📜
𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲
𑀫𑀳𑀸𑀭𑀳𑀦𑀻𑀢𑀺
𑀧𑀡𑁆𑀟𑀺𑀢𑀓𑀣𑀸
𑀫𑀳𑀸𑀭𑀳𑀭𑀳𑀁 ¶ 𑀲𑀓𑁆𑀬,
𑀫𑀼𑀦𑀺𑀁 𑀦𑀻𑀯𑀭𑀡𑀸 𑀢𑀡𑁆𑀳𑀸;
𑀫𑀼𑀢𑁆𑀢𑀁 𑀫𑀼𑀢𑁆𑀢𑀁 𑀲𑀼𑀤𑀲𑁆𑀲𑀦𑀁,
𑀯𑀦𑁆𑀤𑁂 𑀩𑁄𑀥𑀺𑀯𑀭𑀁 𑀯𑀭𑀁.
𑀫𑀼𑀦𑀺𑀦𑀸 ¶ 𑀫𑀼𑀦𑀺𑀦𑀸𑀕𑁂𑀦,
𑀤𑀼𑀝𑁆𑀞𑀧𑀩𑁆𑀩𑀚𑁆𑀚𑀺𑀢𑀸 𑀚𑀺𑀢𑀸;
𑀬𑀣𑀸 𑀬𑀣𑀸𑀅𑀲𑀤𑁆𑀥𑀫𑁆𑀫-
𑀧𑀼𑀭𑀡𑀸 𑀧𑀼𑀭𑀡𑀸𑀤𑀬𑁄.
𑀢𑀣𑀸 𑀢𑀣𑀸𑀕𑀢𑁄𑀯𑀸𑀤𑀸,
𑀦𑀼𑀕𑀢𑁂 𑀮𑁄𑀓𑀦𑀻𑀢𑀺𑀬𑀁;
𑀓𑀢𑀬𑁄𑀕𑁂𑀦 𑀯𑀺𑀤𑀽𑀦𑀸,
𑀚𑁂𑀬𑁆𑀬𑁄𑀯𑀸𑀦𑀢𑁆𑀣 𑀓𑀸𑀭𑀺𑀦𑁄.
𑀦𑀺𑀢𑀻𑀥 ¶ 𑀚𑀦𑁆𑀢𑀼𑀦𑀁 𑀲𑀸𑀭𑁄,
𑀫𑀺𑀢𑁆𑀢𑀸𑀘𑀭𑀺𑀬𑀸𑀘 𑀧𑀻𑀢𑀭𑀸;
𑀦𑀻𑀢𑀺𑀫𑀸 𑀲𑀼𑀩𑀼𑀤𑁆𑀥𑀺 𑀩𑁆𑀬𑀢𑁆𑀢𑁄,
𑀲𑀼𑀢𑀯𑀸 𑀅𑀢𑁆𑀣𑀤𑀲𑁆𑀲𑀺𑀫𑀸.
𑀓𑀯𑀺𑀳𑁂𑀭𑀜𑁆𑀜𑀓𑀸 𑀓𑀢𑁆𑀯𑀸,
𑀲𑀼𑀢𑁆𑀢𑀢𑁆𑀢𑀁 𑀲𑀢𑁆𑀣𑀓𑀜𑁆𑀘𑀦𑀁;
𑀕𑀚𑁆𑀚𑀧𑀚𑁆𑀚𑀸𑀤𑁆𑀬𑀸𑀮𑀗𑁆𑀓𑀸𑀭𑀁,
𑀓𑀭𑁄𑀦𑁆𑀢𑀻𑀥 𑀫𑀦𑁄𑀭𑀫𑁆𑀫𑀁.
𑀯𑀼𑀢𑁆𑀬𑀁 ¶ 𑀯𑀺𑀲𑀤𑀜𑀸𑀡𑀲𑁆𑀲,
𑀜𑀸𑀢𑁄 𑀅𑀢𑁆𑀣𑁄𑀢𑀭𑀲𑁆𑀲 𑀦;
𑀲𑀼𑀭𑀧𑁆𑀧𑀪𑀸𑀬 𑀆𑀤𑀸𑀲𑁄,
𑀙𑀸𑀬𑀁 𑀤𑀺𑀲𑁆𑀲𑁂 𑀦 𑀫𑀸𑀓𑀭𑁂.
𑀫𑀳𑀸𑀢𑁂𑀚𑁄𑀧𑀺 𑀢𑁂𑀚𑁄𑀬𑀁,
𑀫𑀢𑁆𑀢𑀺𑀓𑀁 𑀦𑀫𑀼𑀤𑀼𑀓𑀁𑀓𑀭𑁄;
𑀆𑀧𑁄 𑀆𑀧𑁂𑀢𑀺 𑀫𑀼𑀤𑀼𑀓𑀁,
𑀲𑀸𑀥𑀼𑀯𑀸𑀘𑀸𑀘 𑀓𑀓𑁆𑀔𑀴𑀁.
𑀫𑀼𑀤𑀼𑀦𑀸𑀯 ¶ 𑀭𑀺𑀧𑀼𑀁 𑀚𑁂𑀢𑀺,
𑀫𑀼𑀤𑀼𑀦𑀸 𑀚𑁂𑀢𑀺 𑀤𑀸𑀭𑀼𑀡𑀁;
𑀦𑁄𑀲𑀺𑀤𑁆𑀥𑀁 𑀫𑀼𑀤𑀼𑀦𑀸 𑀓𑀺𑀜𑁆𑀘𑀺,
𑀬𑀢𑁆𑀯𑀢𑁄 𑀫𑀼𑀤𑀼𑀦𑀸 𑀚𑀬𑁂.
𑀘𑀦𑁆𑀤𑀦𑀁 𑀲𑀻𑀢𑀮𑀁 𑀮𑁄𑀓𑁂,
𑀢𑀢𑁄 𑀘𑀦𑁆𑀤𑀁𑀯 𑀲𑀻𑀢𑀮𑀁;
𑀘𑀦𑁆𑀤𑀦𑀘𑀦𑁆𑀤𑀲𑀻𑀢𑀫𑁆𑀳𑀸,
𑀯𑀸𑀓𑁆𑀬𑀁 𑀲𑀸𑀥𑀼𑀲𑀼𑀪𑀸𑀲𑀺𑀢𑀁.
𑀧𑀢𑁆𑀢𑀓𑀮𑁆𑀮𑁄𑀤𑀺𑀢𑀁 ¶ 𑀅𑀧𑁆𑀧𑀁,
𑀯𑀸𑀓𑁆𑀬𑀁 𑀲𑀼𑀪𑀸𑀲𑀺𑀢𑀁 𑀪𑀯𑁂;
𑀔𑀼𑀤𑁆𑀤𑀺𑀢𑀲𑁆𑀲 𑀓𑀤𑀦𑁆𑀦𑀁𑀧𑀺,
𑀲𑀼𑀢𑁆𑀢𑀁 𑀲𑀸𑀤𑀼𑀭𑀲𑁄 𑀲𑀺𑀬𑀸.
𑀲𑀢𑁆𑀣𑀓𑀸𑀧𑀺 𑀩𑀳𑀽𑀯𑀸𑀘𑀸,
𑀦𑀸𑀤𑀭𑀸 𑀩𑀳𑀼𑀪𑀸𑀡𑀺𑀦𑁄;
𑀲𑁄𑀧𑀓𑀸𑀭𑀫𑀼𑀤𑀸𑀲𑀻𑀦𑀁,
𑀦𑀦𑀼𑀤𑀺𑀝𑁆𑀞𑀁 𑀦𑀤𑀻𑀚𑀮𑀁.
𑀲𑀁𑀲𑀸𑀭𑀯𑀺𑀲𑀭𑀼𑀓𑁆𑀔𑀲𑁆𑀲 ¶ ,
𑀤𑁆𑀯𑀬𑀫𑁂𑀯𑀸𑀫𑀢𑀁𑀨𑀮𑀁;
𑀲𑀼𑀪𑀸𑀲𑀺𑀢𑀲𑁆𑀲𑀲𑀸𑀭𑀸𑀤𑁄,
𑀲𑀸𑀥𑀽𑀳𑀺𑀭𑀲𑀫𑀸𑀕𑀫𑁄.
𑀧𑀸𑀲𑀸𑀡𑀙𑀢𑁆𑀢𑀁 𑀕𑀭𑀼𑀓𑀁,
𑀢𑀢𑁄 𑀤𑁂𑀯𑀸𑀦𑀘𑀺𑀓𑁆𑀔𑀦𑀸;
𑀢𑀢𑁄 𑀯𑀼𑀟𑁆𑀠𑀸𑀦𑀫𑁄𑀯𑀸𑀤𑁄,
𑀢𑀢𑁄 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;
𑀢𑀼𑀮𑀁 ¶ 𑀲𑀮𑁆𑀮𑀳𑀼𑀓𑀁 𑀮𑁄𑀓𑁂,
𑀢𑀢𑁄 𑀘𑀧𑀮𑀚𑀸𑀢𑀺𑀓𑁄;
𑀢𑀢𑁄𑀦𑁄𑀯𑀸𑀤𑀺𑀓𑁄 𑀢𑀢𑁄,
𑀬𑀢𑀺 𑀥𑀫𑁆𑀫𑁂𑀧𑀫𑀸𑀤𑀓𑁄.
𑀅𑀳 𑀕𑀘𑁆𑀙𑀢𑀺 𑀳𑀸𑀬𑀦𑁆𑀢𑀻,
𑀲𑀢𑁆𑀢𑀸𑀦𑀫𑀺𑀥 𑀚𑀻𑀯𑀺𑀢𑀁;
𑀢𑀲𑁆𑀫𑀸𑀳𑀺 𑀫𑀸𑀧𑀫𑀢𑁆𑀢𑀢𑁆𑀯𑀁,
𑀕𑀘𑁆𑀙𑀦𑁆𑀢𑀼 𑀚𑀺𑀦𑀲𑀸𑀲𑀦𑁂.
𑀧𑀡𑁆𑀟𑀺𑀢𑀲𑁆𑀲 𑀧𑀲𑀁𑀲𑀸𑀬,
𑀤𑀡𑁆𑀟𑁄𑀩𑀸𑀮𑁂𑀦 𑀤𑀻𑀬𑀢𑁂;
𑀧𑀡𑁆𑀟𑀺𑀢𑁄 𑀧𑀡𑁆𑀟𑀺𑀢𑁂𑀦𑁂𑀯,
𑀯𑀡𑁆𑀡𑀺𑀢𑁄𑀯 𑀲𑀼𑀯𑀡𑁆𑀡𑀺𑀢𑁄.
𑀲𑀢𑁂𑀲𑀼 ¶ 𑀚𑀸𑀬𑀢𑁂 𑀲𑀽𑀭𑁄,
𑀲𑀳𑀲𑁆𑀲𑁂𑀲𑀼𑀘 𑀧𑀡𑁆𑀟𑀺𑀢𑁄;
𑀯𑀼𑀢𑁆𑀢𑀸 𑀲𑀢𑀲𑀳𑀲𑁆𑀲𑁂𑀲𑀼,
𑀤𑀸𑀢𑀸 𑀪𑀯𑀢𑀺𑀯𑀸 𑀦𑀯𑀸.
𑀪𑀽𑀧𑀢𑁆𑀢𑀁𑀘 𑀧𑀡𑁆𑀟𑀺𑀢𑀢𑁆𑀢𑀜𑁆𑀘,
𑀦𑁂𑀯𑀢𑀼𑀮𑁆𑀬𑀁 𑀓𑀤𑀸𑀘𑀺𑀧𑀺;
𑀲𑀤𑁂𑀲𑁂𑀧𑀽𑀚𑀺𑀢𑁄 𑀭𑀸𑀚𑀸,
𑀩𑀼𑀤𑁆𑀥𑁄 𑀲𑀩𑁆𑀩𑀢𑁆𑀣𑀧𑀽𑀚𑀺𑀢𑁄.
𑀓𑁆𑀯𑀸𑀢𑀺𑀪𑀸𑀭𑁄 ¶ 𑀲𑀫𑀢𑁆𑀣𑀸𑀦𑀁,
𑀓𑀺𑀁𑀤𑀽𑀭𑁄 𑀩𑁆𑀬𑀯𑀳𑀸𑀭𑀺𑀦𑀁;
𑀓𑁄𑀯𑀺𑀤𑁂𑀲𑁄 𑀲𑀯𑀺𑀚𑁆𑀚𑀸𑀦𑀁,
𑀓𑁄𑀧𑀭𑁄 𑀧𑀺𑀬𑀯𑀸𑀤𑀺𑀦𑀁.
𑀦𑀦𑀼 𑀢𑁂 𑀬𑁂𑀯𑀲𑀦𑁆𑀢𑀸 𑀦𑁄,
𑀲𑀸𑀕𑀭𑀸 𑀦𑀓𑀼𑀮𑀸𑀘𑀮𑀸;
𑀅𑀧𑁆𑀧𑀫𑁆𑀧𑀺 𑀫𑀭𑀺𑀬𑀸𑀤𑀁 𑀬𑁂,
𑀲𑀁𑀯𑀝𑁆𑀝𑁂𑀯𑀺 𑀚𑀳𑀦𑁆𑀢𑀺𑀦𑁄.
𑀧𑀮𑀬𑁂𑀢𑀻𑀢𑀫𑀭𑀺𑀬𑀸𑀤𑀸 ¶ ,
𑀪𑀯𑀦𑁆𑀢𑀺𑀓𑀺𑀭 𑀲𑀸𑀕𑀭𑀸;
𑀫𑀭𑀺𑀬𑀸𑀤𑀸𑀢𑀺𑀓𑀁 𑀲𑀸𑀥𑀼,
𑀦𑀇𑀘𑁆𑀙𑀦𑁆𑀢𑀺 𑀧𑀮𑀬𑁂𑀧𑀺.
𑀲𑀢𑀁 𑀤𑀻𑀖𑀸𑀬𑀼𑀓𑀁 𑀲𑀩𑁆𑀩,
𑀲𑀢𑁆𑀢𑀸𑀦𑀁 𑀲𑀼𑀔𑀓𑀸𑀭𑀡𑀁;
𑀅𑀲𑀢𑀁𑀧𑀦 𑀲𑀩𑁆𑀩𑁂𑀲𑀁,
𑀤𑀼𑀓𑁆𑀔𑀳𑁂𑀢𑀼 𑀦𑀲𑀁𑀲𑀬𑁄.
𑀧𑀸𑀫𑁄𑀓𑁆𑀔𑁂 ¶ 𑀲𑀼𑀚𑀦𑁂 𑀲𑀦𑁆𑀢𑁂,
𑀲𑀩𑁆𑀩𑁂𑀧𑀺 𑀲𑀼𑀚𑀦𑀸 𑀚𑀦𑀸;
𑀚𑀸𑀢𑁂𑀓𑀲𑁆𑀫𑀺𑀁𑀲𑀸𑀭𑀕𑀦𑁆𑀥𑁂,
𑀲𑀩𑁆𑀩𑁂 𑀕𑀦𑁆𑀥𑀫𑀬𑀸 𑀤𑀼𑀫𑀸.
𑀅𑀢𑁆𑀢𑀦𑀸 𑀬𑀤𑀺 𑀏𑀓𑁂𑀦,
𑀯𑀺𑀦𑀢𑁂𑀦 𑀫𑀳𑀸𑀚𑀦𑀸;
𑀯𑀺𑀦𑀬𑀁 𑀬𑀦𑁆𑀢𑀺 𑀲𑀩𑁆𑀩𑁂𑀧𑀺,
𑀓𑁄 𑀢𑀁 𑀦𑀸𑀲𑁂𑀬𑁆𑀬 𑀧𑀡𑁆𑀟𑀺𑀢𑁄.
𑀲𑀭𑀻𑀭𑀲𑁆𑀲 ¶ 𑀕𑀼𑀡𑀸𑀦𑀜𑁆𑀘,
𑀤𑀽𑀭𑀫𑀘𑁆𑀘𑀦𑁆𑀢 𑀫𑀦𑁆𑀢𑀭𑀁;
𑀲𑀭𑀻𑀭𑀁 𑀔𑀡𑀯𑀺𑀤𑁆𑀥𑀁𑀲𑀺,
𑀓𑀧𑁆𑀧𑀦𑁆𑀢𑀺𑀝𑁆𑀞𑀸𑀬𑀺𑀦𑁄 𑀕𑀼𑀡𑀸.
𑀬𑀤𑀺 𑀦𑀺𑀘𑁆𑀘𑀫𑀦𑀺𑀘𑁆𑀘𑁂𑀦,
𑀦𑀺𑀫𑀮𑀁 𑀫𑀮𑀯𑀸𑀳𑀺𑀦𑀸;
𑀬𑁄 𑀲𑁄 𑀓𑀸𑀬𑁂𑀦 𑀮𑀪𑁂𑀣,
𑀓𑀺𑀁𑀦𑀮𑀤𑁆𑀥𑀁 𑀪𑀯𑁂 𑀦𑀼𑀓𑀺𑀁.
𑀥𑀫𑁆𑀫𑀢𑁆𑀣𑀓𑀸𑀫𑀫𑁄𑀓𑁆𑀔𑀸𑀦𑀁,
𑀧𑀸𑀡𑀁 𑀲𑀁𑀲𑀺𑀤𑁆𑀥𑀺𑀓𑀸𑀭𑀡𑀁;
𑀢𑀦𑁆𑀦𑀺𑀖𑀸𑀢𑀸 𑀓𑀺𑀦𑁆𑀦𑀳𑀢𑀁,
𑀭𑀓𑁆𑀔𑀦𑀸 𑀓𑀺𑀦𑁆𑀦𑀭𑀓𑁆𑀔𑀺𑀢𑀁.
𑀅𑀢𑁆𑀢𑀸 ¶ 𑀩𑀦𑁆𑀥𑀼 𑀫𑀦𑀼𑀲𑁆𑀲𑀲𑁆𑀲,
𑀭𑀺𑀧𑀼 𑀅𑀢𑁆𑀢𑀸𑀯 𑀚𑀦𑁆𑀢𑀼𑀦𑀁;
𑀅𑀢𑁆𑀢𑀸𑀯 𑀦𑀺𑀬𑀢𑁄 𑀜𑀸𑀢𑀺,
𑀅𑀢𑁆𑀢𑀸𑀯 𑀦𑀺𑀬𑀢𑁄 𑀭𑀺𑀧𑀼.
𑀅𑀢𑁆𑀢𑀦𑁄𑀧𑀭𑀺𑀘𑀸𑀕𑁂𑀦,
𑀬𑀁𑀲𑀺𑀢𑀫𑀦𑀼𑀭𑀓𑁆𑀔𑀦𑀁;
𑀓𑀭𑁄𑀦𑁆𑀢𑀺 𑀲𑀚𑁆𑀚𑀦𑀸𑀬𑁂𑀯,
𑀦 𑀢𑀁 𑀦𑀻𑀢𑀺𑀫𑀢𑀸 𑀫𑀢𑀁.
𑀢𑀺𑀡𑀸𑀦𑀺 ¶ 𑀪𑀽𑀫𑀺𑀭𑀼𑀤𑀓𑀁,
𑀘𑀢𑀼𑀢𑁆𑀣𑀻 𑀯𑀸𑀓𑁆𑀬𑀲𑀼𑀝𑁆𑀞𑀼𑀢𑀸;
𑀏𑀢𑀸𑀦𑀺 𑀳𑀺 𑀲𑀢𑀁𑀕𑁂𑀳𑁂,
𑀦𑁄𑀙𑀺𑀦𑁆𑀤𑀦𑁆𑀢𑁂 𑀓𑀤𑀸𑀘𑀺𑀧𑀺.
𑀅𑀫𑁆𑀩𑀼𑀁 𑀧𑀺𑀯𑀦𑁆𑀢𑀺𑀦𑁄 𑀦𑀚𑁆𑀚𑁄,
𑀭𑀼𑀓𑁆𑀔𑁄 𑀔𑀸𑀤𑀢𑀺𑀦𑁄 𑀨𑀮𑀁;
𑀫𑁂𑀖𑁄 𑀓𑁆𑀯𑀘𑀺𑀧𑀺 𑀦𑁄 𑀲𑀲𑁆𑀲𑀁,
𑀧𑀭𑀢𑁆𑀣𑀸𑀬 𑀲𑀢𑀁𑀥𑀦𑀁.
𑀲𑀢𑀁 𑀨𑀭𑀼𑀲𑀯𑀸𑀘𑀸𑀳𑀺,
𑀦𑀬𑀸𑀢𑀺 𑀯𑀺𑀓𑀢𑀺𑀁 𑀫𑀦𑁄;
𑀢𑀺𑀡𑀼𑀓𑁆𑀓𑀸𑀳𑀺 𑀦𑀲𑀓𑁆𑀓𑀸𑀯,
𑀢𑀸𑀧𑁂𑀢𑀼𑀁 𑀲𑀸𑀕𑀭𑁂 𑀚𑀮𑀁.
𑀲𑀫𑁆𑀧𑀢𑁆𑀬𑀁 ¶ 𑀫𑀳𑀢𑁆𑀢𑀁𑀘𑁂𑀢𑁄,
𑀪𑀯𑀢𑁆𑀬𑀼𑀧𑁆𑀧𑀮𑀓𑁄𑀫𑀮𑀁;
𑀯𑀺𑀧𑁆𑀧𑀢𑁆𑀬𑀜𑁆𑀘 𑀫𑀳𑀸𑀲𑁂𑀮𑁂,
𑀲𑀺𑀮𑀸𑀲𑀗𑁆𑀖𑀸𑀤𑀓𑀓𑁆𑀓𑀲𑁄.
