📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀮𑁄𑀓𑀦𑀻𑀢𑀺

𑁧. 𑀧𑀡𑁆𑀟𑀺𑀢𑀓𑀡𑁆𑀟𑁄

𑁧.

𑀮𑁄𑀓𑀦𑀻𑀢𑀺𑀁 ¶ 𑀧𑀯𑀓𑁆𑀔𑀸𑀫𑀺,

𑀦𑀸𑀦𑀸𑀲𑀢𑁆𑀣𑀲𑀫𑀼𑀤𑁆𑀥𑀝𑀁;

𑀫𑀸𑀕𑀥𑁂𑀦𑁂𑀯 𑀲𑀗𑁆𑀔𑁂𑀧𑀁,

𑀯𑀦𑁆𑀤𑀺𑀢𑁆𑀯𑀸 𑀭𑀢𑀦𑀢𑁆𑀣𑀬𑀁.

𑁨.

𑀦𑀻𑀢𑀺𑀮𑁄𑀓𑁂 𑀧𑀼𑀭𑀺𑀲𑀲𑁆𑀲 𑀲𑀸𑀭𑁄,

𑀫𑀸𑀢𑀸 𑀧𑀺𑀢𑀸 𑀆𑀘𑀭𑀺𑀬𑁄𑀘 𑀫𑀺𑀢𑁆𑀢𑁄;

𑀢𑀲𑁆𑀫𑀸 𑀳𑀺 𑀦𑀻𑀢𑀺𑀁 𑀧𑀼𑀭𑀺𑀲𑁄 𑀯𑀺𑀚𑀜𑁆𑀜𑀸,

𑀜𑀸𑀡𑀻 𑀫𑀳𑀸 𑀳𑁄𑀢𑀺 𑀩𑀳𑀼𑀲𑁆𑀲𑀼𑀢𑁄𑀘.

𑁩.

𑀅𑀮𑀲𑀲𑁆𑀲 𑀓𑀼𑀢𑁄 𑀲𑀺𑀧𑁆𑀧𑀁,

𑀅𑀲𑀺𑀧𑁆𑀧𑀲𑁆𑀲 𑀓𑀼𑀢𑁄 𑀥𑀦𑀁;

𑀅𑀥𑀦𑀲𑁆𑀲 𑀓𑀼𑀢𑁄 𑀫𑀺𑀢𑁆𑀢𑀁,

𑀅𑀫𑀺𑀢𑁆𑀢𑀲𑁆𑀲 𑀓𑀼𑀢𑁄 𑀲𑀼𑀔𑀁;

𑀅𑀲𑀼𑀔𑀲𑁆𑀲 ¶ 𑀓𑀼𑀢𑁄 𑀧𑀼𑀜𑁆𑀜𑀁,

𑀅𑀧𑀼𑀜𑁆𑀜𑀲𑁆𑀲 𑀓𑀼𑀢𑁄 𑀯𑀭𑀁.

𑁪.

𑀲𑀺𑀧𑁆𑀧𑀸 𑀲𑀫𑀁 𑀥𑀦𑀁 𑀦𑀢𑁆𑀣𑀺,

𑀲𑀺𑀧𑁆𑀧𑀁 𑀘𑁄𑀭𑀸 𑀦𑀕𑀡𑁆𑀳𑀭𑁂;

𑀇𑀥 𑀮𑁄𑀓𑁂 𑀲𑀺𑀧𑁆𑀧𑀁 𑀫𑀺𑀢𑁆𑀢𑀁,

𑀧𑀭𑀮𑁄𑀓𑁂 𑀲𑀼𑀔𑀸𑀯𑀳𑀁.

𑁫.

𑀅𑀧𑁆𑀧𑀓𑀁 𑀦𑀸𑀢𑀺𑀫𑀜𑁆𑀜𑁂𑀬𑁆𑀬,

𑀘𑀺𑀢𑁆𑀢𑁂 𑀲𑀼𑀢𑀁 𑀦𑀺𑀥𑀸𑀧𑀬𑁂;

𑀯𑀫𑁆𑀫𑀺𑀓𑁄𑀤𑀓𑀩𑀺𑀦𑁆𑀤𑀽𑀯,

𑀘𑀺𑀭𑁂𑀦 𑀧𑀭𑀺𑀧𑀽𑀭𑀢𑀺.

𑁬.

𑀔𑀼𑀤𑁆𑀤𑁄𑀢𑀺 𑀦𑀸𑀢𑀺𑀫𑀜𑁆𑀜𑁂𑀬𑁆𑀬,

𑀯𑀺𑀚𑁆𑀚𑀁 𑀯𑀸 𑀲𑀺𑀧𑁆𑀧𑀫𑁂𑀯 𑀯𑀸;

𑀏𑀓𑀫𑁆𑀧𑀺 𑀧𑀭𑀺𑀬𑁄𑀤𑀸𑀢𑀁,

𑀚𑀻𑀯𑀺𑀢𑀓𑀧𑁆𑀧𑀓𑀸𑀭𑀡𑀁.

𑁭.

𑀲𑁂𑀮𑁂 𑀲𑁂𑀮𑁂 𑀦 𑀫𑀸𑀡𑀺𑀓𑀁,

𑀕𑀚𑁂 𑀕𑀚𑁂 𑀦 𑀫𑀼𑀢𑁆𑀢𑀺𑀓𑀁;

𑀯𑀦𑁂 𑀯𑀦𑁂 𑀦 𑀘𑀦𑁆𑀤𑀦𑀁,

𑀞𑀸𑀦𑁂 𑀞𑀸𑀦𑁂 𑀦 𑀧𑀡𑁆𑀟𑀺𑀢𑀁.

𑁮.

𑀧𑀡𑁆𑀟𑀺𑀢𑁄 𑀲𑀼𑀢𑀲𑀫𑁆𑀧𑀦𑁆𑀦𑁄,

𑀬𑀢𑁆𑀣 𑀅𑀢𑁆𑀣𑀻𑀢𑀺 𑀘𑁂 𑀲𑀼𑀢𑁄;

𑀫𑀳𑀼𑀲𑁆𑀲𑀸𑀳𑁂𑀦 ¶ 𑀢𑀁 𑀞𑀸𑀦𑀁,

𑀕𑀦𑁆𑀢𑀩𑁆𑀩𑀁𑀯 𑀲𑀼𑀢𑁂𑀲𑀺𑀦𑀸.

𑁯.

𑀲𑀺𑀦𑁂 𑀲𑀺𑀧𑁆𑀧𑀁 𑀲𑀺𑀦𑁂 𑀥𑀦𑀁,

𑀲𑀺𑀦𑁂 𑀧𑀩𑁆𑀩𑀢𑀫𑀸𑀭𑀼𑀳𑀁;

𑀲𑀺𑀦𑁂 𑀓𑀸𑀫𑀲𑁆𑀲 𑀓𑁄𑀥𑀲𑁆𑀲,

𑀇𑀫𑁂 𑀧𑀜𑁆𑀘 𑀲𑀺𑀦𑁂 𑀲𑀺𑀦𑁂.

𑁧𑁦.

𑀲𑀼𑀢𑀺 𑀲𑀫𑁆𑀫𑀼𑀢𑀺 𑀲𑀗𑁆𑀔𑁆𑀬𑀸𑀘,

𑀬𑁄𑀕𑀸 𑀦𑀻𑀢𑀺 𑀯𑀺𑀲𑁂𑀲𑀓𑀸;

𑀕𑀦𑁆𑀥𑀩𑁆𑀩𑀸 𑀕𑀡𑀺𑀓𑀸 𑀘𑁂𑀯,

𑀥𑀦𑀼 𑀩𑁂𑀤𑀸 𑀘 𑀧𑀽𑀭𑀡𑀸.

𑁧𑁧.

𑀢𑀺𑀓𑀺𑀘𑁆𑀙𑀸 𑀇𑀢𑀺𑀳𑀸𑀲𑀸 𑀘,

𑀚𑁄𑀢𑀺 𑀫𑀸𑀬𑀸 𑀘 𑀙𑀦𑁆𑀤𑀢𑀺;

𑀓𑁂𑀢𑀼 𑀫𑀦𑁆𑀢𑀸 𑀘 𑀲𑀤𑁆𑀤𑀸 𑀘,

𑀲𑀺𑀧𑁆𑀧𑀸𑀝𑁆𑀞𑀸𑀭𑀲𑀓𑀸 𑀇𑀫𑁂.

𑁧𑁨.

𑀅𑀧𑀼𑀝𑁆𑀞𑁄 𑀧𑀡𑁆𑀟𑀺𑀢𑁄 𑀪𑁂𑀭𑀻,

𑀧𑀚𑁆𑀚𑀼𑀦𑁆𑀦𑁄 𑀫𑁂 𑀳𑁄𑀢𑀺 𑀧𑀼𑀘𑁆𑀙𑀺𑀢𑁄;

𑀩𑀸𑀮𑁄 𑀧𑀼𑀝𑁆𑀞𑁄 𑀅𑀧𑀼𑀝𑁆𑀞𑁄𑀧𑀺,

𑀩𑀳𑀼𑀫𑁆𑀧𑀺 𑀪𑀡𑀢𑁂 𑀲𑀤𑀸.

𑁧𑁩.

𑀧𑁄𑀢𑁆𑀣𑀓𑁂𑀲𑀼 𑀘 𑀬𑀁 𑀲𑀺𑀧𑁆𑀧𑀁,

𑀧𑀭𑀳𑀢𑁆𑀣𑁂𑀲𑀼 𑀬𑀁 𑀥𑀦𑀁;

𑀬𑀣𑀸𑀓𑀺𑀘𑁆𑀘𑁂 ¶ 𑀲𑀫𑀼𑀧𑁆𑀧𑀦𑁆𑀦𑁂,

𑀦 𑀢𑀁 𑀲𑀺𑀧𑁆𑀧𑀁 𑀦 𑀢𑀁 𑀥𑀦𑀁.

𑁧𑁪.

𑀚𑀮𑀧𑁆𑀧𑀫𑀸𑀡𑀁 𑀓𑀼𑀫𑀼𑀤𑁆𑀤𑀦𑀸𑀮𑀁,

𑀓𑀼𑀮𑀧𑁆𑀧𑀫𑀸𑀡𑀁 𑀯𑀺𑀦𑀬𑁄 𑀧𑀫𑀸𑀡𑀁;

𑀩𑁆𑀬𑀢𑁆𑀢𑀺𑀧𑁆𑀧𑀫𑀸𑀡𑀁 𑀓𑀣𑀻𑀢𑀯𑀸𑀓𑁆𑀬𑀁,

𑀧𑀣𑀯𑀺𑀬𑀸 𑀧𑀫𑀸𑀡𑀁 𑀢𑀺𑀡 𑀫𑀺𑀮𑀸𑀢𑀁.

𑁧𑁫.

𑀅𑀧𑁆𑀧𑀲𑁆𑀲𑀼𑀢𑁄 𑀲𑀼𑀢𑀁 𑀅𑀧𑁆𑀧𑀁,

𑀩𑀳𑀼𑀁 𑀫𑀜𑁆𑀜𑀢𑀺 𑀫𑀸𑀦𑀯𑀸;

𑀲𑀺𑀦𑁆𑀥𑀽𑀤𑀓𑀁 𑀅𑀧𑀲𑁆𑀲𑀦𑁆𑀢𑁄,

𑀓𑀽𑀧𑁂 𑀢𑁄𑀬𑀁𑀯 𑀫𑀡𑁆𑀟𑀼𑀓𑁄.

𑁧𑁬.

𑀧𑀣𑀫𑀁 𑀧𑀭𑀸𑀚𑀬𑁂 𑀲𑀺𑀧𑁆𑀧𑀁,

𑀤𑀼𑀢𑀺𑀬𑀁 𑀧𑀭𑀸𑀚𑀬𑁂 𑀥𑀦𑀁;

𑀢𑀢𑀺𑀬𑀁 𑀧𑀭𑀸𑀚𑀬𑁂 𑀥𑀫𑁆𑀫𑀁,

𑀘𑀢𑀼𑀢𑁆𑀣𑀁 𑀓𑀺𑀁 𑀓𑀭𑀺𑀲𑁆𑀲𑀢𑀺.

𑁧𑁭.

𑀩𑁆𑀬𑀢𑁆𑀢 𑀧𑀼𑀢𑁆𑀭 𑀓𑀺𑀫𑀮𑀲𑁄,

𑀅𑀩𑁆𑀬𑀢𑁆𑀢𑁄 𑀪𑀸𑀭𑀳𑀸𑀭𑀓𑁄;

𑀩𑁆𑀬𑀢𑁆𑀢𑀓𑁄 𑀧𑀽𑀚𑀺𑀢𑁄 𑀮𑁄𑀓𑁂,

𑀩𑁆𑀬𑀢𑁆𑀢 𑀧𑀼𑀢𑁆𑀭 𑀤𑀺𑀦𑁂 𑀤𑀺𑀦𑁂.

𑁧𑁮.

𑀫𑀸𑀢𑀸 𑀯𑁂𑀭𑀻 𑀧𑀺𑀢𑀸 𑀲𑀢𑁆𑀭𑀼,

𑀓𑁂𑀦 𑀩𑀸𑀮𑁂 𑀦 𑀲𑀺𑀓𑁆𑀔𑀺𑀢𑀸;

𑀲𑀪𑀸𑀫𑀚𑁆𑀛𑁂 ¶ 𑀦 𑀲𑁄𑀪𑀦𑁆𑀢𑀺,

𑀳𑀁𑀲𑀫𑀚𑁆𑀛𑁂 𑀩𑀓𑁄𑀬𑀣𑀸.

𑁧𑁯.

𑀓𑀡𑁆𑀝𑀓𑀁 𑀕𑀺𑀭𑀺 𑀓𑁄 𑀢𑀺𑀓𑁆𑀔𑀢𑀺,

𑀓𑁄 𑀅𑀜𑁆𑀚𑀦𑀁 𑀫𑀺𑀕𑀓𑁆𑀔𑀺𑀓𑀁;

𑀉𑀧𑁆𑀧𑀣𑀁 𑀧𑀮𑁆𑀮𑀮𑁂 𑀓𑁄 𑀲𑀼𑀕𑀦𑁆𑀥𑀁,

𑀓𑀼𑀮-𑀧𑀼𑀢𑁆𑀢-𑀭𑀽𑀧𑁄 𑀓𑁄 𑀧𑀯𑀢𑁆𑀢𑀢𑀺;

𑀲𑀸𑀫𑀁-𑀪𑀸𑀯𑁄.

𑁨𑁦.

𑀦 𑀭𑀲𑀁 𑀅𑀓𑁄𑀢𑀫𑁆𑀩𑀼𑀮𑀁,

𑀅𑀥𑀦𑀲𑁆𑀲, 𑀮𑀗𑁆𑀓𑀢𑀫𑁆𑀧𑀺;

𑀅𑀮𑁄𑀦𑀓𑀦𑁆𑀢𑀼 𑀩𑁆𑀬𑀜𑁆𑀚𑀦𑀁,

𑀩𑁆𑀬𑀸𑀓𑀭𑀡𑀁 𑀅𑀲𑀺𑀧𑁆𑀧𑀲𑁆𑀲.

𑁨𑁧.

