𑀅𑀜𑁆𑀜 > 𑀲𑀗𑁆𑀕𑀸𑀬𑀦-𑀧𑀼𑀘𑁆𑀙 𑀯𑀺𑀲𑁆𑀲𑀚𑁆𑀚𑀦𑀸

𑀧𑀼𑀘𑁆𑀙𑀸 𑁋 𑀲𑀸𑀥𑀼 ¶ 𑀲𑀸𑀥𑀼 𑀆𑀯𑀼𑀲𑁄 𑀫𑀬𑀫𑁆𑀧𑀺 𑀤𑀸𑀦𑀺 𑀢𑀢𑁄𑀬𑁂𑀯 𑀧𑀝𑁆𑀞𑀸𑀬 𑀲𑀁𑀕𑀸𑀬𑀺𑀢𑀼𑀁 𑀧𑀼𑀩𑁆𑀩𑀓𑀺𑀘𑁆𑀘𑀸𑀦𑀺 𑀲𑀫𑀸𑀭𑀪𑀸𑀫…, 𑀢𑁂𑀦𑀸𑀯𑀼𑀲𑁄 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀁 𑀓𑀢𑁆𑀣 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀅𑀦𑁆𑀢𑀭𑀸 𑀘 𑀪𑀦𑁆𑀢𑁂 𑀭𑀸𑀚𑀕𑀳𑀁 𑀅𑀦𑁆𑀢𑀭𑀸 𑀘 𑀦𑀸𑀴𑀦𑁆𑀤𑀁 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀁 𑀭𑀸𑀚𑀸𑀕𑀸𑀭𑀓𑁂 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑀁 ¶ 𑀆𑀯𑀼𑀲𑁄 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀼𑀧𑁆𑀧𑀺𑀬𑀜𑁆𑀘 𑀪𑀦𑁆𑀢𑁂 𑀧𑀭𑀺𑀩𑁆𑀩𑀸𑀚𑀓𑀁 𑀩𑁆𑀭𑀳𑁆𑀫𑀤𑀢𑁆𑀢𑀜𑁆𑀘 𑀫𑀸𑀡𑀯𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑀺𑀲𑁆𑀫𑀺𑀁 𑀆𑀯𑀼𑀲𑁄 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀯𑀡𑁆𑀡𑀸𑀯𑀡𑁆𑀡𑁂 𑀪𑀦𑁆𑀢𑁂, 𑀲𑀼𑀧𑁆𑀧𑀺𑀬𑁄 𑀳𑀺 𑀪𑀦𑁆𑀢𑁂 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀼𑀧𑁆𑀧𑀺𑀬𑀲𑁆𑀲 𑀧𑀦 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀅𑀦𑁆𑀢𑁂𑀯𑀸𑀲𑀻 𑀩𑁆𑀭𑀳𑁆𑀫𑀤𑀢𑁆𑀢𑁄 𑀫𑀸𑀡𑀯𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺 𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺 𑀲𑀗𑁆𑀖𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑀢𑀺 ¶ 𑀆𑀯𑀼𑀲𑁄 𑀢𑀢𑁆𑀣 𑀅𑀦𑀼𑀲𑀦𑁆𑀥𑀬𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀬𑁄 𑀪𑀦𑁆𑀢𑁂 𑀢𑀢𑁆𑀣 𑀅𑀦𑀼𑀲𑀦𑁆𑀥𑀬𑁄, 𑀏𑀓𑁄 𑀅𑀯𑀡𑁆𑀡𑀸𑀦𑀼𑀲𑀦𑁆𑀥𑀺, 𑀤𑁆𑀯𑁂 𑀯𑀡𑁆𑀡𑀸𑀦𑀼𑀲𑀦𑁆𑀥𑀺𑀬𑁄.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑀸𑀯𑀼𑀲𑁄 𑀧𑀞𑀫𑁂 𑀅𑀦𑀼𑀲𑀦𑁆𑀥𑀺𑀫𑁆𑀳𑀺 𑀓𑀣𑀁 𑀪𑀕𑀯𑀢𑀸 𑀪𑀸𑀲𑀺𑀢𑀁, 𑀢𑀁 𑀲𑀁𑀔𑁂𑀧𑀢𑁄 𑀓𑀣𑁂𑀳𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀧𑀞𑀫𑁂 𑀪𑀦𑁆𑀢𑁂 𑀅𑀦𑀼𑀲𑀦𑁆𑀥𑀺𑀫𑁆𑀳𑀺 𑀅𑀯𑀡𑁆𑀡𑁂 𑀫𑀦𑁄𑀧𑀤𑁄𑀲𑀁 𑀦𑀺𑀯𑀸𑀭𑁂𑀢𑁆𑀯𑀸, 𑀢𑀢𑁆𑀣 𑀘 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸, 𑀢𑀢𑁆𑀣 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸𑀓𑀸𑀭𑁄 𑀪𑀕𑀯𑀢𑀸 𑀪𑀸𑀲𑀺𑀢𑁄.

𑀫𑀫𑀁 ¶ 𑀯𑀸 𑀪𑀺𑀓𑁆𑀔𑀯𑁂 𑀧𑀭𑁂 𑀅𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀥𑀫𑁆𑀫𑀲𑁆𑀲 𑀯𑀸 𑀅𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁 𑀲𑀗𑁆𑀖𑀲𑁆𑀲 𑀯𑀸 𑀅𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀢𑀢𑁆𑀭 𑀢𑀼𑀫𑁆𑀳𑁂𑀳𑀺 𑀦 𑀆𑀖𑀸𑀢𑁄 𑀅𑀧𑁆𑀧𑀘𑁆𑀘𑀬𑁄 𑀦 𑀘𑁂𑀢𑀲𑁄 𑀅𑀦𑀪𑀺𑀭𑀤𑁆𑀥𑀺 𑀓𑀭𑀡𑀻𑀬𑀸…

𑀧𑀼𑀘𑁆𑀙𑀸 𑁋 𑀲𑀸𑀥𑀼 ¶ 𑀲𑀸𑀥𑀼 𑀆𑀯𑀼𑀲𑁄, 𑀲𑀸𑀥𑀼 𑀔𑁄 𑀪𑀕𑀯𑀸 𑀅𑀢𑁆𑀢𑀦𑀸 𑀧𑀭𑀫𑀼𑀓𑁆𑀓𑀁 𑀲𑀸𑀕𑀢𑀔𑀦𑁆𑀢𑀻𑀕𑀼𑀡𑀲𑀫𑀦𑁆𑀦𑀸𑀕𑀢𑁄 𑀅𑀢𑁆𑀢𑀦𑁄 𑀲𑀸𑀯𑀓𑀪𑀽𑀢𑁂 𑀅𑀫𑁆𑀳𑁂𑀧𑀺 𑀢𑀢𑁆𑀣 𑀲𑀫𑀸𑀤𑀸𑀧𑁂𑀲𑀺, 𑀅𑀢𑁆𑀢𑀦𑀸 𑀘 𑀮𑁄𑀓𑀥𑀫𑁆𑀫𑁂𑀲𑀼 𑀅𑀦𑀺𑀜𑁆𑀚𑀦𑀲𑀪𑀸𑀯𑁄 𑀅𑀫𑁆𑀳𑀸𑀓𑀫𑁆𑀧𑀺 𑀢𑀣𑀢𑁆𑀢𑀸𑀬 𑀑𑀯𑀸𑀤𑀫𑀤𑀸𑀲𑀺, 𑀤𑀼𑀢𑀺𑀬𑁂𑀧𑀦𑀸𑀯𑀼𑀲𑁄 𑀅𑀦𑀼𑀲𑀦𑁆𑀥𑀺𑀫𑁆𑀳𑀺 𑀓𑀣𑀁 𑀪𑀕𑀯𑀢𑀸 𑀪𑀸𑀲𑀺𑀢𑀁, 𑀢𑀫𑁆𑀧𑀺 𑀲𑀁𑀔𑁂𑀧𑀢𑁄 𑀧𑀓𑀸𑀲𑁂𑀳𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀤𑀼𑀢𑀺𑀬𑁂 𑀧𑀦 𑀪𑀦𑁆𑀢𑁂 𑀅𑀦𑀼𑀲𑀦𑁆𑀥𑀺𑀫𑁆𑀳𑀺 𑀯𑀡𑁆𑀡𑁂 𑀘𑁂𑀢𑀲𑁄 𑀉𑀧𑁆𑀧𑀺𑀮𑀸𑀯𑀺𑀢𑀢𑁆𑀢𑀁 𑀦𑀺𑀲𑁂𑀥𑁂𑀢𑁆𑀯𑀸, 𑀢𑀢𑁆𑀣 𑀘 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸, 𑀢𑀢𑁆𑀣 𑀘 𑀧𑀝𑀺𑀧𑀚𑁆𑀚𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸, 𑀧𑀼𑀣𑀼𑀚𑁆𑀚𑀦𑀲𑁆𑀲 𑀯𑀡𑁆𑀡𑀪𑀽𑀫𑀺𑀪𑀽𑀢𑀸𑀦𑀺 𑀢𑀻𑀡𑀺 𑀲𑀻𑀮𑀸𑀦𑀺 𑀯𑀺𑀢𑁆𑀣𑀸𑀭𑀢𑁄 𑀪𑀕𑀯𑀢𑀸 𑀪𑀸𑀲𑀺𑀢𑀸𑀦𑀺.

𑀫𑀫𑀁 ¶ 𑀯𑀸 𑀪𑀺𑀓𑁆𑀔𑀯𑁂 𑀧𑀭𑁂 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀥𑀫𑁆𑀫𑀲𑁆𑀲 𑀯𑀸 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀲𑀗𑁆𑀖𑀲𑁆𑀲 𑀯𑀸 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀢𑀢𑁆𑀭 𑀢𑀼𑀫𑁆𑀳𑁂𑀳𑀺 𑀦 𑀆𑀦𑀦𑁆𑀤𑁄 𑀦 𑀲𑁄𑀫𑀦𑀲𑁆𑀲𑀁 𑀦 𑀘𑁂𑀢𑀲𑁄 𑀅𑀪𑀺𑀭𑀤𑁆𑀥𑀺 𑀓𑀭𑀡𑀻𑀬𑀸 𑁋

𑀧𑀼𑀘𑁆𑀙𑀸 𑁋 𑀲𑀸𑀥𑀼 ¶ 𑀲𑀸𑀥𑀼 𑀆𑀯𑀼𑀲𑁄, 𑀲𑀸𑀥𑀼 𑀔𑁄 𑀪𑀕𑀯𑀸 𑀅𑀢𑁆𑀢𑀦𑀸 𑀧𑀭𑀫𑀼𑀓𑁆𑀓𑀁𑀲𑀕𑀢𑀲𑀼𑀧𑀭𑀺𑀲𑀼𑀤𑁆𑀥𑀲𑀻𑀮𑀲𑀫𑀦𑁆𑀦𑀸𑀕𑀢𑁄, 𑀢𑀁 𑀅𑀢𑁆𑀢𑀦𑁄 𑀲𑀼𑀧𑀭𑀺𑀲𑀼𑀤𑁆𑀥𑀲𑀻𑀮𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑁂𑀧𑀺 𑀢𑀢𑁆𑀣 𑀦𑀺𑀬𑁄𑀚𑁂𑀲𑀺, 𑀢𑀢𑀺𑀬𑁂 𑀧𑀦𑀸𑀯𑀼𑀲𑁄 𑀅𑀦𑀼𑀲𑀦𑁆𑀥𑀺𑀫𑁆𑀳𑀺 𑀓𑀣𑀁 𑀪𑀕𑀯𑀢𑀸 𑀪𑀸𑀲𑀺𑀢𑀁, 𑀢𑀁 𑀲𑀁𑀔𑁂𑀧𑀢𑁄 𑀧𑀓𑀸𑀲𑁂𑀳𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀢𑀺𑀬𑁂 𑀧𑀦 𑀪𑀦𑁆𑀢𑁂 𑀅𑀦𑀼𑀲𑀦𑁆𑀥𑀺𑀫𑁆𑀳𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀲𑀩𑁆𑀩𑀜𑁆𑀜𑀼𑀢 𑀜𑀸𑀡𑁂𑀦 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸, 𑀢𑀸𑀲𑀜𑁆𑀘 𑀙 𑀨𑀲𑁆𑀲𑀸𑀬𑀢𑀦𑀧𑀤𑀝𑁆𑀞𑀸𑀦𑀪𑀸𑀯𑀁 𑀯𑀺𑀪𑀸𑀯𑁂𑀢𑁆𑀯𑀸, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑀢𑀺𑀓𑀸𑀥𑀺𑀝𑁆𑀞𑀸 𑀦𑀜𑁆𑀘 𑀯𑀝𑁆𑀝𑀁 𑀓𑀣𑁂𑀢𑁆𑀯𑀸, 𑀬𑀼𑀢𑁆𑀢𑀬𑁄𑀕𑀪𑀺𑀓𑁆𑀔𑀼𑀅𑀥𑀺𑀝𑁆𑀞𑀸𑀦𑀜𑁆𑀘 𑀯𑀺𑀯𑀝𑁆𑀝𑀁 𑀓𑀣𑁂𑀢𑁆𑀯𑀸, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀤𑁂𑀲𑀦𑀸𑀚𑀸𑀮𑀢𑁄 𑀅𑀯𑀺𑀫𑀼𑀢𑁆𑀢𑀪𑀸𑀯𑀁 ¶ 𑀤𑁂𑀲𑀦𑀸𑀚𑀸𑀮𑀢𑁄 𑀯𑀺𑀫𑀼𑀢𑁆𑀢𑀲𑁆𑀲 𑀦𑀢𑁆𑀣𑀺𑀓𑀪𑀸𑀯𑀜𑁆𑀘 𑀯𑀺𑀪𑀸𑀯𑁂𑀢𑁆𑀯𑀸, 𑀅𑀢𑁆𑀢𑀦𑁄 𑀘 𑀓𑀢𑁆𑀣𑀘𑀺 𑀅𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸, 𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀁 𑀧𑀸𑀧𑁂𑀢𑁆𑀯𑀸 𑀤𑁂𑀲𑀦𑀸 𑀪𑀕𑀯𑀢𑀸 𑀦𑀺𑀝𑁆𑀞𑀸𑀧𑀺𑀢𑀸.

𑀉𑀘𑁆𑀙𑀺𑀦𑁆𑀦𑀪𑀸𑀯𑀦𑁂𑀢𑁆𑀢𑀺𑀓𑁄 ¶ 𑀪𑀺𑀓𑁆𑀔𑀯𑁂 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄 𑀢𑀺𑀝𑁆𑀞𑀢𑀺, 𑀬𑀸𑀯𑀲𑁆𑀲 𑀓𑀸𑀬𑁄 𑀞𑀲𑁆𑀲𑀢𑀺 𑀢𑀸𑀯 𑀦𑀁 𑀤𑀓𑁆𑀔𑀦𑁆𑀢𑀺 𑀤𑁂𑀯𑀫𑀦𑀼𑀲𑁆𑀲𑀸, 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀤𑁆𑀥𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸 𑀦 𑀦𑀁 𑀤𑀓𑁆𑀔𑀦𑁆𑀢𑀺 𑀤𑁂𑀯𑀫𑀦𑀼𑀲𑁆𑀲𑀸.

𑀧𑀼𑀘𑁆𑀙𑀸 𑁋 𑀲𑀸𑀥𑀼 ¶ 𑀲𑀸𑀥𑀼 𑀆𑀯𑀼𑀲𑁄, 𑀲𑀸𑀥𑀼 𑀔𑁄 𑀪𑀕𑀯𑀸 𑀅𑀢𑁆𑀢𑀦𑀸 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀘 𑀙 𑀨𑀲𑁆𑀲𑀸𑀬𑀢𑀦𑀸𑀦𑀺 𑀘 𑀤𑁆𑀯𑀸𑀤𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀸𑀦𑀺 𑀘 𑀲𑀩𑁆𑀩𑀲𑁄 𑀧𑀭𑀺𑀚𑀸𑀦𑀺𑀢𑁆𑀯𑀸 𑀢𑁂𑀲𑀁 𑀧𑀭𑀺𑀚𑀸𑀦𑀦𑀢𑁆𑀣𑀸𑀬 𑀧𑀭𑁂𑀲𑀫𑁆𑀧𑀺 𑀢𑀣𑀢𑁆𑀢𑀸𑀬 𑀥𑀫𑁆𑀫𑀁 𑀧𑀓𑀸𑀲𑁂𑀢𑀺, 𑀲𑀼𑀢𑁆𑀢𑀜𑁆𑀘 𑀦𑀸𑀫 𑀆𑀯𑀼𑀲𑁄 𑀘𑀢𑀼𑀦𑁆𑀦𑀁 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸𑀦𑀁 𑀅𑀜𑁆𑀜𑀢𑀭𑀯𑀲𑁂𑀦𑁂𑀯 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀫𑀸 𑀢𑁂𑀲𑀼 𑀇𑀤𑀁 𑀲𑀼𑀢𑁆𑀢𑀁 𑀓𑀢𑀭𑁂𑀦 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁂𑀦 𑀪𑀕𑀯𑀢𑀸 𑀦𑀺𑀓𑁆𑀔𑀺𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀘𑀢𑀽𑀲𑀼 𑀪𑀦𑁆𑀢𑁂 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁂𑀲𑀼 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀦𑀺𑀓𑁆𑀔𑁂𑀧𑀦 𑀇𑀤𑀁 𑀲𑀼𑀢𑁆𑀢𑀁 𑀦𑀺𑀓𑁆𑀔𑀺𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀓𑀲𑁆𑀲 ¶ 𑀆𑀯𑀼𑀲𑁄 𑀯𑀘𑀦𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀪𑀕𑀯𑀢𑁄 𑀪𑀦𑁆𑀢𑁂 𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀧𑀼𑀘𑁆𑀙𑀸 𑁋 𑀓𑁂𑀦𑀸𑀯𑀼𑀲𑁄 ¶ 𑀆𑀪𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀧𑀭𑀫𑁆𑀧𑀭𑀸𑀬 𑀪𑀦𑁆𑀢𑁂 𑀆𑀪𑀢𑀁.

𑀧𑀼𑀘𑁆𑀙𑀸 𑁋 𑀅𑀢𑁆𑀣𑀺 𑀦𑀼 𑀔𑁄 𑀆𑀯𑀼𑀲𑁄 𑀏𑀢𑁆𑀣 𑀓𑁄𑀘𑀺 𑀯𑀺𑀭𑀤𑁆𑀥𑀤𑁄𑀲𑀸, 𑀬𑁂𑀦 𑀧𑀘𑁆𑀙𑀺𑀫𑀸 𑀚𑀦𑀸 𑀫𑀺𑀘𑁆𑀙𑀸𑀅𑀢𑁆𑀣𑀁 𑀕𑀡𑁆𑀳𑁂𑀬𑁆𑀬𑀼𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀦𑀢𑁆𑀣𑀺 𑀪𑀦𑁆𑀢𑁂.

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 ¶ 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀁 𑀓𑀢𑁆𑀣 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀅𑀫𑁆𑀩𑀯𑀦𑁂 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑁂𑀦𑀸𑀯𑀼𑀲𑁄 𑀲𑀤𑁆𑀥𑀺𑀁 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀜𑁆𑀜𑀸 𑀪𑀦𑁆𑀢𑁂 𑀫𑀸𑀕𑀥𑁂𑀦 𑀅𑀚𑀸𑀢𑀲𑀢𑁆𑀢𑀼𑀦𑀸 𑀯𑁂𑀤𑁂𑀳𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀁 ¶ 𑀧𑀦𑀸𑀯𑀼𑀲𑁄 𑀲𑀼𑀢𑁆𑀢𑀁 𑀘𑀢𑀼𑀦𑁆𑀦𑀁 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸𑀦𑀁 𑀓𑀢𑀭𑁂𑀦 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁂𑀦 𑀪𑀕𑀯𑀢𑀸 𑀦𑀺𑀓𑁆𑀔𑀺𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀘𑀢𑀼𑀦𑁆𑀦𑀁 𑀪𑀦𑁆𑀢𑁂 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸𑀦𑀁 𑀧𑀼𑀘𑁆𑀙𑀸𑀯𑀲𑀺𑀓𑁂𑀦 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁂𑀦 𑀦𑀺𑀓𑁆𑀔𑀺𑀢𑀁 𑀪𑀕𑀯𑀢𑀸.

𑀧𑀼𑀘𑁆𑀙𑀸 𑁋 𑀲𑀸 𑀧𑀦𑀸𑀯𑀼𑀲𑁄 𑀧𑀼𑀘𑁆𑀙𑀸 𑀓𑁂𑀦𑀸𑀓𑀸𑀭𑁂𑀦 𑀲𑀫𑀼𑀧𑁆𑀧𑀦𑁆𑀦𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀸 𑀪𑀦𑁆𑀢𑁂 𑀫𑀸𑀕𑀥𑁄 𑀅𑀚𑀸𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀧𑀼𑀡𑁆𑀡𑀸𑀬 𑀧𑀼𑀡𑁆𑀡𑀫𑀸𑀬 𑀭𑀢𑁆𑀢𑀺𑀬𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀁𑀓𑀫𑀺, 𑀉𑀧𑀲𑀁𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀁𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀘𑁆𑀙𑀺, 𑀏𑀯𑀁 𑀔𑁄 𑀲𑀸 𑀪𑀦𑁆𑀢𑁂 𑀧𑀼𑀘𑁆𑀙𑀸 𑀉𑀧𑁆𑀧𑀦𑁆𑀦𑀸.

𑀭𑀫𑁆𑀫𑀡𑀻𑀬𑀸 ¶ 𑀯𑀢 𑀪𑁄 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀅𑀪𑀺𑀭𑀽𑀧𑀸 𑀯𑀢 𑀪𑁄 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀤𑀲𑁆𑀲𑀦𑀻𑀬𑀸 𑀯𑀢 𑀪𑁄 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀧𑀸𑀲𑀸𑀤𑀺𑀓𑀸 𑀯𑀢 𑀪𑁄 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀮𑀓𑁆𑀔𑀜𑁆𑀜𑀸 𑀯𑀢 𑀪𑁄 𑀤𑁄𑀲𑀺𑀦𑀸 𑀭𑀢𑁆𑀢𑀺….

𑀓𑀁 𑀦𑀼𑀔𑁆𑀯𑀚𑁆𑀚 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀧𑀬𑀺𑀭𑀼𑀧𑀸𑀲𑁂𑀬𑁆𑀬𑀸𑀫….

𑀬𑀁 ¶ 𑀦𑁄 𑀧𑀬𑀺𑀭𑀼𑀧𑀲𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑁂𑀬𑁆𑀬….

𑀢𑁆𑀯𑀁 𑀧𑀦 𑀲𑀫𑁆𑀫 𑀚𑀻𑀯𑀓 𑀓𑀺𑀁 𑀢𑀼𑀡𑁆𑀳𑀻𑀲𑀺 𑁋

𑀅𑀬𑀁 ¶ 𑀤𑁂𑀯 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀫𑁆𑀳𑀸𑀓𑀁 𑀅𑀫𑁆𑀩𑀯𑀦𑁂 𑀯𑀺𑀳𑀭𑀢𑀺.

𑀢𑀁 𑀔𑁄 𑀧𑀦 𑀪𑀕𑀯𑀦𑁆𑀢𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺.

𑀢𑀁 𑀤𑁂𑀯𑁄 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀢𑀼, 𑀅𑀧𑁆𑀧𑁂𑀯𑀦𑀸𑀫 𑀤𑁂𑀯𑀲𑁆𑀲 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑁂𑀬𑁆𑀬.

𑀢𑁂𑀦 𑀳𑀺 𑀲𑀫𑁆𑀫 𑀚𑀻𑀯𑀓 𑀳𑀢𑁆𑀣𑀺𑀬𑀸𑀦𑀸𑀦𑀺 𑀓𑀧𑁆𑀧𑀸𑀧𑁂𑀳𑀺.

𑀓𑀧𑁆𑀧𑀺𑀢𑀸𑀦𑀺 ¶ 𑀔𑁄 𑀢𑁂 𑀤𑁂𑀯 𑀳𑀢𑁆𑀣𑀺𑀬𑀸𑀦𑀸𑀦𑀺, 𑀬𑀲𑁆𑀲 𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀺.

𑀓𑀺𑀘𑁆𑀘𑀺 𑀫𑀁 𑀲𑀫𑁆𑀫 𑀚𑀻𑀯𑀓 𑀦 𑀯𑀜𑁆𑀘𑁂𑀲𑀺, 𑀓𑀘𑁆𑀘𑀺 𑀫𑀁 𑀲𑀫𑁆𑀫 𑀚𑀻𑀯𑀓 𑀦 𑀧𑀮𑀫𑁆𑀪𑁂𑀲𑀺….

