📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀭𑀲𑀯𑀸𑀳𑀺𑀦𑀻

𑀧𑀡𑀸𑀫𑀸𑀤𑀺𑀓𑀣𑀸

𑁧.

𑀲𑀢𑁆𑀣𑀼𑀧𑁆𑀧𑀲𑀢𑁆𑀣𑀘𑀭𑀡𑀁 ¶ 𑀲𑀭𑀡𑀁 𑀚𑀦𑀸𑀦𑀁,

𑀩𑁆𑀭𑀳𑁆𑀫𑀸𑀤𑀺𑀫𑁄𑀴𑀺 𑀫𑀡𑀺𑀭𑀁𑀲𑀺 𑀲𑀫𑀸𑀯𑀳𑀦𑁆𑀢𑀁,

𑀧𑀗𑁆𑀓𑁂𑀭𑀼𑀳𑀸𑀪𑀫𑀼𑀤𑀼𑀓𑁄𑀫𑀮𑀘𑀸𑀭𑀼𑀯𑀡𑁆𑀡𑀁;

𑀯𑀦𑁆𑀤𑀸𑀫𑀺 𑀘𑀓𑁆𑀓𑀯𑀭𑀮𑀓𑁆𑀔𑀡𑀫𑀸𑀤𑀥𑀸𑀦𑀁.

𑁨.

𑀲𑀺𑀤𑁆𑀥𑀁 𑀚𑀺𑀦𑁂𑀦 𑀘𑀺𑀭𑀓𑀸𑀮𑀫𑀢𑀦𑁆𑀤𑀺𑀢𑁂𑀦,

𑀬𑀁 𑀪𑀸𑀯𑀓𑁄 𑀲𑀫𑀥𑀺𑀕𑀘𑁆𑀙𑀢𑀺 𑀔𑁂𑀫𑀫𑀕𑁆𑀕𑀁;

𑀬𑀁 𑀓𑀧𑁆𑀧𑀭𑀼𑀓𑁆𑀔 𑀭𑀼𑀘𑀺𑀤𑀸𑀦 𑀫𑀡𑀺𑀯 𑀪𑀸𑀢𑀺,

𑀢𑀁 𑀥𑀫𑁆𑀫𑀫𑀕𑁆𑀕 𑀫𑀲𑀫𑀁 𑀧𑀡𑀫𑀸𑀫𑀺 𑀦𑀺𑀘𑁆𑀘𑀁.

𑁩.

𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀁 𑀲𑀼𑀕𑀢𑀲𑀽𑀦𑀼𑀯𑀭𑀁 𑀯𑀺𑀲𑀼𑀤𑁆𑀥𑀁,

𑀬𑀁 𑀤𑀓𑁆𑀔𑀺𑀡𑁂𑀬𑁆𑀬𑀫𑀢𑀤𑀁 𑀲𑀼𑀘𑀺𑀧𑀼𑀜𑁆𑀜𑀔𑁂𑀢𑁆𑀢𑀁;

𑀢𑀸𑀡𑁂𑀲𑀺𑀦𑀁 𑀲𑀭𑀡𑀫𑀼𑀚𑁆𑀛𑀺𑀢𑀲𑀩𑁆𑀩𑀤𑀼𑀓𑁆𑀔𑀁,

𑀯𑀦𑁆𑀤𑀸𑀫𑀺 𑀲𑀗𑁆𑀖 𑀫𑀦𑀖𑀁 𑀲𑀺𑀭𑀲𑀸 𑀫𑀳𑀕𑁆𑀖𑀁.

𑁪.