𑀲𑀼𑀲𑁆𑀲𑀼𑀲𑀸 𑀲𑀼𑀢𑀲𑀫𑁆𑀧𑀦𑁆𑀦𑁄,

𑀲𑀼𑀢𑀸𑀧𑀜𑁆𑀜𑀸𑀬 𑀧𑀯𑀟𑁆𑀠𑀢𑀺;

𑀧𑀜𑁆𑀜𑀸𑀬 𑀅𑀢𑁆𑀣𑀁 𑀚𑀸𑀦𑀸𑀢𑀺,

𑀜𑀸𑀢𑁄 𑀅𑀢𑁆𑀣𑁄 𑀲𑀼𑀔𑀸𑀯𑀳𑁄.

𑁨𑁨.

𑀪𑁄𑀚𑀦𑀁 𑀫𑁂𑀣𑀼𑀦𑀁 𑀦𑀺𑀤𑁆𑀤𑀸,

𑀕𑁄𑀡𑁂 𑀧𑁄𑀲𑁂𑀧𑀺 𑀯𑀺𑀚𑁆𑀚𑀢𑀺;

𑀯𑀺𑀚𑁆𑀚𑀸 𑀯𑀺𑀲𑁂𑀲𑁄 𑀧𑁄𑀲𑀲𑁆𑀲,

𑀢𑀁 𑀳𑀻𑀦𑁄 𑀕𑁄𑀲𑀫𑁄 𑀪𑀯𑁂.

𑁨𑁩.

𑀦𑀢𑁆𑀣𑀺 𑀯𑀺𑀚𑁆𑀚𑀸𑀲𑀫𑀁𑀫𑀺𑀢𑁆𑀢𑀁,

𑀦𑀘 𑀩𑁆𑀬𑀸𑀥𑀺𑀲𑀫𑁄 𑀭𑀺𑀧𑀼;

𑀦𑀘 ¶ 𑀅𑀢𑁆𑀢𑀲𑀫𑀁 𑀧𑁂𑀫𑀁,

𑀦𑀘 𑀓𑀫𑁆𑀫𑀲𑀫𑀁 𑀩𑀮𑀁.

𑁨𑁪.

𑀳𑀁𑀲𑁄 𑀫𑀚𑁆𑀛𑁂 𑀦 𑀓𑀸𑀓𑀸𑀦𑀁,

𑀲𑀻𑀳𑁄 𑀕𑀼𑀦𑁆𑀦𑀁 𑀦 𑀲𑁄𑀪𑀢𑁂;

𑀕𑀤𑁆𑀭𑀪𑀫𑀚𑁆𑀛𑁂 𑀢𑀼𑀭𑀗𑁆𑀕𑁄,

𑀩𑀸𑀮𑀫𑀚𑁆𑀛𑁂 𑀘 𑀧𑀡𑁆𑀟𑀺𑀢𑁄.

𑁨𑁫.

𑀬𑀸𑀯𑀚𑀻𑀯𑀫𑁆𑀧𑀺 𑀘𑁂 𑀩𑀸𑀮𑁄,

𑀧𑀡𑁆𑀟𑀺𑀢𑀁 𑀧𑀬𑀺𑀭𑀼𑀧𑀸𑀲𑀢𑀺;

𑀦 𑀲𑁄 𑀥𑀫𑁆𑀫𑀁 𑀯𑀺𑀚𑀸𑀦𑀸𑀢𑀺,

𑀤𑀩𑁆𑀩𑀺 𑀲𑀽𑀧𑀭𑀲𑀁 𑀬𑀣𑀸.

𑁨𑁬.

𑀫𑀼𑀳𑀼𑀢𑁆𑀢𑀫𑀧𑀺 𑀘𑁂 𑀯𑀺𑀜𑁆𑀜𑀽,

𑀧𑀡𑁆𑀟𑀺𑀢𑀁 𑀧𑀬𑀺𑀭𑀼𑀧𑀸𑀲𑀢𑀺;

𑀔𑀺𑀧𑁆𑀧𑀁 𑀥𑀫𑁆𑀫𑀁 𑀯𑀺𑀚𑀸𑀦𑀸𑀢𑀺,

𑀚𑀺𑀯𑁆𑀳𑀸 𑀲𑀽𑀧𑀭𑀲𑀁 𑀬𑀣𑀸.

𑁨𑁭.

𑀯𑀺𑀦𑀸 𑀲𑀢𑁆𑀣𑀁 𑀦 𑀕𑀘𑁆𑀙𑁂𑀬𑁆𑀬,

𑀲𑀽𑀭𑁄 𑀲𑀗𑁆𑀕𑀸𑀫𑀪𑀽𑀫𑀺𑀬𑀁;

𑀧𑀡𑁆𑀟𑀺𑀢𑁆𑀯𑀸𑀤𑁆𑀥𑀕𑀽 𑀯𑀸𑀡𑀺𑀚𑁄,

𑀯𑀺𑀤𑁂𑀲𑀕𑀫𑀦𑁄 𑀢𑀣𑀸.

𑁨𑁮.

𑀥𑀦𑀦𑀸𑀲𑀁 𑀫𑀦𑁄𑀢𑀸𑀧𑀁,

𑀖𑀭𑁂 𑀤𑀼𑀘𑁆𑀘𑀭𑀺𑀢𑀸𑀦𑀺 𑀘;

𑀯𑀜𑁆𑀘𑀦𑀜𑁆𑀘 ¶ 𑀅𑀯𑀫𑀸𑀦𑀁,

𑀧𑀡𑁆𑀟𑀺𑀢𑁄 𑀦 𑀧𑀓𑀸𑀲𑀬𑁂.

𑁨𑁯.

𑀧𑀢𑁆𑀢𑀸𑀦𑀼𑀭𑀽𑀧𑀓𑀁 𑀯𑀸𑀓𑁆𑀬𑀁,

𑀲𑀪𑀸𑀯𑀭𑀽𑀧𑀓𑀁 𑀧𑀺𑀬𑀁;

𑀅𑀢𑁆𑀢𑀸𑀦𑀼𑀭𑀽𑀧𑀓𑀁 𑀓𑁄𑀥𑀁,

𑀬𑁄 𑀚𑀸𑀦𑀸𑀢𑀺 𑀲 𑀧𑀡𑁆𑀟𑀺𑀢𑁄.

𑁩𑁦.

𑀅-𑀥𑀦𑀲𑁆𑀲 𑀭𑀲𑀁 𑀔𑀸𑀤𑀸,

𑀅-𑀩𑀮𑀲𑁆𑀲 𑀳𑀣𑀸 𑀦𑀭𑀸;

𑀅-𑀧𑀜𑁆𑀜𑀲𑁆𑀲 𑀯𑀸𑀓𑁆𑀬-𑀓𑀣𑀸,

𑀉𑀫𑁆𑀫𑀢𑁆𑀢𑀓-𑀲𑀫𑀸 𑀇𑀫𑁂.

𑁩𑁧.

𑀅𑀦𑀯𑁆𑀳𑀸𑀬𑀁 𑀕𑀫𑀬𑀦𑁆𑀢𑁄,

𑀅-𑀧𑀼𑀘𑁆𑀙𑀸 𑀩𑀳𑀼-𑀪𑀸𑀲𑀓𑁄;

𑀅𑀢𑁆𑀢-𑀕𑀼𑀡𑀁 𑀧𑀓𑀸𑀲𑁂𑀦𑁆𑀢𑁄,

𑀢𑀺-𑀯𑀺𑀥𑀁 𑀳𑀻𑀦-𑀮𑀓𑁆𑀔𑀡𑀁.

𑁩𑁨.

𑀅𑀧𑁆𑀧-𑀭𑀽𑀧𑁄 𑀩𑀳𑀼𑀁 𑀪𑀸𑀲𑁄,

𑀅𑀧𑁆𑀧-𑀧𑀜𑁆𑀜𑁄 𑀧𑀓𑀸𑀲𑀺𑀢𑁄;

𑀅𑀧𑁆𑀧-𑀧𑀽𑀭𑁄 𑀖𑀝𑁄 𑀔𑁄𑀪𑁂,

𑀅𑀧𑁆𑀧-𑀔𑀻𑀭𑀸 𑀕𑀸𑀯𑀻 𑀘𑀣𑁂.

𑁩𑁩.

𑀫𑀡𑁆𑀟𑀽𑀓𑁂𑀧𑀺 𑀉𑀓𑁆𑀭𑁂 𑀲𑀻𑀳𑁂,

𑀓𑀸𑀓𑀕𑁆𑀕𑀳𑁂 𑀧𑀺𑀬𑁂 𑀧𑀺𑀬𑁂;

𑀅-𑀧𑀡𑁆𑀟𑀻𑀧𑀺 ¶ 𑀧𑀡𑁆𑀟𑀻 𑀳𑀼𑀢𑁆𑀯𑀸,

𑀥𑀻𑀭𑀸 𑀧𑀼𑀘𑁆𑀙𑁂 𑀯𑀬𑁂 𑀯𑀬𑁂.

𑁩𑁪.

𑀫𑀡𑁆𑀟𑀽𑀓𑁂𑀧𑀺 𑀉𑀓𑁆𑀭𑁂 𑀲𑀻𑀳𑁂,

𑀲𑀽𑀓𑀭𑁂𑀧𑀺 𑀉𑀳𑁂 𑀤𑀻𑀧𑁂;

𑀩𑀺𑀴𑀸𑀭𑁂 𑀲𑀤𑀺𑀲𑁂 𑀩𑁆𑀬𑀕𑁆𑀖𑁂,

𑀲𑀩𑁆𑀩 𑀥𑀻𑀭𑁂 𑀲𑀺𑀧𑁆𑀧-𑀲𑀫𑁂.

𑁩𑁫.

𑀦 𑀢𑀺𑀢𑁆𑀢𑀺 𑀭𑀸𑀚𑀸 𑀥𑀦𑀫𑁆𑀳𑀺,

𑀧𑀡𑁆𑀟𑀺𑀢𑁄𑀧𑀺 𑀲𑀼-𑀪𑀸𑀲𑀺𑀢𑁂;

𑀘𑀓𑁆𑀔𑀼𑀁𑀧𑀺 𑀧𑀺𑀬-𑀤𑀲𑁆𑀲𑀦𑁂,

𑀚𑀮𑁂 𑀲𑀸𑀕𑀭𑁄 𑀦 𑀢𑀺𑀢𑁆𑀢𑀺.

𑁩𑁬.

𑀭𑀽𑀧-𑀬𑁄𑀩𑁆𑀩𑀦-𑀲𑀫𑁆𑀧𑀦𑁆𑀦𑀸,

𑀯𑀺𑀲𑀸𑀣-𑀓𑀼𑀣-𑀲𑀫𑁆𑀪𑀯𑀸;

𑀯𑀺𑀚𑁆𑀚𑀸-𑀳𑀻𑀦𑀸 𑀦 𑀲𑁄𑀪𑀦𑁆𑀢𑀺,

𑀦𑀺𑀕𑀦𑁆𑀥𑀸 𑀇𑀯 𑀓𑀺𑀁𑀲𑀼𑀓𑀸.

𑁩𑁭.

𑀳𑀻𑀦𑁂 𑀧𑀼𑀢𑁆𑀢𑁄 𑀭𑀸𑀚𑀸𑀫𑀘𑁆𑀘𑁄,

𑀩𑀸𑀮-𑀧𑀼𑀢𑁆𑀢𑁄 𑀘 𑀧𑀡𑁆𑀟𑀺𑀢𑁄;

𑀅-𑀥𑀦𑀲𑁆𑀲 𑀥𑀦𑀁 𑀩𑀳𑀼,

𑀧𑀼𑀭𑀺𑀲𑀸𑀦𑀁 𑀦 𑀫𑀜𑁆𑀜𑀣.

𑁩𑁮.

𑀬𑁄 𑀲𑀺𑀧𑁆𑀧-𑀮𑁄𑀪𑁂𑀦,

𑀩𑀳𑀼𑀁 𑀕𑀡𑁆𑀳𑀸𑀢𑀺 𑀢𑀁 𑀲𑀺𑀧𑁆𑀧𑀁;

𑀫𑀽𑀕𑁄𑀯 ¶ 𑀲𑀼𑀧𑀺𑀦𑀁 𑀧𑀲𑁆𑀲𑀁,

𑀓𑀣𑁂𑀢𑀼𑀫𑁆𑀧𑀺 𑀦 𑀉𑀲𑁆𑀲𑀳𑁂.

𑁩𑁯.

𑀪𑀺𑀚𑁆𑀚𑁂𑀢𑀼𑀁 𑀓𑀼𑀫𑁆𑀪𑀓𑀸𑀭𑁄,

𑀲𑁄𑀪𑁂𑀢𑀼𑀁 𑀓𑀼𑀫𑁆𑀪 𑀖𑀝𑁆𑀝𑀢𑀺;

𑀦 𑀔𑀺𑀧𑀺𑀢𑀼𑀁 𑀅𑀧𑀸𑀬𑁂𑀲𑀼,

𑀲𑀺𑀲𑁆𑀲𑀸𑀦𑀁 𑀯𑀼𑀟𑁆𑀠𑀺-𑀓𑀸𑀭𑀡𑀸.

𑁪𑁦.

𑀢𑀕𑁆𑀕𑀭𑀜𑁆𑀘 𑀧𑀮𑀸𑀲𑁂𑀦,

𑀬𑁄 𑀦𑀭𑁄 𑀉𑀧𑀦𑀬𑁆𑀳𑀢𑀺;

𑀧𑀢𑁆𑀢𑀸𑀧𑀺 𑀲𑀼𑀭𑀪𑀺 𑀯𑀸𑀬𑀦𑁆𑀢𑀺,

𑀏𑀯𑀁 𑀥𑀻𑀭𑀽𑀧𑀲𑁂𑀯𑀦𑀸.

𑀧𑀡𑁆𑀟𑀺𑀢𑀓𑀡𑁆𑀟𑁄 𑀦𑀺𑀝𑁆𑀞𑀺𑀢𑁄.

𑀲𑀼𑀚𑀦𑀓𑀡𑁆𑀟𑁄

𑁪𑁧.

𑀲𑀩𑁆𑀪𑀺𑀭𑁂𑀯 𑀲𑀫𑀸𑀲𑁂𑀣,

𑀲𑀩𑁆𑀪𑀺 𑀓𑀼𑀩𑁆𑀩𑁂𑀣 𑀲𑀦𑁆𑀣𑀯𑀁;

𑀲𑀢𑀁 𑀲𑀤𑁆𑀥𑀫𑁆𑀫𑀫𑀜𑁆𑀜𑀸𑀬,

𑀲𑁂𑀬𑁆𑀬𑁄 𑀳𑁄𑀢𑀺 𑀦 𑀧𑀸𑀧𑀺𑀬𑁄.

𑁪𑁨.

𑀘𑀚 𑀤𑀼𑀚𑁆𑀚𑀦 𑀲𑀁𑀲𑀕𑁆𑀕𑀁,

𑀪𑀚 𑀲𑀸𑀥𑀼 𑀲𑀫𑀸𑀕𑀫𑀁;

𑀓𑀭 𑀧𑀼𑀜𑁆𑀜𑀫𑀳𑁄𑀭𑀢𑁆𑀢𑀺𑀁,

𑀲𑀭 𑀦𑀺𑀘𑁆𑀘𑀫𑀦𑀺𑀘𑁆𑀘𑀢𑀁.

𑁪𑁩.