𑀅𑀢𑁆𑀣𑀁 𑀫𑀳𑀦𑁆𑀢𑀫𑀸𑀧𑀚𑁆𑀚,
𑀯𑀺𑀚𑁆𑀚𑀁 𑀲𑀫𑁆𑀧𑀢𑁆𑀢𑀺𑀫𑁂𑀯𑀘;
𑀘𑀭𑁂𑀬𑁆𑀬𑀸𑀫𑀸𑀦𑀣𑀤𑁆𑀥𑁄𑀬𑁄,
𑀧𑀡𑁆𑀟𑀺𑀢𑁄 𑀲𑁄 𑀧𑀯𑀼𑀘𑁆𑀘𑀢𑀺.
𑀦𑀸𑀮𑀩𑁆𑀪𑀫𑀪𑀺𑀧𑀢𑁆𑀣𑁂𑀦𑁆𑀢𑀺 ¶ ,
𑀦𑀝𑁆𑀞𑀫𑁆𑀧𑀺 𑀦𑀘𑀲𑁄𑀘𑀭𑁂;
𑀯𑀺𑀧𑁆𑀧𑀢𑁆𑀬𑀜𑁆𑀘 𑀦𑀫𑀼𑀬𑁆𑀳𑀦𑁆𑀢𑀺,
𑀬𑁂𑀦𑀭𑀸 𑀢𑁂𑀯 𑀧𑀡𑁆𑀟𑀺𑀢𑁄.
𑀕𑀡𑁆𑀞𑀺𑀝𑁆𑀞𑀸𑀦𑁂 𑀏𑀓𑀧𑀤𑁂,
𑀦𑀸𑀢𑀺𑀫𑀜𑁆𑀜𑁂𑀬𑁆𑀬 𑀧𑀡𑁆𑀟𑀺𑀢𑁄;
𑀓𑀺𑀁 𑀅𑀓𑁆𑀓𑁄 𑀯𑁂𑀴𑀼𑀧𑀩𑁆𑀪𑀸𑀭𑁄,
𑀢𑀺𑀫𑀳𑀸𑀤𑀻𑀧𑀪𑀸𑀦𑀼𑀤𑁄.
𑀕𑀼𑀡𑀤𑁄𑀲𑁂𑀲𑀼𑀫𑁂𑀓𑁂𑀦,
𑀦𑀢𑁆𑀣𑀺 𑀓𑁄𑀘𑀺 𑀯𑀺𑀯𑀚𑁆𑀚𑀺𑀢𑁄;
𑀲𑀼𑀔𑀼𑀫𑀸𑀮𑀲𑁆𑀲 𑀧𑀤𑀼𑀫𑀲𑁆𑀲,
𑀦𑀴𑀸 𑀪𑀯𑀢𑀺 𑀓𑀓𑁆𑀓𑀲𑀸.
𑀲𑀼𑀫𑀳𑀦𑁆𑀢𑀸𑀦𑀺 ¶ 𑀲𑀢𑁆𑀣𑀸𑀦𑀺,
𑀥𑀸𑀭𑀬𑀦𑁆𑀢𑁄 𑀩𑀳𑀼𑀲𑁆𑀲𑀼𑀢𑀸;
𑀙𑁂𑀢𑁆𑀢𑀸𑀭𑁄 𑀲𑀁𑀲𑀬𑀸𑀦𑀦𑁆𑀢𑀼,
𑀓𑀺𑀮𑀦𑁆𑀢𑁂 𑀮𑁄𑀪𑀫𑁄𑀳𑀢𑀸.
𑀤𑁄𑀲𑀫𑁆𑀧𑀺 𑀲𑀕𑀼𑀡𑁂 𑀤𑀺𑀲𑁆𑀯𑀸,
𑀕𑀼𑀡𑀯𑀸𑀤𑀻 𑀯𑀤𑀦𑁆𑀢𑀺𑀦𑁄;
𑀦 𑀮𑁄𑀓𑁄 𑀯𑀺𑀚𑁆𑀚𑀫𑀸𑀦𑀫𑁆𑀧𑀺,
𑀘𑀦𑁆𑀤𑁂 𑀧𑀲𑁆𑀲𑀢𑀺 𑀮𑀜𑁆𑀙𑀦𑀁.
𑀦𑀺𑀧𑀼𑀡𑁂 ¶ 𑀲𑀼𑀢𑀫𑁂𑀲𑁂𑀬𑁆𑀬,
𑀯𑀺𑀘𑀺𑀦𑀺𑀢𑁆𑀯𑀸 𑀲𑀼𑀢𑀢𑁆𑀣𑀺𑀓𑁄;
𑀪𑀢𑁆𑀢𑀁 𑀳𑀼𑀓𑁆𑀔𑀮𑀺𑀬𑀁 𑀧𑀓𑁆𑀓𑀁,
𑀪𑀸𑀚𑀦𑀁𑀧𑀺 𑀢𑀣𑀸 𑀪𑀯𑁂.
𑀕𑀼𑀡𑀸 𑀓𑀼𑀩𑁆𑀩𑀦𑁆𑀢𑀺 𑀤𑀽𑀢𑀢𑁆𑀢𑀁,
𑀤𑀽𑀭𑁂𑀧𑀺 𑀯𑀲𑀢𑀁 𑀲𑀢𑀁;
𑀓𑁂𑀢𑀓𑁂 𑀕𑀦𑁆𑀥 𑀖𑀸𑀲𑀸𑀬,
𑀕𑀘𑁆𑀙𑀦𑁆𑀢𑀺 𑀪𑀫𑀭𑀸 𑀲𑀬𑀁.
𑀧𑀡𑁆𑀟𑀺𑀢𑁄 𑀲𑀼𑀢𑀲𑀫𑁆𑀧𑀦𑁆𑀦𑁄,
𑀬𑀢𑁆𑀣𑀅𑀢𑁆𑀣𑀻𑀢𑀺 𑀘𑁂𑀲𑀼𑀢𑁄;
𑀫𑀳𑀼𑀲𑁆𑀲𑀸𑀳𑁂𑀦 𑀢𑀁𑀞𑀸𑀦𑀁,
𑀕𑀦𑁆𑀢𑀩𑁆𑀩𑀁 𑀲𑀼𑀢𑀭𑁂𑀲𑀺𑀦𑀸.
𑀲𑀩𑁆𑀩𑀲𑀼𑀢𑀁 ¶ 𑀫𑀥𑀻𑀬𑁂𑀣,
𑀳𑀻𑀦𑀫𑀼𑀓𑁆𑀓𑀝𑁆𑀞 𑀫𑀚𑁆𑀛𑀺𑀫𑀁;
𑀲𑀩𑁆𑀩𑀲𑁆𑀲𑀅𑀢𑁆𑀣𑀁 𑀚𑀸𑀦𑁂𑀬𑁆𑀬,
𑀦𑀘 𑀲𑀩𑁆𑀩𑀁 𑀧𑀬𑁄𑀚𑀬𑁂;
𑀳𑁄𑀢𑀺 𑀢𑀸𑀤𑀺𑀲𑀓𑁄𑀓𑀸𑀮𑁄,
𑀬𑀢𑁆𑀣 𑀅𑀢𑁆𑀣𑀸𑀯𑀳𑀁 𑀲𑀼𑀢𑀁.
𑀞𑀺𑀢𑁄 𑀘𑀺𑀭𑀢𑁆𑀢𑀦𑀁 𑀦𑀻𑀭𑁂,
𑀲𑀓𑁆𑀔𑀭𑁄 𑀦𑀦𑁆𑀢𑀭𑀁𑀲𑀼𑀢𑁄;
𑀤𑀩𑁆𑀪𑁄 𑀦𑀻𑀭𑀦𑁆𑀢𑀺𑀓𑁂 𑀚𑀸𑀢𑁄,
𑀲𑀩𑁆𑀩𑀓𑀸𑀮𑀦𑁆𑀢𑀭𑀁𑀲𑀼𑀢𑁄.
𑀯𑀲𑀼𑀁 ¶ 𑀕𑀡𑁆𑀳𑀦𑁆𑀢𑀺 𑀤𑀽𑀭𑀝𑁆𑀞𑀸,
𑀧𑀩𑁆𑀩𑀢𑁂 𑀭𑀢𑀦𑁄𑀘𑀺𑀢𑁂;
𑀦 𑀫𑀺𑀮𑀓𑁆𑀔𑀸 𑀲𑀫𑀻𑀧𑀝𑁆𑀞𑀸,
𑀏𑀯𑀁 𑀩𑀸𑀮𑀸 𑀩𑀳𑀼𑀲𑁆𑀲𑀼𑀢𑁂.
𑀳𑀺𑀭𑀜𑁆𑀜𑁂𑀦 𑀫𑀺𑀕𑀸𑀦𑀁𑀯,
𑀲𑀼𑀲𑀻𑀮𑀁𑀧𑀺 𑀅𑀲𑀻𑀮𑀺𑀦𑁄;
𑀅𑀥𑀫𑁆𑀫𑀺𑀓𑀲𑁆𑀲 𑀥𑀫𑁆𑀫𑁂𑀦,
𑀩𑀸𑀮𑀸𑀦𑀁𑀧𑀺 𑀲𑀼𑀢𑁂𑀦 𑀓𑀺𑀁.
𑀲𑀼𑀢𑁂𑀦 ¶ 𑀳𑀤𑀬𑀝𑁆𑀞𑁂𑀦,
𑀔𑀮𑁄 𑀦𑁂𑀯𑀲𑀼𑀲𑀻𑀮𑀯𑀸;
𑀫𑀥𑀼𑀦𑀸 𑀓𑁄𑀝𑀭𑀝𑁆𑀞𑁂𑀦,
𑀦𑀺𑀫𑁆𑀩𑁄 𑀓𑀺𑀁 𑀫𑀥𑀼𑀭𑀸𑀬𑀢𑁂.
𑀲𑀓𑀺𑀁𑀧𑀺 𑀯𑀺𑀜𑁆𑀜𑀼 𑀥𑀻𑀭𑁂𑀦,
𑀓𑀭𑁄𑀢𑀺 𑀲𑀳𑀲𑀗𑁆𑀕𑀫𑀁;
𑀅𑀢𑁆𑀢𑀢𑁆𑀣𑀜𑁆𑀘 𑀧𑀭𑀢𑁆𑀣𑀜𑁆𑀘,
𑀦𑀺𑀩𑁆𑀩𑀸𑀦𑀦𑁆𑀢𑀁 𑀲𑀼𑀔𑀁 𑀮𑀪𑁂.
𑀳𑀁𑀲𑁄 𑀫𑀚𑁆𑀛𑁂 𑀦𑀓𑀸𑀓𑀸𑀦𑀁,
𑀲𑀻𑀳𑁄 𑀕𑀼𑀦𑁆𑀦𑀁 𑀦𑀲𑁄𑀪𑀢𑀺;
𑀕𑀤𑁆𑀭𑀪𑀸𑀦𑀁 𑀢𑀼𑀭𑀗𑁆𑀕𑁄𑀦𑁄,
𑀩𑀸𑀮𑀸𑀦𑀜𑁆𑀘 𑀦𑀧𑀡𑁆𑀟𑀺𑀢𑁄.
𑀆𑀓𑀺𑀡𑁆𑀡𑁄𑀧𑀺 ¶ 𑀅𑀲𑀩𑁆𑀪𑀻𑀯,
𑀅𑀲𑀁𑀲𑀝𑁆𑀞𑁄𑀯 𑀪𑀤𑁆𑀤𑀓𑁄;
𑀩𑀳𑀼𑀦𑀸 𑀲𑀦𑁆𑀦𑀚𑀸𑀢𑁂𑀦,
𑀕𑀘𑁆𑀙𑁂 𑀦𑀼𑀫𑁆𑀫𑀢𑁆𑀢𑀓𑁂𑀦𑀺𑀥.
𑀦𑀤𑀻𑀢𑀺𑀭𑁂 𑀔𑀢𑁂𑀓𑀽𑀧𑁂,
𑀅𑀭𑀡𑀻𑀢𑀸𑀮𑀯𑀡𑁆𑀝𑀓𑁂;
𑀦𑀯𑀤𑁂 𑀆𑀧𑀸𑀤𑀺 𑀦𑀢𑁆𑀣𑀻𑀢𑀺,
𑀫𑀼𑀔𑁂𑀘 𑀯𑀘𑀦𑀁 𑀢𑀣𑀸.
𑀲𑀼𑀢𑀲𑀦𑁆𑀦𑀺𑀘𑁆𑀘𑀬𑀸 ¶ 𑀥𑀻𑀭𑀸,
𑀢𑀼𑀡𑁆𑀳𑀺𑀪𑀽𑀢𑀸 𑀅𑀧𑀼𑀘𑁆𑀙𑀺𑀢𑀸;
𑀧𑀼𑀡𑁆𑀡𑀸 𑀲𑀼𑀪𑀸𑀲𑀺𑀢𑁂𑀦𑀸𑀧𑀺,
𑀖𑀡𑁆𑀟𑀸𑀤𑁆𑀬𑀖𑀝𑀺𑀢𑀸𑀬𑀣𑀸.
𑀅𑀧𑀼𑀝𑁆𑀞𑁄 𑀧𑀡𑁆𑀟𑀺𑀢𑁄 𑀪𑁂𑀭𑀻,
𑀧𑀚𑁆𑀚𑀼𑀦𑁆𑀦𑁄 𑀳𑁄𑀢𑀺 𑀧𑀼𑀘𑁆𑀙𑀺𑀢𑁄;
𑀩𑀸𑀮𑁄 𑀧𑀼𑀝𑁆𑀞𑁄 𑀅𑀧𑀼𑀝𑁆𑀞𑁄𑀘,
𑀩𑀳𑀼𑀁 𑀯𑀺𑀓𑀢𑁆𑀢𑀢𑁂 𑀲𑀤𑀸.
𑀲𑀫𑁆𑀧𑀦𑁆𑀦𑀕𑀼𑀡𑀸 𑀮𑀗𑁆𑀓𑀸𑀭𑁄,
𑀲𑀩𑁆𑀩𑀲𑀢𑁆𑀢 𑀳𑀺𑀢𑀸𑀯𑀳𑁄;
𑀦𑀘𑀭𑁂𑀬𑁆𑀬 𑀧𑀭𑀢𑁆𑀢𑀢𑁆𑀣𑀁,
𑀓𑀼𑀢𑁄 𑀲𑁄 𑀧𑀡𑁆𑀟𑀺𑀢𑁄 𑀪𑀯𑁂.
𑀲𑀧𑀭𑀢𑁆𑀣𑀁 ¶ 𑀘𑀭𑁂 𑀥𑀻𑀭𑁄,
𑀅𑀲𑀓𑁆𑀓𑁄𑀦𑁆𑀢𑁄 𑀲𑀓𑀁 𑀘𑀭𑁂;
𑀢𑀣𑀸𑀧𑀺𑀘 𑀅𑀲𑀓𑁆𑀓𑁄𑀦𑁆𑀢𑁄,
𑀧𑀸𑀧𑀸𑀢𑁆𑀢𑀸𑀦𑀁 𑀯𑀺𑀬𑁄𑀚𑀬𑁂.
𑀩𑀸𑀮𑁂𑀘𑀼𑀫𑁆𑀫𑀢𑁆𑀢𑀓𑁂 𑀪𑀽𑀧𑁂,
𑀕𑀼𑀭𑀼𑀫𑀸𑀢𑀸𑀧𑀺𑀢𑀽𑀲𑁆𑀯𑀧𑀺;
𑀦𑀤𑁄𑀲𑀁 𑀓𑀭𑀺𑀬𑀸 𑀧𑀜𑁆𑀜𑁄,
𑀲𑀗𑁆𑀖𑁂𑀘 𑀚𑁂𑀝𑁆𑀞𑀪𑀸𑀢𑀭𑀺.
𑀅𑀢𑁆𑀣𑀦𑀸𑀲𑀁 ¶ 𑀫𑀦𑁄𑀢𑀸𑀧𑀁,
𑀖𑀭𑁂𑀤𑀼𑀘𑁆𑀘𑀭𑀺𑀢𑀸𑀦𑀺𑀘;
𑀯𑀜𑁆𑀘𑀦𑀁 𑀅𑀯𑀫𑀸𑀦𑀜𑁆𑀘,
𑀫𑀢𑀺𑀫𑀸 𑀦𑀧𑀓𑀸𑀲𑀬𑁂.
𑀧𑀭𑀤𑀸𑀦𑀁 𑀚𑀦𑁂𑀢𑁆𑀢𑀻𑀯,
𑀮𑁂𑀝𑁆𑀝𑀼𑀯 𑀧𑀭𑀤𑀩𑁆𑀩𑀓𑀁;
𑀅𑀢𑁆𑀢𑀸𑀯 𑀲𑀩𑁆𑀩𑀪𑀽𑀢𑀸𑀦𑀺,
𑀬𑁄 𑀧𑀲𑁆𑀲𑀢𑀺 𑀲𑁄 𑀧𑀲𑁆𑀲𑀢𑀺.
𑀧𑀭𑀽𑀧𑀯𑀸𑀤𑁂 𑀧𑀥𑀺𑀭𑁄,
𑀧𑀭𑀯𑀚𑁆𑀚𑁂𑀲𑁆𑀯𑀮𑁄𑀘𑀦𑁄;
𑀧𑀗𑁆𑀕𑀼𑀮𑁄 𑀅𑀜𑁆𑀜𑀦𑀸𑀭𑀻𑀲𑀼,
𑀤𑀼𑀲𑁆𑀲𑀓𑀧𑁆𑀧𑁂𑀲𑁆𑀯𑀘𑁂𑀢𑀦𑁄.
𑀲𑀩𑁆𑀩𑀁 𑀲𑀼𑀡𑀸𑀢𑀺 𑀲𑁄𑀢𑁂𑀦,
𑀲𑀩𑁆𑀩𑀁 𑀧𑀲𑁆𑀲𑀢𑀺 𑀘𑀓𑁆𑀔𑀼𑀦𑀸;
𑀦𑀘𑀤𑀺𑀝𑁆𑀞𑀁 𑀲𑀼𑀢𑀁 𑀥𑀻𑀭𑁄,
𑀲𑀩𑁆𑀩𑀁 𑀉𑀘𑁆𑀘𑀺𑀢𑀼𑀫𑀭𑀳𑀢𑀺.
𑀘𑀓𑁆𑀔𑀼𑀫𑀲𑁆𑀲 𑀬𑀣𑀸𑀅𑀦𑁆𑀥𑁄,
𑀲𑁄𑀢𑀯𑀸 𑀧𑀥𑀺𑀭𑁄𑀬𑀣𑀸;
𑀧𑀜𑁆𑀜𑀸𑀯𑀸𑀲𑁆𑀲 𑀬𑀣𑀸𑀫𑀽𑀕𑁄,
𑀩𑀮𑀯𑀸 𑀤𑀼𑀩𑁆𑀩𑀮𑁄𑀭𑀺𑀯;
𑀅𑀣 𑀅𑀢𑁆𑀣𑁂𑀲𑀫𑀼𑀧𑁆𑀧𑀦𑁆𑀦𑁂,
𑀲𑀬𑁂𑀣 𑀫𑀢𑀲𑀸𑀬𑀺𑀢𑀁.
𑀧𑀸𑀧𑀫𑀺𑀢𑁆𑀢𑁂 ¶ 𑀯𑀺𑀯𑀚𑁆𑀚𑁂𑀢𑁆𑀯𑀸,
𑀪𑀚𑁂𑀬𑁆𑀬𑀼 𑀢𑁆𑀢𑀫𑀧𑀼𑀕𑁆𑀕𑀮𑀁;
𑀑𑀯𑀸𑀤𑁂𑀘𑀲𑁆𑀲 𑀢𑀺𑀝𑁆𑀞𑁂𑀬𑁆𑀬,
𑀧𑀢𑁆𑀣𑁂𑀦𑁆𑀢𑁄 𑀅𑀘𑀮𑀁𑀲𑀼𑀔𑀁.
𑀲𑀼𑀲𑀼𑀲𑀸 𑀲𑀼𑀢𑀯𑀟𑁆𑀠𑀦𑀁,
𑀲𑀼𑀢𑀁 𑀧𑀜𑁆𑀜𑀸𑀬𑀯𑀟𑁆𑀠𑀦𑀁;
𑀧𑀜𑁆𑀜𑀸𑀬 𑀅𑀢𑁆𑀣𑀁 𑀚𑀸𑀦𑀸𑀢𑀺,
𑀜𑀸𑀢𑁄 𑀅𑀢𑁆𑀣𑁄 𑀲𑀼𑀔𑀸𑀯𑀳𑁄.
𑀧𑀸𑀫𑁄𑀚𑁆𑀚 ¶ 𑀓𑀭𑀡𑀁 𑀞𑀸𑀦𑀁,
𑀧𑀲𑀁𑀲𑀸𑀯𑀳𑀦𑀁𑀲𑀼𑀔𑀁;
𑀨𑀮𑀸𑀦𑀺𑀲𑀁𑀲𑁄 𑀪𑀸𑀯𑁂𑀢𑀺,
𑀯𑀳𑀦𑁆𑀢𑁄 𑀧𑁄𑀭𑀺𑀲𑁆𑀲𑀁𑀥𑀼𑀭𑀁.
