑀦𑀺𑀧𑁆𑀧𑀪𑀢𑀸𑀦𑀻𑀢-

𑀔𑀚𑁆𑀚𑁄𑀢𑁄 𑀳𑁄𑀢𑀺 𑀪𑀸𑀡𑀼𑀫𑀸.

𑁮𑁪. ‘‘𑀅𑀧𑁆𑀧𑀓𑀸𑀦’’𑀫𑀺𑀘𑁆𑀘𑀸𑀤𑀺. 𑀩𑀼𑀥𑁄 𑀧𑀡𑁆𑀟𑀺𑀢𑀧𑁄𑀲𑁄 𑀅𑀧𑁆𑀧𑀓𑀸𑀦𑀁 𑀧𑀸𑀧𑀸𑀦𑀫𑁆𑀧𑀺 𑀓𑀺𑀫𑀼𑀢𑀫𑀥𑀺𑀓𑀸𑀦𑀁 𑀧𑀪𑀸𑀯𑀁 𑀆𑀦𑀼𑀪𑀸𑀯𑀁 𑀦𑀸𑀲𑀬𑁂 𑀅𑀧𑁆𑀧𑀯𑀢𑁆𑀢𑀺𑀁 𑀧𑀸𑀧𑁂𑀬𑁆𑀬. 𑀢𑀁 𑀅𑀢𑁆𑀣𑀦𑁆𑀢𑀭𑀦𑁆𑀬𑀸𑀲𑁂𑀦 𑀲𑀸𑀥𑁂𑀢𑀺. 𑀪𑀸𑀡𑀼𑀫𑀸 𑀲𑀽𑀭𑀺𑀬𑁄 𑀦𑀺𑀧𑁆𑀧𑀪𑀢𑀁 𑀆𑀦𑀻𑀢𑁄 𑀔𑀚𑁆𑀚𑁄𑀢𑁄 𑀬𑁂𑀦 𑀢𑀣𑀸𑀯𑀺𑀥𑁄 𑀅𑀧𑀺 𑀳𑁄𑀢𑀺. ‘‘𑀫𑀦𑁆𑀤𑀧𑁆𑀧𑀪𑁄 𑀅𑀬’’𑀦𑁆𑀢𑀺 𑀚𑁄𑀢𑀺𑀭𑀺𑀗𑁆𑀕𑀡𑀫𑁆𑀧𑀺 𑀦𑁄𑀧𑁂𑀓𑁆𑀔𑀢𑀺 𑀘𑀓𑁆𑀓𑀯𑀸𑀴𑀓𑀼𑀳𑀭𑀸𑀦𑀼𑀘𑀭𑀺𑀢𑀫𑀳𑀸𑀦𑀼𑀪𑀸𑀯𑁄𑀧𑀻𑀢𑀺. 𑀏𑀢𑁆𑀣 𑀅𑀧𑀻𑀢𑁆𑀬𑀸𑀤𑀺𑀦𑀸 𑀯𑀘𑁄𑀪𑀗𑁆𑀕𑀺𑀬𑀸 𑀳𑀻𑀦𑀢𑁆𑀣𑀤𑁄𑀲𑁄 𑀧𑀭𑀺𑀳𑀝𑁄.

𑁮𑁪. ‘‘𑀅𑀧𑁆𑀧𑀓𑀸𑀦𑀺’’𑀘𑁆𑀘𑀸𑀤𑀺. 𑀩𑀼𑀥𑁄 𑀧𑀜𑁆𑀜𑀯𑀸 𑀅𑀧𑁆𑀧𑀓𑀸𑀦𑀫𑁆𑀧𑀺 𑀅𑀢𑀺𑀫𑀦𑁆𑀤𑀸𑀦𑀫𑁆𑀧𑀺 𑀧𑀸𑀧𑀸𑀦𑀁 𑀅𑀓𑀼𑀲𑀮𑀸𑀦𑀁 𑀧𑀪𑀸𑀯𑀁 𑀯𑀺𑀧𑀸𑀓𑀤𑀸𑀦𑀲𑀸𑀫𑀢𑁆𑀣𑀺𑀬𑀲𑀗𑁆𑀔𑀸𑀢𑀸𑀦𑀼𑀪𑀸𑀯𑀁 𑀦𑀸𑀲𑀬𑁂 𑀅𑀳𑁄𑀲𑀺𑀓𑀫𑁆𑀫𑀢𑀸𑀧𑀸𑀤𑀦𑁂𑀦 𑀦𑀸𑀲𑁂𑀬𑁆𑀬, ¶ 𑀩𑀳𑀽𑀦𑀁 𑀧𑀸𑀧𑀸𑀦𑀁 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑀫𑀢𑁆𑀣𑀫𑀢𑁆𑀣𑀦𑁆𑀢𑀭𑀦𑁆𑀬𑀸𑀲𑀸𑀮𑀗𑁆𑀓𑀸𑀭𑁂𑀦 𑀲𑀫𑀢𑁆𑀣𑁂𑀢𑀺 𑀅𑀧𑀺𑀘𑁆𑀘𑀸𑀤𑀺. 𑀪𑀸𑀡𑀼𑀫𑀸 𑀲𑀽𑀭𑀺𑀬𑁄 𑀦𑀺𑀧𑁆𑀧𑀪𑀢𑀸𑀦𑀻𑀢𑀔𑀚𑁆𑀚𑁄𑀢𑁄 𑀅𑀧𑀺 𑀦𑀺𑀧𑁆𑀧𑀪𑀢𑀫𑀸𑀧𑀸𑀤𑀺𑀢𑀚𑁄𑀢𑀺𑀭𑀺𑀗𑁆𑀕𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄𑀧𑀺 𑀳𑁄𑀢𑀻𑀢𑀺. 𑀳𑀻𑀦𑀧𑀪𑀸𑀯𑁄 𑀳𑁄𑀢𑀺 𑀔𑀚𑁆𑀚𑁄𑀧𑀦𑀓𑁂 𑀧𑀳𑀸𑀬 𑀅𑀢𑁆𑀢𑀦𑁄 𑀆𑀮𑁄𑀓𑀁 𑀓𑀭𑁄𑀦𑁆𑀢𑁄 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀅𑀧𑀺 𑀦𑀺𑀧𑁆𑀧𑀪𑀢𑀺𑀘𑁆𑀘𑀸𑀤𑀺𑀯𑀘𑀦𑀯𑀺𑀮𑀸𑀲𑀯𑀲𑁂𑀦 𑀳𑀻𑀦𑀧𑀓𑁆𑀔𑀁 𑀕𑀳𑁂𑀢𑁆𑀯𑀸𑀧𑀺 𑀲𑀽𑀭𑀺𑀬𑀉𑀤𑀸𑀭𑀢𑁆𑀢𑀲𑁆𑀲𑁂𑀯 𑀧𑁄𑀲𑀺𑀢𑀢𑁆𑀢𑀸 ‘‘𑀦𑀺𑀧𑁆𑀧𑀪𑀢𑀸𑀦𑀻𑀢𑀔𑀚𑁆𑀚𑁄𑀢𑁄’’𑀢𑀺 𑀯𑀺𑀲𑁂𑀲𑀦𑀧𑀤𑀁 𑀳𑀻𑀦𑀢𑁆𑀣𑀤𑁄𑀲𑀁 𑀦 𑀦𑀺𑀲𑁆𑀲𑀬𑀢𑀺. 𑀦𑀢𑁆𑀣𑀺 𑀧𑀪𑀸 𑀬𑁂𑀲𑀦𑁆𑀢𑀺 𑀘, 𑀢𑁂𑀲𑀁 𑀪𑀸𑀯𑁄𑀢𑀺 𑀘, 𑀢𑀁 𑀆𑀦𑀻𑀢𑀸 𑀔𑀚𑁆𑀚𑁄𑀢𑀸 𑀬𑁂𑀦𑁂𑀢𑀺 𑀘 𑀯𑀺𑀕𑁆𑀕𑀳𑁄.

𑀅𑀦𑀢𑁆𑀣𑀲𑁆𑀲 𑀬𑀣𑀸 𑁋

𑁮𑁫.

𑀦 𑀧𑀸𑀤𑀧𑀽𑀭𑀡𑀢𑁆𑀣𑀸𑀬, 𑀧𑀤𑀁 𑀬𑁄𑀚𑁂𑀬𑁆𑀬 𑀓𑀢𑁆𑀣𑀘𑀺;

𑀬𑀣𑀸 𑀯𑀦𑁆𑀤𑁂 𑀫𑀼𑀦𑀺𑀦𑁆𑀤𑀲𑁆𑀲, 𑀧𑀸𑀤𑀧𑀗𑁆𑀓𑁂𑀭𑀼𑀳𑀁 𑀯𑀭𑀁.

𑁮𑁫. ‘‘𑀦 𑀧𑀸𑀤𑁂’’𑀘𑁆𑀘𑀸𑀤𑀺. 𑀏𑀢𑁆𑀣 𑀯𑀦𑁆𑀤𑁂𑀇𑀘𑁆𑀘𑀸𑀤𑁄 𑀳𑁂𑀝𑁆𑀞𑀸 𑀯𑀺𑀬 𑀧𑀸𑀤𑀧𑀽𑀭𑀡𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑁂𑀦 𑀅𑀦𑀢𑁆𑀣𑀸𑀪𑀸𑀯𑁄.

𑁮𑁫. ‘‘𑀦 𑀧𑀸𑀤𑀺’’𑀘𑁆𑀘𑀸𑀤𑀺. 𑀧𑀸𑀤𑀧𑀽𑀭𑀡𑀢𑁆𑀣𑀸𑀬 𑀕𑀸𑀣𑀸𑀧𑀸𑀤𑀸𑀦𑀁 𑀧𑀽𑀭𑀡𑀲𑀗𑁆𑀔𑀸𑀢𑀧𑀬𑁄𑀚𑀦𑀢𑁆𑀣𑀸𑀬 𑀧𑀤𑀁 𑀦𑀸𑀫𑀸𑀤𑀺𑀓𑀁 𑀓𑀢𑁆𑀣𑀘𑀺 𑀦 𑀬𑁄𑀚𑁂𑀬𑁆𑀬 𑀯𑀺𑀜𑁆𑀜𑀽𑀢𑀺, 𑀬𑀣𑀸 𑀦𑀺𑀭𑀢𑁆𑀣𑀓𑀧𑀤𑀸𑀬𑁄𑀚𑀦𑁂 𑀉𑀤𑀸𑀳𑀭𑀡𑀫𑁂𑀯𑀁 ‘‘𑀫𑀼𑀦𑀺𑀦𑁆𑀤𑀲𑁆𑀲 𑀯𑀭𑀁 𑀧𑀸𑀤𑀧𑀗𑁆𑀓𑁂𑀭𑀼𑀳𑀁 𑀯𑀦𑁆𑀤𑁂’’𑀢𑀺. 𑀳𑁂𑀝𑁆𑀞𑀸 𑀤𑀼𑀝𑁆𑀞𑁄𑀤𑀸𑀳𑀭𑀡𑁂 𑀯𑀺𑀬 𑀧𑀸𑀤𑀧𑀽𑀭𑀡𑀢𑁆𑀣𑀁 𑀓𑀲𑁆𑀲𑀘𑀺 𑀧𑀤𑀲𑁆𑀲 𑀅𑀬𑁄𑀚𑀺𑀢𑀢𑁆𑀢𑀸 𑀲𑀸𑀢𑁆𑀣𑀓𑀧𑀤𑁂𑀳𑀺 𑀦𑀺𑀭𑀢𑁆𑀣𑀓𑀤𑁄𑀲𑁄 𑀦𑀺𑀭𑀸𑀓𑀢𑁄𑀢𑀺. 𑀫𑀼𑀤𑀼𑀦𑀺𑀫𑁆𑀫𑀮𑀲𑁄𑀪𑀸𑀤𑀺𑀲𑀸𑀥𑀸𑀭𑀡𑀕𑀼𑀡𑀬𑁄𑀕𑀢𑁄 𑀧𑀗𑁆𑀓𑁂𑀭𑀼𑀳𑀲𑀤𑀺𑀲𑀁 𑀉𑀧𑀘𑀸𑀭𑀢𑁄 𑀧𑀗𑁆𑀓𑁂𑀭𑀼𑀳𑀁 𑀦𑀸𑀫. 𑀧𑀸𑀤𑀫𑁂𑀯 𑀧𑀗𑁆𑀓𑁂𑀭𑀼𑀳𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀬𑀧𑀤𑀤𑁄𑀲𑀧𑀭𑀺𑀳𑀸𑀭𑁄.

𑁮𑁬.

𑀪𑀬𑀓𑁄𑀥𑀧𑀲𑀁𑀲𑀸𑀤𑀺-

𑀯𑀺𑀲𑁂𑀲𑁄 𑀢𑀸𑀤𑀺𑀲𑁄 𑀬𑀤𑀺;

𑀯𑀢𑁆𑀢𑀼𑀁 𑀓𑀸𑀫𑀻𑀬𑀢𑁂 𑀤𑁄𑀲𑁄,

𑀦 𑀢𑀢𑁆𑀣𑁂’𑀓𑀢𑁆𑀣𑀢𑀸𑀓𑀢𑁄.

𑁮𑁬. ‘‘𑀪𑀬𑁂’’𑀘𑁆𑀘𑀸𑀤𑀺. ¶ 𑀪𑀬𑀜𑁆𑀘 𑀘𑀺𑀢𑁆𑀢𑀼𑀢𑁆𑀭𑀸𑀲𑁄 𑀓𑁄𑀥𑁄 𑀘 𑀤𑁄𑀲𑁄 𑀧𑀲𑀁𑀲𑀸 𑀘 𑀣𑀼𑀢𑀺, 𑀢𑀸 𑀆𑀤𑀺 𑀬𑀲𑁆𑀲 𑀢𑀼𑀭𑀺𑀢𑀸𑀤𑀺𑀦𑁄 𑀲𑁄 𑀢𑀸𑀤𑀺𑀲𑁄 𑀯𑀺𑀲𑁂𑀲𑁄 𑀬𑀤𑀺 𑀯𑀢𑁆𑀢𑀼𑀁 𑀓𑀸𑀫𑀻𑀬𑀢𑁂 𑀇𑀘𑁆𑀙𑀻𑀬𑀢𑁂, 𑀢𑀢𑁆𑀣 𑀢𑀲𑁆𑀫𑀺𑀁 𑀪𑀬𑀸𑀤𑀺𑀯𑀺𑀲𑁂𑀲𑁂 𑀯𑀺𑀲𑀬𑁂 𑀏𑀓𑀢𑁆𑀣𑀢𑀸𑀬 𑀏𑀓𑀢𑁆𑀣𑀪𑀸𑀯𑁂𑀦 𑀓𑀢𑁄 𑀤𑁄𑀲𑁄 𑀦𑀢𑁆𑀣𑀺.

𑁮𑁬. 𑀇𑀤𑀸𑀦𑀺 𑀯𑀸𑀓𑁆𑀬𑀤𑁄𑀲𑀧𑀭𑀺𑀳𑀸𑀭𑀢𑁆𑀣𑀫𑀸𑀭𑀪𑀢𑀺 ‘‘𑀪𑀬𑀓𑁄𑀥𑁂’’𑀘𑁆𑀘𑀸𑀤𑀺. 𑀪𑀬𑀓𑁄𑀥𑀧𑀲𑀁𑀲𑀸𑀤𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑀧𑀝𑀺𑀖𑀣𑀼𑀢𑀺𑀆𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄 𑀢𑀸𑀤𑀺𑀲𑁄 𑀯𑀺𑀲𑁂𑀲𑁄 𑀯𑀢𑁆𑀢𑀼𑀁 𑀬𑀤𑀺 𑀓𑀸𑀫𑀻𑀬𑀢𑁂 𑀘𑁂 𑀯𑀺𑀜𑁆𑀜𑀽𑀳𑀺 𑀇𑀘𑁆𑀙𑀻𑀬𑀢𑁂, 𑀢𑀢𑁆𑀣 𑀪𑀬𑀓𑁄𑀥𑀸𑀤𑀺𑀓𑁂 𑀯𑀺𑀲𑁂𑀲𑁂 𑀏𑀓𑀢𑁆𑀣𑀢𑀸𑀓𑀢𑁄 𑀏𑀓𑀢𑁆𑀣𑀪𑀸𑀯𑁂𑀦 𑀓𑀢𑁄 𑀤𑁄𑀲𑁄 𑀯𑀸𑀓𑁆𑀬𑀤𑁄𑀲𑁄 𑀦 𑀪𑀯𑀢𑀺. 𑀪𑀬𑀸𑀤𑀺𑀯𑀺𑀲𑁂𑀲𑁂 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑁂 𑀧𑀼𑀩𑁆𑀩𑀼𑀘𑁆𑀘𑀸𑀭𑀺𑀢𑀧𑀤𑀲𑁆𑀲 𑀧𑀼𑀦𑀼𑀘𑁆𑀘𑀸𑀭𑀡𑁂 𑀏𑀓𑀢𑁆𑀣𑀤𑁄𑀲𑁄 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀬𑀜𑁆𑀘 𑀓𑁄𑀥𑁄 𑀘 𑀧𑀲𑀁𑀲𑀸 𑀘𑀸𑀢𑀺 𑀘, 𑀢𑀸 𑀆𑀤𑀺 𑀬𑀲𑁆𑀲 𑀢𑀼𑀭𑀺𑀢𑀓𑁄𑀢𑀽𑀳𑀮𑀅𑀘𑁆𑀙𑀭𑀸𑀳𑀸𑀲𑀲𑁄𑀓𑀧𑀲𑀸𑀤𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀯𑀺𑀲𑁂𑀲𑀲𑁆𑀲𑁂𑀢𑀺 𑀘 𑀯𑀺𑀕𑁆𑀕𑀳𑁄. 𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑀢𑁆𑀢𑀸 𑀪𑀬𑀸𑀤𑀻𑀲𑀼 𑀓𑀣𑀺𑀢𑀫𑀧𑀺 𑀕𑀳𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀓𑀣𑀦𑀫𑀯𑀺𑀭𑁄𑀥𑀁. 𑀏𑀓𑁄 𑀅𑀢𑁆𑀣𑁄 𑀬𑁂𑀲𑀁 𑀧𑀤𑀸𑀤𑀻𑀦𑀁 𑀢𑁂 𑀏𑀓𑀢𑁆𑀣𑀸, 𑀢𑁂𑀲𑀁 𑀪𑀸𑀯𑁄 𑀏𑀓𑀢𑁆𑀣𑀢𑀸, 𑀢𑀸𑀬 𑀓𑀢𑁄𑀢𑀺 𑀯𑀺𑀕𑁆𑀕𑀳𑁄.

𑀬𑀣𑀸 𑁋

𑁮𑁭.

𑀲𑀧𑁆𑀧𑁄 𑀲𑀧𑁆𑀧𑁄 𑀅𑀬𑀁 𑀳𑀦𑁆𑀤, 𑀦𑀺𑀯𑀢𑁆𑀢𑀢𑀼 𑀪𑀯𑀁 𑀢𑀢𑁄;

𑀬𑀤𑀺 𑀚𑀻𑀯𑀺𑀢𑀼𑀓𑀸𑀫𑁄’𑀲𑀺, 𑀓𑀣𑀁 𑀢𑀫𑀼𑀧𑀲𑀧𑁆𑀧𑀲𑀺.

𑁮𑁭. ‘‘𑀬𑀣𑁂’’𑀢𑁆𑀬𑀼𑀤𑀸𑀳𑀭𑀢𑀺 ‘‘𑀲𑀧𑁆𑀧𑁄’’𑀇𑀘𑁆𑀘𑀸𑀤𑀺. ‘‘𑀅𑀬𑀁 𑀲𑀧𑁆𑀧𑁄 𑀲𑀧𑁆𑀧𑁄’’𑀢𑀺 𑀪𑀬𑁂𑀦𑀸𑀫𑁂𑀟𑀺𑀢𑀁 𑀳𑀦𑁆𑀤𑀸𑀢𑀺 𑀔𑁂𑀤𑁂 𑀢𑀢𑁄 𑀢𑀫𑁆𑀳𑀸 𑀞𑀸𑀦𑀸, 𑀲𑀧𑁆𑀧𑀢𑁄 𑀯𑀸 𑀪𑀯𑀁 𑀪𑀯𑀦𑁆𑀢𑁄 𑀦𑀺𑀯𑀢𑁆𑀢𑀢𑀼 𑀕𑀢𑀫𑀕𑁆𑀕𑀸𑀪𑀺𑀫𑀼𑀔𑁄 𑀆𑀯𑀢𑁆𑀢𑀢𑀼. 𑀢𑀁 𑀞𑀸𑀦𑀁, 𑀲𑀧𑁆𑀧𑀁 𑀯𑀸. 𑀦𑀢𑁆𑀣𑁂𑀢𑁆𑀣 𑀏𑀓𑀢𑁆𑀣𑀢𑀸𑀤𑁄𑀲𑁄 𑀪𑀬𑁂𑀦𑀸𑀫𑁂𑀟𑀺𑀢𑀧𑁆𑀧𑀬𑁄𑀕𑀢𑁄.

𑁮𑁭. ‘‘𑀲𑀧𑁆𑀧𑁄’’𑀘𑁆𑀘𑀸𑀤𑀺. ¶ 𑀳𑀦𑁆𑀤 𑀦𑀝𑁆𑀞𑁄 𑀯𑀢, 𑀅𑀬𑀁 𑀲𑀧𑁆𑀧𑁄 𑀲𑀧𑁆𑀧𑁄 𑀪𑀯𑀁 𑀢𑀢𑁄 𑀞𑀸𑀦𑀢𑁄, 𑀲𑀧𑁆𑀧𑀢𑁄 𑀯𑀸 𑀦𑀺𑀯𑀢𑁆𑀢𑀢𑀼 𑀆𑀯𑀢𑁆𑀢𑀢𑀼 𑀬𑀤𑀺 𑀚𑀻𑀯𑀺𑀢𑀼𑀓𑀸𑀫𑁄 𑀅𑀲𑀺, 𑀢𑀁 𑀞𑀸𑀦𑀁, 𑀲𑀧𑁆𑀧𑀁 𑀯𑀸 𑀓𑀣𑀫𑀼𑀧𑀲𑀧𑁆𑀧𑀲𑀺 𑀓𑀣𑀫𑀼𑀧𑀕𑀘𑁆𑀙𑀲𑀻𑀢𑀺. 𑀪𑀬𑁂 𑀆𑀫𑁂𑀟𑀺𑀢𑀯𑀘𑀦𑀢𑁆𑀢𑀸 𑀏𑀓𑀢𑁆𑀣𑀢𑀸𑀤𑁄𑀲𑁄 𑀦𑀢𑁆𑀣𑀺, 𑀚𑀻𑀯𑀺𑀢𑀼𑀓𑀸𑀫𑁄𑀲𑀻𑀢𑀺 𑀏𑀢𑁆𑀣 𑀩𑀺𑀦𑁆𑀤𑀼𑀮𑁄𑀧𑁄.

𑀧𑀤𑀤𑁄𑀲𑀧𑀭𑀺𑀳𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀸𑀓𑁆𑀬𑀤𑁄𑀲𑀧𑀭𑀺𑀳𑀸𑀭𑀯𑀡𑁆𑀡𑀦𑀸

𑀪𑀕𑁆𑀕𑀭𑀻𑀢𑀺𑀦𑁄 𑀬𑀣𑀸 𑁋

𑁮𑁮.

𑀬𑁄 𑀓𑁄𑀘𑀺 𑀭𑀽𑀧𑀸𑀢𑀺𑀲𑀬𑁄,

𑀓𑀦𑁆𑀢𑀺 𑀓𑀸𑀧𑀺 𑀫𑀦𑁄𑀳𑀭𑀸;

𑀯𑀺𑀮𑀸𑀲𑀸𑀢𑀺𑀲𑀬𑁄 𑀓𑁄𑀧𑀺,

𑀅𑀳𑁄 𑀩𑀼𑀤𑁆𑀥𑀫𑀳𑁄𑀤𑀬𑁄.

𑁮𑁮. ‘‘𑀬𑁄’’𑀇𑀘𑁆𑀘𑀸𑀤𑀺. 𑀭𑀽𑀧𑀲𑁆𑀲 𑀅𑀦𑀼𑀩𑁆𑀬𑀜𑁆𑀚𑀦𑁂𑀳𑀺 𑀅𑀦𑀼𑀩𑁆𑀬𑀜𑁆𑀚𑀺𑀢𑀩𑀸𑀢𑁆𑀢𑀺𑀁𑀲𑀯𑀭𑀧𑀼𑀭𑀺𑀲𑀮𑀓𑁆𑀔𑀡𑁄𑀧𑀲𑁄𑀪𑀺𑀢𑀲𑁆𑀲 𑀩𑁆𑀬𑀸𑀫𑀧𑁆𑀧𑀪𑀸𑀓𑁂𑀢𑀼𑀫𑀸𑀮𑀸𑀯𑀺𑀭𑀸𑀚𑀺𑀢𑀲𑁆𑀲 𑀅𑀢𑀺𑀲𑀬𑁄 𑀆𑀥𑀺𑀓𑁆𑀓𑀁 𑀯𑀸𑀘𑀸𑀕𑁄𑀘𑀭𑀪𑀸𑀯𑀸𑀢𑀺𑀓𑁆𑀓𑀫𑁂𑀦 𑀅𑀯𑀘𑀦𑀻𑀬𑀢𑁆𑀢𑀸 𑀬𑁄 𑀓𑁄𑀘𑀺𑀬𑁂𑀯. 𑀫𑀦𑁄 𑀅𑀦𑁂𑀓𑀮𑁄𑀓𑀲𑁆𑀲 𑀘𑀺𑀢𑁆𑀢𑀁 𑀳𑀭𑀢𑀻𑀢𑀺 𑀫𑀦𑁄𑀳𑀭𑀸 𑀘𑀺𑀢𑁆𑀢𑀫𑀯𑀳𑀭𑀦𑁆𑀢𑀻 𑀓𑀦𑁆𑀢𑀺 𑀲𑁄𑀪𑀸 𑀓𑀸𑀧𑀺 𑀅𑀯𑀘𑀦𑀧𑀣𑀸 𑀓𑀸𑀧𑀺𑀬𑁂𑀯. 𑀯𑀺𑀮𑀸𑀲𑀲𑁆𑀲 𑀕𑀢𑁆𑀬𑀸𑀤𑀺𑀦𑁄 𑀅𑀢𑀺𑀲𑀬𑁄 𑀯𑀘𑀦𑀧𑀣𑀸𑀢𑀺𑀓𑁆𑀓𑀦𑁆𑀢𑁄 𑀓𑁄𑀧𑀺𑀬𑁂𑀯, 𑀢𑀲𑁆𑀫𑀸 𑀩𑀼𑀤𑁆𑀥𑀲𑁆𑀲 𑀫𑀳𑀦𑁆𑀢𑁄 𑀉𑀤𑀬𑁄 𑀅𑀪𑀺𑀯𑀼𑀟𑁆𑀠𑀺 𑀅𑀳𑁄 𑀅𑀩𑁆𑀪𑀼𑀢𑁄𑀢𑀺. 𑀏𑀢𑁆𑀣 𑀓𑀺𑀁𑀲𑀤𑁆𑀤𑁂𑀦𑀸𑀭𑀤𑁆𑀥𑀸 𑀭𑀻𑀢𑀺 𑀦 𑀓𑀢𑁆𑀣𑀘𑀺 𑀪𑀕𑁆𑀕𑀸.

𑁮𑁮. ‘‘𑀬𑁄 𑀓𑁄𑀘𑀺’’𑀘𑁆𑀘𑀸𑀤𑀺. 𑀭𑀽𑀧𑀸𑀢𑀺𑀲𑀬𑁄 𑀲𑀼𑀧𑁆𑀧𑀳𑀺𑀝𑁆𑀞𑀺𑀢𑀧𑀸𑀤𑀢𑀸𑀤𑀺𑀤𑁆𑀯𑀢𑁆𑀢𑀺𑀁𑀲𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑁄𑀪𑀺𑀢𑀲𑁆𑀲 𑀘𑀺𑀢𑁆𑀢𑀗𑁆𑀕𑀼𑀮𑀺𑀢𑀸𑀤𑀺𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑁂𑀳𑀺 ¶ 𑀅𑀮𑀗𑁆𑀓𑀢𑀲𑁆𑀲 𑀩𑁆𑀬𑀸𑀫𑀧𑁆𑀧𑀪𑀸𑀓𑁂𑀢𑀼𑀫𑀸𑀮𑀸𑀳𑀺 𑀉𑀚𑁆𑀚𑀮𑀲𑁆𑀲 𑀭𑀽𑀧𑀓𑀸𑀬𑀲𑁆𑀲 𑀆𑀥𑀺𑀓𑁆𑀬𑀁 𑀬𑁄 𑀓𑁄𑀘𑀺𑀬𑁂𑀯 𑀫𑀦𑁄𑀕𑁄𑀘𑀭𑀪𑀸𑀯𑀁 𑀯𑀺𑀦𑀸 𑀯𑀘𑀦𑀯𑀺𑀲𑀬𑀸𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀬𑁄 𑀓𑁄𑀘𑀺𑀬𑁂𑀯. 𑀫𑀦𑁄𑀳𑀭𑀸 𑀮𑁄𑀓𑀲𑁆𑀲 𑀘𑀺𑀢𑁆𑀢𑀁 𑀳𑀭𑀦𑁆𑀢𑀻 𑀓𑀦𑁆𑀢𑀺 𑀲𑁄𑀪𑀸 𑀓𑀸𑀧𑀺𑀬𑁂𑀯 𑀯𑀘𑀻𑀯𑀺𑀲𑀬𑀸𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀓𑀸𑀧𑀺𑀬𑁂𑀯. 𑀯𑀺𑀮𑀸𑀲𑀸𑀢𑀺𑀲𑀬𑁄 𑀯𑀺𑀲𑀬𑀪𑀽𑀢𑀧𑀺𑀬𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀕𑀫𑀦𑀸𑀤𑀺𑀯𑀺𑀮𑀸𑀲𑀲𑁆𑀲 𑀆𑀥𑀺𑀓𑁆𑀬𑀫𑁆𑀧𑀺 𑀓𑁄𑀧𑀺𑀬𑁂𑀯 𑀯𑀼𑀢𑁆𑀢𑀓𑀸𑀭𑀡𑁂𑀦𑁂𑀯𑀓𑁄𑀧𑀺𑀬𑁂𑀯. 𑀢𑀢𑁄 𑀩𑀼𑀤𑁆𑀥𑀫𑀳𑁄𑀤𑀬𑁄 𑀩𑀼𑀤𑁆𑀥𑀲𑁆𑀲 𑀫𑀳𑀸𑀪𑀺𑀯𑀼𑀤𑁆𑀥𑀺𑀲𑀗𑁆𑀔𑀸𑀢𑁄 𑀉𑀤𑀬𑁄 𑀅𑀳𑁄 𑀅𑀘𑁆𑀙𑀭𑀺𑀬𑁄𑀢𑀺. 𑀏𑀢𑁆𑀣 𑀲𑀩𑁆𑀩𑀦𑀸𑀫𑀺𑀓𑁂𑀦 𑀓𑀺𑀁 𑀲𑀤𑁆𑀤𑁂𑀦 𑀯𑀢𑁆𑀢𑀼𑀫𑀸𑀭𑀤𑁆𑀥𑀓𑁆𑀓𑀫𑁄 𑀦 𑀓𑀢𑁆𑀣𑀘𑀺 𑀪𑀺𑀦𑁆𑀦𑁄𑀢𑀺 𑀪𑀕𑁆𑀕𑀭𑀻𑀢𑀺𑀤𑁄𑀲𑁄 𑀦𑀢𑁆𑀣𑀻𑀢𑀺.

𑁮𑁯.

𑀅𑀩𑁆𑀬𑀸𑀫𑁄𑀳𑀓𑀭𑀁 𑀩𑀦𑁆𑀥𑀁, 𑀅𑀩𑁆𑀬𑀸𑀓𑀺𑀡𑁆𑀡𑀁 𑀫𑀦𑁄𑀳𑀭𑀁;

𑀅𑀤𑀽𑀭𑀧𑀤𑀯𑀺𑀦𑁆𑀬𑀸𑀲𑀁, 𑀧𑀲𑀁𑀲𑀦𑁆𑀢𑀺 𑀓𑀯𑀺𑀲𑁆𑀲𑀭𑀸.

𑁮𑁯. ‘‘𑀅𑀩𑁆𑀬𑀸𑀫𑁄𑀳’’𑀇𑀘𑁆𑀘𑀸𑀤𑀺. 𑀦𑀢𑁆𑀣𑀺 𑀤𑀽𑀭𑀫𑁂𑀲𑀦𑁆𑀢𑀺 𑀅𑀤𑀽𑀭𑀸𑀦𑀺, 𑀢𑀸𑀦𑀺𑀬𑁂𑀯 𑀧𑀤𑀸𑀦𑀺, 𑀢𑁂𑀲𑀁 𑀯𑀺𑀦𑁆𑀬𑀸𑀲𑁄 𑀬𑀸𑀣𑀸𑀯𑀢𑁄 𑀞𑀧𑀦𑀁 𑀬𑀲𑁆𑀲 𑀢𑀁. 𑀢𑀢𑁄𑀬𑁂𑀯 𑀅𑀩𑁆𑀬𑀸𑀓𑀺𑀡𑁆𑀡𑁄 𑀅𑀲𑀫𑁆𑀫𑀺𑀲𑁆𑀲𑁄 𑀘. 𑀲𑁄 𑀅𑀩𑁆𑀬𑀸𑀓𑀺𑀡𑁆𑀡𑀢𑀸𑀬 𑀏𑀯 𑀫𑀦𑁄𑀳𑀭𑁄 𑀘𑀸𑀢𑀺 𑀅𑀩𑁆𑀬𑀸𑀓𑀺𑀡𑁆𑀡𑀁 𑀫𑀦𑁄𑀳𑀭𑀁. 𑀢𑁂𑀦𑁂𑀯 ‘‘𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀅𑀬𑀁 𑀯𑀸’’𑀢𑀺 𑀏𑀯𑀁 𑀩𑁆𑀬𑀸𑀫𑁄𑀳𑀁 𑀦 𑀓𑀭𑁄𑀢𑀻𑀢𑀺 𑀅𑀩𑁆𑀬𑀸𑀫𑁄𑀳𑀓𑀭𑁄, 𑀢𑀁. 𑀧𑀲𑀸𑀤𑀸𑀮𑀗𑁆𑀓𑀸𑀭𑀸𑀮𑀗𑁆𑀓𑀺𑀢𑀁 𑀩𑀦𑁆𑀥𑀁. 𑀓𑀯𑀻𑀦𑀁 𑀇𑀲𑁆𑀲𑀭𑀸 𑀧𑀥𑀸𑀦𑀸. 𑀬𑁂 𑀓𑀦𑀺𑀝𑁆𑀞𑀗𑁆𑀕𑀼𑀮𑀺𑀕𑀡𑀦𑀸𑀦𑀺𑀝𑁆𑀞𑀸, 𑀢𑁂 𑀧𑀲𑀁𑀲𑀦𑁆𑀢𑀺 𑀣𑀼𑀯𑀦𑁆𑀢𑀺 𑀢𑀸𑀤𑀺𑀲𑀩𑀦𑁆𑀥𑀕𑀼𑀡𑀲𑁆𑀲𑀸𑀢𑀺𑀲𑀬𑀧𑀲𑀁𑀲𑀸𑀭𑀳𑀪𑀸𑀯𑁂𑀦.

𑁮𑁯. ‘‘𑀅𑀩𑁆𑀬𑀸𑀫𑁄𑀳𑁂’’𑀘𑁆𑀘𑀸𑀤𑀺. 𑀅𑀤𑀽𑀭𑀧𑀤𑀯𑀺𑀦𑁆𑀬𑀸𑀲𑀁 𑀦𑀸𑀫𑀸𑀤𑀺𑀧𑀤𑀸𑀦𑀁 𑀯𑁄𑀳𑀸𑀭𑀓𑀸𑀮𑁂 𑀅𑀤𑀽𑀭𑀲𑀫𑁆𑀩𑀦𑁆𑀥𑁄 𑀬𑀣𑀸 𑀲𑀺𑀬𑀸, 𑀢𑀣𑀸 𑀧𑀝𑀺𑀧𑀸𑀝𑀺𑀬𑀸 𑀧𑀤𑀝𑁆𑀞𑀧𑀦𑁂𑀦 𑀲𑀫𑀦𑁆𑀦𑀸𑀕𑀢𑀁 𑀅𑀩𑁆𑀬𑀸𑀓𑀺𑀡𑁆𑀡𑀁, 𑀢𑀢𑁄𑀬𑁂𑀯 𑀅𑀜𑁆𑀜𑀲𑀫𑁆𑀩𑀦𑁆𑀥𑀻𑀧𑀤𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑀁 𑀫𑀦𑁄𑀳𑀭𑀁, 𑀢𑀢𑁄𑀬𑁂𑀯 𑀯𑀺𑀜𑁆𑀜𑀽𑀦𑀁 𑀘𑀺𑀢𑁆𑀢𑀫𑀸𑀭𑀸𑀥𑁂𑀦𑁆𑀢𑀁 𑀅𑀩𑁆𑀬𑀸𑀫𑁄𑀳𑀓𑀭𑀁 ‘‘𑀇𑀫𑀲𑁆𑀲𑀢𑁆𑀣𑁄 𑀇𑀫𑀲𑁆𑀲𑀢𑁆𑀣𑁄 𑀏𑀲𑁄 𑀏𑀲𑁄 𑀯𑀸’’𑀢𑀺 𑀲𑀁𑀲𑀬𑀫𑀦𑀼𑀧𑁆𑀧𑀸𑀤𑁂𑀦𑁆𑀢𑀁 𑀩𑀦𑁆𑀥𑀁 𑀧𑀲𑀸𑀤𑀸𑀮𑀗𑁆𑀓𑀸𑀭𑀲𑀁𑀬𑀼𑀢𑁆𑀢𑀁 𑀩𑀦𑁆𑀥𑀦𑀁 𑀓𑀯𑀺𑀲𑁆𑀲𑀭𑀸 𑀓𑀯𑀻𑀦𑀁 ¶ 𑀧𑀥𑀸𑀦𑀸 𑀧𑀡𑁆𑀟𑀺𑀪𑀚𑀦𑀸, 𑀓𑀦𑀺𑀝𑁆𑀞𑀗𑁆𑀕𑀼𑀮𑀺𑀬𑀸 𑀕𑀡𑀺𑀢𑀩𑁆𑀩𑀸 𑀅𑀕𑁆𑀕𑀓𑀯𑀺𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀲𑀁𑀲𑀦𑁆𑀢𑀺 𑀣𑁄𑀫𑁂𑀦𑁆𑀢𑀺. 𑀩𑁆𑀬𑀸𑀫𑁄𑀳𑀁 𑀦 𑀓𑀭𑁄𑀢𑀻𑀢𑀺 𑀅𑀩𑁆𑀬𑀸𑀫𑁄𑀳𑀓𑀭𑁄. 𑀯𑀺 𑀆𑀓𑀺𑀡𑁆𑀡𑁄 𑀩𑁆𑀬𑀸𑀓𑀺𑀡𑁆𑀡𑁄, 𑀦 𑀩𑁆𑀬𑀸𑀓𑀺𑀡𑁆𑀡𑁄 𑀅𑀩𑁆𑀬𑀸𑀓𑀺𑀡𑁆𑀡𑁄. 𑀦𑀢𑁆𑀣𑀺 𑀤𑀽𑀭𑀁 𑀬𑁂𑀲𑀁, 𑀢𑀸𑀦𑀺𑀬𑁂𑀯 𑀧𑀤𑀸𑀦𑀺, 𑀢𑁂𑀲𑀁 𑀯𑀺𑀦𑁆𑀬𑀸𑀲𑁄 𑀞𑀧𑀦𑀁 𑀬𑀲𑁆𑀲 𑀩𑀦𑁆𑀥𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄.

𑀬𑀣𑀸 𑁋

𑁯𑁦.

𑀦𑀻𑀮𑀼𑀧𑁆𑀧𑀮𑀸𑀪𑀁 𑀦𑀬𑀦𑀁,

𑀩𑀦𑁆𑀥𑀼𑀓𑀭𑀼𑀘𑀺𑀭𑁄’𑀥𑀭𑁄;

𑀦𑀸𑀲𑀸 𑀳𑁂𑀫𑀗𑁆𑀓𑀼𑀲𑁄 𑀢𑁂𑀦,

𑀚𑀺𑀦𑁄𑀬𑀁 𑀧𑀺𑀬𑀤𑀲𑁆𑀲𑀦𑁄.

𑁯𑁦. ‘‘𑀬𑀣𑁂’’𑀢𑁆𑀬𑀼𑀤𑀸𑀳𑀭𑀢𑀺 ‘‘𑀦𑀻𑀮𑀼𑀧𑁆𑀧𑀮𑀸𑀪’’𑀫𑀺𑀘𑁆𑀘𑀸𑀤𑀺. 𑀬𑀲𑁆𑀲 𑀚𑀺𑀦𑀲𑁆𑀲 𑀦𑀬𑀦𑀁 𑀦𑁂𑀢𑁆𑀢𑀁 𑀦𑀻𑀮𑀼𑀧𑁆𑀧𑀮𑀸𑀪𑀁 𑀇𑀦𑁆𑀤𑀻𑀯𑀭𑀤𑁆𑀯𑀬𑀦𑀺𑀪𑀁, 𑀅𑀥𑀭𑁄 𑀅𑀥𑀭𑁄𑀝𑁆𑀞𑁄 𑀩𑀦𑁆𑀥𑀼𑀓𑀫𑀺𑀯 𑀩𑀦𑁆𑀥𑀼𑀓𑀓𑀼𑀲𑀼𑀫𑀫𑀺𑀯 𑀭𑀼𑀘𑀺𑀭𑁄 𑀓𑀦𑁆𑀢𑁄, 𑀦𑀸𑀲𑀸 𑀦𑀸𑀲𑀺𑀓𑀸 𑀲𑀬𑀁 𑀳𑁂𑀫𑀗𑁆𑀓𑀼𑀲𑁄 𑀲𑀼𑀯𑀡𑁆𑀡𑀗𑁆𑀓𑀼𑀲𑁄𑀬𑁂𑀯, 𑀢𑁂𑀦 𑀓𑀸𑀭𑀡𑁂𑀦 𑀅𑀬𑀁 𑀚𑀺𑀦𑁄 𑀧𑀺𑀬𑀁 𑀫𑀥𑀼𑀭𑀁 𑀤𑀲𑁆𑀲𑀦𑀫𑀲𑁆𑀲𑀸𑀢𑀺 𑀧𑀺𑀬𑀤𑀲𑁆𑀲𑀦𑁄. 𑀈𑀤𑀺𑀲𑁄 𑀦 𑀩𑁆𑀬𑀸𑀓𑀺𑀡𑁆𑀡𑀤𑁄𑀲𑁄, 𑀅𑀩𑁆𑀬𑀸𑀓𑀺𑀡𑁆𑀡𑁄 𑀧𑀲𑀸𑀤𑁄𑀬𑁂𑀯𑀸𑀢𑀺.

𑁯𑁦. 𑀇𑀤𑀸𑀦𑀺 𑀩𑁆𑀬𑀸𑀓𑀺𑀡𑁆𑀡𑀤𑁄𑀲𑀧𑀭𑀺𑀳𑀸𑀭𑀁 𑀧𑀭𑀺𑀳𑀭𑀢𑀺 ‘‘𑀦𑀻𑀮𑀼𑀧𑁆𑀧𑀮𑀺’’𑀘𑁆𑀘𑀸𑀤𑀺𑀦𑀸. 𑀦𑀬𑀦𑀁 𑀬𑀲𑁆𑀲 𑀦𑁂𑀢𑁆𑀢𑀬𑀼𑀕𑀴𑀁 𑀦𑀻𑀮𑀼𑀧𑁆𑀧𑀮𑀸𑀪𑀁 𑀦𑀻𑀮𑀼𑀧𑁆𑀧𑀮𑀤𑀮𑀲𑀤𑀺𑀲𑀁, 𑀅𑀥𑀭𑁄 𑀅𑀥𑀭𑁄𑀝𑁆𑀞𑁄 𑀩𑀦𑁆𑀥𑀼𑀓𑀭𑀼𑀘𑀺𑀭𑁄 𑀩𑀦𑁆𑀥𑀼𑀓𑀧𑀼𑀧𑁆𑀨𑀫𑀺𑀯 𑀫𑀦𑀼𑀜𑁆𑀜𑁄, 𑀦𑀸𑀲𑀸 𑀦𑀸𑀲𑀺𑀓𑀸 𑀳𑁂𑀫𑀗𑁆𑀓𑀼𑀲𑁄 𑀲𑀼𑀯𑀡𑁆𑀡𑀗𑁆𑀓𑀼𑀲𑁄𑀬𑁂𑀯, 𑀢𑁂𑀦 𑀓𑀸𑀭𑀡𑁂𑀦 𑀅𑀬𑀁 𑀚𑀺𑀦𑁄 𑀧𑀺𑀬𑀤𑀲𑁆𑀲𑀦𑁄 𑀫𑀦𑀼𑀜𑁆𑀜𑀤𑀲𑁆𑀲𑀦𑁄 𑀳𑁄𑀢𑀻𑀢𑀺. 𑀏𑀢𑁆𑀣 𑀧𑀲𑀸𑀤𑀸𑀮𑀗𑁆𑀓𑀸𑀭𑁂𑀦 𑀬𑀼𑀢𑁆𑀢𑀢𑁆𑀢𑀸 𑀦 𑀩𑁆𑀬𑀸𑀓𑀺𑀡𑁆𑀡𑀤𑁄𑀲𑁄. 𑀆𑀪𑀸𑀲𑀤𑁆𑀤𑁄 𑀦𑀺𑀪𑀸𑀲𑀤𑁆𑀤𑁄 𑀯𑀺𑀬 𑀇𑀯𑀢𑁆𑀣𑁄. 𑀦𑁄 𑀘𑁂, 𑀧𑀪𑀸𑀧𑀭𑀺𑀬𑀸𑀬𑁄 𑀯𑀸 𑀳𑁄𑀢𑀺. 𑀩𑀦𑁆𑀥𑀼𑀓𑀫𑀺𑀯 𑀭𑀼𑀘𑀺𑀭𑁄𑀢𑀺 𑀘, 𑀧𑀺𑀬𑀁 𑀤𑀲𑁆𑀲𑀦𑀁 𑀬𑀲𑁆𑀲𑁂𑀢𑀺 𑀘 𑀯𑀺𑀕𑁆𑀕𑀳𑁄. 𑀇𑀳 𑀤𑀲𑁆𑀲𑀦𑀲𑁆𑀲 𑀓𑀢𑁆𑀢𑀼𑀪𑀽𑀢𑀲𑀸𑀥𑀼𑀚𑀦𑀲𑀫𑁆𑀩𑀦𑁆𑀥𑀢𑁆𑀢𑁂𑀧𑀺 𑀯𑀺𑀲𑀬𑀢𑁆𑀢𑁂𑀦𑁂𑀯 ¶ 𑀚𑀺𑀦𑀲𑀫𑁆𑀩𑀦𑁆𑀥𑁄 𑀳𑁄𑀢𑀻𑀢𑀺 𑀅𑀜𑁆𑀜𑀧𑀤𑀢𑁆𑀣𑁂𑀦 𑀢𑀣𑀸𑀕𑀢𑁄 𑀕𑀳𑀺𑀢𑁄𑀢𑀺.

𑁯𑁧.

𑀲𑀫𑀢𑀺𑀓𑁆𑀓𑀦𑁆𑀢𑀕𑀸𑀫𑁆𑀫𑀢𑁆𑀢-𑀓𑀦𑁆𑀢𑀯𑀸𑀘𑀸𑀪𑀺𑀲𑀗𑁆𑀔𑀢𑀁;

𑀩𑀦𑁆𑀥𑀦𑀁 𑀭𑀲𑀳𑁂𑀢𑀼𑀢𑁆𑀢𑀸, 𑀕𑀸𑀫𑁆𑀫𑀢𑁆𑀢𑀁 𑀅𑀢𑀺𑀯𑀢𑁆𑀢𑀢𑀺.

𑁯𑁧. ‘‘𑀲𑀫𑀢𑀺𑀓𑁆𑀓𑀦𑁆𑀢𑀺’’𑀘𑁆𑀘𑀸𑀤𑀺. 𑀲𑀫𑁆𑀫𑀸 𑀅𑀢𑀺𑀓𑁆𑀓𑀦𑁆𑀢𑀁 𑀦𑀺𑀕𑁆𑀕𑀢𑀁. 𑀕𑀸𑀫𑁆𑀫𑀲𑁆𑀲 𑀪𑀸𑀯𑁄 𑀕𑀸𑀫𑁆𑀫𑀢𑁆𑀢𑀁. 𑀬𑀸𑀲𑀁 𑀓𑀦𑁆𑀢𑀸𑀦𑀁 𑀫𑀥𑀼𑀭𑀸𑀦𑀁 𑀯𑀸𑀘𑀸𑀦𑀁 𑀢𑀸𑀳𑀺 𑀅𑀪𑀺𑀲𑀗𑁆𑀔𑀢𑀁 𑀭𑀘𑀺𑀢𑀁 𑀩𑀦𑁆𑀥𑀦𑀁 𑀭𑀲𑀲𑁆𑀲 𑀫𑀸𑀥𑀼𑀭𑀺𑀬𑀲𑁆𑀲 𑀳𑁂𑀢𑀼𑀢𑁆𑀢𑀸 𑀓𑀸𑀭𑀡𑀪𑀸𑀯𑁂𑀦 𑀕𑀸𑀫𑁆𑀫𑀢𑁆𑀢𑀁 𑀬𑀣𑀸𑀯𑀼𑀢𑁆𑀢𑀁 𑀅𑀢𑀺𑀯𑀢𑁆𑀢𑀢𑀺 𑀅𑀢𑀺𑀓𑁆𑀓𑀫𑀢𑀺.

𑁯𑁧. ‘‘𑀲𑀫𑀢𑀺’’𑀘𑁆𑀘𑀸𑀤𑀺. 𑀲𑀫𑀢𑀺𑀓𑁆𑀓𑀦𑁆𑀢𑀕𑀸𑀫𑁆𑀫𑀢𑁆𑀢𑀓𑀦𑁆𑀢𑀯𑀸𑀘𑀸𑀪𑀺𑀲𑀗𑁆𑀔𑀢𑀁 𑀯𑀺𑀲𑁂𑀲𑀢𑁄 𑀅𑀢𑀺𑀓𑁆𑀓𑀦𑁆𑀢𑀕𑀸𑀫𑁆𑀫𑀪𑀸𑀯𑀸𑀳𑀺 𑀓𑀦𑁆𑀢𑀯𑀸𑀘𑀸𑀳𑀺 𑀭𑀘𑀺𑀢𑀁 𑀩𑀦𑁆𑀥𑀦𑀁 𑀫𑀼𑀢𑁆𑀢𑀓𑀸𑀤𑀺𑀩𑀦𑁆𑀥𑀦𑀁 𑀭𑀲𑀳𑁂𑀢𑀼𑀢𑁆𑀢𑀸 𑀧𑀡𑁆𑀟𑀺𑀢𑀸𑀦𑀁 𑀧𑀻𑀢𑀺𑀭𑀲𑀲𑁆𑀲 𑀓𑀸𑀭𑀡𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀕𑀸𑀫𑁆𑀫𑀤𑁄𑀲𑀁 𑀅𑀢𑀺𑀯𑀢𑁆𑀢𑀢𑀺 𑀅𑀢𑀺𑀓𑁆𑀓𑀫𑁆𑀫 𑀧𑀯𑀢𑁆𑀢𑀢𑀻𑀢𑀺. 𑀲𑀫𑁆𑀫𑀸 𑀅𑀢𑀺𑀓𑁆𑀓𑀦𑁆𑀢𑀁 𑀕𑀸𑀫𑁆𑀫𑀢𑁆𑀢𑀁 𑀬𑀸𑀲𑀁, 𑀢𑀸𑀳𑀺𑀬𑁂𑀯 𑀓𑀦𑁆𑀢𑀯𑀸𑀘𑀸𑀳𑀺 𑀅𑀪𑀺𑀲𑀗𑁆𑀔𑀢𑀦𑁆𑀢𑀺 𑀘, 𑀭𑀲𑀲𑁆𑀲 𑀳𑁂𑀢𑀼, 𑀢𑀲𑁆𑀲 𑀪𑀸𑀯𑁄𑀢𑀺 𑀘 𑀯𑀺𑀕𑁆𑀕𑀳𑁄.

𑀬𑀣𑀸 𑁋

𑁯𑁨.

𑀤𑀼𑀦𑁄𑀢𑀺 𑀓𑀸𑀫𑀘𑀡𑁆𑀟𑀸𑀮𑁄,

𑀲𑁄 𑀫𑀁 𑀲𑀤𑀬 𑀦𑀺𑀤𑁆𑀤𑀬𑁄;

𑀈𑀤𑀺𑀲𑀁 𑀩𑁆𑀬𑀲𑀦𑀸𑀧𑀦𑁆𑀦𑀁,

𑀲𑀼𑀔𑀻𑀧𑀺 𑀓𑀺𑀫𑀼𑀧𑁂𑀓𑁆𑀔𑀲𑁂.

𑁯𑁨. ‘‘𑀬𑀣𑁂’’𑀢𑁆𑀬𑀼𑀤𑀸𑀳𑀭𑀢𑀺. 𑀓𑀸𑀫𑀸𑀢𑀼𑀭𑀸 𑀓𑀸𑀘𑀺 𑀯𑀦𑀺𑀢𑀸 𑀅𑀢𑁆𑀢𑀦𑁄 𑀧𑀺𑀬𑀁 𑀧𑀢𑀺𑀁 𑀯𑀺𑀭𑀯𑀢𑀺 ‘‘𑀤𑀼𑀦𑁄𑀢𑀺’’𑀘𑁆𑀘𑀸𑀤𑀺𑀦𑀸. 𑀤𑀬𑀸𑀬 𑀲𑀳 𑀧𑀯𑀢𑁆𑀢𑀻𑀢𑀺 𑀲𑀤𑀬𑀇𑀢𑀺 𑀅𑀦𑀼𑀦𑀬𑀯𑀲𑁂𑀦 𑀧𑀺𑀬𑀲𑁆𑀲 𑀆𑀫𑀦𑁆𑀢𑀦𑀁, 𑀲𑀸𑀦𑀼𑀦𑀬𑀸𑀫𑀦𑁆𑀢𑀦𑀜𑁆𑀳𑀺 𑀢𑀢𑁄𑀦𑀼𑀕𑁆𑀕𑀳𑀸𑀪𑀺𑀓𑀗𑁆𑀔𑀸𑀬𑀫𑀘𑁆𑀘𑀦𑁆𑀢𑀫𑀼𑀘𑀺𑀢𑀁, 𑀲𑁄 𑀓𑀸𑀫𑁄 𑀓𑀦𑁆𑀤𑀧𑁆𑀧𑁄 𑀏𑀯 𑀘𑀡𑁆𑀟𑀸𑀮𑁄 𑀅𑀓𑀡𑁆𑀟𑁄 ¶ 𑀯𑀸 𑀅𑀲𑀬𑁆𑀳𑁄𑀧𑀢𑀸𑀧𑀸𑀯𑀳𑀢𑁆𑀢𑀸. 𑀓𑀸𑀫𑁂 𑀘𑀡𑁆𑀟𑀸𑀮𑀢𑁆𑀢𑀸𑀭𑁄𑀧𑀦𑀜𑁆𑀘 𑀉𑀘𑀺𑀢𑀫𑁂𑀯 𑀬𑀢𑁄𑀦𑁂𑀦 𑀓𑀬𑀺𑀭𑀫𑀸𑀦𑀫𑀲𑀳𑀦𑀫𑀼𑀧𑀢𑀸𑀧𑀫𑀲𑀳𑀫𑀸𑀦𑀸 𑀢𑀁 𑀧𑀭𑀺𑀪𑀯𑀦𑁆𑀢𑀁 𑀯𑀺𑀧𑁆𑀧𑀮𑀧𑀢𑀺, 𑀦𑀺𑀤𑁆𑀤𑀬𑁄 𑀦𑀺𑀓𑁆𑀓𑀭𑀼𑀡𑁄, 𑀇𑀤𑀫𑀧𑀺 𑀉𑀘𑀺𑀢𑀫𑀼𑀧𑀢𑀸𑀧𑁂 𑀦𑀺𑀓𑁆𑀓𑀭𑀼𑀡𑀸𑀦𑀁 𑀢𑀸𑀤𑀺𑀲𑀻 𑀕𑀢𑀻𑀢𑀺. 𑀫𑀁 𑀤𑀼𑀦𑁄𑀢𑀺 𑀅𑀥𑀺𑀓𑀫𑀼𑀧𑀢𑀸𑀧𑁂𑀢𑀺 𑀦𑀺𑀤𑁆𑀤𑀬𑀢𑁆𑀢𑀸, 𑀦 𑀪𑀯𑀦𑁆𑀢𑀁, 𑀢𑁂𑀦𑁂𑀯 𑀪𑀯𑀁 𑀲𑀼𑀔𑀻. 𑀇𑀫𑀺𑀦𑀸 𑀅𑀜𑁆𑀜𑀸𑀲𑀢𑁆𑀢𑀢𑀁 𑀢𑀲𑁆𑀲 𑀤𑀻𑀧𑁂𑀢𑀺. 𑀬𑀤𑀺 𑀦𑀸𑀜𑁆𑀜𑀸𑀲𑀢𑁆𑀢𑁄𑀲𑀺, 𑀦𑀸𑀳𑀫𑁂𑀓𑀸𑀓𑀺𑀦𑀻 𑀪𑀯𑀸𑀫𑀺. 𑀅𑀲𑀳𑀸𑀬𑀸𑀦𑀜𑁆𑀳𑀺 𑀧𑀝𑀺𑀲𑀢𑁆𑀢𑀯𑁄 𑀳𑁄𑀦𑁆𑀢𑀺. 𑀏𑀓𑀸𑀓𑀺𑀢𑁆𑀢𑀸𑀬𑁂𑀯𑀸𑀳𑀫𑀧𑁆𑀧𑀝𑀺𑀲𑀭𑀡𑀢𑁆𑀢𑀸𑀦𑁂𑀦 𑀤𑀼𑀲𑀸𑀫𑀻𑀢𑀺 [𑀤𑀼𑀜𑁆𑀜𑀸𑀫𑀻𑀢𑀺 (?)] 𑀢𑀯 𑀓𑀸𑀫𑀁 𑀢𑁆𑀯𑀁 𑀲𑀼𑀔𑀻 𑀳𑁄𑀲𑀺. 𑀲𑀦𑀸𑀣𑀸𑀦𑀁 𑀢𑀸𑀤𑀺𑀲𑀻 𑀯𑀼𑀢𑁆𑀢𑀻𑀢𑀺 𑀏𑀯𑀁 𑀲𑀼𑀔𑀻𑀧𑀺 𑀢𑁆𑀯𑀁 𑀈𑀤𑀺𑀲𑀁 𑀩𑁆𑀬𑀲𑀦𑀫𑀸𑀧𑀦𑁆𑀦𑀁 𑀓𑀺𑀁 𑀓𑀲𑁆𑀫𑀸 𑀉𑀧𑁂𑀓𑁆𑀔𑀲𑁂𑀢𑀺. 𑀏𑀯𑀫𑀬𑀁 𑀯𑀗𑁆𑀓𑀯𑀼𑀢𑁆𑀢𑀺𑀬𑀸 𑀅𑀢𑁆𑀢𑀦𑁄, 𑀢𑀁 𑀯𑀺𑀲𑀬𑀫𑀦𑀼𑀪𑀯𑀦𑁆𑀢𑀲𑁆𑀲 𑀘 𑀯𑀺𑀫𑀼𑀔𑀢𑁆𑀢𑀁 𑀦𑀺𑀤𑀲𑁆𑀲𑁂𑀢𑀻𑀢𑀻𑀤𑀺𑀲𑀁 𑀦 𑀕𑀸𑀫𑁆𑀫𑀁.

𑁯𑁨. 𑀕𑀸𑀫𑁆𑀫𑀤𑁄𑀲𑀧𑀭𑀺𑀳𑀸𑀭𑁂 𑀮𑀓𑁆𑀔𑀺𑀬𑀁 𑀤𑀲𑁆𑀲𑁂𑀢𑀺 ‘‘𑀤𑀼𑀦𑁄𑀢𑀺’’𑀘𑁆𑀘𑀸𑀤𑀺. 𑀓𑀸𑀫𑀢𑀡𑁆𑀳𑀸𑀪𑀺𑀪𑀽𑀢𑀸 𑀅𑀗𑁆𑀕𑀦𑀸 𑀅𑀢𑁆𑀢𑀦𑁄 𑀯𑀮𑁆𑀮𑀪𑀁 𑀦𑀺𑀲𑁆𑀲𑀸𑀬 𑀏𑀯𑀁 𑀯𑀺𑀮𑀧𑀢𑀺 ‘‘𑀲𑀤𑀬 𑀳𑁂 𑀓𑀸𑀭𑀼𑀡𑀺𑀓 𑀲𑁄 𑀓𑀸𑀫𑀘𑀡𑁆𑀟𑀸𑀮𑁄 𑀲𑁄 𑀅𑀦𑀗𑁆𑀕𑀦𑀻𑀘𑁄 𑀦𑀺𑀤𑁆𑀤𑀬𑁄 𑀦𑀺𑀓𑁆𑀓𑀸𑀭𑀼𑀡𑀺𑀓𑁄 𑀫𑀁 𑀤𑀼𑀦𑁄𑀢𑀺 𑀧𑀻𑀴𑁂𑀢𑀺, 𑀲𑀼𑀔𑀻𑀧𑀺 𑀫𑀫 𑀯𑀺𑀬 𑀅𑀦𑀸𑀣𑀪𑀸𑀯𑀸𑀪𑀸𑀯𑀢𑁄 𑀲𑀼𑀔𑀺𑀢𑁄𑀧𑀺 𑀢𑁆𑀯𑀁 𑀈𑀤𑀺𑀲𑀁 𑀩𑁆𑀬𑀲𑀦𑀸𑀧𑀦𑁆𑀦𑀁 𑀏𑀯𑀁 𑀓𑀸𑀫𑀘𑀡𑁆𑀟𑀸𑀮𑁂𑀦 𑀅𑀓𑀸𑀭𑀼𑀡𑁂𑀦 𑀓𑀢𑀅𑀲𑀬𑁆𑀳𑀲𑀦𑁆𑀢𑀸𑀧𑀲𑀗𑁆𑀔𑀸𑀢𑀩𑁆𑀬𑀲𑀦𑀫𑀦𑀼𑀧𑁆𑀧𑀢𑁆𑀢𑀁 𑀫𑀁 𑀓𑀺𑀫𑀼𑀧𑁂𑀓𑁆𑀔𑀲𑁂 𑀓𑀲𑁆𑀫𑀸 𑀉𑀤𑀸𑀲𑀻𑀦𑁄𑀲𑀻’’𑀢𑀺. 𑀅𑀢𑁆𑀢𑀦𑁄 𑀤𑀼𑀓𑁆𑀔𑀸𑀢𑀼𑀭𑀢𑁆𑀢𑀸 𑀤𑀼𑀓𑁆𑀔𑀤𑀽𑀭𑀻𑀓𑀭𑀡𑀁 𑀓𑀸𑀭𑀼𑀡𑀺𑀓𑀸𑀦𑀁𑀬𑁂𑀯 𑀯𑀺𑀲𑀬𑀦𑁆𑀢𑀺 ‘‘𑀲𑀤𑀬𑁂’’𑀢𑀺 𑀅𑀦𑀼𑀦𑀬𑀯𑀲𑁂𑀦 𑀆𑀫𑀦𑁆𑀢𑀦𑀼𑀘𑀺𑀢𑀁 𑀅𑀢𑁆𑀢𑀦𑁄 𑀤𑀼𑀓𑁆𑀔𑀸𑀢𑀼𑀭𑀢𑀁 𑀧𑁄𑀲𑁂𑀢𑀼𑀁 𑀧𑀻𑀴𑀸𑀓𑀸𑀭𑀓𑁂 𑀓𑀸𑀫𑁂 𑀘𑀡𑁆𑀟𑀸𑀮𑀢𑁆𑀢𑀸𑀭𑁄𑀧𑀦𑀜𑁆𑀘 𑀦𑀺𑀤𑁆𑀤𑀬𑀢𑁆𑀢𑀓𑀣𑀦𑀜𑁆𑀘 𑀉𑀘𑀺𑀢𑀫𑁂𑀯 𑀅𑀢𑁆𑀢𑀦𑀺 𑀉𑀧𑁂𑀓𑁆𑀔𑀓𑀢𑁆𑀢𑀸. 𑀲𑀼𑀔𑀻𑀧𑀻𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀧𑀭𑀯𑀺𑀲𑀬𑀸𑀲𑀢𑁆𑀢𑀢𑀸𑀬 𑀅𑀢𑀺𑀘𑀸𑀭𑀁 𑀅𑀩𑁆𑀪𑀼𑀧𑀕𑀫𑁂𑀢𑀺. 𑀏𑀯𑀁 𑀯𑀗𑁆𑀓𑀯𑀼𑀢𑁆𑀢𑀺𑀬𑀸 𑀅𑀢𑁆𑀢𑀦𑁄 𑀯𑀮𑁆𑀮𑀪𑁂 𑀲𑀸𑀦𑀼𑀭𑀸𑀕𑀢𑁆𑀢𑀜𑁆𑀘 𑀅𑀢𑁆𑀢𑀦𑀺 𑀢𑀲𑁆𑀲 𑀢𑀤𑀪𑀸𑀯𑀢𑁆𑀢𑀜𑁆𑀘 𑀤𑀲𑁆𑀲𑁂𑀢𑀻𑀢𑀺. ‘‘𑀓𑀜𑁆𑀜𑁂 𑀓𑀸𑀫𑀬𑀫𑀸𑀦𑀁 𑀫𑀁, 𑀦 𑀓𑀸𑀫𑀬𑀲𑀺 𑀓𑀺𑀁𑀦𑁆𑀯𑀺𑀤’’𑀦𑁆𑀢𑀺 𑀏𑀢𑁆𑀣 𑀯𑀺𑀬 𑀇𑀳 𑀕𑀸𑀫𑁆𑀫𑀤𑁄𑀲𑁄 𑀦𑀢𑁆𑀣𑀻𑀢𑀺 ¶ 𑀕𑀸𑀫𑁆𑀫𑀤𑁄𑀲𑀧𑀭𑀺𑀳𑀸𑀭𑀫𑀺𑀤𑀁. 𑀓𑀸𑀫𑁄𑀬𑁂𑀯 𑀘𑀡𑁆𑀟𑀸𑀮𑁄 𑀓𑀸𑀫𑀘𑀡𑁆𑀟𑀸𑀮𑁄, 𑀲𑀳 𑀤𑀬𑀸𑀬 𑀬𑁄 𑀯𑀢𑁆𑀢𑀢𑀻𑀢𑀺 𑀘, 𑀦𑀢𑁆𑀣𑀺 𑀤𑀬𑀸 𑀅𑀲𑁆𑀲𑁂𑀢𑀺 𑀘, 𑀲𑀼𑀔𑀫𑀲𑁆𑀲 𑀅𑀢𑁆𑀣𑀻𑀢𑀺 𑀘 𑀯𑀺𑀕𑁆𑀕𑀳𑁄. 𑀅𑀧𑀺𑀲𑀤𑁆𑀤𑁄 𑀅𑀓𑁆𑀔𑀫𑁂.

𑁯𑁩.

𑀬𑀢𑀺𑀳𑀻𑀦𑀧𑀭𑀺𑀳𑀸𑀭𑁄, 𑀦 𑀧𑀼𑀦𑁂’𑀤𑀸𑀦𑀺 𑀦𑀻𑀬𑀢𑁂;

𑀬𑀢𑁄 𑀦 𑀲𑀯𑀦𑀼𑀩𑁆𑀩𑁂𑀕𑀁, 𑀳𑁂𑀝𑁆𑀞𑀸 𑀬𑁂𑀢𑀁 𑀯𑀺𑀘𑀸𑀭𑀺𑀢𑀁.

𑁯𑁩. ‘‘𑀬𑀢𑀺’’𑀘𑁆𑀘𑀸𑀤𑀺. 𑀯𑀺𑀘𑀸𑀭𑀺𑀢𑀦𑁆𑀢𑀺 ‘‘𑀢𑀁 𑀦𑀫𑁂 𑀲𑀺𑀭𑀲𑀸 𑀘𑀸𑀫𑀻-𑀓𑀭𑀯𑀡𑁆𑀡𑀁 𑀢𑀣𑀸𑀕𑀢’’𑀦𑁆𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀸 𑀧𑀓𑀸𑀲𑀺𑀢𑀦𑁆𑀢𑀺 𑀅𑀢𑁆𑀣𑁄.

𑁯𑁩. ‘‘𑀬𑀢𑀺𑀳𑀻𑀦𑀺’’𑀘𑁆𑀘𑀸𑀤𑀺. 𑀬𑀢𑁄 𑀬𑀲𑁆𑀫𑀸 𑀲𑀯𑀦𑀼𑀩𑁆𑀩𑁂𑀕𑀁 ‘‘𑀤𑁄𑀲𑀸𑀦𑀫𑀼𑀤𑁆𑀤𑁂𑀲𑀓𑁆𑀓𑀫𑁂𑀦 𑀤𑁄𑀲𑀧𑀭𑀺𑀳𑀸𑀭𑀓𑁆𑀓𑀫𑁄 𑀦 𑀯𑀼𑀢𑁆𑀢𑁄’’𑀢𑀺 𑀏𑀯𑀁 𑀯𑀺𑀜𑁆𑀜𑀽𑀦𑀫𑀼𑀧𑁆𑀧𑀚𑁆𑀚𑀫𑀸𑀦𑀁 𑀇𑀫𑀲𑁆𑀲 𑀕𑀦𑁆𑀣𑀲𑁆𑀲 𑀲𑀯𑀦𑀸𑀲𑀳𑀦𑀁 𑀦𑀢𑁆𑀣𑀺, 𑀢𑀢𑁄 𑀬𑀢𑀺𑀳𑀻𑀦𑀧𑀭𑀺𑀳𑀸𑀭𑁄 𑀬𑀢𑀺𑀳𑀻𑀦𑀤𑁄𑀲𑀲𑁆𑀲 𑀧𑀭𑀺𑀳𑀭𑀡𑀯𑀲𑁂𑀦 𑀧𑀯𑀢𑁆𑀢𑀫𑀼𑀤𑀸𑀳𑀭𑀡𑀁 𑀇𑀤𑀸𑀦𑀺 𑀧𑀼𑀦 𑀦 𑀦𑀻𑀬𑀢𑁂 𑀦𑀸𑀳𑀭𑀻𑀬𑀢𑁂𑀢𑀺. 𑀇𑀫𑀺𑀦𑀸𑀥𑀺𑀕𑀢𑀫𑀸𑀤𑁄 𑀯𑀼𑀢𑁆𑀢𑀢𑁆𑀣𑀫𑁂𑀯 𑀲𑀫𑀢𑁆𑀣𑁂𑀢𑀺. 𑀳𑁂𑀝𑁆𑀞𑀸 𑀬𑁂𑀢𑀁 𑀯𑀺𑀘𑀸𑀭𑀺𑀢𑀦𑁆𑀢𑀺 𑀏𑀯𑀁 𑀬𑀢𑀺𑀳𑀻𑀦𑀤𑁄𑀲𑀧𑀭𑀺𑀳𑀭𑀡𑀁 𑀳𑁂𑀝𑁆𑀞𑀸 𑀅𑀦𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑁂 𑀯𑀺𑀘𑀸𑀭𑀺𑀢𑀁 ‘‘𑀢𑀁 𑀦𑀫𑁂 𑀲𑀺𑀭𑀲𑀸 𑀘𑀸𑀫𑀻-𑀓𑀭𑀯𑀡𑁆𑀡𑀁 𑀢𑀣𑀸𑀕𑀢’’𑀦𑁆𑀢𑀺𑀆𑀤𑀺𑀦𑀸 𑀧𑀓𑀸𑀲𑀺𑀢𑀦𑁆𑀢𑀺. 𑀆𑀤𑁄 𑀬𑀢𑀺𑀳𑀻𑀦𑀤𑁄𑀲𑀧𑀸𑀢𑀼𑀪𑀸𑀯𑁂𑀬𑁂𑀯 𑀧𑀭𑀺𑀳𑀸𑀭𑀓𑁆𑀓𑀫𑀲𑁆𑀲𑀸𑀧𑀺 𑀤𑀲𑁆𑀲𑀺𑀢𑀢𑁆𑀢𑀸 𑀇𑀳𑀸𑀤𑀲𑁆𑀲𑀦𑁂𑀧𑀺 𑀕𑀦𑁆𑀣𑀲𑁆𑀲 𑀊𑀦𑀢𑀸 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀢𑀺 𑀳𑀻𑀦𑀸 𑀏𑀢𑁆𑀣𑁂𑀢𑀺 𑀘, 𑀢𑀲𑁆𑀲 𑀧𑀭𑀺𑀳𑀸𑀭𑁄𑀢𑀺 𑀘, 𑀲𑀯𑀦𑁂 𑀉𑀩𑁆𑀩𑁂𑀕𑀦𑁆𑀢𑀺 𑀘 𑀯𑀺𑀕𑁆𑀕𑀳𑁄.

𑀓𑀫𑀘𑁆𑀘𑀼𑀢𑀲𑁆𑀲 𑀬𑀣𑀸 𑁋

𑁯𑁪.

𑀉𑀤𑀸𑀭𑀘𑀭𑀺𑀢𑁄’𑀲𑀺 𑀢𑁆𑀯𑀁, 𑀢𑁂𑀦𑁂𑀯𑀸’𑀭𑀸𑀥𑀦𑀸 𑀢𑁆𑀯𑀬𑀺;

𑀤𑁂𑀲𑀁 𑀯𑀸 𑀤𑁂𑀳𑀺 𑀕𑀸𑀫𑀁 𑀯𑀸, 𑀔𑁂𑀢𑁆𑀢𑀁 𑀯𑀸 𑀫𑀫 𑀲𑁄𑀪𑀦𑀁.

𑁯𑁪. ‘‘𑀉𑀤𑀸𑀭’’𑀇𑀘𑁆𑀘𑀸𑀤𑀺. 𑀉𑀤𑀸𑀭𑀁 𑀉𑀤𑀸𑀭𑀢𑁆𑀢𑀁 𑀘𑀸𑀕𑀸𑀢𑀺𑀲𑀬𑀲𑀫𑁆𑀩𑀦𑁆𑀥𑀢𑁄 𑀘𑀭𑀺𑀢𑀁 𑀅𑀢𑀺𑀕𑀼𑀡𑀧𑀯𑀢𑁆𑀢𑀺 𑀬𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄. 𑀏𑀢𑁆𑀣 𑀉𑀘𑀺𑀢𑀢𑁆𑀢𑀸 ¶ 𑀤𑁂𑀲𑀸𑀤𑀻𑀦𑀁 𑀬𑀸𑀘𑀦𑀓𑁆𑀓𑀫𑀲𑁆𑀲 𑀓𑀫𑀘𑁆𑀘𑀼𑀢𑀲𑁆𑀲 𑀧𑀭𑀺𑀳𑀸𑀭𑁄𑀬𑀁.

𑁯𑁪. ‘‘𑀉𑀤𑀸𑀭𑀺’’𑀘𑁆𑀘𑀸𑀤𑀺. 𑀢𑁆𑀯𑀁 𑀧𑀼𑀜𑁆𑀜𑀯𑀦𑁆𑀢 𑀉𑀤𑀸𑀭𑀘𑀭𑀺𑀢𑁄𑀲𑀺 𑀘𑀸𑀕𑀸𑀢𑀺𑀲𑀬𑀬𑁄𑀕𑀢𑁄 𑀯𑀺𑀲𑀸𑀭𑀤𑀧𑀯𑀢𑁆𑀢𑀺𑀬𑀼𑀢𑁆𑀢𑁄𑀲𑀺, 𑀢𑁂𑀦𑁂𑀯 𑀢𑁂𑀦 𑀓𑀸𑀭𑀡𑁂𑀦𑁂𑀯 𑀆𑀭𑀸𑀥𑀦𑀸 𑀫𑀫 𑀬𑀸𑀘𑀦𑀸 𑀢𑁆𑀯𑀬𑀺 𑀳𑁄𑀢𑀺. 𑀤𑁂𑀲𑀁 𑀯𑀸𑀚𑀦𑀧𑀤𑀁 𑀯𑀸, 𑀦𑁄 𑀘𑁂, 𑀕𑀸𑀫𑀁 𑀯𑀸 𑀲𑀁𑀯𑀲𑀣𑀁 𑀯𑀸, 𑀦𑁄 𑀘𑁂, 𑀲𑁄𑀪𑀦𑀁 𑀔𑁂𑀢𑁆𑀢𑀁 𑀯𑀸 𑀓𑁂𑀤𑀸𑀭𑀁 𑀯𑀸 𑀫𑀫 𑀤𑁂𑀳𑀻𑀢𑀺 𑀅𑀦𑀼𑀧𑀼𑀩𑁆𑀩𑀁 𑀳𑀻𑀦𑀧𑀤𑀢𑁆𑀣𑀬𑀸𑀘𑀦𑀸 𑀤𑀸𑀬𑀓𑀲𑁆𑀲 𑀤𑀸𑀦𑀲𑁆𑀲𑀸𑀧𑀺 𑀬𑀸𑀘𑀓𑀲𑁆𑀲 𑀇𑀘𑁆𑀙𑀺𑀢𑀢𑁆𑀣𑀧𑀝𑀺𑀮𑀸𑀪𑀲𑁆𑀲𑀸𑀧𑀺 𑀅𑀦𑀼𑀭𑀽𑀧𑀢𑁆𑀢𑀸 𑀓𑀫𑀘𑁆𑀘𑀼𑀢𑀤𑁄𑀲𑀫𑀧𑀦𑁂𑀢𑀺. 𑀉𑀤𑀸𑀭𑀁 𑀘𑀭𑀺𑀢𑀁 𑀅𑀲𑁆𑀲𑀸𑀢𑀺 𑀯𑀺𑀕𑁆𑀕𑀳𑁄.

𑀅𑀢𑀺𑀯𑀼𑀢𑁆𑀢𑀲𑁆𑀲 𑀬𑀣𑀸 𑁋

𑁯𑁫.

𑀫𑀼𑀦𑀺𑀦𑁆𑀤𑀘𑀦𑁆𑀤𑀲𑀫𑁆𑀪𑀽𑀢-

𑀬𑀲𑁄𑀭𑀸𑀲𑀺𑀫𑀭𑀻𑀘𑀺𑀦𑀁;

𑀲𑀓𑀮𑁄𑀧𑁆𑀬’𑀬𑀫𑀸𑀓𑀸𑀲𑁄,

𑀦𑀸’𑀯𑀓𑀸𑀲𑁄 𑀯𑀺𑀚𑀫𑁆𑀪𑀦𑁂.

𑁯𑁫. ‘‘𑀫𑀼𑀦𑀺𑀦𑁆𑀤’’𑀇𑀘𑁆𑀘𑀸𑀤𑀺. 𑀫𑀼𑀦𑀺𑀦𑁆𑀤𑁄𑀬𑁂𑀯 𑀘𑀦𑁆𑀤𑁄, 𑀢𑀢𑁄 𑀲𑀫𑁆𑀪𑀽𑀢𑀸 𑀧𑀸𑀢𑀼𑀪𑀽𑀢𑀸, 𑀬𑀲𑁄𑀭𑀸𑀲𑀻 𑀏𑀯 𑀫𑀭𑀻𑀘𑀺𑀬𑁄, 𑀢𑀸𑀲𑀁. 𑀅𑀬𑀁 𑀲𑀓𑀮𑁄 𑀆𑀓𑀸𑀲𑁄𑀧𑀺 𑀕𑀕𑀦𑀫𑁂𑀯, 𑀦 𑀢𑀲𑁆𑀲𑁂𑀓𑁄 𑀧𑀤𑁂𑀲𑁄. 𑀯𑀺𑀚𑀫𑁆𑀪𑀦𑁂 𑀩𑁆𑀬𑀸𑀧𑀦𑁂 𑀦𑀸𑀯𑀓𑀸𑀲𑁄 𑀢𑀸𑀤𑀺𑀲𑀢𑁆𑀢𑀸 𑀢𑀸𑀲𑀁 𑀫𑀭𑀻𑀘𑀺𑀦𑀦𑁆𑀢𑀺 𑀦𑀸𑀢𑀺𑀯𑀼𑀢𑁆𑀢𑀁.

𑁯𑁫. ‘‘𑀫𑀼𑀦𑀺𑀦𑁆𑀤𑀺’’𑀘𑁆𑀘𑀸𑀤𑀺. 𑀫𑀼𑀦𑀺𑀦𑁆𑀤𑀘𑀦𑁆𑀤𑀲𑀫𑁆𑀪𑀽𑀢𑀬𑀲𑁄𑀭𑀸𑀲𑀺𑀫𑀭𑀻𑀘𑀺𑀦𑀁 𑀫𑀼𑀦𑀺𑀦𑁆𑀤𑀲𑀗𑁆𑀔𑀸𑀢𑀘𑀦𑁆𑀤𑀢𑁄 𑀧𑀸𑀢𑀼𑀪𑀽𑀢𑀸𑀦𑀁 𑀓𑀺𑀢𑁆𑀢𑀺𑀲𑀫𑀽𑀳𑀲𑀗𑁆𑀔𑀸𑀢𑀓𑀺𑀭𑀡𑀸𑀦𑀁 𑀯𑀺𑀚𑀫𑁆𑀪𑀦𑁂 𑀩𑁆𑀬𑀸𑀧𑀦𑁂 𑀅𑀬𑀁 𑀲𑀓𑀮𑁄𑀧𑀺 𑀆𑀓𑀸𑀲𑁄 𑀦𑀸𑀯𑀓𑀸𑀲𑁄 𑀦 𑀑𑀓𑀸𑀲𑁄 𑀳𑁄𑀢𑀻𑀢𑀺. 𑀳𑁂𑀢𑀼𑀨𑀮𑀸𑀤𑀺𑀏𑀓𑁂𑀓𑀓𑀸𑀭𑀡𑁂𑀦𑀸𑀧𑀺 𑀅𑀧𑁆𑀧𑀫𑁂𑀬𑁆𑀬𑀸𑀦𑀁 𑀲𑀩𑁆𑀩𑀜𑁆𑀜𑀼𑀕𑀼𑀡𑀸𑀦𑀁 𑀧𑀯𑀢𑁆𑀢𑀺𑀬𑀸 𑀅𑀧𑁆𑀧𑀫𑁂𑀬𑁆𑀬𑀲𑀸𑀫𑀜𑁆𑀜𑀪𑀽𑀢𑀸𑀓𑀸𑀲𑀲𑁆𑀲 𑀦𑀺𑀭𑀯𑀓𑀸𑀲𑀲𑁆𑀲 𑀇𑀯 𑀓𑀣𑀦𑀫𑀼𑀘𑀺𑀢𑀦𑁆𑀢𑀺 𑀅𑀢𑀺𑀯𑀼𑀢𑁆𑀢𑀤𑁄𑀲𑁄 𑀇𑀳 𑀦 𑀪𑀯𑀢𑀺. 𑀘𑀦𑁆𑀤𑁄 𑀇𑀯 ¶ 𑀘𑀦𑁆𑀤𑁄, 𑀫𑀼𑀦𑀺𑀦𑁆𑀤𑁄 𑀏𑀯 𑀘𑀦𑁆𑀤𑁄, 𑀢𑀢𑁄 𑀲𑀫𑁆𑀪𑀽𑀢𑀸𑀦𑀁𑀬𑁂𑀯 𑀬𑀲𑀸𑀦𑀁 𑀭𑀸𑀲𑀻 𑀘 𑀢𑀸 𑀫𑀭𑀻𑀘𑀺𑀬𑁄 𑀘𑀸𑀢𑀺 𑀯𑀺𑀕𑁆𑀕𑀳𑁄.

𑁯𑁬.

𑀯𑀸𑀓𑁆𑀬𑀁 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸𑀦𑀁, 𑀅𑀧𑁂𑀢𑀢𑁆𑀣𑀁 𑀅𑀦𑀺𑀦𑁆𑀤𑀺𑀢𑀁;

𑀢𑁂𑀦𑀼’𑀫𑁆𑀫𑀢𑁆𑀢𑀸𑀤𑀺𑀓𑀸𑀦𑀁 𑀢𑀁, 𑀯𑀘𑀦𑀸’𑀜𑁆𑀜𑀢𑁆𑀭 𑀤𑀼𑀲𑁆𑀲𑀢𑀺.

𑁯𑁬. ‘‘𑀯𑀸𑀓𑁆𑀬’’𑀫𑀺𑀘𑁆𑀘𑀸𑀤𑀺. 𑀩𑁆𑀬𑀸𑀧𑀦𑁆𑀦𑀁 𑀦𑀝𑁆𑀞𑀁 𑀅𑀬𑀣𑀸𑀧𑀯𑀢𑁆𑀢𑀁 𑀘𑀺𑀢𑁆𑀢𑀁 𑀬𑁂𑀲𑀁, 𑀢𑁂𑀲𑀁. 𑀯𑀸𑀓𑁆𑀬𑀁 𑀯𑀸𑀓𑁆𑀬𑀮𑀓𑁆𑀔𑀡𑁄𑀧𑁂𑀢𑀁. 𑀅𑀧𑁂𑀢𑁄 𑀅𑀧𑀕𑀢𑁄 𑀲𑀼𑀜𑁆𑀜𑁄 𑀅𑀢𑁆𑀣𑁄 𑀅𑀪𑀺𑀥𑁂𑀬𑁆𑀬𑀁 𑀲𑀁𑀯𑁄𑀳𑀸𑀭𑀺𑀓𑀁 𑀬𑀲𑁆𑀲, 𑀢𑀁. 𑀅𑀦𑀺𑀦𑁆𑀤𑀺𑀢𑀁 𑀅𑀳𑀻𑀴𑀺𑀢𑀁. 𑀢𑁂𑀦 𑀬𑀣𑀸𑀯𑀼𑀢𑁆𑀢𑁂𑀦 𑀓𑀸𑀭𑀡𑁂𑀦. 𑀢𑀁 𑀯𑀸𑀓𑁆𑀬𑀁 𑀉𑀫𑁆𑀫𑀢𑁆𑀢𑁄 𑀥𑀸𑀢𑀼𑀓𑁆𑀔𑁄𑀪𑀸𑀤𑀺𑀦𑀸 𑀔𑀺𑀢𑁆𑀢𑀘𑀺𑀢𑁆𑀢𑁄, 𑀲𑁄 𑀆𑀤𑀺 𑀬𑁂𑀲𑀁 𑀩𑀸𑀮𑀸𑀤𑀻𑀦𑀁 𑀢𑁂𑀲𑀁 𑀯𑀘𑀦𑀸 𑀅𑀲𑀗𑁆𑀕𑀢𑀸𑀬 𑀯𑀸𑀘𑀸𑀬 𑀅𑀜𑁆𑀜𑀢𑁆𑀭 𑀅𑀜𑁆𑀜𑀲𑁆𑀫𑀺𑀁 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀯𑀺𑀲𑀬𑁂 𑀤𑀼𑀲𑁆𑀲𑀢𑀺 𑀤𑀼𑀝𑁆𑀞𑀁 𑀚𑀸𑀬𑀢𑁂, 𑀉𑀫𑁆𑀫𑀢𑁆𑀢𑀸𑀤𑀻𑀦𑀁𑀬𑁂𑀯 𑀢𑀣𑀸𑀯𑀺𑀥𑀸𑀬 𑀯𑀸𑀘𑀸𑀬 𑀉𑀘𑀺𑀢𑀢𑁆𑀢𑀸𑀢𑀺.

𑁯𑁬. ‘‘𑀯𑀸𑀓𑁆𑀬’’𑀫𑀺𑀘𑁆𑀘𑀸𑀤𑀺. 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸𑀦𑀁 𑀯𑀺𑀭𑀼𑀤𑁆𑀥𑀪𑀸𑀯𑀫𑀸𑀧𑀦𑁆𑀦𑀘𑀺𑀢𑁆𑀢𑀸𑀦𑀁 𑀯𑀸𑀓𑁆𑀬𑀁 𑀲𑁆𑀬𑀸𑀤𑁆𑀬𑀦𑁆𑀢𑀢𑁆𑀬𑀸𑀤𑁆𑀬𑀦𑁆𑀢𑀧𑀤𑀲𑀫𑀼𑀤𑀸𑀬𑀭𑀽𑀧𑀁 𑀯𑀸𑀓𑁆𑀬𑀁 𑀅𑀧𑁂𑀢𑀢𑁆𑀣𑀁 𑀅𑀧𑀕𑀢𑀲𑀫𑀼𑀤𑀸𑀬𑀢𑁆𑀣𑀁 𑀅𑀦𑀺𑀦𑁆𑀤𑀺𑀢𑀁 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀢𑀁 𑀦 𑀳𑁄𑀢𑀺, 𑀢𑁂𑀦 𑀓𑀸𑀭𑀡𑁂𑀦 𑀉𑀫𑁆𑀫𑀢𑁆𑀢𑀸𑀤𑀺𑀓𑀸𑀦𑀁 𑀉𑀫𑁆𑀫𑀢𑁆𑀢𑀯𑁂𑀤𑀦𑀝𑁆𑀝𑀸𑀤𑀻𑀦𑀁 𑀯𑀘𑀦𑀸𑀜𑁆𑀜𑀢𑁆𑀭 𑀯𑀘𑀦𑀁 𑀯𑀺𑀦𑀸 𑀅𑀦𑀼𑀫𑁆𑀫𑀢𑁆𑀢𑀸𑀤𑀺𑀯𑀘𑀦𑁂 𑀢𑀁 𑀲𑀫𑀼𑀤𑀸𑀬𑀢𑁆𑀣𑀲𑀫𑁆𑀩𑀦𑁆𑀥𑀭𑀳𑀺𑀢𑀁 𑀯𑀘𑀦𑀁 𑀤𑀼𑀲𑁆𑀲𑀢𑀺 𑀤𑁄𑀲𑀤𑀼𑀝𑁆𑀞𑀁 𑀳𑁄𑀢𑀺. 𑀩𑁆𑀬𑀸𑀧𑀦𑁆𑀦𑀁 𑀘𑀺𑀢𑁆𑀢𑀁 𑀬𑁂𑀲𑀦𑁆𑀢𑀺 𑀘, 𑀅𑀧𑁂𑀢𑁄 𑀅𑀢𑁆𑀣𑁄 𑀅𑀲𑁆𑀲𑀸𑀢𑀺 𑀘, 𑀉𑀫𑁆𑀫𑀢𑁆𑀢𑁄 𑀆𑀤𑀺 𑀬𑁂𑀲𑀦𑁆𑀢𑀺 𑀘 𑀯𑀺𑀕𑁆𑀕𑀳𑁄.

𑀬𑀣𑀸 𑁋

𑁯𑁭.

𑀲𑀫𑀼𑀤𑁆𑀤𑁄 𑀧𑀻𑀬𑀢𑁂 𑀲𑁄’𑀬-𑀫𑀳’𑀫𑀚𑁆𑀚 𑀚𑀭𑀸𑀢𑀼𑀭𑁄;

𑀇𑀫𑁂 𑀕𑀚𑁆𑀚𑀦𑁆𑀢𑀺 𑀚𑀻𑀫𑀽𑀢𑀸, 𑀲𑀓𑁆𑀓𑀲𑁆𑀲𑁂’𑀭𑀸𑀯𑀡𑁄 𑀧𑀺𑀬𑁄.

𑁯𑁭. ‘‘𑀬𑀣𑁂’’𑀢𑁆𑀬𑀼𑀤𑀸𑀳𑀭𑀢𑀺 ‘‘𑀲𑀫𑀼𑀤𑁆𑀤𑁄’’𑀇𑀘𑁆𑀘𑀸𑀤𑀺. 𑀦 𑀳𑁂𑀢𑁆𑀣 ‘‘𑀲𑀫𑀼𑀤𑁆𑀤𑁄 𑀧𑀻𑀬𑀢𑁂’’𑀇𑀘𑁆𑀘𑀸𑀤𑀺𑀦𑁄 𑀧𑀤𑀲𑀫𑀼𑀤𑀸𑀬𑀲𑁆𑀲 𑀓𑁄𑀘𑀺 𑀏𑀓𑁄 𑀅𑀢𑁆𑀣𑁄 𑀕𑀬𑁆𑀳𑀢𑀺, 𑀬𑁄 𑀲𑁄 𑀩𑀦𑁆𑀥𑀢𑁆𑀣𑁄 𑀲𑀺𑀬𑀸. 𑀅𑀯𑀬𑀯𑀢𑁆𑀣𑀸 ¶ 𑀏𑀯 𑀢𑀼 𑀅𑀬𑁄𑀲𑀮𑀸𑀓𑀸𑀓𑀧𑁆𑀧𑀸𑀧𑀝𑀺𑀪𑀦𑁆𑀢𑀻𑀢𑀺 𑀈𑀤𑀺𑀲𑀫𑀧𑁂𑀢𑀢𑁆𑀣𑀫𑀦𑀺𑀦𑁆𑀤𑀺𑀢𑀁 𑀯𑀺𑀜𑁆𑀜𑁂𑀬𑁆𑀬𑀁 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸𑀦𑀁.

𑁯𑁭. ‘‘𑀲𑀫𑀼𑀤𑁆𑀤𑁄’’𑀘𑁆𑀘𑀸𑀤𑀺. 𑀲𑁄 𑀅𑀬𑀁 𑀲𑀫𑀼𑀤𑁆𑀤𑁄 𑀧𑀻𑀬𑀢𑁂 𑀬𑁂𑀦 𑀓𑁂𑀦𑀘𑀺 𑀧𑀻𑀬𑀢𑁂, 𑀅𑀳𑀁 𑀅𑀚𑁆𑀚 𑀚𑀭𑀸𑀢𑀼𑀭𑁄 𑀚𑀭𑀭𑁄𑀕𑀸𑀪𑀺𑀪𑀽𑀢𑁄, 𑀇𑀫𑁂 𑀚𑀻𑀫𑀽𑀢𑀸 𑀫𑁂𑀖𑀸 𑀕𑀚𑁆𑀚𑀦𑁆𑀢𑀺 𑀣𑀦𑀬𑀦𑁆𑀢𑀺. 𑀲𑀓𑁆𑀓𑀲𑁆𑀲 𑀏𑀭𑀸𑀯𑀡𑁄 𑀧𑀺𑀬𑁄𑀢𑀺. 𑀇𑀤𑀁 𑀦𑀺𑀦𑁆𑀤𑀺𑀢𑀸𑀦𑀺𑀦𑁆𑀤𑀺𑀢𑀸𑀦𑀁 𑀤𑁆𑀯𑀺𑀦𑁆𑀦𑀫𑀼𑀤𑀸𑀳𑀭𑀡𑀁. 𑀇𑀤𑀁 𑀯𑀸𑀓𑁆𑀬𑀁 𑀅𑀯𑀬𑀯𑀢𑁆𑀣𑀫𑀦𑁆𑀢𑀭𑁂𑀦 𑀲𑀫𑀼𑀤𑀸𑀬𑀢𑁄 𑀕𑀫𑁆𑀬𑀫𑀸𑀦𑀢𑁆𑀣𑀲𑁆𑀲𑀸𑀪𑀸𑀯𑀸 𑀅𑀧𑁂𑀢𑀢𑁆𑀣𑀁 𑀦𑀸𑀫 𑀳𑁄𑀢𑀺. 𑀈𑀤𑀺𑀲𑀁 𑀯𑀸𑀓𑁆𑀬𑀁 𑀉𑀫𑁆𑀫𑀢𑁆𑀢𑀓𑀸𑀤𑀻𑀳𑀺 𑀯𑀼𑀢𑁆𑀢𑀫𑀧𑁆𑀧𑀻𑀢𑀺𑀓𑀭𑀁 𑀦 𑀳𑁄𑀢𑀺, 𑀅𑀜𑁆𑀜𑁂𑀳𑀺 𑀯𑀼𑀢𑁆𑀢𑀁 𑀧𑀦 𑀓𑀡𑁆𑀡𑁂 𑀅𑀬𑁄𑀲𑀮𑀸𑀓𑀸 𑀯𑀺𑀬 𑀅𑀧𑁆𑀧𑀻𑀢𑀺𑀓𑀭𑀁. 𑀚𑀭𑀸𑀬 𑀆𑀢𑀼𑀭𑁄𑀢𑀺 𑀯𑀸𑀓𑁆𑀬𑀁.

𑁯𑁮.

𑀲𑀼𑀔𑀼𑀫𑀸𑀮𑀸𑀯𑀺𑀭𑁄𑀥𑀺𑀢𑁆𑀢-𑀤𑀺𑀢𑁆𑀢𑀪𑀸𑀯𑀧𑁆𑀧𑀪𑀸𑀯𑀺𑀢𑀁;

𑀩𑀦𑁆𑀥𑀦𑀁 𑀩𑀦𑁆𑀥𑀨𑀭𑀼𑀲-𑀤𑁄𑀲𑀁 𑀲𑀁𑀤𑀽𑀲𑀬𑁂𑀬𑁆𑀬 𑀢𑀁.

𑁯𑁮. ‘‘𑀲𑀼𑀔𑀼𑀫𑀸𑀮𑀺’’𑀘𑁆𑀘𑀸𑀤𑀺. 𑀦 𑀯𑀺𑀭𑀼𑀚𑁆𑀛𑀢𑀺 𑀲𑀻𑀮𑁂𑀦𑀸𑀢𑀺 𑀅𑀯𑀺𑀭𑁄𑀥𑀻, 𑀢𑀲𑁆𑀲 𑀪𑀸𑀯𑁄 𑀅𑀯𑀺𑀭𑁄𑀥𑀺𑀢𑁆𑀢𑀁. 𑀲𑀼𑀔𑀼𑀫𑀸𑀮𑀲𑁆𑀲 𑀅𑀯𑀺𑀭𑁄𑀥𑀺𑀢𑁆𑀢𑀁 𑀬𑀲𑁆𑀲 𑀲𑁄 𑀤𑀺𑀢𑁆𑀢𑀪𑀸𑀯𑁄, 𑀢𑁂𑀦 𑀧𑀪𑀸𑀯𑀺𑀢𑀁 𑀯𑀟𑁆𑀠𑀺𑀢𑀁 𑀲𑀁𑀬𑀼𑀢𑁆𑀢𑀁 𑀢𑀁 𑀩𑀦𑁆𑀥𑀦𑀁 𑀩𑀦𑁆𑀥𑀨𑀭𑀼𑀲𑀤𑁄𑀲𑀁 𑀲𑀁𑀤𑀽𑀲𑀬𑁂𑀬𑁆𑀬 𑀦𑀸𑀲𑀬𑁂𑀢𑀺 𑀅𑀢𑁆𑀣𑁄.

𑁯𑁮. ‘‘𑀲𑀼𑀔𑀼𑀫𑀸𑀮𑀺’’𑀘𑁆𑀘𑀸𑀤𑀺. 𑀲𑀼𑀔𑀼𑀫𑀸𑀮𑀸𑀯𑀺𑀭𑁄𑀥𑀺𑀢𑁆𑀢𑀤𑀺𑀢𑁆𑀢𑀪𑀸𑀯𑀧𑁆𑀧𑀪𑀸𑀯𑀺𑀢𑀁 ‘‘𑀅𑀦𑀺𑀝𑁆𑀞𑀼𑀭𑀓𑁆𑀔𑀭𑀧𑁆𑀧𑀸𑀬𑁂’’𑀘𑁆𑀘𑀸𑀤𑀺𑀦𑀸 𑀯𑀼𑀘𑁆𑀘𑀫𑀸𑀦𑀲𑀼𑀔𑀼𑀫𑀸𑀮𑀕𑀼𑀡𑀲𑁆𑀲 𑀅𑀯𑀺𑀭𑀼𑀤𑁆𑀥𑀪𑀸𑀯𑀲𑀫𑀦𑁆𑀦𑀸𑀕𑀢𑁂𑀦 𑀯𑀡𑁆𑀡𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀗𑁆𑀕𑀪𑀺𑀮𑀓𑁆𑀔𑀡𑁂𑀦 𑀤𑀺𑀢𑁆𑀢𑀪𑀸𑀯𑁂𑀦 𑀧𑀺𑀬𑀪𑀸𑀯𑁂𑀦 𑀅𑀦𑀼𑀩𑁆𑀭𑀽𑀳𑀺𑀢𑀁 𑀢𑀁 𑀩𑀦𑁆𑀥𑀦𑀁 𑀩𑀦𑁆𑀥𑀨𑀭𑀼𑀲𑀤𑁄𑀲𑀁 𑀩𑀦𑁆𑀥𑀨𑀭𑀼𑀲𑀲𑀗𑁆𑀔𑀸𑀢𑀤𑁄𑀲𑀁 𑀲𑀁𑀤𑀽𑀲𑀬𑁂𑀬𑁆𑀬 𑀦𑀸𑀲𑁂𑀬𑁆𑀬, 𑀢𑀁 𑀩𑀦𑁆𑀥𑀨𑀭𑀼𑀲𑀤𑁄𑀲𑀦𑁆𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄𑀢𑀺. 𑀦 𑀯𑀺𑀭𑀼𑀚𑁆𑀛𑀢𑀺 𑀲𑀻𑀮𑁂𑀦𑀸𑀢𑀺 𑀅𑀯𑀺𑀭𑁄𑀥𑀻, 𑀢𑀲𑁆𑀲 𑀪𑀸𑀯𑁄𑀢𑀺 𑀘, 𑀲𑀼𑀔𑀼𑀫𑀸𑀮𑀲𑁆𑀲 𑀅𑀯𑀺𑀭𑁄𑀥𑀺𑀢𑁆𑀢𑀁 𑀬𑀲𑁆𑀲𑀸𑀢𑀺 𑀘, 𑀲𑁄𑀬𑁂𑀯 𑀤𑀺𑀢𑁆𑀢𑀲𑁆𑀲 𑀪𑀸𑀯𑁄𑀢𑀺 𑀘, 𑀢𑁂𑀦 𑀧𑀪𑀸𑀯𑀺𑀢𑀦𑁆𑀢𑀺 𑀘 𑀯𑀸𑀓𑁆𑀬𑀁.