𑀬𑀣𑀸 ¶ 𑀉𑀤𑀼𑀫𑁆𑀩𑀭𑀧𑀓𑁆𑀓𑀸,

𑀩𑀳𑀺𑀭𑀢𑁆𑀢𑀓𑀫𑁂𑀯𑀘;

𑀅𑀦𑁆𑀢𑁄 𑀓𑀺𑀫𑀻𑀳𑀺 𑀲𑀫𑁆𑀧𑀼𑀡𑁆𑀡𑀸,

𑀏𑀯𑀁 𑀤𑀼𑀚𑁆𑀚𑀦𑀳𑀤𑁆𑀤𑀬𑀸.

𑁪𑁪.

𑀬𑀣𑀸𑀧𑀺 𑀧𑀦𑀲𑀸𑀧𑀓𑁆𑀓𑀸,

𑀩𑀳𑀺 𑀓𑀡𑁆𑀟𑀓𑀫𑁂𑀯 𑀘;

𑀅𑀦𑁆𑀢𑁄 𑀅𑀫𑀢𑀲𑀫𑁆𑀧𑀦𑁆𑀦𑀸,

𑀏𑀯𑀁 𑀲𑀼𑀚𑀦𑀳𑀤𑀬𑀸.

𑁪𑁫.

𑀲𑀼𑀓𑁆𑀔𑁄𑀧𑀺 𑀘𑀦𑁆𑀤𑀦𑀢𑀭𑀼 𑀦 𑀚𑀳𑀸𑀢𑀺 𑀕𑀦𑁆𑀥𑀁,

𑀦𑀸𑀕𑁄 𑀕𑀢𑁄 𑀦𑀭𑀫𑀼𑀔𑁂 𑀦 𑀚𑀳𑀸𑀢𑀺 𑀮𑀻𑀴𑀁;

𑀬𑀦𑁆𑀢𑀸𑀕𑀢𑁄 𑀫𑀥𑀼𑀭𑀲𑀁 𑀦 𑀚𑀳𑀸𑀢𑀺 𑀉𑀘𑁆𑀙𑀼,

𑀤𑀼𑀓𑁆𑀔𑁄𑀧𑀺 𑀧𑀡𑁆𑀟𑀺𑀢𑀚𑀦𑁄 𑀦 𑀚𑀳𑀸𑀢𑀺 𑀥𑀫𑁆𑀫𑀁.

𑁪𑁬.

𑀲𑀻𑀳𑁄 𑀦𑀸𑀫 𑀚𑀺𑀖𑀘𑁆𑀙𑀸𑀧𑀺,

𑀧𑀡𑁆𑀡𑀸𑀤𑀻𑀦𑀺 𑀦 𑀔𑀸𑀤𑀢𑀺;

𑀲𑀻𑀳𑁄 𑀦𑀸𑀫 𑀓𑀺𑀲𑁄𑀘𑀸𑀧𑀺,

𑀦𑀸𑀕𑀫𑀁𑀲𑀁 𑀦 𑀔𑀸𑀤𑀢𑀺.

𑁪𑁭.

𑀓𑀼𑀮-𑀚𑀸𑀢𑁄 𑀓𑀼𑀮-𑀧𑀼𑀢𑁆𑀢𑁄,

𑀓𑀼𑀮-𑀯𑀁𑀲-𑀲𑀼𑀭𑀓𑁆𑀔𑀢𑁄;

𑀅𑀢𑁆𑀢𑀦𑀸 𑀤𑀼𑀓𑁆𑀔-𑀧𑀢𑁆𑀢𑁄𑀧𑀺,

𑀳𑀻𑀦-𑀓𑀫𑁆𑀫𑀁 𑀦 𑀓𑀸𑀭𑀬𑁂.

𑁪𑁮.

𑀘𑀦𑁆𑀤𑀦𑀁 ¶ 𑀲𑀻𑀢𑀮𑀁 𑀮𑁄𑀓𑁂,

𑀢𑀢𑁄 𑀘𑀦𑁆𑀤𑀁𑀯 𑀲𑀻𑀢𑀮𑀁;

𑀘𑀦𑁆𑀤-𑀘𑀦𑁆𑀤𑀦𑀲𑀻𑀢𑀫𑁆𑀳𑀸,

𑀲𑀸𑀥𑀼 𑀯𑀸𑀓𑁆𑀬𑀁 𑀲𑀼𑀪𑀸𑀲𑀺𑀢𑀁.

𑁪𑁯.

𑀉𑀤𑁂𑀬𑁆𑀬 𑀪𑀸𑀡𑀼 𑀧𑀘𑁆𑀙𑀺𑀫𑁂,

𑀫𑁂𑀭𑀼𑀭𑀸𑀚𑀸 𑀦𑀫𑁂𑀬𑁆𑀬𑀧𑀺;

𑀲𑀻𑀢𑀮𑀸 𑀦𑀭𑀓𑀕𑁆𑀕𑀺𑀧𑀺,

𑀧𑀩𑁆𑀩𑀢𑀕𑁆𑀕𑁂 𑀘 𑀉𑀧𑁆𑀧𑀮𑀁.

𑀯𑀺𑀓𑀲𑁂 𑀦 𑀯𑀺𑀧𑀭𑀻𑀢𑀁,

𑀲𑀸𑀥𑀼𑀯𑀸𑀬𑁆𑀬𑀁 𑀓𑀼𑀤𑀸𑀘𑀦𑀁.

𑁫𑁦.

𑀲𑀼𑀔𑀸 𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀯,

𑀢𑀢𑁄 𑀜𑀸𑀢𑀺 𑀫𑀸𑀢𑀸 𑀧𑀺𑀢𑀼;

𑀢𑀢𑁄 𑀆𑀘𑀭𑀺𑀬𑁄 𑀭𑀜𑁆𑀜𑁄,

𑀢𑀢𑁄 𑀩𑀼𑀤𑁆𑀥𑀲𑁆𑀲𑀦𑁂𑀓𑀥𑀸.

𑁫𑁧.

𑀪𑀫𑀭𑀸 𑀧𑀼𑀧𑁆𑀨𑀫𑀺𑀘𑁆𑀙𑀦𑁆𑀢𑀺,

𑀕𑀼𑀡𑀫𑀺𑀘𑁆𑀙𑀦𑁆𑀢𑀺 𑀲𑀼𑀚𑀦𑀸;

𑀫𑀓𑁆𑀔𑀺𑀓𑀸 𑀧𑀽𑀢𑀺𑀫𑀺𑀘𑁆𑀙𑀦𑁆𑀢𑀺,

𑀤𑁄𑀲𑀫𑀺𑀘𑁆𑀙𑀦𑁆𑀢𑀺 𑀤𑀼𑀚𑁆𑀚𑀦𑀸.

𑁫𑁨.

𑀫𑀸𑀢𑀸𑀳𑀻𑀦𑀲𑁆𑀲 𑀤𑀼𑀩𑁆𑀪𑀸𑀲𑀸,

𑀧𑀺𑀢𑀸𑀳𑀻𑀦𑀲𑁆𑀲 𑀤𑀼𑀓𑁆𑀭𑀺𑀬𑀸;

𑀉𑀪𑁄 ¶ 𑀫𑀸𑀢𑀸 𑀧𑀺𑀢𑀸 𑀳𑀻𑀦𑀸,

𑀤𑀼𑀩𑁆𑀪𑀲𑀸𑀘 𑀤𑀼𑀓𑀻𑀭𑀺𑀬𑀸.

𑁫𑁩.

𑀫𑀸𑀢𑀸 𑀲𑁂𑀝𑁆𑀞𑀲𑁆𑀲 𑀲𑀼𑀪𑀸𑀲𑀸,

𑀧𑀺𑀢𑀸 𑀲𑁂𑀝𑁆𑀞𑀲𑁆𑀲 𑀲𑀼𑀓𑁆𑀭𑀺𑀬𑀸;

𑀉𑀪𑁄 𑀫𑀸𑀢𑀸 𑀧𑀺𑀢𑀸 𑀲𑁂𑀝𑁆𑀞𑀸,

𑀲𑀼𑀪𑀸𑀲𑀸𑀘 𑀲𑀼𑀓𑀻𑀭𑀺𑀬𑀸.

𑁫𑁪.

𑀲𑀗𑁆𑀕𑀸𑀫𑁂 𑀲𑀽𑀭-𑀫𑀺𑀘𑁆𑀙𑀦𑁆𑀢𑀺,

𑀫𑀦𑁆𑀢𑀻𑀲𑀼 𑀅𑀓𑀽𑀢𑀽𑀳𑀮𑀁;

𑀧𑀺𑀬𑀜𑁆𑀘 𑀅𑀦𑁆𑀦𑀧𑀸𑀦𑁂𑀲𑀼,

𑀅𑀢𑁆𑀣𑁂 𑀚𑀸𑀢𑁂 𑀘 𑀧𑀡𑁆𑀟𑀺𑀢𑀁.

𑁫𑁫.

𑀲𑀼𑀦𑀔𑁄 𑀲𑀼𑀦𑀔𑀁 𑀤𑀺𑀲𑁆𑀯𑀸,

𑀤𑀦𑁆𑀢𑀁 𑀤𑀲𑁆𑀲𑁂𑀢𑀺 𑀳𑀺𑀁𑀲𑀺𑀢𑀼𑀁;

𑀤𑀼𑀚𑁆𑀚𑀦𑁄 𑀲𑀼𑀚𑀦𑀁 𑀤𑀺𑀲𑁆𑀯𑀸,

𑀭𑁄𑀲𑀬𑀁 𑀳𑀺𑀁𑀲𑀫𑀺𑀘𑁆𑀙𑀢𑀺.

𑁫𑁬.

𑀫𑀸 𑀘 𑀯𑁂𑀕𑁂𑀦 𑀓𑀺𑀘𑁆𑀘𑀸𑀦𑀺,

𑀓𑀭𑁄𑀲𑀺 𑀓𑀸𑀭𑀸𑀧𑁂𑀲𑀺 𑀯𑀸;

𑀲𑀳𑀲𑀸 𑀓𑀸𑀭𑀺𑀢𑀁 𑀓𑀫𑁆𑀫𑀁,

𑀫𑀦𑁆𑀤𑁄 𑀧𑀘𑁆𑀙𑀸𑀦𑀼𑀢𑀧𑁆𑀧𑀢𑀺.

𑁫𑁭.

𑀓𑁄𑀥𑀁 𑀯𑀺𑀳𑀺𑀢𑁆𑀯𑀸 𑀦 𑀓𑀤𑀸𑀘𑀺𑀦𑀲𑁄𑀘𑁂,

𑀫𑀓𑁆𑀔𑀧𑁆𑀧𑀳𑀸𑀦𑀁 𑀇𑀲𑀬𑁄 𑀅𑀯𑀡𑁆𑀡𑀬𑀼𑀁;

𑀲𑀩𑁆𑀩𑁂𑀲 ¶ 𑀨𑀸𑀭𑀼𑀲-𑀯𑀘𑀁 𑀔𑀫𑁂𑀣,

𑀏𑀢𑀁 𑀔𑀦𑁆𑀢𑀺𑀁 𑀉𑀢𑁆𑀢𑀫𑀫𑀸𑀳𑀼 𑀲𑀦𑁆𑀢𑁄.

𑁫𑁮.

𑀤𑀼𑀓𑁆𑀔𑁄 𑀦𑀺𑀯𑀸𑀲𑁄 𑀲𑀫𑁆𑀩𑀸𑀥𑁂,

𑀞𑀸𑀦𑁂 𑀅𑀲𑀼𑀘𑀺𑀲𑀗𑁆𑀓𑀢𑁂;

𑀢𑀢𑁄 𑀅𑀭𑀺𑀫𑁆𑀳𑀺 𑀅𑀧𑁆𑀧𑀺𑀬𑁂,

𑀢𑀢𑁄𑀧𑀺 𑀅𑀓𑀢𑀜𑁆𑀜𑀼𑀦𑀸.

𑁫𑁯.

𑀑𑀯𑀸𑀤𑁂𑀬𑁆𑀬𑀸𑀦𑀼𑀲𑀸𑀲𑁂𑀬𑁆𑀬,

𑀕𑀸𑀧𑀓𑀸 𑀘 𑀦𑀺𑀯𑀸𑀭𑀬𑁂;

𑀲𑀢𑀜𑁆𑀳𑀺 𑀲𑁄 𑀧𑀺𑀬𑁄 𑀳𑁄𑀢𑀺,

𑀅𑀲𑀢𑀁 𑀳𑁄𑀢𑀺 𑀅𑀧𑁆𑀧𑀺𑀬𑁄.

𑁬𑁦.

𑀉𑀢𑁆𑀢𑀫𑀢𑁆𑀢𑀦𑀺𑀯𑀸𑀢𑁂𑀦,

𑀲𑀽𑀭𑀁 𑀪𑁂𑀤𑁂𑀦 𑀦𑀺𑀚𑁆𑀚𑀬𑁂;

𑀦𑀻𑀘𑀁 𑀅𑀧𑁆𑀧𑀓 𑀤𑀸𑀦𑁂𑀦,

𑀯𑀻𑀭𑀺𑀬𑁂𑀦 𑀲𑀫𑀁 𑀚𑀬𑁂.

𑁬𑁧.

𑀦 𑀯𑀺𑀲𑀁 𑀯𑀺𑀲𑀫𑀺𑀘𑁆𑀘𑀸𑀳𑀼,

𑀥𑀦𑀁 𑀲𑀗𑁆𑀖𑀲𑁆𑀲 𑀉𑀘𑁆𑀘𑀢𑁂;

𑀯𑀺𑀲𑀁 𑀏𑀓𑀁𑀯 𑀳𑀦𑀢𑀺,

𑀲𑀩𑁆𑀩𑀁 𑀲𑀗𑁆𑀖𑀲𑁆𑀲 𑀲𑀦𑁆𑀢𑀓𑀁.

𑁬𑁨.

𑀚𑀯𑀦𑁂 𑀪𑀤𑁆𑀭𑀁 𑀚𑀸𑀦𑀦𑁆𑀢𑀺,

𑀩𑀮𑀺𑀤𑁆𑀤𑀜𑁆𑀘 𑀯𑀸𑀳𑁂𑀦𑀸;

𑀤𑀼𑀳𑁂𑀦 ¶ 𑀥𑁂𑀦𑀼𑀁 𑀚𑀸𑀦𑀦𑁆𑀢𑀺,

𑀪𑀸𑀲𑀫𑀸𑀦𑁂𑀦 𑀧𑀡𑁆𑀟𑀺𑀢𑀁.

𑁬𑁩.

𑀥𑀦𑀫𑀧𑁆𑀧𑀫𑁆𑀧𑀺 𑀲𑀸𑀥𑀽𑀦𑀁,

𑀓𑀽𑀧𑁂 𑀯𑀸𑀭𑀺𑀯 𑀦𑀺𑀲𑁆𑀲𑀬𑁄;

𑀩𑀳𑀼𑀁 𑀅𑀧𑀺 𑀅𑀲𑀸𑀥𑀽𑀦𑀁,

𑀦𑀘 𑀯𑀸𑀭𑀻𑀯 𑀅𑀡𑁆𑀡𑀯𑁂.

𑁬𑁪.

𑀦𑀚𑁆𑀚𑁄 𑀧𑀺𑀯𑀦𑁆𑀢𑀺 𑀦𑁄 𑀆𑀧𑀁,

𑀭𑀼𑀓𑁆𑀔𑀸 𑀔𑀸𑀤𑀦𑁆𑀢𑀺 𑀦𑁄 𑀨𑀮𑀁;

𑀯𑀲𑁆𑀲𑀦𑁆𑀢𑀺 𑀓𑁆𑀯𑀘𑀺 𑀦𑁄 𑀫𑁂𑀖𑀸,

𑀧𑀭𑀢𑁆𑀣𑀸𑀬 𑀲𑀢𑀁 𑀥𑀦𑀁.