𑀅𑀢𑀺𑀲𑀻𑀢𑀁 𑀅𑀢𑀺𑀉𑀡𑁆𑀳𑀁,
𑀅𑀢𑀺𑀲𑀸𑀬 𑀫𑀺𑀤𑀁𑀅𑀳𑀼;
𑀇𑀢𑀺 𑀯𑀺𑀲𑀝𑁆𑀞 𑀓𑀫𑁆𑀫𑀦𑁆𑀢𑁂,
𑀔𑀡𑀸 𑀅𑀘𑁆𑀘𑀦𑁆𑀢𑀺 𑀫𑀸𑀡𑀯𑁂.
𑀬𑁄𑀘 ¶ 𑀲𑀻𑀢𑀜𑁆𑀘 𑀉𑀡𑁆𑀳𑀜𑁆𑀘,
𑀢𑀺𑀡𑀸𑀢𑀺𑀬𑁄 𑀦𑀫𑀜𑁆𑀜𑀢𑀺;
𑀓𑀭𑀁 𑀧𑀼𑀭𑀺𑀲 𑀓𑀺𑀘𑁆𑀘𑀸𑀦𑀺,
𑀲𑁄 𑀲𑀼𑀔𑀸 𑀦𑀯𑀺𑀳𑀸𑀬𑀢𑀺.
𑀬𑀲𑀮𑀸𑀪𑀁 𑀚𑀺𑀕𑀻𑀲𑀦𑁆𑀢𑀁,
𑀦𑀭𑀁 𑀯𑀚𑁆𑀚𑁂𑀦𑁆𑀢𑀺 𑀤𑀽𑀭𑀢𑁄;
𑀅𑀧𑀢𑁆𑀣𑁂𑀢𑁆𑀯𑀸𑀦 𑀢𑁂 𑀢𑀲𑁆𑀫𑀸,
𑀢𑀁𑀫𑀕𑁆𑀕𑀁 𑀫𑀕𑁆𑀕𑀬𑁂 𑀩𑀼𑀥𑁄.
𑀤𑁂𑀲𑀫𑁄𑀲𑀚𑁆𑀚 𑀕𑀘𑁆𑀙𑀦𑁆𑀢𑀺,
𑀲𑀻𑀳𑀸 𑀲𑀧𑁆𑀧𑀼𑀭𑀺𑀲𑀸 𑀕𑀚𑀸;
𑀢𑀢𑁆𑀣𑁂𑀯 𑀦𑀺𑀥𑀦𑀁 𑀬𑀦𑁆𑀢𑀺,
𑀓𑀸𑀓𑀸 𑀓𑀸𑀧𑀼𑀭𑀺𑀲𑀸 𑀫𑀺𑀕𑀸.
𑀬𑀲𑁆𑀫𑀺𑀁𑀤𑁂𑀲𑁂 ¶ 𑀦𑀲𑀫𑁆𑀫𑀸𑀭𑁄,
𑀦𑀧𑀺𑀢𑀺 𑀦𑀘𑀩𑀦𑁆𑀥𑀯𑀸;
𑀦𑀘𑀯𑀺𑀚𑁆𑀚𑀸𑀕𑀫𑁄 𑀓𑁄𑀘𑀺,
𑀦𑀢𑀢𑁆𑀣 𑀯𑀲𑀢𑀻 𑀯𑀲𑁆𑀲𑁂.
𑀥𑀦𑀯𑀸 𑀕𑀡𑀓𑁄 𑀭𑀸𑀚𑀸,
𑀦𑀤𑀻 𑀯𑁂𑀚𑁆𑀚𑀸 𑀇𑀫𑁂𑀚𑀦𑀸;
𑀬𑀢𑁆𑀣 𑀧𑀜𑁆𑀘 𑀦𑀯𑀺𑀚𑁆𑀚𑀦𑁆𑀢𑁂,
𑀦 𑀢𑀢𑁆𑀣𑀯𑀲𑀢𑀻 𑀯𑀲𑁂.
𑀅𑀲𑀦𑀁 ¶ 𑀪𑀬𑀫𑀦𑁆𑀢𑀸𑀦𑀁,
𑀫𑀘𑁆𑀘𑀸𑀦𑀁 𑀫𑀭𑀡𑀁 𑀪𑀬𑀁;
𑀉𑀢𑁆𑀢𑀫𑀸𑀦𑀦𑁆𑀢𑀼𑀲𑀩𑁆𑀩𑁂𑀲𑀁,
𑀅𑀯𑀫𑀸𑀦𑀁 𑀧𑀭𑀁 𑀪𑀬𑀁.
𑀅𑀫𑀸𑀦𑀦𑀸 𑀬𑀢𑁆𑀣 𑀲𑀺𑀬𑀸,
𑀲𑀦𑁆𑀢𑀸𑀦𑀁 𑀅𑀯𑀫𑀸𑀦𑀦𑀸;
𑀳𑀻𑀦𑀲𑀫𑀸𑀦𑀦𑀸𑀯𑀸𑀧𑀺,
𑀦 𑀢𑀢𑁆𑀣𑀯𑀲𑀢𑀺 𑀯𑀲𑁂.
𑀬𑀢𑁆𑀣𑀸𑀮𑀲𑁄𑀘 𑀤𑀓𑁆𑀔𑁄𑀘,
𑀲𑀽𑀭𑁄 𑀪𑀻𑀭𑀼𑀘 𑀧𑀽𑀚𑀺𑀢𑁄;
𑀦 𑀲𑀦𑁆𑀢𑀸 𑀢𑀢𑁆𑀣 𑀯𑀲𑁆𑀲𑀦𑁆𑀢𑀺,
𑀅𑀯𑀺𑀲𑁂𑀲𑀓𑀭𑁂𑀦 𑀓𑁄.
𑀤𑀼𑀓𑁆𑀔𑁄 ¶ 𑀦𑀺𑀯𑀸𑀲𑁄 𑀲𑀫𑁆𑀩𑀸𑀥𑁂,
𑀞𑀸𑀦𑁂 𑀅𑀲𑀼𑀘𑀺𑀲𑀗𑁆𑀓𑀝𑁂;
𑀢𑀢𑁄 𑀭𑀺𑀫𑁆𑀳𑀺𑀧𑀺𑀬𑀸𑀦𑀦𑁆𑀢𑁂,
𑀢𑀢𑁄𑀘 𑀅𑀓𑀢𑀜𑁆𑀜𑀼𑀦𑀁.
𑀲𑀺𑀗𑁆𑀕𑀻𑀦𑀁 𑀧𑀜𑁆𑀘𑀳𑀢𑁆𑀣𑁂𑀦,
𑀲𑀢𑁂𑀦 𑀯𑀸𑀚𑀺𑀦𑀁 𑀘𑀚𑁂;
𑀳𑀢𑁆𑀣𑀻𑀦𑀦𑁆𑀢𑀼 𑀲𑀳𑀲𑁆𑀲𑁂𑀦,
𑀤𑁂𑀲𑀘𑀸𑀕𑁂𑀦 𑀤𑀼𑀚𑁆𑀚𑀦𑁂.
𑀘𑀚𑁂 ¶ 𑀏𑀓𑀁 𑀓𑀼𑀮𑀲𑁆𑀲𑀢𑁆𑀣𑀁,
𑀕𑀸𑀫𑀲𑁆𑀲𑀢𑁆𑀣𑀁 𑀓𑀼𑀮𑀁 𑀘𑀚𑁂;
𑀕𑀸𑀫𑀁 𑀚𑀦𑀧𑀤𑀲𑁆𑀲𑀢𑁆𑀣𑀁;
𑀅𑀢𑁆𑀢𑀢𑁆𑀣𑀁 𑀧𑀣𑀯𑀻 𑀘𑀚𑁂.
𑀘𑀮𑀢𑁆𑀬𑁂𑀓𑁂𑀦𑀧𑀸𑀤𑁂𑀦,
𑀢𑀺𑀝𑁆𑀞𑀢𑁆𑀬𑁂𑀓𑁂𑀦 𑀧𑀡𑁆𑀟𑀺𑀢𑁄;
𑀅𑀲𑀫𑀺𑀔𑁆𑀬𑀧𑀭𑀁𑀞𑀸𑀦𑀁,
𑀧𑀼𑀩𑁆𑀩𑀫𑀸𑀬𑀦𑀁𑀦𑀘𑀚𑁂.
𑀞𑀸𑀦𑀪𑀝𑁆𑀞𑀸 ¶ 𑀦𑀲𑁄𑀪𑀦𑁆𑀢𑀺,
𑀤𑀦𑁆𑀢𑀸𑀓𑁂𑀲𑀸𑀦 𑀔𑀸𑀦𑀭𑀸;
𑀫𑀢𑀺𑀫𑀸 𑀇𑀢𑀺𑀯𑀺𑀜𑁆𑀜𑀸𑀬,
𑀲𑀞𑀸𑀦𑀁 𑀦𑀘𑀚𑁂 𑀮𑀳𑀼𑀁.
𑀘𑀚𑁂 𑀥𑀦𑀁 𑀅𑀗𑁆𑀕𑀯𑀭𑀲𑁆𑀲𑀳𑁂𑀢𑀼,
𑀅𑀗𑁆𑀕𑀁 𑀘𑀚𑁂 𑀚𑀺𑀯𑀺𑀢𑀁 𑀭𑀓𑁆𑀔𑀫𑀸𑀦𑁄;
𑀅𑀗𑁆𑀕𑀁 𑀥𑀦𑀁 𑀚𑀺𑀯𑀺𑀢𑀜𑁆𑀘𑀸𑀧𑀺 𑀲𑀩𑁆𑀩𑀁,
𑀘𑀚𑁂 𑀦𑀭𑁄 𑀥𑀫𑁆𑀫 𑀫𑀦𑀼𑀲𑁆𑀲𑀭𑀦𑁆𑀢𑁄.
𑀲𑁄𑀢𑀁 ¶ 𑀲𑀼𑀢𑁂𑀦𑁂𑀯 𑀦 𑀓𑀼𑀡𑁆𑀟𑀮𑁂𑀦,
𑀤𑀸𑀦𑁂𑀦 𑀧𑀸𑀡𑀻 𑀦𑀢𑀼 𑀓𑀗𑁆𑀓𑀡𑁂𑀦;
𑀆𑀪𑀸𑀢𑀺 𑀓𑀸𑀬𑁄 𑀧𑀼𑀭𑀺𑀲𑀼𑀢𑁆𑀢𑀫𑀲𑁆𑀲,
𑀧𑀭𑁄𑀧𑀓𑀸𑀭𑁂𑀦 𑀦 𑀘𑀦𑁆𑀤𑀦𑁂𑀦.
𑀲𑀫𑁆𑀪𑁂𑀤𑀓𑀣𑀸
𑀲𑀢𑁆𑀣 ¶ 𑀓𑀧𑁆𑀧𑀯𑀺𑀘𑀸𑀭𑁂𑀦,
𑀓𑀸𑀮𑁄 𑀕𑀘𑁆𑀙𑀢𑀺 𑀥𑀻𑀫𑀢𑀁;
𑀩𑁆𑀬𑀲𑀦𑁂𑀦 𑀅𑀲𑀸𑀥𑀽𑀦𑀁,
𑀦𑀺𑀤𑁆𑀤𑀸𑀬 𑀓𑀮𑀳𑁂𑀦𑀯𑀸.
𑀲𑁄𑀓𑀞𑀸𑀦𑀲𑀳𑀲𑁆𑀲𑀸𑀦𑀺,
𑀪𑀬𑀞𑀸𑀦𑀲𑀢𑀸𑀦𑀺𑀘;
𑀤𑀺𑀯𑀲𑁂𑀤𑀺𑀯𑀲𑁂 𑀫𑀼𑀴𑁆𑀳𑀁,
𑀆𑀯𑀻𑀲𑀦𑁆𑀢𑀺 𑀦𑀧𑀡𑁆𑀟𑀺𑀢𑀁.
𑀅𑀢𑀺𑀤𑀻𑀖𑁄 ¶ 𑀫𑀳𑀸𑀫𑀼𑀴𑁆𑀳𑁄,
𑀫𑀚𑁆𑀛𑀺𑀫𑁄𑀘 𑀯𑀺𑀘𑀓𑁆𑀔𑀡𑁄;
𑀯𑀸𑀲𑀼𑀤𑁂𑀯𑀁 𑀧𑀼𑀭𑀓𑁆𑀔𑀺𑀢𑁆𑀯𑀸,
𑀲𑀩𑁆𑀩𑁂𑀯𑀸𑀫𑀦𑀓𑀸 𑀲𑀝𑁆𑀞𑀸.
𑀦 𑀮𑁄𑀓𑁂 𑀲𑁄𑀪𑀢𑁂 𑀫𑀼𑀴𑁆𑀳𑁄,
𑀓𑁂𑀯𑀮𑀢𑁆𑀢𑀧𑀲𑀁𑀲𑀓𑁄;
𑀅𑀧𑀺 𑀲𑀫𑁆𑀧𑀺𑀳𑀺𑀢𑁂 𑀓𑀽𑀧𑁂,
𑀓𑀢𑀯𑀺𑀚𑁆𑀚𑁄 𑀧𑀓𑀸𑀲𑀢𑁂.
𑀫𑀤𑀦𑁆𑀢𑀤𑀫𑀦𑀁 𑀲𑀢𑁆𑀣𑀁,
𑀔𑀮𑀸𑀦𑀁 𑀓𑀼𑀭𑀼𑀢𑁂 𑀫𑀤𑀁;
𑀘𑀓𑁆𑀔𑀼𑀲𑀗𑁆𑀔𑀸𑀭𑀓𑀁 𑀢𑁂𑀚𑀁,
𑀉𑀮𑀼𑀗𑁆𑀓𑀸𑀦 𑀫𑀺𑀯𑀦𑁆𑀥𑀓𑀁.
𑀅𑀢𑁆𑀬𑀧𑁆𑀧𑀫𑀧𑀺 ¶ 𑀲𑀸𑀥𑀽𑀦𑀁,
𑀲𑀺𑀮𑀸𑀮𑁂𑀔𑁂𑀯 𑀢𑀺𑀝𑁆𑀞𑀢𑁂;
𑀚𑀮𑁂𑀮𑁂𑀔𑁂𑀯 𑀦𑀻𑀘𑀸𑀦𑀁,
𑀬𑀁 𑀓𑀢𑀁 𑀢𑀁𑀧𑀺 𑀦𑀲𑁆𑀲𑀢𑀺.
𑀤𑀩𑁆𑀩𑀫𑀧𑁆𑀧𑀁𑀧𑀺 𑀲𑀸𑀥𑀽𑀦𑀁,
𑀚𑀮𑀁 𑀓𑀽𑀧𑁂𑀯 𑀦𑀺𑀲𑁆𑀲𑀬𑁄;
𑀩𑀳𑀼𑀢𑁆𑀢𑀁𑀧𑀺 𑀅𑀲𑀸𑀥𑀽𑀦𑀁,
𑀦𑀘 𑀯𑀸𑀭𑀺𑀯 𑀅𑀡𑁆𑀡𑀯𑁂.
𑀤𑀼𑀝𑁆𑀞𑀘𑀺𑀢𑁆𑀢𑁄 ¶ 𑀧𑀦𑀸𑀳𑀺𑀲𑁆𑀲,
𑀓𑁄𑀥𑁄 𑀧𑀸𑀲𑀸𑀡𑀮𑀺𑀓𑁆𑀔𑀺𑀢𑁄;
𑀓𑀼𑀚𑁆𑀛𑀺𑀢𑀩𑁆𑀩𑁂 𑀲𑀼𑀚𑀦𑀲𑁆𑀲,
𑀚𑀮𑁂𑀮𑁂𑀔𑀸 𑀘𑀺𑀭𑀝𑁆𑀞𑀺𑀢𑁄.
𑀩𑀸𑀮𑀲𑁆𑀲 𑀚𑀻𑀯𑀺𑀢𑀁 𑀧𑀸𑀧𑀁,
𑀫𑀺𑀢𑀭𑀲𑁆𑀲𑀺 𑀢𑀭𑀁 𑀪𑀯𑁂;
𑀚𑀦𑀓𑀸𑀬𑀲𑁆𑀲 𑀭𑀸𑀚𑀸𑀯,
𑀭𑀸𑀚𑀥𑀫𑁆𑀫𑁄𑀯 𑀭𑀸𑀚𑀼𑀦𑀁.
𑀲𑀧𑁆𑀧𑀸𑀤𑀸𑀦𑀁 𑀩𑀮𑀻 𑀲𑀻𑀳𑁄,
𑀧𑀼𑀴𑀸𑀯𑀓𑁄 𑀢𑀢𑁄 𑀓𑀺𑀧𑁆𑀧𑀻𑀮𑀺𑀓𑀸,
𑀦𑀭𑀸 𑀢𑀢𑁄 𑀩𑀮𑀻 𑀭𑀸𑀚𑀸,
𑀲𑀩𑁆𑀩𑁂𑀲 𑀫𑀦𑁆𑀢𑀓𑁄 𑀩𑀮𑀻.
𑀪𑀽𑀧𑁄𑀡𑁆𑀡𑀯 ¶ 𑀕𑁆𑀕𑀺 𑀣𑀻 𑀲𑀺𑀧𑁆𑀧𑀺,
𑀅𑀪𑀺𑀚𑁆𑀛𑀸𑀮𑀼𑀘𑀧𑀼𑀕𑁆𑀕𑀮𑁄;
𑀏𑀢𑁂𑀲𑀁𑀧𑀺 𑀫𑀳𑀺𑀘𑁆𑀙𑀸𑀦𑀁,
𑀫𑀳𑀺𑀘𑁆𑀙𑀺𑀢𑀸 𑀅𑀦𑀺𑀘𑁆𑀘𑀢𑀸.
𑀦𑀺𑀤𑁆𑀤𑀸𑀮𑀼𑀓𑁄 𑀅𑀲𑀦𑁆𑀢𑀼𑀝𑁆𑀞𑁄,
𑀅𑀓𑀢𑀜𑁆𑀜𑀽𑀘 𑀪𑀻𑀭𑀼𑀓𑁄;
𑀲𑀓𑁆𑀓𑀼𑀡𑀦𑁆𑀢𑀺𑀦 𑀲𑀸𑀘𑀸𑀭𑀁,
𑀲𑀺𑀓𑁆𑀔𑀺𑀢𑀼𑀁 𑀢𑁂 𑀓𑀤𑀸𑀘𑀺𑀧𑀺.
𑀦𑀺𑀤𑁆𑀤𑀸𑀮𑀼 ¶ 𑀓𑀸𑀫𑀭𑀸𑀫𑁄𑀘,
𑀲𑀼𑀔𑀺𑀢𑁄 𑀪𑁄𑀕𑀯𑀸𑀮𑀲𑁄;
𑀦𑀺𑀘𑁆𑀙𑀦𑁆𑀢𑁄 𑀓𑀫𑁆𑀫𑀭𑀸𑀫𑁄 𑀘,
𑀲𑀢𑁆𑀢𑁂𑀢𑁂 𑀲𑀢𑁆𑀣𑀯𑀚𑁆𑀚𑀺𑀢𑀸.
𑀲𑀫𑀺𑀤𑁆𑀥𑁄 𑀥𑀦𑀥𑀜𑁆𑀜𑁂𑀦,
𑀓𑀝𑁆𑀞𑁄 𑀤𑀓𑀢𑀺𑀡𑀕𑁆𑀕𑀺𑀳𑀺;
𑀲𑀩𑁆𑀩𑀢𑁄 𑀤𑀼𑀕𑁆𑀕𑀢𑁂𑀦𑀝𑁆𑀞𑁄,
𑀢𑀲𑁆𑀫𑀸 𑀦𑀤𑀼𑀓𑁆𑀓𑀢𑀁 𑀓𑀭𑁂.
𑀧𑀼𑀜𑁆𑀜𑀧𑀸𑀧𑀨𑀮𑀁 ¶ 𑀬𑁄 𑀘𑁂,
𑀦𑀲𑀤𑁆𑀥𑀳𑀢𑀺 𑀲𑀘𑁆𑀘𑀢𑁄;
𑀲𑁄 𑀯𑁂 𑀔𑀺𑀧𑁆𑀧𑀁𑀯 𑀅𑀢𑁆𑀢𑀸𑀦𑀁,
𑀆𑀤𑀸𑀲𑀢𑀮𑀫𑀸𑀦𑀬𑁂.
𑀲𑀫𑁆𑀧𑀭𑀸𑀬𑀺𑀓𑀫𑀢𑁆𑀣𑀁 𑀬𑁄,
𑀦𑀲𑀤𑁆𑀥𑀳𑀢𑀺 𑀘𑁂𑀧𑀺𑀲𑁄;
𑀆𑀯𑀸𑀲𑁂 𑀲𑀕𑁆𑀕 𑀕𑀸𑀫𑀻𑀦𑀁,
𑀫𑀸𑀓𑁆𑀓𑀪𑁂 𑀓𑀺𑀁𑀦𑀧𑀲𑁆𑀲𑀢𑀺.