𑀬𑀣𑀸 𑁋

𑁯𑁯.

𑀧𑀲𑁆𑀲𑀦𑁆𑀢𑀸 ¶ 𑀭𑀽𑀧𑀯𑀺𑀪𑀯𑀁, 𑀲𑀼𑀡𑀦𑁆𑀢𑀸 𑀫𑀥𑀼𑀭𑀁 𑀕𑀺𑀭𑀁;

𑀘𑀭𑀦𑁆𑀢𑀺 𑀲𑀸𑀥𑀽 𑀲𑀫𑁆𑀩𑀼𑀤𑁆𑀥-𑀓𑀸𑀮𑁂 𑀓𑁂𑀴𑀺𑀧𑀭𑀫𑁆𑀫𑀼𑀔𑀸.

𑁯𑁯. ‘‘𑀬𑀣𑁂’’𑀢𑁆𑀬𑀼𑀤𑀸𑀳𑀭𑀢𑀺 ‘‘𑀧𑀲𑁆𑀲𑀦𑁆𑀢𑀸’’𑀇𑀘𑁆𑀘𑀸𑀤𑀺. 𑀓𑁂𑀴𑀺𑀬𑀸 𑀓𑀻𑀴𑀸𑀬 𑀧𑀭𑀫𑁆𑀫𑀼𑀔𑀸 𑀯𑀺𑀕𑀢𑀘𑁆𑀙𑀦𑁆𑀤𑀸 𑀘𑀭𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁯𑁯. ‘‘𑀧𑀲𑁆𑀲𑀦𑁆𑀢𑁂’’𑀘𑁆𑀘𑀸𑀤𑀺. 𑀲𑀸𑀥𑀽 𑀲𑀚𑁆𑀚𑀦𑀸 𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀲𑀫𑁆𑀩𑀼𑀤𑁆𑀥𑀲𑁆𑀲 𑀥𑀭𑀫𑀸𑀦𑀓𑀸𑀮𑁂 𑀭𑀽𑀧𑀯𑀺𑀪𑀯𑀁 𑀢𑀲𑁆𑀲 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀧𑀲𑁆𑀲𑀦𑁆𑀢𑀸 𑀘𑀓𑁆𑀔𑀼𑀁 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀸 𑀫𑀥𑀼𑀭𑀁 𑀕𑀺𑀭𑀁 𑀢𑀲𑁆𑀲𑁂𑀯 𑀪𑀕𑀯𑀢𑁄 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀫𑀥𑀼𑀭𑀯𑀘𑀦𑀁 𑀲𑀼𑀡𑀦𑁆𑀢𑀸 𑀓𑁂𑀴𑀺𑀧𑀭𑀫𑁆𑀫𑀼𑀔𑀸 𑀓𑀻𑀴𑀸𑀬 𑀯𑀺𑀫𑀼𑀔𑀸 𑀓𑀻𑀴𑀸𑀪𑀺𑀭𑀢𑀺𑀭𑀳𑀺𑀢𑀸 𑀘𑀭𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀓𑁂𑀯𑀮𑀁 𑀨𑀭𑀼𑀲𑀲𑀺𑀣𑀺𑀮𑀯𑀡𑁆𑀡𑁂𑀳𑀺 𑀯𑀺𑀦𑀸 𑀲𑀼𑀔𑀼𑀘𑁆𑀘𑀸𑀭𑀡𑀻𑀬𑀯𑀡𑁆𑀡𑁂𑀳𑀺 𑀲𑀫𑁆𑀪𑀽𑀢𑀲𑀼𑀔𑀼𑀫𑀸𑀮𑀕𑀼𑀡𑀸𑀯𑀺𑀭𑁄𑀥𑀅𑀜𑁆𑀜𑀫𑀜𑁆𑀜𑀲𑀗𑁆𑀕𑀢𑀯𑀡𑁆𑀡𑀯𑀺𑀲𑀤𑀧𑁆𑀧𑀯𑀢𑁆𑀢𑀕𑀼𑀡𑀬𑀼𑀢𑁆𑀢𑀢𑁆𑀢𑀸 𑀏𑀢𑁆𑀣 𑀩𑀦𑁆𑀥𑀨𑀭𑀼𑀲𑀤𑁄𑀲𑁄 𑀦𑀢𑁆𑀣𑀺. 𑀓𑁂𑀴𑀺𑀬𑀸 𑀧𑀭𑀸𑀦𑀺 𑀧𑀭𑀺𑀯𑀢𑁆𑀢𑀺𑀢𑀸𑀦𑀺 𑀫𑀼𑀔𑀸𑀦𑀺 𑀏𑀢𑁂𑀲𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀏𑀢𑁆𑀣 𑀓𑀸𑀮𑁄𑀢𑀺 𑀓𑀺𑀭𑀺𑀬𑀸. 𑀲𑀸 𑀘 𑀅𑀢𑁆𑀣𑀢𑁄 𑀢𑀤𑀸𑀓𑀸𑀭𑀧𑁆𑀧𑀯𑀢𑁆𑀢𑀲𑀫𑁆𑀩𑀦𑁆𑀥𑁄𑀬𑁂𑀯. 𑀮𑁄𑀓𑁄 𑀧𑀦 𑀯𑀺𑀲𑀼𑀁 𑀏𑀓𑁄 𑀧𑀤𑀢𑁆𑀣𑁄𑀬𑁂𑀯𑀸𑀢𑀺 𑀯𑁄𑀳𑀭𑀢𑀺. 𑀯𑀸𑀓𑁆𑀬𑀤𑁄𑀲𑀧𑀭𑀺𑀳𑀸𑀭𑁄.

𑀯𑀸𑀓𑁆𑀬𑀤𑁄𑀲𑀧𑀭𑀺𑀳𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀸𑀓𑁆𑀬𑀢𑁆𑀣𑀤𑁄𑀲𑀧𑀭𑀺𑀳𑀸𑀭𑀯𑀡𑁆𑀡𑀦𑀸

𑀅𑀧𑀓𑁆𑀓𑀫𑀲𑁆𑀲 𑀬𑀣𑀸 𑁋

𑁧𑁦𑁦.

𑀪𑀸𑀯𑀦𑀸𑀤𑀸𑀦𑀲𑀻𑀮𑀸𑀦𑀺, 𑀲𑀫𑁆𑀫𑀸 𑀲𑀫𑁆𑀧𑀸𑀤𑀺𑀢𑀸𑀦𑀺’𑀳;

𑀦𑀺𑀩𑁆𑀩𑀸𑀦𑀪𑁄𑀕𑀲𑀕𑁆𑀕𑀸𑀤𑀺-𑀲𑀸𑀥𑀦𑀸𑀦𑀺 𑀦 𑀲𑀁𑀲𑀬𑁄.

𑁧𑁦𑁦. ‘‘𑀪𑀸𑀯𑀦𑀸’’𑀇𑀘𑁆𑀘𑀸𑀤𑀺. 𑀏𑀢𑁆𑀣 𑀪𑀸𑀯𑀦𑀸𑀤𑀻𑀦𑀺 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀬𑀣𑀸𑀓𑁆𑀓𑀫𑀁 𑀦𑀺𑀩𑁆𑀩𑀸𑀦𑀸𑀤𑀻𑀦𑀁 𑀦𑀺𑀤𑁆𑀤𑁂𑀲𑁂𑀦 𑀅𑀧𑀓𑁆𑀓𑀫𑀤𑁄𑀲𑁄 𑀧𑀭𑀺𑀳𑀝𑁄.

𑁧𑁦𑁦. ‘‘𑀪𑀸𑀯𑀦𑁂’’𑀘𑁆𑀘𑀸𑀤𑀺. ¶ 𑀇𑀳 𑀫𑀦𑀼𑀲𑁆𑀲𑀮𑁄𑀓𑁂 𑀲𑀫𑁆𑀫𑀸 𑀲𑀫𑁆𑀧𑀸𑀤𑀺𑀢𑀸𑀦𑀺 𑀓𑀫𑁆𑀫𑀨𑀮𑀁 𑀲𑀤𑁆𑀤𑀳𑀺𑀢𑁆𑀯𑀸 𑀬𑀣𑀸𑀯𑀺𑀥𑀺 𑀲𑀫𑁆𑀧𑀸𑀤𑀺𑀢𑀸𑀦𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀸𑀧𑀺𑀢𑀸𑀦𑀺 𑀪𑀸𑀯𑀦𑀸𑀤𑀸𑀦𑀲𑀻𑀮𑀸𑀦𑀺 𑀦𑀺𑀩𑁆𑀩𑀸𑀦𑀪𑁄𑀕𑀲𑀕𑁆𑀕𑀸𑀤𑀺𑀲𑀸𑀥𑀦𑀸𑀦𑀺 𑀬𑀣𑀸𑀓𑁆𑀓𑀫𑀁 𑀦𑀺𑀩𑁆𑀩𑀸𑀦𑀉𑀧𑀪𑁄𑀕𑀧𑀭𑀺𑀪𑁄𑀕𑀲𑀫𑁆𑀧𑀢𑁆𑀢𑀺𑀲𑀕𑁆𑀕𑀼𑀧𑁆𑀧𑀢𑁆𑀢𑀺𑀆𑀤𑀻𑀦𑀁 𑀳𑁂𑀢𑀼𑀪𑀸𑀯𑁂𑀦 𑀲𑀸𑀥𑀓𑀸𑀦𑀺 𑀳𑁄𑀦𑁆𑀢𑀺, 𑀏𑀢𑁆𑀣 𑀲𑀸𑀥𑀦𑁂 𑀦 𑀲𑀁𑀲𑀬𑁄 𑀳𑁄𑀢𑀻𑀢𑀺. 𑀇𑀳 𑀪𑀸𑀯𑀦𑀸𑀤𑀬𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀉𑀤𑁆𑀤𑁂𑀲𑀓𑁆𑀓𑀫𑀁 𑀅𑀦𑀢𑀺𑀓𑁆𑀓𑀫𑁆𑀫 𑀦𑀺𑀩𑁆𑀩𑀸𑀦𑀸𑀤𑀻𑀦𑀫𑀦𑀼𑀤𑁆𑀤𑁂𑀲𑀲𑁆𑀲 𑀓𑀢𑀢𑁆𑀢𑀸 𑀅𑀧𑀓𑁆𑀓𑀫𑀯𑀸𑀓𑁆𑀬𑀢𑁆𑀣𑀤𑁄𑀲𑀲𑁆𑀲 𑀑𑀓𑀸𑀲𑁄 𑀦 𑀳𑁄𑀢𑀺.

𑁧𑁦𑁧.

𑀉𑀤𑁆𑀤𑀺𑀝𑁆𑀞𑀯𑀺𑀲𑀬𑁄 𑀓𑁄𑀘𑀺 [𑀓𑁄𑀧𑀺 (𑀓. 𑀲𑀻.)], 𑀯𑀺𑀲𑁂𑀲𑁄 𑀢𑀸𑀤𑀺𑀲𑁄 𑀬𑀤𑀺;

𑀅𑀦𑀼𑀤𑁆𑀤𑀺𑀝𑁆𑀞𑁂𑀲𑀼 [𑀅𑀦𑀼𑀤𑀺𑀝𑁆𑀞𑁂𑀲𑀼 (?)] 𑀦𑁂𑀯’𑀢𑁆𑀣𑀺, 𑀤𑁄𑀲𑁄 𑀓𑀫𑀯𑀺𑀮𑀗𑁆𑀖𑀦𑁂.

𑁧𑁦𑁧. ‘‘𑀉𑀤𑁆𑀤𑀺𑀝𑁆𑀞𑁂’’𑀘𑁆𑀘𑀸𑀤𑀺. 𑀉𑀤𑁆𑀤𑀺𑀝𑁆𑀞𑀸 𑀧𑀞𑀫𑀁 𑀬𑀼𑀢𑁆𑀢𑀸 𑀅𑀢𑁆𑀣𑀸 𑀯𑀺𑀲𑀬𑁄 𑀕𑁄𑀘𑀭𑁄 𑀬𑀲𑁆𑀲 𑀉𑀤𑁆𑀤𑁂𑀲𑀸𑀦𑀼𑀤𑁆𑀤𑁂𑀲𑀲𑀫𑁆𑀩𑀦𑁆𑀥𑀯𑀺𑀚𑀸𑀦𑀦𑀮𑀓𑁆𑀔𑀡𑀲𑁆𑀲 𑀯𑀺𑀲𑁂𑀲𑀲𑁆𑀲 𑀲𑁄 𑀢𑀸𑀤𑀺𑀲𑁄 𑀓𑁄𑀘𑀺 𑀯𑀺𑀲𑁂𑀲𑁄 𑀅𑀦𑀼𑀤𑁆𑀤𑀺𑀝𑁆𑀞𑁂𑀲𑀼 𑀬𑀣𑀸𑀓𑁆𑀓𑀫𑀫𑀼𑀤𑁆𑀤𑁂𑀲𑀓𑀫𑀸𑀦𑀫𑀢𑀺𑀓𑁆𑀓𑀫𑁂𑀦 𑀧𑀼𑀦 𑀅𑀢𑁆𑀣𑀦𑁆𑀢𑀭𑀦𑀺𑀲𑁆𑀲𑀬𑁂𑀦 𑀧𑀭𑀸𑀫𑀝𑁆𑀞𑁂𑀲𑀼 𑀬𑀤𑀺 𑀪𑀯𑁂𑀬𑁆𑀬, 𑀓𑀫𑀲𑁆𑀲 𑀬𑀣𑁄𑀤𑁆𑀤𑀺𑀝𑁆𑀞𑁂𑀲𑀼 𑀅𑀦𑀼𑀓𑁆𑀓𑀫𑀲𑁆𑀲 𑀯𑀺𑀮𑀗𑁆𑀖𑀦𑁂 𑀅𑀢𑀺𑀓𑁆𑀓𑀫𑁂 𑀤𑁄𑀲𑁄 𑀦𑁂𑀯𑀢𑁆𑀣𑀺.

𑁧𑁦𑁧. ‘‘𑀉𑀤𑁆𑀤𑀺𑀝𑁆𑀞𑁂’’𑀘𑁆𑀘𑀸𑀤𑀺. 𑀉𑀤𑁆𑀤𑀺𑀝𑁆𑀞𑀯𑀺𑀲𑀬𑁄 𑀧𑀞𑀫𑀁 𑀧𑀬𑀼𑀢𑁆𑀢𑀢𑁆𑀣𑀯𑀺𑀲𑀬𑁄 𑀢𑀸𑀤𑀺𑀲𑁄 𑀓𑁄𑀘𑀺 𑀯𑀺𑀲𑁂𑀲𑁄 𑀉𑀤𑁆𑀤𑁂𑀲𑀸𑀦𑀼𑀤𑁆𑀤𑁂𑀲𑀸𑀦𑀁 ‘‘𑀇𑀤𑀫𑀲𑁆𑀲 𑀧𑀼𑀩𑁆𑀩𑀓𑀣𑀦𑀁, 𑀇𑀤𑀫𑀲𑁆𑀲 𑀧𑀘𑁆𑀙𑀸𑀓𑀣𑀦’’𑀦𑁆𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀮𑀓𑁆𑀔𑀡𑀲𑀫𑁆𑀩𑀦𑁆𑀥𑀧𑀭𑀺𑀚𑀸𑀦𑀦𑀮𑀓𑁆𑀔𑀡𑁄 𑀯𑀺𑀲𑁂𑀲𑁄 𑀅𑀦𑀼𑀤𑁆𑀤𑀺𑀝𑁆𑀞𑁂𑀲𑀼 𑀅𑀢𑁆𑀣𑀦𑁆𑀢𑀭𑀁 𑀦𑀺𑀲𑁆𑀲𑀸𑀬 𑀧𑀼𑀦 𑀯𑀼𑀢𑁆𑀢𑁂𑀲𑀼 𑀬𑀤𑀺 ‘‘𑀪𑀯𑁂𑀬𑁆𑀬𑀸’’𑀢𑀺 𑀲𑁂𑀲𑁄. 𑀓𑀫𑀯𑀺𑀮𑀗𑁆𑀖𑀦𑁂 𑀉𑀤𑁆𑀤𑁂𑀲𑀸𑀦𑀼𑀤𑁆𑀤𑁂𑀲𑀸𑀦𑀁 𑀓𑀫𑀸𑀢𑀺𑀓𑁆𑀓𑀫𑁂 𑀤𑁄𑀲𑁄 𑀲𑀢𑁆𑀣𑀜𑁆𑀜𑀽𑀦𑀁 𑀲𑀼𑀢𑀺𑀓𑀸𑀮𑁂 𑀅𑀲𑀳𑀦𑀓𑀸𑀭𑀡𑀁 𑀦𑁂𑀯𑀢𑁆𑀣𑀻𑀢𑀺. 𑀉𑀤𑁆𑀤𑀺𑀝𑁆𑀞𑀸 𑀧𑀞𑀫𑀼𑀘𑁆𑀘𑀸𑀭𑀺𑀢𑀸 𑀅𑀢𑁆𑀣𑀸 𑀯𑀺𑀲𑀬𑁄 𑀕𑁄𑀘𑀭𑁄 𑀅𑀲𑁆𑀲𑁂𑀢𑀺 𑀘, 𑀓𑀫𑀲𑁆𑀲 𑀯𑀺𑀮𑀗𑁆𑀖𑀦𑀦𑁆𑀢𑀺 𑀘 𑀯𑀸𑀓𑁆𑀬𑀁.

𑀬𑀣𑀸 𑁋

𑁧𑁦𑁨.

𑀓𑀼𑀲𑀮𑀸𑀓𑀼𑀲𑀮𑀁 ¶ 𑀅𑀩𑁆𑀬𑀸-𑀓𑀢’𑀫𑀺𑀘𑁆𑀘𑁂𑀲𑀼 𑀧𑀘𑁆𑀙𑀺𑀫𑀁;

𑀅𑀩𑁆𑀬𑀸𑀓𑀢𑀁 𑀧𑀸𑀓𑀤𑀁 𑀦, 𑀧𑀸𑀓𑀤𑀁 𑀧𑀞𑀫𑀤𑁆𑀯𑀬𑀁.

𑁧𑁦𑁨. ‘‘𑀬𑀣𑁂’’𑀢𑁆𑀬𑀼𑀤𑀸𑀳𑀭𑀢𑀺 ‘‘𑀓𑀼𑀲𑀮𑁂’’𑀘𑁆𑀘𑀸𑀤𑀺. 𑀓𑀼𑀲𑀮𑀁 𑀓𑀸𑀫𑀸𑀯𑀘𑀭𑀸𑀤𑀺𑀓𑀫𑁂𑀓𑀯𑀻𑀲𑀢𑀺𑀯𑀺𑀥𑀁, 𑀅𑀓𑀼𑀲𑀮𑀜𑁆𑀘 𑀤𑁆𑀯𑀸𑀤𑀲𑀯𑀺𑀥𑀁, 𑀅𑀩𑁆𑀬𑀸𑀓𑀢𑀁 𑀯𑀺𑀧𑀸𑀓𑀓𑁆𑀭𑀺𑀬𑀸𑀲𑀗𑁆𑀔𑀸𑀢𑀫𑀺𑀢𑀺 𑀏𑀢𑁂𑀲𑀼 𑀢𑀻𑀲𑀼 𑀧𑀘𑁆𑀙𑀺𑀫𑀁 𑀅𑀩𑁆𑀬𑀸𑀓𑀢𑀁, 𑀧𑀸𑀓𑀁 𑀯𑀺𑀧𑀸𑀓𑀁 𑀤𑀤𑀸𑀢𑀻𑀢𑀺 𑀧𑀸𑀓𑀤𑀁. 𑀦𑁂𑀢𑀺 𑀦𑀺𑀧𑀸𑀢𑀧𑀤𑀁. 𑀧𑀞𑀫𑀤𑁆𑀯𑀬𑀁 𑀓𑀼𑀲𑀮𑀸𑀓𑀼𑀲𑀮𑀁 𑀧𑀸𑀓𑀁 𑀤𑀤𑀸𑀢𑀻𑀢𑀺 𑀧𑀸𑀓𑀤𑀦𑁆𑀢𑀺. 𑀏𑀢𑁆𑀣 𑀅𑀧𑀸𑀓𑀤𑀢𑁆𑀢𑀁 𑀅𑀩𑁆𑀬𑀸𑀓𑀢𑀲𑁆𑀲𑁂𑀯, 𑀧𑀸𑀓𑀤𑀢𑁆𑀢𑀁 𑀢𑁂𑀲𑀫𑁂𑀯 𑀤𑁆𑀯𑀺𑀦𑁆𑀦𑀦𑁆𑀢𑀺 𑀯𑀺𑀲𑁂𑀲𑁄 𑀤𑀝𑁆𑀞𑀩𑁆𑀩𑁄.

𑁧𑁦𑁨. ‘‘𑀓𑀼𑀲𑀮𑁂’’𑀘𑁆𑀘𑀸𑀤𑀺. 𑀓𑀼𑀲𑀮𑀁 𑀓𑀸𑀫𑀸𑀯𑀘𑀭𑀸𑀤𑀺𑀏𑀓𑀯𑀻𑀲𑀢𑀺𑀓𑀼𑀲𑀮𑀜𑁆𑀘 𑀅𑀓𑀼𑀲𑀮𑀁 𑀤𑁆𑀯𑀸𑀤𑀲𑀯𑀺𑀥𑀁 𑀅𑀓𑀼𑀲𑀮𑀜𑁆𑀘 𑀅𑀩𑁆𑀬𑀸𑀓𑀢𑀁 𑀯𑀺𑀧𑀸𑀓𑀓𑁆𑀭𑀺𑀬𑀸𑀭𑀽𑀧𑀦𑀺𑀩𑁆𑀩𑀸𑀦𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀫𑀩𑁆𑀬𑀸𑀓𑀢𑀜𑁆𑀘 𑀇𑀘𑁆𑀘𑁂𑀲𑀼 𑀏𑀯𑀫𑁂𑀢𑁂𑀲𑀼 𑀢𑀻𑀲𑀼 𑀧𑀘𑁆𑀙𑀺𑀫𑀁 𑀉𑀤𑁆𑀤𑁂𑀲𑀓𑁆𑀓𑀫𑁂𑀦 𑀧𑀘𑁆𑀙𑀺𑀫𑀫𑀩𑁆𑀬𑀸𑀓𑀢𑀁 𑀧𑀸𑀓𑀤𑀁 𑀦 𑀯𑀺𑀧𑀸𑀓𑀤𑀸𑀬𑀓𑀁 𑀦 𑀳𑁄𑀢𑀺, 𑀧𑀞𑀫𑀤𑁆𑀯𑀬𑀁 𑀓𑀼𑀲𑀮𑀸𑀓𑀼𑀲𑀮𑀁 𑀧𑀸𑀓𑀤𑀁 𑀬𑀣𑀸𑀲𑀓𑀁 𑀯𑀺𑀧𑀸𑀓𑀤𑀸𑀬𑀓𑀁 𑀳𑁄𑀢𑀻𑀢𑀺. ‘‘𑀬𑀣𑀸𑀲𑀗𑁆𑀔𑁆𑀬𑀫𑀦𑀼𑀤𑁂𑀲𑁄 𑀲𑀫𑀸𑀦’’𑀦𑁆𑀢𑀺 [𑀧𑀸𑀡𑀺𑀦𑀺 𑁧.𑁩.𑁧𑁦 𑀲𑀼𑀢𑁆𑀢𑀫𑀺𑀤𑀁. 𑀅𑀦𑀼𑀤𑀺𑀲𑁆𑀲𑀢𑁂 𑀇𑀢𑀺 𑀅𑀦𑀼𑀤𑁂𑀲𑁄, 𑀧𑀘𑁆𑀙𑀸 𑀉𑀘𑁆𑀘𑀸𑀭𑀺𑀢𑁄 𑀇𑀘𑁆𑀘𑀢𑁆𑀣𑁄 ‘‘𑀲𑀫𑀸𑀦𑀁’’𑀇𑀢𑀺 𑀲𑀫𑁆𑀩𑀦𑁆𑀥𑁂𑀙𑀝𑁆𑀞𑀻 (𑀓𑀢𑁆𑀯𑀩𑁄𑀥𑀺𑀦𑀻)] 𑀯𑀼𑀢𑁆𑀢𑀢𑁆𑀢𑀸 𑀉𑀤𑁆𑀤𑀺𑀝𑁆𑀞𑁂𑀳𑀺 𑀲𑀫𑀸𑀦𑀫𑀦𑀼𑀤𑁆𑀤𑀺𑀝𑁆𑀞𑀸𑀦𑀫𑁂𑀯 𑀲𑀫𑀲𑀗𑁆𑀔𑁆𑀬𑀸𑀬 𑀮𑀩𑁆𑀪𑀫𑀸𑀦𑀢𑁆𑀢𑀸 𑀲𑀗𑁆𑀔𑁆𑀬𑀸𑀬𑀸𑀦𑀢𑀺𑀓𑁆𑀓𑀫𑁄 𑀳𑁄𑀢𑀺. 𑀏𑀢𑁆𑀣 𑀧𑀦 𑀓𑀼𑀲𑀮𑀸𑀤𑀺𑀲𑀪𑀸𑀯𑀢𑁄 𑀢𑀺𑀯𑀺𑀥𑀢𑁆𑀢𑁂𑀧𑀺 𑀯𑀺𑀧𑀸𑀓𑀤𑀸𑀦𑀸𑀤𑀸𑀦𑀯𑀲𑁂𑀦 𑀤𑀼𑀯𑀺𑀥𑀓𑀼𑀲𑀮𑀸𑀓𑀼𑀲𑀮𑀸𑀤𑀺𑀯𑀺𑀲𑀬𑀪𑀽𑀢𑀯𑀺𑀲𑁂𑀲𑀲𑁆𑀲 𑀧𑀯𑀢𑁆𑀢𑀺𑀬𑀸 𑀯𑀢𑁆𑀢𑀺𑀘𑁆𑀙𑀸𑀢𑁄 𑀧𑀞𑀫𑀁 𑀯𑀢𑁆𑀢𑀩𑁆𑀩𑀢𑀁 𑀯𑀺𑀦𑀸 𑀓𑀫𑁂𑀦 𑀦𑀺𑀲𑁆𑀲𑀬𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀧𑀓𑁆𑀓𑀫𑀤𑁄𑀲𑁄 𑀦 𑀳𑁄𑀢𑀻𑀢𑀺.

𑁧𑁦𑁩.

𑀲𑀕𑀼𑀡𑀸𑀦𑀸’𑀯𑀺𑀓𑀭𑀡𑁂, 𑀓𑀸𑀭𑀡𑁂 𑀲𑀢𑀺 𑀢𑀸𑀤𑀺𑀲𑁂;

𑀑𑀘𑀺𑀢𑁆𑀬𑀳𑀻𑀦𑀢𑀸𑀧𑀢𑁆𑀢𑀺, 𑀦𑀢𑁆𑀣𑀺 𑀪𑀽𑀢𑀢𑁆𑀣𑀲𑀁𑀲𑀺𑀦𑁄.

𑁧𑁦𑁩. ‘‘𑀲𑀕𑀼𑀡𑀸𑀦’’𑀫𑀺𑀘𑁆𑀘𑀸𑀤𑀺. ¶ 𑀲𑁄𑀢𑀽𑀦𑀁 𑀅𑀢𑁆𑀢𑀢𑁆𑀣𑀦𑀺𑀧𑁆𑀨𑀸𑀤𑀦𑀸𑀤𑀺𑀓𑁂 𑀢𑀸𑀤𑀺𑀲𑁂 𑀓𑀸𑀭𑀡𑁂 𑀳𑁂𑀢𑀼𑀫𑁆𑀳𑀺 𑀲𑀢𑀺 𑀪𑀽𑀢𑀁 𑀬𑀣𑀸𑀧𑀯𑀢𑁆𑀢𑀁 𑀅𑀢𑁆𑀣𑀁 𑀅𑀢𑁆𑀢𑀦𑁄 𑀘𑀭𑀺𑀢𑀮𑀓𑁆𑀔𑀡𑀁 𑀲𑀁𑀲𑀺𑀦𑁄 𑀯𑀤𑀦𑁆𑀢𑀲𑁆𑀲 𑀲𑀲𑁆𑀲 𑀅𑀢𑁆𑀢𑀦𑁄, 𑀲𑀸𑀦𑀁 𑀯𑀸 𑀕𑀼𑀡𑀸𑀦𑀁 𑀆𑀯𑀺𑀓𑀭𑀡𑁂 𑀅𑀥𑀺𑀓𑀸𑀭𑀯𑀲𑁂𑀦 ‘‘𑀧𑀽𑀚𑀦𑀻𑀬𑀢𑀭𑁄 𑀮𑁄𑀓𑁂’’𑀇𑀘𑁆𑀘𑀸𑀤𑀺𑀓𑀣𑀦𑁂 𑀑𑀘𑀺𑀓𑁆𑀬𑀳𑀻𑀦𑀢𑀸𑀬 𑀆𑀧𑀢𑁆𑀢𑀺 𑀧𑀸𑀧𑀼𑀡𑀦𑀁 𑀲𑀫𑁆𑀪𑀯𑁄 𑀦𑀢𑁆𑀣𑀺.

𑁧𑁦𑁩. ‘‘𑀲𑀕𑀼𑀡𑀺’’𑀘𑁆𑀘𑀸𑀤𑀺. 𑀢𑀸𑀤𑀺𑀲𑁂 𑀓𑀸𑀭𑀡𑁂 𑀲𑀢𑀺 𑀲𑁄𑀢𑀽𑀦𑀁 𑀅𑀢𑁆𑀢𑀢𑁆𑀣𑀦𑀺𑀧𑁆𑀨𑀸𑀤𑀦𑀸𑀤𑀺𑀓𑁂 𑀢𑀸𑀤𑀺𑀲𑁂 𑀳𑁂𑀢𑀼𑀫𑁆𑀳𑀺 𑀯𑀺𑀚𑁆𑀚𑀫𑀸𑀦𑁂 𑀪𑀽𑀢𑀢𑁆𑀣𑀲𑀁𑀲𑀺𑀦𑁄 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀓𑀸𑀬𑀸𑀤𑀺𑀲𑀁𑀯𑀭𑀮𑀓𑁆𑀔𑀡𑀕𑀼𑀡𑀲𑀗𑁆𑀔𑀸𑀢𑀫𑀢𑁆𑀣𑀁 ‘‘𑀧𑀽𑀚𑀦𑀻𑀬𑀢𑀭𑁄 𑀮𑁄𑀓𑁂 𑀅𑀳𑀫𑁂𑀓𑁄’’𑀇𑀘𑁆𑀘𑀸𑀤𑀺𑀦𑀸 𑀢𑀸𑀤𑀺𑀲𑀸𑀯𑀲𑀭𑁂 𑀯𑀤𑀦𑁆𑀢𑀲𑁆𑀲 𑀲𑀕𑀼𑀡𑀸𑀦𑀁 𑀲𑀲𑁆𑀲 𑀅𑀢𑁆𑀢𑀦𑁄, 𑀲𑀸𑀦𑀁 𑀯𑀸 𑀲𑀓𑀸𑀦𑀁 𑀕𑀼𑀡𑀸𑀦𑀁 𑀆𑀯𑀺𑀓𑀭𑀡𑁂 𑀧𑀸𑀓𑀝𑀻𑀓𑀭𑀡𑁂 𑀑𑀘𑀺𑀢𑁆𑀬𑀳𑀻𑀦𑀢𑀸𑀧𑀢𑁆𑀢𑀺 𑀑𑀘𑀺𑀢𑁆𑀬𑀳𑀻𑀦𑀲𑀗𑁆𑀔𑀸𑀢𑀤𑁄𑀲𑀲𑁆𑀲𑀸𑀧𑀢𑁆𑀢𑀺 𑀦𑀢𑁆𑀣𑀻𑀢𑀺. 𑀲𑀲𑀤𑁆𑀤𑀲𑁆𑀲 𑀅𑀢𑁆𑀢𑀅𑀢𑁆𑀢𑀦𑀺𑀬𑀯𑀸𑀘𑀓𑀢𑁆𑀢𑀸 𑀲𑀲𑁆𑀲 𑀅𑀢𑁆𑀢𑀦𑁄 𑀕𑀼𑀡𑀸 𑀲𑁂 𑀘 𑀢𑁂 𑀕𑀼𑀡𑀸 𑀘𑁂𑀢𑀺 𑀯𑀸 𑀯𑀺𑀕𑁆𑀕𑀳𑁄. 𑀪𑀽𑀢𑁄𑀬𑁂𑀯 𑀅𑀢𑁆𑀣𑁄, 𑀢𑀁 𑀲𑀁𑀲𑀢𑀺 𑀯𑀤𑀢𑀺 𑀲𑀻𑀮𑁂𑀦𑀸𑀢𑀺 𑀯𑀺𑀕𑁆𑀕𑀳𑁄.

𑁧𑁦𑁪.

𑀑𑀘𑀺𑀢𑁆𑀬𑀁 𑀦𑀸𑀫 𑀯𑀺𑀜𑁆𑀜𑁂𑀬𑁆𑀬𑀁, 𑀮𑁄𑀓𑁂 𑀯𑀺𑀔𑁆𑀬𑀸𑀢𑀫𑀸𑀤𑀭𑀸;

𑀢𑀢𑁆𑀣𑁄’𑀧𑀤𑁂𑀲𑀧𑀪𑀯𑀸, 𑀲𑀼𑀚𑀦𑀸 𑀓𑀯𑀺𑀧𑀼𑀗𑁆𑀕𑀯𑀸.

𑁧𑁦𑁪. ‘‘𑀑𑀘𑀺𑀢𑁆𑀬’’𑀫𑀺𑀘𑁆𑀘𑀸𑀤𑀺. 𑀮𑁄𑀓𑁂 𑀲𑀢𑁆𑀢𑀮𑁄𑀓𑁂 𑀯𑀺𑀔𑁆𑀬𑀸𑀢𑀁 𑀧𑀲𑀺𑀤𑁆𑀥𑀁 𑀆𑀩𑀸𑀮𑀚𑀦𑀁 [𑀆𑀩𑀸𑀮𑀚𑀦𑀸𑀦𑀁 (𑀓.)] 𑀬𑀣𑀸𑀲𑀓𑀫𑀦𑀼𑀭𑀽𑀧𑀁 𑀯𑀺𑀚𑀸𑀦𑀦𑀢𑁄 𑀑𑀘𑀺𑀢𑁆𑀬𑀁 𑀉𑀘𑀺𑀢𑀪𑀸𑀯𑁄 𑀦𑀸𑀫𑁂𑀢𑀺 𑀧𑀲𑀺𑀤𑁆𑀥𑀺𑀬𑀁 𑀆𑀤𑀭𑀸 𑀆𑀤𑀭𑁂𑀦 𑀉𑀲𑁆𑀲𑀸𑀳𑁂𑀦 𑀢𑀢𑁄 𑀧𑀭𑀫𑀸𑀤𑀭𑀡𑀻𑀬𑀲𑁆𑀲𑀸𑀪𑀸𑀯𑀢𑁄, 𑀦 𑀳𑀺 𑀅𑀦𑀼𑀘𑀺𑀢𑀁 𑀓𑀺𑀜𑁆𑀘𑀺 𑀓𑁂𑀦𑀸𑀧𑁆𑀬𑀸𑀤𑀭𑀡𑀻𑀬𑀁 𑀲𑀩𑁆𑀩𑀣𑀸 𑀅𑀦𑀲𑁆𑀲𑀸𑀤𑀦𑀻𑀬𑀢𑁆𑀢𑀸, 𑀯𑀺𑀜𑁆𑀜𑁂𑀬𑁆𑀬𑀁 ‘‘𑀲𑁄𑀢𑀽𑀦’’𑀦𑁆𑀢𑀺 𑀲𑁂𑀲𑁄. 𑀢𑀢𑁆𑀣 𑀢𑀲𑁆𑀫𑀺𑀁 𑀑𑀘𑀺𑀢𑁆𑀬𑁂 𑀉𑀧𑀤𑁂𑀲𑀲𑁆𑀲 𑀧𑀞𑀫𑀼𑀘𑁆𑀘𑀸𑀭𑀡𑀲𑁆𑀲 𑀉𑀕𑁆𑀕𑀡𑁆𑀳𑀸𑀧𑀦𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀧𑀪𑀯𑀸 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀸 𑀲𑀼𑀚𑀦𑀸 𑀲𑀼𑀝𑁆𑀞𑀼𑀚𑀦𑀸 𑀓𑀯𑀺𑀧𑀼𑀗𑁆𑀕𑀯𑀸 𑀉𑀢𑁆𑀢𑀫𑀸, [𑀓𑀯𑀺𑀉𑀢𑁆𑀢𑀫𑀸 (?)] 𑀓𑀯𑀺𑀲𑁂𑀝𑁆𑀞𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁦𑁪. ‘‘𑀑𑀘𑀺𑀢𑁆𑀬𑁂’’𑀘𑁆𑀘𑀸𑀤𑀺. ¶ 𑀮𑁄𑀓𑁂 𑀲𑀢𑁆𑀢𑀮𑁄𑀓𑁂 𑀯𑀺𑀔𑁆𑀬𑀸𑀢𑀁 𑀆𑀩𑀸𑀮𑀧𑀲𑀺𑀤𑁆𑀥𑀁 𑀑𑀘𑀺𑀢𑁆𑀬𑀁 𑀦𑀸𑀫 𑀆𑀤𑀭𑀸 𑀕𑀸𑀭𑀯𑁂𑀦 𑀯𑀺𑀜𑁆𑀜𑁂𑀬𑁆𑀬𑀁 𑀯𑀺𑀜𑁆𑀜𑀽𑀳𑀺 𑀜𑀸𑀢𑀩𑁆𑀩𑀁 𑀳𑁄𑀢𑀺, 𑀢𑀢𑁆𑀣 𑀑𑀘𑀺𑀢𑁆𑀬𑀯𑀺𑀲𑀬𑁂 𑀉𑀧𑀤𑁂𑀲𑀧𑀪𑀯𑀸 𑀧𑀞𑀫𑀼𑀘𑁆𑀘𑀸𑀭𑀡𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀸 𑀲𑀼𑀚𑀦𑀸 𑀲𑀸𑀥𑀼𑀚𑀦𑀪𑀽𑀢𑀸 𑀓𑀯𑀺𑀧𑀼𑀗𑁆𑀕𑀯𑀸 𑀉𑀢𑁆𑀢𑀫𑀓𑀯𑀬𑁄 𑀪𑀯𑀦𑁆𑀢𑀻𑀢𑀺, 𑀧𑀲𑀺𑀤𑁆𑀥𑀑𑀘𑀺𑀢𑁆𑀬𑀧𑀤𑁂𑀦 𑀬𑀼𑀢𑁆𑀢𑀢𑁆𑀢𑀸 𑀏𑀢𑁆𑀣 𑀦𑀸𑀫𑀲𑀤𑁆𑀤𑁄 𑀧𑀲𑀺𑀤𑁆𑀥𑀺𑀬𑀁. 𑀉𑀧𑀤𑁂𑀲𑀲𑁆𑀲 𑀧𑀪𑀯𑀸𑀢𑀺 𑀘, 𑀧𑀼𑀫𑀸𑀦𑁄 𑀘 𑀢𑁂 𑀕𑀸𑀯𑁄 𑀘𑁂𑀢𑀺 𑀘, 𑀓𑀯𑀻𑀦𑀁 𑀧𑀼𑀗𑁆𑀕𑀯𑀸𑀢𑀺 𑀘 𑀯𑀸𑀓𑁆𑀬𑀁.

𑁧𑁦𑁫.

𑀯𑀺𑀜𑁆𑀜𑀸𑀢𑁄𑀘𑀺𑀢𑁆𑀬𑀯𑀺𑀪𑀯𑁄-

𑀘𑀺𑀢𑁆𑀬𑀳𑀻𑀦𑀁 𑀧𑀭𑀺𑀳𑀭𑁂;

𑀢𑀢𑁄’𑀘𑀺𑀢𑁆𑀬𑀲𑁆𑀲 𑀲𑀫𑁆𑀧𑁄𑀲𑁂,

𑀭𑀲𑀧𑁄𑀲𑁄 𑀲𑀺𑀬𑀸 𑀓𑀢𑁂.

𑁧𑁦𑁫. ‘‘𑀯𑀺𑀜𑁆𑀜𑀸𑀢’’𑀫𑀺𑀘𑁆𑀘𑀸𑀤𑀺. 𑀯𑀺𑀜𑁆𑀜𑀸𑀢𑁄 𑀅𑀯𑀩𑀼𑀤𑁆𑀥𑁄 𑀬𑀣𑀸𑀯𑀼𑀢𑁆𑀢𑀓𑀯𑀺𑀯𑀭𑀧𑀲𑀸𑀤𑀸 𑀑𑀘𑀺𑀢𑁆𑀬𑀫𑁂𑀯 𑀯𑀺𑀪𑀯𑁄 𑀲𑀫𑁆𑀧𑀢𑁆𑀢𑀺 𑀬𑁂𑀦 𑀲𑁄 𑀑𑀘𑀺𑀢𑁆𑀬𑀳𑀻𑀦𑀁 𑀦𑀸𑀫 𑀤𑀽𑀲𑀦𑀁 𑀧𑀭𑀺𑀳𑀭𑁂 𑀧𑀭𑀺𑀯𑀚𑁆𑀚𑁂𑀬𑁆𑀬. 𑀢𑀢𑁄 𑀢𑀲𑁆𑀫𑀸 𑀧𑀭𑀺𑀳𑀸𑀭𑀢𑁄 𑀳𑁂𑀢𑀼𑀢𑁄 𑀑𑀘𑀺𑀢𑁆𑀬𑀲𑁆𑀲 𑀲𑀫𑁆𑀧𑁄𑀲𑁂 𑀲𑀼𑀝𑁆𑀞𑀼 𑀯𑀟𑁆𑀠𑀺𑀪𑀸𑀯𑁂 𑀯𑀟𑁆𑀠𑀦𑁂 𑀓𑀢𑁂 𑀭𑀲𑀲𑁆𑀲 𑀅𑀲𑁆𑀲𑀸𑀤𑀺𑀢𑀩𑁆𑀩𑀢𑀸𑀲𑀗𑁆𑀔𑀸𑀢𑀲𑁆𑀲 𑀫𑀸𑀥𑀼𑀭𑀺𑀬𑀲𑁆𑀲 𑀲𑀫𑁆𑀧𑁄𑀲𑁄 𑀲𑀺𑀬𑀸 𑀪𑀯𑁂𑀬𑁆𑀬.

𑁧𑁦𑁫. ‘‘𑀯𑀺𑀜𑁆𑀜𑀸𑀢𑁂’’𑀘𑁆𑀘𑀸𑀤𑀺. 𑀯𑀺𑀜𑁆𑀜𑀸𑀢𑁄𑀘𑀺𑀢𑁆𑀬𑀯𑀺𑀪𑀯𑁄 𑀢𑀸𑀤𑀺𑀲𑀓𑀯𑀻𑀦𑀫𑀦𑀼𑀕𑁆𑀕𑀳𑁂𑀦 𑀯𑀺𑀜𑁆𑀜𑀸𑀢𑀑𑀘𑀺𑀢𑁆𑀬𑀲𑀗𑁆𑀔𑀸𑀢𑀲𑀫𑁆𑀧𑀢𑁆𑀢𑀺𑀲𑀫𑀦𑁆𑀦𑀸𑀕𑀢𑁄 𑀓𑀯𑀺 𑀑𑀘𑀺𑀢𑁆𑀬𑀳𑀻𑀦𑀁 𑀦𑀸𑀫 𑀤𑀽𑀲𑀦𑀁 𑀧𑀭𑀺𑀳𑀭𑁂 𑀦𑀺𑀭𑀸𑀓𑀭𑁂𑀬𑁆𑀬, 𑀢𑀢𑁄 𑀤𑁄𑀲𑀧𑀭𑀺𑀳𑀸𑀭𑀢𑁄 𑀑𑀘𑀺𑀢𑁆𑀬𑀲𑁆𑀲 𑀲𑀫𑁆𑀧𑁄𑀲𑁂 𑀉𑀧𑀩𑁆𑀭𑀽𑀳𑀦𑁂 𑀓𑀢𑁂 𑀲𑀢𑀺 𑀭𑀲𑀧𑁄𑀲𑁄 𑀫𑀸𑀥𑀼𑀭𑀺𑀬𑀲𑀗𑁆𑀔𑀢𑀲𑁆𑀲 𑀅𑀲𑁆𑀲𑀸𑀤𑁂𑀢𑀩𑁆𑀩𑀲𑁆𑀲 𑀧𑀽𑀭𑀡𑀁 𑀲𑀺𑀬𑀸 𑀪𑀯𑁂𑀬𑁆𑀬𑀸𑀢𑀺. 𑀑𑀘𑀺𑀢𑁆𑀬𑀫𑁂𑀯 𑀯𑀺𑀪𑀯𑁄𑀢𑀺 𑀘, 𑀯𑀺𑀜𑁆𑀜𑀸𑀢𑁄 𑀑𑀘𑀺𑀢𑁆𑀬𑀯𑀺𑀪𑀯𑁄 𑀬𑁂𑀦𑁂𑀢𑀺 𑀘, 𑀭𑀲𑀲𑁆𑀲 𑀧𑁄𑀲𑁄 𑀧𑀼𑀝𑁆𑀞𑀪𑀸𑀯𑁄 [𑀯𑀼𑀤𑁆𑀥𑀪𑀸𑀯𑁄 (𑀓.)] 𑀧𑁄𑀲𑁂𑀢𑀩𑁆𑀩𑀪𑀸𑀯𑁄𑀢𑀺 𑀘 𑀯𑀸𑀓𑁆𑀬𑀁.

𑀬𑀣𑀸 𑁋

𑁧𑁦𑁬.

𑀬𑁄 ¶ 𑀫𑀸𑀭𑀲𑁂𑀦𑀫𑀸𑀲𑀦𑁆𑀦-𑀫𑀸𑀲𑀦𑁆𑀦𑀯𑀺𑀚𑀬𑀼𑀲𑁆𑀲𑀯𑁄;

𑀢𑀺𑀡𑀸𑀬𑀧𑀺 𑀦 𑀫𑀜𑁆𑀜𑀺𑀢𑁆𑀣, 𑀲𑁄 𑀯𑁄 𑀤𑁂𑀢𑀼 𑀚𑀬𑀁 𑀚𑀺𑀦𑁄.

𑁧𑁦𑁬. ‘‘𑀬𑀣𑁂’’𑀢𑁆𑀬𑀼𑀤𑀸𑀳𑀭𑀢𑀺 ‘‘𑀬𑁄’’𑀇𑀘𑁆𑀘𑀸𑀤𑀺. 𑀯𑀺𑀚𑀬𑁄 𑀧𑀭𑀸𑀪𑀺𑀪𑀯𑁄 𑀆𑀲𑀦𑁆𑀦𑁄 𑀯𑀺𑀚𑀬𑁄 𑀏𑀯 𑀉𑀲𑁆𑀲𑀯𑁄 𑀅𑀩𑁆𑀪𑀼𑀤𑀬𑁄 𑀦𑀺𑀧𑁆𑀧𑀝𑀺𑀧𑀓𑁆𑀔𑀸 𑀧𑀯𑀢𑁆𑀢𑀺 𑀬𑀲𑁆𑀲 𑀏𑀤𑀺𑀲𑁄 𑀬𑁄 𑀆𑀲𑀦𑁆𑀦𑀁 𑀅𑀢𑁆𑀢𑀦𑁄 𑀲𑀫𑀻𑀧𑀫𑀼𑀧𑀕𑀢𑀁 𑀫𑀸𑀭𑀲𑁂𑀦𑀁 𑀢𑀺𑀡𑀸𑀬𑀧𑀺 𑀦 𑀫𑀜𑁆𑀜𑀺𑀢𑁆𑀣 𑀢𑀺𑀡𑀫𑁆𑀧𑀺 𑀦 𑀫𑀜𑁆𑀜𑀺𑀢𑁆𑀣, 𑀢𑀺𑀡𑀢𑁄𑀧𑀺 𑀳𑀻𑀦𑀁 𑀫𑀜𑁆𑀜𑀺𑀢𑁆𑀣, 𑀲𑁄 𑀚𑀺𑀦𑁄 𑀫𑀸𑀭𑀚𑀺 𑀯𑁄 𑀢𑀼𑀫𑁆𑀳𑀸𑀓𑀁 𑀚𑀬𑀁 𑀤𑁂𑀢𑀽𑀢𑀺 𑀯𑀺𑀤𑀥𑀸𑀢𑀼. 𑀏𑀢𑁆𑀣 𑀚𑀬𑀸𑀲𑀻𑀲𑀦𑀸 ‘‘𑀚𑀺𑀦𑁄’’𑀢𑀺 𑀅𑀘𑁆𑀘𑀦𑁆𑀢𑀫𑀼𑀘𑀺𑀢𑀁, 𑀬𑁄 𑀅𑀚𑀺𑀦𑀺 𑀧𑀜𑁆𑀘𑀫𑀸𑀭𑁂𑀢𑀺 𑀚𑀺𑀦𑁄 𑀧𑀭𑀸𑀪𑀺𑀪𑀯𑁂𑀓𑀭𑀲𑁄, 𑀢𑀲𑁆𑀲 𑀧𑀭𑁂𑀲𑀁 𑀯𑀺𑀚𑀬𑀧𑁆𑀧𑀤𑀸𑀦𑁂 𑀲𑀸𑀫𑀢𑁆𑀣𑀺𑀬𑁂𑀓𑀬𑁄𑀕𑁄 𑀲𑀺𑀬𑀸𑀢𑀺. ‘‘𑀫𑀸𑀭𑀲𑁂𑀦𑀫𑀸𑀲𑀦𑁆𑀦𑀁 𑀢𑀺𑀡𑀸𑀬𑀧𑀺 𑀦 𑀫𑀜𑁆𑀜𑀺𑀢𑁆𑀣𑀸’’𑀢𑀺 𑀇𑀤𑀁 𑀧𑀦𑁂𑀢𑁆𑀣 𑀅𑀢𑀺𑀲𑀫𑀼𑀘𑀺𑀢𑀁 𑀬𑀢𑁄 𑀲𑀫𑀻𑀧𑀫𑀼𑀧𑀕𑀢𑀫𑁆𑀧𑀺 𑀢𑀸𑀤𑀺𑀲𑀁 𑀫𑀸𑀭𑀲𑁂𑀦𑀁 𑀢𑀺𑀡𑀢𑁄𑀧𑀺 𑀳𑀻𑀦𑀁 𑀫𑀜𑁆𑀜𑀺, 𑀢𑁂𑀦𑀲𑁆𑀲 𑀧𑀭𑁂𑀲𑀁 𑀯𑀺𑀚𑀬𑀧𑁆𑀧𑀤𑀸𑀦𑁂𑀓𑀭𑀲𑀢𑀸 𑀯𑀺𑀲𑁂𑀲𑀢𑁄 𑀬𑀼𑀢𑁆𑀢𑀸𑀢𑀺.

𑁧𑁦𑁬. 𑀇𑀳 𑀲𑀢𑁆𑀣𑁂 𑀲𑀩𑁆𑀩𑀢𑁆𑀣 𑀲𑀗𑁆𑀔𑁂𑀧𑀓𑁆𑀓𑀫𑀫𑀺𑀘𑁆𑀙𑀦𑁆𑀢𑁄𑀧𑀺 𑀆𑀘𑀭𑀺𑀬𑁄 𑀑𑀘𑀺𑀢𑁆𑀬𑀁 𑀦𑀸𑀫 𑀆𑀤𑀭𑁂𑀦 𑀲𑀕𑁆𑀕𑀭𑀽𑀳𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀬𑀼𑀚𑁆𑀚𑀺𑀢𑀩𑁆𑀩𑀫𑀺𑀘𑁆𑀘𑁂𑀯𑀁 𑀯𑀺𑀢𑁆𑀣𑀸𑀭𑁂𑀦 𑀲𑀺𑀲𑁆𑀲𑁂 𑀅𑀦𑀼𑀲𑀸𑀲𑀺𑀢𑁆𑀯𑀸 𑀇𑀤𑀸𑀦𑀺 𑀑𑀘𑀺𑀢𑁆𑀬𑀳𑀻𑀦𑀧𑀭𑀺𑀳𑀭𑀡𑀢𑁆𑀣𑀁 ‘‘𑀬𑁄 𑀫𑀸𑀭𑀲𑁂𑀦𑀫𑀸𑀲𑀦𑁆𑀦𑁂’’𑀘𑁆𑀘𑀸𑀤𑀺𑀦𑀸 𑀮𑀓𑁆𑀔𑀺𑀬𑀫𑀼𑀤𑀸𑀳𑀭𑀢𑀺. 𑀆𑀲𑀦𑁆𑀦𑀯𑀺𑀚𑀬𑀼𑀲𑁆𑀲𑀯𑁄 𑀅𑀤𑀽𑀭𑀲𑀢𑁆𑀢𑀼𑀯𑀺𑀚𑀬𑀲𑀗𑁆𑀔𑀸𑀢𑀉𑀲𑁆𑀲𑀯𑁄, 𑀅𑀣 𑀯𑀸 𑀅𑀘𑁆𑀘𑀸𑀲𑀦𑁆𑀦𑀧𑀝𑀺𑀧𑀓𑁆𑀔𑀯𑀺𑀭𑀳𑀧𑁆𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑀅𑀪𑀺𑀯𑀼𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀬𑁄 𑀚𑀺𑀦𑁄 𑀆𑀲𑀦𑁆𑀦𑀁 𑀅𑀦𑁂𑀓𑀧𑁆𑀧𑀓𑀸𑀭𑀪𑀺𑀁𑀲𑀦𑀓𑀭𑀽𑀧𑁂𑀦 𑀅𑀢𑁆𑀢𑀦𑁄 𑀲𑀫𑀻𑀧𑀫𑀸𑀕𑀢𑀁 𑀫𑀸𑀭𑀲𑁂𑀦𑀁 𑀫𑀸𑀭𑀩𑀮𑀁 𑀢𑀺𑀡𑀸𑀬𑀧𑀺 𑀢𑀺𑀡𑀮𑀯𑀁 𑀓𑀢𑁆𑀯𑀸𑀧𑀺 𑀦 𑀫𑀜𑁆𑀜𑀺𑀢𑁆𑀣 𑀲𑀮𑁆𑀮𑀓𑁆𑀔𑀡𑀁 𑀦𑀸𑀓𑀸𑀲𑀺, 𑀲𑁄 𑀚𑀺𑀦𑁄 𑀲𑁄 𑀚𑀺𑀢𑀧𑀜𑁆𑀘𑀫𑀸𑀭𑁄 𑀯𑁄 𑀢𑀼𑀫𑁆𑀳𑀸𑀓𑀁 𑀚𑀬𑀁 𑀤𑁂𑀢𑀽𑀢𑀺. 𑀏𑀢𑁆𑀣 𑀬𑁄 𑀧𑀜𑁆𑀘𑀫𑀸𑀭𑁂 𑀚𑀺𑀢𑀢𑁆𑀢𑀸 𑀚𑀺𑀦𑁄 𑀦𑀸𑀫 𑀳𑁄𑀢𑀺, 𑀲𑁄 𑀧𑀭𑀸𑀪𑀺𑀪𑀯𑀦𑁂 𑀅𑀲𑀳𑀸𑀬𑀓𑀺𑀘𑁆𑀘𑀢𑁆𑀢𑀸 𑀧𑀭𑁂𑀲𑀁 𑀚𑀬𑀤𑀸𑀦𑁂 𑀲𑀸𑀫𑀢𑁆𑀣𑀺𑀬𑀬𑀼𑀢𑁆𑀢𑁄𑀢𑀺 ‘‘𑀚𑀬𑀁 𑀤𑁂𑀢𑀽’’𑀢𑀺 𑀓𑀢𑀁 𑀚𑀬𑀸𑀲𑀻𑀲𑀦𑀫𑀢𑀺𑀉𑀘𑀺𑀢𑀁 ¶ 𑀳𑁄𑀢𑀺, 𑀚𑀬𑀤𑀸𑀦𑁂 𑀲𑀸𑀫𑀢𑁆𑀣𑀺𑀬𑀲𑁆𑀲𑁂𑀯 𑀧𑁄𑀲𑀓𑀢𑁆𑀢𑀸. ‘‘𑀫𑀸𑀭𑀲𑁂𑀦𑀫𑀸𑀲𑀦𑁆𑀦𑀁 𑀢𑀺𑀡𑀸𑀬𑀧𑀺 𑀦 𑀫𑀜𑁆𑀜𑀺𑀢𑁆𑀣𑀸’’𑀢𑀺 𑀇𑀤𑀁 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺. 𑀏𑀯𑀁 𑀅𑀘𑁆𑀘𑀦𑁆𑀢𑀉𑀘𑀺𑀢𑀧𑀬𑁄𑀕𑁂𑀦 𑀑𑀘𑀺𑀢𑁆𑀬𑀳𑀻𑀦𑀤𑁄𑀲𑁄 𑀦𑀺𑀭𑀸𑀓𑀢𑁄𑀢𑀺. 𑀯𑀺𑀚𑀬𑁄 𑀏𑀯 𑀉𑀲𑁆𑀲𑀯𑁄, 𑀆𑀲𑀦𑁆𑀦𑁄 𑀯𑀺𑀚𑀬𑀼𑀲𑁆𑀲𑀯𑁄 𑀬𑀲𑁆𑀲𑁂𑀢𑀺 𑀯𑀺𑀕𑁆𑀕𑀳𑁄.

𑁧𑁦𑁭.

𑀆𑀭𑀤𑁆𑀥𑀓𑀢𑁆𑀢𑀼𑀓𑀫𑁆𑀫𑀸𑀤𑀺-𑀓𑀫𑀸𑀢𑀺𑀓𑁆𑀓𑀫𑀮𑀗𑁆𑀖𑀦𑁂;

𑀪𑀕𑁆𑀕𑀭𑀻𑀢𑀺𑀯𑀺𑀭𑁄𑀥𑁄’𑀬𑀁, 𑀕𑀢𑀺𑀁 𑀦 𑀓𑁆𑀯𑀸𑀧𑀺 𑀯𑀺𑀦𑁆𑀤𑀢𑀺.

𑁧𑁦𑁭. ‘‘𑀆𑀭𑀤𑁆𑀥’’𑀇𑀘𑁆𑀘𑀸𑀤𑀺. 𑀓𑀢𑁆𑀢𑀸 𑀘 𑀓𑀫𑁆𑀫𑀜𑁆𑀘 𑀢𑀸𑀦𑀺 𑀆𑀤𑀻𑀦𑀺 𑀬𑁂𑀲𑀁 𑀓𑀭𑀡𑀸𑀤𑀻𑀦𑀁 𑀆𑀭𑀤𑁆𑀥𑀸𑀦𑀺 𑀯𑀢𑁆𑀢𑀼𑀁 𑀧𑀝𑁆𑀞𑀧𑀺𑀢𑀸𑀦𑀺 𑀓𑀢𑁆𑀢𑀼𑀓𑀫𑁆𑀫𑀸𑀤𑀻𑀦𑀺 𑀢𑁂𑀲𑀁 𑀓𑀫𑁄 𑀢𑀲𑁆𑀲 𑀅𑀢𑀺𑀓𑁆𑀓𑀫𑁄 𑀧𑀭𑀺𑀘𑁆𑀘𑀸𑀕𑁄 𑀢𑀲𑁆𑀲 𑀮𑀗𑁆𑀖𑀦𑁂 𑀲𑀢𑀺, 𑀯𑀢𑁆𑀢𑀼𑀫𑀸𑀭𑀤𑁆𑀥𑀓𑀢𑁆𑀢𑀼𑀓𑀫𑁆𑀫𑀸𑀤𑀺𑀓𑀫𑀸𑀦𑀢𑀺𑀓𑁆𑀓𑀫𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀁 𑀬𑀣𑀸𑀯𑀼𑀢𑁆𑀢𑁄 𑀪𑀕𑁆𑀕𑀭𑀻𑀢𑀺𑀯𑀺𑀭𑁄𑀥𑁄 𑀓𑁆𑀯𑀸𑀧𑀺 𑀓𑀢𑁆𑀣𑀘𑀺𑀧𑀺 𑀞𑀸𑀦𑁂 𑀕𑀢𑀺𑀁 𑀦 𑀯𑀺𑀦𑁆𑀤𑀢𑀺 𑀧𑀢𑀺𑀝𑁆𑀞𑀁 𑀦 𑀮𑀪𑀢𑁂.

𑁧𑁦𑁭. ‘‘𑀆𑀭𑀤𑁆𑀥𑀺’’𑀘𑁆𑀘𑀸𑀤𑀺. 𑀆𑀭𑀤𑁆𑀥𑀓𑀢𑁆𑀢𑀼𑀓𑀫𑁆𑀫𑀸𑀤𑀺𑀓𑀫𑀸𑀢𑀺𑀓𑁆𑀓𑀫𑀮𑀗𑁆𑀖𑀦𑁂 𑀯𑀢𑁆𑀢𑀼𑀫𑀸𑀭𑀤𑁆𑀥𑀓𑀢𑁆𑀢𑀼𑀓𑀫𑁆𑀫𑀸𑀤𑀻𑀦𑀁 𑀓𑀫𑀧𑀭𑀺𑀘𑁆𑀘𑀸𑀕𑀲𑁆𑀲𑀸𑀢𑀺𑀓𑁆𑀓𑀫𑁂 𑀅𑀬𑀁 𑀬𑀣𑀸𑀯𑀼𑀢𑁆𑀢𑀪𑀕𑁆𑀕𑀭𑀻𑀢𑀺𑀯𑀺𑀭𑁄𑀥𑁄 𑀓𑁆𑀯𑀸𑀧𑀺 𑀓𑀢𑁆𑀣𑀘𑀺𑀧𑀺 𑀞𑀸𑀦𑁂 𑀕𑀢𑀺𑀁 𑀧𑀢𑀺𑀝𑁆𑀞𑀁 𑀦 𑀯𑀺𑀦𑁆𑀤𑀢𑀺 𑀦 𑀮𑀪𑀢𑁂𑀢𑀺. 𑀆𑀭𑀤𑁆𑀥𑀸𑀦𑀺 𑀘 𑀢𑀸𑀦𑀺 𑀓𑀢𑁆𑀢𑀼𑀓𑀫𑁆𑀫𑀸𑀤𑀻𑀦𑀺 𑀬𑁂𑀲𑀁 𑀓𑀭𑀡𑀸𑀤𑀻𑀦𑀁 𑀢𑁂𑀲𑀁 𑀓𑀫𑀲𑁆𑀲 𑀅𑀢𑀺𑀓𑁆𑀓𑀫𑁄 𑀢𑀲𑁆𑀲 𑀮𑀗𑁆𑀖𑀦𑀦𑁆𑀢𑀺 𑀯𑀺𑀕𑁆𑀕𑀳𑁄.

𑀬𑀣𑀸 𑁋

𑁧𑁦𑁮.

𑀲𑀼𑀚𑀦𑀜𑁆𑀜𑀸𑀦’𑀫𑀺𑀢𑁆𑀣𑀻𑀦𑀁, 𑀯𑀺𑀲𑁆𑀲𑀸𑀲𑁄 𑀦𑁄’𑀧𑀧𑀚𑁆𑀚𑀢𑁂;

𑀯𑀺𑀲𑀲𑁆𑀲 𑀲𑀺𑀗𑁆𑀕𑀺𑀦𑁄 𑀭𑁄𑀕-𑀦𑀤𑀻𑀭𑀸𑀚𑀓𑀼𑀮𑀲𑁆𑀲 𑀘.

𑁧𑁦𑁯.

𑀪𑁂𑀲𑀚𑁆𑀚𑁂 𑀯𑀺𑀳𑀺𑀢𑁂 𑀲𑀼𑀤𑁆𑀥-𑀩𑀼𑀤𑁆𑀥𑀸𑀤𑀺𑀭𑀢𑀦𑀢𑁆𑀢𑀬𑁂;

𑀧𑀲𑀸𑀤’𑀫𑀸𑀘𑀭𑁂 𑀦𑀺𑀘𑁆𑀘𑀁, 𑀲𑀚𑁆𑀚𑀦𑁂 𑀲𑀕𑀼𑀡𑁂𑀧𑀺 𑀘.

𑁧𑁦𑁮-𑁧𑁦𑁯. 𑀏𑀢𑁆𑀣 𑀘 ‘‘𑀲𑀼𑀚𑀦’’𑀫𑀺𑀘𑁆𑀘𑀸𑀤𑀺𑀓𑁂 ‘‘𑀪𑁂𑀲𑀚𑁆𑀚𑁂’’𑀇𑀘𑁆𑀘𑀸𑀤𑀺𑀓𑁂 𑀘 𑀕𑀸𑀣𑀸𑀤𑁆𑀯𑀬𑁂 𑀙𑀝𑁆𑀞𑀺𑀬𑀸, 𑀲𑀢𑁆𑀢𑀫𑀺𑀬𑀸 𑀘 𑀅𑀧𑀭𑀺𑀘𑁆𑀘𑀸𑀕𑁂𑀦 𑀦𑀸𑀢𑁆𑀣𑀭𑀻𑀢𑀺𑀬𑀸 𑀪𑀗𑁆𑀕𑁄, 𑀘𑀓𑀸𑀭𑀲𑁆𑀲𑁂𑀓𑀲𑁆𑀲 𑀓𑀢𑀢𑁆𑀢𑀸 𑀦 𑀲𑀤𑁆𑀤𑀭𑀻𑀢𑀺𑀬𑀸 ¶ 𑀪𑀗𑁆𑀕𑁄. 𑀩𑀳𑀽𑀦𑀫𑀢𑁆𑀣𑀸𑀦𑀜𑁆𑀳𑀺 𑀲𑀫𑀼𑀘𑁆𑀘𑀬𑀢𑁆𑀣𑀁 𑀯𑀸𑀓𑁆𑀬𑁂 𑀏𑀓𑁄 𑀯𑀸 𑀘𑀓𑀸𑀭𑁄 𑀓𑀸𑀢𑀩𑁆𑀩𑁄 𑀧𑀝𑀺𑀧𑀤𑀁 𑀯𑀸.

𑁧𑁦𑁮. ‘‘𑀲𑀼𑀚𑀦𑁂’’𑀘𑁆𑀘𑀸𑀤𑀺. 𑀲𑀼𑀚𑀦𑀜𑁆𑀜𑀸𑀦𑀁 𑀲𑀚𑁆𑀚𑀦𑁂𑀳𑀺 𑀅𑀜𑁆𑀜𑁂𑀲𑀁 𑀤𑀼𑀚𑁆𑀚𑀦𑀸𑀦𑀜𑁆𑀘 𑀇𑀢𑁆𑀣𑀻𑀦𑀜𑁆𑀘 𑀯𑀺𑀲𑀲𑁆𑀲 𑀚𑀻𑀯𑀺𑀢𑀳𑀭𑀡𑀲𑀫𑀢𑁆𑀣𑀲𑁆𑀲 𑀲𑀺𑀗𑁆𑀕𑀺𑀦𑁄 𑀯𑀺𑀲𑀸𑀡𑀯𑀢𑁄 𑀘 𑀭𑁄𑀕𑀦𑀤𑀻𑀭𑀸𑀚𑀓𑀼𑀮𑀲𑁆𑀲 𑀘 𑀯𑀺𑀲𑁆𑀲𑀸𑀲𑁄 𑀲𑀁𑀲𑀕𑁆𑀕𑁄 𑀦 𑀉𑀧𑀧𑀚𑁆𑀚𑀢𑁂 𑀓𑀺𑀜𑁆𑀘𑀺𑀓𑀸𑀮𑁂 𑀯𑀺𑀭𑀼𑀚𑁆𑀛𑀦𑀢𑁄 𑀦 𑀬𑀼𑀚𑁆𑀚𑀢𑁂𑀢𑀺. 𑀏𑀢𑁆𑀣 𑀆𑀭𑀤𑁆𑀥𑀲𑁆𑀲 𑀙𑀝𑁆𑀞𑀼𑀦𑁆𑀢𑀓𑁆𑀓𑀫𑀲𑁆𑀲 𑀲𑀩𑁆𑀩𑀢𑁆𑀣 𑀅𑀧𑀭𑀺𑀘𑁆𑀘𑀸𑀕𑀢𑁄 𑀅𑀢𑁆𑀣𑀭𑀻𑀢𑀺𑀪𑀗𑁆𑀕𑁄 𑀘, 𑀬𑀼𑀢𑁆𑀢𑀝𑁆𑀞𑀸𑀦𑁂 𑀏𑀓𑀲𑁆𑀲𑁂𑀯 𑀘𑀓𑀸𑀭𑀲𑁆𑀲 𑀬𑀼𑀢𑁆𑀢𑀢𑁆𑀢𑀸 𑀲𑀤𑁆𑀤𑀭𑀻𑀢𑀺𑀪𑀗𑁆𑀕𑁄 𑀘 𑀦𑀢𑁆𑀣𑀺. 𑀘𑀲𑀤𑁆𑀤𑀲𑁆𑀲 𑀅𑀦𑁂𑀓𑀢𑁆𑀣𑀲𑀫𑀼𑀘𑁆𑀘𑀬𑀢𑁆𑀢𑀸 ‘‘𑀲𑀼𑀚𑀦𑀜𑁆𑀜𑀸𑀦𑀜𑁆𑀘𑀸’’𑀢𑀺𑀆𑀤𑀺𑀫𑁆𑀳𑀺 𑀯𑀸, 𑀇𑀳 𑀯𑀼𑀢𑁆𑀢𑀦𑀺𑀬𑀸𑀫𑁂𑀦 𑀅𑀯𑀲𑀸𑀦𑁂 𑀯𑀸, 𑀲𑀩𑁆𑀩𑀢𑁆𑀣 𑀯𑀸 𑀬𑁄𑀚𑀦𑀫𑀭𑀳𑀢𑀺.

𑁧𑁦𑁯. ‘‘𑀪𑁂𑀲𑀚𑁆𑀚𑁂’’𑀘𑁆𑀘𑀸𑀤𑀺𑀕𑀸𑀣𑀸𑀬𑀫𑁆𑀧𑀺 𑀏𑀲𑁂𑀯 𑀦𑀬𑁄 𑀲𑀢𑁆𑀢𑀫𑀻𑀫𑀢𑁆𑀢𑀫𑁂𑀯 𑀯𑀺𑀲𑁂𑀲𑁄. 𑀯𑀺𑀳𑀺𑀢𑁂 𑀧𑀣𑁆𑀬𑁂 𑀪𑁂𑀲𑀚𑁆𑀚𑁂 𑀑𑀲𑀥𑁂 𑀘 𑀲𑀼𑀤𑁆𑀥𑀩𑀼𑀤𑁆𑀥𑀸𑀤𑀺𑀭𑀢𑀦𑀢𑁆𑀢𑀬𑁂 𑀘 𑀲𑀚𑁆𑀚𑀦𑁂 𑀲𑀸𑀥𑀼𑀚𑀦𑁂 𑀘 𑀅𑀧𑀺 𑀧𑀼𑀦𑀧𑀺 𑀲𑀕𑀼𑀡𑁂 𑀯𑀺𑀚𑁆𑀚𑀫𑀸𑀦𑀕𑀼𑀡𑁂 𑀘 𑀧𑀲𑀸𑀤𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀧𑀲𑀸𑀤𑀁 𑀦𑀺𑀘𑁆𑀘𑀁 𑀲𑀢𑀢𑀁 𑀆𑀘𑀭𑁂 𑀲𑀧𑁆𑀧𑀼𑀭𑀺𑀲𑁄 𑀓𑀭𑁂𑀬𑁆𑀬 𑀲𑁂𑀯𑁂𑀬𑁆𑀬𑀸𑀢𑀺.

𑀲𑀲𑀁𑀲𑀬𑀲𑁆𑀲 𑀬𑀣𑀸 𑁋

𑁧𑁧𑁦.

𑀫𑀼𑀦𑀺𑀦𑁆𑀤𑀘𑀦𑁆𑀤𑀺𑀫𑀸𑀮𑁄𑀓-

𑀭𑀲𑀮𑁄𑀮𑀯𑀺𑀮𑁄𑀘𑀦𑁄;

𑀚𑀦𑁄’𑀯𑀓𑁆𑀓𑀦𑁆𑀢𑀧𑀦𑁆𑀣𑁄’𑀯,

𑀭𑀁𑀲𑀺𑀤𑀲𑁆𑀲𑀦𑀧𑀻𑀡𑀺𑀢𑁄.

𑁧𑁧𑁦. ‘‘𑀫𑀼𑀦𑀺𑀦𑁆𑀤𑁂’’𑀘𑁆𑀘𑀸𑀤𑀺. 𑀏𑀢𑁆𑀣 𑀭𑀁𑀲𑀺𑀲𑀤𑁆𑀤𑁄 𑀲𑀲𑀁𑀲𑀬𑀁 𑀧𑀭𑀺𑀳𑀭𑀢𑀺.

𑁧𑁧𑁦. 𑀲𑀲𑀁𑀲𑀬𑀧𑀭𑀺𑀳𑀸𑀭𑀮𑀓𑁆𑀔𑀺𑀬𑀪𑀽𑀢𑀸 ‘‘𑀫𑀼𑀦𑀺𑀦𑁆𑀤𑀺’’𑀘𑁆𑀘𑀸𑀤𑀺𑀕𑀸𑀣𑀸 𑀅𑀦𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑁂 𑀯𑀼𑀢𑁆𑀢𑀢𑁆𑀣𑀸𑀯. 𑀭𑀁𑀲𑀺𑀲𑀤𑁆𑀤𑁄𑀬𑁂𑀯 𑀳𑀺 𑀯𑀺𑀲𑁂𑀲𑁄, 𑀏𑀢𑁆𑀣 𑀭𑀁𑀲𑀺𑀲𑀤𑁆𑀤𑁂𑀦 𑀲𑀼𑀡𑀦𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀲𑀁𑀲𑀬𑁂𑀦 𑀲𑀲𑀁𑀲𑀬𑀪𑀽𑀢𑀁 𑀩𑀦𑁆𑀥𑀤𑁄𑀲𑀫𑁄𑀳𑀢𑀻𑀢𑀺.

𑁧𑁧𑁧.

𑀲𑀁𑀲𑀬𑀸𑀬𑁂𑀯 ¶ 𑀬𑀁 𑀓𑀺𑀜𑁆𑀘𑀺, 𑀬𑀤𑀺 𑀓𑀻𑀴𑀸𑀤𑀺𑀳𑁂𑀢𑀼𑀦𑀸;

𑀧𑀬𑀼𑀚𑁆𑀚𑀢𑁂 𑀦 𑀤𑁄𑀲𑁄’𑀯, 𑀲𑀲𑀁𑀲𑀬𑀲𑀫𑀧𑁆𑀧𑀺𑀢𑁄.

𑁧𑁧𑁧. ‘‘𑀲𑀁𑀲𑀬𑁂’’𑀘𑁆𑀘𑀸𑀤𑀺. 𑀓𑀻𑀴𑀸𑀤𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀆𑀓𑀺𑀡𑁆𑀡𑀲𑀫𑁆𑀫𑀦𑁆𑀢𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀓𑀻𑀴𑀸𑀤𑀺𑀳𑁂𑀢𑀼𑀦𑀸 𑀬𑀁 𑀓𑀺𑀜𑁆𑀘𑀺 𑀲𑀁𑀲𑀬𑀸𑀬𑁂𑀯 𑀬𑀤𑀺 𑀧𑀬𑀼𑀚𑁆𑀚𑀢𑁂𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁧𑁧. ‘‘𑀲𑀁𑀲𑀬𑀸𑀬𑁂𑀯𑁂’’𑀘𑁆𑀘𑀸𑀤𑀺. 𑀓𑀻𑀴𑀸𑀤𑀺𑀳𑁂𑀢𑀼𑀦𑀸 𑀓𑀻𑀴𑀸𑀲𑀫𑁆𑀩𑀸𑀥𑀲𑀫𑁆𑀫𑀦𑁆𑀢𑀦𑀸𑀤𑀺𑀓𑀸𑀭𑀡𑁂𑀦 𑀬𑀁 𑀓𑀺𑀜𑁆𑀘𑀺 𑀲𑀁𑀲𑀬𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀁 𑀬𑀁 𑀓𑀺𑀜𑁆𑀘𑀺 𑀧𑀤𑀁 𑀲𑀁𑀲𑀬𑀸𑀬 𑀏𑀯 𑀲𑁄𑀢𑀽𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀲𑀁𑀲𑀬𑀢𑁆𑀣𑀫𑁂𑀯 𑀬𑀤𑀺 𑀧𑀬𑀼𑀚𑁆𑀚𑀢𑁂 𑀢𑀲𑁆𑀫𑀺𑀁 𑀩𑀦𑁆𑀥𑀦𑁂 𑀯𑀢𑁆𑀢𑀸𑀭𑁂𑀳𑀺 𑀧𑀬𑀼𑀚𑁆𑀚𑀢𑁂 𑀘𑁂, 𑀲𑀲𑀁𑀲𑀬𑀲𑀫𑀧𑁆𑀧𑀺𑀢𑁄 𑀲𑀲𑀁𑀲𑀬𑀤𑁄𑀲𑀲𑀳𑀺𑀢𑁄 𑀩𑀦𑁆𑀥𑁄 𑀦 𑀤𑁄𑀲𑁄𑀯 𑀅𑀤𑀼𑀝𑁆𑀞𑁄𑀯𑀸𑀢𑀺. 𑀲𑀲𑀁𑀲𑀬𑁂𑀦 𑀲𑀫𑀧𑁆𑀧𑀺𑀢𑁄𑀢𑀺 𑀯𑀺𑀕𑁆𑀕𑀳𑁄.

𑀬𑀣𑀸 𑁋

𑁧𑁧𑁨.

𑀬𑀸𑀢𑁂 𑀤𑀼𑀢𑀺𑀬𑀁𑀦𑀺𑀮𑀬𑀁, 𑀕𑀼𑀭𑀼𑀫𑁆𑀳𑀺 𑀲𑀓𑀕𑁂𑀳𑀢𑁄;

𑀧𑀸𑀧𑀼𑀡𑁂𑀬𑁆𑀬𑀸𑀫 𑀦𑀺𑀬𑀢𑀁, 𑀲𑀼𑀔’𑀫𑀚𑁆𑀛𑀬𑀦𑀸𑀤𑀺𑀦𑀸.

𑁧𑁧𑁨. ‘‘𑀬𑀸𑀢𑁂’’𑀘𑁆𑀘𑀸𑀤𑀺. 𑀕𑀼𑀭𑀼𑀫𑁆𑀳𑀺 𑀅𑀚𑁆𑀛𑀸𑀧𑀓𑁂 𑀲𑀓𑀕𑁂𑀳𑀢𑁄 𑀅𑀢𑁆𑀢𑀦𑁄 𑀫𑀽𑀮𑀦𑀺𑀮𑀬𑀢𑁄 𑀤𑀼𑀢𑀺𑀬𑀁 𑀦𑀺𑀮𑀬𑀁 𑀤𑀼𑀢𑀺𑀬𑀁 𑀖𑀭𑀁 𑀬𑀸𑀢𑁂 𑀲𑀢𑀺 𑀦𑀺𑀬𑀢𑀫𑁂𑀓𑀦𑁆𑀢𑀫𑀚𑁆𑀛𑀬𑀦𑀸𑀤𑀺𑀦𑀸 𑀲𑀼𑀔𑀁 𑀧𑀸𑀧𑀼𑀡𑁂𑀬𑁆𑀬𑀸𑀫𑀸𑀢𑀺 𑀅𑀬𑀫𑀦𑀺𑀘𑁆𑀙𑀺𑀢𑀢𑁆𑀣𑁄. 𑀕𑀼𑀭𑀼𑀫𑁆𑀳𑀺 𑀲𑀼𑀭𑀸𑀘𑀭𑀺𑀬𑁂 [𑀲𑀼𑀭𑀘𑁆𑀘𑀸𑀘𑀭𑀺𑀬𑁂 (𑀓.)] 𑀲𑀓𑀕𑁂𑀳𑀢𑁄 𑀅𑀢𑁆𑀢𑀦𑁄 𑀚𑀸𑀢𑀭𑀸𑀲𑀺𑀢𑁄 𑀤𑀼𑀢𑀺𑀬𑀁 𑀦𑀺𑀮𑀬𑀁 𑀤𑀼𑀢𑀺𑀬𑀁 𑀭𑀸𑀲𑀺𑀁 𑀬𑀸𑀢𑁂 𑀲𑀢𑀺 𑀦𑀺𑀬𑀢𑀫𑀚𑁆𑀛𑀬𑀦𑀸𑀤𑀺𑀦𑀸 𑀲𑀼𑀔𑀁 𑀧𑀸𑀧𑀼𑀡𑁂𑀬𑁆𑀬𑀸𑀫𑀸𑀢𑀺 𑀅𑀬𑀫𑁂𑀢𑁆𑀣 𑀇𑀘𑁆𑀙𑀺𑀢𑀢𑁆𑀣𑁄.

𑁧𑁧𑁨. ‘‘𑀬𑀸𑀢𑁂’’𑀘𑁆𑀘𑀸𑀤𑀺. 𑀕𑀼𑀭𑀼𑀫𑁆𑀳𑀺 𑀆𑀘𑀭𑀺𑀬𑁂 𑀲𑀓𑀕𑁂𑀳𑀢𑁄 𑀅𑀢𑁆𑀢𑀦𑁄 𑀯𑀸𑀲𑀸𑀕𑀸𑀭𑀢𑁄 𑀤𑀼𑀢𑀺𑀬𑀁 𑀦𑀺𑀮𑀬𑀁 𑀤𑀼𑀢𑀺𑀬𑀁 𑀖𑀭𑀁𑀬𑀸𑀢𑁂 𑀲𑀢𑀺, 𑀅𑀬𑀫𑀦𑀺𑀘𑁆𑀙𑀺𑀢𑀢𑁆𑀣𑁄. 𑀕𑀼𑀭𑀼𑀫𑁆𑀳𑀺 𑀲𑀼𑀭𑀸𑀘𑀭𑀺𑀬𑁂 𑀲𑀓𑀕𑁂𑀳𑀢𑁄 𑀅𑀢𑁆𑀢𑀦𑁄 𑀚𑀸𑀢𑀭𑀸𑀲𑀺𑀢𑁄 𑀤𑀼𑀢𑀺𑀬𑀁 𑀦𑀺𑀮𑀬𑀁 𑀤𑀼𑀢𑀺𑀬𑀁 ¶ 𑀭𑀸𑀲𑀺𑀁 𑀬𑀸𑀢𑁂 𑀕𑀢𑁂 𑀲𑀢𑀺 𑀅𑀦𑀼𑀓𑀽𑀮𑀢𑁆𑀢𑀸 𑀦𑀺𑀬𑀢𑀫𑁂𑀓𑀦𑁆𑀢𑁂𑀦 𑀅𑀚𑁆𑀛𑀬𑀦𑀸𑀤𑀺𑀦𑀸 𑀉𑀕𑁆𑀕𑀳𑀡𑀸𑀤𑀺𑀦𑀸 𑀲𑀼𑀔𑀁 𑀫𑀸𑀦𑀲𑀺𑀓𑀲𑀼𑀔𑀁, 𑀦𑁄 𑀘𑁂 𑀲𑀼𑀔𑀓𑀸𑀭𑀡𑀁 𑀕𑀦𑁆𑀣𑀧𑀭𑀺𑀲𑀫𑀢𑁆𑀢𑀺𑀁 𑀧𑀸𑀧𑀼𑀡𑁂𑀬𑁆𑀬𑀸𑀫𑀸𑀢𑀺. 𑀉𑀪𑀬𑀧𑀓𑁆𑀔𑀲𑁆𑀲𑀸𑀧𑀺 𑀅𑀧𑀭𑀢𑁆𑀣𑁂 𑀅𑀢𑁆𑀣𑁄 𑀲𑀸𑀥𑀸𑀭𑀡𑁄 𑀳𑁄𑀢𑀺. 𑀏𑀢𑁆𑀣 𑀅𑀚𑁆𑀛𑀬𑀦𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂𑀦 𑀧𑀬𑀼𑀢𑁆𑀢𑀕𑀼𑀭𑀼𑀲𑀤𑁆𑀤𑀲𑁆𑀲 𑀆𑀘𑀭𑀺𑀬𑀢𑁆𑀣𑀯𑀸𑀘𑀓𑀢𑁆𑀢𑁂𑀧𑀺 𑀇𑀘𑁆𑀙𑀺𑀢𑀢𑁆𑀣𑀕𑁄𑀧𑀦𑀢𑁆𑀣𑀁 𑀧𑀬𑀼𑀢𑁆𑀢𑀢𑁆𑀢𑀸 𑀅𑀤𑀼𑀝𑁆𑀞𑁄𑀢𑀺.

𑁧𑁧𑁩.

𑀲𑀼𑀪𑀕𑀸 𑀪𑀕𑀺𑀦𑀻 𑀲𑀸’𑀬𑀁, 𑀏𑀢𑀲𑁆𑀲𑀺’𑀘𑁆𑀘𑁂𑀯𑀫𑀸𑀤𑀺𑀓𑀁;

𑀦 ‘‘𑀕𑀸𑀫𑁆𑀫’’𑀫𑀺𑀢𑀺 𑀦𑀺𑀤𑁆𑀤𑀺𑀝𑁆𑀞𑀁, 𑀓𑀯𑀻𑀳𑀺 𑀲𑀓𑀮𑁂𑀳𑀺𑀧𑀺.

𑁧𑁧𑁩. ‘‘𑀲𑀼𑀪𑀕𑀸’’𑀇𑀘𑁆𑀘𑀸𑀤𑀺. 𑀇𑀘𑁆𑀘𑁂𑀯𑀫𑀸𑀤𑀺𑀓𑀁 𑀪𑀕𑀺𑀦𑀻𑀇𑀘𑁆𑀘𑁂𑀯𑀫𑀸𑀤𑀺𑀓𑀁.

𑁧𑁧𑁩. ‘‘𑀲𑀼𑀪𑀕𑁂’’𑀘𑁆𑀘𑀸𑀤𑀺. 𑀏𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀸 𑀅𑀬𑀁 𑀪𑀕𑀺𑀦𑀻 𑀲𑀼𑀪𑀕𑀸 𑀲𑀼𑀦𑁆𑀤𑀭𑀸𑀢𑀺 𑀇𑀘𑁆𑀘𑁂𑀯𑀫𑀸𑀤𑀺𑀓𑀁 𑀲𑀓𑀮𑁂𑀳𑀺 𑀓𑀯𑀻𑀳𑀺 𑀅𑀧𑀺 𑀦 𑀕𑀸𑀫𑁆𑀫𑀫𑀺𑀢𑀺 𑀕𑀸𑀫𑁆𑀫𑀤𑁄𑀲𑁂𑀦 𑀦 𑀤𑀼𑀝𑁆𑀞𑀫𑀺𑀢𑀺 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺. 𑀲𑀼𑀪𑀁 𑀲𑀼𑀦𑁆𑀤𑀭𑀪𑀸𑀯𑀁 𑀕𑀢𑀸𑀢𑀺 ‘‘𑀲𑀼𑀪𑀕𑀸’’𑀢𑀺 𑀅𑀕𑁆𑀕𑀳𑁂𑀢𑁆𑀯𑀸 𑀩𑀳𑀼𑀩𑁆𑀩𑀻𑀳𑀺𑀲𑀫𑀸𑀲𑁂 𑀓𑀢𑁂 𑀮𑀩𑁆𑀪𑀫𑀸𑀦𑀢𑁆𑀣𑀲𑁆𑀲 𑀅𑀲𑀩𑁆𑀪𑀪𑀸𑀯𑁂𑀧𑀺 𑀓𑀯𑀻𑀦𑀁 𑀘𑀺𑀢𑁆𑀢𑀔𑁂𑀤𑀁 𑀦 𑀚𑀦𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀺 𑀏𑀯𑀁 𑀅𑀬𑀁 𑀧𑀓𑀸𑀭𑁄 𑀆𑀤𑀺 𑀅𑀲𑁆𑀲 𑀈𑀤𑀺𑀲𑀲𑁆𑀲 𑀯𑀸𑀓𑁆𑀬𑀲𑁆𑀲𑀸𑀢𑀺 𑀯𑀸𑀓𑁆𑀬𑀁.

𑁧𑁧𑁪.

𑀤𑀼𑀝𑁆𑀞𑀸𑀮𑀗𑁆𑀓𑀸𑀭𑀯𑀺𑀕𑀫𑁂, 𑀲𑁄𑀪𑀦𑀸𑀮𑀗𑁆𑀓𑀢𑀺𑀓𑁆𑀓𑀫𑁄;

𑀅𑀮𑀗𑁆𑀓𑀸𑀭𑀧𑀭𑀺𑀘𑁆𑀙𑁂𑀤𑁂, 𑀆𑀯𑀺𑀪𑀸𑀯𑀁 𑀕𑀫𑀺𑀲𑁆𑀲𑀢𑀺.

𑁧𑁧𑁪. ‘‘𑀤𑀼𑀝𑁆𑀞’’𑀇𑀘𑁆𑀘𑀸𑀤𑀺. 𑀤𑀼𑀝𑁆𑀞𑀸𑀮𑀗𑁆𑀓𑀸𑀭𑀲𑁆𑀲 𑀤𑁄𑀲𑀤𑀽𑀲𑀺𑀢𑀲𑁆𑀲 𑀅𑀮𑀗𑁆𑀓𑀸𑀭𑀲𑁆𑀲 𑀯𑀺𑀕𑀫𑁂 𑀅𑀧𑀕𑀫𑁂 𑀲𑀢𑀺.

𑁧𑁧𑁪. ‘‘𑀤𑀼𑀝𑁆𑀞𑀺’’𑀘𑁆𑀘𑀸𑀤𑀺. 𑀤𑀼𑀝𑁆𑀞𑀸𑀮𑀗𑁆𑀓𑀸𑀭𑀯𑀺𑀕𑀫𑁂 𑀤𑁄𑀲𑀤𑀼𑀝𑁆𑀞𑀲𑁆𑀲 𑀅𑀮𑀗𑁆𑀓𑀸𑀭𑀲𑁆𑀲 𑀅𑀧𑀕𑀫𑁂 𑀲𑀢𑀺 𑀲𑁄𑀪𑀦𑀸𑀮𑀗𑁆𑀓𑀢𑀺𑀓𑁆𑀓𑀫𑁄 𑀧𑀲𑀢𑁆𑀣𑀸𑀦𑀫𑀮𑀗𑁆𑀓𑀸𑀭𑀸𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑁄 𑀅𑀮𑀗𑁆𑀓𑀸𑀭𑀧𑀭𑀺𑀘𑁆𑀙𑁂𑀤𑁂 𑀅𑀮𑀗𑁆𑀓𑀸𑀭𑀧𑀓𑀸𑀲𑀓𑀢𑁆𑀢𑀸 𑀢𑀦𑁆𑀦𑀸𑀫𑀓𑁂 𑀧𑀭𑀺𑀘𑁆𑀙𑁂𑀤𑁂 𑀆𑀯𑀺𑀪𑀸𑀯𑀁 𑀧𑀓𑀸𑀲𑀢𑁆𑀢𑀁 𑀕𑀫𑀺𑀲𑁆𑀲𑀢𑀺 𑀧𑀸𑀧𑀼𑀡𑀺𑀲𑁆𑀲𑀢𑀻𑀢𑀺. 𑀧𑀭𑀺𑀘𑁆𑀙𑀺𑀚𑁆𑀚𑀢𑀻𑀢𑀺 𑀧𑀭𑀺𑀘𑁆𑀙𑁂𑀤𑁄. 𑀅𑀮𑀗𑁆𑀓𑀸𑀭𑀧𑀓𑀸𑀲𑀓𑀢𑁆𑀢𑀸 𑀢𑀤𑀢𑁆𑀣𑁂𑀦 𑀅𑀮𑀗𑁆𑀓𑀸𑀭𑁄 𑀘 𑀲𑁄 𑀧𑀭𑀺𑀘𑁆𑀙𑁂𑀤𑁄 𑀘𑁂𑀢𑀺 𑀯𑀺𑀕𑁆𑀕𑀳𑁄.

𑁧𑁧𑁫.

𑀤𑁄𑀲𑁂 ¶ 𑀧𑀭𑀻𑀳𑀭𑀺𑀢𑀼𑀫𑁂𑀲 𑀯𑀭𑁄’𑀧𑀤𑁂𑀲𑁄,

𑀲𑀢𑁆𑀣𑀦𑁆𑀢𑀭𑀸𑀦𑀼𑀲𑀭𑀡𑁂𑀦 𑀓𑀢𑁄 𑀫𑀬𑁂𑀯𑀁;

𑀯𑀺𑀜𑁆𑀜𑀸𑀬𑀺’𑀫𑀁 𑀕𑀼𑀭𑀼𑀯𑀭𑀸𑀦’𑀥𑀺𑀓𑀧𑁆𑀧𑀲𑀸𑀤𑀸,

𑀤𑁄𑀲𑁂 𑀧𑀭𑀁 𑀧𑀭𑀺𑀳𑀭𑁂𑀬𑁆𑀬 𑀬𑀲𑁄𑀪𑀺𑀮𑀸𑀲𑀻.

𑀇𑀢𑀺 𑀲𑀗𑁆𑀖𑀭𑀓𑁆𑀔𑀺𑀢𑀫𑀳𑀸𑀲𑀸𑀫𑀺𑀧𑀸𑀤𑀯𑀺𑀭𑀘𑀺𑀢𑁂

𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂

𑀤𑁄𑀲𑀧𑀭𑀺𑀳𑀸𑀭𑀸𑀯𑀩𑁄𑀥𑁄 𑀦𑀸𑀫

𑀤𑀼𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁧𑁫. ‘‘𑀤𑁄𑀲𑁂’’𑀇𑀘𑁆𑀘𑀸𑀤𑀺. 𑀤𑁄𑀲𑁂 𑀬𑀣𑀸𑀯𑀼𑀢𑁆𑀢𑁂 𑀧𑀤𑀤𑁄𑀲𑀸𑀤𑀺𑀓𑁂 𑀧𑀭𑀺𑀳𑀭𑀺𑀢𑀼𑀁 𑀧𑀭𑀺𑀘𑁆𑀘𑀚𑀺𑀢𑀼𑀁 𑀏𑀲𑁄 𑀯𑀭𑁄 𑀉𑀢𑁆𑀢𑀫𑁄 𑀉𑀧𑀤𑁂𑀲𑁄 𑀲𑀢𑁆𑀣𑀦𑁆𑀢𑀭𑀸𑀦𑀁 𑀩𑀳𑀽𑀦𑀁 𑀅𑀦𑀼𑀲𑀭𑀡𑁂𑀦 𑀅𑀦𑀼𑀕𑀫𑁂𑀦 [𑀅𑀦𑀼𑀧𑀕𑀫𑁂𑀦 (𑀓.)] 𑀫𑀬𑀸 𑀏𑀯𑀁 𑀓𑀢𑁄 𑀦𑀺𑀧𑁆𑀨𑀸𑀤𑀺𑀢𑁄, 𑀇𑀫𑀁 𑀉𑀧𑀤𑁂𑀲𑀁 𑀕𑀼𑀭𑀼𑀯𑀭𑀸𑀦𑀁 𑀅𑀥𑀺𑀓𑀧𑁆𑀧𑀲𑀸𑀤𑀸 𑀫𑀳𑀢𑀸 𑀧𑀲𑀸𑀤𑁂𑀦 𑀦 𑀅𑀧𑁆𑀧𑀓𑁂𑀦, 𑀢𑀣𑀸𑀯𑀺𑀥𑁂𑀦 𑀢𑀸𑀤𑀺𑀲𑀲𑁆𑀲 𑀫𑀳𑀢𑁄 𑀅𑀢𑁆𑀣𑀲𑁆𑀲 𑀅𑀧𑀲𑀺𑀚𑁆𑀛𑀦𑀢𑁄, 𑀯𑀺𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀆𑀤𑀭𑀢𑁄 𑀓𑀭𑁂𑀬𑁆𑀬 𑀤𑁄𑀲𑁂 𑀬𑀣𑀸𑀯𑀼𑀢𑁆𑀢𑁂 𑀤𑁄𑀲𑁂 𑀬𑀲𑁄 𑀧𑀭𑀺𑀲𑀼𑀤𑁆𑀥𑀩𑀦𑁆𑀥𑀦𑀁 𑀓𑁆𑀭𑀺𑀬𑀸𑀮𑀓𑁆𑀔𑀡𑀢𑁄 𑀏𑀓𑀦𑁆𑀢𑁂𑀦 𑀓𑀺𑀢𑁆𑀢𑀺𑀳𑁂𑀢𑀼𑀢𑁆𑀢𑀸, 𑀢𑀁𑀲𑀩𑁆𑀪𑀸𑀯𑀸 𑀓𑀺𑀢𑁆𑀢𑀺 𑀯𑀸, 𑀢𑀁 𑀅𑀪𑀺𑀮𑀲𑀢𑀺 𑀲𑀻𑀮𑁂𑀦𑁂𑀢𑀺 𑀬𑀲𑁄𑀪𑀺𑀮𑀸𑀲𑀻 𑀧𑀭𑀁 𑀅𑀘𑁆𑀘𑀦𑁆𑀢𑀫𑁂𑀯 𑀧𑀭𑀺𑀳𑀭𑁂𑀬𑁆𑀬 𑀤𑀽𑀭𑀢𑁄 𑀓𑀭𑁂𑀬𑁆𑀬.

𑀇𑀢𑀺 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂 𑀫𑀳𑀸𑀲𑀸𑀫𑀺𑀦𑀸𑀫𑀺𑀓𑀸𑀬𑀁 𑀝𑀻𑀓𑀸𑀬𑀁

𑀤𑁄𑀲𑀧𑀭𑀺𑀳𑀸𑀭𑀸𑀯𑀩𑁄𑀥𑀧𑀭𑀺𑀘𑁆𑀙𑁂𑀤𑁄 𑀤𑀼𑀢𑀺𑀬𑁄.

