𑀅𑀜𑁆𑀜 > 𑀲𑀗𑁆𑀕𑀸𑀬𑀦-𑀧𑀼𑀘𑁆𑀙 𑀯𑀺𑀲𑁆𑀲𑀚𑁆𑀚𑀦𑀸

𑀧𑀼𑀘𑁆𑀙𑀸 𑁋 𑀧𑀞𑀫𑀫𑀳𑀸𑀲𑀁𑀕𑀻𑀢𑀺𑀓𑀸𑀮𑁂 ¶ 𑀆𑀯𑀼𑀲𑁄 𑀥𑀫𑁆𑀫𑀲𑀁𑀕𑀸𑀳𑀓𑀸 𑀫𑀳𑀸𑀓𑀲𑁆𑀲𑀧𑀸𑀤𑀬𑁄 𑀫𑀳𑀸𑀣𑁂𑀭𑀯𑀭𑀸 𑀧𑁄𑀭𑀸𑀡𑀲𑀁𑀕𑀻𑀢𑀺𑀓𑀸𑀭𑀸 𑀧𑀞𑀫𑀁 𑀯𑀺𑀦𑀬𑀧𑀺𑀝𑀓𑀁 𑀲𑀁𑀕𑀸𑀬𑀺𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀲𑀁𑀕𑀸𑀬𑀦𑁆𑀢𑀸 𑀤𑀻𑀖𑀦𑀺𑀓𑀸𑀬𑀜𑁆𑀘 𑀫𑀚𑁆𑀛𑀺𑀫𑀦𑀺𑀓𑀸𑀬𑀜𑁆𑀘 𑀲𑀁𑀕𑀸𑀬𑀺𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀓𑀺𑀁𑀦𑀸𑀫 𑀧𑀸𑀯𑀘𑀦𑀁 𑀲𑀁𑀕𑀸𑀬𑀺𑀁𑀲𑀼.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀧𑀞𑀫𑀫𑀳𑀸𑀲𑀁𑀕𑀻𑀢𑀺𑀓𑀸𑀮𑁂 𑀪𑀦𑁆𑀢𑁂 𑀥𑀫𑁆𑀫𑀲𑀁𑀕𑀸𑀳𑀓𑀸 𑀫𑀳𑀸𑀓𑀲𑁆𑀲𑀧𑀸𑀤𑀬𑁄 𑀧𑁄𑀭𑀸𑀡𑀣𑁂𑀭𑀯𑀭𑀸 𑀧𑀞𑀫𑀁 𑀯𑀺𑀦𑀬𑀧𑀺𑀝𑀓𑀁 𑀲𑀁𑀕𑀸𑀬𑀺𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀲𑀁𑀕𑀸𑀬𑀦𑁆𑀢𑀸 𑀤𑀻𑀖𑀦𑀺𑀓𑀸𑀬𑀜𑁆𑀘 𑀫𑀚𑁆𑀛𑀺𑀫𑀦𑀺𑀓𑀸𑀬𑀜𑁆𑀘 𑀲𑀁𑀕𑀸𑀬𑀺𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀲𑀢𑁆𑀢𑀳𑀺 𑀘 𑀲𑀼𑀢𑁆𑀢𑀲𑀳𑀲𑁆𑀲𑁂𑀳𑀺 𑀲𑀢𑁆𑀢𑀳𑀺 𑀘 𑀲𑀼𑀢𑁆𑀢𑀲𑀢𑁂𑀳𑀺 𑀤𑁆𑀯𑀸𑀲𑀝𑁆𑀞𑀺𑀬𑀸 𑀘 𑀲𑀼𑀢𑁆𑀢𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑀁 𑀪𑀸𑀡𑀯𑀸𑀭𑀲𑀢𑀧𑀭𑀺𑀫𑀸𑀡𑀁 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀁 𑀦𑀸𑀫 𑀧𑀸𑀯𑀘𑀦𑀁 𑀲𑀁𑀕𑀸𑀬𑀺𑀁𑀲𑀼.

𑀧𑀼𑀘𑁆𑀙𑀸 𑁋 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂 ¶ 𑀘 𑀆𑀯𑀼𑀲𑁄 𑀲𑀕𑀸𑀣𑀸𑀯𑀕𑁆𑀕𑁄 𑀦𑀺𑀤𑀸𑀦𑀯𑀕𑁆𑀕𑁄 𑀔𑀦𑁆𑀥𑀯𑀕𑁆𑀕𑁄 𑀲𑀴𑀸𑀬𑀢𑀦𑀯𑀕𑁆𑀕𑁄 𑀫𑀳𑀸𑀯𑀕𑁆𑀕𑁄𑀢𑀺 𑀧𑀜𑁆𑀘𑀲𑀁𑀬𑀼𑀢𑁆𑀢𑀧𑁆𑀧𑀓𑀭𑀡𑀸𑀦𑀺, 𑀢𑁂𑀲𑀼 𑀧𑀞𑀫𑀁 𑀓𑀢𑀭𑀁 𑀲𑀁𑀬𑀼𑀢𑁆𑀢𑀧𑁆𑀧𑀓𑀭𑀡𑀁 𑀢𑁂 𑀲𑀁𑀕𑀸𑀬𑀺𑀁𑀲𑀼.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀧𑀜𑁆𑀘𑀲𑀼 𑀪𑀦𑁆𑀢𑁂 𑀲𑀁𑀬𑀼𑀢𑁆𑀢𑀧𑁆𑀧𑀓𑀭𑀡𑁂𑀲𑀼 𑀧𑀞𑀫𑀁 𑀲𑀕𑀸𑀣𑀸𑀯𑀕𑁆𑀕𑀲𑀁𑀬𑀼𑀢𑁆𑀢𑀧𑁆𑀧𑀓𑀭𑀡𑀁 𑀲𑀁𑀕𑀸𑀬𑀺𑀁𑀲𑀼.

𑀧𑀼𑀘𑁆𑀙𑀸 𑁋 𑀲𑀕𑀸𑀣𑀸𑀯𑀕𑁆𑀕𑁂𑀧𑀺 ¶ 𑀆𑀯𑀼𑀲𑁄 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀸𑀤𑀺𑀯𑀲𑁂𑀦 𑀏𑀓𑀸𑀤𑀲𑀲𑀁𑀬𑀼𑀢𑁆𑀢𑀸𑀦𑀺, 𑀢𑁂𑀲𑀼 𑀧𑀞𑀫𑀁 𑀓𑀢𑀭𑀁 𑀲𑀁𑀬𑀼𑀢𑁆𑀢𑀁 𑀢𑁂 𑀲𑀁𑀕𑀸𑀬𑀺𑀁𑀲𑀼.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀓𑀸𑀤𑀲𑀲𑀼 𑀪𑀦𑁆𑀢𑁂 𑀲𑀁𑀬𑀼𑀢𑁆𑀢𑁂𑀲𑀼 𑀧𑀞𑀫𑀁 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀁 𑀲𑀁𑀕𑀸𑀬𑀺𑀁𑀲𑀼.

𑀧𑀼𑀘𑁆𑀙𑀸 𑁋 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑁂𑀧𑀺 𑀆𑀯𑀼𑀲𑁄 𑀦𑀴𑀯𑀕𑁆𑀕𑀸𑀤𑀬𑁄 𑀅𑀝𑁆𑀞 𑀯𑀕𑁆𑀕𑀸, 𑀑𑀖𑀢𑀭𑀡𑀲𑀼𑀢𑁆𑀢𑀸𑀤𑀻𑀦𑀺 𑀘 𑀏𑀓𑀸𑀲𑀻𑀢𑀺 𑀲𑀼𑀢𑁆𑀢𑀸𑀦𑀺, 𑀢𑁂𑀲𑀼 𑀧𑀞𑀫𑀁 𑀓𑀢𑀭𑀁 𑀯𑀕𑁆𑀕𑀁 𑀓𑀢𑀭𑀜𑁆𑀘 𑀲𑀼𑀢𑁆𑀢𑀁 𑀲𑀕𑀸𑀬𑀺𑀁𑀲𑀼.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀅𑀝𑁆𑀞𑀲𑀼 𑀪𑀦𑁆𑀢𑁂 𑀯𑀕𑁆𑀕𑁂𑀲𑀼 𑀧𑀞𑀫𑀁 𑀦𑀴𑀯𑀕𑁆𑀕𑀁 𑀏𑀓𑀸𑀲𑀻𑀢𑀺𑀬𑀸 𑀘 𑀲𑀼𑀢𑁆𑀢𑁂𑀲𑀼 𑀧𑀞𑀫𑀁 𑀑𑀖𑀢𑀭𑀡𑀲𑀼𑀢𑁆𑀢𑀁 𑀲𑀁𑀕𑀸𑀬𑀺𑀁𑀲𑀼.

𑀲𑀸𑀥𑀼 ¶ 𑀲𑀸𑀥𑀼 𑀆𑀯𑀼𑀲𑁄, 𑀫𑀬𑀫𑁆𑀧𑀺 𑀤𑀸𑀦𑀺 𑀢𑀢𑁄𑀬𑁂𑀯 𑀧𑀝𑁆𑀞𑀸𑀬 𑀲𑀁𑀕𑀻𑀢𑀺𑀧𑀼𑀩𑁆𑀩𑀗𑁆𑀕𑀫𑀸𑀦𑀺 𑀧𑀼𑀘𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀓𑀺𑀘𑁆𑀘𑀸𑀦𑀺 𑀆𑀯𑀳𑀺𑀢𑀼𑀁 𑀲𑀫𑀸𑀭𑀪𑀸𑀭.

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀑𑀖𑀢𑀭𑀡𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀅𑀜𑁆𑀜𑀢𑀭𑀁 𑀤𑁂𑀯𑀢𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁, 𑀅𑀜𑁆𑀜𑀢𑀭𑀸 𑀪𑀦𑁆𑀢𑁂 𑀤𑁂𑀯𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺, 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀓𑀣𑀁 𑀦𑀼 𑀢𑁆𑀯𑀁 𑀫𑀸𑀭𑀺𑀲 𑀑𑀖𑀫𑀢𑀭𑀻’’𑀢𑀺,

𑀢𑀲𑁆𑀫𑀺𑀁 ¶ 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀅𑀧𑀢𑀺𑀝𑁆𑀞𑀁 𑀔𑁆𑀯𑀸𑀳𑀁 𑀆𑀯𑀼𑀲𑁄 𑀅𑀦𑀸𑀬𑀽𑀳𑀁 𑀑𑀖𑀫𑀢𑀭𑀺𑀁’’𑀢𑀺, 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀅𑀘𑁆𑀘𑁂𑀦𑁆𑀢𑀺𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀅𑀜𑁆𑀜𑀢𑀭𑀁 𑀤𑁂𑀯𑀢𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀅𑀜𑁆𑀜𑀢𑀭𑀸 𑀪𑀦𑁆𑀢𑁂 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑁋

‘‘𑀅𑀘𑁆𑀘𑁂𑀦𑁆𑀢𑀺 𑀓𑀸𑀮𑀸 𑀢𑀭𑀬𑀦𑁆𑀢𑀺 𑀭𑀢𑁆𑀢𑀺𑀬𑁄,

𑀯𑀬𑁄𑀕𑀼𑀡𑀸 𑀅𑀦𑀼𑀧𑀼𑀩𑁆𑀩𑀁 𑀚𑀳𑀦𑁆𑀢𑀺,

𑀏𑀢𑀁 𑀪𑀬𑀁 𑀫𑀭𑀡𑁂 𑀧𑁂𑀓𑁆𑀔𑀫𑀸𑀦𑁄,

𑀧𑀼𑀜𑁆𑀜𑀸𑀦𑀺 𑀓𑀬𑀺𑀭𑀸𑀣 𑀲𑀼𑀔𑀸𑀯𑀳𑀸𑀦𑀻’’𑀢𑀺𑁋

𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑁋

‘‘𑀅𑀘𑁆𑀘𑁂𑀦𑁆𑀢𑀺 𑀓𑀸𑀮𑀸 𑀢𑀭𑀬𑀦𑁆𑀢𑀺 𑀭𑀢𑁆𑀢𑀺𑀬𑁄,

𑀯𑀬𑁄𑀕𑀼𑀡𑀸 𑀅𑀦𑀼𑀧𑀼𑀩𑁆𑀩𑀁 𑀚𑀳𑀦𑁆𑀢𑀺,

𑀏𑀢𑀁 𑀪𑀬𑀁 𑀫𑀭𑀡𑁂 𑀧𑁂𑀓𑁆𑀔𑀫𑀸𑀦𑁄,

𑀮𑁄𑀓𑀸𑀫𑀺𑀲𑀁 𑀧𑀚𑀳𑁂 𑀲𑀦𑁆𑀢𑀺𑀧𑁂𑀓𑁆𑀔𑁄’’𑀢𑀺 𑁋

𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀲𑀢𑁆𑀢𑀺𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀅𑀜𑁆𑀜𑀢𑀭𑀁 𑀤𑁂𑀯𑀢𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁, 𑀅𑀜𑁆𑀜𑀢𑀭𑀸 𑀪𑀦𑁆𑀢𑁂 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑁋

‘‘𑀲𑀢𑁆𑀢𑀺𑀬𑀸 𑀯𑀺𑀬 𑀑𑀫𑀝𑁆𑀞𑁄, 𑀟𑀬𑁆𑀳𑀫𑀸𑀦𑁄𑀯 𑀫𑀢𑁆𑀣𑀓𑁂;

𑀓𑀸𑀫𑀭𑀸𑀕𑀧𑁆𑀧𑀳𑀸𑀦𑀸𑀬, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂’’𑀢𑀺𑁋

𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

𑀲𑀢𑁆𑀢𑀺𑀬𑀸 ¶ 𑀯𑀺𑀬 𑀑𑀫𑀝𑁆𑀞𑁄 𑀟𑀬𑁆𑀳𑀫𑀸𑀦𑁄𑀯 𑀫𑀢𑁆𑀣𑀓𑁂;

𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑁆𑀧𑀳𑀸𑀦𑀸𑀬, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂𑀢𑀺;

𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀲𑀢𑁆𑀢𑀺𑀬𑀸 𑀯𑀺𑀬 𑀑𑀫𑀝𑁆𑀞𑁄, 𑀟𑀬𑁆𑀳𑀫𑀸𑀦𑁄𑀯 𑀫𑀢𑁆𑀣𑀓𑁂;

𑀓𑀸𑀫𑀭𑀸𑀕𑀧𑁆𑀧𑀳𑀸𑀦𑀸𑀬, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂 𑁋

𑀲𑀢𑁆𑀢𑀺𑀬𑀸 ¶ 𑀯𑀺𑀬 𑀑𑀫𑀝𑁆𑀞𑁄, 𑀟𑀬𑁆𑀳𑀫𑀸𑀦𑁄𑀯 𑀫𑀢𑁆𑀣𑀓𑁂,

𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑁆𑀧𑀫𑀸𑀦𑀸𑀬, 𑀲𑀢𑁄 𑀪𑀺𑀓𑁆𑀔𑀼 𑀧𑀭𑀺𑀩𑁆𑀩𑀚𑁂 𑁋

𑀧𑀼𑀘𑁆𑀙𑀸 𑁋 𑀚𑀝𑀸𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀅𑀜𑁆𑀜𑀢𑀭𑀁 𑀤𑁂𑀯𑀢𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁, 𑀅𑀜𑁆𑀜𑀢𑀭𑀸 𑀪𑀦𑁆𑀢𑁂 𑀤𑁂𑀯𑀢𑀸 𑀪𑀯𑀕𑀦𑁆𑀢𑀁 𑀏𑀢𑀤𑀯𑁄𑀘𑁋

‘‘𑀅𑀦𑁆𑀢𑁄 𑀚𑀝𑀸 𑀩𑀳𑀺𑀚𑀝𑀸, 𑀚𑀝𑀸𑀬 𑀚𑀝𑀺𑀢𑀸 𑀧𑀚𑀸;

𑀢𑀁 𑀢𑀁 𑀕𑁄𑀢𑀫 𑀧𑀼𑀘𑁆𑀙𑀸𑀫𑀺, 𑀓𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝’’𑀦𑁆𑀢𑀺𑁋

𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑁋

𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄, 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬𑀁;

𑀆𑀢𑀸𑀧𑀻 𑀦𑀺𑀧𑀓𑁄 𑀪𑀺𑀓𑁆𑀔𑀼, 𑀲𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝𑀁.

𑀬𑁂𑀲𑀁 ¶ 𑀭𑀸𑀕𑁄 𑀘 𑀤𑁄𑀲𑁄 𑀘, 𑀅𑀯𑀺𑀚𑁆𑀚𑀸 𑀘 𑀯𑀺𑀭𑀸𑀚𑀺𑀢𑀸;

𑀔𑀻𑀡𑀸𑀲𑀯𑀸 𑀅𑀭𑀳𑀦𑁆𑀢𑁄, 𑀢𑁂𑀲𑀁 𑀯𑀺𑀚𑀝𑀺𑀢𑀸 𑀚𑀝𑀸𑀢𑀺;

𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀲𑀻𑀮𑁂 ¶ 𑀧𑀢𑀺𑀝𑁆𑀞𑀸𑀬 𑀦𑀭𑁄 𑀲𑀧𑀜𑁆𑀜𑁄, 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬𑀁;

𑀆𑀢𑀸𑀧𑀻 𑀦𑀺𑀧𑀓𑁄 𑀪𑀺𑀓𑁆𑀔𑀼, 𑀲𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝𑀁𑁋

𑀬𑁂𑀲𑀁 𑀭𑀸𑀕𑁄 𑀘 𑀤𑁄𑀲𑁄 𑀘, 𑀅𑀯𑀺𑀚𑁆𑀚𑀸 𑀘 𑀯𑀺𑀭𑀸𑀚𑀺𑀢𑀸;

𑀔𑀻𑀡𑀸𑀲𑀯𑀸 𑀅𑀭𑀳𑀦𑁆𑀢𑁄, 𑀢𑁂𑀲𑀁 𑀯𑀺𑀚𑀝𑀺𑀢𑀸 𑀚𑀝𑀸𑁋

𑀬𑀢𑁆𑀣 ¶ 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺;

𑀧𑀝𑀺𑀖𑀁 𑀭𑀽𑀧𑀲𑀜𑁆𑀜𑀸 𑀘, 𑀏𑀢𑁆𑀣𑁂𑀲𑀸 𑀙𑀺𑀚𑁆𑀚𑀢𑁂 𑀚𑀝𑀸.

𑀧𑀼𑀘𑁆𑀙𑀸 𑁋 𑀅𑀘𑁆𑀙𑀭𑀸𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀅𑀜𑁆𑀜𑀢𑀭𑀁 𑀤𑁂𑀯𑀧𑀼𑀢𑁆𑀢𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀅𑀜𑁆𑀜𑀢𑀭𑁄 𑀪𑀦𑁆𑀢𑁂 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑁋

‘‘𑀅𑀘𑁆𑀙𑀭𑀸𑀕𑀡𑀲𑀗𑁆𑀖𑀝𑁆𑀞𑀁, 𑀧𑀺𑀲𑀸𑀘 𑀕𑀡𑀲𑁂𑀯𑀺𑀢𑀁;

𑀯𑀦𑀦𑁆𑀢𑀁 𑀫𑁄𑀳𑀦𑀁 𑀦𑀸𑀫, 𑀓𑀣𑀁 𑀬𑀸𑀢𑁆𑀭𑀸 𑀪𑀯𑀺𑀲𑁆𑀲𑀢𑀻’’𑀢𑀺.

𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

‘‘𑀉𑀚𑀼𑀓𑁄 𑀦𑀸𑀫 𑀲𑁄 𑀫𑀕𑁆𑀕𑁄, 𑀅𑀪𑀬𑀸 𑀦𑀸𑀫 𑀲𑀸 𑀤𑀺𑀲𑀸,

𑀭𑀣𑁄 𑀅𑀓𑀽𑀚𑀦𑁄 𑀦𑀸𑀫, 𑀥𑀫𑁆𑀫𑀘𑀓𑁆𑀓𑁂𑀳𑀺 𑀲𑀁𑀬𑀼𑀢𑁄.

𑀳𑀺𑀭𑀻 ¶ 𑀢𑀲𑁆𑀲 𑀅𑀧𑀸𑀮𑀫𑁆𑀩𑁄, 𑀲𑀢𑁆𑀬𑀲𑁆𑀲 𑀧𑀭𑀺𑀯𑀸𑀭𑀡𑀁;

𑀥𑀫𑁆𑀫𑀸𑀳𑀁 𑀲𑀸𑀭𑀣𑀺𑀁 𑀩𑁆𑀭𑀽𑀫𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀼𑀭𑁂𑀚𑀯𑀁.

𑀬𑀲𑁆𑀲 𑀏𑀢𑀸𑀤𑀺𑀲𑀁 𑀬𑀸𑀦𑀁, 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀲𑁆𑀲 𑀯𑀸;

𑀲 𑀯𑁂 𑀏𑀢𑁂𑀦 𑀬𑀸𑀦𑁂𑀦, 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀲𑀦𑁆𑀢𑀺𑀓𑁂’’𑀢𑀺.

𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀅𑀘𑁆𑀙𑀭𑀸𑀕𑀡𑀲𑀗𑁆𑀖𑀼𑀝𑁆𑀞𑀁 ¶ , 𑀧𑀺𑀲𑀸𑀘𑀕𑀡𑀲𑁂𑀯𑀺𑀢𑀁;

𑀯𑀦𑀦𑁆𑀢𑀁 𑀫𑁄𑀳𑀦𑀁 𑀦𑀸𑀫, 𑀓𑀣𑀁 𑀬𑀸𑀢𑁆𑀭𑀸 𑀪𑀯𑀺𑀲𑁆𑀲𑀢𑀺𑁋

𑀧𑀼𑀘𑁆𑀙𑀸 𑁋 𑀚𑀭𑀸𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

‘‘𑀓𑀺𑀁 𑀲𑀼 𑀬𑀸𑀯 𑀚𑀭𑀸 𑀲𑀸𑀥𑀼, 𑀓𑀺𑀁 𑀲𑀼 𑀲𑀸𑀥𑀼 𑀧𑀢𑀺𑀝𑁆𑀞𑀺𑀢𑀁;

𑀓𑀺𑀁 𑀲𑀼 𑀦𑀭𑀸𑀦𑀁 𑀭𑀢𑀦𑀁, 𑀓𑀺𑀁 𑀲𑀼 𑀘𑁄𑀭𑁂𑀳𑀺 𑀤𑀽𑀳𑀭’’𑀦𑁆𑀢𑀺.

𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

‘‘𑀲𑀻𑀮𑀁 𑀬𑀸𑀯 𑀚𑀭𑀸 𑀲𑀸𑀥𑀼, 𑀲𑀤𑁆𑀥𑀸 𑀲𑀸𑀥𑀼 𑀧𑀢𑀺𑀝𑁆𑀞𑀺𑀢𑀸;

𑀧𑀜𑁆𑀜𑀸 𑀦𑀭𑀸𑀦𑀁 𑀭𑀢𑀦𑀁, 𑀧𑀼𑀜𑁆𑀜𑀁 𑀘𑁄𑀭𑁂𑀳𑀺 𑀤𑀽𑀳𑀭’’𑀦𑁆𑀢𑀺.

𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀼𑀩𑁆𑀭𑀳𑁆𑀫𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀢𑀜𑁆𑀘 𑀪𑀸𑀲𑀺𑀢𑀁. 𑀓𑀻𑀤𑀺𑀲𑁄 𑀘 𑀢𑀢𑁆𑀣 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀥𑀫𑁆𑀫𑀲𑁆𑀲𑀯𑀦𑀸𑀦𑀺𑀲𑀁𑀲𑁄 𑀅𑀥𑀺𑀕𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 ¶ 𑀪𑀦𑁆𑀢𑁂 𑀲𑀼𑀩𑁆𑀭𑀳𑁆𑀫𑀤𑁂𑀯𑀧𑀼𑀢𑁆𑀢𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀲𑀼𑀩𑁆𑀭𑀳𑁆𑀫𑀸 𑀪𑀦𑁆𑀢𑁂 𑀤𑁂𑀯𑀧𑀼𑀢𑁆𑀢𑁄 𑀫𑀭𑀡𑀪𑀬𑀪𑀻𑀢𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘𑁋

‘‘𑀦𑀺𑀘𑁆𑀘𑀁 𑀉𑀢𑁆𑀭𑀲𑁆𑀢𑀫𑀺𑀤𑀁 𑀘𑀺𑀢𑁆𑀢𑀁, 𑀦𑀺𑀘𑁆𑀘𑀁 𑀉𑀩𑁆𑀩𑀺𑀕𑁆𑀕𑀫𑀺𑀤𑀁 𑀫𑀦𑁄;

𑀅𑀦𑀼𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀙𑁂𑀲𑀼, 𑀅𑀣𑁄 𑀉𑀧𑁆𑀧𑀢𑀺𑀢𑁂𑀲𑀼 𑀘;

𑀲𑀘𑁂 𑀅𑀢𑁆𑀣𑀺 𑀅𑀦𑀼𑀢𑁆𑀭𑀲𑁆𑀢𑀁, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄’’𑀢𑀺𑁋

𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁.

‘‘𑀦𑀸𑀜𑁆𑀜𑀢𑁆𑀭 𑀩𑁄𑀚𑁆𑀚𑀸 𑀢𑀧𑀲𑀸, 𑀦𑀸𑀜𑁆𑀜𑀢𑁆𑀭𑀺𑀦𑁆𑀤𑁆𑀭𑀺𑀬𑀲𑀁𑀯𑀭𑀸;

𑀦𑀸𑀜𑁆𑀜𑀢𑁆𑀭 𑀲𑀩𑁆𑀩𑀦𑀺𑀲𑁆𑀲𑀕𑁆𑀕𑀸, 𑀲𑁄𑀢𑁆𑀣𑀺𑀁 𑀧𑀲𑁆𑀲𑀸𑀫𑀺 𑀧𑀸𑀡𑀺𑀦’’𑀦𑁆𑀢𑀺.

𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘 𑀪𑀦𑁆𑀢𑁂 𑀲𑀼𑀩𑁆𑀭𑀳𑁆𑀫𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, ‘‘𑀬𑀁𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺.

𑀦𑀺𑀘𑁆𑀘𑀁 ¶ 𑀉𑀢𑁆𑀭𑀲𑁆𑀢𑀫𑀺𑀤𑀁 𑀘𑀺𑀢𑁆𑀢𑀁, 𑀦𑀺𑀘𑁆𑀘𑀁 𑀉𑀩𑁆𑀩𑀺𑀕𑁆𑀕𑀫𑀺𑀤𑀁 𑀫𑀦𑁄;

𑀅𑀦𑀼𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀙𑁂𑀲𑀼, 𑀅𑀣𑁄 𑀉𑀧𑁆𑀧𑀢𑀺𑀢𑁂𑀲𑀼 𑀘;

𑀲𑀘𑁂 𑀅𑀢𑁆𑀣𑀺 𑀅𑀦𑀼𑀢𑁆𑀭𑀲𑁆𑀢, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄-𑀳𑀼𑁋

𑀦𑀸𑀜𑁆𑀜𑀢𑁆𑀭 ¶ 𑀩𑁄𑀚𑁆𑀚𑀸 𑀢𑀧𑀲𑀸, 𑀦𑀸𑀜𑁆𑀜𑀢𑁆𑀭𑀺𑀦𑁆𑀤𑁆𑀭𑀺𑀬𑀲𑀁𑀯𑀭𑀸;

𑀦𑀸𑀜𑁆𑀜𑀢𑁆𑀭 𑀲𑀩𑁆𑀩𑀦𑀺𑀲𑁆𑀲𑀕𑁆𑀕𑀸, 𑀲𑁄𑀢𑁆𑀣𑀺𑀁 𑀧𑀲𑁆𑀲𑀸𑀫𑀺 𑀧𑀸𑀡𑀺𑀦𑀁𑁋

𑀧𑀼𑀘𑁆𑀙𑀸 𑁋 𑀭𑁄𑀳𑀺𑀢𑀲𑁆𑀲𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀭𑁄𑀳𑀺𑀢𑀲𑁆𑀲𑀁 𑀤𑁂𑀯𑀧𑀼𑀢𑁆𑀢𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀭𑁄𑀳𑀺𑀢𑀲𑁆𑀲𑁄 𑀪𑀦𑁆𑀢𑁂 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀬𑀢𑁆𑀣 𑀦𑀼 𑀔𑁄 𑀪𑀦𑁆𑀢𑁂 𑀦 𑀚𑀸𑀬𑀢𑀺 𑀦 𑀚𑀻𑀬𑀢𑀺 𑀦 𑀫𑀻𑀬𑀢𑀺 𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀺, 𑀲𑀓𑁆𑀓𑀸 𑀦𑀼 𑀔𑁄 𑀲𑁄 𑀪𑀦𑁆𑀢𑁂 𑀕𑀫𑀦𑁂𑀦 𑀮𑁄𑀓𑀲𑁆𑀲 𑀅𑀦𑁆𑀢𑁄 𑀜𑀸𑀢𑀼𑀁 𑀯𑀸 𑀤𑀝𑁆𑀞𑀼𑀁 𑀯𑀸 𑀧𑀸𑀧𑀼𑀡𑀺𑀢𑀼𑀁 𑀯𑀸’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀬𑀢𑁆𑀣 𑀔𑁄 𑀆𑀯𑀼𑀲𑁄 𑀦 𑀚𑀸𑀬𑀢𑀺 𑀦 𑀚𑀻𑀬𑀢𑀺 𑀦 𑀫𑀻𑀬𑀢𑀺 𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀺, 𑀦𑀸𑀳𑀁 𑀢𑀁 𑀕𑀫𑀦𑁂𑀦 𑀮𑁄𑀓𑀲𑁆𑀲 𑀅𑀦𑁆𑀢𑀁 𑀜𑀸𑀢𑁂𑀬𑁆𑀬𑀁 𑀅𑀝𑁆𑀞𑁂𑀬𑁆𑀬𑀁 𑀧𑀢𑁆𑀢𑁂𑀬𑁆𑀬𑀦𑁆𑀢𑀺 𑀯𑀤𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀤𑀳𑀭𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀭𑀸𑀚𑀸 𑀪𑀦𑁆𑀢𑁂 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀪𑀦𑁆𑀢𑁂 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀪𑀯𑀫𑁆𑀧𑀺 𑀦𑁄 𑀕𑁄𑀢𑀫𑁄 ‘𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’𑀢𑀺 𑀧𑀝𑀺𑀚𑀸𑀦𑀸𑀢𑀻’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀬𑀜𑁆𑀳𑀺 𑀢𑀁 𑀫𑀳𑀸𑀭𑀸𑀚 𑀲𑀫𑁆𑀫𑀸 𑀯𑀤𑀫𑀸𑀦𑁄𑀯𑀤𑁂𑀬𑁆𑀬 ‘𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’𑀢𑀺 ¶ , 𑀫𑀫𑁂𑀯 𑀢𑀁 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀢𑀲𑁆𑀫𑀸 ¶ 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄;

𑀪𑀼𑀚𑀗𑁆𑀕𑀫𑀁 𑀧𑀸𑀯𑀓𑀜𑁆𑀘, 𑀔𑀢𑁆𑀢𑀺𑀬𑀜𑁆𑀘 𑀬𑀲𑀲𑁆𑀲𑀺𑀦𑀁;

𑀪𑀺𑀓𑁆𑀔𑀼𑀜𑁆𑀘 𑀲𑀻𑀮𑀲𑀫𑁆𑀧𑀦𑁆𑀦𑀁, 𑀲𑀫𑁆𑀫𑀤𑁂𑀯 𑀲𑀫𑀸𑀘𑀭𑁂𑁋

𑀧𑀼𑀘𑁆𑀙𑀸 𑁋 𑀅𑀢𑁆𑀢𑀭𑀓𑁆𑀔𑀺𑀢𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀭𑀸𑀚𑀸𑀦𑀁𑀬𑁂𑀯 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀭𑀸𑀚𑀸 𑀪𑀦𑁆𑀢𑁂 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀇𑀥 𑀫𑀬𑁆𑀳𑀁 𑀪𑀦𑁆𑀢𑁂 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 ¶ 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀻’’𑀢𑀺 𑀏𑀯𑀫𑀸𑀤𑀺𑀓𑀁 𑀯𑀘𑀦𑀁 𑀅𑀯𑁄𑀘. 𑀪𑀕𑀯𑀸 𑀘 𑀪𑀦𑁆𑀢𑁂 𑀏𑀯𑀫𑁂𑀢𑀁 𑀫𑀳𑀸𑀭𑀸𑀚 𑀏𑀯𑀫𑁂𑀢𑀁 𑀫𑀳𑀸𑀭𑀸𑀚𑀸𑀢𑀺 𑀏𑀯𑀫𑀸𑀤𑀺𑀦𑀸 𑀯𑀺𑀪𑀚𑀺𑀢𑁆𑀯𑀸 𑀪𑀸𑀲𑀺𑀢𑀁.

𑀓𑀸𑀬𑁂𑀦 ¶ 𑀲𑀁𑀯𑀭𑁄 𑀲𑀸𑀥𑀼, 𑀲𑀸𑀥𑀼 𑀯𑀸𑀘𑀸𑀬 𑀲𑀁𑀯𑀭𑁄;

𑀫𑀦𑀲𑀸 𑀲𑀁𑀯𑀭𑁄 𑀲𑀸𑀥𑀼, 𑀲𑀸𑀥𑀼, 𑀲𑀩𑁆𑀩𑀢𑁆𑀣 𑀲𑀁𑀯𑀭𑁄;

𑀲𑀩𑁆𑀩𑀢𑁆𑀣 𑀲𑀁𑀯𑀼𑀢𑁄 𑀮𑀚𑁆𑀚𑀻, 𑀭𑀓𑁆𑀔𑀺𑀢𑁄𑀢𑀺 𑀧𑀯𑀼𑀘𑁆𑀘𑀢𑀺.

𑀧𑀼𑀘𑁆𑀙𑀸 𑁋 𑀅𑀧𑁆𑀧𑀓𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀭𑀸𑀚𑀸𑀦𑀁𑀬𑁂𑀯 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀭𑀸𑀚𑀸 𑀪𑀦𑁆𑀢𑁂 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀇𑀥 𑀫𑀬𑁆𑀳𑀁 𑀪𑀦𑁆𑀢𑁂 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑀅𑀧𑁆𑀧𑀓𑀸 𑀢𑁂 𑀲𑀢𑁆𑀢𑀸 𑀮𑁄𑀓𑀲𑁆𑀫𑀺𑀁, 𑀬𑁂 𑀉𑀴𑀸𑀭𑁂 𑀉𑀴𑀸𑀭𑁂 𑀪𑁄𑀕𑁂 𑀮𑀪𑀺𑀢𑁆𑀯𑀸 𑀦 𑀘𑁂𑀯 𑀫𑀚𑁆𑀚𑀦𑁆𑀢𑀺 𑀦 𑀘 𑀧𑀫𑀚𑁆𑀚𑀦𑁆𑀢𑀺, 𑀦 𑀘 𑀓𑀸𑀫𑁂𑀲𑀼 𑀕𑁂𑀥𑀁 𑀆𑀧𑀚𑁆𑀚𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀓𑀁 𑀯𑀘𑀦𑀁 𑀅𑀯𑁄𑀘. 𑀪𑀕𑀯𑀸 𑀘 𑀪𑀦𑁆𑀢𑁂 ‘‘𑀏𑀯𑀫𑁂𑀢𑀁 𑀫𑀳𑀸𑀭𑀸𑀚 𑀏𑀯𑀫𑁂𑀢𑀁 𑀫𑀳𑀸𑀭𑀸𑀚𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀅𑀧𑁆𑀧𑀓𑀲𑀼𑀢𑁆𑀢𑀁 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀫𑀮𑁆𑀮𑀺𑀓𑀸𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀭𑀸𑀚𑀸𑀦𑀁𑀬𑁂𑀯 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀭𑀸𑀚𑀸 𑀪𑀦𑁆𑀢𑁂 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀫𑀮𑁆𑀮𑀺𑀓𑀁 𑀤𑁂𑀯𑀺𑀁 𑀏𑀢𑀤𑀯𑁄𑀘 ‘‘𑀅𑀢𑁆𑀣𑀺 𑀦𑀼 𑀔𑁄 𑀢𑁂 𑀫𑀮𑁆𑀮𑀺𑀓𑁂 𑀓𑁄𑀘𑀜𑁆𑀜𑁄 𑀅𑀢𑁆𑀢𑀦𑀸 𑀧𑀺𑀬𑀢𑀭𑁄’’𑀢𑀺. 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀲𑀩𑁆𑀩𑀸𑀤𑀺𑀲𑀸 𑀅𑀦𑀼𑀧𑀭𑀺𑀕𑀫𑁆𑀫 𑀘𑁂𑀢𑀲𑀸𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀲𑀩𑁆𑀩𑀸 ¶ 𑀤𑀺𑀲𑀸 𑀅𑀦𑀼𑀧𑀭𑀺𑀕𑀫𑁆𑀫 𑀘𑁂𑀢𑀲𑀸, 𑀦𑁂𑀯𑀚𑁆𑀛𑀕𑀸 𑀧𑀺𑀬𑀢𑀭𑀫𑀢𑁆𑀢𑀦𑀸 𑀓𑁆𑀯𑀘𑀺. 𑀏𑀯𑀁 𑀧𑀺𑀬𑁄 𑀧𑀼𑀣𑀼 𑀅𑀢𑁆𑀢𑀸 𑀧𑀭𑁂𑀲𑀁, 𑀢𑀲𑁆𑀫𑀸 𑀦 𑀳𑀺𑀁𑀲𑁂 𑀧𑀭𑀫𑀢𑁆𑀢𑀓𑀸𑀫𑁄𑁋

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 ¶ 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀢𑁆𑀢𑀚𑀝𑀺𑀮𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀭𑀸𑀚𑀸 𑀪𑀦𑁆𑀢𑁂 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀲𑀼 𑀲𑀢𑁆𑀢𑀲𑀼 𑀘 𑀚𑀝𑀺𑀮𑁂𑀲𑀼 𑀲𑀢𑁆𑀢𑀲𑀼 𑀘 𑀦𑀺𑀕𑀡𑁆𑀞𑁂𑀲𑀼 𑀲𑀢𑁆𑀢𑀲𑀼 𑀘 𑀅𑀘𑁂𑀮𑀓𑁂𑀲𑀼 𑀲𑀢𑁆𑀢𑀲𑀼 𑀘 𑀏𑀓𑀲𑀸𑀝𑀓𑁂𑀲𑀼 𑀲𑀢𑁆𑀢𑀲𑀼 𑀘 𑀧𑀭𑀺𑀩𑁆𑀩𑀸𑀚𑀓𑁂𑀲𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀪𑀦𑁆𑀢𑁂 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀬𑁂 𑀢𑁂 𑀪𑀦𑁆𑀢𑁂 𑀮𑁄𑀓𑁂 𑀅𑀭𑀳𑀦𑁆𑀢𑁄 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑀸, 𑀏𑀢𑁂 𑀢𑁂𑀲𑀁 𑀅𑀜𑁆𑀜𑀢𑀭𑀸’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀤𑀼𑀚𑁆𑀚𑀸𑀦𑀁 𑀔𑁄 𑀏𑀢𑀁 𑀫𑀳𑀸𑀭𑀸𑀚 𑀢𑀬𑀸 𑀕𑀺𑀳𑀺𑀦𑀸 𑀓𑀸𑀫𑀪𑁄𑀕𑀺𑀦𑀸 𑀧𑀼𑀢𑁆𑀢𑀲𑀫𑁆𑀩𑀸𑀥𑀲𑀬𑀦𑀁 𑀅𑀚𑁆𑀛𑀸𑀯𑀲𑀦𑁆𑀢𑁂𑀦 𑀓𑀸𑀲𑀺𑀡𑀘𑀦𑁆𑀤𑀦𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑁂𑀦 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀥𑀸𑀭𑀬𑀦𑁆𑀢𑁂𑀦 𑀚𑀸𑀢𑀭𑀽𑀧𑀭𑀚𑀢𑀁 𑀲𑀸𑀤𑀺𑀬𑀦𑁆𑀢𑁂𑀦 ‘‘𑀇𑀫𑁂 𑀯𑀸 𑀅𑀭𑀳𑀦𑁆𑀢𑁄, 𑀇𑀫𑁂 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀁 𑀲𑀫𑀸𑀧𑀦𑁆𑀦𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀦 ¶ 𑀯𑀡𑁆𑀡𑀭𑀽𑀧𑁂𑀦 𑀦𑀭𑁄 𑀲𑀼𑀚𑀸𑀦𑁄, 𑀦 𑀯𑀺𑀲𑁆𑀲𑀲𑁂 𑀇𑀢𑁆𑀢𑀭𑀤𑀲𑁆𑀲𑀦𑁂𑀦;

𑀲𑀼𑀲𑀜𑁆𑀜𑀢𑀸𑀦𑀜𑁆𑀳𑀺 𑀯𑀺𑀬𑀜𑁆𑀚𑀦𑁂𑀦, 𑀅𑀲𑀜𑁆𑀜𑀢𑀸 𑀮𑁄𑀓𑀫𑀺𑀫𑀁 𑀘𑀭𑀦𑁆𑀢𑀺.

𑀧𑀢𑀺𑀭𑀽𑀧𑀓𑁄 𑀫𑀢𑁆𑀢𑀺𑀓𑀸𑀓𑀼𑀡𑁆𑀟𑀮𑁄𑀯, 𑀮𑁄𑀳𑀟𑁆𑀠𑀫𑀸𑀲𑁄𑀯 𑀲𑀼𑀯𑀡𑁆𑀡𑀙𑀦𑁆𑀦𑁄;

𑀘𑀭𑀦𑁆𑀢𑀺 𑀮𑁄𑀓𑁂 𑀧𑀭𑀺𑀯𑀸𑀭𑀙𑀦𑁆𑀦𑀸, 𑀅𑀦𑁆𑀢𑁄 𑀅𑀲𑀼𑀤𑁆𑀥𑀸 𑀩𑀳𑀺𑀲𑁄𑀪𑀫𑀸𑀦𑀸-𑀳𑀽

𑀧𑀼𑀘𑁆𑀙𑀸 𑁋 𑀧𑀜𑁆𑀘𑀭𑀸𑀚𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀭𑀸𑀚𑀸𑀦𑀁𑀬𑁂𑀯 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀭𑀸𑀚𑀸 𑀪𑀦𑁆𑀢𑁂 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀓𑀺𑀁 𑀦𑀼 𑀔𑁄 𑀪𑀦𑁆𑀢𑁂 𑀓𑀸𑀫𑀸𑀦𑀁 𑀅𑀕𑁆𑀕’’𑀦𑁆𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀫𑀦𑀸𑀧𑀧𑀭𑀺𑀬𑀦𑁆𑀢𑀁 𑀔𑁆𑀯𑀸𑀳𑀁 𑀫𑀳𑀸𑀭𑀸𑀚 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀅𑀕𑁆𑀕𑀦𑁆𑀢𑀺 𑀯𑀤𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀇𑀥 ¶ 𑀪𑀦𑁆𑀢𑁂 𑀅𑀫𑁆𑀳𑀸𑀓𑀁 𑀧𑀜𑁆𑀘𑀦𑁆𑀦𑀁 𑀭𑀸𑀚𑀽𑀦𑀁 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸𑀦𑀁 𑀲𑀫𑀗𑁆𑀕𑀻𑀪𑀽𑀢𑀸𑀦𑀁 𑀧𑀭𑀺𑀘𑀸𑀭𑀬𑀫𑀸𑀦𑀸𑀦𑀁 𑀅𑀬𑀫𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺𑀁 ‘𑀓𑀺𑀁 𑀦𑀼 𑀔𑁄 𑀓𑀸𑀫𑀸𑀦𑀁 𑀅𑀕𑁆𑀕’𑀦𑁆𑀢𑀺𑁋

𑀧𑀤𑀼𑀫𑀁 ¶ 𑀬𑀣𑀸 𑀓𑁄𑀓𑀦𑀤𑀁 𑀲𑀼𑀕𑀦𑁆𑀥𑀁, 𑀧𑀸𑀢𑁄 𑀲𑀺𑀬𑀸 𑀨𑀼𑀮𑁆𑀮𑀫𑀯𑀻𑀢𑀕𑀦𑁆𑀥𑀁. 𑀅𑀗𑁆𑀕𑀻𑀭𑀲𑀁 𑀧𑀲𑁆𑀲 𑀯𑀺𑀭𑁄𑀘𑀫𑀸𑀦𑀁, 𑀢𑀧𑀦𑁆𑀢𑀫𑀸𑀤𑀺𑀘𑁆𑀘𑀫𑀺𑀯𑀦𑁆𑀢𑀮𑀺𑀓𑁆𑀔𑁂𑁋

𑀧𑀼𑀘𑁆𑀙𑀸 𑁋 𑀤𑀼𑀢𑀺𑀬𑀅𑀧𑀼𑀢𑁆𑀢𑀓𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀭𑀸𑀚𑀸𑀦𑀁𑀬𑁂𑀯 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀭𑀸𑀚𑀸 𑀪𑀦𑁆𑀢𑁂 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀇𑀥 𑀪𑀦𑁆𑀢𑁂 𑀲𑀸𑀯𑀢𑁆𑀣𑀺𑀬𑀁 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀓𑀸𑀮𑀗𑁆𑀓𑀢𑁄, 𑀢𑀫𑀳𑀁 𑀅𑀧𑀼𑀢𑁆𑀢𑀓𑀁 𑀲𑀸𑀧𑀢𑁂𑀬𑁆𑀬𑀁 𑀭𑀸𑀚𑀦𑁆𑀢𑁂𑀧𑀼𑀭𑀁 𑀅𑀢𑀺𑀳𑀭𑀺𑀢𑁆𑀯𑀸 𑀆𑀕𑀘𑁆𑀙𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀓𑀁 𑀯𑀘𑀦𑀁 𑀅𑀯𑁄𑀘. 𑀪𑀕𑀯𑀸 𑀘 𑀪𑀦𑁆𑀢𑁂 ‘‘𑀏𑀯𑀫𑁂𑀢𑀁 𑀫𑀳𑀸𑀭𑀸𑀚, 𑀏𑀯𑀫𑁂𑀢𑀁 𑀫𑀳𑀸𑀭𑀸𑀚, 𑀪𑀽𑀢𑀧𑀼𑀩𑁆𑀩𑀁 𑀲𑁄 𑀫𑀳𑀸𑀭𑀸𑀚 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀢𑀕𑁆𑀕𑀭𑀲𑀺𑀔𑀺𑀁 𑀦𑀸𑀫 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀁 𑀧𑀺𑀡𑁆𑀟𑀧𑀸𑀢𑁂𑀦 𑀧𑀝𑀺𑀧𑀸𑀤𑁂𑀲𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀢𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀕𑀳𑀧𑀢𑀺𑀲𑁆𑀲 𑀅𑀢𑀻𑀢𑀁 𑀯𑀢𑁆𑀣𑀼𑀁 𑀆𑀳𑀭𑀺𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑁂 𑀘𑀢𑀽𑀳𑀺 𑀕𑀸𑀣𑀸𑀳𑀺 𑀪𑀸𑀲𑀺𑀢𑀁.

𑀥𑀜𑁆𑀜𑀁 ¶ 𑀥𑀦𑀁 𑀭𑀚𑀢𑀁 𑀚𑀸𑀢𑀭𑀽𑀧𑀁, 𑀧𑀭𑀺𑀕𑁆𑀕𑀳𑀁 𑀯𑀸𑀧𑀺 𑀬𑀤𑀢𑁆𑀣𑀺 𑀓𑀺𑀜𑁆𑀘𑀺,

𑀤𑀸𑀲𑀸 𑀓𑀫𑁆𑀫𑀓𑀭𑀸 𑀧𑁂𑀲𑁆𑀲𑀸, 𑀬𑁂 𑀘𑀲𑁆𑀲 𑀅𑀦𑀼𑀚𑀻𑀯𑀺𑀦𑁄.

𑀲𑀩𑁆𑀩𑀁 𑀦𑀸𑀤𑀸𑀬 𑀕𑀦𑁆𑀢𑀩𑁆𑀩𑀁, 𑀲𑀩𑁆𑀩𑀁 𑀦𑀺𑀓𑁆𑀔𑀺𑀧𑁆𑀧𑀕𑀸𑀫𑀺𑀦𑀁;

𑀬𑀜𑁆𑀘 𑀓𑀭𑁄𑀢𑀺 𑀓𑀸𑀬𑁂𑀦, 𑀯𑀸𑀘𑀸𑀬 𑀉𑀤𑀘𑁂𑀢𑀲𑀸.

𑀢𑀜𑁆𑀳𑀺 𑀢𑀲𑁆𑀲 𑀲𑀓𑀁 𑀳𑁄𑀢𑀺, 𑀢𑀁𑀯 𑀆𑀤𑀸𑀬 𑀕𑀘𑁆𑀙𑀢𑀺;

𑀢𑀁𑀯𑀲𑁆𑀲 𑀅𑀦𑀼𑀕𑀁 𑀳𑁄𑀢𑀺, 𑀙𑀸𑀬𑀸𑀯 𑀅𑀦𑀧𑀸𑀬𑀺𑀦𑀻.

𑀢𑀲𑁆𑀫𑀸 𑀓𑀭𑁂𑀬𑁆𑀬 𑀓𑀮𑁆𑀬𑀸𑀡𑀁, 𑀦𑀺𑀘𑀬𑀁 𑀲𑀫𑁆𑀧𑀭𑀸𑀬𑀺𑀓𑀁;

𑀧𑀼𑀜𑁆𑀜𑀸𑀦𑀺 𑀧𑀭𑀮𑁄𑀓𑀲𑁆𑀫𑀺𑀁, 𑀧𑀢𑀺𑀝𑁆𑀞𑀸 𑀳𑁄𑀦𑁆𑀢𑀺 𑀧𑀸𑀡𑀺𑀦𑀁 𑁋

𑀧𑀼𑀘𑁆𑀙𑀸 𑁋 𑀢𑀧𑁄𑀓𑀫𑁆𑀫𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀚𑀺𑀦𑁂𑀦 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀉𑀭𑀼𑀯𑁂𑀮𑀸𑀬𑀁 𑀪𑀦𑁆𑀢𑁂 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀫𑀸𑀭𑁄 𑀪𑀦𑁆𑀢𑁂 𑀧𑀸𑀧𑀺𑀫𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺.

‘‘𑀢𑀧𑁄𑀓𑀫𑁆𑀫𑀸 𑀅𑀧𑀓𑁆𑀓𑀫𑁆𑀫, 𑀬𑁂𑀦 𑀲𑀼𑀚𑁆𑀛𑀦𑁆𑀢𑀺 𑀫𑀸𑀡𑀯𑀸;

𑀅𑀲𑀼𑀤𑁆𑀥𑁄 𑀫𑀜𑁆𑀜𑀲𑀺 𑀲𑀼𑀤𑁆𑀥𑁄, 𑀲𑀼𑀤𑁆𑀥𑀺𑀫𑀕𑁆𑀕𑀸 𑀅𑀧𑀭𑀤𑁆𑀥𑁄’’𑀢𑀺.

𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

‘‘𑀅𑀦𑀢𑁆𑀢𑀲𑀁𑀳𑀺𑀢𑀁 𑀜𑀢𑁆𑀯𑀸, 𑀬𑀁 𑀓𑀺𑀜𑁆𑀘𑀺 𑀅𑀫𑀭𑀁 𑀢𑀧𑀁;

𑀲𑀩𑁆𑀩𑀁 𑀦𑀢𑁆𑀣𑀸𑀯𑀳𑀁 𑀳𑁄𑀢𑀺, 𑀨𑀺𑀬𑀸𑀭𑀺𑀢𑁆𑀢𑀁𑀯 𑀥𑀫𑁆𑀫𑀦𑀺;

𑀲𑀻𑀮𑀁 𑀲𑀫𑀸𑀥𑀺 𑀧𑀜𑁆𑀜𑀜𑁆𑀘, 𑀫𑀕𑁆𑀕𑀁 𑀩𑁄𑀥𑀸𑀬 𑀪𑀸𑀯𑀬𑀁;

𑀧𑀢𑁆𑀢𑁄𑀲𑁆𑀫𑀺 𑀧𑀭𑀫𑀁 𑀲𑀼𑀤𑁆𑀥𑀺𑀁, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓𑀸’’𑀢𑀺.

𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀚𑀺𑀦𑁂𑀦 𑀪𑀸𑀲𑀺𑀢𑀁.

𑀢𑀧𑁄𑀓𑀫𑁆𑀫𑀸 ¶ 𑀅𑀧𑀓𑁆𑀓𑀫𑁆𑀫, 𑀬𑁂 𑀦 𑀲𑀼𑀚𑁆𑀛𑀦𑁆𑀢𑀺 𑀫𑀸𑀡𑀯𑀸;

𑀅𑀲𑀼𑀤𑁆𑀥𑁄 𑀫𑀜𑁆𑀜𑀲𑀺 𑀲𑀼𑀤𑁆𑀥𑁄, 𑀲𑀼𑀤𑁆𑀥𑀺𑀫𑀕𑁆𑀕𑀸 𑀅𑀧𑀭𑀤𑁆𑀥𑁄𑁋

𑀅𑀦𑀢𑁆𑀣𑀲𑀁𑀳𑀺𑀢𑀁 ¶ 𑀉𑀢𑁆𑀯𑀸, 𑀬𑀁𑀓𑀺𑀜𑁆𑀘𑀺 𑀅𑀫𑀭𑀁 𑀢𑀧𑀁;

𑀲𑀩𑁆𑀩𑀁 𑀦𑀢𑁆𑀣𑀸𑀯𑀳𑀁 𑀳𑁄𑀢𑀺, 𑀨𑀺𑀬𑀸𑀭𑀺𑀢𑁆𑀢𑀁𑀯 𑀥𑀫𑁆𑀫𑀦𑀺;

𑀧𑀼𑀘𑁆𑀙𑀸 𑁋 𑀳𑀢𑁆𑀣𑀺𑀭𑀸𑀚𑀯𑀡𑁆𑀡𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀯𑀕𑀢𑀸 𑀚𑀺𑀦𑁂𑀦 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀉𑀭𑀼𑀯𑁂𑀮𑀸𑀬𑀁 𑀪𑀦𑁆𑀢𑁂 𑀫𑀸𑀭𑀓𑀁𑀬𑁂𑀯 𑀧𑀸𑀧𑀺𑀫𑀦𑁆𑀢𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀫𑀸𑀭𑁄 𑀪𑀦𑁆𑀢𑁂 𑀧𑀸𑀧𑀺𑀫𑀸 𑀪𑀕𑀯𑀢𑁄 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀫𑀳𑀦𑁆𑀢𑀁 𑀳𑀢𑁆𑀣𑀺𑀭𑀸𑀚𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

‘‘𑀲𑀁𑀲𑀭𑀁 𑀤𑀻𑀖𑀫𑀤𑁆𑀥𑀸𑀦𑀁, 𑀯𑀡𑁆𑀡𑀁 𑀓𑀢𑁆𑀯𑀸 𑀲𑀼𑀪𑀸𑀲𑀼𑀪𑀁;

𑀅𑀮𑀁 𑀢𑁂 𑀢𑁂𑀦 𑀧𑀸𑀧𑀺𑀫, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓𑀸’’𑀢𑀺.

𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀚𑀺𑀦𑁂𑀦 𑀪𑀸𑀲𑀺𑀢𑀁.

𑀲𑀁𑀲𑀭𑀁 ¶ 𑀤𑀻𑀖𑀫𑀤𑁆𑀥𑀸𑀦𑀁, 𑀯𑀡𑁆𑀡𑀁 𑀓𑀢𑁆𑀯𑀸 𑀲𑀼𑀪𑀸𑀲𑀼𑀪𑀁,

𑀅𑀮𑀁 𑀢𑁂 𑀢𑁂𑀦 𑀧𑀸𑀧𑀺𑀫, 𑀦𑀺𑀳𑀢𑁄 𑀢𑁆𑀯𑀫𑀲𑀺 𑀅𑀦𑁆𑀢𑀓 𑁋

𑀧𑀼𑀘𑁆𑀙𑀸 𑁋 𑀇𑀤𑀸𑀦𑀺 𑀆𑀯𑀼𑀲𑁄 𑀪𑀺𑀓𑁆𑀔𑀼𑀦𑀻 𑀲𑀁𑀬𑀼𑀢𑁆𑀢𑀁 𑀧𑀼𑀘𑁆𑀙𑀸𑀫𑀺, 𑀬𑀁 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀯𑀺𑀓𑀸𑀳𑀺 𑀣𑁂𑀭𑀻𑀳𑀺 𑀅𑀢𑁆𑀢𑀦𑁄

𑀘 ¶ 𑀩𑀼𑀤𑁆𑀥𑀲𑀸𑀲𑀦𑀲𑁆𑀲 𑀘 𑀬𑀣𑀸𑀪𑀽𑀢𑀁 𑀕𑀼𑀡𑀁 𑀧𑀓𑀸𑀲𑁂𑀢𑁆𑀯𑀸 𑀪𑀸𑀲𑀺𑀢𑀁. 𑀢𑀢𑁆𑀣𑀸𑀯𑀼𑀲𑁄 𑀧𑀞𑀫𑀁 𑀧𑁄𑀭𑀸𑀡𑀓𑁂𑀳𑀺 𑀫𑀳𑀸𑀓𑀲𑁆𑀲𑀧𑀸𑀤𑀻𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑁂𑀳𑀺 𑀣𑁂𑀭𑀯𑀭𑁂𑀳𑀺 𑀲𑀁𑀕𑀻𑀢𑀁 𑀆𑀴𑀯𑀺𑀓𑀸𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀆𑀭𑀩𑁆𑀪 𑀆𑀴𑀯𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀸𑀲𑀺𑀢𑀁. 𑀫𑀸𑀭𑁄 𑀪𑀦𑁆𑀢𑁂 𑀧𑀸𑀧𑀺𑀫𑀸 𑀆𑀴𑀯𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀯𑀺𑀯𑁂𑀓𑀫𑁆𑀳𑀸 𑀘𑀸𑀯𑁂𑀢𑀼𑀓𑀸𑀫𑁄 𑀆𑀴𑀯𑀺𑀓𑀁 𑀪𑀺𑀓𑁆𑀔𑀼𑀦𑀺𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺𑁋

‘‘𑀦𑀢𑁆𑀣𑀺 𑀦𑀺𑀲𑁆𑀲𑀭𑀡𑀁 𑀮𑁄𑀓𑁂, 𑀓𑀺𑀁 𑀯𑀺𑀯𑁂𑀓𑁂𑀦 𑀓𑀸𑀳𑀲𑀺;

𑀪𑀼𑀜𑁆𑀚𑀲𑁆𑀲 𑀓𑀸𑀫𑀭𑀢𑀺𑀬𑁄, 𑀫𑀸𑀳𑀼 𑀧𑀘𑁆𑀙𑀸𑀦𑀼𑀢𑀸𑀧𑀺𑀦𑀻’’𑀢𑀺.

𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

‘‘𑀅𑀢𑁆𑀣𑀺 𑀦𑀺𑀲𑁆𑀲𑀭𑀡𑀁 𑀮𑁄𑀓𑁂, 𑀧𑀜𑁆𑀜𑀸𑀬 𑀫𑁂 𑀲𑀼𑀨𑀼𑀲𑁆𑀲𑀺𑀢𑀁;

𑀧𑀫𑀢𑁆𑀢𑀩𑀦𑁆𑀥𑀼 𑀧𑀸𑀧𑀺𑀫, 𑀦 𑀢𑁆𑀯𑀁 𑀚𑀸𑀦𑀸𑀲𑀺 𑀢𑀁 𑀧𑀤𑀁;

𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸, 𑀔𑀦𑁆𑀥𑀸𑀲𑀁 𑀅𑀥𑀺𑀓𑀼𑀝𑁆𑀝𑀦𑀸;

𑀬𑀁 𑀢𑁆𑀯𑀁 𑀓𑀸𑀫𑀭𑀢𑀺𑀁 𑀩𑁆𑀭𑀽𑀲𑀺, 𑀅𑀭𑀳𑀺 𑀫𑀬𑁆𑀳 𑀲𑀸 𑀅𑀳𑀽’’𑀢𑀺.

𑀏𑀯𑀁 𑀔𑁄 𑀪𑀦𑁆𑀢𑁂 𑀆𑀴𑀯𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀸𑀲𑀺𑀢𑀁.

𑀦𑀢𑁆𑀣𑀺 ¶ 𑀦𑀺𑀲𑁆𑀲𑀭𑀡𑀁 𑀮𑁄𑀓𑁂, 𑀓𑀺𑀁 𑀯𑀺𑀯𑁂𑀓𑁂𑀦 𑀓𑀸𑀳𑀲𑀺;

𑀪𑀼𑀜𑁆𑀚𑀲𑁆𑀲𑀼 𑀓𑀸𑀫𑀭𑀢𑀺𑀬𑁄, 𑀫𑀸𑀳𑀼 𑀧𑀘𑁆𑀙𑀸𑀦𑀼𑀢𑀸𑀧𑀺𑀦𑀻-𑀳𑀼𑁋

𑀅𑀢𑁆𑀣𑀺 ¶ 𑀦𑀺𑀲𑁆𑀲𑀭𑀡𑀁 𑀮𑁄𑀓𑁂, 𑀧𑀜𑁆𑀜𑀸𑀬 𑀫𑁂 𑀲𑀼𑀨𑀼𑀲𑁆𑀲𑀺𑀢𑀁;

𑀧𑀫𑀢𑁆𑀢𑀩𑀦𑁆𑀥𑀼 𑀧𑀸𑀧𑀺𑀫, 𑀦 𑀢𑁆𑀯𑀁 𑀚𑀸𑀦𑀸𑀲𑀺 𑀢𑀁 𑀧𑀤𑀁.

𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀓𑀸𑀫𑀸, 𑀔𑀦𑁆𑀥𑀸𑀲𑀁 𑀅𑀥𑀺𑀓𑀼𑀝𑁆𑀝𑀦𑀸;

𑀬𑀁 𑀢𑁆𑀯𑀁 𑀓𑀸𑀫𑀭𑀢𑀺𑀁 𑀩𑁆𑀭𑀽𑀲𑀺, 𑀅𑀭𑀢𑀺 𑀫𑀬𑁆𑀳 𑀲𑀸 𑀅𑀳𑀼𑁋

𑀧𑀼𑀘𑁆𑀙𑀸 𑁋 𑀲𑁄𑀫𑀸𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁𑀬𑁂𑀯 𑀪𑀦𑁆𑀢𑁂 𑀅𑀦𑁆𑀥𑀯𑀦𑁂 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀆𑀭𑀩𑁆𑀪 𑀲𑁄𑀫𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀸𑀲𑀺𑀢𑀁. 𑀫𑀸𑀭𑁄 𑀪𑀦𑁆𑀢𑁂 𑀧𑀸𑀧𑀺𑀫𑀸 𑀲𑁄𑀫𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀲𑀫𑀸𑀥𑀺𑀫𑁆𑀳𑀸 𑀘𑀸𑀯𑁂𑀢𑀼𑀓𑀸𑀫𑁄 𑀲𑁄𑀫𑀁 𑀪𑀺𑀓𑁆𑀔𑀼𑀦𑀺𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺.

‘‘𑀬𑀁 𑀢𑀁 𑀇𑀲𑀻𑀳𑀺 𑀧𑀢𑁆𑀢𑀩𑁆𑀩𑀁, 𑀞𑀸𑀦𑀁 𑀤𑀼𑀭𑀪𑀺𑀲𑀫𑁆𑀪𑀯𑀁;

𑀦 𑀢𑀁 𑀤𑁆𑀯𑀗𑁆𑀕𑀼𑀮𑀧𑀜𑁆𑀜𑀸𑀬, 𑀲𑀓𑁆𑀓𑀸 𑀧𑀧𑁆𑀧𑁄𑀢𑀼𑀫𑀺𑀢𑁆𑀣𑀺𑀬𑀸’’𑀢𑀺.

𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

‘‘𑀇𑀢𑁆𑀣𑀺𑀪𑀸𑀯𑁄 𑀓𑀺𑀁 𑀓𑀬𑀺𑀭𑀸, 𑀘𑀺𑀢𑁆𑀢𑀫𑁆𑀳𑀺 𑀲𑀼𑀲𑀫𑀸𑀳𑀺𑀢𑁂;

𑀜𑀸𑀡𑀫𑁆𑀳𑀺 𑀯𑀢𑁆𑀢𑀫𑀸𑀦𑀫𑁆𑀳𑀺, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄;

𑀬𑀲𑁆𑀲 𑀦𑀽𑀦 𑀲𑀺𑀬𑀸 𑀏𑀯𑀁, 𑀇𑀢𑁆𑀣𑀸𑀳𑀁 𑀧𑀼𑀭𑀺𑀲𑁄𑀢𑀺 𑀯𑀸;

𑀓𑀺𑀜𑁆𑀘𑀺 𑀯𑀸 𑀧𑀦 𑀅𑀜𑁆𑀜𑀲𑁆𑀫𑀺, 𑀢𑀁 𑀫𑀸𑀭𑁄 𑀯𑀢𑁆𑀢𑀼𑀫𑀭𑀳𑀢𑀻’’𑀢𑀺.

𑀏𑀯𑀁 𑀔𑁄 𑀪𑀦𑁆𑀢𑁂 𑀲𑁄𑀫𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀅𑀭𑀺𑀬𑀲𑀸𑀯𑀺𑀓𑀸𑀬 𑀪𑀸𑀲𑀺𑀢𑀁.