𑀫𑀳𑀦𑁆𑀢𑀁 𑀯𑀝𑁆𑀝𑀭𑀼𑀓𑁆𑀔𑀸𑀤𑀺𑀁,
𑀔𑀼𑀤𑁆𑀤𑀩𑀻𑀚𑀁 𑀩𑀳𑀽𑀨𑀮𑀁;
𑀲𑀓𑁆𑀔𑀺𑀓𑀢𑁆𑀯𑀸 𑀉𑀤𑀺𑀓𑁆𑀔𑁂𑀬𑁆𑀬,
𑀧𑀼𑀜𑁆𑀜𑀧𑀸𑀧𑀓𑀭𑁄 𑀦𑀭𑁄.
𑀬𑀲𑁆𑀲 ¶ 𑀲𑀮𑁆𑀮𑀳𑀼𑀓𑀁 𑀳𑁄𑀢𑀺,
𑀕𑀼𑀭𑀼𑀲𑀓𑁆𑀓𑀸𑀭𑀫𑀸𑀦𑀦𑀁;
𑀢𑀲𑁆𑀲 𑀲𑀮𑁆𑀮𑀳𑀼𑀓𑀸𑀬𑁂𑀯,
𑀯𑀺𑀚𑁆𑀚𑀸𑀲𑀫𑁆𑀧𑀢𑁆𑀢𑀺𑀲𑀫𑁆𑀧𑀤𑀸.
𑀉𑀧𑀚𑁆𑀛𑀸𑀘𑀭𑀺𑀬𑀸𑀦𑀜𑁆𑀘,
𑀫𑀸𑀢𑀸𑀧𑀺𑀢𑀽𑀦𑀫𑁂𑀯𑀘;
𑀲𑀓𑁆𑀓𑀘𑁆𑀘𑀁 𑀬𑁄𑀦𑀼𑀧𑀝𑁆𑀞𑀸𑀢𑀺,
𑀲𑀼𑀢𑁄 𑀢𑀲𑁆𑀲𑀧𑀺𑀢𑀸𑀤𑀺𑀲𑁄.
𑀤𑁂𑀲𑁂 𑀤𑁂𑀲𑁂 𑀓𑀼𑀮𑀸𑀦𑀻𑀘,
𑀤𑁂𑀲𑁂𑀤𑁂𑀲𑁂 𑀘 𑀩𑀦𑁆𑀥𑀯𑁄;
𑀢𑀸𑀤𑀺𑀲𑀁 𑀲𑀳𑀚𑀸 𑀬𑀢𑁆𑀣,
𑀤𑁂𑀲𑀁 𑀧𑀲𑁆𑀲𑀸𑀫𑀺𑀦𑁂𑀯𑀢𑀼.
𑀧𑀼𑀢𑁆𑀢𑀁𑀯𑀸 ¶ 𑀪𑀸𑀢𑀭𑀁 𑀤𑀼𑀝𑁆𑀞𑀁,
𑀅𑀦𑀼𑀲𑀸𑀲𑁂𑀬𑁆𑀬 𑀦𑁄𑀚𑀳𑁂;
𑀓𑀺𑀁𑀦𑀼 𑀙𑁂𑀚𑁆𑀚𑀁 𑀓𑀭𑀁𑀧𑀸𑀤𑀁,
𑀮𑀺𑀢𑁆𑀢𑀁 𑀅𑀲𑀼𑀘𑀺𑀦𑀸 𑀲𑀺𑀬𑀸;
𑀩𑀳𑀼𑀧𑀼𑀢𑁆𑀢𑁂 𑀧𑀺𑀢𑀸𑀏𑀓𑁄,
𑀅𑀯𑀲𑁆𑀲𑀁 𑀧𑁄𑀲𑁂𑀢𑀺 𑀲𑀤𑀸;
𑀩𑀳𑀼𑀧𑀼𑀢𑁆𑀢𑀸 𑀦𑀲𑀓𑁆𑀓𑁄𑀦𑁆𑀢𑀺,
𑀧𑁄𑀲𑁂𑀢𑀼𑀁 𑀧𑀺𑀢𑀭𑁂𑀓𑀓𑀁.
𑀅𑀢𑀺𑀚𑀸𑀢𑀫𑀦𑀼𑀚𑀸𑀢𑀁 ¶ ,
𑀧𑀼𑀢𑁆𑀢𑀫𑀺𑀘𑁆𑀙𑀦𑁆𑀢𑀺 𑀧𑀡𑁆𑀟𑀺𑀢𑀸;
𑀅𑀯𑀚𑀸𑀢𑀁 𑀦𑀇𑀘𑁆𑀙𑀦𑁆𑀢𑀺,
𑀬𑁄𑀳𑁄𑀢𑀺 𑀓𑀼𑀮𑀕𑀦𑁆𑀥𑀦𑁄.
𑀧𑀜𑁆𑀘𑀞𑀸𑀦𑀸𑀦𑀺 𑀲𑀫𑁆𑀧𑀲𑁆𑀲𑀁,
𑀧𑀼𑀢𑁆𑀢𑀫𑀺𑀘𑁆𑀙𑀦𑁆𑀢𑀺 𑀧𑀡𑁆𑀟𑀺𑀢𑀸;
𑀚𑀸𑀢𑁄𑀯𑀸 𑀦𑁄 𑀪𑀭𑀺𑀲𑁆𑀲𑀢𑀺,
𑀓𑀺𑀘𑁆𑀘𑀁𑀯𑀸 𑀦𑁄 𑀓𑀭𑀺𑀲𑁆𑀲𑀢𑀺.
𑀓𑀼𑀮𑀯𑀁𑀲𑁄 ¶ 𑀘𑀺𑀭𑀁 𑀢𑀺𑀝𑁆𑀞𑁂,
𑀤𑀸𑀬𑀚𑁆𑀚𑀁 𑀧𑀝𑀺𑀧𑀘𑁆𑀘𑀢𑀺;
𑀅𑀣𑀯𑀸𑀧𑀦 𑀧𑁂𑀢𑀸𑀦𑀁,
𑀤𑀓𑁆𑀔𑀺𑀡𑀁𑀦𑀼𑀧𑀤𑀲𑁆𑀲𑀢𑀺.
𑀅𑀦𑁆𑀢𑁄𑀚𑀸𑀢𑁄 𑀥𑀦𑀓𑁆𑀓𑀻𑀢𑁄,
𑀤𑀸𑀲𑀩𑁆𑀬𑁄𑀧𑀕𑀢𑁄 𑀲𑀬𑀁;
𑀤𑀸𑀲𑀸𑀓𑀭𑀫𑀭𑀸𑀦𑀻𑀢𑁄,
𑀘𑁆𑀘𑁂𑀯𑀦𑁆𑀢𑁂 𑀘𑀢𑀼𑀥𑀸 𑀲𑀺𑀬𑀼𑀁.
𑀤𑀸𑀲𑀸 𑀧𑀜𑁆𑀘𑁂𑀯 𑀘𑁄𑀭𑀬𑁆𑀬-
𑀲𑀔𑀜𑀸𑀢𑁆𑀬𑀢𑁆𑀢𑀲𑀤𑀺𑀲𑀸;
𑀢𑀣𑀸 𑀯𑀺𑀜𑁆𑀜𑀽𑀳𑀺 𑀯𑀺𑀜𑁆𑀜𑁂𑀬𑁆𑀬𑀸,
𑀫𑀺𑀢𑁆𑀢𑀸𑀤𑀸𑀭𑀸𑀘 𑀩𑀦𑁆𑀥𑀯𑀸.
𑀢𑀬𑁄𑀯 ¶ 𑀧𑀡𑁆𑀟𑀺𑀢𑀸 𑀲𑀢𑁆𑀣𑁂,
𑀅𑀳𑀫𑁂𑀯𑀸𑀢𑀺𑀯𑀸𑀤𑀻𑀘,
𑀅𑀳𑀫𑀧𑀺𑀢𑀺 𑀯𑀸𑀤𑀻𑀘,
𑀦𑀸𑀳𑀦𑁆𑀢𑀺𑀘 𑀇𑀫𑁂𑀢𑀬𑁄.
𑀯𑀺𑀦𑀸 𑀲𑀢𑁆𑀣𑀁 𑀦𑀕𑀘𑁆𑀙𑁂𑀬𑁆𑀬,
𑀲𑀽𑀭𑁄 𑀲𑀗𑁆𑀓𑀸𑀫𑀪𑀽𑀫𑀺𑀬𑀁;
𑀧𑀡𑁆𑀟𑀺𑀢𑀤𑁆𑀥𑀕𑀽 𑀯𑀸𑀡𑀺𑀚𑁆𑀚𑁄,
𑀯𑀺𑀤𑁂𑀲𑀕𑀫𑀦𑁄 𑀢𑀣𑀸.
𑀲𑀫𑁆𑀫𑀸 ¶ 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸,
𑀅𑀓𑁆𑀔𑀭𑁂𑀲𑀼 𑀧𑀤𑁂𑀲𑀼𑀘;
𑀘𑁄𑀭𑀖𑀸𑀢𑁄 𑀲𑀺𑀬𑀸 𑀲𑀺𑀲𑁆𑀲𑁄,
𑀕𑀼𑀭𑀼 𑀘𑁄𑀭𑀝𑁆𑀝𑀓𑀸𑀭𑀓𑁄.
𑀲𑀸𑀥𑀼𑀢𑁆𑀢𑀁 𑀲𑀼𑀚𑀦𑀲𑀫𑀸𑀕𑀫𑀸 𑀔𑀮𑀸𑀦𑀁,
𑀲𑀸𑀥𑀽𑀦𑀁 𑀦𑀔𑀮𑀲𑀫𑀸𑀕𑀫𑀸 𑀔𑀮𑀢𑁆𑀢𑀁;
𑀆𑀫𑁄𑀤𑀁𑀓𑀼𑀲𑀼𑀫𑀪𑀯𑀁𑀤𑀥𑀸𑀢𑀺𑀪𑀽𑀫𑀺,
𑀪𑀽𑀕𑀦𑁆𑀥𑀁 𑀦𑀘 𑀓𑀼𑀲𑀼𑀫𑀸𑀦𑀺 𑀥𑀸𑀭𑀬𑀦𑁆𑀢𑀺.
𑀲𑀝𑁆𑀞𑁂𑀦 ¶ 𑀫𑀺𑀢𑁆𑀢𑀁 𑀓𑀮𑀼𑀲𑁂𑀦 𑀥𑀫𑁆𑀫𑀁,
𑀧𑀭𑁄𑀧𑀢𑀸𑀧𑁂𑀦 𑀲𑀫𑀺𑀤𑁆𑀥𑀺𑀪𑀸𑀯𑀁;
𑀲𑀼𑀔𑁂𑀦 𑀯𑀺𑀚𑁆𑀚𑀁 𑀨𑀭𑀼𑀲𑁂𑀦 𑀦𑀸𑀭𑀺𑀁,
𑀇𑀘𑁆𑀙𑀦𑁆𑀢𑀺 𑀬𑁂 𑀢𑁂 𑀦𑀯𑀧𑀡𑁆𑀟𑀺𑀢𑀸𑀯.
𑀫𑀺𑀢𑁆𑀢𑀓𑀣𑀸
𑀓𑀢𑁆𑀯𑀸𑀦 ¶ 𑀓𑀼𑀲𑀮𑀁𑀓𑀫𑁆𑀫𑀁,
𑀓𑀢𑁆𑀯𑀸𑀘𑀸 𑀓𑀼𑀲𑀮𑀁 𑀧𑀼𑀭𑁂;
𑀲𑀼𑀔𑀺𑀢𑀤𑀼𑀓𑁆𑀔𑀺𑀢𑀸 𑀳𑁄𑀦𑁆𑀢𑀺,
𑀲𑁄 𑀩𑀸𑀮𑁄 𑀬𑁄 𑀦𑀧𑀲𑁆𑀲𑀢𑀺.
𑀲𑀬𑀁𑀓𑀢𑁂𑀦 𑀧𑀸𑀧𑁂𑀦,
𑀅𑀦𑀺𑀝𑁆𑀞𑀁 𑀮𑀪𑀢𑁂 𑀨𑀮𑀁;
𑀢𑁂 𑀫𑁂 𑀲𑁄 𑀫𑁂 𑀚𑀦𑁂𑀦𑁆𑀢𑀻𑀢𑀺,
𑀧𑀼𑀦𑀸𑀕𑀼𑀁 𑀓𑀼𑀭𑀼𑀢𑁂 𑀚𑀴𑁄.
𑀓𑀸𑀮𑀔𑁂𑀧𑁂𑀦 ¶ 𑀳𑀸𑀧𑁂𑀢𑀺,
𑀤𑀸𑀦𑀲𑀻𑀮𑀸𑀤𑀺𑀓𑀁 𑀚𑀴𑁄;
𑀅𑀣𑀺𑀭𑀫𑁆𑀧𑀺 𑀣𑀺𑀭𑀁 𑀫𑀜𑁆𑀜𑁂,
𑀅𑀢𑁆𑀢𑀸𑀦𑀁 𑀲𑀲𑁆𑀲𑀢𑀻𑀲𑀫𑀁.
𑀩𑀸𑀮𑁄𑀯 𑀧𑀸𑀧𑀓𑀁 𑀓𑀢𑁆𑀯𑀸,
𑀦𑀢𑀁𑀙𑀝𑁆𑀝𑁂𑀢𑀼𑀫𑀼𑀲𑁆𑀲𑀳𑁂;
𑀓𑀺𑀁 𑀩𑁆𑀬𑀕𑁆𑀖𑀢𑀸𑀤𑀺 𑀕𑀘𑁆𑀙𑀦𑁆𑀢𑁄,
𑀧𑀤𑀁 𑀫𑀓𑁆𑀔𑁂𑀢𑀼𑀫𑀼𑀲𑁆𑀲𑀳𑁂.
𑀧𑀭𑀦𑀲𑁆𑀲𑀦𑀢𑁄 𑀦𑀝𑁆𑀞𑁄,
𑀧𑀼𑀭𑁂𑀯 𑀧𑀭𑀦𑀸𑀲𑀓𑁄;
𑀲𑀻𑀖𑀁𑀯𑀸 𑀤𑀲𑁆𑀲𑀦𑀁 𑀬𑀸𑀢𑀺,
𑀢𑀺𑀡𑀁 𑀧𑀸𑀲𑀸𑀤𑀚𑁆𑀛𑀸𑀧𑀓𑀁.
𑀪𑁄𑀚𑀦𑀸 ¶ 𑀫𑁂𑀣𑀼𑀦𑀸 𑀦𑀺𑀤𑁆𑀤𑀸,
𑀕𑀯𑁂 𑀧𑁄𑀲𑁂𑀘 𑀯𑀺𑀚𑁆𑀚𑀢𑀺;
𑀯𑀺𑀚𑁆𑀚𑀸 𑀯𑀺𑀲𑁂𑀲𑁄 𑀧𑁄𑀲𑀲𑁆𑀲,
𑀢𑀢𑁄𑀳𑀻𑀦𑁄 𑀕𑁄𑀲𑀫𑁄 𑀪𑀯𑁂.
𑀫𑀼𑀴𑁆𑀳𑀲𑀺𑀲𑁆𑀲𑁄 𑀧𑀤𑁂𑀲𑁂𑀦,
𑀓𑀼𑀦𑀸𑀭𑀻𑀪𑀭𑀡𑁂𑀦𑀘;
𑀔𑀮𑀲𑀢𑁆𑀣𑀽𑀳𑀺𑀲𑀁𑀬𑁄𑀕𑀸,
𑀧𑀡𑁆𑀟𑀺𑀢𑁄𑀧𑁆𑀬𑀯𑀲𑀻𑀤𑀢𑀺.
𑀤𑁆𑀯𑁂𑀘𑀺𑀫𑁂𑀓𑀡𑁆𑀝𑀓𑀸 ¶ 𑀢𑀺𑀓𑁆𑀔𑀸,
𑀲𑀭𑀻𑀭𑀲𑁄𑀪𑀺𑀢𑀸 𑀓𑀸𑀫𑁂;
𑀦𑀺𑀥𑀦𑁄 𑀬𑁄𑀘 𑀓𑀸𑀫𑁂𑀢𑀺,
𑀬𑁄𑀘𑀓𑀼𑀧𑁆𑀧𑀢𑁆𑀬𑀦𑀺𑀲𑁆𑀲𑀸𑀭𑁄.
𑀦𑀺𑀥𑀦𑁄𑀘𑀸𑀧𑀺 𑀓𑀸𑀫𑁂𑀢𑀺,
𑀤𑀼𑀩𑁆𑀩𑀮𑁄 𑀓𑀮𑀳𑀁𑀧𑀺𑀬𑁄;
𑀫𑀦𑁆𑀤𑀲𑀢𑁆𑀣𑁄 𑀯𑀺𑀯𑀸𑀤𑀢𑁆𑀣𑀺,
𑀢𑀺𑀯𑀺𑀥𑀁 𑀫𑀼𑀴𑁆𑀳𑀮𑀓𑁆𑀔𑀡𑀁.
𑀅𑀧𑁆𑀧𑀲𑀼𑀢𑁄 𑀲𑀼𑀢𑁂 𑀅𑀧𑁆𑀧𑁂,
𑀩𑀳𑀼𑀁𑀫𑀜𑁆𑀜𑀢𑀺 𑀫𑀸𑀦𑀯𑁄;
𑀲𑀺𑀦𑁆𑀥𑀼𑀤𑀓𑀫 𑀧𑀲𑁆𑀲𑀦𑁆𑀢𑁄,
𑀓𑀽𑀧𑁂𑀢𑁄𑀬𑀁𑀯 𑀫𑀡𑁆𑀟𑀼𑀓𑁄.
𑀢𑀤𑀫𑀺𑀦𑀸𑀧𑀺 ¶ 𑀚𑀸𑀦𑀸𑀢𑀺,
𑀲𑁄𑀩𑁆𑀪𑁂𑀲𑀼 𑀧𑀤𑀭𑁂𑀲𑀼𑀘;
𑀲𑀼𑀦𑀦𑁆𑀢𑀸 𑀬𑀦𑁆𑀢𑀺 𑀓𑀼𑀲𑀼𑀫𑁆𑀪𑀸,
𑀢𑀼𑀡𑁆𑀳𑀻𑀬𑀦𑁆𑀢𑀺 𑀫𑀳𑁄𑀤𑀥𑀺.
𑀬𑀁 𑀊𑀦𑀓𑀁 𑀢𑀁 𑀲𑀼𑀦𑀢𑀺,
𑀬𑀁 𑀧𑀽𑀭𑀁 𑀲𑀦𑁆𑀢𑀫𑁂𑀯 𑀢𑀁;
𑀅𑀟𑁆𑀠𑀓𑀼𑀫𑁆𑀪𑀽𑀧𑀫𑁄 𑀩𑀸𑀮𑁄,
𑀭𑀳𑀢𑁄 𑀧𑀽𑀭𑁄𑀯 𑀧𑀡𑁆𑀟𑀺𑀢𑁄.
𑀩𑀼𑀥𑁂𑀳𑀺𑀪𑀸𑀲𑀫𑀸𑀦𑁄𑀧𑀺 ¶ ,
𑀔𑀮𑁄 𑀩𑀳𑀼𑀢𑀓𑁂𑀢𑀯𑁄;
𑀖𑀁𑀲𑀺𑀬𑀫𑀸𑀦𑁄 𑀅𑀗𑁆𑀕𑀸𑀭𑁄,
𑀦𑀺𑀮𑀫𑀢𑁆𑀢𑀁 𑀦𑀕𑀘𑁆𑀙𑀢𑀺.
𑀘𑀸𑀭𑀼𑀢𑀸 𑀧𑀭𑀤𑀸𑀭𑀸𑀬,
𑀥𑀦𑀁 𑀮𑁄𑀓𑀢𑀧𑁆𑀧𑀢𑀺𑀬𑀸;
𑀧𑀲𑀼𑀢𑀁 𑀲𑀸𑀥𑀼𑀦𑀸𑀲𑀸𑀬,
𑀔𑀮𑁂 𑀔𑀮𑀢𑀭𑀸 𑀕𑀼𑀡𑀸.
𑀇𑀢𑁄 ¶ 𑀳𑀲𑁆𑀲𑀢𑀭𑀁 𑀮𑁄𑀓𑁂,
𑀓𑀺𑀜𑁆𑀘𑀺 𑀢𑀲𑁆𑀲 𑀦𑀯𑀺𑀚𑁆𑀚𑀢𑀺;
𑀤𑀼𑀚𑁆𑀚𑀦𑁄𑀢𑀺𑀘 𑀬𑀁𑀆𑀳,
𑀲𑀚𑁆𑀚𑀦𑀁 𑀤𑀼𑀚𑁆𑀚𑀦𑁄 𑀲𑀬𑀁.
𑀭𑁄𑀕𑀡𑁆𑀟𑀘𑀗𑁆𑀓𑀼𑀭𑁄 𑀢𑁂𑀚𑁄,
𑀯𑀺𑀲𑀫𑀲𑁆𑀲𑀢𑀭𑁄 𑀖𑀡𑁄;
𑀅𑀯𑀺𑀦𑀸𑀲𑀺𑀬 𑀲𑀫𑀦𑁆𑀢𑀺,
𑀦 𑀔𑀮𑁄𑀘 𑀲𑀦𑀺𑀲𑁆𑀲𑀬𑀁.