𑀫𑀸 𑀪𑀸𑀬𑀺 𑀫𑀳𑀸𑀭𑀸𑀚, 𑀫𑀸 𑀪𑀸𑀬𑀺 𑀫𑀳𑀸𑀭𑀸𑀚….

𑀦 𑀢𑀁 𑀤𑁂𑀯 𑀯𑀜𑁆𑀘𑁂𑀫𑀺, 𑀦 𑀢𑀁 𑀤𑁂𑀯 𑀧𑀮𑀫𑁆𑀪𑀸𑀫𑀺….

𑀏𑀲𑁄 ¶ 𑀫𑀳𑀸𑀭𑀸𑀚 𑀪𑀕𑀯𑀸, 𑀏𑀲𑁄 𑀫𑀳𑀸𑀭𑀸𑀚 𑀪𑀕𑀯𑀸 𑀫𑀚𑁆𑀛𑀺𑀫𑀁 𑀣𑀫𑁆𑀪𑀁 𑀦𑀺𑀲𑁆𑀲𑀸𑀬 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀺𑀦𑁆𑀦𑁄 𑀧𑀼𑀭𑀓𑁆𑀔𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲….

𑀇𑀫𑀺𑀦𑀸 𑀫𑁂 𑀉𑀧𑀲𑀫𑁂𑀦 𑀉𑀤𑀬𑀪𑀤𑁆𑀤𑁄 𑀓𑀼𑀫𑀸𑀭𑁄 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀼…

𑀅𑀕𑀫𑀸 ¶ 𑀔𑁄 𑀢𑁆𑀯𑀁 𑀫𑀳𑀸𑀭𑀸𑀚 𑀬𑀣𑀸 𑀧𑁂𑀫𑀁.

𑀧𑀼𑀘𑁆𑀙𑁂𑀬𑁆𑀬𑀸𑀫𑀳𑀁 𑀪𑀦𑁆𑀢𑁂 𑀪𑀕𑀯𑀦𑁆𑀢𑀁 𑀓𑀺𑀜𑁆𑀘𑀺𑀤𑁂𑀯 𑀤𑁂𑀲𑀁 𑀲𑀘𑁂 𑀫𑁂 𑀪𑀕𑀯𑀸 𑀑𑀓𑀸𑀲𑀁 𑀓𑀭𑁄𑀢𑀺 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀸𑀬.

𑀧𑀼𑀘𑁆𑀙 𑀫𑀳𑀸𑀭𑀸𑀚 𑀬𑀤𑀸𑀓𑀗𑁆𑀔𑀲𑀺.

𑀬𑀣𑀸 ¶ 𑀦𑀼 𑀔𑁄 𑀇𑀫𑀸𑀦𑀺 𑀪𑀦𑁆𑀢𑁂 𑀧𑀼𑀣𑀼𑀲𑀺𑀧𑁆𑀧𑀸𑀬𑀢𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁, 𑀳𑀢𑁆𑀣𑀸𑀭𑁄𑀳𑀸 𑀅𑀲𑁆𑀲𑀸𑀭𑁄𑀳𑀸 𑀭𑀣𑀺𑀓𑀸 𑀥𑀦𑀼𑀕𑁆𑀕𑀳𑀸 𑀘𑁂𑀮𑀓𑀸 𑀘𑀮𑀓𑀸 𑀧𑀺𑀡𑁆𑀟𑀤𑀸𑀬𑀓𑀸 (𑀧𑁂𑀬𑁆𑀬𑀸𑀮) 𑀕𑀡𑀓𑀸 𑀫𑀼𑀤𑁆𑀤𑀺𑀓𑀸, 𑀅𑀜𑁆𑀜𑀸𑀦𑀺𑀧𑀺 𑀏𑀯𑀁 𑀕𑀢𑀺𑀓𑀸𑀦𑀺 𑀧𑀼𑀣𑀼𑀲𑀺𑀧𑁆𑀧𑀸𑀬𑀢𑀦𑀸𑀦𑀺, 𑀢𑁂 𑀢𑁂𑀦 𑀲𑀺𑀧𑁆𑀧𑁂𑀦 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀺𑀧𑁆𑀧𑀨𑀮𑀁 𑀚𑀻𑀯𑀦𑁆𑀢𑀺, 𑀢𑁂 𑀢𑁂𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀦𑁆𑀢𑀺 𑀧𑀻𑀡𑁂𑀦𑁆𑀢𑀺, 𑀫𑀸𑀢𑀸𑀧𑀺𑀢𑀭𑁄 𑀲𑀼𑀔𑁂𑀦𑁆𑀢𑀺, 𑀧𑀻𑀡𑁂𑀦𑁆𑀢𑀺, 𑀧𑀼𑀢𑁆𑀢𑀤𑀸𑀭𑀁 𑀲𑀼𑀔𑁂𑀦𑁆𑀢𑀺 𑀧𑀻𑀡𑁂𑀦𑁆𑀢𑀺, 𑀫𑀺𑀢𑁆𑀢𑀸𑀫𑀘𑁆𑀘𑁂 𑀲𑀼𑀔𑁂𑀦𑁆𑀢𑀺 𑀧𑀻𑀡𑁂𑀦𑁆𑀢𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀉𑀤𑁆𑀥𑀕𑁆𑀕𑀺𑀓𑀁 𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀧𑁂𑀦𑁆𑀢𑀺 𑀲𑁄𑀯𑀕𑁆𑀕𑀺𑀓𑀁 𑀲𑀼𑀔𑀯𑀺𑀧𑀸𑀓𑀁 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁, 𑀲𑀓𑁆𑀓𑀸 𑀦𑀼 𑀔𑁄 𑀪𑀦𑁆𑀢𑁂 𑀏𑀯𑀫𑁂𑀯 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀜𑁆𑀜𑀧𑁂𑀢𑀼𑀁.

𑀧𑀼𑀘𑁆𑀙𑀸 𑁋 𑀢𑀤𑀸 ¶ 𑀆𑀯𑀼𑀲𑁄 𑀓𑀣𑀁 𑀪𑀕𑀯𑀢𑀸 𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺 𑀧𑀼𑀢𑁆𑀢𑁄 𑀧𑀝𑀺𑀧𑀼𑀘𑁆𑀙𑀺𑀢𑁄 𑀓𑀣𑀜𑁆𑀘 𑀢𑁂𑀦 𑀪𑀕𑀯𑀢𑁄 𑀆𑀭𑁄𑀘𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 ‘‘𑀅𑀪𑀺𑀚𑀸𑀦𑀸𑀲𑀺 𑀦𑁄 𑀢𑁆𑀯𑀁 𑀫𑀳𑀸𑀭𑀸𑀚 𑀇𑀫𑀁 𑀧𑀜𑁆𑀳𑀁 𑀅𑀜𑁆𑀜𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀧𑀼𑀘𑁆𑀙𑀺𑀢𑀸𑀢𑀺, 𑀅𑀪𑀺𑀚𑀸𑀦𑀸𑀫𑀳𑀁 𑀪𑀦𑁆𑀢𑁂 𑀅𑀜𑁆𑀜𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀧𑀼𑀘𑁆𑀙𑀺𑀢𑀸𑀢𑀺, 𑀬𑀣𑀸𑀓𑀣𑀁 𑀧𑀦 𑀢𑁂 𑀫𑀳𑀸𑀭𑀸𑀚 𑀩𑁆𑀬𑀸𑀓𑀭𑀺𑀁𑀲𑀼, 𑀲𑀘𑁂 𑀢𑁂 𑀅𑀕𑀭𑀼, 𑀪𑀸𑀲𑀲𑁆𑀲𑀽𑀢𑀺 𑀦 𑀔𑁄 𑀫𑁂 𑀪𑀦𑁆𑀢𑁂 𑀕𑀭𑀼, 𑀬𑀢𑁆𑀣𑀲𑁆𑀲 𑀪𑀕𑀯𑀸 𑀦𑀺𑀲𑀺𑀦𑁆𑀦𑁄 𑀪𑀯𑀦𑁆𑀢𑀭𑀽𑀧𑁄 𑀯𑀸𑀢𑀺, 𑀢𑁂𑀦𑁂𑀳𑀺 𑀫𑀳𑀸𑀭𑀸𑀚 𑀪𑀸𑀲𑀲𑁆𑀲𑀽’’𑀢𑀺, 𑀏𑀯𑀁 𑀔𑁄 𑀪𑀦𑁆𑀢𑁂 𑀢𑀤𑀸 𑀪𑀕𑀯𑀢𑀸 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺 𑀧𑀼𑀢𑁆𑀢𑁄 𑀧𑀝𑀺𑀧𑀼𑀘𑁆𑀙𑀺𑀢𑁄, 𑀏𑀯𑀁 𑀔𑁄 𑀪𑀦𑁆𑀢𑁂 𑀢𑁂𑀦 𑀢𑀤𑀸 𑀪𑀕𑀯𑀢𑁄 𑀆𑀭𑁄𑀘𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀧𑀽𑀭𑀡𑀓𑀲𑁆𑀲𑀧𑀲𑁆𑀲 𑀲𑀦𑁆𑀢𑀺𑀓𑁂 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸 𑀅𑀳𑁄𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀓𑀫𑀺𑀤𑀁 𑀪𑀦𑁆𑀢𑁂 𑀲𑀫𑀬𑀁 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀬𑁂𑀦 𑀧𑀽𑀭𑀡𑁄 𑀓𑀲𑁆𑀲𑀧𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀽𑀭𑀡𑀁 𑀓𑀲𑁆𑀲𑀧𑀁 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀘𑁆𑀙𑀺, 𑀅𑀣 𑀔𑁄 𑀪𑀦𑁆𑀢𑁂 𑀧𑀽𑀭𑀡𑁄 𑀓𑀲𑁆𑀲𑀧𑁄 𑀓𑀭𑁄𑀢𑁄 𑀔𑁄 𑀫𑀳𑀸𑀭𑀸𑀚 𑀓𑀸𑀭𑀬𑀢𑁄, 𑀙𑀺𑀦𑁆𑀤𑀢𑁄 𑀙𑁂𑀤𑀸𑀧𑀬𑀢𑁄, 𑀧𑀘𑀢𑁄 𑀧𑀸𑀘𑀸𑀧𑀬𑀢𑁄, 𑀲𑁄𑀘𑀬𑀢𑁄 𑀲𑁄𑀘𑀸𑀧𑀬𑀢𑁄 (𑀧𑁂𑀬𑁆𑀬𑀸𑀮) 𑀓𑀭𑁄𑀢𑁄 𑀦 𑀓𑀭𑀻𑀬𑀢𑀺 𑀧𑀸𑀧𑀁 𑀢𑁆𑀬𑀸𑀤𑀺𑀦𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀲𑀁𑀤𑀺𑀝𑁆𑀞𑀺 𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀅𑀓𑀺𑀭𑀺𑀬𑀁 𑀩𑁆𑀬𑀸𑀓𑀸𑀲𑀺, 𑀏𑀯𑀁 𑀔𑁄 𑀪𑀦𑁆𑀢𑁂 𑀧𑀽𑀭𑀡𑀲𑁆𑀲 𑀓𑀲𑁆𑀲𑀧𑀲𑁆𑀲 𑀲𑀦𑁆𑀢𑀺𑀓𑁂 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸 𑀅𑀳𑁄𑀲𑀺.

𑀦𑀺𑀲𑁆𑀲𑀺𑀭𑀺𑀓𑁄 ¶ 𑀯𑀢 𑀆𑀯𑀼𑀲𑁄 𑀧𑀽𑀭𑀡𑀲𑁆𑀲 𑀓𑀲𑁆𑀲𑀧𑀲𑁆𑀲 𑀯𑀸𑀤𑁄 𑀅𑀦𑀢𑁆𑀣𑀲𑀁𑀳𑀺𑀢𑁄 𑀚𑀺𑀕𑀼𑀘𑁆𑀙𑀦𑀻𑀬𑁄 𑀅𑀢𑀺𑀯𑀺𑀬 𑀪𑀬𑀸𑀦𑀓𑁄, 𑀬𑁂 𑀢𑀲𑁆𑀲 𑀯𑀘𑀦𑀁 𑀲𑁄𑀢𑀩𑁆𑀩𑀁 𑀲𑀤𑁆𑀥𑀸𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀼𑀁, 𑀢𑁂𑀲𑀁 𑀢𑀁 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬, 𑀏𑀢𑁆𑀢𑀓𑁂𑀦𑁂𑀯 𑀅𑀚𑁆𑀚 𑀫𑀬𑀁 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑀣𑀧𑁂𑀲𑁆𑀲𑀸𑀫.

𑀧𑀼𑀘𑁆𑀙𑀸 𑁋 𑀧𑀼𑀭𑀺𑀫𑀤𑀺𑀯𑀲𑁂 𑀆𑀯𑀼𑀲𑁄 𑀫𑀬𑀸 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀲𑁆𑀲 𑀦𑀺𑀤𑀸𑀦𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀧𑀼𑀘𑁆𑀙𑀺𑀢𑀩𑁆𑀩𑀝𑁆𑀞𑀸𑀦𑀸𑀦𑀺 𑀓𑀸𑀦𑀺𑀘𑀺 𑀓𑀸𑀦𑀺𑀘𑀺 𑀧𑀼𑀘𑁆𑀙𑀺𑀢𑀸𑀦𑀺, 𑀢𑀬𑀸 𑀘 𑀲𑀼𑀝𑁆𑀞𑀼 𑀯𑀺𑀲𑁆𑀲𑀚𑁆𑀚𑀺𑀢𑀸𑀦𑀺, 𑀅𑀚𑁆𑀚 𑀧𑀦 𑀬𑀣𑀸𑀦𑀼𑀧𑁆𑀧𑀢𑁆𑀢𑀫𑀓𑁆𑀔𑀮𑀺𑀕𑁄𑀲𑀸𑀬 𑀯𑀸𑀤𑀢𑁄 𑀧𑀝𑁆𑀞𑀸𑀬 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀫𑀓𑁆𑀔𑀮𑀺 𑀧𑀦 𑀆𑀯𑀼𑀲𑁄

𑀕𑁄𑀲𑀸𑀮𑁄 ¶ 𑀭𑀜𑁆𑀜𑀸 𑀫𑀸𑀕𑀥𑁂𑀦 𑀅𑀚𑀸𑀢𑀲𑀢𑁆𑀢𑀼𑀦𑀸 𑀯𑁂𑀤𑁂𑀳𑀺𑀧𑀼𑀢𑁆𑀢𑁂𑀦 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀓𑀣𑀁 𑀩𑁆𑀬𑀸𑀓𑀸𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀓𑀫𑀺𑀤𑀁 𑀪𑀦𑁆𑀢𑁂 𑀲𑀫𑀬𑀁 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀬𑁂𑀦 𑀫𑀓𑁆𑀔𑀮𑀺𑀕𑁄𑀲𑀸𑀮𑁄 𑀢𑁂𑀦𑀼𑀧𑀲𑀁𑀓𑀫𑀺, 𑀉𑀧𑀲𑀁𑀓𑀫𑀺𑀢𑁆𑀯𑀸 𑀫𑀓𑁆𑀔𑀮𑀺𑀁 𑀕𑁄𑀲𑀸𑀮𑀁 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀘𑁆𑀙𑀺, 𑀅𑀣 𑀔𑁄 𑀪𑀦𑁆𑀢𑁂 𑀫𑀓𑁆𑀔𑀮𑀺𑀕𑁄𑀲𑀸𑀮𑁄 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀅𑀚𑀸𑀢𑀲𑀢𑁆𑀢𑀼𑀁 𑀯𑁂𑀤𑁂𑀳𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 ‘‘𑀦𑀢𑁆𑀣𑀺 𑀫𑀳𑀸𑀭𑀸𑀚 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬, 𑀅𑀳𑁂𑀢𑀽 𑀅𑀧𑀘𑁆𑀘𑀬𑀸 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺. 𑀦𑀢𑁆𑀣𑀺 𑀫𑀳𑀸𑀭𑀸𑀚 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸, 𑀅𑀳𑁂𑀢𑀽 𑀅𑀧𑀘𑁆𑀘𑀬𑀸 𑀲𑀢𑁆𑀢𑀸 𑀯𑀺𑀲𑀼𑀚𑁆𑀛𑀦𑁆𑀢𑀺, (𑀧𑁂𑀬𑁆𑀬𑀸𑀮) 𑀘𑀼𑀮𑁆𑀮𑀸𑀲𑀻𑀢𑀺 𑀫𑀳𑀸𑀓𑀧𑁆𑀧𑀺𑀦𑁄 𑀲𑀢𑀲𑀳𑀲𑁆𑀲𑀸𑀦𑀺, 𑀬𑀸𑀦𑀺 𑀩𑀸𑀮𑁂 𑀘 𑀧𑀡𑁆𑀟𑀺𑀢𑁂 𑀘 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀢𑀢𑁆𑀣 𑀦𑀢𑁆𑀣𑀺 ‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀢𑀧𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀅𑀧𑀭𑀺𑀧𑀓𑁆𑀓𑀁 𑀯𑀸 𑀓𑀫𑁆𑀫𑀁 𑀧𑀭𑀺𑀧𑀸𑀘𑁂𑀲𑁆𑀲𑀸𑀫𑀺, 𑀧𑀭𑀺𑀧𑀓𑁆𑀓𑀁 𑀯𑀸 𑀓𑀫𑁆𑀫𑀁 𑀨𑀼𑀲𑁆𑀲 𑀨𑀼𑀲𑁆𑀲 𑀩𑁆𑀬𑀦𑁆𑀢𑀺𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀳𑁂𑀯𑀁 𑀦𑀢𑁆𑀣𑀺. 𑀤𑁄𑀡𑀫𑀺𑀢𑁂 𑀲𑀼𑀔𑀤𑀼𑀓𑁆𑀔𑁂, 𑀧𑀭𑀺𑀬𑀦𑁆𑀢𑀓𑀢𑁂 𑀲𑀁𑀲𑀸𑀭𑁂 𑀦𑀢𑁆𑀣𑀺 𑀳𑀸𑀬𑀦𑀯𑀟𑁆𑀠𑀦𑁂, 𑀦𑀢𑁆𑀣𑀺 𑀉𑀓𑁆𑀓𑀁𑀲𑀸𑀯𑀓𑀁𑀲𑁂. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀼𑀢𑁆𑀢𑀧𑀼𑀝𑁆𑀞𑁂 𑀔𑀺𑀢𑁆𑀢𑁂 𑀦𑀺𑀩𑁆𑀩𑁂𑀞𑀺𑀬𑀫𑀸𑀦𑀫𑁂𑀯 𑀧𑀮𑁂𑀢𑀺, 𑀏𑀯𑀫𑁂𑀯 𑀩𑀸𑀮𑁂 𑀘 𑀧𑀡𑁆𑀟𑀺𑀢𑁂 𑀘 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺, 𑀇𑀢𑁆𑀣𑀁 𑀔𑁄 𑀪𑀦𑁆𑀢𑁂 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀫𑀓𑁆𑀔𑀮𑀺𑀕𑁄𑀲𑀸𑀮𑁄 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀲𑀁𑀲𑀸𑀭𑀲𑀼𑀤𑁆𑀥𑀺𑀁 𑀩𑁆𑀬𑀸𑀓𑀸𑀲𑀺.

𑀅𑀬𑀫𑁆𑀧𑀺 ¶ 𑀆𑀯𑀼𑀲𑁄 𑀯𑀸𑀤𑁄 𑀦𑀺𑀲𑁆𑀲𑀺𑀭𑀺𑀓𑁄𑀬𑁂𑀯 𑀅𑀦𑀢𑁆𑀣𑀲𑀁𑀳𑀺𑀢𑁄 𑀚𑀺𑀕𑀼𑀘𑁆𑀙𑀦𑀻𑀬𑁄 𑀅𑀢𑀺 𑀯𑀺𑀬 𑀪𑀬𑀸𑀦𑀓𑁄, 𑀬𑁂 𑀢𑀲𑁆𑀲 𑀯𑀘𑀦𑀁 𑀲𑁄𑀢𑀩𑁆𑀩𑀁 𑀲𑀤𑁆𑀥𑀸𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀼𑀁, 𑀢𑁂𑀲𑀁 𑀢𑀁 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬.

𑀧𑀼𑀘𑁆𑀙𑀸 𑁋 𑀅𑀣𑀸𑀧𑀭𑀫𑁆𑀧𑀺 ¶ 𑀧𑀼𑀘𑁆𑀙𑀸𑀫𑀺, 𑀅𑀚𑀺𑀢𑁄 𑀧𑀦 𑀆𑀯𑀼𑀲𑁄 𑀓𑁂𑀲𑀓𑀫𑁆𑀩𑀮𑁄 𑀭𑀜𑁆𑀜𑀸 𑀫𑀸𑀕𑀥𑁂𑀦 𑀅𑀚𑀸𑀢𑀲𑀢𑁆𑀢𑀼𑀦𑀸 𑀯𑁂𑀤𑁂𑀳𑀺𑀧𑀼𑀢𑁆𑀢𑁂𑀦 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀓𑀣𑀁 𑀩𑁆𑀬𑀸𑀓𑀸𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀓𑀫𑀺𑀤𑀁 𑀪𑀦𑁆𑀢𑁂 𑀲𑀫𑀬𑀁 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀬𑁂𑀦 𑀅𑀚𑀺𑀢𑁄 𑀓𑁂𑀲𑀓𑀫𑁆𑀩𑀮𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀚𑀺𑀢𑀁 𑀓𑁂𑀲𑀓𑀫𑁆𑀩𑀮𑀁 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀘𑁆𑀙𑀺, 𑀅𑀣 𑀔𑁄 𑀪𑀦𑁆𑀢𑁂 𑀅𑀚𑀺𑀢𑁄 𑀓𑁂𑀲𑀓𑀫𑁆𑀩𑀮𑁄 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀅𑀚𑀸𑀢𑀲𑀢𑁆𑀢𑀼𑀁 𑀯𑁂𑀤𑁂𑀳𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 ‘‘𑀦𑀢𑁆𑀣𑀺 𑀫𑀳𑀸𑀭𑀸𑀚 𑀤𑀺𑀦𑁆𑀦𑀁, 𑀦𑀢𑁆𑀣𑀺 𑀬𑀺𑀝𑁆𑀞𑀁, 𑀦𑀢𑁆𑀣𑀺 𑀳𑀼𑀢𑀁, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄, 𑀦𑀢𑁆𑀣𑀺 𑀅𑀬𑀁 𑀮𑁄𑀓𑁄, 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀫𑀸𑀢𑀸, 𑀦𑀢𑁆𑀣𑀺 𑀧𑀺𑀢𑀸, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀮𑁄𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑁆𑀫𑀕𑁆𑀕𑀢𑀸 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸, 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀺. (𑀧𑁂𑀬𑁆𑀬𑀸𑀮) 𑀩𑀸𑀮𑁂 𑀘 𑀧𑀡𑁆𑀟𑀺𑀢𑁂 𑀘 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀦𑁆𑀢𑀺 𑀯𑀺𑀦𑀲𑁆𑀲𑀦𑁆𑀢𑀻’’𑀢𑀺. 𑀇𑀢𑁆𑀣𑀁 𑀔𑁄 𑀪𑀦𑁆𑀢𑁂 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀅𑀚𑀺𑀢𑁄 𑀓𑁂𑀲𑀓𑀫𑁆𑀩𑀮𑁄 ¶ 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀉𑀘𑁆𑀙𑁂𑀤𑀁 𑀩𑁆𑀬𑀸𑀓𑀸𑀲𑀺.

𑀅𑀬𑀫𑁆𑀧𑀺 ¶ 𑀔𑁄 𑀆𑀯𑀼𑀲𑁄 𑀦𑀺𑀲𑁆𑀲𑀺𑀭𑀺𑀓𑁄𑀬𑁂𑀯, 𑀅𑀦𑀢𑁆𑀣𑀲𑀁𑀳𑀺𑀢𑁄 𑀚𑀺𑀕𑀼𑀘𑁆𑀙𑀦𑀻𑀬𑁄 𑀅𑀢𑀺 𑀯𑀺𑀬 𑀪𑀬𑀸𑀦𑀓𑁄, 𑀬𑁂 𑀢𑀲𑁆𑀲 𑀯𑀘𑀦𑀁 𑀲𑁄𑀢𑀩𑁆𑀩𑀁 𑀲𑀤𑁆𑀥𑀸𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀼𑀁, 𑀢𑁂𑀲𑀁 𑀢𑀁 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬.