𑀬𑀁 ¶ 𑀢𑀁 𑀇𑀲𑀻𑀳𑀺 𑀧𑀢𑁆𑀢𑀩𑁆𑀩𑀁, 𑀞𑀸𑀦𑀁 𑀤𑀼𑀭𑀪𑀺𑀲𑀫𑁆𑀪𑀯𑀁;

𑀦 𑀢𑀁 𑀤𑁆𑀯𑀗𑁆𑀕𑀼𑀮𑀧𑀜𑁆𑀜𑀸𑀬, 𑀲𑀓𑁆𑀓𑀸 𑀧𑀧𑁆𑀧𑁄𑀢𑀼𑀫𑀺𑀢𑁆𑀣𑀺𑀬𑀸𑁋

𑀇𑀢𑁆𑀣𑀺 ¶ 𑀪𑀸𑀯𑁄 𑀓𑀺𑀁 𑀓𑀬𑀺𑀭𑀸, 𑀘𑀺𑀢𑁆𑀢𑀫𑁆𑀳𑀺 𑀲𑀼𑀲𑀫𑀸𑀳𑀺𑀢𑁂;

𑀜𑀸𑀡𑀫𑁆𑀳𑀺 𑀯𑀢𑁆𑀢 𑀫𑀸𑀦𑀫𑁆𑀳𑀺, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄.

𑀬𑀲𑁆𑀲 𑀦𑀽𑀦 𑀲𑀺𑀬𑀸 𑀏𑀯𑀁, 𑀇𑀢𑁆𑀣𑀸𑀳𑀁 𑀧𑀼𑀭𑀺𑀲𑁄𑀢𑀺 𑀯𑀸;

𑀓𑀺𑀜𑁆𑀘𑀺 𑀯𑀸 𑀧𑀦 𑀅𑀜𑁆𑀜𑀲𑁆𑀫𑀺, 𑀢𑀁 𑀫𑀸𑀭𑁄 𑀯𑀢𑁆𑀢𑀼𑀫𑀭𑀳𑀢𑀺.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑀸𑀯𑀼𑀲𑁄 ¶ 𑀓𑀺𑀲𑀸𑀕𑁄𑀢𑀫𑀻𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁𑀬𑁂𑀯 𑀪𑀦𑁆𑀢𑁂 𑀅𑀦𑁆𑀥𑀯𑀦𑁂 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀆𑀭𑀩𑁆𑀪 𑀓𑀺𑀲𑀸𑀕𑁄𑀢𑀫𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀣𑁂𑀭𑀺𑀬𑀸 𑀪𑀸𑀲𑀺𑀢𑀁. 𑀫𑀸𑀭𑁄 𑀪𑀦𑁆𑀢𑁂 𑀧𑀸𑀧𑀺𑀫𑀸 𑀓𑀺𑀲𑀸𑀕𑁄𑀢𑀫𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀲𑀫𑀸𑀥𑀺𑀫𑁆𑀳𑀸 𑀘𑀸𑀯𑁂𑀢𑀼𑀓𑀸𑀫𑁄 𑀓𑀺𑀲𑀸𑀕𑁄𑀢𑀫𑀺𑀁 𑀪𑀺𑀓𑁆𑀔𑀼𑀦𑀺𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺𑁋

‘‘𑀓𑀺𑀁 𑀦𑀼 𑀢𑁆𑀯𑀁 𑀫𑀢𑀧𑀼𑀢𑁆𑀢𑀸𑀯, 𑀏𑀓𑀫𑀸𑀲𑀺 𑀭𑀼𑀤𑀫𑁆𑀫𑀼𑀔𑀻;

𑀯𑀦𑀫𑀚𑁆𑀛𑀕𑀢𑀸 𑀏𑀓𑀸, 𑀧𑀼𑀭𑀺𑀲𑀁 𑀦𑀼 𑀕𑀯𑁂𑀲𑀲𑀻’’𑀢𑀺.

𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

𑀅𑀘𑁆𑀘𑀦𑁆𑀢𑀁 𑀫𑀢𑀧𑀼𑀢𑁆𑀢𑀸𑀫𑁆𑀳𑀺, 𑀧𑀼𑀭𑀺𑀲𑀸 𑀏𑀓𑀤𑀦𑁆𑀢𑀺𑀓𑀸;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀦 𑀢𑀁 𑀪𑀸𑀬𑀸𑀫𑀺 𑀆𑀯𑀼𑀲𑁄.

𑀲𑀩𑁆𑀩𑀢𑁆𑀣 𑀯𑀺𑀳𑀢𑀸 𑀦𑀦𑁆𑀤𑀻, 𑀢𑀫𑁄𑀓𑁆𑀔𑀦𑁆𑀥𑁄 𑀧𑀤𑀸𑀮𑀺𑀢𑁄;

𑀚𑁂𑀢𑁆𑀯𑀸𑀦 𑀫𑀘𑁆𑀘𑀼𑀦𑁄 𑀲𑁂𑀦𑀁, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸’’𑀢𑀺.

𑀏𑀯𑀁 𑀔𑁄 𑀪𑀦𑁆𑀢𑁂 𑀓𑀺𑀲𑀸𑀕𑁄𑀢𑀫𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀪𑀸𑀲𑀺𑀢𑀁.

𑀓𑀺𑀁 ¶ 𑀦𑀼 𑀢𑁆𑀯𑀁 𑀫𑀢𑀧𑀼𑀢𑁆𑀢𑀸𑀯, 𑀏𑀓𑀫𑀸𑀲𑀺 𑀭𑀼𑀤𑀫𑁆𑀫𑀼𑀔𑀻;

𑀯𑀦𑀫𑀚𑁆𑀛𑀕𑀢𑀸 𑀏𑀓𑀸, 𑀧𑀼𑀭𑀺𑀲𑀁 𑀦𑀼 𑀕𑀲𑁂𑀲𑀲𑀺-𑀳𑀼𑁋

𑀅𑀘𑁆𑀘𑀦𑁆𑀢𑀁 𑀫𑀢𑀧𑀼𑀢𑁆𑀢𑀸𑀫𑁆𑀳𑀺, 𑀧𑀼𑀭𑀺𑀲𑀸 𑀏𑀢𑀤𑀦𑁆𑀢𑀺𑀓𑀸;

𑀦 𑀲𑁄𑀘𑀸𑀫𑀺 𑀦 𑀭𑁄𑀤𑀸𑀫𑀺, 𑀦 𑀢𑀁 𑀪𑀸𑀬𑀸𑀫𑀺 𑀆𑀯𑀼𑀲𑁄.

𑀲𑀩𑁆𑀩𑀢𑁆𑀣 ¶ 𑀯𑀺𑀳𑀢𑀸 𑀦𑀦𑁆𑀤𑀻, 𑀢𑀫𑁄𑀓𑁆𑀔𑀦𑁆𑀥𑁄 𑀧𑀤𑀸𑀮𑀺𑀢𑁄;

𑀚𑁂𑀢𑁆𑀯𑀸𑀦 𑀫𑀘𑁆𑀘𑀼𑀦𑁄 𑀲𑁂𑀦𑀁, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑀸.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑀸𑀯𑀼𑀲𑁄 𑀧𑁄𑀭𑀸𑀡𑁂𑀳𑀺 𑀲𑀁𑀕𑀻𑀢𑀺𑀓𑀸𑀭𑀫𑀳𑀸𑀣𑁂𑀭𑀯𑀭𑁂𑀳𑀺 𑀲𑀁𑀕𑀻𑀢𑀁 𑀉𑀧𑁆𑀧𑀮𑀯𑀡𑁆𑀡𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁𑀬𑁂𑀯 𑀪𑀦𑁆𑀢𑁂 𑀅𑀦𑁆𑀥𑀯𑀦𑁂 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀆𑀭𑀩𑁆𑀪 𑀉𑀧𑁆𑀧𑀮𑀯𑀡𑁆𑀡𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀸𑀲𑀺𑀢𑀁. 𑀫𑀸𑀭𑁄 𑀪𑀦𑁆𑀢𑁂 𑀧𑀸𑀧𑀺𑀫𑀸 𑀉𑀧𑁆𑀧𑀮𑀯𑀡𑁆𑀡𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀲𑀫𑀸𑀥𑀺𑀫𑁆𑀳𑀸 𑀘𑀸𑀯𑁂𑀢𑀼𑀓𑀸𑀫𑁄 𑀉𑀧𑁆𑀧𑀮𑀯𑀡𑁆𑀡𑀁 𑀪𑀺𑀓𑁆𑀔𑀼𑀦𑀺𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺𑁋

‘‘𑀲𑀼𑀧𑀼𑀧𑁆𑀨𑀺𑀢𑀕𑁆𑀕𑀁 ¶ 𑀉𑀧𑀕𑀫𑁆𑀫 𑀪𑀺𑀓𑁆𑀔𑀼𑀦𑀺, 𑀏𑀓𑀸 𑀢𑀼𑀯𑀁 𑀢𑀺𑀝𑁆𑀞𑀲𑀺 𑀲𑀸𑀮𑀫𑀽𑀮𑁂. 𑀦 𑀘𑀢𑁆𑀣𑀺 𑀢𑁂 𑀤𑀼𑀢𑀺𑀬𑀸 𑀯𑀡𑁆𑀡𑀥𑀸𑀢𑀼, 𑀩𑀸𑀮𑁂 𑀦 𑀢𑁆𑀯𑀁 𑀪𑀸𑀬𑀲𑀺 𑀥𑀼𑀢𑁆𑀢𑀓𑀸𑀦’’𑀦𑁆𑀢𑀺.

𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

‘‘𑀲𑀢𑀁 𑀲𑀳𑀲𑁆𑀲𑀸𑀦𑀺𑀧𑀺 𑀥𑀼𑀢𑁆𑀢𑀓𑀸𑀦𑀁,

𑀇𑀥𑀸𑀕𑀢𑀸 𑀢𑀸𑀤𑀺𑀲𑀓𑀸 𑀪𑀯𑁂𑀬𑁆𑀬𑀼𑀁;

𑀮𑁄𑀫𑀁 𑀦 𑀇𑀜𑁆𑀚𑀸𑀫𑀺 𑀦 𑀲𑀦𑁆𑀢𑀲𑀸𑀫𑀺,

𑀦 𑀫𑀸𑀭 𑀪𑀸𑀬𑀸𑀫𑀺 𑀢𑀫𑁂𑀓𑀺𑀓𑀸𑀧𑀺.

𑀏𑀲𑀸 𑀅𑀦𑁆𑀢𑀭𑀥𑀸𑀬𑀸𑀫𑀺, 𑀓𑀼𑀘𑁆𑀙𑀺𑀁 𑀯𑀸 𑀧𑀯𑀺𑀲𑀸𑀫𑀺 𑀢𑁂;

𑀧𑀔𑀼𑀫𑀦𑁆𑀢𑀭𑀺𑀓𑀸𑀬𑀫𑁆𑀧𑀺, 𑀢𑀺𑀝𑁆𑀞𑀦𑁆𑀢𑀺𑀁 𑀫𑀁 𑀦 𑀤𑀓𑁆𑀔𑀲𑀺.

𑀘𑀺𑀢𑁆𑀢𑀲𑁆𑀫𑀺𑀁 𑀯𑀲𑀻𑀪𑀽𑀢𑀸𑀫𑁆𑀳𑀺, 𑀇𑀤𑁆𑀥𑀺𑀧𑀸𑀤𑀸 𑀲𑀼𑀪𑀸𑀯𑀺𑀢𑀸;

𑀲𑀩𑁆𑀩𑀩𑀦𑁆𑀥𑀦𑀫𑀼𑀢𑁆𑀢𑀸𑀫𑁆𑀳𑀺, 𑀦 𑀢𑀁 𑀪𑀸𑀬𑀸𑀫𑀺 𑀆𑀯𑀼𑀲𑁄’’𑀢𑀺.

𑀏𑀯𑀁 𑀔𑁄 𑀪𑀦𑁆𑀢𑁂 𑀉𑀧𑁆𑀧𑀮𑀯𑀡𑁆𑀡𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑀸𑀯𑀼𑀲𑁄 ¶ 𑀘𑀸𑀮𑀸𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀅𑀦𑁆𑀥𑀯𑀦𑁂 𑀫𑀸𑀭𑀁𑀬𑁂𑀯 𑀧𑀸𑀧𑀺𑀫𑀦𑁆𑀢𑀁 𑀆𑀭𑀩𑁆𑀪 𑀘𑀸𑀮𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀅𑀭𑀺𑀬𑀲𑀸𑀯𑀺𑀓𑀸𑀬 𑀪𑀸𑀲𑀺𑀢𑀁. 𑀫𑀸𑀭𑁄 𑀪𑀦𑁆𑀢𑁂 𑀧𑀸𑀧𑀺𑀫𑀸 𑀘𑀸𑀮𑀁 𑀪𑀺𑀓𑁆𑀔𑀼𑀦𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 ‘‘𑀓𑀺𑀁 𑀦𑀼 𑀢𑁆𑀯𑀁 𑀪𑀺𑀓𑁆𑀔𑀼𑀦𑀺 𑀦 𑀭𑁄𑀘𑁂𑀲𑀻’’𑀢𑀺. 𑀚𑀸𑀢𑀺𑀁 𑀔𑁆𑀯𑀸𑀳𑀁 𑀆𑀯𑀼𑀲𑁄 𑀦 𑀭𑁄𑀘𑁂𑀫𑀻’’𑀢𑀺.

𑀓𑀺𑀁 𑀦𑀼 𑀚𑀸𑀢𑀺𑀁 𑀦 𑀭𑁄𑀘𑁂𑀲𑀺, 𑀚𑀸𑀢𑁄 𑀓𑀸𑀫𑀸𑀦𑀺 𑀪𑀼𑀜𑁆𑀚𑀢𑀺;

𑀓𑁄 𑀦𑀼 𑀢𑀁 𑀇𑀤𑀫𑀸𑀤𑀧𑀬𑀺, 𑀚𑀸𑀢𑀺𑀁 𑀫𑀸 𑀭𑁄𑀘 𑀪𑀺𑀓𑁆𑀔𑀼𑀦𑀻𑀢𑀺.

𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

𑀚𑀸𑀢𑀲𑁆𑀲 𑀫𑀭𑀡𑀁 𑀳𑁄𑀢𑀺, 𑀚𑀸𑀢𑁄 𑀤𑀼𑀓𑁆𑀔𑀸𑀦𑀺 𑀨𑀼𑀲𑁆𑀲𑀢𑀺;

𑀩𑀦𑁆𑀥𑀁 𑀯𑀥𑀁 𑀧𑀭𑀺𑀓𑁆𑀮𑁂𑀲𑀁, 𑀢𑀲𑁆𑀫𑀸 𑀚𑀸𑀢𑀺𑀁 𑀦 𑀭𑁄𑀘𑀬𑁂.

𑀩𑀼𑀤𑁆𑀥𑁄 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀚𑀸𑀢𑀺𑀬𑀸 𑀲𑀫𑀢𑀺𑀓𑁆𑀓𑀫𑀁;

𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀳𑀸𑀦𑀸𑀬, 𑀲𑁄 𑀫𑀁 𑀲𑀘𑁆𑀘𑁂 𑀦𑀺𑀯𑁂𑀲𑀬𑀺.

𑀬𑁂 𑀘 𑀭𑀽𑀧𑀽𑀧𑀕𑀸 𑀲𑀢𑁆𑀢𑀸, 𑀬𑁂 𑀘 𑀅𑀭𑀽𑀧𑀝𑁆𑀞𑀸𑀬𑀺𑀦𑁄;

𑀦𑀺𑀭𑁄𑀥𑀁 𑀅𑀧𑁆𑀧𑀚𑀸𑀦𑀦𑁆𑀢𑀸, 𑀆𑀕𑀦𑁆𑀢𑀸𑀭𑁄 𑀧𑀼𑀦𑀩𑁆𑀪𑀯𑀦𑁆𑀢𑀺.

𑀏𑀯𑀁 𑀔𑁄 𑀪𑀦𑁆𑀢𑁂 𑀘𑀸𑀮𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀸𑀲𑀺𑀢𑀁.

𑀓𑀺𑀁 ¶ 𑀦𑀼 𑀚𑀸𑀢𑀺𑀁 𑀦 𑀭𑁄𑀘𑁂𑀲𑀺, 𑀚𑀸𑀢𑁄 𑀓𑀸𑀫𑀸𑀦𑀺 𑀪𑀼𑀜𑁆𑀚𑀢𑀺;

𑀓𑁄 𑀦𑀼 𑀢𑀁 𑀇𑀤𑀫𑀸𑀤𑀧𑀬𑀺, 𑀚𑀸𑀢𑀺𑀁 𑀫𑀸 𑀭𑁄𑀘 𑀪𑀺𑀓𑁆𑀔𑀼𑀦𑀻.

𑀚𑀸𑀢𑀲𑁆𑀲 ¶ 𑀫𑀭𑀡𑀁 𑀳𑁄𑀢𑀺, 𑀚𑀸𑀢𑁄 𑀤𑀼𑀓𑁆𑀔𑀸𑀦𑀺 𑀨𑀼𑀲𑁆𑀲𑀢𑀺;

𑀩𑀦𑁆𑀥𑀁 𑀯𑀥𑀁 𑀧𑀭𑀺𑀓𑁆𑀮𑁂𑀲𑀁, 𑀢𑀲𑁆𑀫𑀸 𑀚𑀸𑀢𑀺𑀁 𑀦 𑀭𑁄𑀘𑀬𑁂.

𑀩𑀼𑀤𑁆𑀥𑁄 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀚𑀸𑀢𑀺𑀬𑀸 𑀲𑀫𑀢𑀺𑀓𑁆𑀓𑀫𑀁,

𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀳𑀸𑀦𑀸𑀬, 𑀲𑁄 𑀫𑀁 𑀲𑀘𑁆𑀘𑁂 𑀦𑀺𑀯𑁂𑀲𑀬𑀺.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑀸𑀯𑀼𑀲𑁄 ¶ 𑀲𑁂𑀮𑀸𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀫𑀸𑀭𑀁𑀬𑁂𑀯 𑀧𑀸𑀧𑀺𑀫𑀦𑁆𑀢𑀁 𑀆𑀭𑀩𑁆𑀩𑁆𑀪 𑀲𑁂𑀮𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀅𑀭𑀺𑀬𑀲𑀸𑀯𑀺𑀓𑀸𑀬 𑀪𑀸𑀲𑀺𑀢𑀁. 𑀫𑀸𑀭𑁄 𑀪𑀦𑁆𑀢𑁂 𑀧𑀸𑀧𑀺𑀫𑀸 𑀲𑁂𑀮𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀮𑁄𑀫𑀳𑀁𑀲𑀁 𑀉𑀧𑁆𑀧𑀸𑀤𑁂𑀢𑀼𑀓𑀸𑀫𑁄 𑀲𑀫𑀸𑀥𑀺𑀫𑁆𑀳𑀸 𑀘𑀸𑀯𑁂𑀢𑀼𑀓𑀸𑀫𑁄 𑀲𑁂𑀮𑀁 𑀪𑀺𑀓𑁆𑀔𑀼𑀦𑀺𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺𑁋

𑀓𑁂𑀦𑀺𑀤𑀁 𑀧𑀓𑀢𑀁 𑀩𑀺𑀫𑁆𑀩𑀁, 𑀓𑁆𑀯𑀦𑀼 𑀩𑀺𑀫𑁆𑀩𑀲𑁆𑀲 𑀓𑀸𑀭𑀓𑁄;

𑀓𑁆𑀯𑀦𑀼 𑀩𑀺𑀫𑁆𑀩𑀁 𑀲𑀫𑀼𑀧𑁆𑀧𑀦𑁆𑀦𑀁, 𑀓𑁆𑀯𑀦𑀼 𑀩𑀺𑀫𑁆𑀩𑀁 𑀦𑀺𑀭𑀼𑀚𑁆𑀛𑀢𑀻𑀢𑀺.

𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

𑀦𑀬𑀺𑀤𑀁 𑀅𑀢𑁆𑀢𑀓𑀢𑀁 𑀩𑀺𑀫𑁆𑀩𑀁, 𑀦𑀬𑀺𑀤𑀁 𑀧𑀭𑀓𑀢𑀁 𑀅𑀖𑀁;

𑀳𑁂𑀢𑀼𑀁 𑀧𑀝𑀺𑀘𑁆𑀘 𑀲𑀫𑁆𑀪𑀽𑀢𑀁, 𑀳𑁂𑀢𑀼𑀪𑀗𑁆𑀕𑀸 𑀦𑀺𑀭𑀼𑀚𑁆𑀛𑀢𑀻𑀢𑀺.

𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀲𑁂𑀮𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀸𑀲𑀺𑀢𑀁.

𑀓𑁂𑀦𑀺𑀤𑀁 ¶ 𑀧𑀓𑀢𑀁 𑀩𑀺𑀫𑁆𑀩𑀁, 𑀓𑁆𑀯𑀦𑀼 𑀩𑀺𑀫𑁆𑀩𑀲𑁆𑀲 𑀓𑀸𑀭𑀓𑁄;

𑀓𑁆𑀯𑀦𑀼 𑀩𑀺𑀫𑁆𑀩𑀁 𑀲𑀫𑀼𑀧𑁆𑀧𑀦𑁆𑀦𑀁, 𑀓𑁆𑀯𑀦𑀼 𑀩𑀺𑀫𑁆𑀩𑀁 𑀦𑀺𑀭𑀼𑀚𑁆𑀛𑀢𑀺-𑀳𑀼𑁋

𑀦𑀬𑀺𑀤𑀁 𑀅𑀢𑁆𑀢𑀓𑀢𑀁 𑀩𑀺𑀫𑁆𑀩𑀁, 𑀦𑀬𑀺𑀤𑀁 𑀧𑀭𑀓𑀢𑀁 𑀅𑀖𑀁;

𑀳𑁂𑀢𑀼𑀁 𑀧𑀝𑀺𑀘𑁆𑀘 𑀲𑀫𑁆𑀪𑀽𑀢𑀁, 𑀳𑁂𑀢𑀼𑀪𑀗𑁆𑀕𑀸 𑀦𑀺𑀭𑀼𑀚𑁆𑀛𑀢𑀺.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑀸𑀯𑀼𑀲𑁄 ¶ 𑀧𑁄𑀭𑀸𑀡𑀓𑁂𑀳𑀺 𑀫𑀳𑀸𑀓𑀲𑁆𑀲𑀧𑀸𑀤𑀻𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀣𑁂𑀭𑀯𑀭𑁂𑀳𑀺 𑀲𑀁𑀕𑀻𑀢𑀁 𑀯𑀚𑀺𑀭𑀸𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀆𑀭𑀩𑁆𑀪 𑀯𑀚𑀺𑀭𑀸𑀬 𑀣𑁂𑀭𑀺𑀬𑀸 𑀪𑀺𑀓𑁆𑀔𑀼𑀦𑀺𑀬𑀸 𑀪𑀸𑀲𑀺𑀢𑀁. 𑀫𑀸𑀭𑁄 𑀪𑀦𑁆𑀢𑁂 𑀧𑀸𑀧𑀺𑀫𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀚𑀺𑀭𑀁 𑀪𑀺𑀓𑁆𑀔𑀼𑀦𑀺𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺𑁋

𑀓𑁂𑀦𑀸𑀬𑀁 ¶ 𑀧𑀓𑀢𑁄 𑀲𑀢𑁆𑀢𑁄, 𑀓𑀼𑀯𑀁 𑀲𑀢𑁆𑀢𑀲𑁆𑀲 𑀓𑀸𑀭𑀓𑁄,

𑀓𑀼𑀯𑀁 𑀲𑀢𑁆𑀢𑁄 𑀲𑀫𑀼𑀧𑁆𑀧𑀦𑁆𑀦𑁄, 𑀓𑀼𑀯𑀁 𑀲𑀢𑁆𑀢𑁄 𑀦𑀺𑀭𑀼𑀚𑁆𑀛𑀢𑀻𑀢𑀺.

𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

𑀓𑀺𑀁 𑀦𑀼 𑀲𑀢𑁆𑀢𑁄𑀢𑀺 𑀧𑀘𑁆𑀘𑁂𑀲𑀺, 𑀫𑀸𑀭𑀤𑀺𑀝𑁆𑀞𑀺𑀕𑀢𑀁 𑀦𑀼 𑀢𑁂;

𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑁄𑀬𑀁, 𑀦𑀬𑀺𑀥 𑀲𑀢𑁆𑀢𑀼𑀧𑀮𑀩𑁆𑀪𑀢𑀺.

𑀬𑀣𑀸 𑀳𑀺 𑀅𑀗𑁆𑀕𑀲𑀫𑁆𑀪𑀸𑀭𑀸, 𑀳𑁄𑀢𑀺 𑀲𑀤𑁆𑀤𑁄 𑀭𑀣𑁄 𑀇𑀢𑀺;

𑀏𑀯𑀁 𑀔𑀦𑁆𑀥𑁂𑀲𑀼 𑀲𑀦𑁆𑀢𑁂𑀲𑀼, 𑀳𑁄𑀢𑀺 𑀲𑀢𑁆𑀢𑁄𑀢𑀺 𑀲𑀫𑁆𑀫𑀼𑀢𑀺.

𑀤𑀼𑀓𑁆𑀔𑀫𑁂𑀯 𑀳𑀺 𑀲𑀫𑁆𑀪𑁄𑀢𑀺, 𑀤𑀼𑀓𑁆𑀔𑀁 𑀢𑀺𑀝𑁆𑀞𑀢𑀺 𑀯𑁂𑀢𑀺 𑀘,

𑀦𑀸𑀜𑁆𑀜𑀢𑁆𑀭 𑀤𑀼𑀓𑁆𑀔𑀸 𑀲𑀫𑁆𑀪𑁄𑀢𑀺, 𑀦𑀸𑀜𑁆𑀜𑀁 𑀤𑀼𑀓𑁆𑀔𑀸 𑀦𑀺𑀭𑀼𑀚𑁆𑀛𑀢𑀻𑀢𑀺.

𑀏𑀯𑀁 𑀔𑁄 𑀪𑀦𑁆𑀢𑁂 𑀯𑀚𑀺𑀭𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀸𑀲𑀺𑀢𑀁.

𑀓𑁂𑀦𑀸𑀬𑀁 𑀧𑀓𑀢𑁄 𑀲𑀢𑁆𑀢𑁄, 𑀓𑀼𑀯𑀁 𑀲𑀢𑁆𑀢𑀲𑁆𑀲𑀓𑀸𑀭𑀓𑁄;

𑀓𑀼𑀯𑀁 𑀲𑀢𑁆𑀢𑁄 𑀲𑀫𑀼𑀧𑁆𑀧𑀦𑁆𑀦𑁄, 𑀓𑀼𑀯𑀁 𑀲𑀢𑁆𑀢𑁄 𑀦𑀺𑀭𑀼𑀚𑁆𑀛𑀢𑀺-𑀳𑀼𑁋

𑀓𑀺𑀁 ¶ 𑀦𑀼 𑀲𑀢𑁆𑀢𑁄𑀢𑀺 𑀧𑀘𑁆𑀘𑁂𑀲𑀺, 𑀫𑀸𑀭 𑀤𑀺𑀝𑁆𑀞𑀺𑀕𑀢𑀁 𑀦𑀼 𑀢𑁂;

𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑁄𑀬𑀁, 𑀦𑀬𑀺𑀥 𑀲𑀢𑁆𑀢𑀼𑀧𑀮𑀩𑁆𑀪𑀢𑀺.

𑀧𑀼𑀘𑁆𑀙𑀸 𑁋 𑀩𑁆𑀭𑀳𑁆𑀫𑀲𑀁𑀬𑀼𑀢𑁆𑀢𑁂 ¶ 𑀆𑀯𑀼𑀲𑁄 𑀧𑁄𑀭𑀸𑀡𑁂𑀳𑀺 𑀫𑀳𑀸𑀓𑀲𑁆𑀲𑀧𑀣𑁂𑀭𑀸𑀤𑀻𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀣𑁂𑀭𑀯𑀭𑁂𑀳𑀺 𑀤𑀼𑀢𑀺𑀬𑀁 𑀲𑀁𑀕𑀻𑀢𑀁 𑀕𑀸𑀭𑀯𑀲𑀼𑀢𑁆𑀢𑀁 𑀓𑀢𑁆𑀣 𑀓𑀣𑀜𑁆𑀘 𑀲𑀫𑀼𑀧𑁆𑀧𑀦𑁆𑀦𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀉𑀭𑀼𑀯𑁂𑀮𑀸𑀬𑀁 𑀪𑀦𑁆𑀢𑁂 𑀲𑀫𑀼𑀧𑁆𑀧𑀦𑁆𑀦𑀁. 𑀪𑀕𑀯𑀸 𑀪𑀦𑁆𑀢𑁂 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀢𑀺 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄. 𑀅𑀣 𑀔𑁄 𑀪𑀕𑀯𑀢𑁄 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 ‘‘𑀤𑀼𑀓𑁆𑀔𑀁 𑀔𑁄 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄, 𑀓𑀁 𑀦𑀼 𑀔𑁆𑀯𑀸𑀳𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀪𑀦𑁆𑀢𑁂 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 ‘‘𑀅𑀧𑀭𑀺𑀧𑀼𑀡𑁆𑀡𑀲𑁆𑀲 𑀔𑁄 𑀲𑀻𑀮𑀓𑁆𑀔𑀦𑁆𑀥𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀅𑀜𑁆𑀜𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬𑀼𑀁, 𑀦 𑀔𑁄 𑀧𑀦𑀸𑀳𑀁 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀢𑁆𑀢𑀦𑀸 𑀲𑀻𑀮𑀲𑀫𑁆𑀧𑀦𑁆𑀦𑀢𑀭𑀁 𑀅𑀜𑁆𑀜𑀁 𑀲𑀫𑀡𑀁 𑀯𑀸

𑀩𑁆𑀭𑀸𑀳𑁆𑀫𑀡𑀁 ¶ 𑀯𑀸, 𑀬𑀫𑀳𑀁 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬𑀼𑀁.

𑀅𑀧𑀭𑀺𑀧𑀼𑀡𑁆𑀡𑀲𑁆𑀲 𑀔𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑀲𑁆𑀲;

𑀅𑀧𑀭𑀺𑀧𑀼𑀡𑁆𑀡𑀲𑁆𑀲 𑀔𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑀲𑁆𑀲;

𑀅𑀧𑀭𑀺𑀧𑀼𑀡𑁆𑀡𑀲𑁆𑀲 𑀔𑁄 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀲𑁆𑀲.

𑀅𑀧𑀭𑀺𑀧𑀼𑀡𑁆𑀡𑀲𑁆𑀲 𑀔𑁄 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀅𑀜𑁆𑀜𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬𑀁. 𑀦 𑀔𑁄 𑀧𑀦𑀸𑀳𑀁 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀢𑁆𑀢𑀦𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀢𑀭𑀁 𑀅𑀜𑁆𑀜𑀁 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸, 𑀬𑀫𑀳𑀁 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬𑀁. 𑀬𑀁𑀦𑀽𑀦𑀸𑀳𑀁 𑀬𑁆𑀯𑀸𑀬𑀁 𑀥𑀫𑁆𑀫𑁄 𑀫𑀬𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀢𑀫𑁂𑀯 𑀥𑀫𑁆𑀫𑀁 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺. 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑁄 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑀯𑀲𑁂𑀦 𑀉𑀧𑁆𑀧𑀦𑁆𑀦𑀁.

𑀬𑁂 ¶ 𑀘 𑀅𑀢𑀻𑀢𑀸 𑀲𑀫𑁆𑀩𑀼𑀤𑁆𑀥𑀸, 𑀬𑁂 𑀘 𑀩𑀼𑀤𑁆𑀥𑀸 𑀅𑀦𑀸𑀕𑀢𑀸;

𑀬𑁄 𑀘𑁂𑀢𑀭𑀳𑀺 𑀲𑀫𑁆𑀩𑀼𑀤𑁆𑀥𑁄, 𑀩𑀳𑀽𑀦𑀁 𑀲𑁄𑀓𑀦𑀸𑀲𑀦𑁄;

𑀲𑀩𑁆𑀩𑁂 𑀲𑀤𑁆𑀥𑀫𑁆𑀫𑀕𑀭𑀼𑀦𑁄, 𑀯𑀺𑀳𑀁𑀲𑀼 𑀯𑀺𑀳𑀭𑀦𑁆𑀢𑀺 𑀘;

𑀢𑀣𑀸𑀧𑀺 𑀯𑀺𑀳𑀭𑀺𑀲𑁆𑀲𑀦𑁆𑀢𑀺, 𑀏𑀲𑀸 𑀩𑀼𑀤𑁆𑀥𑀸𑀦 𑀥𑀫𑁆𑀫𑀢𑀸.

𑀢𑀲𑁆𑀫𑀸 𑀳𑀺 𑀅𑀢𑁆𑀢𑀓𑀸𑀫𑁂𑀦, 𑀫𑀳𑀢𑁆𑀢𑀫𑀪𑀺𑀓𑀗𑁆𑀔𑀢𑀸;

𑀲𑀤𑁆𑀥𑀫𑁆𑀫𑁄 𑀕𑀭𑀼𑀓𑀸𑀢𑀩𑁆𑀩𑁄, 𑀲𑀭𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀁.

𑀧𑀼𑀘𑁆𑀙𑀸- 𑀢𑀢𑁆𑀣𑀸𑀯𑀼𑀲𑁄 ¶ 𑀧𑁄𑀭𑀸𑀡𑀓𑁂𑀳𑀺 𑀫𑀳𑀸𑀓𑀲𑁆𑀲𑀧𑀸𑀤𑀻𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀣𑁂𑀭𑀯𑀭𑁂𑀳𑀺 𑀧𑀞𑀫𑀁 𑀲𑀁𑀕𑀻𑀢𑀁 𑀅𑀜𑁆𑀜𑀢𑀭𑀩𑁆𑀭𑀳𑁆𑀫𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀩𑁆𑀭𑀳𑁆𑀫𑀮𑁄𑀓𑁂 𑀪𑀦𑁆𑀢𑁂 𑀅𑀜𑁆𑀜𑀢𑀭𑀁 𑀩𑁆𑀭𑀳𑁆𑀫𑀸𑀦𑀁 𑀆𑀭𑀩𑁆𑀪 𑀆𑀬𑀲𑁆𑀫𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁂𑀦 𑀪𑀸𑀲𑀺𑀢𑀁. 𑀅𑀜𑁆𑀜𑀢𑀭𑀲𑁆𑀲 𑀪𑀦𑁆𑀢𑁂 𑀩𑁆𑀭𑀳𑁆𑀫𑀼𑀦𑁄 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 ‘‘𑀦𑀢𑁆𑀣𑀺 𑀲𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸, 𑀬𑁄 𑀇𑀥 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

𑀅𑀚𑁆𑀚𑀸𑀧𑀺 𑀢𑁂 𑀆𑀯𑀼𑀲𑁄 𑀲𑀸 𑀤𑀺𑀝𑁆𑀞𑀺, 𑀬𑀸 𑀢𑁂 𑀤𑀺𑀝𑁆𑀞𑀺 𑀧𑀼𑀭𑁂 𑀅𑀳𑀼;

𑀧𑀲𑁆𑀲𑀲𑀺 𑀯𑀻𑀢𑀺𑀯𑀢𑁆𑀢𑀦𑁆𑀢𑀁, 𑀩𑁆𑀭𑀳𑁆𑀫𑀮𑁄𑀓𑁂 𑀧𑀪𑀲𑁆𑀲𑀭𑀦𑁆𑀢𑀺;

𑀏𑀯𑀁 𑀔𑁄 𑀪𑀦𑁆𑀢𑁂 𑀆𑀬𑀲𑁆𑀫𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁂𑀦 𑀪𑀸𑀲𑀺𑀢𑀁.

𑀅𑀚𑁆𑀚𑀸𑀧𑀺 ¶ 𑀢𑁂 𑀆𑀯𑀼𑀲𑁄 𑀲𑀸 𑀤𑀺𑀝𑁆𑀞𑀺, 𑀬𑀸 𑀢𑁂 𑀤𑀺𑀝𑁆𑀞𑀺 𑀧𑀼𑀭𑁂 𑀅𑀳𑀼;

𑀧𑀲𑁆𑀲𑀲𑀺 𑀯𑀻𑀢𑀺𑀯𑀢𑁆𑀢𑀦𑁆𑀢, 𑀩𑁆𑀭𑀳𑁆𑀫𑀮𑁄𑀓𑁂 𑀧𑀪𑀲𑁆𑀲𑀭𑀁-𑀳𑀼𑁋

𑀦 𑀫𑁂 𑀫𑀸𑀭𑀺𑀲 𑀲𑀸 𑀤𑀺𑀝𑁆𑀞𑀺, 𑀬𑀸 𑀫𑁂 𑀤𑀺𑀝𑁆𑀞𑀺 𑀧𑀼𑀭𑁂 𑀅𑀳𑀼;

𑀧𑀲𑁆𑀲𑀸𑀫𑀺 𑀯𑀻𑀢𑀺𑀯𑀢𑁆𑀢𑀦𑁆𑀢𑀁, 𑀩𑁆𑀭𑀳𑁆𑀫𑀮𑁄𑀓𑁂 𑀧𑀪𑀲𑁆𑀲𑀭𑀁;

𑀲𑁆𑀯𑀸𑀳𑀁 𑀅𑀚𑁆𑀚 𑀓𑀣𑀁 𑀯𑀚𑁆𑀚𑀁, 𑀅𑀳𑀁 𑀦𑀺𑀘𑁆𑀘𑁄𑀫𑁆𑀳𑀺 𑀲𑀲𑁆𑀲𑀢𑁄 𑀳𑀼𑁋

𑀢𑁂𑀯𑀺𑀚𑁆𑀚𑀸 ¶ 𑀇𑀤𑁆𑀥𑀺𑀧𑀢𑁆𑀢𑀸 𑀘, 𑀘𑁂𑀢𑁄𑀧𑀭𑀺𑀬𑀸𑀬 𑀓𑁄𑀯𑀺𑀤𑀸;

𑀔𑀻𑀡𑀸𑀲𑀯𑀸 𑀅𑀭𑀳𑀦𑁆𑀢𑁄, 𑀩𑀳𑀽 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑀸-𑀳𑀼𑁋

𑀧𑀼𑀘𑁆𑀙𑀸 𑁋 𑀢𑀢𑁆𑀣𑀸𑀯𑀼𑀲𑁄 ¶ 𑀅𑀭𑀼𑀡𑀯𑀢𑀻𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀪𑀽𑀢𑀧𑀼𑀩𑁆𑀩𑀁 𑀪𑀺𑀓𑁆𑀔𑀯𑁂 𑀭𑀸𑀚𑀸 𑀅𑀳𑁄𑀲𑀺 𑀅𑀭𑀼𑀡𑀯𑀸 𑀦𑀸𑀫. 𑀭𑀜𑁆𑀜𑁄 𑀔𑁄 𑀧𑀦 𑀪𑀺𑀓𑁆𑀔𑀯𑁂 𑀅𑀭𑀼𑀡𑀯𑀢𑁄 𑀅𑀭𑀼𑀡𑀯𑀢𑀻 𑀦𑀸𑀫 𑀭𑀸𑀚𑀥𑀸𑀦𑀻 𑀅𑀳𑁄𑀲𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀅𑀭𑀼𑀡𑀯𑀢𑀻 𑀲𑀼𑀢𑁆𑀢𑀁 𑀪𑀸𑀲𑀺𑀢𑀁.

𑀆𑀭𑀫𑁆𑀪𑀣 ¶ 𑀦𑀺𑀓𑁆𑀓𑀫𑀣, 𑀬𑀼𑀜𑁆𑀚𑀣 𑀩𑀼𑀤𑁆𑀥𑀲𑀸𑀲𑀦𑁂;

𑀥𑀼𑀦𑀸𑀣 𑀫𑀘𑁆𑀘𑀼𑀦𑁄 𑀲𑁂𑀦𑀁, 𑀦𑀴𑀸𑀕𑀸𑀭𑀁𑀯 𑀓𑀼𑀜𑁆𑀚𑀭𑁄;

𑀬𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀲𑁆𑀲𑀢𑀺;

𑀧𑀳𑀸𑀬 𑀚𑀸𑀢𑀺 𑀲𑀁𑀲𑀸𑀭𑀁, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀺-𑀳𑀼𑁋

𑀧𑀼𑀘𑁆𑀙𑀸 𑁋 𑀩𑁆𑀭𑀸𑀳𑁆𑀫𑀡𑀲𑀁𑀬𑀼𑀢𑁆𑀢𑁂 ¶ 𑀆𑀯𑀼𑀲𑁄 𑀧𑀞𑀫𑀁 𑀲𑀁𑀕𑀻𑀢𑀁 𑀥𑀦𑀜𑁆𑀚𑀸𑀦𑀻𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀪𑀸𑀭𑀤𑁆𑀯𑀸𑀚𑀕𑁄𑀢𑁆𑀢𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀪𑀸𑀭𑀤𑁆𑀯𑀸𑀚𑀕𑁄𑀢𑁆𑀢𑁄 𑀪𑀦𑁆𑀢𑁂 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺.

‘‘𑀓𑀺𑀁 𑀲𑀼 𑀙𑁂𑀢𑁆𑀯𑀸 𑀲𑀼𑀔𑀁 𑀲𑁂𑀢𑀺,

𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

‘‘𑀓𑁄𑀥𑀁 𑀙𑁂𑀢𑁆𑀯𑀸 𑀲𑀼𑀔𑀁 𑀲𑁂𑀢𑀺;

𑀢𑀜𑁆𑀳𑀺 𑀙𑁂𑀢𑁆𑀯𑀸 𑀦 𑀲𑁄𑀘𑀢𑀻’’𑀢𑀺;

𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀓𑀺𑀁 ¶ 𑀲𑀼 𑀙𑁂𑀢𑁆𑀯𑀸 𑀲𑀼𑀔𑀁𑀲𑁂𑀢𑀺, 𑀓𑀺𑀁 𑀲𑀼 𑀙𑁂𑀢𑁆𑀯𑀸 𑀦 𑀲𑁄𑀘𑀢𑀺;

𑀓𑀺𑀲𑁆𑀲𑀲𑁆𑀲𑀼 𑀏𑀓𑀥𑀫𑁆𑀫𑀲𑁆𑀲, 𑀯𑀥𑀁 𑀭𑁄𑀘𑁂𑀲𑀺 𑀕𑁄𑀢𑀫𑁋

𑀧𑀼𑀘𑁆𑀙𑀸 𑁋 𑀇𑀫𑀜𑁆𑀘 ¶ 𑀧𑀦𑀸𑀯𑀼𑀲𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀪𑀸𑀭𑀤𑁆𑀯𑀸𑀚𑀕𑁄𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀲𑀦𑁆𑀦𑁄 𑀓𑀻𑀤𑀺𑀲𑀁 𑀧𑀲𑀦𑁆𑀦𑀸𑀓𑀸𑀭𑀫𑀓𑀸𑀲𑀺, 𑀓𑀻𑀯𑀢𑁆𑀢𑀓𑀜𑁆𑀘 𑀅𑀢𑁆𑀣𑀁 𑀲𑀫𑁆𑀧𑀸𑀤𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀇𑀫𑀜𑁆𑀘 𑀧𑀦 𑀪𑀦𑁆𑀢𑁂 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀪𑀸𑀭𑀤𑁆𑀯𑀸𑀚𑀕𑁄𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 ‘‘𑀅𑀪𑀺𑀓𑁆𑀓𑀦𑁆𑀢𑀁 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁 𑀪𑁄 𑀕𑁄𑀢𑀫, 𑀲𑁂𑀬𑁆𑀬𑀣𑀸𑀧𑀺 𑀪𑁄 𑀕𑁄𑀢𑀫 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀲𑀦𑁆𑀦𑁄 𑀧𑀲𑀦𑁆𑀦𑀸𑀓𑀸𑀭𑀫𑀓𑀸𑀲𑀺. 𑀇𑀫𑀜𑁆𑀘 𑀧𑀦 𑀪𑀦𑁆𑀢𑁂 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀪𑀸𑀭𑀤𑁆𑀯𑀸𑀚𑀕𑁄𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁 𑀉𑀧𑀲𑀫𑁆𑀧𑀤𑀁 𑀬𑀸𑀘𑀺𑀢𑁆𑀯𑀸 𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑁄 𑀬𑀸𑀯 𑀅𑀭𑀳𑀢𑁆𑀢𑀁 𑀲𑀫𑁆𑀧𑀸𑀤𑁂𑀲𑀺.

𑀧𑀼𑀘𑁆𑀙𑀸 𑁋 𑀅𑀓𑁆𑀓𑁄𑀲𑀓𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀅𑀓𑁆𑀓𑁄𑀲𑀓𑀪𑀸𑀭𑀤𑁆𑀯𑀸𑀚𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀅𑀓𑁆𑀓𑁄𑀲𑀓𑀪𑀸𑀭𑀤𑁆𑀯𑀸𑀚𑁄 𑀪𑀦𑁆𑀢𑁂 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀲𑀩𑁆𑀪𑀸𑀳𑀺 𑀨𑀭𑀼𑀲𑀸𑀳𑀺 𑀯𑀸𑀘𑀸𑀳𑀺 𑀪𑀕𑀯𑀦𑁆𑀢𑀁 𑀅𑀓𑁆𑀓𑁄𑀲𑀢𑀺 𑀧𑀭𑀺𑀪𑀸𑀲𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀩𑁆𑀭𑀸𑀳𑁆𑀫𑀡, 𑀅𑀧𑀺 𑀦𑀼𑀔𑁄 𑀢𑁂 𑀆𑀕𑀘𑁆𑀙𑀦𑁆𑀢𑀺 𑀫𑀺𑀢𑁆𑀢𑀸𑀫𑀘𑁆𑀘𑀸 ¶ 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀅𑀢𑀺𑀢𑀺𑀬𑁄’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀓𑀼𑀤𑁆𑀥𑀁 𑀅𑀧𑁆𑀧𑀝𑀺𑀓𑀼𑀚𑁆𑀛𑀦𑁆𑀢𑁄,

𑀉𑀪𑀺𑀦𑁆𑀦𑀁 𑀢𑀺𑀓𑀺𑀘𑁆𑀙𑀦𑁆𑀢𑀸𑀦𑀁,

𑀧𑀼𑀘𑁆𑀙𑀸 𑁋 𑀇𑀫𑀜𑁆𑀘 ¶ 𑀧𑀦𑀸𑀯𑀼𑀲𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀅𑀓𑁆𑀓𑁄𑀲𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀲𑀦𑁆𑀦𑁄 𑀓𑀻𑀤𑀺𑀲𑀁 𑀧𑀲𑀦𑁆𑀦𑀸𑀓𑀸𑀭𑀫𑀓𑀸𑀲𑀺. 𑀓𑀻𑀯𑀢𑁆𑀢𑀓𑀜𑁆𑀘 𑀅𑀢𑁆𑀣𑀁 𑀲𑀫𑁆𑀧𑀸𑀤𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀇𑀫𑀜𑁆𑀘 𑀧𑀦 𑀪𑀦𑁆𑀢𑁂 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀅𑀓𑁆𑀓𑁄𑀲𑀓𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 ‘‘𑀅𑀪𑀺𑀓𑁆𑀓𑀦𑁆𑀢𑀁 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁 𑀪𑁄 𑀕𑁄𑀢𑀫𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀲𑀦𑁆𑀦𑁄 𑀧𑀲𑀦𑁆𑀦𑀸𑀓𑀸𑀭𑀫𑀓𑀸𑀲𑀺. 𑀬𑀸𑀯 𑀅𑀭𑀳𑀢𑁆𑀢𑀸 𑀘 𑀧𑀦 𑀫𑀳𑀦𑁆𑀢𑀁 𑀅𑀢𑁆𑀣𑀁 𑀲𑀫𑁆𑀧𑀸𑀤𑁂𑀲𑀺.

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 ¶ 𑀪𑀕𑀯𑀢𑀸 𑀚𑀸𑀦𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀩𑁆𑀭𑀸𑀳𑁆𑀫𑀡𑀲𑀁𑀬𑀼𑀢𑁆𑀢𑁂 𑀩𑀳𑀼𑀥𑀻𑀢𑀭𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑁄𑀲𑀮𑁂𑀲𑀼 𑀪𑀦𑁆𑀢𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀜𑁆𑀜𑀢𑀭𑀁 𑀪𑀸𑀭𑀤𑁆𑀯𑀸𑀚𑀕𑁄𑀢𑁆𑀢𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀅𑀜𑁆𑀜𑀢𑀭𑁄 𑀪𑀦𑁆𑀢𑁂 𑀪𑀸𑀭𑀤𑁆𑀯𑀸𑀚𑀕𑁄𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀕𑁄𑀡𑁂 𑀦𑀝𑁆𑀞𑁂 𑀧𑀭𑀺𑀬𑁂𑀲𑀦𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺.

‘‘𑀦 𑀳𑀺 𑀦𑀽𑀦𑀺𑀫𑀲𑁆𑀲 𑀲𑀫𑀡𑀲𑁆𑀲, 𑀩𑀮𑀻𑀩𑀤𑁆𑀤𑀸 𑀘𑀢𑀼𑀤𑁆𑀤𑀲;

𑀅𑀚𑁆𑀚𑀲𑀝𑁆𑀞𑀺𑀁 𑀦 𑀤𑀺𑀲𑁆𑀲𑀦𑁆𑀢𑀺, 𑀢𑁂𑀦𑀸𑀬𑀁 𑀲𑀫𑀡𑁄 𑀲𑀼𑀔𑀻;

𑀦 𑀳𑀺 𑀦𑀽𑀦𑀺𑀫𑀲𑁆𑀲 𑀲𑀫𑀡𑀲𑁆𑀲, 𑀢𑀺𑀮𑀸𑀔𑁂𑀢𑁆𑀢𑀲𑁆𑀫𑀺 𑀧𑀸𑀧𑀓𑀸;

𑀏𑀓𑀧𑀡𑁆𑀡𑀸 𑀤𑀼𑀧𑀡𑁆𑀡𑀸 𑀘, 𑀢𑁂𑀦𑀸𑀬𑀁 𑀲𑀫𑀡𑁄 𑀲𑀼𑀔𑀻.

𑀦 𑀳𑀺 𑀦𑀽𑀦𑀺𑀫𑀲𑁆𑀲 𑀲𑀫𑀡𑀲𑁆𑀲, 𑀧𑀘𑁆𑀘𑀽𑀲𑀫𑁆𑀳𑀺 𑀇𑀡𑀸𑀬𑀺𑀓𑀸;

𑀤𑁂𑀣 𑀤𑁂𑀣𑀸𑀢𑀺 𑀘𑁄𑀤𑁂𑀦𑁆𑀢𑀺, 𑀢𑁂𑀦𑀸𑀬𑀁 𑀲𑀫𑀡𑁄 𑀲𑀼𑀔𑀻’’𑀢𑀺.

𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

𑀦 𑀳𑀺 𑀫𑀬𑁆𑀳𑀁 𑀩𑁆𑀭𑀸𑀳𑁆𑀫𑀡, 𑀩𑀮𑀻𑀩𑀤𑁆𑀤𑀸 𑀘𑀢𑀼𑀤𑁆𑀤𑀲;

𑀅𑀚𑁆𑀚𑀲𑀝𑁆𑀞𑀺𑀁 𑀦 𑀤𑀺𑀲𑁆𑀲𑀦𑁆𑀢𑀺, 𑀢𑁂𑀦𑀸𑀳𑀁 𑀩𑁆𑀭𑀸𑀳𑁆𑀫𑀡𑀸 𑀲𑀼𑀔𑀻;

𑀦 𑀳𑀺 𑀫𑀬𑁆𑀳𑀁 𑀩𑁆𑀭𑀸𑀳𑁆𑀫𑀡, 𑀢𑀺𑀮𑀸𑀔𑁂𑀢𑁆𑀢𑀲𑁆𑀫𑀺 𑀧𑀸𑀧𑀓𑀸;

𑀏𑀓𑀧𑀡𑁆𑀡𑀸 𑀤𑀼𑀧𑀡𑁆𑀡𑀸 𑀘, 𑀢𑁂𑀦𑀸𑀳𑀁 𑀩𑁆𑀭𑀸𑀳𑁆𑀫𑀡𑀸 𑀲𑀼𑀔𑀻.

𑀦 𑀳𑀺 𑀫𑀬𑁆𑀳𑀁 𑀩𑁆𑀭𑀸𑀳𑁆𑀫𑀡, 𑀧𑀘𑁆𑀘𑀽𑀲𑀫𑁆𑀳𑀺 𑀇𑀡𑀸𑀬𑀺𑀓𑀸;

𑀤𑁂𑀣 𑀤𑁂𑀣𑀸𑀢𑀺 𑀘𑁄𑀤𑁂𑀦𑁆𑀢𑀺, 𑀢𑁂𑀦𑀸𑀳𑀁 𑀩𑁆𑀭𑀸𑀳𑁆𑀫𑀡𑀸 𑀲𑀼𑀔𑀻𑀢𑀺.

𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀦 ¶ 𑀳𑀺 𑀦𑀽𑀦𑀺𑀫𑀲𑁆𑀲 𑀲𑀫𑀡𑀲𑁆𑀲, 𑀩𑀮𑀻𑀩𑀤𑁆𑀤𑀸 𑀘𑀢𑀼𑀤𑁆𑀤𑀲;

𑀅𑀚𑁆𑀚𑀲𑀝𑁆𑀞𑀺𑀁 𑀦 𑀤𑀺𑀲𑁆𑀲𑀦𑁆𑀢𑀺, 𑀢𑁂𑀦𑀸𑀳𑀁 𑀲𑀫𑀡𑁄 𑀲𑀼𑀔𑀻.

𑀦 𑀳𑀺 𑀦𑀽𑀦𑀺𑀫𑀲𑁆𑀲 𑀲𑀫𑀡𑀲𑁆𑀲, 𑀢𑀺𑀮𑀸𑀔𑁂𑀢𑁆𑀢𑀲𑁆𑀫𑀺 𑀧𑀸𑀧𑀓𑀸;

𑀏𑀓𑀧𑀡𑁆𑀡𑀸 𑀤𑀼𑀧𑀡𑁆𑀡𑀸 𑀘, 𑀢𑁂𑀦𑀸𑀬𑀁 𑀲𑀫𑀡𑁄 𑀲𑀼𑀔𑀻.

𑀦 ¶ 𑀳𑀺 𑀦𑀽𑀦𑀺𑀫𑀲𑁆𑀲 𑀲𑀫𑀡𑀲𑁆𑀲, 𑀢𑀼𑀘𑁆𑀙𑀓𑁄𑀝𑁆𑀞𑀲𑁆𑀫𑀺 𑀫𑀽𑀲𑀺𑀓𑀸;

𑀉𑀲𑁆𑀲𑁄𑀴𑁆𑀳𑀺𑀓𑀸𑀬 𑀦𑀘𑁆𑀘𑀦𑁆𑀢𑀺, 𑀢𑁂𑀦𑀸𑀬𑀁 𑀲𑀫𑀡𑁄 𑀲𑀼𑀔𑀻.

𑀦 𑀳𑀺 𑀦𑀽𑀦𑀺𑀫𑀲𑁆𑀲 𑀲𑀫𑀡𑀲𑁆𑀲, 𑀲𑀦𑁆𑀣𑀸𑀭𑁄 𑀲𑀢𑁆𑀢𑀫𑀸𑀲𑀺𑀓𑁄;

𑀉𑀧𑁆𑀧𑀸𑀝𑀓𑁂𑀳𑀺 𑀲𑀜𑁆𑀙𑀦𑁆𑀦𑁄, 𑀢𑁂𑀦𑀸𑀬𑀁 𑀲𑀫𑀡𑁄 𑀲𑀼𑀔𑀻.

𑀦 𑀳𑀺 𑀦𑀽𑀦𑀺𑀫𑀲𑁆𑀲 𑀲𑀫𑀡𑀲𑁆𑀲, 𑀯𑀺𑀥𑀯𑀸 𑀲𑀢𑁆𑀢 𑀥𑀻𑀢𑀭𑁄;

𑀏𑀓𑀧𑀼𑀢𑁆𑀢𑀸 𑀤𑀼𑀧𑀼𑀢𑁆𑀢𑀸 𑀘, 𑀢𑁂𑀦𑀸𑀬𑀁 𑀲𑀫𑀡𑁄 𑀲𑀼𑀔𑀻.

𑀦 ¶ 𑀳𑀺 𑀦𑀽𑀦𑀺𑀫𑀲𑁆𑀲 𑀲𑀫𑀡𑀲𑁆𑀲, 𑀧𑀺𑀗𑁆𑀕𑀮𑀸 𑀢𑀺𑀮𑀓𑀸𑀳𑀢𑀸;

𑀲𑁄𑀢𑁆𑀢𑀁 𑀧𑀸𑀤𑁂𑀦 𑀩𑁄𑀥𑁂𑀢𑀺, 𑀢𑁂𑀦𑀸𑀬𑀁 𑀲𑀫𑀡𑁄 𑀲𑀼𑀔𑀻.

𑀦 𑀳𑀺 𑀦𑀽𑀦𑀺𑀫𑀲𑁆𑀲 𑀲𑀫𑀡𑀲𑁆𑀲, 𑀧𑀘𑁆𑀘𑀽𑀲𑀫𑀺 𑀇𑀡𑀸𑀬𑀺𑀓𑀸;

𑀤𑁂𑀣 𑀤𑁂𑀣𑀸𑀢𑀺 𑀘𑁄𑀤𑁂𑀦𑁆𑀢𑀺, 𑀢𑁂𑀦𑀸𑀬𑀁 𑀲𑀫𑀡𑁄 𑀲𑀼𑀔𑀻.

𑀦 ¶ 𑀳𑀺 𑀫𑀬𑁆𑀳𑀁 𑀩𑁆𑀭𑀸𑀳𑁆𑀫𑀡, 𑀩𑀮𑀻𑀩𑀤𑁆𑀤𑀸 𑀘𑀢𑀼𑀤𑁆𑀤𑀲;

𑀅𑀚𑁆𑀚𑀲𑀝𑁆𑀞𑀺𑀁 𑀦 𑀤𑀺𑀲𑁆𑀲𑀦𑁆𑀢𑀺, 𑀢𑁂𑀦𑀸𑀳𑀁 𑀩𑁆𑀭𑀸𑀳𑁆𑀫𑀡𑀸 𑀲𑀼𑀔𑀻.

𑀦 𑀳𑀺 𑀫𑀬𑁆𑀳𑀁 𑀩𑁆𑀭𑀸𑀳𑁆𑀫𑀡, 𑀢𑀺𑀮𑀸𑀔𑁂𑀢𑁆𑀢𑀲𑁆𑀫𑀺 𑀧𑀸𑀧𑀓𑀸;

𑀏𑀓𑀧𑀡𑁆𑀡𑀸 𑀤𑀼𑀧𑀡𑁆𑀡𑀸 𑀘, 𑀢𑁂𑀦𑀸𑀳𑀁 𑀩𑁆𑀭𑀸𑀳𑁆𑀫𑀡𑀸 𑀲𑀼𑀔𑀻.

𑀦 𑀳𑀺 𑀫𑀬𑁆𑀳𑀁 𑀩𑁆𑀭𑀸𑀳𑁆𑀫𑀡, 𑀢𑀼𑀘𑁆𑀙𑀓𑁄𑀝𑁆𑀞𑀲𑁆𑀫𑀺 𑀫𑀽𑀲𑀺𑀓𑀸;

𑀉𑀲𑁆𑀲𑁄𑀴𑁆𑀳𑀻𑀓𑀸𑀬 𑀦𑀘𑁆𑀘𑀦𑁆𑀢𑀺, 𑀢𑁂𑀦𑀸𑀳𑀁 𑀩𑁆𑀭𑀸𑀳𑁆𑀫𑀡𑀸 𑀲𑀼𑀔𑀻.

𑀦 𑀳𑀺 𑀫𑀬𑁆𑀳𑀁 𑀩𑁆𑀭𑀸𑀳𑁆𑀫𑀡, 𑀲𑀦𑁆𑀣𑀸𑀭𑁄 𑀲𑀢𑁆𑀢𑀫𑀸𑀲𑀺𑀓𑁄;

𑀉𑀧𑁆𑀧𑀸𑀝𑀓𑁂𑀳𑀺 𑀲𑀜𑁆𑀙𑀦𑁆𑀦𑁄, 𑀢𑁂𑀦𑀸𑀳𑀁 𑀩𑁆𑀭𑀸𑀳𑁆𑀫𑀡𑀸 𑀲𑀼𑀔𑀻.

𑀦 ¶ 𑀳𑀺 𑀫𑀬𑁆𑀳𑀁 𑀩𑁆𑀭𑀸𑀳𑁆𑀫𑀡, 𑀯𑀺𑀥𑀯𑀸 𑀲𑀢𑁆𑀢 𑀥𑀻𑀢𑀭𑁄;

𑀏𑀓𑀧𑀼𑀢𑁆𑀢𑀸 𑀤𑀼𑀧𑀼𑀢𑁆𑀢𑀸 𑀘, 𑀢𑁂𑀦𑀸𑀳𑀁 𑀩𑁆𑀭𑀸𑀳𑁆𑀫𑀡𑀸 𑀲𑀼𑀔𑀻.

𑀦 𑀳𑀺 𑀫𑀬𑁆𑀳𑀁 𑀩𑁆𑀭𑀸𑀳𑁆𑀫𑀡, 𑀧𑀺𑀗𑁆𑀕𑀮𑀸 𑀢𑀺𑀮𑀓𑀸𑀳𑀢𑀸;

𑀲𑁄𑀢𑁆𑀢𑀁 𑀧𑀸𑀤𑁂𑀦 𑀩𑁄𑀥𑁂𑀢𑀺, 𑀢𑁂𑀦𑀸𑀳𑀁 𑀩𑁆𑀭𑀸𑀳𑁆𑀫𑀡𑀸 𑀲𑀼𑀔𑀻.

𑀦 𑀳𑀺 𑀫𑀬𑁆𑀳𑀁 𑀩𑁆𑀭𑀸𑀳𑁆𑀫𑀡, 𑀧𑀘𑁆𑀘𑀽𑀲𑀫𑁆𑀳𑀺 𑀇𑀡𑀸𑀬𑀺𑀓𑀸;

𑀤𑁂𑀣 𑀤𑁂𑀣𑀸𑀢𑀺 𑀘𑁄𑀤𑁂𑀦𑁆𑀢𑀺, 𑀢𑁂𑀦𑀸𑀳𑀁 𑀩𑁆𑀭𑀸𑀳𑁆𑀫𑀡𑀸 𑀲𑀼𑀔𑀻.

𑀧𑀼𑀘𑁆𑀙𑀸 𑁋 𑀇𑀫𑀜𑁆𑀘 ¶ 𑀧𑀦𑀸𑀯𑀼𑀲𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑁄 𑀪𑀸𑀭𑀤𑁆𑀯𑀸𑀚𑀕𑁄𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀲𑀦𑁆𑀦𑁄 𑀓𑀻𑀤𑀺𑀲𑀁 𑀧𑀲𑀦𑁆𑀦𑀸𑀓𑀸𑀭𑀫𑀓𑀸𑀲𑀺. 𑀓𑀻𑀯 𑀫𑀳𑀦𑁆𑀢𑀜𑁆𑀘 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀢𑁆𑀣𑀁 𑀲𑀫𑁆𑀧𑀸𑀤𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀇𑀫𑀜𑁆𑀘 𑀧𑀦 𑀪𑀦𑁆𑀢𑁂 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑁄 𑀪𑀸𑀭𑀤𑁆𑀯𑀸𑀚𑀕𑁄𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 ‘‘𑀅𑀪𑀺𑀓𑁆𑀓𑀦𑁆𑀢𑀁 𑀪𑁄 𑀕𑁄𑀢𑀫 𑀅𑀪𑀺𑀓𑁆𑀓𑀦𑁆𑀢𑀁 𑀪𑁄 𑀕𑁄𑀢𑀫, 𑀲𑁂𑀬𑁆𑀬𑀣𑀸𑀧𑀺 𑀪𑁄𑀕𑁄𑀢𑀫, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬, 𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀼𑀓𑁆𑀔𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀇𑀫𑀲𑁆𑀫𑀺 𑀥𑀫𑁆𑀫𑀯𑀺𑀦𑀬𑁂 𑀧𑀲𑀦𑁆𑀦𑁄 𑀧𑀲𑀦𑁆𑀦𑀸𑀓𑀸𑀭𑀫𑀓𑀸𑀲𑀺. 𑀪𑀕𑀯𑀢𑁄 𑀘 𑀲𑀦𑁆𑀢𑀺𑀓𑁂 ‘‘𑀮𑀪𑁂𑀬𑁆𑀬𑀸𑀳𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀁, 𑀮𑀪𑁂𑀬𑁆𑀬𑀁 𑀉𑀧𑀲𑀫𑁆𑀧𑀤’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀧𑀩𑁆𑀩𑀚𑁆𑀚𑀁 𑀉𑀧𑀲𑀫𑁆𑀧𑀤𑀁 𑀬𑀸𑀘𑀺𑀢𑁆𑀯𑀸 𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑁄 𑀬𑀸𑀯 𑀅𑀭𑀳𑀢𑁆𑀢𑀸 𑀫𑀳𑀦𑁆𑀢𑀁 𑀯𑀺𑀲𑁂𑀲𑀁 𑀲𑀫𑁆𑀧𑀸𑀤𑁂𑀲𑀺.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑀸𑀯𑀼𑀲𑁄 ¶ 𑀏𑀓𑀸𑀤𑀲𑀫𑀁 𑀫𑀳𑀸𑀓𑀲𑁆𑀲𑀧𑀸𑀤𑀻𑀳𑀺 𑀧𑁄𑀭𑀸𑀡𑀥𑀫𑁆𑀫𑀲𑀁𑀕𑀸𑀳𑀓𑀣𑁂𑀭𑁂𑀳𑀺 𑀲𑀁𑀕𑀻𑀢𑀁 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀫𑀕𑀥𑁂𑀲𑀼 𑀪𑀦𑁆𑀢𑁂 𑀤𑀓𑁆𑀔𑀺𑀡𑀸𑀕𑀺𑀭𑀺𑀲𑁆𑀫𑀺𑀁 𑀏𑀓𑀦𑀸𑀴𑀸𑀬𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀓𑀲𑀺𑀪𑀸𑀭𑀤𑁆𑀯𑀸𑀚𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀓𑀲𑀺𑀪𑀸𑀭𑀤𑁆𑀯𑀸𑀚𑁄 𑀪𑀦𑁆𑀢𑁂 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺.

