📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀩𑀸𑀮𑀸𑀯𑀢𑀸𑀭

𑀧𑀡𑀸𑀫

[𑀓]

𑀲𑀩𑁆𑀩𑀁 𑀦𑀺𑀭𑀼𑀢𑁆𑀢𑀺𑀧𑀣𑀧𑀸𑀭𑀕𑀢𑀁 𑀲𑀩𑀼𑀤𑁆𑀥𑀁,

𑀩𑀼𑀤𑁆𑀥𑀁 𑀢𑀺𑀮𑁄𑀓𑀢𑀺𑀮𑀓𑀁 𑀳𑀢𑀧𑀸𑀧𑀥𑀫𑁆𑀫𑀁;

𑀥𑀫𑁆𑀫𑀁 𑀯𑀺𑀫𑀼𑀢𑁆𑀢𑀺𑀲𑀼𑀔𑀤𑀁 𑀯𑀺𑀳𑀢𑀸𑀖𑀲𑀁𑀖𑀁,

𑀲𑀁𑀖𑀁 𑀘 𑀦𑀺𑀘𑁆𑀘𑀫𑀪𑀺𑀯𑀦𑁆𑀤𑀺𑀬 𑀤𑀓𑁆𑀔𑀺𑀡𑁂𑀬𑁆𑀬𑀁.

[𑀔]

𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄𑀲𑁆𑀫𑀺 𑀫𑀼𑀤𑁆𑀥𑁄 𑀫𑀫 𑀯𑀭𑀕𑀭𑀯𑁄 𑀲𑀻𑀮𑀧𑀜𑁆𑀜𑀸𑀤𑀺𑀲𑁄𑀪𑁂,

𑀘𑀦𑁆𑀤𑀸𑀤𑀺𑀘𑁆𑀘𑁂𑀯 𑀲𑀼𑀤𑁆𑀥𑁂 𑀯𑀭𑀚𑀺𑀦𑀞𑀧𑀺𑀢𑁂 𑀲𑀸𑀲𑀦𑀸𑀩𑁆𑀪𑁂 𑀧𑀢𑀻𑀢𑁂;

𑀦𑀺𑀲𑁆𑀲𑀸𑀬𑁂𑀯𑀸 𑀢𑀺𑀧𑁂𑀫𑀸 𑀧𑀡𑀫𑀺𑀬 𑀲𑀺𑀭𑀲𑀸 𑀦𑀺𑀘𑁆𑀘𑀫𑁂𑀲𑀁 𑀲𑀭𑀺𑀢𑁆𑀯𑀸,

𑀧𑀸𑀤𑀫𑁆𑀪𑁄𑀚𑁂 𑀕𑀼𑀡𑀕𑁆𑀕𑁂 𑀳𑀢𑀤𑀼𑀭𑀺𑀢𑀫𑀮𑁄 𑀆𑀦𑀼𑀪𑀸𑀯𑁂𑀦 𑀢𑀲𑁆𑀲𑀸.

[𑀕]

𑀧𑁄𑀭𑀸𑀡 𑀲𑀻𑀳𑀴 𑀧𑀤𑀢𑁆𑀣 𑀯𑀺𑀦𑀺𑀘𑁆𑀙𑀬𑀜𑁆𑀘,

𑀲𑀩𑁆𑀩𑀫𑁆𑀧𑀺 𑀫𑀸𑀕𑀥𑀦𑀺𑀭𑀼𑀢𑁆𑀢𑀺𑀦𑀬𑀁 𑀧𑀲𑀢𑁆𑀣𑀁;

𑀅𑀜𑁆𑀜𑀜𑁆𑀘 𑀦𑁂𑀓𑀯𑀺𑀥 𑀲𑀓𑁆𑀓𑀢 𑀲𑀤𑁆𑀤𑀲𑀢𑁆𑀣𑀁,

𑀧𑀸𑀭𑀫𑁆𑀧𑀭𑀸𑀪𑀢 𑀫𑀢𑀜𑁆𑀘 𑀦𑀺𑀲𑀫𑁆𑀫 𑀲𑀫𑁆𑀫𑀸.

[𑀖]

𑀩𑀸𑀮𑀸𑀯𑀢𑀸𑀭 𑀯𑀭𑀫𑀸𑀕𑀥 𑀲𑀤𑁆𑀤𑀲𑀢𑁆𑀣𑁂,

𑀤𑀼𑀩𑁆𑀩𑁄𑀥 𑀦𑁂𑀓𑀧𑀤𑀅𑀢𑁆𑀣 𑀯𑀺𑀦𑀺𑀘𑁆𑀙𑀬𑁂𑀦;

𑀅𑀢𑁆𑀣𑀸𑀬 𑀆𑀥𑀼𑀦𑀺𑀓 𑀩𑀸𑀮𑀧𑀭𑀫𑁆𑀧𑀭𑀸𑀬,

𑀩𑀸𑀮𑀸𑀯𑀢𑀸𑀭 𑀯𑀭𑀕𑀡𑁆𑀞𑀺𑀧𑀤𑀁 𑀓𑀭𑀺𑀲𑁆𑀲𑀁.

[𑀗]

𑀦𑀺𑀘𑁆𑀘𑀁 𑀬𑁂 𑀫𑁂𑀢𑁆𑀣 𑀩𑀸𑀮𑀸 𑀯𑀭𑀳𑀤𑀬𑀬𑀼𑀢𑀸 𑀲𑀼𑀝𑁆𑀞𑀼 𑀦𑀺𑀓𑁆𑀔𑀺𑀢𑁆𑀢𑀦𑁂𑀢𑁆𑀢𑀸,

𑀧𑀼𑀡𑁆𑀡𑁂 𑀦𑀸𑀦𑀸𑀦𑀬𑀸𑀦𑀁 𑀲𑀼𑀭𑀢𑀭𑀼𑀲𑀤𑀺𑀲𑁂 𑀥𑀻𑀭𑀧𑀸𑀲𑀁𑀲𑀺𑀬𑁂 𑀯𑁂;

𑀕𑀫𑁆𑀪𑀻𑀭𑀁 𑀤𑀼𑀢𑁆𑀢𑀭𑀁 𑀢𑁂 𑀚𑀺𑀦𑀯𑀘𑀦𑀼𑀤𑀥𑀺𑀁 𑀢𑀺𑀡𑁆𑀡𑀣𑀸𑀫𑀸 𑀪𑀯𑁂𑀬𑁆𑀬𑀼𑀁,

𑀮𑀤𑁆𑀥𑁄𑀧𑀸𑀬𑀸 𑀘 𑀘𑀦𑁆𑀤𑀁 𑀢𑀤𑀺𑀢𑀭𑀧𑀘𑀼𑀭𑀁 𑀲𑀓𑁆𑀓𑀢𑀁 𑀲𑁄𑀢𑀼𑀓𑀸𑀫𑀸.

[𑀘]

𑀕𑀦𑁆𑀣𑀦𑀺𑀧𑁆𑀨𑀢𑁆𑀢𑀺𑀬𑀸 𑀲𑁂𑀲 𑁋 𑀤𑀼𑀓𑁆𑀓𑀭𑀢𑁆𑀢𑀁 𑀬𑀣𑀸𑀯𑀢𑁄;

𑀚𑀸𑀦𑀦𑁆𑀢𑀺 𑀓𑀼𑀲𑀮𑀸 𑀥𑀻𑀭𑀸, 𑀦𑁂𑀓𑀲𑀢𑁆𑀣𑀦𑁆𑀢𑀭𑀸𑀤𑀺𑀲𑀼;

𑀕𑀦𑁆𑀣𑁂𑀲𑀼 𑀕𑀼𑀡𑀤𑁄𑀲𑀫𑁆𑀧𑀺, 𑀢𑁂𑀬𑁂𑀯 𑀯𑀺𑀤𑀼𑀭𑀸 𑀲𑀤𑀸.

[𑀙]

𑀢𑀲𑁆𑀫𑀸 𑀏𑀢𑁆𑀣 𑀧𑀫𑀸𑀤𑀸𑀤𑀺 𑁋 𑀤𑁄𑀲𑀮𑁂𑀲𑁄 𑀪𑀯𑁂 𑀬𑀤𑀺;

𑀧𑁄𑀭𑀸𑀡𑀸𑀘𑁂𑀭𑀮𑀤𑁆𑀥𑀻𑀳𑀺, 𑀯𑀺𑀮𑁄𑀫𑀁 𑀯𑀸 𑀪𑀯𑁂𑀬𑁆𑀬 𑀘𑁂.

[𑀚]

𑀕𑀦𑁆𑀣𑀦𑁆𑀢𑀭𑀁 𑀯𑀺𑀕𑀸𑀳𑁂𑀢𑁆𑀯𑀸, 𑀯𑀺𑀘𑀸𑀭𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁;

𑀬𑀼𑀢𑁆𑀢𑀺𑀫𑁂𑀯 𑀘 𑀕𑀡𑁆𑀳𑀦𑁆𑀢𑀼, 𑀳𑀼𑀢𑁆𑀯𑀸 𑀯𑀻𑀫𑀁𑀲𑀩𑀼𑀤𑁆𑀥𑀺𑀓𑀸𑀢𑀺.

𑀧𑀡𑀸𑀫

𑁧. 𑀩𑀼𑀤𑁆𑀥𑀁 ¶ 𑀢𑀺𑀥𑀸 𑀪𑀺𑀯𑀦𑁆𑀤𑀺𑀢𑁆𑀯𑀸, 𑀩𑀼𑀤𑁆𑀥𑀫𑁆𑀩𑀼𑀚 𑀯𑀺𑀮𑁄𑀘𑀦𑀁.

𑀩𑀸𑀮𑀸𑀯𑀢𑀸𑀭𑀁 𑀪𑀸𑀲𑀺𑀲𑁆𑀲𑀁, 𑀩𑀸𑀮𑀸𑀦𑀁 𑀩𑀼𑀤𑁆𑀥𑀺𑀯𑀼𑀤𑁆𑀥𑀺𑀬𑀸.

𑁧. 𑀲𑀦𑁆𑀥𑀺 𑀓𑀡𑁆𑀟

𑀲𑀜𑁆𑀜𑀸

𑁨. 𑀅𑀓𑁆𑀔𑀭𑀸𑀧𑀸𑀤𑀬𑁄 𑀏𑀓𑀘𑀢𑁆𑀢𑀸𑀮𑀻𑀲𑀁.

𑀅𑀓𑁆𑀔𑀭𑀸𑀧𑀺 ¶ 𑀅𑀓𑀸𑀭𑀸𑀤𑀬𑁄 𑀏𑀓𑀘𑀢𑁆𑀢𑀸𑀮𑀻𑀲𑀁 𑀲𑀼𑀢𑁆𑀢𑀦𑁆𑀢𑁄𑀧𑀓𑀸𑀭𑀸. 𑀢𑀁 𑀬𑀣𑀸-𑀅 𑀆-𑀇 𑀈-𑀉 𑀊-𑀏 𑀑, 𑀓 𑀔 𑀕 𑀖 𑀗, 𑀘 𑀙 𑀚 𑀛 𑀜, 𑀝 𑀞 𑀟 𑀠 𑀡, 𑀢 𑀣 𑀤 𑀥 𑀦, 𑀧 𑀨 𑀩 𑀪 𑀫, 𑀬 𑀭 𑀮 𑀯 𑀲 𑀳 𑀴 𑀅𑀁-𑀇𑀢𑀺.

𑁩. 𑀢𑀢𑁆𑀣𑁄𑀤𑀦𑁆𑀢𑀸𑀲𑀭𑀸 𑀅𑀝𑁆𑀞.

𑀢𑀢𑁆𑀣 ¶ 𑀅𑀓𑁆𑀔𑀭𑁂𑀲𑀼 𑀑𑀓𑀸𑀭𑀦𑁆𑀢𑀸 𑀅𑀝𑁆𑀞 𑀲𑀭𑀸 𑀦𑀸𑀫. 𑀢𑀢𑁆𑀣𑁂𑀢𑀺 𑀯𑀢𑁆𑀢𑀢𑁂.

𑁪. 𑀮𑀳𑀼𑀫𑀢𑁆𑀢𑀸 𑀢𑀬𑁄 𑀭𑀲𑁆𑀲𑀸.

𑀢𑀢𑁆𑀣 ¶ 𑀲𑀭𑁂𑀲𑀼 𑀮𑀳𑀼𑀫𑀢𑁆𑀢𑀸 𑀅, 𑀇, 𑀉 𑀇𑀢𑀺 𑀢𑀬𑁄 𑀭𑀲𑁆𑀲𑀸.

𑁫. 𑀅𑀜𑁆𑀜𑁂 𑀤𑀻𑀖𑀸.

𑀢𑀢𑁆𑀣 ¶ 𑀲𑀭𑁂𑀲𑀼 𑀭𑀲𑁆𑀲𑁂𑀳𑀜𑁆𑀜𑁂 𑀤𑀻𑀖𑀸.

𑀲𑀁𑀬𑁄𑀕𑀢𑁄 𑀧𑀼𑀩𑁆𑀩𑁂 𑀏𑀑 𑀭𑀲𑁆𑀲𑀸 𑀇𑀯𑁄𑀘𑁆𑀘𑀦𑁆𑀢𑁂, 𑀅𑀦𑀦𑁆𑀢𑀭𑀸 𑀩𑁆𑀬𑀜𑁆𑀚𑀦𑀸 𑀲𑀁𑀬𑁄𑀕𑁄. 𑀏𑀢𑁆𑀣, 𑀲𑁂𑀬𑁆𑀬𑁄, 𑀑𑀝𑁆𑀞𑁄, 𑀲𑁄𑀢𑁆𑀣𑀺.

𑁬. 𑀲𑁂𑀲𑀸 𑀩𑁆𑀬𑀜𑁆𑀚𑀦𑀸.

𑀲𑀭𑁂 ¶ 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀓𑀸𑀤𑀬𑁄 𑀦𑀺𑀕𑁆𑀕𑀳𑀻𑀢𑀦𑁆𑀢𑀸 𑀩𑁆𑀬𑀜𑁆𑀚𑀦𑀸.

𑁭. 𑀯𑀕𑁆𑀕𑀸 𑀧𑀜𑁆𑀘𑀧𑀜𑁆𑀘𑀲𑁄 𑀫𑀦𑁆𑀢𑀸.

𑀩𑁆𑀬𑀜𑁆𑀚𑀦𑀸𑀦𑀁 ¶ 𑀓𑀸𑀤𑀬𑁄 𑀫𑀓𑀸𑀭𑀦𑁆𑀢𑀸 𑀧𑀜𑁆𑀘𑀧𑀜𑁆𑀘𑀲𑁄 𑀅𑀓𑁆𑀔𑀭𑀯𑀦𑁆𑀢𑁄 𑀯𑀕𑁆𑀕𑀸.

𑁮. 𑀯𑀕𑁆𑀕𑀸𑀦𑀁 ¶ 𑀧𑀞𑀫𑀤𑀼𑀢𑀺𑀬𑀸 𑀲𑁄 𑀘𑀸𑀖𑁄𑀲𑁄. 𑀴𑀦𑁆𑀢𑀸𑀜𑁆𑀜𑁂 𑀖𑁄𑀲𑀸. 𑀖𑁄𑀲𑀸𑀖𑁄𑀲𑀲𑀜𑁆𑀜𑀸 𑀘 ‘‘𑀧𑀭𑀲𑀫𑀜𑁆𑀜𑀸 𑀧𑀬𑁄𑀕𑁂’’𑀢𑀺 𑀲𑀗𑁆𑀕𑀳𑀻𑀢𑀸. 𑀏𑀯𑀁 𑀮𑀺𑀗𑁆𑀕, 𑀲𑀩𑁆𑀩𑀦𑀸𑀫, 𑀧𑀤, 𑀉𑀧𑀲𑀕𑁆𑀕, 𑀦𑀺𑀧𑀸𑀢, 𑀢𑀤𑁆𑀥𑀺𑀢, 𑀆𑀔𑁆𑀬𑀸𑀢, 𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑀸𑀤𑀺𑀲𑀜𑁆𑀜𑀸 𑀘.

𑁯. 𑀅𑀁𑀇𑀢𑀺 𑀦𑀺𑀕𑁆𑀕𑀳𑀻𑀢𑀁.

𑀅𑀁𑀇𑀢𑀺 ¶ 𑀅𑀓𑀸𑀭𑀢𑁄 𑀧𑀭𑀁 𑀬𑁄 𑀩𑀺𑀦𑁆𑀤𑀼 𑀲𑀽𑀬𑀢𑁂, 𑀢𑀁 𑀦𑀺𑀕𑁆𑀕𑀳𑀻𑀢𑀁 𑀦𑀸𑀫.

𑀩𑀺𑀦𑁆𑀤𑀼 ¶ 𑀘𑀽𑀴𑀸𑀫𑀡𑀸𑀓𑀸𑀭𑁄, 𑀦𑀺𑀕𑁆𑀕𑀳𑀻𑀢𑀦𑁆𑀢𑀺 𑀯𑀼𑀘𑁆𑀘𑀢𑁂.

𑀓𑁂𑀯𑀮𑀲𑁆𑀲𑀸 𑀧𑁆𑀧𑀬𑁄𑀕𑀢𑁆𑀢𑀸, 𑀅𑀓𑀸𑀭𑁄 𑀲𑀦𑁆𑀦𑀺𑀥𑀻𑀬𑀢𑁂.

𑁧𑁦. 𑀅, 𑀓𑀯𑀕𑁆𑀕, 𑀳𑀸 𑀓𑀡𑁆𑀟𑀚𑀸, 𑀇, 𑀘𑀯𑀕𑁆𑀕, 𑀬𑀸 𑀢𑀸𑀮𑀼𑀚𑀸, 𑀉, 𑀧𑀯𑀕𑁆𑀕𑀸 𑀑𑀝𑁆𑀞𑀚𑀸, 𑀝𑀯𑀕𑁆𑀕, 𑀭, 𑀴𑀸 𑀫𑀼𑀤𑁆𑀥𑀚𑀸, 𑀢𑀯𑀕𑁆𑀕, 𑀮, 𑀲𑀸 𑀤𑀦𑁆𑀢𑀚𑀸, 𑀏 𑀓𑀡𑁆𑀞𑀢𑀸𑀮𑀼𑀚𑁄, 𑀑 𑀓𑀡𑁆𑀞𑁄𑀝𑁆𑀞𑀚𑁄, 𑀯𑁄 𑀤𑀦𑁆𑀢𑁄𑀝𑁆𑀞𑀚𑁄.

𑀲𑀜𑁆𑀜𑀸

𑀲𑀭𑀲𑀦𑁆𑀥𑀺

𑁧𑁧. 𑀮𑁄𑀓 ¶ 𑀅𑀕𑁆𑀕𑁄𑀇𑀢𑁆𑀬𑀲𑁆𑀫𑀺𑀁 𑁋 ‘‘𑀧𑀼𑀩𑁆𑀩𑀫𑀥𑁄𑀞𑀺𑀢 𑀫𑀲𑁆𑀲𑀭𑀁 𑀲𑀭𑁂𑀦 𑀯𑀺𑀬𑁄𑀚𑀬𑁂’’𑀢𑀺 𑀧𑀼𑀩𑁆𑀩𑀩𑁆𑀬𑀜𑁆𑀚𑀦𑀁 𑀲𑀭𑀢𑁄 𑀧𑀼𑀣𑀓𑁆𑀓𑀸𑀢𑀩𑁆𑀩𑀁.

𑀲𑀭𑀸 𑀲𑀭𑁂 𑀮𑁄𑀧𑀁.

𑀅𑀦𑀦𑁆𑀢𑀭𑁂 𑀲𑀭𑁂 𑀧𑀭𑁂 𑀲𑀭𑀸 𑀮𑁄𑀧𑀁 𑀧𑀧𑁆𑀧𑁄𑀦𑁆𑀢𑀺.

‘‘𑀦𑀭𑁂 ¶ 𑀧𑀭𑀁 𑀬𑀼𑀢𑁆𑀢𑁂’’𑀢𑀺 𑀅𑀲𑁆𑀲𑀭𑁄 𑀩𑁆𑀬𑀜𑁆𑀚𑀦𑁄 𑀧𑀭𑀓𑁆𑀔𑀭𑀁 𑀦𑁂𑀢𑀩𑁆𑀩𑁄 𑀮𑁄𑀓𑀕𑁆𑀕𑁄.

𑀲𑀭𑁂𑀢𑁆𑀬𑀲𑁆𑀫𑀺𑀁 ¶ 𑀑𑀧𑀲𑀺𑀮𑁂𑀲𑀺𑀓𑁄 𑀓𑀸𑀲𑀲𑀢𑁆𑀢𑀫𑀻, 𑀢𑀢𑁄 𑀯𑀡𑁆𑀡𑀓𑀸𑀮𑀩𑁆𑀬𑀯𑀥𑀸𑀦𑁂 𑀓𑀸𑀭𑀺𑀬𑀁 𑀦 𑀳𑁄𑀢𑀺. 𑀬𑀣𑀸-𑀫𑀁 𑀅𑀳𑀸 𑀲𑀻𑀢𑀺, ‘‘𑀧𑀫𑀸𑀤𑀫𑀦𑀼𑀬𑀼𑀜𑁆𑀚𑀦𑁆𑀢𑀻’’𑀢𑁆𑀬𑀸𑀤𑀺𑀕𑀸𑀣𑀸𑀬𑀁 ‘𑀚𑀦𑀸 𑀅𑀧𑁆𑀧𑀫𑀸𑀤’𑀦𑁆𑀢𑀺 𑀘. 𑀏𑀯𑀁 𑀲𑀩𑁆𑀩𑀲𑀦𑁆𑀥𑀻𑀲𑀼.

𑀅𑀦𑀦𑁆𑀢𑀭𑀁 𑀧𑀭𑀲𑁆𑀲 𑀲𑀭𑀲𑁆𑀲 𑀮𑁄𑀧𑀁 𑀯𑀓𑁆𑀔𑀢𑀺, 𑀢𑀲𑁆𑀫𑀸𑀦𑁂𑀦 𑀧𑀼𑀩𑁆𑀩𑀲𑁆𑀲 𑀮𑁄𑀧𑁄 𑀜𑀸𑀬𑀢𑀺, 𑀢𑁂𑀦𑁂𑀯 𑀲𑀢𑁆𑀢𑀫𑀻𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀧𑀭𑀢𑀸𑀧𑀺 𑀕𑀫𑁆𑀬𑀢𑁂.

𑁧𑁨. 𑀲𑀭𑁂𑀢𑁆𑀬𑀥𑀺𑀓𑀸𑀭𑁄. ¶ 𑀧𑀦 𑀇𑀫𑁂 𑀧𑀦 𑀇𑀫𑁂𑀢𑀻𑀳-𑀲𑀭𑀸 𑀮𑁄𑀧𑀁 𑀇𑀢𑁆𑀯𑁂𑀯.

𑀯𑀸 𑀧𑀭𑁄 𑀅𑀲𑀭𑀽𑀧𑁄.

𑀅𑀲𑀫𑀸𑀦𑀭𑀽𑀧𑀸𑀲𑀭𑀫𑁆𑀳𑀸 𑀧𑀭𑁄 𑀲𑀭𑁄 𑀯𑀸 𑀮𑀼𑀧𑁆𑀬𑀢𑁂, 𑀧𑀦𑀫𑁂, 𑀧𑀦𑀺𑀫𑁂.

𑁧𑁩. 𑀩𑀦𑁆𑀥𑀼𑀲𑁆𑀲 ¶ 𑀇𑀯, 𑀦 𑀉𑀧𑁂𑀢𑀻𑀢𑀻𑀥 𑁋

𑀓𑁆𑀯𑀘𑀸𑀲𑀯𑀡𑁆𑀡𑀁 𑀮𑀼𑀢𑁆𑀢𑁂.

𑀲𑀭𑁂 𑀮𑀼𑀢𑁆𑀢𑁂 𑀧𑀭𑀲𑀭𑀲𑁆𑀲 𑀓𑁆𑀯𑀘𑀺 𑀅𑀲𑀯𑀡𑁆𑀡𑁄 𑀳𑁄𑀢𑀻𑀢𑀺 𑀇 𑀉 𑀇𑀘𑁆𑀘𑁂𑀢𑁂𑀲𑀁 𑀞𑀸𑀦𑀸𑀲𑀦𑁆𑀦𑀸 𑀏 𑀑. 𑀩𑀦𑁆𑀥𑀼𑀲𑁆𑀲𑁂𑀯. 𑀦𑁄𑀧𑁂𑀢𑀺.

𑁧𑁪. 𑀢𑀢𑁆𑀭 ¶ 𑀅𑀬𑀁, 𑀬𑀸𑀦𑀺 𑀇𑀥, 𑀩𑀳𑀼 𑀉𑀧𑀓𑀸𑀭𑀁, 𑀲𑀤𑁆𑀥𑀸 𑀇𑀥, 𑀢𑀣𑀸 𑀉𑀧𑀫𑀦𑁆𑀢𑁆𑀬𑁂𑀢𑀲𑁆𑀫𑀺𑀁 𑁋

𑀤𑀻𑀖𑀁.

𑀲𑀭𑁂 𑀮𑀼𑀢𑁆𑀢𑁂 𑀧𑀭𑁄 𑀲𑀭𑁄 𑀓𑁆𑀯𑀘𑀺 𑀞𑀸𑀦𑀸𑀲𑀦𑁆𑀦𑀁 𑀤𑀻𑀖𑀁 𑀬𑀸𑀢𑀺. 𑀢𑀢𑁆𑀭𑀸𑀬𑀁, 𑀬𑀸𑀦𑀻𑀥, 𑀩𑀳𑀽𑀧𑀓𑀸𑀭𑀁, 𑀲𑀤𑁆𑀥𑀻𑀥, 𑀢𑀣𑀽𑀧𑀫𑀁.

𑁧𑁫. 𑀓𑀺𑀁𑀲𑀼 𑀇𑀥𑁂𑀢𑁆𑀬𑀢𑁆𑀭 𑁋

𑀧𑀼𑀩𑁆𑀩𑁄 𑀘.

𑀲𑀭𑁂 𑀮𑀼𑀢𑁆𑀢𑁂 𑀧𑀼𑀩𑁆𑀩𑁄 𑀘 𑀓𑁆𑀯𑀘𑀺 𑀤𑀻𑀖𑀁 𑀬𑀸𑀢𑀺. 𑀓𑀺𑀁 𑀲𑀽𑀥.

𑁧𑁬. 𑀢𑁂 ¶ 𑀅𑀚𑁆𑀚, 𑀢𑁂 𑀅𑀳𑀁𑀢𑁂𑀢𑁆𑀣 𑁋

𑀬𑀫𑁂𑀤𑀦𑁆𑀢𑀲𑁆𑀲𑀸𑀤𑁂𑀲𑁄.

𑀲𑀭𑁂 𑀧𑀭𑁂 𑀅𑀦𑁆𑀢𑀲𑁆𑀲 𑀏𑀓𑀸𑀭𑀲𑁆𑀲 𑀓𑁆𑀯𑀘𑀺 𑀬𑁄 𑀆𑀤𑁂𑀲𑁄 𑀳𑁄𑀢𑀺, 𑀢𑁆𑀬𑀚𑁆𑀚, ‘‘𑀤𑀻𑀖’’𑀦𑁆𑀢𑀺 𑀩𑁆𑀬𑀜𑁆𑀚𑀦𑁂 𑀧𑀭𑁂 𑀓𑁆𑀯𑀘𑀺 𑀤𑀻𑀖𑁄, 𑀢𑁆𑀬𑀸𑀳𑀁.

𑀓𑁆𑀯𑀘𑀻𑀢𑀺 𑀓𑀺𑀁. 𑀦𑁂𑀢𑁆𑀣.

𑁧𑁭. 𑀲𑁄 ¶ 𑀅𑀲𑁆𑀲, 𑀅𑀦𑀼 𑀏𑀢𑀺𑀢𑁆𑀬𑁂𑀢𑁆𑀣 𑁋

𑀯𑀫𑁄𑀤𑀼𑀤𑀦𑁆𑀢𑀸𑀦𑀁.

𑀲𑀭𑁂 𑀧𑀭𑁂 𑀅𑀦𑁆𑀢𑁄 𑀓𑀸𑀭𑀼𑀓𑀸𑀭𑀸𑀦𑀁 𑀓𑁆𑀯𑀘𑀺 𑀯𑁄 𑀆𑀤𑁂𑀲𑁄 𑀳𑁄𑀢𑀺. 𑀲𑁆𑀯𑀲𑁆𑀲, 𑀅𑀦𑁆𑀯𑁂𑀢𑀺.

𑀓𑁆𑀯𑀘𑀻𑀢𑀺 𑀓𑀺𑀁. 𑀢𑀬𑀲𑁆𑀲𑀼, 𑀲𑀫𑁂𑀢𑀸𑀬𑀲𑁆𑀫𑀸.

𑁧𑁮. 𑀇𑀥 ¶ 𑀅𑀳𑀁 𑀢𑀻𑀥 𑁋

𑀤𑁄 𑀥𑀲𑁆𑀲 𑀘.

𑀲𑀭𑁂 𑀧𑀭𑁂 𑀥𑀲𑁆𑀲 𑀓𑁆𑀯𑀘𑀺 𑀤𑁄 𑀳𑁄𑀢𑀺. 𑀤𑀻𑀖𑁂 𑁋 𑀇𑀤𑀸𑀳𑀁. 𑀓𑁆𑀯𑀘𑀻𑀢𑀺 𑀓𑀺𑀁. 𑀇𑀥𑁂𑀯. 𑀘𑀓𑀸𑀭𑁂𑀦 𑀩𑁆𑀬𑀜𑁆𑀚𑀦𑁂𑀧𑀺, 𑀇𑀥 𑀪𑀺𑀓𑁆𑀔𑀯𑁂.

𑁧𑁯. 𑀧𑀢𑀺 𑀅𑀦𑁆𑀢𑀼𑀁, 𑀯𑀼𑀢𑁆𑀢𑀺 𑀅𑀲𑁆𑀲𑁂𑀢𑀻𑀳 𑁋

𑀇𑀯𑀡𑁆𑀡𑁄 𑀬𑀦𑁆𑀦𑀯𑀸.

𑀲𑀭𑁂 𑀧𑀭𑁂 𑀇𑀯𑀡𑁆𑀡𑀲𑁆𑀲 𑀬𑁄 𑀦𑀯𑀸 𑀳𑁄𑀢𑀺. 𑀓𑀢 𑀬𑀓𑀸𑀭𑀲𑁆𑀲 𑀢𑀺𑀲𑁆𑀲 ‘‘𑀲𑀩𑁆𑀩𑁄 𑀘𑀦𑁆𑀢𑀻’’𑀢𑀺 𑀓𑁆𑀯𑀘𑀺 𑀘𑀸𑀤𑁂𑀲𑁂 ‘‘𑀧𑀭𑀤𑁆𑀯𑁂𑀪𑀸𑀯𑁄 𑀞𑀸𑀦𑁂’’𑀢𑀺 𑀲𑀭𑀢𑁄 𑀧𑀭𑀩𑁆𑀬𑀜𑁆𑀚𑀦𑀲𑁆𑀲 𑀞𑀸𑀦𑀸𑀲𑀦𑁆𑀦𑀯𑀲𑀸 𑀤𑁆𑀯𑀺𑀢𑁆𑀢𑀁. 𑀧𑀘𑁆𑀘𑀦𑁆𑀢𑀁, 𑀯𑀼𑀢𑁆𑀬𑀲𑁆𑀲.

𑀦𑀯𑀸𑀢𑀺 𑀓𑀺𑀁. 𑀧𑀝𑀕𑁆𑀕𑀺,

𑀏𑀢𑁆𑀣 ‘‘𑀓𑁆𑀯𑀘𑀺 𑀧𑀝𑀺 𑀧𑀢𑀺𑀲𑁆𑀲𑁂’’𑀢𑀺 𑀧𑀢𑀺𑀲𑁆𑀲 𑀧𑀝𑀺, 𑀯𑀡𑁆𑀡𑀕𑁆𑀕𑀳𑀡𑀁 𑀲𑀩𑁆𑀩𑀢𑁆𑀣 𑀭𑀲𑁆𑀲𑀤𑀻𑀖 𑀲𑀗𑁆𑀕𑀳𑀡𑀢𑁆𑀣𑀁.

𑁨𑁦. 𑀬𑀣𑀸 ¶ 𑀏𑀯𑁂𑀢𑀻𑀳 𑁋

𑀏𑀯𑀸𑀤𑀺𑀲𑁆𑀲 𑀭𑀺 𑀧𑀼𑀩𑁆𑀩𑁄 𑀘 𑀭𑀲𑁆𑀲𑁄.

𑀲𑀭𑀢𑁄 𑀧𑀭𑀲𑁆𑀲 𑀏𑀯𑀲𑁆𑀲𑀸𑀤𑀺𑀏𑀓𑀸𑀭𑁄 𑀭𑀺𑀢𑁆𑀢𑀁 𑀦𑀯𑀸 𑀬𑀸𑀢𑀺. 𑀧𑀼𑀩𑁆𑀩𑁄 𑀘 𑀞𑀸𑀦𑀸𑀲𑀦𑁆𑀦𑀁 𑀭𑀲𑁆𑀲𑀁. 𑀬𑀣𑀭𑀺𑀯. 𑀬𑀣𑁂𑀯.

𑁨𑁧. 𑀦 ¶ 𑀇𑀫𑀲𑁆𑀲, 𑀢𑀺 𑀅𑀗𑁆𑀕𑀺𑀓𑀁, 𑀮𑀳𑀼 𑀏𑀲𑁆𑀲𑀢𑀺, 𑀅𑀢𑁆𑀣 𑀅𑀢𑁆𑀣𑀁, 𑀇𑀢𑁄 𑀆𑀬𑀢𑀺, 𑀢𑀲𑁆𑀫𑀸 𑀇𑀳, 𑀲𑀩𑁆𑀪𑀺 𑀏𑀯, 𑀙 𑀅𑀪𑀺𑀜𑁆𑀜𑀸, 𑀧𑀼𑀣 𑀏𑀯, 𑀧𑀸 𑀏𑀯𑀢𑀻𑀳 𑀯𑀸 𑀢𑁆𑀯𑁂𑀯 𑁋

𑀬 𑀯 𑀫 𑀤 𑀦 𑀢 𑀭 𑀴𑀸 𑀘𑀸𑀕𑀫𑀸.

𑀲𑀭𑁂 𑀧𑀭𑁂 𑀬𑀸𑀤𑀬𑁄 𑀆𑀕𑀫𑀸 𑀯𑀸 𑀳𑁄𑀦𑁆𑀢𑀺, 𑀘𑀓𑀸𑀭𑁂𑀦 𑀕𑁄 𑀘. 𑀦𑀬𑀺𑀫𑀲𑁆𑀲, 𑀢𑀺𑀯𑀗𑁆𑀕𑀺𑀓𑀁, 𑀮𑀳𑀼𑀫𑁂𑀲𑁆𑀲𑀢𑀺, 𑀅𑀢𑁆𑀢𑀤𑀢𑁆𑀣𑀁, 𑀇𑀢𑁄𑀦𑀸𑀬𑀢𑀺, 𑀢𑀲𑁆𑀫𑀸𑀢𑀺𑀳, 𑀲𑀩𑁆𑀪𑀺𑀭𑁂𑀯, 𑀙𑀴𑀪𑀺𑀜𑀸, 𑀧𑀼𑀣𑀕𑁂𑀯, ‘‘𑀭𑀲𑁆𑀲’’𑀦𑁆𑀢𑀺 𑀩𑁆𑀬𑀜𑁆𑀚𑀦𑁂 𑀧𑀭𑁂 𑀓𑁆𑀯𑀘𑀺 𑀭𑀲𑁆𑀲𑁄. 𑀧𑀕𑁂𑀯.

𑀯𑀸𑀢𑀺 𑀓𑀺𑀁. 𑀙 𑀅𑀪𑀺𑀜𑁆𑀜𑀸, 𑀧𑀼𑀣 𑀏𑀯, 𑀧𑀸 𑀏𑀯.

𑀏𑀢𑁆𑀣 ‘‘𑀲𑀭𑁂 𑀓𑁆𑀯𑀘𑀻’’𑀢𑀺 𑀲𑀭𑀸𑀦𑀁 𑀧𑀓𑀢𑀺 𑀳𑁄𑀢𑀺, 𑀲𑀲𑁆𑀲𑀭𑀽𑀧𑀫𑁂𑀯, 𑀦 𑀯𑀺𑀓𑀸𑀭𑁄𑀢𑁆𑀬𑀢𑁆𑀣𑁄.

𑁨𑁨. 𑀅𑀪𑀺 ¶ 𑀉𑀕𑁆𑀕𑀢𑁄𑀢𑁆𑀬𑀢𑁆𑀭 𑁋

‘‘𑀅𑀩𑁆𑀪𑁄 𑀅𑀪𑀻’’𑀢𑀺 𑀅𑀪𑀺𑀲𑁆𑀲 𑀅𑀩𑁆𑀪𑁄. 𑀅𑀩𑁆𑀪𑀼𑀕𑁆𑀕𑀢𑁄.

𑀲𑀭𑀲𑀦𑁆𑀥𑀺

𑀩𑁆𑀬𑀜𑁆𑀚𑀦𑀲𑀦𑁆𑀥𑀺

𑁨𑁩. 𑀩𑁆𑀬𑀜𑁆𑀚𑀦𑁂𑀢𑁆𑀬𑀥𑀺𑀓𑀸𑀭𑁄. 𑀓𑁆𑀯𑀘𑀻𑀢𑁆𑀯𑁂𑀯. 𑀲𑁄 𑀪𑀺𑀓𑁆𑀔𑀼, 𑀓𑀘𑁆𑀘𑀺 𑀦𑀼 𑀢𑁆𑀯𑀁, 𑀚𑀸𑀦𑁂𑀫 𑀢𑀦𑁆𑀢𑀻𑀳 𑁋

𑀮𑁄𑀧𑀜𑁆𑀘 𑀢𑀢𑁆𑀭𑀸𑀓𑀸𑀭𑁄.

𑀩𑁆𑀬𑀜𑁆𑀚𑀦𑁂 𑀧𑀭𑁂 𑀲𑀭𑀸𑀦𑀁 𑀓𑁆𑀯𑀘𑀺 𑀮𑁄𑀧𑁄𑀳𑁄𑀢𑀺, 𑀢𑀢𑁆𑀭 𑀮𑀼𑀢𑁆𑀢𑁂 𑀞𑀸𑀦𑁂 𑀅𑀓𑀸𑀭𑀸𑀕𑀫𑁄, 𑀘𑀓𑀸𑀭𑁂𑀦 𑀑𑀓𑀸𑀭𑀼𑀓𑀸𑀭𑀸𑀧𑀺. 𑀲𑀪𑀺𑀓𑁆𑀔𑀼 𑀓𑀘𑁆𑀘𑀺𑀦𑁄 𑀢𑁆𑀯𑀁, 𑀚𑀸𑀦𑁂𑀫𑀼 𑀢𑀁.

𑀓𑁆𑀯𑀘𑀻𑀢𑀺 𑀓𑀺𑀁, 𑀲𑁄𑀫𑀼𑀦𑀺.

𑁨𑁪. 𑀉𑀖𑁄𑀲𑁄 ¶ , 𑀆𑀔𑀸𑀢𑀦𑁆𑀢𑀻𑀳 𑁋 𑀤𑁆𑀯𑁂𑀪𑀸𑀯𑁂 𑀞𑀸𑀦𑁂 𑀇𑀢𑁆𑀯𑁂𑀯.

𑀯𑀕𑁆𑀕𑁂 𑀖𑁄𑀲𑀸𑀖𑁄𑀲𑀸𑀦𑀁 𑀢𑀢𑀺𑀬𑀧𑀞𑀫𑀸.

𑀯𑀕𑁆𑀕𑁂 𑀖𑁄𑀲𑀸𑀖𑁄𑀲𑀸𑀦𑀁 𑀘𑀢𑀼𑀢𑁆𑀣𑀤𑀼𑀢𑀺𑀬𑀸𑀦𑀁 𑀢𑀩𑁆𑀩𑀕𑁆𑀕𑁂 𑀢𑀢𑀺𑀬𑀧𑀞𑀫𑀸 𑀳𑁄𑀦𑁆𑀢𑀺 𑀬𑀣𑀸𑀲𑀗𑁆𑀔𑁆𑀬𑀁 𑀬𑀼𑀢𑁆𑀢𑁂 𑀞𑀸𑀦𑁂, 𑀉𑀕𑁆𑀖𑁄𑀲𑁄, 𑀭𑀲𑁆𑀲𑁂 𑀅𑀓𑁆𑀔𑀸𑀢𑀁.

𑁨𑁫. 𑀧𑀭 ¶ 𑀲𑀳𑀲𑁆𑀲𑀁, 𑀅𑀢𑀺𑀧𑁆𑀧𑀔𑁄𑀢𑀻𑀳 𑁋 ‘‘𑀓𑁆𑀯𑀘𑀺 𑀑 𑀩𑁆𑀬𑀜𑁆𑀚𑀦𑁂’’𑀢𑀺 𑀑𑀓𑀸𑀭𑀸𑀕𑀫𑁄. 𑀧𑀭𑁄𑀲𑀳𑀲𑁆𑀲𑀁. 𑀕𑀸𑀕𑀫𑁂 𑀘, 𑀅𑀢𑀺𑀧𑁆𑀧𑀕𑁄𑀔𑁄.

𑁨𑁬. 𑀅𑀯 𑀦𑀤𑁆𑀥𑀸𑀢𑁆𑀬𑀢𑁆𑀭 𑁋 ‘‘𑀑 𑀅𑀯𑀲𑁆𑀲𑁂’’𑀢𑀺 𑀓𑁆𑀯𑀘𑀺 𑀅𑀯𑀲𑁆𑀲 𑀑. 𑀑𑀦𑀤𑁆𑀥𑀸.

𑀓𑁆𑀯𑀘𑀻𑀢𑀺 𑀓𑀺𑀁. 𑀅𑀯𑀲𑀼𑀲𑁆𑀲𑀢𑀼.

𑀩𑁆𑀬𑀜𑁆𑀚𑀦𑀲𑀦𑁆𑀥𑀺.

𑀦𑀺𑀕𑁆𑀕𑀳𑀻𑀢𑀲𑀦𑁆𑀥𑀺

𑁨𑁭. 𑀦𑀺𑀕𑁆𑀕𑀳𑀻𑀢𑀦𑁆𑀢𑁆𑀬𑀥𑀺𑀓𑀸𑀭𑁄 ¶ . 𑀓𑀺𑀁 𑀓𑀢𑁄, 𑀲𑀁 𑀚𑀸𑀢𑁄, 𑀲𑀁 𑀞𑀺𑀢𑁄, 𑀢𑀁 𑀥𑀦𑀁, 𑀢𑀁 𑀫𑀺𑀢𑁆𑀢𑀦𑁆𑀢𑀺𑀳 𑁋

𑀯𑀕𑁆𑀕𑀦𑁆𑀢𑀁 𑀯𑀸 𑀯𑀕𑁆𑀕𑁂.

𑀯𑀕𑁆𑀕𑀩𑁆𑀬𑀜𑁆𑀚𑀦𑁂 𑀧𑀭𑁂 𑀩𑀺𑀦𑁆𑀤𑀼𑀲𑁆𑀲 𑀢𑀩𑁆𑀩𑀕𑁆𑀕𑀦𑁆𑀢𑁄 𑀯𑀸 𑀳𑁄𑀢𑀺. 𑀓𑀺𑀗𑁆𑀓𑀢𑁄, 𑀲𑀜𑁆𑀚𑀸𑀢𑁄, 𑀲𑀡𑁆𑀞𑀺𑀢𑁄, 𑀢𑀦𑁆𑀥𑀦𑀁, 𑀢𑀫𑁆𑀫𑀺𑀢𑁆𑀢𑀁.

𑀯𑀸𑀢𑀺 𑀓𑀺𑀁. 𑀦 𑀢𑀁 𑀓𑀫𑁆𑀫𑀁.

𑀯𑀸𑀓𑀸𑀭𑁂𑀦𑁂𑀯 𑀮𑁂 𑀮𑁄 𑀘. 𑀧𑀼𑀮𑁆𑀮𑀺𑀗𑁆𑀕𑀁.

𑁨𑁮. 𑀯𑀸𑀢𑁆𑀬𑀥𑀺𑀓𑀸𑀭𑁄 ¶ . 𑀏𑀯𑀁 𑀅𑀲𑁆𑀲, 𑀏𑀢𑀁 𑀅𑀯𑁄𑀘𑁂𑀢𑀻𑀳 𑁋

𑀫𑀤𑀸 𑀲𑀭𑁂.