𑀦𑀯𑀺𑀦𑀸 ¶ 𑀧𑀭𑀯𑀸𑀤𑁂𑀦,
𑀭𑀫𑀦𑁆𑀢𑁂 𑀤𑀼𑀚𑁆𑀚𑀦𑀸 𑀔𑀮𑀼;
𑀦 𑀲𑀸 𑀲𑀩𑁆𑀩𑀭𑀲𑁂 𑀪𑀼𑀢𑁆𑀯𑀸,
𑀯𑀺𑀦𑀸 𑀯𑀘𑁆𑀘𑁂 𑀦𑀢𑀼𑀲𑁆𑀲𑀢𑀺.
𑀢𑀧𑁆𑀧𑀢𑁂 𑀬𑀸𑀢𑀺 𑀲𑀦𑁆𑀥𑀸𑀦𑀁,
𑀤𑀯𑁄 𑀪𑀯𑀢𑀺 𑀯𑀦𑀢𑀁;
𑀫𑀼𑀤𑀼𑀁 𑀤𑀼𑀚𑁆𑀚𑀦𑀘𑀺𑀢𑁆𑀢𑀁 𑀓𑀺𑀁,
𑀮𑁄𑀳𑁂𑀦 𑀉𑀧𑀫𑀻𑀬𑀢𑁂.
𑀢𑀲𑁆𑀫𑀸 𑀤𑀼𑀚𑁆𑀚𑀦𑀲𑀁𑀲𑀕𑁆𑀕𑀁,
𑀆𑀲𑀻𑀯𑀺𑀲 𑀫𑀺𑀯𑁄𑀭𑀕𑀁;
𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀬𑁆𑀬,
𑀪𑀽𑀢𑀺𑀓𑀸𑀫𑁄 𑀯𑀺𑀘𑀓𑁆𑀔𑀡𑁄.
𑀤𑀼𑀚𑁆𑀚𑀦𑁂𑀦 ¶ 𑀳𑀺 𑀲𑀁𑀲𑀕𑁆𑀕𑁄,
𑀲𑀢𑁆𑀢𑀼𑀢𑀸𑀧𑀺 𑀦𑀬𑀼𑀚𑁆𑀚𑀢𑁂;
𑀢𑀢𑁆𑀢𑁄 𑀤𑀳𑀢𑀺 𑀅𑀗𑁆𑀕𑀸𑀭𑁄,
𑀲𑀦𑁆𑀢𑀸𑀢𑀼 𑀓𑀸𑀮𑀢𑀁𑀓𑀭𑁄.
𑀤𑀼𑀚𑁆𑀚𑀦𑁄 𑀯𑀚𑁆𑀚𑀦𑀻𑀬𑁄𑀯,
𑀯𑀺𑀚𑁆𑀚𑀸𑀬𑀸𑀮𑀗𑁆𑀓𑀢𑁄𑀧𑀺 𑀘𑁂;
𑀫𑀡𑀺𑀦𑀸 𑀮𑀗𑁆𑀓𑀢𑁄 𑀲𑀦𑁆𑀢𑁄,
𑀲𑀧𑁆𑀧𑁄 𑀓𑀺𑀁 𑀦𑀪𑀬𑀗𑁆𑀓𑀭𑁄.
𑀅𑀕𑁆𑀕𑀺𑀦𑁄 ¶ 𑀤𑀳𑀢𑁄 𑀤𑀸𑀬𑀁,
𑀲𑀔𑀸𑀪𑀯𑀢𑀺 𑀫𑀸𑀮𑀼𑀢𑁄;
𑀲𑁄𑀯 𑀤𑀻𑀧𑀁𑀢𑀼 𑀦𑀸𑀲𑁂𑀢𑀺,
𑀔𑀮𑁂 𑀦𑀢𑁆𑀣𑁂𑀯 𑀫𑀺𑀢𑁆𑀢𑀢𑀸.
𑀦𑀲𑁆𑀫𑀲𑁂 𑀓𑀢𑀧𑀸𑀧𑀫𑁆𑀳𑀺,
𑀦𑀲𑁆𑀫𑀲𑁂 𑀅𑀮𑀺𑀓𑀯𑀸𑀤𑀺𑀦𑀺;
𑀦𑀲𑁆𑀫𑀲𑁂𑀢𑁆𑀢𑀢𑁆𑀣𑀧𑀜𑁆𑀜𑀫𑁆𑀳𑀺,
𑀅𑀢𑀺𑀲𑀦𑁆𑀢𑁂𑀧𑀺 𑀦𑀲𑁆𑀫𑀲𑁂.
𑀫𑀸𑀭𑁂𑀢𑀼𑀁 𑀓𑀺𑀢𑁆𑀢𑀓𑀸 𑀲𑀓𑁆𑀓𑀸,
𑀤𑀼𑀚𑁆𑀚𑀦𑀸 𑀕𑀕𑀡𑀽𑀧𑀫𑀸;
𑀫𑀸𑀭𑀺𑀢𑀸 𑀓𑁄𑀥𑀘𑀺𑀢𑁆𑀢𑁂𑀢𑀼,
𑀫𑀸𑀭𑀺𑀢𑁄 𑀳𑁄𑀦𑁆𑀢𑀺 𑀤𑀼𑀚𑁆𑀚𑀦𑀸.
𑀪𑀽𑀫𑀺 ¶ 𑀓𑀡𑁆𑀝𑀓𑀲𑀁𑀓𑀺𑀡𑁆𑀡𑀸,
𑀙𑀸𑀤𑀺𑀢𑀼𑀁 𑀦𑁂𑀯𑀲𑀓𑁆𑀬𑀢𑁂;
𑀉𑀧𑀸𑀳𑀦 𑀫𑀢𑁆𑀢𑀓𑁂𑀦,
𑀙𑀦𑁆𑀦𑀸 𑀪𑀯𑀢𑀺 𑀫𑁂𑀤𑀦𑀻.
𑀲𑀢𑁆𑀢𑀸 𑀲𑀤𑀸𑀧𑀲𑁂𑀯𑀦𑁆𑀢𑀺,
𑀲𑁄𑀤𑀓𑀁 𑀯𑀸𑀧𑀺𑀆𑀤𑀺𑀓𑀁;
𑀲𑀪𑁄𑀕𑀁 𑀲𑀥𑀦𑀜𑁆𑀘𑁂𑀯𑀁,
𑀢𑀼𑀘𑁆𑀙𑀸𑀘𑁂 𑀢𑁂 𑀚𑀳𑀦𑁆𑀢𑀺 𑀢𑁂.
𑀥𑀦𑀳𑀻𑀦𑀁 ¶ 𑀘𑀚𑁂 𑀫𑀺𑀢𑁆𑀢𑁄,
𑀧𑀼𑀢𑁆𑀢𑀤𑀸𑀭𑀸 𑀲𑀳𑁄𑀤𑀭𑀸;
𑀅𑀢𑁆𑀣𑀯𑀦𑁆𑀢𑀁𑀯 𑀲𑁂𑀯𑀦𑁆𑀢𑀺,
𑀅𑀢𑁆𑀣𑁄 𑀮𑁄𑀓𑁂 𑀫𑀳𑀸𑀲𑀔𑀸.
𑀦 𑀭𑀽𑀧𑀺𑀦𑀻 𑀦 𑀧𑀜𑁆𑀜𑀸𑀡𑁄,
𑀦𑀓𑀼𑀮𑀻𑀦𑁄 𑀧𑀥𑀸𑀦𑀢𑀸;
𑀓𑀸𑀮𑁂 𑀯𑀺𑀧𑀢𑁆𑀢𑀺𑀲𑀫𑁆𑀧𑀢𑁆𑀢𑁂,
𑀥𑀦𑀺𑀫𑀸𑀯 𑀯𑀺𑀲𑁂𑀲𑀢𑀸.
𑀓𑀮𑁆𑀬𑀸𑀡𑀫𑀺𑀢𑁆𑀢𑀁 ¶ 𑀓𑀦𑁆𑀢𑀸𑀭𑀁,
𑀬𑀼𑀤𑁆𑀥𑀁 𑀲𑀪𑀸𑀬𑀁 𑀪𑀸𑀲𑀺𑀢𑀼𑀁;
𑀅𑀲𑀢𑁆𑀣𑀸 𑀕𑀦𑁆𑀢𑀼 𑀫𑀺𑀘𑁆𑀙𑀦𑁆𑀢𑀺,
𑀫𑀼𑀴𑁆𑀳𑀸 𑀢𑁂𑀘𑀢𑀼𑀭𑁄𑀚𑀦𑀸.
𑀅𑀳𑀺𑀢𑀸 𑀧𑀝𑀺𑀲𑁂𑀥𑁄𑀘,
𑀳𑀺𑀢𑁂𑀲𑀼𑀘 𑀧𑀬𑁄𑀚𑀦𑀁;
𑀩𑁆𑀬𑀲𑀦𑁂𑀲𑁆𑀯 𑀧𑀭𑀺𑀘𑁆𑀘𑀸𑀕𑁄,
𑀲𑀗𑁆𑀔𑁂𑀧𑀸 𑀫𑀺𑀢𑁆𑀢𑀮𑀓𑁆𑀔𑀡𑀁.
𑀆𑀢𑀼𑀭𑁂 𑀩𑁆𑀬𑀲𑀦𑁂𑀧𑀢𑁆𑀢𑁂,
𑀤𑀼𑀩𑁆𑀪𑀺𑀓𑁆𑀔𑁂 𑀲𑀢𑁆𑀢𑀼 𑀯𑀺𑀕𑁆𑀕𑀳𑁂;
𑀭𑀸𑀚𑀤𑁆𑀯𑀸𑀭𑁂 𑀲𑀼𑀲𑀸𑀦𑁂𑀘,
𑀬𑁄 𑀢𑀺𑀝𑁆𑀞𑀢𑀺 𑀲𑀩𑀦𑁆𑀥𑀯𑁄.
𑀲𑁄 ¶ 𑀩𑀦𑁆𑀥𑀼 𑀬𑁄 𑀳𑀺𑀢𑁂𑀬𑀼𑀢𑁆𑀢𑁄,
𑀲𑁄 𑀧𑀺𑀢𑀸 𑀬𑁄 𑀢𑀼 𑀧𑁄𑀲𑀓𑁄;
𑀲𑁄 𑀜𑀸𑀢𑀺 𑀬𑀢𑁆𑀭 𑀯𑀺𑀲𑀸𑀲𑁄,
𑀲𑀸 𑀪𑀭𑀺𑀬𑀸 𑀬𑀢𑁆𑀭 𑀦𑀺𑀩𑁆𑀩𑀽𑀢𑀺.
𑀳𑀺𑀢𑁂𑀲𑀺𑀦𑁄 𑀲𑀼𑀫𑀺𑀢𑁆𑀢𑁄𑀘,
𑀯𑀺𑀜𑁆𑀜𑀽𑀘 𑀤𑀼𑀮𑁆𑀮𑀪𑀸 𑀚𑀦𑀸;
𑀬𑀣𑁄 𑀲𑀥𑀁𑀘 𑀲𑀸𑀤𑀼𑀁𑀘,
𑀭𑁄𑀕𑀳𑀸𑀭𑀻𑀘 𑀲𑀼𑀚𑀦𑁄.
𑀅𑀕𑀭𑀼𑀓𑁄 ¶ 𑀅𑀦𑀸𑀮𑀲𑁆𑀲𑁄,
𑀅𑀲𑀝𑁆𑀞𑁄𑀘 𑀲𑀘𑁆𑀘𑀯𑀸 𑀲𑀼𑀘𑀺;
𑀅𑀮𑀼𑀤𑁆𑀥𑁄 𑀅𑀢𑁆𑀣𑀓𑀸𑀫𑁄𑀘,
𑀏𑀤𑀺𑀲𑁄 𑀲𑀼𑀳𑀤𑀼𑀢𑁆𑀢𑀫𑁄.
𑀬𑁄 𑀥𑀼𑀯𑀸𑀦𑀺 𑀧𑀭𑀺𑀘𑁆𑀘𑀚𑁆𑀚,
𑀅𑀥𑀽𑀯𑀸𑀦𑁆𑀬𑀼𑀧𑀲𑁂𑀯𑀢𑀺;
𑀥𑀼𑀯𑀸𑀧𑀺 𑀢𑀲𑁆𑀲 𑀦𑀲𑁆𑀲𑀦𑁆𑀢𑀺,
𑀅𑀥𑀼𑀯𑁂𑀲𑀼 𑀓𑀣𑀸𑀯𑀓𑀸.
𑀮𑀼𑀤𑁆𑀥𑀫𑀢𑁆𑀣𑁂𑀦𑀕𑀡𑁆𑀳𑁂𑀬𑁆𑀬 ¶ ,
𑀣𑀤𑁆𑀥 𑀫𑀜𑁆𑀚𑀮𑀺𑀓𑀫𑁆𑀫𑀼𑀦𑀸;
𑀙𑀦𑁆𑀤𑀸𑀦𑀼𑀯𑀢𑁆𑀢𑀺𑀬𑀸 𑀫𑀼𑀴𑁆𑀳𑀁,
𑀬𑀣𑀸𑀪𑀽𑀢𑁂𑀦 𑀧𑀡𑁆𑀟𑀺𑀢𑀁.
𑀉𑀢𑁆𑀢𑀫𑀁 𑀧𑀸𑀡𑀺𑀧𑀸𑀢𑁂𑀦,
𑀲𑀽𑀭𑀁 𑀪𑁂𑀤𑁂𑀦 𑀯𑀺𑀚𑀬𑁂;
𑀦𑀺𑀘𑀁 𑀤𑀩𑁆𑀩𑀧𑀤𑀸𑀦𑁂𑀦,
𑀯𑀺𑀓𑁆𑀓𑀫𑁂𑀦 𑀲𑀫𑀁 𑀚𑀬𑁂.
𑀬𑀲𑁆𑀲𑀬𑀲𑁆𑀲 𑀳𑀺 𑀬𑁄𑀪𑀸𑀯𑁄,
𑀢𑁂𑀦𑀢𑁂𑀦 𑀳𑀺 𑀢𑀁𑀦𑀭𑀁;
𑀅𑀦𑀼𑀧𑀯𑀺𑀲𑁆𑀲 𑀫𑁂𑀥𑀸𑀯𑀻,
𑀔𑀺𑀧𑁆𑀧𑀫𑀢𑁆𑀢𑀯𑀲𑀁 𑀦𑀬𑁂.
𑀬𑁂𑀦 ¶ 𑀇𑀘𑁆𑀙𑀢𑀺 𑀲𑀫𑁆𑀩𑀦𑁆𑀥𑀁,
𑀢𑁂𑀦 𑀢𑀻𑀡𑀺 𑀦𑀓𑀸𑀭𑀬𑁂;
𑀯𑀺𑀯𑀸𑀤 𑀫𑀢𑁆𑀣𑀲𑀫𑁆𑀩𑀦𑁆𑀥𑀁,
𑀧𑀭𑁄𑀓𑁆𑀔𑁂 𑀤𑀸𑀭𑀤𑀲𑁆𑀲𑀦𑀁.
𑀅𑀘𑁆𑀘𑀸𑀪𑀺𑀓𑁆𑀔𑀡𑀲𑀁𑀲𑀕𑁆𑀕𑀸,
𑀅𑀲𑀫𑁆𑀫𑁄𑀲𑀭𑀡𑁂𑀦𑀘;
𑀏𑀢𑁂𑀦 𑀫𑀺𑀢𑁆𑀢𑀸 𑀚𑀻𑀭𑀦𑁆𑀢𑀺,
𑀅𑀓𑀸𑀮𑁂 𑀬𑀸𑀘𑀦𑀸𑀬𑀘.
𑀢𑀲𑁆𑀫𑀸 ¶ 𑀦𑀸𑀪𑀺𑀓𑁆𑀔𑀡𑀁 𑀕𑀘𑁆𑀙𑁂,
𑀦𑀘𑀕𑀘𑁆𑀙𑁂 𑀘𑀺𑀭𑀸𑀘𑀺𑀭𑀁;
𑀓𑀸𑀮𑁂𑀦 𑀬𑀸𑀘𑀁 𑀬𑀸𑀘𑁂𑀬𑁆𑀬,
𑀏𑀯𑀁 𑀫𑀺𑀢𑁆𑀢𑀸 𑀦𑀚𑀻𑀭𑀬𑁂.
𑀏𑀢𑁂 𑀪𑀺𑀬𑁆𑀬𑁄 𑀲𑀫𑀁 𑀬𑀦𑁆𑀢𑀺,
𑀲𑀦𑁆𑀥𑀺 𑀢𑁂𑀲𑀁 𑀦𑀚𑀻𑀭𑀢𑀺;
𑀬𑁄 𑀅𑀥𑀺𑀧𑁆𑀧𑀦𑁆𑀦𑀁 𑀲𑀳𑀢𑀺,
𑀬𑁄𑀘 𑀚𑀸𑀦𑀸𑀢𑀺 𑀤𑁂𑀲𑀦𑀁.
𑀲𑀘𑁂 𑀲𑀦𑁆𑀢𑀸 𑀯𑀺𑀯𑀸𑀤𑀦𑁆𑀢𑀺,
𑀔𑀺𑀧𑁆𑀧𑀁 𑀲𑀦𑁆𑀥𑀺𑀭𑀬𑁂 𑀧𑀼𑀦;
𑀩𑀸𑀮𑀸 𑀧𑀢𑁆𑀢𑀸𑀯 𑀪𑀺𑀚𑁆𑀚𑀦𑁆𑀢𑀺,
𑀦 𑀢𑁂 𑀲𑀫𑀣𑀫𑀚𑁆𑀛𑀕𑀼𑀁.
𑀬𑁂𑀦𑀫𑀺𑀢𑁆𑀢𑁂𑀦 ¶ 𑀲𑀁𑀲𑀕𑁆𑀕𑁄,
𑀬𑁄𑀕𑀓𑁆𑀔𑁂𑀫𑁄 𑀯𑀺𑀳𑀻𑀬𑀢𑀺;
𑀧𑀼𑀩𑁆𑀩𑁂𑀯 𑀚𑁆𑀛𑀸𑀪𑀯𑀦𑁆𑀢𑀲𑁆𑀲,
𑀭𑀓𑁆𑀔𑁂 𑀅𑀓𑁆𑀔𑀺𑀯 𑀧𑀡𑁆𑀟𑀺𑀢𑁄.
𑀬𑁂𑀦𑀫𑀺𑀢𑁆𑀢𑁂𑀦 𑀲𑀁𑀲𑀕𑁆𑀕𑀸,
𑀬𑁄𑀕𑀓𑁆𑀔𑁂𑀫𑁄 𑀧𑀯𑀟𑁆𑀠𑀢𑀺;
𑀓𑀭𑁂𑀬𑁆𑀬𑀢𑁆𑀢𑀲𑀫𑀁 𑀯𑀼𑀢𑁆𑀢𑀺,
𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀧𑀡𑁆𑀟𑀺𑀢𑁄.
𑀕𑀼𑀡𑁄 ¶ 𑀲𑀩𑁆𑀩𑀜𑁆𑀜𑀼𑀢𑀼𑀮𑁆𑀬𑁄𑀧𑀺,
𑀲𑀻𑀤𑀢𑁂 𑀓𑁄 𑀅𑀦𑀺𑀲𑁆𑀲𑀬𑁄;
𑀅𑀦𑀕𑁆𑀖 𑀫𑀧𑀺𑀫𑀸𑀡𑀺𑀓𑁆𑀓𑀁,
𑀳𑁂𑀫𑀁 𑀦𑀺𑀲𑁆𑀲𑀸𑀬 𑀲𑁄𑀪𑀢𑁂.
𑀧𑀩𑁆𑀩𑁂𑀧𑀩𑁆𑀩𑁂 𑀓𑀫𑁂𑀦𑀼𑀘𑁆𑀙𑀼,
𑀯𑀺𑀲𑁂𑀲𑀭𑀲𑀺𑀯𑀕𑁆𑀕𑀢𑁄;
𑀢𑀣𑀸 𑀲𑀼𑀫𑀺𑀢𑁆𑀢𑀺𑀓𑁄 𑀲𑀸𑀥𑀼,
𑀯𑀺𑀧𑀭𑀺𑀢𑁄𑀯 𑀤𑀼𑀚𑁆𑀚𑀦𑁄.
𑀢𑁂𑀦𑁂𑀯 𑀫𑀼𑀦𑀺𑀦𑀸 𑀯𑀼𑀢𑁆𑀢𑀁,
𑀬𑁂𑀓𑁂𑀘𑀺𑀮𑁄𑀓𑀺𑀬𑀸𑀥𑀫𑁆𑀫𑀸;
𑀢𑀣𑀸 𑀦𑀺𑀩𑁆𑀩𑀸𑀦𑀕𑀸𑀫𑀻𑀦𑁄,
𑀲𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀸𑀥𑀫𑁆𑀫𑀸.
𑀓𑀮𑁆𑀬𑀸𑀡𑀫𑀺𑀢𑁆𑀢 ¶ 𑁧 𑀫𑀸𑀕𑀫𑁆𑀫,
𑀲𑀩𑁆𑀩𑁂 𑀢𑁂 𑀳𑁄𑀦𑁆𑀢𑀺 𑀧𑀸𑀡𑀺𑀦𑀁;
𑀢𑀲𑁆𑀫𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑁂𑀲𑀼,
𑀓𑀸𑀢𑀩𑁆𑀩𑁄 𑀆𑀤𑀭𑁄 𑀲𑀤𑀸.