‘‘𑀓𑀲𑁆𑀲𑀓𑁄 ¶ 𑀧𑀝𑀺𑀚𑀸𑀦𑀸𑀲𑀺, 𑀦 𑀘 𑀧𑀲𑁆𑀲𑀸𑀫𑀺 𑀢𑁂 𑀓𑀲𑀺𑀁. 𑀓𑀲𑁆𑀲𑀓𑁄 𑀧𑀼𑀘𑁆𑀙𑀺𑀢𑁄 𑀩𑁆𑀭𑀽𑀳𑀺, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀓𑀲𑀺’’𑀦𑁆𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

‘‘𑀲𑀤𑁆𑀥𑀸 𑀩𑀻𑀚𑀁 𑀢𑀧𑁄 𑀯𑀼𑀝𑁆𑀞𑀺, 𑀧𑀜𑁆𑀜𑀸 𑀫𑁂 𑀬𑀼𑀕𑀦𑀗𑁆𑀕𑀮𑀁;

𑀳𑀺𑀭𑀻 𑀈𑀲𑀸 𑀫𑀦𑁄 𑀬𑁄𑀢𑁆𑀢𑀁, 𑀲𑀢𑀺 𑀫𑁂 𑀨𑀸𑀮𑀧𑀸𑀘𑀦𑀁.

𑀓𑀸𑀬𑀕𑀼𑀢𑁆𑀢𑁄 𑀯𑀘𑀻𑀕𑀼𑀢𑁆𑀢𑁄, 𑀆𑀳𑀸𑀭𑁂 𑀉𑀤𑀭𑁂 𑀬𑀢𑁄;

𑀲𑀘𑁆𑀘𑀁 𑀓𑀭𑁄𑀫𑀺 𑀦𑀺𑀤𑁆𑀤𑀸𑀦𑀁, 𑀲𑁄𑀭𑀘𑁆𑀘𑀁 𑀫𑁂 𑀧𑀫𑁄𑀘𑀦𑀁.

𑀯𑀻𑀭𑀺𑀬𑀁 𑀫𑁂 𑀥𑀼𑀭𑀥𑁄𑀭𑀬𑁆𑀳𑀁, 𑀬𑁄𑀕𑀓𑁆𑀔𑁂𑀫𑀸𑀥𑀺𑀯𑀸𑀳𑀦𑀁;

𑀕𑀘𑁆𑀙𑀢𑀺 𑀅𑀦𑀺𑀯𑀢𑁆𑀢𑀦𑁆𑀢𑀁, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀦 𑀲𑁄𑀘𑀢𑀺.

𑀏𑀯𑀫𑁂𑀲𑀸 𑀓𑀲𑀻 𑀓𑀝𑁆𑀞𑀸, 𑀲𑀸 𑀳𑁄𑀢𑀺 𑀅𑀫𑀢𑀧𑁆𑀨𑀮𑀸;

𑀏𑀢𑀁 𑀓𑀲𑀺𑀁 𑀓𑀲𑀺𑀢𑁆𑀯𑀸𑀦, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺.

𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀓𑀲𑁆𑀲𑀓𑁄 ¶ 𑀧𑀝𑀺𑀚𑀸𑀦𑀸𑀲𑀺, 𑀦 𑀘 𑀧𑀲𑁆𑀲𑀸𑀫𑀺 𑀢𑁂 𑀓𑀲𑀺𑀁;

𑀓𑀲𑁆𑀲𑀓𑁄 𑀧𑀼𑀘𑁆𑀙𑀺𑀢𑁄 𑀩𑁆𑀭𑀽𑀳𑀺, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀓𑀲𑀺𑀁.

𑀲𑀤𑁆𑀥𑀸 ¶ 𑀩𑀻𑀚𑀁 𑀢𑀧𑁄 𑀯𑀼𑀝𑁆𑀞𑀺, 𑀧𑀜𑁆𑀜𑀸 𑀫𑁂 𑀬𑀼𑀕𑀦𑀗𑁆𑀕𑀮𑀁;

𑀳𑀺𑀭𑀻 𑀈𑀲𑀸 𑀫𑀦𑁄 𑀬𑁄𑀢𑁆𑀢𑀁, 𑀲𑀢𑀺 𑀫𑁂 𑀨𑀸𑀮𑀧𑀸𑀘𑀦𑀁.

𑀧𑀼𑀘𑁆𑀙𑀸 𑁋 𑀇𑀫𑀜𑁆𑀘 ¶ 𑀧𑀦𑀸𑀯𑀼𑀲𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑁄 𑀓𑀲𑀺𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀲𑀦𑁆𑀦𑁄 𑀓𑀻𑀤𑀺𑀲𑀁 𑀧𑀲𑀦𑁆𑀦𑀸𑀓𑀸𑀭𑀫𑀓𑀸𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀇𑀫𑀜𑁆𑀘 𑀧𑀦 𑀪𑀦𑁆𑀢𑁂 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀓𑀲𑀺𑀪𑀸𑀭𑀤𑁆𑀯𑀸𑀚𑁄 𑀩𑁆𑀭𑀸𑀳𑁆𑀫𑀡𑁄 ‘‘𑀅𑀪𑀺𑀓𑁆𑀓𑀦𑁆𑀢𑀁 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁 𑀪𑁄 𑀕𑁄𑀢𑀫𑀸’’𑀢𑀺𑀏𑀯𑀫𑀸𑀤𑀺𑀦𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀧𑀲𑀦𑁆𑀦𑁄 𑀧𑀲𑀦𑁆𑀦𑀸𑀓𑀸𑀭𑀫𑀓𑀸𑀲𑀺.

𑀲𑁂𑀬𑁆𑀬𑀣𑀸𑀧𑀺 𑀪𑁄 𑀕𑁄𑀢𑀫 𑀉𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀦𑀺𑀓𑁆𑀓𑀼𑀚𑁆𑀚𑁂𑀬𑁆𑀬.

𑀧𑀼𑀘𑁆𑀙𑀸 𑁋 𑀉𑀤𑀬𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀉𑀤𑀬𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀉𑀤𑀬𑁄 𑀪𑀦𑁆𑀢𑁂 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀧𑀓𑀝𑁆𑀞𑀓𑁄𑀬𑀁 𑀲𑀫𑀡𑁄 𑀕𑁄𑀢𑀫𑁄 𑀧𑀼𑀦𑀧𑁆𑀧𑀼𑀦𑀁 𑀆𑀕𑀘𑁆𑀙𑀢𑀻’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

𑀧𑀼𑀦𑀧𑁆𑀧𑀼𑀦𑀜𑁆𑀘𑁂𑀯 𑀯𑀧𑀦𑁆𑀢𑀺 𑀩𑀻𑀚𑀁, 𑀧𑀼𑀦𑀧𑁆𑀧𑀼𑀦𑀁 𑀯𑀲𑁆𑀲𑀢𑀺 𑀤𑁂𑀯𑀭𑀸𑀚𑀸;

𑀧𑀼𑀦𑀧𑁆𑀧𑀼𑀦𑀁 𑀔𑁂𑀢𑁆𑀢𑀁 𑀓𑀲𑀦𑁆𑀢𑀺 𑀓𑀲𑁆𑀲𑀓𑀸, 𑀧𑀼𑀦𑀧𑁆𑀧𑀼𑀦𑀁 𑀥𑀜𑁆𑀜𑀫𑀼𑀧𑁂𑀢𑀺 𑀭𑀝𑁆𑀞𑀁.

𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀦𑀧𑁆𑀧𑀼𑀦𑀁 ¶ 𑀘𑁂𑀯 𑀯𑀧𑀦𑁆𑀢𑀺 𑀩𑀻𑀚𑀁, 𑀧𑀼𑀦𑀧𑁆𑀧𑀼𑀦𑀁 𑀯𑀲𑁆𑀲𑀢𑀺 𑀤𑁂𑀯 𑀭𑀸𑀚𑀸;

𑀧𑀼𑀦𑀧𑁆𑀧𑀼𑀦𑀁 ¶ 𑀬𑀸𑀘𑀓𑀸 𑀬𑀸𑀘𑀬𑀦𑁆𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀤𑀸𑀦𑀧𑀢𑀻 𑀤𑀤𑀦𑁆𑀢𑀺;

𑀧𑀼𑀦𑀧𑁆𑀧𑀼𑀦𑀁 𑀤𑀸𑀦𑀧𑀢𑀻 𑀤𑀤𑀺𑀢𑁆𑀯𑀸, 𑀧𑀼𑀦𑀧𑁆𑀧𑀼𑀦𑀁 𑀲𑀕𑁆𑀕𑀫𑀼𑀧𑁂𑀢𑀺 𑀞𑀸𑀦𑀁.

𑀧𑀼𑀦𑀧𑁆𑀧𑀼𑀦𑀁 𑀔𑀻𑀭𑀦𑀺𑀓𑀸 𑀤𑀼𑀳𑀦𑁆𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀯𑀘𑁆𑀙𑁄 𑀉𑀧𑁂𑀢𑀺 𑀫𑀸𑀢𑀭𑀁;

𑀧𑀼𑀦𑀧𑁆𑀧𑀼𑀦𑀁 𑀓𑀺𑀮𑀫𑀢𑀺 𑀨𑀦𑁆𑀤𑀢𑀺 𑀘, 𑀧𑀼𑀦𑀧𑁆𑀧𑀼𑀦𑀁 𑀕𑀩𑁆𑀪𑀫𑀼𑀧𑁂𑀢𑀺 𑀫𑀦𑁆𑀤𑁄.

𑀧𑀼𑀦𑀧𑁆𑀧𑀼𑀦𑀁 𑀚𑀸𑀬𑀢𑀺 𑀫𑀻𑀬𑀢𑀺 𑀘, 𑀧𑀼𑀦𑀧𑁆𑀧𑀼𑀦𑀁 𑀲𑀺𑀯𑀣𑀺𑀓𑀁 𑀳𑀭𑀦𑁆𑀢𑀺;

𑀫𑀕𑁆𑀕𑀜𑁆𑀘 𑀮𑀤𑁆𑀥𑀸 𑀅𑀧𑀼𑀦𑀩𑁆𑀪𑀯𑀸𑀬, 𑀦 𑀧𑀼𑀦𑀧𑁆𑀧𑀼𑀦𑀁 𑀚𑀸𑀬𑀢𑀺 𑀪𑀽𑀭𑀺𑀧𑀜𑁆𑀜𑁄-𑀳𑀼𑁋

𑀧𑀼𑀘𑁆𑀙𑀸 𑁋 𑀫𑀸𑀢𑀼𑀧𑁄𑀲𑀓𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀫𑀸𑀢𑀼𑀧𑁄𑀲𑀓𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀫𑀸𑀢𑀼𑀧𑁄𑀲𑀓𑁄 𑀪𑀦𑁆𑀢𑁂 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀅𑀳𑀜𑁆𑀳𑀺 𑀪𑁄 𑀕𑁄𑀢𑀫 𑀥𑀫𑁆𑀫𑁂𑀦 𑀪𑀺𑀓𑁆𑀔𑀁 𑀧𑀭𑀺𑀬𑁂𑀲𑀸𑀫𑀺, 𑀥𑀫𑁆𑀫𑁂𑀦 𑀪𑀺𑀓𑁆𑀔𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀧𑁄𑀲𑁂𑀫𑀺, 𑀓𑀘𑁆𑀘𑀸𑀳𑀁 𑀪𑁄 𑀕𑁄𑀢𑀫 𑀏𑀯𑀁𑀓𑀸𑀭𑀻 𑀓𑀺𑀘𑁆𑀘𑀓𑀸𑀭𑀻 𑀳𑁄𑀫𑀻’’𑀢𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀢𑀕𑁆𑀖 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡 𑀏𑀯𑀁𑀓𑀸𑀭𑀻 𑀓𑀺𑀘𑁆𑀘𑀓𑀸𑀭𑀻 𑀳𑁄𑀲𑀺, 𑀬𑁄 𑀔𑁄 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑁂𑀦 𑀪𑀺𑀓𑁆𑀔𑀁 𑀧𑀭𑀺𑀬𑁂𑀲𑀢𑀺, 𑀥𑀫𑁆𑀫𑁂𑀦 𑀪𑀺𑀓𑁆𑀔𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀧𑁄𑀲𑁂𑀢𑀺, 𑀩𑀳𑀼𑀁 𑀲𑁄 𑀧𑀼𑀜𑁆𑀜𑀁 𑀧𑀲𑀯𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀸.

𑀬𑁄 ¶ 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸, 𑀫𑀘𑁆𑀘𑁄 𑀥𑀫𑁆𑀫𑁂𑀦 𑀧𑁄𑀲𑀢𑀺;

𑀢𑀸𑀬 𑀦𑀁 𑀧𑀸𑀭𑀺𑀘𑀭𑀺𑀬𑀸𑀬, 𑀫𑀸𑀢𑀸𑀧𑀺𑀢𑀽𑀲𑀼 𑀧𑀡𑁆𑀟𑀺𑀢𑀸;

𑀇𑀥𑁂𑀯 𑀦𑀁 𑀧𑀲𑀁𑀲𑀦𑁆𑀢𑀺, 𑀧𑁂𑀘𑁆𑀘 𑀲𑀕𑁆𑀕𑁂 𑀧𑀫𑁄𑀤𑀢𑀺𑁋

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 ¶ 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀩𑁆𑀭𑀸𑀳𑁆𑀫𑀡𑀲𑀁𑀬𑀼𑀢𑁆𑀢𑁂 𑀔𑁄𑀫𑀤𑀼𑀲𑁆𑀲𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀓𑁆𑀓𑁂𑀲𑀼 𑀪𑀦𑁆𑀢𑁂 𑀔𑁄𑀫𑀤𑀼𑀲𑁆𑀲𑁂 𑀦𑀸𑀫 𑀲𑀓𑁆𑀬𑀸𑀦𑀁 𑀦𑀺𑀕𑀫𑁂 𑀔𑁄𑀫𑀤𑀼𑀲𑁆𑀲𑀓𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀆𑀭𑀩𑁆𑀪 𑀪𑀸𑀲𑀺𑀢, 𑀔𑁄𑀫𑀤𑀼𑀲𑁆𑀲𑀓𑀸 𑀪𑀦𑁆𑀢𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 ‘‘𑀓𑁂 𑀘 𑀫𑀼𑀡𑁆𑀟𑀓𑀸 𑀲𑀫𑀡𑀓𑀸, 𑀓𑁂 𑀘 𑀲𑀪𑀸𑀥𑀫𑁆𑀫𑀁 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺.

𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

‘‘𑀦𑁂𑀲𑀸 𑀲𑀪𑀸 𑀬𑀢𑁆𑀣 𑀦 𑀲𑀦𑁆𑀢𑀺 𑀲𑀦𑁆𑀢𑁄,

𑀲𑀦𑁆𑀢𑁄 𑀦 𑀢𑁂 𑀬𑁂 𑀦 𑀯𑀤𑀦𑁆𑀢𑀺 𑀥𑀫𑁆𑀫𑀁;

𑀭𑀸𑀕𑀜𑁆𑀘 𑀤𑁄𑀲𑀜𑁆𑀘 𑀧𑀳𑀸𑀬 𑀫𑁄𑀳𑀁,

𑀥𑀫𑁆𑀫𑀁 𑀯𑀤𑀦𑁆𑀢𑀸 𑀘 𑀪𑀯𑀦𑁆𑀢𑀺 𑀲𑀦𑁆𑀢𑁄’’𑀢𑀺.

𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀦𑁂𑀲𑀸 ¶ 𑀲𑀪𑀸 𑀬𑀢𑁆𑀣 𑀦𑀲𑀦𑁆𑀢𑀺 𑀲𑀦𑁆𑀢𑁄,

𑀲𑀦𑁆𑀢𑁄 𑀦 𑀢𑁂 𑀬𑁂 𑀦 𑀯𑀤𑀦𑁆𑀢𑀺 𑀥𑀫𑁆𑀫𑀁;

𑀭𑀸𑀕𑀜𑁆𑀘 𑀤𑁄𑀲𑀜𑁆𑀘 𑀧𑀳𑀸𑀬 𑀫𑁄𑀳𑀁,

𑀥𑀫𑁆𑀫𑀁 𑀯𑀤𑀦𑁆𑀢𑀸 𑀘 𑀪𑀯𑀦𑁆𑀢𑀺 𑀲𑀦𑁆𑀢𑁄𑁋

𑀧𑀼𑀘𑁆𑀙𑀸 𑁋 𑀯𑀗𑁆𑀕𑀻𑀲𑀲𑀁𑀬𑀼𑀢𑁆𑀢𑁂 ¶ 𑀧𑀦𑀸𑀯𑀼𑀲𑁄 𑀘𑀢𑀼𑀢𑁆𑀣𑀁 𑀲𑀁𑀗𑁆𑀕𑀻𑀢𑀁 𑀆𑀦𑀦𑁆𑀤𑀲𑀼𑀢𑁆𑀢𑀁 𑀓𑀢𑁆𑀣𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀯𑀗𑁆𑀕𑀻𑀲𑀢𑁆𑀣𑁂𑀭𑀁 𑀆𑀭𑀩𑁆𑀪 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀢𑀸 𑀪𑀦𑁆𑀢𑁂 𑀯𑀗𑁆𑀕𑀻𑀲𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺𑁋

‘‘𑀓𑀸𑀫𑀭𑀸𑀕𑁂𑀦 𑀟𑀬𑁆𑀳𑀸𑀫𑀺, 𑀘𑀺𑀢𑁆𑀢𑀁 𑀫𑁂 𑀧𑀭𑀺𑀟𑀬𑁆𑀳𑀢𑀺;

𑀲𑀸𑀥𑀼 𑀦𑀺𑀩𑁆𑀩𑀸𑀧𑀦𑀁 𑀩𑁆𑀭𑀽𑀳𑀺, 𑀅𑀦𑀼𑀓𑀫𑁆𑀧𑀸𑀬 𑀕𑁄𑀢𑀫𑀸’’𑀢𑀺.

𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

‘‘𑀲𑀜𑁆𑀜𑀸𑀬 𑀯𑀺𑀧𑀭𑀺𑀬𑁂𑀲𑀸, 𑀘𑀺𑀢𑁆𑀢𑀁 𑀢𑁂 𑀧𑀭𑀺𑀟𑀬𑁆𑀳𑀢𑀺;

𑀦𑀺𑀫𑀺𑀢𑁆𑀢𑀁 𑀧𑀭𑀺𑀯𑀚𑁆𑀚𑁂𑀳𑀺, 𑀲𑀼𑀪𑀁 𑀭𑀸𑀕𑀽𑀧𑀲𑀁𑀳𑀺𑀢𑀁;

𑀲𑀗𑁆𑀔𑀸𑀭𑁂 𑀧𑀭𑀢𑁄 𑀧𑀲𑁆𑀲, 𑀤𑀼𑀓𑁆𑀔𑀢𑁄 𑀫𑀸 𑀘 𑀅𑀢𑁆𑀢𑀢𑁄;

𑀦𑀺𑀩𑁆𑀩𑀸𑀧𑁂𑀳𑀺 𑀫𑀳𑀸𑀭𑀸𑀕𑀁, 𑀫𑀸 𑀟𑀬𑁆𑀳𑀺𑀢𑁆𑀣𑁄 𑀧𑀼𑀦𑀧𑁆𑀧𑀼𑀦𑀁;

𑀅𑀲𑀼𑀪𑀸𑀬 𑀘𑀺𑀢𑁆𑀢𑀁 𑀪𑀸𑀯𑁂𑀳𑀺, 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀁;

𑀲𑀢𑀺 𑀓𑀸𑀬𑀕𑀢𑀸 𑀢𑁆𑀬𑀢𑁆𑀣𑀼, 𑀦𑀺𑀩𑁆𑀩𑀺𑀤𑀸𑀩𑀳𑀼𑀮𑁄 𑀪𑀯;

𑀅𑀦𑀺𑀫𑀺𑀢𑁆𑀢𑀜𑁆𑀘 𑀪𑀸𑀯𑁂𑀳𑀺, 𑀫𑀸𑀦𑀸𑀦𑀼𑀲𑀬𑀫𑀼𑀚𑁆𑀚𑀳;

𑀢𑀢𑁄 𑀫𑀸𑀦𑀸𑀪𑀺𑀲𑀫𑀬𑀸, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀻’’𑀢𑀺.

𑀏𑀯𑀁 𑀔𑁄 𑀪𑀦𑁆𑀢𑁂 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀪𑀸𑀲𑀺𑀢𑀁.

𑀓𑀸𑀫𑀭𑀸𑀕𑁂𑀦 ¶ 𑀟𑀬𑁆𑀳𑀸𑀫𑀺, 𑀘𑀺𑀢𑁆𑀢𑀁 𑀫𑁂 𑀧𑀭𑀺𑀟𑀬𑁆𑀳𑀢𑀺;

𑀲𑀸𑀥𑀼 𑀦𑀺𑀩𑁆𑀩𑀸𑀧𑀦𑀁 𑀩𑁆𑀭𑀽𑀳𑀺, 𑀅𑀦𑀼𑀓𑀫𑁆𑀧𑀸𑀬 𑀕𑁄𑀢𑀫𑁋

𑀲𑀜𑁆𑀜𑀸𑀬 ¶ 𑀯𑀺𑀧𑀭𑀺𑀬𑁂𑀲𑀸, 𑀘𑀺𑀢𑁆𑀢𑀁 𑀢𑁂 𑀧𑀭𑀺𑀟𑀬𑁆𑀳𑀢𑀺;

𑀦𑀺𑀫𑀺𑀢𑁆𑀢𑀁 𑀧𑀭𑀺𑀯𑀚𑁆𑀚𑁂𑀳𑀺, 𑀲𑀼𑀪𑀁 𑀭𑀸𑀕𑀽𑀧𑀲𑀁𑀳𑀺𑀢𑀁.

𑀲𑀗𑁆𑀔𑀸𑀭𑁂 𑀧𑀭𑀢𑁄𑀧𑀲𑁆𑀲, 𑀤𑀼𑀓𑁆𑀔𑀢𑁄 𑀫𑀸 𑀘 𑀅𑀢𑁆𑀢𑀢𑁄;

𑀦𑀺𑀩𑁆𑀩𑀸𑀧𑁂𑀳𑀺 𑀫𑀳𑀸𑀭𑀸𑀕𑀁, 𑀫𑀸 𑀟𑀬𑁆𑀳𑀺𑀢𑁆𑀣𑁄 𑀧𑀼𑀦𑀧𑁆𑀧𑀼𑀦𑀁.

𑀅𑀲𑀼𑀪𑀸𑀬 𑀘𑀺𑀢𑁆𑀢𑀁 𑀪𑀸𑀯𑁂𑀳𑀺, 𑀏𑀓𑀕𑁆𑀕𑀁 𑀲𑀼𑀲𑀫𑀸𑀳𑀺𑀢𑀁;

𑀲𑀢𑀺 𑀓𑀸𑀬𑀕𑀢𑀸 𑀢𑁆𑀬𑀢𑁆𑀣𑀼, 𑀦𑀺𑀩𑁆𑀩𑀺𑀤𑀸𑀩𑀳𑀼𑀮𑁄 𑀪𑀯.

𑀅𑀦𑀺𑀫𑀺𑀢𑁆𑀢𑀜𑁆𑀘 ¶ 𑀪𑀸𑀯𑁂𑀳𑀺, 𑀫𑀸𑀦𑀸𑀦𑀼𑀲𑀬𑀫𑀼𑀚𑁆𑀚𑀳;

𑀢𑀢𑁄 𑀫𑀸𑀦𑀸𑀪𑀺𑀲𑀫𑀬𑀸, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀺.

𑀧𑀼𑀘𑁆𑀙𑀸 𑁋 𑀢𑀢𑁆𑀣 𑀆𑀯𑀼𑀲𑁄 𑀤𑁆𑀯𑀸𑀤𑀲𑀫𑀁 𑀯𑀗𑁆𑀕𑀻𑀲𑀲𑀼𑀢𑁆𑀢𑀁 𑀓𑀢𑁆𑀣 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀆𑀬𑀲𑁆𑀫𑀢𑀸 𑀯𑀗𑁆𑀕𑀻𑀲𑀢𑁆𑀣𑁂𑀭𑁂𑀦 𑀅𑀘𑀺𑀭 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁂𑀦 𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀝𑀺𑀲𑀁𑀯𑁂𑀤𑀺𑀦𑀸𑁋

‘‘𑀓𑀸𑀯𑁂𑀬𑁆𑀬𑀫𑀢𑁆𑀢𑀸 𑀯𑀺𑀘𑀭𑀺𑀫𑁆𑀳 𑀧𑀼𑀩𑁆𑀩𑁂, 𑀕𑀸𑀫𑀸𑀕𑀸𑀫𑀁 𑀧𑀼𑀭𑀸𑀧𑀼𑀭𑀁,

𑀅𑀣𑀤𑁆𑀤𑀲𑀸𑀫 𑀲𑀫𑁆𑀩𑀼𑀤𑁆𑀥𑀁, 𑀲𑀤𑁆𑀥𑀸 𑀦𑁄 𑀉𑀧𑀧𑀚𑁆𑀚𑀣;

𑀲𑁄 𑀫𑁂 𑀥𑀫𑁆𑀫 𑀫𑀤𑁂𑀲𑁂𑀲𑀺, 𑀔𑀦𑁆𑀥𑀸𑀬𑀢𑀦 𑀥𑀸𑀢𑀼𑀬𑁄;

𑀢𑀲𑁆𑀲𑀸𑀳𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁;

𑀩𑀳𑀼𑀦𑁆𑀦𑀁 𑀯𑀢 𑀅𑀢𑁆𑀣𑀸𑀬, 𑀩𑁄𑀥𑀺𑀁 𑀅𑀚𑁆𑀛𑀕𑀫𑀸 𑀫𑀼𑀦𑀺;

𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀽𑀦𑀻𑀦𑀜𑁆𑀘, 𑀬𑁂 𑀦𑀺𑀬𑀸𑀫𑀕𑀢𑀤𑁆𑀤𑀲𑀸;

𑀲𑁆𑀯𑀸𑀕𑀢𑀁 ¶ 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;

𑀧𑀼𑀩𑁆𑀩𑁂 𑀦𑀺𑀯𑀸𑀲𑀁 𑀚𑀸𑀦𑀸𑀫𑀺, 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑀺𑀢𑀁;

𑀢𑁂𑀯𑀺𑀚𑁆𑀚𑁄 𑀇𑀤𑁆𑀥𑀺𑀧𑀢𑁆𑀢𑁄𑀫𑁆𑀳𑀺, 𑀘𑁂𑀢𑁄𑀧𑀭𑀺𑀬𑀸𑀬 𑀓𑁄𑀯𑀺𑀤𑁄.

𑀏𑀯𑀁 𑀔𑁄 𑀪𑀦𑁆𑀢𑁂 𑀉𑀤𑀸𑀦𑀯𑀲𑁂𑀦 𑀪𑀸𑀲𑀺𑀢𑀁.

𑀓𑀸𑀯𑁂𑀬𑁆𑀬 ¶ 𑀫𑀢𑁆𑀢𑀸 𑀯𑀺𑀘𑀭𑀺𑀫𑁆𑀳 𑀧𑀼𑀩𑁆𑀩𑁂; 𑀕𑀸𑀫𑀸𑀕𑀸𑀫𑀁𑀧𑀼𑀭𑀸𑀧𑀼𑀭𑀁,

𑀅𑀣𑀤𑁆𑀤𑀲𑀸𑀫 𑀲𑀫𑁆𑀩𑀼𑀤𑁆𑀥𑀁, 𑀲𑀤𑁆𑀥𑀸 𑀦𑁄 𑀉𑀧𑀧𑀚𑁆𑀚𑀣.

𑀲𑁄 ¶ 𑀫𑁂 𑀥𑀫𑁆𑀫𑀫𑀤𑁂𑀲𑁂𑀲𑀺, 𑀔𑀦𑁆𑀥𑀸𑀬𑀢𑀦 𑀥𑀸𑀢𑀼𑀬𑁄;

𑀢𑀲𑁆𑀲𑀸𑀳𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸𑀦, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑀩𑀳𑀼𑀦𑁆𑀦𑀁 𑀯𑀢 𑀅𑀢𑁆𑀣𑀸𑀬, 𑀩𑁄𑀥𑀺𑀁 𑀅𑀚𑁆𑀛𑀕𑀫𑀸 𑀫𑀼𑀦𑀺;

𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻 𑀦𑀜𑁆𑀘, 𑀬𑁂 𑀦𑀺𑀬𑀸𑀫𑀕𑀢𑀤𑁆𑀤𑀲𑀸.

𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀫𑀫 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂;

𑀢𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑀧𑀼𑀩𑁆𑀩𑁂𑀦𑀺𑀯𑀸𑀲𑀁 ¶ 𑀚𑀸𑀦𑀸𑀫𑀺; 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀺𑀢𑀁;

𑀢𑁂𑀯𑀺𑀚𑁆𑀚𑁄 𑀇𑀤𑁆𑀥𑀺𑀧𑀢𑁆𑀢𑁄𑀫𑁆𑀳𑀺, 𑀘𑁂𑀢𑁄𑀧𑀭𑀺𑀬𑀸𑀬𑀓𑁄𑀯𑀺𑀤𑁄.

𑀧𑀼𑀘𑁆𑀙𑀸 𑁋 𑀯𑀦𑀲𑀁𑀬𑀼𑀢𑁆𑀢𑁂 𑀧𑀦𑀸𑀯𑀼𑀲𑁄 𑀧𑀜𑁆𑀘𑀫𑀁 𑀲𑀁𑀕𑀻𑀢𑀁 𑀆𑀦𑀦𑁆𑀤𑀲𑀼𑀢𑁆𑀢𑀁 𑀓𑀤𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑁄𑀲𑀮𑁂𑀲𑀼 𑀪𑀦𑁆𑀢𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀘𑀺𑀭𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀭𑀩𑁆𑀪 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀥𑀺𑀯𑀢𑁆𑀣𑀸𑀬 𑀤𑁂𑀯𑀢𑀸𑀬 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀆𑀦𑀦𑁆𑀤𑁄 𑀅𑀘𑀺𑀭𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀅𑀢𑀺𑀯𑁂𑀮𑀁 𑀕𑀺𑀳𑀺𑀲𑀜𑁆𑀜𑀢𑁆𑀢𑀺𑀩𑀳𑀼𑀮𑁄 𑀯𑀺𑀳𑀭𑀢𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

‘‘𑀭𑀼𑀓𑁆𑀔𑀫𑀽𑀮𑀕𑀳𑀦𑀁 𑀧𑀲𑀓𑁆𑀓𑀺𑀬,

𑀦𑀺𑀩𑁆𑀩𑀸𑀦𑀁 𑀳𑀤𑀬𑀲𑁆𑀫𑀺𑀁 𑀑𑀧𑀺𑀬;

𑀓𑀺𑀁 𑀢𑁂 𑀩𑀺𑀴𑀺𑀩𑀺𑀴𑀺𑀓𑀸 𑀓𑀭𑀺𑀲𑁆𑀲𑀢𑀻’’𑀢𑀺.

𑀏𑀯𑀁 ¶ 𑀔𑁄 𑀪𑀦𑁆𑀢𑁂 𑀯𑀦𑀲𑀡𑁆𑀟𑁂 𑀅𑀥𑀺𑀯𑀢𑁆𑀣𑀸𑀬 𑀤𑁂𑀯𑀢𑀸𑀬 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀅𑀦𑀼𑀓𑀫𑁆𑀧𑀺𑀓𑀸𑀬 𑀅𑀢𑁆𑀣𑀓𑀸𑀫𑀸𑀬 𑀪𑀸𑀲𑀺𑀢𑀁.

𑀭𑀼𑀓𑁆𑀔𑀫𑀽𑀮 ¶ 𑀕𑀳𑀦𑀁 𑀧𑀲𑀓𑁆𑀓𑀺𑀬, 𑀦𑀺𑀩𑁆𑀩𑀸𑀦𑀁 𑀳𑀤𑀬𑀲𑁆𑀫𑀺𑀁 𑀑𑀧𑀺𑀬;

𑀛𑀸𑀬 𑀕𑁄𑀢𑀫 𑀫𑀸 𑀧𑀫𑀸𑀤𑁄, 𑀓𑀺𑀁 𑀢𑁂 𑀩𑀺𑀴𑀺𑀩𑀺𑀴𑀺𑀓𑀸 𑀓𑀭𑀺𑀲𑁆𑀲𑀢𑀺-𑀳𑀼𑁋

𑀧𑀼𑀘𑁆𑀙𑀸 𑁋 𑀬𑀓𑁆𑀔𑀲𑀁𑀬𑀼𑀢𑁆𑀢𑁂 ¶ 𑀧𑀦𑀸𑀯𑀼𑀲𑁄 𑀧𑀞𑀫𑀁 𑀲𑀁𑀕𑀻𑀢𑀁 𑀇𑀦𑁆𑀤𑀓𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀇𑀦𑁆𑀤𑀓𑀽𑀝𑁂 𑀧𑀩𑁆𑀩𑀢𑁂 𑀇𑀦𑁆𑀤𑀓𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑁂 𑀇𑀦𑁆𑀤𑀓𑀁 𑀬𑀓𑁆𑀔𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀇𑀦𑁆𑀤𑀓𑁄 𑀪𑀦𑁆𑀢𑁂 𑀬𑀓𑁆𑀔𑁄 𑀅𑀢𑁆𑀢𑀯𑀸𑀤𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺𑁋

‘‘𑀭𑀽𑀧𑀁 𑀦 𑀚𑀻𑀯𑀦𑁆𑀢𑀺 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸,

𑀓𑀣𑀁 𑀦𑁆𑀯𑀬𑀁 𑀯𑀺𑀦𑁆𑀤𑀢𑀺𑀫𑀁 𑀲𑀭𑀻𑀭𑀁;

𑀓𑀼𑀢𑀲𑁆𑀲 𑀅𑀝𑁆𑀞𑀻𑀬𑀓𑀧𑀺𑀡𑁆𑀟𑀫𑁂𑀪𑀺,

𑀓𑀣𑀁 𑀦𑁆𑀯𑀬𑀁 𑀲𑀚𑁆𑀚𑀢𑀺 𑀕𑀩𑁆𑀪𑀭𑀲𑁆𑀫𑀺’’𑀦𑁆𑀢𑀺.

𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

‘‘𑀧𑀞𑀫𑀁 𑀓𑀮𑀮𑀁 𑀳𑁄𑀢𑀺, 𑀓𑀮𑀮𑀸 𑀳𑁄𑀢𑀺 𑀅𑀩𑁆𑀩𑀼𑀤𑀁,

𑀅𑀩𑁆𑀩𑀼𑀤𑀸 𑀚𑀸𑀬𑀢𑁂 𑀧𑁂𑀲𑀺, 𑀧𑁂𑀲𑀺 𑀦𑀺𑀩𑁆𑀩𑀢𑁆𑀢𑀢𑀻 𑀖𑀦𑁄;

𑀖𑀦𑀸 𑀧𑀲𑀸𑀔𑀸 𑀚𑀸𑀬𑀦𑁆𑀢𑀺, 𑀓𑁂𑀲𑀸 𑀮𑁄𑀫𑀸 𑀦𑀔𑀸𑀧𑀺𑀘;

𑀬𑀜𑁆𑀘𑀲𑁆𑀲 𑀪𑀼𑀜𑁆𑀚𑀢𑀻 𑀫𑀸𑀢𑀸, 𑀅𑀦𑁆𑀦𑀁 𑀧𑀸𑀦𑀜𑁆𑀘 𑀪𑁄𑀚𑀦𑀁;

𑀢𑁂𑀦 𑀲𑁄 𑀢𑀢𑁆𑀣 𑀬𑀸𑀧𑁂𑀢𑀺, 𑀫𑀸𑀢𑀼𑀓𑀼𑀘𑁆𑀙𑀺𑀕𑀢𑁄𑀦𑀭𑁄’’𑀢𑀺.

𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 ¶ 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀬𑀓𑁆𑀔𑀲𑀁𑀬𑀼𑀢𑁆𑀢𑁂 𑀆𑀴𑀯𑀓𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀆𑀴𑀯𑀺𑀬𑀁 𑀪𑀦𑁆𑀢𑁂 𑀆𑀴𑀯𑀓𑀲𑁆𑀲 𑀬𑀓𑁆𑀔𑀲𑁆𑀲 𑀪𑀯𑀦𑁂 𑀆𑀴𑀯𑀓𑀁 𑀬𑀓𑁆𑀔𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀴𑀯𑀓𑁄 𑀪𑀦𑁆𑀢𑁂 𑀬𑀓𑁆𑀔𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺𑁋

𑀓𑀺𑀁 𑀲𑀽𑀥𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞𑀁,

𑀓𑀺𑀁 𑀲𑀼 𑀲𑀼𑀘𑀺𑀡𑁆𑀡𑀁 𑀲𑀼𑀔𑀫𑀸𑀯𑀳𑀸𑀢𑀺;

𑀓𑀺𑀁 𑀲𑀼 𑀳𑀯𑁂 𑀲𑀸𑀤𑀼𑀢𑀭𑀁 𑀭𑀲𑀸𑀦𑀁,

𑀓𑀣𑀁 𑀚𑀻𑀯𑀺𑀁 𑀚𑀻𑀯𑀺𑀢𑀸𑀫𑀸𑀳𑀼 𑀲𑁂𑀝𑁆𑀞𑀦𑁆𑀢𑀺.

𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

𑀲𑀤𑁆𑀥𑀻𑀘 𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞𑀁,

𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀲𑀼𑀔𑀫𑀸𑀯𑀳𑀸𑀢𑀺;

𑀲𑀘𑁆𑀘𑀁 𑀳𑀯𑁂 𑀲𑀸𑀤𑀼𑀢𑀭𑀁 𑀭𑀲𑀸𑀦𑀁,

𑀧𑀜𑁆𑀜𑀸𑀚𑀻𑀯𑀺𑀁 𑀚𑀻𑀯𑀺𑀢𑀫𑀸𑀳𑀼 𑀲𑁂𑀝𑁆𑀞𑀦𑁆𑀢𑀺.

𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀦 ¶ 𑀔𑁆𑀯𑀸𑀳𑀁 𑀢𑀁 𑀆𑀯𑀼𑀲𑁄 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺, 𑀬𑀁 𑀢𑁂 𑀓𑀭𑀡𑀻𑀬𑀁, 𑀢𑀁 𑀓𑀭𑁄𑀳𑀺,

𑀧𑀜𑁆𑀳𑀁 𑀢𑀁 𑀲𑀫𑀡 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀲𑀘𑁂 𑀫𑁂 𑀦 𑀩𑁆𑀬𑀸𑀓𑀭𑀺𑀲𑁆𑀲𑀲𑀺, 𑀘𑀺𑀢𑁆𑀢𑀁 𑀯𑀸 𑀢𑁂 𑀔𑀺𑀧𑀺𑀲𑁆𑀲𑀸𑀫𑀺, 𑀳𑀤𑀬𑀁 𑀯𑀸 𑀢𑁂 𑀨𑀸𑀮𑁂𑀲𑁆𑀲𑀸𑀫𑀺, 𑀧𑀸𑀤𑁂𑀲𑀼 𑀯𑀸 𑀕𑀳𑁂𑀢𑁆𑀯𑀸 𑀧𑀸𑀭𑀕𑀗𑁆𑀕𑀸𑀬 𑀔𑀺𑀧𑀺𑀲𑁆𑀲𑀸𑀫𑀺𑁋

𑀓𑀺𑀁 ¶ 𑀲𑀽𑀔 𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞𑀁, 𑀓𑀺𑀁 𑀲𑀼 𑀲𑀼𑀘𑀺𑀡𑁆𑀡𑀁 𑀲𑀼𑀔𑀫𑀸𑀯𑀳𑀸𑀢𑀺;

𑀓𑀺𑀁 𑀲𑀼 𑀳𑀯𑁂 𑀲𑀸𑀤𑀼𑀪𑀭𑀁 𑀭𑀲𑀸𑀦𑀁, 𑀓𑀣𑀁 𑀚𑀻𑀯𑀺𑀁 𑀚𑀻𑀯𑀺𑀢𑀫𑀸𑀳𑀼 𑀲𑁂𑀝𑁆𑀞𑀁𑁋

𑀲𑀤𑁆𑀥𑀻𑀥 𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞𑀁, 𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀲𑀼𑀔𑀫𑀸𑀯𑀳𑀸𑀢𑀺;

𑀲𑀘𑁆𑀘𑀁 𑀳𑀯𑁂 𑀲𑀸𑀤𑀼𑀢𑀭𑀁 𑀭𑀲𑀸𑀦𑀁, 𑀧𑀜𑁆𑀜𑀸𑀚𑀻𑀯𑀺𑀁 𑀚𑀻𑀯𑀺𑀢𑀫𑀸𑀳𑀼 𑀲𑁂𑀝𑁆𑀞𑀁;

𑀓𑀣𑀁𑀲𑀼 ¶ 𑀢𑀭𑀢𑀺 𑀑𑀖𑀁, 𑀓𑀣𑀁𑀲𑀼 𑀢𑀭𑀢𑀺 𑀅𑀡𑁆𑀡𑀯𑀁;

𑀓𑀣𑀁𑀲𑀼 𑀤𑀼𑀓𑁆𑀔 𑀫𑀘𑁆𑀘𑁂𑀢𑀺, 𑀓𑀣𑀁𑀲𑀼 𑀧𑀭𑀺𑀲𑀼𑀚𑁆𑀛𑀢𑀺.

𑀲𑀤𑁆𑀥𑀸𑀬 𑀢𑀭𑀢𑀺 𑀑𑀖𑀁, 𑀅𑀧𑁆𑀧𑀫𑀸𑀤𑁂𑀦 𑀅𑀡𑁆𑀡𑀯𑀁;

𑀯𑀻𑀭𑀺𑀬𑁂𑀦 𑀤𑀼𑀓𑁆𑀔 𑀫𑀘𑁆𑀘𑁂𑀢𑀺, 𑀧𑀜𑁆𑀜𑀸𑀬 𑀧𑀭𑀺𑀲𑀼𑀚𑁆𑀛𑀢𑀺𑁋

𑀓𑀣𑀁𑀲𑀼 ¶ 𑀮𑀪𑀢𑁂 𑀧𑀜𑁆𑀜𑀁, 𑀓𑀣𑀁𑀲𑀼 𑀯𑀺𑀦𑁆𑀤𑀢𑁂 𑀥𑀦𑀁;

𑀓𑀣𑀁𑀲𑀼 𑀓𑀺𑀢𑁆𑀢𑀺𑀁 𑀧𑀧𑁆𑀧𑁄𑀢𑀺, 𑀓𑀣𑀁 𑀫𑀺𑀢𑁆𑀢𑀸𑀦𑀺 𑀕𑀦𑁆𑀣𑀢𑀺;

𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀓𑀣𑀁 𑀧𑁂𑀘𑁆𑀘 𑀦 𑀲𑁄𑀘𑀢𑀺𑁋

𑀲𑀤𑁆𑀤𑀳𑀸𑀦𑁄 𑀅𑀭𑀳𑀢𑀁, 𑀥𑀫𑁆𑀫𑀁 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸;

𑀲𑀼𑀲𑁆𑀲𑀽𑀲𑀁 𑀮𑀪𑀢𑁂 𑀧𑀜𑁆𑀜𑀁, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀘𑀓𑁆𑀔𑀡𑁄;

𑀧𑀢𑀺𑀭𑀽𑀧𑀓𑀸𑀭𑀻 𑀥𑀼𑀭𑀯𑀸, 𑀉𑀝𑁆𑀞𑀸𑀢𑀸 𑀯𑀺𑀦𑁆𑀤𑀢𑁂 𑀥𑀦𑀁;

𑀲𑀘𑁆𑀘𑁂𑀦 ¶ 𑀓𑀺𑀢𑁆𑀢𑀺𑀁 𑀧𑀧𑁆𑀧𑁄𑀢𑀺, 𑀤𑀤𑀁 𑀫𑀺𑀢𑁆𑀢𑀸𑀦𑀺 𑀕𑀦𑁆𑀣𑀢𑀺;

𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁, 𑀏𑀯𑀁 𑀧𑁂𑀘𑁆𑀘 𑀦 𑀲𑁄𑀘𑀢𑀺;

𑀬𑀲𑁆𑀲𑁂𑀢𑁂 𑀘𑀢𑀼𑀭𑁄 𑀥𑀫𑁆𑀫𑀸, 𑀲𑀤𑁆𑀥𑀲𑁆𑀲 𑀖𑀭𑀫𑁂𑀲𑀺𑀦𑁄;

𑀲𑀘𑁆𑀘𑀁 𑀥𑀫𑁆𑀫𑁄 𑀥𑀺𑀢𑀺 𑀘𑀸𑀕𑁄, 𑀲 𑀯𑁂 𑀧𑁂𑀘𑁆𑀘𑀦 𑀲𑁄𑀘𑀢𑀺𑁋

𑀧𑀼𑀘𑁆𑀙𑀸 𑁋 𑀲𑀓𑁆𑀓𑀲𑀁𑀬𑀼𑀢𑁆𑀢𑁂 ¶ 𑀧𑀦𑀸𑀯𑀼𑀲𑁄 𑀯𑀢𑀧𑀤𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀲𑀓𑁆𑀓𑀲𑁆𑀲 𑀪𑀺𑀓𑁆𑀔𑀯𑁂 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑀲𑁆𑀲 𑀲𑀢𑁆𑀢 𑀯𑀢𑀧𑀤𑀸𑀦𑀺 𑀲𑀫𑀢𑁆𑀢𑀸𑀦𑀺 𑀲𑀫𑀸𑀤𑀺𑀦𑁆𑀦𑀸𑀦𑀺 𑀅𑀳𑁂𑀲𑀼𑀁, 𑀬𑁂𑀲𑀁 𑀲𑀫𑀸𑀤𑀺𑀦𑁆𑀦𑀢𑁆𑀢𑀸 𑀲𑀓𑁆𑀓𑁄 𑀲𑀓𑁆𑀓𑀢𑁆𑀢𑀁 𑀅𑀚𑁆𑀛𑀕𑀸𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀲𑀓𑁆𑀓𑀲𑁆𑀲 ¶ 𑀪𑀺𑀓𑁆𑀔𑀯𑁂 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑀲𑁆𑀲 𑀇𑀫𑀸𑀦𑀺 𑀲𑀢𑁆𑀢 𑀯𑀢𑀧𑀤𑀸𑀦𑀺 𑀲𑀫𑀢𑁆𑀢𑀸𑀦𑀺 𑀲𑀫𑀸𑀤𑀺𑀦𑁆𑀦𑀸𑀦𑀺 𑀅𑀳𑁂𑀲𑀼𑀁.

𑀫𑀸𑀢𑀸𑀧𑁂𑀢𑁆𑀢𑀺𑀪𑀭𑀁 𑀚𑀦𑁆𑀢𑀼𑀁, 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑀁;

𑀲𑀡𑁆𑀳𑀁 𑀲𑀔𑀺𑀮𑀲𑀫𑁆𑀪𑀸𑀲𑀁, 𑀧𑁂𑀲𑀼𑀡𑁂𑀬𑁆𑀬𑀧𑁆𑀧𑀳𑀸𑀬𑀺𑀦𑀁;

𑀫𑀘𑁆𑀙𑁂𑀭𑀯𑀺𑀦𑀬𑁂 𑀬𑀼𑀢𑁆𑀢𑀁, 𑀲𑀘𑁆𑀘𑀁 𑀓𑁄𑀥𑀸𑀪𑀺𑀪𑀼𑀁 𑀦𑀭𑀁;

𑀢𑀁 𑀯𑁂 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀆𑀳𑀼 ‘‘𑀲𑀧𑁆𑀧𑀼𑀭𑀺𑀲𑁄’’𑀇𑀢𑀺.

𑀧𑀼𑀘𑁆𑀙𑀸 𑁋 𑀤𑀮𑀺𑀤𑁆𑀤𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁. 𑀯𑀺𑀲𑁆𑀲𑀚𑁆𑀚𑀦𑀸. 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀪𑀽𑀢𑀧𑀼𑀩𑁆𑀩𑀁 𑀪𑀺𑀓𑁆𑀔𑀯𑁂 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀇𑀫𑀲𑁆𑀫𑀺𑀁𑀬𑁂𑀯 𑀭𑀸𑀚𑀕𑀳𑁂 𑀫𑀦𑀼𑀲𑁆𑀲𑀤𑀮𑀺𑀤𑁆𑀤𑁄 ¶ 𑀅𑀳𑁄𑀲𑀺 𑀫𑀦𑀼𑀲𑁆𑀲𑀓𑀧𑀡𑁄 𑀫𑀦𑀼𑀲𑁆𑀲𑀯𑀭𑀸𑀓𑁄, 𑀲𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑁂 𑀥𑀫𑁆𑀫𑀯𑀺𑀦𑀬𑁂 𑀲𑀤𑁆𑀥𑀁 𑀲𑀫𑀸𑀤𑀺𑀬𑀺, 𑀲𑀻𑀮𑀁, 𑀲𑀼𑀢𑀁, 𑀘𑀸𑀕𑀁, 𑀧𑀜𑁆𑀜𑀁 𑀲𑀫𑀸𑀤𑀺𑀬𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀬𑀲𑁆𑀲 ¶ 𑀲𑀤𑁆𑀥𑀸 𑀢𑀣𑀸𑀕𑀢𑁂, 𑀅𑀘𑀮𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸;

𑀲𑀻𑀮𑀜𑁆𑀘 𑀬𑀲𑁆𑀲 𑀓𑀮𑁆𑀬𑀸𑀡𑀁, 𑀅𑀭𑀺𑀬𑀓𑀦𑁆𑀢𑀁 𑀧𑀲𑀁𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀬𑀚𑀫𑀸𑀦𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 ¶ 𑀪𑀦𑁆𑀢𑁂 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀲𑀓𑁆𑀓𑁄 𑀪𑀦𑁆𑀢𑁂 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺𑁋

‘‘𑀬𑀚𑀫𑀸𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀧𑀼𑀜𑁆𑀜𑀧𑁂𑀓𑁆𑀔𑀸𑀦 𑀧𑀸𑀡𑀺𑀦𑀁;

𑀓𑀭𑁄𑀢𑀁 𑀑𑀧𑀥𑀺𑀓𑀁 𑀧𑀼𑀜𑁆𑀜𑀁, 𑀓𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺.

𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁𑁋

‘‘𑀘𑀢𑁆𑀢𑀸𑀭𑁄 𑀘 𑀧𑀝𑀺𑀧𑀦𑁆𑀦𑀸, 𑀘𑀢𑁆𑀢𑀸𑀭𑁄𑀘 𑀨𑀮𑁂 𑀞𑀺𑀢𑀸;

𑀏𑀲 𑀲𑀗𑁆𑀖𑁄 𑀉𑀚𑀼𑀪𑀽𑀢𑁄, 𑀧𑀜𑁆𑀜𑀸𑀲𑀻𑀮𑀲𑀫𑀸𑀳𑀺𑀢𑁄;

𑀬𑀚𑀫𑀸𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀧𑀼𑀜𑁆𑀜𑀧𑁂𑀓𑁆𑀔𑀸𑀦 𑀧𑀸𑀡𑀺𑀦𑀁;

𑀓𑀭𑁄𑀢𑀁 𑀑𑀧𑀥𑀺𑀓𑀁 𑀧𑀼𑀜𑁆𑀜𑀁, 𑀲𑀗𑁆𑀖𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁’’𑀦𑁆𑀢𑀺.

𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀬𑀚𑀫𑀸𑀦𑀸𑀦𑀁 ¶ 𑀫𑀦𑀼𑀲𑁆𑀲𑀸𑀦𑀁, 𑀧𑀼𑀜𑁆𑀜𑀧𑁂𑀓𑁆𑀔𑀸𑀦 𑀧𑀸𑀡𑀺𑀦𑀁,

𑀓𑀭𑁄𑀢𑀁 𑀑𑀧𑀥𑀺𑀢𑀁 𑀧𑀼𑀜𑁆𑀜𑀁, 𑀓𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁𑁋

𑀘𑀢𑁆𑀢𑀸𑀭𑁄 𑀘 𑀧𑀝𑀺𑀧𑀦𑁆𑀦𑀸, 𑀘𑀢𑁆𑀢𑀸𑀭𑁄 𑀘 𑀨𑀮𑁂 𑀞𑀺𑀢𑀸;

𑀏𑀲 𑀲𑀗𑁆𑀖𑁄 𑀉𑀚𑀼𑀪𑀽𑀢𑁄, 𑀧𑀜𑁆𑀜𑀸𑀲𑀻𑀮𑀲𑀫𑀸𑀳𑀺𑀢𑁄;

𑀬𑀚𑀫𑀸𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁, 𑀧𑀼𑀜𑁆𑀜𑀧𑁂𑀓𑁆𑀔𑀸𑀦 𑀧𑀸𑀡𑀺𑀦𑀁;

𑀓𑀭𑁄𑀢𑀁 𑀑𑀧𑀥𑀺𑀓𑀁 𑀧𑀼𑀜𑁆𑀜𑀁, 𑀲𑀗𑁆𑀖𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁𑁋

𑀧𑀼𑀘𑁆𑀙𑀸 𑁋 𑀕𑀳𑀝𑁆𑀞𑀯𑀦𑁆𑀤𑀦𑀸𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀪𑀽𑀢𑀧𑀼𑀩𑁆𑀩𑀁 𑀪𑀺𑀓𑁆𑀔𑀯𑁂 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀫𑀸𑀢𑀮𑀺𑀁 𑀲𑀗𑁆𑀕𑀸𑀳𑀓𑀁 𑀆𑀫𑀦𑁆𑀢𑁂𑀲𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀢𑀁 ¶ 𑀦𑀫𑀲𑁆𑀲𑀦𑁆𑀢𑀺 𑀢𑁂𑀯𑀺𑀚𑁆𑀚𑀸, 𑀲𑀩𑁆𑀩𑁂 𑀪𑀼𑀫𑁆𑀫𑀸𑀘 𑀔𑀢𑁆𑀢𑀺𑀬𑀸;

𑀘𑀢𑁆𑀢𑀸𑀭𑁄 𑀘 𑀫𑀳𑀸𑀭𑀸𑀚𑀸, 𑀢𑀺𑀤𑀲𑀸𑀘 𑀬𑀲𑀲𑁆𑀲𑀺𑀦𑁄;

𑀅𑀣𑀓𑁄 𑀦𑀸𑀫 𑀲𑁄 𑀬𑀓𑁆𑀔𑁄, 𑀬𑀁 𑀢𑁆𑀯𑀁 𑀲𑀓𑁆𑀓 𑀦𑀫𑀲𑁆𑀲𑀲𑀺𑁋

𑀅𑀳𑀜𑁆𑀘 ¶ 𑀲𑀻𑀮𑀲𑀫𑁆𑀧𑀦𑁆𑀦𑁂, 𑀘𑀺𑀭𑀭𑀢𑁆𑀢𑀲𑀫𑀸𑀳𑀺𑀢𑁂;

𑀲𑀫𑁆𑀫𑀸𑀧𑀩𑁆𑀩𑀚𑀺𑀢𑁂 𑀯𑀦𑁆𑀤𑁂, 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀸𑀬𑀦𑁂.

𑀬𑁂 𑀕𑀳𑀝𑁆𑀞𑀸 𑀧𑀼𑀜𑁆𑀜𑀓𑀭𑀸, 𑀲𑀻𑀮𑀯𑀦𑁆𑀢𑁄 𑀉𑀧𑀸𑀲𑀓𑀸;

𑀥𑀫𑁆𑀫𑁂𑀦 𑀤𑀸𑀭𑀁 𑀧𑁄𑀲𑁂𑀦𑁆𑀢𑀺, 𑀢𑁂 𑀦𑀫𑀲𑁆𑀲𑀸𑀫𑀺 𑀫𑀸𑀢𑀮𑀺.

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 ¶ 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀦𑀺𑀤𑀸𑀦𑀯𑀕𑁆𑀕𑀲𑀁𑀬𑀼𑀢𑁆𑀢𑁂 𑀧𑀞𑀫𑀁 𑀲𑀁𑀕𑀻𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀼𑀢𑁆𑀢𑀁 𑀓𑀢𑁆𑀣 𑀢𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀧𑀜𑁆𑀘𑀲𑀢𑁂 𑀚𑀦𑀧𑀤𑀯𑀸𑀲𑀺𑀦𑁄 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀧𑀜𑁆𑀘𑀲𑀢𑀸 𑀪𑀦𑁆𑀢𑁂 𑀚𑀦𑀧𑀤𑀯𑀸𑀲𑀺𑀦𑁄 𑀪𑀺𑀓𑁆𑀔𑀽 𑀲𑀩𑁆𑀩𑁂 𑀉𑀕𑁆𑀖𑀸𑀝𑀺𑀢𑀜𑁆𑀜𑀼𑀦𑁄 𑀥𑀼𑀢𑀗𑁆𑀕𑀥𑀭𑀸 𑀆𑀭𑀤𑁆𑀥𑀯𑀻𑀭𑀺𑀬𑀸 𑀬𑀼𑀢𑁆𑀢𑀬𑁄𑀕𑀸 𑀯𑀺𑀧𑀲𑁆𑀲𑀓𑀸 𑀲𑀡𑁆𑀳𑀁 𑀲𑀼𑀔𑀼𑀫𑀁 𑀲𑀼𑀜𑁆𑀜𑀢𑀁 𑀧𑀘𑁆𑀘𑀬𑀸𑀓𑀸𑀭𑀥𑀫𑁆𑀫𑀤𑁂𑀲𑀦𑀁 𑀧𑀢𑁆𑀣𑀬𑀫𑀸𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀯𑁄 𑀪𑀺𑀓𑁆𑀔𑀯𑁂 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀓𑀢𑀫𑁄 ¶ 𑀘 𑀪𑀺𑀓𑁆𑀔𑀯𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀪𑀺𑀓𑁆𑀔𑀯𑁂 𑀲𑀗𑁆𑀔𑀸𑀭𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁 (𑀧𑁂𑀬𑁆𑀬𑀸𑀮) 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀲𑀸 𑀲𑀫𑁆𑀪𑀯𑀦𑁆𑀢𑀺, 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀺𑀓𑁆𑀔𑀯𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄.

𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄 𑀲𑀗𑁆𑀔𑀸𑀭𑀦𑀺𑀭𑁄𑀥𑁄 (𑀧𑁂𑀬𑁆𑀬𑀸𑀮) 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀺 𑁋

𑀧𑀼𑀘𑁆𑀙𑀸 𑁋 𑀢𑀢𑁆𑀣𑀸𑀯𑀼𑀲𑁄 ¶ 𑀤𑀼𑀢𑀺𑀬𑀁 𑀲𑀁𑀕𑀻𑀢𑀁 𑀯𑀺𑀪𑀗𑁆𑀕𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀧𑀜𑁆𑀘𑀲𑀢𑁂 𑀚𑀦𑀧𑀤𑀯𑀸𑀲𑀺𑀦𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀦𑁄 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀧𑀜𑁆𑀘𑀲𑀢𑀸 𑀪𑀦𑁆𑀢𑁂 𑀚𑀦𑀧𑀤𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀦𑁄 𑀥𑀼𑀢𑀗𑁆𑀕𑀥𑀭𑀸 𑀆𑀭𑀤𑁆𑀥𑀯𑀻𑀭𑀺𑀬𑀸 𑀬𑀼𑀢𑁆𑀢𑀬𑁄𑀕𑀸 𑀯𑀺𑀲𑁆𑀲𑀓𑀸 𑀲𑀡𑁆𑀳𑀁 𑀲𑀼𑀔𑀼𑀫𑀁 𑀲𑀼𑀜𑁆𑀜𑀢𑀧𑀝𑀺𑀲𑀁𑀬𑀼𑀢𑁆𑀢𑀁 𑀧𑀘𑁆𑀘𑀬𑀸𑀓𑀸𑀭𑀥𑀫𑁆𑀫𑀤𑁂𑀲𑀦𑀁 𑀧𑀢𑁆𑀣𑀬𑀫𑀸𑀦𑀸 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀸𑀤𑀁 𑀯𑁄 𑀪𑀺𑀓𑁆𑀔𑀯𑁂 𑀤𑁂𑀤𑁂𑀲𑁆𑀲𑀸𑀫𑀺 𑀯𑀺𑀪𑀚𑀺𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀧𑀜𑁆𑀘𑀯𑁂𑀭𑀪𑀬𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀆𑀭𑀩𑁆𑀪 ‘‘𑀬𑀢𑁄 𑀔𑁄 𑀕𑀳𑀧𑀢𑀺 𑀅𑀭𑀺𑀬𑀲𑀸𑀯𑀓𑀲𑁆𑀲 𑀧𑀜𑁆𑀘 𑀪𑀬𑀸𑀦𑀺 𑀯𑁂𑀭𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀘𑀢𑀽𑀳𑀺 𑀘 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀭𑀺𑀬𑁄 𑀘𑀲𑁆𑀲 𑀜𑀸𑀬𑁄 𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑁄 𑀳𑁄𑀢𑀺 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑁄, 𑀲𑁄 𑀆𑀓𑀗𑁆𑀔𑀫𑀸𑀦𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀩𑁆𑀬𑀸𑀓𑀭𑁂𑀬𑁆𑀬 𑀔𑀻𑀡𑀦𑀺𑀭𑀬𑁄𑀫𑀺 𑀔𑀻𑀡𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀔𑀻𑀡𑀧𑁂𑀢𑁆𑀢𑀺𑀯𑀺𑀲𑀬𑁄 𑀔𑀻𑀡𑀸𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑁄, 𑀲𑁄𑀢𑀸𑀧𑀦𑁆𑀦𑁄𑀳𑀫𑀲𑁆𑀫𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑁄’’𑀢𑀺 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄𑀢𑀢𑁆𑀣 ¶ 𑀪𑀕𑀯𑀢𑀸 𑀅𑀭𑀺𑀬𑀲𑀸𑀯𑀓𑀲𑁆𑀲 𑀧𑀜𑁆𑀘𑀦𑁆𑀦𑀁 𑀪𑀬𑀸𑀦𑀁 𑀯𑁂𑀭𑀸𑀦𑀁 𑀯𑀽𑀧𑀲𑀦𑁆𑀢𑀢𑀸 𑀧𑀓𑀸𑀲𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 ‘‘𑀓𑀢𑀫𑀸𑀦𑀺 ¶ 𑀧𑀜𑁆𑀘 𑀪𑀬𑀸𑀦𑀺 𑀯𑁂𑀭𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀬𑀁 𑀕𑀳𑀧𑀢𑀺 𑀧𑀸𑀡𑀸𑀢𑀺𑀧𑀸𑀢𑀻 𑀧𑀸𑀡𑀸𑀢𑀺𑀧𑀸𑀢𑀧𑀘𑁆𑀘𑀬𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑁆𑀧𑀺 𑀪𑀬𑀁 𑀯𑁂𑀭𑀁 𑀧𑀲𑀯𑀢𑀺, 𑀲𑀫𑁆𑀧𑀭𑀸𑀬𑀺𑀓𑀫𑁆𑀧𑀺 𑀪𑀬𑀁 𑀯𑁂𑀭𑀁 𑀧𑀲𑀯𑀢𑀺, 𑀘𑁂𑀢𑀲𑀺𑀓𑀫𑁆𑀧𑀺 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑀬𑀢𑀺. 𑀧𑀸𑀡𑀸𑀢𑀺𑀧𑀸𑀢𑀸 𑀝𑀺𑀯𑀺𑀭𑀢𑀲𑁆𑀲 𑀏𑀯𑀁 𑀢𑀁 𑀪𑀬𑀁 𑀯𑁂𑀭𑀁 𑀯𑀽𑀧𑀲𑀦𑁆𑀢𑀁 𑀳𑁄𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀢𑀢𑁆𑀣 𑀪𑀕𑀯𑀢𑀸 𑀅𑀭𑀺𑀬𑀲𑀸𑀯𑀓𑀲𑁆𑀲 𑀧𑀜𑁆𑀘𑀦𑁆𑀦𑀁 𑀪𑀬𑀸𑀦𑀁 𑀯𑁂𑀭𑀸𑀦𑀁 𑀯𑀽𑀧𑀲𑀦𑁆𑀢𑀢𑀸 𑀧𑀓𑀸𑀲𑀺𑀢𑀸.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀢𑀢𑁆𑀣 𑀪𑀕𑀯𑀢𑀸 𑀅𑀭𑀺𑀬𑀲𑀸𑀯𑀓𑀲𑁆𑀲 𑀘𑀢𑀽𑀳𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑀸 𑀧𑀓𑀸𑀲𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑀢𑀫𑁂𑀳𑀺 𑀘𑀢𑀽𑀳𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀇𑀥 𑀕𑀳𑀧𑀢𑀺 𑀅𑀭𑀺𑀬𑀲𑀸𑀯𑀓𑁄 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 ‘‘𑀇𑀢𑀺𑀧𑀺𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀢𑀢𑁆𑀣 𑀪𑀕𑀯𑀢𑀸 𑀅𑀭𑀺𑀬𑀲𑀸𑀯𑀓𑀲𑁆𑀲 𑀘𑀢𑀽𑀳𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑀸 𑀧𑀓𑀸𑀲𑀺𑀢𑀸.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀢𑀢𑁆𑀣 𑀪𑀕𑀯𑀢𑀸 𑀅𑀭𑀺𑀬𑀲𑀸𑀯𑀓𑁂𑀦 𑀅𑀭𑀺𑀬𑀲𑁆𑀲 𑀜𑀸𑀬𑀲𑁆𑀲 𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀢𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑀸 𑀧𑀓𑀸𑀲𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑀢𑀫𑁄 𑀘𑀲𑁆𑀲 𑀅𑀭𑀺𑀬𑁄 𑀜𑀸𑀬𑁄 𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑁄 𑀳𑁄𑀢𑀺 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑁄. 𑀇𑀥 𑀕𑀳𑀧𑀢𑀺 𑀅𑀭𑀺𑀬𑀲𑀸𑀯𑀓𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀜𑁆𑀜𑁂𑀯 𑀲𑀸𑀥𑀼𑀓𑀁 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀺 ‘‘𑀇𑀢𑀺 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺, 𑀇𑀫𑀲𑁆𑀫𑀺𑀁 𑀅𑀲𑀢𑀺 𑀇𑀤𑀁 𑀦 𑀳𑁄𑀢𑀺, 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀺, 𑀇𑀫𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀚𑁆𑀛𑀢𑀺, 𑀬𑀤𑀺𑀤𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 (𑀧𑁂𑀬𑁆𑀬𑀸𑀮) 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺, 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀢𑀢𑁆𑀣 𑀅𑀭𑀺𑀬𑀲𑀸𑀯𑀓𑁂𑀦 𑀅𑀭𑀺𑀬𑀲𑁆𑀲 𑀜𑀸𑀬𑀲𑁆𑀲 𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀢𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑀸 𑀧𑀓𑀸𑀲𑀺𑀢𑀸.

