𑀅𑀜𑁆𑀜 > 𑀦𑀻𑀢𑀺-𑀕𑀦𑁆𑀣-𑀲𑀗𑁆𑀕𑀳𑁄 > 𑀘𑀢𑀼𑀭𑀸𑀭𑀓𑁆𑀔𑀤𑀻𑀧𑀦𑀻

MMR Vol 0

Misc. Paragraph

𑀘𑀢𑀼𑀭𑀸𑀭𑀓𑁆𑀔𑀤𑀻𑀧𑀦𑀻

𑀓𑀸𑀬𑀧𑀘𑁆𑀘𑀯𑁂𑀓𑁆𑀔𑀡𑀸

𑀧𑀡𑀸𑀫𑀧𑀝𑀺𑀜𑀸

𑁧. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺 𑀦𑀺𑀤𑁆𑀤𑁂𑀲

𑁨. 𑀫𑀭𑀡𑀲𑁆𑀲𑀢𑀺𑀦𑀺𑀤𑁆𑀤𑁂𑀲

𑁩. 𑀅𑀲𑀼𑀪𑀪𑀸𑀯𑀦𑀸 𑀦𑀺𑀤𑁆𑀤𑁂𑀲

𑁪. 𑀫𑁂𑀢𑁆𑀢𑀸𑀪𑀸𑀯𑀦𑀸𑀦𑀺𑀤𑁆𑀤𑁂𑀲

𑀅𑀧𑁆𑀧𑀫𑀸𑀤𑀸𑀯𑀳 𑀧𑀓𑀺𑀡𑁆𑀡𑀓𑀦𑀺𑀤𑁆𑀤𑁂𑀲

𑀓𑀸𑀬𑀧𑀘𑁆𑀘𑀯𑁂𑀓𑁆𑀔𑀡𑀸

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀘𑀓𑁆𑀓𑀯𑀸𑀴 ¶ 𑀦𑀳𑀼𑀢𑀸 𑀕, 𑀤𑁂𑀯𑀸𑀮𑀺 𑀕𑀡 𑀘𑀼𑀫𑁆𑀩𑀺𑀢𑁄;

𑀩𑀼𑀤𑁆𑀥 𑀧𑀸𑀤𑀫𑁆𑀩𑀼𑀚𑁄 𑀞𑀸𑀢𑀼, 𑀲𑀻𑀲𑁂 𑀤𑀬𑀸 𑀢𑀺𑀕𑀦𑁆𑀥𑀚𑁄.

𑀦𑀦𑁆𑀢 ¶ 𑀘𑀓𑁆𑀓𑀯𑀸𑀴 𑀩𑁆𑀪𑀼𑀕𑁆𑀕, 𑀕𑀼𑀡 𑀲𑀦𑁆𑀦𑀺𑀘𑁆𑀘𑀺𑀢𑀁 𑀚𑀺𑀦𑀁;

𑀯𑀦𑁆𑀤𑁂 𑀢𑀧𑁆𑀧𑀽𑀚𑀺𑀢𑀁 𑀥𑀫𑁆𑀫𑀁, 𑀢𑀚𑁆𑀚𑀁 𑀲𑀗𑁆𑀖𑀜𑁆𑀘 𑀦𑀺𑀫𑁆𑀫𑀮𑀁.

𑀯𑀓𑁆𑀔𑀸𑀫𑀺 ¶ 𑀘𑀢𑀼𑀭𑀸𑀭𑀓𑁆𑀔𑀁, 𑀲𑀫𑁆𑀩𑀼𑀤𑁆𑀥 𑀯𑀘𑀦 𑀦𑁆𑀯𑀬𑀁;

𑀅𑀧𑁆𑀧𑀫𑀸𑀤𑀸𑀯𑀳𑀁 𑀏𑀢𑀁, 𑀲𑁄𑀢𑁆𑀢𑀩𑁆𑀩𑀁 𑀪𑀯𑀪𑀻𑀭𑀼𑀳𑀺.

𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺 ¶ 𑀫𑀭𑀡𑀸, 𑀪𑀼𑀪𑀸 𑀫𑁂𑀢𑁆𑀢𑀸𑀘 𑀪𑀸𑀯𑀦𑀸;

𑀅𑀧𑁆𑀧𑀫𑀸𑀤𑀸𑀬 𑀆𑀭𑀓𑁆𑀔𑀸, 𑀘𑀢𑀲𑁆𑀲𑁄 𑀫𑀸𑀦𑀺𑀢𑀸 𑀲𑀢𑀁.

𑁧. 𑀩𑀼𑀤𑁆𑀥𑀸𑀦𑀽𑀲𑁆𑀲𑀢𑀺 𑀪𑀸𑀯𑀦𑀸,

𑀩𑀼𑀤𑁆𑀥𑁄𑀯𑀸𑀤𑀁 ¶ 𑀲𑀭𑀺𑀢𑁆𑀯𑀸𑀯, 𑀫𑀘𑁆𑀘𑀼𑀩𑁆𑀩𑀺𑀕𑁆𑀕𑀸 𑀲𑀼𑀔𑁂𑀲𑀺𑀦𑁄;

𑀲𑀻𑀢𑀸 𑀲𑀻𑀢𑀢𑀭𑀁 𑀬𑀦𑁆𑀢𑀺, 𑀲𑀼𑀪𑀫𑁂𑀢𑁆𑀢𑀫𑁆𑀩𑀼𑀲𑀺-𑀝𑁆𑀞𑀺𑀢𑀸.

𑀫𑀭𑀡𑀕𑁆𑀕𑀺 𑀯𑀸𑀭𑀡𑀫𑁆𑀩𑀼, 𑀲𑀫𑁆𑀩𑀼𑀤𑁆𑀥𑀯𑀘𑀦𑀁 𑀬𑀺𑀤𑀁;

𑀩𑀳𑀽 𑀢𑀤𑀕𑁆𑀕𑀺 𑀲𑀦𑁆𑀢𑀢𑁆𑀢𑀸, 𑀲𑀻𑀢𑀸𑀯𑀸𑀲𑀼𑀁 𑀢𑀤𑀫𑁆𑀩𑀼𑀦𑀸.

𑀲𑀤𑁆𑀥𑀁 ¶ 𑀩𑀼𑀤𑁆𑀥𑁂𑀦 𑀢𑁂𑀚𑁂𑀢𑁆𑀯𑀸, 𑀫𑀸𑀦𑀁 𑀫𑀭𑀡𑀘𑀺𑀦𑁆𑀢𑀬𑀸;

𑀅𑀲𑀼𑀪𑀸𑀬 𑀳𑀦𑁂 𑀭𑀸𑀕𑀁, 𑀤𑁄𑀲𑀁 𑀫𑁂𑀢𑁆𑀢𑀸𑀬 𑀧𑀜𑁆𑀜𑀯𑀸.

𑁧. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺 𑀦𑀺𑀤𑁆𑀤𑁂𑀲

𑀅𑀭𑀳𑀁 ¶ 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀯𑀺𑀚𑁆𑀚𑀓𑁆𑀔𑀺 𑀘𑀭𑀡𑀧𑁆𑀧𑀤𑁄;

𑀲𑀼𑀕𑀢𑁄 𑀲𑀼𑀕𑀤𑁄 𑀲𑀢𑁆𑀣𑀸, 𑀲𑀩𑁆𑀩𑀜𑁆𑀜𑀽 𑀪𑀕𑀯𑀸𑀤𑀫𑁄.

𑀆𑀭𑀓𑀢𑁆𑀢𑀸𑀭𑀺𑀳𑀦𑁆𑀢𑀢𑁆𑀢𑀸 ¶ , 𑀧𑀸𑀧𑀸𑀓𑀸𑀭𑀓𑀢𑁄𑀭𑀳𑁄;

𑀳𑀢 𑀘𑀓𑁆𑀓𑀸𑀭𑀢𑁄 𑀧𑀽𑀚𑀸, 𑀭𑀳𑀢𑁆𑀢𑀸 𑀘𑀸𑀭𑀳𑀁 𑀦𑀫𑁂.

𑀲𑀫𑀼𑀢𑁆𑀢𑁂 ¶ 𑀚𑀺𑀬 𑀕𑀺𑀳𑀻𑀦𑀁, 𑀅𑀦𑀼𑀧𑀼𑀩𑁆𑀩𑀺𑀓𑀣𑁄 𑀚𑀺𑀦𑁄;

𑀅𑀤𑀸𑀲𑀺 𑀧𑀭𑀫𑀁 𑀢𑀼𑀝𑁆𑀞𑀺𑀁, 𑀲𑀘𑁆𑀘𑀸𑀦𑀺 𑀤𑀲𑁆𑀲𑀬𑀁 𑀤𑀺𑀯𑀸.

𑀪𑀺𑀓𑁆𑀔𑀽𑀦𑀁 ¶ 𑀧𑀞𑀫𑁂 𑀬𑀸𑀫𑁂, 𑀧𑀸𑀬𑁂𑀲𑀺 𑀅𑀫𑀢𑀸𑀕𑀤𑀁;

𑀚𑀸𑀢𑀺𑀔𑁂𑀢𑁆𑀢𑀸𑀕 𑀤𑁂𑀯𑀸𑀦𑀁, 𑀓𑀗𑁆𑀔𑀘𑁆𑀙𑁂𑀤𑁄 𑀲 𑀫𑀚𑁆𑀛𑀺𑀫𑁂;

𑀆𑀤𑁄 𑀨𑀮𑀲𑀼𑀔𑀁 𑀯𑁂𑀤𑀺, 𑀫𑀚𑁆𑀛𑁂 𑀲𑁂𑀬𑁆𑀬 𑀫𑀓𑀸 𑀚𑀺𑀦𑁄;

𑀯𑁂𑀦𑁂𑀬𑁆𑀬𑁄 𑀮𑁄𑀓𑀦𑀁 𑀅𑀦𑁆𑀢𑁂, 𑀧𑀘𑁆𑀙𑀺𑀫𑁂𑀧𑀺 𑀢𑀺𑀥𑀸 𑀓𑀢𑁂.

𑀔𑁂𑀤𑀁 ¶ 𑀅𑀕𑀡𑀬𑀁 𑀦𑀸𑀣𑁄, 𑀧𑀜𑁆𑀘 𑀩𑀼𑀤𑁆𑀥𑀓𑀢𑀁 𑀯𑀳𑀁;

𑀲𑀢𑁆𑀣𑀲𑀺𑀤𑁆𑀥𑁄 𑀧𑀭𑀢𑁆𑀣𑀁𑀯, 𑀩𑁆𑀬𑀸𑀯𑀝𑁄 𑀲𑀼𑀫𑀳𑀸𑀤𑀬𑁄.

𑀘𑀗𑁆𑀓𑀫𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸, 𑀭𑀢𑁆𑀢𑀺𑀁𑀤𑀺𑀯𑀜𑁆𑀘 𑀛𑀸𑀬𑀺𑀢𑀼𑀁;

𑀲𑀼𑀧𑀺𑀢𑀼𑀁 𑀫𑀚𑁆𑀛𑀬𑀸𑀫𑁂𑀯, 𑀩𑀼𑀤𑁆𑀥𑁄 𑀪𑀺𑀓𑁆𑀔𑀽𑀦 𑀫𑁄𑀯𑀤𑀺.

𑀦𑀸𑀮 ¶ 𑀫𑀸𑀮𑀲𑀺𑀢𑀼𑀁 𑀢𑀲𑁆𑀲, 𑀫𑀳𑀸𑀯𑀻𑀭𑀲𑁆𑀲 𑀲𑀸𑀲𑀦𑁂;

𑀧𑀫𑀸𑀤𑀸𑀬 𑀫𑀼𑀦𑀺𑀦𑁆𑀤𑀲𑁆𑀲, 𑀓𑀢𑀜𑁆𑀜𑀽 𑀲𑀸𑀥𑀼 𑀲𑀫𑁆𑀫𑀢𑁄.

𑀅𑀦𑀜𑁆𑀜𑀸𑀢𑀲𑁆𑀲 𑀜𑀸𑀢𑀸𑀬, 𑀅𑀧𑀢𑁆𑀢𑀲𑁆𑀲𑀘 𑀧𑀢𑁆𑀢𑀺𑀬𑀸;

𑀆𑀭𑀪𑁂𑀢𑀼𑀁𑀯 𑀦𑁄 𑀬𑀼𑀢𑁆𑀢𑁄, 𑀅𑀧𑁆𑀧𑀫𑀢𑁆𑀢𑁄 𑀭𑀳𑁄𑀕𑀢𑁄.

𑀆𑀭𑀩𑁆𑀪𑀣 ¶ 𑀦𑀺𑀓𑁆𑀓𑀫𑀣, 𑀬𑀼𑀜𑁆𑀚𑀣 𑀩𑀼𑀤𑁆𑀥𑀲𑀸𑀲𑀦𑁂;

𑀥𑀼𑀦𑀸𑀣 𑀫𑀘𑁆𑀘𑀼𑀦𑁄 𑀲𑁂𑀦𑀁, 𑀦𑀴𑀸𑀕𑀸𑀭𑀁𑀯 𑀓𑀼𑀜𑁆𑀚𑀭𑁄.

𑀬𑁄 ¶ 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀺𑀲𑁆𑀲𑀢𑀺;

𑀧𑀳𑀸𑀬 𑀚𑀸𑀢𑀺 𑀲𑀁𑀲𑀸𑀭𑀁, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀺;

𑀇𑀢𑀺 ¶ 𑀉𑀬𑁆𑀬𑁄𑀚𑀦𑀁 𑀫𑁆𑀳𑀸𑀓𑀁, 𑀫𑀼𑀢𑁆𑀢𑀲𑁆𑀲 𑀫𑀼𑀢𑁆𑀢𑀺𑀬𑀸 𑀲𑀭𑀁;

𑀦𑀬𑀼𑀢𑁆𑀢𑁄𑀯 𑀧𑀫𑀸𑀤𑀸𑀬, 𑀫𑀳𑀸𑀤𑀬𑀲𑁆𑀲 𑀲𑀢𑁆𑀣𑀼𑀦𑁄.

𑀲𑀼𑀢𑁆𑀢𑁂𑀦 𑀤𑀼𑀩𑁆𑀩𑀺𑀢𑀓𑁆𑀓𑁂𑀦, 𑀅𑀓𑀺𑀘𑁆𑀘 𑀓𑀭𑀡𑁂𑀦𑀯𑀸;

𑀫𑁄𑀖 𑀓𑀸𑀮𑀓𑁆𑀔𑀬𑁄 𑀫𑀦𑁆𑀤𑁄, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀣𑀁𑀓𑀭𑁂.

𑀆𑀓𑀸𑀲𑀁 ¶ 𑀘𑀓𑁆𑀓𑀯𑀸𑀴𑀜𑁆𑀘, 𑀲𑀢𑁆𑀢𑀸 𑀩𑀼𑀤𑁆𑀥𑀕𑀼𑀡𑀸 𑀧𑀺𑀘;

𑀅𑀦𑀦𑁆𑀢𑀸𑀦𑀸𑀫 𑀘𑀢𑁆𑀢𑀸𑀭𑁄, 𑀧𑀭𑀺𑀘𑁆𑀙𑁂𑀤𑁄 𑀦𑀯𑀺𑀚𑁆𑀚𑀢𑀺.

𑀬𑀣𑀸𑀧𑀺 𑀦𑀪 𑀫𑀸𑀓𑀸𑀲𑀁, 𑀅𑀗𑁆𑀕𑀼𑀮𑀭𑀚𑁆𑀚𑀼𑀬𑀝𑁆𑀞𑀺𑀪𑀺;

𑀫𑀺𑀦𑁂𑀢𑀼𑀁 𑀦𑁂𑀯 𑀲𑀓𑁆𑀓𑁄𑀢𑀺, 𑀏𑀯𑀁 𑀓𑁂𑀦𑀘𑀺 𑀢𑀕𑁆𑀕𑀼𑀡𑀁.

𑀫𑀭𑀡𑀲𑁆𑀲𑀢𑀺 ¶ 𑀫𑀺𑀘𑁆𑀙𑀦𑁆𑀢𑁄, 𑀢𑀸𑀯 𑀩𑀼𑀤𑁆𑀥𑀯𑀘𑁄 𑀲𑀼𑀡;

𑀅𑀯𑀺𑀓𑁆𑀔𑀺𑀢𑁆𑀢𑁂𑀦 𑀘𑀺𑀢𑁆𑀢𑁂𑀦, 𑀲𑀫𑁆𑀩𑀼𑀤𑁆𑀥 𑀯𑀘𑀦𑀁 𑀳𑀺𑀤𑀁.

𑀅𑀦𑀺𑀫𑀺𑀢𑁆𑀢 ¶ 𑀫𑀦𑀜𑁆𑀜𑀸𑀢𑀁, 𑀫𑀘𑁆𑀘𑀸𑀦𑀁 𑀇𑀥 𑀚𑀻𑀯𑀺𑀢𑀁;

𑀓𑀲𑀺𑀭𑀜𑁆𑀘 𑀧𑀭𑀺𑀢𑁆𑀢𑀜𑁆𑀘, 𑀢𑀜𑁆𑀘 𑀤𑀼𑀓𑁆𑀔𑁂𑀦 𑀲𑀁𑀬𑀼𑀢𑀁.

𑀦 𑀳𑀺 𑀲𑁄 𑀧𑀓𑁆𑀓𑀫𑁄 𑀅𑀢𑁆𑀣𑀺, 𑀬𑁂𑀦 𑀚𑀸𑀢𑀸 𑀦𑀫𑀺𑀬𑁆𑀬𑀭𑁂;

𑀚𑀭𑀫𑁆𑀧𑀺 𑀧𑀢𑁆𑀯𑀸 𑀫𑀭𑀡𑀁, 𑀏𑀯𑀁𑀥𑀫𑁆𑀫𑀸 𑀳𑀺 𑀧𑀸𑀡𑀺𑀦𑁄.

𑀨𑀮𑀸𑀦 ¶ 𑀫𑀺𑀯 𑀧𑀓𑁆𑀓𑀸𑀦𑀁, 𑀧𑀸𑀢𑁄 𑀧𑀢𑀦𑀢𑁄 𑀪𑀬𑀁;

𑀏𑀯𑀁 𑀚𑀸𑀢𑀸𑀦 𑀫𑀘𑁆𑀘𑀸𑀦𑀁, 𑀦𑀺𑀘𑁆𑀘𑀁 𑀫𑀭𑀡 𑀢𑁄 𑀪𑀬𑀁.

𑀬𑀣𑀸𑀧𑀺 𑀓𑀼𑀫𑁆𑀪𑀓𑀸𑀭𑀲𑁆𑀲, 𑀓𑀢𑀸 𑀫𑀢𑁆𑀢𑀺𑀓𑀪𑀸𑀚𑀦𑀸;

𑀲𑀩𑁆𑀩𑁂 𑀪𑁂𑀤𑀧𑀭𑀺𑀬𑀦𑁆𑀢𑀸, 𑀏𑀯𑀁 𑀫𑀘𑁆𑀘𑀸𑀦 𑀚𑀻𑀯𑀺𑀢𑀁.

𑀤𑀳𑀭𑀸𑀘 ¶ 𑀫𑀳𑀦𑁆𑀢𑀸𑀘, 𑀬𑁂𑀩𑀸𑀮𑀸 𑀬𑁂𑀘 𑀧𑀡𑁆𑀟𑀺𑀢𑀸;

𑀲𑀩𑁆𑀩𑁂 𑀫𑀘𑁆𑀘𑀼𑀯𑀲𑀁 𑀬𑀦𑁆𑀢𑀺, 𑀲𑀩𑁆𑀩𑁂 𑀫𑀘𑁆𑀘𑀼𑀧𑀭𑀸𑀬𑀦𑀸.

𑀢𑁂𑀲𑀁 𑀫𑀘𑁆𑀘𑀼𑀧𑀭𑁂𑀢𑀸𑀦𑀁, 𑀕𑀘𑁆𑀙𑀢𑀁 𑀧𑀭𑀮𑁄𑀓𑀢𑁄;

𑀦𑀧𑀺𑀢𑀸 𑀢𑀸𑀬𑀢𑁂 𑀧𑀼𑀢𑁆𑀢𑀁, 𑀜𑀸𑀢𑀺𑀯𑀸𑀧𑀦 𑀜𑀸𑀢𑀓𑁂;

𑀧𑁂𑀓𑁆𑀔𑀢𑀜𑁆𑀜𑁂𑀯 ¶ 𑀜𑀸𑀢𑀻𑀦𑀁, 𑀧𑀲𑁆𑀲 𑀮𑀸𑀮𑀧𑁆𑀧𑀢𑀁 𑀧𑀼𑀣𑀼;

𑀏𑀓𑀫𑁂𑀓𑁄𑀯 𑀫𑀘𑁆𑀘𑀸𑀦𑀁, 𑀕𑁄 𑀯𑀚𑁆𑀛𑁄𑀯𑀺𑀬 𑀦𑀺𑀬𑁆𑀬𑀢𑀺.

𑀏𑀯 𑀫𑀩𑁆𑀪𑀸𑀳𑀢𑁄 𑀮𑁄𑀓𑁄, 𑀫𑀘𑁆𑀘𑀼𑀦𑀸𑀘 𑀚𑀭𑀸𑀬𑀘;

𑀢𑀲𑁆𑀫𑀸 𑀥𑀻𑀭𑀸 𑀦𑀲𑁄𑀘𑀦𑁆𑀢𑀺, 𑀯𑀺𑀤𑀺𑀢𑁆𑀯𑀸 𑀮𑁄𑀓 𑀧𑀭𑀺𑀬𑀸𑀬𑀁.

𑀅𑀜𑁆𑀜𑁂𑀧𑀺 ¶ 𑀧𑀲𑁆𑀲 𑀕𑀫𑀦𑁂, 𑀬𑀣𑀸 𑀓𑀫𑁆𑀫𑀼𑀧𑀕𑁂 𑀦𑀭𑁂;

𑀫𑀘𑁆𑀘𑀼𑀦𑁄 𑀯𑀲𑀫𑀸𑀕𑀫𑁆𑀫, 𑀨𑀦𑁆𑀤𑀦𑁆𑀢𑁂𑀯𑀺𑀥 𑀧𑀸𑀡𑀺𑀦𑁄.

𑀧𑀲𑁆𑀲 𑀮𑁄𑀓𑀲𑁆𑀲 𑀧𑀭𑀺𑀬𑀸𑀬𑀦𑁆𑀢𑀺.

𑀦𑀺𑀧𑁆𑀧𑁄𑀣𑁂𑀦𑁆𑀢𑀸 𑀘𑀢𑀼𑀤𑁆𑀤𑀺𑀲𑀸.

𑀔𑀢𑁆𑀢𑀺𑀬𑁂𑀩𑁆𑀭𑀸𑀳𑁆𑀫𑀡𑁂 𑀯𑁂𑀲𑁆𑀲𑁂,

𑀦 ¶ 𑀢𑀢𑁆𑀣 𑀳𑀢𑁆𑀣𑀺 𑀦𑀁 𑀪𑀼𑀫𑁆𑀫𑀺, 𑀦 𑀭𑀣𑀸𑀦𑀁 𑀦𑀧𑀢𑁆𑀢𑀺𑀬𑀸;

𑀦 𑀘𑀸𑀧𑀺 𑀫𑀦𑁆𑀢𑀬𑀼𑀤𑁆𑀥𑁂𑀦, 𑀲𑀓𑁆𑀓𑀸 𑀚𑁂𑀢𑀼𑀁 𑀥𑀦𑁂𑀦𑀯𑀸.

𑀬𑁄 𑀥𑀫𑁆𑀫𑀘𑀸𑀭𑀻 𑀓𑀸𑀬𑁂𑀦, 𑀯𑀸𑀘𑀸𑀬 𑀉𑀤 𑀘𑁂𑀢𑀲𑀸;

𑀇𑀥𑁂𑀯𑀦𑀁 𑀧𑀲𑀁𑀲𑀦𑁆𑀢𑀺, 𑀧𑀘𑁆𑀘𑀲𑀕𑁆𑀕𑁂 𑀧𑀫𑁄𑀤𑀢𑀻𑀢𑀺.

[𑀧𑀩𑁆𑀩𑀢𑀽 𑀫𑀫 𑀲𑀼𑀢𑁆𑀢𑁂 𑀯𑀼𑀢𑁆𑀢𑀁.]

𑀬𑀣𑀸 ¶ 𑀯𑀸𑀭𑀺𑀯𑀳𑁄 𑀧𑀽𑀭𑁄, 𑀯𑀳𑁂 𑀭𑀼𑀓𑁆𑀔𑁂 𑀧𑀓𑀽𑀮𑀚𑁂;

𑀏𑀯𑀁 𑀚𑀭𑀸𑀫𑀭𑀡𑁂𑀦, 𑀯𑀼𑀬𑁆𑀳𑀦𑁆𑀢𑁂 𑀲𑀩𑁆𑀩 𑀧𑀸𑀡𑀺𑀦𑁄.

𑀲𑀸𑀬 ¶ 𑀫𑁂𑀓𑁂 𑀦𑀺𑀤𑀺𑀲𑁆𑀲𑀦𑁆𑀢𑀺, 𑀧𑀸𑀢𑁄 𑀤𑀺𑀝𑁆𑀞𑀸 𑀩𑀳𑀼𑀚𑁆𑀚𑀦𑀸;

𑀧𑀸𑀢𑁄 𑀏𑀓𑁂 𑀦𑀤𑀺𑀲𑁆𑀲𑀦𑁆𑀢𑀺, 𑀲𑀸𑀬𑀁 𑀤𑀺𑀝𑁆𑀞𑀸 𑀩𑀳𑀼𑀚𑁆𑀚𑀦𑀸.

𑀅𑀚𑁆𑀚𑁂𑀯 𑀓𑀺𑀘𑁆𑀘𑀁 𑀆𑀢𑀧𑁆𑀧𑀁, 𑀓𑁄 𑀚𑀜𑁆𑀜𑀸 𑀫𑀭𑀡𑀁 𑀲𑀼𑀯𑁂;

𑀦𑀳𑀺 𑀦𑁄 𑀲𑀗𑁆𑀓𑀭𑀁 𑀢𑁂𑀦, 𑀫𑀳𑀸𑀲𑁂𑀦𑀦 𑀫𑀘𑁆𑀘𑀼𑀦𑀸𑀢𑀺.

𑀦𑀢𑁆𑀣𑁂𑀢𑁆𑀣𑀜𑁆𑀜𑁄 ¶ 𑀦𑀼𑀲𑀸𑀲𑀦𑁆𑀢𑁄, 𑀲𑀬𑀁𑀯𑀢𑁆𑀢𑀸𑀦 𑀫𑁄𑀯𑀤;

𑀚𑀺𑀦𑁂𑀭𑀺𑀢𑀸 𑀦𑀼𑀲𑀸𑀭𑁂𑀦, 𑀪𑀺𑀓𑁆𑀔𑀼 𑀲𑀁𑀲𑀸𑀭 𑀪𑀻𑀭𑀼𑀓𑁄.

𑀅𑀳𑀺𑀯𑀸𑀧𑀺 ¶ 𑀫𑀁 𑀟𑀁𑀲𑁂𑀬𑁆𑀬, 𑀅𑀜𑁆𑀜𑁂𑀧𑀺 𑀯𑀺𑀲𑀥𑀸𑀭𑀺𑀦𑁄;

𑀅𑀧𑀺𑀬𑀸𑀧𑀺𑀘 𑀖𑀸𑀢𑁂𑀬𑁆𑀬𑀼𑀁, 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀭𑀼𑀚𑀸𑀧𑀺𑀫𑁂.

𑀫𑀘𑁆𑀘𑀼𑀲𑁂𑀦𑀸 𑀯𑀼𑀥𑀸𑀲𑀗𑁆𑀔𑁆𑀬𑀸, 𑀩𑀸𑀳𑀺𑀭𑀚𑁆𑀛𑀢𑁆𑀢𑀼 𑀧𑀤𑁆𑀤𑀯𑀸;

𑀢𑁂𑀳𑀸𑀬𑀼 𑀧𑀻𑀴𑀺𑀢𑀁𑀙𑁂𑀚𑁆𑀚𑀁, 𑀫𑀭𑀺𑀲𑁆𑀲 𑀫𑀚𑁆𑀚𑀯𑀸 𑀲𑀼𑀯𑁂.

𑀅𑀴𑀓𑁆𑀓𑀸 ¶ 𑀳𑀺 𑀕𑀯𑀸𑀤𑀻𑀳𑀺, 𑀘𑁄𑀭𑀸𑀤𑀻𑀳𑀺 𑀅𑀭𑀻𑀳𑀺𑀧𑀺;

𑀅𑀪𑀺𑀡𑁆𑀳 𑀲𑀦𑁆𑀦𑀺𑀧𑀸𑀢𑁂𑀳𑀺, 𑀭𑀼𑀚𑀸 𑀙𑀦𑀯𑀼𑀢𑀻𑀳𑀺𑀧𑀺.

𑀩𑀳𑀽𑀦 𑀫𑀼𑀧𑀓𑀸𑀭𑁂𑀳𑀺, 𑀅𑀦𑁆𑀦𑁄𑀤𑀓𑀸𑀤𑀺𑀓𑁂𑀳𑀺𑀧𑀺;

𑀫𑀭𑀺𑀲𑁆𑀲𑀁 𑀧𑀻𑀴𑀺𑀢𑁄 𑀦𑀺𑀘𑁆𑀘𑀁, 𑀦𑀺𑀭𑀼𑀚𑁆𑀛𑁂𑀬𑁆𑀬𑀸𑀬𑀼 𑀅𑀚𑁆𑀚𑀯𑀸.

𑀩𑀳𑁆𑀯𑀸𑀯𑀼𑀥𑁂 ¶ 𑀯𑀺𑀲𑀚𑁆𑀚𑁂𑀢𑀺, 𑀦𑀺𑀮𑁆𑀮𑁂𑀡𑀁 𑀫𑀘𑁆𑀘𑀼𑀦𑀺𑀤𑁆𑀤𑀬𑁄;

𑀯𑀲𑀦𑁆𑀢𑀁 𑀪𑀯𑀲𑀗𑁆𑀕𑀸𑀫𑁂, 𑀦𑀫𑀼𑀢𑁆𑀢𑁄 𑀓𑁄𑀘𑀺 𑀆𑀯𑀼𑀥𑀸;

𑀫𑀳𑀩𑁆𑀩𑀮𑀸 𑀫𑀳𑀸𑀧𑀜𑁆𑀜𑀸, 𑀫𑀳𑀺𑀤𑁆𑀥𑀺𑀓𑀸 𑀫𑀳𑀤𑁆𑀥𑀦𑀸;

𑀦𑀫𑀼𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀲𑀩𑁆𑀩𑀮𑁄𑀓𑀸𑀥𑀺𑀧𑁄 𑀅𑀧𑀺;

𑀫𑀬𑀸 ¶ 𑀲𑀫𑀸 𑀦𑀯𑀸 𑀯𑀼𑀤𑁆𑀥𑀸, 𑀢𑀤𑀸𑀯𑀼𑀥𑁂𑀳𑀺 𑀢𑁂 𑀫𑀢𑀸;

𑀢𑀣𑀸 𑀳𑀫𑁆𑀧𑀺 𑀫𑀭𑀺𑀲𑁆𑀲𑀸𑀫𑀺, 𑀮𑁂𑀡𑀁 𑀧𑀼𑀜𑁆𑀜𑀁𑀯 𑀫𑁂 𑀓𑀢𑀁.

𑀥𑀸𑀢𑁆𑀯𑀸𑀳𑀸𑀭𑀼 ¶ 𑀢𑀼𑀤𑁄𑀲𑀸𑀦𑀁, 𑀲𑀫𑀢𑁆𑀢𑁂 𑀯𑀸𑀬𑀼 𑀢𑀺𑀝𑁆𑀞𑀢𑀺;

𑀯𑀺𑀲𑀫𑁂 𑀢𑀗𑁆𑀔𑀡𑀜𑁆𑀜𑁂𑀯, 𑀙𑁂𑀚𑁆𑀚 𑀫𑀧𑁆𑀧𑀁 𑀧𑀭𑀸𑀥𑀺𑀦𑀁.

𑀥𑀸𑀢𑁆𑀯𑀸 𑀳𑀸𑀭𑀼𑀢𑀼 𑀤𑁄𑀲𑀸𑀦𑀁, 𑀯𑀺𑀲𑀫𑀸 𑀲𑁆𑀯𑁂𑀧𑁆𑀬𑀓𑀮𑁆𑀮𑀓𑁄;

𑀉𑀲𑁆𑀲𑀸𑀳𑁂 𑀓𑀮𑁆𑀮𑀓𑀸𑀮𑁂𑀯, 𑀓𑀺𑀁𑀓𑀭𑁂𑀬𑁆𑀬𑀅𑀓𑀮𑁆𑀮𑀓𑁄;

𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 ¶ 𑀭𑀼𑀚𑀸 𑀲𑁆𑀯𑁂𑀧𑀺, 𑀅𑀲𑀸𑀢𑁄 𑀤𑀼𑀓𑁆𑀔𑀫𑀸 𑀔𑀭𑀸;

𑀧𑀼𑀭𑁂𑀢𑀭𑀁𑀯 𑀆𑀭𑀩𑁆𑀪𑁂, 𑀫𑀸𑀧𑀘𑁆𑀙𑀸 𑀅𑀦𑀼𑀢𑀸𑀧𑀦𑀁.

𑀲𑀢𑁆𑀢𑀸𑀦𑀁 ¶ 𑀦𑀻𑀘𑀓𑀫𑁆𑀫𑀸𑀦𑀁, 𑀲𑀭𑀡𑁄𑀧𑀺 𑀪𑀬𑀗𑁆𑀓𑀭𑁄;

𑀦𑀻𑀘𑀸𑀦𑀻𑀘𑀁 𑀦𑀚𑀸𑀦𑀸𑀫𑀺, 𑀫𑀭𑀡𑀸𑀲𑀦𑁆𑀦𑀢𑀫𑁆𑀧𑀺𑀘.

𑀓𑀫𑁆𑀫 𑀧𑀻𑀴𑀺𑀢 𑀲𑀢𑁆𑀢𑀸𑀦𑀁, 𑀢𑀗𑁆𑀔𑀡𑀫𑁆𑀧𑀺 𑀪𑀬𑀼𑀩𑁆𑀪𑀯𑁄;

𑀫𑀭𑁂𑀬𑁆𑀬 𑀫𑀚𑁆𑀚𑀯𑀸 𑀲𑁆𑀯𑁂𑀯𑀸, 𑀦𑀬𑀼𑀢𑁆𑀢𑁄𑀯 𑀧𑀫𑀚𑁆𑀚𑀺𑀢𑀼𑀁.

𑀧𑀼𑀜𑁆𑀜𑀓𑁆𑀔𑀻𑀡𑀸 𑀧𑀚𑀸 𑀔𑀺𑀧𑁆𑀧𑀁, 𑀅𑀳𑁂𑀢𑀼𑀦𑀸𑀧𑀺 𑀦𑀲𑁆𑀲𑀬𑁂;

𑀲𑀼𑀤𑁆𑀥𑀘𑀺𑀢𑁆𑀢𑁄 𑀫𑀭𑀺𑀲𑁆𑀲𑀸𑀫𑀺, 𑀦 𑀓𑀺𑀮𑀺𑀝𑁆𑀞𑁂𑀦 𑀘𑁂𑀢𑀲𑀸.

𑀉𑀧𑀘𑁆𑀙𑁂𑀤𑀸𑀧𑀺 ¶ 𑀫𑁂 𑀲𑀦𑁆𑀢𑀺, 𑀪𑀯𑀸𑀪𑀯𑀘𑀺𑀢𑀸 𑀩𑀳𑀽;

𑀙𑁂𑀚𑁆𑀚𑀁 𑀢𑁂𑀳𑀸𑀬𑀼 𑀅𑀚𑁆𑀚𑀸𑀧𑀺, 𑀲𑀸𑀥𑁆𑀯𑀸𑀲𑀼𑀫𑀸𑀭𑀪𑁂 𑀫𑀢𑀁;

𑀓𑀫𑁆𑀫𑀸 𑀧𑀭𑀸𑀥 𑀲𑀢𑁆𑀢𑀸𑀦𑀁, 𑀯𑀺𑀦𑀸𑀲𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂;

𑀅𑀦𑀬𑁄 𑀦𑀬𑀭𑀽𑀧𑁂𑀦, 𑀩𑀼𑀤𑁆𑀥𑀺𑀫𑀸𑀓𑀫𑁆𑀬 𑀢𑀺𑀝𑁆𑀞𑀢𑀺.

𑀫𑀭𑀡𑀸𑀲𑀦𑁆𑀦 ¶ 𑀢𑀜𑁆𑀜𑁂𑀯, 𑀘𑀺𑀦𑁆𑀢𑁂𑀬𑁆𑀬 𑀧𑀜𑁆𑀜𑀯𑀸 𑀲𑀢𑁄;

𑀏𑀯𑀁 𑀘𑀺𑀦𑁆𑀢𑀬𑀦𑁆𑀢𑁄 𑀲𑀦𑁆𑀢𑁄, 𑀦𑀧𑀸𑀧𑀁 𑀓𑀢𑁆𑀢𑀼 𑀫𑀼𑀲𑁆𑀲𑀳𑁂.

𑀫𑀭𑀡𑀸𑀲𑀦𑁆𑀦 𑀢𑀜𑁆𑀜𑁂𑀯, 𑀘𑀺𑀦𑁆𑀢𑁂𑀬𑁆𑀬 𑀩𑀼𑀤𑁆𑀥𑀲𑀸𑀯𑀓𑁄;

𑀏𑀯𑀁 𑀘𑀺𑀦𑁆𑀢𑀬𑀦𑁆𑀢𑁄 𑀲𑀦𑁆𑀢𑁄, 𑀓𑀤𑀸𑀘𑀺𑀧𑀺 𑀅𑀦𑀼𑀡𑁆𑀡𑀢𑁄.

𑀅𑀤𑁆𑀥𑀸𑀕 ¶ 𑀫𑀭𑀡𑀁 𑀧𑀜𑁆𑀜𑁄, 𑀧𑀼𑀭𑁂𑀢𑀭𑀁𑀯 𑀘𑀺𑀦𑁆𑀢𑀬𑁂;

𑀓𑀭𑁂 𑀓𑀸𑀢𑀩𑁆𑀩 𑀓𑀫𑁆𑀫𑀜𑁆𑀘, 𑀏𑀯𑀁 𑀲𑁄 𑀦𑀸𑀦𑀼𑀲𑁄𑀘𑀢𑀺.

𑀫𑀭𑀡𑀸𑀲𑀦𑁆𑀦 𑀲𑀜𑁆𑀜𑀻 𑀲𑁄, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀘𑀓𑁆𑀔𑀡𑁄;

𑀧𑀢𑁆𑀢𑁂𑀧𑀺 𑀫𑀭𑀡𑁂 𑀓𑀸𑀮𑁂, 𑀦 𑀲𑀫𑁆𑀫𑀼𑀴𑁆𑀳𑁄 𑀦𑀲𑁄𑀓𑀯𑀸.

𑀫𑀭𑀡𑀸 ¶ 𑀲𑀦𑁆𑀦𑀲𑀜𑁆𑀜𑀻 𑀲𑁄, 𑀲𑁄𑀥𑁂𑀢𑀺 𑀅𑀢𑁆𑀢𑀦𑁄 𑀫𑀮𑀁;

𑀦𑀺𑀫𑁆𑀫𑀮𑁂𑀦 𑀘𑀼𑀢𑁄 𑀪𑀺𑀓𑁆𑀔𑀼, 𑀦𑀢𑁆𑀯𑁂𑀯𑀸 𑀧𑀸𑀬 𑀕𑀸𑀫𑀺𑀓𑁄.

𑀲𑀢𑀺 ¶ 𑀆𑀲𑀦𑁆𑀦𑀫𑀭𑀡𑁂, 𑀤𑀽𑀭𑀲𑀜𑁆𑀜𑀻 𑀧𑀫𑀸𑀤𑀯𑀸;

𑀆𑀓𑀺𑀡𑁆𑀡𑁄 𑀧𑀸𑀧𑀥𑀫𑁆𑀫𑁂𑀳𑀺, 𑀧𑀚𑁆𑀛𑀸𑀬𑀺 𑀤𑀼𑀫𑁆𑀫𑀦𑁄 𑀢𑀤𑀸.

𑀲𑀢𑀺 𑀆𑀲𑀦𑁆𑀦 𑀫𑀭𑀡𑁂, 𑀤𑀼𑀝𑁆𑀞𑁄 𑀤𑁄𑀲𑁄𑀢𑀺 𑀣𑀤𑁆𑀥𑀯𑀸;

𑀅𑀪𑀺𑀦𑀦𑁆𑀤𑀢𑀺 𑀲𑀸𑀤𑁂𑀢𑀺, 𑀢𑀤𑀸𑀲𑁄 𑀅𑀢𑀺𑀤𑀼𑀓𑁆𑀔𑀺𑀢𑁄.

𑀲𑀢𑀺 ¶ 𑀆𑀲𑀦𑁆𑀦𑀫𑀭𑀡𑁂, 𑀢𑀼𑀯𑀝𑀁 𑀦 𑀘𑀺𑀓𑀺𑀘𑁆𑀙𑀢𑀺;

𑀲𑀜𑁆𑀘𑀺𑀘𑁆𑀘𑀸𑀧𑀢𑁆𑀢𑀺 𑀫𑀸𑀧𑀦𑁆𑀦𑁄, 𑀢𑀤𑀸 𑀲𑁄 𑀧𑀭𑀺𑀤𑁂𑀯𑀢𑀺.

𑀲𑀢𑀺 𑀆𑀲𑀦𑁆𑀦 𑀫𑀭𑀡𑁂, 𑀕𑀺𑀳𑀻𑀳𑀺 𑀦𑀯𑀓𑁂𑀳𑀺𑀘;

𑀲𑀁𑀲𑀝𑁆𑀞𑁄 𑀦 𑀦𑀼𑀮𑁄𑀫𑁂𑀳𑀺, 𑀲𑁆𑀯𑀢𑀺𑀯𑀲𑁆𑀲𑀼 𑀫𑀼𑀔𑁄 𑀢𑀤𑀸.

𑀲𑀢𑀺 ¶ 𑀆𑀲𑀦𑁆𑀦 𑀫𑀭𑀡𑁂, 𑀓𑀼𑀳𑀓𑁄 𑀓𑀼𑀮𑀤𑀽𑀲𑀓𑁄;

𑀫𑀺𑀘𑁆𑀙𑀸𑀚𑀻𑀯 𑀲𑀫𑀸𑀧𑀦𑁆𑀦𑁄, 𑀤𑀼𑀦𑁆𑀦𑀺𑀫𑀺𑀢𑁆𑀢𑁄𑀯 𑀲𑁄 𑀘𑀼𑀢𑁄.

𑀲𑀲𑁄𑀓𑀻 ¶ 𑀲𑀳𑀦𑀦𑁆𑀤𑀻𑀘, 𑀤𑀼𑀓𑁆𑀔𑁂 𑀤𑀼𑀓𑁆𑀔𑁄 𑀲𑀼𑀔𑁂 𑀲𑀼𑀔𑁄;

𑀕𑀺𑀳𑀺𑀓𑀫𑁆𑀫𑁂𑀲𑀼 𑀉𑀲𑁆𑀲𑀼𑀓𑁆𑀓𑁄, 𑀧𑀲𑁆𑀲𑀁 𑀕𑀺𑀚𑁆𑀛𑀓𑀽𑀝𑀁 𑀘𑀼𑀢𑁄.

𑀫𑀭𑀺𑀲𑁆𑀲𑀦𑁆𑀢𑀺 𑀅𑀦𑀸𑀯𑀚𑁆𑀚, 𑀓𑀺𑀮𑁂𑀲𑀸𑀢𑀼𑀭 𑀧𑀻𑀴𑀺𑀢𑁄;

𑀓𑀺𑀫𑀺𑀔𑀚𑁆𑀚𑀯𑀡𑁄 𑀲𑀸𑀯, 𑀪𑀦𑁆𑀢𑁄 𑀓𑀺𑀁 𑀲𑀼𑀕𑀢𑀺𑀁 𑀯𑀚𑁂.