𑀧𑀼𑀘𑁆𑀙𑀸 𑁋 𑀅𑀣𑀸𑀧𑀭𑀫𑁆𑀧𑀺 ¶ 𑀧𑀼𑀘𑁆𑀙𑀸𑀫𑀺, 𑀧𑀓𑀼𑀥𑁄 𑀧𑀦 𑀆𑀯𑀼𑀲𑁄 𑀓𑀘𑁆𑀘𑀸𑀬𑀦𑁄 𑀭𑀜𑁆𑀜𑀸 𑀫𑀸𑀕𑀥𑁂𑀦 𑀅𑀚𑀸𑀢𑀲𑀢𑁆𑀢𑀼𑀦𑀸 𑀯𑁂𑀤𑁂𑀳𑀺𑀧𑀼𑀢𑁆𑀢𑁂𑀦 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀓𑀣𑀁 𑀩𑁆𑀬𑀸𑀓𑀸𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀓𑀫𑀺𑀤𑀁 𑀪𑀦𑁆𑀢𑁂 𑀲𑀫𑀬𑀁 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀬𑁂𑀦 𑀧𑀓𑀼𑀥𑁄 𑀓𑀘𑁆𑀘𑀸𑀬𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀓𑀼𑀥𑀁 𑀓𑀘𑁆𑀘𑀸𑀬𑀦𑀁 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀘𑁆𑀙𑀺, 𑀅𑀣 𑀔𑁄 𑀪𑀦𑁆𑀢𑁂 𑀧𑀓𑀼𑀥𑁄 𑀓𑀘𑁆𑀘𑀸𑀬𑀦𑁄 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀅𑀚𑀸𑀲𑀢𑁆𑀢𑀼𑀁 𑀯𑁂𑀤𑁂𑀳𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 ‘‘𑀲𑀢𑁆𑀢𑀺𑀫𑁂 𑀫𑀳𑀸𑀭𑀸𑀚 𑀓𑀸𑀬𑀸 𑀅𑀓𑀝𑀸 𑀅𑀓𑀝𑀯𑀺𑀥𑀸 𑀅𑀦𑀺𑀫𑁆𑀫𑀺𑀢𑀸 𑀅𑀦𑀺𑀫𑁆𑀫𑀸𑀢𑀸 𑀯𑀜𑁆𑀘𑀸 𑀓𑀽𑀝𑀝𑁆𑀞𑀸 𑀏𑀲𑀺𑀓𑀝𑁆𑀞𑀸𑀬𑀺𑀢𑀸, 𑀢𑁂 𑀦 𑀇𑀜𑁆𑀚𑀦𑁆𑀢𑀺, 𑀦 𑀯𑀺𑀧𑀭𑀺𑀡𑀸𑀫𑁂𑀦𑁆𑀢𑀺, 𑀦 𑀅𑀜𑁆𑀜𑀫𑀜𑁆𑀜𑀁 𑀩𑁆𑀬𑀸𑀩𑀸𑀥𑁂𑀦𑁆𑀢𑀺, 𑀦𑀸𑀮𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀼𑀔𑀸𑀬 𑀯𑀸 𑀤𑀼𑀓𑁆𑀔𑀸𑀬 𑀯𑀸 𑀲𑀼𑀔𑀤𑀼𑀓𑁆𑀔𑀸𑀬 𑀯𑀸. 𑀓𑀢𑀫𑁂 𑀲𑀢𑁆𑀢, 𑀧𑀣𑀯𑀻𑀓𑀸𑀬𑁄, 𑀆𑀧𑁄𑀓𑀸𑀬𑁄, 𑀢𑁂𑀚𑁄𑀓𑀸𑀬𑁄 ¶ 𑀯𑀸𑀬𑁄𑀓𑀸𑀬𑁄, 𑀲𑀼𑀔𑁂, 𑀤𑀼𑀓𑁆𑀔𑁂, 𑀚𑀻𑀯𑁂 𑀲𑀢𑁆𑀢𑀫𑁂. 𑀇𑀫𑁂 𑀲𑀢𑁆𑀢𑀓𑀸𑀬𑀸 𑀅𑀓𑀝𑀸 𑀅𑀓𑀝𑀯𑀺𑀥𑀸 𑀅𑀦𑀺𑀫𑁆𑀫𑀺𑀢𑀸 𑀅𑀦𑀺𑀫𑁆𑀫𑀸𑀢𑀸 𑀯𑀜𑁆𑀘𑁆𑀬𑀸 𑀓𑀽𑀝𑀝𑁆𑀞𑀸 𑀏𑀲𑀺𑀓𑀝𑁆𑀞𑀸𑀬𑀺𑀢𑀸, 𑀢𑁂 𑀦 𑀇𑀜𑁆𑀚𑀦𑁆𑀢𑀺, 𑀦 𑀯𑀺𑀧𑀭𑀺𑀡𑀸𑀫𑁂𑀦𑁆𑀢𑀺, 𑀦 𑀅𑀜𑁆𑀜𑀫𑀜𑁆𑀜𑀁 𑀩𑁆𑀬𑀸𑀩𑀸𑀥𑁂𑀦𑁆𑀢𑀺, 𑀦𑀸𑀮𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀼𑀔𑀸𑀬 𑀯𑀸 𑀤𑀼𑀓𑁆𑀔𑀸𑀬 𑀯𑀸 𑀲𑀼𑀔𑀤𑀼𑀓𑁆𑀔𑀸𑀬 𑀯𑀸. 𑀢𑀢𑁆𑀣 𑀦𑀢𑁆𑀣𑀺 𑀳𑀦𑁆𑀢𑀸 𑀯𑀸 𑀖𑀸𑀢𑁂𑀢𑀸 𑀯𑀸, 𑀲𑁄𑀢𑀸 𑀯𑀸 𑀲𑀸𑀯𑁂𑀢𑀸 𑀯𑀸, 𑀯𑀺𑀜𑁆𑀜𑀸𑀢𑀸 𑀯𑀸 𑀯𑀺𑀜𑁆𑀜𑀸𑀧𑁂𑀢𑀸 𑀯𑀸, 𑀬𑁄𑀧𑀺 𑀢𑀺𑀡𑁆𑀳𑁂𑀦 𑀲𑀢𑁆𑀣𑁂𑀦 𑀲𑀻𑀲𑀁 𑀙𑀺𑀦𑁆𑀤𑀢𑀺, 𑀦 𑀓𑁄𑀘𑀺 𑀓𑀺𑀜𑁆𑀘𑀺 𑀚𑀺𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀲𑀢𑁆𑀢𑀦𑁆𑀦𑀁𑀢𑁆𑀯𑁂𑀯 𑀓𑀸𑀬𑀸𑀦𑀫𑀦𑁆𑀢𑀭𑁂𑀦 𑀲𑀢𑁆𑀣𑀁 𑀯𑀺𑀯𑀭𑀫𑀦𑀼𑀧𑀢𑀢𑀻’’𑀢𑀺. 𑀇𑀢𑁆𑀣𑀁 𑀔𑁄 𑀪𑀦𑁆𑀢𑁂 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀧𑀓𑀼𑀥𑁄 𑀓𑀘𑁆𑀘𑀸𑀬𑀦𑁄 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀅𑀜𑁆𑀜𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀸𑀲𑀺.

𑀅𑀬𑀫𑁆𑀧𑀺 ¶ 𑀔𑁄 𑀆𑀯𑀼𑀲𑁄 𑀯𑀸𑀤𑁄 𑀧𑀼𑀭𑀺𑀫𑀯𑀸𑀤𑁄𑀯𑀺𑀬 𑀦𑀺𑀲𑁆𑀲𑀺𑀭𑀺𑀓𑁄𑀬𑁂𑀯 𑀅𑀦𑀢𑁆𑀣𑀲𑀁𑀳𑀺𑀢𑁄 𑀚𑀺𑀕𑀼𑀘𑁆𑀙𑀦𑀻𑀬𑁄 𑀅𑀢𑀺𑀯𑀺𑀬 𑀪𑀬𑀸𑀦𑀓𑁄.

𑀧𑀼𑀘𑁆𑀙𑀸 𑁋 𑀅𑀣𑀸𑀧𑀭𑀫𑁆𑀧𑀺 𑀧𑀼𑀘𑁆𑀙𑀸𑀫𑀺, 𑀦𑀺𑀕𑀡𑁆𑀞𑁄 𑀧𑀦𑀸𑀯𑀼𑀲𑁄 𑀦𑀸𑀝𑀧𑀼𑀢𑁆𑀢𑁄 𑀭𑀜𑁆𑀜𑀸 𑀫𑀸𑀕𑀥𑁂𑀦 𑀅𑀚𑀸𑀢𑀲𑀢𑁆𑀢𑀼𑀦𑀸 𑀯𑁂𑀤𑁂𑀳𑀺𑀧𑀼𑀢𑁆𑀢𑁂𑀦 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀓𑀣𑀁 𑀩𑁆𑀬𑀸𑀓𑀸𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀓𑀫𑀺𑀤𑀁 𑀪𑀦𑁆𑀢𑁂 𑀲𑀫𑀬𑀁 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀬𑁂𑀦 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀁𑀓𑀫𑀺, 𑀉𑀧𑀲𑀁𑀓𑀫𑀺𑀢𑁆𑀯𑀸 𑀦𑀺𑀕𑀡𑁆𑀞𑀁 𑀦𑀸𑀝𑀧𑀼𑀢𑁆𑀢𑀁 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀘𑁆𑀙𑀺, 𑀅𑀣 𑀔𑁄 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀅𑀚𑀸𑀢𑀲𑀢𑁆𑀢𑀼𑀁 𑀯𑁂𑀤𑁂𑀳𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘, ‘‘𑀇𑀥 𑀫𑀳𑀸𑀭𑀸𑀚 𑀦𑀺𑀕𑀡𑁆𑀞𑁄 𑀘𑀸𑀢𑀼𑀬𑀸𑀫𑀲𑀁𑀯𑀭𑀲𑀁𑀯𑀼𑀢𑁄 𑀳𑁄𑀢𑀺, 𑀓𑀣𑀜𑁆𑀘 𑀫𑀳𑀸𑀭𑀸𑀚

𑀦𑀺𑀕𑀡𑁆𑀞𑁄 ¶ 𑀘𑀸𑀢𑀼𑀬𑀸𑀫𑀲𑀁𑀯𑀭𑀲𑀁𑀯𑀼𑀢𑁄 𑀳𑁄𑀢𑀺, 𑀇𑀥 𑀫𑀳𑀸𑀭𑀸𑀚 𑀦𑀺𑀕𑀡𑁆𑀞𑁄 𑀲𑀩𑁆𑀩𑀯𑀸𑀭𑀺𑀯𑀸𑀭𑀺𑀢𑁄 𑀘 𑀳𑁄𑀢𑀺, 𑀲𑀩𑁆𑀩𑀯𑀸𑀭𑀺𑀬𑀼𑀢𑁆𑀢𑁄 𑀘, 𑀲𑀩𑁆𑀩𑀯𑀸𑀭𑀺𑀥𑀼𑀢𑁄 𑀘, 𑀲𑀩𑁆𑀩𑀯𑀸𑀭𑀺𑀨𑀼𑀝𑁄 𑀘. 𑀏𑀯𑀁 𑀔𑁄 𑀫𑀳𑀸𑀭𑀸𑀚 𑀦𑀺𑀕𑀡𑁆𑀞𑁄 𑀘𑀸𑀢𑀼𑀬𑀸𑀫𑀲𑀁𑀯𑀭𑀲𑀁𑀯𑀼𑀢𑁄 𑀳𑁄𑀢𑀺, 𑀬𑀢𑁄 𑀔𑁄 𑀫𑀳𑀸𑀭𑀸𑀚 𑀦𑀺𑀕𑀡𑁆𑀞𑁄 𑀏𑀯𑀁 𑀘𑀸𑀢𑀼𑀬𑀸𑀫𑀲𑀁𑀯𑀭𑀲𑀁𑀯𑀼𑀢𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀫𑀳𑀸𑀭𑀸𑀚 𑀦𑀺𑀕𑀡𑁆𑀞𑁄 𑀕𑀢𑀢𑁆𑀢𑁄 𑀘 𑀬𑀢𑀢𑁆𑀢𑁄 𑀘 𑀞𑀺𑀢𑀢𑁆𑀢𑁄 𑀘𑀸’’𑀢𑀺. 𑀇𑀢𑁆𑀣𑀁 𑀔𑁄 𑀪𑀦𑁆𑀢𑁂 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀘𑀸𑀢𑀼𑀬𑀸𑀫𑀲𑀁𑀯𑀭𑀁 𑀩𑁆𑀬𑀸𑀓𑀸𑀲𑀺.

𑀏𑀢𑀲𑁆𑀲 ¶ 𑀧𑀦𑀸𑀯𑀼𑀲𑁄 𑀯𑀸𑀤𑁂 𑀓𑁄𑀘𑀺 𑀲𑀸𑀲𑀦𑀸𑀦𑀼𑀮𑁄𑀫𑀯𑀸𑀤𑁄 𑀅𑀢𑁆𑀣𑀺, 𑀅𑀲𑀼𑀤𑁆𑀥𑀮𑀤𑁆𑀥𑀺𑀢𑀸𑀬 𑀧𑀦 𑀏𑀲𑁄𑀧𑀺 𑀯𑀸𑀤𑁄 𑀚𑀺𑀕𑀼𑀘𑁆𑀙𑀦𑀻𑀬𑁄𑀬𑁂𑀯, 𑀲𑁂𑀬𑁆𑀬𑀣𑀸𑀧𑀺 𑀪𑁄𑀚𑀦𑀁 𑀕𑀽𑀣𑀫𑀺𑀲𑁆𑀲𑀁 𑀕𑀸𑀭𑀬𑁆𑀳𑁄𑀬𑁂𑀯 𑀆𑀭𑀓𑀸 𑀧𑀭𑀺𑀯𑀚𑁆𑀚𑀺𑀢𑀩𑁆𑀩𑁄𑀬𑁂𑀯, 𑀲𑁂𑀬𑁆𑀬𑀣𑀸𑀧𑀺 𑀯𑀺𑀲𑀲𑀁𑀲𑀝𑁆𑀞𑁄 𑀆𑀧𑀸𑀦𑀻𑀬𑀓𑀁𑀲𑁄.

𑀧𑀼𑀘𑁆𑀙𑀸 𑁋 𑀅𑀣𑀸𑀧𑀭𑀫𑁆𑀧𑀺 ¶ 𑀧𑀼𑀘𑁆𑀙𑀸𑀫𑀺, 𑀲𑀜𑁆𑀘𑀬𑁄 𑀧𑀦𑀸𑀯𑀼𑀲𑁄 𑀩𑁂𑀮𑀝𑁆𑀞𑀧𑀼𑀢𑁆𑀢𑁄 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀓𑀣𑀁 𑀩𑁆𑀬𑀸𑀓𑀸𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀓𑀫𑀺𑀤𑀁 𑀪𑀦𑁆𑀢𑁂 𑀲𑀫𑀬𑀁 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀬𑁂𑀦 𑀲𑀜𑁆𑀘𑀬𑁄 𑀩𑁂𑀮𑀝𑁆𑀞𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀜𑁆𑀘𑀬𑀁 𑀩𑁂𑀮𑀝𑁆𑀞𑀧𑀼𑀢𑁆𑀢𑀁 𑀏𑀢𑀤𑀯𑁄𑀘, ‘‘𑀬𑀣𑀸 𑀦𑀼 𑀔𑁄 𑀇𑀫𑀸𑀦𑀺 𑀪𑁄 𑀲𑀜𑁆𑀘𑀬 𑀧𑀼𑀣𑀼𑀲𑀺𑀧𑁆𑀧𑀸𑀬𑀢𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁, 𑀳𑀢𑁆𑀣𑀸𑀭𑁄𑀳𑀸 𑀅𑀲𑁆𑀲𑀭𑁄𑀳𑀸…𑀧𑁂… 𑀲𑀓𑁆𑀓𑀸 𑀦𑀼 𑀔𑁄 𑀪𑁄 𑀲𑀜𑁆𑀘𑀬 𑀏𑀯𑀫𑁂𑀯 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀜𑁆𑀜𑀧𑁂𑀢𑀼’’𑀦𑁆𑀢𑀺, 𑀏𑀯𑀁 𑀯𑀼𑀢𑁆𑀢𑁂 𑀪𑀦𑁆𑀢𑁂 𑀲𑀜𑁆𑀘𑀬𑁄 𑀩𑁂𑀮𑀝𑁆𑀞𑀧𑀼𑀢𑁆𑀢𑁄 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀅𑀚𑀸𑀢𑀲𑀢𑁆𑀢𑀼𑀁 𑀯𑁂𑀤𑁂𑀳𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘.

‘‘𑀅𑀢𑁆𑀣𑀺 𑀧𑀭𑁄𑀮𑁄𑀓𑁄𑀢𑀺 𑀇𑀢𑀺 𑀘𑁂 𑀫𑀁 𑀧𑀼𑀘𑁆𑀙𑀲𑀺, 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄𑀢𑀺 𑀇𑀢𑀺 𑀘𑁂 𑀫𑁂 𑀅𑀲𑁆𑀲, 𑀅𑀢𑁆𑀣𑀺 𑀧𑀭𑁄

𑀮𑁄𑀓𑁄𑀢𑀺 ¶ 𑀇𑀢𑀺 𑀢𑁂 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀁, 𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄, 𑀢𑀣𑀸𑀢𑀺𑀧𑀺 𑀫𑁂 𑀦𑁄, 𑀅𑀜𑁆𑀜𑀣𑀸𑀢𑀺𑀧𑀺 𑀫𑁂 𑀦𑁄, 𑀦𑁄𑀢𑀺𑀧𑀺 𑀫𑁂 𑀦𑁄, 𑀦𑁄 𑀦𑁄𑀢𑀺𑀧𑀺 𑀫𑁂 𑀦𑁄…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀇𑀢𑀺 𑀘𑁂 𑀫𑀁 𑀧𑀼𑀘𑁆𑀙𑀲𑀺, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀇𑀢𑀺 𑀘𑁂 𑀫𑁂 𑀅𑀲𑁆𑀲, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀇𑀢𑀺 𑀢𑁂 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀁, 𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄, 𑀢𑀣𑀸𑀢𑀺𑀧𑀺 𑀫𑁂 𑀦𑁄, 𑀅𑀜𑁆𑀜𑀣𑀸𑀢𑀺𑀧𑀺 𑀫𑁂 𑀦𑁄, 𑀦𑁄𑀢𑀺𑀧𑀺 𑀫𑁂 𑀦𑁄, 𑀦𑁄 𑀦𑁄𑀢𑀺𑀧𑀺 𑀫𑁂 𑀦𑁄’’𑀢𑀺. 𑀇𑀢𑁆𑀣𑀁 𑀔𑁄 𑀪𑀦𑁆𑀢𑁂 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀲𑀜𑁆𑀘𑀬𑁄 𑀩𑁂𑀮𑀝𑁆𑀞𑀧𑀼𑀢𑁆𑀢𑁄 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀯𑀺𑀓𑁆𑀔𑁂𑀧𑀁 𑀩𑁆𑀬𑀸𑀓𑀸𑀲𑀺.

𑀲𑀩𑁆𑀩𑁂𑀧𑀺 ¶ 𑀆𑀯𑀼𑀲𑁄 𑀏𑀢𑁂 𑀙𑀦𑁆𑀦𑀁 𑀲𑀢𑁆𑀣𑀸𑀭𑀸𑀦𑀁 𑀯𑀸𑀤𑀸 𑀦𑀺𑀲𑁆𑀲𑀺𑀭𑀺𑀓𑀸𑀬𑁂𑀯 𑀚𑀺𑀕𑀼𑀘𑁆𑀙𑀦𑀻𑀬𑀸𑀬𑁂𑀯 𑀅𑀦𑀢𑁆𑀣𑀲𑀁𑀳𑀺𑀢𑀸𑀬𑁂𑀯, 𑀩𑀸𑀮𑀸𑀦𑀁 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀲𑀫𑁆𑀫𑁄𑀳𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀅𑀦𑀢𑁆𑀣𑀸𑀬.

𑀅𑀚𑁆𑀚 ¶ 𑀧𑀦 𑀆𑀯𑀼𑀲𑁄 𑀓𑀸𑀮𑁄 𑀅𑀢𑀺𑀓𑁆𑀓𑀦𑁆𑀢𑁄, 𑀲𑁆𑀯𑁂𑀬𑁂𑀯 𑀪𑀕𑀯𑀢𑀸 𑀯𑀼𑀢𑁆𑀢𑀁 𑀧𑀡𑀻𑀢𑀁 𑀧𑀲𑀝𑁆𑀞𑀁 𑀲𑀦𑁆𑀤𑀺𑀝𑁆𑀞𑀺𑀓𑀨𑀮𑀁 𑀧𑀼𑀘𑁆𑀙𑀸𑀫.

𑀧𑀼𑀘𑁆𑀙𑀸 𑁋 𑀧𑀼𑀭𑀺𑀫𑀤𑀺𑀯𑀲𑁂𑀲𑀼 𑀆𑀯𑀼𑀲𑁄 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀬𑀸𑀯 𑀙𑀲𑀢𑁆𑀣𑀸𑀭𑀫𑀺𑀘𑁆𑀙𑀸𑀯𑀸𑀤𑀧𑀭𑀺𑀬𑁄𑀲𑀸𑀦𑀁 𑀧𑀼𑀘𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀁 𑀅𑀫𑁆𑀳𑁂𑀳𑀺 𑀓𑀢𑀁, 𑀅𑀚𑁆𑀚 𑀧𑀦 𑀬𑀣𑀸𑀦𑀼𑀧𑁆𑀧𑀢𑁆𑀢𑀁 𑀪𑀕𑀯𑀢𑀸 𑀤𑁂𑀲𑀺𑀢𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀸𑀥𑀺𑀓𑀸𑀭𑁂 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑀓𑀭𑀺𑀲𑁆𑀲𑀸𑀫. 𑀪𑀕𑀯𑀸 𑀧𑀦 𑀆𑀯𑀼𑀲𑁄 𑀭𑀜𑁆𑀜𑀸 𑀫𑀸𑀕𑀥𑁂𑀦 𑀅𑀚𑀸𑀢𑀲𑀢𑁆𑀢𑀼𑀦𑀸 𑀯𑁂𑀤𑁂𑀳𑀺𑀧𑀼𑀢𑁆𑀢𑁂𑀦 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀓𑀣𑀁 𑀩𑁆𑀬𑀸𑀓𑀸𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀪𑀕𑀯𑀸 𑀪𑀦𑁆𑀢𑁂 𑀢𑀺𑀥𑀸 𑀯𑀺𑀪𑀚𑀺𑀢𑁆𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀩𑁆𑀬𑀸𑀓𑀸𑀲𑀺.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀪𑀕𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀦𑁄 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀧𑀞𑀫𑀁 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀤𑁂𑀲𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀤𑀸𑀲𑀁 𑀪𑀦𑁆𑀢𑁂 𑀧𑀩𑁆𑀩𑀚𑀺𑀢𑀁 𑀉𑀧𑀫𑀸𑀪𑀸𑀯𑁂𑀦 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀪𑀕𑀯𑀸 𑀧𑀞𑀫𑀁 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀤𑁂𑀲𑁂𑀲𑀺.

𑀲𑁄𑀳𑀁 ¶ 𑀪𑀦𑁆𑀢𑁂 𑀪𑀕𑀯𑀦𑁆𑀢𑀫𑁆𑀧𑀺 𑀧𑀼𑀘𑁆𑀙𑀸𑀫𑀺, 𑀬𑀣𑀸 𑀦𑀼 𑀔𑁄 𑀇𑀫𑀸𑀦𑀺 𑀪𑀦𑁆𑀢𑁂 𑀧𑀼𑀣𑀼𑀲𑀺𑀧𑁆𑀧𑀸𑀬𑀢𑀦𑀸𑀦𑀺 𑀲𑁂𑀬𑁆𑀬𑀣𑀺𑀤𑀁…𑀧𑁂… 𑀲𑀓𑁆𑀓𑀸 𑀦𑀼 𑀔𑁄 𑀪𑀦𑁆𑀢𑁂 𑀏𑀯 𑀫𑁂𑀯 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀜𑁆𑀜𑀧𑁂𑀢𑀼𑀁 𑁋

𑀅𑀘𑁆𑀙𑀭𑀺𑀬𑀁 ¶ 𑀆𑀯𑀼𑀲𑁄 𑀅𑀩𑁆𑀪𑀼𑀢𑀁 𑀆𑀯𑀼𑀲𑁄, 𑀬𑀸𑀯 𑀲𑁆𑀯𑀸𑀔𑀸𑀢𑀲𑁆𑀲 𑀩𑀼𑀤𑁆𑀥𑀲𑀸𑀲𑀦𑀲𑁆𑀲 𑀫𑀳𑀺𑀤𑁆𑀥𑀺𑀓𑀢𑀸 𑀫𑀳𑀸𑀦𑀼𑀪𑀸𑀯𑀢𑀸, 𑀬𑀢𑁆𑀭𑀳𑀺 𑀦𑀸𑀫 𑀤𑀸𑀲𑁄𑀧𑀺 𑀦𑀺𑀳𑀻𑀦𑀚𑀘𑁆𑀘𑁄 𑀏𑀯𑀁 𑀲𑁆𑀯𑀸𑀔𑀸𑀢𑁂 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀇𑀲𑁆𑀲𑀭𑀪𑀽𑀢𑁂𑀦 𑀭𑀜𑁆𑀜𑀸𑀧𑀺 𑀯𑀦𑁆𑀤𑀦𑀻𑀬𑀢𑁆𑀢𑀁 𑀕𑀭𑀼𑀓𑀭𑀡𑀻𑀬𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀲𑀼𑀧𑀜𑁆𑀜𑀢𑁆𑀢𑀫𑁂𑀢𑀁 𑀪𑀕𑀯𑀢𑀸 𑀧𑀞𑀫𑀁 𑀲𑀦𑁆𑀤𑀺𑀝𑁆𑀞𑀺𑀓𑀨𑀮𑀁.

