𑀅𑀜𑁆𑀜 > 𑀦𑀻𑀢𑀺-𑀕𑀦𑁆𑀣-𑀲𑀗𑁆𑀕𑀳𑁄

(𑁧) 𑀆𑀘𑀭𑀺𑀬𑀓𑀣𑀸 (𑁨) 𑀲𑀺𑀧𑁆𑀧𑀓𑀣𑀸 (𑁩) 𑀧𑀜𑁆𑀜𑀸𑀓𑀣𑀸 (𑁪) 𑀲𑀼𑀢𑀓𑀣𑀸 (𑁫) 𑀓𑀣𑀸𑀦𑀓𑀣𑀸 (𑁬) 𑀥𑀦𑀓𑀣𑀸 (𑁭) 𑀤𑁂𑀲𑀓𑀣𑀸 (𑁮) 𑀦𑀺𑀲𑁆𑀲𑀬𑀓𑀣𑀸 (𑁯) 𑀫𑀺𑀢𑁆𑀢𑀓𑀣𑀸 (𑁧𑁦) 𑀤𑀼𑀚𑁆𑀚𑀦𑀓𑀣𑀸 (𑁧𑁧) 𑀲𑀼𑀚𑀦𑀓𑀣𑀸 (𑁧𑁨) 𑀩𑀮𑀓𑀣𑀸 (𑁧𑁩) 𑀇𑀢𑁆𑀣𑀺𑀓𑀣𑀸 (𑁧𑁪) 𑀬𑀼𑀢𑁆𑀢𑀓𑀣𑀸 (𑁧𑁫) 𑀤𑀸𑀲𑀓𑀣𑀸 (𑁧𑁬) 𑀖𑀭𑀸𑀯𑀸𑀲𑀓𑀣𑀸 (𑁧𑁭) 𑀓𑀸𑀢𑀩𑁆𑀩𑀓𑀣𑀸 (𑁧𑁮) 𑀅𑀓𑀸𑀢𑀩𑁆𑀩𑀓𑀣𑀸 (𑁧𑁯) 𑀜𑀸𑀢𑀩𑁆𑀩𑀓𑀣𑀸 (𑁨𑁦) 𑀅𑀮𑀗𑁆𑀓𑀸𑀭𑀓𑀣𑀸 (𑁨𑁧) 𑀭𑀸𑀚𑀥𑀫𑁆𑀫𑀓𑀣𑀸 (𑁨𑁨) 𑀉𑀧𑀲𑁂𑀯𑀓𑀓𑀣𑀸 (𑁨𑁩) 𑀤𑀼𑀓𑁆𑀔𑀸𑀤𑀺𑀫𑀺𑀲𑁆𑀲𑀓𑀓𑀣𑀸 (𑁨𑁪) 𑀧𑀓𑀺𑀡𑁆𑀡𑀓𑀓𑀣𑀸

𑀘𑀓𑁆𑀓𑀸𑀢𑀺𑀘𑀓𑁆𑀓𑀘𑀓𑁆𑀓𑀺𑀦𑁆𑀤𑁄, 𑀤𑁂𑀯𑀸𑀢𑀺𑀤𑁂𑀯𑀸𑀤𑁂𑀯𑀺𑀦𑁆𑀤𑁄,

𑀩𑁆𑀭𑀳𑁆𑀫𑀸𑀢𑀺 𑀩𑁆𑀭𑀳𑁆𑀫𑀩𑁆𑀭𑀳𑁆𑀫𑀺𑀦𑁆𑀤𑁄, 𑀚𑀺𑀦𑁄 𑀧𑀽𑀭𑁂𑀢𑀼 𑀫𑁂 𑀪𑀸𑀯𑀁.

𑀘𑀺𑀭𑀁 𑀢𑀺𑀝𑁆𑀞𑀢𑀼 𑀮𑁄𑀓𑀫𑁆𑀳𑀺, 𑀥𑀁𑀲𑀓𑀁 𑀲𑀩𑁆𑀩𑀧𑀸𑀡𑀺𑀦𑀁;

𑀫𑀳𑀸𑀫𑁄𑀳𑀢𑀫𑀁 𑀚𑀬𑀁, 𑀚𑁄𑀢𑀦𑁆𑀢𑀁 𑀚𑀺𑀦𑀲𑀸𑀲𑀦𑀁.

𑀯𑀦𑁆𑀤𑀺𑀢𑁆𑀯𑀸 𑀭𑀢𑀦𑀁 𑀲𑁂𑀝𑁆𑀞𑀁, 𑀦𑀺𑀲𑁆𑀲𑀸𑀬 𑀧𑀼𑀩𑁆𑀩𑀓𑁂 𑀕𑀭𑀼;

𑀦𑀻𑀢𑀺𑀥𑀫𑁆𑀫𑀁 𑀧𑀯𑀓𑁆𑀔𑀸𑀫𑀺, 𑀲𑀩𑁆𑀩𑀮𑁄𑀓 𑀲𑀼𑀔𑀸𑀯𑀳𑀁.

𑀆𑀘𑀭𑀺𑀬𑁄 𑀘 𑀲𑀺𑀧𑁆𑀧𑀜𑁆𑀘, 𑀧𑀜𑁆𑀜𑀸𑀲𑀼𑀢𑀓𑀣𑀸𑀥𑀦𑀁;

𑀤𑁂𑀲𑀜𑁆𑀘 𑀦𑀺𑀲𑁆𑀲𑀬𑁄 𑀫𑀺𑀢𑁆𑀢𑀁, 𑀤𑀼𑀚𑁆𑀚𑀦𑁄 𑀲𑀼𑀚𑀦𑁄 𑀩𑀮𑀁.

𑀇𑀢𑁆𑀣𑀻 𑀧𑀼𑀢𑁆𑀢𑁄 𑀘 𑀤𑀸𑀲𑁄 𑀘, 𑀖𑀭𑀸𑀯𑀸𑀲𑁄 𑀓𑀢𑀸𑀓𑀢𑁄;

𑀜𑀸𑀢𑀩𑁆𑀩𑁄 𑀘 𑀅𑀮𑀗𑁆𑀓𑀸𑀭𑁄, 𑀭𑀸𑀚𑀥𑀫𑁆𑀫𑀸 𑀧𑀲𑁂𑀯𑀓𑁄;

𑀤𑀼𑀓𑁆𑀔𑀸𑀤𑀺𑀫𑀺𑀲𑁆𑀲𑀓𑁄 𑀘𑁂𑀯, 𑀧𑀓𑀺𑀡𑁆𑀡𑀓𑀸𑀢𑀺 𑀫𑀸𑀢𑀺𑀓𑀸.

𑀲𑀻𑀳𑀸 𑀏𑀓𑀁 𑀩𑀓𑀸 𑀏𑀓𑀁, 𑀲𑀺𑀓𑁆𑀔𑁂 𑀘𑀢𑁆𑀢𑀸𑀭𑀺 𑀓𑀼𑀓𑁆𑀓𑀼𑀝𑀸;

𑀧𑀜𑁆𑀘 𑀓𑀸𑀓𑀸 𑀭𑀸𑀚𑀸 𑀦𑀸𑀫, 𑀙 𑀲𑀼𑀦𑀓𑁆𑀔𑀸 𑀢𑀻𑀡𑀺 𑀕𑀤𑁆𑀭𑀪𑀸.

𑀫𑀳𑀸𑀓𑀫𑁆𑀫𑀁 𑀔𑀼𑀤𑁆𑀤𑀓𑀁 𑀯𑀸, 𑀬𑀁 𑀓𑀫𑁆𑀫𑀁 𑀓𑀸𑀢𑀼𑀫𑀺𑀘𑁆𑀙𑀢𑀺;

𑀲𑀩𑁆𑀩𑀸𑀭𑀫𑁆𑀪𑁂𑀦 𑀓𑀸𑀢𑀩𑁆𑀩𑀁, 𑀲𑀻𑀳𑀸 𑀏𑀓𑀁 𑀢𑀤𑀸 𑀪𑀯𑁂.

𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀼𑀲𑀁𑀬𑀫, 𑀩𑀓𑁄𑀯 𑀧𑀡𑁆𑀟𑀺𑀢𑁄 𑀪𑀯𑁂;

𑀤𑁂𑀲𑀓 𑀮𑁄𑀫𑀧𑀦𑁆𑀦𑀸𑀦𑀺, 𑀲𑀩𑁆𑀩𑀓𑀫𑁆𑀫𑀸𑀦𑀺 𑀲𑀸𑀥𑀬𑁂.

𑀧𑀼𑀩𑁆𑀩𑀝𑁆𑀞𑀸𑀦𑀜𑁆𑀘 𑀬𑀼𑀤𑁆𑀥𑀜𑁆𑀘, 𑀲𑀁𑀯𑀺𑀪𑀸𑀕𑀜𑁆𑀘 𑀩𑀦𑁆𑀥𑀼 𑀳𑀺;

𑀣𑀺𑀬𑀸 𑀅𑀓𑁆𑀓𑀫𑁆𑀫 𑀪𑀼𑀢𑁆𑀢𑀜𑁆𑀘, 𑀲𑀺𑀓𑁆𑀔𑁂 𑀘𑀢𑁆𑀢𑀸𑀭𑀺 𑀓𑀼𑀓𑁆𑀓𑀼𑀝𑁄.

𑀕𑀼𑀬𑁆𑀳𑁂 𑀫𑁂𑀣𑀼𑀦𑀁 𑀧𑁂𑀓𑁆𑀔𑀺𑀢𑁆𑀯𑀸, 𑀪𑁄𑀚𑀦𑀁 𑀜𑀸𑀢𑀺𑀲𑀗𑁆𑀕𑀳𑁄;

𑀯𑀺𑀮𑁄𑀓𑀸 𑀧𑁂𑀓𑁆𑀔𑀦𑀸𑀮𑀲𑁆𑀬𑀁, 𑀧𑀜𑁆𑀘 𑀲𑀺𑀓𑁆𑀔𑁂𑀬𑁆𑀬 𑀯𑀸𑀬𑀲𑀸.

𑀅𑀦𑀸𑀮𑀲𑁆𑀲𑀁𑀢𑀺𑀲𑀯𑀦𑁆𑀢𑀸𑀲𑁄, 𑀲𑀼𑀦𑀺𑀤𑁆𑀥𑀸 𑀲𑀼𑀧𑁆𑀧𑀩𑁄𑀥𑀦𑀸;

𑀤𑀴𑁆𑀳𑀪𑀢𑁆𑀢𑀺 𑀘 𑀲𑀽𑀭𑀜𑁆𑀘, 𑀙 𑀏𑀢𑁂𑀲𑁆𑀯𑀸𑀦𑀢𑁄 𑀕𑀼𑀡𑁄.

𑀔𑀺𑀦𑁆𑀦𑁄𑀯 𑀯𑀳𑀢𑁂 𑀪𑀸𑀭𑀁, 𑀲𑀻𑀢𑀼𑀡𑁆𑀳𑀜𑁆𑀘 𑀦 𑀘𑀺𑀦𑁆𑀢𑀬𑀻;

𑀲𑀦𑁆𑀢𑀼𑀝𑁆𑀞𑁄 𑀘 𑀪𑀯𑁂 𑀦𑀺𑀘𑁆𑀘𑀁, 𑀢𑀻𑀡𑀺 𑀲𑀺𑀓𑁆𑀔𑁂𑀬𑁆𑀬 𑀕𑀤𑁆𑀭𑀪𑀸.

𑀯𑀻𑀲𑀢𑀺 𑀢𑀸𑀦𑀺 𑀕𑀼𑀡𑀸𑀦𑀺, 𑀘𑀭𑁂𑀬𑁆𑀬 𑀇𑀳 𑀧𑀡𑁆𑀟𑀺𑀢𑁄;

𑀯𑀺𑀚𑁂𑀬𑁆𑀬 𑀭𑀺𑀧𑀽 𑀲𑀩𑁆𑀩𑁂𑀧𑀺, 𑀢𑁂𑀚𑀲𑁆𑀲𑀻 𑀲𑁄 𑀪𑀯𑀺𑀲𑁆𑀲𑀢𑀺.

(𑁧) 𑀧𑀡𑁆𑀟𑀺𑀢𑀓𑀡𑁆𑀟 (𑁨) 𑀲𑀼𑀚𑀦𑀓𑀡𑁆𑀟 (𑁩) 𑀩𑀸𑀮𑀤𑀼𑀚𑁆𑀚𑀦𑀓𑀡𑁆𑀟 (𑁪) 𑀫𑀺𑀢𑁆𑀢𑀓𑀡𑁆𑀟 (𑁫) 𑀭𑀸𑀚𑀓𑀡𑁆𑀟 (𑁬) 𑀦𑀸𑀬𑀓𑀓𑀡𑁆𑀟 (𑁭) 𑀧𑀼𑀢𑁆𑀢𑀓𑀡𑁆𑀟 (𑁮) 𑀯𑁂𑀚𑁆𑀚𑀸𑀘𑀭𑀺𑀬𑀓𑀡𑁆𑀟 (𑁯) 𑀤𑀸𑀲𑀓𑀓𑀡𑁆𑀟 (𑁧𑁦) 𑀇𑀢𑁆𑀣𑀺𑀓𑀡𑁆𑀟 (𑁧𑁧) 𑀧𑀓𑀺𑀡𑁆𑀡𑀓𑀓𑀡𑁆𑀟

𑀓𑀯𑀺𑀤𑀧𑁆𑀧𑀡𑀦𑀻𑀢𑀺𑀁𑀬𑁄, 𑀯𑀸𑀘𑀼𑀕𑁆𑀕𑀢𑀁 𑀓𑀭𑁄𑀢𑀺 𑀘𑁂;

𑀪𑀼𑀯𑀦𑀫𑀚𑁆𑀛𑁂 𑀏𑀲𑁄 𑀳𑀺, 𑀯𑀺𑀜𑁆𑀜𑀽 𑀧𑀡𑁆𑀟𑀺𑀢𑀚𑀸𑀢𑀺𑀓𑁄.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀫𑀳𑀸𑀓𑀯𑀺𑀯𑀭𑀁 ¶ 𑀩𑀼𑀤𑁆𑀥𑀁, 𑀥𑀫𑁆𑀫𑀜𑁆𑀘 𑀢𑁂𑀦 𑀲𑁂𑀯𑀺𑀢𑀁;

𑀲𑀗𑁆𑀖𑀁 𑀦𑀺𑀭𑀗𑁆𑀕𑀡𑀜𑁆𑀘𑀸𑀧𑀺, 𑀯𑀦𑁆𑀤𑀸𑀫𑀺 𑀲𑀺𑀭𑀲𑀸 𑀤𑀭𑀁.

𑀓𑀭𑀺𑀲𑁆𑀲𑀸𑀫𑀺 𑀲𑀫𑀸𑀲𑁂𑀦, 𑀦𑀸𑀦𑀸𑀲𑀢𑁆𑀣 𑀲𑀫𑀼𑀤𑁆𑀥𑀝𑀁;

𑀳𑀺𑀢𑀸𑀬 𑀓𑀯𑀺𑀦𑀁 𑀦𑀻𑀢𑀺𑀁, 𑀓𑀯𑀺𑀤𑀧𑁆𑀧𑀡𑀦𑀸𑀫𑀓𑀁.

𑀦𑀻𑀢𑀺 ¶ 𑀲𑀸𑀭𑁄 𑀫𑀦𑀼𑀲𑁆𑀲𑀸𑀦𑀁, 𑀫𑀺𑀢𑁆𑀢𑁄 𑀆𑀘𑀭𑀺𑀬𑁄𑀧𑀺 𑀘;

𑀫𑀸𑀢𑀸 𑀧𑀺𑀢𑀸 𑀘 𑀦𑀻𑀢𑀺𑀫𑀸, 𑀲𑀼𑀢𑀯𑀸 𑀕𑀦𑁆𑀣𑀓𑀸𑀭𑀓𑁄.

𑀅𑀮𑀲𑀲𑁆𑀲 ¶ 𑀓𑀼𑀢𑁄 𑀲𑀺𑀧𑁆𑀧𑀁, 𑀅𑀲𑀺𑀧𑁆𑀧𑀲𑁆𑀲 𑀓𑀼𑀢𑁄 𑀥𑀦𑀁;

𑀅𑀥𑀦𑀲𑁆𑀲 𑀓𑀼𑀢𑁄 𑀫𑀺𑀢𑁆𑀢𑀁, 𑀅𑀫𑀺𑀢𑁆𑀢𑀲𑁆𑀲 𑀓𑀼𑀢𑁄 𑀲𑀼𑀔𑀁;

𑀅𑀲𑀼𑀔𑀲𑁆𑀲 𑀓𑀼𑀢𑁄 𑀧𑀼𑀜𑁆𑀜𑀁, 𑀅𑀧𑀼𑀜𑁆𑀜𑀲𑁆𑀲 𑀓𑀼𑀢𑁄 𑀯𑀭𑀁.

𑀲𑀼𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻 ¶ 𑀘𑁂𑀯, 𑀲𑀼𑀪𑀸𑀲𑀺𑀢𑀪𑀸𑀲𑀻𑀧𑀺 𑀘;

𑀲𑀼𑀓𑀢𑀓𑀫𑁆𑀫𑀓𑀸𑀭𑀻 𑀘, 𑀧𑀡𑁆𑀟𑀺𑀢𑁄 𑀲𑀸𑀥𑀼𑀫𑀸𑀦𑀼𑀲𑁄.

𑀓𑀯𑀺𑀳𑁂𑀭𑀜𑁆𑀜𑀓𑀸 ¶ 𑀓𑀢𑁆𑀯𑀸, 𑀉𑀢𑁆𑀢𑀢𑁆𑀢𑀁 𑀲𑀢𑁆𑀣𑀓𑀜𑁆𑀘𑀦𑀁;

𑀪𑀽𑀲𑀦𑀁 𑀕𑀚𑁆𑀚𑀧𑀚𑁆𑀚𑀸𑀤𑀺𑀁, 𑀓𑀭𑁄𑀦𑁆𑀢𑀺 𑀘 𑀫𑀦𑁄𑀳𑀭𑀁.

𑀩𑀳𑀼𑀁 ¶ 𑀮𑀳𑀼𑀜𑁆𑀘 𑀕𑀳𑀡𑀁, 𑀲𑀫𑁆𑀫𑀽𑀧𑀥𑀸𑀭𑀡𑀫𑁆𑀧𑀺 𑀘;

𑀕𑀳𑀺𑀢 𑀅𑀲𑀫𑁆𑀫𑀼𑀲𑁆𑀲𑀦𑀁, 𑀏𑀢𑀁 𑀲𑀼𑀯𑀺𑀜𑁆𑀜𑀼𑀮𑀓𑁆𑀔𑀡𑀁.

𑀅𑀚𑀭𑀸𑀫𑀭𑀁𑀯 𑀧𑀜𑁆𑀜𑁄, 𑀯𑀺𑀚𑁆𑀚𑀫𑀢𑁆𑀣𑀜𑁆𑀘 𑀘𑀺𑀦𑁆𑀢𑀬𑁂;

𑀕𑀳𑀺𑀢𑁄 𑀇𑀯 𑀓𑁂𑀲𑁂𑀲𑀼, 𑀫𑀘𑁆𑀘𑀼𑀦𑀸 𑀥𑀫𑁆𑀫𑀫𑀸𑀘𑀭𑁂.

𑀲𑀺𑀧𑁆𑀧𑀲𑀫𑀁 ¶ 𑀥𑀦𑀁 𑀦𑀢𑁆𑀣𑀺, 𑀲𑀺𑀧𑁆𑀧𑀁 𑀘𑁄𑀭𑀸 𑀦 𑀕𑀡𑁆𑀳𑀭𑁂;

𑀇𑀥 𑀮𑁄𑀓𑁂 𑀲𑀺𑀧𑁆𑀧𑀁 𑀫𑀺𑀢𑁆𑀢𑀁, 𑀧𑀭𑀮𑁄𑀓𑁂 𑀲𑀼𑀔𑀸𑀯𑀳𑀁.

𑀪𑀼𑀜𑁆𑀚𑀦𑀢𑁆𑀣𑀁 ¶ 𑀓𑀣𑀦𑀢𑁆𑀣𑀁, 𑀫𑀼𑀔𑀁 𑀳𑁄𑀢𑀻𑀢𑀺 𑀦𑁄 𑀯𑀤𑁂;

𑀬𑀁 𑀯𑀸𑀢𑀁 𑀯𑀸 𑀫𑀼𑀔𑀸𑀭𑀼𑀴𑁆𑀳𑀁, 𑀯𑀘𑀦𑀁 𑀧𑀡𑁆𑀟𑀺𑀢𑁄 𑀦𑀭𑁄.

𑀤𑀼𑀫𑁆𑀫𑁂𑀥𑁂𑀳𑀺 𑀧𑀲𑀁𑀲𑀸 𑀘, 𑀯𑀺𑀜𑁆𑀜𑀽𑀳𑀺 𑀕𑀭𑀳𑀸 𑀘 𑀬𑀸;

𑀕𑀭𑀳𑀸𑀯 𑀲𑁂𑀬𑁆𑀬𑁄 𑀯𑀺𑀜𑁆𑀜𑀽𑀳𑀺, 𑀬𑀜𑁆𑀘𑁂 𑀩𑀸𑀮𑀧𑁆𑀧𑀲𑀁𑀲𑀦𑀸.

𑀅𑀘𑀺𑀦𑁆𑀢𑀺𑀬𑁂 ¶ 𑀲𑀸𑀝𑁆𑀞𑀓𑀣𑁂, 𑀧𑀡𑁆𑀟𑀺𑀢𑁄 𑀚𑀺𑀦𑀪𑀸𑀲𑀺𑀢𑁂;

𑀉𑀧𑀤𑁂𑀲𑀁 𑀲𑀤𑀸 𑀕𑀡𑁆𑀳𑁂, 𑀕𑀭𑀼𑀁 𑀲𑀫𑁆𑀫𑀸 𑀉𑀧𑀝𑁆𑀞𑀳𑀁.

𑀢𑀲𑁆𑀫𑀸 𑀲𑀸𑀝𑁆𑀞𑀓𑀣𑁂 𑀥𑀻𑀭𑁄, 𑀕𑀫𑁆𑀪𑀻𑀭𑁂 𑀚𑀺𑀦𑀪𑀸𑀲𑀺𑀢𑁂;

𑀉𑀧𑀤𑁂𑀲𑀁 𑀲𑀤𑀸 𑀕𑀡𑁆𑀳𑁂, 𑀕𑀭𑀼𑀁 𑀲𑀫𑁆𑀫𑀸 𑀉𑀧𑀝𑁆𑀞𑀳𑀁.

𑀕𑀭𑀽𑀧𑀤𑁂𑀲𑀳𑀻𑀦𑁄 ¶ 𑀳𑀺, 𑀅𑀢𑁆𑀣𑀲𑀸𑀭𑀁 𑀦 𑀯𑀺𑀦𑁆𑀤𑀢𑀺;

𑀅𑀢𑁆𑀣𑀲𑀸𑀭𑀯𑀺𑀳𑀻𑀦𑁄 𑀲𑁄, 𑀲𑀤𑁆𑀥𑀫𑁆𑀫𑀸 𑀧𑀭𑀺𑀳𑀸𑀬𑀢𑀺.

𑀕𑀭𑀽𑀧𑀤𑁂𑀲𑀮𑀸𑀪𑀻 𑀘, 𑀅𑀢𑁆𑀣𑀲𑀸𑀭𑀲𑀫𑀸𑀬𑀼𑀢𑁄;

𑀲𑀤𑁆𑀥𑀫𑁆𑀫𑀁 𑀧𑀭𑀺𑀧𑀸𑀮𑁂𑀦𑁆𑀢𑁄, 𑀲𑀤𑁆𑀥𑀫𑁆𑀫𑀲𑁆𑀫𑀸 𑀦 𑀳𑀸𑀬𑀢𑀺.

𑀲𑀩𑁆𑀩𑀤𑀩𑁆𑀩𑁂𑀲𑀼 ¶ 𑀯𑀺𑀚𑁆𑀚𑁂𑀯, 𑀤𑀩𑁆𑀩𑀫𑀸𑀳𑀼 𑀅𑀦𑀼𑀢𑁆𑀢𑀭𑀁;

𑀅𑀳𑀸𑀭𑀢𑁆𑀢𑀸 𑀅𑀦𑀕𑁆𑀖𑀢𑁆𑀢𑀸, 𑀅𑀓𑁆𑀔𑀬𑀢𑁆𑀢𑀸 𑀘 𑀲𑀩𑁆𑀩𑀤𑀸.

𑀅𑀧𑁆𑀧𑀓𑁂𑀦𑀧𑀺 𑀫𑁂𑀥𑀸𑀯𑀻, 𑀧𑀸𑀪𑀢𑁂𑀦 𑀯𑀺𑀘𑀓𑁆𑀔𑀡𑁄;

𑀲𑀫𑀼𑀝𑁆𑀞𑀸𑀧𑁂𑀢𑀺 𑀅𑀢𑁆𑀢𑀸𑀦𑀁, 𑀅𑀡𑀼𑀁 𑀅𑀕𑁆𑀕𑀺𑀁𑀯 𑀲𑀦𑁆𑀥𑀫𑀁.

𑀧𑀡𑁆𑀟𑀺𑀢𑁂 ¶ 𑀘 𑀕𑀼𑀡𑀸 𑀲𑀩𑁆𑀩𑁂, 𑀫𑀽𑀴𑁆𑀳𑁂 𑀤𑁄𑀲𑀸 𑀳𑀺 𑀓𑁂𑀯𑀮𑀁;

𑀢𑀲𑁆𑀫𑀸 𑀫𑀽𑀴𑁆𑀳𑀲𑀳𑀲𑁆𑀲𑁂𑀲𑀼, 𑀧𑀜𑁆𑀜𑁄 𑀏𑀓𑁄 𑀯𑀺𑀲𑁂𑀲𑀺𑀬𑀢𑁂.

𑀩𑀸𑀮𑀸 ¶ 𑀇𑀲𑁆𑀲𑀦𑁆𑀢𑀺 𑀤𑀼𑀫𑁆𑀫𑁂𑀥𑀸, 𑀕𑀼𑀡𑀻 𑀦𑀺𑀤𑁆𑀤𑁄𑀲𑀓𑀸𑀭𑀺𑀦𑁄;

𑀕𑀭𑀼𑀓𑁄 𑀧𑀡𑁆𑀟𑀺𑀢𑁄 𑀏𑀢𑀲-𑀫𑀺𑀲𑁆𑀲𑀁 𑀢𑁂𑀳𑁆𑀬𑀯𑀺𑀤𑁆𑀯𑀸 𑀲𑀫𑁄.

𑀫𑀦𑀼𑀜𑁆𑀜𑀫𑁂𑀯 ¶ 𑀪𑀸𑀲𑁂𑀬𑁆𑀬, 𑀦𑀸𑀫𑀦𑀼𑀜𑁆𑀜𑀁 𑀓𑀼𑀤𑀸𑀘𑀦𑀁;

𑀫𑀦𑀼𑀜𑁆𑀜𑀁 𑀪𑀸𑀲𑀫𑀸𑀦𑀲𑁆𑀲, 𑀕𑀭𑀼𑀁 𑀪𑀸𑀭𑀁 𑀉𑀤𑀤𑁆𑀥𑀭𑀺;

𑀥𑀦𑀜𑁆𑀘 𑀦𑀁 𑀅𑀮𑀸𑀪𑁂𑀲𑀺, 𑀢𑁂𑀦 𑀘𑀢𑁆𑀢𑀫𑀦𑁄 𑀅𑀳𑀼.

𑀯𑀺𑀚𑁆𑀚𑀸 ¶ 𑀤𑀤𑀸𑀢𑀺 𑀯𑀺𑀦𑀬𑀁, 𑀯𑀺𑀦𑀬𑀸 𑀬𑀸𑀢𑀺 𑀧𑀢𑁆𑀢𑀢𑀁;

𑀧𑀢𑁆𑀢𑀢𑁆𑀢𑀸 𑀥𑀦𑀁 𑀧𑀧𑁆𑀧𑁄𑀢𑀺, 𑀥𑀦𑀸 𑀥𑀫𑁆𑀫𑀁 𑀢𑀢𑁄 𑀲𑀼𑀔𑀁.

𑀬𑁂 𑀯𑀼𑀟𑁆𑀠𑀫𑀧𑀘𑀬𑀦𑁆𑀢𑀺, 𑀦𑀭𑀸 𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀸;

𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀸𑀲𑀁𑀲𑀸, 𑀲𑀫𑁆𑀧𑀭𑀸𑀬𑁂 𑀘 𑀲𑀼𑀕𑁆𑀕𑀢𑀺𑀁.

𑀫𑀸𑀢𑀭𑀺𑀯 ¶ 𑀧𑀭𑀤𑀸𑀭𑁂𑀲𑀼, 𑀧𑀭𑀤𑀩𑁆𑀩𑁂𑀲𑀼 𑀮𑁂𑀤𑁆𑀤𑀼𑀁𑀯;

𑀅𑀢𑁆𑀢𑀦𑀻𑀯 𑀲𑀩𑁆𑀩𑀪𑀽𑀢𑁂𑀲𑀼, 𑀬𑁄 𑀧𑀲𑁆𑀲𑀢𑀺 𑀲𑁄 𑀧𑀡𑁆𑀟𑀺𑀢𑁄.

𑀆𑀲𑀻𑀲𑁂𑀣𑁂𑀯 ¶ 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀅𑀦𑀯𑀚𑁆𑀚𑁂𑀲𑀼 𑀓𑀫𑁆𑀫𑁂𑀲𑀼, 𑀧𑀲𑀁𑀲𑀺𑀢𑁂𑀲𑀼 𑀲𑀸𑀥𑀼𑀪𑀺.

𑀆𑀲𑀻𑀲𑁂𑀣𑁂𑀯 ¶ 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀲𑁆𑀲𑀸𑀫𑀺 𑀯𑁄𑀳𑀁 𑀅𑀢𑁆𑀢𑀸𑀦𑀁, 𑀬𑀣𑀸 𑀇𑀘𑁆𑀙𑀺𑀁 𑀢𑀣𑀸 𑀅𑀳𑀼.

𑀯𑀸𑀬𑀫𑁂𑀣𑁂𑀯 𑀧𑀼𑀭𑀺𑀲𑁄, 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀧𑀼𑀜𑁆𑀜𑀓𑁆𑀭𑀺𑀬𑀯𑀢𑁆𑀣𑀽𑀲𑀼, 𑀧𑀲𑀁𑀲𑀺𑀢𑁂𑀲𑀼 𑀯𑀺𑀜𑁆𑀜𑀼𑀪𑀺.

𑀮𑁄𑀓𑁂 ¶ 𑀉𑀲𑁆𑀲𑀸𑀳𑀯𑀦𑁆𑀢𑀸𑀦𑀁, 𑀚𑀦𑀸𑀦𑀁 𑀓𑀺𑀫𑀲𑀸𑀥𑀺𑀬𑀁;

𑀲𑀸𑀕𑀭𑁂𑀧𑀺 𑀫𑀳𑀸𑀲𑁂𑀢𑀼𑀁, 𑀓𑀧𑀺𑀬𑀽𑀣𑁂𑀳𑀺 𑀩𑀦𑁆𑀥𑀢𑀺.

𑀓𑀺𑀁 𑀓𑀼𑀮𑁂𑀦 𑀯𑀺𑀲𑀸𑀮𑁂𑀦, 𑀕𑀼𑀡𑀳𑀻𑀦𑁄 𑀢𑀼 𑀬𑁄 𑀦𑀭𑁄;

𑀅𑀓𑀼𑀮𑀺𑀦𑁄𑀧𑀺 𑀲𑀢𑁆𑀣𑀜𑁆𑀜𑁄, 𑀤𑁂𑀯𑀢𑀸𑀳𑀺𑀧𑀺 𑀧𑀼𑀚𑁆𑀚𑀢𑁂.

𑀉𑀓𑁆𑀓𑀝𑁆𑀞𑁂 ¶ 𑀲𑀽𑀭𑀫𑀺𑀘𑁆𑀙𑀦𑁆𑀢𑀺, 𑀫𑀦𑁆𑀢𑀻𑀲𑀼 𑀅𑀓𑀼𑀢𑀽𑀳𑀮𑀁;

𑀧𑀺𑀬𑀜𑁆𑀘 𑀅𑀦𑁆𑀦𑀧𑀸𑀦𑀫𑁆𑀳𑀺, 𑀅𑀢𑁆𑀣𑁂 𑀚𑀸𑀢𑁂 𑀘 𑀧𑀡𑁆𑀟𑀺𑀢𑀁.

𑀭𑀽𑀧𑀬𑁄𑀩𑁆𑀩𑀦𑁆𑀦𑀲𑀫𑁆𑀧𑀦𑁆𑀦𑀸 ¶ , 𑀯𑀺𑀲𑀸𑀮𑀓𑀼𑀮𑀲𑀫𑁆𑀪𑀯𑀸;

𑀯𑀺𑀚𑁆𑀚𑀸𑀳𑀻𑀦𑀸 𑀦 𑀲𑁄𑀪𑀦𑁆𑀢𑁂, 𑀦𑀺𑀕𑁆𑀕𑀦𑁆𑀥𑀸 𑀇𑀯 𑀓𑀺𑀁 𑀲𑀼𑀓𑀸.

𑀯𑀼𑀢𑁆𑀬𑀁 ¶ 𑀯𑀺𑀲𑀤𑀜𑀸𑀡𑀲𑁆𑀲, 𑀜𑀸𑀢𑁄 𑀅𑀢𑁆𑀣𑁄 𑀢𑀭𑀲𑁆𑀲𑀦;

𑀲𑀽𑀭𑀧𑁆𑀧𑀪𑀸𑀬 𑀆𑀤𑀸𑀲𑁄, 𑀙𑀸𑀬𑀁 𑀤𑀺𑀲𑁆𑀲𑁂 𑀦 𑀫𑀸𑀓𑀭𑁂.

𑀅𑀯𑁂𑀬𑁆𑀬𑀸𑀓𑀭𑀡𑁄 𑀢𑁆𑀯𑀦𑁆𑀥𑁄, 𑀩𑀥𑀺𑀭𑁄 𑀓𑁄𑀲𑀯𑀚𑁆𑀚𑀺𑀢𑁄;

𑀲𑀸𑀳𑀺𑀘𑁆𑀘𑀭𑀳𑀺𑀢𑁄 𑀧𑀗𑁆𑀕𑀼, 𑀫𑀽𑀕𑁄 𑀢𑀓𑁆𑀓𑀯𑀺𑀯𑀚𑁆𑀚𑀺𑀢𑁄.

𑀥𑀻𑀭𑁄 ¶ 𑀘 𑀯𑀺𑀯𑀺𑀥𑀸𑀦𑀜𑁆𑀜𑀽, 𑀧𑀭𑁂𑀲𑀁 𑀯𑀺𑀯𑀭𑀸𑀦𑀼𑀕𑀽;

𑀲𑀩𑁆𑀩𑀸𑀫𑀺𑀢𑁆𑀢𑁂 𑀯𑀲𑀻𑀓𑀢𑁆𑀯𑀸, 𑀓𑁄𑀲𑀺𑀬𑁄𑀯 𑀲𑀼𑀔𑀻 𑀲𑀺𑀬𑀸.