𑀬𑀫𑁆𑀧𑀢𑁆𑀢𑀫𑁂𑀢𑁆𑀣 𑀭𑀢𑀦𑀢𑁆𑀢𑀬𑀣𑁄𑀫𑀦𑁂𑀦,

𑀧𑀼𑀜𑁆𑀜𑁂𑀦 𑀢𑁂𑀦 𑀤𑀼𑀭𑀺𑀢𑀁 𑀲𑀓𑀮𑀁 𑀧𑀡𑀼𑀚𑁆𑀚,

𑀯𑀓𑁆𑀔𑀸𑀫𑀳𑀁 𑀲𑀼𑀫𑀥𑀼𑀭𑀁 𑀭𑀲𑀯𑀸𑀳𑀺𑀦𑀺𑀦𑁆𑀢𑀁,

𑀪𑁄 𑀪𑁄 𑀲𑀼𑀡𑀦𑁆𑀢𑀼 𑀲𑀼𑀚𑀦𑀸 𑀪𑀺𑀫𑀼𑀤𑀸𑀯𑀳𑀸 𑀲𑀸.

𑁫.

𑀢𑀢𑁆𑀣𑀢𑀢𑁆𑀣𑀽𑀧𑀧𑀦𑁆𑀦𑀸𑀦𑀺, ¶ 𑀯𑀢𑁆𑀣𑀽𑀦𑀺 𑀅𑀭𑀳𑀸 𑀧𑀼𑀭𑁂;

𑀅𑀪𑀸𑀲𑀼𑀁 𑀤𑀻𑀧𑀪𑀸𑀲𑀸𑀬, 𑀞𑀧𑁂𑀲𑀼𑀁 𑀢𑀁 𑀧𑀼𑀭𑀸𑀢𑀦𑀸.

𑁬.

𑀫𑀳𑀸𑀯𑀺𑀳𑀸𑀭𑁂 𑀢𑀗𑁆𑀕𑀼𑀢𑁆𑀢, 𑀯𑀗𑁆𑀓𑀧𑀭𑀺𑀯𑁂𑀡𑀯𑀸𑀲𑀺𑀓𑁄;

𑀭𑀝𑁆𑀞𑀧𑀸𑀮𑁄𑀢𑀺 𑀦𑀸𑀫𑁂𑀦, 𑀲𑀻𑀮𑀸𑀘𑀸𑀭 𑀕𑀼𑀡𑀸𑀓𑀭𑁄.

𑁭.

𑀳𑀺𑀢𑀸𑀬 𑀧𑀭𑀺𑀯𑀢𑁆𑀢𑁂𑀲𑀺, 𑀧𑀚𑀸𑀦𑀁 𑀧𑀸𑀴𑀺𑀪𑀸𑀲𑀢𑁄;

𑀧𑀼𑀦𑀭𑀼𑀢𑁆𑀢𑀸𑀤𑀺𑀤𑁄𑀲𑁂𑀳𑀺, 𑀢𑀫𑀸𑀲𑀺 𑀲𑀩𑁆𑀩𑀫𑀸𑀓𑀼𑀮𑀁;

𑀅𑀦𑀸𑀓𑀼𑀮𑀁 𑀓𑀭𑀺𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣 𑀲𑀫𑀸𑀳𑀺𑀢𑀸.

𑁮.

𑀯𑀺𑀢𑀭𑀸𑀕𑀸 𑀧𑀼𑀭𑁂 𑀯𑁄𑀘𑀼𑀁, 𑀬𑀲𑁆𑀫𑀸 𑀢𑀲𑁆𑀫𑀸 𑀳𑀺 𑀪𑀸𑀲𑀺𑀢𑀁;

𑀏𑀢𑀫𑀸𑀤𑀭𑀡𑀻𑀬𑀜𑁆𑀳𑀺, 𑀲𑀸𑀥𑀼 𑀲𑀸𑀥𑀽𑀳𑀺 𑀲𑀩𑁆𑀩𑀤𑀸𑀢𑀺.

𑀚𑀫𑁆𑀩𑀼𑀤𑀻𑀧𑀼𑀧𑁆𑀧𑀢𑁆𑀢𑀺 𑀯𑀢𑁆𑀣𑀽𑀦𑀺.