𑀧𑀼𑀘𑁆𑀙𑀸 𑁋 𑀓𑀣𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀦𑁄 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀤𑀼𑀢𑀺𑀬𑀁 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀤𑁂𑀲𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑀲𑁆𑀲𑀓𑀁 𑀪𑀦𑁆𑀢𑁂 𑀧𑀩𑁆𑀩𑀚𑀺𑀢𑀁 𑀉𑀧𑀫𑀸𑀪𑀸𑀯𑁂𑀦 𑀤𑀲𑁆𑀲𑁂𑀢𑁆𑀯𑀸 𑀪𑀕𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀤𑁂𑀲𑁂𑀲𑀺.

𑀅𑀘𑁆𑀙𑀭𑀺𑀬𑀁 ¶ 𑀆𑀯𑀼𑀲𑁄 𑀅𑀩𑁆𑀪𑀼𑀢𑀁 𑀆𑀯𑀼𑀲𑁄, 𑀬𑀸𑀯 𑀩𑀼𑀤𑁆𑀥𑀲𑀸𑀲𑀦𑀲𑁆𑀲 𑀲𑁆𑀯𑀸𑀔𑀸𑀢𑀢𑀸 𑀫𑀳𑀺𑀤𑁆𑀥𑀺𑀓𑀢𑀸 𑀫𑀳𑀸𑀦𑀼𑀪𑀸𑀯𑀢𑀸, 𑀬𑀢𑁆𑀭𑀳𑀺 𑀦𑀸𑀫 𑀓𑀲𑁆𑀲 𑀓𑁄𑀧𑀺 𑀕𑀼𑀡𑀭𑀳𑀺𑀢𑁄 𑀏𑀯𑀁 𑀲𑁆𑀯𑀸𑀔𑀸𑀢𑁂 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀭𑀝𑁆𑀞𑀥𑀺𑀧𑀢𑀺𑀦𑀸 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀪𑀽𑀢𑁂𑀦 𑀭𑀜𑁆𑀜𑀸𑀧𑀺 𑀕𑀭𑀼𑀓𑀭𑀡𑀻𑀬𑀢𑀁 𑀯𑀦𑁆𑀤𑀦𑀻𑀬𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀲𑀼𑀧𑀜𑁆𑀜𑀢𑁆𑀢𑀫𑁂𑀢𑀁 𑀆𑀯𑀼𑀲𑁄 𑀪𑀕𑀯𑀢𑀸 𑀤𑀼𑀢𑀺𑀬𑀁 𑀲𑀦𑁆𑀤𑀺𑀝𑁆𑀞𑀺𑀓𑀨𑀮𑀁.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀸 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀭𑀜𑁆𑀜𑁄 𑀤𑁂𑀲𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀪𑀕𑀯𑀸 𑀪𑀦𑁆𑀢𑁂 𑀩𑀼𑀤𑁆𑀥𑀼𑀧𑁆𑀧𑀸𑀤𑀢𑁄 𑀧𑀝𑁆𑀞𑀸𑀬 𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀩𑁆𑀩𑀚𑀺𑀢 𑀪𑀸𑀯𑀁, 𑀢𑀲𑁆𑀲 𑀘 𑀲𑀻𑀮𑀲𑀫𑁆𑀧𑀤𑀁, 𑀢𑀲𑁆𑀲 𑀘 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀁, 𑀅𑀭𑀺𑀬𑀜𑁆𑀘𑀲𑀢𑀺𑀲𑀫𑁆𑀧𑀚𑀜𑁆𑀜𑀁, 𑀅𑀭𑀺𑀬𑀜𑁆𑀘 𑀲𑀦𑁆𑀢𑀼𑀝𑁆𑀞𑀺𑀁, 𑀧𑀜𑁆𑀘𑀦𑁆𑀦𑀜𑁆𑀘 𑀦𑀻𑀯𑀭𑀡𑀸𑀦𑀁 𑀧𑀳𑀸𑀦𑀁, 𑀘𑀢𑁆𑀢𑀸𑀭𑀺 𑀘 𑀛𑀸𑀦𑀸𑀦𑀺, 𑀅𑀝𑁆𑀞 𑀘 𑀯𑀺𑀚𑁆𑀚𑀸𑀬𑁄, 𑀢𑀸𑀳𑀺 𑀢𑀸𑀳𑀺 𑀉𑀧𑀫𑀸𑀳𑀺 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘 𑀤𑁂𑀲𑁂𑀲𑀺.

𑀲𑀓𑁆𑀓𑀸 ¶ 𑀧𑀦 𑀪𑀦𑁆𑀢𑁂 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁, 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘 𑀧𑀜𑁆𑀜𑀧𑁂𑀢𑀼𑀁.

𑀲𑀓𑁆𑀓𑀸 𑀫𑀳𑀸𑀭𑀸𑀚𑀸, 𑀢𑁂𑀦 𑀳𑀺 𑀫𑀳𑀸𑀭𑀸𑀚 𑀲𑀼𑀡𑁄𑀳𑀺 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀳𑀺 𑀪𑀸𑀲𑀺𑀲𑁆𑀲𑀸𑀫𑀺.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘 ¶ 𑀧𑀦𑀸𑀯𑀼𑀲𑁄 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀓𑀣𑀜𑁆𑀘 𑀪𑀕𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀦𑁄 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀘𑀽𑀴𑀲𑀻𑀮𑀁 𑀯𑀺𑀪𑀚𑀺𑀢𑁆𑀯𑀸 𑀤𑁂𑀲𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 ‘‘𑀓𑀣𑀜𑁆𑀘 ¶ 𑀫𑀳𑀸𑀭𑀸𑀚 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺. 𑀇𑀥 𑀫𑀳𑀸𑀭𑀸𑀚 𑀪𑀺𑀓𑁆𑀔𑀼 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄, 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁’’ 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀙𑀩𑁆𑀩𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀘𑀽𑀴𑀲𑀻𑀮𑀁 𑀯𑀺𑀪𑀚𑀺𑀢𑁆𑀯𑀸 𑀤𑁂𑀲𑁂𑀲𑀺.

𑀲𑀸𑀥𑀼 ¶ 𑀲𑀸𑀥𑀼 𑀆𑀯𑀼𑀲𑁄, 𑀲𑀸𑀥𑀼 𑀲𑀸𑀥𑀼 𑀆𑀯𑀼𑀲𑁄 𑀬𑀁 𑀪𑀺𑀓𑁆𑀔𑀼 𑀏𑀯𑀁 𑀲𑁆𑀯𑀸𑀔𑀸𑀢𑁂 𑀩𑀼𑀤𑁆𑀥𑀲𑀸𑀲𑀦𑁂 𑀲𑀤𑁆𑀥𑀸𑀧𑀩𑁆𑀩𑀸𑀚𑀺𑀢𑁄 𑀇𑀫𑀺𑀦𑀸 𑀘 𑀘𑀽𑀴𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀯𑀺𑀳𑀭𑁂𑀬𑁆𑀬.

𑀇𑀤𑀸𑀦𑀺 ¶ 𑀧𑀦 𑀓𑀸𑀮𑁄 𑀅𑀢𑀺𑀓𑁆𑀓𑀦𑁆𑀢𑁄.

𑀲𑀼𑀯𑁂 𑀬𑀣𑀸𑀦𑀼𑀧𑁆𑀧𑀢𑁆𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑀓𑀭𑀺𑀲𑁆𑀲𑀸𑀫.

𑀧𑀼𑀘𑁆𑀙𑀸 𑁋 𑀓𑀣𑀁 𑀧𑀦𑀸𑀯𑀼𑀲𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀦𑁄 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀫𑀚𑁆𑀛𑀺𑀫𑀲𑀻𑀮𑀜𑁆𑀘 𑀫𑀳𑀸𑀲𑀻𑀮𑀜𑁆𑀘 𑀯𑀺𑀪𑀚𑀺𑀢𑁆𑀯𑀸 𑀤𑁂𑀲𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 ‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁. 𑀫𑀽𑀮𑀩𑀻𑀚𑀁 𑀔𑀦𑁆𑀥𑀩𑀻𑀚𑀁 𑀨𑀴𑀼𑀩𑀻𑀚𑀁 𑀅𑀕𑁆𑀕𑀩𑀻𑀚𑀁 𑀩𑀻𑀚𑀩𑀻𑀚𑀫𑁂𑀯 𑀧𑀜𑁆𑀘𑀫𑀁, 𑀇𑀢𑀺 𑀏𑀯𑀭𑀽𑀧𑀸 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁’’ 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀫𑀚𑁆𑀛𑀺𑀫𑀲𑀻𑀮𑀜𑁆𑀘 𑀫𑀳𑀸𑀲𑀻𑀮𑀜𑁆𑀘 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀤𑁂𑀲𑁂𑀲𑀺.

𑀲𑀸𑀥𑀼 ¶ 𑀲𑀸𑀥𑀼 𑀆𑀯𑀼𑀲𑁄, 𑀲𑀸𑀥𑀼 𑀔𑁄 𑀆𑀯𑀼𑀲𑁄 𑀬𑀁 𑀪𑀺𑀓𑁆𑀔𑀼 𑀏𑀯𑀁 𑀲𑁆𑀯𑀸𑀔𑀸𑀢𑁂 𑀩𑀼𑀤𑁆𑀥𑀲𑀸𑀲𑀦𑁂 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁄 𑀏𑀯𑀁 𑀅𑀭𑀺𑀬𑁂𑀦 𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀯𑀺𑀳𑀭𑁂𑀬𑁆𑀬.

𑀧𑀼𑀘𑁆𑀙𑀸 𑁋 𑀓𑀣𑀁 𑀧𑀦𑀸𑀯𑀼𑀲𑁄 𑀅𑀭𑀺𑀬𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀜𑁆𑀘 𑀅𑀭𑀺𑀬𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀜𑁆𑀘 𑀅𑀭𑀺𑀬𑀁 𑀲𑀦𑁆𑀢𑁄𑀲𑀜𑁆𑀘 𑀪𑀕𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑀺𑀪𑀚𑀺𑀢𑁆𑀯𑀸 𑀤𑁂𑀲𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀇𑀥 𑀫𑀳𑀸𑀭𑀸𑀚 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻, 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺, 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺, 𑀏𑀯𑀫𑀸𑀤𑀺𑀦𑀸 𑀘.

𑀇𑀥 𑀫𑀳𑀸𑀭𑀸𑀚 𑀪𑀺𑀓𑁆𑀔𑀼 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀲𑀫𑁆𑀧𑀚𑀦𑀓𑀸𑀭𑀻 𑀳𑁄𑀢𑀺,

𑀆𑀮𑁄𑀓𑀺𑀢𑁂 ¶ 𑀯𑀺𑀮𑁄𑀓𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀫𑀺𑀜𑁆𑀚𑀺𑀢𑁂 𑀧𑀲𑀸𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀅𑀲𑀺𑀢𑁂 𑀧𑀻𑀢𑁂 𑀔𑀸𑀬𑀺𑀢𑁂 𑀲𑀸𑀬𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀕𑀢𑁂 𑀞𑀺𑀢𑁂 𑀦𑀺𑀲𑀺𑀦𑁆𑀦𑁂 𑀲𑀼𑀢𑁆𑀢𑁂 𑀚𑀸𑀕𑀭𑀺𑀢𑁂 𑀪𑀸𑀲𑀺𑀢𑁂 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀏𑀯𑀁 𑀔𑁄 𑀫𑀳𑀸𑀭𑀸𑀚 𑀪𑀺𑀓𑁆𑀔𑀼 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺.

𑀓𑀣𑀜𑁆𑀘 𑀫𑀳𑀸𑀭𑀸𑀚 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺, 𑀇𑀥 𑀫𑀳𑀸𑀭𑀸𑀚 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀓𑀸𑀬𑀧𑀭𑀺𑀳𑀸𑀭𑀺𑀓𑁂𑀦 𑀘𑀻𑀯𑀭𑁂𑀦 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑁂𑀦 𑀧𑀺𑀡𑁆𑀟𑀧𑀸𑀢𑁂𑀦.

𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀅𑀭𑀺𑀬𑀜𑁆𑀘 𑀇𑀦𑁆𑀤𑁆𑀭𑀺𑀬𑁂𑀲𑀼𑀕𑀼𑀢𑁆𑀢𑀤𑁆𑀯𑀸𑀭𑀢𑀁 𑀅𑀭𑀺𑀬𑀜𑁆𑀘 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀅𑀭𑀺𑀬𑀜𑁆𑀘 𑀲𑀦𑁆𑀢𑁄𑀲𑀁 𑀯𑀺𑀪𑀚𑀺𑀢𑁆𑀯𑀸 𑀤𑁂𑀲𑁂𑀲𑀺.

𑀲𑀸𑀥𑀼 ¶ 𑀲𑀸𑀥𑀼 𑀆𑀯𑀼𑀲𑁄, 𑀲𑀸𑀥𑀼 𑀔𑁄 𑀆𑀯𑀼𑀲𑁄 𑀬𑀁 𑀪𑀺𑀓𑁆𑀔𑀼 𑀏𑀯𑀁 𑀲𑁆𑀯𑀸𑀔𑀸𑀢𑁂 𑀩𑀼𑀤𑁆𑀥𑀲𑀸𑀲𑀦𑁂 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁄 𑀇𑀫𑀺𑀦𑀸 𑀘 𑀅𑀭𑀺𑀬𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀇𑀫𑀺𑀦𑀸 𑀘 𑀅𑀭𑀺𑀬𑁂𑀦 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦

𑀲𑀫𑀦𑁆𑀦𑀸𑀕𑀢𑁄 ¶ , 𑀇𑀫𑀸𑀬 𑀘 𑀅𑀭𑀺𑀬𑀸𑀬 𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀯𑀺𑀳𑀭𑁂𑀬𑁆𑀬.

𑀧𑀼𑀘𑁆𑀙𑀸 𑁋 𑀓𑀣𑀁 𑀧𑀦𑀸𑀯𑀼𑀲𑁄 𑀪𑀕𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀦𑀻𑀯𑀭𑀡𑀧𑀳𑀸𑀦𑀁 𑀯𑀺𑀪𑀚𑀺𑀢𑁆𑀯𑀸 𑀤𑁂𑀲𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑁄 𑀏𑀯𑀁 𑀅𑀭𑀺𑀬𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀅𑀭𑀺𑀬𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀅𑀭𑀺𑀬𑁂𑀦 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀅𑀭𑀺𑀬𑀸𑀬 𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄, 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀺 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀁 𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀲𑀼𑀲𑀸𑀦𑀁 𑀯𑀦𑀧𑀢𑁆𑀢𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀮𑀧𑀼𑀜𑁆𑀚𑀁. 𑀲𑁄 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀦𑀺𑀲𑀻𑀤𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀜𑁆𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸. 𑀲𑁄 𑀅𑀪𑀺𑀚𑁆𑀛𑀁 𑀮𑁄𑀓𑁂 𑀧𑀳𑀸𑀬 𑀯𑀺𑀕𑀢𑀸𑀪𑀺𑀚𑁆𑀛𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺…𑀧𑁂… 𑀢𑀲𑁆𑀲𑀺𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀻𑀦𑁂 𑀅𑀢𑁆𑀢𑀦𑀺 𑀲𑀫𑀦𑀼𑀧𑀲𑁆𑀲𑀢𑁄 𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀺, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 ¶ 𑀲𑀼𑀔𑀁 𑀯𑁂𑀤𑁂𑀳𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀦𑀻𑀯𑀭𑀡𑀧𑁆𑀧𑀳𑀸𑀦𑀁 𑀯𑀺𑀪𑀚𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑀢𑁄 𑀤𑁂𑀲𑁂𑀲𑀺.

𑀲𑀸𑀥𑀼 ¶ 𑀲𑀸𑀥𑀼 𑀆𑀯𑀼𑀲𑁄, 𑀲𑀸𑀥𑀼 𑀔𑁄 𑀆𑀯𑀼𑀲𑁄 𑀬𑀁 𑀪𑀺𑀓𑁆𑀔𑀼 𑀏𑀯𑀁 𑀲𑁆𑀯𑀸𑀔𑀸𑀢𑁂 𑀩𑀼𑀤𑁆𑀥𑀲𑀸𑀲𑀦𑁂 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁄 𑀏𑀯𑀁 𑀧𑀜𑁆𑀘𑀦𑀻𑀯𑀭𑀡𑁂 𑀧𑀚𑀳𑀺𑀢𑁆𑀯𑀸 𑀢𑁂𑀳𑀺 𑀘𑀺𑀢𑁆𑀢𑀁 𑀯𑀺𑀲𑁄𑀥𑁂𑀢𑁆𑀯𑀸 𑀯𑀺𑀳𑀭𑁂𑀬𑁆𑀬.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀪𑀕𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀧𑀞𑀫𑀁 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀤𑁂𑀲𑁂𑀲𑀺, 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺…𑀧𑁂… 𑀇𑀤𑀫𑁆𑀧𑀺 𑀔𑁄 𑀫𑀳𑀸𑀭𑀸𑀚 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘

𑀧𑀡𑀻𑀢𑀢𑀭𑀜𑁆𑀘 ¶ . 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀧𑀞𑀫𑀁 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘 𑀤𑁂𑀲𑁂𑀲𑀺.

𑀲𑀸𑀥𑀼 ¶ 𑀲𑀸𑀥𑀼 𑀆𑀯𑀼𑀲𑁄, 𑀲𑀸𑀥𑀼 𑀔𑁄 𑀆𑀯𑀼𑀲𑁄 𑀬𑀁 𑀪𑀺𑀓𑁆𑀔𑀼 𑀏𑀯𑀁 𑀲𑁆𑀯𑀸𑀔𑀸𑀢𑁂 𑀩𑀼𑀤𑁆𑀥𑀲𑀸𑀲𑀦𑀲𑀗𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑁆𑀯𑀸 𑀏𑀯𑀁 𑀧𑀞𑀫𑀁 𑀛𑀸𑀦𑀁

𑀉𑀧𑀲𑀫𑁆𑀧𑀚𑁆𑀚 ¶ 𑀯𑀺𑀯𑁂𑀓𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀢𑁆𑀢𑀦𑁄 𑀓𑀸𑀬𑀁 𑀅𑀪𑀺𑀲𑀦𑁆𑀤𑁂𑀬𑁆𑀬 𑀧𑀭𑀺𑀲𑀦𑁆𑀤𑁂𑀬𑁆𑀬 𑀧𑀭𑀺𑀧𑀽𑀭𑁂𑀬𑁆𑀬.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀪𑀕𑀯𑀸 𑀤𑀼𑀢𑀺𑀬𑀜𑁆𑀘 𑀢𑀢𑀺𑀬𑀜𑁆𑀘 𑀘𑀢𑀼𑀢𑁆𑀣𑀜𑁆𑀘 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀤𑁂𑀲𑁂𑀲𑀺, 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀧𑀼𑀦 𑀘 𑀧𑀭𑀁 𑀫𑀳𑀸𑀭𑀸𑀚 𑀪𑀺𑀓𑁆𑀔𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀤𑀼𑀢𑀺𑀬𑀜𑁆𑀘 𑀢𑀢𑀺𑀬𑀜𑁆𑀘 𑀘𑀢𑀼𑀢𑁆𑀣𑀜𑁆𑀘 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘 𑀤𑁂𑀲𑁂𑀲𑀺.

𑀲𑀸𑀥𑀼 ¶ 𑀲𑀸𑀥𑀼 𑀆𑀯𑀼𑀲𑁄, 𑀲𑀸𑀥𑀼 𑀔𑁄 𑀆𑀯𑀼𑀲𑁄 𑀬𑀁 𑀪𑀺𑀓𑁆𑀔𑀼 𑀏𑀯𑀁 𑀲𑁆𑀯𑀸𑀔𑀸𑀢𑁂 𑀩𑀼𑀤𑁆𑀥𑀲𑀸𑀲𑀦𑀲𑀗𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁄 𑀏𑀯𑀁 𑀤𑀼𑀢𑀺𑀬𑀛𑀸𑀦𑀜𑁆𑀘 𑀢𑀢𑀺𑀬𑀛𑀸𑀦𑀜𑁆𑀘 𑀘𑀢𑀼𑀢𑁆𑀣𑀛𑀸𑀦𑀜𑁆𑀘 𑀉𑀧𑀲𑀫𑁆𑀧𑀚𑁆𑀚 𑀢𑁂𑀳𑀺 𑀛𑀸𑀦𑀲𑀼𑀔𑁂𑀳𑀺 𑀅𑀢𑁆𑀢𑀦𑁄 𑀓𑀸𑀬𑀁 𑀅𑀪𑀺𑀲𑀦𑁆𑀤𑁂𑀢𑁆𑀯𑀸 𑀧𑀭𑀺𑀲𑀦𑁆𑀤𑁂𑀢𑁆𑀯𑀸 𑀧𑀭𑀺𑀧𑀽𑀭𑁂𑀢𑁆𑀯𑀸 𑀯𑀺𑀳𑀭𑁂𑀬𑁆𑀬.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀅𑀧𑀭𑀫𑁆𑀧𑀺 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀤𑁂𑀲𑁂𑀲𑀺, 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑀜𑁆𑀚𑀧𑁆𑀧𑀢𑁆𑀢𑁂 𑀜𑀸𑀡𑀤𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺, 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 ‘‘𑀅𑀬𑀁 𑀔𑁄 𑀫𑁂 𑀓𑀸𑀬𑁄 𑀭𑀽𑀧𑀻 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑁄 𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑁄 𑀅𑀦𑀺𑀘𑁆𑀘𑀼𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑁄, 𑀇𑀤𑀜𑁆𑀘 𑀧𑀦 𑀫𑁂 𑀯𑀺𑀜𑁆𑀜𑀸𑀡𑀁 𑀏𑀢𑁆𑀣 𑀲𑀺𑀢𑀁 𑀏𑀢𑁆𑀣 𑀧𑀝𑀺𑀩𑀦𑁆𑀥𑀦𑁆𑀢𑀺…𑀧𑁂… 𑀇𑀤𑀫𑁆𑀧𑀺 𑀔𑁄 𑀫𑀳𑀸𑀭𑀸𑀚 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘. 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀅𑀧𑀭𑀫𑁆𑀧𑀺 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘 𑀤𑁂𑀲𑁂𑀲𑀺.

𑀲𑀼𑀜𑁆𑀜𑀸𑀭𑀁𑀕𑀸 ¶ 𑀧𑀯𑀺𑀝𑁆𑀞𑀲𑁆𑀲, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀅𑀫𑀸𑀦𑀼𑀲𑀻 𑀭𑀢𑀻 𑀳𑁄𑀢𑀺, 𑀲𑀫𑁆𑀫𑀸𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄.

𑀲𑀸𑀥𑀼 ¶ 𑀲𑀸𑀥𑀼 𑀆𑀯𑀼𑀲𑁄, 𑀲𑀸𑀥𑀼 𑀔𑁄 𑀆𑀯𑀼𑀲𑁄 𑀬𑀁 𑀪𑀺𑀓𑁆𑀔𑀼 𑀏𑀯𑀁 𑀲𑁆𑀯𑀸𑀔𑀸𑀢𑁂 𑀩𑀼𑀤𑁆𑀥𑀲𑀸𑀲𑀦𑀲𑀗𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁄 𑀏𑀯𑀁 𑀜𑀸𑀡𑀤𑀲𑁆𑀲𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀏𑀯𑀁 𑀜𑀸𑀡𑀤𑀲𑁆𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸 𑀯𑀺𑀳𑀭𑁂𑀬𑁆𑀬.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀪𑀕𑀯𑀸 𑀅𑀧𑀭𑀫𑁆𑀧𑀺 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀤𑁂𑀲𑁂𑀲𑀺, 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑀜𑁆𑀚𑀧𑁆𑀧𑀢𑁆𑀢𑁂 𑀫𑀦𑁄𑀫𑀬𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀸𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺, 𑀲𑁄 𑀇𑀫𑀫𑁆𑀳𑀸 𑀓𑀸𑀬𑀸 𑀅𑀜𑁆𑀜𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀺𑀦𑀸𑀢𑀺 𑀭𑀽𑀧𑀺𑀁 𑀫𑀦𑁄𑀫𑀬𑀁 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀺𑀁 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀁 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀅𑀧𑀭𑀫𑁆𑀧𑀺 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘 𑀤𑁂𑀲𑁂𑀲𑀺.