𑀫𑀳𑀸𑀢𑁂𑀚𑁄𑀧𑀺 ¶ 𑀢𑁂𑀚𑁄𑀬𑀁, 𑀫𑀢𑁆𑀢𑀺𑀓𑀁 𑀦 𑀫𑀼𑀤𑀼𑀁 𑀓𑀭𑁂;

𑀆𑀧𑁄 𑀆𑀧𑁂𑀲𑀺 𑀫𑀼𑀤𑀼𑀓𑀁, 𑀲𑀸𑀥𑀼𑀯𑀸𑀘𑀸𑀯 𑀓𑀓𑁆𑀔𑀴𑀁.

𑀓𑁄𑀢𑁆𑀣𑁄 𑀧𑀼𑀢𑁆𑀢𑁂𑀦 𑀚𑀸𑀢𑁂𑀦, 𑀬𑁄 𑀦 𑀯𑀺𑀤𑀽 𑀦 𑀥𑀫𑁆𑀫𑀺𑀓𑁄;

𑀓𑀸𑀡𑁂𑀦 𑀘𑀓𑁆𑀔𑀼𑀦𑀸 𑀓𑀺𑀁 𑀯𑀸, 𑀘𑀓𑁆𑀔𑀼 𑀧𑀻𑀴𑁂𑀯 𑀓𑁂𑀯𑀮𑀁.

𑀫𑀼𑀤𑀼𑀦𑀸𑀯 ¶ 𑀭𑀺𑀧𑀼𑀁 𑀚𑁂𑀢𑀺, 𑀫𑀼𑀤𑀼𑀦𑀸 𑀚𑁂𑀢𑀺 𑀤𑀸𑀭𑀼𑀡𑀁;

𑀦𑁄 𑀦 𑀲𑀺𑀤𑁆𑀥𑀁 𑀫𑀼𑀤𑀼 𑀓𑀺𑀜𑁆𑀘𑀺, 𑀢𑀢𑁄 𑀘 𑀫𑀼𑀤𑀼𑀦𑀸 𑀚𑀬𑁂.

𑀲𑀚𑀸𑀢𑁄 𑀬𑁂𑀦 𑀚𑀸𑀢𑁂𑀦, 𑀬𑀸𑀢𑀺 𑀯𑀁𑀲𑁄 𑀲𑀫𑀼𑀦𑁆𑀦𑀢𑀺𑀁;

𑀧𑀭𑀺𑀯𑀢𑁆𑀢𑀺𑀦𑀺𑀲𑀁𑀲𑀸𑀭𑁂, 𑀫𑀢𑁄 𑀓𑁄 𑀯𑀸 𑀦 𑀚𑀸𑀬𑀢𑁂.

𑀤𑀸𑀦𑁂 ¶ 𑀢𑀧𑀲𑀺 𑀲𑀽𑀭𑁂 𑀘, 𑀬𑀲𑁆𑀲 𑀦 𑀧𑀢𑁆𑀣𑀺𑀢𑁄 𑀬𑀲𑁄;

𑀯𑀺𑀚𑁆𑀚𑀸𑀬 𑀫𑀢𑁆𑀣𑀮𑀸𑀪𑁂 𑀘, 𑀓𑁂𑀯𑀮𑀁 𑀅𑀥𑀺𑀓𑁄𑀯𑀲𑁄.

𑀯𑀭𑁄 𑀏𑀓𑁄 𑀕𑀼𑀡𑀻 𑀧𑀼𑀢𑁆𑀢𑁄, 𑀦 𑀘 𑀫𑀽𑀴𑁆𑀳𑀲𑀢𑀸𑀦𑁆𑀬𑀧𑀺;

𑀏𑀓𑁄 𑀘𑀦𑁆𑀤𑁄 𑀢𑀫𑁄 𑀳𑀦𑀢𑀺, 𑀦 𑀘 𑀢𑀸𑀭𑀸𑀕𑀡𑁄 𑀢𑀣𑀸.

𑀧𑀼𑀜𑁆𑀜𑀢𑀺𑀢𑁆𑀣𑀓𑀢𑁄 𑀬𑁂𑀦, 𑀢𑀧𑁄 𑀓𑁆𑀯𑀸𑀧𑀺 𑀲𑀼𑀤𑀼𑀓𑁆𑀓𑀭𑁄;

𑀢𑀲𑁆𑀲 𑀧𑀼𑀢𑁆𑀢𑁄 𑀪𑀯𑁂 𑀯𑀲𑁆𑀲𑁄, 𑀲𑀫𑀺𑀤𑁆𑀥𑁄 𑀥𑀫𑁆𑀫𑀺𑀓𑁄 𑀲𑀼𑀤𑁆𑀥𑁂.

𑀮𑀸𑀮𑀬𑁂 𑀧𑀜𑁆𑀘𑀯𑀲𑁆𑀲𑀸𑀦𑀺, 𑀤𑀲𑀯𑀲𑁆𑀲𑀸𑀦𑀺 𑀢𑀸𑀮𑀬𑁂;

𑀧𑀢𑁆𑀢𑁂𑀢𑀼 𑀲𑁄𑀴𑀲𑁂 𑀯𑀲𑁆𑀲𑁂, 𑀧𑀼𑀢𑁆𑀢𑀁 𑀫𑀺𑀢𑁆𑀢𑀁𑀯 𑀆𑀘𑀭𑁂.

𑀮𑀸𑀮𑀦𑁂 ¶ 𑀩𑀳𑀯𑁄 𑀤𑁄𑀲𑀸, 𑀢𑀸𑀮𑀦𑁂 𑀩𑀳𑀯𑁄 𑀕𑀼𑀡𑀸;

𑀢𑀲𑁆𑀫𑀸 𑀧𑀼𑀢𑁆𑀢𑀜𑁆𑀘 𑀲𑀺𑀲𑁆𑀲𑀜𑁆𑀘, 𑀢𑀸𑀮𑀬𑁂 𑀦 𑀢𑀼 𑀮𑀸𑀮𑀬𑁂.

𑀫𑀸𑀕𑀥𑀸 𑀧𑀸𑀓𑀢𑀸 𑀘𑁂𑀯, 𑀲𑀓𑁆𑀓𑀢𑀯𑁄𑀳𑀸𑀭𑁄𑀧𑀺 𑀘;

𑀏𑀢𑁂𑀲𑀼 𑀓𑁄𑀯𑀺𑀤𑁄 𑀧𑀜𑁆𑀜𑁄, 𑀥𑀻𑀭𑁄 𑀧𑀸𑀴𑀺𑀁 𑀯𑀺𑀲𑁄𑀥𑀬𑁂.

𑀲𑀓𑁆𑀓𑀢𑀁 ¶ 𑀧𑀸𑀓𑀢𑀜𑁆𑀘𑁂𑀯-𑀧𑀪𑀁𑀲𑁄 𑀘 𑀧𑀺𑀲𑀸𑀘𑀺𑀓𑀻;

𑀫𑀸𑀕𑀥𑀻 𑀲𑁄𑀭𑀲𑁂𑀦𑀻𑀯, 𑀙 𑀪𑀸𑀲𑀸 𑀧𑀭𑀺𑀓𑀺𑀢𑁆𑀢𑀺𑀢𑀸.

𑀘𑀦𑁆𑀤𑀦𑀁 ¶ 𑀲𑀻𑀢𑀮𑀁 𑀮𑁄𑀓𑁂, 𑀘𑀦𑁆𑀤𑀺𑀓𑀸 𑀲𑀻𑀢𑀮𑀸 𑀢𑀢𑁄;

𑀘𑀦𑁆𑀤𑀦 𑀘𑀦𑁆𑀤𑀺𑀓𑀸𑀢𑁄𑀧𑀺, 𑀯𑀸𑀓𑁆𑀬𑀁 𑀲𑀸𑀥𑀼 𑀲𑀼𑀪𑀸𑀲𑀺𑀢𑀁.

𑀧𑀢𑁆𑀢𑀓𑀸𑀮𑁄𑀤𑀺𑀢𑀁 𑀅𑀧𑁆𑀧𑀁, 𑀯𑀸𑀓𑁆𑀬𑀁 𑀲𑀼𑀪𑀸𑀲𑀺𑀢𑀁 𑀪𑀯𑁂;

𑀔𑀼𑀤𑀺𑀢𑀲𑁆𑀲 𑀓𑀤𑀦𑁆𑀦𑀫𑁆𑀧𑀺, 𑀪𑀼𑀢𑁆𑀢𑀁 𑀲𑀸𑀤𑀼𑀭𑀲𑀁 𑀲𑀺𑀬𑀸.

𑀲𑀢𑁆𑀣𑀓𑀸𑀧𑀺 ¶ 𑀩𑀳𑀽𑀯𑀸𑀘𑀸, 𑀦𑀸𑀤𑀭𑀸 𑀩𑀳𑀼𑀪𑀸𑀡𑀺𑀦𑁄;

𑀲𑁄𑀧𑀓𑀸𑀭𑀫𑀼𑀤𑀸𑀲𑀺𑀦𑀸, 𑀦𑀦𑀼 𑀤𑀺𑀝𑁆𑀞𑀁 𑀦𑀤𑀻𑀚𑀮𑀁.

𑀧𑀸𑀲𑀸𑀡𑀙𑀢𑁆𑀢𑀁 𑀕𑀭𑀼𑀓𑀁, 𑀢𑀢𑁄 𑀤𑁂𑀯𑀸𑀦𑀸𑀘𑀺𑀓𑁆𑀔𑀦𑀸;

𑀢𑀢𑁄 𑀯𑀼𑀟𑁆𑀠𑀸𑀦𑀫𑁄𑀯𑀸𑀤𑁄, 𑀢𑀢𑁄 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑀢𑀽𑀮𑀁 ¶ 𑀲𑀮𑁆𑀮𑀳𑀼𑀓𑀁 𑀮𑁄𑀓𑁂, 𑀢𑀢𑁄 𑀘𑀧𑀮𑀚𑀸𑀢𑀺𑀓𑁄;

𑀢𑀢𑁄𑀦𑁄𑀲𑀸𑀯𑀓𑁄 𑀢𑀢𑁄, 𑀬𑀢𑀺 𑀥𑀫𑁆𑀫𑀧𑀫𑀸𑀤𑀓𑁄.

𑀧𑀡𑁆𑀟𑀺𑀢𑀲𑁆𑀲 𑀧𑀲𑀁𑀲𑀸𑀬, 𑀤𑀡𑁆𑀟𑁄 𑀩𑀸𑀮𑁂𑀦 𑀤𑀻𑀬𑀢𑁂;

𑀧𑀡𑁆𑀟𑀺𑀢𑁄 𑀧𑀡𑁆𑀟𑀺𑀢𑁂𑀦𑁂𑀯, 𑀯𑀡𑁆𑀡𑀺𑀢𑁄𑀯 𑀲𑀼𑀯𑀡𑁆𑀡𑀺𑀢𑁄.

𑀲𑀢𑁂𑀲𑀼 𑀚𑀸𑀬𑀢𑁂 𑀲𑀽𑀭𑁄, 𑀲𑀳𑀲𑁆𑀲𑁂𑀲𑀼 𑀘 𑀧𑀡𑁆𑀟𑀺𑀢𑁄;

𑀯𑀼𑀢𑁆𑀢𑀸 𑀲𑀢𑀲𑀳𑀲𑁆𑀲𑁂𑀲𑀼, 𑀤𑀸𑀢𑀸 𑀪𑀯𑀢𑀺 𑀯𑀸 𑀦 𑀯𑀸.

𑀯𑀺𑀤𑁆𑀯𑀢𑁆𑀢𑀜𑁆𑀘 𑀭𑀸𑀚𑀢𑁆𑀢𑀜𑁆𑀘, 𑀦𑁂𑀯 𑀢𑀼𑀮𑁆𑀬𑀁 𑀓𑀤𑀸𑀘𑀺𑀧𑀺;

𑀲𑀤𑁂𑀲𑁂 𑀧𑀽𑀚𑀺𑀢𑁄 𑀭𑀸𑀚𑀸, 𑀯𑀺𑀤𑁆𑀯𑀸 𑀲𑀩𑁆𑀩𑀢𑁆𑀣 𑀧𑀽𑀚𑀺𑀢𑁄.

𑀲𑀢𑀁 ¶ 𑀤𑀻𑀖𑀸𑀬𑀼𑀓𑀁 𑀲𑀩𑁆𑀩-𑀲𑀢𑁆𑀢𑀸𑀦𑀁 𑀲𑀼𑀔𑀓𑀸𑀭𑀡𑀁;

𑀅𑀲𑀢𑀁 𑀧𑀦 𑀲𑀩𑁆𑀩𑁂𑀲𑀁, 𑀤𑀼𑀓𑁆𑀔𑀳𑁂𑀢𑀼 𑀦 𑀲𑀁𑀲𑀬𑁄.

𑀧𑀡𑁆𑀟𑀺𑀢𑁂 𑀲𑀼𑀚𑀦𑁂 𑀲𑀦𑁆𑀢𑁂, 𑀲𑀩𑁆𑀩𑁂𑀧𑀺 𑀲𑀼𑀚𑀦𑀸 𑀚𑀦𑀸;

𑀚𑀸𑀢𑁂𑀓𑀲𑁆𑀫𑀺𑀁 𑀲𑀸𑀭𑀕𑀦𑁆𑀥𑁂, 𑀲𑀩𑁆𑀩𑁂 𑀕𑀦𑁆𑀥𑀫𑀬𑀸 𑀤𑀼𑀫𑀸.

𑀅𑀢𑁆𑀢𑀸𑀯 𑀬𑀤𑀺 𑀯𑀺𑀦𑀻𑀢𑁄, 𑀦𑀺𑀚𑀲𑁆𑀲𑀺𑀢𑀸 𑀫𑀳𑀸𑀚𑀦𑀸;

𑀯𑀺𑀦𑀻𑀢𑀁 𑀬𑀦𑁆𑀢𑀺 𑀲𑀩𑁆𑀩𑁂𑀧𑀺, 𑀓𑁄 𑀢𑀁 𑀦𑀸𑀲𑁂𑀬𑁆𑀬 𑀧𑀡𑁆𑀟𑀺𑀢𑁄.

𑀲𑀭𑀻𑀭𑀲𑁆𑀲 𑀕𑀼𑀡𑀸𑀦𑀜𑁆𑀘, 𑀤𑀽𑀭𑀫𑀘𑁆𑀘𑀦𑁆𑀢𑀫𑀦𑁆𑀢𑀭𑀁;

𑀲𑀭𑀻𑀭𑀁 𑀔𑀡𑀯𑀺𑀤𑁆𑀥𑀁𑀲𑀻, 𑀓𑀧𑁆𑀧𑀦𑁆𑀢𑀝𑁆𑀞𑀸𑀬𑀺𑀦𑁄 𑀕𑀼𑀡𑀸.

𑀅𑀫𑁆𑀩𑀼𑀁 𑀧𑀺𑀯𑀦𑁆𑀢𑀺 𑀦𑁄 𑀦𑀚𑁆𑀚𑁄, 𑀭𑀼𑀓𑁆𑀔𑁄 𑀔𑀸𑀤𑀢𑀺 𑀦𑁄 𑀨𑀮𑀁;

𑀫𑁂𑀖𑁄 𑀓𑁆𑀯𑀘𑀺𑀧𑀺 𑀦𑁄 𑀲𑀲𑁆𑀲𑀁, 𑀧𑀭𑀢𑁆𑀣𑀸𑀬 𑀲𑀢𑀁 𑀥𑀦𑀁.

𑀲𑀘𑁆𑀘𑀁 𑀧𑀼𑀦𑀧𑀺 𑀲𑀘𑁆𑀘𑀦𑁆𑀢𑀺, 𑀪𑀼𑀚𑀫𑀼𑀓𑁆𑀔𑀺𑀧𑁆𑀧 𑀫𑀼𑀘𑁆𑀘𑀢𑁂;

𑀲𑀓𑀢𑁆𑀣𑁄 𑀦𑀢𑁆𑀣𑀺 𑀦𑀢𑁆𑀣𑁂𑀯, 𑀧𑀭𑀲𑁆𑀲𑀢𑁆𑀣 𑀫𑀓𑀼𑀩𑁆𑀩𑀢𑁄.

𑀲𑀢𑀁 ¶ 𑀨𑀭𑀼𑀲𑀯𑀸𑀘𑀸𑀳𑀺, 𑀦 𑀬𑀸𑀢𑀺 𑀯𑀺𑀓𑀢𑀺𑀁 𑀫𑀦𑁄;

𑀢𑀺𑀡𑀼𑀓𑁆𑀓𑀸𑀳𑀺 𑀦 𑀲𑀓𑁆𑀓𑀸𑀯, 𑀢𑀸𑀧𑁂𑀢𑀼𑀁 𑀲𑀸𑀕𑀭𑁂 𑀚𑀮𑀁.

𑀲𑁂𑀮𑁄 𑀬𑀣𑀸 𑀏𑀓𑀖𑀦𑁄, 𑀯𑀸𑀢𑁂𑀦 𑀦 𑀲𑀫𑀻𑀭𑀢𑀺;

𑀏𑀯𑀁 𑀦𑀺𑀦𑁆𑀤𑀸𑀧𑀲𑀁𑀲𑀸𑀲𑀼, 𑀦 𑀲𑀫𑀺𑀜𑁆𑀚𑀦𑁆𑀢𑀺 𑀧𑀡𑁆𑀟𑀺𑀢𑀸.

𑀥𑀫𑁆𑀫𑀢𑁆𑀣𑀓𑀸𑀫𑀫𑁄𑀓𑁆𑀔𑀸𑀦𑀁 ¶ , 𑀬𑀲𑁆𑀲𑁂𑀓𑁄𑀧𑀺 𑀦 𑀯𑀺𑀚𑁆𑀚𑀢𑀺;

𑀅𑀚𑀕𑀮𑀣𑀦𑀲𑁆𑀲𑁂𑀯, 𑀢𑀲𑁆𑀲 𑀚𑀸𑀢𑀺 𑀦𑀺𑀭𑀢𑁆𑀣𑀓𑀸.

𑀦 𑀓𑀫𑁆𑀫𑀫𑀧𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀘𑀚𑁂 𑀉𑀬𑁆𑀬𑁄𑀕𑀫𑀢𑁆𑀢𑀦𑁄;

𑀅𑀦𑀼𑀬𑁆𑀬𑁄𑀕𑁂𑀦 𑀢𑁂𑀮𑀸𑀦𑀺, 𑀢𑀺𑀮𑁂𑀳𑀺 𑀦 𑀲𑀓𑁆𑀓𑀸 𑀮𑀤𑁆𑀥𑀼𑀁.

𑀬𑀣𑀸 ¶ 𑀳𑁆𑀬𑁂𑀓𑁂𑀦 𑀘𑀓𑁆𑀓𑁂𑀦, 𑀦 𑀭𑀣𑀲𑁆𑀲 𑀧𑀢𑀺 𑀪𑀯𑁂;

𑀏𑀯𑀁 𑀧𑀼𑀭𑀺𑀲𑀓𑀸𑀭𑁂𑀦, 𑀯𑀺𑀦𑀸 𑀓𑀫𑁆𑀫𑀁 𑀦 𑀲𑀺𑀚𑁆𑀛𑀢𑀺.

𑀉𑀬𑁆𑀬𑀸𑀫𑁂𑀦 𑀳𑀺 𑀲𑀺𑀚𑁆𑀛𑀦𑁆𑀢𑀺, 𑀓𑀸𑀭𑀺𑀬𑀸𑀦𑀺 𑀦 𑀫𑀦𑁄𑀭𑀣𑀁;

𑀦 𑀳𑀺 𑀲𑀼𑀢𑁆𑀢𑀲𑁆𑀲 𑀲𑀻𑀳𑀲𑁆𑀲, 𑀧𑀯𑀺𑀲𑀦𑁆𑀢𑀺 𑀫𑀺𑀕𑀸𑀫𑀼𑀔𑁂.

𑀫𑀸𑀢𑀸𑀧𑀺𑀢𑀼 ¶ 𑀓𑀢𑀸𑀪𑁆𑀬𑀸𑀲𑁄, 𑀕𑀼𑀡𑀺𑀢𑀫𑁂𑀢𑀺 𑀩𑀸𑀮𑀓𑁄;

𑀦 𑀕𑀩𑁆𑀪𑀚𑀸𑀢𑀺𑀫𑀢𑁆𑀢𑁂𑀦, 𑀧𑀼𑀢𑁆𑀢𑁄 𑀪𑀯𑀢𑀺 𑀧𑀡𑁆𑀟𑀺𑀢𑁄.

𑀫𑀸𑀢𑀸 𑀲𑀢𑁆𑀢𑀼 𑀧𑀺𑀢𑀸 𑀯𑁂𑀭𑀻, 𑀬𑁂𑀦 𑀩𑀸𑀮𑁄 𑀦 𑀧𑀸𑀞𑀺𑀢𑁄;

𑀦 𑀲𑁄𑀪𑀢𑁂 𑀲𑀪𑀸𑀫𑀚𑁆𑀛𑁂, 𑀳𑀁𑀲𑀫𑀚𑁆𑀛𑁂 𑀩𑀓𑁄 𑀬𑀣𑀸.

𑀓𑀸𑀘𑁄 ¶ 𑀓𑀜𑁆𑀘𑀦𑀲𑀁𑀲𑀕𑁆𑀕𑁄, 𑀥𑀢𑁆𑀢𑁂 𑀫𑀭𑀓𑀢𑀺𑀁 𑀚𑀼𑀢𑀺𑀁;

𑀢𑀣𑀸 𑀲𑀩𑁆𑀪𑀺𑀲𑀦𑁆𑀦𑀺𑀥𑀸𑀦𑀸, 𑀫𑀽𑀴𑁆𑀳𑁄 𑀬𑀸𑀢𑀺 𑀧𑀯𑀻𑀡𑀢𑀁.

𑀢𑀲𑁆𑀫𑀸 𑀅𑀓𑁆𑀔𑀭𑀓𑁄𑀲𑀮𑁆𑀮𑀁, 𑀲𑀫𑁆𑀫𑀸𑀤𑁂𑀬𑁆𑀬 𑀳𑀺𑀢𑀢𑁆𑀣𑀺𑀓𑁄;

𑀉𑀧𑀝𑁆𑀞𑀳𑀁 𑀕𑀭𑀼𑀁 𑀲𑀫𑁆𑀫𑀸, 𑀉𑀝𑁆𑀞𑀸𑀦𑀸𑀤𑀻𑀳𑀺 𑀧𑀜𑁆𑀘𑀳𑀺.

𑀉𑀝𑁆𑀞𑀸𑀦𑀸 ¶ 𑀉𑀧𑀝𑁆𑀞𑀸𑀦𑀸, 𑀘, 𑀲𑀼𑀲𑁆𑀲𑀽𑀲𑀸 𑀧𑀸𑀭𑀺𑀘𑀭𑀻𑀬𑀸;

𑀲𑀓𑁆𑀓𑀘𑁆𑀘𑀁 𑀲𑀺𑀧𑁆𑀧𑀼𑀕𑁆𑀕𑀳𑀡𑀸, 𑀕𑀭𑀼𑀁 𑀆𑀭𑀸𑀥𑀬𑁂 𑀩𑀼𑀥𑁄.

𑀓𑀸𑀩𑁆𑀬𑀲𑀢𑁆𑀣 ¶ 𑀯𑀺𑀦𑁄𑀤𑁂𑀦, 𑀓𑀸𑀮𑁄 𑀕𑀘𑁆𑀙𑀢𑀺 𑀥𑀻𑀫𑀢𑀁;

𑀩𑁆𑀬𑀲𑀦𑁂𑀦 𑀘 𑀫𑀽𑀴𑁆𑀳𑀸𑀦𑀁, 𑀦𑀺𑀤𑀸𑀬 𑀓𑀮𑀳𑁂𑀦 𑀯𑀸.

𑀙 𑀤𑁄𑀲𑀸 𑀧𑀼𑀭𑀺𑀲𑁂𑀦𑁂𑀳, 𑀳𑀸𑀢𑀩𑁆𑀩𑀸 𑀪𑀽𑀢𑀺𑀫𑀺𑀘𑁆𑀙𑀢𑀸;

𑀦𑀺𑀤𑁆𑀤𑀸𑀢𑀦𑁆𑀤𑀻 𑀪𑀬𑀁 𑀓𑁄𑀥𑁄, 𑀆𑀮𑀲𑁆𑀬𑀁 𑀤𑀻𑀖𑀲𑀼𑀢𑁆𑀢𑀢𑀸.

𑀦𑀺𑀤𑁆𑀤𑀸𑀲𑀻𑀮𑀻 ¶ 𑀲𑀪𑀸𑀲𑀻𑀮𑀻, 𑀅𑀦𑀼𑀝𑁆𑀞𑀸𑀢𑀸 𑀘 𑀬𑁄 𑀦𑀭𑁄;

𑀅𑀮𑀲𑁄 𑀓𑁄𑀥𑀧𑀜𑁆𑀜𑀸𑀡𑁄, 𑀢𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁.

𑀦𑀺𑀕𑁆𑀕𑀼𑀡𑁂𑀲𑀼𑀧𑀺 𑀲𑀢𑁆𑀢𑁂𑀲𑀼, 𑀤𑀬𑀸 𑀓𑀼𑀩𑁆𑀩𑀦𑁆𑀢𑀺 𑀲𑀸𑀥𑀯𑁄;

𑀦 𑀳𑀺 𑀲𑀁𑀳𑀭𑀢𑁂 𑀚𑀼𑀢𑀺𑀁, 𑀘𑀦𑁆𑀤𑁄 𑀘𑀡𑁆𑀟𑀸𑀮𑀯𑁂𑀲𑁆𑀫𑁂.

𑀬𑀢𑁆𑀭 ¶ 𑀯𑀺𑀤𑁆𑀯𑀚𑁆𑀚𑀦𑁄 𑀦𑀢𑁆𑀣𑀺, 𑀲𑀻𑀮𑀸𑀖𑁆𑀬𑁄 𑀢𑀢𑁆𑀭 𑀅𑀧𑁆𑀧𑀥𑀺𑀧𑀺;

𑀦𑀺𑀭𑀢𑁆𑀣𑀧𑀸𑀤𑀫𑁂 𑀤𑁂𑀲𑁂, 𑀏𑀭𑀡𑁆𑀟𑁄𑀧𑀺 𑀤𑀼𑀫𑀸𑀬𑀢𑁂.

𑀞𑀸𑀦𑀪𑀝𑁆𑀞𑀸 𑀦 𑀲𑁄𑀪𑀦𑁆𑀢𑁂, 𑀤𑀦𑁆𑀢𑀸 𑀓𑁂𑀲𑀸 𑀦𑀔𑀸 𑀦𑀭𑀸;

𑀇𑀢𑀺𑀯𑀺𑀜𑁆𑀜𑀸𑀬 𑀫𑀢𑀺𑀫𑀸, 𑀲𑀝𑁆𑀞𑀸𑀦𑀁 𑀦 𑀧𑀭𑀺𑀘𑁆𑀘𑀚𑁂.

𑀧𑀭𑁄𑀧𑀤𑁂𑀲𑁂 ¶ 𑀧𑀡𑁆𑀟𑀺𑀘𑁆𑀘𑀁, 𑀲𑀩𑁆𑀩𑁂𑀲𑀁 𑀲𑀼𑀓𑀭𑀜𑁆𑀳𑀺 𑀔𑁄;

𑀥𑀫𑁆𑀫𑁂 𑀲𑀬𑀫𑀦𑀼𑀝𑁆𑀞𑀸𑀦𑀁, 𑀓𑀲𑁆𑀲𑀘𑀺𑀲𑀼𑀫𑀳𑀢𑁆𑀢𑀦𑁄.

𑀅𑀧𑁆𑀧𑀫𑀸𑀤𑀁 𑀧𑀲𑀁𑀲𑀦𑁆𑀢𑀺, 𑀧𑀼𑀜𑁆𑀜𑀓𑀺𑀭𑀺𑀬𑀸𑀲𑀼 𑀧𑀡𑁆𑀟𑀺𑀢𑀸;

𑀅𑀧𑁆𑀧𑀫𑀢𑁆𑀢𑁄 𑀉𑀪𑁄 𑀅𑀢𑁆𑀣𑁂, 𑀅𑀥𑀺𑀕𑁆𑀕𑀡𑁆𑀳𑀸𑀢𑀺 𑀧𑀡𑁆𑀟𑀺𑀢𑁄.

𑀦𑀺𑀥𑀻𑀦𑀁𑀯 ¶ 𑀧𑀯𑀢𑁆𑀢𑀸𑀭𑀁, 𑀬𑀁 𑀧𑀲𑁆𑀲𑁂 𑀯𑀚𑁆𑀚𑀤𑀲𑁆𑀲𑀺𑀦𑀁;

𑀦𑀺𑀕𑁆𑀕𑀬𑁆𑀳𑀯𑀸𑀤𑀺𑀁 𑀫𑁂𑀥𑀸𑀯𑀺𑀁, 𑀢𑀸𑀤𑀺𑀲𑀁 𑀧𑀡𑁆𑀟𑀺𑀢𑀁 𑀪𑀚𑁂;

𑀢𑀸𑀤𑀺𑀲𑀁 𑀪𑀚𑀫𑀸𑀦𑀲𑁆𑀲, 𑀲𑁂𑀬𑁆𑀬𑁄 𑀳𑁄𑀢𑀺 𑀦 𑀧𑀸𑀧𑀺𑀬𑁄.

𑀫𑀼𑀳𑀼𑀢𑁆𑀢𑀫𑀧𑀺 ¶ 𑀘𑁂 𑀯𑀺𑀜𑁆𑀜𑀽, 𑀧𑀡𑁆𑀟𑀺𑀢𑀁 𑀧𑀬𑀺𑀭𑀼𑀧𑀸𑀲𑀢𑀺;

𑀔𑀺𑀧𑁆𑀧𑀁 𑀥𑀫𑁆𑀫𑀁 𑀯𑀺𑀚𑀸𑀦𑀸𑀢𑀺, 𑀚𑀺𑀯𑁆𑀳𑀸 𑀲𑀽𑀧𑀭𑀲𑀁 𑀬𑀣𑀸.

𑀤𑀼𑀮𑁆𑀮𑀪𑁄 𑀧𑀼𑀭𑀺𑀲𑀸𑀚𑀜𑁆𑀜𑁄, 𑀦 𑀲𑁄 𑀲𑀩𑁆𑀩𑀢𑁆𑀣 𑀚𑀸𑀬𑀢𑀺;

𑀬𑀢𑁆𑀣 𑀲𑁄 𑀚𑀸𑀬𑀢𑀻 𑀥𑀻𑀭𑁄, 𑀢𑀁 𑀓𑀼𑀮𑀁 𑀲𑀼𑀔 𑀫𑁂𑀥𑀢𑀺.

𑀢𑀕𑀭𑀜𑁆𑀘 ¶ 𑀧𑀮𑀸𑀲𑁂𑀦, 𑀬𑁄 𑀦𑀭𑁄 𑀉𑀧𑀦𑀬𑁆𑀳𑀢𑀺;

𑀧𑀢𑁆𑀢𑀸𑀧𑀺 𑀲𑀼𑀭𑀢𑀺 𑀯𑀸𑀬𑀦𑁆𑀢𑀺, 𑀏𑀯𑀁 𑀥𑀻𑀭𑀽𑀧𑀲𑁂𑀯𑀦𑀸.

𑀦𑀺𑀧𑀼𑀡𑁂 𑀲𑀼𑀢𑀫𑁂𑀲𑁂𑀬𑁆𑀬, 𑀯𑀺𑀘𑀺𑀦𑀺𑀢𑁆𑀯𑀸 𑀲𑀼𑀢𑀢𑁆𑀣𑀺𑀓𑁄;

𑀪𑀢𑁆𑀢𑀁 𑀉𑀓𑁆𑀔𑀮𑀺𑀬𑀁 𑀧𑀓𑁆𑀓𑀁, 𑀪𑀸𑀚𑀦𑁂𑀧𑀺 𑀢𑀣𑀸 𑀪𑀯𑁂.

𑀅𑀧𑁆𑀧𑀓𑀁 ¶ 𑀦𑀸𑀢𑀺𑀫𑀜𑁆𑀜𑁂𑀬𑁆𑀬, 𑀘𑀺𑀢𑁆𑀢𑁂 𑀲𑀼𑀢𑀁 𑀦𑀺𑀥𑀸𑀧𑀬𑁂;

𑀯𑀫𑁆𑀫𑀺𑀓𑁄𑀤𑀓𑀩𑀺𑀦𑁆𑀤𑀽𑀯, 𑀘𑀺𑀭𑁂𑀦 𑀧𑀭𑀺𑀧𑀽𑀭𑀢𑀺.

𑀕𑀘𑁆𑀙𑀁 ¶ 𑀓𑀺𑀧𑀺𑀮𑁆𑀮𑀺𑀓𑁄 𑀬𑀸𑀢𑀺, 𑀬𑁄𑀚𑀦𑀸𑀦𑀁 𑀲𑀢𑀸𑀦𑀺𑀧𑀺;

𑀅𑀕𑀘𑁆𑀙𑀁 𑀯𑁂𑀦𑀬𑁆𑀬𑁄𑀅𑀧𑀺, 𑀧𑀤𑀫𑁂𑀓𑀁 𑀦 𑀕𑀘𑁆𑀙𑀢𑀺.

𑀲𑁂𑀮𑁂 𑀲𑁂𑀮𑁂 𑀦 𑀫𑀡𑀺𑀓𑀁, 𑀕𑀚𑁂 𑀕𑀚𑁂 𑀦 𑀫𑀼𑀢𑁆𑀢𑀺𑀓𑀁;

𑀯𑀦𑁂 𑀯𑀦𑁂 𑀦 𑀘𑀦𑁆𑀤𑀦𑀁, 𑀞𑀸𑀦𑁂 𑀞𑀸𑀦𑁂 𑀦 𑀧𑀡𑁆𑀟𑀺𑀢𑁄.

𑀧𑀡𑁆𑀟𑀺𑀢𑁄 ¶ 𑀲𑀼𑀢𑀲𑀫𑁆𑀧𑀦𑁆𑀦𑁄, 𑀬𑀢𑁆𑀣 𑀅𑀢𑁆𑀣𑀻𑀢𑀺 𑀘𑁂 𑀲𑀼𑀢𑁄;

𑀫𑀳𑀼𑀲𑁆𑀲𑀸𑀳𑁂𑀦 𑀢𑀁 𑀞𑀸𑀦𑀁, 𑀕𑀦𑁆𑀢𑀩𑁆𑀩𑀁𑀯 𑀲𑀼𑀢𑁂𑀲𑀺𑀦𑀸.

𑀧𑁄𑀢𑁆𑀣𑀓𑁂𑀲𑀼 𑀘 𑀬𑀁 𑀲𑀺𑀧𑁆𑀧𑀁, 𑀧𑀭𑀳𑀢𑁆𑀣𑁂𑀲𑀼 𑀬𑀁 𑀥𑀦𑀁;

𑀬𑀣𑀸𑀓𑀺𑀘𑁆𑀘𑁂 𑀲𑀫𑀼𑀧𑁆𑀧𑀦𑁆𑀦𑁂, 𑀦 𑀢𑀁 𑀲𑀺𑀧𑁆𑀧𑀁 𑀦 𑀢𑀁 𑀥𑀦𑀁.

𑀉𑀧𑁆𑀧𑀮𑁂𑀦 ¶ 𑀚𑀮𑀁 𑀚𑀜𑁆𑀜𑀸, 𑀓𑀺𑀭𑀺𑀬𑀸𑀬 𑀓𑀼𑀮𑀁 𑀦𑀭𑁄;

𑀩𑁆𑀬𑀢𑁆𑀢𑀺𑀧𑁆𑀧𑀫𑀸𑀡 𑀯𑀸𑀘𑀸𑀬, 𑀚𑀜𑁆𑀜𑀸 𑀢𑀺𑀡𑁂𑀦 𑀫𑁂𑀤𑀦𑀺𑀁.

