📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀲𑀽𑀭𑀲𑁆𑀲𑀢𑀻𑀦𑀻𑀢𑀺

𑀧𑀞𑀫𑁄 𑀪𑀸𑀕𑁄

𑀧𑀡𑀸𑀫𑀕𑀸𑀣𑀸

𑁧.

𑀫𑀼𑀔𑀫𑁆𑀳𑀸 𑀪𑀕𑀯𑀦𑁆𑀢𑀲𑁆𑀲,

𑀲𑀼𑀕𑀦𑁆𑀥𑀓𑀫𑀮𑀸 𑀲𑀼𑀪𑀸;

𑀲𑀜𑁆𑀚𑀸𑀢𑀁 𑀉𑀢𑁆𑀢𑀫𑀁 𑀯𑀸𑀡𑀺𑀁,

𑀯𑀦𑁆𑀤𑀸𑀫𑀺 𑀯𑀺𑀢𑁆𑀢𑀫𑀸𑀦𑀲𑀸.

𑁨.

𑀲𑀫𑀚𑁆𑀛𑀺𑀝𑁆𑀞𑁄 𑀭𑀘𑀺𑀲𑁆𑀲𑀸𑀫𑀺,

𑀤𑀓𑁆𑀔𑁂𑀦 𑀭𑀸𑀚𑀫𑀦𑁆𑀢𑀺𑀦𑀸;

𑀦𑀸𑀫𑁂𑀦 𑀲𑀦𑁆𑀢𑁂𑀦,

𑀦𑀻𑀢𑀺𑀁 𑀮𑁄𑀓𑀳𑀺𑀢𑀸𑀯𑀳𑀁;

𑀲𑀸𑀮𑀗𑁆𑀓𑀸𑀭𑀁 𑀲𑁄𑀧𑀤𑁂𑀲𑀁,

𑀦𑀸𑀫𑁂𑀦𑀸𑀳𑀁 𑀲𑁆𑀯𑀭𑀲𑁆𑀲𑀢𑀺𑀁.

𑁩.

𑀧𑁂𑀓𑁆𑀔𑀦𑁆𑀢𑁆𑀯𑀺𑀫𑀁 𑀦𑀻𑀢𑀺𑀁 𑀲𑀦𑁆𑀢𑀸,

𑀫𑀜𑁆𑀚𑀽𑀲𑀭𑀼𑀓𑁆𑀔𑀲𑀦𑁆𑀦𑀺𑀪𑀁;

𑀦𑀸𑀦𑁄𑀧𑀤𑁂𑀲𑀲𑀁𑀧𑀼𑀡𑁆𑀡𑀁,

𑀲𑀤𑀢𑁆𑀣𑀓𑀼𑀲𑀮𑀸 𑀲𑀤𑀸.

𑀲𑀽𑀭𑀲𑁆𑀲𑀢𑀻𑀦𑀻𑀢𑀺

𑁧.

𑀓𑀢𑀜𑁆𑀜𑀼𑀢𑀸 𑀘 𑀲𑀘𑁆𑀘𑀜𑁆𑀘,

𑀮𑁄𑀓𑀲𑀸𑀭𑀸 𑀳𑀺 𑀢𑁂 𑀤𑀼𑀯𑁂;

𑀮𑁄𑀓𑀸𑀧𑀺 𑀢𑁂𑀳𑀺 𑀢𑀺𑀝𑁆𑀞𑀦𑁆𑀢𑀺,

𑀭𑀝𑁆𑀞𑀁 𑀅𑀓𑀁𑀲𑀼 𑀇𑀲𑁆𑀲𑀭𑀁.

𑁨.

𑀓𑀸𑀓𑀸𑀘 𑀤𑀼𑀚𑁆𑀚𑀦𑀸 𑀮𑁄𑀓𑁂,

𑀫𑀮𑀻𑀪𑀽𑀢𑀸𑀯 𑀲𑀩𑁆𑀩𑀤𑀸;

𑀇𑀝𑁆𑀞𑀁 𑀕𑀼𑀡𑀁 𑀦𑀸𑀲𑀬𑀦𑁆𑀢𑀺,

𑀢𑁂 𑀯𑁂 𑀮𑁄𑀓𑀲𑁆𑀲 𑀯𑁂𑀭𑀺𑀦𑁄.

𑀫𑀺𑀕𑀸𑀦𑀁 𑀲𑀺𑀗𑁆𑀕𑀸𑀮𑁄 𑀅𑀦𑁆𑀢𑁄,

𑀧𑀓𑁆𑀔𑀻𑀦𑀁 𑀧𑀦 𑀯𑀸𑀬𑀲𑁄.

𑀅𑀓𑀸𑀭𑀡𑀯𑁂𑀭𑀻 𑀳𑁄𑀦𑁆𑀢𑀺,

𑀫𑀘𑁆𑀙𑀸𑀦𑀁 𑀥𑀻𑀯𑀭𑀸 𑀬𑀣𑀸;

𑀕𑀼𑀡𑀻𑀦𑀁 𑀲𑀚𑁆𑀚𑀦𑀸𑀦𑀜𑁆𑀘,

𑀤𑀼𑀚𑁆𑀚𑀦𑀸 𑀦𑀺𑀘𑁆𑀘𑀯𑁂𑀭𑀺𑀦𑁄.

𑁩.

𑀲𑀺𑀭𑀺𑀁 𑀪𑁄𑀦𑁆𑀢𑁄 𑀲𑀼𑀧𑁄𑀲𑁂𑀣,

𑀲𑀺𑀭𑀺 𑀫𑀽𑀮𑀸 𑀳𑀺 𑀲𑀫𑁆𑀧𑀤𑀸;

𑀲𑀺𑀭𑀺𑀬 𑀇𑀥 𑀚𑁄𑀢𑀦𑁆𑀢𑀺,

𑀲𑀺𑀭𑀻 𑀲𑀸 𑀲𑀩𑁆𑀩𑀲𑀺𑀤𑁆𑀥𑀺𑀓𑀸.

𑁪.

𑀫𑀼𑀲𑀸 𑀢𑀫𑁄𑀓𑀭𑀸 𑀮𑁄𑀓𑁂,

𑀲𑀘𑁆𑀘𑀁 𑀫𑀻𑀤𑀺𑀢𑀺𑀓𑀸𑀭𑀓𑀁;

𑀫𑀼𑀲𑀸𑀢𑀫𑁂𑀦 𑀤𑀼𑀓𑁆𑀔𑀦𑁆𑀢𑀺,

𑀲𑀘𑁆𑀘𑀸𑀪𑀸𑀬 𑀲𑀼𑀔𑀦𑁆𑀢𑀺𑀯𑁂.

𑀲𑀼𑀯𑀺𑀚𑀸𑀦𑀁 𑀲𑀺𑀗𑁆𑀕𑀸𑀮𑀸𑀦𑀁,

𑀲𑀓𑀼𑀡𑀸𑀦𑀜𑁆𑀘 𑀯𑀲𑁆𑀲𑀺𑀢𑀁;

𑀫𑀦𑀼𑀲𑁆𑀲𑀯𑀲𑁆𑀲𑀺𑀢𑀁 𑀭𑀸𑀚,

𑀤𑀼𑀩𑁆𑀩𑀺𑀚𑀸𑀦𑀢𑀭𑀁 𑀢𑀢𑁄.

𑁫.

𑀓𑀧𑁆𑀧𑀕𑁆𑀕𑀺𑀲𑀤𑀺𑀲𑀸 𑀇𑀲𑁆𑀲𑀸,

𑀛𑀸𑀧𑁂𑀢𑀺 𑀲𑀩𑁆𑀩𑀲𑀫𑁆𑀧𑀤𑀁;

𑀫𑀼𑀤𑀺𑀢𑀸 𑀓𑀧𑁆𑀧𑀫𑁂𑀖𑁄𑀯,

𑀭𑁄𑀧𑁂𑀢𑀺 𑀲𑀩𑁆𑀩𑀲𑀫𑁆𑀧𑀤𑀁.

𑁬.

𑀬𑀣𑀸 𑀅𑀲𑀦𑁆𑀣𑀺𑀭𑀸 𑀣𑀫𑁆𑀪𑀸,

𑀣𑀼𑀲𑀭𑀸𑀲𑀺𑀫𑁆𑀳𑀺 𑀉𑀲𑁆𑀲𑀺𑀢𑀸;

𑀢𑀣𑁂𑀯 𑀓𑀧𑀺𑀘𑀺𑀢𑁆𑀢𑀸𑀦𑀁,

𑀓𑀫𑁆𑀫𑀦𑁆𑀢𑀸 𑀘𑀜𑁆𑀘𑀮𑀗𑁆𑀕𑀢𑀸.

𑀳𑀮𑀺𑀤𑁆𑀤𑀺𑀭𑀸𑀕𑀁 𑀓𑀧𑀺𑀘𑀺𑀢𑁆𑀢𑀁;

𑀧𑀼𑀭𑀺𑀲𑀁 𑀭𑀸𑀕𑀯𑀺𑀭𑀸𑀕𑀺𑀦𑀁,

𑀏𑀤𑀺𑀲𑀁 𑀢𑀸𑀢 𑀫𑀸𑀲𑁂𑀯𑀺;

𑀦𑀺𑀫𑁆𑀫𑀦𑀼𑀲𑁆𑀲𑀫𑁆𑀧𑀺 𑀘𑁂 𑀲𑀺𑀬𑀸.

𑁭. [𑀓]

𑀧𑀼𑀧𑁆𑀨𑀘𑀼𑀫𑁆𑀩𑀺 𑀘𑀺𑀢𑁆𑀢𑀧𑀢𑁆𑀢𑀻,

𑀲𑀓𑀯𑀡𑁆𑀡𑁂𑀦 𑀫𑀚𑁆𑀚𑀺𑀢𑁄;

𑀯𑀺𑀓𑁆𑀓𑀫𑀻 𑀧𑀼𑀧𑁆𑀨𑀢𑁄 𑀧𑀼𑀧𑁆𑀨𑀁,

𑀦𑀲𑁆𑀲𑀸𑀕𑀸𑀭𑀁 𑀦 𑀲𑀗𑁆𑀕𑀫𑁄.