𑀫𑀭𑀺𑀲𑁆𑀲𑀦𑁆𑀢𑀺 ¶ 𑀅𑀦𑀸𑀯𑀚𑁆𑀚, 𑀥𑀼𑀭𑀤𑁆𑀯𑀬𑀁 𑀦 𑀧𑀽𑀭𑀢𑀺;

𑀕𑀦𑁆𑀣𑀁 𑀯𑀺𑀧𑀲𑁆𑀲𑀦𑀁 𑀢𑀦𑁆𑀤𑀻, 𑀓𑀸𑀭𑀼𑀜𑁆𑀜𑁄𑀬𑁂𑀯 𑀲𑁄 𑀘𑀼𑀢𑁄.

𑀫𑀭𑀺𑀲𑁆𑀲𑀦𑁆𑀢𑀺 𑀅𑀦𑀸𑀯𑀚𑁆𑀚, 𑀓𑀺𑀮𑁂𑀲𑀸𑀦𑀁 𑀯𑀲𑀸𑀦𑀼𑀕𑁄;

𑀲𑀫𑁆𑀩𑀼𑀤𑁆𑀥𑀸-𑀡𑀁 𑀯𑀻𑀢𑀺𑀓𑁆𑀓𑀦𑁆𑀢𑁄, 𑀓𑀸𑀭𑀼𑀜𑁆𑀜𑁄 𑀦𑀢𑁆𑀣𑀺 𑀢𑀲𑁆𑀲𑀫𑁄.

𑀫𑀭𑀺𑀲𑁆𑀲𑀦𑁆𑀢𑀺 ¶ 𑀅𑀦𑀸𑀯𑀚𑁆𑀚𑀁, 𑀥𑀦𑀫𑁂𑀲𑀻 𑀅𑀥𑀫𑁆𑀫𑀢𑁄;

𑀧𑀼𑀜𑁆𑀜𑁂 𑀘𑀺𑀦𑁆𑀢𑀸𑀧𑀺 𑀦𑀼𑀧𑁆𑀧𑀚𑁆𑀚𑀺, 𑀦𑀺𑀭𑀬𑀁 𑀲𑁄 𑀫𑀦𑀁 𑀕𑀢𑁄.

𑀫𑀭𑁂𑀬𑁆𑀬𑀦𑁆𑀢𑀺 𑀅𑀦𑀸𑀯𑀚𑁆𑀚𑀁, 𑀥𑀦𑀁 𑀘𑀺𑀦𑀺 𑀅𑀥𑀫𑁆𑀫𑀢𑁄;

𑀘𑀺𑀢𑀁 𑀘𑀺𑀢𑀁 𑀇𑀳𑁂𑀯𑁂𑀢𑀁, 𑀢𑀲𑁆𑀫𑀺𑀁𑀕𑀺𑀤𑁆𑀥𑁄 𑀲 𑀧𑁂𑀢𑁆𑀢𑀺𑀓𑁄.

𑀅𑀢𑁆𑀣𑀸 ¶ 𑀕𑁂𑀳𑁂 𑀦𑀺𑀯𑀢𑁆𑀢𑀦𑁆𑀢𑁂, 𑀲𑀼𑀲𑀸𑀦𑁂 𑀫𑀺𑀢𑁆𑀢𑀩𑀦𑁆𑀥𑀯𑀸;

𑀲𑀼𑀓𑀢𑀁 𑀤𑀼𑀓𑁆𑀓𑀢𑀁 𑀓𑀫𑁆𑀫𑀁, 𑀕𑀘𑁆𑀙𑀦𑁆𑀢 𑀫𑀦𑀼𑀕𑀘𑁆𑀙𑀢𑀺.

𑀫𑀭𑁂𑀬𑁆𑀬𑀦𑁆𑀢𑀺 𑀅𑀦𑀸𑀯𑀚𑁆𑀚𑀁, 𑀇𑀳𑀢𑁆𑀣𑀁 𑀯𑀸 𑀦𑀼𑀬𑀼𑀜𑁆𑀚𑀢𑀺;

𑀲𑀫𑁆𑀧𑀭𑀸𑀬 𑀫𑀦𑀧𑁂𑀓𑁆𑀔𑁄, 𑀲𑀼𑀚𑀼𑀁 𑀯𑀸 𑀧𑀸𑀬𑀕𑀸𑀫𑀺𑀓𑁄.

𑀫𑀭𑁂𑀬𑁆𑀬𑀦𑁆𑀢𑀺 ¶ 𑀲𑀫𑀸𑀯𑀚𑁆𑀚, 𑀥𑀫𑁆𑀫𑀢𑁄 𑀥𑀦 𑀫𑁂𑀲𑀢𑀺;

𑀧𑀼𑀜𑁆𑀜𑀓𑀸𑀭𑀻 𑀲𑀼𑀮𑀤𑁆𑀥𑁂𑀦, 𑀫𑀭𑀡𑁂𑀧𑀺 𑀲 𑀫𑁄𑀤𑀢𑀺.

𑀧𑀜𑁆𑀘𑀲𑀻𑀮 𑀲𑀤𑀸𑀭𑀓𑁆𑀔𑁄, 𑀬𑀣𑀸𑀩𑀮𑀜𑁆𑀘 𑀤𑀸𑀬𑀓𑁄;

𑀓𑀸𑀮𑁂 𑀉𑀧𑁄𑀲𑀣𑀸𑀯𑀸𑀲𑁄, 𑀲𑁄 𑀦𑀺𑀘𑁆𑀘𑀁 𑀲𑀼𑀕𑀢𑀺𑀁 𑀯𑀚𑁆𑀚𑁂.

𑀥𑁄𑀯𑀸𑀧𑀢𑁆𑀢𑀺𑀫𑀮𑀁 ¶ 𑀔𑀺𑀧𑁆𑀧𑀁, 𑀫𑀘𑁆𑀘𑀼 𑀅𑀤𑁆𑀥𑀸 𑀕𑀫𑀺𑀲𑁆𑀲𑀢𑀺;

𑀫𑀺𑀘𑁆𑀙𑀸𑀯𑀺𑀢𑀓𑁆𑀓 𑀫𑀼𑀘𑁆𑀙𑀺𑀚𑁆𑀚, 𑀓𑀭 𑀓𑀸𑀢𑀩𑁆𑀩𑀪𑀸𑀯𑀦𑀁.

𑀅𑀢𑀺𑀓𑁆𑀓𑀦𑁆𑀢𑀸 𑀩𑀳𑀽 𑀭𑀢𑁆𑀬𑁄, 𑀔𑁂𑀧𑁂𑀢𑁆𑀯𑀸 𑀫𑀫 𑀚𑀻𑀯𑀺𑀢𑀁;

𑀫𑀦𑁆𑀤𑀸𑀬𑀼𑀦𑀸 𑀧𑀫𑀸𑀤𑁂𑀦, 𑀬𑀼𑀢𑁆𑀢𑁄 𑀯𑀺𑀳𑀭𑀺𑀢𑀼𑀁 𑀓𑀣𑀁.

𑀳𑀸𑀲𑀦𑁆𑀢𑀁 ¶ 𑀦𑀦𑁆𑀤𑀺 𑀫𑀢𑁆𑀢𑀸𑀦𑀁, 𑀫𑀘𑁆𑀘𑀼𑀲𑀦𑁆𑀥𑀻𑀳𑀺 𑀢𑀘𑁆𑀙𑀬𑁂;

𑀓𑀼𑀘𑁆𑀙𑀺 𑀫𑁂𑀬𑁆𑀬𑀘𑀼𑀢𑁄 𑀅𑀚𑁆𑀚, 𑀓𑁄 𑀳𑀸𑀲𑀦𑀦𑁆𑀤𑀺𑀢𑀩𑁆𑀩𑀓𑁄.

𑀫𑀘𑁆𑀘𑀼𑀲𑁂𑀦𑀸𑀯𑀼𑀥𑀸 𑀲𑀗𑁆𑀔𑁆𑀬𑀸, 𑀫𑀭𑀡𑀸𑀪𑀺𑀫𑀼𑀔𑁄 𑀅𑀳𑀁;

𑀅𑀘𑁆𑀘𑀸𑀬𑀺𑀢𑀩𑁆𑀩 𑀓𑀸𑀮𑁄 𑀬𑀁, 𑀇𑀓𑁆𑀔𑀺𑀢𑀩𑁆𑀩 𑀫𑀼𑀤𑀺𑀓𑁆𑀔𑀢𑀼.

𑀤𑀓𑁆𑀔𑁂𑀬𑁆𑀬𑀁 𑀫𑀘𑁆𑀘𑀼 𑀏𑀲𑁆𑀲𑀢𑀺;

𑀆𑀓𑀺𑀡𑁆𑀡𑀫𑀘𑁆𑀘𑀼𑀲𑁂𑀦𑀸𑀦𑀁 ¶ , 𑀅𑀚𑁆𑀚 𑀲𑁆𑀯𑁂𑀯𑀸 𑀯𑀺𑀦𑀸𑀲𑀺𑀦𑀁;

𑀅𑀤𑁆𑀥𑀸 𑀧𑀳𑀸𑀬 𑀕𑀸𑀫𑀻𑀦𑀁, 𑀓𑀺𑀁 𑀧𑀫𑀸𑀤 𑀯𑀺𑀳𑀸𑀭𑀺𑀦𑀸.

𑀔𑀡𑀫𑀢𑁆𑀢𑁄𑀯 𑀧𑀘𑁆𑀘𑀓𑁆𑀔𑁄, 𑀅𑀚𑁆𑀚 𑀲𑁆𑀯𑁂𑀯𑀸 𑀅𑀢𑀺𑀲𑁆𑀲𑀢𑀺;

𑀲𑀫𑁆𑀧𑀭𑀸𑀬𑁄 𑀅𑀢𑀺𑀤𑀻𑀖𑁄, 𑀧𑀭𑀫𑁆𑀧𑀭𑁄 𑀅𑀦𑀦𑁆𑀢𑀺𑀓𑁄.

𑀔𑀡𑀫𑀢𑁆𑀢𑁄𑀯 ¶ 𑀧𑀘𑁆𑀘𑀓𑁆𑀔𑁄, 𑀫𑀘𑁆𑀘𑀼𑀦𑀸 𑀢𑀁 𑀚𑀳𑀺𑀲𑁆𑀲𑀢𑀺;

𑀧𑀳𑀸𑀬 𑀕𑀫𑀦𑀻𑀬𑁂-𑀲𑁆𑀫𑀺𑀁, 𑀫𑀳𑀼𑀲𑁆𑀲𑀸𑀳𑁄 𑀦𑀺𑀭𑀢𑁆𑀣𑀓𑁄.

𑀲𑀫𑁆𑀧𑀭𑀸𑀬𑁄 𑀅𑀢𑀺𑀤𑀻𑀖𑁄, 𑀅𑀧𑀸𑀣𑁂𑀬𑁆𑀬𑁂 𑀲𑀼𑀤𑀼𑀢𑁆𑀢𑀭𑁄;

𑀫𑀳𑀼𑀲𑁆𑀲𑀸𑀳𑁂𑀦 𑀓𑀸𑀢𑀩𑁆𑀩𑁄, 𑀢𑀤𑀢𑁆𑀣𑁄 𑀤𑀻𑀖𑀤𑀲𑁆𑀲𑀺𑀦𑀸.

𑀲𑀤𑁆𑀥𑀸 ¶ 𑀩𑀦𑁆𑀥𑀢𑀼 𑀧𑀸𑀣𑁂𑀬𑁆𑀬𑀁, 𑀢𑀤𑁂𑀲𑀦𑀁 𑀇𑀳𑁂𑀯 𑀳𑀺;

𑀪𑀯𑀦𑁆𑀢𑀭𑁂 𑀦𑀮𑀩𑁆𑀪𑁂𑀬𑁆𑀬, 𑀅𑀧𑀸𑀣𑁂𑀬𑁆𑀬 𑀢𑀺𑀤𑀼𑀓𑁆𑀔𑀺𑀢𑁄.

𑀲𑀁𑀲𑀸𑀭 𑀢𑀭𑀡𑀢𑁆𑀣𑀸𑀬, 𑀫𑀳𑁄𑀮𑀼𑀫𑁆𑀧𑀸𑀦𑀺 𑀩𑀦𑁆𑀥𑀣;

𑀪𑀸𑀯𑀦𑀸 𑀤𑀸𑀦 𑀲𑀻𑀮𑁂𑀳𑀺, 𑀢𑀺𑀯𑀺𑀢𑁆𑀢𑀺𑀡𑁆𑀡𑁄 𑀪𑀯𑀡𑁆𑀡𑀯𑁄.

𑀪𑀼𑀜𑁆𑀚𑀁 ¶ 𑀪𑀼𑀜𑁆𑀚𑀁 𑀚𑀦𑀁 𑀓𑀸𑀫𑁂,

𑀫𑀭𑁂𑀬𑁆𑀬𑀦𑁆𑀢𑀺 ¶ 𑀅𑀦𑀼𑀩𑁆𑀩𑀺𑀕𑁆𑀕𑁄, 𑀧𑀸𑀧𑀓𑀁 𑀓𑀢𑁆𑀢𑀼𑀫𑀼𑀲𑁆𑀲𑀳𑁂;

𑀓𑀭𑁂𑀬𑁆𑀬 𑀳𑀸𑀲𑀦𑀦𑁆𑀤𑀺𑀜𑁆𑀘, 𑀘𑀸𑀧𑀮𑁆𑀮𑀜𑁆𑀘 𑀧𑀫𑀸𑀤 𑀯𑀸.

𑀫𑀭𑁂𑀬𑁆𑀬𑀫𑀺𑀢𑀺 ¶ 𑀲𑀁𑀯𑀺𑀕𑁆𑀕𑁄, 𑀮𑁂𑀡𑀫𑁂𑀯 𑀕𑀯𑁂𑀲𑀢𑀺;

𑀦 𑀳𑀸𑀲𑀺 𑀦𑁂𑀯𑀦𑀦𑁆𑀤𑀻𑀘, 𑀦 𑀘𑀸𑀧𑀮𑁆𑀮𑁄 𑀓𑀤𑀸𑀘𑀺𑀧𑀺.

𑀅𑀘𑁆𑀘𑀼𑀝𑁆𑀞𑀺𑀢 𑀭𑀼𑀚𑀕𑁆𑀕𑀻𑀳𑀺, 𑀅𑀘𑁆𑀘𑀸𑀬𑀸𑀲𑁂 𑀪𑀬𑀸𑀦𑀓𑁂;

𑀦𑁄𑀲𑀥𑁂 𑀫𑀭𑀡𑀸𑀲𑀦𑁆𑀦𑁂, 𑀓𑀢𑀧𑀼𑀜𑁆𑀜𑀁𑀯 𑀲𑀸𑀢-𑀤𑀁.

𑀜𑀸𑀢𑀺𑀲𑀗𑁆𑀖𑀸 ¶ 𑀯𑀺𑀬𑁄𑀚𑁂𑀦𑁆𑀢𑀸, 𑀫𑀭𑀡𑀦𑁆𑀢 𑀪𑀼𑀲𑀸𑀢𑀼𑀭𑀸;

𑀲𑀩𑁆𑀩𑀁 𑀧𑀳𑀸𑀬 𑀕𑀦𑁆𑀢𑀸𑀧𑀺, 𑀦𑀦𑁆𑀤𑀺𑀢𑀩𑁆𑀩𑀸𑀦𑀺 𑀧𑀼𑀜𑁆𑀜𑀺𑀦𑁄.

𑀧𑀲𑁆𑀲𑀦𑁆𑀢𑀸 𑀲𑀼𑀦𑀺𑀫𑀺𑀢𑁆𑀢𑀸𑀦𑀺, 𑀧𑀸𑀓𑀝𑀸𑀦𑀺 𑀲𑀓𑀫𑁆𑀫𑀼𑀦𑀸;

𑀲𑀼𑀔𑀦𑁆𑀢𑀺 𑀫𑀭𑀡𑁂 𑀓𑀸𑀮𑁂, 𑀦𑀼𑀫𑁄𑀤𑀦𑁆𑀢𑀸 𑀓𑀢𑀸𑀦𑀺𑀘.

𑀲𑀸𑀢-𑀤𑀸𑀢𑀸𑀦𑀺 ¶ 𑀧𑀼𑀜𑁆𑀜𑀸𑀦𑀺, 𑀏𑀯𑀁 𑀫𑀳𑀩𑁆𑀪𑀬𑁂 𑀅𑀧𑀺;

𑀲𑀼𑀕𑀢𑀺𑀁 𑀮𑀳𑀼𑀦𑁂𑀢𑀸𑀦𑀺, 𑀓𑀸𑀢𑀩𑁆𑀩𑀸𑀦𑀺 𑀧𑀼𑀭𑁂𑀢𑀭𑀁.

𑀤𑁂𑀯𑀤𑀽𑀢𑁂 ¶ 𑀧𑀓𑀸𑀲𑁂𑀢𑁆𑀯𑀸, 𑀬𑀫𑀧𑀼𑀝𑁆𑀞𑁄 𑀲𑀬𑀁𑀓𑀢𑀁;

𑀧𑀼𑀜𑁆𑀜𑀁 𑀲𑀭𑀢𑀺 𑀘𑁂 𑀲𑀢𑁆𑀢𑁄, 𑀢𑀤𑁂𑀯 𑀲𑀼𑀕𑀢𑀺𑀁 𑀯𑀚𑁂.

𑀧𑀸𑀧 ¶ 𑀓𑀟𑁆𑀠𑀫𑁆𑀧𑀺 𑀦𑀺𑀭𑀬𑁂, 𑀫𑀦𑀁 𑀤𑀼𑀓𑁆𑀔𑀕𑀢𑀁 𑀧𑀚𑀁;

𑀤𑀼𑀓𑁆𑀔𑀸 𑀫𑁄𑀘𑁂𑀢𑀺 𑀬𑀁𑀧𑀼𑀜𑁆𑀜𑀁, 𑀲𑀤𑀸 𑀓𑀸𑀢𑀩𑁆𑀩𑀫𑁂𑀯 𑀢𑀁.

𑀧𑀳𑀸𑀬𑀓𑀁𑀯 𑀧𑀼𑀜𑁆𑀜𑀜𑁆𑀳𑀺, 𑀧𑀳𑀸𑀢𑀩𑁆𑀩𑀁𑀯 𑀧𑀸𑀧𑀓𑀁;

𑀢𑀁 𑀧𑀤𑀻𑀧𑀦𑁆𑀥𑀓𑀸𑀭𑀁𑀯, 𑀤𑁆𑀯𑀬𑀁 𑀑𑀢𑁆𑀯𑀸 𑀔𑀼𑀓𑀁 𑀯𑀺𑀬.

𑀜𑀸𑀢𑀺𑀲𑀗𑁆𑀖𑀸 ¶ 𑀯𑀺𑀬𑁄𑀚𑁂𑀦𑁆𑀢𑀸, 𑀫𑀭𑀡𑀦𑁆𑀢 𑀪𑀼𑀲𑀸𑀢𑀼𑀭𑀸;

𑀲𑀩𑁆𑀩𑀁 𑀧𑀳𑀸𑀬 𑀕𑀦𑁆𑀢𑀸𑀭𑁄, 𑀪𑀬𑀸𑀦𑀓𑀸𑀦𑀺 𑀧𑀸𑀧𑀺𑀦𑁄.

𑀧𑀲𑁆𑀲𑀦𑁆𑀢𑀸 𑀤𑀼𑀦𑁆𑀦𑀺𑀫𑀺𑀢𑁆𑀢𑀸𑀦𑀺, 𑀧𑀸𑀓𑀝𑀸𑀦𑀺 𑀲𑀓𑀫𑁆𑀫𑀼𑀦𑀸;

𑀫𑀭𑀡𑁂 𑀅𑀢𑀺𑀤𑀼𑀓𑁆𑀔𑀦𑁆𑀢𑀺, 𑀦𑀼𑀢𑀸𑀧𑁂𑀦𑁆𑀢𑀸 𑀓𑀢𑀸𑀦𑀺𑀘.

𑀧𑀝𑀺𑀧𑀻𑀴𑀸𑀦𑀺 ¶ 𑀧𑀸𑀧𑀸𑀦𑀺, 𑀏𑀯𑀁 𑀫𑀳𑀩𑁆𑀪𑀬𑁂 𑀲𑀢𑀺;

𑀤𑀼𑀕𑁆𑀕𑀢𑀺𑀁 𑀮𑀳𑀼𑀦𑁂𑀢𑀸𑀦𑀺, 𑀬𑀼𑀢𑁆𑀢𑁄𑀯 𑀧𑀭𑀺𑀯𑀚𑁆𑀚𑀺𑀢𑀼𑀁.

𑀤𑁂𑀯𑀤𑀽𑀢𑁂 ¶ 𑀧𑀓𑀸𑀲𑁂𑀢𑁆𑀯𑀸, 𑀬𑀫𑀭𑀸𑀚𑁂𑀦 𑀧𑀼𑀘𑁆𑀙𑀺𑀢𑁄;

𑀧𑀫𑀸𑀤𑀲𑁆𑀲𑀦𑁆𑀢𑀺 𑀘𑀺𑀓𑁆𑀔𑀦𑁆𑀢𑁄, 𑀫𑀳𑀕𑁆𑀕𑀺𑀫𑁆𑀳𑀺 𑀢𑀼𑀭𑀁 𑀧𑀢𑀺.

𑀧𑀼𑀜𑁆𑀜𑀁 𑀅𑀓𑀭𑀺𑀯𑀸 𑀫𑀸𑀯𑀸, 𑀬𑀫𑀭𑀸𑀚𑀺𑀦𑁆𑀤 𑀧𑀼𑀘𑁆𑀙𑀺𑀢𑁄;

𑀧𑀫𑀸𑀤𑀲𑁆𑀲𑀦𑁆𑀢𑀺 𑀘𑀺𑀓𑁆𑀔𑀦𑁆𑀢𑁄, 𑀫𑀳𑀸𑀤𑀼𑀓𑁆𑀔𑀁 𑀢𑀼𑀭𑀁 𑀕𑀫𑀺.

𑀧𑀸𑀧𑀁 ¶ 𑀅𑀓𑀭𑀺𑀯𑀸 𑀫𑀸𑀯𑀸, 𑀧𑀼𑀘𑁆𑀙𑀺𑀢𑁄 𑀬𑀫𑀲𑀸𑀫𑀺𑀦𑀸;

𑀧𑀫𑀸𑀤𑀲𑁆𑀲𑀦𑁆𑀢𑀺 𑀘𑀺𑀓𑁆𑀔𑀦𑁆𑀢𑁄, 𑀢𑀢𑁆𑀢𑀁 𑀕𑀼𑀴𑀁 𑀢𑀼𑀭𑀁 𑀕𑀺𑀮𑀺.

𑀚𑀸𑀢𑀫𑀢𑁆𑀢𑀸 𑀢𑀺𑀚𑀺𑀡𑁆𑀡𑀸𑀘, 𑀆𑀢𑀼𑀭𑀸𑀘 𑀫𑀢𑀸 𑀯𑀼𑀥𑀸;

𑀤𑁂𑀯𑀤𑀽𑀢𑁂 𑀇𑀫𑁂 𑀧𑀜𑁆𑀘, 𑀤𑀺𑀲𑁆𑀯𑀸 𑀲𑀁𑀯𑀺𑀕𑁆𑀕𑀢𑀁 𑀯𑀚𑁂.

𑀘𑁄𑀤𑀺𑀢𑀸 ¶ 𑀤𑁂𑀯𑀤𑀽𑀢𑁂𑀳𑀺, 𑀬𑁂 𑀧𑀫𑀚𑁆𑀚𑀦𑁆𑀢𑀺 𑀫𑀸𑀦𑀯𑀸;

𑀢𑁂 𑀤𑀻𑀖𑀭𑀢𑁆𑀢𑀁 𑀲𑁄𑀘𑀦𑁆𑀢𑀺, 𑀳𑀺𑀦 𑀓𑀸𑀬𑀽 𑀧𑀕𑀸𑀦𑀭𑀸.

𑀥𑀼𑀭𑀤𑁆𑀯𑀬 ¶ 𑀫𑀦𑀸𑀭𑀩𑁆𑀪, 𑀕𑀺𑀳𑀺𑀓𑀫𑁆𑀫𑀸𑀤𑀺𑀓𑁂 𑀭𑀢𑁄;

𑀓𑀣𑀁 𑀕𑀺𑀚𑁆𑀛𑀓𑀽𑀝𑀁 𑀲𑁂𑀲𑀁, 𑀧𑁂𑀢𑀸𑀯𑀸𑀲𑀁 𑀅𑀢𑀺𑀲𑁆𑀲𑀢𑀺.

𑀫𑁄𑀘𑀦𑀢𑁆𑀣𑀸𑀬 ¶ 𑀧𑀩𑁆𑀩𑀚𑁆𑀚, 𑀲𑀁𑀓𑀺𑀮𑀺𑀝𑁆𑀞𑀸 𑀧𑀫𑀸𑀤𑀺𑀦𑁄;

𑀲𑀼𑀕𑀢𑁆𑀬𑀸𑀧𑀺𑀘 𑀢𑁂 𑀪𑀝𑁆𑀞𑀸, 𑀅𑀢𑀺𑀤𑀽𑀭𑀸𑀯 𑀫𑀼𑀢𑁆𑀢𑀺𑀢𑁄.

𑀲𑀻𑀤𑀦𑁆𑀢𑁂𑀯 ¶ 𑀚𑀮𑁂 𑀔𑀺𑀢𑁆𑀢𑀸, 𑀲𑀺𑀮𑀸 𑀫𑀳𑀸𑀯 𑀔𑀼𑀤𑁆𑀤𑀓𑀸;

𑀧𑀢𑀦𑁆𑀢𑀺 𑀔𑀼𑀤𑁆𑀤𑀓𑁂𑀦𑀸𑀧𑀺, 𑀅𑀧𑀸𑀬𑀁 𑀧𑀸𑀧 𑀓𑀫𑁆𑀫𑀼𑀦𑀸.

𑀧𑀢𑀦𑁆𑀢𑀸 𑀔𑀼𑀤𑁆𑀤𑀓𑁂𑀦𑁂𑀯, 𑀩𑀳𑀽𑀳𑀺 𑀧𑀼𑀦 𑀧𑀻𑀴𑀺𑀢𑀸;

𑀫𑁄𑀓𑁆𑀔𑁄𑀓𑀸𑀲𑀁 𑀦𑀯𑀺𑀦𑁆𑀤𑀦𑁆𑀢𑀺, 𑀧𑀸𑀧𑀁 𑀔𑀼𑀤𑁆𑀤𑀫𑁆𑀧𑀺 𑀦𑀸𑀘𑀭𑁂.

𑀚𑁂𑀕𑀼𑀘𑁆𑀙𑀺𑀢𑁆𑀣𑀽𑀤𑀭𑀸𑀕𑀫𑁆𑀫 ¶ , 𑀧𑀼𑀦𑀸𑀧𑀺 𑀢𑀢𑁆𑀣 𑀦𑀺𑀘𑁆𑀘𑀕𑀽;

𑀤𑀼𑀓𑁆𑀔𑀸𑀢𑀺 𑀤𑀼𑀓𑁆𑀔 𑀲𑀁𑀓𑀺𑀡𑁆𑀡𑁄, 𑀳𑀝𑁆𑀞𑀼𑀁 𑀢𑀼𑀝𑁆𑀞𑀼𑀁 𑀦𑀲𑀓𑁆𑀓𑀼𑀡𑁂.

𑀅𑀢𑀺𑀩𑁆𑀬𑀸𑀧𑀺𑀕𑀼𑀡𑁄 ¶ 𑀧𑀼𑀜𑁆𑀜𑁄,

𑀫𑀘𑁆𑀘𑀼𑀤𑀼𑀓𑁆𑀔𑀁 𑀔𑀡𑀁𑀬𑁂𑀯, 𑀅𑀢𑀺𑀤𑀼𑀓𑁆𑀔𑀁 𑀢𑀤𑀼𑀢𑁆𑀢𑀭𑀺;

𑀫𑀸𑀢𑀼𑀕𑀸𑀫𑀼𑀤𑀭𑁂 𑀲𑀦𑁆𑀥𑀺, 𑀧𑀢𑀺𑀝𑁆𑀞𑀸𑀦𑀁 𑀪𑀬𑀸𑀦𑀓𑀁.

𑀫𑀘𑁆𑀘𑀼𑀤𑀼𑀓𑁆𑀔𑀁 ¶ 𑀔𑀡𑀁𑀬𑁂𑀯, 𑀅𑀢𑀺𑀤𑀼𑀓𑁆𑀔𑀁 𑀘𑀺𑀭𑀢𑁆𑀢𑀦𑀁;

𑀆𑀫 𑀧𑀓𑁆𑀓𑀦𑁆𑀢𑀭𑁂 𑀲𑀦𑁆𑀥𑀺, 𑀧𑀢𑀺𑀝𑁆𑀞𑀸𑀦𑀁 𑀪𑀬𑀸𑀦𑀓𑀁.

𑀤𑀼𑀕𑁆𑀕𑀢𑁆𑀬𑀁𑀞𑀸𑀢𑀼 𑀢𑀁𑀤𑀼𑀓𑁆𑀔𑀁, 𑀲𑀼𑀡 𑀉𑀘𑁆𑀘𑀓𑀼𑀮𑁂𑀅𑀧𑀺;

𑀓𑀼𑀘𑁆𑀙𑀺𑀬𑀁 𑀅𑀢𑀺𑀲𑀫𑁆𑀩𑀸𑀥𑁂, 𑀚𑀮𑀸𑀩𑀼𑀫𑁆𑀳𑀺 𑀚𑀺𑀕𑀼𑀘𑁆𑀙𑀺𑀢𑁂.

𑀫𑀺𑀴𑁆𑀳 𑀲𑁂𑀫𑁆𑀳𑀸𑀤𑀺 𑀲𑀁𑀓𑀺𑀡𑁆𑀡𑁂, 𑀅𑀢𑀺 𑀤𑀼𑀕𑁆𑀕𑀦𑁆𑀥 𑀯𑀸𑀲𑀺𑀢𑁂;

𑀕𑀽𑀣𑀓𑀽𑀧𑁂 𑀓𑀺𑀫𑀻𑀯𑀺𑀬, 𑀢𑀫𑁂𑀚𑀸 𑀫𑀽𑀮𑀓𑀫𑁆𑀫𑀢𑁄.

𑀧𑀭𑀫𑀸𑀡𑀼𑀓𑀸𑀬𑁄 𑀞𑀸𑀢𑀺, 𑀤𑀼𑀓𑁆𑀔𑀻 𑀦𑁂𑀭𑀬𑀺𑀓𑁄 𑀯𑀺𑀬;

𑀥𑀼𑀯𑀸𑀢𑀼𑀭𑁄 𑀲𑀼𑀔𑀸𑀫𑀺𑀲𑁆𑀲𑁄, 𑀆𑀫 𑀧𑀓𑁆𑀓𑀸𑀲𑀬𑀦𑁆𑀢𑀭𑁂;

𑀯𑁂𑀤𑀦𑀝𑁆𑀝𑁄𑀯 𑀲𑀁𑀯𑀟𑁆𑀠𑁄, 𑀅𑀘𑀺𑀢𑁆𑀢𑁄𑀯𑀺𑀬 𑀦𑀺𑀘𑁆𑀘𑀮𑁄;

𑀤𑀲𑀫𑀸𑀲𑀦𑁆𑀢𑀭𑁂 𑀓𑀘𑁆𑀘𑁂, 𑀩𑀳𑀽 𑀫𑀭𑀦𑁆𑀢𑀺 𑀧𑀸𑀡𑀺𑀦𑁄.

𑀏𑀯𑀁 ¶ 𑀫𑀘𑁆𑀘𑀼𑀜𑁆𑀘 𑀲𑀦𑁆𑀥𑀺𑀜𑁆𑀘, 𑀯𑀺𑀚𑀸𑀬𑀦𑀜𑁆𑀘 𑀪𑁂𑀭𑀯𑀁;

𑀧𑀲𑁆𑀲𑀁 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀲𑀦𑁆𑀢𑁄, 𑀯𑀺𑀭𑀚𑁆𑀚𑁂𑀬𑁆𑀬 𑀪𑀯𑀦𑁆𑀤𑀼𑀓𑁂.

𑀏𑀯𑀁 𑀫𑀘𑁆𑀘𑀼𑀜𑁆𑀘 𑀲𑀦𑁆𑀤𑀺𑀜𑁆𑀘, 𑀅𑀦𑀼𑀲𑁆𑀲𑀭 𑀫𑀪𑀺𑀡𑁆𑀳𑀲𑁄;

𑀭𑀸𑀚𑀲𑁂𑀝𑁆𑀞𑀺 𑀪𑀯𑀸𑀤𑀺𑀫𑁆𑀧𑀺, 𑀦𑀇𑀘𑁆𑀙𑁂𑀬𑁆𑀬 𑀢𑀤𑀦𑁆𑀯𑀺𑀢𑀁.

𑀪𑀯𑁂 ¶ 𑀤𑀼𑀓𑁆𑀔 𑀫𑀘𑀺𑀦𑁆𑀢𑁂𑀢𑁆𑀯𑀸, 𑀪𑀯𑀸𑀲𑀸𑀬 𑀧𑀯𑀢𑁆𑀢𑀺𑀢𑀁;

𑀧𑀼𑀜𑁆𑀜𑀁 𑀧𑀼𑀦𑀧𑁆𑀧𑀼𑀦𑀁 𑀤𑁂𑀢𑀺, 𑀲𑀦𑁆𑀥𑀺𑀁 𑀦 𑀦𑀺𑀩𑁆𑀩𑀼𑀢𑀺𑀁 𑀯𑀭𑀁.

𑀪𑀯𑁂 𑀤𑀼𑀓𑁆𑀔𑀁 𑀯𑀺𑀪𑀸𑀬𑀺𑀢𑁆𑀯𑀸, 𑀦𑀺𑀩𑁆𑀩𑀺𑀦𑁆𑀤𑁂𑀦 𑀧𑀯𑀢𑁆𑀢𑀺𑀢𑀁;

𑀧𑀼𑀜𑁆𑀜𑀁 𑀪𑀯 𑀫𑀢𑀺𑀓𑁆𑀓𑀫𑁆𑀫, 𑀦𑀺𑀩𑁆𑀩𑀸𑀦𑀁 𑀤𑁂𑀢𑀺 𑀦𑀺𑀩𑁆𑀩𑀼𑀢𑀺𑀁.

𑀪𑀯𑁂 ¶ 𑀤𑀼𑀓𑁆𑀔𑀁 𑀲𑀭𑀺𑀢𑁆𑀯𑀸𑀦, 𑀫𑀘𑁆𑀘𑀼𑀲𑀦𑁆𑀥𑀺 𑀲𑀬𑀸𑀤𑀺𑀓𑀁;

𑀢𑀺𑀪𑀯𑁂𑀲𑀼 𑀯𑀺𑀭𑀚𑁆𑀚𑁂𑀬𑁆𑀬𑀸, 𑀤𑀺𑀢𑁆𑀢 𑀕𑁂𑀳𑁂𑀯 𑀲𑀸𑀫𑀺𑀓𑁄.

𑀲𑀦𑁆𑀢𑁄 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄, 𑀲𑀦𑁆𑀥𑀺𑀤𑀼𑀓𑁆𑀔 𑀫𑀦𑀼𑀲𑁆𑀲𑀭𑀁;

𑀦𑀺𑀩𑁆𑀩𑀺𑀦𑁆𑀤 𑀬𑀼𑀢𑁆𑀢 𑀘𑀺𑀢𑁆𑀢𑁂𑀦, 𑀯𑀚𑁆𑀚𑁂𑀬𑁆𑀬 𑀪𑀯𑀲𑀸𑀢 𑀢𑁄.

𑀧𑀼𑀜𑁆𑀜 ¶ 𑀦𑀺𑀩𑁆𑀩𑀢𑁆𑀢 𑀞𑀸𑀦𑁂𑀧𑀺, 𑀚𑁂𑀕𑀼𑀘𑁆𑀙𑁂 𑀲𑀦𑁆𑀥𑀺𑀲𑀫𑁆𑀪𑀯𑁄;

𑀪𑀯 𑀲𑀸𑀢 𑀯𑀲𑀸 𑀢𑀲𑁆𑀫𑀸, 𑀥𑀻𑀭𑁄 𑀢𑀁 𑀮𑀕𑁆𑀕𑀦𑀁 𑀘𑀚𑁂.

𑀲𑀺𑀭𑀺𑀫𑀁 ¶ 𑀕𑀡𑀺𑀓𑀁 𑀤𑀺𑀲𑁆𑀯𑀸, 𑀤𑀫𑁂𑀢𑀼𑀁 𑀭𑀢𑁆𑀢𑀘𑁂𑀢𑀲𑀁;

𑀤𑀲𑁆𑀲𑁂𑀢𑁆𑀯𑀸 𑀫𑀢𑀲𑀸𑀭𑀻𑀭𑀁, 𑀢𑀲𑁆𑀲𑀸 𑀚𑀺𑀦𑁄 𑀇𑀤𑀁 𑀩𑁆𑀭𑀯𑀺.

𑀘𑀭𑀁𑀯𑀸 ¶ 𑀬𑀤𑀺𑀯𑀸 𑀢𑀺𑀝𑁆𑀞𑀁, 𑀦𑀺𑀲𑀺𑀦𑁆𑀦𑁄 𑀉𑀤𑀯𑀸 𑀲𑀬𑀁;

𑀲𑀫𑀜𑁆𑀙𑁂𑀢𑀺 𑀧𑀲𑀸𑀭𑁂𑀢𑀺, 𑀏𑀲𑀸 𑀓𑀸𑀬𑀲𑁆𑀲 𑀇𑀜𑁆𑀚𑀦𑀸.

𑀅𑀝𑁆𑀞𑀺 𑀦𑁆𑀳𑀸𑀭𑀽𑀳𑀺 𑀲𑀁𑀬𑀼𑀢𑁆𑀢𑁄, 𑀢𑀘 𑀫𑀁𑀲𑀸𑀯 𑀮𑁂𑀧𑀦𑁄;

𑀙𑀯𑀺𑀬𑀸 𑀓𑀸𑀬𑁄 𑀧𑀝𑀺𑀘𑁆𑀙𑀦𑁆𑀦𑁄, 𑀬𑀣𑀸𑀪𑀽𑀢𑀁 𑀦𑀤𑀺𑀲𑁆𑀲𑀢𑀺.

𑀅𑀦𑁆𑀢𑀧𑀽𑀭𑁄 ¶ 𑀤𑀭𑀧𑀽𑀭𑁄, 𑀬𑀓𑀦 𑀧𑁂𑀴𑀲𑁆𑀲 𑀯𑀢𑁆𑀣𑀺𑀦𑁄;

𑀳𑀤𑀬𑀲𑁆𑀲 𑀧𑀧𑁆𑀨𑀸𑀲𑀲𑁆𑀲, 𑀯𑀓𑁆𑀓𑀲𑁆𑀲 𑀧𑀺𑀳𑀓𑀲𑁆𑀲𑀘.

𑀲𑀺𑀗𑁆𑀖𑀸𑀦𑀺𑀓𑀸𑀬 𑀔𑁂𑀴𑀲𑁆𑀲, 𑀲𑁂𑀤𑀲𑁆𑀲𑀘 𑀫𑁂𑀤𑀲𑁆𑀲𑀘;

𑀮𑁄𑀳𑀺𑀢𑀲𑁆𑀲 𑀮𑀲𑀺𑀓𑀸𑀬, 𑀧𑀺𑀢𑁆𑀢𑀲𑁆𑀲𑀘 𑀯𑀲𑀸𑀬𑀘.

𑀅𑀣𑀲𑁆𑀲 ¶ 𑀦𑀯𑀳𑀺 𑀲𑁄𑀢𑁂𑀳𑀺, 𑀅𑀲𑀼𑀘𑀺 𑀲𑀯𑀢𑀺 𑀲𑀩𑁆𑀩𑀤𑀸;

𑀅𑀓𑁆𑀔𑀺𑀫𑁆𑀳𑀸 𑀅𑀓𑁆𑀔𑀺𑀕𑀽𑀣𑀓𑁄, 𑀓𑀡𑁆𑀡𑀫𑁆𑀳𑀸 𑀓𑀡𑁆𑀡𑀕𑀽𑀣𑀓𑁄.

𑀲𑀺𑀗𑁆𑀖𑀸𑀦𑀺𑀓𑀸𑀘 𑀦𑀸𑀲𑀢𑁄, 𑀫𑀼𑀔𑀢𑁄 𑀯𑀫𑀢𑀺 𑀏𑀓𑀤𑀸;

𑀧𑀺𑀢𑁆𑀢𑀁 𑀲𑁂𑀫𑁆𑀳𑀜𑁆𑀘 𑀯𑀫𑀢𑀺, 𑀓𑀸𑀬𑀫𑁆𑀳𑀸 𑀲𑁂𑀤𑀚𑀮𑁆𑀮𑀺𑀓𑀸.

𑀔𑀸𑀤𑀦𑁆𑀢𑀺 ¶ 𑀦𑀁 𑀲𑀼𑀯𑀸𑀦𑀸𑀘, 𑀲𑀺𑀗𑁆𑀕𑀸𑀮𑀓𑀸𑀘 𑀓𑀺𑀫𑀺𑀬𑁄;

𑀓𑀸𑀓𑀸 𑀕𑀺𑀚𑁆𑀛𑀸𑀘 𑀔𑀸𑀤𑀦𑁆𑀢𑀺, 𑀬𑁂𑀘𑀜𑁆𑀜𑁂 𑀲𑀦𑁆𑀢𑀺 𑀧𑀸𑀡𑀓𑀸.

𑀲𑀼𑀢𑁆𑀯𑀸𑀦 ¶ 𑀩𑀼𑀤𑁆𑀥𑀯𑀘𑀦𑀁, 𑀪𑀺𑀓𑁆𑀔𑀼 𑀧𑀜𑁆𑀜𑀸𑀡𑀯𑀸 𑀇𑀥;

𑀲𑁄𑀔𑁄 𑀦𑀁 𑀧𑀭𑀺𑀚𑀸𑀦𑀸𑀢𑀺, 𑀬𑀣𑀸𑀪𑀽𑀢𑀜𑁆𑀳𑀺 𑀧𑀲𑁆𑀲𑀢𑀺.

𑀬𑀣𑀸𑀇𑀤𑀁 𑀢𑀣𑀸𑀏𑀢𑀁, 𑀬𑀣𑀸𑀏𑀢𑀁 𑀢𑀣𑀸𑀇𑀤𑀁;

𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸𑀘, 𑀓𑀸𑀬𑁂 𑀙𑀦𑁆𑀤𑀁 𑀯𑀺𑀭𑀸𑀚𑀬𑁂.

𑀙𑀦𑁆𑀤 ¶ 𑀭𑀸𑀕 𑀯𑀺𑀭𑀢𑁆𑀢𑁄 𑀲𑁄, 𑀪𑀺𑀓𑁆𑀔𑀼 𑀧𑀜𑁆𑀜𑀸𑀡𑀯𑀸 𑀇𑀥;

𑀅𑀚𑁆𑀛𑀕𑀸 𑀅𑀫𑀢𑀁 𑀲𑀦𑁆𑀢𑀺𑀁, 𑀦𑀺𑀩𑁆𑀩𑀸𑀦𑀁 𑀧𑀤 𑀫𑀘𑁆𑀘𑀼𑀢𑀁.

𑀤𑁆𑀯𑀺𑀧𑀸𑀤𑀓𑁄 𑀬𑀁 𑀅𑀲𑀼𑀘𑀺, 𑀤𑀼𑀕𑁆𑀕𑀦𑁆𑀥𑁄 𑀧𑀭𑀺𑀳𑀸𑀭𑀢𑀺;

𑀦𑀸𑀦𑀸𑀓𑀼𑀡𑀧 𑀧𑀭𑀺𑀧𑀽𑀭𑁄, 𑀯𑀺𑀲𑁆𑀲𑀯𑀦𑁆𑀢𑁄 𑀢𑀢𑁄𑀢𑀢𑁄.