𑀓𑀼𑀮𑀧𑁆𑀧𑀫𑀸𑀡𑀁 𑀯𑀺𑀦𑀬𑁄𑀧𑀫𑀸𑀡𑀁;

𑀩𑁆𑀬𑀢𑁆𑀢𑀺𑀧𑁆𑀧𑀫𑀸𑀡𑀁 𑀓𑀣𑀺𑀢𑀯𑀸𑀓𑁆𑀬𑀁,

𑀧𑀣𑀯𑀺𑀬𑀸 𑀧𑀫𑀸𑀡𑀁 𑀢𑀺𑀡𑀫𑀺𑀮𑀸𑀢𑀁 𑁋

𑀅𑀧𑁆𑀧𑀲𑁆𑀲𑀼𑀢𑁄 ¶ 𑀲𑀼𑀢𑀁 𑀅𑀧𑁆𑀧𑀁, 𑀩𑀳𑀼𑀁 𑀫𑀜𑁆𑀜𑀢𑀺 𑀫𑀸𑀦𑀯𑀸;

𑀲𑀺𑀦𑁆𑀥𑀼𑀤𑀓𑀫𑀧𑀲𑁆𑀲𑀦𑁆𑀢𑁄, 𑀓𑀽𑀧𑁂 𑀢𑁄𑀬𑀁𑀯 𑀫𑀡𑁆𑀟𑀼𑀓𑁄.

𑀧𑀞𑀫𑁂 𑀲𑀺𑀧𑁆𑀧𑀁 𑀕𑀡𑁆𑀳𑁂𑀬𑁆𑀬, 𑀏𑀲𑁂𑀬𑁆𑀬 𑀤𑀼𑀢𑀺𑀬𑁂 𑀥𑀦𑀁;

𑀘𑀭𑁂𑀬𑁆𑀬 𑀢𑀢𑀺𑀬𑁂 𑀥𑀫𑁆𑀫𑀁, 𑀏𑀲𑀸 𑀚𑀦𑀸𑀦 𑀥𑀫𑁆𑀫𑀢𑀸.

𑀲𑀼𑀲𑁆𑀲𑀽𑀲𑀸 ¶ 𑀲𑀼𑀢𑁆𑀢𑀯𑀤𑁆𑀥𑀦𑀻, 𑀲𑀼𑀢𑀁 𑀧𑀜𑁆𑀜𑀸𑀬 𑀯𑀤𑁆𑀥𑀦𑀁;

𑀧𑀜𑁆𑀜𑀸𑀬 𑀅𑀢𑁆𑀣𑀁 𑀚𑀸𑀦𑀸𑀢𑀺, 𑀅𑀢𑁆𑀣𑁄 𑀜𑀸𑀢𑁄 𑀲𑀼𑀔𑀸𑀯𑀳𑁄.

𑀦𑀢𑁆𑀣𑀺 ¶ 𑀯𑀺𑀚𑁆𑀚𑀸𑀲𑀫𑀁 𑀫𑀺𑀢𑁆𑀢𑀁, 𑀦 𑀘 𑀩𑁆𑀬𑀸𑀥𑀺𑀲𑀫𑁄 𑀭𑀺𑀧𑀼;

𑀦 𑀘 𑀅𑀢𑁆𑀣𑀲𑀫𑀁 𑀧𑁂𑀫𑀁, 𑀦 𑀘 𑀓𑀫𑁆𑀫𑀲𑀫𑀁 𑀩𑀮𑀁.

𑀯𑀺𑀦𑀸 𑀲𑀢𑁆𑀣𑀁 𑀦 𑀕𑀘𑁆𑀙𑁂𑀬𑁆𑀬, 𑀲𑀽𑀭𑁄 𑀲𑀗𑁆𑀕𑀸𑀫𑀪𑀽𑀫𑀺𑀬𑀁;

𑀧𑀡𑁆𑀟𑀺𑀢𑁆𑀯𑀤𑁆𑀥𑀕𑀽 𑀯𑀸𑀡𑀺𑀚𑁄, 𑀯𑀺𑀤𑁂𑀲𑀕𑀫𑀦𑁄 𑀢𑀣𑀸.

𑀥𑀦𑀦𑀸𑀲𑀁 ¶ 𑀫𑀦𑁄𑀢𑀸𑀧𑀁, 𑀖𑀭𑁂 𑀤𑀼𑀘𑁆𑀘𑀭𑀺𑀢𑀸𑀦𑀺 𑀘;

𑀯𑀜𑁆𑀘𑀦𑀜𑁆𑀘 𑀅𑀯𑀫𑀸𑀦𑀁, 𑀧𑀡𑁆𑀟𑀺𑀢𑁄 𑀦 𑀧𑀓𑀸𑀲𑀬𑁂.

𑀅𑀦𑀯𑁆𑀳𑀸𑀬𑀁 𑀕𑀫𑀬𑀦𑁆𑀢𑁄, 𑀅𑀧𑀼𑀘𑁆𑀙𑀸 𑀩𑀳𑀼𑀪𑀸𑀲𑀓𑁄;

𑀅𑀢𑁆𑀢𑀕𑀼𑀡𑀁 𑀧𑀓𑀸𑀲𑀦𑁆𑀢𑁄, 𑀢𑀺𑀯𑀺𑀥𑁄 𑀳𑀻𑀦𑀧𑀼𑀕𑁆𑀕𑀮𑁄.

𑀳𑀁𑀲𑁄 ¶ 𑀫𑀚𑁆𑀛𑁂 𑀦 𑀓𑀸𑀓𑀸𑀦𑀁, 𑀲𑀻𑀳𑁄 𑀕𑀼𑀦𑁆𑀦𑀁 𑀦 𑀲𑁄𑀪𑀢𑁂;

𑀕𑀤𑁆𑀭𑀪𑀫𑀚𑁆𑀛𑁂 𑀢𑀼𑀭𑀗𑁆𑀕𑁄, 𑀩𑀸𑀮𑀫𑀚𑁆𑀛𑁂𑀯 𑀧𑀡𑁆𑀟𑀺𑀢𑁄.

𑀧𑀢𑁆𑀢𑀸𑀦𑀼𑀭𑀽𑀧𑀓𑀁 𑀯𑀸𑀓𑁆𑀬𑀁, 𑀲𑀪𑀸𑀯𑀸𑀦𑀼𑀭𑀽𑀧𑀁 𑀧𑀺𑀬𑀁;

𑀅𑀢𑁆𑀢𑀸𑀦𑀼𑀭𑀽𑀧𑀓𑀁 𑀓𑁄𑀥𑀁, 𑀬𑁄 𑀚𑀸𑀦𑀸𑀢𑀺 𑀲 𑀧𑀡𑁆𑀟𑀺𑀢𑁄.

𑀅𑀧𑁆𑀧𑀭𑀽𑀧𑁄 ¶ 𑀩𑀳𑀼𑀁𑀪𑀸𑀲𑁄, 𑀅𑀧𑁆𑀧𑀧𑀜𑁆𑀜𑁄 𑀧𑀓𑀸𑀲𑀓𑁄;

𑀅𑀧𑁆𑀧𑀧𑀽𑀭𑁄 𑀖𑀝𑁄 𑀔𑁄𑀪𑁂, 𑀅𑀧𑁆𑀧𑀔𑀻𑀭𑀸 𑀕𑀸𑀯𑀻 𑀘𑀮𑁂.

𑀦 𑀢𑀺𑀢𑁆𑀢𑀺 𑀭𑀸𑀚𑀸 𑀥𑀦𑀫𑁆𑀳𑀺, 𑀧𑀡𑁆𑀟𑀺𑀢𑁄𑀧𑀺 𑀲𑀼𑀪𑀸𑀲𑀺𑀢𑁂;

𑀘𑀓𑁆𑀔𑀼𑀧𑀺 𑀧𑀺𑀬𑀤𑀲𑁆𑀲𑀦𑁂, 𑀦 𑀢𑀺𑀢𑁆𑀢𑀺 𑀲𑀸𑀕𑀭𑁄 𑀚𑀮𑁂.

𑀳𑀻𑀦𑀧𑀼𑀢𑁆𑀢𑁄 ¶ 𑀭𑀸𑀚𑀫𑀘𑁆𑀘𑁄, 𑀩𑀸𑀮𑀧𑀼𑀢𑁆𑀢𑁄 𑀘 𑀧𑀡𑁆𑀟𑀺𑀢𑁄;

𑀅𑀥𑀦𑀲𑁆𑀲 𑀥𑀦𑀁𑀩𑀳𑀼, 𑀧𑀼𑀭𑀺𑀲𑀸𑀦𑀁 𑀦 𑀫𑀜𑁆𑀜𑀣.

𑀬𑁄 ¶ 𑀲𑀺𑀲𑁆𑀲𑁄 𑀲𑀺𑀧𑁆𑀧𑀮𑁄𑀪𑁂𑀦, 𑀩𑀳𑀼𑀁 𑀕𑀡𑁆𑀳𑀸𑀢𑀺 𑀢𑀁 𑀲𑀺𑀧𑁆𑀧𑀁;

𑀫𑀽𑀕𑁄𑀯 𑀲𑀼𑀧𑀺𑀦𑀁 𑀧𑀲𑁆𑀲𑀁, 𑀓𑀣𑁂𑀢𑀼𑀫𑁆𑀧𑀺 𑀦 𑀉𑀲𑁆𑀲𑀳𑁂.

𑀦 𑀪𑀺𑀚𑁆𑀚𑁂𑀢𑀼𑀁 𑀓𑀼𑀫𑁆𑀪𑀓𑀸𑀭𑁄, 𑀲𑁄𑀪𑁂𑀢𑀼𑀁 𑀓𑀼𑀫𑁆𑀪 𑀖𑀝𑀢𑀺;

𑀦 𑀔𑀺𑀧𑀺𑀢𑀼𑀁 𑀅𑀧𑀸𑀬𑁂𑀲𑀼, 𑀲𑀺𑀲𑁆𑀲𑀸𑀦𑀁 𑀯𑀼𑀟𑁆𑀠𑀺𑀓𑀸𑀭𑀡𑀸.

𑀅𑀥𑀦𑀲𑁆𑀲 ¶ 𑀭𑀲𑀁𑀔𑀸𑀤𑁄, 𑀅𑀩𑀮𑀲𑁆𑀲 𑀳𑀢𑁄 𑀦𑀭𑁄;

𑀅𑀧𑁆𑀧𑀜𑁆𑀜𑀲𑁆𑀲 𑀯𑀸𑀓𑁆𑀬𑀓𑀭𑁄, 𑀉𑀫𑁆𑀫𑀢𑁆𑀢𑀓 𑀲𑀫𑀸𑀳𑀺𑀔𑁄.

𑀏𑀓𑁂𑀦𑀸𑀧𑀺 𑀲𑀼𑀭𑀼𑀓𑁆𑀔𑁂𑀦, 𑀧𑀼𑀧𑁆𑀨𑀺𑀢𑁂𑀦 𑀲𑀼𑀕𑀦𑁆𑀥𑀺𑀦𑀸;

𑀯𑀸𑀲𑀺𑀢𑀁 𑀓𑀸𑀦𑀦𑀁 𑀲𑀩𑁆𑀩𑀁, 𑀲𑀼𑀧𑀼𑀢𑁆𑀢𑁂𑀦 𑀓𑀼𑀮𑀁 𑀬𑀣𑀸.

𑀇𑀡𑀓𑀢𑁆𑀢𑀸 ¶ 𑀧𑀺𑀢𑀸 𑀲𑀢𑁆𑀢𑀼, 𑀫𑀸𑀢𑀸 𑀘 𑀩𑁆𑀬𑀪𑀺𑀘𑀸𑀭𑀺𑀦𑀻;

𑀪𑀭𑀺𑀬𑀸 𑀭𑀽𑀧𑀯𑀢𑀻 𑀲𑀢𑁆𑀢𑀼, 𑀧𑀼𑀢𑁆𑀢𑁄 𑀲𑀢𑁆𑀢𑀼 𑀅𑀧𑀡𑁆𑀟𑀺𑀢𑁄.

𑀕𑀼𑀡𑀤𑁄𑀲𑀫𑀲𑀢𑁆𑀣𑀜𑁆𑀜𑀽, 𑀚𑀦𑁄 𑀯𑀺𑀪𑀚𑀢𑁂 𑀓𑀣𑀁;

𑀅𑀥𑀺𑀓𑀸𑀭𑁄 𑀓𑀺𑀫𑀦𑁆𑀥𑀲𑁆𑀲, 𑀭𑀽𑀧𑀪𑁂𑀤𑁄𑀧𑀮𑀤𑁆𑀥𑀺𑀬𑀁.

𑀲𑀩𑁆𑀩𑀢𑁆𑀣 ¶ 𑀲𑀢𑁆𑀣𑀢𑁄𑀬𑁂𑀯, 𑀕𑀼𑀡𑀤𑁄𑀲𑀯𑀺𑀘𑁂𑀘𑀦𑀁;

𑀬𑀁 𑀓𑀭𑁄𑀢𑀺 𑀯𑀺𑀦𑀸𑀲𑀢𑁆𑀣𑀁, 𑀲𑀸𑀳𑀲𑀁 𑀓𑀺𑀫𑀢𑁄𑀥𑀺𑀓𑀁.

𑀦𑀺𑀳𑀻𑀬𑀢𑀺 ¶ 𑀧𑀼𑀭𑀺𑀲𑁄 𑀦𑀺𑀳𑀻𑀦𑀲𑁂𑀯𑀻,

𑀦 𑀘 𑀳𑀸𑀬𑁂𑀣 𑀓𑀤𑀸𑀘𑀺 𑀢𑀼𑀮𑁆𑀬𑀲𑁂𑀯𑀻;

𑀲𑁂𑀝𑁆𑀞𑀫𑀼𑀧𑀦𑀫𑀁 𑀉𑀤𑁂𑀢𑀺 𑀔𑀺𑀧𑁆𑀧𑀁,

𑀢𑀲𑁆𑀫𑀸 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀁 𑀪𑀚𑁂.

𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 ¶ 𑀬𑁄 𑀥𑀫𑁆𑀫𑀁, 𑀢𑀢𑁆𑀣 𑀢𑀢𑁆𑀣 𑀯𑀺𑀧𑀲𑁆𑀲𑀢𑀺;

𑀅𑀲𑀁𑀳𑀻𑀭𑀁 𑀅𑀲𑀁𑀓𑀼𑀧𑁆𑀧𑀁, 𑀢𑀁 𑀯𑀺𑀤𑁆𑀯𑀸 𑀫𑀦𑀼𑀩𑁆𑀭𑀽𑀳𑀬𑁂.

𑀙𑀦𑁆𑀤𑀸 𑀤𑁄𑀲𑀸 𑀪𑀬𑀸 𑀫𑁄𑀳𑀸, 𑀬𑁄 𑀥𑀫𑁆𑀫𑀁 𑀦𑀸𑀢𑀺𑀯𑀢𑁆𑀢𑀢𑀺;

𑀆𑀧𑀽𑀭𑀢𑀺 𑀢𑀲𑁆𑀲 𑀬𑀲𑁄, 𑀲𑀼𑀓𑁆𑀓𑀧𑀓𑁆𑀔𑁂𑀯 𑀘𑀦𑁆𑀤𑀺𑀫𑀸.

𑀧𑀡𑁆𑀟𑀺𑀢𑁄 ¶ 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀲𑀡𑁆𑀳𑁄 𑀘 𑀧𑀝𑀺𑀪𑀸𑀦𑀯𑀸;

𑀦𑀺𑀯𑀸𑀢𑀯𑀼𑀢𑁆𑀢𑀺 𑀅𑀣𑀤𑁆𑀥𑁄, 𑀢𑀸𑀤𑀺𑀲𑁄 𑀮𑀪𑀢𑁂 𑀬𑀲𑀁.

𑀤𑀼𑀮𑁆𑀮𑀪𑀁 ¶ 𑀧𑀸𑀓𑀢𑀺𑀓𑀁 𑀯𑀸𑀓𑁆𑀬𑀁, 𑀤𑀼𑀮𑁆𑀮𑀪𑁄 𑀔𑁂𑀫𑀓𑀭𑁄 𑀲𑀼𑀢𑁄;

𑀤𑀼𑀮𑁆𑀮𑀪𑀸 𑀲𑀤𑀺𑀲𑀻 𑀚𑀸𑀬𑀸, 𑀤𑀼𑀮𑁆𑀮𑀪𑁄 𑀲𑀚𑀦𑁄 𑀧𑀺𑀬𑁄.

𑀅𑀢𑁆𑀣𑀁 𑀫𑀳𑀦𑁆𑀢𑀫𑀸𑀧𑀚𑁆𑀚, 𑀯𑀺𑀚𑁆𑀚𑀁 𑀲𑀫𑁆𑀧𑀢𑁆𑀢𑀺𑀫𑁂𑀯 𑀘;

𑀘𑀭𑁂𑀬𑁆𑀬𑀸𑀫𑀸𑀦𑀣𑀤𑁆𑀥𑁄 𑀬𑁄, 𑀧𑀡𑁆𑀟𑀺𑀢𑁄 𑀲𑁄 𑀧𑀯𑀼𑀘𑁆𑀘𑀢𑀺.

𑀲𑀼𑀢𑀲𑀦𑁆𑀦𑀺𑀘𑁆𑀘𑀬𑀸 ¶ 𑀥𑀻𑀭𑀸, 𑀢𑀼𑀡𑁆𑀳𑀻𑀪𑀽𑀢𑀸 𑀅𑀧𑀼𑀘𑁆𑀙𑀺𑀢𑀸;

𑀧𑀼𑀡𑁆𑀡𑀸𑀲𑀼𑀪𑀸𑀲𑀺𑀢𑁂𑀦𑀸𑀧𑀺, 𑀖𑀡𑁆𑀝𑀸𑀤𑀻 𑀖𑀝𑁆𑀝𑀺𑀢𑀸 𑀬𑀣𑀸.

𑀅𑀧𑀼𑀝𑁆𑀞𑁄 𑀧𑀡𑁆𑀟𑀺𑀢𑁄 𑀪𑁂𑀭𑀻, 𑀧𑀚𑁆𑀚𑀼𑀦𑁆𑀦𑁄 𑀳𑁄𑀢𑀺 𑀧𑀼𑀘𑁆𑀙𑀺𑀢𑁄;

𑀩𑀸𑀮𑁄 𑀧𑀼𑀝𑁆𑀞𑁄 𑀅𑀧𑀼𑀝𑁆𑀞𑁄 𑀘, 𑀩𑀳𑀼𑀁 𑀯𑀺𑀓𑀢𑁆𑀣𑀢𑁂 𑀲𑀤𑀸.

𑀧𑀭𑀽𑀧𑀯𑀸𑀤𑁂 ¶ 𑀩𑀥𑀺𑀭𑁄, 𑀧𑀭𑀯𑀚𑁆𑀚𑁂 𑀅𑀮𑁄𑀘𑀦𑁄;

𑀧𑀗𑁆𑀕𑀼𑀮𑁄 𑀅𑀜𑁆𑀜𑀦𑀸𑀭𑀻𑀲𑀼, 𑀤𑀼𑀲𑁆𑀲𑀢𑀓𑁆𑀓𑁂 𑀅𑀘𑁂𑀢𑀦𑁄.

𑀘𑀓𑁆𑀔𑀼𑀫𑀸𑀲𑁆𑀲 𑀬𑀣𑀸 𑀅𑀦𑁆𑀥𑁄, 𑀲𑁄𑀢𑀯𑀸 𑀩𑀥𑀺𑀭𑁄 𑀬𑀣𑀸;

𑀧𑀜𑁆𑀜𑀯𑀸𑀲𑁆𑀲 𑀬𑀣𑀸𑀫𑀽𑀕𑁄, 𑀩𑀮𑀯𑀸 𑀤𑀼𑀩𑁆𑀩𑀮𑁄𑀭𑀺𑀯;

𑀅𑀣 𑀅𑀢𑁆𑀣𑁂 𑀲𑀫𑀼𑀧𑁆𑀧𑀦𑁆𑀦𑁂, 𑀲𑀬𑁂𑀣 𑀫𑀢𑀲𑀸𑀬𑀺𑀢𑀁.

𑀧𑀸𑀧𑀫𑀺𑀢𑁆𑀢𑁂 ¶ 𑀯𑀺𑀯𑀚𑁆𑀚𑁂𑀢𑁆𑀯𑀸, 𑀪𑀚𑁂𑀬𑁆𑀬𑀼𑀢𑁆𑀢𑀫𑀧𑀼𑀕𑁆𑀕𑀮𑀁;

𑀑𑀯𑀸𑀤𑁂 𑀘𑀲𑁆𑀲 𑀢𑀺𑀝𑁆𑀞𑁂𑀬𑁆𑀬, 𑀧𑀢𑁆𑀣𑁂𑀦𑁆𑀢𑁄 𑀅𑀘𑀮𑀁 𑀲𑀼𑀔𑀁.

𑀅𑀢𑀺𑀲𑀻𑀢𑀁 𑀅𑀢𑀺𑀉𑀡𑁆𑀳𑀁, 𑀅𑀢𑀺𑀲𑀸𑀬𑀫𑀺𑀤𑀁 𑀅𑀳𑀼;

𑀇𑀢𑀺 𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀦𑁆𑀢𑁂, 𑀅𑀢𑁆𑀣𑀸 𑀅𑀘𑁆𑀘𑁂𑀦𑁆𑀢𑀺 𑀫𑀸𑀡𑀯𑁂.

𑀬𑁄 ¶ 𑀘 𑀲𑀻𑀢𑀜𑁆𑀘 𑀉𑀡𑁆𑀳𑀜𑁆𑀘, 𑀢𑀺𑀡𑀸𑀪𑀺𑀬𑁆𑀬𑁄 𑀦 𑀫𑀜𑁆𑀜𑀢𑀺;

𑀓𑀭𑀁 𑀧𑀼𑀭𑀺𑀲𑀓𑀺𑀘𑁆𑀘𑀸𑀦𑀺, 𑀲𑁄 𑀲𑀼𑀔𑀁 𑀦 𑀯𑀺𑀳𑀸𑀬𑀢𑀺.

𑀬𑀲𑁆𑀫𑀺𑀁𑀤𑁂𑀲𑁂 ¶ 𑀦 𑀲𑀫𑁆𑀫𑀸𑀦𑁄, 𑀦 𑀧𑀺𑀬𑁄 𑀦 𑀘 𑀩𑀦𑁆𑀥𑀯𑁄;

𑀦 𑀘 𑀯𑀺𑀚𑁆𑀚𑀸𑀕𑀫𑁄 𑀓𑁄𑀘𑀺, 𑀦 𑀢𑀢𑁆𑀣 𑀤𑀺𑀯𑀲𑀁 𑀯𑀲𑁂.

𑀥𑀦𑀯𑀸 𑀲𑀼𑀢𑀯𑀸 𑀭𑀸𑀚𑀸, 𑀦𑀤𑀻 𑀯𑀚𑁆𑀚𑁄 𑀇𑀫𑁂 𑀧𑀜𑁆𑀘;

𑀬𑀢𑁆𑀣 𑀤𑁂𑀲𑁂 𑀦 𑀯𑀺𑀚𑁆𑀚𑀦𑁆𑀢𑀺, 𑀦 𑀢𑀢𑁆𑀣 𑀤𑀺𑀯𑀲𑀁 𑀯𑀲𑁂.

𑀦𑀪𑀲𑁆𑀲 ¶ 𑀪𑀽𑀲𑀦𑀁 𑀘𑀦𑁆𑀤𑁄, 𑀦𑀸𑀭𑀻𑀦𑀁 𑀪𑀽𑀲𑀦𑀁 𑀧𑀢𑀺;

𑀙𑀫𑀸𑀬 𑀪𑀽𑀲𑀦𑀁 𑀭𑀸𑀚𑀸, 𑀯𑀺𑀚𑁆𑀚𑀸 𑀲𑀩𑁆𑀩𑀲𑁆𑀲 𑀪𑀽𑀲𑀦𑀁.

𑀲𑀼𑀔𑀢𑁆𑀣𑀺𑀓𑁄 𑀲𑀘𑁂 𑀯𑀺𑀚𑁆𑀚𑀁, 𑀯𑀺𑀚𑁆𑀚𑀢𑁆𑀣𑀺𑀓𑁄 𑀘𑀚𑁂 𑀲𑀼𑀔𑀁;

𑀲𑀼𑀔𑀢𑁆𑀣𑀺𑀦𑁄 𑀓𑀼𑀢𑁄 𑀯𑀺𑀚𑁆𑀚𑀸, 𑀓𑀼𑀢𑁄 𑀯𑀺𑀚𑁆𑀚𑀢𑁆𑀣𑀺𑀦𑁄 𑀲𑀼𑀔𑀁.

𑀔𑀡𑁂𑀦 ¶ 𑀓𑀡𑁂𑀦 𑀘𑁂𑀯, 𑀯𑀺𑀚𑁆𑀚𑀸𑀫𑀢𑁆𑀣𑀜𑁆𑀘 𑀲𑀸𑀥𑀬𑁂;

𑀔𑀡𑀘𑀸𑀕𑁂 𑀓𑀼𑀢𑁄 𑀯𑀺𑀚𑁆𑀚𑀸, 𑀓𑀡𑀘𑀸𑀕𑁂 𑀓𑀢𑁄 𑀥𑀦𑀁.

𑀆𑀘𑀭𑀺𑀬𑀸 𑀧𑀸𑀤𑀫𑀸𑀤𑀢𑁆𑀢𑁂, 𑀧𑀸𑀤𑀁 𑀲𑀺𑀲𑁆𑀲𑁄 𑀲𑀚𑀸𑀦𑀦𑀸;

𑀧𑀸𑀤𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺, 𑀧𑀸𑀤𑀁 𑀓𑀸𑀮𑀓𑁆𑀓𑀫𑁂𑀦 𑀘.

𑀥𑀫𑁆𑀫𑁄 ¶ 𑀚𑀬𑁂 𑀦𑁄 𑀅𑀥𑀫𑁆𑀫𑁄, 𑀲𑀘𑁆𑀘𑀁 𑀚𑀬𑀢𑀺 𑀦𑀸𑀲𑀘𑁆𑀘𑀁;

𑀔𑀫𑀸 𑀚𑀬𑀢𑀺 𑀦𑁄 𑀓𑁄𑀥𑁄, 𑀤𑁂𑀯𑁄 𑀚𑀬𑀢𑀺 𑀦𑀸𑀲𑀽𑀭𑁄.

𑀳𑀢𑁆𑀣𑀲𑁆𑀲 𑀪𑀽𑀲𑀦𑀁 𑀤𑀸𑀦𑀁, 𑀲𑀘𑁆𑀘𑀁 𑀓𑀡𑁆𑀞𑀲𑁆𑀲 𑀪𑀽𑀲𑀦𑀁;

𑀲𑁄𑀢𑀲𑁆𑀲 𑀪𑀽𑀲𑀦𑀁 𑀲𑀢𑁆𑀣𑀁, 𑀪𑀽𑀲𑀦𑁂 𑀓𑀺𑀁 𑀧𑀬𑁄𑀚𑀦𑀁.

𑀯𑀺𑀤𑁂𑀲𑁂𑀢𑀼 ¶ 𑀥𑀦𑀁 𑀯𑀺𑀚𑁆𑀚𑀸, 𑀩𑁆𑀬𑀲𑀦𑁂𑀲𑀼 𑀥𑀦𑀁 𑀫𑀢𑀺;

𑀧𑀭𑀮𑁄𑀓𑁂 𑀥𑀦𑀁 𑀥𑀫𑁆𑀫𑁄, 𑀲𑀻𑀮𑀁 𑀲𑀩𑁆𑀩𑀢𑁆𑀣 𑀯𑁂 𑀥𑀦𑀁.

𑀧𑀤𑁄𑀲𑁂 ¶ 𑀤𑀻𑀧𑀓𑁄 𑀘𑀦𑁆𑀤𑁄, 𑀧𑀪𑀸𑀢𑁂 𑀤𑀻𑀧𑀓𑁄 𑀭𑀯𑀺;

𑀢𑀺𑀮𑁄𑀓𑁂 𑀤𑀻𑀧𑀓𑁄 𑀥𑀫𑁆𑀫𑁄, 𑀲𑀼𑀧𑀼𑀢𑁆𑀢𑁄 𑀓𑀼𑀮𑀤𑀻𑀧𑀓𑁄.

𑀯𑀺𑀤𑁆𑀯𑀸 𑀏𑀯 𑀯𑀺𑀚𑀸𑀦𑀸𑀢𑀺, 𑀯𑀺𑀤𑁆𑀯𑀚𑁆𑀚𑀦𑀧𑀭𑀺𑀲𑁆𑀲𑀫𑀁;

𑀦 𑀳𑀺 𑀯𑀜𑁆𑀛𑀸 𑀯𑀺𑀚𑀸𑀦𑀸𑀢𑀺, 𑀕𑀼𑀭𑀼𑀁 𑀧𑀲𑀯𑀯𑁂𑀤𑀦𑀁.

𑀬𑀲𑁆𑀲 ¶ 𑀦𑀢𑁆𑀣𑀺 𑀲𑀬𑀁 𑀧𑀜𑁆𑀜𑀸, 𑀲𑀢𑁆𑀣𑀁 𑀢𑀲𑁆𑀲 𑀓𑀭𑁄𑀢𑀺 𑀓𑀺𑀁;

𑀮𑁄𑀘𑀦𑁂𑀳𑀺 𑀯𑀺𑀳𑀻𑀦𑀲𑁆𑀲, 𑀤𑀧𑁆𑀧𑀡𑁄 𑀓𑀺𑀁 𑀓𑀭𑀺𑀲𑁆𑀲𑀢𑀺.

𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀺 𑀯𑀢𑁆𑀢𑀸𑀭𑁄, 𑀲𑁄𑀢𑀁 𑀬𑀢𑁆𑀣 𑀦 𑀯𑀺𑀚𑁆𑀚𑀢𑁂;

𑀦𑀕𑁆𑀕𑀓𑀧𑀡𑀓𑁂 𑀤𑁂𑀲𑁂, 𑀭𑀚𑀓𑁄 𑀓𑀺𑀁 𑀓𑀭𑀺𑀲𑁆𑀲𑀢𑀺.

𑀫𑀽𑀴𑁆𑀳𑀲𑀺𑀥𑀲𑁆𑀲𑀸𑀧𑀤𑁂𑀲𑁂𑀦, ¶ 𑀓𑀼𑀦𑀸𑀭𑀻𑀪𑀭𑀡𑁂𑀦 𑀘;

𑀔𑀮𑀲𑀢𑁆𑀢𑀽𑀳𑀺 𑀲𑀁𑀬𑁄𑀕𑀸, 𑀧𑀡𑁆𑀟𑀺𑀢𑁄𑀧𑁆𑀬𑀸𑀯𑀲𑀻𑀤𑀢𑀺.

𑀦𑀢𑁆𑀣𑀺 𑀅𑀢𑁆𑀢𑀲𑀫𑀁 𑀧𑁂𑀫𑀁, 𑀦𑀢𑁆𑀣𑀺 𑀥𑀜𑁆𑀜𑀲𑀫𑀁 𑀥𑀦𑀁;

𑀦𑀢𑁆𑀣𑀺 𑀧𑀜𑁆𑀜𑀸𑀲𑀫𑀸 𑀆𑀪𑀸, 𑀯𑀼𑀝𑁆𑀞𑀺 𑀯𑁂 𑀧𑀭𑀫𑀸 𑀲𑀭𑀸.

𑀪𑀼𑀚𑀗𑁆𑀕𑀫𑀁 ¶ 𑀧𑀸𑀯𑀓𑀜𑁆𑀘 𑀔𑀢𑁆𑀢𑀺𑀬𑀜𑁆𑀘 𑀬𑀲𑀲𑁆𑀲𑀺𑀦𑀁;

𑀪𑀺𑀓𑁆𑀔𑀼𑀜𑁆𑀘 𑀲𑀻𑀮𑀲𑀫𑁆𑀧𑀦𑁆𑀦𑀁, 𑀲𑀫𑁆𑀫𑀤𑁂𑀯 𑀲𑀫𑀸𑀘𑀭𑁂.

𑀢𑀲𑁆𑀫𑀸 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄;

𑀩𑀼𑀤𑁆𑀥𑁂 𑀥𑀫𑁆𑀫𑁂 𑀘 𑀲𑀗𑁆𑀖𑁂 𑀘, 𑀥𑀻𑀭𑁄 𑀲𑀤𑁆𑀥𑀁 𑀦𑀺𑀯𑁂𑀲𑀬𑁂.

𑀕𑀼𑀡𑁄 ¶ 𑀲𑁂𑀝𑁆𑀞𑀗𑁆𑀕𑀢𑀁 𑀬𑀸𑀢𑀺, 𑀦 𑀉𑀘𑁆𑀘𑁂 𑀲𑀬𑀦𑁂 𑀯𑀲𑁂;

𑀧𑀸𑀲𑀸𑀤𑀲𑀺𑀔𑀭𑁂 𑀯𑀸𑀲𑁄, 𑀓𑀸𑀓𑁄 𑀓𑀺𑀁 𑀕𑀭𑀼𑀴𑁄 𑀲𑀺𑀬𑀸.

𑀅𑀦𑀸𑀕𑀢𑀁 𑀪𑀬𑀁 𑀤𑀺𑀲𑁆𑀯𑀸, 𑀤𑀽𑀭𑀢𑁄 𑀧𑀭𑀺𑀯𑀚𑁆𑀚𑀬𑁂;

𑀆𑀕𑀢𑀜𑁆𑀘 𑀪𑀬𑀁 𑀤𑀺𑀲𑁆𑀯𑀸, 𑀅𑀪𑀻𑀢𑁄 𑀳𑁄𑀢𑀺 𑀧𑀡𑁆𑀟𑀺𑀢𑁄.

𑀅𑀲𑀚𑁆𑀚𑀸𑀬 𑀫𑀮𑀸𑀫𑀦𑁆𑀢𑀸, 𑀅𑀦𑀼𑀝𑁆𑀞𑀸𑀦𑀫𑀮𑀸 𑀖𑀭𑀸;

𑀫𑀮𑀁 𑀯𑀡𑁆𑀡𑀲𑁆𑀲 𑀓𑁄𑀲𑀚𑁆𑀚𑀁, 𑀧𑀫𑀸𑀤𑁄 𑀭𑀓𑁆𑀔𑀢𑁄 𑀫𑀮𑀁.

𑀅𑀦𑀼𑀧𑀼𑀩𑁆𑀩𑁂𑀦 ¶ 𑀫𑁂𑀥𑀸𑀯𑀻, 𑀣𑁄𑀓𑀁 𑀣𑁄𑀓𑀁 𑀔𑀡𑁂 𑀔𑀡𑁂;

𑀓𑀫𑁆𑀫𑀸𑀭𑁄 𑀭𑀚𑀢𑀲𑁆𑀲𑁂𑀯, 𑀦𑀺𑀤𑁆𑀥𑀫𑁂 𑀫𑀮𑀫𑀢𑁆𑀢𑀦𑁄.