𑁬𑁫.

𑀅𑀧𑀢𑁆𑀣𑁂𑀬𑁆𑀬𑀁 𑀦 𑀧𑀢𑁆𑀣𑁂𑀬𑁆𑀬,

𑀅 𑀘𑀺𑀦𑁆𑀢𑁂𑀬𑁆𑀬𑀁 𑀦 𑀘𑀺𑀦𑁆𑀢𑀬𑁂;

𑀥𑀫𑁆𑀫𑀫𑁂𑀯 𑀲𑀼𑀘𑀺𑀦𑁆𑀢𑁂𑀬𑁆𑀬,

𑀓𑀸𑀮𑀁 𑀫𑁄𑀖𑀁 𑀦 𑀅𑀘𑁆𑀘𑀬𑁂.

𑁬𑁬.

𑀅𑀘𑀺𑀦𑁆𑀢𑀺𑀢𑀫𑁆𑀧𑀺 𑀪𑀯𑀢𑀺,

𑀘𑀺𑀦𑁆𑀢𑀺𑀢𑀫𑁆𑀧𑀺 𑀯𑀺𑀦𑀲𑁆𑀲𑀢𑀺;

𑀦 𑀳𑀺 𑀘𑀺𑀦𑁆𑀢𑀸𑀫𑀬𑀸 𑀪𑁄𑀕𑀸,

𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀲𑁆𑀲𑀯𑀸.

𑁬𑁭.

𑀅𑀲𑀦𑁆𑀢𑀲𑁆𑀲 𑀧𑀺𑀬𑁄 𑀳𑁄𑀢𑀺,

𑀲𑀦𑁆𑀢𑁂 𑀦 𑀓𑀼𑀭𑀼𑀢𑁂 𑀧𑀺𑀬𑀁;

𑀅𑀲𑀢𑀁 ¶ 𑀥𑀫𑁆𑀫𑀁 𑀭𑁄𑀘𑁂𑀢𑀺,

𑀢𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁.

𑀲𑀼𑀚𑀦𑀓𑀡𑁆𑀟𑁄 𑀦𑀺𑀝𑁆𑀞𑀺𑀢𑁄.

𑁪. 𑀩𑀸𑀮𑀤𑀼𑀚𑁆𑀚𑀦𑀓𑀡𑁆𑀟𑁄

𑁬𑁮.

𑀅𑀢𑀺𑀧𑁆𑀧𑀺𑀬𑁄 𑀦 𑀓𑀸𑀢𑀩𑁆𑀩𑁄,

𑀔𑀮𑁄 𑀓𑁄𑀢𑀽𑀳𑀮𑀁 𑀓𑀭𑁄;

𑀲𑀺𑀭𑀲𑀸 𑀯𑀳𑁆𑀬𑀫𑀸𑀦𑁄𑀧𑀺,

𑀅𑀟𑁆𑀠𑀧𑀽𑀭𑁄 𑀖𑀝𑁄 𑀬𑀣𑀸.

𑁬𑁯.

𑀲𑀧𑁆𑀧𑁄 𑀤𑀼𑀝𑁆𑀞𑁄 𑀔𑀮𑁄 𑀤𑀼𑀝𑁆𑀞𑁄,

𑀲𑀧𑁆𑀧𑁄 𑀤𑀼𑀝𑁆𑀞𑀢𑀭𑁄 𑀔𑀮𑁄;

𑀫𑀦𑁆𑀢𑁄𑀲𑀥𑁂𑀳𑀺 𑀲𑁄 𑀲𑀧𑁆𑀧𑁄,

𑀔𑀮𑁄 𑀓𑁂𑀦𑀼𑀧𑀲𑀫𑁆𑀫𑀢𑀺.

𑁭𑁦.

𑀬𑁄 𑀩𑀸𑀮𑁄 𑀫𑀜𑁆𑀜𑀢𑀺 𑀩𑀸𑀮𑁆𑀬𑀁,

𑀧𑀡𑁆𑀟𑀺𑀢𑁄 𑀯𑀸𑀧𑀺 𑀢𑁂𑀦 𑀲𑁄;

𑀩𑀸𑀮𑁄𑀯 𑀧𑀡𑁆𑀟𑀺𑀢𑀫𑀸𑀦𑀻,

𑀲𑁄 𑀯𑁂 𑀩𑀸𑀮𑁄𑀢𑀺 𑀯𑀼𑀘𑁆𑀘𑀢𑀺.

𑁭𑁧.

𑀫𑀥𑀼𑀁𑀯 𑀫𑀜𑁆𑀜𑀢𑀻 𑀩𑀸𑀮𑁄,

𑀬𑀸𑀯 𑀧𑀸𑀧𑀁 𑀦 𑀧𑀘𑁆𑀘𑀢𑀺;

𑀬𑀤𑀸𑀘 ¶ 𑀧𑀘𑁆𑀘𑀢𑀻 𑀧𑀸𑀧𑀁,

𑀅𑀣 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀺.

𑁭𑁨.

𑀦 𑀲𑀸𑀥𑀼 𑀩𑀮𑀯𑀸 𑀩𑀸𑀮𑁄,

𑀲𑀳𑀲𑀸 𑀯𑀺𑀦𑁆𑀤𑀢𑁂 𑀥𑀦𑀁;

𑀓𑀸𑀬𑀲𑁆𑀲 𑀪𑁂𑀤𑀸 𑀤𑀼𑀧𑁆𑀧𑀜𑁆𑀜𑁄,

𑀦𑀺𑀭𑀬𑀁 𑀲𑁄𑀧𑀧𑀚𑁆𑀚𑀢𑀺.

𑁭𑁩.

𑀖𑀭𑁂 𑀤𑀼𑀝𑁆𑀞𑁄 𑀘 𑀫𑀽𑀲𑀻𑀓𑁄 𑀘,

𑀯𑀦𑁂 𑀤𑀼𑀝𑁆𑀞𑁄 𑀘 𑀯𑀸𑀦𑀭𑁄;

𑀲𑀓𑀼𑀡𑁂 𑀘 𑀤𑀼𑀝𑁆𑀞𑁄 𑀓𑀸𑀓𑁄,

𑀦𑀭𑁂 𑀤𑀼𑀝𑁆𑀞𑁄𑀘 𑀩𑁆𑀭𑀸𑀳𑁆𑀫𑀡𑁄.

𑁭𑁪.

𑀤𑀻𑀖𑀸 𑀚𑀸𑀕𑀭𑀢𑁄 𑀭𑀢𑁆𑀢𑀺,

𑀤𑀻𑀖𑀁 𑀲𑀦𑁆𑀢𑀲𑁆𑀲 𑀬𑁄𑀚𑀦𑀁;

𑀤𑀻𑀖𑁄 𑀩𑀸𑀮𑀸𑀦 𑀲𑀁𑀲𑀸𑀭𑁄,

𑀲𑀤𑁆𑀥𑀫𑁆𑀫𑀁 𑀅-𑀯𑀺𑀚𑀸𑀦𑀢𑀁.

𑁭𑁫.

𑀢𑀺𑀮 𑀫𑀢𑁆𑀢𑀁 𑀧𑀭𑁂𑀲𑀁𑀯,

𑀅𑀧𑁆𑀧 𑀤𑁄𑀲𑀜𑁆𑀘 𑀧𑀲𑁆𑀲𑀢𑀺;

𑀦𑀸𑀴𑀺𑀓𑁂𑀭𑀫𑁆𑀧𑀺 𑀲𑀤𑁄𑀲𑀁,

𑀔𑀮-𑀚𑀸𑀢𑁄 𑀦 𑀧𑀲𑁆𑀲𑀢𑀺.

𑁭𑁬.

𑀦𑀢𑁆𑀢𑀤𑁄𑀲𑀁 𑀧𑀭𑁂 𑀚𑀜𑁆𑀜𑀸,

𑀚𑀜𑁆𑀜𑀸 𑀤𑁄𑀲𑀁 𑀧𑀭𑀲𑁆𑀲𑀢𑀼;

𑀕𑀼𑀬𑁆𑀳𑁂 ¶ 𑀓𑀼𑀫𑁆𑀫𑁄 𑀅𑀗𑁆𑀕𑀸𑀦𑀺,

𑀧𑀭 𑀤𑁄𑀲𑀜𑁆𑀘 𑀮𑀓𑁆𑀔𑀬𑁂.

𑁭𑁭.

𑀧𑀡𑁆𑀟𑀺𑀢𑀲𑁆𑀲 𑀧𑀲𑀁𑀲𑀸𑀬,

𑀤𑀡𑁆𑀟𑁄 𑀩𑀸𑀮𑁂𑀦 𑀤𑀻𑀬𑀢𑁂;

𑀧𑀡𑁆𑀟𑀺𑀢𑁄 𑀧𑀡𑁆𑀟𑀺𑀢𑁂𑀦𑁂𑀯,

𑀯𑀡𑁆𑀡𑀺𑀢𑁄𑀯 𑀲𑀼𑀯𑀡𑁆𑀡𑀺𑀢𑁄.

𑁭𑁮.

𑀮𑀼𑀤𑁆𑀥𑀁 𑀅𑀢𑁆𑀣𑁂𑀦 𑀕𑀡𑁆𑀳𑁂𑀬𑁆𑀬,

𑀣𑀤𑁆𑀥𑀁 𑀅𑀜𑁆𑀚𑀮𑀺 𑀓𑀫𑁆𑀫𑀼𑀦𑀸;

𑀙𑀦𑁆𑀤𑀸𑀦𑀼𑀯𑀢𑁆𑀢𑀺𑀬𑀸 𑀫𑀽𑀴𑁆𑀳𑀁,

𑀬𑀣𑀸𑀪𑀽𑀢𑁂𑀦 𑀧𑀡𑁆𑀟𑀺𑀢𑀁.

𑀩𑀸𑀮𑀤𑀼𑀚𑁆𑀚𑀦𑀓𑀡𑁆𑀟𑁄 𑀦𑀺𑀝𑁆𑀞𑀺𑀢𑁄.

𑁪. 𑀫𑀺𑀢𑁆𑀢𑀓𑀡𑁆𑀟𑁄

𑁭𑁯.

𑀳𑀺𑀢𑀓𑀸𑀭𑁄 𑀧𑀭𑁄 𑀩𑀦𑁆𑀥𑀼,

𑀩𑀦𑁆𑀥𑀽𑀧𑀺 𑀅𑀳𑀺𑀢𑁄 𑀧𑀭𑁄;

𑀅 𑀳𑀺𑀢𑁄 𑀤𑁂𑀳𑀚𑁄 𑀩𑁆𑀬𑀸𑀥𑀺,

𑀳𑀺𑀢𑀁 𑀅𑀭𑀜𑁆𑀜𑀫𑁄𑀲𑀥𑀁.

𑁮𑁦.

𑀧𑀭𑁄𑀓𑁆𑀔𑁂 𑀕𑀼𑀡-𑀳𑀦𑁆𑀢𑀸𑀭𑀁,

𑀧𑀘𑁆𑀘𑀓𑁆𑀔𑁂 𑀧𑀺𑀬𑀯𑀸𑀤𑀺𑀦𑀁;

𑀯𑀚𑁆𑀚𑁂𑀬𑁆𑀬 ¶ 𑀢𑀸𑀤𑀺𑀲𑀁 𑀫𑀺𑀢𑁆𑀢𑀁,

𑀯𑀺𑀲𑀓𑀼𑀫𑁆𑀪𑁂 𑀬𑀣𑀸 𑀫𑀥𑀼𑀁.

𑁮𑁧.

𑀥𑀦𑀳𑀻𑀦𑁂 𑀘𑀚𑁂 𑀫𑀺𑀢𑁆𑀢𑁄,

𑀧𑀼𑀢𑁆𑀢𑀤𑀸𑀭𑀸 𑀲𑀳𑁄𑀤𑀭𑀸;

𑀥𑀦𑀯𑀦𑁆𑀢𑀁𑀯 𑀲𑁂𑀯𑀦𑁆𑀢𑀺,

𑀥𑀦𑀁 𑀮𑁄𑀓𑁂 𑀫𑀳𑀸 𑀲𑀔𑀸.

𑁮𑁨.

𑀚𑀸𑀦𑁂𑀬𑁆𑀬 𑀧𑁂𑀲𑁂𑀦 𑀪𑀘𑁆𑀘𑀁,

𑀩𑀦𑁆𑀥𑀼𑀁 𑀯𑀸𑀧𑀺 𑀪𑀬𑀸𑀕𑀢𑁂;

𑀅𑀧𑁆𑀧𑀓𑀸𑀲𑀼 𑀢𑀣𑀸 𑀫𑀺𑀢𑁆𑀢𑀁,

𑀤𑀸𑀭𑀜𑁆𑀘 𑀯𑀺𑀪𑀯𑀓𑁆𑀔𑀬𑁂.

𑁮𑁩.

𑀲𑁄 𑀩𑀦𑁆𑀥𑀼 𑀬𑁄 𑀳𑀺𑀢𑁂 𑀬𑀼𑀢𑁆𑀢𑁄,

𑀧𑀺𑀢𑀭𑁄 𑀳𑁄𑀦𑁆𑀢𑀺 𑀧𑁄𑀲𑀓𑁄;

𑀢𑀁 𑀫𑀺𑀢𑁆𑀢𑀁 𑀬𑀢𑁆𑀣 𑀯𑀺𑀲𑁆𑀲𑀸𑀲𑁄,

𑀲𑀸 𑀪𑀭𑀺𑀬𑀸 𑀘 𑀬𑀲𑁆𑀲 𑀦𑀺𑀩𑁆𑀩𑀽𑀢𑀺.

𑁮𑁪.

𑀦 𑀯𑀺𑀲𑁆𑀲𑀲𑁂 𑀅-𑀯𑀺𑀲𑁆𑀲𑀢𑁆𑀢𑀁,

𑀫𑀺𑀢𑁆𑀢𑀜𑁆𑀘𑀸𑀧𑀺 𑀦 𑀯𑀺𑀲𑁆𑀲𑀲𑁂;

𑀓𑀤𑀸𑀘𑀺 𑀓𑀼𑀧𑀺𑀢𑁄 𑀫𑀺𑀢𑁄,

𑀲𑀩𑁆𑀩𑀁 𑀤𑁄𑀲𑀁 𑀧𑀓𑀸𑀲𑀬𑁂.

𑁮𑁫.

𑀲𑀓𑀺𑀁 𑀤𑀼𑀝𑁆𑀞𑀜𑁆𑀘 𑀬𑁄 𑀫𑀺𑀢𑁆𑀢𑀁,

𑀧𑀼𑀦 𑀲𑀦𑁆𑀥𑀺𑀢𑀼𑀫𑀺𑀘𑁆𑀙𑀢𑀺;

𑀲𑁄 ¶ 𑀫𑀘𑁆𑀘𑀼𑀁 𑀉𑀧𑀕𑀡𑁆𑀳𑀸𑀢𑀺,

𑀕𑀩𑁆𑀪𑀫𑀲𑁆𑀲𑀢𑀭𑀻 𑀬𑀣𑀸.

𑁮𑁬.