𑁧𑁧𑁫. ‘‘𑀤𑁄𑀲𑁂’’𑀘𑁆𑀘𑀸𑀤𑀺. 𑀤𑁄𑀲𑁂 𑀬𑀣𑀸𑀯𑀼𑀢𑁆𑀢𑀧𑀤𑀤𑁄𑀲𑀸𑀤𑀺𑀓𑁂 𑀧𑀭𑀺𑀳𑀭𑀺𑀢𑀼𑀫𑀧𑀦𑁂𑀢𑀼𑀁 𑀯𑀭𑁄 𑀉𑀢𑁆𑀢𑀫𑁄 𑀏𑀲𑁄 𑀉𑀧𑀤𑁂𑀲𑁄 𑀲𑀢𑁆𑀣𑀦𑁆𑀢𑀭𑀸𑀦𑀼𑀲𑀭𑀡𑁂𑀦 𑀩𑀳𑀽𑀦𑀁 𑀩𑀸𑀳𑀺𑀭𑀲𑀢𑁆𑀣𑀸𑀦𑀁 𑀅𑀦𑀼𑀲𑁆𑀲𑀢𑀺𑀬𑀸 𑀫𑀬𑀸 𑀏𑀯𑀁 𑀅𑀦𑀦𑁆𑀢𑀭𑀼𑀤𑁆𑀤𑀺𑀝𑁆𑀞𑀓𑁆𑀓𑀫𑁂𑀦 𑀓𑀢𑁄 𑀯𑀺𑀭𑀘𑀺𑀢𑁄, 𑀇𑀫𑀁 𑀉𑀧𑀤𑁂𑀲𑀁 𑀕𑀼𑀭𑀼𑀯𑀭𑀸𑀦𑀁 𑀅𑀥𑀺𑀓𑀧𑁆𑀧𑀲𑀸𑀤𑀸 𑀅𑀥𑀺𑀓𑀧𑁆𑀧𑀲𑀸𑀤𑁂𑀦 𑀯𑀺𑀜𑁆𑀜𑀸𑀬 𑀲𑀪𑀸𑀯𑀢𑁄 𑀜𑀢𑁆𑀯𑀸 𑀬𑀲𑁄𑀪𑀺𑀮𑀸𑀲𑀻 𑀬𑀲𑀧𑀝𑀺𑀮𑀸𑀪𑀓𑀸𑀭𑀡𑀢𑁆𑀢𑀸 ¶ 𑀓𑀸𑀭𑀡𑁂 𑀓𑀸𑀭𑀺𑀬𑁄𑀧𑀘𑀸𑀭𑁂𑀦 𑀤𑁄𑀲𑀸𑀧𑀕𑀫𑁂𑀦 𑀧𑀭𑀺𑀲𑀼𑀤𑁆𑀥𑀩𑀦𑁆𑀥𑀦𑀁 𑀯𑀸 𑀢𑀸𑀤𑀺𑀲𑀩𑀦𑁆𑀥𑀦𑀳𑁂𑀢𑀼 𑀉𑀧𑁆𑀧𑀚𑁆𑀚𑀫𑀸𑀦𑀓𑀺𑀢𑁆𑀢𑀺𑀁 𑀯𑀸 𑀇𑀘𑁆𑀙𑀦𑁆𑀢𑁄 𑀧𑀜𑁆𑀜𑀯𑀸 𑀤𑁄𑀲𑁂 𑀬𑀣𑀸𑀯𑀼𑀢𑁆𑀢𑀤𑁄𑀲𑁂 𑀧𑀭𑀁 𑀅𑀢𑀺𑀲𑀬𑁂𑀦 𑀧𑀭𑀺𑀳𑀭𑁂𑀬𑁆𑀬 𑀤𑀽𑀭𑀢𑁄 𑀓𑀭𑁂𑀬𑁆𑀬𑀸𑀢𑀺. 𑀏𑀢𑁆𑀣 𑀧𑀼𑀩𑁆𑀩𑀤𑁆𑀥𑁂𑀦 𑀤𑁄𑀲𑀧𑀭𑀺𑀳𑀸𑀭𑀧𑀭𑀺𑀘𑁆𑀙𑁂𑀤𑀲𑁆𑀲 𑀧𑀲𑀢𑁆𑀣𑀪𑀸𑀯𑁄 𑀤𑀲𑁆𑀲𑀺𑀢𑁄, 𑀅𑀧𑀭𑀤𑁆𑀥𑁂𑀦 𑀲𑀺𑀲𑁆𑀲𑀚𑀦𑀸𑀦𑀼𑀲𑀸𑀲𑀦𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑀣𑀸 𑀧𑀼𑀩𑁆𑀩𑀤𑁆𑀥𑁂𑀦 𑀓𑀭𑀼𑀡𑀸𑀧𑀼𑀩𑁆𑀩𑀗𑁆𑀕𑀫𑀧𑀜𑁆𑀜𑀸𑀓𑀺𑀘𑁆𑀘𑀁 𑀤𑀲𑁆𑀲𑀺𑀢𑀁, 𑀅𑀧𑀭𑀤𑁆𑀥𑁂𑀦 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀓𑀭𑀼𑀡𑀸𑀓𑀺𑀘𑁆𑀘𑀁 𑀤𑀲𑁆𑀲𑀺𑀢𑀁. 𑀢𑀣𑀸 𑀧𑀼𑀩𑁆𑀩𑀤𑁆𑀥𑁂𑀦 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺, 𑀅𑀧𑀭𑀤𑁆𑀥𑁂𑀦 𑀧𑀭𑀳𑀺𑀢𑀲𑀫𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸𑀢𑀺. 𑀏𑀯𑀫𑀦𑁂𑀓𑀸𑀓𑀸𑀭𑀤𑀻𑀧𑀺𑀓𑀸𑀬 𑀇𑀫𑀸𑀬 𑀕𑀸𑀣𑀸𑀬 𑀧𑀭𑀺𑀘𑁆𑀙𑁂𑀤𑀁 𑀦𑀺𑀕𑀫𑁂𑀢𑀺. 𑀅𑀜𑁆𑀜𑁂 𑀲𑀢𑁆𑀣𑀸 𑀲𑀢𑁆𑀣𑀦𑁆𑀢𑀭𑀸, 𑀅𑀦𑁆𑀢𑀭𑀲𑀤𑁆𑀤𑁄 𑀳𑀺 𑀅𑀜𑁆𑀜𑀲𑀤𑁆𑀤𑀧𑀭𑀺𑀬𑀸𑀬𑁄. 𑀬𑀣𑀸 ‘‘𑀕𑀸𑀫𑀦𑁆𑀢𑀭𑀁 𑀦 𑀕𑀘𑁆𑀙𑁂𑀬𑁆𑀬𑀸’’𑀢𑀺. 𑀬𑀲𑀁 𑀅𑀪𑀺𑀮𑀲𑀢𑀺 𑀲𑀻𑀮𑁂𑀦𑀸𑀢𑀺 𑀯𑀸𑀓𑁆𑀬𑀁.

𑀇𑀢𑀺 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑀦𑀺𑀲𑁆𑀲𑀬𑁂

𑀤𑀼𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.

𑁩. 𑀕𑀼𑀡𑀸𑀯𑀩𑁄𑀥𑀧𑀭𑀺𑀘𑁆𑀙𑁂𑀤

𑀅𑀦𑀼𑀲𑀦𑁆𑀥𑀺𑀯𑀡𑁆𑀡𑀦𑀸

𑁧𑁧𑁬.

𑀲𑀫𑁆𑀪𑀯𑀦𑁆𑀢𑀺 𑀕𑀼𑀡𑀸 𑀬𑀲𑁆𑀫𑀸,

𑀤𑁄𑀲𑀸𑀦𑁂’𑀯’𑀫𑀢𑀺𑀓𑁆𑀓𑀫𑁂;

𑀤𑀲𑁆𑀲𑁂𑀲𑁆𑀲𑀁 𑀢𑁂 𑀢𑀢𑁄 𑀤𑀸𑀦𑀺,

𑀲𑀤𑁆𑀤𑁂 𑀲𑀫𑁆𑀪𑀽𑀲𑀬𑀦𑁆𑀢𑀺 𑀬𑁂.

𑁧𑁧𑁬. 𑀏𑀯𑀁 𑀤𑁄𑀲𑀧𑀭𑀺𑀳𑀸𑀭𑁄𑀧𑀤𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀤𑁄𑀲𑀧𑀭𑀺𑀳𑀸𑀭𑀸 𑀲𑀫𑀼𑀧𑀕𑀢𑀕𑀼𑀡𑀁 𑀉𑀧𑀤𑀲𑁆𑀲𑀺𑀢𑀼𑀫𑀥𑀺𑀓𑀸𑀭𑀁 𑀯𑀺𑀭𑀘𑀬𑀦𑁆𑀢𑁄 𑀆𑀳 ‘‘𑀲𑀫𑁆𑀪𑀯𑀦𑁆𑀢𑀺’’𑀇𑀘𑁆𑀘𑀸𑀤𑀺. 𑀤𑁄𑀲𑀸𑀦𑀁 𑀬𑀣𑀸𑀯𑀼𑀢𑁆𑀢𑀸𑀦𑀁 𑀧𑀤𑀤𑁄𑀲𑀸𑀤𑀻𑀦𑀁 𑀏𑀯𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀅𑀢𑀺𑀓𑁆𑀓𑀫𑁂 𑀲𑀢𑀺 𑀕𑀼𑀡𑀸 𑀥𑀫𑁆𑀫𑀸 ¶ 𑀲𑀤𑁆𑀤𑀸𑀮𑀗𑁆𑀓𑀸𑀭𑀲𑀪𑀸𑀯𑀸 𑀧𑀲𑀸𑀤𑀸𑀤𑀬𑁄 𑀬𑀲𑁆𑀫𑀸 𑀓𑀸𑀭𑀡𑀸 𑀲𑀫𑁆𑀪𑀯𑀦𑁆𑀢𑀺 𑀲𑀺𑀚𑁆𑀛𑀦𑁆𑀢𑀺, 𑀢𑀜𑁆𑀘 ‘‘𑀧𑀲𑀸𑀤𑁄 𑀓𑀺𑀮𑀺𑀝𑁆𑀞𑀸𑀤𑀻𑀦𑀁 𑀯𑀚𑁆𑀚𑀦𑀸 𑀲𑀫𑁆𑀪𑀯𑀢𑀻’’𑀢𑁆𑀬𑀸𑀤𑀺𑀦𑀸 𑀬𑀣𑀸𑀬𑁄𑀕𑀁 𑀯𑀺𑀜𑁆𑀜𑁂𑀬𑁆𑀬𑀁, 𑀢𑀢𑁄 𑀢𑀲𑁆𑀫𑀸 𑀓𑀸𑀭𑀡𑀸 𑀬𑁂 𑀕𑀼𑀡𑀸 𑀲𑀤𑁆𑀤𑁂 𑀲𑀫𑁆𑀪𑀽𑀲𑀬𑀦𑁆𑀢𑀺 𑀅𑀮𑀗𑁆𑀓𑀭𑁄𑀦𑁆𑀢𑀺, 𑀢𑁂 𑀲𑀤𑁆𑀤𑀸𑀮𑀗𑁆𑀓𑀸𑀭𑀲𑀗𑁆𑀔𑀸𑀢𑁂 𑀕𑀼𑀡𑁂 𑀇𑀤𑀸𑀦𑀺 𑀤𑀲𑁆𑀲𑁂𑀲𑁆𑀲𑀁 𑀉𑀧𑀤𑀺𑀲𑀺𑀲𑁆𑀲𑀸𑀫𑀺.

𑁧𑁧𑁬. 𑀏𑀯𑀁 𑀤𑁄𑀲𑀧𑀭𑀺𑀳𑀸𑀭𑀧𑀯𑁂𑀲𑁄𑀧𑀸𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀤𑁄𑀲𑀸𑀦𑀁 𑀧𑀭𑀺𑀳𑀸𑀭𑁂𑀦 ‘‘𑀩𑀦𑁆𑀥𑀦𑀺𑀲𑁆𑀲𑀺𑀢𑀕𑀼𑀡𑀸 𑀏𑀢𑁂’’𑀢𑀺 𑀤𑀲𑁆𑀲𑁂𑀢𑀼𑀁 𑀧𑀼𑀩𑁆𑀩𑀸𑀧𑀭𑀧𑀭𑀺𑀘𑁆𑀙𑁂𑀤𑀸𑀦𑀁 𑀲𑀫𑁆𑀩𑀦𑁆𑀥𑀁 𑀖𑀝𑁂𑀦𑁆𑀢𑁄 ‘‘𑀲𑀫𑁆𑀪𑀯𑀦𑁆𑀢𑀺’’𑀘𑁆𑀘𑀸𑀤𑀺𑀕𑀸𑀣𑀫𑀸𑀳. 𑀤𑁄𑀲𑀸𑀦𑀁 𑀦𑀺𑀤𑁆𑀤𑀺𑀝𑁆𑀞𑀧𑀤𑀤𑁄𑀲𑀸𑀤𑀻𑀦𑀁 𑀏𑀯𑀁 𑀅𑀦𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑁂 𑀦𑀺𑀤𑁆𑀤𑀺𑀝𑁆𑀞𑀓𑁆𑀓𑀫𑁂𑀦 𑀅𑀢𑀺𑀓𑁆𑀓𑀫𑁂 𑀲𑀢𑀺 𑀕𑀼𑀡𑀸 𑀧𑀲𑀸𑀤𑀸𑀤𑀺𑀲𑀤𑁆𑀤𑀸𑀮𑀗𑁆𑀓𑀸𑀭𑀲𑀗𑁆𑀔𑀸𑀢𑀸 𑀧𑀲𑀸𑀤𑀸𑀤𑀬𑁄 𑀲𑀤𑁆𑀤𑀥𑀫𑁆𑀫𑀸 𑀬𑀲𑁆𑀫𑀸 𑀲𑀫𑁆𑀪𑀯𑀦𑁆𑀢𑀺, 𑀢𑀢𑁄 𑀬𑁂 𑀲𑀤𑁆𑀤𑀥𑀫𑁆𑀫𑀸 𑀲𑀤𑁆𑀤𑁂 𑀲𑀫𑁆𑀪𑀽𑀲𑀬𑀦𑁆𑀢𑀺 𑀲𑀚𑁆𑀚𑀦𑁆𑀢𑀺, 𑀢𑁂 𑀲𑀤𑁆𑀤𑀥𑀫𑁆𑀫𑁂 𑀤𑀲𑁆𑀲𑁂𑀲𑁆𑀲𑀁 𑀧𑀓𑀸𑀲𑀺𑀲𑁆𑀲𑀸𑀫𑀻𑀢𑀺. 𑀏𑀢𑁆𑀣 𑀓𑀺𑀮𑀺𑀝𑁆𑀞𑀤𑁄𑀲𑀩𑁆𑀬𑀸𑀓𑀺𑀡𑁆𑀡𑀤𑁄𑀲𑀧𑀭𑀺𑀳𑀸𑀭𑁂𑀳𑀺 𑀧𑀲𑀸𑀤𑀸𑀮𑀗𑁆𑀓𑀸𑀭𑁄 𑀲𑀺𑀚𑁆𑀛𑀢𑀺, 𑀲𑁂𑀲𑀸𑀧𑀺 𑀬𑀣𑀸𑀮𑀸𑀪𑀢𑁄 𑀜𑀸𑀢𑀩𑁆𑀩𑀸.

𑀲𑀤𑁆𑀤𑀸𑀮𑀗𑁆𑀓𑀸𑀭𑀉𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁧𑁭.

𑀧𑀲𑀸𑀤𑁄’𑀚𑁄 𑀫𑀥𑀼𑀭𑀢𑀸,

𑀲𑀫𑀢𑀸 𑀲𑀼𑀔𑀼𑀫𑀸𑀮𑀢𑀸;

𑀲𑀺𑀮𑁂𑀲𑁄’𑀤𑀸𑀭𑀢𑀸 𑀓𑀦𑁆𑀢𑀺,

𑀅𑀢𑁆𑀣𑀩𑁆𑀬𑀢𑁆𑀢𑀺𑀲𑀫𑀸𑀥𑀬𑁄.

𑁧𑁧𑁭. 𑀇𑀤𑀸𑀦𑀺 𑀢𑁂 𑀯𑀺𑀪𑀚𑀢𑀺 ‘‘𑀧𑀲𑀸𑀤𑁄’’𑀇𑀘𑁆𑀘𑀸𑀤𑀺𑀦𑀸 𑀧𑀲𑀢𑁆𑀣𑀺 𑀧𑀲𑀸𑀤𑁄 𑀧𑀓𑀸𑀲𑀢𑁆𑀣𑀢𑀸, 𑀑𑀚𑁄 𑀲𑀫𑀸𑀲𑀯𑀼𑀢𑁆𑀢𑀺𑀩𑀸𑀳𑀼𑀮𑁆𑀮𑀁 𑀅𑀢𑁆𑀣𑀧𑀸𑀭𑀺𑀡𑀢𑁆𑀬𑀜𑁆𑀘, 𑀫𑀥𑀼𑀭𑀢𑀸 𑀲𑀤𑁆𑀤𑀸𑀦𑀁 𑀭𑀲𑀯𑀦𑁆𑀢𑀢𑀸, 𑀲𑀫𑀢𑀸 𑀧𑀚𑁆𑀚𑀸𑀧𑁂𑀓𑁆𑀔𑀸𑀬 𑀘𑀢𑀼𑀦𑁆𑀦𑀁 𑀧𑀸𑀤𑀸𑀦𑀫𑁂𑀓𑀚𑀸𑀢𑀺𑀬𑀲𑀫𑁆𑀩𑀦𑁆𑀥𑀢𑀸, 𑀕𑀚𑁆𑀚𑀸𑀧𑁂𑀓𑁆𑀔𑀸𑀬 𑀢𑀼 𑀧𑀤𑀸𑀦𑀁, 𑀲𑀼𑀔𑀼𑀫𑀸𑀮𑀢𑀸 𑀅𑀨𑀭𑀼𑀲𑀓𑁆𑀔𑀭𑀩𑀸𑀳𑀼𑀮𑁆𑀮𑀁, 𑀲𑀺𑀮𑁂𑀲𑀦𑀁 𑀲𑀺𑀮𑁂𑀲𑁄 𑀩𑀦𑁆𑀥𑀕𑀸𑀭𑀯𑀁, 𑀉𑀤𑀸𑀭𑀢𑀸 𑀉𑀓𑁆𑀓𑀁𑀲𑀢𑀸 𑀓𑁂𑀦𑀘𑀺 𑀅𑀢𑁆𑀣𑁂𑀦 𑀲𑀦𑀸𑀣𑀢𑀸 𑀯𑀺𑀲𑀺𑀝𑁆𑀞𑀯𑀺𑀲𑁂𑀲𑀦𑀬𑀼𑀢𑁆𑀢𑀢𑀸 𑀘, 𑀓𑀦𑁆𑀢𑀺 𑀲𑀩𑁆𑀩𑀮𑁄𑀓𑀫𑀦𑁄𑀳𑀭𑀢𑀸, 𑀅𑀢𑁆𑀣𑀩𑁆𑀬𑀢𑁆𑀢𑀺 𑀲𑀺𑀤𑁆𑀥𑁂𑀦 ¶ 𑀜𑀸𑀬𑁂𑀦 𑀯𑀸 𑀅𑀪𑀺𑀥𑁂𑀬𑁆𑀬𑀲𑁆𑀲 𑀕𑀳𑀡𑀁, 𑀲𑀫𑀸𑀥𑀺 𑀮𑁄𑀓𑀧𑁆𑀧𑀢𑀻𑀢𑁆𑀬𑀦𑀼𑀲𑀸𑀭𑀺𑀅𑀫𑀼𑀔𑁆𑀬𑀢𑁆𑀣𑀢𑀸, 𑀢𑁂𑀲𑀼 𑀑𑀚𑀉𑀤𑀸𑀭𑀢𑀸 𑀲𑀤𑁆𑀤𑀢𑁆𑀣𑀕𑀼𑀡𑀸, 𑀲𑀫𑀸𑀥𑀺 𑀅𑀢𑁆𑀣𑀕𑀼𑀡𑁄, 𑀅𑀢𑁆𑀣𑀸𑀦𑀼𑀕𑀸𑀫𑀺𑀢𑁆𑀢𑀸 𑀏𑀢𑁆𑀣 𑀲𑀤𑁆𑀤𑀸𑀦𑀁, 𑀅𑀜𑁆𑀜𑁂 𑀢𑀼 𑀲𑀤𑁆𑀤𑀕𑀼𑀡𑀸𑀯.

𑁧𑁧𑁭. 𑀇𑀤𑀸𑀦𑀺 ‘‘𑀧𑀲𑀸𑀤𑁄𑀚𑁄’’𑀇𑀘𑁆𑀘𑀸𑀤𑀺𑀦𑀸 𑀢𑁂 𑀲𑀤𑁆𑀤𑀸𑀮𑀗𑁆𑀓𑀸𑀭𑁂 𑀓𑀫𑁂𑀦 𑀯𑀺𑀪𑀚𑀺𑀢𑀼𑀁 𑀉𑀤𑁆𑀤𑀺𑀲𑀢𑀺. 𑀧𑀲𑀸𑀤𑁄 𑀧𑀲𑀦𑁆𑀦𑀨𑀴𑀺𑀓𑀸𑀯𑀮𑀺 𑀅𑀢𑁆𑀢𑀦𑀺 𑀆𑀯𑀼𑀦𑀺𑀢𑀭𑀢𑁆𑀢𑀓𑀫𑁆𑀩𑀮𑀲𑀼𑀢𑁆𑀢𑀫𑀺𑀯 𑀲𑀤𑁆𑀤𑀸𑀦𑀁 𑀅𑀢𑁆𑀣𑀲𑁆𑀲 𑀧𑀲𑀸𑀤𑀦𑀲𑀗𑁆𑀔𑀸𑀢𑁄 𑀧𑀲𑀸𑀤𑀸𑀮𑀗𑁆𑀓𑀸𑀭𑁄 𑀘, 𑀑𑀚𑁄 𑀲𑀫𑀸𑀲𑀯𑀼𑀢𑁆𑀢𑀺𑀩𑀸𑀳𑀼𑀮𑁆𑀬𑀅𑀢𑁆𑀣𑀧𑀸𑀭𑀺𑀡𑀢𑁆𑀬𑀲𑀗𑁆𑀔𑀢𑁄 𑀲𑀤𑁆𑀤𑀢𑁆𑀣𑀸𑀦𑀁 𑀕𑀼𑀡𑁄 𑀘, 𑀫𑀥𑀼𑀭𑀢𑀸 𑀲𑀤𑁆𑀤𑀸𑀦𑀁 𑀭𑀲𑀯𑀦𑁆𑀢𑀪𑀸𑀯𑀲𑀗𑁆𑀔𑀸𑀢𑀓𑀡𑁆𑀡𑀫𑀥𑀼𑀭𑀢𑀸 𑀘, 𑀲𑀫𑀢𑀸 𑀧𑀚𑁆𑀚𑁂 𑀧𑀸𑀤𑀲𑁆𑀲 𑀲𑀼𑀢𑀺𑀢𑁄 𑀲𑀤𑀺𑀲𑀢𑀸 𑀘, 𑀕𑀚𑁆𑀚𑁂 𑀧𑀤𑀸𑀦𑀁 𑀢𑀣𑁂𑀯 𑀲𑀤𑀺𑀲𑀢𑀸𑀢𑀺 𑀏𑀯𑀁 𑀧𑀸𑀤𑀸𑀦𑀁 𑀧𑀤𑀸𑀦𑀜𑁆𑀘 𑀢𑀼𑀮𑁆𑀬𑀕𑀼𑀡𑀢𑀸 𑀘, 𑀲𑀼𑀔𑀼𑀫𑀸𑀮𑀢𑀸 𑀯𑀡𑁆𑀡𑀸𑀦𑀁 𑀅𑀢𑀺𑀨𑀭𑀼𑀲𑀅𑀢𑀺𑀲𑀺𑀣𑀺𑀮𑀪𑀸𑀯𑀁 𑀯𑀺𑀦𑀸 𑀲𑀫𑀧𑁆𑀧𑀫𑀸𑀡𑀫𑀼𑀤𑀼𑀕𑀼𑀡𑁄 𑀘, 𑀲𑀺𑀮𑁂𑀲𑁄 𑀞𑀸𑀦𑀓𑀭𑀡𑀸𑀤𑀺𑀲𑀫𑁆𑀪𑀽𑀢𑀲𑀪𑀸𑀕𑀯𑀡𑁆𑀡𑀲𑀼𑀢𑀻𑀳𑀺 𑀅𑀘𑁆𑀙𑀺𑀤𑁆𑀤𑀕𑀼𑀭𑀼𑀕𑀼𑀡𑁄 𑀘, 𑀉𑀤𑀸𑀭𑀢𑀸 𑀉𑀓𑁆𑀓𑀝𑁆𑀞𑁂𑀦 𑀓𑁂𑀦𑀘𑀺 𑀅𑀢𑁆𑀣𑁂𑀦 𑀩𑀦𑁆𑀥𑀲𑁆𑀲 𑀲𑀚𑁆𑀚𑀺𑀢𑀪𑀸𑀯𑁄 𑀘, 𑀯𑀺𑀲𑀺𑀝𑁆𑀞𑀯𑀺𑀲𑁂𑀲𑀦𑀧𑀤𑁂𑀦 𑀬𑀼𑀢𑁆𑀢𑀢𑀸 𑀘, 𑀓𑀦𑁆𑀢𑀺 𑀲𑀩𑁆𑀩𑁂𑀲𑀁 𑀧𑀺𑀬𑀕𑀼𑀡𑀢𑀸 𑀘, 𑀅𑀢𑁆𑀣𑀩𑁆𑀬𑀢𑁆𑀢𑀺 𑀇𑀘𑁆𑀙𑀺𑀢𑀢𑁆𑀣𑀲𑁆𑀲 𑀲𑀺𑀤𑁆𑀥𑁂𑀦 𑀯𑀸 𑀦𑁆𑀬𑀸𑀬𑁂𑀦 𑀯𑀸 𑀲𑀼𑀧𑀸𑀓𑀝𑀪𑀸𑀯𑁄 𑀘, 𑀲𑀫𑀸𑀥𑀬𑁄 𑀮𑁄𑀓𑀧𑁆𑀧𑀢𑀻𑀢𑀺𑀅𑀦𑀢𑀺𑀓𑁆𑀓𑀦𑁆𑀢𑀅𑀜𑁆𑀜𑀥𑀫𑁆𑀫𑀸𑀭𑁄𑀧𑀦𑁂𑀦 𑀅𑀫𑀼𑀔𑁆𑀬𑀢𑁆𑀣𑀢𑀸 𑀘𑀸𑀢𑀺 𑀇𑀫𑁂 𑀲𑀤𑁆𑀤𑀢𑁆𑀣𑀕𑀼𑀡𑀸 𑀤𑀲 𑀳𑁄𑀦𑁆𑀢𑀺. ‘‘𑀲𑀫𑀸𑀥𑀬𑁄’’𑀢𑀺 𑀢𑀲𑁆𑀲𑁂𑀯 𑀩𑀳𑀼𑀢𑁆𑀢𑀁 𑀤𑀻𑀧𑁂𑀢𑀺, 𑀇𑀫𑁂𑀲𑀼 𑀤𑀲𑀲𑀼 𑀑𑀚𑁄𑀤𑀸𑀭𑀢𑀸𑀢𑀺 𑀤𑁆𑀯𑁂 𑀲𑀤𑁆𑀤𑀢𑁆𑀣𑀕𑀼𑀡𑀸, 𑀲𑀫𑀸𑀥𑀺 𑀅𑀢𑁆𑀣𑀕𑀼𑀡𑁄 𑀧𑀭𑀺𑀬𑀸𑀬𑁂𑀦 𑀢𑀤𑀢𑁆𑀣𑀚𑁄𑀢𑀓𑀲𑀤𑁆𑀤𑀕𑀼𑀡𑁄𑀧𑀺, 𑀲𑁂𑀲𑀸 𑀲𑀢𑁆𑀢 𑀲𑀤𑁆𑀤𑀕𑀼𑀡𑀸 𑀏𑀯, 𑀏𑀢𑁂 𑀲𑀩𑁆𑀩𑁂𑀧𑀺 𑀅𑀮𑀗𑁆𑀓𑀭𑁄𑀦𑁆𑀢𑀺 𑀩𑀦𑁆𑀥𑀫𑀦𑁂𑀦𑀸𑀢𑀺 𑀯𑀸𑀓𑁆𑀬𑁂𑀦 𑀅𑀮𑀗𑁆𑀓𑀸𑀭𑀸 𑀦𑀸𑀫.

𑀲𑀤𑁆𑀤𑀸𑀮𑀗𑁆𑀓𑀸𑀭𑀧𑀬𑁄𑀚𑀦𑀯𑀡𑁆𑀡𑀦𑀸

𑁧𑁧𑁮.

𑀕𑀼𑀡𑁂𑀳𑁂’𑀢𑁂𑀳𑀺 𑀲𑀫𑁆𑀧𑀦𑁆𑀦𑁄, 𑀩𑀦𑁆𑀥𑁄 𑀓𑀯𑀺𑀫𑀦𑁄𑀳𑀭𑁄;

𑀲𑀫𑁆𑀧𑀸𑀤𑀬𑀢𑀺 𑀓𑀢𑁆𑀢𑀽𑀦𑀁, 𑀓𑀺𑀢𑁆𑀢𑀺𑀫𑀘𑁆𑀘𑀦𑁆𑀢𑀦𑀺𑀫𑁆𑀫𑀮𑀁.

𑁧𑁧𑁮. ‘‘𑀕𑀼𑀡𑁂𑀳𑀺’’𑀘𑁆𑀘𑀸𑀤𑀺. ¶ 𑀏𑀢𑁂𑀳𑀺𑀬𑁂𑀯 𑀯𑀼𑀢𑁆𑀢𑁂𑀳𑀺 𑀤𑀲𑀳𑀺 𑀕𑀼𑀡𑁂𑀳𑀺 𑀥𑀫𑁆𑀫𑁂𑀳𑀺 𑀲𑀤𑁆𑀤𑀸𑀮𑀗𑁆𑀓𑀸𑀭𑀲𑀩𑁆𑀪𑀸𑀯𑁂𑀳𑀺 𑀲𑀫𑁆𑀧𑀦𑁆𑀦𑁄 𑀬𑀼𑀢𑁆𑀢𑁄 𑀲𑀫𑀺𑀤𑁆𑀥𑁄 𑀯𑀸 𑀓𑀯𑀻𑀦𑀁 𑀫𑀦𑁄 𑀳𑀭𑀢𑀺 𑀲𑀯𑀲𑁂 𑀯𑀢𑁆𑀢𑁂𑀢𑀻𑀢𑀺 𑀓𑀯𑀺𑀫𑀦𑁄𑀳𑀭𑁄 𑀓𑀯𑀺𑀳𑀤𑀬𑀳𑀺𑀮𑀸𑀤𑀓𑀸𑀭𑀻 𑀩𑀦𑁆𑀥𑁄 𑀓𑀢𑁆𑀢𑀽𑀦𑀁 𑀩𑀦𑁆𑀥𑀦𑁆𑀢𑀸𑀦𑀁 𑀓𑀯𑀻𑀦𑀁 𑀅𑀘𑁆𑀘𑀦𑁆𑀢𑀦𑀺𑀫𑁆𑀫𑀮𑀁 𑀅𑀢𑀺𑀲𑀬𑀧𑀭𑀺𑀲𑀼𑀤𑁆𑀥𑀁 𑀅𑀕𑀼𑀡𑀮𑁂𑀲𑁂𑀦𑀸𑀧’𑀦𑀸𑀮𑀺𑀫𑁆𑀧𑀢𑁆𑀢𑀸 𑀓𑀺𑀢𑁆𑀢𑀺𑀁 𑀕𑀼𑀡𑀖𑁄𑀲𑀁 𑀲𑀫𑁆𑀧𑀸𑀤𑀬𑀢𑀺 𑀦𑀺𑀧𑁆𑀨𑀸𑀤𑁂𑀢𑀺.

𑁧𑁧𑁮. ‘‘𑀕𑀼𑀡𑁂’’𑀘𑁆𑀘𑀸𑀤𑀺. 𑀏𑀢𑁂𑀳𑀺 𑀕𑀼𑀡𑁂𑀳𑀺 𑀇𑀫𑁂𑀳𑀺 𑀲𑀤𑁆𑀤𑀸𑀮𑀗𑁆𑀓𑀸𑀭𑀲𑀗𑁆𑀔𑀸𑀢𑀤𑀲𑀯𑀺𑀥𑀲𑀤𑁆𑀤𑀥𑀫𑁆𑀫𑁂𑀳𑀺 𑀲𑀫𑁆𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄 𑀲𑀫𑀺𑀤𑁆𑀥𑁄 𑀯𑀸 𑀩𑀦𑁆𑀥𑁄 𑀧𑀚𑁆𑀚𑀸𑀤𑀺𑀩𑀦𑁆𑀥𑁄 𑀓𑀯𑀺𑀫𑀦𑁄𑀳𑀭𑁄 𑀅𑀢𑁆𑀢𑀦𑁄 𑀦𑀺𑀭𑀯𑀚𑁆𑀚𑀢𑁆𑀢𑀸 𑀓𑀯𑀻𑀦𑀁 𑀘𑀺𑀢𑁆𑀢𑀁 𑀧𑀻𑀡𑁂𑀦𑁆𑀢𑁄 𑀓𑀢𑁆𑀢𑀽𑀦𑀁 𑀭𑀘𑀬𑀦𑁆𑀢𑀸𑀦𑀁 𑀅𑀘𑁆𑀘𑀦𑁆𑀢𑀦𑀺𑀫𑁆𑀫𑀮𑀁 𑀅𑀧𑁆𑀧𑀓𑀤𑁄𑀲𑁂𑀦𑀸𑀧𑀺 𑀅𑀲𑀫𑁆𑀫𑀺𑀲𑁆𑀲𑀢𑁆𑀢𑀸 𑀅𑀢𑀺𑀧𑀭𑀺𑀲𑀼𑀤𑁆𑀥𑀁 𑀓𑀺𑀢𑁆𑀢𑀺𑀁 𑀩𑀦𑁆𑀥𑀦𑀯𑀺𑀲𑀬𑀪𑀽𑀢𑀬𑀲𑁄𑀭𑀸𑀲𑀺𑀁 𑀲𑀫𑁆𑀧𑀸𑀤𑀬𑀢𑀺 𑀦𑀺𑀧𑁆𑀨𑀸𑀤𑁂𑀢𑀻𑀢𑀺. 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀩𑀦𑁆𑀥𑀲𑁆𑀲 𑀬𑀣𑀸𑀯𑀼𑀢𑁆𑀢𑀤𑀲𑀯𑀺𑀥𑀕𑀼𑀡𑀧𑀭𑀺𑀕𑁆𑀕𑀳𑁄 𑀲𑀉𑀲𑁆𑀲𑀸𑀳𑀁 𑀓𑀸𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀦𑁄 𑀳𑀭𑀢𑀻𑀢𑀺 𑀫𑀦𑁄𑀳𑀭𑁄, 𑀓𑀯𑀻𑀦𑀁 𑀫𑀦𑁄𑀳𑀭𑁄 𑀓𑀯𑀺𑀫𑀦𑁄𑀳𑀭𑁄𑀢𑀺 𑀯𑀺𑀕𑁆𑀕𑀳𑁄.

𑀲𑀤𑁆𑀤𑀸𑀮𑀗𑁆𑀓𑀸𑀭𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁧𑁯.

𑀅𑀤𑀽𑀭𑀸𑀳𑀺𑀢𑀲𑀫𑁆𑀩𑀦𑁆𑀥-𑀲𑀼𑀪𑀕𑀸 𑀬𑀸 𑀧𑀤𑀸𑀯𑀮𑀺;

𑀲𑀼𑀧𑀲𑀺𑀤𑁆𑀥𑀸𑀪𑀺𑀥𑁂𑀬𑁆𑀬𑀸’𑀬𑀁, 𑀧𑀲𑀸𑀤𑀁 𑀚𑀦𑀬𑁂 𑀬𑀣𑀸.

𑁧𑁧𑁯. 𑀇𑀤𑀸𑀦𑀺 𑀬𑀣𑁄𑀤𑁆𑀤𑁂𑀲𑀸𑀦𑀫𑁂𑀲𑀁 𑀦𑀺𑀤𑁆𑀤𑁂𑀲𑀁 𑀲𑁄𑀤𑀸𑀳𑀭𑀡𑀁 𑀓𑀭𑁄𑀦𑁆𑀢𑁄 𑀆𑀳 ‘‘𑀅𑀤𑀽𑀭’’𑀇𑀘𑁆𑀘𑀸𑀤𑀺. 𑀅𑀤𑀽𑀭𑁂 𑀆𑀲𑀦𑁆𑀦𑁂 𑀅𑀤𑀽𑀭𑁂𑀦 𑀯𑀸 𑀅𑀤𑀽𑀭𑀸𑀳𑀺𑀢𑀓𑁆𑀭𑀺𑀬𑀸𑀓𑀢𑁆𑀢𑀼𑀓𑀫𑁆𑀫𑀸𑀤𑀺𑀧𑀤𑀯𑀲𑁂𑀦 𑀆𑀳𑀺𑀢𑁄 𑀞𑀧𑀺𑀢𑁄 𑀓𑀢𑁄 𑀲𑀫𑁆𑀩𑀦𑁆𑀥𑁄 𑀅𑀦𑁆𑀯𑀬𑁄, 𑀢𑁂𑀦 𑀲𑀼𑀪𑀕𑀸 𑀫𑀦𑁄𑀳𑀭𑀸 𑀲𑀼𑀧𑀲𑀺𑀤𑁆𑀥𑁄 𑀲𑀼𑀧𑁆𑀧𑀓𑀸𑀲𑁄 𑀲𑀼𑀕𑀫𑁆𑀫𑁄 𑀅𑀪𑀺𑀥𑁂𑀬𑁆𑀬𑁄 𑀅𑀢𑁆𑀣𑁄 𑀬𑀲𑁆𑀲𑀸 𑀲𑀸𑀢𑀺 𑀢𑀣𑀸, 𑀦 𑀢𑀼 𑀪𑀸𑀯𑀢𑁆𑀣𑁄 𑀢𑀲𑁆𑀲 𑀲𑀪𑀸𑀯𑀕𑀫𑁆𑀪𑀻𑀭𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀓𑀯𑀻𑀦’𑀥𑀺𑀧𑁆𑀧𑀸𑀬’𑀫𑀲𑀤𑁆𑀤𑀕𑁄𑀘𑀭𑀁,

¶ 𑀧𑀤𑁂 𑀨𑀼𑀭𑀦𑁆𑀢𑀁 𑀫𑀼𑀤𑀼𑀓𑀫𑁆𑀳𑀺 𑀓𑁂𑀯𑀮𑀁;

𑀯𑀺𑀲𑀦𑁆𑀢𑀺 𑀪𑀸𑀯𑀸𑀯𑀕𑀫𑀸 𑀓𑀢𑀲𑁆𑀲𑀫𑀸,

𑀧𑀓𑀸𑀲𑀬𑀦𑁆𑀢𑁆𑀬𑀸’𑀓𑀢𑀺𑀬𑁄 𑀢𑀼 𑀢𑀸𑀤𑀺𑀲𑀸’’𑀢𑀺.

𑀢𑀸𑀤𑀺𑀲𑀸 𑀬𑀸 𑀧𑀤𑀸𑀯𑀮𑀺 𑀧𑀤𑀧𑀦𑁆𑀢𑀺 𑀅𑀬𑀁 𑀧𑀲𑀸𑀤𑀁 𑀢𑀦𑁆𑀦𑀸𑀫𑀓𑀁 𑀕𑀼𑀡𑀁 𑀚𑀦𑀬𑁂 𑀉𑀧𑁆𑀧𑀸𑀤𑀬𑀢𑀺. 𑀬𑀣𑀸𑀢𑀺 𑀢𑀫𑀼𑀤𑀸𑀳𑀭𑀢𑀺.

𑁧𑁧𑁯. 𑀇𑀤𑀸𑀦𑀺 𑀉𑀤𑁆𑀤𑁂𑀲𑀓𑁆𑀓𑀫𑁂𑀦 𑀏𑀢𑁂𑀲𑀁 𑀲𑀤𑁆𑀤𑀸𑀮𑀗𑁆𑀓𑀸𑀭𑀸𑀤𑀻𑀦𑀁 𑀦𑀺𑀤𑁆𑀤𑁂𑀲𑀁 𑀲𑁄𑀤𑀸𑀳𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀤𑀽𑀭𑀸𑀳𑀺𑀢𑁂’’𑀘𑁆𑀘𑀸𑀤𑀺. 𑀅𑀤𑀽𑀭𑁂 𑀆𑀲𑀦𑁆𑀦𑀧𑀤𑁂𑀲𑁂 𑀢𑀤𑀼𑀧𑀘𑀸𑀭𑁂𑀦 𑀆𑀲𑀦𑁆𑀦𑁂 𑀯𑀸 𑀆𑀳𑀺𑀢𑁄 𑀓𑁆𑀭𑀺𑀬𑀸𑀬, 𑀮𑀤𑁆𑀥𑀓𑁆𑀭𑀺𑀬𑀸𑀬𑁄𑀕𑀓𑀢𑁆𑀢𑀼𑀓𑀫𑁆𑀫𑀸𑀤𑀺𑀧𑀤𑀸𑀦𑀁 𑀯𑀲𑁂𑀦 𑀘 𑀓𑀢𑁄, 𑀦𑁄 𑀘𑁂 𑀯𑀺𑀦𑁆𑀬𑀸𑀲𑀯𑀲𑁂𑀦 𑀞𑀧𑀺𑀢𑁄 𑀯𑀸 𑀲𑀫𑁆𑀩𑀦𑁆𑀥𑁄 𑀇𑀘𑁆𑀙𑀺𑀢𑀢𑁆𑀣𑀧𑀢𑀻𑀢𑀺𑀓𑁆𑀓𑀫𑁂𑀦 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀮𑀓𑁆𑀔𑀡𑀓𑁆𑀭𑀺𑀬𑀸𑀓𑀸𑀭𑀓𑀬𑁄𑀕𑁄 𑀢𑁂𑀦 𑀲𑀼𑀪𑀕𑀸 𑀫𑀦𑁄𑀳𑀭𑀸, 𑀲𑀼𑀧𑀲𑀺𑀤𑁆𑀥𑁄 𑀧𑀲𑀺𑀤𑁆𑀥𑀢𑁆𑀣𑀯𑀺𑀲𑀬𑁂 𑀲𑀤𑁆𑀤𑀧𑀬𑁄𑀕𑀢𑁄 𑀅𑀢𑀺𑀧𑀸𑀓𑀝𑁄 𑀅𑀪𑀺𑀥𑁂𑀬𑁆𑀬𑁄 𑀲𑀤𑁆𑀤𑀢𑁆𑀣𑁄 𑀬𑀲𑁆𑀲𑀸 𑀲𑀸 𑀅𑀬𑀁 𑀧𑀤𑀸𑀯𑀮𑀺 𑀧𑀤𑀧𑀦𑁆𑀢𑀺 𑀧𑀲𑀸𑀤𑀁 𑀧𑀲𑀸𑀤𑀦𑀸𑀫𑀓𑀁 𑀕𑀼𑀡𑀁 𑀚𑀦𑀬𑁂 𑀉𑀧𑁆𑀧𑀸𑀤𑀬𑀢𑀺. 𑀬𑀣𑀸𑀢𑀺 𑀮𑀓𑁆𑀔𑀺𑀬𑀁 𑀤𑀲𑁆𑀲𑁂𑀢𑀺. 𑀅𑀤𑀽𑀭𑁂 𑀆𑀳𑀺𑀢𑁄𑀢𑀺 𑀯𑀸, 𑀉𑀧𑀘𑀭𑀺𑀢𑀢𑁆𑀢𑀸 𑀅𑀤𑀽𑀭𑁄 𑀘 𑀲𑁄 𑀆𑀳𑀺𑀢𑁄 𑀘𑀸𑀢𑀺 𑀯𑀸, 𑀲𑁄 𑀘 𑀲𑁄 𑀲𑀫𑁆𑀩𑀦𑁆𑀥𑁄 𑀘𑁂𑀢𑀺 𑀘, 𑀢𑁂𑀦 𑀲𑀼𑀪𑀕𑀸𑀢𑀺 𑀘, 𑀲𑀼 𑀅𑀢𑀺𑀲𑀬𑁂𑀦 𑀧𑀲𑀺𑀤𑁆𑀥𑁄𑀢𑀺 𑀘, 𑀲𑁄 𑀅𑀪𑀺𑀥𑁂𑀬𑁆𑀬𑁄 𑀅𑀲𑁆𑀲𑁂𑀢𑀺 𑀘 𑀯𑀸𑀓𑁆𑀬𑀁. 𑀏𑀢𑁆𑀣 𑀲𑀼𑀧𑀲𑀺𑀤𑁆𑀥𑁄 𑀦𑀸𑀫 𑀲𑀤𑁆𑀤𑀢𑁆𑀣𑁄, 𑀅𑀥𑀺𑀧𑁆𑀧𑀸𑀬𑀢𑁆𑀣𑁄 𑀧𑀦 𑀧𑀓𑀢𑀺𑀕𑀫𑁆𑀪𑀻𑀭𑁄. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀓𑀯𑀻𑀦’𑀥𑀺𑀧𑁆𑀧𑀸𑀬’𑀫𑀲𑀤𑁆𑀤𑀕𑁄𑀘𑀭𑀁,

𑀧𑀤𑁂 𑀨𑀼𑀭𑀦𑁆𑀢𑀁 𑀫𑀼𑀤𑀼𑀓𑀫𑁆𑀳𑀺 𑀓𑁂𑀯𑀮𑀁;

𑀯𑀺𑀲𑀦𑁆𑀢𑀺 𑀪𑀸𑀯𑀸𑀯𑀕𑀫𑀸 𑀓𑀢𑀲𑁆𑀲𑀫𑀸,

𑀧𑀓𑀸𑀲𑀬𑀦𑁆𑀢𑁆𑀬𑀸’𑀓𑀢𑀺𑀬𑁄 𑀢𑀼 𑀢𑀸𑀤𑀺𑀲𑀸’’𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀅𑀲𑀤𑁆𑀤𑀕𑁄𑀘𑀭𑀁 𑀲𑀤𑁆𑀤𑀲𑁆𑀲 𑀅𑀯𑀺𑀲𑀬𑀁 𑀳𑀼𑀢𑁆𑀯𑀸 𑀫𑀼𑀤𑀼𑀓𑀫𑁆𑀳𑀺 𑀧𑀤𑁂 𑀓𑁂𑀯𑀮𑀁 𑀯𑀺𑀲𑀼𑀁 𑀨𑀼𑀭𑀦𑁆𑀢𑀁 𑀘𑀸𑀧𑁂𑀦𑁆𑀢𑀁 𑀓𑀯𑀻𑀦𑀥𑀺𑀧𑁆𑀧𑀸𑀬𑀁 𑀓𑀯𑀻𑀦𑀫𑀚𑁆𑀛𑀸𑀲𑀬𑀁 ¶ 𑀓𑀢𑀲𑁆𑀲𑀫𑀸 𑀲𑀤𑁆𑀤𑀢𑁆𑀣𑀯𑀺𑀲𑀬𑁂 𑀓𑀢𑀧𑀭𑀺𑀘𑀬𑀸 𑀧𑀡𑁆𑀟𑀺𑀢𑀸 𑀪𑀸𑀯𑀸𑀯𑀕𑀫𑀸 𑀧𑀤𑀢𑁆𑀣𑀸𑀯𑀩𑁄𑀥𑁂𑀦 𑀯𑀺𑀲𑀦𑁆𑀢𑀺 𑀧𑀯𑀺𑀲𑀦𑁆𑀢𑀺, 𑀢𑀸𑀤𑀺𑀲𑀸 𑀆𑀓𑀢𑀺𑀬𑁄 𑀢𑀼 𑀲𑀤𑁆𑀤𑀲𑀤𑁆𑀤𑀢𑁆𑀣𑀸𑀦𑀁 𑀆𑀓𑀸𑀭𑀸 𑀧𑀓𑀸𑀲𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑀢𑁆𑀣𑀁 𑀚𑁄𑀢𑁂𑀦𑁆𑀢𑀻𑀢𑀺.

𑁧𑁨𑁦.

𑀅𑀮𑀗𑁆𑀓𑀭𑁄𑀦𑁆𑀢𑀸 𑀯𑀤𑀦𑀁, 𑀫𑀼𑀦𑀺𑀦𑁄’𑀥𑀭𑀭𑀁𑀲𑀺𑀬𑁄;

𑀲𑁄𑀪𑀦𑁆𑀢𑁂’𑀭𑀼𑀡𑀭𑀁𑀲𑀻’𑀯, 𑀲𑀫𑁆𑀧𑀢𑀦𑁆𑀢𑀸’𑀫𑁆𑀩𑀼𑀚𑁄𑀤𑀭𑁂.

𑁧𑁨𑁦. ‘‘𑀅𑀮𑀗𑁆𑀓𑀭𑁄𑀦𑁆𑀢𑀸’’𑀇𑀘𑁆𑀘𑀸𑀤𑀺. 𑀫𑀼𑀦𑀺𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀤𑀦𑀁 𑀲𑀪𑀸𑀯𑀫𑀥𑀼𑀭𑀧𑀓𑀢𑀺𑀫𑀼𑀔𑀁 𑀅𑀮𑀗𑁆𑀓𑀭𑁄𑀦𑁆𑀢𑀸 𑀲𑀚𑁆𑀚𑀦𑁆𑀢𑀸 𑀲𑁄𑀪𑀬𑀫𑀸𑀦𑀸 𑀅𑀥𑀭𑀸𑀦𑀁 𑀭𑀁𑀲𑀺𑀬𑁄 𑀲𑀼𑀧𑀓𑁆𑀓𑀩𑀺𑀫𑁆𑀩𑀨𑀮𑁄𑀧𑀫𑀑𑀝𑁆𑀞𑀬𑀼𑀕𑀴𑀯𑀺𑀦𑀺𑀲𑁆𑀲𑀝𑀩𑀳𑀼𑀢𑀭𑀓𑀦𑁆𑀢𑀺𑀘𑁆𑀙𑀺𑀢𑀸𑀪𑀸 𑀫𑀼𑀦𑀺𑀦𑁄𑀢𑀺 𑀯𑀺𑀜𑁆𑀜𑀸𑀬𑀢𑀺 𑀲𑀼𑀢𑀢𑁆𑀢𑀸. 𑀅𑀫𑁆𑀩𑀼𑀚𑁄𑀤𑀭𑁂 𑀢𑀸 𑀓𑀸𑀮𑁄𑀧𑀦𑀢𑀧𑀼𑀧𑁆𑀨𑀓𑀸𑀲𑀭𑀫𑀡𑀻𑀬𑁂 𑀧𑀤𑀼𑀫𑀩𑁆𑀪𑀦𑁆𑀢𑀭𑁂 𑀲𑀫𑁆𑀧𑀢𑀦𑁆𑀢𑀸 𑀧𑀯𑀢𑁆𑀢𑀫𑀸𑀦𑀸 𑀅𑀭𑀼𑀡𑀭𑀁𑀲𑀻𑀯 𑀩𑀸𑀮𑀲𑀽𑀭𑀺𑀬𑀭𑀁𑀲𑀺𑀬𑁄 𑀯𑀺𑀬 𑀲𑁄𑀪𑀦𑁆𑀢𑁂 𑀯𑀺𑀭𑀸𑀚𑀦𑁆𑀢𑀺.

𑁧𑁨𑁦. ‘‘𑀅𑀮𑀗𑁆𑀓𑀭𑁄𑀦𑁆𑀢𑁂’’𑀘𑁆𑀘𑀸𑀤𑀺. 𑀫𑀼𑀦𑀺𑀦𑁄 𑀯𑀤𑀦𑀁 𑀧𑀓𑀢𑀺𑀲𑀼𑀦𑁆𑀤𑀭𑀫𑀼𑀔𑀁 𑀅𑀮𑀗𑁆𑀓𑀭𑁄𑀦𑁆𑀢𑀸 𑀲𑀚𑁆𑀚𑀦𑁆𑀢𑀸 𑀅𑀥𑀭𑀭𑀁𑀲𑀺𑀬𑁄 𑀢𑀲𑁆𑀲𑁂𑀯 𑀫𑀼𑀦𑀺𑀦𑁄 𑀑𑀝𑁆𑀞𑀤𑁆𑀯𑀬𑀢𑁄 𑀦𑀺𑀓𑁆𑀔𑀦𑁆𑀢𑀓𑀦𑁆𑀢𑀺𑀲𑀫𑀽𑀳𑀸 𑀅𑀫𑁆𑀩𑀼𑀚𑁄𑀤𑀭𑁂 𑀯𑀺𑀓𑀲𑀦𑀸𑀦𑀼𑀭𑀽𑀧𑀓𑀸𑀮𑀸𑀪𑀺𑀫𑀼𑀔𑁂 𑀧𑀤𑀼𑀫𑀕𑀩𑁆𑀪𑁂 𑀉𑀧𑀟𑁆𑀠𑀯𑀺𑀓𑀲𑀺𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑁆𑀧𑀢𑀦𑁆𑀢𑀸 𑀧𑀯𑀢𑁆𑀢𑀫𑀸𑀦𑀸 𑀅𑀭𑀼𑀡𑀭𑀁𑀲𑀻 𑀇𑀯 𑀩𑀸𑀮𑀲𑀽𑀭𑀺𑀬𑀭𑀁𑀲𑀻𑀯 𑀲𑁄𑀪𑀦𑁆𑀢𑁂 𑀤𑀺𑀩𑁆𑀩𑀦𑁆𑀢𑀻𑀢𑀺. 𑀏𑀢𑁆𑀣 𑀅𑀤𑀽𑀭𑀲𑀫𑁆𑀩𑀦𑁆𑀥𑀁 𑀧𑀲𑀺𑀤𑁆𑀥𑀢𑁆𑀣𑀜𑁆𑀘 𑀦𑀺𑀲𑁆𑀲𑀸𑀬 𑀧𑀲𑀸𑀤𑀕𑀼𑀡𑁄 𑀧𑀸𑀓𑀝𑁄. 𑀅𑀥𑀭𑀭𑀁𑀲𑀻𑀦𑀁 𑀫𑀼𑀦𑀺𑀲𑀫𑁆𑀩𑀦𑁆𑀥𑁄 𑀲𑀼𑀢𑀸𑀦𑀼𑀫𑀺𑀢𑀲𑀫𑁆𑀩𑀦𑁆𑀥𑁂𑀲𑀼 𑀲𑀼𑀢𑀲𑀫𑁆𑀩𑀦𑁆𑀥𑀲𑁆𑀲 𑀩𑀮𑀯𑀢𑁆𑀢𑀸 [𑀲𑀼𑀢𑀸𑀦𑀼𑀫𑀺𑀢𑁂𑀲𑀼 𑀲𑀼𑀢𑀲𑀫𑁆𑀩𑀦𑁆𑀥𑁄 𑀩𑀮𑀯𑀸 (𑀧𑀭𑀺𑀪𑀸𑀲𑁂𑀦𑁆𑀤𑀼𑀲𑁂𑀭𑁂 𑁧𑁧𑁨)], 𑀓𑀸𑀓𑀓𑁆𑀔𑀺𑀕𑁄𑀴𑀓𑀦𑀬𑁂𑀦 𑀯𑀸 𑀮𑀩𑁆𑀪𑀢𑀻𑀢𑀺. 𑀅𑀥𑀭𑁂 𑀭𑀁𑀲𑀻𑀢𑀺 𑀘, 𑀅𑀫𑁆𑀩𑀼𑀚𑀲𑁆𑀲 𑀉𑀤𑀭𑀦𑁆𑀢𑀺 𑀘 𑀯𑀸𑀓𑁆𑀬𑀁.

𑁧𑁨𑁧.

𑀑𑀚𑁄 𑀲𑀫𑀸𑀲𑀩𑀸𑀳𑀼𑀮𑁆𑀬-

𑀫𑁂𑀲𑁄 𑀕𑀚𑁆𑀚𑀲𑁆𑀲 𑀚𑀻𑀯𑀺𑀢𑀁;

𑀧𑀚𑁆𑀚𑁂𑀧𑁆𑀬’𑀦𑀸𑀓𑀼𑀮𑁄 𑀲𑁄’𑀬𑀁,

𑀓𑀦𑁆𑀢𑁄 𑀓𑀸𑀫𑀻𑀬𑀢𑁂 𑀬𑀣𑀸.

𑁧𑁨𑁧. ‘‘𑀑𑀚𑁄’’𑀇𑀘𑁆𑀘𑀸𑀤𑀺. ¶ 𑀲𑀫𑀸𑀲𑀲𑁆𑀲 𑀏𑀓𑀢𑁆𑀣𑀯𑀼𑀢𑁆𑀢𑀺𑀬𑀸 𑀩𑀸𑀳𑀼𑀮𑁆𑀬𑀁 𑀪𑀺𑀬𑁆𑀬𑁄𑀪𑀸𑀯𑁄 𑀇𑀢𑁆𑀬𑀦𑀼𑀯𑀤𑀺𑀢𑁆𑀯𑀸 𑀧𑀼𑀦 𑀑𑀚𑁄 𑀯𑀺𑀥𑀻𑀬𑀢𑁂, 𑀏𑀲𑁄 𑀑𑀚𑁄 𑀲𑀫𑀸𑀲𑀩𑀸𑀳𑀼𑀮𑁆𑀮𑀮𑀓𑁆𑀔𑀡𑁄 𑀕𑀚𑁆𑀚𑀲𑁆𑀲 𑀯𑀼𑀢𑁆𑀢𑀺𑀭𑀽𑀧𑀲𑁆𑀲 𑀚𑀻𑀯𑀺𑀢𑀁 𑀳𑀤𑀬𑀁 𑀲𑀸𑀭𑀁 𑀢𑀧𑁆𑀧𑀥𑀸𑀦𑀢𑁆𑀢𑀸 𑀕𑀚𑁆𑀚𑀲𑁆𑀲, 𑀦 𑀧𑀚𑁆𑀚𑀲𑁆𑀲, 𑀲𑁄𑀬𑀁 𑀑𑀚𑁄 𑀅𑀦𑀸𑀓𑀼𑀮𑁄 𑀅𑀕𑀳𑀦𑁄 𑀅𑀢𑁄𑀬𑁂𑀯 𑀓𑀦𑁆𑀢𑁄 𑀳𑀤𑀬𑀗𑁆𑀕𑀫𑁄, 𑀧𑀚𑁆𑀚𑁂𑀧𑀺 𑀦 𑀓𑁂𑀯𑀮𑀁 𑀕𑀚𑁆𑀚𑁂 𑀓𑀸𑀫𑀻𑀬𑀢𑁂 𑀧𑀬𑀼𑀚𑁆𑀚𑀢𑁂. 𑀬𑀣𑁂𑀢𑁆𑀬𑀼𑀤𑀸𑀳𑀭𑀢𑀺.

𑁧𑁨𑁧. 𑀇𑀤𑀸𑀦𑀺 𑀑𑀚𑀕𑀼𑀡𑀁 𑀤𑀲𑁆𑀲𑁂𑀢𑀺 ‘‘𑀑𑀚𑁄’’𑀘𑁆𑀘𑀸𑀤𑀺𑀦𑀸. 𑀑𑀚𑁄 𑀦𑀸𑀫 𑀲𑀫𑀸𑀲𑀩𑀸𑀳𑀼𑀮𑁆𑀬𑀁 𑀪𑀺𑀦𑁆𑀦𑀢𑁆𑀣𑁂𑀲𑀼 𑀧𑀯𑀢𑁆𑀢𑀲𑀤𑁆𑀤𑀸𑀦𑀁 𑀏𑀓𑀢𑁆𑀣𑀧𑀯𑀢𑁆𑀢𑀺𑀮𑀓𑁆𑀔𑀡𑀲𑁆𑀲 𑀲𑀫𑀸𑀲𑀲𑁆𑀲 𑀩𑀳𑀼𑀮𑀢𑀸, 𑀏𑀲𑁄 𑀑𑀚𑁄 𑀕𑀚𑁆𑀚𑀲𑁆𑀲 𑀕𑀚𑁆𑀚𑀩𑀦𑁆𑀥𑀲𑁆𑀲 𑀚𑀻𑀯𑀺𑀢𑀁 𑀳𑀤𑀬𑀁, 𑀚𑀻𑀯𑀺𑀢𑀲𑀻𑀲𑁂𑀦 𑀳𑀤𑀬𑀲𑀗𑁆𑀔𑀢𑀁 𑀘𑀺𑀢𑁆𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁄 𑀅𑀬𑀁 𑀑𑀚𑁄 𑀅𑀦𑀸𑀓𑀼𑀮𑁄 𑀦𑀺𑀩𑁆𑀬𑀸𑀓𑀼𑀮𑁄 𑀓𑀦𑁆𑀢𑁄 𑀢𑀢𑁄𑀬𑁂𑀯 𑀯𑀺𑀜𑁆𑀜𑀽𑀦𑀁 𑀧𑀺𑀬𑀪𑀽𑀢𑁄 𑀧𑀚𑁆𑀚𑁂𑀧𑀺 𑀧𑀚𑁆𑀚𑀩𑀦𑁆𑀥𑁂𑀧𑀺 𑀓𑀸𑀫𑀻𑀬𑀢𑁂 𑀓𑀯𑀻𑀳𑀺 𑀧𑀬𑀼𑀚𑁆𑀚𑀢𑁂𑀢𑀺. 𑀩𑀳𑀼𑀮𑀲𑁆𑀲 𑀪𑀸𑀯𑁄 𑀩𑀸𑀳𑀼𑀮𑁆𑀬𑀁, 𑀲𑀫𑀸𑀲𑀲𑁆𑀲 𑀩𑀸𑀳𑀼𑀮𑁆𑀬𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀕𑀚𑁆𑀚𑀩𑀦𑁆𑀥𑀸𑀥𑀺𑀓𑀸𑀭𑀲𑁆𑀲𑀸𑀪𑀸𑀯𑀸 𑀧𑀚𑁆𑀚𑀯𑀺𑀲𑀬𑀲𑁆𑀲 𑀑𑀚𑀕𑀼𑀡𑀲𑁆𑀲 𑀮𑀓𑁆𑀔𑀺𑀬𑀁 𑀤𑀲𑁆𑀲𑁂𑀢𑀺 ‘‘𑀬𑀣𑁂’’𑀘𑁆𑀘𑀸𑀤𑀺𑀦𑀸.

𑁧𑁨𑁨.

𑀫𑀼𑀦𑀺𑀦𑁆𑀤𑀫𑀦𑁆𑀤𑀲𑀜𑁆𑀚𑀸𑀢-𑀳𑀸𑀲𑀘𑀦𑁆𑀤𑀦𑀮𑀺𑀫𑁆𑀧𑀺𑀢𑀸;

𑀧𑀮𑁆𑀮𑀯𑀸 𑀥𑀯𑀮𑀸 𑀢𑀲𑁆𑀲𑁂-𑀯𑁂𑀓𑁄𑀦𑀸’𑀥𑀭𑀧𑀮𑁆𑀮𑀯𑁄.

𑁧𑁨𑁨. ‘‘𑀫𑀼𑀦𑀺𑀦𑁆𑀤’’𑀇𑀘𑁆𑀘𑀸𑀤𑀺. 𑀫𑀼𑀦𑀺𑀦𑁆𑀤𑀲𑁆𑀲 𑀫𑀦𑁆𑀤𑀁 𑀈𑀲𑀓𑀁 𑀲𑀜𑁆𑀚𑀸𑀢𑁄 𑀧𑀯𑀢𑁆𑀢𑁄 𑀢𑀁𑀲𑀪𑀸𑀯𑀢𑁆𑀢𑀸 𑀪𑀕𑀯𑀢𑁄 𑀳𑀸𑀲𑀲𑁆𑀲 [𑀬𑀲𑀲𑁆𑀲 (𑀓.)] 𑀳𑀸𑀲𑁄 𑀳𑀲𑀺𑀢𑀁 𑀲𑁄𑀯 𑀘𑀦𑁆𑀤𑀦𑀫𑀺𑀯 𑀘𑀦𑁆𑀤𑀦𑀁 𑀥𑀯𑀮𑀢𑁆𑀢𑀭𑀽𑀧𑀢𑁆𑀢𑀸, 𑀢𑁂𑀦 𑀮𑀺𑀫𑁆𑀧𑀺𑀢𑀸 𑀉𑀧𑀤𑁂𑀳𑀺𑀢𑀸 𑀧𑀮𑁆𑀮𑀯𑀸 𑀲𑀩𑁆𑀩𑀸𑀦𑀺 𑀓𑀺𑀮𑀲𑀬𑀸𑀦𑀺 ‘‘𑀇𑀤𑀫𑁂𑀯𑁂’’𑀢𑀺 𑀦𑀺𑀬𑀫𑀸𑀪𑀸𑀯𑀢𑁄, 𑀥𑀯𑀮𑀸 𑀧𑀓𑀢𑀺𑀯𑀡𑁆𑀡𑀧𑀭𑀺𑀘𑁆𑀘𑀸𑀕𑁂𑀦 𑀲𑀼𑀓𑁆𑀓𑀸 𑀅𑀳𑁂𑀲𑀼𑀁 𑀕𑀸𑀳𑀸𑀧𑀺𑀢𑀢𑁆𑀢𑀸 𑀲𑀕𑀼𑀡𑀲𑁆𑀲 𑀢𑀸𑀤𑀺𑀲𑀯𑀺𑀲𑀺𑀝𑁆𑀞𑀲𑁆𑀲 𑀧𑀝𑀺𑀮𑀸𑀪𑀢𑁄, 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀲𑁆𑀲 𑀫𑀼𑀦𑀺𑀦𑁆𑀤𑀲𑁆𑀲𑁂𑀯 𑀏𑀓𑁄 𑀅𑀜𑁆𑀜𑀲𑁆𑀲 𑀢𑀸𑀤𑀺𑀲𑀲𑁆𑀲𑀸𑀪𑀸𑀯𑀸 𑀅𑀥𑀭𑀧𑀮𑁆𑀮𑀯𑁄 𑀦 𑀥𑀯𑀮𑁄 ¶ 𑀥𑀯𑀮𑁄 𑀦𑀸𑀳𑁄𑀲𑀺. 𑀅𑀘𑁆𑀘𑀸𑀲𑀦𑁆𑀦𑀤𑁂𑀲𑀺𑀬𑁄𑀧𑀺 𑀩𑀳𑀼𑀫𑀦𑁆𑀢𑀩𑁆𑀩𑁄’𑀬’𑀫𑀲𑁆𑀲𑀸𑀦𑀼𑀪𑀸𑀯𑁄𑀢𑀺.

‘‘𑀧𑁂𑀫𑀸𑀯𑀩𑀦𑁆𑀥𑀳𑀤𑀬𑁂 𑀲𑀤𑀬𑁂 𑀚𑀺𑀦𑀲𑁆𑀫𑀺𑀁,

𑀢𑀲𑁆𑀫𑀺𑀁 𑀦𑀼 𑀓𑀺𑀁 𑀓𑀼𑀫𑀢𑀬𑁄 𑀪𑀯𑀣’𑀧𑁆𑀧𑀲𑀦𑁆𑀦𑀸;

𑀓𑀺𑀁 𑀢𑁂𑀦 𑀯𑁄 𑀦 𑀯𑀺𑀳𑀺𑀢𑀁 𑀳𑀺𑀢’𑀫𑀼𑀕𑁆𑀕𑀤𑀼𑀕𑁆𑀕-

𑀲𑀁𑀲𑀸𑀭𑀲𑀸𑀕𑀭𑀲𑀫𑀼𑀢𑁆𑀢𑀭𑀡𑀸𑀯𑀲𑀸𑀦𑀁’’.

𑀇𑀘𑁆𑀘𑀧𑀭𑀫𑀼𑀤𑀸𑀳𑀭𑀡𑀁. 𑀏𑀯𑀫𑁂𑀢𑀸𑀤𑀺𑀲𑁄 𑀅𑀦𑀸𑀓𑀼𑀮𑁄 𑀓𑀦𑁆𑀢𑁄 𑀑𑀚𑁄 𑀚𑀸𑀦𑀺𑀢𑀩𑁆𑀩𑁄𑀢𑀺. 𑀦𑀦𑀼 𑀘 𑀬-𑀢𑀲𑀤𑁆𑀤𑀸𑀦𑀁 𑀦𑀺𑀘𑁆𑀘𑁄 𑀲𑀫𑁆𑀩𑀦𑁆𑀥𑁄, 𑀢𑀲𑁆𑀫𑀸 𑀓𑀣𑀁 ‘‘𑀢𑀲𑁆𑀲𑁂𑀯𑁂𑀓𑁄 𑀦𑀸𑀥𑀭𑀧𑀮𑁆𑀮𑀯𑁄’’𑀢𑀺 𑀏𑀢𑁆𑀣 𑀬𑀲𑀤𑁆𑀤𑀸𑀪𑀸𑀯𑁄𑀢𑀺? 𑀲𑀘𑁆𑀘𑀁, 𑀓𑀺𑀦𑁆𑀢𑀼 𑀧𑀓𑁆𑀓𑀦𑁆𑀢𑀯𑀺𑀲𑀬𑁄, 𑀢𑀣𑀸 𑀧𑀲𑀺𑀤𑁆𑀥𑀯𑀺𑀲𑀬𑁄, 𑀅𑀦𑀼𑀪𑀽𑀢𑀯𑀺𑀲𑀬𑁄 𑀘 𑀢𑀲𑀤𑁆𑀤𑁄 𑀬𑀲𑀤𑁆𑀤𑀁 𑀦𑀸𑀧𑁂𑀓𑁆𑀔𑀢𑁂. 𑀬𑀣𑀸 𑁋

‘‘𑀲𑀯𑀸𑀲𑀦𑁂 𑀓𑀺𑀮𑁂𑀲𑁂 𑀲𑁄, 𑀏𑀓𑁄 𑀲𑀩𑁆𑀩𑁂 𑀦𑀺𑀖𑀸𑀢𑀺𑀬;

𑀅𑀳𑀼 𑀲𑀼𑀲𑀼𑀤𑁆𑀥𑀲𑀦𑁆𑀢𑀸𑀦𑁄, 𑀧𑀽𑀚𑀸𑀦𑀜𑁆𑀘 𑀲𑀤𑀸𑀭𑀳𑁄’’.

𑀇𑀘𑁆𑀘𑀸𑀤𑀺. 𑀏𑀢𑁆𑀣 𑀩𑀼𑀤𑁆𑀥𑁄 ‘‘𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀫𑀸𑀤𑀺𑀢𑁄’’𑀢𑀺 𑀧𑀓𑁆𑀓𑀦𑁆𑀢𑁄.

𑀧𑀲𑀺𑀤𑁆𑀥𑀯𑀺𑀲𑀬𑁄 𑀬𑀣𑀸 𑁋

‘‘𑀅𑀕𑁆𑀕𑀺𑀁 𑀧𑀓𑁆𑀔𑀦𑁆𑀤’ 𑀅𑀣 𑀯𑀸, ‘𑀧𑀩𑁆𑀩𑀢𑀕𑁆𑀕𑀸 𑀧𑀢𑁂’𑀢𑀺 𑀯𑀸;

𑀬𑀤𑀺 𑀯𑀓𑁆𑀔𑀢𑀺 𑀓𑀢𑁆𑀢𑀩𑁆𑀩𑀁, 𑀜𑀸𑀢𑀓𑀸𑀭𑀻𑀳𑀺 𑀲𑁄 𑀚𑀺𑀦𑁄’’.

𑀇𑀘𑁆𑀘𑀸𑀤𑀺.

𑀅𑀦𑀼𑀪𑀽𑀢𑀯𑀺𑀲𑀬𑁄 𑀬𑀣𑀸 𑁋

‘‘𑀅𑀢𑀻𑀢𑀁 𑀦𑀸𑀦𑀼𑀲𑁄𑀘𑀸𑀫𑀺, 𑀦𑀧𑁆𑀧𑀚𑀧𑁆𑀧𑀸𑀫’𑀦𑀸𑀕𑀢𑀁;

𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀬𑀸𑀧𑁂𑀫𑀺, 𑀢𑁂𑀦 𑀯𑀡𑁆𑀡𑁄 𑀧𑀲𑀻𑀤𑀢𑀺’’.

𑀇𑀘𑁆𑀘𑀸𑀤𑀺.

𑀬𑀲𑀤𑁆𑀤𑁄 𑀢𑀼𑀢𑁆𑀢𑀭𑀯𑀸𑀓𑁆𑀬𑀝𑁆𑀞𑁄 𑀧𑀼𑀩𑁆𑀩𑀯𑀸𑀓𑁆𑀬𑁂 𑀢𑀲𑀤𑁆𑀤𑀫𑁂𑀯 𑀕𑀫𑀬𑀢𑀺. 𑀬𑀣𑀸 𑁋

‘‘𑀩𑁄𑀥𑀺𑀁 ¶ 𑀦𑀫𑀸𑀫𑀺 𑀦𑀢𑀺𑀪𑀸𑀚𑀦𑀫𑀘𑁆𑀘𑀼𑀴𑀸𑀭𑀁,

𑀧𑀼𑀜𑁆𑀜𑀸𑀓𑀭𑀁 𑀪𑀼𑀯𑀦𑀫𑀡𑁆𑀟𑀮𑀲𑁄𑀢𑁆𑀣𑀺𑀪𑀽𑀢𑀁;

𑀬𑁄 𑀘𑀓𑁆𑀔𑀼𑀲𑁄𑀢𑀲𑀢𑀺𑀕𑁄𑀘𑀭𑀢𑀁 𑀲𑀫𑁂𑀢𑁄,

𑀤𑁄𑀲𑀸𑀭𑀺𑀤𑀧𑁆𑀧𑀫𑀣𑀦𑁂’𑀓𑀭𑀲𑁄 𑀩𑀼𑀥𑀸𑀦𑀁’’.

𑀇𑀘𑁆𑀘𑀸𑀤𑀺.

𑀧𑀼𑀩𑁆𑀩𑀯𑀸𑀓𑁆𑀬𑁄𑀧𑀸𑀢𑁆𑀢𑁄 𑀢𑀼 𑀬𑀲𑀤𑁆𑀤𑁄 𑀉𑀢𑁆𑀢𑀭𑀯𑀸𑀓𑁆𑀬𑁂𑀢𑀲𑀤𑁆𑀤𑁄𑀧𑀸𑀤𑀸𑀦𑀁 𑀯𑀺𑀦𑀸 𑀲𑀸𑀓𑀗𑁆𑀔𑁂 𑀯𑀸𑀓𑁆𑀬𑀲𑁆𑀲 𑀊𑀦𑀢𑁆𑀢𑀁 𑀚𑀦𑁂𑀢𑀺. 𑀏𑀢𑁆𑀣 𑀧𑀓𑁆𑀓𑀦𑁆𑀢𑀯𑀺𑀲𑀬𑁄 𑀢𑀲𑀤𑁆𑀤𑁄.

𑁧𑁨𑁨. 𑀫𑀼𑀦𑀺𑀦𑁆𑀤𑀲𑁆𑀲 𑀫𑀦𑁆𑀤𑀁 𑀈𑀲𑀓𑀁 𑀲𑀜𑁆𑀚𑀸𑀢𑁄 𑀧𑀯𑀢𑁆𑀢𑁄 𑀳𑀸𑀲𑁄𑀬𑁂𑀯 𑀲𑀺𑀢𑀁 𑀘𑀦𑁆𑀤𑀦𑀘𑀼𑀡𑁆𑀡𑀫𑀺𑀯 𑀢𑁂𑀦 𑀮𑀺𑀫𑁆𑀧𑀺𑀢𑀸 𑀆𑀮𑁂𑀧𑀺𑀢𑀸 𑀧𑀮𑁆𑀮𑀯𑀸 𑀭𑀼𑀓𑁆𑀔𑀮𑀢𑀸𑀤𑀻𑀦𑀁 𑀧𑀓𑀢𑀺𑀭𑀢𑁆𑀢𑀸𑀦𑀺 𑀓𑀺𑀲𑀮𑀬𑀸𑀦𑀺 𑀥𑀯𑀮𑀸 𑀲𑀕𑀼𑀡𑀧𑀭𑀺𑀘𑁆𑀘𑀸𑀕𑁂𑀦 𑀲𑁂𑀢𑀸 𑀅𑀳𑁂𑀲𑀼𑀁, 𑀢𑀣𑀸𑀧𑀺 𑀢𑀲𑁆𑀲𑁂𑀯 𑀢𑀣𑀸𑀕𑀢𑀲𑁆𑀲 𑀏𑀓𑁄 𑀅𑀢𑀼𑀮𑁄 𑀅𑀲𑀳𑀸𑀬𑁄 𑀯𑀸 𑀅𑀥𑀭𑀧𑀮𑁆𑀮𑀯𑁄 𑀤𑀦𑁆𑀢𑀸𑀯𑀭𑀡𑀲𑀗𑁆𑀔𑀸𑀢𑀧𑀮𑁆𑀮𑀯𑁄 𑀦 𑀭𑀁𑀲𑀺𑀲𑀁𑀲𑀝𑁆𑀞𑁄𑀧𑀺 𑀲𑀫𑀻𑀧𑀝𑁆𑀞𑁄𑀧𑀺 𑀥𑀯𑀮𑁄 𑀲𑁂𑀢𑁄 𑀦𑀸𑀳𑁄𑀲𑀺. 𑀏𑀯𑀫𑁂𑀢𑁆𑀣 𑀅𑀕𑀳𑀦𑀲𑀫𑀸𑀲𑀩𑀸𑀳𑀼𑀮𑁆𑀬𑀁 𑀤𑀻𑀧𑀺𑀢𑀁 𑀳𑁄𑀢𑀺.

‘‘𑀧𑁂𑀫𑀸𑀯𑀩𑀦𑁆𑀥𑀳𑀤𑀬𑁂 𑀲𑀤𑀬𑁂 𑀚𑀺𑀦𑀲𑁆𑀫𑀺𑀁,

𑀢𑀲𑁆𑀫𑀺𑀁 𑀦𑀼 𑀓𑀺𑀁 𑀓𑀼𑀫𑀢𑀬𑁄 𑀪𑀯𑀣’𑀧𑁆𑀧𑀲𑀦𑁆𑀦𑀸;

𑀓𑀺𑀁 𑀢𑁂𑀦 𑀯𑁄 𑀦 𑀯𑀺𑀳𑀺𑀢𑀁 𑀳𑀺𑀢’𑀫𑀼𑀕𑁆𑀕𑀤𑀼𑀕𑁆𑀕-

𑀲𑀁𑀲𑀸𑀭𑀲𑀸𑀕𑀭𑀲𑀫𑀼𑀢𑁆𑀢𑀭𑀡𑀸𑀯𑀲𑀸𑀦’’𑀦𑁆𑀢𑀺.

𑀅𑀧𑀭𑀫𑀼𑀤𑀸𑀳𑀭𑀡𑀁. 𑀢𑀲𑁆𑀲𑀢𑁆𑀣𑁄 𑁋 𑀓𑀼𑀫𑀢𑀬𑁄 𑀳𑁂 𑀅𑀜𑁆𑀜𑀸𑀡𑀸! 𑀧𑁂𑀫𑀸𑀯𑀩𑀦𑁆𑀥𑀳𑀤𑀬𑁂 𑀲𑀩𑁆𑀩𑁂𑀲𑀼 𑀢𑀼𑀫𑁆𑀳𑁂𑀲𑀼 𑀦𑀺𑀘𑁆𑀘𑀁 𑀧𑀯𑀢𑁆𑀢𑀺𑀢𑀤𑀴𑁆𑀳𑀧𑁂𑀫𑀸𑀦𑀼𑀩𑀦𑁆𑀥𑀘𑀺𑀢𑁆𑀢𑁂 𑀲𑀤𑀬𑁂 𑀢𑀢𑁄𑀬𑁂𑀯 𑀤𑀬𑀸𑀲𑀳𑀺𑀢𑁂 𑀢𑀲𑁆𑀫𑀺𑀁 𑀚𑀺𑀦𑀲𑁆𑀫𑀺𑀁 𑀯𑀺𑀲𑀬𑀪𑀽𑀢𑁂 𑀓𑀺𑀁 𑀦𑀼 𑀓𑀲𑁆𑀫𑀸 𑀅𑀧𑁆𑀧𑀲𑀦𑁆𑀦𑀸 𑀪𑀯𑀣, 𑀢𑀣𑀸 𑀳𑀺 𑀯𑁄 𑀢𑀼𑀫𑁆𑀳𑀸𑀓𑀁 𑀢𑁂𑀦 𑀚𑀺𑀦𑁂𑀦 𑀉𑀕𑁆𑀕𑁄 𑀤𑀸𑀭𑀼𑀡𑁄 𑀘, 𑀤𑀼𑀕𑁆𑀕𑁄 𑀕𑀦𑁆𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑁄 𑀘, 𑀲𑁄𑀬𑁂𑀯 𑀲𑀁𑀲𑀸𑀭𑀲𑀸𑀕𑀭𑁄 𑀢𑀲𑁆𑀲 𑀲𑀫𑀼𑀢𑁆𑀢𑀭𑀡𑀁 𑀧𑀭𑀺𑀬𑀦𑁆𑀢𑀧𑁆𑀧𑀢𑁆𑀢𑀺𑀬𑁂𑀯 𑀅𑀯𑀲𑀸𑀦𑀁 𑀬𑀲𑁆𑀲 𑀢𑀁 𑀦 𑀯𑀺𑀳𑀺𑀢𑀁 𑀅𑀓𑀢𑀁 𑀳𑀺𑀢𑀁 𑀯𑀼𑀤𑁆𑀥𑀺 𑀦𑀸𑀫 𑀓𑀺𑀁 𑀳𑁄𑀢𑀺, 𑀦 ¶ 𑀳𑁄𑀢𑁂𑀯. 𑀏𑀢𑁆𑀣𑀸𑀧𑀺 𑀲𑀫𑀸𑀲𑀲𑁆𑀲 𑀧𑀸𑀓𑀝𑀢𑁆𑀢𑀸 𑀑𑀚𑁄 𑀕𑀼𑀡𑁄 𑀓𑀦𑁆𑀢𑁄 𑀳𑁄𑀢𑀻𑀢𑀺.

𑀦𑀦𑀼 𑀬-𑀢𑀲𑀤𑁆𑀤𑀸𑀦𑀁 𑀦𑀺𑀘𑁆𑀘𑀲𑀫𑁆𑀩𑀦𑁆𑀥𑁄𑀢𑀺 𑀓𑀣𑀁 ‘‘𑀢𑀲𑁆𑀲𑁂𑀯𑁂𑀓𑁄’’𑀢𑀺 𑀘 ‘‘𑀢𑀲𑁆𑀫𑀺𑀁 𑀦𑀼 𑀓𑀺𑀁 𑀓𑀼𑀫𑀢𑀬𑁄’’𑀢𑀺 𑀘 𑀇𑀘𑁆𑀘𑀸𑀤𑀻𑀲𑀼 𑀳𑁂𑀝𑁆𑀞𑀸 𑀯𑀼𑀢𑁆𑀢𑀬𑀲𑀤𑁆𑀤𑁄 𑀦𑀢𑁆𑀣𑀻𑀢𑀺? 𑀲𑀘𑁆𑀘𑀁, 𑀢𑀣𑀸𑀧𑀺 𑀧𑀓𑁆𑀓𑀦𑁆𑀢𑀢𑁆𑀣𑀯𑀺𑀲𑀬𑁄, 𑀧𑀲𑀺𑀤𑁆𑀥𑀢𑁆𑀣𑀯𑀺𑀲𑀬𑁄, 𑀅𑀦𑀼𑀪𑀽𑀢𑀢𑁆𑀣𑀯𑀺𑀲𑀬𑁄 𑀯𑀸 𑀢𑀲𑀤𑁆𑀤𑁄 𑀬𑀲𑀤𑁆𑀤𑀁 𑀦𑀸𑀧𑁂𑀓𑁆𑀔𑀢𑀺. 𑀢𑀣𑀸 𑀳𑀺 𑁋

‘‘𑀲𑀯𑀸𑀲𑀦𑁂 𑀓𑀺𑀮𑁂𑀲𑁂 𑀲𑁄, 𑀏𑀓𑁄 𑀲𑀩𑁆𑀩𑁂 𑀦𑀺𑀖𑀸𑀢𑀺𑀬;

𑀅𑀳𑀼 𑀲𑀼𑀲𑀼𑀤𑁆𑀥𑀲𑀦𑁆𑀢𑀸𑀦𑁄, 𑀧𑀽𑀚𑀸𑀦𑀜𑁆𑀘 𑀲𑀤𑀸𑀭𑀳𑁄’’𑀢𑀺.

𑀏𑀯𑀫𑀸𑀤𑀻𑀲𑀼 ‘‘𑀲𑁄’’𑀢𑀺 𑀦𑀺𑀤𑁆𑀤𑀺𑀝𑁆𑀞𑀢𑀲𑀤𑁆𑀤𑁄 ‘‘𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀫𑀸𑀤𑀺𑀢𑁄’’𑀢𑀺 𑀏𑀢𑁆𑀣 𑀅𑀢𑀻𑀢𑁂𑀦 𑀩𑀼𑀤𑁆𑀥𑀲𑀤𑁆𑀤𑁂𑀦 𑀯𑀘𑀦𑀻𑀬𑀯𑀺𑀲𑀬𑁄 𑀳𑁄𑀢𑀺.

‘‘𑀅𑀕𑁆𑀕𑀺𑀁 𑀧𑀓𑁆𑀔𑀦𑁆𑀤’ 𑀅𑀣𑀯𑀸, ‘𑀧𑀩𑁆𑀩𑀢𑀕𑁆𑀕𑀸 𑀧𑀢𑁂’𑀢𑀺 𑀯𑀸;

𑀬𑀤𑀺 𑀯𑀓𑁆𑀔𑀢𑀺 𑀓𑀢𑁆𑀢𑀩𑁆𑀩𑀁, 𑀜𑀸𑀢𑀓𑀸𑀭𑀻𑀳𑀺 𑀲𑁄 𑀚𑀺𑀦𑁄’’𑀢𑀺.

𑀏𑀯𑀫𑀸𑀤𑀻𑀲𑀼 𑀢𑀲𑀤𑁆𑀤𑁄 𑀜𑀸𑀢𑀓𑀸𑀭𑀻𑀳𑀺 𑀓𑀢𑁆𑀢𑀩𑁆𑀩𑀢𑁆𑀢𑀸 𑀧𑀲𑀺𑀤𑁆𑀥𑀩𑀼𑀤𑁆𑀥𑀧𑀤𑀢𑁆𑀣𑀯𑀺𑀲𑀬𑁄.

‘‘𑀅𑀢𑀻𑀢𑀁 𑀦𑀸𑀦𑀼𑀲𑁄𑀘𑀸𑀫𑀺, 𑀦𑀧𑁆𑀧𑀚𑀧𑁆𑀧𑀸𑀫’𑀦𑀸𑀕𑀢𑀁;

𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀬𑀸𑀧𑁂𑀫𑀺, 𑀢𑁂𑀦 𑀯𑀡𑁆𑀡𑁄 𑀧𑀲𑀻𑀤𑀢𑀻’’𑀢𑀺.

𑀏𑀯𑀫𑀸𑀤𑀻𑀲𑀼 𑀢𑀲𑀤𑁆𑀤𑁄 𑀅𑀦𑀦𑀼𑀲𑁄𑀘𑀦𑀦𑀧𑁆𑀧𑀚𑀧𑁆𑀧𑀦𑀬𑀸𑀧𑀦𑀲𑀗𑁆𑀔𑀸𑀢𑀯𑀺𑀚𑀸𑀦𑀦𑀯𑀲𑁂𑀦 𑀅𑀦𑀼𑀪𑀽𑀢𑀢𑁆𑀣𑀯𑀺𑀲𑀬𑁄, 𑀢𑀲𑁆𑀫𑀸 𑀢𑀻𑀲𑀼𑀧𑀺 𑀞𑀸𑀦𑁂𑀲𑀼 𑀢𑀲𑀤𑁆𑀤𑁄 𑀬𑀲𑀤𑁆𑀤𑀁 𑀦𑀸𑀧𑁂𑀓𑁆𑀔𑀢𑁂. 𑀏𑀢𑁆𑀣 𑀧𑀦 𑀧𑀓𑁆𑀓𑀦𑁆𑀢𑀯𑀺𑀲𑀬𑁄 𑀢𑀲𑀤𑁆𑀤𑁄 𑀅𑀥𑀺𑀧𑁆𑀧𑁂𑀢𑁄. 𑀅𑀧𑀺𑀘 𑀉𑀢𑁆𑀢𑀭𑀯𑀸𑀓𑁆𑀬𑁂 𑀞𑀺𑀢𑁄 𑀬𑀲𑀤𑁆𑀤𑁄 𑀧𑀼𑀩𑁆𑀩𑀯𑀸𑀓𑁆𑀬𑁂 𑀢𑀲𑀤𑁆𑀤𑁂 𑀅𑀲𑀢𑀺𑀧𑀺 𑀢𑀫𑁂𑀯 𑀤𑀻𑀧𑁂𑀢𑀺. 𑀢𑀣𑀸 𑀳𑀺 𑁋

𑀩𑁄𑀥𑀺𑀁 𑀦𑀫𑀸𑀫𑀺 𑀦𑀢𑀺𑀪𑀸𑀚𑀦𑀫𑀘𑁆𑀘𑀼𑀴𑀸𑀭𑀁,

𑀧𑀼𑀜𑁆𑀜𑀸𑀓𑀭𑀁 𑀪𑀼𑀯𑀦𑀫𑀡𑁆𑀟𑀮𑀲𑁄𑀢𑁆𑀣𑀺𑀪𑀽𑀢𑀁;

𑀬𑁄 𑀘𑀓𑁆𑀔𑀼𑀲𑁄𑀢𑀲𑀢𑀺𑀕𑁄𑀘𑀭𑀢𑀁 𑀲𑀫𑁂𑀢𑁄,

𑀤𑁄𑀲𑀸𑀭𑀺𑀤𑀧𑁆𑀧𑀫𑀣𑀦𑁂’𑀓𑀭𑀲𑁄 𑀩𑀼𑀥𑀸𑀦𑀦𑁆𑀢𑀺.

𑀬𑁄 ¶ 𑀩𑀼𑀥𑀸𑀦𑀁 𑀘𑀓𑁆𑀔𑀼𑀲𑁄𑀢𑀲𑀢𑀻𑀦𑀁 𑀕𑁄𑀘𑀭𑀢𑀁 𑀯𑀺𑀲𑀬𑀪𑀸𑀯𑀁 𑀲𑀫𑁂𑀢𑁄 𑀧𑀢𑁆𑀢𑁄, 𑀢𑁂𑀲𑀁𑀬𑁂𑀯 𑀤𑁄𑀲𑀸𑀭𑀻𑀦𑀁 𑀓𑀺𑀮𑁂𑀲𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀤𑀧𑁆𑀧𑀫𑀣𑀦𑁂 𑀤𑀧𑁆𑀧𑀫𑀤𑁆𑀤𑀦𑁂 𑀏𑀓𑀭𑀲𑁄 𑀧𑀥𑀸𑀦𑀓𑀺𑀘𑁆𑀘𑁄 𑀲𑀫𑀺𑀤𑁆𑀥𑀺𑀯𑀦𑁆𑀢𑁄 𑀯𑀸 𑀳𑁄𑀢𑀺, 𑀢𑀁 𑀩𑁄𑀥𑀺𑀁 𑀦𑀫𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀩𑁆𑀩𑀯𑀸𑀓𑁆𑀬𑁂 𑀧𑀬𑁄𑀚𑀺𑀢𑁄 𑀬𑀲𑀤𑁆𑀤𑁄 𑀉𑀢𑁆𑀢𑀭𑀯𑀸𑀓𑁆𑀬𑁂 𑀢𑀲𑀤𑁆𑀤𑁄𑀧𑀸𑀤𑀸𑀦𑁂 𑀅𑀲𑀢𑀺 𑀲𑀁𑀲𑀬𑀫𑀼𑀧𑁆𑀧𑀸𑀤𑀬𑀫𑀸𑀦𑁄 𑀯𑀸𑀓𑁆𑀬𑀲𑁆𑀲 𑀊𑀦𑀢𑁆𑀢𑀁 𑀓𑀭𑁄𑀢𑀺. 𑀉𑀤𑀸𑀳𑀭𑀡𑀁 𑀧𑀦 𑀧𑀸𑀓𑀝𑀁.

𑁧𑁨𑁩.

𑀧𑀤𑀸𑀪𑀺𑀥𑁂𑀬𑁆𑀬𑀯𑀺𑀲𑀬𑀁,

𑀲𑀫𑀸𑀲𑀩𑁆𑀬𑀸𑀲𑀲𑀫𑁆𑀪𑀯𑀁;

𑀬𑀁 𑀧𑀸𑀭𑀺𑀡𑀢𑁆𑀬𑀁 𑀳𑁄𑀢𑀺’𑀳,

𑀲𑁄𑀧𑀺 𑀑𑀚𑁄𑀯 𑀢𑀁 𑀬𑀣𑀸.

𑁧𑁨𑁩. ‘‘𑀧𑀤𑀺’’𑀘𑁆𑀘𑀸𑀤𑀺. 𑀧𑀤𑀲𑁆𑀲 𑀅𑀪𑀺𑀥𑁂𑀬𑁆𑀬𑁄 𑀅𑀢𑁆𑀣𑁄 𑀲𑁄 𑀯𑀺𑀲𑀬𑁄 𑀬𑀲𑁆𑀲. 𑀬𑀢𑁆𑀣 𑀧𑀘𑀼𑀭𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑁄 𑀅𑀢𑁆𑀣𑁄 𑀲𑀁𑀔𑀺𑀢𑁆𑀢𑀧𑀤𑁂𑀳𑀺 𑀯𑀼𑀘𑁆𑀘𑀢𑁂, 𑀲𑁄 𑀲𑀫𑀸𑀲𑁄. 𑀬𑀢𑁆𑀣𑀧𑁆𑀧𑀓𑁂𑀳𑀺 𑀧𑀤𑁂𑀳𑀺 𑀅𑀪𑀺𑀥𑁂𑀬𑁆𑀬𑀢𑁆𑀣𑁄 𑀧𑀘𑀼𑀭𑀧𑀤𑁂𑀳𑀺 𑀯𑀼𑀘𑁆𑀘𑀢𑁂, 𑀲𑁄 𑀩𑁆𑀬𑀸𑀲𑁄. 𑀢𑀢𑁄 𑀲𑀫𑀸𑀲𑀩𑁆𑀬𑀸𑀲𑀢𑁄 𑀲𑀫𑁆𑀪𑀯𑁄 𑀬𑀲𑁆𑀲. 𑀢𑀁 𑀢𑀣𑀸𑀯𑀺𑀥𑀁 𑀬𑀁 𑀧𑀸𑀭𑀺𑀡𑀢𑁆𑀬𑀁 𑀧𑀭𑀺𑀡𑀢𑀪𑀸𑀯𑁄 𑀳𑁄𑀢𑀻𑀢𑀺 𑀅𑀦𑀼𑀯𑀤𑀺𑀢𑁆𑀯𑀸 𑀲𑁄𑀧𑀺 𑀇𑀳 𑀲𑀲𑀢𑁆𑀣𑁂 𑀑𑀚𑁄𑀯𑀸𑀢𑀺 𑀯𑀺𑀥𑀻𑀬𑀢𑁂. 𑀢𑀁 𑀬𑀣𑁂𑀢𑁆𑀬𑀼𑀪𑀬𑀫𑁆𑀧𑀺 𑀉𑀤𑀸𑀳𑀭𑀢𑀺.

𑁧𑁨𑁩. ‘‘𑀧𑀤𑁂’’𑀘𑁆𑀘𑀸𑀤𑀺. 𑀧𑀤𑀸𑀦𑀁 𑀩𑀳𑀽𑀦𑀁 𑀅𑀧𑁆𑀧𑀓𑀸𑀦𑀁 𑀯𑀸 𑀧𑀤𑀸𑀦𑀁 𑀅𑀪𑀺𑀥𑁂𑀬𑁆𑀬𑀯𑀺𑀲𑀬𑀁 𑀯𑀺𑀢𑁆𑀣𑀸𑀭𑀲𑀁𑀔𑀺𑀢𑁆𑀢𑀢𑁆𑀣𑀯𑀺𑀲𑀬𑀯𑀦𑁆𑀢𑀁 𑀲𑀫𑀸𑀲𑀩𑁆𑀬𑀸𑀲𑀲𑀫𑁆𑀪𑀯𑀁 𑀬𑀣𑀸𑀓𑁆𑀓𑀫𑀁 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀤𑁆𑀯𑀬𑁂𑀦 𑀦𑀺𑀧𑁆𑀨𑀦𑁆𑀦𑀁 𑀦𑀺𑀧𑁆𑀨𑀢𑁆𑀢𑀺𑀯𑀦𑁆𑀢𑀁 𑀯𑀸 𑀬𑀁 𑀧𑀸𑀭𑀺𑀡𑀢𑁆𑀬𑀁 𑀓𑀢𑁆𑀢𑀽𑀦𑀁 𑀕𑀦𑁆𑀣𑀯𑀺𑀲𑀬𑁂 𑀧𑀭𑀺𑀡𑀢𑀺𑀧𑁆𑀧𑀓𑀸𑀲𑀓𑁄 𑀬𑁄 𑀲𑀤𑁆𑀤𑀥𑀫𑁆𑀫𑁄 𑀅𑀢𑁆𑀣𑀥𑀫𑁆𑀫𑁄 𑀳𑁄𑀢𑀺, 𑀲𑀤𑁆𑀤𑀕𑀼𑀡𑁄 𑀅𑀢𑁆𑀣𑀕𑀼𑀡𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀲𑁄𑀧𑀺 𑀇𑀳 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂 𑀑𑀚𑁄 𑀦𑀸𑀫 𑀲𑀤𑁆𑀤𑀕𑀼𑀡𑁄 𑀅𑀢𑁆𑀣𑀕𑀼𑀡𑁄. 𑀢𑀁 𑀬𑀣𑀸𑀢𑀺 𑀤𑁆𑀯𑀻𑀲𑀼 𑀮𑀓𑁆𑀔𑀺𑀬𑀁 𑀤𑀲𑁆𑀲𑁂𑀢𑀺, 𑀧𑀤𑀸𑀦𑀁 𑀅𑀪𑀺𑀥𑁂𑀬𑁆𑀬𑁄 𑀯𑀺𑀲𑀬𑁄 𑀬𑀲𑁆𑀲 𑀧𑀸𑀭𑀺𑀡𑀢𑁆𑀬𑀲𑁆𑀲𑁂𑀢𑀺 𑀘, 𑀲𑀫𑀸𑀲𑁄 𑀘 𑀩𑁆𑀬𑀸𑀲𑁄 𑀘𑀸𑀢𑀺 𑀘, 𑀢𑀢𑁄 𑀲𑀫𑁆𑀪𑀯𑀦𑁆𑀢𑀺 𑀘, 𑀢𑀢𑁄 𑀲𑀫𑁆𑀪𑀯𑁄 𑀅𑀲𑁆𑀲𑀸𑀢𑀺 𑀘, 𑀧𑀭𑀺𑀡𑀢𑀲𑁆𑀲 ¶ 𑀓𑀢𑁆𑀢𑀼𑀦𑁄 𑀕𑀦𑁆𑀣𑀲𑁆𑀲 𑀏𑀯 𑀯𑀸 𑀪𑀸𑀯𑁄𑀢𑀺 𑀘 𑀯𑀺𑀕𑁆𑀕𑀳𑁄. 𑀓𑀢𑁆𑀢𑀼 𑀧𑀸𑀭𑀺𑀡𑀢𑁆𑀬𑀧𑀓𑁆𑀔𑁂 𑀢𑀧𑁆𑀧𑀓𑀸𑀲𑀓𑀕𑀦𑁆𑀣𑀲𑁆𑀲 𑀢𑀤𑀢𑁆𑀣𑁂𑀦 𑀧𑀸𑀭𑀺𑀡𑀢𑁆𑀬𑀁 𑀲𑀺𑀤𑁆𑀥𑀁.

𑁧𑁨𑁪.

𑀚𑁄𑀢𑀬𑀺𑀢𑁆𑀯𑀸𑀦 𑀲𑀤𑁆𑀥𑀫𑁆𑀫𑀁,

𑀲𑀦𑁆𑀢𑀸𑀭𑁂𑀢𑁆𑀯𑀸 𑀲𑀤𑁂𑀯𑀓𑁂;

𑀚𑀮𑀺𑀢𑁆𑀯𑀸 𑀅𑀕𑁆𑀕𑀺𑀔𑀦𑁆𑀥𑁄’𑀯,

𑀦𑀺𑀩𑁆𑀩𑀼𑀢𑁄 𑀲𑁄 𑀲𑀲𑀸𑀯𑀓𑁄.

𑁧𑁨𑁪. ‘‘𑀚𑁄𑀢𑀬𑀺𑀢𑁆𑀯𑀸𑀦𑁂’’𑀘𑁆𑀘𑀸𑀤𑀺. 𑀇𑀫𑀺𑀦𑀸 𑀳𑁂𑀝𑁆𑀞𑀸 𑀧𑀘𑀼𑀭𑀧𑀤𑀸𑀪𑀺𑀳𑀺𑀢𑁄 𑀩𑀼𑀤𑁆𑀥𑀯𑀁𑀲𑁄 𑀲𑀗𑁆𑀔𑁂𑀧𑀭𑀽𑀧𑁂𑀦 𑀯𑀼𑀢𑁆𑀢𑁄.