𑀲𑀭𑁂 𑀧𑀭𑁂 𑀩𑀺𑀦𑁆𑀤𑀼𑀦𑁄 𑀫 𑀤𑀸 𑀯𑀸 𑀳𑁄𑀦𑁆𑀢𑀺. 𑀏𑀯𑀫𑀲𑁆𑀲, 𑀏𑀢𑀤𑀯𑁄𑀘.

𑀯𑀸𑀢𑀺 𑀓𑀺𑀁. 𑀫𑀁 𑀅𑀚𑀺𑀦𑀺.

𑁨𑁯. 𑀢𑀁 𑀏𑀯, 𑀢𑀁 𑀳𑀻𑀢𑀻𑀳 𑁋

𑀏𑀳𑁂𑀜𑀁.

𑀏𑀓𑀸𑀭𑁂, 𑀳𑁂 𑀘 𑀧𑀭𑁂 𑀩𑀺𑀦𑁆𑀤𑀼𑀦𑁄 𑀜𑁄 𑀯𑀸 𑀳𑁄𑀢𑀺. 𑀤𑁆𑀯𑀺𑀢𑁆𑀢𑁂 𑁋 𑀢𑀜𑁆𑀜𑁂𑀯, 𑀢𑀫𑁂𑀯. 𑀢𑀜𑁆𑀳𑀺, 𑀢𑀁 𑀳𑀺.

𑁩𑁦. 𑀲𑀁𑀬𑁄𑀕𑁄𑀢𑀻𑀳 𑁋

𑀲𑀬𑁂 𑀘.

𑀬𑀓𑀸𑀭𑁂 𑀧𑀭𑁂 𑀢𑁂𑀦 𑀲𑀳 𑀩𑀺𑀦𑁆𑀤𑀼𑀦𑁄 𑀜𑁄 𑀯𑀸 𑀳𑁄𑀢𑀺. 𑀤𑁆𑀯𑀺𑀢𑁆𑀢𑁂 𑁋 𑀲𑀜𑁆𑀜𑁄𑀕𑁄, 𑀲𑀁𑀬𑁄𑀕𑁄.

𑁩𑁧. 𑀘𑀓𑁆𑀔𑀼 𑀅𑀦𑀺𑀘𑁆𑀘𑀁, 𑀅𑀯 𑀲𑀺𑀭𑁄𑀢𑀻𑀳 - 𑀆𑀕𑀫𑁄, 𑀓𑁆𑀯𑀘𑀺𑀢𑁆𑀯𑁂𑀯.

𑀦𑀺𑀕𑁆𑀕𑀳𑀻𑀢𑀜𑁆𑀘.

𑀲𑀭𑁂, 𑀩𑁆𑀬𑀜𑁆𑀚𑀦𑁂 𑀯𑀸 𑀧𑀭𑁂 𑀓𑁆𑀯𑀘𑀺 𑀩𑀺𑀦𑁆𑀤𑁆𑀯𑀸𑀕𑀫𑁄 𑀳𑁄𑀢𑀺. 𑀘𑀓𑁆𑀔𑀼𑀁𑀅𑀦𑀺𑀘𑁆𑀘𑀁, 𑀅𑀯𑀁𑀲𑀺𑀭𑁄.

𑁩𑁨. 𑀯𑀺𑀤𑀽𑀦𑀁 ¶ 𑀅𑀕𑁆𑀕𑀁, 𑀢𑀸𑀲𑀁 𑀅𑀳𑀁𑀢𑀻𑀳 𑁋

‘‘𑀓𑁆𑀯𑀘𑀺 𑀮𑁄𑀧𑀁’’𑀢𑀺 𑀲𑀭𑁂 𑀩𑀺𑀦𑁆𑀤𑀼𑀮𑁄𑀧𑁄, 𑀯𑀺𑀤𑀽𑀦𑀕𑁆𑀕𑀁. 𑀤𑀻𑀖𑁂𑀢𑀸𑀲𑀸𑀳𑀁.

𑁩𑁩. 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁, 𑀲𑀁 𑀭𑀸𑀕𑁄𑀢𑀻𑀳 𑁋

‘‘𑀩𑁆𑀬𑀜𑁆𑀚𑀦𑁂 𑀘𑁂’’𑀢𑀺 𑀩𑀺𑀦𑁆𑀤𑀼𑀮𑁄𑀧𑁄, 𑀩𑀼𑀤𑁆𑀥𑀸𑀦𑀲𑀸𑀲𑀦𑀁. 𑀤𑀻𑀖𑁂𑀲𑀸𑀭𑀸𑀕𑁄.

𑁩𑁪. 𑀩𑀻𑀚𑀁 𑀇𑀯𑁂𑀢𑀻𑀳 𑁋

𑀧𑀭𑁄 𑀯𑀸 𑀲𑀭𑁄.

𑀩𑀺𑀦𑁆𑀤𑀼𑀢𑁄 𑀧𑀭𑁄 𑀲𑀭𑁄 𑀯𑀸 𑀮𑀼𑀧𑁆𑀬𑀢𑁂, 𑀩𑀻𑀚𑀁𑀯.

𑁩𑁫. 𑀏𑀯𑀁 𑀅𑀲𑁆𑀲𑁂𑀢𑀻𑀳 𑁋

𑀩𑁆𑀬𑀜𑁆𑀚𑀦𑁄 𑀘 𑀯𑀺𑀲𑀜𑁆𑀜𑁄𑀕𑁄.

𑀩𑀺𑀦𑁆𑀤𑀼𑀢𑁄 𑀧𑀭𑁂 𑀲𑀭𑁂 𑀮𑀼𑀢𑁆𑀢𑁂 𑀲𑀁𑀬𑁄𑀕𑁄 𑀩𑁆𑀬𑀜𑁆𑀚𑀦𑁄 𑀯𑀺𑀦𑀝𑁆𑀞𑀲𑀁𑀬𑁄𑀕𑁄 𑀳𑁄𑀢𑀻𑀢𑀺 𑀧𑀼𑀩𑁆𑀩𑀲𑀮𑁄𑀧𑁄. 𑀏𑀯𑀁𑀲.

𑀦𑀺𑀕𑁆𑀕𑀳𑀻𑀢𑀲𑀦𑁆𑀥𑀺.

𑀯𑁄𑀫𑀺𑀲𑁆𑀲𑀓 𑀲𑀦𑁆𑀥𑀻

𑁩𑁬. 𑀅𑀦𑀼𑀧𑀤𑀺𑀝𑁆𑀞𑀸𑀦𑀁 𑀯𑀼𑀢𑁆𑀢𑀬𑁄𑀕𑀢𑁄.

𑀇𑀥𑀸𑀦𑀺𑀤𑁆𑀤𑀺𑀝𑁆𑀞𑀸 ¶ 𑀲𑀦𑁆𑀥𑀬𑁄 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀜𑁂 𑀬𑁆𑀬𑀸, 𑀬𑀣𑀸 𑁋 𑀬𑀤𑀺 𑀏𑀯𑀁, 𑀩𑁄𑀥𑀺 𑀅𑀗𑁆𑀕𑀸𑀢𑀻𑀳 𑁋 𑀬𑀸𑀤𑁂𑀲𑁂 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀤𑀬𑀓𑀸𑀭𑀲𑀁𑀬𑁄𑀕𑀲𑁆𑀲 𑀚𑁄, 𑀥𑀬𑀓𑀸𑀭𑀲𑀁𑀬𑁄𑀕𑀲𑁆𑀲 𑀛𑁄, 𑀤𑁆𑀯𑀺𑀢𑁆𑀢𑁂 𑁋 𑀬𑀚𑁆𑀚𑁂𑀯𑀁, 𑀩𑁄𑀚𑁆𑀛𑀗𑁆𑀕𑀸.

𑁩𑁭. 𑀅𑀲𑀤𑀺𑀲𑀲𑀁𑀬𑁄𑀕𑁂 ¶ 𑀏𑀓𑀲𑀭𑀽𑀧𑀢𑀸 𑀘.

𑀧𑀭𑀺 𑀏𑀲𑀦𑀸𑀢𑀻𑀳 𑁋 𑀬𑀸𑀤𑁂𑀲𑁂 𑀭𑀓𑀸𑀭𑀲𑁆𑀲 𑀬𑁄, 𑀧𑀬𑁆𑀬𑁂𑀲 𑀦𑀸.

𑁩𑁮. 𑀯𑀡𑁆𑀡𑀸𑀦𑀁 ¶ 𑀩𑀳𑀼𑀢𑁆𑀢𑀁, 𑀯𑀺𑀧𑀭𑀻𑀢𑀢𑀸 𑀘.

𑀲𑀭𑀢𑀺, 𑀇𑀢𑀺 𑀏𑀯, 𑀲𑀸 𑀇𑀢𑁆𑀣𑀻, 𑀩𑀼𑀲𑀁 𑀏𑀯, 𑀩𑀳𑀼 𑀆𑀩𑀸𑀥𑁄, 𑀅𑀥𑀺 𑀅𑀪𑀯𑀺, 𑀲𑀼𑀔𑀁, 𑀤𑀼𑀓𑁆𑀔𑀁, 𑀚𑀻𑀯𑁄𑀢𑀻𑀳 𑁋

𑀫𑀸𑀕𑀫𑁄 𑀲𑀓𑀸𑀭𑁂 𑀅𑀓𑀸𑀭𑀲𑁆𑀲 𑀉 𑀘, 𑀲𑀼𑀫𑀭𑀢𑀺.

𑀇𑀲𑁆𑀲 𑀯𑁄, 𑀇𑀢𑁆𑀯𑁂𑀯.

𑀧𑀭𑀮𑁄𑀧𑁂 𑀆𑀓𑀸𑀭𑀲𑁆𑀲 𑀑, 𑀲𑁄𑀢𑁆𑀣𑀻.

𑀫𑀸𑀤𑁂𑀲𑁂 ¶ , 𑀧𑀼𑀩𑁆𑀩𑀤𑀻𑀖𑁂 𑀘 𑀏𑀓𑀸𑀭𑀲𑁆𑀲 𑀇. 𑀩𑀼𑀲𑀸𑀫𑀺𑀯.

𑀯𑀸𑀤𑁂𑀲𑁂 𑀳𑀯𑀓𑀸𑀭𑀯𑀺𑀧𑀭𑀺𑀬𑀬𑁄. 𑀩𑀳𑁆𑀯𑀸𑀩𑀸𑀥𑁄.

𑀅𑀥𑀺𑀲𑁆𑀲 𑀓𑁆𑀯𑀘𑀺 𑀅𑀤𑁆𑀥𑁄, 𑀤𑀻𑀖𑁂-𑀅𑀤𑁆𑀥𑀸𑀪𑀯𑀺.

𑀩𑀺𑀦𑁆𑀤𑀼𑀦𑁄, 𑀑𑀓𑀸𑀭𑀲𑁆𑀲 𑀘 𑀏. 𑀲𑀼𑀔𑁂, 𑀤𑀼𑀓𑁆𑀔𑁂, 𑀚𑀻𑀯𑁂.

𑁩𑁯. 𑀭𑀤𑀸𑀦𑀁 ¶ 𑀴𑁄, 𑀧𑀝𑀺𑀩𑁄𑀥𑁄, 𑀧𑀭𑀺𑀴𑀸𑀳𑁄.

𑁪𑁦. 𑀲𑀭𑁂, 𑀩𑁆𑀬𑀜𑁆𑀚𑀦𑁂 𑀯𑀸 𑀧𑀭𑁂 𑀩𑀺𑀦𑁆𑀤𑀼𑀦𑁄 𑀓𑁆𑀯𑀘𑀺 𑀫𑁄. 𑀫𑀫 𑀅𑀪𑀸𑀲𑀺, 𑀩𑀼𑀤𑁆𑀥𑀫 𑀲𑀭𑀡𑀁, 𑀧𑀼𑀩𑁆𑀩𑁂 𑀫𑁄 𑀧𑀭𑀁 𑀦 𑀦𑁂𑀢𑀩𑁆𑀩𑁄 𑀅𑀬𑀼𑀢𑁆𑀢𑀢𑁆𑀢𑀸.

𑁪𑁧. 𑀩𑀺𑀦𑁆𑀤𑀼𑀢𑁄 𑀧𑀭𑀲𑀭𑀸𑀦 𑀫𑀜𑁆𑀜𑀲𑁆𑀲𑀭𑀢𑀸𑀧𑀺.

𑀢𑀁 𑀇𑀫𑀺𑀦𑀸, 𑀏𑀯𑀁 𑀇𑀫𑀁, 𑀓𑀺𑀁 𑀅𑀳𑀁 𑀢𑀻𑀳-𑀇𑀲𑁆𑀲 𑀅. 𑀢𑀤𑀫𑀺𑀦𑀸.

𑀇𑀲𑁆𑀲 𑀉, 𑀅𑀓𑀸𑀭𑀲𑁆𑀲 𑀘 𑀏, 𑀩𑀺𑀦𑁆𑀤𑀼𑀮𑁄𑀧𑀸𑀤𑁄. 𑀏𑀯𑀼𑀫𑀁, 𑀓𑁂𑀳𑀁.

𑁪𑁨. 𑀯𑀸𑀓𑁆𑀬𑀲𑀼𑀔𑀼𑀘𑁆𑀘𑀸𑀭𑀡𑀢𑁆𑀣𑀁, 𑀙𑀦𑁆𑀤𑀳𑀸𑀦𑀺𑀢𑁆𑀣𑀜𑁆𑀘 𑀯𑀡𑁆𑀡𑀮𑁄𑀧𑁄𑀧𑀺.

𑀧𑀝𑀺𑀲𑀗𑁆𑀔𑀸𑀬 𑀬𑁄𑀦𑀺𑀲𑁄𑀢𑀻𑀳 𑁋 𑀧𑀼𑀩𑁆𑀩𑀬𑀮𑁄𑀧𑁄, 𑀧𑀝𑀺𑀲𑀗𑁆𑀔𑀸𑀬𑁄𑀦𑀺𑀲𑁄.

𑁪𑁩. 𑀅𑀮𑀸𑀩𑀽𑀦𑀺𑀢𑁆𑀬𑀸𑀤𑁄 ¶ 𑀅𑀓𑀸𑀭𑀮𑁄𑀧𑁄. 𑀮𑀸𑀩𑀽𑀦𑀺 𑀲𑀻𑀤𑀦𑁆𑀢𑀺, 𑀲𑀺𑀮𑀸 𑀧𑁆𑀮𑀯𑀦𑁆𑀢𑀺.

𑁪𑁪. 𑀯𑀼𑀢𑁆𑀬𑀪𑁂𑀤𑀸𑀬 𑀯𑀺𑀓𑀸𑀭𑁄𑀧𑀺.

𑀅𑀓𑀭𑀫𑁆𑀳𑀲𑁂 𑀢𑁂𑀢𑁆𑀬𑀸𑀤𑁄 𑀲𑀓𑀸𑀭𑁂 𑀕𑀭𑀼𑀦𑁄 𑀏𑀓𑀸𑀭𑀲𑁆𑀲 𑀇𑀫𑀺𑀦𑀸 𑀮𑀳𑀼𑀅𑀓𑀸𑀭𑁄, 𑀅𑀓𑀭𑀫𑁆𑀳𑀲 𑀢𑁂 𑀓𑀺𑀘𑁆𑀘𑀁.

𑁪𑁫. 𑀅𑀓𑁆𑀔𑀭𑀦𑀺𑀬𑀫𑁄 ¶ 𑀙𑀦𑁆𑀤𑀁, 𑀕𑀭𑀼𑀮𑀳𑀼𑀦𑀺𑀬𑀫𑁄 𑀪𑀯𑁂 𑀯𑀼𑀢𑁆𑀢𑀺,

𑀤𑀻𑀖𑁄, 𑀲𑀁𑀬𑁄𑀕𑀸𑀤𑀺𑀧𑀼𑀩𑁆𑀩𑁄 𑀭𑀲𑁆𑀲𑁄 𑀘 𑀕𑀭𑀼, 𑀮𑀳𑀼 𑀢𑀼 𑀭𑀲𑁆𑀲𑁄. 𑀬𑀣𑀸- 𑀆, 𑀅𑀲𑁆𑀲, 𑀅𑀁, 𑀅.

𑁪𑁬.

𑀏𑀯𑀫𑀜𑁆𑀜𑀸𑀧𑀺 ¶ 𑀯𑀺𑀜𑁆𑀜𑁂𑀬𑁆𑀬𑀸, 𑀲𑀁𑀳𑀺𑀢𑀸 𑀢𑀦𑁆𑀢𑀺𑀬𑀸 𑀳𑀺𑀢𑀸;

𑀲𑀁𑀳𑀺𑀢𑀸𑀢𑀺 𑀘 𑀯𑀡𑁆𑀡𑀸𑀦𑀁, 𑀲𑀦𑁆𑀦𑀺𑀥𑀩𑁆𑀬𑀯𑀥𑀸𑀦𑀢𑁄.

𑀯𑁄𑀫𑀺𑀲𑁆𑀲𑀓𑀲𑀦𑁆𑀥𑀺.

𑁨. 𑀦𑀸𑀫𑀓𑀡𑁆𑀟

𑀧𑀼𑀮𑁆𑀮𑀺𑀗𑁆𑀕

𑁪𑁭. ‘‘𑀚𑀺𑀦𑀯𑀘𑀦𑀬𑀼𑀢𑁆𑀢𑀁 ¶ 𑀳𑀻’’𑀢𑀺 𑀲𑀩𑁆𑀩𑀢𑁆𑀣𑀸𑀥𑀺𑀓𑀸𑀭𑁄.

𑀮𑀺𑀗𑁆𑀕𑀜𑁆𑀘 𑀦𑀺𑀧𑀘𑁆𑀘𑀢𑁂.

𑀥𑀸𑀢𑀼𑀧𑁆𑀧𑀘𑁆𑀘𑀬𑀯𑀺𑀪𑀢𑁆𑀢𑀺𑀯𑀚𑁆𑀚𑀺𑀢𑀫𑀢𑁆𑀣𑀬𑀼𑀢𑁆𑀢𑀁 𑀲𑀤𑁆𑀤𑀭𑀽𑀧𑀁 𑀮𑀺𑀗𑁆𑀕𑀁 𑀦𑀸𑀫, 𑀚𑀺𑀦𑀯𑀘𑀦𑀬𑁄𑀕𑁆𑀕𑀁 𑀮𑀺𑀗𑁆𑀕𑀁 𑀇𑀥 𑀞𑀧𑀻𑀬𑀢𑀺 𑀦𑀺𑀧𑁆𑀨𑀸𑀤𑀻𑀬𑀢𑀺 𑀘.

𑁪𑁮. 𑀩𑀼𑀤𑁆𑀥𑀇𑀢𑀺 ¶ 𑀞𑀺𑀢𑁂 𑁋

𑀢𑀢𑁄 𑀘 𑀯𑀺𑀪𑀢𑁆𑀢𑀺𑀬𑁄.

𑀢𑀲𑁆𑀫𑀸 𑀮𑀺𑀗𑁆𑀕𑀸 𑀧𑀭𑀸 𑀯𑀺𑀪𑀢𑁆𑀢𑀺𑀬𑁄 𑀳𑁄𑀦𑁆𑀢𑀺. 𑀘𑀓𑀸𑀭𑁂𑀦 𑀢𑀸𑀲𑀁 𑀏𑀓𑀯𑀘𑀦𑀸𑀤𑀺𑀧𑀞𑀫𑀸𑀤𑀺𑀲𑀜𑁆𑀜𑀸 𑀘.

‘‘𑀲𑀺 𑀬𑁄 𑀅𑀁 𑀬𑁄 𑀦𑀸 𑀳𑀺 𑀲 𑀦𑀁 𑀲𑁆𑀫𑀸 𑀳𑀺 𑀲 𑀦𑀁 𑀲𑁆𑀫𑀺𑀁 𑀲𑀽’’ 𑀢𑀺 𑀯𑀺𑀪𑀢𑁆𑀢𑀺𑀬𑁄. 𑀲𑀺 𑀬𑁄 𑀇𑀢𑀺 𑀧𑀞𑀫𑀸, 𑀅𑀁 𑀬𑁄 𑀇𑀢𑀺 𑀤𑀼𑀢𑀺𑀬𑀸, 𑀦𑀸 𑀳𑀺 𑀇𑀢𑀺 𑀢𑀢𑀺𑀬𑀸, 𑀲 𑀦𑀁 𑀇𑀢𑀺 𑀘𑀢𑀼𑀢𑁆𑀣𑀻, 𑀲𑁆𑀫𑀸 𑀳𑀺 𑀇𑀢𑀺 𑀧𑀜𑁆𑀘𑀫𑀻, 𑀲 𑀦𑀁 𑀇𑀢𑀺 𑀙𑀝𑁆𑀞𑀻, 𑀲𑁆𑀫𑀺𑀁 𑀲𑀼 𑀇𑀢𑀺 𑀲𑀢𑁆𑀢𑀫𑀻.

𑀮𑀺𑀗𑁆𑀕𑀢𑁆𑀣𑁂 𑀧𑀞𑀫𑀸.

𑀬𑁄 ¶ 𑀓𑀫𑁆𑀫𑀓𑀢𑁆𑀢𑀸𑀤𑀺𑀯𑀢𑁆𑀢𑀦𑁆𑀢𑀭𑀫𑀧𑁆𑀧𑀢𑁆𑀢𑁄 𑀲𑀲𑁆𑀲𑀭𑀽𑀧𑀝𑁆𑀞𑁄 𑀲𑀼𑀤𑁆𑀥𑁄, 𑀲𑁄 𑀮𑀺𑀗𑁆𑀕𑀢𑁆𑀣𑁄 𑀦𑀸𑀫, 𑀢𑀲𑁆𑀲𑀸𑀪𑀺𑀥𑀸𑀦𑀫𑀢𑁆𑀢𑁂 𑀧𑀞𑀫𑀸𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀢𑀲𑁆𑀲𑀸𑀧𑀦𑀺𑀬𑀫𑁂 𑀏𑀓𑀫𑁆𑀳𑀺 𑀯𑀢𑁆𑀢𑀩𑁆𑀩𑁂 𑀏𑀓𑀯𑀘𑀦𑀁 𑀲𑀺, 𑀯𑀼𑀘𑁆𑀘𑀢𑁂 𑀦𑁂𑀦𑁂𑀢𑀺𑀯𑀘𑀦𑀁, 𑀏𑀓𑀲𑁆𑀲𑀢𑁆𑀣𑀲𑁆𑀲 𑀯𑀘𑀦𑀁 𑀏𑀓𑀯𑀘𑀦𑀁. 𑀏𑀯𑀁 𑀩𑀳𑀼𑀯𑀘𑀦𑀁.

𑀅𑀢𑁄𑀢𑁆𑀯𑁂𑀯.

𑀲𑁄.

𑀅𑀓𑀸𑀭𑀦𑁆𑀢𑀸 ¶ 𑀧𑀭𑀲𑁆𑀲 𑀲𑀺𑀲𑁆𑀲 𑀑 𑀳𑁄𑀢𑀺.

𑀲𑀭𑀮𑁄𑀧𑁄 𑀫𑀸𑀤𑁂𑀲𑀧𑁆𑀧𑀘𑁆𑀘𑀬𑀸𑀤𑀺𑀫𑁆𑀳𑀺 𑀲𑀭𑀮𑁄𑀧𑁂 𑀢𑀼 𑀧𑀓𑀢𑀺.

𑀅𑀁𑀆𑀤𑀻𑀲𑀼 𑀧𑀭𑁂𑀲𑀼 𑀲𑀭𑀲𑁆𑀲 𑀮𑁄𑀧𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀓𑀢𑁂 𑀢𑀼 𑀓𑁆𑀯𑀘𑀸𑀤𑀺𑀦𑀸 𑀅𑀲𑀯𑀡𑁆𑀡𑁂 𑀧𑀢𑁆𑀢𑁂 𑀧𑀓𑀢𑀺 𑀳𑁄𑀢𑀺.

𑀦𑀬𑁂 ¶ 𑀧𑀭𑀁 𑀬𑀼𑀢𑁆𑀢𑁂. 𑀏𑀯𑀫𑀼𑀧𑀭𑀺 𑀲𑀭𑀮𑁄𑀧𑀸𑀤𑀺. 𑀩𑀼𑀤𑁆𑀥𑁄.

𑀩𑀳𑀼𑀫𑁆𑀳𑀺 𑀯𑀢𑁆𑀢𑀩𑁆𑀩𑁂 𑀩𑀳𑀼𑀯𑀘𑀦𑀁 𑀬𑁄.

𑀅𑀢𑁄 𑀯𑀸𑀢𑁆𑀯𑁂𑀯.

𑀲𑀩𑁆𑀩𑀬𑁄𑀦𑀻𑀦𑀫𑀸𑀏.

𑀅𑀓𑀸𑀭𑀦𑁆𑀢𑀸 𑀧𑀭𑁂𑀲𑀁 𑀧𑀞𑀫𑀤𑀼𑀢𑀺𑀬𑀸𑀬𑁄𑀦𑀻𑀦𑀁 𑀬𑀣𑀸𑀲𑀗𑁆𑀔𑁆𑀬𑀁 𑀆𑀏 𑀯𑀸 𑀳𑁄𑀦𑁆𑀢𑀺. 𑀩𑀼𑀤𑁆𑀥𑀸.

𑀯𑀸𑀢𑀺 𑀓𑀺𑀁. 𑀅𑀕𑁆𑀕𑀬𑁄.

𑁪𑁯. 𑀮𑀺𑀗𑁆𑀕𑀢𑁆𑀣𑁂 ¶ 𑀧𑀞𑀫𑀸𑀢𑁆𑀯𑁂𑀯.

𑀆𑀮𑀧𑀦𑁂 𑀘.

𑀅𑀪𑀺𑀫𑀼𑀔𑀻𑀓𑀭𑀡𑀫𑀸𑀮𑀧𑀦𑀁, 𑀢𑀤𑀥𑀺𑀓𑁂 𑀮𑀺𑀗𑁆𑀕𑀢𑁆𑀣𑁂 𑀧𑀞𑀫𑀸 𑀳𑁄𑀢𑀺.

‘‘𑀆𑀮𑀧𑀦𑁂 𑀲𑀺 𑀕𑀲𑀜𑁆𑀜𑁄’’𑀢𑀺 𑀲𑀺𑀲𑁆𑀲 𑀕𑀲𑀜𑁆𑀜𑀸. 𑀕𑁂𑀇𑀢𑁆𑀯𑁂𑀯.

𑀅𑀓𑀸𑀭𑀸 𑀧𑀺𑀢𑀸𑀤𑁆𑀬𑀦𑁆𑀢𑀸𑀦𑀫𑀸.

𑀕𑁂 𑀧𑀭𑁂 𑀅𑀓𑀸𑀭𑁄 𑀧𑀺𑀢𑀼𑀲𑀢𑁆𑀣𑀼𑀅𑀢𑁆𑀢𑀭𑀸𑀚𑀸𑀤𑀻𑀦𑀫𑀦𑁆𑀢𑁄 𑀘 𑀆𑀢𑁆𑀢𑀁 𑀬𑀸𑀢𑀺.

‘‘𑀆𑀓𑀸𑀭𑁄 𑀯𑀸’’𑀢𑀺 𑀕𑁂 𑀧𑀭𑁂 𑀆𑀓𑀸𑀭𑀲𑁆𑀲 𑀭𑀲𑁆𑀲𑁄 𑀯𑀸.

𑀲𑁂𑀲𑀢𑁄 𑀮𑁄𑀧𑀁 𑀕𑀲𑀻𑀧𑀺.

𑀲𑁄 𑀲𑀺𑀁 𑀲𑁆𑀬𑀸 𑀘 𑀲𑀔𑀸𑀢𑁄 𑀕𑀲𑁆𑀲𑁂𑀯𑀸𑀢𑁆𑀬𑀸𑀤𑀺𑀦𑀺𑀤𑁆𑀤𑀺𑀝𑁆𑀞𑁂𑀳𑀜𑁆𑀜𑁂 𑀅𑀯𑀡𑁆𑀡𑀺𑀯𑀡𑁆𑀡𑀼𑀯𑀡𑁆𑀡𑁄𑀓𑀸𑀭𑀦𑁆𑀢𑀸 𑀲𑁂𑀲𑀸, 𑀢𑁂𑀳𑀺 𑀧𑀭𑁂 𑀕𑀲𑀻 𑀮𑀼𑀧𑁆𑀬𑀦𑁆𑀢𑁂. 𑀳𑁂 - 𑀩𑀼𑀤𑁆𑀥, 𑀩𑀼𑀤𑁆𑀥𑀸. 𑀬𑁄 - 𑀩𑀼𑀤𑁆𑀥𑀸.

𑁫𑁦. 𑀓𑀫𑁆𑀫𑀢𑁆𑀣𑁂 𑀤𑀼𑀢𑀺𑀬𑀸.

𑀬𑀁 ¶ 𑀓𑀭𑁄𑀢𑀺, 𑀢𑀁 𑀓𑀫𑁆𑀫𑀁 𑀦𑀸𑀫. 𑀢𑀢𑁆𑀣 𑀤𑀼𑀢𑀺𑀬𑀸 𑀳𑁄𑀢𑀺. 𑀅𑀁𑀩𑀼𑀤𑁆𑀥𑀁. 𑀬𑁄𑀲𑁆𑀲 𑀏-𑀩𑀼𑀤𑁆𑀥𑁂.

𑁫𑁧. 𑀢𑀢𑀺𑀬𑀸𑀢𑁆𑀯𑁂𑀯.

𑀓𑀢𑁆𑀢𑀭𑀺 𑀘.

𑀬𑁄 𑀓𑀭𑁄𑀢𑀺, 𑀲 𑀓𑀢𑁆𑀢𑀸 𑀦𑀸𑀫. 𑀢𑀢𑁆𑀣 𑀢𑀢𑀺𑀬𑀸 𑀳𑁄𑀢𑀺. 𑀦𑀸.

𑀅𑀢𑁄 𑀦𑁂𑀦.

𑀅𑀓𑀸𑀭𑀸 𑀧𑀭𑁄 𑀦𑀸 𑀏𑀦𑀁 𑀬𑀸𑀢𑀺. 𑀩𑀼𑀤𑁆𑀥𑁂𑀦.

𑀳𑀺.

𑀲𑀼𑀳𑀺𑀲𑁆𑀯𑀓𑀸𑀭𑁄 𑀏.

𑀲𑀼𑀳𑀺𑀲𑀼 ¶ 𑀧𑀭𑁂𑀲𑁆𑀯𑀓𑀸𑀭𑀲𑁆𑀲 𑀏 𑀳𑁄𑀢𑀺.

𑀲𑁆𑀫𑀸𑀳𑀺𑀲𑁆𑀫𑀺𑀦𑁆𑀦𑀁 𑀫𑁆𑀳𑀸𑀪𑀺𑀫𑁆𑀳𑀺 𑀯𑀸.

𑀲𑀩𑁆𑀩𑀲𑀤𑁆𑀤𑁂𑀳𑀺 𑀧𑀭𑁂𑀲𑀁 𑀲𑁆𑀫𑀸𑀳𑀺𑀲𑁆𑀫𑀺𑀦𑁆𑀦𑀁 𑀬𑀣𑀸𑀲𑀗𑁆𑀔𑁆𑀬𑀁 𑀫𑁆𑀳𑀸𑀪𑀺𑀫𑁆𑀳𑀺𑀇𑀘𑁆𑀘𑁂𑀢𑁂 𑀯𑀸 𑀳𑁄𑀦𑁆𑀢𑀺. 𑀩𑀼𑀤𑁆𑀥𑁂𑀪𑀺, 𑀩𑀼𑀤𑁆𑀥𑁂𑀳𑀺.

𑁫𑁨. 𑀓𑀭𑀡𑁂 𑀢𑀢𑀺𑀬𑀸.

𑀬𑁂𑀦 ¶ 𑀯𑀸 𑀓𑀬𑀺𑀭𑀢𑁂, 𑀢𑀁 𑀓𑀭𑀡𑀁 𑀦𑀸𑀫. 𑀢𑀢𑁆𑀣 𑀢𑀢𑀺𑀬𑀸 𑀳𑁄𑀢𑀺. 𑀲𑀩𑁆𑀩𑀁 𑀓𑀢𑁆𑀢𑀼𑀲𑀫𑀁.

𑁫𑁩. 𑀲𑀫𑁆𑀧𑀤𑀸𑀦𑁂 𑀘𑀢𑀼𑀢𑁆𑀣𑀻.

𑀬𑀲𑁆𑀲 𑀤𑀸𑀢𑀼𑀓𑀸𑀫𑁄 𑀭𑁄𑀘𑀢𑁂, 𑀥𑀸𑀭𑀬𑀢𑁂 𑀯𑀸, 𑀢𑀁 𑀲𑀫𑁆𑀧𑀤𑀸𑀦𑀁 𑀦𑀸𑀫. 𑀢𑀢𑁆𑀣 𑀘𑀢𑀼𑀢𑁆𑀣𑀻 𑀳𑁄𑀢𑀺. 𑀲.

𑀅𑀢𑁄 𑀯𑀸𑀢𑁆𑀯𑁂𑀯.

𑀆𑀬 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀢𑀼.

𑀅𑀓𑀸𑀭𑀸 𑀧𑀭𑀲𑁆𑀲 𑀘𑀢𑀼𑀢𑁆𑀣𑁂𑀓𑀯𑀘𑀦𑀲𑁆𑀲 𑀆𑀬𑁄 𑀯𑀸 𑀳𑁄𑀢𑀺. 𑀩𑀼𑀤𑁆𑀥𑀸𑀬.

‘‘𑀲𑀸𑀕𑀫𑁄 ¶ 𑀲𑁂’’𑀢𑀺 𑀲𑁂 𑀲𑀓𑀸𑀭𑀸𑀕𑀫𑁄. 𑀩𑀼𑀤𑁆𑀥𑀲𑁆𑀲. 𑀦𑀁.

𑀤𑀻𑀖𑀦𑁆𑀢𑁆𑀯𑁂𑀯.

𑀲𑀼𑀦𑀁𑀳𑀺𑀲𑀼 𑀘.

𑀲𑀼𑀦𑀁𑀳𑀺𑀲𑀼 𑀧𑀭𑁂𑀲𑀼 𑀲𑀭𑀸𑀤𑀻𑀦𑀁 𑀤𑀻𑀖𑁄 𑀳𑁄𑀢𑀺. 𑀘𑀲𑀤𑁆𑀤𑁂𑀦 𑀓𑁆𑀯𑀘𑀺 𑀦. 𑀩𑀼𑀤𑁆𑀥𑀸𑀦𑀁.

𑁫𑁪. 𑀅𑀧𑀸𑀤𑀸𑀦𑁂 𑀧𑀜𑁆𑀘𑀫𑀻.

𑀬𑀲𑁆𑀫𑀸𑀤𑀧𑁂𑀢𑀺, 𑀪𑀬𑀫𑀸𑀤𑀢𑁆𑀢𑁂 𑀯𑀸, 𑀢𑀤𑀧𑀸𑀤𑀸𑀦𑀁 𑀦𑀸𑀫, 𑀢𑀢𑁆𑀣 𑀧𑀜𑁆𑀘𑀫𑀻 𑀳𑁄𑀢𑀺. 𑀲𑁆𑀫𑀸.

𑀅𑀢𑁄 𑀆𑀏𑀢𑁆𑀯𑁂𑀯.

𑁫𑁫. 𑀲𑁆𑀫𑀸𑀲𑁆𑀫𑀺𑀦𑁆𑀦𑀁 𑀯𑀸.

𑀅𑀓𑀸𑀭𑀸 𑀧𑀭𑁂𑀲𑀁 𑀲𑁆𑀫𑀸𑀲𑁆𑀫𑀺𑀦𑁆𑀦𑀁 𑀆𑀏 𑀯𑀸 𑀳𑁄𑀦𑁆𑀢𑀺. 𑀩𑀼𑀤𑁆𑀥𑀸, 𑀩𑀼𑀤𑁆𑀥𑀫𑁆𑀳𑀸, 𑀩𑀼𑀤𑁆𑀥𑀲𑁆𑀫𑀸. 𑀩𑀼𑀤𑁆𑀥𑁂𑀪𑀺, 𑀩𑀼𑀤𑁆𑀥𑁂𑀳𑀺.

𑁫𑁬. 𑀲𑀸𑀫𑀺𑀲𑁆𑀫𑀺𑀁 𑀙𑀝𑁆𑀞𑀻.

𑀬𑀲𑁆𑀲 ¶ 𑀯𑀸 𑀧𑀭𑀺𑀕𑁆𑀕𑀳𑁄, 𑀢𑀁 𑀲𑀸𑀫𑀻 𑀦𑀸𑀫. 𑀢𑀢𑁆𑀣 𑀙𑀝𑁆𑀞𑀻 𑀳𑁄𑀢𑀺. 𑀩𑀼𑀤𑁆𑀥𑀲𑁆𑀲. 𑀩𑀼𑀤𑁆𑀥𑀸𑀦𑀁.

𑁫𑁭. 𑀑𑀓𑀸𑀲𑁂 𑀲𑀢𑁆𑀢𑀫𑀻.

𑀬𑁄𑀥𑀸𑀭𑁄, 𑀢𑀫𑁄𑀓𑀸𑀲𑀁 𑀦𑀸𑀫. 𑀢𑀢𑁆𑀣 𑀲𑀢𑁆𑀢𑀫𑀻 𑀳𑁄𑀢𑀺. 𑀲𑁆𑀫𑀺𑀁-𑀩𑀼𑀤𑁆𑀥𑁂, 𑀩𑀼𑀤𑁆𑀥𑀫𑁆𑀳𑀺, 𑀩𑀼𑀤𑁆𑀥𑀲𑁆𑀫𑀺𑀁. 𑀲𑀼-𑀩𑀼𑀤𑁆𑀥𑁂𑀲𑀼.

𑁫𑁮.

𑀩𑀼𑀤𑁆𑀥𑁄 𑀩𑀼𑀤𑁆𑀥 𑀲𑀼𑀔𑀁 𑀤𑀤𑀸𑀢𑀺 𑀲𑀭𑀢𑁄 𑀩𑀼𑀤𑁆𑀥𑀁 𑀢𑀢𑁄 𑀤𑀼𑀓𑁆𑀓𑀭𑀁,

𑀓𑀺𑀁 𑀩𑀼𑀤𑁆𑀥𑁂𑀦 𑀫𑀳𑀺𑀤𑁆𑀥𑀬𑁄𑀧𑀺 𑀫𑀼𑀦𑀬𑁄 𑀩𑀼𑀤𑁆𑀥𑁂𑀦 𑀚𑀸𑀢𑀸𑀲𑀼𑀔𑀻;

𑀩𑀼𑀤𑁆𑀥𑀲𑁆𑀲𑁂𑀯 𑀫𑀦𑀁 𑀤𑀤𑁂 𑀧𑀤𑀫𑀳𑀁 𑀩𑀼𑀤𑁆𑀥𑀸 𑀮𑀪𑁂𑀬𑁆𑀬𑀸𑀘𑁆𑀘𑀼𑀢𑀁,

𑀩𑀼𑀤𑁆𑀥𑀲𑁆𑀲𑀺𑀤𑁆𑀥𑀺 𑀦 𑀓𑀺𑀁 𑀓𑀭𑁂 𑀪𑀯𑀪𑀯𑁂 𑀪𑀢𑁆𑀢𑁆𑀬𑀢𑁆𑀣𑀼 𑀩𑀼𑀤𑁆𑀥𑁂 𑀫𑀫.

𑁫𑁯. 𑀇𑀢𑁄 ¶ 𑀧𑀭𑀁 𑀢𑀢𑀺𑀬𑀸𑀧𑀜𑁆𑀘𑀫𑀻𑀦𑀜𑁆𑀘 𑀘𑀢𑀼𑀢𑁆𑀣𑀻𑀙𑀝𑁆𑀞𑀻𑀦𑀜𑁆𑀘 𑀲𑀭𑀽𑀧𑀢𑁆𑀢𑀸 𑀧𑀜𑁆𑀘𑀫𑀻𑀙𑀝𑁆𑀞𑀺𑀬𑁄 𑀪𑀻𑀬𑁄 𑀉𑀧𑁂𑀓𑁆𑀔𑀦𑁆𑀢𑁂.

𑁬𑁦. 𑀅𑀢𑁆𑀢, 𑀲𑀺.

𑀩𑁆𑀭𑀳𑁆𑀫𑀢𑁆𑀢𑀲𑀔𑀭𑀸𑀚𑀸𑀤𑀺𑀢𑁄 𑀢𑁆𑀯𑁂𑀯.

𑀲𑁆𑀬𑀸 𑀘.

𑀩𑁆𑀭𑀳𑁆𑀫𑀸𑀤𑀺𑀢𑁄 𑀲𑀺𑀲𑁆𑀲 𑀆 𑀳𑁄𑀢𑀺. 𑀅𑀢𑁆𑀢𑀸.

‘‘𑀬𑁄𑀦𑀫𑀸𑀦𑁄’’𑀢𑀺 𑀩𑁆𑀭𑀳𑁆𑀫𑀸𑀤𑀺𑀢𑁄 𑀬𑁄𑀦𑀁 𑀆𑀦𑁄𑀢𑁆𑀢𑀁. 𑀅𑀢𑁆𑀢𑀸𑀦𑁄.

𑁬𑁧. 𑀳𑁂 - 𑀅𑀢𑁆𑀢, 𑀅𑀢𑁆𑀢𑀸. 𑀬𑁄, 𑀅𑀢𑁆𑀢𑀸𑀦𑁄.

𑁬𑁨. ‘‘𑀩𑁆𑀭𑀳𑁆𑀫𑀢𑁆𑀢𑀲𑀔𑀭𑀸𑀚𑀸𑀤𑀺𑀢𑁄 ¶ 𑀅𑀫𑀸𑀦’’𑀦𑁆𑀢𑀺 𑀩𑁆𑀭𑀳𑁆𑀫𑀸𑀤𑀺𑀢𑁄 𑀅𑀁𑀯𑀘𑀦𑀲𑁆𑀲 𑀆𑀦𑀁 𑀯𑀸 𑀳𑁄𑀢𑀺. 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀁. 𑀅𑀢𑁆𑀢𑀸𑀦𑁄.

𑁬𑁩. 𑀅𑀢𑁆𑀢𑁂𑀦, 𑀅𑀢𑁆𑀢𑀦𑀸. 𑀧𑀓𑁆𑀔𑁂-𑀚𑀺𑀦𑀯𑀘𑀦𑀸𑀦𑀼𑀭𑁄𑀥𑁂𑀦 𑀏𑀦𑀸𑀪𑀸𑀯𑁄.

‘‘𑀅𑀢𑁆𑀢𑀸𑀦𑁆𑀢𑁄 ¶ 𑀳𑀺𑀲𑁆𑀫𑀺𑀫𑀦𑀢𑁆𑀢𑀁’’𑀢𑀺 𑀳𑀺𑀫𑁆𑀳𑀺 𑀅𑀢𑁆𑀢𑀦𑁆𑀢𑀲𑁆𑀲 𑀅𑀦𑁄. 𑀅𑀢𑁆𑀢𑀦𑁂𑀳𑀺. 𑀏𑀯𑀁 𑀓𑀭𑀡𑁂.

𑁬𑁪. ‘‘𑀲𑀲𑁆𑀲 𑀦𑁄’’𑀢𑀺 𑀦𑁄𑀓𑀸𑀭𑁄. 𑀅𑀢𑁆𑀢𑀦𑁄. 𑀅𑀢𑁆𑀢𑀸𑀦𑀁.

𑁬𑁫. 𑀅𑀫𑁆𑀳𑀢𑀼𑀫𑁆𑀳𑀦𑁆𑀢𑀼 𑀭𑀸𑀚𑀩𑁆𑀭𑀳𑁆𑀫𑀢𑁆𑀢𑀲𑀔 𑀲𑀢𑁆𑀣𑀼𑀧𑀺𑀢𑀸𑀤𑀻𑀳𑀺 𑀲𑁆𑀫𑀸 𑀦𑀸𑀯.

𑀅𑀫𑁆𑀳𑀸𑀤𑀺𑀢𑁄 𑀲𑁆𑀫𑀸 𑀦𑀸 𑀇𑀯 𑀳𑁄𑀢𑀺. 𑀅𑀢𑁆𑀢𑀦𑀸.

𑁬𑁬. ‘‘𑀢𑀢𑁄 𑀲𑁆𑀫𑀺𑀦𑁆𑀦𑀻’’𑀢𑀺 𑀲𑁆𑀫𑀺𑀦𑁄 𑀦𑀺. 𑀅𑀢𑁆𑀢𑀦𑀺. ‘‘𑀅𑀦𑀢𑁆𑀢’’𑀦𑁆𑀢𑀺 𑀪𑀸𑀯𑀦𑀺𑀤𑁆𑀤𑁂𑀲𑁂𑀦 𑀲𑀼𑀫𑁆𑀳𑀺 𑀘 𑀅𑀦𑁄. 𑀅𑀢𑁆𑀢𑀦𑁂𑀲𑀼.