𑀬𑁄 𑀯𑁂 𑀓𑀢𑀜𑁆𑀜𑀽 𑀓𑀢𑀯𑁂𑀤𑀺𑀓𑁄 𑀥𑀺𑀭𑁄,
𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀤𑀴𑁆𑀳𑀪𑀢𑁆𑀢𑀺𑀘 𑀳𑁄𑀢𑀺;
𑀤𑀼𑀓𑁆𑀔𑀺𑀢𑀲𑁆𑀲 𑀲𑀓𑁆𑀓𑀘𑁆𑀘𑀁 𑀓𑀭𑁂𑀢𑀺 𑀓𑀺𑀘𑁆𑀘𑀁,
𑀢𑀣𑀸𑀯𑀺𑀥𑀁 𑀲𑀧𑁆𑀧𑀼𑀭𑀺𑀲𑀸𑀢𑀺 𑀯𑀤𑀦𑁆𑀢𑀺.
𑀬𑀲𑁆𑀲𑀳𑀺 ¶ 𑀥𑀫𑁆𑀫𑀁 𑀧𑀼𑀭𑀺𑀲𑁄 𑀯𑀺𑀚𑀜𑁆𑀜𑀸,
𑀬𑁂𑀘𑀲𑁆𑀲 𑀓𑀗𑁆𑀔𑀁 𑀯𑀺𑀦𑀬𑀦𑁆𑀢𑀺 𑀲𑀦𑁆𑀢𑁄;
𑀢𑀜𑁆𑀳𑀺𑀲𑁆𑀲 𑀤𑀻𑀧𑀜𑁆𑀘 𑀧𑀭𑀸𑀬𑀦𑀜𑁆𑀘,
𑀦 𑀢𑁂𑀦 𑀫𑀺𑀢𑁆𑀢𑀁 𑀚𑀺𑀭𑀬𑁂𑀣 𑀧𑀜𑁆𑀜𑁄.
𑀦𑀸𑀬𑀓𑀓𑀣𑀸
𑀓𑀲𑁆𑀲𑀓𑁄 ¶ 𑀯𑀸𑀡𑀺𑀚𑁄𑀫𑀘𑁆𑀘𑁄,
𑀲𑀫𑀡𑁄 𑀲𑀼𑀢𑀲𑀻𑀮𑀯𑀸;
𑀢𑁂𑀲𑀼 𑀯𑀺𑀧𑀼𑀮𑀚𑀸𑀢𑁂𑀲𑀼,
𑀭𑀝𑁆𑀞𑀁𑀧𑀺 𑀯𑀺𑀧𑀼𑀮𑀁 𑀲𑀺𑀬𑀸.
𑀢𑁂𑀲𑀼 𑀤𑀼𑀩𑁆𑀩𑀮𑀚𑀸𑀢𑁂𑀲𑀼,
𑀭𑀝𑁆𑀞𑀁𑀧𑀺 𑀤𑀼𑀩𑁆𑀩𑀮𑀁 𑀲𑀺𑀬𑀸;
𑀢𑀲𑁆𑀫𑀸 𑀭𑀝𑁆𑀞𑀁𑀧𑀺 𑀯𑀺𑀧𑀼𑀮𑀁,
𑀥𑀸𑀭𑀬𑁂 𑀭𑀝𑁆𑀞𑀲𑀸𑀭𑀯𑀸.
𑀫𑀳𑀸𑀭𑀼𑀓𑁆𑀔𑀲𑁆𑀲 ¶ 𑀨𑀮𑀺𑀦𑁄,
𑀆𑀫𑀁 𑀙𑀺𑀦𑁆𑀤𑀢𑀺 𑀬𑁄 𑀨𑀮𑀁;
𑀭𑀲𑀜𑁆𑀘𑀲𑁆𑀲 𑀦𑀚𑀸𑀦𑀸𑀢𑀺,
𑀩𑀻𑀚𑀜𑁆𑀘𑀲𑁆𑀲 𑀯𑀺𑀦𑀲𑁆𑀲𑀢𑀺.
𑀫𑀳𑀸𑀭𑀼𑀓𑁆𑀔𑀼𑀧𑀫𑀁 𑀭𑀝𑁆𑀞𑀁,
𑀬𑁄 𑀅𑀥𑀫𑁆𑀫𑁂𑀦 𑀲𑀸𑀲𑀢𑀺;
𑀭𑀲𑀜𑁆𑀘𑀲𑁆𑀲 𑀦𑀚𑀸𑀦𑀸𑀢𑀺,
𑀭𑀝𑁆𑀞𑀜𑁆𑀘𑀸𑀧𑀺 𑀯𑀺𑀦𑀲𑁆𑀲𑀢𑀺.
𑀫𑀳𑀸𑀭𑀼𑀓𑁆𑀔𑀲𑁆𑀲 𑀨𑀮𑀺𑀦𑁄,
𑀧𑀓𑁆𑀓𑀁 𑀙𑀺𑀦𑁆𑀤𑀢𑀺 𑀬𑁄 𑀨𑀮𑀁;
𑀭𑀲𑀜𑁆𑀘𑀲𑁆𑀲 𑀯𑀺𑀚𑀸𑀦𑀸𑀢𑀺,
𑀩𑀻𑀚𑀜𑁆𑀘𑀲𑁆𑀲 𑀦𑀦𑀲𑁆𑀲𑀢𑀺.
𑀫𑀳𑀸𑀭𑀼𑀓𑁆𑀔𑀼𑀧𑀫𑀁 ¶ 𑀭𑀝𑁆𑀞𑀁,
𑀥𑀫𑁆𑀫𑁂𑀦 𑀬𑁄 𑀧𑀲𑀸𑀲𑀢𑀺;
𑀭𑀲𑀜𑁆𑀘𑀲𑁆𑀲 𑀯𑀺𑀚𑀸𑀦𑀸𑀢𑀺,
𑀭𑀝𑁆𑀞𑀜𑁆𑀘𑀸𑀧𑀺 𑀦𑀦𑀲𑁆𑀲𑀢𑀺.
𑀚𑀦𑀧𑁆𑀧𑀤𑀜𑁆𑀘 𑀬𑁄𑀭𑀸𑀚𑀸,
𑀅𑀥𑀫𑁆𑀫𑁂𑀦 𑀧𑀲𑀸𑀲𑀢𑀺;
𑀲𑀩𑁆𑀩𑁄 𑀲𑀥𑀺𑀳𑀺 𑀲𑁄𑀭𑀸𑀚𑀸,
𑀯𑀺𑀭𑀼𑀤𑁆𑀥𑁄 𑀳𑁄𑀢𑀺 𑀔𑀢𑁆𑀢𑀺𑀬𑁄.
𑀢𑀣𑁂𑀯 ¶ 𑀦𑀺𑀕𑀫𑁂 𑀳𑀺𑀁𑀲𑀁,
𑀬𑁂 𑀬𑀼𑀢𑁆𑀢𑀸 𑀓𑀬𑀯𑀺𑀓𑁆𑀓𑀬𑁂;
𑀲𑀼𑀗𑁆𑀓𑀤𑀸𑀦𑀩𑀮𑀻𑀓𑀸𑀭𑁂,
𑀲 𑀓𑁄𑀲𑁂𑀦 𑀯𑀺𑀭𑀼𑀚𑁆𑀛𑀢𑀺.
𑀫𑀳𑀸𑀭𑀯𑀭𑀔𑁂𑀢𑁆𑀢𑁂𑀲𑀼,
𑀲𑀗𑁆𑀕, 𑀫𑁂 𑀓𑀢𑀦𑀺𑀲𑁆𑀲𑀫𑁂;
𑀉𑀲𑁆𑀲𑀺𑀢𑁂 𑀳𑀺𑀁𑀲𑀬𑀁 𑀭𑀸𑀚𑀸,
𑀲𑀩𑀮𑁂𑀦 𑀯𑀺𑀭𑀼𑀚𑁆𑀛𑀢𑀺.
𑀢𑀣𑁂𑀯 𑀇𑀲𑀬𑁄 𑀳𑀺𑀁𑀲𑁄,
𑀲𑀁𑀬𑀫𑁂 𑀩𑁆𑀭𑀳𑁆𑀫𑀘𑀸𑀭𑀺𑀬𑁄;
𑀅𑀥𑀫𑁆𑀫𑀘𑀸𑀭𑀺 𑀔𑀢𑁆𑀢𑀻𑀬𑁄,
𑀲𑁄 𑀲𑀕𑁆𑀕𑁂𑀦 𑀯𑀺𑀭𑀼𑀚𑁆𑀛𑀢𑀺.
𑀲𑀬𑀁𑀓𑀢𑀸 ¶ 𑀦𑀧𑀭𑁂𑀦,
𑀫𑀳𑀸𑀦𑀚𑁆𑀚𑁄 𑀚𑀼𑀯𑀓𑀢𑀸;
𑀇𑀲𑁆𑀲𑀭𑁂𑀦 𑀢𑀣𑀸 𑀭𑀜𑁆𑀜𑀸,
𑀲𑀭𑀝𑁆𑀞𑁂 𑀅𑀥𑀺𑀧𑀘𑁆𑀘𑀢𑀸.
𑀧𑀸𑀧𑀁𑀯𑀸𑀧𑀺 𑀳𑀺 𑀧𑀼𑀜𑁆𑀜𑀁𑀯𑀸,
𑀧𑀥𑀸𑀦𑁄 𑀬𑀁 𑀓𑀭𑁄𑀢𑀺𑀘𑁂;
𑀮𑁄𑀓𑁄𑀧𑁂𑀯𑀁 𑀓𑀭𑁄𑀢𑁆𑀬𑁂𑀯,
𑀢𑀁 𑀯𑀺𑀚𑀸𑀦𑁂𑀬𑁆𑀬 𑀧𑀡𑁆𑀟𑀺𑀢𑁄.
𑀓𑀘𑁆𑀙𑀧𑀻𑀦𑀜𑁆𑀘 ¶ 𑀫𑀘𑁆𑀙𑀻𑀦𑀁,
𑀓𑀼𑀓𑁆𑀓𑀼𑀝𑀻𑀦𑀜𑁆𑀘 𑀥𑁂𑀦𑀽𑀦𑀁;
𑀧𑀼𑀢𑁆𑀢𑀧𑁄𑀲𑀸 𑀬𑀣𑀸𑀳𑁄𑀢𑀺,
𑀢𑀣𑀸 𑀫𑀘𑁆𑀘𑁂𑀲𑀼 𑀭𑀸𑀚𑀽𑀦𑀁.
𑀅𑀦𑀸𑀬𑀓𑀸 𑀯𑀺𑀦𑀲𑁆𑀲𑀦𑁆𑀢𑀺,
𑀦𑀲𑁆𑀲𑀦𑁆𑀢𑀺 𑀩𑀳𑀼𑀦𑀸𑀬𑀓𑀸;
𑀣𑀻𑀦𑀸𑀬𑀓𑀸 𑀯𑀺𑀦𑀲𑁆𑀲𑀦𑁆𑀢𑀺,
𑀦𑀲𑁆𑀲𑀦𑁆𑀢𑀺 𑀲𑀼𑀲𑀼𑀦𑀸𑀬𑀓𑀸.
𑀩𑀳𑀼𑀯𑁄 ¶ 𑀬𑀢𑁆𑀣 𑀦𑁂𑀢𑀸𑀭𑁄,
𑀲𑀩𑁆𑀩𑁂 𑀧𑀡𑁆𑀟𑀺𑀢𑀫𑀸𑀦𑀺𑀦𑁄;
𑀲𑀩𑁆𑀩𑁂 𑀫𑀳𑀢𑁆𑀢𑀫𑀺𑀘𑁆𑀙𑀦𑁆𑀢𑀺,
𑀓𑀢𑀁 𑀦𑁂𑀲𑀁 𑀯𑀺𑀦𑀲𑁆𑀲𑀢𑀺.
𑀦𑁄𑀤𑀬𑀸𑀬 𑀯𑀺𑀦𑀸𑀲𑀸𑀬,
𑀩𑀳𑀼𑀦𑀸𑀬𑀓𑀢𑀸 𑀪𑀽𑀲𑀁;
𑀦𑁄𑀫𑀺𑀮𑀦𑁆𑀢𑀺 𑀯𑀺𑀦𑀲𑁆𑀲𑀦𑁆𑀢𑀺,
𑀧𑀤𑁆𑀫𑀸 𑀦𑁆𑀬𑀓𑁆𑀓𑁂𑀳𑀺𑀲𑀢𑁆𑀢𑀳𑀺.
𑀅𑀲𑀦𑁆𑀢𑀼𑀝𑁆𑀞𑁄 𑀬𑀢𑀻 𑀦𑀝𑁆𑀞𑁄,
𑀲𑀦𑁆𑀢𑀼𑀝𑁆𑀞𑁄𑀘 𑀫𑀳𑀻𑀧𑀢𑀺;
𑀲𑀮𑀚𑁆𑀚𑀸 𑀕𑀡𑀺𑀓𑀸 𑀦𑀝𑁆𑀞𑀸,
𑀦𑀺𑀮𑀚𑁆𑀚𑀸𑀢𑀼 𑀓𑀼𑀮𑀗𑁆𑀕𑀦𑀸.
𑀦 ¶ 𑀕𑀡𑀲𑁆𑀲 𑀕𑁆𑀕𑀢𑁄 𑀕𑀘𑁆𑀙𑁂,
𑀲𑀺𑀤𑁆𑀥𑁂 𑀓𑀫𑁆𑀫𑁂 𑀲𑀫𑀁𑀨𑀮𑀁;
𑀓𑀫𑁆𑀫𑀯𑀺𑀧𑁆𑀧𑀢𑁆𑀢𑀺 𑀘𑁂𑀳𑁄𑀢𑀺,
𑀫𑀼𑀔𑀭𑁄 𑀢𑀢𑁆𑀭 𑀳𑀜𑁆𑀜𑀢𑁂.
𑀧𑀥𑀺𑀭𑁄 𑀘 𑀢𑀧𑀲𑁆𑀲𑀻𑀦𑀺,
𑀲𑀽𑀭𑁄 𑀭𑀡𑀯𑀡𑁄 𑀢𑀣𑀸;
𑀫𑀚𑁆𑀚𑀧𑁄 𑀧𑀢𑀺𑀣𑀻 𑀭𑀸𑀚𑀸,
𑀏𑀢𑁂 𑀦𑀲𑀤𑁆𑀤𑀳𑀸𑀫𑀳𑀁.
𑀚𑀸𑀦𑁂𑀬𑁆𑀬 ¶ 𑀧𑁂𑀲𑀦𑁂 𑀪𑀘𑁆𑀘𑀁,
𑀩𑀦𑁆𑀥𑀯𑀸𑀧𑀺 𑀪𑀬𑀸𑀕𑀢𑁂;
𑀆𑀧𑀤𑀸𑀲𑀼 𑀢𑀣𑀸 𑀫𑀺𑀢𑁆𑀢𑀁,
𑀤𑀸𑀭𑀜𑁆𑀘 𑀯𑀺𑀪𑀯𑀓𑁆𑀔𑀬𑁂.
𑀭𑀡𑀸 𑀧𑀘𑁆𑀘𑀸𑀕𑀢𑀁 𑀲𑀽𑀭𑀁,
𑀥𑀦𑀜𑁆𑀘 𑀖𑀭𑀫𑀸𑀕𑀢𑀁;
𑀚𑀺𑀡𑁆𑀡 𑀫𑀦𑁆𑀦𑀁 𑀧𑀲𑀁𑀲𑁂𑀬𑁆𑀬,
𑀤𑀸𑀭𑀜𑁆𑀘 𑀕𑀢𑀬𑁄𑀩𑁆𑀩𑀦𑀁.
𑀲𑀤𑁆𑀥𑀸𑀧𑁂𑀫𑁂𑀲𑀼 𑀲𑀦𑁆𑀢𑁂𑀲𑀼,
𑀦𑀕𑀡𑁂 𑀫𑀸𑀲𑀓𑀁 𑀲𑀢𑀁;
𑀲𑀤𑁆𑀥𑀸𑀯𑁂𑀫𑁂𑀲𑁆𑀯 𑀲𑀦𑁆𑀢𑁂𑀲𑀼,
𑀫𑀸𑀲𑀓𑀁𑀧𑀺 𑀲𑀢𑀁 𑀕𑀡𑁂.
𑀅𑀤𑀦𑁆𑀢𑀤𑀫𑀦𑀁 ¶ 𑀤𑀸𑀦𑀁,
𑀤𑀸𑀦𑀁 𑀲𑀩𑁆𑀩𑀢𑁆𑀣𑀲𑀸𑀥𑀓𑀁;
𑀤𑀸𑀦𑁂𑀦 𑀧𑀺𑀬𑀯𑀸𑀘𑁂𑀦,
𑀉𑀦𑁆𑀦𑀫𑀦𑁆𑀢𑀺 𑀦𑀫𑀦𑁆𑀢𑀺𑀘.
𑀤𑀸𑀦𑀁 𑀲𑀺𑀦𑁂𑀳𑀪𑁂𑀲𑀚𑁆𑀚𑀁,
𑀫𑀘𑁆𑀙𑁂𑀭𑀁 𑀤𑀼𑀲𑁆𑀲𑀦𑁄𑀲𑀥𑀁;
𑀤𑀸𑀦𑀁 𑀬𑀲𑀲𑁆𑀲𑀪𑁄𑀲𑀚𑁆𑀚𑀁,
𑀫𑀘𑁆𑀙𑁂𑀭𑀁 𑀓𑀧𑁆𑀧𑀦𑁄𑀲𑀥𑀁.
𑀤𑀼𑀩𑁆𑀪𑀺𑀓𑁆𑀔𑁂 ¶ 𑀅𑀦𑁆𑀦𑀤𑀸𑀢𑀁𑀘,
𑀲𑀼𑀪𑀺𑀓𑁆𑀔𑁂𑀘 𑀳𑀺𑀭𑀜𑁆𑀜𑀤𑀁;
𑀪𑀬𑁂𑀘𑀸𑀪𑀬𑀢𑀸𑀤𑀸𑀦𑀁,
𑀲𑀕𑁆𑀕𑁂𑀧𑀺 𑀩𑀳𑀼 𑀫𑀜𑁆𑀜𑀢𑁂.
𑀲𑀢𑀁𑀘𑀓𑁆𑀔𑀼 𑀲𑀢𑀁𑀓𑀡𑁆𑀡𑀸,
𑀦𑀸𑀬𑀓𑀲𑁆𑀲 𑀲𑀼𑀢𑀸 𑀲𑀤𑀸;
𑀢𑀣𑀸𑀧𑀺 𑀅𑀦𑁆𑀥𑀧𑀥𑀻𑀭𑁄;
𑀏𑀲𑀸 𑀦𑀸𑀬𑀓𑀥𑀫𑁆𑀫𑀢𑀸.
𑀔𑀫𑀸 𑀚𑀸𑀕𑀭𑀺𑀬𑀼 𑀝𑁆𑀞𑀸𑀦𑀁,
𑀲𑀁𑀯𑀺𑀪𑀸𑀕𑁄 𑀤𑀬𑀺𑀓𑁆𑀔𑀡𑀸;
𑀦𑀸𑀬𑀓𑀲𑁆𑀲 𑀕𑀼𑀡𑀸𑀏𑀢𑁂,
𑀇𑀘𑁆𑀙𑀺𑀢𑀩𑁆𑀩𑀸 𑀳𑀺𑀢𑀢𑁆𑀣𑀺𑀦𑀸.
𑀧𑀭𑀺𑀪𑀽𑀢𑁄 ¶ 𑀫𑀼𑀤𑀽 𑀳𑁄𑀢𑀺,
𑀅𑀢𑀺𑀢𑀺𑀓𑁆𑀔𑁄𑀘 𑀯𑁂𑀭𑀯𑀸;
𑀏𑀢𑀜𑁆𑀘𑀉𑀪𑀬𑀁 𑀜𑀢𑁆𑀯𑀸,
𑀅𑀦𑀼𑀫𑀚𑁆𑀛𑀁 𑀲𑀫𑀸𑀘𑀭𑁂.
𑀦𑁂𑀓𑀦𑁆𑀢𑀫𑀼𑀤𑀼𑀦𑀸 𑀲𑀓𑁆𑀓𑀸,
𑀏𑀓𑀦𑁆𑀢𑀢𑀺𑀔𑀺𑀡𑁂𑀦𑀯𑀸;
𑀅𑀢𑁆𑀢𑀁 𑀫𑀳𑀦𑁆𑀢𑁂 𑀞𑀧𑁂𑀢𑀼𑀁,
𑀢𑀲𑁆𑀫𑀸 𑀉𑀪𑀬 𑀫𑀸𑀘𑀭𑁂.
𑀧𑀺𑀝𑁆𑀞𑀺𑀢𑁄 ¶ 𑀓𑁆𑀓𑀁 𑀦𑀺𑀲𑁂𑀯𑁂𑀬𑁆𑀬,
𑀓𑀼𑀘𑁆𑀙𑀺𑀦𑀸𑀢𑀼 𑀳𑀼𑀢𑀸𑀲𑀦𑀁;
𑀲𑀸𑀫𑀺𑀓𑀁 𑀲𑀩𑁆𑀩𑀪𑀸𑀯𑁂𑀦,
𑀧𑀭𑀮𑁄𑀓𑀁 𑀅𑀫𑀸𑀬𑀸𑀬.