𑁧𑁨𑁪. ‘‘𑀚𑁄𑀢𑀬𑀺’’𑀘𑁆𑀘𑀸𑀤𑀺. 𑀲𑁄 𑀢𑀣𑀸𑀕𑀢𑁄 𑀲𑀤𑁆𑀥𑀫𑁆𑀫𑀁 𑀲𑀧𑀭𑀺𑀬𑀢𑁆𑀢𑀺𑀓𑀁 𑀦𑀯𑀮𑁄𑀓𑀼𑀢𑁆𑀢𑀭𑀲𑀤𑁆𑀥𑀫𑁆𑀫𑀁 𑀚𑁄𑀢𑀬𑀺𑀢𑁆𑀯𑀸𑀦 𑀜𑀸𑀡𑀸𑀮𑁄𑀓𑁂𑀦 𑀑𑀪𑀸𑀲𑁂𑀢𑁆𑀯𑀸 𑀲𑀤𑁂𑀯𑀓𑁂 𑀲𑀢𑁆𑀢𑁂 𑀲𑀦𑁆𑀢𑀸𑀭𑁂𑀢𑁆𑀯𑀸 𑀲𑀁𑀲𑀸𑀭𑀲𑀸𑀕𑀭𑀧𑀭𑀺𑀬𑀦𑁆𑀢𑀫𑀼𑀧𑀦𑁂𑀢𑁆𑀯𑀸 𑀅𑀕𑁆𑀕𑀺𑀔𑀦𑁆𑀥𑁄𑀯 𑀫𑀳𑀸𑀢𑁂𑀚𑁂𑀦 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀯𑀺𑀬 𑀚𑀮𑀺𑀢𑁆𑀯𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀭𑀽𑀧𑀓𑀸𑀬𑀲𑀫𑁆𑀧𑀢𑁆𑀢𑀺𑀬𑀸 𑀧𑀚𑁆𑀚𑀮𑀺𑀢𑁆𑀯𑀸 𑀅𑀦𑁆𑀢𑁂 𑀲𑀲𑀸𑀯𑀓𑁄 𑀲𑀸𑀯𑀓𑁂𑀳𑀺 𑀲𑀳 𑀦𑀺𑀩𑁆𑀩𑀼𑀢𑁄 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺. 𑀇𑀫𑀺𑀦𑀸 𑀲𑀓𑀮𑀩𑀼𑀤𑁆𑀥𑀯𑀁𑀲𑁂 𑀩𑀳𑀽𑀳𑀺 𑀧𑀤𑁂𑀳𑀺 𑀯𑀼𑀢𑁆𑀢𑀢𑁆𑀣𑁄 𑀲𑀗𑁆𑀔𑁂𑀧𑀓𑁆𑀓𑀫𑁂𑀦 𑀯𑀼𑀢𑁆𑀢𑁄. 𑀲𑀢𑀁 𑀥𑀫𑁆𑀫𑁄, 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑁄 𑀯𑀸 𑀥𑀫𑁆𑀫𑁄𑀢𑀺 𑀘, 𑀲𑀳 𑀤𑁂𑀯𑁂𑀳𑀺 𑀯𑀢𑁆𑀢𑀫𑀸𑀦𑀸𑀢𑀺 𑀘, 𑀲𑀳 𑀲𑀸𑀯𑀓𑁂𑀳𑀺 𑀯𑀢𑁆𑀢𑀫𑀸𑀦𑁄𑀢𑀺 𑀘 𑀯𑀺𑀕𑁆𑀕𑀳𑁄.

𑁧𑁨𑁫.

𑀫𑀢𑁆𑀣𑀓𑀝𑁆𑀞𑀻 𑀫𑀢𑀲𑁆𑀲𑀸𑀧𑀺, 𑀭𑀚𑁄𑀪𑀸𑀯𑀁 𑀯𑀚𑀦𑁆𑀢𑀼 𑀫𑁂;

𑀬𑀢𑁄 𑀧𑀼𑀜𑁆𑀜𑁂𑀦 𑀢𑁂 𑀲𑁂𑀦𑁆𑀢𑀺 [𑀲𑁂𑀦𑁆𑀢𑀼 (𑀓.)], 𑀚𑁂𑀦𑀧𑀸𑀤𑀫𑁆𑀩𑀼𑀚𑀤𑁆𑀯𑀬𑁂.

𑁧𑁨𑁫. ‘‘𑀫𑀢𑁆𑀣𑀓𑀝𑁆𑀞𑀻’’𑀇𑀘𑁆𑀘𑀸𑀤𑀺. 𑀫𑀢𑀲𑁆𑀲𑀸𑀧𑀺 𑀫𑀭𑀡𑀫𑀸𑀧𑀦𑁆𑀦𑀲𑁆𑀲𑀸𑀧𑀺 𑀫𑁂 𑀫𑀢𑁆𑀣𑀓𑁂 𑀫𑀼𑀤𑁆𑀥𑀦𑀺 𑀅𑀝𑁆𑀞𑀻 𑀭𑀚𑁄𑀪𑀸𑀯𑀁 𑀥𑀽𑀮𑀺𑀢𑁆𑀢𑀁 𑀯𑀚𑀦𑁆𑀢𑀼 𑀧𑀸𑀧𑀼𑀡𑀦𑁆𑀢𑀼. 𑀓𑀲𑁆𑀫𑀸𑀢𑀺 𑀘𑁂? 𑀬𑀢𑁄 𑀬𑀲𑁆𑀫𑀸 𑀓𑀸𑀭𑀡𑀸 𑀧𑀼𑀜𑁆𑀜𑁂𑀦 𑀓𑀼𑀲𑀮𑁂𑀦 𑀓𑀫𑁆𑀫𑁂𑀦 𑀳𑁂𑀢𑀼𑀦𑀸 𑀢𑁂 𑀭𑀚𑀸 𑀚𑀺𑀦𑀲𑁆𑀲 𑀇𑀫𑁂 𑀚𑁂𑀦𑀸, 𑀧𑀸𑀤𑀸, 𑀢𑁂𑀬𑁂𑀯 𑀅𑀫𑁆𑀩𑀼𑀚𑀸𑀦𑀺𑀯 𑀅𑀫𑁆𑀩𑀼𑀚𑀸𑀦𑀺, 𑀢𑁂𑀲𑀁 𑀤𑁆𑀯𑀬𑁂 ¶ 𑀲𑁂𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀣𑀸 𑀳𑁄𑀢𑀼 𑀯𑀸 𑀫𑀸 𑀯𑀸, 𑀧𑀡𑀢𑀺𑀕𑁂𑀥𑁂𑀦𑁂𑀯 𑀯𑀤𑀢𑀺. 𑀏𑀢𑁆𑀣 ‘‘𑀓𑀣𑀫𑀳𑀁 𑀪𑀕𑀯𑀢𑁄 𑀧𑀸𑀤𑁂 𑀦𑀺𑀘𑁆𑀘𑀁 𑀲𑀺𑀭𑀲𑀸 𑀧𑀡𑀫𑀸𑀫𑀻’’𑀢𑁆𑀬𑀥𑀺𑀧𑁆𑀧𑀸𑀬𑁄 𑀯𑀺𑀢𑁆𑀣𑀸𑀭𑁂𑀦 𑀯𑀼𑀢𑁆𑀢𑁄.

𑁧𑁨𑁫. ‘‘𑀫𑀢𑁆𑀣𑀓𑀺’’𑀘𑁆𑀘𑀸𑀤𑀺, 𑀫𑀢𑀲𑁆𑀲𑀸𑀧𑀺 𑀫𑁂 𑀫𑀬𑁆𑀳𑀁 𑀫𑀢𑁆𑀣𑀓𑀝𑁆𑀞𑀻 𑀫𑀼𑀤𑁆𑀥𑀦𑀺 𑀅𑀝𑁆𑀞𑀻𑀦𑀺 𑀭𑀚𑁄𑀪𑀸𑀯𑀁 𑀅𑀢𑀺𑀲𑀼𑀔𑀼𑀫𑀭𑀚𑀢𑁆𑀢𑀁 𑀯𑀚𑀦𑁆𑀢𑀼 𑀧𑀸𑀧𑀼𑀡𑀦𑁆𑀢𑀼. 𑀓𑀲𑁆𑀫𑀸 𑀆𑀲𑀻𑀲𑀦𑀁 𑀓𑀭𑁄𑀢𑀻𑀢𑀺 𑀘𑁂? 𑀬𑀢𑁄 𑀬𑀲𑁆𑀫𑀸 𑀓𑀸𑀭𑀡𑀸 𑀧𑀼𑀜𑁆𑀜𑁂𑀦 𑀫𑀬𑁆𑀳𑀁 𑀢𑀣𑀸𑀯𑀺𑀥𑁂𑀦 𑀓𑀼𑀲𑀮𑀓𑀫𑁆𑀫𑁂𑀦 𑀳𑁂𑀢𑀼𑀦𑀸 𑀢𑁂 𑀭𑀚𑀸 𑀚𑁂𑀦𑀧𑀸𑀤𑀫𑁆𑀩𑀼𑀚𑀤𑁆𑀯𑀬𑁂 𑀚𑀺𑀦𑀧𑀝𑀺𑀩𑀤𑁆𑀥𑀘𑀭𑀡𑀧𑀤𑀼𑀫𑀬𑀼𑀕𑀴𑁂 𑀲𑁂𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺, 𑀩𑀼𑀤𑁆𑀥𑀲𑁆𑀲 𑀲𑀺𑀭𑀺𑀧𑀸𑀤𑁂 𑀓𑀺𑀜𑁆𑀘𑀺𑀧𑀺 𑀭𑀚𑁄𑀚𑀮𑁆𑀮𑀁 𑀦 𑀉𑀧𑀮𑀺𑀫𑁆𑀧𑀢𑁂𑀯, 𑀢𑀣𑀸𑀧𑀺 𑀯𑀦𑁆𑀤𑀦𑀸𑀪𑀺𑀮𑀸𑀲𑁂𑀦 𑀏𑀯𑀁 𑀯𑀼𑀢𑁆𑀢𑀁. 𑀏𑀢𑁆𑀣 ‘‘𑀓𑀣𑀫𑀳𑀁 𑀪𑀕𑀯𑀢𑁄 𑀲𑀺𑀭𑀺𑀧𑀸𑀤𑁂 𑀫𑀼𑀤𑁆𑀥𑀦𑀸 𑀦𑀺𑀘𑁆𑀘𑀁 𑀧𑀡𑀫𑀸𑀫𑀻’’𑀢𑁆𑀬𑀪𑀺𑀮𑀸𑀲𑁄 𑀯𑀺𑀢𑁆𑀣𑀸𑀭𑁂𑀦 𑀯𑀼𑀢𑁆𑀢𑁄. 𑀫𑀢𑁆𑀣𑀓𑁂 𑀅𑀝𑁆𑀞𑀻𑀢𑀺 𑀘, 𑀭𑀚𑀲𑁄 𑀪𑀸𑀯𑁄𑀢𑀺 𑀘, 𑀚𑀺𑀦𑀲𑁆𑀲 𑀇𑀫𑁂𑀢𑀺 𑀘, 𑀚𑁂𑀦𑀸 𑀘 𑀢𑁂 𑀧𑀸𑀤𑀸 𑀘𑁂𑀢𑀺 𑀘, 𑀢𑁂𑀬𑁂𑀯 𑀅𑀫𑁆𑀩𑀼𑀚𑀸𑀦𑀻𑀢𑀺 𑀘, 𑀢𑁂𑀲𑀁 𑀤𑁆𑀯𑀬𑀦𑁆𑀢𑀺 𑀘 𑀯𑀺𑀕𑁆𑀕𑀳𑁄.

𑁧𑁨𑁬.

𑀇𑀘𑁆𑀘𑀢𑁆𑀭 𑀦𑀺𑀘𑁆𑀘𑀁𑀧𑀡𑀢𑀺-𑀕𑁂𑀥𑁄 𑀲𑀸𑀥𑀼 𑀧𑀤𑀺𑀲𑁆𑀲𑀢𑀺;

𑀚𑀸𑀬𑀢𑁂’𑀬𑀁 𑀕𑀼𑀡𑁄 𑀢𑀺𑀓𑁆𑀔-𑀧𑀜𑁆𑀜𑀸𑀦’𑀫𑀪𑀺𑀬𑁄𑀕𑀢𑁄.

𑁧𑁨𑁬. 𑀩𑁆𑀬𑀸𑀲𑀢𑁆𑀢𑀫𑁂𑀯𑀲𑁆𑀲 𑀯𑀺𑀯𑀭𑀢𑀺 ‘‘𑀇𑀘𑁆𑀘𑀢𑁆𑀭𑀺’’𑀘𑁆𑀘𑀸𑀤𑀺𑀦𑀸. 𑀇𑀘𑁆𑀘𑁂𑀯𑀁 𑀅𑀢𑁆𑀭 𑀕𑀸𑀣𑀸𑀬𑀁 𑀧𑀡𑀢𑀺𑀬𑀁 𑀧𑀡𑀸𑀫𑁂 𑀕𑁂𑀥𑁄 𑀅𑀥𑀺𑀓𑀘𑁆𑀙𑀦𑁆𑀤𑁄 𑀲𑀸𑀥𑀼 𑀲𑀼𑀦𑁆𑀤𑀭𑀁 𑀧𑀤𑀺𑀲𑁆𑀲𑀢𑀺 𑀯𑀺𑀜𑁆𑀜𑀸𑀬𑀢𑁂, 𑀅𑀬𑀁 𑀬𑀣𑀸𑀯𑀼𑀢𑁆𑀢𑁄 𑀑𑀚𑁄 𑀕𑀼𑀡𑁄 𑀧𑀭𑀺𑀡𑀢𑀪𑀸𑀯𑀲𑀗𑁆𑀔𑀸𑀢𑁄 𑀢𑀺𑀓𑁆𑀔𑀧𑀜𑁆𑀜𑀸𑀦𑀁 𑀲𑀸𑀢𑀺𑀲𑀬𑀫𑀢𑀻𑀦𑀁 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀪𑀺𑀬𑁄𑀕𑀢𑁄 𑀧𑀼𑀦𑀧𑁆𑀧𑀼𑀦𑀧𑁆𑀧𑀯𑀢𑁆𑀢𑀺𑀢𑀧𑀭𑀺𑀘𑀬𑀩𑀮𑁂𑀦 𑀚𑀸𑀬𑀢𑁂 𑀉𑀧𑁆𑀧𑀚𑁆𑀚𑀢𑀺.

𑁧𑁨𑁬. 𑀇𑀤𑀸𑀦𑀺 𑀲𑀁𑀔𑀺𑀢𑁆𑀢𑀲𑁆𑀲𑀢𑁆𑀣𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀧𑀓𑀸𑀲𑀺𑀢𑀪𑀸𑀯𑀁 ‘‘𑀇𑀘𑁆𑀘𑀢𑁆𑀭’’𑀇𑀘𑁆𑀘𑀸𑀤𑀺𑀦𑀸 𑀦𑀺𑀤𑁆𑀤𑀺𑀲𑀢𑀺. 𑀇𑀢𑀺 𑀇𑀫𑀺𑀦𑀸 𑀅𑀦𑀦𑁆𑀢𑀭𑀕𑀸𑀣𑀸𑀬𑀁 𑀯𑀼𑀢𑁆𑀢𑀓𑁆𑀓𑀫𑁂𑀦 𑀅𑀢𑁆𑀭 𑀇𑀫𑀺𑀲𑁆𑀲𑀁 𑀕𑀸𑀣𑀸𑀬𑀁 𑀦𑀺𑀘𑁆𑀘𑀁𑀧𑀡𑀢𑀺𑀕𑁂𑀥𑁄 𑀦𑀺𑀭𑀦𑁆𑀢𑀭𑀧𑀡𑀸𑀫𑁂 𑀅𑀥𑀺𑀓𑀓𑀢𑁆𑀢𑀼𑀓𑀸𑀫𑀢𑀸𑀓𑀼𑀲𑀮𑀘𑁆𑀙𑀦𑁆𑀤𑁄 𑀲𑀸𑀥𑀼 𑀯𑀺𑀪𑀽𑀢𑁄 𑀯𑀺𑀪𑀽𑀢𑀁 𑀯𑀸 𑀧𑀤𑀺𑀲𑁆𑀲𑀢𑀺 𑀧𑀜𑁆𑀜𑀸𑀬𑀢𑀺, 𑀅𑀬𑀁 ¶ 𑀕𑀼𑀡𑁄 𑀬𑀣𑀸𑀯𑀼𑀢𑁆𑀢𑁄 𑀅𑀬𑀁 𑀧𑀭𑀺𑀡𑀢𑀪𑀸𑀯𑀲𑀗𑁆𑀔𑀸𑀢𑁄 𑀑𑀚𑁄 𑀦𑀸𑀫 𑀲𑀤𑁆𑀤𑀢𑁆𑀣𑀕𑀼𑀡𑁄 𑀢𑀺𑀓𑁆𑀔𑀧𑀜𑁆𑀜𑀸𑀦𑀁 𑀲𑀼𑀔𑀼𑀫𑀩𑀼𑀤𑁆𑀥𑀺𑀫𑀦𑁆𑀢𑀸𑀦𑀁 𑀅𑀪𑀺𑀬𑁄𑀕𑀢𑁄 𑀕𑀦𑁆𑀣𑀯𑀺𑀲𑀬𑀪𑀽𑀢𑁂𑀦 𑀦𑀺𑀭𑀦𑁆𑀢𑀭𑀸𑀪𑁆𑀬𑀸𑀲𑁂𑀦𑁂𑀯 𑀚𑀸𑀬𑀢𑁂 𑀲𑀺𑀚𑁆𑀛𑀢𑀺, 𑀯𑀢𑁆𑀢𑀼 𑀧𑀸𑀭𑀺𑀡𑀢𑁆𑀬𑁂𑀦𑁂𑀯 𑀪𑀯𑀦𑀢𑁄 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀬𑁂𑀦 𑀓𑁂𑀦𑀘𑀺 𑀧𑀓𑀸𑀭𑁂𑀦 𑀦 𑀲𑀺𑀚𑁆𑀛𑀢𑀻𑀢𑀺. 𑀦𑀺𑀘𑁆𑀘𑀁 𑀧𑀯𑀢𑁆𑀢𑀸 𑀧𑀡𑀢𑀻𑀢𑀺 𑀘, 𑀢𑀲𑁆𑀲𑀁 𑀕𑁂𑀥𑁄𑀢𑀺 𑀘, 𑀢𑀺𑀓𑁆𑀔𑀸 𑀧𑀜𑁆𑀜𑀸 𑀬𑁂𑀲𑀦𑁆𑀢𑀺 𑀘, 𑀅𑀪𑀺 𑀧𑀼𑀦𑀧𑁆𑀧𑀼𑀦𑀁 𑀬𑁄𑀕𑁄 𑀬𑀼𑀜𑁆𑀚𑀦𑀦𑁆𑀢𑀺 𑀘 𑀯𑀺𑀕𑁆𑀕𑀳𑁄.

𑁧𑁨𑁭.

𑀫𑀥𑀼𑀭𑀢𑁆𑀢𑀁 𑀧𑀤𑀸𑀲𑀢𑁆𑀢𑀺-𑀭𑀦𑀼𑀧𑁆𑀧𑀸𑀲𑀯𑀲𑀸 𑀤𑁆𑀯𑀺𑀥𑀸;

𑀲𑀺𑀬𑀸 𑀲𑀫𑀲𑀼𑀢𑀺 𑀧𑀼𑀩𑁆𑀩𑀸, 𑀯𑀡𑁆𑀡𑀸𑀯𑀼𑀢𑁆𑀢𑀺 𑀧𑀭𑁄 𑀬𑀣𑀸.

𑁧𑁨𑁭. 𑀫𑀸𑀥𑀼𑀭𑀺𑀬𑀫𑀯𑀥𑀸𑀭𑀬𑀫𑀸𑀳 ‘‘𑀫𑀥𑀼𑀭𑀢𑁆𑀢’’𑀫𑀺𑀘𑁆𑀘𑀸𑀤𑀺. 𑀲𑀯𑀦𑀻𑀬𑀢𑁆𑀢𑁂𑀦 𑀫𑀦𑁄𑀳𑀭𑀢𑁆𑀢𑀁 𑀫𑀥𑀼𑀭𑀢𑁆𑀢𑀁. 𑀢𑀁 𑀧𑀤𑀸𑀦𑀺 𑀯𑀸𑀓𑁆𑀬𑀸𑀮𑀗𑁆𑀓𑀸𑀭𑀸𑀦𑀺 𑀲𑀫𑀸𑀦𑀸𑀦𑀺 𑀉𑀢𑁆𑀢𑀭𑀼𑀢𑁆𑀢𑀭𑁂𑀳𑀺, 𑀢𑁂𑀲𑀁 𑀆𑀲𑀢𑁆𑀢𑀺 𑀞𑀸𑀦𑀸𑀤𑀺𑀦𑀸𑀬𑀣𑀸𑀓𑀣𑀜𑁆𑀘𑀺 𑀲𑀫𑀲𑀼𑀢𑀻𑀦𑀁 𑀆𑀲𑀦𑁆𑀦𑀢𑀸 𑀧𑀤𑀸𑀲𑀢𑁆𑀢𑀺, 𑀧𑀞𑀫𑀧𑁆𑀧𑀬𑀼𑀢𑁆𑀢𑀲𑁆𑀲𑀓𑁆𑀔𑀭𑀲𑁆𑀲 𑀧𑀘𑁆𑀙𑀸 𑀧𑀸𑀲𑁄 𑀧𑀓𑁆𑀔𑁂𑀧𑁄 𑀅𑀦𑀼𑀧𑁆𑀧𑀸𑀲𑁄, 𑀧𑀤𑀸𑀲𑀢𑁆𑀢𑀺 𑀘 𑀅𑀦𑀼𑀧𑁆𑀧𑀸𑀲𑁄 𑀘, 𑀢𑁂𑀲𑀁 𑀯𑀲𑁂𑀦 𑀤𑁆𑀯𑀺𑀥𑀸 𑀳𑁄𑀢𑀺. ‘‘𑀓𑀻𑀤𑀺𑀲𑀸 𑀢𑁂’’𑀢𑀺 𑀆𑀳 ‘‘𑀲𑀺𑀬𑀸’’𑀢𑀺𑀆𑀤𑀺. 𑀧𑀼𑀩𑁆𑀩𑀸 𑀧𑀞𑀫𑀸𑀪𑀺𑀳𑀺𑀢𑀸 𑀧𑀤𑀸𑀲𑀢𑁆𑀢𑀺 𑀲𑀫𑀸 𑀬𑁂𑀦 𑀓𑁂𑀦𑀘𑀺 𑀞𑀸𑀦𑀫𑀢𑁆𑀢𑀸𑀲𑀁𑀬𑁄𑀕𑀸𑀤𑀺𑀦𑀸 𑀧𑀤𑀦𑁆𑀢𑀭𑁂𑀦 𑀲𑀼𑀢𑀺 𑀯𑀡𑁆𑀡𑁄 𑀬𑀲𑁆𑀲𑀸 𑀲𑀸 𑀲𑀺𑀬𑀸 𑀪𑀯𑁂𑀬𑁆𑀬, 𑀧𑀭𑁄 𑀧𑀘𑁆𑀙𑀺𑀫𑁄 𑀅𑀦𑀼𑀧𑁆𑀧𑀸𑀲𑁄 𑀢𑀼 𑀯𑀡𑁆𑀡𑀲𑁆𑀲 𑀲𑀭𑀩𑁆𑀬𑀜𑁆𑀚𑀦𑀮𑀓𑁆𑀔𑀡𑀲𑁆𑀲 𑀆𑀯𑀼𑀢𑁆𑀢𑀺 𑀧𑀼𑀦𑀧𑁆𑀧𑀼𑀦𑀼𑀘𑁆𑀘𑀸𑀭𑀡𑀁 𑀲𑀺𑀬𑀸𑀢𑀺. 𑀏𑀯𑀁 𑀓𑀢𑁆𑀣𑀘𑀺 𑀩𑀦𑁆𑀥𑁂 𑀲𑀫𑀸𑀦𑀧𑀤𑀸𑀲𑀢𑁆𑀢𑀺 𑀓𑀢𑁆𑀣𑀘𑀺 𑀅𑀦𑀼𑀧𑁆𑀧𑀸𑀲𑁄 𑀓𑀢𑁆𑀣𑀘𑀺 𑀢𑀤𑀼𑀪𑀬𑀁, 𑀤𑁆𑀯𑀬𑁂𑀦 𑀭𑀳𑀺𑀢𑁄 𑀯𑀺𑀭𑀲𑁄 𑀩𑀦𑁆𑀥𑁄 𑀦𑀲𑁆𑀲𑀸𑀤𑀻𑀬𑀢𑁂 𑀓𑀯𑀻𑀳𑀺, 𑀢𑀸𑀤𑀺𑀲𑀁 𑀫𑀥𑀼𑀭𑀢𑁆𑀢𑀁 𑀤𑀼𑀯𑀺𑀥𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁, 𑀲𑀺𑀮𑁂𑀲𑀲𑀫𑀢𑀸𑀦𑁆𑀯𑀺𑀢𑀦𑁆𑀢𑀼𑀘𑁆𑀘𑀦𑁆𑀢𑀫𑁂𑀯 𑀭𑀫𑀡𑀻𑀬𑀁 𑀲𑀺𑀬𑀸𑀢𑀺 𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀬𑀣𑁂’’𑀢𑀺 𑀮𑀓𑁆𑀔𑀺𑀬𑀫𑀼𑀪𑀬𑀢𑁆𑀣𑁄𑀤𑀸𑀳𑀭𑀢𑀺 ‘‘𑀬𑀤𑁂’’𑀘𑁆𑀘𑀸𑀤𑀺𑀦𑀸, ‘‘𑀫𑀼𑀦𑀺𑀦𑁆𑀤𑀺’’𑀘𑁆𑀘𑀸𑀤𑀺𑀦𑀸 𑀘.

𑁧𑁨𑁭. 𑀇𑀤𑀸𑀦𑀺 𑀫𑀥𑀼𑀭𑀕𑀼𑀡𑀁 𑀤𑀲𑁆𑀲𑁂𑀢𑀺 ‘‘𑀫𑀥𑀼𑀭𑀺’’𑀘𑁆𑀘𑀸𑀤𑀺𑀦𑀸. 𑀫𑀥𑀼𑀭𑀢𑁆𑀢𑀁 𑀲𑀯𑀦𑀻𑀬𑀪𑀸𑀯𑀢𑁄 𑀫𑀦𑁄𑀳𑀭𑀢𑁆𑀢𑀁 𑀫𑀥𑀼𑀭𑀕𑀼𑀡𑀁, 𑀧𑀤𑀸𑀦𑀁 𑀯𑀸𑀓𑁆𑀬𑀸𑀯𑀬𑀯𑀲𑀗𑁆𑀔𑀸𑀢𑀸𑀦𑀁 𑀲𑁆𑀬𑀸𑀤𑁆𑀬𑀦𑁆𑀢𑀸𑀤𑀻𑀦𑀁 𑀉𑀧𑀭𑀽𑀧𑀭𑀺𑀧𑀤𑁂𑀳𑀺 𑀲𑀫𑀸𑀦𑀸𑀦𑀁 ¶ 𑀆𑀲𑀢𑁆𑀢𑀺 𑀞𑀸𑀦𑀓𑀭𑀡𑀸𑀤𑀺𑀦𑀸 𑀬𑁂𑀦 𑀓𑁂𑀦𑀘𑀺 𑀧𑀓𑀸𑀭𑁂𑀦 𑀅𑀜𑁆𑀜𑀫𑀜𑁆𑀜𑀁 𑀆𑀲𑀦𑁆𑀦𑀢𑀸, 𑀅𑀦𑀼𑀧𑁆𑀧𑀸𑀲𑁄 𑀧𑀼𑀩𑁆𑀩𑀼𑀘𑁆𑀘𑀸𑀭𑀺𑀢𑀯𑀡𑁆𑀡𑀸𑀦𑀁 𑀧𑀼𑀦 𑀧𑀓𑁆𑀔𑀺𑀧𑀦𑀜𑁆𑀘𑀸𑀢𑀺 𑀤𑁆𑀯𑀺𑀦𑁆𑀦𑀁 𑀯𑀲𑀸 𑀯𑀺𑀪𑀸𑀕𑁂𑀦 𑀤𑁆𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀧𑀼𑀩𑁆𑀩𑀸 𑀧𑀤𑀸𑀲𑀢𑁆𑀢𑀺 𑀲𑀫𑀲𑀼𑀢𑀺 𑀲𑀺𑀬𑀸, 𑀧𑀼𑀩𑁆𑀩𑀸𑀧𑀭𑀯𑀡𑁆𑀡𑀸𑀦𑀁 𑀞𑀸𑀦𑀫𑀢𑁆𑀢𑀸𑀓𑀭𑀡𑀸𑀤𑀻𑀳𑀺 𑀆𑀲𑀦𑁆𑀦𑀲𑀼𑀢𑀺𑀲𑀗𑁆𑀔𑀢𑀯𑀡𑁆𑀡𑀯𑀼𑀢𑁆𑀢𑀺 𑀳𑁄𑀢𑀺, 𑀧𑀭𑁄 𑀅𑀦𑀼𑀧𑁆𑀧𑀸𑀲𑁄 𑀧𑀦 𑀯𑀡𑁆𑀡𑀸𑀯𑀼𑀢𑁆𑀢𑀺 𑀲𑀭𑀩𑁆𑀬𑀜𑁆𑀚𑀦𑀲𑀪𑀸𑀯𑀸𑀦𑀁 𑀧𑀼𑀩𑁆𑀩𑀼𑀘𑁆𑀘𑀸𑀭𑀺𑀢𑀯𑀡𑁆𑀡𑀸𑀦𑀁 𑀧𑀼𑀦𑀧𑁆𑀧𑀼𑀦𑀼𑀘𑁆𑀘𑀸𑀭𑀡𑀁 𑀲𑀺𑀬𑀸𑀢𑀺. 𑀬𑀣𑀸𑀢𑀺 𑀤𑁆𑀯𑀻𑀲𑀼 𑀉𑀤𑀸𑀳𑀭𑀡𑀫𑀸𑀤𑀺𑀲𑀢𑀺. 𑀏𑀯𑀁 𑀓𑀢𑁆𑀣𑀘𑀺 𑀩𑀦𑁆𑀥𑁂 𑀧𑀤𑀸𑀲𑀢𑁆𑀢𑀺 𑀓𑀢𑁆𑀣𑀘𑀺 𑀅𑀦𑀼𑀧𑁆𑀧𑀸𑀲𑁄 𑀓𑀢𑁆𑀣𑀘𑀺 𑀢𑀤𑀼𑀪𑀬𑀁, 𑀤𑁆𑀯𑀻𑀳𑀺 𑀯𑀺𑀦𑀺𑀫𑀼𑀢𑁆𑀢𑁄 𑀧𑀦 𑀩𑀦𑁆𑀥𑁄 𑀯𑀺𑀜𑁆𑀜𑀽𑀳𑀺 𑀅𑀲𑁆𑀲𑀸𑀤𑀦𑀻𑀬𑁄 𑀦 𑀳𑁄𑀢𑀺. 𑀉𑀧𑀭𑀺 𑀯𑀓𑁆𑀔𑀫𑀸𑀦𑀸𑀳𑀺 𑀲𑀺𑀮𑁂𑀲𑀲𑀫𑀢𑀸𑀳𑀺 𑀬𑀼𑀢𑁆𑀢𑀁 𑀫𑀥𑀼𑀭𑀢𑁆𑀢𑀁 𑀧𑀦 𑀯𑀺𑀲𑁂𑀲𑀢𑁄 𑀅𑀲𑁆𑀲𑀸𑀤𑀦𑀻𑀬𑀁 𑀳𑁄𑀢𑀻𑀢𑀺. 𑀫𑀥𑀼𑀭𑀲𑁆𑀲 𑀩𑀦𑁆𑀥𑀲𑁆𑀲 𑀪𑀸𑀯𑁄𑀢𑀺 𑀘, 𑀧𑀤𑀸𑀦𑀁 𑀆𑀲𑀢𑁆𑀢𑀻𑀢𑀺 𑀘, 𑀅𑀦𑀼 𑀧𑀘𑁆𑀙𑀸 𑀧𑀸𑀲𑁄 𑀧𑀓𑁆𑀔𑁂𑀧𑁄𑀢𑀺 𑀘, 𑀧𑀤𑀸𑀲𑀢𑁆𑀢𑀺 𑀘 𑀅𑀦𑀼𑀧𑁆𑀧𑀸𑀲𑁄 𑀘𑀸𑀢𑀺 𑀘, 𑀢𑁂𑀲𑀁 𑀯𑀲𑁄 𑀪𑁂𑀤𑁄𑀢𑀺 𑀘, 𑀲𑀫𑀸 𑀲𑀼𑀢𑀺 𑀯𑀡𑁆𑀡𑁄 𑀬𑀲𑁆𑀲𑀸𑀢𑀺 𑀘, 𑀯𑀡𑁆𑀡𑀲𑁆𑀲 𑀆𑀯𑀼𑀢𑁆𑀢𑀻𑀢𑀺 𑀘 𑀯𑀺𑀕𑁆𑀕𑀳𑁄.

𑁧𑁨𑁮.

𑀬𑀤𑀸 𑀏𑀲𑁄’𑀪𑀺𑀲𑀫𑁆𑀩𑁄𑀥𑀺𑀁,

𑀲𑀫𑁆𑀧𑀢𑁆𑀢𑁄 𑀫𑀼𑀦𑀺𑀧𑀼𑀗𑁆𑀕𑀯𑁄;

𑀢𑀤𑀸 𑀧𑀪𑀼𑀢𑀺 𑀥𑀫𑁆𑀫𑀲𑁆𑀲,

𑀮𑁄𑀓𑁂 𑀚𑀸𑀢𑁄 𑀫𑀳𑀼𑀲𑁆𑀲𑀯𑁄.

𑁧𑁨𑁮. 𑀏𑀲𑁄 𑀫𑀼𑀦𑀺𑀧𑀼𑀗𑁆𑀕𑀯𑁄 𑀬𑀤𑀸 𑀬𑀢𑁄 𑀧𑀪𑀼𑀢𑀺 𑀅𑀪𑀺𑀲𑀫𑁆𑀩𑁄𑀥𑀺𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀲𑀫𑁆𑀧𑀢𑁆𑀢𑁄 𑀲𑀫𑀥𑀺𑀕𑀢𑁄, 𑀢𑀤𑀸 𑀧𑀪𑀼𑀢𑀺 𑀢𑀢𑁄 𑀆𑀭𑀩𑁆𑀪 𑀥𑀫𑁆𑀫𑀲𑁆𑀲 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑀲𑁆𑀲 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀲𑀗𑁆𑀔𑀸𑀢𑀲𑁆𑀲 𑀫𑀳𑀼𑀲𑁆𑀲𑀯𑁄 𑀫𑀳𑀦𑁆𑀢𑁄 𑀅𑀩𑁆𑀪𑀼𑀤𑀬𑁄 𑀦𑀺𑀧𑁆𑀧𑀝𑀺𑀧𑀓𑁆𑀔𑀸 𑀧𑀯𑀢𑁆𑀢𑀺 𑀮𑁄𑀓𑁂 𑀢𑀺𑀯𑀺𑀥𑁂 𑀚𑀸𑀢𑁄 𑀅𑀳𑁄𑀲𑀻𑀢𑀺. 𑀇𑀳 𑀓𑁆𑀯𑀘𑀺 𑀤𑀻𑀖𑀢𑀸𑀓𑀢𑀁 𑀲𑀤𑀺𑀲𑀢𑁆𑀢𑀁, 𑀓𑁆𑀯𑀘𑀺 𑀞𑀸𑀦𑀓𑀢𑀁, 𑀓𑁆𑀯𑀘𑀺 𑀲𑀁𑀬𑁄𑀕𑀓𑀢𑀁, 𑀓𑁆𑀯𑀘𑀺 𑀅𑀜𑁆𑀜𑀣𑀸, 𑀢𑁂𑀦𑀸𑀳 ‘‘𑀲𑀺𑀬𑀸 𑀲𑀫𑀲𑀼𑀢𑀺 𑀧𑀼𑀩𑁆𑀩𑀸’’𑀢𑀺.

𑁧𑁨𑁮. ‘‘𑀬𑀤𑀺’’𑀘𑁆𑀘𑀸𑀤𑀺. ¶ 𑀏𑀲𑁄 𑀫𑀼𑀦𑀺𑀧𑀼𑀗𑁆𑀕𑀯𑁄 𑀬𑀤𑀸 𑀅𑀪𑀺𑀲𑀫𑁆𑀩𑁄𑀥𑀺𑀁 𑀲𑀩𑁆𑀩𑀜𑁆𑀜𑀼𑀢𑀁 𑀲𑀫𑁆𑀧𑀢𑁆𑀢𑁄 𑀲𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑀦𑀯𑀲𑁂𑀦 𑀲𑀫𑁆𑀧𑀸𑀧𑀼𑀡𑀺, 𑀢𑀤𑀸 𑀧𑀪𑀼𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑀲𑁆𑀲 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀧𑀪𑁂𑀤𑀲𑁆𑀲 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀲𑁆𑀲 𑀫𑀳𑀼𑀲𑁆𑀲𑀯𑁄 𑀫𑀳𑀸𑀪𑀺𑀯𑀼𑀤𑁆𑀥𑀺 𑀮𑁄𑀓𑁂 𑀓𑀸𑀫𑀸𑀤𑀺𑀮𑁄𑀓𑀢𑁆𑀢𑀬𑁂 𑀚𑀸𑀢𑁄𑀢𑀺. 𑀇𑀳 ‘‘𑀬𑀤𑀸 𑀏𑀲𑁄’’𑀢𑀺 𑀤𑀻𑀖𑀓𑀸𑀮𑀯𑀲𑁂𑀦 𑀆𑀲𑀦𑁆𑀦𑀢𑀸, ‘‘𑀬 𑀏’’𑀢𑀺 𑀞𑀸𑀦𑀯𑀲𑁂𑀦 𑀆𑀲𑀦𑁆𑀦𑀢𑀸, ‘‘𑀅𑀪𑀺𑀲𑀫𑁆𑀩𑁄𑀥𑀺𑀁 𑀲𑀫𑁆𑀧𑀢𑁆𑀢𑁄’’𑀢𑀺 𑀲𑀁𑀬𑁄𑀕𑀯𑀲𑁂𑀦 𑀆𑀲𑀦𑁆𑀦𑀢𑀸, ‘‘𑀪𑀺 𑀥𑀺’’𑀦𑁆𑀢𑀺 𑀥𑀦𑀺𑀢𑀢𑁄 𑀆𑀲𑀦𑁆𑀦𑀢𑀸𑀢𑀺 𑀇𑀘𑁆𑀘𑀸𑀤𑀺𑀦𑀸 𑀧𑀤𑀸𑀲𑀢𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺 𑀏𑀢𑀸𑀬𑀸𑀢𑀺 𑀘, 𑀧𑀼𑀫𑀸 𑀘 𑀲𑁄 𑀕𑁄𑀘𑁂𑀢𑀺 𑀘, 𑀫𑀼𑀦𑀻𑀦𑀁 𑀧𑀼𑀗𑁆𑀕𑀯𑁄𑀢𑀺 𑀘, 𑀫𑀳𑀦𑁆𑀢𑁄 𑀘 𑀲𑁄 𑀉𑀲𑁆𑀲𑀯𑁄 𑀘𑀸𑀢𑀺 𑀘 𑀯𑀺𑀕𑁆𑀕𑀳𑁄.

𑁧𑁨𑁯.

𑀫𑀼𑀦𑀺𑀦𑁆𑀤𑀫𑀦𑁆𑀤𑀳𑀸𑀲𑀸 𑀢𑁂, 𑀓𑀼𑀦𑁆𑀤𑀲𑀦𑁆𑀤𑁄𑀳𑀯𑀺𑀩𑁆𑀪𑀫𑀸;

𑀤𑀺𑀲𑀦𑁆𑀢’𑀫𑀦𑀼𑀥𑀸𑀯𑀦𑁆𑀢𑀺, 𑀳𑀲𑀦𑁆𑀢𑀸 𑀘𑀦𑁆𑀤𑀓𑀦𑁆𑀢𑀺𑀬𑁄.

𑁧𑁨𑁯. 𑀓𑀼𑀦𑁆𑀤𑀸𑀦𑀁 𑀓𑀼𑀲𑀼𑀫𑀸𑀦𑀁 𑀲𑀦𑁆𑀤𑁄𑀳𑁄 𑀲𑀫𑀽𑀳𑁄, 𑀢𑀲𑁆𑀲 𑀯𑀺𑀩𑁆𑀪𑀫𑁄 𑀬𑁂𑀲𑀁 𑀢𑁂, 𑀫𑀼𑀦𑀺𑀦𑁆𑀤𑀲𑁆𑀲 𑀫𑀦𑁆𑀤𑀳𑀸𑀲𑀸 𑀫𑀦𑀼𑀜𑁆𑀜𑀸 𑀳𑀲𑀺𑀢𑀸𑀦𑀺 𑀘𑀦𑁆𑀤𑀲𑁆𑀲 𑀓𑀦𑁆𑀢𑀺𑀬𑁄 𑀲𑁄𑀪𑀸𑀬𑁄 𑀳𑀲𑀦𑁆𑀢𑀸 𑀯𑀺𑀟𑀫𑁆𑀩𑀬𑀦𑁆𑀢𑀸 𑀤𑀺𑀲𑀦𑁆𑀢𑀫𑀦𑀼𑀥𑀸𑀯𑀦𑁆𑀢𑀺 𑀅𑀦𑀼𑀯𑀺𑀘𑀭𑀦𑁆𑀢𑀺. 𑀇𑀘𑁆𑀘𑀢𑁆𑀭 𑀦𑀓𑀸𑀭𑀲𑀳𑀺𑀢𑀲𑁆𑀲 𑀤𑀓𑀸𑀭𑀲𑁆𑀲, 𑀢𑀓𑀸𑀭𑀲𑁆𑀲 𑀘𑀸𑀦𑀼𑀯𑀢𑁆𑀢𑀦𑀁.

‘‘𑀇𑀦𑁆𑀤𑀦𑀻𑀮𑀤𑀮𑀤𑁆𑀯𑀦𑁆𑀤-𑀲𑀼𑀦𑁆𑀤𑀭𑀁 𑀲𑀺𑀭𑀺𑀫𑀦𑁆𑀤𑀺𑀭𑀁;

𑀫𑀼𑀦𑀺𑀦𑁆𑀤𑀦𑀬𑀦𑀤𑁆𑀯𑀦𑁆𑀤𑀁, 𑀯𑀺𑀦𑁆𑀤𑀢𑀺’𑀦𑁆𑀤𑀻𑀯𑀭𑀚𑁆𑀚𑀼𑀢𑀺𑀁’’.

𑀇𑀘𑁆𑀘𑀧𑀭𑀫𑀼𑀤𑀸𑀳𑀭𑀡𑀁.

𑁧𑁨𑁯. ‘‘𑀫𑀼𑀦𑀺𑀦𑁆𑀤𑀺’’𑀘𑁆𑀘𑀸𑀤𑀺. 𑀓𑀼𑀦𑁆𑀤𑀲𑀦𑁆𑀤𑁄𑀳𑀯𑀺𑀩𑁆𑀪𑀫𑀸 𑀲𑀼𑀧𑀼𑀧𑁆𑀨𑀺𑀢𑀓𑀼𑀦𑁆𑀤𑀓𑀼𑀲𑀼𑀫𑀭𑀸𑀲𑀺𑀲𑀤𑀺𑀲𑀮𑀻𑀮𑀸𑀯𑀦𑁆𑀢𑀸 𑀢𑁂 𑀫𑀼𑀦𑀺𑀦𑁆𑀤𑀫𑀦𑁆𑀤𑀳𑀸𑀲𑀸 𑀩𑀼𑀤𑁆𑀥𑀲𑁆𑀲 𑀫𑀦𑀼𑀜𑁆𑀜𑀸 𑀳𑀲𑀺𑀢𑀸 𑀘𑀦𑁆𑀤𑀓𑀦𑁆𑀢𑀺𑀬𑁄 𑀦𑀺𑀫𑁆𑀫𑀮𑀘𑀦𑁆𑀤𑀓𑀺𑀭𑀡𑁂 𑀳𑀲𑀦𑁆𑀢𑀸 𑀦𑀺𑀦𑁆𑀤𑀦𑁆𑀢𑀸 𑀤𑀺𑀲𑀦𑁆𑀢𑀁 𑀢𑀁 𑀢𑀁 𑀤𑀺𑀲𑀁, 𑀤𑀺𑀲𑀸𑀧𑀭𑀺𑀬𑀦𑁆𑀢𑀁 𑀯𑀸 𑀅𑀦𑀼𑀥𑀸𑀯𑀦𑁆𑀢𑀺 𑀯𑀺𑀥𑀸𑀯𑀦𑁆𑀢𑀻𑀢𑀺. 𑀏𑀢𑁆𑀣 𑀦𑀓𑀸𑀭𑀲𑀳𑀺𑀢𑀤𑀓𑀸𑀭𑀲𑁆𑀲, 𑀦𑀓𑀸𑀭𑀲𑀳𑀺𑀢𑀢𑀓𑀸𑀭𑀲𑁆𑀲 𑀘 𑀆𑀯𑀼𑀢𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀫𑀦𑁆𑀤𑀸 𑀘 𑀢𑁂 𑀳𑀸𑀲𑀸 𑀘𑁂𑀢𑀺 ¶ 𑀘, 𑀫𑀼𑀦𑀺𑀦𑁆𑀤𑀲𑁆𑀲 𑀫𑀦𑁆𑀤𑀳𑀸𑀲𑀸𑀢𑀺 𑀘, 𑀓𑀼𑀦𑁆𑀤𑀸𑀦𑀁 𑀲𑀦𑁆𑀤𑁄𑀳𑁄𑀢𑀺 𑀘, 𑀢𑀲𑁆𑀲 𑀯𑀺𑀩𑁆𑀪𑀫𑁄 𑀬𑁂𑀲𑀦𑁆𑀢𑀺 𑀘, 𑀤𑀺𑀲𑀸𑀬𑁂𑀯 𑀤𑀺𑀲𑀦𑁆𑀢𑀁, 𑀤𑀺𑀲𑀸𑀦𑀁 𑀯𑀸 𑀅𑀦𑁆𑀢𑀦𑁆𑀢𑀺 𑀘 𑀯𑀺𑀕𑁆𑀕𑀳𑁄.

‘‘𑀇𑀦𑁆𑀤𑀦𑀻𑀮𑀤𑀮𑀤𑁆𑀯𑀦𑁆𑀤-𑀲𑀼𑀦𑁆𑀤𑀭𑀁 𑀲𑀺𑀭𑀺𑀫𑀦𑁆𑀤𑀺𑀭𑀁;

𑀫𑀼𑀦𑀺𑀦𑁆𑀤𑀦𑀬𑀦𑀤𑁆𑀯𑀦𑁆𑀤𑀁, 𑀯𑀺𑀦𑁆𑀤𑀢𑀺’𑀦𑁆𑀤𑀻𑀯𑀭𑀚𑁆𑀚𑀼𑀢𑀺’’𑀦𑁆𑀢𑀺.

𑀇𑀤𑀫𑁆𑀧𑀺 𑀦𑀓𑀸𑀭𑀲𑀳𑀺𑀢𑀤𑀓𑀸𑀭𑀯𑀡𑁆𑀡𑀸𑀯𑀼𑀢𑁆𑀢𑀺𑀬𑀸 𑀅𑀧𑀭𑀫𑀼𑀤𑀸𑀳𑀭𑀡𑀁.

𑀢𑀢𑁆𑀣 𑀇𑀦𑁆𑀤𑀦𑀻𑀮𑀤𑀮𑀤𑁆𑀯𑀦𑁆𑀤𑀲𑀼𑀦𑁆𑀤𑀭𑀁 𑀇𑀦𑁆𑀤𑀦𑀻𑀮𑀫𑀡𑀺𑀲𑀓𑀮𑀺𑀓𑀸𑀬𑀼𑀕𑀴𑀫𑀺𑀯 𑀫𑀦𑁄𑀳𑀭𑀁 𑀲𑀺𑀭𑀺𑀫𑀦𑁆𑀤𑀺𑀭𑀁 𑀢𑀢𑁄𑀬𑁂𑀯 𑀲𑁄𑀪𑀸𑀬 𑀦𑀺𑀯𑀸𑀲𑀝𑁆𑀞𑀸𑀦𑀪𑀽𑀢𑀁 𑀫𑀼𑀦𑀺𑀦𑁆𑀤𑀦𑀬𑀦𑀤𑁆𑀯𑀦𑁆𑀤𑀁 𑀇𑀦𑁆𑀤𑀻𑀯𑀭𑀚𑁆𑀚𑀼𑀢𑀺𑀁 𑀦𑀻𑀮𑀼𑀧𑁆𑀧𑀮𑀓𑀦𑁆𑀢𑀺𑀁 𑀯𑀺𑀦𑁆𑀤𑀢𑀺 𑀅𑀦𑀼𑀪𑁄𑀢𑀺, 𑀇𑀦𑁆𑀤𑀻𑀯𑀭𑀚𑁆𑀚𑀼𑀢𑀺𑀲𑀫𑀸𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁩𑁦.

𑀲𑀩𑁆𑀩𑀓𑁄𑀫𑀮𑀯𑀡𑁆𑀡𑁂𑀳𑀺, 𑀦𑀸’𑀦𑀼𑀧𑁆𑀧𑀸𑀲𑁄 𑀧𑀲𑀁𑀲𑀺𑀬𑁄;

𑀬𑀣𑀸’𑀬𑀁 𑀫𑀸𑀮𑀢𑀻𑀫𑀸𑀮𑀸, 𑀮𑀺𑀦𑀮𑁄𑀮𑀸𑀮𑀺𑀫𑀸𑀮𑀺𑀦𑀻.

𑁧𑁩𑁦. 𑀬𑁂𑀳𑀺 𑀓𑁂𑀳𑀺𑀘𑀺 𑀆𑀯𑀼𑀢𑁆𑀢𑀺𑀢𑁄 𑀅𑀦𑀼𑀧𑁆𑀧𑀸𑀲𑁄𑀢𑀺 𑀘𑁂? 𑀦𑁂𑀢𑁆𑀬𑀸𑀳 ‘‘𑀲𑀩𑁆𑀩’’𑀇𑀘𑁆𑀘𑀸𑀤𑀺. 𑀲𑀩𑁆𑀩𑁂𑀳𑀺 𑀓𑁄𑀫𑀮𑁂𑀳𑀺 𑀲𑀼𑀓𑀼𑀫𑀸𑀭𑁂𑀳𑀺 𑀯𑀡𑁆𑀡𑁂𑀳𑀺 𑀅𑀓𑁆𑀔𑀭𑁂𑀳𑀺 𑀅𑀦𑀼𑀧𑁆𑀧𑀸𑀲𑁄 𑀦 𑀧𑀲𑀁𑀲𑀺𑀬𑁄 𑀲𑀺𑀮𑀸𑀖𑀦𑀻𑀬𑁄 𑀦 𑀳𑁄𑀢𑀺 𑀲𑀺𑀮𑁂𑀲𑀯𑀺𑀭𑁄𑀥𑀺𑀢𑁆𑀢𑀸. ‘‘𑀬𑀣𑁂’’𑀢𑀺 𑀢𑀁 𑀉𑀤𑀸𑀳𑀭𑀢𑀺. 𑀅𑀬𑀁 𑀫𑀸𑀮𑀢𑀻𑀫𑀸𑀮𑀸 𑀚𑀸𑀢𑀺𑀓𑀼𑀲𑀼𑀫𑀤𑀸𑀫𑀁 𑀮𑀺𑀦𑀸𑀦𑀁 𑀩𑁆𑀬𑀸𑀥𑀺𑀢𑀸𑀦𑀁 𑀮𑁄𑀮𑀸𑀦𑀁 ¶ 𑀓𑀼𑀲𑀼𑀫𑀭𑀲𑀸𑀭𑀩𑁆𑀪 𑀮𑁄𑀮𑀼𑀧𑀸𑀦𑀁 𑀅𑀮𑀻𑀦𑀁 𑀪𑀫𑀭𑀸𑀦𑀁 𑀫𑀸𑀮𑀸 𑀧𑀦𑁆𑀢𑀺 𑀲𑀸 𑀅𑀲𑁆𑀲𑀸 𑀅𑀢𑁆𑀣𑀻𑀢𑀺 𑀮𑀺𑀦𑀮𑁄𑀮𑀸𑀮𑀺𑀫𑀸𑀮𑀺𑀦𑀻.

𑁧𑁩𑁦. 𑀯𑀼𑀢𑁆𑀢𑀸𑀦𑀼𑀧𑁆𑀧𑀸𑀲𑁄𑀧𑀺 𑀲𑀩𑁆𑀩𑀓𑁄𑀫𑀮𑀯𑀡𑁆𑀡𑁂𑀳𑀺 𑀯𑀺𑀭𑀘𑀺𑀢𑁄 𑀦 𑀧𑀲𑀁𑀲𑀺𑀬𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀓𑁄𑀫𑀮𑀯𑀡𑁆𑀡𑁂𑀳𑀻’’𑀢𑀺𑀆𑀤𑀺𑀫𑀸𑀳. 𑀲𑀩𑁆𑀩𑀓𑁄𑀫𑀮𑀯𑀡𑁆𑀡𑁂𑀳𑀺 𑀲𑀩𑁆𑀩𑁂𑀳𑀺 𑀲𑀼𑀓𑀼𑀫𑀸𑀭𑀓𑁆𑀔𑀭𑁂𑀳𑀺 𑀓𑀢𑁄 𑀅𑀦𑀼𑀧𑁆𑀧𑀸𑀲𑁄 𑀯𑀡𑁆𑀡𑀸𑀯𑀼𑀢𑁆𑀢𑀺𑀮𑀓𑁆𑀔𑀡𑁄 𑀦 𑀧𑀲𑀁𑀲𑀺𑀬𑁄 𑀲𑀺𑀮𑁂𑀲𑀸𑀮𑀗𑁆𑀓𑀸𑀭𑀯𑀺𑀭𑀼𑀤𑁆𑀥𑀢𑁆𑀢𑀸 𑀧𑀲𑀢𑁆𑀣𑁄 𑀦 𑀳𑁄𑀢𑀺. ‘‘𑀬𑀣𑀸’’𑀢𑀺 𑀢𑀫𑀼𑀤𑀸𑀳𑀭𑀢𑀺. 𑀅𑀬𑀁 𑀫𑀸𑀮𑀢𑀻𑀫𑀸𑀮𑀸 𑀏𑀲𑀸 𑀚𑀸𑀢𑀺𑀲𑀼𑀫𑀦𑀫𑀸𑀮𑀺𑀓𑀸 𑀮𑀺𑀦𑀸𑀦𑀁 𑀩𑁆𑀬𑀸𑀯𑀝𑀸𑀦𑀁 𑀧𑀢𑀦𑁆𑀢𑀸𑀦𑀁 𑀮𑁄𑀮𑀸𑀦𑀁 𑀕𑀦𑁆𑀥𑀮𑀼𑀤𑁆𑀥𑀸𑀦𑀁 𑀅𑀮𑀻𑀦𑀁 𑀪𑀫𑀭𑀸𑀦𑀁 𑀫𑀸𑀮𑀺𑀦𑀻 𑀧𑀦𑁆𑀢𑀺𑀬𑀼𑀢𑁆𑀢𑀸𑀢𑀺. 𑀏𑀢𑁆𑀣 𑀮𑀓𑀸𑀭𑀲𑁆𑀲𑁂𑀯 𑀧𑀼𑀦𑀧𑁆𑀧𑀼𑀦𑀧𑁆𑀧𑀬𑁄𑀕𑁂𑀦 𑀓𑁄𑀫𑀮𑀯𑀡𑁆𑀡𑀸𑀯𑀼𑀢𑁆𑀢𑀺. 𑀫𑀸𑀮𑀢𑀻𑀦𑀁 𑀫𑀸𑀮𑀸𑀢𑀺 𑀘, 𑀮𑁄𑀮𑀸 𑀘 𑀢𑁂 𑀅𑀮𑀬𑁄 𑀘𑀸𑀢𑀺 𑀘, 𑀮𑀺𑀦𑀸 𑀘 𑀢𑁂 𑀮𑁄𑀮𑀸𑀮𑀬𑁄 𑀘𑀸𑀢𑀺 𑀘, 𑀢𑁂𑀲𑀁 𑀫𑀸𑀮𑀸𑀢𑀺 𑀘, 𑀲𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀘 𑀯𑀺𑀕𑁆𑀕𑀳𑁄.

𑁧𑁩𑁧.

𑀫𑀼𑀤𑀽𑀳𑀺 𑀯𑀸 𑀓𑁂𑀯𑀮𑁂𑀳𑀺,

𑀓𑁂𑀯𑀮𑁂𑀳𑀺 𑀨𑀼𑀝𑁂𑀳𑀺 𑀯𑀸;

𑀫𑀺𑀲𑁆𑀲𑁂𑀳𑀺 𑀯𑀸 𑀢𑀺𑀥𑀸 𑀳𑁄𑀢𑀺,

𑀯𑀡𑁆𑀡𑁂𑀳𑀺 𑀲𑀫𑀢𑀸 𑀬𑀣𑀸.

𑁧𑁩𑁧. 𑀲𑀫𑀢𑀁 𑀲𑀫𑁆𑀪𑀸𑀯𑁂𑀢𑀺 ‘‘𑀫𑀼𑀤𑀽𑀳𑀺’’𑀘𑁆𑀘𑀸𑀤𑀺𑀦𑀸. 𑀓𑁂𑀯𑀮𑁂𑀳𑀺 𑀓𑁂𑀯𑀮𑀨𑀼𑀝𑀸𑀤𑀺𑀪𑀸𑀯𑀸𑀧𑀯𑀢𑁆𑀢𑁂𑀳𑀺 𑀲𑀓𑀮𑁂𑀳𑀺 𑀫𑀼𑀤𑀽𑀳𑀺 𑀘𑀢𑀽𑀲𑀼𑀧𑀺 𑀧𑀸𑀤𑁂𑀲𑀼 𑀲𑀚𑀸𑀢𑀺𑀬𑁂𑀳𑀺 𑀅𑀲𑀺𑀣𑀺𑀮𑀓𑁄𑀫𑀮𑁂𑀳𑀺 𑀯𑀸 𑀓𑀓𑀸𑀭𑀸𑀤𑀻𑀳𑀺 𑀯𑀸 𑀲𑀺𑀣𑀺𑀮𑀓𑁄𑀫𑀮𑀲𑁆𑀲 𑀲𑀺𑀮𑁂𑀲𑀧𑀝𑀺𑀧𑀓𑁆𑀔𑀢𑁆𑀢𑀸 𑀓𑁂𑀯𑀮𑁂𑀳𑀺 𑀨𑀼𑀝𑁂𑀳𑀺 𑀯𑀸 𑀅𑀥𑀺𑀫𑀢𑁆𑀢𑀲𑀼𑀢𑀻𑀳𑀺 𑀪𑀓𑀸𑀭𑀸𑀤𑀻𑀳𑀺 [𑀭𑀸𑀕𑀸𑀤𑀻𑀳𑀺 (𑀓.)] 𑀯𑀸 𑀅𑀓𑀺𑀘𑁆𑀙𑀯𑀘𑀦𑀻𑀬𑁂 𑀓𑀺𑀘𑁆𑀙𑀯𑀘𑀦𑀻𑀬𑀲𑁆𑀲 𑀲𑀼𑀔𑀼𑀫𑀸𑀮𑀯𑀺𑀧𑀭𑀺𑀬𑀬𑀢𑁆𑀢𑀸 𑀫𑀺𑀲𑁆𑀲𑁂𑀳𑀺 𑀯𑀸 𑀫𑀚𑁆𑀛𑀺𑀫𑀲𑀼𑀢𑀻𑀳𑀺 𑀫𑀼𑀤𑀼𑀪𑀽𑀢𑀲𑀁𑀲𑀝𑁆𑀞𑁂𑀳𑀺 𑀯𑀸 𑀯𑀡𑁆𑀡𑁂𑀳𑀺 𑀅𑀓𑁆𑀔𑀭𑁂𑀳𑀺 𑀓𑀭𑀡𑀪𑀽𑀢𑁂𑀳𑀺 𑀲𑀫𑀢𑀸 𑀢𑀺𑀥𑀸 𑀳𑁄𑀢𑀺 𑀕𑀚𑁆𑀚𑁂 𑀧𑀚𑁆𑀚𑁂 𑀯𑀸. ‘‘𑀬𑀣𑁂’’𑀢𑀺 𑀢𑀺𑀯𑀺𑀥𑀫𑀼𑀤𑀸𑀳𑀭𑀢𑀺.

𑁧𑁩𑁧. 𑀇𑀤𑀸𑀦𑀺 𑀲𑀫𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀫𑀼𑀤𑀽𑀳𑀺’’𑀘𑁆𑀘𑀸𑀤𑀺𑀫𑀸𑀳. 𑀓𑁂𑀯𑀮𑁂𑀳𑀺 𑀨𑀼𑀝𑀫𑀺𑀲𑁆𑀲𑁂𑀳𑀺 𑀅𑀜𑁆𑀜𑀢𑁆𑀢𑀸 𑀲𑀓𑀮𑁂𑀳𑀺 𑀫𑀼𑀤𑀽𑀳𑀺 𑀲𑀺𑀣𑀺𑀮𑀓𑁄𑀫𑀮𑁂𑀳𑀺 𑀯𑀡𑁆𑀡𑁂𑀳𑀺 𑀓𑀓𑀸𑀭𑀸𑀤𑀻𑀳𑀺 𑀯𑀸 𑀓𑁂𑀯𑀮𑁂𑀳𑀺 𑀨𑀼𑀝𑁂𑀳𑀺 𑀓𑁂𑀯𑀮𑀓𑁄𑀫𑀮𑀯𑀡𑁆𑀡𑀭𑀳𑀺𑀢𑀢𑁆𑀢𑀸 𑀲𑀓𑀮𑁂𑀳𑀺 𑀅𑀓𑀺𑀘𑁆𑀙𑀼𑀘𑁆𑀘𑀸𑀭𑀡𑀻𑀬𑁂𑀳𑀺 𑀅𑀥𑀺𑀫𑀢𑁆𑀢𑀲𑀼𑀢𑀻𑀳𑀺 𑀪𑀓𑀸𑀭𑀸𑀤𑀻𑀳𑀺 𑀯𑀡𑁆𑀡𑁂𑀳𑀺 𑀯𑀸 𑀫𑀺𑀲𑁆𑀲𑁂𑀳𑀺 𑀬𑀣𑀸𑀯𑀼𑀢𑁆𑀢𑀫𑀼𑀤𑀼𑀨𑀼𑀝𑀲𑀫𑁆𑀫𑀺𑀲𑁆𑀲𑁂𑀳𑀺 𑀯𑀡𑁆𑀡𑁂𑀳𑀺 𑀯𑀸 𑀓𑀭𑀡𑀪𑀽𑀢𑁂𑀳𑀺 𑀲𑀫𑀢𑀸 𑀕𑀚𑁆𑀚𑁂 𑀯𑀸 𑀧𑀚𑁆𑀚𑁂 𑀯𑀸 𑀢𑀺𑀥𑀸 𑀳𑁄𑀢𑀻𑀢𑀺. 𑀬𑀤𑀺 𑀲𑀺𑀣𑀺𑀮𑀓𑁄𑀫𑀮𑀯𑀡𑁆𑀡𑁂𑀳𑀺 𑀯𑀺𑀘𑀭𑀺𑀢𑀁 𑀲𑀺𑀮𑁂𑀲𑀸𑀮𑀗𑁆𑀓𑀸𑀭𑀲𑁆𑀲, 𑀓𑀺𑀘𑁆𑀙𑀼𑀘𑁆𑀘𑀸𑀭𑀡𑀻𑀬𑁂𑀳𑀺 𑀨𑀼𑀝𑀯𑀡𑁆𑀡𑁂𑀳𑀺 𑀓𑀢𑀁 𑀲𑀼𑀔𑀼𑀫𑀸𑀮𑀸𑀮𑀗𑁆𑀓𑀸𑀭𑀲𑁆𑀲 ¶ 𑀘 𑀯𑀺𑀭𑀼𑀚𑁆𑀛𑀢𑀻𑀢𑀺. ‘‘𑀬𑀣𑀸’’𑀢𑀺 𑀢𑀺𑀯𑀺𑀥𑀫𑀼𑀤𑀸𑀳𑀭𑀢𑀺.

𑀓𑁂𑀯𑀮𑀫𑀼𑀤𑀼𑀲𑀫𑀢𑀸

𑁧𑁩𑁨.

𑀓𑁄𑀓𑀺𑀮𑀸𑀮𑀸𑀧𑀲𑀁𑀯𑀸𑀤𑀻,

𑀫𑀼𑀦𑀺𑀦𑁆𑀤𑀸𑀮𑀸𑀧𑀯𑀺𑀩𑁆𑀪𑀫𑁄;

𑀳𑀤𑀬𑀗𑁆𑀕𑀫𑀢𑀁 𑀬𑀸𑀢𑀺,

𑀲𑀢𑀁 𑀤𑁂𑀢𑀺 𑀘 𑀦𑀺𑀩𑁆𑀩𑀼𑀢𑀺𑀁.

𑁧𑁩𑁨. ‘‘𑀓𑁄𑀓𑀺𑀮𑁂’’𑀘𑁆𑀘𑀸𑀤𑀺. 𑀓𑁄𑀓𑀺𑀮𑀸𑀦𑀁 𑀓𑀭𑀯𑀻𑀓𑀲𑀓𑀼𑀡𑀸𑀦𑀁 𑀆𑀮𑀸𑀧𑁄 𑀓𑀽𑀚𑀺𑀢𑀁, 𑀢𑀁 𑀲𑀁𑀯𑀤𑀢𑀺 𑀧𑀓𑀸𑀲𑀢𑀺 𑀲𑀻𑀮𑁂𑀦𑀸𑀢𑀺 𑀓𑁄𑀓𑀺𑀮𑀸𑀮𑀸𑀧𑀲𑀁𑀯𑀸𑀤𑀻, 𑀢𑀁𑀲𑀤𑀺𑀲𑁄𑀢𑀺 𑀅𑀢𑁆𑀣𑁄, 𑀫𑀼𑀦𑀺𑀦𑁆𑀤𑀲𑁆𑀲 𑀆𑀮𑀸𑀧𑁄 𑀯𑀺𑀲𑀝𑁆𑀞𑀸𑀤𑀺𑀅𑀝𑁆𑀞𑀗𑁆𑀕𑀺𑀓𑁄 𑀲𑀭𑁄 𑀢𑀲𑁆𑀲 𑀯𑀺𑀩𑁆𑀪𑀫𑁄 𑀯𑀺𑀮𑀸𑀲𑁄 𑀲𑀢𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀳𑀤𑀬𑀗𑁆𑀕𑀫𑀢𑀁 𑀫𑀦𑁄𑀦𑀼𑀲𑀸𑀭𑀺𑀢𑀁 𑀫𑀥𑀼𑀭𑀪𑀸𑀯𑀁 𑀬𑀸𑀢𑀺, 𑀦𑀺𑀩𑁆𑀩𑀼𑀢𑀺𑀁 𑀦𑀺𑀩𑁆𑀩𑀸𑀦𑀜𑁆𑀘 𑀢𑁂𑀲𑀁 𑀤𑁂𑀢𑀺.

𑁧𑁩𑁨. ‘‘𑀓𑁄𑀓𑀺𑀮𑀺’’𑀘𑁆𑀘𑀸𑀤𑀺. 𑀓𑁄𑀓𑀺𑀮𑀸𑀦𑀁 𑀓𑀭𑀯𑀻𑀓𑀲𑀓𑀼𑀡𑀸𑀦𑀁 𑀆𑀮𑀸𑀧𑀁 𑀦𑀸𑀤𑀮𑀻𑀮𑀁 𑀲𑀁𑀯𑀸𑀤𑀻 𑀧𑀓𑀸𑀲𑀦𑀲𑀻𑀮𑁄, 𑀢𑀁𑀲𑀤𑀺𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀫𑀼𑀦𑀺𑀦𑁆𑀤𑀲𑁆𑀲 𑀲𑀩𑁆𑀩𑀜𑁆𑀜𑀼𑀦𑁄 𑀆𑀮𑀸𑀧𑀲𑁆𑀲 𑀯𑀺𑀲𑀝𑁆𑀞𑀸𑀤𑀺𑀅𑀝𑁆𑀞𑀗𑁆𑀕𑀺𑀓𑀦𑀸𑀤𑀲𑁆𑀲 𑀯𑀺𑀩𑁆𑀪𑀫𑁄 𑀯𑀺𑀮𑀸𑀲𑁄 𑀲𑀢𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀳𑀤𑀬𑀗𑁆𑀕𑀫𑀢𑀁 𑀘𑀺𑀢𑁆𑀢𑀸𑀭𑀸𑀥𑀺𑀢𑀪𑀸𑀯𑀁 𑀬𑀸𑀢𑀺 𑀘, 𑀦𑀺𑀩𑁆𑀩𑀼𑀢𑀺𑀁 𑀲𑀼𑀢𑀲𑀫𑁆𑀩𑀦𑁆𑀥𑁂𑀦 𑀢𑁂𑀲𑀁𑀬𑁂𑀯 𑀲𑀸𑀥𑀽𑀦𑀁 𑀦𑀺𑀩𑁆𑀩𑀸𑀦𑀁 𑀤𑁂𑀢𑀺 𑀘 𑀤𑁂𑀦𑁆𑀢𑁄𑀧𑀺 𑀳𑁄𑀢𑀻𑀢𑀺. 𑀏𑀢𑁆𑀣 𑀓𑁄𑀓𑀺𑀮𑀸𑀮𑀸𑀧𑀲𑀤𑁆𑀤𑁂𑀦 𑀦𑀺𑀲𑁆𑀲𑀺𑀢𑁂 𑀦𑀺𑀲𑁆𑀲𑀬𑀯𑁄𑀳𑀸𑀭𑁂𑀦 𑀮𑀻𑀮𑀸 𑀕𑀳𑀺𑀢𑀸.

𑀓𑁂𑀯𑀮𑀨𑀼𑀝𑀲𑀫𑀢𑀸

𑁧𑁩𑁩.

𑀲𑀫𑁆𑀪𑀸𑀯𑀦𑀻𑀬𑀲𑀫𑁆𑀪𑀸𑀯𑀁,

𑀪𑀕𑀯𑀦𑁆𑀢𑀁 𑀪𑀯𑀦𑁆𑀢𑀕𑀼𑀁;

𑀪𑀯𑀦𑁆𑀢𑀲𑀸𑀥𑀦𑀸𑀓𑀗𑁆𑀔𑀻,

𑀓𑁄 𑀦 𑀲𑀫𑁆𑀪𑀸𑀯𑀬𑁂 𑀯𑀺𑀪𑀼𑀁.

𑁧𑁩𑁩. ‘‘𑀲𑀫𑁆𑀪𑀸𑀯𑀦𑀻𑀬𑁂’’𑀘𑁆𑀘𑀸𑀤𑀺. ¶ 𑀲𑀫𑁆𑀪𑀸𑀯𑀦𑀻𑀬𑁄 𑀆𑀤𑀭𑀡𑀻𑀬𑁄. 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀦𑁆𑀢𑁄 𑀲𑁄𑀪𑀦𑁄 𑀪𑀸𑀯𑁄 𑀅𑀥𑀺𑀧𑁆𑀧𑀸𑀬𑁄 𑀬𑀲𑁆𑀲 𑀢𑀁. 𑀪𑀯𑀦𑁆𑀢𑀁 𑀦𑀺𑀩𑁆𑀩𑀸𑀦𑀁 𑀕𑀢𑁄𑀢𑀺 𑀪𑀯𑀦𑁆𑀢𑀕𑀼, 𑀢𑀁 𑀯𑀺𑀪𑀼𑀁. 𑀪𑀕𑀯𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁. 𑀪𑀯𑀲𑁆𑀲 𑀲𑀁𑀲𑀸𑀭𑀲𑁆𑀲 𑀅𑀦𑁆𑀢𑁄 𑀅𑀯𑀲𑀸𑀦𑀁 𑀦𑀺𑀩𑁆𑀩𑀸𑀦𑀁, 𑀢𑀲𑁆𑀲 𑀲𑀸𑀥𑀦𑀁 𑀲𑀫𑁆𑀧𑀸𑀤𑀦𑀫𑀸𑀓𑀗𑁆𑀔𑀢𑀺 𑀲𑀻𑀮𑁂𑀦𑀸𑀢𑀺 𑀪𑀯𑀦𑁆𑀢𑀲𑀸𑀥𑀦𑀸𑀓𑀗𑁆𑀔𑀻, 𑀓𑁄 𑀦𑀸𑀫 𑀲𑀁𑀲𑀸𑀭𑀯𑀢𑁆𑀢𑀺𑀚𑀦𑁄. 𑀦 𑀲𑀫𑁆𑀪𑀸𑀯𑀬𑁂 𑀆𑀤𑀭𑀁 𑀦 𑀓𑀭𑁂𑀬𑁆𑀬, 𑀓𑀭𑁄𑀢𑁆𑀬𑁂𑀯𑀸𑀢𑀺 𑀅𑀢𑁆𑀣𑁄.

𑁧𑁩𑁩. ‘‘𑀲𑀫𑁆𑀪𑀸𑀯𑀦𑀻𑀬𑀺’’𑀘𑁆𑀘𑀸𑀤𑀺. 𑀲𑀫𑁆𑀪𑀸𑀯𑀦𑀻𑀬𑀲𑀫𑁆𑀪𑀸𑀯𑀁 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀆𑀤𑀭𑀡𑀻𑀬𑀲𑁄𑀪𑀦𑀸𑀥𑀺𑀧𑁆𑀧𑀸𑀬𑀁 𑀪𑀯𑀦𑁆𑀢𑀕𑀼𑀁 𑀪𑀯𑀲𑁆𑀲 𑀅𑀦𑁆𑀢𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀕𑀢𑀁 𑀯𑀺𑀪𑀼𑀁 𑀧𑀪𑀼𑀁 𑀪𑀕𑀯𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀪𑀯𑀦𑁆𑀢𑀲𑀸𑀥𑀦𑀸𑀓𑀗𑁆𑀔𑀻 𑀦𑀺𑀩𑁆𑀩𑀸𑀦𑀲𑀸𑀥𑀦𑀸𑀪𑀺𑀮𑀸𑀲𑀻 𑀓𑁄 𑀓𑀢𑀫𑁄 𑀲𑀁𑀲𑀸𑀭𑀯𑀢𑁆𑀢𑀺𑀚𑀦𑁄 𑀦 𑀲𑀫𑁆𑀪𑀸𑀯𑀬𑁂 𑀆𑀤𑀭𑀁 𑀦 𑀓𑀭𑁂𑀬𑁆𑀬, 𑀓𑀭𑁄𑀢𑁆𑀬𑁂𑀯. 𑀲𑀦𑁆𑀢𑁄 𑀘 𑀲𑁄 𑀪𑀸𑀯𑁄 𑀘𑀸𑀢𑀺 𑀘, 𑀲𑀫𑁆𑀪𑀸𑀯𑀦𑀻𑀬𑁄 𑀲𑀫𑁆𑀪𑀸𑀯𑁄 𑀬𑀲𑁆𑀲𑁂𑀢𑀺 𑀘, 𑀪𑀯𑀲𑁆𑀲 𑀅𑀦𑁆𑀢𑀦𑁆𑀢𑀺 𑀘, 𑀪𑀯𑀦𑁆𑀢𑀁 𑀕𑀢𑁄𑀢𑀺 𑀘, 𑀢𑀲𑁆𑀲 𑀲𑀸𑀥𑀦𑀦𑁆𑀢𑀺 𑀘, 𑀢𑀁 𑀆𑀓𑀗𑁆𑀔𑀢𑀺 𑀲𑀻𑀮𑁂𑀦𑀸𑀢𑀺 𑀘 𑀯𑀺𑀕𑁆𑀕𑀳𑁄.

𑀫𑀺𑀲𑁆𑀲𑀓𑀲𑀫𑀢𑀸

𑁧𑁩𑁪.

𑀮𑀤𑁆𑀥𑀘𑀦𑁆𑀤𑀦𑀲𑀁𑀲𑀕𑁆𑀕-𑀲𑀼𑀕𑀦𑁆𑀥𑀺𑀫𑀮𑀬𑀸𑀦𑀺𑀮𑁄;

𑀫𑀦𑁆𑀤’𑀫𑀸𑀬𑀸𑀢𑀺 𑀪𑀻𑀢𑁄𑀯, 𑀫𑀼𑀦𑀺𑀦𑁆𑀤𑀫𑀼𑀔𑀫𑀸𑀭𑀼𑀢𑀸.

𑁧𑁩𑁪. ‘‘𑀮𑀤𑁆𑀥𑀺’’𑀘𑁆𑀘𑀸𑀤𑀺. 𑀮𑀤𑁆𑀥𑁄 𑀘𑀦𑁆𑀤𑀦𑀢𑀭𑀽𑀦𑀁 𑀲𑀁𑀲𑀕𑁆𑀕𑁄 𑀧𑀭𑀺𑀘𑀬𑁄 𑀢𑁂𑀦 𑀲𑁄𑀪𑀦𑁄 𑀕𑀦𑁆𑀥𑁄 𑀅𑀲𑁆𑀲𑀸𑀢𑀺 𑀲𑀼𑀕𑀦𑁆𑀥𑀻 𑀲𑀼𑀭𑀪𑀺 𑀫𑀮𑀬𑀸𑀦𑀺𑀮𑁄𑀤𑀓𑁆𑀔𑀺𑀡𑀧𑀯𑀫𑀸𑀦𑁄 𑀫𑀼𑀦𑀺𑀦𑁆𑀤𑀲𑁆𑀲 𑀫𑀼𑀔𑀫𑀸𑀭𑀼𑀢𑀸 𑀪𑀻𑀢𑁄𑀯 𑀢𑀸𑀤𑀺𑀲𑀫𑀼𑀤𑀼𑀢𑁆𑀢𑀲𑀻𑀢𑀮𑀢𑁆𑀢𑀲𑀼𑀕𑀦𑁆𑀥𑀲𑀫𑁆𑀧𑀢𑁆𑀢𑀺𑀬𑀸 𑀅𑀢𑁆𑀢𑀦𑁄 𑀤𑀽𑀭𑀢𑀭𑀢𑁆𑀢𑀸 𑀆𑀬𑀸𑀢𑀺 𑀅𑀦𑀼𑀯𑀢𑁆𑀢𑀢𑀺. 𑀫𑀦𑁆𑀤𑀦𑁆𑀢𑀺 𑀆𑀕𑀫𑀦𑀓𑁆𑀭𑀺𑀬𑀸𑀯𑀺𑀲𑁂𑀲𑀦𑀁.

𑁧𑁩𑁪. ‘‘𑀮𑀤𑁆𑀥𑀺’’𑀘𑁆𑀘𑀸𑀤𑀺. ¶ 𑀮𑀤𑁆𑀥𑀘𑀦𑁆𑀤𑀦𑀲𑀁𑀲𑀕𑁆𑀕𑀲𑀼𑀕𑀦𑁆𑀥𑀺𑀫𑀮𑀬𑀸𑀦𑀺𑀮𑁄 𑀧𑀝𑀺𑀮𑀤𑁆𑀥𑀘𑀦𑁆𑀤𑀦𑀢𑀭𑀼𑀲𑀸𑀭𑀲𑀫𑀯𑀸𑀬𑁂𑀦 𑀲𑁄𑀪𑀦𑀕𑀦𑁆𑀥𑀲𑀫𑀦𑁆𑀦𑀸𑀕𑀢𑁄 𑀫𑀮𑀬𑀤𑁂𑀲𑀢𑁄 𑀆𑀕𑀘𑁆𑀙𑀫𑀸𑀦𑀫𑀸𑀮𑀼𑀢𑁄 𑀫𑀼𑀦𑀺𑀦𑁆𑀤𑀫𑀼𑀔𑀫𑀸𑀭𑀼𑀢𑀸 𑀩𑀼𑀤𑁆𑀥𑀲𑁆𑀲 𑀫𑀼𑀔𑀲𑀼𑀭𑀪𑀺𑀯𑀸𑀲𑀺𑀢𑀧𑀯𑀦𑀢𑁄 𑀪𑀻𑀢𑁄 𑀇𑀯 𑀢𑀸𑀤𑀺𑀲𑀫𑀼𑀤𑀼𑀲𑀼𑀭𑀪𑀺𑀲𑀻𑀢𑀮𑀢𑁆𑀢𑀲𑁆𑀲 𑀅𑀢𑁆𑀢𑀦𑀺 𑀅𑀲𑀫𑁆𑀪𑀯𑀢𑁄 𑀪𑀻𑀢𑁄𑀯 𑀫𑀦𑁆𑀤𑀁 𑀲𑀡𑀺𑀓𑀁 𑀬𑀸𑀢𑀺 𑀅𑀪𑀺𑀫𑀼𑀔𑀫𑁂𑀢𑀻𑀢𑀺. 𑀘𑀦𑁆𑀤𑀦𑀸𑀦𑀁 𑀲𑀁𑀲𑀕𑁆𑀕𑁄𑀢𑀺 𑀘, 𑀮𑀤𑁆𑀥𑁄 𑀘 𑀲𑁄 𑀘𑀦𑁆𑀤𑀦𑀲𑀁𑀲𑀕𑁆𑀕𑁄𑀢𑀺 𑀘, 𑀲𑁄𑀪𑀦𑁄 𑀕𑀦𑁆𑀥𑁄 𑀬𑀲𑁆𑀲𑀸𑀢𑀺 𑀘, 𑀮𑀤𑁆𑀥𑀘𑀦𑁆𑀤𑀦𑀲𑀁𑀲𑀕𑁆𑀕𑁂𑀦 𑀲𑀼𑀕𑀦𑁆𑀥𑀻𑀢𑀺 𑀘, 𑀫𑀮𑀬𑀢𑁄 𑀆𑀕𑀢𑁄 𑀅𑀦𑀺𑀮𑁄𑀢𑀺 𑀘, 𑀫𑀼𑀦𑀺𑀦𑁆𑀤𑀫𑀼𑀔𑀢𑁄 𑀦𑀺𑀓𑁆𑀔𑀦𑁆𑀢𑁄 𑀫𑀸𑀭𑀼𑀢𑁄𑀢𑀺 𑀘 𑀯𑀺𑀕𑁆𑀕𑀳𑁄. 𑀫𑀦𑁆𑀤𑀦𑁆𑀢𑀺 𑀓𑁆𑀭𑀺𑀬𑀸𑀯𑀺𑀲𑁂𑀲𑀦𑀁. 𑀏𑀢𑁆𑀣 𑀢𑀺𑀯𑀺𑀥𑀲𑀫𑀢𑀸𑀬𑀁 ‘‘𑀓𑁄𑀓𑀺𑀮𑀸𑀮𑀸𑀧𑀲𑀁𑀯𑀸𑀤𑀺’’𑀘𑁆𑀘𑀸𑀤𑀺𑀢𑀺𑀯𑀺𑀥𑀮𑀓𑁆𑀔𑀺𑀬𑀲𑁆𑀲𑀸𑀧𑀺 ‘‘𑀫𑀼𑀤𑀽𑀳𑀺 𑀯𑀸 𑀓𑁂𑀯𑀮𑁂𑀳𑀺’’𑀘𑁆𑀘𑀸𑀤𑀺𑀦𑀸 𑀤𑀲𑁆𑀲𑀺𑀢𑀮𑀓𑁆𑀔𑀡𑀢𑁆𑀢𑀬𑁂𑀦 𑀢𑀼𑀮𑁆𑀬𑀢𑀸 𑀲𑀼𑀧𑀸𑀓𑀝𑀸𑀯𑀸𑀢𑀺.

𑁧𑁩𑁫.

𑀅𑀦𑀺𑀝𑁆𑀞𑀼𑀭𑀓𑁆𑀔𑀭𑀧𑁆𑀧𑀸𑀬𑀸, 𑀲𑀩𑁆𑀩𑀓𑁄𑀫𑀮𑀦𑀺𑀲𑁆𑀲𑀝𑀸;

𑀓𑀺𑀘𑁆𑀙𑀫𑀼𑀘𑁆𑀘𑀸𑀭𑀡𑀸𑀧𑁂𑀢-𑀩𑁆𑀬𑀜𑁆𑀚𑀦𑀸 𑀲𑀼𑀔𑀼𑀫𑀸𑀮𑀢𑀸.

𑁧𑁩𑁫. 𑀲𑀼𑀔𑀼𑀫𑀸𑀮𑀢𑀸 𑀓𑀣𑀻𑀬𑀢𑀺 ‘‘𑀅𑀦𑀺𑀝𑁆𑀞𑀼𑀭𑀓𑁆𑀔𑀭𑁂’’𑀘𑁆𑀘𑀸𑀤𑀺𑀦𑀸. 𑀅𑀦𑀺𑀝𑁆𑀞𑀼𑀭𑀸𑀦𑀺 𑀅𑀨𑀭𑀼𑀲𑀸𑀦𑀺 𑀅𑀓𑁆𑀔𑀭𑀸𑀦𑀺 𑀯𑀡𑁆𑀡𑀸𑀦𑀺 𑀧𑀸𑀬𑀸𑀦𑀺 𑀩𑀳𑀽𑀦𑀺 𑀬𑀲𑁆𑀲𑀸 𑀲𑀸 𑀢𑀣𑀸, ‘‘𑀦𑀺𑀝𑁆𑀞𑀼𑀭𑀸𑀦𑀺 𑀅𑀧𑁆𑀧𑀓𑀸𑀦𑀻’’𑀢𑀺 𑀧𑀸𑀬𑀕𑁆𑀕𑀳𑀡𑁂𑀦 𑀲𑀽𑀘𑀺𑀢𑀁, 𑀢𑀢𑁄𑀬𑁂𑀯 𑀲𑀩𑁆𑀩𑁂𑀳𑀺 𑀓𑁂𑀯𑀮𑁂𑀳𑀺 𑀓𑁄𑀫𑀮𑁂𑀳𑀺 𑀲𑀺𑀣𑀺𑀮𑁂𑀳𑀺 𑀮𑀖𑀽𑀳𑀺 𑀅𑀓𑁆𑀔𑀭𑁂𑀳𑀺 𑀦𑀺𑀲𑁆𑀲𑀝𑀸 𑀦𑀺𑀕𑁆𑀕𑀢𑀸 𑀓𑀺𑀘𑁆𑀙𑁂𑀦 𑀤𑀼𑀓𑁆𑀔𑁂𑀦 𑀉𑀘𑁆𑀘𑀸𑀭𑀡𑀸 𑀢𑀢𑁄 𑀅𑀧𑁂𑀢𑀸𑀦𑀺 𑀅𑀧𑀕𑀢𑀸𑀦𑀺 𑀩𑁆𑀬𑀜𑁆𑀚𑀦𑀸𑀦𑀺 𑀬𑀲𑁆𑀲𑀸 𑀲𑀸𑀢𑀺 𑀅𑀦𑀼𑀯𑀤𑀺𑀢𑁆𑀯𑀸 𑀲𑀼𑀔𑀼𑀫𑀸𑀮𑀢𑀸 𑀯𑀺𑀥𑀻𑀬𑀢𑁂.

𑁧𑁩𑁫. 𑀇𑀤𑀸𑀦𑀺 𑀲𑀼𑀔𑀼𑀫𑀸𑀮𑀢𑀁 𑀤𑀲𑁆𑀲𑁂𑀢𑀺 ‘‘𑀅𑀦𑀺𑀝𑁆𑀞𑀼𑀭𑁂’’𑀘𑁆𑀘𑀸𑀤𑀺𑀦𑀸. 𑀅𑀦𑀺𑀝𑁆𑀞𑀼𑀭𑀓𑁆𑀔𑀭𑀧𑁆𑀧𑀸𑀬𑀸 𑀅𑀓𑀓𑁆𑀓𑀲𑀯𑀡𑁆𑀡𑀩𑀳𑀼𑀮𑀸 𑀲𑀩𑁆𑀩𑀓𑁄𑀫𑀮𑀦𑀺𑀲𑁆𑀲𑀝𑀸 𑀅𑀦𑀺𑀝𑁆𑀞𑀼𑀭𑀓𑁆𑀔𑀭𑀸𑀦𑀁 𑀬𑁂𑀪𑀼𑀬𑁆𑀬𑀕𑁆𑀕𑀳𑀡𑀢𑁄𑀬𑁂𑀯 𑀲𑀓𑀮𑀲𑀺𑀣𑀺𑀮𑀯𑀡𑁆𑀡𑀯𑀺𑀭𑀳𑀺𑀢𑀸 𑀓𑀺𑀘𑁆𑀙𑀫𑀼𑀘𑁆𑀘𑀸𑀭𑀡𑀸𑀧𑁂𑀢𑀩𑁆𑀬𑀜𑁆𑀚𑀦𑀸 𑀤𑀼𑀓𑁆𑀔𑀼𑀘𑁆𑀘𑀸𑀭𑀡𑀻𑀬𑀯𑀡𑁆𑀡𑁂𑀳𑀺 𑀯𑀺𑀕𑀢𑀅𑀓𑁆𑀔𑀭𑀲𑀫𑀦𑁆𑀦𑀸𑀕𑀢𑀸 𑀲𑀼𑀔𑀼𑀫𑀸𑀮𑀢𑀸 𑀦𑀸𑀫𑀸𑀢𑀺. 𑀅𑀦𑀺𑀝𑁆𑀞𑀼𑀭𑀸𑀦𑀺 𑀅𑀓𑁆𑀔𑀭𑀸𑀦𑀺 𑀧𑀸𑀬𑀸𑀦𑀺 𑀩𑀳𑀽𑀦𑀺 𑀬𑀲𑁆𑀲𑀦𑁆𑀢𑀺 𑀘, 𑀲𑀩𑁆𑀩𑁂 𑀘 𑀢𑁂 𑀓𑁄𑀫𑀮𑀸 𑀘𑁂𑀢𑀺 𑀘, 𑀢𑁂𑀳𑀺 𑀦𑀺𑀲𑁆𑀲𑀝𑀸𑀢𑀺 ¶ 𑀘, 𑀓𑀺𑀘𑁆𑀙𑁂𑀦 𑀉𑀘𑁆𑀘𑀸𑀭𑀡𑀸𑀢𑀺 𑀘, 𑀢𑁂𑀳𑀺 𑀅𑀧𑁂𑀢𑀸𑀦𑀻𑀢𑀺 𑀘, 𑀢𑀸𑀦𑀺 𑀩𑁆𑀬𑀜𑁆𑀚𑀦𑀸𑀦𑀺 𑀬𑀲𑁆𑀲𑀸𑀢𑀺 𑀘 𑀯𑀺𑀕𑁆𑀕𑀳𑁄. 𑀦𑀺𑀕𑁆𑀕𑀳𑀻𑀢𑀸𑀕𑀫𑁄.

𑁧𑁩𑁬.

𑀧𑀲𑁆𑀲𑀦𑁆𑀢𑀸 𑀭𑀽𑀧𑀯𑀺𑀪𑀯𑀁, 𑀲𑀼𑀡𑀦𑁆𑀢𑀸 𑀫𑀥𑀼𑀭𑀁 𑀕𑀺𑀭𑀁;

𑀘𑀭𑀦𑁆𑀢𑀺 𑀲𑀸𑀥𑀽 𑀲𑀫𑁆𑀩𑀼𑀤𑁆𑀥-𑀓𑀸𑀮𑁂 𑀓𑁂𑀴𑀺𑀧𑀭𑀫𑁆𑀫𑀼𑀔𑀸.

𑁧𑁩𑁬. 𑀉𑀤𑀸𑀳𑀭𑀢𑀺 ‘‘𑀧𑀲𑁆𑀲𑀦𑁆𑀢𑀸’’𑀇𑀘𑁆𑀘𑀸𑀤𑀺. 𑀭𑀽𑀧𑀯𑀺𑀪𑀯𑀁 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀧𑀲𑁆𑀲𑀦𑁆𑀢𑀸 𑀫𑀥𑀼𑀭𑀁 𑀕𑀺𑀭𑀁 𑀯𑀸𑀘𑀁 𑀲𑀼𑀡𑀦𑁆𑀢𑀸 𑀲𑀸𑀥𑀯𑁄 𑀓𑁂𑀴𑀺𑀧𑀭𑀫𑁆𑀫𑀼𑀔𑀸 𑀓𑀻𑀴𑀸𑀬 𑀦𑀺𑀘𑁆𑀙𑀦𑁆𑀢𑀸 𑀘𑀭𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀢𑁆𑀣𑀸𑀢𑀺 𑀆𑀳 ‘‘𑀲𑀫𑁆𑀩𑀼𑀤𑁆𑀥𑀓𑀸𑀮𑁂’’𑀢𑀺.

𑁧𑁩𑁬. ‘‘𑀧𑀲𑁆𑀲𑀦𑁆𑀢𑀺’’𑀘𑁆𑀘𑀸𑀤𑀺𑀦𑀸 𑀮𑀓𑁆𑀔𑀺𑀬𑀫𑀼𑀤𑀸𑀳𑀭𑀢𑀺, 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

𑁧𑁩𑁭.

𑀅𑀮𑀗𑁆𑀓𑀸𑀭𑀯𑀺𑀳𑀻𑀦𑀸𑀧𑀺, 𑀲𑀢𑀁 𑀲𑀫𑁆𑀫𑀼𑀔𑀢𑁂’𑀤𑀺𑀲𑀻;

𑀆𑀭𑁄𑀳𑀢𑀺 𑀯𑀺𑀲𑁂𑀲𑁂𑀦, 𑀭𑀫𑀡𑀻𑀬𑀸 𑀢𑀤𑀼𑀚𑁆𑀚𑀮𑀸.

𑁧𑁩𑁭. 𑀯𑀺𑀲𑀺𑀝𑁆𑀞𑀲𑁆𑀲𑀸𑀜𑁆𑀜𑀥𑀫𑁆𑀫𑀲𑁆𑀲 𑀅𑀪𑀸𑀯𑁂𑀧𑀺𑀫𑀺𑀦𑀸𑀯𑁄𑀧𑀸𑀤𑁂𑀬𑁄 𑀩𑀦𑁆𑀥𑁄𑀢𑀺 𑀆𑀳 ‘‘𑀅𑀮𑀗𑁆𑀓𑀸𑀭𑁂’’𑀘𑁆𑀘𑀸𑀤𑀺. 𑀅𑀮𑀗𑁆𑀓𑀸𑀭𑁂𑀳𑀺 𑀯𑀺𑀳𑀻𑀦𑀸𑀧𑀺 𑀏𑀤𑀺𑀲𑀻 𑀲𑀼𑀔𑀼𑀫𑀸𑀮𑀢𑀸 𑀲𑀢𑀁 𑀧𑀡𑁆𑀟𑀺𑀢𑀚𑀦𑀸𑀦𑀁 𑀲𑀫𑁆𑀫𑀼𑀔𑀢𑀁 𑀅𑀪𑀺𑀫𑀼𑀔𑀪𑀸𑀯𑀁 𑀯𑀸𑀘𑀸𑀕𑁄𑀘𑀭𑀢𑁆𑀢𑀁 𑀆𑀭𑁄𑀳𑀢𑀺 𑀉𑀧𑀕𑀘𑁆𑀙𑀢𑀺, 𑀓𑀺𑀫𑀼𑀢𑀅𑀢𑁆𑀣𑀸𑀮𑀗𑁆𑀓𑀸𑀭𑀸𑀮𑀗𑁆𑀓𑀺𑀢𑁂𑀢𑁆𑀬𑀧𑀺𑀲𑀤𑁆𑀤𑁄. 𑀢𑁂𑀦 𑀲𑀪𑀸𑀯𑀯𑀼𑀢𑁆𑀬𑀸𑀤𑀺𑀦𑀸 𑀅𑀮𑀗𑁆𑀓𑀸𑀭𑁂𑀦 𑀉𑀚𑁆𑀚𑀮𑀸 𑀤𑀺𑀢𑁆𑀢𑀸 𑀧𑀦 𑀯𑀺𑀲𑁂𑀲𑁂𑀦𑀸𑀢𑀺𑀲𑀬𑁂𑀦 𑀭𑀫𑀡𑀻𑀬𑀸 𑀫𑀦𑀼𑀜𑁆𑀜𑀸𑀢𑀺.

𑁧𑁩𑁭. ‘‘𑀅𑀮𑀗𑁆𑀓𑀸𑀭𑁂’’𑀘𑁆𑀘𑀸𑀤𑀺. 𑀏𑀤𑀺𑀲𑀻 𑀏𑀯𑀁𑀯𑀺𑀥𑀸 𑀲𑀼𑀔𑀼𑀫𑀸𑀮𑀢𑀸 𑀅𑀮𑀗𑁆𑀓𑀸𑀭𑀯𑀺𑀳𑀻𑀦𑀸𑀧𑀺 𑀅𑀢𑁆𑀣𑀸𑀮𑀗𑁆𑀓𑀸𑀭𑀯𑀺𑀭𑀳𑀺𑀢𑀸𑀧𑀺 𑀲𑀢𑀁 𑀧𑀜𑁆𑀜𑀯𑀦𑁆𑀢𑀸𑀦𑀁 𑀲𑀫𑁆𑀫𑀼𑀔𑀢𑀁 𑀅𑀪𑀺𑀫𑀼𑀔𑀪𑀸𑀯𑀁 𑀢𑁂𑀲𑀁 𑀯𑀘𑀦𑀯𑀺𑀲𑀬𑀪𑀸𑀯𑀦𑁆𑀢𑀺 𑀅𑀢𑁆𑀣𑁄 𑀆𑀭𑁄𑀳𑀢𑀺 𑀧𑀸𑀧𑀼𑀡𑀸𑀢𑀺. 𑀢𑀤𑀼𑀚𑁆𑀚𑀮𑀸 𑀢𑁂𑀦 𑀲𑀪𑀸𑀯𑀯𑀼𑀢𑁆𑀢𑀺𑀯𑀗𑁆𑀓𑀯𑀼𑀢𑁆𑀢𑀺𑀲𑀫𑁆𑀪𑀽𑀢𑁂𑀦 𑀅𑀢𑁆𑀣𑀸𑀮𑀗𑁆𑀓𑀸𑀭𑁂𑀦 𑀚𑁄𑀢𑀫𑀸𑀦𑀸 𑀯𑀺𑀲𑁂𑀲𑁂𑀦 𑀅𑀢𑀺𑀲𑀬𑁂𑀦 𑀭𑀫𑀡𑀻𑀬𑀸 𑀫𑀦𑀼𑀜𑁆𑀜𑀸 𑀳𑁄𑀢𑀺. 𑀅𑀮𑀗𑁆𑀓𑀸𑀭𑁂𑀳𑀺 𑀯𑀺𑀳𑀻𑀦𑀸𑀢𑀺 𑀘, 𑀢𑁂𑀦 𑀉𑀚𑁆𑀚𑀮𑀸𑀢𑀺 𑀘 𑀯𑀺𑀕𑁆𑀕𑀳𑁄.

𑁧𑁩𑁮.

𑀭𑁄𑀫𑀜𑁆𑀘𑀧𑀺𑀜𑁆𑀙𑀭𑀘𑀦𑀸, ¶ 𑀲𑀸𑀥𑀼𑀯𑀸𑀤𑀸𑀳𑀺𑀢𑀤𑁆𑀥𑀦𑀻;

𑀮𑀴𑀦𑁆𑀢𑀺’𑀫𑁂 𑀫𑀼𑀦𑀻𑀫𑁂𑀖𑀼-𑀫𑁆𑀫𑀤𑀸 𑀲𑀸𑀥𑀼 𑀲𑀺𑀔𑀸𑀯𑀮𑀸.