𑁬𑁭. 𑀭𑀸𑀚𑀸 ¶ 𑀅𑀢𑁆𑀢𑀸𑀯. 𑀦𑀸.

𑀲𑀯𑀺𑀪𑀢𑁆𑀢𑀺𑀲𑁆𑀲 𑀭𑀸𑀚𑀲𑁆𑀲𑁂𑀢𑁆𑀯𑁂𑀯.

𑀦𑀸𑀫𑁆𑀳𑀺 𑀭𑀜𑁆𑀜𑀸 𑀯𑀸.

𑀦𑀸𑀫𑁆𑀳𑀺 𑀲𑀯𑀺𑀪𑀢𑁆𑀢𑀺𑀲𑁆𑀲 𑀭𑀸𑀚𑀲𑀤𑁆𑀤𑀲𑁆𑀲 𑀭𑀜𑁆𑀜𑀸 𑀯𑀸 𑀳𑁄𑀢𑀺. 𑀭𑀜𑁆𑀜𑀸, 𑀭𑀸𑀚𑁂𑀦.

𑀭𑀸𑀚𑀲𑁆𑀲 𑀭𑀸𑀚𑀼 𑀲𑀼𑀦𑀁𑀳𑀺𑀲𑀼 𑀘.

𑀲𑀼𑀦𑀁 𑀳𑀺𑀲𑀼 𑀧𑀭𑁂𑀲𑀼 𑀭𑀸𑀚𑀲𑁆𑀲 𑀭𑀸𑀚𑀼 𑀳𑁄𑀢𑀺, 𑀘𑀓𑀸𑀭𑁂𑀦 𑀓𑁆𑀯𑀘𑀺 𑀦.

‘‘𑀲𑀼𑀦𑀁𑀳𑀺𑀲𑀼 ¶ 𑀘𑁂𑀢𑀺’’ 𑀤𑀻𑀖𑁂 - 𑀭𑀸𑀚𑀽𑀪𑀺, 𑀭𑀸𑀚𑀽𑀳𑀺, 𑀭𑀸𑀚𑁂𑀪𑀺, 𑀭𑀸𑀚𑁂𑀳𑀺.

𑁬𑁮. 𑀲𑀯𑀺𑀪𑀢𑁆𑀢𑀺𑀲𑁆𑀲𑁂𑀢𑁆𑀬𑀥𑀺𑀓𑀸𑀭𑁄.

‘‘𑀭𑀸𑀚𑀲𑁆𑀲 𑀭𑀜𑁆𑀜𑁄 𑀭𑀸𑀚𑀺𑀦𑁄 𑀲𑁂’’𑀢𑀺 𑀲𑁂 𑀭𑀜𑁆𑀜𑁄 𑀭𑀸𑀚𑀺𑀦𑁄 𑀳𑁄𑀦𑁆𑀢𑀺. 𑀭𑀜𑁆𑀜𑁄, 𑀭𑀸𑀚𑀺𑀦𑁄.

‘‘𑀭𑀜𑁆𑀜𑀁 𑀦𑀫𑁆𑀳𑀺 𑀯𑀸’’𑀢𑀺 𑀦𑀫𑁆𑀳𑀺 𑀭𑀜𑁆𑀜𑀁 𑀯𑀸. 𑀭𑀜𑁆𑀜𑀁, 𑀭𑀸𑀚𑀽𑀦𑀁, 𑀭𑀸𑀚𑀸𑀦𑀁.

𑁬𑁯. 𑀲𑁆𑀫𑀸𑀲𑁆𑀲𑀦𑀸𑀢𑀼𑀮𑁆𑀬𑀢𑁆𑀢𑀸-𑀦𑀸𑀫𑁆𑀳𑀺 ¶ 𑀭𑀜𑁆𑀜𑀸 𑀯𑀸. 𑀭𑀜𑁆𑀜𑀸, 𑀭𑀸𑀚𑀫𑁆𑀳𑀸, 𑀭𑀸𑀚𑀲𑁆𑀫𑀸.

𑁭𑁦. ‘‘𑀲𑁆𑀫𑀺𑀫𑁆𑀳𑀺 𑀭𑀜𑁆𑀜𑁂 𑀭𑀸𑀚𑀺𑀦𑀻’’𑀢𑀺 𑀲𑁆𑀫𑀺𑀫𑁆𑀳𑀺 𑀭𑀜𑁆𑀜𑁂 𑀭𑀸𑀚𑀺𑀦𑀺 𑀳𑁄𑀦𑁆𑀢𑀺. 𑀭𑀜𑁆𑀜𑁂, 𑀭𑀸𑀚𑀺𑀦𑀺. 𑀭𑀸𑀚𑀽𑀲𑀼, 𑀭𑀸𑀚𑁂𑀲𑀼.

𑁭𑁧. 𑀕𑀼𑀡𑀯𑀦𑁆𑀢𑀼, 𑀲𑀺.

𑀲𑀯𑀺𑀪𑀢𑁆𑀢𑀺𑀲𑁆𑀲 𑀦𑁆𑀢𑀼𑀲𑁆𑀲𑁂𑀢𑁆𑀯𑁂𑀯.

‘‘𑀆 𑀲𑀺𑀫𑁆𑀳𑀻’’𑀢𑀺 𑀲𑀺𑀫𑁆𑀳𑀺 𑀲𑀯𑀺𑀪𑀢𑁆𑀢𑀺𑀲𑁆𑀲 𑀦𑁆𑀢𑀼𑀲𑁆𑀲 𑀆. 𑀕𑀼𑀡𑀯𑀸.

𑀬𑁄𑀫𑁆𑀳𑀺 𑀧𑀞𑀫𑁂𑀢𑁆𑀯𑁂𑀯.

𑀦𑁆𑀢𑀼𑀲𑁆𑀲 𑀦𑁆𑀢𑁄.

𑀧𑀞𑀫𑁂 𑀬𑁄𑀫𑁆𑀳𑀺 𑀲𑀯𑀺𑀪𑀢𑁆𑀢𑀺𑀲𑁆𑀲 𑀦𑁆𑀢𑀼𑀲𑁆𑀲 𑀦𑁆𑀢𑁄𑀓𑀸𑀭𑁄 𑀳𑁄𑀢𑀺. 𑀕𑀼𑀡𑀯𑀦𑁆𑀢𑁄.

𑀲𑀼𑀦𑀁𑀳𑀺𑀲𑀼 𑀅𑀢𑁆𑀢𑀁𑀢𑁆𑀯𑁂𑀯.

𑀦𑁆𑀢𑀼𑀲𑁆𑀲𑀦𑁆𑀢𑁄 𑀬𑁄𑀲𑀼 𑀘.

𑀲𑀼𑀦𑀁𑀳𑀺𑀲𑀼, 𑀬𑁄𑀲𑀼, 𑀘𑀓𑀸𑀭𑁂𑀦 𑀅𑀜𑁆𑀜𑁂𑀲𑀼𑀧𑀺 𑀧𑀭𑁂𑀲𑀼 𑀦𑁆𑀢𑀼𑀲𑁆𑀲𑀦𑁆𑀢𑁄 𑀅𑀢𑁆𑀢𑀁 𑀬𑀸𑀢𑀺. 𑀕𑀼𑀡𑀯𑀦𑁆𑀢𑀸.

𑁭𑁨. 𑀲𑀯𑀺𑀪𑀢𑁆𑀢𑀺𑀲𑁆𑀲𑁂𑀢𑁆𑀬𑀥𑀺𑀓𑀸𑀭𑁄 ¶ . 𑀅𑀁𑀇𑀢𑁆𑀯𑁂𑀯.

𑀅𑀯𑀡𑁆𑀡𑁄 𑀘 𑀕𑁂.

𑀕𑁂 𑀧𑀭𑁂 𑀲𑀯𑀺𑀪𑀢𑁆𑀢𑀺𑀲𑁆𑀲 𑀦𑁆𑀢𑀼𑀲𑁆𑀲 𑀅𑀁𑀅𑀆 𑀳𑁄𑀦𑁆𑀢𑀺. 𑀳𑁂𑀕𑀼𑀡𑀯𑀁,𑀕𑀼𑀡𑀯, 𑀕𑀼𑀡𑀯𑀸. 𑀬𑁄 - 𑀕𑀼𑀡𑀯𑀦𑁆𑀢𑁄, 𑀕𑀼𑀡𑀯𑀦𑁆𑀢𑀸.

𑁭𑁩. 𑀅𑀢𑁆𑀢𑀁 𑁋 𑀕𑀼𑀡𑀯𑀦𑁆𑀢𑀁. 𑀕𑀼𑀡𑀯𑀦𑁆𑀢𑁂.

𑁭𑁪. ‘‘𑀢𑁄𑀢𑀺𑀢𑀸 ¶ 𑀲𑀲𑁆𑀫𑀺𑀁 𑀦𑀸𑀲𑁆𑀯𑀻’’𑀢𑀺 𑀲𑀯𑀺𑀪𑀢𑁆𑀢𑀺𑀲𑁆𑀲 𑀦𑁆𑀢𑀼𑀲𑁆𑀲 𑀦𑀸𑀫𑁆𑀳𑀺 𑀢𑀸, 𑀲𑁂 𑀢𑁄𑀓𑀸𑀭𑁄, 𑀲𑁆𑀫𑀺𑀫𑁆𑀳𑀺 𑀢𑀺 𑀘 𑀯𑀸. 𑀕𑀼𑀡𑀯𑀢𑀸, 𑀕𑀼𑀡𑀯𑀦𑁆𑀢𑁂𑀦. 𑀕𑀼𑀡𑀯𑀦𑁆𑀢𑁂𑀪𑀺, 𑀕𑀼𑀡𑀯𑀦𑁆𑀢𑁂𑀳𑀺.

𑁭𑁫. 𑀕𑀼𑀡𑀯𑀢𑁄, 𑀕𑀼𑀡𑀯𑀦𑁆𑀢𑀲𑁆𑀲.

‘‘𑀦𑀫𑁆𑀳𑀺 𑀢𑀁 𑀯𑀸’’𑀢𑀺 𑀦𑀫𑁆𑀳𑀺 𑀦𑁆𑀢𑀼𑀲𑁆𑀲 𑀢𑀁 𑀯𑀸. 𑀕𑀼𑀡𑀯𑀢𑀁, 𑀕𑀼𑀡𑀯𑀦𑁆𑀢𑀸𑀦𑀁. 𑀲𑁆𑀫𑀸 𑀦𑀸𑀯.

𑁭𑁬. 𑀕𑀼𑀡𑀯𑀢𑀺, 𑀕𑀼𑀡𑀯𑀦𑁆𑀢𑁂, 𑀕𑀼𑀡𑀯𑀦𑁆𑀢𑀫𑁆𑀳𑀺, 𑀕𑀼𑀡𑀯𑀦𑁆𑀢𑀲𑁆𑀫𑀺𑀁, 𑀕𑀼𑀡𑀯𑀦𑁆𑀢𑁂𑀲𑀼.

𑁭𑁭. 𑀕𑀘𑁆𑀙𑀦𑁆𑀢, 𑀲𑀺.

‘‘𑀲𑀺𑀫𑁆𑀳𑀺 𑀕𑀘𑁆𑀙𑀦𑁆𑀢𑀸𑀤𑀻𑀦𑀁 𑀦𑁆𑀢𑀲𑀤𑁆𑀤𑁄 𑀅’’𑀦𑁆𑀢𑀺 𑀦𑁆𑀢𑀲𑀤𑁆𑀤𑀲𑁆𑀲 𑀅𑀁𑀯𑀸, 𑀲𑀺𑀮𑁄𑀧𑁄. 𑀕𑀘𑁆𑀙𑀁, 𑀲𑀺𑀲𑁆𑀲 𑀑 𑁋 𑀕𑀘𑁆𑀙𑀦𑁆𑀢𑁄.

𑀕𑀘𑁆𑀙𑀦𑁆𑀢𑀸𑀤𑀻𑀦𑀁 𑀦𑁆𑀢𑀲𑀤𑁆𑀤𑁄𑀢𑁆𑀯𑁂𑀯.

𑀲𑁂𑀲𑁂𑀲𑀼𑀦𑁆𑀢𑀼𑀯.

𑀯𑀼𑀢𑁆𑀢𑀁 𑀳𑀺𑀢𑁆𑀯𑀸 𑀲𑁂𑀲𑁂𑀲𑀼 𑀕𑀘𑁆𑀙𑀦𑁆𑀢𑀸𑀤𑀻𑀦𑀁 𑀦𑁆𑀢𑀲𑀤𑁆𑀤𑁄 𑀦𑁆𑀢𑀼 𑀇𑀯 𑀤𑀝𑁆𑀞𑀩𑁆𑀩𑁄. 𑀕𑀘𑁆𑀙𑀦𑁆𑀢𑁄, 𑀕𑀘𑁆𑀙𑀦𑁆𑀢𑀸𑀇𑀘𑁆𑀘𑀸𑀤𑀺.

𑀲𑁂𑀲𑀁 𑀕𑀼𑀡𑀯𑀦𑁆𑀢𑀼𑀲𑀫𑀁.

𑁭𑁮. 𑀕𑀘𑁆𑀙𑀦𑁆𑀢𑀸𑀤𑀬𑁄 ¶ 𑀦𑀸𑀫 𑀅𑀦𑁆𑀢𑀧𑁆𑀧𑀘𑁆𑀘𑀬𑀦𑁆𑀢𑀸.

𑁭𑁯. 𑀅𑀕𑁆𑀕𑀺, 𑀲𑀺𑀮𑁄𑀧𑁄.

‘‘𑀇𑀯𑀡𑁆𑀡𑀼𑀯𑀡𑁆𑀡𑀸 𑀛𑀮𑀸’’𑀢𑀺 𑀇𑀯𑀡𑁆𑀡𑀼𑀯𑀡𑁆𑀡𑀸𑀦𑀁 𑀬𑀣𑀸𑀲𑀗𑁆𑀔𑁆𑀬𑀁 𑀛𑀮𑀲𑀜𑁆𑀜𑀸.

𑀛𑀮𑀢𑁄 𑀯𑀸𑀢𑁆𑀯𑁂𑀯.

𑀖𑀧𑀢𑁄 𑀘 𑀬𑁄𑀦𑀁 𑀮𑁄𑀧𑁄.

𑀖𑀧𑀛𑀮𑀢𑁄 𑀬𑁄𑀦𑀁 𑀮𑁄𑀧𑁄 𑀯𑀸 𑀳𑁄𑀢𑀺.

𑀬𑁄𑀲𑀼 𑀓𑀢𑀦𑀺𑀓𑀸𑀭𑀮𑁄𑀧𑁂𑀲𑀼 𑀤𑀻𑀖𑀁.

𑀓𑀢𑁄 𑀦𑀺𑀓𑀸𑀭𑁄 𑀮𑁄𑀧𑁄 𑀘 𑀬𑁂𑀲𑀁 𑀢𑁂𑀲𑀼 𑀬𑁄𑀲𑀼 𑀲𑀭𑀸𑀦𑀁 𑀤𑀻𑀖𑁄 𑀳𑁄𑀢𑀺. 𑀅𑀕𑁆𑀕𑀻. 𑀧𑀓𑁆𑀔𑁂-𑀅𑀢𑁆𑀢𑀦𑁆𑀢𑁆𑀯𑁂𑀯.

𑀬𑁄 𑀲𑁆𑀯𑀓𑀢𑀭𑀲𑁆𑀲𑁄 𑀛𑁄.

𑀬𑁄𑀲𑀼 𑀅𑀓𑀢𑀭𑀲𑁆𑀲𑁄 𑀛𑁄 𑀅𑀢𑁆𑀢𑀁 𑀬𑀸𑀢𑀺. 𑀅𑀕𑁆𑀕𑀬𑁄. 𑀢𑀣𑀸𑀮𑀧𑀦𑁂.

𑁮𑁦. 𑀅𑀁 𑀫𑁄 𑀦𑀺𑀕𑁆𑀕𑀳𑀻𑀢𑀁 𑀛𑀮𑀧𑁂𑀳𑀺.

𑀛𑀮𑀧𑀢𑁄 𑀅𑀁 𑀫𑁄 𑀘 𑀩𑀺𑀦𑁆𑀤𑀼𑀁 𑀬𑀦𑁆𑀢𑀺. 𑀅𑀕𑁆𑀕𑀺𑀁. 𑀅𑀕𑁆𑀕𑀻, 𑀅𑀕𑁆𑀕𑀬𑁄.

𑁮𑁧. 𑀅𑀕𑁆𑀕𑀺𑀦𑀸. 𑀤𑀻𑀖𑁂-𑀅𑀕𑁆𑀕𑀻𑀪𑀺, 𑀅𑀕𑁆𑀕𑀻𑀳𑀺.

𑁮𑁨. ‘‘𑀛𑀮𑀢𑁄 𑀲𑀲𑁆𑀲 𑀦𑁄 𑀯𑀸’’𑀢𑀺 𑀲𑀲𑁆𑀲 𑀦𑁄𑀢𑁆𑀢𑀁 𑀯𑀸. 𑀅𑀕𑁆𑀕𑀺𑀦𑁄, 𑀅𑀕𑁆𑀕𑀺𑀲𑁆𑀲. 𑀅𑀕𑁆𑀕𑀻𑀦𑀁.

𑁮𑁩. ‘‘𑀛𑀮𑀢𑁄 𑀘𑁂’’𑀢𑀺 𑀲𑁆𑀫𑀸𑀲𑁆𑀲 𑀦𑀸. 𑀅𑀕𑁆𑀕𑀺𑀦𑀸.

𑁮𑁪. 𑀅𑀕𑁆𑀕𑀺𑀫𑁆𑀳𑀺, 𑀅𑀕𑁆𑀕𑀺𑀲𑁆𑀫𑀺𑀁. 𑀅𑀕𑁆𑀕𑀻𑀲𑀼.

𑁮𑁫. 𑀆𑀤𑀺 𑀅𑀕𑁆𑀕𑀻𑀯. 𑀲𑁆𑀫𑀺𑀁𑀦𑁄 𑀧𑀦 ‘‘𑀆𑀤𑀺𑀢𑁄 𑀑 𑀘𑁂’’𑀢𑀺 𑀅𑀁, 𑀑 𑀘 𑀯𑀸. 𑀆𑀤𑀺, 𑀆𑀤𑁄, 𑀆𑀤𑀺𑀫𑁆𑀳𑀺, 𑀆𑀤𑀺𑀲𑁆𑀫𑀺𑀁. 𑀆𑀤𑀻𑀲𑀼.

𑁮𑁬. 𑀤𑀡𑁆𑀟𑀻 ¶ , 𑀲𑀺.

‘‘𑀅𑀖𑁄 𑀭𑀲𑁆𑀲’’𑀫𑀸𑀤𑀺𑀦𑀸 𑀭𑀲𑁆𑀲𑁂 𑀲𑀫𑁆𑀧𑀢𑁆𑀢𑁂 ‘‘𑀦 𑀲𑀺𑀲𑁆𑀫𑀺𑀫𑀦𑀧𑀼𑀁𑀲𑀓𑀸𑀦𑀻’’𑀢𑀺 𑀲𑀺𑀫𑁆𑀳𑀺 𑀅𑀦𑀧𑀼𑀁𑀲𑀓𑀸𑀦𑀁 𑀦 𑀭𑀲𑁆𑀲𑁄. 𑀲𑀺𑀮𑁄𑀧𑁄, 𑀤𑀡𑁆𑀟𑀻, 𑀬𑁄𑀮𑁄𑀧𑁂 𑁋 𑀤𑀡𑁆𑀟𑀻. 𑀧𑀓𑁆𑀔𑁂 𑁋

𑀅𑀖𑁄 𑀭𑀲𑁆𑀲𑀫𑁂𑀓𑀯𑀘𑀦𑀬𑁄𑀲𑁆𑀯𑀧𑀺 𑀘.

𑀏𑀓𑀯𑀘𑀦𑀬𑁄𑀲𑀼 𑀛𑀮𑀧𑀸 𑀭𑀲𑁆𑀲𑀁 𑀬𑀦𑁆𑀢𑀺.

𑀛𑀢𑁄 𑀓𑀢𑀭𑀲𑁆𑀲𑀸𑀢𑁆𑀯𑁂𑀯.

𑀬𑁄𑀦𑀁 𑀦𑁄.

𑀓𑀢𑀲𑁆𑀲𑀸 𑀛𑀢𑁄 𑀬𑁄𑀦𑀁 𑀦𑁄𑀢𑁆𑀢𑀁 𑀳𑁄𑀢𑀺. 𑀤𑀡𑁆𑀟𑀺𑀦𑁄.

𑁮𑁭. ‘‘𑀛𑀮𑀧𑀸 𑀭𑀲𑁆𑀲’’𑀦𑁆𑀢𑀺 𑀕𑁂 𑀧𑀭𑁂 𑀛𑀮𑀧𑀸𑀦𑀁 𑀭𑀲𑁆𑀲𑁄. 𑀳𑁂𑀤𑀡𑁆𑀟𑀺. 𑀤𑀡𑁆𑀟𑀻, 𑀤𑀡𑁆𑀟𑀺𑀦𑁄.

𑁮𑁮. 𑀯𑀸 ¶ 𑀅𑀁𑀇𑀢𑁆𑀯𑁂𑀯.

‘‘𑀦𑀁 𑀛𑀢𑁄 𑀓𑀢𑀭𑀲𑁆𑀲𑀸’’𑀢𑀺 𑀅𑀁𑀇𑀘𑁆𑀘𑀲𑁆𑀲 𑀦𑀁 𑀯𑀸. 𑀤𑀡𑁆𑀟𑀺𑀦𑀁, 𑀤𑀡𑁆𑀟𑀺𑀁. 𑀤𑀡𑁆𑀟𑀻, 𑀤𑀡𑁆𑀟𑀺𑀦𑁄.

𑁮𑁯. 𑀤𑀡𑁆𑀟𑀺𑀦𑀸. 𑀤𑀡𑁆𑀟𑀻𑀪𑀺, 𑀤𑀡𑁆𑀟𑀻𑀳𑀺.

𑁯𑁦. 𑀤𑀡𑁆𑀟𑀺𑀦𑁄, 𑀤𑀡𑁆𑀟𑀺𑀲𑁆𑀲. 𑀤𑀡𑁆𑀟𑀻𑀦𑀁.

𑁯𑁧. 𑀛𑀢𑁄 𑀓𑀢𑀭𑀲𑁆𑀲𑀸𑀢𑁆𑀯𑁂𑀯.

‘‘𑀲𑁆𑀫𑀺𑀦𑁆𑀦𑀻’’𑀢𑀺 𑀲𑁆𑀫𑀺𑀦𑁄 𑀦𑀺. 𑀤𑀡𑁆𑀟𑀺𑀦𑀺. 𑀤𑀡𑁆𑀟𑀻𑀲𑀼.

𑁯𑁨. 𑀪𑀺𑀓𑁆𑀔𑀼, 𑀲𑀺𑀮𑁄𑀧𑁄.

𑀯𑀸 𑀬𑁄𑀦𑀁𑀢𑁆𑀯𑁂𑀯.

‘‘𑀮𑀢𑁄 𑀯𑁄 𑀓𑀸𑀭𑁄 𑀘𑁂’’𑀢𑀺 𑀮𑀢𑁄 𑀬𑁄𑀦𑀁 𑀯𑁄𑀢𑁆𑀢𑀁 𑀯𑀸.

𑀅𑀢𑁆𑀢𑀁 𑀅𑀓𑀢𑀭𑀲𑁆𑀲𑁄𑀢𑁆𑀯𑁂𑀯.

𑀯𑁂𑀯𑁄𑀲𑀼 𑀮𑁄 𑀘.

𑀯𑁂𑀯𑁄𑀲𑀼 𑀅𑀓𑀢𑀭𑀲𑁆𑀲𑁄 𑀮𑁄 𑀅𑀢𑁆𑀢𑀁 𑀬𑀸𑀢𑀺. 𑀪𑀺𑀓𑁆𑀔𑀯𑁄, 𑀧𑀓𑁆𑀔𑁂 𑁋 𑀬𑁄𑀮𑁄𑀧 𑀤𑀻𑀖𑀸. 𑀪𑀺𑀓𑁆𑀔𑀽.

𑁯𑁩. 𑀳𑁂-𑀪𑀺𑀓𑁆𑀔𑀼.

‘‘𑀅𑀓𑀢𑀭𑀲𑁆𑀲𑀸 𑀮𑀢𑁄 𑀬𑁆𑀯𑀸𑀮𑀧𑀦𑀲𑁆𑀲 𑀯𑁂𑀯𑁄’’𑀢𑀺 𑀆𑀮𑀧𑀦𑁂 𑀬𑁄𑀲𑁆𑀲 𑀯𑁂𑀯𑁄𑀓𑀸𑀭𑀸, 𑀅𑀢𑁆𑀢𑀁. 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀯𑁄, 𑀪𑀺𑀓𑁆𑀔𑀽.

𑁯𑁪. 𑀪𑀺𑀓𑁆𑀔𑀼𑀁. 𑀪𑀺𑀓𑁆𑀔𑀯𑁄, 𑀪𑀺𑀓𑁆𑀔𑀽. 𑀲𑁂𑀲𑀁 𑀅𑀕𑁆𑀕𑀻𑀯.

𑁯𑁫. 𑀏𑀯𑀁 𑀚𑀦𑁆𑀢𑀼. 𑀚𑀦𑁆𑀢𑀽, 𑀚𑀦𑁆𑀢𑀯𑁄.

‘‘𑀮𑀢𑁄 ¶ 𑀯𑁄𑀓𑀸𑀭𑁄 𑀘𑁂’’𑀢𑀻𑀳 𑀓𑀸𑀭𑀕𑁆𑀕𑀳𑀡𑁂𑀦 𑀬𑁄𑀦𑀁 𑀦𑁄𑀢𑁆𑀢𑀁, 𑀘𑀓𑀸𑀭𑁂𑀦 𑀓𑁆𑀯𑀘𑀺 𑀯𑁄𑀦𑁄𑀦𑀫𑀪𑀸𑀯𑁄𑀯 𑀯𑀺𑀲𑁂𑀲𑁄. 𑀚𑀦𑁆𑀢𑀼𑀦𑁄, 𑀚𑀦𑁆𑀢𑀼𑀬𑁄.

𑁯𑁬. 𑀲𑀢𑁆𑀣𑀼, 𑀲𑀺.

‘‘𑀲𑀢𑁆𑀣𑀼𑀧𑀺𑀢𑀸𑀤𑀻𑀦𑀫𑀸 𑀲𑀺𑀲𑁆𑀫𑀺𑀁 𑀲𑀺𑀮𑁄𑀧𑁄 𑀘𑁂’’𑀢𑀺 𑀲𑀢𑁆𑀣𑀸𑀤𑁆𑀬𑀦𑁆𑀢𑀲𑁆𑀲 𑀆, 𑀲𑀺𑀮𑁄𑀧𑁄 𑀘. 𑀲𑀢𑁆𑀣𑀸.

𑀲𑀢𑁆𑀣𑀼𑀧𑀺𑀢𑀸𑀤𑀻𑀦𑀦𑁆𑀢𑁆𑀬𑀥𑀺𑀓𑀸𑀭𑁄.

𑀅𑀜𑁆𑀜𑁂𑀲𑁆𑀯𑀸𑀭𑀢𑁆𑀢𑀁.

𑀲𑀺𑀢𑁄𑀜𑁆𑀜𑁂𑀲𑀼 𑀲𑀢𑁆𑀣𑀸𑀤𑁆𑀬𑀦𑁆𑀢𑀲𑁆𑀲 𑀆𑀭𑁄 𑀳𑁄𑀢𑀺.

𑀢𑀢𑁄 𑀬𑁄𑀦𑀫𑁄 𑀢𑀼.

𑀢𑀢𑁄 𑀆𑀭𑀢𑁄 𑀬𑁄𑀦𑀁 𑀑 𑀳𑁄𑀢𑀺. 𑀲𑀢𑁆𑀣𑀸𑀭𑁄.

𑁯𑁭. 𑀳𑁂-𑀲𑀢𑁆𑀣, 𑀲𑀢𑁆𑀣𑀸. 𑀲𑀢𑁆𑀣𑀸𑀭𑁄.

𑁯𑁮. 𑀲𑀢𑁆𑀣𑀸𑀭𑀁. 𑀲𑀢𑁆𑀣𑀸𑀭𑁂, 𑀲𑀢𑁆𑀣𑀸𑀭𑁄.

𑁯𑁯. ‘‘𑀦𑀸 𑀆’’𑀢𑀺 𑀆𑀭𑀢𑁄 𑀦𑀸𑀲𑁆𑀲 𑀆. 𑀲𑀢𑁆𑀣𑀸𑀭𑀸. 𑀲𑀢𑁆𑀣𑀸𑀭𑁂𑀪𑀺, 𑀲𑀢𑁆𑀣𑀸𑀭𑁂𑀳𑀺.

𑁧𑁦𑁦. 𑀉 𑀲𑀲𑁆𑀫𑀺𑀁 𑀲𑀮𑁄𑀧𑁄 𑀘.

𑀲𑁂 ¶ 𑀲𑀢𑁆𑀣𑀸𑀤𑁆𑀬𑀦𑁆𑀢𑀲𑁆𑀲 𑀉 𑀳𑁄𑀢𑀺 𑀲𑀮𑁄𑀧𑁄 𑀘 𑀯𑀸. 𑀲𑀢𑁆𑀣𑀼, 𑀲𑀢𑁆𑀣𑀼𑀦𑁄, 𑀲𑀢𑁆𑀣𑀼𑀲𑁆𑀲.

‘‘𑀯𑀸 𑀦𑀫𑁆𑀳𑀻’’𑀢𑀺 𑀦𑀫𑁆𑀳𑀺 𑀆𑀭𑁄 𑀯𑀸. 𑀲𑀢𑁆𑀣𑀸𑀭𑀸𑀦𑀁.

‘‘𑀲𑀢𑁆𑀣𑀼𑀦𑀸𑀢𑁆𑀢𑀜𑁆𑀘𑁂’’𑀢𑀺 𑀦𑀫𑁆𑀳𑀺 𑀲𑀢𑁆𑀣𑀸𑀤𑁆𑀬𑀦𑁆𑀢𑀲𑁆𑀲 𑀅𑀢𑁆𑀢𑀁 𑀯𑀸. 𑀤𑀻𑀖𑁂𑀲𑀢𑁆𑀣𑀸𑀦𑀁.

𑁧𑁦𑁧. ‘‘𑀢𑀢𑁄 𑀲𑁆𑀫𑀺𑀫𑀻’’𑀢𑀺 𑀆𑀭𑀢𑁄 𑀲𑁆𑀫𑀺𑀦𑁄 𑀇. ‘‘𑀆𑀭𑁄 𑀭𑀲𑁆𑀲𑀫𑀻𑀓𑀸𑀭𑁂’’𑀢𑀺 𑀇𑀫𑁆𑀳𑀺 𑀆𑀭𑀲𑁆𑀲 𑀭𑀲𑁆𑀲𑁄. 𑀲𑀢𑁆𑀣𑀭𑀺. 𑀲𑀢𑁆𑀣𑀸𑀭𑁂𑀲𑀼. 𑀏𑀯𑀁 𑀦𑀢𑁆𑀢𑀸𑀤𑀺.

𑁧𑁦𑁨. 𑀧𑀺𑀢𑀸 ¶ 𑀲𑀢𑁆𑀣𑁂𑀯. ‘‘𑀧𑀺𑀢𑀸𑀤𑀻𑀦𑀫𑀲𑀺𑀫𑁆𑀳𑀻’’𑀢𑀺 𑀲𑀺𑀢𑁄𑀜𑁆𑀜𑁂𑀲𑀼 𑀆𑀭𑀲𑁆𑀲 𑀭𑀲𑁆𑀲𑁄𑀯 𑀯𑀺𑀲𑁂𑀲𑁄. 𑀧𑀺𑀢𑀭𑁄.

𑀦𑀫𑁆𑀳𑀺 𑁋 𑀧𑀺𑀢𑀽𑀦𑀦𑁆𑀢𑀺𑀧𑀺 𑀳𑁄𑀢𑀺. 𑀏𑀯𑀁 𑀪𑀸𑀢𑀼𑀧𑁆𑀧𑀪𑀼𑀢𑀬𑁄.

𑁧𑁦𑁩. 𑀅𑀪𑀺𑀪𑀽. 𑀭𑀲𑁆𑀲𑁂-𑀅𑀪𑀺𑀪𑀼𑀯𑁄. 𑀬𑁄𑀮𑁄𑀧𑁂𑀅𑀪𑀺𑀪𑀽. 𑀲𑁂𑀲𑀁 𑀪𑀺𑀓𑁆𑀔𑀽𑀯, 𑀭𑀲𑁆𑀲𑁄𑀯 𑀯𑀺𑀲𑁂𑀲𑁄.

𑁧𑁦𑁪. 𑀏𑀯𑀁 ¶ 𑀲𑀩𑁆𑀩𑀜𑁆𑀜𑀽. 𑀧𑀼𑀩𑁆𑀩𑁂𑀯 𑀬𑁄𑀦𑀁 𑀦𑁄𑀓𑀸𑀭𑁄 𑀘. 𑀲𑀩𑁆𑀩𑀜𑁆𑀜𑀼𑀦𑁄, 𑀲𑀩𑁆𑀩𑀜𑁆𑀜𑀽.

𑁧𑁦𑁫. 𑀕𑁄.

𑀕𑀸𑀯𑀇𑀢𑁆𑀯𑁂𑀯.

‘‘𑀬𑁄𑀲𑀼 𑀘𑁂’’𑀢𑀺 𑀕𑁄𑀲𑀤𑁆𑀤𑁄𑀓𑀸𑀭𑀲𑁆𑀲 𑀆𑀯𑁄, ‘‘𑀢𑀢𑁄 𑀬𑁄𑀦𑀫𑁄 𑀢𑀼’’𑀢𑀻𑀳 𑀢𑀼𑀲𑀤𑁆𑀤𑁂𑀦 𑀬𑁄𑀦𑀁 𑀑. 𑀕𑀸𑀯𑁄. 𑀢𑀣𑀸𑀮𑀧𑀦𑁂.

𑁧𑁦𑁬. 𑀅𑀯𑀫𑁆𑀳𑀺 𑀘.

𑀅𑀫𑁆𑀳𑀺 𑀧𑀭𑁂 𑀕𑁄𑀲𑀤𑁆𑀤𑁄𑀓𑀸𑀭𑀲𑁆𑀲 𑀆𑀯𑀅𑀯𑀸 𑀳𑁄𑀦𑁆𑀢𑀺, 𑀘𑀲𑀤𑁆𑀤𑁂𑀦 𑀳𑀺𑀦𑀁𑀯𑀚𑁆𑀚𑀺𑀢𑁂𑀲𑀼 𑀲𑁂𑀲𑁂𑀲𑀼𑀧𑀺.

𑁧𑁦𑁭. ‘‘𑀆𑀯𑀲𑁆𑀲𑀼 𑀯𑀸’’𑀢𑀺 𑀅𑀫𑁆𑀳𑀺 𑀆𑀯𑀦𑁆𑀢𑀲𑁆𑀲 𑀉𑀢𑁆𑀢𑀁 𑀯𑀸, 𑀕𑀸𑀳𑁆𑀯𑀁, 𑀕𑀸𑀯𑀁, 𑀕𑀯𑀁. 𑀬𑁄-𑀕𑀸𑀯𑁄. 𑀕𑀸𑀯𑁂𑀦, 𑀕𑀯𑁂𑀦. 𑀕𑁄𑀪𑀺, 𑀕𑁄𑀳𑀺.

𑁧𑁦𑁮. ‘‘𑀕𑀸𑀯 𑀲𑁂’’𑀢𑀺 𑀲𑁂 𑀑𑀲𑁆𑀲 𑀆𑀯𑁄. 𑀕𑀸𑀯𑀲𑁆𑀲, 𑀕𑀯𑀲𑁆𑀲. ‘‘𑀢𑀢𑁄 𑀦’’𑀫𑀸𑀤𑁄 𑀘𑀓𑀸𑀭𑁂𑀦 𑀦𑀁𑀇𑀘𑁆𑀘𑀲𑁆𑀲 𑀅𑀁, 𑀑𑀲𑁆𑀲 𑀅𑀯𑁄 𑀘. 𑀕𑀯𑀁.

𑁧𑁦𑁯. ‘‘𑀲𑀼𑀳𑀺𑀦𑀸𑀲𑀼 ¶ 𑀘𑁂’’𑀢𑀻𑀳 𑀘𑀓𑀸𑀭𑁂𑀦 𑀕𑁄𑀲𑁆𑀲 𑀕𑀼 𑀘. 𑀤𑁆𑀯𑀺𑀢𑁆𑀢𑁂-𑀕𑀼𑀦𑁆𑀦𑀁, 𑀕𑁄𑀦𑀁. 𑀕𑀸𑀯𑀸, 𑀕𑀯𑀸, 𑀕𑀸𑀯𑀫𑁆𑀳𑀸, 𑀕𑀯𑀫𑁆𑀳𑀸, 𑀕𑀸𑀯𑀲𑁆𑀫𑀸, 𑀕𑀯𑀲𑁆𑀫𑀸. 𑀕𑁄𑀪𑀺, 𑀕𑁄𑀳𑀺.

𑁧𑁧𑁦. 𑀕𑀸𑀯𑁂, 𑀕𑀯𑁂, 𑀕𑀸𑀯𑀫𑁆𑀳𑀺, 𑀕𑀯𑀫𑁆𑀳𑀺, 𑀕𑀸𑀯𑀲𑁆𑀫𑀺𑀁, 𑀕𑀯𑀲𑁆𑀫𑀺𑀁. 𑀕𑀸𑀯𑁂𑀲𑀼, 𑀕𑀯𑁂𑀲𑀼, 𑀕𑁄𑀲𑀼.

𑀧𑀼𑀮𑁆𑀮𑀺𑀗𑁆𑀕𑀸.

𑀇𑀢𑁆𑀣𑀺𑀮𑀺𑀗𑁆𑀕

𑁧𑁧𑁧. 𑀓𑀜𑁆𑀜𑀸 ¶ . 𑀲𑀺𑀮𑁄𑀧𑁄.

‘‘𑀆 𑀖𑁄’’𑀢𑀺 𑀇𑀢𑁆𑀣𑀺𑀬𑀁 𑀆𑀓𑀸𑀭𑀲𑁆𑀲 𑀖𑀲𑀜𑁆𑀜𑀸. 𑀬𑁄 𑀮𑁄𑀧𑁂 𑁋 𑀓𑀜𑁆𑀜𑀸. 𑀧𑀓𑁆𑀔𑁂 𑁋 𑀓𑀜𑁆𑀜𑀸𑀬𑁄.

𑁧𑁧𑁨. ‘‘𑀖𑀢𑁂 𑀘𑁂’’𑀢𑀺 𑀕𑀲𑁆𑀲 𑀏. 𑀳𑁂-𑀓𑀜𑁆𑀜𑁂. 𑀓𑀜𑁆𑀜𑀸, 𑀓𑀜𑁆𑀜𑀸𑀬𑁄.

𑁧𑁧𑁩. 𑀓𑀜𑁆𑀜𑀁. 𑀓𑀜𑁆𑀜𑀸, 𑀓𑀜𑁆𑀜𑀸𑀬𑁄.

𑁧𑁧𑁪. 𑀆𑀬 𑀏𑀓𑀯𑀘𑀦𑀲𑁆𑀲𑁂𑀢𑁆𑀯𑁂𑀯.

‘‘𑀖𑀢𑁄 𑀦𑀸𑀤𑀻𑀦’’𑀦𑁆𑀢𑀺 𑀦𑀸𑀤𑁂𑀓𑀯𑀘𑀦𑀸𑀦𑀫𑀸𑀬𑁄. 𑀓𑀜𑁆𑀜𑀸𑀬. 𑀓𑀜𑁆𑀜𑀸𑀪𑀺, 𑀓𑀜𑁆𑀜𑀸𑀳𑀺.

𑁧𑁧𑁫. 𑀓𑀜𑁆𑀜𑀸𑀬. 𑀓𑀜𑁆𑀜𑀸𑀦𑀁.

𑁧𑁧𑁬. 𑀖𑀧𑀢𑁄 𑀲𑁆𑀫𑀺𑀁 𑀬𑀁 𑀯𑀸.

𑀖𑀧𑁂𑀳𑀺 𑀲𑁆𑀫𑀺𑀦𑁄 𑀬𑀁 𑀯𑀸 𑀳𑁄𑀢𑀺. 𑀓𑀜𑁆𑀜𑀸𑀬𑀁, 𑀓𑀜𑁆𑀜𑀸𑀬. 𑀓𑀜𑁆𑀜𑀸𑀲𑀼.

𑁧𑁧𑁭. 𑀭𑀢𑁆𑀢𑀺 ¶ , 𑀲𑀺𑀮𑁄𑀧𑁄.

‘‘𑀢𑁂 𑀇𑀢𑁆𑀣𑀺𑀔𑁆𑀬𑀸 𑀧𑁄’’𑀢𑀺 𑀇𑀢𑁆𑀣𑀺𑀬𑀫𑀺𑀯𑀡𑁆𑀡𑀼𑀯𑀡𑁆𑀡𑀸𑀦𑀁 𑀧𑀲𑀜𑁆𑀜𑀸. 𑀬𑁄𑀮𑁄𑀧𑀤𑀻𑀖𑀸. 𑀭𑀢𑁆𑀢𑀻. 𑀧𑀓𑁆𑀔𑁂 𑁋 𑀭𑀢𑁆𑀢𑀺𑀬𑁄. 𑀢𑀣𑀸𑀮𑀧𑀦𑁂.

𑁧𑁧𑁮. 𑀭𑀢𑁆𑀢𑀺𑀁, 𑀭𑀢𑁆𑀢𑀻. 𑀭𑀢𑁆𑀢𑀺𑀬𑁄.

𑁧𑁧𑁯. 𑀏𑀓𑀯𑀘𑀦𑀲𑁆𑀲 𑀦𑀸𑀤𑀻𑀦𑀦𑁆𑀢𑁆𑀯𑁂𑀯.

‘‘𑀧𑀢𑁄 𑀬𑀸’’𑀢𑀺 𑀦𑀸𑀤𑁂𑀓𑀯𑀘𑀦𑀸𑀦𑀁 𑀬𑀸. 𑀭𑀢𑁆𑀢𑀺𑀬𑀸. 𑀭𑀢𑁆𑀢𑀻𑀪𑀺, 𑀭𑀢𑁆𑀢𑀻𑀳𑀺.

𑁧𑁨𑁦. 𑀭𑀢𑁆𑀢𑀺𑀬𑀸. 𑀭𑀢𑁆𑀢𑀻𑀦𑀁.

𑁧𑁨𑁧. 𑀭𑀢𑁆𑀢𑀺𑀬𑀁, 𑀭𑀢𑁆𑀢𑀺𑀬𑀸. 𑀭𑀢𑁆𑀢𑀻𑀲𑀼.

𑁧𑁨𑁨. 𑀦𑀤𑀻 ¶ . 𑀲𑁂𑀲𑀁 𑀭𑀢𑁆𑀢𑀻𑀯. 𑀅𑀖𑀢𑁆𑀢𑀸 𑀭𑀲𑁆𑀲𑁄𑀯 𑀯𑀺𑀲𑁂𑀲𑁄.

𑁧𑁨𑁩. 𑀬𑀸𑀕𑀼 𑀭𑀢𑁆𑀢𑀻𑀯.

𑁧𑁨𑁪. 𑀫𑀸𑀢𑀼, 𑀥𑀻𑀢𑀼, 𑀤𑀼𑀳𑀺𑀢𑁆𑀯𑀸𑀤𑀬𑁄 𑀧𑀺𑀢𑁂𑀯.

𑁧𑁨𑁫. 𑀚𑀫𑁆𑀩𑀽 𑀦𑀤𑀻𑀯.

𑀓𑀜𑁆𑀜𑀇𑀢𑀺 𑀞𑀺𑀢𑁂 𑁋

𑀇𑀢𑁆𑀣𑀺𑀬𑀫𑀢𑁄 𑀆𑀧𑀘𑁆𑀘𑀬𑁄.

𑀇𑀢𑁆𑀣𑀺𑀬𑀁 𑀯𑀢𑁆𑀢𑀫𑀸𑀦𑀸 𑀅𑀓𑀸𑀭𑀦𑁆𑀢𑀢𑁄 𑀆𑀧𑀘𑁆𑀘𑀬𑁄 𑀳𑁄𑀢𑀺. 𑀲𑀭𑀮𑁄𑀧𑀧𑀓𑀮𑁆𑀬𑀸𑀤𑀺. 𑀓𑀜𑁆𑀜𑀸.