𑀯𑀳𑁂 𑀅-𑀫𑀺𑀢𑁆𑀢𑀁 𑀔𑀦𑁆𑀥𑁂𑀦,

𑀬𑀸𑀯 𑀓𑀸𑀮𑁄 𑀅𑀦𑀸𑀕𑀢𑁄;

𑀢𑀫𑁂𑀯 𑀆𑀕𑀢𑁂 𑀓𑀸𑀮𑁂,

𑀲𑁂𑀮𑁂 𑀪𑀺𑀦𑁆𑀤𑁂 𑀖𑀝𑀁 𑀇𑀯.

𑁮𑁭.

𑀇𑀡𑀲𑁂𑀲𑁄 𑀅𑀕𑁆𑀕𑀺𑀲𑁂𑀲𑁄,

𑀲𑀢𑁆𑀭𑀼𑀲𑁂𑀲𑁄 𑀢𑀣𑁂𑀯 𑀘;

𑀧𑀼𑀦𑀧𑁆𑀧𑀼𑀦𑀁 𑀯𑀺𑀯𑀟𑁆𑀠𑀦𑁆𑀢𑀺,

𑀢𑀲𑁆𑀫𑀸 𑀲𑁂𑀲𑀁 𑀦 𑀓𑀸𑀭𑀬𑁂.

𑁮𑁮.

𑀧𑀤𑀼𑀫𑀁𑀯 𑀫𑀼𑀔𑀁 𑀬𑀲𑁆𑀲,

𑀯𑀸𑀘𑀸 𑀘𑀦𑁆𑀤𑀦 𑀲𑀻𑀢𑀮𑀸;

𑀢𑀸𑀤𑀺𑀲𑀁 𑀦𑁄𑀧𑀲𑁂𑀯𑁂𑀬𑁆𑀬,

𑀳𑀤𑀬𑁂𑀢𑀼 𑀳𑀮𑀸𑀳𑀮𑀁.

𑁮𑁯.

𑀦 𑀲𑁂𑀯𑁂 𑀨𑀭𑀼𑀲𑀁 𑀲𑀸𑀫𑀺𑀁,

𑀦𑀘 𑀲𑁂𑀯𑁂𑀬𑁆𑀬 𑀫𑀘𑁆𑀙𑀭𑀺𑀁;

𑀢𑀢𑁄 𑀅𑀧𑀕𑁆𑀕𑀡𑁆𑀳𑀁 𑀲𑀸𑀫𑀺𑀁,

𑀦𑁂𑀯 𑀦𑀺𑀕𑁆𑀕𑀳𑀺𑀢𑀁 𑀢𑀢𑁄.

𑁯𑁦.

𑀲𑀺𑀗𑁆𑀕𑀻 𑀧𑀜𑁆𑀜𑀸𑀲 𑀳𑀢𑁆𑀣𑁂𑀦,

𑀯𑀚𑁆𑀚𑁂 𑀲𑀢𑁂𑀦 𑀯𑀸𑀚𑀺𑀦𑀁;

𑀳𑀢𑁆𑀣𑀺𑀁 ¶ 𑀤𑀦𑁆𑀢𑀺𑀁 𑀲𑀳𑀲𑁆𑀲𑁂𑀦,

𑀤𑁂𑀲 𑀘𑀸𑀕𑁂𑀦 𑀤𑀼𑀚𑁆𑀚𑀦𑀁.

𑁯𑁧.

𑀓𑀼𑀤𑁂𑀲𑀜𑁆𑀘 𑀓𑀼𑀫𑀺𑀢𑁆𑀢𑀜𑁆𑀘,

𑀓𑀼𑀓𑀼𑀮𑀜𑁆𑀘 𑀓𑀼𑀩𑀦𑁆𑀥𑀯𑀁;

𑀓𑀼𑀤𑀸𑀭𑀜𑁆𑀘 𑀓𑀼𑀤𑀸𑀲𑀜𑁆𑀘,

𑀤𑀽𑀭𑀢𑁄 𑀧𑀭𑀺𑀯𑀚𑁆𑀚𑀬𑁂.

𑁯𑁨.

𑀭𑁄𑀕𑀸𑀢𑀼𑀭𑁂 𑀘 𑀤𑀼𑀩𑁆𑀪𑀺𑀓𑁆𑀔𑁂,

𑀩𑁆𑀬𑀲𑀦𑁂 𑀲𑀢𑁆𑀢𑀼 𑀯𑀺𑀕𑁆𑀕𑀳𑁂;

𑀭𑀸𑀚𑀤𑁆𑀯𑀸𑀭𑁂 𑀲𑀼𑀲𑀸𑀦𑁂 𑀘,

𑀬𑁂 𑀢𑀺𑀝𑁆𑀞𑀦𑁆𑀢𑀺 𑀲𑀼𑀫𑀺𑀢𑁆𑀢𑀓𑀸.

𑁯𑁩.

𑀲𑀻𑀢𑀯𑀸𑀘𑁄 𑀩𑀳𑀼𑀫𑀺𑀢𑁆𑀢𑁄,

𑀨𑀭𑀼𑀲𑁄 𑀅𑀧𑁆𑀧𑀫𑀺𑀢𑁆𑀢𑀓𑁄;

𑀉𑀧𑀫𑀁 𑀏𑀢𑁆𑀣 𑀜𑀸𑀢𑀩𑁆𑀩𑀸,

𑀘𑀦𑁆𑀤-𑀲𑀽𑀭𑀺𑀬-𑀭𑀸𑀚𑀽𑀦𑀁.

𑀫𑀺𑀢𑁆𑀢𑀓𑀡𑁆𑀟𑁄 𑀦𑀺𑀝𑁆𑀞𑀺𑀢𑁄.

𑁫. 𑀇𑀢𑁆𑀣𑀺𑀓𑀡𑁆𑀟𑁄

𑁯𑁪.

𑀓𑁄𑀓𑀺𑀮𑀸𑀦𑀁 𑀲𑀤𑁆𑀤𑀁 𑀭𑀽𑀧𑀁,

𑀦𑀸𑀭𑀻𑀭𑀽𑀧𑀁 𑀧𑀢𑀺𑀩𑁆𑀩𑀢𑀸;

𑀯𑀺𑀚𑁆𑀚𑀸 ¶ 𑀭𑀽𑀧𑀁 𑀅-𑀭𑀽𑀧𑀸𑀦𑀁,

𑀔𑀫𑀸 𑀭𑀽𑀧𑀁 𑀢𑀧𑀲𑁆𑀲𑀺𑀦𑀁.

𑁯𑁫.

𑀇𑀢𑁆𑀣𑀻𑀦𑀜𑁆𑀘 𑀥𑀦𑀁 𑀭𑀽𑀧𑀁,

𑀧𑀼𑀭𑀺𑀲𑀸𑀦𑀁 𑀯𑀺𑀚𑁆𑀚𑀸 𑀥𑀦𑀁;

𑀪𑀺𑀓𑁆𑀔𑀽𑀦𑀜𑁆𑀘 𑀥𑀦𑀁 𑀲𑀻𑀮𑀁,

𑀭𑀸𑀚𑀸𑀦𑀜𑁆𑀘 𑀥𑀦𑀁 𑀩𑀮𑀁.

𑁯𑁬.

𑀢𑀧𑀲𑁆𑀲𑀺𑀦𑁄 𑀓𑀺𑀲𑀸 𑀲𑁄𑀪𑀸,

𑀣𑀽𑀮𑀸 𑀲𑁄𑀪𑀸 𑀘𑀢𑀼𑀧𑁆𑀧𑀤𑀸;

𑀧𑀼𑀭𑀺𑀲𑀸 𑀯𑀺𑀚𑁆𑀚𑀯𑀸 𑀲𑁄𑀪𑀸,

𑀇𑀢𑁆𑀣𑀻 𑀲𑁄𑀪𑀸𑀲 𑀲𑀸𑀫𑀺𑀓𑀸.

𑁯𑁭.

𑀧𑀜𑁆𑀘 𑀭𑀢𑁆𑀬𑀸 𑀲𑀼𑀕𑀦𑁆𑀥𑀩𑁆𑀩𑀸,

𑀲𑀢𑁆𑀢 𑀭𑀢𑁆𑀬𑀸 𑀥𑀦𑀼𑀕𑁆𑀕𑀳𑀸;

𑀏𑀓 𑀫𑀸𑀲𑀸 𑀲𑀼𑀪𑀭𑀺𑀬𑀸,

𑀅𑀟𑁆𑀠 𑀫𑀸𑀲𑀸 𑀲𑀺𑀲𑁆𑀲𑀸 𑀫𑀮𑀸.

𑁯𑁮.

𑀳𑀺𑀁 𑀭𑀫𑀢𑀺 𑀧𑀗,

𑀳𑀗 𑀭𑀫𑀢𑀺 𑀧𑁄𑀓.

𑀣𑀻 𑀭𑀫𑀢𑀺 𑀧𑀼,

𑀔𑀼 𑀭𑀫𑀢𑀺 𑀥𑀁.

𑁯𑁯.

𑀚𑀺𑀡𑁆𑀡𑀫𑀦𑁆𑀦𑀁 𑀧𑀲𑀁𑀲𑁂𑀬𑁆𑀬,

𑀤𑀸𑀭𑀜𑁆𑀘 𑀕𑀢𑀬𑁄𑀩𑁆𑀩𑀦𑀁;

𑀭𑀡𑀸 𑀧𑀼𑀦𑀸𑀕𑀢𑀸 𑀲𑀽𑀭𑀁,

𑀲𑀲𑁆𑀲𑀜𑁆𑀘 𑀕𑁂𑀳𑀫𑀸𑀕𑀢𑀁.

𑁧𑁦𑁦.

𑀤𑁆𑀯𑀢𑁆𑀢𑀺-𑀧𑀢𑀺𑀓𑀸 ¶ 𑀦𑀸𑀭𑀻 𑀘,

𑀪𑀺𑀓𑁆𑀔𑀼 𑀤𑁆𑀯𑀢𑁆𑀢𑀺-𑀯𑀺𑀳𑀸𑀭𑀺𑀓𑁄;

𑀤𑁆𑀯𑀢𑁆𑀢𑀺-𑀧𑀸𑀲-𑀫𑀼𑀢𑁆𑀢𑁄 𑀧𑀓𑁆𑀔𑀻,

𑀓𑀢-𑀫𑀸𑀬𑀸 𑀩𑀳𑀽𑀣𑀭𑀁.

𑁧𑁦𑁧.

𑀤𑀼𑀚𑁆𑀚𑀦𑀁 𑀧𑀳𑀸𑀭𑀸𑀤𑀫𑁂,

𑀫𑀺𑀢𑁆𑀢𑀁 𑀤𑀫𑁂 𑀅-𑀪𑀸𑀡𑀺𑀓𑀸;

𑀇𑀢𑁆𑀣𑀺𑀜𑁆𑀘 𑀩𑁆𑀬𑀲𑀦𑀸 𑀤𑀫𑁂,

𑀭𑀸𑀕𑀺𑀦𑀁 𑀅𑀧𑁆𑀧 𑀪𑁄𑀚𑀦𑀸.

𑁧𑁦𑁨.

𑀦 𑀭𑀢𑁆𑀢𑀺 𑀯𑀺𑀦𑀸 𑀘𑀦𑁆𑀤𑀺𑀫𑀸,

𑀯𑀻𑀘𑀺𑀁 𑀯𑀺𑀦𑀸 𑀘 𑀅𑀡𑁆𑀡𑀯𑁄;

𑀳𑀁𑀲𑀁 𑀯𑀺𑀦𑀸 𑀧𑁄𑀓𑁆𑀔𑀭𑀡𑀻,

𑀧𑀢𑀺𑀁 𑀓𑀜𑁆𑀜𑀸𑀘 𑀲𑁄𑀪𑀢𑁂.

𑁧𑁦𑁩.

𑀧𑀢𑀺𑀦𑀸 𑀚𑀦𑀺𑀢𑁄 𑀪𑁄𑀕𑁄,

𑀇𑀢𑁆𑀣𑀺𑀬𑀸𑀯 𑀲𑀁𑀕𑁄𑀧𑁆𑀧𑀺𑀢𑁄;

𑀧𑀼𑀭𑀺𑀲𑁄𑀯 𑀳𑀺 𑀧𑀥𑀸𑀦𑁄,

𑀇𑀢𑁆𑀣𑀻 𑀲𑀼𑀢𑁆𑀢𑀁𑀯 𑀲𑀽𑀘𑀺𑀬𑀸.

𑁧𑁦𑁪.

𑀲𑀩𑁆𑀩𑀸𑀦𑀤𑀻 𑀯𑀗𑁆𑀓𑀦𑀤𑀻,

𑀲𑀩𑁆𑀩𑁂 𑀓𑀝𑁆𑀞𑀫𑀬𑀸 𑀯𑀦𑀸;

𑀲𑀩𑁆𑀩𑀺𑀢𑁆𑀣𑀺𑀬𑁄 𑀓𑀭𑁂 𑀧𑀸𑀧𑀁,

𑀮𑀪𑀫𑀸𑀦𑁂 𑀦𑀺𑀯𑀸𑀢𑀓𑁂.

𑁧𑁦𑁫.

𑀯𑀺𑀯𑀸𑀤𑀲𑀻𑀮𑀺𑀁 ¶ 𑀉𑀲𑀽𑀬𑀪𑀸𑀡𑀺𑀦𑀺𑀁,

𑀲𑀫𑁆𑀧𑀲𑁆𑀲𑀢𑀡𑁆𑀳𑀺𑀁 𑀩𑀳𑀼𑀧𑀸𑀓𑀪𑀼𑀢𑁆𑀢𑀺𑀦𑀺𑀁;

𑀅𑀕𑁆𑀕𑀦𑁆𑀢𑀪𑀼𑀢𑁆𑀢𑀺𑀁 𑀧𑀭𑀕𑁂𑀳𑀯𑀸𑀲𑀺𑀦𑀺𑀁,

𑀦𑀸𑀭𑀺𑀁 𑀘𑀚𑁂 𑀧𑀼𑀢𑁆𑀢𑀲𑀢𑀫𑁆𑀧𑀺 𑀧𑀽𑀫𑀸.

𑁧𑁦𑁬.

𑀪𑀼𑀢𑁆𑀢𑁂𑀲𑀼 𑀫𑀡𑁆𑀟𑁂𑀲𑀼 𑀚𑀦𑀻𑀯 𑀓𑀦𑁆𑀢𑀺𑀦𑀻,

𑀕𑀼𑀬𑁆𑀳𑁂𑀘 𑀞𑀸𑀦𑁂 𑀪𑀕𑀺𑀦𑀻𑀯 𑀳𑀺𑀭𑀺𑀡𑀻;

𑀓𑀫𑁆𑀫𑁂𑀲𑀼 𑀧𑀢𑁆𑀢𑁂𑀲𑀼 𑀓𑀭𑁄𑀢𑀺 𑀤𑀸𑀲𑀻𑀯,

𑀪𑀬𑁂𑀲𑀼 𑀫𑀦𑁆𑀢𑀻 𑀲𑀬𑀦𑁂𑀲𑀼 𑀭𑀸𑀫𑀬𑁂;

𑀭𑀽𑀧𑀻𑀲𑀼 𑀲𑀺𑀓𑁆𑀔𑀻 𑀓𑀼𑀧𑀦𑁂𑀲𑀼 𑀔𑀦𑁆𑀢𑀺𑀦𑀻,

𑀲𑀸 𑀦𑀸𑀭𑀻 𑀲𑁂𑀝𑁆𑀞𑀸𑀢𑀺 𑀯𑀤𑀦𑁆𑀢𑀺 𑀧𑀡𑁆𑀟𑀺𑀢𑀸;

𑀓𑀸𑀬𑀲𑁆𑀲 𑀪𑁂𑀤𑀸𑀘 𑀤𑀺𑀯𑁂𑀪𑀯𑁂𑀬𑁆𑀬 𑀲𑀸.