𑀥𑀫𑁆𑀫𑀲𑁄𑀡𑁆𑀟𑀓𑀯𑀕𑁆𑀕𑁄

𑁧. 𑀥𑀫𑁆𑀫𑀲𑁄𑀡𑁆𑀟𑀓𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀢𑀢𑁆𑀣 𑀢𑁂𑀲𑀁 𑀯𑀢𑁆𑀣𑀽𑀦 𑀫𑀼𑀧𑁆𑀧𑀢𑁆𑀢𑀺𑀬𑁄 𑀤𑁆𑀯𑀺𑀥𑀸 𑀪𑀯𑀦𑁆𑀢𑀺 𑀚𑀫𑁆𑀩𑀼𑀤𑀻𑀧𑁂 𑀲𑀻𑀳𑀴𑀤𑀻𑀧𑁂𑀘𑀸𑀢𑀺, 𑀢𑀢𑁆𑀣 𑀚𑀫𑁆𑀩𑀼𑀤𑀻𑀧𑁂 𑀢𑀸𑀴𑀻𑀲, 𑀲𑀻𑀳𑀴𑀤𑀻𑀧𑁂 𑀢𑁂𑀲𑀝𑁆𑀞𑀺, 𑀢𑁂𑀲𑀼 𑀢𑀸𑀯 𑀚𑀫𑁆𑀩𑀼𑀤𑀻𑀧𑀼𑀧𑁆𑀧𑀢𑁆𑀢𑀺𑀯𑀢𑁆𑀣𑀽𑀦𑀺 𑀆𑀯𑀺 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀢𑁄𑀧𑀺 𑀥𑀫𑁆𑀫𑀲𑁄𑀡𑁆𑀟𑀓𑀲𑁆𑀲 𑀯𑀢𑁆𑀣𑀼 𑀆𑀤𑀺, 𑀓𑀣𑀁, 𑀅𑀫𑁆𑀳𑀸𑀓𑀁 𑀓𑀺𑀭 𑀪𑀕𑀯𑀢𑁄 𑀧𑀼𑀩𑁆𑀩𑁂 𑀇𑀫𑀲𑁆𑀫𑀺𑀁𑀬𑁂𑀯 𑀪𑀤𑁆𑀤𑀓𑀧𑁆𑀧𑁂 𑀓𑀲𑁆𑀲𑀧𑁄𑀦𑀸𑀫 𑀲𑀢𑁆𑀣𑀸 𑀮𑁄𑀓𑁂 𑀉𑀤𑀧𑀸𑀤𑀺, 𑀢𑀲𑁆𑀲 𑀔𑁄 𑀧𑀦 𑀪𑀕𑀯𑀢𑁄 𑀲𑀸𑀲𑀦𑀦𑁆𑀢𑀭𑀥𑀸𑀦𑀢𑁄 𑀦 𑀘𑀺𑀭𑁂𑀦𑁂𑀯 𑀓𑀸𑀮𑁂𑀦 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀩𑀸𑀭𑀸𑀡𑀲𑀻𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲𑀼 𑀧𑁆𑀧𑀢𑁆𑀢𑀺 𑀓𑀸𑀮𑀲𑀫𑀦𑀦𑁆𑀢𑀭𑀫𑁂𑀯 𑀲𑀩𑁆𑀩𑀲𑀢𑁆𑀢𑀸𑀦𑀁 𑀫𑀦𑀲𑀺 𑀥𑀫𑁆𑀫𑀲𑀜𑁆𑀜𑀸 𑀉𑀤𑀧𑀸𑀤𑀺, 𑀢𑀲𑁆𑀫𑀸𑀲𑁆𑀲 