𑀏𑀢𑀸𑀤𑀺𑀲𑁂𑀦 ¶ 𑀓𑀸𑀬𑁂𑀦, 𑀬𑁄 𑀫𑀜𑁆𑀜𑁂 𑀉𑀦𑁆𑀦𑀫𑁂𑀢𑀯𑁂;

𑀧𑀭𑀁𑀯𑀸 𑀅𑀯𑀚𑀸𑀦𑁂𑀬𑁆𑀬, 𑀓𑀺𑀫𑀜𑁆𑀜𑀢𑁆𑀭 𑀅𑀤𑀲𑁆𑀲𑀦𑀸𑀢𑀺;

𑀓𑀸𑀬 𑀯𑀺𑀘𑁆𑀙𑀦𑁆𑀤𑀦𑀻𑀬𑀲𑀼𑀢𑁆𑀢𑀁, 𑀯𑀺𑀚𑀬𑀲𑀼𑀢𑁆𑀢𑀦𑁆𑀢𑀺𑀧𑀺 𑀯𑀢𑁆𑀢𑀩𑁆𑀩𑀁.

𑀭-𑀅𑀓𑁆𑀔𑀭𑁄 ¶ 𑀲𑀺𑀬𑀸𑀕𑁆𑀕𑀺𑀫𑁆𑀳𑀺, 𑀭𑁄𑀯 𑀅𑀕𑁆𑀕𑀺𑀯 𑀆𑀕𑀢𑁄;

𑀢𑀲𑁆𑀫𑀸 𑀭𑀸𑀕𑁄𑀢𑀺 𑀯𑀢𑁆𑀢𑀩𑁆𑀩𑁄, 𑀢𑀡𑁆𑀳𑀸𑀯 𑀦𑀺𑀘𑁆𑀘𑀢𑀸𑀧𑀺𑀓𑀸.

𑀅𑀪𑀺𑀡𑁆𑀳𑀫𑁂𑀯 𑀭𑀸𑀕𑀕𑁆𑀕𑀺, 𑀤𑀬𑁆𑀳𑀢𑁂 𑀲𑀼𑀪𑀲𑀜𑁆𑀜𑀺𑀦𑀁;

𑀓𑀺𑀫𑀺𑀔𑀚𑁆𑀚𑀯𑀡𑁄 𑀲𑀸𑀯, 𑀤𑀼𑀓𑁆𑀔𑀻 𑀭𑀸𑀕𑀻 𑀲 𑀲𑀩𑁆𑀩𑀤𑀸.

𑀤𑀼𑀓𑁆𑀔𑀻 ¶ 𑀧𑀺𑀬 𑀫𑀮𑀤𑁆𑀥𑀸𑀦, 𑀮𑀤𑁆𑀥𑀸𑀧𑁆𑀬 𑀧𑀭𑀺𑀧𑀼𑀡𑁆𑀡𑀢𑁄;

𑀦𑀢𑁆𑀣𑀺 𑀭𑀸𑀕𑀕𑁆𑀕𑀺𑀔𑀦𑁆𑀥𑀲𑁆𑀲, 𑀧𑀺𑀬𑀺𑀦𑁆𑀥𑁂𑀦 𑀳𑀺 𑀧𑀼𑀡𑁆𑀡𑀢𑀸.

𑀏𑀓𑀲𑁆𑀲 𑀧𑀺𑀯𑀺𑀢𑀁 𑀔𑀻𑀭𑀁, 𑀘𑀢𑀽 𑀤𑀥𑀺 𑀚𑀮𑀸 𑀩𑀳𑀼;

𑀭𑀸𑀕𑀳𑁂𑀢𑀼 𑀪𑀯𑁂 𑀲𑀦𑁆𑀥𑀺, 𑀝𑁆𑀞𑀸𑀦𑀁 𑀅𑀦𑀫𑀢𑀕𑁆𑀕𑀺𑀓𑀁.

𑀘𑀢𑀽𑀤𑀫𑀺 ¶ 𑀚𑀮𑀸 𑀪𑀺𑀬𑁆𑀬𑁄, 𑀲𑀻𑀲𑀘𑁆𑀙𑁂𑀤𑀦 𑀮𑁄𑀳𑀺𑀢𑀁;

𑀭𑀸𑀕𑀳𑁂𑀢𑀼 𑀪𑀯𑁂 𑀫𑀘𑁆𑀘, 𑀪𑀬𑀁 𑀅𑀦𑀫𑀢𑀕𑁆𑀕𑀺𑀓𑀁.

𑀏𑀓𑀲𑁆𑀲 𑀭𑀼𑀤𑀢𑁄 𑀅𑀲𑁆𑀲𑀼, 𑀘𑀢𑀽 𑀤𑀥𑀺 𑀚𑀮𑀸 𑀩𑀳𑀼;

𑀤𑀼𑀓𑁆𑀔𑀁 𑀅𑀦𑀫𑀢𑀕𑁆𑀕𑀁𑀯, 𑀢𑀁𑀳𑁂𑀢𑀼 𑀧𑀭𑀺𑀤𑁂𑀯𑀦𑀁.

𑀢𑀢𑁆𑀢𑀸𑀬𑁄 ¶ 𑀕𑀼𑀴 𑀕𑀺𑀮𑀺𑀢, 𑀯𑀥𑀕𑁆𑀕𑀺 𑀤𑀬𑁆𑀳𑀦𑀸 𑀤𑀺𑀓𑀁;

𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀫𑀳𑀸𑀤𑀼𑀓𑁆𑀔𑀁, 𑀢𑀁𑀳𑁂𑀢𑀼 𑀦𑀺𑀭𑀬𑁂 𑀮𑀪𑀺.

𑀏𑀓 𑀤𑁆𑀯𑀺𑀢𑁆𑀢𑀺 𑀘𑀢𑀼 𑀧𑀜𑁆𑀘, 𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀧𑁆𑀬 𑀫𑁄𑀘𑀺𑀢𑀁;

𑀔𑀼𑀧𑁆𑀧𑀺𑀧𑀸𑀲𑀺𑀢 𑀦𑀺𑀚𑁆𑀛𑀸𑀫𑀁, 𑀮𑀪𑀺 𑀢𑀁𑀳𑁂𑀢𑀼 𑀧𑁂𑀢𑁆𑀢𑀺𑀓𑀁.

𑀢𑀺𑀭𑀘𑁆𑀙𑀸𑀦𑁂 ¶ 𑀅𑀲𑀽𑀭𑁂𑀘, 𑀤𑀼𑀓𑁆𑀔𑀁 𑀦𑀸𑀦𑀸𑀯𑀺𑀥𑀁 𑀮𑀪𑀺;

𑀦𑀫𑀢𑀕𑁆𑀕𑀺𑀓 𑀲𑀁𑀲𑀸𑀭𑁂, 𑀲𑀩𑁆𑀩𑀦𑁆𑀢𑀁 𑀭𑀸𑀕𑀳𑁂𑀢𑀼𑀓𑀁.

𑀏𑀓𑀲𑁆𑀲𑁂𑀓𑁂𑀦 𑀓𑀧𑁆𑀧𑁂𑀦, 𑀧𑀼𑀕𑁆𑀕𑀮𑀲𑁆𑀲𑀝𑁆𑀞𑀺 𑀲𑀜𑁆𑀘𑀬𑁄;

𑀲𑀘𑁂 𑀲𑀁𑀳𑀸𑀭𑀺𑀢𑁄 𑀅𑀲𑁆𑀲, 𑀯𑁂𑀧𑀼𑀮𑁆𑀮 𑀧𑀩𑁆𑀩𑀢𑀸𑀥𑀺𑀓𑁄.

𑀏𑀓 𑀓𑀧𑁆𑀧𑁂 𑀇𑀤𑀁 𑀤𑀼𑀓𑁆𑀔𑀁, 𑀦𑀸𑀤𑀺𑀓𑀧𑁆𑀧𑁂𑀲𑀼 𑀓𑀸𑀓𑀣𑀸;

𑀭𑀸𑀕𑁄 𑀦𑀦𑀼 𑀫𑀳𑀸𑀯𑁂𑀭𑀻, 𑀩𑀸𑀮𑁄 𑀚𑀦𑁄 𑀢 𑀫𑀺𑀘𑁆𑀙𑀢𑀺.

𑀭𑀸𑀕𑀲𑀼𑀤𑁆𑀥𑀺 ¶ 𑀅𑀲𑁄𑀓𑁄𑀘, 𑀦𑀺𑀤𑁆𑀤𑀼𑀓𑁆𑀔𑁄 𑀜𑀸𑀬𑀧𑀢𑁆𑀢𑀺𑀘;

𑀦𑀺𑀩𑁆𑀩𑀸𑀦𑀁 𑀧𑀜𑁆𑀘 𑀧𑀘𑁆𑀘𑀓𑁆𑀔𑀸, 𑀅𑀲𑀼𑀪𑀸𑀬 𑀨𑀮𑀸 𑀫𑀢𑀸.

𑀅𑀲𑀼𑀪𑀕𑁆𑀕𑀳𑀡𑀁 ¶ 𑀛𑀸𑀬𑀻, 𑀫𑀺𑀢𑀸 𑀲𑀺𑀦𑁆𑀤𑁆𑀭𑀺𑀬 𑀲𑀁𑀯𑀭𑁄;

𑀲𑁄𑀫𑀺𑀢𑁆𑀬 𑀫𑀼𑀓𑁆𑀓𑀝𑁆𑀞𑀸𑀯𑀸𑀘𑀸, 𑀙𑀴𑀺𑀫𑁂 𑀭𑀸𑀕 𑀲𑀼𑀤𑁆𑀥𑀺𑀬𑀸.

𑀦𑀺𑀘𑁆𑀘𑀼𑀕𑁆𑀕𑀭𑀸𑀕 𑀭𑁄𑀕𑀻𑀦𑀁, 𑀅𑀲𑀼𑀪𑀸 𑀯𑀸𑀢𑀼𑀮𑁄𑀲𑀥𑀸;

𑀭𑀸𑀕𑀬𑀓𑁆𑀔𑀸𑀪𑀺 𑀕𑀬𑁆𑀳𑀸𑀦𑀁, 𑀅𑀲𑀼𑀪𑀸 𑀫𑀦𑁆𑀢 𑀫𑀼𑀢𑁆𑀢𑀭𑀁.

𑀲𑀚𑀻𑀯𑀓𑀸𑀘 ¶ 𑀦𑀺𑀚𑁆𑀚𑀻𑀯𑀸, 𑀅𑀲𑀼𑀪𑀸 𑀤𑀼𑀯𑀺𑀥𑀸 𑀫𑀢𑀸;

𑀲𑀚𑀻𑀯𑀸 𑀓𑁂𑀲𑀮𑁄𑀫𑀸𑀤𑀺, 𑀤𑀲𑁂𑀯𑀺𑀫𑁂 𑀅𑀚𑀻𑀯𑀓𑀸.

𑀉𑀤𑁆𑀥𑀼𑀫𑀸𑀢𑀓 ¶ 𑀯𑀻𑀦𑀻𑀮𑀁, 𑀯𑀺𑀧𑀼𑀩𑁆𑀩𑀓𑀁 𑀯𑀺𑀙𑀺𑀤𑁆𑀤𑀓𑀁;

𑀯𑀺𑀓𑁆𑀔𑀸𑀬𑀺𑀢𑀓 𑀯𑀺𑀓𑁆𑀔𑀺𑀢𑁆𑀢𑀁, 𑀳𑀢𑀺𑀯𑀺𑀓𑁆𑀔𑀺𑀢𑁆𑀢 𑀮𑁄𑀳𑀺𑀢𑀁.

𑀧𑀼𑀴𑀼𑀯 𑀝𑁆𑀞𑀺𑀓 𑀫𑀺𑀘𑁆𑀘𑁂𑀲𑀼, 𑀮𑀤𑁆𑀥𑀸 𑀅𑀜𑁆𑀜𑀢𑀭𑀁 𑀲𑀢𑁄;

𑀭𑀢𑀦 𑀯𑀸𑀦𑀧𑀲𑁆𑀲𑁂𑀬𑁆𑀬, 𑀬𑀣𑀸 𑀘𑁂𑀢𑀲𑀺 𑀧𑀸𑀓𑀝𑀁.

𑀫𑀢𑀁 ¶ 𑀔𑀚𑁆𑀚𑀁 𑀲 𑀫𑀁𑀲𑀜𑁆𑀘, 𑀦𑀺𑀮𑁄𑀳𑀺𑀢𑀁 𑀦𑀺𑀫𑀁𑀲𑀓𑀁;

𑀯𑀺𑀓𑁆𑀔𑀺𑀢𑁆𑀢𑀁 𑀲𑁂𑀢 𑀧𑀼𑀜𑁆𑀚𑀝𑁆𑀞𑀺𑀁, 𑀦𑀯𑀥𑀸 𑀧𑀼𑀢𑀺𑀫𑀺𑀓𑁆𑀔𑀬𑁂.

𑀫𑀘𑁆𑀘𑀼𑀢𑁄 ¶ 𑀧𑀭𑀺𑀫𑀼𑀘𑁆𑀘𑀸𑀫𑀺, 𑀧𑀝𑀺𑀯𑀢𑁆𑀢𑀺 𑀬𑀺𑀫𑀸 𑀬𑀺𑀢𑀺;

𑀧𑀬𑁄𑀚𑀦 𑀲𑀫𑀸𑀯𑀚𑁆𑀚, 𑀫𑁄𑀤𑀺𑀢𑀩𑁆𑀩𑀁 𑀚𑀺𑀕𑀼𑀘𑁆𑀙𑀓𑁂.

𑀲𑀚𑀻𑀯𑀓𑁂 𑀚𑀺𑀕𑀼𑀘𑁆𑀙𑀢𑁆𑀣𑀁, 𑀦𑀺𑀚𑁆𑀚𑀻𑀯𑀸 𑀲𑀼𑀪 𑀫𑀻𑀭𑀺𑀢𑀁;

𑀢𑀣𑀽𑀧𑀫𑁄 𑀅𑀬𑀁𑀓𑀸𑀬𑁄, 𑀏𑀯𑀫𑁂𑀯 𑀪𑀯𑀺𑀲𑁆𑀲𑀢𑀺.

𑀏𑀯𑀁𑀥𑀫𑁆𑀫𑁄 ¶ 𑀅𑀬𑀁𑀓𑀸𑀬𑁄, 𑀏𑀯𑀁𑀪𑀸𑀯𑀻 𑀦𑀢𑀺𑀓𑁆𑀓𑀫𑁄;

𑀇𑀘𑁆𑀘𑀼𑀧 𑀲𑀁𑀳𑀭𑁂 𑀤𑀺𑀲𑁆𑀯𑀸, 𑀏𑀓𑀤𑁆𑀯𑀺𑀳 𑀫𑀢𑀸𑀤𑀺𑀓𑀁.

𑀬𑀣𑀸 ¶ 𑀇𑀤𑀁 𑀢𑀣𑀸𑀏𑀢𑀁, 𑀬𑀣𑀸𑀏𑀢𑀁 𑀢𑀣𑀸 𑀇𑀤𑀁;

𑀚𑁂𑀕𑀼𑀘𑁆𑀙𑀁 𑀧𑀝𑀺𑀓𑀽𑀮𑁆𑀬𑀜𑁆𑀘, 𑀓𑀸𑀬𑁂 𑀇𑀘𑁆𑀘𑀼𑀧 𑀲𑀁𑀳𑀭𑁂.

𑀉𑀤𑁆𑀥𑀼𑀫𑀸𑀢 ¶ 𑀯𑀺𑀦𑀻𑀮𑀸𑀤𑁄, 𑀲𑁄𑀪𑀡𑀁 𑀦𑀢𑁆𑀣𑀺 𑀓𑀺𑀜𑁆𑀘𑀺𑀧𑀺;

𑀇𑀫𑀲𑁆𑀫𑀺𑀁𑀧𑀺 𑀫𑁂 𑀓𑀸𑀬𑁂, 𑀕𑀯𑁂𑀲𑀦𑁆𑀢𑁄𑀧𑀺 𑀲𑀩𑁆𑀩𑀲𑁄.

𑀧𑀝𑀺𑀓𑀽𑀮𑀯𑀲𑀸 𑀥𑀸𑀢𑀼, 𑀯𑀲𑀸𑀘 𑀤𑁆𑀯𑀺𑀧𑁆𑀧𑀓𑀸𑀭𑀢𑁄;

𑀧𑀘𑁆𑀘𑀯𑁂𑀓𑁆𑀔𑁂𑀬𑁆𑀬𑀺𑀫𑀁 𑀓𑀸𑀬𑀁, 𑀇𑀘𑁆𑀙𑀁 𑀯𑀺𑀭𑀸𑀕 𑀫𑀢𑁆𑀢𑀦𑀺.

𑀯𑀡𑁆𑀡 ¶ 𑀲𑀡𑁆𑀞𑀸𑀦 𑀕𑀦𑁆𑀥𑁂𑀳𑀺, 𑀆𑀲𑀬𑁄 𑀓𑀸𑀲𑀢𑁄𑀧𑀺𑀘;

𑀚𑁂𑀕𑀼𑀘𑁆𑀙 𑀧𑀝𑀺𑀓𑀽𑀮𑁆𑀬𑀸𑀘, 𑀓𑁂𑀲𑀸 𑀦 𑀢𑀼𑀝𑁆𑀞𑀫𑀸𑀦𑀺𑀢𑀸.

𑀤𑁆𑀯𑀢𑁆𑀢𑀺𑀁𑀲𑁂𑀯𑀜𑁆𑀳𑀺 𑀓𑁄𑀝𑁆𑀞𑀸𑀲𑁂,

𑀧𑀘𑁆𑀘𑀯𑁂𑀓𑁆𑀔𑁂 𑀯𑀺𑀲𑀼𑀁𑀯𑀺𑀲𑀼𑀁.

𑀓𑀸𑀬𑀢𑁄 ¶ 𑀩𑀳𑀺𑀦𑀺𑀓𑁆𑀔𑀦𑁆𑀢𑀁, 𑀧𑀝𑀺𑀓𑀽𑀮𑁆𑀬𑀁 𑀚𑀺𑀕𑀼𑀘𑁆𑀙𑀺𑀢𑀁;

𑀅𑀦𑀺𑀓𑁆𑀔𑀦𑁆𑀢𑀫𑁆𑀧𑀺 𑀚𑁂𑀕𑀼𑀘𑁆𑀙𑀁, 𑀧𑀝𑀺𑀓𑀽𑀮𑁆𑀬𑀁𑀯 𑀢𑀲𑁆𑀲𑀫𑀁.

𑀲𑀗𑁆𑀔𑀢𑀫𑁆𑀧𑀺 𑀬𑀣𑀸 𑀯𑀘𑁆𑀘𑀁, 𑀫𑀦𑀼𑀜𑁆𑀜𑀢𑀁 𑀦 𑀧𑀸𑀧𑀼𑀡𑁂;

𑀉𑀧𑀓𑁆𑀓𑀫 𑀲𑀳𑀲𑁆𑀲𑁂𑀳𑀺, 𑀏𑀯𑀁 𑀓𑁂𑀲𑀸𑀤𑀺𑀓𑀫𑁆𑀧𑀺𑀘.

𑀲𑀪𑀸𑀯 ¶ 𑀧𑀝𑀺𑀓𑀽𑀮𑁆𑀬𑀁𑀯, 𑀏𑀓𑀫𑁆𑀧𑀺 𑀯𑀘𑁆𑀘 𑀧𑀼𑀜𑁆𑀚𑀓𑀁;

𑀦𑀦𑀼 𑀚𑁂𑀕𑀼𑀘𑁆𑀙𑀺𑀢𑀸 𑀪𑀺𑀬𑁆𑀬𑁄, 𑀤𑁆𑀯𑀢𑁆𑀢𑀺𑀁𑀲 𑀯𑀘𑁆𑀘𑀧𑀼𑀜𑁆𑀚𑀓𑀸.

𑀧𑀘𑁆𑀘𑁂𑀓𑀫𑁆𑀧𑀺 ¶ 𑀧𑀝𑀺𑀓𑀽𑀮𑁆𑀬𑀁, 𑀓𑁂𑀲𑀸𑀤𑀺𑀓𑀁 𑀲𑀪𑀸𑀯𑀢𑁄;

𑀓𑁂𑀲𑀸𑀤𑀺𑀤𑁆𑀯𑀢𑁆𑀢𑀺𑀁𑀲 𑀧𑀼𑀜𑁆𑀚𑁄, 𑀪𑀺𑀬𑁆𑀬𑁄 𑀚𑁂𑀕𑀼𑀘𑁆𑀙𑀺𑀢𑁄 𑀦𑀦𑀼.

𑀧𑀼𑀜𑁆𑀚𑀺𑀢𑁂𑀲𑁆𑀯𑁂𑀯 𑀓𑀦𑁆𑀢𑁂𑀲𑀼, 𑀓𑀦𑁆𑀢𑁄𑀳𑁄𑀢𑀺 𑀲 𑀧𑀼𑀜𑁆𑀚𑀓𑁄;

𑀧𑀼𑀜𑁆𑀚𑀺𑀢𑁂𑀲𑀼 𑀅𑀓𑀦𑁆𑀢𑁂𑀲, 𑀅𑀓𑀦𑁆𑀢𑁄𑀯 𑀲 𑀧𑀼𑀜𑁆𑀚𑀓𑁄.

𑀧𑀘𑁆𑀘𑁂𑀓𑀁 ¶ 𑀯𑀺𑀦𑀺𑀪𑀼𑀢𑁆𑀢𑁂𑀲, 𑀓𑁂𑀲 𑀮𑁄𑀫 𑀦𑀔𑀸𑀤𑀺𑀲𑀼;

𑀦𑀢𑁆𑀣𑀺 𑀢𑀜𑁆𑀜𑀸 𑀓𑀼𑀫𑀸𑀭𑀻𑀯𑀸, 𑀫𑀼𑀔𑀳𑀢𑁆𑀣𑀸𑀤𑀺𑀓𑀸𑀦𑀺𑀯𑀸.

𑀲𑀫𑁆𑀧𑀺𑀡𑁆𑀟𑀺 𑀢𑁂𑀲𑀼 𑀢𑁂𑀲𑁆𑀯𑁂𑀯,

𑀲𑀦𑁆𑀢𑀁 ¶ 𑀘𑀺𑀦𑁆𑀢𑁂𑀬𑁆𑀬 𑀦𑀸𑀲𑀦𑁆𑀢𑀁, 𑀲𑀦𑁆𑀢 𑀘𑀺𑀦𑁆𑀢𑀬𑀢𑁄 𑀲𑀼𑀔𑀁;

𑀅𑀲𑀦𑁆𑀢𑀁 𑀧𑀭𑀺𑀓𑀧𑁆𑀧𑁂𑀦𑁆𑀢𑁄, 𑀦𑀸𑀦𑀸𑀤𑀼𑀓𑁆𑀔𑁂𑀳𑀺 𑀢𑀧𑁆𑀧𑀢𑀺.

𑀦𑀸𑀯𑀚𑁆𑀚 𑀲𑀦𑁆𑀢𑀚𑁂𑀕𑀼𑀘𑁆𑀙𑀁, 𑀲𑀜𑁆𑀜𑀁 𑀅𑀲𑀢𑀺 𑀓𑀸𑀢𑀼𑀦;

𑀲𑀼𑀪𑀸 𑀇𑀢𑁆𑀣𑀻𑀢𑀺 𑀕𑀸𑀭𑀕𑁆𑀕𑀺, 𑀉𑀧𑁆𑀧𑀚𑁆𑀚𑀺 𑀲𑀼𑀪𑀲𑀜𑁆𑀜𑀺𑀦𑁄.

𑀅𑀲𑀦𑁆𑀢𑀁𑀯 ¶ 𑀅𑀪𑀽𑀢𑀁𑀯, 𑀧𑀲𑁆𑀲𑁂 𑀭𑀸𑀕𑀕𑁆𑀕𑀺𑀚𑁄𑀢𑀺𑀬𑀸;

𑀢𑀸𑀬 𑀲𑀦𑁆𑀢𑀜𑁆𑀘 𑀪𑀽𑀢𑀜𑁆𑀘, 𑀦 𑀧𑀲𑁆𑀲𑀢𑀺 𑀓𑀤𑀸𑀘𑀺𑀧𑀺.

𑀏𑀓𑀲𑁆𑀲 ¶ 𑀧𑀺𑀯𑀺𑀢𑀁 𑀔𑀻𑀭𑀁, 𑀲𑀻𑀲𑀘𑁆𑀙𑁂𑀤𑀦 𑀮𑁄𑀳𑀺𑀢𑀁;

𑀭𑀼𑀤𑀢𑁄 𑀅𑀲𑁆𑀲𑀼 𑀢𑀁𑀳𑁂𑀢𑀼, 𑀘𑀢𑀽𑀤𑀥𑀺 𑀚𑀮𑀸 𑀩𑀳𑀼.

𑀆𑀬𑀢𑀺𑀫𑁆𑀧𑀺 𑀅𑀢𑀻𑀢𑁂𑀯, 𑀲𑀁𑀲𑀭𑀦𑁆𑀢𑀲𑁆𑀲 𑀳𑁂𑀲𑁆𑀲𑀢𑀺;

𑀭𑀸𑀕𑀁 𑀳𑀦𑁆𑀢𑀼 𑀫𑀦𑀻𑀳𑁄𑀘𑁂, 𑀔𑀻𑀭𑀁 𑀅𑀲𑁆𑀲𑀼𑀘 𑀮𑁄𑀳𑀺𑀢𑀁.

𑀉𑀲𑁆𑀲𑁄𑀴𑁆𑀳𑀺 ¶ 𑀯𑀻𑀭𑀺𑀬𑁄 𑀳𑀼𑀢𑁆𑀯𑀸, 𑀩𑁆𑀭𑀽𑀳𑁂𑀬𑁆𑀬𑀸𑀲𑀼𑀪 𑀪𑀸𑀯𑀦𑀁;

𑀲𑀼𑀪𑀲𑀜𑁆𑀜𑀸𑀧𑁆𑀧 𑀳𑀸𑀦𑀸𑀬, 𑀧𑀭𑀺𑀘𑁆𑀘𑀚𑁆𑀚𑀸𑀧𑀺 𑀚𑀻𑀯𑀺𑀢𑀁.

𑀅𑀜𑁆𑀜𑀓𑀺𑀘𑁆𑀘 𑀫𑀼𑀧𑁂𑀓𑁆𑀔𑀸𑀬, 𑀩𑁆𑀭𑀽𑀳𑁂𑀬𑁆𑀬𑀸𑀲𑀼𑀪 𑀪𑀸𑀯𑀦𑀁;

𑀫𑀦𑁆𑀤𑀺 𑀳𑀼𑀢𑁆𑀯𑁂𑀳 𑀭𑀸𑀕𑀕𑁆𑀕𑀺, 𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺 𑀆𑀬𑀢𑀺𑀁.

𑀓𑀺𑀘𑁆𑀘𑀁 𑀫𑁂 𑀇𑀤𑀫𑁂𑀯𑁂𑀢𑀺, 𑀩𑁆𑀭𑀽𑀳𑁂𑀬𑁆𑀬𑀸𑀲𑀼𑀪 𑀪𑀸𑀯𑀦𑀁;

𑀤𑀸𑀦𑀺 𑀫𑀦𑁆𑀤𑀕𑁆𑀕𑀺 𑀳𑀼𑀢𑁆𑀯𑀸𑀦, 𑀧𑀸𑀫𑁄𑀚𑁆𑀚𑀁 𑀯𑁂 𑀮𑀪𑀺𑀲𑁆𑀲𑀢𑀺.

𑀓𑀸𑀬𑁂 ¶ 𑀤𑀝𑁆𑀞𑀩𑁆𑀩 𑀚𑁂𑀕𑀼𑀘𑁆𑀙𑀁, 𑀅𑀧𑀲𑁆𑀲𑀦𑁆𑀢𑁄 𑀧𑀫𑀸𑀤𑀯𑀸;

𑀅𑀮𑀤𑁆𑀥𑀸 𑀓𑀺𑀜𑁆𑀘𑀺 𑀧𑀸𑀫𑁄𑀚𑁆𑀚𑀁, 𑀧𑀩𑁆𑀩𑀚𑁆𑀚𑀫𑁆𑀧𑀺 𑀦 𑀫𑁄𑀤𑀢𑀺.

𑀧𑀼𑀭𑁂 𑀫𑀭𑀸𑀫𑀺 𑀓𑀸𑀬𑁂 𑀲𑁆𑀫𑀺𑀁, 𑀧𑀲𑁆𑀲𑀸 𑀫𑀺 𑀧𑀲𑁆𑀲𑀺𑀢𑀩𑁆𑀩𑀓𑀁;

𑀇𑀘𑁆𑀘𑀸 𑀭𑀤𑁆𑀥𑁄 𑀯𑀻𑀢𑀺𑀁𑀮𑀤𑁆𑀥𑀸, 𑀧𑀩𑁆𑀩𑀚𑁆𑀚𑀁 𑀅𑀢𑀺𑀫𑁄𑀤𑀢𑀺.

𑀓𑀸𑀬𑁂 ¶ 𑀤𑀝𑁆𑀞𑀩𑁆𑀩 𑀚𑁂𑀕𑀼𑀘𑁆𑀙𑀁, 𑀅𑀧𑀲𑁆𑀲𑀦𑁆𑀢𑁄 𑀧𑀫𑀸𑀤 𑀯𑀸;

𑀫𑁄𑀖𑀁𑀯 𑀤𑀼𑀮𑁆𑀮𑀪𑀸𑀢𑀻𑀢𑁄, 𑀫𑀳𑀸𑀚𑀸𑀦𑀻𑀬𑀢𑀁 𑀕𑀢𑁄.

𑀲𑀦𑁆𑀢𑀁 𑀪𑀽𑀢𑀜𑁆𑀘 𑀚𑁂𑀕𑀼𑀘𑁆𑀙𑀁, 𑀭𑀸𑀕𑀕𑁆𑀕𑀺𑀦𑀸 𑀅𑀧𑀲𑁆𑀲𑀺𑀬𑀁;

𑀧𑀜𑁆𑀜𑀸𑀧𑀤𑀻𑀧𑀚𑁄𑀢𑁂𑀦, 𑀲𑀫𑀺𑀓𑁆𑀔𑁂𑀬𑁆𑀬 𑀅𑀪𑀺𑀡𑁆𑀳𑀲𑁄.

𑀲𑀦𑁆𑀢𑀁 ¶ 𑀪𑀽𑀢𑀜𑁆𑀘 𑀓𑀸𑀬𑁂 𑀲𑁆𑀫𑀺𑀁, 𑀤𑀝𑁆𑀞𑀼𑀓𑀸𑀫𑁄 𑀲𑀤𑀸𑀲𑀢𑁄;

𑀧𑀜𑁆𑀜𑀸𑀧𑀤𑀻𑀧𑀓𑁂𑀦𑁂𑀯, 𑀤𑀓𑁆𑀔𑁂 𑀦 𑀭𑀸𑀕𑀻𑀲𑀻𑀔𑀺𑀦𑀸.

𑀚𑁂𑀕𑀼𑀘𑁆𑀙𑀺𑀢𑁂𑀦 𑀓𑀸𑀬𑁂𑀦, 𑀦𑀺𑀓𑁆𑀔𑀦𑁆𑀢𑁂𑀦 𑀚𑀺𑀕𑀼𑀘𑁆𑀙𑀢𑁄;

𑀅𑀚𑁆𑀚 𑀲𑁆𑀯𑁂𑀯𑀸 𑀯𑀺𑀦𑀝𑁆𑀞𑁂𑀦, 𑀦𑀸𑀮 𑀫𑀼𑀦𑁆𑀦𑀫𑀺𑀢𑀼𑀁 𑀲𑀢𑁄.

𑀓𑀻𑀤𑀺𑀲𑀁 ¶ 𑀫𑀁 𑀢𑀼𑀯𑀁 𑀫𑀜𑁆𑀜𑀺, 𑀅𑀳𑀁 𑀲𑀩𑁆𑀩 𑀚𑁂𑀕𑀼𑀘𑁆𑀙𑀓𑁄;

𑀚𑁂𑀕𑀼𑀘𑁆𑀙𑀢𑁄𑀘 𑀦𑀺𑀓𑁆𑀔𑀦𑁆𑀢𑁄, 𑀇𑀘𑁆𑀘𑁂𑀯 𑀯𑀢𑁆𑀢𑀼 𑀫𑀭𑀳𑀢𑀺.

𑀓𑀸𑀬𑁂 𑀚𑁂𑀕𑀼𑀘𑁆𑀙𑀲𑀜𑁆𑀜𑀁𑀯, 𑀓𑀭𑁂 𑀲𑀩𑁆𑀩𑀺𑀭𑀺𑀬𑀸 𑀧𑀣𑁂;

𑀢𑀲𑁆𑀫𑀺𑀁 𑀢𑀼𑀝𑁆𑀞𑀩𑁆𑀩𑀓𑀁 𑀦𑀢𑁆𑀣𑀺, 𑀧𑀺𑀬𑀸𑀬𑀺𑀢𑀁 𑀫𑀫𑀸𑀬𑀺𑀢𑀁.

𑀲𑀼𑀪𑀸𑀬 ¶ 𑀦𑀯 𑀫𑀢𑁆𑀢𑀸𑀦𑀁, 𑀅𑀲𑀼𑀪𑀸 𑀧𑀭𑀺𑀧𑀸𑀘𑀬𑁂;

𑀲𑀦𑁆𑀢𑁄 𑀧𑀓𑁆𑀓𑀲𑁆𑀲 𑀲𑀁𑀲𑀸𑀭𑁄, 𑀦𑀦𑁆𑀢𑁄 𑀦𑀯𑀲𑁆𑀲 𑀭𑀸𑀕𑀺𑀦𑁄.

𑀓𑀸𑀬𑁂 𑀅𑀲𑀼𑀪 𑀲𑀜𑁆𑀜𑀸𑀬, 𑀧𑀭𑀺𑀧𑀓𑁆𑀓 𑀲𑀪𑀸𑀯𑀺𑀦𑁄;

𑀆𑀮𑀫𑁆𑀩𑁂𑀲𑀼 𑀅𑀘𑀸𑀧𑀮𑁆𑀮𑀸, 𑀣𑀺𑀭𑀸 𑀲𑀫𑁆𑀩𑀼𑀤𑁆𑀥 𑀲𑀸𑀲𑀦𑁂.

𑀅𑀦𑁆𑀢𑁄 ¶ 𑀕𑁄𑀘𑀭𑀺𑀓𑀸 𑀧𑀓𑁆𑀓𑀸, 𑀩𑀳𑀺 𑀕𑁄𑀘𑀭𑀺𑀓𑀸 𑀦𑀯𑀸;

𑀧𑀓𑁆𑀓𑀸 𑀦𑀸𑀲𑀸𑀬 𑀉𑀘𑁆𑀘𑀸 𑀢𑁂, 𑀦𑀻𑀘𑀸𑀬𑁂𑀯 𑀦𑀯𑀸 𑀲𑀺𑀦𑁄.

𑀦𑀯𑀸𑀦𑀯𑀸 ¶ 𑀲𑀼𑀪𑀸𑀪𑁄𑀕𑀻, 𑀦𑀻𑀘𑀸𑀦𑀻𑀘𑀸 𑀪𑀺𑀕𑀸𑀫𑀺𑀦𑁄;

𑀧𑀓𑁆𑀓𑀸 𑀧𑀓𑁆𑀓𑀸𑀯 𑀥𑀻𑀛𑀸𑀬𑀻, 𑀲𑀦𑁆𑀢𑀸𑀲𑀦𑁆𑀢𑀸 𑀯𑀺𑀭𑀸𑀕𑀺𑀦𑁄.

𑀲𑀓𑁆𑀓𑀸 𑀲𑀓𑁆𑀓𑀸 𑀦 𑀤𑀲𑁆𑀲𑁂𑀢𑀼𑀁, 𑀲𑀼𑀪𑀁𑀲𑀼𑀪𑀁 𑀲𑀢𑀁𑀲𑀢𑀁;

𑀥𑀻𑀭𑀸𑀥𑀻𑀭𑀸𑀕 𑀫𑀼𑀚𑁆𑀛𑀦𑁆𑀢𑀺, 𑀓𑀸𑀬𑁂 𑀓𑀸𑀬𑁂 𑀓𑁆𑀭𑀺𑀬𑁂𑀓𑁆𑀭𑀺𑀬𑁂.

𑀲𑀓𑁆𑀓𑀸 ¶ 𑀲𑀓𑁆𑀓𑀸𑀧𑀺 𑀢𑀁 𑀓𑀸𑀢𑀼𑀁, 𑀲𑀼𑀪𑀁𑀲𑀼𑀪𑀁 𑀦 𑀥𑀻𑀫𑀬𑀁;

𑀲𑀦𑁆𑀢𑁄𑀲𑀦𑁆𑀢𑁄𑀚𑀺𑀕𑀼𑀘𑁆𑀙𑀜𑁆𑀜𑀽, 𑀦 𑀯𑀸𑀦𑀯𑀸 𑀲𑀼𑀪𑁂𑀲𑀓𑁄.

𑀤𑀼𑀓𑀸𑀬𑀁 ¶ 𑀲𑀼𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀫𑀫𑀸𑀬𑀦𑁆𑀢𑀸 𑀫𑀳𑀸𑀢𑀧𑀸;

𑀢𑀧𑀁 𑀦𑀺𑀩𑁆𑀩𑀸𑀬𑀺𑀢𑀼𑀁 𑀇𑀘𑁆𑀙𑀁, 𑀤𑀼𑀓𑀸𑀬𑀁 𑀤𑀼𑀢𑀺 𑀘𑀺𑀦𑁆𑀢𑀬𑁂.

𑀬𑁆𑀯𑀸𑀲𑀼𑀪𑀁 𑀲𑀼𑀪𑀢𑁄 𑀫𑀜𑁆𑀜𑀺, 𑀓𑁄𑀦𑀼𑀩𑀸𑀮𑁄𑀢𑀤𑀼𑀢𑁆𑀢𑀭𑀺;

𑀅𑀦𑁆𑀥𑁄 𑀉𑀫𑁆𑀫𑀢𑁆𑀢𑀓𑁄𑀯𑀸 𑀲𑁄, 𑀦𑀢𑁆𑀢𑀸𑀦𑀁 𑀫𑀜𑁆𑀜𑀢𑁂 𑀢𑀣𑀸.

𑀲𑀭𑀺𑀢𑀩𑁆𑀩𑀓 ¶ 𑀫𑁂𑀯𑁂𑀢𑀁, 𑀓𑀸𑀬𑁂 𑀚𑁂𑀕𑀼𑀘𑁆𑀙 𑀧𑀼𑀜𑁆𑀚𑀢𑀁;

𑀫𑀦𑁆𑀤𑀭𑀸𑀕𑁄 𑀫𑀦𑁄𑀲𑀻𑀢𑀁, 𑀮𑀪𑁂𑀬𑁆𑀬 𑀢𑀫𑀦𑀼𑀲𑁆𑀲𑀦𑀁.

𑀕𑀺𑀳𑀺𑀪𑀸𑀯𑁂 𑀅𑀧𑀸𑀬𑁂𑀘, 𑀭𑀸𑀕𑀬𑀓𑁆𑀔𑀦𑁆𑀥 𑀦𑀺𑀦𑁆𑀦𑀺𑀢𑀸;

𑀫𑀁𑀧𑀺 𑀦𑁂𑀲𑁆𑀲𑀢𑀺 𑀲𑁄𑀬𑀓𑁆𑀔𑁄, 𑀲𑀸𑀤𑁂𑀫𑀺𑀘𑁂 𑀢𑀤𑀸𑀕𑀢𑀁.

𑀅𑀪𑀺𑀡𑁆𑀳 ¶ 𑀕𑀸𑀳𑀺𑀦𑀁 𑀭𑀸𑀕, 𑀬𑀓𑁆𑀔𑀁 𑀅𑀦𑀦𑁆𑀢 𑀤𑀼𑀓𑁆𑀔 𑀤𑀁;

𑀅𑀲𑀼𑀪𑀸 𑀢𑀼𑀮 𑀫𑀦𑁆𑀢𑁂𑀦, 𑀯𑀸𑀭𑁂𑀳𑀺 𑀢𑀁 𑀲 𑀪𑀸𑀬𑀢𑀺.

𑀭𑀸𑀕𑀬𑀓𑁆𑀔𑁄 𑀩𑀳𑀼𑀫𑀸𑀬𑁄, 𑀲𑀤𑁆𑀥𑀸𑀫𑁂𑀢𑁆𑀢𑀸 𑀤𑀺𑀯𑁂𑀲𑀯𑀸;

𑀭𑀸𑀕𑀫𑁆𑀧𑀺 𑀓𑀼𑀲𑀮𑀁 𑀫𑀜𑁆𑀜𑀺, 𑀚𑀦𑁄 𑀢𑁂𑀦𑁂𑀯 𑀯𑀜𑁆𑀘𑀺𑀢𑁄.

𑀆𑀢𑀼𑀭𑀁 ¶ 𑀅𑀲𑀼𑀘𑀺𑀁 𑀧𑀼𑀢𑀺𑀁, 𑀧𑀲𑁆𑀲 𑀦𑀦𑁆𑀤𑁂 𑀲𑀫𑀼𑀲𑁆𑀲𑀬𑀁;

𑀉𑀕𑁆𑀖𑀭𑀦𑁆𑀢𑀁 𑀧𑀕𑁆𑀖𑀭𑀦𑁆𑀢𑀁, 𑀩𑀸𑀮𑀸𑀦𑀁 𑀅𑀪𑀺𑀧𑀢𑁆𑀣𑀺𑀢𑀁.

𑀲𑀼𑀪𑀢𑁄 𑀦𑀁 𑀫𑀜𑁆𑀜𑀢𑀺 𑀩𑀸𑀮𑁄, 𑀅𑀯𑀺𑀚𑁆𑀚𑀸𑀬 𑀧𑀼𑀭𑀓𑁆𑀔𑀢𑁄;

𑀇𑀘𑁆𑀘𑀸𑀳 𑀪𑀕𑀯𑀸 𑀦𑀺𑀦𑁆𑀤𑀺, 𑀩𑀸𑀮𑁄𑀢𑀺 𑀲𑀼𑀪𑀲𑀜𑁆𑀜𑀺𑀦𑀁.

𑀦𑁆𑀳𑀸𑀭𑀼𑀝𑁆𑀞𑀺 ¶ 𑀢𑀘 𑀫𑀁𑀲𑀸𑀦𑀺, 𑀲𑀭𑀁 𑀲𑀢𑀁 𑀦 𑀦𑀺𑀦𑁆𑀤𑀺𑀢𑁄;

𑀩𑀼𑀤𑁆𑀥𑀦𑀺𑀦𑁆𑀤𑀸𑀬 𑀫𑁄𑀘𑁂𑀢𑀼𑀁, 𑀢𑀸𑀦𑀸𑀭𑀩𑁆𑀪 𑀅𑀦𑀼𑀲𑁆𑀲𑀭𑁂.

𑀫𑀜𑁆𑀜𑀺𑀢𑁆𑀯𑀸 𑀅𑀢𑁆𑀢𑀦𑁄 𑀩𑀸𑀮𑁆𑀬𑀁, 𑀅𑀲𑀼𑀪𑁂 𑀲𑀼𑀪𑀤𑀲𑁆𑀲𑀺𑀦𑁄;

𑀯𑀸𑀬𑀸𑀫𑁂𑀬𑁆𑀬 𑀅𑀩𑀸𑀮𑀸𑀬, 𑀓𑀸𑀬𑀁 𑀅𑀲𑀼𑀪𑀢𑁄 𑀲𑀭𑀁.

𑀅𑀢𑁆𑀢𑀸𑀦𑀁 ¶ 𑀕𑀭𑀳𑀺𑀢𑁆𑀯𑀸𑀦, 𑀩𑀸𑀮𑀁 𑀯𑀺𑀧𑀭𑀺𑀤𑀲𑁆𑀲𑀺𑀦𑀁;

𑀲𑀼𑀪𑀲𑀜𑁆𑀜𑀁 𑀧𑀳𑀺𑀦𑁆𑀦𑁂𑀬𑁆𑀬, 𑀓𑀭𑁂𑀬𑁆𑀬𑀸𑀲𑀼𑀪 𑀲𑀜𑁆𑀜𑀺𑀢𑀁.