[𑀔]

𑀓𑀺𑀧𑁆𑀧𑀺𑀮𑀺𑀓𑀸 𑀤𑀼𑀩𑁆𑀩𑀡𑁆𑀡𑀸𑀧𑀺,

𑀲𑀫𑀕𑁆𑀕𑀸𑀘 𑀧𑀭𑀓𑁆𑀓𑀫𑀸;

𑀫𑀸 𑀳𑁄𑀣 𑀧𑀼𑀧𑁆𑀨𑀘𑀼𑀫𑁆𑀩𑀻𑀯,

𑀳𑁄𑀣 𑀯𑁄 𑀧𑀘𑀺𑀓𑀸 𑀬𑀣𑀸.

𑁧.

𑀬𑁂 𑀫𑀭𑀦𑁆𑀢𑀺 𑀓𑀻𑀴𑀦𑁆𑀢𑀸 𑀢𑁂,

𑀲𑁆𑀯𑀸𑀦𑀸 𑀅𑀜𑁆𑀜𑁄𑀜𑁆𑀜𑀫𑁄𑀤𑀺𑀢𑀸;

𑀤𑀺𑀲𑁆𑀯𑀸𑀦 𑀙𑀝𑁆𑀝𑀺𑀢𑀁 𑀪𑀢𑁆𑀢𑀁,

𑀲𑀻𑀖𑀯𑁂𑀭𑀻 𑀯𑀺𑀳𑀺𑀁𑀲𑀭𑁂.

𑁨.

𑀢𑀣𑁂𑀓𑁂𑀧𑀺 𑀚𑀦𑀸 𑀤𑀸𑀦𑀺,

𑀲𑀫𑀕𑁆𑀕𑀸 𑀜𑁆𑀜𑁄𑀜𑁆𑀜𑀫𑁄𑀤𑀺𑀢𑀸;

𑀥𑀦𑀳𑁂𑀢𑀼 𑀯𑀺𑀳𑀺𑀁𑀲𑀦𑁆𑀢𑀺,

𑀥𑀻𑀭𑀢𑁆𑀣𑀼 𑀲𑀻𑀖𑀯𑁂𑀭𑀺𑀓𑀸.

𑁯.

𑀯𑀲𑀦𑁆𑀢𑁂 𑀳𑁂𑀫𑀦𑁆𑀢𑁂 𑀕𑀺𑀫𑁆𑀳𑁂;

𑀦𑁂𑀯 𑀢𑀸𑀮𑀸 𑀯𑀺𑀲𑁂𑀲𑀺𑀦𑁄;

𑀣𑀺𑀭𑀘𑀺𑀢𑁆𑀢𑀸 𑀚𑀦𑀸 𑀲𑀦𑁆𑀢𑀸;

𑀲𑀼𑀔𑀤𑀼𑀓𑁆𑀔𑁂𑀲𑀼 𑀦𑀺𑀘𑁆𑀘𑀮𑀸.

𑁧𑁦.

𑀬𑀣𑀸 𑀧𑀯𑀝𑁆𑀝𑀫𑀸𑀦𑀫𑁆𑀳𑀺,

𑀲𑀼𑀝𑁆𑀞𑀼 𑀢𑀺𑀝𑁆𑀞𑀢𑀺 𑀕𑁂𑀡𑁆𑀞𑀼𑀓𑁂;

𑀅𑀧𑁆𑀧𑀯𑀝𑁆𑀝𑁂 𑀪𑀽𑀫𑁆𑀬𑀁 𑀲𑁂𑀢𑀺,

𑀢𑀣𑁂𑀯 𑀕𑁂𑀡𑁆𑀞𑀼𑀓𑁄 𑀚𑀦𑁄.

𑁧𑁧.

𑀅𑀕𑁆𑀖𑀸𑀧𑁂𑀢𑀼𑀁 𑀦𑀲𑀓𑁆𑀓𑁄𑀦𑁆𑀢𑀺,

𑀓𑀸𑀮𑀜𑁆𑀳𑀺 𑀓𑀸𑀮𑀺𑀓𑀸 𑀚𑀦𑀸;

𑀯𑀚𑀺𑀭𑀸𑀤𑀺𑀜𑁆𑀘 𑀲𑀓𑁆𑀓𑁄𑀦𑁆𑀢𑀺,

𑀢𑁂𑀦 𑀓𑀸𑀮𑁄 𑀅𑀦𑀕𑁆𑀖𑀺𑀓𑁄.

𑁧𑁨. [𑀓]

𑀅𑀲𑀦𑁄 𑀳𑀺 𑀤𑀻𑀖𑀤𑁆𑀥𑀸𑀦𑁄,

𑀲𑀸𑀭𑀲𑀸𑀭𑁄 𑀲𑀼𑀕𑀦𑁆𑀥𑀺𑀓𑁄;

𑀦𑀺𑀕𑁆𑀕𑀦𑁆𑀥𑁄 𑀢𑁆𑀯𑁂𑀯 𑀦𑀺𑀲𑁆𑀲𑀸𑀭𑁄,

𑀤𑀻𑀖𑀤𑁆𑀥𑀸𑀦𑁄𑀧𑀺 𑀲𑀺𑀫𑁆𑀩𑀮𑀻.

[𑀔]

𑀢𑀣𑁂𑀯𑁂𑀓𑁂 𑀚𑀦𑀸 𑀮𑁄𑀓𑁂,

𑀤𑀻𑀖𑀤𑁆𑀥𑀸𑀦𑀸 𑀲𑀼𑀲𑀸𑀭𑀓𑀸;

𑀦𑀺𑀲𑁆𑀲𑀸𑀭𑀸 𑀓𑁂𑀘𑀺 𑀨𑁂𑀕𑁆𑀕𑀽𑀯,

𑀤𑀻𑀖𑀤𑁆𑀥𑀸𑀦𑀸𑀧𑀺 𑀕𑁄𑀬𑀣𑀸.

𑁧𑁩.

𑀉𑀧𑀓𑀸𑀭𑁄 𑀘𑀸𑀧𑀓𑀸𑀭𑁄,

𑀬𑀲𑁆𑀫𑀺𑀁 𑀕𑀘𑁆𑀙𑀢𑀺 𑀦𑀝𑁆𑀞𑀢𑀁;

𑀧𑀸𑀲𑀸𑀡𑀳𑀤𑀬𑀲𑁆𑀲𑀲𑁆𑀲,

𑀚𑀻𑀯𑀢𑀻𑀢𑁆𑀬𑀸 𑀪𑀺𑀥𑀸𑀫𑀼𑀥𑀸.

𑀧𑀲𑀸𑀤𑁄 𑀦𑀺𑀧𑁆𑀨𑀮𑁄 𑀬𑀲𑁆𑀲,

𑀓𑁄𑀧𑁄𑀘𑀸𑀧𑀺 𑀦𑀺𑀭𑀢𑁆𑀣𑀓𑁄;

𑀦 𑀢𑀁 𑀲𑀗𑁆𑀕𑀦𑁆𑀢𑀼 𑀫𑀺𑀘𑁆𑀙𑁂𑀬𑁆𑀬,

𑀣𑀻𑀧𑀼𑀫𑀸𑀯 𑀦𑀧𑀼𑀁𑀲𑀓𑀁.

𑁧𑁪.

𑀉𑀧𑀘𑀸𑀭𑁄 𑀳𑀺 𑀓𑀸𑀢𑀩𑁆𑀩𑁄,

𑀦 𑀬𑀸𑀯 𑀲𑁄𑀳𑀤𑀁 𑀪𑀯𑁂;

𑀉𑀧𑀘𑀸𑀭𑁄 𑀲𑀼𑀫𑀺𑀢𑁆𑀢𑀫𑁆𑀳𑀺,

𑀫𑀸𑀬𑀸 𑀘 𑀳𑁄𑀢𑀺 𑀓𑁄𑀝𑀺𑀮𑀁.

𑁧𑁫.

𑀓𑀫𑁂𑀦 𑀅𑀕𑁆𑀕𑀢𑁄 𑀉𑀘𑁆𑀙𑀼,

𑀭𑀲𑁄 𑀲𑀸𑀤𑀼𑀢𑀭𑁄 𑀬𑀣𑀸;

𑀢𑀣𑁂𑀯 𑀲𑀼𑀫𑀺𑀢𑁆𑀢𑁄 𑀮𑁄𑀓𑁂,

𑀤𑀼𑀫𑁆𑀫𑀺𑀢𑁆𑀢𑁄 𑀧𑀦 𑀦𑁂𑀤𑀺𑀲𑁄.

𑁧𑁬.

𑀲𑁄𑀓𑀸𑀭𑀸𑀢𑀺 𑀧𑀭𑀺𑀢𑁆𑀢𑀸𑀡𑀁,

𑀯𑀺𑀲𑁆𑀲𑀸𑀲𑀧𑀻𑀢𑀺𑀪𑀸𑀚𑀦𑀁;

𑀭𑀢𑀦𑀸𑀪𑀺𑀭𑀢𑀦𑀁 𑀇𑀘𑁆𑀙𑁂,

𑀲𑀼𑀫𑀺𑀢𑁆𑀢𑀁 𑀅𑀓𑁆𑀔𑀭𑀢𑁆𑀢𑀬𑀁.

𑁧𑁭.