𑀲𑀸𑀥𑀼 ¶ 𑀲𑀸𑀥𑀼 𑀆𑀯𑀼𑀲𑁄, 𑀲𑀸𑀥𑀼 𑀔𑁄 𑀆𑀯𑀼𑀲𑁄 𑀬𑀁 𑀪𑀺𑀓𑁆𑀔𑀼 𑀏𑀯𑀁 𑀲𑁆𑀯𑀸𑀔𑀸𑀢𑁂 𑀩𑀼𑀤𑁆𑀥𑀲𑀸𑀲𑀦𑀲𑀗𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁄 𑀏𑀯𑀁 𑀯𑀺𑀲𑁂𑀲𑁂𑀦 𑀫𑀦𑁄𑀫𑀬𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀯𑀺𑀳𑀭𑁂𑀬𑁆𑀬.

𑀧𑀼𑀘𑁆𑀙𑀸 𑁋 𑀪𑀕𑀯𑀸 ¶ 𑀆𑀯𑀼𑀲𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀛𑀸𑀦𑀘𑀢𑀼𑀓𑁆𑀓𑀲𑀗𑁆𑀔𑀸𑀢𑀜𑁆𑀘 𑀧𑀞𑀫 𑀤𑀼𑀢𑀺𑀬 𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀜𑁆𑀘 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀤𑀲𑁆𑀲𑁂𑀢𑁆𑀯𑀸, 𑀅𑀧𑀭𑀁 𑀓𑀻𑀤𑀺𑀲𑀁 𑀲𑀁𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀤𑁂𑀲𑁂𑀲𑀺, 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑀜𑁆𑀚𑀧𑁆𑀧𑀢𑁆𑀢𑁂 𑀇𑀤𑁆𑀥𑀺𑀯𑀺𑀥𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺, 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺, 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀺…𑀧𑁂… 𑀇𑀤𑀫𑁆𑀧𑀺 𑀔𑁄 𑀫𑀳𑀸𑀭𑀸𑀚 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘𑀸𑀢𑀺. 𑀇𑀢𑁆𑀣𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀅𑀧𑀭𑀫𑁆𑀧𑀺 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘 𑀤𑁂𑀲𑁂𑀲𑀺.

𑀅𑀘𑁆𑀙𑀭𑀺𑀬𑀁 ¶ 𑀆𑀯𑀼𑀲𑁄 𑀅𑀩𑁆𑀪𑀼𑀢𑀁 𑀆𑀯𑀼𑀲𑁄, 𑀬𑀸𑀯 𑀩𑀼𑀤𑁆𑀥𑀲𑀸𑀲𑀦𑀲𑁆𑀲 𑀲𑁆𑀯𑀸𑀔𑀸𑀢𑀢𑀸, 𑀬𑀢𑁆𑀭𑀳𑀺 𑀦𑀸𑀫 𑀏𑀯𑀁 𑀲𑁆𑀯𑀸𑀔𑀸𑀢𑁂 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀸𑀯𑀓𑁄𑀧𑀺 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀏𑀯𑀁 𑀫𑀳𑀺𑀤𑁆𑀥𑀺𑀓𑀁 𑀏𑀯𑀁 𑀫𑀳𑀸𑀦𑀼𑀪𑀸𑀯𑀁 𑀇𑀤𑁆𑀥𑀺𑀯𑀺𑀥𑀜𑀸𑀡𑀫𑁆𑀧𑀺 𑀧𑀘𑁆𑀘𑀦𑀼𑀪𑁄𑀲𑁆𑀲𑀢𑀺.

𑀧𑀼𑀘𑁆𑀙𑀸 𑁋 𑀓𑀣𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀸 𑀅𑀧𑀭𑀫𑁆𑀧𑀺 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀤𑁂𑀲𑁂𑀲𑀺, 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑀜𑁆𑀚𑀧𑁆𑀧𑀢𑁆𑀢𑁂 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺, 𑀲𑁄 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀯𑀺𑀲𑀼𑀤𑁆𑀥𑀸𑀬 𑀅𑀢𑀺𑀓𑁆𑀓𑀦𑁆𑀢 𑀫𑀸𑀦𑀼𑀲𑀺𑀓𑀸𑀬 𑀉𑀪𑁄 𑀲𑀤𑁆𑀤𑁂 𑀲𑀼𑀡𑀸𑀢𑀺 𑀤𑀺𑀩𑁆𑀩𑁂 𑀘 𑀫𑀸𑀦𑀼𑀲𑁂 𑀘 𑀬𑁂 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀘…𑀧𑁂… 𑀇𑀤𑀫𑁆𑀧𑀺 𑀔𑁄 𑀫𑀳𑀸𑀭𑀸𑀚 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘. 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀅𑀧𑀭𑀫𑁆𑀧𑀺 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘 𑀤𑁂𑀲𑁂𑀲𑀺.

𑀅𑀘𑁆𑀙𑀭𑀺𑀬𑀁 ¶ 𑀆𑀯𑀼𑀲𑁄, 𑀅𑀩𑁆𑀪𑀼𑀢𑀁 𑀆𑀯𑀼𑀲𑁄, 𑀬𑀸𑀯 𑀩𑀼𑀤𑁆𑀥𑀲𑀸𑀲𑀦𑀲𑁆𑀲 𑀲𑁆𑀯𑀸𑀔𑀸𑀢𑀢𑀸, 𑀬𑀢𑁆𑀭𑀳𑀺 𑀦𑀸𑀫 𑀏𑀯𑀁 𑀲𑁆𑀯𑀸𑀔𑀸𑀢𑁂 𑀩𑀼𑀤𑁆𑀥𑀲𑀸𑀲𑀦𑁂 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁄 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀲𑀸𑀯𑀓𑁄𑀧𑀺 𑀏𑀯𑀁 𑀯𑀺𑀲𑁂𑀲𑀁 𑀤𑀺𑀩𑁆𑀩𑀲𑁄𑀢𑀜𑀸𑀡𑀁 𑀧𑀝𑀺𑀮𑀪𑀺𑀲𑁆𑀲𑀢𑀺.

𑀧𑀼𑀘𑁆𑀙𑀸 𑁋 𑀓𑀣𑀁 𑀧𑀦𑀸𑀯𑀼𑀲𑁄 𑀪𑀕𑀯𑀸 𑀅𑀧𑀭𑀫𑁆𑀧𑀺 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀤𑁂𑀲𑁂𑀲𑀺, 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂. 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂

𑀆𑀦𑀜𑁆𑀚𑀧𑁆𑀧𑀢𑁆𑀢𑁂 ¶ 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺, 𑀲𑁄 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀢𑀺, 𑀲𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 𑀲𑀭𑀸𑀕𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀯𑀻𑀢𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 𑀯𑀻𑀢𑀭𑀸𑀕𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀢𑀺…𑀧𑁂… 𑀇𑀤𑀫𑁆𑀧𑀺 𑀔𑁄 𑀫𑀳𑀸𑀭𑀸𑀚 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘. 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀅𑀧𑀭𑀫𑁆𑀧𑀺 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘 𑀤𑁂𑀲𑁂𑀲𑀺.

𑀅𑀘𑁆𑀙𑀭𑀺𑀬𑀁 ¶ 𑀆𑀯𑀼𑀲𑁄, 𑀅𑀩𑁆𑀪𑀼𑀢𑀁 𑀆𑀯𑀼𑀲𑁄, 𑀬𑀸𑀯 𑀩𑀼𑀤𑁆𑀥𑀲𑀸𑀲𑀦𑀲𑁆𑀲 𑀲𑁆𑀯𑀸𑀔𑀸𑀢𑀢𑀸, 𑀬𑀢𑁆𑀭𑀳𑀺 𑀦𑀸𑀫 𑀏𑀯𑀁 𑀲𑁆𑀯𑀸𑀔𑀸𑀢𑁂 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀲𑀸𑀯𑀓𑁄𑀧𑀺 𑀏𑀯𑀁 𑀯𑀺𑀲𑁂𑀲𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀧𑀝𑀺𑀮𑀪𑀺𑀲𑁆𑀲𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑀜𑁆𑀚𑀧𑁆𑀧𑀢𑁆𑀢𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺, 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑁂𑀬𑁆𑀬𑀣𑀺𑀤𑀁, 𑀏𑀓𑀫𑁆𑀧𑀺𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄…𑀧𑁂… 𑀇𑀤𑀫𑁆𑀧𑀺 𑀔𑁄 𑀫𑀳𑀸𑀭𑀸𑀚 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘. 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀅𑀧𑀭𑀫𑁆𑀧𑀺 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘 𑀤𑁂𑀲𑁂𑀲𑀺.

𑀅𑀘𑁆𑀙𑀭𑀺𑀬𑀁 ¶ 𑀆𑀯𑀼𑀲𑁄, 𑀅𑀩𑁆𑀪𑀼𑀢𑀁 𑀆𑀯𑀼𑀲𑁄, 𑀬𑀸𑀯 𑀩𑀼𑀤𑁆𑀥𑀲𑀸𑀲𑀦𑀲𑁆𑀲 𑀲𑁆𑀯𑀸𑀔𑀸𑀢𑀢𑀸, 𑀬𑀢𑁆𑀭𑀳𑀺 𑀦𑀸𑀫 𑀏𑀯𑀁 𑀲𑁆𑀯𑀸𑀔𑀸𑀢𑁂 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀸𑀯𑀓𑁄𑀧𑀺 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀏𑀯𑀁 𑀯𑀺𑀲𑁂𑀲𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀧𑀝𑀺𑀮𑀪𑀺𑀲𑁆𑀲𑀢𑀺.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘 𑀧𑀦𑀸𑀯𑀼𑀲𑁄 𑀪𑀕𑀯𑀸 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀤𑁂𑀲𑁂𑀲𑀺, 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 ¶ 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺, 𑀲𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂 𑀬𑀣𑀸𑀓𑀫𑁆𑀫𑀼𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺…𑀧𑁂… 𑀇𑀤𑀫𑁆𑀧𑀺 𑀔𑁄 𑀫𑀳𑀸𑀭𑀸𑀚 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘. 𑀇𑀢𑁆𑀣𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀅𑀧𑀭𑀫𑁆𑀧𑀺 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘 𑀤𑁂𑀲𑁂𑀲𑀺.

𑀅𑀘𑁆𑀙𑀭𑀺𑀬𑀁 ¶ 𑀆𑀯𑀼𑀲𑁄, 𑀅𑀩𑁆𑀪𑀼𑀢𑀁 𑀆𑀯𑀼𑀲𑁄, 𑀬𑀸𑀯 𑀩𑀼𑀤𑁆𑀥𑀲𑀸𑀲𑀦𑀲𑁆𑀲 𑀲𑁆𑀯𑀸𑀔𑀸𑀢𑀢𑀸, 𑀬𑀢𑁆𑀭𑀳𑀺 𑀦𑀸𑀫 𑀏𑀯𑀁 𑀲𑁆𑀯𑀸𑀔𑀸𑀢𑁂 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄 𑀲𑀸𑀯𑀓𑁄𑀧𑀺 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀏𑀯𑀁 𑀯𑀺𑀲𑁂𑀲𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀧𑀝𑀺𑀮𑀪𑀺𑀲𑁆𑀲𑀢𑀺.

𑀧𑀼𑀘𑁆𑀙𑀸 𑁋 𑀓𑀣𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀸 𑀧𑀭𑀺𑀬𑁄𑀲𑀸𑀦𑁂 𑀉𑀢𑁆𑀢𑀭𑀺𑀢𑀭𑀁 𑀲𑀸𑀫𑀜𑁆𑀜𑀨𑀮𑀁 𑀤𑁂𑀲𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺…𑀧𑁂… 𑀇𑀤𑀁 𑀔𑁄 𑀫𑀳𑀸𑀭𑀸𑀚 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘. 𑀇𑀫𑀲𑁆𑀫𑀸 𑀘 𑀧𑀦 𑀫𑀳𑀸𑀭𑀸𑀚 𑀲𑀦𑁆𑀤𑀺𑀝𑁆𑀞𑀺𑀓𑀸 𑀲𑀸𑀫𑀜𑁆𑀜𑀨𑀮𑀸 𑀅𑀜𑁆𑀜𑀁 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀉𑀢𑁆𑀢𑀭𑀺𑀢𑀭𑀁 𑀯𑀸 𑀧𑀡𑀻𑀢𑀢𑀭𑀁 𑀯𑀸 𑀦𑀢𑁆𑀣𑀻𑀢𑀺. 𑀇𑀢𑁆𑀣𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀸 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀧𑀭𑀺𑀬𑁄𑀲𑀸𑀦𑀁 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘 𑀤𑁂𑀲𑁂𑀲𑀺.

𑀲𑀸𑀥𑀼 ¶ 𑀲𑀸𑀥𑀼 𑀆𑀯𑀼𑀲𑁄, 𑀲𑀸𑀥𑀼 𑀔𑁄 𑀆𑀯𑀼𑀲𑁄, 𑀬𑀁 𑀪𑀺𑀓𑁆𑀔𑀼 𑀩𑀼𑀤𑁆𑀥𑀲𑀸𑀲𑀦𑁂 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁄 𑀏𑀯𑀁 𑀲𑁆𑀯𑀸𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀆𑀲𑀯𑀓𑁆𑀔𑀬𑀜𑀸𑀡𑀁 𑀧𑀸𑀧𑀼𑀡𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺.

𑀧𑀼𑀘𑁆𑀙𑀸 𑁋 𑀓𑀣𑀁 ¶ 𑀧𑀦𑀸𑀯𑀼𑀲𑁄 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀧𑀭𑀺𑀬𑁄𑀲𑀸𑀦𑁂 𑀪𑀕𑀯𑀢𑀺 𑀘 𑀤𑁂𑀲𑀦𑀸𑀬𑀜𑁆𑀘 𑀧𑀲𑀦𑁆𑀦𑁄 𑀧𑀲𑀦𑁆𑀦𑀸𑀓𑀸𑀭𑀁 𑀅𑀓𑀸𑀲𑀺, 𑀓𑀻𑀤𑀺𑀲𑀜𑁆𑀘 𑀆𑀦𑀺𑀲𑀁𑀲𑀁 𑀧𑀝𑀺𑀮𑀪𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀯𑀁 𑀯𑀼𑀢𑁆𑀢𑁂 𑀪𑀦𑁆𑀢𑁂 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘, 𑀅𑀪𑀺𑀓𑁆𑀓𑀦𑁆𑀢𑀁 𑀪𑀦𑁆𑀢𑁂, 𑀅𑀪𑀺𑀓𑁆𑀓𑀦𑁆𑀢𑀁 𑀪𑀦𑁆𑀢𑁂, 𑀲𑁂𑀬𑁆𑀬𑀣𑀸𑀧𑀺 𑀪𑀦𑁆𑀢𑁂 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬…𑀧𑁂… 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑁆𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢𑀦𑁆𑀢𑀺, 𑀅𑀬𑀜𑁆𑀳𑀺 𑀪𑀦𑁆𑀢𑁂 𑀭𑀸𑀚𑀸 𑀧𑀺𑀢𑀼𑀫𑀸𑀭𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦𑁂𑀯 𑀭𑀢𑁆𑀢𑀺𑀁 𑀦 𑀤𑀺𑀯𑀸 𑀦𑀺𑀤𑁆𑀤𑀁 𑀧𑀝𑀺𑀮𑀪𑀢𑀺, 𑀲𑀢𑁆𑀣𑀸𑀭𑀁 𑀧𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀇𑀫𑀸𑀬 𑀫𑀥𑀼𑀭𑀸𑀬 𑀑𑀚𑀯𑀦𑁆𑀢𑀺𑀬𑀸 𑀥𑀫𑁆𑀫𑀤𑁂𑀲𑀦𑀸𑀬 𑀲𑀼𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦𑀺𑀤𑁆𑀤𑀁 𑀧𑀝𑀺𑀮𑀪𑀢𑀺, 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀫𑀳𑀸𑀲𑀓𑁆𑀓𑀸𑀭𑀫𑀓𑀸𑀲𑀺, 𑀧𑀼𑀣𑀼𑀚𑁆𑀚𑀦𑀺𑀓𑀸𑀬 𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑁄 𑀦𑀸𑀫 𑀇𑀫𑀺𑀦𑀸 𑀭𑀜𑁆𑀜𑀸 𑀲𑀤𑀺𑀲𑁄 𑀦𑀸𑀳𑁄𑀲𑀺, 𑀅𑀦𑀸𑀕𑀢𑁂 𑀧𑀦 𑀯𑀺𑀚𑀺𑀢𑀸𑀯𑀻 𑀦𑀸𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺. 𑀏𑀯𑀁 𑀔𑁄 𑀪𑀦𑁆𑀢𑁂 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 ¶ 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀲𑀦𑁆𑀦𑁄 𑀧𑀲𑀦𑁆𑀦𑀸𑀓𑀸𑀭𑀫𑀓𑀸𑀲𑀺, 𑀇𑀤𑀺𑀲𑀜𑁆𑀘 𑀪𑀦𑁆𑀢𑁂 𑀫𑀳𑀸𑀦𑀺𑀲𑀁𑀲𑀁 𑀧𑀝𑀺𑀮𑀪𑀺.

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 ¶ 𑀪𑀕𑀯𑀸 𑀚𑀸𑀦𑀢𑀸 𑀅𑀭𑀳𑀢𑀸 𑀧𑀲𑁆𑀲𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀫𑁆𑀩𑀝𑁆𑀞𑀁 𑀝𑀸𑀫 𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑁄𑀲𑀮𑁂𑀲𑀼 𑀪𑀦𑁆𑀢𑁂 𑀚𑀦𑀧𑀤𑁂 𑀇𑀘𑁆𑀙𑀸𑀦𑀗𑁆𑀕𑀮𑁂 𑀦𑀸𑀫 𑀓𑁄𑀲𑀮𑀸𑀦𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀅𑀫𑁆𑀩𑀝𑁆𑀞𑀁 𑀦𑀸𑀫 𑀫𑀸𑀡𑀯𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀲𑁄𑀡𑀤𑀡𑁆𑀟𑀁 ¶ 𑀧𑀦𑀸𑀯𑀼𑀲𑁄 𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀅𑀗𑁆𑀕𑁂𑀲𑀼 𑀪𑀦𑁆𑀢𑁂 𑀚𑀦𑀧𑀤𑁂 𑀘𑀫𑁆𑀧𑀸𑀬𑀁 𑀲𑁄𑀡𑀤𑀡𑁆𑀟𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑀽𑀝𑀤𑀦𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀫𑀕𑀥𑁂𑀲𑀼 𑀪𑀦𑁆𑀢𑁂 𑀔𑀸𑀡𑀼𑀫𑀢𑁂 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀓𑀽𑀝𑀤𑀦𑁆𑀢 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀫𑀳𑀸𑀮𑀺𑀁 ¶ 𑀧𑀦𑀸𑀯𑀼𑀲𑁄 𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀯𑁂𑀲𑀸𑀮𑀺𑀬𑀁 𑀪𑀦𑁆𑀢𑁂 𑀑𑀝𑁆𑀞𑀤𑁆𑀥𑀁 𑀦𑀸𑀫 𑀮𑀺𑀘𑁆𑀙𑀯𑀺𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀚𑀸𑀮𑀺𑀬𑀁 ¶ 𑀧𑀦𑀸𑀯𑀼𑀲𑁄 𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑁄𑀲𑀫𑁆𑀩𑀺𑀬𑀁 𑀪𑀦𑁆𑀢𑁂 𑀤𑁆𑀯𑁂 𑀧𑀩𑁆𑀩𑀚𑀺𑀢𑁂 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀫𑀳𑀸𑀲𑀻𑀳𑀦𑀸𑀤𑀁 ¶ 𑀧𑀦𑀸𑀯𑀼𑀲𑁄 𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀉𑀭𑀼𑀜𑁆𑀜𑀸𑀬𑀁 𑀪𑀦𑁆𑀢𑁂 𑀓𑀡𑁆𑀡𑀓𑀣𑀮𑁂 𑀅𑀘𑁂𑀮𑀁 𑀓𑀲𑁆𑀲𑀧𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀧𑁄𑀝𑁆𑀞𑀧𑀸𑀤𑀁 ¶ 𑀧𑀦𑀸𑀯𑀼𑀲𑁄 𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀧𑁄𑀝𑁆𑀞𑀧𑀸𑀤𑀜𑁆𑀘 𑀧𑀭𑀺𑀩𑁆𑀩𑀸𑀚𑀓𑀁 𑀘𑀺𑀢𑁆𑀢𑀜𑁆𑀘 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀲𑀼𑀪𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑁂𑀦 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀲𑀼𑀪𑀁 𑀫𑀸𑀡𑀯𑀁 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑁂𑀯𑀝𑁆𑀝𑀁 ¶ 𑀧𑀦𑀸𑀯𑀼𑀲𑁄 𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀦𑀸𑀴𑀦𑁆𑀤𑀸 𑀬𑀁 𑀪𑀦𑁆𑀢𑁂 𑀓𑁂𑀯𑀝𑁆𑀝𑀁 𑀕𑀳𑀧𑀢𑀺𑀧𑀼𑀢𑁆𑀢𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀮𑁄𑀳𑀺𑀘𑁆𑀘𑀲𑀼𑀢𑁆𑀢 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑁄𑀲𑀮𑁂𑀲𑀼 𑀪𑀦𑁆𑀢𑁂 𑀚𑀦𑀧𑀤𑁂 𑀲𑀸𑀮𑀯𑀢𑀺𑀓𑀸𑀬𑀁 𑀮𑁄𑀳𑀺𑀘𑁆𑀘𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑁂𑀯𑀺𑀚𑁆𑀚𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑁄𑀲𑀮𑁂𑀲𑀼 𑀪𑀦𑁆𑀢𑁂 𑀫𑀦𑀲𑀸𑀓𑀝𑁂 𑀦𑀸𑀫 𑀓𑁄𑀲𑀮𑀸𑀦𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀯𑀸𑀲𑁂𑀝𑁆𑀞𑀁 𑀪𑀸𑀭𑀤𑁆𑀯𑀸𑀚𑀁 𑀫𑀸𑀡𑀯𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑁂𑀦 ¶ 𑀆𑀯𑀼𑀲𑁄 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀫𑀳𑀸𑀧𑀤𑀸𑀦𑀲𑀼𑀢𑁆𑀢𑀁 𑀤𑀻𑀖𑀦𑀺𑀓𑀸𑀬𑁂 𑀫𑀳𑀸𑀯𑀕𑁆𑀕𑁂 𑀧𑁄𑀭𑀸𑀡𑀓𑁂𑀳𑀺 𑀲𑀗𑁆𑀕𑀺𑀢𑀺𑀓𑀸𑀭𑁂𑀳𑀺 𑀧𑀞𑀫𑀁 𑀲𑀗𑁆𑀕𑀺𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀪𑀸𑀲𑀺𑀢𑀁, 𑀲𑀫𑁆𑀩𑀳𑀼𑀮𑀸𑀦𑀁 𑀪𑀦𑁆𑀢𑁂 𑀪𑀺𑀓𑁆𑀔𑀽𑀦𑀁 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸𑀦𑀁 𑀫𑀡𑁆𑀟𑀮𑀫𑀸𑀴𑁂 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀸 𑀥𑀫𑁆𑀫𑀻𑀓𑀣𑀸 𑀉𑀤𑀧𑀸𑀤𑀺, 𑀇𑀢𑀺𑀧𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑁄 𑀇𑀢𑀺𑀧𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑁄𑀢𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑀼𑀭𑀽𑀲𑀼 𑀪𑀦𑁆𑀢𑁂 𑀓𑀫𑁆𑀫𑀸𑀲𑀥𑀫𑁆𑀫𑁂 𑀦𑀸𑀫 𑀓𑀼𑀭𑀽𑀦𑀁 𑀦𑀺𑀕𑀫𑁂 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁, 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 ‘‘𑀅𑀘𑁆𑀙𑀭𑀺𑀬𑀁 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁 𑀪𑀦𑁆𑀢𑁂, 𑀬𑀸𑀯 𑀕𑀫𑁆𑀪𑀻𑀭𑁄𑀘𑀸𑀬𑀁 𑀪𑀦𑁆𑀢𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄

𑀕𑀫𑁆𑀪𑀻𑀭𑀸𑀯𑀪𑀸𑀲𑁄 ¶ 𑀘, 𑀅𑀣 𑀘 𑀧𑀦 𑀫𑁂 𑀉𑀢𑁆𑀢𑀸𑀦𑀓𑀼𑀢𑁆𑀢𑀸𑀦𑀓𑁄 𑀯𑀺𑀬 𑀔𑀸𑀬𑀢𑀻’’𑀢𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀩𑀳𑀼𑀅𑀦𑀼𑀲𑀦𑁆𑀥𑀺𑀓𑀁, 𑀩𑀳𑀼𑀤𑁂𑀲𑀦𑀸 𑀲𑀗𑁆𑀕𑀳𑀁, 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀸𑀲𑀦𑁆𑀦𑀯𑀲𑁆𑀲𑁂 𑀧𑀯𑀢𑁆𑀢𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀤𑀻𑀧𑀓𑀯𑀘𑀦𑀧𑀩𑀦𑁆𑀥𑀪𑀽𑀢𑀁, 𑀢𑀲𑁆𑀫𑀸 𑀢𑀁 𑀅𑀦𑁆𑀢𑀭𑀸𑀪𑁂𑀤𑀯𑀲𑁂𑀦 𑀯𑀺𑀪𑀚𑁆𑀚 𑀧𑀭𑀺𑀘𑁆𑀙𑀺𑀚𑁆𑀚 𑀧𑀭𑀺𑀘𑁆𑀙𑀺𑀚𑁆𑀚 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀢𑀢𑁆𑀣𑀸𑀯𑀼𑀲𑁄 𑀪𑀕𑀯𑀢𑀸 𑀧𑀞𑀫𑀁

𑀭𑀸𑀚𑀽𑀦𑀁 ¶ 𑀅𑀧𑀭𑀺𑀳𑀸𑀦𑀺𑀬𑀥𑀫𑁆𑀫𑀤𑁂𑀲𑀦𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀯𑀲𑁆𑀲𑀓𑀸𑀭𑀁 𑀩𑁆𑀭𑀸𑀳𑁆𑀫𑀡𑀁 𑀫𑀕𑀥𑀫𑀳𑀸𑀫𑀢𑁆𑀢𑀁 𑀆𑀭𑀩𑁆𑀪 𑀪𑀸𑀲𑀺𑀢𑀸, 𑀯𑀲𑁆𑀲𑀓𑀸𑀭𑁄 𑀪𑀦𑁆𑀢𑁂 𑀩𑁆𑀭𑀸𑀳𑁆𑀫𑀡𑁄 𑀫𑀕𑀥𑀫𑀳𑀸𑀫𑀢𑁆𑀢𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 ‘‘𑀭𑀸𑀚𑀸 𑀪𑁄 𑀕𑁄𑀢𑀫 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀯𑀚𑁆𑀚𑀻 𑀅𑀪𑀺𑀬𑀸𑀢𑀼𑀓𑀸𑀫𑁄 𑀲𑁄 𑀏𑀯𑀫𑀸𑀳 𑀅𑀳𑀁 𑀳𑀺𑀫𑁂 𑀯𑀚𑁆𑀚𑀻 𑀏𑀯𑀁 𑀫𑀳𑀺𑀤𑁆𑀥𑀺𑀓𑁂 𑀏𑀯𑀁 𑀫𑀳𑀸𑀦𑀼𑀪𑀸𑀯𑁂 𑀉𑀘𑁆𑀙𑁂𑀘𑁆𑀙𑀸𑀫𑀺 𑀯𑀚𑁆𑀚𑀻 𑀯𑀺𑀦𑀸𑀲𑁂𑀲𑁆𑀲𑀸𑀫𑀺 𑀯𑀚𑁆𑀚𑀻 𑀅𑀦𑀬𑀩𑁆𑀬𑀲𑀦𑀁 𑀆𑀧𑀸𑀤𑁂𑀲𑁆𑀲𑀸𑀫𑀻 𑀯𑀚𑁆𑀚𑀻’’𑀢𑀺 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀸.

𑀧𑀼𑀘𑁆𑀙𑀸 𑁋 𑀪𑀺𑀓𑁆𑀔𑀽𑀦𑀁 ¶ 𑀧𑀦𑀸𑀯𑀼𑀲𑁄 𑀅𑀧𑀭𑀺𑀳𑀸𑀦𑀺𑀬𑀥𑀫𑁆𑀫𑀤𑁂𑀲𑀦𑀸 𑀪𑀕𑀯𑀢𑀸 𑀓𑀢𑁆𑀣 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀲𑁆𑀫𑀺𑀁𑀬𑁂𑀯 𑀪𑀦𑁆𑀢𑁂 𑀭𑀸𑀚𑀕𑀳𑁂 𑀢𑀲𑁆𑀫𑀺𑀁𑀬𑁂𑀯 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀸.

𑀧𑀼𑀘𑁆𑀙𑀸 𑁋 𑀥𑀫𑁆𑀫𑀸𑀤𑀸𑀲𑁄 ¶ 𑀆𑀯𑀼𑀲𑁄 𑀥𑀫𑁆𑀫𑀧𑀭𑀺𑀬𑀸𑀬𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀦𑀸𑀢𑀺𑀓𑁂 𑀪𑀦𑁆𑀢𑁂 𑀕𑀺𑀜𑁆𑀚𑀓𑀸𑀯𑀲𑀣𑁂 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤 𑀆𑀭𑀩𑁆𑀪 𑀪𑀸𑀲𑀺𑀢𑁄, 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀸𑀢𑀺𑀓𑀺𑀬𑀸𑀦𑀁 𑀤𑁆𑀯𑀸𑀤𑀲𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀕𑀢𑀺𑀅𑀪𑀺𑀲𑀫𑁆𑀧𑀭𑀸𑀬𑀁 𑀧𑀼𑀘𑁆𑀙𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑁄.

𑀧𑀼𑀘𑁆𑀙𑀸 𑁋 𑀅𑀢𑁆𑀢𑀤𑀻𑀧𑀥𑀫𑁆𑀫𑀤𑁂𑀲𑀦𑀸 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀯𑁂𑀲𑀸𑀮𑀺𑀬𑀁 𑀪𑀦𑁆𑀢𑁂 𑀯𑁂𑀴𑀼𑀯𑀕𑀸𑀫𑀓𑁂 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀭𑀩𑁆𑀪 𑀪𑀸𑀲𑀺𑀢𑀸, 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀕𑀺𑀮𑀸𑀦𑀯𑀼𑀝𑁆𑀞𑀺𑀢𑀲𑁆𑀲 𑀅𑀘𑀺𑀭𑀯𑀼𑀝𑁆𑀞𑀺𑀢𑀲𑁆𑀲 𑀕𑁂𑀮𑀜𑁆𑀜𑀸 𑀪𑀕𑀯𑀢𑁄 𑀕𑁂𑀮𑀜𑁆𑀜𑁂𑀦 𑀅𑀢𑁆𑀢𑀦𑁄 𑀔𑁂𑀤𑀧𑀢𑁆𑀢𑀓𑀸𑀭𑀡𑀁 𑀆𑀭𑁄𑀘𑁂𑀲𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀸.

‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤 ¶ 𑀅𑀢𑁆𑀢𑀤𑀻𑀧𑀸 𑀯𑀺𑀳𑀭𑀣 𑀅𑀢𑁆𑀢𑀲𑀭𑀡𑀸 𑀅𑀦𑀜𑁆𑀜𑀲𑀭𑀡𑀸’’.

𑀧𑀼𑀘𑁆𑀙𑀸 𑁋 𑀪𑀕𑀯𑀢𑀸 𑀆𑀯𑀼𑀲𑁄 𑀧𑀼𑀭𑀺𑀫 𑀤𑀼𑀢𑀺𑀬𑀤𑀺𑀯𑀲𑁂 𑀧𑀼𑀘𑁆𑀙𑀺𑀢𑀯𑀺𑀲𑁆𑀲𑀚𑁆𑀚𑀺𑀢𑀓𑁆𑀓𑀫𑁂𑀦 𑀅𑀢𑁆𑀢𑀤𑀻𑀧𑀥𑀫𑁆𑀫𑀤𑁂𑀲𑀦𑀜𑁆𑀘 𑀅𑀜𑁆𑀜𑀸𑀦𑀺 𑀘 𑀥𑀫𑁆𑀫𑀤𑁂𑀲𑀦𑀸𑀦𑀺 𑀓𑀣𑁂𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀺𑀢 𑀲𑀩𑁆𑀩𑀩𑀼𑀤𑁆𑀥𑀓𑀺𑀘𑁆𑀘𑁂𑀦 𑀆𑀬𑀼𑀲𑀗𑁆𑀔𑀸𑀭𑁄 𑀓𑀢𑁆𑀣 𑀑𑀲𑁆𑀲𑀝𑁆𑀞𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀯𑁂𑀲𑀸𑀮𑀺𑀬𑀁 𑀪𑀦𑁆𑀢𑁂 𑀘𑀸𑀧𑀸𑀮𑁂 𑀘𑁂𑀢𑀺𑀬𑁂 𑀫𑀸𑀭𑁂𑀦 𑀧𑀸𑀧𑀺𑀫𑀢𑀸 𑀬𑀸𑀘𑀺𑀢𑁄 𑀪𑀕𑀯𑀸 𑀲𑀢𑁂𑀦 𑀲𑀫𑁆𑀧𑀚𑀸𑀦𑁂𑀦 𑀆𑀬𑀼𑀲𑀗𑁆𑀔𑀸𑀭𑁄 𑀑𑀲𑁆𑀲𑀝𑁆𑀞𑁄.

‘‘𑀧𑀭𑀺𑀦𑀺𑀩𑁆𑀩𑀸𑀢𑀼 ¶ 𑀤𑀸𑀦𑀺 𑀪𑀦𑁆𑀢𑁂 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼 𑀲𑀼𑀕𑀢𑁄, 𑀧𑀭𑀺𑀦𑀺𑀩𑁆𑀩𑀸𑀦 𑀓𑀸𑀮𑁄 𑀤𑀸𑀦𑀺 𑀪𑀦𑁆𑀢𑁂 𑀪𑀕𑀯𑀢𑁄.

𑀅𑀧𑁆𑀧𑁄𑀲𑀼𑀓𑁆𑀓𑁄 𑀢𑁆𑀯𑀁 𑀧𑀸𑀧𑀺𑀫 𑀳𑁄𑀢𑀺, 𑀦 𑀘𑀺𑀭𑀁 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀇𑀢𑁄 𑀢𑀺𑀡𑁆𑀡𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀢𑀣𑀸𑀕𑀢𑁄 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺.

𑀧𑀼𑀘𑁆𑀙𑀸 𑁋 𑀘𑀢𑀼𑀫𑀳𑀸𑀧𑀤𑁂𑀲𑀥𑀫𑁆𑀫𑀤𑁂𑀲𑀦𑀸 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀪𑀸𑀲𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀪𑁄𑀕𑀦𑀕𑀭𑁂 𑀪𑀦𑁆𑀢𑁂 𑀆𑀦𑀦𑁆𑀤𑁂 𑀘𑁂𑀢𑀺𑀬𑁂 𑀪𑀸𑀲𑀺𑀢𑀸.

𑀧𑀭𑀺𑀧𑀓𑁆𑀓𑁄 ¶ 𑀯𑀬𑁄 𑀫𑀬𑁆𑀳𑀁, 𑀧𑀭𑀺𑀢𑁆𑀢𑀁 𑀫𑀫 𑀚𑀻𑀯𑀺𑀢𑀁. 𑀧𑀳𑀸𑀬 𑀯𑁄 𑀕𑀫𑀺𑀲𑁆𑀲𑀸𑀫𑀺, 𑀓𑀢𑀁 𑀫𑁂 𑀲𑀭𑀡𑀫𑀢𑁆𑀢𑀦𑁄.

𑀧𑀼𑀘𑁆𑀙𑀸 𑁋 𑀘𑀢𑀼𑀲𑀁𑀯𑁂𑀚𑀦𑀻𑀬𑀓𑀣𑀸 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑀼𑀲𑀺𑀦𑀸𑀭𑀸𑀬𑀁 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀭𑀩𑁆𑀪 𑀪𑀸𑀲𑀺𑀢𑀸, 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀧𑀼𑀩𑁆𑀩𑁂 𑀪𑀦𑁆𑀢𑁂 𑀤𑀺𑀲𑀸𑀲𑀼 𑀯𑀲𑁆𑀲𑀁𑀯𑀼𑀝𑁆𑀞𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬, 𑀢𑁂 𑀫𑀬𑀁 𑀮𑀪𑀸𑀫 𑀫𑀦𑁄𑀪𑀸𑀯𑀦𑀻𑀬𑁂 𑀪𑀺𑀓𑁆𑀔𑀽 𑀤𑀲𑁆𑀲𑀦𑀸𑀬, 𑀮𑀪𑀸𑀫 𑀧𑀬𑀺𑀭𑀼𑀧𑀸𑀲𑀦𑀸𑀬. 𑀪𑀕𑀯𑀢𑁄 𑀧𑀦 𑀫𑀬𑀁 𑀪𑀦𑁆𑀢𑁂 𑀅𑀘𑁆𑀘𑀬𑁂𑀦 𑀦 𑀮𑀪𑀺𑀲𑁆𑀲𑀸𑀫 𑀫𑀦𑁄𑀪𑀸𑀯𑀦𑀻𑀬𑁂 𑀪𑀺𑀓𑁆𑀔𑀽 𑀤𑀲𑁆𑀲𑀦𑀸𑀬, 𑀦 𑀮𑀪𑀺𑀲𑁆𑀲𑀸𑀫 𑀧𑀬𑀺𑀭𑀼𑀧𑀸𑀲𑀦𑀸𑀬𑀸’’𑀢𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀸.

𑀬𑁂𑀳𑀺 ¶ 𑀓𑁂𑀘𑀺 𑀆𑀦𑀦𑁆𑀤 𑀘𑁂𑀢𑀺𑀬𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀓𑀸𑀮𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺𑀲𑁆𑀲𑀦𑁆𑀢𑀺 𑀳𑀼 𑁋

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀫𑀸𑀢𑀼𑀕𑀸𑀫𑁂𑀲𑀼 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀯𑀢𑁆𑀢𑀁 𑀓𑀣𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀅𑀤𑀲𑁆𑀲𑀦𑀁 𑀆𑀦𑀦𑁆𑀤𑀸𑀢𑀺 𑀘 𑀅𑀦𑀸𑀮𑀸𑀧𑁄 𑀆𑀦𑀦𑁆𑀤𑀸𑀢𑀺 𑀘 𑀲𑀢𑀺 𑀆𑀦𑀦𑁆𑀤 𑀉𑀧𑀝𑁆𑀞𑀩𑁆𑀩𑁂𑀢𑀩𑁆𑀩𑀸𑀢𑀺 𑀘 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀸 𑀫𑀸𑀢𑀼𑀕𑀸𑀫𑁂𑀲𑀼 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸𑀓𑀸𑀭𑀁 𑀓𑀣𑁂𑀲𑀺.

𑀧𑀼𑀘𑁆𑀙𑀸 𑁋 𑀫𑀳𑀸𑀲𑀼𑀤𑀲𑁆𑀲𑀦𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀺𑀲𑁆𑀲𑀁𑀬𑁂𑀯 𑀪𑀦𑁆𑀢𑁂 𑀓𑀼𑀲𑀺𑀦𑀸𑀭𑀸𑀬𑀁 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁, 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀫𑀸 𑀪𑀦𑁆𑀢𑁂 𑀪𑀕𑀯𑀸 𑀇𑀫𑀲𑁆𑀫𑀺𑀁 𑀔𑀼𑀤𑁆𑀤𑀓𑀦𑀕𑀭𑀓𑁂

𑀉𑀚𑁆𑀚𑀗𑁆𑀕𑀮𑀦𑀕𑀭𑀓𑁂 ¶ 𑀲𑀸𑀔𑀸𑀦𑀕𑀭𑀓𑁂 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀲𑀦𑁆𑀢𑀺 𑀪𑀦𑁆𑀢𑁂 𑀅𑀜𑁆𑀜𑀸𑀦𑀺 𑀫𑀳𑀸𑀦𑀕𑀭𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁, 𑀘𑀫𑁆𑀧𑀸, 𑀭𑀸𑀚𑀕𑀳𑀁, 𑀲𑀸𑀯𑀢𑁆𑀣𑀻, 𑀲𑀸𑀓𑁂𑀢𑀁, 𑀓𑁄𑀲𑀫𑁆𑀩𑀻, 𑀩𑀸𑀭𑀸𑀡𑀲𑀻, 𑀏𑀢𑁆𑀣 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀼, 𑀏𑀢𑁆𑀣 𑀩𑀳𑀽 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸 𑀩𑁆𑀭𑀸𑀳𑁆𑀫𑀡 𑀫𑀳𑀸𑀲𑀸𑀮𑀸 𑀕𑀳𑀧𑀢𑀺 𑀫𑀳𑀸𑀲𑀸𑀮𑀸 𑀢𑀣𑀸𑀕𑀢𑁂 𑀅𑀪𑀺𑀧𑁆𑀧𑀲𑀦𑁆𑀦𑀸. 𑀢𑁂 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀧𑀽𑀚𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀪𑀕𑀯𑀸 ¶ 𑀆𑀯𑀼𑀲𑁄 𑀧𑀼𑀭𑀺𑀫𑀤𑀺𑀯𑀲𑁂 𑀧𑀼𑀘𑁆𑀙𑀺𑀢 𑀯𑀺𑀲𑁆𑀲𑀚𑁆𑀚𑀺𑀢𑀓𑁆𑀓𑀫𑁂𑀦 𑀫𑀳𑀸𑀲𑀼𑀤𑀲𑁆𑀲𑀦 𑀲𑀼𑀢𑁆𑀢𑀦𑁆𑀢𑀁 𑀤𑁂𑀲𑁂𑀢𑁆𑀯𑀸 𑀲𑀼𑀪𑀤𑁆𑀤𑀁𑀦𑀸𑀫 𑀧𑀭𑀺𑀩𑁆𑀩𑀸𑀚𑀓𑀁 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑁂𑀲𑀼 𑀧𑀘𑁆𑀙𑀺𑀫𑀲𑀸𑀯𑀓𑀪𑀽𑀢𑀁 𑀓𑀣𑀁 𑀯𑀺𑀦𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀬𑀲𑁆𑀫𑀺𑀁 𑀔𑁄 𑀲𑀼𑀪𑀤𑁆𑀤 𑀥𑀫𑁆𑀫𑀯𑀺𑀦𑀬𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀦 𑀉𑀧𑀮𑀩𑁆𑀪𑀢𑀺, 𑀲𑀫𑀡𑁄𑀧𑀺 𑀢𑀢𑁆𑀣 𑀦 𑀉𑀧𑀮𑀩𑁆𑀪𑀢𑀺, 𑀤𑀼𑀢𑀺𑀬𑁄𑀧𑀺 𑀢𑀢𑁆𑀣 𑀲𑀫𑀡𑁄 𑀦 𑀉𑀧𑀮𑀩𑁆𑀪𑀢𑀺, 𑀢𑀢𑀺𑀬𑁄𑀧𑀺 𑀢𑀢𑁆𑀣 𑀲𑀫𑀡𑁄 𑀦 𑀉𑀧𑀮𑀩𑁆𑀪𑀢𑀺, 𑀘𑀢𑀼𑀢𑁆𑀣𑁄𑀧𑀺 𑀢𑀢𑁆𑀣 𑀲𑀫𑀡𑁄 𑀦 𑀉𑀧𑀮𑀩𑁆𑀪𑀢𑀺 (𑀧𑁂𑀬𑁆𑀬𑀸𑀮). 𑀇𑀫𑁂 𑀘 𑀲𑀼𑀪𑀤𑁆𑀤 𑀪𑀺𑀓𑁆𑀔𑀽 𑀲𑀫𑁆𑀫𑀸 𑀯𑀺𑀳𑀭𑁂𑀬𑁆𑀬𑀼𑀁, 𑀅𑀲𑀼𑀜𑁆𑀜𑁄 𑀮𑁄𑀓𑁄 𑀅𑀭𑀳𑀦𑁆𑀢𑁂𑀳𑀺 𑀅𑀲𑁆𑀲, 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀸 𑀲𑀼𑀪𑀤𑁆𑀤𑀁 𑀧𑀭𑀺𑀩𑁆𑀩𑀸𑀚𑀓𑀁 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑁂𑀲𑀼 𑀧𑀘𑁆𑀙𑀺𑀫𑀁 𑀲𑀓𑁆𑀔𑀺𑀲𑀸𑀯𑀓𑀁 𑀯𑀺𑀦𑁂𑀲𑀺.

𑀧𑀼𑀘𑁆𑀙𑀸 𑁋 𑀧𑀘𑁆𑀙𑀺𑀫𑁂 ¶ 𑀧𑀦𑀸𑀯𑀼𑀲𑁄 𑀓𑀸𑀮𑁂 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀓𑀻𑀤𑀺𑀲𑀁 𑀯𑀘𑀦𑀁 𑀓𑀣𑁂𑀢𑁆𑀯𑀸, 𑀓𑀣𑀜𑁆𑀘 𑀪𑀺𑀓𑁆𑀔𑀽 𑀧𑀯𑀸𑀭𑁂𑀢𑁆𑀯𑀸, 𑀓𑀻𑀤𑀺𑀲𑀜𑁆𑀘 𑀪𑀺𑀓𑁆𑀔𑀽𑀦𑀁 𑀯𑀘𑀦𑀁 𑀆𑀫𑀦𑁆𑀢𑁂𑀢𑁆𑀯𑀸, 𑀓𑀣𑀜𑁆𑀘 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀪𑀕𑀯𑀸 𑀪𑀦𑁆𑀢𑁂 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀲𑀺𑀬𑀸 𑀔𑁄 𑀧𑀦𑀸𑀦𑀦𑁆𑀤 𑀢𑀼𑀫𑁆𑀳𑀸𑀓𑀁 𑀏𑀯𑀫𑀲𑁆𑀲 𑀅𑀢𑀻𑀢𑀲𑀢𑁆𑀣𑀼𑀓𑀁 𑀧𑀸𑀯𑀘𑀦𑀁 𑀦𑀢𑁆𑀣𑀺 𑀦𑁄 𑀲𑀢𑁆𑀣𑀸𑀢𑀺 𑀏𑀯𑀫𑀸𑀤𑀺𑀓𑀁 𑀯𑀘𑀦𑀁 𑀓𑀣𑁂𑀢𑁆𑀯𑀸, 𑀲𑀺𑀬𑀸 𑀔𑁄 𑀧𑀦 𑀪𑀺𑀓𑁆𑀔𑀯𑁂 𑀏𑀓𑀪𑀺𑀓𑁆𑀔𑀼𑀲𑁆𑀲𑀸𑀧𑀺 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 𑀩𑀼𑀤𑁆𑀥𑁂 𑀯𑀸 𑀥𑀫𑁆𑀫𑁂 𑀯𑀸 𑀲𑀗𑁆𑀖𑁂 𑀯𑀸 𑀫𑀕𑁆𑀕𑁂 𑀯𑀸 𑀧𑀝𑀺𑀧𑀤𑀸𑀬 𑀯𑀸𑀢𑀺 𑀏𑀯𑀫𑀸𑀤𑀺𑀦𑀸 𑀪𑀺𑀓𑁆𑀔𑀽 𑀧𑀯𑀸𑀭𑁂𑀢𑁆𑀯𑀸, 𑀳𑀦𑁆𑀤𑀤𑀸𑀦𑀺 𑀪𑀺𑀓𑁆𑀔𑀯𑁂 𑀆𑀫𑀦𑁆𑀢𑀬𑀸𑀫𑀺 𑀯𑁄, 𑀯𑀬𑀥𑀫𑁆𑀫𑀸 𑀲𑀗𑁆𑀔𑀸𑀭𑀸 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣𑀸𑀢𑀺 𑀧𑀘𑁆𑀙𑀺𑀫𑀜𑁆𑀘 𑀑𑀯𑀸𑀤𑀯𑀘𑀦𑀁 𑀪𑀺𑀓𑁆𑀔𑀽𑀦𑀁 𑀆𑀫𑀦𑁆𑀢𑁂𑀢𑁆𑀯𑀸, 𑀦𑀯 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀺𑀬𑁄 𑀅𑀦𑀼𑀮𑁄𑀫𑀁 𑀧𑀝𑀺𑀮𑁄𑀫𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸, 𑀘𑀢𑀼𑀢𑁆𑀣𑀚𑁆𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀲𑀫𑀦𑀦𑁆𑀢𑀭𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀦𑀸𑀯𑀼𑀲𑁄 ¶ 𑀆𑀦𑀦𑁆𑀤 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀲𑀜𑁆𑀜𑀸𑀯𑁂𑀤𑀬𑀺𑀢 𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄.