𑀥𑀫𑁆𑀫𑀲𑁄𑀡𑁆𑀟𑁄𑀢𑀺𑀦𑀸𑀫 𑀫𑀓𑀁𑀲𑀼, 𑀲𑁄 𑀧𑀦𑁂𑀲𑁄 𑀓𑀼𑀫𑀸𑀭𑁄 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀯𑀟𑁆𑀠𑁂𑀦𑁆𑀢𑁄 𑀲𑀩𑁆𑀩𑀲𑀺𑀧𑁆𑀧𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀯𑀸 𑀧𑀺𑀢𑀭𑀸 𑀉𑀧𑀭𑀚𑁆𑀚𑁂𑀦 𑀧𑀽𑀚𑀺𑀢𑁄 𑀳𑀼𑀢𑁆𑀯𑀸 𑀤𑀸𑀦𑀸𑀤𑀬𑁄 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑁂 𑀧𑀽𑀭𑁂𑀦𑁆𑀢𑁄 𑀧𑀺𑀢𑀼𑀅𑀘𑁆𑀘𑀬𑁂𑀦𑀸𑀫𑀘𑁆𑀘𑁂𑀳𑀺 ¶ 𑀭𑀚𑁆𑀚𑁂𑀦𑀸𑀪𑀺𑀲𑀺𑀜𑁆𑀘𑀺𑀢𑁄 𑀅𑀳𑁄𑀲𑀺, 𑀲𑁄 𑀧𑀦𑁂𑀲 𑀥𑀫𑁆𑀫𑀲𑁄𑀡𑁆𑀟𑀓𑀫𑀳𑀸𑀭𑀸𑀚𑀸 𑀤𑁂𑀯𑀦𑀕𑀭𑀲𑀤𑀺𑀲𑁂 𑀩𑀸𑀭𑀸𑀡𑀲𑀻𑀦𑀕𑀭𑁂 𑀘𑀓𑁆𑀓𑀯𑀢𑁆𑀢𑀺𑀲𑀤𑀺𑀲𑀁 𑀩𑀸𑀭𑀸𑀡𑀲𑀻𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀫𑀸𑀲𑀤𑁆𑀥𑀫𑀸𑀲𑀘𑁆𑀘𑀬𑁂𑀦 𑀲𑀺𑀭𑀺𑀲𑀬𑀦𑀕𑀢𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺, 𑀫𑀫𑁂𑀯𑀁 𑀭𑀚𑁆𑀚𑀲𑀺𑀭𑀺𑀫𑀦𑀼𑀪𑀯𑀦𑀁 𑀦 𑀲𑁄𑀪𑀢𑀺 𑀥𑀫𑁆𑀫𑀯𑀺𑀬𑁄𑀕𑁂𑀦, 𑀤𑀺𑀯𑀸𑀓𑀭 𑀯𑀺𑀭𑀳𑀺𑀢𑁄 𑀦𑀪𑁄 𑀯𑀺𑀬𑀸𑀢𑀺𑀆𑀤𑀺𑀦𑀸 𑀦𑀸𑀦𑀸𑀓𑀸𑀭𑀡𑀁 𑀘𑀺𑀦𑁆𑀢𑁂𑀲𑀺, 𑀢𑁂𑀦𑁂𑀢𑁆𑀣.