𑀤𑀫𑁆𑀧𑀢𑀻𑀦𑀁 𑀲𑀼𑀫𑀺𑀢𑁆𑀢𑀸𑀦𑀁,

𑀫𑀼𑀔𑀁 𑀅𑀜𑁆𑀜𑁄𑀜𑁆𑀜𑀤𑀧𑁆𑀧𑀡𑀁,

𑀲𑀼𑀔𑁂 𑀲𑀼𑀔𑀁 𑀤𑀼𑀓𑁆𑀔𑁂 𑀤𑀼𑀓𑁆𑀔𑀁,

𑀧𑀝𑀺𑀘𑁆𑀙𑀸𑀬𑁂𑀯 𑀤𑀧𑁆𑀧𑀡𑁂.

𑀓𑀣𑀁 𑀦𑀼 𑀢𑀸𑀲𑀁 𑀳𑀤𑀬𑀁,

𑀲𑀼𑀔𑀭𑀸𑀯𑀢 𑀇𑀢𑁆𑀣𑀺𑀬𑁄;

𑀬𑀸𑀲𑀸𑀫𑀺𑀓𑁂 𑀤𑀼𑀓𑁆𑀔𑀺𑀢𑀫𑁆𑀳𑀺,

𑀲𑀼𑀔𑀫𑀺𑀘𑁆𑀙𑀦𑁆𑀢𑀺 𑀅𑀢𑁆𑀢𑀦𑁄.

𑁧𑁮.

𑀦𑀺𑀯𑀸𑀢𑀜𑁆𑀘 𑀧𑀼𑀭𑁂 𑀓𑀢𑁆𑀯𑀸,

𑀫𑀸𑀦𑀁 𑀓𑀢𑁆𑀯𑀸𑀦 𑀧𑀘𑁆𑀙𑀢𑁄;

𑀲𑀓𑀢𑁆𑀣𑀁 𑀥𑀸𑀭𑀬𑁂 𑀥𑀻𑀭𑁄,

𑀅𑀢𑁆𑀣𑀪𑀜𑁆𑀚𑁄 𑀳𑀺 𑀫𑀼𑀴𑁆𑀳𑀢𑀸.

𑁧𑁯.

𑀧𑀼𑀭𑁂𑀘𑀸𑀭𑀁 𑀲𑀢𑀺𑀁 𑀓𑀢𑁆𑀯𑀸,

𑀲𑀤𑁆𑀥𑀁 𑀓𑀭𑁂𑀬𑁆𑀬 𑀧𑀘𑁆𑀙𑀢𑁄;

𑀢𑀼𑀭𑀁 𑀦 𑀲𑀤𑁆𑀤𑀳𑁂 𑀥𑀻𑀭𑁄,

𑀲𑀻𑀖𑀲𑀤𑁆𑀥𑁄 𑀳𑀺 𑀫𑀦𑁆𑀤𑀓𑁄.

𑁨𑁦.

𑀯𑀦𑁂 𑁦.𑁦𑁦𑁯𑁯 𑀩𑀳𑀽𑀦𑀺 𑀓𑀝𑁆𑀞𑀸𑀦𑀺;

𑀤𑀼𑀮𑁆𑀮𑀪𑀁 𑀭𑀢𑁆𑀢𑀘𑀦𑁆𑀤𑀦𑀁;

𑀢𑀣𑀸 𑀚𑀦𑀸 𑀩𑀳𑀽 𑀮𑁄𑀓𑁂;

𑀧𑀼𑀫𑀸 𑀚𑀜𑁆𑀜𑁄 𑀲𑀼𑀤𑀼𑀮𑁆𑀮𑀪𑁄.

𑁨𑁧.

𑀢𑀺𑀡𑀓𑀝𑁆𑀞𑀧𑀮𑀸𑀲𑁂𑀳𑀺;

𑀲𑀼𑀓𑁆𑀔𑁂𑀳𑀺 𑀤𑀬𑁆𑀳𑀢𑁂 𑀯𑀦𑀁;

𑀏𑀢𑀸𑀤𑀻𑀳𑀺 𑀅𑀲𑀸𑀭𑁂𑀳𑀺;

𑀮𑁄𑀓𑁄 𑀚𑀦𑁂𑀳𑀺 𑀤𑀬𑁆𑀳𑀢𑁂.

𑁨𑁨.

𑀅𑀦𑁆𑀢𑁄𑀯𑀲𑁆𑀲𑁂 𑀢𑀺𑀫𑀸𑀲𑀫𑁆𑀳𑀺,

𑀧𑀼𑀜𑁆𑀜𑀓𑀫𑁆𑀫𑁂𑀦 𑀫𑁄𑀤𑀺𑀢𑀸;

𑀲𑀼𑀔𑀁 𑀯𑀲𑀺𑀁𑀲𑀼 𑀧𑁄𑀭𑀸𑀡𑀸,

𑀩𑀼𑀤𑁆𑀥𑀲𑀸𑀲𑀦𑀫𑀸𑀫𑀓𑀸.

𑁨𑁩.

𑀫𑀺𑀕𑀫𑀤𑁂𑀦 𑀏𑀓𑁂𑀦,

𑀢𑀁 𑀯𑀦𑀁 𑀲𑀼𑀭𑀪𑀺𑀕𑀦𑁆𑀥𑀺𑀓𑀁;

𑀢𑀣𑀸 𑀚𑀦𑁂𑀦 𑀢𑀁 𑀭𑀝𑁆𑀞𑀁,

𑀕𑀼𑀡𑀺𑀦𑀸 𑀳𑀺 𑀲𑀺𑀭𑀻𑀫𑀢𑀸.

𑀲𑀭𑀻𑀭𑀁 𑀔𑀡𑀯𑀺𑀤𑁆𑀥𑀁𑀲𑀻,

𑀓𑀧𑁆𑀧𑀦𑁆𑀢𑀝𑁆𑀞𑀸𑀬𑀺𑀦𑁄 𑀕𑀼𑀡𑀸.

𑁨𑁪.

𑀔𑀭𑀸𑀦𑀁 𑀲𑀻𑀳𑀩𑁆𑀬𑀕𑁆𑀖𑀸𑀦𑀁,

𑀲𑀗𑁆𑀕𑀫𑁄 𑀦𑁄 𑀳𑀺𑀲𑀩𑁆𑀩𑀤𑀸;

𑀢𑀣𑁂𑀯 𑀩𑁆𑀬𑀕𑁆𑀖𑀘𑀺𑀢𑁆𑀢𑀸𑀦𑀁,

𑀲𑀚𑀸𑀢𑀺𑀓𑀸 𑀔𑀬𑁄𑀦𑀢𑀸.

𑁨𑁫.

𑀲𑀓 𑀲𑀸𑀥𑀼𑀧𑀺 𑀦𑁄 𑀲𑀸𑀥𑀽,

𑀬𑁄 𑀘𑁂𑀜𑁆𑀜 𑀤𑀼𑀝𑁆𑀞𑀓𑀸𑀭𑀓𑁄;

𑀩𑀳𑀽𑀦𑀁 𑀲𑀸𑀥𑀽 𑀧𑀸𑀬𑁂𑀦,

𑀲 𑀯𑁂 𑀲𑀸𑀥𑀽𑀢𑀺 𑀯𑀼𑀘𑁆𑀘𑀢𑁂.

𑁨𑁬.

𑀩𑀳𑀽𑀤𑀓𑁂 𑀲𑀫𑀼𑀤𑁆𑀤𑁂𑀧𑀺,

𑀚𑀮𑀁 𑀦𑀢𑁆𑀣𑁂𑀯 𑀧𑀸𑀢𑀯𑁂;

𑀔𑀼𑀤𑁆𑀤𑀓𑁂 𑀔𑀢𑀓𑀽𑀧𑀫𑁆𑀳𑀺,

𑀲𑀸𑀤𑀼𑀁 𑀅𑀢𑁆𑀣𑀺 𑀩𑀳𑀼𑀁 𑀤𑀓𑀁.

𑁨𑁭.

𑀫𑀸 𑀲𑀻𑀖𑀁 𑀯𑀺𑀯𑀭𑁂𑀬𑁆𑀬𑀸𑀣,

𑀦𑀺𑀦𑁆𑀤𑀺𑀢𑀼𑀜𑁆𑀘 𑀧𑀲𑀁𑀲𑀺𑀢𑀼𑀁;

𑀫𑀼𑀔𑀜𑁆𑀳𑀺 𑀯𑁄 𑀓𑀣𑀸𑀤𑁆𑀯𑀸𑀭𑀁,

𑀦𑀺𑀭𑀼𑀦𑁆𑀥𑁂𑀬𑁆𑀬𑀸𑀣 𑀲𑀩𑁆𑀩𑀤𑀸.

𑁨𑁮.

𑀫𑀸 𑀲𑀻𑀖𑀁 𑀯𑀺𑀯𑀭𑁂𑀬𑁆𑀬𑀸𑀣,

𑀘𑀓𑁆𑀔𑀼𑀁 𑀯𑁄 𑀤𑀲𑁆𑀲𑀺𑀢𑀼𑀁 𑀧𑀺𑀬𑀁;

𑀲𑀡𑀺𑀓𑀜𑁆𑀳𑀺 𑀧𑀺𑀬𑀮𑀸𑀪𑀁,

𑀥𑀦𑀮𑀸𑀪𑀁 𑀢𑀼𑀭𑀁 𑀓𑀭𑁂.

𑁨𑁯.

𑀅𑀦𑀸𑀭𑀫𑁆𑀪𑁄 𑀳𑀺 𑀓𑀫𑁆𑀫𑀸𑀦𑀁,

𑀧𑀞𑀫𑀁 𑀩𑀼𑀤𑁆𑀥𑀺𑀮𑀓𑁆𑀔𑀡𑀁;

𑀦𑀺𑀝𑁆𑀞𑀗𑁆𑀕𑀢𑀁 𑀆𑀭𑀤𑁆𑀥𑀲𑁆𑀲,

𑀤𑀼𑀢𑀺𑀬𑀁 𑀩𑀼𑀤𑁆𑀥𑀺𑀮𑀓𑁆𑀔𑀡𑀁.