𑀬𑀢𑁄 ¶ 𑀔𑁄 𑀕𑀳𑀧𑀢𑀺 𑀅𑀭𑀺𑀬𑀲𑀸𑀯𑀓𑀲𑁆𑀲 𑀇𑀫𑀸𑀦𑀺 𑀧𑀜𑁆𑀘 𑀪𑀬𑀸𑀦𑀺 𑀯𑁂𑀭𑀸𑀦𑀺 𑀯𑀽𑀧𑀲𑀦𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀇𑀫𑁂𑀳𑀺 𑀘𑀢𑀽𑀳𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀅𑀬𑀜𑁆𑀘𑀲𑁆𑀲 𑀅𑀭𑀺𑀬𑁄 𑀜𑀸𑀬𑁄 𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑁄 𑀳𑁄𑀢𑀺 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑁄𑁋

𑀧𑀼𑀘𑁆𑀙𑀸 𑁋 𑀤𑀼𑀓𑁆𑀔𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀤𑀼𑀓𑁆𑀔𑀲𑁆𑀲 𑀪𑀺𑀓𑁆𑀔𑀯𑁂 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀢𑀢𑁆𑀣 𑀪𑀕𑀯𑀢𑀸 𑀤𑀼𑀓𑁆𑀔𑀲𑀫𑀼𑀤𑀬𑁄 𑀧𑀓𑀸𑀲𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑀢𑀫𑁄 𑀘 𑀪𑀺𑀓𑁆𑀔𑀯𑁂 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄. 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸. 𑀅𑀬𑀁 𑀔𑁄 𑀪𑀺𑀓𑁆𑀔𑀯𑁂 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄. 𑀲𑁄𑀢𑀜𑁆𑀘 𑀧𑀝𑀺𑀘𑁆𑀘 𑀲𑀤𑁆𑀤𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀁…𑀧𑁂… 𑀖𑀸𑀦𑀜𑁆𑀘 𑀧𑀝𑀺𑀘𑁆𑀘 𑀕𑀦𑁆𑀥𑁂 𑀘…𑀧𑁂… 𑀚𑀺𑀯𑁆𑀳𑀜𑁆𑀘 𑀧𑀝𑀺𑀘𑁆𑀘 𑀭𑀲𑁂 𑀘…𑀧𑁂… 𑀓𑀸𑀬𑀜𑁆𑀘 𑀧𑀝𑀺𑀘𑁆𑀘 𑀨𑁄𑀝𑁆𑀞𑀩𑁆𑀩𑁂 𑀘…𑀧𑁂… 𑀫𑀦𑀜𑁆𑀘 𑀧𑀝𑀺𑀘𑁆𑀘 𑀥𑀫𑁆𑀫𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸. 𑀅𑀬𑀁 𑀔𑁄 𑀪𑀺𑀓𑁆𑀔𑀯𑁂 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄𑀢𑀺 𑀏𑀯𑀁𑀔𑁄 𑀪𑀦𑁆𑀢𑁂 𑀢𑀢𑁆𑀣 𑀪𑀕𑀯𑀢𑀸 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄 𑀧𑀓𑀸𑀲𑀺𑀢𑁄.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀢𑀢𑁆𑀣 𑀪𑀕𑀯𑀢𑀸 𑀤𑀼𑀓𑁆𑀔𑀲𑁆𑀲 𑀅𑀢𑁆𑀣𑀗𑁆𑀕𑀫𑁄 𑀧𑀓𑀸𑀲𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑀢𑀫𑁄 𑀘 𑀪𑀺𑀓𑁆𑀔𑀯𑁂 𑀤𑀼𑀓𑁆𑀔𑀲𑁆𑀲 𑀅𑀢𑁆𑀣𑀗𑁆𑀕𑀫𑁄. 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀲𑁆𑀲𑀸𑀬𑁂𑀯 𑀢𑀡𑁆𑀳𑀸𑀬 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄, 𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄, 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀢𑀢𑁆𑀣 𑀪𑀕𑀯𑀢𑀸 𑀤𑀼𑀓𑁆𑀔𑀲𑁆𑀲 𑀅𑀢𑁆𑀣𑀗𑁆𑀕𑀫𑁄 𑀧𑀓𑀸𑀲𑀺𑀢𑁄.

𑀧𑀼𑀘𑁆𑀙𑀸 𑁋 𑀧𑀼𑀢𑁆𑀢𑀫𑀁𑀲𑀽𑀧𑀫𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀅𑀥𑀼𑀦𑀸 𑀧𑀩𑁆𑀩𑀚𑀺𑀢𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀪𑀕𑀯𑀢𑁄 𑀘 𑀪𑀦𑁆𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀉𑀤𑀧𑀸𑀤𑀺, 𑀏𑀓𑀘𑁆𑀘𑁂 𑀘 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀦𑀯𑀸 𑀅𑀘𑀺𑀭𑀧𑀩𑁆𑀩𑀚𑀺𑀢𑀸 𑀓𑀼𑀮𑀧𑀼𑀢𑁆𑀢𑀸 𑀆𑀳𑀸𑀭𑀁 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀁𑀲𑀼. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀘𑀢𑁆𑀢𑀸𑀭𑁄𑀫𑁂 𑀪𑀺𑀓𑁆𑀔𑀯𑁂 𑀆𑀳𑀸𑀭𑀸 𑀪𑀽𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀲𑀫𑁆𑀪𑀯𑁂𑀲𑀻𑀦𑀁 𑀯𑀸 𑀅𑀦𑀼𑀕𑁆𑀕𑀳𑀸𑀬. 𑀓𑀢𑀫𑁂 𑀘𑀢𑁆𑀢𑀸𑀭𑁄 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀑𑀴𑀸𑀭𑀺𑀓𑁄 𑀯𑀸 𑀲𑀼𑀔𑀼𑀫𑁄 𑀯𑀸 𑀨𑀲𑁆𑀲𑁄 𑀤𑀼𑀢𑀺𑀬𑁄 𑀫𑀦𑁄𑀲𑀜𑁆𑀘𑁂𑀢𑀦𑀸 𑀢𑀢𑀺𑀬𑀸 𑀯𑀺𑀜𑁆𑀜𑀸𑀡𑀁 𑀘𑀢𑀼𑀢𑁆𑀣’’𑀦𑁆𑀢𑀺 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀢𑀢𑁆𑀣 𑀓𑀩𑀴𑀻𑀓𑀸𑀭𑀲𑁆𑀲 𑀆𑀳𑀸𑀭𑀲𑁆𑀲 𑀤𑀝𑁆𑀞𑀩𑁆𑀩𑀸𑀓𑀸𑀭𑁄 𑀪𑀕𑀯𑀢𑀸 𑀧𑀓𑀸𑀲𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂 𑀤𑁆𑀯𑁂 𑀚𑀸𑀬𑀫𑁆𑀧𑀢𑀺𑀓𑀸 𑀧𑀭𑀺𑀢𑁆𑀢𑀁 𑀲𑀫𑁆𑀩𑀮𑀁 𑀆𑀤𑀸𑀬 𑀓𑀦𑁆𑀢𑀸𑀭𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑁂𑀬𑁆𑀬𑀼𑀁. 𑀢𑁂𑀲𑀫𑀲𑁆𑀲 𑀏𑀓𑀧𑀼𑀢𑁆𑀢𑀓𑁄 𑀧𑀺𑀬𑁄 𑀫𑀦𑀸𑀧𑁄𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀢𑀢𑁆𑀣 𑀪𑀕𑀯𑀢𑀸 ¶ 𑀓𑀩𑀴𑀻𑀓𑀸𑀭𑀲𑁆𑀲 𑀆𑀳𑀸𑀭𑀲𑁆𑀲 𑀤𑀝𑁆𑀞𑀩𑁆𑀩𑀸𑀓𑀸𑀭𑁄 𑀧𑀓𑀸𑀲𑀺𑀢𑁄.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀢𑀢𑁆𑀣 𑀪𑀕𑀯𑀢𑀸 𑀨𑀲𑁆𑀲𑀸𑀳𑀸𑀭𑀲𑁆𑀲 𑀤𑀝𑁆𑀞𑀩𑁆𑀩𑀸𑀓𑀸𑀭𑁄 𑀧𑀓𑀸𑀲𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂 𑀕𑀸𑀯𑀻 𑀦𑀺𑀘𑁆𑀘𑀫𑁆𑀫𑀸 𑀓𑀼𑀝𑁆𑀝𑀁 𑀘𑁂 𑀦𑀺𑀲𑁆𑀲𑀸𑀬 𑀢𑀺𑀝𑁆𑀞𑁂𑀬𑁆𑀬, 𑀬𑁂 𑀓𑀼𑀝𑁆𑀝𑀦𑀺𑀲𑁆𑀲𑀺𑀢𑀸 𑀧𑀸𑀡𑀸, 𑀢𑁂 𑀦𑀁 𑀔𑀸𑀤𑁂𑀬𑁆𑀬𑀼𑀁. 𑀭𑀼𑀓𑁆𑀔𑀁 𑀘𑁂 𑀦𑀺𑀲𑁆𑀲𑀸𑀬 𑀢𑀺𑀝𑁆𑀞𑁂𑀬𑁆𑀬. 𑀉𑀤𑀓𑀁 𑀘𑁂 𑀦𑀺𑀲𑁆𑀲𑀸𑀬 𑀢𑀺𑀝𑁆𑀞𑁂𑀬𑁆𑀬. 𑀆𑀓𑀸𑀲𑀁 𑀘𑁂 𑀦𑀺𑀲𑁆𑀲𑀸𑀬 𑀢𑀺𑀝𑁆𑀞𑁂𑀬𑁆𑀬, 𑀬𑁂 𑀆𑀓𑀸𑀲𑀦𑀺𑀲𑁆𑀲𑀺𑀢𑀸 𑀧𑀸𑀡𑀸, 𑀢𑁂 𑀦𑀁 𑀔𑀸𑀤𑁂𑀬𑁆𑀬𑀼𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀢𑀢𑁆𑀣 𑀪𑀕𑀯𑀢𑀸 𑀨𑀲𑁆𑀲𑀲𑁆𑀲 𑀆𑀳𑀸𑀭𑀲𑁆𑀲 𑀤𑀝𑁆𑀞𑀩𑁆𑀩𑀸𑀓𑀸𑀭𑁄 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀧𑀓𑀸𑀲𑀺𑀢𑁄.

𑀏𑀯𑀫𑁂𑀯 ¶ 𑀔𑁆𑀯𑀸𑀳𑀁 𑀪𑀺𑀓𑁆𑀔𑀯𑁂 𑀨𑀲𑁆𑀲𑀸𑀳𑀸𑀭𑁄 𑀤𑀝𑁆𑀞𑀩𑁆𑀩𑁄𑀢𑀺 𑀯𑀤𑀸𑀫𑀺.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀢𑀢𑁆𑀣 𑀪𑀕𑀯𑀢𑀸 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑀲𑁆𑀲 𑀤𑀝𑁆𑀞𑀩𑁆𑀩𑀸𑀓𑀸𑀭𑁄 𑀧𑀓𑀸𑀲𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂 𑀅𑀗𑁆𑀕𑀸𑀭𑀓𑀸𑀲𑀼 𑀲𑀸𑀥𑀺𑀓𑀧𑁄𑀭𑀺𑀲𑀸 𑀧𑀼𑀡𑁆𑀡𑀸 𑀅𑀗𑁆𑀕𑀸𑀭𑀸𑀦𑀁 𑀯𑀻𑀢𑀘𑁆𑀘𑀺𑀓𑀸𑀦𑀁 𑀯𑀻𑀢𑀥𑀽𑀫𑀸𑀦𑀁. 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀚𑀻𑀯𑀺𑀢𑀼𑀓𑀸𑀫𑁄 𑀅𑀫𑀭𑀺𑀢𑀼𑀓𑀸𑀫𑁄 𑀲𑀼𑀔 𑀓𑀸𑀫𑁄 𑀤𑀼𑀓𑁆𑀔𑀧𑁆𑀧𑀝𑀺𑀓𑀽𑀮𑁄𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀢𑀢𑁆𑀣 𑀪𑀕𑀯𑀢𑀸 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑀲𑁆𑀲 𑀤𑀝𑁆𑀞𑀩𑁆𑀩𑀸𑀓𑀸𑀭𑁄 𑀯𑀺𑀢𑁆𑀣𑀸𑀭𑁂𑀦 𑀧𑀓𑀸𑀲𑀺𑀢𑁄.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀢𑀢𑁆𑀣 𑀪𑀕𑀯𑀢𑀸 𑀯𑀺𑀜𑁆𑀜𑀸𑀡𑀸𑀳𑀸𑀭𑀲𑁆𑀲 𑀤𑀝𑁆𑀞𑀩𑁆𑀩𑀸𑀓𑀸𑀭𑁄 𑀧𑀓𑀸𑀲𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂 𑀘𑁄𑀭𑀁 𑀆𑀕𑀼𑀘𑀸𑀭𑀺𑀁 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀬𑁆𑀬𑀼𑀁 ‘‘𑀅𑀬𑀁 𑀢𑁂 𑀤𑁂𑀯𑀘𑁄𑀭𑁄 𑀆𑀕𑀼𑀘𑀸𑀭𑀻, 𑀇𑀫𑀲𑁆𑀲 𑀬𑀁 𑀇𑀘𑁆𑀙𑀲𑀺, 𑀢𑀁 𑀤𑀡𑁆𑀟𑀁 𑀧𑀡𑁂𑀳𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀢𑀢𑁆𑀣 𑀪𑀕𑀯𑀢𑀸 𑀯𑀺𑀜𑁆𑀜𑀸𑀡𑀸𑀳𑀸𑀭𑀲𑁆𑀲 𑀤𑀝𑁆𑀞𑀩𑁆𑀩𑀸𑀓𑀸𑀭𑁄 𑀧𑀓𑀸𑀲𑀺𑀢𑁄.

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 ¶ 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀼𑀲𑀺𑀫𑀧𑀭𑀺𑀩𑁆𑀩𑀸𑀚𑀓 𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀲𑀼𑀲𑀺𑀫𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀲𑀼𑀲𑀺𑀫𑁄 𑀬𑀸𑀯𑀢𑀓𑁄 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀅𑀳𑁄𑀲𑀺 𑀓𑀣𑀸𑀲𑀮𑁆𑀮𑀸𑀧𑁄, 𑀢𑀁 𑀲𑀩𑁆𑀩𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀧𑀼𑀩𑁆𑀩𑁂 𑀔𑁄 𑀲𑀼𑀲𑀺𑀫 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁, 𑀧𑀘𑁆𑀙𑀸 𑀦𑀺𑀩𑁆𑀩𑀸𑀦𑁂 𑀜𑀸𑀡’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀢𑀢𑁆𑀣 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀲𑀼𑀲𑀺𑀫𑀢𑁆𑀣𑁂𑀭𑀲𑁆𑀲 𑀲𑀫𑁆𑀧𑀢𑀺𑀅𑀭𑀳𑀢𑁆𑀢𑀧𑀢𑁆𑀢𑀲𑁆𑀲 𑀅𑀦𑀼𑀬𑁄𑀕𑀯𑀲𑁂𑀦 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀉𑀢𑁆𑀢𑀭𑀺 𑀥𑀫𑁆𑀫𑀤𑁂𑀲𑀦𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑁂𑀲𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀲𑀼𑀲𑀺𑀫 𑀧𑀲𑁆𑀲𑀲𑀻𑀢𑀺. 𑀏𑀯𑀁 𑀪𑀦𑁆𑀢𑁂. 𑀪𑀯𑀧𑀘𑁆𑀘𑀬𑀸 𑀚𑀸𑀢𑀻𑀢𑀺 𑀲𑀼𑀲𑀺𑀫 𑀧𑀲𑁆𑀲𑀲𑀻𑀢𑀺. 𑀏𑀯𑀁 𑀪𑀦𑁆𑀢𑁂𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀸 𑀢𑀢𑁆𑀣 𑀆𑀬𑀲𑁆𑀫𑀢𑁄 𑀲𑀼𑀲𑀺𑀫𑀲𑁆𑀲 𑀲𑀫𑁆𑀧𑀢𑀺𑀅𑀭𑀳𑀢𑁆𑀢𑀧𑀢𑁆𑀢𑀲𑁆𑀲 𑀉𑀢𑁆𑀢𑀭𑀺𑀧𑀺 𑀅𑀦𑀼𑀬𑁄𑀕𑀯𑀲𑁂𑀦 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑀢𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀢𑀲𑁆𑀲 ¶ 𑀫𑁂 𑀪𑀦𑁆𑀢𑁂 𑀪𑀕𑀯𑀸 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀆𑀬𑀢𑀺𑀁𑀲𑀁𑀯𑀭𑀸𑀬𑁋

𑀧𑀼𑀘𑁆𑀙𑀸 𑁋 𑀅𑀪𑀺𑀲𑀫𑀬𑀲𑀁𑀬𑀼𑀢𑁆𑀢𑁂 ¶ 𑀧𑀦𑀸𑀯𑀼𑀲𑁄 𑀧𑀞𑀫𑀁 𑀲𑀁𑀕𑀻𑀢𑀁 𑀦𑀔𑀲𑀺𑀔𑀸𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀢𑀁 𑀓𑀺𑀁 𑀫𑀜𑁆𑀜𑀣 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀩𑀳𑀼𑀢𑀭𑀁, 𑀬𑁄 𑀯𑀸𑀬𑀁 𑀫𑀬𑀸 𑀧𑀭𑀺𑀢𑁆𑀢𑁄 𑀦𑀔𑀲𑀺𑀔𑀸𑀬𑀁 𑀧𑀁𑀲𑀼𑀆𑀭𑁄𑀧𑀺𑀢𑁄, 𑀅𑀬𑀁 𑀯𑀸 𑀫𑀳𑀸𑀧𑀣𑀯𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀥𑀸𑀢𑀼𑀲𑀁𑀬𑀼𑀢𑁆𑀢𑁂 ¶ 𑀧𑀦𑀸𑀯𑀼𑀲𑁄 𑀘𑀗𑁆𑀓𑀫𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀥𑀸𑀢𑀼𑀲𑁄𑀯 𑀪𑀺𑀓𑁆𑀔𑀯𑁂 𑀲𑀢𑁆𑀢𑀸 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑁂𑀦𑁆𑀢𑀺, 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑁂𑀦𑁆𑀢𑀺, 𑀓𑀮𑁆𑀬𑀸𑀡𑀸𑀥𑀺𑀫𑀼𑀢𑁆𑀢𑀺𑀓𑀸 𑀓𑀮𑁆𑀬𑀸𑀡𑀸𑀥𑀺𑀫𑀼𑀢𑁆𑀢𑀺𑀓𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑁂𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀅𑀲𑁆𑀲𑀤𑁆𑀥𑀲𑀁𑀲𑀦𑁆𑀤𑀦𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀥𑀸𑀢𑀼𑀲𑁄𑀯 𑀪𑀺𑀓𑁆𑀔𑀯𑁂 𑀲𑀢𑁆𑀢𑀸 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑁂𑀦𑁆𑀢𑀺, 𑀅𑀲𑁆𑀲𑀤𑁆𑀥𑀸 𑀅𑀲𑁆𑀲𑀤𑁆𑀥𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑁂𑀦𑁆𑀢𑀺, 𑀅𑀳𑀺𑀭𑀺𑀓𑀸 𑀅𑀳𑀺𑀭𑀺𑀓𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑁂𑀦𑁆𑀢𑀺, 𑀅𑀦𑁄𑀢𑁆𑀢𑀧𑁆𑀧𑀺𑀦𑁄. 𑀅𑀧𑁆𑀧𑀲𑁆𑀲𑀼𑀢𑀸. 𑀓𑀼𑀲𑀻𑀢𑀸. 𑀫𑀼𑀝𑁆𑀞𑀲𑁆𑀲𑀢𑀺𑀦𑁄. 𑀤𑀼𑀧𑁆𑀧𑀜𑁆𑀜𑀸 𑀤𑀼𑀧𑁆𑀧𑀜𑁆𑀜𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑁂𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀅𑀦𑀫𑀢𑀕𑁆𑀕𑀲𑀁𑀬𑀼𑀢𑁆𑀢𑁂 ¶ 𑀆𑀯𑀼𑀲𑁄 𑀤𑀼𑀢𑀺𑀬𑀁 𑀲𑀁𑀕𑀻𑀢𑀁 𑀧𑀣𑀯𑀻𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀅𑀦𑀫𑀢𑀕𑁆𑀕𑁄𑀬𑀁 𑀪𑀺𑀓𑁆𑀔𑀯𑁂 𑀲𑀁𑀲𑀸𑀭𑁄, 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁. 𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂 𑀧𑀼𑀭𑀺𑀲𑁄 𑀇𑀫𑀁 𑀫𑀳𑀸𑀧𑀣𑀯𑀺𑀁 𑀓𑁄𑀮𑀝𑁆𑀞𑀺𑀫𑀢𑁆𑀢𑀁 𑀓𑁄𑀮𑀝𑁆𑀞𑀺𑀫𑀢𑁆𑀢𑀁 𑀫𑀢𑁆𑀢𑀺𑀓𑀸𑀕𑀼𑀴𑀺𑀓𑀁 𑀓𑀭𑀺𑀢𑁆𑀯𑀸 𑀦𑀺𑀓𑁆𑀔𑀺𑀧𑁂𑀬𑁆𑀬 ‘𑀅𑀬𑀁 𑀫𑁂 𑀧𑀺𑀬𑀸, 𑀢𑀲𑁆𑀲 𑀫𑁂 𑀧𑀺𑀢𑀼 𑀅𑀬𑀁 𑀧𑀺𑀢𑀸’𑀢𑀺. 𑀅𑀧𑀭𑀺𑀬𑀸𑀤𑀺𑀦𑁆𑀦𑀸𑀯 𑀪𑀺𑀓𑁆𑀔𑀯𑁂 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀺𑀢𑀼𑀧𑀺𑀢𑀭𑁄 𑀅𑀲𑁆𑀲𑀼. 𑀅𑀣𑀸𑀬𑀁 𑀫𑀳𑀸𑀧𑀣𑀯𑀻 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑁂𑀬𑁆𑀬. 𑀢𑀁 𑀓𑀺𑀲𑁆𑀲𑀳𑁂𑀢𑀼, 𑀅𑀦𑀫𑀢𑀕𑁆𑀕𑁄𑀬𑀁 𑀪𑀺𑀓𑁆𑀔𑀯𑁂 𑀲𑀁𑀲𑀸𑀭𑁄, 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸 𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁’’ 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀏𑀯𑀁 ¶ 𑀤𑀻𑀖𑀭𑀢𑁆𑀢𑀁 𑀯𑁄 𑀪𑀺𑀓𑁆𑀔𑀯𑁂 𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑀽𑀢𑀁 𑀢𑀺𑀩𑁆𑀩𑀁 𑀧𑀘𑁆𑀘𑀦𑀼𑀪𑀽𑀢𑀁 𑀩𑁆𑀬𑀲𑀦𑀁 𑀧𑀘𑁆𑀘𑀦𑀼𑀪𑀽𑀢𑀁 𑀓𑀝𑀲𑀻 𑀯𑀟𑁆𑀠𑀺𑀢𑀸.

𑀅𑀮𑀫𑁂𑀯 ¶ 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁,

𑀅𑀮𑀁 𑀯𑀺𑀭𑀚𑁆𑀚𑀺𑀢𑀼𑀁, 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼𑀁,

𑀧𑀼𑀘𑁆𑀙𑀸 𑁋 𑀢𑀢𑁆𑀣𑀸𑀯𑀼𑀲𑁄 𑀢𑀢𑀺𑀬𑀁 𑀲𑀁𑀕𑀻𑀢𑀁 𑀅𑀲𑁆𑀲𑀼𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂𑀬𑁂𑀯 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀢𑀁 𑀓𑀺𑀁 𑀫𑀜𑁆𑀜𑀣 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀩𑀳𑀼𑀢𑀭𑀁, 𑀬𑀁 𑀯𑀸 𑀯𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁 𑀅𑀫𑀦𑀸𑀧𑀲𑀫𑁆𑀧𑀬𑁄𑀕𑀸 𑀫𑀦𑀸𑀧𑀯𑀺𑀧𑁆𑀧𑀬𑁄𑀕𑀸 𑀓𑀦𑁆𑀤𑀦𑁆𑀢𑀸𑀦𑀁 𑀭𑁄𑀤𑀦𑁆𑀢𑀸𑀦𑀁 𑀅𑀲𑁆𑀲𑀼 𑀧𑀲𑁆𑀲𑀦𑁆𑀦𑀁 𑀧𑀕𑁆𑀖𑀭𑀺𑀢𑀁, 𑀬𑀁 𑀯𑀸 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑀸𑀯𑀼𑀲𑁄 ¶ 𑀙𑀝𑁆𑀞𑀁 𑀲𑀁𑀕𑀻𑀢𑀁 𑀲𑀸𑀲𑀧𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀅𑀜𑁆𑀜𑀢𑀭𑁄 𑀪𑀦𑁆𑀢𑁂 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀓𑀻𑀯𑀤𑀻𑀖𑁄 𑀦𑀼 𑀔𑁄 𑀪𑀦𑁆𑀢𑁂 𑀓𑀧𑁆𑀧𑁄’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀤𑀻𑀖𑁄 𑀔𑁄 𑀪𑀺𑀓𑁆𑀔𑀼 𑀓𑀧𑁆𑀧𑁄, 𑀲𑁄 𑀦 𑀲𑀼𑀓𑀭𑁄 𑀲𑀗𑁆𑀔𑀸𑀢𑀼𑀁 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀸𑀦𑀺 𑀇𑀢𑀺𑀯𑀸, (𑀧𑁂𑀬𑁆𑀬𑀸𑀮) 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀇𑀢𑀺𑀯𑀸𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄…𑀧𑁂… ¶ 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀦𑀫𑀢𑀕𑁆𑀕𑀲𑀁𑀬𑀼𑀢𑁆𑀢𑁂 𑀕𑀗𑁆𑀕𑀸𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀅𑀜𑁆𑀜𑀢𑀭𑀁 𑀩𑁆𑀭𑀸𑀳𑁆𑀫𑀡𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀅𑀜𑁆𑀜𑀢𑀭𑁄 𑀪𑀦𑁆𑀢𑁂 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀓𑀻𑀯-

𑀩𑀳𑀼𑀓𑀸 ¶ 𑀦𑀼 𑀔𑁄 𑀪𑁄 𑀕𑁄𑀢𑀫 𑀓𑀧𑁆𑀧𑀸 𑀅𑀩𑁆𑀪𑀢𑀻𑀢𑀸 𑀅𑀢𑀺𑀓𑁆𑀓𑀦𑁆𑀢𑀸’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀩𑀳𑀼𑀓𑀸 𑀔𑁄 𑀩𑁆𑀭𑀸𑀳𑁆𑀫𑀡 𑀓𑀧𑁆𑀧𑀸 𑀅𑀩𑁆𑀪𑀢𑀻𑀢𑀸 𑀅𑀢𑀺𑀓𑁆𑀓𑀦𑁆𑀢𑀸, 𑀢𑁂 𑀦 𑀲𑀼𑀓𑀭𑀸 𑀲𑀗𑁆𑀔𑀸𑀢𑀼𑀁 ‘𑀏𑀢𑁆𑀢𑀓𑀸 𑀓𑀧𑁆𑀧𑀸’ 𑀇𑀢𑀺 𑀯𑀸 ‘𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀲𑀢𑀸𑀦𑀺’ 𑀇𑀢𑀺 𑀯𑀸 ‘𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀺’ 𑀇𑀢𑀺𑀯𑀸 ‘𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀺’ 𑀇𑀢𑀺 𑀯𑀸’’𑀢𑀺 𑀏𑀯 𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀧𑀼𑀕𑁆𑀕𑀮𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀅𑀦𑀫𑀢𑀕𑁆𑀕𑁄𑀬𑀁 𑀪𑀺𑀓𑁆𑀔𑀯𑁂 𑀲𑀁𑀲𑀸𑀭𑁄, 𑀧𑀼𑀩𑁆𑀩𑀸𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸 𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁. 𑀏𑀓𑀧𑀼𑀕𑁆𑀕𑀮𑀲𑁆𑀲 𑀪𑀺𑀓𑁆𑀔𑀯𑁂 𑀓𑀧𑁆𑀧𑀁 𑀲𑀦𑁆𑀥𑀸𑀯𑀢𑁄 𑀲𑀁𑀲𑀭𑀢𑁄 𑀲𑀺𑀬𑀸 𑀏𑀯𑀁 𑀫𑀳𑀸 𑀅𑀝𑁆𑀞𑀺𑀓𑀗𑁆𑀓𑀮𑁄 𑀅𑀝𑁆𑀞𑀺𑀧𑀼𑀜𑁆𑀚𑁄 𑀅𑀝𑁆𑀞𑀺𑀭𑀸𑀲𑀺, 𑀬𑀣𑀸 𑀬𑀁 𑀯𑁂𑀧𑀼𑀮𑁆𑀮𑁄 𑀧𑀩𑁆𑀩𑀢𑁄. 𑀲𑀘𑁂 𑀲𑀁𑀳𑀸𑀭𑀓𑁄 𑀅𑀲𑁆𑀲, 𑀲𑀫𑁆𑀪𑀢𑀜𑁆𑀘 𑀦 𑀯𑀺𑀦𑀲𑁆𑀲𑁂𑀢𑁆𑀬𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀤𑀼𑀕𑁆𑀕𑀢𑀲𑀼𑀢𑁆𑀢, 𑀲𑀼𑀔𑀺𑀢𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀢𑀢𑁆𑀣𑀸𑀯𑀼𑀲𑁄 ¶ 𑀤𑀼𑀕𑁆𑀕𑀢𑀲𑀼𑀢𑁆𑀢𑀜𑁆𑀘 𑀲𑀼𑀔𑀺𑀢𑀲𑀼𑀢𑁆𑀢𑀜𑁆𑀘 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀅𑀦𑀫𑀢𑀕𑁆𑀕𑁄𑀬𑀁 𑀪𑀺𑀓𑁆𑀔𑀯𑁂 𑀲𑀁𑀲𑀸𑀭𑁄, 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁. 𑀬𑀁 𑀪𑀺𑀓𑁆𑀔𑀯𑁂 𑀧𑀲𑁆𑀲𑁂𑀬𑁆𑀬𑀸𑀣 𑀤𑀼𑀕𑁆𑀕𑀢𑀁 𑀤𑀼𑀭𑀽𑀧𑁂𑀢𑀁, 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 ‘𑀅𑀫𑁆𑀳𑁂𑀳𑀺𑀧𑀺 𑀏𑀯𑀭𑀽𑀧𑀁 𑀧𑀘𑁆𑀘𑀦𑀼𑀪𑀽𑀢𑀁 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸’𑀢𑀺, 𑀬𑀁 𑀪𑀺𑀓𑁆𑀔𑀯𑁂 𑀧𑀲𑁆𑀲𑁂𑀬𑁆𑀬𑀸𑀣 𑀲𑀼𑀔𑀺𑀢𑀁 𑀲𑀼𑀲𑀚𑁆𑀚𑀺𑀢𑀁,

𑀦𑀺𑀝𑁆𑀞𑀫𑁂𑀢𑁆𑀣 ¶ 𑀕𑀦𑁆𑀢𑀩𑁆𑀩𑀁, ‘‘𑀅𑀫𑁆𑀳𑁂𑀳𑀺𑀧𑀺 𑀧𑀘𑁆𑀘𑀦𑀼𑀪𑀽𑀢𑀁 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀺𑀁𑀲𑀫𑀢𑁆𑀢𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀢𑀺𑀁𑀲𑀫𑀢𑁆𑀢𑁂 𑀧𑀸𑀯𑁂𑀬𑁆𑀬𑀓𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀅𑀦𑀫𑀢𑀕𑁆𑀕𑁄𑀬𑀁 𑀪𑀺𑀓𑁆𑀔𑀯𑁂 𑀲𑀁𑀲𑀸𑀭𑁄, 𑀧𑀼𑀩𑁆𑀩𑀸𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁. 𑀢𑀁 𑀓𑀺𑀁 𑀫𑀜𑁆𑀜𑀣 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀩𑀳𑀼𑀢𑀭𑀁, 𑀬𑀁 𑀯𑀸 𑀯𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁 𑀲𑀻𑀲𑀘𑁆𑀙𑀺𑀦𑁆𑀦𑀸𑀦𑀁 𑀮𑁄𑀳𑀺𑀢𑀁 𑀧𑀲𑁆𑀲𑀦𑁆𑀦𑀁 𑀧𑀕𑁆𑀖𑀭𑀺𑀢𑀁, 𑀬𑀁 𑀯𑀸 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀪𑀯𑀕𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀫𑀸𑀢𑀼𑀲𑀼𑀢𑁆𑀢𑀸𑀤𑀻𑀦𑀺 ¶ 𑀧𑀦𑀸𑀯𑀼𑀲𑁄 𑀙𑀲𑀼𑀢𑁆𑀢𑀸𑀦𑀺 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀅𑀦𑀫𑀢𑀕𑁆𑀕𑁄𑀬𑀁 𑀪𑀺𑀓𑁆𑀔𑀯𑁂 𑀲𑀁𑀲𑀸𑀭𑁄, 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢𑀁. 𑀦 𑀲𑁄 𑀪𑀺𑀓𑁆𑀔𑀯𑁂 𑀲𑀢𑁆𑀢𑁄 𑀲𑀼𑀮𑀪𑀭𑀽𑀧𑁄, 𑀬𑁄 𑀦 𑀫𑀸𑀢𑀸𑀪𑀽𑀢𑀧𑀼𑀩𑁆𑀩𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸. 𑀬𑁄 𑀦 𑀧𑀺𑀢𑀸𑀪𑀽𑀢𑀧𑀼𑀩𑁆𑀩𑁄. 𑀬𑁄 𑀦 𑀪𑀸𑀢𑀸𑀪𑀽𑀢𑀧𑀼𑀩𑁆𑀩𑁄. 𑀬𑁄 𑀦 𑀪𑀕𑀺𑀦𑀺𑀪𑀽𑀢𑀧𑀼𑀩𑁆𑀩𑁄. 𑀬𑁄 𑀦 𑀧𑀼𑀢𑁆𑀢𑀪𑀽𑀢𑀧𑀼𑀩𑁆𑀩𑁄. 𑀬𑁄 𑀦 𑀥𑀻𑀢𑀸𑀪𑀽𑀢𑀧𑀼𑀩𑁆𑀩𑁄 ¶ 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑁂 ¶ 𑀧𑀦𑀸𑀯𑀼𑀲𑁄 𑀘𑀦𑁆𑀤𑀽𑀧𑀫𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀘𑀦𑁆𑀤𑀽𑀧𑀫𑀸 𑀪𑀺𑀓𑁆𑀔𑀯𑁂 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀣 𑀅𑀧𑀓𑀲𑁆𑀲𑁂𑀯 𑀓𑀸𑀬𑀁 𑀅𑀧𑀓𑀲𑁆𑀲 𑀘𑀺𑀢𑁆𑀢𑀁 𑀦𑀺𑀘𑁆𑀘𑀦𑀯𑀓𑀸 𑀓𑀼𑀮𑁂𑀲𑀼 𑀅𑀧𑁆𑀧𑀕𑀩𑁆𑀪𑀸. 𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂 𑀧𑀼𑀭𑀺𑀲𑁄 𑀚𑀭𑀼𑀤𑀧𑀸𑀦𑀁 𑀯𑀸 𑀑𑀮𑁄𑀓𑁂𑀬𑁆𑀬 𑀧𑀩𑁆𑀩𑀢𑀯𑀺𑀲𑀫𑀁 𑀯𑀸 𑀦𑀤𑀻𑀯𑀺𑀤𑀼𑀕𑁆𑀕𑀁 𑀯𑀸 𑀅𑀧𑀓𑀲𑁆𑀲𑁂𑀯 𑀓𑀸𑀬𑀁 𑀅𑀧𑀓𑀲𑁆𑀲 𑀘𑀺𑀢𑁆𑀢𑀁. 𑀏𑀯𑀫𑁂𑀯 𑀔𑁄 𑀪𑀺𑀓𑁆𑀔𑀯𑁂 𑀘𑀦𑁆𑀤𑀽𑀧𑀫𑀸 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀣 𑀅𑀧𑀓𑀲𑁆𑀲𑁂𑀯 𑀓𑀸𑀬𑀁 𑀅𑀧𑀓𑀲𑁆𑀲 𑀘𑀺𑀢𑁆𑀢𑀁 𑀦𑀺𑀘𑁆𑀘𑀦𑀯𑀓𑀸 𑀓𑀼𑀮𑁂𑀲𑀼 𑀅𑀧𑁆𑀧𑀕𑀩𑁆𑀪𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀢𑀁 ¶ 𑀓𑀺𑀁 𑀫𑀜𑁆𑀜𑀣 𑀪𑀺𑀓𑁆𑀔𑀯𑁂, 𑀓𑀣𑀁 𑀭𑀽𑀧𑀸 𑀪𑀺𑀓𑁆𑀔𑀼 𑀅𑀭𑀳𑀢𑀺 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀢𑀼𑀁.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀢𑀢𑁆𑀣 𑀪𑀕𑀯𑀢𑀸 𑀧𑀭𑀺𑀲𑀼𑀤𑁆𑀥𑀸𑀧𑀭𑀺𑀲𑀼𑀤𑁆𑀥 𑀥𑀫𑁆𑀫𑀤𑁂𑀲𑀦𑀁 𑀤𑀲𑁆𑀲𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀑𑀯𑀸𑀤𑁄 𑀤𑀺𑀦𑁆𑀦𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 ‘‘𑀢𑀁 𑀓𑀺𑀁 𑀫𑀜𑁆𑀜𑀣 𑀪𑀺𑀓𑁆𑀔𑀯𑁂, 𑀓𑀣𑀁 𑀭𑀽𑀧𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀲𑀼𑀤𑁆𑀥𑀸 𑀥𑀫𑁆𑀫𑀤𑁂𑀲𑀦𑀸 𑀳𑁄𑀢𑀺, 𑀓𑀣𑀁 𑀭𑀽𑀧𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀲𑀼𑀤𑁆𑀥𑀸 𑀥𑀫𑁆𑀫𑀤𑁂𑀲𑀦𑀸 ¶ 𑀳𑁄𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀧𑀭𑀺𑀲𑀼𑀤𑁆𑀥𑀸𑀧𑀭𑀺𑀲𑀼𑀤𑁆𑀥𑀥𑀫𑁆𑀫𑀤𑁂𑀲𑀦𑀸 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑁆𑀯𑀸 ‘‘𑀓𑀲𑁆𑀲𑀧𑁂𑀦 𑀯𑀸 𑀳𑀺 𑀯𑁄 𑀪𑀺𑀓𑁆𑀔𑀯𑁂 𑀑𑀯𑀤𑀺𑀲𑁆𑀲𑀸𑀫𑀺 𑀬𑁄 𑀯𑀸 𑀧𑀦𑀲𑁆𑀲 𑀓𑀲𑁆𑀲𑀧𑀲𑀤𑀺𑀲𑁄, 𑀑𑀯𑀤𑀺𑀢𑁂𑀳𑀺 𑀘 𑀧𑀦 𑀯𑁄 𑀢𑀣𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺. 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑁄 𑀪𑀺𑀓𑁆𑀔𑀽𑀦𑀁 𑀑𑀯𑀸𑀤𑁄 𑀤𑀺𑀦𑁆𑀦𑁄.

𑀬𑁄 ¶ 𑀳𑀺 𑀓𑁄𑀘𑀺 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀏𑀯𑀁𑀘𑀺𑀢𑁆𑀢𑁄 𑀧𑀭𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 ‘‘𑀅𑀳𑁄 𑀯𑀢 𑀫𑁂 𑀥𑀫𑁆𑀫𑀁 𑀲𑀼𑀡𑁂𑀬𑁆𑀬𑀼𑀁, 𑀲𑀼𑀢𑁆𑀯𑀸 𑀘 𑀧𑀦 𑀥𑀫𑁆𑀫𑀁 𑀧𑀲𑀻𑀤𑁂𑀬𑁆𑀬𑀼𑀁, 𑀧𑀲𑀦𑁆𑀦𑀸 𑀘 𑀫𑁂 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁂𑀬𑁆𑀬𑀼𑀁𑁋

𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀓𑀸𑀮𑀺𑀓𑁄 𑀏𑀳𑀺 𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀺𑁋

𑀓𑀲𑁆𑀲𑀧𑁂𑀦 ¶ 𑀯𑀸 𑀳𑀺 𑀯𑁄 𑀪𑀺𑀓𑁆𑀔𑀯𑁂 𑀑𑀯𑀤𑀺𑀲𑁆𑀲𑀸𑀫𑀺 𑀬𑁄 𑀯𑀸 𑀧𑀦𑀲𑁆𑀲 𑀓𑀲𑁆𑀲𑀧𑀲𑀤𑀺𑀲𑁄, 𑀑𑀯𑀤𑀺𑀢𑁂𑀳𑀺 𑀘 𑀧𑀦 𑀯𑁄 𑀢𑀣𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁𑁋

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 ¶ 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑁂 𑀘𑀢𑀼𑀢𑁆𑀣𑀁 𑀓𑀼𑀮𑀽𑀧𑀓𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀢𑀁 𑀓𑀺𑀁 𑀫𑀜𑁆𑀜𑀣 𑀪𑀺𑀓𑁆𑀔𑀯𑁂, 𑀓𑀣𑀁 𑀭𑀽𑀧𑁄 𑀪𑀺𑀓𑁆𑀔𑀼 𑀅𑀭𑀳𑀢𑀺 𑀓𑀼𑀮𑀽𑀧𑀓𑁄 𑀳𑁄𑀢𑀼𑀁, 𑀓𑀣𑀁 𑀭𑀽𑀧𑁄 𑀪𑀺𑀓𑁆𑀔𑀼 𑀦 𑀅𑀭𑀳𑀢𑀺 𑀓𑀼𑀮𑀽𑀧𑀓𑁄 𑀳𑁄𑀢𑀼’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀓𑀲𑁆𑀲𑀧𑁂𑀦 ¶ 𑀯𑀸 𑀳𑀺 𑀯𑁄 𑀪𑀺𑀓𑁆𑀔𑀯𑁂 𑀑𑀯𑀤𑀺𑀲𑁆𑀲𑀸𑀫𑀺 𑀬𑁄 𑀯𑀸 𑀧𑀦𑀲𑁆𑀲 𑀓𑀲𑁆𑀲𑀧𑀲𑀤𑀺𑀲𑁄, 𑀑𑀯𑀤𑀺𑀢𑁂𑀳𑀺 𑀘 𑀧𑀦 𑀯𑁄 𑀢𑀣𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯𑀸𑀯𑀼𑀲𑁄 ¶ 𑀪𑀕𑀯𑀢𑀸 𑀤𑀼𑀢𑀺𑀬 𑀑𑀯𑀸𑀤𑀲𑀼𑀢𑁆𑀢𑀁 𑀓𑀢𑁆𑀣 𑀓𑁂𑀦 𑀲𑀤𑁆𑀥𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 𑀲𑀤𑁆𑀥𑀺𑀁 ‘‘𑀑𑀯𑀤 𑀓𑀲𑁆𑀲𑀧 𑀪𑀺𑀓𑁆𑀔𑀽, 𑀓𑀭𑁄𑀳𑀺 𑀓𑀲𑁆𑀲𑀧 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁, 𑀅𑀳𑀁 𑀯𑀸 𑀓𑀲𑁆𑀲𑀧 𑀪𑀺𑀓𑁆𑀔𑀽 𑀑𑀯𑀤𑁂𑀬𑁆𑀬𑀁 𑀢𑁆𑀯𑀁 𑀯𑀸, 𑀅𑀳𑀁 𑀯𑀸 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁂𑀬𑁆𑀬𑀁 𑀢𑁆𑀯𑀁 𑀯𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀬𑀲𑁆𑀲 ¶ 𑀓𑀲𑁆𑀲𑀘𑀺 𑀪𑀦𑁆𑀢𑁂 𑀲𑀤𑁆𑀥𑀸 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀳𑀺𑀭𑀻 𑀦𑀢𑁆𑀣𑀺. 𑀑𑀢𑁆𑀢𑀧𑁆𑀧𑀁 𑀦𑀢𑁆𑀣𑀺. 𑀯𑀻𑀭𑀺𑀬𑀁 𑀦𑀢𑁆𑀣𑀺. 𑀧𑀜𑁆𑀜𑀸 𑀦𑀢𑁆𑀣𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯𑀸𑀯𑀼𑀲𑁄 ¶ 𑀪𑀕𑀯𑀢𑀸 𑀢𑀢𑀺𑀬𑀑𑀯𑀸𑀤𑀲𑀼𑀢𑁆𑀢𑀁 𑀓𑀢𑁆𑀣 𑀓𑁂𑀦 𑀲𑀤𑁆𑀥𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀆𑀬𑀲𑁆𑀫𑀢𑀸𑀬𑁂𑀯 𑀫𑀳𑀸𑀓𑀲𑁆𑀲𑀧𑁂𑀦 𑀲𑀤𑁆𑀥𑀺𑀁 ‘‘𑀑𑀯𑀤 𑀓𑀲𑁆𑀲𑀧 𑀪𑀺𑀓𑁆𑀔𑀽. 𑀓𑀭𑁄𑀳𑀺 𑀓𑀲𑁆𑀲𑀧 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁, 𑀅𑀳𑀁 𑀯𑀸 𑀓𑀲𑁆𑀲𑀧 𑀪𑀺𑀓𑁆𑀔𑀽 𑀑𑀯𑀤𑁂𑀬𑁆𑀬𑀁 𑀢𑁆𑀯𑀁 𑀯𑀸. 𑀅𑀳𑀁 𑀯𑀸 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀓𑀣𑀁 𑀓𑀭𑁂𑀬𑁆𑀬𑀁 𑀢𑁆𑀯𑀁 𑀯𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀤𑀼𑀩𑁆𑀩𑀘𑀸 ¶ 𑀔𑁄 𑀪𑀦𑁆𑀢𑁂 𑀏𑀢𑀭𑀳𑀺 𑀪𑀺𑀓𑁆𑀔𑀽 𑀤𑁄𑀯𑀘𑀲𑁆𑀲𑀓𑀭𑀡𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀅𑀓𑁆𑀔𑀫𑀸 𑀅𑀧𑁆𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀺𑀦𑁄 𑀅𑀦𑀼𑀲𑀸𑀲𑀦𑀺𑀁𑁋

𑀲𑀤𑁆𑀥𑀫𑁆𑀫𑀧𑁆𑀧𑀢𑀺𑀭𑀽𑀧𑀓𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯𑀸𑀯𑀼𑀲𑁄 ¶ 𑀪𑀕𑀯𑀢𑀸 𑀧𑀭𑀺𑀬𑁄𑀲𑀸𑀦𑀁 𑀲𑀤𑁆𑀥𑀫𑁆𑀫𑀧𑁆𑀧𑀢𑀺𑀭𑀽𑀧𑀓𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁𑀬𑁂𑀯 𑀫𑀳𑀸𑀓𑀲𑁆𑀲𑀧𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀫𑀳𑀸𑀓𑀲𑁆𑀲𑀧𑁄 𑀪𑀕𑀯𑀦𑁆𑀢𑀁 𑀏𑀢𑀤𑁂𑀯𑁄𑀘 ‘‘𑀓𑁄 𑀦𑀼 𑀔𑁄 𑀪𑀦𑁆𑀢𑁂 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀧𑀼𑀩𑁆𑀩𑁂 𑀅𑀧𑁆𑀧𑀢𑀭𑀸𑀦𑀺 𑀘𑁂𑀯 𑀲𑀺𑀓𑁆𑀔𑀸𑀧𑀤𑀸𑀦𑀺 𑀅𑀳𑁂𑀲𑀼𑀁, 𑀩𑀳𑀼𑀢𑀭𑀸 𑀘 𑀪𑀺𑀓𑁆𑀔𑀽 𑀅𑀜𑁆𑀜𑀸𑀬 𑀲𑀡𑁆𑀞𑀳𑀺𑀁𑀲𑀼. 𑀓𑁄 𑀧𑀦 𑀪𑀦𑁆𑀢𑁂 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦𑁂𑀢𑀭𑀳𑀺 𑀩𑀳𑀼𑀢𑀭𑀸𑀦𑀺 𑀘𑁂𑀯 𑀲𑀓𑁆𑀔𑀸𑀧𑀤𑀸𑀦𑀺 𑀅𑀧𑁆𑀧𑀢𑀭𑀸 𑀘 𑀪𑀺𑀓𑁆𑀔𑀽 𑀅𑀜𑁆𑀜𑀸𑀬 𑀲𑀡𑁆𑀞𑀳𑀦𑁆𑀢𑀻’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀏𑀯𑀜𑁆𑀘𑁂𑀢𑀁 𑀓𑀲𑁆𑀲𑀧 𑀳𑁄𑀢𑀺 𑀲𑀢𑁆𑀢𑁂𑀲𑀼 𑀳𑀸𑀬𑀫𑀸𑀦𑁂𑀲𑀼 𑀲𑀤𑁆𑀥𑀫𑁆𑀫𑁂 𑀅𑀦𑁆𑀢𑀭𑀥𑀸𑀬𑀫𑀸𑀦𑁂 𑀩𑀳𑀼𑀢𑀭𑀸𑀦𑀺𑀘𑁂𑀯 𑀲𑀺𑀓𑁆𑀔𑀸𑀧𑀤𑀸𑀦𑀺 ¶ 𑀳𑁄𑀦𑁆𑀢𑀺, 𑀅𑀧𑁆𑀧𑀢𑀭𑀸𑀘 𑀪𑀺𑀓𑁆𑀔𑀽 𑀅𑀜𑁆𑀜𑀸𑀬 𑀲𑀡𑁆𑀞𑀳𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄…𑀧𑁂… ¶ 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀮𑀸𑀪𑀲𑀓𑁆𑀓𑀸𑀭𑀁𑀬𑀼𑀢𑁆𑀢𑁂 𑀧𑀜𑁆𑀘𑀫𑀁 𑀲𑀁𑀕𑀻𑀢𑀁 𑀫𑀻𑀴𑁆𑀳𑀓𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀤𑀸𑀭𑀼𑀡𑁄 𑀪𑀺𑀓𑁆𑀔𑀯𑁂 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀨𑀭𑀼𑀲𑁄 𑀅𑀦𑁆𑀢𑀭𑀸𑀬𑀺𑀓𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬. 𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂 𑀫𑀻𑀴𑁆𑀳𑀓𑀸 𑀕𑀽𑀣𑀸𑀤𑀻 𑀕𑀽𑀣𑀧𑀽𑀭𑀸 𑀧𑀼𑀡𑁆𑀡𑀸 𑀕𑀽𑀣𑀲𑁆𑀲, 𑀧𑀼𑀭𑀢𑁄 𑀘𑀲𑁆𑀲 𑀫𑀳𑀸𑀕𑀽𑀣𑀧𑀼𑀜𑁆𑀚𑁄, 𑀲𑀸 𑀢𑁂𑀦 𑀅𑀜𑁆𑀜𑀸 𑀫𑀻𑀴𑁆𑀳𑀓𑀸 𑀅𑀢𑀺𑀫𑀜𑁆𑀜𑁂𑀬𑁆𑀬 ‘‘𑀅𑀳𑀫𑁆𑀳𑀺 𑀕𑀽𑀣𑀸𑀤𑀻 𑀕𑀽𑀣𑀧𑀽𑀭𑀸 𑀧𑀼𑀡𑁆𑀡𑀸 𑀕𑀽𑀣𑀲𑁆𑀲, 𑀧𑀼𑀭𑀢𑁄 𑀘 𑀫𑁆𑀬𑀸𑀬𑀁 𑀫𑀳𑀸𑀕𑀽𑀣𑀧𑀼𑀜𑁆𑀚𑁄’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀢𑀁 ¶ 𑀳𑀺 𑀢𑀲𑁆𑀲 𑀪𑀺𑀓𑁆𑀔𑀯𑁂 𑀫𑁄𑀖𑀧𑀼𑀭𑀺𑀲𑀲𑁆𑀲 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬.

𑀏𑀯𑀁 𑀤𑀸𑀭𑀼𑀡𑁄 𑀔𑁄 𑀪𑀺𑀓𑁆𑀔𑀯𑁂 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄.

𑀢𑀲𑁆𑀫𑀸𑀢𑀺𑀳 ¶ 𑀪𑀺𑀓𑁆𑀔𑀯𑁂 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁, ‘‘𑀉𑀧𑁆𑀧𑀦𑁆𑀦𑀁 𑀮𑀸𑀪𑀲𑀓𑁆𑀓𑀸𑀭𑀲𑀺 𑀮𑁄𑀓𑀁 𑀧𑀚𑀳𑀺𑀲𑁆𑀲𑀸𑀫, 𑀦 𑀘 𑀦𑁄 𑀉𑀧𑁆𑀧𑀦𑁆𑀦𑁄 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀪𑀻’’𑀢𑀺, 𑀏𑀯𑀜𑁆𑀳𑀺 𑀔𑁄 𑀪𑀺𑀓𑁆𑀔𑀯𑁂 𑀲𑀺𑀓𑁆𑀔𑀺𑀢𑀩𑁆𑀩𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁄 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑁂𑀳𑀺 𑀲𑀁𑀕𑀻𑀢𑀁 𑀏𑀓𑀧𑀼𑀢𑁆𑀢𑀓𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀤𑀸𑀭𑀼𑀡𑁄 𑀪𑀺𑀓𑁆𑀔𑀯𑁂 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀓𑀝𑀼𑀓𑁄 𑀨𑀭𑀼𑀲𑁄 𑀅𑀦𑁆𑀢𑀭𑀸𑀬𑀺𑀓𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬, 𑀲𑀤𑁆𑀥𑀸 𑀪𑀺𑀓𑁆𑀔𑀯𑁂 𑀉𑀧𑀸𑀲𑀺𑀓𑀸 𑀏𑀓𑀧𑀼𑀢𑁆𑀢𑀓𑀁 𑀧𑀺𑀬𑀁 𑀫𑀦𑀸𑀧𑀁 𑀏𑀯𑀁 𑀲𑀫𑁆𑀫𑀸𑀆𑀬𑀸𑀘𑀫𑀸𑀦𑀸 ¶ 𑀆𑀬𑀸𑀘𑁂𑀬𑁆𑀬 𑀢𑀸𑀤𑀺𑀲𑁄 𑀢𑀸𑀢 𑀪𑀯𑀸𑀳𑀺, 𑀬𑀸𑀤𑀺𑀲𑁄 𑀘𑀺𑀢𑁆𑀢𑁄 𑀘 𑀕𑀳𑀧𑀢𑀺 𑀳𑀢𑁆𑀣𑀓𑁄 𑀘 𑀆𑀴𑀯𑀓𑁄’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀏𑀲𑀸 ¶ 𑀪𑀺𑀓𑁆𑀔𑀯𑁂 𑀢𑀼𑀮𑀸 𑀏𑀢𑀁 𑀧𑀫𑀸𑀡𑀁 𑀫𑀫 𑀲𑀸𑀯𑀓𑀸𑀦𑀁 𑀉𑀧𑀸𑀲𑀓𑀸𑀦𑀁 𑀬𑀤𑀺𑀤𑀁 𑀘𑀺𑀢𑁆𑀢𑁄 𑀘 𑀕𑀳𑀧𑀢𑀺 𑀳𑀢𑁆𑀣𑀓𑁄 𑀘 𑀆𑀴𑀯𑀓𑁄.

𑀲𑀘𑁂 𑀔𑁄 𑀢𑁆𑀯𑀁 𑀢𑀸𑀢 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀲𑀺, 𑀢𑀸𑀤𑀺𑀲𑁄 𑀢𑀸𑀢 𑀪𑀯𑀸𑀳𑀺, 𑀬𑀸𑀤𑀺𑀲𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸.

𑀫𑀸 𑀘 𑀔𑁄 𑀢𑁆𑀯𑀁 𑀢𑀸𑀢 𑀲𑁂𑀔𑀁 𑀅𑀧𑁆𑀧𑀢𑁆𑀢𑀫𑀸𑀦𑀲𑀁 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀅𑀦𑀼𑀧𑀸𑀧𑀼𑀡𑀸𑀢𑀼𑁋

𑀏𑀯𑀁 ¶ 𑀤𑀸𑀭𑀼𑀡𑁄 𑀪𑀺𑀓𑁆𑀔𑀯𑁂 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀓𑀝𑀼𑀓𑁄 𑀨𑀭𑀼𑀲𑁄 𑀅𑀦𑁆𑀢𑀭𑀸𑀬𑀺𑀓𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀬𑀓𑁂𑀳𑀺 𑀲𑀁𑀕𑀻𑀢𑀁 𑀏𑀓𑀥𑀻𑀢𑀼𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁𑀬𑁂𑀯 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀤𑀸𑀭𑀼𑀡𑁄 𑀪𑀺𑀓𑁆𑀔𑀯𑁂 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁄 𑀓𑀝𑀼𑀓𑁄 𑀨𑀭𑀼𑀲𑁄 𑀅𑀦𑁆𑀢𑀭𑀸𑀬𑀺𑀓𑁄 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲 𑀅𑀥𑀺𑀕𑀫𑀸𑀬. 𑀲𑀤𑁆𑀥𑀸 𑀪𑀺𑀓𑁆𑀔𑀯𑁂 𑀉𑀧𑀸𑀲𑀺𑀓𑀸 𑀏𑀓𑀁 𑀥𑀻𑀢𑀭𑀁 𑀧𑀺𑀬𑀁 𑀫𑀦𑀸𑀧𑀁 𑀏𑀯𑀁 𑀲𑀫𑁆𑀫𑀸 𑀆𑀬𑀸𑀘𑀫𑀸𑀦𑀸 𑀆𑀬𑀸𑀘𑁂𑀬𑁆𑀬 ‘𑀢𑀸𑀤𑀺𑀲𑀸 𑀅𑀬𑁆𑀬𑁂 𑀪𑀯𑀸𑀳𑀺, 𑀬𑀸𑀤𑀺𑀲𑀸 𑀔𑀼𑀚𑁆𑀚𑀼𑀢𑁆𑀢𑀭𑀸 𑀘 𑀉𑀧𑀸𑀲𑀺𑀓𑀸 𑀯𑁂𑀴𑀼𑀓𑀡𑁆𑀟𑀓𑀺𑀬𑀸 𑀘 𑀦𑀦𑁆𑀤𑀫𑀸𑀢𑀸’𑀢𑀺. 𑀏𑀲𑀸 𑀪𑀺𑀓𑁆𑀔𑀯𑁂 𑀢𑀼𑀮𑀸 𑀏𑀢𑀁 𑀧𑀫𑀸𑀡𑀁 𑀫𑀫 𑀲𑀸𑀯𑀺𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁, 𑀬𑀤𑀺𑀤𑀁 𑀔𑀼𑀚𑁆𑀚𑀼𑀢𑁆𑀢𑀭𑀸 𑀘 𑀉𑀧𑀸𑀲𑀺𑀓𑀸 𑀯𑁂𑀴𑀼𑀓𑀡𑁆𑀟𑀓𑀺𑀬𑀸 𑀘 𑀦𑀦𑁆𑀤𑀫𑀸𑀢𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀲𑀘𑁂 ¶ 𑀔𑁄 𑀢𑁆𑀯𑀁 𑀅𑀬𑁆𑀬𑁂 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀲𑀺, 𑀪𑀸𑀤𑀺𑀲𑀸 𑀅𑀬𑁆𑀬𑁂 𑀪𑀯𑀸𑀳𑀺, 𑀬𑀸𑀤𑀺𑀲𑀸 𑀔𑁂𑀫𑀸 𑀘 𑀪𑀺𑀓𑁆𑀔𑀼𑀦𑀻 𑀉𑀧𑁆𑀧𑀮𑀯𑀡𑁆𑀡𑀸 𑀘𑁋

𑀢𑀲𑁆𑀫𑀸𑀢𑀺𑀳 ¶ 𑀪𑀺𑀓𑁆𑀔𑀯𑁂 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁.

𑀧𑀼𑀘𑁆𑀙𑀸 𑁋 𑀭𑀸𑀳𑀼𑀮𑀲𑀁𑀬𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀭𑀸𑀳𑀼𑀮𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀭𑀸𑀳𑀼𑀮𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀲𑀸𑀥𑀼 𑀫𑁂 𑀪𑀦𑁆𑀢𑁂 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼, 𑀬𑀫𑀳𑀁 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺, 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀭𑀸𑀳𑀼𑀮, 𑀘𑀓𑁆𑀔𑀼𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸𑀢𑀺. 𑀅𑀦𑀺𑀘𑁆𑀘𑀁 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁, 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸𑀢𑀺. 𑀤𑀼𑀓𑁆𑀔𑀁 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 ‘𑀏𑀢𑀁 𑀫𑀫, 𑀏𑀲𑁄 𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺. 𑀦𑁄 𑀳𑁂𑀢𑀁 𑀪𑀦𑁆𑀢𑁂’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀮𑀓𑁆𑀔𑀡𑀲𑀁𑀬𑀼𑀢𑁆𑀢𑁂 ¶ 𑀧𑀦𑀸𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀧𑀞𑀫𑀁 𑀲𑀁𑀕𑀻𑀢𑀁 𑀅𑀝𑁆𑀞𑀺𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀜𑁆𑀘 𑀮𑀓𑁆𑀔𑀡𑀁 𑀆𑀬𑀲𑁆𑀫𑀦𑁆𑀢𑀜𑁆𑀘 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀮𑀓𑁆𑀔𑀡𑁄 𑀪𑀕𑀯𑀢𑀸 𑀲𑀫𑁆𑀫𑀼𑀔𑁂 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀏𑀢𑀤𑀯𑁄𑀘 ¶ ‘‘𑀇𑀥𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀕𑀺𑀚𑁆𑀛𑀓𑀽𑀝𑀸 𑀧𑀩𑁆𑀩𑀢𑀸 𑀑𑀭𑁄𑀳𑀦𑁆𑀢𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀤𑁂𑀲𑁂 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺, 𑀓𑁄 𑀦𑀼 𑀔𑁄 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄 𑀲𑀺𑀢𑀲𑁆𑀲 𑀧𑀸𑀢𑀼𑀓𑀫𑁆𑀫𑀸𑀬𑀸’’𑀢𑀺. 𑀆𑀬𑀲𑁆𑀫𑀸 𑀘 𑀪𑀦𑁆𑀢𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 ‘‘𑀇𑀥𑀸𑀳𑀁 𑀆𑀯𑀼𑀲𑁄 𑀕𑀺𑀚𑁆𑀛𑀓𑀽𑀝𑀸 𑀧𑀩𑁆𑀩𑀢𑀸 𑀑𑀭𑁄𑀳𑀦𑁆𑀢𑁄 𑀅𑀤𑁆𑀤𑀲𑀁 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀁 𑀯𑁂𑀳𑀸𑀲𑀁 𑀕𑀘𑁆𑀙𑀦𑁆𑀢𑀺𑀁’’𑀢𑀺 𑀏𑀯𑀫𑀸𑀤𑀺𑀦𑀸 𑀆𑀭𑁄𑀘𑁂𑀲𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀘𑀓𑁆𑀔𑀼𑀪𑀽𑀢𑀸 𑀯𑀢 𑀪𑀺𑀓𑁆𑀔𑀯𑁂 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺, 𑀜𑀸𑀡𑀪𑀽𑀢𑀸 𑀯𑀢 𑀪𑀺𑀓𑁆𑀔𑀯𑁂 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺, 𑀬𑀢𑁆𑀭𑀳𑀺 𑀦𑀸𑀫 𑀲𑀸𑀯𑀓𑁄 𑀏𑀯𑀭𑀽𑀧𑀁 𑀜𑀲𑁆𑀲𑀢𑀺 𑀯𑀸 𑀤𑀓𑁆𑀔𑀢𑀺 𑀯𑀸 𑀲𑀓𑁆𑀔𑀺𑀁 𑀯𑀸 𑀓𑀭𑀺𑀲𑁆𑀲𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀅𑀘𑁆𑀙𑀭𑀺𑀬𑀁 ¶ 𑀯𑀢 𑀪𑁄, 𑀅𑀩𑁆𑀪𑀼𑀢𑀁 𑀯𑀢 𑀪𑁄;

𑀏𑀯𑀭𑀽𑀧𑁄𑀧𑀺 𑀦𑀸𑀫 𑀲𑀢𑁆𑀢𑁄 𑀪𑀯𑀺𑀲𑁆𑀲𑀢𑀺.