𑁧.

𑀧𑀼𑀜𑁆𑀜𑁂𑀦 𑀲𑀻𑀮𑀸𑀤𑀺𑀫𑀬𑁂𑀦 𑀧𑀼𑀩𑁆𑀩𑁂,

𑀓𑀢𑁂𑀦 𑀧𑀢𑁆𑀢𑁄𑀲𑁆𑀫𑀺 𑀅𑀢𑀦𑁆𑀤𑀺𑀢𑁂𑀦,

𑀫𑀲𑀓𑁆𑀓𑀲𑀸𑀭𑁂 𑀯𑀺𑀬 𑀤𑁂𑀯𑀭𑀸𑀚𑀸;

𑀭𑀸𑀚𑀢𑁆𑀢𑀫𑀺𑀤𑁆𑀥𑁂 𑀧𑀼𑀭𑀫𑀼𑀢𑁆𑀢𑀫𑀫𑁆𑀳𑀺.

𑁨.

𑀭𑀽𑀧𑁂𑀦 𑀳𑀸𑀭𑀻𑀦𑀬𑀦𑀼𑀲𑁆𑀲𑀯𑁂𑀦,

𑀲𑀤𑁆𑀤𑁂𑀦 𑀲𑀫𑁆𑀫𑀸 𑀲𑀯𑀡𑀸𑀫𑀢𑁂𑀦,

𑀕𑀦𑁆𑀥𑁂𑀦 𑀖𑀸𑀦𑀼𑀲𑁆𑀲𑀯𑀲𑁄𑀪𑀦𑁂𑀦,

𑀭𑀲𑀜𑁆𑀜𑀧𑀼𑀜𑁆𑀜𑁂𑀦 𑀭𑀲𑁂𑀦𑀘𑀸𑀧𑀺.

𑁩.

𑀨𑀲𑁆𑀲𑁂𑀦 𑀕𑀢𑁆𑀢𑀲𑁆𑀲 𑀲𑀼𑀨𑀲𑁆𑀲𑀤𑁂𑀦,

𑀲𑀫𑀺𑀤𑁆𑀥𑀺𑀧𑀢𑁆𑀢𑁄𑀲𑁆𑀫𑀺 𑀫𑀳𑀺𑀤𑁆𑀥𑀺𑀓𑁄𑀳𑀁,

𑀦𑁂𑀯𑁂𑀢𑁆𑀢𑀓𑁂𑀦𑁂𑀯 𑀧𑀫𑀸𑀤𑀪𑀸𑀯,

𑀫𑀸 𑀧𑀚𑁆𑀚𑀺𑀢𑀼𑀁 𑀬𑀼𑀢𑁆𑀢𑀭𑀽𑀧𑀦𑁆𑀢𑀺 𑀜𑀢𑁆𑀯𑀸.

𑁪.

𑀤𑀲𑁆𑀲𑀸𑀫𑀺 𑀅𑀗𑁆𑀕𑀅𑀧𑀺 𑀚𑀻𑀯𑀺𑀢𑀜𑁆𑀘,

𑀥𑀜𑁆𑀜𑀁 𑀥𑀦𑀁 𑀘𑀸𑀧𑀺 𑀧𑀲𑀦𑁆𑀦𑀘𑀺𑀢𑁆𑀢𑁄,

𑀲𑁄𑀲𑁆𑀲𑀸𑀫𑀺 𑀥𑀫𑁆𑀫𑀁 𑀲𑀺𑀯𑀫𑀸𑀤𑀥𑀸𑀦𑀁,

𑀚𑀺𑀦𑁂𑀭𑀺𑀢𑀁 𑀚𑀸𑀢𑀺𑀚𑀭𑀸𑀧𑀳𑀸𑀡𑀁.

𑁫.

𑀦 𑀲𑁄𑀪𑀢𑀺 𑀬𑀣𑀸𑀓𑀸𑀲𑀁, 𑀚𑀮𑀁 𑀥𑀸𑀫𑀧𑀢𑀺𑀁𑀯𑀺𑀦𑀸,

𑀭𑀚𑁆𑀚𑀓𑀭𑀡𑀁 𑀢𑀣𑀸 𑀫𑀬𑁆𑀳𑀁, 𑀯𑀺𑀦𑀸 𑀥𑀫𑁆𑀫𑀸 𑀦 𑀲𑁄𑀪𑀢𑀺.

𑁬.

𑀦 𑀲𑁄𑀪𑀢𑀺 𑀳𑀣𑀸 𑀭𑀢𑁆𑀢𑀺, 𑀦𑀺𑀲𑀸𑀦𑀸𑀣𑀁 𑀯𑀺𑀦𑀸 𑀲𑀤𑀸,

𑀭𑀚𑁆𑀚𑀓𑀭𑀡𑀁 𑀢𑀣𑀸 𑀫𑀬𑁆𑀳𑀁, 𑀯𑀺𑀦𑀸 𑀥𑀫𑁆𑀫𑀸 𑀦 𑀲𑁄𑀪𑀢𑀺.