𑀅𑀲𑀫𑁂𑀓𑁆𑀔𑀺𑀢𑀓𑀫𑁆𑀫𑀦𑁆𑀢𑀁,

𑀢𑀼𑀭𑀺𑀢𑀸𑀪𑀺𑀦𑀺𑀧𑀸𑀢𑀺𑀦𑀁;

𑀲𑀸𑀦𑀺 𑀓𑀫𑁆𑀫𑀸𑀦𑀺 𑀢𑀧𑁆𑀧𑁂𑀦𑁆𑀢𑀺,

𑀉𑀡𑁆𑀳𑀁 𑀯𑀚𑁆𑀛𑁄𑀳𑀝𑀁 𑀫𑀼𑀔𑁂.

𑁩𑁦.

𑀅𑀨𑀮𑀸𑀦𑀺 𑀤𑀼𑀭𑀦𑁆𑀢𑀸𑀦𑀺,

𑀚𑀦𑀢𑀸 𑀦𑀺𑀦𑁆𑀤𑀺𑀢𑀸𑀦𑀺 𑀘;

𑀅𑀲𑀓𑁆𑀬𑀸𑀦𑀺 𑀘 𑀓𑀫𑁆𑀫𑀸𑀦𑀺,

𑀦𑀸𑀭𑀪𑁂𑀣 𑀯𑀺𑀘𑀓𑁆𑀔𑀡𑁄.

𑁩𑁧.

𑀅𑀢𑀺𑀯𑀺𑀭𑁄𑀥𑀪𑀻𑀢𑀸𑀦𑀁,

𑀲𑀗𑁆𑀓𑀺𑀢𑀸𑀦𑀁 𑀧𑀤𑁂 𑀧𑀤𑁂;

𑀧𑀭𑀧𑁆𑀧𑀯𑀸𑀤𑀢𑀸𑀲𑀸𑀦𑀁,

𑀤𑀽𑀭𑀢𑁄 𑀬𑀦𑁆𑀢𑀺 𑀲𑀫𑁆𑀧𑀤𑀸.

𑀲𑀤𑁆𑀤𑀫𑀢𑁆𑀢𑀁 𑀦 𑀪𑁂𑀢𑀩𑁆𑀩𑀁,

𑀮𑁄𑀓𑁄 𑀲𑀤𑁆𑀤𑀲𑁆𑀲 𑀕𑁄𑀘𑀭𑁄;

𑀬𑁄 𑀘 𑀲𑀤𑁆𑀤𑀧𑀭𑀺𑀢𑁆𑀢𑀸𑀲𑁄,

𑀯𑀦𑁂 𑀪𑀦𑁆𑀢𑀫𑀺𑀕𑁄 𑀳𑀺 𑀲𑁄.

𑁩𑁨.

𑀤𑁆𑀯𑀺𑀦𑁆𑀦𑀁 𑀢𑀡𑁆𑀟𑀼𑀮𑀣𑀽𑀲𑀸𑀦𑀁,

𑀯𑀺𑀲𑁂𑀲𑁄 𑀲𑀼𑀝𑁆𑀞𑀼 𑀔𑀸𑀬𑀢𑀺;

𑀭𑀦𑁆𑀥𑀺𑀢𑁄𑀧𑀺 𑀲𑀺𑀦𑀺𑀤𑁆𑀥𑁄 𑀦𑁄,

𑀣𑀼𑀲𑁄 𑀯𑀺𑀭𑀲𑀨𑀸𑀭𑀼𑀲𑁄;

𑀢𑀡𑁆𑀟𑀼𑀮𑀁 𑀲𑀺𑀦𑀺𑀤𑁆𑀥𑀁 𑀭𑀲𑀁,

𑀏𑀯𑀁 𑀮𑁄𑀓𑁂𑀧𑀺 𑀜𑀸𑀬𑀢𑁂.

𑁩𑁩.

𑀏𑀭𑀡𑁆𑀟𑀁 𑀦𑀺𑀲𑁆𑀲𑀺𑀢𑀸 𑀯𑀮𑁆𑀮𑀺,

𑀭𑀼𑀳𑀢𑁂 𑀓𑀺𑀁 𑀬𑀣𑀸𑀩𑀮𑀁;

𑀫𑀳𑀸𑀲𑀸𑀮𑀁 𑀲𑀼𑀦𑀺𑀲𑁆𑀲𑀸𑀬,

𑀭𑀼𑀳𑀢𑁂 𑀩𑁆𑀭𑀳𑀢𑀁 𑀕𑀢𑀸.

𑁩𑁪.

𑀫𑁂𑀢𑁆𑀢𑀸 𑀳𑀺 𑀲𑀻𑀫𑀲𑀫𑁆𑀪𑁂𑀤𑀸,

𑀧𑀓𑁆𑀔𑀧𑀸𑀢 𑀯𑀺𑀖𑀸𑀢𑀺𑀓𑀸;

𑀧𑀓𑁆𑀔𑀧𑀸𑀢𑁂𑀦 𑀤𑀼𑀓𑁆𑀔𑀦𑁆𑀢𑀺,

𑀦𑀺𑀧𑁆𑀧𑀓𑁆𑀔𑁄 𑀯𑀲𑀢𑁂 𑀲𑀼𑀔𑀁.

𑁩𑁫.

𑀦𑀭𑀸 𑀧𑀜𑁆𑀜𑀸 𑀘 𑀮𑀗𑁆𑀓𑀸𑀭𑀸,

𑀬𑀣𑀸𑀞𑀸𑀦𑁂 𑀦𑀺𑀬𑀼𑀚𑁆𑀚𑀭𑁂;

𑀦𑁄 𑀳𑀺 𑀘𑀽𑀴𑀸𑀫𑀡𑀺 𑀧𑀸𑀤𑁂,

𑀧𑀸𑀤𑀼𑀓𑀸 𑀘 𑀲𑀺𑀭𑁄𑀧𑀭𑀺.

𑀉𑀓𑁆𑀓𑀼𑀝𑁆𑀞𑁂 𑀲𑀽𑀭 𑀫𑀺𑀘𑁆𑀙𑀦𑁆𑀢𑀺;

𑀫𑀦𑁆𑀢𑀻𑀲𑀼 𑀅𑀓𑀼𑀢𑀽𑀳𑀮𑀁;

𑀯𑀺𑀬𑀜𑁆𑀘 𑀅𑀦𑁆𑀦𑀧𑀸𑀦𑀫𑁆𑀳𑀺;

𑀅𑀢𑁆𑀣𑁂 𑀚𑀸𑀢𑁂 𑀘 𑀧𑀡𑁆𑀟𑀺𑀢𑀁.

𑁩𑁬.

𑀧𑀫𑀸𑀤𑁄 𑀳𑀺 𑀢𑀫𑁄 𑀮𑁄𑀓𑁂,

𑀓𑀸𑀮𑁄 𑀘𑁄𑀭𑁄 𑀪𑀬𑀸𑀦𑀓𑁄;

𑀓𑀸𑀬𑀕𑁂𑀳𑀁 𑀩𑀳𑀼𑀙𑀺𑀤𑁆𑀤𑀁,

𑀓𑀸𑀮𑀘𑁄𑀭𑀲𑁆𑀲 𑀘𑁄𑀭𑀺𑀢𑀁.

𑁩𑁭.

𑀘𑀜𑁆𑀘𑀮𑁄 𑀓𑀸𑀮𑀤𑀸𑀲𑁄 𑀳𑀺,

𑀥𑀻𑀢𑀺𑀫𑀸 𑀓𑀸𑀮𑀇𑀲𑁆𑀲𑀭𑁄;

𑀓𑀸𑀮𑀺𑀲𑁆𑀲𑀭𑁄 𑀭𑀝𑁆𑀞𑀺𑀲𑁆𑀲𑀭𑀁,

𑀅𑀢𑀺𑀯𑀢𑁆𑀢𑀢𑀺 𑀲𑀩𑁆𑀩𑀲𑁄.

𑁩𑁮.

𑀯𑀺𑀮𑀼𑀧𑁆𑀧𑀦𑁆𑀢𑀺 𑁮 𑀥𑀦𑀁 𑀏𑀓𑁂,

𑀓𑀸𑀮𑀫𑁂𑀓𑁂 𑀅𑀦𑁂𑀓𑁆𑀔𑀓𑀸;

𑀢𑁂𑀲𑀼 𑀓𑀸𑀮𑀯𑀺𑀮𑁄𑀧𑀸𑀯,

𑀪𑀬𑀸𑀦𑀓𑀸 𑀢𑀺𑀓𑀓𑁆𑀔𑀴𑀸.

𑁩𑁯.

𑀭𑀜𑁆𑀜𑀸 𑀭𑀝𑁆𑀞𑀳𑀺𑀢𑀁 𑀓𑀢𑁆𑀢𑀸,

𑀭𑀜𑁆𑀜𑁄 𑀳𑀺𑀢𑀁 𑀚𑀦𑁂𑀳𑀺 𑀯𑁂;

𑀤𑁂𑀲𑁆𑀲𑁄 𑀅𑀢𑁆𑀢𑀳𑀺𑀢𑀁 𑀤𑀲𑁆𑀲𑀻,

𑀕𑀸𑀭𑀬𑁆𑀳𑁄 𑀓𑀺𑀦𑁆𑀦𑀼 𑀓𑀸𑀭𑀓𑁄.

𑀅𑀢𑁆𑀢𑀤𑀢𑁆𑀣𑀁 𑀧𑀭𑀢𑁆𑀣𑁂𑀦;

𑀩𑀳𑀼𑀦𑀸𑀧𑀺 𑀦 𑀳𑀸𑀧𑀬𑁂.

𑁪𑁦.