𑀯𑀺𑀲 𑀪𑁂𑀲𑀚𑁆𑀚𑀭𑀼𑀓𑁆𑀔𑀝𑁆𑀞𑁄, 𑀅𑀳𑀺 𑀟𑀁𑀲𑁂𑀬𑁆𑀬𑀲𑁄𑀲𑀢𑁄;

𑀬𑀣𑀸 𑀢𑀲𑁆𑀲𑁂𑀯 𑀧𑀡𑁆𑀡𑀸𑀤𑀺𑀁, 𑀔𑀸𑀤𑁂𑀢𑁆𑀯𑀸 𑀯𑀺𑀲 𑀫𑀼𑀚𑁆𑀚𑀳𑁂.

𑀏𑀯𑀁 𑀭𑀸𑀕𑁄 𑀲𑀫𑀼𑀧𑁆𑀧𑀚𑁆𑀚𑁂, 𑀓𑀸𑀬𑁂 𑀕𑀦𑁆𑀥𑀸𑀤𑀺 𑀯𑀸𑀲𑀺𑀢𑁂;

𑀅𑀦𑁆𑀢𑁄 𑀢𑀲𑁆𑀲𑁂𑀯 𑀚𑁂𑀕𑀼𑀘𑁆𑀙𑀁, 𑀘𑀺𑀦𑁆𑀢𑁂𑀢𑁆𑀯𑀸 𑀭𑀸𑀕 𑀫𑀼𑀚𑁆𑀚𑀳𑁂.

𑀚𑀺𑀕𑀼𑀘𑁆𑀙𑀺𑀢𑁂𑀦 ¶ 𑀓𑀸𑀬𑁂𑀦, 𑀅𑀧𑀲𑁆𑀲𑀦𑁆𑀢𑁄 𑀚𑀺𑀕𑀼𑀘𑁆𑀙𑀢𑀁;

𑀉𑀦𑁆𑀦𑀫𑁂𑀢𑀺 𑀅𑀯𑀜𑁆𑀜𑀸𑀢𑀺, 𑀅𑀯𑀺𑀚𑁆𑀚𑀸𑀬 𑀧𑀼𑀭𑀓𑁆𑀔𑀢𑁄.

𑀆𑀬𑀢𑀺𑀁 ¶ 𑀫𑀕𑁆𑀕𑀮𑀸𑀪𑀸𑀬, 𑀩𑀻𑀚𑀁 𑀓𑀭𑁂𑀬𑁆𑀬 𑀪𑀸𑀯𑀦𑀁;

𑀩𑀻𑀚𑀸 𑀪𑀸𑀯𑁂 𑀓𑀼𑀢𑁄 𑀫𑀕𑁆𑀕𑁄, 𑀫𑀕𑁆𑀕𑀩𑀻𑀚𑀸 𑀳𑀺 𑀪𑀸𑀯𑀦𑀸.

𑀫𑀕𑁆𑀕𑀩𑀻𑀚𑁄 𑀅𑀧𑀸𑀬𑁂𑀧𑀺, 𑀦𑀺𑀫𑁆𑀫𑀼𑀕𑁆𑀕𑁄 𑀲𑀫𑀬𑁂 𑀕𑀢𑁂;

𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸𑀯 𑀩𑀼𑀤𑁆𑀥𑀸𑀦𑀁, 𑀫𑀕𑁆𑀕𑀁 𑀮𑀪𑁂𑀬𑁆𑀬 𑀲𑀦𑁆𑀢𑀺𑀓𑁂.

𑀅𑀚𑀻𑀚𑀲𑁆𑀲 ¶ 𑀢𑀼 𑀲𑀁𑀲𑀸𑀭𑁄, 𑀤𑀻𑀖𑁄𑀬𑁂𑀯 𑀅𑀦𑀦𑁆𑀢𑀺𑀓𑁄;

𑀢𑀲𑁆𑀫𑀸𑀳𑀺 𑀪𑀸𑀯𑀦𑀸𑀩𑀻𑀚𑀁, 𑀓𑀭𑁂𑀬𑁆𑀬 𑀫𑁄𑀘𑀦𑀢𑁆𑀣𑀺𑀓𑁄.

𑀅𑀪𑀺𑀡𑁆𑀳 𑀧𑀻𑀴𑀺𑀢𑀁 𑀭𑀸𑀕𑀁, 𑀅𑀲𑀼𑀪𑀸𑀬 𑀦𑀺𑀯𑀸𑀭𑀬𑁂;

𑀫𑀦𑁆𑀤𑀻𑀳𑀼𑀢𑁆𑀯𑀸 𑀧𑀳𑀻𑀬𑁂𑀬𑁆𑀬, 𑀭𑀸𑀕𑁄 𑀅𑀲𑀼𑀪 𑀪𑀻𑀭𑀼𑀓𑁄.

𑀫𑀸𑀚𑁂𑀕𑀼𑀘𑁆𑀙𑀁 ¶ 𑀫𑀫𑀸𑀬𑁂𑀣, 𑀲𑀸𑀯 𑀚𑁂𑀕𑀼𑀘𑁆𑀙𑀫𑀸𑀫𑀓𑁄;

𑀅𑀦𑀦𑁆𑀢 𑀤𑀼𑀓𑁆𑀔 𑀫𑀸𑀧𑀸𑀤𑀺, 𑀚𑁂𑀕𑀼𑀘𑁆𑀙𑀺𑀢 𑀫𑀫𑀸𑀬𑀦𑀸.

𑀦𑁆𑀳𑀸𑀭𑀼𑀩𑀦𑁆𑀥𑁄 𑀝𑁆𑀞𑀺𑀧𑀼𑀜𑁆𑀚𑀓𑁄;

𑀦𑁆𑀳𑀸𑀭𑀼𑀝𑁆𑀞𑀺 ¶ 𑀢𑀘 𑀫𑀁𑀲𑁂𑀳𑀺, 𑀭𑀸𑀕𑀯𑀟𑁆𑀠𑀓𑀺 𑀲𑀗𑁆𑀔𑀢𑁂;

𑀕𑁂𑀳𑁂 𑀭𑁄𑀕𑀸 𑀧𑀼𑀢𑀻 𑀧𑀸𑀧𑀸, 𑀯𑀲𑀦𑁆𑀢𑀺 𑀓𑀼𑀘𑁆𑀙𑀺𑀢𑀸 𑀲𑀤𑀸.

𑀮𑀼𑀗𑁆𑀕𑀦𑁆𑀢𑀸 𑀯𑀻𑀲 𑀪𑀽𑀥𑀸𑀢𑀽, 𑀧𑀺𑀢𑁆𑀢𑀸𑀤𑀻 𑀤𑁆𑀯𑀸𑀤𑀲𑀫𑁆𑀩𑀼𑀯;

𑀢𑀸𑀧𑀁 𑀚𑀺𑀭𑀁 𑀤𑀳𑀁 𑀧𑀓𑁆𑀓𑀁, 𑀘𑀢𑀼𑀭𑀕𑁆𑀕𑀺 𑀙𑀯𑀸𑀬𑀼𑀓𑀸.

𑀅𑀥𑁄𑀤𑁆𑀥𑀁 𑀓𑀼𑀘𑁆𑀙𑀺 𑀓𑁄𑀝𑁆𑀞𑀸𑀲𑀸,

𑀬𑀣𑀸 ¶ 𑀩𑀳𑀺 𑀢𑀣𑀸 𑀅𑀚𑁆𑀛𑀢𑁆𑀢𑀁, 𑀥𑀸𑀢𑀽 𑀪𑁆𑀯𑀸𑀧𑀸 𑀦𑀮𑀸𑀦𑀺𑀮𑀸;

𑀦𑀫𑁂 𑀦𑀸𑀳𑀁 𑀦𑀅𑀢𑁆𑀢𑀸𑀢𑀺, 𑀲𑀁𑀫𑀲𑁂𑀬𑁆𑀬 𑀧𑀼𑀦𑀧𑁆𑀧𑀼𑀦𑀦𑁆𑀢𑀺.

𑀫𑁂𑀢𑁆𑀢𑀸 ¶ 𑀪𑀸𑀯𑀦 𑀫𑀺𑀘𑁆𑀙𑀫𑁆𑀧𑀺, 𑀲𑀼𑀡 𑀩𑀼𑀤𑁆𑀥𑀯𑀘𑁄 𑀬𑀺𑀤𑀁;

𑀤𑁄𑀲 𑀦𑀺𑀕𑁆𑀕𑀳𑀡𑀢𑁆𑀣𑀸𑀬, 𑀤𑁄𑀲𑁄 𑀫𑁂𑀢𑁆𑀢𑀸𑀬𑀯𑁂𑀭𑀺𑀳𑀺.

𑀅𑀓𑁆𑀓𑁄𑀘𑁆𑀙𑀺𑀫𑀁 𑀅𑀯𑀥𑀺𑀫𑀁, 𑀅𑀚𑀺𑀦𑀺𑀫𑀁 𑀅𑀳𑀸𑀲𑀺𑀫𑁂;

𑀬𑁂𑀘 𑀢𑀁 𑀉𑀧𑀦𑀬𑁆𑀳𑀦𑁆𑀢𑀺, 𑀯𑁂𑀭𑀁 𑀢𑁂𑀲𑀁 𑀦𑀲𑀫𑁆𑀫𑀢𑀺.

𑀅𑀓𑁆𑀓𑁄𑀘𑁆𑀙𑀺𑀫𑀁 ¶ 𑀅𑀯𑀥𑀺𑀫𑀁, 𑀅𑀚𑀺𑀦𑀺𑀫𑀁 𑀅𑀳𑀸𑀲𑀺𑀫𑁂;

𑀬𑁂𑀘𑀢𑀁 𑀦𑀼𑀧𑀦𑀬𑁆𑀳𑀦𑁆𑀢𑀺, 𑀯𑁂𑀭𑀁 𑀢𑁂𑀲𑀁 𑀉𑀧𑀲𑀫𑁆𑀫𑀢𑀺.

𑀦𑀳𑀺𑀯𑁂𑀭𑁂𑀦 𑀯𑁂𑀭𑀸𑀦𑀺, 𑀲𑀫𑁆𑀫𑀦𑁆𑀢𑀺𑀥 𑀓𑀼𑀤𑀸𑀘𑀦;

𑀅𑀯𑁂𑀭𑁂𑀦𑀘 𑀲𑀫𑁆𑀫𑀦𑁆𑀢𑀺, 𑀏𑀲𑀥𑀫𑁆𑀫𑁄 𑀲𑀦𑀦𑁆𑀢𑀦𑁄.

𑀧𑀭𑁂𑀘 ¶ 𑀦𑀯𑀺𑀚𑀸𑀦𑀦𑁆𑀢𑀺, 𑀫𑀬 𑀫𑁂𑀢𑁆𑀣 𑀬𑀫𑀸𑀫𑀲𑁂;

𑀬𑁂𑀘 𑀢𑀢𑁆𑀣 𑀯𑀺𑀚𑀸𑀦𑀦𑁆𑀢𑀺, 𑀢𑀢𑁄 𑀲𑀫𑁆𑀫𑀦𑁆𑀢𑀺 𑀫𑁂𑀥𑀕𑀸.

𑀓𑀼𑀤𑁆𑀥𑁄 𑀅𑀢𑁆𑀣𑀁 𑀦𑀚𑀸𑀦𑀸𑀢𑀺, 𑀓𑀼𑀤𑁆𑀥𑁄 𑀥𑀫𑁆𑀫𑀁 𑀦𑀧𑀲𑁆𑀲𑀢𑀺;

𑀲𑀤𑀸 𑀅𑀦𑁆𑀥𑀢𑀫𑀁 𑀳𑁄𑀢𑀺, 𑀬𑀁𑀓𑁄𑀥𑁄 𑀲𑀳𑀢𑁂𑀦𑀭𑀁.

𑀉𑀪𑀺𑀦𑁆𑀦 ¶ 𑀫𑀢𑁆𑀣𑀁 𑀘𑀭𑀢𑀺, 𑀅𑀢𑁆𑀢𑀦𑁄𑀘 𑀧𑀭𑀲𑁆𑀲𑀘;

𑀧𑀭𑀁 𑀲𑀁𑀓𑀼𑀧𑁆𑀧𑀺𑀢𑀁 𑀜𑀢𑁆𑀯𑀸, 𑀬𑁄 𑀲𑀢𑁄 𑀉𑀧𑀲𑀫𑁆𑀫𑀢𑀺.

𑀢𑀲𑁆𑀲𑁂𑀯 𑀢𑁂𑀦 𑀧𑀸𑀧𑀺𑀬𑁆𑀬𑁄, 𑀬𑁄 𑀓𑀼𑀤𑁆𑀥𑀁 𑀧𑀝𑀺𑀓𑀼𑀚𑁆𑀛𑀢𑀺;

𑀓𑀼𑀤𑁆𑀥𑀁 𑀅𑀧𑀝𑀺𑀓𑀼𑀚𑁆𑀛𑀦𑁆𑀢𑁄, 𑀲𑀗𑁆𑀕𑀸𑀫𑀁 𑀚𑁂𑀢𑀺 𑀤𑀼𑀚𑁆𑀚𑀬𑀁.

𑀔𑀦𑁆𑀢𑀻 ¶ 𑀧𑀭𑀫𑀁 𑀢𑀧𑁄 𑀢𑀺𑀢𑀺𑀓𑁆𑀔𑀸,

𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸;

𑀦𑀲𑀫𑀡𑁄 𑀳𑁄𑀢𑀺 𑀧𑀭𑀁 𑀯𑀺𑀳𑁂𑀞𑀬𑀦𑁆𑀢𑁄.

𑀅𑀓𑁄𑀥𑁂𑀦 𑀚𑀺𑀦𑁂 𑀓𑁄𑀥𑀁, 𑀅𑀲𑀸𑀥𑀼𑀁 𑀲𑀸𑀥𑀼𑀦𑀸 𑀚𑀺𑀦𑁂;

𑀚𑀺𑀦𑁂 𑀓𑀤𑀭𑀺𑀬𑀁 𑀤𑀸𑀦𑁂𑀦, 𑀲𑀘𑁆𑀘𑁂𑀦𑀸 𑀮𑀺𑀓𑀯𑀸𑀤𑀺𑀦𑀁.

𑀬𑁄 ¶ 𑀯𑁂 𑀉𑀧𑁆𑀧𑀢𑀺𑀢𑀁 𑀓𑁄𑀥𑀁, 𑀭𑀣𑀁 𑀪𑀦𑁆𑀢𑀁𑀯 𑀯𑀸𑀭𑀬𑁂;

𑀢 𑀫𑀳𑀁 𑀲𑀸𑀭𑀣𑀻 𑀩𑁆𑀭𑀽𑀫𑀺, 𑀭𑀲𑁆𑀫𑀺𑀕𑁆𑀕𑀸𑀳𑁄 𑀇𑀢𑀭𑁄𑀚𑀦𑁄.

𑀧𑀼𑀭𑀺𑀲𑀲𑁆𑀲 ¶ 𑀳𑀺 𑀚𑀸𑀢𑀲𑁆𑀲, 𑀓𑀼𑀥𑀸𑀭𑀻 𑀚𑀸𑀬𑀢𑁂 𑀫𑀼𑀔𑁂;

𑀬𑀸𑀬 𑀙𑀺𑀦𑁆𑀤𑀢𑀺 𑀅𑀢𑁆𑀢𑀸𑀦𑀁, 𑀩𑀸𑀮𑁄 𑀤𑀼𑀩𑁆𑀪𑀸𑀲𑀺𑀢𑀁𑀪𑀡𑀁.

𑀲𑁂𑀮𑁄 𑀬𑀣𑀸 𑀏𑀓𑀕𑁆𑀖𑀦𑁄, 𑀯𑀸𑀢𑁂𑀦 𑀦𑀲𑀫𑀻𑀭𑀢𑀺;

𑀏𑀯𑀁 𑀦𑀺𑀦𑁆𑀤𑀸 𑀧𑀲𑀁𑀲𑀸𑀲𑀼, 𑀦𑀲𑀫𑀺𑀜𑁆𑀚𑀦𑁆𑀢𑀺 𑀧𑀡𑁆𑀟𑀺𑀢𑀸.

𑀲𑀫𑀸𑀦𑀪𑀸𑀕𑀁 ¶ 𑀓𑁆𑀭𑀼𑀩𑁆𑀩𑁂𑀣, 𑀕𑀸𑀫𑁂 𑀅𑀓𑁆𑀓𑀼𑀝𑁆𑀞 𑀯𑀦𑁆𑀤𑀺𑀢𑀁;

𑀫𑀦𑁄𑀧𑀤𑁄𑀲𑀁 𑀭𑀓𑁆𑀔𑁂𑀬𑁆𑀬, 𑀲𑀦𑁆𑀢𑁄 𑀅𑀦𑀼𑀡𑁆𑀡𑀢𑁄 𑀲𑀺𑀬𑀸.

𑀦𑀧𑀭𑁄 𑀧𑀭𑀁 𑀦𑀺𑀓𑀼𑀧𑁆𑀧𑁂𑀣, 𑀦𑀸𑀢𑀺𑀫𑀜𑁆𑀜𑁂𑀣 𑀓𑀢𑁆𑀣𑀘𑀺 𑀦𑀓𑀺𑀜𑁆𑀘𑀺;

𑀩𑁆𑀬𑀸𑀭𑁄𑀲𑀦𑀸 𑀧𑀝𑀺𑀖𑀲𑀜𑁆𑀜𑀸, 𑀦𑀜𑁆𑀜𑀫𑀜𑁆𑀜𑀲𑁆𑀲 𑀤𑀼𑀓𑁆𑀔 𑀫𑀺𑀘𑁆𑀙𑁂𑀬𑁆𑀬.

𑀫𑀸𑀬𑀼𑀲𑀸 𑀏𑀓𑀧𑀼𑀢𑁆𑀢 𑀫𑀦𑀼𑀭𑀓𑁆𑀔𑁂;

𑀲𑀼𑀢𑁆𑀯𑀸𑀦 𑀤𑀼𑀲𑀺𑀢𑁄 𑀩𑀳𑀼𑀁 𑀯𑀸𑀘𑀁,

𑀦 𑀳𑀺 𑀲𑀦𑁆𑀢𑁄 𑀧𑀝𑀺𑀲𑁂𑀦𑀺𑀁 𑀓𑀭𑁄𑀦𑁆𑀢𑀺.

𑀲𑀘𑁆𑀘𑀁 ¶ 𑀪𑀡𑁂 𑀦𑀓𑀼𑀚𑁆𑀛𑁂𑀬𑁆𑀬, 𑀤𑀚𑁆𑀚𑀸 𑀅𑀧𑁆𑀧𑀫𑁆𑀧𑀺 𑀬𑀸𑀘𑀺𑀢𑁄;

𑀏𑀢𑁂𑀳𑀺 𑀢𑀻𑀳𑀺 𑀞𑀸𑀦𑁂𑀳𑀺, 𑀕𑀘𑁆𑀙𑁂 𑀤𑁂𑀯𑀸𑀦 𑀲𑀦𑁆𑀢𑀺𑀓𑁂.

𑀦 𑀧𑀭𑁂𑀲𑀁 𑀯𑀺𑀮𑁄𑀫𑀸𑀦𑀺, 𑀦 𑀧𑀭𑁂𑀲𑀁 𑀓𑀢𑀸𑀓𑀢𑀁;

𑀅𑀢𑁆𑀢𑀦𑁄𑀯 𑀅𑀯𑁂𑀓𑁆𑀔𑁂𑀬𑁆𑀬, 𑀓𑀢𑀸𑀦𑀺 𑀅𑀓𑀢𑀸𑀦𑀺𑀘.

𑀲𑀼 ¶ 𑀤𑀲𑀁 𑀯𑀚𑁆𑀚𑀫𑀜𑁆𑀜𑁂𑀲𑀁, 𑀅𑀢𑁆𑀢𑀦𑁄 𑀧𑀦 𑀤𑀼𑀤𑁆𑀤𑀲𑀁;

𑀧𑀭𑁂𑀲𑀜𑁆𑀳𑀺 𑀲𑁄 𑀯𑀚𑁆𑀚𑀸𑀦𑀺, 𑀑𑀨𑀼𑀦𑀸𑀢𑀺 𑀬𑀣𑀸 𑀪𑀼𑀲𑀁;

𑀅𑀢𑁆𑀢𑀦𑁄 𑀧𑀦 𑀙𑀸𑀤𑁂𑀢𑀺, 𑀓𑀮𑀺𑀁𑀯 𑀓𑀺𑀢𑀯𑀸 𑀲𑀝𑁆𑀞𑁄.

𑀦𑀺𑀥𑀻𑀦𑀁𑀯 ¶ 𑀧𑀯𑀢𑁆𑀢𑀸𑀦𑀁, 𑀬𑀁 𑀧𑀲𑁆𑀲𑁂 𑀯𑀚𑁆𑀚𑀤𑀲𑁆𑀲𑀺𑀦𑀁;

𑀦𑀺𑀕𑁆𑀕𑀬𑁆𑀳𑀯𑀸𑀤𑀺𑀁 𑀫𑁂𑀥𑀸𑀯𑀺𑀁, 𑀢𑀸𑀤𑀺𑀲𑀁 𑀧𑀡𑁆𑀟𑀺𑀢𑀁 𑀪𑀚𑁂.

𑀫𑁂𑀢𑁆𑀢𑀸 ¶ 𑀕𑀦𑁆𑀥𑁂𑀦 𑀯𑀸𑀲𑁂𑀦𑁆𑀢𑁄,

𑀳𑀦𑁂 𑀤𑁄𑀲𑀽 𑀧𑀦𑀸𑀳𑀸𑀦𑀺, 𑀅𑀦𑀢𑁆𑀣 𑀓𑀸𑀭𑀓𑀸𑀦𑀺 𑀳𑀺;

𑀢𑁂𑀲𑁆𑀯 𑀲𑀦𑁆𑀢𑁂𑀲𑀼 𑀲𑀩𑁆𑀩𑁂𑀲𑀼, 𑀫𑁂𑀢𑁆𑀢𑀸𑀳𑁄𑀢𑀺 𑀲𑀼𑀦𑀺𑀫𑁆𑀫𑀮𑀸.

𑀲𑀢𑀁 ¶ 𑀤𑀼𑀚𑁆𑀚𑀦 𑀯𑀸𑀓𑁆𑀬𑁂𑀳𑀺, 𑀦𑀫𑀦𑁄 𑀬𑀸𑀢𑀺 𑀯𑀺𑀓𑁆𑀭𑀺𑀬𑀁;

𑀦𑀳𑀺𑀢𑀸𑀧𑀬𑀺𑀢𑀼𑀁 𑀲𑀓𑁆𑀓𑀸, 𑀕𑀗𑁆𑀕𑀸𑀦𑀤𑀺𑀁 𑀢𑀺𑀡𑀼𑀓𑁆𑀓𑀬𑀸.

𑀦𑀳𑀺 𑀦𑀺𑀦𑁆𑀤𑀸 𑀧𑀲𑀁𑀲𑀸𑀳𑀺, 𑀲𑀢𑀁 𑀫𑀦𑁄𑀯𑀺𑀓𑀸𑀭𑀢𑀸;

𑀦 𑀓𑀤𑀸𑀘𑀺𑀧𑀺 𑀓𑀫𑁆𑀧𑁂𑀬𑁆𑀬, 𑀯𑀸𑀢𑁂𑀳𑀺 𑀲𑁂𑀮𑀧𑀩𑁆𑀩𑀢𑁄.

𑀦𑀤𑀺𑀬𑀁 ¶ 𑀔𑀼𑀤𑁆𑀤𑀓𑀸 𑀦𑀸𑀯𑀸, 𑀯𑀺𑀘𑀻𑀳𑀺 𑀉𑀦𑁆𑀦𑀢𑁄𑀦𑀢𑀸;

𑀫𑀳𑀸𑀦𑀸𑀯𑀸 𑀦𑀓𑀫𑁆𑀧𑀦𑁆𑀢𑀺, 𑀫𑀳𑀦𑁆𑀢𑀻𑀳𑀺 𑀯𑀺𑀘𑀻𑀳𑀺𑀧𑀺.

𑀮𑁄𑀓𑁂 𑀧𑀲𑀁𑀲 𑀦𑀺𑀦𑁆𑀤𑀸𑀳𑀺, 𑀤𑀼𑀚𑁆𑀚𑀦𑁄𑀯𑀼𑀦𑁆𑀦𑀢𑁄𑀦𑀢𑁄;

𑀲𑀦𑁆𑀢𑁄𑀧𑀜𑁆𑀜𑁄 𑀦𑀘𑀮𑀢𑀺, 𑀫𑀳𑀸𑀦𑀺𑀦𑁆𑀤𑀸 𑀣𑀼𑀢𑀻𑀳𑀺𑀧𑀺.

𑀔𑀫𑀸𑀥𑀕𑁆𑀕 𑀓𑀭𑁂𑀢𑀲𑁆𑀲, 𑀤𑀼𑀚𑁆𑀚𑀦𑁄 𑀓𑀺𑀁 𑀓𑀭𑀺𑀲𑁆𑀲𑀢𑀺;

𑀅𑀢𑀺𑀡𑁂 𑀧𑀢𑀺𑀢𑁄 𑀅𑀕𑁆𑀕𑀺, 𑀲𑀬𑀫𑁂𑀯 𑀧𑀲𑀫𑁆𑀪𑀢𑀺.

𑀲𑀬𑀫𑁂𑀯 ¶ 𑀲𑀓𑀢𑁆𑀢𑀸𑀦𑀁, 𑀫𑀘𑁆𑀘𑀼𑀩𑁆𑀪𑀬𑁂𑀦 𑀢𑀘𑁆𑀙𑀢𑀼;

𑀫𑀸𑀜𑁆𑀜𑁂 𑀢𑀘𑁆𑀙𑀢𑀼 𑀤𑁄𑀲𑁂𑀦, 𑀓𑀺𑀫𑀢𑁆𑀣𑀁 𑀅𑀜𑁆𑀜𑀢𑀘𑁆𑀙𑀦𑀁.

𑀫𑀸𑀜𑁆𑀜𑁂 𑀢𑀘𑁆𑀙 𑀢𑀼𑀤𑁄𑀲𑁂𑀦, 𑀦𑀲𑁂𑀬𑁆𑀬𑁄 𑀅𑀜𑁆𑀜𑀢𑀘𑁆𑀙𑀦𑀁;

𑀫𑀸𑀜𑁆𑀜𑁄 𑀢𑀁 𑀅𑀳𑀺𑀩𑁆𑀬𑀕𑁆𑀖𑁂𑀯, 𑀤𑁄𑀫𑀦𑀲𑁆𑀲𑁂𑀦 𑀪𑀸𑀬𑀢𑀼.

𑀦𑀺𑀲𑁆𑀲𑀸𑀬 ¶ 𑀕𑀭𑀼𑀓𑀸𑀢𑀩𑁆𑀩𑀁, 𑀩𑀳𑀽𑀦𑀁 𑀧𑀸𑀧𑀫𑁄𑀘𑀦𑀁;

𑀅𑀘𑀸𑀧𑀮𑁆𑀮𑁂𑀦 𑀲𑀦𑁆𑀢𑁂𑀦, 𑀕𑀭𑀼𑀓𑀸𑀢𑀩𑁆𑀩𑀢𑀁 𑀯𑀚𑁂.

𑀦𑀺𑀲𑁆𑀲𑀸𑀬 𑀕𑀭𑀼𑀓𑀸𑀢𑀩𑁆𑀩𑀁, 𑀩𑀳𑀽𑀦𑀁 𑀧𑀼𑀜𑁆𑀜𑀯𑀟𑁆𑀠𑀦𑀁;

𑀕𑀭𑀼𑀓𑀸𑀢𑀩𑁆𑀩𑀢𑀁 𑀕𑀘𑁆𑀙𑁂, 𑀥𑀻𑀢𑀺𑀬𑀸 𑀲𑀻𑀮 𑀕𑀼𑀢𑁆𑀢𑀺𑀬𑀸.

𑀲𑀦𑁆𑀢𑀁 ¶ 𑀳𑀺 𑀲𑀻𑀮𑀯𑀁 𑀥𑀻𑀢𑀺𑀁, 𑀳𑀺𑀭𑁄𑀢𑁆𑀢𑀧𑁆𑀧𑁂𑀦 𑀪𑀸𑀬𑀢𑀺;

𑀤𑀼𑀚𑁆𑀚𑀦𑀁 𑀤𑁄𑀫𑀦𑀲𑁆𑀲𑁂𑀦, 𑀅𑀳𑀺𑀩𑁆𑀬𑀕𑁆𑀖𑁂𑀯 𑀪𑀸𑀬𑀢𑀺.

𑀦𑀨𑀭𑀼𑀲𑀸𑀬 𑀯𑀸𑀘𑀸𑀬, 𑀅𑀜𑁆𑀜𑁂 𑀤𑀫𑁂𑀬𑁆𑀬 𑀧𑀡𑁆𑀟𑀺𑀢𑁄;

𑀅𑀢𑁆𑀢𑀸𑀦𑀁𑀯 𑀤𑀫𑁂𑀢𑁆𑀯𑀸𑀦, 𑀅𑀜𑁆𑀜𑁂 𑀲𑀡𑁆𑀳𑁂𑀦 𑀑𑀯𑀤𑁂.

𑀘𑀺𑀢𑁆𑀢𑁂 ¶ 𑀲𑀡𑁆𑀳𑁂 𑀅𑀲𑀡𑁆𑀳𑀸𑀧𑀺, 𑀦𑀯𑀸𑀘𑀸𑀨𑀭𑀼𑀲𑀸 𑀪𑀯𑁂;

𑀢𑀲𑁆𑀫𑀸 𑀑𑀯𑀸 𑀤𑀦𑀸𑀤𑀻𑀲𑀼, 𑀭𑀓𑁆𑀔𑁂𑀬𑁆𑀬 𑀣𑀤𑁆𑀥𑀘𑀺𑀢𑁆𑀢𑀢𑁄.

𑀅𑀢𑁆𑀢𑀸𑀦 𑀫𑁄𑀯𑀤𑀢𑁆𑀣𑀸𑀬, 𑀲𑀺𑀓𑁆𑀔𑁂𑀬𑁆𑀬 𑀩𑀼𑀤𑁆𑀥𑀪𑀸𑀲𑀺𑀢𑀁;

𑀧𑀭𑀫𑁆𑀧𑀺 𑀅𑀦𑀼𑀓𑀫𑁆𑀧𑀸𑀬, 𑀇𑀘𑁆𑀙𑀦𑁆𑀢𑁄 𑀅𑀦𑀼𑀲𑀸𑀲𑀬𑁂.

𑀅𑀜𑁆𑀜𑀁 𑀦𑀦𑀺𑀕𑁆𑀕𑀳𑁂 𑀓𑀺𑀜𑁆𑀘𑀺, 𑀲𑀼𑀢𑁂𑀦 𑀧𑀝𑀺𑀧𑀢𑁆𑀢𑀺𑀬𑀸;

𑀅𑀢𑁆𑀢𑀦𑀺𑀕𑁆𑀕𑀳𑀡𑀁 𑀲𑁂𑀬𑁆𑀬𑁄, 𑀦𑀼𑀦𑁆𑀦𑀫𑁂𑀬𑁆𑀬 𑀚𑀺𑀦𑁄𑀭𑀲𑁄.

𑀦𑀸𑀯𑀻𑀓𑀭𑁂𑀬𑁆𑀬 ¶ 𑀤𑁄𑀲𑀁𑀯𑀸, 𑀮𑁄𑀪𑀁 𑀫𑀸𑀦𑀁 𑀲𑀓𑀁𑀫𑀮𑀁;

𑀫𑀸𑀜𑁆𑀜𑁂 𑀫𑀜𑁆𑀜𑀦𑁆𑀢𑀼 𑀢𑀁 𑀤𑀺𑀲𑁆𑀯𑀸, 𑀘𑀺𑀭𑀧𑁆𑀧𑀩𑁆𑀩 𑀚𑀺𑀢𑁄 𑀦𑀼𑀢𑀺.

𑀓𑀓𑀘𑁂𑀦 𑀢𑁆𑀢𑀙𑁂𑀤𑁂𑀦𑁆𑀢𑁂, 𑀯𑁂𑀭𑀺𑀓𑁂𑀧𑀺𑀦𑀤𑁄𑀲𑀬𑁂;

𑀇𑀘𑁆𑀘𑁄𑀯𑀸𑀤𑀁 𑀫𑀼𑀦𑀺𑀦𑁆𑀤𑀲𑁆𑀲, 𑀲𑀫𑁆𑀧𑀝𑀺𑀘𑁆𑀙 𑀚𑀺𑀦𑁄𑀭𑀲𑁄.

𑀯𑁂𑀭𑀻 ¶ 𑀅𑀘𑁆𑀘𑀼𑀧𑀦𑀸𑀳𑀻𑀧𑀺, 𑀭𑀽𑀧𑁂𑀯 𑀤𑀼𑀓𑁆𑀔𑀓𑀸𑀭𑀓𑁄;

𑀦 𑀢𑁆𑀯 𑀢𑀩𑁆𑀩𑀺𑀲𑀬𑁂 𑀦𑀸𑀫𑁂, 𑀤𑀼𑀓𑁆𑀔𑀁 𑀫𑀸𑀓𑀭𑀺 𑀘𑁂𑀢𑀲𑀺.

𑀯𑁂𑀭𑀻 𑀢𑀺𑀩𑀦𑁆𑀥 𑀯𑁂𑀭𑁄𑀧𑀺, 𑀇𑀳𑁂𑀯 𑀤𑀼𑀓𑁆𑀔𑀓𑀸𑀭𑀓𑁄;

𑀪𑀯𑀦𑁆𑀢𑀭𑀁 𑀦𑀅𑀦𑁆𑀯𑁂𑀢𑀺, 𑀲𑀓𑀫𑁆𑀫𑀼𑀦𑀸 𑀕𑀢𑁄 𑀳𑀺𑀲𑁄.

𑀫𑁂𑀢𑁆𑀢𑀸𑀲𑀻𑀢𑀫𑁆𑀩𑀼𑀲𑁂𑀓𑁂𑀦, 𑀚𑀺𑀦𑁄𑀯𑀸𑀤 𑀫𑀦𑀼𑀲𑁆𑀲𑀭𑀁;

𑀫𑀳𑀸 𑀦𑀢𑁆𑀣 𑀓𑀭𑀁 𑀤𑁄𑀲𑀁, 𑀦𑀺𑀩𑁆𑀩𑀸𑀬𑀢𑀼 𑀲 𑀘𑁂𑀢𑀲𑀺.

𑀙𑀤𑁆𑀤𑀦𑁆𑀢𑁄 ¶ 𑀮𑀼𑀤𑁆𑀤𑀓𑀁 𑀧𑀸𑀧𑀁, 𑀪𑀽𑀭𑀺𑀤𑀢𑁆𑀢𑁄𑀳𑀺 𑀢𑀼𑀡𑁆𑀟𑀺𑀓𑀁;

𑀥𑀫𑁆𑀫𑀧𑀸𑀮𑁄 𑀔𑀫𑀺 𑀢𑀸𑀢𑀁, 𑀓𑀧𑀺𑀦𑁆𑀤𑁄 𑀓𑀦𑁆𑀤𑀭𑁄 𑀧𑀢𑀁.

𑀅𑀲𑀗𑁆𑀔𑁆𑀬𑁂𑀬𑁆𑀬 𑀢𑁆𑀢𑀪𑀸𑀯𑁂𑀲𑀼, 𑀧𑀭𑀯𑀚𑁆𑀚𑀁 𑀢𑀺𑀢𑀺𑀓𑁆𑀔𑀢𑁄;

𑀦𑀸𑀣𑀲𑁆𑀲 𑀧𑀸𑀭𑀫𑀺𑀁 𑀔𑀦𑁆𑀢𑀺𑀁, 𑀲𑀭𑀁 𑀥𑀻𑀭𑁄 𑀢𑀺𑀢𑀺𑀓𑁆𑀔𑀢𑀼.

𑀲𑀸𑀲𑀦𑁂 ¶ 𑀘𑀺𑀭𑀯𑀸𑀲𑁂𑀦, 𑀏𑀯𑀁 𑀦𑀺𑀤𑁆𑀤𑁄𑀲𑀓𑀸 𑀇𑀢𑀺;

𑀢𑀼𑀯𑀁 𑀧𑀝𑀺𑀘𑁆𑀘 𑀫𑀜𑁆𑀜𑀦𑁆𑀢𑀼, 𑀲𑀸𑀲𑀦𑁂 𑀲𑀧𑁆𑀧𑀬𑁄𑀚𑀦𑀁.

𑀲𑀸𑀲𑀦𑁂 𑀘𑀺𑀭 𑀯𑀸𑀲𑀸𑀧𑀺, 𑀫𑀸𑀤𑀺𑀲𑀸𑀯 𑀇𑀫𑁂 𑀇𑀢𑀺;

𑀢𑀫𑀸𑀕𑀫𑁆𑀫 𑀦𑀫𑀜𑁆𑀜𑀦𑁆𑀢𑀼, 𑀲𑀸𑀲𑀦𑁂 𑀦𑀺𑀧𑁆𑀧𑀬𑁄𑀚𑀦𑀁.

𑀤𑁆𑀯𑁂 𑀉𑀲𑁂𑀢𑀻𑀢𑀺 𑀤𑁄𑀲𑁄 𑀲𑁄, 𑀲𑀧𑀭𑀁 𑀤𑀬𑁆𑀳𑀢𑁂 𑀤𑁆𑀯𑀬𑀁;

𑀧𑀳𑀸𑀢𑀩𑁆𑀩𑁄 𑀲 𑀲𑀩𑁆𑀩𑁂𑀲𑀼, 𑀧𑀭𑀢𑁆𑀣 𑀲𑀢𑁆𑀣 𑀫𑀺𑀘𑁆𑀙𑀢𑀸.

𑀧𑀭𑀤𑀺𑀦𑁆𑀦𑁂𑀳𑀺 ¶ 𑀦𑁄𑀆𑀬𑀼, 𑀢𑀺𑀝𑁆𑀞𑀢𑁂 𑀦𑀸𑀢𑁆𑀢𑀦𑁄 𑀯𑀲𑀸;

𑀧𑀭𑀯𑀚𑁆𑀚𑀁 𑀔𑀫𑁂𑀢𑀩𑁆𑀩𑀁, 𑀦𑀲𑀸𑀥𑀼 𑀅𑀜𑁆𑀜𑀯𑀺𑀭𑁄𑀥𑀺𑀢𑁄.

𑀚𑁂𑀕𑀼𑀘𑁆𑀙 ¶ 𑀓𑁆𑀓𑁄𑀲 𑀦𑀺𑀦𑁆𑀤𑀸𑀦𑀺, 𑀩𑀸𑀮𑁄 𑀕𑀡𑁆𑀳𑀸𑀢𑀺 𑀅𑀓𑁆𑀔𑀫𑁄;

𑀔𑀫𑀦𑁆𑀢𑁄𑀢𑀼 𑀦𑀕𑀡𑁆𑀳𑀸𑀢𑀺, 𑀚𑀸𑀦𑀁 𑀚𑁂𑀕𑀼𑀘𑁆𑀙𑀺𑀢𑀸𑀦𑀺𑀢𑀺.

𑀧𑀭𑀤𑀺𑀦𑁆𑀦𑀸𑀦𑀺 𑀯𑀘𑁆𑀘𑀸𑀦𑀺, 𑀧𑀸𑀪𑀢𑀦𑁆𑀢𑀺 𑀦𑀓𑁄𑀘𑀺𑀧𑀺;

𑀕𑀡𑁆𑀳𑁂𑀬𑁆𑀬𑁂𑀯𑀁 𑀤𑀼𑀭𑀼𑀢𑁆𑀢𑀸𑀦𑀺, 𑀅𑀕𑀡𑁆𑀳𑀦𑁆𑀢𑁄 𑀔𑀫𑁂 𑀲𑀢𑁄.

𑀦𑀤𑀺 ¶ 𑀓𑀮𑁆𑀮𑁄𑀮 𑀯𑀺𑀘𑀺𑀬𑁄, 𑀢𑀻𑀭𑀁 𑀧𑀢𑁆𑀯𑀸 𑀲𑀫𑀦𑁆𑀢𑀺𑀥;

𑀲𑀩𑁆𑀩𑁂 𑀉𑀧𑁆𑀧𑀢𑀺𑀢𑀸 𑀤𑁄𑀲𑀸, 𑀔𑀦𑁆𑀢𑀺𑀧𑀢𑁆𑀯𑀸 𑀲𑀫𑀦𑁆𑀢𑀺 𑀢𑁂.

𑀤𑁄𑀲𑀼𑀫𑁆𑀫𑀢𑁆𑀢𑀓 𑀯𑀸𑀘𑀸𑀬, 𑀦𑀼𑀫𑁆𑀫𑀢𑁆𑀢𑁄 𑀓𑀺𑀁𑀓𑀭𑀺𑀲𑁆𑀲𑀢𑀺;

𑀪𑀯𑁂 𑀬𑁆𑀬𑀼𑀫𑁆𑀫𑀢𑁆𑀢𑀓𑁄 𑀲𑁄𑀯, 𑀢𑀸𑀤𑀺𑀲𑀁 𑀯𑀘𑀦𑀁 𑀪𑀡𑀁.

𑀓𑁄𑀥𑀦𑁄 𑀅𑀓𑁆𑀔𑀫𑁄 𑀅𑀜𑁆𑀜, 𑀤𑀼𑀝𑁆𑀞𑀲𑀜𑁆𑀜𑀻 𑀪𑀬𑀸𑀮𑀼𑀓𑁄;

𑀕𑀸𑀫𑀫𑀚𑁆𑀛𑁂 𑀅𑀴𑀓𑁆𑀓𑁄𑀯, 𑀢𑀣𑀸 𑀫𑀸𑀳𑁄𑀳𑀺 𑀢𑀁 𑀚𑀳.

𑀧𑀭𑀓𑁆𑀓𑁄𑀲𑀸𑀦𑀺 𑀦𑀺𑀦𑁆𑀤𑀸𑀦𑀺, 𑀢𑀁𑀯 𑀧𑀘𑁆𑀘𑁂𑀦𑁆𑀢𑀺 𑀦𑀸𑀜𑁆𑀜𑀕𑀽;

𑀔𑀺𑀢𑁆𑀢𑀁𑀧𑀁𑀲𑀼𑀯 𑀯𑀸𑀢𑀼𑀤𑁆𑀥𑀁, 𑀕𑀭𑀼𑀓𑀁 𑀓𑀺𑀁 𑀔𑀫𑀸𑀬𑀢𑁂.

𑀅𑀓𑁆𑀓𑁄𑀲𑀦𑁆𑀢𑁄𑀘 ¶ 𑀦𑀺𑀦𑁆𑀤𑀻𑀘, 𑀧𑀻𑀴𑀺𑀢𑁄 𑀲𑀓 𑀓𑀫𑁆𑀫𑀼𑀦𑀸;

𑀇𑀥 𑀧𑁂𑀘𑁆𑀘𑀘 𑀦𑀻𑀘𑁂𑀬𑁆𑀬𑁄, 𑀦𑀁𑀦𑀬𑀁 𑀕𑀡𑁆𑀳𑀺 𑀅𑀓𑁆𑀔𑀫𑁄.

𑀯𑀺𑀓𑀸𑀭𑀸𑀧𑀢𑁆𑀢𑀺 𑀫𑀺𑀘𑁆𑀙𑀦𑁆𑀢𑁄, 𑀯𑁂𑀭𑀻 𑀩𑀳𑀼 𑀫𑀼𑀧𑀓𑁆𑀓𑀫𑀺;

𑀫𑀸𑀫𑀺𑀢𑁆𑀢𑀯𑀲 𑀫𑀦𑁆𑀯𑁂𑀳𑀺, 𑀦𑀺𑀩𑁆𑀩𑀺𑀓𑀸𑀭𑁄 𑀢𑀼𑀯𑀁𑀪𑀯.