𑁧𑁦𑁭.

𑀲𑀸𑀫𑀸 𑀫𑀺𑀕𑀓𑁆𑀔𑀻 𑀢𑀦𑀼𑀫𑀚𑁆𑀛𑀕𑀢𑁆𑀢𑀸,

𑀲𑀽𑀭𑀽 𑀲𑀼𑀓𑁂𑀲𑀻 𑀲𑀫𑀤𑀦𑁆𑀢𑀧𑀦𑁆𑀢𑀻;

𑀕𑀫𑁆𑀪𑀻𑀭𑀦𑀸𑀪𑀻 𑀬𑀼𑀯𑀢𑀻 𑀲𑀼𑀲𑀻𑀮𑀻,

𑀳𑀻𑀦𑁂 𑀓𑀼𑀮𑁂 𑀚𑀸𑀢𑀸𑀧𑀺 𑀯𑀺𑀯𑀸𑀳𑁆𑀬𑀸.

𑁧𑁦𑁮.

𑀲𑀭𑀤𑀁𑀭𑀢𑀼-𑀓𑀸𑀮𑀸𑀦𑀁,

𑀪𑀭𑀺𑀬𑀸𑀦𑀁 𑀭𑀽𑀧𑀯𑀢𑀻;

𑀚𑁂𑀝𑁆𑀞𑁄 𑀧𑀥𑀸𑀦𑀁 𑀧𑀼𑀢𑁆𑀢𑀸𑀦𑀁,

𑀤𑀺𑀲𑀸𑀦𑀁 𑀉𑀢𑁆𑀢𑀭𑀸𑀤𑀺𑀲𑀸.

𑁧𑁦𑁯.

𑀬𑀸 𑀇𑀘𑁆𑀙𑁂 𑀧𑀼𑀭𑀺𑀲𑁄 𑀳𑁄𑀢𑀼𑀁,

𑀚𑀸𑀢𑀺 𑀚𑀸𑀢𑀺 𑀧𑀼𑀦𑀧𑁆𑀧𑀼𑀦𑀁;

𑀲𑀸𑀫𑀺𑀓𑀁 ¶ 𑀅𑀧𑀘𑀸𑀬𑁂𑀬𑁆𑀬,

𑀇𑀦𑁆𑀤𑀁𑀯 𑀧𑀸𑀭𑀺𑀘𑀸𑀭𑀺𑀓𑀸.

𑁧𑁧𑁦.

𑀬𑁄 𑀇𑀘𑁆𑀙𑁂 𑀧𑀼𑀭𑀺𑀲𑁄 𑀳𑁄𑀢𑀼𑀁,

𑀚𑀸𑀢𑀺 𑀚𑀸𑀢𑀺 𑀧𑀼𑀦𑀧𑁆𑀧𑀼𑀦𑀁;

𑀧𑀭𑀤𑀸𑀦𑀁 𑀯𑀺𑀯𑀚𑁆𑀚𑁂𑀬𑁆𑀬,

𑀥𑁄𑀢𑀧𑀸𑀤𑁄𑀯 𑀓𑀤𑁆𑀤𑀫𑀁.

𑁧𑁧𑁧.

𑀅𑀢𑀺𑀓𑁆𑀓𑀦𑁆𑀢 𑀯𑀬𑁄 𑀧𑁄𑀲𑁄,

𑀆𑀦𑁂𑀢𑀺 𑀢𑀺𑀫𑁆𑀩𑀭𑀼𑀢𑁆𑀢𑀦𑀺𑀁;

𑀢𑀲𑁆𑀲𑀸 𑀇𑀲𑁆𑀲𑀸 𑀅𑀲𑀤𑁆𑀥𑀸𑀢𑀺,

𑀢𑀁 𑀧𑀭𑀸𑀪𑀯𑀢𑁄 𑀫𑀼𑀔𑀁.

𑀇𑀢𑁆𑀣𑀺𑀓𑀡𑁆𑀟𑁄 𑀦𑀺𑀝𑁆𑀞𑀺𑀢𑁄.

𑁬. 𑀭𑀸𑀚𑀓𑀡𑁆𑀟𑁄

𑁧𑁧𑁨.

𑀏𑀓𑀬𑀸𑀫𑀁 𑀲𑀬𑁂 𑀭𑀸𑀚𑀸,

𑀤𑁆𑀯𑀺𑀬𑀸𑀫𑀜𑁆𑀜𑁂𑀯 𑀧𑀡𑁆𑀟𑀺𑀢𑁄;

𑀖𑀭𑀸𑀯𑀸𑀲𑁄 𑀢𑀺𑀬𑀸𑀫𑀁𑀯,

𑀘𑀢𑀼𑀬𑀸𑀫𑀁 𑀢𑀼 𑀬𑀸𑀘𑀓𑁄.

𑁧𑁧𑁩.

𑀥𑀦𑀯𑀸 𑀲𑀼𑀢𑀯𑀸 𑀭𑀸𑀚𑀸,

𑀦𑀤𑀻 𑀯𑁂𑀚𑁆𑀚𑁄 𑀘𑀺𑀫𑁂𑀧𑀜𑁆𑀘;

𑀬𑀢𑁆𑀣 ¶ 𑀤𑁂𑀲𑁂 𑀦 𑀯𑀺𑀚𑁆𑀚𑀦𑁆𑀢𑀺,

𑀦 𑀢𑀢𑁆𑀣 𑀤𑀺𑀯𑀲𑀁 𑀯𑀲𑁂.

𑁧𑁧𑁪.

𑀬𑀲𑁆𑀫𑀺𑀁 𑀧𑀤𑁂𑀲𑁂 𑀦 𑀫𑀸𑀦𑁄,

𑀦 𑀧𑁂𑀫𑀁 𑀦𑀘 𑀩𑀦𑁆𑀥𑀯𑀸;

𑀦𑀘 𑀯𑀺𑀚𑁆𑀚𑀸𑀕𑀫𑁄 𑀓𑁄𑀘𑀺,

𑀦 𑀢𑀢𑁆𑀣 𑀤𑀺𑀯𑀲𑀁 𑀯𑀲𑁂.

𑁧𑁧𑁫.

𑀅𑀧𑀼𑀢𑁆𑀢𑀓𑀁 𑀖𑀭𑀁 𑀲𑀼𑀜𑁆𑀜𑀁,

𑀭𑀝𑁆𑀞𑀁 𑀲𑀼𑀜𑁆𑀜𑀁 𑀅𑀭𑀸𑀚𑀓𑀁;

𑀅 𑀲𑀺𑀧𑁆𑀧𑀲𑁆𑀲 𑀫𑀼𑀔𑀁 𑀲𑀼𑀜𑁆𑀜𑀁,

𑀲𑀩𑁆𑀩 𑀲𑀼𑀜𑁆𑀜𑀁 𑀤𑀮𑀺𑀤𑁆𑀤𑀓𑀸.

𑁧𑁧𑁬.

𑀥𑀦𑀫𑀺𑀘𑁆𑀙𑁂𑀬𑁆𑀬 𑀯𑀸𑀡𑀺𑀚𑁆𑀚𑁄,

𑀯𑀺𑀚𑁆𑀚𑀫𑀺𑀘𑁆𑀙𑁂 𑀪𑀚𑁂𑀲𑀼𑀢𑀁;

𑀧𑀼𑀢𑁆𑀢𑀫𑀺𑀘𑁆𑀙𑁂 𑀢𑀭𑀼𑀡𑀺𑀢𑁆𑀣𑀺𑀁,

𑀭𑀸𑀚𑀸𑀫𑀘𑁆𑀘𑀁 𑀯𑀲𑀁 𑀕𑀫𑁂.

𑁧𑁧𑁭.

𑀦𑀝𑁆𑀞𑁄𑀬𑀢𑀺 𑀅𑀲𑀦𑁆𑀢𑀼𑀝𑁆𑀞𑁄,

𑀲𑀦𑁆𑀢𑀼𑀝𑁆𑀞𑁄 𑀘 𑀫𑀳𑀻𑀧𑀢𑀺;

𑀮𑀚𑁆𑀚𑀸 𑀘 𑀕𑀡𑀺𑀓𑀸 𑀦𑀝𑁆𑀞𑀸,

𑀦𑀺𑀮𑁆𑀮𑀚𑁆𑀚𑀸 𑀓𑀼𑀮𑀥𑀻𑀢𑀺𑀓𑀸.

𑁧𑁧𑁮.

𑀧𑀓𑁆𑀔𑀻𑀦𑀁 𑀩𑀮𑀫𑀸𑀓𑀸𑀲𑁄,

𑀫𑀘𑁆𑀙𑀸𑀦𑀫𑀼𑀤𑀓𑀁 𑀩𑀮𑀁;

𑀤𑀼𑀩𑁆𑀩𑀮𑀲𑁆𑀲 ¶ 𑀩𑀮𑀁 𑀭𑀸𑀚𑀸,

𑀓𑀼𑀫𑀸𑀭𑀸𑀦𑀁 𑀭𑀼𑀤𑀁 𑀩𑀮𑀁.

𑁧𑁧𑁯.

𑀔𑀫𑀸 𑀚𑀸𑀕𑀭𑀺𑀬𑀼𑀝𑁆𑀞𑀸𑀦𑀁,

𑀲𑀁𑀯𑀺𑀪𑀸𑀕𑁄 𑀤𑀬𑀺𑀓𑁆𑀔𑀡𑀸;

𑀦𑀸𑀬𑀓𑀲𑁆𑀲 𑀕𑀼𑀡𑀸 𑀏𑀢𑁂,

𑀇𑀘𑁆𑀙𑀺𑀢𑀩𑁆𑀩𑀸 𑀲𑀢𑀁 𑀕𑀼𑀡𑀸.

𑁧𑁨𑁦.

𑀲𑀓𑀺𑀁 𑀯𑀤𑀦𑁆𑀢𑀺 𑀭𑀸𑀚𑀸𑀦𑁄,

𑀲𑀓𑀺𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸;

𑀲𑀓𑀺𑀁 𑀲𑀧𑁆𑀧𑀼𑀭𑀺𑀲𑀸 𑀮𑁄𑀓𑁂,

𑀏𑀲 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄.

𑁧𑁨𑁧.

𑀅𑀮𑀲𑁄 𑀕𑀺𑀳𑀻 𑀓𑀸𑀫𑀪𑁄𑀕𑀻 𑀦 𑀲𑀸𑀥𑀼,

𑀅𑀲𑀜𑁆𑀜𑀢𑁄 𑀧𑀩𑁆𑀩𑀚𑀺𑀢𑁄 𑀦 𑀲𑀸𑀥𑀼;

𑀭𑀸𑀚𑀸 𑀅𑀦𑀺𑀲𑀫𑁆𑀫𑀓𑀸𑀭𑀻 𑀦 𑀲𑀸𑀥𑀼,

𑀧𑀡𑁆𑀟𑀺𑀢𑁄 𑀓𑁄𑀥𑀦𑁄 𑀢𑀁𑀧𑀺 𑀦 𑀲𑀸𑀥𑀼.

𑁧𑁨𑁨.

𑀩𑀳𑀯𑁄 𑀬𑀢𑁆𑀣 𑀦𑁂𑀢𑁆𑀢𑀸𑀭𑁄,

𑀲𑀩𑁆𑀩𑁂 𑀧𑀡𑁆𑀟𑀺𑀢𑀫𑀸𑀦𑀺𑀦𑁄;

𑀲𑀩𑁆𑀩𑁂 𑀫𑀳𑀢𑁆𑀢𑀫𑀺𑀘𑁆𑀙𑀦𑁆𑀢𑀺,

𑀢𑁂𑀲𑀁 𑀓𑀫𑁆𑀫𑀁 𑀯𑀺𑀦𑀲𑁆𑀲𑀢𑀺.

𑁧𑁨𑁩.

𑀆𑀬𑀁 𑀔𑀬𑀁 𑀲𑀬𑀁 𑀚𑀜𑁆𑀜𑀸,

𑀭𑀸𑀚𑀸 𑀲𑀬𑀁 𑀓𑀢𑀸𑀓𑀢𑀁;

𑀦𑀺𑀕𑁆𑀕𑀳𑁂 ¶ 𑀦𑀺𑀕𑁆𑀕𑀳𑁂𑀢𑀩𑁆𑀩𑀁,

𑀧𑀕𑁆𑀕𑀳𑁂 𑀧𑀕𑁆𑀕𑀳𑀸𑀭𑀳𑀁.

𑁧𑁨𑁪.

𑀧𑀺𑀝𑁆𑀞𑀺𑀢𑁄𑀓𑁆𑀓𑀁 𑀦𑀺𑀲𑁂𑀯𑁂𑀬𑁆𑀬,

𑀓𑀼𑀘𑁆𑀙𑀺𑀦𑀸𑀯 𑀳𑀼𑀢𑀸𑀲𑀦𑀁;

𑀲𑀸𑀫𑀺𑀓𑀁 𑀲𑀩𑁆𑀩𑀪𑀸𑀕𑁂𑀦,

𑀧𑀭𑀮𑁄𑀓𑀁 𑀅𑀫𑁄𑀳𑀯𑀸.

𑁧𑁨𑁫.

𑀅𑀕𑁆𑀕𑀺 𑀆𑀧𑁄 𑀇𑀢𑁆𑀣𑀺𑀫𑀽𑀴𑁆𑀳𑁄,

𑀲𑀧𑁆𑀧𑁄 𑀭𑀸𑀚-𑀓𑀼𑀮𑀸𑀦𑀺𑀘;

𑀅𑀧𑀬𑀦𑁆𑀢𑁂𑀦 𑀕𑀦𑁆𑀢𑀩𑁆𑀩𑀸,

𑀅𑀘𑁆𑀘𑁂𑀓-𑀧𑀸𑀡𑀳𑀸𑀭𑀓𑀸.

𑁧𑁨𑁬.

𑀧𑀤𑀼𑀝𑁆𑀞-𑀪𑀭𑀺𑀬-𑀲𑀁𑀯𑀸𑀲𑁄,

𑀧𑀤𑀼𑀝𑁆𑀞 𑀘𑀺𑀢𑁆𑀢 𑀤𑀸𑀲𑀓𑁄;

𑀲-𑀲𑀧𑁆𑀧𑁂 𑀘 𑀖𑀭𑁂 𑀯𑀸𑀲𑁄,

𑀫𑀘𑁆𑀘𑀼 𑀏𑀯 𑀦 𑀲𑀁𑀲𑀬𑁄.

𑁧𑁨𑁭.

𑀫𑀽𑀴𑁆𑀳 𑀲𑀺𑀲𑁆𑀲𑁄 𑀧𑀤𑁂𑀲𑁂𑀦,

𑀓𑀼𑀦𑀸𑀭𑀻 𑀪𑀭𑀡𑁂𑀦 𑀘;

𑀅𑀲𑀢𑀸 𑀲𑀫𑁆𑀧𑀬𑁄𑀕𑁂𑀦,

𑀧𑀡𑁆𑀟𑀺𑀢𑁄𑀧𑁆𑀧𑀯𑀲𑀻𑀤𑀢𑀺.

𑁧𑁨𑁮.