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 ¶ 𑀚𑀸𑀦𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀮𑀓𑁆𑀔𑀡𑀲𑀁𑀬𑀼𑀢𑁆𑀢𑁂 𑀢𑀢𑀺𑀬𑀁 𑀲𑀁𑀕𑀻𑀢𑀁 𑀧𑀺𑀡𑁆𑀟𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀜𑁆𑀘 𑀮𑀓𑁆𑀔𑀡𑀁 𑀆𑀬𑀲𑁆𑀫𑀦𑁆𑀢𑀜𑁆𑀘 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀮𑀓𑁆𑀔𑀡𑁄 𑀪𑀕𑁆𑀕𑀯𑀢𑁄 𑀲𑀫𑁆𑀫𑀼𑀔𑁂 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀏𑀢𑀤𑀯𑁄𑀘 ‘‘𑀇𑀥𑀸𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀕𑀺𑀚𑁆𑀛𑀓𑀽𑀝𑀸 𑀧𑀩𑁆𑀩𑀢𑀸 𑀑𑀭𑁄𑀳𑀦𑁆𑀢𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀤𑁂𑀲𑁂 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺 ¶ , 𑀓𑁄 𑀦𑀼𑀔𑁄 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄 𑀲𑀺𑀢𑀲𑁆𑀲 𑀧𑀸𑀢𑀼𑀓𑀫𑁆𑀫𑀸𑀬𑀸’’𑀢𑀺. 𑀆𑀬𑀲𑁆𑀫𑀸 𑀘 𑀪𑀦𑁆𑀢𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 ‘‘𑀇𑀥𑀸𑀳𑀁 𑀆𑀯𑀼𑀲𑁄 𑀕𑀺𑀚𑁆𑀛𑀓𑀽𑀝𑀸 𑀧𑀩𑁆𑀩𑀢𑀸 𑀑𑀭𑁄𑀳𑀦𑁆𑀢𑁄 𑀅𑀤𑁆𑀤𑀲𑀁 𑀫𑀁𑀲𑀧𑀺𑀡𑁆𑀟𑀁 𑀯𑁂𑀳𑀸𑀲𑀁 𑀕𑀘𑁆𑀙𑀦𑁆𑀢𑀁, 𑀢𑀫𑁂𑀦𑀁 𑀕𑀺𑀚𑁆𑀛𑀸𑀧𑀺 𑀓𑀸𑀓𑀸𑀧𑀺 𑀓𑀼𑀮𑀮𑀸𑀧𑀺 𑀅𑀦𑀼𑀧𑀢𑀺𑀢𑁆𑀯𑀸 𑀅𑀦𑀼𑀧𑀢𑀺𑀢𑁆𑀯𑀸 𑀯𑀺𑀢𑀘𑁆𑀙𑁂𑀦𑁆𑀢𑀺 𑀯𑀺𑀭𑀸𑀚𑁂𑀦𑁆𑀢𑀺. 𑀲𑀸 𑀲𑀼𑀤𑀁 𑀅𑀝𑁆𑀝𑀲𑁆𑀲𑀭𑀁 𑀓𑀭𑁄𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀆𑀭𑁄𑀘𑁂𑀲𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀘𑀓𑁆𑀔𑀼𑀪𑀽𑀢𑀸 𑀯𑀢 𑀪𑀺𑀓𑁆𑀔𑀯𑁂 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺, 𑀜𑀸𑀡𑀪𑀽𑀢𑀸 𑀯𑀢 𑀪𑀺𑀓𑁆𑀔𑀯𑁂 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺, 𑀬𑀢𑁆𑀭𑀳𑀺 𑀦𑀸𑀫 𑀲𑀸𑀯𑀓𑁄 𑀏𑀯𑀭𑀽𑀧𑀁 𑀜𑀲𑁆𑀲𑀢𑀺 𑀯𑀸 𑀤𑀓𑁆𑀔𑀢𑀺 𑀯𑀸 𑀲𑀓𑁆𑀔𑀺𑀁 𑀯𑀸 𑀓𑀭𑀺𑀲𑁆𑀲𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑁂𑀳𑀺 𑀫𑀳𑀸𑀣𑁂𑀭𑁂𑀳𑀺 𑀲𑀁𑀕𑀻𑀢𑀁 𑀅𑀲𑀺𑀮𑁄𑀫𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀜𑁆𑀘 𑀮𑀓𑁆𑀔𑀡𑀁 𑀆𑀬𑀲𑁆𑀫𑀦𑁆𑀢𑀜𑁆𑀘 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀮𑀓𑁆𑀔𑀡𑁄 𑀪𑀕𑀯𑀢𑁄 𑀲𑀫𑁆𑀫𑀼𑀔𑁂 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 ¶ 𑀏𑀢𑀤𑀯𑁄𑀘 ‘‘𑀓𑁄 𑀦𑀼 𑀔𑁄 𑀆𑀯𑀼𑀲𑁄 𑀫𑁄𑀕𑁆𑀕𑀮𑁆𑀮𑀸𑀦 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄 𑀲𑀺𑀢𑀲𑁆𑀲 𑀧𑀸𑀢𑀼𑀓𑀫𑁆𑀫𑀸𑀬𑀸’’𑀢𑀺. 𑀆𑀬𑀲𑁆𑀫𑀸 𑀘 𑀪𑀦𑁆𑀢𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 ‘‘𑀇𑀥𑀸𑀳𑀁 𑀆𑀯𑀼𑀲𑁄 𑀕𑀺𑀚𑁆𑀛𑀓𑀽𑀝𑀸 𑀧𑀩𑁆𑀩𑀢𑀸 𑀑𑀭𑁄𑀳𑀦𑁆𑀢𑁄 𑀅𑀤𑁆𑀤𑀲𑀁 𑀅𑀲𑀺𑀮𑁄𑀫𑀁 𑀯𑁂𑀳𑀸𑀲𑀁 𑀕𑀘𑁆𑀙𑀦𑁆𑀢𑀁’’𑀢𑀺 𑀏𑀯𑀫𑀸𑀤𑀺𑀦𑀸 𑀆𑀭𑁄𑀘𑁂𑀲𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀘𑀓𑁆𑀔𑀼𑀪𑀽𑀢𑀸 𑀯𑀢 𑀪𑀺𑀓𑁆𑀔𑀯𑁂 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺, 𑀜𑀸𑀡𑀪𑀽𑀢𑀸 𑀯𑀢 𑀪𑀺𑀓𑁆𑀔𑀯𑁂 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺. (𑀧𑁂𑀬𑁆𑀬𑀸𑀮) 𑀏𑀲𑁄 𑀪𑀺𑀓𑁆𑀔𑀯𑁂 𑀲𑀢𑁆𑀢𑁄 𑀇𑀫𑀲𑁆𑀫𑀺𑀁𑀬𑁂𑀯 𑀭𑀸𑀚𑀕𑀳𑁂 𑀲𑀽𑀓𑀭𑀺𑀓𑁄 𑀅𑀳𑁄𑀲𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀲𑀁𑀕𑀻𑀢𑀁 𑀲𑀽𑀘𑀺𑀮𑁄𑀫𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀢𑁆𑀣𑁂𑀯 𑀪𑀦𑁆𑀢𑁂 𑀭𑀸𑀚𑀕𑀳𑁂 𑀆𑀬𑀲𑁆𑀫𑀦𑁆𑀢𑀜𑁆𑀘 𑀮𑀓𑁆𑀔𑀡𑀁 𑀆𑀬𑀲𑁆𑀫𑀦𑁆𑀢𑀜𑁆𑀘 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀮𑀓𑁆𑀔𑀡𑁄 𑀪𑀕𑀯𑀢𑁄 𑀲𑀫𑁆𑀫𑀼𑀔𑁂 𑀢𑀣𑁂𑀯 𑀅𑀯𑁄𑀘.

𑀆𑀬𑀲𑁆𑀫𑀸 ¶ 𑀘 𑀪𑀦𑁆𑀢𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀣𑁂𑀯 𑀆𑀭𑁄𑀘𑁂𑀲𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀘𑀓𑁆𑀔𑀼𑀪𑀽𑀢𑀸 𑀯𑀢 𑀪𑀺𑀓𑁆𑀔𑀯𑁂 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺, 𑀜𑀸𑀡𑀪𑀽𑀢𑀸 𑀯𑀢 𑀪𑀺𑀓𑁆𑀔𑀯𑁂 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺, (𑀧𑁂𑀬𑁆𑀬𑀸𑀮) 𑀏𑀲𑁄 𑀪𑀺𑀓𑁆𑀔𑀯𑁂 𑀲𑀢𑁆𑀢𑁄 𑀇𑀫𑀲𑁆𑀫𑀺𑀁𑀬𑁂𑀯 𑀭𑀸𑀚𑀕𑀳𑁂 𑀲𑀽𑀢𑁄 𑀅𑀳𑁄𑀲𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀸.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀲𑀁𑀕𑀻𑀢𑀸𑀦𑀺 𑀧𑀸𑀧𑀪𑀺𑀓𑁆𑀔𑀼𑀲𑀼𑀢𑁆𑀢𑀸𑀤𑀻𑀦𑀺 𑀧𑀜𑁆𑀘𑀲𑀼𑀢𑁆𑀢𑀸𑀦𑀺 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀸𑀦𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀆𑀬𑀲𑁆𑀫𑀦𑁆𑀢𑀜𑁆𑀘 𑀮𑀓𑁆𑀔𑀡𑀁 𑀆𑀬𑀲𑁆𑀫𑀦𑁆𑀢𑀜𑁆𑀘 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀆𑀭𑀩𑁆𑀪 𑀪𑀸𑀲𑀺𑀢𑀸𑀦𑀺. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀮𑀓𑁆𑀔𑀡𑁄 𑀪𑀕𑀯𑀢𑁄 𑀲𑀫𑁆𑀫𑀼𑀔𑁂 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀭𑁄𑀘𑁂𑀲𑀺. 𑀆𑀬𑀲𑁆𑀫𑀸 𑀘 𑀪𑀦𑁆𑀢𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 ‘‘𑀇𑀥𑀸𑀳𑀁 𑀆𑀯𑀼𑀲𑁄 𑀕𑀺𑀚𑁆𑀛𑀓𑀽𑀝𑀸 𑀧𑀩𑁆𑀩𑀢𑀸 𑀑𑀭𑁄𑀳𑀦𑁆𑀢𑁄 𑀅𑀤𑁆𑀤𑀲𑀁 𑀪𑀺𑀓𑁆𑀔𑀼𑀁 𑀯𑁂𑀳𑀸𑀲𑀁 𑀕𑀘𑁆𑀙𑀦𑁆𑀢𑀁. 𑀅𑀤𑁆𑀤𑀲𑀁 𑀪𑀺𑀓𑁆𑀔𑀼𑀦𑀺𑀁 𑀯𑁂𑀳𑀸𑀲𑀁 𑀕𑀘𑁆𑀙𑀦𑁆𑀢𑀺𑀁. 𑀅𑀤𑁆𑀤𑀲𑀁 𑀲𑀺𑀓𑁆𑀔𑀫𑀸𑀦𑀁 𑀯𑁂𑀳𑀸𑀲𑀁 𑀕𑀘𑁆𑀙𑀦𑁆𑀢𑀺𑀁. 𑀅𑀤𑁆𑀤𑀲𑀁 𑀲𑀸𑀫𑀡𑁂𑀭𑀁 𑀯𑁂𑀳𑀸𑀲𑀁 𑀕𑀘𑁆𑀙𑀦𑁆𑀢𑀁. 𑀅𑀤𑁆𑀤𑀲𑀁 𑀲𑀸𑀫𑀡𑁂𑀭𑀺𑀁 𑀯𑁂𑀳𑀸𑀲𑀁 𑀕𑀘𑁆𑀙𑀦𑁆𑀢𑀺𑀁. 𑀢𑀲𑁆𑀲𑀸 𑀲𑀗𑁆𑀖𑀸𑀝𑀺𑀧𑀺 𑀆𑀤𑀺𑀢𑁆𑀢𑀸 𑀲𑀫𑁆𑀧𑀚𑁆𑀚𑀮𑀺𑀢𑀸 𑀲𑀚𑁄𑀢𑀺𑀪𑀽𑀢𑀸, 𑀧𑀢𑁆𑀢𑁄𑀧𑀺 𑀆𑀤𑀺𑀢𑁆𑀢𑁄 𑀲𑀫𑁆𑀧𑀚𑁆𑀚𑀮𑀺𑀢𑁄 𑀲𑀚𑁄𑀢𑀺𑀪𑀽𑀢𑁄, 𑀓𑀸𑀬𑀩𑀦𑁆𑀥𑀦𑀫𑁆𑀧𑀺 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁 ¶ , 𑀓𑀸𑀬𑁄𑀧𑀺 𑀆𑀤𑀺𑀢𑁆𑀢𑁄 𑀲𑀫𑁆𑀧𑀚𑁆𑀚𑀮𑀺𑀢𑁄 𑀲𑀚𑁄𑀢𑀺𑀪𑀽𑀢𑁄, 𑀲𑀸 𑀲𑀼𑀤𑀁 𑀅𑀝𑁆𑀝𑀲𑁆𑀲𑀭𑀁 𑀓𑀭𑁄𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀆𑀭𑁄𑀘𑁂𑀲𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀘𑀓𑁆𑀔𑀼𑀪𑀽𑀢𑀸 𑀯𑀢 𑀪𑀺𑀓𑁆𑀔𑀯𑁂 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺 𑀜𑀸𑀡𑀪𑀽𑀢𑀸 𑀯𑀢 𑀪𑀺𑀓𑁆𑀔𑀯𑁂 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺. (𑀧𑁂𑀬𑁆𑀬𑀸𑀮). 𑀏𑀲𑁄 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀓𑀲𑁆𑀲𑀧𑀲𑁆𑀲𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀸𑀯𑀘𑀦𑁂 𑀧𑀸𑀧𑀪𑀺𑀓𑁆𑀔𑀼 𑀅𑀳𑁄𑀲𑀺. 𑀏𑀲𑀸 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼𑀦𑀻 𑀓𑀲𑁆𑀲𑀧𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀸𑀯𑀘𑀦𑁂 𑀧𑀸𑀧𑀪𑀺𑀓𑁆𑀔𑀼𑀦𑀻 𑀅𑀳𑁄𑀲𑀺. 𑀏𑀲𑀸 𑀪𑀺𑀓𑁆𑀔𑀯𑁂 𑀲𑀺𑀓𑁆𑀔𑀫𑀸𑀦𑀸 𑀓𑀲𑁆𑀲𑀧𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀸𑀯𑀘𑀦𑁂 𑀧𑀸𑀧𑀲𑀺𑀓𑁆𑀔𑀫𑀸𑀦𑀸 𑀅𑀳𑁄𑀲𑀺. 𑀏𑀲𑁄 𑀪𑀺𑀓𑁆𑀔𑀯𑁂 𑀲𑀸𑀫𑀡𑁂𑀭𑁄 𑀓𑀲𑁆𑀲𑀧𑀲𑁆𑀲𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀸𑀯𑀘𑀦𑁂 𑀧𑀸𑀧𑀲𑀸𑀫𑀡𑁂𑀭𑁄 𑀅𑀳𑁄𑀲𑀺. 𑀏𑀲𑀸 𑀪𑀺𑀓𑁆𑀔𑀯𑁂 𑀲𑀸𑀫𑀡𑁂𑀭𑀻 𑀓𑀲𑁆𑀲𑀧𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀸𑀯𑀘𑀦𑁂 𑀧𑀸𑀧𑀲𑀸𑀫𑀡𑁂𑀭𑀻 𑀅𑀳𑁄𑀲𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀸𑀦𑀺.

𑀧𑀼𑀘𑁆𑀙𑀸 𑁋 𑀑𑀧𑀫𑁆𑀫𑀲𑀁𑀬𑀼𑀢𑁆𑀢𑁂 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀲𑀁𑀕𑀻𑀢𑀁 𑀦𑀔𑀲𑀺𑀔𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀢𑀁 𑀓𑀺𑀁 𑀫𑀜𑁆𑀜𑀣 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀩𑀳𑀼𑀢𑀭𑀁, 𑀬𑁄 𑀘𑀸𑀬𑀁 𑀫𑀬𑀸 𑀧𑀭𑀺𑀢𑁆𑀢𑁄 ¶ 𑀦𑀔𑀲𑀺𑀔𑀸𑀬𑀁 𑀧𑀁𑀲𑀼 𑀆𑀭𑁄𑀧𑀺𑀢𑁄, 𑀬𑀸 𑀘𑀸𑀬𑀁 𑀫𑀳𑀸𑀧𑀣𑀯𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀢𑀁 𑀓𑀺𑀁 𑀫𑀜𑁆𑀜𑀣 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀩𑀳𑀼𑀢𑀭𑀁.

𑀢𑀲𑁆𑀫𑀸𑀢𑀺𑀳 ¶ 𑀪𑀺𑀓𑁆𑀔𑀯𑁂 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀲𑀁𑀕𑀻𑀢𑀁 𑀆𑀡𑀺𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁𑀬𑁂𑀯 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀪𑀽𑀢𑀧𑀼𑀩𑁆𑀩𑀁 𑀪𑀺𑀓𑁆𑀔𑀯𑁂 𑀤𑀲𑀸𑀭𑀳𑀸𑀦𑀁 𑀆𑀦𑀓𑁄 𑀦𑀸𑀫 𑀫𑀼𑀤𑀺𑀗𑁆𑀕𑁄 𑀅𑀳𑁄𑀲𑀺, 𑀢𑀲𑁆𑀲 𑀤𑀲𑀸𑀭𑀳𑀸 𑀆𑀦𑀓𑁂 𑀖𑀝𑀺𑀢𑁂 𑀅𑀜𑁆𑀜𑀁 𑀆𑀡𑀺𑀁 𑀑𑀤𑀳𑀺𑀁𑀲𑀼, 𑀅𑀳𑀼 𑀔𑁄 𑀲𑁄 𑀪𑀺𑀓𑁆𑀔𑀯𑁂 𑀲𑀫𑀬𑁄 𑀬𑀁 𑀆𑀦𑀓𑀲𑁆𑀲 𑀫𑀼𑀤𑀺𑀗𑁆𑀕𑀲𑁆𑀲 𑀧𑁄𑀭𑀸𑀡𑀁 𑀧𑁄𑀓𑁆𑀔𑀭𑀨𑀮𑀓𑀁 𑀅𑀦𑁆𑀢𑀭𑀥𑀸𑀬𑀺 ¶ , 𑀆𑀡𑀺𑀲𑀗𑁆𑀖𑀸𑀝𑁄𑀯 𑀅𑀯𑀲𑀺𑀲𑁆𑀲𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀪𑀺𑀓𑁆𑀔𑀼𑀲𑀁𑀬𑀼𑀢𑁆𑀢𑁂 ¶ 𑀆𑀯𑀼𑀲𑁄 𑀪𑀕𑀯𑀢𑀸 𑀦𑀯𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀅𑀜𑁆𑀜𑀢𑀭𑀁 𑀦𑀯𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀅𑀜𑁆𑀜𑀢𑀭𑁄 𑀪𑀦𑁆𑀢𑁂 𑀦𑀯𑁄 𑀪𑀺𑀓𑁆𑀔𑀼 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀅𑀧𑁆𑀧𑁄𑀲𑀼𑀓𑁆𑀓𑁄 𑀢𑀼𑀡𑁆𑀳𑀻𑀪𑀽𑀢𑁄 𑀲𑀗𑁆𑀓𑀲𑀸𑀬𑀪𑀺, 𑀦 𑀪𑀺𑀓𑁆𑀔𑀽𑀦𑀁 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀢𑀺 𑀘𑀻𑀯𑀭𑀓𑀸𑀭𑀲𑀫𑀬𑁂 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀫𑀸 𑀔𑁄 𑀢𑀼𑀫𑁆𑀳𑁂 𑀪𑀺𑀓𑁆𑀔𑀯𑁂 𑀏𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀚𑁆𑀛𑀸𑀬𑀺𑀢𑁆𑀣𑀸 𑀏𑀲𑁄 𑀔𑁄 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫 𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀅𑀳𑀫𑁆𑀧𑀺 ¶ 𑀔𑁄 𑀪𑀦𑁆𑀢𑁂 𑀲𑀓𑀁 𑀓𑀺𑀘𑁆𑀘𑀁 𑀓𑀭𑁄𑀫𑀺,

𑀏𑀲𑁄 ¶ 𑀔𑁄 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀆𑀪𑀺𑀘𑁂𑀢𑀲𑀺𑀓𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀁 𑀦𑀺𑀓𑀸𑀫𑀮𑀸𑀪𑀻 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻 𑁋

𑀦𑀬𑀺𑀤𑀁 𑀲𑀺𑀣𑀺𑀮𑀫𑀸𑀭𑀩𑁆𑀪, 𑀦𑀬𑀺𑀤𑀁 𑀅𑀧𑁆𑀧𑁂𑀦 𑀣𑀸𑀫𑀲𑀸;

𑀦𑀺𑀩𑁆𑀩𑀸𑀦𑀁 𑀅𑀥𑀺𑀕𑀦𑁆𑀢𑀩𑁆𑀩𑀁, 𑀲𑀩𑁆𑀩𑀤𑀼𑀓𑁆𑀔𑀧𑁆𑀧𑀫𑁄𑀘𑀦𑀁;

𑀅𑀬𑀜𑁆𑀘 𑀤𑀳𑀭𑁄 𑀪𑀺𑀓𑁆𑀔𑀼, 𑀅𑀬𑀫𑀼𑀢𑁆𑀢𑀫𑀧𑀼𑀭𑀺𑀲𑁄;

𑀥𑀸𑀭𑁂𑀢𑀺 𑀅𑀦𑁆𑀢𑀺𑀫𑀁 𑀤𑁂𑀳𑀁, 𑀚𑁂𑀢𑁆𑀯𑀸 𑀫𑀸𑀭𑀁 𑀲𑀯𑀸𑀳𑀺𑀦𑀺𑀁𑁋

𑀲𑀁𑀕𑀸𑀬𑀦𑀲𑁆𑀲 𑀧𑀼𑀘𑁆𑀙𑀸 𑀯𑀺𑀲𑁆𑀲𑀚𑁆𑀚𑀦𑀸

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 ¶ 𑀪𑀕𑀯𑀢𑀸 𑀚𑀸𑀦𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀔𑀦𑁆𑀥𑀯𑀕𑁆𑀕𑀲𑀁𑀬𑀼𑀢𑁆𑀢𑁂 𑀧𑀞𑀫𑀁 𑀦𑀓𑀼𑀮𑀧𑀺𑀢𑀼𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀪𑀕𑁆𑀕𑁂𑀲𑀼 𑀪𑀦𑁆𑀢𑁂 𑀲𑀼𑀲𑀼𑀫𑀸𑀭𑀕𑀺𑀭𑁂 𑀪𑁂𑀲𑀓𑀴𑀸𑀯𑀦𑁂 𑀫𑀺𑀕𑀤𑀸𑀬𑁂 𑀦𑀓𑀼𑀮𑀧𑀺𑀢𑀭𑀁 𑀕𑀳𑀧𑀢𑀺𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀦𑀓𑀼𑀮𑀧𑀺𑀢𑀸 𑀪𑀦𑁆𑀢𑁂 𑀕𑀳𑀧𑀢𑀺 𑀪𑀕𑀯𑀦𑁆𑀢𑀁 ‘‘𑀅𑀳𑀫𑀲𑁆𑀫𑀺 𑀪𑀦𑁆𑀢𑁂 𑀚𑀺𑀡𑁆𑀡𑁄 𑀯𑀼𑀟𑁆𑀠𑁄 𑀫𑀳𑀮𑁆𑀮𑀓𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄 𑀆𑀢𑀼𑀭𑀓𑀸𑀬𑁄 𑀅𑀪𑀺𑀓𑁆𑀔𑀡𑀸𑀢𑀗𑁆𑀓𑁄, 𑀅𑀦𑀺𑀘𑁆𑀘𑀤𑀲𑁆𑀲𑀸𑀯𑀻 𑀔𑁄 𑀧𑀦𑀸𑀳𑀁 𑀪𑀦𑁆𑀢𑁂 𑀪𑀕𑀯𑀢𑁄 𑀫𑀦𑁄𑀪𑀸𑀯𑀦𑀻𑀬𑀸𑀦𑀜𑁆𑀘 𑀪𑀺𑀓𑁆𑀔𑀽𑀦𑀁, 𑀑𑀯𑀤𑀢𑀼 𑀫𑀁 𑀪𑀦𑁆𑀢𑁂 𑀪𑀕𑀯𑀸, 𑀅𑀦𑀼𑀲𑀸𑀲𑀢𑀼 𑀫𑀁 𑀪𑀦𑁆𑀢𑁂 𑀪𑀕𑀯𑀸, 𑀬𑀁 𑀫𑀫𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀏𑀯𑀫𑁂𑀢𑀁 𑀕𑀳𑀧𑀢𑀺, 𑀏𑀯𑀫𑁂𑀢𑀁 𑀕𑀳𑀧𑀢𑀺, 𑀆𑀢𑀼𑀭𑁄 𑀳𑀸𑀬𑀁 𑀕𑀳𑀧𑀢𑀺 𑀓𑀸𑀬𑁄 𑀅𑀡𑁆𑀟𑀪𑀽𑀢𑁄 𑀧𑀭𑀺𑀬𑁄𑀦𑀤𑁆𑀥𑁄, 𑀬𑁄 𑀳𑀺 𑀕𑀳𑀧𑀢𑀺 𑀇𑀫𑀁 𑀓𑀸𑀬𑀁 𑀧𑀭𑀺𑀳𑀭𑀦𑁆𑀢𑁄 𑀫𑀼𑀳𑀼𑀢𑁆𑀢𑀫𑁆𑀧𑀺 𑀆𑀭𑁄𑀕𑁆𑀬𑀁 𑀧𑀝𑀺𑀚𑀸𑀦𑁂𑀬𑁆𑀬, 𑀓𑀺𑀫𑀜𑁆𑀜𑀢𑁆𑀭 𑀩𑀸𑀮𑁆𑀬𑀸. 𑀢𑀲𑁆𑀫𑀸𑀢𑀺𑀳 𑀢𑁂 𑀕𑀳𑀧𑀢𑀺 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘𑀆𑀢𑀼𑀭𑀓𑀸𑀬𑀲𑁆𑀲 𑀫𑁂 𑀲𑀢𑁄 𑀘𑀺𑀢𑁆𑀢𑀁 𑀅𑀦𑀸𑀢𑀼𑀭𑀁 𑀪𑀯𑀺𑀲𑁆𑀲𑀢𑀻’𑀢𑀺. 𑀏𑀯𑀜𑁆𑀳𑀺 𑀢𑁂 𑀕𑀳𑀧𑀢𑀺 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀢𑀲𑁆𑀫𑀸𑀢𑀺𑀳 ¶ 𑀢𑁂 𑀕𑀳𑀧𑀢𑀺 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁.

𑀧𑀼𑀘𑁆𑀙𑀸 𑁋 𑀢𑀜𑁆𑀘𑀸𑀯𑀼𑀲𑁄 ¶ 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀁 𑀯𑀺𑀢𑁆𑀣𑀸𑀭𑁂𑀦 𑀓𑁂𑀦 𑀓𑀣𑀜𑁆𑀘 𑀯𑀺𑀪𑀢𑁆𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀤𑁂𑀲𑀺𑀢𑀁 ‘‘𑀓𑀣𑀜𑁆𑀘 𑀕𑀳𑀧𑀢𑀺 𑀆𑀢𑀼𑀭𑀓𑀸𑀬𑁄 𑀘𑁂𑀯 𑀳𑁄𑀢𑀺 𑀆𑀢𑀼𑀭𑀘𑀺𑀢𑁆𑀢𑁄 𑀘. 𑀇𑀥 𑀕𑀳𑀧𑀢𑀺 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄, 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁, ‘‘𑀅𑀳𑀁 𑀭𑀽𑀧𑀁 𑀫𑀫 𑀭𑀽𑀧’’𑀦𑁆𑀢𑀺 𑀧𑀭𑀺𑀬𑀼𑀝𑁆𑀞𑀝𑁆𑀞𑀸𑀬𑀻 𑀳𑁄𑀢𑀺. 𑀢𑀲𑁆𑀲 ‘‘𑀅𑀳𑀁 𑀭𑀽𑀧𑀁 𑀫𑀫 𑀭𑀽𑀧’’𑀦𑁆𑀢𑀺 𑀧𑀭𑀺𑀬𑀼𑀝𑁆𑀞𑀝𑁆𑀞𑀸𑀬𑀺𑀦𑁄 𑀢𑀁 𑀭𑀽𑀧𑀁 𑀯𑀺𑀧𑀭𑀺𑀡𑀫𑀢𑀺 𑀅𑀜𑁆𑀜𑀣𑀸 𑀳𑁄𑀢𑀺. 𑀢𑀲𑁆𑀲 𑀭𑀽𑀧𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀢𑁆𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀤𑀼𑀢𑀺𑀬𑀯𑀕𑁆𑀕𑁂 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓 𑀫𑀳𑀸𑀣𑁂𑀭𑁂𑀳𑀺 𑀧𑀞𑀫𑀁 𑀲𑀁𑀕𑀻𑀢𑀁 𑀅𑀦𑀺𑀘𑁆𑀘𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀭𑀽𑀧𑀁 𑀪𑀺𑀓𑁆𑀔𑀯𑁂𑀅𑀦𑀺𑀘𑁆𑀘𑀁, 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸, 𑀲𑀜𑁆𑀜𑀸 𑀅𑀦𑀺𑀘𑁆𑀘𑀸, 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸, 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁. 𑀏𑀯𑀁 𑀧𑀲𑁆𑀲𑀁 𑀪𑀺𑀓𑁆𑀔𑀯𑁂 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀭𑀽𑀧𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑁂𑀤𑀦𑀸𑀬𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀲𑀜𑁆𑀜𑀸𑀬𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀲𑀗𑁆𑀔𑀸𑀭𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑀺𑀜𑁆𑀜𑀸𑀡𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺, 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺, 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 ‘𑀯𑀺𑀫𑀼𑀢𑁆𑀢’𑀫𑀺𑀢𑀺 𑀜𑀸𑀡𑀁 𑀳𑁄𑀢𑀻’’𑀢𑀺. 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀤𑀼𑀓𑁆𑀔𑀅𑀦𑀢𑁆𑀢𑀲𑀼𑀢𑁆𑀢𑀸𑀦𑀺 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀸𑀦𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁𑀬𑁂𑀯 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀭𑀽𑀧𑀁 𑀪𑀺𑀓𑁆𑀔𑀯𑁂 𑀤𑀼𑀓𑁆𑀔𑀁, 𑀯𑁂𑀤𑀦𑀸 𑀤𑀼𑀓𑁆𑀔𑀸, 𑀲𑀜𑁆𑀜𑀸 𑀤𑀼𑀓𑁆𑀔𑀸, 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸, 𑀯𑀺𑀜𑁆𑀜𑀸𑀡𑀁 𑀤𑀼𑀓𑁆𑀔𑀁. 𑀭𑀽𑀧𑀁 𑀪𑀺𑀓𑁆𑀔𑀯𑁂 𑀅𑀦𑀢𑁆𑀢𑀸, 𑀯𑁂𑀤𑀦𑀸 𑀅𑀦𑀢𑁆𑀢𑀸, 𑀲𑀜𑁆𑀜𑀸 𑀅𑀦𑀢𑁆𑀢𑀸, 𑀲𑀗𑁆𑀔𑀸𑀭𑀸 𑀅𑀦𑀢𑁆𑀢𑀸, 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸. 𑀏𑀯𑀁 𑀧𑀲𑁆𑀲𑀁 𑀪𑀺𑀓𑁆𑀔𑀯𑁂 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀭𑀽𑀧𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑁂𑀤𑀦𑀸𑀬𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀲𑀜𑁆𑀜𑀸𑀬𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀲𑀗𑁆𑀔𑀸𑀭𑁂𑀲𑀼𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀯𑀺𑀜𑁆𑀜𑀸𑀡𑀲𑁆𑀫𑀺𑀫𑁆𑀧𑀺 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺, 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺, 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 ‘𑀯𑀺𑀫𑀼𑀢𑁆𑀢’𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺, 𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻’’𑀢𑀺 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀸𑀦𑀺.

𑀧𑀼𑀘𑁆𑀙𑀸 𑁋 𑀪𑀸𑀭𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁𑀬𑁂𑀯 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀪𑀸𑀭𑀜𑁆𑀘 𑀯𑁄 𑀪𑀺𑀓𑁆𑀔𑀯𑁂 𑀤𑁂𑀲𑁂𑀲𑁆𑀲𑀸𑀫𑀺 𑀪𑀸𑀭𑀳𑀸𑀭𑀜𑁆𑀘 𑀪𑀸𑀭𑀸𑀤𑀸𑀦𑀜𑁆𑀘 𑀪𑀸𑀭𑀦𑀺𑀓𑁆𑀔𑁂𑀧𑀦𑀜𑁆𑀘, 𑀢𑀁 𑀲𑀼𑀡𑀸𑀣. 𑀓𑀢𑀫𑁄 𑀘 𑀪𑀺𑀓𑁆𑀔𑀯𑁂𑀪𑀸𑀭𑁄, ‘𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸’ 𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀓𑀢𑀫𑁂 𑀧𑀜𑁆𑀘, 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄 𑀯𑁂𑀤𑀦𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄 𑀲𑀜𑁆𑀜𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀺𑀓𑁆𑀔𑀯𑁂 𑀪𑀸𑀭𑁄’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀪𑀸𑀭𑀸 ¶ 𑀳𑀯𑁂 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀪𑀸𑀭𑀳𑀸𑀭𑁄 𑀘 𑀧𑀼𑀕𑁆𑀕𑀮𑁄;

𑀪𑀸𑀭𑀸𑀤𑀸𑀦𑀁 𑀤𑀼𑀔𑀁 𑀮𑁄𑀓𑁂, 𑀪𑀸𑀭𑀦𑀺𑀓𑁆𑀔𑁂𑀧𑀦𑀁 𑀲𑀼𑀔𑀁;

𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀭𑀼𑀁 𑀪𑀸𑀭𑀁, 𑀅𑀜𑁆𑀜𑀁 𑀪𑀸𑀭𑀁 𑀅𑀦𑀸𑀤𑀺𑀬;

𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀩𑀼𑀬𑁆𑀳, 𑀦𑀺𑀘𑁆𑀙𑀸𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄.

𑀧𑀼𑀘𑁆𑀙𑀸 𑁋 𑀦 𑀢𑀼𑀫𑁆𑀳𑀸𑀓𑀲𑀼𑀢𑁆𑀢𑀁 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁𑀬𑁂𑀯 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀼 𑀆𑀭𑀩𑁆𑀪 ‘‘𑀬𑀁 𑀪𑀺𑀓𑁆𑀔𑀯𑁂 𑀦𑀢𑀼𑀫𑁆𑀳𑀸𑀓𑀁 𑀢𑀁 𑀧𑀚𑀳𑀣, 𑀢𑀁 𑀯𑁄 𑀧𑀳𑀻𑀦𑀁 𑀳𑀺𑀢𑀸𑀬 𑀲𑀼𑀔𑀸𑀬𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀅𑀦𑀢𑁆𑀢𑀮𑀓𑁆𑀔𑀡𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀩𑀸𑀭𑀸𑀡𑀲𑀺𑀬𑀁 𑀪𑀦𑁆𑀢𑁂 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀭𑀽𑀧𑀁 𑀪𑀺𑀓𑁆𑀔𑀯𑁂 𑀅𑀦𑀢𑁆𑀢𑀸, 𑀭𑀽𑀧𑀜𑁆𑀘 𑀳𑀺𑀤𑀁 𑀪𑀺𑀓𑁆𑀔𑀯𑁂 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲, 𑀦𑀬𑀺𑀤𑀁 𑀭𑀽𑀧𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬, 𑀮𑀩𑁆𑀪𑁂𑀣 𑀘 𑀭𑀽𑀧𑁂 𑀏𑀯𑀁 𑀫𑁂 𑀭𑀽𑀧𑀁 𑀳𑁄𑀢𑀼, 𑀏𑀯𑀁 𑀫𑁂 𑀭𑀽𑀧𑀁 𑀫𑀸 𑀅𑀳𑁄𑀲𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀣𑁂𑀭𑀯𑀕𑁆𑀕𑁂 𑀧𑀦𑀸𑀯𑀼𑀲𑁄 𑀢𑀢𑀺𑀬𑀁 𑀲𑀁𑀕𑀻𑀢𑀁 𑀬𑀫𑀓𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀬𑀫𑀓𑀢𑁆𑀣𑁂𑀭𑀁 𑀆𑀭𑀩𑁆𑀪 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀢𑁄 𑀪𑀦𑁆𑀢𑁂 𑀬𑀫𑀓𑀢𑁆𑀣𑁂𑀭𑀲𑁆𑀲 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀬𑀣𑀸 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺, 𑀦 𑀳𑁄𑀢𑀺 𑀧𑀭𑀁𑀫𑀭𑀡𑀸’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀆𑀯𑀼𑀲𑁄 𑀬𑀫𑀓, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀢𑀢𑁆𑀣 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀥𑀫𑁆𑀫𑀲𑁂𑀦𑀸𑀧𑀢𑀺 𑀆𑀬𑀲𑁆𑀫𑀢𑁄 𑀬𑀫𑀓𑀢𑁆𑀣𑁂𑀭𑀲𑁆𑀲 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑀲𑁆𑀲 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀲𑁆𑀲 𑀅𑀦𑀼𑀬𑁄𑀕𑀯𑀢𑁆𑀢𑀛𑀸𑀧𑀦𑀯𑀲𑁂𑀦 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀉𑀢𑁆𑀢𑀭𑀺 𑀥𑀫𑁆𑀫𑀤𑁂𑀲𑀦𑀁 𑀯𑀺𑀢𑁆𑀣𑀸𑀭𑁂𑀦 𑀤𑁂𑀲𑁂𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀆𑀯𑀼𑀲𑁄 𑀬𑀫𑀓, 𑀭𑀽𑀧𑀁 ‘𑀢𑀣𑀸𑀕𑀢𑁄’𑀢𑀺 𑀲𑀫𑀦𑀼𑀧𑀲𑁆𑀲𑀲𑀻𑀢𑀺. ‘𑀦𑁄 𑀳𑁂𑀢𑀁 𑀆𑀯𑀼𑀲𑁄’. 𑀯𑁂𑀤𑀦𑀁. 𑀲𑀜𑁆𑀜𑀁. 𑀲𑀗𑁆𑀔𑀸𑀭𑁂. 𑀯𑀺𑀜𑁆𑀜𑀸𑀡𑀁 ‘𑀢𑀣𑀸𑀕𑀢𑁄’𑀢𑀺 𑀲𑀫𑀦𑀼𑀧𑀲𑁆𑀲𑀲𑀻𑀢𑀺. ‘𑀦𑁄 𑀳𑁂𑀢𑀁 𑀆𑀯𑀼𑀲𑁄’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀥𑀫𑁆𑀫𑀲𑁂𑀦𑀸𑀧𑀢𑀺 𑀆𑀬𑀲𑁆𑀫𑀢𑁄 𑀬𑀫𑀓𑀢𑁆𑀣𑁂𑀭𑀲𑁆𑀲 𑀅𑀦𑀼𑀬𑁄𑀕𑀯𑀢𑁆𑀢𑀛𑀸𑀧𑀦𑀯𑀲𑁂𑀦 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀉𑀢𑁆𑀢𑀭𑀺 𑀥𑀫𑁆𑀫𑀤𑁂𑀲𑀦𑀁 𑀧𑀯𑀢𑁆𑀢𑁂𑀲𑀺.

𑀢𑀁 ¶ 𑀓𑀺𑀁 𑀫𑀜𑁆𑀜𑀲𑀺 𑀆𑀯𑀼𑀲𑁄 𑀬𑀫𑀓, 𑀭𑀽𑀧𑀁, 𑀯𑁂𑀤𑀦𑀁, 𑀲𑀜𑁆𑀜𑀁, 𑀲𑀗𑁆𑀔𑀸𑀭𑁂, 𑀯𑀺𑀜𑁆𑀜𑀸𑀡𑀁 ‘𑀢𑀣𑀸𑀕𑀢𑁄’𑀢𑀺 𑀲𑀫𑀦𑀼𑀧𑀲𑁆𑀲𑀲𑀺𑁋

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 ¶ 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀔𑀦𑁆𑀥𑀯𑀕𑁆𑀕𑀲𑀁𑀬𑀼𑀢𑁆𑀢𑁂 𑀣𑁂𑀭𑀯𑀕𑁆𑀕𑁂 𑀧𑀜𑁆𑀘𑀫𑀁 𑀯𑀓𑁆𑀓𑀮𑀺𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀯𑀓𑁆𑀓𑀮𑀺𑀁 𑀣𑁂𑀭𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀯𑀓𑁆𑀓𑀮𑀺𑀣𑁂𑀭𑁄 𑀆𑀩𑀸𑀥𑀺𑀓𑁄 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀘𑀺𑀭𑀧𑀝𑀺𑀓𑀸𑀳𑀁 𑀪𑀦𑁆𑀢𑁂 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀓𑀸𑀫𑁄, 𑀦𑀢𑁆𑀣𑀺 𑀘 𑀫𑁂 𑀓𑀸𑀬𑀲𑁆𑀫𑀺𑀁 𑀢𑀸𑀯𑀢𑀺𑀓𑀸 𑀩𑀮𑀫𑀢𑁆𑀢𑀸, 𑀬𑀸𑀯𑀢𑀸𑀳𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑁂𑀬𑁆𑀬’’𑀦𑁆𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀅𑀮𑀁 𑀯𑀓𑁆𑀓𑀮𑀺, 𑀓𑀺𑀁 𑀢𑁂 𑀇𑀫𑀺𑀦𑀸 𑀧𑀽𑀢𑀺𑀓𑀸𑀬𑁂𑀦 𑀤𑀺𑀝𑁆𑀞𑁂𑀦, 𑀬𑁄 𑀔𑁄 𑀯𑀓𑁆𑀓𑀮𑀺 𑀥𑀫𑁆𑀫𑀁 𑀧𑀲𑁆𑀲𑀢𑀺, 𑀲𑁄 𑀫𑀁 𑀧𑀲𑁆𑀲𑀢𑀺, 𑀬𑁄 𑀫𑀁 𑀧𑀲𑁆𑀲𑀢𑀺, 𑀲𑁄 𑀥𑀫𑁆𑀫𑀁 𑀧𑀲𑁆𑀲𑀢𑀺. 𑀥𑀫𑁆𑀫𑀜𑁆𑀳𑀺 𑀯𑀓𑁆𑀓𑀮𑀺 𑀧𑀲𑁆𑀲𑀦𑁆𑀢𑁄 𑀫𑀁 𑀧𑀲𑁆𑀲𑀢𑀺, 𑀫𑀁 𑀧𑀲𑁆𑀲𑀦𑁆𑀢𑁄 𑀥𑀫𑁆𑀫𑀁 𑀧𑀲𑁆𑀲𑀢𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀯𑀓𑁆𑀓𑀮𑀺 ¶ , 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

‘‘𑀅𑀳𑀁 ¶ 𑀯𑀓𑁆𑀓𑀮𑀺, 𑀓𑀺𑀁 𑀢𑁂 𑀇𑀫𑀺𑀦𑀸 𑀧𑀽𑀢𑀺𑀓𑀸𑀬𑁂𑀦 𑀤𑀺𑀝𑁆𑀞𑁂𑀦’’ 𑁋

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀯𑀓𑁆𑀓𑀮𑀺, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’ 𑁋

‘‘𑀬𑀁 𑀧𑀦𑀸𑀦𑀺𑀘𑁆𑀘𑀁, 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸’’𑁋

𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 ‘‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’𑁋

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀧𑀼𑀦𑀧𑀺 𑀪𑀕𑀯𑀸 𑀪𑀺𑀓𑁆𑀔𑀽 𑀧𑁂𑀲𑁂𑀢𑁆𑀯𑀸 𑀆𑀬𑀲𑁆𑀫𑀢𑁄 𑀯𑀓𑁆𑀓𑀮𑀺𑀢𑁆𑀣𑁂𑀭𑀲𑁆𑀲 𑀧𑀕𑁆𑀕𑀳𑀯𑀘𑀦𑀁 𑀆𑀭𑁄𑀘𑀸𑀧𑁂𑀲𑀺. 𑀲𑁄𑀧𑀺 𑀓𑀣𑀁 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀁 𑀪𑀕𑀯𑀢𑁄 𑀧𑀘𑁆𑀘𑀸𑀭𑁄𑀘𑀸𑀧𑁂𑀲𑀺. 𑀓𑀣𑀜𑁆𑀘𑀲𑁆𑀲 𑀅𑀪𑀺𑀲𑀫𑁆𑀧𑀭𑀸𑀬𑁄 𑀅𑀳𑁄𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀼𑀡𑀸𑀯𑀼𑀲𑁄 𑀢𑁆𑀯𑀁 𑀯𑀓𑁆𑀓𑀮𑀺 𑀪𑀕𑀯𑀢𑁄 𑀯𑀘𑀦𑀁 𑀤𑁆𑀯𑀺𑀦𑁆𑀦𑀜𑁆𑀘 𑀤𑁂𑀯𑀢𑀸𑀦𑀁, 𑀇𑀫𑀁 𑀆𑀯𑀼𑀲𑁄 𑀭𑀢𑁆𑀢𑀺𑀁 𑀤𑁆𑀯𑁂 𑀤𑁂𑀯𑀢𑀸𑀬𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀕𑀺𑀚𑁆𑀛𑀓𑀽𑀝𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦

𑀪𑀕𑀯𑀸 ¶ 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼, 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀆𑀯𑀼𑀲𑁄 𑀏𑀓𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘𑀯𑀓𑁆𑀓𑀮𑀺 𑀪𑀦𑁆𑀢𑁂 𑀪𑀺𑀓𑁆𑀔𑀼 𑀯𑀺𑀫𑁄𑀓𑁆𑀔𑀸𑀬 𑀘𑁂𑀢𑁂𑀢𑀻’𑀢𑀺. 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘𑀲𑁄 𑀳𑀺 𑀦𑀽𑀦 𑀪𑀦𑁆𑀢𑁂 𑀲𑀼𑀯𑀺𑀫𑀼𑀢𑁆𑀢𑁄 𑀯𑀺𑀫𑀼𑀘𑁆𑀘𑀺𑀲𑁆𑀲𑀢𑀻’𑀢𑀺. 𑀪𑀕𑀯𑀸 𑀘 𑀢𑀁 𑀆𑀯𑀼𑀲𑁄 𑀯𑀓𑁆𑀓𑀮𑀺 𑀏𑀯𑀫𑀸𑀳 ‘𑀫𑀸 𑀪𑀸𑀬𑀺 𑀯𑀓𑁆𑀓𑀮𑀺, 𑀫𑀸 𑀪𑀸𑀬𑀺 𑀯𑀓𑁆𑀓𑀮𑀺, 𑀅𑀧𑀸𑀧𑀓𑀁 𑀢𑁂 𑀫𑀭𑀡𑀁 𑀪𑀯𑀺𑀲𑁆𑀲𑀢𑀺, 𑀅𑀧𑀸𑀧𑀺𑀓𑀸 𑀓𑀸𑀮𑀓𑀺𑀭𑀺𑀬𑀸’𑀢𑀺. 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀸 𑀧𑀼𑀦𑀧𑀺 𑀪𑀺𑀓𑁆𑀔𑀽 𑀧𑁂𑀲𑁂𑀢𑁆𑀯𑀸 𑀆𑀬𑀲𑁆𑀫𑀢𑁄 𑀯𑀓𑁆𑀓𑀮𑀺𑀢𑁆𑀣𑁂𑀭𑀲𑁆𑀲 𑀧𑀕𑁆𑀕𑀳𑀯𑀘𑀦𑀁 𑀆𑀭𑁄𑀘𑀸𑀧𑁂𑀲𑀺. 𑀲𑁄𑀧𑀺 𑀪𑀦𑁆𑀢𑁂 𑀆𑀬𑀲𑁆𑀫𑀸 𑀢𑁂𑀦𑀳𑀸𑀯𑀼𑀲𑁄 𑀫𑀫 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀣 ‘‘𑀯𑀓𑁆𑀓𑀮𑀺 𑀪𑀦𑁆𑀢𑁂 𑀪𑀺𑀓𑁆𑀔𑀼 𑀆𑀩𑀸𑀥𑀺𑀓𑁄 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄, 𑀲𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’’𑀢𑀺, 𑀏𑀯𑀜𑁆𑀘 𑀯𑀤𑁂𑀣 ‘‘𑀭𑀽𑀧𑀁 𑀅𑀦𑀺𑀘𑁆𑀘𑀁, 𑀢𑀸𑀳𑀁 𑀪𑀦𑁆𑀢𑁂 𑀦 𑀓𑀗𑁆𑀔𑀸𑀫𑀺, 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀦𑀯𑀺𑀘𑀺𑀓𑀺𑀘𑁆𑀙𑀸𑀫𑀺, 𑀬𑀤𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀦𑀢𑁆𑀣𑀺 𑀫𑁂 𑀢𑀢𑁆𑀣 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀧𑁂𑀫𑀁𑀯𑀸𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑁄 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀁 𑀧𑀘𑁆𑀘𑀸𑀭𑁄𑀘𑀸𑀧𑁂𑀲𑀺. 𑀲𑁄 𑀳𑀺 𑀪𑀦𑁆𑀢𑁂 𑀆𑀬𑀲𑁆𑀫𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀲𑀼 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀲𑀢𑁆𑀣𑀁 𑀆𑀳𑀭𑀺𑀢𑁆𑀯𑀸 𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀆𑀤𑀸𑀬 𑀲𑀫𑁆𑀧𑀚𑀸𑀦𑁄 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀏𑀯𑀁 𑀔𑁄 𑀪𑀦𑁆𑀢𑁂 𑀢𑀲𑁆𑀲 𑀆𑀬𑀲𑁆𑀫𑀢𑁄 𑀅𑀪𑀺𑀲𑀫𑁆𑀧𑀭𑀸𑀬𑁄 𑀅𑀳𑁄𑀲𑀺.

𑀧𑀼𑀘𑁆𑀙𑀸 𑁋 𑀅𑀲𑁆𑀲𑀚𑀺𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀅𑀲𑁆𑀲𑀚𑀺𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀅𑀲𑁆𑀲𑀚𑀺 𑀆𑀩𑀸𑀥𑀺𑀓𑁄 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀧𑀼𑀩𑁆𑀩𑁂 𑀔𑁆𑀯𑀸𑀳𑀁 𑀪𑀦𑁆𑀢𑁂 𑀕𑁂𑀮𑀜𑁆𑀜𑁂 𑀧𑀲𑁆𑀲𑀫𑁆𑀪𑁂𑀢𑁆𑀯𑀸 𑀧𑀲𑁆𑀲𑀫𑁆𑀪𑁂𑀢𑁆𑀯𑀸 𑀓𑀸𑀬𑀲𑀗𑁆𑀔𑀸𑀭𑁂 𑀯𑀺𑀳𑀭𑀸𑀫𑀺, 𑀲𑁄𑀳𑀁 𑀲𑀫𑀸𑀥𑀺𑀁 𑀦𑀧𑁆𑀧𑀝𑀺𑀮𑀪𑀸𑀫𑀺. 𑀢𑀲𑁆𑀲 𑀫𑀬𑁆𑀳𑀁 𑀪𑀦𑁆𑀢𑁂 𑀢𑀁 𑀲𑀫𑀸𑀥𑀺𑀁 𑀅𑀧𑁆𑀧𑀝𑀺𑀮𑀪𑀢𑁄 𑀏𑀯𑀁 𑀳𑁄𑀢𑀺 𑀦𑁄 𑀘𑀲𑁆𑀲𑀸𑀳𑀁 𑀧𑀭𑀺𑀳𑀸𑀬𑀸𑀫𑀻’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀬𑁂 𑀢𑁂 𑀅𑀲𑁆𑀲𑀚𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑀸𑀥𑀺𑀲𑀸𑀭𑀓𑀸 𑀲𑀫𑀸𑀥𑀺𑀲𑀸𑀫𑀜𑁆𑀜𑀸, 𑀢𑁂𑀲𑀁 𑀢𑀁 𑀲𑀫𑀸𑀥𑀺𑀁 𑀅𑀧𑁆𑀧𑀝𑀺𑀮𑀪𑀢𑀁 𑀏𑀯𑀁 𑀳𑁄𑀢𑀺 ‘𑀦𑁄 𑀘𑀲𑁆𑀲𑀼 𑀫𑀬𑀁 𑀧𑀭𑀺𑀳𑀸𑀬𑀸𑀫𑀸’𑀢𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀅𑀲𑁆𑀲𑀚𑀺, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀔𑁂𑀫𑀓𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑁄𑀲𑀫𑁆𑀩𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀣𑁂𑀭𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀆𑀬𑀲𑁆𑀫𑀢𑀸 𑀔𑁂𑀫𑀓𑀢𑁆𑀣𑁂𑀭𑁂𑀦 𑀪𑀸𑀲𑀺𑀢𑀁. 𑀲𑀫𑁆𑀩𑀳𑀼𑀮𑀸 𑀪𑀦𑁆𑀢𑁂 𑀣𑁂𑀭𑀸 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀤𑀸𑀲𑀓𑀁 𑀧𑁂𑀲𑁂𑀢𑁆𑀯𑀸 𑀘𑀢𑀼𑀓𑁆𑀔𑀢𑁆𑀢𑀼𑀁 𑀆𑀬𑀲𑁆𑀫𑀦𑁆𑀢𑀁 𑀔𑁂𑀫𑀓𑀁 𑀆𑀩𑀸𑀥𑀺𑀓𑀁 𑀤𑀼𑀓𑁆𑀔𑀺𑀢𑀁 𑀩𑀸𑀴𑁆𑀳𑀕𑀺𑀮𑀸𑀦𑀁 𑀕𑁂𑀮𑀜𑁆𑀜𑀓𑀸𑀭𑀡𑀜𑁆𑀘 𑀥𑀫𑁆𑀫𑀜𑁆𑀘 𑀧𑀼𑀘𑁆𑀙𑀺𑀁𑀲𑀼 ¶ , 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀧𑀜𑁆𑀘𑀺𑀫𑁂 𑀆𑀯𑀼𑀲𑁄 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸. 𑀲𑁂𑀬𑁆𑀬𑀣𑀺𑀤𑀁, 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄 𑀯𑁂𑀤𑀦𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄 𑀲𑀜𑁆𑀜𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀇𑀫𑁂𑀲𑀼 𑀔𑁆𑀯𑀸𑀳𑀁 𑀆𑀯𑀼𑀲𑁄 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀦 𑀓𑀺𑀜𑁆𑀘𑀺 𑀅𑀢𑁆𑀢𑀁 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸 𑀲𑀫𑀦𑀼𑀧𑀲𑁆𑀲𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀆𑀬𑀲𑁆𑀫𑀢𑀸 𑀔𑁂𑀫𑀓𑀢𑁆𑀣𑁂𑀭𑁂𑀦 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀢𑀢𑁆𑀣 𑀆𑀬𑀲𑁆𑀫𑀸 𑀔𑁂𑀫𑀓𑁄 𑀉𑀢𑁆𑀢𑀭𑀺 𑀥𑀫𑁆𑀫𑀤𑁂𑀲𑀦𑀁 𑀧𑀯𑀟𑁆𑀠𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀤𑁂𑀲𑁂𑀲𑀺. 𑀓𑀻𑀤𑀺𑀲𑁄 𑀘 𑀦𑁂𑀲𑀁 𑀥𑀫𑁆𑀫𑀤𑁂𑀲𑀓𑀥𑀫𑁆𑀫𑀧𑁆𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀥𑀫𑁆𑀫𑀤𑁂𑀲𑀦𑀸𑀬 𑀆𑀦𑀺𑀲𑀁𑀲𑁄 𑀅𑀥𑀺𑀕𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀘𑀢𑀼𑀢𑁆𑀣𑁂 𑀪𑀦𑁆𑀢𑁂 𑀯𑀸𑀭𑁂 𑀆𑀬𑀲𑁆𑀫𑀸 𑀔𑁂𑀫𑀓𑁄 ‘‘𑀅𑀮𑀁 𑀆𑀯𑀼𑀲𑁄 𑀤𑀸𑀲𑀓 𑀓𑀺𑀁 𑀇𑀫𑀸𑀬 𑀲𑀦𑁆𑀥𑀸𑀯𑀦𑀺𑀓𑀸𑀬, 𑀆𑀳𑀭𑀸𑀯𑀼𑀲𑁄 𑀤𑀡𑁆𑀟𑀁, 𑀅𑀳𑀫𑁂𑀯 𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀤𑀡𑁆𑀟𑀫𑁄𑀮𑀼𑀩𑁆𑀪 𑀆𑀬𑀲𑁆𑀫𑀸 𑀔𑁂𑀫𑀓𑁄 𑀬𑁂𑀦 𑀣𑁂𑀭𑀸 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀣𑁂𑀭𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀼𑀘𑁆𑀙𑀺𑀢𑁄 ‘‘𑀦𑀔𑁆𑀯𑀸𑀳𑀁 𑀆𑀯𑀼𑀲𑁄 𑀭𑀽𑀧𑀁 𑀅𑀲𑁆𑀫𑀻𑀢𑀺 𑀯𑀤𑀸𑀫𑀺, 𑀦𑀧𑀺 𑀅𑀜𑁆𑀜𑀢𑁆𑀭 𑀭𑀽𑀧𑀸 𑀅𑀲𑁆𑀫𑀻𑀢𑀺 𑀯𑀤𑀸𑀫𑀺. 𑀦 𑀔𑁆𑀯𑀸𑀳𑀁 𑀆𑀯𑀼𑀲𑁄 𑀯𑁂𑀤𑀦𑀁 𑀅𑀲𑁆𑀫𑀻𑀢𑀺 𑀯𑀤𑀸𑀫𑀺, 𑀦𑀧𑀺 𑀅𑀜𑁆𑀜𑀢𑁆𑀭 𑀯𑁂𑀤𑀦𑀸 𑀅𑀲𑁆𑀫𑀻𑀢𑀺 𑀯𑀤𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀆𑀬𑀲𑁆𑀫𑀸 𑀔𑁂𑀫𑀓𑁄 𑀉𑀢𑁆𑀢𑀭𑀺𑀧𑀺 𑀥𑀫𑁆𑀫𑀤𑁂𑀲𑀦𑀁 𑀧𑀯𑀟𑁆𑀠𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀤𑁂𑀲𑁂𑀲𑀺. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀪𑀦𑁆𑀢𑁂 𑀯𑁂𑀬𑁆𑀬𑀸𑀓𑀭𑀡𑀲𑁆𑀫𑀺𑀁 𑀪𑀜𑁆𑀜𑀫𑀸𑀦𑁂 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀼 𑀆𑀬𑀲𑁆𑀫𑀢𑁄𑀘 𑀔𑁂𑀫𑀓𑀲𑁆𑀲. 𑀏𑀯𑀁 𑀔𑁄 𑀪𑀦𑁆𑀢𑁂 𑀢𑁂𑀲𑀁 𑀣𑁂𑀭𑀸𑀦𑀁 𑀥𑀫𑁆𑀫𑀤𑁂𑀲𑀓𑀥𑀫𑁆𑀫𑀧𑁆𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺.

𑀧𑀼𑀘𑁆𑀙𑀸 𑁋 𑀙𑀦𑁆𑀦𑀲𑀼𑀢𑁆𑀢𑀁 ¶ 𑀧𑀦𑀸𑀯𑀼𑀲𑁄 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑁄𑀲𑀫𑁆𑀩𑀺𑀬𑀁 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀙𑀦𑁆𑀦𑀢𑁆𑀣𑁂𑀭𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀙𑀦𑁆𑀦𑀢𑁆𑀣𑁂𑀭𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 ‘‘𑀑𑀯𑀤𑀢𑀼 𑀫𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄, 𑀅𑀦𑀼𑀲𑀸𑀲𑀢𑀼 𑀫𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄, 𑀓𑀭𑁄𑀢𑀼 𑀫𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀥𑀫𑁆𑀫𑀺𑀁 𑀓𑀣𑀁, 𑀬𑀣𑀸𑀳𑀁 𑀥𑀫𑁆𑀫𑀁 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀲𑀫𑁆𑀫𑀼𑀔𑀸 𑀫𑁂 𑀢𑀁 𑀆𑀯𑀼𑀲𑁄 𑀙𑀦𑁆𑀦 𑀪𑀕𑀯𑀢𑁄 𑀲𑀼𑀢𑀁, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑀓𑀘𑁆𑀘𑀸𑀦𑀕𑁄𑀢𑁆𑀢𑀁 𑀪𑀺𑀓𑁆𑀔𑀼𑀁 𑀑𑀯𑀤𑀦𑁆𑀢𑀲𑁆𑀲, 𑀤𑁆𑀯𑀬𑀦𑀺𑀲𑁆𑀲𑀺𑀢𑁄 𑀔𑁆𑀯𑀸𑀬𑀁 𑀓𑀘𑁆𑀘𑀸𑀦 𑀮𑁄𑀓𑁄 𑀬𑁂𑀪𑀼𑀬𑁆𑀬𑁂𑀦 𑀅𑀢𑁆𑀣𑀺𑀢𑀜𑁆𑀘𑁂𑀯 𑀦𑀢𑁆𑀣𑀺𑀢𑀜𑁆𑀘, 𑀮𑁄𑀓𑀲𑀫𑀼𑀤𑀬𑀁 𑀔𑁄 𑀓𑀘𑁆𑀘𑀸𑀦 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄 𑀬𑀸 𑀮𑁄𑀓𑁂 𑀦𑀢𑁆𑀣𑀺𑀢𑀸, 𑀲𑀸 𑀦 𑀳𑁄𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀪𑀸𑀲𑀺𑀢𑀁.

𑀑𑀯𑀤𑀢𑀼 ¶ 𑀫𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄, 𑀅𑀦𑀼𑀲𑀸𑀲𑀢𑀼 𑀫𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄.

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄…𑀧𑁂… ¶ 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀔𑀦𑁆𑀥𑀯𑀕𑁆𑀕𑀲𑀁𑀬𑀼𑀢𑁆𑀢𑁂 𑀧𑀼𑀧𑁆𑀨𑀯𑀕𑁆𑀕𑁂 𑀧𑀼𑀧𑁆𑀨𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀦𑀸𑀳𑀁 𑀪𑀺𑀓𑁆𑀔𑀯𑁂 𑀮𑁄𑀓𑁂𑀦 𑀯𑀺𑀯𑀤𑀸𑀫𑀺, 𑀮𑁄𑀓𑁄𑀯 𑀫𑀬𑀸 𑀯𑀺𑀯𑀤𑀢𑀺, 𑀦 𑀪𑀺𑀓𑁆𑀔𑀯𑁂 𑀥𑀫𑁆𑀫𑀯𑀸𑀤𑀻 ¶ 𑀓𑁂𑀦𑀘𑀺 𑀮𑁄𑀓𑀲𑁆𑀫𑀺𑀁 𑀯𑀺𑀯𑀤𑀢𑀺, 𑀬𑀁 𑀪𑀺𑀓𑁆𑀔𑀯𑁂 𑀦𑀢𑁆𑀣𑀺 𑀲𑀫𑁆𑀫𑀢𑀁 𑀮𑁄𑀓𑁂 𑀧𑀡𑁆𑀟𑀺𑀢𑀸𑀦𑀁, 𑀅𑀳𑀫𑁆𑀧𑀺𑀢𑀁 ‘‘𑀦𑀢𑁆𑀣𑀻’’𑀢𑀺 𑀯𑀤𑀸𑀫𑀺, 𑀬𑀁 𑀪𑀺𑀓𑁆𑀔𑀯𑁂 𑀅𑀢𑁆𑀣𑀺𑀲𑀫𑁆𑀫𑀢𑀁 𑀮𑁄𑀓𑁂 𑀧𑀡𑁆𑀟𑀺𑀢𑀸𑀦𑀁, 𑀅𑀳𑀫𑁆𑀧𑀺𑀢𑀁 ‘‘𑀅𑀢𑁆𑀣𑀻’’𑀢𑀺 𑀯𑀤𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀦𑀸𑀳𑀁 𑀪𑀺𑀓𑁆𑀔𑀯𑁂 𑀮𑁄𑀓𑁂𑀦 𑀯𑀺𑀯𑀤𑀸𑀫𑀺.