𑀫𑁂𑀢𑁆𑀢𑀫𑁆𑀩𑀼𑀦𑀸 𑀲𑀤𑁆𑀤𑁄𑀲𑁄𑀘, 𑀧𑀭𑀤𑁄𑀲𑁄𑀘 𑀲𑀫𑁆𑀫𑀢𑀺;

𑀫𑁂𑀢𑁆𑀢𑀸𑀲𑁂𑀓𑁂𑀦 𑀲𑀩𑁆𑀩𑁂𑀲𑀼, 𑀲𑀩𑁆𑀩𑀢𑁄𑀕𑁆𑀕𑀺𑀁 𑀦𑀺𑀧𑀸𑀭𑀬𑁂.

𑀲𑀤𑁄𑀲 ¶ 𑀧𑀭𑀤𑁄𑀲𑀕𑁆𑀕𑀺𑀁, 𑀲𑀩𑁆𑀩𑀢𑁄 𑀤𑀺𑀲𑀢𑁄 𑀝𑁆𑀞𑀺𑀢𑀁;

𑀫𑁂𑀢𑁆𑀢𑀸 𑀢𑁄𑀬𑁂𑀦 𑀯𑀸𑀭𑁂𑀬𑁆𑀬, 𑀲𑀺𑀬𑀸 𑀦𑀺𑀩𑁆𑀩𑀼𑀢𑀺 𑀲𑀩𑁆𑀩𑀥𑀺.

𑀦𑀕𑀫𑁂 𑀅𑀢𑁆𑀢𑀦𑁄 𑀅𑀕𑁆𑀕𑀺𑀁, 𑀧𑀭𑀕𑁆𑀕𑀺𑀁𑀯𑀸𑀧𑀺 𑀦𑀸𑀕𑀫𑁂;

𑀫𑁂𑀢𑁆𑀢𑀫𑁆𑀩𑀼𑀦𑀸𑀯 𑀦𑀺𑀩𑁆𑀩𑀸𑀢𑀼, 𑀲𑀧𑀭𑀕𑁆𑀕𑀺 𑀤𑁆𑀯𑀬𑀁 𑀪𑀼𑀲𑀁.

𑀕𑀼𑀡𑀻 ¶ 𑀕𑀼𑀡𑀻 𑀦𑀦𑁆𑀤𑀺𑀦𑁆𑀤𑀸𑀬, 𑀧𑀲𑀁𑀲𑀸𑀬 𑀕𑀼𑀡𑀻 𑀕𑀼𑀡𑀻;

𑀦𑀺𑀦𑁆𑀤𑀁𑀦𑀺𑀦𑁆𑀤𑀁 𑀦𑀓𑀼𑀧𑁆𑀧𑁂𑀬𑁆𑀬, 𑀦𑀲𑀸𑀤𑀺𑀬𑁂 𑀣𑀼𑀢𑀺𑀁 𑀣𑀼𑀢𑀺𑀁.

𑀕𑀼𑀡𑀁 𑀦𑀺𑀦𑁆𑀤𑀸𑀬 𑀦𑀸𑀲𑁂𑀢𑀼𑀁, 𑀦𑀲𑀓𑁆𑀓𑀸 𑀓𑁄𑀘𑀺 𑀓𑀼𑀲𑁆𑀲𑀓𑁄;

𑀯𑀟𑁆𑀠𑁂𑀢𑀼𑀁𑀯𑀸 𑀧𑀲𑀁𑀲𑀸𑀬, 𑀕𑀭𑀼𑀁𑀓𑀭𑁂 𑀦 𑀢𑀁𑀤𑁆𑀯𑀬𑀁.

𑀤𑁄𑀲𑀩𑁆𑀪𑀸 ¶ 𑀫𑀮 𑀲𑀜𑁆𑀙𑀦𑁆𑀦𑁄, 𑀫𑁂𑀢𑁆𑀢𑀸𑀘𑀦𑁆𑀤𑁄 𑀦 𑀭𑁄𑀘𑀢𑀺;

𑀢𑀁𑀫𑀼𑀢𑁆𑀢𑀲𑁆𑀲 𑀢𑀼 𑀏𑀢𑀲𑁆𑀲, 𑀅𑀢𑀺𑀲𑁆𑀲𑀬 𑀧𑀪𑀸𑀯𑀢𑁄.

𑀲𑀼 𑀲𑀼𑀢𑁆𑀢 𑀩𑀼𑀤𑁆𑀥 𑀲𑀼𑀧𑀺𑀦𑀸, 𑀤𑁆𑀯𑁂𑀧𑀺𑀬𑀸 𑀕𑀼𑀢𑁆𑀢𑀺 𑀦𑀸𑀓𑁆𑀓𑀫𑁄;

𑀲𑀫𑀸𑀥𑀺 𑀲𑀼𑀫𑀼𑀔𑀸 𑀫𑀼𑀴𑁆𑀳𑀸, 𑀩𑁆𑀭𑀳𑁆𑀫𑀸 𑀢𑁆𑀬𑁂𑀓𑀸 𑀤𑀲 𑀕𑁆𑀕𑀼𑀡𑀸.

𑀲𑀻𑀢𑀁 ¶ 𑀓𑀭𑁄𑀢𑀼 𑀫𑁂𑀢𑁆𑀢𑀸𑀬, 𑀘𑀓𑁆𑀔𑀼𑀁 𑀮𑀸𑀪𑁂𑀢𑀼 𑀧𑀜𑁆𑀜𑀸𑀬;

𑀫𑀸𑀓𑀸𑀲𑀺𑀦𑀺𑀧𑁆𑀧𑀪𑁂 𑀘𑀜𑁆𑀜𑁂, 𑀘𑀦𑁆𑀤𑁄 𑀳𑁄𑀳𑀺 𑀕𑀢𑁂𑀕𑀢𑁂.

𑀤𑀽𑀭𑀸𑀲𑀦𑁆𑀦𑁂𑀲𑀼 ¶ 𑀲𑀩𑁆𑀩𑁂𑀲𑀼, 𑀫𑁂𑀢𑁆𑀢𑀁 𑀧𑁂𑀲𑁂𑀢𑀼 𑀧𑀸𑀪𑀢𑀁;

𑀥𑀫𑁆𑀫𑀁 𑀤𑁂𑀲𑁂𑀢𑀼 𑀧𑀢𑁆𑀢𑀸𑀦𑀁, 𑀘𑀦𑁆𑀤𑁄 𑀳𑁄𑀳𑀺 𑀕𑀢𑁂𑀕𑀢𑁂.

𑀲𑀫𑁆𑀧𑀢𑁆𑀢𑀸𑀦𑀁 𑀫𑀮𑀁 𑀥𑁄𑀯, 𑀲𑀻𑀢𑀁𑀓𑀭𑁂 𑀲𑀤𑀸𑀤𑀬𑁄;

𑀉𑀘𑁆𑀘𑀦𑀻𑀘𑁂 𑀦𑀯𑀺𑀲𑁂𑀲𑁂, 𑀚𑀮𑀲𑁆𑀲𑀫𑁄 𑀕𑀢𑁂𑀕𑀢𑁂.

𑀅𑀲𑀅𑀲𑁆𑀲𑀢𑁂𑀲𑀼 ¶ 𑀨𑀼𑀝𑁆𑀞𑁂𑀲𑀼, 𑀮𑁄𑀓𑀥𑀫𑁆𑀫𑁂𑀲𑀼 𑀅𑀝𑁆𑀞𑀲𑀼;

𑀧𑀢𑀺𑀝𑁆𑀞𑁄 𑀦𑀺𑀩𑁆𑀩𑀺𑀓𑀸𑀭𑁄 𑀢𑁆𑀯𑀁, 𑀧𑀣𑀯𑀻𑀲𑀤𑀺𑀲𑁄 𑀪𑀯.

𑀦𑀸𑀓𑀸𑀲𑀺 𑀓𑀮𑀳𑀁 𑀲𑀺𑀮𑀸, 𑀲𑀤𑀸 𑀓𑁂𑀦𑀘𑀺 𑀦𑀺𑀘𑁆𑀘𑀮𑀸;

𑀫𑁂𑀢𑁆𑀢𑀸𑀬𑀦𑁆𑀢𑁄 𑀔𑀫𑀸𑀬𑀦𑁆𑀢𑁄, 𑀫𑀳𑀸𑀲𑀺𑀮𑀁 𑀕𑀼𑀭𑀼𑀁𑀓𑀭𑁂.

𑀲𑀺𑀮𑀸𑀯 ¶ 𑀲𑀻𑀮𑀯𑀸 𑀳𑁄𑀢𑀼, 𑀤𑀼𑀭𑀼𑀢𑁆𑀢𑀸𑀦𑀺 𑀢𑀺𑀢𑀺𑀓𑁆𑀔𑀢𑀼;

𑀧𑀘𑁆𑀘𑀼𑀢𑁆𑀢𑁂 𑀤𑁄𑀲𑀲𑀁𑀯𑀟𑁆𑀠𑁄, 𑀅𑀦𑀼𑀢𑁆𑀢𑁄𑀯 𑀧𑀲𑀫𑁆𑀪𑀢𑀺.

𑀲𑀩𑁆𑀩𑁂 𑀅𑀳𑀁𑀯 𑀇𑀘𑁆𑀙𑀦𑁆𑀢𑀺, 𑀲𑀢𑁆𑀢𑀸 𑀲𑀼𑀔𑀦𑁆𑀢𑀺 𑀜𑀸𑀢𑀼𑀦;

𑀪𑀸𑀯𑁂𑀬𑁆𑀬 𑀓𑀫𑀢𑁄 𑀫𑁂𑀢𑁆𑀢𑀁, 𑀧𑀺𑀬 𑀫𑀚𑁆𑀛𑀢𑁆𑀢 𑀯𑁂𑀭𑀺𑀓𑁂.

𑀲𑀩𑁆𑀩𑁂 ¶ 𑀢𑀲𑀦𑁆𑀢𑀺 𑀤𑀡𑁆𑀟𑀲𑁆𑀲, 𑀲𑀩𑁆𑀩𑁂 𑀪𑀸𑀬𑀦𑁆𑀢𑀺 𑀫𑀘𑁆𑀘𑀼𑀦𑁄;

𑀅𑀢𑁆𑀢𑀸𑀦𑀁 𑀉𑀧𑀫𑀁 𑀓𑀢𑁆𑀯𑀸, 𑀦𑀳𑀦𑁂𑀬𑁆𑀬 𑀦𑀖𑀸𑀢𑀬𑁂.

𑀅𑀯𑁂𑀭𑀸 ¶ 𑀩𑁆𑀬𑀸𑀧𑀚𑁆𑀚𑀸 𑀦𑀻𑀖𑁄, 𑀲𑀼𑀔𑀻 𑀘𑀲𑁆𑀲𑀁 𑀅𑀳𑀁𑀯 𑀫𑁂;

𑀳𑀺𑀢𑀓𑀸𑀫𑀸 𑀢𑀣𑀸 𑀅𑀲𑁆𑀲𑀼, 𑀫𑀚𑁆𑀛𑀢𑁆𑀢𑀸 𑀯𑁂𑀭𑀺𑀦𑁄𑀧𑀺𑀘.

𑀫𑀸𑀢𑀭𑁄 ¶ 𑀪𑀸𑀢𑀭𑁄 𑀜𑀸𑀢𑀻, 𑀤𑀸𑀬𑀓𑁄 𑀧𑀸𑀲𑀓𑀸𑀧𑀺𑀘;

𑀲𑀼𑀔𑀻𑀳𑁄𑀦𑁆𑀢𑀽𑀢𑀺 𑀪𑀸𑀯𑁂𑀬𑁆𑀬, 𑀘𑀚𑁂 𑀢𑁂𑀲𑀼𑀘 𑀮𑀕𑁆𑀕𑀦𑀁.

𑀤𑁄𑀲𑁄 𑀫𑁂𑀢𑁆𑀢𑀸𑀬 𑀤𑀽𑀭𑀸𑀭𑀺, 𑀢𑀡𑁆𑀳𑀸 𑀆𑀲𑀦𑁆𑀦 𑀯𑁂𑀭𑀺𑀓𑀸;

𑀢𑀡𑁆𑀳𑀁 𑀧𑀺𑀬𑁂𑀲𑀼 𑀯𑀸𑀭𑁂𑀬𑁆𑀬, 𑀤𑁄𑀲𑀁 𑀯𑁂𑀭𑀻𑀲𑀼 𑀫𑁂𑀢𑁆𑀢𑀺𑀓𑁄.

𑀏𑀓𑀼𑀤𑁆𑀤𑁂𑀲𑁂 ¶ 𑀓𑀓𑀫𑁆𑀫𑀸𑀘, 𑀲𑀺𑀲𑁆𑀲𑀸 𑀆𑀘𑀭𑀺𑀬𑀸 𑀲𑀼𑀔𑀻;

𑀳𑁄𑀦𑁆𑀢𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀘, 𑀢𑁂𑀘 𑀜𑁆𑀜𑁄𑀜𑁆𑀜 𑀳𑀺𑀢𑀸𑀯𑀳𑀸.

𑀭𑀸𑀚𑀸𑀦𑁄𑀘 𑀅𑀫𑀘𑁆𑀘𑀸𑀘, 𑀕𑀸𑀫𑁂 𑀇𑀲𑁆𑀲𑀭𑀺𑀬𑀸 𑀲𑀼𑀔𑀻;

𑀪𑀯𑀦𑁆𑀢𑀼 𑀤𑁂𑀯𑀢𑀸𑀬𑁄𑀘, 𑀢𑁂𑀳𑀺 𑀲𑀼𑀭𑀓𑁆𑀔𑀺𑀢𑁄 𑀲𑀼𑀔𑁄.

𑀭𑀝𑁆𑀞 ¶ 𑀧𑀺𑀡𑁆𑀟𑁂𑀦 𑀚𑀻𑀯𑀸𑀫, 𑀭𑀝𑁆𑀞𑀯𑀸𑀲𑀻 𑀲𑀼𑀔𑀦𑁆𑀢𑀼𑀢𑀺;

𑀪𑀸𑀯𑁂𑀬𑁆𑀬𑁂𑀯𑀁 𑀅𑀫𑁄𑀖𑀁𑀯, 𑀭𑀝𑁆𑀞𑀧𑀺𑀡𑁆𑀟𑀁 𑀲𑀼𑀪𑀼𑀜𑁆𑀚𑀢𑀺.

𑀆𑀧𑀸𑀬𑀺𑀓𑀸 𑀩𑀳𑀽 𑀲𑀦𑁆𑀢𑀺, 𑀫𑀸𑀢𑀸𑀧𑀺𑀢𑀸𑀤𑀺 𑀧𑀼𑀩𑁆𑀩𑀓𑀸;

𑀢𑁂𑀘𑀜𑁆𑀜𑁂𑀘 𑀲𑀼𑀔𑀻𑀦𑀻𑀖𑀸, 𑀲𑁆𑀲𑁆𑀯 𑀩𑁆𑀬𑀸𑀧𑀚𑁆𑀚𑀸 𑀅𑀯𑁂𑀭𑀺𑀦𑁄.

𑀲𑀢𑁆𑀢𑀸 ¶ 𑀪𑀽𑀢𑀸𑀘 𑀧𑀸𑀡𑀸𑀘, 𑀧𑀼𑀕𑁆𑀕𑀮𑀸 𑀅𑀢𑁆𑀢𑀪𑀸𑀯𑀺𑀓𑀸;

𑀣𑀻 𑀧𑀽 𑀭𑀺𑀬𑀸 𑀦𑀭𑀺𑀬𑀸𑀘, 𑀤𑁂𑀯𑀸𑀦𑀭𑀸 𑀦𑀺𑀧𑀸𑀢𑀺𑀓𑀸.

𑀅𑀯𑁂𑀭𑀸 𑀳𑁄𑀦𑁆𑀢𑀼 𑀩𑁆𑀬𑀸𑀧𑀚𑁆𑀚𑀸, 𑀅𑀦𑀻𑀖𑀸𑀘 𑀲𑀼𑀔𑀻 𑀇𑀫𑁂;

𑀅𑀢𑁆𑀢𑀸𑀦𑀁 𑀧𑀭𑀺𑀳𑀸𑀭𑀦𑁆𑀢𑀼, 𑀘𑀢𑀼𑀥𑀸 𑀇𑀢𑀺 𑀪𑀸𑀯𑀬𑁂.

𑀧𑀼𑀭𑀢𑁆𑀣𑀺𑀫𑀸𑀬 ¶ 𑀤𑀺𑀲𑀸𑀬, 𑀲𑀩𑁆𑀩𑁂𑀲𑀢𑁆𑀢𑀸 𑀅𑀯𑁂𑀭𑀺𑀦𑁄;

𑀅𑀩𑁆𑀬𑀸𑀧𑀚𑁆𑀚𑀸 𑀲𑀼𑀔𑀻𑀦𑀻𑀖𑀸, 𑀳𑁄𑀦𑁆𑀢𑀽𑀢𑀺 𑀢𑀸𑀯 𑀪𑀸𑀯𑀬𑁂.

𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬, 𑀲𑀩𑁆𑀩𑁂𑀧𑀸𑀡𑀸𑀢𑀺𑀆𑀤𑀺𑀦𑀸;

𑀤𑁆𑀯𑀸𑀤𑀲𑀓𑁆𑀔𑀢𑁆𑀢𑀼𑀁 𑀪𑀸𑀯𑁂𑀬𑁆𑀬, 𑀲𑁂𑀲𑀸𑀲𑀼𑀧𑀺 𑀅𑀬𑀁𑀦𑀬𑁄.

𑀘𑀢𑀼𑀤𑁆𑀤𑀺𑀲𑀸 ¶ 𑀦𑀼𑀤𑀺𑀲𑀸 𑀥𑁄, 𑀉𑀤𑁆𑀥𑀁 𑀲𑀢𑁆𑀢𑀸𑀘 𑀧𑀸𑀡𑀺𑀦𑁄;

𑀪𑀽𑀢𑀸𑀘 𑀧𑀼𑀕𑁆𑀕𑀮𑀸 𑀅𑀢𑁆𑀢, 𑀪𑀸𑀯𑀻 𑀲𑀩𑁆𑀩𑁂 𑀣𑀺 𑀧𑀽𑀭𑀺𑀲𑀸.

𑀅𑀭𑀺𑀬𑀸 𑀅𑀭𑀺𑀬𑀸 𑀤𑁂𑀯𑀸, 𑀦𑀭𑀸𑀘 𑀯𑀺𑀦𑀺𑀧𑀸𑀢𑀺𑀓𑀸;

𑀅𑀯𑁂𑀭𑀸 𑀩𑁆𑀬𑀸𑀧𑀚𑁆𑀚𑀸 𑀦𑀻𑀖𑀸, 𑀲𑀼𑀔𑀢𑁆𑀢𑀸𑀘 𑀪𑀯𑀦𑁆𑀢𑀼 𑀢𑁂.

𑀘𑀢𑀼𑀤𑁆𑀤𑀺𑀲𑀸 ¶ 𑀦𑀼𑀤𑀺𑀲𑀸 𑀥𑁄, 𑀉𑀤𑁆𑀥𑀦𑁆𑀢𑀺 𑀤𑀲𑀓𑁂𑀤𑀺𑀲𑀺;

𑀤𑁆𑀯𑀸𑀤𑀲𑁂 𑀢𑁂 𑀧𑀭𑀺𑀘𑁆𑀙𑀺𑀚𑁆𑀚, 𑀪𑀸𑀯𑁂𑀬𑁆𑀬 𑀧𑀼𑀕𑁆𑀕𑀮𑁂 𑀩𑀼𑀥𑁄.

𑀫𑁂𑀢𑁆𑀢𑀸 ¶ 𑀯𑀲𑁆𑀲𑁂𑀦 𑀢𑁂𑀫𑁂𑀢𑀼, 𑀧𑀚𑁆𑀚𑀼𑀦𑁆𑀢𑁄𑀯𑀺𑀬 𑀲𑀩𑁆𑀩𑀥𑀺;

𑀫𑀸𑀓𑀺𑀜𑁆𑀘𑀺 𑀧𑀭𑀺𑀯𑀚𑁆𑀚𑁂𑀳𑀺, 𑀏𑀯𑀁 𑀫𑁂𑀢𑁆𑀢𑀸 𑀲𑀼𑀪𑀸𑀯𑀺𑀢𑀸.

𑀧𑀜𑁆𑀘𑀸 𑀦𑁄𑀥𑀺 𑀲𑀢𑁆𑀢𑁄𑀥𑀺𑀲𑀸, 𑀲𑀺𑀬𑀼𑀁 𑀤𑁆𑀯𑀸𑀤𑀲𑀧𑀼𑀕𑁆𑀕𑀮𑀸;

𑀦𑁆𑀢𑀼 𑀘𑀢𑀽𑀳𑁂𑀲𑀼 𑀪𑀸𑀯𑁂𑀢𑁆𑀯𑀸, 𑀅𑀝𑁆𑀞𑀢𑀸𑀮𑀻𑀲𑀓𑀸 𑀲𑀺𑀬𑀼𑀁.

𑀤𑀲𑀓𑁂𑀤𑀺𑀲𑀺 ¶ 𑀢𑀸𑀫𑁂𑀢𑁆𑀢𑀸, 𑀘𑀢𑀼𑀲𑁆𑀲𑀢 𑀅𑀲𑀻𑀢𑀺𑀬𑁄;

𑀅𑀝𑁆𑀞𑀢𑀸𑀮𑀻𑀲𑀸𑀳𑀺 𑀧𑀜𑁆𑀘, 𑀲𑀢𑀸 𑀝𑁆𑀞𑀯𑀻𑀲 𑀲𑀸𑀥𑀺𑀓𑀸.

𑀤𑀼𑀓𑁆𑀔𑀺𑀢𑁂 ¶ 𑀓𑀭𑀼𑀡𑀁 𑀩𑁆𑀭𑀽𑀳𑁂, 𑀫𑀼𑀤𑀺𑀢𑀁 𑀲𑀼𑀔𑀺𑀢𑁂 𑀚𑀦𑁂;

𑀫𑁂𑀢𑁆𑀢𑀸𑀘𑁂𑀯 𑀉𑀧𑁂𑀓𑁆𑀔𑀸𑀘, 𑀉𑀪𑁄 𑀉𑀪𑁄𑀲𑀼 𑀪𑀸𑀯𑀺𑀢𑀸.

𑀩𑁆𑀭𑀳𑁆𑀫𑀯𑀸𑀲𑀻𑀢𑀺 𑀯𑀢𑁆𑀢𑀩𑁆𑀩𑁄, 𑀢𑁂𑀲𑁆𑀯𑀜𑁆𑀜𑀢𑀭 𑀯𑀸𑀲𑀺𑀢𑁄;

𑀕𑀦𑁆𑀥𑀪𑀽𑀢𑁂𑀲𑀼 𑀲𑁄 𑀮𑁄𑀓𑁂, 𑀩𑁆𑀭𑀳𑁆𑀫𑀸𑀯𑀺𑀬 𑀯𑀺𑀭𑁄𑀘𑀢𑀺.

𑀅𑀧𑁆𑀧𑀫𑀸𑀤𑀸𑀯𑀳 𑀧𑀓𑀺𑀡𑁆𑀡𑀓𑀦𑀺𑀤𑁆𑀤𑁂𑀲

𑀲𑀁𑀯𑀺𑀚𑁆𑀚𑀦𑁆𑀢𑀺 ¶ 𑀥 𑀮𑁄𑀓𑀲𑁆𑀫𑀺𑀁,

𑀕𑀳𑁂𑀢𑁆𑀯𑀸 𑀧𑀢𑁆𑀢 𑀫𑀼𑀜𑁆𑀙𑁄 𑀬𑁄,

𑀲𑀼𑀓𑀼𑀮𑀸𑀘 𑀢𑀤𑀼𑀧𑀕𑀸, 𑀓𑀸𑀫𑀪𑁄𑀕𑀸 𑀦𑀧𑁂𑀓𑁆𑀔𑀺𑀦𑁄;

𑀦 𑀪𑀬𑀝𑁆𑀝𑀸 𑀦 𑀇𑀡𑀝𑁆𑀝𑀸, 𑀦𑁂𑀯 𑀆𑀚𑀻𑀯 𑀓𑀸𑀭𑀡𑀸.

𑀦𑀸𑀮𑀁𑀯 ¶ 𑀕𑀺𑀳𑀺𑀦𑀸 𑀩𑁆𑀭𑀳𑁆𑀫, 𑀘𑀭𑀺𑀬𑀸𑀬 𑀅𑀔𑀡𑁆𑀟𑀺𑀢𑀁;

𑀖𑀭𑀸𑀯𑀸𑀲𑁄 𑀢𑀺𑀲𑀫𑁆𑀩𑀸𑀥𑁄, 𑀧𑀩𑁆𑀩𑀚𑁆𑀚𑀸𑀯 𑀦𑀺𑀭𑀸𑀮𑀬𑀸.

𑀪𑀯𑀧𑀗𑁆𑀓𑀸 ¶ 𑀧𑀫𑀼𑀘𑁆𑀘𑀸𑀫, 𑀢𑀺𑀯𑀺𑀢𑁆𑀢𑀺𑀡𑁆𑀡𑀸 𑀪𑀬𑀸𑀦𑀓𑀸;

𑀧𑀝𑀺𑀧𑀢𑁆𑀢𑀺 𑀬𑀺𑀫𑀸𑀬𑀸𑀢𑀺, 𑀓𑀢𑁆𑀯𑀸 𑀢𑀤𑀼𑀧𑀕𑀸 𑀇𑀫𑁂.

𑀉𑀢𑁆𑀢𑀺𑀝𑁆𑀞𑁂 𑀦𑀧𑁆𑀧𑀫𑀚𑁆𑀚𑁂𑀬𑁆𑀬, 𑀥𑀫𑁆𑀫𑀁 𑀘𑀭𑀺𑀢𑀁 𑀲𑀼𑀘𑀭𑁂;

𑀥𑀫𑁆𑀫𑀘𑀸𑀭𑀻 𑀲𑀼𑀔𑀁𑀲𑁂𑀢𑀺, 𑀅𑀲𑁆𑀫𑀺𑀁𑀮𑁄𑀓𑁂 𑀧𑀭𑀫𑁆𑀳𑀺𑀘.

𑀲𑁆𑀯𑀸𑀕𑀢𑀸 ¶ 𑀯𑀢 𑀢𑁂𑀪𑀺𑀓𑁆𑀔𑀽, 𑀧𑀢𑁆𑀢𑀸 𑀲𑀫𑁆𑀩𑀼𑀤𑁆𑀥𑀧𑀼𑀢𑁆𑀢 𑀢𑀁;

𑀕𑀺𑀳𑀺 𑀩𑀦𑁆𑀥𑀦 𑀧𑀼𑀘𑁆𑀙𑀺𑀚𑁆𑀚, 𑀲𑀼𑀔𑀺𑀢𑀸 𑀲𑀸𑀲𑀦𑁂 𑀭𑀢𑀸.

𑀓𑀢𑀧𑀼𑀜𑁆𑀜 𑀯𑀺𑀲𑁂𑀲𑀸𑀯, 𑀏𑀢𑁂 𑀲𑀼𑀮𑀤𑁆𑀥 𑀤𑀼𑀮𑁆𑀮𑀪𑀸;

𑀙𑀝𑁆𑀝𑁂𑀢𑁆𑀯𑀸𑀧𑀺 𑀫𑀳𑀸𑀭𑀚𑁆𑀚𑀁, 𑀦𑁂𑀤𑀺𑀲𑀁 𑀮𑀤𑁆𑀥 𑀫𑀜𑁆𑀜𑀤𑀸.

𑀲𑁆𑀯𑀸𑀕𑀢𑀸 ¶ 𑀲𑀼𑀕𑀢𑀻 𑀳𑁄𑀦𑁆𑀢𑀼, 𑀫𑀸𑀤𑀼𑀕𑁆𑀕𑀢𑀻 𑀧𑀫𑀸𑀤𑀺𑀦𑁄;

𑀤𑀼𑀲𑁆𑀲𑀻𑀮𑀸 𑀘𑁂 𑀕𑀫𑀺𑀲𑁆𑀲𑀦𑁆𑀢𑀺, 𑀅𑀧𑀸𑀬𑀁 𑀢𑀺𑀪𑀬𑀸𑀦𑀓𑀁.

𑀕𑀺𑀳𑀺𑀪𑁄𑀕𑀸 ¶ 𑀧𑀭𑀻𑀳𑀺𑀦𑁆𑀦𑁄, 𑀲𑀸𑀫𑀜𑁆𑀜𑀢𑁆𑀢𑀜𑁆𑀘 𑀤𑀽𑀪𑀢𑁄;

𑀧𑀭𑀺𑀥𑀁𑀲𑀫𑀸𑀦𑁄 𑀧𑀓𑀺𑀭𑁂𑀢𑀺, 𑀙𑀯𑀸𑀮𑀸𑀢𑀁𑀯 𑀦𑀲𑁆𑀲𑀢𑀺.

𑀓𑀼𑀲𑁄 𑀬𑀣𑀸 𑀤𑀼𑀕𑁆𑀕𑀳𑀺𑀢𑁄, 𑀳𑀢𑁆𑀣𑀫𑁂𑀯𑀸 𑀦𑀼𑀓𑀦𑁆𑀢𑀢𑀺;

𑀲𑀸𑀫𑀜𑁆𑀜𑀁 𑀤𑀼𑀧𑁆𑀧𑀭𑀸𑀫𑀝𑁆𑀞𑀁, 𑀦𑀺𑀭𑀬𑀸 𑀬𑀼𑀧 𑀓𑀟𑁆𑀠𑀢𑀺.

𑀬𑀁𑀓𑀺𑀜𑁆𑀘𑀺 ¶ 𑀲𑀺𑀣𑀺𑀮𑀁 𑀓𑀫𑁆𑀫𑀁, 𑀲𑀁𑀓𑀺𑀮𑀺𑀝𑁆𑀞𑀜𑁆𑀘 𑀬𑀁𑀓𑀢𑀁;

𑀲𑀗𑁆𑀓𑀲𑁆𑀲𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦𑀢𑀁𑀳𑁄𑀢𑀺 𑀫𑀳𑀧𑁆𑀨𑀮𑀁.

𑀓𑀭𑀺𑀬𑀸𑀘𑁂 𑀓𑀭𑀺𑀬𑀸 𑀯𑁂𑀦𑀁, 𑀤𑀴𑁆𑀳𑀫𑁂𑀦𑀁 𑀧𑀭𑀓𑁆𑀓𑀫𑁂;

𑀲𑀺𑀣𑀺𑀮𑁄𑀳𑀺 𑀧𑀭𑀺𑀩𑁆𑀩𑀚𑁄, 𑀪𑀺𑀬𑁆𑀬𑁄 𑀆𑀓𑀺𑀭𑀢𑁂 𑀭𑀚𑀁.

𑀇𑀢𑀺 ¶ 𑀯𑀼𑀢𑁆𑀢𑀁 𑀫𑀼𑀦𑀺𑀦𑁆𑀤𑁂𑀦, 𑀦𑀼𑀲𑁆𑀲𑀭𑀁 𑀅𑀦𑀺 𑀯𑀢𑁆𑀢𑀺𑀢𑁄;

𑀲𑀤𑀸 𑀅𑀮𑀺𑀦 𑀘𑀺𑀢𑁆𑀢𑁂𑀦, 𑀘𑀭𑁂𑀬𑁆𑀬 𑀩𑀼𑀤𑁆𑀥𑀲𑀸𑀯𑀓𑁄.

𑀭𑀸𑀕𑀁 𑀅𑀲𑀼𑀪𑀘𑀺𑀦𑁆𑀢𑀸𑀬, 𑀤𑁄𑀲𑀁 𑀫𑁂𑀢𑁆𑀢𑀸𑀬 𑀯𑀸𑀭𑀬𑁂;

𑀫𑀭𑀡𑁂𑀦 𑀥𑀚𑀁𑀫𑀸𑀦𑀁, 𑀲𑀫𑁆𑀩𑀼𑀤𑁆𑀥𑁂 𑀢𑀺𑀓𑁆𑀔 𑀲𑀤𑁆𑀥𑀺𑀓𑁄.

𑀅𑀲𑀼𑀪𑀸 𑀓𑀸𑀫𑀯𑀺𑀢𑀓𑁆𑀓𑀁, 𑀫𑁂𑀢𑁆𑀢𑀸 𑀩𑁆𑀬𑀸𑀧𑀸𑀤 𑀢𑀓𑁆𑀓𑀺𑀢𑀁;

𑀯𑀺𑀳𑀺𑀁𑀲𑀁 𑀓𑀭𑀼𑀡𑀸𑀬𑁂𑀯, 𑀦𑀺𑀯𑀸𑀭𑁂𑀬𑁆𑀬 𑀲𑀤𑀸𑀲𑀢𑁄.

𑀩𑀼𑀤𑁆𑀥𑀸𑀡𑀢𑁆𑀢𑀺 ¶ 𑀲𑀤𑀸𑀢𑀻𑀢𑁄, 𑀫𑀺𑀘𑁆𑀙𑀸𑀯𑀺𑀢𑀓𑁆𑀓 𑀧𑀻𑀴𑀺𑀢𑁄;

𑀧𑀸𑀧𑀥𑀫𑁆𑀫𑁂𑀳𑀺 𑀲𑀁𑀓𑀺𑀡𑁆𑀡𑁄, 𑀲𑁄𑀦𑀺𑀘𑁆𑀘𑀸𑀧𑀸𑀬 𑀕𑀸𑀫𑀺𑀓𑁄.

𑀥𑁄𑀯𑀺𑀢𑁆𑀯𑀸 𑀧𑀢𑁆𑀢𑀺𑀫𑀮𑀸𑀦𑀺, 𑀧𑀼𑀦𑀸𑀢𑀺𑀓𑁆𑀓𑀫 𑀲𑀁𑀯𑀼𑀢𑁄;

𑀫𑀺𑀘𑁆𑀙𑀸𑀯𑀺𑀢𑀓𑁆𑀓 𑀲𑀜𑁆𑀙𑁂𑀤𑀻, 𑀤𑀽𑀭𑁄 𑀅𑀧𑀸𑀬 𑀕𑀸𑀫𑀺𑀢𑁄.

𑀔𑀻𑀡𑀸𑀲𑀯𑀢𑁆𑀢 ¶ 𑀩𑀼𑀤𑁆𑀥𑀢𑁆𑀢𑀁, 𑀦𑀺𑀬𑁆𑀬𑀸𑀦𑀺𑀓 𑀦𑁆𑀢𑀭𑀸 𑀬𑀺𑀓𑀁;

𑀲𑀻𑀳𑀦𑀸𑀤𑀁 𑀘𑀢𑀼𑀝𑁆𑀞𑀸𑀦𑁂, 𑀯𑁂𑀲𑀸𑀭𑀚𑁆𑀚𑁄 𑀚𑀺𑀦𑁄 𑀦𑀤𑀺.

𑀲𑀻𑀮𑀁 ¶ 𑀦𑀺𑀬𑁆𑀬𑀸𑀦𑀺𑀓𑀁 𑀦𑀸𑀫, 𑀆𑀧𑀢𑁆𑀢𑀺 𑀅𑀦𑁆𑀢𑀭𑀸𑀬𑀺𑀓𑀁;

𑀅𑀦𑁆𑀢𑀭𑀸𑀬 𑀫𑀦𑀸𑀧𑀚𑁆𑀚, 𑀦𑀺𑀬𑁆𑀬𑀸𑀦𑁂𑀯 𑀧𑀢𑀺𑀝𑁆𑀞𑀢𑀼.

𑀦𑀺𑀬𑁆𑀬𑀸𑀦𑀺𑀓𑀸𑀘 ¶ 𑀅𑀲𑀼𑀪𑀸, 𑀲𑀼𑀪𑀲𑀜𑁆𑀜𑀸 𑀦𑁆𑀢𑀭𑀸𑀬𑀺𑀓𑀸;

𑀅𑀦𑁆𑀢𑀭𑀸𑀬 𑀫𑀦𑀸𑀧𑀚𑁆𑀚, 𑀦𑀺𑀬𑁆𑀬𑀸𑀦𑁂𑀯 𑀧𑀢𑀺𑀝𑁆𑀞𑀢𑀼.

𑀦𑀸𑀦𑀸𑀧𑀢𑁆𑀢𑀺 ¶ 𑀧𑀓𑀺𑀡𑁆𑀡𑁄𑀧𑀺, 𑀧𑀸𑀭𑀸𑀚𑀺𑀓𑀸 𑀯𑀲𑁂𑀲𑀓𑁄;

𑀲𑁄 𑀫𑀺𑀢𑁆𑀬𑀢𑁆𑀢 𑀧𑀡𑀻𑀥𑀻𑀳𑀺, 𑀮𑀚𑁆𑀚𑀻𑀬𑁂𑀯 𑀯𑀺𑀲𑁄𑀥𑀓𑁄.

𑀲𑀁𑀯𑁂𑀚𑁂𑀢𑁆𑀯𑀸 𑀲𑀼𑀫𑀺𑀢𑁆𑀢𑀺𑀓𑁄;

𑀬𑁄 ¶ 𑀧𑀼𑀩𑁆𑀩𑁂𑀯 𑀧𑀫𑀚𑁆𑀚𑀺𑀢𑁆𑀯𑀸, 𑀧𑀘𑁆𑀙𑀸𑀲𑁄 𑀦𑀧𑁆𑀧𑀫𑀚𑁆𑀚𑀢𑀺;

𑀲𑁄𑀫𑀁 𑀮𑁄𑀓𑀁 𑀧𑀪𑀸𑀲𑁂𑀢𑀺, 𑀅𑀩𑁆𑀪𑀸𑀫𑀼𑀢𑁆𑀢𑁄𑀯𑀘𑀦𑁆𑀤𑀺𑀫𑀸.

𑀥𑀼𑀭𑀁𑀓𑀢𑁆𑀯𑀸 ¶ 𑀥𑀺𑀧𑀢𑀬𑁄, 𑀬𑁄 𑀧𑀼𑀜𑁆𑀜𑁂𑀲𑀼 𑀧𑀭𑀓𑁆𑀓𑀫𑁂;

𑀢𑀲𑁆𑀲 𑀦𑀺𑀬𑁆𑀬𑀸𑀦𑀺𑀓𑀁 𑀓𑀫𑁆𑀫𑀁, 𑀓𑀺𑀁𑀦𑀸𑀫𑀓𑀁 𑀦𑀲𑀺𑀚𑁆𑀛𑀢𑁂.

𑀧𑀘𑁆𑀘𑀢𑁂 ¶ 𑀫𑀼𑀦𑀺𑀦𑁄 𑀪𑀢𑁆𑀢𑀁, 𑀣𑁄𑀓𑀁𑀣𑁄𑀓𑀁 𑀖𑀭𑁂𑀖𑀭𑁂;

𑀧𑀺𑀡𑁆𑀟𑀺𑀓𑀸𑀬𑁂𑀯 𑀚𑀻𑀯𑀦𑁆𑀢𑀼, 𑀫𑀸𑀧𑀚𑁆𑀚𑀦𑁆𑀢𑀼 𑀅𑀦𑁂𑀲𑀦𑀁.

𑀥𑁄𑀯𑁂𑀬𑁆𑀬𑀸 𑀧𑀢𑁆𑀢𑀺𑀫𑀕𑀸𑀦𑀺, 𑀯𑀼𑀝𑁆𑀞𑀸𑀦 𑀤𑁂𑀲𑀦𑀫𑁆𑀩𑀼𑀳𑀺;

𑀲𑀁𑀯𑀭𑀺𑀲𑁆𑀲𑀦𑁆𑀢𑀺 𑀘𑀺𑀢𑁆𑀢𑁂𑀦, 𑀲𑀻𑀮𑀁 𑀥𑁄𑀢𑀲𑁆𑀲 𑀦𑀺𑀫𑁆𑀫𑀮𑀁.

𑀩𑀼𑀤𑁆𑀥𑀸𑀡𑀸𑀢𑀺𑀓𑁆𑀓𑀫𑀸𑀧𑀢𑁆𑀢𑀺 ¶ , 𑀦𑀺𑀕𑁆𑀕𑀳𑁂 𑀭𑀸𑀕𑀤𑁄𑀲𑀓𑁂;

𑀦𑀢𑁆𑀣𑀺 𑀲𑀜𑁆𑀘𑀺𑀘𑁆𑀘 𑀆𑀧𑀢𑁆𑀢𑀺, 𑀮𑀚𑀻𑀯 𑀲𑁄 𑀧𑀯𑀼𑀘𑁆𑀘𑀢𑀺.

𑀯𑀸𑀡𑀺𑀚𑁆𑀚 𑀓𑀲𑀺𑀓𑀸𑀤𑀻𑀳𑀺, 𑀦𑀸𑀳𑀸𑀭𑁂𑀝𑁆𑀞𑀺 𑀥𑀲𑀸𑀲𑀦𑁂;

𑀥𑀼𑀭 𑀤𑁆𑀯𑀬𑀁𑀯 𑀓𑀺𑀘𑁆𑀘𑀁 𑀢𑀁, 𑀦𑀸𑀜𑁆𑀜𑀓𑀺𑀘𑁆𑀘𑁂𑀳𑀺 𑀳𑀸𑀧𑀬𑁂.

𑀦𑀺𑀕𑁆𑀕𑀡𑁆𑀳𑁂𑀬𑁆𑀬 ¶ 𑀲𑀓𑀁𑀘𑀺𑀢𑁆𑀢𑀁, 𑀓𑀺𑀝𑁆𑀞𑀸𑀤𑀺𑀁 𑀯𑀺𑀬 𑀤𑀼𑀧𑁆𑀧𑀲𑀼𑀁;

𑀲𑀢𑀺𑀫𑀸 𑀲𑀫𑁆𑀧𑀚𑀸𑀦𑁄𑀘, 𑀘𑀭𑁂 𑀲𑀩𑁆𑀩𑀺𑀭𑀺𑀬𑀸𑀧𑀣𑁂.

𑀬𑀣𑀸 ¶ 𑀣𑀫𑁆𑀪𑁂 𑀦𑀺𑀩𑀦𑁆𑀥𑁂𑀬𑁆𑀬, 𑀯𑀘𑁆𑀙𑀁 𑀤𑀫𑀁 𑀦𑀭𑁄 𑀇𑀥;

𑀩𑀦𑁆𑀥𑁂𑀬𑁆𑀬𑁂𑀯𑀁 𑀲𑀓𑀁𑀘𑀺𑀢𑁆𑀢𑀁, 𑀲𑀢𑀺𑀬𑀸 𑀭𑀫𑁆𑀫𑀡𑁂 𑀤𑀴𑁆𑀳𑀁.

𑀅𑀥𑀺𑀲𑀻𑀮𑀸𑀥𑀺𑀘𑀺𑀢𑁆𑀢𑀸𑀦𑀁, 𑀅𑀥𑀺𑀧𑀜𑁆𑀜𑀸𑀬 𑀲𑀺𑀓𑁆𑀔𑀦𑀁;

𑀪𑀺𑀓𑁆𑀔𑀼 𑀓𑀺𑀘𑁆𑀘𑀢𑁆𑀢𑀬𑀁 𑀏𑀢𑀁, 𑀓𑀭𑁄𑀦𑁆𑀢𑁄𑀯 𑀲𑀼𑀪𑀺𑀓𑁆𑀔𑀼𑀓𑁄.

𑀧𑀜𑁆𑀘𑀸𑀝𑁆𑀞 ¶ 𑀤𑀲 𑀲𑀻𑀮𑀸𑀦𑀺, 𑀦𑀸𑀥𑀺𑀲𑀻𑀮𑀁 𑀢𑀤𑀼𑀢𑁆𑀢𑀭𑀺;

𑀧𑀸𑀢𑀺𑀫𑁄𑀓𑁆𑀔𑀁 𑀅𑀥𑀺𑀲𑀻𑀮𑀁, 𑀧𑀩𑁆𑀩𑀢𑀸 𑀥𑀺𑀓 𑀫𑁂𑀭𑀼𑀯.