‘‘𑀥𑀸𑀢𑀼𑀧𑁆𑀧𑀘𑁆𑀘𑀬𑀯𑀺𑀪𑀢𑁆𑀢𑀺 𑀯𑀚𑁆𑀚𑀺𑀢𑀫𑀢𑁆𑀣𑀯𑀁 𑀮𑀺𑀗𑁆𑀕’’𑀦𑁆𑀢𑀺 𑀯𑀘𑀦𑀢𑁄 𑀧𑀘𑁆𑀘𑀬𑀦𑁆𑀢𑀲𑁆𑀲𑀸𑀮𑀺𑀗𑁆𑀕𑀢𑁆𑀢𑀸 𑀢𑀤𑁆𑀥𑀺𑀢𑀸𑀤𑀺𑀲𑀼𑀢𑁆𑀢𑁂 𑀘𑀓𑀸𑀭𑁂𑀦 𑀦𑀸𑀫𑀫𑀺𑀯 𑀓𑀢𑁂 𑁋 𑀲𑁆𑀬𑀸𑀤𑀺. 𑀏𑀯𑀁 𑀈𑀇𑀦𑀻𑀲𑀼.

𑀏𑀯𑀁 𑀅𑀚𑀸, 𑀏𑀴𑀓𑀸, 𑀓𑁄𑀓𑀺𑀮𑀸, 𑀅𑀲𑁆𑀲𑀸, 𑀫𑀽𑀲𑀺𑀓𑀸, 𑀩𑀮𑀸𑀓𑀸, 𑀫𑀦𑁆𑀤𑀸, 𑀚𑀭𑀸𑀇𑀘𑁆𑀘𑀸𑀤𑀺.

𑁧𑁨𑁬. 𑀇𑀢𑁆𑀣𑀺𑀬𑀦𑁆𑀢𑁆𑀬𑀥𑀺𑀓𑀸𑀭𑁄.

𑀦𑀤𑀸𑀤𑀺𑀢𑁄 𑀯𑀸 𑀈.

𑀇𑀢𑁆𑀣𑀺𑀬𑀁 ¶ 𑀦𑀤𑀸𑀤𑀺𑀢𑁄 𑀯𑀸 𑀅𑀦𑀤𑀸𑀤𑀺𑀢𑁄 𑀯𑀸 𑀈 𑀳𑁄𑀢𑀺. 𑀦𑀤𑀻, 𑀦𑀕𑀭𑀻, 𑀓𑀼𑀫𑀸𑀭𑀻, 𑀩𑁆𑀭𑀸𑀳𑁆𑀫𑀡𑀻, 𑀢𑀭𑀼𑀡𑀻, 𑀓𑀼𑀓𑁆𑀓𑀼𑀝𑀻, 𑀇𑀢𑁆𑀣𑀻 𑀇𑀘𑁆𑀘𑀸𑀤𑀺.

‘‘𑀫𑀸𑀢𑀼𑀮𑀸𑀤𑀻𑀦𑀫𑀸𑀦𑀢𑁆𑀢𑀫𑀻𑀓𑀸𑀭𑁂’’𑀢𑀺 ¶ 𑀈𑀫𑁆𑀳𑀺 𑀫𑀸𑀢𑀼𑀮𑀸𑀤𑁆𑀬𑀦𑁆𑀢𑀲𑁆𑀲 𑀆𑀦𑁄. 𑀫𑀸𑀢𑀼𑀮𑀸𑀦𑀻𑀢𑁆𑀬𑀸𑀤𑀺.

𑀅𑀦𑀤𑀸𑀤𑀺𑀢𑁄 𑀯𑀸 𑀈. 𑀲𑀔𑀻, 𑀳𑀢𑁆𑀣𑀻.

𑀪𑀯𑀢𑁄 𑀪𑁄𑀢𑁄.

𑀈𑀫𑁆𑀳𑀺 𑀪𑀯𑀦𑁆𑀢𑀲𑁆𑀲 𑀪𑁄𑀢𑁄 𑀳𑁄𑀢𑀺. 𑀪𑁄𑀢𑀻.

𑁧𑁨𑁭. ‘‘𑀡 ¶ 𑀯 𑀡𑀺𑀓𑀡𑁂𑀬𑁆𑀬 𑀡𑀦𑁆𑀢𑀽𑀳𑀻’’𑀢𑀺 𑀈. 𑀫𑀸𑀦𑀯𑀻, 𑀦𑀸𑀯𑀺𑀓𑀻, 𑀯𑁂𑀦𑀢𑁂𑀬𑁆𑀬𑀻, 𑀕𑁄𑀢𑀫𑀻.

𑁧𑁨𑁮. ‘‘𑀦𑁆𑀢𑀼𑀲𑁆𑀲 𑀢𑀫𑀻𑀓𑀸𑀭𑁂’’𑀢𑀺 𑀦𑁆𑀢𑀼𑀲𑁆𑀲 𑀢𑁄 𑀯𑀸. 𑀕𑀼𑀡𑀯𑀢𑀻, 𑀕𑀼𑀡𑀯𑀦𑁆𑀢𑀻. 𑀥𑀺𑀢𑀺𑀫𑀢𑀻, 𑀥𑀺𑀢𑀺𑀫𑀦𑁆𑀢𑀻.

𑀦𑁆𑀢𑀲𑁆𑀲 𑀦𑁆𑀢𑀼𑀩𑁆𑀬𑀧𑀤𑁂𑀲𑁄. 𑀫𑀳𑀢𑀻, 𑀫𑀳𑀦𑁆𑀢𑀻.

𑁧𑁨𑁯. 𑀧𑀢𑀺𑀪𑀺𑀓𑁆𑀔𑀼𑀭𑀸𑀚𑀻𑀓𑀸𑀭𑀦𑁆𑀢𑁂𑀳𑀺 𑀇𑀦𑀻.

𑀧𑀢𑁆𑀬𑀸𑀤𑀻𑀳𑀺 ¶ 𑀈𑀓𑀸𑀭𑀦𑁆𑀢𑁂𑀳𑀺 𑀘 𑀇𑀢𑁆𑀣𑀺𑀬𑀁 𑀇𑀦𑀻 𑀳𑁄𑀢𑀺.

‘‘𑀧𑀢𑀺𑀲𑁆𑀲𑀺𑀦𑀻𑀫𑁆𑀳𑀻’’𑀢𑀺 𑀧𑀢𑁆𑀬𑀦𑁆𑀢𑀲𑁆𑀲 𑀅𑀢𑁆𑀢𑁂 𑀲𑀭𑀮𑁄𑀧𑀸𑀤𑁄 𑀢𑀼𑀓𑀸𑀭𑁂𑀦 𑀮𑁄𑀧𑀸𑀪𑀸𑀯𑁄. ‘‘𑀯𑀸 𑀧𑀭𑁄 𑀅𑀲𑀭𑀽𑀧𑀸’’𑀢𑀺 𑀇𑀮𑁄𑀧𑁄, 𑀤𑀻𑀖𑁄 𑀘. 𑀕𑀳𑀧𑀢𑀸𑀦𑀻, 𑀪𑀺𑀓𑁆𑀔𑀼𑀦𑀻, 𑀭𑀸𑀚𑀺𑀦𑀻, 𑀫𑁂𑀥𑀸𑀯𑀺𑀦𑀻, 𑀢𑀧𑀲𑁆𑀲𑀺𑀦𑀻, 𑀥𑀫𑁆𑀫𑀘𑀸𑀭𑀺𑀡𑀻, 𑀪𑀬𑀤𑀲𑁆𑀲𑀸𑀯𑀺𑀦𑀻, 𑀪𑀼𑀢𑁆𑀢𑀸𑀯𑀺𑀦𑀻𑀢𑁆𑀬𑀸𑀤𑀺.

𑀇𑀢𑁆𑀣𑀺𑀮𑀺𑀗𑁆𑀕𑀸.

𑀦𑀧𑀼𑀁𑀲𑀓𑀮𑀺𑀗𑁆𑀕

𑁧𑁩𑁦. 𑀘𑀺𑀢𑁆𑀢 ¶ , 𑀲𑀺.

𑀦𑀧𑀼𑀁𑀲𑀓𑁂𑀳𑀺 𑀅𑀢𑁄 𑀦𑀺𑀘𑁆𑀘𑀦𑁆𑀢𑁂𑀯.

𑀲𑀺𑀁.

𑀅𑀓𑀸𑀭𑀦𑁆𑀢𑁂𑀢𑀺 𑀦𑀧𑀼𑀁𑀲𑀓𑁂𑀳𑀺 𑀲𑀺𑀲𑁆𑀲 𑀦𑀺𑀘𑀁 𑀅𑀁 𑀳𑁄𑀢𑀺. 𑀘𑀺𑀢𑁆𑀢𑀁.

𑀬𑁄𑀦𑀁 𑀦𑀺 𑀦𑀧𑀼𑀁𑀲𑀓𑁂𑀳𑀺𑀢𑁆𑀯𑁂𑀯.

𑀅𑀢𑁄 𑀦𑀺𑀘𑁆𑀘𑀁.

𑀅𑀓𑀸𑀭𑀦𑁆𑀢𑁂𑀳𑀺 𑀦 𑀧𑀼𑀁𑀲𑀓𑁂𑀳𑀺 𑀬𑁄𑀦𑀁 𑀦𑀺𑀘𑁆𑀘𑀁 𑀦𑀺 𑀳𑁄𑀢𑀺, 𑀦𑀺𑀲𑁆𑀲 𑀆. 𑀘𑀺𑀢𑁆𑀢𑀸. 𑀧𑀓𑁆𑀔𑁂 𑁋 𑀬𑁄𑀲𑁆𑀯𑀸𑀤𑀺𑀦𑀸 𑀤𑀻𑀖𑁂 𑁋 𑀘𑀺𑀢𑁆𑀢𑀸𑀦𑀺.

𑁧𑁩𑁧. 𑀕𑀮𑁄𑀧𑁂 𑁋 𑀳𑁂 𑁋 𑀘𑀺𑀢𑁆𑀢. 𑀘𑀺𑀢𑁆𑀢𑀸, 𑀘𑀺𑀢𑁆𑀢𑀸𑀦𑀺.

𑁧𑁩𑁨. 𑀘𑀺𑀢𑁆𑀢𑀁 ¶ . 𑀦𑀺𑀲𑁆𑀲 𑀏 𑁋 𑀘𑀺𑀢𑁆𑀢𑁂, 𑀘𑀺𑀢𑁆𑀢𑀸𑀦𑀺. 𑀲𑁂𑀲𑀁 𑀩𑀼𑀤𑁆𑀥𑁄𑀯.

𑁧𑁩𑁩. 𑀫𑀦, 𑀲𑀺, 𑀫𑀦𑀁.

𑀦𑀸 𑀯𑀸𑀢𑁆𑀯𑁂𑀯.

𑁧𑁩𑁪. 𑀫𑀦𑁄𑀕𑀡𑀸𑀤𑀺𑀢𑁄 𑀲𑁆𑀫𑀺𑀦𑁆𑀦𑀸𑀦𑀫𑀺𑀆.

𑀫𑀦𑀸𑀤𑀺𑀢𑁄 𑀲𑁆𑀫𑀺𑀦𑁆𑀦𑀸𑀦𑀁 𑀇𑀆 𑀯𑀸 𑀳𑁄𑀦𑁆𑀢𑀺.

𑀲 𑀲𑀭𑁂 𑀯𑀸𑀕𑀫𑁄.

𑀯𑀺𑀪𑀢𑁆𑀬𑀸𑀤𑁂𑀲𑁂 𑀲𑀭𑁂 𑀧𑀭𑁂 𑀫𑀦𑀸𑀤𑀺𑀢𑁄 𑀲𑀸𑀕𑀫𑁄 𑀯𑀸 𑀳𑁄𑀢𑀺. 𑀫𑀦𑀲𑀸.

𑁧𑁩𑁫. 𑀲𑀲𑁆𑀲 𑀘𑁄

𑀫𑀦𑀸𑀤𑀺𑀢𑁄 𑀲𑀲𑁆𑀲 𑀑 𑀳𑁄𑀢𑀺, 𑀘𑀲𑀤𑁆𑀤𑁂𑀦 𑀲𑁆𑀫𑀸𑀲𑁆𑀲 𑀆 𑀘. 𑀫𑀦𑀲𑁄, 𑀫𑀦𑀲𑀸.

𑁧𑁩𑁬. 𑀫𑀦𑀲𑀺 ¶ . 𑀲𑁂𑀲𑀁 𑀘𑀺𑀢𑁆𑀢𑀁𑀯.

𑁧𑁩𑁭.

𑀫𑀦𑀁 𑀲𑀺𑀭𑀁 𑀉𑀭𑀁 𑀢𑁂𑀚𑀁, 𑀭𑀚𑀁 𑀑𑀚𑀁 𑀯𑀬𑀁 𑀧𑀬𑀁;

𑀬𑀲𑀁 𑀢𑀧𑀁 𑀯𑀘𑀁 𑀘𑁂𑀢𑀁, 𑀏𑀯𑀫𑀸𑀤𑀺 𑀫𑀦𑁄𑀕𑀡𑁄.

𑁧𑁩𑁮. 𑀕𑀼𑀡𑀯𑀦𑁆𑀢𑀼 ¶ , 𑀲𑀺.

‘‘𑀅𑀁 𑀦𑀧𑀼𑀁𑀲𑀓𑁂’’𑀢𑀺 𑀲𑀺𑀫𑁆𑀳𑀺 𑀲𑀯𑀺𑀪𑀢𑁆𑀢𑀺𑀲𑁆𑀲 𑀦𑁆𑀢𑀼𑀲𑁆𑀲 𑀅𑀁. 𑀕𑀼𑀡𑀯𑀁. 𑀦𑁆𑀢𑀼𑀲𑁆𑀲 𑀢𑁆𑀢𑁂 𑁋 𑀕𑀼𑀡𑀯𑀦𑁆𑀢𑀸𑀦𑀺.

𑁧𑁩𑁯. 𑀬𑁄𑀢𑁄𑀜𑁆𑀜𑀁 𑀧𑀼𑀫𑁂𑀯. 𑀏𑀯𑀁 𑀕𑀘𑁆𑀙𑀁.

𑁧𑁪𑁦. 𑀅𑀝𑁆𑀞𑀺.

𑀯𑀸𑀢𑁆𑀯𑁂𑀯.

‘‘𑀬𑁄𑀦𑀦𑁆𑀦𑀺 𑀦𑀧𑀼𑀁𑀲𑀓𑁂𑀳𑀻’’𑀢𑀺 𑀬𑁄𑀦𑀁 𑀦𑀺 𑀯𑀸. 𑀅𑀝𑁆𑀝𑀻𑀦𑀺. 𑀛𑀢𑁆𑀢𑀸 𑀬𑁄𑀮𑁄𑀧𑁂 𑁋 𑀅𑀝𑁆𑀞𑀻. 𑀢𑀣𑀸𑀮𑀧𑀦𑁂.

𑁧𑁪𑁧. 𑀅𑀝𑁆𑀞𑀺𑀁, 𑀅𑀝𑁆𑀞𑀻𑀦𑀺, 𑀅𑀝𑁆𑀞𑀻. 𑀲𑁂𑀲𑀁 𑀅𑀕𑁆𑀕𑀻𑀯.

𑁧𑁪𑁨. 𑀤𑀡𑁆𑀟𑀻, 𑀲𑀺.

𑀅𑀖𑀢𑁆𑀢𑀸 𑀭𑀲𑁆𑀲𑁄, 𑀤𑀡𑁆𑀟𑀺. 𑀬𑁄𑀢𑁄𑀜𑁆𑀜𑀁 𑀧𑀼𑀫𑁂𑀯.

𑁧𑁪𑁩. 𑀆𑀬𑀼 𑀅𑀝𑁆𑀞𑀻𑀯.

𑀦𑀧𑀼𑀁𑀲𑀓𑀮𑀺𑀗𑁆𑀕𑀸.

𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕

𑁧𑁪𑁪. 𑀧𑀼𑀫𑀺𑀢𑁆𑀣𑀺𑀮𑀺𑀗𑁆𑀕𑀸 ¶ 𑁋 𑀖𑀝, 𑀓𑀝, 𑀬𑀝𑁆𑀞𑀺, 𑀫𑀼𑀝𑁆𑀞𑀺, 𑀲𑀺𑀦𑁆𑀥𑀼, 𑀭𑁂𑀡𑀼𑀧𑁆𑀧𑀪𑀼𑀢𑀬𑁄 𑀤𑁆𑀯𑀺𑀧𑀤 𑀘𑀢𑀼𑀧𑁆𑀧𑀤 𑀚𑀸𑀢𑀺𑀯𑀸𑀘𑀺𑀦𑁄 𑀘.

𑀬𑀣𑀸 𑁋 𑀖𑀝𑁄, 𑀈𑀧𑀘𑁆𑀘𑀬𑁂-𑀖𑀝𑀻. 𑀏𑀲𑁄 𑀬𑀝𑁆𑀞𑀺, 𑀏𑀲𑀸 𑀬𑀝𑁆𑀞𑀺𑀘𑁆𑀘𑀸𑀤𑀺.

𑀤𑁆𑀯𑀺𑀧𑀤𑀚𑀸𑀢𑀺𑀯𑀸𑀘𑀺𑀦𑁄 𑀬𑀣𑀸 𑁋 𑀔𑀢𑁆𑀢𑀺𑀬𑁄. 𑀆𑀧𑀘𑁆𑀘𑀬𑁂- 𑀔𑀢𑁆𑀢𑀺𑀬𑀸, 𑀲𑀫𑀡𑁄, 𑀈𑀫𑁆𑀳𑀺-𑀲𑀫𑀡𑀻𑀇𑀘𑁆𑀘𑀸𑀤𑀺.

𑀘𑀢𑀼𑀧𑁆𑀧𑀤𑀚𑀸𑀢𑀺𑀯𑀸𑀘𑀺𑀦𑁄 𑀬𑀣𑀸 𑁋 𑀕𑀚𑁄, 𑀆-𑀕𑀚𑀸, 𑀩𑁆𑀬𑀕𑁆𑀖𑁄, 𑀈𑀫𑁆𑀳𑀺 - 𑀩𑁆𑀬𑀕𑁆𑀖𑀻𑀇𑀘𑁆𑀘𑀸𑀤𑀺.

𑀧𑀼𑀫𑀦𑀧𑀼𑀁𑀲𑀓𑀮𑀺𑀗𑁆𑀕

𑁧𑁪𑁫. 𑀧𑀼𑀫𑀦𑀧𑀼𑀁𑀲𑀓𑀮𑀺𑀗𑁆𑀕𑀸 ¶ 𑁋 𑀥𑀫𑁆𑀫, 𑀓𑀫𑁆𑀫, 𑀩𑁆𑀭𑀳𑁆𑀫, 𑀓𑀼𑀲𑀼𑀫 𑀲𑀗𑁆𑀕𑀫, 𑀧𑀤𑀼𑀫, 𑀅𑀲𑁆𑀲𑀫, 𑀯𑀺𑀳𑀸𑀭, 𑀲𑀭𑀻𑀭, 𑀲𑀼𑀯𑀡𑁆𑀡, 𑀯𑀡𑁆𑀡, 𑀓𑀳𑀸𑀧𑀡, 𑀪𑀯𑀦, 𑀪𑀼𑀯𑀦, 𑀬𑁄𑀩𑁆𑀩𑀦, 𑀪𑀼𑀲𑀦, 𑀆𑀲𑀦, 𑀲𑀬𑀦, 𑀑𑀤𑀦, 𑀆𑀓𑀸𑀲, 𑀉𑀧𑀯𑀸𑀲, 𑀫𑀸𑀲, 𑀤𑀺𑀯𑀲, 𑀭𑀲, 𑀣𑀮, 𑀨𑀮, 𑀭𑀝𑁆𑀞 𑀅𑀫𑁆𑀩𑀼, 𑀫𑀥𑁆𑀯𑀸𑀤𑀬𑁄.

𑀇𑀢𑁆𑀣𑀺𑀦𑀧𑀼𑀁𑀲𑀓𑀮𑀺𑀗𑁆𑀕

𑁧𑁪𑁬. 𑀇𑀢𑁆𑀣𑀺𑀦𑀧𑀼𑀁𑀲𑀓𑀮𑀺𑀗𑁆𑀕𑀸 𑁋 𑀦𑀕𑀭, 𑀅𑀘𑁆𑀘𑀺𑀧𑁆𑀧𑀫𑀼𑀔𑀸.

𑀲𑀩𑁆𑀩𑀮𑀺𑀗𑁆𑀕

𑁧𑁪𑁭. 𑀲𑀩𑁆𑀩𑀮𑀺𑀗𑁆𑀕𑀸 ¶ 𑁋 𑀢𑀝 𑀧𑀼𑀝 𑀧𑀢𑁆𑀢 𑀫𑀡𑁆𑀟𑀮 𑀓𑀮𑀲𑀸 𑀤𑀬𑁄, 𑀦𑀸𑀫𑀻𑀓𑀢𑀸, 𑀲𑀩𑁆𑀩𑀦𑀸𑀫𑀸𑀦𑀺 𑀘. 𑀬𑀣𑀸 𑁋 𑀢𑀝𑁄, 𑀈𑀫𑁆𑀳𑀺 𑁋 𑀢𑀝𑀻, 𑀢𑀝𑀫𑀺𑀘𑁆𑀘𑀸𑀤𑀺.

𑀦𑀸𑀫𑀻𑀓𑀢𑀸 𑀬𑀣𑀸 𑁋 𑀤𑁂𑀯𑀤𑀢𑁆𑀢𑁄, 𑀆 𑁋 𑀤𑁂𑀯𑀤𑀢𑁆𑀢𑀸 𑀤𑁂𑀯𑀤𑀢𑁆𑀢𑀫𑀺𑀘𑁆𑀘𑀸𑀤𑀺.

𑀲𑀩𑁆𑀩𑀦𑀸𑀫

𑁧𑁪𑁮. 𑀲𑀩𑁆𑀩 ¶ , 𑀓𑀢𑀭, 𑀓𑀢𑀫, 𑀉𑀪𑀬, 𑀇𑀢𑀭, 𑀅𑀜𑁆𑀜, 𑀅𑀜𑁆𑀜𑀢𑀭, 𑀅𑀜𑁆𑀜𑀢𑀫, 𑀧𑀼𑀩𑁆𑀩, 𑀧𑀭, 𑀅𑀧𑀭, 𑀤𑀓𑁆𑀔𑀺𑀡, 𑀉𑀢𑁆𑀢𑀭, 𑀏𑀓, 𑀬, 𑀢, 𑀏𑀢, 𑀇𑀫, 𑀅𑀫𑀼, 𑀓𑀺𑀁, 𑀢𑀼𑀫𑁆𑀳, 𑀅𑀫𑁆𑀳-𑀇𑀢𑀺 𑀲𑀩𑁆𑀩𑀦𑀸𑀫𑀸𑀦𑀺.

𑀲𑀩𑁆𑀩𑁄 𑀩𑀼𑀤𑁆𑀥𑁄𑀯. 𑀅𑀬𑀁 𑀯𑀺𑀲𑁂𑀲𑁄.

𑀬𑁄𑀢𑁆𑀯𑁂𑀯.

𑀲𑀩𑁆𑀩𑀦𑀸𑀫𑀓𑀸𑀭𑀢𑁂 𑀧𑀞𑀫𑁄.

𑀲𑀩𑁆𑀩𑀸𑀤𑀻𑀦𑀫𑀓𑀸𑀭𑀢𑁄 ¶ 𑀧𑀭𑁄 𑀧𑀞𑀫𑁄 𑀬𑁄 𑀏𑀢𑁆𑀢𑀁 𑀬𑀸𑀢𑀺 𑀲𑀩𑁆𑀩𑁂.

‘‘𑀢𑀬𑁄 𑀦𑁂𑀯 𑀘 𑀲𑀩𑁆𑀩𑀦𑀸𑀫𑁂𑀳𑀻’’𑀢𑀺 𑀦𑀺𑀲𑁂𑀥𑀸 𑀲𑀲𑁆𑀫𑀸𑀲𑁆𑀫𑀺𑀦𑁆𑀦𑀁 𑀆𑀬 𑀆 𑀏 𑀦 𑀳𑁄𑀦𑁆𑀢𑀺. 𑀲𑀩𑁆𑀩𑀲𑁆𑀲.

𑀲𑀩𑁆𑀩𑀢𑁄 𑀦𑀁 𑀲𑀁𑀲𑀸𑀦𑀁.

𑀲𑀩𑁆𑀩𑀸𑀤𑀺𑀢𑁄 𑀦𑀁𑀇𑀘𑁆𑀘𑀲𑁆𑀲 𑀲𑀁𑀲𑀸𑀦𑀁 𑀳𑁄𑀦𑁆𑀢𑀺.

𑀅𑀓𑀸𑀭𑁄 𑀏𑀇𑀢𑁆𑀯𑁂𑀯.

𑀲𑀩𑁆𑀩𑀦𑀸𑀫𑀸𑀦𑀁 𑀦𑀫𑁆𑀳𑀺 𑀘.

𑀦𑀫𑁆𑀳𑀺 𑀲𑀩𑁆𑀩𑀸𑀤𑀻𑀦𑀫𑀓𑀸𑀭𑀲𑁆𑀲 𑀏 𑀳𑁄𑀢𑀺. 𑀲𑀩𑁆𑀩𑁂𑀲𑀁, 𑀲𑀩𑁆𑀩𑁂𑀲𑀸𑀦𑀁.

𑁧𑁪𑁯. 𑀇𑀢𑁆𑀣𑀺𑀬𑀁 ¶ 𑀆, 𑀲𑀩𑁆𑀩𑀸 𑀓𑀜𑁆𑀜𑀸𑀯. 𑀅𑀬𑀁 𑀯𑀺𑀲𑁂𑀲𑁄. 𑀯𑀸𑀢𑁆𑀯𑁂𑀯.

𑀖𑀧𑀢𑁄 𑀲𑁆𑀫𑀺𑀁𑀲𑀸𑀦𑀁 𑀲𑀁𑀲𑀸.

𑀖𑀧𑀲𑀜𑁆𑀜𑀸𑀢𑁄 𑀲𑀩𑁆𑀩𑀸𑀤𑀺𑀢𑁄 𑀲𑁆𑀫𑀺𑀁𑀲𑀸𑀦𑀁 𑀲𑀁𑀲𑀸 𑀯𑀸 𑀳𑁄𑀦𑁆𑀢𑀺.

‘‘𑀲𑀁𑀲𑀸𑀲𑁆𑀯𑁂𑀓𑀯𑀘𑀦𑁂𑀲𑀼 𑀘𑁂’’𑀢𑀺 𑀲𑀸𑀕𑀫𑁄.

𑀖𑁄 𑀭𑀲𑁆𑀲𑀁.

𑀏𑀓𑀯𑀘𑀦𑀲𑀁𑀲𑀸𑀲𑀼 𑀖𑁄 𑀭𑀲𑁆𑀲𑀁 𑀬𑀸𑀢𑀺. 𑀲𑀩𑁆𑀩𑀲𑁆𑀲𑀸, 𑀲𑀩𑁆𑀩𑀸𑀬. 𑀲𑀩𑁆𑀩𑀸𑀲𑀁, 𑀲𑀩𑁆𑀩𑀸𑀲𑀸𑀦𑀁. 𑀲𑀩𑁆𑀩𑀲𑁆𑀲𑀁, 𑀲𑀩𑁆𑀩𑀸𑀬𑀁. 𑀲𑀩𑁆𑀩𑀸𑀲𑀼.

𑀦𑁂𑀢𑀸𑀳𑀺 𑀲𑁆𑀫𑀺𑀫𑀸𑀬𑀬𑀸.

𑀖𑀧𑀜𑁆𑀜𑀸𑀳𑀺 𑀲𑀩𑁆𑀩𑀸𑀤𑀻𑀳𑀺 𑀲𑁆𑀫𑀺𑀦𑁄 𑀆𑀬 𑀬𑀸 𑀦 𑀳𑁄𑀦𑁆𑀢𑀺.

𑁧𑁫𑁦. 𑀦𑀧𑀼𑀁𑀲𑀓𑁂 ¶ 𑁋 𑀲𑀩𑁆𑀩𑀁. 𑀲𑀩𑁆𑀩𑀸𑀦𑀺. 𑀏𑀯𑀁 𑀤𑀼𑀢𑀺𑀬𑀸.

𑀲𑀩𑁆𑀩𑀸𑀤𑀬𑁄 𑀦𑀧𑀼𑀁𑀲𑀓𑁂 𑀢𑀢𑀺𑀬𑀸𑀤𑀻𑀲𑀼 𑀲𑀓𑀲𑀓𑀧𑀼𑀫𑀲𑀫𑀸. 𑀏𑀯𑀁 𑀬 - 𑀲𑀤𑁆𑀤𑀦𑁆𑀢𑀸.

𑁧𑁫𑁧. 𑀧𑀼𑀩𑁆𑀩𑀧𑀭𑀸𑀧𑀭𑁂𑀳𑀺 𑀢𑀼 𑀲𑁆𑀫𑀺𑀦𑁄 ‘‘𑀬𑀤𑀦𑀼𑀧𑀧𑀦𑁆𑀦𑀸 𑀦𑀺𑀧𑀸𑀢𑀦𑀸 𑀲𑀺𑀚𑁆𑀛𑀦𑁆𑀢𑀻’’𑀢𑀺 𑀅𑀦𑀺𑀢𑁆𑀣𑀺𑀬𑀁 𑀏 𑀯𑀸. 𑀧𑀼𑀩𑁆𑀩𑁂, 𑀧𑀼𑀩𑁆𑀩𑀲𑁆𑀫𑀺𑀁𑀇𑀘𑁆𑀘𑀸𑀤𑀺.

𑀏𑀓𑀲𑀤𑁆𑀤𑁄 𑀲𑀗𑁆𑀔𑁆𑀬𑀸𑀢𑀼𑀮𑁆𑀬𑀜𑁆𑀜𑀸𑀲𑀳𑀸𑀬𑀢𑁆𑀣𑁄. 𑀬𑀤𑀸 𑀲𑀗𑁆𑀔𑁆𑀬𑀢𑁆𑀣𑁄, 𑀢𑀤𑁂𑀓𑀯𑀘𑀦𑁄, 𑀅𑀜𑁆𑀜𑀢𑁆𑀣 𑀲𑀩𑁆𑀩𑀯𑀘𑀦𑁄 𑀘.

𑀬𑀸𑀤𑀻𑀦𑀫𑀸𑀮𑀧𑀦𑀁 𑀦𑀢𑁆𑀣𑀺.

𑁧𑁫𑁨. 𑀢, 𑀲𑀺.

𑀲𑀺𑀫𑁆𑀳𑀺 𑀲𑀁 𑀅𑀦𑀧𑀼𑀁𑀲𑀓𑀲𑁆𑀲𑁂𑀢𑁆𑀯𑁂𑀯.

𑀏𑀢𑀢𑁂𑀲𑀁 𑀢𑁄.

𑀲𑀺𑀫𑁆𑀳𑀺 𑀅𑀦𑀧𑀼𑀁𑀲𑀓𑀸𑀦𑀁 𑀏𑀢𑀢𑀇𑀘𑁆𑀘𑁂𑀢𑁂𑀲𑀁 𑀢𑀓𑀸𑀭𑀲𑁆𑀲 𑀲 𑀳𑁄𑀢𑀺. 𑀲𑁄.

𑀢𑀲𑁆𑀲 𑀯𑀸 𑀦𑀢𑁆𑀢𑀁 𑀲𑀩𑁆𑀩𑀢𑁆𑀣.

𑀢𑀺𑀮𑀺𑀗𑁆𑀕𑁂𑀲𑀼 ¶ 𑀲𑀩𑁆𑀩𑀸𑀤𑀻𑀦𑀁 𑀢𑀓𑀸𑀭𑀲𑁆𑀲 𑀦𑁄 𑀯𑀸 𑀳𑁄𑀢𑀺. 𑀦𑁂, 𑀢𑁂. 𑀲𑁂𑀲𑀁 𑀲𑀩𑁆𑀩𑀲𑀫𑀁, 𑀦𑀢𑁆𑀢𑀁𑀯 𑀯𑀺𑀲𑁂𑀲𑁄.

𑁧𑁫𑁩. 𑀇𑀢𑁆𑀣𑀺𑀬𑀁 𑁋 𑀲𑀸, 𑀦𑀸, 𑀦𑀸𑀬𑁄, 𑀢𑀸, 𑀢𑀸𑀬𑁄𑀇𑀘𑁆𑀘𑀸𑀤𑀺.

𑀯𑀸𑀢𑁆𑀯𑁂𑀯.

𑀢𑀢𑁄 𑀲𑀲𑁆𑀲 𑀲𑁆𑀲𑀸𑀬.

𑀢𑀸𑀏𑀢𑀸𑀇𑀫𑀸𑀳𑀺 𑀲𑀲𑁆𑀲 𑀲𑁆𑀲𑀸𑀬𑁄 𑀯𑀸 𑀳𑁄𑀢𑀺.

𑀲𑀁𑀲𑀸𑀲𑁆𑀯𑁂𑀓𑀯𑀘𑀦𑁂𑀲𑀼 𑀇𑀇𑀢𑁆𑀯𑁂𑀯.

𑀢𑀲𑁆𑀲𑀸 𑀯𑀸.

𑀏𑀓𑀯𑀘𑀦𑀲𑀁𑀲𑀸𑀲𑀼 𑀢𑀸𑀲𑀤𑁆𑀤𑀲𑁆𑀲 𑀆 𑀇𑀢𑁆𑀢𑀁 𑀯𑀸 𑀬𑀸𑀢𑀺. 𑀢𑀺𑀲𑁆𑀲𑀸𑀬, 𑀢𑀺𑀲𑁆𑀲𑀸, 𑀢𑀲𑁆𑀲𑀸, 𑀢𑀸𑀬. 𑀢𑀸𑀲𑀁, 𑀢𑀸𑀲𑀸𑀦𑀁. 𑀢𑀺𑀲𑁆𑀲𑀁, 𑀢𑀲𑁆𑀲𑀁, 𑀢𑀸𑀬𑀁. 𑀢𑀸𑀲𑀼.

𑁧𑁫𑁪. 𑀦𑀧𑀼𑀁𑀲𑀓𑁂 ¶ 𑁋 𑀢𑀁𑀇𑀘𑁆𑀘𑀸𑀤𑀺.

𑁧𑁫𑁫. 𑀏𑀲𑁄. 𑀲𑁂𑀲𑀁 𑀲𑀩𑁆𑀩𑀲𑀫𑀁.

𑁧𑁫𑁬. 𑀇𑀢𑁆𑀣𑀺𑀬𑀁 𑁋 𑀏𑀲𑀸.

𑀲𑀁𑀲𑀸𑀲𑁆𑀯𑁂𑀓𑀯𑀘𑀦𑁂𑀲𑁆𑀯𑁂𑀢𑁆𑀯𑁂𑀯.

𑀏𑀢𑀺𑀫𑀸𑀲𑀫𑀺.

𑀏𑀓𑀯𑀘𑀦𑀲𑀁𑀲𑀸𑀲𑀼 𑀏𑀢𑀸𑀇𑀫𑀸𑀦𑀫𑀦𑁆𑀢𑀲𑁆𑀲 𑀇 𑀳𑁄𑀢𑀺. 𑀏𑀢𑀺𑀲𑁆𑀲𑀸𑀬, 𑀏𑀢𑀺𑀲𑀸, 𑀏𑀢𑀸𑀬. 𑀏𑀢𑀸𑀲𑀁, 𑀏𑀢𑀸𑀲𑀸𑀦𑀁. 𑀏𑀢𑀺𑀲𑁆𑀲𑀁, 𑀏𑀢𑀲𑁆𑀲𑀁, 𑀏𑀢𑀸𑀬𑀁. 𑀏𑀢𑀸𑀲𑀼. 𑀲𑁂𑀲𑀁 𑀲𑀩𑁆𑀩𑀸𑀯.

𑁧𑁫𑁭. 𑀦𑀧𑀼𑀁𑀲𑀓𑁂 𑁋 𑀏𑀢𑀁 𑀇𑀘𑁆𑀘𑀸𑀤𑀺.

𑁧𑁫𑁮. 𑀇𑀫, 𑀲𑀺.

‘‘𑀅𑀦𑀧𑀼𑀁𑀲𑀓𑀲𑁆𑀲𑀸𑀬𑀁 𑀲𑀺𑀫𑁆𑀳𑀻’’𑀢𑀺 𑀇𑀫𑀲𑁆𑀲 𑀅𑀬𑀁. 𑀲𑀺𑀮𑁄𑀧𑁄. 𑀅𑀬𑀁, 𑀇𑀫𑁂. 𑀇𑀫𑀁, 𑀇𑀫𑁂.

‘‘𑀅𑀦𑀺𑀫𑀺 𑀦𑀸𑀫𑁆𑀳𑀺 𑀘𑁂’’𑀢𑀺 𑀇𑀫𑀲𑁆𑀲 𑀅𑀦𑁄, 𑀇𑀫𑀺 𑀘. 𑀅𑀦𑁂𑀦, 𑀇𑀫𑀺𑀦𑀸.

‘‘𑀲𑀩𑁆𑀩𑀲𑁆𑀲𑀺𑀫𑀲𑁆𑀲𑁂 𑀯𑀸’’𑀢𑀺 𑀲𑀼𑀦𑀁𑀳𑀺𑀲𑀼 𑀏𑀯𑀸. 𑀏𑀳𑀺, 𑀇𑀫𑁂𑀳𑀺. 𑀯𑀸 𑀲𑁆𑀫𑀸𑀲𑀲𑁆𑀫𑀺𑀁𑀲𑀁𑀲𑀸𑀲𑁆𑀯𑀢𑁆𑀢𑀦𑁆𑀢𑁆𑀯𑁂𑀯.

𑀇𑀫𑀲𑀤𑁆𑀤𑀲𑁆𑀲 𑀘.

𑀲𑀲𑁆𑀫𑀸𑀲𑁆𑀫𑀺𑀁𑀲𑀁𑀲𑀸𑀲𑀼 ¶ 𑀇𑀫𑀲𑁆𑀲 𑀅𑀢𑁆𑀢𑀁 𑀯𑀸 𑀳𑁄𑀢𑀺. 𑀅𑀲𑁆𑀲, 𑀇𑀫𑀲𑁆𑀲. 𑀏𑀲𑀁, 𑀏𑀲𑀸𑀦𑀁, 𑀇𑀫𑁂𑀲𑀁, 𑀇𑀫𑁂𑀲𑀸𑀦𑀁. 𑀅𑀲𑁆𑀫𑀸, 𑀇𑀫𑀫𑁆𑀳𑀸, 𑀇𑀫𑀲𑁆𑀫𑀸. 𑀏𑀳𑀺, 𑀇𑀫𑁂𑀳𑀺. 𑀅𑀲𑁆𑀫𑀺𑀁, 𑀇𑀫𑀫𑁆𑀳𑀺, 𑀇𑀫𑀲𑁆𑀫𑀺𑀁. 𑀏𑀲𑀼, 𑀇𑀫𑁂𑀲𑀼.

𑀅𑀢𑁆𑀢𑀧𑀓𑁆𑀔𑁂 𑁋 ‘‘𑀦 𑀢𑀺𑀫𑁂𑀳𑀺 𑀓𑀢𑀸𑀓𑀸𑀭𑁂𑀳𑀻’’𑀢𑀺 𑀲𑁆𑀫𑀸𑀲𑁆𑀫𑀺𑀦𑁆𑀦𑀁 𑀫𑁆𑀳𑀸𑀫𑁆𑀳𑀺 𑀦 𑀲𑀺𑀚𑁆𑀛𑀦𑁆𑀢𑁂.

𑁧𑁫𑁯. 𑀇𑀢𑁆𑀣𑀺𑀬𑀁 𑁋 𑀅𑀬𑀁. 𑀲𑁂𑀲𑀁 𑀏𑀢𑀸𑀯, 𑀲𑀁𑀲𑀸𑀲𑁆𑀯𑀢𑁆𑀢𑀁𑀯 𑀯𑀺𑀲𑁂𑀲𑁄.

𑁧𑁬𑁦. 𑀦𑀧𑀼𑀁𑀲𑀓𑁂 𑁋 𑀲𑀯𑀺𑀪𑀢𑁆𑀢𑀺𑀲𑁆𑀲 𑀯𑀸𑀢𑁆𑀯𑁂𑀯.

‘‘𑀇𑀫𑀲𑁆𑀲𑀺𑀤𑀫𑀁𑀲𑀺𑀲𑀼 𑀦𑀧𑀼𑀁𑀲𑀓𑁂’’𑀢𑀺 𑀇𑀫𑀲𑁆𑀲 𑀇𑀤𑀁 𑀯𑀸. 𑀇𑀤𑀁, 𑀇𑀫𑀁 𑀇𑀫𑁂, 𑀇𑀫𑀸𑀦𑀺. 𑀏𑀯𑀁 𑀤𑀼𑀢𑀺𑀬𑀸.

𑁧𑁬𑁧. 𑀅𑀫𑀼 ¶ , 𑀲𑀺.

𑀯𑀸 𑀅𑀦𑀧𑀼𑀁𑀲𑀓𑀲𑁆𑀲 𑀲𑀺𑀫𑁆𑀳𑀺𑀢𑁆𑀯𑁂𑀯.

‘‘𑀅𑀫𑀼𑀲𑁆𑀲 𑀫𑁄 𑀲𑀁’’𑀢𑀺 𑀫𑀲𑁆𑀲 𑀲𑁄 𑀯𑀸, 𑀲𑀺𑀮𑁄𑀧𑁄. 𑀅𑀲𑀼.

‘‘𑀲𑀩𑁆𑀩𑀢𑁄 𑀓𑁄’’𑀢𑀺 𑀲𑀩𑁆𑀩𑀦𑀸𑀫𑀢𑁄 𑀓𑀸𑀕𑀫𑁄. ‘‘𑀲𑁄’’𑀢𑀺 𑀑, 𑀅𑀫𑀼𑀓𑁄, 𑀧𑀓𑁆𑀔𑁂 𑁋 𑀅𑀫𑀼. 𑀅𑀫𑀽, 𑀅𑀫𑀼𑀬𑁄.

𑀧𑀼𑀩𑁆𑀩𑁂𑀯 ¶ 𑀬𑁄𑀦𑀁 𑀯𑁄𑀓𑀸𑀭𑁄 𑀦. 𑀅𑀫𑀼𑀁. 𑀅𑀫𑀽, 𑀅𑀫𑀼𑀬𑁄. 𑀲𑁂𑀲𑀁 𑀪𑀺𑀓𑁆𑀔𑀽𑀯 𑀲𑀩𑁆𑀩𑀸𑀤𑀺𑀓𑀸𑀭𑀺𑀬𑀸𑀜𑁆𑀜𑀢𑁆𑀭.

𑁧𑁬𑁨. 𑀇𑀢𑁆𑀣𑀺𑀬𑀁 𑁋 𑀅𑀲𑀼. 𑀲𑁂𑀲𑀁 𑀬𑀸𑀕𑀼𑀲𑀫𑀁. 𑀯𑀺𑀲𑁂𑀲𑁄𑀬𑀁 𑁋 𑀅𑀫𑀼𑀲𑁆𑀲𑀸, 𑀅𑀫𑀼𑀬𑀸. 𑀅𑀫𑀽𑀲𑀁, 𑀅𑀫𑀽𑀲𑀸𑀦𑀁. 𑀅𑀫𑀼𑀲𑁆𑀲𑀁, 𑀅𑀫𑀼𑀬𑀁. 𑀅𑀫𑀽𑀲𑀼.

𑁧𑁬𑁩. 𑀦𑀧𑀼𑀁𑀲𑀓𑁂 𑁋 𑀲𑀯𑀺𑀪𑀢𑁆𑀢𑀺𑀲𑁆𑀲 𑀅𑀁𑀲𑀺𑀲𑀼 𑀦𑀧𑀼𑀁𑀲𑀓𑁂𑀢𑁆𑀯𑁂𑀯.

‘‘𑀅𑀫𑀼𑀲𑁆𑀲𑀸𑀤𑀼𑀁’’𑀢𑀺 𑀅𑀤𑀼𑀁. 𑀅𑀤𑀼𑀁. 𑀅𑀫𑀽, 𑀅𑀫𑀽𑀦𑀺. 𑀏𑀯𑀁 𑀤𑀼𑀢𑀺𑀬𑀸.