𑁧𑁩𑁮. 𑀢𑀫𑀼𑀤𑀸𑀳𑀭𑀢𑀺 ‘‘𑀭𑁄𑀫𑀜𑁆𑀘𑁂’’𑀘𑁆𑀘𑀸𑀤𑀺𑀦𑀸. 𑀭𑁄𑀫𑀜𑁆𑀘𑀸 𑀮𑁄𑀫𑀳𑀁𑀲𑀸 𑀇𑀯 𑀭𑁄𑀫𑀜𑁆𑀘𑀸 𑀏𑀯 𑀯𑀸, 𑀧𑀺𑀜𑁆𑀙𑀸𑀦𑀺 𑀩𑀭𑀺𑀳𑀸𑀦𑀺 [𑀧𑀭𑀺𑀳𑀸𑀭𑀸𑀦𑀺 (𑀓.)] 𑀢𑁂𑀲𑀁 𑀭𑀘𑀦𑀸 𑀙𑀢𑁆𑀢𑀸𑀓𑀸𑀭𑁂𑀦 𑀯𑀺𑀥𑀸𑀦𑀁 𑀬𑁂𑀲𑀁 𑀢𑁂 𑀢𑀣𑀸, ‘‘𑀲𑀸𑀥𑀽’’𑀢𑀺 𑀯𑀸𑀤𑁄 𑀯𑀘𑀦𑀁 𑀢𑀁𑀲𑀤𑀺𑀲𑁄𑀬𑁂𑀯 𑀯𑀸, 𑀆𑀳𑀺𑀢𑁄 𑀥𑀦𑀺 𑀓𑁂𑀓𑀸𑀲𑀗𑁆𑀔𑀸𑀢𑁄 𑀬𑁂𑀲𑀁 𑀢𑁂 𑀢𑀣𑀸, 𑀫𑀼𑀦𑀺𑀫𑁂𑀖𑁂𑀦 𑀫𑀼𑀦𑀺𑀲𑀤𑀺𑀲𑁂𑀦 𑀫𑀼𑀦𑀺𑀲𑀗𑁆𑀔𑀸𑀢𑁂𑀦 𑀯𑀸 𑀯𑀸𑀭𑀺𑀤𑁂𑀦 𑀉𑀫𑁆𑀫𑀤𑀸 𑀫𑀢𑁆𑀢𑀸 𑀲𑀸𑀥𑀼𑀲𑀤𑀺𑀲𑀸 𑀲𑀸𑀥𑀼 𑀏𑀯 𑀯𑀸 𑀲𑀺𑀔𑀸𑀯𑀮𑀸 𑀫𑀬𑀽𑀭𑀸 𑀮𑀴𑀦𑁆𑀢𑀺 𑀮𑀻𑀮𑁄𑀧𑁂𑀢𑀸 𑀯𑀺𑀘𑀭𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀭𑀫𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁩𑁮. 𑀅𑀢𑁆𑀣𑀸𑀮𑀗𑁆𑀓𑀸𑀭𑀬𑀼𑀢𑁆𑀢𑀲𑀼𑀔𑀼𑀫𑀸𑀮𑀢𑀫𑀼𑀤𑀸𑀳𑀭𑀢𑀺 ‘‘𑀭𑁄𑀫𑁂’’𑀘𑁆𑀘𑀸𑀤𑀺𑀦𑀸. 𑀭𑁄𑀫𑀜𑁆𑀘𑀧𑀺𑀜𑁆𑀙𑀭𑀘𑀦𑀸 𑀮𑁄𑀫𑀳𑀁𑀲𑀲𑀤𑀺𑀲𑀸 𑀭𑁄𑀫𑀸 𑀏𑀯 𑀯𑀸 𑀧𑀺𑀜𑁆𑀙𑀸𑀦𑀁 𑀩𑀭𑀺𑀳𑀸𑀦𑀁 𑀭𑀘𑀦𑀸 𑀙𑀢𑁆𑀢𑀸𑀓𑀸𑀭𑁂𑀦 𑀯𑀺𑀢𑁆𑀣𑀸𑀭𑀯𑀦𑁆𑀢𑀸 𑀲𑀸𑀥𑀼𑀯𑀸𑀤𑀸𑀳𑀺𑀢𑀤𑁆𑀥𑀦𑀻 ‘‘𑀲𑀸𑀥𑀽’’𑀢𑀺 𑀯𑀘𑀦𑀲𑀤𑀺𑀲𑁂𑀳𑀺 𑀲𑀸𑀥𑀼𑀯𑀸𑀤𑁂𑀳𑀺 𑀯𑀸 𑀧𑀯𑀢𑁆𑀢𑀓𑁂𑀓𑀸𑀦𑀺𑀦𑁆𑀦𑀸𑀤𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀫𑀼𑀦𑀺𑀫𑁂𑀖𑀼𑀫𑁆𑀫𑀤𑀸 𑀫𑀼𑀦𑀺𑀲𑀤𑀺𑀲𑁂𑀦 𑀫𑀼𑀦𑀺𑀲𑀗𑁆𑀔𑀸𑀢𑁂𑀦 𑀯𑀸 𑀫𑁂𑀖𑁂𑀦 𑀲𑀜𑁆𑀚𑀸𑀢𑀫𑀤𑀸 𑀇𑀫𑁂 𑀲𑀸𑀥𑀼𑀲𑀺𑀔𑀸𑀯𑀮𑀸 𑀲𑀚𑁆𑀚𑀦𑀲𑀤𑀺𑀲𑀸 𑀲𑀸𑀥𑀼𑀦𑁄 𑀏𑀯 𑀯𑀸 𑀫𑀬𑀽𑀭𑀸 𑀮𑀴𑀦𑁆𑀢𑀺 𑀮𑀻𑀮𑁄𑀧𑁂𑀢𑀸 𑀪𑀯𑀦𑁆𑀢𑀻𑀢𑀺. 𑀇𑀤𑀁 𑀅𑀲𑁂𑀲𑀯𑀢𑁆𑀣𑀼𑀯𑀺𑀲𑀬𑀁 𑀲𑀫𑀸𑀲𑀭𑀽𑀧𑀓𑀁 𑀅𑀫𑀼𑀔𑁆𑀬𑀧𑀓𑁆𑀔𑁂 ‘‘𑀭𑁄𑀫𑀜𑁆𑀘𑀸 𑀯𑀺𑀬 𑀲𑀸𑀥𑀼𑀯𑀸𑀤𑁄 𑀯𑀺𑀬 𑀫𑀼𑀦𑀺 𑀯𑀺𑀬 𑀲𑀸𑀥𑀯𑁄 𑀯𑀺𑀬𑀸’’𑀢𑀺 𑀘, 𑀫𑀼𑀔𑁆𑀬𑀧𑀓𑁆𑀔𑁂 ‘‘𑀧𑀺𑀜𑁆𑀙𑀭𑀘𑀦𑀸 𑀯𑀺𑀬 𑀆𑀳𑀺𑀢𑀤𑁆𑀥𑀦𑀻 𑀯𑀺𑀬 𑀫𑁂𑀖𑁄 𑀯𑀺𑀬 𑀲𑀺𑀔𑀸𑀯𑀮𑀸 𑀯𑀺𑀬𑀸’’𑀢𑀺 𑀉𑀧𑀘𑀭𑀺𑀢𑀩𑁆𑀩𑀁. 𑀭𑁄𑀫𑀜𑁆𑀘𑀸 𑀏𑀯 𑀧𑀺𑀜𑁆𑀙𑀸𑀦𑀻𑀢𑀺 𑀘, 𑀢𑁂𑀲𑀁 𑀭𑀘𑀦𑀸 𑀬𑁂𑀲𑀦𑁆𑀢𑀺 𑀘, ‘‘𑀲𑀸𑀥𑀼’’𑀇𑀢𑀺 𑀯𑀸𑀤𑁄𑀢𑀺 𑀘, 𑀆𑀳𑀺𑀢𑁄 𑀘 𑀲𑁄 𑀥𑀦𑀺 𑀘𑁂𑀢𑀺 𑀘, 𑀲𑀸𑀥𑀼𑀯𑀸𑀤𑁄 𑀆𑀳𑀺𑀢𑀤𑁆𑀥𑀦𑀺 𑀬𑁂𑀲𑀦𑁆𑀢𑀺 𑀘, 𑀫𑀼𑀦𑀺 𑀏𑀯 𑀫𑁂𑀖𑁄𑀢𑀺 𑀘, 𑀢𑁂𑀦 𑀉𑀫𑁆𑀫𑀤𑀸𑀢𑀺 𑀘, 𑀲𑀸𑀥𑀯𑁄 𑀏𑀯 𑀲𑀺𑀔𑀸𑀯𑀮𑀸𑀢𑀺 𑀘 𑀯𑀸𑀓𑁆𑀬𑀁. ‘‘𑀫𑀼𑀦𑀻𑀫𑁂𑀖𑁄’’𑀢𑀺 𑀏𑀢𑁆𑀣 𑀤𑀻𑀖𑀢𑁆𑀢𑀁 𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀁.

𑁧𑁩𑁯.

𑀲𑀼𑀔𑀼𑀫𑀸𑀮𑀢𑁆𑀢𑀫𑀢𑁆𑀣𑁂𑀯, 𑀧𑀤𑀢𑁆𑀣𑀯𑀺𑀲𑀬𑀫𑁆𑀧𑀺 𑀘;

𑀬𑀣𑀸 𑀫𑀢𑀸𑀤𑀺𑀲𑀤𑁆𑀤𑁂𑀲𑀼, 𑀓𑀺𑀢𑁆𑀢𑀺𑀲𑁂𑀲𑀸𑀤𑀺𑀓𑀺𑀢𑁆𑀢𑀦𑀁.

𑁧𑁩𑁯. 𑀦 ¶ 𑀓𑁂𑀯𑀮𑀁 𑀲𑀼𑀔𑀼𑀫𑀸𑀮𑀢𑀸 𑀲𑀤𑁆𑀤𑁂𑀯, 𑀅𑀢𑁆𑀣𑁂𑀧𑀻𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀼𑀔𑀼𑀫𑀸𑀮𑀢𑁆𑀢’’𑀫𑀺𑀘𑁆𑀘𑀸𑀤𑀺. 𑀅𑀢𑁆𑀣𑁂𑀯𑀸𑀢𑀺 𑀯𑀺𑀚𑁆𑀚𑀢𑁂𑀯, 𑀢𑀁 𑀢𑀼 𑀅𑀦𑁄𑀘𑀺𑀢𑁆𑀬𑀕𑀸𑀫𑁆𑀫𑀸𑀤𑀺𑀯𑀚𑁆𑀚𑀦𑀸 𑀲𑀫𑁆𑀪𑀯𑀢𑀺. ‘‘𑀬𑀣𑁂’’𑀢𑀺 𑀢𑀫𑀼𑀤𑀸𑀳𑀭𑀢𑀺. 𑀫𑀢𑀸𑀤𑀺𑀲𑀤𑁆𑀤𑁂𑀲𑀼 𑀯𑀢𑁆𑀢𑀩𑁆𑀩𑁂𑀲𑀼 𑀓𑀺𑀢𑁆𑀢𑀺𑀲𑁂𑀲𑀸𑀤𑀻𑀦𑀁 𑀲𑀤𑁆𑀤𑀸𑀦𑀁 𑀓𑀺𑀢𑁆𑀢𑀦𑀁 𑀓𑀣𑀦𑀁.

𑁧𑁩𑁯. 𑀅𑀬𑀁 𑀲𑀼𑀔𑀼𑀫𑀸𑀮𑀢𑀸 𑀦 𑀓𑁂𑀯𑀮𑀁 𑀲𑀤𑁆𑀤𑁂𑀯, 𑀅𑀢𑁆𑀣𑁂𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 𑀆𑀳 ‘‘𑀲𑀼𑀔𑀼𑀫𑀸𑀮𑀢𑁆𑀢’’𑀫𑀺𑀘𑁆𑀘𑀸𑀤𑀺. 𑀲𑀼𑀔𑀼𑀫𑀸𑀮𑀢𑁆𑀢𑀫𑀢𑁆𑀣𑁂𑀯 𑀧𑀤𑀢𑁆𑀣𑀯𑀺𑀲𑀬𑀫𑁆𑀧𑀺 𑀘 𑀧𑀤𑀸𑀪𑀺𑀥𑁂𑀬𑁆𑀬𑀕𑁄𑀘𑀭𑀫𑁆𑀧𑀺 𑀲𑀼𑀔𑀼𑀫𑀸𑀮𑀢𑁆𑀢𑀁 𑀅𑀢𑁆𑀣𑁂𑀯, 𑀢𑀜𑁆𑀘 𑀑𑀘𑀺𑀢𑁆𑀬𑀳𑀻𑀦𑀕𑀸𑀫𑁆𑀫𑀤𑁄𑀲𑀧𑀭𑀺𑀳𑀸𑀭𑁂𑀦 𑀲𑀺𑀚𑁆𑀛𑀢𑀺. ‘‘𑀬𑀣𑀸’’𑀢𑀺 𑀢𑀫𑀼𑀤𑀸𑀳𑀭𑀢𑀺. 𑀫𑀢𑀸𑀤𑀺𑀲𑀤𑁆𑀤𑁂𑀲𑀼 𑀯𑀢𑁆𑀢𑀩𑁆𑀩𑁂𑀲𑀼 𑀓𑀺𑀢𑁆𑀢𑀺𑀲𑁂𑀲𑀸𑀤𑀺𑀲𑀤𑁆𑀤𑀸𑀦𑀁 𑀓𑀺𑀢𑁆𑀢𑀦𑀁 𑀓𑀣𑀦𑀦𑁆𑀢𑀺. 𑀫𑀢𑁄 𑀇𑀢𑀺𑀆𑀤𑀺 𑀬𑁂𑀲𑀁 ‘‘𑀚𑀻𑀯𑀺𑀢𑀓𑁆𑀔𑀬𑀁 𑀧𑀢𑁆𑀢𑁄’’ 𑀇𑀘𑁆𑀘𑀸𑀤𑀻𑀦𑀫𑀺𑀢𑀺 𑀘, 𑀓𑀺𑀢𑁆𑀢𑀺𑀲𑁂𑀲𑁄 𑀇𑀢𑀺𑀆𑀤𑀺𑀬𑁂𑀲𑀁 ‘‘𑀤𑁂𑀯𑀢𑁆𑀢𑀁 𑀕𑀢𑁄, 𑀲𑀕𑁆𑀕𑀓𑀸𑀬𑀫𑀮𑀗𑁆𑀓𑀭𑀻’’𑀢𑁆𑀬𑀸𑀤𑀻𑀦𑀫𑀺𑀢𑀺 𑀘 𑀯𑀺𑀕𑁆𑀕𑀳𑁄.

𑁧𑁪𑁦.

𑀲𑀺𑀮𑀺𑀝𑁆𑀞𑀧𑀤𑀲𑀁𑀲𑀕𑁆𑀕-

𑀭𑀫𑀡𑀻𑀬𑀕𑀼𑀡𑀸𑀮𑀬𑁄;

𑀲𑀩𑀦𑁆𑀥𑀕𑀸𑀭𑀯𑁄 𑀲𑁄’𑀬𑀁,

𑀲𑀺𑀮𑁂𑀲𑁄 𑀦𑀸𑀫 𑀢𑀁 𑀬𑀣𑀸.

𑁧𑁪𑁦. 𑀲𑀺𑀮𑁂𑀲𑀁 𑀤𑀲𑁆𑀲𑁂𑀢𑀺 ‘‘𑀲𑀺𑀮𑀺𑀝𑁆𑀞𑁂’’𑀘𑁆𑀘𑀸𑀤𑀺𑀦𑀸. 𑀲𑀺𑀮𑀺𑀝𑁆𑀞𑀸𑀦𑀁 𑀩𑀦𑁆𑀥𑀮𑀸𑀖𑀯𑀸𑀪𑀸𑀯𑁂𑀦 𑀅𑀜𑁆𑀜𑀫𑀜𑁆𑀜𑀁 𑀲𑀺𑀮𑀺𑀝𑁆𑀞𑀸𑀦𑀁 𑀧𑀤𑀸𑀦𑀁 𑀲𑀁𑀲𑀕𑁆𑀕𑁂𑀦 𑀭𑀫𑀡𑀻𑀬𑁄 𑀫𑀦𑀼𑀜𑁆𑀜𑁄 𑀕𑀼𑀡𑁄 𑀢𑀲𑁆𑀲 𑀆𑀮𑀬𑁄 𑀧𑀯𑀢𑁆𑀢𑀺𑀝𑁆𑀞𑀸𑀦𑀁. 𑀩𑀦𑁆𑀥𑀲𑁆𑀲 𑀭𑀘𑀦𑀸𑀬 𑀕𑀸𑀭𑀯𑁄 𑀅𑀲𑀺𑀣𑀺𑀮𑀢𑀸, 𑀲𑀳 𑀢𑁂𑀦 𑀯𑀢𑁆𑀢𑀢𑀻𑀢𑀺 𑀲𑀩𑀦𑁆𑀥𑀕𑀸𑀭𑀯𑁄𑀢𑀺 𑀅𑀦𑀼𑀯𑀤𑀺𑀢𑁆𑀯𑀸 𑀲𑁄𑀬𑀁 𑀲𑀺𑀮𑁂𑀲𑁄 𑀦𑀸𑀫𑀸𑀢𑀺 𑀯𑀺𑀥𑀻𑀬𑀢𑁂. ‘‘𑀢𑀁 𑀬𑀣𑁂’’𑀢𑁆𑀬𑀼𑀤𑀸𑀳𑀭𑀢𑀺. 𑀬𑀣𑀸 𑀅𑀬𑀁 𑀲𑀺𑀮𑁂𑀲𑁄, 𑀢𑀣𑀸 𑀅𑀜𑁆𑀜𑁄𑀧𑀺 𑀢𑀸𑀤𑀺𑀲𑁄 𑀤𑀝𑁆𑀞𑀩𑁆𑀩𑁄, 𑀦 𑀢𑁆𑀯𑀬𑀫𑁂𑀯𑁂𑀢𑀺 ‘‘𑀢𑀁 𑀬𑀣𑀸’’ 𑀲𑀤𑁆𑀤𑀲𑁆𑀲𑀢𑁆𑀣𑁄.

𑁧𑁪𑁦. 𑀇𑀤𑀸𑀦𑀺 𑀲𑀺𑀮𑁂𑀲𑀁 𑀦𑀺𑀤𑁆𑀤𑀺𑀲𑀢𑀺 ‘‘𑀲𑀺𑀮𑀺𑀝𑁆𑀞𑁂’’𑀘𑁆𑀘𑀸𑀤𑀺𑀦𑀸. 𑀲𑀺𑀮𑀺𑀝𑁆𑀞𑀧𑀤𑀲𑀁𑀲𑀕𑁆𑀕𑀭𑀫𑀡𑀻𑀬𑀕𑀼𑀡𑀸𑀮𑀬𑁄 𑀞𑀸𑀦𑀓𑀭𑀡𑀸𑀤𑀻𑀳𑀺 𑀆𑀲𑀦𑁆𑀦𑀯𑀡𑁆𑀡𑀸𑀦𑀁 ¶ 𑀯𑀺𑀦𑁆𑀬𑀸𑀲𑀳𑁂𑀢𑀼 𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀺𑀢𑀸𑀦𑀁 𑀧𑀤𑀸𑀦𑀁 𑀲𑀫𑀯𑀸𑀬𑁂𑀦 𑀫𑀦𑀼𑀜𑁆𑀜𑀕𑀼𑀡𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑁄 𑀲𑀩𑀦𑁆𑀥𑀕𑀸𑀭𑀯𑁄 𑀩𑀦𑁆𑀥𑀕𑀸𑀭𑀯𑀲𑀗𑁆𑀔𑀸𑀢𑀭𑀘𑀦𑀸𑀬 𑀅𑀲𑀺𑀣𑀺𑀮𑀪𑀸𑀯𑁂𑀦 𑀲𑀳 𑀧𑀯𑀢𑁆𑀢𑁄 𑀲𑁄 𑀅𑀬𑀁 𑀩𑀦𑁆𑀥𑁄 𑀲𑀺𑀮𑁂𑀲𑁄 𑀦𑀸𑀫𑀸𑀢𑀺. 𑀲𑀺𑀮𑁂𑀲𑁄 𑀦𑀸𑀫 𑀩𑀦𑁆𑀥𑀕𑀸𑀭𑀯𑁄, 𑀢𑀧𑁆𑀧𑀝𑀺𑀧𑀸𑀤𑀓𑀩𑀦𑁆𑀥𑁄𑀧𑁆𑀬𑁂𑀢𑁆𑀣 𑀲𑀺𑀮𑁂𑀲𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀺𑀮𑀺𑀝𑁆𑀞𑀸 𑀘 𑀢𑁂 𑀧𑀤𑀸 𑀘𑁂𑀢𑀺 𑀘, 𑀢𑁂𑀲𑀁 𑀲𑀁𑀲𑀕𑁆𑀕𑁄𑀢𑀺 𑀘, 𑀢𑁂𑀦 𑀭𑀫𑀡𑀻𑀬𑁄𑀢𑀺 𑀘, 𑀲𑁄 𑀏𑀯 𑀕𑀼𑀡𑁄𑀢𑀺 𑀘, 𑀢𑀲𑁆𑀲 𑀆𑀮𑀬𑁄𑀢𑀺 𑀘, 𑀩𑀦𑁆𑀥𑀲𑁆𑀲 𑀕𑀼𑀭𑀼𑀦𑁄 𑀪𑀸𑀯𑁄𑀢𑀺 𑀘, 𑀢𑁂𑀦 𑀲𑀳 𑀧𑀯𑀢𑁆𑀢𑀢𑀻𑀢𑀺 𑀘 𑀯𑀸𑀓𑁆𑀬𑀁. 𑀢𑀁 𑀬𑀣𑀸 ‘‘𑀩𑀸𑀮𑀺𑀦𑁆𑀤𑀼’’𑀇𑀘𑁆𑀘𑀸𑀤𑀺.

𑁧𑁪𑁧.

𑀩𑀸𑀮𑀺𑀦𑁆𑀤𑀼𑀯𑀺𑀩𑁆𑀪𑀫𑀘𑁆𑀙𑁂𑀤𑀺-𑀦𑀔𑀭𑀸𑀯𑀮𑀺𑀓𑀦𑁆𑀢𑀺𑀪𑀺;

𑀲𑀸 𑀫𑀼𑀦𑀺𑀦𑁆𑀤𑀧𑀤𑀫𑁆𑀪𑁄𑀚-𑀓𑀦𑁆𑀢𑀺 𑀯𑁄 𑀯𑀮𑀺𑀢𑀸’𑀯𑀢𑀁.

𑁧𑁪𑁧. ‘‘𑀩𑀸𑀮𑀺𑀦𑁆𑀤𑀼’’𑀇𑀘𑁆𑀘𑀸𑀤𑀺. 𑀩𑀸𑀮𑀺𑀦𑁆𑀤𑀼𑀦𑁄 𑀧𑀜𑁆𑀘𑀫𑀻 [𑀧𑀜𑁆𑀘𑀫𑀻𑀘𑀦𑁆𑀤𑀲𑁆𑀲 (?)] 𑀧𑀜𑁆𑀘𑀤𑀲𑀓𑀮𑀲𑁆𑀲 𑀯𑀺𑀩𑁆𑀪𑀫𑁄 𑀫𑀦𑁄𑀳𑀭𑀢𑁆𑀢𑀁, 𑀢𑀁 𑀙𑀺𑀦𑁆𑀤𑀢𑀺 𑀲𑀻𑀮𑁂𑀦𑀸𑀢𑀺 𑀩𑀸𑀮𑀺𑀦𑁆𑀤𑀼𑀯𑀺𑀩𑁆𑀪𑀫𑀘𑁆𑀙𑁂𑀤𑀺𑀬𑁄 𑀧𑀜𑁆𑀘𑀫𑀻𑀘𑀦𑁆𑀤𑀲𑁆𑀲 𑀓𑀮𑀸𑀲𑀦𑁆𑀦𑀺𑀪𑀸𑀦𑀁 𑀦𑀔𑀭𑀸𑀦𑀁 𑀦𑀔𑀸𑀦𑀁 𑀆𑀯𑀮𑀺𑀬𑁄 𑀢𑀸𑀲𑀁 𑀓𑀦𑁆𑀢𑀺𑀪𑀺 𑀲𑁄𑀪𑀸𑀳𑀺 𑀲𑀳 𑀯𑀮𑀺𑀢𑀸 𑀲𑀁𑀬𑀼𑀢𑁆𑀢𑀸 𑀲𑀸, 𑀫𑀼𑀦𑀺𑀦𑁆𑀤𑀲𑁆𑀲 𑀧𑀤𑀸𑀦𑀺𑀬𑁂𑀯 𑀅𑀫𑁆𑀪𑁄𑀚𑀸𑀦𑀺 𑀧𑀤𑀼𑀫𑀸𑀦𑀺 𑀢𑁂𑀲𑀁 𑀓𑀦𑁆𑀢𑀺. 𑀯𑁄 𑀢𑀼𑀫𑁆𑀳𑁂 𑀲𑀸𑀫𑀜𑁆𑀜𑁂𑀦 𑀯𑀤𑀢𑀺. 𑀅𑀯𑀢𑀁 𑀧𑀸𑀮𑀬𑀢𑀼.

𑁧𑁪𑁧. 𑀩𑀸𑀮𑀺𑀦𑁆𑀤𑀼…𑀧𑁂… 𑀓𑀦𑁆𑀢𑀺𑀪𑀺 𑀢𑀭𑀼𑀡𑀘𑀦𑁆𑀤𑀯𑀺𑀮𑀸𑀲𑀯𑀺𑀦𑀸𑀲𑀦𑀲𑀪𑀸𑀯𑀲𑀫𑀦𑁆𑀦𑀸𑀕𑀢𑀦𑀔𑀧𑀦𑁆𑀢𑀺𑀲𑁄𑀪𑀸𑀳𑀺 𑀲𑀳 𑀯𑀮𑀺𑀢𑀸 𑀲𑀁𑀬𑀼𑀢𑁆𑀢𑀸 𑀲𑀸 𑀫𑀼𑀦𑀺𑀦𑁆𑀤𑀧𑀤𑀫𑁆𑀪𑁄𑀚𑀓𑀦𑁆𑀢𑀺 𑀲𑀸 𑀲𑀫𑁆𑀩𑀼𑀤𑁆𑀥𑀧𑀸𑀤𑀧𑀤𑀼𑀫𑀲𑁄𑀪𑀸 𑀯𑁄 𑀢𑀼𑀫𑁆𑀳𑁂 𑀅𑀯𑀢𑀁 𑀭𑀓𑁆𑀔𑀢𑀽𑀢𑀺. 𑀩𑀸𑀮𑁄 𑀘 𑀲𑁄 𑀇𑀦𑁆𑀤𑀼 𑀘𑀸𑀢𑀺 𑀘, 𑀢𑀲𑁆𑀲 𑀯𑀺𑀩𑁆𑀪𑀫𑁄𑀢𑀺 𑀘, 𑀢𑀁 𑀙𑀺𑀦𑁆𑀤𑀢𑀺 𑀲𑀻𑀮𑁂𑀦𑀸𑀢𑀺 𑀘, 𑀦𑀔𑀸𑀦𑀁 𑀆𑀯𑀮𑀺𑀬𑁄𑀢𑀺 𑀘, 𑀢𑀸𑀲𑀁 𑀓𑀦𑁆𑀢𑀻𑀢𑀺 𑀘, 𑀩𑀸𑀮𑀺𑀦𑁆𑀤𑀼𑀯𑀺𑀩𑁆𑀪𑀫𑀘𑁆𑀙𑁂𑀤𑀺𑀬𑁄 𑀘 𑀢𑀸 𑀦𑀔𑀭𑀸𑀯𑀮𑀺𑀓𑀦𑁆𑀢𑀺𑀬𑁄 𑀘𑀸𑀢𑀺 𑀘, 𑀫𑀼𑀦𑀺𑀦𑁆𑀤𑀲𑁆𑀲 𑀧𑀤𑀸𑀦𑀻𑀢𑀺 𑀘, 𑀢𑀸𑀦𑀺𑀬𑁂𑀯 𑀅𑀫𑁆𑀪𑁄𑀚𑀸𑀦𑀻𑀢𑀺 𑀘, 𑀢𑁂𑀲𑀁 𑀓𑀦𑁆𑀢𑀻𑀢𑀺 𑀘 𑀯𑀺𑀕𑁆𑀕𑀳𑁄.

𑁧𑁪𑁨.

𑀉𑀓𑁆𑀓𑀁𑀲𑀯𑀦𑁆𑀢𑁄 ¶ 𑀬𑁄 𑀓𑁄𑀘𑀺,

𑀕𑀼𑀡𑁄 𑀬𑀤𑀺 𑀧𑀢𑀻𑀬𑀢𑁂;

𑀉𑀤𑀸𑀭𑁄’𑀬𑀁 𑀪𑀯𑁂 𑀢𑁂𑀦,

𑀲𑀦𑀸𑀣𑀸 𑀩𑀦𑁆𑀥𑀧𑀤𑁆𑀥𑀢𑀺.

𑁧𑁪𑁨. 𑀉𑀤𑀸𑀭𑀢𑁆𑀢𑀫𑀯𑀥𑀸𑀭𑀬𑀫𑀸𑀳 ‘‘𑀉𑀓𑁆𑀓𑀁𑀲𑀯𑀦𑁆𑀢𑁄’’𑀇𑀘𑁆𑀘𑀸𑀤𑀺. 𑀬𑁄 𑀓𑁄𑀘𑀺 ‘‘𑀇𑀤𑀫𑁂𑀯𑁂’’𑀢𑀺 𑀦𑀺𑀬𑀫𑀸𑀪𑀸𑀯𑀸 𑀕𑀼𑀡𑁄 𑀘𑀸𑀕𑀸𑀢𑀺𑀲𑀬𑀸𑀤𑀺𑀓𑁄 𑀉𑀓𑁆𑀓𑀁𑀲𑀯𑀦𑁆𑀢𑁄 𑀅𑀥𑀺𑀫𑀢𑁆𑀢𑁄 𑀬𑀤𑀺 𑀧𑀢𑀻𑀬𑀢𑁂 𑀯𑀺𑀜𑁆𑀜𑀸𑀬𑀢𑁂 𑀩𑀦𑁆𑀥𑁂𑀢𑀺 𑀯𑀺𑀜𑁆𑀜𑀸𑀬𑀢𑀺 ‘‘𑀩𑀦𑁆𑀥𑀧𑀤𑁆𑀥𑀢𑀻’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸, 𑀅𑀬𑀁 𑀉𑀤𑀸𑀭𑁄 𑀪𑀯𑁂𑀢𑀺 𑀯𑀺𑀥𑀺. 𑀉𑀤𑀸𑀭𑁄𑀬𑀁 𑀳𑁄𑀢𑀼, 𑀓𑀺𑀁 𑀢𑀢𑁄 𑀲𑀺𑀬𑀸𑀢𑀺 𑀆𑀳 ‘‘𑀢𑁂𑀦𑀺’’𑀘𑁆𑀘𑀸𑀤𑀺. 𑀢𑁂𑀦 𑀉𑀓𑁆𑀓𑀁𑀲𑀯𑀢𑀸 𑀕𑀼𑀡𑁂𑀦 𑀩𑀦𑁆𑀥𑀧𑀤𑁆𑀥𑀢𑀺 𑀭𑀘𑀦𑀓𑁆𑀓𑀫𑁄 𑀦𑀸𑀣𑀪𑀽𑀢𑁂𑀦 𑀉𑀤𑀸𑀭𑀕𑀼𑀡𑁂𑀦 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀦𑀸𑀣𑀸, 𑀲𑀫𑁆𑀧𑀤𑀸𑀯𑀸𑀢𑀺 [𑀲𑀫𑁆𑀧𑀤𑀸𑀯𑀢𑀻𑀢𑀺 (?)] 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁪𑁨. 𑀇𑀤𑀸𑀦𑀺 𑀉𑀤𑀸𑀭𑀢𑁆𑀢𑀫𑀼𑀤𑁆𑀤𑀺𑀲𑀢𑀺 ‘‘𑀉𑀓𑁆𑀓𑀁𑀲𑁂’’𑀘𑁆𑀘𑀸𑀤𑀺𑀦𑀸. 𑀉𑀓𑁆𑀓𑀁𑀲𑀯𑀦𑁆𑀢𑁄 𑀅𑀢𑀺𑀲𑀬𑀯𑀸 𑀬𑁄𑀓𑁄𑀘𑀺 𑀕𑀼𑀡𑁄 𑀘𑀸𑀕𑀸𑀢𑀺𑀲𑀬𑀸𑀤𑀺𑀓𑁄 𑀲𑀤𑁆𑀤𑀸𑀯𑀮𑀺𑀬𑀸 𑀧𑀝𑀺𑀧𑀸𑀤𑀦𑀻𑀬𑁄 𑀆𑀦𑀼𑀪𑀸𑀯𑁄 𑀬𑀤𑀺 𑀧𑀢𑀻𑀬𑀢𑁂 𑀲𑀘𑁂 𑀓𑀢𑁆𑀣𑀘𑀺 𑀩𑀦𑁆𑀥𑁂 𑀯𑀺𑀜𑁆𑀜𑀸𑀬𑀢𑁂, 𑀅𑀬𑀁 𑀬𑀣𑀸𑀯𑀼𑀢𑁆𑀢𑀕𑀼𑀡𑁄 𑀉𑀤𑀸𑀭𑁄 𑀦𑀸𑀫 𑀪𑀯𑁂. 𑀢𑁂𑀦 𑀓𑀺𑀁 𑀧𑀬𑁄𑀚𑀦𑀦𑁆𑀢𑀺 𑀘𑁂? 𑀩𑀦𑁆𑀥𑀩𑀦𑁆𑀥𑀢𑀺 𑀧𑀤𑀸𑀯𑀮𑀺 𑀢𑁂𑀦 𑀉𑀓𑁆𑀓𑀁𑀲𑀯𑀢𑀸 𑀕𑀼𑀡𑁂𑀦 𑀲𑀦𑀸𑀣𑀸 𑀲𑀧𑁆𑀧𑀢𑀺𑀝𑁆𑀞𑀸 𑀳𑁄𑀢𑀺. 𑀉𑀓𑁆𑀓𑀁𑀲𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀘, 𑀦𑀸𑀣𑁂𑀦 𑀲𑀳 𑀯𑀢𑁆𑀢𑀢𑀻𑀢𑀺 𑀘, 𑀩𑀦𑁆𑀥𑀲𑁆𑀲 𑀧𑀤𑁆𑀥𑀢𑀻𑀢𑀺 𑀘 𑀯𑀺𑀕𑁆𑀕𑀳𑁄.

𑁧𑁪𑁩.

𑀧𑀸𑀤𑀫𑁆𑀪𑁄𑀚𑀭𑀚𑁄𑀮𑀺𑀢𑁆𑀢-𑀕𑀢𑁆𑀢𑀸 𑀬𑁂𑀢𑀯 𑀕𑁄𑀢𑀫;

𑀅𑀳𑁄 𑀢𑁂 𑀚𑀦𑁆𑀢𑀯𑁄 𑀬𑀦𑁆𑀢𑀺, 𑀲𑀩𑁆𑀩𑀣𑀸 𑀦𑀺𑀭𑀚𑀢𑁆𑀢𑀦𑀁.

𑁧𑁪𑁩. 𑀢𑀫𑀼𑀤𑀸𑀳𑀭𑀢𑀺 ‘‘𑀧𑀸𑀤𑁂’’𑀘𑁆𑀘𑀸𑀤𑀺𑀦𑀸. 𑀕𑁄𑀢𑀫𑀸𑀢𑀺 𑀪𑀕𑀯𑀦𑁆𑀢𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺. 𑀢𑀯 𑀪𑀕𑀯𑀢𑁄 𑀧𑀸𑀤𑀫𑁆𑀪𑁄𑀚𑀸𑀦𑀁 𑀭𑀚𑀸𑀦𑀺 𑀭𑁂𑀡𑀯𑁄, 𑀢𑁂𑀳𑀺 𑀮𑀺𑀢𑁆𑀢𑀸𑀦𑀺 𑀉𑀧𑀤𑁂𑀳𑀺𑀢𑀸𑀦𑀺 𑀕𑀢𑁆𑀢𑀸𑀦𑀺 𑀬𑁂𑀲𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀬𑁂 𑀚𑀦𑀸 𑀢𑁂 𑀚𑀦𑁆𑀢𑀯𑁄 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀭𑀚𑁄𑀮𑀯𑁂𑀦𑀸𑀧𑁆𑀬𑀦𑀼𑀧𑀮𑀺𑀢𑁆𑀢𑀢𑁆𑀢𑀸 𑀭𑀚𑁂𑀳𑀺 𑀓𑀺𑀮𑁂𑀲𑀲𑀗𑁆𑀔𑀸𑀢𑁂𑀳𑀺 ¶ 𑀦𑀺𑀕𑁆𑀕𑀢𑀸 𑀦𑀺𑀭𑀚𑀸, 𑀢𑁂𑀲𑀁 𑀪𑀸𑀯𑁄 𑀦𑀺𑀭𑀚𑀢𑁆𑀢𑀦𑀁 𑀦𑀺𑀓𑁆𑀓𑀺𑀮𑁂𑀲𑀪𑀸𑀯𑀁 𑀬𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀺. 𑀅𑀳𑁄 𑀅𑀘𑁆𑀙𑀭𑀺𑀬𑀁 𑀬𑀢𑁄 𑀭𑀚𑀲𑀸 𑀮𑀺𑀢𑁆𑀢𑀸 𑀦𑀸𑀫 𑀲𑀁𑀓𑀺𑀮𑀺𑀝𑁆𑀞𑀸𑀬𑁂𑀯 𑀲𑀺𑀬𑀼𑀁, 𑀪𑀯𑀁 𑀧𑀦 𑀧𑀸𑀤𑀭𑀚𑀲𑀸 𑀯𑀺𑀮𑁂𑀧𑀦𑁂 𑀚𑀦𑁂 𑀦𑀺𑀭𑀚𑁂 𑀓𑀭𑁄𑀢𑀺. 𑀅𑀘𑁆𑀙𑀭𑀺𑀬𑀁 𑀪𑀯𑀢𑁄 𑀇𑀤𑀦𑁆𑀢𑀺 𑀅𑀢𑁆𑀣𑁄.

𑁧𑁪𑁩. 𑀇𑀤𑀸𑀦𑀺 𑀉𑀤𑀸𑀳𑀭𑀢𑀺 ‘‘𑀧𑀸𑀤𑀫𑁆𑀪𑁄𑀚𑁂’’𑀘𑁆𑀘𑀸𑀤𑀺𑀦𑀸. 𑀪𑁄 𑀕𑁄𑀢𑀫 𑀬𑁂 𑀲𑀢𑁆𑀢𑀸 𑀢𑀯 𑀢𑀼𑀬𑁆𑀳𑀁 𑀧𑀸𑀤𑀫𑁆𑀪𑁄𑀚𑀭𑀚𑁄𑀮𑀺𑀢𑁆𑀢𑀕𑀢𑁆𑀢𑀸 𑀧𑀸𑀤𑀧𑀤𑀼𑀫𑀭𑁂𑀡𑀼𑀮𑀺𑀢𑁆𑀢𑀫𑀢𑁆𑀣𑀓𑀦𑀮𑀸𑀝𑀸𑀤𑀺𑀲𑀭𑀻𑀭𑀸𑀯𑀬𑀯𑀬𑀼𑀢𑁆𑀢𑀸 𑀢𑁂 𑀚𑀦𑁆𑀢𑀯𑁄 𑀲𑀢𑁆𑀢𑀸 𑀲𑀩𑁆𑀩𑀣𑀸 𑀓𑀺𑀮𑁂𑀲𑀲𑀗𑁆𑀔𑀸𑀢𑀭𑀚𑁄𑀚𑀮𑁆𑀮𑁂𑀳𑀺 𑀅𑀦𑀼𑀧𑀮𑀺𑀢𑁆𑀢𑀢𑁆𑀢𑀸 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀦𑀺𑀭𑀚𑀢𑁆𑀢𑀦𑀁 𑀯𑀺𑀕𑀢𑀓𑀺𑀮𑁂𑀲𑀭𑀚𑁄𑀪𑀸𑀯𑀁 𑀬𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀺, 𑀅𑀳𑁄 𑀅𑀘𑁆𑀙𑀭𑀺𑀬𑀁. 𑀭𑀚𑁄𑀮𑀺𑀢𑁆𑀢𑀸 𑀦𑀸𑀫 𑀲𑀁𑀓𑀺𑀮𑀺𑀝𑁆𑀞𑀸 𑀲𑀺𑀬𑀼𑀁, 𑀢𑁆𑀯𑀁 𑀧𑀦 𑀧𑀸𑀤𑀭𑀚𑀲𑀸 𑀉𑀧𑀮𑀺𑀢𑁆𑀢𑁂𑀧𑀺 𑀲𑀢𑁆𑀢𑁂 𑀦𑀺𑀭𑀚𑁂 𑀓𑀭𑁄𑀲𑀻𑀢𑀺 𑀪𑀸𑀯𑁄. 𑀇𑀳 𑀪𑀕𑀯𑀢𑁄 𑀉𑀓𑁆𑀓𑀁𑀲𑀕𑀼𑀡𑁄 𑀤𑀻𑀧𑀺𑀢𑁄 𑀳𑁄𑀢𑀺. 𑀧𑀸𑀤𑀸𑀦𑀺𑀬𑁂𑀯 𑀅𑀫𑁆𑀪𑁄𑀚𑀸𑀦𑀻𑀢𑀺 𑀘, 𑀢𑁂𑀲𑀁 𑀭𑀚𑀸𑀦𑀻𑀢𑀺 𑀘, 𑀢𑁂𑀳𑀺 𑀮𑀺𑀢𑁆𑀢𑀸𑀦𑀺 𑀕𑀢𑁆𑀢𑀸𑀦𑀺 𑀬𑁂𑀲𑀦𑁆𑀢𑀺 𑀘, 𑀭𑀚𑁂𑀳𑀺 𑀓𑀺𑀮𑁂𑀲𑁂𑀳𑀺 𑀦𑀺𑀕𑁆𑀕𑀢𑀸𑀢𑀺 𑀘, 𑀢𑁂𑀲𑀁 𑀪𑀸𑀯𑁄𑀢𑀺 𑀘 𑀯𑀸𑀓𑁆𑀬𑀁.

𑁧𑁪𑁪.

𑀏𑀯𑀁 𑀚𑀺𑀦𑀸𑀦𑀼𑀪𑀸𑀯𑀲𑁆𑀲, 𑀲𑀫𑀼𑀓𑁆𑀓𑀁𑀲𑁄’𑀢𑁆𑀭𑀤𑀺𑀲𑁆𑀲𑀢𑀺;

𑀧𑀜𑁆𑀜𑀯𑀸 𑀯𑀺𑀥𑀺𑀦𑀸’𑀦𑁂𑀦, 𑀘𑀺𑀦𑁆𑀢𑀬𑁂 𑀧𑀭𑀫𑀻𑀤𑀺𑀲𑀁.

𑁧𑁪𑁪. 𑀓𑁄 𑀧𑀦𑁂𑀢𑁆𑀣 𑀉𑀓𑁆𑀓𑀁𑀲𑀯𑀦𑁆𑀢𑁄 𑀕𑀼𑀡𑁄 𑀬𑁂𑀦 𑀩𑀦𑁆𑀥𑁄 𑀲𑀦𑀸𑀣𑁄 𑀲𑀺𑀬𑀸𑀢𑀺 𑀘𑁂? 𑀆𑀳 ‘‘𑀏𑀯’’𑀫𑀺𑀘𑁆𑀘𑀸𑀤𑀺. 𑀏𑀯𑀫𑀺𑀢𑀺 𑀚𑀺𑀦𑀸𑀦𑀼𑀪𑀸𑀯𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀪𑀸𑀯𑀲𑁆𑀲 𑀲𑀫𑀼𑀓𑁆𑀓𑀁𑀲𑁄 𑀅𑀢𑀺𑀲𑀬𑁄 𑀤𑀺𑀲𑁆𑀲𑀢𑀺 𑀧𑀤𑀺𑀲𑁆𑀲𑀢𑁂 𑀅𑀢𑁆𑀭 𑀩𑀦𑁆𑀥𑁂, 𑀢𑀲𑁆𑀫𑀸 𑀚𑀺𑀦𑀸𑀦𑀼𑀪𑀸𑀯𑁂𑀦 𑀉𑀓𑁆𑀓𑀁𑀲𑀯𑀢𑀸 𑀕𑀼𑀡𑁂𑀦 𑀩𑀦𑁆𑀥𑁄 𑀲𑀦𑀸𑀣𑁄 𑀲𑀺𑀬𑀸𑀢𑀺. 𑀧𑀓𑀸𑀭𑀫𑀺𑀫𑀫𑀜𑁆𑀜𑀢𑁆𑀭𑀧𑀺𑀅𑀢𑀺𑀤𑀺𑀲𑀦𑁆𑀢𑁄 𑀆𑀳 ‘‘𑀧𑀜𑁆𑀜𑀯𑀸’’𑀢𑀺𑀆𑀤𑀺. 𑀧𑀜𑁆𑀜𑀯𑀸 𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄 𑀅𑀦𑁂𑀦 𑀯𑀺𑀥𑀺𑀦𑀸 𑀇𑀫𑀺𑀦𑀸 𑀧𑀓𑀸𑀭𑁂𑀦 𑀏𑀤𑀺𑀲𑀁 𑀏𑀯𑀭𑀽𑀧𑀁 𑀧𑀭𑀁 𑀅𑀜𑁆𑀜𑀁 𑀘𑀺𑀦𑁆𑀢𑀬𑁂 𑀯𑀺𑀢𑀓𑁆𑀓𑁂𑀬𑁆𑀬.

𑁧𑁪𑁪. 𑀇𑀤𑀸𑀦𑀺 ¶ 𑀬𑀣𑀸𑀯𑀼𑀢𑁆𑀢𑀕𑀼𑀡𑀦𑀺𑀤𑀲𑁆𑀲𑀦𑀜𑁆𑀘 𑀲𑀺𑀲𑁆𑀲𑀸𑀦𑀼𑀲𑀸𑀲𑀦𑀜𑁆𑀘 𑀤𑀲𑁆𑀲𑁂𑀢𑀺 ‘‘𑀏𑀯’’𑀫𑀺𑀘𑁆𑀘𑀸𑀤𑀺𑀦𑀸. 𑀅𑀢𑁆𑀭 𑀇𑀫𑀺𑀲𑁆𑀲𑀁 𑀅𑀦𑀦𑁆𑀢𑀭𑀕𑀸𑀣𑀸𑀬𑀁 𑀏𑀯𑀁 𑀬𑀣𑀸𑀯𑀼𑀢𑁆𑀢𑀓𑁆𑀓𑀫𑁂𑀦 𑀚𑀺𑀦𑀸𑀦𑀼𑀪𑀸𑀯𑀲𑁆𑀲 𑀢𑀣𑀸𑀕𑀢𑀧𑁆𑀧𑀪𑀸𑀯𑀲𑁆𑀲 𑀲𑀫𑀼𑀓𑁆𑀓𑀁𑀲𑁄 𑀆𑀥𑀺𑀓𑁆𑀓𑀁 𑀤𑀺𑀲𑁆𑀲𑀢𑀺 𑀧𑀤𑀺𑀲𑁆𑀲𑀢𑁂, 𑀢𑀲𑁆𑀫𑀸 𑀚𑀺𑀦𑀸𑀦𑀼𑀪𑀸𑀯𑀲𑀗𑁆𑀔𑀸𑀢𑁂𑀦 𑀉𑀓𑁆𑀓𑀁𑀲𑀯𑀢𑀸 𑀕𑀼𑀡𑁂𑀦 𑀩𑀦𑁆𑀥𑁄 𑀲𑀦𑀸𑀣𑁄 𑀪𑀯𑁂𑀬𑁆𑀬. 𑀧𑀜𑁆𑀜𑀯𑀸 𑀧𑀲𑀢𑁆𑀣𑀜𑀸𑀡𑀯𑀦𑁆𑀢𑁄 𑀅𑀦𑁂𑀦 𑀯𑀺𑀥𑀺𑀦𑀸 𑀇𑀫𑀺𑀦𑀸 𑀓𑀫𑁂𑀦 𑀈𑀤𑀺𑀲𑀁 𑀧𑀭𑀁 𑀅𑀜𑁆𑀜𑀁 𑀘𑀺𑀦𑁆𑀢𑀬𑁂 𑀓𑀧𑁆𑀧𑁂𑀬𑁆𑀬.

𑁧𑁪𑁫.

𑀉𑀤𑀸𑀭𑁄 𑀲𑁄𑀧𑀺 𑀯𑀺𑀜𑁆𑀜𑁂𑀬𑁆𑀬𑁄,

𑀬𑀁 𑀧𑀲𑀢𑁆𑀣𑀯𑀺𑀲𑁂𑀲𑀦𑀁;

𑀬𑀣𑀸 𑀓𑀻𑀴𑀸𑀲𑀭𑁄 𑀮𑀻𑀮𑀸-

𑀳𑀸𑀲 [𑀳𑀸𑀲𑁄 (𑀓.)] 𑀳𑁂𑀫𑀗𑁆𑀕𑀤𑀸𑀤𑀬𑁄.

𑁧𑁪𑁫. 𑀅𑀧𑀭𑀫𑀼𑀤𑀸𑀭𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀉𑀤𑀸𑀭𑁄’’𑀇𑀘𑁆𑀘𑀸𑀤𑀺. 𑀬𑀁 𑀧𑀲𑀢𑁆𑀣𑀁 𑀲𑀺𑀮𑀸𑀖𑀦𑀻𑀬𑀁 𑀯𑀺𑀲𑁂𑀲𑀦𑀁 𑀉𑀧𑀸𑀤𑀺𑀬𑀢𑀺, 𑀲𑁄𑀧𑀺 𑀦 𑀧𑀦 𑀬𑀣𑀸𑀯𑀼𑀢𑁆𑀢𑁄𑀯 𑀉𑀤𑀸𑀭𑁄 𑀯𑀺𑀜𑁆𑀜𑁂𑀬𑁆𑀬𑁄. ‘‘𑀬𑀣𑁂’’𑀢𑁆𑀬𑀼𑀤𑀸𑀳𑀭𑀢𑀺. 𑀓𑀻𑀴𑀸𑀬 𑀓𑀻𑀴𑀢𑁆𑀣𑀁 𑀲𑀭𑁄, 𑀮𑀻𑀮𑀸𑀬 𑀬𑀼𑀢𑁆𑀢𑁄 𑀳𑀸𑀲𑁄, 𑀳𑁂𑀫𑀁 𑀳𑁂𑀫𑀫𑀬𑀫𑀗𑁆𑀕𑀤𑀦𑁆𑀢𑀺 𑀲𑀫𑀸𑀲𑁄, 𑀢𑀁 𑀆𑀤𑀺 𑀬𑁂𑀲𑀦𑁆𑀢𑀺 𑀩𑀸𑀳𑀺𑀭𑀢𑁆𑀣𑁄. 𑀆𑀤𑀺𑀲𑀤𑁆𑀤𑁂𑀦 𑀓𑀼𑀲𑀼𑀫𑀤𑀸𑀫𑀫𑀡𑀺𑀫𑁂𑀔𑀮𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀅𑀬𑀁 𑀢𑀼 𑀩𑀦𑁆𑀥𑀨𑀭𑀼𑀲𑀕𑀸𑀫𑁆𑀫𑀧𑀭𑀺𑀘𑁆𑀘𑀸𑀕𑀸 𑀲𑀫𑁆𑀪𑀯𑀢𑀺.

𑁧𑁪𑁫. 𑀅𑀜𑁆𑀜𑀫𑀧𑀺 𑀉𑀤𑀸𑀭𑀁 𑀤𑀲𑁆𑀲𑁂𑀢𑀺 ‘‘𑀉𑀤𑀸𑀭𑁄’’𑀘𑁆𑀘𑀸𑀤𑀺𑀦𑀸. 𑀬𑀁 𑀧𑀲𑀢𑁆𑀣𑀯𑀺𑀲𑁂𑀲𑀦𑀁 𑀧𑀲𑀁𑀲𑀦𑀻𑀬𑀯𑀺𑀲𑁂𑀲𑀦𑀁 𑀳𑁄𑀢𑀺, 𑀲𑁄𑀧𑀺 𑀉𑀤𑀸𑀭𑁄𑀢𑀺 𑀯𑀺𑀜𑁆𑀜𑁂𑀬𑁆𑀬𑁄. ‘‘𑀬𑀣𑀸’’𑀢𑀺 𑀢𑀫𑀼𑀤𑀸𑀳𑀭𑀢𑀺. 𑀓𑀻𑀴𑀸𑀲𑀭𑁄 𑀓𑀻𑀴𑀸𑀬 𑀓𑀢𑁄 𑀲𑀭𑁄. 𑀮𑀻𑀮𑀸𑀳𑀸𑀲𑁄 𑀮𑀻𑀮𑀸𑀬 𑀬𑀼𑀢𑁆𑀢𑁄 𑀳𑀸𑀲𑁄. 𑀳𑁂𑀫𑀗𑁆𑀕𑀤𑀸𑀤𑀬𑁄 𑀲𑀼𑀯𑀡𑁆𑀡𑀓𑁂𑀬𑀽𑀭𑀸𑀇𑀘𑁆𑀘𑀸𑀤𑀬𑁄𑀢𑀺. 𑀓𑀻𑀴𑀢𑁆𑀣𑀸𑀬 𑀲𑀭𑁄𑀢𑀺 𑀘, 𑀮𑀻𑀮𑀸𑀬 𑀬𑀼𑀢𑁆𑀢𑁄 𑀳𑀸𑀲𑁄𑀢𑀺 𑀘, 𑀳𑁂𑀫𑀁 𑀳𑁂𑀫𑀫𑀬𑀁 𑀅𑀗𑁆𑀕𑀤𑀦𑁆𑀢𑀺 𑀘, 𑀮𑀻𑀮𑀸𑀳𑀸𑀲𑁄 𑀘 𑀳𑁂𑀫𑀗𑁆𑀕𑀤𑀜𑁆𑀘𑀸𑀢𑀺 𑀘, 𑀢𑀸𑀦𑀺 𑀆𑀤𑀻𑀦𑀺 𑀬𑁂𑀲𑀁 𑀓𑀼𑀲𑀼𑀫𑀤𑀸𑀫𑀫𑀡𑀺𑀫𑁂𑀔𑀮𑀸𑀤𑀻𑀦𑀦𑁆𑀢𑀺 𑀘 𑀯𑀺𑀕𑁆𑀕𑀳𑁄. 𑀅𑀬𑀫𑀼𑀤𑀸𑀭𑁄 𑀩𑀦𑁆𑀥𑀨𑀭𑀼𑀲𑀕𑀸𑀫𑁆𑀫𑀸𑀤𑀺𑀤𑁄𑀲𑀧𑀭𑀺𑀘𑁆𑀘𑀸𑀕𑁂𑀦 𑀲𑀺𑀚𑁆𑀛𑀢𑀺.

𑁧𑁪𑁬.

𑀮𑁄𑀓𑀺𑀬𑀢𑁆𑀣𑀸𑀦𑀢𑀺𑀓𑁆𑀓𑀦𑁆𑀢𑀸,

¶ 𑀓𑀦𑁆𑀢𑀸 𑀲𑀩𑁆𑀩𑀚𑀦𑀸𑀦𑀧𑀺;

𑀓𑀦𑁆𑀢𑀺 𑀦𑀸𑀫𑀸’𑀢𑀺𑀯𑀼𑀢𑁆𑀢𑀲𑁆𑀲,

𑀯𑀼𑀢𑁆𑀢𑀸 𑀲𑀸 𑀧𑀭𑀺𑀳𑀸𑀭𑀢𑁄.

𑀬𑀣𑀸 ‘‘𑀫𑀼𑀦𑀺𑀦𑁆𑀤’’𑀇𑀘𑁆𑀘𑀸𑀤𑀺.

𑁧𑁪𑁬. 𑀓𑀦𑁆𑀢𑀺𑀁 𑀓𑀣𑀬𑀢𑀺 ‘‘𑀮𑁄𑀓𑀺𑀬𑀺’’𑀘𑁆𑀘𑀸𑀤𑀺𑀦𑀸. 𑀮𑁄𑀓𑁂 𑀯𑀺𑀤𑀺𑀢𑁄 𑀮𑁄𑀓𑀺𑀬𑁄, 𑀢𑀁 𑀮𑁄𑀓𑀺𑀬𑀁 𑀅𑀢𑁆𑀣𑀁 𑀅𑀪𑀺𑀥𑁂𑀬𑁆𑀬𑀁 𑀅𑀦𑀢𑀺𑀓𑁆𑀓𑀦𑁆𑀢𑀸 𑀅𑀦𑀢𑀻𑀢𑀸 𑀲𑀩𑁆𑀩𑁂𑀲𑀁 𑀓𑀯𑀻𑀦𑀫𑀺𑀢𑀭𑁂𑀲𑀁 𑀯𑀸 𑀚𑀦𑀸𑀦𑀁 𑀏𑀯 𑀓𑀦𑁆𑀢𑀸 𑀫𑀦𑁄𑀳𑀭𑀸 𑀓𑀦𑁆𑀢𑀺 𑀦𑀸𑀫𑀸𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀧𑀦 𑀲𑀤𑁆𑀤𑀕𑀼𑀡𑁄 𑀅𑀢𑀺𑀯𑀼𑀢𑁆𑀢𑀲𑁆𑀲 𑀯𑀸𑀓𑁆𑀬𑀤𑁄𑀲𑀲𑁆𑀲 𑀧𑀭𑀺𑀘𑁆𑀘𑀸𑀕𑁂𑀦 𑀲𑀫𑁆𑀪𑀯𑀢𑀺. 𑀢𑁂𑀦𑀸𑀳 ‘‘𑀅𑀢𑀺𑀯𑀼𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺. 𑀉𑀤𑀸𑀳𑀭𑀡𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯.

𑁧𑁪𑁬. 𑀇𑀤𑀸𑀦𑀺 𑀓𑀦𑁆𑀢𑀺𑀁 𑀤𑀲𑁆𑀲𑁂𑀢𑀺 ‘‘𑀮𑁄𑀓𑀺𑀬𑀺’’𑀘𑁆𑀘𑀸𑀤𑀺𑀦𑀸. 𑀮𑁄𑀓𑀺𑀬𑀢𑁆𑀣𑀸𑀦𑀢𑀺𑀓𑁆𑀓𑀦𑁆𑀢𑀸 𑀮𑁄𑀓𑁂 𑀧𑀲𑀺𑀤𑁆𑀥𑀲𑀤𑁆𑀤𑀢𑁆𑀣𑀫𑀦𑀢𑀺𑀓𑁆𑀓𑀦𑁆𑀢𑀸 𑀲𑀩𑁆𑀩𑀚𑀦𑀸𑀦𑀁 𑀲𑀓𑀮𑀓𑀯𑀻𑀦𑀁 𑀓𑀦𑁆𑀢𑀸 𑀫𑀦𑀼𑀜𑁆𑀜𑀸 𑀓𑀦𑁆𑀢𑀺 𑀦𑀸𑀫 𑀯𑀼𑀘𑁆𑀘𑀢𑁂, 𑀲𑀸 𑀅𑀢𑀺𑀯𑀼𑀢𑁆𑀢𑀲𑁆𑀲 𑀅𑀢𑀺𑀯𑀼𑀢𑁆𑀢𑀤𑁄𑀲𑀲𑁆𑀲 𑀧𑀭𑀺𑀳𑀸𑀭𑀢𑁄 𑀯𑀼𑀢𑁆𑀢𑀸 𑀤𑁄𑀲𑀧𑀭𑀺𑀳𑀸𑀭𑀧𑀭𑀺𑀘𑁆𑀙𑁂𑀤𑁂 𑀓𑀣𑀺𑀢𑀸 𑀳𑁄𑀢𑀺. 𑀅𑀢𑀺𑀯𑀼𑀢𑁆𑀢𑀤𑁄𑀲𑀧𑀭𑀺𑀳𑀸𑀭𑀢𑁄 𑀏𑀯 𑀓𑀦𑁆𑀢𑀺𑀬𑀸 𑀲𑀺𑀤𑁆𑀥𑀢𑁆𑀢𑀸 𑀢𑀲𑁆𑀲 𑀮𑀓𑁆𑀔𑀺𑀬𑁄 𑀏𑀯 𑀏𑀢𑀺𑀲𑁆𑀲𑀸 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀮𑁄𑀓𑁂 𑀯𑀺𑀤𑀺𑀢𑁄𑀢𑀺 𑀘, 𑀲𑁄 𑀘 𑀲𑁄 𑀅𑀢𑁆𑀣𑁄 𑀘𑁂𑀢𑀺 𑀘 𑀯𑀺𑀕𑁆𑀕𑀳𑁄. ‘‘𑀬𑀣𑀸’’𑀢𑀺 𑀓𑀦𑁆𑀢𑀺𑀬𑀸 𑀉𑀤𑀸𑀳𑀭𑀡𑀁 𑀤𑀲𑁆𑀲𑁂𑀢𑀺 ‘‘𑀫𑀼𑀦𑀺𑀦𑁆𑀤’’𑀇𑀘𑁆𑀘𑀸𑀤𑀺. 𑀢𑀁 𑀯𑀼𑀢𑁆𑀢𑀫𑁂𑀯.

𑁧𑁪𑁭.

𑀅𑀢𑁆𑀣𑀩𑁆𑀬𑀢𑁆𑀢𑀸’𑀪𑀺𑀥𑁂𑀬𑁆𑀬𑀲𑁆𑀲𑀸-

𑀦𑁂𑀬𑁆𑀬𑀢𑀸 𑀲𑀤𑁆𑀤𑀢𑁄’𑀢𑁆𑀣𑀢𑁄;

𑀲𑀸’𑀬𑀁 𑀢𑀤𑀼𑀪𑀬𑀸 𑀦𑁂𑀬𑁆𑀬-

𑀧𑀭𑀺𑀳𑀸𑀭𑁂 𑀧𑀤𑀲𑁆𑀲𑀺𑀢𑀸.

𑀬𑀣𑀸 ‘‘𑀫𑀭𑀻𑀘𑀺’’𑀘𑁆𑀘𑀸𑀤𑀺 𑀘, ‘‘𑀫𑀦𑁄𑀦𑀼𑀭𑀜𑁆𑀚𑀦𑁄’’𑀘𑁆𑀘𑀸𑀤𑀺 𑀘.

𑁧𑁪𑁭. 𑀅𑀢𑁆𑀣𑀩𑁆𑀬𑀢𑁆𑀢𑀺𑀁 ¶ 𑀩𑁆𑀬𑀜𑁆𑀚𑀬𑀢𑀺 ‘‘𑀅𑀢𑁆𑀣𑀩𑁆𑀬𑀢𑁆𑀢𑀸𑀪𑀺𑀥𑁂𑀬𑁆𑀬𑀺’’𑀘𑁆𑀘𑀸𑀤𑀺𑀦𑀸. 𑀅𑀪𑀺𑀥𑁂𑀬𑁆𑀬𑀲𑁆𑀲 𑀲𑀫𑁆𑀩𑀦𑁆𑀥𑀅𑀢𑁆𑀣𑀲𑁆𑀲 𑀲𑀤𑁆𑀤𑀢𑁄 𑀅𑀢𑁆𑀣𑀢𑁄 𑀯𑀸 𑀲𑀸𑀫𑀢𑁆𑀣𑀺𑀬𑀢𑁄 𑀯𑀸 𑀅𑀦𑁂𑀬𑁆𑀬𑀢𑀸 𑀧𑀢𑀻𑀢𑀺 𑀅𑀜𑁆𑀜𑀣𑀸 𑀯𑀕𑀫𑁄 𑀕𑀢𑁆𑀬𑀦𑁆𑀢𑀭𑀸𑀪𑀸𑀯𑀸, 𑀬𑀢𑁄 𑀯𑀼𑀢𑁆𑀢𑀁 ‘‘𑀤𑀼𑀮𑁆𑀮𑀪𑀸𑀯𑀕𑀢𑀻 𑀲𑀤𑁆𑀤-𑀲𑀸𑀫𑀢𑁆𑀣𑀺𑀬𑀯𑀺𑀮𑀗𑁆𑀖𑀺𑀦𑀻’’𑀢𑀺. 𑀢𑀫𑀦𑀼𑀯𑀤𑀺𑀢𑁆𑀯𑀸 𑀅𑀢𑁆𑀣𑀩𑁆𑀬𑀢𑁆𑀢𑀺 𑀯𑀺𑀥𑀻𑀬𑀢𑁂. 𑀲𑀸 𑀧𑀦 𑀩𑁆𑀬𑀸𑀓𑀺𑀡𑁆𑀡𑀦𑁂𑀬𑁆𑀬𑀸𑀤𑀺𑀤𑁄𑀲𑀯𑀚𑁆𑀚𑀦𑀸𑀬 𑀚𑀸𑀬𑀢𑁂. 𑀢𑀤𑀼𑀪𑀬𑀸 𑀚𑀸𑀢𑀸 𑀲𑀸𑀬𑀁 𑀅𑀦𑁂𑀬𑁆𑀬𑀢𑀸 𑀦𑁂𑀬𑁆𑀬𑀧𑀭𑀺𑀳𑀸𑀭𑁂 𑀧𑀤𑀲𑁆𑀲𑀺𑀢𑀸 𑀧𑀓𑀸𑀲𑀺𑀢𑀸. 𑀧𑀞𑀫𑀤𑀼𑀢𑀺𑀬𑁄𑀤𑀸𑀳𑀭𑀡𑀲𑁆𑀲𑀢𑁆𑀣𑁄 𑀯𑀼𑀢𑁆𑀢𑁄.

𑁧𑁪𑁭. 𑀇𑀤𑀸𑀦𑀺 𑀅𑀢𑁆𑀣𑀩𑁆𑀬𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 ‘‘𑀅𑀢𑁆𑀣𑀩𑁆𑀬𑀢𑁆𑀢𑀺’’𑀘𑁆𑀘𑀸𑀤𑀺𑀦𑀸. 𑀅𑀪𑀺𑀥𑁂𑀬𑁆𑀬𑀲𑁆𑀲 𑀅𑀢𑁆𑀣𑀲𑁆𑀲 𑀲𑀤𑁆𑀤𑀢𑁄 𑀅𑀢𑁆𑀣𑀢𑁄 𑀅𑀢𑁆𑀣𑀲𑀸𑀫𑀢𑁆𑀣𑀺𑀬𑀢𑁄 𑀘 𑀅𑀦𑁂𑀬𑁆𑀬𑀢𑀸 𑀢𑀢𑁆𑀣𑁂𑀯 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀲𑀤𑁆𑀤𑀲𑁆𑀲 𑀅𑀢𑁆𑀣𑀲𑁆𑀲 𑀯𑀸 𑀆𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀲𑁆𑀲 𑀅𑀪𑀸𑀯𑁄 𑀅𑀢𑁆𑀣𑀩𑁆𑀬𑀢𑁆𑀢𑀺 𑀦𑀸𑀫, 𑀢𑀤𑀼𑀪𑀬𑀸 𑀢𑁂𑀳𑀺 𑀤𑁆𑀯𑀻𑀳𑀺 𑀚𑀸𑀢𑀸 𑀲𑀸 𑀅𑀬𑀁 𑀅𑀦𑁂𑀬𑁆𑀬𑀢𑀸𑀲𑀗𑁆𑀔𑀢𑀸 𑀅𑀢𑁆𑀣𑀩𑁆𑀬𑀢𑁆𑀢𑀺 𑀦𑁂𑀬𑁆𑀬𑀧𑀭𑀺𑀳𑀸𑀭𑁂 𑀦𑁂𑀬𑁆𑀬𑀤𑁄𑀲𑀧𑀭𑀺𑀳𑀸𑀭𑀧𑀤𑁂𑀲𑁂 𑀧𑀤𑀲𑁆𑀲𑀺𑀢𑀸 𑀧𑀓𑀸𑀲𑀺𑀢𑀸𑀢𑀺. ‘‘𑀤𑀼𑀮𑁆𑀮𑀪𑀸𑀯𑀕𑀢𑀻 𑀲𑀤𑁆𑀤-𑀲𑀸𑀫𑀢𑁆𑀣𑀺𑀬𑀯𑀺𑀮𑀗𑁆𑀖𑀺𑀦𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀢𑁆𑀣𑀧𑀢𑀻𑀢𑀺 𑀧𑀦 𑀯𑀺𑀦𑀸 𑀲𑀤𑁆𑀤𑀜𑁆𑀘 𑀲𑀸𑀫𑀢𑁆𑀣𑀺𑀬𑀜𑁆𑀘 𑀅𑀜𑁆𑀜𑀣𑀸𑀦𑀼𑀧𑀮𑀩𑁆𑀪𑀢𑀻𑀢𑀺 𑀇𑀳 ‘‘𑀲𑀤𑁆𑀤𑀢𑁄 𑀅𑀢𑁆𑀣𑀢𑁄’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀲𑁆𑀲 𑀩𑁆𑀬𑀢𑁆𑀢𑀺 𑀧𑀢𑀻𑀢𑀻𑀢𑀺 𑀘, 𑀦𑀢𑁆𑀣𑀺 𑀦𑁂𑀬𑁆𑀬𑀁 𑀆𑀳𑀭𑀺𑀢𑀩𑁆𑀩𑀁 𑀅𑀲𑁆𑀲 𑀅𑀪𑀺𑀥𑁂𑀬𑁆𑀬𑀲𑁆𑀲𑀸𑀢𑀺 𑀘, 𑀢𑀲𑁆𑀲 𑀪𑀸𑀯𑁄𑀢𑀺 𑀘, 𑀢𑁂 𑀘 𑀢𑁂 𑀉𑀪𑁄 𑀲𑀤𑁆𑀤𑀢𑁆𑀣𑀸 𑀘𑀸𑀢𑀺 𑀘, 𑀢𑁂 𑀅𑀯𑀬𑀯𑀸 𑀏𑀢𑀺𑀲𑁆𑀲𑀸𑀢𑀺 𑀘, 𑀦𑁂𑀬𑁆𑀬𑀲𑁆𑀲 𑀧𑀭𑀺𑀳𑀸𑀭𑁄𑀢𑀺 𑀘 𑀯𑀸𑀓𑁆𑀬𑀁. 𑀇𑀤𑀸𑀦𑀺 ‘‘𑀬𑀣𑁂’’𑀘𑁆𑀘𑀸𑀤𑀺𑀦𑀸 𑀤𑁆𑀯𑀺𑀧𑁆𑀧𑀓𑀸𑀭𑀸𑀬 𑀅𑀢𑁆𑀣𑀩𑁆𑀬𑀢𑁆𑀢𑀺𑀬𑀸 𑀬𑀣𑀸𑀓𑁆𑀓𑀫𑀁 𑀉𑀤𑀸𑀳𑀭𑀡𑀫𑀦𑀼𑀲𑁆𑀲𑀸𑀭𑁂𑀢𑀺 ‘‘𑀫𑀭𑀺’’𑀘𑁆𑀘𑀸𑀤𑀺𑀕𑀸𑀣𑀸𑀤𑁆𑀯𑀬𑁂𑀦, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀧𑀼𑀦 𑀅𑀢𑁆𑀣𑁂𑀦 𑀬𑀣𑀸 𑁋

𑁧𑁪𑁮.

𑀲𑀪𑀸𑀯𑀸𑀫𑀮𑀢𑀸 𑀥𑀻𑀭,

𑀫𑀼𑀥𑀸 𑀧𑀸𑀤𑀦𑀔𑁂𑀲𑀼 𑀢𑁂;

𑀬𑀢𑁄 𑀢𑁂’𑀯𑀦𑀢𑀸𑀦𑀦𑁆𑀢-

𑀫𑁄𑀴𑀺𑀘𑁆𑀙𑀸𑀬𑀸 𑀚𑀳𑀦𑁆𑀢𑀺 𑀦𑁄.

𑁧𑁪𑁮. 𑀧𑀼𑀦 ¶ 𑀤𑀼𑀢𑀺𑀬𑁂 𑀢𑀼 𑀥𑀻𑀭𑀸𑀢𑀺 𑀆𑀫𑀦𑁆𑀢𑀦𑀁. 𑀢𑁂 𑀢𑀯 𑀧𑀸𑀤𑀦𑀔𑁂𑀲𑀼 𑀲𑀪𑀸𑀯𑀸𑀫𑀮𑀢𑀸 𑀧𑀓𑀢𑀺𑀧𑀭𑀺𑀲𑀼𑀤𑁆𑀥𑀢𑀸 𑀫𑀼𑀥𑀸 𑀢𑀼𑀘𑁆𑀙𑀸. 𑀓𑀲𑁆𑀫𑀸𑀢𑀺 𑀘𑁂? 𑀬𑀢𑁄 𑀬𑀲𑁆𑀫𑀸 𑀓𑀸𑀭𑀡𑀸 𑀢𑁂 𑀧𑀸𑀤𑀦𑀔𑀸 𑀅𑀯𑀦𑀢𑀲𑁆𑀲 𑀲𑀦𑁆𑀦𑀢𑀲𑁆𑀲 𑀅𑀦𑀦𑁆𑀢𑀲𑁆𑀲 𑀦𑀸𑀕𑀭𑀸𑀚𑀲𑁆𑀲 𑀫𑁄𑀴𑀺𑀦𑁄 𑀓𑀺𑀭𑀻𑀝𑀲𑁆𑀲 𑀅𑀯𑀦𑀢𑀸𑀦𑀁 𑀯𑀸 𑀦𑀭𑀫𑀭𑀸𑀦𑀁 𑀅𑀦𑀦𑁆𑀢𑀸𑀦𑀁 𑀫𑁄𑀴𑀻𑀦𑀁 𑀙𑀸𑀬𑀸 𑀙𑀯𑀺𑀬𑁄 𑀦𑁄 𑀚𑀳𑀦𑁆𑀢𑀺 𑀦 𑀧𑀭𑀺𑀘𑁆𑀘𑀚𑀦𑁆𑀢𑀺, 𑀲𑀜𑁆𑀙𑀯𑀺𑀬𑁄 𑀧𑀦 𑀚𑀳𑀦𑁆𑀢𑀻𑀢𑀺. 𑀏𑀢𑁆𑀣 𑀦𑀔𑁂𑀲𑀼 𑀲𑀜𑁆𑀙𑀯𑀺𑀢𑁆𑀢𑀸 𑀧𑀸𑀤𑀦𑀔𑀲𑁆𑀲 𑀫𑁄𑀴𑀻𑀦𑀁 𑀦𑀺𑀭𑀦𑁆𑀢𑀭𑀧𑁆𑀧𑀡𑀸𑀫𑀸𑀩𑁆𑀬𑀪𑀺𑀘𑀸𑀭𑀸𑀦𑀭𑀫𑀭𑀸𑀤𑀻𑀦𑀁 𑀪𑀕𑀯𑀢𑁄 𑀧𑀸𑀤𑀸𑀭𑀯𑀺𑀦𑁆𑀤𑀯𑀦𑁆𑀤𑀦𑀁 𑀲𑀸𑀫𑀢𑁆𑀣𑀺𑀬𑀸 𑀨𑀼𑀝𑀁 𑀕𑀫𑁆𑀬𑀢𑁂.

𑁧𑁪𑁮. ‘‘𑀧𑀼𑀦 𑀅𑀢𑁆𑀣𑁂𑀦 𑀬𑀣𑀸 𑀲𑀪𑀸𑀯𑀺’’𑀘𑁆𑀘𑀸𑀤𑀺. 𑀥𑀻𑀭 𑀢𑁂 𑀢𑀯 𑀧𑀸𑀤𑀦𑀔𑁂𑀲𑀼 𑀲𑀪𑀸𑀯𑀸𑀫𑀮𑀢𑀸 𑀧𑀓𑀢𑀺𑀧𑀭𑀺𑀲𑀼𑀤𑁆𑀥𑀢𑀸 𑀫𑀼𑀥𑀸 𑀢𑀼𑀘𑁆𑀙𑀸. 𑀓𑀲𑁆𑀫𑀸𑀢𑀺 𑀘𑁂? 𑀬𑀢𑁄 𑀬𑀲𑁆𑀫𑀸 𑀢𑁂 𑀘𑀭𑀡𑀦𑀔𑀸 𑀅𑀯𑀦𑀢𑀸𑀦𑀦𑁆𑀢𑀫𑁄𑀴𑀺𑀘𑁆𑀙𑀸𑀬𑀸 𑀧𑀸𑀤𑀸𑀦𑀢𑀲𑁆𑀲 𑀅𑀦𑀦𑁆𑀢𑀦𑀸𑀕𑀭𑀸𑀚𑀲𑁆𑀲 𑀓𑀺𑀭𑀻𑀝𑀲𑁆𑀲 𑀲𑀫𑁆𑀩𑀦𑁆𑀥𑀺𑀦𑀻, 𑀅𑀯𑀦𑀢𑀸𑀦𑀁 𑀯𑀸 𑀅𑀦𑀦𑁆𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀫𑁄𑀴𑀻𑀦𑀁 𑀙𑀸𑀬𑀸 𑀓𑀦𑁆𑀢𑀺𑀬𑁄 𑀦𑁄 𑀚𑀳𑀦𑁆𑀢𑀺 𑀦 𑀯𑀺𑀚𑀳𑀦𑁆𑀢𑀺, 𑀧𑀓𑀢𑀺𑀯𑀡𑁆𑀡𑀁 𑀧𑀳𑀸𑀬 𑀓𑀺𑀭𑀻𑀝𑀓𑀦𑁆𑀢𑀺𑀲𑀤𑀺𑀲𑀸 𑀢𑁂 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀏𑀢𑁆𑀣 𑀘𑀦𑁆𑀤𑀓𑀺𑀭𑀡𑀲𑀦𑁆𑀦𑀺𑀪𑀸𑀦𑀁 𑀦𑀔𑀭𑀁𑀲𑀻𑀦𑀁 𑀲𑀫𑀻𑀧𑁂 𑀫𑁄𑀴𑀻𑀦𑀁 𑀦𑀔𑀭𑀁𑀲𑀻𑀳𑀺 𑀅𑀫𑀤𑁆𑀤𑀺𑀢𑀲𑀓𑀓𑀦𑁆𑀢𑀺𑀬𑀼𑀢𑁆𑀢𑀪𑀸𑀯𑀫𑀸𑀧𑀚𑁆𑀚𑀦𑀁 𑀢𑀸𑀤𑀺𑀲𑀸𑀦𑀁 𑀦𑀺𑀭𑀦𑁆𑀢𑀭𑀧𑁆𑀧𑀡𑀸𑀫𑀸𑀪𑀸𑀯𑀸𑀪𑀸𑀯𑀢𑁄 𑀔𑀢𑁆𑀢𑀺𑀬𑀸𑀤𑀻𑀦𑀁 𑀫𑀼𑀦𑀺𑀦𑁆𑀤𑀧𑀸𑀤𑀸𑀭𑀯𑀺𑀦𑁆𑀤𑀤𑁆𑀯𑀦𑁆𑀤𑁂 𑀦𑀺𑀭𑀦𑁆𑀢𑀭𑀧𑁆𑀧𑀡𑀸𑀫𑁄 𑀲𑀸𑀫𑀢𑁆𑀣𑀺𑀬𑀸 𑀯𑀺𑀪𑀽𑀢𑀁 𑀕𑀫𑁆𑀬𑀢𑁂. 𑀲𑀲𑁆𑀲 𑀪𑀸𑀯𑁄𑀢𑀺 𑀘, 𑀢𑁂𑀦 𑀅𑀫𑀮𑀸𑀢𑀺 𑀘, 𑀢𑁂𑀲𑀁 𑀪𑀸𑀯𑁄𑀢𑀺 𑀘, 𑀧𑀞𑀫𑀧𑀓𑁆𑀔𑁂 𑀅𑀯𑀦𑀢𑁄 𑀘 𑀲𑁄 𑀅𑀦𑀦𑁆𑀢𑁄 𑀘𑀸𑀢𑀺 𑀘, 𑀢𑀲𑁆𑀲 𑀫𑁄𑀴𑀻𑀢𑀺 𑀘, 𑀢𑀲𑁆𑀲 𑀙𑀸𑀬𑀸𑀬𑁄𑀢𑀺 𑀘, 𑀤𑀼𑀢𑀺𑀬𑀧𑀓𑁆𑀔𑁂 𑀅𑀦𑀦𑁆𑀢𑀸 𑀘 𑀢𑁂 𑀫𑁄𑀴𑀻 𑀘𑁂𑀢𑀺 𑀘, 𑀅𑀯𑀦𑀢𑀸𑀦𑀁 𑀅𑀦𑀦𑁆𑀢𑀫𑁄𑀴𑀻𑀢𑀺 𑀘, 𑀢𑁂𑀲𑀁 𑀙𑀸𑀬𑀸𑀬𑁄𑀢𑀺 𑀘 𑀯𑀸𑀓𑁆𑀬𑀁.

𑁧𑁪𑁯.

‘‘𑀩𑀦𑁆𑀥𑀲𑀸𑀭𑁄’’𑀢𑀺 𑀫𑀜𑁆𑀜𑀦𑁆𑀢𑀺, 𑀬𑀁 𑀲𑀫𑀕𑁆𑀕𑀸𑀧𑀺 𑀯𑀺𑀜𑁆𑀜𑀼𑀦𑁄;

𑀤𑀲𑁆𑀲𑀦𑀸𑀯𑀲𑀭𑀁 𑀧𑀢𑁆𑀢𑁄, 𑀲𑀫𑀸𑀥𑀺 𑀦𑀸𑀫’𑀬𑀁 𑀕𑀼𑀡𑁄.

𑁧𑁪𑁯. 𑀲𑀫𑀸𑀥𑀺𑀨𑀮𑀁 𑀓𑀺𑀘𑁆𑀘𑀸𑀳 ‘‘𑀩𑀦𑁆𑀥𑁂’’𑀘𑁆𑀘𑀸𑀤𑀺. 𑀬𑀦𑁆𑀢𑀺 𑀬𑀁 𑀲𑀫𑀸𑀥𑀺𑀁 𑀩𑀦𑁆𑀥𑀲𑁆𑀲 𑀕𑀚𑁆𑀚𑀧𑀚𑁆𑀚𑀫𑀺𑀲𑁆𑀲𑀪𑀸𑀯𑀲𑁆𑀲 𑀲𑀸𑀭𑁄𑀢𑀺 𑀲𑀩𑁆𑀩𑀲𑁆𑀲 𑀚𑀻𑀯𑀺𑀢𑀁 ¶ 𑀢𑀧𑁆𑀧𑀭𑀸𑀬𑀢𑁆𑀢𑀸 𑀩𑀦𑁆𑀥𑀲𑁆𑀲 𑀲𑀫𑀕𑁆𑀕𑀸𑀧𑀺 𑀯𑀺𑀜𑁆𑀜𑀼𑀦𑁄 𑀲𑀩𑁆𑀩𑁂𑀧𑀺 𑀓𑀯𑀺𑀦𑁄 𑀫𑀜𑁆𑀜𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑀺 𑀚𑀸𑀦𑀦𑁆𑀢𑀺, 𑀅𑀬𑀁 𑀲𑀫𑀸𑀥𑀺 𑀦𑀸𑀫 𑀲𑀫𑀸𑀥𑀺𑀔𑁆𑀬𑁄 𑀕𑀼𑀡𑁄 𑀤𑀲𑁆𑀲𑀦𑁂 𑀧𑀓𑀸𑀲𑀦𑁂 𑀅𑀯𑀲𑀭𑀁 𑀑𑀓𑀸𑀲𑀁 𑀅𑀦𑁄𑀢𑁆𑀢𑀭𑀢𑁆𑀢𑀸 𑀧𑀭𑀲𑁆𑀲 𑀲𑀫𑁆𑀧𑀢𑁆𑀢𑁄 𑀉𑀤𑁆𑀤𑀺𑀝𑁆𑀞𑀸𑀦𑀼𑀓𑁆𑀓𑀫𑁂𑀦𑀸𑀢𑀺.

𑁧𑁪𑁯. 𑀇𑀤𑀸𑀦𑀺 𑀲𑀫𑀸𑀥𑀬𑁄 𑀦𑀺𑀤𑁆𑀤𑀺𑀲𑀢𑀺 ‘‘𑀩𑀦𑁆𑀥𑀺’’𑀘𑁆𑀘𑀸𑀤𑀺𑀦𑀸. 𑀲𑀫𑀕𑁆𑀕𑀸 𑀅𑀧𑀺 𑀯𑀺𑀜𑁆𑀜𑀼𑀦𑁄 𑀲𑀩𑁆𑀩𑁂𑀧𑀺 𑀓𑀯𑀬𑁄 𑀬𑀁 𑀲𑀫𑀸𑀥𑀺𑀁 ‘‘𑀩𑀦𑁆𑀥𑀲𑀸𑀭𑁄’’𑀢𑀺 𑀧𑀚𑁆𑀚𑀕𑀚𑁆𑀚𑀯𑀺𑀫𑀺𑀲𑁆𑀲𑀲𑀗𑁆𑀔𑀸𑀢𑀲𑁆𑀲 𑀩𑀦𑁆𑀥𑀲𑁆𑀲 𑀚𑀻𑀯𑀺𑀢𑀫𑀺𑀢𑀺 𑀫𑀜𑁆𑀜𑀦𑁆𑀢𑀺, 𑀅𑀬𑀁 𑀲𑀫𑀸𑀥𑀺 𑀦𑀸𑀫 𑀕𑀼𑀡𑁄 𑀤𑀲𑁆𑀲𑀦𑀸𑀯𑀲𑀭𑀁 𑀧𑀢𑁆𑀢𑁄 𑀉𑀤𑁆𑀤𑀺𑀝𑁆𑀞𑀸𑀦𑀼𑀓𑁆𑀓𑀫𑁂𑀦 𑀤𑀲𑁆𑀲𑀦𑁄𑀓𑀸𑀲𑀁 𑀧𑀢𑁆𑀢𑁄 𑀳𑁄𑀢𑀺. 𑀩𑀦𑁆𑀥𑀲𑁆𑀲 𑀲𑀸𑀭𑁄𑀢𑀺 𑀘, 𑀤𑀲𑁆𑀲𑀦𑁂 𑀅𑀯𑀲𑀭𑀦𑁆𑀢𑀺 𑀘, 𑀢𑀁 𑀧𑀢𑁆𑀢𑁄𑀢𑀺 𑀘 𑀯𑀺𑀕𑁆𑀕𑀳𑁄.

𑁧𑁫𑁦.

𑀅𑀜𑁆𑀜𑀥𑀫𑁆𑀫𑁄 𑀢𑀢𑁄’𑀜𑁆𑀜𑀢𑁆𑀣,

𑀮𑁄𑀓𑀲𑀻𑀫𑀸𑀦𑀼𑀭𑁄𑀥𑀢𑁄;

𑀲𑀫𑁆𑀫𑀸 𑀆𑀥𑀻𑀬𑀢𑁂’𑀘𑁆𑀘𑁂’𑀲𑁄,

𑀲𑀫𑀸𑀥𑀻𑀢𑀺 𑀦𑀺𑀭𑀼𑀘𑁆𑀘𑀢𑀺.

𑁧𑁫𑁦. 𑀓𑀣𑀫𑀬𑀁 𑀲𑀤𑁆𑀤𑀯𑁄𑀳𑀸𑀭𑁄 𑀩𑀦𑁆𑀥𑁂 ‘‘𑀲𑀫𑀸𑀥𑀻’’𑀢𑀺 𑀯𑀼𑀘𑁆𑀘𑀢𑀻𑀢𑁆𑀬𑀸𑀳 ‘‘𑀅𑀜𑁆𑀜𑁂’’𑀘𑁆𑀘𑀸𑀤𑀺. 𑀅𑀜𑁆𑀜𑀲𑁆𑀲 𑀯𑀢𑁆𑀣𑀼𑀦𑁄 𑀧𑀓𑀢𑀸𑀧𑁂𑀓𑁆𑀔𑀸𑀬 𑀥𑀫𑁆𑀫𑁄 𑀕𑀼𑀡𑁄 𑀧𑀲𑀺𑀤𑁆𑀥𑁄, 𑀢𑀢𑁄 𑀢𑀲𑁆𑀫𑀸 𑀫𑀼𑀔𑁆𑀬𑀯𑀺𑀲𑀬𑀸 𑀅𑀜𑁆𑀜𑀢𑁆𑀣 𑀅𑀫𑀼𑀔𑁆𑀬𑁂 𑀯𑀺𑀲𑀬𑁂 𑀮𑁄𑀓𑀲𑀻𑀫𑀸𑀦𑀼𑀭𑁄𑀥𑀢𑁄 𑀮𑁄𑀓𑀧𑁆𑀧𑀢𑀻𑀢𑁆𑀬𑀦𑀼𑀯𑀢𑁆𑀢𑀦𑁂𑀦 𑀲𑀫𑁆𑀫𑀸 𑀲𑀸𑀥𑀼 𑀮𑁄𑀓𑀲𑀻𑀫𑀸𑀦𑀼𑀯𑀢𑁆𑀢𑀦𑀫𑁂𑀯𑁂𑀳 𑀲𑀸𑀥𑀼𑀢𑁆𑀢𑀁 𑀆𑀥𑀻𑀬𑀢𑁂 𑀆𑀭𑁄𑀧𑁆𑀬𑀢𑁂, 𑀇𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀏𑀲𑁄 𑀏𑀯𑀁𑀯𑀺𑀥𑁄 𑀥𑀫𑁆𑀫𑁄 ‘‘𑀲𑀫𑀸𑀥𑀻’’𑀢𑀺 𑀦𑀺𑀭𑀼𑀘𑁆𑀘𑀢𑀻𑀢𑀺𑀥 𑀲𑀫𑁆𑀫𑀸 𑀆𑀥𑀻𑀬𑀢𑀻𑀢𑀺 𑀏𑀯𑀁 𑀦𑀻𑀳𑀭𑀺𑀢𑁆𑀯𑀸 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑁧𑁫𑁦. ‘‘𑀲𑀫𑀸𑀥𑀻’’𑀢𑀺 𑀅𑀬𑀁 𑀯𑁄𑀳𑀸𑀭𑁄 𑀩𑀦𑁆𑀥𑀯𑀺𑀲𑀬𑁂 𑀓𑀣𑀁 𑀧𑀯𑀢𑁆𑀢𑀢𑀻𑀢𑀺 𑀆𑀲𑀗𑁆𑀓𑀸𑀬𑀁 𑀧𑀞𑀫𑀁 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀢𑀼𑀁 𑀆𑀳 ‘‘𑀅𑀜𑁆𑀜𑀺’’𑀘𑁆𑀘𑀸𑀤𑀺. 𑀬𑀲𑁆𑀫𑀸 𑀅𑀜𑁆𑀜𑀥𑀫𑁆𑀫𑁄 𑀲𑀫𑀸𑀥𑀸𑀦𑀲𑁆𑀲 𑀯𑀺𑀲𑀬𑀪𑀽𑀢𑀅𑀫𑀼𑀔𑁆𑀬𑀢𑁄 𑀅𑀜𑁆𑀜𑀲𑁆𑀲 𑀫𑀼𑀔𑁆𑀬𑀯𑀢𑁆𑀣𑀼𑀦𑁄 𑀧𑀲𑀺𑀤𑁆𑀥𑀕𑀼𑀡𑁄, 𑀢𑀢𑁄 ¶ 𑀫𑀼𑀔𑁆𑀬𑀯𑀺𑀲𑀬𑀢𑁄 𑀅𑀜𑁆𑀜𑀢𑁆𑀣 𑀅𑀫𑀼𑀔𑁆𑀬𑀯𑀺𑀲𑀬𑁂 𑀮𑁄𑀓𑀲𑀻𑀫𑀸𑀦𑀼𑀭𑁄𑀥𑀢𑁄 𑀮𑁄𑀓𑀯𑁄𑀳𑀸𑀭𑀫𑀭𑀺𑀬𑀸𑀤𑀸𑀯𑀺𑀭𑁄𑀥𑀪𑀸𑀯𑁂𑀦 𑀮𑁄𑀓𑀧𑁆𑀧𑀢𑀻𑀢𑁆𑀬𑀦𑀼𑀯𑀢𑁆𑀢𑀦𑁂𑀦𑁂𑀯 𑀲𑀫𑁆𑀫𑀸 𑀆𑀥𑀻𑀬𑀢𑀺 𑀞𑀧𑀻𑀬𑀢𑀺, 𑀇𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀏𑀲𑁄 𑀬𑀣𑀸𑀯𑀼𑀢𑁆𑀢𑀕𑀼𑀡𑁄 ‘‘𑀲𑀫𑀸𑀥𑀻’’𑀢𑀺 𑀦𑀺𑀭𑀼𑀘𑁆𑀘𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀅𑀜𑁆𑀜𑀲𑁆𑀲 𑀥𑀫𑁆𑀫𑁄𑀢𑀺 𑀘, 𑀮𑁄𑀓𑀲𑁆𑀲 𑀲𑀻𑀫𑀸𑀢𑀺 𑀘, 𑀢𑀲𑁆𑀲𑀸 𑀅𑀦𑀼𑀭𑁄𑀥𑁄𑀢𑀺 𑀘 𑀯𑀺𑀕𑁆𑀕𑀳𑁄.

𑀲𑀫𑀸𑀥𑀺𑀉𑀤𑁆𑀤𑁂𑀲

𑁧𑁫𑁧.

𑀅𑀧𑀸𑀡𑁂 𑀧𑀸𑀡𑀺𑀦𑀁 𑀥𑀫𑁆𑀫𑁄, 𑀲𑀫𑁆𑀫𑀸 𑀆𑀥𑀻𑀬𑀢𑁂 𑀓𑁆𑀯𑀘𑀺;

𑀦𑀺𑀭𑀽𑀧𑁂 𑀭𑀽𑀧𑀬𑀼𑀢𑁆𑀢𑀲𑁆𑀲, 𑀦𑀺𑀭𑀲𑁂 𑀲𑀭𑀲𑀲𑁆𑀲 𑀘.

𑁧𑁫𑁨.

𑀅𑀤𑁆𑀭𑀯𑁂 𑀤𑁆𑀭𑀯𑀬𑀼𑀢𑁆𑀢𑀲𑁆𑀲, 𑀅𑀓𑀢𑁆𑀢𑀭𑀺𑀧𑀺 𑀓𑀢𑁆𑀢𑀼𑀢𑀸;

𑀓𑀞𑀺𑀦𑀲𑁆𑀲𑀸’𑀲𑀭𑀻𑀭𑁂𑀧𑀺, 𑀭𑀽𑀧𑀁 𑀢𑁂𑀲𑀁 𑀓𑀫𑀸 𑀲𑀺𑀬𑀸.

𑁧𑁫𑁧-𑁧𑁫𑁨. 𑀲𑀫𑀸𑀥𑀸𑀦𑀯𑀺𑀲𑀬𑀫𑀸𑀳 ‘‘𑀅𑀧𑀸𑀡𑁂’’𑀇𑀘𑁆𑀘𑀸𑀤𑀺. 𑀓𑁆𑀯𑀘𑀺 𑀞𑀸𑀦𑁂 𑀧𑀸𑀡𑀺𑀦𑀁 𑀧𑀸𑀡𑀯𑀦𑁆𑀢𑀸𑀦𑀁 𑀧𑀤𑀢𑁆𑀣𑀸𑀦𑀁 𑀥𑀫𑁆𑀫𑁄 𑀕𑀼𑀡𑁄 𑀅𑀧𑀸𑀡𑁂 𑀧𑀸𑀡𑀯𑀺𑀭𑀳𑀺𑀢𑁂 𑀯𑀢𑁆𑀣𑀼𑀦𑀺 𑀲𑀫𑁆𑀫𑀸 𑀮𑁄𑀓𑀧𑀢𑀻𑀢𑁆𑀬𑀦𑀼𑀯𑀢𑁆𑀢𑀦𑁂𑀦 𑀆𑀥𑀻𑀬𑀢𑁂 𑀆𑀭𑁄𑀧𑁆𑀬𑀢𑁂, 𑀏𑀯𑀫𑀼𑀧𑀭𑀺𑀧𑀺 𑀬𑀣𑀸𑀦𑀼𑀭𑀽𑀧𑀁. 𑀦𑀺𑀭𑀽𑀧𑁂𑀢𑀺 𑀭𑀽𑀧𑀯𑀺𑀭𑀳𑀺𑀢𑁂 𑀯𑀢𑁆𑀣𑀼𑀦𑀺, 𑀓𑁆𑀯𑀘𑀻𑀢𑀺 𑀲𑀩𑁆𑀩𑀢𑁆𑀣 𑀅𑀦𑀼𑀯𑀢𑁆𑀢𑀢𑀺. 𑀅𑀲𑀭𑀻𑀭𑁂 𑀅𑀖𑀦𑁂 𑀅𑀲𑀁𑀳𑀢𑁂 𑀯𑀢𑁆𑀣𑀼𑀦𑀺 𑀓𑀞𑀺𑀦𑀲𑁆𑀲 𑀤𑀴𑁆𑀳𑀲𑁆𑀲, 𑀢𑁂𑀲𑀁 𑀬𑀣𑀸𑀯𑀼𑀢𑁆𑀢𑀸𑀦𑀁 𑀲𑀫𑀸𑀥𑀻𑀦𑀁 𑀭𑀽𑀧𑀁 𑀉𑀤𑀸𑀳𑀭𑀡𑀁 𑀓𑀫𑀸 𑀉𑀤𑁆𑀤𑀺𑀝𑁆𑀞𑀸𑀦𑀼𑀓𑁆𑀓𑀫𑁂𑀦.

𑁧𑁫𑁧-𑁧𑁫𑁨. 𑀉𑀤𑁆𑀤𑁂𑀲𑁂 ‘‘𑀲𑀫𑀸𑀥𑀬𑁄’’𑀢𑀺 𑀩𑀳𑀼𑀯𑀘𑀦𑁂𑀦 𑀦𑀺𑀤𑁆𑀤𑀺𑀝𑁆𑀞𑀸𑀦𑀁 𑀲𑀫𑀸𑀥𑀻𑀦𑀁 𑀯𑀺𑀲𑀬𑀫𑀼𑀧𑀤𑀲𑁆𑀲𑁂𑀢𑀺 ‘‘𑀅𑀧𑀸𑀡𑁂’’𑀘𑁆𑀘𑀸𑀤𑀺𑀦𑀸. 𑀓𑁆𑀯𑀘𑀺 𑀓𑀺𑀲𑁆𑀫𑀺𑀜𑁆𑀘𑀺 𑀞𑀸𑀦𑁂 𑀧𑀸𑀡𑀺𑀦𑀁 𑀥𑀫𑁆𑀫𑁄 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀁 𑀕𑀼𑀡𑁄 𑀅𑀧𑀸𑀡𑁂 𑀧𑀸𑀡𑀭𑀳𑀺𑀢𑀯𑀢𑁆𑀣𑀼𑀫𑁆𑀳𑀺 𑀲𑀫𑁆𑀫𑀸 𑀮𑁄𑀓𑀧𑀢𑀻𑀢𑀺𑀅𑀦𑀼𑀲𑀸𑀭𑁂𑀦 𑀆𑀥𑀻𑀬𑀢𑁂 𑀆𑀭𑁄𑀧𑁆𑀬𑀢𑁂, 𑀓𑁆𑀯𑀘𑀺 𑀭𑀽𑀧𑀬𑀼𑀢𑁆𑀢𑀲𑁆𑀲 𑀭𑀽𑀧𑀯𑀦𑁆𑀢𑀯𑀢𑁆𑀣𑀼𑀦𑁄 𑀥𑀫𑁆𑀫𑁄 𑀦𑀺𑀭𑀽𑀧𑁂 𑀭𑀽𑀧𑀭𑀳𑀺𑀢𑀯𑀢𑁆𑀣𑀼𑀫𑁆𑀳𑀺, 𑀓𑁆𑀯𑀘𑀺 𑀲𑀭𑀲𑀲𑁆𑀲 𑀭𑀲𑀯𑀦𑁆𑀢𑀲𑁆𑀲 𑀯𑀢𑁆𑀣𑀼𑀦𑁄 𑀥𑀫𑁆𑀫𑁄 𑀦𑀺𑀭𑀲𑁂 𑀭𑀲𑀭𑀳𑀺𑀢𑁂 𑀘, 𑀓𑁆𑀯𑀘𑀺 𑀤𑁆𑀭𑀯𑀬𑀼𑀢𑁆𑀢𑀲𑁆𑀲 𑀤𑁆𑀭𑀯𑀯𑀦𑁆𑀢𑀯𑀢𑁆𑀣𑀼𑀦𑁄 𑀥𑀫𑁆𑀫𑁄 𑀅𑀤𑁆𑀭𑀯𑁂 𑀤𑁆𑀭𑀯𑀭𑀳𑀺𑀢𑁂 𑀘, ¶ 𑀓𑁆𑀯𑀘𑀺 𑀓𑀢𑁆𑀢𑀼𑀢𑀸 𑀓𑀢𑁆𑀢𑀼𑀕𑀼𑀡𑁄 𑀅𑀓𑀢𑁆𑀢𑀭𑀺𑀧𑀺, 𑀓𑁆𑀯𑀘𑀺 𑀓𑀞𑀺𑀦𑀲𑁆𑀲 𑀣𑀤𑁆𑀥𑀲𑁆𑀲 𑀯𑀢𑁆𑀣𑀼𑀦𑁄 𑀥𑀫𑁆𑀫𑁄 𑀅𑀲𑀭𑀻𑀭𑁂𑀧𑀺 𑀲𑀭𑀻𑀭𑀭𑀳𑀺𑀢𑁂𑀧𑀺 𑀲𑀫𑁆𑀫𑀸 𑀆𑀥𑀻𑀬𑀢𑁂. 𑀢𑁂𑀲𑀁 𑀙𑀦𑁆𑀦𑀁 𑀲𑀫𑀸𑀥𑀻𑀦𑀁 𑀭𑀽𑀧𑀁 𑀉𑀤𑀸𑀳𑀭𑀡𑀁 𑀓𑀫𑀸 ‘‘𑀅𑀧𑀸𑀡𑁂 𑀧𑀸𑀡𑀺𑀦’’𑀦𑁆𑀢𑀺 𑀉𑀤𑁆𑀤𑀺𑀝𑁆𑀞𑀸𑀦𑀼𑀓𑁆𑀓𑀫𑁂𑀦 𑀲𑀺𑀬𑀸 𑀪𑀯𑁂𑀬𑁆𑀬𑀸𑀢𑀺. 𑀦 𑀲𑀦𑁆𑀢𑀺 𑀧𑀸𑀡𑀸 𑀅𑀲𑁆𑀲𑁂𑀢𑀺 𑀘, 𑀭𑀽𑀧𑀸 𑀦𑀺𑀕𑁆𑀕𑀢𑁄𑀢𑀺 𑀘, 𑀭𑀽𑀧𑁂𑀦 𑀬𑀼𑀢𑁆𑀢𑁄𑀢𑀺 𑀘, 𑀭𑀲𑀸 𑀦𑀺𑀕𑁆𑀕𑀢𑁄𑀢𑀺 𑀘, 𑀭𑀲𑁂𑀦 𑀲𑀳 𑀯𑀢𑁆𑀢𑀫𑀸𑀦𑁄𑀢𑀺 𑀘, 𑀤𑁆𑀭𑀯𑀸𑀅𑀜𑁆𑀜𑁄𑀢𑀺 𑀘, 𑀤𑁆𑀭𑀯𑁂𑀦 𑀤𑁆𑀭𑀯𑀪𑀸𑀯𑁂𑀦 𑀬𑀼𑀢𑁆𑀢𑁄𑀢𑀺 𑀘, 𑀓𑀢𑁆𑀢𑀼𑀢𑁄 𑀅𑀜𑁆𑀜𑁄𑀢𑀺 𑀘, 𑀓𑀢𑁆𑀢𑀼𑀦𑁄 𑀪𑀸𑀯𑁄𑀢𑀺 𑀘, 𑀦𑀢𑁆𑀣𑀺 𑀲𑀭𑀻𑀭𑀁 𑀅𑀲𑁆𑀲𑀸𑀢𑀺 𑀘 𑀯𑀺𑀕𑁆𑀕𑀳𑁄.