𑀬𑀲𑁆𑀲 𑀉𑀧𑀓𑀸𑀭𑁄 𑀤𑀺𑀦𑁆𑀦𑁄,

𑀉𑀧𑀓𑀸𑀭𑀁 𑀤𑀤𑁂 𑀧𑀼𑀦;

𑀢𑀢𑁄 𑀧𑀓𑀸𑀭𑀁 𑀦𑀺𑀘𑁆𑀙𑁂𑀬𑁆𑀬,

𑀓𑀢𑀜𑁆𑀜𑀽 𑀤𑀼𑀮𑁆𑀮𑀪𑁄 𑀇𑀥.

𑀲𑀘𑁆𑀘𑀁 𑀓𑀺𑀭𑁂𑀯 𑀫𑀸𑀳𑀁𑀲𑀼,

𑀦𑀭𑀸 𑀏𑀓𑀘𑁆𑀘𑀺𑀬𑀸 𑀇𑀥;

𑀓𑀝𑁆𑀞𑀁 𑀦𑀺𑀧𑁆𑀮𑀯𑀺𑀢𑀁 𑀲𑁂𑀬𑁆𑀬𑁄,

𑀦𑀢𑁆𑀯𑁂𑀯𑁂 𑀓𑀘𑁆𑀘𑀺𑀬𑁄 𑀦𑀭𑁄.

𑁪𑁧.

𑀓𑀸𑀭𑀼𑀓𑁄 𑀲𑀓𑀧𑀜𑁆𑀜𑀸𑀬,

𑀫𑀳𑀕𑁆𑀖𑀁 𑀤𑀸𑀭𑀼𑀓𑀁 𑀓𑀭𑁂;

𑀢𑀣𑀸 𑀚𑀦𑁄𑀧𑀺 𑀅𑀢𑁆𑀢𑀸𑀦𑀁,

𑀫𑀳𑀕𑁆𑀖𑁄 𑀮𑁄𑀓𑀫𑀸𑀦𑀺𑀢𑁄.

𑁪𑁨.

𑀅𑀧𑁆𑀧𑀕𑁆𑀖𑁄 𑀳𑀺 𑀅𑀬𑁄 𑀳𑁂𑀫𑀁,

𑀫𑀳𑀕𑁆𑀖𑀁 𑀙𑀺𑀦𑁆𑀤𑀢𑁂 𑀬𑀣𑀸;

𑀦𑀺𑀕𑁆𑀕𑀼𑀡𑁄 𑀲𑀕𑀼𑀡𑀁 𑀮𑁄𑀓𑁂,

𑀅𑀮𑀓𑁆𑀔𑀻𑀘 𑀲𑀺𑀭𑀺𑀁 𑀢𑀣𑀸.

𑀲𑀽𑀭𑀲𑁆𑀲𑀢𑀻𑀦𑀻𑀢𑀺

𑀤𑀼𑀢𑀺𑀬𑁄 𑀪𑀸𑀕𑁄

𑁧.

𑀥𑀦𑀲𑁆𑀲 𑀤𑀼𑀩𑁆𑀩𑀺𑀥𑀁 𑀓𑀺𑀘𑁆𑀘𑀁,

𑀧𑀸𑀧𑁂𑀢𑀺 𑀉𑀡𑁆𑀡𑀢𑀁 𑀥𑀦𑀺𑀁;

𑀅𑀥𑀦𑀺𑀁 𑀑𑀡𑀢𑀁 𑀮𑁄𑀓𑁂,

𑀲𑀜𑁆𑀘𑀺𑀦𑁂 𑀢𑁂𑀦 𑀢𑀁 𑀥𑀦𑀁.

𑁨.

𑀯𑀝𑁆𑀝𑀢𑁂 𑀲𑀢𑀢𑀁 𑀲𑀻𑀖𑀁,

𑀓𑀸𑀮𑀘𑀓𑁆𑀓𑀁 𑀅𑀯𑀸𑀭𑀺𑀢𑀁;

𑀢𑁂𑀦 𑀖𑀝𑀻 𑀤𑀺𑀦𑀁 𑀫𑀸𑀲𑁄,

𑀯𑀲𑁆𑀲𑁄 𑀪𑀯𑀢𑁆𑀬 𑀘𑀻𑀭𑀢𑁄.

𑁩.

𑀲𑀢𑁆𑀢𑀼𑀦𑀸 𑀦 𑀳𑀺 𑀲𑀦𑁆𑀥𑁂𑀬𑁆𑀬,

𑀏𑀓𑀤𑀸 𑀲𑁄 𑀪𑀬𑀁 𑀓𑀭𑁄;

𑀲𑀼𑀢𑀢𑁆𑀢𑀫𑀧𑀺 𑀧𑀸𑀦𑀻𑀬𑀁,

𑀲𑀫𑀬𑀢𑁂 𑀦𑀼 𑀧𑀸𑀯𑀓𑀁.

𑁪.

𑀯𑀺𑀚𑀳𑀁 𑀧𑀓𑀢𑀺𑀁 𑀬𑁄 𑀳𑀺,

𑀯𑀺𑀓𑀢𑀺𑀁 𑀧𑀼𑀦 𑀕𑀘𑁆𑀙𑀢𑀺;

𑀲𑀪𑀸𑀯𑁂𑀦 𑀆𑀓𑀸𑀭𑁂𑀦,

𑀯𑀺𑀧𑁆𑀧𑀮𑁆𑀮𑀸𑀲𑀁 𑀲 𑀕𑀘𑁆𑀙𑀢𑀺;

𑀲𑀁𑀲𑀼𑀫𑀸𑀭 𑀕𑀢𑀸 𑀕𑁄𑀥𑀸,

𑀬𑀣𑀸 𑀣𑀻 𑀧𑀼𑀫𑀯𑁂𑀲𑀺𑀓𑀸.

𑁫.

𑀧𑀓𑁆𑀔𑀁 𑀮𑀤𑁆𑀥𑀸𑀦 𑀉𑀟𑁆𑀟𑁂𑀦𑁆𑀢𑀺,

𑀉𑀧𑀘𑀺𑀓𑀸 𑀳𑀺 𑀯𑀫𑁆𑀫𑀺𑀓𑀸;

𑀦𑀺𑀓𑁆𑀔𑀦𑁆𑀢𑀸 𑀫𑀭𑀡𑀁 𑀬𑀦𑁆𑀢𑀺,

𑀉𑀧𑁆𑀧𑀢𑀸 𑀦𑀺𑀧𑁆𑀧𑀢𑀁 𑀕𑀢𑀸.

𑁬.

𑀲𑀩𑁆𑀩𑀁𑀧𑀺𑀬𑀲𑁆𑀲 𑀤𑀚𑁆𑀚𑁂𑀬𑁆𑀬,

𑀦𑀺𑀲𑁆𑀲𑁂𑀲𑀁 𑀧𑀺𑀬𑀫𑀸𑀦𑀲𑀁;

𑀲𑀤𑁆𑀥𑀸𑀘𑀺𑀢𑁆𑀢𑀁 𑀢𑀼 𑀦𑁄 𑀯𑀺𑀜𑁆𑀜𑀽,

𑀲𑀤𑁆𑀥𑀸𑀬𑀺𑀓𑁄 𑀧𑀓𑁆𑀔𑀮𑀺𑀢𑁄.

𑁭.

𑀲𑀓𑁆𑀓𑁄𑀢𑀺 𑀮𑀗𑁆𑀖𑀺𑀢𑀼𑀁 𑀩𑁆𑀬𑀸𑀫𑀁,

𑀫𑀳𑀼𑀲𑁆𑀲𑀸𑀳𑁂𑀦 𑀬𑁄 𑀳𑀺 𑀲𑁄;

𑀢𑀤𑀟𑁆𑀠𑀁 𑀅𑀦𑀼𑀲𑁆𑀲𑀸𑀳𑁂𑀦,

𑀦𑁄𑀲𑁆𑀲𑀸𑀳𑁄 𑀢𑁂𑀲𑀼 𑀣𑁄𑀫𑀺𑀢𑁄;

𑀫𑀳𑀼𑀲𑁆𑀲𑀸𑀳𑁄 𑀤𑀼𑀓𑁆𑀔𑁄 𑀮𑁄𑀓𑁂,

𑀅𑀦𑀼𑀲𑁆𑀲𑀸𑀳𑁄 𑀲𑀤𑀸 𑀲𑀼𑀔𑁄.

𑁮.

𑀤𑀼𑀓𑁆𑀔𑀫𑀁 𑀅𑀓𑁆𑀔𑀫𑀦𑁆𑀢𑁄 𑀬𑁄,

𑀧𑀺𑀝𑁆𑀞𑀺𑀓𑀸𑀭𑀻𑀘 𑀤𑀼𑀓𑁆𑀓𑀭𑀁,

𑀓𑀤𑀸 𑀮𑀪𑁂𑀬𑁆𑀬 𑀲𑁄 𑀮𑁄𑀓𑁂,

𑀲𑀼𑀔𑀫𑀁 𑀲𑀼𑀓𑀭𑀁 𑀫𑀼𑀥𑀸;

𑀧𑀘𑁆𑀘𑀓𑁆𑀔𑀜𑁆𑀳𑀺 𑀲𑁄 𑀓𑀭𑁂𑀬𑁆𑀬,

𑀤𑀼𑀓𑁆𑀔𑀫𑀜𑁆𑀘𑀸𑀧𑀺 𑀤𑀼𑀓𑁆𑀓𑀭𑀁.

𑁯.

𑀅𑀦𑀕𑁆𑀖𑁄 𑀫𑀦𑀼𑀲𑁆𑀲𑁄 𑀮𑁄𑀓𑁂,

𑀢𑁄𑀲𑀦𑀸𑀧𑁄𑀲𑀦𑀸𑀤𑀺𑀦𑀸;

𑀢𑁂𑀦 𑀲𑁄 𑀫𑀳𑀕𑁆𑀖𑀁 𑀓𑀫𑁆𑀫𑀁,

𑀓𑀭𑁂 𑀮𑁄𑀓𑀳𑀺𑀢𑀸𑀬𑀼𑀢𑀁.