𑁧𑁬𑁪. ‘‘𑀲𑁂𑀲𑁂𑀲𑀼 𑀘𑁂’’𑀢𑀺 𑀲𑀩𑁆𑀩𑀢𑁆𑀣 𑀓𑀺𑀲𑁆𑀲 𑀓𑁄. 𑀓𑁄, 𑀓𑀸, 𑀓𑀁 𑀇𑀘𑁆𑀘𑀸𑀤𑀺. 𑀮𑀺𑀗𑁆𑀕𑀢𑁆𑀢𑀬𑁂 𑀲𑀩𑁆𑀩𑀲𑀫𑁄.

𑁧𑁬𑁫. 𑀢𑀼𑀫𑁆𑀳 ¶ , 𑀲𑀺, 𑀅𑀫𑁆𑀳, 𑀲𑀺.

𑀲𑀯𑀺𑀪𑀢𑁆𑀢𑀺𑀲𑁆𑀲 𑀢𑀼𑀫𑁆𑀳𑀫𑁆𑀳𑀸𑀦𑀦𑁆𑀢𑁆𑀬𑀥𑀺𑀓𑀸𑀭𑁄.

𑀢𑁆𑀯𑀫𑀳𑀁 𑀲𑀺𑀫𑁆𑀳𑀺 𑀘.

𑀲𑀺𑀫𑁆𑀳𑀺 𑀲𑀯𑀺𑀪𑀢𑁆𑀢𑀻𑀦𑀁 𑀢𑀼𑀫𑁆𑀳𑀫𑁆𑀳𑀸𑀦𑀁 𑀢𑁆𑀯𑀁 𑀅𑀳𑀁 𑀳𑁄𑀦𑁆𑀢𑀺. 𑀘𑀲𑀤𑁆𑀤𑁂𑀦 𑀢𑀼𑀫𑁆𑀳𑀲𑁆𑀲 𑀢𑀼𑀯𑀁 𑀘. 𑀢𑁆𑀯𑀁, 𑀢𑀼𑀯𑀁, 𑀅𑀳𑀁. 𑀬𑁄 𑁋 𑀢𑀼𑀫𑁆𑀳𑁂.

‘‘𑀫𑀬𑀁 𑀬𑁄𑀫𑁆𑀳𑀺 𑀧𑀞𑀫𑁂’’𑀢𑀺 𑀅𑀫𑁆𑀳𑀲𑁆𑀲 𑀫𑀬𑀁 𑀳𑁄𑀢𑀺. 𑀫𑀬𑀁.

𑁧𑁬𑁬. ‘‘𑀢𑀁𑀫𑀫𑀫𑁆𑀳𑀻’’𑀢𑀺 𑀅𑀫𑁆𑀳𑀺 𑀢𑀁 𑀫𑀁 𑀳𑁄𑀦𑁆𑀢𑀺.

‘‘𑀢𑀯𑀁 𑀫𑀫𑀜𑁆𑀘 𑀦𑀯𑀸’’𑀢𑀺 𑀅𑀫𑁆𑀳𑀺 𑀢𑀯𑀁 𑀫𑀫𑀜𑁆𑀘 𑀦𑀯𑀸.

‘‘𑀢𑀼𑀫𑁆𑀳𑀲𑁆𑀲 𑀢𑀼𑀯𑀁 𑀢𑁆𑀯𑀫𑀫𑁆𑀳𑀻’’𑀢𑀺 𑀢𑀼𑀫𑁆𑀳𑀲𑁆𑀲 𑀢𑀼𑀯𑀁, 𑀢𑁆𑀯𑀜𑁆𑀘. 𑀢𑀁, 𑀢𑀯𑀁, 𑀢𑀼𑀯𑀁, 𑀢𑁆𑀯𑀁, 𑀫𑀁, 𑀫𑀫𑀁.

𑀆𑀓𑀦𑁆𑀢𑁆𑀯𑁂𑀯.

‘‘𑀯𑀸 𑀬𑁄𑀧𑁆𑀧𑀞𑀫𑁄’’𑀢𑀺 𑀤𑀼𑀢𑀺𑀬𑀸𑀬𑁄𑀲𑁆𑀲 𑀆𑀓𑀁 𑀯𑀸. 𑀢𑀼𑀫𑁆𑀳𑀸𑀓𑀁, 𑀢𑀼𑀫𑁆𑀳𑁂. 𑀅𑀫𑁆𑀳𑀸𑀓𑀁, 𑀅𑀫𑁆𑀳𑁂.

𑁧𑁬𑁭. ‘‘𑀦𑀸𑀫𑁆𑀳𑀺 𑀢𑀬𑀸 𑀫𑀬𑀸’’𑀢𑀺 𑀦𑀸𑀫𑁆𑀳𑀺 𑀢𑀬𑀸 𑀫𑀬𑀸 𑀳𑁄𑀦𑁆𑀢𑀺. ‘‘𑀢𑀬𑀸𑀢𑀬𑀻𑀦𑀁 𑀢𑀓𑀸𑀭𑁄 𑀢𑁆𑀯𑀢𑁆𑀢𑀁𑀯𑀸’’𑀢𑀺 𑀢𑀲𑁆𑀲 𑀢𑁆𑀯𑁄 𑀯𑀸. 𑀢𑁆𑀯𑀬𑀸, 𑀢𑀬𑀸, 𑀫𑀬𑀸. 𑀢𑀼𑀫𑁆𑀳𑁂𑀳𑀺, 𑀅𑀫𑁆𑀳𑁂𑀳𑀺.

𑁧𑁬𑁮. ‘‘𑀢𑀯 ¶ 𑀫𑀫 𑀲𑁂’’𑀢𑀺 𑀲𑁂 𑀢𑀯 𑀫𑀫 𑀳𑁄𑀦𑁆𑀢𑀺.

‘‘𑀢𑀼𑀬𑁆𑀳𑀁 𑀫𑀬𑁆𑀳𑀁 𑀘𑁂’’𑀢𑀺 𑀲𑁂 𑀢𑀼𑀬𑁆𑀳𑀁 𑀫𑀬𑁆𑀳𑀜𑁆𑀘.

‘‘𑀲𑀲𑁆𑀲𑀁’’𑀢𑀺 𑀲𑀲𑁆𑀲 𑀅𑀁 𑀯𑀸.

‘‘𑀅𑀫𑁆𑀳𑀲𑁆𑀲 𑀫𑀫𑀁 𑀲𑀯𑀺𑀪𑀢𑁆𑀢𑀺𑀲𑁆𑀲 𑀲𑁂’’𑀢𑀺 𑀲𑁂 𑀅𑀫𑁆𑀳𑀲𑁆𑀲 𑀫𑀫𑀁 𑀘. 𑀢𑀯, 𑀢𑀼𑀬𑁆𑀳𑀁, 𑀢𑀼𑀫𑁆𑀳𑀁, 𑀫𑀫, 𑀫𑀬𑁆𑀳𑀁, 𑀅𑀫𑁆𑀳𑀁, 𑀫𑀫𑀁.

‘‘𑀢𑀼𑀫𑁆𑀳𑀫𑁆𑀳𑁂𑀳𑀺 𑀦𑀫𑀸𑀓𑀁’’𑀢𑀺 𑀦𑀁𑀯𑀘𑀦𑀲𑁆𑀲 𑀆𑀓𑀁. 𑀢𑀼𑀫𑁆𑀳𑀸𑀓𑀁, 𑀅𑀫𑁆𑀳𑀸𑀓𑀁. 𑀲𑁆𑀫𑀸𑀦𑀸𑀯.

𑁧𑁬𑁯. ‘‘𑀢𑀼𑀫𑁆𑀳𑀸𑀫𑁆𑀳𑀸𑀦𑀁 𑀢𑀬𑀺 𑀫𑀬𑀻’’𑀢𑀺 𑀲𑁆𑀫𑀺𑀫𑁆𑀳𑀺 𑀢𑀬𑀺 𑀫𑀬𑀺 𑀳𑁄𑀦𑁆𑀢𑀺. 𑀢𑁆𑀯𑁂 𑀓𑀢𑁂 - 𑀢𑁆𑀯𑀬𑀺, 𑀢𑀬𑀺, 𑀫𑀬𑀺, 𑀢𑀼𑀫𑁆𑀳𑁂𑀲𑀼, 𑀅𑀫𑁆𑀳𑁂𑀲𑀼. 𑀮𑀺𑀗𑁆𑀕𑀢𑁆𑀢𑀬𑁂 𑀲𑀫𑀁.

𑁧𑁭𑁦. 𑀦𑀯𑀸𑀢𑁆𑀯𑁂𑀯.

𑀧𑀤𑀢𑁄 𑀤𑀼𑀢𑀺𑀬𑀸 𑀘𑀢𑀼𑀢𑁆𑀣𑀻 𑀙𑀝𑁆𑀞𑀻𑀲𑀼 𑀯𑁄𑀦𑁄.

𑀅𑀢𑁆𑀣𑀚𑁆𑀚𑁄𑀢𑀓𑀸 𑀯𑀡𑁆𑀡𑀸 𑀧𑀤𑀁, 𑀤𑀼𑀢𑀺𑀬𑀸 𑀘𑀢𑀼𑀢𑁆𑀣𑀻 𑀙𑀝𑁆𑀞𑀻 𑀩𑀳𑀼𑀯𑀘𑀦𑁂𑀲𑀼 𑀧𑀭𑁂𑀲𑀼 𑀧𑀤𑀲𑁆𑀫𑀸 𑀧𑀭𑁂𑀲𑀁 𑀲𑀯𑀺𑀪𑀢𑁆𑀢𑀻𑀦𑀁 𑀢𑀼𑀫𑁆𑀳𑀸𑀫𑁆𑀳𑀸𑀦𑀁 𑀯𑁄𑀦𑁄𑀓𑀸𑀭𑀸 𑀦𑀯𑀸 𑀳𑁄𑀦𑁆𑀢𑀺.

𑀭𑀓𑁆𑀔𑀢𑀼 ¶ 𑀯𑁄, 𑀧𑀲𑁆𑀲𑀢𑀼 𑀦𑁄, 𑀤𑀤𑀸𑀢𑀺 𑀯𑁄, 𑀤𑀤𑀸𑀳𑀺 𑀦𑁄, 𑀲𑀤𑁆𑀥𑀸 𑀯𑁄, 𑀲𑀢𑁆𑀣𑀸 𑀦𑁄.

𑀦𑀯𑀸𑀢𑀺 𑀓𑀺𑀁, 𑀏𑀲𑁄 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸.

𑁧𑁭𑁧. 𑀧𑀤𑀢𑁄𑀢𑁆𑀬𑀥𑀺𑀓𑀸𑀭𑁄.

‘‘𑀢𑁂𑀫𑁂𑀓𑀯𑀘𑀦𑁂𑀲𑀼 𑀘𑁂’’𑀢𑀺 𑀘𑀢𑀼𑀢𑁆𑀣𑀻𑀙𑀝𑁆𑀞𑁂𑀓𑀯𑀘𑀦𑁂𑀲𑀼 𑀢𑁂 𑀫𑁂 𑀳𑁄𑀦𑁆𑀢𑀺. 𑀤𑀤𑀸𑀫𑀺 𑀢𑁂, 𑀤𑀤𑀸𑀳𑀺 𑀫𑁂, 𑀇𑀤𑀁 𑀢𑁂, 𑀅𑀬𑀁 𑀫𑁂.

‘‘𑀦𑀅𑀫𑁆𑀳𑀻’’𑀢𑀺 ¶ 𑀅𑀫𑁆𑀳𑀺 𑀦𑀺𑀲𑁂𑀥𑁄. 𑀧𑀲𑁆𑀲𑁂𑀣 𑀢𑀁, 𑀅𑀚𑀺𑀦𑀺 𑀫𑀁.

‘‘𑀯𑀸 𑀢𑀢𑀺𑀬𑁂 𑀘𑁂’’𑀢𑀺 𑀢𑀢𑀺𑀬𑁂𑀓𑀯𑀘𑀦𑁂 𑀢𑁂 𑀫𑁂 𑀯𑀸 𑀳𑁄𑀦𑁆𑀢𑀺. 𑀓𑀢𑀁 𑀢𑁂 𑀢𑀬𑀸 𑀯𑀸. 𑀓𑀢𑀁 𑀫𑁂 𑀫𑀬𑀸 𑀯𑀸.

‘‘𑀩𑀳𑀼𑀯𑀘𑀦𑁂𑀲𑀼 𑀯𑁄𑀦𑁄’’𑀢𑀺 𑀢𑀢𑀺𑀬𑀸𑀩𑀳𑀼𑀯𑀘𑀦𑁂𑀲𑀼 𑀯𑁄 𑀦𑁄 𑀳𑁄𑀦𑁆𑀢𑀺. 𑀩𑀳𑀼𑀯𑀘𑀦𑁂 𑀧𑀞𑀫𑁂 𑀬𑁄𑀫𑁆𑀳𑀺 𑀘. 𑀓𑀢𑀁 𑀯𑁄, 𑀓𑀢𑀁 𑀦𑁄, 𑀕𑀸𑀫𑀁 𑀯𑁄 𑀕𑀘𑁆𑀙𑁂𑀬𑁆𑀬𑀸𑀣, 𑀕𑀸𑀫𑀁 𑀦𑁄 𑀕𑀘𑁆𑀙𑁂𑀬𑁆𑀬𑀸𑀫.

𑀲𑀗𑁆𑀔𑁆𑀬𑀸

𑁧𑁭𑁨. 𑀲𑀗𑁆𑀔𑁆𑀬𑀸 𑀯𑀼𑀘𑁆𑀘𑀢𑁂.

𑀏𑀓𑀲𑀤𑁆𑀤𑁄 𑀲𑀩𑁆𑀩𑀦𑀸𑀫𑁂𑀲𑀼 𑀯𑀼𑀢𑁆𑀢𑁄.

𑁧𑁭𑁩. 𑀤𑁆𑀯𑀸𑀤𑀬𑁄 ¶ 𑀅𑀝𑁆𑀞𑀸𑀭𑀲𑀦𑁆𑀢𑀸 𑀩𑀳𑀼𑀯𑀘𑀦𑀦𑁆𑀢𑀸.

𑀲𑀯𑀺𑀪𑀢𑁆𑀢𑀺𑀲𑁆𑀲, 𑀇𑀢𑁆𑀣𑀺𑀧𑀼𑀫𑀦𑀧𑀼𑀁𑀲𑀓𑀲𑀗𑁆𑀔𑁆𑀬𑀦𑁆𑀢𑀺 𑀘𑀸𑀥𑀺𑀓𑀸𑀭𑁄.

‘‘𑀬𑁄𑀲𑀼 𑀤𑁆𑀯𑀺𑀦𑁆𑀦𑀁 𑀤𑁆𑀯𑁂 𑀘𑁂’’𑀢𑀺 𑀤𑁆𑀯𑀺𑀲𑁆𑀲 𑀤𑁆𑀯𑁂 𑀳𑁄𑀢𑀺. 𑀤𑁆𑀯𑁂, 𑀤𑁆𑀯𑁂, 𑀤𑁆𑀯𑀻𑀪𑀺, 𑀤𑁆𑀯𑀻𑀳𑀺.

𑀦𑁄 𑀘 𑀤𑁆𑀯𑀸𑀤𑀺𑀢𑁄 𑀦𑀫𑁆𑀳𑀺.

𑀦𑀫𑁆𑀳𑀺 𑀤𑁆𑀯𑀸𑀤𑀺𑀢𑁄 𑀦𑀓𑀸𑀭𑀸𑀕𑀫𑁄 𑀳𑁄𑀢𑀺. 𑀤𑁆𑀯𑀺𑀦𑁆𑀦𑀁, 𑀤𑁆𑀯𑀻𑀲𑀼, 𑀮𑀺𑀗𑁆𑀕𑀢𑁆𑀢𑀬𑁂 𑀲𑀫𑀁.

𑁧𑁭𑁪. 𑀢𑀺𑀘𑀢𑀼𑀦𑁆𑀦𑀁 𑀢𑀺𑀲𑁆𑀲𑁄 𑀘𑀢𑀲𑁆𑀲𑁄 𑀢𑀬𑁄 𑀘𑀢𑁆𑀢𑀸𑀭𑁄 𑀢𑀻𑀡𑀺 𑀘𑀢𑁆𑀢𑀸𑀭𑀺.

𑀬𑁄𑀲𑀼 𑀇𑀢𑁆𑀣𑀺𑀧𑀼𑀫𑀦𑀧𑀼𑀁𑀲𑀓𑁂𑀲𑀼 𑀲𑀯𑀺𑀪𑀢𑁆𑀢𑀻𑀦𑀁 𑀢𑀺𑀘𑀢𑀼𑀦𑁆𑀦𑀁 𑀢𑀺𑀲𑁆𑀲𑁄 𑀘𑀢𑀲𑁆𑀲𑁄 𑀆𑀤𑀬𑁄 𑀳𑁄𑀦𑁆𑀢𑀺. 𑀢𑀬𑁄, 𑀢𑀬𑁄, 𑀢𑀻𑀪𑀺, 𑀢𑀻𑀳𑀺, 𑀢𑀺𑀦𑁆𑀦𑀁.

‘‘𑀇𑀡𑁆𑀡𑀫𑀺𑀡𑁆𑀡𑀦𑁆𑀦𑀁 𑀢𑀻𑀳𑀺 𑀲𑀗𑁆𑀔𑁆𑀬𑀸𑀳𑀻’’𑀢𑀺 𑀢𑀺𑀲𑀤𑁆𑀤𑀢𑁄 𑀦𑀁𑀇𑀘𑁆𑀘𑀲𑁆𑀲 𑀇𑀡𑁆𑀡𑀁 𑀇𑀡𑁆𑀡𑀦𑁆𑀦𑀁 𑀘. 𑀢𑀺𑀡𑁆𑀡𑀁, 𑀢𑀺𑀡𑁆𑀡𑀦𑁆𑀦𑀁, 𑀢𑀻𑀲𑀼.

𑁧𑁭𑁫. 𑀇𑀢𑁆𑀣𑀺𑀬𑀁-𑀢𑀺𑀲𑁆𑀲𑁄 ¶ , 𑀢𑀺𑀲𑁆𑀲𑁄, 𑀢𑀻𑀪𑀺, 𑀢𑀻𑀳𑀺.

‘‘𑀦𑁄 𑀘𑀸’’𑀤𑁄 𑀘𑀓𑀸𑀭𑁂𑀦 𑀦𑀫𑁆𑀳𑀺 𑀲𑁆𑀲𑀁𑀆𑀕𑀫𑁄, 𑀯𑀕𑁆𑀕𑀦𑁆𑀢𑁂𑀢𑀺𑀲𑁆𑀲𑀦𑀁, 𑀢𑀻𑀲𑀼.

𑁧𑁭𑁬. 𑀦𑀧𑀼𑀁𑀲𑀓𑁂-𑀢𑀻𑀡𑀺, 𑀢𑀻𑀡𑀺, 𑀢𑀻𑀳𑀺.

𑁧𑁭𑁭. 𑀘𑀢𑁆𑀢𑀸𑀭𑁄.

‘‘𑀑𑀲𑀭𑁂 𑀘𑁂’’𑀢𑀻𑀳 𑀘𑀓𑀸𑀭𑁂𑀦 𑀬𑁄𑀲𑀼 𑀉𑀲𑁆𑀲 𑀉𑀭𑁄. ‘‘𑀢𑀢𑁄 𑀬𑁄𑀦𑀫𑁄𑀢𑀽’’𑀢𑀻𑀳 𑀢𑀼𑀓𑀸𑀭𑁂𑀦 𑀬𑁄𑀦𑀁 𑀑. 𑀘𑀢𑀼𑀭𑁄. 𑀏𑀯𑀁 𑀤𑀼𑀢𑀺𑀬𑀸. 𑀘𑀢𑀽𑀳𑀺, 𑀘𑀢𑀼𑀦𑁆𑀦𑀁, 𑀘𑀢𑀽𑀲𑀼.

𑁧𑁭𑁮. 𑀇𑀢𑁆𑀣𑀺𑀬𑀁 ¶ , 𑀘𑀢𑀲𑁆𑀲𑁄, 𑀘𑀢𑀲𑁆𑀲𑁄, 𑀘𑀢𑀽𑀳𑀺. 𑀧𑀼𑀩𑁆𑀩𑁂𑀯 𑀲𑁆𑀲𑀁𑀆𑀕𑀫𑁄. 𑀬𑀤𑀸𑀤𑀺𑀦𑀸 𑀉𑀲𑁆𑀲 𑀅𑀢𑁆𑀢𑀁. 𑀘𑀢𑀲𑁆𑀲𑀦𑁆𑀦𑀁, 𑀘𑀢𑀽𑀲𑀼.

𑁧𑁭𑁯. 𑀦𑀧𑀼𑀁𑀲𑀓𑁂, 𑀘𑀢𑁆𑀢𑀸𑀭𑀺, 𑀘𑀢𑁆𑀢𑀸𑀭𑀺.

𑁧𑁮𑁦. ‘‘𑀧𑀜𑁆𑀘𑀸𑀤𑀻𑀦 𑀫𑀓𑀸𑀭𑁄’’𑀢𑀺 𑀬𑁄𑀲𑀼 𑀲𑀯𑀺𑀪𑀢𑁆𑀢𑀺𑀲𑁆𑀲 𑀧𑀜𑁆𑀘𑀸𑀤𑁆𑀬𑀦𑁆𑀢𑀲𑁆𑀲 𑀅𑀢𑁆𑀢𑀁. 𑀧𑀜𑁆𑀘, 𑀧𑀜𑁆𑀘.

‘‘𑀧𑀜𑁆𑀘𑀸𑀤𑀻𑀦 𑀫𑀢𑁆𑀢𑀁’’𑀢𑀺 𑀲𑀼𑀦𑀁𑀳𑀺𑀲𑀼 𑀧𑀜𑁆𑀘𑀸𑀤𑁆𑀬𑀦𑁆𑀢𑀲𑁆𑀲 𑀅𑀢𑁆𑀢𑀁. 𑀏𑀤𑀻𑀖𑀸𑀦𑀫𑀧𑀯𑀸𑀤𑁄𑀬𑀁. 𑀧𑀜𑁆𑀘𑀳𑀺, 𑀧𑀜𑁆𑀘𑀦𑁆𑀦𑀁, 𑀧𑀜𑁆𑀘𑀲𑀼. 𑀮𑀺𑀗𑁆𑀕𑀢𑁆𑀢𑀬𑁂 𑀲𑀫𑀁.

𑁧𑁮𑁧. 𑀏𑀯𑀁 𑀙 𑀲𑀢𑁆𑀢 𑀅𑀝𑁆𑀞 𑀦𑀯 𑀤𑀲𑀸𑀤𑀬𑁄 𑀅𑀝𑁆𑀞𑀸𑀭𑀲𑀦𑁆𑀢𑀸.

𑁧𑁮𑁨. 𑀯𑀻𑀲𑀢𑁆𑀬𑀸𑀤𑀬𑁄 ¶ 𑀆𑀦𑀯𑀼𑀢𑀺𑀬𑀸 𑀇𑀢𑁆𑀣𑀺𑀮𑀺𑀗𑁆𑀕𑀸 𑀏𑀓𑀯𑀘𑀦𑀦𑁆𑀢𑀸, 𑀯𑀻𑀲𑀢𑀺 𑀭𑀢𑁆𑀢𑀻𑀯. 𑀏𑀯𑀁 𑀢𑀺𑀁𑀲𑀢𑀺.

𑀘𑀢𑁆𑀢𑀸𑀮𑀻𑀲𑀁 𑀧𑀜𑁆𑀜𑀸𑀲𑀁 𑀲𑀤𑁆𑀤𑁂𑀳𑀺 𑀧𑀭𑀸𑀲𑀁 𑀲𑀩𑁆𑀩𑀸𑀲𑀁 𑀯𑀺𑀪𑀢𑁆𑀢𑀻𑀦𑀁 ‘‘𑀲𑀩𑁆𑀩𑀸𑀲𑀫𑀸’’𑀤𑁄𑀢𑀻𑀳 𑀆𑀤𑀺𑀲𑀤𑁆𑀤𑁂𑀦 𑀮𑁄𑀧𑁄, 𑀲𑀝𑁆𑀞𑀺 𑀯𑀻𑀲𑀢𑀻 𑀯. 𑀏𑀯𑀁 𑀲𑀢𑁆𑀢𑀢𑀺 𑀅𑀲𑀻𑀢𑀺 𑀦𑀯𑀼𑀢𑀺.

𑀲𑀢𑀁 𑀦𑀧𑀼𑀁𑀲𑀓𑀫𑁂𑀓𑀯𑀘𑀦𑀦𑁆𑀢𑀁. 𑀏𑀯𑀁 𑀲𑀳𑀲𑁆𑀲𑀸𑀤𑀺.

𑀓𑁄𑀝𑀺 𑀯𑀻𑀲𑀢𑀻𑀯.

𑁧𑁮𑁩. 𑀭𑀸𑀲𑀺𑀪𑁂𑀤𑁂 ¶ 𑀢𑀼 𑀲𑀩𑁆𑀩𑀢𑁆𑀣 𑀩𑀳𑀼𑀯𑀘𑀦𑀫𑁆𑀧𑀺. 𑀬𑀣𑀸-𑀤𑁆𑀯𑁂𑀯𑀻𑀲𑀢𑀺𑀬𑁄 𑀩𑀼𑀤𑁆𑀥𑀤𑀦𑁆𑀢𑀸. 𑀢𑀺𑀲𑁆𑀲𑁄 𑀯𑀻𑀲𑀢𑀺𑀬𑁄 𑀤𑀺𑀦𑀖𑀝𑀺𑀓𑀸. 𑀏𑀯𑀫𑀜𑁆𑀜𑀢𑁆𑀭.

𑀏𑀲𑁂𑀲𑁄 𑀏𑀢𑀦𑁆𑀢𑀺𑀧𑁆𑀧𑀲𑀺𑀤𑁆𑀥𑀺, 𑀮𑁄𑀓𑀲𑁆𑀲 𑀳𑁄𑀢𑀺 𑀬𑀢𑁆𑀣𑀢𑁆𑀣𑁂𑀲𑀼.

𑀣𑀻𑀧𑀼𑀫𑀦𑀧𑀼𑀁𑀲𑀓𑀸𑀦𑀺𑀢𑁆𑀬𑀼𑀘𑁆𑀘𑀦𑁆𑀢𑁂, 𑀢𑀸𑀦𑀺𑀫𑀸𑀦𑀺 𑀮𑁄𑀓𑁂𑀦𑀸𑀢𑁆𑀣𑀸.

𑀅𑀮𑀺𑀗𑁆𑀕

𑁧𑁮𑁪. 𑀅𑀮𑀺𑀗𑁆𑀕𑀸 𑀯𑀼𑀘𑁆𑀘𑀦𑁆𑀢𑁂.

𑀓𑁆𑀯𑀘𑀺 𑀢𑁄 𑀧𑀜𑁆𑀘𑀫𑁆𑀬𑀢𑁆𑀣𑁂.

𑀮𑀺𑀗𑁆𑀕𑀢𑁄 𑀧𑀜𑁆𑀘𑀫𑁆𑀬𑀢𑁆𑀣𑁂 𑀓𑁆𑀯𑀘𑀺 𑀢𑁄𑀧𑁆𑀧𑀘𑁆𑀘𑀬𑁄 𑀳𑁄𑀢𑀺.

‘‘𑀢𑁆𑀯𑀸𑀤𑀬𑁄 𑀯𑀺𑀪𑀢𑁆𑀢𑀺𑀲𑀜𑁆𑀜𑀸𑀬𑁄’’𑀢𑀺 𑀢𑁄𑀧𑁆𑀧𑀪𑀼𑀢𑀺𑀤𑀸𑀦𑁆𑀬𑀦𑁆𑀢𑀸𑀦𑀁 𑀯𑀺𑀪𑀢𑁆𑀢𑀺𑀲𑀜𑁆𑀜𑀸. 𑀢𑀲𑁆𑀫𑀸 𑀢𑀤𑀦𑁆𑀢𑀸𑀦𑀫𑁆𑀧𑀺 𑀯𑀺𑀪𑀢𑁆𑀬𑀦𑁆𑀢𑀢𑁆𑀢𑀸 𑀧𑀤𑀢𑁆𑀢𑀁 𑀲𑀺𑀤𑁆𑀥𑀦𑁆𑀢𑀺 𑀦 𑀧𑀼𑀦 𑀯𑀺𑀪𑀢𑁆𑀢𑀺. 𑀘𑁄𑀭𑀲𑁆𑀫𑀸 𑀘𑁄𑀭𑀢𑁄. 𑀏𑀯𑀁 𑀧𑀺𑀢𑀺𑀢𑁄, 𑀏𑀢𑁆𑀣 ‘‘𑀧𑀺𑀢𑀸𑀤𑀻𑀦 𑀫𑀲𑀺𑀫𑁆𑀳𑀺’’ 𑀢𑁆𑀬𑀢𑁆𑀭𑀸𑀲𑀺𑀫𑁆𑀳𑀺𑀕𑁆𑀕𑀳𑀡𑁂𑀦 𑀢𑁄𑀫𑁆𑀳𑀺 𑀧𑀺𑀢𑀸𑀤𑀻𑀦𑀁 𑀉𑀲𑁆𑀲 𑀇.

𑀇𑀫𑀲𑁆𑀲𑀺 𑀣𑀦𑁆𑀤𑀸𑀦𑀺𑀳𑀢𑁄𑀥𑁂𑀲𑀼 𑀘.

𑀣𑀁𑀆𑀤𑀻𑀲𑀼 𑀧𑀭𑁂𑀲𑀼 𑀇𑀫𑀲𑁆𑀲 𑀇 𑀳𑁄𑀢𑀺. 𑀇𑀢𑁄.

‘‘𑀲𑀩𑁆𑀩𑀲𑁆𑀲𑁂𑀢𑀲𑁆𑀲𑀸𑀓𑀸𑀭𑁄 𑀯𑀸’’𑀢𑀺 𑀢𑁄𑀣𑁂𑀲𑁆𑀯𑁂𑀢𑀲𑁆𑀲 𑀅𑀢𑁆𑀢𑀁 𑀯𑀸, 𑀅𑀢𑁄, 𑀏𑀢𑁆𑀢𑁄. 𑀧𑀓𑁆𑀔𑁂- ‘‘𑀲𑀭𑀮𑁄𑀧𑀸’’𑀤𑀺𑀦𑀸 𑀅𑀓𑀸𑀭𑀮𑁄𑀧𑁄.

‘‘𑀢𑁆𑀭𑀢𑁄𑀣𑁂𑀲𑀼 ¶ 𑀘𑁂’’𑀢𑀺 𑀓𑀺𑀲𑁆𑀲 𑀓𑀼. 𑀓𑀼𑀢𑁄.

‘‘𑀓𑁆𑀯𑀘𑀺 𑀢𑁄’’𑀢𑀺 𑀲𑀼𑀢𑁆𑀢𑀤𑁆𑀯𑀺𑀥𑀸𑀓𑀭𑀡𑁂𑀦 𑀲𑀢𑁆𑀢𑀫𑁆𑀬𑀢𑁆𑀣𑁂 𑀘 𑀢𑁄 𑀳𑁄𑀢𑀺, 𑀆𑀤𑀺𑀲𑁆𑀫𑀺𑀁, 𑀆𑀤𑀺𑀢𑁄.

𑁧𑁮𑁫. ‘‘𑀢𑁆𑀭𑀣 ¶ 𑀲𑀢𑁆𑀢𑀫𑀺𑀬𑀸 𑀲𑀩𑁆𑀩𑀦𑀸𑀫𑁂𑀳𑀻’’𑀢𑀺 𑀲𑀢𑁆𑀢𑀫𑁆𑀬𑀢𑁆𑀣𑁂 𑀢𑁆𑀭𑀣𑀧𑁆𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀲𑀩𑁆𑀩𑀲𑁆𑀫𑀺𑀁, 𑀲𑀩𑁆𑀩𑀢𑁆𑀭, 𑀲𑀩𑁆𑀩𑀢𑁆𑀣, 𑀤𑁆𑀯𑀺𑀢𑁆𑀢𑀁. 𑀏𑀯𑀁 𑀅𑀢𑁆𑀭, 𑀅𑀢𑁆𑀣. 𑀏𑀢𑁆𑀣 ‘‘𑀢𑁆𑀭𑁂 𑀦𑀺𑀘𑁆𑀘’’𑀦𑁆𑀢𑀺 𑀧𑀼𑀩𑁆𑀩𑁂 𑀏𑀢𑀲𑁆𑀲 𑀅. 𑀓𑀼𑀢𑁆𑀭, 𑀓𑀼𑀢𑁆𑀣.

‘‘𑀲𑁂𑀲𑁂𑀲𑀼 𑀘𑁂’’𑀢𑀺 𑀓𑀸𑀤𑁂𑀲𑁂-𑀓𑀢𑁆𑀣.

𑁧𑁮𑁬. ‘‘𑀓𑀺𑀲𑁆𑀫𑀸 𑀯𑁄 𑀘𑁂’’𑀢𑀺 𑀯𑀧𑁆𑀧𑀘𑁆𑀘𑀬𑁄. ‘‘𑀓𑀺𑀲𑁆𑀲 𑀓 𑀯𑁂𑀘𑁂’’𑀢𑀺 𑀓𑁄, 𑀓𑀓𑀸𑀭𑀸𑀓𑀸𑀭𑀮𑁄𑀧𑁄. 𑀓𑁆𑀯.

𑁧𑁮𑁭. ‘‘𑀳𑀺𑀁 𑀳𑀁 𑀳𑀺𑀜𑁆𑀘𑀦’’𑀦𑁆𑀢𑀺 𑀓𑀲𑁆𑀫𑀸 𑀳𑀺𑀁 𑀆𑀤𑀺𑀧𑀘𑁆𑀘𑀬𑀸. ‘‘𑀓𑀼 𑀳𑀺𑀁 𑀳𑀁𑀲𑀼 𑀘𑁂’’𑀢𑀺 𑀓𑀺𑀲𑁆𑀲 𑀓𑀼. 𑀘𑀓𑀸𑀭𑁂𑀦 𑀳𑀺𑀜𑁆𑀘𑀦𑀁 𑀤𑀸𑀘𑀦𑀁𑀲𑀼 𑀘. 𑀓𑀼𑀳𑀺𑀁, 𑀓𑀼𑀳𑀁, 𑀓𑀼𑀳𑀺𑀜𑁆𑀘𑀦𑀁.

𑁧𑁮𑁮. ‘‘𑀢𑀫𑁆𑀳𑀸 𑀘𑁂’’𑀢𑀺 𑀳𑀺𑀁𑀳𑀁. 𑀢𑀳𑀺𑀁, 𑀢𑀳𑀁.

𑁧𑁮𑁯. ‘‘𑀬𑀢𑁄 𑀳𑀺𑀁’’𑀢𑀺 𑀳𑀺𑀁. 𑀬𑀳𑀺𑀁.

𑁧𑁯𑁦. ‘‘𑀇𑀫𑀲𑁆𑀫𑀸 ¶ 𑀳𑀥𑀸 𑀘𑁂’’𑀢𑀺 𑀳𑀥𑀸. 𑀇𑀳, 𑀇𑀥.

𑁧𑁯𑁧. ‘‘𑀲𑀩𑁆𑀩𑀢𑁄 𑀥𑀻’’𑀢𑀺 𑀥𑀺. 𑀲𑀩𑁆𑀩𑀥𑀺.

𑁧𑁯𑁨. 𑀓𑀸𑀮𑁂𑀢𑁆𑀬𑀥𑀺𑀓𑀸𑀭𑁄.

‘‘𑀓𑀺𑀁𑀲𑀩𑁆𑀩𑀜𑁆𑀜𑁂𑀓𑀬𑀓𑀼𑀳𑀺 𑀤𑀸𑀤𑀸𑀘𑀦’’𑀦𑁆𑀢𑀺 𑀓𑀺𑀁 𑀆𑀤𑀺𑀢𑁄 𑀤𑀸, 𑀤𑀸𑀘𑀦𑀁 𑀘. 𑀓𑀲𑁆𑀫𑀺𑀁 𑀓𑀸𑀮𑁂 𑀓𑀤𑀸, 𑀓𑀼𑀤𑀸𑀘𑀦𑀁.

‘‘𑀲𑀩𑁆𑀩𑀲𑁆𑀲 𑀲𑁄 𑀤𑀸𑀫𑁆𑀳𑀺 𑀯𑀸’’𑀢𑀺 𑀲𑀩𑁆𑀩𑀲𑁆𑀲 𑀲𑁄 𑀯𑀸. 𑀲𑀤𑀸, 𑀲𑀩𑁆𑀩𑀤𑀸.

𑁧𑁯𑁩. ‘‘𑀢𑀫𑁆𑀳𑀸 𑀤𑀸𑀦𑀺 𑀘𑁂’’𑀢𑀺 𑀤𑀸𑀦𑀺, 𑀤𑀸 𑀘. 𑀢𑀤𑀸𑀦𑀺, 𑀢𑀤𑀸.

𑁧𑁯𑁪. 𑀬𑀤𑀸𑀤𑀺𑀦𑀸 𑀇𑀫𑀲𑀤𑁆𑀤𑀸, 𑀲𑀫𑀸𑀦𑀸𑀧𑀭𑁂𑀳𑀺 𑀘 𑀬𑀣𑀸𑀲𑀗𑁆𑀔𑁆𑀬𑀁 𑀚𑁆𑀚 𑀚𑁆𑀚𑀼𑀧𑁆𑀧𑀘𑁆𑀘𑀬𑀸, 𑀇𑀫, 𑀲𑀫𑀸𑀦𑀸𑀦𑀁 𑀅, 𑀲𑀸 𑀘. 𑀅𑀚𑁆𑀚, 𑀲𑀚𑁆𑀚𑀼, 𑀅𑀧𑀭𑀚𑁆𑀚𑀼.

𑁧𑁯𑁫. ‘‘𑀇𑀫𑀲𑁆𑀫𑀸 ¶ 𑀭𑀳𑀺𑀥𑀼𑀦𑀸𑀤𑀸𑀦𑀺 𑀘𑁂’’𑀢𑀺 𑀭𑀳𑁆𑀬𑀸𑀤𑀺𑀧𑁆𑀧𑀘𑁆𑀘𑀬𑀸. ‘‘𑀏𑀢 𑀭𑀳𑀺𑀫𑁆𑀳𑀻’’𑀢𑀺 𑀇𑀫𑀲𑁆𑀲 𑀏𑀢𑁄. 𑀏𑀢𑀭𑀳𑀺.

‘‘𑀅 𑀥𑀼𑀦𑀸𑀫𑁆𑀳𑀺 𑀘𑁂’’𑀢𑀺 𑀇𑀫𑀲𑁆𑀲 𑀅. 𑀅𑀥𑀼𑀦𑀸, 𑀇𑀤𑀸𑀦𑀺.

𑁧𑁯𑁬. 𑀮𑁄𑀧𑀁 𑀇𑀢𑁆𑀯𑁂𑀯.

𑀲𑀩𑁆𑀩𑀸𑀲𑀫𑀸𑀯𑀼𑀲𑁄𑀧𑀲𑀕𑁆𑀕𑀦𑀺𑀧𑀸𑀢𑀸𑀤𑀻𑀳𑀺 𑀘.

𑀏𑀢𑁂𑀳𑀺 𑀧𑀭𑀸 𑀲𑀩𑁆𑀩𑀸 𑀯𑀺𑀪𑀢𑁆𑀢𑀻 𑀮𑀼𑀧𑁆𑀬𑀦𑁆𑀢𑁂. 𑀢𑁆𑀯𑀁 𑀆𑀯𑀼𑀲𑁄, 𑀢𑀼𑀫𑁆𑀳𑁂 𑀆𑀯𑀼𑀲𑁄.

𑀉𑀧𑀲𑀕𑁆𑀕𑀦𑀺𑀧𑀸𑀢

𑁧𑁯𑁭. 𑀉𑀧𑀲𑀕𑁆𑀕𑀦𑀺𑀧𑀸𑀢𑀸 𑀯𑀼𑀘𑁆𑀘𑀦𑁆𑀢𑁂.

𑀧 ¶ 𑀧𑀭𑀸 𑀦𑀺 𑀦𑀻 𑀉 𑀤𑀼 𑀲𑀁 𑀯𑀺 𑀅𑀯 𑀅𑀦𑀼 𑀧𑀭𑀺 𑀅𑀥𑀺 𑀅𑀪𑀺 𑀧𑀢𑀺 𑀲𑀼 𑀆 𑀅𑀢𑀺 𑀅𑀧𑀺 𑀅𑀧 𑀉𑀧 𑀏𑀢𑁂 𑀯𑀻𑀲𑀢𑁆𑀬𑀼𑀧𑀲𑀕𑁆𑀕𑀸.

𑀘 𑀦 𑀯 𑀯𑀸 𑀫𑀸 𑀳𑀺 𑀥𑀺 𑀘𑀺 𑀓𑀼 𑀢𑀼 𑀦𑀼 𑀘𑁂 𑀭𑁂 𑀳𑁂 𑀲𑁆𑀯𑁂 𑀯𑁂 𑀯𑁄 𑀔𑁄 𑀦𑁄 𑀢𑁄 𑀬𑀁 𑀦𑀁 𑀢𑀁 𑀓𑀺𑀁 𑀳𑀦𑁆𑀤 𑀓𑀺𑀭 𑀏𑀯 𑀓𑀻𑀯 𑀬𑀸𑀯 𑀢𑀸𑀯 𑀯𑀢 𑀯𑀣 𑀅𑀣 𑀅𑀗𑁆𑀕 𑀇𑀗𑁆𑀖 𑀢𑀕𑁆𑀖 𑀆𑀫 𑀦𑀸𑀫 𑀦𑀽𑀦 𑀧𑀼𑀦 𑀧𑀦 𑀆𑀳 𑀲𑀳 𑀲𑀓𑁆𑀓𑀸 𑀮𑀩𑁆𑀪𑀸 𑀳𑁂𑀝𑁆𑀞𑀸 𑀆𑀭𑀸 𑀤𑀽𑀭𑀸 𑀤𑀺𑀯𑀸 𑀦𑀯𑀸 𑀯𑀺𑀦𑀸 𑀦𑀸𑀦𑀸 𑀅𑀤𑁆𑀥𑀸 𑀫𑀼𑀥𑀸 𑀫𑀺𑀘𑁆𑀙𑀸 𑀧𑀘𑁆𑀙𑀸 𑀆𑀯𑀺 𑀲𑀓𑁆𑀔𑀺 𑀲𑀘𑁆𑀘𑀺 𑀲𑀘𑁆𑀙𑀺 𑀩𑀳𑀺 𑀬𑀤𑀺 𑀇𑀢𑀺 𑀓𑀺𑀦𑁆𑀢𑀺 𑀅𑀢𑁆𑀣𑀺 𑀲𑁄𑀢𑁆𑀣𑀺 𑀔𑀮𑀼 𑀦𑀦𑀼 𑀓𑀺𑀫𑀼 𑀅𑀲𑁆𑀲𑀼 𑀬𑀕𑁆𑀖𑁂 𑀲𑀘𑁂 𑀳𑀯𑁂 𑀲𑀼𑀯𑁂 𑀅𑀭𑁂 𑀧𑀼𑀭𑁂 𑀦𑀫𑁄 𑀢𑀺𑀭𑁄 𑀅𑀥𑁄 𑀅𑀣𑁄 𑀅𑀳𑁄 𑀭𑀳𑁄 𑀳𑀻𑀬𑁄 𑀪𑀻𑀬𑁄 𑀅𑀦𑁆𑀢𑁄 𑀧𑀸𑀢𑁄 𑀲𑀼𑀤𑀁 𑀓𑀮𑁆𑀮𑀁 𑀏𑀯𑀁 𑀥𑀼𑀯𑀁 𑀅𑀮𑀁 𑀳𑀮𑀁 𑀲𑀬𑀁 𑀲𑀸𑀬𑀁 𑀲𑀫𑀁 𑀲𑀸𑀫𑀁 𑀓𑀸𑀫𑀁 𑀧𑀸𑀭𑀁 𑀑𑀭𑀁 𑀘𑀺𑀭𑀁 𑀳𑀼𑀭𑀁 𑀅𑀳𑀁 𑀲𑀳𑀁 𑀉𑀘𑁆𑀘𑀁 𑀦𑀻𑀘𑀁 𑀲𑀓𑀺𑀁 𑀲𑀤𑁆𑀥𑀺𑀁, 𑀅𑀣𑀯𑀸 𑀅𑀦𑁆𑀢𑀭𑀸 𑀆𑀭𑀓𑀸 𑀩𑀸𑀳𑀺𑀭𑀸 𑀩𑀳𑀺𑀤𑁆𑀥𑀸 𑀬𑀸𑀯𑀢𑀸 𑀢𑀸𑀯𑀢𑀸 𑀲𑀫𑀦𑁆𑀢𑀸 𑀲𑀸𑀫𑀦𑁆𑀢𑀸 𑀆𑀫𑀦𑁆𑀢𑀸 𑀲𑀫𑁆𑀫𑀼𑀔𑀸 𑀘𑀭𑀳𑀺 𑀢𑀭𑀳𑀺 𑀲𑀫𑁆𑀧𑀢𑀺 𑀆𑀬𑀢𑀺 𑀉𑀧𑀭𑀺 𑀬𑀸𑀯𑀤𑁂 𑀢𑀸𑀯𑀤𑁂 𑀢𑀺𑀭𑀺𑀬𑀁 𑀲𑀦𑀺𑀓𑀁 𑀲𑀲𑀓𑁆𑀓𑀁 𑀏𑀢𑁆𑀢𑀸𑀯𑀢𑀸 𑀧𑀭𑀫𑁆𑀫𑀼𑀔𑀸 𑀓𑀺𑀢𑁆𑀢𑀸𑀯𑀢𑀸 𑀏𑀢𑀭𑀳𑀺 𑀅𑀜𑁆𑀜𑀤𑀢𑁆𑀣𑀼 𑀲𑁂𑀬𑁆𑀬𑀣𑀺𑀤𑀁 𑀅𑀧𑁆𑀧𑁂𑀯𑀦𑀸𑀫 𑀪𑀻𑀬𑁄𑀲𑁄𑀫𑀢𑁆𑀢𑀸𑀬 𑀇𑀘𑁆𑀘𑀸𑀤𑀬𑁄 𑀦𑀺𑀧𑀸𑀢𑀸.