𑀲𑀫𑀸𑀥𑀺𑀦𑀺𑀤𑁆𑀤𑁂𑀲

𑀅𑀧𑀸𑀡𑁂 𑀧𑀸𑀡𑀺𑀦𑀁 𑀥𑀫𑁆𑀫𑁄

𑁧𑁫𑁩.

𑀉𑀡𑁆𑀡𑀸𑀧𑀼𑀡𑁆𑀡𑀺𑀦𑁆𑀤𑀼𑀦𑀸 𑀦𑀸𑀣, 𑀤𑀺𑀯𑀸𑀧𑀺 𑀲𑀳 𑀲𑀗𑁆𑀕𑀫𑀸;

𑀯𑀺𑀦𑀺𑀤𑁆𑀤𑀸 𑀲𑀫𑁆𑀧𑀫𑁄𑀤𑀦𑁆𑀢𑀺, 𑀫𑀜𑁆𑀜𑁂 𑀓𑀼𑀫𑀼𑀤𑀺𑀦𑀻 𑀢𑀯.

𑁧𑁫𑁩. ‘‘𑀉𑀡𑁆𑀡𑀸’’𑀇𑀘𑁆𑀘𑀸𑀤𑀺. 𑀦𑀸𑀣𑀸𑀢𑀺 𑀮𑁄𑀓𑀢𑁆𑀢𑀬𑁂𑀓𑀧𑀝𑀺𑀲𑀭𑀡𑀪𑀽𑀢𑀢𑀸𑀬 𑀪𑀕𑀯𑀦𑁆𑀢𑀁 𑀆𑀮𑀧𑀢𑀺. 𑀢𑀯 𑀉𑀡𑁆𑀡𑀸𑀭𑁄𑀫𑀥𑀸𑀢𑀼𑀲𑀗𑁆𑀔𑀸𑀢𑁂𑀦 𑀧𑀼𑀡𑁆𑀡𑀺𑀦𑁆𑀤𑀼𑀦𑀸 𑀲𑀳 𑀲𑀗𑁆𑀕𑀫𑀸 𑀲𑀁𑀬𑁄𑀕𑁂𑀦 𑀓𑀼𑀫𑀼𑀤𑀺𑀦𑀻 𑀓𑀼𑀫𑀼𑀤𑀺𑀦𑀺𑀬𑁄 𑀓𑀼𑀫𑀼𑀤𑀸𑀓𑀭𑀸 𑀤𑀺𑀯𑀸𑀧𑀺 𑀯𑀺𑀦𑀺𑀤𑁆𑀤𑀸 𑀯𑀺𑀕𑀢𑀲𑁄𑀧𑁆𑀧𑀸 𑀲𑀫𑁆𑀧𑀫𑁄𑀤𑀦𑁆𑀢𑀺 𑀫𑀜𑁆𑀜𑁂 𑀲𑀼𑀝𑁆𑀞𑀼𑀬𑁂𑀯 𑀧𑀫𑁄𑀤𑀦𑁆𑀢𑀻𑀢𑀺 𑀧𑀭𑀺𑀓𑀧𑁆𑀧𑁂𑀫𑀻𑀢𑀺. 𑀏𑀢𑁆𑀣 𑀧𑀸𑀡𑀺𑀥𑀫𑁆𑀫𑀲𑁆𑀲 𑀲𑀼𑀭𑀢𑀭𑀽𑀧𑀲𑁆𑀲 𑀲𑀗𑁆𑀕𑀫𑀲𑁆𑀲 𑀯𑀺𑀦𑀺𑀤𑁆𑀤𑀸𑀬 𑀲𑀫𑁆𑀧𑀻𑀡𑀦𑀲𑁆𑀲 𑀘 𑀅𑀧𑀸𑀡𑀺𑀦𑀺 𑀆𑀭𑁄𑀧𑀺𑀢𑀧𑀼𑀫𑁆𑀪𑀸𑀯𑁂 𑀉𑀡𑁆𑀡𑀸𑀧𑀼𑀡𑁆𑀡𑀺𑀦𑁆𑀤𑀼𑀫𑁆𑀳𑀺, 𑀢𑀣𑀸 𑀆𑀭𑁄𑀧𑀺𑀢𑀇𑀢𑁆𑀣𑀺𑀪𑀸𑀯𑀸𑀲𑀼 𑀓𑀼𑀫𑀼𑀤𑀺𑀦𑀻𑀲𑀼 𑀮𑁄𑀓𑀲𑀻𑀫𑀸𑀦𑀼𑀭𑁄𑀥𑁂𑀦 𑀲𑀫𑀸𑀥𑀸𑀦𑀢𑁄 𑀲𑁄𑀬𑀁 𑀧𑀲𑀺𑀤𑁆𑀥𑁄 𑀥𑀫𑁆𑀫𑁄 ‘‘𑀲𑀫𑀸𑀥𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑀤𑀪𑀺𑀥𑀸𑀬𑀻 𑀲𑀤𑁆𑀤𑁄 𑀘 𑀉𑀧𑀘𑀸𑀭𑀢𑁄 𑀅𑀢𑁆𑀣𑀸𑀦𑀼𑀕𑀸𑀫𑀺𑀢𑁆𑀢𑀸 𑀲𑀤𑁆𑀤𑀺𑀓𑀯𑁄𑀳𑀸𑀭𑀁 𑀤𑀲𑁆𑀲𑁂𑀢𑀺, 𑀏𑀯𑀫𑀼𑀧𑀭𑀺𑀧𑀺 𑀬𑀣𑀸𑀬𑁄𑀕𑀁.

𑁧𑁫𑁩. 𑀢𑁂𑀲𑀼 𑀧𑀸𑀡𑀺𑀥𑀫𑁆𑀫𑀲𑀫𑀸𑀥𑀺𑀦𑁄 𑀉𑀤𑀸𑀳𑀭𑀡𑀫𑀸𑀤𑀺𑀲𑀢𑀺 ‘‘𑀉𑀡𑁆𑀡𑀸’’𑀇𑀘𑁆𑀘𑀸𑀤𑀺𑀦𑀸. 𑀦𑀸𑀣 𑀢𑀯 𑀢𑀼𑀬𑁆𑀳𑀁 𑀉𑀡𑁆𑀡𑀸𑀧𑀼𑀡𑁆𑀡𑀺𑀦𑁆𑀤𑀼𑀦𑀸 𑀉𑀡𑁆𑀡𑀸𑀭𑁄𑀫𑀫𑀡𑁆𑀟𑀮𑀲𑀗𑁆𑀔𑀸𑀢𑀧𑀼𑀡𑁆𑀡𑀘𑀦𑁆𑀤𑁂𑀦 𑀲𑀳 𑀲𑀗𑁆𑀕𑀫𑀸 𑀅𑀜𑁆𑀜𑀫𑀜𑁆𑀜𑀲𑀫𑀯𑀸𑀬𑀳𑁂𑀢𑀼𑀦𑀸 𑀓𑀼𑀫𑀼𑀤𑀺𑀦𑀻 𑀓𑁂𑀭𑀯𑀸𑀓𑀭𑀲𑀗𑁆𑀔𑀸𑀢𑀸 𑀓𑀼𑀫𑀼𑀤𑀺𑀦𑀺𑀬𑁄 𑀤𑀺𑀯𑀸𑀧𑀺 ¶ 𑀯𑀺𑀦𑀺𑀤𑁆𑀤𑀸 𑀯𑀺𑀓𑀲𑀺𑀢𑀸 𑀲𑀫𑁆𑀧𑀫𑁄𑀤𑀦𑁆𑀢𑀺 𑀫𑀜𑁆𑀜𑁂 𑀅𑀢𑀺𑀲𑀦𑁆𑀢𑀼𑀝𑁆𑀞𑀸 𑀳𑁄𑀦𑁆𑀢𑀻𑀢𑀺 𑀓𑀧𑁆𑀧𑁂𑀫𑀻𑀢𑀺 𑀇𑀦𑁆𑀤𑀼𑀲𑀫𑁆𑀧𑀫𑁄𑀤𑁄 𑀲𑀳𑀲𑀤𑁆𑀤𑁂𑀦 𑀜𑀸𑀬𑀢𑁂. 𑀏𑀢𑁆𑀣 𑀧𑀸𑀡𑀺𑀥𑀫𑁆𑀫𑀲𑀗𑁆𑀔𑀸𑀢𑁄 𑀲𑀼𑀭𑀢𑀲𑀗𑁆𑀕𑀫𑁄 𑀘 𑀦𑀺𑀤𑁆𑀤𑀸𑀧𑀕𑀫𑁄 𑀘 𑀲𑀫𑁆𑀧𑀫𑁄𑀤𑀦𑀜𑁆𑀘𑀸𑀢𑀺 𑀢𑀺𑀡𑁆𑀡𑀁 𑀉𑀡𑁆𑀡𑀸𑀧𑀼𑀡𑁆𑀡𑀺𑀦𑁆𑀤𑀼𑀓𑀼𑀫𑀼𑀤𑀺𑀦𑀻𑀲𑀗𑁆𑀔𑀸𑀢𑁂𑀲𑀼 𑀅𑀧𑀸𑀡𑁂𑀲𑀼 𑀮𑁄𑀓𑀯𑁄𑀳𑀸𑀭𑀸𑀦𑀢𑀺𑀓𑁆𑀓𑀫𑁆𑀫 𑀩𑀼𑀤𑁆𑀥𑀺𑀬𑀸 𑀆𑀭𑁄𑀧𑀦𑁂𑀦 𑀧𑀸𑀡𑀺𑀥𑀫𑁆𑀫𑀢𑁄 𑀧𑀲𑀺𑀤𑁆𑀥𑀸 𑀢𑀬𑁄 𑀅𑀢𑁆𑀣𑀸 𑀇𑀥 𑀲𑀫𑀸𑀥𑀬𑁄 𑀦𑀸𑀫, 𑀢𑀧𑁆𑀧𑀝𑀺𑀧𑀸𑀤𑀓𑀕𑀦𑁆𑀣𑁄𑀧𑀺 𑀅𑀢𑁆𑀣𑀸𑀦𑀼𑀕𑀸𑀫𑀺𑀢𑁆𑀢𑀸 𑀢𑀤𑀼𑀧𑀘𑀸𑀭𑁂𑀦 𑀲𑀫𑀸𑀥𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀧𑀼𑀡𑁆𑀡𑁄 𑀘 𑀲𑁄 𑀇𑀦𑁆𑀤𑀼 𑀘𑁂𑀢𑀺 𑀘, 𑀉𑀡𑁆𑀡𑀸 𑀏𑀯 𑀧𑀼𑀡𑁆𑀡𑀺𑀦𑁆𑀤𑀼 𑀘𑀸𑀢𑀺 𑀘, 𑀯𑀺𑀕𑀢𑀸 𑀦𑀺𑀤𑁆𑀤𑀸 𑀬𑁂𑀳𑀻𑀢𑀺 𑀘 𑀯𑀺𑀕𑁆𑀕𑀳𑁄.

𑀦𑀺𑀭𑀽𑀧𑁂 𑀭𑀽𑀧𑀬𑀼𑀢𑁆𑀢𑀲𑁆𑀲

𑁧𑁫𑁪.

𑀤𑀬𑀸𑀭𑀲𑁂𑀲𑀼 𑀫𑀼𑀚𑁆𑀚𑀦𑁆𑀢𑀸, 𑀚𑀦𑀸’𑀫𑀢𑀭𑀲𑁂𑀲𑁆𑀯𑀺’𑀯;

𑀲𑀼𑀔𑀺𑀢𑀸 𑀳𑀢𑀤𑁄𑀲𑀸 𑀢𑁂, 𑀦𑀸𑀣 𑀧𑀸𑀤𑀫𑁆𑀩𑀼𑀚𑀸𑀦𑀢𑀸.

𑁧𑁫𑁪. ‘‘𑀤𑀬𑀸’’𑀇𑀘𑁆𑀘𑀸𑀤𑀺. 𑀦𑀸𑀣 𑀢𑁂 𑀧𑀸𑀤𑀫𑁆𑀩𑀼𑀚𑁂𑀲𑀼 𑀆𑀦𑀢𑀸 𑀧𑀡𑀸𑀫𑀯𑀲𑁂𑀦 𑀚𑀦𑀸 𑀢𑀺𑀮𑁄𑀓𑀓𑀼𑀳𑀭𑀧𑀯𑀢𑁆𑀢𑀺𑀦𑁄 𑀲𑀢𑁆𑀢𑀸 𑀅𑀫𑀢𑀭𑀲𑁂𑀲𑁆𑀯𑀺𑀯 𑀧𑀻𑀬𑀽𑀲𑀭𑀲𑁂𑀲𑀼 𑀯𑀺𑀬 𑀤𑀬𑀸𑀭𑀲𑁂𑀲𑀼 𑀓𑀭𑀼𑀡𑀸𑀭𑀲𑁂𑀲𑀼 𑀕𑀼𑀡𑁂𑀲𑀼. ‘‘𑀲𑀺𑀗𑁆𑀕𑀸𑀭𑀸𑀤𑁄 𑀯𑀺𑀲𑁂 𑀯𑀻𑀭𑀺𑀬𑁂, 𑀕𑀼𑀡𑁂 𑀭𑀸𑀕𑁂 𑀤𑁆𑀭𑀯𑁂 𑀭𑀲𑁄’’𑀢𑀺 [𑀅𑀫𑀭𑀓𑁄𑀲 𑁩.𑁩.𑁨𑁨𑁬] 𑀳𑀺 𑀦𑀺𑀖𑀡𑁆𑀝𑀼. 𑀫𑀼𑀚𑁆𑀚𑀦𑁆𑀢𑀸 𑀦𑀺𑀫𑀼𑀚𑁆𑀚𑀫𑀸𑀦𑀸 𑀳𑀢𑀸 𑀦𑀝𑁆𑀞𑀸 𑀤𑁄𑀲𑀸 𑀯𑀸𑀢𑀸𑀤𑀬𑁄 𑀅𑀫𑀢𑀧𑀓𑁆𑀔𑁂, 𑀅𑀜𑁆𑀜𑀢𑁆𑀣 𑀢𑀼 𑀳𑀢𑀸 𑀦𑀝𑁆𑀞𑀸 𑀤𑁄𑀲𑀸 𑀭𑀸𑀕𑀸𑀤𑀬𑁄 𑀬𑁂𑀲𑀦𑁆𑀢𑀺 𑀯𑀺𑀕𑁆𑀕𑀳𑁄, 𑀢𑀢𑁄𑀬𑁂𑀯 𑀲𑀼𑀔𑀺𑀢𑀸 𑀲𑀼𑀔𑀁 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀁 𑀇𑀢𑀸 𑀧𑀢𑁆𑀢𑀸 𑀕𑀢𑀸𑀢𑀺 𑀅𑀢𑁆𑀣𑁄.

𑁧𑁫𑁪. 𑀇𑀤𑀸𑀦𑀺 𑀭𑀽𑀧𑀥𑀫𑁆𑀫𑀲𑀫𑀸𑀥𑀺𑀦𑁄 𑀉𑀤𑀸𑀳𑀭𑀡𑀁 𑀉𑀤𑁆𑀤𑀺𑀲𑀢𑀺 ‘‘𑀤𑀬𑀸’’𑀇𑀘𑁆𑀘𑀸𑀤𑀺𑀦𑀸. 𑀦𑀸𑀣 𑀢𑁂 𑀢𑀯 𑀧𑀸𑀤𑀫𑁆𑀩𑀼𑀚𑀸𑀦𑀢𑀸 𑀘𑀭𑀡𑀧𑀤𑀼𑀫𑁂 𑀧𑀡𑀢𑀸 𑀚𑀦𑀸 𑀤𑁂𑀯𑀫𑀦𑀼𑀲𑁆𑀲𑀸 𑀅𑀫𑀢𑀭𑀲𑁂𑀲𑀼 𑀇𑀯 𑀲𑀼𑀥𑀸𑀚𑀮𑁂𑀲𑀼 𑀯𑀺𑀬 𑀤𑀬𑀸𑀭𑀲𑁂𑀲𑀼 𑀅𑀦𑀜𑁆𑀜𑀲𑀸𑀥𑀸𑀭𑀡𑀓𑀭𑀼𑀡𑀸𑀕𑀼𑀡𑁂𑀲𑀼 𑀫𑀼𑀚𑁆𑀚𑀦𑁆𑀢𑀸 𑀦𑀺𑀫𑀼𑀚𑁆𑀚𑀫𑀸𑀦𑀸 𑀳𑀢𑀤𑁄𑀲𑀸 𑀯𑀺𑀦𑀝𑁆𑀞𑀯𑀸𑀢𑀧𑀺𑀢𑁆𑀢𑀸𑀤𑀬𑁄 𑀯𑀺𑀦𑀝𑁆𑀞𑀭𑀸𑀕𑀸𑀤𑀺𑀤𑁄𑀲𑀸 𑀯𑀸 𑀲𑀼𑀔𑀺𑀢𑀸 𑀢𑀢𑁄𑀬𑁂𑀯 𑀅𑀚𑀭𑀸𑀫𑀭𑀲𑀗𑁆𑀔𑀸𑀢𑀲𑀼𑀔𑀁 ¶ 𑀇𑀢𑀸 𑀧𑀢𑁆𑀢𑀸𑀢𑀺. 𑀏𑀢𑁆𑀣 𑀭𑀽𑀧𑀬𑀼𑀢𑁆𑀢𑀚𑀮𑁂 𑀮𑀩𑁆𑀪𑀫𑀸𑀦𑀁 𑀫𑀼𑀚𑁆𑀚𑀦𑀁 𑀦𑀺𑀭𑀽𑀧𑁂 𑀤𑀬𑀸𑀕𑀼𑀡𑁂 𑀆𑀭𑁄𑀧𑀺𑀢𑀁 𑀳𑁄𑀢𑀺. 𑀤𑀬𑀸 𑀏𑀯 𑀭𑀲𑀸 𑀕𑀼𑀡𑀸𑀢𑀺 𑀘, 𑀅𑀫𑀢𑀸 𑀏𑀯 𑀭𑀲𑀸𑀢𑀺 𑀘, 𑀳𑀢𑀸 𑀯𑀸𑀢𑀸𑀤𑀬𑁄 𑀭𑀸𑀕𑀸𑀤𑀬𑁄 𑀯𑀸 𑀤𑁄𑀲𑀸 𑀬𑁂𑀲𑀦𑁆𑀢𑀺 𑀘, 𑀧𑀸𑀤𑀸𑀦𑀺 𑀏𑀯 𑀅𑀫𑁆𑀩𑀼𑀚𑀸𑀦𑀻𑀢𑀺 𑀘, 𑀢𑁂𑀲𑀼 𑀆𑀦𑀢𑀸𑀢𑀺 𑀘 𑀯𑀺𑀕𑁆𑀕𑀳𑁄.

‘‘𑀲𑀺𑀗𑁆𑀕𑀸𑀭𑀸𑀤𑁄𑀯𑀺𑀲𑁂 𑀯𑀻𑀭𑀺𑀬𑁂, 𑀕𑀼𑀡𑁂 𑀭𑀸𑀕𑁂 𑀤𑁆𑀭𑀯𑁂𑀭𑀲𑁄’’𑀢𑀺 [𑀅𑀫𑀭𑀓𑁄𑀲 𑁩.𑁩.𑁨𑁨𑁬] 𑀏𑀢𑁆𑀣 𑀭𑀲𑀲𑀤𑁆𑀤𑁄 𑀕𑀼𑀡𑀚𑀮𑁂𑀲𑀼 𑀯𑀢𑁆𑀢𑀢𑀺.

𑀦𑀺𑀭𑀲𑁂 𑀲𑀭𑀲𑀲𑁆𑀲

𑁧𑁫𑁫.

𑀫𑀥𑀼𑀭𑁂𑀧𑀺 𑀕𑀼𑀡𑁂 𑀥𑀻𑀭, 𑀦𑀧𑁆𑀧𑀲𑀻𑀤𑀦𑁆𑀢𑀺 𑀬𑁂 𑀢𑀯;

𑀓𑀻𑀤𑀺𑀲𑀻𑀫𑀦𑀲𑁄 𑀯𑀼𑀢𑁆𑀢𑀺, 𑀢𑁂𑀲𑀁 𑀔𑀸𑀭𑀕𑀼𑀡𑀸𑀦𑀪𑁄 [𑀳𑁂 (𑀲𑀻.)].

𑁧𑁫𑁫. ‘‘𑀫𑀥𑀼𑀭𑁂’’𑀘𑁆𑀘𑀸𑀤𑀺. 𑀥𑀺𑀬𑀸 𑀈𑀭𑀢𑀻𑀢𑀺 𑀥𑀻𑀭𑁄, 𑀪𑁄 𑀥𑀻𑀭 𑀢𑀯 𑀫𑀥𑀼𑀭𑁂𑀧𑀺 𑀫𑀦𑁄𑀳𑀭𑁂𑀧𑀺 𑀕𑀼𑀡𑁂 𑀓𑀭𑀼𑀡𑀸𑀤𑀺𑀓𑁂 𑀬𑁂 𑀦𑀧𑁆𑀧𑀲𑀻𑀤𑀦𑁆𑀢𑀺 𑀧𑀲𑀸𑀤𑀁 𑀦 𑀓𑀭𑁄𑀦𑁆𑀢𑀺, 𑀔𑀸𑀭𑀕𑀼𑀡𑀸𑀦𑀁 𑀅𑀫𑀥𑀼𑀭𑀕𑀼𑀡𑀸𑀦𑀁 𑀢𑁂𑀲𑀁 𑀚𑀦𑀸𑀦𑀁 𑀫𑀦𑀲𑁄 𑀯𑀼𑀢𑁆𑀢𑀺 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀓𑀻𑀤𑀺𑀲𑀻𑀢𑀺 𑀓𑀺𑀫𑀺𑀯 𑀤𑀺𑀲𑁆𑀲𑀢𑀺, 𑀦 𑀯𑀺𑀜𑁆𑀜𑀸𑀬𑀢𑁂 ‘‘𑀈𑀤𑀺𑀲𑀻’’𑀢𑀺. 𑀬𑀢𑁄 𑀢𑀸𑀤𑀺𑀲𑀕𑀼𑀡𑀸𑀯𑀩𑁄𑀥𑀧𑀭𑀫𑁆𑀫𑀼𑀔𑀸 𑀫𑁄𑀳𑀦𑁆𑀥𑀓𑀸𑀭𑀲𑀫𑁆𑀩𑀦𑁆𑀥𑀺𑀢𑀸𑀢𑀺.

𑁧𑁫𑁫. 𑀇𑀤𑀸𑀦𑀺 𑀲𑀭𑀲𑀥𑀫𑁆𑀫𑀲𑀫𑀸𑀥𑀺𑀦𑁄 𑀉𑀤𑀸𑀳𑀭𑀡𑀫𑀼𑀤𑁆𑀤𑀺𑀲𑀢𑀺 ‘‘𑀫𑀥𑀼𑀭𑀺’’𑀘𑁆𑀘𑀸𑀤𑀺𑀦𑀸. 𑀪𑁄 𑀥𑀻𑀭 𑀢𑀯 𑀢𑁂 𑀫𑀥𑀼𑀭𑁂 𑀅𑀧𑀺 𑀕𑀼𑀡𑁂 𑀧𑀓𑀢𑀺𑀲𑀼𑀦𑁆𑀤𑀭𑁂 𑀓𑀭𑀼𑀡𑀸𑀧𑀜𑁆𑀜𑀸𑀕𑀼𑀡𑁂𑀧𑀺 𑀬𑁂 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸 𑀚𑀦𑀸 𑀦𑀧𑁆𑀧𑀲𑀻𑀤𑀦𑁆𑀢𑀺, 𑀔𑀸𑀭𑀕𑀼𑀡𑀸𑀦𑀁 𑀅𑀫𑀥𑀼𑀭𑀕𑀼𑀡𑀸𑀦𑀁 𑀢𑁂𑀲𑀁 𑀚𑀦𑀸𑀦𑀁 𑀫𑀦𑀲𑁄 𑀯𑀼𑀢𑁆𑀢𑀺 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀓𑀻𑀤𑀺𑀲𑀻 𑀓𑀣𑀁 𑀭𑀼𑀳𑀢𑀺. 𑀥𑀺𑀬𑀸 𑀈𑀭𑀢𑀺 𑀧𑀯𑀢𑁆𑀢𑀢𑀻𑀢𑀺 𑀘, 𑀓𑀸 𑀯𑀺𑀬 𑀲𑀸 𑀤𑀺𑀲𑁆𑀲𑀢𑀻𑀢𑀺 𑀘, 𑀔𑀸𑀭𑀸 𑀕𑀼𑀡𑀸 𑀬𑁂𑀲𑀦𑁆𑀢𑀺 𑀘 𑀯𑀺𑀕𑁆𑀕𑀳𑁄. 𑀏𑀢𑁆𑀣 𑀲𑀫𑀸𑀥𑀺 𑀦𑀸𑀫 𑀭𑀲𑀳𑀻𑀦𑁂 𑀆𑀭𑁄𑀧𑀺𑀢𑀭𑀲𑀬𑀼𑀢𑁆𑀢𑀥𑀫𑁆𑀫𑀪𑀽𑀢𑀁 𑀫𑀥𑀼𑀭𑀔𑀸𑀭𑀕𑀼𑀡𑀤𑁆𑀯𑀬𑀁.

𑀅𑀤𑁆𑀭𑀯𑁂 𑀤𑁆𑀭𑀯𑀬𑀼𑀢𑁆𑀢𑀲𑁆𑀲

𑁧𑁫𑁬.

𑀲𑀩𑁆𑀩𑀢𑁆𑀣𑀲𑀺𑀤𑁆𑀥 ¶ 𑀘𑀽𑀴𑀓-𑀧𑀼𑀝𑀧𑁂𑀬𑁆𑀬𑀸 𑀫𑀳𑀸𑀕𑀼𑀡𑀸;

𑀤𑀺𑀲𑀸 𑀲𑀫𑀦𑁆𑀢𑀸 𑀥𑀸𑀯𑀦𑁆𑀢𑀺, 𑀓𑀼𑀦𑁆𑀤𑀲𑁄𑀪𑀸𑀲𑀮𑀓𑁆𑀔𑀡𑀸.

𑁧𑁫𑁬. ‘‘𑀲𑀩𑁆𑀩𑀢𑁆𑀣𑀲𑀺𑀤𑁆𑀥𑀺’’𑀘𑁆𑀘𑀸𑀤𑀺. 𑀲𑀩𑁆𑀩𑀢𑁆𑀣𑀲𑀺𑀤𑁆𑀥𑀲𑁆𑀲 𑀫𑀳𑀸𑀫𑀼𑀦𑀺𑀦𑁄 𑀘𑀽𑀴𑀓𑀧𑀼𑀝𑁂𑀦 𑀧𑁂𑀬𑁆𑀬𑀸 𑀧𑀸𑀢𑀩𑁆𑀩𑀸 𑀓𑀼𑀦𑁆𑀤𑀲𑁄𑀪𑀸𑀲𑀮𑀓𑁆𑀔𑀡𑀸 𑀓𑀼𑀦𑁆𑀤𑀓𑀼𑀲𑀼𑀫𑀲𑁆𑀲 𑀲𑁄𑀪𑀸𑀲𑀯𑀦𑁆𑀢𑀸 𑀚𑀼𑀢𑀺𑀯𑀺𑀚𑀫𑁆𑀪𑀺𑀦𑁄 𑀫𑀳𑀸𑀕𑀼𑀡𑀸 𑀲𑀫𑀦𑁆𑀢𑀸 𑀧𑀭𑀺𑀢𑁄 𑀤𑀺𑀲𑀸 𑀤𑀺𑀲𑀦𑁆𑀢𑀸𑀦𑀺 𑀥𑀸𑀯𑀦𑁆𑀢𑀺.

𑁧𑁫𑁬. 𑀇𑀤𑀸𑀦𑀺 𑀤𑁆𑀭𑀯𑀬𑀼𑀢𑁆𑀢𑀲𑀫𑀸𑀥𑀺𑀦𑁄 𑀉𑀤𑀸𑀳𑀭𑀡𑀫𑀼𑀤𑁆𑀤𑀺𑀲𑀢𑀺 ‘‘𑀲𑀩𑁆𑀩𑀢𑁆𑀣𑀺’’𑀘𑁆𑀘𑀸𑀤𑀺𑀦𑀸. 𑀲𑀩𑁆𑀩𑀢𑁆𑀣𑀲𑀺𑀤𑁆𑀥 𑀲𑀩𑁆𑀩𑀓𑀺𑀘𑁆𑀘𑁂 𑀧𑀭𑀺𑀦𑀺𑀧𑁆𑀨𑀦𑁆𑀦, 𑀦𑀺𑀧𑁆𑀨𑀦𑁆𑀦𑁂𑀳𑀺 𑀲𑀩𑁆𑀩𑀢𑁆𑀣𑁂𑀳𑀺 𑀯𑀸 𑀲𑀫𑀦𑁆𑀦𑀸𑀕𑀢 𑀳𑁂 𑀢𑀣𑀸𑀕𑀢 𑀢𑀯 𑀘𑀽𑀴𑀓𑀧𑀼𑀝𑀧𑁂𑀬𑁆𑀬𑀸 𑀘𑀽𑀴𑀓𑀧𑀼𑀝𑁂𑀦 𑀧𑀸𑀢𑀩𑁆𑀩𑀸 𑀓𑀼𑀦𑁆𑀤𑀲𑁄𑀪𑀸𑀲𑀮𑀓𑁆𑀔𑀡𑀸 𑀓𑀼𑀦𑁆𑀤𑀲𑁄𑀪𑀸𑀳𑀺 𑀲𑀫𑀸𑀦𑀮𑀓𑁆𑀔𑀡𑀸 𑀓𑀼𑀦𑁆𑀤𑀲𑁄𑀪𑀸𑀲𑀤𑀺𑀲𑀸 𑀯𑀸 𑀫𑀳𑀸𑀕𑀼𑀡𑀸 𑀲𑀗𑁆𑀔𑁆𑀬𑀸𑀫𑀳𑀦𑁆𑀢𑀢𑁆𑀢𑀸 𑀆𑀦𑀼𑀪𑀸𑀯𑀫𑀳𑀦𑁆𑀢𑀢𑁆𑀢𑀸 𑀯𑀸 𑀫𑀳𑀦𑁆𑀢𑀸 𑀯𑀸 𑀅𑀭𑀳𑀢𑁆𑀢𑀸𑀤𑀬𑁄 𑀕𑀼𑀡𑀸 𑀲𑀫𑀦𑁆𑀢𑀸 𑀲𑀫𑀦𑁆𑀢𑀢𑁄 𑀤𑀺𑀲𑀸 𑀤𑀲𑀤𑀺𑀲𑀸𑀲𑀼 𑀥𑀸𑀯𑀦𑁆𑀢𑀻𑀢𑀺. 𑀏𑀢𑁆𑀣 𑀤𑁆𑀭𑀯𑀬𑀼𑀢𑁆𑀢𑀕𑀼𑀡𑀪𑀽𑀢𑁄 𑀘𑀽𑀴𑀓𑀧𑀼𑀝𑀧𑁂𑀬𑁆𑀬𑀪𑀸𑀯𑁄 𑀤𑁆𑀭𑀯𑀭𑀳𑀺𑀢𑁂 𑀕𑀼𑀡𑁂 𑀆𑀭𑁄𑀧𑀺𑀢𑁄 𑀲𑀫𑀸𑀥𑀺 𑀦𑀸𑀫 𑀳𑁄𑀢𑀺. 𑀲𑀩𑁆𑀩𑁂 𑀘 𑀢𑁂 𑀅𑀢𑁆𑀣𑀸 𑀘𑁂𑀢𑀺 𑀘, 𑀢𑁂 𑀲𑀺𑀤𑁆𑀥𑀸 𑀬𑀲𑁆𑀲𑁂𑀢𑀺 𑀘, 𑀘𑀽𑀴𑀓𑀫𑁂𑀯 𑀧𑀼𑀝𑀫𑀺𑀢𑀺 𑀘, 𑀢𑁂𑀦 𑀧𑁂𑀬𑁆𑀬𑀸𑀢𑀺 𑀘, 𑀫𑀳𑀦𑁆𑀢𑀸 𑀘 𑀢𑁂 𑀕𑀼𑀡𑀸 𑀘𑁂𑀢𑀺 𑀘, 𑀓𑀼𑀦𑁆𑀤𑀸𑀦𑀁 𑀲𑁄𑀪𑀸𑀢𑀺 𑀘, 𑀢𑀸𑀳𑀺 𑀲𑀫𑀸𑀦𑀁 𑀮𑀓𑁆𑀔𑀡𑀁 𑀬𑁂𑀲𑀦𑁆𑀢𑀺 𑀘 𑀯𑀺𑀕𑁆𑀕𑀳𑁄.

𑀅𑀓𑀢𑁆𑀢𑀭𑀺 𑀓𑀢𑁆𑀢𑀼𑀢𑀸

𑁧𑁫𑁭.

𑀫𑀸𑀭𑀸𑀭𑀺𑀩𑀮𑀯𑀺𑀲𑁆𑀲𑀝𑁆𑀞𑀸, 𑀓𑀼𑀡𑁆𑀞𑀸 𑀦𑀸𑀦𑀸𑀯𑀺𑀥𑀸’𑀬𑀼𑀥𑀸;

𑀮𑀚𑁆𑀚𑀫𑀸𑀦𑀸’𑀜𑁆𑀜𑀯𑁂𑀲𑁂𑀦, 𑀚𑀺𑀦 𑀧𑀸𑀤𑀸𑀦𑀢𑀸 𑀢𑀯.

𑁧𑁫𑁭. ‘‘𑀫𑀸𑀭𑀸’’𑀇𑀘𑁆𑀘𑀸𑀤𑀺. 𑀫𑀸𑀭𑁄𑀬𑁂𑀯 𑀅𑀭𑀺 𑀲𑀢𑁆𑀢𑀽𑀢𑀺 𑀫𑀸𑀭𑀸𑀭𑀻, 𑀢𑁂𑀦, 𑀩𑀮𑁂𑀦 𑀅𑀢𑁆𑀢𑀦𑁄 𑀲𑀢𑁆𑀢𑀺𑀬𑀸, 𑀢𑀲𑁆𑀲 𑀯𑀸 𑀩𑀮𑁂𑀦 𑀲𑁂𑀦𑀸𑀬 𑀯𑀺𑀲𑁆𑀲𑀝𑁆𑀞𑀸 𑀅𑀪𑀺𑀫𑀼𑀔𑀁 𑀙𑀟𑁆𑀟𑀺𑀢𑀸 𑀦𑀸𑀦𑀸𑀯𑀺𑀥𑀸 𑀅𑀦𑁂𑀓𑀧𑁆𑀧𑀓𑀸𑀭𑀸 ¶ 𑀆𑀬𑀼𑀥𑀸 𑀪𑀺𑀦𑁆𑀤𑀺𑀯𑀸𑀴𑀸𑀤𑀬𑁄 𑀓𑀼𑀡𑁆𑀞𑀸 [𑀪𑁂𑀡𑁆𑀟𑀺𑀯𑀸𑀮𑀸𑀤𑀬𑁄 (𑀓.)] 𑀧𑀭𑀺𑀘𑁆𑀘𑀢𑁆𑀢𑀢𑀺𑀔𑀺𑀡𑀪𑀸𑀯𑀸 𑀢𑀸𑀬𑁂𑀯 𑀓𑀼𑀡𑁆𑀞𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀮𑀚𑁆𑀚𑀫𑀸𑀦𑀸 ‘‘𑀮𑁄𑀓𑀧𑁆𑀧𑀢𑀻𑀢𑀸𑀦𑀼𑀪𑀸𑀯𑀸𑀦𑀫𑀫𑁆𑀳𑀸𑀓𑀫𑁆𑀧𑀺 𑀏𑀯𑀭𑀽𑀧𑀁 𑀚𑀸𑀢’’𑀦𑁆𑀢𑀺 𑀮𑀚𑁆𑀚𑀦𑁆𑀢𑀸 𑀅𑀜𑁆𑀜𑀯𑁂𑀲𑁂𑀦 ‘‘𑀓𑀣𑀁 𑀦𑀸𑀫 𑀧𑀭𑁂 𑀅𑀫𑁆𑀳𑁂 𑀦 𑀚𑀸𑀦𑁂𑀬𑁆𑀬𑀼’’𑀦𑁆𑀢𑀺 𑀅𑀢𑁆𑀢𑀦𑁄 𑀆𑀯𑀼𑀥𑀯𑁂𑀲𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀓𑀼𑀲𑀼𑀫𑀯𑁂𑀲𑁂𑀦, 𑀚𑀺𑀦𑀸𑀢𑀺 𑀆𑀫𑀦𑁆𑀢𑀦𑀁, 𑀢𑀯 𑀧𑀸𑀤𑀸𑀦𑀢𑀸 𑀧𑀸𑀤𑁂𑀲𑀼 𑀲𑀦𑁆𑀦𑀢𑀸.

𑁧𑁫𑁭. 𑀇𑀤𑀸𑀦𑀺 𑀓𑀢𑁆𑀢𑀼𑀥𑀫𑁆𑀫𑀲𑀫𑀸𑀥𑀺𑀦𑁄 𑀉𑀤𑀸𑀳𑀭𑀡𑀫𑀼𑀤𑁆𑀤𑀺𑀲𑀢𑀺 ‘‘𑀫𑀸𑀭𑀸𑀭𑀺’’𑀘𑁆𑀘𑀸𑀤𑀺𑀦𑀸. 𑀳𑁂 𑀚𑀺𑀦 𑀫𑀸𑀭𑀸𑀭𑀺𑀩𑀮𑀯𑀺𑀲𑁆𑀲𑀝𑁆𑀞𑀸 𑀫𑀸𑀭𑀲𑀢𑁆𑀢𑀼𑀦𑀸 𑀅𑀢𑁆𑀢𑀦𑁄 𑀲𑀢𑁆𑀢𑀺𑀬𑀸 𑀯𑀺𑀲𑁆𑀲𑀝𑁆𑀞𑀸, 𑀫𑀸𑀭𑀸𑀭𑀺𑀦𑁄 𑀯𑀸 𑀲𑁂𑀦𑀸𑀬 𑀯𑀺𑀲𑁆𑀲𑀝𑁆𑀞𑀸 𑀅𑀪𑀺𑀫𑀼𑀔𑁂 𑀧𑀸𑀢𑀺𑀢𑀸 𑀦𑀸𑀦𑀸𑀯𑀺𑀥𑀸𑀬𑀼𑀥𑀸 𑀅𑀦𑁂𑀓𑀧𑁆𑀧𑀓𑀸𑀭𑀪𑀺𑀦𑁆𑀤𑀺𑀯𑀸𑀴𑀉𑀲𑀼𑀲𑀢𑁆𑀢𑀺𑀢𑁄𑀫𑀭𑀸𑀤𑀬𑁄 𑀆𑀯𑀼𑀥𑀸 𑀓𑀼𑀡𑁆𑀞𑀸 𑀅𑀢𑀺𑀔𑀺𑀡𑀸 𑀮𑀚𑁆𑀚𑀫𑀸𑀦𑀸 ‘‘𑀓𑀲𑁆𑀫𑀸 𑀏𑀯𑀁 𑀮𑁄𑀓𑀧𑀲𑀺𑀤𑁆𑀥𑀸𑀦𑀼𑀪𑀸𑀯𑀸𑀦𑀫𑀫𑁆𑀳𑀸𑀓𑀫𑁆𑀧𑀺 𑀈𑀤𑀺𑀲𑀁 𑀯𑀺𑀧𑁆𑀧𑀓𑀸𑀭𑀫𑀳𑁄𑀲𑀻’’𑀢𑀺 𑀮𑀚𑁆𑀚𑀦𑁆𑀢𑀸 𑀅𑀜𑁆𑀜𑀯𑁂𑀲𑁂𑀦 ‘‘𑀓𑀣𑀫𑀫𑁆𑀳𑁂 𑀧𑀭𑁂 𑀦 𑀚𑀸𑀦𑁂𑀬𑁆𑀬𑀼’’𑀦𑁆𑀢𑀺 𑀆𑀯𑀼𑀥𑀯𑁂𑀲𑀁 𑀳𑀺𑀢𑁆𑀯𑀸 𑀢𑀤𑀜𑁆𑀜𑀪𑀽𑀢𑁂𑀦 𑀧𑀼𑀧𑁆𑀨𑀯𑁂𑀲𑁂𑀦 𑀢𑀯 𑀧𑀸𑀤𑀸𑀦𑀢𑀸 𑀧𑀸𑀤𑀲𑀫𑀻𑀧𑁂 𑀦𑀢𑀸 𑀅𑀳𑁂𑀲𑀼𑀦𑁆𑀢𑀺. 𑀏𑀢𑁆𑀣 𑀓𑀢𑁆𑀢𑀼𑀥𑀫𑁆𑀫𑀪𑀽𑀢𑀁 𑀮𑀚𑁆𑀚𑀦𑀜𑁆𑀘 𑀅𑀜𑁆𑀜𑀯𑁂𑀲𑁂𑀦 𑀧𑀭𑀺𑀯𑀢𑁆𑀢𑀦𑀜𑁆𑀘 𑀆𑀦𑀢𑀜𑁆𑀘𑁂𑀢𑀺 𑀇𑀫𑁂 𑀮𑀚𑁆𑀚𑀦𑀸𑀤𑀻𑀦𑀁 𑀅𑀓𑀢𑁆𑀢𑀼𑀪𑀽𑀢𑁂𑀲𑀼 𑀯𑀺𑀲𑀬𑁂𑀲𑀼 𑀆𑀭𑁄𑀧𑀺𑀢𑀸 𑀲𑀫𑀸𑀥𑀬𑁄 𑀦𑀸𑀫 𑀳𑁄𑀦𑁆𑀢𑀺. 𑀫𑀸𑀭𑁄 𑀏𑀯 𑀅𑀭𑀻𑀢𑀺 𑀘, 𑀩𑀮𑁂𑀦 𑀯𑀺𑀲𑁆𑀲𑀝𑁆𑀞𑀸𑀢𑀺 𑀘, 𑀫𑀸𑀭𑀸𑀭𑀺𑀦𑀸 𑀩𑀮𑀯𑀺𑀲𑁆𑀲𑀝𑁆𑀞𑀸𑀢𑀺 𑀘 𑀫𑀸𑀭𑀸𑀭𑀺𑀦𑁄 𑀩𑀮𑀁 𑀲𑁂𑀦𑀸𑀢𑀺 𑀘, 𑀢𑁂𑀦 𑀯𑀺𑀲𑁆𑀲𑀝𑁆𑀞𑀸𑀢𑀺 𑀘, 𑀦𑀸𑀦𑀸 𑀅𑀦𑁂𑀓𑀯𑀺𑀥𑀸 𑀧𑀓𑀸𑀭𑀸 𑀬𑁂𑀲𑀦𑁆𑀢𑀺 𑀘, 𑀅𑀜𑁆𑀜𑁂𑀲𑀁 𑀯𑁂𑀲𑁄𑀢𑀺 𑀘, 𑀅𑀜𑁆𑀜𑁄 𑀘 𑀲𑁄 𑀯𑁂𑀲𑁄 𑀘𑀸𑀢𑀺 𑀘, 𑀧𑀸𑀤𑁂𑀲𑀼 𑀆𑀦𑀢𑀸𑀢𑀺 𑀘 𑀯𑀺𑀕𑁆𑀕𑀳𑁄.

𑀓𑀞𑀺𑀦𑀲𑁆𑀲 𑀅𑀲𑀭𑀻𑀭𑁂

𑁧𑁫𑁮.

𑀫𑀼𑀦𑀺𑀦𑁆𑀤𑀪𑀸𑀡𑀼𑀫𑀸 𑀓𑀸𑀮𑁄-

𑀤𑀺𑀢𑁄 𑀩𑁄𑀥𑁄𑀤𑀬𑀸𑀘𑀮𑁂;

𑀲𑀤𑁆𑀥𑀫𑁆𑀫𑀭𑀁𑀲𑀺𑀦𑀸 𑀪𑀸𑀢𑀺,

𑀇𑀦𑁆𑀤𑀫𑀦𑁆𑀥𑀢𑀫𑀁 𑀧𑀭𑀁.

𑁧𑁫𑁮. ‘‘𑀫𑀼𑀦𑀺𑀦𑁆𑀤’’𑀇𑀘𑁆𑀘𑀸𑀤𑀺. ¶ 𑀩𑁄𑀥𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀤𑀺𑀲𑁄 𑀲𑁄𑀬𑁂𑀯 𑀯𑀸 𑀉𑀤𑀬𑀸𑀘𑀮𑁄 𑀉𑀤𑀬𑀧𑀩𑁆𑀩𑀢𑁄 𑀢𑀲𑁆𑀫𑀺𑀁 𑀓𑀸𑀮𑁂 𑀭𑀢𑁆𑀢𑀺𑀧𑀭𑀺𑀬𑀦𑁆𑀢𑁂 𑀅𑀪𑀺𑀦𑀺𑀓𑁆𑀔𑀦𑁆𑀢𑀲𑀫𑀬𑁂 𑀉𑀤𑀺𑀢𑁄 𑀧𑀸𑀢𑀼𑀪𑀽𑀢𑁄 𑀫𑀼𑀦𑀺𑀦𑁆𑀤𑁄 𑀫𑀼𑀦𑀺𑀦𑁆𑀤𑀲𑀤𑀺𑀲𑁄 𑀲𑁄𑀬𑁂𑀯 𑀯𑀸 𑀪𑀸𑀡𑀼𑀫𑀸 𑀲𑀽𑀭𑀺𑀬𑁄 𑀅𑀦𑁆𑀥𑀢𑀫𑀁 𑀅𑀦𑁆𑀥𑀓𑀸𑀭𑀁 𑀫𑁄𑀳𑀁 𑀯𑀸 𑀧𑀭𑀁 𑀅𑀘𑁆𑀘𑀦𑁆𑀢𑀫𑁂𑀯 𑀲𑀤𑁆𑀥𑀫𑁆𑀫𑀭𑀁𑀲𑀺𑀦𑀸 𑀲𑀤𑁆𑀥𑀫𑁆𑀫𑀲𑀤𑀺𑀲𑁂𑀦 𑀲𑀤𑁆𑀥𑀫𑁆𑀫𑀲𑀗𑁆𑀔𑀢𑁂𑀦 𑀯𑀸 𑀭𑀁𑀲𑀺𑀦𑀸 𑀪𑀺𑀦𑁆𑀤𑀁 𑀧𑀤𑀸𑀮𑁂𑀦𑁆𑀢𑁄 𑀪𑀸𑀢𑀺 𑀲𑁄𑀪𑀢𑀻𑀢𑀺.

𑁧𑁫𑁮. 𑀇𑀤𑀸𑀦𑀺 𑀓𑀞𑀺𑀦𑀥𑀫𑁆𑀫𑀲𑀫𑀸𑀥𑀺𑀦𑁄 𑀉𑀤𑀸𑀳𑀭𑀡𑀫𑀼𑀤𑁆𑀤𑀺𑀲𑀢𑀺 ‘‘𑀫𑀼𑀦𑀺𑀦𑁆𑀤𑀺’’𑀘𑁆𑀘𑀸𑀤𑀺𑀦𑀸. 𑀩𑁄𑀥𑁄𑀤𑀬𑀸𑀘𑀮𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀤𑀺𑀲𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀗𑁆𑀔𑀸𑀢𑁂 𑀯𑀸 𑀉𑀤𑀬𑀧𑀩𑁆𑀩𑀢𑁂 𑀓𑀸𑀮𑁄𑀤𑀺𑀢𑁄 𑀭𑀢𑁆𑀢𑀺𑀓𑁆𑀔𑀬𑁂 𑀫𑀸𑀭𑀧𑀭𑀸𑀚𑀺𑀢𑀲𑀫𑀬𑁂 𑀯𑀸 𑀉𑀤𑀺𑀢𑁄 𑀧𑀸𑀢𑀼𑀪𑀽𑀢𑁄 𑀫𑀼𑀦𑀺𑀦𑁆𑀤𑀪𑀸𑀦𑀼𑀫𑀸 𑀫𑀼𑀦𑀺𑀦𑁆𑀤𑀲𑀤𑀺𑀲𑁄 𑀫𑀼𑀦𑀺𑀦𑁆𑀤𑁄𑀬𑁂𑀯 𑀯𑀸 𑀲𑀽𑀭𑀺𑀬𑁄 𑀅𑀦𑁆𑀥𑀢𑀫𑀁 𑀧𑀓𑀢𑀺𑀖𑀦𑀦𑁆𑀥𑀓𑀸𑀭𑀁 𑀩𑀳𑀮𑀫𑁄𑀳𑀦𑁆𑀥𑀓𑀸𑀭𑀁 𑀲𑀤𑁆𑀥𑀫𑁆𑀫𑀭𑀁𑀲𑀺𑀦𑀸 𑀲𑀤𑁆𑀥𑀫𑁆𑀫𑀲𑀤𑀺𑀲𑁂𑀦 𑀲𑀤𑁆𑀥𑀫𑁆𑀫𑀪𑀽𑀢𑁂𑀦 𑀯𑀸 𑀓𑀺𑀭𑀡𑁂𑀦 𑀧𑀭𑀫𑀢𑀺𑀲𑀬𑁂𑀦 𑀪𑀺𑀦𑁆𑀤𑀁 𑀧𑀤𑀸𑀮𑁂𑀦𑁆𑀢𑁄 𑀪𑀸𑀢𑀺 𑀲𑁄𑀪𑀢𑀻𑀢𑀺. 𑀏𑀢𑁆𑀣 𑀣𑀤𑁆𑀥𑀥𑀫𑁆𑀫𑀪𑀽𑀢𑀁 𑀪𑁂𑀤𑀦𑀁 𑀅𑀲𑀭𑀻𑀭𑀪𑀽𑀢𑁂 𑀅𑀦𑁆𑀥𑀓𑀸𑀭𑁂 𑀩𑀼𑀤𑁆𑀥𑀺𑀬𑀸 𑀆𑀭𑁄𑀧𑀺𑀢𑀁 𑀲𑀫𑀸𑀥𑀺 𑀦𑀸𑀫 𑀳𑁄𑀢𑀺. 𑀫𑀼𑀦𑀻𑀦𑀁 𑀇𑀦𑁆𑀤𑁄𑀢𑀺 𑀘, 𑀲𑁄𑀬𑁂𑀯 𑀪𑀸𑀦𑀼𑀫𑀸𑀢𑀺 𑀘, 𑀩𑁄𑀥𑁄 𑀏𑀯 𑀉𑀤𑀬𑀸𑀘𑀮𑁄𑀢𑀺 𑀘, 𑀲𑀤𑁆𑀥𑀫𑁆𑀫𑁄 𑀏𑀯 𑀭𑀁𑀲𑀻𑀢𑀺 𑀘 𑀯𑀺𑀕𑁆𑀕𑀳𑁄.

𑁧𑁫𑁯.

𑀯𑀫𑀦𑀼𑀕𑁆𑀕𑀺𑀭𑀦𑀸𑀤𑁆𑀬𑁂’𑀢𑀁, 𑀕𑀼𑀡𑀯𑀼𑀢𑁆𑀬𑀧𑀭𑀺𑀘𑁆𑀘𑀼𑀢𑀁;

𑀅𑀢𑀺𑀲𑀼𑀦𑁆𑀤𑀭𑀫𑀜𑁆𑀜𑀁 𑀢𑀼, 𑀓𑀸𑀫𑀁 𑀯𑀺𑀦𑁆𑀤𑀢𑀺 𑀕𑀸𑀫𑁆𑀫𑀢𑀁.

𑁧𑁫𑁯. 𑀓𑁄𑀘𑀺 𑀥𑀫𑁆𑀫𑁄 𑀅𑀫𑀼𑀔𑁆𑀬𑀯𑀺𑀲𑀬𑁂 𑀩𑀦𑁆𑀥𑁂 𑀲𑁄𑀪𑀢𑁂, 𑀦 𑀫𑀼𑀔𑁆𑀬𑀯𑀺𑀲𑀬𑁂𑀢𑀺 𑀤𑀲𑁆𑀲𑀦𑁆𑀢𑁄 𑀆𑀳 ‘‘𑀯𑀫𑀦𑀁’’𑀇𑀘𑁆𑀘𑀸𑀤𑀺. 𑀯𑀫𑀦𑀜𑁆𑀘 𑀉𑀕𑁆𑀕𑀺𑀭𑀦𑀜𑁆𑀘, 𑀆𑀤𑀺𑀲𑀤𑁆𑀤𑁂𑀦 𑀯𑀺𑀭𑁂𑀘𑀦𑀸𑀤𑀺𑀧𑀭𑀺𑀕𑁆𑀕𑀳𑁄. 𑀏𑀢𑀁 𑀬𑀣𑀸𑀯𑀼𑀢𑁆𑀢𑀁 𑀕𑀼𑀡𑀸 𑀧𑀥𑀸𑀦𑁂𑀢𑀭𑀸 𑀧𑀲𑀺𑀤𑁆𑀥𑀯𑀺𑀲𑀬𑀸 𑀯𑀺𑀲𑀬𑀦𑁆𑀢𑀭𑀧𑀭𑀺𑀕𑁆𑀕𑀳𑀮𑀓𑁆𑀔𑀡𑀸 𑀯𑀼𑀢𑁆𑀢𑀺 𑀧𑀬𑁄𑀕𑀭𑀽𑀧𑀸, 𑀢𑀢𑁄 𑀅𑀧𑀭𑀺𑀘𑁆𑀘𑀼𑀢𑀁 𑀅𑀧𑀭𑀺𑀕𑀴𑀺𑀢𑀁 𑀲𑀦𑁆𑀢𑀁 𑀅𑀫𑀼𑀔𑁆𑀬𑀪𑀽𑀢𑀁 𑀅𑀢𑀺𑀲𑀼𑀦𑁆𑀤𑀭𑀁 𑀅𑀘𑁆𑀘𑀦𑁆𑀢𑀫𑀦𑁄𑀳𑀭𑀫𑀮𑀗𑁆𑀓𑀸𑀭𑀭𑀽𑀧𑀢𑁆𑀢𑀸, 𑀅𑀜𑁆𑀜𑀁 𑀢𑀼 𑀇𑀢𑀭𑀁 𑀧𑀦 𑀫𑀼𑀔𑁆𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀫𑀁 𑀏𑀓𑀦𑁆𑀢𑁂𑀦 ¶ 𑀕𑀸𑀫𑁆𑀫𑀢𑀁 𑀅𑀲𑀩𑁆𑀪𑀲𑀪𑀸𑀯𑀁 𑀩𑀦𑁆𑀥𑁂 𑀢𑀲𑁆𑀲𑀸𑀦𑀼𑀘𑀺𑀢𑀪𑀸𑀯𑀢𑁄 𑀯𑀺𑀦𑁆𑀤𑀢𑀺 𑀧𑀝𑀺𑀮𑀪𑀢𑀺 𑀧𑀲𑀯𑀢𑀻𑀢𑀺 𑀅𑀢𑁆𑀣𑁄.

𑁧𑁫𑁯. 𑀇𑀤𑀸𑀦𑀺 𑀇𑀫𑁂𑀲𑀼𑀬𑁂𑀯 𑀧𑀸𑀡𑀺𑀥𑀫𑁆𑀫𑀸𑀤𑀻𑀲𑀼 𑀓𑁄𑀘𑀺 𑀥𑀫𑁆𑀫𑁄 𑀅𑀫𑀼𑀔𑁆𑀬𑀯𑀺𑀲𑀬𑁂 𑀧𑀬𑀼𑀢𑁆𑀢𑁄 𑀧𑀲𑀢𑁆𑀣𑁄, 𑀫𑀼𑀔𑁆𑀬𑀯𑀺𑀲𑀬𑁂 𑀧𑀬𑀼𑀢𑁆𑀢𑁄 𑀅𑀧𑀲𑀢𑁆𑀣𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀫𑀦𑀼𑀕𑁆𑀕𑀺’’𑀘𑁆𑀘𑀸𑀤𑀺𑀫𑀸𑀳. 𑀏𑀢𑀁 𑀯𑀫𑀦𑀼𑀕𑁆𑀕𑀺𑀭𑀦𑀸𑀤𑀺 𑀯𑀫𑀦𑀉𑀕𑁆𑀕𑀺𑀭𑀦𑀯𑀺𑀭𑁂𑀘𑀦𑀸𑀤𑀺𑀓𑀁 𑀕𑀼𑀡𑀯𑀼𑀢𑁆𑀬𑀧𑀭𑀺𑀘𑁆𑀘𑀼𑀢𑀁 𑀅𑀫𑀼𑀔𑁆𑀬𑀧𑀬𑁄𑀕𑀢𑁄 𑀅𑀕𑀴𑀺𑀢𑀁 𑀅𑀫𑀼𑀔𑁆𑀬𑀪𑀽𑀢𑀁 𑀅𑀢𑀺𑀲𑀼𑀦𑁆𑀤𑀭𑀁 𑀲𑀩𑁆𑀩𑁂𑀲𑀁 𑀅𑀢𑀺𑀧𑀺𑀬𑀁 𑀳𑁄𑀢𑀺, 𑀅𑀜𑁆𑀜𑀁 𑀢𑀼 𑀉𑀢𑁆𑀢𑀢𑁄 𑀩𑁆𑀬𑀢𑀺𑀭𑁂𑀓𑀁 𑀫𑀼𑀔𑁆𑀬𑀯𑀺𑀲𑀬𑁂 𑀧𑀬𑀼𑀢𑁆𑀢𑀁 𑀯𑀫𑀦𑀼𑀕𑁆𑀕𑀺𑀭𑀦𑀸𑀤𑀺𑀓𑀁 𑀧𑀦 𑀓𑀸𑀫𑀁 𑀏𑀓𑀦𑁆𑀢𑁂𑀦 𑀕𑀸𑀫𑁆𑀫𑀢𑀁 𑀲𑀪𑀸𑀯𑀅𑀧𑁆𑀧𑀺𑀬𑀕𑀸𑀫𑁆𑀫𑀤𑁄𑀲𑀢𑀁 𑀯𑀺𑀦𑁆𑀤𑀢𑀺 𑀲𑁂𑀯𑀢𑀻𑀢𑀺. 𑀯𑀫𑀦𑀜𑁆𑀘 𑀉𑀕𑁆𑀕𑀺𑀭𑀦𑀜𑁆𑀘𑁂𑀢𑀺 𑀘, 𑀢𑀸𑀦𑀺 𑀆𑀤𑀻𑀦𑀺 𑀬𑀲𑁆𑀲𑁂𑀢𑀺 𑀘, 𑀕𑀼𑀡𑀸 𑀅𑀧𑁆𑀧𑀥𑀸𑀦𑀸 𑀯𑀼𑀢𑁆𑀢𑀻𑀢𑀺 𑀘, 𑀢𑀢𑁄 𑀅𑀧𑀭𑀺𑀘𑁆𑀘𑀼𑀢𑀦𑁆𑀢𑀺 𑀘 𑀯𑀺𑀕𑁆𑀕𑀳𑁄.

𑁧𑁬𑁦.

𑀓𑀦𑁆𑀢𑀻𑀦𑀁 𑀯𑀫𑀦𑀩𑁆𑀬𑀸𑀚𑀸, 𑀫𑀼𑀦𑀺𑀧𑀸𑀤𑀦𑀔𑀸𑀯𑀮𑀻;

𑀘𑀦𑁆𑀤𑀓𑀦𑁆𑀢𑀻 𑀧𑀺𑀯𑀦𑁆𑀢𑀻𑀯, 𑀦𑀺𑀧𑁆𑀧𑀪𑀁 𑀢𑀁 𑀓𑀭𑁄𑀦𑁆𑀢𑀺𑀬𑁄.

𑁧𑁬𑁦. 𑀉𑀤𑀸𑀳𑀭𑀢𑀺 ‘‘𑀓𑀦𑁆𑀢𑀻𑀦’’𑀫𑀺𑀘𑁆𑀘𑀸𑀤𑀺. 𑀫𑀼𑀦𑀺𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀸𑀤𑀦𑀔𑀸𑀦𑀁 𑀆𑀯𑀮𑀻 𑀲𑁂𑀡𑀺𑀬𑁄 𑀓𑀦𑁆𑀢𑀻𑀦𑀁 𑀅𑀢𑁆𑀢𑀦𑁄 𑀦𑀺𑀭𑀦𑁆𑀢𑀭𑀁 𑀦𑀺𑀲𑁆𑀲𑀭𑀦𑁆𑀢𑀻𑀦𑀁 𑀲𑁄𑀪𑀸𑀯𑀺𑀲𑁂𑀲𑀸𑀦𑀁 𑀯𑀫𑀦𑀩𑁆𑀬𑀸𑀚𑀸 𑀉𑀕𑁆𑀕𑀺𑀭𑀦𑀮𑁂𑀲𑁂𑀦 𑀘𑀦𑁆𑀤𑀓𑀦𑁆𑀢𑀻 𑀘𑀦𑁆𑀤𑀘𑁆𑀙𑀯𑀺𑀬𑁄 𑀲𑀩𑁆𑀩𑀢𑁆𑀣 𑀧𑀢𑁆𑀣𑀝𑀢𑁆𑀢𑀸 𑀧𑀺𑀯𑀦𑁆𑀢𑀻𑀯 𑀧𑀸𑀦𑀁 𑀓𑀭𑁄𑀦𑁆𑀢𑀻𑀢𑀺 𑀢𑀓𑁆𑀓𑁂𑀫𑀺. 𑀓𑀻𑀤𑀺𑀲𑀻 𑀯𑀺𑀬𑀸𑀢𑀺 𑀧𑀭𑀺𑀓𑀧𑁆𑀧𑀦𑀸𑀩𑀻𑀚𑀫𑀸𑀳 ‘‘𑀦𑀺𑀧𑁆𑀧𑀪’’𑀦𑁆𑀢𑀺𑀆𑀤𑀺. 𑀢𑀁 𑀘𑀦𑁆𑀤𑀁 𑀦𑀺𑀧𑁆𑀧𑀪𑀁 𑀧𑀪𑀸𑀯𑀺𑀭𑀳𑀺𑀢𑀁 𑀓𑀭𑁄𑀦𑁆𑀢𑀺𑀬𑁄 𑀯𑀺𑀤𑀳𑀫𑀸𑀦𑀸. 𑀇𑀤𑀜𑁆𑀳𑀺 𑀓𑀧𑁆𑀧𑀦𑀸𑀩𑀻𑀚𑀁 𑀬𑀢𑁄 𑀦𑀔𑀲𑁄𑀪𑀸𑀮𑀺𑀗𑁆𑀕𑀦𑁂𑀦 𑀘𑀦𑁆𑀤𑀲𑁆𑀲 𑀲𑁄𑀪𑀸𑀯𑀢𑁄 𑀦𑀺𑀧𑁆𑀧𑀪𑀢𑁆𑀢𑀁 𑀧𑀲𑁆𑀲𑀺𑀢𑁆𑀯𑀸 𑀫𑀳𑀢𑁆𑀢𑀜𑁆𑀘 𑀢𑀲𑁆𑀲𑀸 𑀦𑀔𑀸𑀯𑀮𑀺𑀬𑁄 𑀘𑀦𑁆𑀤𑀓𑀦𑁆𑀢𑀻 𑀧𑀺𑀯𑀦𑁆𑀢𑀻𑀢𑀺 𑀧𑀭𑀺𑀓𑀧𑁆𑀧𑁂𑀢𑀺 𑀓𑀦𑁆𑀢𑀻𑀦𑀜𑁆𑀘 𑀯𑀫𑀦𑀩𑁆𑀬𑀸𑀚𑀁.

𑁧𑁬𑁦. 𑀇𑀝𑁆𑀞𑀯𑀺𑀲𑀬𑁂 𑀧𑀬𑀼𑀢𑁆𑀢𑀯𑀫𑀦𑀼𑀕𑁆𑀕𑀺𑀭𑀦𑀸𑀤𑀻𑀦𑀫𑀼𑀤𑀸𑀳𑀭𑀡𑀫𑀼𑀤𑁆𑀤𑀺𑀲𑀢𑀺 ‘‘𑀓𑀦𑁆𑀢𑀻𑀦’’𑀫𑀺𑀘𑁆𑀘𑀸𑀤𑀺𑀦𑀸. 𑀫𑀼𑀦𑀺𑀧𑀸𑀤𑀦𑀔𑀸𑀯𑀮𑀻 𑀫𑀼𑀦𑀺𑀧𑀸𑀤𑀦𑀔𑀲𑁂𑀡𑀺𑀬𑁄 𑀓𑀦𑁆𑀢𑀻𑀦𑀁 𑀅𑀢𑁆𑀢𑀦𑁄 𑀘𑀦𑁆𑀤𑀫𑀭𑀻𑀘𑀺𑀲𑀤𑀺𑀲𑀲𑁄𑀪𑀸𑀦𑀁 𑀯𑀫𑀦𑀩𑁆𑀬𑀸𑀚𑀸 𑀉𑀕𑁆𑀕𑀺𑀭𑀦𑀮𑁂𑀲𑁂𑀦 𑀢𑀁 𑀦𑀺𑀫𑁆𑀫𑀮𑀘𑀦𑁆𑀤𑀁 𑀦𑀺𑀧𑁆𑀧𑀪𑀁 𑀓𑀭𑁄𑀦𑁆𑀢𑀺𑀬𑁄 𑀅𑀢𑁆𑀢𑀦𑁄 𑀲𑀩𑁆𑀩𑀢𑁆𑀣 𑀧𑀢𑁆𑀣𑀝𑀢𑁆𑀢𑀸 𑀦𑀺𑀧𑁆𑀧𑀪𑀁 𑀓𑀭𑁄𑀦𑁆𑀢𑀺𑀬𑁄 𑀘𑀦𑁆𑀤𑀓𑀦𑁆𑀢𑀻 𑀘𑀦𑁆𑀤𑀭𑀁𑀲𑀺𑀬𑁄 ¶ 𑀧𑀺𑀯𑀦𑁆𑀢𑀺 𑀫𑀜𑁆𑀜𑁂. 𑀦𑀔𑀭𑀁𑀲𑀻𑀦𑀁 𑀲𑀩𑁆𑀩𑀢𑁆𑀣 𑀧𑀢𑁆𑀣𑀝𑀢𑁆𑀢𑀸 𑀲𑀧𑁆𑀧𑀪𑀲𑁆𑀲𑀸𑀧𑀺 𑀘𑀦𑁆𑀤𑀲𑁆𑀲 𑀦𑀺𑀧𑁆𑀧𑀪𑀢𑁆𑀢𑀜𑁆𑀘 𑀦𑀔𑀭𑀁𑀲𑀻𑀦𑀁 𑀅𑀥𑀺𑀓𑀢𑁆𑀢𑀜𑁆𑀘 𑀤𑀺𑀲𑁆𑀯𑀸 𑀘𑀦𑁆𑀤𑀓𑀦𑁆𑀢𑀻 𑀧𑀺𑀯𑀦𑁆𑀢𑀺 𑀇𑀯𑁂𑀢𑀺 𑀦𑀔𑀸𑀯𑀮𑀻𑀦𑀁 𑀘𑀦𑁆𑀤𑀓𑀦𑁆𑀢𑀺𑀧𑀺𑀯𑀦𑀜𑁆𑀘 𑀲𑀓𑀓𑀦𑁆𑀢𑀺𑀯𑀫𑀦𑀜𑁆𑀘 𑀧𑀓𑀢𑀺 𑀦 𑀳𑁄𑀢𑀺, 𑀩𑁆𑀬𑀸𑀚𑀫𑀺𑀢𑀺 𑀓𑀯𑀺𑀦𑀸 𑀧𑀭𑀺𑀓𑀧𑁆𑀧𑀺𑀢𑀁 𑀳𑁄𑀢𑀺. 𑀏𑀢𑁆𑀣 𑀪𑀢𑁆𑀢𑀲𑀺𑀢𑁆𑀣𑀸𑀤𑀺𑀫𑀼𑀔𑁆𑀬𑀯𑀺𑀲𑀬𑀢𑁄 𑀅𑀜𑁆𑀜𑀓𑀦𑁆𑀢𑀺𑀲𑀗𑁆𑀔𑀢𑀅𑀫𑀼𑀔𑁆𑀬𑀯𑀺𑀲𑀬𑁂 𑀧𑀬𑀼𑀢𑁆𑀢𑀁 𑀯𑀫𑀦𑀁 𑀕𑀼𑀡𑀯𑀼𑀢𑁆𑀢𑀻𑀢𑀺 𑀜𑀸𑀢𑀩𑁆𑀩𑀁. 𑀯𑀫𑀦𑀫𑁂𑀯 𑀩𑁆𑀬𑀸𑀚𑀫𑀺𑀢𑀺 𑀘, 𑀫𑀼𑀦𑀺𑀦𑁄 𑀧𑀸𑀤𑀸𑀢𑀺 𑀘, 𑀢𑁂𑀲𑀼 𑀦𑀔𑀸𑀢𑀺 𑀘, 𑀢𑁂𑀲𑀁 𑀆𑀯𑀮𑀺𑀬𑁄𑀢𑀺 𑀘, 𑀘𑀦𑁆𑀤𑀲𑁆𑀲 𑀓𑀦𑁆𑀢𑀺𑀬𑁄𑀢𑀺 𑀘, 𑀦𑀺𑀕𑁆𑀕𑀢𑁄 𑀧𑀪𑀸𑀳𑀻𑀢𑀺 𑀘 𑀯𑀺𑀕𑁆𑀕𑀳𑁄.

𑁧𑁬𑁧.

𑀅𑀘𑀺𑀢𑁆𑀢𑀓𑀢𑁆𑀢𑀼𑀓𑀁 𑀭𑀼𑀛-𑀫𑀺𑀘𑁆𑀘𑁂𑀯𑀁 𑀕𑀼𑀡𑀓𑀫𑁆𑀫 𑀢𑀁 [𑀕𑀼𑀡𑀓𑀫𑁆𑀫𑀓𑀁 (𑀲𑀻.)];

𑀲𑀘𑀺𑀢𑁆𑀢𑀓𑀢𑁆𑀢𑀼𑀓𑀁 𑀧𑁂’𑀢𑀁, 𑀕𑀼𑀡𑀓𑀫𑁆𑀫𑀁 𑀬𑀤𑀼’𑀢𑁆𑀢𑀫𑀁.

𑁧𑁬𑁧. 𑀬𑀣𑀸𑀯𑀼𑀢𑁆𑀢𑀁 𑀦𑀺𑀕𑀫𑁂𑀢𑀺 ‘‘𑀅𑀘𑀺𑀢𑁆𑀢’’𑀇𑀘𑁆𑀘𑀸𑀤𑀺𑀦𑀸. 𑀇𑀘𑁆𑀘𑁂𑀯𑀁 𑀅𑀘𑀺𑀢𑁆𑀢𑁄 𑀓𑀢𑁆𑀢𑀸 𑀬𑀲𑁆𑀲 𑀢𑀁 𑀅𑀘𑀺𑀢𑁆𑀢𑀓𑀢𑁆𑀢𑀼𑀓𑀁. 𑀕𑀼𑀡𑁄 𑀓𑀫𑁆𑀫𑀁 𑀬𑀲𑁆𑀲 𑀢𑀁 𑀕𑀼𑀡𑀓𑀫𑁆𑀫𑀁. 𑀢𑀜𑁆𑀘 𑀯𑀫𑀦𑀸𑀤𑀺 𑀭𑀼𑀛𑀫𑀢𑀺𑀫𑀦𑁄𑀳𑀭𑀁 𑀪𑀯𑀢𑀺 𑀩𑀦𑁆𑀥𑁄𑀘𑀺𑀢𑀢𑁆𑀢𑀸. 𑀦𑀔𑀸𑀯𑀮𑀺𑀬𑁄 𑀳𑀺 𑀅𑀘𑀺𑀢𑁆𑀢𑀓𑀢𑁆𑀢𑀸𑀭𑁄, 𑀓𑀦𑁆𑀢𑀺𑀬𑁄 𑀕𑀼𑀡𑀓𑀫𑁆𑀫𑀦𑁆𑀢𑀺 𑀯𑀫𑀦𑀫𑀢𑁆𑀭𑀸𑀢𑀺𑀲𑀼𑀦𑁆𑀤𑀭𑀁. 𑀦𑁂𑀤𑀫𑁂𑀯 𑀭𑀼𑀛𑀦𑁆𑀢𑀺 𑀆𑀳 ‘‘𑀲𑀘𑀺𑀢𑁆𑀢’’𑀇𑀘𑁆𑀘𑀸𑀤𑀺. 𑀏𑀢𑀁 𑀯𑀫𑀦𑀸𑀤𑀺𑀓𑀁 𑀲𑀘𑀺𑀢𑁆𑀢𑀓𑀢𑁆𑀢𑀼𑀓𑀫𑁆𑀧𑀺𑀬𑀤𑀺𑀕𑀼𑀡𑀓𑀫𑁆𑀫𑀁, 𑀉𑀢𑁆𑀢𑀫𑀁 𑀲𑁂𑀝𑁆𑀞𑀁 𑀩𑀦𑁆𑀥𑁄𑀘𑀺𑀢𑀢𑁆𑀢𑀸.

𑁧𑁬𑁧. 𑀅𑀦𑀦𑁆𑀢𑀭𑁄𑀤𑀸𑀳𑀭𑀡𑀲𑁆𑀲 𑀧𑀲𑀢𑁆𑀣𑀢𑁆𑀢𑀜𑁆𑀘 𑀓𑀫𑁆𑀫𑀦𑀺 𑀕𑀼𑀡𑁂 𑀲𑀢𑀺 𑀲𑀘𑀺𑀢𑁆𑀢𑀓𑀢𑁆𑀢𑀼𑀓𑀯𑀫𑀦𑀸𑀤𑀺𑀓𑀜𑁆𑀘 𑀇𑀝𑁆𑀞𑀫𑀺𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀘𑀺𑀢𑁆𑀢𑀓𑀢𑁆𑀢𑀼𑀓’’𑀫𑀺𑀘𑁆𑀘𑀸𑀤𑀺𑀫𑀸𑀳. 𑀇𑀘𑁆𑀘𑁂𑀯𑀁 𑀇𑀫𑀺𑀦𑀸 𑀧𑀓𑀸𑀭𑁂𑀦 𑀅𑀘𑀺𑀢𑁆𑀢𑀓𑀢𑁆𑀢𑀼𑀓𑀁 𑀦𑀔𑀸𑀯𑀮𑀺𑀲𑀗𑁆𑀔𑀸𑀢𑀅𑀯𑀺𑀜𑁆𑀜𑀸𑀡𑀓𑀓𑀢𑁆𑀢𑀼𑀯𑀦𑁆𑀢𑀁 𑀕𑀼𑀡𑀓𑀫𑁆𑀫𑀁 𑀦𑀔𑀓𑀦𑁆𑀢𑀺𑀲𑀗𑁆𑀔𑀸𑀢𑀅𑀧𑁆𑀧𑀥𑀸𑀦𑀓𑀫𑁆𑀫𑀯𑀦𑁆𑀢𑀁 𑀯𑀫𑀦𑀸𑀤𑀺𑀓𑀁 𑀭𑀼𑀛𑀁 𑀭𑀘𑀦𑀸𑀬 𑀉𑀘𑀺𑀢𑀢𑁆𑀢𑀸 𑀭𑀼𑀘𑀺𑀚𑀦𑀓𑀁 𑀳𑁄𑀢𑀺, 𑀏𑀢𑀁 𑀯𑀫𑀦𑀸𑀤𑀺𑀓𑀁 𑀲𑀘𑀺𑀢𑁆𑀢𑀓𑀢𑁆𑀢𑀼𑀓𑀫𑁆𑀧𑀺 𑀲𑀯𑀺𑀜𑁆𑀜𑀸𑀡𑀓𑀓𑀢𑁆𑀢𑀼𑀯𑀦𑁆𑀢𑀫𑁆𑀧𑀺 𑀬𑀤𑀺 𑀕𑀼𑀡𑀓𑀫𑁆𑀫𑀁 𑀅𑀫𑀼𑀔𑁆𑀬𑀓𑀫𑁆𑀫𑀁 𑀘𑁂, 𑀉𑀢𑁆𑀢𑀫𑀁 𑀯𑀺𑀲𑀺𑀝𑁆𑀞𑀫𑁂𑀯, ‘‘𑀓𑀦𑁆𑀢𑀻𑀦’’𑀦𑁆𑀢𑀺 𑀪𑀸𑀯𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀺𑀬𑀸 𑀲𑀢𑀺𑀧𑀺 𑀯𑀫𑀦𑀓𑁆𑀭𑀺𑀬𑀸𑀬 𑀓𑀫𑁆𑀫𑀢𑁆𑀢𑀁 𑀦𑀸𑀢𑀺𑀯𑀢𑁆𑀢𑀢𑀺. 𑀦𑀢𑁆𑀣𑀺 𑀘𑀺𑀢𑁆𑀢𑀁 𑀬𑁂𑀲𑀦𑁆𑀢𑀺 𑀘, 𑀅𑀘𑀺𑀢𑁆𑀢𑀸 𑀓𑀢𑁆𑀢𑀸𑀭𑁄 𑀬𑀲𑁆𑀲𑀸𑀢𑀺 𑀘, 𑀕𑀼𑀡𑁄 𑀓𑀫𑁆𑀫𑀁 𑀬𑀲𑁆𑀲𑁂𑀢𑀺 𑀘, 𑀲𑀳 ¶ 𑀘𑀺𑀢𑁆𑀢𑁂𑀦 𑀯𑀢𑁆𑀢𑀫𑀸𑀦𑁄𑀢𑀺 𑀘 𑀯𑀸𑀓𑁆𑀬𑀁. 𑀇𑀢𑀺 𑀦𑀺𑀤𑀲𑁆𑀲𑀦𑁂 𑀏𑀯𑀁 𑀧𑀓𑀸𑀭𑁂 𑀦𑀺𑀧𑀸𑀢𑁄, 𑀅𑀣 𑀯𑀸 𑀯𑀘𑀦𑀯𑀘𑀦𑀻𑀬𑀸𑀦𑀁 [𑀯𑀘𑀦𑀯𑀘𑀦𑀻𑀬𑀸𑀤𑀻𑀦𑀁 (𑀓.)] 𑀦𑀺𑀕𑀫𑀸𑀭𑀫𑁆𑀪𑁂 𑀦𑀺𑀧𑀸𑀢𑀲𑀫𑀼𑀤𑀸𑀬𑁄.

𑁧𑁬𑁨.

𑀉𑀕𑁆𑀕𑀺𑀭𑀦𑁆𑀢𑁄𑀯 𑀲 𑀲𑁆𑀦𑁂𑀳-𑀭𑀲𑀁 𑀚𑀺𑀦𑀯𑀭𑁄 𑀚𑀦𑁂;

𑀪𑀸𑀲𑀦𑁆𑀢𑁄 𑀫𑀥𑀼𑀭𑀁 𑀥𑀫𑁆𑀫𑀁, 𑀓𑀁 𑀦 𑀲𑀫𑁆𑀧𑀻𑀡𑀬𑁂 𑀚𑀦𑀁.

𑁧𑁬𑁨. 𑀢𑀤𑀼𑀤𑀸𑀳𑀭𑀢𑀺 ‘‘𑀉𑀕𑁆𑀕𑀺𑀭𑀦𑁆𑀢𑁄𑀯𑀸’’𑀢𑀺𑀆𑀤𑀺𑀦𑀸. 𑀲𑁄 𑀚𑀺𑀦𑀯𑀭𑁄 𑀚𑀦𑁂 𑀲𑀓𑀮𑀲𑀢𑁆𑀢𑀦𑀺𑀓𑀸𑀬𑁂 𑀲𑁆𑀦𑁂𑀳𑀭𑀲𑀁 𑀅𑀢𑁆𑀢𑀦𑁄 𑀧𑁂𑀫𑀲𑀗𑁆𑀔𑀸𑀢𑀁 𑀅𑀦𑀼𑀭𑀸𑀕𑀁 𑀉𑀕𑁆𑀕𑀺𑀭𑀦𑁆𑀢𑁄𑀯 𑀯𑀫𑀦𑁆𑀢𑁄 𑀯𑀺𑀬 𑀫𑀥𑀼𑀭𑀁 𑀅𑀢𑀺𑀧𑀡𑀻𑀢𑀁 𑀥𑀫𑁆𑀫𑀁 𑀪𑀸𑀲𑀦𑁆𑀢𑁄 𑀓𑀁 𑀚𑀦𑀁 𑀦 𑀲𑀫𑁆𑀧𑀻𑀡𑀬𑁂, 𑀲𑀩𑁆𑀩𑀫𑁂𑀯 𑀲𑀫𑁆𑀧𑀻𑀡𑁂𑀢𑀺. 𑀏𑀢𑁆𑀣 𑀚𑀺𑀦𑀯𑀭𑁄 𑀓𑀢𑁆𑀢𑀸 𑀲𑀘𑀺𑀢𑁆𑀢𑁄, 𑀲𑁆𑀦𑁂𑀳𑀭𑀲𑁄 𑀕𑀼𑀡𑀓𑀫𑁆𑀫𑀁.

𑁧𑁬𑁨. 𑀇𑀤𑀸𑀦𑀺 𑀲𑀘𑀺𑀢𑁆𑀢𑀓𑀓𑀢𑁆𑀢𑀼𑀧𑀓𑁆𑀔𑁂 𑀉𑀤𑀸𑀳𑀭𑀡𑀫𑀼𑀤𑁆𑀤𑀺𑀲𑀢𑀺 ‘‘𑀉𑀕𑁆𑀕𑀺𑀭𑀦𑁆𑀢𑁄’’𑀘𑁆𑀘𑀸𑀤𑀺𑀦𑀸. 𑀲𑁄 𑀚𑀺𑀦𑀯𑀭𑁄 𑀚𑀦𑁂 𑀲𑀓𑀮𑀲𑀢𑁆𑀢𑀦𑀺𑀓𑀸𑀬𑁂 𑀲𑁆𑀦𑁂𑀳𑀭𑀲𑀁 𑀅𑀢𑁆𑀢𑀦𑁄 𑀧𑁂𑀫𑀲𑀗𑁆𑀔𑀸𑀢𑀅𑀦𑀼𑀭𑀸𑀕𑀁 𑀉𑀕𑁆𑀕𑀺𑀭𑀦𑁆𑀢𑁄 𑀇𑀯 𑀯𑀫𑀦𑁆𑀢𑁄 𑀯𑀺𑀬 𑀫𑀥𑀼𑀭𑀁 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀪𑀸𑀯𑁂𑀦 𑀧𑀡𑀻𑀢𑀁 𑀥𑀫𑁆𑀫𑀁 𑀲𑀤𑁆𑀥𑀫𑁆𑀫𑀁 𑀪𑀸𑀲𑀦𑁆𑀢𑁄 𑀤𑁂𑀲𑁂𑀦𑁆𑀢𑁄 𑀬𑀣𑀸𑀲𑀬𑀁 𑀯𑀤𑀦𑁆𑀢𑁄 𑀓𑀁 𑀚𑀦𑀁 𑀓𑀻𑀤𑀺𑀲𑀁 𑀧𑀼𑀕𑁆𑀕𑀮𑀁 𑀦 𑀲𑀫𑁆𑀧𑀻𑀡𑀬𑁂, 𑀧𑀻𑀡𑁂𑀢𑀺 𑀏𑀯𑀸𑀢𑀺. 𑀏𑀢𑁆𑀣 𑀉𑀕𑁆𑀕𑀺𑀭𑀦𑀁 𑀚𑀺𑀦𑀯𑀭𑀲𑀗𑁆𑀔𑀢𑀲𑀘𑀺𑀢𑁆𑀢𑀓𑀓𑀢𑁆𑀢𑀼𑀯𑀦𑁆𑀢𑀫𑁆𑀧𑀺 𑀲𑁆𑀦𑁂𑀳𑀭𑀲𑀲𑀗𑁆𑀔𑀸𑀢𑀅𑀫𑀼𑀔𑁆𑀬𑀓𑀫𑁆𑀫𑀬𑀼𑀢𑁆𑀢𑀢𑁆𑀢𑀸 𑀧𑀲𑀢𑁆𑀣𑀁 𑀳𑁄𑀢𑀺. 𑀲𑁆𑀦𑁂𑀳𑁄 𑀏𑀯 𑀭𑀲𑁄 𑀅𑀦𑀼𑀭𑀸𑀕𑁄𑀢𑀺 𑀯𑀺𑀕𑁆𑀕𑀳𑁄.

𑁧𑁬𑁩.

𑀬𑁄 𑀲𑀤𑁆𑀤𑀲𑀢𑁆𑀣𑀓𑀼𑀲𑀮𑁄 𑀓𑀼𑀲𑀮𑁄 𑀦𑀺𑀖𑀡𑁆𑀝𑀼-

𑀙𑀦𑁆𑀤𑁄𑀅𑀮𑀗𑁆𑀓𑀢𑀺𑀲𑀼 𑀦𑀺𑀘𑁆𑀘𑀓𑀢𑀸𑀪𑀺𑀬𑁄𑀕𑁄;

𑀲𑁄’𑀬𑀁 𑀓𑀯𑀺𑀢𑁆𑀢𑀯𑀺𑀓𑀮𑁄𑀧𑀺 𑀓𑀯𑀻𑀲𑀼 𑀲𑀗𑁆𑀔𑁆𑀬-

𑀫𑁄𑀕𑀬𑁆𑀳 𑀯𑀺𑀦𑁆𑀤𑀢𑀺 𑀳𑀺 𑀓𑀺𑀢𑁆𑀢𑀺’𑀫𑀫𑀦𑁆𑀤𑀭𑀽𑀧𑀁.

𑀇𑀢𑀺 𑀲𑀗𑁆𑀖𑀭𑀓𑁆𑀔𑀺𑀢𑀫𑀳𑀸𑀲𑀸𑀫𑀺𑀧𑀸𑀤𑀯𑀺𑀭𑀘𑀺𑀢𑁂

𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂

𑀕𑀼𑀡𑀸𑀯𑀩𑁄𑀥𑁄 𑀦𑀸𑀫 𑀢𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.

𑁧𑁬𑁩. 𑀕𑀦𑁆𑀣𑀦𑁆𑀢𑀭𑀸𑀳𑀺𑀢𑀯𑀸𑀲𑀦𑀸𑀬, ¶ 𑀢𑀤𑀦𑀼𑀩𑀦𑁆𑀥𑀧𑀝𑀺𑀪𑀸𑀦𑁂 𑀘𑀸𑀯𑀺𑀚𑁆𑀚𑀫𑀸𑀦𑁂𑀧𑀺 𑀲𑀼𑀢𑁂𑀦 𑀅𑀪𑀺𑀬𑁄𑀕𑀩𑀮𑁂𑀦 𑀓𑀯𑀺𑀢𑀸 𑀓𑀺𑀢𑁆𑀢𑀺 𑀘 𑀢𑀤𑀦𑀼𑀕𑀢𑀸 𑀲𑀫𑀼𑀧𑀮𑀩𑁆𑀪𑀢𑀻𑀢𑀺 𑀲𑀫𑀦𑀼𑀲𑀸𑀲𑀢𑀺 ‘‘𑀬𑁄’’𑀇𑀘𑁆𑀘𑀸𑀤𑀺𑀦𑀸. 𑀲𑀤𑁆𑀤𑀲𑀢𑁆𑀣𑁂 𑀩𑁆𑀬𑀸𑀓𑀭𑀡𑁂 𑀓𑀺𑀲𑁆𑀫𑀺𑀜𑁆𑀘𑀺 ‘‘𑀇𑀤𑀫𑁂𑀯𑁂’’𑀢𑀺 𑀦𑀺𑀬𑀫𑀸𑀪𑀸𑀯𑀸 𑀓𑀼𑀲𑀮𑁄 𑀙𑁂𑀓𑁄 𑀦𑀺𑀖𑀡𑁆𑀝𑀼𑀫𑁆𑀳𑀺 𑀅𑀪𑀺𑀥𑀸𑀦𑀲𑀢𑁆𑀣𑁂 𑀘 𑀙𑀦𑁆𑀤𑀲𑀺 𑀯𑀼𑀢𑁆𑀢𑀺𑀚𑀸𑀢𑀺𑀧𑁆𑀧𑀧𑀜𑁆𑀘𑀧𑀓𑀸𑀲𑀓𑀙𑀦𑁆𑀤𑁄𑀯𑀺𑀘𑀺𑀢𑀺𑀲𑀢𑁆𑀣𑁂 𑀘 𑀅𑀮𑀗𑁆𑀓𑀢𑀺𑀲𑀼 𑀅𑀮𑀗𑁆𑀓𑀸𑀭𑀲𑀢𑁆𑀣𑁂 𑀘 𑀓𑀼𑀲𑀮𑁄 𑀦 𑀓𑁂𑀯𑀮𑀁 𑀲𑀤𑁆𑀤𑀲𑀢𑁆𑀣𑁂𑀬𑁂𑀯, 𑀅𑀣 𑀘 𑀧𑀦 𑀦𑀺𑀘𑁆𑀘𑀫𑀦𑀯𑀭𑀢𑀁 𑀤𑀺𑀯𑀸 𑀘 𑀭𑀢𑁆𑀢𑁄 𑀘 𑀓𑀢𑁄 𑀅𑀪𑀺𑀬𑁄𑀕𑁄 𑀯𑀸𑀬𑀸𑀫𑁄 𑀭𑀘𑀦𑀸𑀯𑀺𑀲𑀬𑁂 𑀬𑀲𑁆𑀲 𑀲𑁄𑀬𑀁 𑀓𑀯𑀺𑀢𑁆𑀢𑀯𑀺𑀓𑀮𑁄𑀧𑀺 𑀩𑀦𑁆𑀥𑀓𑀭𑀡𑀲𑀗𑁆𑀔𑀸𑀢𑀓𑀯𑀺𑀕𑀼𑀡𑀧𑀭𑀺𑀳𑀻𑀦𑁄𑀧𑀺 𑀓𑀯𑀻𑀲𑀼 𑀓𑀯𑀺𑀕𑀼𑀡𑁄𑀧𑁂𑀢𑁂𑀲𑀼 𑀲𑀗𑁆𑀔𑁆𑀬𑀁 𑀕𑀡𑀦𑀁 𑀑𑀕𑀬𑁆𑀳 𑀧𑀝𑀺𑀮𑀪𑀺𑀢𑁆𑀯𑀸 𑀅𑀫𑀦𑁆𑀤𑀭𑀽𑀧𑀁 𑀅𑀢𑀺𑀩𑀳𑀼𑀁 𑀓𑀺𑀢𑁆𑀢𑀺𑀁 𑀧𑀭𑀺𑀲𑀼𑀤𑁆𑀥𑀩𑀦𑁆𑀥𑀭𑀘𑀦𑀸𑀮𑀓𑁆𑀔𑀡𑀁 𑀢𑀧𑁆𑀧𑀪𑀯𑀁 𑀔𑁆𑀬𑀸𑀢𑀁 𑀯𑀺𑀦𑁆𑀤𑀢𑀺 𑀧𑀝𑀺𑀮𑀪𑀢𑁂𑀯𑀸𑀢𑀺.

𑀇𑀢𑀺 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑁂 𑀫𑀳𑀸𑀲𑀸𑀫𑀺𑀦𑀸𑀫𑀺𑀓𑀸𑀬𑀁

𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑀝𑀻𑀓𑀸𑀬𑀁

𑀕𑀼𑀡𑀸𑀯𑀩𑁄𑀥𑀧𑀭𑀺𑀘𑁆𑀙𑁂𑀤𑁄 𑀢𑀢𑀺𑀬𑁄.

𑁧𑁬𑁩. 𑀇𑀤𑀸𑀦𑀺 𑀉𑀤𑁆𑀤𑁂𑀲𑀓𑁆𑀓𑀫𑁂𑀦 𑀲𑀤𑁆𑀤𑀸𑀮𑀗𑁆𑀓𑀸𑀭𑁂 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀩𑁆𑀬𑀸𑀓𑀭𑀡𑀦𑀺𑀖𑀡𑁆𑀝𑀼𑀙𑀦𑁆𑀤𑁄𑀧𑀭𑀺𑀯𑀸𑀭𑀺𑀢𑁂 𑀇𑀫𑀲𑁆𑀫𑀺𑀁 𑀦𑀺𑀭𑀦𑁆𑀢𑀭𑀸𑀪𑀺𑀬𑁄𑀕𑁄 𑀇𑀳𑀮𑁄𑀓𑀺𑀬𑀸𑀤𑀺𑀫𑀳𑀦𑁆𑀢𑀬𑀲𑀲𑁆𑀲 𑀓𑀸𑀭𑀡𑀫𑀺𑀢𑀺 𑀲𑀺𑀲𑁆𑀲𑀸𑀦𑀫𑀦𑀼𑀲𑀸𑀲𑀦𑁆𑀢𑁄 ‘‘𑀬𑁄 𑀲𑀤𑁆𑀤𑀲𑀢𑁆𑀣𑀓𑀼𑀲𑀮𑁄’’𑀘𑁆𑀘𑀸𑀤𑀺𑀫𑀸𑀳. 𑀬𑁄 𑀣𑁂𑀭𑀦𑀯𑀫𑀚𑁆𑀛𑀺𑀫𑁂𑀲𑀼 𑀓𑁄𑀘𑀺 𑀲𑀤𑁆𑀤𑀲𑀢𑁆𑀣𑀓𑀼𑀲𑀮𑁄 𑀲𑀤𑁆𑀤𑀸𑀦𑀼𑀲𑀸𑀲𑀦𑀩𑁆𑀬𑀸𑀓𑀭𑀡𑀯𑀺𑀲𑀬𑁂 𑀧𑀓𑀢𑀺𑀧𑀘𑁆𑀘𑀬𑀸𑀤𑀺𑀯𑀺𑀪𑀸𑀕𑀓𑀧𑁆𑀧𑀦𑀸𑀬 𑀙𑁂𑀓𑁄 𑀦𑀺𑀖𑀡𑁆𑀝𑀼𑀙𑀦𑁆𑀤𑁄𑀅𑀮𑀗𑁆𑀓𑀢𑀻𑀲𑀼 𑀅𑀪𑀺𑀥𑀸𑀦𑀙𑀦𑁆𑀤𑁄𑀅𑀮𑀗𑁆𑀓𑀸𑀭𑀲𑀢𑁆𑀣𑁂𑀲𑀼𑀧𑀺 𑀓𑀼𑀲𑀮𑁄 𑀢𑀁𑀢𑀁𑀯𑀺𑀪𑀸𑀕𑀩𑀼𑀤𑁆𑀥𑀻𑀦𑀁 𑀧𑀝𑀺𑀧𑀸𑀤𑀦𑁂𑀦 𑀙𑁂𑀓𑁄 𑀦𑀺𑀘𑁆𑀘𑀓𑀢𑀸𑀪𑀺𑀬𑁄𑀕𑁄 𑀥𑀸𑀭𑀡𑀫𑀦𑀲𑀺𑀓𑀸𑀭𑀯𑀲𑁂𑀦 𑀦𑀺𑀘𑁆𑀘𑀁 𑀓𑀢𑀼𑀲𑁆𑀲𑀸𑀳𑁄 𑀳𑁄𑀢𑀺. 𑀲𑁄 𑀅𑀬𑀁 𑀅𑀧𑁆𑀧𑀫𑀸𑀤𑀻 𑀓𑀯𑀺𑀢𑁆𑀢𑀯𑀺𑀓𑀮𑁄𑀧𑀺 𑀧𑀓𑀢𑀺𑀲𑀺𑀤𑁆𑀥𑀓𑀩𑁆𑀩𑀭𑀘𑀦𑀕𑀼𑀡𑀭𑀳𑀺𑀢𑁄𑀧𑀺 𑀓𑀯𑀻𑀲𑀼 𑀲𑀗𑁆𑀔𑁆𑀬𑀁 𑀓𑀩𑁆𑀩𑀓𑀢𑁆𑀢𑀽𑀲𑀼 𑀕𑀡𑀦𑀁 𑀑𑀕𑀬𑁆𑀳 𑀓𑀩𑁆𑀩𑀓𑀭𑀡𑀝𑀻𑀓𑀸𑀓𑀭𑀡𑀸𑀤𑀺𑀧𑀓𑀸𑀭𑁂𑀦 𑀑𑀕𑀸𑀳𑁂𑀢𑁆𑀯𑀸 𑀢𑀁 𑀕𑀡𑀦𑀁 𑀧𑀸𑀧𑀼𑀡𑀺𑀢𑁆𑀯𑀸 ¶ 𑀅𑀫𑀦𑁆𑀤𑀭𑀽𑀧𑀁 𑀅𑀦𑀧𑁆𑀧𑀓𑀲𑀪𑀸𑀯𑀁 𑀅𑀢𑀺𑀩𑀳𑀼𑀁 𑀓𑀺𑀢𑁆𑀢𑀺𑀁 𑀦𑀺𑀤𑁆𑀤𑁄𑀲𑀁 𑀲𑀢𑁆𑀣𑀭𑀘𑀦𑀮𑀓𑁆𑀔𑀡𑀁 𑀧𑀼𑀜𑁆𑀜𑀲𑀜𑁆𑀘𑀬𑀁, 𑀢𑀧𑁆𑀧𑀪𑀯𑀁 𑀧𑀲𑀺𑀤𑁆𑀥𑀺𑀁 𑀯𑀸 𑀯𑀺𑀦𑁆𑀤𑀢𑀺 𑀮𑀪𑀢𑁂𑀯𑀸𑀢𑀺. 𑀬𑀣𑀸𑀯𑀼𑀢𑁆𑀢𑀲𑀢𑁆𑀣𑁂𑀲𑀼 𑀅𑀪𑀺𑀬𑁄𑀕𑁄 𑀩𑀦𑁆𑀥𑀲𑁆𑀲 𑀏𑀓𑀦𑁆𑀢𑀓𑀸𑀭𑀡𑀫𑁂𑀯. 𑀯𑀼𑀢𑁆𑀢𑀁 𑀳𑀺𑁋

‘‘𑀲𑀸𑀪𑀸𑀯𑀺𑀓𑀻 𑀘 𑀧𑀝𑀺𑀪𑀸,

𑀲𑀼𑀢𑀜𑁆𑀘 𑀩𑀳𑀼𑀦𑀺𑀫𑁆𑀫𑀮𑀁;

𑀅𑀫𑀦𑁆𑀤𑁄 𑀘𑀸𑀪𑀺𑀬𑁄𑀕𑁄’𑀬𑀁,

𑀳𑁂𑀢𑀼 𑀳𑁄𑀢𑀺’𑀳 𑀩𑀦𑁆𑀥𑀦𑁂’’𑀢𑀺 [𑀓𑀸𑀩𑁆𑀬𑀸𑀤𑀸𑀲 𑁧.𑁧𑁦𑁩].

𑀢𑀢𑁆𑀣 𑀲𑀸𑀪𑀸𑀯𑀺𑀓𑀻 𑀲𑀪𑀸𑀯𑀲𑀺𑀤𑁆𑀥𑀸 𑀧𑀝𑀺𑀪𑀸 𑀘 𑀧𑀜𑁆𑀜𑀸 𑀘 𑀩𑀳𑀼 𑀦𑀺𑀫𑁆𑀫𑀮𑀁 𑀅𑀦𑀧𑁆𑀧𑀓𑀁 𑀦𑀺𑀚𑁆𑀚𑀝𑀁 𑀲𑀼𑀢𑀜𑁆𑀘 𑀅𑀫𑀦𑁆𑀤𑁄 𑀅𑀪𑀺𑀬𑁄𑀕𑁄 𑀘 𑀅𑀦𑀧𑁆𑀧𑀓𑁄 𑀅𑀪𑁆𑀬𑀸𑀲𑁄 𑀘𑁂𑀢𑀺 𑀅𑀬𑀫𑁂𑀲𑁄 𑀲𑀩𑁆𑀩𑁄𑀧𑀺 𑀇𑀳 𑀩𑀦𑁆𑀥𑀦𑁂 𑀇𑀫𑀺𑀲𑁆𑀲𑀁 𑀓𑀩𑁆𑀩𑀭𑀘𑀦𑀸𑀬𑀁 𑀳𑁂𑀢𑀼 𑀳𑁄𑀢𑀺 𑀓𑀸𑀭𑀡𑀁 𑀪𑀯𑀢𑀻𑀢𑀺. 𑀲𑀤𑁆𑀤𑁂 𑀲𑀸𑀲𑀢𑀺 𑀏𑀢𑁆𑀣 𑀏𑀢𑁂𑀦𑀸𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀢𑀧𑁆𑀧𑀘𑁆𑀘𑀬𑀜𑁆𑀘 𑀢𑀲𑁆𑀲 𑀣𑀸𑀤𑁂𑀲𑀜𑁆𑀘 𑀓𑀢𑁆𑀯𑀸 𑀲𑀤𑁆𑀤𑀲𑀢𑁆𑀣𑀦𑁆𑀢𑀺 𑀜𑀸𑀢𑀩𑁆𑀩𑀁, 𑀲𑀤𑁆𑀤𑀲𑀢𑁆𑀣𑁂 𑀓𑀼𑀲𑀮𑁄𑀢𑀺 𑀘, 𑀦𑀺𑀖𑀡𑁆𑀝𑀼 𑀘 𑀙𑀦𑁆𑀤𑁄 𑀘 𑀅𑀮𑀗𑁆𑀓𑀢𑀺 𑀅𑀮𑀗𑁆𑀓𑀸𑀭𑀜𑁆𑀘𑁂𑀢𑀺 𑀘 𑀯𑀺𑀕𑁆𑀕𑀳𑁄, 𑀏𑀢𑁆𑀣 𑀅𑀮𑀗𑁆𑀓𑀢𑀺𑀲𑀤𑁆𑀤𑁄 𑀲𑀢𑁆𑀣𑀸𑀧𑁂𑀓𑁆𑀔𑀸𑀬 𑀦𑀧𑀼𑀁𑀲𑀓𑁄 𑀳𑁄𑀢𑀺, 𑀦𑀺𑀘𑁆𑀘𑀁 𑀓𑀢𑁄 𑀅𑀪𑀺𑀬𑁄𑀕𑁄 𑀅𑀲𑁆𑀲𑁂𑀢𑀺 𑀘, 𑀓𑀯𑀺𑀦𑁄 𑀪𑀸𑀯𑁄𑀢𑀺 𑀘, 𑀢𑁂𑀦 𑀯𑀺𑀓𑀮𑁄𑀢𑀺 𑀘, 𑀅𑀫𑀦𑁆𑀤𑀁 𑀭𑀽𑀧𑀁 𑀲𑀪𑀸𑀯𑁄 𑀬𑀲𑁆𑀲𑁂𑀢𑀺 𑀘 𑀯𑀸𑀓𑁆𑀬𑀁.