𑀬𑀜𑁆𑀳𑀺 ¶ 𑀓𑀬𑀺𑀭𑀸 𑀢𑀜𑁆𑀳𑀺 𑀯𑀤𑁂, 𑀬𑀁 𑀦 𑀓𑀬𑀺𑀭𑀸 𑀦 𑀢𑀁 𑀯𑀤𑁂;

𑀅𑀓𑀭𑁄𑀦𑁆𑀢𑀁 𑀪𑀸𑀲𑀫𑀸𑀦𑀁, 𑀧𑀭𑀺𑀚𑀸𑀦𑀦𑁆𑀢𑀺 𑀧𑀡𑁆𑀟𑀺𑀢𑀸.

𑀯𑀺𑀲𑀫𑀁 𑀲𑀪𑀬𑀁 𑀅𑀢𑀺𑀯𑀸𑀢𑁄, 𑀧𑀝𑀺𑀘𑁆𑀙𑀦𑁆𑀦𑀁 𑀤𑁂𑀯𑀦𑀺𑀲𑁆𑀲𑀺𑀢𑀁;

𑀧𑀦𑁆𑀣𑁄 𑀘 𑀲𑀗𑁆𑀕𑀸𑀫𑁄 𑀢𑀺𑀢𑁆𑀣𑀁, 𑀅𑀝𑁆𑀞𑁂𑀢𑁂 𑀧𑀭𑀺𑀯𑀚𑁆𑀚𑀺𑀬𑀸.

𑀭𑀢𑁆𑀢𑁄𑀤𑀼𑀝𑁆𑀞𑁄 ¶ 𑀘 𑀫𑀼𑀴𑁆𑀳𑁄 𑀘, 𑀫𑀸𑀦𑀻 𑀮𑀼𑀤𑁆𑀥𑁄 𑀢𑀣𑀸𑀮𑀲𑁄;

𑀏𑀓𑀘𑀺𑀦𑁆𑀢𑀻 𑀘 𑀩𑀸𑀮𑁄 𑀘, 𑀏𑀢𑁂 𑀅𑀢𑁆𑀣𑀯𑀺𑀦𑀸𑀲𑀓𑀸.

𑀭𑀢𑁆𑀢𑁄 𑀤𑀼𑀝𑁆𑀞𑁄 𑀘 𑀫𑀽𑀴𑁆𑀳𑁄 𑀘, 𑀪𑀻𑀭𑀼 𑀆𑀫𑀺𑀲𑀕𑀭𑀼𑀓𑁄;

𑀇𑀢𑁆𑀣𑀻 𑀲𑁄𑀡𑁆𑀟𑁄 𑀧𑀡𑁆𑀟𑀓𑁄 𑀘, 𑀦𑀯𑀫𑁄 𑀤𑀸𑀭𑀓𑁄𑀧𑀺 𑀘.

𑀦𑀯𑀢𑁂 𑀧𑀼𑀕𑁆𑀕𑀮𑀸 𑀮𑁄𑀓𑁂, 𑀇𑀢𑁆𑀢𑀭𑀸 𑀘𑀮𑀺𑀢𑀸 𑀘𑀮𑀸;

𑀏𑀢𑁂𑀳𑀺 𑀫𑀦𑁆𑀢𑀺𑀢𑀁 𑀕𑀼𑀬𑁆𑀳𑀁, 𑀔𑀺𑀧𑁆𑀧𑀁 𑀪𑀯𑀢𑀺 𑀧𑀸𑀓𑀝𑀁.

𑀬𑁄 ¶ 𑀦𑀺𑀭𑀼𑀢𑁆𑀢𑀺𑀁 𑀦 𑀲𑀺𑀓𑁆𑀔𑁂𑀬𑁆𑀬, 𑀲𑀺𑀓𑁆𑀔𑀦𑁆𑀢𑁄 𑀧𑀺𑀝𑀓𑀢𑁆𑀢𑀬𑀁;

𑀧𑀤𑁂 𑀧𑀤𑁂 𑀯𑀺𑀓𑀗𑁆𑀔𑁂𑀬𑁆𑀬, 𑀯𑀦𑁂 𑀅𑀦𑁆𑀥𑀕𑀚𑁄 𑀬𑀣𑀸.

𑀲𑀼𑀢𑁆𑀢𑀁 ¶ 𑀥𑀸𑀢𑀼 𑀕𑀡𑁄𑀡𑁆𑀯𑀸𑀤𑀺, 𑀦𑀸𑀫𑀮𑀺𑀗𑁆𑀕𑀸𑀦𑀼𑀲𑀸𑀲𑀦𑀁;

𑀬𑀲𑁆𑀲 𑀢𑀺𑀝𑁆𑀞𑀢𑀺 𑀚𑀺𑀯𑁆𑀳𑀕𑁆𑀕𑁂, 𑀲𑀩𑁆𑀬𑀸𑀓𑀭𑀡𑀓𑁂𑀲𑀭𑀻.

𑀲𑀤𑁆𑀤𑀢𑁆𑀣𑀮𑀓𑁆𑀔𑀡𑁂 𑀪𑁂𑀤𑀻, 𑀬𑁄 𑀬𑁄 𑀦𑀺𑀘𑁆𑀙𑀺𑀢𑀮𑀓𑁆𑀔𑀡𑁂;

𑀲𑁄 𑀲𑁄 𑀜𑀸𑀢𑀼𑀫𑀓𑀺𑀘𑁆𑀙𑁂𑀦, 𑀧𑀳𑁄𑀢𑀺 𑀧𑀺𑀝𑀓𑀢𑁆𑀢𑀬𑁂.

𑀬𑁄 ¶ 𑀲𑀤𑁆𑀤𑀲𑀢𑁆𑀣𑀓𑀼𑀲𑀮𑁄 𑀓𑀼𑀲𑀮𑁄 𑀦𑀺𑀖𑀡𑁆𑀟𑀼,

𑀙𑀦𑁆𑀤𑁄 𑀅𑀮𑀗𑁆𑀓𑀢𑀺𑀲𑀼 𑀦𑀺𑀘𑁆𑀘𑀓𑀢𑀸𑀪𑀺𑀬𑁄𑀕𑁄;

𑀲𑁄 𑀬𑀁 𑀓𑀯𑀺𑀢𑁆𑀢𑀯𑀺𑀓𑀮𑁄𑀧𑀺 𑀓𑀯𑀻𑀲𑀼 𑀲𑀗𑁆𑀔𑁆𑀬𑀁,

𑀫𑁄𑀕𑁆𑀕𑀬𑁆𑀳 𑀯𑀺𑀦𑁆𑀤𑀢𑀺 𑀳𑀺 𑀓𑀺𑀢𑁆𑀢𑀺’ 𑀫𑀫𑀦𑁆𑀤𑀭𑀽𑀧𑀁.

𑀲𑀼𑀓𑁆𑀔𑁄𑀧𑀺 ¶ 𑀘𑀦𑁆𑀤𑀦𑀢𑀭𑀼 𑀦 𑀚𑀳𑀸𑀢𑀺 𑀕𑀦𑁆𑀥𑀁,

𑀦𑀸𑀕𑁄 𑀕𑀢𑁄 𑀦𑀭𑀫𑀼𑀔𑁂 𑀦 𑀚𑀳𑀸𑀢𑀺 𑀮𑀻𑀴𑀁;

𑀬𑀦𑁆𑀢𑀕𑀢𑁄 𑀫𑀥𑀼𑀭𑀲𑀁 𑀦 𑀚𑀳𑀸𑀢𑀺 𑀉𑀘𑁆𑀙𑀼,

𑀤𑀼𑀓𑁆𑀔𑁄𑀧𑀺 𑀧𑀡𑁆𑀟𑀺𑀢𑀚𑀦𑁄 𑀦 𑀚𑀳𑀸𑀢𑀺 𑀥𑀫𑁆𑀫𑀁.

𑀥𑀦𑀥𑀜𑁆𑀜𑀧𑁆𑀧𑀬𑁄𑀕𑁂𑀲𑀼, 𑀢𑀣𑀸 𑀯𑀺𑀚𑁆𑀚𑀸𑀕𑀫𑁂𑀲𑀼 𑀘;

𑀆𑀳𑀸𑀭𑁂 𑀩𑁆𑀬𑀯𑀳𑀸𑀭𑁂 𑀘, 𑀘𑀢𑁆𑀢𑀮𑀚𑁆𑀚𑁄 𑀲𑀤𑀸 𑀪𑀯𑁂.

𑀲𑀸𑀪𑀸𑀯𑀺𑀓𑀻 ¶ 𑀘 𑀧𑀝𑀺𑀪𑀸, 𑀲𑀼𑀢𑀜𑁆𑀘 𑀩𑀳𑀼𑀦𑀺𑀫𑁆𑀫𑀮𑀁;

𑀅𑀫𑀦𑁆𑀤𑁄 𑀘𑀸𑀪𑀺𑀬𑁄𑀕𑁄𑀬𑀁, 𑀳𑁂𑀢𑀼 𑀳𑁄𑀢𑀺𑀳 𑀩𑀦𑁆𑀥𑀦𑁂.

𑀚𑀳𑁂𑀬𑁆𑀬 ¶ 𑀧𑀸𑀧𑀓𑁂 𑀫𑀺𑀢𑁆𑀢𑁂, 𑀪𑀚𑁂𑀬𑁆𑀬 𑀧𑀡𑁆𑀟𑀺𑀢𑁂 𑀚𑀦𑁂;

𑀲𑀸𑀥𑀯𑁄 𑀅𑀪𑀺𑀲𑁂𑀯𑁂𑀬𑁆𑀬, 𑀲𑀼𑀡𑁂𑀬𑁆𑀬 𑀥𑀫𑁆𑀫𑀫𑀼𑀢𑁆𑀢𑀫𑀁.

𑀓𑀮𑁆𑀬𑀸𑀡𑀓𑀸𑀭𑀻 𑀓𑀮𑁆𑀬𑀸𑀡𑀁, 𑀧𑀸𑀧𑀓𑀸𑀭𑀻 𑀘 𑀧𑀸𑀧𑀓𑀁;

𑀬𑀸𑀤𑀺𑀲𑀁 𑀯𑀧𑁆𑀧𑀢𑁂 𑀩𑀻𑀚𑀁, 𑀢𑀸𑀤𑀺𑀲𑀁 𑀳𑀭𑀢𑁂 𑀨𑀮𑀁.

𑀙𑀦𑁆𑀤𑁄 ¶ 𑀦𑀺𑀤𑀸𑀦𑀁 𑀕𑀸𑀣𑀸𑀦𑀁, 𑀅𑀓𑁆𑀔𑀭𑀸 𑀢𑀸𑀲𑀁 𑀯𑀺𑀬𑀜𑁆𑀚𑀦𑀁;

𑀦𑀸𑀫𑀲𑀦𑁆𑀦𑀺𑀲𑁆𑀲𑀺𑀢𑀸 𑀕𑀸𑀣𑀸, 𑀓𑀯𑀺 𑀕𑀸𑀣𑀸𑀦𑀫𑀸𑀲𑀬𑁄.

𑀢𑀲𑁆𑀫𑀸 ¶ 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄, 𑀲𑀫𑁆𑀧𑀲𑁆𑀲𑀁 𑀳𑀺𑀢𑀫𑀢𑁆𑀢𑀦𑁄;

𑀧𑀜𑁆𑀜𑀯𑀦𑁆𑀢𑀁𑀪𑀺𑀧𑀽𑀚𑁂𑀬𑁆𑀬, 𑀘𑁂𑀢𑀺𑀬𑀁 𑀯𑀺𑀬 𑀲𑀸𑀤𑀭𑁄.

𑀥𑀻𑀭𑀁 𑀧𑀲𑁆𑀲𑁂 𑀲𑀼𑀡𑁂 𑀥𑀻𑀭𑀁, 𑀥𑀻𑀭𑁂𑀦 𑀲𑀳𑀲𑀁𑀯𑀲𑁂;

𑀥𑀻𑀭𑁂𑀦𑀮𑁆𑀮𑀸𑀧𑀲𑀮𑁆𑀮𑀸𑀧𑀁, 𑀢𑀁 𑀓𑀭𑁂 𑀢𑀜𑁆𑀘 𑀭𑁄𑀘𑀬𑁂.

𑀦𑀬𑀁 ¶ 𑀦𑀬𑀢𑀺 𑀫𑁂𑀥𑀸𑀯𑀻, 𑀅𑀥𑀼𑀭𑀸𑀬𑀁 𑀦 𑀬𑀼𑀜𑁆𑀚𑀢𑀺;

𑀲𑀼𑀦𑀬𑁄 𑀲𑁂𑀬𑁆𑀬𑀲𑁄 𑀳𑁄𑀢𑀺, 𑀲𑀫𑁆𑀫𑀸 𑀯𑀼𑀢𑁆𑀢𑁄 𑀦 𑀓𑀼𑀧𑁆𑀧𑀢𑀺;

𑀯𑀺𑀦𑀬𑀁 𑀲𑁄 𑀧𑀚𑀸𑀦𑀸𑀢𑀺, 𑀲𑀸𑀥𑀼 𑀢𑁂𑀦 𑀲𑀫𑀸𑀕𑀫𑁄.

𑀲𑀤𑁆𑀥𑀺𑀁 𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀁;

𑀅𑀪𑀺𑀪𑀼𑀬𑁆𑀬 𑀲𑀩𑁆𑀩𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀺,

𑀘𑀭𑁂𑀬𑁆𑀬 𑀢𑁂𑀦𑀢𑁆𑀢𑀫𑀦𑁄 𑀲𑀢𑀺𑀫𑀸.

𑀦𑁄 ¶ 𑀘𑁂 𑀮𑀪𑁂𑀣 𑀦𑀺𑀧𑀓𑀁 𑀲𑀳𑀸𑀬𑀁,

𑀲𑀤𑁆𑀥𑀺𑀁 𑀘𑀭𑀁 𑀲𑀸𑀥𑀼𑀯𑀺𑀳𑀸𑀭𑀺 𑀥𑀻𑀭𑀁;

𑀭𑀸𑀚𑀸𑀯 𑀭𑀝𑁆𑀞𑀁 𑀯𑀺𑀚𑀺𑀢𑀁 𑀧𑀳𑀸𑀬,

𑀏𑀓𑁄 𑀘𑀭𑁂 𑀫𑀸𑀢𑀗𑁆𑀕𑀭𑀜𑁆𑀜𑁂𑀯 𑀦𑀸𑀕𑁄.

𑀲𑁄𑀓𑀝𑁆𑀞𑀸𑀦𑀲𑀳𑀲𑁆𑀲𑀸𑀦𑀺 ¶ , 𑀪𑀬𑀝𑁆𑀞𑀸𑀦𑀲𑀢𑀸𑀦𑀺 𑀘;

𑀤𑀺𑀯𑀲𑁂 𑀤𑀺𑀯𑀲𑁂 𑀫𑀽𑀴𑁆𑀳-𑀫𑀸𑀯𑀺𑀲𑀦𑁆𑀢𑀺 𑀦 𑀧𑀡𑁆𑀟𑀺𑀢𑀁.

𑀚𑀮𑀩𑀺𑀦𑁆𑀤𑀼𑀦𑀺𑀧𑀸𑀢𑁂𑀦, 𑀘𑀺𑀭𑁂𑀦 𑀧𑀽𑀭𑀢𑁂 𑀖𑀝𑁄;

𑀢𑀣𑀸 𑀲𑀓𑀮𑀯𑀺𑀚𑁆𑀚𑀸𑀦𑀁, 𑀥𑀫𑁆𑀫𑀲𑁆𑀲 𑀘 𑀥𑀦𑀲𑁆𑀲 𑀘.

𑀧𑀡𑁆𑀟𑀺𑀢𑀸 ¶ 𑀤𑀼𑀓𑁆𑀔𑀁 𑀧𑀢𑁆𑀯𑀸𑀦, 𑀦 𑀪𑀯𑀦𑁆𑀢𑀺 𑀯𑀺𑀲𑀸𑀤𑀺𑀦𑁄;

𑀧𑀯𑀺𑀲𑁆𑀲 𑀭𑀸𑀳𑀼𑀦𑁄 𑀫𑀼𑀔𑀁, 𑀓𑀺𑀁 𑀦𑁄 𑀤𑁂𑀢𑀺 𑀧𑀼𑀦 𑀲𑀲𑀻.

𑀚𑀯𑁂𑀦 𑀅𑀲𑁆𑀲𑀁 𑀚𑀸𑀦𑀦𑁆𑀢𑀺, 𑀯𑀸𑀳𑁂𑀦 𑀘 𑀩𑀮𑀺𑀩𑀤𑁆𑀥𑀁;

𑀤𑀼𑀳𑁂𑀦 𑀥𑁂𑀦𑀼𑀁 𑀚𑀸𑀦𑀦𑁆𑀢𑀺, 𑀪𑀸𑀲𑀫𑀸𑀦𑁂𑀦 𑀧𑀡𑁆𑀟𑀺𑀢𑀁.

𑀫𑀦𑀲𑀸 ¶ 𑀘𑀺𑀦𑁆𑀢𑀺𑀢𑀁 𑀓𑀫𑁆𑀫𑀁, 𑀯𑀘𑀲𑀸 𑀦 𑀧𑀓𑀸𑀲𑀬𑁂;

𑀅𑀜𑁆𑀜𑀮𑀓𑁆𑀔𑀺𑀢𑀓𑀸𑀭𑀺𑀬𑀲𑁆𑀲, 𑀬𑀢𑁄 𑀲𑀺𑀤𑁆𑀥𑀺 𑀦 𑀚𑀸𑀬𑀢𑁂.

𑀅𑀦𑀪𑁆𑀬𑀸𑀲𑁂 𑀯𑀺𑀲𑀁 𑀯𑀺𑀚𑁆𑀚𑀸, 𑀅𑀚𑀺𑀡𑁆𑀡𑁂 𑀪𑁄𑀚𑀦𑀁 𑀯𑀺𑀲𑀁;

𑀯𑀺𑀲𑀁 𑀲𑀪𑀸 𑀤𑀮𑀺𑀤𑁆𑀤𑀲𑁆𑀲, 𑀯𑀼𑀤𑁆𑀥𑀲𑁆𑀲 𑀢𑀭𑀼𑀡𑀻 𑀯𑀺𑀲𑀁.

𑀘𑀢𑁆𑀢𑀸𑀭𑁄 𑀧𑀜𑁆𑀘 𑀆𑀮𑁄𑀧𑁂, 𑀆𑀪𑀼𑀢𑁆𑀯𑀸 𑀉𑀤𑀓𑀁 𑀧𑀺𑀯𑁂;

𑀅𑀮𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑀬𑀲𑁆𑀲 𑀏𑀲𑁄 𑀧𑀲𑀼𑀢𑁄𑀧𑀺, 𑀕𑀼𑀡𑀯𑀸 𑀧𑀼𑀚𑁆𑀚𑀢𑁂 𑀦𑀭𑁄;

𑀥𑀦𑀼 𑀯𑀁𑀲𑀯𑀺𑀲𑀼𑀤𑁆𑀥𑁄𑀧𑀺, 𑀦𑀺𑀕𑁆𑀕𑀼𑀡𑁄 𑀓𑀺𑀁 𑀓𑀭𑀺𑀲𑁆𑀲𑀢𑀺.

𑀇𑀲𑁆𑀲𑀻 ¶ 𑀤𑀬𑀻 𑀅𑀲𑀁𑀢𑀼𑀝𑁆𑀞𑁄, 𑀓𑁄𑀥𑀦𑁄 𑀦𑀺𑀘𑁆𑀘𑀲𑀗𑁆𑀓𑀻𑀢𑁄;

𑀧𑀭𑀪𑀸𑀕𑁆𑀬𑁄𑀧𑀚𑀻𑀯𑀻 𑀘, 𑀙𑀴𑁂𑀢𑁂 𑀤𑀼𑀓𑁆𑀔𑀪𑀸𑀕𑀺𑀦𑁄.

𑀲𑀼𑀫𑀳𑀦𑁆𑀢𑀸𑀦𑀺 𑀲𑀢𑁆𑀢𑀸𑀦𑀻, 𑀥𑀸𑀭𑀬𑀦𑁆𑀢𑀸 𑀩𑀳𑀼𑀲𑁆𑀲𑀼𑀢𑀸;

𑀙𑁂𑀢𑁆𑀢𑀸𑀭𑁄 𑀲𑀁𑀲𑀬𑀸𑀦𑀜𑁆𑀘, 𑀓𑀮𑀺𑀁 𑀬𑀦𑁆𑀢𑀺 𑀮𑁄𑀪𑀫𑁄𑀳𑀺𑀢𑀸.

𑀦𑀤𑀻𑀢𑀻𑀭𑁂 ¶ 𑀔𑀢𑁂 𑀓𑀽𑀧𑁂, 𑀅𑀭𑀡𑀻𑀢𑀸𑀮𑀯𑀡𑁆𑀝𑀓𑁂;

𑀦 𑀯𑀤𑁂 𑀤𑀓𑀸𑀤𑀻 𑀦𑀢𑁆𑀣𑀻𑀢𑀺, 𑀫𑀼𑀔𑁂 𑀘 𑀯𑀘𑀦𑀁 𑀢𑀣𑀸.

𑀲𑀩𑁆𑀩𑀁 𑀲𑀼𑀡𑀸𑀢𑀺 𑀲𑁄𑀢𑁂𑀦, 𑀲𑀩𑁆𑀩𑀁 𑀧𑀲𑁆𑀲𑀢𑀺 𑀘𑀓𑁆𑀔𑀼𑀦𑀸;

𑀦 𑀘 𑀤𑀺𑀝𑁆𑀞𑀁 𑀲𑀼𑀢𑀁 𑀥𑀻𑀭𑁄, 𑀲𑀩𑁆𑀩𑀁 𑀉𑀘𑁆𑀘𑀺𑀢𑀼 𑀫𑀭𑀳𑀢𑀺.

𑀩𑀸𑀮𑀸𑀤𑀧𑀺 ¶ 𑀕𑀳𑁂𑀢𑀩𑁆𑀩𑀁, 𑀬𑀼𑀢𑁆𑀢𑀫𑀼𑀢𑁆𑀢𑀫𑀦𑀻𑀲𑀺𑀪𑀺;

𑀭𑀯𑀺𑀲𑁆𑀲𑀸𑀯𑀺𑀲𑀬𑁂 𑀓𑀺𑀁 𑀦, 𑀧𑀤𑀻𑀧𑀲𑁆𑀲 𑀧𑀓𑀸𑀲𑀦𑀁.

𑀢𑀲𑁆𑀫𑀸 ¶ 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀢𑀫𑀢𑁆𑀢𑀦𑁄;

𑀬𑁄𑀦𑀺𑀲𑁄 𑀯𑀺𑀘𑀺𑀦𑁂 𑀥𑀫𑁆𑀫𑀁, 𑀏𑀯𑀁 𑀢𑀢𑁆𑀣 𑀯𑀺𑀲𑀼𑀚𑁆𑀛𑀢𑀺.

𑀓𑀺𑀁 𑀢𑁂𑀦 𑀚𑀸𑀢𑀼𑀚𑀸𑀢𑁂𑀦, 𑀫𑀸𑀢𑀼𑀬𑁄𑀩𑁆𑀩𑀦𑁆𑀦𑀳𑀸𑀭𑀺𑀦𑀸;

𑀆𑀭𑁄𑀳𑀢𑀺 𑀦 𑀬𑁄 𑀲𑀓-𑀯𑀁𑀲𑀅𑀕𑁆𑀕𑁂 𑀥𑀚𑁄 𑀬𑀣𑀸.

𑀲𑀫𑁆𑀫𑀸 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸, 𑀅𑀓𑁆𑀔𑀭𑁂𑀲𑀼 𑀧𑀤𑁂𑀲𑀼 𑀘;

𑀘𑁄𑀭𑀖𑀸𑀢𑁄 𑀲𑀺𑀬𑀸 𑀲𑀺𑀲𑁆𑀲𑁄, 𑀕𑀼𑀭𑀼 𑀘𑁄𑀭𑀝𑁆𑀝𑀓𑀸𑀭𑀓𑁄.

𑀅𑀤𑀦𑁆𑀢𑀤𑀫𑀦𑀁 ¶ 𑀲𑀢𑁆𑀣𑀁, 𑀔𑀮𑀸𑀦𑀁 𑀓𑀼𑀭𑀼𑀢𑁂 𑀫𑀤𑀁;

𑀘𑀓𑁆𑀔𑀼𑀲𑀗𑁆𑀔𑀸𑀭𑀓𑀁 𑀢𑁂𑀚𑀁, 𑀉𑀮𑀽𑀓𑀸𑀦𑀁𑀫𑀺𑀯𑀦𑁆𑀥𑀓𑀁.

𑀦𑀭𑀢𑁆𑀢𑀁 𑀤𑀼𑀮𑁆𑀮𑀪𑀁 𑀮𑁄𑀓𑁂, 𑀯𑀺𑀚𑁆𑀚𑀸 𑀢𑀢𑁆𑀭 𑀲𑀼𑀤𑀼𑀮𑁆𑀮𑀪𑀸;

𑀓𑀯𑀺𑀢𑁆𑀢𑀁 𑀤𑀼𑀮𑁆𑀮𑀪𑀁 𑀢𑀢𑁆𑀭, 𑀲𑀢𑁆𑀢𑀺 𑀢𑀢𑁆𑀭 𑀲𑀼𑀤𑀼𑀮𑁆𑀮𑀪𑀸.

𑀬𑁂𑀪𑀼𑀬𑁆𑀬𑁂𑀦 ¶ 𑀳𑀺 𑀲𑀢𑁆𑀢𑀸𑀦𑀁, 𑀯𑀺𑀦𑀸𑀲𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂;

𑀅𑀦𑀬𑁄 𑀦𑀬𑀭𑀽𑀧𑁂𑀦, 𑀩𑀼𑀤𑁆𑀥𑀺𑀫𑀸𑀕𑀫𑁆𑀫 𑀢𑀺𑀝𑁆𑀞𑀢𑀺.

𑀲𑀤𑁆𑀥𑀸𑀲𑀻𑀮𑀸𑀤𑀺𑀥𑀫𑁆𑀫𑁂𑀳𑀺, ¶ 𑀲𑀧𑁆𑀧𑀦𑁆𑀦𑁄 𑀲𑁂𑀝𑁆𑀞𑀫𑀸𑀦𑀼𑀲𑁄;

𑀯𑀼𑀢𑁆𑀢𑁄 𑀩𑀼𑀤𑁆𑀥𑀸𑀤𑀺𑀲𑀦𑁆𑀢𑁂𑀳𑀺, 𑀲𑀸𑀥𑀼𑀲𑀧𑁆𑀧𑀼𑀭𑀺𑀲𑁄 𑀇𑀢𑀺.

𑀲𑀤𑁆𑀤𑀸𑀥𑀦𑀁 𑀲𑀻𑀮𑀥𑀦𑀁, 𑀳𑀺𑀭𑀻𑀑𑀢𑁆𑀢𑀧𑁆𑀧𑀺𑀬𑀁 𑀥𑀦𑀁;

𑀲𑀼𑀢𑀥𑀦𑀜𑁆𑀘 𑀘𑀸𑀕𑁄 𑀘, 𑀧𑀜𑁆𑀜𑀸 𑀯𑁂 𑀲𑀢𑁆𑀢𑀫𑀁 𑀥𑀦𑀁.

𑀬𑀲𑁆𑀲 𑀏𑀢𑁂 𑀥𑀦𑀸 𑀅𑀢𑁆𑀣𑀺, 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀲𑁆𑀲 𑀯𑀸;

𑀅𑀤𑀮𑀺𑀤𑁆𑀤𑁄𑀢𑀺 𑀢𑀁 𑀆𑀳𑀼, 𑀅𑀫𑁄𑀖𑀁 𑀢𑀲𑁆𑀲 𑀚𑀻𑀯𑀺𑀢𑀁.

𑀢𑀲𑁆𑀫𑀸 𑀲𑀤𑁆𑀥𑀜𑁆𑀘 𑀲𑀻𑀮𑀜𑁆𑀘, 𑀧𑀲𑀸𑀤𑀁 𑀥𑀫𑁆𑀫𑀤𑀲𑁆𑀲𑀦𑀁;

𑀅𑀦𑀼𑀬𑀼𑀜𑁆𑀚𑁂𑀣 𑀫𑁂𑀥𑀸𑀯𑀻, 𑀲𑀭𑀁 𑀩𑀼𑀤𑁆𑀥𑀸𑀦𑀲𑀸𑀲𑀦𑀁.

𑀲𑀩𑁆𑀪𑀺𑀭𑁂𑀯 ¶ 𑀲𑀫𑀸𑀲𑁂𑀣, 𑀲𑀩𑁆𑀪𑀺 𑀓𑀼𑀩𑁆𑀩𑁂𑀣 𑀲𑀦𑁆𑀣𑀯𑀁;

𑀲𑀢𑀁 𑀲𑀤𑁆𑀥𑀫𑁆𑀫𑀫𑀜𑁆𑀜𑀸𑀬, 𑀲𑁂𑀬𑁆𑀬𑁄 𑀳𑁄𑀢𑀺 𑀦 𑀧𑀸𑀧𑀺𑀬𑁄.

𑀘𑀚 𑀤𑀼𑀚𑁆𑀚𑀦𑀲𑀁𑀲𑀕𑁆𑀕𑀁, 𑀪𑀚 𑀲𑀸𑀥𑀼𑀲𑀫𑀸𑀕𑀫𑀁;

𑀓𑀭 𑀧𑀼𑀜𑁆𑀜𑀫𑀳𑁄𑀭𑀢𑁆𑀢𑀁, 𑀲𑀭 𑀦𑀺𑀘𑁆𑀘𑀫𑀦𑀺𑀘𑁆𑀘𑀢𑀁.

𑀬𑁄 ¶ 𑀯𑁂 𑀓𑀢𑀜𑁆𑀜𑀽 𑀓𑀢𑀯𑁂𑀤𑀻 𑀥𑀻𑀭𑁄,

𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀤𑀴𑁆𑀳𑀪𑀢𑁆𑀢𑀺 𑀘 𑀳𑁄𑀢𑀺;

𑀤𑀼𑀓𑁆𑀔𑀺𑀢𑀲𑁆𑀲 𑀲𑀓𑁆𑀓𑀘𑁆𑀘 𑀓𑀭𑁄𑀢𑀺 𑀓𑀺𑀘𑁆𑀘𑀁,

𑀢𑀣𑀸𑀯𑀺𑀥𑀁 𑀲𑀧𑁆𑀧𑀼𑀭𑀺𑀲𑀁 𑀯𑀤𑀦𑁆𑀢𑀺.

𑀫𑀸𑀢𑀸𑀧𑁂𑀢𑁆𑀢𑀺𑀪𑀭𑀁 ¶ 𑀚𑀦𑁆𑀢𑀼𑀁, 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑀁;

𑀲𑀡𑁆𑀳𑀁 𑀲𑀔𑀺𑀮𑀲𑀫𑁆𑀪𑀸𑀲𑀁, 𑀧𑁂𑀲𑀼𑀡𑁂𑀬𑁆𑀬𑀧𑁆𑀧𑀳𑀸𑀬𑀺𑀦𑀁.

𑀫𑀘𑁆𑀙𑁂𑀭𑀯𑀺𑀦𑀬𑁂 𑀬𑀼𑀢𑁆𑀢𑀁, 𑀲𑀘𑁆𑀘𑀁 𑀓𑁄𑀥𑀸𑀪𑀺𑀪𑀼𑀁 𑀦𑀭𑀁;

𑀢𑀁 𑀯𑁂 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀆𑀳𑀼 ‘‘𑀲𑀧𑁆𑀧𑀼𑀭𑀺𑀲𑁄’’𑀇𑀢𑀺.

𑀓𑀼𑀮𑀚𑀸𑀢𑁄 𑀓𑀼𑀮𑀧𑀼𑀢𑁆𑀢𑁄, 𑀓𑀼𑀮𑀯𑀁𑀲𑀲𑀼𑀭𑀓𑁆𑀔𑀢𑁄;

𑀅𑀢𑁆𑀢𑀦𑀸 𑀤𑀼𑀓𑁆𑀔𑀧𑁆𑀧𑀢𑁆𑀢𑁄𑀧𑀺, 𑀳𑀻𑀦𑀓𑀫𑁆𑀫𑀁 𑀦 𑀓𑀸𑀭𑀬𑁂.

𑀉𑀤𑁂𑀬𑁆𑀬 ¶ 𑀪𑀸𑀡𑀼 𑀧𑀘𑁆𑀙𑀺𑀫𑁂, 𑀦𑀫𑁂𑀬𑁆𑀬 𑀫𑁂𑀭𑀼𑀅𑀤𑁆𑀤𑀺𑀧𑀺;

𑀲𑀻𑀢𑀮𑀁 𑀬𑀤𑀺 𑀦𑀭𑀕𑁆𑀕𑀺, 𑀧𑀩𑁆𑀩𑀢𑀕𑁆𑀕𑁂 𑀘 𑀉𑀧𑁆𑀧𑀮𑀁;

𑀯𑀺𑀓𑀲𑁂 𑀦 𑀯𑀺𑀧𑀭𑀺𑀢𑀸, 𑀲𑀸𑀥𑀼𑀯𑀸𑀘𑀸 𑀓𑀼𑀤𑀸𑀘𑀦𑀁.

𑀲𑀼𑀔𑀸 𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀯, 𑀢𑀢𑁄 𑀜𑀸𑀢𑀺𑀫𑀸𑀢𑀸𑀧𑀺𑀢𑀼;

𑀢𑀢𑁄 𑀆𑀘𑁂𑀭𑀲𑁆𑀲 𑀭𑀜𑁆𑀜𑁄, 𑀢𑀢𑁄 𑀩𑀼𑀤𑁆𑀥𑀲𑁆𑀲𑀦𑁂𑀓𑀥𑀸.

𑀪𑀫𑀭𑀸 ¶ 𑀧𑀼𑀧𑁆𑀨𑀫𑀺𑀘𑁆𑀙𑀦𑁆𑀢𑀺, 𑀕𑀼𑀡𑀫𑀺𑀘𑁆𑀙𑀦𑁆𑀢𑀺 𑀲𑀚𑁆𑀚𑀦𑀸;

𑀫𑀓𑁆𑀔𑀺𑀓𑀸 𑀧𑀽𑀢𑀺𑀫𑀺𑀘𑁆𑀙𑀦𑁆𑀢𑀺, 𑀤𑁄𑀲𑀫𑀺𑀘𑁆𑀙𑀦𑁆𑀢𑀺 𑀤𑀼𑀚𑁆𑀚𑀦𑀸.

𑀫𑀸𑀢𑀼𑀳𑀻𑀦𑁄 ¶ 𑀤𑀼𑀩𑁆𑀪𑀸𑀲𑁄 𑀳𑀺, 𑀧𑀺𑀢𑀼𑀳𑀻𑀦𑁄 𑀤𑀼𑀓𑁆𑀓𑀺𑀭𑀺𑀬𑁄;

𑀉𑀪𑁄 𑀫𑀸𑀢𑀼𑀧𑀺𑀢𑀼𑀳𑀻𑀦𑀸, 𑀤𑀼𑀩𑁆𑀪𑀸𑀲𑀸 𑀘 𑀤𑀼𑀓𑁆𑀓𑀺𑀭𑀺𑀬𑀸.

𑀫𑀸𑀢𑀼𑀲𑁂𑀝𑁆𑀞𑁄 𑀲𑀼𑀪𑀸𑀲𑁄 𑀳𑀺, 𑀧𑀺𑀢𑀼𑀲𑁂𑀝𑁆𑀞𑁄 𑀲𑀼𑀓𑀺𑀭𑀺𑀬𑁄;

𑀉𑀪𑁄𑀫𑀸𑀢𑀼 𑀧𑀺𑀢𑀼𑀲𑁂𑀝𑁆𑀞𑀸, 𑀲𑀼𑀪𑀸𑀲𑀸 𑀘 𑀲𑀼𑀓𑀺𑀭𑀺𑀬𑀸.