𑀦 𑀪𑀺𑀓𑁆𑀔𑀯𑁂 𑀥𑀫𑁆𑀫𑀯𑀸𑀤𑀻 𑀓𑁂𑀦𑀘𑀺 𑀮𑁄𑀓𑀲𑁆𑀫𑀺𑀁 𑀯𑀺𑀯𑀤𑀢𑀺.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀨𑁂𑀡𑀧𑀺𑀡𑁆𑀟𑀽𑀧𑀫𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀅𑀬𑀼𑀚𑁆𑀛𑀸𑀬𑀁 𑀪𑀦𑁆𑀢𑁂 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂 𑀅𑀬𑀁 𑀕𑀗𑁆𑀕𑀸 𑀦𑀤𑀻 𑀫𑀳𑀦𑁆𑀢𑀁 𑀨𑁂𑀡𑀧𑀺𑀡𑁆𑀟𑀁 𑀆𑀯𑀳𑁂𑀬𑁆𑀬, 𑀢𑀫𑁂𑀦𑀁 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀧𑀲𑁆𑀲𑁂𑀬𑁆𑀬 𑀦𑀺𑀚𑁆𑀛𑀸𑀬𑁂𑀬𑁆𑀬 𑀬𑁄𑀦𑀺𑀲𑁄 𑀉𑀧𑀧𑀭𑀺𑀓𑁆𑀔𑁂𑀬𑁆𑀬, 𑀢𑀲𑁆𑀲 𑀢𑀁 𑀧𑀲𑁆𑀲𑀢𑁄 𑀦𑀺𑀚𑁆𑀛𑀸𑀬𑀢𑁄 𑀬𑁄𑀦𑀺𑀲𑁄 𑀉𑀧𑀧𑀭𑀺𑀓𑁆𑀔𑀢𑁄 𑀭𑀺𑀢𑁆𑀢𑀓𑀜𑁆𑀜𑁂𑀯 𑀔𑀸𑀬𑁂𑀬𑁆𑀬, 𑀢𑀼𑀘𑁆𑀙𑀓𑀜𑁆𑀜𑁂𑀯 𑀔𑀸𑀬𑁂𑀬𑁆𑀬, 𑀅𑀲𑀸𑀭𑀓𑀜𑁆𑀜𑁂𑀯 𑀔𑀸𑀬𑁂𑀬𑁆𑀬, 𑀓𑀺𑀁 𑀲𑀺𑀬𑀸 𑀪𑀺𑀓𑁆𑀔𑀯𑁂 𑀨𑁂𑀡𑀧𑀺𑀡𑁆𑀟𑁂 𑀲𑀸𑀭𑁄. 𑀏𑀯𑀫𑁂𑀯 𑀔𑁄 𑀪𑀺𑀓𑁆𑀔𑀯𑁂 𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀢𑀁 𑀪𑀺𑀓𑁆𑀔𑀼 𑀧𑀲𑁆𑀲𑀢𑀺 𑀦𑀺𑀚𑁆𑀛𑀸𑀬𑀢𑀺 𑀬𑁄𑀦𑀺𑀲𑁄 𑀉𑀧𑀧𑀭𑀺𑀓𑁆𑀔𑀢𑀺, 𑀢𑀲𑁆𑀲 𑀢𑀁 𑀧𑀲𑁆𑀲𑀢𑁄 𑀦𑀺𑀚𑁆𑀛𑀸𑀬𑀢𑁄 𑀬𑁄𑀦𑀺𑀲𑁄 𑀉𑀧𑀧𑀭𑀺𑀓𑁆𑀔𑀢𑁄 𑀭𑀺𑀢𑁆𑀢𑀓𑀜𑁆𑀜𑁂𑀯 𑀔𑀸𑀬𑀢𑀺, 𑀢𑀼𑀘𑁆𑀙𑀓𑀜𑁆𑀜𑁂𑀯 𑀔𑀸𑀬𑀢𑀺, 𑀅𑀲𑀸𑀭𑀓𑀜𑁆𑀜𑁂𑀯 𑀔𑀸𑀬𑀢𑀺, 𑀓𑀺𑀜𑁆𑀳𑀺 𑀲𑀺𑀬𑀸 𑀪𑀺𑀓𑁆𑀔𑀯𑁂 𑀭𑀽𑀧𑁂 𑀲𑀸𑀭𑁄’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀨𑁂𑀡𑀧𑀺𑀡𑁆𑀟𑀽𑀧𑀫𑀁 ¶ 𑀭𑀽𑀧𑀁, 𑀯𑁂𑀤𑀦𑀸 𑀧𑀼𑀩𑁆𑀩𑀼𑀴𑀼𑀧𑀫𑀸;

𑀫𑀭𑀻𑀘𑀺𑀓𑀽𑀧𑀫𑀸 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸 𑀓𑀤𑀮𑀽𑀧𑀫𑀸;

𑀫𑀸𑀬𑀽𑀧𑀫𑀜𑁆𑀘 𑀯𑀺𑀜𑁆𑀜𑀸𑀡𑀁, 𑀤𑁂𑀲𑀺𑀢𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀬𑀣𑀸 𑀬𑀣𑀸 𑀦𑀺𑀚𑁆𑀛𑀸𑀬𑀢𑀺, 𑀬𑁄𑀦𑀺𑀲𑁄 𑀉𑀧𑀧𑀭𑀺𑀓𑁆𑀔𑀢𑀺;

𑀭𑀺𑀢𑁆𑀢𑀓𑀁 𑀢𑀼𑀘𑁆𑀙𑀓𑀁 𑀳𑁄𑀢𑀺, 𑀬𑁄 𑀦𑀁 𑀧𑀲𑁆𑀲𑀢𑀺 𑀬𑁄𑀦𑀺𑀲𑁄.

𑀇𑀫𑀜𑁆𑀘 ¶ 𑀓𑀸𑀬𑀁 𑀆𑀭𑀩𑁆𑀪, 𑀪𑀽𑀭𑀺𑀧𑀜𑁆𑀜𑁂𑀦 𑀤𑁂𑀲𑀺𑀢𑀁;

𑀧𑀳𑀸𑀦𑀁 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁, 𑀭𑀽𑀧𑀁 𑀧𑀲𑁆𑀲𑀣 𑀙𑀟𑁆𑀟𑀺𑀢𑀁.

𑀆𑀬𑀼 𑀉𑀲𑁆𑀫𑀸𑀘 𑀯𑀺𑀜𑁆𑀜𑀸𑀡𑀁, 𑀬𑀤𑀸 𑀓𑀸𑀬𑀁 𑀚𑀳𑀦𑁆𑀢𑀺𑀫𑀁;

𑀅𑀧𑀯𑀺𑀤𑁆𑀥𑁄 𑀢𑀤𑀸 𑀲𑁂𑀢𑀺, 𑀧𑀭𑀪𑀢𑁆𑀢𑀁 𑀅𑀘𑁂𑀢𑀦𑀁.

𑀏𑀢𑀸𑀤𑀺𑀲𑀸𑀬𑀁 𑀲𑀦𑁆𑀢𑀸𑀦𑁄, 𑀫𑀸𑀬𑀸𑀬𑀁 𑀩𑀸𑀮𑀮𑀸𑀧𑀺𑀦𑀻;

𑀯𑀥𑀓𑁄 𑀏𑀲 𑀅𑀓𑁆𑀔𑀸𑀢𑁄, 𑀲𑀸𑀭𑁄 𑀏𑀢𑁆𑀣 𑀦 𑀯𑀺𑀚𑁆𑀚𑀢𑀺.

𑀏𑀯𑀁 𑀔𑀦𑁆𑀥𑁂 𑀅𑀯𑁂𑀓𑁆𑀔𑁂𑀬𑁆𑀬, 𑀪𑀺𑀓𑁆𑀔𑀼 𑀆𑀭𑀤𑁆𑀥𑀯𑀻𑀭𑀺𑀬𑁄;

𑀤𑀺𑀯𑀸 𑀯𑀸 𑀬𑀤𑀺 𑀯𑀸 𑀭𑀢𑁆𑀢𑀺𑀁, 𑀲𑀫𑁆𑀧𑀚𑀸𑀦𑁄 𑀧𑀝𑀺𑀲𑁆𑀲𑀢𑁄.

𑀚𑀳𑁂𑀬𑁆𑀬 𑀲𑀩𑁆𑀩𑀲𑀁𑀬𑁄𑀕𑀁, 𑀓𑀭𑁂𑀬𑁆𑀬 𑀲𑀭𑀡𑀢𑁆𑀢𑀦𑁄;

𑀘𑀭𑁂𑀬𑁆𑀬𑀸𑀤𑀺𑀢𑁆𑀢𑀲𑀻𑀲𑁄𑀯, 𑀧𑀢𑁆𑀣𑀬𑀁 𑀅𑀘𑁆𑀘𑀼𑀢𑀁 𑀧𑀤𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 𑀆𑀯𑀼𑀲𑁄 𑀥𑀫𑁆𑀫𑀓𑀣𑀺𑀓𑀯𑀕𑁆𑀕𑁂 𑀤𑀼𑀢𑀺𑀬𑀥𑀫𑁆𑀫𑀓𑀣𑀺𑀓𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀅𑀜𑁆𑀜𑀢𑀫𑁄 𑀪𑀦𑁆𑀢𑁂 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀥𑀫𑁆𑀫𑀓𑀣𑀺𑀓𑁄 𑀥𑀫𑁆𑀫𑀓𑀣𑀺𑀓𑁄𑀢𑀺 𑀪𑀦𑁆𑀢𑁂 𑀯𑀼𑀘𑁆𑀘𑀢𑀺, 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄 𑀪𑀦𑁆𑀢𑁂 𑀥𑀫𑁆𑀫𑀓𑀣𑀺𑀓𑁄 𑀳𑁄𑀢𑀺, 𑀓𑀺𑀢𑁆𑀢𑀸𑀯𑀢𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀓𑀺𑀢𑁆𑀢𑀸𑀯𑀢𑀸 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄 𑀳𑁄𑀢𑀻’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀭𑀽𑀧𑀲𑁆𑀲 𑀘𑁂 𑀪𑀺𑀓𑁆𑀔𑀼 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, ‘𑀥𑀫𑁆𑀫𑀓𑀣𑀺𑀓𑁄 𑀪𑀺𑀓𑁆𑀔𑀽’𑀢𑀺 𑀅𑀮𑀁 𑀯𑀘𑀦𑀸𑀬𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀲𑀻𑀮𑀯𑀦𑁆𑀢𑀲𑀼𑀢𑁆𑀢, 𑀲𑀼𑀢𑀯𑀦𑁆𑀢𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀲𑀁𑀕𑀻𑀢𑀁 𑀲𑀻𑀮𑀯𑀦𑁆𑀢𑀲𑀼𑀢𑁆𑀢𑀜𑁆𑀘 𑀲𑀼𑀢𑀯𑀦𑁆𑀢𑀲𑀼𑀢𑁆𑀢𑀜𑁆𑀘 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀩𑀸𑀭𑀸𑀡𑀲𑀺𑀬𑀁 ¶ 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑁄𑀝𑁆𑀞𑀺𑀓𑀁 𑀆𑀭𑀩𑁆𑀪 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀫𑀳𑀸𑀓𑁄𑀝𑁆𑀞𑀺𑀓𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 ‘‘𑀲𑀻𑀮𑀯𑀢𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢 𑀪𑀺𑀓𑁆𑀔𑀼𑀦𑀸 𑀓𑀢𑀫𑁂 𑀥𑀫𑁆𑀫𑀸 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀢𑀩𑁆𑀩𑀸. 𑀲𑀼𑀢𑀸𑀯𑀢𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢 𑀪𑀺𑀓𑁆𑀔𑀼𑀦𑀸 𑀓𑀢𑀫𑁂 𑀥𑀫𑁆𑀫𑀸 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀢𑀩𑁆𑀩𑀸’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀲𑀻𑀮𑀯𑀢𑀸𑀯𑀼𑀲𑁄 𑀓𑁄𑀝𑁆𑀞𑀺𑀓 𑀪𑀺𑀓𑁆𑀔𑀼𑀦𑀸, 𑀲𑀼𑀢𑀸𑀯𑀢𑀸𑀯𑀼𑀲𑁄 𑀓𑁄𑀝𑁆𑀞𑀺𑀓 𑀪𑀺𑀓𑁆𑀔𑀼𑀦𑀸 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀭𑁄𑀕𑀢𑁄 𑀕𑀡𑁆𑀟𑀢𑁄 𑀲𑀮𑁆𑀮𑀢𑁄 𑀅𑀖𑀢𑁄 𑀆𑀩𑀸𑀥𑀢𑁄 𑀧𑀭𑀢𑁄 𑀧𑀮𑁄𑀓𑀢𑁄 𑀲𑀼𑀜𑁆𑀜𑀢𑁄 𑀅𑀦𑀢𑁆𑀢𑀢𑁄 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀢𑀩𑁆𑀩𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀭𑀸𑀥𑀲𑀁𑀬𑀼𑀢𑁆𑀢𑁂 ¶ 𑀧𑀦𑀸𑀯𑀼𑀲𑁄 𑀤𑀼𑀢𑀺𑀬𑀁 𑀲𑀢𑁆𑀢𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀭𑀸𑀥𑀢𑁆𑀣𑁂𑀭𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀭𑀸𑀥𑀢𑁆𑀣𑁂𑀭𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀲𑀢𑁆𑀢𑁄 𑀲𑀢𑁆𑀢𑁄𑀢𑀺 𑀪𑀦𑁆𑀢𑁂 𑀯𑀼𑀘𑁆𑀘𑀢𑀺, 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄 𑀪𑀦𑁆𑀢𑁂 𑀲𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀭𑀽𑀧𑁂 𑀔𑁄 𑀭𑀸𑀥 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸, 𑀢𑀢𑁆𑀭 𑀲𑀢𑁆𑀢𑁄 𑀢𑀢𑁆𑀭 𑀯𑀺𑀲𑀢𑁆𑀢𑁄, 𑀢𑀲𑁆𑀫𑀸 𑀲𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀤𑀺𑀝𑁆𑀞𑀺𑀲𑀁𑀬𑀼𑀢𑁆𑀢𑁂 ¶ 𑀧𑀦𑀸𑀯𑀼𑀲𑁄 𑀢𑀢𑀺𑀬𑀁 𑀲𑀁𑀕𑀻𑀢𑀁 𑀲𑁄𑀅𑀢𑁆𑀢𑀸 𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀓𑀺𑀲𑁆𑀫𑀺𑀁 𑀦𑀼 𑀔𑁄 𑀪𑀺𑀓𑁆𑀔𑀯𑁂 𑀲𑀢𑀺 𑀓𑀺𑀁 𑀉𑀧𑀸𑀤𑀸𑀬 𑀓𑀺𑀁 𑀅𑀪𑀺𑀦𑀺𑀯𑀺𑀲𑁆𑀲 𑀏𑀯𑀁 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺 𑀲𑁄 𑀅𑀢𑁆𑀢𑀸 𑀲𑁄 𑀮𑁄𑀓𑁄 𑀲𑁄 𑀧𑁂𑀘𑁆𑀘 𑀪𑀯𑀺𑀲𑁆𑀲𑀸𑀫𑀺 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀧𑀜𑁆𑀘𑀫𑀁 𑀦𑀢𑁆𑀣𑀺𑀤𑀺𑀦𑁆𑀦𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁𑀬𑁂𑀯 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀓𑀺𑀲𑁆𑀫𑀺𑀁 𑀦𑀼 𑀔𑁄 𑀪𑀺𑀓𑁆𑀔𑀯𑁂 𑀲𑀢𑀺 𑀓𑀺𑀁 𑀉𑀧𑀸𑀤𑀸𑀬 𑀓𑀺𑀁 𑀅𑀪𑀺𑀦𑀺𑀯𑀺𑀲𑁆𑀲 𑀏𑀯𑀁 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺 𑀦𑀢𑁆𑀣𑀺 𑀤𑀺𑀦𑁆𑀦𑀁, 𑀦𑀢𑁆𑀣𑀺 𑀬𑀺𑀝𑁆𑀞𑀁, 𑀦𑀢𑁆𑀣𑀺 𑀳𑀼𑀢𑀁, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀑𑀓𑁆𑀓𑀦𑁆𑀢𑀲𑀁𑀬𑀼𑀢𑁆𑀢𑁂 ¶ 𑀧𑀦𑀸𑀯𑀼𑀲𑁄 𑀧𑀞𑀫𑀁 𑀘𑀓𑁆𑀔𑀼𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 ¶ 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀘𑀓𑁆𑀔𑀼𑀁 𑀪𑀺𑀓𑁆𑀔𑀯𑁂 𑀅𑀦𑀺𑀘𑁆𑀘𑀁 𑀯𑀺𑀧𑀭𑀺𑀡𑀸𑀫𑀺 𑀅𑀜𑁆𑀜𑀣𑀸𑀪𑀸𑀯𑀺. 𑀲𑁄𑀢𑀁. 𑀖𑀸𑀦𑀁. 𑀚𑀺𑀯𑁆𑀳𑀁. 𑀓𑀸𑀬𑁄. 𑀫𑀦𑁄 𑀅𑀦𑀺𑀘𑁆𑀘𑁄 𑀯𑀺𑀧𑀭𑀺𑀡𑀸𑀫𑀻 𑀅𑀜𑁆𑀜𑀣𑀸𑀪𑀸𑀯𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀲𑀸𑀭𑀺𑀧𑀼𑀢𑁆𑀢𑀲𑀁𑀬𑀼𑀢𑁆𑀢𑁂 ¶ 𑀧𑀦𑀸𑀯𑀼𑀲𑁄 𑀤𑀲𑀫𑀁 𑀲𑀼𑀘𑀺𑀫𑀼𑀔𑀻𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀲𑀼𑀘𑀺𑀫𑀼𑀔𑀺𑀁 𑀧𑀭𑀺𑀩𑁆𑀩𑀸𑀚𑀺𑀓𑀁 𑀆𑀭𑀩𑁆𑀪 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀪𑀸𑀲𑀺𑀢𑀁. 𑀲𑀼𑀘𑀺𑀫𑀼𑀔𑀻 𑀪𑀦𑁆𑀢𑁂 𑀧𑀭𑀺𑀩𑁆𑀩𑀸𑀚𑀺𑀓𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 ‘‘𑀓𑀺𑀁 𑀦𑀼 𑀔𑁄 𑀲𑀫𑀡 𑀅𑀥𑁄𑀫𑀼𑀔𑁄 𑀪𑀼𑀜𑁆𑀚𑀲𑀻’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀦 𑀔𑁆𑀯𑀸𑀳𑀁 𑀪𑀕𑀺𑀦𑀺 𑀅𑀥𑁄𑀫𑀼𑀔𑁄 𑀪𑀼𑀜𑁆𑀚𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀬𑁂 𑀳𑀺 𑀓𑁂𑀘𑀺 𑀪𑀕𑀺𑀦𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀯𑀢𑁆𑀣𑀼𑀯𑀺𑀚𑁆𑀚𑀸 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀺, 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺 𑀪𑀕𑀺𑀦𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀥𑁄𑀫𑀼𑀔𑀸 𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀪𑀸𑀲𑀺𑀢𑀁.

𑀓𑀺𑀁 ¶ 𑀦𑀼 𑀔𑁄 𑀲𑀫𑀡 𑀅𑀥𑁄 𑀫𑀼𑀔𑁄 𑀪𑀼𑀜𑁆𑀚𑀲𑀺.

𑀦 𑀔𑁆𑀯𑀸𑀳𑀁 𑀪𑀕𑀺𑀦𑀺 𑀅𑀥𑁄𑀫𑀼𑀔𑁄 𑀪𑀼𑀜𑁆𑀚𑀸𑀫𑀺.

𑀢𑁂𑀦 𑀳𑀺 𑀲𑀫𑀡 𑀉𑀩𑁆𑀪𑀫𑀼𑀔𑁄 𑀪𑀼𑀜𑁆𑀚𑀲𑀺.

𑀦 𑀔𑁆𑀯𑀸𑀳𑀁 𑀪𑀕𑀺𑀦𑀺 𑀉𑀩𑁆𑀪𑀫𑀼𑀔𑁄 𑀪𑀼𑀜𑁆𑀚𑀸𑀫𑀺.

𑀲𑀴𑀸𑀬𑀢𑀦𑀯𑀕𑁆𑀕𑀲𑀁𑀬𑀼𑀢𑁆𑀢𑀧𑀸𑀴𑀺

𑀅𑀚𑁆𑀛𑀢𑁆𑀢𑀸𑀦𑀺𑀘𑁆𑀘𑀲𑀼𑀢𑁆𑀢, 𑀩𑀸𑀳𑀺𑀭𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 ¶ 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀴𑀸𑀬𑀢𑀦𑀯𑀕𑁆𑀕𑀲𑀁𑀬𑀼𑀢𑁆𑀢𑁂 𑀧𑀞𑀫𑀁 𑀅𑀚𑁆𑀛𑀢𑁆𑀢𑀸𑀦𑀺𑀘𑁆𑀘𑀲𑀼𑀢𑁆𑀢𑀜𑁆𑀘 𑀘𑀢𑀼𑀢𑁆𑀣𑀁 𑀩𑀸𑀳𑀺𑀭𑀸𑀦𑀺𑀘𑁆𑀘𑀲𑀼𑀢𑁆𑀢𑀜𑁆𑀘 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀘𑀓𑁆𑀔𑀼𑀁 𑀪𑀺𑀓𑁆𑀔𑀯𑁂 𑀅𑀦𑀺𑀘𑁆𑀘𑀁, 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁, 𑀬𑀁 𑀤𑀼𑀓𑁆𑀔𑀁 𑀢𑀤𑀦𑀢𑁆𑀢𑀸, 𑀬𑀤𑀦𑀢𑁆𑀢𑀸 𑀢𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸𑀘. ‘‘𑀭𑀽𑀧𑀸 𑀪𑀺𑀓𑁆𑀔𑀯𑁂 𑀅𑀦𑀺𑀘𑁆𑀘𑀸. 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁, 𑀬𑀁 𑀤𑀼𑀓𑁆𑀔𑀁 𑀢𑀤𑀦𑀢𑁆𑀢𑀸, 𑀬𑀤𑀦𑀢𑁆𑀢𑀸 𑀢𑀁 𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’’𑀢𑀺 𑀘 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑀸𑀯𑀼𑀲𑁄 ¶ 𑀲𑀩𑁆𑀩𑀯𑀕𑁆𑀕𑁂 𑀙𑀝𑁆𑀞𑀁 𑀆𑀤𑀺𑀢𑁆𑀢𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀕𑀬𑀸𑀬𑀁 ¶ 𑀪𑀦𑁆𑀢𑁂 𑀕𑀬𑀸𑀲𑀻𑀲𑁂 𑀧𑀼𑀭𑀸𑀡𑀚𑀝𑀺𑀮𑀁 𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀆𑀭𑀩𑁆𑀪 ‘‘𑀲𑀩𑁆𑀩𑀁 𑀪𑀺𑀓𑁆𑀔𑀯𑁂 𑀆𑀤𑀺𑀢𑁆𑀢𑀁, 𑀓𑀺𑀜𑁆𑀘 𑀪𑀺𑀓𑁆𑀔𑀯𑁂 𑀲𑀩𑁆𑀩𑀁 𑀆𑀤𑀺𑀢𑁆𑀢𑀁. 𑀘𑀓𑁆𑀔𑀼 𑀪𑀺𑀓𑁆𑀔𑀯𑁂 𑀆𑀤𑀺𑀢𑁆𑀢𑀁, 𑀭𑀽𑀧𑀸 𑀆𑀤𑀺𑀢𑁆𑀢𑀸, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀆𑀤𑀺𑀢𑁆𑀢𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀆𑀤𑀺𑀢𑁆𑀢𑁄, 𑀬𑀫𑁆𑀧𑀺𑀤𑀁 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺, 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁𑀯𑀸, 𑀢𑀫𑁆𑀧𑀺 𑀆𑀤𑀺𑀢𑁆𑀢𑀁. 𑀓𑁂𑀦 𑀆𑀤𑀺𑀢𑁆𑀢𑀁. 𑀭𑀸𑀕𑀕𑁆𑀕𑀺𑀦𑀸 𑀤𑁄𑀲𑀕𑁆𑀕𑀺𑀦𑀸 𑀫𑁄𑀳𑀕𑁆𑀕𑀺𑀦𑀸 𑀆𑀤𑀺𑀢𑁆𑀢𑀁, 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺 𑀆𑀤𑀺𑀢𑁆𑀢𑀦𑁆𑀢𑀺 𑀯𑀤𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀫𑀺𑀕𑀚𑀸𑀮𑀯𑀕𑁆𑀕𑁂 ¶ 𑀆𑀯𑀼𑀲𑁄 𑀧𑀞𑀫𑀫𑀺𑀕𑀚𑀸𑀮𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 ¶ 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀫𑀺𑀕𑀚𑀸𑀮𑀢𑁆𑀣𑁂𑀭𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀫𑀺𑀕𑀚𑀸𑀮𑀢𑁆𑀣𑁂𑀭𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀏𑀓𑀯𑀺𑀳𑀸𑀭𑀻 𑀏𑀓𑀯𑀺𑀳𑀸𑀭𑀻𑀢𑀺 𑀪𑀦𑁆𑀢𑁂 𑀯𑀼𑀘𑁆𑀘𑀢𑀺, 𑀓𑀺𑀢𑁆𑀢𑀸𑀯𑀢𑀸𑀦𑀼𑀔𑁄 𑀪𑀦𑁆𑀢𑁂 𑀏𑀓𑀯𑀺𑀳𑀸𑀭𑀻 𑀳𑁄𑀢𑀺, 𑀓𑀺𑀢𑁆𑀢𑀸𑀯𑀢𑀸𑀘 𑀧𑀦 𑀲𑀤𑀼𑀢𑀺𑀬𑀯𑀺𑀳𑀸𑀭𑀻 𑀳𑁄𑀢𑀻’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀲𑀦𑁆𑀢𑀺 𑀔𑁄 𑀫𑀺𑀕𑀚𑀸𑀮 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸, 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺, 𑀢𑀲𑁆𑀲 𑀢𑀁 𑀅𑀪𑀺𑀦𑀦𑁆𑀤𑀢𑁄 𑀅𑀪𑀺𑀯𑀤𑀢𑁄 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑁄 𑀉𑀧𑁆𑀧𑀚𑁆𑀚𑀢𑀺 𑀦𑀦𑁆𑀤𑀻, 𑀦𑀦𑁆𑀤𑀺𑀬𑀸 𑀲𑀢𑀺 𑀲𑀸𑀭𑀸𑀕𑁄 𑀳𑁄𑀢𑀺, 𑀲𑀸𑀭𑀸𑀕𑁂 𑀲𑀢𑀺 𑀲𑀁𑀬𑁄𑀕𑁄 𑀳𑁄𑀢𑀺, 𑀦𑀦𑁆𑀤𑀺𑀲𑀁𑀬𑁄𑀚𑀦𑀲𑀁𑀬𑀼𑀢𑁆𑀢𑁄 𑀔𑁄 𑀫𑀺𑀕𑀚𑀸𑀮 𑀪𑀺𑀓𑁆𑀔𑀼 𑀲𑀤𑀼𑀢𑀺𑀬𑀯𑀺𑀳𑀸𑀭𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀦𑀯𑀫𑀁 𑀲𑀁𑀕𑀻𑀢𑀁 𑀧𑀞𑀫𑀙𑀨𑀲𑁆𑀲𑀸𑀬𑀢𑀦𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀬𑁄 𑀳𑀺 𑀓𑁄𑀘𑀺 𑀯𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀯𑀼𑀲𑀺𑀢𑀁 𑀢𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀆𑀭𑀓𑀸 𑀲𑁄 𑀇𑀫𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀅𑀳𑀁 ¶ 𑀳𑀺 𑀪𑀦𑁆𑀢𑁂 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀫𑀺.

𑀘𑀓𑁆𑀔𑀼𑀁 ¶ 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑀲𑀫𑀦𑀼𑀧𑀲𑁆𑀲𑀲𑀺.

𑀏𑀢𑁆𑀣 𑀘 𑀢𑁂 𑀪𑀺𑀓𑁆𑀔𑀼 𑀘𑀓𑁆𑀔𑀼 𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀁 𑀪𑀯𑀺𑀲𑁆𑀲𑀢𑀺, 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲.

𑀧𑀼𑀘𑁆𑀙𑀸 𑁋 𑀕𑀺𑀮𑀸𑀦𑀯𑀕𑁆𑀕𑁂 ¶ 𑀧𑀦𑀸𑀯𑀼𑀲𑁄 𑀧𑀞𑀫𑀁 𑀕𑀺𑀮𑀸𑀦𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀅𑀜𑁆𑀜𑀢𑀭𑀁 𑀦𑀯𑀁 𑀪𑀺𑀓𑁆𑀔𑀼𑀁 𑀕𑀺𑀮𑀸𑀦𑀁 𑀆𑀩𑀸𑀥𑀺𑀢𑀁 𑀤𑀼𑀓𑁆𑀔𑀺𑀢𑀁 𑀩𑀸𑀴𑁆𑀳𑀕𑀺𑀮𑀸𑀦𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀅𑀜𑁆𑀜𑀢𑀭𑁄 𑀪𑀦𑁆𑀢𑁂 𑀪𑀺𑀓𑁆𑀔𑀼 𑀕𑀺𑀮𑀸𑀦𑁄 𑀆𑀩𑀸𑀥𑀺𑀓𑁄 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀦𑀔𑁆𑀯𑀸𑀳𑀁 𑀪𑀦𑁆𑀢𑁂 𑀲𑀻𑀮𑀯𑀺𑀲𑀼𑀤𑁆𑀥𑀢𑁆𑀣𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀻’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀢𑀁 𑀪𑀺𑀓𑁆𑀔𑀼𑀁 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀲 𑀘 𑀯𑀘𑀦𑀁 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 ‘‘𑀭𑀸𑀕𑀯𑀺𑀭𑀸𑀕𑀢𑁆𑀣𑁄 𑀳𑀺 𑀪𑀺𑀓𑁆𑀔𑀼 𑀫𑀬𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀪𑀺𑀓𑁆𑀔𑀼, 𑀘𑀓𑁆𑀔𑀼 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸𑀢𑀺. 𑀅𑀦𑀺𑀘𑁆𑀘𑀁 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸𑀢𑀺, 𑀤𑀼𑀓𑁆𑀔𑀁 𑀪𑀦𑁆𑀢𑁂’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀲𑀸𑀥𑀼 ¶ 𑀔𑁄 𑀢𑁆𑀯𑀁 𑀪𑀺𑀓𑁆𑀔𑀼 𑀭𑀸𑀕𑀯𑀺𑀭𑀸𑀕𑀢𑁆𑀣𑀁 𑀫𑀬𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀲𑀺,

𑀧𑀼𑀘𑁆𑀙𑀸 𑁋 𑀙𑀦𑁆𑀦𑀯𑀕𑁆𑀕𑁂 ¶ 𑀧𑀦𑀸𑀯𑀼𑀲𑁄 𑀧𑀜𑁆𑀘𑀫𑀁 𑀲𑀁𑀕𑀻𑀢𑀁 𑀧𑀼𑀡𑁆𑀡𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀧𑀼𑀡𑁆𑀡𑀢𑁆𑀣𑁂𑀭𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁, 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀧𑀼𑀡𑁆𑀡𑀢𑁆𑀣𑁂𑀭𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀲𑀸𑀥𑀼 𑀫𑁂 𑀪𑀦𑁆𑀢𑁂 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼, 𑀬𑀫𑀳𑀁 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺. 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀲𑀦𑁆𑀢𑀺 𑀔𑁄 𑀧𑀼𑀡𑁆𑀡 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸, 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺, 𑀢𑀲𑁆𑀲 𑀢𑀁 𑀅𑀪𑀺𑀦𑀦𑁆𑀤𑀢𑁄 𑀅𑀪𑀺𑀯𑀤𑀢𑁄 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑁄 𑀉𑀧𑁆𑀧𑀚𑁆𑀚𑀢𑀺 𑀦𑀦𑁆𑀤𑀻, 𑀦𑀦𑁆𑀤𑀻 𑀲𑀫𑀼𑀤𑀬𑁄 𑀤𑀼𑀓𑁆𑀔𑀲𑀫𑀼𑀤𑀬𑁄 𑀧𑀼𑀡𑁆𑀡𑀸𑀢𑀺 𑀯𑀤𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀏𑀯𑀜𑁆𑀘𑀸𑀯𑀼𑀲𑁄 ¶ 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀧𑀼𑀡𑁆𑀡𑀢𑁆𑀣𑁂𑀭𑀲𑁆𑀲 𑀲𑀁𑀔𑀺𑀢𑁆𑀢𑁂𑀦 𑀑𑀯𑀸𑀤𑀁 𑀤𑀢𑁆𑀯𑀸 𑀓𑀣𑀜𑁆𑀘 𑀦𑀁 𑀧𑀝𑀺𑀧𑀼𑀘𑁆𑀙𑀺, 𑀓𑀣𑀜𑁆𑀘 𑀲𑁄 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺, 𑀓𑀣𑀜𑁆𑀘𑀲𑁆𑀲𑀸𑀬𑀲𑁆𑀫𑀢𑁄 𑀧𑀼𑀡𑁆𑀡𑀢𑁆𑀣𑁂𑀭𑀲𑁆𑀲 𑀅𑀪𑀺𑀲𑀫𑁆𑀧𑀭𑀸𑀬𑁄 𑀅𑀳𑁄𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀏𑀯𑀁 𑀔𑁄 𑀪𑀦𑁆𑀢𑁂 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀧𑀼𑀡𑁆𑀡𑀢𑁆𑀣𑁂𑀭𑀲𑁆𑀲 𑀲𑀁𑀔𑀺𑀢𑁆𑀢𑁂𑀦 𑀑𑀯𑀸𑀤𑀁 𑀤𑀢𑁆𑀯𑀸 ‘‘𑀇𑀫𑀺𑀦𑀸 𑀢𑁆𑀯𑀁 𑀧𑀼𑀡𑁆𑀡 𑀫𑀬𑀸 𑀲𑀁𑀔𑀺𑀢𑁆𑀢𑁂𑀦 𑀑𑀯𑀸𑀤𑁂𑀦 𑀑𑀯𑀤𑀺𑀢𑁄 𑀓𑀢𑀫𑀲𑁆𑀫𑀺𑀁 𑀚𑀦𑀧𑀤𑁂 𑀯𑀺𑀳𑀭𑀺𑀲𑁆𑀲𑀲𑀻’’𑀢𑀺 𑀢𑀁 𑀆𑀬𑀲𑁆𑀫𑀦𑁆𑀢𑀁 𑀧𑀼𑀡𑁆𑀡𑀢𑁆𑀣𑁂𑀭𑀁 𑀧𑀝𑀺𑀧𑀼𑀘𑁆𑀙𑀺. 𑀲𑁄 𑀘 𑀪𑀦𑁆𑀢𑁂 𑀆𑀬𑀲𑁆𑀫𑀸 ‘‘𑀅𑀢𑁆𑀣𑀺 𑀪𑀦𑁆𑀢𑁂 𑀲𑀼𑀦𑀸𑀧𑀭𑀦𑁆𑀢𑁄 𑀦𑀸𑀫 𑀚𑀦𑀧𑀤𑁄, 𑀢𑀢𑁆𑀣𑀸𑀳𑀁 𑀯𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀲𑁄 𑀳𑀺 𑀪𑀦𑁆𑀢𑁂 𑀆𑀬𑀲𑁆𑀫𑀸 𑀲𑀼𑀦𑀸𑀧𑀭𑀦𑁆𑀢𑁂 𑀚𑀦𑀧𑀤𑁂 𑀯𑀲𑀺𑀢𑁆𑀯𑀸 𑀢𑁂𑀦𑁂𑀯 𑀅𑀦𑁆𑀢𑀭𑀯𑀲𑁆𑀲𑁂𑀦 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀲𑀘𑁆𑀙𑀸𑀓𑀸𑀲𑀺. 𑀢𑁂𑀦𑁂𑀯 𑀅𑀦𑁆𑀢𑀭𑀯𑀲𑁆𑀲𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀏𑀯𑀁 𑀔𑁄 𑀪𑀦𑁆𑀢𑁂 𑀢𑀲𑁆𑀲 𑀆𑀬𑀲𑁆𑀫𑀢𑁄 𑀅𑀪𑀺𑀲𑀫𑁆𑀧𑀭𑀸𑀬𑁄 𑀅𑀳𑁄𑀲𑀺.

𑀲𑀦𑁆𑀢𑀺 ¶ 𑀔𑁄 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑀸 𑀓𑀸𑀬𑁂𑀦 𑀘 𑀚𑀻𑀯𑀺𑀢𑁂𑀦 𑀘 𑀅𑀝𑁆𑀝𑀻𑀬𑀫𑀸𑀦𑀸 𑀳𑀭𑀸𑀬𑀫𑀸𑀦𑀸 𑀚𑀺𑀕𑀼𑀘𑁆𑀙𑀫𑀸𑀦𑀸 𑀲𑀢𑁆𑀣𑀳𑀸𑀭𑀓𑀁 𑀧𑀭𑀺𑀬𑁂𑀲𑀦𑁆𑀢𑀺.

𑀲𑀓𑁆𑀔𑀺𑀲𑁆𑀲𑀲𑀺 𑀔𑁄 𑀢𑁆𑀯𑀁 𑀧𑀼𑀡𑁆𑀡 𑀇𑀫𑀺𑀦𑀸 𑀤𑀫𑀽𑀧𑀲𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀼𑀦𑀸𑀧𑀭𑀲𑀦𑁆𑀢𑀲𑁆𑀫𑀺𑀁 𑀚𑀦𑀧𑀤𑁂 𑀯𑀢𑁆𑀣𑀼𑀁.

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 ¶ 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀴𑀯𑀕𑁆𑀕𑁂 𑀤𑀼𑀢𑀺𑀬𑀁 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 ¶ 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀢𑁆𑀣𑁂𑀭𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀢𑁆𑀣𑁂𑀭𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀲𑀸𑀥𑀼 𑀫𑁂 𑀪𑀦𑁆𑀢𑁂 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼, 𑀬𑀫𑀳𑀁 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺. 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀏𑀢𑁆𑀣 𑀤𑀸𑀦𑀺 𑀫𑀸𑀮𑀼𑀓𑁆𑀬𑀧𑀼𑀢𑁆𑀢 𑀓𑀺𑀁 𑀤𑀳𑀭𑁂 𑀪𑀺𑀓𑁆𑀔𑀽 𑀯𑀓𑁆𑀔𑀸𑀫𑀸𑀢𑀺’’𑀆𑀤𑀺𑀦𑀸 𑀣𑁂𑀭𑀁 𑀅𑀧𑀲𑀸𑀤𑁂𑀢𑁆𑀯𑀸 𑀘𑁂𑀯 𑀉𑀲𑁆𑀲𑀸𑀤𑁂𑀢𑁆𑀯𑀸 𑀘 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀫𑀸𑀮𑀼𑀓𑁆𑀬𑀧𑀼𑀢𑁆𑀢, 𑀬𑁂 𑀢𑁂 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀅𑀤𑀺𑀝𑁆𑀞𑀸 𑀅𑀤𑀺𑀝𑁆𑀞𑀧𑀼𑀩𑁆𑀩𑀸, 𑀦 𑀘 𑀧𑀲𑁆𑀲𑀲𑀺, 𑀦 𑀘 𑀢𑁂 𑀳𑁄𑀢𑀺 𑀧𑀲𑁆𑀲𑁂𑀬𑁆𑀬𑀦𑁆𑀢𑀺, 𑀅𑀢𑁆𑀣𑀺 𑀢𑁂 𑀢𑀢𑁆𑀣 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀇𑀫𑀲𑁆𑀫𑀺𑀁 ¶ 𑀘 𑀔𑁄 𑀧𑀦𑀸𑀯𑀼𑀲𑁄 𑀪𑀕𑀯𑀢𑀸 𑀑𑀯𑀸𑀤𑁂 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑁂 𑀲𑁄 𑀆𑀬𑀲𑁆𑀫𑀸 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀢𑁆𑀣𑁂𑀭𑁄 𑀪𑀕𑀯𑀦𑁆𑀢𑀁 𑀓𑀺𑀁 𑀅𑀯𑁄𑀘 𑀓𑀣𑀜𑁆𑀘𑀲𑁆𑀲 𑀪𑀕𑀯𑀸 𑀅𑀦𑀼𑀜𑁆𑀜𑀸𑀲𑀺. 𑀓𑀻𑀤𑀺𑀲𑁄 𑀘𑀲𑁆𑀲𑀸𑀬𑀲𑁆𑀫𑀢𑁄 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀇𑀫𑀲𑁆𑀫𑀺𑀁 𑀔𑁄 𑀪𑀦𑁆𑀢𑁂 𑀑𑀯𑀸𑀤𑁂 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑁂 𑀆𑀬𑀲𑁆𑀫𑀸 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀢𑁆𑀣𑁂𑀭𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀇𑀫𑀲𑁆𑀲 𑀔𑁆𑀯𑀸𑀳𑀁 𑀪𑀦𑁆𑀢𑁂 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀺.

𑀭𑀽𑀧𑀁 𑀤𑀺𑀲𑁆𑀯𑀸 𑀫𑀼𑀝𑁆𑀞𑀸, 𑀧𑀺𑀬𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑁄;

𑀲𑀸𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀅𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

𑀢𑀲𑁆𑀲 𑀯𑀟𑁆𑀠𑀦𑁆𑀢𑀺 𑀯𑁂𑀤𑀦𑀸, 𑀅𑀦𑁂𑀓𑀸 𑀭𑀽𑀧𑀲𑀫𑁆𑀪𑀯𑀸;

𑀅𑀪𑀺𑀚𑁆𑀛𑀸 𑀘 𑀯𑀺𑀳𑁂𑀲𑀸 𑀘, 𑀘𑀺𑀢𑁆𑀢𑀫𑀲𑁆𑀲𑀽𑀧𑀳𑀜𑁆𑀜𑀢𑀺;

𑀏𑀯𑀁 𑀆𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀆𑀭𑀸 𑀦𑀺𑀩𑁆𑀩𑀸𑀦 𑀯𑀼𑀘𑁆𑀘𑀢𑀺;

𑀦 𑀲𑁄 𑀭𑀚𑁆𑀚𑀢𑀺 𑀥𑀫𑁆𑀫𑁂𑀲𑀼, 𑀥𑀫𑁆𑀫𑀁 𑀜𑀢𑁆𑀯𑀸 𑀧𑀝𑀺𑀲𑁆𑀲𑀢𑁄;

𑀯𑀺𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀦𑀸𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

𑀬𑀣𑀸𑀲𑁆𑀲 𑀚𑀸𑀦𑀢𑁄 𑀥𑀫𑁆𑀫𑀁, 𑀲𑁂𑀯𑀢𑁄 𑀘𑀸𑀧𑀺 𑀯𑁂𑀤𑀦𑀁;

𑀔𑀻𑀬𑀢𑀺 𑀦𑁄𑀧𑀘𑀻𑀬𑀢𑀺, 𑀏𑀯𑀁 𑀲𑁄 𑀘𑀭𑀢𑀻 𑀲𑀢𑁄;

𑀏𑀯𑀁 𑀅𑀧𑀘𑀺𑀦𑀢𑁄 𑀤𑀼𑀓𑁆𑀔𑀁, 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀸𑀦 𑀯𑀼𑀘𑁆𑀘𑀢𑀻𑀢𑀺.

𑀇𑀫𑀲𑁆𑀲 𑀔𑁆𑀯𑀸𑀳𑀁 𑀪𑀦𑁆𑀢𑁂 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀻𑀢𑀺. 𑀪𑀕𑀯𑀸 𑀘 𑀪𑀦𑁆𑀢𑁂 ‘‘𑀲𑀸𑀥𑀼 𑀲𑀸𑀥𑀼 𑀫𑀸𑀮𑀼𑀓𑁆𑀬𑀧𑀼𑀢𑁆𑀢, 𑀲𑀸𑀥𑀼 𑀔𑁄 𑀢𑁆𑀯𑀁 𑀫𑀸𑀮𑀼𑀓𑁆𑀬𑀧𑀼𑀢𑁆𑀢 𑀫𑀬𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀲𑀻’’𑀢𑀺 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸𑁋

‘‘𑀭𑀽𑀧𑀁 𑀤𑀺𑀲𑁆𑀯𑀸 𑀲𑀢𑀺 𑀫𑀼𑀝𑁆𑀞𑁄, 𑀧𑀺𑀬𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑁄;

𑀲𑀸𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀅𑀚𑁆𑀛𑁄𑀲 𑀢𑀺𑀝𑁆𑀞𑀢𑀻’’𑀢𑀺𑁋

𑀣𑁂𑀭𑀲𑁆𑀲 𑀯𑀘𑀦𑀁 𑀲𑀫𑀦𑀼𑀜𑁆𑀜𑀸𑀲𑀺. 𑀲𑁄 𑀘 𑀪𑀦𑁆𑀢𑁂 𑀆𑀬𑀲𑁆𑀫𑀸 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀢𑁆𑀣𑁂𑀭𑁄 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 ¶ 𑀯𑀺𑀳𑀭𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺, 𑀢𑀤𑀦𑀼𑀢𑁆𑀢𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺, ‘‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’’𑀢𑀺 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄𑀘 𑀧𑀦𑀸𑀬𑀲𑁆𑀫𑀸 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑁄 𑀅𑀭𑀳𑀢𑀁 𑀅𑀳𑁄𑀲𑀺. 𑀏𑀯𑀁 𑀔𑁄 𑀪𑀦𑁆𑀢𑁂 𑀢𑀲𑁆𑀲 𑀆𑀬𑀲𑁆𑀫𑀢𑁄 𑀅𑀪𑀺𑀲𑀫𑁆𑀧𑀭𑀸𑀬𑁄 𑀅𑀳𑁄𑀲𑀺.

𑀭𑀽𑀧𑀁 ¶ 𑀤𑀺𑀲𑁆𑀯𑀸 𑀲𑀢𑀺 𑀫𑀼𑀝𑁆𑀞𑀸, 𑀧𑀺𑀬𑀁 𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑁄;

𑀲𑀸𑀭𑀢𑁆𑀢𑀘𑀺𑀢𑁆𑀢𑁄 𑀯𑁂𑀤𑁂𑀢𑀺, 𑀢𑀜𑁆𑀘 𑀅𑀚𑁆𑀛𑁄𑀲 𑀢𑀺𑀝𑁆𑀞𑀢𑀺.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀘𑀢𑀼𑀢𑁆𑀣𑀁 𑀧𑀫𑀸𑀤𑀯𑀺𑀳𑀸𑀭𑀻𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀧𑀫𑀸𑀤𑀯𑀺𑀳𑀸𑀭𑀺𑀜𑁆𑀘 𑀯𑁄 𑀪𑀺𑀓𑁆𑀔𑀯𑁂 𑀤𑁂𑀲𑁂𑀲𑁆𑀲𑀸𑀫𑀺 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀺𑀜𑁆𑀘, 𑀢𑀁 𑀲𑀼𑀡𑀸𑀣. 𑀓𑀣𑀜𑁆𑀘 𑀪𑀺𑀓𑁆𑀔𑀯𑁂 𑀧𑀫𑀸𑀤𑀯𑀺𑀳𑀸𑀭𑀻 𑀳𑁄𑀢𑀺. 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀲𑁆𑀲 𑀪𑀺𑀓𑁆𑀔𑀯𑁂 𑀯𑀺𑀳𑀭𑀢𑁄 𑀘𑀺𑀢𑁆𑀢𑀁 𑀩𑁆𑀬𑀸𑀲𑀺𑀜𑁆𑀘𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼, 𑀢𑀲𑁆𑀲 𑀩𑁆𑀬𑀸𑀲𑀺𑀢𑁆𑀢𑀘𑀺𑀢𑁆𑀢𑀲𑁆𑀲 𑀧𑀸𑀫𑁄𑀚𑁆𑀚𑀁 𑀦 𑀳𑁄𑀢𑀺, 𑀧𑀸𑀫𑁄𑀚𑁆𑀚𑁂 𑀅𑀲𑀢𑀺 𑀧𑀻𑀢𑀺 𑀦 𑀳𑁄𑀢𑀺, 𑀧𑀻𑀢𑀺𑀬𑀸 𑀧𑀲𑁆𑀲𑀤𑁆𑀥𑀺 𑀦 𑀳𑁄𑀢𑀺, 𑀧𑀲𑁆𑀲𑀤𑁆𑀥𑀺𑀬𑀸 𑀅𑀲𑀢𑀺 𑀤𑀼𑀓𑁆𑀔𑀁 𑀳𑁄𑀢𑀺, 𑀤𑀼𑀓𑁆𑀔𑀺𑀦𑁄 𑀘𑀺𑀢𑁆𑀢𑀁 𑀦 𑀲𑀫𑀸𑀥𑀺𑀬𑀢𑀺, 𑀅𑀲𑀫𑀸𑀳𑀺 𑀢𑁂 𑀘𑀺𑀢𑁆𑀢𑁂 𑀥𑀫𑁆𑀫𑀸 𑀦 𑀧𑀸𑀢𑀼𑀪𑀯𑀦𑁆𑀢𑀺, 𑀥𑀫𑁆𑀫𑀸𑀦𑀁 𑀅𑀧𑀸𑀢𑀼𑀪𑀸𑀯𑀸 𑀧𑀫𑀸𑀤𑀯𑀺𑀳𑀸𑀭𑀻𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀮𑁄𑀓𑀓𑀸𑀫𑀕𑀼𑀡𑀯𑀕𑁆𑀕𑁂 ¶ 𑀆𑀯𑀼𑀲𑁄 𑀅𑀝𑁆𑀞𑀫𑀁 𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁𑀬𑁂𑀯 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀭𑀸𑀳𑀼𑀮𑀁 𑀆𑀭𑀩𑁆𑀪 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀭𑀸𑀳𑀼𑀮, 𑀘𑀓𑁆𑀔𑀼 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸𑀢𑀺. 𑀅𑀦𑀺𑀘𑁆𑀘𑀁 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁, 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁𑀯𑀸𑀢𑀺. 𑀤𑀼𑀓𑁆𑀔𑀁 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺. 𑀦𑁄 𑀳𑁂𑀢𑀁 𑀪𑀦𑁆𑀢𑁂’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀬𑀁𑀦𑀽𑀦𑀸𑀳𑀁 ¶ 𑀭𑀸𑀳𑀼𑀮𑀁 𑀉𑀢𑁆𑀢𑀭𑀺𑀁 𑀆𑀲𑀯𑀸𑀦𑀁 𑀔𑀬𑁂 𑀯𑀺𑀦𑁂𑀬𑁆𑀬𑀁.

𑀧𑀼𑀘𑁆𑀙𑀸 𑁋 𑀕𑀳𑀧𑀢𑀺𑀯𑀕𑁆𑀕𑁂 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀘𑀢𑀼𑀢𑁆𑀣𑀁 𑀲𑀁𑀕𑀻𑀢𑀁 𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑁄𑀲𑀫𑁆𑀩𑀺𑀬𑀁 𑀪𑀦𑁆𑀢𑁂 𑀭𑀸𑀚𑀸𑀦𑀁 𑀉𑀤𑁂𑀦𑀁 𑀆𑀭𑀩𑁆𑀪 𑀆𑀬𑀲𑁆𑀫𑀢𑀸 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑀢𑁆𑀣𑁂𑀭𑁂𑀦 𑀪𑀸𑀲𑀺𑀢𑀁. 𑀭𑀸𑀚𑀸 𑀪𑀦𑁆𑀢𑁂 𑀉𑀤𑁂𑀦𑁄 𑀆𑀬𑀲𑁆𑀫𑀦𑁆𑀢𑀁 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑀁 𑀏𑀢𑀤𑀯𑁄𑀘 ‘‘𑀓𑁄 𑀦𑀼 𑀔𑁄 𑀪𑁄 𑀪𑀸𑀭𑀤𑁆𑀯𑀸𑀚 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦𑀺𑀫𑁂 𑀤𑀳𑀭𑀸 𑀪𑀺𑀓𑁆𑀔𑀽 𑀲𑀼𑀲𑀽 𑀓𑀸𑀴𑀓𑁂𑀲𑀸 𑀪𑀤𑁆𑀭𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑀸 𑀧𑀞𑀫𑁂𑀦 𑀯𑀬𑀲𑀸 𑀅𑀦𑀺𑀓𑀻𑀴𑀺𑀢𑀸𑀯𑀺𑀦𑁄 𑀓𑀸𑀫𑁂𑀲𑀼 𑀬𑀸𑀯𑀚𑀻𑀯𑀁 𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺, 𑀅𑀤𑁆𑀥𑀸𑀦𑀜𑁆𑀘 𑀆𑀧𑀸𑀤𑁂𑀦𑁆𑀢𑀻’’𑀢𑀺. 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀯𑀼𑀢𑁆𑀢𑀁 𑀔𑁄

𑀏𑀢𑀁 ¶ 𑀫𑀳𑀸𑀭𑀸𑀚 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀏𑀣 𑀢𑀼𑀫𑁆𑀳𑁂 𑀪𑀺𑀓𑁆𑀔𑀯𑁂 𑀫𑀸𑀢𑀼𑀫𑀢𑁆𑀢𑀻𑀲𑀼 𑀫𑀸𑀢𑀼𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀣. 𑀪𑀕𑀦𑀺𑀫𑀢𑁆𑀢𑀻𑀲𑀼 𑀪𑀕𑀺𑀦𑀺𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀣, 𑀥𑀻𑀢𑀼𑀫𑀢𑁆𑀢𑀻𑀲𑀼 𑀥𑀻𑀢𑀼𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀣𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀆𑀬𑀲𑁆𑀫𑀢𑀸 𑀧𑀺𑀡𑁆𑀟𑁄𑀮 𑀪𑀸𑀭𑀤𑁆𑀯𑀸𑀚𑀢𑁆𑀣𑁂𑀭𑁂𑀦 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀤𑀲𑀫𑀁 𑀲𑀁𑀕𑀻𑀢𑀁 𑀯𑁂𑀭𑀳𑀘𑁆𑀘𑀸𑀦𑀺𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑀸𑀫𑀡𑁆𑀟𑀸𑀬𑀁 𑀪𑀦𑁆𑀢𑁂 𑀯𑁂𑀭𑀳𑀘𑁆𑀘𑀸𑀦𑀺𑀕𑁄𑀢𑁆𑀢𑀁 𑀩𑁆𑀭𑀸𑀳𑁆𑀫𑀡𑀺𑀁 𑀆𑀭𑀩𑁆𑀪 𑀆𑀬𑀲𑁆𑀫𑀢𑀸 𑀉𑀤𑀸𑀬𑀺𑀢𑁆𑀣𑁂𑀭𑁂𑀦 𑀪𑀸𑀲𑀺𑀢𑀁. 𑀯𑁂𑀭𑀳𑀘𑁆𑀘𑀸𑀦𑀻𑀕𑁄𑀢𑁆𑀢𑀸 𑀪𑀦𑁆𑀢𑁂 𑀩𑁆𑀭𑀸𑀳𑁆𑀫𑀡𑀻 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀢𑁆𑀣𑁂𑀭𑀁 𑀏𑀢𑀤𑀯𑁄𑀘 ‘‘𑀓𑀺𑀲𑁆𑀫𑀺𑀁 𑀦𑀼 𑀔𑁄 𑀪𑀦𑁆𑀢𑁂 𑀲𑀢𑀺 𑀅𑀭𑀳𑀦𑁆𑀢𑁄 𑀲𑀼𑀔𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀓𑀺𑀲𑁆𑀫𑀺𑀁 𑀅𑀲𑀢𑀺 𑀅𑀭𑀳𑀦𑁆𑀢𑁄 𑀲𑀼𑀔𑀤𑀼𑀓𑁆𑀔𑀁 𑀦 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺. 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀘𑀓𑁆𑀔𑀼𑀲𑁆𑀫𑀺𑀁 𑀔𑁄 𑀪𑀕𑀺𑀦𑀺 𑀲𑀢𑀺 ¶ 𑀅𑀭𑀳𑀦𑁆𑀢𑁄 𑀲𑀼𑀔𑀤𑀼𑀓𑁆𑀔𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀘𑀓𑁆𑀔𑀼𑀲𑁆𑀫𑀺𑀁 𑀅𑀲𑀢𑀺 𑀅𑀭𑀳𑀦𑁆𑀢𑁄 𑀲𑀼𑀔𑀤𑀼𑀓𑁆𑀔𑀁 𑀦 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀆𑀬𑀲𑁆𑀫𑀢𑀸 𑀉𑀤𑀸𑀬𑀺𑀢𑁆𑀣𑁂𑀭𑁂𑀦 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀤𑁂𑀯𑀤𑀳𑀯𑀕𑁆𑀕𑁂 ¶ 𑀆𑀯𑀼𑀲𑁄 𑀔𑀡𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀓𑁆𑀓𑁂𑀲𑀼 𑀪𑀦𑁆𑀢𑁂 𑀤𑁂𑀯𑀤𑀳𑁂 𑀦𑀸𑀫 𑀲𑀓𑁆𑀬𑀸𑀦𑀁 𑀦𑀺𑀕𑀫𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀮𑀸𑀪𑀸 𑀯𑁄 𑀪𑀺𑀓𑁆𑀔𑀯𑁂, 𑀲𑀼𑀮𑀤𑁆𑀥𑀁 𑀯𑁄 𑀪𑀺𑀓𑁆𑀔𑀯𑁂, 𑀔𑀡𑁄 𑀯𑁄 𑀧𑀝𑀺𑀮𑀤𑁆𑀥𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀲𑀫𑀼𑀤𑁆𑀤𑀯𑀕𑁆𑀕𑁂 ¶ 𑀧𑀦𑀸𑀯𑀼𑀲𑁄 𑀢𑀢𑀺𑀬𑀁 𑀩𑀸𑀴𑀺𑀲𑀺𑀓𑁄𑀧𑀫𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 ¶ 𑀪𑀦𑁆𑀢𑁂 𑀚𑀻𑀯𑀓𑀫𑁆𑀩𑀯𑀦𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂 𑀩𑀸𑀴𑀺𑀲𑀺𑀓𑁄 𑀆𑀫𑀺𑀲𑀕𑀢𑀩𑀴𑀺𑀲𑀁 𑀕𑀫𑁆𑀪𑀻𑀭𑁂 𑀉𑀤𑀓𑀭𑀳𑀤𑁂 𑀧𑀓𑁆𑀔𑀺𑀧𑁂𑀬𑁆𑀬𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀲𑀴𑀸𑀬𑀢𑀦𑀯𑀕𑁆𑀕𑀲𑀁𑀬𑀼𑀢𑁆𑀢𑁂 ¶ 𑀲𑀫𑀼𑀤𑁆𑀤𑀯𑀕𑁆𑀕𑁂 𑀧𑀦𑀸𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀲𑀁𑀕𑀻𑀢𑀁 𑀅𑀝𑁆𑀞𑀫𑀁 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀫𑁆𑀩𑀳𑀼𑀮𑁂 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀁 𑀯𑁄 𑀪𑀺𑀓𑁆𑀔𑀯𑁂 𑀥𑀫𑁆𑀫𑀧𑀭𑀺𑀬𑀸𑀬𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣. 𑀓𑀢𑀫𑁄 𑀘 𑀪𑀺𑀓𑁆𑀔𑀯𑁂 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑁄 𑀥𑀫𑁆𑀫𑀧𑀭𑀺𑀬𑀸𑀬𑁄. 𑀯𑀭𑀁 𑀪𑀺𑀓𑁆𑀔𑀯𑁂 𑀢𑀢𑁆𑀢𑀸𑀬 𑀅𑀬𑁄𑀲𑀮𑀸𑀓𑀸𑀬 𑀆𑀤𑀺𑀢𑁆𑀢𑀸𑀬 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀲𑀚𑁄𑀢𑀺𑀪𑀽𑀢𑀸𑀬 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀲𑀫𑁆𑀧𑀮𑀺𑀫𑀝𑁆𑀞𑀁, 𑀦𑀢𑁆𑀯𑁂𑀯 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀲𑀼 𑀭𑀽𑀧𑁂𑀲𑀼 𑀅𑀦𑀼𑀩𑁆𑀬𑀜𑁆𑀚𑀦𑀲𑁄 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄’’𑀢𑀺𑀆𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀞𑀫𑀤𑀸𑀭𑀼𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀆𑀲𑀻𑀯𑀺𑀲𑀯𑀕𑁆𑀕𑁂 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀘𑀢𑀼𑀢𑁆𑀣𑀁 𑀲𑀁𑀕𑀻𑀢𑀁 𑀧𑀞𑀫𑀤𑀸𑀭𑀼𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑁄𑀲𑀫𑁆𑀩𑀺𑀬𑀁 𑀪𑀦𑁆𑀢𑁂 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀧𑀲𑁆𑀲𑀣 𑀦𑁄 𑀢𑀼𑀫𑁆𑀳𑁂 𑀪𑀺𑀓𑁆𑀔𑀯𑁂 𑀅𑀫𑁆𑀳𑀁 𑀫𑀳𑀦𑁆𑀢𑀁 𑀤𑀸𑀭𑀼𑀓𑁆𑀔𑀦𑁆𑀥𑀁 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀸.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀢𑀢𑁆𑀣 𑀪𑀕𑀯𑀢𑀸 𑀑𑀭𑀺𑀫𑀢𑀻𑀭𑀸𑀤𑀻𑀦𑀁 𑀉𑀧𑀘𑀸𑀭𑀯𑀘𑀦𑀸𑀦𑀁 𑀅𑀢𑁆𑀣𑁄 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀚𑀺𑀢𑁆𑀯𑀸 𑀧𑀓𑀸𑀲𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀑𑀭𑀺𑀫𑀁 𑀢𑀻𑀭𑀦𑁆𑀢𑀺 𑀔𑁄 𑀪𑀺𑀓𑁆𑀔𑀼 𑀙𑀦𑁆𑀦𑁂𑀢𑀁 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀆𑀬𑀢𑀦𑀸𑀦𑀁 𑀅𑀥𑀺𑀯𑀘𑀦𑀁. 𑀧𑀸𑀭𑀺𑀫𑀁 𑀢𑀻𑀭𑀦𑁆𑀢𑀺 𑀔𑁄 𑀪𑀺𑀓𑁆𑀔𑀼 𑀙𑀦𑁆𑀦𑁂𑀢𑀁 𑀩𑀸𑀳𑀺𑀭𑀸𑀦𑀁 𑀆𑀬𑀢𑀦𑀸𑀦𑀁 𑀅𑀥𑀺𑀯𑀘𑀦𑀁. 𑀫𑀚𑁆𑀛𑁂 𑀲𑀁𑀲𑀻𑀤𑁄𑀢𑀺 𑀔𑁄 𑀪𑀺𑀓𑁆𑀔𑀼 𑀦𑀦𑁆𑀤𑀺𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀣𑀮𑁂 𑀉𑀲𑁆𑀲𑀸𑀤𑁄𑀢𑀺 𑀔𑁄 𑀪𑀺𑀓𑁆𑀔𑀼 𑀅𑀲𑁆𑀫𑀺𑀫𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀢𑀢𑁆𑀣 𑀑𑀭𑀺𑀫𑀢𑀻𑀭𑀸𑀤𑀻𑀦𑀁 𑀉𑀧𑀘𑀸𑀭𑀯𑀘𑀦𑀸𑀦𑀁 𑀅𑀢𑁆𑀣𑁄 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀚𑀺𑀢𑁆𑀯𑀸 𑀧𑀓𑀸𑀲𑀺𑀢𑁄.

𑀧𑀼𑀘𑁆𑀙𑀸 𑁋 𑀇𑀫𑀲𑁆𑀫𑀺𑀁 ¶ 𑀔𑁄 𑀧𑀦 𑀆𑀯𑀼𑀲𑁄 𑀲𑀼𑀢𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑁂 𑀯𑀺𑀲𑁂𑀲𑀢𑁄 𑀓𑀲𑁆𑀲 𑀓𑀻𑀤𑀺𑀲𑁄 𑀅𑀢𑁆𑀣𑁄 𑀓𑀣𑀜𑁆𑀘 𑀧𑀝𑀺𑀮𑀤𑁆𑀥𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀇𑀫𑀲𑁆𑀫𑀺𑀁 𑀪𑀦𑁆𑀢𑁂 𑀲𑀼𑀢𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑁂 𑀯𑀺𑀲𑁂𑀲𑀢𑁄 𑀦𑀦𑁆𑀤𑀲𑁆𑀲 𑀕𑁄𑀧𑀸𑀮𑀓𑀲𑁆𑀲 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀬𑀸𑀯 𑀅𑀭𑀳𑀢𑁆𑀢𑀸𑀘 𑀯𑀺𑀲𑁂𑀲𑀢𑁄 𑀅𑀢𑁆𑀣𑁄 𑀅𑀥𑀺𑀕𑀢𑁄.

𑀮𑀪𑁂𑀬𑁆𑀬𑀸𑀳𑀁 ¶ 𑀪𑀦𑁆𑀢𑁂 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀁 𑀉𑀧𑀲𑀫𑁆𑀧𑀤𑀁.

𑀢𑁂𑀦 𑀳𑀺 𑀢𑁆𑀯𑀁 𑀦𑀦𑁆𑀤 𑀲𑀸𑀫𑀺𑀓𑀸𑀦𑀁 𑀕𑀸𑀯𑁄 𑀦𑀺𑀬𑁆𑀬𑀸𑀢𑁂𑀳𑀺.