𑁧𑁯𑁮. 𑀲𑀤𑀺𑀲𑀸 ¶ 𑀬𑁂 𑀢𑀺𑀮𑀺𑀗𑁆𑀕𑁂𑀲𑀼, 𑀲𑀩𑁆𑀩𑀸𑀲𑀼 𑀘 𑀯𑀺𑀪𑀢𑁆𑀢𑀻𑀲𑀼.

𑀯𑀘𑀦𑁂𑀲𑀼 𑀘 𑀲𑀩𑁆𑀩𑁂𑀲𑀼, 𑀢𑁂 𑀦𑀺𑀧𑀸𑀢𑀸𑀢𑀺 𑀓𑀺𑀢𑁆𑀢𑀺𑀢𑀸.

𑀬𑀣𑀸 ¶ 𑁋 𑀉𑀘𑁆𑀘𑀁 𑀭𑀼𑀓𑁆𑀔𑁄, 𑀮𑀢𑀸, 𑀖𑀭𑀁 𑀯𑀸, 𑀉𑀘𑁆𑀘𑀁 𑀭𑀼𑀓𑁆𑀔𑁄. 𑀳𑁂 𑀭𑀼𑀓𑁆𑀔, 𑀭𑀼𑀓𑁆𑀔𑀁, 𑀭𑀼𑀓𑁆𑀔𑁂𑀦, 𑀭𑀼𑀓𑁆𑀔𑀲𑁆𑀲, 𑀭𑀼𑀓𑁆𑀔𑀲𑁆𑀫𑀸, 𑀭𑀼𑀓𑁆𑀔𑁂 𑀯𑀸 𑀇𑀘𑁆𑀘𑀸𑀤𑀺. 𑀉𑀘𑁆𑀘𑀁 𑀭𑀼𑀓𑁆𑀔𑁄, 𑀭𑀼𑀓𑁆𑀔𑀸 𑀯𑀸 𑀇𑀘𑁆𑀘𑀸𑀤𑀺. 𑀏𑀯𑀁 𑀮𑀢𑀸, 𑀖𑀭𑀸𑀦𑀺.

𑁧𑁯𑁯.

𑀉𑀪𑀬𑁂𑀲𑀼 𑀯𑀺𑀪𑀢𑁆𑀬𑀢𑁆𑀢 -

𑀓𑁆𑀭𑀺𑀬𑀤𑁂𑀲 𑀲𑀫𑀬 𑀤𑀺𑀲𑀸𑀕𑀼𑀡𑀢𑁆𑀣𑁂𑀳𑀺;

𑀲𑀩𑁆𑀩𑀸𑀧𑀺 𑀬𑀣𑀸𑀬𑁄𑀕𑀁,

𑀯𑀺𑀪𑀢𑁆𑀢𑀺𑀬𑁄𑀜𑁆𑀜𑁂𑀳𑀺 𑀢𑀼𑀧𑁆𑀧𑀞𑀫𑀸.

𑀢𑀁 𑀬𑀣𑀸 𑁋 𑀅𑀥𑀺𑀅𑀦𑁆𑀢𑁄𑀲𑀤𑁆𑀤𑁂𑀳𑀺 𑀲𑀢𑁆𑀢𑀫𑀻. 𑀲𑀬𑀁𑀲𑀤𑁆𑀤𑀸 𑀢𑀢𑀺𑀬𑀸, 𑀙𑀝𑁆𑀞𑀻 𑀘. 𑀦𑀫𑁄𑀲𑀤𑁆𑀤𑀸 𑀧𑀞𑀫𑀸, 𑀤𑀼𑀢𑀺𑀬𑀸 𑀘. 𑀧𑀸𑀭𑀁𑀲𑀤𑁆𑀤𑀸 𑀲𑀢𑁆𑀢𑀫𑀻. 𑀤𑀺𑀯𑀸𑀲𑀤𑁆𑀤𑀸 𑀧𑀞𑀫𑀸, 𑀤𑀼𑀢𑀺𑀬𑀸, 𑀲𑀢𑁆𑀢𑀫𑀻 𑀘. 𑀳𑁂𑀝𑁆𑀞𑀸𑀲𑀤𑁆𑀤𑀸 𑀲𑀢𑁆𑀢𑀫𑀻. 𑀉𑀘𑁆𑀘𑀁𑀲𑀤𑁆𑀤𑀸 𑀲𑀩𑁆𑀩𑀸𑀧𑀺. 𑀧𑀲𑀤𑁆𑀤𑀸 𑀘 𑀘𑀲𑀤𑁆𑀤𑀸 𑀘 𑀧𑀞𑀫𑀸, 𑀳𑁂𑀲𑀤𑁆𑀤𑀸 𑀆𑀮𑀧𑀦𑁂 𑀧𑀞𑀫𑀸. 𑀢𑀣𑀸𑀜𑁆𑀜𑁂𑀳𑀺𑀧𑀺.

𑁨𑁦𑁦. 𑀉𑀧𑀲𑀕𑁆𑀕𑀸 ¶ 𑀲𑀩𑁆𑀩𑁂𑀧𑀺 𑀲𑀤𑁆𑀤𑀦𑁆𑀢𑀭𑁂𑀦 𑀲𑀳 𑀧𑀬𑀼𑀚𑁆𑀚𑀦𑁆𑀢𑁂. 𑀦𑀺𑀧𑀸𑀢𑀸 𑀢𑀼 𑀓𑁂𑀘𑀺 𑀯𑀺𑀲𑀼𑀫𑁆𑀧𑀺. 𑀬𑀣𑀸 𑁋 𑀧𑀳𑀸𑀭𑁄, 𑀧𑀳𑀭𑀢𑀺, 𑀲𑀸 𑀘 𑀲𑁄 𑀘 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸, 𑀲𑁄𑀢𑁆𑀣𑀺𑀢𑁆𑀬𑀸𑀤𑀺.

𑁨𑁦𑁧. 𑀏𑀓𑁂𑀓𑀮𑀺𑀗𑁆𑀕𑀁 ¶ 𑀤𑁆𑀯𑀺𑀮𑀺𑀗𑁆𑀕𑀁, 𑀢𑀺𑀮𑀺𑀗𑁆𑀕𑀁 𑀘𑀸𑀧𑁆𑀬𑀮𑀺𑀗𑁆𑀕𑀺𑀓𑀁.

𑀘𑀢𑀼𑀥𑁂𑀢𑀺 𑀦𑀸𑀫𑀁 𑀦𑀸𑀫𑀁, 𑀦𑀫𑀢𑁆𑀬𑀢𑁆𑀣𑀦𑁆𑀢𑀺 𑀓𑀺𑀢𑁆𑀢𑀺𑀢𑀁.

𑀦𑀸𑀫𑀺𑀓𑀁.

𑁩. 𑀲𑀫𑀸𑀲𑀓𑀡𑁆𑀟

𑀲𑀫𑀸𑀲𑀮𑀓𑁆𑀔𑀡𑀸𑀤𑀺

𑁨𑁦𑁨. 𑀦𑀸𑀫𑀸𑀦𑀁 ¶ 𑀲𑀫𑀸𑀲𑁄 𑀬𑀼𑀢𑁆𑀢𑀢𑁆𑀣𑁄𑀢𑁆𑀬𑀥𑀺𑀓𑀸𑀭𑁄. 𑀲𑀫𑀸𑀲𑁄𑀢𑀺 𑀪𑀺𑀦𑁆𑀦𑀢𑁆𑀣𑀸𑀦𑀁 𑀧𑀤𑀸𑀦 𑀫𑁂𑀓𑀢𑁆𑀣𑀢𑀸. 𑀬𑀼𑀢𑁆𑀢𑀢𑁆𑀣𑁄𑀢𑀺 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀢𑁆𑀣𑁄.

𑀯𑀺𑀪𑀸𑀲𑀸𑀢𑁆𑀬𑀥𑀺𑀓𑀸𑀢𑀩𑁆𑀩𑀁 ¶ 𑀯𑀸𑀓𑁆𑀬𑀢𑁆𑀣𑀁.

𑀓𑀫𑁆𑀫𑀥𑀸𑀭𑀬𑀲𑀫𑀸𑀲

𑁨𑁦𑁩. ‘‘𑀫𑀳𑀦𑁆𑀢𑁄 𑀘 𑀲𑁄 𑀯𑀻𑀭𑁄 𑀘𑀸’’𑀢𑀺 𑀯𑀸𑀓𑁆𑀬𑁂 𑁋

𑀤𑁆𑀯𑀺𑀧𑀤𑁂 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀓𑀫𑁆𑀫𑀥𑀸𑀭𑀬𑁄.

𑀪𑀺𑀦𑁆𑀦𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀸 ¶ 𑀲𑀤𑁆𑀤𑀸 𑀏𑀓𑀲𑁆𑀫𑀺𑀁 𑀯𑀢𑁆𑀣𑀼𑀦𑀺 𑀧𑀯𑀢𑁆𑀢𑀸 𑀢𑀼𑀮𑁆𑀬𑀸𑀥𑀺𑀓𑀭𑀡𑀸, 𑀯𑀺𑀲𑁂𑀲𑀦𑀯𑀺𑀲𑁂𑀲𑀲𑁆𑀲𑀪𑀽𑀢𑀸 𑀲𑀫𑀸𑀦𑀸𑀥𑀺𑀓𑀭𑀡𑀸 𑀤𑁆𑀯𑁂 𑀧𑀤𑀸 𑀬𑀤𑀸 𑀲𑀫𑀲𑁆𑀬𑀦𑁆𑀢𑁂, 𑀢𑀤𑀸 𑀲𑁄 𑀲𑀫𑀸𑀲𑁄 𑀓𑀫𑁆𑀫𑀥𑀸𑀭𑀬𑁄

𑀦𑀸𑀫 ¶ , 𑀇𑀥 𑀯𑀸 𑀲𑀫𑀸𑀲𑀲𑀼𑀢𑁆𑀢𑀸𑀦𑀺 𑀲𑀜𑁆𑀜𑀸𑀤𑁆𑀯𑀸𑀭𑁂𑀦 𑀲𑀫𑀸𑀲𑀯𑀺𑀥𑀸𑀬𑀓𑀸𑀦𑀺.

𑀅𑀕𑁆𑀕𑀳𑀺𑀢𑀯𑀺𑀲𑁂𑀲𑀦𑀸 ¶ 𑀩𑀼𑀤𑁆𑀥𑀺 𑀯𑀺𑀲𑁂𑀲𑁆𑀲𑀫𑁆𑀳𑀺 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀺𑀲𑁂𑀲𑀦𑀁 𑀧𑀼𑀩𑁆𑀩𑀁 𑀳𑁄𑀢𑀺, 𑀲𑀫𑀸𑀲𑁂𑀦𑁂𑀯 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑁆𑀢𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀢𑀧𑁆𑀧𑀓𑀸𑀲𑀦𑀢𑁆𑀣𑀁 𑀧𑀬𑀼𑀢𑁆𑀢𑀸 𑀲𑀫𑀸𑀲𑀢𑁄 𑀅𑀢𑀺𑀭𑀺𑀢𑁆𑀢𑀸 𑀘 𑀲𑁄 𑀇𑀘𑁆𑀘𑁂𑀢𑁂 ‘‘𑀯𑀼𑀢𑁆𑀢𑀝𑁆𑀞𑀸𑀦𑀫𑀧𑁆𑀧𑀬𑁄𑀕𑁄’’𑀢𑀺 𑀜𑀸𑀬𑀸 𑀦𑀧𑁆𑀧𑀬𑀼𑀚𑁆𑀚𑀦𑁆𑀢𑁂. 𑀏𑀯𑀫𑀜𑁆𑀜𑀢𑁆𑀭.

𑀢𑁂𑀲𑀁 𑀯𑀺𑀪𑀢𑁆𑀢𑀺𑀬𑁄 𑀮𑁄𑀧𑀸 𑀘.

𑀢𑁂𑀲𑀁 𑀬𑀼𑀢𑁆𑀢𑀢𑁆𑀣𑀸𑀦𑀁 𑀲𑀫𑀸𑀲𑀸𑀦𑀁 𑀧𑀼𑀩𑁆𑀩𑀼𑀢𑁆𑀢𑀭𑀧𑀤𑀸𑀦𑀁 𑀯𑀺𑀪𑀢𑁆𑀢𑀻 𑀮𑀼𑀧𑁆𑀬𑀦𑁆𑀢𑁂, 𑀘𑀓𑀸𑀭𑁂𑀦 𑀓𑁆𑀯𑀘𑀺 𑀦.

𑀢𑀢𑁄 𑀫𑀳𑀦𑁆𑀢 𑀯𑀻𑀭 𑀇𑀢𑀺 𑀘 𑀭𑀽𑀧𑀧𑁆𑀧𑀲𑀗𑁆𑀕𑁂 𑁋

𑀧𑀓𑀢𑀺 𑀘𑀲𑁆𑀲 𑀲𑀭𑀦𑁆𑀢𑀲𑁆𑀲.

𑀯𑀺𑀪𑀢𑁆𑀢𑀻𑀲𑀼 ¶ 𑀮𑀼𑀢𑁆𑀢𑀸𑀲𑀼 𑀲𑀭𑀦𑁆𑀢𑀲𑁆𑀲 𑀧𑀼𑀩𑁆𑀩𑀪𑀽𑀢𑀲𑁆𑀲, 𑀧𑀭𑀪𑀽𑀢𑀲𑁆𑀲 𑀘 𑀅𑀲𑁆𑀲 𑀲𑀫𑀸𑀲𑀧𑀤𑀲𑁆𑀲 𑀧𑀓𑀢𑀺 𑀳𑁄𑀢𑀻𑀢𑀻𑀳 𑀮𑀼𑀢𑁆𑀢𑀸𑀓𑀸𑀭𑀸 𑀧𑀼𑀦𑀸𑀦𑀻𑀬𑀦𑁆𑀢𑁂.

𑀢𑀢𑁄 𑀫𑀳𑀦𑁆𑀢 𑀯𑀻𑀭𑀇𑀢𑀺 𑀞𑀺𑀢𑁂 𑁋

‘‘𑀫𑀳𑀢𑀁 ¶ 𑀫𑀳𑀸 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀧𑀤𑁂’’𑀢𑀺 𑀫𑀳𑀦𑁆𑀢𑀲𑁆𑀲 𑀫𑀳𑀸.

𑀢𑀤𑁆𑀥𑀺𑀢 𑀲𑀫𑀸𑀲 𑀓𑀺𑀢𑀓𑀸 𑀦𑀸𑀫𑀁𑀯𑀸𑀢𑀯𑁂𑀢𑀼𑀦𑀸𑀤𑀻𑀲𑀼 𑀘.

𑀢𑀤𑁆𑀥𑀺𑀢𑀸𑀤𑀬𑁄 𑀦𑀸𑀫𑀁 𑀇𑀯 𑀤𑀝𑁆𑀞𑀩𑁆𑀩𑀸 𑀢𑀯𑁂𑀧𑁆𑀧𑀪𑀼𑀢𑀺𑀧𑀘𑁆𑀘𑀬𑁂 𑀯𑀚𑁆𑀚𑁂𑀢𑁆𑀯𑀸.

𑀢𑀢𑁄 ¶ 𑀯𑀢𑁆𑀢𑀺𑀘𑁆𑀙𑀸𑀬 𑀲𑁆𑀬𑀸𑀤𑀺. 𑀫𑀳𑀸𑀯𑀻𑀭𑁄, 𑀫𑀳𑀸𑀯𑀻𑀭𑀸𑀇𑀘𑁆𑀘𑀸𑀤𑀺.

𑁨𑁦𑁪. 𑀓𑀫𑁆𑀫𑀥𑀸𑀭𑀬𑁄 ¶ 𑀤𑁆𑀯𑀦𑁆𑀤𑁄 𑀘, 𑀢𑀧𑁆𑀧𑀼𑀭𑀺𑀲𑁄 𑀘 𑀮𑀸𑀪𑀺𑀦𑁄.

𑀢𑀬𑁄 𑀧𑀭𑀧𑀤𑁂 𑀮𑀺𑀗𑁆𑀕𑀁, 𑀩𑀳𑀼𑀩𑁆𑀩𑀻𑀳𑀺 𑀧𑀤𑀦𑁆𑀢𑀭𑁂.

𑁨𑁦𑁫. 𑀭𑀢𑁆𑀢𑀸 𑀘 𑀲𑀸 𑀧𑀝𑀻 𑀘𑀸𑀢𑀺 𑀭𑀢𑁆𑀢𑀧𑀝𑀻, 𑀫𑀳𑀦𑁆𑀢𑀻 𑀘 𑀲𑀸 𑀲𑀤𑁆𑀥𑀸 𑀘𑀸𑀢𑀺 𑀫𑀳𑀸𑀲𑀤𑁆𑀥𑀸. 𑀏𑀢𑁆𑀣 ‘‘𑀓𑀫𑁆𑀫𑀥𑀸𑀭𑀬𑀲𑀜𑁆𑀜𑁂 𑀘𑁂’’𑀢𑀺 𑀧𑀼𑀩𑁆𑀩𑀧𑀤𑁂 𑀧𑀼𑀫𑁂𑀯 𑀓𑀢𑁂 𑀆𑀈𑀧𑀘𑁆𑀘𑀬𑀸𑀦𑀁 𑀦𑀺𑀯𑀼𑀢𑁆𑀢𑀺.

𑁨𑁦𑁬. 𑀦𑀻𑀮𑀜𑁆𑀘 𑀢𑀁 𑀉𑀧𑁆𑀧𑀮𑀜𑁆𑀘𑀸𑀢𑀺 𑀦𑀻𑀮𑀼𑀧𑁆𑀧𑀮𑀁, 𑀲𑀢𑁆𑀣𑀻𑀯 𑀲𑀢𑁆𑀣𑀺, 𑀲𑀢𑁆𑀣𑀺 𑀘 𑀲𑀸 𑀲𑀸𑀫𑀸 𑀘𑀸𑀢𑀺 𑀲𑀢𑁆𑀣𑀺𑀲𑀸𑀫𑀸. 𑀫𑀼𑀔𑀫𑁂𑀯 𑀘𑀦𑁆𑀤𑁄 𑀫𑀼𑀔𑀘𑀦𑁆𑀤𑁄.

𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀲𑀸𑀦𑀁 ¶ 𑀬𑀣𑁂𑀘𑁆𑀙𑀢𑁆𑀢𑀸 𑀓𑁆𑀯𑀘𑀺 𑀯𑀺𑀲𑁂𑀲𑀦𑀁 𑀧𑀭𑀁 𑀳𑁄𑀢𑀺, 𑀔𑀢𑁆𑀢𑀺𑀬𑀪𑀽𑀢𑁄𑀇𑀘𑁆𑀘𑀸𑀤𑀺, 𑀇𑀘𑁆𑀙𑀸 𑀘 𑀬𑀣𑀸𑀢𑀦𑁆𑀢𑀺.

𑀉𑀪𑁂 𑀢𑀧𑁆𑀧𑀼𑀭𑀺𑀲 𑀲𑀫𑀸𑀲

𑁨𑁦𑁭. 𑀦𑀲𑀤𑁆𑀤𑀸 𑀲𑀺, 𑀢𑀲𑁆𑀲 𑀮𑁄𑀧𑁄. 𑀦 𑀲𑀼𑀭𑁄 𑀅𑀲𑀼𑀭𑁄.

𑀏𑀢𑁆𑀣 𑀓𑀫𑁆𑀫𑀥𑀸𑀭𑀬𑁂 𑀓𑀢𑁂 𑁋 ‘‘𑀉𑀪𑁂 𑀢𑀧𑁆𑀧𑀼𑀭𑀺𑀲𑀸’’𑀢𑀺 𑀢𑀧𑁆𑀧𑀼𑀭𑀺𑀲𑀲𑀜𑁆𑀜𑀸. ‘‘𑀅𑀢𑁆𑀢𑀦𑁆𑀦𑀲𑁆𑀲 𑀢𑀧𑁆𑀧𑀼𑀭𑀺𑀲𑁂’’𑀢𑀺 𑀦𑀲𑁆𑀲 𑀅. 𑀦 𑀅𑀲𑁆𑀲𑁄 𑀅𑀦𑀲𑁆𑀲𑁄. 𑀏𑀢𑁆𑀣 ‘‘𑀲𑀭𑁂 𑀅𑀦’’𑀢𑀺 𑀦𑀲𑁆𑀲 𑀅𑀦.

𑁨𑁦𑁮. ‘‘𑀦𑀸𑀫𑀸𑀦𑀁 ¶ 𑀲𑀫𑀸𑀲𑁄’’𑀢𑀺 𑀲𑀼𑀢𑁆𑀢𑁂 𑀤𑁆𑀯𑀺𑀥𑀸𑀓𑀢𑁂 𑀅𑀬𑀼𑀢𑁆𑀢𑀢𑁆𑀣𑀸𑀦𑀫𑁆𑀧𑀺 𑀓𑁆𑀯𑀘𑀺 𑀲𑀫𑀸𑀲𑁄. 𑀦 𑀧𑀼𑀦 𑀕𑁂𑀬𑁆𑀬𑀸 𑀅𑀧𑀼𑀦𑀕𑁂𑀬𑁆𑀬𑀸 𑀕𑀸𑀣𑁂𑀢𑁆𑀬𑀸𑀤𑀺. 𑀏𑀢𑁆𑀣 𑀕𑁂𑀬𑁆𑀬𑁂𑀦 𑀲𑀫𑁆𑀩𑀦𑁆𑀥𑁄 𑀦-𑀲𑀤𑁆𑀤𑁄 𑀅𑀬𑀼𑀢𑁆𑀢𑀢𑁆𑀣𑁂𑀦𑀸𑀧𑀺 𑀧𑀼𑀦𑁂𑀦 𑀬𑁄𑀕𑀯𑀺𑀪𑀸𑀕𑀩𑀮𑀸 𑀲𑀫𑀲𑁆𑀬𑀢𑁂.

𑀤𑀺𑀕𑀼𑀲𑀫𑀸𑀲

𑁨𑁦𑁯. 𑀢𑀬𑁄 ¶ 𑀮𑁄𑀓𑀸 𑀲𑀫𑀸𑀳𑀝𑀸 𑀢𑀺𑀮𑁄𑀓𑀁.

𑀏𑀢𑁆𑀣 ‘‘𑀲𑀗𑁆𑀔𑁆𑀬𑀸𑀧𑀼𑀩𑁆𑀩𑁄 𑀤𑀺𑀕𑀽’’𑀢𑀺 𑀓𑀫𑁆𑀫𑀥𑀸𑀭𑀬𑀲𑁆𑀲 𑀤𑀺𑀕𑀼𑀲𑀜𑁆𑀜𑀸. ‘𑀤𑀺𑀕𑀼𑀲𑁆𑀲𑁂𑀓𑀢𑁆𑀢𑀁’’𑀢𑀺 𑀏𑀓𑀢𑁆𑀢𑀁, 𑀦𑀧𑀼𑀁𑀲𑀓𑀢𑁆𑀢𑀜𑁆𑀘.

𑀲𑀼𑀤𑁆𑀥𑀢𑀧𑁆𑀧𑀼𑀭𑀺𑀲𑀲𑀫𑀸𑀲

𑁨𑁧𑁦. 𑀢𑀧𑁆𑀧𑀼𑀭𑀺𑀲𑀸 ¶ 𑀢𑁆𑀯𑁂𑀯.

𑀅𑀫𑀸𑀤𑀬𑁄 𑀧𑀭𑀧𑀤𑁂𑀳𑀺.

𑀤𑀼𑀢𑀺𑀬𑀦𑁆𑀢𑀸𑀤𑀬𑁄 𑀧𑀭𑀧𑀤𑁂𑀳𑀺 𑀦𑀸𑀫𑁂𑀳𑀺 𑀬𑀤𑀸 𑀲𑀫𑀲𑁆𑀬𑀦𑁆𑀢𑁂, 𑀢𑀤𑀸 𑀲𑁄 𑀲𑀫𑀸𑀲𑁄 𑀢𑀧𑁆𑀧𑀼𑀭𑀺𑀲𑁄 𑀦𑀸𑀫.

𑀕𑀸𑀫𑀁 ¶ 𑀕𑀢𑁄 𑀕𑀸𑀫𑀕𑀢𑁄.

‘‘𑀧𑀲𑁆𑀲 𑀯𑀸𑀲𑀺𑀝𑁆𑀞 𑀕𑀸𑀫𑀁, 𑀕𑀢𑁄 𑀢𑀺𑀲𑁆𑀲𑁄 𑀲𑀸𑀯𑀢𑁆𑀣𑀺𑀁’’𑀢𑁆𑀬 𑀢𑁆𑀭𑀸𑀬𑀼𑀢𑁆𑀢𑀢𑁆𑀣𑀢𑀸𑀬 𑀦 𑀲𑀫𑀸𑀲𑁄. 𑀢𑀣𑀸 𑀜𑁆𑀜𑀢𑁆𑀭 𑀜𑁂𑀬𑁆𑀬𑀁.

𑁨𑁧𑁧. 𑀭𑀜𑁆𑀜𑀸 ¶ 𑀳𑀢𑁄 𑀭𑀸𑀚𑀳𑀢𑁄.

𑀓𑀺𑀘𑁆𑀘𑀦𑁆𑀢𑁂𑀳𑀺 𑀪𑀻𑀬𑁄 𑀅𑀥𑀺𑀓𑀢𑁆𑀣𑀯𑀘𑀦𑁂.

𑀢𑀩𑁆𑀩, 𑀅𑀦𑀻𑀬, 𑀡𑁆𑀬, 𑀢𑁂𑀬𑁆𑀬, 𑀭𑀺𑀘𑁆𑀘𑀧𑁆𑀧𑀘𑁆𑀘𑀬𑀸 𑀓𑀺𑀘𑁆𑀘𑀸. 𑀣𑀼𑀢𑀺𑀦𑀺𑀦𑁆𑀤𑀢𑁆𑀣𑀫𑀚𑁆𑀛𑀸𑀭𑁄𑀧𑀺𑀢𑀢𑁆𑀣𑀁 𑀯𑀘𑀦𑀁 𑀅𑀥𑀺𑀓𑀢𑁆𑀣𑀯𑀘𑀦𑀁. 𑀲𑁄𑀡𑀮𑁂𑀬𑁆𑀬𑁄 𑀓𑀽𑀧𑁄𑀇𑀘𑁆𑀘𑀸𑀤𑀺. 𑀲𑁄𑀡𑁂𑀳𑀺 𑀬𑀣𑀸 𑀮𑀺𑀬𑁆𑀳𑀢𑁂, 𑀢𑀣𑀸 𑀧𑀼𑀡𑁆𑀡𑀢𑁆𑀢𑀸 𑀣𑀼𑀢𑀺. 𑀢𑁂𑀳𑀺 𑀉𑀘𑁆𑀙𑀺𑀝𑁆𑀞𑀢𑁆𑀢𑀸 𑀦𑀺𑀦𑁆𑀤𑀸 𑀘.

𑀤𑀥𑀺𑀦𑀸 𑀉𑀧𑀲𑀺𑀢𑁆𑀢𑀁 𑀪𑁄𑀚𑀦𑀁 𑀤𑀥𑀺𑀪𑁄𑀚𑀦𑀁, 𑀲𑀫𑀸𑀲𑀧𑀤𑁂𑀦𑁂𑀯 𑀉𑀧𑀲𑀺𑀢𑁆𑀢𑀓𑁆𑀭𑀺𑀬𑀸𑀬 𑀓𑀣𑀦𑀸 𑀦𑀢𑁆𑀣𑁂𑀢𑁆𑀣𑀸𑀬𑀼𑀢𑁆𑀢𑀢𑁆𑀣𑀢𑀸. 𑀉𑀧𑀲𑀺𑀢𑁆𑀢𑀲𑀤𑁆𑀤𑀸𑀧𑁆𑀧𑀬𑁄𑀕𑁄 𑀧𑀼𑀩𑁆𑀩𑁂𑀯.

𑁨𑁧𑁨. 𑀓𑀭𑀡𑁂 ¶ 𑀢𑀼-𑀅𑀲𑀺𑀦𑀸 𑀓𑀮𑀳𑁄 𑀅𑀲𑀺𑀓𑀮𑀳𑁄.

𑁨𑁧𑁩. 𑀩𑀼𑀤𑁆𑀥𑀲𑁆𑀲 𑀤𑁂𑀬𑁆𑀬𑀁 𑀩𑀼𑀤𑁆𑀥𑀤𑁆𑀤𑁂𑀬𑁆𑀬𑀁, 𑀧𑀭𑀲𑁆𑀲𑀧𑀤𑀁, 𑀏𑀢𑁆𑀣 𑀯𑀺𑀪𑀢𑁆𑀬𑀮𑁄𑀧𑁄. 𑀏𑀯𑀁 𑀅𑀢𑁆𑀢𑀦𑁄𑀧𑀤𑀫𑀺𑀘𑁆𑀘𑀸𑀤𑀺.

𑁨𑁧𑁪. 𑀘𑁄𑀭𑀲𑁆𑀫𑀸 ¶ 𑀪𑀬𑀁 𑀘𑁄𑀭𑀪𑀬𑀁. 𑀏𑀯𑀁 𑀩𑀤𑁆𑀥𑀦𑀫𑀼𑀢𑁆𑀢𑁄𑀘𑁆𑀘𑀸𑀤𑀺.

𑁨𑁧𑁫. 𑀭𑀜𑁆𑀜𑁄 𑀧𑀼𑀢𑁆𑀢𑁄 𑀭𑀸𑀚𑀧𑀼𑀢𑁆𑀢𑁄.

‘‘𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀡𑁆𑀳𑀸 𑀤𑀦𑁆𑀢𑀸’’ 𑀇𑀘𑁆𑀘𑀢𑁆𑀭 𑀤𑀦𑁆𑀢𑀸𑀧𑁂𑀓𑁆𑀔𑀸 𑀙𑀝𑁆𑀞𑀻𑀢𑀺 𑀓𑀡𑁆𑀳𑁂𑀦 𑀲𑀫𑁆𑀩𑀦𑁆𑀥𑀸𑀪𑀸𑀯𑀸 𑀦 𑀲𑀫𑀸𑀲𑁄. 𑀬𑀤𑀸 𑀢𑀼 𑀓𑀡𑁆𑀳𑀸 𑀘 𑀢𑁂 𑀤𑀦𑁆𑀢𑀸 𑀘𑁂𑀢𑀺 𑀓𑀫𑁆𑀫𑀥𑀸𑀭𑀬𑁄, 𑀢𑀤𑀸 𑀙𑀝𑁆𑀞𑀻 𑀓𑀡𑁆𑀳𑀤𑀦𑁆𑀢𑀸𑀧𑁂𑀓𑁆𑀔𑀸𑀢𑀺 𑀩𑁆𑀭𑀸𑀳𑁆𑀫𑀡𑀓𑀡𑁆𑀳𑀤𑀦𑁆𑀢𑀸𑀢𑀺 𑀲𑀫𑀸𑀲𑁄 𑀳𑁄𑀢𑁂𑀯.

𑁨𑁧𑁬. ‘‘𑀭𑀜𑁆𑀜𑁄 ¶ 𑀫𑀸𑀕𑀥𑀲𑁆𑀲 𑀥𑀦’’ 𑀦𑁆𑀢𑁆𑀬𑀢𑁆𑀭 𑀭𑀜𑁆𑀜𑁄𑀢𑀺 𑀙𑀝𑁆𑀞𑀻 𑀥𑀦 𑀫𑀧𑁂𑀓𑁆𑀔𑀢𑁂, 𑀦 𑀫𑀸𑀕𑀥𑀁. 𑀭𑀸𑀚𑀸 𑀏𑀯 𑀫𑀸𑀕𑀥𑀲𑀤𑁆𑀤𑁂𑀦 𑀯𑀼𑀘𑁆𑀘𑀢𑁂𑀢𑀺 𑀪𑁂𑀤𑀸𑀪𑀸𑀯𑀸 𑀲𑀫𑁆𑀩𑀦𑁆𑀥𑀸𑀪𑀸𑀯𑁄𑀢𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑁂𑀦 𑀫𑀸𑀕𑀥𑁂𑀦 𑀲𑀳 𑀭𑀸𑀚𑀸 𑀦 𑀲𑀫𑀲𑁆𑀬𑀢𑁂. 𑀤𑁆𑀯𑀺𑀝𑁆𑀞𑁄 𑀳𑀺 𑀲𑀫𑁆𑀩𑀦𑁆𑀥𑁄.

𑀭𑀜𑁆𑀜𑁄 ¶ 𑀅𑀲𑁆𑀲𑁄 𑀧𑀼𑀭𑀺𑀲𑁄 𑀘𑁂’’ 𑀢𑁆𑀬 𑀢𑁆𑀭 𑀭𑀜𑁆𑀜𑁄 𑀅𑀲𑁆𑀲𑁄, 𑀭𑀜𑁆𑀜𑁄 𑀧𑀼𑀭𑀺𑀲𑁄 𑀢𑀺 𑀘 𑀧𑀘𑁆𑀘𑁂𑀓𑀁 𑀲𑀫𑁆𑀩𑀦𑁆𑀥𑀢𑁄 𑀲𑀸𑀧𑁂𑀓𑁆𑀔𑀢𑀸 𑀅𑀢𑁆𑀣𑀻𑀢𑀺 𑀦 𑀲𑀫𑀸𑀲𑁄. ‘‘𑀅𑀲𑁆𑀲𑁄 𑀘 𑀧𑀼𑀭𑀺𑀲𑁄 𑀘𑀸’’𑀢𑀺 𑀤𑁆𑀯𑀦𑁆𑀤𑁂 𑀓𑀢𑁂 𑀢𑀼 𑀭𑀸𑀚𑀲𑁆𑀲𑀧𑀼𑀭𑀺𑀲𑀸𑀢𑀺 𑀳𑁄𑀢𑁂𑀯, 𑀅𑀜𑁆𑀜𑀸𑀦𑀧𑁂𑀓𑁆𑀔𑀢𑁆𑀢𑀸.

‘‘𑀭𑀜𑁆𑀜𑁄 𑀕𑀭𑀼𑀧𑀼𑀢𑁆𑀢𑁄’’ 𑀇𑀘𑁆𑀘𑀢𑁆𑀭 𑀭𑀸𑀚𑀸𑀧𑁂𑀓𑁆𑀔𑀺𑀦𑁄𑀧𑀺 𑀕𑀭𑀼𑀦𑁄

𑀧𑀼𑀢𑁆𑀢𑁂𑀦 ¶ 𑀲𑀳 𑀲𑀫𑀸𑀲𑁄, 𑀕𑀫𑀓𑀢𑁆𑀢𑀸. 𑀕𑀫𑀓𑀢𑁆𑀢𑀫𑁆𑀧𑀺 𑀲𑀫𑀸𑀲𑀲𑁆𑀲 𑀦𑀺𑀩𑀦𑁆𑀥𑀦𑀁. 𑀢𑀢𑁆𑀣 𑀕𑀭𑀼𑀦𑁄 𑀧𑀼𑀢𑁆𑀢𑁄𑀢𑀺 𑀯𑀺𑀕𑁆𑀕𑀳𑁄, 𑀏𑀯𑀫𑀜𑁆𑀜𑀢𑁆𑀭.

𑁨𑁧𑁭. 𑀭𑀽𑀧𑁂 𑀲𑀜𑁆𑀜𑀸 𑀭𑀽𑀧𑀲𑀜𑁆𑀜𑀸.

𑀓𑁆𑀯𑀘𑀺 𑀦𑀺𑀦𑁆𑀤𑀸𑀬𑀁 - 𑀓𑀽𑀧𑁂 𑀫𑀡𑁆𑀟𑀽𑀓𑁄 𑀯𑀺𑀬 𑀓𑀽𑀧𑀫𑀡𑁆𑀟𑀽𑀓𑁄. 𑀏𑀯𑀁 𑀦𑀕𑀭𑀓𑀸𑀓𑁄 𑀇𑀘𑁆𑀘𑀸𑀤𑀺. 𑀅𑀢𑁆𑀭𑁄𑀧𑀫𑀸𑀬 𑀦𑀺𑀦𑁆𑀤𑀸 𑀕𑀫𑁆𑀬𑀢𑁂.

𑀅𑀦𑁆𑀢𑁂𑀯𑀸𑀲𑀺𑀓𑁄 𑀢𑁆𑀬𑀸𑀤𑁄 𑀯𑀺𑀪𑀢𑁆𑀢𑁆𑀬𑀮𑁄𑀧𑁄.

𑀩𑀳𑀼𑀩𑁆𑀩𑀻𑀳𑀺𑀲𑀫𑀸𑀲

𑁨𑁧𑁮. 𑀅𑀜𑁆𑀜𑀧𑀤𑀢𑁆𑀣𑁂𑀲𑀼 𑀩𑀳𑀼𑀩𑁆𑀩𑀻𑀳𑀺.

𑀅𑀧𑁆𑀧𑀞𑀫𑀦𑁆𑀢𑀸𑀦 ¶ 𑀫𑀜𑁆𑀜𑁂𑀲𑀁 𑀧𑀤𑀸𑀦𑀁 𑀅𑀢𑁆𑀣𑁂𑀲𑀼 𑀤𑁆𑀯𑁂 𑀯𑀸 𑀩𑀳𑀽𑀦𑀺 𑀯𑀸 𑀦𑀸𑀫𑀸𑀦𑀺 𑀬𑀤𑀸 𑀲𑀫𑀲𑁆𑀬𑀦𑁆𑀢𑁂, 𑀢𑀤𑀸 𑀲𑁄 𑀲𑀫𑀸𑀲𑁄 𑀩𑀳𑀼𑀩𑁆𑀩𑀻𑀳𑀺 𑀦𑀸𑀫.

𑀆𑀕𑀢𑀸 𑀲𑀫𑀡𑀸 𑀬𑀁 𑀲𑀸 𑀆𑀕𑀢𑀲𑀫𑀡𑁄, 𑀯𑀺𑀳𑀸𑀭𑁄.

𑁨𑁧𑁯. 𑀚𑀺𑀢𑀸𑀦𑀺 ¶ 𑀇𑀦𑁆𑀤𑁆𑀭𑀺𑀬𑀸𑀦𑀺 𑀬𑁂𑀦 𑀲𑁄 𑀚𑀺𑀢𑀺𑀦𑁆𑀤𑁆𑀭𑀺𑀬𑁄, 𑀪𑀕𑀯𑀸. 𑀆𑀳𑀺𑀢𑁄 𑀅𑀕𑁆𑀕𑀺 𑀬𑁂𑀦 𑀲𑁄 𑀆𑀳𑀺𑀢𑀕𑁆𑀕𑀺. 𑀅𑀕𑁆𑀬𑀸𑀳𑀺𑀢𑁄 𑀯𑀸𑀢𑁆𑀬𑀸𑀤𑁄 𑀬𑀣𑁂𑀘𑁆𑀙𑀁 𑀯𑀺𑀲𑁂𑀲𑀦𑀲𑁆𑀲 𑀧𑀭𑀢𑀸.

𑁨𑁨𑁦. 𑀓𑀭𑀡𑁂 𑀢𑀼-𑀙𑀺𑀦𑁆𑀦𑁄 𑀭𑀼𑀓𑁆𑀔𑁄 𑀬𑁂𑀦 𑀲𑁄 𑀙𑀺𑀦𑁆𑀦𑀭𑀼𑀓𑁆𑀔𑁄, 𑀨𑀭𑀲𑀼.

𑁨𑁨𑁧. 𑀤𑀺𑀦𑁆𑀦𑁄 𑀲𑀼𑀗𑁆𑀓𑁄 𑀬𑀲𑁆𑀲 𑀲𑁄 𑀤𑀺𑀦𑁆𑀦𑀲𑀼𑀗𑁆𑀓𑁄, 𑀭𑀸𑀚𑀸.

𑁨𑁨𑁨. 𑀦𑀺𑀕𑁆𑀕𑀢𑀸 𑀚𑀦𑀸 𑀬𑀲𑁆𑀫𑀸 𑀲𑁄 𑀦𑀺𑀕𑁆𑀕𑀢𑀚𑀦𑁄, 𑀕𑀸𑀫𑁄.

𑁨𑁨𑁩. 𑀤𑀲 ¶ 𑀩𑀮𑀸𑀦𑀺 𑀬𑀲𑁆𑀲 𑀲𑁄 𑀤𑀲𑀩𑀮𑁄, 𑀪𑀕𑀯𑀸. 𑀦𑀢𑁆𑀣𑀺 𑀲𑀫𑁄 𑀬𑀲𑁆𑀲 𑀲𑁄 𑀅𑀲𑀫𑁄. 𑀏𑀢𑁆𑀣 ‘‘𑀅𑀢𑁆𑀢𑀦𑁆𑀦𑀲𑁆𑀲𑀸’’𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀦𑀲𑁆𑀲 𑀅.

𑀧𑀳𑀽𑀢𑀸 𑀚𑀺𑀯𑁆𑀳𑀸 𑀬𑀲𑁆𑀲 𑀲𑁄 𑀧𑀳𑀽𑀢𑀚𑀺𑀯𑁆𑀳𑁄, 𑀫𑀳𑀦𑁆𑀢𑀻 𑀧𑀜𑁆𑀜𑀸 𑀬𑀲𑁆𑀲 𑀲𑁄 𑀫𑀳𑀸𑀧𑀜𑁆𑀜𑁄. 𑀤𑁆𑀯𑀻𑀲𑀼 ‘‘𑀇𑀢𑁆𑀣𑀺𑀬𑀫𑁆𑀪𑀸𑀲𑀺𑀢𑀧𑀼𑀫𑀺𑀢𑁆𑀣𑀻𑀧𑀼𑀫𑀸𑀯 𑀘𑁂’’𑀢𑀺 𑀧𑀼𑀫𑁆𑀪𑀸𑀯𑀸𑀢𑀺𑀤𑁂𑀲𑀸 𑀧𑀼𑀩𑁆𑀩𑀼𑀢𑁆𑀢𑀭𑀧𑀤𑁂𑀲𑀼 𑀆𑀈𑀧𑁆𑀧𑀘𑁆𑀘𑀬𑀸𑀦𑀫𑀪𑀸𑀯𑁄.