𑀇𑀢𑀺 𑀲𑀼𑀩𑁄𑀥𑀸𑀮𑀗𑁆𑀓𑀸𑀭𑀦𑀺𑀲𑁆𑀲𑀬𑁂

𑀢𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.

𑁪. 𑀅𑀢𑁆𑀣𑀸𑀮𑀗𑁆𑀓𑀸𑀭𑀸𑀯𑀩𑁄𑀥𑀧𑀭𑀺𑀘𑁆𑀙𑁂𑀤

𑁧𑁬𑁪.

𑀅𑀢𑁆𑀣𑀸𑀮𑀗𑁆𑀓𑀸𑀭𑀲𑀳𑀺𑀢𑀸, 𑀲𑀕𑀼𑀡𑀸 𑀩𑀦𑁆𑀥𑀧𑀤𑁆𑀥𑀢𑀺;

𑀅𑀘𑁆𑀘𑀦𑁆𑀢𑀓𑀦𑁆𑀢𑀸 𑀓𑀦𑁆𑀢𑀸𑀯 [𑀬𑀢𑁄𑀅𑀘𑁆𑀘𑀦𑁆𑀢𑀓𑀦𑁆𑀢𑀸𑀯 (𑀓.)], 𑀯𑀼𑀘𑁆𑀘𑀦𑁆𑀢𑁂𑀢𑁂 𑀢𑀢𑁄’𑀥𑀼𑀦𑀸.

𑁧𑁬𑁪. 𑀏𑀯𑀁 ¶ 𑀲𑀤𑁆𑀤𑀸𑀮𑀗𑁆𑀓𑀸𑀭𑁂 𑀧𑀭𑀺𑀘𑁆𑀙𑀺𑀚𑁆𑀚 𑀲𑀫𑁆𑀧𑀢𑁆𑀬𑀢𑁆𑀣𑀸𑀮𑀗𑁆𑀓𑀸𑀭𑀁 𑀩𑁄𑀥𑀬𑀺𑀢𑀼𑀫𑀸𑀳 ‘‘𑀅𑀢𑁆𑀣𑀸𑀮𑀗𑁆𑀓𑀸𑀭’’𑀇𑀘𑁆𑀘𑀸𑀤𑀺. 𑀲𑀕𑀼𑀡𑀸 𑀬𑀣𑀸𑀯𑀼𑀢𑁆𑀢𑁂𑀳𑀺 𑀧𑀲𑀸𑀤𑀸𑀤𑀻𑀳𑀺 𑀲𑀤𑁆𑀤𑀕𑀼𑀡𑁂𑀳𑀺 𑀲𑀳𑀺𑀢𑀸 𑀩𑀦𑁆𑀥𑀧𑀤𑁆𑀥𑀢𑀺 𑀓𑀩𑁆𑀩𑀭𑀘𑀦𑀁. 𑀅𑀮𑀗𑁆𑀓𑀭𑀻𑀬𑀢𑀺 𑀓𑀦𑁆𑀢𑀺𑀁 𑀦𑀻𑀬𑀢𑀺 𑀩𑀦𑁆𑀥𑁄 𑀏𑀢𑁂𑀳𑀺 𑀲𑀭𑀻𑀭𑀫𑀺𑀯 𑀳𑀸𑀭𑀸𑀤𑀻𑀳𑀻𑀢𑀺 𑀅𑀮𑀗𑁆𑀓𑀸𑀭𑀸, 𑀢𑁂𑀳𑀺 𑀅𑀢𑁆𑀣𑀸𑀮𑀗𑁆𑀓𑀸𑀭𑁂𑀳𑀺 𑀚𑀸𑀢𑁆𑀬𑀸𑀤𑀺𑀮𑀓𑁆𑀔𑀡𑁂𑀳𑀺 𑀲𑀳𑀺𑀢𑀸 𑀲𑀁𑀬𑀼𑀢𑁆𑀢𑀸 𑀲𑀢𑀻 𑀲𑀕𑀼𑀡𑀸 𑀧𑀢𑀺𑀩𑁆𑀩𑀢𑀸𑀤𑀺𑀕𑀼𑀡𑁄𑀧𑁂𑀢𑀸 𑀅𑀢𑁆𑀣𑁂𑀦 𑀥𑀦𑁂𑀦 𑀅𑀮𑀗𑁆𑀓𑀸𑀭𑁂𑀦 𑀆𑀪𑀭𑀡𑁂𑀦 𑀲𑀳𑀺𑀢𑀸 𑀬𑀼𑀢𑁆𑀢𑀸 𑀓𑀦𑁆𑀢𑀸𑀯 𑀅𑀗𑁆𑀕𑀦𑀸 𑀯𑀺𑀬. 𑀬𑀢𑁄 𑀅𑀘𑁆𑀘𑀦𑁆𑀢𑀓𑀦𑁆𑀢𑀸 𑀅𑀢𑀺𑀲𑀬𑀭𑀫𑀡𑀻𑀬𑀸 𑀲𑀺𑀬𑀸, 𑀢𑀢𑁄 𑀢𑁂𑀦 𑀓𑀸𑀭𑀡𑁂𑀦 𑀬𑁂 𑀅𑀢𑁆𑀣𑀸𑀮𑀗𑁆𑀓𑀸𑀭𑀸 𑀅𑀯𑀲𑀭𑀁 𑀧𑀢𑁆𑀢𑀸, 𑀢𑁂 𑀅𑀥𑀼𑀦𑀸 𑀇𑀤𑀸𑀦𑀺 𑀯𑀼𑀘𑁆𑀘𑀦𑁆𑀢𑁂 𑀓𑀣𑀻𑀬𑀦𑁆𑀢𑀺.

𑁧𑁬𑁪. 𑀏𑀯𑀁 𑀲𑀤𑁆𑀤𑀸𑀮𑀗𑁆𑀓𑀸𑀭𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀦𑁆𑀦𑀺𑀲𑁆𑀲𑀬𑀁𑀬𑁂𑀯 𑀅𑀢𑁆𑀣𑀸𑀮𑀗𑁆𑀓𑀸𑀭𑀩𑀦𑁆𑀥𑀫𑀸𑀭𑀪𑀦𑁆𑀢𑁄 ‘‘𑀅𑀢𑁆𑀣𑀸𑀮𑀗𑁆𑀓𑀸𑀭𑀺’’𑀘𑁆𑀘𑀸𑀤𑀺𑀫𑀸𑀳. 𑀲𑀕𑀼𑀡𑀸 𑀬𑀣𑀸𑀯𑀼𑀢𑁆𑀢𑀧𑀲𑀸𑀤𑀸𑀤𑀺𑀲𑀤𑁆𑀤𑀕𑀼𑀡𑀬𑀼𑀢𑁆𑀢𑀸 𑀩𑀦𑁆𑀥𑀧𑀤𑁆𑀥𑀢𑀺 𑀧𑀚𑁆𑀚𑀕𑀚𑁆𑀚𑀸𑀤𑀺𑀧𑀪𑁂𑀤𑀸 𑀭𑀘𑀦𑀸𑀯𑀮𑀺 𑀅𑀢𑁆𑀣𑀸𑀮𑀗𑁆𑀓𑀸𑀭𑀲𑀳𑀺𑀢𑀸 𑀲𑀪𑀸𑀯𑀯𑀼𑀢𑁆𑀢𑀺𑀯𑀗𑁆𑀓𑀯𑀼𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀅𑀢𑁆𑀣𑀸𑀮𑀗𑁆𑀓𑀸𑀭𑁂𑀦 𑀲𑀁𑀬𑀼𑀢𑁆𑀢𑀸 𑀲𑀕𑀼𑀡𑀸 𑀅𑀢𑁆𑀣𑀸𑀮𑀗𑁆𑀓𑀸𑀭𑀲𑀳𑀺𑀢𑀸 𑀓𑀦𑁆𑀢𑀸 𑀇𑀯 𑀧𑀢𑀺𑀩𑁆𑀩𑀢𑀸𑀤𑀻𑀳𑀺 𑀕𑀼𑀡𑁂𑀳𑀺 𑀬𑀼𑀢𑁆𑀢𑀸 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀼𑀢𑁆𑀢𑀸𑀤𑀺𑀥𑀦𑁂𑀳𑀺 𑀕𑀻𑀯𑁂𑀬𑁆𑀬𑀓𑀝𑀓𑀦𑀽𑀧𑀼𑀭𑀸𑀤𑀻𑀳𑀺 𑀆𑀪𑀭𑀡𑁂𑀳𑀺 𑀘 𑀬𑀼𑀢𑁆𑀢𑀸 𑀅𑀗𑁆𑀕𑀦𑀸𑀯 𑀅𑀘𑁆𑀘𑀦𑁆𑀢𑀓𑀦𑁆𑀢𑀸 𑀬𑀢𑁄 𑀅𑀢𑀺𑀲𑀬𑁂𑀦 𑀭𑀫𑀡𑀻𑀬𑀸, 𑀢𑀢𑁄 𑀢𑀲𑁆𑀫𑀸 𑀢𑁂 𑀅𑀢𑁆𑀣𑀸𑀮𑀗𑁆𑀓𑀸𑀭𑀸 𑀅𑀥𑀼𑀦𑀸 𑀤𑀸𑀦𑀺 𑀯𑀼𑀘𑁆𑀘𑀦𑁆𑀢𑁂. 𑀅𑀮𑀗𑁆𑀓𑀭𑁄𑀦𑁆𑀢𑀺 𑀩𑀦𑁆𑀥𑀁 𑀲𑀭𑀻𑀭𑀁 𑀯𑀸 𑀏𑀢𑁂𑀳𑀻𑀢𑀺 𑀘, 𑀅𑀢𑁆𑀣𑀲𑁆𑀲 𑀅𑀮𑀗𑁆𑀓𑀸𑀭𑀸𑀢𑀺 𑀘, 𑀢𑁂𑀳𑀺 𑀲𑀳𑀺𑀢𑀸𑀢𑀺 𑀘, 𑀕𑀼𑀡𑁂𑀳𑀺 𑀲𑀳 𑀯𑀢𑁆𑀢𑀢𑀻𑀢𑀺 𑀘, 𑀩𑀦𑁆𑀥𑀲𑁆𑀲 𑀧𑀤𑁆𑀥𑀢𑀻𑀢𑀺 𑀘, 𑀅𑀘𑁆𑀘𑀦𑁆𑀢𑀁 𑀅𑀢𑀺𑀲𑀬𑁂𑀦 𑀓𑀦𑁆𑀢𑀸𑀢𑀺 𑀘 𑀯𑀺𑀕𑁆𑀕𑀳𑁄.

𑁧𑁬𑁫.

𑀲𑀪𑀸𑀯𑀯𑀗𑁆𑀓𑀯𑀼𑀢𑁆𑀢𑀻𑀦𑀁, 𑀪𑁂𑀤𑀸 𑀤𑁆𑀯𑀺𑀥𑀸 𑀅𑀮𑀁𑀓𑁆𑀭𑀺𑀬𑀸;

𑀧𑀞𑀫𑀸 𑀢𑀢𑁆𑀣 𑀯𑀢𑁆𑀣𑀽𑀦𑀁, 𑀦𑀸𑀦𑀸𑀯𑀢𑁆𑀣𑀸𑀯𑀺𑀪𑀸𑀯𑀺𑀦𑀻.

𑁧𑁬𑁫. 𑀓𑀢𑀺𑀧𑁆𑀧𑀪𑁂𑀤𑀸 𑀢𑁂 𑀇𑀘𑁆𑀘𑀸𑀳 ‘‘𑀲𑀪𑀸𑀯’’𑀇𑀘𑁆𑀘𑀸𑀤𑀺. 𑀲𑀪𑀸𑀯𑀯𑀼𑀢𑁆𑀢𑀺 𑀯𑀗𑁆𑀓𑀯𑀼𑀢𑁆𑀢𑀻𑀢𑀺 𑀇𑀫𑁂𑀲𑀁 𑀪𑁂𑀤𑀸 𑀧𑀪𑁂𑀤𑁂𑀦 𑀅𑀮𑀁𑀓𑁆𑀭𑀺𑀬𑀸 𑀅𑀢𑁆𑀣𑀸𑀮𑀗𑁆𑀓𑀸𑀭𑀸𑀤𑁆𑀯𑀺𑀥𑀸𑀤𑁆𑀯𑀺𑀧𑁆𑀧𑀓𑀸𑀭𑀸. ¶ 𑀢𑁂𑀲𑀼 𑀲𑀪𑀸𑀯𑀯𑀼𑀢𑁆𑀢𑀺 𑀓𑀻𑀤𑀺𑀲𑀻𑀢𑀺 𑀆𑀳 ‘‘𑀧𑀞𑀫𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀸𑀲𑀼 𑀧𑀞𑀫𑀸 𑀲𑀪𑀸𑀯𑀯𑀼𑀢𑁆𑀢𑀺 𑀯𑀢𑁆𑀣𑀽𑀦𑀁 𑀧𑀤𑀢𑁆𑀣𑀸𑀦𑀁 𑀚𑀸𑀢𑀺𑀕𑀼𑀡𑀓𑁆𑀭𑀺𑀬𑀸𑀤𑀩𑁆𑀩𑀲𑀪𑀸𑀯𑀸𑀦𑀁 𑀦𑀸𑀦𑀸 𑀯𑀺𑀘𑀺𑀢𑁆𑀢𑀸, 𑀦 𑀤𑁆𑀯𑁂𑀓𑀸𑀯 𑀅𑀯𑀢𑁆𑀣𑀸 𑀅𑀯𑀲𑀭𑀸 𑀯𑀺𑀪𑀸𑀯𑀺𑀦𑀻 𑀧𑀓𑀸𑀲𑀺𑀓𑀸 𑀯𑀺𑀜𑁆𑀜𑁂𑀬𑁆𑀬𑀸. 𑀚𑀸𑀢𑁆𑀬𑀸𑀤𑀻𑀦𑀁 𑀧𑀤𑀢𑁆𑀣𑀸𑀦𑀁 𑀬𑀣𑀸𑀲𑀪𑀸𑀯𑀫𑀦𑁂𑀓𑀧𑁆𑀧𑀓𑀸𑀭𑀁 𑀲𑀫𑁆𑀫𑀤𑁂𑀯 𑀯𑀺𑀯𑀭𑀦𑁆𑀢𑀻 𑀲𑀪𑀸𑀯𑀁 𑀧𑀤𑀢𑁆𑀣𑀸𑀦𑀁 𑀯𑀺𑀘𑀺𑀢𑁆𑀢𑀁 𑀯𑀤𑀢𑀻𑀢𑀺 𑀲𑀪𑀸𑀯𑀯𑀼𑀢𑁆𑀢𑀺 𑀦𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀲𑀸𑀯 𑀚𑀸𑀢𑀺𑀬𑀸 𑀧𑀤𑀢𑁆𑀣𑀲𑀭𑀽𑀧𑀲𑁆𑀲 𑀢𑀣𑀸𑀢𑀣𑀸𑀧𑀝𑀺𑀧𑀸𑀤𑀓𑀢𑁆𑀢𑁂𑀦 𑀯𑀼𑀢𑁆𑀢𑀺𑀬𑀸 [𑀤𑀢𑁆𑀢𑀺𑀬𑀸 (𑀓.)] 𑀚𑀸𑀢𑀺𑀧𑀺 𑀯𑀼𑀘𑁆𑀘𑀢𑀺.

𑁧𑁬𑁫. 𑀧𑀲𑀢𑁆𑀣𑀸𑀮𑀗𑁆𑀓𑀸𑀭𑀸 [𑀧𑀲𑀢𑁆𑀣𑀸𑀤𑀺𑀅𑀮𑀗𑁆𑀓𑀸𑀭𑀸 (𑀓.)] 𑀧𑀪𑁂𑀤𑀢𑁄 𑀏𑀢𑁆𑀢𑀓𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀪𑀸𑀯𑀺’’𑀘𑁆𑀘𑀸𑀤𑀺𑀫𑀸𑀳. 𑀅𑀮𑀁𑀓𑁆𑀭𑀺𑀬𑀸 𑀅𑀢𑁆𑀣𑀸𑀮𑀗𑁆𑀓𑀸𑀭𑀸 𑀲𑀪𑀸𑀯𑀯𑀗𑁆𑀓𑀯𑀼𑀢𑁆𑀢𑀻𑀦𑀁 𑀪𑁂𑀤𑀸 𑀧𑀪𑁂𑀤𑀢𑁄 𑀤𑁆𑀯𑀺𑀥𑀸 𑀤𑁆𑀯𑀺𑀧𑁆𑀧𑀓𑀸𑀭𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀢𑀸𑀲𑀼𑀤𑁆𑀯𑀻𑀲𑀼 𑀧𑀞𑀫𑀸 𑀲𑀪𑀸𑀯𑀯𑀼𑀢𑁆𑀢𑀺 𑀯𑀢𑁆𑀣𑀽𑀦𑀁 𑀚𑀸𑀢𑀺𑀕𑀼𑀡𑀓𑁆𑀭𑀺𑀬𑀸𑀤𑀩𑁆𑀩𑀮𑀓𑁆𑀔𑀡𑀸𑀦𑀁 𑀧𑀤𑀢𑁆𑀣𑀸𑀦𑀁 𑀦𑀸𑀦𑀸𑀯𑀢𑁆𑀣𑀸𑀯𑀺𑀪𑀸𑀯𑀺𑀦𑀻 𑀅𑀦𑁂𑀓𑀧𑁆𑀧𑀓𑀸𑀭𑀲𑁆𑀲 𑀧𑀓𑀸𑀲𑀺𑀦𑀻 𑀳𑁄𑀢𑀺. 𑀏𑀢𑁆𑀣 𑀚𑀸𑀢𑁆𑀬𑀸𑀤𑀻𑀦𑀁 𑀧𑀤𑀢𑁆𑀣𑀸𑀦𑀁 𑀅𑀦𑁂𑀓𑀧𑁆𑀧𑀓𑀸𑀭𑀲𑀪𑀸𑀯𑀧𑀓𑀸𑀲𑀺𑀦𑀻 𑀲𑀪𑀸𑀯𑀯𑀼𑀢𑁆𑀢𑀺 𑀦𑀸𑀫. 𑀏𑀲𑀸𑀯 𑀚𑀸𑀢𑀺 𑀕𑀼𑀡𑀸𑀤𑀺𑀘𑀢𑀼𑀩𑁆𑀩𑀺𑀥𑀧𑀤𑀢𑁆𑀣𑀸𑀦𑀁 𑀲𑀭𑀽𑀧𑀲𑀗𑁆𑀔𑀸𑀢𑀚𑀸𑀢𑀺𑀬𑀸 𑀢𑁂𑀳𑀺 𑀆𑀓𑀸𑀭𑁂𑀳𑀺 𑀧𑀝𑀺𑀧𑀸𑀤𑀦𑀢𑁄 𑀉𑀧𑀘𑀸𑀭𑀢𑁄 𑀚𑀸𑀢𑀺 𑀦𑀸𑀫 𑀳𑁄𑀢𑀺. 𑀚𑀸𑀢𑁆𑀬𑀸𑀤𑀺𑀧𑀤𑀢𑁆𑀣𑀸𑀦𑀁𑀬𑁂𑀯 𑀬𑀣𑀸𑀲𑀪𑀸𑀯𑀁 𑀳𑀺𑀢𑁆𑀯𑀸 𑀯𑀢𑁆𑀣𑀼𑀧𑀭𑀺𑀓𑀧𑁆𑀧𑀺𑀢𑀅𑀢𑀺𑀲𑀬𑁄𑀧𑀫𑀸𑀭𑀽𑀧𑀓𑀸𑀤𑀺𑀲𑀭𑀽𑀧𑀲𑀗𑁆𑀔𑀸𑀢𑀁 𑀯𑀗𑁆𑀓𑀲𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑀻 𑀯𑀗𑁆𑀓𑀯𑀼𑀢𑁆𑀢𑀺 𑀦𑀸𑀫. 𑀬𑀪𑀸𑀯𑁄 𑀘 𑀯𑀗𑁆𑀓𑁄 𑀘𑀸𑀢𑀺 𑀘, 𑀢𑁂𑀲𑀁 𑀯𑀼𑀢𑁆𑀢𑀻𑀢𑀺 𑀘, 𑀅𑀮𑀁𑀓𑀭𑁄𑀦𑁆𑀢𑀺 𑀏𑀢𑀸𑀳𑀻𑀢𑀺 𑀘, 𑀦𑀸𑀦𑀸 𑀅𑀦𑁂𑀓𑀸 𑀘 𑀲𑀸 𑀅𑀯𑀢𑁆𑀣𑀸 𑀘𑀸𑀢𑀺 𑀘 𑀯𑀸𑀓𑁆𑀬𑀁.

𑀬𑀣𑀸 𑁋

𑁧𑁬𑁬.

𑀮𑀻𑀮𑀸𑀯𑀺𑀓𑀦𑁆𑀢𑀺𑀲𑀼𑀪𑀕𑁄,

𑀤𑀺𑀲𑀸𑀣𑀺𑀭𑀯𑀺𑀮𑁄𑀓𑀦𑁄;

𑀩𑁄𑀥𑀺𑀲𑀢𑁆𑀢𑀗𑁆𑀓𑀼𑀭𑁄 𑀪𑀸𑀲𑀁,

𑀯𑀺𑀭𑁄𑀘𑀺 𑀯𑀸𑀘𑀫𑀸𑀲𑀪𑀺𑀁.

𑁧𑁬𑁬. ‘‘𑀬𑀣𑁂’’𑀢𑀺 𑀢𑀁 𑀉𑀤𑀸𑀳𑀭𑀢𑀺. 𑀮𑀻𑀮𑀸𑀬 𑀯𑀺𑀮𑀸𑀲𑁂𑀦 𑀯𑀺𑀳𑀺𑀢𑀸𑀬 𑀯𑀺𑀓𑀦𑁆𑀢𑀺𑀬𑀸 𑀕𑀫𑀦𑁂𑀦 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑀲𑀗𑁆𑀔𑀸𑀢𑁂𑀦 𑀲𑀼𑀪𑀕𑁄 𑀲𑀼𑀦𑁆𑀤𑀭𑁄 𑀤𑀺𑀲𑀸𑀲𑀼 𑀤𑀲𑀲𑀼 𑀣𑀺𑀭𑀫𑀘𑀮𑀁 𑀯𑀺𑀮𑁄𑀓𑀦𑀁 𑀬𑀲𑁆𑀲 𑀲𑁄 𑀩𑁄𑀥𑀺𑀲𑀢𑁆𑀢𑀗𑁆𑀓𑀼𑀭𑁄 𑀢𑀤𑀳𑀼𑀚𑀸𑀢𑁄 𑀫𑀳𑀸𑀩𑁄𑀥𑀺𑀲𑀢𑁆𑀢𑁄 𑀆𑀲𑀪𑀺𑀁 𑀯𑀸𑀘𑀁 ‘‘𑀅𑀕𑁆𑀕𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀓𑀫𑀼𑀢𑁆𑀢𑀫𑀁 𑀦𑀺𑀩𑁆𑀪𑀬𑀯𑀘𑀦𑀁 𑀪𑀸𑀲𑀁 𑀯𑀤𑀦𑁆𑀢𑁄 𑀯𑀺𑀭𑁄𑀘𑀺 𑀯𑀺𑀲𑁂𑀲𑁂𑀦 𑀭𑀫𑀡𑀻𑀬𑀢𑁆𑀢𑀁 𑀧𑀢𑁆𑀢𑁄. 𑀅𑀬𑀁 𑀲𑀪𑀸𑀯𑀯𑀼𑀢𑁆𑀢𑀺. 𑀏𑀯𑀁 𑀚𑀸𑀢𑀺𑀲𑀪𑀸𑀯𑀯𑀼𑀢𑁆𑀬𑀸𑀤𑀬𑁄𑀧𑀺 𑀧𑀭𑀺𑀓𑀧𑁆𑀧𑀦𑀻𑀬𑀸.

𑁧𑁬𑁬. 𑀇𑀤𑀸𑀦𑀺 𑀲𑀪𑀸𑀯𑀯𑀼𑀢𑁆𑀢𑀺𑀬𑀸 𑀉𑀤𑀸𑀳𑀭𑀡𑀁 𑀆𑀳 ‘‘𑀬𑀣𑀸 𑁋 𑀮𑀻𑀮𑀸𑀯𑀺𑀓𑀦𑁆𑀢𑀺’’𑀘𑁆𑀘𑀸𑀤𑀺. 𑀮𑀻𑀮𑀸𑀯𑀺𑀓𑀦𑁆𑀢𑀺𑀲𑀼𑀪𑀕𑁄 𑀯𑀺𑀮𑀸𑀲𑀕𑀫𑀦𑁂𑀦 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀲𑀼𑀦𑁆𑀤𑀭𑁄 𑀤𑀺𑀲𑀸𑀣𑀺𑀭𑀯𑀺𑀮𑁄𑀓𑀦𑁄 𑀤𑀲𑀤𑀺𑀲𑀸𑀲𑀼 𑀅𑀘𑀮𑀑𑀮𑁄𑀓𑀦𑁄 𑀩𑁄𑀥𑀺𑀲𑀢𑁆𑀢𑀗𑁆𑀓𑀼𑀭𑁄 𑀫𑀳𑀸𑀩𑁄𑀥𑀺𑀲𑀢𑁆𑀢𑀗𑁆𑀓𑀼𑀭𑁄 𑀆𑀲𑀪𑀺𑀁 𑀯𑀸𑀘𑀁 ‘‘𑀅𑀕𑁆𑀕𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸 𑀅𑀪𑀻𑀢𑀯𑀘𑀦𑀁 𑀪𑀸𑀲𑀁 𑀯𑀤𑀦𑁆𑀢𑁄 𑀯𑀺𑀭𑁄𑀘𑀺 𑀅𑀲𑁄𑀪𑀻𑀢𑀺. 𑀇𑀳 𑀩𑁄𑀥𑀺𑀲𑀢𑁆𑀢𑀲𑀗𑁆𑀔𑀸𑀢𑀲𑁆𑀲 𑀤𑀩𑁆𑀩𑀲𑁆𑀲 𑀮𑀻𑀮𑀸𑀯𑀺𑀓𑀦𑁆𑀢𑀺𑀤𑀺𑀲𑀸𑀣𑀺𑀭𑀯𑀺𑀮𑁄𑀓𑀦𑀯𑀘𑁄𑀦𑀺𑀘𑁆𑀙𑀸𑀭𑀡𑀲𑀗𑁆𑀔𑀢𑀸𑀦𑀁 𑀅𑀯𑀢𑁆𑀣𑀸𑀦𑀁 𑀧𑀓𑀸𑀲𑀺𑀢𑀢𑁆𑀢𑀸 𑀤𑀩𑁆𑀩𑀲𑀪𑀸𑀯𑀯𑀼𑀢𑁆𑀢𑀻𑀢𑀺 𑀜𑀸𑀢𑀩𑁆𑀩𑀸. 𑀏𑀲𑀸𑀬𑁂𑀯 𑀤𑀩𑁆𑀩𑀕𑀢𑀕𑀢𑁆𑀬𑀸𑀤𑀺𑀯𑀺𑀘𑀺𑀢𑁆𑀭𑀲𑀭𑀽𑀧𑀁 𑀅𑀮𑀗𑁆𑀓𑀭𑀡𑀢𑁄 𑀅𑀮𑀗𑁆𑀓𑀸𑀭𑁄 𑀦𑀸𑀫, 𑀤𑀩𑁆𑀩𑀕𑀢𑀕𑀢𑁆𑀬𑀸𑀤𑀬𑁄 𑀧𑀦 𑀅𑀮𑀁𑀓𑀺𑀭𑀺𑀬𑀫𑀸𑀦𑀢𑁆𑀢𑀸 𑀅𑀮𑀁𑀓𑀺𑀭𑀺𑀬𑀸 𑀦𑀸𑀫. 𑀚𑀸𑀢𑀺𑀕𑀼𑀡𑀓𑁆𑀭𑀺𑀬𑀸𑀲𑀪𑀸𑀯𑀯𑀼𑀢𑁆𑀢𑀺𑀬𑁄𑀧𑀺 𑀏𑀯𑀫𑁂𑀯 𑀤𑀝𑁆𑀞𑀩𑁆𑀩𑀸. 𑀮𑀻𑀮𑀸𑀬 𑀬𑀼𑀢𑁆𑀢𑀸 𑀯𑀺𑀓𑀦𑁆𑀢𑀻𑀢𑀺 𑀘, 𑀢𑀸𑀬 𑀲𑀼𑀪𑀕𑁄𑀢𑀺 𑀘, 𑀤𑀺𑀲𑀸𑀲𑀼 𑀣𑀺𑀭𑀁 𑀯𑀺𑀮𑁄𑀓𑀦𑀁 𑀬𑀲𑁆𑀲𑁂𑀢𑀺 𑀘, 𑀩𑁄𑀥𑀺𑀬𑀸 𑀧𑀜𑁆𑀜𑀸𑀬 𑀲𑀢𑁆𑀢𑁄𑀢𑀺 𑀘, 𑀲𑁄𑀬𑁂𑀯 𑀅𑀗𑁆𑀓𑀼𑀭𑁄𑀢𑀺 𑀘, 𑀉𑀲𑀪𑀲𑁆𑀲 𑀪𑀸𑀯𑁄𑀢𑀺 𑀘 𑀯𑀸𑀓𑁆𑀬𑀁. 𑀉𑀲𑀪𑀲𑁆𑀲 𑀪𑀸𑀯𑀲𑀗𑁆𑀔𑀸𑀢𑀸 𑀅𑀓𑀫𑁆𑀧𑀦𑀻𑀬𑀸 𑀞𑀺𑀢𑀺 𑀆𑀲𑀪𑀁 𑀦𑀸𑀫, 𑀅𑀓𑀫𑁆𑀧𑀪𑀸𑀯𑀢𑁄 𑀢𑁂𑀦 𑀲𑀫𑀸𑀧𑀺 𑀯𑀸𑀘𑀸 𑀉𑀧𑀘𑀸𑀭𑀢𑁄 𑀆𑀲𑀪𑀻 𑀦𑀸𑀫 𑀳𑁄𑀢𑀺.

𑁧𑁬𑁭.

𑀯𑀼𑀢𑁆𑀢𑀺 𑀯𑀢𑁆𑀣𑀼𑀲𑀪𑀸𑀯𑀲𑁆𑀲, 𑀬𑀸’𑀜𑁆𑀜𑀣𑀸 𑀲𑀸 𑀧𑀭𑀸𑀪𑀯𑁂;

𑀢𑀲𑁆𑀲𑀸’𑀦𑀦𑁆𑀢𑀯𑀺𑀓𑀧𑁆𑀧𑀢𑁆𑀢𑀸, 𑀳𑁄𑀢𑀺 𑀩𑀻𑀚𑁄𑀧𑀤𑀲𑁆𑀲𑀦𑀁.

𑁧𑁬𑁭. 𑀤𑀼𑀢𑀺𑀬𑀫𑀸𑀳 ¶ ‘‘𑀯𑀼𑀢𑁆𑀢𑀺’’𑀘𑁆𑀘𑀸𑀤𑀺𑀦𑀸. 𑀯𑀢𑁆𑀣𑀼𑀦𑁄 𑀚𑀸𑀢𑁆𑀬𑀸𑀤𑀺𑀭𑀽𑀧𑀲𑁆𑀲 𑀧𑀤𑀢𑁆𑀣𑀲𑁆𑀲 𑀲𑀪𑀸𑀯𑁄 𑀬𑀲𑁆𑀲𑀁 𑀅𑀯𑀢𑁆𑀣𑀸𑀬𑀁 𑀬𑀸𑀤𑀺𑀲𑀁 𑀭𑀽𑀧𑀁 𑀢𑀲𑁆𑀲 𑀅𑀜𑁆𑀜𑀣𑀸𑀪𑀸𑀯𑁂𑀦 𑀢𑀲𑁆𑀲 𑀭𑀽𑀧𑀲𑁆𑀲 𑀢𑀣𑁂𑀢𑀁 𑀤𑀩𑁆𑀩𑀸𑀧𑀦𑁂𑀦 𑀯𑀼𑀢𑁆𑀢𑀺 𑀯𑀘𑀦𑀁. 𑀧𑀭𑀸 𑀪𑀯𑁂 𑀅𑀜𑁆𑀜𑀸 𑀯𑀗𑁆𑀓𑀯𑀼𑀢𑁆𑀢𑀺 𑀦𑀸𑀫 𑀲𑀺𑀬𑀸. 𑀓𑀺𑀁 𑀲𑀸 𑀲𑀸𑀓𑀮𑁆𑀮𑁂𑀦 𑀯𑀢𑁆𑀢𑀼𑀁 𑀲𑀓𑁆𑀓𑀸𑀢𑀺 𑀆𑀳 ‘‘𑀢𑀲𑁆𑀲𑀸’’𑀇𑀘𑁆𑀘𑀸𑀤𑀺. 𑀢𑀲𑁆𑀲𑀸 𑀯𑀗𑁆𑀓𑀯𑀼𑀢𑁆𑀢𑀺𑀬𑀸 𑀅𑀦𑀦𑁆𑀢𑀯𑀺𑀓𑀧𑁆𑀧𑀢𑁆𑀢𑀸 𑀅𑀧𑀭𑀺𑀫𑀺𑀢𑀪𑁂𑀤𑀓𑀢𑁆𑀢𑀸 𑀩𑀻𑀚𑀲𑁆𑀲 𑀓𑀸𑀭𑀡𑀢𑁆𑀢𑀸 𑀲𑀓𑀮𑀩𑁆𑀬𑀢𑁆𑀢𑀺𑀩𑁆𑀬𑀸𑀧𑀺𑀲𑀸𑀫𑀜𑁆𑀜𑀭𑀽𑀧𑀲𑁆𑀲 𑀬𑀢𑁄 𑀧𑀭𑁂 𑀯𑀺𑀘𑀺𑀢𑁆𑀢𑀸𑀮𑀗𑁆𑀓𑀸𑀭𑀸 𑀧𑀲𑀯𑀦𑁆𑀢𑀺, 𑀉𑀧𑀤𑀲𑁆𑀲𑀦𑀁 𑀓𑀣𑀦𑀁 𑀳𑁄𑀢𑀺 𑀦𑀺𑀭𑀯𑀲𑁂𑀲𑀸𑀪𑀺𑀥𑀸𑀦𑀲𑁆𑀲 𑀓𑁂𑀦𑀸𑀧𑁆𑀬𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸.

𑁧𑁬𑁭. 𑀇𑀤𑀸𑀦𑀺 𑀯𑀗𑁆𑀓𑀯𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 ‘‘𑀯𑀼𑀢𑁆𑀢𑀺’’𑀘𑁆𑀘𑀸𑀤𑀺𑀦𑀸. 𑀯𑀢𑁆𑀣𑀼𑀲𑀪𑀸𑀯𑀲𑁆𑀲 𑀚𑀸𑀢𑁆𑀬𑀸𑀤𑀺𑀧𑀤𑀢𑁆𑀣𑀲𑀫𑁆𑀩𑀦𑁆𑀥𑀺𑀦𑁄 𑀢𑀸𑀲𑀼 𑀢𑀸𑀲𑀼 𑀅𑀯𑀢𑁆𑀣𑀸𑀲𑀼 𑀬𑁄 𑀲𑀪𑀸𑀯𑁄 𑀯𑀺𑀚𑁆𑀚𑀢𑀺, 𑀢𑀲𑁆𑀲 𑀲𑀪𑀸𑀯𑀲𑁆𑀲 𑀅𑀜𑁆𑀜𑀣𑀸 𑀯𑀺𑀚𑁆𑀚𑀫𑀸𑀦𑀸𑀓𑀸𑀭𑀁 𑀳𑀺𑀢𑁆𑀯𑀸 𑀯𑀢𑁆𑀢𑀼𑀧𑀭𑀺𑀓𑀧𑁆𑀧𑀺𑀢𑁂𑀦 𑀅𑀢𑀺𑀲𑀬𑀉𑀧𑀫𑀸𑀭𑀽𑀧𑀓𑀸𑀤𑀺𑀅𑀜𑁆𑀜𑀧𑀓𑀸𑀭𑁂𑀦 𑀬𑀸 𑀯𑀼𑀢𑁆𑀢𑀺 𑀬𑀁 𑀓𑀣𑀦𑀁 𑀅𑀢𑁆𑀣𑀺, 𑀲𑀸 𑀧𑀭𑀸𑀪𑀯𑁂 𑀲𑀪𑀸𑀯𑀯𑀼𑀢𑁆𑀢𑀺𑀢𑁄 𑀅𑀜𑁆𑀜𑀸 𑀯𑀗𑁆𑀓𑀯𑀼𑀢𑁆𑀢𑀺 𑀦𑀸𑀫 𑀲𑀺𑀬𑀸. 𑀢𑀲𑁆𑀲𑀸 𑀯𑀗𑁆𑀓𑀯𑀼𑀢𑁆𑀢𑀺𑀬𑀸 𑀅𑀦𑀦𑁆𑀢𑀯𑀺𑀓𑀧𑁆𑀧𑀢𑁆𑀢𑀸 𑀅𑀧𑁆𑀧𑀫𑀸𑀡𑀧𑀓𑁆𑀔𑀢𑁆𑀢𑀸 𑀓𑀣𑀦𑁂𑀦 𑀧𑀭𑀺𑀲𑀫𑀸𑀧𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀦𑀬𑀢𑁄 𑀢𑀲𑁆𑀲 𑀅𑀦𑀦𑁆𑀢𑀧𑀓𑁆𑀔𑀲𑁆𑀲 𑀧𑀭𑀺𑀕𑁆𑀕𑀳𑀡𑀢𑁆𑀣𑀁 𑀩𑀻𑀚𑁄𑀧𑀤𑀲𑁆𑀲𑀦𑀁 𑀓𑀸𑀭𑀡𑀫𑀢𑁆𑀢𑀲𑁆𑀲 𑀦𑀺𑀤𑀲𑁆𑀲𑀦𑀁 𑀳𑁄𑀢𑀺. 𑀯𑀓𑁆𑀔𑀫𑀸𑀦𑀪𑁂𑀤𑀢𑁄 𑀏𑀓𑀫𑁂𑀓𑀫𑁆𑀧𑀺 𑀅𑀢𑁆𑀢𑀦𑀸 𑀲𑀤𑀺𑀲𑀁 𑀅𑀦𑀦𑁆𑀢𑀪𑁂𑀤𑀧𑀭𑀺𑀕𑁆𑀕𑀳𑀚𑀸𑀦𑀦𑀢𑁆𑀣𑀁 𑀧𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀢𑁆𑀣𑀽𑀦𑀁 𑀲𑀪𑀸𑀯𑁄𑀢𑀺 𑀘, 𑀅𑀦𑀦𑁆𑀢𑀸 𑀯𑀺𑀓𑀧𑁆𑀧𑀸 𑀬𑀲𑁆𑀲 𑀲𑀪𑀸𑀯𑀲𑁆𑀲𑁂𑀢𑀺 𑀘, 𑀢𑀲𑁆𑀲 𑀪𑀸𑀯𑁄𑀢𑀺 𑀘, 𑀩𑀻𑀚𑀲𑁆𑀲 𑀉𑀧𑀤𑀲𑁆𑀲𑀦𑀦𑁆𑀢𑀺 𑀘 𑀯𑀺𑀕𑁆𑀕𑀳𑁄.

𑀯𑀗𑁆𑀓𑀯𑀼𑀢𑁆𑀢𑀺𑀅𑀢𑁆𑀣𑀸𑀮𑀗𑁆𑀓𑀸𑀭𑀉𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁬𑁮.

𑀢𑀢𑁆𑀣𑀸’𑀢𑀺𑀲𑀬𑀉𑀧𑀫𑀸-

𑀭𑀽𑀧𑀓𑀸𑀯𑀼𑀢𑁆𑀢𑀺𑀤𑀻𑀧𑀓𑀁;

𑀅𑀓𑁆𑀔𑁂𑀧𑁄’𑀢𑁆𑀣𑀦𑁆𑀢𑀭𑀦𑁆𑀬𑀸𑀲𑁄,

𑀩𑁆𑀬𑀢𑀺𑀭𑁂𑀓𑁄 𑀯𑀺𑀪𑀸𑀯𑀦𑀸.

𑁧𑁬𑁯.

𑀳𑁂𑀢𑀼𑀓𑁆𑀓𑀫𑁄 ¶ 𑀧𑀺𑀬𑀢𑀭𑀁, 𑀲𑀫𑀸𑀲𑀧𑀭𑀺𑀓𑀧𑁆𑀧𑀦𑀸;

𑀲𑀫𑀸𑀳𑀺𑀢𑀁 𑀧𑀭𑀺𑀬𑀸𑀬-𑀯𑀼𑀢𑁆𑀢𑀺𑀩𑁆𑀬𑀸𑀚𑁄𑀧𑀯𑀡𑁆𑀡𑀦𑀁.

𑁧𑁭𑁦.

𑀯𑀺𑀲𑁂𑀲 𑀭𑀼𑀴𑁆𑀳𑀸𑀳𑀗𑁆𑀓𑀸𑀭𑀸,

𑀲𑀺𑀮𑁂𑀲𑁄 𑀢𑀼𑀮𑁆𑀬𑀬𑁄𑀕𑀺𑀢𑀸;

𑀦𑀺𑀤𑀲𑁆𑀲𑀦𑀁 𑀫𑀳𑀦𑁆𑀢𑀢𑁆𑀢𑀁,

𑀯𑀜𑁆𑀘𑀦𑀸’𑀧𑁆𑀧𑀓𑀢𑀢𑁆𑀣𑀼𑀢𑀺.

𑁧𑁭𑁧.

𑀏𑀓𑀸𑀯𑀮𑀺 𑀅𑀜𑁆𑀜𑀫𑀜𑁆𑀜𑀁, 𑀲𑀳𑀯𑀼𑀢𑁆𑀢𑀺 𑀯𑀺𑀭𑁄𑀥𑀺𑀢𑀸;

𑀧𑀭𑀺𑀯𑀼𑀢𑁆𑀢𑀺𑀩𑁆𑀪𑀫𑁄𑀪𑀸𑀯𑁄, 𑀫𑀺𑀲𑁆𑀲’𑀫𑀸𑀲𑀻 𑀭𑀲𑀻 𑀇𑀢𑀺.

𑁧𑁭𑁨.

𑀏𑀢𑁂 𑀪𑁂𑀤𑀸 𑀲𑀫𑀼𑀤𑁆𑀤𑀺𑀝𑁆𑀞𑀸, 𑀪𑀸𑀯𑁄 𑀚𑀻𑀯𑀺𑀢𑀫𑀼𑀘𑁆𑀘𑀢𑁂;

𑀯𑀗𑁆𑀓𑀯𑀼𑀢𑁆𑀢𑀻𑀲𑀼 𑀧𑁄𑀲𑁂𑀢𑀺, 𑀲𑀺𑀮𑁂𑀲𑁄 𑀢𑀼 𑀲𑀺𑀭𑀺𑀁 𑀧𑀭𑀁.

𑁧𑁬𑁮-𑁧𑁭𑁨. 𑀬𑀣𑁄𑀤𑁆𑀤𑁂𑀲𑀁 𑀦𑀺𑀤𑁆𑀤𑀺𑀲𑀺𑀢𑀼𑀓𑀸𑀫𑁄 𑀉𑀤𑁆𑀤𑀺𑀲𑀢𑀺 ‘‘𑀢𑀢𑁆𑀣𑁂’’𑀘𑁆𑀘𑀸𑀤𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 𑀯𑀗𑁆𑀓𑀯𑀼𑀢𑁆𑀢𑀺𑀬𑀁 ‘‘𑀏𑀢𑁂 𑀪𑁂𑀤𑀸 𑀲𑀫𑀼𑀤𑁆𑀤𑀺𑀝𑁆𑀞𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀲𑀫𑀼𑀤𑁆𑀤𑀺𑀝𑁆𑀞𑀸𑀢𑀺 𑀲𑀗𑁆𑀔𑁂𑀧𑀦𑀬𑁂𑀦 𑀯𑀼𑀢𑁆𑀢𑀸. 𑀅𑀢𑀺𑀲𑀬𑁄 𑀉𑀧𑀫𑀸 𑀭𑀽𑀧𑀓𑀁 𑀆𑀯𑀼𑀢𑁆𑀢𑀺 𑀤𑀻𑀧𑀓𑀜𑁆𑀘, 𑀲𑀫𑀸𑀲𑁄 𑀲𑀫𑀸𑀲𑀯𑀼𑀢𑁆𑀢𑀺 𑀧𑀭𑀺𑀓𑀧𑁆𑀧𑀦𑀸 𑀘, 𑀯𑀺𑀲𑁂𑀲𑁄 𑀭𑀼𑀴𑁆𑀳𑀸𑀳𑀗𑁆𑀓𑀸𑀭𑁄 𑀘, 𑀚𑀻𑀯𑀺𑀢𑀫𑀼𑀘𑁆𑀘𑀢𑁂𑀢𑀺 𑀢𑀤𑀪𑀸𑀯𑁂 𑀩𑀦𑁆𑀥𑀲𑁆𑀲 𑀙𑀯𑀲𑁆𑀲𑁂𑀯 𑀳𑁂𑀬𑁆𑀬𑀢𑁆𑀢𑀸 𑀯𑀼𑀢𑁆𑀢𑀁, 𑀲𑀺𑀮𑁂𑀲𑁄 𑀢𑀼 𑀯𑀗𑁆𑀓𑀯𑀼𑀢𑁆𑀢𑀻𑀲𑀼 𑀲𑀪𑀸𑀯𑀯𑀼𑀢𑁆𑀢𑀺𑀁 𑀳𑀺𑀢𑁆𑀯𑀸 𑀯𑀢𑁆𑀣𑀼𑀲𑀪𑀸𑀯𑀢𑁄 𑀅𑀜𑁆𑀜𑀣𑀸 𑀬𑀣𑀸 𑀢𑀣𑀸 𑀧𑀭𑀺𑀓𑀧𑁆𑀧𑀦𑀭𑀽𑀧𑀸𑀲𑀼 𑀅𑀢𑀺𑀲𑀬𑀸𑀤𑀻𑀲𑀼 𑀯𑀼𑀢𑁆𑀢𑀻𑀲𑀼 𑀧𑀭𑀁 𑀲𑀺𑀭𑀺𑀁 𑀓𑀦𑁆𑀢𑀺𑀁 𑀧𑁄𑀲𑁂𑀢𑀺 𑀢𑀁 𑀧𑀽𑀭𑁂𑀢𑀺 𑀆𑀯𑀳𑀢𑀻𑀢𑀺.

𑁧𑁬𑁮-𑁧𑁭𑁨. 𑀪𑁂𑀤𑀯𑀦𑁆𑀢𑀸𑀦𑀁 𑀧𑀤𑀢𑁆𑀣𑀸𑀦𑀁 𑀲𑀪𑀸𑀯𑀓𑀣𑀦𑀁 𑀉𑀤𑁆𑀤𑁂𑀲𑀓𑁆𑀓𑀫𑁂𑀦 𑀧𑀸𑀓𑀝𑀁 𑀳𑁄𑀢𑀻𑀢𑀺 𑀯𑀢𑁆𑀢𑀫𑀸𑀦𑁂𑀳𑀺 𑀅𑀮𑀗𑁆𑀓𑀸𑀭𑁂𑀳𑀺 𑀉𑀤𑁆𑀤𑀺𑀲𑀦𑁆𑀢𑁄 ‘‘𑀢𑀢𑁆𑀣𑀸𑀢𑀺𑀲𑀬…𑀧𑁂… 𑀭𑀲𑀻’’𑀢𑀺 𑀕𑀸𑀣𑀸𑀘𑀢𑀼𑀓𑁆𑀓𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀺𑀲𑁆𑀲𑀁 𑀯𑀗𑁆𑀓𑀯𑀼𑀢𑁆𑀢𑀺𑀬𑀁 𑀇𑀢𑀺 𑀏𑀯𑀁 𑀏𑀢𑁂 𑀧𑀜𑁆𑀘𑀢𑀺𑀁𑀲 𑀪𑁂𑀤𑀸 𑀲𑀫𑀼𑀤𑁆𑀤𑀺𑀝𑁆𑀞𑀸 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀸𑀢𑀺. 𑀏𑀢𑁂𑀲𑀁 𑀧𑀦 𑀧𑀤𑀸𑀦𑀁 𑀅𑀢𑁆𑀣𑁄 𑀦𑀺𑀤𑁆𑀤𑁂𑀲𑁂 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀇𑀫𑀺𑀦𑀸 𑀪𑀸𑀯𑁄 𑀘 𑀲𑀺𑀮𑁂𑀲𑁄 𑀘 𑀅𑀢𑀺𑀧𑁆𑀧𑀲𑀢𑁆𑀣𑁄𑀢𑀺 𑀤𑀻𑀧𑁂𑀢𑀺. 𑀪𑀸𑀯𑁄 𑀪𑀸𑀯𑀸𑀮𑀗𑁆𑀓𑀸𑀭𑁄 𑀚𑀻𑀯𑀺𑀢𑀁 𑀩𑀦𑁆𑀥𑀲𑁆𑀲 𑀧𑀸𑀡𑀪𑀽𑀢𑁄𑀢𑀺 𑀯𑀼𑀘𑁆𑀘𑀢𑁂, ¶ 𑀪𑀸𑀯𑀭𑀳𑀺𑀢𑀲𑁆𑀲 𑀩𑀦𑁆𑀥𑀲𑁆𑀲 𑀙𑀯𑀲𑀭𑀻𑀭𑀲𑁆𑀲 𑀯𑀺𑀬 𑀅𑀦𑀼𑀧𑀸𑀤𑁂𑀬𑁆𑀬𑀢𑁆𑀢𑀸, 𑀲𑀺𑀮𑁂𑀲𑁄 𑀢𑀼 𑀲𑀺𑀮𑁂𑀲𑀸𑀮𑀗𑁆𑀓𑀸𑀭𑁄 𑀧𑀦 𑀯𑀗𑁆𑀓𑀯𑀼𑀢𑁆𑀢𑀻𑀲𑀼 𑀅𑀢𑀺𑀲𑀬𑁄𑀧𑀫𑀸𑀤𑀺𑀯𑀗𑁆𑀓𑀯𑀼𑀢𑁆𑀢𑀻𑀲𑀼 𑀧𑀭𑀫𑀼𑀓𑁆𑀓𑀁𑀲𑀪𑀽𑀢𑀁 𑀲𑀺𑀭𑀺𑀁 𑀲𑁄𑀪𑀁 𑀧𑁄𑀲𑁂𑀢𑀺 𑀧𑀽𑀭𑁂𑀢𑀺.

𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁧𑁭𑁩.

𑀧𑀓𑀸𑀲𑀺𑀓𑀸 𑀯𑀺𑀲𑁂𑀲𑀲𑁆𑀲,

𑀲𑀺𑀬𑀸’𑀢𑀺𑀲𑀬𑀯𑀼𑀢𑁆𑀢𑀺 𑀬𑀸;

𑀮𑁄𑀓𑀸𑀢𑀺𑀓𑁆𑀓𑀦𑁆𑀢𑀯𑀺𑀲𑀬𑀸,

𑀮𑁄𑀓𑀺𑀬𑀸𑀢𑀺 𑀘 𑀲𑀸 𑀤𑁆𑀯𑀺𑀥𑀸.

𑁧𑁭𑁩. 𑀢𑀢𑁆𑀣𑀸𑀢𑀺𑀲𑀬𑀯𑀼𑀢𑁆𑀢𑀻𑀦𑀁 𑀢𑀸𑀯 𑀦𑀺𑀤𑁆𑀤𑀺𑀲𑀦𑁆𑀢𑁄 𑀆𑀳 ‘‘𑀧𑀓𑀸𑀲𑀺𑀓𑀸’’𑀇𑀘𑁆𑀘𑀸𑀤𑀺. 𑀯𑀺𑀲𑁂𑀲𑀲𑁆𑀲 𑀯𑀢𑁆𑀣𑀼𑀕𑀢𑀲𑁆𑀲𑀸𑀢𑀺𑀫𑀢𑁆𑀢𑀲𑁆𑀲 𑀧𑀓𑀸𑀲𑀺𑀓𑀸𑀬𑀸𑀢𑀺 𑀅𑀦𑀼𑀯𑀤𑀺𑀢𑁆𑀯𑀸 𑀲𑀸 𑀅𑀢𑀺𑀲𑀬𑀯𑀼𑀢𑁆𑀢𑀺 𑀲𑀺𑀬𑀸𑀢𑀺 𑀯𑀺𑀥𑀻𑀬𑀢𑁂, 𑀅𑀢𑀺𑀲𑀬𑀲𑁆𑀲 𑀯𑀢𑁆𑀣𑀼𑀦𑁄 𑀉𑀓𑁆𑀓𑀁𑀲𑀲𑁆𑀲 𑀧𑀝𑀺𑀧𑀸𑀤𑀺𑀓𑀸 𑀯𑀼𑀢𑁆𑀢𑀺 𑀅𑀢𑀺𑀲𑀬𑀯𑀼𑀢𑁆𑀢𑀺. 𑀲𑀸 𑀘 𑀤𑀼𑀯𑀺𑀥𑀸𑀢𑀺 𑀆𑀳 ‘‘𑀮𑁄𑀓’’𑀇𑀘𑁆𑀘𑀸𑀤𑀺. 𑀮𑁄𑀓𑀁 𑀮𑁄𑀓𑀧𑁆𑀧𑀢𑀻𑀢𑀺𑀁 𑀅𑀢𑀺𑀓𑁆𑀓𑀦𑁆𑀢𑁄 𑀯𑀺𑀲𑀬𑁄 𑀕𑁄𑀘𑀭𑁄 𑀬𑀲𑁆𑀲𑀸 𑀲𑀸 𑀮𑁄𑀓𑀸𑀢𑀺𑀓𑁆𑀓𑀦𑁆𑀢𑀯𑀺𑀲𑀬𑀸 𑀘 𑀮𑁄𑀓𑁂 𑀪𑀯𑀸 𑀮𑁄𑀓𑀞𑀺𑀢𑀺𑀫𑀦𑀢𑀺𑀓𑁆𑀓𑀦𑁆𑀢𑀢𑁆𑀢𑀸𑀢𑀺 𑀮𑁄𑀓𑀺𑀬𑀸 𑀘𑀸𑀢𑀺 𑀅𑀢𑀺𑀲𑀬𑀯𑀼𑀢𑁆𑀢𑀺 𑀤𑁆𑀯𑀺𑀥𑀸 𑀤𑁆𑀯𑀺𑀧𑁆𑀧𑀓𑀸𑀭𑀸 𑀪𑀯𑀢𑀺.

𑁧𑁭𑁩. 𑀇𑀤𑀸𑀦𑀺 𑀉𑀤𑁆𑀤𑁂𑀲𑀓𑁆𑀓𑀫𑁂𑀦 𑀅𑀢𑀺𑀲𑀬𑀯𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 ‘‘𑀧𑀓𑀸𑀲𑀺’’𑀘𑁆𑀘𑀸𑀤𑀺𑀦𑀸. 𑀯𑀺𑀲𑁂𑀲𑀲𑁆𑀲 𑀚𑀸𑀢𑁆𑀬𑀸𑀤𑀺𑀧𑀤𑀢𑁆𑀣𑀕𑀢𑀅𑀥𑀺𑀓𑀯𑀺𑀲𑁂𑀲𑀲𑁆𑀲 𑀬𑀸 𑀯𑀼𑀢𑁆𑀢𑀺 𑀧𑀓𑀸𑀲𑀺𑀓𑀸, 𑀲𑀸 𑀅𑀢𑀺𑀲𑀬𑀯𑀼𑀢𑁆𑀢𑀺 𑀦𑀸𑀫 𑀲𑀺𑀬𑀸, 𑀲𑀸 𑀅𑀢𑀺𑀲𑀬𑀯𑀼𑀢𑁆𑀢𑀺 𑀮𑁄𑀓𑀸𑀢𑀺𑀓𑁆𑀓𑀦𑁆𑀢𑀯𑀺𑀲𑀬𑀸 𑀘 𑀚𑀸𑀢𑁆𑀬𑀸𑀤𑀺𑀧𑀤𑀢𑁆𑀣𑀸𑀦𑀁 𑀬𑀣𑀸𑀲𑀪𑀸𑀯𑀲𑀗𑁆𑀔𑀢𑀮𑁄𑀓𑀞𑀺𑀢𑁆𑀬𑀸𑀢𑀺𑀓𑁆𑀓𑀦𑁆𑀢𑀯𑀺𑀲𑀬𑀢𑁆𑀢𑀸 𑀮𑁄𑀓𑀸𑀢𑀺𑀓𑁆𑀓𑀦𑁆𑀢 𑀯𑀺𑀲𑀬𑀸𑀢𑀺 𑀘 𑀮𑁄𑀓𑀺𑀬𑀸𑀢𑀺 𑀘 𑀬𑀣𑀸𑀯𑀼𑀢𑁆𑀢𑀮𑁄𑀓𑀫𑀦𑀢𑀺𑀓𑁆𑀓𑀫𑁆𑀫 𑀧𑀯𑀢𑁆𑀢𑀦𑀢𑁄 𑀮𑁄𑀓𑀺𑀬𑀸𑀢𑀺 𑀘𑁂𑀯𑀁 𑀤𑁆𑀯𑀺𑀥𑀸 𑀤𑁆𑀯𑀺𑀧𑁆𑀧𑀓𑀸𑀭𑀸 𑀳𑁄𑀦𑁆𑀢𑀺. 𑀯𑀤𑀢𑀻𑀢𑀺 𑀯𑀼𑀢𑁆𑀢𑀺, 𑀅𑀢𑀺𑀲𑀬𑀲𑁆𑀲 𑀯𑀼𑀢𑁆𑀢𑀻𑀢𑀺 𑀘, 𑀮𑁄𑀓𑀁 𑀅𑀢𑀺𑀓𑁆𑀓𑀦𑁆𑀢𑁄 𑀯𑀺𑀲𑀬𑁄 𑀏𑀢𑀺𑀲𑁆𑀲𑀸𑀢𑀺 𑀘, 𑀮𑁄𑀓𑁂 𑀪𑀯𑀸𑀢𑀺 𑀘 𑀯𑀺𑀕𑁆𑀕𑀳𑁄. ‘‘𑀯𑀺𑀲𑁂𑀲𑀲𑁆𑀲 𑀧𑀓𑀸𑀲𑀺𑀓𑀸’’𑀢𑀺 𑀧𑀲𑀺𑀤𑁆𑀥𑀕𑀼𑀡𑀸𑀦𑀼𑀯𑀸𑀤𑁂𑀦 ¶ 𑀲𑀸 𑀅𑀢𑀺𑀲𑀬𑀯𑀼𑀢𑁆𑀢𑀺 𑀲𑀺𑀬𑀸𑀢𑀺 𑀅𑀧𑀲𑀺𑀤𑁆𑀥𑀁 𑀅𑀢𑀺𑀲𑀬𑀯𑀼𑀢𑁆𑀢𑀺𑀯𑀺𑀥𑀸𑀦𑀁 𑀓𑀭𑁄𑀢𑀺, 𑀬𑀣𑀸 ‘‘𑀬𑁄 𑀓𑀼𑀡𑁆𑀟𑀮𑀻, 𑀲𑁄 𑀤𑁂𑀯𑀤𑀢𑁆𑀢𑁄’’𑀢𑀺. 𑀅𑀦𑀼𑀯𑀸𑀤𑀓𑀅𑀦𑀼𑀯𑀸𑀤𑀦𑀻𑀬𑀪𑁂𑀤𑁄 𑀉𑀧𑀭𑀺𑀧𑁆𑀬𑁂𑀯𑀫𑁂𑀯 𑀤𑀝𑁆𑀞𑀩𑁆𑀩𑁄.

𑁧𑁭𑁪.

𑀮𑁄𑀓𑀺𑀬𑀸𑀢𑀺𑀲𑀬𑀲𑁆𑀲𑁂’𑀢𑁂,

𑀪𑁂𑀤𑀸 𑀬𑁂 𑀚𑀸𑀢𑀺𑀆𑀤𑀬𑁄;

𑀧𑀝𑀺𑀧𑀸𑀤𑀻𑀬𑀢𑁂 𑀢𑁆𑀯’𑀚𑁆𑀚,

𑀮𑁄𑀓𑀸𑀢𑀺𑀓𑁆𑀓𑀦𑁆𑀢𑀕𑁄𑀘𑀭𑀸.

𑁧𑁭𑁪. 𑀅𑀬𑀁 𑀤𑁆𑀯𑀺𑀧𑁆𑀧𑀓𑀸𑀭𑀸 𑀅𑀢𑀺𑀲𑀬𑀯𑀼𑀢𑁆𑀢𑀺 𑀲𑀪𑀸𑀯𑀯𑀼𑀢𑁆𑀬𑀸𑀤𑀻𑀳𑀺 𑀪𑀺𑀦𑁆𑀦𑀸𑀢𑀺 𑀘𑁂? 𑀆𑀳 ‘‘𑀮𑁄𑀓’’𑀇𑀘𑁆𑀘𑀸𑀤𑀺. 𑀚𑀸𑀢𑀺𑀆𑀤𑀬𑁄 𑀬𑀢𑁄 𑀧𑀤𑀢𑁆𑀣𑀲𑁆𑀲 𑀯𑀺𑀘𑀺𑀢𑁆𑀢𑀁 𑀲𑀭𑀽𑀧𑀁 𑀯𑀤𑀢𑀻𑀢𑀺 𑀯𑀺𑀘𑀺𑀢𑁆𑀢𑀲𑀭𑀽𑀧𑀧𑀝𑀺𑀧𑀸𑀤𑀺𑀓𑀸 𑀲𑀪𑀸𑀯𑀯𑀼𑀢𑁆𑀢𑀺𑀧𑀺 𑀅𑀮𑀗𑁆𑀓𑀸𑀭𑁄, 𑀅𑀮𑀗𑁆𑀓𑀸𑀭𑀺𑀬𑀁 𑀢𑀼 𑀯𑀢𑁆𑀣𑀼𑀫𑀢𑁆𑀢𑀁, 𑀢𑀢𑁄 𑀲𑀪𑀸𑀯𑀯𑀼𑀢𑁆𑀬𑀸𑀤𑀬𑁄 𑀬𑁂 𑀪𑁂𑀤𑀸 𑀯𑀺𑀲𑁂𑀲𑀸, 𑀏𑀢𑁂 𑀮𑁄𑀓𑀺𑀬𑀸𑀢𑀺𑀲𑀬𑀲𑁆𑀲 𑀪𑁂𑀤𑀸, 𑀬𑀣𑀸 𑀲𑀭𑀻𑀭𑁂 𑀬𑀁 𑀲𑀳𑀚𑀁 𑀲𑀼𑀦𑁆𑀤𑀭𑀢𑁆𑀢𑀁, 𑀢𑀲𑁆𑀲 𑀧𑁄𑀲𑀓𑀸𑀧𑀺 𑀫𑀼𑀢𑁆𑀢𑀸𑀯𑀮𑀺𑀧𑁆𑀧𑀪𑀼𑀢𑀺 𑀅𑀮𑀗𑁆𑀓𑀸𑀭𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀩𑀦𑁆𑀥𑁂𑀧𑁆𑀬𑀮𑀗𑁆𑀓𑀸𑀭𑀺𑀬𑀯𑀢𑁆𑀣𑀼𑀦𑀺𑀫𑀺𑀢𑁆𑀢𑀁 𑀥𑀫𑁆𑀫𑀢𑁆𑀢𑀁 𑀬𑀸𑀬 𑀉𑀓𑁆𑀓𑀁𑀲𑀻𑀬𑀢𑀺, 𑀲𑀸 𑀉𑀓𑁆𑀓𑀁𑀲𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀘 𑀯𑀼𑀢𑁆𑀢𑀺 𑀅𑀮𑀗𑁆𑀓𑀸𑀭𑀲𑀤𑁆𑀤𑁂𑀦 𑀯𑀼𑀘𑁆𑀘𑀢𑁂. 𑀲𑀸 𑀧𑀦 𑀅𑀢𑀺𑀲𑀬𑀯𑀼𑀢𑁆𑀢𑀺𑀬𑁂𑀯. 𑀢𑁂𑀦𑁂𑀯𑀸𑀳 ‘‘𑀮𑁄𑀓𑀺𑀬𑀸𑀢𑀺𑀲𑀬𑀲𑁆𑀲𑁂𑀢𑁂, 𑀪𑁂𑀤𑀸 𑀬𑁂 𑀚𑀸𑀢𑀺𑀆𑀤𑀬𑁄’’𑀢𑀺. 𑀬𑀢𑁄 𑀏𑀯𑀁, 𑀢𑀢𑁄 𑀮𑁄𑀓𑀸𑀢𑀺𑀓𑁆𑀓𑀦𑁆𑀢𑀯𑀺𑀲𑀬𑀸 𑀘 𑀯𑀺𑀲𑀼𑀁 𑀤𑀲𑁆𑀲𑀦𑀻𑀬𑀸𑀢𑀺 𑀆𑀳 ‘‘𑀧𑀝𑀻’’𑀢𑀺𑀆𑀤𑀺. 𑀢𑀼𑀲𑀤𑁆𑀤𑁄 𑀪𑁂𑀤𑁂. 𑀅𑀚𑁆𑀚 𑀢𑀼 𑀇𑀤𑀸𑀦𑀺 𑀧𑀦 𑀮𑁄𑀓𑀸𑀢𑀺𑀓𑁆𑀓𑀦𑁆𑀢𑀕𑁄𑀘𑀭𑀸 𑀧𑀝𑀺𑀧𑀸𑀤𑀻𑀬𑀢𑁂𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁭𑁪. 𑀇𑀤𑀸𑀦𑀺 𑀏𑀲𑀸 𑀤𑁆𑀯𑀺𑀧𑁆𑀧𑀓𑀸𑀭𑀸𑀧𑀺 𑀅𑀢𑀺𑀲𑀬𑀯𑀼𑀢𑁆𑀢𑀺𑀲𑀪𑀸𑀯𑀯𑀼𑀢𑁆𑀬𑀸𑀤𑀻𑀳𑀺 𑀅𑀦𑀜𑁆𑀜𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀮𑁄𑀓𑀺𑀬𑁂’’𑀘𑁆𑀘𑀸𑀤𑀺𑀫𑀸𑀳. 𑀚𑀸𑀢𑀺𑀆𑀤𑀬𑁄 𑀚𑀸𑀢𑀺𑀕𑀼𑀡𑀸𑀤𑀺𑀧𑀤𑀢𑁆𑀣𑀕𑀢𑀯𑀺𑀘𑀺𑀢𑁆𑀢𑀲𑀭𑀽𑀧𑀲𑁆𑀲 𑀧𑀓𑀸𑀲𑀦𑀢𑁄 𑀦𑀺𑀲𑁆𑀲𑀬𑀯𑁄𑀳𑀸𑀭𑁂𑀦 ‘‘𑀚𑀸𑀢𑁆𑀬𑀸𑀤𑀬𑁄’’𑀢𑀺 𑀦𑀺𑀤𑁆𑀤𑀺𑀝𑁆𑀞𑀸 𑀚𑀸𑀢𑀺𑀲𑀪𑀸𑀯𑀯𑀼𑀢𑁆𑀢𑀺𑀕𑀼𑀡𑀲𑀪𑀸𑀯𑀯𑀼𑀢𑁆𑀬𑀸𑀤𑀬𑁄 𑀬𑁂 𑀪𑁂𑀤𑀸 ¶ 𑀯𑀺𑀲𑁂𑀲𑀸, 𑀏𑀢𑁂 𑀮𑁄𑀓𑀺𑀬𑀸𑀢𑀺𑀲𑀬𑀲𑁆𑀲 𑀮𑁄𑀓𑀺𑀬𑀸𑀢𑀺𑀲𑀬𑀯𑀼𑀢𑁆𑀢𑀺𑀬𑀸𑀬𑁂𑀯 𑀪𑁂𑀤𑀸 𑀅𑀯𑀬𑀯𑀸. 𑀢𑀢𑁆𑀣 𑀮𑁄𑀓𑀺𑀬𑀸𑀢𑀺𑀲𑀬𑀯𑀼𑀢𑁆𑀢𑀺 𑀦𑀸𑀫 𑀚𑀸𑀢𑀺𑀲𑀪𑀸𑀯𑀯𑀼𑀢𑁆𑀢𑀺𑀕𑀼𑀡𑀲𑀪𑀸𑀯𑀯𑀼𑀢𑁆𑀬𑀸𑀤𑀬𑁄𑀬𑁂𑀯𑀸𑀢𑀺. 𑀏𑀲𑀸𑀬𑁂𑀯 𑀯𑀺𑀘𑀺𑀢𑁆𑀭𑀭𑀽𑀧𑀧𑀝𑀺𑀧𑀸𑀤𑀺𑀓𑀸 𑀉𑀓𑁆𑀓𑀁𑀲𑀸𑀢𑀺 𑀘 𑀯𑀼𑀘𑁆𑀘𑀢𑀺. 𑀏𑀯𑀁 𑀮𑁄𑀓𑀺𑀬𑀸𑀢𑀺𑀲𑀬𑀯𑀼𑀢𑁆𑀢𑀺𑀬𑀸 ‘‘𑀮𑀻𑀮𑀸𑀯𑀺𑀓𑀦𑁆𑀢𑀺𑀲𑀼𑀪𑀕𑁄’’𑀢𑀺 𑀉𑀤𑀸𑀳𑀭𑀡𑀲𑁆𑀲 𑀕𑀫𑁆𑀬𑀫𑀸𑀦𑀢𑁆𑀢𑀸 𑀯𑀓𑁆𑀔𑀫𑀸𑀦𑀁 𑀧𑀝𑀺𑀚𑀸𑀦𑀸𑀢𑀺 ‘‘𑀧𑀝𑀺𑀧𑀸𑀤𑀻𑀬𑀢𑁂’’𑀘𑁆𑀘𑀸𑀤𑀺𑀦𑀸. 𑀅𑀚𑁆𑀚 𑀢𑀼 𑀇𑀤𑀸𑀦𑀺 𑀧𑀦 𑀮𑁄𑀓𑀸𑀢𑀺𑀓𑁆𑀓𑀦𑁆𑀢𑀕𑁄𑀘𑀭𑀸 𑀅𑀢𑀺𑀲𑀬𑀯𑀼𑀢𑁆𑀢𑀺 𑀧𑀝𑀺𑀧𑀸𑀤𑀻𑀬𑀢𑁂 𑀉𑀤𑀸𑀳𑀭𑀡𑀢𑁄 𑀦𑀺𑀧𑁆𑀨𑀸𑀤𑀻𑀬𑀢𑀺. 𑀮𑁄𑀓𑁂 𑀪𑀯𑁄𑀢𑀺 𑀘, 𑀢𑀲𑁆𑀲 𑀅𑀢𑀺𑀲𑀬𑁄 𑀆𑀥𑀺𑀓𑁆𑀓𑀫𑀺𑀢𑀺 𑀘 𑀯𑀸𑀓𑁆𑀬𑀁.

𑁧𑁭𑁫.

𑀧𑀺𑀯𑀦𑁆𑀢𑀺 𑀤𑁂𑀳𑀓𑀦𑁆𑀢𑀻 𑀬𑁂,

𑀦𑁂𑀢𑁆𑀢𑀜𑁆𑀚𑀮𑀺𑀧𑀼𑀝𑁂𑀦 𑀢𑁂;

𑀦𑀸’𑀮𑀁 𑀳𑀦𑁆𑀢𑀼𑀁 𑀚𑀺𑀦𑁂’𑀲𑀁 𑀢𑁆𑀯𑀁,

𑀢𑀡𑁆𑀳𑀁 𑀢𑀡𑁆𑀳𑀸𑀳𑀭𑁄𑀧𑀺 𑀓𑀺𑀁.

𑁧𑁭𑁫. 𑀢𑀫𑀼𑀤𑀸𑀳𑀭𑀢𑀺 ‘‘𑀧𑀺𑀯𑀦𑁆𑀢𑀺’’𑀘𑁆𑀘𑀸𑀤𑀺𑀦𑀸. 𑀚𑀺𑀦 𑀢𑁂 𑀤𑁂𑀳𑀓𑀦𑁆𑀢𑀻 𑀲𑀭𑀻𑀭𑀲𑁄𑀪𑀸𑀬𑁄 𑀬𑁂 𑀚𑀦𑀸 𑀦𑁂𑀢𑁆𑀢𑀜𑁆𑀚𑀮𑀺𑀧𑀼𑀝𑁂𑀦 𑀅𑀢𑁆𑀢𑀦𑁄 𑀦𑀬𑀦𑀤𑁆𑀯𑀦𑁆𑀤𑀲𑀗𑁆𑀔𑀸𑀢𑁂𑀦 𑀅𑀜𑁆𑀚𑀮𑀺𑀧𑀼𑀝𑁂𑀦 𑀧𑀺𑀯𑀦𑁆𑀢𑀺, 𑀏𑀲𑀁 𑀚𑀦𑀸𑀦𑀁 𑀢𑀡𑁆𑀳𑀁 𑀧𑀺𑀧𑀸𑀲𑀁 𑀮𑁄𑀪𑀫𑁂𑀯 𑀯𑀸 𑀳𑀭𑀢𑀺 𑀅𑀦𑀼𑀧𑀢𑀢𑀺 [𑀅𑀧𑀦𑀬𑀢𑀺 (?)]. 𑀢𑀡𑁆𑀳𑀸𑀳𑀭𑁄𑀧𑀺 𑀲𑀫𑀸𑀦𑁄 𑀢𑁆𑀯𑀁 𑀳𑀦𑁆𑀢𑀼𑀁 𑀦𑀺𑀯𑀢𑁆𑀢𑀺𑀢𑀼𑀁 𑀓𑀺𑀁 𑀦𑀸𑀮𑀁 𑀓𑀲𑁆𑀫𑀸 𑀅𑀲𑀫𑀢𑁆𑀣𑁄𑀲𑀺. 𑀢𑀡𑁆𑀳𑀸𑀳𑀭𑀸 𑀦𑀸𑀫 𑀢𑀡𑁆𑀳𑀫𑁂𑀯 𑀦𑀼𑀤𑀦𑁆𑀢𑀺. 𑀅𑀢𑁆𑀭 𑀳𑀦𑀦𑁆𑀢𑀸𑀫𑀧𑀺𑀳 𑀲𑀫𑁆𑀧𑀦𑀼𑀤𑀢𑀺 𑀮𑁄𑀓𑀞𑀺𑀢𑀺𑀁 𑀅𑀢𑀺𑀓𑁆𑀓𑀫𑁆𑀫 𑀤𑁂𑀳𑀓𑀦𑁆𑀢𑀺𑀬𑀸 𑀩𑀳𑀼𑀢𑁆𑀢𑀦𑀥𑀫𑁆𑀫𑁄 𑀯𑀼𑀢𑁆𑀢𑁄.

𑁧𑁭𑁫. 𑀇𑀤𑀸𑀦𑀺 𑀧𑀝𑀺𑀜𑁆𑀜𑀸𑀢𑀸𑀦𑀼𑀲𑀸𑀭𑁂𑀦 𑀧𑀝𑀺𑀧𑀸𑀤𑁂𑀢𑀺 ‘‘𑀧𑀺𑀯𑀦𑁆𑀢𑀺’’𑀘𑁆𑀘𑀸𑀤𑀺𑀦𑀸. 𑀪𑁄 𑀚𑀺𑀦 𑀢𑁂 𑀢𑀼𑀬𑁆𑀳𑀁 𑀤𑁂𑀳𑀓𑀦𑁆𑀢𑀻 𑀲𑀭𑀻𑀭𑀲𑁄𑀪𑀸𑀬𑁄 𑀬𑁂 𑀚𑀦𑀸 𑀦𑁂𑀢𑁆𑀢𑀜𑁆𑀚𑀮𑀺𑀧𑀼𑀝𑁂𑀦 𑀦𑁂𑀢𑁆𑀢𑀲𑀗𑁆𑀔𑀸𑀢𑁂𑀦 𑀳𑀢𑁆𑀣𑀧𑀼𑀝𑁂𑀦 𑀧𑀺𑀯𑀦𑁆𑀢𑀺, 𑀏𑀲𑀁 𑀲𑀸𑀥𑀼𑀚𑀦𑀸𑀦𑀁 𑀢𑀡𑁆𑀳𑀁 𑀧𑀺𑀧𑀸𑀲𑀁 𑀮𑁄𑀪𑀫𑁂𑀯 ¶ 𑀯𑀸 𑀢𑀡𑁆𑀳𑀸𑀳𑀭𑁄𑀧𑀺 𑀢𑁆𑀯𑀁 𑀲𑀩𑁆𑀩𑁂𑀲𑀁 𑀢𑀡𑁆𑀳𑀸𑀯𑀺𑀦𑀸𑀲𑀓𑁄𑀧𑀺 𑀳𑀦𑁆𑀢𑀼𑀁 𑀦𑀺𑀯𑀸𑀭𑁂𑀢𑀼𑀁 𑀓𑀺𑀁 𑀦𑀸𑀮𑀁 𑀓𑀲𑁆𑀫𑀸 𑀅𑀲𑀫𑀢𑁆𑀣𑁄𑀲𑀻𑀢𑀺. 𑀏𑀢𑁆𑀣 𑀧𑀺𑀯𑀦𑀁 𑀦𑀸𑀫 𑀧𑀺𑀧𑀸𑀲𑀁 𑀯𑀺𑀦𑁂𑀢𑀻𑀢𑀺 𑀮𑁄𑀓𑀲𑀪𑀸𑀯𑁄. 𑀢𑀡𑁆𑀳𑀁 𑀳𑀦𑁆𑀢𑀼𑀁 𑀦𑀸𑀮𑀫𑀺𑀢𑀺 𑀮𑁄𑀓𑀲𑀪𑀸𑀯𑀫𑀢𑀺𑀓𑁆𑀓𑀦𑁆𑀢𑀢𑁆𑀣𑁄. 𑀓𑀦𑁆𑀢𑀻𑀦𑀁 𑀅𑀥𑀺𑀓𑀧𑀺𑀬𑀢𑀸 𑀅𑀢𑀺𑀲𑀬𑀥𑀫𑁆𑀫𑁄, 𑀢𑀲𑁆𑀲 𑀯𑀼𑀢𑁆𑀢𑀺 𑀧𑀦 𑀢𑀡𑁆𑀳𑀁 𑀳𑀦𑁆𑀢𑀼𑀁 𑀦𑀸𑀮𑀫𑀺𑀢𑀺 𑀮𑁄𑀓𑀸𑀢𑀺𑀓𑁆𑀓𑀦𑁆𑀢𑀅𑀢𑁆𑀣𑀁 𑀯𑀺𑀲𑀬𑀁 𑀓𑀢𑁆𑀯𑀸 𑀧𑀯𑀢𑁆𑀢𑁄 𑀳𑁄𑀢𑀺. 𑀲𑀸 𑀧𑀦 𑀓𑀣𑁂𑀢𑀼𑀫𑀺𑀘𑁆𑀙𑀺𑀢𑀁 𑀓𑀦𑁆𑀢𑀻𑀦𑀁 𑀅𑀥𑀺𑀓𑀧𑀺𑀬𑀢𑀁 𑀢𑀡𑁆𑀳𑀸𑀳𑀦𑀦𑁂 𑀅𑀲𑀫𑀢𑁆𑀣𑀁 𑀯𑀢𑁆𑀯𑀸 𑀤𑀻𑀧𑁂𑀢𑀻𑀢𑀺 𑀯𑀗𑁆𑀓𑀯𑀼𑀢𑁆𑀢𑀺 𑀦𑀸𑀫. 𑀯𑀼𑀘𑁆𑀘𑀫𑀸𑀦𑀸𑀦𑀁 𑀉𑀧𑀫𑀸𑀭𑀽𑀧𑀓𑀸𑀤𑀻𑀦𑀫𑁆𑀧𑀺 𑀯𑀗𑁆𑀓𑀯𑀼𑀢𑁆𑀢𑀺𑀢𑀸 𑀇𑀘𑁆𑀙𑀺𑀢𑀢𑁆𑀣𑀲𑁆𑀲 𑀧𑀓𑀸𑀭𑀦𑁆𑀢𑀭𑁂𑀦 𑀧𑀓𑀸𑀲𑀦𑀢𑁄𑀬𑁂𑀯. 𑀬𑀣𑀸 𑀦𑀸𑀫 𑀲𑀭𑀻𑀭𑀲𑀳𑀚𑀁 𑀧𑀻𑀦𑀢𑁆𑀢𑀸𑀤𑀺𑀲𑀼𑀦𑁆𑀤𑀭𑀢𑁆𑀢𑀁 𑀉𑀤𑁆𑀤𑀻𑀧𑀦𑀸𑀓𑀸𑀭𑁂𑀦 𑀞𑀺𑀢𑀸 𑀓𑀝𑀓𑀉𑀡𑁆𑀳𑀻𑀲𑀳𑀸𑀭𑀸𑀤𑀬𑁄 𑀅𑀮𑀗𑁆𑀓𑀸𑀭𑀸 𑀦𑀸𑀫 𑀪𑀯𑀦𑁆𑀢𑀺, 𑀏𑀯𑀁 𑀩𑀦𑁆𑀥𑀲𑀭𑀻𑀭𑀲𑀗𑁆𑀔𑀸𑀢𑁂 𑀅𑀮𑀗𑁆𑀓𑀭𑀡𑀻𑀬𑀯𑀢𑁆𑀣𑀼𑀫𑁆𑀳𑀺 𑀯𑀺𑀚𑁆𑀚𑀫𑀸𑀦𑀅𑀢𑀺𑀧𑀺𑀬𑀢𑀸𑀤𑀺𑀫𑁂𑀯 𑀉𑀤𑁆𑀤𑀻𑀧𑁂𑀢𑁆𑀯𑀸 𑀅𑀮𑀗𑁆𑀓𑀼𑀭𑀼𑀫𑀸𑀦𑀸 ‘‘𑀢𑀡𑁆𑀳𑀸𑀳𑀭𑁄𑀲𑀺 𑀢𑁆𑀯𑀁 𑀏𑀲𑀁 𑀓𑀦𑁆𑀢𑀻 𑀧𑀺𑀯𑀦𑁆𑀢𑀸𑀦𑀁 𑀢𑀡𑁆𑀳𑀁 𑀳𑀦𑁆𑀢𑀼𑀁 𑀦𑀸𑀮’’𑀫𑀺𑀢𑀺 𑀯𑀸𑀘𑀸𑀪𑀗𑁆𑀕𑀻 𑀅𑀮𑀗𑁆𑀓𑀸𑀭𑁄 𑀦𑀸𑀫. 𑀅𑀮𑀗𑁆𑀓𑀸𑀭𑀺𑀬𑀁 𑀦𑀸𑀫 𑀅𑀮𑀗𑁆𑀓𑀸𑀢𑀩𑁆𑀩𑀓𑀦𑁆𑀢𑀺𑀧𑀺𑀬𑀢𑀸𑀬 𑀩𑀳𑀼𑀢𑁆𑀢𑀦𑁆𑀢𑀺. 𑀉𑀢𑁆𑀢𑀭𑀺𑀧𑀺 𑀅𑀮𑀗𑁆𑀓𑀸𑀭𑀅𑀮𑀗𑁆𑀓𑀸𑀭𑀺𑀬𑀯𑀺𑀪𑀸𑀕𑁄 𑀘 𑀅𑀦𑀼𑀭𑀽𑀧𑀢𑁄 𑀬𑁄𑀚𑀦𑀓𑁆𑀓𑀫𑁄 𑀘 𑀏𑀯𑀫𑁂𑀯 𑀤𑀝𑁆𑀞𑀩𑁆𑀩𑁄. 𑀤𑁂𑀳𑁂 𑀓𑀦𑁆𑀢𑀻𑀢𑀺 𑀘, 𑀅𑀜𑁆𑀚𑀮𑀻𑀬𑁂𑀯 𑀧𑀼𑀝𑁄𑀢𑀺 𑀘, 𑀦𑁂𑀢𑁆𑀢𑀸𑀦𑀺𑀬𑁂𑀯 𑀅𑀜𑁆𑀚𑀮𑀺𑀧𑀼𑀝𑁄𑀢𑀺 𑀘, 𑀢𑀡𑁆𑀳𑀁 𑀳𑀭𑀢𑀻𑀢𑀺 𑀘 𑀯𑀺𑀕𑁆𑀕𑀳𑁄.

𑁧𑁭𑁬.

𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀸𑀦𑀁, 𑀲𑀥𑀫𑁆𑀫𑀢𑁆𑀢𑀁 𑀲𑀺𑀬𑁄’𑀧𑀫𑀸;

𑀲𑀤𑁆𑀤𑀢𑁆𑀣𑀕𑀫𑁆𑀫𑀸 𑀯𑀸𑀓𑁆𑀬𑀢𑁆𑀣-𑀯𑀺𑀲𑀬𑀸𑀢𑀺 𑀘 𑀲𑀸 𑀢𑀺𑀥𑀸.

𑁧𑁭𑁬. 𑀉𑀧𑀫𑀁 𑀦𑀺𑀤𑁆𑀤𑀺𑀲𑀢𑀺 ‘‘𑀉𑀧𑀫𑀸𑀦𑁂’’𑀘𑁆𑀘𑀸𑀤𑀺𑀦𑀸. 𑀉𑀧𑀫𑀻𑀬𑀢𑁂 𑀅𑀦𑁂𑀦𑀸𑀢𑀺 𑀉𑀧𑀫𑀸𑀦𑀁, 𑀧𑀤𑀼𑀫𑀸𑀤𑀺𑀓𑀯𑀢𑁆𑀣𑀼. 𑀧𑀤𑀼𑀫𑀸𑀤𑀺𑀓𑁄 𑀢𑀼 𑀲𑀤𑁆𑀤𑁄 𑀉𑀧𑀫𑀸𑀦𑀯𑀸𑀘𑀓𑁄. 𑀉𑀧𑀫𑀻𑀬𑀢𑀻𑀢𑀺 𑀉𑀧𑀫𑁂𑀬𑁆𑀬𑀁, 𑀫𑀼𑀔𑀸𑀤𑀺𑀓𑀯𑀢𑁆𑀣𑀼. 𑀫𑀼𑀔𑀸𑀤𑀺𑀓𑁄 𑀲𑀤𑁆𑀤𑁄 𑀢𑀼 𑀉𑀧𑀫𑁂𑀬𑁆𑀬𑀯𑀸𑀘𑀓𑁄. 𑀢𑁂𑀲𑀁 𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀸𑀦𑀁 𑀧𑀤𑀼𑀫𑀸𑀤𑀺𑀫𑀼𑀔𑀸𑀤𑀺𑀯𑀢𑁆𑀣𑀽𑀦𑀜𑁆𑀘. 𑀲𑀥𑀫𑁆𑀫𑀢𑁆𑀢𑀦𑁆𑀢𑀺 𑀲𑀫𑀸𑀦𑁄 𑀥𑀫𑁆𑀫𑁄 𑀓𑀦𑁆𑀢𑀺𑀫𑀦𑁆𑀢𑀢𑀸 𑀬𑀲𑁆𑀲 𑀲𑁄 𑀲𑀥𑀫𑁆𑀫𑁄, 𑀢𑀲𑁆𑀲 𑀪𑀸𑀯𑁄 𑀲𑀥𑀫𑁆𑀫𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀲𑀫𑀸𑀦𑁂𑀦 𑀥𑀫𑁆𑀫𑁂𑀦 𑀲𑀳 𑀲𑀫𑁆𑀩𑀦𑁆𑀥𑁄 𑀲𑀥𑀫𑁆𑀫𑀢𑁆𑀢𑀁 ¶ 𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀧𑀢𑀺𑀝𑁆𑀞𑀺𑀢𑀁 𑀉𑀧𑀫𑀸 𑀲𑀺𑀬𑀸, 𑀉𑀧𑀫𑀻𑀬𑀢𑀺 𑀬𑀣𑀸𑀯𑀼𑀢𑁆𑀢𑁄 𑀲𑀫𑁆𑀩𑀦𑁆𑀥𑁄𑀢𑀺 𑀓𑀢𑁆𑀯𑀸. 𑀲𑀸 𑀧𑀦𑀸𑀮𑀗𑁆𑀓𑀸𑀭𑀺𑀬𑀲𑁆𑀲 𑀥𑀫𑁆𑀫𑀲𑁆𑀲𑀸𑀢𑀺𑀲𑀬𑀧𑀝𑀺𑀧𑀸𑀤𑀦𑀧𑁆𑀧𑀓𑀸𑀭𑁄. 𑀓𑀢𑀺𑀯𑀺𑀥𑀸 𑀲𑀸𑀢𑀺 𑀆𑀳 ‘‘𑀲𑀤𑁆𑀤’’𑀇𑀘𑁆𑀘𑀸𑀤𑀺. 𑀲𑀤𑁆𑀤𑁄 𑀘 𑀅𑀢𑁆𑀣𑁄 𑀘, 𑀢𑁂𑀳𑀺 𑀕𑀫𑁆𑀫𑀸 𑀧𑀢𑀻𑀬𑀫𑀸𑀦𑀸 𑀲𑀤𑁆𑀤𑀢𑁆𑀣𑀕𑀫𑁆𑀫𑀸. 𑀯𑀸𑀓𑁆𑀬𑀁 𑀧𑀤𑀲𑀫𑀼𑀤𑀸𑀬𑁄. 𑀢𑀲𑁆𑀲 𑀅𑀢𑁆𑀣𑁄 𑀯𑀺𑀲𑀬𑁄 𑀕𑁄𑀘𑀭𑁄 𑀬𑀲𑁆𑀲𑀸 𑀯𑀸𑀓𑁆𑀬𑀢𑁆𑀣𑀯𑀺𑀲𑀬𑀸𑀢𑀺 𑀘 𑀲𑀸 𑀉𑀧𑀫𑀸 𑀢𑀺𑀯𑀺𑀥𑀸 𑀲𑀤𑁆𑀤𑀕𑀫𑁆𑀫𑀅𑀢𑁆𑀣𑀕𑀫𑁆𑀫𑀯𑀸𑀓𑁆𑀬𑀢𑁆𑀣𑀯𑀺𑀲𑀬𑀸𑀢𑀺 𑀢𑀺𑀥𑀸 𑀳𑁄𑀢𑀺.

𑁧𑁭𑁬. 𑀇𑀤𑀸𑀦𑀺 𑀉𑀧𑀫𑀸𑀮𑀗𑁆𑀓𑀸𑀭𑀁 𑀦𑀺𑀤𑁆𑀤𑀺𑀲𑀢𑀺 ‘‘𑀉𑀧𑀫𑀸𑀦𑁄’’𑀘𑁆𑀘𑀸𑀤𑀺𑀦𑀸. 𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀸𑀦𑀁 𑀘𑀦𑁆𑀤𑀦𑀻𑀮𑀼𑀧𑁆𑀧𑀮𑀤𑀮𑀸𑀪𑀸𑀤𑀻𑀦𑀁 𑀆𑀦𑀦𑀦𑀬𑀦𑀸𑀤𑀻𑀦𑀜𑁆𑀘 𑀧𑀤𑀢𑁆𑀣𑀸𑀦𑀁 𑀲𑀥𑀫𑁆𑀫𑀢𑁆𑀢𑀁 𑀓𑀦𑁆𑀢𑀺𑀫𑀦𑁆𑀢𑀢𑀸𑀧𑀻𑀦𑀢𑀸𑀤𑀺𑀢𑀼𑀮𑁆𑀬𑀥𑀫𑁆𑀫𑀲𑀫𑁆𑀩𑀦𑁆𑀥𑁄 𑀉𑀧𑀫𑀸 𑀦𑀸𑀫 𑀲𑀺𑀬𑀸, 𑀲𑀸 𑀅𑀮𑀗𑁆𑀓𑀭𑀡𑀻𑀬𑀯𑀢𑁆𑀣𑀼𑀦𑁄 𑀆𑀥𑀺𑀓𑁆𑀓𑀧𑀝𑀺𑀧𑀸𑀤𑀦𑀧𑁆𑀧𑀓𑀸𑀭𑀸 𑀉𑀧𑀫𑀸 𑀲𑀤𑁆𑀤𑀢𑁆𑀣𑀕𑀫𑁆𑀫𑀸 𑀲𑀤𑁆𑀤𑀕𑀫𑁆𑀫𑀸 𑀘 𑀅𑀢𑁆𑀣𑀕𑀫𑁆𑀫𑀸 𑀘 𑀯𑀸𑀓𑁆𑀬𑀢𑁆𑀣𑀯𑀺𑀲𑀬𑀸 𑀘, 𑀇𑀢𑀺 𑀏𑀯𑀁 𑀢𑀺𑀥𑀸 𑀢𑀺𑀧𑁆𑀧𑀓𑀸𑀭𑀸 𑀳𑁄𑀢𑀺. 𑀏𑀢𑁆𑀣 𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀪𑀽𑀢𑀸𑀦𑀁 𑀘𑀦𑁆𑀤𑀸𑀦𑀦𑀸𑀤𑀺𑀧𑀤𑀢𑁆𑀣𑀸𑀦𑀁 𑀲𑀥𑀫𑁆𑀫𑀲𑀗𑁆𑀔𑀢𑁄 𑀅𑀜𑁆𑀜𑀫𑀜𑁆𑀜𑀢𑀼𑀮𑁆𑀬𑀓𑀦𑁆𑀢𑀺𑀫𑀦𑁆𑀢𑀢𑀸𑀧𑀻𑀦𑀢𑀸𑀤𑀺𑀥𑀫𑁆𑀫𑀬𑁄𑀕𑁄 𑀧𑀤𑀢𑁆𑀣𑀸𑀦𑀁 𑀉𑀧𑀫𑀢𑁆𑀣𑀲𑁆𑀲 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀉𑀧𑀝𑁆𑀞𑀸𑀦𑀢𑀸𑀬 𑀉𑀧𑀫𑀸 𑀦𑀸𑀫 𑀳𑁄𑀢𑀺, 𑀢𑀦𑁆𑀦𑀺𑀲𑁆𑀲𑀬𑀘𑀦𑁆𑀤𑀸𑀤𑀬𑁄 𑀧𑀦 𑀦𑀺𑀲𑁆𑀲𑀺𑀢𑀯𑁄𑀳𑀸𑀭𑁂𑀦 𑀉𑀧𑀫𑀸 𑀦𑀸𑀫 𑀳𑁄𑀢𑀺, 𑀉𑀧𑀫𑀸𑀦𑀪𑀽𑀢𑀘𑀦𑁆𑀤𑀸𑀤𑀺𑀅𑀢𑁆𑀣𑀧𑀝𑀺𑀧𑀸𑀤𑀓𑁄 𑀘𑀦𑁆𑀤𑀺𑀫𑀸𑀤𑀺𑀲𑀤𑁆𑀤𑁄𑀧𑀺 𑀢𑀤𑀢𑁆𑀣𑁂𑀦 𑀉𑀧𑀫𑀸 𑀦𑀸𑀫 𑀳𑁄𑀢𑀺, 𑀉𑀧𑀫𑁂𑀬𑁆𑀬𑀼𑀧𑀫𑁂𑀬𑁆𑀬𑀦𑀺𑀲𑁆𑀲𑀬𑀢𑀧𑁆𑀧𑀝𑀺𑀧𑀸𑀤𑀓𑀸𑀦𑀫𑁆𑀧𑀺 𑀉𑀧𑀫𑁂𑀬𑁆𑀬𑀪𑀸𑀯𑁄 𑀏𑀯𑀫𑁂𑀯 𑀤𑀝𑁆𑀞𑀩𑁆𑀩𑁄. 𑀉𑀧𑀫𑀻𑀬𑀢𑁂 𑀅𑀦𑁂𑀦𑀸𑀢𑀺 𑀉𑀧𑀫𑀸𑀦𑀦𑁆𑀢𑀺 𑀓𑀢𑁆𑀯𑀸 𑀘𑀦𑁆𑀤𑀸𑀤𑀺 𑀉𑀧𑀫𑀸𑀦𑀁 𑀯𑀼𑀘𑁆𑀘𑀢𑀺, 𑀉𑀧𑀫𑀻𑀬𑀢𑀻𑀢𑀺 𑀉𑀧𑀫𑁂𑀬𑁆𑀬𑀁, 𑀆𑀦𑀦𑀸𑀤𑀺, 𑀉𑀧𑀫𑀸𑀦𑀜𑁆𑀘 𑀉𑀧𑀫𑁂𑀬𑁆𑀬𑀜𑁆𑀘𑀸𑀢𑀺 𑀘, 𑀲𑀫𑀸𑀦𑁄 𑀘 𑀲𑁄 𑀥𑀫𑁆𑀫𑁄 𑀘𑁂𑀢𑀺 𑀘, 𑀢𑀲𑁆𑀲 𑀪𑀸𑀯𑁄𑀢𑀺 𑀘, 𑀲𑀤𑁆𑀤𑁄 𑀘 𑀅𑀢𑁆𑀣𑁄 𑀘𑀸𑀢𑀺 𑀘, 𑀢𑁂𑀳𑀺 𑀕𑀫𑁆𑀫𑀸𑀢𑀺 𑀘, 𑀯𑀸𑀓𑁆𑀬𑀲𑁆𑀲 𑀅𑀢𑁆𑀣𑁄𑀢𑀺 𑀘, 𑀲𑁄 𑀯𑀺𑀲𑀬𑁄 𑀬𑀲𑁆𑀲𑀸 𑀉𑀧𑀫𑀸𑀬𑀸𑀢𑀺 𑀘 𑀯𑀸𑀓𑁆𑀬𑀁.

𑁧𑁭𑁭.

𑀲𑀫𑀸𑀲𑀧𑀘𑁆𑀘𑀬𑁂𑀯𑀸𑀤𑀻, 𑀲𑀤𑁆𑀤𑀸 𑀢𑁂𑀲𑀁 𑀯𑀲𑀸 𑀢𑀺𑀥𑀸;

𑀲𑀤𑁆𑀤𑀕𑀫𑁆𑀫𑀸 𑀲𑀫𑀸𑀲𑁂𑀦, 𑀫𑀼𑀦𑀺𑀦𑁆𑀤𑁄 𑀘𑀦𑁆𑀤𑀺𑀫𑀸𑀦𑀦𑁄.