𑀕𑀫𑀺𑀲𑁆𑀲𑀦𑁆𑀢𑀺 ¶ 𑀪𑀦𑁆𑀢𑁂 𑀕𑀸𑀯𑁄 𑀯𑀘𑁆𑀙𑀕𑀺𑀤𑁆𑀥𑀺𑀦𑀺𑀬𑁄.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀅𑀝𑁆𑀞𑀫𑀁 𑀲𑀁𑀕𑀻𑀢𑀁 𑀓𑀺𑀁𑀲𑀼𑀓𑁄𑀧𑀫𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀓𑁆𑀓𑁂𑀲𑀼 𑀪𑀦𑁆𑀢𑁂 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂 𑀅𑀜𑁆𑀜𑀢𑀭𑀁 𑀓𑀸𑀭𑀓𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀅𑀜𑁆𑀜𑀢𑀭𑁄 𑀪𑀦𑁆𑀢𑁂 𑀓𑀸𑀭𑀓𑁄 𑀪𑀺𑀓𑁆𑀔𑀼 𑀘𑀢𑁆𑀢𑀸𑀭𑁄 𑀔𑀸𑀡𑀸𑀲𑀯𑁂 𑀪𑀺𑀓𑁆𑀔𑀽 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀁 𑀧𑀼𑀘𑁆𑀙𑀺𑀢𑁆𑀯𑀸 𑀅𑀲𑀦𑁆𑀢𑀼𑀝𑁆𑀞𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀧𑀜𑁆𑀳𑀸𑀯𑁂𑀬𑁆𑀬𑀸𑀓𑀭𑀡𑁂𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄 𑀪𑀦𑁆𑀢𑁂 𑀪𑀺𑀓𑁆𑀔𑀼𑀦𑁄 𑀤𑀲𑁆𑀲𑀦𑀁 𑀲𑀼𑀯𑀺𑀲𑀼𑀤𑁆𑀥𑀁 𑀳𑁄𑀢𑀻’’𑀢𑀺. 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀼 𑀧𑀼𑀭𑀺𑀲𑀲𑁆𑀲 𑀓𑀺𑀁𑀲𑀼𑀓𑁄 𑀅𑀤𑀺𑀝𑁆𑀞𑀧𑀼𑀩𑁆𑀩𑁄 𑀅𑀲𑁆𑀲, 𑀲𑁄 𑀬𑁂𑀦𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀓𑀺𑀁𑀲𑀼𑀓𑀲𑁆𑀲 𑀤𑀲𑁆𑀲𑀸𑀯𑀻 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀤𑀲𑀫𑀁 𑀲𑀁𑀕𑀻𑀢𑀁 𑀙𑀧𑁆𑀧𑀸𑀡𑀓𑁄𑀧𑀫𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀓𑁆𑀓𑁂𑀲𑀼𑀬𑁂𑀯 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂 𑀧𑀼𑀭𑀺𑀲𑁄 𑀅𑀭𑀼𑀕𑀢𑁆𑀢𑁄 𑀧𑀓𑁆𑀓𑀕𑀢𑁆𑀢𑁄 𑀲𑀭𑀯𑀦𑀁 𑀧𑀯𑀺𑀲𑁂𑀬𑁆𑀬𑀸’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀢𑀢𑁆𑀣 𑀪𑀕𑀯𑀢𑀸 𑀅𑀲𑀁𑀯𑀭𑁄 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑁂𑀲𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑀣𑀜𑁆𑀘 𑀪𑀺𑀓𑁆𑀔𑀯𑁂 𑀅𑀲𑀁𑀯𑀭𑁄 𑀳𑁄𑀢𑀺, 𑀇𑀥 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀧𑀺𑀬𑀭𑀽𑀧𑁂 𑀭𑀽𑀧𑁂 𑀅𑀥𑀺𑀫𑀼𑀘𑁆𑀘𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀭𑀽𑀧𑁂 𑀩𑁆𑀬𑀸𑀧𑀚𑁆𑀚𑀢𑀺, 𑀅𑀦𑀼𑀧𑀝𑁆𑀞𑀺𑀢𑀓𑀸𑀬𑀲𑁆𑀲𑀢𑀺 𑀘 𑀯𑀺𑀳𑀭𑀢𑀺 𑀧𑀭𑀺𑀢𑁆𑀢𑀘𑁂𑀢𑀲𑁄. 𑀢𑀜𑁆𑀘 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀬𑀢𑁆𑀣𑀲𑁆𑀲 𑀢𑁂 𑀉𑀧𑁆𑀧𑀦𑁆𑀦𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀢𑀢𑁆𑀣 𑀅𑀲𑀁𑀯𑀭𑁄 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑁂𑀲𑀺𑀢𑁄.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀢𑀢𑁆𑀣 𑀪𑀕𑀯𑀢𑀸 𑀲𑀁𑀯𑀭𑁄 𑀯𑀺𑀪𑀚𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀤𑁂𑀲𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑀣𑀜𑁆𑀘 𑀪𑀺𑀓𑁆𑀔𑀯𑁂 𑀲𑀁𑀯𑀭𑁄 𑀳𑁄𑀢𑀺, 𑀇𑀥 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀧𑀺𑀬𑀭𑀽𑀧𑁂 𑀭𑀽𑀧𑁂 𑀦𑀸𑀥𑀺𑀫𑀼𑀘𑁆𑀘𑀢𑀺, 𑀅𑀧𑁆𑀧𑀺𑀬𑀭𑀽𑀧𑁂 𑀭𑀽𑀧𑁂 𑀦 𑀩𑁆𑀬𑀸𑀧𑀚𑁆𑀚𑀢𑀻𑀢𑀺, 𑀏𑀯𑀫𑀸𑀤𑀺𑀦𑀸 ¶ 𑀪𑀦𑁆𑀢𑁂 𑀪𑀕𑀯𑀢𑀸 𑀢𑀢𑁆𑀣 𑀲𑀁𑀯𑀭𑁄 𑀯𑀺𑀪𑀚𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀤𑁂𑀲𑀺𑀢𑁄.

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 ¶ 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀯𑁂𑀤𑀦𑀸𑀲𑀁𑀬𑀼𑀢𑁆𑀢𑁂 𑀧𑀜𑁆𑀘𑀫𑀁 𑀤𑀝𑁆𑀞𑀩𑁆𑀩𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀓𑁆𑀓𑁂𑀲𑀼 𑀪𑀦𑁆𑀢𑁂 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀢𑀺𑀲𑁆𑀲𑁄 𑀇𑀫𑀸 𑀪𑀺𑀓𑁆𑀔𑀯𑁂 𑀯𑁂𑀤𑀦𑀸. 𑀓𑀢𑀫𑀸 𑀢𑀺𑀲𑁆𑀲𑁄, 𑀲𑀼𑀔𑀸 𑀯𑁂𑀤𑀦𑀸 𑀤𑀼𑀓𑁆𑀔𑀸𑀯𑁂𑀤𑀦𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀲𑀼𑀔𑀸 𑀪𑀺𑀓𑁆𑀔𑀯𑁂 𑀯𑁂𑀤𑀦𑀸 𑀤𑀼𑀓𑁆𑀔𑀢𑁄 𑀤𑀝𑁆𑀞𑀩𑁆𑀩𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀲𑀮𑁆𑀮𑀢𑁄 𑀤𑀝𑁆𑀞𑀩𑁆𑀩𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀅𑀦𑀺𑀘𑁆𑀘𑀢𑁄 𑀤𑀝𑁆𑀞𑀩𑁆𑀩𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀲𑀼𑀔𑀸 ¶ 𑀪𑀺𑀓𑁆𑀔𑀯𑁂 𑀯𑁂𑀤𑀦𑀸 𑀤𑀼𑀓𑁆𑀔𑀢𑁄 𑀤𑀝𑁆𑀞𑀩𑁆𑀩𑀸.

𑀬𑁄 𑀲𑀼𑀔𑀁 𑀤𑀼𑀓𑁆𑀔𑀢𑁄 𑀅𑀤𑁆𑀤𑀲, 𑀤𑀼𑀓𑁆𑀔𑀫𑀤𑁆𑀤𑀓𑁆𑀔𑀺 𑀲𑀮𑁆𑀮𑀢𑁄;

𑀅𑀤𑀼𑀓𑁆𑀔𑀫𑀲𑀼𑀔𑀁 𑀲𑀦𑁆𑀢𑀁, 𑀅𑀤𑁆𑀤𑀓𑁆𑀔𑀺𑀦𑀁 𑀅𑀦𑀺𑀘𑁆𑀘𑀢𑁄.

𑀲 𑀯𑁂 𑀲𑀫𑁆𑀫𑀤𑁆𑀤𑀲𑁄 𑀪𑀺𑀓𑁆𑀔𑀼, 𑀧𑀭𑀺𑀚𑀸𑀦𑀸𑀢𑀺 𑀯𑁂𑀤𑀦𑀸;

𑀲𑁄 𑀯𑁂𑀤𑀦𑀸 𑀧𑀭𑀺𑀜𑁆𑀜𑀸𑀬, 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀅𑀦𑀸𑀲𑀯𑁄;

𑀓𑀸𑀬𑀲𑁆𑀲 𑀪𑁂𑀤𑀸 𑀥𑀫𑁆𑀫𑀝𑁆𑀞𑁄, 𑀲𑀗𑁆𑀔𑁆𑀬𑀁 𑀦𑁄𑀧𑁂𑀢𑀺 𑀯𑁂𑀤𑀕𑀽.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀙𑀝𑁆𑀞𑀁 𑀲𑀮𑁆𑀮𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀓𑁆𑀓𑁂𑀲𑀼 𑀪𑀦𑁆𑀢𑁂 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀅𑀲𑁆𑀲𑀼𑀢𑀯𑀸 𑀪𑀺𑀓𑁆𑀔𑀯𑁂 𑀧𑀼𑀣𑀼𑀚𑁆𑀚𑀦𑁄 𑀲𑀼𑀔𑀫𑁆𑀧𑀺 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀤𑀼𑀓𑁆𑀔𑀫𑁆𑀧𑀺 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀫𑁆𑀧𑀺 𑀯𑁂𑀤𑀦𑀁 𑀯𑁂𑀤𑀬𑀢𑀺. 𑀲𑀼𑀢𑀯𑀸 𑀪𑀺𑀓𑁆𑀔𑀯𑁂 𑀅𑀭𑀺𑀬𑀲𑀸𑀯𑀓𑁄 𑀲𑀼𑀔𑀫𑁆𑀧𑀺 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀤𑀼𑀓𑁆𑀔𑀫𑁆𑀧𑀺 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀫𑁆𑀧𑀺 𑀯𑁂𑀤𑀦𑀁 𑀯𑁂𑀤𑀬𑀢𑀺. 𑀢𑀢𑁆𑀭 𑀪𑀺𑀓𑁆𑀔𑀯𑁂 𑀓𑁄 𑀯𑀺𑀲𑁂𑀲𑁄, 𑀓𑁄 𑀅𑀥𑀺𑀧𑁆𑀧𑀬𑀸𑀲𑁄, 𑀓𑀺𑀁 𑀦𑀸𑀦𑀸𑀓𑀭𑀡𑀁 𑀲𑀼𑀢𑀯𑀢𑁄 𑀅𑀭𑀺𑀬𑀪𑀸𑀯𑀓𑀲𑁆𑀲 𑀅𑀲𑁆𑀲𑀼𑀢𑀯𑀢𑀸 𑀧𑀼𑀣𑀼𑀚𑁆𑀚𑀦𑁂𑀦𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀚𑀫𑁆𑀩𑀼𑀔𑀸𑀤𑀓𑀲𑀁𑀬𑀼𑀢𑁆𑀢𑁂 ¶ 𑀆𑀯𑀼𑀲𑁄 𑀧𑀞𑀫𑀁 𑀦𑀺𑀩𑁆𑀩𑀸𑀦𑀧𑀜𑁆𑀳𑀸𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀫𑀕𑀥𑁂𑀲𑀼 𑀪𑀦𑁆𑀢𑁂 𑀦𑀸𑀮𑀓𑀕𑀸𑀫𑀓𑁂 𑀚𑀫𑁆𑀩𑀼𑀔𑀸𑀤𑀓𑀁 𑀧𑀭𑀺𑀩𑁆𑀩𑀸𑀚𑀓𑀁 𑀆𑀭𑀩𑁆𑀪 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀪𑀸𑀲𑀺𑀢𑀁. 𑀚𑀫𑁆𑀩𑀼𑀔𑀸𑀤𑀓𑁄 𑀪𑀦𑁆𑀢𑁂 𑀧𑀭𑀺𑀩𑁆𑀩𑀸𑀚𑀓𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 ‘‘𑀦𑀺𑀩𑁆𑀩𑀸𑀦𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢 𑀯𑀼𑀘𑁆𑀘𑀢𑀺, 𑀓𑀢𑀫𑀁 𑀦𑀼𑀔𑁄 𑀆𑀯𑀼𑀲𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀬𑁄 ¶ 𑀔𑁄 𑀆𑀯𑀼𑀲𑁄 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄, 𑀇𑀤𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀢𑀢𑀺𑀬𑀁 𑀲𑀁𑀕𑀻𑀢𑀁 𑀥𑀫𑁆𑀫𑀯𑀸𑀤𑀻𑀧𑀜𑁆𑀳𑀸𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀫𑀕𑀥𑁂𑀲𑀼𑀬𑁂𑀯 𑀪𑀦𑁆𑀢𑁂 𑀦𑀸𑀮𑀓𑀕𑀸𑀫𑁂 𑀚𑀫𑁆𑀩𑀼𑀔𑀸𑀤𑀓𑀁 𑀧𑀭𑀺𑀩𑁆𑀩𑀸𑀚𑀓𑀁 𑀆𑀭𑀩𑁆𑀪 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀪𑀸𑀲𑀺𑀢𑀁. 𑀚𑀫𑁆𑀩𑀼𑀔𑀸𑀤𑀓𑁄 𑀪𑀦𑁆𑀢𑁂 𑀧𑀭𑀺𑀩𑁆𑀩𑀸𑀚𑀓𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 ‘‘𑀓𑁂 𑀦𑀼 𑀔𑁄 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢 𑀮𑁄𑀓𑁂 𑀥𑀫𑁆𑀫𑀯𑀸𑀤𑀺𑀦𑁄, 𑀓𑁂 𑀮𑁄𑀓𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑀸, 𑀓𑁂 𑀮𑁄𑀓𑁂 𑀲𑀼𑀕𑀢𑀸’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀬𑁂 𑀔𑁄 𑀆𑀯𑀼𑀲𑁄 𑀭𑀸𑀕𑀧𑁆𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀤𑁄𑀲𑀧𑁆𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀫𑁄𑀳𑀧𑁆𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀢𑁂 𑀮𑁄𑀓𑁂 𑀥𑀫𑁆𑀫𑀯𑀸𑀤𑀺𑀦𑁄’’𑀢𑀺 𑀏𑀯𑀫𑀸𑀤𑀺𑀦𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓 𑀫𑀳𑀸𑀣𑁂𑀭𑁂𑀳𑀺 𑀧𑀭𑀺𑀬𑁄𑀲𑀸𑀦𑀲𑀼𑀢𑁆𑀢𑀪𑀸𑀯𑁂𑀦 𑀲𑀁𑀕𑀻𑀢𑀁 𑀤𑀼𑀓𑁆𑀓𑀭𑀧𑀜𑁆𑀳𑀸𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀫𑀕𑀥𑁂𑀲𑀼𑀬𑁂𑀯 𑀦𑀸𑀮𑀓𑀕𑀸𑀫𑁂 𑀚𑀫𑁆𑀩𑀼𑀔𑀸𑀤𑀓𑀁 𑀧𑀭𑀺𑀩𑁆𑀩𑀸𑀚𑀓𑀁 𑀆𑀭𑀩𑁆𑀪 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀪𑀸𑀲𑀺𑀢𑀁. 𑀚𑀫𑁆𑀩𑀼𑀔𑀸𑀤𑀓𑁄 𑀪𑀦𑁆𑀢𑁂 𑀧𑀭𑀺𑀩𑁆𑀩𑀸𑀚𑀓𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 ‘‘𑀓𑀺𑀁 𑀦𑀼 𑀔𑁄 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀤𑀼𑀓𑁆𑀓𑀭’’𑀦𑁆𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀧𑀩𑁆𑀩𑀚𑁆𑀚𑀸 𑀔𑁄 𑀆𑀯𑀼𑀲𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀤𑀼𑀓𑁆𑀓𑀭𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀫𑁄𑀕𑁆𑀕𑀮𑁆𑀮𑀸𑀦𑀲𑀁𑀬𑀼𑀢𑁆𑀢𑁂 ¶ 𑀆𑀯𑀼𑀲𑁄 𑀤𑀲𑀫𑀁 𑀲𑀁𑀕𑀻𑀢𑀁 𑀲𑀓𑁆𑀓𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀤𑁂𑀯𑁂𑀲𑀼 𑀪𑀦𑁆𑀢𑁂 𑀢𑀸𑀯𑀢𑀺𑀁𑀲𑁂𑀲𑀼 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀆𑀭𑀩𑁆𑀪 ‘‘𑀲𑀸𑀥𑀼 𑀔𑁄 𑀤𑁂𑀯𑀸𑀦𑀫𑀺𑀦𑁆𑀤 𑀩𑀼𑀤𑁆𑀥𑀲𑀭𑀡𑀕𑀫𑀦𑀁 𑀳𑁄𑀢𑀺, 𑀩𑀼𑀤𑁆𑀥𑀲𑀭𑀡𑀕𑀫𑀦𑀳𑁂𑀢𑀼 𑀔𑁄 𑀤𑁂𑀯𑀸𑀦𑀫𑀺𑀦𑁆𑀤 ¶ 𑀏𑀯𑀫𑀺𑀥𑁂𑀓𑀘𑁆𑀘𑁂 𑀲𑀢𑁆𑀢𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀆𑀬𑀲𑁆𑀫𑀢𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁂𑀦 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀘𑀺𑀢𑁆𑀢𑀲𑀁𑀬𑀼𑀢𑁆𑀢𑁂 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀅𑀝𑁆𑀞𑀫𑀁 𑀲𑀁𑀕𑀻𑀢𑀁 𑀦𑀺𑀕𑀡𑁆𑀞𑀦𑀸𑀝𑀧𑀼𑀢𑁆𑀢𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀫𑀘𑁆𑀙𑀺𑀓𑀸𑀲𑀡𑁆𑀟𑁂 𑀪𑀦𑁆𑀢𑁂 𑀦𑀺𑀕𑀡𑁆𑀞𑀁 𑀦𑀸𑀝𑀧𑀼𑀢𑁆𑀢𑀁 𑀆𑀭𑀩𑁆𑀪 𑀘𑀺𑀢𑁆𑀢𑁂𑀦 𑀕𑀳𑀧𑀢𑀺𑀦𑀸 𑀪𑀸𑀲𑀺𑀢𑀁. 𑀦𑀺𑀕𑀡𑁆𑀞𑁄 𑀪𑀦𑁆𑀢𑁂 𑀦𑀸𑀝𑀧𑀼𑀢𑁆𑀢𑁄 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 ‘‘𑀲𑀤𑁆𑀤𑀳𑀲𑀺 𑀢𑁆𑀯𑀁 𑀕𑀳𑀧𑀢𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀢𑁆𑀣𑀺 𑀅𑀯𑀺𑀢𑀓𑁆𑀓𑁄 𑀅𑀯𑀺𑀘𑀸𑀭𑁄 𑀲𑀫𑀸𑀥𑀺, 𑀅𑀢𑁆𑀣𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀦𑀺𑀭𑁄𑀥𑁄’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀦 𑀔𑁆𑀯𑀸𑀳𑀁 𑀏𑀢𑁆𑀣 𑀪𑀦𑁆𑀢𑁂 𑀪𑀕𑀯𑀢𑁄 𑀲𑀤𑁆𑀥𑀸𑀬 𑀕𑀘𑁆𑀙𑀸𑀫𑀺, 𑀅𑀢𑁆𑀣𑀺 𑀅𑀯𑀺𑀢𑀓𑁆𑀓𑁄 𑀅𑀯𑀺𑀘𑀸𑀭𑁄 𑀲𑀫𑀸𑀥𑀺, 𑀅𑀢𑁆𑀣𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀦𑀺𑀭𑁄𑀥𑁄’’𑀢𑀺 𑀏𑀯𑀫𑀸𑀤𑀺𑀦𑀸 𑀘𑀺𑀢𑁆𑀢𑁂𑀦 𑀕𑀳𑀧𑀢𑀺𑀦𑀸 𑀪𑀸𑀲𑀺𑀢𑀁.

𑀬𑀸𑀯 𑀉𑀚𑀼𑀓𑁄 𑀘𑀸𑀬𑀁 𑀘𑀺𑀢𑁆𑀢𑁄 𑀕𑀳𑀧𑀢𑀺.

‘‘𑀅𑀳𑀁 ¶ 𑀔𑁄 𑀪𑀦𑁆𑀢𑁂 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺, 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺’’ 𑁋

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀦𑀯𑀫𑀁 𑀲𑀁𑀕𑀻𑀢𑀁 𑀅𑀘𑁂𑀮𑀓𑀲𑁆𑀲𑀧𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀢𑁆𑀣𑁂𑀯 𑀪𑀦𑁆𑀢𑁂 𑀫𑀘𑁆𑀙𑀺𑀓𑀸𑀲𑀡𑁆𑀟𑁂 𑀅𑀘𑁂𑀮𑀁 𑀓𑀲𑁆𑀲𑀧𑀁 𑀆𑀭𑀩𑁆𑀪 𑀘𑀺𑀢𑁆𑀢𑁂𑀦 𑀕𑀳𑀧𑀢𑀺𑀦𑀸 𑀪𑀸𑀲𑀺𑀢𑀁. 𑀅𑀘𑁂𑀮𑁄 𑀪𑀦𑁆𑀢𑁂 𑀓𑀲𑁆𑀲𑀧𑁄 𑀘𑀺𑀢𑁆𑀢𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 ‘‘𑀇𑀫𑁂𑀳𑀺 𑀧𑀦 𑀢𑁂 𑀕𑀳𑀧𑀢𑀺 𑀢𑀺𑀁𑀲𑀫𑀢𑁆𑀢𑁂𑀳𑀺 𑀯𑀲𑁆𑀲𑁂𑀳𑀺 𑀅𑀢𑁆𑀣𑀺 𑀓𑁄𑀘𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀕𑀺𑀳𑀺𑀦𑁄𑀧𑀺 𑀲𑀺𑀬𑀸 𑀪𑀦𑁆𑀢𑁂 𑀅𑀳𑀜𑁆𑀳𑀺 𑀪𑀦𑁆𑀢𑁂 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀺, 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀘𑀺𑀢𑁆𑀢𑁂𑀦 𑀕𑀳𑀧𑀢𑀺𑀦𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 ¶ 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀕𑀸𑀫𑀡𑀺𑀲𑀁𑀬𑀼𑀢𑁆𑀢𑁂 𑀧𑀞𑀫𑀁 𑀘𑀡𑁆𑀟𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 ¶ 𑀪𑀦𑁆𑀢𑁂 𑀘𑀡𑁆𑀟𑀁 𑀕𑀸𑀫𑀡𑀺𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀘𑀡𑁆𑀟𑁄 𑀪𑀦𑁆𑀢𑁂 𑀕𑀸𑀫𑀡𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀓𑁄 𑀦𑀼 𑀔𑁄 𑀪𑀦𑁆𑀢𑁂 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀘𑀡𑁆𑀟𑁄 𑀘𑀡𑁆𑀟𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀓𑁄 𑀧𑀦 𑀪𑀦𑁆𑀢𑁂 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀫𑀺𑀥𑁂𑀓𑀘𑁆𑀘𑁄 𑀲𑁄𑀭𑀢𑁄 𑀲𑁄𑀭𑀢𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀇𑀥 𑀕𑀸𑀫𑀡𑀺 𑀏𑀓𑀘𑁆𑀘𑀲𑁆𑀲 𑀭𑀸𑀕𑁄 𑀅𑀧𑁆𑀧𑀳𑀻𑀦𑁄 𑀳𑁄𑀢𑀺, 𑀭𑀸𑀕𑀲𑁆𑀲 𑀅𑀧𑁆𑀧𑀳𑀻𑀦𑀢𑁆𑀢𑀸 𑀧𑀭𑁂 𑀓𑁄𑀧𑁂𑀦𑁆𑀢𑀺, 𑀧𑀭𑁂𑀳𑀺 𑀓𑁄𑀧𑀺𑀬𑀫𑀸𑀦𑁄 𑀓𑁄𑀧𑀁 𑀧𑀸𑀢𑀼𑀓𑀭𑁄𑀢𑀺, 𑀲𑁄 𑀘𑀡𑁆𑀟𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀲𑀢𑁆𑀢𑀫𑀁 𑀲𑀁𑀕𑀻𑀢𑀁 𑀔𑁂𑀢𑁆𑀢𑀽𑀧𑀫𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀦𑀸𑀴𑀦𑁆𑀤𑀸𑀬𑀁 𑀪𑀦𑁆𑀢𑁂 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑁂 𑀅𑀲𑀺𑀩𑀦𑁆𑀥𑀓𑀧𑀼𑀢𑁆𑀢𑀁 𑀕𑀸𑀫𑀡𑀺𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀅𑀲𑀺𑀩𑀦𑁆𑀥𑀓𑀧𑀼𑀢𑁆𑀢𑁄 𑀪𑀦𑁆𑀢𑁂 𑀕𑀸𑀫𑀡𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀦𑀦𑀼 𑀪𑀦𑁆𑀢𑁂 𑀪𑀕𑀯𑀸 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀢𑀻𑀢𑀺. 𑀏𑀯𑀁 𑀕𑀸𑀫𑀡𑀺 𑀢𑀣𑀸𑀕𑀢𑁄 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀢𑀻𑀢𑀺. 𑀅𑀣 𑀓𑀺𑀜𑁆𑀘𑀭𑀳𑀺 𑀪𑀦𑁆𑀢𑁂 𑀪𑀕𑀯𑀸 𑀏𑀓𑀘𑁆𑀘𑀸𑀦𑀁 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀏𑀓𑀘𑁆𑀘𑀸𑀦𑀁 𑀦𑁄 𑀢𑀣𑀸 ¶ 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀢𑁂𑀦 𑀳𑀺 𑀕𑀸𑀫𑀡𑀺 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀬𑀣𑀸 𑀢𑁂 𑀔𑀫𑁂𑀬𑁆𑀬, 𑀢𑀣𑀸 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓 𑀫𑀳𑀸𑀣𑁂𑀭𑁂𑀳𑀺 𑀅𑀝𑁆𑀞𑀫𑀁 𑀲𑀁𑀕𑀻𑀢𑀁 𑀲𑀗𑁆𑀔𑀥𑀫𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀦𑀸𑀴𑀦𑁆𑀤𑀸𑀬𑀁𑀬𑁂𑀯 𑀪𑀦𑁆𑀢𑁂 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑁂 𑀅𑀲𑀺𑀩𑀦𑁆𑀥𑀓𑀧𑀼𑀢𑁆𑀢𑀁 𑀕𑀸𑀫𑀡𑀺𑀁 𑀦𑀺𑀕𑀡𑁆𑀞𑀲𑀸𑀯𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀪𑀕𑀯𑀸 𑀪𑀦𑁆𑀢𑁂 𑀅𑀲𑀺𑀩𑀦𑁆𑀥𑀓𑀧𑀼𑀢𑁆𑀢𑀁 𑀕𑀸𑀫𑀡𑀺𑀁 𑀦𑀺𑀕𑀡𑁆𑀞𑀲𑀸𑀯𑀓𑀁 𑀏𑀢𑀤𑀯𑁄𑀘 ‘‘𑀓𑀣𑀁 𑀦𑀼 𑀔𑁄 𑀕𑀸𑀫𑀡𑀺 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺. 𑀏𑀯𑀁 𑀔𑁄 𑀪𑀦𑁆𑀢𑁂 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 ‘‘𑀬𑁄 𑀓𑁄𑀘𑀺 𑀧𑀸𑀡𑀁 𑀅𑀢𑀺𑀧𑀸𑀢𑁂𑀢𑀺, 𑀲𑀩𑁆𑀩𑁄 𑀲𑁄 𑀆𑀧𑀸𑀬𑀺𑀓𑁄 𑀦𑁂𑀭𑀬𑀺𑀓𑁄. (𑀧𑁂𑀬𑁆𑀬𑀸𑀮) 𑀬𑀁𑀩𑀳𑀼𑀮𑀁 𑀬𑀁𑀩𑀳𑀼𑀮𑀁 𑀯𑀺𑀳𑀭𑀢𑀺, 𑀢𑁂𑀦 𑀢𑁂𑀦 𑀦𑀻𑀬𑀢𑀻’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀬𑀁𑀩𑀳𑀼𑀮𑀁 𑀬𑀁𑀩𑀳𑀼𑀮𑀜𑁆𑀘 𑀕𑀸𑀫𑀡𑀺 𑀯𑀺𑀳𑀭𑀢𑀺, 𑀢𑁂𑀦 𑀢𑁂𑀦 𑀦𑀻𑀬𑀢𑀺, 𑀏𑀯𑀁 𑀲𑀦𑁆𑀢𑁂 𑀦 𑀓𑁄𑀘𑀺 𑀆𑀧𑀸𑀬𑀺𑀓𑁄 𑀦𑁂𑀭𑀬𑀺𑀓𑁄 𑀪𑀯𑀺𑀲𑁆𑀲𑀢𑀺, 𑀬𑀣𑀸 𑀦𑀺𑀕𑀡𑁆𑀞𑀲𑁆𑀲 𑀦𑀸𑀝𑀧𑀼𑀢𑁆𑀢𑀲𑁆𑀲 𑀯𑀘𑀦’’𑀦𑁆𑀢𑀺 𑀏𑀯𑀁 𑀔𑁄 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀢𑀢𑁆𑀣 𑀪𑀕𑀯𑀢𑀸 𑀬𑀁𑀩𑀳𑀼𑀮𑀯𑀸𑀤𑁂 𑀤𑁄𑀲𑁄 𑀧𑀓𑀸𑀲𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀕𑀸𑀫𑀡𑀺, 𑀬𑁄 𑀲𑁄 𑀧𑀼𑀭𑀺𑀲𑁄 𑀧𑀸𑀡𑀸𑀢𑀺𑀧𑀸𑀢𑀻 𑀭𑀢𑁆𑀢𑀺𑀬𑀸 𑀯𑀸 𑀤𑀺𑀯𑀲𑀲𑁆𑀲 𑀯𑀸 𑀲𑀫𑀬𑀸𑀲𑀫𑀬𑀁 𑀉𑀧𑀸𑀤𑀸𑀬 𑀓𑀢𑀫𑁄 𑀩𑀳𑀼𑀢𑀭𑁄 𑀲𑀫𑀬𑁄 𑀬𑀁 𑀯𑀸𑀲𑁄 𑀧𑀸𑀡𑀫𑀢𑀺𑀧𑀸𑀢𑁂𑀢𑀺. 𑀬𑀁 𑀯𑀸 𑀲𑁄 𑀧𑀸𑀡𑀁 𑀦𑀸𑀢𑀺𑀧𑀸𑀢𑁂𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀢𑀢𑁆𑀣 𑀪𑀕𑀯𑀢𑀸 𑀅𑀲𑀺𑀩𑀦𑁆𑀥𑀓𑀁 𑀦𑀺𑀕𑀡𑁆𑀞𑀦𑀸𑀝𑀧𑀼𑀢𑁆𑀢𑀲𑁆𑀲 𑀲𑀸𑀯𑀓𑀁 𑀕𑀸𑀫𑀡𑀺𑀁 𑀧𑀼𑀘𑁆𑀙𑀺𑀢𑁆𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 𑀬𑀁𑀩𑀳𑀼𑀮𑀯𑀸𑀤𑁂 𑀤𑁄𑀲𑁄 𑀧𑀓𑀸𑀲𑀺𑀢𑁄.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀢𑀢𑁆𑀣 𑀪𑀕𑀯𑀢𑀸 𑀅𑀦𑁂𑀓𑀁𑀲 𑀯𑀺𑀧𑀸𑀓𑀓𑀫𑁆𑀫𑀲𑁆𑀲 𑀏𑀓𑀁 𑀲𑀯𑀺𑀧𑀸𑀓𑀯𑀸𑀤𑁂 𑀤𑁄𑀲𑁄 𑀧𑀓𑀸𑀲𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀇𑀥 𑀕𑀸𑀫𑀡𑀺 𑀏𑀓𑀘𑁆𑀘𑁄 𑀲𑀢𑁆𑀣𑀸 𑀏𑀯𑀁𑀯𑀸𑀤𑀻 𑀳𑁄𑀢𑀺 𑀏𑀯𑀁𑀤𑀺𑀝𑁆𑀞𑀺 𑀬𑁄 𑀓𑁄𑀘𑀺 𑀧𑀸𑀡𑀫𑀢𑀺𑀧𑀸𑀢𑁂𑀢𑀺, 𑀲𑀩𑁆𑀩𑁄 𑀲𑁄 𑀆𑀧𑀸𑀬𑀺𑀓𑁄 𑀦𑁂𑀭𑀬𑀺𑀓𑁄𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀢𑀢𑁆𑀣 𑀪𑀕𑀯𑀢𑀸 𑀅𑀦𑁂𑀓𑀁𑀲 𑀓𑀫𑁆𑀫𑀯𑀺𑀧𑀸𑀓𑀲𑁆𑀲 𑀏𑀓𑀁𑀲𑀯𑀺𑀧𑀸𑀓𑀯𑀸𑀤𑁂 𑀤𑁄𑀲𑁄 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀧𑀓𑀸𑀲𑀺𑀢𑁄.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀢𑀢𑁆𑀣 𑀪𑀕𑀯𑀢𑀸 𑀬𑀣𑀸𑀥𑀫𑁆𑀫𑀲𑀸𑀲𑀦𑁂 𑀕𑀼𑀡𑁄𑀯𑀺𑀪𑀚𑀺𑀢𑁆𑀯𑀸 𑀧𑀓𑀸𑀲𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀇𑀥 ¶ 𑀧𑀦 𑀕𑀸𑀫𑀡𑀺 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄𑀧𑀼𑀭𑀺𑀲 𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸, 𑀲𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀧𑀸𑀡𑀸𑀢𑀺𑀧𑀸𑀢𑀁 𑀕𑀭𑀳𑀢𑀺 𑀯𑀺𑀕𑀭𑀳𑀢𑀺. ‘‘𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀣𑀸’’𑀢𑀺 𑀘𑀸𑀳𑀸𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀢𑀢𑁆𑀣 𑀬𑀣𑀸𑀥𑀫𑁆𑀫𑀲𑀸𑀲𑀦𑁂 𑀕𑀼𑀡𑁄 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀧𑀓𑀸𑀲𑀺𑀢𑁄.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀏𑀓𑀸𑀤𑀲𑀫𑀁 𑀲𑀁𑀕𑀻𑀢𑀁 𑀪𑀤𑁆𑀭𑀓𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀫𑀮𑁆𑀮𑁂𑀲𑀼 𑀪𑀦𑁆𑀢𑁂 𑀉𑀭𑀼𑀯𑁂𑀮𑀓𑀧𑁆𑀧𑁂𑀦𑀸𑀫 𑀫𑀮𑁆𑀮𑀸𑀦𑀁 𑀦𑀺𑀕𑀫𑁂 𑀪𑀤𑁆𑀭𑀓𑀁 𑀕𑀸𑀫𑀡𑀺𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀪𑀤𑁆𑀭𑀓𑁄 𑀪𑀦𑁆𑀢𑁂 𑀕𑀸𑀫𑀡𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀲𑀸𑀥𑀼 𑀫𑁂 𑀪𑀦𑁆𑀢𑁂 𑀪𑀕𑀯𑀸 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀤𑁂𑀲𑁂𑀢𑀽’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀅𑀳𑀜𑁆𑀘𑁂 𑀢𑁂 𑀕𑀸𑀫𑀡𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑀆𑀭𑀩𑁆𑀪 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀤𑁂𑀲𑁂𑀬𑁆𑀬𑀁 ‘𑀏𑀯𑀁 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦’𑀦𑁆𑀢𑀺. 𑀢𑀢𑁆𑀭 𑀢𑁂 𑀲𑀺𑀬𑀸 𑀓𑀗𑁆𑀔𑀸 𑀲𑀺𑀬𑀸 𑀯𑀺𑀫𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀲𑀸𑀥𑀼 ¶ 𑀫𑁂 𑀪𑀦𑁆𑀢𑁂 𑀪𑀕𑀯𑀸 𑀤𑀼𑀓𑁆𑀔𑀲𑁆𑀲

𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀤𑁂𑀲𑁂𑀢𑀼𑁋

‘‘𑀢𑀁 ¶ 𑀓𑀺𑀁 𑀫𑀜𑁆𑀜𑀲𑀺 𑀕𑀸𑀫𑀡𑀺, 𑀅𑀢𑁆𑀣𑀺 𑀉𑀭𑀼𑀯𑁂𑀮𑀓𑀧𑁆𑀧𑁂 𑀫𑀦𑀼𑀲𑁆𑀲𑀸’’ 𑁋

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 ¶ 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀕𑀸𑀫𑀡𑀺𑀲𑀁𑀬𑀼𑀢𑁆𑀢𑁂 𑀤𑁆𑀯𑀸𑀤𑀲𑀫𑀁 𑀲𑀁𑀕𑀻𑀢𑀁 𑀭𑀸𑀲𑀺𑀬𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀫𑀮𑁆𑀮𑁂𑀲𑀼 𑀪𑀦𑁆𑀢𑁂 𑀉𑀭𑀼𑀯𑁂𑀮𑀓𑀧𑁆𑀧𑁂𑀦𑀸𑀫 𑀫𑀮𑁆𑀮𑀸𑀦𑀁 𑀦𑀺𑀕𑀫𑁂 𑀭𑀸𑀲𑀺𑀬𑀁 𑀕𑀸𑀫𑀡𑀺𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀭𑀸𑀲𑀺𑀬𑁄 𑀪𑀦𑁆𑀢𑁂 𑀕𑀸𑀫𑀡𑀺 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀤𑁄𑀘 ¶ ‘‘𑀲𑀼𑀢𑀁 𑀫𑁂 𑀪𑀦𑁆𑀢𑁂 ‘𑀲𑀫𑀡𑁄 𑀕𑁄𑀢𑀫𑁄 𑀲𑀩𑁆𑀩𑀁 𑀢𑀧𑀁 𑀕𑀭𑀳𑀢𑀺, 𑀲𑀩𑁆𑀩𑀁 𑀢𑀫𑀲𑁆𑀲𑀺𑀁 𑀮𑀽𑀔𑀚𑀻𑀯𑀺𑀁 𑀏𑀓𑀁𑀲𑁂𑀦 𑀉𑀧𑀯𑀤𑀢𑀺 𑀉𑀧𑀓𑁆𑀓𑁄𑀲𑀢𑀻’’𑀢𑀺. 𑀬𑁂 𑀢𑁂 𑀪𑀦𑁆𑀢𑁂 𑀏𑀯𑀫𑀸𑀳𑀁𑀲𑀼 ‘𑀲𑀫𑀡𑁄 𑀕𑁄𑀢𑀫𑁄 𑀲𑀩𑁆𑀩𑀁 𑀢𑀧𑀁 𑀕𑀭𑀳𑀢𑀺, 𑀲𑀩𑁆𑀩𑀁 𑀢𑀧𑀲𑁆𑀲𑀺𑀁 𑀮𑀽𑀔𑀚𑀻𑀯𑀺𑀁 𑀏𑀓𑀁𑀲𑁂𑀦 𑀉𑀧𑀯𑀤𑀢𑀺 𑀉𑀧𑀓𑁆𑀓𑁄𑀲𑀢𑀻’’𑀢𑀺. 𑀓𑀘𑁆𑀘𑀺 𑀢𑁂 𑀪𑀦𑁆𑀢𑁂 𑀪𑀕𑀯𑀢𑁄 𑀯𑀼𑀢𑁆𑀢𑀯𑀸𑀤𑀺𑀦𑁄, 𑀦 𑀘 𑀪𑀕𑀯𑀦𑁆𑀢𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁄𑀦𑁆𑀢𑀻’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀬𑁂 𑀢𑁂 𑀕𑀸𑀫𑀡𑀺 𑀏𑀯𑀫𑀸𑀳𑀁𑀲𑀼 ‘‘𑀲𑀫𑀡𑁄 𑀕𑁄𑀢𑀫𑁄 𑀲𑀩𑁆𑀩𑀁 𑀢𑀧𑀁 𑀕𑀭𑀳𑀢𑀺, 𑀲𑀩𑁆𑀩𑀁 𑀢𑀧𑀲𑁆𑀲𑀺𑀁 𑀮𑀽𑀔𑀚𑀻𑀯𑀺𑀁 𑀏𑀓𑀁𑀲𑁂𑀦 𑀉𑀧𑀯𑀤𑀢𑀺 𑀉𑀧𑀓𑁆𑀓𑁄𑀲𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀢𑀢𑁆𑀣 𑀪𑀕𑀯𑀢𑀸 𑀕𑀭𑀳𑀺𑀢𑀩𑁆𑀩𑀸𑀕𑀭𑀳𑀺𑀢𑀩𑁆𑀩𑀸 𑀓𑀸𑀫𑀪𑁄𑀕𑀺𑀦𑁄 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀚𑀺𑀢𑁆𑀯𑀸 𑀧𑀓𑀸𑀲𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀬𑁄 𑀔𑁄 𑀫𑁂 𑀕𑀸𑀫𑀡𑀺 𑀓𑀸𑀫𑀪𑁄𑀕𑀺𑀦𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄. 𑀇𑀥 𑀕𑀸𑀫𑀡𑀺 𑀏𑀓𑀘𑁆𑀘𑁄 𑀓𑀸𑀫𑀪𑁄𑀕𑀻 𑀅𑀥𑀫𑁆𑀫𑁂𑀦 ¶ 𑀪𑁄𑀕𑁂 𑀧𑀭𑀺𑀬𑁂𑀲𑀢𑀺 𑀲𑀸𑀳𑀲𑁂𑀦, 𑀅𑀥𑀫𑁆𑀫𑁂𑀦 𑀪𑁄𑀕𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀲𑀸𑀳𑀲𑁂𑀦 𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑀺 𑀦 𑀧𑀻𑀡𑁂𑀢𑀺, 𑀦 𑀲𑀁𑀯𑀺𑀪𑀚𑀢𑀺 𑀦 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀢𑀢𑁆𑀣 𑀪𑀕𑀯𑀢𑀸 𑀕𑀭𑀳𑀺𑀢𑀩𑁆𑀩𑀸𑀕𑀭𑀳𑀺𑀢𑀩𑁆𑀩𑀸 𑀓𑀸𑀫𑀪𑁄𑀕𑀺𑀦𑁄 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀚𑀺𑀢𑁆𑀯𑀸 𑀧𑀓𑀸𑀲𑀺𑀢𑀸.

𑀧𑀼𑀘𑁆𑀙𑀸 𑁋 𑀓𑀣𑀜𑁆𑀘𑀸𑀯𑀼𑀲𑁄 ¶ 𑀢𑀢𑁆𑀣 𑀪𑀕𑀯𑀢𑀸 𑀕𑀭𑀳𑀺𑀢𑀩𑁆𑀩𑀸𑀕𑀭𑀳𑀺𑀢𑀩𑁆𑀩𑀸 𑀢𑀧𑀲𑁆𑀲𑀺𑀦𑁄 𑀮𑀽𑀔𑀚𑀻𑀯𑀺𑀦𑁄 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀚𑀺𑀢𑁆𑀯𑀸 𑀧𑀓𑀸𑀲𑀺𑀢𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀢𑀬𑁄 𑀫𑁂 𑀕𑀸𑀫𑀡𑀺 𑀢𑀧𑀲𑁆𑀲𑀺𑀦𑁄 𑀮𑀽𑀔𑀚𑀻𑀯𑀺𑀦𑁄 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀢𑀬𑁄. 𑀇𑀥 𑀕𑀸𑀫𑀡𑀻 𑀏𑀓𑀘𑁆𑀘𑁄 𑀢𑀧𑀲𑁆𑀲𑀻 𑀮𑀽𑀔𑀚𑀻𑀯𑀻 𑀲𑀤𑁆𑀥𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺 ‘‘𑀅𑀧𑁆𑀧𑁂𑀯 𑀦𑀸𑀫 𑀓𑀼𑀲𑀮𑀁 𑀥𑀫𑁆𑀫𑀁 𑀅𑀥𑀺𑀕𑀘𑁆𑀙𑁂𑀬𑁆𑀬𑀁, 𑀅𑀧𑁆𑀧𑁂𑀯 𑀦𑀸𑀫 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁 𑀲𑀘𑁆𑀙𑀺𑀓𑀭𑁂𑀬𑁆𑀬’’𑀦𑁆𑀢𑀺, 𑀲𑁄 𑀅𑀢𑁆𑀢𑀸𑀦𑀁 𑀆𑀢𑀸𑀧𑁂𑀢𑀺 𑀧𑀭𑀺𑀢𑀸𑀧𑁂𑀢𑀺, 𑀓𑀼𑀲𑀮𑀜𑁆𑀘 𑀥𑀫𑁆𑀫𑀁 𑀦𑀸𑀥𑀺𑀕𑀘𑁆𑀙𑀢𑀺, 𑀉𑀢𑁆𑀢𑀭𑀺 𑀘 𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑀁 𑀦 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀢𑀢𑁆𑀣 𑀪𑀕𑀯𑀢𑀸 𑀕𑀭𑀳𑀺𑀢𑀩𑁆𑀩𑀸𑀕𑀭𑀳𑀺𑀢𑀩𑁆𑀩𑀸 𑀢𑀧𑀲𑁆𑀲𑀺𑀦𑁄 𑀮𑀽𑀔𑀚𑀻𑀯𑀺𑀦𑁄 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀚𑀺𑀢𑁆𑀯𑀸 𑀧𑀓𑀸𑀲𑀺𑀢𑀸.

𑀧𑀼𑀘𑁆𑀙𑀸 𑁋 𑀅𑀩𑁆𑀬𑀸𑀓𑀢𑀲𑀁𑀬𑀼𑀢𑁆𑀢𑁂 ¶ 𑀧𑀦𑀸𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓 𑀫𑀳𑀸𑀣𑁂𑀭𑁂𑀳𑀺 𑀧𑀞𑀫𑀁 𑀲𑀁𑀕𑀻𑀢𑀁 𑀔𑁂𑀫𑀸𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁. 𑀓𑀣𑀜𑁆𑀘 𑀢𑀁 𑀪𑀕𑀯𑀢𑀸𑀧𑀺 𑀧𑀼𑀦 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀅𑀦𑁆𑀢𑀭𑀸 𑀘 𑀪𑀦𑁆𑀢𑁂 𑀲𑀸𑀯𑀢𑁆𑀣𑀺𑀁 𑀅𑀦𑁆𑀢𑀭𑀸 𑀘 𑀲𑀸𑀓𑁂𑀢𑀁 𑀢𑁄𑀭𑀡𑀯𑀢𑁆𑀣𑀼𑀲𑁆𑀫𑀺𑀁 𑀧𑀤𑁂𑀲𑁂 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀆𑀭𑀩𑁆𑀪 𑀔𑁂𑀫𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀸𑀲𑀺𑀢𑀁. 𑀭𑀸𑀚𑀸 𑀪𑀦𑁆𑀢𑁂 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀬𑁂𑀦 𑀔𑁂𑀫𑀸 𑀪𑀺𑀓𑁆𑀔𑀼𑀦𑀻 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀪𑀦𑁆𑀢𑁂 𑀭𑀸𑀚𑀸 𑀧𑀲𑁂𑀦𑀤𑀺𑀓𑁄𑀲𑀮𑁄 𑀔𑁂𑀫𑀁 𑀪𑀺𑀓𑁆𑀔𑀼𑀦𑀺𑀁 𑀏𑀢𑀤𑀯𑁄𑀘 ‘‘𑀓𑀺𑀁 𑀦𑀼𑀔𑁄 𑀅𑀬𑁆𑀬𑁂 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁𑀫𑀭𑀡𑀸’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁 𑀫𑀳𑀸𑀭𑀸𑀚 𑀪𑀕𑀯𑀢𑀸 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀔𑁂𑀫𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀪𑀸𑀲𑀺𑀢𑀁. 𑀪𑀕𑀯𑀢𑀸 𑀘 𑀪𑀦𑁆𑀢𑁂 𑀅𑀧𑀭𑁂𑀦 𑀲𑀫𑀬𑁂𑀦 𑀭𑀜𑁆𑀜𑀸 𑀧𑀲𑁂𑀦𑀤𑀺𑀓𑁄𑀲𑀮𑁂𑀦 𑀧𑀼𑀝𑁆𑀞𑁂𑀦 𑀏𑀯𑀫𑁂𑀯 𑀧𑀼𑀦 𑀪𑀸𑀲𑀺𑀢𑀁.

𑀓𑀺𑀁 ¶ 𑀧𑀦𑀬𑁆𑀬𑁂 𑀦𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀦𑀯𑀫𑀁 𑀲𑀁𑀕𑀻𑀢𑀁 𑀓𑀼𑀢𑀽𑀳𑀮𑀲𑀸𑀮𑀸𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀯𑁂𑀲𑀸𑀮𑀺𑀬𑀁 𑀪𑀦𑁆𑀢𑁂 𑀯𑀘𑁆𑀙𑀕𑁄𑀢𑁆𑀢𑀁 𑀧𑀭𑀺𑀩𑁆𑀩𑀸𑀚𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀯𑀘𑁆𑀙𑀕𑁄𑀢𑁆𑀢𑁄 𑀪𑀦𑁆𑀢𑁂 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀧𑀼𑀭𑀺𑀫𑀸𑀦𑀺 𑀪𑁄 𑀕𑁄𑀢𑀫 𑀤𑀺𑀯𑀲𑀸𑀦𑀺 𑀧𑀼𑀭𑀺𑀫𑀢𑀭𑀸𑀦𑀺 𑀲𑀫𑁆𑀩𑀳𑀼𑀮𑀸𑀦𑀁 𑀦𑀸𑀦𑀸𑀢𑀺𑀢𑁆𑀣𑀺𑀬𑀸𑀦𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀓𑀼𑀢𑀽𑀳𑀮𑀲𑀸𑀮𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀬𑀫𑀦𑁆𑀢𑀭𑀓𑀣𑀸 𑀉𑀤𑀧𑀸𑀤𑀻’’𑀢𑀺 𑀏𑀯𑀫𑀸𑀤𑀺𑀓𑀁 𑀯𑀘𑀦𑀁 𑀅𑀯𑁄𑀘. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀅𑀮𑀜𑁆𑀳𑀺 𑀢𑁂 𑀯𑀘𑁆𑀙 𑀓𑀗𑁆𑀔𑀺𑀢𑀼𑀁, 𑀅𑀮𑀁 𑀯𑀺𑀘𑀺𑀓𑀺𑀘𑁆𑀙𑀺𑀢𑀼𑀁. 𑀓𑀗𑁆𑀔𑀦𑀻𑀬𑁂 𑀘 𑀧𑀦 𑀢𑁂 𑀞𑀸𑀦𑁂 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀦𑁆𑀦𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀫𑀳𑀸𑀯𑀕𑁆𑀕𑀲𑀁𑀬𑀼𑀢𑁆𑀢𑁂 ¶ 𑀧𑀦𑀸𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀤𑀼𑀢𑀺𑀬𑀁 𑀲𑀁𑀕𑀻𑀢𑀁 𑀉𑀧𑀟𑁆𑀠𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀓𑁆𑀓𑁂𑀲𑀼 𑀪𑀦𑁆𑀢𑁂 𑀲𑀓𑁆𑀓𑀭𑁂 𑀦𑀸𑀫 𑀲𑀓𑁆𑀬𑀸𑀦𑀁 𑀦𑀺𑀕𑀫𑁂 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀆𑀦𑀦𑁆𑀤𑀢𑁆𑀣𑁂𑀭𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀉𑀧𑀟𑁆𑀠𑀫𑀺𑀤𑀁 𑀪𑀦𑁆𑀢𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀬𑀤𑀺𑀤𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀓𑀮𑁆𑀬𑀸𑀡𑀲𑀳𑀸𑀬𑀢𑀸 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀢𑀸’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀫𑀸 𑀳𑁂𑀯𑀁 𑀆𑀦𑀦𑁆𑀤, 𑀫𑀸 𑀳𑁂𑀯𑀁 𑀆𑀦𑀦𑁆𑀤, 𑀲𑀓𑀮𑀫𑁂𑀯𑀺𑀤𑀁 𑀆𑀦𑀦𑁆𑀤 𑀩𑁆𑀭𑀳𑁆𑀫𑀘𑀭𑀺𑀬𑀁 𑀬𑀤𑀺𑀤𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀓𑀮𑁆𑀬𑀸𑀡𑀲𑀳𑀸𑀬𑀢𑀸 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀢𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀫𑀫𑀁 ¶ 𑀳𑀺 𑀆𑀦𑀦𑁆𑀤 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀆𑀕𑀫𑁆𑀫 𑀚𑀸𑀢𑀺𑀥𑀫𑁆𑀫𑀸 𑀲𑀢𑁆𑀢𑀸 𑀚𑀸𑀢𑀺𑀬𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀺.

𑀧𑀼𑀘𑁆𑀙𑀸 𑁋 𑀩𑁄𑀚𑁆𑀛𑀗𑁆𑀕𑀲𑀁𑀬𑀼𑀢𑁆𑀢𑁂 ¶ 𑀧𑀦𑀸𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀙𑀝𑁆𑀞𑀁 𑀲𑀁𑀕𑀻𑀢𑀁 𑀓𑀼𑀡𑁆𑀟𑀮𑀺𑀬𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀓𑁂𑀢𑁂 𑀪𑀦𑁆𑀢𑁂 𑀅𑀜𑁆𑀚𑀦𑀯𑀦𑁂 𑀫𑀺𑀕𑀤𑀸𑀬𑁂 𑀓𑀼𑀡𑁆𑀟𑀮𑀺𑀬𑀁 𑀧𑀭𑀺𑀩𑁆𑀩𑀸𑀚𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀓𑀼𑀡𑁆𑀟𑀮𑀺𑀬𑁄 𑀪𑀦𑁆𑀢𑁂 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀅𑀳𑀫𑀲𑁆𑀫𑀺 𑀪𑁄 𑀕𑁄𑀢𑀫 𑀆𑀭𑀸𑀫𑀦𑀺𑀲𑁆𑀲𑀬𑀻 𑀧𑀭𑀺𑀲𑀸𑀯𑀘𑀭𑁄, 𑀢𑀲𑁆𑀲 𑀫𑀬𑁆𑀳𑀁 𑀪𑁄 𑀕𑁄𑀢𑀫 𑀧𑀘𑁆𑀙𑀸𑀪𑀢𑁆𑀢𑀁 𑀪𑀼𑀢𑁆𑀢𑀧𑀸𑀢𑀭𑀸𑀲𑀲𑁆𑀲 𑀅𑀬𑀫𑀸𑀘𑀸𑀭𑁄 𑀳𑁄𑀢𑀺 𑀆𑀭𑀸𑀫𑁂𑀦 𑀆𑀭𑀸𑀫𑀁 𑀉𑀬𑁆𑀬𑀸𑀦𑁂𑀦 𑀉𑀬𑁆𑀬𑀸𑀦𑀁 𑀅𑀦𑀼𑀘𑀗𑁆𑀓𑀫𑀸𑀫𑀺 𑀅𑀦𑀼𑀯𑀺𑀘𑀭𑀸𑀫𑀺, 𑀲𑁄 𑀢𑀢𑁆𑀣 𑀧𑀲𑁆𑀲𑀸𑀫𑀺 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀇𑀢𑀺𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀦𑀺𑀲𑀁𑀲𑀜𑁆𑀘𑁂𑀯 𑀓𑀣𑀁 𑀓𑀣𑀦𑁆𑀢𑁂 𑀉𑀧𑀸𑀭𑀫𑁆𑀪𑀸𑀦𑀺𑀲𑀁𑀲𑀜𑁆𑀘, 𑀪𑀯𑀁 𑀧𑀦 𑀕𑁄𑀢𑀫𑁄 𑀓𑀺𑀫𑀸𑀦𑀺𑀲𑀁𑀲𑁄 𑀯𑀺𑀳𑀭𑀢𑀻’’𑀢𑀺 𑀏𑀢𑀁 𑀯𑀘𑀦𑀁 𑀅𑀯𑁄𑀘. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀸𑀦𑀺𑀲𑀁𑀲𑁄 ¶ 𑀔𑁄 𑀓𑀼𑀡𑁆𑀟𑀮𑀺𑀬 𑀢𑀣𑀸𑀕𑀢𑁄 𑀯𑀺𑀳𑀭𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 ¶ 𑀪𑀕𑀯𑁆𑀯𑀢𑀸 𑀚𑀸𑀦𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀩𑁄𑀚𑁆𑀛𑀗𑁆𑀕𑀲𑀁𑀬𑀼𑀢𑁆𑀢𑁂 𑀤𑀼𑀢𑀺𑀬𑁂 𑀕𑀺𑀮𑀸𑀦𑀯𑀕𑁆𑀕𑁂 𑀧𑀞𑀫𑀕𑀺𑀮𑀸𑀦𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀧𑀺𑀧𑁆𑀧𑀮𑀺𑀕𑀼𑀳𑀸𑀬𑀁 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀧𑀺𑀧𑁆𑀧𑀮𑀺𑀕𑀼𑀳𑀸𑀬𑀁 𑀯𑀺𑀳𑀭𑀢𑀺 𑀆𑀩𑀸𑀥𑀺𑀓𑁄 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄. 𑀅𑀣 𑀔𑁄 𑀪𑀦𑁆𑀢𑁂 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺, 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀁 ¶ 𑀏𑀢𑀤𑀯𑁄𑀘𑁋 ‘‘𑀓𑀘𑁆𑀘𑀺 𑀢𑁂 𑀓𑀲𑁆𑀲𑀧 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀧𑀝𑀺𑀓𑁆𑀓𑀫𑀦𑁆𑀢𑀺 𑀦𑁄 𑀅𑀪𑀺𑀓𑁆𑀓𑀫𑀦𑁆𑀢𑀺, 𑀧𑀝𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺 𑀦𑁄 𑀅𑀪𑀺𑀓𑁆𑀓𑀫𑁄𑀢𑀺. 𑀦 𑀫𑁂 𑀪𑀦𑁆𑀢𑁂 𑀔𑀫𑀦𑀻𑀬𑀁 𑀦 𑀬𑀸𑀧𑀦𑀻𑀬𑀁, 𑀩𑀸𑀴𑁆𑀳𑀸 𑀫𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀪𑀺𑀓𑁆𑀓𑀫𑀦𑁆𑀢𑀺 𑀦𑁄 𑀧𑀝𑀺𑀓𑁆𑀓𑀫𑀦𑁆𑀢𑀺, 𑀅𑀪𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺 𑀦𑁄 𑀧𑀝𑀺𑀓𑁆𑀓𑀫𑁄’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀲𑀢𑁆𑀢𑀺𑀫𑁂 𑀓𑀲𑁆𑀲𑀧 𑀩𑁄𑀚𑁆𑀛𑀗𑁆𑀕𑀸 𑀫𑀬𑀸 𑀲𑀫𑁆𑀫𑀤𑀓𑁆𑀔𑀸𑀢𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀢𑀢𑀺𑀬𑁂 𑀉𑀤𑀸𑀬𑀺𑀯𑀕𑁆𑀕𑁂 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀤𑀲𑀫𑀁 𑀲𑀁𑀕𑀻𑀢𑀁 𑀉𑀤𑀸𑀬𑀺𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀼𑀫𑁆𑀪𑁂𑀲𑀼 𑀪𑀦𑁆𑀢𑁂 𑀲𑁂𑀢𑀓𑁂𑀦𑀸𑀫 𑀲𑀼𑀫𑁆𑀪𑀸𑀦𑀁 𑀦𑀺𑀕𑀫𑁂 𑀆𑀬𑀲𑁆𑀫𑀦𑁆𑀢𑀁 𑀉𑀤𑀸𑀬𑀺𑀢𑁆𑀣𑁂𑀭𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀉𑀤𑀸𑀬𑀺𑀢𑁆𑀣𑁂𑀭𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀅𑀘𑁆𑀙𑀭𑀺𑀬𑀁 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁 𑀪𑀦𑁆𑀢𑁂, 𑀬𑀸𑀯 𑀩𑀳𑀼𑀓𑀢𑀜𑁆𑀘 𑀫𑁂 𑀪𑀦𑁆𑀢𑁂 𑀪𑀕𑀯𑀢𑀺 𑀧𑁂𑀫𑀜𑁆𑀘 𑀕𑀸𑀭𑀯𑁄 𑀘 𑀳𑀺𑀭𑀻 𑀘 𑀑𑀢𑁆𑀢𑀧𑁆𑀧𑀜𑁆𑀘𑀸𑀢𑀺 𑀏𑀯𑀫𑀸𑀤𑀺𑀓𑀁 𑀯𑀘𑀦𑀁 𑀅𑀯𑁄𑀘. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀲𑀸𑀥𑀼 𑀲𑀸𑀥𑀼 𑀉𑀤𑀸𑀬𑀺 𑀏𑀲𑁄 𑀳𑀺 𑀢𑁂 𑀉𑀤𑀸𑀬𑀺 𑀫𑀕𑁆𑀕𑁄 𑀧𑀝𑀺𑀮𑀤𑁆𑀥𑁄. 𑀬𑁄 𑀢𑁂 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄, 𑀢𑀣𑀸 𑀢𑀣𑀸 𑀯𑀺𑀳𑀭𑀦𑁆𑀢𑀁 𑀢𑀣𑀢𑁆𑀢𑀸𑀬 𑀉𑀧𑀦𑁂𑀲𑁆𑀲𑀢𑀺, 𑀬𑀣𑀸 𑀢𑁆𑀯𑀁 ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀺𑀲𑁆𑀲𑀢𑀻’’𑀢𑀺. 𑀏𑀯𑀁 𑀔𑁄 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀲𑀢𑀺𑀧𑀝𑁆𑀞𑀸𑀦𑀲𑀁𑀬𑀼𑀢𑁆𑀢𑁂 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓 𑀫𑀳𑀸𑀣𑁂𑀭𑁂𑀳𑀺 𑀤𑀼𑀢𑀺𑀬𑀁 𑀲𑀁𑀕𑀻𑀢𑀁 𑀲𑀢𑀺𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀓𑀸𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀯𑁂𑀲𑀸𑀮𑀺𑀬𑀁 𑀪𑀦𑁆𑀢𑁂 𑀅𑀫𑁆𑀩𑀧𑀸𑀮𑀺𑀯𑀦𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀲𑀢𑁄 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀯𑀺𑀳𑀭𑁂𑀬𑁆𑀬 𑀲𑀫𑁆𑀧𑀚𑀸𑀦𑁄 𑀅𑀬𑀁 𑀯𑁄 𑀅𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀘𑀢𑀼𑀢𑁆𑀣𑀁 𑀲𑀁𑀕𑀻𑀢𑀁 𑀲𑀸𑀮𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑁄𑀲𑀮𑁂𑀲𑀼 𑀪𑀦𑁆𑀢𑁂 𑀲𑀸𑀮𑀸𑀬𑀦𑀸𑀫 𑀓𑁂𑀲𑀮𑀸𑀦𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀬𑁂 𑀢𑁂 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀽 𑀦𑀯𑀸 𑀅𑀘𑀺𑀭𑀧𑀩𑁆𑀩𑀚𑀺𑀢𑀸 𑀅𑀥𑀼𑀦𑀸𑀕𑀢𑀸 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁, 𑀢𑁂 𑀯𑁄 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀽 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀪𑀸𑀯𑀦𑀸𑀬 𑀲𑀫𑀸𑀤𑀧𑁂𑀢𑀩𑁆𑀩𑀸 𑀦𑀺𑀯𑁂𑀲𑁂𑀢𑀩𑁆𑀩𑀸 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀙𑀝𑁆𑀞𑀁 𑀲𑀁𑀕𑀻𑀢𑀁 𑀲𑀓𑀼𑀡𑀕𑁆𑀖𑀺𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀪𑀽𑀢𑀧𑀼𑀩𑁆𑀩𑀁 𑀪𑀺𑀓𑁆𑀔𑀯𑁂 𑀲𑀓𑀼𑀡𑀕𑁆𑀖𑀺 𑀮𑀸𑀧𑀁 𑀲𑀓𑀼𑀡𑀁 𑀲𑀳𑀲𑀸 𑀅𑀚𑁆𑀛𑀧𑁆𑀧𑀢𑁆𑀢𑀸 𑀅𑀕𑁆𑀕𑀳𑁂𑀲𑀺. 𑀅𑀣 𑀔𑁄 𑀪𑀺𑀓𑁆𑀔𑀯𑁂 𑀮𑀸𑀧𑁄 𑀲𑀓𑀼𑀡𑁄 𑀲𑀓𑀼𑀡𑀕𑁆𑀖𑀺𑀬𑀸 𑀳𑀭𑀺𑀬𑀫𑀸𑀦𑁄 𑀏𑀯𑀁 𑀧𑀭𑀺𑀤𑁂𑀯𑀲𑀺 𑀫𑀬𑀫𑁂𑀯𑀫𑁆𑀳 𑀅𑀮𑀓𑁆𑀔𑀺𑀓𑀸, 𑀫𑀬𑀁 𑀅𑀧𑁆𑀧𑀧𑀼𑀜𑁆𑀜𑀸, 𑀬𑁂 𑀫𑀬𑀁 𑀅𑀕𑁄𑀘𑀭𑁂 𑀘𑀭𑀺𑀫𑁆𑀳 𑀧𑀭𑀯𑀺𑀲𑀬𑁂, 𑀲𑀘𑁂𑀚𑁆𑀚 𑀫𑀬𑀁 𑀕𑁄𑀘𑀭𑁂 𑀘𑀭𑁂𑀬𑁆𑀬𑀸𑀫 𑀲𑀓𑁂 𑀧𑁂𑀢𑁆𑀢𑀺𑀓𑁂 𑀯𑀺𑀲𑀬𑁂, 𑀦 𑀫𑁆𑀬𑀸𑀳𑀁 𑀲𑀓𑀼𑀡𑀕𑁆𑀖𑀺 𑀅𑀮𑀁 𑀅𑀪𑀯𑀺𑀲𑁆𑀲 𑀬𑀤𑀺𑀤𑀁 𑀬𑀼𑀤𑁆𑀥𑀸𑀬𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀫𑀬𑀫𑁂𑀯𑀫𑁆𑀳 ¶ 𑀅𑀮𑀓𑁆𑀔𑀺𑀓𑀸, 𑀫𑀬𑀁 𑀅𑀧𑁆𑀧𑀧𑀼𑀜𑁆𑀜𑀸.