𑀲𑀼𑀦𑀔𑁄 ¶ 𑀲𑀼𑀦𑀔𑀁 𑀤𑀺𑀲𑁆𑀯𑀸, 𑀤𑀦𑁆𑀢𑀁 𑀤𑀲𑁆𑀲𑁂𑀢𑀺 𑀳𑀺𑀁𑀲𑀺𑀢𑀼𑀁;

𑀤𑀼𑀚𑁆𑀚𑀦𑁄 𑀲𑀼𑀚𑀦𑀁 𑀤𑀺𑀲𑁆𑀯𑀸, 𑀭𑁄𑀲𑀬𑀁 𑀳𑀺𑀁𑀲𑀫𑀺𑀘𑁆𑀙𑀢𑀺.

𑀦 𑀘 𑀯𑁂𑀕𑁂𑀦 𑀓𑀺𑀘𑁆𑀘𑀸𑀦𑀺, 𑀓𑀢𑁆𑀢𑀩𑁆𑀩𑀸𑀦𑀺 𑀓𑀼𑀤𑀸𑀘𑀦𑀁;

𑀲𑀳𑀲𑀸 𑀓𑀸𑀭𑀺𑀢𑀁 𑀓𑀫𑁆𑀫𑀁, 𑀩𑀸𑀮𑁄 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑀓𑁄𑀥𑀁 ¶ 𑀯𑀥𑀺𑀢𑁆𑀯𑀸 𑀦 𑀓𑀤𑀸𑀘𑀺 𑀲𑁄𑀘𑀢𑀺,

𑀫𑀓𑁆𑀔𑀧𑁆𑀧𑀳𑀸𑀦𑀁 𑀇𑀲𑀬𑁄 𑀯𑀡𑁆𑀡𑀬𑀦𑁆𑀢𑀺;

𑀲𑀩𑁆𑀩𑁂𑀲𑀁 𑀯𑀼𑀢𑁆𑀢𑀁 𑀨𑀭𑀼𑀲𑀁 𑀔𑀫𑁂𑀣,

𑀏𑀢𑀁 𑀔𑀦𑁆𑀢𑀺𑀁 𑀉𑀢𑁆𑀢𑀫𑀫𑀸𑀳𑀼 𑀲𑀦𑁆𑀢𑁄.

𑀤𑀼𑀓𑁆𑀔𑁄 𑀦𑀺𑀯𑀸𑀲𑁄 𑀲𑀫𑁆𑀩𑀸𑀥𑁂, 𑀞𑀸𑀦𑁂 𑀅𑀲𑀼𑀘𑀻𑀲𑀗𑁆𑀓𑀢𑁂;

𑀢𑀢𑁄 𑀅𑀭𑀺𑀫𑁆𑀳𑀺 𑀅𑀧𑁆𑀧𑀺𑀬𑁂, 𑀢𑀢𑁄𑀧𑀺 𑀅𑀓𑀢𑀜𑁆𑀜𑀼𑀦𑀸.

𑀑𑀯𑀤𑁂𑀬𑁆𑀬𑀸’𑀦𑀼𑀲𑀸𑀲𑁂𑀬𑁆𑀬 ¶ , 𑀅𑀲𑀩𑁆𑀪𑀸 𑀘 𑀦𑀺𑀯𑀸𑀭𑀬𑁂;

𑀲𑀢𑀜𑁆𑀳𑀺 𑀲𑁄 𑀧𑀺𑀬𑁄 𑀳𑁄𑀢𑀺, 𑀅𑀲𑀢𑀁 𑀳𑁄𑀢𑀺𑀅𑀧𑁆𑀧𑀺𑀬𑁄.

𑀉𑀢𑁆𑀢𑀫𑀢𑁆𑀢𑀦𑀺𑀯𑀸𑀢𑁂𑀦, 𑀓𑀓𑁆𑀔𑀴𑀁 𑀫𑀼𑀤𑀼𑀦𑀸 𑀚𑀬𑁂;

𑀦𑀻𑀘𑀁 𑀅𑀧𑁆𑀧𑀓𑀤𑀸𑀦𑁂𑀦, 𑀯𑀸𑀬𑀸𑀫𑁂𑀦 𑀲𑀫𑀁 𑀚𑀬𑁂.

𑀦 ¶ 𑀯𑀺𑀲𑀁 𑀯𑀺𑀲𑀫𑀺𑀘𑁆𑀘𑀸𑀳, 𑀥𑀦𑀁 𑀲𑀗𑁆𑀖𑀲𑁆𑀲 𑀉𑀘𑁆𑀘𑀢𑁂;

𑀯𑀺𑀲𑀁 𑀏𑀓𑀁𑀯 𑀳𑀦𑀢𑀺, 𑀳𑀦𑀢𑀺 𑀲𑀗𑁆𑀖𑀲𑁆𑀲 𑀲𑀩𑁆𑀩𑀁.

𑀥𑀦𑀫𑀧𑁆𑀧𑀫𑁆𑀧𑀺 ¶ 𑀲𑀸𑀥𑀽𑀦𑀁, 𑀓𑀽𑀧𑁂 𑀯𑀸𑀭𑀺𑀯 𑀦𑀺𑀲𑁆𑀲𑀬𑁄;

𑀩𑀳𑀼𑀁𑀅𑀧𑀺 𑀅𑀲𑀸𑀥𑀽𑀦𑀁, 𑀦 𑀘 𑀯𑀸𑀭𑀺𑀯 𑀅𑀡𑁆𑀡𑀯𑁂.

𑀅𑀧𑀢𑁆𑀣𑁂𑀬𑁆𑀬𑀁 𑀦 𑀧𑀢𑁆𑀣𑁂𑀬𑁆𑀬, 𑀅𑀘𑀺𑀦𑁆𑀢𑁂𑀬𑁆𑀬𑀁 𑀦 𑀘𑀺𑀦𑁆𑀢𑀬𑁂;

𑀥𑀫𑁆𑀫𑀫𑁂𑀯 𑀲𑀼𑀘𑀺𑀦𑁆𑀢𑁂𑀬𑁆𑀬, 𑀓𑀸𑀮𑀁 𑀫𑁄𑀖𑀁 𑀦 𑀇𑀘𑁆𑀙𑀬𑁂.

𑀅𑀘𑀺𑀦𑁆𑀢𑀺𑀢𑀫𑁆𑀧𑀺 ¶ 𑀪𑀯𑀢𑀺, 𑀘𑀺𑀦𑁆𑀢𑀺𑀢𑀫𑁆𑀧𑀺 𑀯𑀺𑀦𑀲𑁆𑀲𑀢𑀺;

𑀦 𑀳𑀺 𑀘𑀺𑀦𑁆𑀢𑀸𑀫𑀬𑀸 𑀪𑁄𑀕𑀸, 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀲𑁆𑀲 𑀯𑀸.

𑀅𑀲𑀦𑁆𑀢𑀲𑁆𑀲 𑀧𑀺𑀬𑁄 𑀳𑁄𑀢𑀺, 𑀲𑀦𑁆𑀢𑁂 𑀦 𑀓𑀼𑀭𑀼𑀢𑁂 𑀧𑀺𑀬𑀁;

𑀅𑀲𑀢𑀁 𑀥𑀫𑁆𑀫𑀁 𑀭𑁄𑀘𑁂𑀢𑀺, 𑀢𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁.

𑀕𑀼𑀡𑀸 ¶ 𑀓𑀼𑀩𑁆𑀩𑀦𑁆𑀢𑀺 𑀤𑀽𑀢𑀢𑁆𑀢𑀁, 𑀤𑀽𑀭𑁂𑀧𑀺 𑀯𑀲𑀢𑀁 𑀲𑀢𑀁;

𑀓𑁂𑀢𑀓𑁂 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸, 𑀕𑀘𑁆𑀙𑀦𑁆𑀢𑀺 𑀪𑀫𑀭𑀸 𑀲𑀬𑀁.

𑀧𑀼𑀩𑁆𑀩𑀚𑀸𑀢𑀺𑀓𑀢𑀁 𑀓𑀫𑁆𑀫𑀁, 𑀢𑀁 𑀓𑀫𑁆𑀫𑀫𑀻𑀢𑀺 𑀓𑀣𑁆𑀬𑀢𑁂;

𑀢𑀲𑁆𑀫𑀸 𑀧𑀼𑀭𑀺𑀲𑀸𑀓𑀸𑀭𑁂𑀦𑀁, 𑀬𑀢𑀁 𑀓𑀭𑁂 𑀅𑀢𑀦𑁆𑀤𑀺𑀢𑁄.

𑀫𑀢𑁆𑀢𑀺𑀓𑀧𑀺𑀡𑁆𑀟𑀢𑁄 𑀓𑀢𑁆𑀢𑀸, 𑀓𑀼𑀭𑀼𑀢𑁂 𑀬𑀁 𑀬𑀤𑀺𑀘𑁆𑀙𑀢𑀺;

𑀏𑀯𑀫𑀢𑁆𑀢𑀓𑀢𑀁 𑀓𑀫𑁆𑀫𑀁, 𑀫𑀸𑀡𑀯𑁄 𑀧𑀝𑀺𑀧𑀚𑁆𑀚𑀢𑁂.

𑀉𑀝𑁆𑀞𑀸𑀬𑁄𑀝𑁆𑀞𑀸𑀬 ¶ 𑀩𑁄𑀥𑁂𑀬𑁆𑀬𑀁, 𑀫𑀳𑀩𑁆𑀪𑀬 𑀫𑀼𑀧𑀝𑁆𑀞𑀺𑀢𑀁;

𑀫𑀭𑀡𑀩𑁆𑀬𑀸𑀥𑀺𑀲𑁄𑀓𑀸𑀦𑀁, 𑀓𑀺𑀫𑀚𑁆𑀚 𑀦𑀺𑀧𑀢𑀺𑀲𑁆𑀲𑀢𑀺.

𑀧𑀸𑀡𑀸 𑀬𑀣𑀸𑀢𑁆𑀢𑀦𑁄𑀪𑀺𑀝𑁆𑀞𑀸, 𑀪𑀽𑀢𑀸𑀦𑀫𑀧𑀺 𑀢𑁂 𑀢𑀣𑀸;

𑀅𑀢𑁆𑀢𑁄𑀧𑀫𑁂𑀦 𑀪𑀽𑀢𑁂𑀲𑀼, 𑀤𑀬𑀁 𑀓𑀼𑀩𑁆𑀩𑀦𑁆𑀢𑀺 𑀲𑀸𑀥𑀯𑁄.

𑀲𑀩𑁆𑀩𑁂 ¶ 𑀢𑀲𑀦𑁆𑀢𑀺 𑀤𑀡𑁆𑀟𑀲𑁆𑀲, 𑀲𑀩𑁆𑀩𑁂 𑀪𑀸𑀬𑀦𑁆𑀢𑀺 𑀫𑀘𑁆𑀘𑀼𑀦𑁄;

𑀅𑀢𑁆𑀢𑀸𑀦𑀁 𑀉𑀧𑀫𑀁 𑀓𑀢𑁆𑀯𑀸, 𑀦 𑀳𑀦𑁂𑀬𑁆𑀬 𑀦 𑀖𑀸𑀢𑀬𑁂.

𑀩𑀸𑀮𑁄 𑀯𑀸 𑀬𑀤𑀺 𑀯𑀸 𑀯𑀼𑀤𑁆𑀥𑁄, 𑀬𑀼𑀯𑀸 𑀯𑀸 𑀕𑁂𑀳𑀫𑀸𑀕𑀢𑁄;

𑀢𑀲𑁆𑀲 𑀧𑀽𑀚𑀸 𑀯𑀺𑀥𑀸𑀢𑀩𑁆𑀩𑀸, 𑀲𑀩𑁆𑀩𑀲𑁆𑀲𑀸𑀪𑁆𑀬𑀸𑀕𑀢𑁄 𑀕𑀭𑀼.

𑀆𑀓𑀺𑀡𑁆𑀡𑁄𑀧𑀺 𑀅𑀲𑀦𑁆𑀢𑁂𑀳𑀺, 𑀅𑀲𑀁𑀲𑀝𑁆𑀞𑁄𑀯 𑀪𑀤𑁆𑀤𑀓𑁄;

𑀩𑀳𑀼𑀦𑀸 𑀲𑀦𑁆𑀦𑀚𑀸𑀢𑁂𑀦, 𑀕𑀘𑁆𑀙𑁂𑀦 𑀉𑀩𑁆𑀩𑀢𑁆𑀢𑁂𑀦𑀺𑀥.

𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 ¶ , 𑀲𑀫𑁆𑀧𑀦𑁆𑀦𑁄 𑀧𑀸𑀧𑀫𑀸𑀦𑀼𑀚𑁄;

𑀩𑀸𑀮𑁄𑀢𑀺 𑀮𑁄𑀓𑀦𑀸𑀣𑁂𑀦, 𑀓𑀺𑀢𑁆𑀢𑀺𑀢𑁄 𑀥𑀫𑁆𑀫𑀲𑀸𑀫𑀺𑀦𑀸.

𑀤𑀼𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻 𑀘𑁂𑀯, 𑀤𑀼𑀩𑁆𑀪𑀸𑀲𑀺𑀢𑀪𑀸𑀲𑀻𑀧𑀺 𑀘;

𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀻 𑀘, 𑀧𑀸𑀧𑀓𑁄 𑀩𑀸𑀮𑀫𑀸𑀦𑀼𑀚𑁄.

𑀅𑀢𑀺𑀧𑀺𑀬𑁄 ¶ 𑀦 𑀓𑀸𑀢𑀩𑁆𑀩𑁄, 𑀔𑀮𑁄 𑀓𑁄𑀢𑀼𑀳𑀮𑀁 𑀓𑀭𑁄;

𑀲𑀺𑀭𑀲𑀸 𑀯𑀳𑀫𑀸𑀦𑁄𑀧𑀺, 𑀅𑀟𑁆𑀠𑀧𑀽𑀭𑁄 𑀖𑀝𑁄 𑀬𑀣𑀸.

𑀲𑀧𑁆𑀧𑁄 𑀤𑀼𑀝𑁆𑀞𑁄 𑀔𑀮𑁄 𑀤𑀼𑀝𑁆𑀞𑁄, 𑀲𑀧𑁆𑀧𑀸 𑀤𑀼𑀝𑁆𑀞𑀢𑀭𑁄 𑀔𑀮𑁄;

𑀫𑀦𑁆𑀢𑁄𑀲𑀥𑁂𑀳𑀺 𑀢𑀁 𑀲𑀧𑁆𑀧𑀁, 𑀔𑀮𑀁 𑀓𑁂𑀦𑀼𑀧𑀲𑀫𑁆𑀫𑀢𑀺.

𑀬𑁄 ¶ 𑀩𑀸𑀮𑁄 𑀫𑀜𑁆𑀜𑀢𑀺 𑀩𑀸𑀮𑁆𑀬𑀁, 𑀧𑀡𑁆𑀟𑀺𑀢𑁄 𑀯𑀸𑀧𑀺 𑀢𑁂𑀦𑀲𑁄;

𑀩𑀸𑀮𑁄 𑀘 𑀧𑀡𑁆𑀟𑀺𑀢𑀫𑀸𑀦𑀻, 𑀲 𑀯𑁂 𑀩𑀸𑀮𑁄𑀢𑀺 𑀯𑀼𑀘𑁆𑀘𑀢𑀺.

𑀫𑀥𑀽𑀯 𑀫𑀜𑁆𑀜𑀢𑀺 𑀩𑀸𑀮𑁄, 𑀬𑀸𑀯 𑀧𑀸𑀧𑀁 𑀦 𑀧𑀘𑁆𑀘𑀢𑀺;

𑀬𑀤𑀸 𑀘 𑀧𑀘𑁆𑀘𑀢𑀺 𑀧𑀸𑀧𑀁, 𑀅𑀣 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀺.

𑀦 ¶ 𑀲𑀸𑀥𑀼 𑀩𑀮𑀯𑀸 𑀩𑀸𑀮𑁄, 𑀲𑀸𑀳𑀲𑀸 𑀯𑀺𑀦𑁆𑀤𑀢𑁂 𑀥𑀦𑀁;

𑀓𑀸𑀬𑀲𑁆𑀲 𑀪𑁂𑀤𑀸 𑀤𑀼𑀧𑁆𑀧𑀜𑁆𑀜𑁄, 𑀦𑀺𑀭𑀬𑀁 𑀲𑁄𑀧𑀧𑀚𑁆𑀚𑀢𑀺.

𑀖𑀭𑁂 ¶ 𑀤𑀼𑀝𑁆𑀞𑁄 𑀫𑀽𑀲𑀺𑀓𑁄 𑀘, 𑀯𑀦𑁂 𑀤𑀼𑀝𑁆𑀞𑁄 𑀘 𑀯𑀸𑀦𑀭𑁄;

𑀲𑀓𑀼𑀡𑁂 𑀘 𑀤𑀼𑀝𑁆𑀞𑁄 𑀓𑀸𑀓𑁄, 𑀦𑀭𑁂𑀤𑀼𑀝𑁆𑀞𑁄 𑀘 𑀩𑁆𑀭𑀸𑀳𑁆𑀫𑀡𑁄.

𑀤𑀻𑀖𑀸 𑀚𑀸𑀕𑀭𑀢𑁄 𑀭𑀢𑁆𑀢𑀺, 𑀤𑀻𑀖𑀁 𑀲𑀦𑁆𑀢𑀲𑁆𑀲 𑀬𑁄𑀚𑀦𑀁;

𑀤𑀻𑀖𑁄 𑀩𑀸𑀮𑀸𑀦𑀲𑀁𑀲𑀸𑀭𑁄, 𑀲𑀤𑁆𑀥𑀫𑁆𑀫𑀁 𑀅𑀯𑀺𑀚𑀸𑀦𑀢𑀁.

𑀢𑀺𑀮𑀫𑀢𑁆𑀢𑀁 ¶ 𑀧𑀭𑁂𑀲𑀜𑁆𑀘, 𑀅𑀧𑁆𑀧𑀤𑁄𑀲𑀜𑁆𑀘 𑀧𑀲𑁆𑀲𑀢𑀺;

𑀦𑀸𑀴𑀺𑀓𑁂𑀭𑀫𑁆𑀧𑀺 𑀲𑀤𑁄𑀲𑀁, 𑀔𑀮𑀚𑀸𑀢𑁄 𑀦 𑀧𑀲𑁆𑀲𑀢𑀺.

𑀦𑀢𑁆𑀢𑀤𑁄𑀲𑀁 𑀧𑀭𑁂 𑀚𑀜𑁆𑀜𑀸, 𑀚𑀜𑁆𑀜𑀸 𑀤𑁄𑀲𑀁 𑀧𑀭𑀲𑁆𑀲𑀢𑀼;

𑀕𑀼𑀬𑁆𑀳𑁄 𑀓𑀼𑀫𑁆𑀫𑀸𑀯 𑀅𑀗𑁆𑀕𑀸𑀦𑀺, 𑀧𑀭𑀤𑁄𑀲𑀜𑁆𑀘 𑀮𑀓𑁆𑀔𑀬𑁂.

𑀮𑀼𑀤𑁆𑀥𑀁 ¶ 𑀅𑀢𑁆𑀣𑁂𑀦 𑀕𑀡𑁆𑀳𑁂𑀬𑁆𑀬, 𑀣𑀤𑁆𑀥𑀁 𑀅𑀜𑁆𑀚𑀮𑀺𑀓𑀫𑁆𑀫𑀼𑀦𑀸;

𑀙𑀦𑁆𑀤𑀸𑀦𑀼𑀯𑀢𑁆𑀢𑀺𑀬𑀸 𑀫𑀽𑀴𑁆𑀳𑀁, 𑀬𑀣𑀸𑀪𑀽𑀢𑁂𑀦 𑀧𑀡𑁆𑀟𑀺𑀢𑀁.

𑀬𑀣𑀸 𑀉𑀤𑀼𑀫𑁆𑀩𑀭𑀧𑀓𑁆𑀓𑀸, 𑀩𑀳𑀺 𑀭𑀢𑁆𑀢𑀓𑀸 𑀏𑀯 𑀘;

𑀅𑀦𑁆𑀢𑁄𑀓𑀺𑀫𑀺𑀮 𑀲𑀫𑁆𑀧𑀼𑀡𑁆𑀡𑀸, 𑀏𑀯𑀁 𑀤𑀼𑀚𑁆𑀚𑀦𑀳𑀤𑀬𑀸.

𑀬𑀸𑀯𑀚𑀻𑀯𑀫𑁆𑀧𑀺 ¶ 𑀘𑁂 𑀩𑀸𑀮𑁄, 𑀧𑀡𑁆𑀟𑀺𑀢𑀁 𑀧𑀬𑀺𑀭𑀼𑀧𑀸𑀲𑀢𑀺;

𑀦 𑀲𑁄 𑀥𑀫𑁆𑀫𑀁 𑀯𑀺𑀚𑀸𑀦𑀸𑀢𑀺, 𑀤𑀩𑁆𑀩𑀻 𑀲𑀽𑀧𑀭𑀲𑀁 𑀬𑀣𑀸.

𑀘𑀭𑀜𑁆𑀘𑁂 𑀦𑀸𑀥𑀺𑀕𑀘𑁆𑀙𑁂𑀬𑁆𑀬, 𑀲𑁂𑀬𑁆𑀬𑀁 𑀲𑀤𑀺𑀲𑀫𑀢𑁆𑀢𑀦𑁄;

𑀏𑀓𑀘𑀭𑀺𑀬𑀁 𑀤𑀴𑁆𑀳𑀁 𑀓𑀬𑀺𑀭𑀸, 𑀦𑀢𑁆𑀣𑀺 𑀩𑀸𑀮𑁂 𑀲𑀳𑀸𑀬𑀢𑀸.

𑀅𑀚𑀸𑀢𑀫𑀢𑀫𑀽𑀴𑁆𑀳𑀸𑀦𑀁 ¶ , 𑀯𑀭𑀫𑀸𑀤𑀬𑁄 𑀦 𑀘𑀦𑁆𑀢𑀺𑀫𑁄;

𑀲𑀓𑀺𑀁 𑀤𑀼𑀓𑁆𑀔𑀓𑀭𑀸𑀯𑀸𑀤-𑀬𑁄𑀦𑁆𑀢𑀺𑀫𑁄 𑀢𑀼 𑀧𑀤𑁂 𑀧𑀤𑁂.

𑀤𑀼𑀚𑁆𑀚𑀦𑁂𑀦 ¶ 𑀲𑀫𑀁 𑀯𑁂𑀭𑀁, 𑀲𑀔𑁆𑀬𑀜𑁆𑀘𑀸𑀧𑀺 𑀦 𑀓𑀸𑀭𑀬𑁂;

𑀉𑀡𑁆𑀳𑁄 𑀤𑀳𑀢𑀺 𑀘𑀗𑁆𑀕𑀸𑀭𑁄, 𑀲𑀻𑀢𑁄 𑀓𑀡𑁆𑀳𑀸𑀬𑀢𑁂 𑀓𑀭𑀁.

𑀤𑀼𑀚𑁆𑀚𑀦𑁄 𑀧𑀺𑀬𑀯𑀸𑀤𑀻 𑀘, 𑀦𑁂𑀢𑀁 𑀯𑀺𑀲𑁆𑀲𑀸𑀲𑀓𑀸𑀭𑀡𑀁;

𑀫𑀥𑀼 𑀢𑀺𑀝𑁆𑀞𑀢𑀺 𑀚𑀺𑀯𑁆𑀳𑀕𑁆𑀕𑁂, 𑀳𑀤𑀬𑁂 𑀳𑀮𑀸𑀳𑀮𑀁 𑀯𑀺𑀲𑀁.

𑀤𑀼𑀚𑁆𑀚𑀦𑁄 ¶ 𑀧𑀭𑀺𑀳𑀸𑀢𑀩𑁆𑀩𑁄, 𑀯𑀺𑀚𑁆𑀚𑀸𑀬𑀸𑀮𑀗𑁆𑀓𑀢𑁄𑀧𑀺 𑀘;

𑀫𑀡𑀺𑀦𑀸 𑀪𑀽𑀲𑀺𑀢𑁄 𑀲𑀧𑁆𑀧𑁄, 𑀓𑀺𑀫𑁂𑀲𑁄 𑀦 𑀪𑀬𑀗𑁆𑀓𑀭𑁄.

𑀦𑀸𑀴𑀺𑀓𑁂𑀭𑀲𑀫𑀸𑀓𑀸𑀭𑀸, 𑀤𑀺𑀲𑁆𑀲𑀦𑁆𑀢𑁂𑀧𑀺 𑀳𑀺 𑀲𑀚𑁆𑀚𑀦𑀸;

𑀅𑀜𑁆𑀜𑁂 𑀩𑀤𑀭𑀺𑀓𑀸𑀓𑀸𑀭𑀸, 𑀩𑀳𑀺𑀭𑁂𑀯 𑀫𑀦𑁄𑀳𑀭𑀸.

𑀬𑀣𑀸𑀧𑀺 ¶ 𑀧𑀦 𑀲𑀧𑀓𑁆𑀓𑀸, 𑀩𑀳𑀺 𑀓𑀡𑁆𑀝𑀓𑀫𑁂𑀯 𑀘;

𑀅𑀦𑁆𑀢𑁄 𑀅𑀫𑀢𑀲𑀫𑁆𑀧𑀼𑀡𑁆𑀡𑀸, 𑀏𑀯𑀁 𑀲𑀼𑀚𑀦𑀳𑀤𑀬𑀸.

𑀬𑀣𑀸 𑀉𑀤𑀼𑀫𑁆𑀩𑀭𑀧𑀓𑁆𑀓𑀸, 𑀩𑀳𑀺 𑀭𑀢𑁆𑀢𑀓𑀫𑁂𑀯 𑀘;

𑀏𑀯𑀁 𑀓𑀺𑀫𑀺𑀮𑀲𑀫𑁆𑀧𑀼𑀡𑀸, 𑀏𑀯𑀁 𑀤𑀼𑀚𑁆𑀚𑀦𑀳𑀤𑀬𑀸.

𑀤𑁄𑀲𑀪𑀻𑀢𑁄 𑀅𑀦𑀸𑀭𑀫𑁆𑀪𑁄, 𑀢𑀁 𑀓𑀸 𑀧𑀼𑀭𑀺𑀲𑀮𑀓𑁆𑀔𑀡𑀁;

𑀓𑁄𑀳𑁆𑀬𑀚𑀺𑀡𑁆𑀡𑀪𑀬𑀸 𑀦𑀦𑀼, 𑀪𑁄𑀚𑀦𑀁 𑀧𑀭𑀺𑀳𑀻𑀬𑀢𑁂.

𑀧𑀬𑁄𑀧𑀸𑀦𑀁 𑀪𑀼𑀚𑀗𑁆𑀕𑀸𑀦𑀁, 𑀓𑁂𑀯𑀮𑀁 𑀯𑀺𑀲𑀯𑀟𑁆𑀠𑀦𑀁;

𑀉𑀧𑀤𑁂𑀲𑁄 𑀳𑀺 𑀫𑀽𑀴𑁆𑀳𑀸𑀦𑀁, 𑀧𑀓𑁄𑀧𑀸𑀬 𑀦 𑀲𑀦𑁆𑀢𑀺𑀬𑀸.

𑀦 ¶ 𑀞𑀸𑀢𑀩𑁆𑀩𑀁 𑀦 𑀕𑀦𑁆𑀢𑀩𑁆𑀩𑀁, 𑀤𑀼𑀚𑁆𑀚𑀦𑁂𑀦 𑀲𑀫𑀁 𑀓𑁆𑀯𑀘𑀺;

𑀤𑀼𑀚𑁆𑀚𑀦𑁄 𑀳𑀺 𑀤𑀼𑀓𑁆𑀔𑀁 𑀤𑁂𑀢𑀺, 𑀦 𑀲𑁄 𑀲𑀼𑀔𑀁 𑀓𑀤𑀸𑀘𑀺𑀧𑀺.

𑀅𑀩𑀤𑁆𑀥𑀸 𑀢𑀢𑁆𑀣 𑀩𑀚𑁆𑀛𑀦𑁆𑀢𑀺, 𑀬𑀢𑁆𑀣 𑀩𑀸𑀮𑀸 𑀧𑀪𑀸𑀲𑀭𑁂;

𑀩𑀤𑁆𑀥𑀸𑀧𑀺 𑀢𑀢𑁆𑀣 𑀫𑀼𑀘𑁆𑀘𑀦𑁆𑀢𑀺, 𑀬𑀢𑁆𑀣 𑀥𑀻𑀭𑀸 𑀧𑀪𑀸𑀲𑀭𑁂.

𑀧𑀭𑀺𑀢𑁆𑀢𑀁 ¶ 𑀤𑀸𑀭𑀼𑀫𑀸𑀭𑀼𑀬𑁆𑀳, 𑀬𑀣𑀸 𑀲𑀻𑀤𑁂 𑀫𑀳𑀡𑁆𑀡𑀯𑁂;

𑀏𑀯𑀁 𑀓𑀼𑀲𑀺𑀢𑀫𑀸𑀕𑀫𑁆𑀫, 𑀲𑀸𑀥𑀼 𑀚𑀻𑀯𑀺𑀧𑀺 𑀲𑀻𑀤𑀢𑀺;

𑀢𑀲𑁆𑀫𑀸 𑀢𑀁 𑀧𑀭𑀺𑀯𑀚𑁆𑀚𑁂𑀬𑁆𑀬, 𑀓𑀼𑀲𑀻𑀢𑀁 𑀳𑀻𑀦𑀯𑀻𑀭𑀺𑀬𑀁.

𑀲𑀤𑁆𑀥𑀸𑀲𑀻𑀮𑀸𑀤𑀺𑀲𑀫𑁆𑀧𑀦𑁆𑀦𑁄 ¶ , 𑀲𑀼𑀫𑀺𑀢𑁆𑀢𑁄 𑀲𑀸𑀥𑀼𑀫𑀸𑀦𑀼𑀲𑁄;

𑀢𑀸𑀤𑀺𑀲𑀁 𑀫𑀺𑀢𑁆𑀢𑀁 𑀲𑁂𑀯𑁂𑀬𑁆𑀬, 𑀯𑀼𑀤𑁆𑀥𑀺𑀓𑀸𑀫𑁄 𑀯𑀺𑀘𑀓𑁆𑀔𑀡𑁄.

𑀤𑀸𑀦𑀸𑀤𑀺𑀕𑀼𑀡𑀲𑁂𑀝𑁆𑀞𑁂𑀳𑀺, 𑀫𑀺𑀤𑀺𑀢𑀩𑁆𑀩𑁄 𑀫𑀺𑀢𑁆𑀢𑁄 𑀳𑀺 𑀔𑁄;

𑀢𑀸𑀤𑀺𑀲𑀁 𑀅𑀯𑀗𑁆𑀓𑁂𑀦𑁂𑀯, 𑀫𑀦𑀲𑀸 𑀪𑀚𑁂𑀬𑁆𑀬 𑀲𑀼𑀥𑀻.

𑀳𑀺𑀢𑀓𑁆𑀓𑀭𑁄 ¶ 𑀧𑀭𑁄 𑀩𑀦𑁆𑀥𑀼, 𑀩𑀦𑁆𑀥𑀼𑀧𑀺 𑀅𑀳𑀺𑀢𑁄 𑀧𑀭𑁄;

𑀅𑀳𑀺𑀢𑁄 𑀤𑁂𑀳𑀚𑁄 𑀩𑁆𑀬𑀸𑀥𑀺, 𑀳𑀺𑀢𑀁 𑀅𑀭𑀜𑁆𑀜𑀫𑁄𑀲𑀥𑀁.

𑀧𑀭𑁄𑀓𑁆𑀔𑁂 ¶ 𑀓𑀺𑀘𑁆𑀘𑀳𑀦𑁆𑀢𑀸𑀭𑀁, 𑀧𑀘𑁆𑀘𑀓𑁆𑀔𑁂 𑀧𑀺𑀬𑀯𑀸𑀤𑀺𑀦𑀁;

𑀯𑀚𑁆𑀚𑀬𑁂 𑀢𑀸𑀤𑀺𑀲𑀁 𑀫𑀺𑀢𑁆𑀢𑀁, 𑀯𑀺𑀲𑀓𑀼𑀫𑁆𑀪𑀁 𑀧𑀬𑁄𑀫𑀼𑀔𑀁.

𑀥𑀦𑀳𑀻𑀦𑁂 𑀘𑀚𑁂 𑀫𑀺𑀢𑁆𑀢𑁄, 𑀧𑀼𑀢𑁆𑀢𑀤𑀸𑀭𑀸 𑀲𑀳𑁄𑀤𑀭𑀸;

𑀥𑀦𑀯𑀦𑁆𑀢𑁂𑀯 𑀲𑁂𑀯𑀦𑁆𑀢𑀺, 𑀥𑀦𑀁 𑀮𑁄𑀓𑁂 𑀫𑀳𑀸𑀲𑀔𑀸.

𑀚𑀸𑀦𑀺𑀬𑀸 ¶ 𑀧𑁂𑀲𑀦𑁂 𑀪𑀘𑁆𑀘𑁂, 𑀩𑀦𑁆𑀥𑀯𑁂 𑀩𑁆𑀬𑀲𑀦𑀸𑀕𑀫𑁂;

𑀫𑀺𑀢𑁆𑀢𑀜𑁆𑀘 𑀆𑀧𑀤𑀺𑀓𑀸𑀮𑁂, 𑀪𑀭𑀺𑀬𑀜𑁆𑀘 𑀯𑀺𑀪𑀯𑀓𑁆𑀔𑀬𑁂.

𑀉𑀲𑁆𑀲𑀯𑁂 𑀩𑁆𑀬𑀲𑀦𑁂 𑀘𑁂𑀯, 𑀤𑀼𑀩𑁆𑀪𑀺𑀓𑁆𑀔𑁂 𑀲𑀢𑁆𑀢𑀼𑀯𑀺𑀕𑁆𑀕𑀳𑁂;

𑀭𑀸𑀚𑀤𑁆𑀯𑀸𑀭𑁂 𑀲𑀼𑀲𑀸𑀦𑁂 𑀘, 𑀬𑁄 𑀢𑀺𑀝𑁆𑀞𑀢𑀺 𑀲𑁄 𑀩𑀦𑁆𑀥𑀯𑀸.

𑀦 ¶ 𑁨 𑀯𑀺𑀲𑁆𑀲𑀲𑁂 𑀅𑀫𑀺𑀢𑁆𑀢𑀲𑁆𑀲, 𑀫𑀺𑀢𑁆𑀢𑀜𑁆𑀘𑀸𑀧𑀺 𑀦 𑀯𑀺𑀲𑁆𑀲𑀲𑁂;

𑀓𑀤𑀸𑀘𑀺 𑀓𑀼𑀧𑀺𑀢𑁂 𑀫𑀺𑀢𑁆𑀢𑁂, 𑀲𑀩𑁆𑀩𑀤𑁄𑀲𑀁 𑀧𑀓𑀸𑀲𑀢𑀺.

𑀫𑀸𑀢𑀸 𑀫𑀺𑀢𑁆𑀢𑀁 𑀧𑀺𑀢𑀸 𑀘𑁂𑀢𑀺, 𑀲𑀪𑀸𑀯𑀸 𑀢𑀁 𑀢𑀬𑀁 𑀳𑀺𑀢𑀁;

𑀓𑀫𑁆𑀫𑀓𑀭𑀡𑀢𑁄 𑀘𑀜𑁆𑀜𑁂, 𑀪𑀯𑀦𑁆𑀢𑀺 𑀳𑀺𑀢𑀩𑀼𑀤𑁆𑀥𑀺𑀬𑁄.