𑀦𑀲𑁂𑀯𑁂 𑀨𑀭𑀼𑀲𑀁𑀲𑀸𑀫𑀺𑀁,
𑀢𑀁𑀧𑀺 𑀲𑁂𑀯𑁂𑀦 𑀫𑀘𑁆𑀙𑀭𑀺𑀁;
𑀢𑀢𑁄 𑀧𑀕𑁆𑀕𑀡𑁆𑀳𑀓𑀁𑀲𑁂𑀯𑁂,
𑀲𑁂𑀯𑁂 𑀦𑀺𑀕𑁆𑀕𑀡𑁆𑀳𑀓𑀁 𑀢𑀢𑁄;
𑀦 𑀲𑀸 𑀭𑀸𑀚𑀸 𑀬𑁄 𑀅𑀚𑁂𑀬𑁆𑀬𑀁 𑀚𑀺𑀦𑀸𑀢𑀺,
𑀦 𑀲𑁄 𑀲𑀔𑀸𑀬𑁄 𑀲𑀔𑀸𑀭𑀁 𑀚𑀺𑀦𑀸𑀢𑀺;
𑀦 𑀲𑀸 𑀪𑀭𑀺𑀬𑀸 𑀧𑀢𑀺𑀦𑁄 𑀯𑀺𑀭𑁄𑀥𑀢𑀺,
𑀦 𑀢𑁂 𑀯𑀼𑀢𑁆𑀢𑀸 𑀬𑁂 𑀦𑀪𑀭𑀦𑁆𑀢𑀺 𑀚𑀺𑀡𑁆𑀡𑀓𑀁.
𑀦 ¶ 𑀲𑀸 𑀲𑀪𑀸 𑀬𑀢𑁆𑀣 𑀦𑀲𑀦𑁆𑀢𑀺 𑀲𑀦𑁆𑀢𑁄,
𑀦 𑀢𑁂 𑀲𑀦𑁆𑀢𑁄 𑀬𑁂 𑀦𑀯𑀤𑀦𑁆𑀢𑀺 𑀥𑀫𑁆𑀫𑀁;
𑀭𑀸𑀕𑀜𑁆𑀘 𑀤𑁄𑀲𑀜𑁆𑀘 𑀧𑀳𑀸𑀬 𑀫𑁄𑀳𑀁,
𑀥𑀫𑁆𑀫𑀁 𑀪𑀡𑀦𑁆𑀢𑀸𑀯 𑀪𑀯𑀦𑁆𑀢𑀺 𑀲𑀦𑁆𑀢𑁄.
𑀲𑀼𑀢𑀲𑁆𑀲 𑀭𑀓𑁆𑀔𑀸 𑀲𑀢𑀢𑀸𑀪𑀺𑀬𑁄𑀕𑁄;
𑀓𑀼𑀮𑀲𑁆𑀲 𑀯𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀯𑀺𑀚𑁆𑀚𑀸;
𑀭𑀜𑁆𑀜𑁄 𑀧𑀫𑀸𑀤𑁄 𑀧𑀲𑀫𑁄𑀥𑀦𑀲𑁆𑀲,
𑀣𑀻𑀦𑀦𑁆𑀢𑀼 𑀚𑀸𑀦𑀸𑀫𑀺 𑀦 𑀚𑀸𑀢𑀼 𑀭𑀓𑁆𑀔𑀁.
𑀇𑀢𑁆𑀣𑀺𑀓𑀣𑀸
𑀦𑀫𑀸𑀢𑀭𑀸 ¶ 𑀥𑀻𑀢𑀼𑀬𑀸 𑀯𑀸𑀧𑀺,
𑀪𑀕𑀻𑀦𑀺𑀬𑀸 𑀯𑀺𑀘𑀓𑁆𑀔𑀡𑁄;
𑀦𑀯𑀺𑀯𑀺𑀢𑁆𑀢𑀸𑀲𑀦𑁂 𑀫𑀦𑁆𑀢𑁂,
𑀦𑀸𑀭𑀻 𑀫𑀸𑀬𑀸𑀯𑀺𑀦𑀻𑀦𑀦𑀼.
𑀯𑀺𑀚𑁆𑀚𑀼𑀢𑀸𑀦𑀜𑁆𑀘 𑀮𑁄𑀮𑀢𑁆𑀢𑀁,
𑀲𑀢𑁆𑀣𑀸𑀦𑀜𑁆𑀘𑀢𑀺𑀢𑀺𑀓𑁆𑀔𑀡𑀁;
𑀲𑀻𑀖𑀢𑀁 𑀯𑀸𑀬𑀼𑀢𑁂𑀚𑀸𑀦𑀁,
𑀅𑀦𑀼𑀓𑀼𑀩𑁆𑀩𑀦𑁆𑀢𑀺 𑀦𑀸𑀭𑀺𑀬𑁄.
𑀤𑁆𑀯𑀺𑀕𑀼𑀡𑁄 𑀣𑀻𑀦 𑀫𑀸𑀳𑀸𑀭𑁄,
𑀩𑀼𑀤𑁆𑀥𑀺𑀘𑀸𑀧𑀺 𑀘𑀢𑀼𑀕𑁆𑀕𑀼𑀡𑁄;
𑀙𑀕𑀼𑀡𑁄 𑀳𑁄𑀢𑀺 𑀯𑀸𑀬𑀸𑀫𑁄,
𑀓𑀸𑀫𑁄𑀢𑁆𑀯 𑀝𑁆𑀞 𑀕𑀼𑀡𑁄𑀪𑀯𑁂.
𑀏𑀓𑀫𑁂𑀓𑀸𑀬𑀇𑀢𑁆𑀣𑀻𑀬𑀸,
𑀅𑀝𑁆𑀞𑀝𑁆𑀞𑀧𑀢𑀺𑀦𑁄 𑀲𑀺𑀬𑀼𑀁;
𑀲𑀽𑀭𑀸𑀘 𑀩𑀮𑀯𑀦𑁆𑀢𑁄𑀘,
𑀲𑀩𑁆𑀩𑀸𑀓𑀸𑀫𑀭𑀲𑀸𑀳𑀭𑀸;
𑀓𑀭𑁂𑀬𑁆𑀬 𑀦𑀯𑀫𑁂 𑀙𑀦𑁆𑀤𑀁,
𑀉𑀦𑁆𑀦𑀢𑁆𑀢𑀸 𑀳𑀺 𑀦𑀧𑀽𑀭𑀢𑀺.
𑀮𑀧𑀦𑁆𑀢𑀺 ¶ 𑀲𑀤𑁆𑀥𑀺𑀫𑀜𑁆𑀜𑁂𑀦,
𑀧𑀲𑁆𑀲𑀦𑁆𑀢𑀜𑁆𑀜𑀁 𑀲𑀯𑀺𑀩𑁆𑀪𑀫𑀸;
𑀘𑀺𑀢𑁆𑀢𑀓𑀁 𑀘𑀺𑀦𑁆𑀢𑀬𑀦𑁆𑀢𑀜𑁆𑀜𑀁,
𑀦𑀸𑀭𑀻𑀦𑀁𑀦𑀸𑀫 𑀓𑁄 𑀧𑀺𑀬𑁄.
𑀚𑀺𑀯𑁆𑀳𑀸𑀲𑀳𑀲𑁆𑀲𑀺𑀓𑁄 𑀬𑁄 𑀳𑀺,
𑀚𑀻𑀯𑁂 𑀯𑀲𑁆𑀲𑀲𑀢𑀁 𑀦𑀭𑁄;
𑀢𑁂𑀦 𑀦𑀺𑀓𑀫𑁆𑀫𑀼𑀦𑁄 𑀯𑀼𑀢𑁆𑀢𑁄,
𑀣𑀻𑀤𑁄𑀲𑁄 𑀓𑀺𑀁𑀔𑀬𑀁𑀕𑀢𑁄.
𑀅𑀕𑁆𑀕𑀺 𑀆𑀧𑁄 𑀣𑀺𑀬𑁄 𑀫𑀼𑀴𑁆𑀳𑁄,
𑀲𑀧𑁆𑀧𑁄 𑀭𑀸𑀚𑀓𑀼𑀮𑀸𑀦𑀺𑀘;
𑀧𑀬𑀢𑀦𑀸𑀧𑀕𑀦𑁆𑀢𑀩𑁆𑀩𑁄,
𑀫𑀘𑁆𑀘𑀼𑀧𑀸𑀡𑀳𑀭𑀸𑀦𑀺𑀢𑀺.
𑀇𑀢𑁆𑀣𑀻𑀦𑀁 ¶ 𑀤𑀼𑀚𑁆𑀚𑀦𑀸 𑀦𑀜𑁆𑀘,
𑀯𑀺𑀲𑀸𑀲𑁄𑀦𑁄𑀧𑀧𑀚𑁆𑀚𑀢𑁂;
𑀯𑀻𑀲𑀲𑁆𑀲 𑀲𑀺𑀗𑁆𑀕𑀺𑀦𑁄 𑀭𑁄𑀕,
𑀦𑀤𑀻𑀭𑀸𑀚𑀓𑀼𑀮𑀲𑁆𑀲𑀘.
𑀲𑀢𑁆𑀣𑀁 𑀲𑀼𑀦𑀺𑀘𑁆𑀙𑀺𑀢𑀫𑀢𑀻𑀧𑀺 𑀯𑀺𑀘𑀺𑀦𑁆𑀢𑀦𑀻𑀬𑀁,
𑀲𑁆𑀯𑀸𑀭𑀸𑀥𑀺𑀢𑁄𑀧𑁆𑀬 𑀯𑀦𑀺𑀧𑁄 𑀧𑀭𑀺𑀲𑀗𑁆𑀓𑀦𑀻𑀬𑁄;
𑀳𑀢𑁆𑀣𑀗𑁆𑀕𑀢𑀸𑀧𑀺 𑀬𑀼𑀯𑀢𑀻𑀧𑀭𑀺𑀭𑀓𑁆𑀔𑀦𑀻𑀬𑀸,
𑀲𑀢𑁆𑀣𑀸𑀯𑀦𑀻𑀧𑀬𑀼𑀯𑀢𑀻𑀲𑀼 𑀓𑀼𑀢𑁄𑀯𑀲𑀺𑀢𑁆𑀣𑀁.
𑀅𑀬𑀼𑀢𑁆𑀢𑀓𑀫𑁆𑀫𑀸𑀭𑀤𑁆𑀥𑀦𑀁 𑀯𑀺𑀭𑁄𑀥𑁄,
𑀲𑀗𑁆𑀖𑀲𑁆𑀲 𑀬𑀼𑀤𑁆𑀥𑀜𑁆𑀘 𑀫𑀳𑀸𑀩𑀮𑁂𑀳𑀺;
𑀯𑀺𑀲𑁆𑀲𑀸𑀲𑀓𑀫𑁆𑀫𑀁 𑀧𑀫𑀸𑀤𑀸𑀲𑀼 𑀦𑀺𑀘𑁆𑀘𑀁,
𑀤𑁆𑀯𑀸𑀭𑀸𑀦𑀺𑀫𑀘𑁆𑀘𑀼𑀲𑁆𑀲 𑀯𑀤𑀦𑁆𑀢𑀺 𑀧𑀜𑁆𑀜𑀸.
𑀯𑀸𑀢𑀁 𑀚𑀸𑀮𑁂𑀦 𑀦𑀭𑁄 𑀧𑀭𑀸𑀫𑀲𑁂,
𑀑𑀲𑀺𑀜𑁆𑀘𑁂 𑀲𑀸𑀕𑀭𑀁 𑀏𑀓𑀧𑀸𑀡𑀺𑀦𑀸;
𑀲𑀓𑁂𑀦𑀢𑀸𑀮𑁂𑀦 𑀚𑀦𑁂𑀬𑁆𑀬 𑀖𑁄𑀲𑀁,
𑀬𑁄 𑀲𑀩𑁆𑀩𑀪𑀸𑀯𑀁 𑀧𑀫𑀤𑀸𑀲𑀼 𑀑𑀲𑀚𑁂.
𑀇𑀢𑁆𑀣𑀻𑀧𑀺 ¶ 𑀳𑀺 𑀏𑀓𑀘𑁆𑀘𑀺𑀬𑀸,
𑀲𑁂𑀬𑁆𑀬𑀸 𑀯𑀼𑀢𑁆𑀢𑀸𑀯 𑀫𑀼𑀦𑀺𑀦𑀸;
𑀪𑀡𑁆𑀟𑀸𑀦 𑀫𑀼𑀢𑁆𑀢𑀫𑀁 𑀇𑀢𑁆𑀣𑀻,
𑀅𑀕𑁆𑀕𑀼𑀧𑀝𑁆𑀞𑀸𑀬𑀺𑀓𑀸𑀢𑀺𑀘.
𑀬𑁄 𑀦𑀁 𑀪𑀭𑀢𑀺 𑀲𑀩𑁆𑀩𑀤𑀸,
𑀦𑀺𑀘𑁆𑀘𑀁 𑀆𑀢𑀸𑀧𑀺 𑀉𑀲𑁆𑀲𑀼𑀓𑁄;
𑀲𑀩𑁆𑀩𑀓𑀸𑀫𑀳𑀭𑀁 𑀧𑁄𑀲𑀁,
𑀪𑀢𑁆𑀢𑀸𑀭𑀁 𑀦𑀸𑀢𑀺𑀫𑀜𑁆𑀜𑀢𑀺.
𑀦𑀸𑀘𑀸𑀧𑀺 ¶ 𑀲𑁄𑀢𑁆𑀣𑀺 𑀪𑀢𑁆𑀢𑀸𑀭𑀁,
𑀇𑀲𑁆𑀲𑀸𑀘𑀸𑀭𑁂𑀦 𑀭𑁄𑀲𑀬𑁂;
𑀪𑀢𑁆𑀢𑀼𑀘 𑀕𑀭𑀼𑀦𑁄𑀲𑀩𑁆𑀩𑁂,
𑀧𑀝𑀺𑀧𑀽𑀚𑁂𑀢𑀺 𑀧𑀡𑁆𑀟𑀺𑀢𑁄.
𑀉𑀝𑁆𑀞𑀸𑀬𑀺𑀓𑀸 𑀅𑀦𑀸𑀮𑀸𑀲𑀸,
𑀲𑀗𑁆𑀕𑀳𑀺𑀢𑀧𑀭𑀺𑀚𑁆𑀚𑀦𑀸;
𑀪𑀢𑁆𑀢𑀼 𑀫𑀦𑀸𑀧𑀁 𑀘𑀭𑀢𑀺,
𑀪𑀢𑁆𑀢𑀓𑀁 𑀅𑀦𑀼𑀭𑀓𑁆𑀔𑀢𑀺.
𑀏𑀯𑀁 𑀯𑀢𑁆𑀢𑀢𑀺 𑀬𑀸𑀦𑀸𑀭𑀻,
𑀪𑀢𑁆𑀢𑀼𑀙𑀦𑁆𑀤𑀯𑀲𑀸𑀦𑀼𑀕𑀸;
𑀫𑀦𑀸𑀧𑀸𑀦𑀸𑀫 𑀢𑁂𑀤𑁂𑀯𑀸,
𑀬𑀢𑁆𑀣 𑀲𑀸 𑀉𑀧𑀧𑀚𑁆𑀚𑀢𑀺.
𑀓𑁄𑀓𑀺𑀮𑀸𑀦𑀁 ¶ 𑀲𑀭𑁄 𑀭𑀽𑀧𑀁,
𑀦𑀸𑀭𑀻𑀭𑀽𑀧𑀁 𑀧𑀢𑀺𑀩𑁆𑀩𑀢𑀁;
𑀯𑀺𑀚𑁆𑀚𑀸 𑀭𑀽𑀧 𑀫𑀭𑀽𑀧𑀸𑀦𑀁,
𑀔𑀫𑀸 𑀭𑀽𑀧𑀁 𑀢𑀧𑀲𑁆𑀲𑀻𑀦𑀁.
𑀆𑀦𑁂𑀬 𑀓𑀼𑀮𑀚𑀁 𑀧𑀜𑁆𑀜𑁄,
𑀯𑀺𑀭𑀽𑀧𑀫𑀧𑀺 𑀓𑀜𑁆𑀜𑀓𑀁;
𑀳𑀻𑀦𑀸𑀬𑀧𑀺 𑀲𑀼𑀭𑀽𑀧𑀸𑀬,
𑀯𑀺𑀯𑀸𑀳𑀁𑀲𑀤𑀺𑀲𑀁 𑀓𑀭𑁂.
𑀯𑀺𑀲𑀫𑁆𑀳𑀸𑀫𑀢𑀫𑀸𑀤𑁂𑀬𑁆𑀬 ¶ ,
𑀅𑀫𑀚𑁆𑀚𑀫𑁆𑀳𑀸𑀧𑀺𑀓𑀜𑁆𑀘𑀦𑀁;
𑀦𑀺𑀘𑀫𑁆𑀳𑀸𑀧𑁆𑀬𑀼𑀢𑁆𑀢𑀫𑀸𑀯𑀺𑀚𑁆𑀚𑀸,
𑀭𑀢𑀦𑀺𑀢𑁆𑀣𑀻𑀧𑀺𑀤𑀼𑀓𑀼𑀮𑀸.
𑀩𑀸𑀮𑀺𑀢𑁆𑀣𑀻 𑀫𑀓𑁆𑀔𑀺𑀓𑀸𑀢𑀼𑀡𑁆𑀟𑀁,
𑀇𑀲𑀻𑀦𑀜𑁆𑀘 𑀓𑀫𑀡𑁆𑀟𑀮𑀼𑀁;
𑀲𑁂𑀢𑀫𑁆𑀩𑀼 𑀨𑀮𑀁 𑀢𑀫𑁆𑀩𑀼𑀮𑀁,
𑀦𑁄𑀘𑁆𑀙𑀺𑀝𑁆𑀞𑀫𑀼𑀧𑀚𑀸𑀬𑀢𑁂.
𑀩𑀸𑀮𑀓𑁆𑀓𑁄 𑀧𑀡𑁆𑀡𑀥𑀽𑀫𑁄𑀘,
𑀯𑀼𑀤𑁆𑀥𑀺𑀢𑁆𑀣𑀻 𑀧𑀮𑁆𑀮𑀮𑁄𑀤𑀓𑀁;
𑀆𑀬𑀼𑀓𑁆𑀔𑀬𑀓𑀭𑀁 𑀦𑀺𑀘𑁆𑀘𑀁,
𑀭𑀢𑁆𑀢𑁄𑀘 𑀤𑀥𑀺𑀪𑁄𑀚𑀦𑀁.
𑀣𑀺𑀬𑁄 ¶ 𑀲𑁂𑀯𑁂𑀬𑁆𑀬 𑀦𑀘𑁆𑀘𑀦𑁆𑀢𑀁,
𑀲𑀸𑀤𑀼𑀁 𑀪𑀼𑀜𑁆𑀚𑁂𑀬𑁆𑀬𑀦𑀸𑀳𑀺𑀢𑀁;
𑀧𑀽𑀚𑀬𑁂 𑀫𑀸𑀦𑀬𑁂 𑀯𑀼𑀤𑁆𑀥𑁂,
𑀕𑀼𑀭𑀼𑀁 𑀫𑀸𑀬𑀸𑀬 𑀦𑁄𑀪𑀚𑁂.
𑀆𑀘𑀸𑀭𑁄 𑀓𑀼𑀮 𑀫𑀸𑀔𑁆𑀬𑀸𑀢𑀺,
𑀤𑁂𑀲 𑀫𑀸𑀔𑁆𑀬𑀸𑀢𑀺 𑀪𑀸𑀲𑀺𑀢𑀁;
𑀲𑀫𑁆𑀪𑀯𑁄 𑀧𑁂𑀫 𑀫𑀸𑀔𑁆𑀬𑀸𑀢𑀺,
𑀤𑁂𑀳 𑀫𑀸𑀔𑁆𑀬𑀸𑀢𑀺𑀪𑁄𑀚𑀦𑀁.
𑀤𑁂𑀳𑀻𑀢𑀺𑀯𑀘𑀦𑀸𑀤𑁆𑀯𑀸𑀭𑀸 ¶ ,
𑀤𑁂𑀳𑀝𑁆𑀞𑀸𑀧𑀜𑁆𑀘𑀤𑁂𑀯𑀢𑀸;
𑀲𑀚𑁆𑀚 𑀦𑀺𑀬𑀦𑁆𑀢𑀺 𑀥𑀻 𑀓𑀺𑀢𑁆𑀢𑀺,
𑀳𑀺𑀭𑀻 𑀲𑀺𑀭𑀻 𑀫𑀢𑀻𑀧𑀺𑀘.
𑀤𑁂𑀳𑀻𑀢𑀺𑀯𑀘𑀦𑀁 𑀤𑀼𑀓𑁆𑀔𑀁,
𑀦𑀢𑁆𑀣𑀻𑀢𑀺𑀯𑀘𑀦𑀁 𑀢𑀣𑀸;
𑀯𑀸𑀓𑁆𑀬𑀁𑀤𑁂𑀳𑀻𑀢𑀺𑀦𑀢𑁆𑀣𑀻𑀢𑀺,
𑀫𑀸𑀪𑀯𑁂𑀬𑁆𑀬 𑀪𑀯𑁂𑀪𑀯𑁂.