𑀧𑀸𑀢𑀺𑀫𑁄𑀓𑁆𑀔𑀁 ¶ 𑀯𑀺𑀲𑁄𑀥𑁂𑀦𑁆𑀢𑁄, 𑀅𑀧𑁆𑀧𑁂𑀯 𑀚𑀻𑀯𑀺𑀢𑀁 𑀚𑀳𑁂;

𑀧𑀜𑁆𑀜𑀢𑁆𑀢𑀁 𑀮𑁄𑀓𑀦𑀸𑀣𑁂𑀦, 𑀦𑀪𑀺𑀦𑁆𑀤𑁂 𑀲𑀻𑀮𑀲𑀁𑀯𑀭𑀁.

𑀲𑀻𑀮𑁂𑀦𑀸 𑀢𑀺𑀓𑁆𑀓𑀫𑀁 𑀣𑀼𑀮𑁆𑀮𑀁, 𑀧𑀭𑀺𑀬𑀼𑀝𑁆𑀞𑀁 𑀲𑀫𑀸𑀥𑀺𑀦𑀸;

𑀧𑀜𑁆𑀜𑀸𑀬𑀸 𑀦𑀼𑀲𑀬𑀁 𑀲𑀡𑁆𑀳𑀁, 𑀓𑀺𑀮𑁂𑀲𑀁 𑀪𑀺𑀓𑁆𑀔𑀼 𑀪𑀺𑀦𑁆𑀤𑀢𑀺.

𑀲𑀸𑀲𑀦𑀲𑁆𑀲𑀸𑀤𑀺 ¶ 𑀲𑀻𑀮𑀁𑀯, 𑀫𑀚𑁆𑀛𑁂 𑀢𑀲𑁆𑀲 𑀲𑀫𑀸𑀥𑀺𑀯;

𑀧𑀜𑁆𑀜𑀸𑀯 𑀧𑀭𑀺𑀬𑁄𑀲𑀸𑀦𑀁, 𑀓𑀮𑁆𑀬𑀸𑀡𑀸𑀯 𑀇𑀫𑁂𑀢𑀬𑁄.

𑀫𑀳𑀸𑀧𑀼𑀜𑁆𑀜𑁂 ¶ 𑀞𑀺𑀢𑀁 𑀲𑀻𑀮𑀁, 𑀲𑀫𑀸𑀥𑀺 𑀅𑀧𑁆𑀧𑀦𑀸 𑀕𑀢𑀁;

𑀘𑀢𑀼𑀫𑀕𑁆𑀕 𑀬𑀼𑀢𑀸 𑀧𑀜𑁆𑀜𑀸, 𑀏𑀢𑀁 𑀲𑀺𑀓𑁆𑀔𑀢𑁆𑀢𑀬𑀁 𑀫𑀢𑀁.

𑀲𑀻𑀮𑀦𑀮𑀓𑁆𑀔𑀡𑀁 𑀲𑀻𑀮𑀁, 𑀤𑀼𑀲𑁆𑀲𑀻𑀮𑁆𑀬 𑀥𑀁𑀲𑀦𑀁 𑀭𑀲𑀁;

𑀳𑀺𑀭𑁄𑀢𑁆𑀢𑀧𑁆𑀧 𑀧𑀤𑀝𑁆𑀞𑀸𑀦𑀁, 𑀲𑀼𑀘𑀺 𑀧𑀘𑁆𑀘𑀼𑀧𑀝𑁆𑀞𑀸𑀦𑀓𑀁.

𑀲𑀲𑀻𑀮𑀕𑀼𑀢𑁆𑀢𑀺 ¶ 𑀦𑀸𑀣𑁄𑀘, 𑀤𑀼𑀦𑁆𑀦𑀺𑀕𑀳𑁄 𑀯𑀺𑀲𑀸𑀭𑀤𑁄;

𑀥𑀫𑁆𑀫𑀝𑁆𑀞𑀻𑀢𑀻𑀢𑀺 𑀧𑀜𑁆𑀘𑁂𑀢𑁂, 𑀕𑀼𑀡𑀸 𑀯𑁂𑀦𑀬𑀺𑀓𑁂 𑀫𑀢𑀸.

𑀆𑀤𑀺 ¶ 𑀓𑀮𑁆𑀭𑀸𑀡 𑀲𑀁𑀯𑁂𑀤𑀻, 𑀲𑀻𑀮𑀫𑀢𑁆𑀢𑀝𑁆𑀞 𑀪𑀺𑀓𑁆𑀔𑀯𑁄;

𑀉𑀤𑁆𑀥𑀁 𑀓𑀮𑁆𑀬𑀸𑀡 𑀮𑀸𑀪𑀸𑀬, 𑀅𑀮𑀺𑀦𑁄 𑀅𑀦𑀺𑀯𑀢𑁆𑀢𑀺𑀓𑁄.

𑀥𑁄𑀯𑀺𑀢𑁆𑀯𑀸 𑀧𑀢𑁆𑀢𑀺𑀫𑀮𑀸𑀦𑀺, 𑀯𑀼𑀝𑁆𑀞𑀸𑀦 𑀤𑁂𑀲𑀦 𑀫𑁆𑀩𑀼𑀳𑀺;

𑀲𑀼𑀤𑁆𑀥𑀲𑀻𑀮𑁂 𑀞𑀺𑀢𑁄𑀬𑁂𑀯, 𑀏𑀯𑀁 𑀘𑀺𑀦𑁆𑀢𑁂𑀬𑁆𑀬 𑀧𑀜𑁆𑀜𑀯𑀸.

𑀲𑀫𑁆𑀧𑀼𑀤𑁆𑀥𑁄𑀭𑀲 ¶ 𑀧𑀼𑀢𑁆𑀢𑀸𑀯, 𑀩𑀼𑀤𑁆𑀥𑀼𑀭𑁄𑀚𑀸 𑀦𑀼𑀲𑁆𑀲𑀸𑀯𑀦𑀸;

𑀲𑀫𑁆𑀪𑀽𑀢𑀸 𑀧𑀺𑀢𑀼 𑀤𑀸𑀬𑀸𑀤𑀸, 𑀧𑀼𑀢𑁆𑀢𑀸𑀦𑀸𑀫 𑀲𑀪𑀸𑀯𑀢𑁄.

𑀔𑀻𑀭𑀁 𑀧𑀺𑀢𑁆𑀯𑀸𑀯 𑀚𑀻𑀯𑀦𑁆𑀢𑀺, 𑀚𑀸𑀢𑀸𑀧𑀺 𑀇𑀥 𑀧𑀼𑀢𑁆𑀢𑀓𑀸;

𑀧𑀭𑀺𑀬𑀢𑁆𑀢𑀺 𑀚𑀺𑀦𑀓𑁆𑀔𑀻𑀭𑀁, 𑀧𑀺𑀢𑁆𑀯𑀸𑀯 𑀚𑀺𑀦𑀧𑀼𑀢𑁆𑀢𑀓𑀸.

𑀤𑀸𑀬𑁄𑀘 ¶ 𑀦𑀸𑀫 𑀩𑀼𑀤𑁆𑀥𑀲𑁆𑀲, 𑀥𑀫𑁆𑀫𑀸𑀫𑀺𑀲 𑀯𑀲𑀸𑀤𑁆𑀯𑀺𑀥𑀸;

𑀫𑀕𑁆𑀕𑀜𑀸𑀡𑀸 𑀤𑀬𑁄 𑀥𑀫𑁆𑀫𑁄, 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸𑀫𑀺𑀲𑀸.

𑀘𑀺𑀭 𑀫𑀸𑀫𑀺𑀲 𑀤𑀸𑀬𑀸𑀤𑀸, 𑀭𑀸𑀚𑀧𑀽𑀚𑀸𑀤𑀺 𑀕𑀸𑀳𑀺𑀦𑁄;

𑀤𑀸𑀬𑀸 𑀫𑀺𑀲𑁆𑀲𑀕𑁆𑀕𑀳𑀁 𑀦𑀺𑀘𑁆𑀙𑀺, 𑀲𑀤𑁆𑀥𑀫𑁆𑀫 𑀕𑀭𑀼𑀓𑁄 𑀚𑀺𑀦𑁄.

𑀮𑀓𑁆𑀔 ¶ 𑀓𑀧𑁆𑀧 𑀘𑀢𑀼𑀲𑁆𑀲𑀗𑁆𑀔𑁆𑀬, 𑀓𑀸𑀮𑀁 𑀯𑀺𑀘𑀺𑀢 𑀦𑀺𑀘𑁆𑀘𑀺𑀢𑀁;

𑀥𑀫𑁆𑀫𑀤𑀸𑀬𑀁 𑀦𑀯𑀺𑀦𑁆𑀤𑀫𑁆𑀳𑀸, 𑀩𑀼𑀤𑁆𑀥𑀧𑀼𑀢𑁆𑀢𑀸𑀧𑀺 𑀬𑁂𑀫𑀬𑀁.

𑀩𑀼𑀤𑁆𑀥𑀯𑀸𑀭𑀺𑀢 𑀤𑀸𑀬𑀸𑀤𑀸, 𑀲𑀤𑁆𑀥𑀫𑁆𑀫𑀤𑀸𑀬 𑀩𑀸𑀳𑀺𑀭𑀸;

𑀧𑀼𑀢𑁆𑀢𑀸𑀧𑀺 𑀲𑀢𑁆𑀣𑀼𑀤𑀸𑀲𑀸𑀪𑀸, 𑀪𑀼𑀢𑁆𑀢𑀫𑀢𑁆𑀢𑀸 𑀳𑀺 𑀤𑀸𑀲𑀓𑀸.

𑀪𑀤𑁆𑀤𑀦𑁆𑀢 ¶ 𑀭𑀸𑀳𑀼𑀮𑀲𑁆𑀲𑁂𑀯, 𑀤𑀸𑀬𑀁 𑀦𑁄𑀧𑀺 𑀅𑀤𑀸 𑀚𑀺𑀦𑁄;

𑀦𑀸𑀤𑀺𑀬𑀺𑀫𑁆𑀳𑀸 𑀧𑀫𑀸𑀤𑀸𑀬, 𑀢𑀁 𑀤𑀸𑀬𑀁 𑀓𑀼𑀲𑀮𑀦𑁆𑀢𑀓𑀁.

𑀥𑀫𑁆𑀫𑀤𑀸𑀬𑀸𑀤𑀸 𑀫𑁂𑀪𑀺𑀓𑁆𑀔𑀯𑁂 𑀢𑀼𑀫𑁆𑀳𑁂𑀪𑀯𑀣,

𑀇𑀫𑀸𑀬 ¶ 𑀩𑀼𑀤𑁆𑀥𑀯𑀸𑀘𑀸𑀬, 𑀩𑀼𑀤𑁆𑀥𑀲𑀦𑁆𑀢𑀓 𑀢𑀁 𑀲𑀭𑁂;

𑀤𑁆𑀯𑀺𑀦𑁆𑀦𑀁 𑀆𑀫𑀺𑀲𑀅 𑀤𑀸𑀬𑀸𑀤, 𑀪𑀸𑀯𑀲𑁆𑀲𑀘 𑀦𑀺𑀯𑀸𑀭𑀡𑀁.

𑀭𑀚𑁆𑀚𑁂 𑀘𑀡𑁆𑀟𑀸𑀮𑀧𑀼𑀢𑁆𑀢𑀸𑀯, 𑀲𑀤𑁆𑀥𑀫𑁆𑀫𑀘𑀓𑁆𑀓 𑀯𑀢𑁆𑀢𑀺𑀦𑁄;

𑀧𑀼𑀢𑁆𑀢𑀸 𑀳𑁄𑀦𑁆𑀢𑀸𑀧𑀺 𑀤𑀸𑀬𑁂𑀲𑁆𑀫𑀺𑀁, 𑀦𑀺𑀭𑀸𑀲𑀸 𑀢𑀺𑀯 𑀦𑀺𑀦𑁆𑀤𑀺𑀢𑀸.

𑀫𑀺𑀘𑁆𑀙𑀸𑀚𑀻𑀯 ¶ 𑀲𑀫𑀸𑀧𑀦𑁆𑀦𑀸, 𑀅𑀘𑁆𑀘𑀸𑀲𑀸 𑀧𑀘𑁆𑀘𑀬𑀸𑀫𑀺𑀲𑁂;

𑀫𑀳𑀸𑀚𑀸𑀦𑀻𑀬 𑀲𑀫𑁆𑀧𑀢𑁆𑀢𑀸, 𑀫𑁄𑀖𑀓𑀢𑁆𑀯𑀸 𑀢𑀺𑀤𑀼𑀮𑁆𑀮𑀪𑀁.

𑀕𑀺𑀳𑀺𑀓𑀸𑀫𑁂 ¶ 𑀧𑀳𑀸𑀬𑀸𑀕𑁄, 𑀧𑀭𑀯𑀦𑁆𑀢𑁄𑀲𑀼 𑀮𑀕𑁆𑀕𑀺𑀢𑁄;

𑀕𑀗𑁆𑀕𑀸𑀢𑀺𑀡𑁆𑀡𑁄 𑀢𑀴𑀸𑀓𑀫𑁆𑀳𑀺, 𑀦𑀺𑀫𑀼𑀕𑁆𑀕𑁄𑀯𑀸 𑀢𑀺𑀦𑀺𑀦𑁆𑀤𑀺𑀢𑁄.

𑀘𑀻𑀯𑀭𑁂 ¶ 𑀧𑀺𑀡𑁆𑀟𑀧𑀸𑀢𑁂𑀘, 𑀧𑀘𑁆𑀘𑀬𑁂 𑀲𑀬𑀦𑀸𑀲𑀦𑁂;

𑀏𑀢𑁂𑀲𑀼 𑀢𑀡𑁆𑀳 𑀫𑀸𑀓𑀸𑀲𑀺, 𑀫𑀸𑀮𑁄𑀓𑀁 𑀧𑀼𑀦𑀭𑀸𑀕𑀫𑀺.

𑀇𑀢𑀺𑀯𑀼𑀢𑁆𑀢𑀸 𑀦𑀼𑀲𑀸𑀭𑁂𑀦, 𑀧𑀘𑁆𑀘𑀯𑁂𑀓𑁆𑀔𑀡 𑀲𑀼𑀤𑁆𑀥𑀺𑀬𑀸;

𑀆𑀫𑀺𑀲𑁂𑀲𑀼 𑀳𑀦𑁂 𑀆𑀲𑀁, 𑀧𑀼𑀢𑁆𑀢𑀫𑀁𑀲𑀼 𑀧𑀫𑀁 𑀲𑀭𑀁.

𑀲𑁂𑀬𑁆𑀬𑁄 ¶ 𑀅𑀬𑁄𑀕𑀼𑀴𑁄 𑀪𑀼𑀢𑁆𑀢𑁄,

𑀬𑀜𑁆𑀘𑁂 𑀪𑀼𑀜𑁆𑀚𑁂𑀬𑁆𑀬 𑀤𑀼𑀲𑁆𑀲𑀻𑀮𑁄,

𑀇𑀢𑀺𑀯𑀼𑀢𑁆𑀢𑀁 ¶ 𑀦𑀼𑀘𑀺𑀦𑁆𑀢𑁂𑀦𑁆𑀢𑁄, 𑀯𑀚𑁆𑀚𑁂 𑀤𑀼𑀲𑁆𑀲𑀻𑀮 𑀪𑀸𑀯𑀢𑁄;

𑀲𑀻𑀮𑁂 𑀞𑀺𑀢𑁄𑀯 𑀪𑀼𑀜𑁆𑀚𑁂𑀬𑁆𑀬, 𑀫𑀸𑀤𑀺𑀢𑁆𑀢 𑀕𑀼𑀴𑀓𑀁 𑀕𑀺𑀮𑀺.

𑀔𑀸𑀤𑀦𑀻𑀬𑀸𑀦 𑀫𑀣𑁄𑀧𑀺 𑀯𑀢𑁆𑀣𑀸𑀦𑀁;

𑀦𑀘 𑀧𑀭𑀺𑀢𑁆𑀢𑀲𑁂 𑀢𑀸𑀦𑀺 𑀅𑀮𑀪𑀫𑀸𑀦𑁄.

𑀅𑀜𑁆𑀜𑀸𑀳𑀺 ¶ 𑀮𑀸𑀪𑀼𑀧𑀦𑀺𑀲𑀸, 𑀅𑀜𑁆𑀜𑀸 𑀦𑀺𑀩𑁆𑀩𑀸𑀦 𑀕𑀸𑀫𑀺𑀦𑀻;

𑀲𑀓𑁆𑀓𑀸𑀭𑀁 𑀦𑀸𑀪𑀺𑀦𑀦𑁆𑀤𑁂𑀬𑁆𑀬, 𑀯𑀺𑀯𑁂𑀓 𑀫𑀦𑀼𑀩𑁆𑀭𑀽𑀳𑀬𑁂.

𑀧𑀭𑀺𑀬𑀢𑁆𑀢𑀺𑀁 𑀯𑀺𑀦𑀸 𑀲𑁂𑀬𑁆𑀬𑀁, 𑀦𑀮𑀪𑀦𑁆𑀢𑀺 𑀩𑀼𑀥𑀸𑀅𑀧𑀺;

𑀲𑁂𑀬𑁆𑀬𑀢𑁆𑀣𑀺𑀓𑁄𑀯 𑀲𑀺𑀓𑁆𑀔𑁂𑀬𑁆𑀬, 𑀦𑁂𑀯 𑀧𑀽𑀚𑀸𑀤𑀺 𑀓𑀸𑀭𑀡𑀸.

𑀪𑀯𑀦𑀺𑀲𑁆𑀲𑀭𑀡𑀢𑁆𑀣𑀁𑀯 ¶ , 𑀲𑀺𑀓𑁆𑀔𑁂 𑀦𑀸 𑀮𑀕𑁆𑀕𑀤𑀽𑀧𑀫𑁄;

𑀢𑀣𑀽𑀧𑀫𑀸𑀬 𑀲𑀺𑀓𑁆𑀔𑀦𑁆𑀢𑁄, 𑀅𑀧𑀸𑀬𑁂𑀲𑀼 𑀧𑀢𑀺𑀲𑁆𑀲𑀢𑀺.

𑀲𑀺𑀓𑁆𑀔𑀺𑀢𑁂𑀦 𑀅𑀫𑀸𑀦𑀢𑁆𑀣𑀁, 𑀦𑀲𑀸𑀥𑀼 𑀫𑀸𑀦𑀣𑀤𑁆𑀥𑀺𑀓𑁄;

𑀫𑀼𑀤𑀼𑀪𑀸𑀯𑀸𑀬 𑀲𑀺𑀓𑁆𑀔𑀺𑀢𑁆𑀯𑀸, 𑀤𑀫𑁂𑀦𑁆𑀢𑁄 𑀫𑀼𑀤𑀼𑀓𑁄 𑀪𑀯𑁂.

𑀭𑀸𑀕𑀁 ¶ 𑀤𑁄𑀲𑀁 𑀥𑀚𑀁𑀫𑀸𑀦𑀁, 𑀲𑀺𑀓𑁆𑀔𑀦𑁆𑀢𑁄𑀧𑀺 𑀯𑀺𑀯𑀚𑁆𑀚𑀬𑁂;

𑀤𑀳𑀭𑀸𑀧𑀺 𑀳𑀺 𑀫𑀺𑀬𑁆𑀬𑀦𑁆𑀢𑀺, 𑀦𑀢𑁆𑀣𑀺 𑀯𑀲𑁆𑀲𑀕𑁆𑀕𑀢𑁄 𑀫𑀢𑀁.

𑀲𑀤𑁆𑀥𑀁𑀢𑀺𑀓𑁆𑀔𑁂𑀬𑁆𑀬 𑀩𑀼𑀤𑁆𑀥𑁂𑀦, 𑀭𑀸𑀕𑀁 𑀅𑀲𑀼𑀪 𑀘𑀺𑀦𑁆𑀢𑀬𑀸;

𑀫𑀭𑀡𑁂𑀦 𑀥𑀚𑀁𑀫𑀸𑀦𑀁, 𑀤𑁄𑀲𑀁 𑀫𑁂𑀢𑁆𑀢𑀸𑀬 𑀯𑀸𑀭𑀬𑁂.

𑀏𑀢𑁂𑀳𑀺 ¶ 𑀘𑀢𑀼𑀭𑀓𑁆𑀔𑁂𑀳𑀺, 𑀕𑀦𑁆𑀣𑀁 𑀲𑀺𑀓𑁆𑀔𑁂𑀬𑁆𑀬 𑀲𑀁 𑀯𑀼𑀢𑁄;

𑀲𑀺𑀓𑁆𑀔𑀦𑁆𑀢𑀲𑁆𑀲𑁂𑀳𑀺 𑀭𑀓𑁆𑀔𑁂𑀳𑀺, 𑀦𑀓𑁄𑀘𑀺 𑀲𑀁𑀓𑀺𑀮𑁂𑀲𑀺𑀓𑁄.

𑀩𑀼𑀤𑁆𑀥𑀯𑀸𑀘𑀫𑁆𑀧𑀺 ¶ 𑀲𑀚𑁆𑀛𑀸𑀬, 𑀏𑀢𑁂𑀧𑀺 𑀫𑀦𑀲𑀻𑀓𑀭;

𑀯𑀼𑀢𑁆𑀢𑁄 𑀥𑀫𑁆𑀫𑀯𑀺𑀳𑀸𑀭𑀻𑀢𑀺, 𑀏𑀤𑀺𑀲𑁄 𑀲𑀸𑀲𑀦𑁂 𑀯𑀭𑁄.

𑀲𑀸𑀢𑀁 ¶ 𑀲𑁂𑀯𑀓𑁆𑀔𑀡𑁂𑀯𑀧𑁆𑀧𑀁, 𑀢𑀁𑀳𑁂𑀢𑁆𑀯𑀸 𑀦𑀦𑁆𑀢𑀸𑀤𑀼𑀓𑁆𑀔𑀦𑁆𑀢𑀺;

𑀥𑀻𑀭𑁄 𑀆𑀲𑀁 𑀳𑀦𑁂 𑀓𑀸𑀫𑁂, 𑀔𑀼𑀭𑀥𑀸𑀭𑀫𑀥𑀽𑀧𑀫𑁂.

𑀫𑀸𑀢𑀸𑀳𑀺 𑀩𑁆𑀬𑀕𑁆𑀖 𑀫𑀦𑁆𑀯𑁂𑀦𑁆𑀢𑁄,

𑀢𑀺𑀭𑀘𑁆𑀙𑀸 ¶ 𑀧𑁂𑀢 𑀮𑀤𑁆𑀥𑀩𑁆𑀩𑁂, 𑀦𑀸𑀲𑀁 𑀓𑀸𑀫𑀲𑀼𑀔𑁂 𑀓𑀭𑁂;

𑀪𑀸𑀬𑀺𑀢𑀩𑁆𑀩 𑀲𑀼𑀔𑀁 𑀢𑀜𑁆𑀳𑀺, 𑀢𑀲𑁆𑀫𑀺𑀁 𑀮𑀕𑁆𑀕𑀸 𑀫𑀳𑀸𑀢𑀧𑀸.

𑀮𑀤𑁆𑀥𑀸 𑀓𑀸𑀫𑀲𑀼𑀔𑀁 𑀩𑀸𑀮𑀸, 𑀧𑀫𑁄𑀤𑀦𑁆𑀢𑀺 𑀦𑀧𑀡𑁆𑀟𑀺𑀢𑀸;

𑀧𑀲𑀼𑀧𑀓𑁆𑀔𑀻𑀪𑀺 𑀮𑀤𑁆𑀥𑀩𑁆𑀩𑀁, 𑀅𑀦𑀦𑁆𑀢𑀤𑀼𑀓𑁆𑀔 𑀓𑀸𑀭𑀡𑀁.

𑀮𑀤𑁆𑀥𑀸 ¶ 𑀥𑀫𑁆𑀫𑀭𑀢𑀺𑀁𑀯𑀺𑀜𑁆𑀜𑀽, 𑀫𑁄𑀤𑀦𑁆𑀢𑀺 𑀦 𑀅𑀧𑀡𑁆𑀟𑀺𑀢𑀸;

𑀅𑀦𑁄𑀫 𑀲𑀢𑁆𑀢 𑀧𑀭𑀺𑀪𑁄𑀕𑀁, 𑀪𑀕𑀦𑀺𑀲𑁆𑀲𑀭𑀡𑀸𑀯𑀳𑀁.

𑀳𑀻𑀦𑀓𑀫𑁆𑀫𑀁 ¶ 𑀧𑀝𑀺𑀘𑁆𑀙𑀦𑁆𑀦𑀁, 𑀓𑀸𑀫𑀲𑁆𑀲𑀸𑀤𑀁 𑀦𑀧𑀢𑁆𑀣𑀬𑁂;

𑀥𑀫𑁆𑀫𑁂 𑀧𑀻𑀢𑀺𑀜𑁆𑀘 𑀧𑀸𑀫𑁄𑀚𑁆𑀚𑀁, 𑀧𑀢𑁆𑀣𑁂𑀬𑁆𑀬 𑀲𑀸𑀥𑀼𑀲𑀫𑁆𑀧𑀢𑁄.

𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺 𑀬𑁂𑀓𑀸𑀫𑁂, 𑀳𑀺𑀁 𑀲𑀦𑁆𑀢𑀺𑀢𑁂 𑀢𑀤𑀢𑁆𑀣𑀺𑀓𑀸;

𑀧𑀭𑀺𑀘𑁆𑀘𑀢𑁆𑀢𑀁 𑀦 𑀳𑀺𑀁 𑀲𑀦𑁆𑀢𑀺, 𑀫𑀼𑀢𑁆𑀢𑀁 𑀯𑀡𑁆𑀡𑁂𑀦𑁆𑀢𑀺 𑀲𑀸𑀥𑀯𑁄.

𑀦𑀺𑀘𑁆𑀘𑀼𑀧𑀓𑁆𑀓𑀫𑁆𑀫 ¶ 𑀧𑀼𑀝𑁆𑀞𑁄𑀧𑀺, 𑀓𑀸𑀬𑁄 𑀯𑁂𑀭𑀻𑀯𑀲𑀸 𑀦𑀼𑀕𑁄;

𑀅𑀘𑀺𑀭𑀁𑀬𑁂𑀯 𑀪𑀽𑀲𑀸𑀬𑀻, 𑀬𑀼𑀢𑁆𑀢𑁄𑀯 𑀢 𑀫𑀼𑀧𑁂𑀓𑁆𑀔𑀺𑀢𑀼𑀁.

𑀭𑀓𑁆𑀔𑀺𑀢𑁄𑀧𑀺 𑀅𑀕𑀼𑀢𑁆𑀢𑁄𑀯, 𑀓𑀸𑀬𑁄 𑀪𑀬𑀫𑀼𑀔𑁂 𑀞𑀺𑀢𑁄;

𑀢𑀲𑁆𑀫𑀸 𑀓𑀸𑀬 𑀫𑀼𑀧𑁂𑀓𑁆𑀔𑀺𑀢𑁆𑀯𑀸, 𑀘𑀭𑁂𑀥𑀫𑁆𑀫 𑀫𑀙𑀫𑁆𑀪𑀺𑀢𑁄.

𑀧𑀼𑀝𑁆𑀞𑁄 ¶ 𑀧𑀼𑀝𑁆𑀞𑁄𑀧𑀺 𑀬𑀁𑀓𑀸𑀬𑁄, 𑀪𑀼𑀯𑀺 𑀭𑁄𑀕𑀸𑀲𑀬𑀻𑀲𑀬𑀻;

𑀓𑀢𑀁𑀓𑀢𑀁 𑀫𑀼𑀥𑀸𑀢𑁄 𑀦, 𑀢𑀤𑀢𑁆𑀣𑀁 𑀤𑀼𑀘𑁆𑀘𑀭𑁂 𑀘𑀭𑁂.

𑀧𑀼𑀝𑁆𑀞𑀼𑀁 𑀓𑀸𑀬𑀁 𑀢𑀺𑀤𑀼𑀩𑁆𑀪𑀭𑀁;

𑀧𑀸𑀧𑀁 ¶ 𑀫𑀸𑀓𑀭 𑀓𑀸𑀬𑀢𑁆𑀣𑀁, 𑀓𑀸𑀬𑁄 𑀯𑁂𑀭𑀻 𑀯𑀲𑀸𑀦𑀼𑀕𑁄;

𑀪𑀽𑀫𑁆𑀬𑀁 𑀲𑁂𑀲𑁆𑀲𑀢𑀺 𑀯𑁂𑀓𑀸𑀭𑀻, 𑀧𑀸𑀧𑀺𑀓𑁄 𑀦𑀺𑀭𑀬𑀁 𑀕𑀢𑁄.

𑀘𑀺𑀢𑁆𑀢 ¶ 𑀲𑀁𑀲𑁄𑀥𑀓𑀸 𑀧𑀓𑁆𑀓𑀸, 𑀓𑀸𑀬𑀲𑀁𑀲𑁄𑀥𑀓𑀸 𑀦𑀯𑀸;

𑀲𑁄𑀥𑁂 𑀘𑀺𑀢𑁆𑀢𑀁𑀯 𑀧𑀓𑁆𑀓𑀢𑁆𑀣𑀁, 𑀦𑀓𑀸𑀬𑀁 𑀪𑀯𑀪𑀻𑀭𑀼𑀓𑁄.

𑀘𑀺𑀢𑁆𑀢𑀲𑀗𑁆𑀔𑀭𑀡𑀁 ¶ 𑀲𑀸𑀥𑀼, 𑀢𑀁 𑀲𑀗𑁆𑀔𑀢𑀁 𑀧𑀪𑀲𑁆𑀲𑀭𑀁;

𑀦𑀲𑀸𑀥𑀼 𑀓𑀸𑀬𑀲𑀗𑁆𑀔𑀸𑀭𑁄, 𑀲𑀗𑁆𑀔𑀢𑁄𑀧𑁆𑀬𑀲𑀼𑀪𑁄𑀯 𑀲𑁄.

𑀲𑀪𑀸𑀯 𑀫𑀮𑀺𑀦𑀁 𑀓𑀸𑀬𑀁, 𑀦𑀺𑀫𑁆𑀫𑀮𑀸𑀬 𑀓𑀣𑀁 𑀓𑀭𑁂;

𑀆𑀕𑀦𑁆𑀢𑀼𑀫𑀮𑀺𑀦𑀁 𑀘𑀺𑀢𑁆𑀢𑀁, 𑀲𑀓𑁆𑀓𑀸 𑀓𑀸𑀢𑀼𑀁 𑀲𑀼𑀦𑀺𑀫𑁆𑀫𑀮𑀁.

𑀆𑀥𑀺𑀩𑁆𑀬𑀸𑀥𑀺 ¶ 𑀧𑀭𑁄𑀢𑀸𑀬, 𑀅𑀚𑁆𑀚𑀲𑁆𑀯𑁂𑀯𑀸 𑀯𑀺𑀦𑀸𑀲𑀺𑀦𑀸;

𑀓𑁄𑀳𑀺𑀦𑀸𑀫 𑀲𑀭𑀻𑀭𑀸𑀬, 𑀥𑀫𑁆𑀫𑀸𑀧𑁂𑀢𑀁 𑀲𑀫𑀸𑀘𑀭𑁂.

𑀲𑀪𑀸𑀯𑀚𑁂𑀕𑀼𑀘𑁆𑀙𑀁 𑀓𑀸𑀬𑀁, 𑀲𑁄𑀪𑁂𑀢𑀼𑀁𑀦𑁂𑀯𑀲𑀓𑁆𑀓𑀼𑀡𑁂;

𑀘𑀺𑀢𑁆𑀢𑀁 𑀯𑀸 𑀮𑀗𑁆𑀓𑀢𑀁 𑀲𑁄𑀪𑀁, 𑀲𑀻𑀮𑀸𑀤𑀺 𑀕𑀦𑁆𑀥𑀯𑀸𑀲𑀺𑀢𑀁.

𑀲𑀘𑁂 ¶ 𑀪𑀸𑀬𑀣 𑀤𑀼𑀓𑁆𑀔𑀲𑁆𑀲, 𑀲𑀘𑁂 𑀯𑁄 𑀤𑀼𑀓𑁆𑀔 𑀫𑀧𑁆𑀧𑀺𑀬𑀁;

𑀫𑀸𑀓𑀢𑁆𑀣 𑀧𑀸𑀧𑀓𑀁 𑀓𑀫𑁆𑀫𑀁, 𑀆𑀯𑀺𑀯𑀸 𑀬𑀤𑀺𑀯𑀸 𑀭𑀳𑁄.

𑀓𑀺𑀮𑁂𑀲𑀸 𑀕𑀦𑁆𑀢𑀼𑀫𑀮𑀁𑀘𑀺𑀢𑁆𑀢𑀁, 𑀧𑀪𑀲𑁆𑀲𑀭 𑀲𑀪𑀸𑀯𑀺𑀓𑀁;

𑀢𑀤𑀸𑀕𑀦𑁆𑀢𑀼𑀫𑀮𑀁 𑀥𑁄𑀯, 𑀘𑀺𑀢𑁆𑀢𑀁 𑀥𑁄𑀢𑁂 𑀧𑀪𑀲𑁆𑀲𑀭𑀁.

𑀓𑀺𑀮𑁂𑀲𑀸 ¶ 𑀕𑀦𑁆𑀢𑀼𑀫𑀮𑀁𑀘𑀺𑀢𑁆𑀢𑀁, 𑀉𑀧𑀓𑁆𑀓𑀫𑁂𑀦 𑀲𑁄𑀥𑀬𑁂;

𑀲𑀼𑀯𑀺𑀲𑀼𑀤𑁆𑀥 𑀫𑀦𑀸𑀬𑁂𑀯, 𑀉𑀢𑁆𑀢𑀭𑀺𑀁𑀲𑀼 𑀪𑀯𑀡𑁆𑀡𑀯𑀸.

𑀓𑀸𑀬𑁂 𑀫𑀮𑀫𑀼𑀧𑁂𑀓𑁆𑀔𑀸𑀬, 𑀘𑀺𑀢𑁆𑀢𑁂 𑀫𑀮𑀁𑀯 𑀥𑁄𑀯𑀢𑀼;

𑀘𑀺𑀢𑁆𑀢𑁂 𑀳𑀺 𑀦𑀺𑀫𑁆𑀫𑀮𑁂𑀲𑀦𑁆𑀢𑁄, 𑀧𑀽𑀢𑀺𑀓𑀸𑀬𑁄𑀧𑀺 𑀧𑀽𑀚𑀺𑀢𑁄.

𑀓𑀸𑀬𑀭𑁄𑀕𑀁 ¶ 𑀢𑀺𑀢𑀺𑀓𑁆𑀔𑀸𑀬, 𑀘𑀺𑀢𑁆𑀢𑀭𑁄𑀕𑀁 𑀘𑀺𑀓𑀺𑀘𑁆𑀙𑀢𑀼;

𑀲𑀼𑀔𑀺𑀢𑁄 𑀓𑀸𑀬𑀭𑁄𑀕𑀻𑀧𑀺, 𑀘𑀺𑀢𑁆𑀢𑁂 𑀦𑀺𑀭𑀸𑀫𑀬𑁂 𑀲𑀢𑀺.

𑀓𑀸𑀬𑀭𑁄𑀕𑁂 𑀩𑀳𑀽 𑀯𑁂𑀚𑁆𑀚𑀸, 𑀩𑀼𑀤𑁆𑀥𑀼𑀢𑁆𑀢𑀺𑀯 𑀫𑀦𑁄𑀕𑀤𑁂;

𑀇𑀥𑀸𑀧𑀺 𑀓𑀸𑀬𑀺𑀓𑁄 𑀲𑀦𑁆𑀢𑁄, 𑀅𑀦𑀦𑁆𑀢𑀸𑀯 𑀫𑀦𑁄𑀭𑀼𑀚𑀸.

𑀲𑀻𑀲𑀤𑀟𑁆𑀠 ¶ 𑀫𑀼𑀧𑁂𑀓𑁆𑀔𑀸𑀬, 𑀦𑀺𑀩𑁆𑀩𑀸𑀢𑀼 𑀭𑀸𑀕𑀧𑀸𑀯𑀓𑀁;

𑀔𑀺𑀧𑁆𑀧𑀁 𑀅𑀲𑀼𑀪 𑀲𑀜𑁆𑀜𑀸𑀬, 𑀦𑀺𑀘𑁆𑀘𑀤𑀟𑁆𑀠𑀁 𑀪𑀯𑁂𑀪𑀯𑁂.

𑀲𑀼𑀪𑀸𑀬 𑀉𑀝𑁆𑀞𑀺𑀢𑀁 𑀭𑀸𑀕𑀁, 𑀅𑀲𑀼𑀪𑀸𑀬 𑀦𑀺𑀯𑀸𑀭𑀬𑁂;

𑀲𑁄𑀭𑀸𑀕𑁄 𑀲𑀸𑀤𑀺𑀢𑀁 𑀚𑀦𑁆𑀢𑀼𑀁, 𑀘𑀢𑁆𑀯𑀸𑀧𑀸𑀬𑀁 𑀦𑀬𑀺𑀲𑁆𑀲𑀢𑀺.

𑀧𑀡𑁆𑀟𑀺𑀢𑀸𑀦𑀁 ¶ 𑀫𑀮𑀁 𑀫𑀸𑀦𑁄, 𑀲𑁄𑀢𑁆𑀢𑀼𑀓𑁆𑀓𑀁𑀲𑁂𑀦 𑀧𑀸𑀓𑀝𑁄;

𑀫𑀸𑀔𑁄 𑀅𑀢𑁆𑀢𑀸𑀦 𑀫𑀼𑀓𑁆𑀓𑀁𑀲𑁂, 𑀫𑀸𑀯𑀺𑀪𑀸𑀯𑁂 𑀲𑀓𑀁𑀫𑀮𑀁.

𑀕𑀼𑀡𑀁 𑀧𑀝𑀺𑀘𑁆𑀘 𑀕𑀼𑀡𑀻𑀦𑀁, 𑀅𑀳𑀁𑀫𑀸𑀦𑁄 𑀲𑀫𑀼𑀝𑁆𑀞𑀳𑁂;

𑀫𑀭𑀡𑀁 𑀅𑀦𑀼𑀘𑀺𑀦𑁆𑀢𑀸𑀬, 𑀥𑀚𑀁𑀫𑀸𑀦𑀁 𑀦𑀺𑀧𑀸𑀢𑀬.

𑀏𑀓𑁄 ¶ 𑀓𑀸𑀬𑀯𑀺𑀯𑁂𑀓𑁂𑀲𑀻, 𑀓𑀢𑁆𑀯𑀸 𑀓𑀺𑀮𑁂𑀲𑀦𑀺𑀕𑁆𑀕𑀳𑀁;

𑀯𑀲𑁂 𑀘𑀺𑀢𑁆𑀢𑀯𑀺𑀯𑁂𑀓𑁂𑀲𑀻, 𑀉𑀪𑁄 𑀧𑀥𑀺 𑀯𑀺𑀯𑁂𑀓𑀸𑀤𑀸.

𑀅𑀤𑀺𑀝𑁆𑀞𑁂 𑀅𑀲𑀼𑀢𑁂 𑀞𑀸𑀦𑁂, 𑀯𑀲𑁂𑀬𑁆𑀬 𑀫𑁄𑀘𑀦𑀢𑁆𑀣𑀺𑀓𑁄;

𑀅𑀲𑁆𑀲𑀸𑀤𑀁𑀳𑀺 𑀦𑀺𑀯𑀸𑀭𑁂𑀢𑀼𑀁, 𑀤𑀺𑀝𑁆𑀞𑁂 𑀲𑀼𑀢𑁂 𑀢𑀺𑀤𑀼𑀓𑁆𑀓𑀭𑀁.

𑀅𑀤𑀺𑀝𑁆𑀞𑁂 ¶ 𑀅𑀲𑀼𑀢𑁂 𑀭𑀜𑁆𑀜𑁂, 𑀯𑀲𑁂𑀬𑁆𑀬𑀺 𑀦𑁆𑀤𑁆𑀭𑀺𑀬𑀕𑁄𑀧𑀓𑁄;

𑀯𑀸𑀭𑁂𑀢𑀼𑀁 𑀯𑀺𑀲𑀬𑀸𑀓𑀺𑀡𑁆𑀡𑁂, 𑀘𑀓𑁆𑀔𑀼𑀲𑁄𑀢𑀁 𑀢𑀺𑀤𑀼𑀓𑁆𑀓𑀭𑀁.

𑀭𑀸𑀕𑀁 𑀅𑀲𑀢𑀺 𑀉𑀧𑁆𑀧𑀦𑁆𑀦𑀁, 𑀲𑀦𑁆𑀢𑀸𑀪𑀼𑀚𑁂𑀦 𑀯𑀸𑀭𑀬𑁂;

𑀩𑀸𑀳𑀺𑀭𑁂 𑀭𑀸𑀕 𑀫𑀼𑀧𑁆𑀧𑀦𑁆𑀦𑀁, 𑀅𑀦𑁆𑀢𑁄 𑀅𑀲𑀼𑀪𑀘𑀺𑀦𑁆𑀢𑀬𑀸.

𑀭𑀸𑀕𑀁 ¶ 𑀙𑀺𑀦𑁆𑀤𑀸𑀢𑀺 𑀩𑀼𑀤𑁆𑀥𑀸𑀡𑀁, 𑀲𑀭𑀁 𑀪𑀺𑀓𑁆𑀔𑀼 𑀭𑀳𑁄𑀕𑀢𑁄;

𑀧𑀲𑁆𑀲𑀁 𑀓𑀸𑀬𑁂𑀥 𑀚𑁂𑀕𑀼𑀘𑁆𑀙𑀁, 𑀮𑀪𑁂𑀬𑁆𑀬𑀸 𑀲𑀺𑀝𑁆𑀞𑀫𑁄𑀘𑀦𑀁.

𑀓𑀸𑀬𑀁 𑀅𑀲𑀼𑀪𑀢𑁄𑀧𑀲𑁆𑀲, 𑀓𑀮𑁆𑀮𑀓𑀸𑀮𑁂𑀯 𑀤𑀲𑁆𑀲𑀦𑀁;

𑀫𑁄𑀖𑀁 𑀓𑀸𑀮𑀁 𑀦𑀔𑀻𑀬𑁂𑀬𑁆𑀬, 𑀪𑀯𑁂𑀬𑁆𑀬𑀼𑀁𑀲𑁆𑀯𑁂𑀧𑀺𑀆𑀢𑀼𑀭𑀸.

𑀓𑀸𑀬𑀁 ¶ 𑀚𑁂𑀕𑀼𑀘𑁆𑀙𑀢𑁄𑀧𑀲𑁆𑀲, 𑀩𑀸𑀮𑁆𑀬𑀦𑁆𑀢𑁄 𑀧𑀘𑁆𑀘𑀯𑁂𑀓𑁆𑀔𑀺𑀬;

𑀆𑀤𑁄 𑀓𑀺𑀜𑁆𑀘𑀺 𑀚𑀺𑀕𑀼𑀘𑁆𑀙𑀸𑀬, 𑀚𑀺𑀕𑀼𑀘𑁆𑀙𑁂𑀬𑁆𑀬𑀸𑀬𑀢𑀺𑀁 𑀪𑀼𑀲𑀁.

𑀓𑀸𑀬𑀸𑀤𑀺𑀦𑀯 𑀫𑀺𑀓𑁆𑀔𑁂𑀬𑁆𑀬, 𑀤𑀸𑀦𑀺 𑀓𑀺𑀜𑁆𑀘𑀺𑀧𑀺 𑀤𑀲𑁆𑀲𑀦𑀁;

𑀆𑀬𑀢𑀺𑀁 𑀫𑀕𑁆𑀕𑀮𑀸𑀪𑀸𑀬, 𑀪𑀯𑁂𑀬𑁆𑀬 𑀉𑀧𑀦𑀺𑀲𑁆𑀲 𑀬𑁄.