𑀆𑀧𑀤𑀸𑀲𑀼 ¶ 𑀫𑀺𑀢𑁆𑀢𑀁 𑀚𑀜𑁆𑀜𑀸, 𑀬𑀼𑀤𑁆𑀥𑁂 𑀲𑀽𑀭𑀁 𑀇𑀡𑁂 𑀲𑀼𑀘𑀺𑀁;

𑀪𑀭𑀺𑀬𑀁 𑀔𑀻𑀡𑁂𑀲𑀼 𑀯𑀺𑀢𑁆𑀢𑁂𑀲𑀼, 𑀩𑁆𑀬𑀲𑀦𑁂𑀲𑀼 𑀘 𑀩𑀦𑁆𑀥𑀯𑀁.

𑀲𑀓𑀺𑀁 𑀤𑀼𑀝𑁆𑀞𑀜𑁆𑀘 𑀬𑁄 𑀫𑀺𑀢𑁆𑀢𑀁, 𑀧𑀼𑀦 𑀲𑀦𑁆𑀥𑀸𑀢𑀼𑀫𑀺𑀘𑁆𑀙𑀢𑀺;

𑀲 𑀫𑀘𑁆𑀘𑀼𑀫𑀼𑀧𑀕𑀡𑁆𑀳𑀸𑀢𑀺, 𑀕𑀩𑁆𑀪𑀁 𑀅𑀲𑁆𑀲𑀢𑀭𑀻 𑀬𑀣𑀸.

𑀇𑀡𑀲𑁂𑀲𑁄 ¶ 𑀅𑀕𑁆𑀕𑀺𑀲𑁂𑀲𑁄, 𑀭𑁄𑀕𑀲𑁂𑀲𑁄 𑀢𑀣𑁂𑀯 𑀘;

𑀧𑀼𑀦𑀧𑁆𑀧𑀼𑀦𑀁 𑀯𑀺𑀯𑀟𑁆𑀠𑀦𑁆𑀢𑀺, 𑀢𑀲𑁆𑀫𑀸 𑀲𑁂𑀲𑀁 𑀦 𑀓𑀸𑀭𑀬𑁂.

𑀧𑀤𑀼𑀫𑀁𑀯 𑀫𑀼𑀔𑀁 𑀬𑀲𑁆𑀲, 𑀯𑀸𑀘𑀸 𑀘𑀦𑁆𑀤𑀦𑀲𑀻𑀢𑀮𑀸;

𑀢𑀸𑀤𑀺𑀲𑀁 𑀦𑁄 𑀧𑀲𑁂𑀯𑁂𑀬𑁆𑀬, 𑀳𑀤𑀬𑁂 𑀢𑀼 𑀳𑀮𑀸𑀳𑀮𑀁.

𑀦 ¶ 𑀲𑁂𑀯𑁂 𑀨𑀭𑀼𑀲𑀁 𑀲𑀸𑀫𑀺𑀁, 𑀦 𑀘 𑀲𑁂𑀯𑁂𑀬𑁆𑀬 𑀫𑀘𑁆𑀙𑀭𑀺𑀁;

𑀢𑀢𑁄 𑀅𑀧𑀕𑁆𑀕𑀡𑁆𑀳 𑀲𑀸𑀫𑀺𑀁, 𑀦𑁂𑀯 𑀦𑀺𑀕𑁆𑀕𑀳𑀺𑀢𑀁 𑀢𑀢𑁄.

𑀓𑀼𑀤𑁂𑀲𑀜𑁆𑀘 ¶ 𑀓𑀼𑀫𑀺𑀢𑁆𑀢𑀜𑁆𑀘, 𑀓𑀼𑀓𑀼𑀮𑀜𑁆𑀘 𑀓𑀼𑀩𑀦𑁆𑀥𑀯𑀁;

𑀓𑀼𑀤𑀸𑀭𑀜𑁆𑀘 𑀓𑀼𑀤𑀸𑀲𑀜𑁆𑀘, 𑀤𑀽𑀭𑀢𑁄 𑀧𑀭𑀺𑀯𑀚𑁆𑀚𑀬𑁂.

𑀲𑀻𑀢𑀯𑀸𑀘𑁄 𑀩𑀳𑀼𑀫𑀺𑀢𑁆𑀢𑁄, 𑀨𑀭𑀼𑀲𑁄 𑀅𑀧𑁆𑀧𑀫𑀺𑀢𑁆𑀢𑀓𑁄;

𑀉𑀧𑀫𑀸 𑀏𑀢𑁆𑀣 𑀜𑀸𑀢𑀩𑁆𑀩𑀸, 𑀲𑀽𑀭𑀺𑀬𑀘𑀦𑁆𑀤𑀭𑀸𑀚𑀽𑀦𑀁.

𑀅𑀳𑀺𑀢𑀸 𑀧𑀝𑀺𑀲𑁂𑀥𑁄 𑀘, 𑀳𑀺𑀢𑁂𑀲𑀼 𑀘 𑀧𑀬𑁄𑀚𑀦𑀁;

𑀩𑁆𑀬𑀲𑀦𑁂 𑀅𑀧𑀭𑀺𑀘𑁆𑀘𑀸𑀕𑁄, 𑀇𑀢𑀺𑀤𑀁 𑀫𑀺𑀢𑁆𑀢𑀮𑀓𑁆𑀔𑀡𑀁.

𑀧𑀺𑀬𑁄 ¶ 𑀕𑀭𑀼 𑀪𑀸𑀯𑀦𑀻𑀬𑁄, 𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄;

𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸, 𑀦𑁄 𑀘𑀝𑁆𑀞𑀸𑀦𑁂 𑀦𑀺𑀬𑁄𑀚𑀓𑁄;

𑀢𑀸𑀤𑀺𑀲𑀁 𑀫𑀺𑀢𑁆𑀢𑀁 𑀲𑁂𑀯𑁂𑀬𑁆𑀬, 𑀪𑀽𑀢𑀺𑀓𑀸𑀫𑁄 𑀯𑀺𑀘𑀓𑁆𑀔𑀡𑁄.

𑀧𑀺𑀬𑁄 ¶ 𑀕𑀭𑀼 𑀪𑀸𑀯 𑀦𑀻𑀬𑁄, 𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄;

𑀕𑀫𑁆𑀪𑀺𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸, 𑀦𑁄 𑀘𑀝𑁆𑀞𑀸𑀦𑁂 𑀦𑀺𑀬𑁄𑀚𑀓𑁄.

𑀬𑀫𑁆𑀳𑀺 𑀏𑀢𑀸𑀦𑀺 𑀞𑀸𑀦𑀸𑀦𑀺, 𑀲𑀁𑀯𑀺𑀚𑁆𑀚𑀦𑁆𑀢𑀺𑀥 𑀧𑀼𑀕𑁆𑀕𑀮𑁂;

𑀲𑁄 𑀫𑀺𑀢𑁆𑀢𑁄 𑀫𑀺𑀢𑁆𑀢𑀓𑀸𑀫𑁂𑀦, 𑀅𑀢𑁆𑀣𑀓𑀸𑀫𑀸𑀦𑀼𑀓𑀫𑁆𑀧𑀢𑁄;

𑀅𑀧𑀺 𑀦𑀸𑀲𑀺𑀬𑀫𑀸𑀦𑁂𑀦, 𑀪𑀚𑀺𑀢𑀩𑁆𑀩𑁄 𑀢𑀣𑀸𑀯𑀺𑀥𑁄.

𑀑𑀭𑀲𑀁 𑀓𑀢𑀲𑀫𑁆𑀩𑀦𑁆𑀥𑀁, 𑀢𑀣𑀸 𑀯𑀁𑀲𑀓𑁆𑀓𑀫𑀸𑀕𑀢𑀁;

𑀭𑀓𑁆𑀔𑀓𑁄 𑀩𑁆𑀬𑀲𑀦𑁂𑀳𑀺, 𑀫𑀺𑀢𑁆𑀢𑀁 𑀜𑁂𑀬𑁆𑀬𑀁 𑀘𑀢𑀼𑀩𑁆𑀩𑀺𑀥𑀁.

𑀧𑀺𑀬𑁄 𑀕𑀭𑀼 𑀪𑀸𑀯𑀦𑀺𑀬𑁄, 𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄;

𑀕𑀫𑁆𑀪𑀺𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸, 𑀦 𑀘𑀝𑁆𑀞𑀸𑀦𑁂 𑀦𑀺𑀬𑁄𑀚𑀓𑁄;

𑀢𑀁 𑀫𑀺𑀢𑁆𑀢𑀁 𑀫𑀺𑀢𑁆𑀢𑀓𑀸𑀫𑁂𑀦, 𑀬𑀸𑀯𑀚𑀻𑀯𑀫𑁆𑀧𑀺 𑀲𑁂𑀯𑀺𑀬𑀁.

𑀧𑀺𑀬𑁄 𑀕𑀭𑀼 𑀪𑀸𑀯𑀦𑀻𑀬𑁄, 𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄;

𑀕𑀫𑁆𑀪𑀺𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸, 𑀦𑁄 𑀘𑀝𑁆𑀞𑀸𑀦𑁂 𑀦𑀺𑀬𑁄𑀚𑀓𑁄;

𑀢𑀸𑀤𑀺𑀲𑀁 𑀫𑀺𑀢𑁆𑀢𑀁 𑀲𑁂𑀯𑁂𑀬𑁆𑀬, 𑀪𑀽𑀢𑀺𑀓𑀸𑀫𑁄 𑀯𑀺𑀘𑀓𑁆𑀔𑀡𑁄.

𑀫𑀳𑀸𑀚𑀦𑀁 ¶ 𑀬𑁄 𑀭𑀜𑁆𑀚𑁂𑀢𑀺, 𑀘𑀢𑀽𑀳𑀺𑀧𑀺 𑀯𑀢𑁆𑀣𑀽𑀳𑀺 𑀯𑀸;

𑀭𑀸𑀚𑀸𑀢𑀺 𑀯𑀼𑀘𑁆𑀘𑀢𑁂 𑀮𑁄𑀓𑁂, 𑀇𑀢𑀺 𑀲𑀮𑁆𑀮𑀓𑁆𑀔𑀬𑁂 𑀯𑀺𑀤𑁆𑀯𑀸.

𑀤𑀸𑀦𑀜𑁆𑀘 𑀅𑀢𑁆𑀣𑀘𑀭𑀺𑀬𑀸, 𑀧𑀺𑀬𑀯𑀸𑀘𑀸 𑀅𑀢𑁆𑀢𑀲𑀫𑀁;

𑀲𑀗𑁆𑀕𑀳𑀸 𑀘𑀢𑀼𑀭𑁄 𑀇𑀫𑁂, 𑀫𑀼𑀦𑀺𑀦𑁆𑀤𑁂𑀦 𑀧𑀓𑀸𑀲𑀺𑀢𑀸.

𑀤𑀸𑀦𑀫𑁆𑀧𑀺 ¶ 𑀅𑀢𑁆𑀣𑀘𑀭𑀺𑀬𑀢𑀜𑁆𑀘, 𑀧𑀺𑀬𑀯𑀸𑀤𑀺𑀢𑀜𑁆𑀘 𑀲𑀫𑀸𑀦𑀢𑁆𑀢𑀢𑀜𑁆𑀘;

𑀓𑀭𑀺𑀬𑀘𑀭𑀺𑀬𑀲𑀼𑀲𑀗𑁆𑀕𑀳𑀁 𑀩𑀳𑀽𑀦𑀁, 𑀅𑀦𑀯𑀫𑀢𑁂𑀦 𑀕𑀼𑀡𑁂𑀦 𑀬𑀸𑀢𑀺 𑀲𑀕𑁆𑀕𑀁;

𑀤𑀸𑀦𑀜𑁆𑀘 𑀧𑁂𑀬𑁆𑀬𑀯𑀚𑁆𑀚𑀜𑁆𑀘, 𑀅𑀢𑁆𑀣𑀘𑀭𑀺𑀬𑀸 𑀘 𑀬𑀸 𑀇𑀥;

𑀲𑀫𑀸𑀦𑀢𑁆𑀢𑀢𑀸 𑀘 𑀥𑀫𑁆𑀫𑁂𑀲𑀼, 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀭𑀳𑀁;

𑀏𑀢𑁂 𑀔𑁄 𑀲𑀗𑁆𑀕𑀳𑀸 𑀮𑁄𑀓𑁂, 𑀭𑀣𑀲𑁆𑀲𑀸𑀡𑀻𑀯 𑀬𑀸𑀬𑀢𑁄.

𑀤𑀸𑀦𑀁 𑀲𑀻𑀮𑀁 𑀧𑀭𑀺𑀘𑁆𑀘𑀸𑀕𑀁, 𑀅𑀚𑁆𑀚𑀯𑀁 𑀫𑀤𑁆𑀤𑀯𑀁 𑀢𑀧𑀁;

𑀅𑀓𑁆𑀓𑁄𑀥𑀁 𑀅𑀯𑀺𑀳𑀺𑀁𑀲𑀜𑁆𑀘, 𑀔𑀦𑁆𑀢𑀻 𑀘 𑀅𑀯𑀺𑀭𑁄𑀥𑀦𑀁;

𑀤𑀲𑁂𑀢𑁂 𑀥𑀫𑁆𑀫𑁂 𑀭𑀸𑀚𑀸𑀦𑁄, 𑀅𑀧𑁆𑀧𑀫𑀢𑁆𑀢𑁂𑀦 𑀥𑀸𑀭𑀬𑁆𑀬𑀼𑀁.

𑀏𑀓𑀬𑀸𑀫𑀁 ¶ 𑀲𑀬𑁂 𑀭𑀸𑀚𑀸, 𑀤𑁆𑀯𑀺𑀬𑀸 𑀫𑀜𑁆𑀜𑁂𑀯 𑀧𑀡𑁆𑀟𑀺𑀢𑁄;

𑀖𑀭𑀸𑀯𑀸𑀲𑁄 𑀢𑀺𑀬𑀸𑀫𑁄𑀯, 𑀘𑀢𑀼𑀬𑀸𑀫𑁄 𑀢𑀼 𑀬𑀸𑀘𑀓𑁄.

𑀅𑀧𑀼𑀢𑁆𑀢𑀓𑀁 𑀖𑀭𑀁 𑀲𑀼𑀜𑁆𑀜𑀁, 𑀭𑀝𑁆𑀞𑀁 𑀲𑀼𑀜𑁆𑀜𑀁 𑀅𑀭𑀸𑀚𑀓𑀁;

𑀅𑀲𑀺𑀧𑁆𑀧𑀲𑁆𑀲 𑀫𑀼𑀔𑀁 𑀲𑀼𑀜𑁆𑀜𑀁, 𑀲𑀩𑁆𑀩𑀲𑀼𑀜𑁆𑀜𑀁 𑀤𑀮𑀺𑀤𑁆𑀤𑀢𑁆𑀢𑀁.

𑀥𑀦𑀫𑀺𑀘𑁆𑀙𑁂 ¶ 𑀯𑀸𑀡𑀺𑀚𑁂𑀬𑁆𑀬, 𑀯𑀺𑀚𑁆𑀚𑀫𑀺𑀘𑁆𑀙𑁂 𑀪𑀚𑁂 𑀲𑀼𑀢𑀁;

𑀧𑀼𑀢𑁆𑀢𑀫𑀺𑀘𑁆𑀙𑁂 𑀢𑀭𑀼𑀡𑀺𑀢𑁆𑀣𑀺𑀁, 𑀭𑀸𑀚𑀸𑀫𑀘𑁆𑀘𑀁 𑀇𑀘𑁆𑀙𑀸𑀕𑀢𑁂.

𑀧𑀓𑁆𑀔𑀻𑀦𑀁 𑀩𑀮𑀫𑀸𑀓𑀸𑀲𑁄, 𑀫𑀘𑁆𑀙𑀸𑀦𑀫𑀼𑀤𑀓𑀁 𑀩𑀮𑀁;

𑀤𑀼𑀩𑁆𑀩𑀮𑀲𑁆𑀲 𑀩𑀮𑀁 𑀭𑀸𑀚𑀸, 𑀓𑀼𑀫𑀸𑀭𑀸𑀦𑀁 𑀭𑀼𑀤𑀁 𑀩𑀮𑀁.

𑀔𑀫𑀸 ¶ 𑀚𑀸𑀕𑀭𑀺𑀬𑀼𑀝𑁆𑀞𑀸𑀦𑀁, 𑀲𑀁𑀯𑀺𑀪𑀸𑀕𑁄 𑀤𑀬𑀺𑀓𑁆𑀔𑀡𑀸;

𑀦𑀸𑀬𑀓𑀲𑁆𑀲 𑀕𑀼𑀡𑀸 𑀏𑀢𑁂, 𑀇𑀘𑁆𑀙𑀺𑀢𑀩𑁆𑀩𑀸 𑀲𑀢𑀁 𑀲𑀤𑀸.

𑀲𑀓𑀺𑀁 𑀯𑀤𑀦𑁆𑀢𑀺 𑀭𑀸𑀚𑀸𑀦𑁄, 𑀲𑀓𑀺𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸;

𑀲𑀓𑀺𑀁 𑀲𑀧𑁆𑀧𑀼𑀭𑀺𑀲𑀸 𑀮𑁄𑀓𑁂, 𑀏𑀲 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄.

𑀅𑀮𑀲𑁄 𑀕𑀻𑀳𑀺 𑀓𑀸𑀫𑀪𑁄𑀕𑀻 𑀦 𑀲𑀸𑀥𑀼,

𑀅𑀲𑀜𑁆𑀜𑀢𑁄 𑀧𑀩𑁆𑀩𑀚𑀺𑀢𑁄 𑀦 𑀲𑀸𑀥𑀼;

𑀭𑀸𑀚𑀸 𑀦 𑀲𑀸𑀥𑀼 𑀅𑀦𑀺𑀲𑀫𑁆𑀫𑀓𑀸𑀭𑀻,

𑀬𑁄 𑀧𑀡𑁆𑀟𑀺𑀢𑁄 𑀓𑁄𑀥𑀦𑁄 𑀢𑀁 𑀦 𑀲𑀸𑀥𑀼.

𑀆𑀬𑀁 𑀔𑀬𑀁 𑀲𑀬𑀁 𑀚𑀜𑁆𑀜𑀸, 𑀓𑀢𑀸𑀓𑀢𑀁 𑀲𑀬𑀁 𑀚𑀜𑁆𑀜𑀸;

𑀦𑀺𑀕𑁆𑀕𑀳𑁂 𑀦𑀺𑀕𑁆𑀕𑀳𑀸𑀭𑀳𑀁, 𑀧𑀕𑁆𑀕𑀳𑁂 𑀧𑀕𑁆𑀕𑀳𑀸𑀭𑀳𑀁.

𑀫𑀸𑀢𑀸 ¶ 𑀧𑀼𑀢𑁆𑀢𑀓𑀢𑀁 𑀧𑀸𑀧𑀁, 𑀲𑀺𑀲𑁆𑀲𑀓𑀢𑀁 𑀕𑀼𑀭𑀼 𑀢𑀣𑀸;

𑀭𑀸𑀚𑀸 𑀭𑀝𑁆𑀞𑀓𑀢𑀁 𑀧𑀸𑀧𑀁, 𑀭𑀸𑀚𑀓𑀢𑀁 𑀧𑀼𑀭𑁄𑀳𑀺𑀢𑁄.

𑀅𑀓𑁆𑀓𑁄𑀥𑁂𑀦 𑀚𑀺𑀦𑁂 𑀓𑁄𑀥𑀁, 𑀅𑀲𑀸𑀥𑀼𑀁 𑀲𑀸𑀥𑀼𑀦𑀸 𑀚𑀺𑀦𑁂;

𑀚𑀺𑀦𑁂 𑀓𑀤𑀭𑀺𑀬𑀁 𑀤𑀸𑀦𑁂𑀦, 𑀲𑀘𑁆𑀘𑁂𑀦𑀸𑀮𑀺𑀓𑀯𑀸𑀤𑀺𑀦𑀁.

𑀅𑀤𑀦𑁆𑀢𑀤𑀫𑀦𑀁 ¶ 𑀤𑀸𑀦𑀁, 𑀤𑀸𑀦𑀁 𑀲𑀩𑁆𑀩𑀢𑁆𑀣𑀲𑀸𑀥𑀓𑀁;

𑀤𑀸𑀦𑁂𑀦 𑀧𑀺𑀬𑀯𑀸𑀘𑀸𑀬, 𑀉𑀦𑁆𑀦𑀫𑀦𑁆𑀢𑀺 𑀦𑀫𑀦𑁆𑀢𑀺 𑀘.

𑀅𑀤𑀦𑁆𑀢𑀤𑀫𑀦𑀁 ¶ 𑀤𑀸𑀦𑀁, 𑀅𑀤𑀸𑀦𑀁 𑀤𑀦𑁆𑀢𑀤𑀽𑀲𑀓𑀁;

𑀤𑀸𑀦𑁂𑀦 𑀧𑀺𑀬𑀯𑀸𑀘𑀸𑀬, 𑀉𑀦𑁆𑀦𑀫𑀦𑁆𑀢𑀺 𑀦𑀫𑀦𑁆𑀢𑀺 𑀘.

𑀤𑀸𑀦𑀁 𑀲𑀺𑀦𑁂𑀳𑀪𑁂𑀲𑀚𑁆𑀚𑀁, 𑀫𑀘𑁆𑀙𑁂𑀭𑀁 𑀤𑁄𑀲𑀦𑁄𑀲𑀥𑀁;

𑀤𑀸𑀦𑀁 𑀬𑀲𑀲𑁆𑀲𑀻𑀪𑁂𑀲𑀚𑁆𑀚𑀁, 𑀫𑀘𑁆𑀙𑁂𑀭𑀁 𑀓𑀧𑀡𑁄𑀲𑀥𑀁.

𑀦 𑀭𑀜𑁆𑀜𑀸 𑀲𑀫𑀓𑀁 𑀪𑀼𑀜𑁆𑀚𑁂, 𑀓𑀸𑀫𑀪𑁄𑀕𑀁 𑀓𑀼𑀤𑀸𑀘𑀦𑀁;

𑀆𑀓𑀧𑁆𑀧𑀁 𑀭𑀲𑀪𑀼𑀢𑁆𑀢𑀁 𑀯𑀸, 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁;

𑀯𑀢𑁆𑀣𑀲𑀩𑁆𑀩𑀫𑀮𑀗𑁆𑀓𑀸𑀭𑀁, 𑀦 𑀭𑀜𑁆𑀜𑀸 𑀲𑀤𑀺𑀲𑀁 𑀓𑀭𑁂.

𑀦 ¶ 𑀫𑁂 𑀭𑀸𑀚𑀸 𑀲𑀔𑀸 𑀳𑁄𑀢𑀺, 𑀦 𑀭𑀸𑀚𑀸 𑀳𑁄𑀢𑀺 𑀲𑀫𑀓𑁄;

𑀏𑀲𑁄 𑀲𑀸𑀫𑀺𑀓𑁄 𑀫𑀬𑁆𑀳𑀦𑁆𑀢𑀺, 𑀘𑀺𑀢𑁆𑀢𑁂 𑀦𑀺𑀝𑁆𑀞𑀁 𑀲𑀡𑁆𑀞𑀸𑀧𑀬𑁂.

𑀦𑀸𑀢𑀺𑀤𑀽𑀭𑁂 𑀪𑀚𑁂 𑀭𑀜𑁆𑀜𑁄, 𑀦𑀘𑁆𑀘𑀸𑀲𑀦𑁆𑀦𑁂 𑀧𑀯𑀸𑀢𑀓𑁂;

𑀉𑀚𑀼𑀓𑁂 𑀦𑀸𑀢𑀺𑀦𑀺𑀦𑁆𑀦𑁂 𑀘, 𑀦 𑀪𑀚𑁂 𑀉𑀘𑁆𑀘𑀫𑀸𑀲𑀦𑁂;

𑀙 𑀤𑁄𑀲𑁂 𑀯𑀚𑁆𑀚𑁂 𑀲𑁂𑀯𑀓𑁄, 𑀅𑀕𑁆𑀕𑀻𑀯 𑀲𑀁𑀬𑀢𑁄 𑀢𑀺𑀝𑁆𑀞𑁂.

𑀦 ¶ 𑀧𑀘𑁆𑀙𑀢𑁄 𑀦 𑀧𑀼𑀭𑀢𑁄, 𑀦𑀸𑀧𑀺 𑀆𑀲𑀦𑁆𑀦𑀤𑀽𑀭𑀢𑁄;

𑀦 𑀓𑀘𑁆𑀙𑁂 𑀦𑁄𑀧𑀺 𑀧𑀝𑀺𑀯𑀸𑀢𑁂, 𑀦 𑀘𑀸𑀧𑀺 𑀑𑀡𑀢𑀼𑀡𑁆𑀡𑀢𑁂;

𑀇𑀫𑁂 𑀤𑁄𑀲𑁂 𑀯𑀺𑀯𑀚𑁆𑀚𑁂𑀢𑁆𑀯𑀸, 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀅𑀳𑀼 𑁋

𑀚𑀧𑁆𑀧𑁂𑀦 𑀫𑀦𑁆𑀢𑁂𑀦 𑀲𑀼𑀪𑀸𑀲𑀺𑀢𑁂𑀦,

𑀅𑀦𑀼𑀧𑁆𑀧𑀤𑀸𑀦𑁂𑀦 𑀧𑀯𑁂𑀡𑀺𑀬𑀸 𑀯𑀸;

𑀬𑀣𑀸 𑀬𑀣𑀸 𑀬𑀢𑁆𑀣 𑀮𑀪𑁂𑀣 𑀅𑀢𑁆𑀣𑀁,

𑀢𑀣𑀸 𑀢𑀣𑀸 𑀢𑀢𑁆𑀣 𑀧𑀭𑀓𑁆𑀓𑀫𑁂𑀬𑁆𑀬.

𑀓𑀲𑁆𑀲𑀓𑁄 ¶ 𑀯𑀸𑀡𑀺𑀚𑁄 𑀫𑀘𑁆𑀘𑁄, 𑀲𑀫𑀡𑁄 𑀲𑀼𑀢𑀲𑀻𑀮 𑀯𑀸;

𑀢𑁂𑀲𑀼 𑀯𑀺𑀧𑀼𑀮𑀚𑀸𑀢𑁂𑀲𑀼, 𑀭𑀝𑁆𑀞𑀫𑁆𑀧𑀺 𑀯𑀺𑀧𑀼𑀮𑀁 𑀲𑀺𑀬𑀸.

𑀢𑁂𑀲𑀼 ¶ 𑀤𑀼𑀩𑁆𑀩𑀮𑀚𑀸𑀢𑁂𑀲𑀼, 𑀭𑀝𑁆𑀞𑀫𑁆𑀧𑀺 𑀤𑀼𑀩𑁆𑀩𑀮𑀁 𑀲𑀺𑀬𑀸;

𑀢𑀲𑁆𑀫𑀸 𑀲𑀭𑀝𑁆𑀞𑀁 𑀯𑀺𑀧𑀼𑀮𑀁, 𑀥𑀸𑀭𑀬𑁂 𑀭𑀝𑁆𑀞𑀪𑀸𑀭𑀯𑀸.

𑀫𑀳𑀸𑀭𑀼𑀓𑁆𑀔𑀲𑁆𑀲 ¶ 𑀨𑀮𑀺𑀦𑁄, 𑀆𑀫𑀁 𑀙𑀺𑀦𑁆𑀤𑀢𑀺 𑀬𑁄 𑀨𑀮𑀁;

𑀭𑀲𑀜𑁆𑀘𑀲𑁆𑀲 𑀦 𑀚𑀸𑀦𑀸𑀢𑀺, 𑀩𑀻𑀚𑀜𑁆𑀘𑀲𑁆𑀲 𑀯𑀺𑀦𑀲𑁆𑀲𑀢𑀺.

𑀫𑀳𑀸𑀭𑀼𑀓𑁆𑀔𑀽𑀧𑀫𑀁 𑀭𑀝𑁆𑀞𑀁, 𑀅𑀥𑀫𑁆𑀫𑁂𑀦 𑀧𑀲𑀸𑀲𑀢𑀺;

𑀭𑀲𑀜𑁆𑀘𑀲𑁆𑀲 𑀦 𑀚𑀸𑀦𑀸𑀢𑀺, 𑀭𑀝𑁆𑀞𑀜𑁆𑀘𑀲𑁆𑀲 𑀯𑀺𑀦𑀲𑁆𑀲𑀢𑀺.

𑀫𑀳𑀸𑀭𑀼𑀓𑁆𑀔𑀲𑁆𑀲 𑀨𑀮𑀺𑀦𑁄, 𑀧𑀓𑁆𑀓𑀁 𑀙𑀺𑀦𑁆𑀤𑀢𑀺 𑀬𑁄 𑀨𑀮𑀁;

𑀭𑀲𑀜𑁆𑀘𑀲𑁆𑀲 𑀯𑀺𑀚𑀸𑀦𑀸𑀢𑀺, 𑀩𑀻𑀚𑀜𑁆𑀚𑀲𑁆𑀲 𑀦 𑀦𑀲𑁆𑀲𑀢𑀺.

𑀫𑀳𑀸𑀭𑀼𑀓𑁆𑀔𑀽𑀧𑀫𑀁 ¶ 𑀭𑀝𑁆𑀞𑀁, 𑀥𑀫𑁆𑀫𑁂𑀦 𑀬𑁄 𑀧𑀲𑀸𑀲𑀢𑀺;

𑀭𑀲𑀜𑁆𑀘𑀲𑁆𑀲 𑀯𑀺𑀚𑀸𑀦𑀸𑀢𑀺, 𑀭𑀝𑁆𑀞𑀜𑁆𑀘𑀲𑁆𑀲 𑀦 𑀦𑀲𑁆𑀲𑀢𑀺.

𑀅𑀦𑀸𑀬𑀓𑀸 ¶ 𑀯𑀺𑀦𑀲𑁆𑀲𑀦𑁆𑀢𑀺, 𑀦𑀲𑁆𑀲𑀦𑁆𑀢𑀺 𑀩𑀳𑀼𑀦𑀸𑀬𑀓𑀸;

𑀣𑀻𑀦𑀸𑀬𑀓𑀸 𑀯𑀺𑀦𑀲𑁆𑀲𑀦𑁆𑀢𑀺, 𑀦𑀲𑁆𑀲𑀦𑁆𑀢𑀺 𑀲𑀼𑀲𑀼𑀦𑀸𑀬𑀓𑀸.

𑀕𑀯𑀁 ¶ 𑀘𑁂 𑀢𑀭𑀫𑀸𑀦𑀸𑀦𑀁, 𑀉𑀚𑀼𑀁 𑀕𑀘𑁆𑀙𑀢𑀺 𑀧𑀼𑀗𑁆𑀕𑀯𑁄;

𑀲𑀩𑁆𑀩𑀸 𑀕𑀸𑀯𑀻 𑀉𑀚𑀼𑀁 𑀬𑀦𑁆𑀢𑀺, 𑀦𑁂𑀢𑁆𑀢𑁂 𑀉𑀚𑀼𑀁 𑀕𑀢𑁂 𑀲𑀢𑀺.

𑀏𑀯𑀫𑁂𑀯 𑀫𑀦𑀼𑀲𑁆𑀲𑁂𑀲𑀼, 𑀬𑁄 𑀳𑁄𑀢𑀺 𑀲𑁂𑀝𑁆𑀞𑀲𑀫𑁆𑀫𑀢𑁄;

𑀲𑁄 𑀲𑀘𑁂 𑀥𑀫𑁆𑀫𑀁 𑀘𑀭𑀢𑀺, 𑀧𑀕𑁂𑀯 𑀇𑀢𑀭𑀸 𑀧𑀚𑀸.

𑀕𑀯𑀁 𑀘𑁂 𑀢𑀭𑀫𑀸𑀦𑀸𑀦𑀁, 𑀉𑀚𑀼𑀁 𑀕𑀘𑁆𑀙𑀢𑀺 𑀧𑀼𑀗𑁆𑀕𑀯𑁄;

𑀲𑀩𑁆𑀩𑀸 𑀕𑀸𑀯𑀻 𑀉𑀚𑀼𑀁𑀬𑀦𑁆𑀢𑀺, 𑀦𑁂𑀢𑁆𑀢𑁂 𑀉𑀚𑀼𑀁 𑀕𑀢𑁂 𑀲𑀢𑀺.

𑀏𑀯𑀫𑁂𑀯 ¶ 𑀫𑀦𑀼𑀲𑁆𑀲𑁂𑀲𑀼, 𑀬𑁄 𑀳𑁄𑀢𑀺 𑀲𑁂𑀝𑁆𑀞𑀲𑀫𑁆𑀫𑀢𑁄;

𑀲𑁄 𑀲𑀘𑁂 𑀥𑀫𑁆𑀫𑀁 𑀘𑀭𑀢𑀺, 𑀧𑀕𑁂𑀯 𑀇𑀢𑀭𑀸 𑀧𑀚𑀸;

𑀲𑀩𑁆𑀩𑀁 𑀭𑀝𑁆𑀞𑀁 𑀲𑀼𑀔𑀁 𑀲𑁂𑀢𑀺, 𑀭𑀸𑀚𑀸 𑀘𑁂 𑀳𑁄𑀢𑀺 𑀥𑀫𑁆𑀫𑀺𑀓𑁄.

𑀦𑁄𑀤𑀬𑀸𑀳 𑀯𑀺𑀦𑀸𑀲𑀸𑀬, 𑀩𑀳𑀼𑀦𑀸𑀬𑀓𑀢𑀸 𑀪𑀼𑀲𑀁;

𑀫𑀺𑀮𑀸𑀬𑀦𑁆𑀢𑀺 𑀯𑀺𑀦𑀲𑁆𑀲𑀦𑁆𑀢𑀺, 𑀧𑀤𑁆𑀫𑀸𑀦𑁆𑀬𑀓𑁆𑀓𑁂𑀳𑀺 𑀲𑀢𑁆𑀢𑀳𑀺.

𑀲𑀼𑀢𑀸𑀭𑀓𑁆𑀔𑁄 𑀅𑀪𑀺𑀬𑁄𑀕𑁄, 𑀓𑀼𑀮𑀸𑀭𑀓𑁆𑀔𑁄 𑀯𑀢𑁆𑀢𑀁 𑀪𑀯𑁂;

𑀯𑀺𑀚𑁆𑀚𑀸 𑀳𑀺 𑀓𑀼𑀮𑀧𑀼𑀢𑁆𑀢𑀲𑁆𑀲, 𑀦𑀸𑀬𑀓𑀲𑁆𑀲𑀸𑀧𑀫𑀸𑀤𑀓𑁄.

𑀅𑀪𑀺𑀚𑀸𑀢𑀁 ¶ 𑀅𑀦𑀼𑀚𑀸𑀢𑀁, 𑀧𑀼𑀢𑁆𑀢𑀫𑀺𑀘𑁆𑀙𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀅𑀯𑀚𑀸𑀢𑀁 𑀦 𑀇𑀘𑁆𑀙𑀦𑁆𑀢𑀺, 𑀬𑁄 𑀳𑁄𑀢𑀺 𑀓𑀼𑀮𑀕𑀦𑁆𑀥𑀦𑁄.