𑁧𑁦.

𑀯𑀸𑀢𑁂𑀦 𑀦𑀧𑁆𑀧𑀪𑀺𑀚𑁆𑀚𑀦𑁆𑀢𑀺,

𑀦𑀺𑀦𑁆𑀦𑀸 𑀯𑁂𑀴𑀽 𑀓𑀲𑀸 𑀦𑀴𑀸;

𑀬𑀣𑀸𑀯𑀸𑀢𑀁 𑀦𑀕𑀘𑁆𑀙𑀦𑁆𑀢𑀺,

𑀢𑀣𑀸 𑀘𑀭𑁂 𑀚𑀦𑁂 𑀓𑀤𑀸.

𑁧𑁧.

𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘𑁂,

𑀦𑀺𑀲𑁆𑀲𑀬𑁄 𑀦𑀢𑁆𑀣𑀺 𑀧𑀲𑁆𑀲𑀢𑁄;

𑀅𑀥𑀺𑀓𑀁 𑀯𑀻𑀭𑀺𑀬𑀁 𑀳𑁄𑀢𑀺,

𑀅𑀢𑁆𑀢𑀦𑀸𑀣𑁄 𑀢𑀤𑀸 𑀪𑀯𑁂.

𑁧𑁨.

𑀔𑀡𑀁 𑀆𑀔𑀼𑀩𑀺𑀮𑀁 𑀲𑀻𑀳𑁄,

𑀧𑀸𑀲𑀸𑀡𑀲𑀓𑀮𑀸𑀓𑀼𑀮𑀁;

𑀧𑀧𑁆𑀧𑁄𑀢𑀺 𑀦𑀔𑀪𑀗𑁆𑀕𑀁𑀯𑀸,

𑀨𑀮𑀁𑀯𑀸 𑀫𑀽𑀲𑀺𑀓𑁄 𑀪𑀯𑁂.

𑁧𑁩.

𑀫𑀕𑁆𑀕𑀫𑀼𑀴𑁆𑀳𑀸 𑀚𑀦𑀸 𑀅𑀦𑁆𑀥𑀸,

𑀅𑀫𑀕𑁆𑀕𑀸 𑀫𑀕𑁆𑀕𑀲𑀜𑁆𑀜𑀺𑀦𑁄;

𑀢𑀣𑁂𑀯 𑀤𑀼𑀧𑁆𑀧𑀜𑁆𑀜𑀸 𑀫𑀼𑀴𑁆𑀳𑀸,

𑀢𑀣𑀢𑁆𑀣𑀁 𑀦𑀸𑀯 𑀩𑀼𑀚𑁆𑀛𑀭𑁂.

𑁧𑁪.

𑀧𑀺𑀬𑀭𑀽𑀧𑀁 𑀯𑀻𑀭𑀭𑀽𑀧𑀁,

𑀤𑀼𑀯𑀺𑀥𑀸 𑀭𑀽𑀧𑀲𑀫𑁆𑀧𑀤𑀸,

𑀦𑀸𑀭𑀺𑀁 𑀇𑀘𑁆𑀙𑁂 𑀧𑀺𑀬𑀭𑀽𑀧𑀺𑀁,

𑀧𑀼𑀭𑀺𑀲𑀁 𑀯𑀻𑀭𑀭𑀽𑀧𑀓𑀁.

𑁧𑁫.

𑀧𑀚𑁆𑀚𑀮𑀦𑁆𑀢𑀺 𑀳𑀺 𑀔𑀚𑁆𑀚𑁄𑀢𑀸,

𑀧𑀓𑁆𑀔𑀘𑀸𑀮𑀦𑀓𑀫𑁆𑀫𑀼𑀦𑀸;

𑀓𑀼𑀲𑀺𑀢𑀸 𑀲𑀼𑀧𑀺𑀢𑀸 𑀦𑁂𑀢𑁂,

𑀢𑀣𑀸 𑀚𑀦𑀸𑀧𑀺 𑀓𑀫𑁆𑀫𑀺𑀓𑀸.

𑁧𑁬.

𑀓𑀼𑀫𑁆𑀫𑀲𑀗𑁆𑀓𑁄𑀘𑀫𑁄𑀧𑀫𑁆𑀬,

𑀦𑀺𑀕𑁆𑀕𑀳𑀫𑀧𑀺 𑀲𑀁𑀔𑀫𑁂;

𑀧𑀢𑁆𑀢𑀓𑀸𑀮𑁂 𑀢𑀼 𑀦𑀻𑀢𑀺𑀜𑁆𑀜𑁄,

𑀓𑀡𑁆𑀳𑀲𑀧𑁆𑀧𑁄𑀯 𑀉𑀝𑁆𑀞𑀳𑁂.

𑁧𑁭.

𑀪𑀓𑁆𑀔𑀲𑁂𑀲𑀁 𑀦𑀔𑀸𑀤𑀦𑁆𑀢𑀺,

𑀲𑀻𑀳𑀸 𑀉𑀦𑁆𑀦𑀢𑀘𑁂𑀢𑀲𑀸;

𑀧𑀭𑀁𑀧𑀺 𑀦𑀧𑀡𑀸𑀫𑁂𑀦𑁆𑀢𑀺,

𑀯𑀼𑀤𑁆𑀥𑀺𑀓𑀸𑀫𑀸 𑀢𑀣𑀸 𑀘𑀭𑁂.

𑁧𑁮.

𑀦 𑀯 𑀯𑀲𑁆𑀲𑁄 𑀲𑀫𑀼𑀧𑁆𑀧𑀦𑁆𑀦𑁄,

𑀔𑀻𑀡𑁄 𑀧𑀼𑀭𑀸𑀡𑀳𑀸𑀬𑀦𑁄;

𑀦𑀯𑀯𑀲𑁆𑀲𑁂 𑀦𑀯𑀸 𑀫𑁂𑀢𑁆𑀢𑀸,

𑀪𑀸𑀯𑀺𑀢𑀩𑁆𑀩𑀸 𑀳𑀺𑀢𑁂𑀲𑀺𑀦𑀸.

𑁧𑁯.

𑀲𑀦𑁆𑀢𑀸𑀧𑀬𑀦𑁆𑀢𑀺 𑀓𑀫𑀬𑀸𑀧𑁆𑀬𑀪𑀼𑀚𑀁 𑀦 𑀭𑁄𑀕𑀸,

𑀤𑀼𑀫𑁆𑀫𑀦𑁆𑀢𑀺𑀦𑀁 𑀓𑀫𑀼𑀧𑀬𑀦𑁆𑀢𑀺 𑀦 𑀦𑀻𑀢𑀺𑀤𑁄𑀲𑀸;

𑀓𑀁 𑀲𑁆𑀭𑀻 𑀦 𑀫𑀸𑀦𑀬𑀢𑀺 𑀓𑀁 𑀦 𑀘 𑀳𑀦𑁆𑀢𑀺 𑀫𑀘𑁆𑀘𑀼,

𑀓𑀁 𑀣𑀻𑀓𑀢𑀸 𑀦 𑀯𑀺𑀲𑀬𑀸 𑀧𑀭𑀺𑀧𑀻𑀴𑀬𑀦𑁆𑀢𑀺.

(𑀯𑀲𑀦𑁆𑀢𑀢𑀺𑀮𑀓𑀸𑀕𑀸𑀣𑀸.)

𑁨𑁦.

(𑀓) 𑀩𑁆𑀬𑀸𑀫𑀫𑀢𑁆𑀢𑁂𑀦 𑀤𑀡𑁆𑀟𑁂𑀦,

𑀬𑁄𑀮𑀼𑀫𑁆𑀩𑁆𑀬 𑀉𑀤𑀓𑀁 𑀫𑀺𑀦𑁂;

𑀅𑀕𑀫𑁆𑀪𑀻𑀭𑀁 𑀕𑀫𑁆𑀪𑀻𑀭𑀁𑀯𑀸,

𑀅𑀕𑀸𑀥𑁂 𑀫𑀜𑁆𑀜𑀺 𑀕𑀫𑁆𑀪𑀻𑀭𑀁.

(𑀔)

𑀢𑀣𑀸 𑀫𑀦𑁆𑀤𑁄 𑀲𑀜𑁆𑀜𑀸𑀡𑁂𑀦,

𑀅𑀕𑀸𑀥𑁂 𑀫𑀜𑁆𑀜𑀺 𑀧𑀡𑁆𑀟𑀺𑀢𑀁;

𑀲𑀫𑀸𑀲𑀫𑀁 𑀦 𑀚𑀸𑀦𑀸𑀢𑀺,

𑀩𑀳𑁆𑀯𑀧𑁆𑀧𑀁 𑀢𑀺𑀓𑁆𑀔𑀫𑀦𑁆𑀤𑀢𑀁.

𑁨𑁧.

𑀤𑀼𑀝𑁆𑀞𑀓𑀫𑁆𑀫𑁂 𑀲𑀗𑁆𑀕𑀫𑀦𑁆𑀢𑀺,

𑀙𑁂𑀓𑀓𑀫𑁆𑀫𑁂 𑀘 𑀦𑁄 𑀇𑀥;

𑀫𑀘𑁆𑀘𑀼𑀁 𑀯𑀳𑀦𑁆𑀢𑀺 𑀲𑀻𑀲𑁂𑀦,

𑀢𑁂 𑀫𑀼𑀴𑁆𑀳𑀸 𑀫𑀼𑀴𑁆𑀳𑀲𑀗𑁆𑀕𑀫𑀸.

𑁨𑁨.