𑀫𑀸𑀢𑀸 𑀧𑀼𑀢𑁆𑀢𑀓𑀭𑀁 𑀧𑀸𑀧𑀁,

𑀲𑀺𑀲𑁆𑀲𑀧𑀸𑀧𑀁 𑀕𑀼𑀭𑀼𑀓𑀢𑀸;

𑀭𑀸𑀚𑀸 ¶ 𑀭𑀝𑁆𑀞𑀓𑀭𑀁 𑀧𑀸𑀧𑀁,

𑀭𑀸𑀚𑀧𑀸𑀧𑀁 𑀧𑀼𑀭𑁄𑀳𑀺𑀢𑁄.

𑁧𑁨𑁯.

𑀅𑀓𑁄𑀥𑁂𑀦 𑀚𑀺𑀦𑁂 𑀓𑁄𑀥𑀁,

𑀅𑀲𑀸𑀥𑀼𑀁 𑀲𑀸𑀥𑀼𑀦𑀸 𑀚𑀺𑀦𑁂;

𑀚𑀺𑀦𑁂 𑀫𑀘𑁆𑀙𑀭𑀺𑀁 𑀤𑀸𑀦𑁂𑀦,

𑀲𑀘𑁆𑀘𑁂𑀦𑀸𑀮𑀻𑀓𑀯𑀸𑀤𑀺𑀦𑀁;

𑁧𑁩𑁦.

𑀅𑀤𑀦𑁆𑀢𑀁 𑀤𑀫𑀦𑀁 𑀤𑀸𑀦𑀁,

𑀤𑀸𑀦𑀁 𑀲𑀩𑁆𑀩𑀢𑁆𑀣 𑀲𑀸𑀥𑀓𑀁;

𑀤𑀸𑀦𑁂𑀦 𑀧𑀺𑀬 𑀯𑀸𑀘𑀸𑀬,

𑀉𑀦𑁆𑀦𑀫𑀦𑁆𑀢𑀺 𑀦𑀫𑀦𑁆𑀢𑀺 𑀘;

𑁧𑁩𑁧.

𑀤𑀸𑀦𑀁 𑀲𑀺𑀦𑁂𑀳𑀪𑁂𑀲𑀚𑁆𑀚𑀁,

𑀫𑀘𑁆𑀙𑁂𑀭𑀁 𑀤𑁄𑀲𑀦𑁄𑀲𑀥𑀁;

𑀤𑀸𑀦𑀁 𑀬𑀲𑀲𑁆𑀲𑀻 𑀪𑁂𑀲𑀚𑁆𑀚𑀁,

𑀫𑀘𑁆𑀙𑁂𑀭𑀁 𑀓𑀧𑀡𑁄𑀲𑀥𑀁.

𑁧𑁩𑁨.

𑀩𑀳𑀽𑀦𑀫𑀧𑁆𑀧𑀲𑀸𑀭𑀸𑀦𑀁,

𑀲𑀸𑀫𑀕𑁆𑀕𑀺𑀬𑀸 𑀚𑀬𑀁 𑀚𑀬𑁂;

𑀢𑀺𑀡𑁂𑀳𑀺 𑀯𑀢𑁆𑀢𑀢𑁂 𑀬𑁄𑀢𑁆𑀢𑀁,

𑀢𑁂𑀦 𑀦𑀸𑀕𑁄𑀧𑀺 𑀩𑀚𑁆𑀛𑀢𑁂.

𑁧𑁩𑁩.

𑀲𑀳𑀸𑀬𑁄 𑀅𑀲𑀫𑀢𑁆𑀣𑁄𑀧𑀺,

𑀢𑁂𑀚𑀲𑀸 𑀓𑀺𑀁𑀓𑀭𑀺𑀲𑁆𑀲𑀢𑀺;

𑀦𑀺𑀯𑀸𑀢𑁂 ¶ 𑀚𑀮𑀺𑀢𑁄 𑀅𑀕𑁆𑀕𑀺,

𑀲𑀬𑀫𑁂 𑀯𑀽𑀧𑀲𑀫𑁆𑀧𑀢𑀺.

𑁧𑁩𑁪.

𑀦 𑀭𑀜𑁆𑀜𑀸 𑀲𑀫𑀓𑀁 𑀪𑀼𑀜𑁆𑀚𑁂,

𑀓𑀸𑀫𑀪𑁄𑀕𑀁 𑀓𑀼𑀤𑀸𑀘𑀦𑀁;

𑀆𑀓𑀧𑁆𑀧𑀁 𑀭𑀲 𑀪𑀼𑀢𑁆𑀢𑀺𑀁𑀯𑀸,

𑀫𑀸𑀮𑀸 𑀕𑀦𑁆𑀥 𑀯𑀺𑀮𑁂𑀧𑀦𑀁;

𑀯𑀢𑁆𑀣𑀁 𑀲𑀩𑁆𑀩𑀅𑀮𑀗𑁆𑀓𑀸𑀭𑀁,

𑀦 𑀭𑀜𑁆𑀜𑀸 𑀲𑀤𑀺𑀲𑀁 𑀓𑀭𑁂.

𑁧𑁩𑁫.

𑀦 𑀫𑁂 𑀭𑀸𑀚𑀸 𑀲𑀔𑀸 𑀳𑁄𑀢𑀺,

𑀦 𑀭𑀸𑀚𑀸 𑀳𑁄𑀢𑀺 𑀫𑁂𑀣𑀼𑀦𑁄;

𑀏𑀲𑁄 𑀲𑀸𑀫𑀺𑀓𑁄 𑀫𑀬𑁆𑀳𑀦𑁆𑀢𑀺,

𑀘𑀺𑀢𑁆𑀢𑁂 𑀦𑀺𑀝𑁆𑀞𑀁 𑀲𑀼𑀣𑀸𑀧𑀬𑁂.

𑁧𑁩𑁬.

𑀦𑀸𑀢𑀺𑀤𑀽𑀭𑁂 𑀪𑀚𑁂 𑀭𑀜𑁆𑀜𑁄,

𑀦𑀸𑀘𑁆𑀘𑀸𑀲𑀦𑁆𑀦𑁄𑀧𑀯𑀸𑀢𑀓𑁂;

𑀉𑀚𑀼𑀓𑁂 𑀦𑀸𑀢𑀺𑀦𑀺𑀦𑁆𑀦𑁂 𑀘,

𑀦 𑀪𑀚𑁂 𑀉𑀘𑁆𑀘𑀫𑀸𑀲𑀦𑁂.

𑀙𑀤𑁄𑀲𑁂 𑀯𑀚𑁆𑀚𑁂 𑀲𑁂𑀯𑀓𑁄,

𑀢𑀺𑀝𑁆𑀞𑁂 𑀅𑀕𑁆𑀕𑀺𑀁𑀯 𑀲𑀁𑀬𑀢𑁄.

𑁧𑁩𑁭.

𑀕𑀼𑀡𑀻 𑀲𑀩𑁆𑀩𑀜𑁆𑀜𑀼 𑀢𑀼𑀮𑁆𑀬𑁄𑀧𑀺,

𑀦𑀲𑁄𑀪𑀢𑀺 𑀅𑀦𑀺𑀲𑁆𑀲𑀬𑁄;

𑀅𑀦𑀕𑁆𑀖𑀫𑁄𑀧𑀺 ¶ 𑀫𑀡𑀺𑀲𑁂𑀝𑁆𑀞𑁄,

𑀳𑁂𑀫𑀁 𑀦𑀺𑀲𑁆𑀲𑀸𑀬 𑀲𑁄𑀪𑀢𑀺.

𑀭𑀸𑀚𑀓𑀡𑁆𑀟𑁄 𑀦𑀺𑀝𑁆𑀞𑀺𑀢𑁄.

𑁭. 𑀧𑀓𑀺𑀡𑁆𑀡𑀓𑀓𑀡𑁆𑀟𑁄

𑁧𑁩𑁮.

𑀇𑀢𑁆𑀣𑀺𑀫𑀺𑀲𑁆𑀲𑁂 𑀓𑀼𑀢𑁄𑀲𑀻𑀮𑀁,

𑀫𑀁𑀲 𑀪𑀓𑁆𑀔𑁂 𑀓𑀼𑀢𑁄𑀤𑀬𑀸;

𑀲𑀼𑀭𑀸 𑀧𑀸𑀦𑁂 𑀓𑀼𑀢𑁄𑀲𑀘𑁆𑀘𑀁,

𑀫𑀳𑀸𑀮𑁄𑀪𑁂 𑀓𑀼𑀢𑁄𑀳𑀺𑀭𑀻;

𑀫𑀳𑀸𑀢𑀦𑁆𑀤𑁂 𑀓𑀼𑀢𑁄𑀲𑀺𑀧𑁆𑀧𑀁,

𑀫𑀳𑀸 𑀓𑁄𑀥𑁂 𑀓𑀼𑀢𑁄𑀥𑀦𑀁.

𑁧𑁩𑁯.

𑀲𑀼𑀭𑀸 𑀬𑁄𑀕𑁄 𑀯𑀺𑀓𑀸𑀮𑁄 𑀘,

𑀲𑀫𑀚𑁆𑀚 𑀘𑀭𑀡𑀸𑀮𑀲𑀁;

𑀔𑀺𑀟𑁆𑀟𑀸𑀥𑀼𑀢𑁆𑀢𑁄 𑀧𑀸𑀧𑀫𑀺𑀢𑁆𑀢𑁄,

𑀪𑁄𑀕𑀦𑀸𑀲𑀫𑀼𑀔𑀸 𑀇𑀫𑁂.

𑁧𑁪𑁦.

𑀤𑀺𑀯𑀸 𑀦𑀸𑀤𑀺𑀓𑁆𑀔𑀸 𑀯𑀢𑁆𑀢𑀩𑁆𑀩𑀁,

𑀭𑀢𑁆𑀢𑁄 𑀦𑀸𑀯𑀘𑀦𑁂𑀦 𑀘;

𑀲𑀜𑁆𑀘𑀭𑁂𑀬𑁆𑀬 𑀪𑀬𑀸 𑀪𑀻𑀢𑁄,

𑀯𑀦𑁂 𑀯𑀦𑀘𑀭𑀻 𑀬𑀣𑀸.

𑁧𑁪𑁧.

𑀚𑀻𑀯𑀦𑁆𑀢𑀸𑀧𑀺 𑀫𑀢𑀸𑀧𑀜𑁆𑀘,

𑀩𑁆𑀬𑀸𑀲𑁂𑀦 𑀧𑀭𑀺𑀓𑀺𑀢𑁆𑀢𑀺𑀢𑀸;

𑀤𑀼𑀓𑁆𑀔𑀺𑀢𑁄 ¶ 𑀩𑁆𑀬𑀸𑀥𑀺𑀢𑁄𑀫𑀽𑀴𑁆𑀳𑁄,

𑀇𑀡𑀯𑀸 𑀦𑀺𑀢𑁆𑀬𑀲𑁂𑀯𑀓𑁄.

𑁧𑁪𑁨.

𑀅𑀦𑀸𑀕𑀢𑀁 𑀪𑀬𑀁 𑀤𑀺𑀲𑁆𑀯𑀸,

𑀤𑀽𑀭𑀢𑁄 𑀧𑀭𑀺𑀯𑀚𑁆𑀚𑀬𑁂;

𑀆𑀕𑀢𑀜𑁆𑀘 𑀪𑀬𑀁 𑀤𑀺𑀲𑁆𑀯𑀸,

𑀅 𑀪𑀻𑀢𑁄 𑀳𑁄𑀢𑀺 𑀧𑀡𑁆𑀟𑀺𑀢𑁄.

𑁧𑁪𑁩.

𑀦𑀺𑀤𑁆𑀤𑀸𑀮𑀼𑀓𑁄 𑀧𑀫𑀢𑁆𑀢𑁄𑀘,

𑀲𑀼𑀔𑀢𑁆𑀢𑁄 𑀭𑁄𑀕𑀯𑀸𑀮𑀲𑁄;

𑀫𑀳𑀺𑀘𑁆𑀙𑁄 𑀓𑀫𑁆𑀫𑀸𑀭𑀸𑀫𑁄𑀘,

𑀲𑀢𑁆𑀢𑁂 𑀢𑁂 𑀲𑀢𑁆𑀣𑀯𑀚𑁆𑀚𑀺𑀢𑀸.

𑁧𑁪𑁪.

𑀤𑀼𑀕𑁆𑀕𑀢𑀁 𑀕𑀘𑁆𑀙 𑀳𑁂 𑀮𑀸𑀪,

𑀮𑀸𑀪𑀻 𑀮𑀸𑀪𑁂𑀦 𑀧𑀽𑀭𑀢𑀺;

𑀣𑀮𑁂 𑀧𑀯𑀲𑁆𑀲 𑀧𑀚𑁆𑀚𑀼𑀦𑁆𑀦,

𑀲𑀺𑀦𑁆𑀥𑀼 𑀆𑀧𑁂𑀦 𑀧𑀽𑀭𑀢𑀺;

𑀦𑀢𑁆𑀣𑀺𑀤𑀁 𑀓𑀫𑁆𑀫𑀧𑁆𑀧𑀥𑀸𑀦𑀓𑀁.

𑁧𑁪𑁫.

𑀦 𑀳𑀺 𑀓𑁄𑀘𑀺 𑀓𑀢𑁂 𑀓𑀺𑀘𑁆𑀘𑁂,

𑀓𑀢𑁆𑀢𑀸𑀭𑀁 𑀲𑀫𑀼𑀧𑁂𑀓𑁆𑀔𑀢𑁂;

𑀢𑀲𑁆𑀫𑀸 𑀲𑀩𑁆𑀩𑀸𑀦𑀺 𑀓𑀺𑀘𑁆𑀘𑀸𑀦𑀺,

𑀲𑀸𑀯 𑀲𑁂𑀲𑁂𑀦 𑀓𑀸𑀭𑀬𑁂.

𑁧𑁪𑁬.

𑀢𑀽𑀮𑀁 𑀲𑀮𑁆𑀮𑀳𑀼𑀓𑀁 𑀮𑁄𑀓𑁂,

𑀢𑀢𑁄 𑀘𑀸𑀧𑀮𑁆𑀮-𑀚𑀸𑀢𑀺𑀓𑁄;

𑀢𑀢𑁄 ¶ 𑀯𑀼𑀟𑁆𑀠 𑀫𑀦𑁄𑀯𑀸𑀤𑁄,

𑀧𑀫𑀢𑁆𑀢𑁄 𑀩𑀼𑀤𑁆𑀥𑀲𑀸𑀲𑀦𑁂.

𑁧𑁪𑁭.

𑀧𑀸𑀲𑀸𑀡𑀙𑀢𑁆𑀢𑀁 𑀕𑀭𑀼𑀓𑀁,

𑀢𑀢𑁄 𑀤𑁂𑀯𑀸𑀦𑀘𑀺𑀓𑁆𑀔𑀡𑀁;

𑀢𑀢𑁄 𑀯𑀼𑀟𑁆𑀠𑀸𑀦𑀫𑁄𑀯𑀸𑀤𑁄,

𑀢𑀢𑁄 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁧𑁪𑁮.

𑀓𑀸𑀬𑀲𑁆𑀲 𑀤𑀓𑁆𑀔𑀺𑀡 𑀳𑀢𑁆𑀣𑁄,

𑀤𑁄𑀲𑁄 𑀏𑀢𑁆𑀣 𑀓𑀦𑀺𑀝𑁆𑀞𑀓𑁄;

𑀓𑀡𑁆𑀡 𑀖𑀸𑀦𑀸𑀦-𑀫𑀓𑁆𑀔𑀻𑀦𑀁,

𑀯𑀸𑀫𑁄 𑀢𑀼 𑀧𑀸𑀤-𑀧𑀸𑀲𑀓𑁄.