𑀓𑁄 𑀧𑀦 𑀢𑁂 𑀮𑀸𑀧 𑀕𑁄𑀘𑀭𑁄 𑀲𑀓𑁄 𑀧𑁂𑀢𑁆𑀢𑀺𑀓𑁄 𑀯𑀺𑀲𑀬𑁄.

𑀬𑀤𑀺𑀤𑀁 𑀦𑀗𑁆𑀕𑀮𑀓𑀝𑁆𑀞𑀓𑀭𑀡𑀁 𑀮𑁂𑀟𑁆𑀟𑀼𑀝𑁆𑀞𑀸𑀦𑀁.

𑀏𑀳𑀺 ¶ 𑀔𑁄 𑀤𑀸𑀦𑀺 𑀫𑁂 𑀲𑀓𑀼𑀡𑀕𑁆𑀖𑀺, 𑀏𑀳𑀺 𑀔𑁄 𑀤𑀸𑀦𑀺 𑀫𑁂 𑀲𑀓𑀼𑀡𑀕𑁆𑀖𑀺,

(𑀤𑀸𑀭𑀼𑀕𑀼𑀴𑁄𑀯𑀺𑀬 𑀯𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀲𑁆𑀲𑁂𑀯 𑀮𑁂𑀟𑁆𑀟𑀼𑀲𑁆𑀲 𑀅𑀦𑁆𑀢𑀭𑁂 𑀧𑀘𑁆𑀘𑀼𑀧𑀸𑀤𑀺. 𑀅𑀝𑁆𑀞𑀓𑀣𑀸)

𑀏𑀯𑀜𑁆𑀳𑀺 𑀢𑀁 𑀪𑀺𑀓𑁆𑀔𑀯𑁂 𑀳𑁄𑀢𑀺 𑀬𑁄 𑀅𑀕𑁄𑀘𑀭𑁂 𑀘𑀭𑀢𑀺 𑀧𑀭𑀯𑀺𑀲𑀬𑁂.

𑀢𑀲𑁆𑀫𑀸𑀢𑀺𑀳 ¶ 𑀪𑀺𑀓𑁆𑀔𑀯𑁂 𑀫𑀸 𑀅𑀕𑁄𑀘𑀭𑁂 𑀘𑀭𑀺𑀢𑁆𑀣 𑀧𑀭𑀯𑀺𑀲𑀬𑁂.

𑀕𑁄𑀘𑀭𑁂 𑀪𑀺𑀓𑁆𑀔𑀯𑁂 𑀘𑀭𑀣 𑀲𑀓𑁂 𑀧𑁂𑀢𑁆𑀢𑀺𑀓𑁂 𑀯𑀺𑀲𑀬𑁂.

𑀕𑁄𑀘𑀭𑁂 𑀪𑀺𑀓𑁆𑀔𑀯𑁂 𑀘𑀭𑀢𑀁 𑀲𑀓𑁂 𑀧𑁂𑀢𑁆𑀢𑀺𑀓𑁂 𑀯𑀺𑀲𑀬𑁂 𑀦 𑀮𑀘𑁆𑀙𑀢𑀺 𑀫𑀸𑀭𑁄 𑀑𑀢𑀸𑀭𑀁, 𑀦 𑀮𑀘𑁆𑀙𑀢𑀺 𑀫𑀸𑀭𑁄 𑀆𑀭𑀫𑁆𑀫𑀡𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀤𑀲𑀫𑀁 𑀲𑀁𑀕𑀻𑀢𑀁 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀆𑀦𑀦𑁆𑀤𑁄 𑀬𑀸𑀯𑀢𑁆𑀢𑀓𑁄 𑀅𑀳𑁄𑀲𑀺 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀓𑀣𑀸𑀲𑀮𑁆𑀮𑀸𑀧𑁄 𑀢𑀁 𑀲𑀩𑁆𑀩𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀏𑀯𑀫𑁂𑀢𑀁 𑀆𑀦𑀦𑁆𑀤, 𑀏𑀯𑀫𑁂𑀢𑀁 𑀆𑀦𑀦𑁆𑀤, 𑀬𑁄𑀳𑀺 𑀓𑁄𑀘𑀺 𑀆𑀦𑀦𑁆𑀤 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑁄 𑀯𑀺𑀳𑀭𑀢𑀺, 𑀢𑀲𑁆𑀲𑁂𑀢𑀁 𑀧𑀸𑀝𑀺𑀓𑀗𑁆𑀔𑀁 𑀉𑀴𑀸𑀭𑀁 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀁 𑀲𑀜𑁆𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀤𑀼𑀢𑀺𑀬𑁂 𑀦𑀸𑀮𑀦𑁆𑀤𑀯𑀕𑁆𑀕𑁂 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀢𑀢𑀺𑀬𑀁 𑀲𑀁𑀕𑀻𑀢𑀁 𑀘𑀼𑀦𑁆𑀤𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁𑀬𑁂𑀯 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀆𑀦𑀦𑁆𑀤𑀢𑁆𑀣𑁂𑀭𑁄 𑀘𑀼𑀦𑁆𑀤𑁂𑀦 𑀲𑀫𑀡𑀼𑀤𑁆𑀤𑁂𑀲𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀪𑀦𑁆𑀢𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀅𑀬𑀁 𑀪𑀦𑁆𑀢𑁂 𑀘𑀼𑀦𑁆𑀤𑁄 𑀲𑀫𑀡𑀼𑀤𑁆𑀤𑁂𑀲𑁄 𑀏𑀯𑀫𑀸𑀳 ‘𑀆𑀬𑀲𑁆𑀫𑀸 𑀪𑀦𑁆𑀢𑁂 𑀲𑀸𑀭𑀺𑀧𑀼𑀢𑁆𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀇𑀤𑀫𑀲𑁆𑀲 𑀧𑀢𑁆𑀢𑀘𑀻𑀯𑀭’𑀦𑁆𑀢𑀺. 𑀅𑀧𑀺 𑀘 𑀫𑁂 𑀪𑀦𑁆𑀢𑁂 𑀫𑀥𑀼𑀭𑀓𑀚𑀸𑀢𑁄 𑀯𑀺𑀬 𑀓𑀸𑀬𑁄, 𑀤𑀺𑀲𑀸𑀧𑀺 𑀫𑁂 𑀦 𑀧𑀓𑁆𑀔𑀸𑀬𑀦𑁆𑀢𑀺, 𑀥𑀫𑁆𑀫𑀸𑀧𑀺 𑀫𑀁 𑀦𑀧𑁆𑀧𑀝𑀺𑀪𑀦𑁆𑀢𑀺 ‘𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’𑀢𑀺 𑀲𑀼𑀢𑁆𑀯𑀸’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀓𑀺𑀁 𑀦𑀼 𑀔𑁄 𑀢𑁂 𑀆𑀦𑀦𑁆𑀤 𑀲𑀸𑀭𑀺𑀧𑀼𑀢𑁆𑀢𑁄 𑀲𑀻𑀮𑀓𑁆𑀔𑀦𑁆𑀥𑀁 𑀯𑀸 𑀆𑀤𑀸𑀬 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀲𑀫𑀸𑀥𑀺𑀓𑁆𑀔𑀦𑁆𑀥𑀁 𑀯𑀸, 𑀧𑀜𑁆𑀜𑀸𑀓𑁆𑀔𑀦𑁆𑀥𑀁𑀯𑀸, 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀁𑀯𑀸, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀁 𑀯𑀸 𑀆𑀤𑀸𑀬 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀅𑀬𑀁 ¶ 𑀪𑀦𑁆𑀢𑁂 𑀘𑀼𑀦𑁆𑀤𑁄𑀲𑀫𑀡𑀼𑀤𑁆𑀤𑁂𑀲𑁄 𑀏𑀯𑀫𑀸𑀳.

𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤 ¶ 𑀅𑀢𑁆𑀢𑀤𑀻𑀧𑀸 𑀯𑀺𑀳𑀭𑀣 𑀅𑀢𑁆𑀢𑀲𑀭𑀡𑀸 𑀅𑀦𑀜𑁆𑀜𑀲𑀭𑀡𑀸 𑀥𑀫𑁆𑀫𑀤𑀻𑀧𑀸 𑀥𑀫𑁆𑀫𑀲𑀭𑀡𑀸 𑀅𑀦𑀜𑁆𑀜𑀲𑀭𑀡𑀸.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀧𑀜𑁆𑀘𑀫𑀁 𑀲𑀁𑀕𑀻𑀢𑀁 𑀩𑀸𑀳𑀺𑀬𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀩𑀸𑀳𑀺𑀬𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀩𑀸𑀳𑀺𑀬𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀲𑀸𑀥𑀼 𑀫𑁂 𑀪𑀦𑁆𑀢𑁂 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼, 𑀬𑀫𑀳𑀁 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀢𑀲𑁆𑀫𑀸𑀢𑀺𑀳 𑀢𑁆𑀯𑀁 𑀩𑀸𑀳𑀺𑀬 𑀆𑀤𑀺𑀫𑁂𑀯 𑀯𑀺𑀲𑁄𑀥𑁂𑀳𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀓𑁄 𑀘𑀸𑀤𑀺𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁, 𑀲𑀻𑀮𑀜𑁆𑀘 𑀲𑀼𑀯𑀺𑀲𑀼𑀤𑁆𑀥𑀁 𑀤𑀺𑀝𑁆𑀞𑀺𑀘 𑀉𑀚𑀼𑀓𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀢𑀢𑀺𑀬𑁂 𑀲𑀻𑀮𑀝𑁆𑀞𑀺𑀢𑀺𑀯𑀕𑁆𑀕𑁂 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀤𑀼𑀢𑀺𑀬𑀁 𑀲𑀁𑀕𑀻𑀢𑀁 𑀘𑀺𑀭𑀝𑁆𑀞𑀺𑀢𑀺𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀧𑀸𑀝𑀮𑀺𑀧𑀼𑀢𑁆𑀢𑁂 𑀪𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀪𑀤𑁆𑀤𑀁 𑀆𑀭𑀩𑁆𑀪 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀪𑀸𑀲𑀺𑀢𑀁. 𑀆𑀬𑀲𑁆𑀫𑀸 𑀪𑀦𑁆𑀢𑁂 𑀪𑀤𑁆𑀤𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 ‘‘𑀓𑁄 𑀦𑀼 𑀔𑁄 𑀆𑀯𑀼𑀲𑁄 𑀆𑀦𑀦𑁆𑀤 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀢𑀣𑀸𑀕𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀤𑁆𑀥𑀫𑁆𑀫𑁄 𑀦 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀺, 𑀓𑁄 𑀧𑀦𑀸𑀯𑀼𑀲𑁄 𑀆𑀦𑀦𑁆𑀤 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀢𑀣𑀸𑀕𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀤𑁆𑀥𑀫𑁆𑀫𑁄 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀻’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀲𑀸𑀥𑀼 𑀲𑀸𑀥𑀼 𑀆𑀯𑀼𑀲𑁄 𑀪𑀤𑁆𑀤, 𑀪𑀤𑁆𑀤𑀓𑁄 𑀔𑁄 𑀢𑁂 𑀆𑀯𑀼𑀲𑁄 𑀪𑀤𑁆𑀤 𑀉𑀫𑁆𑀫𑀗𑁆𑀕𑁄’’𑀢𑀺 𑀏𑀯𑀫𑀸𑀤𑀺𑀦𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀪𑀸𑀲𑀺𑀢𑀁.

𑀪𑀤𑁆𑀤𑀓𑁄 ¶ 𑀢𑁂 𑀆𑀯𑀼𑀲𑁄 𑀪𑀤𑁆𑀤 𑀉𑀫𑁆𑀫𑀗𑁆𑀕𑁄.

‘‘𑀘𑀢𑀼𑀦𑁆𑀦𑀁 ¶ 𑀔𑁄 𑀆𑀯𑀼𑀲𑁄 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀅𑀪𑀸𑀯𑀺𑀢𑀢𑁆𑀢𑀸 𑀅𑀩𑀳𑀼𑀮𑀻𑀓𑀢𑀢𑁆𑀢𑀸 𑀢𑀣𑀸𑀕𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀤𑁆𑀥𑀫𑁆𑀫𑁄 𑀦 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀻’’ 𑁋

𑀧𑀼𑀘𑁆𑀙𑀸 𑁋 𑀢𑀲𑁆𑀲𑀸𑀯𑀼𑀲𑁄 𑀪𑀕𑀯𑀢𑀸 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀸𑀯𑀘𑀦𑀲𑀫𑀼𑀤𑀬𑀪𑀽𑀢𑀸𑀬 𑀫𑀳𑀸𑀯𑀕𑁆𑀕𑀧𑀸𑀴𑀺𑀬𑀸 𑀲𑀢𑀺𑀧𑀝𑁆𑀞𑀸𑀦𑀲𑀁𑀬𑀼𑀢𑁆𑀢𑁂 𑀲𑀻𑀮𑀝𑁆𑀞𑀺𑀢𑀺𑀯𑀕𑁆𑀕𑁂 𑀦𑀯𑀫𑀁 𑀲𑀺𑀭𑀺𑀯𑀟𑁆𑀠𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀲𑀺𑀭𑀺𑀯𑀟𑁆𑀠𑀁 𑀕𑀳𑀧𑀢𑀺𑀁 𑀆𑀭𑀩𑁆𑀪 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀪𑀸𑀲𑀺𑀢𑀁. 𑀲𑀺𑀭𑀺𑀯𑀟𑁆𑀠𑁄 𑀪𑀦𑁆𑀢𑁂 𑀕𑀳𑀧𑀢𑀺 𑀆𑀩𑀸𑀥𑀺𑀓𑁄 𑀳𑁄𑀢𑀺 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄. 𑀅𑀣𑀔𑁄 𑀪𑀦𑁆𑀢𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦𑀲𑀺𑀭𑀺𑀯𑀟𑁆𑀠𑀲𑁆𑀲 𑀕𑀳𑀧𑀢𑀺𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺 ¶ . 𑀦𑀺𑀲𑀚𑁆𑀚 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀺𑀭𑀺𑀯𑀟𑁆𑀠𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘 ‘‘𑀓𑀘𑁆𑀘𑀺 𑀢𑁂 𑀕𑀳𑀧𑀢𑀺 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀧𑀝𑀺𑀓𑁆𑀓𑀫𑀦𑁆𑀢𑀺 𑀦𑁄 𑀅𑀪𑀺𑀓𑁆𑀓𑀫𑀦𑁆𑀢𑀺, 𑀧𑀝𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺 𑀦𑁄 𑀅𑀪𑀺𑀓𑁆𑀓𑀫𑁄’’𑀢𑀺. 𑀦 𑀫𑁂 𑀪𑀦𑁆𑀢𑁂 𑀔𑀫𑀦𑀻𑀬𑀁, 𑀦 𑀬𑀸𑀧𑀦𑀻𑀬𑀁, 𑀩𑀸𑀴𑁆𑀳𑀸 𑀫𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀪𑀺𑀓𑁆𑀓𑀫𑀦𑁆𑀢𑀺 𑀦𑁄 𑀧𑀝𑀺𑀓𑁆𑀓𑀫𑀦𑁆𑀢𑀺, 𑀅𑀪𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺 𑀦𑁄 𑀧𑀝𑀺𑀓𑁆𑀓𑀫𑁄’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀢𑀲𑁆𑀫𑀸𑀢𑀺𑀳 𑀢𑁂 𑀕𑀳𑀧𑀢𑀺 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀺𑀲𑁆𑀲𑀸𑀫𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸 𑀤𑁄𑀫𑀦𑀲𑁆𑀲𑀁. 𑀯𑁂𑀤𑀦𑀸𑀲𑀼. 𑀘𑀺𑀢𑁆𑀢𑁂. 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀺𑀲𑁆𑀲𑀸𑀫𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸 𑀤𑁄𑀫𑀦𑀲𑁆𑀲’𑀦𑁆𑀢𑀺. 𑀏𑀯𑀜𑁆𑀳𑀺 𑀢𑁂 𑀕𑀳𑀧𑀢𑀺 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀏𑀯𑀁 𑀔𑁄 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀇𑀤𑁆𑀥𑀺𑀧𑀸𑀤𑀲𑀁𑀬𑀼𑀢𑁆𑀢𑁂 ¶ 𑀆𑀯𑀼𑀲𑁄 𑀘𑀢𑀼𑀢𑁆𑀣𑀁 𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀲𑀫𑁆𑀩𑀳𑀼𑀮𑀸 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀳𑁂𑀝𑁆𑀞𑀸𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂 𑀯𑀺𑀳𑀭𑀦𑁆𑀢𑀺 𑀉𑀤𑁆𑀥𑀢𑀸 𑀉𑀦𑁆𑀦𑀴𑀸 𑀘𑀧𑀮𑀸 𑀫𑀼𑀔𑀭𑀸 𑀯𑀺𑀓𑀺𑀡𑁆𑀡𑀯𑀸𑀘𑀸 𑀫𑀼𑀝𑁆𑀞𑀲𑁆𑀲𑀢𑀺𑀦𑁄 𑀅𑀲𑀫𑁆𑀧𑀚𑀸𑀦𑀸 𑀅𑀲𑀫𑀸𑀳𑀺𑀢𑀸 𑀪𑀦𑁆𑀢𑀘𑀺𑀢𑁆𑀢𑀸 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑀸. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀢𑁂 𑀪𑀺𑀓𑁆𑀔𑀽 𑀲𑀁𑀯𑁂𑀚𑁂𑀢𑁆𑀯𑀸 ‘‘𑀓𑀺𑀁 𑀦𑀼 𑀢𑀼𑀫𑁆𑀳𑁂 𑀪𑀺𑀓𑁆𑀔𑀯𑁂 𑀲𑀁𑀯𑀺𑀕𑁆𑀕𑀸 𑀮𑁄𑀫𑀳𑀝𑁆𑀞𑀚𑀸𑀢𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀅𑀘𑁆𑀙𑀭𑀺𑀬𑀁 ¶ 𑀯𑀢 𑀪𑁄, 𑀅𑀩𑁆𑀪𑀼𑀢𑀁 𑀯𑀢 𑀪𑁄.

𑀅𑀬𑀜𑁆𑀘 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁄 𑀕𑀫𑁆𑀪𑀻𑀭𑀦𑁂𑀫𑁄.

𑀢𑀼𑀫𑁆𑀳𑁂𑀯 ¶ 𑀔𑁄 𑀪𑀺𑀓𑁆𑀔𑀯𑁂 𑀲𑀁𑀯𑁂𑀚𑁂𑀢𑀼𑀓𑀸𑀫𑁂𑀦 𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁄 𑀲𑀗𑁆𑀓𑀫𑁆𑀧𑀺𑀢𑁄 𑀲𑀫𑁆𑀧𑀓𑀫𑁆𑀧𑀺𑀢𑁄 𑀲𑀫𑁆𑀧𑀥𑀸𑀮𑀺𑀢𑁄.

𑀢𑀁 𑀓𑀺𑀁 𑀫𑀜𑁆𑀜𑀣 𑀪𑀺𑀓𑁆𑀔𑀯𑁂, 𑀓𑀢𑀫𑁂𑀲𑀁 𑀥𑀫𑁆𑀫𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸 𑀫𑁄𑀕𑁆𑀕𑀮𑁆𑀮𑀸𑀦𑁄 𑀪𑀺𑀓𑁆𑀔𑀼 𑀏𑀯𑀁 𑀫𑀳𑀺𑀤𑁆𑀥𑀺𑀓𑁄 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄.

𑀧𑀼𑀘𑁆𑀙𑀸 𑁋 𑀅𑀦𑀼𑀭𑀼𑀤𑁆𑀥𑀲𑀁𑀬𑀼𑀢𑁆𑀢𑁂 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀤𑀲𑀫𑀁 𑀲𑀁𑀕𑀻𑀢𑀁 𑀩𑀸𑀴𑁆𑀳𑀕𑀺𑀦𑀸𑀦𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀆𑀬𑀲𑁆𑀫𑀢𑀸 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁂𑀦 𑀪𑀸𑀲𑀺𑀢𑀁. 𑀲𑀫𑁆𑀩𑀳𑀼𑀮𑀸 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀆𑀩𑀸𑀥𑀺𑀓𑀁 𑀤𑀼𑀓𑁆𑀔𑀺𑀢𑀁 𑀩𑀸𑀴𑁆𑀳𑀕𑀺𑀮𑀸𑀦𑀁 𑀏𑀢𑀤𑀯𑁄𑀘𑀼𑀁 ‘‘𑀓𑀢𑀫𑁂𑀦𑀸𑀬𑀲𑁆𑀫𑀢𑁄 𑀅𑀦𑀼𑀭𑀼𑀤𑁆𑀥𑀲𑁆𑀲 𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑁄 𑀉𑀧𑁆𑀧𑀦𑁆𑀦𑀸 𑀲𑀸𑀭𑀻𑀭𑀺𑀓𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀻’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀘𑀢𑀽𑀲𑀼 𑀔𑁄 𑀫𑁂 𑀆𑀯𑀼𑀲𑁄 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀉𑀧𑁆𑀧𑀦𑁆𑀦𑀸 𑀲𑀸𑀭𑀻𑀭𑀺𑀓𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀆𑀬𑀲𑁆𑀫𑀢𑀸 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁂𑀦 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀆𑀦𑀸𑀧𑀸𑀦𑀲𑀁𑀬𑀼𑀢𑁆𑀢𑁂 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀲𑀢𑁆𑀢𑀫𑀁 𑀲𑀁𑀕𑀻𑀢𑀁 𑀫𑀳𑀸𑀓𑀧𑁆𑀧𑀺𑀦𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀧𑀲𑁆𑀲𑀣 𑀦𑁄 𑀢𑀼𑀫𑁆𑀳𑁂 𑀪𑀺𑀓𑁆𑀔𑀯𑁂 𑀏𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀸𑀬𑀲𑁆𑀲 𑀇𑀜𑁆𑀚𑀺𑀢𑀢𑁆𑀢𑀁 𑀯𑀸 𑀨𑀦𑁆𑀤𑀺𑀢𑀩𑁆𑀩𑀁 𑀯𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀤𑀼𑀢𑀺𑀬𑀯𑀕𑁆𑀕𑁂 𑀧𑀞𑀫𑀁 𑀇𑀘𑁆𑀙𑀸𑀦𑀗𑁆𑀕𑀮𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀇𑀘𑁆𑀙𑀸𑀦𑀗𑁆𑀕𑀮𑁂 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀲𑀘𑁂 𑀔𑁄 𑀪𑀺𑀓𑁆𑀔𑀯𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 ‘𑀓𑀢𑀫𑁂 𑀦𑀸𑀯𑀼𑀲𑁄 𑀯𑀺𑀳𑀸𑀭𑁂𑀦 𑀲𑀫𑀡𑁄 𑀕𑁄𑀢𑀫𑁄 𑀯𑀲𑁆𑀲𑀸𑀯𑀸𑀲𑀁 𑀩𑀳𑀼𑀮𑀁 𑀯𑀺𑀳𑀸𑀲𑀻’𑀢𑀺. 𑀏𑀯𑀁 𑀧𑀼𑀝𑁆𑀞𑀸 𑀢𑀼𑀫𑁆𑀳𑁂 𑀪𑀺𑀓𑁆𑀔𑀯𑁂 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀣 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀦𑀸 𑀔𑁄 𑀆𑀯𑀼𑀲𑁄 𑀪𑀕𑀯𑀸 𑀯𑀲𑁆𑀲𑀸𑀯𑀸𑀲𑀁 𑀩𑀳𑀼𑀮𑀁 𑀯𑀺𑀳𑀸𑀲𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀲𑁄𑀢𑀸𑀧𑀢𑁆𑀢𑀺𑀲𑀁𑀬𑀼𑀢𑁆𑀢𑁂 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀧𑀞𑀫𑀁 𑀲𑀁𑀕𑀻𑀢𑀁 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀓𑀺𑀜𑁆𑀘𑀸𑀧𑀺 𑀪𑀺𑀓𑁆𑀔𑀯𑁂 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀘𑀢𑀼𑀦𑁆𑀦𑀁 𑀤𑀻𑀧𑀸𑀦𑀁 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀁 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀳𑀩𑁆𑀬𑀢𑀁, 𑀲𑁄 𑀢𑀢𑁆𑀣 𑀦𑀦𑁆𑀤𑀦𑁂 𑀯𑀦𑁂 𑀅𑀘𑁆𑀙𑀭𑀸𑀲𑀗𑁆𑀖𑀧𑀭𑀺𑀯𑀼𑀢𑁄 𑀤𑀺𑀩𑁆𑀩𑁂𑀳𑀺 𑀘 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺 𑀲𑁄 𑀘𑀢𑀽𑀳𑀺 𑀥𑀫𑁆𑀫𑁂𑀳𑀺 𑀅𑀲𑀫𑀦𑁆𑀦𑀸𑀕𑀢𑁄, 𑀅𑀣 𑀔𑁄 𑀲𑁄 𑀅𑀧𑀭𑀺𑀫𑀼𑀢𑁆𑀢𑁄𑀯 𑀦𑀺𑀭𑀬𑀸, 𑀅𑀧𑀭𑀺𑀫𑀼𑀢𑁆𑀢𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸, 𑀅𑀧𑀭𑀺𑀫𑀼𑀢𑁆𑀢𑁄 𑀧𑁂𑀢𑁆𑀢𑀺𑀯𑀺𑀲𑀬𑀸, 𑀅𑀧𑀭𑀺𑀫𑀼𑀢𑁆𑀢𑁄 𑀅𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀢𑀢𑀺𑀬𑀁 𑀲𑀁𑀕𑀻𑀢𑀁 𑀤𑀻𑀖𑀸𑀯𑀼𑀉𑀧𑀸𑀲𑀓𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀭𑀸𑀚𑀕𑀳𑁂 ¶ 𑀪𑀦𑁆𑀢𑁂 𑀤𑀻𑀖𑀸𑀯𑀼𑀁 𑀉𑀧𑀸𑀲𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀪𑀕𑀯𑀸 𑀪𑀦𑁆𑀢𑁂 𑀤𑀻𑀖𑀸𑀯𑀼𑀁 𑀉𑀧𑀸𑀲𑀓𑀁 𑀆𑀩𑀸𑀥𑀺𑀓𑀁 𑀤𑀼𑀓𑁆𑀔𑀺𑀢𑀁 𑀩𑀸𑀴𑁆𑀳𑀕𑀺𑀮𑀸𑀦𑀁 𑀏𑀢𑀤𑀯𑁄𑀘 ‘‘𑀓𑀘𑁆𑀘𑀺 𑀢𑁂 𑀤𑀻𑀖𑀸𑀯𑀼 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀧𑀝𑀺𑀓𑁆𑀓𑀫𑀦𑁆𑀢𑀺 𑀦𑁄 𑀅𑀪𑀺𑀓𑁆𑀓𑀫𑀦𑁆𑀢𑀺, 𑀧𑀝𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺 𑀦𑁄 𑀅𑀪𑀺𑀓𑁆𑀓𑀫𑁄’’𑀢𑀺. 𑀦 𑀫𑁂 𑀪𑀦𑁆𑀢𑁂 𑀔𑀫𑀦𑀻𑀬𑀁, 𑀦 𑀬𑀸𑀧𑀦𑀻𑀬𑀁 𑀩𑀸𑀴𑁆𑀳𑀸 𑀫𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀪𑀺𑀓𑁆𑀓𑀫𑀦𑁆𑀢𑀺 𑀦𑁄 𑀧𑀝𑀺𑀓𑁆𑀓𑀫𑀦𑁆𑀢𑀺, 𑀅𑀪𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺 𑀦𑁄 𑀧𑀝𑀺𑀓𑁆𑀓𑀫𑁄𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀢𑀲𑁆𑀫𑀸𑀢𑀺𑀳 𑀢𑁂 𑀤𑀻𑀖𑀸𑀯𑀼 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀬𑀸𑀦𑀺𑀫𑀸𑀦𑀺 ¶ 𑀪𑀦𑁆𑀢𑁂 𑀪𑀕𑀯𑀢𑀸 𑀘𑀢𑁆𑀢𑀸𑀭𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺 𑀤𑁂𑀲𑀺𑀢𑀸𑀦𑀺, 𑀲𑀁𑀯𑀺𑀚𑁆𑀚𑀦𑁆𑀢𑁂 𑀢𑁂 𑀥𑀫𑁆𑀫𑀸 𑀫𑀬𑀺𑁋

𑀢𑀲𑁆𑀫𑀸𑀢𑀺𑀳 𑀢𑁆𑀯𑀁 𑀤𑀻𑀖𑀸𑀯𑀼 𑀇𑀫𑁂𑀲𑀼 𑀘𑀢𑀽𑀲𑀼 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀲𑀼 𑀧𑀢𑀺𑀝𑁆𑀞𑀸𑀬 𑀙 𑀯𑀺𑀚𑁆𑀚𑀸𑀪𑀸𑀕𑀺𑀬𑁂 𑀥𑀫𑁆𑀫𑁂 𑀉𑀢𑁆𑀢𑀭𑀺 𑀪𑀸𑀯𑁂𑀬𑁆𑀬𑀸𑀲𑀺𑁋

𑀫𑀸 ¶ 𑀢𑁆𑀯𑀁 𑀢𑀸𑀢 𑀤𑀻𑀖𑀸𑀯𑀼 𑀏𑀯𑀁 𑀫𑀦𑀲𑀸𑀓𑀸𑀲𑀺.

𑀇𑀗𑁆𑀖 𑀢𑁆𑀯𑀁 𑀢𑀸𑀢 𑀤𑀻𑀖𑀸𑀯𑀼 𑀬𑀤𑁂𑀯 𑀢𑁂 𑀪𑀕𑀯𑀸 𑀆𑀳, 𑀢𑀤𑁂𑀯 𑀢𑁆𑀯𑀁 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀳𑀺.

𑀧𑀡𑁆𑀟𑀺𑀢𑁄 ¶ 𑀪𑀺𑀓𑁆𑀔𑀯𑁂 𑀤𑀻𑀖𑀸𑀯𑀼 𑀉𑀧𑀸𑀲𑀓𑁄.

𑀧𑀘𑁆𑀘𑀧𑀸𑀤𑀺 𑀥𑀫𑁆𑀫𑀲𑁆𑀲𑀸𑀦𑀼𑀥𑀫𑁆𑀫𑀁.

𑀦 ¶ 𑀘 𑀫𑀁 𑀥𑀫𑁆𑀫𑀸𑀥𑀺𑀓𑀭𑀡𑀁 𑀯𑀺𑀳𑁂𑀞𑁂𑀲𑀺.

𑀤𑀻𑀖𑀸𑀯𑀼 𑀪𑀺𑀓𑁆𑀔𑀯𑁂 𑀉𑀧𑀸𑀲𑀓𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀑𑀧𑀧𑀸𑀢𑀺𑀓𑁄 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀢𑀲𑁆𑀫𑀸 𑀮𑁄𑀓𑀸.

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 𑀪𑀕𑀯𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑁄𑀢𑀸𑀧𑀢𑁆𑀢𑀺𑀲𑀁𑀬𑀼𑀢𑁆𑀢𑁂 𑀲𑀢𑁆𑀢𑀫𑀁 𑀲𑀁𑀕𑀻𑀢𑀁 𑀯𑁂𑀴𑀼𑀤𑁆𑀯𑀸𑀭𑁂𑀬𑁆𑀬𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑁄𑀲𑀮𑁂𑀲𑀼 𑀪𑀦𑁆𑀢𑁂 𑀯𑁂𑀴𑀼𑀤𑁆𑀯𑀸𑀭𑁂 𑀦𑀸𑀫 𑀓𑁄𑀲𑀮𑀸𑀦𑀁 𑀩𑁆𑀭𑀸𑀳𑁆𑀫𑀡 𑀕𑀸𑀫𑁂 𑀯𑁂𑀴𑀼𑀤𑁆𑀯𑀸𑀭𑁂𑀬𑁆𑀬𑀓𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀯𑁂𑀴𑀼𑀤𑁆𑀯𑀸𑀭𑁂𑀬𑁆𑀬𑀓𑀸 ¶ 𑀪𑀦𑁆𑀢𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 ‘‘𑀫𑀬𑀁 𑀪𑁄 𑀕𑁄𑀢𑀫 𑀏𑀯𑀁𑀓𑀸𑀫𑀸 𑀏𑀯𑀁𑀙𑀦𑁆𑀤𑀸 𑀏𑀯𑀁𑀅𑀥𑀺𑀧𑁆𑀧𑀸𑀬𑀸 𑀧𑀼𑀢𑁆𑀢𑀲𑀫𑁆𑀩𑀸𑀥𑀲𑀬𑀦𑀁 𑀅𑀚𑁆𑀛𑀸𑀯𑀲𑁂𑀬𑁆𑀬𑀸𑀫…𑀧𑁂… 𑀚𑀸𑀢𑀭𑀽𑀧𑀭𑀚𑀢𑀁 𑀲𑀸𑀤𑀺𑀬𑁂𑀬𑁆𑀬𑀸𑀫, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑁂𑀬𑁆𑀬𑀸𑀫, 𑀢𑁂𑀲𑀁 𑀦𑁄 𑀪𑀯𑀁 𑀕𑁄𑀢𑀫𑁄 𑀅𑀫𑁆𑀳𑀸𑀓𑀁 𑀏𑀯𑀁𑀓𑀸𑀫𑀸𑀦𑀁 𑀏𑀯𑀁𑀙𑀦𑁆𑀤𑀸𑀦𑀁 𑀏𑀯𑀁𑀅𑀥𑀺𑀧𑁆𑀧𑀸𑀬𑀸𑀦𑀁 𑀢𑀣𑀸 𑀤𑀫𑁆𑀫𑀁 𑀤𑁂𑀲𑁂𑀢𑀼, 𑀬𑀣𑀸 𑀫𑀬𑀁 𑀧𑀼𑀢𑁆𑀢𑀲𑀫𑁆𑀩𑀸𑀥𑀲𑀬𑀦𑀁 𑀅𑀚𑁆𑀛𑀸𑀯𑀲𑁂𑀬𑁆𑀬𑀸𑀫…𑀧𑁂… 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑁂𑀬𑁆𑀬𑀸𑀫𑀸’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀅𑀢𑁆𑀢𑀽𑀧𑀦𑀸𑀬𑀺𑀓𑀁 𑀯𑁄 𑀕𑀳𑀧𑀢𑀬𑁄 𑀥𑀫𑁆𑀫𑀧𑀭𑀺𑀬𑀸𑀬𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀢𑀢𑀺𑀬𑁂 𑀲𑀭𑀡𑀸𑀦𑀺𑀯𑀕𑁆𑀕𑁂 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀧𑀞𑀫𑀁 𑀲𑀁𑀕𑀻𑀢𑀁 𑀧𑀞𑀫𑀫𑀳𑀸𑀦𑀸𑀫𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀓𑁆𑀓𑁂𑀲𑀼 ¶ 𑀪𑀦𑁆𑀢𑁂 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂 𑀫𑀳𑀸𑀦𑀸𑀫𑀁 𑀲𑀓𑁆𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀫𑀳𑀸𑀦𑀸𑀫𑁄 𑀪𑀦𑁆𑀢𑁂 𑀲𑀓𑁆𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀇𑀤𑀁 𑀪𑀦𑁆𑀢𑁂 𑀓𑀧𑀺𑀮𑀯𑀢𑁆𑀣𑀼 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘 𑀩𑀸𑀳𑀼𑀚𑀜𑁆𑀜𑀁 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀁 𑀲𑀫𑁆𑀩𑀸𑀥𑀩𑁆𑀬𑀽𑀳𑀁, 𑀲𑁄 𑀔𑁆𑀯𑀸𑀳𑀁 𑀪𑀦𑁆𑀢𑁂 𑀪𑀕𑀯𑀦𑁆𑀢𑀁 𑀯𑀸 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀫𑀦𑁄𑀪𑀸𑀯𑀦𑀻𑀬𑁂 𑀯𑀸 𑀪𑀺𑀓𑁆𑀔𑀽 𑀲𑀸𑀬𑀦𑁆𑀳𑀲𑀫𑀬𑀁 𑀓𑀧𑀺𑀮𑀯𑀢𑁆𑀣𑀼𑀁 𑀧𑀯𑀺𑀲𑀦𑁆𑀢𑁄 𑀪𑀦𑁆𑀢𑁂𑀦𑀧𑀺 𑀳𑀢𑁆𑀣𑀺𑀦𑀸 𑀲𑀫𑀸𑀕𑀘𑁆𑀙𑀸𑀫𑀺, 𑀪𑀦𑁆𑀢𑁂𑀦𑀧𑀺 𑀅𑀲𑁆𑀲𑁂𑀦 𑀲𑀫𑀸𑀕𑀘𑁆𑀙𑀸𑀫𑀺, 𑀪𑀦𑁆𑀢𑁂𑀦𑀧𑀺 𑀭𑀣𑁂𑀦 𑀲𑀫𑀸𑀕𑀘𑁆𑀙𑀸𑀫𑀺, 𑀪𑀦𑁆𑀢𑁂𑀦𑀧𑀺 𑀲𑀓𑀝𑁂𑀦 𑀲𑀫𑀸𑀕𑀘𑁆𑀙𑀸𑀫𑀺, 𑀪𑀦𑁆𑀢𑁂𑀦𑀧𑀺 𑀧𑀼𑀭𑀺𑀲𑁂𑀦 𑀲𑀫𑀸𑀕𑀘𑁆𑀙𑀸𑀫𑀺, 𑀢𑀲𑁆𑀲 𑀫𑀬𑁆𑀳𑀁 𑀪𑀦𑁆𑀢𑁂 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀼𑀲𑁆𑀲𑀢𑁂𑀯 𑀪𑀕𑀯𑀦𑁆𑀢𑀁 𑀆𑀭𑀩𑁆𑀪 𑀲𑀢𑀺, 𑀫𑀼𑀲𑁆𑀲𑀢𑀺 𑀥𑀫𑁆𑀫𑀁 𑀆𑀭𑀩𑁆𑀪 𑀲𑀢𑀺, 𑀫𑀼𑀲𑁆𑀲𑀢𑀺 𑀲𑀗𑁆𑀖𑀁 𑀆𑀭𑀩𑁆𑀪 𑀲𑀢𑀺, 𑀢𑀲𑁆𑀲 𑀫𑀬𑁆𑀳𑀁 𑀪𑀦𑁆𑀢𑁂 𑀏𑀯𑀁 𑀳𑁄𑀢𑀺 𑀇𑀫𑀫𑁆𑀳𑀺 𑀘𑀸𑀳𑀁 𑀲𑀫𑀬𑁂 𑀓𑀸𑀮𑀁 𑀓𑀭𑁂𑀬𑁆𑀬𑀁, 𑀓𑀸 𑀫𑀬𑁆𑀳𑀁 𑀕𑀢𑀺, 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀫𑀸 𑀪𑀸𑀬𑀺 𑀫𑀳𑀸𑀦𑀸𑀫, 𑀫𑀸 𑀪𑀸𑀬𑀺 𑀫𑀳𑀸𑀦𑀸𑀫, 𑀅𑀧𑀸𑀧𑀓𑀁 𑀢𑁂 𑀫𑀭𑀡𑀁 𑀪𑀯𑀺𑀲𑁆𑀲𑀢𑀺 𑀅𑀧𑀸𑀧𑀺𑀓𑀸 𑀓𑀸𑀮𑀁 𑀓𑀺𑀭𑀺𑀬𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀤𑀼𑀢𑀺𑀬 𑀲𑀭𑀡𑀸𑀦𑀺𑀲𑀓𑁆𑀓𑀲𑀼𑀢𑁆𑀢

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀧𑀜𑁆𑀘𑀫𑀁 𑀲𑀁𑀕𑀻𑀢𑀁 𑀤𑀼𑀢𑀺𑀬𑀲𑀭𑀡𑀸𑀦𑀺𑀲𑀓𑁆𑀓𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀓𑁆𑀓𑁂𑀲𑀼 𑀪𑀦𑁆𑀢𑁂 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂 𑀫𑀳𑀸𑀦𑀸𑀫𑀁𑀬𑁂𑀯 𑀲𑀓𑁆𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀫𑀳𑀸𑀦𑀸𑀫𑁄 𑀪𑀦𑁆𑀢𑁂 𑀲𑀓𑁆𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀇𑀥 𑀪𑀦𑁆𑀢𑁂 𑀲𑀭𑀡𑀸𑀦𑀺 𑀲𑀓𑁆𑀓𑁄 𑀓𑀸𑀮𑀗𑁆𑀓𑀢𑁄, 𑀲𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄 ‘𑀲𑁄𑀢𑀸𑀧𑀦𑁆𑀦𑁄 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’𑀢𑀺. 𑀢𑀢𑁆𑀭 𑀲𑀼𑀤𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑀸 𑀲𑀓𑁆𑀓𑀸 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀉𑀚𑁆𑀛𑀸𑀬𑀦𑁆𑀢𑀺 𑀔𑀻𑀬𑀦𑁆𑀢𑀺 𑀯𑀺𑀧𑀸𑀘𑁂𑀦𑁆𑀢𑀺 ‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀅𑀩𑁆𑀪𑀼𑀢𑀁 𑀯𑀢

𑀪𑁄 ¶ , 𑀏𑀢𑁆𑀣 𑀤𑀸𑀦𑀺 𑀓𑁄 𑀦 𑀲𑁄𑀢𑀸𑀧𑀦𑁆𑀦𑁄 𑀪𑀯𑀺𑀲𑁆𑀲𑀢𑀺, 𑀬𑀢𑁆𑀭 𑀳𑀺 𑀦𑀸𑀫 𑀲𑀭𑀡𑀸𑀦𑀺 𑀲𑀓𑁆𑀓𑁄 𑀓𑀸𑀮𑀗𑁆𑀓𑀢𑁄, 𑀲𑁄 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄 ‘𑀲𑁄𑀢𑀸𑀧𑀦𑁆𑀦𑁄 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’𑀢𑀺, 𑀲𑀭𑀡𑀸𑀦𑀺 𑀲𑀓𑁆𑀓𑁄 𑀲𑀺𑀓𑁆𑀔𑀸𑀬 𑀅𑀧𑀭𑀺𑀧𑀽𑀭𑀓𑀸𑀭𑀻 𑀅𑀳𑁄𑀲𑀻’’𑀢𑀺 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀬𑁄 𑀲𑁄 𑀫𑀳𑀸𑀦𑀸𑀫 𑀤𑀻𑀖𑀭𑀢𑁆𑀢𑀁 𑀉𑀧𑀸𑀲𑀓𑁄 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑁄, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑁄, 𑀲𑁄 𑀓𑀣𑀁 𑀯𑀺𑀦𑀺𑀧𑀸𑀢𑀁 𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀙𑀝𑁆𑀞𑀁 𑀲𑀁𑀕𑀻𑀢𑀁 𑀧𑀞𑀫𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑁂𑀦 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀆𑀭𑀩𑁆𑀪 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀪𑀸𑀲𑀺𑀢𑀁.

𑀆𑀬𑀲𑁆𑀫𑀸 𑀪𑀦𑁆𑀢𑁂 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀧𑀘𑁆𑀙𑀸𑀲𑀫𑀡𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀕𑀳𑀧𑀢𑀺𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺, 𑀦𑀺𑀲𑀚𑁆𑀚 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀆𑀩𑀸𑀥𑀺𑀓𑀁 𑀤𑀼𑀓𑁆𑀔𑀺𑀢𑀁 𑀩𑀸𑀴𑁆𑀳𑀕𑀺𑀮𑀸𑀦𑀁 𑀏𑀢𑀤𑀯𑁄𑀘 ‘‘𑀓𑀘𑁆𑀘𑀺 𑀢𑁂 𑀕𑀳𑀧𑀢𑀺 𑀔𑀫𑀦𑀻𑀬𑀁 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀧𑀝𑀺𑀓𑁆𑀓𑀫𑀦𑁆𑀢𑀺, 𑀦𑁄 𑀅𑀪𑀺𑀓𑁆𑀓𑀫𑀦𑁆𑀢𑀺, 𑀧𑀝𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀦𑁄 𑀅𑀪𑀺𑀓𑁆𑀓𑀫𑁄’’𑀢𑀺, 𑀦 𑀫𑁂 𑀪𑀦𑁆𑀢𑁂 𑀔𑀫𑀦𑀻𑀬𑀁, 𑀦 𑀬𑀸𑀧𑀦𑀻𑀬𑀁, 𑀩𑀸𑀴𑁆𑀳𑀸 𑀫𑁂 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀪𑀺𑀓𑁆𑀓𑀫𑀦𑁆𑀢𑀺, 𑀦𑁄 𑀧𑀝𑀺𑀓𑁆𑀓𑀫𑀦𑁆𑀢𑀺, 𑀅𑀪𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀦𑁄 𑀧𑀝𑀺𑀓𑁆𑀓𑀫𑁄𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀬𑀣𑀸 𑀭𑀽𑀧𑁂𑀦 𑀔𑁄 𑀕𑀳𑀧𑀢𑀺 𑀩𑀼𑀤𑁆𑀥𑁂 𑀅𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀬𑀭𑀁 𑀉𑀧𑀧𑀚𑁆𑀚𑀢𑀺 𑀢𑀣𑀸𑀭𑀽𑀧𑁄 𑀢𑁂 𑀩𑀼𑀤𑁆𑀥𑁂 𑀅𑀧𑁆𑀧𑀲𑀸𑀤𑁄 𑀦𑀢𑁆𑀣𑀺, 𑀅𑀢𑁆𑀣𑀺 𑀘 𑀔𑁄 𑀢𑁂 𑀕𑀳𑀧𑀢𑀺 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁄 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… 𑀪𑀕𑀯𑀸’𑀢𑀺 𑀢𑀜𑁆𑀘 𑀧𑀦 𑀢𑁂 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀁 𑀅𑀢𑁆𑀢𑀦𑀺 𑀲𑀫𑀦𑀼𑀧𑀲𑁆𑀲𑀢𑁄 𑀞𑀸𑀦𑀲𑁄 𑀯𑁂𑀤𑀦𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀪𑀸𑀲𑀺𑀢𑀁.

𑀬𑀲𑁆𑀲 ¶ 𑀲𑀤𑁆𑀥𑀸 𑀢𑀣𑀸𑀕𑀢𑁂, 𑀅𑀘𑀮𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸;

𑀲𑀻𑀮𑀜𑁆𑀘 𑀬𑀲𑁆𑀲 𑀓𑀮𑁆𑀬𑀸𑀡𑀁, 𑀅𑀭𑀺𑀬𑀓𑀦𑁆𑀢𑀁 𑀧𑀲𑀁𑀲𑀺𑀢𑀁.

𑀲𑀗𑁆𑀖𑁂 𑀧𑀲𑀸𑀤𑁄 𑀬𑀲𑁆𑀲𑀢𑁆𑀣𑀺, 𑀉𑀚𑀼𑀪𑀽𑀢𑀜𑁆𑀘 𑀤𑀲𑁆𑀲𑀦𑀁;

𑀅𑀤𑀮𑀺𑀤𑁆𑀤𑁄𑀢𑀺 𑀢𑀁 𑀆𑀳𑀼, 𑀅𑀫𑁄𑀖𑀁 𑀢𑀲𑁆𑀲 𑀚𑀻𑀯𑀺𑀢𑀁.

𑀢𑀲𑁆𑀫𑀸 𑀲𑀤𑁆𑀥𑀜𑁆𑀘 𑀲𑀻𑀮𑀜𑁆𑀘, 𑀧𑀲𑀸𑀤𑀁 𑀥𑀫𑁆𑀫𑀤𑀲𑁆𑀲𑀦𑀁;

𑀅𑀦𑀼𑀬𑀼𑀜𑁆𑀚𑁂𑀣 𑀫𑁂𑀥𑀸𑀯𑀻, 𑀲𑀭𑀁 𑀩𑀼𑀤𑁆𑀥𑀸𑀦𑀲𑀸𑀲𑀦𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 𑀆𑀯𑀼𑀲𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀯𑀕𑁆𑀕𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀲𑀢𑁆𑀢𑀫𑀁 𑀲𑀁𑀕𑀻𑀢𑀁 𑀫𑀳𑀸𑀦𑀸𑀫𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀓𑁆𑀓𑁂𑀲𑀼 ¶ 𑀪𑀦𑁆𑀢𑁂 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀫𑀳𑀸𑀦𑀸𑀫𑀁 𑀲𑀓𑁆𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁.

𑀫𑀳𑀸𑀦𑀸𑀫𑁄 𑀪𑀦𑁆𑀢𑁂 𑀲𑀓𑁆𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄 𑀪𑀦𑁆𑀢𑁂 𑀉𑀧𑀸𑀲𑀓𑁄 𑀳𑁄𑀢𑀻’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀬𑀢𑁄 𑀔𑁄 𑀫𑀳𑀸𑀦𑀸𑀫 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀢𑁄 𑀳𑁄𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄 𑀪𑀦𑁆𑀢𑁂 𑀉𑀧𑀸𑀲𑀓𑁄 𑀳𑁄𑀢𑀺.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀦𑀯𑀫𑀁 𑀲𑀁𑀕𑀻𑀢𑀁 𑀓𑀸𑀴𑀺𑀕𑁄𑀥𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀓𑀸𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀓𑁆𑀓𑁂𑀲𑀼 𑀪𑀦𑁆𑀢𑁂 𑀓𑀸𑀴𑀺𑀕𑁄𑀥𑀁 𑀦𑀸𑀫 𑀲𑀸𑀓𑀺𑀬𑀸𑀦𑀺𑀁 𑀆𑀭𑀩𑁆𑀪 ‘‘𑀘𑀢𑀽𑀳𑀺 𑀔𑁄 𑀕𑁄𑀥𑁂 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀲𑀸𑀯𑀺𑀓𑀸 𑀲𑁄𑀢𑀸𑀧𑀦𑁆𑀦𑀸 𑀳𑁄𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀮𑀸𑀪𑀸 ¶ 𑀢𑁂 𑀕𑁄𑀥𑁂, 𑀲𑀼𑀮𑀤𑁆𑀥𑀁 𑀢𑁂 𑀕𑁄𑀥𑁂, 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀢𑀬𑀸 𑀕𑁄𑀥𑁂 𑁋

𑀧𑀼𑀘𑁆𑀙𑀸 𑁋 𑀢𑁂𑀦𑀸𑀯𑀼𑀲𑁄 𑀚𑀸𑀦𑀢𑀸…𑀧𑁂… 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑁄𑀢𑀸𑀧𑀢𑁆𑀢𑀺𑀲𑀁𑀬𑀼𑀢𑁆𑀢𑁂 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀯𑀕𑁆𑀕𑁂 𑀤𑀲𑀫𑀁 𑀦𑀦𑁆𑀤𑀺𑀬𑀲𑀓𑁆𑀓𑀲𑀼𑀢𑁆𑀢𑀁 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀓𑁆𑀓𑁂𑀲𑀼 𑀪𑀦𑁆𑀢𑁂 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀸𑀭𑀸𑀫𑁂 𑀦𑀦𑁆𑀤𑀺𑀬𑀁 𑀲𑀓𑁆𑀓𑀁 𑀆𑀭𑀩𑁆𑀪 𑀪𑀸𑀲𑀺𑀢𑀁. 𑀦𑀦𑁆𑀤𑀺𑀬𑁄 𑀪𑀦𑁆𑀢𑁂 𑀲𑀓𑁆𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀬𑀲𑁆𑀲𑁂𑀯 𑀦𑀼 𑀔𑁄 𑀪𑀦𑁆𑀢𑁂 𑀅𑀭𑀺𑀬𑀲𑀸𑀯𑀓𑀲𑁆𑀲 𑀘𑀢𑁆𑀢𑀸𑀭𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸𑀲𑀩𑁆𑀩𑀁 𑀦𑀢𑁆𑀣𑀺, 𑀲𑁆𑀯𑁂𑀯 𑀦𑀼 𑀔𑁄 𑀪𑀦𑁆𑀢𑁂 𑀅𑀭𑀺𑀬𑀲𑀸𑀯𑀓𑁄 𑀧𑀫𑀸𑀤𑀯𑀺𑀳𑀸𑀭𑀻’’𑀢𑀺. 𑀢𑀲𑁆𑀫𑀺𑀁 𑀪𑀦𑁆𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀬𑀲𑁆𑀲 𑀔𑁄 𑀦𑀦𑁆𑀤𑀺𑀬 𑀘𑀢𑁆𑀢𑀸𑀭𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺 𑀲𑀩𑁆𑀩𑁂𑀦𑀲𑀩𑁆𑀩𑀁 𑀲𑀩𑁆𑀩𑀣𑀸𑀲𑀩𑁆𑀩𑀁 𑀦𑀢𑁆𑀣𑀺, 𑀢𑀫𑀳𑀁 𑀩𑀸𑀳𑀺𑀭𑁄 𑀧𑀼𑀣𑀼𑀚𑁆𑀚𑀦𑀧𑀓𑁆𑀔𑁂 𑀞𑀺𑀢𑁄𑀢𑀺 𑀯𑀤𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀲𑀘𑁆𑀘𑀲𑀁𑀬𑀼𑀢𑁆𑀢𑁂 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀬𑀓𑀫𑀳𑀸𑀣𑁂𑀭𑁂𑀳𑀺 𑀤𑀲𑀫𑀁 𑀲𑀁𑀕𑀻𑀢𑀁 𑀢𑀺𑀭𑀘𑁆𑀙𑀸𑀦𑀓𑀣𑀸𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 𑀫𑀸 𑀪𑀺𑀓𑁆𑀔𑀯𑁂 𑀅𑀦𑁂𑀓𑀯𑀺𑀳𑀺𑀢𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀓𑀣𑁂𑀬𑁆𑀬𑀸𑀣. 𑀲𑁂𑀬𑁆𑀬𑀣𑀺𑀤𑀁, 𑀭𑀸𑀚𑀓𑀣𑀁 𑀘𑁄𑀭𑀓𑀣𑀁 𑀫𑀳𑀸𑀫𑀢𑁆𑀢𑀓𑀣𑀁 𑀲𑁂𑀦𑀸𑀓𑀣𑀁 𑀪𑀬𑀓𑀣𑀁 𑀬𑀼𑀤𑁆𑀥𑀓𑀣𑀁 𑀅𑀦𑁆𑀦𑀓𑀣𑀁 𑀧𑀸𑀦𑀓𑀣𑀁 𑀯𑀢𑁆𑀣𑀓𑀣𑀁 𑀲𑀬𑀦𑀓𑀣𑀁 𑀏𑀯𑀫𑀸𑀤𑀺𑀦𑀸 𑀪𑀦𑁆𑀢𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀇𑀤𑀁 ¶ 𑀤𑀼𑀓𑁆𑀔𑀦𑁆𑀢𑀺 𑀓𑀣𑁂𑀬𑁆𑀬𑀸𑀣.

𑀢𑀲𑁆𑀫𑀸𑀢𑀺𑀳 ¶ 𑀪𑀺𑀓𑁆𑀔𑀯𑁂 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀬𑁄𑀕𑁄 𑀓𑀭𑀡𑀻𑀬𑁄…𑀧𑁂… 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀬𑁄𑀕𑁄 𑀓𑀭𑀡𑀻𑀬𑁄.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 𑀆𑀯𑀼𑀲𑁄 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀯𑀕𑁆𑀕𑁂 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀧𑀞𑀫𑀁 𑀲𑀁𑀕𑀻𑀢𑀁 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀩𑀸𑀭𑀸𑀡𑀲𑀺𑀬𑀁 𑀪𑀦𑁆𑀢𑁂 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀤𑁆𑀯𑁂 𑀫𑁂 𑀪𑀺𑀓𑁆𑀔𑀯𑁂 𑀅𑀦𑁆𑀢𑀸 𑀧𑀩𑁆𑀩𑀚𑀺𑀢𑁂𑀦 𑀦𑀲𑁂𑀯𑀺𑀢𑀩𑁆𑀩𑀸. 𑀓𑀢𑀫𑁂 𑀤𑁆𑀯𑁂, 𑀬𑁄 𑀘𑀸𑀬𑀁 𑀓𑀸𑀫𑁂𑀲𑀼 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄 𑀳𑀻𑀦𑁄 𑀕𑀫𑁆𑀫𑁄 𑀧𑁄𑀣𑀼𑀚𑁆𑀚𑀦𑀺𑀓𑁄 𑀅𑀦𑀭𑀺𑀬𑁄 𑀅𑀦𑀢𑁆𑀣𑀲𑀁𑀳𑀺𑀢𑁄, 𑀬𑁄 𑀘𑀸𑀬𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 ¶ 𑀤𑀼𑀓𑁆𑀔𑁄 𑀅𑀦𑀭𑀺𑀬𑁄 𑀅𑀦𑀢𑁆𑀣𑀲𑀁𑀳𑀺𑀢𑁄, 𑀏𑀢𑁂 𑀔𑁄 𑀪𑀺𑀓𑁆𑀔𑀯𑁂 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑀺𑀫𑀸𑀧𑀝𑀺𑀧𑀤𑀸 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀓𑁄𑀝𑀺𑀕𑀸𑀫𑀯𑀕𑁆𑀕𑁂 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀧𑀜𑁆𑀘𑀫𑀁 𑀲𑀁𑀕𑀻𑀢𑀁 𑀆𑀲𑀯𑀓𑁆𑀔𑀬𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀚𑀸𑀦𑀢𑁄𑀳𑀁 𑀪𑀺𑀓𑁆𑀔𑀯𑁂 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑀁 𑀯𑀤𑀸𑀫𑀺, 𑀦𑁄 𑀅𑀚𑀸𑀦𑀢𑁄 𑀅𑀧𑀲𑁆𑀲𑀢𑁄. 𑀓𑀺𑀜𑁆𑀘 𑀪𑀺𑀓𑁆𑀔𑀯𑁂 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺, 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀪𑀺𑀓𑁆𑀔𑀯𑁂 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺, 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻𑀧𑀝𑀺𑀧𑀤𑀸𑀢𑀺 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺. 𑀏𑀯𑀁 𑀔𑁄 𑀪𑀺𑀓𑁆𑀔𑀯𑁂 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺. 𑀢𑀲𑁆𑀫𑀸𑀢𑀺𑀳 𑀪𑀺𑀓𑁆𑀔𑀯𑁂 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀬𑁄𑀕𑁄 𑀓𑀭𑀡𑀻𑀬𑁄, 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻𑀧𑀝𑀺𑀧𑀤𑀸𑀢𑀺 𑀬𑁄𑀕𑁄 𑀓𑀭𑀡𑀻𑀬𑁄’’𑀢𑀺 𑀏𑀯𑀁 𑀔𑁄 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀲𑀻𑀲𑀧𑀸𑀯𑀦𑀯𑀕𑁆𑀕𑁂 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀧𑀞𑀫𑀁 𑀲𑀁𑀕𑀻𑀢𑀁 𑀲𑀻𑀲𑀧𑀸𑀯𑀦𑀲𑀼𑀢𑁆𑀢𑀁 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀓𑁄𑀲𑀫𑁆𑀩𑀺𑀬𑀁 ¶ 𑀪𑀦𑁆𑀢𑁂 𑀲𑀻𑀲𑀧𑀸𑀯𑀦𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀢𑀁 𑀓𑀺𑀁 𑀫𑀜𑁆𑀜𑀣 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼𑀔𑁄 𑀩𑀳𑀼𑀢𑀭𑀁 𑀬𑀸𑀦𑀺 𑀯𑀸 𑀫𑀬𑀸 𑀧𑀭𑀺𑀢𑁆𑀢𑀸𑀦𑀺 𑀲𑀻𑀲𑀧𑀸𑀧𑀡𑁆𑀡𑀸𑀦𑀺 𑀧𑀸𑀡𑀺𑀦𑀸 𑀕𑀳𑀺𑀢𑀸𑀦𑀺 𑀬𑀤𑀺𑀤𑀁 𑀉𑀧𑀭𑀺 𑀲𑀻𑀲𑀧𑀸𑀯𑀦𑁂’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑀁.

𑀧𑀼𑀘𑁆𑀙𑀸 𑁋 𑀢𑀢𑁆𑀣𑁂𑀯 ¶ 𑀆𑀯𑀼𑀲𑁄 𑀧𑁄𑀭𑀸𑀡𑀓𑁂𑀳𑀺 𑀥𑀫𑁆𑀫𑀲𑀁𑀕𑀸𑀳𑀓𑀫𑀳𑀸𑀣𑁂𑀭𑁂𑀳𑀺 𑀧𑀭𑀺𑀬𑁄𑀲𑀸𑀦𑀪𑀸𑀯𑁂𑀦 𑀲𑀁𑀕𑀻𑀢𑁄 𑀧𑀜𑁆𑀘𑀕𑀢𑀺𑀧𑁂𑀬𑁆𑀬𑀸𑀮𑀯𑀕𑁆𑀕𑁂, 𑀪𑀕𑀯𑀢𑀸 𑀓𑀢𑁆𑀣 𑀓𑀁 𑀆𑀭𑀩𑁆𑀪 𑀓𑀣𑀜𑁆𑀘 𑀪𑀸𑀲𑀺𑀢𑁄.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀯𑁂𑀲𑀸𑀮𑀺𑀬𑀁 𑀪𑀦𑁆𑀢𑁂 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀆𑀭𑀩𑁆𑀪 ‘‘𑀢𑀁 𑀓𑀺𑀁 𑀫𑀜𑁆𑀜𑀣 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀩𑀳𑀼𑀢𑀭𑀁, 𑀬𑁄 𑀯𑀸𑀬𑀁 𑀫𑀬𑀸 𑀧𑀭𑀺𑀢𑁆𑀢𑁄 𑀦𑀔𑀲𑀺𑀔𑀸𑀬𑀁 𑀧𑀁𑀲𑀼 𑀆𑀭𑁄𑀧𑀺𑀢𑁄, 𑀅𑀬𑀁 𑀯𑀸 𑀫𑀳𑀸𑀧𑀣𑀯𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀕𑀯𑀢𑀸 𑀪𑀸𑀲𑀺𑀢𑁄.

𑀧𑀼𑀘𑁆𑀙𑀸 𑁋 𑀓𑁂 ¶ 𑀆𑀯𑀼𑀲𑁄 𑀲𑀺𑀓𑁆𑀔𑀦𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑁂𑀓𑁆𑀔𑀸 𑀘 𑀪𑀦𑁆𑀢𑁂 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀸 𑀘 𑀲𑀺𑀓𑁆𑀔𑀦𑁆𑀢𑀺.

𑀧𑀼𑀘𑁆𑀙𑀸 𑁋 𑀓𑁂 ¶ 𑀆𑀯𑀼𑀲𑁄 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀅𑀭𑀳𑀦𑁆𑀢𑁄 𑀪𑀦𑁆𑀢𑁂 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸.

𑀧𑀼𑀘𑁆𑀙𑀸 𑁋 𑀓𑀢𑁆𑀣 𑀆𑀯𑀼𑀲𑁄 𑀞𑀺𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀲𑀺𑀓𑁆𑀔𑀸𑀓𑀸𑀫𑁂𑀲𑀼 𑀪𑀦𑁆𑀢𑁂 𑀞𑀺𑀢𑀁.

𑀧𑀼𑀘𑁆𑀙𑀸 𑁋 𑀓𑁂 𑀆𑀯𑀼𑀲𑁄 𑀥𑀸𑀭𑁂𑀦𑁆𑀢𑀺.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀬𑁂𑀲𑀁 𑀪𑀦𑁆𑀢𑁂 𑀯𑀢𑁆𑀢𑀢𑀺 𑀢𑁂 𑀥𑀸𑀭𑁂𑀦𑁆𑀢𑀺.

𑀧𑀼𑀘𑁆𑀙𑀸 𑁋 𑀓𑀲𑁆𑀲 ¶ 𑀆𑀯𑀼𑀲𑁄 𑀯𑀘𑀦𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀪𑀕𑀯𑀢𑁄 𑀪𑀦𑁆𑀢𑁂 𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀧𑀼𑀘𑁆𑀙𑀸 𑁋 𑀓𑁂𑀦 𑀆𑀯𑀼𑀲𑁄 𑀆𑀪𑀢𑀁.

𑀯𑀺𑀲𑁆𑀲𑀚𑁆𑀚𑀦𑀸 𑁋 𑀧𑀭𑀫𑁆𑀧𑀭𑀸𑀬 𑀪𑀦𑁆𑀢𑁂 𑀆𑀪𑀢𑀁.