𑀇𑀢𑁆𑀣𑀻𑀦 ¶ 𑀫𑀗𑁆𑀕𑀫𑀗𑁆𑀕𑀸𑀦𑀺, 𑀦𑀧𑀲𑁆𑀲𑁂𑀬𑁆𑀬 𑀦𑀘𑀺𑀦𑁆𑀢𑀬𑁂;

𑀢𑀤𑀸𑀲𑀸 𑀉𑀪𑀢𑁄 𑀪𑀝𑁆𑀞𑀸, 𑀲𑀼𑀕𑀢𑁆𑀬𑀸 𑀲𑀸𑀲𑀦𑀸𑀧𑀺𑀘.

𑀇𑀢𑁆𑀣𑀺𑀭𑀽𑀧 𑀲𑀭𑀸𑀓𑀟𑁆𑀠𑀸, 𑀪𑀝𑁆𑀞𑀸 𑀩𑀳𑀽𑀯 𑀲𑀸𑀲𑀦𑀸;

𑀇𑀳𑀸𑀧𑀺 𑀤𑀼𑀓𑁆𑀔𑀺𑀢𑀸 𑀳𑀼𑀢𑁆𑀯𑀸, 𑀢𑁂 𑀧𑁂𑀘𑁆𑀘 𑀅𑀢𑀺𑀤𑀼𑀓𑁆𑀔𑀺𑀦𑁄.

𑀧𑀼𑀁𑀫𑀦𑁄 ¶ 𑀧𑀭𑀺𑀬𑀸𑀤𑀸𑀬, 𑀇𑀢𑁆𑀣𑀺𑀭𑀽𑀧𑀲𑀭𑀸 𑀞𑀺𑀢𑀸;

𑀢𑀲𑁆𑀲𑀫 𑀫𑀜𑁆𑀜 𑀫𑁂𑀓𑀫𑁆𑀧𑀺, 𑀦𑀯𑀺𑀚𑁆𑀚𑀢𑁂𑀯 𑀲𑀩𑁆𑀩𑀥𑀺.

𑀲𑀮𑁆𑀮𑀧𑁂 ¶ 𑀅𑀲𑀺𑀳𑀢𑁆𑀣𑁂𑀦, 𑀧𑀺𑀲𑀸𑀘𑁂𑀦𑀸𑀧𑀺 𑀲𑀮𑁆𑀮𑀧𑁂;

𑀆𑀲𑀤𑁂 𑀆𑀲𑀺𑀯𑀺𑀲𑁂𑀧𑀺, 𑀅𑀕𑁆𑀕𑀺𑀓𑁆𑀔𑀦𑁆𑀥𑁂𑀧𑀺 𑀆𑀲𑀤𑁂;

𑀦𑀢𑁆𑀯𑁂𑀯 𑀫𑀸𑀢𑀼𑀕𑀸𑀫𑁂𑀦, 𑀏𑀓𑁂𑀓𑀸𑀬 𑀲𑀼𑀧𑁂𑀲𑀮𑁄.

𑀓𑀸𑀫𑀁 𑀅𑀲𑀼𑀪𑀘𑀺𑀦𑁆𑀢𑀸𑀬, 𑀩𑁆𑀬𑀸𑀧𑀸𑀤𑀁 𑀲𑁆𑀦𑁂𑀳𑀘𑁂𑀢𑀲𑀸;

𑀯𑀺𑀳𑀺𑀁𑀲𑀁 𑀓𑀭𑀼𑀡𑀸𑀬𑁂𑀳𑀺, 𑀯𑀺𑀢𑀓𑁆𑀓𑀕𑁆𑀕𑀻 𑀢𑀬𑁄𑀲𑀫𑁂.

𑀅𑀲𑀫𑁂𑀢 ¶ 𑀯𑀺𑀢𑀓𑁆𑀓𑀕𑁆𑀕𑀻, 𑀣𑀼𑀲𑀭𑀸𑀲𑀺𑀫𑁆𑀳𑀺 𑀔𑀸𑀡𑀼𑀯;

𑀅𑀣𑀺𑀭𑀸 𑀲𑀸𑀲𑀦𑁂 𑀢𑀸𑀧𑀻, 𑀢𑁂𑀧𑀘𑁆𑀙𑀸𑀅𑀢𑀺𑀢𑀸𑀧𑀺𑀦𑁄.

𑀅𑀲𑀼𑀪𑀸 ¶ 𑀧𑀕𑀫𑁂 𑀮𑁄𑀓𑀸, 𑀢𑀁 𑀫𑁂𑀢𑁆𑀢𑀸𑀬𑀼𑀧𑀲𑀗𑁆𑀓𑀫𑁂;

𑀲𑀼𑀪𑀸𑀯𑀺𑀢𑀸𑀳𑀺 𑀏𑀢𑀸𑀳𑀺, 𑀚𑀳𑁂𑀮𑁄𑀓𑁂 𑀧𑀺𑀬𑀸𑀧𑀺𑀬𑀁.

𑀕𑀢𑀝𑁆𑀞𑀺𑀢𑀸𑀤𑁄 𑀉𑀧𑁆𑀧𑀦𑁆𑀦𑁂, 𑀯𑀺𑀢𑀓𑁆𑀓𑀕𑁆𑀕𑀻 𑀢𑀬𑁄 𑀲𑀫𑁂;

𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄𑀢𑀺, 𑀏𑀯𑀁𑀪𑀽𑀢𑁄 𑀧𑀯𑀼𑀘𑁆𑀘𑀢𑀺.

𑀯𑀺𑀯𑀸𑀤𑀧𑁆𑀧𑀢𑁆𑀢𑁄 ¶ 𑀤𑀼𑀢𑀻𑀬𑁄, 𑀓𑁂𑀦𑁂𑀓𑁄 𑀯𑀺𑀯𑀤𑀺𑀲𑁆𑀲𑀢𑀺;

𑀢𑀲𑁆𑀲𑀢𑁂 𑀲𑀕𑁆𑀕𑀓𑀸𑀫𑀲𑁆𑀲, 𑀏𑀓𑀢𑁆𑀢 𑀫𑀼𑀧𑀭𑁄𑀘𑀺𑀢𑀁.

𑀲𑀺𑀦𑀺𑀳𑀧𑁆𑀧𑀢𑁆𑀢𑁄 𑀤𑀼𑀢𑀻𑀬𑁄, 𑀓𑀫𑁂𑀓𑀸 𑀲𑀺𑀦𑀺𑀳𑀺𑀲𑁆𑀲𑀢𑀺;

𑀢𑀲𑁆𑀲𑀢𑁂 𑀫𑁄𑀓𑁆𑀔𑀓𑀸𑀫𑀲𑁆𑀲, 𑀏𑀓𑀢𑁆𑀢 𑀫𑀼𑀧𑀭𑁄𑀘𑀺𑀢𑀁.

𑀧𑀼𑀭𑀢𑁄 ¶ 𑀧𑀘𑁆𑀙𑀢𑁄𑀯𑀸𑀧𑀺, 𑀅𑀧𑀭𑁄 𑀘𑁂 𑀦𑀯𑀺𑀚𑁆𑀚𑀢𑀺;

𑀢𑀲𑁆𑀲𑁂𑀯 𑀨𑀸𑀲𑀼 𑀪𑀯𑀢𑀺, 𑀏𑀓𑀲𑁆𑀲 𑀯𑀲𑀢𑁄 𑀯𑀦𑁂.

𑀲𑀼𑀔𑀜𑁆𑀘 𑀓𑀸𑀫 𑀫𑀬𑀺𑀓𑀁, 𑀤𑀼𑀓𑁆𑀔𑀜𑁆𑀘 𑀧𑀯𑀺𑀯𑁂𑀓𑀺𑀓𑀁;

𑀧𑀯𑀺𑀯𑁂𑀓𑀁 𑀤𑀼𑀓𑁆𑀔𑀁 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀓𑀸𑀫𑀫𑀬𑀁 𑀲𑀼𑀔𑀁.

𑀬𑁄𑀘 ¶ 𑀯𑀲𑁆𑀲𑀲𑀢𑀁 𑀚𑀻𑀯𑁂, 𑀅𑀧𑀲𑁆𑀲𑀁 𑀉𑀤𑀬𑀩𑁆𑀩𑀬𑀁;

𑀏𑀓𑀸𑀳𑀁 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄, 𑀧𑀲𑁆𑀲𑀢𑁄 𑀉𑀤𑀬𑀩𑁆𑀩𑀬𑀁.

𑀲𑀼𑀜𑁆𑀜𑀸𑀕𑀸𑀭𑀁 ¶ 𑀧𑀯𑀺𑀝𑁆𑀞𑀲𑁆𑀲, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀅𑀫𑀸𑀦𑀼𑀲𑁆𑀲𑀻 𑀭𑀢𑀺 𑀳𑁄𑀢𑀺, 𑀲𑀫𑁆𑀫𑀸𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄.

𑀬𑀢𑁄𑀬𑀢𑁄 ¶ 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀺 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢𑀁.

𑀇𑀘𑁆𑀘𑀼𑀢𑁆𑀢𑀁 𑀥𑀫𑁆𑀫𑀧𑀸𑀫𑁄𑀚𑁆𑀚𑀁, 𑀯𑀺𑀯𑁂𑀓𑀚𑀁 𑀭𑀲𑀸𑀥𑀺𑀓𑀁;

𑀇𑀘𑁆𑀙𑀦𑁆𑀢𑁄 𑀲𑀻𑀮𑀯𑀸 𑀪𑀺𑀓𑁆𑀔𑀼, 𑀅𑀦𑀺𑀯𑀢𑁆𑀢𑀺𑀢 𑀯𑀻𑀭𑀺𑀬𑁄.

𑀯𑀦𑀸 𑀯𑀸𑀲𑁂 𑀯𑀲𑀺𑀢𑁆𑀯𑀸𑀦, 𑀅𑀧𑁆𑀧𑀺𑀘𑁆𑀙𑀸𑀤𑀺𑀕𑀼𑀡𑀸𑀯𑀳𑁄;

𑀧𑀮𑀺 𑀩𑁄𑀥𑁂 𑀲𑀫𑀼𑀘𑁆𑀙𑀺𑀚𑁆𑀚, 𑀪𑀸𑀯𑁂𑀬𑁆𑀬𑁂𑀯𑀁𑀭𑀳𑁄𑀕𑀢𑁄.

𑀓𑀸𑀬𑁂 ¶ 𑀚𑁂𑀕𑀼𑀘𑁆𑀙𑀧𑀼𑀜𑁆𑀚𑀸𑀦𑀺, 𑀭𑀽𑀧𑀁 𑀭𑀼𑀧𑁆𑀧𑀦𑀪𑀸𑀯𑀢𑁄;

𑀢𑀲𑁆𑀲𑀺𑀢𑀸 𑀯𑁂𑀤𑀦𑀸 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸𑀘 𑀢𑀢𑁄𑀧𑀭𑁂.

𑀯𑀺𑀜𑁆𑀜𑀸𑀡𑀜𑁆𑀘 𑀇𑀫𑁂𑀧𑀜𑁆𑀘, 𑀔𑀦𑁆𑀥𑀸 𑀭𑀸𑀲𑀢𑁆𑀣𑀢𑁄 𑀫𑀢𑀸;

𑀢𑁂𑀘𑀸𑀦𑀺𑀘𑁆𑀘 𑀤𑀼𑀓𑁆𑀔𑀸 𑀦𑀢𑁆𑀢𑀸, 𑀉𑀧𑀸𑀤𑀸 𑀯𑀬𑀥𑀫𑁆𑀫𑀺𑀦𑁄.

𑀨𑁂𑀡𑀧𑀺𑀡𑁆𑀟𑀽 ¶ 𑀧𑀫𑀁 𑀭𑀽𑀧𑀁, 𑀯𑁂𑀤𑀦𑀸 𑀧𑀼𑀧𑁆𑀨𑀼𑀴𑀽𑀧𑀫𑀸;

𑀫𑀭𑀻𑀘𑀺𑀓𑀽𑀧𑀫𑀸 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸 𑀓𑀤𑀮𑀽𑀧𑀫𑀸.

𑀫𑀸𑀬𑀽𑀧𑀫𑀦𑁆𑀢𑀺 𑀯𑀺𑀜𑁆𑀜𑀸𑀡𑀁, 𑀤𑀲𑁆𑀲𑀺𑀢𑁂 𑀲𑀩𑁆𑀩 𑀤𑀲𑁆𑀲𑀺𑀦𑀸;

𑀉𑀧𑀫𑀸𑀳𑀺 𑀲𑀫𑀲𑁆𑀲𑁂 𑀬𑁆𑀬, 𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀲𑀸𑀭𑀓𑁂.

𑀬𑀸𑀯 ¶ 𑀩𑁆𑀬𑀸𑀢𑀺 𑀦𑀺𑀫𑁆𑀫𑀺𑀲𑁆𑀲𑀢𑀺,

𑀔𑀦𑁆𑀥𑀸 𑀪𑀺𑀚𑁆𑀚𑀦𑁆𑀢𑀺 𑀳𑀼𑀢𑁆𑀯𑀸𑀦,

𑀪𑀬 𑀧𑀻𑀴𑀺𑀢𑀢𑁄 𑀤𑀼𑀓𑁆𑀔𑀸, 𑀅𑀦𑀢𑁆𑀢𑀸 𑀅𑀯𑀺𑀥𑁂𑀬𑁆𑀬𑀢𑁄;

𑀔𑀦𑁆𑀥𑀸𑀯 𑀳𑁄𑀦𑁆𑀢𑀺 𑀪𑀺𑀚𑁆𑀚𑀦𑁆𑀢𑀺, 𑀅𑀜𑁆𑀜𑁄 𑀓𑁄𑀘𑀺 𑀦𑀮𑀩𑁆𑀪𑀢𑀺.

𑀔𑀦𑁆𑀥𑀸 ¶ 𑀦𑀺𑀘𑁆𑀘𑀸 𑀔𑀬𑀝𑁆𑀞𑁂𑀦, 𑀪𑀬𑀝𑁆𑀞𑁂𑀦 𑀤𑀼𑀔𑀸𑀘𑀢𑁂;

𑀅𑀦𑀢𑁆𑀢𑀸 𑀲𑀸𑀭𑀓𑀝𑁆𑀞𑁂𑀦, 𑀇𑀢𑀺 𑀧𑀲𑁆𑀲𑁂 𑀧𑀼𑀦𑀧𑁆𑀧𑀼𑀦𑀁.

𑀪𑀸𑀡𑀽𑀤𑀬𑁂 𑀓𑀬𑀁 𑀏𑀦𑁆𑀢𑀺, 𑀳𑁂𑀫𑀦𑁆𑀢𑁂 𑀧𑀢𑀺𑀢𑀼𑀲𑁆𑀲𑀯𑀸;

𑀭𑀸𑀕𑀸 𑀫𑀸𑀦𑀸𑀘 𑀲𑀩𑁆𑀩𑁂𑀯𑀁, 𑀲𑀢𑁆𑀬𑀸 𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑁂.

𑀲𑀻𑀳𑀦𑀸𑀤𑀁 ¶ 𑀯𑀦𑁂𑀲𑀼𑀢𑁆𑀯𑀸, 𑀲𑀁𑀯𑁂𑀚𑁂𑀦𑁆𑀢𑀺 𑀲𑀲𑁄𑀢𑀓𑀸;

𑀯𑁂𑀳𑀧𑁆𑀨𑀮𑀸𑀧𑀺 𑀮𑁄𑀓𑁂𑀯𑀁, 𑀚𑀺𑀦𑁂𑀭𑀺𑀢 𑀢𑀺𑀮𑀓𑁆𑀔𑀡𑀁.

𑀯𑁂𑀤𑀦𑀸𑀤𑀻𑀦𑀺 ¶ 𑀦𑀸𑀫𑀸𑀦𑀺, 𑀦𑀸𑀫𑀭𑀽𑀧𑀤𑁆𑀯𑀬𑀁𑀯 𑀢𑁂;

𑀢𑀡𑁆𑀳𑀸𑀯𑀺𑀚𑁆𑀚𑀸𑀘 𑀓𑀫𑁆𑀫𑀸𑀤𑀺, 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑀸.

𑀦𑀸𑀫𑀭𑀽𑀧𑀁 𑀧𑀭𑀺𑀕𑁆𑀕𑀬𑁆𑀳, 𑀢𑀢𑁄 𑀢𑀲𑁆𑀲𑀘 𑀧𑀘𑁆𑀘𑀬𑀁;

𑀳𑀼𑀢𑁆𑀯𑀸 𑀅𑀪𑀸𑀯𑀢𑁄 𑀦𑀺𑀘𑁆𑀘𑀸, 𑀉𑀤𑀬𑀩𑁆𑀩𑀬 𑀧𑀻𑀴𑀦𑀸.

𑀤𑀼𑀓𑁆𑀔𑀸 𑀅𑀯𑀲𑀯𑀢𑁆𑀢𑀺𑀢𑁆𑀢𑀸, 𑀅𑀦𑀢𑁆𑀢𑀸𑀢𑀺𑀢𑀺𑀮𑀓𑁆𑀔𑀡𑀁;

𑀆𑀭𑁄𑀧𑁂𑀢𑁆𑀯𑀸𑀯 𑀲𑀗𑁆𑀔𑀸𑀭𑁂, 𑀲𑀫𑁆𑀫𑀲𑀦𑁆𑀢𑁄 𑀧𑀼𑀦𑀧𑁆𑀧𑀼𑀦𑀁.

𑀧𑀸𑀧𑀼𑀡𑁂𑀬𑁆𑀬𑀸 ¶ 𑀦𑀼𑀧𑀼𑀩𑁆𑀩𑁂𑀦,

𑀦𑀢𑀼𑀫𑁆𑀳𑀁 ¶ 𑀪𑀺𑀓𑁆𑀔𑀯𑁂 𑀭𑀽𑀧𑀁, 𑀢𑀁 𑀚𑀳𑁂𑀣𑀸𑀢𑀺 𑀯𑀼𑀢𑁆𑀢𑀢𑁄;

𑀫𑁂𑀫𑁂𑀢𑀦𑁆𑀢𑀺 𑀉𑀧𑀸𑀤𑀸𑀦𑀁, 𑀧𑀜𑁆𑀘𑀓𑁆𑀔𑀦𑁆𑀥𑁂 𑀯𑀺𑀦𑀸𑀲𑀬𑁂.

𑀧𑀼𑀢𑁆𑀢𑀸 𑀫𑀢𑁆𑀣𑀺 𑀥𑀦𑀸 𑀫𑀢𑁆𑀣𑀺, 𑀇𑀢𑀺 𑀩𑀸𑀮𑁄 𑀯𑀺𑀳𑀜𑁆𑀜𑀢𑀺;

𑀅𑀢𑁆𑀢𑀸𑀧𑀺 𑀅𑀢𑁆𑀢𑀦𑁄 𑀦𑀢𑁆𑀣𑀺, 𑀓𑀼𑀢𑁄𑀧𑀼𑀢𑁆𑀢𑁄𑀓𑀼𑀢𑁄𑀥𑀦𑀁.

𑀇𑀘𑁆𑀘𑀼𑀢𑁆𑀢 𑀫𑀦𑀼𑀘𑀺𑀦𑁆𑀢𑀸𑀬, 𑀅𑀢𑁆𑀢𑀸𑀢𑀺 𑀅𑀢𑁆𑀣𑀺𑀫𑁂𑀢𑀺𑀯𑀸;

𑀲𑀜𑁆𑀜𑀁 𑀦𑀸𑀲𑁂𑀬𑁆𑀬 𑀔𑀦𑁆𑀥𑀸𑀯, 𑀅𑀢𑁆𑀣𑀻𑀢𑀺 𑀆𑀪𑀼𑀚𑁂 𑀩𑀼𑀥𑁄.

𑀔𑀦𑁆𑀥𑀦𑀸𑀲 ¶ 𑀫𑀦𑀸𑀪𑀼𑀚𑁆𑀚, 𑀫𑀢𑁄 𑀫𑁂 𑀧𑀼𑀢𑁆𑀢𑀓𑁄 𑀇𑀢𑀺;

𑀲𑁄𑀘𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑀺 𑀧𑀼𑀢𑁆𑀢𑁄𑀦𑀢𑁆𑀣𑀺 𑀦𑀲𑁄𑀫𑀢𑁄.

𑀪𑀺𑀚𑁆𑀚𑀫𑀸𑀦𑁂𑀲𑀼 ¶ 𑀔𑀦𑁆𑀥𑁂𑀲𑀼, 𑀅𑀢𑁆𑀢𑀲𑀜𑁆𑀜𑀻 𑀅𑀦𑀢𑁆𑀢𑁂𑀲𑀼;

𑀦𑀸𑀤𑀺𑀓𑀸𑀮 𑀯𑀺𑀧𑀭𑀺𑀢𑀸, 𑀫𑀳𑀸𑀚𑀸𑀦𑀻𑀬𑀢𑀁 𑀕𑀢𑀸.

𑀪𑀺𑀚𑁆𑀚𑀫𑀸𑀦𑁂𑀲𑀼 𑀔𑀦𑁆𑀥𑁂𑀲𑀼, 𑀮𑀕𑁆𑀕𑀸 𑀭𑀢𑁆𑀢𑀸 𑀫𑀫𑀸𑀬𑀺𑀢𑀸;

𑀦𑀸𑀭𑀻𑀧𑀼𑀫𑀸𑀤𑀺 𑀲𑀜𑁆𑀜𑀸𑀬, 𑀯𑀺𑀧𑀭𑁂𑀢𑀸 𑀅𑀦𑀸𑀤𑀺𑀓𑁂.

𑀦𑀸𑀤𑀺𑀓𑀸𑀮 ¶ 𑀯𑀺𑀧𑀭𑀺𑀢𑁄, 𑀅𑀢𑁆𑀢𑀲𑀜𑁆𑀜𑀻 𑀅𑀦𑀢𑁆𑀢𑀦𑀺;

𑀪𑀺𑀚𑁆𑀚𑀫𑀸𑀦𑁂𑀲𑀼 𑀔𑀦𑁆𑀥𑁂𑀲𑀼, 𑀚𑀳 𑀢𑁆𑀢𑀸𑀢𑀺 𑀫𑀫𑀸𑀬𑀦𑀁.

𑀅𑀪𑀺𑀡𑁆𑀳𑀼𑀧𑁆𑀧𑀢𑁆𑀢𑀺𑀬𑀸𑀬𑁂𑀯, 𑀪𑀺𑀚𑁆𑀚𑀫𑀸𑀦𑁄 𑀦𑀜𑁆𑀜𑀬𑀢𑀺;

𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀙𑀦𑁆𑀦𑀁, 𑀢𑀁 𑀘𑀺𑀦𑁆𑀢𑁂𑀬𑁆𑀬 𑀲𑀼𑀧𑀜𑁆𑀜𑀯𑀸.

𑀅𑀲𑀦𑁆𑀢𑁂𑀬𑁂𑀯 ¶ 𑀮𑀕𑁆𑀕𑀦𑁆𑀢𑀸, 𑀦𑀫𑀼𑀘𑁆𑀘𑀦𑁆𑀢𑀺 𑀪𑀯𑀢𑁆𑀢𑀬𑀸;

𑀦𑀢𑁆𑀣𑀺 𑀲𑀦𑁆𑀢𑁂𑀲𑀼 𑀮𑀕𑁆𑀕𑀦𑁆𑀢𑀸, 𑀭𑀽𑀧𑀓𑁆𑀔𑀦𑁆𑀥𑀸 𑀤𑀺𑀓𑁂 𑀲𑁆𑀯𑀺𑀥.

𑀢𑀡𑁆𑀳𑀸 𑀕𑀺𑀚𑁆𑀛𑀢𑀺 𑀫𑁂𑀢𑀦𑁆𑀢𑀺, 𑀫𑀸𑀦𑁄 𑀅𑀳𑀦𑁆𑀢𑀺 𑀫𑀜𑁆𑀜𑀢𑀺;

𑀤𑀺𑀝𑁆𑀞𑀺 𑀕𑀡𑁆𑀳𑀸𑀢𑀺 𑀅𑀢𑁆𑀢𑀸𑀢𑀺, 𑀏𑀢𑁂 𑀧𑀧𑀜𑁆𑀘𑀓𑀸 𑀢𑀬𑁄.

𑀫𑀫𑁂 ¶ 𑀢 𑀫𑀳 𑀫𑀢𑁆𑀢𑀸𑀢𑀺, 𑀧𑀧𑀜𑁆𑀘𑀸𑀦𑀁 𑀯𑀲𑀸𑀦𑀼𑀕𑁄;

𑀕𑀡𑁆𑀳𑀦𑁆𑀢𑁄 𑀪𑀯 𑀧𑀗𑁆𑀓𑀫𑁆𑀳𑀺, 𑀦𑀺𑀫𑁆𑀫𑀼𑀕𑁆𑀕𑁄𑀯 𑀪𑀬𑀸𑀦𑀓𑁂.

𑀦𑀫𑁂 𑀦𑀸𑀳𑀁 𑀦𑀅𑀢𑁆𑀢𑀸𑀢𑀺, 𑀏𑀢𑁂𑀳𑀺 𑀯𑀺𑀯𑀤𑀁 𑀓𑀭𑁂;

𑀯𑀺𑀯𑀤𑀦𑁆𑀢𑀸𑀯 𑀫𑀼𑀘𑁆𑀘𑀦𑁆𑀢𑀺, 𑀪𑀯𑀧𑀗𑁆𑀓𑀸 𑀪𑀬𑀸𑀦𑀓𑀸.

𑀦𑀫𑁂 ¶ 𑀦𑀸𑀳𑀁 𑀦𑀅𑀢𑁆𑀢𑀸𑀢𑀺, 𑀤𑀝𑁆𑀞𑀩𑁆𑀩𑀦𑁆𑀢𑀺 𑀚𑀺𑀦𑁂𑀭𑀺𑀢𑀁;

𑀢𑀣𑁂𑀯 𑀲𑀩𑁆𑀩𑀤𑀸 𑀫𑀜𑁆𑀜𑁂, 𑀫𑀸 𑀧𑀧𑀜𑁆𑀘 𑀯𑀲𑀸𑀦𑀼𑀕𑁄.

𑀮𑁄𑀓𑁄 𑀯𑀺𑀯𑀤𑀺 𑀩𑀼𑀤𑁆𑀥𑁂𑀦, 𑀦𑀮𑁄𑀓𑁂𑀦 𑀓𑀤𑀸𑀘𑀺𑀲𑁄;

𑀅𑀦𑀢𑁆𑀢𑀸𑀢𑀺 𑀚𑀺𑀦𑀼𑀤𑁆𑀤𑀺𑀝𑁆𑀞𑀁, 𑀮𑁄𑀓𑁄 𑀅𑀢𑁆𑀢𑀸𑀢𑀺 𑀫𑀜𑁆𑀜𑀢𑀺.

𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀲𑀁 𑀦𑁆𑀯𑁂𑀢𑀼, 𑀲𑀦𑁆𑀛𑀸𑀤𑀺 𑀪𑀬𑀢𑀚𑁆𑀚𑀺𑀢𑁄;

𑀢𑀩𑁆𑀩𑀲𑀁𑀬𑁂𑀯 𑀅𑀦𑁆𑀯𑁂𑀦𑁆𑀢𑁄, 𑀪𑀯𑀢𑀺𑀡𑁆𑀡𑁄 𑀪𑀯𑀺𑀲𑁆𑀲𑀢𑀺.

𑀅𑀦𑀢𑁆𑀢𑀸𑀢𑀺 ¶ 𑀕𑀺𑀭𑀸 𑀲𑀘𑁆𑀘𑀸, 𑀅𑀢𑁆𑀢𑀸𑀢𑀺 𑀯𑀘𑀦𑀁 𑀫𑀼𑀲𑀸;

𑀫𑀼𑀲𑀸𑀬 𑀯𑀺𑀯𑀤𑁂 𑀮𑁄𑀓𑁄, 𑀩𑀼𑀤𑁆𑀥𑁂𑀦 𑀲𑀘𑁆𑀘 𑀯𑀸𑀤𑀺𑀦𑀸.

𑀢𑀼𑀭𑀗𑁆𑀕𑀯𑀚𑀕𑀸𑀫𑀫𑁆𑀳𑀸, 𑀧𑀼𑀭𑀺𑀫𑁂 𑀘𑀫𑀓𑁆𑀬 𑀓𑀸𑀦𑀦𑁂;

𑀯𑀲𑀢𑀸 𑀅𑀕𑁆𑀕𑀥𑀫𑁆𑀫𑁂𑀦, 𑀣𑁂𑀭𑁂𑀦 𑀭𑀘𑀺𑀢𑁄 𑀅𑀬𑀁.

𑀦𑀸𑀤𑀺𑀓𑀸𑀮 ¶ 𑀯𑀺𑀧𑀭𑀺𑀢, 𑀚𑀦 𑀪𑀽𑀢𑀢𑁆𑀣 𑀤𑀲𑁆𑀲𑀺𑀦𑁄;

𑀤𑀸𑀢𑀼𑀫𑁂 𑀓𑀦𑁆𑀢𑀺𑀓𑀲𑁆𑀲𑀸𑀤𑀁, 𑀲𑀢𑁆𑀣𑀼 𑀧𑀸𑀤𑁄 𑀢𑀺𑀫𑀸𑀦𑀺𑀢𑁄.

𑀲𑀻𑀲𑁂 ¶ 𑀧𑀺𑀮𑀦𑁆𑀤𑀺𑀬𑀸 𑀫𑁄𑀤𑀻, 𑀲𑀫𑁆𑀩𑀼𑀤𑁆𑀥 𑀘𑀭𑀡 𑀫𑁆𑀩𑀼𑀚𑀁;

𑀲𑀸𑀥𑀼 𑀢𑀼𑀝𑁆𑀞𑀺𑀓𑀭𑀁 𑀩𑁆𑀭𑀽𑀫𑀺, 𑀲𑀼𑀓𑀸𑀬 𑀧𑀘𑁆𑀘𑀯𑁂𑀓𑁆𑀔𑀡𑀁.

𑀬𑁄𑀦𑀺𑀲𑁄 𑀫𑀦𑀲𑀻𑀓𑀢𑁆𑀯𑀸, 𑀦𑀸𑀤𑀸 𑀯𑀺𑀭𑀼𑀤𑁆𑀥 𑀫𑀜𑁆𑀜𑀺𑀢𑀁;

𑀲𑀸𑀥𑀯𑁄 𑀢 𑀫𑀼𑀤𑀺𑀓𑁆𑀔𑀦𑁆𑀢𑀼, 𑀫𑀬𑀸𑀧𑀺 𑀫𑀦𑁆𑀤𑀩𑀼𑀤𑁆𑀥𑀺𑀦𑁄.

𑀇𑀘𑁆𑀙𑀺𑀢𑀩𑁆𑀩𑀸𑀦 ¶ 𑀫𑀸𑀬𑀢𑁆𑀢𑀸, 𑀢𑁂𑀲𑀜𑁆𑀘 𑀘𑀬𑀪𑀸𑀯𑀢𑁄;

𑀢𑀤𑀸𑀓𑀸𑀭𑁂𑀦 𑀯𑀢𑁆𑀢𑀺𑀢𑀸, 𑀓𑀸𑀬𑁄 𑀚𑁂𑀕𑀼𑀘𑁆𑀙 𑀧𑀼𑀜𑁆𑀚𑀓𑁄.

𑀧𑀼𑀦𑀧𑁆𑀧𑀼𑀦𑀁𑀯 𑀑𑀓𑁆𑀓𑀫, 𑀜𑀸𑀡 𑀫𑀦𑁆𑀢𑁄 𑀧𑀯𑁂𑀲𑀺𑀬;

𑀩𑀸𑀳𑀺𑀭𑀁𑀯 𑀅𑀦𑀸𑀮𑀫𑁆𑀩, 𑀇𑀓𑁆𑀔𑀡𑀸 𑀧𑀘𑁆𑀘𑀯𑁂𑀓𑁆𑀔𑀡𑀸.

𑀫𑀁𑀲𑀘𑁆𑀙𑀦𑁆𑀦 ¶ 𑀝𑁆𑀞𑀺𑀭𑀽𑀧𑁂𑀯, 𑀫𑀦𑁄𑀚 𑀯𑀸𑀬𑀼 𑀘𑀸𑀮𑀺𑀢𑁂;

𑀦𑀸𑀭𑀻 𑀕𑀢𑀸𑀢𑀺 𑀬𑀸𑀘𑀺𑀦𑁆𑀢𑀸, 𑀦𑁂𑀯 𑀲𑀸𑀧𑀘𑁆𑀘𑀯𑁂𑀓𑁆𑀔𑀡𑀸.

𑀲𑀜𑁆𑀜𑀸𑀤𑀺𑀝𑁆𑀞𑀺𑀘 𑀘𑀺𑀢𑁆𑀢𑀜𑁆𑀘, 𑀯𑀺𑀧𑀮𑁆𑀮𑀸𑀲𑀸 𑀇𑀫𑁂𑀢𑀬𑁄;

𑀢 𑀤𑀸𑀓𑀸𑀭𑁂𑀦 𑀯𑀢𑁆𑀢𑀦𑁆𑀢𑀺, 𑀅𑀯𑀺𑀚𑁆𑀚𑁄 𑀢𑁆𑀣𑀭𑀺𑀢𑀸 𑀪𑀼𑀲𑀁.

𑀅𑀲𑀼𑀪𑁂𑀯 𑀲𑀼𑀪𑀫𑀺𑀢𑀺, 𑀅𑀦𑀺𑀘𑁆𑀘𑁂𑀏𑀯 𑀦𑀺𑀘𑁆𑀘𑀢𑁄;

𑀤𑀼𑀓𑁆𑀔𑁂𑀬𑁂𑀯 𑀲𑀼𑀔𑀁𑀯𑀸𑀢𑀺, 𑀅𑀦𑀢𑁆𑀢𑀦𑀺𑀯 𑀅𑀢𑁆𑀢𑀢𑁄.

𑀢𑀡𑁆𑀳𑀸 ¶ 𑀢𑀲𑁆𑀲𑀺 𑀫𑀫𑁂𑀢𑀦𑁆𑀢𑀺, 𑀫𑀸𑀦𑁄 𑀫𑀜𑁆𑀜𑀺 𑀅𑀳𑀦𑁆𑀢𑀺𑀘;

𑀬𑀲𑁆𑀲𑀺 𑀤𑀺𑀝𑁆𑀞𑀺𑀘 𑀅𑀢𑁆𑀢𑀸𑀢𑀺, 𑀧𑀧𑀜𑁆𑀘𑀸 𑀦𑀸𑀫𑀺𑀫𑁂 𑀢𑀬𑁄.

𑀧𑀧𑀜𑁆𑀘𑀦𑁆𑀢𑀺 𑀲𑀁𑀲𑀸𑀭𑀁, 𑀢𑀲𑁆𑀫𑀸 𑀧𑀧𑀜𑁆𑀘𑀦𑀸𑀫𑀓𑀸;

𑀪𑀯𑀬𑀦𑁆𑀢𑁂 𑀧𑀬𑁄𑀚𑁂𑀦𑁆𑀢𑀸, 𑀫𑁄𑀓𑁆𑀔𑀁 𑀦𑀸𑀤𑀁𑀲𑀼 𑀢𑁂 𑀘𑀺𑀭𑀁.

𑀪𑀯𑀧𑀗𑁆𑀓𑁂 𑀦𑀺 𑀫𑀼𑀚𑁆𑀚𑀦𑁆𑀢𑀸, 𑀧𑀧𑀜𑁆𑀘𑀸𑀦𑀁 𑀯𑀲𑀸𑀦𑀼𑀕𑀸;

𑀘𑀺𑀭𑀲𑁆𑀲𑀁 𑀤𑀼𑀓𑁆𑀔𑀺𑀢𑀸 𑀳𑁄𑀦𑁆𑀢𑀺, 𑀆𑀭𑀸 𑀦𑀺𑀩𑁆𑀩𑀸𑀦𑀢𑁄 𑀢𑀺𑀯.

𑀦𑀫𑁂 ¶ 𑀦𑀸𑀳𑀁 𑀦𑀅𑀢𑁆𑀢𑀸𑀢𑀺, 𑀏𑀢𑁂𑀳𑀺 𑀯𑀺𑀯𑀤𑀁 𑀓𑀭𑁂;

𑀪𑀡𑁆𑀟𑀦𑁆𑀢𑀸 𑀯𑀺𑀯𑀤𑀦𑁆𑀢𑀸 𑀢𑁂, 𑀦𑀺𑀩𑁆𑀩𑀸𑀦𑀢𑁄 𑀅𑀤𑀽𑀭𑀺𑀦𑁄.

𑀯𑀺𑀧𑀮𑁆𑀮𑀸𑀲𑁂 𑀧𑀧𑀜𑁆𑀘𑁂𑀘, 𑀤𑁆𑀯𑁂𑀧𑀺𑀏𑀢𑁂 𑀧𑀳𑀸𑀢𑀯𑁂;

𑀲𑁄𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑁂 𑀯𑀁, 𑀓𑀸𑀬𑁄 𑀚𑁂𑀕𑀼𑀘𑁆𑀙𑀧𑀼𑀜𑁆𑀚𑀓𑁄.

𑀮𑀕𑁆𑀕𑀺𑀓𑀸 𑀙𑀯𑀺𑀬𑀁𑀬𑁂𑀯, 𑀢𑀡𑁆𑀳𑀸 𑀩𑀸𑀳𑀺𑀭𑀕𑁄𑀘𑀭𑀸;

𑀢𑀲𑁆𑀫𑀸 𑀏𑀢𑁆𑀣 𑀢𑀘𑁄𑀯𑀸𑀳, 𑀲𑀫𑁆𑀩𑀼𑀤𑁆𑀥𑁄 𑀦 𑀩𑀳𑀺𑀘𑁆𑀙𑀯𑀺𑀁.

𑀏𑀲𑀸 ¶ 𑀢𑀘𑀧𑀭𑀺𑀬𑀦𑁆𑀢, 𑀧𑀤𑁂𑀦𑀸𑀧𑀺 𑀦𑀺𑀯𑀸𑀭𑀺𑀢𑀸;

𑀅𑀢𑁄 𑀙𑀯𑀺 𑀫𑀦𑀸𑀮𑀫𑁆𑀩, 𑀢𑀘𑀲𑀻𑀯 𑀫𑀦𑁂𑀓𑀭𑁂.

𑀚𑀺𑀕𑀼𑀘𑁆𑀙𑀺𑀢𑀸𑀦𑀺 𑀙𑀸𑀤𑁂𑀢𑀺, 𑀅𑀝𑁆𑀞𑀺 𑀫𑀁𑀲 𑀢𑀘𑀸𑀤𑀺𑀦𑀺;

𑀜𑀸𑀡𑁂𑀦 𑀙𑀺𑀦𑁆𑀤𑀺 𑀢𑀩𑁆𑀩𑀸𑀘, 𑀢𑀲𑁆𑀫𑀸 𑀙𑀯𑀻𑀢𑀺 𑀯𑀼𑀘𑁆𑀘𑀢𑀺.

𑀦𑁆𑀳𑀸𑀭𑀼𑀩𑀦𑁆𑀥𑁄 ¶ 𑀝𑁆𑀞𑀺𑀲𑀗𑁆𑀖𑀸𑀢𑁄, 𑀫𑀁𑀲𑀮𑁄𑀳𑀺 𑀢 𑀮𑀺𑀫𑁆𑀧𑀺𑀢𑁄;

𑀙𑀯𑀺𑀬𑀸𑀯 𑀯𑀺𑀫𑁄𑀳𑁂𑀢𑀺, 𑀢𑀘𑀘𑁆𑀙𑀦𑁆𑀦𑁄 𑀇𑀫𑀁 𑀧𑀚𑀁.

𑀏𑀓𑁂𑀓𑀁 ¶ 𑀫𑀦𑀲𑀻𑀓𑀢𑁆𑀯𑀸, 𑀦𑀬𑁂 𑀦𑀺𑀘𑁆𑀘𑁂𑀯 𑀫𑀸𑀤𑀺𑀦𑀸;

𑀪𑀸𑀯𑁂𑀢𑀩𑁆𑀩𑀸 𑀲𑀫𑀸𑀭𑀫𑁆𑀪, 𑀬𑀣𑀸𑀧𑀜𑁆𑀜𑀸𑀬𑀢𑁂 𑀢𑀣𑀸.

𑀧𑀽𑀭𑀺𑀢𑀁 𑀫𑀢𑁆𑀣𑀮𑀼𑀗𑁆𑀕𑀲𑁆𑀲, 𑀲𑀻𑀲𑀝𑁆𑀞𑀺𑀧𑀺 𑀚𑀺𑀕𑀼𑀘𑁆𑀙𑀺𑀢𑀁;

𑀫𑀼𑀔 𑀦𑀸𑀲𑀓𑁆𑀔𑀺 𑀓𑀡𑁆𑀡𑀸𑀤𑀺, 𑀙𑀺𑀤𑁆𑀤𑀸 𑀯𑀙𑀺𑀤𑁆𑀤 𑀤𑀼𑀤𑁆𑀤𑀲𑀁.

𑀧𑀽𑀢𑀺 ¶ 𑀯𑀸𑀬𑀼 𑀯𑀺𑀘𑀭𑀺𑀢, 𑀓𑀼𑀘𑁆𑀙𑀺𑀝𑁆𑀞𑀦𑁆𑀢𑀸𑀦𑀺 𑀮𑁄𑀳𑀺𑀢𑀁;

𑀧𑀺𑀢𑁆𑀢𑀁 𑀲𑁂𑀫𑁆𑀳𑀜𑁆𑀘 𑀧𑀧𑁆𑀨𑀸𑀲𑀁, 𑀳𑀤𑀬𑀁 𑀬𑀓𑀦𑀫𑁆𑀧𑀺 𑀥𑀻.

𑀅𑀦𑁆𑀦 𑀧𑀸𑀦𑀁 𑀫𑀦𑀼𑀜𑁆𑀜𑀫𑁆𑀧𑀺, 𑀔𑁂𑀴 𑀢𑀺𑀦𑁆𑀢 𑀫𑀥𑁄𑀧𑀭𑀺;

𑀤𑀦𑁆𑀢𑁂𑀳𑀺 𑀧𑀺𑀲𑀺𑀢𑀁 𑀲𑁆𑀯𑀸𑀦, 𑀯𑀫𑀣𑀽𑀯 𑀚𑀺𑀕𑀼𑀘𑁆𑀙𑀺𑀢𑀁.

𑀬𑀸𑀯𑀢𑀸𑀬𑀼 ¶ 𑀅𑀥𑁄𑀢𑁂𑀯𑀸, 𑀫𑀸𑀲𑀬𑁂 𑀕𑀺𑀮𑀺𑀢𑀁 𑀞𑀺𑀢𑀁;

𑀓𑀺𑀫𑀺𑀓𑀽𑀮 𑀲𑀫𑀸𑀓𑀺𑀡𑁆𑀡𑁂, 𑀢𑀳𑀺𑀫𑁂𑀯𑀸 𑀲𑀺𑀢𑀸𑀲𑀺𑀢𑀁.

𑀏𑀢𑀁 𑀉𑀤𑀭𑀺𑀬𑀁 𑀦𑀸𑀫, 𑀢𑀫𑁆𑀳𑀸 𑀧𑀓𑁆𑀓𑀸𑀲𑀬𑀁 𑀕𑀢𑀁;

𑀤𑀺𑀦𑀘𑁆𑀘𑀬𑁂 𑀓𑀭𑀻𑀲𑀦𑁆𑀢𑀁, 𑀲𑀸 𑀲𑀬𑀁 𑀢𑀁𑀤𑁆𑀯𑀬𑀫𑁆𑀧𑀺 𑀥𑀻.

𑀧𑀓𑀸𑀲𑁂𑀢𑁆𑀯𑀸 ¶ 𑀧𑀯𑁂𑀲𑁂𑀢𑀺, 𑀅𑀦𑁆𑀦𑀧𑀸𑀦𑀁 𑀫𑀳𑀸𑀭𑀳𑀁;

𑀧𑀝𑀺𑀘𑁆𑀙𑀦𑁆𑀦𑁄 𑀦𑀺𑀳𑀭𑀢𑀺, 𑀢𑀫𑁂𑀯 𑀦𑁆𑀢𑁄 𑀞𑀺𑀢𑀁 𑀚𑀦𑁄.

𑀦𑀺𑀓𑁆𑀔𑀫𑀦𑁆𑀢𑁂 𑀚𑀺𑀕𑀼𑀘𑁆𑀙𑀺𑀢𑀁.