𑀧𑀜𑁆𑀘𑀝𑁆𑀞𑀸𑀦𑀸𑀦𑀺 ¶ 𑀲𑀫𑁆𑀧𑀲𑁆𑀲𑀁, 𑀧𑀼𑀢𑁆𑀢𑀫𑀺𑀘𑁆𑀙𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀪𑀢𑁄 𑀯𑀸 𑀦𑁄 𑀪𑀭𑀺𑀲𑁆𑀲𑀢𑀺, 𑀓𑀺𑀘𑁆𑀘𑀁 𑀯𑀸 𑀦𑁄 𑀓𑀭𑀺𑀲𑁆𑀲𑀢𑀺.

𑀓𑀼𑀮𑀯𑀁𑀲𑁄 𑀘𑀺𑀭𑀁 𑀢𑀺𑀝𑁆𑀞𑁂, 𑀤𑀸𑀬𑀚𑁆𑀚𑀁 𑀧𑀝𑀺𑀧𑀚𑁆𑀚𑀢𑀺;

𑀅𑀣 𑀯𑀸 𑀧𑀦 𑀧𑁂𑀢𑀸𑀦𑀁, 𑀤𑀓𑁆𑀔𑀺𑀦𑀁 𑀅𑀦𑀼𑀧𑀤𑀲𑁆𑀲𑀢𑀺.

𑀩𑀳𑀼𑀧𑀼𑀢𑁆𑀢𑁂 ¶ 𑀧𑀺𑀢𑀸 𑀏𑀓𑁄, 𑀅𑀯𑀲𑁆𑀲𑀁 𑀧𑁄𑀲𑁂𑀢𑀺 𑀲𑀤𑀸;

𑀩𑀳𑀼𑀧𑀼𑀢𑁆𑀢𑀸 𑀦 𑀲𑀓𑁆𑀓𑁄𑀦𑁆𑀢𑀺, 𑀧𑁄𑀲𑁂𑀢𑀼𑀁 𑀧𑀺𑀢𑀭𑁂𑀓𑀓𑀁.

𑀧𑀼𑀢𑁆𑀢𑀁 𑀯𑀸 𑀪𑀸𑀢𑀭𑀁 𑀤𑀼𑀝𑁆𑀞𑀼, 𑀅𑀦𑀼𑀲𑀸𑀲𑁂𑀬𑁆𑀬 𑀦𑁄 𑀚𑀳𑁂;

𑀓𑀺𑀦𑁆𑀦𑀼 𑀙𑁂𑀚𑁆𑀚𑀁 𑀓𑀭𑀁 𑀧𑀸𑀤𑀁, 𑀮𑀺𑀢𑁆𑀢𑀁 𑀅𑀲𑀼𑀘𑀺𑀦𑀸 𑀲𑀺𑀬𑀸.

𑀆𑀬𑀼𑀩𑁂𑀤𑀓𑀢𑀸𑀪𑁆𑀬𑀸𑀲𑁄 ¶ , 𑀲𑀩𑁆𑀩𑁂𑀲𑀁 𑀧𑀺𑀬𑀤𑀲𑁆𑀲𑀦𑁄;

𑀅𑀭𑀺𑀬𑀲𑀻𑀮𑀕𑀼𑀡𑁄𑀧𑁂𑀢𑁄, 𑀏𑀲 𑀯𑁂𑀚𑁆𑀚𑁄 𑀯𑀺𑀥𑀻𑀬𑀢𑁂.

𑀦𑀸𑀦𑀸𑀕𑀦𑁆𑀣𑀚𑀸𑀦𑀦𑀜𑁆𑀘, 𑀲𑀼𑀤𑀺𑀝𑁆𑀞𑀓𑀫𑁆𑀫𑀲𑀫𑁆𑀧𑀤𑀸;

𑀤𑀓𑁆𑀔𑀢𑀸 𑀳𑀢𑁆𑀣𑀲𑀻𑀖𑀢𑀸, 𑀧𑀲𑀸𑀤𑀲𑀽𑀭𑀲𑀢𑁆𑀢𑀺𑀢𑀸.

𑀲𑀸𑀪𑀸𑀯𑀺𑀓𑀢𑀗𑁆𑀔𑀡𑀺𑀓-𑀜𑀸𑀡𑀲𑀼𑀪𑀸𑀲𑀺𑀢𑀸𑀧𑀺 𑀘;

𑀉𑀲𑁆𑀲𑀸𑀳𑁄 𑀤𑀩𑁆𑀩𑁄 𑀲𑀩𑁆𑀩𑀢𑀸, 𑀯𑁂𑀚𑁆𑀚𑀸𑀘𑁂𑀭𑀲𑁆𑀲 𑀮𑀓𑁆𑀔𑀡𑀁;

𑀓𑀺𑀮𑀺𑀝𑁆𑀞𑀯𑀢𑁆𑀣𑀁 ¶ 𑀓𑁄𑀥𑁄 𑀘, 𑀅𑀢𑀺𑀫𑀸𑀦𑀜𑁆𑀘 𑀕𑀫𑁆𑀫𑀢𑀸;

𑀅𑀦𑀺𑀫𑀦𑁆𑀢𑀺𑀢𑀕𑀫𑀦𑀁, 𑀏𑀢𑁂 𑀧𑀜𑁆𑀘 𑀯𑀺𑀯𑀚𑁆𑀚𑀺𑀬𑀸.

𑀤𑀺𑀝𑁆𑀞𑀓𑀫𑁆𑀫𑀢𑀸 ¶ 𑀲𑁄𑀘𑀜𑁆𑀘, 𑀤𑀓𑁆𑀔𑀢𑀸 𑀯𑀺𑀤𑀺𑀢𑀸𑀕𑀫𑁄;

𑀘𑀢𑁆𑀢𑀸𑀭𑁄 𑀲𑀼𑀪𑀺𑀲𑀓𑁆𑀓𑀲𑁆𑀲, 𑀲𑀼𑀕𑀼𑀡𑀸 𑀯𑀺𑀜𑁆𑀜𑀼𑀦𑀸 𑀫𑀢𑀸.

𑀭𑀼𑀚𑀸𑀬 𑀚𑀬𑀮𑀓𑁆𑀔𑀡𑀁, 𑀭𑀲𑁄 𑀘 𑀪𑁂𑀲𑀚𑁆𑀚𑀫𑁆𑀧𑀺 𑀘;

𑀢𑀺𑀮𑀓𑁆𑀔𑀡𑀪𑁂𑀤𑁄 𑀘𑁂𑀯, 𑀯𑀺𑀜𑁆𑀜𑁂𑀬𑁆𑀬𑁄 𑀪𑀺𑀲𑀓𑁆𑀓𑁂𑀦 𑀯𑁂.

𑀅𑀦𑁆𑀢𑁄𑀚𑀸𑀢𑁄 ¶ 𑀥𑀦𑀓𑁆𑀓𑀻𑀢𑁄, 𑀤𑀸𑀲𑀩𑁆𑀬𑁄𑀧𑀕𑀢𑁄 𑀲𑀬𑀁;

𑀤𑀸𑀲𑀸𑀓𑀭𑀫𑀭𑀸𑀦𑀻𑀢𑁄-𑀘𑁆𑀘𑁂𑀯𑀁 𑀢𑁂 𑀘𑀢𑀼𑀥𑀸 𑀲𑀺𑀬𑀼𑀁.

𑀧𑀼𑀩𑁆𑀩𑀼𑀝𑁆𑀞𑀸 𑀧𑀘𑁆𑀙𑀸𑀦𑀺𑀧𑀸𑀢𑀻, 𑀤𑀺𑀦𑁆𑀦𑀲𑁆𑀲 𑀆𑀤𑀸𑀬𑀻𑀧𑀺 𑀘;

𑀲𑀼𑀓𑀢𑀓𑀫𑁆𑀫𑀓𑀭𑁄 𑀘, 𑀓𑀺𑀢𑁆𑀢𑀺𑀯𑀡𑁆𑀡𑀳𑀭𑁄𑀧𑀺 𑀘.

𑀤𑀸𑀲𑀸 𑁦.𑁦𑁧𑁭𑁭 𑀧𑀜𑁆𑀘𑁂𑀯 𑀘𑁄𑀭𑀬𑁆𑀬-𑀲𑀔𑀸𑀜𑀸𑀢𑁆𑀬𑀢𑁆𑀢𑀲𑀸𑀤𑀺𑀲𑀸;

𑀢𑀣𑀸 𑀯𑀺𑀜𑁆𑀜𑀽𑀳𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀫𑀺𑀢𑁆𑀢𑀤𑀸𑀭𑀸 𑀘 𑀩𑀦𑁆𑀥𑀯𑀸.

𑀆𑀲𑀸 ¶ 𑀮𑁄𑀓𑀺𑀢𑁆𑀣𑀺𑀬𑁄 𑀦𑀸𑀫, 𑀯𑁂𑀮𑀸 𑀢𑀸𑀲𑀁 𑀦 𑀯𑀺𑀚𑁆𑀚𑀢𑀺;

𑀲𑀸𑀭𑀢𑁆𑀢𑀸 𑀘 𑀧𑀕𑀩𑁆𑀪𑀸 𑀘, 𑀲𑀺𑀔𑀻 𑀲𑀩𑁆𑀩𑀖𑀲𑁄 𑀬𑀣𑀸;

𑀢𑀲𑁆𑀫𑀸 𑀢𑀸𑀬𑁄 𑀳𑀺𑀢𑁆𑀯𑀸𑀦, 𑀩𑁆𑀭𑀽𑀳𑁂𑀬𑁆𑀬 𑀯𑀺𑀯𑁂𑀓𑀁 𑀲𑀼𑀥𑀻.

𑀆𑀲𑀸 ¶ 𑀮𑁄𑀓𑀺𑀢𑁆𑀣𑀺𑀬𑁄 𑀦𑀸𑀫, 𑀯𑁂𑀮𑀸 𑀢𑀸𑀲𑀁 𑀦 𑀯𑀺𑀚𑁆𑀚𑀢𑀺;

𑀲𑀸𑀭𑀢𑁆𑀣𑀸 𑀘 𑀧𑀕𑀩𑁆𑀪𑀸 𑀘, 𑀲𑀺𑀔𑀻 𑀲𑀩𑁆𑀩𑀖𑀲𑁄 𑀬𑀣𑀸;

𑀢𑀸 𑀳𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑀬𑀁.

𑀮𑁄𑀓𑁂 𑀳𑀺 𑀅𑀗𑁆𑀕𑀦𑀸 𑀦𑀸𑀫, 𑀓𑁄𑀥𑀦𑀸 𑀫𑀺𑀢𑁆𑀢𑀪𑁂𑀤𑀺𑀓𑀸;

𑀧𑀺𑀲𑀼𑀓𑀸 𑀅𑀓𑀢𑀜𑁆𑀜𑀽 𑀘 𑀤𑀽𑀭𑀢𑁄 𑀧𑀭𑀺𑀯𑀚𑁆𑀚𑀬𑁂.

𑀬𑀣𑀸 𑀦𑀤𑀻 𑀘 𑀧𑀦𑁆𑀣𑁄 𑀘, 𑀧𑀸𑀦𑀸𑀕𑀸𑀭𑀁 𑀲𑀪𑀸 𑀧𑀧𑀸;

𑀏𑀯𑀁 𑀮𑁄𑀓𑀺𑀢𑁆𑀣𑀺𑀬𑁄 𑀦𑀸𑀫, 𑀦𑀸𑀲𑀁 𑀓𑀼𑀚𑁆𑀛𑀦𑁆𑀢𑀺 𑀧𑀡𑁆𑀟𑀺𑀢𑀸.

𑀲𑀩𑁆𑀩𑀸 ¶ 𑀦𑀤𑀻 𑀯𑀗𑁆𑀓𑀕𑀢𑀻, 𑀲𑀩𑁆𑀩𑁂 𑀓𑀝𑁆𑀞𑀫𑀬𑀸 𑀯𑀦𑀸;

𑀲𑀩𑁆𑀩𑀺𑀢𑁆𑀣𑀺𑀬𑁄 𑀓𑀭𑁂 𑀧𑀸𑀧𑀁, 𑀮𑀪𑀫𑀸𑀦𑁂 𑀦𑀺𑀯𑀸𑀢𑀓𑁂.

𑀖𑀝𑀓𑀼𑀫𑁆𑀪𑀲𑀫𑀸 ¶ 𑀦𑀸𑀭𑀻, 𑀢𑀢𑁆𑀣𑀗𑁆𑀕𑀸𑀭𑀲𑀫𑁄 𑀧𑀼𑀫𑀸;

𑀢𑀲𑁆𑀫𑀸 𑀖𑀢𑀜𑁆𑀘 𑀅𑀕𑁆𑀕𑀺𑀜𑁆𑀘, 𑀦𑁂𑀓𑀢𑁆𑀭 𑀞𑀧𑀬𑁂 𑀩𑀼𑀥𑁄.

𑀇𑀢𑁆𑀣𑀻𑀦𑀜𑁆𑀘 𑀥𑀦𑀁 𑀭𑀽𑀧𑀁, 𑀧𑀼𑀭𑀺𑀲𑀸𑀦𑀁 𑀯𑀺𑀚𑁆𑀚𑀸 𑀥𑀦𑀁;

𑀪𑀺𑀓𑁆𑀔𑀽𑀦𑀜𑁆𑀘 𑀥𑀦𑀁 𑀲𑀻𑀮𑀁, 𑀭𑀸𑀚𑀸𑀦𑀜𑁆𑀘 𑀥𑀦𑀁 𑀩𑀮𑀁.

𑀧𑀜𑁆𑀘𑀸𑀭𑀢𑁆𑀬𑀸 ¶ 𑀲𑀼𑀕𑀦𑁆𑀥𑀩𑁆𑀩𑀸, 𑀲𑀢𑁆𑀢𑀸𑀭𑀢𑁆𑀬𑀸 𑀥𑀦𑀼𑀕𑁆𑀕𑀳𑀸;

𑀏𑀓𑀫𑀸𑀲𑀸 𑀲𑀼𑀪𑀭𑀺𑀬𑀸, 𑀅𑀟𑁆𑀠𑀫𑀸𑀲𑀸 𑀲𑀺𑀲𑁆𑀲𑀸 𑀫𑀮𑀸.

𑀚𑀺𑀡𑁆𑀡𑁂 𑀅𑀦𑁆𑀦𑀁 𑀧𑀲𑀁𑀲𑁂𑀬𑁆𑀬, 𑀤𑀸𑀭𑀜𑁆𑀘 𑀕𑀢𑀬𑁄𑀩𑁆𑀩𑀦𑁂;

𑀭𑀡𑀧𑀼𑀦𑀸𑀕𑀢𑁂 𑀲𑀽𑀭𑀁, 𑀲𑀲𑁆𑀲𑀜𑁆𑀘 𑀕𑁂𑀳𑀫𑀸𑀕𑀢𑁂.

𑀤𑁆𑀯𑀺𑀢𑀺𑀧𑀢𑀺 ¶ 𑀦𑀸𑀭𑀻 𑀘𑁂𑀯, 𑀯𑀺𑀳𑀸𑀭𑀤𑁆𑀯𑀺𑀢𑀺 𑀪𑀺𑀓𑁆𑀔𑀼 𑀘;

𑀲𑀓𑀼𑀡𑁄 𑀤𑁆𑀯𑀺𑀢𑀺𑀧𑀸𑀢𑁄 𑀘, 𑀓𑀢𑀫𑀸𑀬𑀸𑀩𑀳𑀼𑀢𑀭𑀸.

𑀭𑀢𑁆𑀢𑀺 𑀯𑀺𑀦𑀸 𑀦 𑀘𑀦𑁆𑀤𑀺𑀫𑀸, 𑀯𑀻𑀘𑀺𑀯𑀺𑀦𑀸 𑀘 𑀲𑀸𑀕𑀭𑁄;

𑀳𑀁𑀲𑀯𑀺𑀦𑀸 𑀧𑁄𑀓𑁆𑀔𑀭𑀡𑀻, 𑀧𑀢𑀺𑀯𑀺𑀦𑀸 𑀓𑀜𑁆𑀜𑀸 𑀲𑁄𑀪𑁂.

𑀅𑀲𑀦𑁆𑀢𑀼𑀝𑁆𑀞𑀸 ¶ 𑀬𑀢𑀻 𑀦𑀝𑁆𑀞𑀸, 𑀲𑀦𑁆𑀢𑀼𑀝𑁆𑀞𑀸𑀧𑀺 𑀘 𑀧𑀢𑁆𑀣𑀺 𑀯𑀸;

𑀲𑀮𑀚𑁆𑀚𑀸 𑀕𑀡𑀺𑀓𑀸 𑀦𑀝𑁆𑀞𑀸, 𑀦𑀺𑀮𑁆𑀮𑀚𑁆𑀚𑀸 𑀘 𑀓𑀼𑀮𑀺𑀢𑁆𑀣𑀺𑀬𑁄.

𑀘𑁄𑀭𑀻𑀦𑀁 𑀩𑀳𑀼𑀩𑀼𑀤𑁆𑀥𑀻𑀦𑀁, 𑀬𑀸𑀲𑀼 𑀲𑀘𑁆𑀘𑀁 𑀲𑀼𑀤𑀼𑀮𑁆𑀮𑀪𑀁;

𑀣𑀻𑀦𑀁 𑀪𑀸𑀯𑁄 𑀤𑀼𑀭𑀸𑀚𑀸𑀦𑁄, 𑀫𑀘𑁆𑀙𑀲𑁆𑀲𑁂𑀯𑁄’𑀤𑀓𑁂 𑀕𑀢𑀁.

𑀅𑀦𑀮𑀸 ¶ 𑀫𑀼𑀤𑀼𑀲𑀫𑁆𑀪𑀸𑀲𑀸, 𑀤𑀼𑀧𑁆𑀧𑀽𑀭𑀸 𑀢𑀸 𑀦𑀤𑀻𑀲𑀫𑀸;

𑀲𑀻𑀤𑀦𑁆𑀢𑀺 𑀦𑀁 𑀯𑀺𑀤𑀺𑀢𑁆𑀯𑀸𑀦, 𑀆𑀭𑀓𑀸 𑀧𑀭𑀺𑀯𑀚𑁆𑀚𑀬𑁂.

𑀆𑀯𑀝𑁆𑀝𑀦𑀻 𑀫𑀳𑀸𑀫𑀸𑀬𑀸, 𑀩𑁆𑀭𑀳𑁆𑀫𑀘𑀭𑀺𑀬𑀯𑀺𑀓𑁄𑀧𑀦𑀸;

𑀲𑀻𑀤𑀦𑁆𑀢𑀺 𑀦𑀁 𑀯𑀺𑀤𑀺𑀢𑁆𑀯𑀸𑀦, 𑀆𑀭𑀓𑀸 𑀧𑀭𑀺𑀯𑀚𑁆𑀚𑀬𑁂.

𑀇𑀢𑁆𑀣𑀻𑀧𑀺 ¶ 𑀳𑀺 𑀏𑀓𑀘𑁆𑀘𑀺𑀬𑀸, 𑀲𑁂𑀬𑁆𑀬𑀸 𑀧𑁄𑀲 𑀚𑀦𑀸𑀥𑀺𑀧;

𑀫𑁂𑀥𑀸𑀯𑀺𑀦𑀻 𑀲𑀻𑀮𑀯𑀢𑀻, 𑀲𑀲𑁆𑀲𑀼𑀤𑁂𑀯𑀸 𑀧𑀢𑀺𑀩𑁆𑀩𑀢𑀸;

𑀲𑀮𑁆𑀮𑀧𑁂 ¶ 𑀅𑀲𑀺𑀳𑀢𑁆𑀣𑁂𑀦, 𑀧𑀺𑀲𑀸𑀘𑁂𑀦𑀸𑀧𑀺 𑀲𑀮𑁆𑀮𑀧𑁂;

𑀆𑀲𑀻𑀯𑀺𑀲𑀫𑁆𑀧𑀺 𑀆𑀲𑀻𑀤𑁂, 𑀬𑁂𑀦 𑀤𑀝𑁆𑀞𑁄 𑀦 𑀚𑀻𑀯𑀢𑀺;

𑀦 𑀢𑁆𑀯𑁂𑀯 𑀏𑀓𑁄 𑀏𑀓𑀸𑀬, 𑀫𑀸𑀢𑀼𑀕𑀸𑀫𑁂𑀦 𑀲𑀮𑁆𑀮𑀧𑁂.

𑀦 ¶ 𑀳𑀺 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼, 𑀧𑀼𑀭𑀺𑀲𑁄 𑀳𑁄𑀢𑀺 𑀧𑀡𑁆𑀟𑀺𑀢𑁄;

𑀇𑀢𑁆𑀣𑀻𑀧𑀺 𑀧𑀡𑁆𑀟𑀺𑀢𑀸 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀓𑁆𑀔𑀡𑀸.

𑀦 𑀳𑀺 𑀲𑀩𑁆𑀩𑁂𑀲𑀼 𑀞𑀸𑀦𑁂𑀲𑀼, 𑀧𑀼𑀭𑀺𑀲𑁄 𑀳𑁄𑀢𑀺 𑀧𑀡𑁆𑀟𑀺𑀢𑁄;

𑀇𑀢𑁆𑀣𑀻𑀧𑀺 𑀧𑀡𑁆𑀟𑀺𑀢𑀸 𑀳𑁄𑀢𑀺, 𑀮𑀳𑀼𑀁 𑀅𑀢𑁆𑀣𑀯𑀺𑀘𑀺𑀦𑁆𑀢𑀺𑀓𑀸.

𑀓𑀽𑀧𑁄𑀤𑀓𑀁 ¶ 𑀯𑀝𑀘𑁆𑀙𑀸𑀬𑀸, 𑀲𑀸𑀫𑀸𑀣𑀻 𑀇𑀝𑁆𑀞𑀓𑀸𑀮𑀬𑀁;

𑀲𑀻𑀢𑀓𑀸𑀮𑁂 𑀪𑀯𑁂 𑀉𑀡𑁆𑀳𑀁, 𑀉𑀡𑁆𑀳𑀓𑀸𑀮𑁂 𑀘 𑀲𑀻𑀢𑀮𑀁.

𑀇𑀢𑁆𑀣𑀺𑀬𑁄 𑀏𑀓𑀘𑁆𑀘𑀺𑀬𑀸𑀧𑀺, 𑀲𑁂𑀬𑁆𑀬𑀸 𑀯𑀼𑀢𑁆𑀢𑀸𑀯 𑀫𑀼𑀦𑀺𑀦𑀸;

𑀪𑀡𑁆𑀟𑀸𑀦𑀁 𑀉𑀢𑁆𑀢𑀫𑀸 𑀇𑀢𑁆𑀣𑀻, 𑀅𑀕𑁆𑀕𑀽𑀧𑀝𑁆𑀞𑀸𑀬𑀺𑀓𑀸 𑀇𑀢𑀺.

𑀓𑀼𑀮𑀲𑀻𑀮𑀕𑀼𑀡𑁄𑀧𑁂𑀢𑁄 ¶ , 𑀲𑀩𑁆𑀩𑀥𑀫𑁆𑀫𑀧𑀭𑀸𑀬𑀡𑁄;

𑀧𑀯𑀻𑀡𑁄 𑀧𑁂𑀲𑀦𑀸𑀚𑁆𑀛𑀓𑁆𑀔𑁄, 𑀥𑀫𑁆𑀫𑀚𑁆𑀛𑀓𑁆𑀔𑁄 𑀯𑀺𑀥𑀻𑀬𑀢𑁂.

𑀯𑁂𑀤𑀯𑁂𑀤𑀗𑁆𑀕𑀢𑀢𑁆𑀯𑀜𑁆𑀜𑁄, 𑀚𑀧𑁆𑀧𑀳𑁄𑀫𑀧𑀭𑀸𑀬𑀡𑁄;

𑀆𑀲𑀻𑀯𑀸𑀤𑀯𑀘𑁄𑀬𑀼𑀢𑁆𑀢𑁄, 𑀏𑀲 𑀭𑀸𑀚𑀧𑀼𑀭𑁄𑀳𑀺𑀢𑁄.

𑀓𑀧𑁆𑀧𑁄 ¶ 𑀩𑁆𑀬𑀸𑀓𑀭𑀡𑀁 𑀚𑁄𑀢𑀺 𑁋 𑀲𑀢𑁆𑀣𑀁 𑀲𑀺𑀓𑁆𑀔𑀸 𑀦𑀺𑀭𑀼𑀢𑁆𑀢𑀺 𑀘;

𑀙𑀦𑁆𑀤𑁄𑀯𑀺𑀘𑀺𑀢𑀺 𑀘𑁂𑀢𑀸𑀦𑀺, 𑀯𑁂𑀤𑀗𑁆𑀕𑀸𑀦𑀺 𑀯𑀤𑀦𑁆𑀢𑀺 𑀙.

𑀲𑀓𑀺𑀁 𑀯𑀼𑀢𑁆𑀢𑀕𑀳𑀺𑀢𑀢𑁆𑀢𑁄, 𑀮𑀳𑀼𑀳𑀢𑁆𑀣𑁄 𑀚𑀺𑀢𑀓𑁆𑀔𑀭𑁄;

𑀲𑀩𑁆𑀩𑀲𑀢𑁆𑀣𑀲𑀫𑀸𑀮𑁄𑀓𑀻, 𑀧𑀓𑀝𑁆𑀞𑁄 𑀦𑀸𑀫 𑀮𑁂𑀔𑀓𑁄.

𑀲𑀫𑀢𑁆𑀢𑀦𑀻𑀢𑀺𑀲𑀢𑁆𑀣𑀜𑁆𑀜𑁄 ¶ , 𑀯𑀸𑀳𑀦𑁂 𑀧𑀽𑀭𑀺𑀢𑀲𑁆𑀲𑀫𑁄;

𑀲𑀽𑀭𑀯𑀻𑀭𑀕𑀼𑀡𑁄𑀧𑁂𑀢𑁄, 𑀲𑁂𑀦𑀸𑀛𑀓𑁆𑀔𑁄 𑀯𑀺𑀥𑀻𑀬𑀢𑁂.

𑀲𑀼𑀥𑀻 𑀯𑀸𑀓𑁆𑀬𑀧𑀝𑀼, 𑀧𑀜𑁆𑀜𑁄, 𑀧𑀭𑀘𑀺𑀢𑁆𑀢𑁄𑀧𑀮𑀓𑁆𑀔𑀡𑁄;

𑀥𑀻𑀭𑁄 𑀬𑀣𑀸𑀢𑁆𑀣𑀯𑀸𑀤𑀻 𑀘, 𑀏𑀲 𑀤𑀽𑀢𑁄 𑀯𑀺𑀥𑀻𑀬𑀢𑁂.

𑀧𑀼𑀢𑁆𑀢𑀦𑀢𑁆𑀢𑀕𑀼𑀡𑁄𑀧𑁂𑀢𑁄, 𑀲𑀢𑁆𑀣𑀜𑁆𑀜𑁄 𑀭𑀲𑀧𑀸𑀘𑀓𑁄;

𑀲𑀽𑀭𑁄 𑀘 𑀓𑀣𑀺𑀦𑁄 𑀘𑁂𑀯, 𑀲𑀽𑀧𑀓𑀸𑀭𑁄 𑀲 𑀯𑀼𑀘𑁆𑀘𑀢𑁂.

𑀇𑀗𑁆𑀕𑀺𑀢𑀸𑀓𑀸𑀭𑀢𑀢𑁆𑀢𑀜𑁆𑀜𑁄, 𑀩𑀮𑀯𑀸𑀧𑀺𑀬𑀤𑀲𑁆𑀲𑀦𑁄;

𑀅𑀧𑁆𑀧𑀫𑀸𑀤𑀻 𑀲𑀤𑀸 𑀤𑀓𑁆𑀔𑁄, 𑀧𑀢𑀻𑀳𑀸𑀭𑁄 𑀲 𑀉𑀘𑁆𑀘𑀢𑁂.

𑀇𑀢𑁆𑀣𑀺𑀫𑀺𑀲𑁆𑀲𑁂 𑀓𑀼𑀢𑁄 𑀲𑀻𑀮𑀁, 𑀫𑀁𑀲𑀪𑀓𑁆𑀔𑁂 𑀓𑀼𑀢𑁄 𑀤𑀬𑀸;

𑀲𑀼𑀭𑀸𑀧𑀸𑀦𑁂 𑀓𑀼𑀢𑁄 𑀲𑀘𑁆𑀘𑀁, 𑀫𑀳𑀸𑀮𑁄𑀪𑁂 𑀓𑀼𑀢𑁄 𑀮𑀚𑁆𑀚𑀸;

𑀫𑀳𑀸𑀢𑀦𑁆𑀤𑁂 𑀓𑀼𑀢𑁄 𑀲𑀺𑀧𑁆𑀧𑀁, 𑀫𑀳𑀸𑀓𑁄𑀥𑁂 𑀓𑀼𑀢𑁄 𑀥𑀦𑀁.

𑀲𑀼𑀭𑀸𑀬𑁄𑀕𑁄 𑀯𑁂𑀮𑀸𑀮𑁄 𑀘, 𑀲𑀫𑀚𑁆𑀚𑀘𑀭𑀡𑀗𑁆𑀕𑀢𑁄;

𑀔𑀺𑀟𑁆𑀟𑀸 𑀥𑀼𑀢𑁆𑀢𑁄 𑀧𑀸𑀧𑀫𑀺𑀢𑁆𑀢𑁄, 𑀅𑀮𑀲𑁄 𑀪𑁄𑀕𑀦𑀸𑀲𑀓𑀸.

𑀚𑀻𑀯𑀦𑁆𑀢𑀸𑀧𑀺 ¶ 𑀫𑀢𑀸 𑀧𑀜𑁆𑀘, 𑀩𑁆𑀬𑀸𑀲𑁂𑀦 𑀧𑀭𑀺𑀓𑀺𑀢𑁆𑀢𑀺𑀢𑀸;

𑀤𑀼𑀓𑁆𑀔𑀺𑀢𑁄 𑀩𑁆𑀬𑀸𑀥𑀺𑀢𑀺 𑀫𑀽𑀴𑁆𑀳𑁄, 𑀇𑀡𑀯𑀸 𑀦𑀺𑀘𑁆𑀘𑀲𑁂𑀯𑀓𑁄.

𑀦𑀺𑀤𑁆𑀤𑀸𑀮𑀼𑀓𑁄 ¶ 𑀧𑀫𑀸𑀤𑁄 𑀘, 𑀲𑀼𑀔𑀺𑀢𑁄 𑀭𑁄𑀕𑀯𑀸𑀮𑀲𑁄;

𑀓𑀸𑀫𑀼𑀓𑁄 𑀓𑀫𑁆𑀫𑀸𑀭𑀸𑀫𑁄 𑀘, 𑀲𑀢𑁆𑀢𑁂𑀢𑁂 𑀲𑀢𑁆𑀣𑀯𑀚𑁆𑀚𑀺𑀢𑀸.

𑀕𑁄𑀡𑀸𑀳𑀺 𑀲𑀩𑁆𑀩𑀕𑀺𑀳𑀻𑀦𑀁, 𑀧𑁄𑀲𑀓𑀸 𑀪𑁄𑀕𑀤𑀸𑀬𑀓𑁄;

𑀢𑀲𑁆𑀫𑀸 𑀳𑀺 𑀫𑀸𑀢𑀸𑀧𑀺𑀢𑀽𑀯, 𑀫𑀸𑀦𑀬𑁂 𑀲𑀓𑁆𑀓𑀭𑁂𑀬𑁆𑀬 𑀘.

𑀬𑀣𑀸 ¶ 𑀫𑀸𑀢𑀸 𑀧𑀺𑀢𑀸 𑀪𑀸𑀢𑀸, 𑀅𑀜𑁆𑀜𑁂𑀯𑀸𑀧𑀺 𑀘 𑀜𑀸𑀢𑀓𑀸;

𑀕𑀸𑀯𑁄 𑀦𑁄 𑀧𑀭𑀫𑀸 𑀫𑀺𑀢𑁆𑀢𑀸, 𑀬𑀸𑀲𑀼 𑀚𑀸𑀬𑀦𑁆𑀢𑀺 𑀑𑀲𑀥𑀸.

𑀅𑀦𑁆𑀦𑀤𑀸 ¶ 𑀩𑀮𑀤𑀸 𑀘𑁂𑀢𑀸, 𑀯𑀡𑁆𑀡𑀤𑀸 𑀲𑀼𑀔𑀤𑀸 𑀢𑀣𑀸;

𑀏𑀢𑀫𑀢𑁆𑀣𑀯𑀲𑀁 𑀜𑀢𑁆𑀯𑀸, 𑀦𑀸𑀲𑀼 𑀕𑀸𑀯𑁄 𑀳𑀦𑀺𑀁𑀲𑀼 𑀢𑁂.

𑀬𑁂 𑀘 𑀔𑀸𑀤𑀦𑁆𑀢𑀺 𑀕𑁄𑀫𑀁𑀲𑀁, 𑀫𑀸𑀢𑀼𑀫𑀁𑀲𑀁𑀯 𑀔𑀸𑀤𑀭𑁂;

𑀫𑀢𑁂𑀲𑀼 𑀢𑁂𑀲𑀼 𑀕𑀺𑀚𑁆𑀛𑀸𑀦𑀁, 𑀤𑀤𑁂 𑀲𑁄𑀢𑁂 𑀘 𑀯𑀸𑀳𑀬𑁂.

𑀤𑁆𑀯𑀺𑀕𑀼𑀡𑁄 ¶ 𑀣𑀻𑀦𑀫𑀸𑀳𑀸𑀭𑁄, 𑀩𑀼𑀤𑁆𑀥𑀺𑀘𑀸𑀧𑀺 𑀘𑀢𑀼𑀕𑁆𑀕𑀼𑀡𑁄;

𑀙𑀕𑁆𑀕𑀼𑀡𑁄 𑀳𑁄𑀢𑀺 𑀯𑀸𑀬𑀸𑀫𑁄, 𑀓𑀸𑀫𑁄𑀢𑁆𑀯𑀝𑁆𑀞𑀕𑀼𑀡𑁄 𑀪𑀯𑁂.

𑀦 ¶ 𑀮𑁄𑀓𑁂 𑀲𑁄𑀪𑀢𑁂 𑀫𑀽𑀴𑁆𑀳𑁄, 𑀓𑁂𑀯𑀮𑀢𑁆𑀢𑀧𑀲𑀁𑀲𑀓𑁄;

𑀅𑀧𑀺 𑀲𑀫𑁆𑀧𑀺𑀳𑀺𑀢𑁂 𑀓𑀽𑀧𑁂, 𑀓𑀢𑀯𑀺𑀚𑁆𑀚𑁄 𑀧𑀓𑀸𑀲𑀢𑁂.

𑀓𑁄𑀲𑀚𑁆𑀚𑀁 𑀪𑀬𑀢𑁄 𑀤𑀺𑀲𑁆𑀯𑀸, 𑀯𑀻𑀭𑀺𑀬𑀸𑀭𑀫𑁆𑀪𑀜𑁆𑀘 𑀔𑁂𑀫𑀢𑁄;

𑀆𑀭𑀤𑁆𑀥𑀯𑀻𑀭𑀺𑀬𑀸 𑀳𑁄𑀣, 𑀏𑀲𑀸 𑀩𑀼𑀤𑁆𑀥𑀸𑀦𑀼𑀲𑀸𑀲𑀦𑀻.

𑀯𑀺𑀯𑀸𑀤𑀁 ¶ 𑀪𑀬𑀢𑁄 𑀤𑀺𑀲𑁆𑀯𑀸, 𑀅𑀯𑀺𑀯𑀸𑀤𑀜𑁆𑀘 𑀔𑁂𑀫𑀢𑁄;

𑀲𑀫𑀕𑁆𑀕𑀸 𑀲𑀔𑀺𑀮𑀸 𑀳𑁄𑀣, 𑀏𑀲𑀸 𑀩𑀼𑀤𑁆𑀥𑀸𑀦𑀼𑀲𑀸𑀲𑀦𑀻.