𑁨𑁨𑁪. ‘‘𑀓𑁆𑀯𑀘𑀺 ¶ 𑀲𑀫𑀸𑀲𑀦𑁆𑀢𑀕𑀢𑀸𑀦𑀫𑀓𑀸𑀭𑀦𑁆𑀢𑁄’’𑀢𑀺 𑀅𑀦𑁆𑀢𑀲𑁆𑀲 𑀅𑀢𑁆𑀢𑀁. 𑀓𑀸𑀭𑀕𑁆𑀕𑀳𑀡𑁂𑀦 𑀆 𑀇 𑀘. 𑀇𑀢𑁆𑀣𑀺𑀬𑀫𑀺𑀯𑀡𑁆𑀡𑀦𑁆𑀢𑀸, 𑀢𑁆𑀯𑀦𑁆𑀢𑁂𑀳𑀺 𑀘 𑀓𑀧𑁆𑀧𑀘𑁆𑀘𑀬𑁄𑀧𑀺. 𑀬𑀣𑀸 - 𑀯𑀺𑀲𑀸𑀮𑀁 𑀅𑀓𑁆𑀔𑀺 𑀬𑀲𑁆𑀲 𑀲𑁄 𑀯𑀺𑀲𑀸𑀮𑀓𑁆𑀔𑁄, 𑀧𑀘𑁆𑀘𑀓𑁆𑀔𑀥𑀫𑁆𑀫𑀸, 𑀲𑀺𑀮𑁄𑀧𑁄. 𑀲𑁄𑀪𑀦𑁄 𑀕𑀦𑁆𑀥𑁄 𑀬𑀲𑁆𑀲 𑀲𑁄 ¶ 𑀲𑀼𑀕𑀦𑁆𑀥𑀺. 𑀩𑀳𑀼𑀓𑀦𑁆𑀢𑀺𑀓𑁄, 𑀩𑀳𑀼𑀦𑀤𑀺𑀓𑁄, 𑀲𑀫𑀼𑀤𑁆𑀤𑁄. 𑀏𑀢𑁆𑀣 𑀬𑀤𑀸𑀤𑀺𑀦𑀸 𑀭𑀲𑁆𑀲𑁄. 𑀩𑀳𑀼𑀓𑀢𑁆𑀢𑀼𑀓𑁄. 𑀫𑀢𑁆𑀢𑀸 𑀩𑀳𑀯𑁄 𑀫𑀸𑀢𑀗𑁆𑀕𑀸 𑀬𑀲𑁆𑀫𑀺𑀁 𑀢𑀁 𑀫𑀢𑁆𑀢𑀩𑀳𑀼𑀫𑀸𑀢𑀗𑁆𑀕𑀁, 𑀯𑀦𑀁.

𑀢𑀼𑀮𑁆𑀬𑀸𑀥𑀺𑀓𑀭𑀡𑁄.

𑁨𑁨𑁫. 𑀲𑀼𑀯𑀡𑁆𑀡𑀲𑁆𑀲 ¶ 𑀯𑀺𑀬 𑀯𑀡𑁆𑀡𑁄 𑀬𑀲𑁆𑀲 𑀲𑁄 𑀲𑀼𑀯𑀡𑁆𑀡𑀯𑀡𑁆𑀡𑁄. 𑀯𑀚𑀺𑀭𑀁 𑀧𑀸𑀡𑀺𑀫𑁆𑀳𑀺 𑀬𑀲𑁆𑀲 𑀲𑁄 𑀯𑀚𑀺𑀭𑀧𑀸𑀡𑀺. 𑀉𑀭𑀲𑀺 𑀮𑁄𑀫𑀸𑀦𑀺 𑀬𑀲𑁆𑀲 𑀲𑁄 𑀉𑀭𑀲𑀺𑀮𑁄𑀫𑁄. 𑀏𑀢𑁆𑀣 𑀯𑀺𑀪𑀢𑁆𑀬𑀮𑁄𑀧𑁄.

‘‘𑀅𑀢𑁆𑀣𑁂𑀲𑀽’’𑀢𑀺 𑀩𑀳𑀼𑀢𑁆𑀢𑀕𑁆𑀕𑀳𑀡𑁂𑀦 𑀓𑁆𑀯𑀘𑀺 𑀧𑀞𑀫𑀦𑁆𑀢𑀸𑀦𑀫𑁆𑀧𑀺. 𑀲𑀳 𑀳𑁂𑀢𑀼𑀦𑀸 𑀬𑁄 𑀯𑀢𑁆𑀢𑀢𑁂 𑀲𑁄 𑀲𑀳𑁂𑀢𑀼𑀓𑁄, ‘‘𑀬𑀤𑀸’’ 𑀤𑀺𑀦𑀸 𑀲𑀳𑀲𑁆𑀲 𑀲𑁄.

𑁨𑁨𑁬. 𑀲𑀢𑁆𑀢 ¶ 𑀯𑀸 𑀅𑀝𑁆𑀞 𑀯𑀸 𑀲𑀢𑁆𑀢𑀝𑁆𑀞, 𑀫𑀸𑀲𑀸, 𑀏𑀢𑁆𑀣𑀜𑁆𑀜𑀧𑀤𑀢𑁆𑀣𑁄 𑀯𑀸 𑀲𑀤𑁆𑀤𑀲𑁆𑀲𑀢𑁆𑀣𑁄. 𑀤𑀓𑁆𑀔𑀺𑀡𑀲𑁆𑀲𑀸 𑀘 𑀧𑀼𑀩𑁆𑀩𑀲𑁆𑀲𑀸 𑀘 𑀤𑀺𑀲𑀸𑀬 𑀬𑀁 𑀅𑀦𑁆𑀢𑀭𑀸𑀮𑀁, 𑀲𑀸 𑀤𑀓𑁆𑀔𑀺𑀡𑀧𑀼𑀩𑁆𑀩𑀸, 𑀤𑀺𑀲𑀸.

𑀪𑀺𑀦𑁆𑀦𑀸𑀥𑀺𑀓𑀭𑀡𑁄.

𑀅𑀧𑁆𑀧𑀞𑀫𑀦𑁆𑀢𑀸𑀦𑀦𑁆𑀢𑀺 𑀓𑀺𑀁, 𑀤𑁂𑀲𑀺𑀢𑁄 𑀩𑀼𑀤𑁆𑀥𑁂𑀦 𑀬𑁄 𑀥𑀫𑁆𑀫𑁄.

𑀤𑁆𑀯𑀦𑁆𑀤𑀲𑀫𑀸𑀲

𑁨𑁨𑁭. 𑀦𑀸𑀫𑀸𑀦𑀁 𑀲𑀫𑀼𑀘𑁆𑀘𑀬𑁄 𑀤𑁆𑀯𑀦𑁆𑀤𑁄.

𑀲𑀫𑀼𑀘𑁆𑀘𑀬𑁄 ¶ , 𑀢𑀺 𑀧𑀺𑀡𑁆𑀟𑀻𑀓𑀭𑀡𑀁 𑀏𑀓𑀯𑀺𑀪𑀢𑁆𑀢𑀺𑀓𑀸𑀦𑀁 𑀦𑀸𑀫𑀸𑀦𑀁 𑀬𑁄 𑀲𑀫𑀼𑀘𑁆𑀘𑀬𑁄, 𑀲𑁄 𑀤𑁆𑀯𑀦𑁆𑀤𑁄 𑀦𑀸𑀫, 𑀇𑀤𑀁 𑀲𑀼𑀢𑁆𑀢𑀁 𑀩𑀳𑀼𑀯𑀘𑀦𑀯𑀺𑀲𑀬𑀁.

𑀘𑀦𑁆𑀤𑁄 𑀘 𑀲𑀽𑀭𑀺𑀬𑁄 𑀘 𑀘𑀦𑁆𑀤𑀲𑀽𑀭𑀺𑀬𑀸. 𑀢𑀺𑀝𑁆𑀞𑀦𑁆𑀢𑀺 𑀢𑁆𑀬𑀸𑀤𑀺-

𑀓𑁆𑀭𑀺𑀬𑀸𑀲𑀫𑁆𑀩𑀦𑁆𑀥𑀲𑀸𑀫𑀜𑁆𑀜𑀢𑁄 ¶ 𑀅𑀢𑁆𑀣𑁂𑀢𑁆𑀣𑀸𑀧𑁂𑀓𑀢𑁆𑀣𑀢𑀸, 𑀏𑀯𑀁 𑀦𑀭𑀦𑀸𑀭𑀺𑀬𑁄, 𑀅𑀓𑁆𑀔𑀭𑀧𑀤𑀸𑀦𑀺.

𑁨𑁨𑁮. 𑀢𑀣𑀸 𑀤𑁆𑀯𑀦𑁆𑀤𑁂 𑀧𑀸𑀡𑀺 𑀢𑀼𑀭𑀺𑀬 𑀬𑁄𑀕𑁆𑀕 𑀲𑁂𑀦𑀗𑁆𑀕 𑀔𑀼𑀤𑁆𑀤𑀚𑀦𑁆𑀢𑀼𑀓 𑀯𑀺𑀯𑀺𑀥 𑀯𑀺𑀭𑀼𑀤𑁆𑀥 𑀯𑀺𑀲𑀪𑀸𑀕𑀢𑁆𑀣𑀸𑀤𑀻𑀦𑀜𑁆𑀘.

𑀯𑀺𑀯𑀺𑀥𑁂𑀦𑀸𑀓𑀸𑀭𑁂𑀦 𑀯𑀺𑀭𑀼𑀤𑁆𑀥𑀸 𑀯𑀺𑀯𑀺𑀥𑀯𑀺𑀭𑀼𑀤𑁆𑀥𑀸, 𑀲𑀪𑀸𑀕𑀸 𑀲𑀤𑀺𑀲𑀸, 𑀯𑀺𑀯𑀺𑀥𑀸 𑀘 𑀢𑁂 𑀲𑀪𑀸𑀕𑀸 𑀘𑁂𑀢𑀺 𑀯𑀺𑀲𑀪𑀸𑀕𑀸. 𑀬𑀣𑀸 𑀤𑀺𑀕𑀼𑀲𑀫𑀸𑀲𑁂, 𑀢𑀣𑀸 𑀤𑁆𑀯𑀦𑁆𑀤𑁂 𑀧𑀸𑀡𑁆𑀬𑀗𑁆𑀕𑀢𑁆𑀣𑀸𑀤𑀻𑀦𑀁 𑀏𑀓𑀢𑁆𑀢𑀁, 𑀦𑀧𑀼𑀁𑀲𑀓𑀢𑁆𑀢𑀜𑁆𑀘 𑀳𑁄𑀢𑀺.

𑀘𑀓𑁆𑀔𑀼𑀲𑁄𑀢𑀁, 𑀕𑀻𑀢𑀯𑀸𑀤𑀺𑀢𑀁, 𑀬𑀼𑀕𑀦𑀗𑁆𑀕𑀮𑀁, 𑀳𑀢𑁆𑀣𑀲𑁆𑀲𑀁, 𑀅𑀲𑀺𑀘𑀫𑁆𑀫𑀁, 𑀟𑀁𑀲𑀫𑀓𑀲𑀁, 𑀓𑁄𑀓𑀸𑀮𑀽𑀓𑀁.

𑀦𑀸𑀫𑀭𑀽𑀧𑀁 ¶ , 𑀦𑀸𑀫𑀁 𑀦𑀫𑀦𑀮𑀓𑁆𑀔𑀡𑀁, 𑀭𑀽𑀧𑀁 𑀭𑀼𑀧𑁆𑀧𑀦𑀮𑀓𑁆𑀔𑀡𑀁. 𑀏𑀯𑀫𑁂𑀢𑁂 𑀥𑀫𑁆𑀫𑀸 𑀮𑀓𑁆𑀔𑀡𑀢𑁄 𑀯𑀺𑀯𑀺𑀥𑀸, 𑀧𑀭𑀫𑀢𑁆𑀣𑀢𑁄 𑀲𑀪𑀸𑀕𑀸 𑀘.

𑀆𑀤𑀺𑀲𑀤𑁆𑀤𑁂𑀦𑀸𑀜𑁆𑀜𑀢𑁆𑀣𑀸𑀧𑀺 ¶ . 𑀬𑀣𑀸 - 𑀪𑀺𑀦𑁆𑀦𑀮𑀺𑀗𑁆𑀕𑀸𑀦𑀁 - 𑀇𑀢𑁆𑀣𑀺𑀧𑀼𑀫𑀁. 𑀬𑀤𑀸𑀤𑀺𑀦𑀸 𑀭𑀲𑁆𑀲𑁄, 𑀤𑀸𑀲𑀺𑀤𑀸𑀲𑀁, 𑀧𑀢𑁆𑀢𑀘𑀻𑀯𑀭𑀁. 𑀕𑀗𑁆𑀕𑀸𑀲𑁄𑀡𑀁.

𑀲𑀗𑁆𑀔𑁆𑀬𑀸𑀧𑀭𑀺𑀫𑀸𑀡𑀸𑀦𑀁 - 𑀢𑀺𑀓𑀘𑀢𑀼𑀓𑁆𑀓𑀁.

𑀲𑀺𑀧𑁆𑀧𑀻𑀦𑀁 - 𑀯𑁂𑀡𑀭𑀣𑀓𑀸𑀭𑀁.

𑀮𑀼𑀤𑁆𑀤𑀓𑀸𑀦𑀁 - 𑀲𑀸𑀓𑀼𑀦𑁆𑀢𑀺𑀓 𑀫𑀸𑀕𑀯𑀺𑀓𑀁.

𑀅𑀧𑁆𑀧𑀸𑀡𑀺𑀚𑀸𑀢𑀻𑀦𑀁 - 𑀆𑀭𑀲𑀢𑁆𑀣𑀺.

𑀏𑀓𑀚𑁆𑀛𑀸𑀬𑀦𑀩𑁆𑀭𑀸𑀳𑁆𑀫𑀡𑀸𑀦𑀁 - 𑀓𑀞𑀓𑀸𑀮𑀸𑀧𑀁 𑀇𑀘𑁆𑀘𑀸𑀤𑀺.

𑁨𑁨𑁯. 𑀯𑀺𑀪𑀸𑀲𑀸 𑀭𑀼𑀓𑁆𑀔 𑀢𑀺𑀡 𑀧𑀲𑀼 𑀥𑀦 𑀥𑀜𑁆𑀜 𑀚𑀦𑀧𑀤𑀸𑀤𑀻𑀦𑀜𑁆𑀘.

𑀤𑁆𑀯𑀦𑁆𑀤𑁂 ¶ 𑀭𑀼𑀓𑁆𑀔𑀸𑀤𑀻𑀦𑀁 𑀏𑀓𑀢𑁆𑀢𑀁 𑀦𑀧𑀼𑀁𑀲𑀓𑀢𑁆𑀢𑀜𑁆𑀘 𑀯𑀸 𑀳𑁄𑀢𑀺.

𑀥𑀯𑀔𑀤𑀺𑀭𑀁, 𑀥𑀯𑀔𑀤𑀺𑀭𑀸, 𑀫𑀼𑀜𑁆𑀚𑀧𑀩𑁆𑀩𑀚𑀁, 𑀫𑀼𑀜𑁆𑀚𑀧𑀩𑁆𑀩𑀚𑀸, 𑀅𑀚𑁂𑀴𑀓𑀁, 𑀅𑀚𑁂𑀴𑀓𑀸, 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁, 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀦𑀺, 𑀲𑀸𑀮𑀺𑀬𑀯𑀁, 𑀲𑀸𑀮𑀺𑀬𑀯𑀸.

𑀓𑀸𑀲𑀺𑀓𑁄𑀲𑀮𑀁 ¶ 𑀓𑀸𑀲𑀺𑀓𑁄𑀲𑀮𑀸.

𑀆𑀤𑀺𑀲𑀤𑁆𑀤𑁂𑀦 𑀅𑀜𑁆𑀜𑁂𑀲𑀼𑀧𑀺 𑀯𑀸. 𑀬𑀣𑀸 𑁋 𑀦𑀺𑀘𑁆𑀘𑀯𑀺𑀭𑁄𑀥𑀻𑀦𑀫𑀤𑁆𑀤𑀩𑁆𑀩𑀸𑀦𑀁 - 𑀓𑀼𑀲𑀮𑀸𑀓𑀼𑀲𑀮𑀁, 𑀓𑀼𑀲𑀮𑀸𑀓𑀼𑀲𑀮𑀸𑀦𑀺.

𑀲𑀓𑀼𑀡𑀻𑀦𑀁 - 𑀩𑀓𑀩𑀮𑀸𑀓𑀁, 𑀩𑀓𑀩𑀮𑀸𑀓𑀸.

𑀩𑁆𑀬𑀜𑁆𑀚𑀦𑀸𑀦𑀁 - 𑀤𑀥𑀺𑀖𑀢𑀁, 𑀤𑀥𑀺𑀖𑀢𑀸𑀦𑀺.

𑀤𑀺𑀲𑀸𑀦𑀁 - 𑀧𑀼𑀩𑁆𑀩𑀸𑀧𑀭𑀁, 𑀧𑀼𑀩𑁆𑀩𑀸𑀧𑀭𑀸 𑀇𑀘𑁆𑀘𑀸𑀤𑀺.

𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲

𑁨𑁩𑁦. 𑀅𑀥𑀺𑀲𑀤𑁆𑀤𑀸 ¶ 𑀲𑁆𑀫𑀺𑀁, 𑀢𑀲𑁆𑀲 𑀮𑁄𑀧𑁄. 𑀅𑀥𑀺𑀲𑀤𑁆𑀤𑁂𑀦 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑁆𑀢𑀸 𑀇𑀢𑁆𑀣𑀺𑀲𑀤𑁆𑀤𑀸𑀧𑀺𑀲𑁆𑀫𑀺𑀁. 𑀦𑀺𑀘𑁆𑀘𑀲𑀫𑀸𑀲𑀢𑁆𑀢𑀸 𑀆𑀥𑀸𑀭𑀪𑀽𑀢𑀸𑀬𑀫𑀺𑀢𑁆𑀣𑀺𑀬𑀦𑁆𑀢𑀺 𑀧𑀤𑀦𑁆𑀢𑀭𑁂𑀦 𑀯𑀺𑀕𑁆𑀕𑀳𑁄. 𑀅𑀥𑀺 𑀇𑀢𑁆𑀣𑀺𑀬𑀦𑁆𑀢𑀺 𑀞𑀺𑀢𑁂 𑁋

𑀉𑀧𑀲𑀕𑁆𑀕𑀦𑀺𑀧𑀸𑀢𑀧𑀼𑀩𑁆𑀩𑀓𑁄 𑀅𑀩𑁆𑀬𑀬𑀻𑀪𑀸𑀯𑁄.

𑀉𑀧𑀲𑀕𑁆𑀕𑀸𑀤𑀺𑀧𑀼𑀩𑁆𑀩𑀓𑁄 𑀲𑀤𑁆𑀤𑁄 𑀯𑀺𑀪𑀢𑁆𑀬𑀢𑁆𑀣𑀸𑀤𑀻𑀲𑀼 𑀲𑀫𑀸𑀲𑁄 𑀳𑁄𑀢𑀺, 𑀅𑀩𑁆𑀬𑀬𑀻𑀪𑀸𑀯𑀲𑀜𑁆𑀜𑁄 𑀘.

‘‘𑀲𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄’’𑀢𑀺 𑀅𑀩𑁆𑀬𑀬𑀻𑀪𑀸𑀯𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄, 𑀬𑀤𑀸𑀤𑀺𑀦𑀸 𑀏𑀓𑀯𑀘𑀦𑁄 𑀘.

‘‘𑀲𑀭𑁄 ¶ 𑀭𑀲𑁆𑀲𑁄 𑀦𑀧𑀼𑀁𑀲𑀓𑁂’’𑀢𑀺 𑀭𑀲𑁆𑀲𑁄.

𑀅𑀜𑁆𑀜𑀲𑁆𑀫𑀸 𑀮𑁄𑀧𑁄 𑀘.

𑀅𑀦𑀓𑀸𑀭𑀦𑁆𑀢𑀸 𑀅𑀩𑁆𑀬𑀬𑀻𑀪𑀸𑀯𑀸 𑀧𑀭𑀸 𑀲𑀩𑁆𑀩𑀸 𑀯𑀺𑀪𑀢𑁆𑀢𑀻 𑀮𑀼𑀚𑁆𑀚𑀭𑁂. 𑀅𑀥𑀺𑀢𑁆𑀣𑀺, 𑀯𑀺𑀪𑀢𑁆𑀢𑀻𑀦𑀫𑀢𑁆𑀣𑁄 𑀆𑀥𑀸𑀭𑀸𑀤𑀺.

𑀇𑀥𑀸𑀥𑀺𑀲𑀤𑁆𑀤𑁄 𑀆𑀥𑀸𑀭𑁂𑀯𑀢𑁆𑀢𑀢𑁂, 𑀅𑀥𑀺𑀢𑁆𑀣𑀺𑀇𑀘𑁆𑀘𑁂𑀢𑀁 𑀧𑀤𑀁 𑀇𑀢𑁆𑀣𑀺𑀬 𑀫𑀺𑀘𑁆𑀘𑁂𑀢𑀫𑀢𑁆𑀣𑀁 𑀯𑀤𑀢𑀺.

𑀲𑀫𑀻𑀧𑀁 ¶ 𑀦𑀕𑀭𑀲𑁆𑀲 𑀉𑀧𑀦𑀕𑀭𑀁. ‘‘𑀅𑀁𑀯𑀺𑀪𑀢𑁆𑀢𑀻𑀦𑀫𑀓𑀸𑀭𑀦𑁆𑀢𑀩𑁆𑀬𑀬𑀻𑀪𑀸𑀯𑀸’’𑀢𑀺 𑀯𑀺𑀪𑀢𑁆𑀢𑀻𑀦𑀁 𑀓𑁆𑀯𑀘𑀺 𑀅𑀁.

𑀓𑁆𑀯𑀘𑀻𑀢𑀺 𑀓𑀺𑀁. 𑀉𑀧𑀦𑀕𑀭𑁂.

𑀅𑀪𑀸𑀯𑁄 𑀫𑀓𑁆𑀔𑀺𑀓𑀸𑀦𑀁 𑀦𑀺𑀫𑁆𑀫𑀓𑁆𑀔𑀺𑀓𑀁 𑀭𑀲𑁆𑀲𑁄. 𑀅𑀦𑀼𑀧𑀼𑀩𑁆𑀩𑁄 𑀣𑁂𑀭𑀸𑀦𑀁 𑀅𑀦𑀼𑀣𑁂𑀭𑀁, 𑀅𑀦𑀢𑀺𑀓𑁆𑀓𑀫𑁆𑀫 𑀲𑀢𑁆𑀢𑀺𑀁 𑀬𑀣𑀸𑀲𑀢𑁆𑀢𑀺.

𑀬𑁂 ¶ 𑀬𑁂 𑀩𑀼𑀟𑁆𑀠𑀸 𑀬𑀣𑀸𑀩𑀼𑀟𑁆𑀠𑀁, 𑀯𑀺𑀘𑁆𑀙𑀸𑀬𑀁.

𑀬𑀢𑁆𑀢𑀓𑁄 𑀧𑀭𑀺𑀘𑁆𑀙𑁂𑀤𑁄 𑀚𑀻𑀯𑀲𑁆𑀲 𑀬𑀸𑀯𑀚𑀻𑀯𑀁, 𑀅𑀯𑀥𑀸𑀭𑀡𑁂.

𑀆 𑀧𑀩𑁆𑀩𑀢𑀸 𑀔𑁂𑀢𑁆𑀢𑀁 𑀆𑀧𑀩𑁆𑀩𑀢𑀁 𑀔𑁂𑀢𑁆𑀢𑀁, 𑀫𑀭𑀺𑀬𑀸𑀤𑀸𑀬𑀁, 𑀯𑀚𑁆𑀚𑀫𑀸𑀦𑀸 𑀲𑀻𑀫𑀸 𑀫𑀭𑀺𑀬𑀸𑀤𑀸, 𑀧𑀩𑁆𑀩𑀢𑀁 𑀯𑀺𑀦𑀸𑀢𑁆𑀬𑀢𑁆𑀣𑁄.

𑀆 𑀚𑀮𑀦𑁆𑀢𑀸 𑀲𑀻𑀢𑀁 𑀆𑀚𑀮𑀦𑁆𑀢𑀁 𑀲𑀻𑀢𑀁, 𑀅𑀪𑀺𑀯𑀺𑀥𑀺𑀫𑁆𑀳𑀺, 𑀕𑀬𑁆𑀳𑀫𑀸𑀦𑀸 𑀲𑀻𑀫𑀸 𑀅𑀪𑀺𑀯𑀺𑀥𑀺, 𑀚𑀮𑀦𑁆𑀢𑁂𑀦 𑀲𑀳𑁂𑀢𑁆𑀬𑀢𑁆𑀣𑁄.

𑀆𑀲𑀤𑁆𑀤𑀬𑁄𑀕𑁂 ‘‘𑀥𑀸𑀢𑀼𑀦𑀸𑀫𑀸’’𑀤𑀺𑀦𑀸 𑀅𑀧𑀸𑀤𑀸𑀦𑀯𑀺𑀥𑀸𑀦𑁂𑀦𑁂𑀯 𑀯𑀸𑀓𑁆𑀬𑀫𑁆𑀧𑀺 𑀲𑀺𑀤𑁆𑀥𑀁. 𑀢𑀣𑀸𑀜𑁆𑀜𑀢𑁆𑀭.

𑁨𑁩𑁧. ‘‘𑀉𑀢𑁆𑀢𑀫𑁄 ¶ 𑀯𑀻𑀭𑁄 𑀧𑀯𑀻𑀭𑁄’’ 𑀇𑀘𑁆𑀘𑀸𑀤𑁄 𑀧𑀦 𑀧𑀼𑀩𑁆𑀩𑀧𑀤𑀢𑁆𑀣𑀧𑁆𑀧𑀥𑀸𑀦𑀢𑁆𑀢𑀸𑀪𑀸𑀯𑀸𑀩𑁆𑀬𑀬𑀻𑀪𑀸𑀯𑀸𑀪𑀸𑀯𑁄 𑀓𑀫𑁆𑀫𑀥𑀸𑀭𑀬𑁄𑀏𑀯. 𑀏𑀯𑀁 𑀯𑀺𑀲𑀺𑀝𑁆𑀞𑁄 𑀥𑀫𑁆𑀫𑁄 𑀅𑀪𑀺𑀥𑀫𑁆𑀫𑁄. 𑀓𑀼𑀘𑁆𑀙𑀺𑀢𑀁 𑀅𑀦𑁆𑀦𑀁 𑀓𑀤𑀦𑁆𑀦𑀁. 𑀏𑀢𑁆𑀢𑁆𑀣 ¶ ‘‘𑀓𑀤 𑀓𑀼𑀲𑁆𑀲𑀸’’𑀢𑀺 𑀲𑀭𑁂 𑀓𑀼𑀲𑁆𑀲 𑀓𑀤𑀸𑀤𑁂𑀲𑁄.

𑀅𑀧𑁆𑀧𑀓𑀁 𑀮𑀯𑀡𑀁 𑀓𑀸𑀮𑀯𑀡𑀁, 𑀏𑀢𑁆𑀣 ‘‘𑀓𑀸𑀧𑁆𑀧𑀢𑁆𑀣𑁂𑀲𑀼 𑀘𑀸’’𑀢𑀺 𑀓𑀼𑀲𑁆𑀲 𑀓𑀸, 𑀩𑀳𑀼𑀯𑀘𑀦𑁂𑀦𑀸𑀜𑁆𑀜𑀢𑁆𑀭𑀸𑀧𑀺 𑀓𑁆𑀯𑀘𑀺. 𑀓𑀼𑀘𑁆𑀙𑀺𑀢𑁄 𑀧𑀼𑀭𑀺𑀲𑁄 𑀓𑀸𑀧𑀼𑀭𑀺𑀲𑁄, 𑀓𑀼𑀧𑀼𑀭𑀺𑀲𑁄 𑀯𑀸, 𑀏𑀯𑀫𑀲𑀼𑀭𑀸𑀤𑀺.

𑀧𑀼𑀩𑁆𑀩𑀧𑀭𑀽𑀪𑀬𑀫𑀜𑁆𑀜𑀧𑀤𑀢𑁆𑀣 - 𑀧𑁆𑀧𑀥𑀸𑀦𑀸𑀩𑁆𑀬𑀬𑀻𑀪𑀸𑀯 𑀲𑀫𑀸𑀲𑁄;

𑀓𑀫𑁆𑀫𑀥𑀸𑀭𑀬𑀓 𑀢𑀧𑁆𑀧𑀼𑀭𑀺𑀲𑀸 𑀤𑁆𑀯𑁂, 𑀤𑁆𑀯𑁂𑀦𑁆𑀤𑁄 𑀘 𑀩𑀳𑀼𑀩𑁆𑀩𑀻𑀳𑀺 𑀘 𑀜𑁂𑀬𑁆𑀬𑀸.

𑀲𑀫𑀸𑀲𑁄.

𑁪. 𑀢𑀤𑁆𑀥𑀺𑀢𑀓𑀡𑁆𑀟

𑀅𑀧𑀘𑁆𑀘𑀢𑀤𑁆𑀥𑀺𑀢

𑁨𑁩𑁨. 𑀯𑀸𑀡𑀧𑀘𑁆𑀘𑁂.

𑀙𑀝𑁆𑀞𑀦𑁆𑀢𑀸 ¶ 𑀲𑀤𑁆𑀤𑀸 ‘‘𑀢𑀲𑁆𑀲𑀸𑀧𑀘𑁆𑀘’’𑀫𑀺𑀘𑁆𑀘𑀲𑁆𑀫𑀺𑀁 𑀅𑀢𑁆𑀣𑁂 𑀡𑁄 𑀯𑀸 𑀳𑁄𑀢𑀺. 𑀯𑀸𑀢𑀺 𑀯𑀸𑀓𑁆𑀬𑀢𑁆𑀣𑀁. 𑀡𑁂𑀦𑁂𑀯𑀸𑀧𑀘𑁆𑀘𑀢𑁆𑀣𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀅𑀧𑀘𑁆𑀘𑀲𑀤𑁆𑀤𑀸𑀧𑁆𑀧𑀬𑁄𑀕𑁄.

‘‘𑀢𑁂𑀲𑀁 𑀯𑀺𑀪𑀢𑁆𑀬𑀸’’ 𑀤𑁄 𑀢𑁂𑀲𑀁𑀕𑀳𑀡𑁂𑀦 𑀯𑀺𑀪𑀢𑁆𑀢𑀺𑀮𑁄𑀧𑁄. 𑀢𑀣𑁄𑀢𑁆𑀢𑀭𑀢𑁆𑀭.

‘‘𑀢𑁂𑀲𑀁 𑀡𑁄 𑀮𑁄𑀧𑀁’’𑀢𑀺 𑀧𑀘𑁆𑀘𑀬𑀸𑀦𑀁 𑀡𑀲𑁆𑀲 𑀮𑁄𑀧𑁄.

‘‘𑀯𑀼𑀤𑁆𑀥𑀸𑀤𑀺𑀲𑀭𑀲𑁆𑀲 𑀯𑀸 𑀲𑀁𑀬𑁄𑀕𑀦𑁆𑀢𑀲𑁆𑀲 𑀲𑀡𑁂 𑀘𑁂’’𑀢𑀺 𑀲𑀡𑀓𑀸𑀭𑁂 𑀧𑀭𑁂 𑀅𑀲𑀁𑀬𑁄𑀕𑀦𑁆𑀢𑀲𑁆𑀲𑀸𑀤𑀺𑀲𑀭𑀲𑁆𑀲 𑀯𑀼𑀤𑁆𑀥𑀺.

𑀢𑀲𑁆𑀲𑀸𑀧𑀦𑀺𑀬𑀫𑁂 𑁋

𑀅𑀬𑀼𑀯𑀡𑁆𑀡𑀸𑀦𑀜𑁆𑀘𑀸𑀬𑁄 𑀯𑀼𑀤𑁆𑀥𑀺.

𑀅𑀓𑀸𑀭𑀺𑀯𑀡𑁆𑀡𑀼𑀯𑀡𑁆𑀡𑀸𑀦𑀁 𑀆𑀏𑀑𑀯𑀼𑀤𑁆𑀥𑀺𑀬𑁄 𑀳𑁄𑀦𑁆𑀢𑀺, 𑀘𑀲𑀤𑁆𑀤𑁂𑀦 𑀓𑁆𑀯𑀘𑀺 𑀦.

𑀲𑀭𑀮𑁄𑀧𑀸𑀤𑀺, 𑀢𑀤𑁆𑀥𑀺𑀢𑀢𑁆𑀢𑀸 𑀦𑀸𑀫𑀫𑀺𑀯 𑀓𑀢𑁂 𑀲𑁆𑀬𑀸𑀤𑀺.

𑀢𑀤𑁆𑀥𑀺𑀢𑀸𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑁋𑀯𑀺𑀪𑀢𑁆𑀢𑀺𑀯𑀘𑀦𑀸 ¶ 𑀲𑀺𑀬𑀼𑀁.

𑀲𑀫𑀽𑀳𑀪𑀸𑀯𑀚𑀸 𑀪𑀻𑀬𑁄, 𑀲𑀓𑀢𑁆𑀣𑁂 𑀡𑁆𑀬𑁄 𑀦𑀧𑀼𑀁𑀲𑀓𑁂.

𑀢𑀸 𑀢𑀼𑀢𑁆𑀣𑀺𑀬𑀁 𑀦𑀺𑀧𑀸𑀢𑀸 𑀢𑁂, 𑀥𑀸𑀫𑀺𑀣𑀁𑀧𑀘𑁆𑀘𑀬𑀦𑁆𑀢𑀓𑀸.

𑀯𑀲𑀺𑀝𑁆𑀞𑀲𑁆𑀲𑀸𑀧𑀘𑁆𑀘𑀁 ¶ 𑀧𑁄𑀲𑁄 𑀯𑀸𑀲𑀺𑀝𑁆𑀞𑁄, 𑀇𑀢𑁆𑀣𑀻 𑀯𑀸𑀲𑀺𑀝𑁆𑀞𑀻, 𑀦𑀧𑀼𑀁𑀲𑀓𑀁 𑀯𑀸𑀲𑀺𑀝𑁆𑀞𑀁. 𑀯𑀺𑀓𑀧𑁆𑀧𑀯𑀺𑀥𑀸𑀦𑀢𑁄 𑀢𑀤𑁆𑀥𑀺𑀢𑁂𑀦 𑀲𑀫𑀸𑀲𑀲𑁆𑀲𑀸𑀘𑁆𑀘𑀦𑁆𑀢𑀁 𑀩𑀸𑀥𑀸𑀬𑀸 𑀪𑀸𑀯𑀸 𑀯𑀲𑀺𑀝𑁆𑀞𑀸 𑀧𑀘𑁆𑀘𑀦𑁆𑀢𑀺𑀧𑀺 𑀳𑁄𑀢𑀺.

𑀦𑀧𑀼𑀁𑀲𑀓𑁂𑀦 𑀯𑀸𑀧𑀻𑀢𑀺, 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀯𑀺𑀤𑀼𑀁.

𑁨𑁩𑁩. 𑀯𑀸 ¶ 𑀅𑀧𑀘𑁆𑀘𑁂𑀢𑀺 𑀘𑀸𑀥𑀺𑀓𑀸𑀭𑁄.

𑀡𑀸𑀬𑀦 𑀡𑀸𑀦 𑀯𑀘𑁆𑀙𑀸𑀤𑀺𑀢𑁄.

𑀯𑀘𑁆𑀙𑀸𑀤𑀺𑀢𑁄 𑀕𑁄𑀢𑁆𑀢𑀕𑀡𑀢𑁄 𑀡𑀸𑀬𑀦𑁄 𑀡𑀸𑀦𑁄 𑀘 𑀯𑀸 𑀳𑁄𑀢𑀺.

𑀅𑀧𑀘𑁆𑀘𑀁 𑀧𑀧𑀼𑀢𑁆𑀢𑀧𑁆𑀧𑀪𑀼𑀢𑀺 𑀕𑁄𑀢𑁆𑀢𑀁. 𑀓𑀘𑁆𑀘𑀲𑁆𑀲𑀸𑀧𑀘𑁆𑀘𑀁 𑀓𑀘𑁆𑀘𑀸𑀬𑀦𑁄, 𑀓𑀘𑁆𑀘𑀸𑀦𑁄 𑀯𑀸. 𑀲𑀁𑀬𑁄𑀕𑀦𑁆𑀢𑀢𑁆𑀢𑀸 𑀦 𑀯𑀼𑀤𑁆𑀥𑀺.

𑁨𑁩𑁪. ‘‘𑀡𑁂𑀬𑁆𑀬𑁄 ¶ 𑀓𑀢𑁆𑀢𑀺𑀓𑀸𑀤𑀻𑀳𑀻’’𑀢𑀺 𑀡𑁂𑀬𑁆𑀬𑁄, 𑀯𑀺𑀦𑀢𑀸𑀬 𑀅𑀧𑀘𑁆𑀘𑀁 𑀯𑁂𑀦𑀢𑁂𑀬𑁆𑀬𑁄 𑀯𑀺𑀦𑀢𑁂𑀬𑁆𑀬𑁄 𑀯𑀸. 𑀦 𑀧𑀓𑁆𑀔𑁂 𑀯𑀼𑀤𑁆𑀥𑀺, 𑀡𑁂𑀬𑁆𑀬𑁄𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 ‘‘𑀢𑀲𑁆𑀲 𑀤𑀻𑀬𑀢𑁂’’ 𑀢𑁆𑀬𑀢𑁆𑀣𑁂𑀧𑀺 𑀡𑁂𑀬𑁆𑀬𑁄, 𑀤𑀓𑁆𑀔𑀺𑀡𑀸 𑀤𑀻𑀬𑀢𑁂 𑀬𑀲𑁆𑀲 𑀲𑁄 𑀤𑀓𑁆𑀔𑀺𑀡𑁂𑀬𑁆𑀬𑁄.

𑁨𑁩𑁫. 𑀅𑀢𑁄 𑀡𑀺 𑀯𑀸.

𑀅𑀓𑀸𑀭𑀦𑁆𑀢𑀢𑁄 ¶ 𑀅𑀧𑀘𑁆𑀘𑁂 𑀡𑀺 𑀯𑀸 𑀳𑁄𑀢𑀺, 𑀧𑀼𑀦 𑀯𑀸𑀲𑀤𑁆𑀤𑁂𑀦 𑀡𑀺𑀓𑁄, 𑀅𑀓𑀸𑀭𑀦𑁆𑀢𑀸 𑀅𑀦𑀓𑀸𑀭𑀦𑁆𑀢𑀸 𑀘 𑀩𑁄𑀧𑀺.

𑀤𑀓𑁆𑀔𑀺, 𑀲𑀓𑁆𑀬𑀧𑀼𑀢𑁆𑀢𑀺𑀓𑁄, 𑀫𑀡𑁆𑀟𑀩𑁆𑀩𑁄, 𑀪𑀸𑀢𑀼𑀩𑁆𑀩𑁄. 𑀤𑁆𑀯𑀺𑀢𑁆𑀢𑀁.

𑁨𑁩𑁬. ‘‘𑀡𑀯𑁄 ¶ 𑀧𑀕𑁆𑀯𑀸𑀤𑀻𑀳𑀻’’ 𑀢𑀺 𑀡𑀯𑁄. 𑀫𑀦𑀼𑀦𑁄 𑀅𑀧𑀘𑁆𑀘𑀁 𑀫𑀸𑀡𑀯𑁄.

𑁨𑁩𑁭. ‘‘𑀡𑁂𑀭 ¶ 𑀯𑀺𑀥𑀯𑀸𑀤𑀺𑀢𑁄’’𑀢𑀺 𑀡𑁂𑀭𑁄, 𑀲𑀸𑀫𑀡𑁂𑀭𑁄.

𑀲𑀁𑀲𑀝𑁆𑀞𑀸𑀤𑀺𑀅𑀦𑁂𑀓𑀢𑁆𑀣𑀢𑀤𑁆𑀥𑀺𑀢

𑁨𑁩𑁮. ‘‘𑀬𑁂𑀦 ¶ 𑀯𑀸 𑀲𑀁𑀲𑀝𑁆𑀞𑀁 𑀢𑀭𑀢𑀺 𑀘𑀭𑀢𑀺 𑀯𑀳𑀢𑀺 𑀡𑀺𑀓𑁄’’𑀢𑀺 𑀡𑀺𑀓𑁄. 𑀯𑀸𑀓𑀸𑀭𑁂𑀦 𑀦𑁂𑀓𑀢𑁆𑀣𑁂𑀦𑁂𑀓𑀧𑀘𑁆𑀘𑀬𑀸 𑀘. 𑀖𑀢𑁂𑀦 𑀲𑀁𑀲𑀝𑁆𑀞𑁄 𑀖𑀸𑀢𑀺𑀓𑁄, 𑀑𑀤𑀦𑁄. 𑀉𑀴𑀽𑀧𑁂𑀦 𑀢𑀭𑀢𑀻𑀢𑀺 𑀑𑀴𑀽𑀧𑀺𑀓𑁄, 𑀉𑀴𑀽𑀧𑀺𑀓𑁄 𑀯𑀸, 𑀦 𑀧𑀓𑁆𑀔𑁂 𑀯𑀼𑀤𑁆𑀥𑀺.

𑀲𑀓𑀝𑁂𑀦 𑀘𑀭𑀢𑀻𑀢𑀺 𑀲𑀸𑀓𑀝𑀺𑀓𑁄. 𑀲𑀻𑀲𑁂𑀦 𑀯𑀳𑀢𑀻𑀢𑀺 𑀲𑀻𑀲𑀺𑀓𑁄, 𑀦 𑀯𑀼𑀤𑁆𑀥𑀺.

𑀇𑀢𑁆𑀣𑀺𑀮𑀺𑀗𑁆𑀕𑀢𑁄 𑀏𑀬𑁆𑀬𑀓𑁄, 𑀡𑀓𑁄 𑀘. 𑀘𑀫𑁆𑀧𑀸𑀬𑀁 𑀚𑀸𑀢𑁄 𑀘𑀫𑁆𑀧𑁂𑀬𑁆𑀬𑀓𑁄. 𑀏𑀯𑀁 𑀩𑀸𑀭𑀸𑀡𑀲𑁂𑀬𑁆𑀬𑀓𑁄. 𑀡𑀓𑁄 𑁋 𑀓𑀼𑀲𑀺𑀦𑀸𑀭𑀸𑀬𑀁 𑀯𑀲𑀢𑀻𑀢𑀺 𑀓𑁄𑀲𑀺𑀦𑀸𑀭𑀓𑁄. 𑀚𑀦𑀧𑀤𑀢𑁄 𑀡𑀓𑁄 𑀘 𑁋 𑀫𑀕𑀥𑁂𑀲𑀼 𑀯𑀲𑀢𑀺, 𑀢𑁂𑀲𑀁 𑀇𑀲𑁆𑀲𑀭𑁄 𑀯𑀸 𑀫𑀸𑀕𑀥𑀓𑁄.

𑀢𑀚𑁆𑀚𑀸𑀢𑀺𑀬𑀸 ¶ 𑀯𑀺𑀲𑀺𑀝𑁆𑀞𑀢𑁆𑀣𑁂 𑀆𑀚𑀸𑀦𑀻𑀬𑁄. 𑀅𑀲𑁆𑀲𑀚𑀸𑀢𑀺𑀬𑀸 𑀯𑀺𑀲𑀺𑀝𑁆𑀞𑁄 𑀅𑀲𑁆𑀲𑀸𑀚𑀸𑀦𑀻𑀬𑁄. 𑀜𑁄 - 𑀅𑀕𑁆𑀕𑀦𑁆𑀢𑀺 𑀚𑀸𑀦𑀺𑀢𑀩𑁆𑀩𑀁 𑀅𑀕𑁆𑀕𑀜𑁆𑀜𑀁, 𑀤𑁆𑀯𑀺𑀢𑁆𑀢𑀁.

𑁨𑁩𑁯. 𑀢𑀫𑀥𑀻𑀢𑁂 𑀢𑁂𑀦 𑀓𑀢𑀸𑀤𑀺𑀲𑀦𑁆𑀦𑀺𑀥𑀸𑀦𑀦𑀺𑀬𑁄𑀕𑀲𑀺𑀧𑁆𑀧𑀪𑀡𑁆𑀟 𑀚𑀻𑀯𑀺𑀓𑀢𑁆𑀣𑁂𑀲𑀼 𑀘.

𑀢𑀁 ¶ 𑀅𑀥𑀻𑀢𑁂 𑀇𑀘𑁆𑀘𑀸𑀤𑀻𑀲𑁆𑀯𑀢𑁆𑀣𑁂𑀲𑀼 𑀆𑀤𑀺𑀲𑀤𑁆𑀤𑁂𑀦 𑀳𑀢𑀸𑀤𑀻𑀲𑀼 𑀘 𑀡𑀺𑀓𑁄 𑀯𑀸 𑀳𑁄𑀢𑀺. 𑀅𑀪𑀺𑀥𑀫𑁆𑀫𑀫𑀥𑀻𑀢𑁂𑀢𑀺 𑀆𑀪𑀺𑀥𑀫𑁆𑀫𑀺𑀓𑁄, 𑀅𑀪𑀺𑀥𑀫𑁆𑀫𑀺𑀓𑁄 𑀯𑀸, 𑀦 𑀧𑀓𑁆𑀔𑁂 𑀯𑀼𑀤𑁆𑀥𑀺. 𑀯𑀘𑀲𑀸 𑀓𑀢𑀁 𑀓𑀫𑁆𑀫𑀁 𑀯𑀸𑀘𑀲𑀺𑀓𑀁. 𑀏𑀯𑀁 𑀫𑀸𑀦𑀲𑀺𑀓𑀁, 𑀏𑀢𑁆𑀣 𑁋

‘‘𑀲 ¶ 𑀲𑀭𑁂 𑀯𑀸𑀕𑀫𑁄’’𑀢𑀻𑀳𑀸𑀦𑀼𑀯𑀢𑁆𑀢𑀺𑀢𑀸𑀤𑀺𑀲𑀤𑁆𑀤𑁂𑀦 𑀲𑀸𑀕𑀫𑁄.