𑀧𑀼𑀘𑁆𑀙𑀸 𑁋 𑀫𑀳𑀸𑀲𑀼𑀤𑀲𑁆𑀲𑀦𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀧𑀼𑀭𑀺𑀫𑀤𑀺𑀯𑀲𑁂 𑀧𑀼𑀘𑁆𑀙𑀺𑀢𑀜𑁆𑀘 𑀯𑀺𑀲𑁆𑀲𑀚𑁆𑀚𑀺𑀢𑀜𑁆𑀘, 𑀚𑀦𑀯𑀲𑀪𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀦𑀸𑀢𑀺𑀓𑁂 𑀪𑀦𑁆𑀢𑁂 𑀕𑀺𑀜𑁆𑀚𑀓𑀸𑀯𑀲𑀣𑁂 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁, 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀆𑀦𑀦𑁆𑀤𑁄 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 𑀆𑀭𑀩𑁆𑀪 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀧𑀭𑀺𑀓𑀣𑀁 𑀓𑀣𑁂𑀲𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀫𑀳𑀸𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀫𑀳𑀸𑀲𑀫𑀬𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀓𑁆𑀓𑁂𑀲𑀼 𑀪𑀦𑁆𑀢𑁂 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀫𑀕𑀥𑁂𑀲𑀼 𑀪𑀦𑁆𑀢𑁂 𑀧𑀸𑀘𑀻𑀦𑀢𑁄 𑀭𑀸𑀚𑀕𑀳𑀲𑁆𑀲 𑀅𑀫𑁆𑀩𑀲𑀡𑁆𑀟𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄, 𑀢𑀲𑁆𑀲𑀼𑀢𑁆𑀢𑀭𑀢𑁄 𑀯𑁂𑀤𑀺𑀬𑀓𑁂 𑀧𑀩𑁆𑀩𑀢𑁂 𑀇𑀦𑁆𑀤𑀲𑀸𑀮𑀕𑀼𑀳𑀸𑀬𑀁 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁, 𑀲𑀓𑁆𑀓𑁄 𑀪𑀦𑁆𑀢𑁂 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑀼𑀭𑀽𑀲𑀼 𑀪𑀦𑁆𑀢𑁂 𑀓𑀫𑁆𑀫𑀸𑀲𑀥𑀫𑁆𑀫𑁂 𑀦𑀸𑀫 𑀓𑀼𑀭𑀽𑀦𑀁 𑀦𑀺𑀕𑀫𑁂 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀧𑀸𑀬𑀸𑀲𑀺 ¶ 𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑁄𑀲𑀮𑁂𑀲𑀼 𑀪𑀦𑁆𑀢𑁂 𑀲𑁂𑀢𑀩𑁆𑀬𑀸𑀦𑀸𑀫 𑀓𑁄𑀲𑀮𑀸𑀦𑀁 𑀦𑀕𑀭𑀁 𑀉𑀢𑁆𑀢𑀭𑁂𑀦 𑀲𑁂𑀢𑀩𑁆𑀬𑀁 𑀲𑀺𑀁𑀲𑀧𑀸𑀯𑀦𑁂 𑀆𑀬𑀲𑁆𑀫𑀢𑀸 𑀓𑀼𑀫𑀸𑀭𑀓𑀲𑁆𑀲𑀧𑁂𑀦 𑀧𑀸𑀬𑀸𑀲𑀺𑀁 𑀭𑀸𑀚𑀜𑁆𑀜𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁, 𑀧𑀸𑀬𑀸𑀲𑀺𑀲𑁆𑀲 𑀪𑀦𑁆𑀢𑁂 𑀭𑀸𑀚𑀜𑁆𑀜𑀲𑁆𑀲 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄𑀮𑁄𑀓𑁄 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄𑀢𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑀸𑀯𑀼𑀲𑁄 ¶ 𑀧𑀸𑀬𑀸𑀲𑀺𑀲𑁆𑀲 𑀭𑀸𑀚𑀜𑁆𑀜𑀲𑁆𑀲 𑀤𑀺𑀝𑁆𑀞𑀺𑀧𑀓𑀸𑀲𑀦𑀸𑀘 𑀆𑀬𑀲𑁆𑀫𑀢𑁄 𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀤𑀺𑀝𑁆𑀞𑀺𑀯𑀺𑀦𑀺𑀯𑁂𑀝𑁆𑀞𑀦𑀓𑀣𑀸 𑀘 𑀅𑀦𑁂𑀓𑀯𑀸𑀭𑀁 𑀆𑀕𑀢𑀸, 𑀢𑀢𑁆𑀣𑀸𑀯𑀼𑀲𑁄 𑀧𑀞𑀫𑀁 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀁 𑀓𑀣𑀁 𑀧𑀓𑀸𑀲𑁂𑀲𑀺, 𑀓𑀣𑀜𑁆𑀘𑀸𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀢𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀯𑀺𑀦𑀺𑀯𑁂𑀞𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀧𑀸𑀬𑀸𑀲𑀺 𑀪𑀦𑁆𑀢𑁂 𑀭𑀸𑀚𑀜𑁆𑀜𑁄 𑀆𑀬𑀲𑁆𑀫𑀦𑁆𑀢𑀁 𑀓𑀼𑀫𑀸𑀭𑀓𑀲𑁆𑀲𑀧𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 ‘‘𑀅𑀳𑀜𑁆𑀳𑀺 𑀪𑁄 𑀓𑀲𑁆𑀲𑀧 𑀏𑀯𑀁 𑀯𑀸𑀤𑀻 𑀏𑀯𑀁 𑀤𑀺𑀝𑁆𑀞𑀻 𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’𑀓𑀺, 𑀏𑀯𑀁 𑀔𑁄 𑀪𑀦𑁆𑀢𑁂 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑁄 𑀅𑀢𑁆𑀢𑀦𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀆𑀬𑀲𑁆𑀫𑀢𑁄 𑀓𑀼𑀫𑀸𑀭𑀓𑀲𑁆𑀲𑀧𑀲𑁆𑀲 𑀲𑀦𑁆𑀢𑀺𑀓𑁂 𑀧𑀓𑀸𑀲𑁂𑀲𑀺. 𑀆𑀬𑀲𑁆𑀫𑀸 𑀘 𑀓𑀼𑀫𑀸𑀭𑀓𑀲𑁆𑀲𑀧𑁄 𑀲𑀓𑁆𑀔𑀺𑀓𑀸𑀭𑀡𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀧𑀸𑀬𑀸𑀲𑀺𑀲𑁆𑀲 𑀭𑀸𑀚𑀜𑁆𑀜𑀲𑁆𑀲 𑀢𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀯𑀺𑀦𑀺𑀯𑁂𑀞𑁂𑀲𑀺.

𑀲𑀸𑀥𑀼 ¶ 𑀲𑀸𑀥𑀼 𑀆𑀯𑀼𑀲𑁄, 𑀲𑀸𑀥𑀼 𑀔𑁄 𑀆𑀯𑀼𑀲𑁄 𑀆𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀧𑀸𑀬𑀸𑀲𑀺𑀲𑁆𑀲 𑀭𑀸𑀚𑀜𑁆𑀜𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀲𑀤𑁆𑀥𑀫𑁆𑀫𑀯𑀺𑀫𑀼𑀔𑀺𑀪𑀽𑀢𑀲𑁆𑀲 𑀧𑀘𑁆𑀘𑀓𑁆𑀔𑀢𑁄 𑀧𑀭𑀮𑁄𑀓𑀁 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀯𑀺𑀦𑀺𑀯𑁂𑀞𑁂𑀲𑀺.

𑀧𑀼𑀘𑁆𑀙𑀸 𑁋 𑀅𑀣 𑀧𑀦𑀸𑀯𑀼𑀲𑁄 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑁄 𑀤𑀼𑀢𑀺𑀬𑀫𑁆𑀧𑀺 𑀓𑀻𑀤𑀺𑀲𑀁 𑀲𑀸𑀥𑀓𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀓𑀣𑀜𑁆𑀘𑀸𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀢𑀁 𑀫𑀺𑀘𑁆𑀙𑀸𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀤𑀼𑀢𑀺𑀬𑁂 𑀧𑀦 𑀪𑀦𑁆𑀢𑁂 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑁄 𑀅𑀢𑁆𑀢𑀦𑁄 𑀫𑀺𑀢𑁆𑀢𑀸𑀫𑀘𑁆𑀘𑁂 𑀜𑀸𑀢𑀺𑀲𑀸𑀮𑁄𑀳𑀺𑀢𑁂 𑀤𑀼𑀘𑁆𑀘𑀭𑀺𑀢𑀲𑀫𑀗𑁆𑀕𑀺𑀦𑁄 𑀓𑀸𑀮𑀁𑀓𑀢𑁂 𑀲𑀸𑀥𑀓𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀫𑀺𑀘𑁆𑀙𑀸𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺 ¶ , 𑀆𑀬𑀲𑁆𑀫𑀸 𑀘 𑀓𑀼𑀫𑀸𑀭𑀓𑀲𑁆𑀲𑀧𑁄 𑀘𑁄𑀭𑀉𑀧𑀫𑀸𑀬 𑀢𑀁 𑀫𑀺𑀘𑁆𑀙𑀸𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀲𑀸𑀥𑀼 ¶ 𑀲𑀸𑀥𑀼 𑀆𑀯𑀼𑀲𑁄, 𑀲𑀸𑀥𑀼 𑀔𑁄 𑀆𑀯𑀼𑀲𑁄 𑀬𑀁 𑀆𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀧𑀼𑀘𑁆𑀙𑀸 𑁋 𑀅𑀣 𑀧𑀦𑀸𑀯𑀼𑀲𑁄 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑁄 𑀢𑀢𑀺𑀬𑀫𑁆𑀧𑀺 𑀓𑀻𑀤𑀺𑀲𑀁 𑀲𑀸𑀥𑀓 𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀓𑀣𑀜𑁆𑀘𑀸𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀢𑀁 𑀫𑀺𑀘𑁆𑀙𑀸𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳 𑀦𑀺𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀢𑀺𑀬𑀫𑁆𑀧𑀦 ¶ 𑀪𑀦𑁆𑀢𑁂 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑁄 𑀅𑀢𑁆𑀢𑀦𑁄 𑀫𑀺𑀢𑁆𑀢𑀸𑀫𑀘𑁆𑀘𑁂 𑀜𑀸𑀢𑀺𑀲𑀸𑀮𑁄𑀳𑀺𑀢𑁂 𑀲𑀼𑀘𑀭𑀺𑀢𑀲𑀫𑀗𑁆𑀕𑀺𑀦𑁄 𑀓𑀸𑀮𑀁𑀓𑀢𑁂 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀫𑀺𑀘𑁆𑀙𑀸𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀆𑀬𑀲𑁆𑀫𑀸 𑀘 𑀓𑀼𑀫𑀸𑀭𑀓𑀲𑁆𑀲𑀧𑁄 𑀕𑀽𑀣𑀓𑀽𑀧𑁂 𑀧𑀢𑀧𑀼𑀭𑀺𑀲𑁄𑀧𑀫𑀸𑀬 𑀢𑀁 𑀫𑀺𑀘𑁆𑀙𑀸𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀧𑀼𑀘𑁆𑀙𑀸 𑁋 𑀆𑀬𑀲𑁆𑀫𑀢𑀸 𑀆𑀯𑀼𑀲𑁄 𑀓𑀼𑀫𑀸𑀭𑀓𑀲𑁆𑀲𑀧𑁂𑀦 𑀧𑀼𑀭𑀺𑀫𑀤𑀺𑀯𑀲𑁂 𑀧𑀼𑀘𑁆𑀙𑀺𑀢𑀯𑀺𑀲𑁆𑀲𑀚𑁆𑀚𑀺𑀢𑀓𑁆𑀓𑀫𑁂𑀦 𑀕𑀽𑀣𑀓𑀽𑀧𑀧𑀼𑀭𑀺𑀲𑀉𑀧𑀫𑀸𑀬 𑀫𑀺𑀘𑁆𑀙𑀸𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀥𑀫𑁆𑀫𑀯𑀸𑀤𑁂 𑀧𑀢𑀺𑀝𑁆𑀞𑀸𑀧𑀺𑀬𑀫𑀸𑀦𑁂 𑀧𑀺𑀬𑀸𑀲𑀺𑀭𑀸𑀚𑀜𑁆𑀜𑁄

𑀘𑀢𑀼𑀢𑁆𑀣𑀁 ¶ 𑀯𑀸 𑀧𑀜𑁆𑀘𑀫𑀁 𑀯𑀸 𑀓𑀻𑀤𑀺𑀲𑀁 𑀲𑀸𑀥𑀓𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀓𑀣𑀜𑁆𑀘𑀸𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀲𑀳𑀥𑀫𑁆𑀫𑁂𑀦 𑀢𑀁 𑀫𑀺𑀘𑁆𑀙𑀸𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀥𑀫𑁆𑀫𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀧𑀸𑀬𑀸𑀲𑀺 𑀪𑀦𑁆𑀢𑁂 𑀭𑀸𑀚𑀜𑁆𑀜𑁄 𑀆𑀬𑀲𑁆𑀫𑀢𑀸 𑀓𑀼𑀫𑀸𑀭𑀓𑀲𑁆𑀲𑀧𑁂𑀦 𑀕𑀽𑀣𑀓𑀽𑀧𑁂 𑀦𑀺𑀫𑀼𑀕𑁆𑀕𑀧𑀼𑀭𑀺𑀲𑁄 𑀧𑀫𑀸𑀬 𑀫𑀺𑀘𑁆𑀙𑀸𑀯𑀸𑀤𑀁 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀯𑀸𑀤𑁂 𑀧𑀢𑀺𑀝𑁆𑀞𑀸𑀧𑀺𑀢𑁂 𑀘𑀢𑀼𑀢𑁆𑀣𑀁 𑀯𑀸 𑀧𑀜𑁆𑀘𑀫𑀁 𑀯𑀸 𑀅𑀢𑁆𑀢𑀦𑁄 𑀫𑀺𑀢𑁆𑀢𑀸𑀫𑀘𑁆𑀘𑁂 𑀜𑀸𑀢𑀺𑀲𑀸𑀮𑁄𑀳𑀺𑀢𑁂 𑀲𑀫𑀸𑀤𑀺𑀦𑁆𑀦 𑀧𑀜𑁆𑀘𑀲𑀻𑀮𑁂 𑀲𑀸𑀥𑀓𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀫𑀺𑀘𑁆𑀙𑀸𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀆𑀬𑀲𑁆𑀫𑀸 𑀘 𑀓𑀼𑀫𑀸𑀭𑀓𑀲𑁆𑀲𑀧𑁄 𑀢𑀸𑀯𑀢𑀺𑀁𑀲𑀤𑁂𑀯𑁄𑀧𑀫𑀸𑀬 𑀘 𑀚𑀘𑁆𑀘𑀦𑁆𑀥𑁄𑀧𑀫𑀸𑀬 𑀘𑀸𑀢𑀺 𑀤𑁆𑀯𑀻𑀳𑀺 𑀉𑀧𑀫𑀸𑀳𑀺 𑀢𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸, 𑀥𑀫𑁆𑀫𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀲𑀸𑀥𑀼 ¶ 𑀲𑀸𑀥𑀼 𑀆𑀯𑀼𑀲𑁄, 𑀲𑀸𑀥𑀼 𑀔𑁄 𑀆𑀯𑀼𑀲𑁄 𑀬𑀁 𑀓𑀼𑀫𑀸𑀭𑀓𑀲𑁆𑀲𑀧𑁄 𑀧𑀸𑀬𑀸𑀲𑀺𑀲𑁆𑀲 𑀭𑀸𑀚𑀜𑁆𑀜𑀲𑁆𑀲 𑀤𑁆𑀯𑁂 𑀉𑀧𑀫𑀸𑀬𑁄 𑀤𑀲𑁆𑀲𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑀁 𑀧𑀸𑀧𑀓𑀁 𑀫𑀺𑀘𑁆𑀙𑀸𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀦𑀺𑀕𑁆𑀕𑀳𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀧𑀼𑀘𑁆𑀙𑀸 𑁋 𑀅𑀣 𑀧𑀦𑀸𑀯𑀼𑀲𑁄 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑁄 𑀙𑀝𑁆𑀞𑀁𑀧𑀺 𑀓𑀻𑀤𑀺𑀲𑀁 𑀲𑀸𑀥𑀓𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀓𑀣𑀜𑁆𑀘𑀸𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀲𑀳𑀥𑀫𑁆𑀫𑁂𑀦 𑀢𑀁 𑀫𑀺𑀘𑁆𑀙𑀸𑀯𑀸𑀤𑀁 𑀲𑀼𑀦𑀺𑀕𑁆𑀕𑀳𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀙𑀝𑁆𑀞𑀁 𑀧𑀦 𑀪𑀦𑁆𑀢𑁂 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑁄 𑀲𑀻𑀮𑀯𑀦𑁆𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀓𑀮𑁆𑀬𑀸𑀡𑀥𑀫𑁆𑀫𑁂 𑀚𑀻𑀯𑀺𑀢𑀼𑀓𑀸𑀫𑁂 𑀅𑀫𑀭𑀺𑀢𑀼𑀓𑀸𑀫𑁂

𑀲𑀼𑀔𑀓𑀸𑀫𑁂 ¶ 𑀤𑀼𑀓𑁆𑀔𑀧𑀝𑀺𑀓𑀽𑀮𑁂 𑀲𑀸𑀥𑀓𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀆𑀬𑀲𑁆𑀫𑀸𑀘 𑀓𑀼𑀫𑀸𑀭𑀓𑀲𑁆𑀲𑀧𑁄 𑀕𑀩𑁆𑀪𑀺𑀦𑀻 𑀉𑀧𑀫𑀸𑀬 𑀢𑀁 𑀫𑀺𑀘𑁆𑀙𑀸𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀲𑀸𑀥𑀼 ¶ 𑀲𑀸𑀥𑀼 𑀆𑀯𑀼𑀲𑁄, 𑀲𑀸𑀥𑀼 𑀔𑁄 𑀆𑀯𑀼𑀲𑁄 𑀬𑀁 𑀆𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀕𑀩𑁆𑀪𑀺𑀦𑀻𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀫𑀺𑀘𑁆𑀙𑀸𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀥𑀫𑁆𑀫𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀧𑀼𑀘𑁆𑀙𑀸 𑁋 𑀅𑀣 𑀧𑀦𑀸𑀯𑀼𑀲𑁄 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑁄 𑀲𑀢𑁆𑀢𑀫𑀁𑀧𑀺 𑀓𑀻𑀤𑀺𑀲𑀁 𑀲𑀸𑀥𑀓𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀓𑀣𑀜𑁆𑀘𑀸𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀢𑀁 𑀫𑀺𑀘𑁆𑀙𑀸𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀢𑁆𑀢𑀫𑀁 𑀧𑀦 𑀪𑀦𑁆𑀢𑁂 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑁄 𑀓𑀼𑀩𑁆𑀪𑀺𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀸𑀭𑀺𑀢𑀧𑀼𑀭𑀺𑀲𑀁 𑀲𑀸𑀥𑀓𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀆𑀬𑀲𑁆𑀫𑀸𑀘 𑀓𑀼𑀫𑀸𑀭𑀓𑀲𑁆𑀲𑀧𑁄 𑀲𑀼𑀧𑀺𑀦𑀓𑀽𑀧𑀫𑀸𑀬 𑀢𑀁 𑀫𑀺𑀘𑁆𑀙𑀸𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀲𑀸𑀥𑀼 ¶ 𑀲𑀸𑀥𑀼 𑀆𑀯𑀼𑀲𑁄, 𑀲𑀸𑀥𑀼 𑀔𑁄 𑀆𑀯𑀼𑀲𑁄 𑀬𑀁 𑀆𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀲𑀼𑀧𑀺𑀦𑀓𑀽𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑀁 𑀫𑀺𑀘𑁆𑀙𑀸𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀧𑀼𑀘𑁆𑀙𑀸 𑁋 𑀅𑀣 ¶ 𑀧𑀦𑀸𑀯𑀼𑀲𑁄 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑁄 𑀅𑀝𑁆𑀞𑀫𑀫𑁆𑀧𑀺 𑀦𑀯𑀫𑀫𑁆𑀧𑀺 𑀓𑀣𑁂𑀢𑀩𑁆𑀩𑀁 𑀓𑀣𑁂𑀢𑁆𑀯𑀸 𑀤𑀲𑀫𑀁 𑀓𑀻𑀤𑀺𑀲𑀁 𑀲𑀸𑀥𑀓𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀓𑀣𑀜𑁆𑀘𑀸𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀲𑀳𑀥𑀫𑁆𑀫𑁂𑀦 𑀢𑀁 𑀫𑀺𑀘𑁆𑀙𑀸𑀯𑀸𑀤𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀧𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀅𑀝𑁆𑀞𑀫𑀫𑁆𑀧𑀺 𑀪𑀦𑁆𑀢𑁂 𑀦𑀯𑀫𑀫𑁆𑀧𑀺 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑁄 𑀬𑀁 𑀯𑀸 𑀢𑀁 𑀯𑀸 𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀤𑀲𑀫𑀁 𑀧𑀦 𑀪𑀦𑁆𑀢𑁂 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑁄 𑀙𑀯𑀺𑀆𑀤𑀻𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀫𑀸𑀭𑀺𑀢𑀧𑀼𑀭𑀺𑀲𑀁 𑀲𑀸𑀥𑀓𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀆𑀬𑀲𑁆𑀫𑀸 𑀘 𑀓𑀼𑀫𑀸𑀭𑀓𑀲𑁆𑀲𑀧𑁄 𑀅𑀕𑁆𑀕𑀺𑀓𑀚𑀝𑀺𑀮𑁄𑀧𑀫𑀸𑀬 𑀢𑀁 𑀫𑀺𑀘𑁆𑀙𑀸𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀯𑀸𑀤𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀁 ¶ 𑀭𑀸𑀚𑀜𑁆𑀜 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁. 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀁 𑀭𑀸𑀚𑀜𑁆𑀜 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁.

𑀲𑀸𑀥𑀼 ¶ 𑀲𑀸𑀥𑀼 𑀆𑀯𑀼𑀲𑁄, 𑀲𑀸𑀥𑀼 𑀔𑁄 𑀆𑀯𑀼𑀲𑁄 𑀬𑀁 𑀆𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀑𑀧𑀸𑀬𑀺𑀓𑀁 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀧𑀸𑀧𑀺𑀓𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀧𑁂𑀲𑀺, 𑀬𑀁 𑀢𑀲𑁆𑀲 𑀪𑀯𑁂𑀬𑁆𑀬 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬.

𑀧𑀼𑀘𑁆𑀙𑀸 𑁋 𑀆𑀬𑀲𑁆𑀫𑀢𑀸 𑀆𑀯𑀼𑀲𑁄 𑀓𑀼𑀫𑀸𑀭𑀓𑀲𑁆𑀲𑀧𑁂𑀦 𑀧𑀼𑀭𑀺𑀫𑀤𑀺𑀯𑀲𑁂 𑀧𑀼𑀘𑁆𑀙𑀺𑀢𑀯𑀺𑀲𑁆𑀲𑀚𑁆𑀚𑀺𑀢𑀸𑀓𑀸𑀭𑁂𑀦 𑀧𑀸𑀬𑀸𑀲𑀺𑀲𑁆𑀲 𑀭𑀸𑀚𑀜𑁆𑀜𑀲𑁆𑀲 𑀅𑀕𑁆𑀕𑀺𑀓𑀚𑀝𑀺𑀮𑁄𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀫𑀺𑀁 𑀧𑀸𑀧𑀓𑁂 𑀤𑀺𑀝𑁆𑀞𑀺𑀕𑀢𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀧𑀺𑀢𑁂 𑀲𑁄 𑀢𑀸𑀯 𑀣𑁂𑀭𑀲𑁆𑀲 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀓𑀻𑀤𑀺𑀲𑀜𑁆𑀘 𑀧𑀘𑁆𑀘𑀦𑀻𑀓𑀓𑀣𑀁 𑀓𑀣𑁂𑀲𑀺, 𑀓𑀣𑀜𑁆𑀘 𑀣𑁂𑀭𑁄 𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑁄 𑀳𑀼𑀢𑁆𑀯𑀸 𑀅𑀧𑀭𑀫𑁆𑀧𑀺 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀧𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀧𑀸𑀬𑀸𑀲𑀺 𑀪𑀦𑁆𑀢𑁂 𑀭𑀸𑀚𑀜𑁆𑀜𑁄 𑀆𑀬𑀲𑁆𑀫𑀢𑀸 𑀓𑀼𑀫𑀸𑀭𑀓𑀲𑁆𑀲𑀧𑁂𑀦 𑀅𑀕𑁆𑀕𑀺𑀓𑀚𑀝𑀺𑀮𑁄𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀧𑀺𑀢𑁂 𑀓𑀺𑀜𑁆𑀘𑀸𑀧𑀺 𑀪𑀯𑀁 𑀓𑀲𑁆𑀲𑀧𑁄 𑀏𑀯𑀫𑀸𑀳, 𑀅𑀣 𑀔𑁄 𑀦𑁂𑀯𑀸𑀳𑀁 𑀲𑀓𑁆𑀓𑁄𑀫𑀺 𑀇𑀤𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑀼𑀦𑁆𑀢𑀺 𑀏𑀯𑀫𑀸𑀤𑀺𑀓𑀁 𑀧𑀘𑁆𑀘𑀦𑀻𑀓𑀓𑀣𑀁 𑀓𑀣𑁂𑀲𑀺, 𑀣𑁂𑀭𑁄 𑀘 𑀪𑀦𑁆𑀢𑁂 𑀓𑀼𑀫𑀸𑀭𑀓𑀲𑁆𑀲𑀧𑁄 𑀤𑁆𑀯𑁂 𑀲𑀢𑁆𑀣𑀯𑀸𑀳𑁄𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀧𑀸𑀧𑀓𑀁 𑀫𑀺𑀘𑁆𑀙𑀸𑀯𑀸𑀤𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀧𑁂𑀲𑀺.