𑀚𑁂𑀕𑀼𑀘𑁆𑀙 ¶ 𑀧𑀝𑀺𑀓𑀼𑀮𑁆𑀬𑀸𑀦𑀺, 𑀫𑀁𑀲𑀦𑁆𑀳𑀸𑀭𑀼 𑀢𑀘𑀝𑁆𑀞𑀺𑀦𑀺;

𑀦𑀧𑀺𑀬𑀸𑀦𑀺 𑀦 𑀢𑀼𑀝𑁆𑀞𑀸𑀦𑀺, 𑀦𑁂𑀯𑀇𑀢𑁆𑀣𑀻 𑀦𑀧𑀽𑀧𑀺𑀲𑁄.

𑀦𑀢𑁆𑀣𑀜𑁆𑀜𑀸𑀦𑀺 𑀚𑀺𑀕𑀼𑀘𑁆𑀙𑀺𑀢𑀸;

𑀧𑀘𑁆𑀘𑁂𑀓𑀁 ¶ 𑀯𑀺𑀦𑀺𑀪𑀼𑀢𑁆𑀢𑁂𑀲, 𑀓𑁂𑀲 𑀮𑁄𑀫 𑀦𑀔𑀸𑀤𑀺𑀲𑀼;

𑀦𑀢𑁆𑀣𑀺𑀓𑀜𑁆𑀜𑀸 𑀓𑀼𑀫𑀸𑀭𑀻𑀯𑀸, 𑀲𑀫𑁆𑀧𑀺𑀡𑁆𑀟𑀺𑀢𑁂𑀲𑀼 𑀲𑀸 𑀓𑀼𑀢𑁄.

𑀧𑀺𑀡𑁆𑀟𑀺𑀢𑁂 𑀲𑁆𑀯𑁂𑀲𑀼 𑀲𑀫𑁆𑀫𑀼𑀢𑀺;

𑀲𑀦𑁆𑀢𑀁 ¶ 𑀘𑀺𑀦𑁆𑀢𑁂𑀬𑁆𑀬 𑀦𑀸𑀲𑀦𑁆𑀢𑀁, 𑀲𑀦𑁆𑀢𑀁 𑀘𑀺𑀦𑁆𑀢𑀬𑀢𑁄 𑀲𑀼𑀔𑀁;

𑀅𑀲𑀦𑁆𑀢𑀁 𑀅𑀦𑀼𑀘𑀺𑀦𑁆𑀢𑁂𑀦𑁆𑀢𑁄, 𑀦𑀸𑀦𑀸𑀤𑀼𑀓𑁆𑀔𑁂𑀳𑀺 𑀢𑀧𑁆𑀧𑀢𑀺.

𑀚𑀯𑀢𑁆𑀬𑀸 𑀯𑀺𑀚𑁆𑀚𑀫𑀸𑀦𑁂𑀯, 𑀦𑀸𑀯𑀺𑀚𑁆𑀚𑀸 𑀯𑀺𑀚𑁆𑀚𑀫𑀸𑀦𑀓𑁂;

𑀢𑀲𑁆𑀫𑀸𑀢𑀁𑀦𑀸𑀫𑀓𑁄 𑀫𑁄𑀳𑁄, 𑀢𑀡𑁆𑀳𑀸𑀧𑀺𑀘 𑀢𑀤𑀦𑁆𑀯𑀺𑀢𑀸.

𑀧𑀼𑀁𑀓𑀸𑀬𑁄𑀯𑀸𑀣𑀻𑀓𑀸𑀬𑁄𑀯𑀸 ¶ , 𑀫𑀮𑀸𑀲𑀼𑀘𑀺𑀚𑀺𑀕𑀼𑀘𑁆𑀙𑀺𑀢𑁄;

𑀢𑀲𑁆𑀲𑀫𑀁 𑀦𑀢𑁆𑀣𑀺𑀕𑀸𑀭𑀬𑁆𑀳𑀁, 𑀬𑁆𑀯𑀸𑀫𑀮𑀫𑁆𑀧𑀺 𑀫𑀮𑀁𑀓𑀭𑁂.

𑀣𑀻𑀧𑀼𑀁 𑀲𑀧𑀭𑀓𑀸𑀬𑁄𑀢𑀺, 𑀧𑀲𑁆𑀲𑀢𑀺𑀧𑀺 𑀦𑀧𑀲𑁆𑀲𑀢𑀺;

𑀚𑁂𑀕𑀼𑀘𑁆𑀙 𑀧𑀝𑀺𑀓𑀼𑀮𑁆𑀬𑁄𑀢𑀺, 𑀲𑀫𑁆𑀫𑀸 𑀧𑀲𑁆𑀲𑀢𑀺 𑀧𑀲𑁆𑀲𑀢𑀺.

𑀪𑀺𑀬𑁆𑀬𑁄𑀪𑀺𑀬𑁆𑀬𑁄𑀯 𑀭𑀸𑀕𑀕𑁆𑀕𑀺,

𑀩𑀳𑀼𑀲𑁆𑀲𑀼𑀢𑁄𑀧𑀺 ¶ 𑀩𑀸𑀮𑁄𑀯, 𑀅𑀲𑀼𑀪𑁂 𑀲𑀼𑀪𑀫𑀜𑁆𑀜𑀓𑁄;

𑀅𑀲𑀼𑀪𑁄𑀢𑀺 𑀯𑀺𑀧𑀲𑁆𑀲𑀦𑁆𑀢𑁄, 𑀅𑀧𑁆𑀧𑀲𑁆𑀲𑀼𑀢𑁄𑀧𑀺𑀧𑀡𑁆𑀟𑀺𑀢𑁄.

𑀬𑁄𑀘 𑀲𑀺𑀧𑁆𑀧𑀸𑀦𑀺 𑀚𑀸𑀦𑁂𑀬𑁆𑀬, 𑀲𑀢𑀸𑀦𑀺 𑀲𑀳𑀲𑁆𑀲𑀸𑀦𑀺𑀧𑀺;

𑀓𑀸𑀬𑁂𑀓𑀚𑀸𑀦𑀦𑀁 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀅𑀜𑁆𑀜 𑀯𑀺𑀚𑀸𑀦𑀁𑀦𑀁.

𑀓𑀸𑀬𑀫𑁂𑀓𑀫𑁆𑀧𑀺 ¶ 𑀦𑀜𑁆𑀜𑀸𑀫𑀺, 𑀩𑀼𑀤𑁆𑀥𑀸𑀮𑀤𑁆𑀥𑀦𑀬𑁄 𑀅𑀧𑀺;

𑀲𑀼𑀢𑀸𑀘 𑀧𑀡𑁆𑀟𑀺𑀢𑀸𑀢𑁆𑀬𑀫𑁆𑀳𑀸, 𑀬𑀼𑀢𑁆𑀢𑁄𑀬𑁂𑀯𑀸 𑀢𑀺𑀮𑀚𑁆𑀚𑀺𑀢𑀼𑀁.

𑀲𑀼𑀪𑀢𑁄𑀬𑁂𑀯 𑀫𑀜𑁆𑀜𑀸𑀫𑀺, 𑀏𑀯𑀁 𑀚𑀺𑀕𑀼𑀘𑁆𑀙𑀺𑀢𑀫𑁆𑀧𑀺𑀦𑀁;

𑀫𑀜𑁆𑀘 𑀜𑁂 𑀧𑀡𑁆𑀟𑀺𑀢𑁄 𑀢𑁆𑀬𑀸𑀳𑀼, 𑀅𑀮𑀫𑁂𑀯𑀸𑀢𑀺𑀮𑀚𑁆𑀚𑀺𑀢𑀼𑀁.

𑀓𑀸𑀬𑁂 ¶ 𑀅𑀲𑀼𑀪𑀲𑀜𑁆𑀜𑀁𑀬𑁄, 𑀦𑀮𑀪𑀸𑀫𑀺 𑀓𑀤𑀸𑀘𑀺𑀧𑀺;

𑀲𑀼𑀮𑀤𑁆𑀥 𑀲𑀼𑀕𑀢𑁄 𑀯𑀸𑀤𑁄, 𑀲𑁆𑀯𑀸𑀭𑀳𑁄𑀯𑀸𑀢𑀺𑀮𑀚𑁆𑀚𑀺𑀢𑀼𑀁.

𑀓𑀸𑀬𑁂𑀦 𑀲𑀁𑀲𑀭𑀦𑁆𑀢𑁄𑀧𑀺, 𑀢𑀤𑀸𑀓𑀸𑀭𑀁 𑀬𑀣𑀸𑀢𑀣𑀁;

𑀪𑀯𑁂𑀪𑀯𑁂 𑀅𑀚𑀸𑀦𑀦𑁆𑀢𑁄, 𑀫𑀫𑀸𑀬𑀺𑀢𑁆𑀯𑀸𑀯 𑀢𑀁 𑀘𑀚𑀺𑀁.

𑀓𑀸𑀬𑁂𑀦 ¶ 𑀲𑀁𑀲𑀭𑀦𑁆𑀢𑁄𑀧𑀺, 𑀦𑀜𑁆𑀜𑀸 𑀓𑀸𑀬 𑀚𑀺𑀕𑀼𑀘𑁆𑀘𑀢𑀁;

𑀦𑀺𑀘𑁆𑀘𑀼𑀧𑀸𑀤𑀸 𑀫𑀫𑀸𑀬𑀦𑁆𑀢𑁄, 𑀧𑀺𑀬𑀸𑀬𑀺𑀢𑁆𑀯𑀸𑀯 𑀢𑀁 𑀘𑀚𑀺𑀁.

𑀓𑀼𑀪𑀸𑀭𑀁 𑀲𑀸𑀭𑀲𑀜𑁆𑀜𑀸𑀬, 𑀧𑀺𑀬𑀸𑀬𑀺𑀢𑁆𑀯𑀸𑀯 𑀳𑀺𑀁𑀲𑀓𑀁;

𑀅𑀦𑀦𑁆𑀢𑀤𑀼𑀓𑁆𑀔 𑀫𑀸𑀧𑀸𑀤𑀺𑀁, 𑀯𑀺𑀧𑀮𑁆𑀮𑀸𑀲𑁄 𑀪𑀯𑁂𑀪𑀯𑁂.

𑀫𑀳𑀸𑀚𑀸𑀦𑀻𑀬 ¶ 𑀧𑀢𑁆𑀢𑁄𑀢𑀺, 𑀲𑀁𑀯𑁂𑀚𑁂𑀢𑁆𑀯𑀸 𑀲𑀓𑀁𑀫𑀦𑀁;

𑀤𑀺𑀭𑁄𑀓𑀢 𑀚𑀺𑀦𑁄𑀯𑀸𑀤𑁄, 𑀅𑀦𑀺𑀯𑀢𑁆𑀢𑀺𑀢 𑀯𑀻𑀭𑀺𑀬𑁄.

𑀅𑀤𑀺𑀝𑁆𑀞𑀧𑀼𑀩𑁆𑀩 𑀫𑁂𑀢𑀲𑁆𑀲, 𑀢𑀣𑀸𑀓𑀸𑀭𑀁𑀯 𑀧𑀲𑁆𑀲𑀢𑀼;

𑀓𑀺𑀘𑁆𑀘 𑀫𑀜𑁆𑀜 𑀫𑀼𑀧𑁂𑀓𑁆𑀔𑀸𑀬, 𑀲𑀁𑀲𑀸𑀭 𑀪𑀬 𑀪𑀻𑀭𑀼𑀓𑁄.

𑀬𑀜𑁆𑀳𑀺𑀓𑀺𑀘𑁆𑀘𑀁 ¶ 𑀅𑀧𑀯𑀺𑀝𑁆𑀞𑀁, 𑀅𑀓𑀺𑀘𑁆𑀘𑀁 𑀧𑀦 𑀓𑀬𑀺𑀭𑀸;

𑀉𑀦𑁆𑀦𑀴𑀸𑀦𑀁 𑀧𑀫𑀢𑁆𑀢𑀸𑀦𑀁, 𑀢𑁂𑀲𑀁 𑀯𑀟𑁆𑀠𑀦𑁆𑀢𑀺 𑀆𑀲𑀯𑀸.

𑀬𑁂𑀲𑀜𑁆𑀘 𑀲𑀼𑀲𑀫𑀸𑀭𑀤𑁆𑀥𑀸, 𑀦𑀺𑀘𑁆𑀘𑀁 𑀓𑀸𑀬𑀕𑀢𑀸 𑀲𑀢𑀺;

𑀅𑀓𑀺𑀘𑁆𑀘𑀁 𑀢𑁂 𑀦𑀲𑁂𑀯𑀦𑁆𑀢𑀺, 𑀓𑀺𑀘𑁆𑀘𑁂 𑀲𑀸𑀢𑀢 𑀓𑀸𑀭𑀺𑀦𑁄;

𑀲𑀢𑀸𑀦𑀁 𑀲𑀫𑁆𑀧𑀚𑀸𑀦𑀸𑀦𑀁, 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀆𑀲𑀯𑀸𑀢𑀺.

𑀣𑁄𑀫𑁂𑀦𑁆𑀢𑀸 ¶ 𑀲𑁄𑀡𑁆𑀡𑀁 𑀓𑀸𑀬𑁄𑀭,

𑀭𑀢𑁆𑀢𑁂 𑀫𑀼𑀝𑁆𑀞𑁂 𑀓𑀭𑁄𑀦𑁆𑀢𑁂𑀢𑁂,

𑀅𑀲𑀼𑀪𑁄𑀢𑀺 ¶ 𑀚𑀺𑀦𑀼𑀤𑁆𑀤𑀺𑀝𑁆𑀞𑀁, 𑀓𑀸𑀬𑀁 𑀲𑀼𑀪𑁄𑀢𑀺 𑀕𑀸𑀳𑀺𑀦𑁄;

𑀲𑀁𑀫𑀼𑀴𑁆𑀳𑀸𑀢𑁂 𑀦 𑀫𑀼𑀘𑁆𑀘𑀦𑁆𑀢𑀺, 𑀪𑀯𑀸 𑀩𑀼𑀤𑁆𑀥 𑀯𑀺𑀭𑁄𑀥𑀺𑀦𑁄.

𑀅𑀲𑀼𑀪𑁄𑀢𑀺 𑀚𑀺𑀦𑀼𑀤𑁆𑀤𑀺𑀝𑁆𑀞𑀁, 𑀓𑀸𑀬𑀁 𑀢𑀣𑁂𑀯 𑀕𑀸𑀳𑀺𑀦𑁄;

𑀧𑀡𑁆𑀟𑀺𑀢𑀸 𑀢𑁂𑀯 𑀫𑀼𑀘𑁆𑀘𑀦𑁆𑀢𑀺, 𑀪𑀯𑀸 𑀩𑀼𑀤𑁆𑀥𑀫𑀢𑀸𑀦𑀼𑀕𑀸.

𑀲𑁄𑀥𑁂𑀦𑁆𑀢𑁂𑀮𑀗𑁆𑀓𑀭𑁄𑀦𑁆𑀢𑁂𑀯 ¶ , 𑀫𑀮𑀸𑀲𑀯𑀦𑁆𑀢𑀺𑀓𑀸𑀬𑀢𑁄;

𑀅𑀮𑀁 𑀓𑀸𑀬𑀯𑀺𑀲𑁄𑀥𑁂𑀦, 𑀩𑀸𑀮𑁄𑀯 𑀢𑀁 𑀕𑀭𑀼𑀁 𑀓𑀭𑁄.

𑀓𑀸𑀬𑁄 𑀫𑀦𑀼𑀲𑁆𑀲𑀚𑀸𑀢𑀻𑀦𑀁, 𑀢𑀺𑀭𑀘𑁆𑀙𑀸𑀦 𑀢𑁆𑀢𑀪𑀸𑀯𑀢𑁄;

𑀚𑁂𑀕𑀼𑀘𑁆𑀙𑀺𑀢 𑀢𑀭𑁄𑀳𑁄𑀢𑀺, 𑀤𑀼𑀩𑁆𑀩𑀺𑀲𑁄𑀥𑁄𑀘 𑀤𑀼𑀩𑁆𑀪𑀭𑁄.

𑀬𑀣𑀸𑀚𑀸𑀢𑁂𑀦 ¶ 𑀓𑀸𑀬𑁂𑀦, 𑀲𑀓𑁆𑀓𑀸 𑀯𑀺𑀳𑀭𑀺𑀢𑀼𑀁 𑀦𑀘;

𑀧𑀘𑁆𑀘𑀳𑀁 𑀲𑁄𑀥𑀦𑀻𑀬𑁄𑀘, 𑀥𑁄𑀯𑀦 𑀫𑀚𑁆𑀚𑀦𑀸𑀤𑀺𑀪𑀺.

𑀭𑀢𑁆𑀢𑀁 𑀧𑀸𑀢𑀼𑀁 𑀙𑀯𑀺𑀁 𑀙𑁂𑀢𑁆𑀯𑀸, 𑀲𑀓𑁆𑀓𑀸 𑀟𑀁𑀲𑀸𑀤𑀬𑁄𑀧𑀺𑀦𑀁;

𑀙𑁂𑀢𑁆𑀯𑀸 𑀫𑀁𑀲 𑀝𑁆𑀞𑀺𑀓𑀸𑀤𑀻𑀦𑀺, 𑀥𑀻𑀭𑁄 𑀦𑀸𑀮𑀫𑁆𑀩𑀺𑀢𑀼𑀁 𑀓𑀣𑀁.

𑀮𑀕𑁆𑀕𑀦𑁆𑀢𑀺 ¶ 𑀙𑀯𑀺𑀫𑀢𑁆𑀢𑁂 𑀬𑁂, 𑀫𑀓𑁆𑀔𑀺𑀓𑀸 𑀲𑁂𑀤𑀧𑀸 𑀬𑀣𑀸;

𑀣𑀻𑀧𑀼𑀁 𑀫𑀼𑀔𑀸𑀤𑀺 𑀲𑀜𑁆𑀜𑀸𑀬, 𑀢𑁂 𑀧𑀫𑀼𑀴𑁆𑀳𑀸 𑀫𑀳𑀸𑀢𑀧𑀸.

𑀘𑀸𑀭𑀻 𑀅𑀕𑁄𑀘𑀭𑁂 𑀓𑀸𑀫𑁂, 𑀮𑀕𑁆𑀕𑀸𑀮𑁂𑀧𑁂 𑀓𑀧𑀻𑀭𑀺𑀯;

𑀩𑀳𑀽𑀳𑀺 𑀧𑀻𑀴𑀺𑀢𑀸 𑀭𑀻𑀳𑀺, 𑀫𑀭𑀦𑁆𑀢𑀺 𑀅𑀢𑀺𑀤𑀼𑀓𑁆𑀔𑀺𑀦𑁄.

𑀭𑀸𑀕𑀸𑀭𑀺𑀁 ¶ 𑀤𑀼𑀚𑁆𑀚𑀬𑀁 𑀚𑁂𑀬𑁆𑀬𑀼𑀁, 𑀚𑀬𑀪𑀼𑀫𑁆𑀫𑀸𑀲𑀼𑀪𑁂 𑀘𑀭𑀸;

𑀲𑀻𑀢𑀸𑀦𑀺𑀲𑁆𑀲𑀺𑀢 𑀮𑀝𑀼𑀓𑀻, 𑀲𑁂𑀦𑀓𑀁𑀯 𑀫𑀳𑀩𑁆𑀩𑀮𑀁.

𑀓𑀸𑀬𑀸 ¶ 𑀲𑀼𑀪𑀁 𑀯𑀺𑀧𑀲𑁆𑀲𑀦𑁆𑀢𑀼, 𑀤𑀺𑀩𑁆𑀩 𑀓𑁆𑀔𑀺𑀦𑀸𑀧𑁆𑀬 𑀧𑀲𑁆𑀲𑀺𑀬𑀁;

𑀆𑀬𑀢𑀺𑀁 𑀫𑀕𑁆𑀕𑀮𑀸𑀪𑀸𑀬, 𑀢𑀁 𑀤𑀲𑁆𑀲𑀦𑀁 𑀪𑀯𑀺𑀲𑁆𑀲𑀢𑀺.

𑀥𑀻𑀘𑀓𑁆𑀔𑀼𑀦𑀸𑀯 𑀥𑀺𑀓𑁆𑀓𑀸𑀬𑀁, 𑀧𑀲𑁆𑀲𑁂 𑀦 𑀫𑀁𑀲𑀘𑀓𑁆𑀔𑀼𑀦𑀸;

𑀉𑀫𑁆𑀫𑀺𑀮𑀺𑀢𑁆𑀯𑀸𑀯 𑀥𑀻𑀘𑀓𑁆𑀔𑀼𑀁, 𑀯𑀺𑀯𑁂𑀓𑀝𑁆𑀞𑁄 𑀉𑀤𑀺𑀓𑁆𑀔𑀢𑀼.

𑀧𑀜𑁆𑀘𑀗𑁆𑀕𑀸𑀦𑀺 ¶ 𑀬𑀣𑀸 𑀓𑀼𑀫𑁆𑀫𑁄, 𑀘𑀓𑁆𑀔𑀸𑀤𑀻𑀦𑀺 𑀦𑀺𑀕𑀽𑀳𑀬𑁂;

𑀯𑁂𑀭𑀻 𑀮𑀪𑀢𑀼 𑀫𑁄𑀓𑀸𑀲𑀁, 𑀧𑀜𑁆𑀘𑀤𑁆𑀯𑀸𑀭𑀸 𑀅𑀭𑀓𑁆𑀔𑀺𑀢𑀸.

𑀘𑀓𑁆𑀔𑀼𑀭𑀽𑀧𑁂𑀦 ¶ 𑀲𑀁𑀯𑀸𑀲𑀸, 𑀭𑀸𑀕𑀧𑀼𑀢𑁆𑀢𑀁 𑀯𑀺𑀚𑀸𑀬𑀢𑀺;

𑀫𑀳𑀸𑀦𑀢𑁆𑀣𑀓𑀭𑁄 𑀲𑁄𑀘, 𑀲𑀁𑀯𑀸𑀲𑀁 𑀢𑁂𑀦 𑀯𑀸𑀭𑀬𑁂.

𑀭𑀽𑀧𑀸𑀤𑀻𑀲𑀼𑀲𑀜𑁆𑀚𑀦𑁆𑀢𑀻𑀢𑀺, 𑀲𑀢𑁆𑀢𑀸 𑀇𑀢𑁆𑀣𑁆𑀬𑀸𑀤𑀺 𑀲𑀜𑁆𑀜𑀸𑀬;

𑀦𑀢𑁆𑀯𑁂𑀯 𑀔𑀦𑁆𑀥𑀲𑀜𑁆𑀜𑀸𑀬, 𑀢𑀁𑀲𑀜𑁆𑀜𑀺𑀳𑀺 𑀯𑀺𑀭𑀸𑀕𑀺𑀦𑁄.

𑀩𑀳𑀻𑀯 ¶ 𑀲𑁄𑀥𑀺𑀢𑀁 𑀬𑀲𑁆𑀲, 𑀦 𑀯𑀦𑁆𑀢𑁄 𑀚𑁂𑀕𑀼𑀘𑁆𑀙 𑀧𑀼𑀜𑁆𑀚𑀓𑀁;

𑀢𑀁𑀓𑀸𑀬𑀁 𑀅𑀲𑀼𑀢𑀁𑀚𑀸𑀦, 𑀢𑀦𑀼𑀭𑀸𑀕𑁄 𑀲𑀺𑀬𑀸𑀢𑁆𑀢𑀦𑀺.

𑀓𑀸𑀬𑁂𑀯𑀺𑀭𑀸𑀕 𑀫𑀺𑀘𑁆𑀙𑀦𑁆𑀢𑁄, 𑀦𑀼𑀧𑀲𑁆𑀲𑁂𑀬𑁆𑀬 𑀢𑀤𑀦𑁆𑀢𑀭𑀁;

𑀅𑀦𑁆𑀢𑁄𑀤𑀲𑁆𑀲𑀻 𑀅𑀢𑀧𑁆𑀧𑀦𑁆𑀢𑁄, 𑀮𑀪𑁂 𑀲𑀁𑀲𑀸𑀭𑀫𑁄𑀘𑀦𑀁.

𑀲𑀢𑁆𑀢𑀸 ¶ 𑀲𑀢𑁆𑀢𑀸 𑀩𑀳𑀺𑀝𑁆𑀞𑁂𑀯𑀸, 𑀲𑀸𑀭𑀁𑀲𑀸𑀭𑀁 𑀫𑀫𑀸𑀬𑀺𑀦𑁄;

𑀲𑀦𑁆𑀢𑁄𑀲𑀦𑁆𑀢𑁄 𑀯𑀺𑀧𑀲𑁆𑀲𑀦𑁆𑀢𑁄, 𑀦𑀯𑀸𑀦𑀯𑀸𑀬𑀢𑀺𑀁𑀪𑀯𑁂.

𑀅𑀮𑀁 ¶ 𑀅𑀮𑀁 𑀓𑀢𑁆𑀯𑀸 𑀓𑀸𑀬𑀁, 𑀫𑀮𑀸𑀫𑀮𑀸𑀲𑀯𑀦𑁆𑀢𑀺𑀢𑁄;

𑀲𑁄𑀪𑀁 𑀲𑁄𑀪𑀁 𑀦𑀬𑁂 𑀞𑀸𑀦𑀁, 𑀫𑀦𑀁 𑀫𑀦𑀁 𑀧𑁆𑀬𑀮𑀁 𑀓𑀢𑀁.

𑀲𑀁𑀲𑀕𑁆𑀕𑀚𑀸𑀢𑀲𑁆𑀲 𑀪𑀯𑀦𑁆𑀢𑀺 𑀲𑁆𑀦𑁂𑀳𑀸,

𑀲𑁆𑀦𑁂𑀳𑀸𑀦𑁆𑀯𑀬𑀁 𑀤𑀼𑀓𑁆𑀔 𑀫𑀺𑀤𑀁 𑀧𑀳𑁄𑀢𑀺;

𑀆𑀤𑀺𑀦𑀯𑀁 𑀲𑁆𑀦𑁂𑀳𑀚𑀁𑀧𑁂𑀓𑁆𑀔 𑀫𑀸𑀦𑁄,

𑀏𑀓𑁄 𑀘𑀭𑁂𑀔𑀕𑁆𑀕 𑀯𑀺𑀲𑀸𑀡 𑀓𑀧𑁆𑀧𑁄.

𑀔𑀺𑀝𑁆𑀝𑀸 ¶ 𑀭𑀢𑀺 𑀳𑁄𑀢𑀺 𑀲𑀳𑀸𑀬 𑀫𑀚𑁆𑀛𑁂,

𑀧𑀼𑀢𑁆𑀢𑁂𑀲𑀼𑀘 𑀯𑀺𑀧𑀼𑀮𑀁 𑀳𑁄𑀢𑀺 𑀧𑁂𑀫𑀁;

𑀧𑀺𑀬𑀯𑀺𑀧𑁆𑀧𑀬𑁄𑀕𑀁 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑁄,

𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡 𑀓𑀧𑁆𑀧𑁄.

𑀯𑀁𑀲𑁄 ¶ 𑀯𑀺𑀲𑀸𑀮𑁄𑀬𑀣𑀸 𑀯𑀺𑀲𑀢𑁆𑀢𑁄,

𑀧𑀼𑀢𑁆𑀢𑁂𑀲𑀼 𑀤𑀸𑀭𑁂𑀲𑀼𑀘 𑀬𑀸𑀅𑀧𑁂𑀓𑁆𑀔𑀸;

𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡 𑀓𑀧𑁆𑀧𑁄.

𑀓𑀸𑀫𑀁 ¶ 𑀓𑀸𑀫𑀬 𑀫𑀸𑀦𑀲𑁆𑀲, 𑀢𑀲𑁆𑀲𑀘𑁂𑀢𑀁 𑀲𑀫𑀺𑀚𑁆𑀛𑀢𑀺;

𑀅𑀤𑁆𑀥𑀸 𑀧𑀻𑀢𑀺𑀫𑀦𑁄 𑀳𑁄𑀢𑀺, 𑀫𑀘𑁆𑀘𑁄 𑀮𑀤𑁆𑀥𑀸 𑀬𑀤𑀺𑀘𑁆𑀙𑀢𑀺.

𑀢𑀲𑁆𑀲𑀘𑁂 𑀓𑀸𑀫𑀬𑀸𑀦𑀲𑁆𑀲, 𑀙𑀦𑁆𑀤𑀚𑀸𑀢𑀲𑁆𑀲 𑀚𑀦𑁆𑀢𑀼𑀦𑁄;

𑀢𑁂𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀺.

𑀬𑁄𑀓𑀸𑀫𑁂 ¶ 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀧𑁆𑀧𑀲𑁆𑀲𑁂𑀯 𑀧𑀤𑀸 𑀲𑀺𑀭𑁄;

𑀲𑁄𑀫𑀁 𑀯𑀺𑀲𑀢𑁆𑀢𑀺𑀓𑀁 𑀮𑁄𑀓𑁂, 𑀲𑀢𑁄 𑀲𑀫𑀢𑀺𑀯𑀢𑁆𑀢𑀢𑀺.

𑀔𑁂𑀢𑁆𑀢𑀁 𑀯𑀢𑁆𑀣𑀼𑀁 𑀢𑀴𑀸𑀓𑀁𑀯𑀸, 𑀕𑀯𑀲𑁆𑀲𑀁 𑀤𑀸𑀲𑀧𑁄𑀭𑀺𑀲𑀁;

𑀣𑀺𑀬𑁄 𑀩𑀦𑁆𑀥𑀽 𑀧𑀼𑀣𑀼𑀓𑀸𑀫𑁂, 𑀬𑁄𑀦𑀭𑁄 𑀅𑀦𑀼𑀕𑀺𑀚𑁆𑀛𑀢𑀺.

𑀅𑀩𑀮𑀸 𑀦𑀁 𑀩𑀮𑀻𑀬𑀦𑁆𑀢𑀺, 𑀫𑀤𑁆𑀤𑀦𑁆𑀢𑁂𑀦𑀁 𑀧𑀭𑀺𑀲𑁆𑀲𑀬𑀸;

𑀢𑀢𑁄𑀦𑀁 𑀤𑀼𑀓𑁆𑀔𑀫𑀦𑁆𑀯𑁂𑀢𑀺, 𑀦𑀸𑀯𑀁 𑀪𑀺𑀦𑁆𑀦 𑀫𑀺𑀯𑁄𑀤𑀓𑀁.

𑀢𑀲𑁆𑀫𑀸𑀚𑀦𑁆𑀢𑀼 ¶ 𑀲𑀤𑀸𑀲𑀢𑁄, 𑀓𑀸𑀫𑀸𑀦𑀺 𑀧𑀭𑀺𑀯𑀚𑁆𑀚𑀬𑁂;

𑀢𑁂 𑀧𑀳𑀸𑀬 𑀢𑀭𑁂 𑀑𑀖𑀁, 𑀦𑀸𑀯𑀁 𑀲𑀺𑀢𑁆𑀯𑀸𑀯 𑀧𑀸𑀭𑀕𑀽.

𑀲𑀼𑀪𑀸𑀦𑀼𑀧𑀲𑁆𑀲𑀺𑀁 ¶ 𑀯𑀺𑀳𑀭𑀦𑁆𑀢𑀁, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀲𑀁𑀯𑀼𑀢𑀁;

𑀪𑁄𑀚𑀦𑀫𑁆𑀳𑀺 𑀅𑀫𑀢𑁆𑀢𑀜𑁆𑀜𑀼𑀁, 𑀓𑀼𑀲𑀺𑀢𑀁 𑀳𑀻𑀦 𑀯𑀻𑀭𑀺𑀬𑀁;

𑀢𑀁𑀯𑁂 𑀧𑀲𑀳𑀢𑀺 𑀫𑀸𑀭𑁄, 𑀯𑀸𑀢𑁄 𑀭𑀼𑀓𑁆𑀔𑀁𑀯 𑀤𑀼𑀩𑁆𑀩𑀮𑀁.

𑀅𑀲𑀼𑀪𑀸𑀦𑀼𑀧𑀲𑁆𑀲𑀺𑀁 𑀯𑀺𑀳𑀭𑀦𑁆𑀢𑀁, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀼𑀲𑀁𑀯𑀼𑀢𑀁;

𑀪𑁄𑀚𑀦𑀫𑁆𑀳𑀺𑀘 𑀫𑀢𑁆𑀢𑀜𑁆𑀜𑀼𑀁, 𑀲𑀤𑁆𑀥𑀁 𑀆𑀭𑀤𑁆𑀥 𑀯𑀻𑀭𑀺𑀬𑀁;

𑀢𑀁𑀯𑁂 𑀦𑀧𑁆𑀧𑀲𑀳𑀢𑀺 𑀫𑀸𑀭𑁄, 𑀯𑀸𑀢𑁄 𑀲𑁂𑀮𑀁𑀯 𑀧𑀩𑁆𑀩𑀢𑀁.

𑀬𑀣𑀸 ¶ 𑀅𑀕𑀸𑀭𑀁 𑀤𑀼𑀘𑁆𑀙𑀦𑁆𑀦𑀁, 𑀯𑀼𑀝𑁆𑀞𑀺 𑀲𑀫𑀢𑀺 𑀯𑀺𑀚𑁆𑀛𑀢𑀺;

𑀏𑀯𑀁 𑀅𑀪𑀸𑀯𑀺𑀢𑀁 𑀘𑀺𑀢𑁆𑀢𑀁, 𑀭𑀸𑀕𑁄 𑀲𑀫𑀢𑀺𑀯𑀺𑀚𑁆𑀛𑀢𑀺.

𑀢𑀤𑁂𑀯𑀁 ¶ 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀺, 𑀬𑁂 𑀢𑁂 𑀭𑀸𑀕𑀕𑁆𑀕𑀺𑀤𑀼𑀩𑁆𑀩𑀮𑀸;

𑀧𑀢𑀺𑀝𑁆𑀞𑀁 𑀲𑀸𑀲𑀦𑁂 𑀮𑀤𑁆𑀥𑀸, 𑀦𑀼𑀓𑁆𑀓𑀡𑁆𑀞𑀸 𑀦𑀮𑀲𑀸 𑀭𑀢𑀸.

𑀩𑀼𑀤𑁆𑀥𑀸𑀯𑀸𑀤𑀁 ¶ 𑀮𑀪𑀺𑀢𑁆𑀯𑀸𑀧𑀺, 𑀦𑀸𑀳𑀁𑀲𑀓𑁆𑀓𑀸 𑀦𑀯𑁄𑀫𑁆𑀳𑀺𑀢𑀺;

𑀤𑁄𑀲𑀁 𑀢𑀡𑁆𑀳𑀁 𑀅𑀦𑀸𑀲𑁂𑀦𑁆𑀢𑁄, 𑀧𑀭𑀺𑀧𑀓𑁆𑀓𑁄 𑀓𑀤𑀸𑀪𑀯𑁂;

𑀧𑀼𑀜𑁆𑀜𑀓𑀫𑁆𑀫𑀁 𑀅𑀓𑀭𑁄𑀦𑁆𑀢𑁄, 𑀧𑀭𑀯𑀚𑁆𑀚𑀁 𑀅𑀔𑀫𑀦𑁆𑀢𑁄.

𑀓𑀸𑀬 𑀲𑀗𑁆𑀔𑀸𑀭𑀺𑀓𑀸 𑀢𑀡𑁆𑀳𑀸, 𑀦𑀻𑀘𑀸𑀦𑀻𑀘𑀓𑀭𑀸𑀘 𑀲𑀸;

𑀘𑀺𑀢𑁆𑀢𑀲𑀗𑁆𑀔𑀸𑀭𑀺𑀓𑀸 𑀲𑀤𑁆𑀥𑀸, 𑀉𑀘𑁆𑀘𑀸 𑀉𑀘𑁆𑀘𑀓𑀭𑀸𑀘 𑀲𑀸.

𑀤𑀲𑁆𑀲𑀦𑀻𑀬𑁂 ¶ 𑀭𑀢𑀸 𑀢𑀡𑁆𑀳𑀸, 𑀲𑀤𑁆𑀥𑀸𑀲𑁆𑀯𑀸𑀘𑀸𑀭𑀪𑀢𑁆𑀢𑀺𑀓𑀸;

𑀯𑀺𑀓𑀺𑀡𑁆𑀡𑀘𑀸𑀭𑀺𑀓𑀸 𑀢𑀡𑁆𑀳𑀸, 𑀲𑀤𑁆𑀥𑀸 𑀯𑀺𑀲𑀤𑀘𑀸𑀭𑀺𑀦𑀻.

𑀫𑀦𑁄𑀓𑀺𑀮𑁂𑀲𑀺𑀓𑀸 𑀢𑀡𑁆𑀳𑀸, 𑀲𑀸𑀦𑀼𑀕𑀸𑀦𑀦𑁆𑀢 𑀤𑀼𑀓𑁆𑀔𑀤𑀸;

𑀘𑀺𑀢𑁆𑀢𑀧𑁆𑀧𑀲𑀸𑀤𑀺𑀓𑀸 𑀲𑀤𑁆𑀥𑀸, 𑀅𑀢𑁆𑀢𑀸𑀦𑀼𑀕 𑀲𑀼𑀔𑀸𑀯𑀳𑀸.

𑀢𑀡𑁆𑀳𑀸 ¶ 𑀲𑀤𑁆𑀥𑀸𑀦 𑀫𑀺𑀘𑁆𑀘𑁂𑀯𑀁, 𑀯𑀺𑀲𑁂𑀲𑀁 𑀚𑀸𑀦 𑀢𑀢𑁆𑀯𑀢𑁄;

𑀜𑀢𑁆𑀯𑀸 𑀢𑀡𑁆𑀳𑀁 𑀯𑀺𑀦𑀸𑀲𑁂𑀬𑁆𑀬, 𑀲𑀤𑁆𑀥𑀁𑀪𑀸𑀯𑁂𑀬𑁆𑀬 𑀘𑁂𑀢𑀲𑀺.

𑀉𑀘𑁆𑀙𑀼𑀓𑀁 𑀬𑀦𑁆𑀢𑀧𑀢𑁆𑀢𑀫𑁆𑀧𑀺, 𑀲𑀜𑁆𑀘𑀼𑀡𑁆𑀡𑀺𑀢𑀫𑁆𑀧𑀺 𑀘𑀦𑁆𑀤𑀦𑀁;

𑀫𑀥𑀼𑀭𑀁𑀯 𑀲𑀼𑀕𑀦𑁆𑀥𑀁𑀯, 𑀫𑁂𑀢𑁆𑀢𑀺𑀯 𑀳𑀺𑀁𑀲𑀺𑀢𑁄𑀧𑀺 𑀲𑀁.

𑀅𑀢𑁆𑀢𑀘𑁆𑀙𑁂𑀤𑀫𑁆𑀧𑀺 ¶ 𑀯𑀸𑀲𑁂𑀢𑀺, 𑀲𑀼𑀕𑀦𑁆𑀥𑁂𑀦𑀺𑀯 𑀘𑀦𑁆𑀤𑀦𑀁;

𑀲𑀦𑁆𑀢𑁄 𑀫𑁂𑀢𑁆𑀢𑀸𑀲𑀼𑀕𑀦𑁆𑀥𑁂𑀦, 𑀅𑀢𑁆𑀢𑀳𑀺𑀁𑀲𑀫𑁆𑀧𑀺 𑀯𑀸𑀲𑀬𑁂.

𑀓𑀤𑀸𑀘𑀺𑀧𑀺 𑀦 𑀤𑀼𑀕𑁆𑀕𑀦𑁆𑀥𑀺, 𑀲𑀼𑀓𑁆𑀔𑀁 𑀘𑀼𑀡𑁆𑀡𑀫𑁆𑀧𑀺 𑀘𑀦𑁆𑀤𑀦𑀁;

𑀢𑀣𑁂𑀯 𑀤𑀼𑀓𑁆𑀔𑀧𑀢𑁆𑀢𑁄𑀧𑀺, 𑀦 𑀲𑀦𑁆𑀢𑁄 𑀧𑀸𑀧𑀓𑀸𑀭𑀓𑁄.

𑀔𑀫𑁂 ¶ 𑀯𑀚𑁆𑀚𑀁 𑀓𑀭𑁂𑀬𑁆𑀬𑀢𑁆𑀣𑀁, 𑀩𑀼𑀤𑁆𑀥𑀔𑀦𑁆𑀢𑀺 𑀫𑀦𑀼𑀲𑁆𑀲𑀭𑀁;

𑀫𑁂𑀢𑁆𑀢𑀸𑀢𑀺𑀦𑁆𑀢𑁂𑀦 𑀯𑁂𑀭𑀻𑀧𑀺, 𑀦𑀼𑀧𑀦𑀸𑀳𑁄 𑀲𑀺𑀬𑀢𑁆𑀢𑀦𑀺.

𑀦𑀕𑀘𑁆𑀙𑀢𑀺 𑀢 𑀫𑀓𑁆𑀓𑁄𑀲𑁄, 𑀫𑀫𑁂𑀯𑀸 𑀦𑀢𑁆𑀣𑀓𑀸𑀭𑀓𑁄;

𑀇𑀢𑀺 𑀜𑀢𑁆𑀯𑀸𑀯 𑀲𑀧𑁆𑀧𑀜𑁆𑀜𑁄, 𑀦𑁂𑀯 𑀓𑁆𑀓𑁄𑀲𑁂𑀬𑁆𑀬 𑀓𑀺𑀜𑁆𑀘𑀦𑀁.

𑀢𑀡𑁆𑀳𑀸𑀯𑀺𑀚𑁆𑀚𑀸𑀘 ¶ 𑀫𑀽𑀮𑀸𑀤𑁆𑀯𑁂, 𑀲𑀁𑀲𑀸𑀭𑀯𑀺𑀲𑀧𑀸𑀤𑀧𑁂;

𑀲𑀩𑁆𑀪𑀢𑁆𑀢𑀺 𑀲𑀤𑁆𑀥𑀫𑁆𑀫𑀲𑁆𑀲𑀼𑀢𑀁, 𑀤𑁆𑀯𑁂𑀬𑁂𑀯 𑀫𑀥𑀼𑀭𑀸 𑀨𑀮𑀸.

𑀲𑁄𑀥𑁂 𑀘𑀺𑀢𑁆𑀢 𑀫𑀼𑀧𑀓𑁆𑀓𑀫𑁆𑀫, 𑀲𑀼𑀤𑁆𑀥𑀁 𑀉𑀧𑀓𑁆𑀓𑀫𑁂𑀦 𑀢𑀁;

𑀯𑀳𑁂 𑀲𑀼𑀔𑀁 𑀅𑀲𑀗𑁆𑀔𑁂𑀬𑁆𑀬𑀁, 𑀤𑀼𑀓𑁆𑀔𑀁 𑀅𑀲𑁄𑀥𑀺𑀢𑀁 𑀫𑀮𑀺.

𑀲𑁄𑀥𑀺𑀢𑀁 ¶ 𑀲𑀼𑀕𑀢𑀺𑀁𑀦𑁂𑀢𑀺, 𑀤𑀼𑀕𑁆𑀕𑀢𑀺𑀁𑀯 𑀅𑀲𑁄𑀥𑀺𑀢𑀁;

𑀘𑀺𑀢𑁆𑀢𑀁 𑀲𑁄𑀥𑁂𑀢𑀼 𑀫𑀸𑀮𑀺𑀫𑁆𑀧𑁂, 𑀭𑀸𑀕𑀤𑁄𑀲 𑀫𑀮𑁂𑀳𑀺 𑀢𑀁.

𑀭𑀦𑀓𑀼𑀦𑀯𑀸𑀲𑀺 ¶ 𑀓𑀢𑀸𑀯𑀸𑀲𑁂, 𑀤𑀕𑀼𑀁𑀘𑁂𑀢𑀻 𑀧𑀼𑀭𑀢𑁆𑀣𑀺𑀫𑁂;

𑀯𑀲𑀢𑀸 𑀅𑀕𑁆𑀕𑀥𑀫𑁆𑀫𑁂𑀦, 𑀣𑁂𑀭𑁂𑀦 𑀭𑀘𑀺𑀢𑁄 𑀅𑀬𑀦𑁆𑀢𑀺.