𑁧𑁭𑁭. 𑀢𑀢𑁆𑀣 ¶ 𑀲𑀤𑁆𑀤𑀕𑀫𑁆𑀫𑀸𑀧𑀺 𑀢𑀺𑀥𑀸 𑀲𑀺𑀬𑀸𑀢𑀺 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀫𑀸𑀲’’𑀇𑀘𑁆𑀘𑀸𑀤𑀺. 𑀲𑀫𑀸𑀲𑁄 𑀘 𑀧𑀘𑁆𑀘𑀬𑁄 𑀘 𑀇𑀯𑀸𑀤𑀺 𑀘, 𑀢𑁂 𑀲𑀤𑁆𑀤𑀸 𑀦𑀸𑀫, 𑀲𑀤𑁆𑀤𑀲𑀤𑁆𑀤𑁂𑀦 𑀲𑀫𑀸𑀲𑀸𑀤𑀬𑁄 𑀯𑀢𑁆𑀢𑀼𑀫𑀥𑀺𑀧𑁆𑀧𑁂𑀢𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀁 𑀲𑀫𑀸𑀲𑀸𑀤𑀻𑀦𑀁 𑀯𑀲𑀸 𑀲𑀤𑁆𑀤𑀕𑀫𑁆𑀫𑀸 𑀢𑀺𑀥𑀸 𑀳𑁄𑀢𑀺 𑀲𑀫𑀸𑀲𑀲𑀤𑁆𑀤𑀕𑀫𑁆𑀫𑀸 𑀧𑀘𑁆𑀘𑀬𑀲𑀤𑁆𑀤𑀕𑀫𑁆𑀫𑀸 𑀇𑀯𑀸𑀤𑀺𑀲𑀤𑁆𑀤𑀕𑀫𑁆𑀫𑀸𑀢𑀺, 𑀲𑀫𑀸𑀲𑁂𑀦 𑀲𑀫𑀸𑀲𑀲𑀤𑁆𑀤𑁂𑀦 𑀕𑀫𑁆𑀫𑀸 𑀉𑀧𑀫𑀸 𑀯𑀼𑀘𑁆𑀘𑀢𑀻𑀢𑀺 𑀲𑁂𑀲𑁄. 𑀉𑀤𑀸𑀳𑀭𑀢𑀺 ‘‘𑀫𑀼𑀦𑀺𑀦𑁆𑀤𑁄 𑀘𑀦𑁆𑀤𑀺𑀫𑀸𑀦𑀦𑁄’’𑀢𑀺, 𑀘𑀦𑁆𑀤𑀺𑀫𑀸 𑀯𑀺𑀬 𑀭𑀼𑀘𑀺𑀭𑀫𑀸𑀦𑀦𑀁 𑀫𑀼𑀔𑀁 𑀬𑀲𑁆𑀲 𑀲𑁄 𑀘𑀦𑁆𑀤𑀺𑀫𑀸𑀦𑀦𑁄. 𑀏𑀢𑁆𑀣 𑀘 𑀘𑀦𑁆𑀤𑀺𑀫𑀁 𑀉𑀧𑀫𑀸𑀦𑀁, 𑀆𑀦𑀦𑀁 𑀉𑀧𑀫𑁂𑀬𑁆𑀬𑀁, 𑀭𑀼𑀘𑀺𑀭𑀢𑁆𑀢𑀁 𑀥𑀫𑁆𑀫𑁄, 𑀘𑀦𑁆𑀤𑀺𑀫𑀸𑀦𑀦𑀸𑀦𑀁 𑀲𑀫𑀸𑀦𑀥𑀫𑁆𑀫𑀲𑀫𑁆𑀩𑀦𑁆𑀥𑀺𑀚𑁄𑀢𑀓𑁄 𑀯𑀺𑀬𑀲𑀤𑁆𑀤𑁄, 𑀢𑁂𑀲𑀼 𑀲𑀸𑀥𑀸𑀭𑀡𑀥𑀫𑁆𑀫𑀯𑀸𑀘𑀓𑀲𑁆𑀲 𑀯𑀺𑀬𑀲𑀤𑁆𑀤𑀲𑁆𑀲 𑀘𑁄𑀧𑀫𑀸𑀚𑁄𑀢𑀓𑀲𑁆𑀲𑀸𑀧𑁆𑀧𑀬𑁄𑀕𑁄 𑀲𑀫𑀸𑀲𑁂𑀦𑁂𑀯 𑀯𑀼𑀢𑁆𑀢𑀢𑁆𑀢𑀸, 𑀏𑀢𑁆𑀣 𑀧𑀦 𑀯𑀺𑀬𑀲𑀤𑁆𑀤𑁄 𑀘𑀦𑁆𑀤𑀺𑀫𑀸𑀲𑀤𑁆𑀤𑁂𑀦 𑀉𑀧𑀫𑀸𑀦𑀯𑀸𑀘𑀓𑁂𑀦 𑀲𑀫𑁆𑀩𑀦𑁆𑀥𑀫𑀼𑀧𑀕𑀢𑁄 𑀘𑀦𑁆𑀤𑀕𑀢𑀫𑁂𑀯 𑀲𑀤𑀺𑀲𑀢𑁆𑀢𑀁 𑀯𑀤𑀢𑀺, 𑀫𑀼𑀔𑀕𑀢𑀁 𑀧𑀦 𑀲𑀸𑀫𑀢𑁆𑀣𑀺𑀬𑀸 𑀧𑀤𑀻𑀬𑀢𑁂, 𑀏𑀯𑀫𑀻𑀤𑀺𑀲𑀁 𑀤𑀝𑁆𑀞𑀩𑁆𑀩𑀁.

𑁧𑁭𑁭. 𑀢𑁂𑀲𑀼 𑀬𑀣𑀸𑀯𑀼𑀢𑁆𑀢𑁂𑀲𑀼 𑀲𑀤𑁆𑀤𑀕𑀫𑁆𑀫𑀲𑁆𑀲 𑀢𑀺𑀯𑀺𑀥𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 𑀆𑀳 ‘‘𑀲𑀫𑀸𑀲𑁂’’𑀘𑁆𑀘𑀸𑀤𑀺. 𑀲𑀫𑀸𑀲𑀧𑀘𑁆𑀘𑀬𑁂𑀯𑀸𑀤𑀻 𑀲𑀫𑀸𑀲𑁄, 𑀆𑀬𑀸𑀤𑀺𑀧𑀘𑁆𑀘𑀬𑀸, 𑀇𑀯𑀸𑀤𑀬𑁄 𑀘 𑀲𑀤𑁆𑀤𑀸 𑀦𑀸𑀫, 𑀢𑁂𑀲𑀁 𑀲𑀫𑀸𑀲𑀸𑀤𑀻𑀦𑀁 𑀯𑀲𑀸 𑀪𑁂𑀤𑁂𑀦 𑀲𑀤𑁆𑀤𑀕𑀫𑁆𑀫𑀸 𑀢𑀺𑀥𑀸 𑀲𑀫𑀸𑀲𑀲𑀤𑁆𑀤𑀕𑀫𑁆𑀫𑀸 𑀧𑀘𑁆𑀘𑀬𑀲𑀤𑁆𑀤𑀕𑀫𑁆𑀫𑀸 𑀇𑀯𑀸𑀤𑀺𑀲𑀤𑁆𑀤𑀕𑀫𑁆𑀫𑀸𑀢𑀺 𑀢𑀺𑀯𑀺𑀥𑀸 𑀳𑁄𑀢𑀺. 𑀲𑀫𑀸𑀲𑁂𑀦 𑀲𑀫𑀸𑀲𑀲𑀤𑁆𑀤𑁂𑀦 𑀕𑀫𑁆𑀫𑁄𑀧𑀫𑀸 𑀯𑀼𑀘𑁆𑀘𑀢𑀺 ‘‘𑀫𑀼𑀦𑀺𑀦𑁆𑀤𑁄 𑀘𑀦𑁆𑀤𑀺𑀫𑀸𑀦𑀦𑁄’’𑀢𑀺. 𑀫𑀼𑀦𑀺𑀦𑁆𑀤𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀘𑀦𑁆𑀤𑀺𑀫𑀸𑀦𑀦𑁄 𑀘𑀦𑁆𑀤𑀲𑀫𑀸𑀦𑀫𑀦𑁄𑀳𑀭𑀫𑀼𑀔𑀫𑀡𑁆𑀟𑀮𑁂𑀦 𑀬𑀼𑀢𑁆𑀢𑁄 𑀳𑁄𑀢𑀺, 𑀲𑀫𑀸𑀲𑁄 𑀘 𑀧𑀘𑁆𑀘𑀬𑁄 𑀘 𑀇𑀯𑀇𑀢𑀺 𑀇𑀤𑀁 𑀆𑀤𑀺 𑀬𑁂𑀲𑀁 𑀯𑀸𑀤𑀻𑀦𑀦𑁆𑀢𑀺 𑀘, 𑀲𑀤𑁆𑀤𑁂𑀦 𑀕𑀫𑁆𑀫𑀸𑀢𑀺 𑀘, 𑀫𑀼𑀦𑀻𑀦𑀁 𑀇𑀦𑁆𑀤𑁄𑀢𑀺 𑀘, 𑀘𑀦𑁆𑀤𑀺𑀫𑀸 𑀯𑀺𑀬 𑀭𑀼𑀘𑀺𑀭𑀁 𑀆𑀦𑀦𑀁 𑀫𑀼𑀔𑀁 𑀬𑀲𑁆𑀲𑁂𑀢𑀺 𑀘 𑀯𑀺𑀕𑁆𑀕𑀳𑁄. 𑀏𑀢𑁆𑀣 ‘‘𑀘𑀦𑁆𑀤𑀺𑀫𑀸’’𑀢𑀺 𑀉𑀧𑀫𑀸𑀦𑀁, ‘‘𑀆𑀦𑀦’’𑀦𑁆𑀢𑀺 𑀉𑀧𑀫𑁂𑀬𑁆𑀬𑀁, 𑀭𑀼𑀘𑀺𑀭𑀢𑁆𑀢𑀁 𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀸𑀦𑀁 𑀲𑀸𑀥𑀸𑀭𑀡𑀥𑀫𑁆𑀫𑁄, ‘‘𑀯𑀺𑀬𑀸’’𑀢𑀺 𑀲𑀤𑁆𑀤𑁄 𑀘𑀦𑁆𑀤𑀸𑀦𑀦𑀸𑀦𑀁 𑀤𑁆𑀯𑀺𑀦𑁆𑀦𑀁 𑀆𑀦𑀦𑀕𑀢𑀭𑀼𑀘𑀺𑀭𑀢𑁆𑀢𑀁 𑀘𑀦𑁆𑀤𑁂 𑀘, 𑀘𑀦𑁆𑀤𑀕𑀢𑀭𑀼𑀘𑀺𑀭𑀢𑁆𑀢𑀁 𑀆𑀦𑀦𑁂 𑀘 𑀅𑀢𑁆𑀣𑀻𑀢𑀺 𑀲𑀫𑀸𑀦𑀥𑀫𑁆𑀫𑀲𑀫𑁆𑀩𑀦𑁆𑀥𑀁 ¶ 𑀚𑁄𑀢𑁂𑀢𑀺, 𑀇𑀳 𑀲𑀸𑀥𑀸𑀭𑀡𑀥𑀫𑁆𑀫𑀯𑀸𑀘𑀓𑀲𑁆𑀲 𑀭𑀼𑀘𑀺𑀭𑀲𑀤𑁆𑀤𑀲𑁆𑀲, 𑀢𑀼𑀮𑁆𑀬𑀥𑀫𑁆𑀫𑀲𑀗𑁆𑀔𑀸𑀢𑁄𑀧𑀫𑀸𑀚𑁄𑀢𑀓𑀲𑁆𑀲 𑀯𑀺𑀬𑀲𑀤𑁆𑀤𑀲𑁆𑀲 𑀘 𑀅𑀧𑁆𑀧𑀬𑁄𑀕𑁄 𑀢𑁂𑀲𑀁 𑀅𑀢𑁆𑀣𑀸𑀦𑀁 𑀲𑀫𑀸𑀲𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀏𑀢𑁆𑀣 𑀉𑀧𑀫𑀸𑀦𑀯𑀸𑀘𑀓𑁂𑀦 𑀘𑀦𑁆𑀤𑀺𑀫𑀸𑀲𑀤𑁆𑀤𑁂𑀦 𑀬𑀼𑀢𑁆𑀢𑁄 𑀯𑀺𑀬 𑀲𑀤𑁆𑀤𑁄 𑀘𑀦𑁆𑀤𑀕𑀢𑀲𑀤𑀺𑀲𑀢𑁆𑀢𑀁 𑀚𑁄𑀢𑁂𑀢𑀺, 𑀫𑀼𑀔𑀕𑀢𑀲𑀤𑀺𑀲𑀢𑁆𑀢𑀁 𑀧𑀦 𑀲𑀸𑀫𑀢𑁆𑀣𑀺𑀬𑀸 𑀧𑀢𑀻𑀬𑀢𑁂. 𑀢𑀣𑀸 𑀳𑀺 𑀫𑀼𑀔𑀁 𑀘𑀦𑁆𑀤𑀲𑀫𑀸𑀦𑀫𑀸𑀕𑀘𑁆𑀙𑀦𑁆𑀢𑀁 𑀘𑀦𑁆𑀤𑀲𑁆𑀲 𑀫𑀼𑀔𑀲𑀤𑀺𑀲𑀢𑁆𑀢𑀁 𑀯𑀺𑀦𑀸 𑀦 𑀪𑀯𑀢𑀻𑀢𑀺 𑀅𑀜𑁆𑀜𑀣𑀸𑀦𑀼𑀧𑀧𑀢𑁆𑀢𑀺 𑀲𑀸𑀫𑀢𑁆𑀣𑀺𑀬𑀦𑁆𑀢𑀺.

𑁧𑁭𑁮.

𑀆𑀬𑀸𑀤𑀻 𑀧𑀘𑁆𑀘𑀬𑀸 𑀢𑁂𑀳𑀺, 𑀯𑀤𑀦𑀁 𑀧𑀗𑁆𑀓𑀚𑀸𑀬𑀢𑁂;

𑀫𑀼𑀦𑀺𑀦𑁆𑀤𑀦𑀬𑀦𑀤𑁆𑀯𑀦𑁆𑀤𑀁, 𑀦𑀻𑀮𑀼𑀧𑁆𑀧𑀮𑀤𑀮𑀻𑀬𑀢𑀺.

𑁧𑁭𑁮. 𑀇𑀤𑀸𑀦𑀺 𑀧𑀘𑁆𑀘𑀬𑀲𑀤𑁆𑀤𑀕𑀫𑁆𑀫𑀁 𑀤𑀲𑁆𑀲𑁂𑀢𑀺 ‘‘𑀆𑀬𑀸𑀤𑀺’’𑀘𑁆𑀘𑀸𑀤𑀺𑀦𑀸. 𑀆𑀬𑀸𑀤𑀻𑀢𑀺 𑀆𑀬𑀈𑀬𑀓𑀧𑀘𑁆𑀘𑀬𑀸𑀤𑀬𑁄 𑀧𑀘𑁆𑀘𑀬𑀸 𑀧𑀘𑁆𑀘𑀬𑀲𑀤𑁆𑀤𑀸 𑀦𑀸𑀫, 𑀢𑁂𑀳𑀺 𑀧𑀘𑁆𑀘𑀬𑀲𑀤𑁆𑀤𑁂𑀳𑀺 𑀕𑀫𑁆𑀫𑀸 𑀉𑀧𑀫𑀸 𑀯𑀼𑀘𑁆𑀘𑀢𑀺. 𑀉𑀤𑀸𑀳𑀭𑀢𑀺 ‘‘𑀯𑀤𑀦’’𑀫𑀺𑀘𑁆𑀘𑀸𑀤𑀺. 𑀧𑀗𑁆𑀓𑀚𑀫𑀺𑀯 𑀭𑀼𑀘𑀺𑀭𑀫𑀸𑀘𑀭𑀢𑀺 𑀧𑀗𑁆𑀓𑀚𑀸𑀬𑀢𑁂. 𑀏𑀢𑁆𑀣𑀸𑀧𑀺 𑀧𑀗𑁆𑀓𑀚𑀫𑀼𑀧𑀫𑀸𑀦𑀁, 𑀆𑀘𑀭𑀡𑀓𑁆𑀭𑀺𑀬𑀸𑀬 𑀓𑀢𑁆𑀢𑀼𑀪𑀽𑀢𑀁 𑀆𑀦𑀦𑀫𑀼𑀧𑀫𑁂𑀬𑁆𑀬𑀁, 𑀭𑀼𑀘𑀺𑀭𑀢𑁆𑀢𑀁 𑀲𑀥𑀫𑁆𑀫𑁄, 𑀧𑀗𑁆𑀓𑀚𑀸𑀦𑀦𑀸𑀦𑀁 𑀲𑀫𑀸𑀦𑀥𑀫𑁆𑀫𑀲𑀫𑁆𑀩𑀦𑁆𑀥𑀚𑁄𑀢𑀓𑁄 𑀇𑀯𑀲𑀤𑁆𑀤𑁄. 𑀢𑀢𑁆𑀣 𑀭𑀼𑀘𑀺𑀭 𑀇𑀯𑀲𑀤𑁆𑀤𑀸𑀦𑀁 𑀧𑀼𑀩𑁆𑀩𑁂 𑀯𑀺𑀬𑀸𑀧𑁆𑀧𑀬𑁄𑀕𑁄 𑀧𑀘𑁆𑀘𑀬𑁂𑀦 𑀯𑀼𑀢𑁆𑀢𑀢𑁆𑀢𑀸𑀢𑀺 𑀲𑀩𑁆𑀩𑀢𑁆𑀣 𑀯𑀺𑀜𑁆𑀜𑁂𑀬𑁆𑀬𑀁. 𑀏𑀯𑀫𑀼𑀧𑀭𑀺𑀧𑀺.

𑁧𑁭𑁮. 𑀇𑀤𑀸𑀦𑀺 𑀧𑀘𑁆𑀘𑀬𑀲𑀤𑁆𑀤𑀕𑀫𑁆𑀫𑁄𑀧𑀫𑀁 𑀦𑀺𑀤𑀲𑁆𑀲𑁂𑀢𑀺 ‘‘𑀆𑀬𑀸𑀤𑀺’’𑀘𑁆𑀘𑀸𑀤𑀺𑀦𑀸. 𑀆𑀬𑀸𑀤𑀻 ‘‘𑀆𑀬 𑀈𑀬 𑀓’’𑀇𑀢𑀺𑀆𑀤𑀬𑁄 𑀧𑀘𑁆𑀘𑀬𑀸 𑀧𑀘𑁆𑀘𑀬𑀲𑀤𑁆𑀤𑀸 𑀦𑀸𑀫, 𑀢𑁂𑀳𑀺 𑀧𑀘𑁆𑀘𑀬𑀲𑀤𑁆𑀤𑁂𑀳𑀺 𑀕𑀫𑁆𑀫𑁄𑀧𑀫𑀸 𑀯𑀼𑀘𑁆𑀘𑀢𑀺 ‘‘𑀯𑀤𑀦𑀁…𑀧𑁂… 𑀤𑀮𑀻𑀬𑀢𑀻’’𑀢𑀺. 𑀯𑀤𑀦𑀁 𑀫𑀼𑀔𑀁 𑀧𑀗𑁆𑀓𑀚𑀸𑀬𑀢𑁂 𑀧𑀤𑀼𑀫𑀫𑀺𑀯 𑀭𑀼𑀘𑀺𑀭𑀁 𑀆𑀘𑀭𑀢𑀺. 𑀫𑀼𑀦𑀺𑀦𑁆𑀤𑀦𑀬𑀦𑀤𑁆𑀯𑀦𑁆𑀤𑀁 𑀲𑀩𑁆𑀩𑀜𑁆𑀜𑀼𑀦𑁄 𑀦𑁂𑀢𑁆𑀢𑀬𑀼𑀕𑀴𑀁 𑀦𑀻𑀮𑀼𑀧𑁆𑀧𑀮𑀤𑀮𑀻𑀬𑀢𑀺 𑀦𑀻𑀮𑀼𑀧𑁆𑀧𑀮𑀧𑀢𑁆𑀢𑀫𑀺𑀯 𑀭𑀼𑀘𑀺𑀭𑀫𑀸𑀘𑀭𑀢𑀺. 𑀆𑀬𑁄 𑀆𑀤𑀺 𑀬𑁂𑀲𑀁 𑀈𑀬𑀸𑀤𑀻𑀦𑀦𑁆𑀢𑀺 𑀘, 𑀧𑀗𑁆𑀓𑀚𑀫𑀺𑀯 𑀭𑀼𑀘𑀺𑀭𑀫𑀸𑀘𑀭𑀢𑀺 𑀧𑀯𑀢𑁆𑀢𑀢𑀻𑀢𑀺 𑀘, 𑀫𑀼𑀦𑀺𑀦𑁆𑀤𑀲𑁆𑀲 𑀦𑀬𑀦𑀤𑁆𑀯𑀦𑁆𑀤𑀫𑀺𑀢𑀺 𑀘, 𑀦𑀻𑀮𑀼𑀧𑁆𑀧𑀮𑀲𑁆𑀲 𑀤𑀮𑀫𑀺𑀢𑀺 𑀘, 𑀢𑀫𑀺𑀯 𑀭𑀼𑀘𑀺𑀭𑀫𑀸𑀘𑀭𑀢𑀻𑀢𑀺 𑀘 𑀯𑀸𑀓𑁆𑀬𑀁. 𑀏𑀢𑁆𑀣 ‘‘𑀧𑀗𑁆𑀓𑀚’’𑀫𑀺𑀢𑀺 𑀘 ‘‘𑀦𑀻𑀮𑀼𑀧𑁆𑀧𑀮’’𑀫𑀺𑀢𑀺 𑀘 𑀉𑀧𑀫𑀸𑀦𑀁, 𑀆𑀘𑀭𑀡𑀓𑁆𑀭𑀺𑀬𑀸𑀬 𑀓𑀢𑁆𑀢𑀼𑀪𑀽𑀢𑀁 𑀯𑀤𑀦𑀁 ¶ 𑀦𑀬𑀦𑀤𑁆𑀯𑀦𑁆𑀤𑀜𑁆𑀘 𑀉𑀧𑀫𑁂𑀬𑁆𑀬𑀁, 𑀭𑀼𑀘𑀺𑀭𑀢𑁆𑀢𑀁 𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀸𑀦𑀁 𑀲𑀥𑀫𑁆𑀫𑁄, 𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀸𑀦𑀁 𑀲𑀫𑀸𑀦𑀥𑀫𑁆𑀫𑀚𑁄𑀢𑀓𑁄 𑀇𑀯𑀲𑀤𑁆𑀤𑁄, 𑀢𑁂𑀲𑀁 𑀅𑀢𑁆𑀣𑀸𑀦𑀁 𑀧𑀘𑁆𑀘𑀬𑁂𑀦 𑀯𑀼𑀢𑁆𑀢𑀢𑁆𑀢𑀸 𑀢𑁂𑀲𑀫𑀧𑁆𑀧𑀬𑁄𑀕𑁄. 𑀏𑀯𑀭𑀽𑀧𑁂𑀲𑀼 𑀅𑀜𑁆𑀜𑁂𑀲𑀼𑀧𑀺 𑀏𑀯𑀫𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁧𑁭𑁯.

𑀇𑀯𑀸𑀤𑀻 𑀇𑀯 𑀯𑀸 𑀢𑀼𑀮𑁆𑀬-𑀲𑀫𑀸𑀦 𑀦𑀺𑀪 𑀲𑀦𑁆𑀦𑀺𑀪𑀸;

𑀬𑀣𑀸𑀲𑀗𑁆𑀓𑀸𑀲 𑀢𑀼𑀮𑀺𑀢-𑀧𑁆𑀧𑀓𑀸𑀲 𑀧𑀢𑀺𑀭𑀽𑀧𑀓𑀸.

𑁧𑁮𑁦.

𑀲𑀭𑀻𑀲𑀭𑀺𑀓𑁆𑀔 𑀲𑀁𑀯𑀸𑀤𑀻, 𑀯𑀺𑀭𑁄𑀥𑀻 𑀲𑀤𑀺𑀲𑀸 𑀯𑀺𑀬;

𑀧𑀝𑀺𑀧𑀓𑁆𑀔𑀧𑀘𑁆𑀘𑀦𑀻𑀓-𑀲𑀧𑀓𑁆𑀔𑁄’𑀧𑀫𑀺𑀢𑁄’𑀧𑀫𑀸.

𑁧𑁮𑁧.

𑀧𑀝𑀺𑀩𑀺𑀫𑁆𑀩 𑀧𑀝𑀺𑀘𑁆𑀙𑀦𑁆𑀦-𑀲𑀭𑀽𑀧 𑀲𑀫 𑀲𑀫𑁆𑀫𑀺𑀢𑀸;

𑀲𑀯𑀡𑁆𑀡𑀸’𑀪𑀸 𑀧𑀝𑀺𑀦𑀺𑀥𑀺, 𑀲𑀥𑀫𑁆𑀫𑀸𑀤𑀺 𑀲𑀮𑀓𑁆𑀔𑀡𑀸.

𑁧𑁮𑁨.

𑀚𑀬𑀢𑁆𑀬’𑀓𑁆𑀓𑁄𑀲𑀢𑀺 𑀳𑀲𑀢𑀺, 𑀧𑀢𑀺𑀕𑀚𑁆𑀚𑀢𑀺 𑀤𑀽𑀪𑀢𑀺;

𑀉𑀲𑀽𑀬𑀢𑁆𑀬’𑀯𑀚𑀸𑀦𑀸𑀢𑀺, 𑀦𑀺𑀦𑁆𑀤𑀢𑀺’𑀲𑁆𑀲𑀢𑀺 𑀭𑀼𑀦𑁆𑀥𑀢𑀺.

𑁧𑁮𑁩.

𑀢𑀲𑁆𑀲 𑀘𑁄𑀭𑁂𑀢𑀺 𑀲𑁄𑀪𑀕𑁆𑀕𑀁, 𑀢𑀲𑁆𑀲 𑀓𑀦𑁆𑀢𑀺𑀁 𑀯𑀺𑀮𑀼𑀫𑁆𑀧𑀢𑀺;

𑀢𑁂𑀦 𑀲𑀤𑁆𑀥𑀺𑀁 𑀯𑀺𑀯𑀤𑀢𑀺, 𑀢𑀼𑀮𑁆𑀬𑀁 𑀢𑁂𑀦𑀸𑀥𑀺𑀭𑁄𑀳𑀢𑀺.

𑁧𑁮𑁪.

𑀓𑀘𑁆𑀙𑀁𑀯𑀺𑀕𑀸𑀳𑀢𑁂 𑀢𑀲𑁆𑀲, 𑀢𑀫𑀦𑁆𑀯𑁂𑀢𑁆𑀬’𑀦𑀼𑀩𑀦𑁆𑀥𑀢𑀺;

𑀢𑀁𑀲𑀻𑀮𑀁, 𑀢𑀁 𑀦𑀺𑀲𑁂𑀥𑁂𑀢𑀺, 𑀢𑀲𑁆𑀲 𑀘𑀸𑀦𑀼𑀓𑀭𑁄𑀢𑀺’𑀫𑁂.

𑁧𑁭𑁯-𑁧𑁮𑁪. 𑀇𑀯𑀸𑀤𑀻 𑀇𑀯𑀸𑀤𑀬𑁄 𑀦𑀸𑀫 𑀇𑀫𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀯𑁄 𑀘 𑀯𑀸 𑀘 𑀢𑀼𑀮𑁆𑀬𑁄 𑀘 𑀲𑀫𑀸𑀦𑁄 𑀘 𑀦𑀺𑀪𑁄 𑀘 𑀲𑀦𑁆𑀦𑀺𑀪𑁄 𑀘𑀸𑀢𑀺 𑀤𑁆𑀯𑀦𑁆𑀤𑁂 𑀇𑀯…𑀧𑁂… 𑀲𑀦𑁆𑀦𑀺𑀪𑀸. 𑀲𑀤𑁆𑀤𑀫𑀧𑁂𑀓𑁆𑀔𑀺𑀬 𑀧𑀼𑀮𑁆𑀮𑀺𑀗𑁆𑀕𑀢𑀸. 𑀏𑀯𑀫𑀼𑀧𑀭𑀺𑀧𑀺 𑀬𑀣𑀸𑀬𑁄𑀕𑀁. ‘‘𑀲𑀥𑀫𑁆𑀫𑀸𑀤𑀻’’𑀢𑀺 𑀆𑀤𑀺𑀲𑀤𑁆𑀤𑁂𑀦 𑀲𑀸𑀥𑀸𑀭𑀡𑀲𑀘𑁆𑀙𑀸𑀬𑀸𑀤𑀻𑀦𑀁 𑀧𑀭𑀺𑀕𑁆𑀕𑀳𑁄. 𑀚𑀬𑀢𑀺𑀘𑁆𑀘𑀸𑀤𑀻𑀲𑀼 𑀓𑀫𑁆𑀫𑀁.

𑁧𑁭𑁯- 𑁧𑁮𑁪. 𑀇𑀯𑀸𑀤𑀺𑀲𑀤𑁆𑀤𑀕𑀫𑁆𑀫𑁄𑀧𑀫𑀸𑀥𑀺𑀓𑀸𑀭𑁂 𑀧𑀞𑀫𑀁 𑀢𑀸𑀯 ‘‘𑀇𑀯𑀸𑀤𑀬𑁄 𑀦𑀸𑀫 𑀏𑀢𑁂’’𑀢𑀺 𑀤𑀲𑁆𑀲𑁂𑀢𑀺 ‘‘𑀇𑀯𑀸𑀤𑀺’’𑀘𑁆𑀘𑀸𑀤𑀺𑀦𑀸. 𑀇𑀯𑀸𑀤𑀻𑀢𑀺 𑀧𑀤𑀲𑁆𑀲 𑀙𑀝𑁆𑀞𑀫𑀕𑀸𑀣𑀸𑀬 𑀇𑀫𑁂𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄, 𑀢𑀲𑁆𑀲 𑀘𑀸𑀢𑀺 𑀘𑀲𑀤𑁆𑀤𑀁 𑀬𑀼𑀚𑁆𑀚𑀦𑀝𑁆𑀞𑀸𑀦𑁂 𑀬𑁄𑀚𑁂𑀢𑁆𑀯𑀸 𑀲𑀦𑁆𑀦𑀺𑀪𑀸 𑀘𑀸𑀢𑀺𑀆𑀤𑀬𑁄 𑀬𑁄𑀚𑁂𑀢𑀩𑁆𑀩𑀸. ‘‘𑀲𑀥𑀫𑁆𑀫𑀸𑀤𑀻’’𑀢𑀺𑀆𑀤𑀺𑀲𑀤𑁆𑀤𑁂𑀦 𑀲𑀸𑀥𑀸𑀭𑀡𑀲𑀘𑁆𑀙𑀸𑀬𑀸𑀤𑀬𑁄 𑀕𑀳𑀺𑀢𑀸. 𑀦𑀺𑀦𑁆𑀤𑀢𑀺 𑀇𑀲𑁆𑀲𑀢𑀻𑀢𑀺 𑀧𑀤𑀘𑁆𑀙𑁂𑀤𑁄, 𑀇𑀫𑁂 ¶ 𑀤𑁆𑀯𑁂𑀧𑀜𑁆𑀜𑀸𑀲 𑀇𑀯𑀸𑀤𑀬𑁄 𑀦𑀸𑀫. ‘‘𑀚𑀬𑀢𑀺 𑀅𑀓𑁆𑀓𑁄𑀲𑀢𑀺 𑀳𑀲𑀢𑀺’’𑀇𑀘𑁆𑀘𑀸𑀤𑀺𑀓𑀁 𑀢𑀁𑀢𑀁𑀓𑁆𑀭𑀺𑀬𑀸𑀧𑀤𑀲𑀗𑁆𑀔𑀢𑀅𑀦𑀼𑀓𑀸𑀭𑀺𑀬𑀸𑀦𑀁 𑀅𑀦𑀼𑀓𑀭𑀡𑀦𑁆𑀢𑀺 𑀓𑀢𑁆𑀯𑀸 𑀤𑁆𑀯𑀦𑁆𑀤𑁄𑀬𑁂𑀯, ‘‘𑀲𑀦𑁆𑀥𑀺𑀲𑀫𑀸𑀲𑀸 𑀅𑀤𑁆𑀥𑀲𑁆𑀲𑀸’’𑀢𑀺 [𑀲𑀦𑁆𑀥𑀺𑀲𑀫𑀸𑀲𑁄 𑀢𑀤𑀤𑁆𑀥𑀲𑁆𑀲𑀸𑀢𑀺 (𑀓.)] 𑀯𑀼𑀢𑁆𑀢𑀢𑁆𑀢𑀸 𑀲𑀦𑁆𑀥𑀺𑀲𑀫𑀸𑀲𑀸𑀦𑀁 𑀕𑀸𑀣𑀤𑁆𑀥𑀲𑁆𑀲 𑀯𑀺𑀦𑀸 𑀉𑀪𑀬𑀤𑁆𑀥𑀫𑀚𑁆𑀛𑁂 𑀅𑀮𑀩𑁆𑀪𑀦𑀢𑁄 𑀤𑀽𑀪𑀢𑀺𑀧𑀤𑀢𑁄 𑀧𑀼𑀩𑁆𑀩𑁂𑀬𑁂𑀯 𑀲𑀫𑀸𑀲𑁄 𑀓𑀸𑀢𑀩𑁆𑀩𑁄, 𑀦𑁄 𑀘𑁂, 𑀅𑀲𑀫𑀸𑀲𑁄𑀢𑀺 𑀕𑀳𑁂𑀢𑀩𑁆𑀩𑁄. 𑀢𑀲𑁆𑀲 𑀘𑁄𑀭𑁂𑀢𑀺 𑀲𑁄𑀪𑀕𑁆𑀕𑀫𑀺𑀘𑁆𑀘𑀸𑀤𑀺𑀓𑀫𑁆𑀧𑀺 𑀯𑀸𑀓𑁆𑀬𑀸𑀦𑀼𑀓𑀭𑀡𑀦𑁆𑀢𑀺 𑀓𑀢𑁆𑀯𑀸 𑀢𑀢𑁆𑀣 𑀲𑀫𑀸𑀲𑁄, 𑀯𑀸𑀓𑁆𑀬𑁂 𑀓𑁂𑀯𑀮𑀧𑀤𑀸𑀦𑀻𑀢𑀺 𑀯𑀸 𑀕𑀳𑁂𑀢𑀩𑁆𑀩𑁄. 𑀇𑀫𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀇𑀯 𑀲𑀤𑁆𑀤𑀧𑀭𑀺𑀬𑀸𑀬𑀢𑁆𑀢𑀸 𑀲𑀤𑀺𑀲𑀢𑁆𑀣𑀸𑀢𑀺 𑀲𑀩𑁆𑀩𑀢𑁆𑀣 𑀪𑀸𑀯𑀢𑁆𑀣𑁄, 𑀅𑀯𑀬𑀯𑀢𑁆𑀣𑁄 𑀧𑀦 𑀧𑀸𑀓𑀝𑁄𑀬𑁂𑀯.

𑁧𑁮𑁫.

𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀸𑀦𑀁, 𑀲𑀥𑀫𑁆𑀫𑀢𑁆𑀢𑀁 𑀯𑀺𑀪𑀸𑀯𑀺𑀳𑀺;

𑀇𑀫𑁂𑀳𑀺 𑀉𑀧𑀫𑀸𑀪𑁂𑀤𑀸, 𑀓𑁂𑀘𑀺 𑀦𑀺𑀬𑁆𑀬𑀦𑁆𑀢𑀺 𑀲𑀫𑁆𑀧𑀢𑀺.

𑁧𑁮𑁫. 𑀇𑀯𑀸𑀤𑀻𑀦𑀁 𑀯𑀺𑀦𑀺𑀬𑁄𑀕𑀯𑀺𑀲𑀬𑀁 𑀤𑀲𑁆𑀲𑁂𑀢𑁆𑀯𑀸 𑀉𑀧𑀫𑀸𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 𑀧𑀝𑀺𑀚𑀸𑀦𑀸𑀢𑀺 ‘‘𑀉𑀧𑀫𑀸𑀦’’𑀇𑀘𑁆𑀘𑀸𑀤𑀺. 𑀓𑁂𑀘𑀻𑀢𑀺 𑀇𑀫𑀺𑀦𑀸 𑀅𑀧𑀭𑀺𑀬𑀦𑁆𑀢𑀢𑁆𑀢𑀫𑁂𑀲𑀁 [𑀅𑀧𑀭𑀺𑀬𑀦𑁆𑀢𑀧𑀪𑁂𑀤𑀁 (𑀓.)] 𑀤𑀲𑁆𑀲𑁂𑀢𑀺. 𑀢𑀣𑀸 𑀘 𑀯𑀓𑁆𑀔𑀢𑀺 ‘‘𑀧𑀭𑀺𑀬𑀦𑁆𑀢𑁄 𑀯𑀺𑀓𑀧𑁆𑀧𑀸𑀦’’𑀦𑁆𑀢𑀺𑀆𑀤𑀺. 𑀦𑀺𑀬𑁆𑀬𑀦𑁆𑀢𑀺 𑀉𑀤𑀸𑀳𑀭𑀻𑀬𑀦𑁆𑀢𑀺.

𑁧𑁮𑁫. 𑀇𑀤𑀸𑀦𑀺 𑀇𑀯𑀸𑀤𑀺𑀲𑀤𑁆𑀤𑀕𑀫𑁆𑀫𑁄𑀧𑀫𑀁 𑀤𑀲𑁆𑀲𑁂𑀢𑀼𑀁 𑀧𑀝𑀺𑀚𑀸𑀦𑀸𑀢𑀺 ‘‘𑀉𑀧𑀫𑀸𑀦𑁄’’𑀘𑁆𑀘𑀸𑀤𑀺𑀦𑀸. 𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀸𑀦𑀁 𑀲𑀥𑀫𑁆𑀫𑀢𑁆𑀢𑀁 𑀲𑀫𑀸𑀦𑀥𑀫𑁆𑀫𑀲𑀫𑁆𑀩𑀦𑁆𑀥𑁄. 𑀯𑀺𑀪𑀸𑀯𑀺𑀳𑀺 𑀧𑀓𑀸𑀲𑀓𑁂𑀳𑀺. 𑀇𑀫𑁂𑀳𑀺 𑀇𑀯𑀸𑀤𑀻𑀳𑀺 𑀲𑀤𑁆𑀤𑁂𑀳𑀺 𑀚𑀸𑀦𑀺𑀢𑀩𑁆𑀩𑀸 𑀓𑁂𑀘𑀺 𑀉𑀧𑀫𑀸𑀪𑁂𑀤𑀸 𑀅𑀧𑀭𑀺𑀬𑀦𑁆𑀢𑀢𑁆𑀢𑀸 𑀲𑀫𑁆𑀧𑀢𑀺 𑀤𑀸𑀦𑀺 𑀮𑀤𑁆𑀥𑀸𑀯𑀲𑀭𑁂 𑀦𑀺𑀬𑁆𑀬𑀦𑁆𑀢𑀺 𑀉𑀤𑀸𑀳𑀭𑀡𑀫𑀢𑁆𑀢𑁂𑀦 𑀧𑀝𑀺𑀧𑀸𑀤𑀻𑀬𑀦𑁆𑀢𑀺.

𑁧𑁮𑁬.

𑀯𑀺𑀓𑀸𑀲𑀺𑀧𑀤𑀼𑀫𑀁’𑀯𑀸’𑀢𑀺-𑀲𑀼𑀦𑁆𑀤𑀭𑀁 𑀲𑀼𑀕𑀢𑀸𑀦𑀦𑀁;

𑀇𑀢𑀺 𑀥𑀫𑁆𑀫𑁄𑀧𑀫𑀸 𑀦𑀸𑀫, 𑀢𑀼𑀮𑁆𑀬𑀥𑀫𑁆𑀫𑀦𑀺𑀤𑀲𑁆𑀲𑀦𑀸.

𑁧𑁮𑁬. ‘‘𑀯𑀺𑀓𑀸𑀲𑀺’’𑀘𑁆𑀘𑀸𑀤𑀺. 𑀲𑀼𑀕𑀢𑀸𑀦𑀦𑀁 𑀫𑀼𑀦𑀺𑀦𑁆𑀤𑀲𑁆𑀲 𑀯𑀤𑀦𑀁 𑀅𑀢𑀺𑀲𑀼𑀦𑁆𑀤𑀭𑀁 𑀅𑀘𑁆𑀘𑀦𑁆𑀢𑀭𑀫𑀡𑀻𑀬𑀁. 𑀓𑀺𑀫𑀺𑀯? 𑀯𑀺𑀓𑀸𑀲𑀺𑀧𑀤𑀼𑀫𑀁𑀯 𑀧𑀩𑀼𑀚𑁆𑀛𑀫𑀸𑀦𑀧𑀤𑀼𑀫𑀁𑀯𑀺𑀬. 𑀇𑀢𑀺 𑀅𑀬𑀫𑁂𑀯𑀁𑀯𑀺𑀥𑀸 𑀥𑀫𑁆𑀫𑁄𑀧𑀫𑀸 𑀦𑀸𑀫 𑀳𑁄𑀢𑀺. 𑀓𑀲𑁆𑀫𑀸? ¶ 𑀆𑀦𑀦𑀧𑀤𑀼𑀫𑀸𑀦𑀁 𑀲𑀫𑀸𑀦𑀲𑁆𑀲 𑀥𑀫𑁆𑀫𑀲𑁆𑀲 𑀕𑀼𑀡𑀲𑁆𑀲 𑀲𑀼𑀦𑁆𑀤𑀭𑀲𑁆𑀲 𑀮𑀓𑁆𑀔𑀡𑀲𑁆𑀲 𑀦𑀺𑀤𑀲𑁆𑀲𑀦𑀸 𑀲𑀼𑀦𑁆𑀤𑀭𑀢𑁆𑀢𑀦𑁆𑀢𑀺 𑀧𑀝𑀺𑀧𑀸𑀤𑀦𑀢𑁄.

𑁧𑁮𑁬. 𑀉𑀤𑀸𑀳𑀭𑀡𑀫𑀸𑀳 ‘‘𑀯𑀺𑀓𑀸𑀲𑀺’’𑀘𑁆𑀘𑀸𑀤𑀺𑀦𑀸. 𑀲𑀼𑀕𑀢𑀸𑀦𑀦𑀁 𑀪𑀕𑀯𑀢𑁄 𑀫𑀼𑀔𑀁 𑀯𑀺𑀓𑀸𑀲𑀺𑀧𑀤𑀼𑀫𑀁𑀯 𑀩𑀼𑀚𑁆𑀛𑀫𑀸𑀦𑀧𑀗𑁆𑀓𑀚𑀫𑀺𑀯 𑀅𑀢𑀺𑀲𑀼𑀦𑁆𑀤𑀭𑀁 𑀳𑁄𑀢𑀺. 𑀇𑀢𑀺 𑀈𑀤𑀺𑀲𑀸 𑀉𑀧𑀫𑀸 𑀢𑀼𑀮𑁆𑀬𑀥𑀫𑁆𑀫𑀦𑀺𑀤𑀲𑁆𑀲𑀦𑀸 𑀅𑀢𑀺𑀲𑀼𑀦𑁆𑀤𑀭𑀫𑀺𑀢𑀺 𑀲𑀫𑀸𑀦𑀕𑀼𑀡𑀤𑀲𑁆𑀲𑀦𑁂𑀦 𑀥𑀫𑁆𑀫𑁄𑀧𑀫𑀸 𑀦𑀸𑀫 𑀳𑁄𑀢𑀺. 𑀧𑀤𑀼𑀫𑀸𑀦𑀦𑀸𑀦𑀁 𑀲𑀸𑀥𑀸𑀭𑀡𑀕𑀼𑀡𑀲𑁆𑀲 𑀧𑀓𑀸𑀲𑀦𑀢𑁄 𑀅𑀢𑀺𑀲𑀼𑀦𑁆𑀤𑀭𑀫𑀺𑀢𑀺 𑀢𑀼𑀮𑁆𑀬𑀥𑀫𑁆𑀫𑁄 𑀦𑀸𑀫 𑀳𑁄𑀢𑀺. 𑀏𑀢𑁆𑀣 𑀧𑀤𑀼𑀫𑀕𑀢𑀢𑀼𑀮𑁆𑀬𑀥𑀫𑁆𑀫𑀲𑀫𑁆𑀩𑀦𑁆𑀥𑀲𑀗𑁆𑀔𑀸𑀢𑀸𑀬 𑀉𑀧𑀫𑀸𑀬 𑀇𑀯𑀲𑀤𑁆𑀤𑁂𑀦 𑀚𑁄𑀢𑀺𑀬𑀫𑀸𑀦𑀢𑁆𑀢𑁂𑀧𑀺 𑀅𑀢𑀺𑀲𑀼𑀦𑁆𑀤𑀭𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑁄𑀧𑀫𑀸𑀬 𑀥𑀫𑁆𑀫𑁂𑀦 𑀬𑀼𑀢𑁆𑀢𑀢𑁆𑀢𑀸 𑀥𑀫𑁆𑀫𑁄𑀧𑀫𑀸 𑀦𑀸𑀫 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁮𑁭.

𑀥𑀫𑁆𑀫𑀳𑀻𑀦𑀸 𑀫𑀼𑀔’𑀫𑁆𑀪𑁄𑀚-𑀲𑀤𑀺𑀲𑀁 𑀫𑀼𑀦𑀺𑀦𑁄 𑀇𑀢𑀺;

𑀯𑀺𑀧𑀭𑀻𑀢𑁄𑀧𑀫𑀸 𑀢𑀼𑀮𑁆𑀬-𑀫𑀸𑀦𑀦𑁂𑀦’𑀫𑁆𑀩𑀼𑀚𑀁 𑀢𑀯.

𑁧𑁮𑁭. ‘‘𑀥𑀫𑁆𑀫’’𑀇𑀘𑁆𑀘𑀸𑀤𑀺. 𑀫𑀼𑀦𑀺𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀫𑀼𑀔𑀁 𑀅𑀫𑁆𑀪𑁄𑀚𑁂𑀦 𑀧𑀤𑀼𑀫𑁂𑀦 𑀲𑀤𑀺𑀲𑀁 𑀲𑀫𑀸𑀦𑀁. 𑀇𑀢𑀺 𑀅𑀬𑀁 𑀥𑀫𑁆𑀫𑀳𑀻𑀦𑁄𑀧𑀫𑀸 𑀦𑀸𑀫 𑀲𑀼𑀦𑁆𑀤𑀭𑀲𑀗𑁆𑀔𑀸𑀢𑀲𑁆𑀲 𑀕𑀼𑀡𑀲𑁆𑀲 𑀅𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸, 𑀲𑀸 𑀢𑀼 𑀅𑀢𑁆𑀣𑀯𑀲𑀸 𑀕𑀫𑁆𑀬𑀢𑁂. 𑀓𑀣𑀫𑀜𑁆𑀜𑀣𑀸 𑀬𑀼𑀚𑁆𑀚𑀢𑀻𑀢𑀺? 𑀏𑀢𑁆𑀣 𑀧𑀦 𑀲𑀤𑀺𑀲𑀲𑀤𑁆𑀤𑁄 𑀉𑀧𑀫𑁂𑀬𑁆𑀬𑀲𑁆𑀲 𑀫𑀼𑀔𑀲𑁆𑀲 𑀯𑀺𑀲𑁂𑀲𑀦𑀦𑁆𑀢𑀺 𑀫𑀼𑀔𑀕𑀢𑀫𑁂𑀯 𑀲𑀤𑀺𑀲𑀢𑁆𑀢𑀁 𑀯𑀤𑀢𑀺, 𑀅𑀫𑁆𑀪𑁄𑀚𑀕𑀢𑀁 𑀢𑀼 𑀲𑀸𑀫𑀢𑁆𑀣𑀺𑀬𑀸 𑀕𑀫𑁆𑀬𑀢𑁂. 𑀏𑀯𑀫𑀻𑀤𑀺𑀲𑀁 𑀜𑁂𑀬𑁆𑀬𑀁. ‘‘𑀯𑀺𑀧𑀭𑀻𑀢𑁂’’𑀘𑁆𑀘𑀸𑀤𑀺. 𑀫𑀼𑀦𑀻𑀢𑀺 𑀕𑀫𑁆𑀬𑀢𑁂 𑀲𑀼𑀢𑀢𑁆𑀢𑀸, 𑀪𑁄 𑀫𑀼𑀦𑀺 𑀢𑀯 𑀆𑀦𑀦𑁂𑀦 𑀫𑀼𑀔𑁂𑀦 𑀅𑀫𑁆𑀩𑀼𑀚𑀁 𑀢𑀼𑀮𑁆𑀬𑀦𑁆𑀢𑀺 𑀅𑀬𑀁 𑀯𑀺𑀧𑀭𑀻𑀢𑁄𑀧𑀫𑀸. 𑀥𑀫𑁆𑀫𑀳𑀻𑀦𑀢𑁆𑀢𑁂𑀧𑀺 𑀧𑀲𑀺𑀤𑁆𑀥𑀺𑀯𑀺𑀧𑀭𑀺𑀬𑀬𑁂𑀦𑀸𑀪𑀺𑀳𑀺𑀢𑀢𑁆𑀢𑀸 𑀢𑀦𑁆𑀦𑀸𑀫𑁂𑀦𑁂𑀯 𑀯𑀼𑀢𑁆𑀢𑀸. 𑀏𑀯𑀫𑀼𑀧𑀭𑀺𑀧𑀺.

𑁧𑁮𑁭. ‘‘𑀥𑀫𑁆𑀫𑀳𑀻𑀦𑁂’’𑀘𑁆𑀘𑀸𑀤𑀺. ‘‘𑀫𑀼𑀔𑀫𑁆𑀪𑁄𑀚𑀲𑀤𑀺𑀲𑀁 𑀫𑀼𑀦𑀺𑀦𑁄’’𑀢𑁆𑀬𑀬𑀁 𑀉𑀧𑀫𑀸. 𑀥𑀫𑁆𑀫𑀳𑀻𑀦𑀸 𑀢𑀼𑀮𑁆𑀬𑀥𑀫𑁆𑀫𑀧𑀓𑀸𑀲𑀓𑀲𑀼𑀦𑁆𑀤𑀭𑀸𑀤𑀺𑀲𑀤𑁆𑀤𑀳𑀻𑀦𑀢𑁆𑀢𑀸 𑀥𑀫𑁆𑀫𑀳𑀻𑀦𑀸 𑀦𑀸𑀫. 𑀯𑀸𑀘𑀓𑀸𑀪𑀸𑀯𑁂 𑀢𑀼𑀮𑁆𑀬𑀥𑀫𑁆𑀫𑁄 𑀓𑀣𑀁 𑀧𑀢𑀻𑀬𑀢𑀻𑀢𑀺 𑀘𑁂? 𑀫𑀼𑀦𑀺𑀦𑁄 𑀫𑀼𑀔𑀁 𑀯𑀤𑀦𑀁 𑀅𑀫𑁆𑀪𑁄𑀚𑀲𑀤𑀺𑀲𑀁 𑀧𑀤𑀼𑀫𑀲𑀤𑀺𑀲𑀫𑀺𑀢𑀺. 𑀏𑀢𑁆𑀣 𑀫𑀼𑀔𑀲𑁆𑀲 𑀅𑀫𑁆𑀪𑁄𑀚𑀲𑀫𑀸𑀦𑀢𑁆𑀢𑀁 𑀫𑀼𑀔𑀫𑁆𑀪𑁄𑀚𑀸𑀦𑀁 𑀲𑀸𑀥𑀸𑀭𑀡𑀥𑀫𑁆𑀫𑁂 𑀅𑀲𑀢𑀺 ¶ 𑀓𑀣𑀁 𑀪𑀯𑀢𑀻𑀢𑀺? 𑀅𑀜𑁆𑀜𑀣𑀸𑀦𑀼𑀧𑀧𑀢𑁆𑀢𑀺𑀮𑀓𑁆𑀔𑀡𑀲𑀸𑀫𑀢𑁆𑀣𑀺𑀬𑀸𑀢𑀺, 𑀇𑀯𑀧𑀭𑀺𑀬𑀸𑀬𑁄 𑀲𑀤𑀺𑀲𑀲𑀤𑁆𑀤𑁄 𑀫𑀼𑀔𑀲𑁆𑀲 𑀯𑀺𑀲𑁂𑀲𑀦𑀁 𑀬𑀲𑁆𑀫𑀸 𑀳𑁄𑀢𑀺, 𑀢𑀲𑁆𑀫𑀸 𑀫𑀼𑀔𑀕𑀢𑀲𑀤𑀺𑀲𑀢𑁆𑀢𑀁 𑀯𑀤𑀢𑀺, 𑀅𑀫𑁆𑀪𑁄𑀚𑀕𑀢𑀲𑀤𑀺𑀲𑀢𑁆𑀢𑀁 𑀧𑀦 𑀲𑀸𑀫𑀢𑁆𑀣𑀺𑀬𑀸 𑀏𑀯 𑀯𑀺𑀜𑁆𑀜𑀸𑀬𑀢𑁂. 𑀳𑁂 𑀫𑀼𑀦𑀺 𑀢𑀯 𑀢𑀼𑀬𑁆𑀳𑀁 𑀆𑀦𑀦𑁂𑀦 𑀅𑀫𑁆𑀪𑁄𑀚𑀁 𑀢𑀼𑀮𑁆𑀬𑀁 𑀲𑀫𑀸𑀦𑀦𑁆𑀢𑀺 𑀅𑀬𑀁 𑀯𑀺𑀧𑀭𑀻𑀢𑁄𑀧𑀫𑀸. ‘‘𑀅𑀫𑁆𑀩𑀼𑀚𑁂𑀦 𑀆𑀦𑀦𑀁 𑀢𑀼𑀮𑁆𑀬’’𑀦𑁆𑀢𑀺 𑀮𑁄𑀓𑀧𑁆𑀧𑀲𑀺𑀤𑁆𑀥𑀺𑀬𑀸 𑀯𑀺𑀧𑀭𑀺𑀬𑀬𑁂𑀦 ‘‘𑀆𑀦𑀦𑁂𑀦 𑀅𑀫𑁆𑀩𑀼𑀚𑀁 𑀢𑀼𑀮𑁆𑀬’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀥𑀫𑁆𑀫𑀳𑀻𑀦𑀢𑁆𑀢𑁂 𑀲𑀢𑀺𑀧𑀺 𑀯𑀺𑀧𑀭𑀻𑀢𑁄𑀧𑀫𑀸 𑀦𑀸𑀫 𑀳𑁄𑀢𑀺. ‘‘𑀲𑀼𑀢𑀸𑀦𑀼𑀫𑀺𑀢𑁂𑀲𑀼 𑀲𑀼𑀢𑀲𑀫𑁆𑀩𑀦𑁆𑀥𑁄 𑀩𑀮𑀯𑀸’’𑀢𑀺 [𑀧𑀭𑀺𑀪𑀸𑀲𑁂𑀦𑁆𑀤𑀼𑀲𑁂𑀔𑀭 𑁧𑁧𑁨] 𑀯𑀼𑀢𑁆𑀢𑀢𑁆𑀢𑀸 𑀏𑀢𑁆𑀣 ‘‘𑀫𑀼𑀦𑀻’’𑀢𑀺 𑀅𑀯𑀺𑀚𑁆𑀚𑀫𑀸𑀦𑁂𑀧𑀺 𑀧𑀼𑀩𑁆𑀩𑀤𑁆𑀥𑁂 ‘‘𑀫𑀼𑀦𑀺𑀦𑁄’’𑀢𑀺 𑀲𑀼𑀢𑀢𑁆𑀢𑀸 𑀮𑀩𑁆𑀪𑀫𑀸𑀦𑁄 ‘‘𑀢𑀯𑀸’’𑀢𑀺 𑀢𑀼𑀫𑁆𑀳𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂𑀦 𑀆𑀫𑀦𑁆𑀢𑀦𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀏𑀢𑁆𑀣 𑀇𑀯𑀧𑀭𑀺𑀬𑀸𑀬𑁄 𑀢𑀼𑀮𑁆𑀬𑀲𑀤𑁆𑀤𑁄 𑀅𑀫𑁆𑀩𑀼𑀚𑀯𑀺𑀲𑁂𑀲𑀦𑀪𑀽𑀢𑁄 𑀅𑀫𑁆𑀩𑀼𑀚𑀕𑀢𑀲𑀤𑀺𑀲𑀢𑁆𑀢𑀁 𑀯𑀤𑀢𑀺, 𑀆𑀦𑀦𑀕𑀢𑀲𑀤𑀺𑀲𑀢𑁆𑀢𑀜𑁆𑀘 𑀅𑀫𑁆𑀩𑀼𑀚𑀸𑀦𑀦𑀸𑀦𑀁 𑀲𑀸𑀥𑀸𑀭𑀡𑀥𑀫𑁆𑀫𑁄 𑀘 𑀲𑀸𑀫𑀢𑁆𑀣𑀺𑀬𑀸 𑀜𑀸𑀬𑀢𑀺𑀘𑁆𑀘𑀸𑀤𑀺𑀓𑀁 𑀯𑀼𑀢𑁆𑀢𑀦𑀬𑁂𑀦 𑀜𑀸𑀢𑀩𑁆𑀩𑀁. 𑀉𑀧𑀭𑀺𑀧𑀺 𑀧𑀸𑀓𑀝𑀝𑁆𑀞𑀸𑀦𑀁 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀁.

𑁧𑁮𑁮.

𑀢𑀯𑀸𑀦𑀦’𑀫𑀺𑀯’𑀫𑁆𑀪𑁄𑀚𑀁, 𑀅𑀫𑁆𑀪𑁄𑀚’𑀫𑀺𑀯 𑀢𑁂 𑀫𑀼𑀔𑀁;

𑀅𑀜𑁆𑀜𑀫𑀜𑁆𑀜𑁄𑀧𑀫𑀸 𑀲𑀸’𑀬𑀁, 𑀅𑀜𑁆𑀜𑀫𑀜𑁆𑀜𑁄𑀧𑀫𑀸𑀦𑀢𑁄.

𑁧𑁮𑁮. ‘‘𑀢𑀯’’𑀇𑀘𑁆𑀘𑀸𑀤𑀺. 𑀅𑀜𑁆𑀜𑀫𑀜𑁆𑀜𑁄𑀧𑀫𑀸𑀦𑀢𑁄𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀫𑀼𑀔𑀲𑁆𑀲 𑀅𑀫𑁆𑀪𑁄𑀚𑀲𑁆𑀲 𑀘 𑀅𑀜𑁆𑀜𑀫𑀜𑁆𑀜𑁂𑀦 𑀢𑀁𑀤𑁆𑀯𑀬𑁂𑀦 𑀉𑀧𑀫𑀸𑀦𑀢𑁄.

𑁧𑁮𑁮. ‘‘𑀢𑀯𑀸𑀦𑀦𑀺’’𑀘𑁆𑀘𑀸𑀤𑀺. ‘‘𑀅𑀫𑁆𑀪𑁄𑀚𑀁 𑀢𑀯𑀸𑀦𑀦𑀫𑀺𑀯, 𑀢𑁂 𑀫𑀼𑀔𑀁 𑀅𑀫𑁆𑀪𑁄𑀚𑀫𑀺𑀯𑀸’’𑀢𑀺 𑀅𑀬𑀫𑀼𑀧𑀫𑀸. 𑀅𑀜𑁆𑀜𑀫𑀜𑁆𑀜𑁄𑀧𑀫𑀸𑀦𑀢𑁄 𑀅𑀜𑁆𑀜𑀫𑀜𑁆𑀜𑀲𑁆𑀲 𑀉𑀧𑀫𑀸𑀦𑀢𑁆𑀢𑀸 𑀅𑀜𑁆𑀜𑀫𑀜𑁆𑀜𑁄𑀧𑀫𑀸 𑀦𑀸𑀫 𑀳𑁄𑀢𑀺. 𑀅𑀜𑁆𑀜𑀫𑀜𑁆𑀜𑀲𑁆𑀲 𑀉𑀧𑀫𑀸𑀢𑀺 𑀘, 𑀅𑀜𑁆𑀜𑀫𑀜𑁆𑀜𑀲𑁆𑀲 𑀉𑀧𑀫𑀸𑀦𑀦𑁆𑀢𑀺 𑀘 𑀯𑀺𑀕𑁆𑀕𑀳𑁄. 𑀯𑀺𑀕𑁆𑀕𑀳𑀤𑁆𑀯𑀬𑁂𑀧𑀺 𑀧𑀼𑀩𑁆𑀩𑀯𑀺𑀪𑀢𑁆𑀢𑀺𑀮𑁄𑀧𑁄. 𑀲𑀩𑁆𑀩𑀸𑀤𑀻𑀦𑀁 𑀩𑁆𑀬𑀢𑀺𑀳𑀸𑀭𑀮𑀓𑁆𑀔𑀡𑁂𑀦 𑀉𑀢𑁆𑀢𑀭𑀯𑀺𑀪𑀢𑁆𑀢𑀺𑀮𑁄𑀧𑁄. 𑀲𑀫𑀸𑀲𑀮𑀓𑁆𑀔𑀡𑁂𑀦 𑀅𑀜𑁆𑀜𑀢𑁆𑀣𑀲𑁆𑀲 𑀅𑀧𑁂𑀓𑁆𑀔𑀸𑀲𑀺𑀤𑁆𑀥𑀢𑁆𑀢𑀸 ¶ 𑀫𑀼𑀔𑀸𑀧𑁂𑀓𑁆𑀔𑀸𑀬 𑀅𑀜𑁆𑀜𑀁 𑀅𑀫𑁆𑀪𑁄𑀚𑀜𑁆𑀘, 𑀅𑀫𑁆𑀪𑁄𑀚𑀸𑀧𑁂𑀓𑁆𑀔𑀸𑀬 𑀅𑀜𑁆𑀜𑀁 𑀫𑀼𑀔𑀜𑁆𑀘 𑀓𑀫𑁂𑀦 𑀉𑀧𑀫𑁂𑀬𑁆𑀬𑀸 𑀦𑀸𑀫. 𑀅𑀫𑁆𑀪𑁄𑀚𑀸𑀧𑁂𑀓𑁆𑀔𑀸𑀬 𑀅𑀜𑁆𑀜𑀁 𑀫𑀼𑀔𑀜𑁆𑀘, 𑀫𑀼𑀔𑀸𑀧𑁂𑀓𑁆𑀔𑀸𑀬 𑀅𑀜𑁆𑀜𑀁 𑀅𑀫𑁆𑀪𑁄𑀚𑀜𑁆𑀘 𑀉𑀧𑀫𑀸𑀦𑀁 𑀦𑀸𑀫.

𑁧𑁮𑁯.

𑀬𑀤𑀺 𑀓𑀺𑀜𑁆𑀘𑀺 𑀪𑀯𑁂’𑀫𑁆𑀪𑁄𑀚𑀁,

𑀮𑁄𑀘𑀦𑀩𑁆𑀪𑀫𑀼𑀯𑀺𑀩𑁆𑀪𑀫𑀁;

𑀥𑀸𑀭𑁂𑀢𑀼𑀁 𑀫𑀼𑀔𑀲𑁄𑀪𑀁 𑀢𑀁,

𑀢𑀯𑁂’𑀢𑀺 𑀅𑀩𑁆𑀪𑀼𑀢𑁄𑀧𑀫𑀸.

𑁧𑁮𑁯. ‘‘𑀬𑀤𑀺’’𑀘𑁆𑀘𑀸𑀤𑀺. 𑀮𑁄𑀘𑀦𑀸𑀦𑀺 𑀘 𑀪𑀫𑀼𑀬𑁄 𑀘, 𑀢𑀸𑀲𑀁 𑀯𑀺𑀩𑁆𑀪𑀫𑁄 𑀬𑀲𑁆𑀫𑀺𑀁, 𑀢𑀁, 𑀢𑀸𑀤𑀺𑀲𑀫𑀫𑁆𑀪𑁄𑀚𑀁 𑀓𑀺𑀜𑁆𑀘𑀺 𑀓𑀺𑀫𑀧𑀺 𑀬𑀤𑀺 𑀪𑀯𑁂. 𑀢𑀫𑀻𑀤𑀺𑀲𑀫𑀫𑁆𑀪𑁄𑀚𑀁 𑀢𑀯 𑀫𑀼𑀔𑀲𑁄𑀪𑀁 𑀯𑀤𑀦𑀓𑀦𑁆𑀢𑀺𑀁 𑀥𑀸𑀭𑁂𑀢𑀼𑀁 𑀦𑀺𑀲𑀺𑀚𑁆𑀛𑀢𑁂. 𑀓𑀺𑀁 𑀦𑁆𑀯𑀘𑁆𑀙𑀭𑀺𑀬𑀫𑀻𑀤𑀺𑀲𑀦𑁆𑀢𑀺 𑀅𑀩𑁆𑀪𑀼𑀢𑀢𑁆𑀣𑀯𑀺𑀪𑀸𑀯𑀦𑁂𑀦 𑀯𑀤𑀦𑀫𑀫𑁆𑀩𑀼𑀚𑁂𑀦𑁄𑀧𑀫𑀻𑀬𑀢𑀻𑀢𑀺 𑀅𑀬𑀫𑀩𑁆𑀪𑀼𑀢𑁄𑀧𑀫𑀸 𑀜𑀸𑀢𑀩𑁆𑀩𑀸𑀢𑀺.

𑁧𑁮𑁯. ‘‘𑀬𑀤𑀺’’𑀘𑁆𑀘𑀸𑀤𑀺. 𑀮𑁄𑀘𑀦𑀩𑁆𑀪𑀫𑀼𑀯𑀺𑀩𑁆𑀪𑀫𑀁 𑀮𑁄𑀘𑀦𑀪𑀫𑀽𑀦𑀁 𑀮𑀻𑀮𑀸𑀯𑀦𑁆𑀢𑀁 𑀓𑀺𑀜𑁆𑀘𑀺 𑀅𑀫𑁆𑀪𑁄𑀚𑀁 𑀓𑀺𑀜𑁆𑀘𑀺 𑀅𑀘𑁆𑀙𑀭𑀺𑀬𑀁 𑀧𑀤𑀼𑀫𑀁 𑀬𑀤𑀺 𑀪𑀯𑁂 𑀘𑁂 𑀲𑀺𑀬𑀸, 𑀢𑀫𑀫𑁆𑀪𑁄𑀚𑀁 𑀢𑀯 𑀫𑀼𑀔𑀲𑁄𑀪𑀁 𑀯𑀤𑀦𑀓𑀦𑁆𑀢𑀺𑀁 𑀥𑀸𑀭𑁂𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺. 𑀇𑀢𑀺 𑀈𑀤𑀺𑀲𑀻 𑀉𑀧𑀫𑀸 𑀅𑀩𑁆𑀪𑀼𑀢𑁄𑀧𑀫𑀸 𑀅𑀩𑁆𑀪𑀼𑀢𑀥𑀫𑁆𑀫𑀧𑀓𑀸𑀲𑀓𑀢𑁆𑀢𑀸 𑀅𑀩𑁆𑀪𑀼𑀢𑁄𑀧𑀫𑀸 𑀦𑀸𑀫. 𑀏𑀢𑁆𑀣 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀯𑀺𑀚𑁆𑀚𑀫𑀸𑀦𑀢𑁆𑀢𑁂𑀦 𑀧𑀭𑀺𑀓𑀧𑁆𑀧𑀺𑀢𑁄 𑀧𑀤𑀼𑀫𑀕𑀢𑁄 𑀮𑁄𑀘𑀦𑀩𑁆𑀪𑀫𑀼𑀯𑀺𑀩𑁆𑀪𑀫𑀲𑀫𑁆𑀩𑀦𑁆𑀥𑁄 𑀅𑀫𑁆𑀪𑁄𑀚𑀯𑀺𑀲𑁂𑀲𑀦𑁂𑀦 ‘‘𑀮𑁄𑀘𑀦𑀩𑁆𑀪𑀫𑀼𑀯𑀺𑀩𑁆𑀪𑀫’’𑀦𑁆𑀢𑀺 𑀇𑀫𑀺𑀦𑀸 𑀚𑁄𑀢𑀺𑀢𑁄. 𑀢𑀲𑁆𑀫𑀸 𑀅𑀫𑁆𑀪𑁄𑀚𑀁 𑀮𑁄𑀘𑀦𑀩𑁆𑀪𑀫𑀼𑀯𑀺𑀩𑁆𑀪𑀫𑀲𑀫𑁆𑀩𑀦𑁆𑀥𑀲𑀗𑁆𑀔𑀢𑀉𑀧𑀫𑀸𑀬 𑀚𑁄𑀢𑀓𑀢𑁆𑀢𑀸 𑀦𑀺𑀲𑁆𑀲𑀺𑀢𑀯𑁄𑀳𑀸𑀭𑁂𑀦 𑀉𑀧𑀫𑀸, 𑀫𑀼𑀔𑀁 𑀉𑀧𑀫𑁂𑀬𑁆𑀬𑀦𑁆𑀢𑀺 𑀫𑀼𑀔𑀕𑀢𑁄 𑀮𑁄𑀘𑀦𑀩𑁆𑀪𑀫𑀼𑀯𑀺𑀩𑁆𑀪𑀫𑀲𑀫𑁆𑀩𑀦𑁆𑀥𑁄 𑀬𑀤𑀺 𑀫𑀼𑀔𑁂 𑀦 𑀪𑀯𑁂𑀬𑁆𑀬, 𑀢𑀸𑀤𑀺𑀲𑀁 𑀫𑀼𑀔𑀲𑁄𑀪𑀁 𑀥𑀸𑀭𑁂𑀢𑀼𑀁 𑀓𑀣𑀁 𑀲𑀫𑀢𑁆𑀣𑁄𑀢𑀺 𑀲𑀸𑀫𑀢𑁆𑀣𑀺𑀬𑀸 𑀜𑀸𑀬𑀢𑀺. 𑀮𑁄𑀘𑀦𑀩𑁆𑀪𑀫𑀼𑀯𑀺𑀩𑁆𑀪𑀫𑀲𑀗𑁆𑀔𑀸𑀢𑀲𑀸𑀥𑀸𑀭𑀡𑀥𑀫𑁆𑀫𑁄 𑀧𑀦 ‘‘𑀮𑁄𑀘𑀦𑀸𑀦𑀺 𑀘 𑀪𑀫𑀼𑀬𑁄 𑀘𑁂𑀢𑀺 𑀘, 𑀢𑀸𑀲𑀁 𑀯𑀺𑀩𑁆𑀪𑀫𑁄 𑀬𑀲𑁆𑀫𑀺’’𑀦𑁆𑀢𑀺 𑀘 𑀯𑀺𑀕𑁆𑀕𑀳𑁂 𑀦𑀺𑀧𑁆𑀨𑀦𑁆𑀦𑁂𑀦 ¶ 𑀪𑀺𑀦𑁆𑀦𑀸𑀥𑀺𑀓𑀭𑀡𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁂𑀦 𑀕𑀼𑀡𑀻𑀪𑀽𑀢𑀲𑁆𑀲𑀧𑀺 𑀕𑀳𑀺𑀢𑀢𑁆𑀢𑀸 𑀯𑀺𑀜𑁆𑀜𑀸𑀬𑀢𑀺 [𑀕𑀳𑀡𑀲𑁆𑀲 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸 (𑀓.)].

𑁧𑁯𑁦.

𑀲𑀼𑀕𑀦𑁆𑀥𑀺 𑀲𑁄𑀪𑀲𑀫𑁆𑀩𑀦𑁆𑀥𑀺, 𑀲𑀺𑀲𑀺𑀭𑀁𑀲𑀼𑀯𑀺𑀭𑁄𑀥𑀺 𑀘;

𑀫𑀼𑀔𑀁 𑀢𑀯’𑀫𑁆𑀩𑀼𑀚𑀁𑀯𑁂’𑀢𑀺, 𑀲𑀸 𑀲𑀺𑀮𑁂𑀲𑁄𑀧𑀫𑀸 𑀫𑀢𑀸.

𑁧𑁯𑁦. ‘‘𑀲𑀼𑀕𑀦𑁆𑀥𑀺’’𑀘𑁆𑀘𑀸𑀤𑀺. 𑀢𑀯 𑀫𑀼𑀔𑀁 𑀅𑀫𑁆𑀪𑁄𑀚𑀫𑀺𑀯 𑀲𑀺𑀲𑀺𑀭𑀁𑀲𑀼𑀦𑁄𑀘𑀦𑁆𑀤𑀲𑁆𑀲 𑀯𑀺𑀭𑁄𑀥𑀺 𑀧𑀘𑁆𑀘𑀦𑀻𑀓𑀁, 𑀫𑀼𑀔𑀁 𑀢𑀁𑀲𑀫𑀸𑀦𑀓𑀦𑁆𑀢𑀺𑀢𑁆𑀢𑀸 𑀅𑀫𑁆𑀩𑀼𑀚𑀜𑁆𑀘 𑀢𑀤𑀼𑀤𑀬𑁂 𑀲𑀗𑁆𑀓𑁄𑀘𑀪𑀚𑀦𑀢𑁄. 𑀲𑁄𑀪𑀲𑀫𑁆𑀩𑀦𑁆𑀥𑀺 𑀓𑀦𑁆𑀢𑀺𑀬𑀼𑀢𑁆𑀢𑀁, 𑀫𑀼𑀔𑀫𑀫𑁆𑀩𑀼𑀚𑀜𑁆𑀘. 𑀲𑀼𑀕𑀦𑁆𑀥𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀼𑀕𑀦𑁆𑀥𑀺 𑀘 𑀤𑁆𑀯𑀬𑀫𑀧𑀻𑀢𑀺 𑀏𑀯𑀁 𑀲𑀺𑀮𑁂𑀲𑀧𑀭𑀺𑀕𑁆𑀕𑀳𑁂𑀦 𑀫𑀼𑀔𑀫𑁆𑀩𑀼𑀚𑀸𑀦𑀁 𑀉𑀧𑀫𑀸𑀬𑁄𑀕𑀢𑁄 𑀲𑀸 𑀬𑀣𑀸𑀯𑀼𑀢𑁆𑀢𑀸 𑀲𑀺𑀮𑁂𑀲𑁄𑀧𑀫𑀸 𑀫𑀢𑀸.

𑁧𑁯𑁦. ‘‘𑀲𑀼𑀕𑀦𑁆𑀥𑀺’’𑀘𑁆𑀘𑀸𑀤𑀺. 𑀢𑀯 𑀫𑀼𑀔𑀁 𑀅𑀫𑁆𑀪𑁄𑀚𑀫𑀺𑀯 𑀲𑀺𑀲𑀺𑀭𑀁𑀲𑀼𑀯𑀺𑀭𑁄𑀥𑀺 𑀘𑀦𑁆𑀤𑀲𑁆𑀲 𑀯𑀺𑀭𑀼𑀤𑁆𑀥𑀁 𑀳𑁄𑀢𑀺 𑀢𑀼𑀮𑁆𑀬𑀢𑁆𑀢𑀸. 𑀧𑀤𑀼𑀫𑀁 𑀧𑀦 𑀘𑀦𑁆𑀤𑁄𑀤𑀬𑁂𑀦 𑀅𑀢𑁆𑀢𑀦𑁄 𑀲𑀗𑁆𑀓𑁄𑀘𑀦𑀢𑁆𑀢𑀸 𑀢𑀲𑁆𑀲 𑀯𑀺𑀭𑀼𑀤𑁆𑀥𑀁 𑀳𑁄𑀢𑀺. 𑀲𑁄𑀪𑀲𑀫𑁆𑀩𑀦𑁆𑀥𑀺 𑀘 𑀅𑀦𑀜𑁆𑀜𑀲𑀸𑀥𑀸𑀭𑀡𑀫𑀼𑀔𑀕𑀢𑀓𑀦𑁆𑀢𑀺𑀲𑀫𑁆𑀩𑀦𑁆𑀥𑀬𑀼𑀢𑁆𑀢𑀜𑁆𑀘 𑀳𑁄𑀢𑀺. 𑀧𑀤𑀼𑀫𑀁 𑀧𑀦 𑀧𑀤𑀼𑀫𑀕𑀢𑀓𑀦𑁆𑀢𑀺𑀲𑀫𑁆𑀩𑀦𑁆𑀥𑀺𑀦𑀸 𑀬𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀕𑀦𑁆𑀥𑀺 𑀘 𑀘𑀢𑀼𑀚𑁆𑀚𑀸𑀢𑀺𑀲𑀼𑀕𑀦𑁆𑀥𑀯𑀳𑀦𑀢𑁄 […𑀯𑀫𑀦𑀢𑁄 (𑀓.)] 𑀲𑀼𑀕𑀦𑁆𑀥𑀺 𑀘 𑀳𑁄𑀢𑀺. 𑀅𑀫𑁆𑀩𑀼𑀚𑀁 𑀧𑀦 𑀧𑀤𑀼𑀫𑀲𑀼𑀕𑀦𑁆𑀥𑁂𑀦𑁂𑀯 𑀬𑀼𑀢𑁆𑀢𑀁 𑀳𑁄𑀢𑀺. 𑀇𑀢𑀺 𑀈𑀤𑀺𑀲𑀻 𑀉𑀧𑀫𑀸 𑀲𑀺𑀮𑁂𑀲𑁄𑀧𑀫𑀸 𑀏𑀓𑀧𑀤𑀸𑀢𑀺𑀳𑀺𑀢𑀉𑀪𑀬𑀢𑁆𑀣𑀮𑀓𑁆𑀔𑀡𑁂𑀦 𑀲𑀺𑀮𑁂𑀲𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀲𑀺𑀮𑁂𑀲𑁄𑀧𑀫𑀸 𑀦𑀸𑀫 𑀳𑁄𑀢𑀺. 𑀲𑀺𑀲𑀺𑀭𑀸 𑀲𑀻𑀢𑀮𑀸 𑀅𑀁𑀲𑀼 𑀓𑀦𑁆𑀢𑀺 𑀅𑀲𑁆𑀲𑁂𑀢𑀺 𑀘, 𑀢𑀲𑁆𑀲 𑀯𑀺𑀭𑀼𑀚𑁆𑀛𑀢𑀺 𑀲𑀻𑀮𑁂𑀦𑁂𑀢𑀺 𑀘, 𑀧𑀘𑁆𑀘𑀬𑀲𑀸𑀫𑀢𑁆𑀣𑀺𑀬𑀯𑀲𑁂𑀦 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀅𑀢𑁆𑀣𑀸𑀦𑀁 𑀮𑀩𑁆𑀪𑀦𑀢𑁄 𑀲𑀺𑀮𑀺𑀲𑁆𑀲𑀢𑀺 𑀅𑀧𑀭𑁄𑀧𑀺 𑀅𑀢𑁆𑀣𑁄 𑀏𑀢𑁆𑀣 𑀅𑀮𑀗𑁆𑀓𑀸𑀭𑁂𑀢𑀺 𑀘, 𑀲𑀺𑀮𑁂𑀲𑀯𑀲𑁂𑀦 𑀯𑀼𑀢𑁆𑀢𑀸 𑀉𑀧𑀫𑀸𑀢𑀺 𑀘 𑀯𑀺𑀕𑁆𑀕𑀳𑁄. 𑀏𑀢𑁆𑀣 𑀲𑀼𑀕𑀦𑁆𑀥𑁄 𑀘 𑀲𑁄𑀢𑀲𑀫𑁆𑀩𑀦𑁆𑀥𑁄 𑀘 𑀲𑀺𑀲𑀺𑀭𑀁𑀲𑀼𑀯𑀺𑀭𑁄𑀥𑀺𑀢𑁆𑀢𑀜𑁆𑀘𑁂𑀢𑀺 𑀇𑀫𑁂 𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀸𑀦𑀫𑀫𑁆𑀩𑀼𑀚𑀫𑀼𑀔𑀸𑀦𑀁 𑀢𑀼𑀮𑁆𑀬𑀥𑀫𑁆𑀫𑁄, 𑀢𑁂𑀲𑀼 𑀅𑀫𑁆𑀩𑀼𑀚𑀕𑀢𑀢𑀼𑀮𑁆𑀬𑀥𑀫𑁆𑀫𑀲𑀫𑁆𑀩𑀦𑁆𑀥𑁄 𑀲𑀥𑀫𑁆𑀫𑀢𑁆𑀢𑀸 𑀉𑀧𑀫𑀸 𑀦𑀸𑀫 𑀳𑁄𑀢𑀺, 𑀲𑀸 𑀅𑀫𑁆𑀩𑀼𑀚𑀲𑀫𑁆𑀩𑀦𑁆𑀥𑀺𑀦𑀸 𑀇𑀯𑀲𑀤𑁆𑀤𑁂𑀦 𑀚𑁄𑀢𑀺𑀢𑀸, ¶ 𑀫𑀼𑀔𑀕𑀢𑀢𑀼𑀮𑁆𑀬𑀥𑀫𑁆𑀫𑁄 𑀧𑀦 𑀅𑀲𑁆𑀲𑀢𑁆𑀣𑀺𑀢𑀲𑁆𑀲𑀻𑀮𑀢𑁆𑀣𑁂 𑀓𑀢𑀧𑀘𑁆𑀘𑀬𑁂 𑀲𑀢𑀺𑀧𑀺 𑀲𑀸𑀫𑀢𑁆𑀣𑀺𑀬𑀸𑀬𑁂𑀯 𑀕𑀫𑁆𑀬𑀢𑁂.

𑁧𑁯𑁧.

𑀲𑀭𑀽𑀧𑀲𑀤𑁆𑀤𑀯𑀸𑀘𑁆𑀘𑀢𑁆𑀢𑀸, 𑀲𑀸 𑀲𑀦𑁆𑀢𑀸𑀦𑁄𑀧𑀫𑀸 𑀬𑀣𑀸;

𑀩𑀸𑀮𑀸’𑀯𑀼’𑀬𑁆𑀬𑀸𑀦𑀫𑀸𑀮𑀸’𑀬𑀁, 𑀲𑀸𑀮𑀓𑀸𑀦𑀦𑀲𑁄𑀪𑀺𑀦𑀻.

𑁧𑁯𑁧. ‘‘𑀲𑀭𑀽𑀧’’𑀇𑀘𑁆𑀘𑀸𑀤𑀺. 𑀅𑀬𑀫𑀼𑀬𑁆𑀬𑀸𑀦𑀫𑀸𑀮𑀸 𑀩𑀸𑀮𑀸𑀯 𑀇𑀢𑁆𑀣𑀻 𑀯𑀺𑀬. 𑀓𑀣𑀁? 𑀲𑀸𑀮𑀓𑀸𑀦𑀦𑀲𑁄𑀪𑀺𑀦𑀻 𑀩𑀸𑀮𑀸 𑀢𑀸𑀯 𑀲𑀳𑀸𑀮𑀓𑁂𑀦 𑀓𑁂𑀲𑀲𑀦𑁆𑀦𑀺𑀯𑁂𑀲𑀯𑀺𑀲𑁂𑀲𑁂𑀦 𑀯𑀢𑁆𑀢𑀢𑁂 𑀲𑀸𑀮𑀓𑀫𑀸𑀦𑀦𑀁 𑀢𑁂𑀦 𑀲𑁄𑀪𑀢𑁂. 𑀲𑀸𑀮𑀓𑀸𑀦𑀦𑀲𑁄𑀪𑀺𑀦𑀻 𑀉𑀬𑁆𑀬𑀸𑀦𑀫𑀸𑀮𑀸𑀧𑀺 𑀲𑀸𑀮𑀸𑀦𑀁 𑀭𑀼𑀓𑁆𑀔𑀯𑀺𑀲𑁂𑀲𑀸𑀦𑀁 𑀓𑀸𑀦𑀦𑁂𑀦 𑀕𑀳𑀦𑁂𑀦 𑀲𑁄𑀪𑀢𑁂, 𑀏𑀯𑀭𑀽𑀧𑀸 𑀲𑀸 𑀢𑀸𑀤𑀺𑀲𑀻 𑀲𑀦𑁆𑀢𑀸𑀦𑁄𑀧𑀫𑀸 𑀆𑀔𑁆𑀬𑀸𑀬𑀢𑁂, 𑀓𑀲𑁆𑀫𑀸? 𑀲𑀺𑀮𑁂𑀲𑁄𑀧𑀫𑀢𑁆𑀢𑀲𑀪𑀸𑀯𑁂𑀧𑀺 𑀲𑀭𑀽𑀧𑁂𑀦 𑀲𑀤𑀺𑀲𑁂𑀦 𑀲𑀤𑁆𑀤𑁂𑀦 ‘‘𑀲𑀸𑀮𑀓𑀸𑀦𑀦𑀲𑁄𑀪𑀺𑀦𑀻’’𑀢𑁆𑀯𑁂𑀯𑀁𑀯𑀺𑀥𑁂𑀦 𑀲𑀤𑁆𑀤𑀲𑀦𑁆𑀢𑀸𑀦𑁂𑀦 𑀯𑀺𑀲𑁂𑀲𑀪𑀽𑀢𑁂𑀦 𑀯𑀸𑀘𑁆𑀘𑀢𑁆𑀢𑀸 𑀧𑀓𑀸𑀲𑀺𑀬𑀢𑁆𑀢𑀸 𑀢𑀲𑁆𑀲𑀸𑀇𑀢𑀺 𑀕𑀫𑁆𑀬𑀢𑁂. 𑀬𑀣𑁂𑀢𑀺 𑀦𑀺𑀤𑀲𑁆𑀲𑀦𑁂.

𑁧𑁯𑁧. ‘‘𑀲𑀭𑀽𑀧𑁂’’𑀘𑁆𑀘𑀸𑀤𑀺. 𑀲𑀭𑀽𑀧𑀲𑀤𑁆𑀤𑀯𑀸𑀘𑁆𑀘𑀢𑁆𑀢𑀸 𑀢𑀼𑀮𑁆𑀬𑀲𑀼𑀢𑀺𑀬𑀸 𑀅𑀘𑁆𑀙𑀺𑀦𑁆𑀦𑀲𑀫𑁆𑀩𑀦𑁆𑀥𑀯𑀘𑀦𑀫𑀸𑀮𑀸𑀬 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀲𑀸 𑀉𑀧𑀫𑀸 𑀲𑀦𑁆𑀢𑀸𑀦𑁄𑀧𑀫𑀸 𑀦𑀸𑀫 𑀳𑁄𑀢𑀺, 𑀲𑀺𑀮𑁂𑀲𑀢𑁆𑀢𑁂 𑀲𑀢𑀺𑀧𑀺 𑀓𑀢𑀲𑀫𑀸𑀲𑁂𑀳𑀺 𑀧𑀤𑀲𑀦𑁆𑀢𑀸𑀦𑁂𑀳𑀺 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀲𑀦𑁆𑀢𑀸𑀦𑁄𑀧𑀫𑀸 𑀦𑀸𑀫 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀬𑀣𑁂’’𑀢𑀺 𑀉𑀤𑀸𑀳𑀭𑀢𑀺. 𑀅𑀬𑀁 𑀉𑀬𑁆𑀬𑀸𑀦𑀫𑀸𑀮𑀸 𑀏𑀲𑀸 𑀉𑀬𑁆𑀬𑀸𑀦𑀧𑀦𑁆𑀢𑀺 𑀲𑀸𑀮𑀓𑀸𑀦𑀦𑀲𑁄𑀪𑀺𑀦𑀻 𑀅𑀮𑀓𑀲𑀗𑁆𑀔𑀸𑀢𑀓𑁂𑀲𑀲𑀦𑁆𑀦𑀺𑀯𑁂𑀲𑀲𑀳𑀺𑀢𑁂𑀦 𑀫𑀼𑀔𑁂𑀦 𑀲𑁄𑀪𑀫𑀸𑀦𑀸 𑀩𑀸𑀮𑀸𑀯 𑀅𑀗𑁆𑀕𑀦𑀸 𑀇𑀯 𑀲𑀸𑀮𑀓𑀸𑀦𑀦𑀲𑁄𑀪𑀺𑀦𑀻 𑀲𑀸𑀮𑀯𑀦𑁂𑀳𑀺 𑀲𑁄𑀪𑀫𑀸𑀦𑀸 𑀳𑁄𑀢𑀺. 𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀸𑀦𑀁 𑀲𑀫𑀸𑀦𑀁 𑀭𑀽𑀧𑀁 𑀬𑁂𑀲𑀦𑁆𑀢𑀺 𑀘, 𑀲𑀭𑀽𑀧𑀸 𑀘 𑀢𑁂 𑀲𑀤𑁆𑀤𑀸 𑀘𑁂𑀢𑀺 𑀘, 𑀢𑁂𑀳𑀺 𑀯𑀸𑀘𑁆𑀘𑀸 𑀉𑀧𑀫𑀸𑀢𑀺 𑀘, 𑀢𑀲𑁆𑀲𑀸 𑀪𑀸𑀯𑁄𑀢𑀺 𑀘, 𑀲𑀦𑁆𑀢𑀸𑀦𑁂𑀦 𑀬𑀼𑀢𑁆𑀢𑀸 𑀉𑀧𑀫𑀸𑀢𑀺 𑀘, 𑀉𑀬𑁆𑀬𑀸𑀦𑀸𑀦𑀁 𑀫𑀸𑀮𑀸𑀢𑀺 𑀘, 𑀲𑀳 𑀅𑀮𑀓𑁂𑀦 𑀯𑀢𑁆𑀢𑀫𑀸𑀦𑀦𑁆𑀢𑀺 𑀘, 𑀢𑀜𑁆𑀘 𑀢𑀁 𑀆𑀦𑀦𑀜𑁆𑀘𑀸𑀢𑀺 𑀘, 𑀢𑁂𑀦 𑀲𑁄𑀪𑀢𑀺 𑀲𑀻𑀮𑁂𑀦𑀸𑀢𑀺 𑀘, 𑀲𑀸𑀮𑀸𑀦𑀁 𑀓𑀸𑀦𑀦𑀦𑁆𑀢𑀺 𑀘, 𑀢𑁂𑀦 𑀲𑁄𑀪𑀢𑀺 𑀲𑀻𑀮𑁂𑀦𑀸𑀢𑀺 𑀘 𑀯𑀸𑀓𑁆𑀬𑀁.

𑁧𑁯𑁨.

𑀔𑀬𑀻 ¶ 𑀘𑀦𑁆𑀤𑁄 𑀩𑀳𑀼𑀭𑀚𑀁, 𑀧𑀤𑀼𑀫𑀁 𑀢𑁂𑀳𑀺 𑀢𑁂 𑀫𑀼𑀔𑀁;

𑀲𑀫𑀸𑀦𑀫𑁆𑀧𑀺 𑀲𑀫𑀼𑀓𑁆𑀓𑀁𑀲𑀻-𑀢𑁆𑀬’𑀬𑀁 𑀦𑀺𑀦𑁆𑀤𑁄𑀧𑀫𑀸 𑀫𑀢𑀸.

𑁧𑁯𑁨. ‘‘𑀔𑀬𑀻’’𑀇𑀘𑁆𑀘𑀸𑀤𑀺. 𑀘𑀦𑁆𑀤𑁄 𑀔𑀬𑀻 𑀔𑀬𑁄 𑀅𑀘𑁆𑀘𑀬𑁄 𑀬𑀲𑁆𑀲𑁂𑀢𑀺, 𑀧𑀤𑀼𑀫𑀁 𑀩𑀳𑀼𑀭𑀚𑀁 𑀩𑀳𑀽𑀦𑀺 𑀭𑀚𑀸𑀦𑀺 𑀧𑀭𑀸𑀕𑀸𑀯𑀬𑀯𑀸 𑀬𑀲𑁆𑀫𑀺𑀦𑁆𑀢𑀺, 𑀢𑁂𑀳𑀺 𑀏𑀯𑀁𑀪𑀽𑀢𑁂𑀳𑀺 𑀘𑀦𑁆𑀤𑀧𑀤𑀼𑀫𑁂𑀳𑀺 𑀓𑀦𑁆𑀢𑀺𑀆𑀤𑀺𑀦𑀸 𑀲𑀫𑀸𑀦𑀫𑁆𑀧𑀺 𑀲𑀤𑀺𑀲𑀫𑁆𑀧𑀺 𑀲𑀦𑁆𑀢𑀁 𑀢𑀯 𑀫𑀼𑀔𑀁 𑀲𑀫𑀼𑀓𑁆𑀓𑀁𑀲𑀺 𑀧𑀭𑀫𑀼𑀓𑁆𑀓𑀁𑀲𑀯𑀦𑁆𑀢𑀁, 𑀔𑀬𑀲𑀤𑁆𑀤𑀲𑁆𑀲 𑀘 𑀭𑀚𑀲𑁆𑀲 𑀘 𑀤𑁄𑀲𑁂𑀧𑀺 𑀯𑀢𑁆𑀢𑀦𑀢𑁄, 𑀲𑀤𑁆𑀤𑀘𑁆𑀙𑀮𑁂𑀦 𑀔𑀬𑀲𑁆𑀲 𑀤𑁄𑀲𑀭𑀽𑀧𑀲𑁆𑀲 𑀩𑀳𑀼𑀭𑀚𑀢𑁆𑀢𑀲𑁆𑀲 𑀘 𑀢𑀢𑁆𑀣𑀸𑀪𑀸𑀯𑀢𑁄𑀢𑀺. 𑀇𑀢𑀺 𑀏𑀯𑀭𑀽𑀧𑀸 𑀅𑀬𑀁 𑀦𑀺𑀦𑁆𑀤𑁄𑀧𑀫𑀸 𑀫𑀢𑀸 𑀦𑀺𑀦𑁆𑀤𑀺𑀢𑁂𑀦 𑀘𑀦𑁆𑀤𑀸𑀤𑀺𑀦𑀸 𑀔𑀬𑀲𑁆𑀲𑁄𑀧𑀫𑀺𑀢𑀢𑁆𑀢𑀸.

𑁧𑁯𑁨. ‘‘𑀔𑀬𑀺’’𑀘𑁆𑀘𑀸𑀤𑀺. 𑀘𑀦𑁆𑀤𑁄 𑀔𑀬𑀻 𑀧𑀸𑀝𑀺𑀧𑀤𑀢𑁄 𑀧𑀝𑁆𑀞𑀸𑀬 𑀤𑀺𑀦𑁂 𑀤𑀺𑀦𑁂 𑀏𑀓𑀫𑁂𑀓𑀸𑀬 𑀓𑀮𑀸𑀬 𑀲𑀽𑀭𑀺𑀬𑀲𑁆𑀲 𑀆𑀲𑀦𑁆𑀦𑀳𑁂𑀢𑀼 𑀔𑀻𑀬𑀦𑀲𑀪𑀸𑀯𑀬𑀼𑀢𑁆𑀢𑁄 𑀳𑁄𑀢𑀺, 𑀧𑀤𑀼𑀫𑀁 𑀩𑀳𑀼𑀭𑀚𑀁 𑀩𑀳𑀼𑀭𑁂𑀡𑀼𑀲𑀫𑀦𑁆𑀦𑀸𑀕𑀢𑀁 𑀳𑁄𑀢𑀺, 𑀢𑁂𑀳𑀺 𑀘𑀦𑁆𑀤𑀧𑀤𑀼𑀫𑁂𑀳𑀺 𑀲𑀫𑀸𑀦𑀫𑁆𑀧𑀺 𑀓𑀦𑁆𑀢𑀺𑀲𑀼𑀕𑀦𑁆𑀥𑀸𑀤𑀻𑀳𑀺 𑀲𑀤𑀺𑀲𑀫𑁆𑀧𑀺 𑀢𑁂 𑀫𑀼𑀔𑀁 𑀢𑀯𑀸𑀦𑀦𑀁 𑀲𑀫𑀼𑀓𑁆𑀓𑀁𑀲𑀺 𑀔𑀬𑀭𑀚𑀲𑀤𑁆𑀤𑁂𑀳𑀺 𑀤𑁄𑀲𑀲𑁆𑀲𑀸𑀧𑀺 𑀯𑀸𑀘𑁆𑀘𑀢𑁆𑀢𑀸 𑀲𑀤𑁆𑀤𑀘𑁆𑀙𑀮𑁂𑀳𑀺 𑀕𑀫𑁆𑀬𑀫𑀸𑀦𑀲𑁆𑀲 𑀢𑀸𑀤𑀺𑀲𑀲𑁆𑀲 𑀤𑁄𑀲𑀲𑁆𑀲 𑀫𑀼𑀔𑁂 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀅𑀥𑀺𑀓𑀼𑀓𑁆𑀓𑀁𑀲𑀕𑀼𑀡𑀯𑀦𑁆𑀢𑀁 𑀳𑁄𑀢𑀺, 𑀇𑀢𑀺 𑀈𑀤𑀺𑀲𑀻 𑀅𑀬𑀁 𑀉𑀧𑀫𑀸 𑀦𑀺𑀦𑁆𑀤𑁄𑀧𑀫𑀸 𑀦𑀺𑀦𑁆𑀤𑀺𑀢𑀸𑀦𑀁 𑀘𑀦𑁆𑀤𑀧𑀤𑀼𑀫𑀸𑀦𑀁 𑀫𑀼𑀔𑀲𑁆𑀲 𑀉𑀧𑀫𑀺𑀢𑀸𑀢𑀺 𑀦𑀺𑀦𑁆𑀤𑁄𑀧𑀫𑀸 𑀦𑀸𑀫 𑀳𑁄𑀢𑀺, 𑀫𑀼𑀔𑀯𑀺𑀲𑁂𑀲𑀦𑁂𑀦 𑀇𑀯𑀲𑀤𑁆𑀤𑀧𑀭𑀺𑀬𑀸𑀬𑁂𑀦 𑀲𑀫𑀸𑀦𑀲𑀤𑁆𑀤𑁂𑀦 𑀫𑀼𑀔𑀕𑀢𑀲𑀥𑀫𑁆𑀫𑁄 𑀚𑁄𑀢𑀺𑀢𑁄 𑀳𑁄𑀢𑀺, 𑀉𑀧𑀫𑀸𑀲𑀗𑁆𑀔𑀢𑀘𑀦𑁆𑀤𑀧𑀤𑀼𑀫𑀕𑀢𑀲𑀥𑀫𑁆𑀫𑁄𑀧𑀺 𑀤𑁆𑀯𑀻𑀲𑀼 𑀢𑀼𑀮𑁆𑀬𑀥𑀫𑁆𑀫𑁄𑀧𑀺 𑀲𑀸𑀫𑀢𑁆𑀣𑀺𑀬𑀸 𑀕𑀫𑁆𑀬𑀢𑁂, 𑀅𑀧𑀺𑀲𑀤𑁆𑀤𑁄 𑀘𑁂𑀢𑁆𑀣 𑀯𑀢𑁆𑀢𑀩𑁆𑀩𑀦𑁆𑀢𑀭𑀲𑀫𑀼𑀘𑁆𑀘𑀬𑁂, 𑀲𑀫𑀼𑀓𑁆𑀓𑀁𑀲𑁄𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀭𑁄.

𑁧𑁯𑁩.

𑀅𑀲𑀫𑀢𑁆𑀣𑁄 𑀫𑀼𑀔𑁂𑀦𑀺’𑀦𑁆𑀤𑀼, 𑀚𑀺𑀦 𑀢𑁂 𑀧𑀝𑀺𑀕𑀚𑁆𑀚𑀺𑀢𑀼𑀁;

𑀚𑀴𑁄 𑀓𑀮𑀗𑁆𑀓𑀻’𑀢𑀺 𑀅𑀬𑀁, 𑀧𑀝𑀺𑀲𑁂𑀥𑁄𑀧𑀫𑀸 𑀲𑀺𑀬𑀸.

𑁧𑁯𑁩. ‘‘𑀅𑀲𑀫𑀢𑁆𑀣𑁄’’𑀇𑀘𑁆𑀘𑀸𑀤𑀺. 𑀚𑀺𑀦 𑀢𑁂 𑀫𑀼𑀔𑁂𑀦 𑀚𑀴𑁄 𑀲𑀻𑀢𑁄 𑀅𑀓𑀼𑀲𑀮𑁄 𑀘 𑀓𑀮𑀗𑁆𑀓𑁄 𑀫𑀺𑀕𑀮𑀜𑁆𑀙𑀦𑀮𑀓𑁆𑀔𑀡𑁄 𑀤𑁄𑀲𑁄 ¶ 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀓𑀮𑀗𑁆𑀓𑀻. 𑀲𑀤𑁆𑀤𑀘𑁆𑀙𑀮𑁂𑀦 𑀤𑁄𑀲𑀓𑀣𑀦𑀁. 𑀢𑀸𑀤𑀺𑀲𑁄 𑀇𑀦𑁆𑀤𑀼 𑀘𑀦𑁆𑀤𑁄 𑀧𑀝𑀺𑀕𑀚𑁆𑀚𑀺𑀢𑀼𑀁 𑀯𑀺𑀯𑀤𑀺𑀢𑀼𑀁 𑀅𑀲𑀫𑀢𑁆𑀣𑁄, 𑀫𑀼𑀔𑀦𑁆𑀢𑀼 𑀯𑀺𑀲𑀤𑀁 𑀅𑀮𑀗𑁆𑀓𑀢𑀜𑁆𑀘𑁂𑀢𑀺 𑀓𑀣𑀫𑀦𑁂𑀦𑀸𑀬𑀁 𑀲𑀤𑀺𑀲𑁄𑀢𑀺 𑀦𑀺𑀲𑁂𑀥𑀤𑁆𑀯𑀸𑀭𑁂𑀦 𑀲𑀥𑀫𑁆𑀫𑀢𑀸𑀯 𑀕𑀫𑁆𑀫𑀢𑁂, 𑀅𑀬𑀁 𑀧𑀝𑀺𑀲𑁂𑀥𑁄𑀧𑀫𑀸 𑀲𑀺𑀬𑀸.

𑁧𑁯𑁩. ‘‘𑀅𑀲𑀫𑀢𑁆𑀣𑁄’’𑀘𑁆𑀘𑀸𑀤𑀺. 𑀳𑁂 𑀚𑀺𑀦 𑀢𑁂 𑀢𑀼𑀬𑁆𑀳𑀁 𑀫𑀼𑀔𑁂𑀦 𑀧𑀝𑀺𑀕𑀚𑁆𑀚𑀺𑀢𑀼𑀁 𑀯𑀺𑀯𑀤𑀺𑀢𑀼𑀁 𑀚𑀴𑁄 𑀲𑀻𑀢𑀮𑁄 𑀅𑀯𑀺𑀲𑀤𑁄 𑀓𑀮𑀗𑁆𑀓𑀻 𑀲𑀲𑀮𑀓𑁆𑀔𑀡𑁄 𑀯𑀸 𑀲𑀤𑁄𑀲𑁄 𑀯𑀸 𑀇𑀦𑁆𑀤𑀼 𑀘𑀦𑁆𑀤𑁄 𑀅𑀲𑀫𑀢𑁆𑀣𑁄 𑀳𑁄𑀢𑀻𑀢𑀺, 𑀅𑀬