𑀲𑀸𑀥𑀼 ¶ 𑀲𑀸𑀥𑀼 𑀆𑀯𑀼𑀲𑁄, 𑀲𑀸𑀥𑀼 𑀔𑁄 𑀆𑀯𑀼𑀲𑁄 𑀬𑀁 𑀆𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀧𑀸𑀬𑀸𑀲𑀺𑀲𑁆𑀲 𑀭𑀸𑀚𑀜𑁆𑀜𑀲𑁆𑀲 𑀤𑁆𑀯𑁂 𑀲𑀢𑁆𑀣𑀯𑀸𑀳𑁄𑀧𑀫𑀫𑁆𑀧𑀺 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀧𑁂𑀲𑀺, 𑀢𑀜𑁆𑀳𑀺 𑀢𑀲𑁆𑀲 𑀘 𑀢𑀤𑀦𑀼𑀬𑀸𑀬𑀻𑀦𑀜𑁆𑀘 𑀪𑀯𑁂𑀬𑁆𑀬 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬.

𑀧𑀼𑀘𑁆𑀙𑀸 𑁋 𑀏𑀯𑀁 ¶ 𑀧𑀦𑀸𑀯𑀼𑀲𑁄 𑀆𑀬𑀲𑁆𑀫𑀢𑀸 𑀓𑀼𑀫𑀸𑀭𑀓𑀲𑁆𑀲𑀧𑁂𑀦 𑀬𑀣𑀸 𑀯𑀼𑀢𑁆𑀢𑀸𑀳𑀺 𑀩𑀳𑀽𑀳𑀺 𑀉𑀧𑀫𑀸𑀳𑀺 𑀘 𑀅𑀧𑀭𑀸𑀳𑀺 𑀕𑀽𑀣𑀪𑀸𑀭𑀺𑀓𑀅𑀓𑁆𑀔𑀥𑀼𑀢𑁆𑀢𑀓𑁄𑀧𑀫𑀸𑀳𑀺 𑀘 𑀢𑀲𑁆𑀫𑀺𑀁 𑀧𑀸𑀧𑀓𑁂 𑀤𑀺𑀝𑁆𑀞𑀺𑀕𑀢𑁂 𑀯𑀺𑀲𑁆𑀲𑀚𑁆𑀚𑀸𑀧𑀺𑀢𑁂 𑀲𑁄 𑀢𑀸𑀯 𑀣𑁂𑀭𑀲𑁆𑀲 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸𑀯 𑀧𑀘𑁆𑀙𑀺𑀫𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀓𑀻𑀤𑀺𑀲𑀁 𑀧𑀘𑁆𑀘𑀦𑀻𑀓𑀓𑀣𑀁 𑀓𑀣𑁂𑀲𑀺, 𑀓𑀣𑀜𑁆𑀘 𑀣𑁂𑀭𑁄 𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑁄 𑀳𑀼𑀢𑁆𑀯𑀸 𑀧𑀘𑁆𑀙𑀺𑀫𑀫𑁆𑀧𑀺 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀧𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀧𑀸𑀬𑀸𑀲𑀺 𑀪𑀦𑁆𑀢𑁂 𑀭𑀸𑀚𑀜𑁆𑀜𑁄 𑀏𑀯𑀁 𑀣𑁂𑀭𑁂𑀦 𑀦𑀸𑀦𑀸𑀉𑀧𑀫𑀸𑀳𑀺 𑀢𑀲𑁆𑀫𑀺𑀁 𑀧𑀸𑀧𑀓𑁂 𑀤𑀺𑀝𑁆𑀞𑀺𑀕𑀢𑁂 𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀧𑀺𑀢𑁂𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀣𑁂𑀭𑀲𑁆𑀲 𑀧𑀘𑁆𑀘𑀦𑀻𑀓𑀓𑀣𑀁 𑀓𑀣𑁂𑀲𑀺, 𑀣𑁂𑀭𑁄𑀧𑀺 𑀘 𑀪𑀦𑁆𑀢𑁂 𑀧𑀘𑁆𑀙𑀺𑀫𑀁 𑀲𑀸𑀡𑀪𑀸𑀭𑀺𑀓𑀽𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑁄 𑀢𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀧𑁂𑀲𑀺.

𑀲𑀸𑀥𑀼 ¶ 𑀲𑀸𑀥𑀼 𑀆𑀯𑀼𑀲𑁄, 𑀲𑀸𑀥𑀼 𑀔𑁄 𑀆𑀯𑀼𑀲𑁄 𑀬𑀁 𑀆𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀧𑀸𑀬𑀸𑀲𑀺𑀲𑁆𑀲 𑀭𑀸𑀚𑀜𑁆𑀜𑀲𑁆𑀲 𑀲𑀸𑀡𑀪𑀸𑀭𑀺𑀓𑁄𑀧𑀫𑀫𑁆𑀧𑀺 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀧𑁂𑀲𑀺, 𑀢𑀜𑁆𑀳𑀺 𑀢𑀲𑁆𑀲 𑀘 𑀢𑀤𑀦𑀼𑀬𑀸𑀬𑀻𑀦𑀜𑁆𑀘 𑀪𑀯𑁂𑀬𑁆𑀬 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬.

𑀧𑀼𑀘𑁆𑀙𑀸 𑁋 𑀇𑀫𑀸𑀬 ¶ 𑀧𑀦𑀸𑀯𑀼𑀲𑁄 𑀧𑀘𑁆𑀙𑀺𑀫𑀺𑀓𑀸𑀬 𑀲𑀸𑀡𑀪𑀸𑀭𑀺𑀓𑁄𑀧𑀫𑀸𑀬 𑀤𑀲𑁆𑀲𑀺𑀢𑀸𑀬 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑁄 𑀣𑁂𑀭𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀦𑀼𑀪𑀸𑀯𑁂𑀦 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀲𑀦𑁆𑀦𑁄 𑀳𑀼𑀢𑁆𑀯𑀸 𑀓𑀻𑀤𑀺𑀲𑀁 𑀧𑀲𑀦𑁆𑀦𑀸𑀓𑀸𑀭𑀫𑀓𑀸𑀲𑀺, 𑀓𑀣𑀜𑁆𑀘 𑀆𑀬𑀲𑁆𑀫𑀦𑁆𑀢𑀁 𑀓𑀼𑀫𑀸𑀭𑀓𑀲𑁆𑀲𑀧𑀁 𑀅𑀦𑀼𑀲𑀸𑀲𑀦𑀺𑀁 𑀬𑀸𑀘𑀺, 𑀓𑀣𑀜𑁆𑀘𑀸𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀅𑀦𑀼𑀲𑀸𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀇𑀫𑀸𑀬 𑀘 𑀧𑀦 𑀪𑀦𑁆𑀢𑁂 𑀉𑀧𑀫𑀸𑀬 𑀤𑀲𑁆𑀲𑀺𑀢𑀸𑀬 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 ‘‘𑀧𑀼𑀭𑀺𑀫𑁂𑀦𑁂𑀯 𑀅𑀳𑀁 𑀑𑀧𑀫𑁆𑀫𑁂𑀦 𑀪𑁄𑀢𑁄 𑀓𑀲𑁆𑀲𑀧𑀲𑁆𑀲 𑀅𑀢𑁆𑀢𑀫𑀦𑁄 𑀅𑀪𑀺𑀭𑀤𑁆𑀥𑁄 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀆𑀬𑀲𑁆𑀫𑀢𑁄 𑀓𑀼𑀫𑀸𑀭𑀓𑀲𑁆𑀲𑀧𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀬 𑀧𑀲𑀦𑁆𑀦𑁄 𑀧𑀲𑀦𑁆𑀦𑀸𑀓𑀸𑀭𑀫𑀓𑀸𑀲𑀺. 𑀇𑀘𑁆𑀙𑀸𑀫𑀺 𑀘𑀸𑀳𑀁 𑀪𑁄 𑀓𑀲𑁆𑀲𑀧 𑀫𑀳𑀸𑀬𑀜𑁆𑀜𑀁 𑀬𑀚𑀺𑀢𑀼𑀁, 𑀅𑀦𑀼𑀲𑀸𑀲𑀢𑀼 𑀫𑀁 𑀪𑀯𑀁 𑀓𑀲𑁆𑀲𑀧𑁄 𑀬𑀁 𑀫𑀫𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸𑀢𑀺 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 𑀆𑀬𑀲𑁆𑀫𑀦𑁆𑀢𑀁 𑀓𑀼𑀫𑀸𑀭𑀓𑀲𑁆𑀲𑀧𑀁 𑀅𑀦𑀼𑀲𑀸𑀲𑀦𑀺𑀁 𑀬𑀸𑀘𑀺, 𑀆𑀬𑀲𑁆𑀫𑀸 𑀘 𑀪𑀦𑁆𑀢𑁂 𑀓𑀼𑀫𑀸𑀭𑀓𑀲𑁆𑀲𑀧𑁄 𑀤𑀼𑀓𑁆𑀔𑁂𑀢𑁆𑀢𑁂 𑀤𑀼𑀩𑁆𑀪𑀽𑀫𑁂 𑀧𑀯𑀼𑀢𑁆𑀢𑀩𑀻𑀚𑁄𑀧𑀫𑀸𑀬 𑀤𑀼𑀲𑁆𑀲𑀻𑀮𑁂𑀲𑀼 𑀤𑀺𑀦𑁆𑀦𑀤𑀸𑀦𑀲𑁆𑀲 𑀦 𑀫𑀳𑀧𑁆𑀨𑀮𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀲𑀼𑀔𑁂𑀢𑁆𑀢𑁂 𑀲𑀼𑀪𑀽𑀫𑁂 𑀧𑀯𑀼𑀢𑁆𑀢𑀩𑀻𑀚𑁄𑀧𑀫𑀸𑀬 𑀲𑀻𑀮𑀯𑀦𑁆𑀢𑁂𑀲𑀼 𑀤𑀺𑀦𑁆𑀦𑀤𑀸𑀦𑀲𑁆𑀲 𑀫𑀳𑀧𑁆𑀨𑀮𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀧𑀸𑀬𑀸𑀲𑀺𑀁 𑀭𑀸𑀚𑀜𑁆𑀜𑀫𑀦𑀼𑀲𑀸𑀲𑀺.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑁄 𑀤𑀸𑀦𑀁 𑀅𑀤𑀸𑀲𑀺, 𑀓𑀣𑀜𑁆𑀘𑀲𑁆𑀲 𑀲𑀫𑁆𑀧𑀭𑀸𑀬𑁄 𑀅𑀳𑁄𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀧𑀸𑀬𑀸𑀲𑀺 𑀪𑀦𑁆𑀢𑁂 𑀭𑀸𑀚𑀜𑁆𑀜𑁄 𑀅𑀲𑀓𑁆𑀓𑀘𑁆𑀘𑀁 𑀤𑀸𑀦𑀫𑀤𑀸𑀲𑀺, 𑀅𑀲𑀳𑀢𑁆𑀣𑀸 𑀤𑀸𑀦𑀫𑀤𑀸𑀲𑀺, 𑀅𑀘𑀺𑀢𑁆𑀢𑀻𑀓𑀢𑀁 𑀤𑀸𑀦𑀫𑀤𑀸𑀲𑀺, 𑀅𑀧𑀯𑀺𑀤𑁆𑀥𑀁 𑀤𑀸𑀦𑀫𑀤𑀸𑀲𑀺, 𑀲𑁄 𑀅𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀤𑀢𑁆𑀯𑀸 𑀅𑀲𑀳𑀢𑁆𑀣𑀸 𑀤𑀸𑀦𑀁 𑀤𑀢𑁆𑀯𑀸 𑀅𑀘𑀺𑀢𑁆𑀢𑀻𑀓𑀢𑀁 𑀤𑀸𑀦𑀁 𑀤𑀢𑁆𑀯𑀸 𑀅𑀧𑀯𑀺𑀤𑁆𑀥𑀁 𑀤𑀸𑀦𑀁 𑀤𑀢𑁆𑀯𑀸 𑀓𑀸𑀬𑀲𑁆𑀲𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺 𑀲𑀼𑀜𑁆𑀜𑀁 𑀲𑁂𑀭𑀻𑀲𑀓𑀁 𑀯𑀺𑀫𑀸𑀦𑀁.

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 ¶ 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀸𑀣𑀺𑀬𑀯𑀕𑁆𑀕𑁂 𑀧𑀞𑀫𑀁 𑀧𑀸𑀣𑀺𑀬𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀫𑀮𑁆𑀮𑁂𑀲𑀼 𑀪𑀦𑁆𑀢𑁂 𑀅𑀦𑀼𑀧𑀺𑀬𑁂 𑀦𑀸𑀫 𑀫𑀮𑁆𑀮𑀸𑀦𑀁 𑀦𑀺𑀕𑀫𑁂 𑀪𑀕𑁆𑀕𑀯𑀕𑁄𑀢𑁆𑀢𑀁 𑀧𑀭𑀺𑀩𑁆𑀩𑀸𑀚𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁, 𑀪𑀕𑁆𑀕𑀯𑀕𑁄𑀢𑁆𑀢𑁄 𑀪𑀦𑁆𑀢𑁂 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀧𑀼𑀭𑀺𑀫𑀸𑀦𑀺 𑀪𑀦𑁆𑀢𑁂 𑀤𑀺𑀯𑀲𑀸𑀦𑀺 𑀧𑀼𑀭𑀺𑀫𑀢𑀭𑀸𑀦𑀺 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀏𑀢𑀤𑀯𑁄𑀘 ‘‘𑀧𑀘𑁆𑀘𑀓𑁆𑀔𑀸𑀢𑁄 𑀤𑀸𑀦𑀺 𑀫𑀬𑀸 𑀪𑀕𑁆𑀕𑀯 𑀪𑀕𑀯𑀸, 𑀦 𑀤𑀸𑀦𑀸𑀳𑀁 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀭𑀸𑀫𑀻’𑀢𑀺, 𑀓𑀘𑁆𑀘𑁂 𑀢𑀁 𑀪𑀦𑁆𑀢𑁂 𑀢𑀣𑁂𑀯, 𑀬𑀣𑀸 𑀲𑀼𑀦𑀓𑁆𑀔𑀢𑁆𑀢𑁄, 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀅𑀯𑀘𑀸’’𑀢𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀉𑀤𑀼𑀫𑁆𑀩𑀭𑀺𑀓𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀦𑀺𑀕𑁆𑀭𑁄𑀥𑀁 𑀧𑀭𑀺𑀩𑁆𑀩𑀸𑀚𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁, 𑀦𑀺𑀕𑁆𑀭𑁄𑀥𑁄 𑀪𑀦𑁆𑀢𑁂 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀢𑁄 𑀧𑀭𑀫𑁆𑀫𑀼𑀔𑀸 𑀪𑀕𑀯𑀦𑁆𑀢𑀁𑀬𑁂𑀯 𑀆𑀭𑀩𑁆𑀪 𑀅𑀦𑁂𑀓𑀯𑀺𑀳𑀺𑀢𑀁 𑀅𑀪𑀽𑀢𑀓𑀣𑀁 𑀓𑀣𑁂𑀲𑀺, 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀘𑀓𑁆𑀓𑀯𑀢𑁆𑀢𑀺𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀫𑀕𑀥𑁂𑀲𑀼 𑀪𑀦𑁆𑀢𑁂 𑀫𑀸𑀢𑀼𑀮𑀸𑀬𑀁 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀅𑀢𑁆𑀢𑀚𑁆𑀛𑀸𑀲𑀬𑁂𑀦 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁂𑀦 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂 𑀯𑀸𑀲𑁂𑀝𑁆𑀞𑀁 𑀧𑀩𑁆𑀩𑀚𑀺𑀢𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁, 𑀩𑁆𑀭𑀸𑀳𑁆𑀫𑀡𑀸 𑀪𑀦𑁆𑀢𑁂 𑀯𑀸𑀲𑁂𑀝𑁆𑀞 𑀪𑀸𑀭𑀤𑁆𑀯𑀸𑀚𑁂 𑀧𑀩𑁆𑀩𑀚𑀺𑀢𑁂 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺 𑀅𑀢𑁆𑀢𑀭𑀽𑀧𑀸𑀬

𑀧𑀭𑀺𑀪𑀸𑀲𑀸𑀬 ¶ 𑀧𑀭𑀺𑀧𑀼𑀡𑁆𑀡𑀸𑀬 𑀦𑁄 𑀅𑀧𑀭𑀺𑀧𑀼𑀡𑁆𑀡𑀸𑀬, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀲𑀫𑁆𑀧𑀲𑀸𑀤𑀦𑀻𑀬 𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀓𑀢𑁆𑀣 𑀓𑁂𑀦 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀦𑀸𑀴𑀦𑁆𑀤𑀸𑀬𑀁 𑀪𑀦𑁆𑀢𑁂 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑁂 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀧𑀸𑀲𑀸𑀤𑀺𑀓𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀓𑁆𑀓𑁂𑀲𑀼 𑀪𑀦𑁆𑀢𑁂 𑀯𑁂𑀥𑀜𑁆𑀜𑀸𑀦𑀸𑀫 𑀲𑀓𑁆𑀬𑀸𑀦𑀁 𑀅𑀫𑁆𑀩𑀯𑀦𑁂 𑀧𑀸𑀲𑀸𑀤𑁂 𑀘𑀼𑀦𑁆𑀤𑀁 𑀲𑀫𑀡𑀼𑀤𑁆𑀤𑁂𑀲𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁, 𑀘𑀼𑀦𑁆𑀤𑁄 𑀪𑀦𑁆𑀢𑁂 𑀲𑀫𑀡𑀼𑀤𑁆𑀤𑁂𑀲𑁄 𑀧𑀸𑀯𑀸𑀬𑀁 𑀦𑀺𑀕𑀡𑁆𑀞𑀲𑁆𑀲 𑀦𑀸𑀝𑀧𑀼𑀢𑁆𑀢𑀲𑁆𑀲 𑀓𑀸𑀮𑀁 𑀓𑀺𑀭𑀺𑀬𑀸𑀬 𑀪𑀺𑀦𑁆𑀦𑀸𑀦𑀁 𑀦𑀺𑀕𑀡𑁆𑀞𑀸𑀦𑀁 𑀤𑁆𑀯𑁂𑀥𑀺𑀓𑀚𑀸𑀢𑀸𑀦𑀁 𑀪𑀡𑁆𑀟𑀦𑀚𑀸𑀢𑀸𑀦𑀁 𑀓𑀮𑀳𑀚𑀸𑀢𑀸𑀦𑀁 𑀯𑀺𑀯𑀸𑀤𑀸𑀧𑀦𑁆𑀦𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀢𑀼𑀚𑁆𑀚𑀦𑀓𑀸𑀭𑀡𑀁 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀆𑀭𑁄𑀘𑁂𑀲𑀺, 𑀆𑀬𑀲𑁆𑀫𑀸 𑀘 𑀪𑀦𑁆𑀢𑁂 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀮𑀓𑁆𑀔𑀡𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀲𑀺𑀗𑁆𑀕𑀸𑀮𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀲𑀺𑀗𑁆𑀕𑀸𑀮𑀁 𑀕𑀳𑀧𑀢𑀺𑀧𑀼𑀢𑁆𑀢𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁, 𑀲𑀺𑀗𑁆𑀕𑀸𑀮𑁄 𑀪𑀦𑁆𑀢𑁂 𑀕𑀳𑀧𑀢𑀺𑀧𑀼𑀢𑁆𑀢𑁄 𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀸𑀬 𑀭𑀸𑀚𑀕𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀮𑁆𑀮𑀯𑀢𑁆𑀣𑁄 𑀅𑀮𑁆𑀮𑀓𑁂𑀲𑁄 𑀧𑀜𑁆𑀚𑀮𑀺𑀓𑁄 𑀧𑀼𑀣𑀼𑀤𑀺𑀲𑀸 𑀦𑀫𑀲𑁆𑀲𑀢𑀺 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀤𑀓𑁆𑀔𑀺𑀡𑀁 𑀤𑀺𑀲𑀁 𑀧𑀘𑁆𑀙𑀺𑀫𑀁 𑀤𑀺𑀲𑀁 𑀉𑀢𑁆𑀢𑀭𑀁 𑀤𑀺𑀲𑀁 𑀳𑁂𑀝𑁆𑀞𑀺𑀫𑀁 𑀤𑀺𑀲𑀁 𑀉𑀧𑀭𑀺𑀫𑀁 𑀤𑀺𑀲𑀁, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀆𑀝𑀸𑀦𑀸𑀝𑀺𑀬𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 ¶ 𑀪𑀦𑁆𑀢𑁂 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀪𑀸𑀲𑀺𑀢𑀁, 𑀪𑀕𑀯𑀢𑀺 𑀪𑀦𑁆𑀢𑁂 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀘𑀢𑀼𑀤𑁆𑀤𑀺𑀲𑀁 𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀘𑀢𑀼𑀤𑁆𑀤𑀺𑀲𑀁 𑀕𑀼𑀫𑁆𑀩𑀁 𑀞𑀧𑁂𑀢𑁆𑀯𑀸 𑀘𑀢𑀼𑀤𑁆𑀤𑀺𑀲𑀁 𑀑𑀯𑀭𑀡𑀁 𑀞𑀧𑁂𑀢𑁆𑀯𑀸 𑀓𑁂𑀯𑀮𑀓𑀧𑁆𑀧𑀁 𑀕𑀺𑀚𑁆𑀛𑀓𑀽𑀝𑀧𑀩𑁆𑀩𑀢𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀪𑀦𑁆𑀢𑁂 𑀯𑁂𑀲𑁆𑀲𑀯𑀡𑁄 𑀫𑀳𑀸𑀭𑀸𑀚𑀸 𑀆𑀝𑀸𑀦𑀸𑀝𑀺𑀬𑀁 𑀭𑀓𑁆𑀔𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀲𑀗𑁆𑀕𑀻𑀢𑀺 ¶ 𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀓𑀢𑁆𑀣 𑀓𑁂𑀦 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀧𑀸𑀯𑀸𑀬𑀁 𑀪𑀦𑁆𑀢𑁂 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀤𑀲𑀼𑀢𑁆𑀢𑀭𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀓𑀢𑁆𑀣 𑀓𑁂𑀦 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀤𑀲𑀼𑀢𑁆𑀢𑀭𑀲𑀼𑀢𑁆𑀢𑀁 𑀪𑀦𑁆𑀢𑁂 𑀘𑀫𑁆𑀧𑀸𑀬𑀁 𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑁂 ¶ 𑀆𑀯𑀼𑀲𑁄 𑀲𑀺𑀓𑁆𑀔𑀦𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑁂𑀓𑁆𑀔𑀸 𑀘 𑀪𑀦𑁆𑀢𑁂 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀸 𑀘 𑀲𑀺𑀓𑁆𑀔𑀦𑁆𑀢𑀺.

𑀧𑀼𑀘𑁆𑀙𑀸 𑁋 𑀓𑁂 𑀆𑀯𑀼𑀲𑁄 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀅𑀭𑀳𑀦𑁆𑀢𑁄 𑀪𑀦𑁆𑀢𑁂 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸.

𑀧𑀼𑀘𑁆𑀙𑀸 𑁋 𑀓𑀲𑁆𑀲 ¶ 𑀆𑀯𑀼𑀲𑁄 𑀯𑀘𑀦𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀪𑀕𑀯𑀢𑁄 𑀪𑀦𑁆𑀢𑁂 𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀧𑀼𑀘𑁆𑀙𑀸 𑁋 𑀓𑁂𑀦𑀸𑀯𑀼𑀲𑁄 𑀆𑀪𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀧𑀭𑀫𑁆𑀧𑀭𑀸𑀬 𑀪𑀦𑁆𑀢𑁂 𑀆𑀪𑀢𑀁.