𑀩𑁄𑀥𑀬𑀦𑁆𑀢𑀺 𑀦𑀬𑀸𑀘𑀦𑁆𑀢𑀺,
𑀤𑁂𑀳𑀻𑀢𑀺 𑀧𑀘𑁆𑀙𑀺𑀫𑀸𑀚𑀦𑀸;
𑀧𑀲𑁆𑀲 𑀯𑀢𑁆𑀣𑀼𑀫𑀤𑀸𑀦𑀲𑁆𑀲,
𑀫𑀸𑀪𑀯𑀢𑀽𑀢𑀺 𑀈𑀤𑀺𑀲𑁄.
𑀫𑀳𑀸 ¶ 𑀅𑀢𑁆𑀬𑀧𑁆𑀧𑀓𑀁 𑀬𑀸𑀢𑀺,
𑀦𑀺𑀕𑀼𑀡𑁂 𑀕𑀼𑀡𑀯𑀸𑀧𑀺𑀳;
𑀅𑀝𑁆𑀞𑀸𑀦𑀝𑁆𑀞𑁂𑀬𑁆𑀬𑀪𑀸𑀯𑁂𑀦,
𑀕𑀚𑀺𑀦𑁆𑀤𑁄𑀇𑀯 𑀤𑀩𑁆𑀩𑀓𑁂.
𑀫𑀳𑀦𑁆𑀢𑀁 𑀦𑀺𑀲𑁆𑀲𑀬𑀁𑀓𑀢𑁆𑀯𑀸,
𑀔𑀼𑀤𑁆𑀤𑁄𑀧𑁆𑀬𑀢𑀺𑀫𑀳𑀸 𑀪𑀯𑁂;
𑀳𑁂𑀫𑀧𑀩𑁆𑀩𑀢𑀫𑀸𑀧𑀚𑁆𑀚,
𑀲𑁄𑀯𑀡𑁆𑀡𑀸𑀓𑀺𑀭 𑀧𑀓𑁆𑀔𑀺𑀦𑁄.
𑀩𑀳𑀽𑀦 ¶ 𑀫𑀧𑁆𑀧𑀲𑀸𑀭𑀸𑀦𑀁,
𑀏𑀓𑀺𑀪𑀸𑀯𑁄 𑀳𑀺𑀤𑀼𑀚𑁆𑀚𑀬𑁄;
𑀢𑀺𑀡𑁂𑀦 𑀯𑀝𑁆𑀝𑀢𑁂 𑀭𑀚𑁆𑀚𑀼,
𑀢𑀸𑀬 𑀦𑀸𑀕𑁄𑀧𑀺 𑀩𑀦𑁆𑀥𑀢𑁂.
𑀅𑀲𑀳𑀸𑀬𑁄 𑀲𑀫𑀢𑁆𑀣𑁄𑀧𑀺,
𑀢𑁂𑀚𑀲𑀺 𑀓𑀺𑀁 𑀓𑀭𑀺𑀲𑁆𑀲𑀢𑀺;
𑀦𑀺𑀯𑀸𑀢𑀲𑀡𑁆𑀞𑀺𑀢𑁄 𑀅𑀕𑁆𑀕𑀺,
𑀲𑀬𑀫𑁂𑀯𑀽𑀧𑀲𑀫𑁆𑀫𑀢𑀺.
𑀔𑀦𑁆𑀢𑀼𑀁 𑀢𑀧𑀦𑀚𑁄𑀢𑁂𑀚𑁄,
𑀲𑀓𑁆𑀓𑀸𑀳𑁄𑀢𑀺 𑀦 𑀯𑀡𑁆𑀡𑀚𑁄;
𑀪𑀽𑀧𑀸𑀤𑀻𑀳𑀺 𑀓𑀢𑁄𑀤𑀡𑁆𑀟𑁄,
𑀲𑀓𑁆𑀓𑀸𑀳𑁄𑀢𑀺 𑀦 𑀪𑀘𑁆𑀘𑀚𑁄.
𑀣𑀻𑀲𑀁𑀲𑀕𑁆𑀕𑁂 ¶ 𑀓𑀼𑀢𑁄𑀲𑀼𑀤𑁆𑀥𑁄,
𑀫𑀁𑀲𑀪𑀓𑁆𑀔𑁂 𑀓𑀼𑀢𑁄𑀤𑀬𑀸;
𑀲𑀼𑀭𑀸𑀧𑀸𑀡𑁂 𑀓𑀼𑀢𑁄𑀲𑀘𑁆𑀘𑀁,
𑀧𑀓𑁄𑀥𑀫𑁆𑀳𑀺 𑀓𑀼𑀢𑁄𑀢𑀧𑁄.
𑀣𑀻𑀬𑀸 𑀕𑀼𑀬𑁆𑀳𑀁 𑀦𑀲𑀁𑀲𑁂𑀬𑁆𑀬,
𑀅𑀫𑀺𑀢𑁆𑀢𑀲𑁆𑀲𑀘 𑀧𑀡𑁆𑀟𑀺𑀢𑁄;
𑀬𑁄𑀘𑀸 𑀫𑀺𑀲𑁆𑀲𑁂𑀦 𑀲𑀁𑀳𑀻𑀭𑁄,
𑀳𑀤𑀬𑀢𑁆𑀣𑁂𑀦𑁄 𑀬𑁄𑀦𑀭𑁄.
𑀕𑀼𑀬𑁆𑀳𑀫𑀢𑁆𑀣 ¶
𑀲𑀫𑁆𑀩𑁄𑀥𑀬𑀢𑀺 𑀬𑁄𑀦𑀭𑁄;
𑀫𑀦𑁆𑀢𑀪𑁂𑀤𑀪𑀬𑀸 𑀢𑀲𑁆𑀲,
𑀤𑀸𑀲𑀪𑀽𑀢𑁄 𑀢𑀺𑀢𑀺𑀓𑁆𑀔𑀢𑀺.
𑀯𑀳𑁂 𑀅𑀫𑀺𑀢𑁆𑀢 𑀔𑀦𑁆𑀥𑁂𑀦,
𑀬𑀸𑀯𑀓𑀸𑀮𑁂 𑀅𑀦𑀸𑀕𑀢𑁂;
𑀢𑀫𑁆𑀳𑁂𑀯 𑀘𑀸𑀕𑀢𑁂 𑀓𑀸𑀮𑁂,
𑀪𑀺𑀦𑁆𑀤𑁂 𑀖𑀝𑀫𑀺 𑀯𑀼𑀧𑁆𑀧𑀮𑁂.
𑀔𑀮𑀁 ¶ 𑀲𑀸𑀮𑀁 𑀧𑀲𑀼𑀁 𑀔𑁂𑀢𑁆𑀢𑀁,
𑀕𑀦𑁆𑀢𑁆𑀯𑀸𑀘𑀲𑁆𑀲 𑀅𑀪𑀺𑀓𑁆𑀔𑀡𑀁;
𑀫𑀺𑀢𑀁 𑀥𑀜𑁆𑀜𑀁 𑀦𑀺𑀥𑀸𑀧𑁂𑀬𑁆𑀬,
𑀫𑀺𑀢𑀜𑁆𑀘 𑀧𑀸𑀘𑀬𑁂 𑀖𑀭𑁂.
𑀓𑁄𑀥𑀁 𑀮𑁄𑀪𑀁 𑀫𑀤𑀁 𑀫𑀸𑀦𑀁,
𑀢𑀦𑁆𑀤𑀺𑀁 𑀫𑀺𑀲𑁆𑀲𑀁 𑀧𑀫𑀢𑁆𑀢𑀓𑀁;
𑀲𑁄𑀡𑁆𑀞𑀁𑀦𑀺𑀤𑁆𑀥𑀸𑀮𑀼𑀓𑀁 𑀫𑀓𑁆𑀔𑀁,
𑀫𑀘𑁆𑀙𑁂𑀭𑀜𑁆𑀘 𑀚𑀳𑁂 𑀩𑀼𑀥𑁄.
𑀓𑁄𑀥𑁄 ¶ 𑀅𑀩𑁆𑀪𑀦𑁆𑀢𑀭𑁂 𑀚𑀸𑀢𑁄,
𑀥𑀽𑀯𑀁 𑀦𑀸𑀲𑁂𑀢𑀺 𑀓𑁄𑀥𑀦𑀁;
𑀯𑀢𑁆𑀣𑀸𑀮𑀗𑁆𑀓𑀸𑀭𑀧𑀼𑀡𑁆𑀡𑀸𑀬𑀁,
𑀫𑀜𑁆𑀚𑀽𑀲𑀸𑀬𑀁 𑀲𑀺𑀔𑀻𑀬𑀣𑀸.
𑀉𑀧𑁆𑀧𑀚𑁆𑀚𑀢𑁂 𑀲𑀘𑁂 𑀓𑁄𑀥𑁄;
𑀆𑀯𑀚𑁆𑀚𑁂 𑀓𑀓𑀘𑀽𑀧𑀫𑀁;
𑀉𑀧𑁆𑀧𑀚𑁆𑀚𑁂 𑀘𑁂 𑀭𑀲𑁂 𑀢𑀡𑁆𑀳𑀸,
𑀧𑀼𑀢𑁆𑀢𑀫𑀁𑀲𑀽𑀧𑀫𑀁 𑀲𑀭𑁂.
𑀕𑀼𑀡 𑀫𑀤𑁆𑀥𑀺𑀲𑀫𑀁 𑀫𑀓𑁆𑀔𑁂,
𑀧𑀭𑁂𑀦 𑀓𑀮𑀳𑁂 𑀲𑀢𑀺;
𑀅𑀤𑁆𑀥𑀺𑀲𑀫𑀁 𑀧𑀓𑀸𑀲𑁂𑀢𑀺,
𑀅𑀡𑀼𑀫𑀢𑁆𑀢𑀁𑀯𑀯𑀚𑁆𑀚𑀓𑀁.
𑀢𑀲𑁆𑀲𑁂𑀯 ¶ 𑀢𑁂𑀦 𑀧𑀸𑀧𑀻𑀬𑁄,
𑀬𑁄 𑀓𑀼𑀤𑁆𑀥𑀁 𑀧𑀝𑀺𑀓𑀼𑀚𑁆𑀛𑀢𑀺;
𑀓𑀼𑀤𑁆𑀥 𑀫𑀧𑀝𑀺𑀓𑀼𑀚𑁆𑀛𑀦𑁆𑀢𑁄,
𑀲𑀗𑁆𑀕𑀸𑀫𑀁 𑀚𑁂𑀢𑀺 𑀤𑀼𑀚𑁆𑀚𑀬𑀁.
𑀭𑀸𑀕𑁄𑀦𑀸𑀫 𑀫𑀦𑁄𑀲𑀮𑁆𑀮𑀁,
𑀕𑀼𑀡𑀢𑁆𑀣𑀯𑀭𑀢𑀓𑁆𑀓𑀭𑁄;
𑀭𑀸𑀳𑀼 𑀯𑀺𑀚𑁆𑀚𑀸𑀲𑀲𑀗𑁆𑀓𑀲𑁆𑀲,
𑀢𑀧𑁄𑀥𑀦𑀳𑀼𑀢𑀸𑀲𑀦𑁄.
𑀧𑀫𑀸𑀤𑁄 ¶ 𑀚𑀸𑀬𑀢𑁂 𑀫𑀤𑀸,
𑀧𑀫𑀸𑀤𑀸 𑀚𑀸𑀬𑀢𑁂 𑀔𑀬𑁄;
𑀔𑀬𑀸 𑀧𑀤𑁄𑀲𑀸 𑀚𑀸𑀬𑀦𑁆𑀢𑀺,
𑀫𑀤𑀁 𑀓𑀺𑀁 𑀦𑀚𑀳𑁂 𑀩𑀼𑀥𑁄.
𑀦𑀫𑀦𑁆𑀢𑀺 𑀨𑀮𑀺𑀦𑁄𑀭𑀼𑀓𑁆𑀔𑀸,
𑀦𑀫𑀦𑁆𑀢𑀺 𑀯𑀺𑀩𑀼𑀥𑀸𑀚𑀦𑀸;
𑀲𑀼𑀓𑁆𑀔𑀓𑀝𑁆𑀞𑀜𑁆𑀘 𑀫𑀼𑀴𑁆𑀳𑁄𑀘,
𑀪𑀺𑀚𑁆𑀚𑀢𑁂𑀯 𑀦𑀦𑀫𑀦𑁆𑀢𑀺.
𑀞𑀸𑀦𑁂 ¶ 𑀯𑀼𑀤𑁆𑀥𑀸𑀦 𑀫𑁄𑀓𑀸𑀲𑀁,
𑀤𑀤𑁂 𑀯𑀼𑀤𑁆𑀥𑀸𑀧𑀘𑀸𑀬𑀺𑀓𑁄;
𑀦𑀦𑀼 𑀢𑀸𑀮𑁄 𑀅𑀚𑀻𑀯𑁄𑀧𑀺,
𑀲𑀫𑀻𑀧 𑀜𑁆𑀜𑁂 𑀧𑀭𑁄𑀦𑀢𑁄.
𑀕𑀭𑀼𑀓𑀸𑀢𑀩𑁆𑀩𑀧𑁄𑀲𑁂𑀲𑀼,
𑀦𑀺𑀘𑁆𑀘𑀯𑀼𑀢𑁆𑀢𑀺𑀁 𑀓𑀭𑁄𑀢𑀺 𑀬𑁄;
𑀦𑀺𑀘𑀢𑁆𑀢𑀁 𑀲𑁄 𑀧𑀳𑀦𑁆𑀢𑀸𑀦,
𑀉𑀢𑁆𑀢𑀫𑀢𑁆𑀢𑁂 𑀧𑀢𑀺𑀝𑁆𑀞𑀢𑀺.
𑀬𑀢𑁆𑀣 𑀧𑁄𑀲𑀁 𑀦𑀚𑀸𑀦𑀦𑁆𑀢𑀺,
𑀚𑀸𑀢𑀺𑀬𑀸 𑀯𑀺𑀦𑀬𑁂𑀦 𑀯𑀸;
𑀦 𑀢𑀢𑁆𑀣 𑀫𑀸𑀦𑀁 𑀓𑀭𑀺𑀬𑀸,
𑀯𑀲 𑀫𑀜𑁆𑀜𑀸𑀢𑀓𑁂𑀚𑀦𑁂.
𑀅𑀜𑁆𑀜𑀸𑀢𑀯𑀸𑀲𑀁 ¶ 𑀯𑀲𑀢𑀸,
𑀚𑀸𑀢𑀯𑁂𑀤𑀲𑀫𑁂𑀦𑀸𑀧𑀺;
𑀔𑀫𑀺𑀢𑀩𑁆𑀩𑀁 𑀲𑀧𑀜𑁆𑀜𑁂𑀦,
𑀅𑀧𑀺 𑀤𑀸𑀲𑀲𑁆𑀲 𑀢𑀚𑁆𑀚𑀺𑀢𑀁.
𑀥𑀦𑀥𑀜𑁆𑀜𑀸𑀧𑀬𑁄𑀕𑁂𑀲𑀼,
𑀢𑀣𑀸 𑀯𑀺𑀚𑁆𑀚𑀸𑀕𑀫𑁂𑀲𑀼𑀘;
𑀤𑀽𑀢𑁂𑀘 𑀩𑁆𑀬𑀯𑀳𑀸𑀭𑁂𑀘,
𑀘𑀢𑁆𑀢𑀮𑀚𑁆𑀚𑁄 𑀲𑀤𑀸 𑀪𑀯𑁂.
𑀦𑀳𑀺 ¶ 𑀓𑁄𑀘𑀺 𑀓𑀢𑁂 𑀓𑀺𑀘𑁆𑀘𑁂,
𑀓𑀢𑁆𑀢𑀸𑀭𑀁 𑀲𑀫𑁆𑀫𑀧𑁂𑀓𑁆𑀔𑀢𑁂;
𑀢𑀲𑁆𑀫𑀸 𑀲𑀩𑁆𑀩𑀸𑀦𑀺𑀓𑀫𑁆𑀫𑀸𑀦𑀺,
𑀲𑀸𑀯𑀲𑁂𑀲𑀸𑀦𑀺 𑀓𑀸𑀭𑀬𑁂.
𑀇𑀡𑀲𑁂𑀲𑁄 𑀅𑀕𑁆𑀕𑀺𑀲𑁂𑀲𑁄,
𑀲𑀢𑁆𑀢𑀼𑀲𑁂𑀲𑁄 𑀢𑀬𑁄𑀇𑀫𑁂;
𑀧𑀼𑀦𑀧𑁆𑀧𑀼𑀦𑀁𑀧𑀺 𑀯𑀟𑁆𑀠𑀦𑁆𑀢𑀺,
𑀢𑀲𑁆𑀫𑀸 𑀲𑁂𑀲𑀁 𑀦𑀓𑀸𑀭𑀬𑁂.
𑀦𑀢𑁆𑀣𑀺 𑀯𑀺𑀚𑁆𑀚𑀸𑀲𑀫𑀁 𑀯𑀺𑀢𑁆𑀢𑀁,
𑀦𑀢𑁆𑀣𑀺 𑀩𑁆𑀬𑀸𑀥𑀺𑀲𑀫𑁄 𑀭𑀺𑀧𑀼;
𑀦𑀢𑁆𑀣𑀺 𑀅𑀢𑁆𑀢𑀲𑀫𑀁 𑀧𑁂𑀫𑀁,
𑀦𑀢𑁆𑀣𑀺 𑀓𑀫𑁆𑀫𑀧𑀭𑀁 𑀩𑀮𑀁.
𑀅𑀢𑁆𑀢𑀦𑀸 ¶ 𑀓𑀼𑀭𑀼𑀢𑁂 𑀮𑀓𑁆𑀔𑀻,
𑀅𑀮𑀓𑁆𑀔𑀻𑀘𑀸𑀧𑀺 𑀅𑀢𑁆𑀢𑀦𑀸;
𑀦𑀳𑀺 𑀮𑀓𑁆𑀔𑀻 𑀅𑀮𑀓𑁆𑀔𑀻𑀘,
𑀅𑀜𑁆𑀜𑁄 𑀅𑀜𑁆𑀜𑀲𑁆𑀲 𑀓𑀼𑀭𑀼𑀢𑁂.
𑀲𑀬𑀁 𑀆𑀬𑀁 𑀯𑀬𑀁 𑀭𑀜𑁆𑀜𑀸,
𑀲𑀬𑀁 𑀚𑀜𑁆𑀜𑀸 𑀓𑀢𑀸𑀓𑀢𑀁;
𑀅𑀢𑁆𑀢𑀦𑀸𑀯 𑀪𑀯𑀓𑁆𑀔𑁂𑀬𑁆𑀬,
𑀓𑀢𑀸𑀦𑀺 𑀅𑀓𑀢𑀸𑀦𑀺𑀘.
𑀉𑀧𑀓𑀸𑀭𑀁 ¶ 𑀳𑀺𑀢𑁂𑀦𑁂𑀯,
𑀲𑀢𑁆𑀢𑀼𑀦𑀸 𑀲𑀢𑁆𑀢𑀼 𑀫𑀼𑀤𑁆𑀥𑀭𑁂;
𑀧𑀸𑀤𑀮𑀕𑁆𑀕𑀁 𑀓𑀭𑀝𑁆𑀞𑁂𑀦,
𑀓𑀡𑁆𑀝𑀓𑁂𑀦 𑀓𑀡𑁆𑀝𑀓𑀁.
𑀦𑀫𑁂 𑀦𑀫𑀦𑁆𑀢𑀲𑁆𑀲 𑀪𑀚𑁂 𑀪𑀚𑀦𑁆𑀢𑀁,
𑀓𑀺𑀘𑁆𑀘𑀸𑀦𑀺 𑀓𑁆𑀭𑀼𑀧𑀲𑁆𑀲 𑀓𑀭𑁂𑀬𑁆𑀬 𑀓𑀺𑀘𑁆𑀘𑀁;
𑀦𑀸 𑀦𑀢𑁆𑀣𑀓𑀸𑀫𑀲𑁆𑀲 𑀓𑀭𑁂𑀬𑁆𑀬 𑀅𑀢𑁆𑀣𑀁,
𑀅𑀲𑀫𑁆𑀪𑀚𑀦𑁆𑀢𑀁𑀧𑀺 𑀦𑀲𑀫𑁆𑀪𑀚𑁂𑀬𑁆𑀬.
𑀘𑀚𑁂 ¶ 𑀘𑀚𑀦𑁆𑀢𑀁 𑀦𑀯𑀢𑀁 𑀓𑀭𑀺𑀬𑀸,
𑀅𑀧𑁂𑀢𑀘𑀺𑀢𑁆𑀢𑁂𑀦 𑀦𑀲𑀫𑁆𑀪𑀚𑁂𑀬𑁆𑀬;
𑀤𑀺𑀚𑁄 𑀤𑀼𑀫𑀁 𑀔𑀻𑀡𑀨𑀮 𑀫𑀜𑀢𑁆𑀯𑀸,
𑀅𑀜𑁆𑀜𑀁 𑀲𑀧𑁂𑀓𑁆𑀔𑁂𑀬𑁆𑀬 𑀫𑀳𑀸𑀢𑀺 𑀮𑁄𑀓𑁄.