𑀲𑀭𑀻𑀭𑁂 𑀲𑀦𑁆𑀦𑀺𑀥𑀸𑀦𑀸 𑀯𑁂𑀤𑀦𑀸 𑀲𑀸𑀭𑀻𑀭𑀺𑀓𑀸. 𑀤𑁆𑀯𑀸𑀭𑁂 𑀦𑀺𑀬𑀼𑀢𑁆𑀢𑁄 𑀤𑁄𑀯𑀸𑀭𑀺𑀓𑁄, 𑀏𑀢𑁆𑀣- ‘‘𑀫𑀸𑀬𑀽𑀦𑀫𑀸𑀕𑀫𑁄 𑀞𑀸𑀦𑁂’’𑀢𑀺 𑀯𑀓𑀸𑀭𑀢𑁄 𑀧𑀼𑀩𑁆𑀩𑁂 𑀑𑀓𑀸𑀭𑀸𑀕𑀫𑁄.

𑀲𑀺𑀧𑁆𑀧𑀦𑁆𑀢𑀺 ¶ 𑀕𑀻𑀢𑀸𑀤𑀺𑀓𑀮𑀸, 𑀯𑀻𑀡𑀸 𑀅𑀲𑁆𑀲 𑀲𑀺𑀧𑁆𑀧𑀦𑁆𑀢𑀺 𑀯𑁂𑀡𑀺𑀓𑁄, 𑀅𑀢𑁆𑀭 𑀯𑀻𑀡𑁂𑀢𑀺 𑀯𑀻𑀡𑀸𑀯𑀸𑀤𑀦𑀁. 𑀕𑀦𑁆𑀥𑁄 𑀅𑀲𑁆𑀲 𑀪𑀡𑁆𑀟𑀦𑁆𑀢𑀺 𑀕𑀦𑁆𑀥𑀺𑀓𑁄, 𑀫𑀕𑁂 𑀳𑀦𑁆𑀢𑁆𑀯𑀸 𑀚𑀻𑀯𑀢𑀻𑀢𑀺 𑀫𑀸𑀕𑀯𑀺𑀓𑁄, 𑀯𑀓𑀸𑀭𑀸𑀕𑀫𑁄. 𑀚𑀸𑀮𑁂𑀦 𑀳𑀢𑁄 𑀚𑀸𑀮𑀺𑀓𑁄, 𑀲𑀼𑀢𑁆𑀢𑁂𑀦 𑀩𑀤𑁆𑀥𑁄 𑀲𑀼𑀢𑁆𑀢𑀺𑀓𑁄, 𑀘𑀸𑀧𑁄 𑀅𑀲𑁆𑀲 𑀆𑀬𑀼𑀥𑀦𑁆𑀢𑀺 𑀘𑀸𑀧𑀺𑀓𑁄, 𑀯𑀸𑀢𑁄 𑀅𑀲𑁆𑀲 𑀆𑀩𑀸𑀥𑁄 𑀅𑀢𑁆𑀣𑀻𑀢𑀺 𑀯𑀸 𑀯𑀸𑀢𑀺𑀓𑁄, 𑀩𑀼𑀤𑁆𑀥𑁂 𑀧𑀲𑀦𑁆𑀦𑁄 𑀩𑀼𑀤𑁆𑀥𑀺𑀓𑁄, 𑀯𑀢𑁆𑀣𑁂𑀦 𑀓𑀻𑀢𑀁 𑀪𑀡𑁆𑀟𑀁 𑀯𑀢𑁆𑀣𑀺𑀓𑀁.

𑀓𑀼𑀫𑁆𑀪𑁄 ¶ 𑀅𑀲𑁆𑀲 𑀧𑀭𑀺𑀫𑀸𑀡𑀁, 𑀢 𑀫𑀭𑀳𑀢𑀺, 𑀢𑁂𑀲𑀁 𑀭𑀸𑀲𑀺 𑀯𑀸 𑀓𑀼𑀫𑁆𑀪𑀺𑀓𑁄. 𑀅𑀓𑁆𑀔𑁂𑀦 𑀤𑀺𑀩𑁆𑀩𑀢𑀻𑀢𑀺 𑀅𑀓𑁆𑀔𑀺𑀓𑁄, 𑀫𑀕𑀥𑁂𑀲𑀼 𑀯𑀲𑀢𑀺, 𑀚𑀸𑀢𑁄𑀢𑀺 𑀯𑀸 𑀫𑀸𑀕𑀥𑀺𑀓𑁄 𑀇𑀘𑁆𑀘𑀸𑀤𑀺.

𑁨𑁪𑁦. 𑀡 𑀭𑀸𑀕𑀸 𑀢𑁂𑀦 𑀭𑀢𑁆𑀢𑀁 𑀢𑀲𑁆𑀲𑁂𑀤𑀫𑀜𑁆𑀜𑀢𑁆𑀣𑁂𑀲𑀼 𑀘.

𑀢𑁂𑀦 ¶ 𑀭𑀢𑁆𑀢𑀁 𑀢𑁆𑀬𑀸𑀤𑁆𑀬𑀢𑁆𑀣𑁂𑀲𑀼 𑀡𑁄 𑀯𑀸 𑀳𑁄𑀢𑀺. 𑀓𑀲𑀸𑀯𑁂𑀦 𑀭𑀢𑁆𑀢𑀁 𑀓𑀸𑀲𑀸𑀯𑀁.

𑀏𑀯𑀁 ¶ 𑀦𑀻𑀮𑀁 𑀧𑀻𑀢𑀫𑀺𑀘𑁆𑀘𑀸𑀤𑀺. 𑀦 𑀯𑀼𑀤𑁆𑀥𑀺, 𑀫𑀳𑀺𑀲𑀲𑁆𑀲 𑀇𑀤𑀁 𑀫𑀸𑀳𑀺𑀲𑀁, 𑀲𑀺𑀗𑁆𑀕𑀁.

𑀏𑀯𑀁 ¶ 𑀭𑀸𑀚𑀧𑁄𑀭𑀺𑀲𑀁, 𑀏𑀢𑁆𑀣 ‘‘𑀅𑀬𑀼𑀯𑀡𑁆𑀡𑀸𑀦𑀜𑁆𑀘𑀸’’ 𑀤𑁄 𑀧𑀼𑀦 𑀯𑀼𑀤𑁆𑀥𑀺𑀕𑁆𑀕𑀳𑀡𑁂𑀦 𑀉𑀢𑁆𑀢𑀭𑀧𑀤𑀲𑁆𑀲 𑀯𑀼𑀤𑁆𑀥𑀺. 𑀫𑀕𑀥𑁂𑀳𑀺 𑀆𑀕𑀢𑁄, 𑀢𑀢𑁆𑀭 𑀚𑀸𑀢𑁄, 𑀢𑁂𑀲𑀁 𑀇𑀲𑁆𑀲𑀭𑁄, 𑀢𑁂 𑀅𑀲𑁆𑀲 𑀦𑀺𑀯𑀸𑀲𑁄𑀢𑀺 𑀯𑀸 𑀫𑀸𑀕𑀥𑁄, 𑀓𑀢𑁆𑀢𑀺𑀓𑀸𑀤𑀻𑀳𑀺 𑀬𑀼𑀢𑁆𑀢𑁄 𑀓𑀢𑁆𑀢𑀺𑀓𑁄, 𑀫𑀸𑀲𑁄.

𑀩𑀼𑀤𑁆𑀥𑁄 ¶ 𑀅𑀲𑁆𑀲 𑀤𑁂𑀯𑀢𑀸𑀢𑀺 𑀩𑀼𑀤𑁆𑀥𑁄. 𑀩𑁆𑀬𑀸𑀓𑀭𑀡𑀁 𑀅𑀯𑁂𑀘𑁆𑀘 𑀅𑀥𑀻𑀢𑁂𑀢𑀺 𑀯𑁂𑀬𑁆𑀬𑀸𑀓𑀭𑀡𑁄. 𑀏𑀢𑁆𑀣 ‘‘𑀫𑀸𑀬𑀽𑀦𑀫𑀸’’𑀤𑀺𑀦𑀸 𑀬𑀓𑀸𑀭𑀢𑁄 𑀧𑀼𑀩𑁆𑀩𑁂 𑀏 𑀆𑀕𑀫𑁄, 𑀬𑀲𑁆𑀲 𑀤𑁆𑀯𑀺𑀢𑁆𑀢𑀁. 𑀲𑀕𑀭𑁂𑀳𑀺 𑀦𑀺𑀩𑁆𑀩𑀢𑁆𑀢𑁄 𑀲𑀸𑀕𑀭𑁄𑀇𑀘𑁆𑀘𑀸𑀤𑀺.

𑁨𑁪𑁧. 𑀚𑀸𑀢𑀸𑀤𑀻𑀦𑀫𑀺𑀫𑀺𑀬𑀸 𑀘.

𑀚𑀸𑀢𑀸𑀤𑀻𑀲𑀼 ¶ 𑀇𑀫𑁄 𑀇𑀬𑁄 𑀘 𑀳𑁄𑀢𑀺, 𑀘𑀲𑀤𑁆𑀤𑁂𑀦 𑀓𑀺𑀬𑁄 𑀘. 𑀧𑀘𑁆𑀙𑀸 𑀚𑀸𑀢𑁄 𑀧𑀘𑁆𑀙𑀺𑀫𑁄, 𑀫𑀦𑀼𑀲𑁆𑀲𑀚𑀸𑀢𑀺𑀬𑀸 𑀚𑀸𑀢𑁄 𑀫𑀦𑀼𑀲𑁆𑀲𑀚𑀸𑀢𑀺𑀬𑁄. 𑀅𑀦𑁆𑀢𑁂 𑀦𑀺𑀬𑀼𑀢𑁆𑀢𑁄 𑀅𑀦𑁆𑀢𑀺𑀫𑁄, 𑀅𑀦𑁆𑀢𑀺𑀬𑁄.

𑀏𑀯𑀁 𑀅𑀦𑁆𑀥𑀓𑀺𑀬𑁄. 𑀧𑀼𑀢𑁆𑀢𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀧𑀼𑀢𑁆𑀢𑀺𑀫𑁄, 𑀧𑀼𑀢𑁆𑀢𑀺𑀬𑁄. 𑀏𑀯𑀁 𑀓𑀧𑁆𑀧𑀺𑀬𑁄.

𑁨𑁪𑁨. ‘‘𑀢𑀤𑀲𑁆𑀲𑀝𑁆𑀞𑀸𑀦𑀫𑀻𑀬𑁄 ¶ 𑀘𑁂’’𑀢𑀺 𑀈𑀬𑁄, 𑀘𑀓𑀸𑀭𑁂𑀦 𑀳𑀺𑀢𑀸𑀤𑁆𑀬𑀢𑁆𑀣𑁂𑀧𑀺, 𑀩𑀦𑁆𑀥𑀦𑀲𑁆𑀲 𑀞𑀸𑀦𑀁 𑀩𑀦𑁆𑀥𑀦𑀻𑀬𑀁, 𑀘𑀗𑁆𑀓𑀫𑀦𑀲𑁆𑀲 𑀳𑀺𑀢𑀁 𑀘𑀗𑁆𑀓𑀫𑀦𑀻𑀬𑀁.

𑁨𑁪𑁩. ‘‘𑀆𑀮𑀼 ¶ 𑀢𑀩𑁆𑀩𑀳𑀼𑀮𑁂’’𑀢𑀺 𑀆𑀮𑀼. 𑀅𑀪𑀺𑀚𑁆𑀛𑀸𑀩𑀳𑀼𑀮𑁄 𑀅𑀪𑀺𑀚𑁆𑀛𑀸𑀮𑀼.

𑀯𑀺𑀲𑁂𑀲𑀢𑀤𑁆𑀥𑀺𑀢

𑁨𑁪𑁪. 𑀯𑀺𑀲𑁂𑀲𑁂 𑀢𑀭𑀢𑀫𑀺𑀲𑁆𑀲𑀺𑀓𑀺𑀬𑀺𑀝𑁆𑀞𑀸.

𑀅𑀢𑀺𑀲𑀬𑀢𑁆𑀣𑁂 𑀢𑀭𑀸𑀤𑀬𑁄 𑀳𑁄𑀦𑁆𑀢𑀺.

𑀅𑀬𑀫𑁂𑀢𑁂𑀲𑀁 ¶ 𑀅𑀢𑀺𑀲𑀬𑁂𑀦 𑀧𑀸𑀧𑁄𑀢𑀺 𑀧𑀸𑀧𑀢𑀭𑁄, 𑀧𑀸𑀧𑀢𑀫𑁄, 𑀧𑀸𑀧𑀺𑀲𑁆𑀲𑀺𑀓𑁄, 𑀧𑀸𑀧𑀺𑀬𑁄, 𑀧𑀸𑀧𑀺𑀝𑁆𑀞𑁄 𑀯𑀸.

‘‘𑀯𑀼𑀤𑁆𑀥𑀲𑁆𑀲 ¶ 𑀚𑁄 𑀇𑀬𑀺𑀝𑁆𑀞𑁂𑀲𑀽’’𑀢𑀺 𑀯𑀼𑀤𑁆𑀥𑀲𑁆𑀲 𑀚𑀸𑀤𑁂𑀲𑁂 𑁋 ‘‘𑀲𑀭𑀮𑁄𑀧𑀸’’𑀤𑁄 𑀧𑀓𑀢𑀺𑀕𑁆𑀕𑀳𑀡𑁂𑀦 𑀧𑀓𑀢𑁆𑀬𑀪𑀸𑀯𑀸 𑀇𑀲𑁆𑀲 𑀏. 𑀚𑁂𑀬𑁆𑀬𑁄, 𑀚𑁂𑀝𑁆𑀞𑁄.

𑀏𑀯𑀁 ‘‘𑀧𑀲𑀢𑁆𑀣𑀲𑁆𑀲 𑀲𑁄 𑀘𑁂’’𑀢𑀺 𑀲𑀸𑀤𑁂𑀲𑁂 𑀲𑁂𑀬𑁆𑀬𑁄, 𑀲𑁂𑀝𑁆𑀞𑁄.

𑀅𑀲𑁆𑀲𑀢𑁆𑀣𑀺𑀢𑀤𑁆𑀥𑀺𑀢

𑁨𑁪𑁫. ‘‘𑀢𑀤𑀲𑁆𑀲𑀢𑁆𑀣𑀻𑀢𑀺 ¶ 𑀯𑀻 𑀘𑁂’’𑀢𑀺 𑀯𑀻. 𑀫𑁂𑀥𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀫𑁂𑀥𑀸𑀯𑀻.

𑁨𑁪𑁬. 𑀏𑀯𑀁 ¶ ‘‘𑀢𑀧𑀸𑀤𑀺𑀢𑁄 𑀲𑀻’’𑀢𑀺 𑀲𑀻, 𑀤𑁆𑀯𑀺𑀢𑁆𑀢𑀁, 𑀢𑀧𑀲𑁆𑀲𑀻.

𑁨𑁪𑁭. ‘‘𑀤𑀡𑁆𑀟𑀸𑀤𑀺𑀢𑁄 ¶ 𑀇𑀓 𑀈’’𑀢𑀺 𑀇𑀓𑁄, 𑀈 𑀘. 𑀤𑀡𑁆𑀟𑀺𑀓𑁄, 𑀤𑀡𑁆𑀟𑀻.

𑁨𑁪𑁮. ‘‘𑀕𑀼𑀡𑀸𑀤𑀺𑀢𑁄 𑀯𑀦𑁆𑀢𑀽’’𑀢𑀺 𑀯𑀦𑁆𑀢𑀼. 𑀕𑀼𑀡𑀯𑀸, 𑀧𑀜𑁆𑀜𑀯𑀸. 𑀬𑀤𑀸𑀤𑀺𑀦𑀸 𑀭𑀲𑁆𑀲𑁄.

𑁨𑁪𑁯. ‘‘𑀲𑀢𑁆𑀬𑀸𑀤𑀻𑀳𑀺 ¶ 𑀫𑀦𑁆𑀢𑀽’’𑀢𑀺 𑀫𑀦𑁆𑀢𑀼. 𑀲𑀢𑀺𑀫𑀸, 𑀪𑀸𑀦𑀼𑀫𑀸.

𑁨𑁫𑁦. ‘‘𑀆𑀬𑀼𑀲𑁆𑀲𑀼𑀓𑀸𑀭𑀸𑀲𑁆𑀫𑀦𑁆𑀢𑀼𑀫𑁆𑀳𑀻’’𑀢𑀺 ¶ 𑀉𑀲𑁆𑀲 𑀅𑀲. 𑀆𑀬𑀲𑁆𑀫𑀸.

𑁨𑁫𑁧. ‘‘𑀲𑀤𑁆𑀥𑀸𑀤𑀺𑀢𑁄 𑀡’’ 𑀇𑀢𑀺 𑀡𑁄. 𑀲𑀤𑁆𑀥𑁄.

𑁨𑁫𑁨. ‘‘𑀢𑀧𑁆𑀧𑀓𑀢𑀺𑀯𑀘𑀦𑁂 ¶ 𑀫𑀬𑁄’’𑀢𑀺 𑀫𑀬𑁄. 𑀲𑀼𑀯𑀡𑁆𑀡𑁂𑀦 𑀧𑀓𑀢𑀁 𑀲𑁄𑀯𑀡𑁆𑀡𑀫𑀬𑀁, 𑀲𑀼𑀯𑀡𑁆𑀡𑀫𑀬𑀁 𑀯𑀸. 𑀧𑀓𑁆𑀔𑁂 - 𑀬𑀤𑀸𑀤𑀺𑀦𑀸 𑀯𑀼𑀤𑁆𑀥𑀺.

𑀏𑀢𑁂𑀲𑀫𑁄 𑀮𑁄𑀧𑁂.

𑀯𑀺𑀪𑀢𑁆𑀢𑀺𑀮𑁄𑀧𑁂 𑀫𑀦𑀸𑀤𑀻𑀦𑀫𑀦𑁆𑀢𑀲𑁆𑀲 𑀑 𑀳𑁄𑀢𑀺. 𑀫𑀦𑁄𑀫𑀬𑀁.

𑀲𑀗𑁆𑀔𑁆𑀬𑀸𑀢𑀤𑁆𑀥𑀺𑀢

𑁨𑁫𑁩. 𑀲𑀗𑁆𑀔𑁆𑀬𑀸𑀧𑀽𑀭𑀡𑁂 ¶ 𑀢𑁆𑀬𑀥𑀺𑀓𑀸𑀭𑁄.

‘‘𑀤𑁆𑀯𑀺𑀢𑀻𑀳𑀺 𑀢𑀺𑀬𑁄’’𑀢𑀺 𑀢𑀺𑀬𑁄, ‘‘𑀢𑀺𑀬𑁂 𑀤𑀼𑀢𑀸𑀧𑀺 𑀘𑁂’’𑀢𑀺 𑀤𑁆𑀯𑀺𑀢𑀻𑀦𑀁 𑀤𑀼𑀢𑀸. 𑀤𑁆𑀯𑀺𑀦𑁆𑀦𑀁 𑀧𑀽𑀭𑀡𑁄 𑀤𑀼𑀢𑀺𑀬𑁄, 𑀏𑀯𑀁 𑀢𑀢𑀺𑀬𑁄.

𑁨𑁫𑁪. ‘‘𑀘𑀢𑀼𑀘𑁆𑀙𑁂𑀳𑀺 𑀣𑀞𑀸’’𑀢𑀺 𑀣𑀞𑀸. 𑀘𑀢𑀼𑀢𑁆𑀣𑁄, 𑀙𑀝𑁆𑀞𑁄.

𑁨𑁫𑁫. 𑀢𑁂𑀲𑀫𑀟𑁆𑀠𑀽𑀧𑀧𑀤𑁂𑀦 𑀅𑀟𑁆𑀠𑀼𑀟𑁆𑀠 𑀤𑀺𑀯𑀟𑁆𑀠 𑀤𑀺𑀬𑀟𑁆𑀠𑀸𑀟𑁆𑀠𑀢𑀺𑀬𑀸.

𑀘𑀢𑀼𑀢𑁆𑀣 ¶ 𑀤𑀼𑀢𑀺𑀬 𑀢𑀢𑀺𑀬𑀸𑀦𑀁 𑀅𑀟𑁆𑀠𑀽𑀧𑀧𑀤𑁂𑀦 𑀲𑀳 𑀅𑀟𑁆𑀠𑀼𑀟𑁆𑀠 𑀤𑀺𑀯𑀟𑁆𑀠 𑀤𑀺𑀬𑀟𑁆𑀠𑀸𑀟𑁆𑀠𑀢𑀺𑀬𑀸 𑀳𑁄𑀦𑁆𑀢𑀺.

𑀅𑀟𑁆𑀠𑁂𑀦 𑀘𑀢𑀼𑀢𑁆𑀣𑁄 𑀅𑀟𑁆𑀠𑀼𑀟𑁆𑀠𑁄, 𑀅𑀟𑁆𑀠𑁂𑀦 𑀤𑀼𑀢𑀺𑀬𑁄 𑀤𑀺𑀯𑀟𑁆𑀠𑁄, 𑀤𑀺𑀬𑀟𑁆𑀠𑁄 𑀯𑀸, 𑀅𑀟𑁆𑀠𑁂𑀦 𑀢𑀢𑀺𑀬𑁄 𑀅𑀟𑁆𑀠𑀢𑀺𑀬𑁄.

𑁨𑁫𑁬. ‘‘𑀲𑀗𑁆𑀔𑁆𑀬𑀸𑀧𑀽𑀭𑀡𑁂 ¶ 𑀫𑁄’’𑀢𑀺 𑀫𑁄, 𑀧𑀜𑁆𑀘𑀫𑁄. 𑀇𑀢𑁆𑀣𑀺𑀬𑀁 𑀧𑀜𑁆𑀘𑀦𑁆𑀦𑀁 𑀧𑀽𑀭𑀡𑀻 𑀧𑀜𑁆𑀘𑀫𑀻.

𑀏𑀓𑁄 𑀘 𑀤𑀲 𑀘𑀸𑀢𑀺 𑀤𑁆𑀯𑀦𑁆𑀤𑁂 𑀓𑀢𑁂 𑁋

𑀤𑁆𑀯𑁂𑀓𑀝𑁆𑀞𑀸𑀦𑀫𑀸𑀓𑀸𑀭𑁄 𑀯𑀸.

𑀲𑀗𑁆𑀔𑁆𑀬𑀸𑀦𑁂 𑀉𑀢𑁆𑀢𑀭𑀧𑀤𑁂 𑀤𑁆𑀯𑀺𑀏𑀓𑀅𑀝𑁆𑀞𑀇𑀘𑁆𑀘𑁂𑀢𑁂𑀲 𑀫𑀦𑁆𑀢𑀲𑁆𑀲 𑀆 𑀯𑀸 𑀳𑁄𑀢𑀺. 𑀏𑀓𑀸𑀤𑀲 𑀧𑀜𑁆𑀘𑀻𑀯. 𑀏𑀯𑀁 𑀤𑁆𑀯𑀸𑀤𑀲.

𑀬𑀤𑀸𑀤𑀺𑀦𑀸 𑀢𑀺𑀲𑁆𑀲 𑀢𑁂𑀆𑀤𑁂𑀲𑁂 ‘‘𑀏𑀓𑀸𑀤𑀺𑀢𑁄 𑀤𑀲𑁆𑀲 𑀭 𑀲𑀗𑁆𑀔𑁆𑀬𑀸𑀦𑁂’’𑀢𑀺 𑀤𑀲𑀲𑀤𑁆𑀤𑁂 𑀤𑀲𑁆𑀲 𑀭𑁄. 𑀢𑁂𑀭𑀲.

𑁨𑁫𑁭. ‘‘𑀘𑀢𑀽𑀧𑀧𑀤𑀲𑁆𑀲 ¶ 𑀮𑁄𑀧𑁄 𑀢𑀼𑀢𑁆𑀢𑀭𑀧𑀤𑀸𑀤𑀺𑀘𑀲𑁆𑀲 𑀘𑀼𑀘𑁄𑀧𑀺 𑀦𑀯𑀸’’𑀢𑀺 𑀘𑀢𑀼𑀲𑀤𑁆𑀤𑁂 𑀢𑀼𑀲𑁆𑀲 𑀮𑁄𑀧𑁄 𑀘𑀲𑁆𑀲 𑀘𑀼 𑀘. 𑀘𑀼𑀤𑁆𑀤𑀲.

‘‘𑀤𑀲𑁂 𑀲𑁄 𑀦𑀺𑀘𑁆𑀘𑀜𑁆𑀘𑁂’’𑀢𑀺 𑀙𑀲𑁆𑀲 𑀲𑁄𑀆𑀤𑁂𑀲𑁂 𑁋 ‘‘𑀴 𑀤𑀭𑀸𑀦𑀁’’𑀢𑀺 𑀤𑀲𑀲𑀤𑁆𑀤𑁂 𑀤𑀲𑁆𑀲 𑀴𑁄. 𑀲𑁄𑀴𑀲, 𑀅𑀝𑁆𑀞𑀸𑀭𑀲.

𑁨𑁫𑁮. ‘‘𑀯𑀻𑀲𑀢𑀺 ¶ 𑀤𑀲𑁂𑀲𑀼 𑀩𑀸 𑀤𑁆𑀯𑀺𑀲𑁆𑀲 𑀢𑀽’’𑀢𑀺 𑀤𑁆𑀯𑀺𑀲𑁆𑀲 𑀩𑀸. 𑀩𑀸𑀯𑀻𑀲𑀢𑀺, 𑀏𑀓𑀸𑀤𑀲𑀦𑁆𑀦𑀁 𑀧𑀽𑀭𑀡𑁄 𑀏𑀓𑀸𑀤𑀲𑀫𑁄.

𑁨𑁫𑁯. ‘‘𑀏𑀓𑀸𑀤𑀺𑀢𑁄 𑀤𑀲𑀲𑁆𑀲𑀻’’𑀢𑀺 𑀇𑀢𑁆𑀣𑀺𑀬𑀁 𑀈. 𑀏𑀓𑀸𑀤𑀲𑀻 𑀇𑀘𑁆𑀘𑀸𑀤𑀺.

‘‘𑀤𑁆𑀯𑀸𑀤𑀺𑀢𑁄 𑀓𑁄𑀦𑁂𑀓𑀢𑁆𑀣𑁂 𑀘𑁂’’𑀢𑀺 𑀓𑁄, 𑀤𑁆𑀯𑁂 𑀧𑀭𑀺𑀫𑀸𑀡𑀸𑀦𑀺 𑀅𑀲𑁆𑀲𑁂𑀢𑀺 𑀤𑁆𑀯𑀺𑀓𑀁. 𑀏𑀯𑀁 𑀢𑀺𑀓𑀸𑀤𑀺.

𑁨𑁬𑁦. ‘‘𑀲𑀫𑀽𑀳𑀢𑁆𑀣𑁂 ¶ 𑀓𑀡𑁆𑀡𑀸’’𑀢𑀺 𑀓𑀡 𑀘, 𑀡𑁄 𑀘. 𑀫𑀦𑀼𑀲𑁆𑀲𑀸𑀦𑀁 𑀲𑀫𑀽𑀳𑁄 𑀫𑀸𑀦𑀼𑀲𑁆𑀲𑀓𑁄, 𑀫𑀸𑀦𑀼𑀲𑁆𑀲𑁄 𑀯𑀸.

𑀡𑁂 𑀓𑀢𑁂 𑁋 ‘‘𑀛𑀮𑀸𑀦𑀫𑀺𑀬𑀼𑀯𑀸 𑀲𑀭𑁂 𑀯𑀸’’ 𑀢𑀻𑀳 𑀯𑀸𑀓𑀸𑀭𑁂𑀦 𑀇𑀲𑁆𑀲 𑀅𑀬𑀸𑀤𑁂𑀲𑁂 𑁋 𑀤𑁆𑀯𑀬𑀁, 𑀢𑀬𑀁. 𑀏𑀯𑀁 ‘‘𑀕𑀸𑀫𑀚𑀦𑀩𑀦𑁆𑀥𑀼𑀲𑀳𑀸𑀬𑀸𑀤𑀻𑀳𑀺 𑀢𑀸’’𑀢𑀺 𑀢𑀸. 𑀕𑀸𑀫𑀢𑀸, 𑀦𑀸𑀕𑀭𑀢𑀸.

𑀪𑀸𑀯𑀢𑀤𑁆𑀥𑀺𑀢

𑁨𑁬𑁧. 𑀡𑁆𑀬𑀢𑁆𑀢𑀢𑀸 𑀪𑀸𑀯𑁂 𑀢𑀼.

𑀪𑀸𑀯𑀢𑁆𑀣𑁂 𑀡𑁆𑀬𑀢𑁆𑀢𑀢𑀸 𑀳𑁄𑀦𑁆𑀢𑀺. 𑀢𑀼𑀲𑀤𑁆𑀤𑁂𑀦 𑀢𑁆𑀢𑀦𑁄 𑀘. 𑀲𑀓𑀢𑁆𑀣𑀸𑀤𑀻𑀲𑀼𑀧𑀺 𑀡𑁆𑀬𑁄, 𑀲𑀓𑀢𑁆𑀣𑁂 𑀢𑀸 𑀘.

𑁨𑁬𑁨.

𑀳𑁄𑀦𑁆𑀢𑁆𑀬𑀲𑁆𑀫𑀸 ¶ 𑀲𑀤𑁆𑀤𑀜𑀸𑀡𑀸𑀦𑀺,

𑀪𑀸𑀯𑁄 𑀲𑀸 𑀲𑀤𑁆𑀤𑀯𑀼𑀢𑁆𑀢𑀺𑀬𑀸;

𑀦𑀺𑀫𑀺𑀢𑁆𑀢𑀪𑀽𑀢𑀁 𑀦𑀸𑀫𑀜𑁆𑀘,

𑀚𑀸𑀢𑀺 𑀤𑀩𑁆𑀩𑀁 𑀓𑁆𑀭𑀺𑀬𑀸 𑀕𑀼𑀡𑁄.

𑁨𑁬𑁩. 𑀬𑀣𑀸 ¶ 𑁋 𑀘𑀦𑁆𑀤𑀲𑁆𑀲 𑀪𑀸𑀯𑁄 𑀘𑀦𑁆𑀤𑀢𑁆𑀢𑀁. 𑀇𑀳 𑀦𑀸𑀫𑀯𑀲𑀸 𑀘𑀦𑁆𑀤𑀲𑀤𑁆𑀤𑁄 𑀘𑀦𑁆𑀤𑀤𑁆𑀤𑀩𑁆𑀩𑁂 𑀯𑀢𑁆𑀢𑀢𑁂, 𑀦𑀺𑀫𑀺𑀢𑁆𑀢𑀲𑁆𑀲 𑀭𑀽𑀧𑀸𑀦𑀼𑀕𑀢𑀜𑁆𑀘 𑀜𑀸𑀡𑀁. 𑀏𑀯𑀁 𑀫𑀦𑀼𑀲𑁆𑀲𑀢𑁆𑀢𑀦𑁆𑀢𑀺 𑀫𑀦𑀼𑀲𑁆𑀲𑀚𑀸𑀢𑀺𑀯𑀲𑀸. 𑀬𑀤𑀸𑀤𑀺𑀦𑀸 𑀈𑀲𑁆𑀲 𑀭𑀲𑁆𑀲𑁂 𑁋 𑀤𑀡𑁆𑀟𑀺𑀢𑁆𑀢𑀦𑁆𑀢𑀺 𑀤𑀡𑁆𑀟𑀤𑁆𑀤𑀩𑁆𑀩𑀲𑀫𑁆𑀩𑀦𑁆𑀥𑀸. 𑀧𑀸𑀘𑀓𑀢𑁆𑀢𑀦𑁆𑀢𑀺 𑀧𑀘𑀦𑀓𑁆𑀭𑀺𑀬𑀸𑀲𑀫𑁆𑀩𑀦𑁆𑀥𑀸. 𑀦𑀻𑀮𑀢𑁆𑀢𑀦𑁆𑀢𑀺 𑀦𑀻𑀮𑀕𑀼𑀡𑀯𑀲𑀸.

𑀏𑀯𑀁 𑀡𑁆𑀬𑀸𑀤𑀻𑀲𑀼𑀧𑀺 𑀬𑀣𑀸𑀬𑁄𑀕𑀁 𑀜𑁂𑀬𑁆𑀬𑀁. 𑀡𑁆𑀬𑁄.

𑀅𑀯𑀡𑁆𑀡𑁄 𑀬𑁂 𑀮𑁄𑀧𑀜𑁆𑀘.

𑀬𑁂 ¶ 𑀧𑀭𑁂 𑀅𑀯𑀡𑁆𑀡𑁄 𑀮𑀼𑀧𑁆𑀬𑀢𑁂, 𑀘𑀓𑀸𑀭𑁂𑀦 𑀇𑀓𑀸𑀭𑁄𑀧𑀺.

𑀬𑀯𑀢𑀁 𑀢𑀮𑀡𑀤𑀓𑀸𑀭𑀸𑀦𑀁 𑀩𑁆𑀬𑀜𑁆𑀚𑀦𑀸𑀦𑀺 𑀘𑀮𑀜 𑀚𑀓𑀸𑀭𑀢𑁆𑀢’’𑀦𑁆𑀢𑀺 𑀬𑀓𑀸𑀭𑀬𑀼𑀢𑁆𑀢𑀸𑀦𑀁 𑀢𑀸𑀤𑀻𑀦𑀁 𑀘𑀸𑀤𑀬𑁄, 𑀓𑀸𑀭𑀕𑁆𑀕𑀳𑀡𑁂𑀦 𑀲𑀓𑀧𑀪𑀫𑀸𑀤𑀺𑀢𑁄 𑀧𑀭𑀬𑀓𑀸𑀭𑀲𑁆𑀲 𑀧𑀼𑀩𑁆𑀩𑁂𑀦 𑀲𑀳 𑀓𑁆𑀯𑀘𑀺 𑀧𑀼𑀩𑁆𑀩𑀭𑀽𑀧𑀜𑁆𑀘, 𑀤𑁆𑀯𑀺𑀢𑁆𑀢𑀁. 𑀧𑀡𑁆𑀟𑀺𑀘𑁆𑀘𑀁, 𑀓𑁄𑀲𑀮𑁆𑀮𑀁, 𑀲𑀸𑀫𑀜𑁆𑀜𑀁, 𑀲𑁄𑀳𑀚𑁆𑀚𑀁, 𑀧𑁄𑀭𑀺𑀲𑁆𑀲𑀁, 𑀦𑁂𑀧𑀓𑁆𑀓𑀁, 𑀲𑀸𑀭𑀼𑀧𑁆𑀧𑀁, 𑀑𑀲𑀩𑁆𑀪𑀁, 𑀑𑀧𑀫𑁆𑀫𑀁.

𑀆𑀢𑁆𑀢𑀜𑁆𑀘.

𑀇𑀉𑀇𑀘𑁆𑀘𑁂𑀢𑁂𑀲𑀁 𑀆 𑀳𑁄𑀢𑀺, 𑀭𑀺𑀓𑀸𑀭𑀸𑀕𑀫𑁄 𑀘 𑀞𑀸𑀦𑁂.

𑀲𑀭𑀮𑁄𑀧𑀸𑀤𑀺𑀦𑀸 𑀇𑀮𑁄𑀧𑁄. 𑀇𑀲𑀺𑀦𑁄 𑀪𑀸𑀯𑁄.

𑀆𑀭𑀺𑀲𑁆𑀲𑀁 ¶ . 𑀏𑀯𑀁 𑀫𑀼𑀤𑀼𑀢𑀸, 𑀅𑀭𑀳𑀢𑀸, 𑀦𑁆𑀢𑀲𑁆𑀲 𑀬𑀤𑀸𑀤𑀺𑀦𑀸 𑀮𑁄𑀧𑁄.

𑀧𑀼𑀣𑀼𑀚𑁆𑀚𑀦𑀢𑁆𑀢𑀦𑀁, 𑀅𑀓𑀺𑀜𑁆𑀘𑀦𑀫𑁂𑀯 𑀆𑀓𑀺𑀜𑁆𑀘𑀜𑁆𑀜𑀁, 𑀓𑀼𑀡𑁆𑀟𑀦𑀺𑀬𑀸 𑀅𑀧𑀘𑁆𑀘𑀁 𑀓𑁄𑀡𑁆𑀟𑀜𑁆𑀜𑁄, 𑀏𑀢𑁆𑀣 𑀯𑀼𑀤𑁆𑀥𑀸𑀤𑁄 𑀯𑀸𑀓𑀸𑀭𑁂𑀦 𑀲𑀁𑀬𑁄𑀕𑀦𑁆𑀢𑀲𑁆𑀲𑀸𑀧𑀺 𑀯𑀼𑀤𑁆𑀥𑀺.

𑀧𑀤𑀸𑀬 ¶ 𑀳𑀺𑀢𑀁 𑀧𑀚𑁆𑀚𑀁, 𑀥𑀦𑀸𑀬𑀁 𑀲𑀁𑀯𑀢𑁆𑀢𑀦𑀺𑀓𑀁 𑀥𑀜𑁆𑀜𑀁, 𑀲𑀢𑀺𑀢𑁄 𑀲𑀫𑁆𑀪𑀽𑀢𑀁 𑀲𑀘𑁆𑀘𑀁, 𑀇𑀮𑁄𑀧𑁄, 𑀢𑀻𑀲𑀼 𑀦 𑀯𑀼𑀤𑁆𑀥𑀺. 𑀤𑁂𑀯𑁄 𑀏𑀯 𑀤𑁂𑀯𑀢𑀸.

𑁨𑁬𑁪. ‘‘𑀡 ¶ 𑀯𑀺𑀲𑀫𑀸𑀤𑀻𑀳𑀻’’𑀢𑀺 𑀪𑀸𑀯𑁂 𑀡𑁄. 𑀯𑁂𑀲𑀫𑀁. 𑀉𑀚𑀼𑀦𑁄 𑀪𑀸𑀯𑁄 𑀅𑀚𑁆𑀚𑀯𑀁. 𑀏𑀢𑁆𑀣 𑀉𑀲𑁆𑀲 𑀆𑀢𑁆𑀢𑁂 𑀧𑀭𑀽𑀓𑀸𑀭𑀲𑁆𑀲 𑀬𑀤𑀸𑀤𑀺𑀦𑀸 𑀅𑀯𑁄.

𑁨𑁬𑁫. ‘‘𑀭𑀫𑀡𑀻𑀬𑀸𑀤𑀺𑀢𑁄 ¶ 𑀓𑀡𑁆𑀢𑀺 𑀓𑀡. 𑀫𑀸𑀦𑀜𑁆𑀜𑀓𑀁.

𑀅𑀩𑁆𑀬𑀬𑀢𑀤𑁆𑀥𑀺𑀢

𑁨𑁬𑁬. ‘‘𑀯𑀺𑀪𑀸𑀕𑁂 ¶ 𑀥𑀸 𑀘𑁂’’𑀢𑀺 𑀥𑀸, 𑀘𑀓𑀸𑀭𑁂𑀦 𑀲𑁄𑀧𑁆𑀧𑀘𑁆𑀘𑀬𑁄 𑀘. 𑀏𑀓𑁂𑀦 𑀯𑀺𑀪𑀸𑀕𑁂𑀦 𑀏𑀓𑀥𑀸, 𑀦𑀺𑀧𑀸𑀢𑀢𑁆𑀢𑀸 𑀲𑀺𑀮𑁄𑀧𑁄. 𑀧𑀤𑀯𑀺𑀪𑀸𑀕𑁂𑀦 𑀧𑀤𑀲𑁄.

𑁨𑁬𑁭. ‘‘𑀲𑀩𑁆𑀩𑀦𑀸𑀫𑁂𑀳𑀺 𑀧𑀓𑀸𑀭𑀯𑀘𑀦𑁂 𑀢𑀼 𑀣𑀸’’𑀢𑀺 𑀣𑀸. 𑀢𑀼𑀓𑀸𑀭𑁂𑀦 𑀣𑀢𑁆𑀢𑀸 𑀘. 𑀲𑀩𑁆𑀩𑁄 𑀧𑀓𑀸𑀭𑁄, 𑀲𑀩𑁆𑀩𑁂𑀦 𑀧𑀓𑀸𑀭𑁂𑀦 𑀯𑀸 𑀲𑀩𑁆𑀩𑀣𑀸. 𑀏𑀯𑀁 𑀅𑀜𑁆𑀜𑀣𑀢𑁆𑀢𑀸.

𑁨𑁬𑁮. ‘‘𑀓𑀺𑀫𑀺𑀫𑁂𑀳𑀺 ¶ 𑀣’’𑀦𑁆𑀢𑀺 𑀣𑀁, 𑀓𑀸𑀤𑁂𑀲𑁂-𑀓𑀣𑀁. 𑀇𑀆𑀤𑁂𑀲𑁂-𑀇𑀢𑁆𑀣𑀁, 𑀣𑀦𑁆𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀣𑀁-𑀩𑀳𑀼𑀢𑁆𑀣𑀁.

𑁨𑁬𑁯. 𑀅𑀫𑀮𑀺𑀦𑀁 𑀫𑀮𑀺𑀦𑀁 𑀓𑀭𑁄𑀢𑀻𑀢𑁆𑀬𑀸𑀤𑁆𑀬𑀢𑁆𑀣𑁂-𑀅𑀪𑀽𑀢𑀢𑀩𑁆𑀪𑀸𑀯𑁂 𑀕𑀫𑁆𑀬𑀫𑀸𑀦𑁂 𑀓𑀭𑀪𑀽𑀬𑁄𑀕𑁂 𑀲𑀢𑀺 𑀦𑀸𑀫𑀢𑁄 𑀬𑀤𑀸𑀤𑀺𑀦𑀸 𑀈𑀧𑁆𑀧𑀘𑁆𑀘𑀬𑁄, 𑀫𑀮𑀺𑀦𑀻𑀓𑀭𑁄𑀢𑀺 𑀲𑁂𑀢𑀁. 𑀅𑀪𑀲𑁆𑀫𑀦𑁄 𑀪𑀲𑁆𑀫𑀦𑁄 𑀓𑀭𑀡𑀦𑁆𑀢𑀺 𑀪𑀲𑁆𑀫𑀻𑀓𑀭𑀡𑀁 𑀓𑀝𑁆𑀞𑀲𑁆𑀲. 𑀅𑀫𑀮𑀺𑀦𑁄 𑀫𑀮𑀺𑀦𑁄 𑀪𑀯𑀢𑀻𑀢𑀺 𑀫𑀮𑀺𑀦𑀻𑀪𑀯𑀢𑀺 𑀲𑁂𑀢𑁄. 𑀈𑀧𑁆𑀧𑀘𑁆𑀘𑀬𑀦𑁆𑀢𑁄𑀧𑀺 𑀦𑀺𑀧𑀸𑀢𑁄. 𑀅𑀪𑀽𑀢𑀢𑀩𑁆𑀪𑀸𑀯𑁂𑀢𑀺 𑀓𑀺𑀁, 𑀖𑀝𑀁 𑀓𑀭𑁄𑀢𑀺, 𑀖𑀝𑁄 𑀪𑀯𑀢𑀺.

𑀓𑀭𑀪𑀽𑀬𑁄𑀕𑁂𑀢𑀺 ¶ 𑀓𑀺𑀁, 𑀅𑀫𑀮𑀺𑀦𑁄 𑀫𑀮𑀺𑀦𑁄 𑀚𑀸𑀬𑀢𑁂.

𑀅𑀯𑀢𑁆𑀣𑀸𑀯𑀢𑁄𑀯𑀢𑁆𑀣𑀬𑀸, 𑀪𑀽𑀢𑀲𑁆𑀲𑀜𑁆𑀜𑀸𑀬 𑀯𑀢𑁆𑀣𑀼𑀦𑁄.

𑀢𑀸𑀬𑀸𑀯𑀢𑁆𑀣𑀸𑀬 𑀪𑀯𑀦𑀁, 𑀅𑀪𑀽𑀢𑀢𑀩𑁆𑀪𑀯𑀁 𑀯𑀺𑀤𑀼𑀁.

𑀢𑀤𑁆𑀥𑀺𑀢𑁄.