𑀤𑀼𑀯𑀺𑀥𑁄 𑀲𑀗𑁆𑀕𑀫𑁄 𑀮𑁄𑀓𑁂,

𑀉𑀚𑀼𑀓𑁄 𑀓𑀼𑀝𑀺𑀮𑁄 𑀪𑀯𑁂;

𑀉𑀚𑀼𑀓𑁄𑀯 𑀧𑀲𑀁𑀲𑁂𑀬𑁆𑀬𑁄,

𑀦𑁄𑀳𑁆𑀬𑀜𑁆𑀜𑁄 𑀲𑀸𑀚𑀲𑀗𑁆𑀕𑀫𑁄.

𑀢𑁂 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀫𑀳𑀸 𑀪𑀺𑀢𑁆𑀢𑀺𑀧𑀺𑀝𑁆𑀞𑀺𑀓𑀸𑀬 𑀯𑀲𑀦𑁆𑀢𑀺. (𑀫𑀳𑁄𑀲𑀥𑀚𑀸𑀢𑀓 𑀅𑀝𑁆𑀞𑀓𑀣𑀸)

𑁨𑁩.

𑀬𑀽𑀣𑀺𑀓𑀸 𑀧𑀼𑀧𑁆𑀨𑀢𑁂 𑀦𑁄𑀳𑀺,

𑀲𑀺𑀜𑁆𑀘𑀺𑀢𑀸𑀧𑀺 𑀧𑀼𑀦𑀧𑁆𑀧𑀼𑀦𑀁;

𑀧𑀼𑀧𑁆𑀨𑀢𑁂 𑀲𑀫𑁆𑀧𑀢𑁆𑀢𑁂 𑀓𑀸𑀮𑁂,

𑀏𑀯𑀁 𑀥𑀸𑀭𑁂𑀣 𑀯𑀻𑀭𑀺𑀬𑀁.

𑁨𑁪.

𑀥𑀦𑀼𑀘𑁆𑀘𑀬𑁄 𑀥𑀦𑀓𑁆𑀔𑁂𑀧𑁄,

𑀤𑀼𑀯𑀺𑀥𑀸 𑀳𑀺 𑀥𑀦𑀸𑀓𑀢𑀺;

𑀥𑀦𑀼𑀘𑁆𑀘𑀬𑁂 𑀦𑀬𑁄 𑀅𑀢𑁆𑀣𑀺,

𑀥𑀦𑀓𑁆𑀔𑁂𑀧𑀫𑁆𑀳𑀺 𑀦𑁄 𑀇𑀥.

𑁨𑁫.

𑀅𑀫𑀸𑀢𑀸 𑀧𑀺𑀢𑀭𑀲𑀁 𑀯𑀟𑁆𑀠𑀁,

𑀚𑀽𑀢𑀓𑀸𑀭𑀜𑁆𑀘 𑀘𑀜𑁆𑀘𑀮𑀁;

𑀦𑀸𑀮𑀧𑁂𑀬𑁆𑀬 𑀯𑀺𑀲𑁂𑀲𑀜𑁆𑀜𑀽,

𑀬𑀤𑀺𑀘𑁆𑀙𑁂 𑀲𑀺𑀤𑁆𑀥𑀺 𑀫𑀢𑁆𑀢𑀦𑁄.

𑀳𑀮𑀺𑀤𑁆𑀤𑀺𑀭𑀸𑀕𑀁 𑀓𑀧𑀺𑀘𑀺𑀢𑁆𑀢𑀁,

𑀧𑀼𑀭𑀺𑀲𑀁 𑀭𑀸𑀕𑀯𑀺𑀭𑀸𑀕𑀺𑀦𑀁;

𑀏𑀤𑀺𑀲𑀁 𑀢𑀸𑀢 𑀫𑀸𑀲𑁂𑀯𑀺,

𑀦𑀺𑀫𑁆𑀫𑀦𑀼𑀲𑁆𑀲𑀁𑀧𑀺 𑀘𑁂 𑀲𑀺𑀬𑀸.

𑁨𑁬.

𑀕𑀼𑀡𑀸 𑀕𑀼𑀡𑀜𑁆𑀜𑀽𑀲𑀼 𑀕𑀼𑀡𑀸 𑀪𑀯𑀦𑁆𑀢𑀺,

𑀢𑁂 𑀦𑀺𑀕𑁆𑀕𑀼𑀡𑀁 𑀧𑀢𑁆𑀯𑀸 𑀪𑀯𑀦𑁆𑀢𑀺 𑀤𑁄𑀲𑀸;

𑀆𑀲𑀸𑀤𑁆𑀬𑀢𑁄𑀬𑀸 𑀧𑀪𑀯𑀦𑁆𑀢𑀺 𑀦𑀚𑁆𑀚𑁄,

𑀲𑀫𑀼𑀤𑁆𑀭𑀫𑀸𑀲𑀚𑁆𑀚 𑀪𑀯𑀦𑁆𑀢𑁆𑀬𑀧𑁂𑀬𑁆𑀬𑀸.

(𑀉𑀧𑀚𑀸𑀢𑀺𑀕𑀸𑀣𑀸)

𑁨𑁭.

𑀲𑀺𑀮𑀸𑀭𑀽𑀧𑀁 𑀦𑀺𑀫𑁆𑀫𑀺𑀦𑀦𑁆𑀢𑀺,

𑀓𑁄𑀝𑁆𑀝𑁂𑀢𑁆𑀯𑀸𑀦 𑀧𑀼𑀦𑀧𑁆𑀧𑀼𑀦𑀁;

𑀓𑁄𑀝𑁆𑀝𑀓𑁄𑀯 𑀢𑀣𑀸 𑀩𑀸𑀮𑀸,

𑀲𑀸𑀥𑀼𑀁 𑀑𑀯𑀚𑁆𑀚 𑀦𑀺𑀫𑁆𑀫𑀺𑀢𑀸.

𑀘𑀸𑀡𑀓𑁆𑀬𑀦𑀻𑀢𑀺𑀮𑀸 𑀕𑀸𑀣𑀸

𑀮𑀸𑀮𑀦𑁂 𑀩𑀳𑀯𑁄 𑀤𑁄𑀲𑀸,

𑀢𑀸𑀴𑀦𑁂 𑀩𑀳𑀯𑁄 𑀕𑀼𑀡𑀸;

𑀢𑀲𑁆𑀫𑀸 𑀧𑀼𑀢𑁆𑀢𑀜𑁆𑀘 𑀲𑀺𑀲𑁆𑀲𑀜𑁆𑀘,

𑀢𑀸𑀴𑀬𑁂 𑀦 𑀘 𑀮𑀸𑀮𑀬𑁂.

𑁨𑁮.

𑀅𑀢𑀻𑀢𑀲𑁆𑀲 𑀳𑀺 𑀫𑀺𑀢𑁆𑀢𑀲𑁆𑀲,

𑀬𑁄 𑀘𑁂 𑀤𑁄𑀲𑀁 𑀧𑀓𑀸𑀲𑀬𑁂;

𑀲𑁄 𑀳𑀯𑁂 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲,

𑀤𑁄𑀲𑀁 𑀪𑀸𑀲𑁂𑀢𑀺 𑀜𑀸𑀬𑀢𑀺.

𑁨𑁯.

𑀮𑀢𑀸𑀯𑀺𑀬 𑀲𑁂𑀯𑀓𑀸 𑀢𑁂,

𑀬𑁂 𑀦𑀺𑀲𑁆𑀲𑀬𑀁 𑀧𑀮𑀫𑁆𑀩𑀭𑁂;

𑀦𑀺𑀲𑁆𑀲𑀬𑀲𑁆𑀲 𑀯𑀺𑀦𑀸𑀲𑁂𑀦,

𑀪𑀽𑀫𑁆𑀬𑀁 𑀲𑁂𑀦𑁆𑀢𑀺 𑀅𑀦𑀸𑀣𑀓𑀸.

𑁩𑁦.

𑀤𑁄𑀲𑀲𑀺𑀗𑁆𑀕𑁂𑀳𑀺 𑀯𑀺𑀚𑁆𑀛𑀦𑁆𑀢𑁄,

𑀫𑀸𑀦𑀔𑀽𑀭𑁂𑀳𑀺 𑀅𑀓𑁆𑀓𑀫𑀁;

𑀪𑀬𑀁 𑀓𑀭𑁄𑀢𑀺 𑀮𑁄𑀓𑀫𑁆𑀳𑀺,

𑀕𑁄𑀯 𑀩𑀸𑀮𑁄 𑀯𑀺𑀳𑀺𑀁𑀲𑀓𑁄.

𑁩𑁧.

𑀆𑀤𑁄 𑀉𑀧𑀭𑀺 𑀮𑁄𑀓𑁄𑀬𑀁,

𑀉𑀚𑀼𑀮𑁂𑀔𑀸𑀬 𑀢𑀺𑀝𑁆𑀞𑀢𑀺;

𑀫𑀼𑀲𑀸𑀯𑀸𑀢𑁂𑀳𑀺 𑀢𑀁𑀮𑁄𑀓𑀁,

𑀦𑀺𑀧𑀸𑀢𑁂𑀲𑀺 𑀅𑀦𑀚𑁆𑀚𑀯𑀁.

𑁩𑁨.

𑀲𑀼𑀖𑀝𑀁 𑀓𑀼𑀫𑁆𑀪𑀓𑀸𑀭𑁂𑀦,

𑀦𑀸𑀭𑀳𑁄 𑀧𑀭𑀺𑀪𑀼𑀜𑁆𑀚𑀺𑀢𑀼𑀁;

𑀢𑀣𑀽𑀧𑀫𑀸𑀬 𑀯𑁂𑀓𑁆𑀔𑁂𑀬𑁆𑀬,

𑀲𑀓𑀫𑁆𑀫𑀧𑀭𑀓𑀫𑁆𑀫𑀦𑀺.

𑁩𑁩.