𑀧𑀫𑀸𑀤𑀁 𑀪𑀬𑀢𑁄 𑀤𑀺𑀲𑁆𑀯𑀸, 𑀅𑀧𑁆𑀧𑀫𑀸𑀤𑀜𑁆𑀘 𑀔𑁂𑀫𑀢𑁄;

𑀪𑀸𑀯𑁂𑀣𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁, 𑀏𑀲𑀸 𑀩𑀼𑀤𑁆𑀥𑀸𑀦𑀼𑀲𑀸𑀲𑀦𑀻.

𑀕𑀭𑀳𑀸 ¶ 𑀘 𑀧𑀲𑀁𑀲𑀸 𑀘, 𑀅𑀦𑀺𑀘𑁆𑀘𑀸 𑀢𑀸𑀯𑀓𑀸𑀮𑀺𑀓𑀸;

𑀅𑀧𑁆𑀧𑀓𑀸𑀘𑁂𑀓𑀤𑁂𑀲𑀸𑀯, 𑀦 𑀢𑀸 𑀇𑀓𑁆𑀔𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀥𑀫𑁆𑀫𑀸𑀥𑀫𑁆𑀫𑀁𑀯 𑀇𑀓𑁆𑀔𑁂𑀬𑁆𑀬, 𑀅𑀢𑁆𑀣𑀸𑀦𑀢𑁆𑀣𑀁 𑀳𑀺𑀢𑀸𑀳𑀺𑀢𑀁.

𑀧𑀔𑀼𑀓𑁆𑀓𑀽𑀧𑀼𑀭𑀲𑁂𑀝𑁆𑀞𑀲𑁆𑀲 ¶ , 𑀧𑀘𑁆𑀙𑀺𑀫𑁂 𑀆𑀲𑀺 𑀯𑀺𑀲𑁆𑀲𑀼𑀢𑁄;

𑀘𑀢𑀼𑀕𑀸𑀯𑀼𑀢𑀤𑁂𑀲𑀫𑁆𑀳𑀻, 𑀓𑀦𑀭𑀬𑀕𑀸𑀫𑁄 𑀲𑀼𑀲𑁄𑀪𑀦𑁄.

𑀤𑁆𑀯𑀺𑀦𑁄 ¶ 𑀤𑁆𑀯𑀺𑀯𑁂𑀓 𑀲𑀸𑀓𑀫𑁆𑀳𑀺, 𑀢𑀫𑁆𑀳𑀺 𑀚𑀸𑀢𑁂𑀦 𑀚𑀸𑀢𑀺𑀬𑀸;

𑀮𑀗𑁆𑀓𑀸𑀪𑀸𑀭𑀢𑀆𑀤𑀻𑀲𑀼, 𑀯𑀼𑀝𑁆𑀞𑀧𑀼𑀩𑁆𑀩 𑀲𑀼𑀢𑁂𑀲𑀺𑀦𑀸.

𑀯𑀺𑀲𑀼𑀢𑀸𑀭𑀸𑀫 𑀲𑀻𑀳𑀸𑀦𑀁, 𑀲𑀺𑀓𑁆𑀔𑀺𑀢𑁂𑀦 𑀢𑀺𑀧𑁂𑀝𑀓𑀁;

𑀲𑀦𑁆𑀢𑀺𑀓𑁂 𑀦𑀯𑀯𑀲𑁆𑀲𑀸𑀦𑀺, 𑀲𑀁𑀕𑀻𑀢𑀺𑀓𑀺𑀘𑁆𑀘𑀓𑀸𑀭𑀺𑀦𑀸.

𑀤𑀓𑁆𑀔𑀺𑀡𑀸𑀭𑀸𑀫 𑀯𑀸𑀲𑀻𑀦𑀁, 𑀲𑀦𑁆𑀢𑀺𑀓𑁂𑀧𑀺 𑀲𑀼𑀯𑀺𑀜𑁆𑀜𑀼𑀦𑀁;

𑀲𑀺𑀓𑁆𑀔𑀺𑀢𑁂𑀦 𑀲𑀢𑁆𑀢𑀯𑀻𑀲-𑀯𑀲𑁆𑀲𑀺𑀢𑁆𑀯𑀸𑀦 𑀬𑀲𑀲𑁆𑀲𑀺𑀦𑀸.

𑀲𑀼𑀦𑁆𑀤𑀭𑁂 ¶ 𑀧𑀼𑀭𑀲𑁂𑀝𑁆𑀞𑀫𑁆𑀳𑀺, 𑀲𑀼𑀦𑁆𑀤𑀭𑁂 𑀯𑀺𑀲𑀼𑀢𑁂 𑀲𑀼𑀪𑁂;

𑀲𑀼𑀦𑁆𑀤𑀭𑁂 𑀚𑁄𑀢𑀺𑀧𑀸𑀮𑀫𑁆𑀳𑀺, 𑀯𑀲𑀢𑀸 𑀕𑀡𑀯𑀸𑀘𑀺𑀦𑀸.

𑀦𑀺𑀲𑁆𑀲𑀸𑀬 𑀧𑁂𑀝𑀓𑁂 𑀘𑁂𑀯, 𑀅𑀦𑁂𑀓𑀦𑀻𑀢𑀺 𑀧𑁄𑀢𑁆𑀣𑀓𑁂;

𑀩𑀳𑀼𑀮𑁂 𑀕𑀦𑁆𑀣𑀲𑁂𑀝𑁆𑀞𑁂𑀧𑀺, 𑀓𑀢𑁄𑀬𑀁 𑀯𑀺𑀥𑀼𑀫𑀸𑀦𑀺𑀢𑁄.

𑀢𑀺𑀝𑁆𑀞𑀢𑀁 ¶ 𑀅𑀬𑀁 𑀫𑁂 𑀕𑀦𑁆𑀣𑁄, 𑀲𑀼𑀲𑀸𑀭𑁄 𑀬𑀸𑀯 𑀲𑀸𑀲𑀦𑀁;

𑀢𑀺𑀝𑁆𑀞𑀢𑁂𑀯 𑀲𑀼𑀢𑁂𑀲𑀻𑀦𑀁, 𑀲𑀼𑀲𑀸𑀭𑀁 𑀲𑀼𑀧𑀓𑀸𑀲𑀬𑀁.

𑀅𑀦𑁂𑀦 𑀲𑀼𑀯𑀺𑀲𑀺𑀝𑁆𑀞𑁂𑀦, 𑀧𑀼𑀜𑁆𑀜𑁂𑀦𑀜𑁆𑀜𑁂𑀦 𑀓𑀫𑁆𑀫𑀼𑀦𑀸;

𑀫𑀦𑀺𑀲𑀺𑀪𑀺𑀕𑀼𑀭𑀽𑀳𑁂𑀯, 𑀕𑀘𑁆𑀙𑁂𑀬𑁆𑀬𑀁 𑀅𑀫𑀢𑀁 𑀲𑀺𑀯𑀁.

‘‘𑀅𑀗𑁆𑀕𑀸𑀭𑀺𑀦𑁄 ¶ 𑀤𑀸𑀦𑀺 𑀤𑀼𑀫𑀸 𑀪𑀤𑀦𑁆𑀢𑁂’’

‘‘𑀬𑀣𑀸𑀧𑀺 𑀭𑀫𑁆𑀫𑀓𑁄 𑀫𑀸𑀲𑁄, 𑀕𑀺𑀫𑁆𑀳𑀸𑀦𑀁 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡;

𑀅𑀢𑁂‘𑀯’𑀜𑁆𑀜𑁂𑀳𑀺 𑀫𑀸𑀲𑁂𑀳𑀺, 𑀤𑀼𑀫𑀧𑀼𑀫𑁆𑀨𑁂𑀳𑀺 𑀲𑁄𑀪𑀢𑀺’’.

‘‘𑀯𑀦𑀧𑁆𑀧𑀕𑀼𑀫𑁆𑀩𑁂 ¶ 𑀬𑀣𑀨𑀼𑀲𑁆𑀲𑀺𑀢𑀕𑁆𑀕𑁂,

𑀕𑀺𑀫𑁆𑀳𑀸𑀦 𑀫𑀸𑀲𑁂 𑀧𑀞𑀫𑀲𑁆𑀫𑀺𑀁 𑀕𑀺𑀫𑁆𑀳𑁂’’ 𑁋

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀩𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀢𑁆𑀣𑀼𑀢𑁆𑀢𑀬𑀁 ¶ 𑀦𑀫𑀲𑀺𑀢𑁆𑀯𑀸, 𑀆𑀘𑁂𑀭𑁂 𑀓𑀯𑀺𑀧𑀼𑀗𑁆𑀕𑀯𑁂;

𑀓𑀲𑁆𑀲𑀁 𑀤𑁆𑀯𑀸𑀤𑀲𑀫𑀸𑀲𑀸𑀦𑀁, 𑀩𑀦𑁆𑀥𑀁 𑀢𑀫𑁆𑀫𑀸𑀲𑀯𑀲𑀺𑀓𑀁.

𑀘𑀺𑀢𑁆𑀢𑀲𑀫𑁆𑀫𑀢𑀫𑀸𑀲𑁄 ¶ 𑀳𑀺, 𑀅𑀢𑁂𑀯𑀜𑁆𑀜𑁂𑀳𑀺 𑀲𑁄𑀪𑀢𑀺;

𑀭𑀫𑁆𑀫𑀓𑀫𑀸𑀲𑁄 𑀭𑀫𑁆𑀫𑀫𑀸𑀲𑁄, 𑀢𑁂𑀦𑁂𑀯 𑀯𑁄𑀳𑀸𑀭𑁄 𑀪𑀯𑀺.

𑀢𑀲𑁆𑀫𑀺𑀁 𑀲𑀼𑀘𑀺𑀢𑁆𑀢𑀫𑀸𑀲𑀫𑁆𑀳𑀺, 𑀦𑀸𑀕𑀤𑀼𑀫𑀸 𑀲𑀼𑀧𑀼𑀧𑁆𑀨𑀭𑁂;

𑀧𑀼𑀧𑁆𑀨𑀦𑁆𑀢𑀺 𑀅𑀲𑀦𑀤𑀼𑀫𑀸, 𑀯𑀸𑀬𑀦𑁆𑀢𑀺 𑀓𑀸𑀦𑀦𑁂 𑀳𑀺 𑀯𑁂.

𑀲𑀗𑁆𑀓𑀦𑁆𑀢 𑀫𑀳𑀼𑀲𑁆𑀲𑀯𑁄𑀧𑀺, 𑀢𑀫𑁆𑀳𑀺 𑀫𑀸𑀲𑀫𑁆𑀳𑀺 𑀯𑀢𑁆𑀢𑀢𑁂;

𑀕𑀦𑁆𑀥𑁄𑀤𑀓𑁂𑀳𑀺 𑀅𑀜𑁆𑀜𑁄𑀜𑁆𑀜𑀁, 𑀲𑀺𑀜𑁆𑀘𑀫𑀸𑀦𑀸 𑀲𑀼𑀫𑁄𑀤𑀭𑁂.

𑀬𑀣𑀸𑀧𑀺 ¶ 𑀭𑀫𑁆𑀫𑀓𑁄 𑀫𑀸𑀲𑁄, 𑀕𑀺𑀫𑁆𑀳𑀸𑀦𑀁 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡;

𑀅𑀢𑁂‘𑀯’𑀜𑁆𑀜𑁂𑀳𑀺 𑀫𑀸𑀲𑁂𑀳𑀺, 𑀤𑀼𑀫𑀧𑀼𑀧𑁆𑀨𑁂𑀳𑀺 𑀲𑁄𑀪𑀢𑀺.

𑀲𑀫𑁆𑀩𑀼𑀤𑁆𑀥𑁄 𑀘𑀺𑀢𑁆𑀢𑀫𑀸𑀲𑀲𑁆𑀲, 𑀓𑀸𑀴𑀧𑀓𑁆𑀔𑁂 𑀉𑀧𑁄𑀲𑀣𑁂;

𑀧𑀸𑀢𑁄𑀬𑁂𑀯 𑀲𑀫𑀸𑀤𑀸𑀬, 𑀧𑀯𑀭𑀁 𑀧𑀢𑁆𑀢𑀘𑀻𑀯𑀭𑀁;

𑀅𑀦𑀼𑀓𑀫𑁆𑀧𑀸𑀬 𑀦𑀸𑀕𑀸𑀦𑀁, 𑀦𑀸𑀕𑀤𑀻𑀧𑀫𑀼𑀧𑀸𑀕𑀫𑀺.

𑀯𑁂𑀲𑀸𑀔𑀯𑁆𑀳𑀬𑀫𑀸𑀲𑁄 𑀢𑀼, 𑀲𑀼𑀯𑀺𑀲𑀺𑀝𑁆𑀞𑁄 𑀲𑀼𑀧𑀸𑀓𑀝𑁄;

𑀮𑁄𑀓𑀕𑁆𑀕𑀦𑀸𑀣𑀁 𑀧𑀝𑀺𑀘𑁆𑀘, 𑀲𑀦𑁆𑀢𑁂𑀳𑀺 𑀅𑀪𑀺𑀮𑀓𑁆𑀔𑀺𑀢𑁄.

𑀢𑀫𑁆𑀳𑀺 ¶ 𑀯𑁂𑀲𑀸𑀔𑀫𑀸𑀲𑀫𑁆𑀳𑀺, 𑀘𑀫𑁆𑀧𑀓𑀸𑀧𑀺 𑀲𑀼𑀧𑀼𑀧𑁆𑀨𑀭𑁂;

𑀩𑁄𑀥𑀺𑀁 𑀤𑀓𑁂𑀳𑀺 𑀲𑀺𑀜𑁆𑀘𑀺𑀢𑁆𑀯𑀸, 𑀲𑀚𑁆𑀚𑀦𑀸 𑀲𑀫𑁆𑀧𑀫𑁄𑀤𑀭𑁂.

𑀯𑀦𑁂𑀲𑀼𑀯 𑀧𑁄𑀢𑀓𑀸𑀧𑀺, 𑀧𑀓𑁆𑀔𑀦𑁆𑀤𑀦𑁆𑀢𑀺 𑀤𑀺𑀲𑁄𑀤𑀺𑀲𑀁;

𑀯𑀺𑀓𑀽𑀚𑀦𑁆𑀢𑀸 𑀲𑀪𑀸𑀲𑀸𑀬, 𑀚𑀦𑀲𑁄𑀢𑀭𑀲𑀸𑀬𑀦𑀁.

𑀤𑀼𑀢𑀺𑀬𑁂 ¶ 𑀤𑀺𑀯𑀲𑁂 𑀪𑀢𑁆𑀢-𑀓𑀸𑀮𑁂 𑀆𑀭𑁄𑀘𑀺𑀢𑁂 𑀚𑀺𑀦𑁄;

𑀭𑀫𑁆𑀫𑁂 𑀯𑁂𑀲𑀸𑀔𑀫𑀸𑀲𑀫𑁆𑀳𑀺, 𑀧𑀼𑀡𑁆𑀡𑀸𑀫𑀸𑀬𑀁 𑀫𑀼𑀦𑀺𑀲𑁆𑀲𑀭𑁄.

𑀚𑁂𑀝𑁆𑀞𑀲𑀫𑁆𑀫𑀢𑀫𑀸𑀲𑁄𑀧𑀺, 𑀲𑁄𑀕𑀢𑀚𑀦𑀩𑁆𑀪𑀦𑁆𑀢𑀭𑁂;

𑀯𑀺𑀔𑁆𑀬𑀸𑀢𑁄 𑀮𑀓𑁆𑀔𑀜𑁆𑀜𑁄 𑀘𑁂𑀯, 𑀚𑁂𑀝𑁆𑀞𑁂𑀦 𑀲𑀁𑀬𑀼𑀢𑁄 𑀳𑀺 𑀯𑁂.

𑀢𑀲𑁆𑀫𑀺𑀁𑀳𑀺 𑀚𑁂𑀝𑁆𑀞𑀫𑀸𑀲𑀫𑁆𑀳𑀺, 𑀲𑀼𑀫𑀦𑀸 𑀯𑀦𑀫𑀮𑁆𑀮𑀺𑀓𑀸;

𑀧𑀼𑀧𑁆𑀨𑀦𑁆𑀢𑀺 𑀘 𑀧𑀯𑀸𑀬𑀦𑁆𑀢𑀺, 𑀲𑀩𑁆𑀩𑀚𑀦𑀫𑀦𑁄𑀳𑀭𑀸.

𑀧𑀭𑀺𑀓𑁆𑀔𑀡𑀸𑀲𑀼𑀲𑀪𑀸𑀧𑀺, 𑀅𑀪𑀯𑀺 𑀫𑁆𑀭𑀦𑀫𑀸𑀫𑀡𑁆𑀟𑀮𑁂;

𑀔𑁂𑀢𑀮𑁂 𑀚𑁂𑀝𑁆𑀞𑀚𑁄𑀢𑀺𑀧𑀺, 𑀧𑀚𑁆𑀚𑀮𑀺 𑀢𑀲𑁆𑀫𑀺𑀜𑁆𑀳𑀺 𑀯𑁂.

𑀆𑀲𑀸𑀴𑁆𑀳𑁄 𑀦𑀸𑀫 𑀫𑀸𑀲𑁄𑀧𑀺, 𑀅𑀢𑀻𑀯 𑀯𑀺𑀲𑀺𑀝𑁆𑀞𑁄 𑀪𑀯𑀺;

𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺 𑀩𑀼𑀤𑁆𑀥𑁄, 𑀢𑀲𑁆𑀫𑀺𑀜𑁆𑀳𑀺 𑀫𑀼𑀦𑀺 𑀲𑀼𑀥𑀻.

𑀦𑀺𑀓𑁆𑀔𑀫𑀺𑀧𑀺 𑀘 𑀲𑀫𑁆𑀩𑀼𑀤𑁆𑀥𑁄, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀺;

𑀉𑀧𑀲𑀫𑁆𑀧𑀤𑀓𑀫𑁆𑀫𑀫𑁆𑀧𑀺, 𑀓𑀭𑁄𑀦𑁆𑀢𑀺 𑀢𑀲𑁆𑀫𑀺𑀁𑀧𑀺 𑀳𑀺.

𑀧𑀼𑀦𑁆𑀦𑀸𑀕𑀤𑀼𑀫𑀸 𑀧𑀼𑀧𑁆𑀨𑀦𑁆𑀢𑀺, 𑀧𑀯𑀸𑀬𑀦𑁆𑀢𑀺 𑀤𑀺𑀲𑁄𑀤𑀺𑀲𑀁;

𑀆𑀤𑀺𑀘𑁆𑀘𑁄 𑀢𑀺𑀝𑁆𑀞𑀢𑀺 𑀢𑀫𑁆𑀳𑀺, 𑀉𑀢𑁆𑀢𑀭𑀸𑀬𑀸𑀦𑀓𑁄𑀝𑀺𑀬𑀁.

𑀲𑀻𑀳𑁂 ¶ 𑀲𑀸𑀯𑀡𑀫𑀸𑀲𑀫𑁆𑀳𑀺, 𑀲𑀮𑀸𑀓𑀤𑀸𑀦𑀫𑀼𑀢𑁆𑀢𑀫𑀁;

𑀤𑁂𑀦𑁆𑀢𑀺 𑀲𑀸𑀥𑀯𑁄 𑀫𑀸𑀦𑀼𑀲𑀸, 𑀲𑀤𑁆𑀤𑀳𑀦𑁆𑀢𑀸 𑀯𑀢𑁆𑀣𑀼𑀢𑁆𑀢𑀬𑀁.

𑀧𑀼𑀧𑁆𑀨𑀦𑁆𑀢𑀺 𑀓𑀝𑁂𑀭𑀼𑀳𑀸𑀧𑀺, 𑀢𑀫𑁆𑀳𑀺 𑀲𑀸𑀯𑀡𑀫𑀸𑀲𑀓𑁂;

𑀔𑁂 𑀲𑀯𑀡𑀦𑀓𑁆𑀔𑀢𑁆𑀢𑀫𑁆𑀧𑀺, 𑀅𑀢𑀻𑀯 𑀚𑁄𑀢𑀬𑀻 𑀳𑀺 𑀯𑁂.

𑀯𑀲𑁆𑀲𑀩𑁆𑀪𑀦𑁆𑀢𑀭𑀪𑀽𑀢𑁂 𑀘, 𑀲𑀫𑀡𑀸 𑀲𑀼𑀕𑀢𑁄𑀭𑀲𑀸;

𑀫𑀸𑀲𑁂 𑀯𑀸𑀘𑀦𑀉𑀕𑁆𑀕𑀡𑁆𑀳-𑀓𑀫𑁆𑀫𑀁𑀓𑀁𑀲𑀼 𑀲𑀼𑀔𑀸𑀲𑀬𑀸.

𑀓𑀜𑁆𑀜𑀸𑀭𑀸𑀲𑀺𑀲𑀫𑁆𑀫𑀢𑁂𑀳𑀺 ¶ , 𑀧𑁄𑀝𑁆𑀞𑀧𑀸𑀤𑀲𑀼𑀫𑀸𑀲𑀓𑁂;

𑀦𑀤𑀻𑀲𑀼 𑀤𑀓𑀧𑀽𑀭𑀺𑀢𑀸, 𑀓𑀝𑀧𑀢𑁆𑀣𑀢𑀲𑀸𑀤𑀺𑀲𑀸.

𑀦𑀸𑀯𑀸𑀫𑀳𑀸𑀉𑀲𑁆𑀲𑀯𑀫𑁆𑀧𑀺, 𑀓𑀭𑁄𑀦𑁆𑀢𑀺 𑀫𑀸𑀦𑀼𑀚𑀸 𑀢𑀤𑀸;

𑀓𑀻𑀴𑀦𑁆𑀢𑀺 𑀲𑀫𑁆𑀧𑀫𑁄𑀤𑀦𑁆𑀢𑀺, 𑀯𑀺𑀚𑀺𑀢𑁂 𑀦𑀭 𑀦𑀸𑀭𑀺𑀬𑁄.

𑀓𑀜𑁆𑀘𑀦𑀬𑀫𑀤𑀼𑀫𑀸𑀧𑀺, 𑀯𑀺𑀓𑀲𑀦𑁆𑀢𑀺 𑀢𑀤𑀸 𑀳𑀺 𑀯𑁂;

𑀫𑁂𑀖𑁄 𑀣𑁄𑀓𑀁 𑀣𑁄𑀓𑀁 𑀳𑀺𑀫𑀁, 𑀯𑀲𑁆𑀲𑀢𑀺 𑀧𑀢𑀢𑀺𑀧𑀺 𑀘.

𑀯𑀲𑁆𑀲𑀺𑀓𑁂 ¶ 𑀅𑀲𑁆𑀲𑀬𑀼𑀚𑀺𑀫𑁆𑀳𑀺, 𑀯𑀺𑀓𑀲𑀦𑁆𑀢𑀺 𑀅𑀦𑁂𑀓𑀥𑀸;

𑀧𑀤𑀼𑀫𑀸𑀤𑀺𑀤𑀓𑀚𑀸𑀦𑀺, 𑀧𑀼𑀧𑁆𑀨𑀸𑀦𑀺 𑀫𑀦𑀼𑀜𑁆𑀜𑀸𑀦𑀺 𑀯𑁂.

𑀫𑀳𑀸𑀧𑀤𑀻𑀧𑀧𑀦𑁆𑀢𑀻𑀳𑀺, 𑀲𑀓𑀮𑀫𑁆𑀭𑀦𑀫𑀸𑀪𑀽𑀢𑀮𑁂;

𑀧𑀽𑀚𑁂𑀦𑁆𑀢𑀺 𑀮𑁄𑀓𑀕𑁆𑀕𑀦𑀸𑀣𑀁, 𑀲𑀸𑀥𑀯𑁄 𑀲𑁄𑀕𑀢𑀸𑀚𑀦𑀸.

𑀢𑀧𑁄𑀥𑀦𑀸 𑀯𑀺𑀘𑀭𑀦𑁆𑀢𑀺, 𑀯𑀲𑁆𑀲𑀁𑀯𑀼𑀝𑁆𑀞𑀸 𑀤𑀺𑀲𑁄𑀤𑀺𑀲𑀁;

𑀲𑀸𑀥𑀯𑁄 𑀤𑀸𑀦𑀲𑁄𑀡𑁆𑀟𑀸𑀯, 𑀲𑀻𑀢𑀸𑀬𑀦𑁆𑀢𑀺 𑀲𑀼𑀔𑀦𑁆𑀢𑀺 𑀘.

𑀓𑀢𑁆𑀢𑀺𑀓𑀫𑀸𑀲𑀲𑁂𑀝𑁆𑀞𑁂𑀧𑀺 ¶ , 𑀲𑀫𑁆𑀧𑀫𑁄𑀤𑀦𑁆𑀢𑀺 𑀫𑀸𑀦𑀼𑀚𑀸;

𑀓𑁄𑀲𑀻𑀢𑀓𑀻𑀧𑀼𑀧𑁆𑀨𑀸𑀦𑀺 𑀘, 𑀯𑀺𑀓𑀲𑀦𑁆𑀢𑀺 𑀯𑀸𑀬𑀦𑁆𑀢𑀺 𑀘.

𑀓𑀣𑀺𑀦𑀫𑀳𑀸𑀤𑀸𑀦𑀫𑁆𑀧𑀺, 𑀤𑀤𑀦𑁆𑀢𑀺 𑀲𑀸𑀥𑀯𑁄 𑀚𑀦𑀸;

𑀢𑀤𑀸 𑀘𑀦𑁆𑀤𑀓𑀺𑀭𑀡𑁄𑀧𑀺, 𑀅𑀢𑀻𑀯 𑀧𑀚𑁆𑀚𑁄𑀢𑁄 𑀅𑀳𑀼.

𑀅𑀳𑁄𑀲𑀺 𑀳𑀺𑀫𑀧𑀸𑀢𑁄 𑀘, 𑀉𑀢𑁆𑀢𑀭𑀯𑀸𑀢𑁄 𑀧𑀯𑀸𑀬𑀢𑀺;

𑀓𑀢𑁆𑀢𑀺𑀓𑀚𑁄𑀢𑀺𑀙𑀡𑁄𑀧𑀺, 𑀅𑀳𑁄𑀲𑀺 𑀢𑀲𑁆𑀫𑀺𑀜𑁆𑀳𑀺 𑀯𑁂.

𑀥𑀦𑀼𑀭𑀸𑀲𑀻𑀫𑀸𑀕𑀲𑀺𑀭 ¶ , 𑀫𑀸𑀲𑁂 𑀳𑁂𑀫𑀦𑁆𑀢𑀲𑀫𑁆𑀫𑀢𑁂;

𑀲𑀢𑁆𑀢𑀺𑀥𑀭𑀲𑀼𑀧𑀽𑀚𑀸𑀯𑁆𑀳, 𑀲𑀪𑀸𑀧𑀺 𑀲𑀫𑁆𑀧𑀯𑀢𑁆𑀢𑀺𑀢𑀸.

𑀤𑁂𑀯𑀲𑀫𑁆𑀫𑀢𑀧𑀼𑀧𑁆𑀨𑀸𑀦𑀺, 𑀫𑀦𑀼𑀜𑁆𑀜𑀭𑀼𑀘𑀺𑀭𑀸𑀦𑀺𑀧𑀺;

𑀧𑀼𑀧𑁆𑀨𑀦𑁆𑀢𑀺 𑀢𑀫𑁆𑀳𑀺 𑀫𑀸𑀲𑀫𑁆𑀳𑀺, 𑀳𑀺𑀫𑀧𑀸𑀢𑁄 𑀅𑀳𑁄𑀲𑀺 𑀘.

𑀯𑀻𑀳𑀬𑁄 𑀳𑁄𑀦𑁆𑀢𑀺 𑀧𑀓𑁆𑀓𑀸 𑀘, 𑀔𑁂𑀢𑁆𑀢𑁂𑀲𑀼 𑀫𑁆𑀭𑀦𑀫𑀸𑀪𑀽𑀢𑀮𑁂;

𑀫𑀺𑀕𑀲𑀺𑀭𑀦𑀓𑁆𑀔𑀢𑁆𑀢𑀫𑁆𑀧𑀺, 𑀚𑁄𑀢𑁂𑀢𑀺 𑀆𑀓𑀸𑀲𑀗𑁆𑀕𑀡𑁂.

𑀫𑀓𑀸𑀭𑁂 ¶ 𑀨𑀼𑀲𑁆𑀲𑀫𑀸𑀲𑁂𑀧𑀺, 𑀧𑀼𑀧𑁆𑀨𑀦𑁆𑀢𑀺 𑀧𑀯𑀸𑀬𑀦𑁆𑀢𑀺 𑀘;

𑀲𑀼𑀦𑀻𑀮𑀯𑀮𑁆𑀮𑀺𑀧𑀼𑀧𑁆𑀨𑀸𑀦𑀺, 𑀚𑀦𑀫𑀦𑁄𑀳𑀭𑀸𑀦𑀺𑀧𑀺.

𑀲𑁂𑀦𑀸𑀩𑁆𑀬𑀽𑀳𑀫𑁆𑀧𑀺 ¶ 𑀓𑀭𑁄𑀦𑁆𑀢𑀺, 𑀪𑀽𑀧𑀸𑀮𑀸 𑀫𑁆𑀭𑀦𑀫𑀸𑀭𑀝𑁆𑀞𑀺𑀓𑀸;

𑀲𑀧𑀭𑀺𑀲𑀸 𑀉𑀤𑀺𑀓𑁆𑀔𑀦𑁆𑀢𑀺, 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀆𑀤𑀬𑁄.

𑀢𑀫𑁆𑀳𑀺𑀲𑀻 𑀅𑀢𑀺𑀲𑀻𑀢𑀮𑀫𑁆𑀧𑀺, 𑀤𑀓𑁆𑀔𑀺𑀡𑀸𑀬𑀦𑀓𑁄𑀝𑀺𑀬𑀁;

𑀅𑀝𑁆𑀞𑀸𑀧𑀼𑀡𑁆𑀡𑀫𑀤𑀺𑀦𑀫𑁆𑀳𑀺, 𑀲𑀽𑀭𑀺𑀬𑁄 𑀮𑁄𑀓𑀫𑀸𑀦𑀺𑀢𑁄.

𑀩𑁄𑀥𑀺𑀢𑁄 𑀦𑀯𑀫𑁂 𑀫𑀸𑀲𑁂, 𑀨𑀼𑀲𑁆𑀲𑀧𑀼𑀡𑁆𑀡𑀫𑀺𑀬𑀁 𑀚𑀺𑀦𑁄;

𑀮𑀁𑀓𑀸𑀤𑀻𑀧𑀁 𑀯𑀺𑀲𑁄𑀥𑁂𑀢𑀼𑀁, 𑀮𑀗𑁆𑀓𑀸𑀤𑀻𑀧𑀫𑀼𑀧𑀸𑀕𑀫𑀺.

𑀓𑀼𑀫𑁆𑀪𑁂𑀲𑀼 ¶ 𑀫𑀸𑀖𑀫𑀸𑀲𑁂𑀳𑀺, 𑀢𑀽𑀮𑀤𑀼𑀫𑀸 𑀲𑀼𑀧𑀼𑀧𑁆𑀨𑀭𑁂;

𑀧𑀼𑀫𑁆𑀢𑀸𑀮𑀸 𑀫𑀥𑀼𑀭𑀭𑀲𑀁, 𑀫𑀸𑀦𑀼𑀚𑀸𑀦𑀁 𑀤𑀤𑀦𑁆𑀢𑀺 𑀘.

𑀬𑀸𑀕𑀼𑀫𑀳𑀸𑀉𑀲𑁆𑀲𑀯𑁄𑀧𑀺, 𑀧𑀸𑀓𑀝𑁄 𑀫𑁆𑀭𑀦𑀫𑀸𑀪𑀽𑀢𑀮𑁂;

𑀅𑀯𑀲𑁂𑀲𑀲𑀼 𑀫𑁂𑀖𑁄𑀧𑀺, 𑀣𑀦𑀬𑀁 𑀅𑀪𑀺𑀯𑀲𑁆𑀲𑀢𑀺.

𑀦𑀭𑀦𑀸𑀭𑀻 𑀫𑀦𑀼𑀜𑁆𑀜𑀸𑀦𑀺, 𑀧𑀤𑀭𑀸𑀦𑀺 𑀧𑀡𑁆𑀟𑀸𑀦𑀺 𑀘;

𑀧𑀼𑀘𑀺𑀫𑀦𑁆𑀤𑀤𑀼𑀫𑀸 𑀦𑀯-𑀧𑀢𑁆𑀢𑀸𑀦𑀺 𑀥𑀸𑀭𑁂𑀦𑁆𑀢𑀺𑀧𑀺 𑀘.

𑀫𑀺𑀦𑁂 ¶ 𑀨𑀕𑁆𑀕𑀼𑀡𑀫𑀸𑀲𑀫𑁆𑀳𑀺, 𑀲𑀼𑀭𑀪𑀺𑀕𑀦𑁆𑀥𑀺𑀓𑀸 𑀲𑀼𑀪𑀸;

𑀧𑀼𑀧𑁆𑀨𑀦𑁆𑀢𑀺 𑀯𑀦𑀫𑁆𑀳𑀺 𑀤𑀼𑀫𑀸, 𑀦𑀯𑀧𑀢𑁆𑀢𑁂𑀳𑀺 𑀲𑁄𑀪𑀭𑁂.

𑀤𑀓𑁆𑀔𑀺𑀡𑀤𑁂𑀲𑀢𑁄 𑀢𑀫𑁆𑀳𑀺, 𑀯𑀸𑀢𑁄 𑀧𑀯𑀸𑀬𑀢𑀺 𑀳𑀺 𑀯𑁂;

𑀯𑀸𑀴𑀼𑀓𑀧𑀺𑀝𑁆𑀞𑁂 𑀯𑀸𑀮𑀼𑀓-𑀣𑀽𑀧𑁂 𑀓𑀢𑁆𑀯𑀸𑀦 𑀧𑀽𑀚𑀬𑁆𑀬𑀼𑀁.

𑀧𑀣𑀫𑀕𑀺𑀫𑁆𑀳 𑀫𑀸𑀲𑀫𑁆𑀳𑀺, 𑀦𑀸𑀦𑀸𑀤𑀼𑀫𑀸𑀢𑀺 𑀧𑀼𑀧𑁆𑀨𑀭𑁂;

𑀢𑁂𑀦 𑀲𑀩𑁆𑀩𑀫𑁆𑀧𑀺 𑀯𑀺𑀧𑀺𑀦𑀁, 𑀯𑀺𑀘𑀺𑀢𑁆𑀢𑀁 𑀤𑀲𑁆𑀲𑀦𑀺𑀬𑀜𑁆𑀳𑀺 𑀯𑁂.

𑀯𑀺𑀲𑀼𑀢𑁂 𑀚𑁄𑀢𑀺𑀧𑀸𑀮𑀫𑁆𑀳𑀺, 𑀯𑀺𑀲𑀼𑀢𑀫𑁆𑀳𑀺 𑀦𑀺𑀓𑁂𑀢𑀦𑁂;

𑀯𑀲𑀢𑀸 𑀦𑁂𑀓𑀕𑀦𑁆𑀣𑀸𑀦𑀁, 𑀮𑁂𑀔𑀓𑁂𑀦 𑀓𑀢𑁄 𑀅𑀬𑀁.