𑁧𑁪𑁯.

𑀢𑀫𑁆𑀩𑀽𑀮𑀲𑁆𑀲 𑀫𑀚𑁆𑀛 𑀧𑀢𑁆𑀢𑁂,

𑀓𑀼𑀯𑁂𑀭𑁄 𑀭𑀓𑁆𑀔𑀢𑀻 𑀲𑀤𑀸;

𑀫𑀽𑀮𑀫𑁆𑀳𑀺 𑀭𑀓𑁆𑀔𑀢𑀺 𑀬𑀓𑁆𑀔𑁄,

𑀅𑀕𑁆𑀕𑀫𑁆𑀳𑀺 𑀓𑀸𑀮𑀓𑀡𑁆𑀡𑀺𑀓𑀸;

𑀢𑀸𑀦𑀺 𑀪𑀼𑀜𑁆𑀚𑁂𑀬𑁆𑀬 𑀙𑀺𑀦𑁆𑀤𑀺𑀢𑁆𑀯𑀸,

𑀲𑀺𑀭𑀻 𑀏𑀯𑀁 𑀧𑀯𑀟𑁆𑀠𑀢𑀺.

𑁧𑁫𑁦.

𑀲𑀫𑁆𑀧𑀼𑀡𑁆𑀡𑀭𑀓𑁆𑀔𑁄 𑀩𑁆𑀭𑀳𑁆𑀫𑀸𑀯,

𑀅𑀘𑁆𑀘𑀼𑀭𑀓𑁆𑀔𑁄 𑀘 𑀩𑀺𑀲𑁆𑀲𑀡𑁄;

𑀢𑀲𑁆𑀫𑀸 𑀳𑀺 𑀢𑁂 𑀧𑀽𑀚𑀬𑀦𑁆𑀢𑀼,

𑀲𑀤𑀸 𑀫𑀸𑀦𑁂𑀦𑁆𑀢𑀺 𑀢𑀁 𑀦𑀭𑀁.

𑁧𑁫𑁧.

𑀕𑁄𑀡𑀸 ¶ 𑀳𑀺 𑀲𑀩𑁆𑀩𑀕𑀺𑀳𑀻𑀦𑀁,

𑀧𑁄𑀲𑀓𑀸 𑀪𑁄𑀕𑀤𑀸𑀬𑀓𑀸;

𑀢𑀲𑁆𑀫𑀸 𑀳𑀺 𑀫𑀸𑀢𑀸 𑀧𑀺𑀢𑀽𑀯,

𑀫𑀸𑀦𑀬𑁂 𑀲𑀓𑁆𑀓𑀭𑁂𑀬𑁆𑀬 𑀘.

𑁧𑁫𑁨.

𑀬𑁂𑀘 𑀔𑀸𑀤𑀦𑁆𑀢𑀺 𑀕𑁄𑀫𑀁𑀲𑀁,

𑀫𑀸𑀢𑀼 𑀫𑀁𑀲𑀁𑀯 𑀔𑀸𑀤𑀭𑁂;

𑀫𑀢𑁂𑀲𑀼 𑀢𑁂𑀲𑀼 𑀕𑀺𑀚𑁆𑀛𑀸𑀦𑀁,

𑀤𑀤𑁂 𑀲𑁄𑀢𑁂 𑀘 𑀯𑀸𑀳𑀬𑁂.

𑁧𑁫𑁩.

𑀕𑀼𑀭𑀼𑀲𑀺𑀤𑁆𑀥𑁄 𑀲𑀺𑀧𑁆𑀧𑀸𑀭𑀫𑁆𑀪𑁄,

𑀭𑀯𑀺 𑀲𑁄𑀓𑁆𑀭𑀸 𑀘 𑀫𑀚𑁆𑀛𑀺𑀫𑁄;

𑀦 𑀲𑀺𑀧𑁆𑀧𑁄 𑀩𑀼𑀤𑁆𑀥𑀘𑀦𑁆𑀤𑀭𑁄,

𑀲𑁄𑀭𑀻 𑀅𑀗𑁆𑀕𑀸𑀘 𑀫𑀭𑀡𑀁.

𑁧𑁫𑁪.

𑀅𑀝𑁆𑀞𑀫𑀺𑀬𑀁 𑀕𑀼𑀭𑀼𑀁 𑀳𑀦𑁆𑀢𑀺,

𑀲𑀺𑀲𑁆𑀲𑀁 𑀳𑀦𑁆𑀢𑀺 𑀘𑀢𑀼𑀤𑁆𑀤𑀲𑀺𑀁;

𑀲𑀺𑀧𑁆𑀧𑀁 𑀳𑀦𑁆𑀢𑀺 𑀤𑀲 𑀲𑀺𑀧𑁆𑀧𑀁,

𑀫𑀸𑀢𑀸𑀧𑀺𑀢𑀸 𑀘 𑀧𑀼𑀡𑁆𑀡𑀫𑀺𑀁.

𑁧𑁫𑁫.

𑀦𑀸𑀴𑀺𑀓𑀁 𑀲𑀢𑁆𑀢 𑀦𑀪𑀼𑀜𑁆𑀚𑁂,

𑀦 𑀮𑀸𑀩𑀼𑀁 𑀦𑀯𑀫𑀁 𑀢𑀣𑀸;

𑀤𑁆𑀯𑀸𑀤𑀲 𑀧𑁆𑀭𑀺𑀦𑁆𑀦𑀁𑀢𑁆𑀭𑀺𑀫𑀺𑀦𑀁,

𑀪𑀼𑀜𑁆𑀚𑁂 𑀲𑀺𑀧𑁆𑀧𑀁 𑀯𑀺𑀦𑀲𑁆𑀲𑀢𑀺.

𑁧𑁫𑁬.

𑀏𑀓𑀁 ¶ 𑀘𑀚𑁂 𑀓𑀼𑀮𑀅𑀢𑁆𑀣𑀁,

𑀕𑀸𑀫𑀲𑁆𑀲𑀢𑁆𑀣𑀁 𑀓𑀼𑀯𑀁 𑀘𑀚𑁂;

𑀕𑀸𑀫 𑀘𑀚𑁂 𑀚𑀦𑀧𑀤𑀢𑁆𑀣𑀁,

𑀅𑀢𑁆𑀢𑀢𑁆𑀣𑀁 𑀧𑀣𑀯𑀺𑀁 𑀘𑀚𑁂.

𑁧𑁫𑁭.

𑀤𑁂𑀲𑀁 𑀑𑀲𑁆𑀲𑀚𑁆𑀚 𑀕𑀘𑁆𑀙𑀦𑁆𑀢𑀺,

𑀲𑀻𑀳𑁄 𑀲𑀧𑁆𑀧𑀼𑀭𑀺𑀲𑁄 𑀕𑀚𑁄;

𑀢𑀢𑁆𑀣𑁂𑀯 𑀦𑀺𑀥𑀦𑀁 𑀬𑀦𑁆𑀢𑀺,

𑀓𑀸𑀓𑁄 𑀓𑀸𑀧𑀼𑀭𑀺𑀲𑁄 𑀫𑀺𑀕𑁄.

𑁧𑁫𑁮.

𑀬𑀫𑁆𑀳𑀺 𑀧𑀤𑁂𑀲𑁂 𑀦 𑀫𑀸𑀦𑁄,

𑀦 𑀧𑁂𑀫𑀁 𑀦 𑀘 𑀩𑀦𑁆𑀥𑀯𑀸;

𑀦 𑀘 𑀯𑀺𑀚𑁆𑀚𑀸𑀕𑀸𑀳𑁄 𑀓𑁄𑀘𑀺,

𑀦 𑀢𑀢𑁆𑀣 𑀯𑀲𑀦𑀁 𑀓𑀭𑁂.

𑁧𑁫𑁯.

𑀘𑀭𑀢𑁆𑀬𑁂𑀓𑁂𑀦 𑀧𑀸𑀤𑁂𑀦,

𑀢𑀺𑀝𑁆𑀞𑀢𑁆𑀬𑁂𑀓𑁂𑀦 𑀧𑀡𑁆𑀟𑀺𑀢𑁄;

𑀅 𑀦𑀺𑀲𑀫𑁆𑀫 𑀧𑀭𑀁 𑀞𑀸𑀦𑀁,

𑀦 𑀧𑀼𑀩𑁆𑀩𑀫𑀸𑀮𑀬𑀁 𑀚𑀳𑁂.

𑁧𑁬𑁦.

𑀥𑀦 𑀥𑀜𑁆𑀜 𑀧𑀬𑁄𑀕𑁂𑀲𑀼,

𑀢𑀣𑀸 𑀯𑀺𑀚𑁆𑀚𑀸𑀕𑀫𑁂𑀲𑀼 𑀘;

𑀤𑀽𑀢𑁂𑀲𑀼 𑀅𑀧𑀘𑀸𑀭𑁂𑀲𑀼,

𑀘𑀚𑁆𑀚𑀸 𑀮𑀚𑁆𑀚𑀸 𑀢𑀤𑀸 𑀪𑀯𑁂.

𑁧𑁬𑁧.

𑀤𑁆𑀯𑀺 ¶ 𑀕𑀼𑀡𑁄 𑀣𑀻𑀦𑀫𑀸𑀳𑀸𑀭𑁄,

𑀩𑀼𑀤𑁆𑀥𑀺𑀘𑀸𑀧𑀺 𑀘𑀢𑀼𑀕𑁆𑀕𑀼𑀡𑁄;

𑀙𑀕𑁆𑀕𑀼𑀡𑁄 𑀳𑁄𑀢𑀺 𑀯𑀸𑀬𑀸𑀫𑁄,

𑀓𑀸𑀫𑁄𑀢𑁆𑀯𑀝𑁆𑀞-𑀕𑀼𑀡𑁄 𑀪𑀯𑁂.

𑁧𑁬𑁨.

𑀧𑀩𑁆𑀩𑁂 𑀧𑀩𑁆𑀩𑁂 𑀓𑀫𑁂𑀦𑀼𑀘𑁆𑀙𑀼,

𑀯𑀺𑀲𑁂𑀲𑀭𑀲𑀯𑀸𑀕𑁆𑀕𑀢𑁄;

𑀢𑀣𑀸 𑀲𑀼𑀫𑁂𑀢𑁆𑀢𑀺𑀓𑁄 𑀲𑀸𑀥𑀼,

𑀯𑀺𑀧𑀭𑀻𑀢𑁄𑀯 𑀤𑀼𑀚𑁆𑀚𑀦𑁄.

𑁧𑁬𑁩.

𑀓𑀲𑁆𑀲𑀓𑁄 𑀯𑀸𑀡𑀺𑀚𑁄 𑀫𑀘𑁆𑀘𑁄,

𑀲𑀫𑀡𑁄 𑀲𑀼𑀢 𑀲𑀻𑀮𑀯𑀸;

𑀢𑁂𑀲𑀼 𑀯𑀺𑀧𑀼𑀮 𑀚𑀸𑀢𑁂𑀲𑀼,

𑀭𑀝𑁆𑀞𑀫𑁆𑀧𑀺 𑀯𑀺𑀧𑀼𑀮𑀁 𑀲𑀺𑀬𑀸.

𑁧𑁬𑁪.

𑀅𑀲𑀚𑁆𑀛𑀸𑀬 𑀫𑀮𑀸 𑀫𑀦𑁆𑀢𑀸,

𑀅𑀦𑀼𑀝𑁆𑀞𑀸𑀦 𑀫𑀮𑀸 𑀖𑀭𑀸;

𑀫𑀮𑀁 𑀯𑀡𑁆𑀡𑀲𑁆𑀲 𑀓𑁄𑀲𑀚𑁆𑀚𑀁,

𑀧𑀫𑀸𑀤𑁄 𑀭𑀓𑁆𑀔𑀢𑁄 𑀫𑀮𑀁.

𑁧𑁬𑁫.

𑀳𑀻𑀦𑀸𑀦𑀁 𑀕𑀘𑁆𑀙𑀢𑁂 𑀯𑀺𑀢𑁆𑀢𑀁,

𑀯𑀻𑀭𑀸𑀦𑀁 𑀲𑀦𑁆𑀢𑀓𑀢𑁆𑀢𑀦𑀁;

𑀯𑀤𑀦𑁆𑀢𑀺 𑀘 𑀳𑀻𑀦𑀸 𑀚𑀦𑀸,

𑀧𑀼𑀩𑁆𑀩-𑀓𑀫𑁆𑀫𑀧𑁆𑀧𑀥𑀸𑀦𑀓𑀸.

𑁧𑁬𑁬.

𑀦 ¶ 𑀯𑀤𑀦𑁆𑀢𑀺 𑀘𑁂𑀯𑀁𑀥𑀻𑀭𑀸,

𑀯𑀸𑀬𑀫𑀺𑀁𑀲𑀼 𑀲𑀩𑁆𑀩𑀓𑀫𑁆𑀫𑁂;

𑀦 𑀘𑁂 𑀲𑀺𑀚𑁆𑀛𑀢𑀺 𑀢𑀁 𑀓𑀫𑁆𑀫𑀁,

𑀅-𑀨𑀮𑀁 𑀏𑀯 𑀓𑁄 𑀤𑁄𑀲𑁄.

𑁧𑁬𑁭.

𑀦𑀻𑀘𑀁 𑀓𑀼𑀮𑀁 𑀦𑀺𑀧𑀜𑁆𑀜𑀁 𑀯𑀸,

𑀦𑀺𑀭𑀽𑀧𑀁 𑀦𑀺𑀩𑀮𑀁 𑀲𑀫𑀁;

𑀇𑀫𑀁 𑀓𑀸𑀮𑀁 𑀙𑀼𑀢𑁆𑀢𑀓𑀸𑀮𑀁,

𑀥𑀦𑀫𑁂𑀯 𑀯𑀺𑀲𑁂𑀲𑀓𑀁.

𑀧𑀓𑀺𑀡𑁆𑀡𑀓𑀓𑀡𑁆𑀟𑁄 𑀦𑀺𑀝𑁆𑀞𑀺𑀢𑁄.

𑀧𑀡𑁆𑀟𑀺𑀢𑁄 𑀲𑀼𑀚𑀦𑁄 𑀓𑀡𑁆𑀟𑁄,

𑀤𑀼𑀚𑁆𑀚𑀦𑁄 𑀫𑀺𑀢𑁆𑀢-𑀇𑀢𑁆𑀣𑀺 𑀘;

𑀭𑀸𑀚𑀸 𑀧𑀓𑀺𑀡𑁆𑀡𑀓𑁄 𑀘𑀸𑀢𑀺,

𑀲𑀢𑁆𑀢-𑀓𑀡𑁆𑀟-𑀯𑀺𑀪𑀽𑀲𑀺𑀢𑀁.

𑀯𑀺𑀲𑀼𑀤𑁆𑀥𑀸 𑀘𑀸𑀭-𑀣𑁂𑀭𑁂𑀦,

𑀯𑀺𑀲𑀼𑀤𑁆𑀥𑀸𑀭𑀸𑀫-𑀯𑀸𑀲𑀺𑀦𑀸;

𑀲𑀩𑁆𑀩-𑀓𑀼𑀮𑀸𑀦𑀫𑀢𑁆𑀣𑀸𑀬,

𑀯𑀺𑀲𑁄𑀥𑀺𑀢𑀁 𑀧𑀣𑀓𑁆𑀔𑀬𑁂.