𑀅𑀦𑀦𑁆𑀢𑀭𑀁𑀲𑀻 𑀲𑀽𑀭𑁄𑀧𑀺,

𑀦𑀲𑀓𑁆𑀓𑁄𑀢𑀺 𑀖𑀦𑀁 𑀢𑀫𑀁;

𑀯𑀺𑀚𑁆𑀛𑀺𑀢𑀼𑀁 𑀭𑀁𑀲𑀺𑀬𑀸 𑀮𑁄𑀓𑁂,

𑀢𑀣𑀸 𑀫𑀤𑀦𑀫𑁄𑀳𑀺𑀢𑀸;

𑀦𑀲𑀓𑁆𑀓𑁄𑀦𑁆𑀢𑀺 𑀫𑀤𑀁 𑀪𑁂𑀢𑁆𑀯𑀸,

𑀧𑀜𑁆𑀜𑀸𑀪𑀸𑀬 𑀧𑀪𑀸𑀲𑀺𑀢𑀼𑀁.

𑁩𑁪.

𑀔𑁂𑀤𑀯𑁂𑀭𑀁 𑀤𑀮𑀺𑀤𑁆𑀤𑀫𑁆𑀳𑀺,

𑀪𑁄𑀕𑀺𑀫𑁆𑀳𑀺 𑀭𑁄𑀕𑀼𑀧𑀤𑁆𑀤𑀯𑀁;

𑀤𑁂𑀲𑁆𑀲𑀯𑁂𑀭𑀜𑁆𑀘 𑀆𑀡𑀺𑀫𑁆𑀳𑀺,

𑀧𑀲𑁆𑀲𑁂 𑀮𑁄𑀓𑀲𑁆𑀲 𑀯𑁂𑀭𑀺𑀢𑀁.

𑁩𑁫.

𑀲𑀁𑀮𑀤𑁆𑀥𑁂𑀦 𑀲𑀼𑀪𑁄𑀕𑁂𑀦,

𑀚𑀻𑀯𑀁 𑀲𑀼𑀤𑁆𑀥𑀁 𑀓𑀭𑁂 𑀦𑀺𑀚𑀁;

𑀲𑁂𑀝𑁆𑀞𑁄 𑀲𑁄 𑀢𑁂𑀦 𑀚𑀻𑀯𑁂𑀦,

𑀚𑁂𑀕𑀼𑀘𑁆𑀙𑁄 𑀫𑀮𑀚𑀻𑀯𑀺𑀓𑁄.

𑁩𑁬.

𑀯𑀚𑀺𑀭 𑀧𑀼𑀧𑁆𑀨𑀭𑀸𑀕𑀸𑀦𑀁,

𑀯𑀺𑀲𑁂𑀲𑀁 𑀬𑁄 𑀦𑀩𑀼𑀚𑁆𑀛𑀢𑀺;

𑀓𑀣𑀜𑁆𑀳𑀺 𑀲𑁄 𑀯𑀺𑀓𑁆𑀓𑀻𑀡𑁂𑀬𑁆𑀬,

𑀓𑀻𑀡𑁂𑀬𑁆𑀬 𑀯𑀸 𑀬𑀣𑀸𑀢𑀣𑀁.

𑁩𑁭.

𑀓𑀺𑀧𑁆𑀧𑀻𑀮𑀺 𑀓𑁄𑀧𑀺 𑀘𑀺𑀦𑁆𑀢𑁂𑀢𑁆𑀯𑀸,

𑀧𑀩𑁆𑀩𑀢𑀁 𑀪𑁂𑀢𑁆𑀢𑀼 𑀫𑀼𑀲𑁆𑀲𑀳𑀁;

𑀅𑀩𑀮𑀸 𑀢𑀦𑀼𑀫𑀚𑁆𑀛𑀢𑁆𑀢𑀸,

𑀘𑀺𑀦𑁆𑀢𑀸 𑀳𑀲𑁆𑀬𑀸𑀯 𑀲𑀸 𑀫𑀼𑀥𑀸.

𑁩𑁮.

𑀚𑀸𑀢𑀫𑀢𑁆𑀢𑀁 𑀦 𑀬𑁄 𑀲𑀢𑁆𑀢𑀼𑀁,

𑀭𑁄𑀕𑀜𑁆𑀘𑀽𑀧𑀲𑀫𑀁 𑀦𑀬𑁂;

𑀫𑀳𑀸𑀩𑀮𑁄𑀧𑀺 𑀢𑁂𑀦𑁂𑀯,

𑀯𑀼𑀤𑁆𑀥𑀺𑀁𑀧𑀢𑁆𑀯𑀸 𑀲 𑀳𑀜𑁆𑀜𑀢𑁂.

𑁩𑁯.

𑀲𑀚𑀻𑀯𑀫𑀁𑀲𑀪𑀓𑁆𑀔𑁂𑀳𑀺,

𑀲𑀤𑀸𑀞𑀻𑀳𑀺 𑀫𑀼𑀔𑁂𑀳𑀺 𑀪𑁄;

𑀩𑀺𑀴𑀸𑀭𑀩𑁆𑀬𑀕𑁆𑀖𑀲𑀻𑀳𑀸𑀦𑀁,

𑀦𑀺𑀳𑀻𑀦𑀸𑀦𑀺 𑀅𑀦𑁂𑀓𑀥𑀸;

𑀢𑀺𑀓𑁆𑀔𑀸𑀦𑀺 𑀔𑀭𑀯𑀸𑀤𑀸𑀦𑀺,

𑀫𑀦𑀼𑀲𑁆𑀲𑀸𑀦𑀁 𑀫𑀼𑀔𑀸𑀦𑀺 𑀯𑁂.

𑁪𑁦.

𑀯𑀺𑀮𑀼𑀧𑁆𑀧𑀦𑁆𑀢𑀸 𑀯𑀺𑀥𑀸𑀯𑀦𑁆𑀢𑀺,

𑀲𑀚𑀻𑀯𑀯𑀼𑀢𑁆𑀢𑀺𑀓𑀫𑁆𑀫𑀼𑀦𑀸;

𑀚𑀦𑀸 𑀢𑁂𑀦 𑀯𑀺𑀳𑀜𑁆𑀜𑀦𑁆𑀢𑀺,

𑀘𑀭𑀦𑁆𑀢𑀺 𑀥𑀫𑁆𑀫𑀯𑁂𑀫𑀼𑀔𑀸.

𑁪𑁧.

𑀲𑀼𑀮𑀪𑀁 𑀮𑁄𑀓𑀺𑀬𑀁 𑀮𑁄𑀓𑁂,

𑀲𑀸𑀲𑀦𑀻𑀬𑀁𑀯 𑀤𑀼𑀮𑁆𑀮𑀪𑀁;

𑀤𑀼𑀮𑁆𑀮𑀪𑀁 𑀢𑀁 𑀯𑀫𑀜𑁆𑀜𑀦𑁆𑀢𑁄,

𑀏𑀲𑁄 𑀩𑀸𑀮𑀢𑀫𑁄 𑀪𑀯𑁂.

𑁪𑁨.

𑀬𑁄 𑀧𑀢𑀺𑀢𑁆𑀣 𑀅𑀕𑁆𑀬𑀸𑀯𑀸𑀝𑀁,

𑀫𑁄𑀳𑀸 𑀢𑀁 𑀉𑀧𑀓𑀸𑀭𑀺𑀢𑀼𑀁;

𑀅𑀜𑁆𑀜𑁄𑀭𑁄𑀳𑀺 𑀢𑀤𑀸 𑀯𑀸𑀝𑀁,

𑀤𑀼𑀢𑀻𑀬𑁄 𑀫𑀼𑀴𑁆𑀳𑀫𑀼𑀴𑁆𑀳𑀓𑁄.

𑁪𑁩.

𑀩𑁆𑀬𑀕𑁆𑀖𑁄 𑀆𑀯𑀼𑀥𑀯𑀺𑀤𑁆𑀥𑁄 𑀳𑀺,

𑀅𑀓𑀸 𑀤𑀼𑀝𑁆𑀞𑀸𑀦𑀺 𑀦𑀺𑀦𑁆𑀦𑀤𑀁;

𑀢𑀣𑁂𑀯 𑀲𑀸𑀥𑀼𑀲𑀢𑁆𑀣𑁂𑀦,

𑀯𑀺𑀤𑁆𑀥𑁄 𑀩𑀸𑀮𑁄 𑀧𑀓𑀼𑀧𑁆𑀧𑀺𑀢𑁄.

𑁪𑁪.

𑀧𑀺𑀯𑀦𑁆𑀢𑀺 𑀮𑁄𑀳𑀺𑀢𑀁 𑀟𑀁𑀲𑀸,

𑀅𑀦𑁆𑀢𑁄 𑀢𑀼𑀡𑁆𑀟𑁂𑀦 𑀫𑀓𑁆𑀔𑀺𑀓𑀸;

𑀩𑀳𑀺𑀤𑁆𑀥𑀸 𑀧𑀭𑀺𑀯𑀸𑀭𑁂𑀦𑁆𑀢𑀺,

𑀚𑀦𑁄 𑀢𑁂𑀦 𑀟𑀁𑀲𑀸𑀬𑀬𑁂.

𑁪𑁫.

𑀅𑀥𑀦𑀲𑁆𑀲 𑀔𑀡𑁄 𑀅𑀧𑁆𑀧𑁄,

𑀲𑀤𑁆𑀥𑀫𑁆𑀫𑁄 𑀅𑀧𑁆𑀧𑀓𑀸𑀮𑀺𑀦𑁄;

𑀅𑀧𑁆𑀧𑀓𑁄 𑀢𑁂𑀦 𑀬𑀼𑀜𑁆𑀚𑁂𑀬𑁆𑀬𑀼𑀁,

𑀔𑀡𑀁 𑀩𑀳𑀼𑀁 𑀮𑀪𑁂𑀢𑀯𑁂.