𑁭.

𑀅𑀮𑀗𑁆𑀓𑀢𑁄𑀧𑀺 ¶ 𑀘𑁂 𑀳𑀢𑁆𑀣𑀻, 𑀯𑀺𑀦𑀸 𑀤𑀸𑀞𑀸 𑀦 𑀲𑁄𑀪𑀢𑀺,

𑀭𑀚𑁆𑀚𑀓𑀭𑀡𑀁 𑀢𑀣𑀸 𑀫𑀬𑁆𑀳𑀁, 𑀯𑀺𑀦𑀸 𑀥𑀫𑁆𑀫𑀸 𑀦 𑀲𑁄𑀪𑀢𑀺.

𑁮.

𑀬𑀣𑀸 𑀓𑀮𑁆𑀮𑁄𑀮𑀫𑀸𑀮𑀻𑀬𑀁,

𑀯𑀺𑀦𑀸 𑀯𑁂𑀮𑀸 𑀦 𑀲𑁄𑀪𑀢𑀺,

𑀭𑀚𑁆𑀚𑀓𑀭𑀡𑀁 𑀢𑀣𑀸 𑀫𑀬𑁆𑀳𑀁,

𑀯𑀺𑀦𑀸 𑀥𑀫𑁆𑀫𑀸 𑀦 𑀲𑁄𑀪𑀢𑀺.

𑁯.

𑀬𑀣𑀸 𑀲𑀼𑀫𑀡𑁆𑀟𑀺𑀢𑁄 𑀭𑀸𑀚𑀸,

𑀓𑀼𑀧𑀝𑁄 𑀦𑁂𑀯 𑀲𑁄𑀪𑀢𑀺,

𑀭𑀚𑁆𑀚𑀓𑀭𑀡𑀁 𑀢𑀣𑀸 𑀫𑀬𑁆𑀳𑀁,

𑀯𑀺𑀦𑀸 𑀥𑀫𑁆𑀫𑀸 𑀦 𑀲𑁄𑀪𑀢𑀺.

𑁧𑁦.

𑀥𑀫𑁆𑀫𑀫𑁂𑀯 𑀲𑀼𑀡𑀺𑀲𑁆𑀲𑀸𑀫𑀺, 𑀥𑀫𑁆𑀫𑁂 𑀫𑁂 𑀭𑀫𑀢𑀻 𑀫𑀦𑁄,

𑀦 𑀳𑀺 𑀥𑀫𑁆𑀫𑀸 𑀧𑀭𑀁 𑀅𑀢𑁆𑀣𑀺, 𑀥𑀫𑁆𑀫𑀫𑀽𑀮𑀁 𑀢𑀺𑀲𑀫𑁆𑀧𑀤𑀦𑁆𑀢𑀺.

𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀧𑀸𑀢𑁄𑀯 𑀲𑀺𑀭𑀺𑀕𑀩𑁆𑀪𑀸 𑀦𑀺𑀓𑁆𑀔𑀫𑁆𑀫 𑀲𑀼𑀲𑀚𑁆𑀚𑀺𑀢𑁂 𑀲𑀫𑀼𑀲𑁆𑀲𑀺𑀢𑀲𑁂𑀢𑀘𑁆𑀙𑀢𑁆𑀢𑁂 𑀭𑀸𑀚𑀧𑀮𑁆𑀮𑁂𑀗𑁆𑀓𑁂 𑀅𑀫𑀘𑁆𑀘𑀕𑀡 𑀧𑀭𑀺𑀯𑀼𑀢𑁄 𑀦𑀺𑀲𑀻𑀤𑀺 𑀤𑁂𑀯𑀭𑀸𑀚𑀸𑀯𑀺𑀬 𑀯𑀺𑀭𑁄𑀘𑀫𑀸𑀦𑁄, 𑀦𑀺𑀲𑀺𑀦𑁆𑀦𑁄 𑀧𑀦 𑀭𑀸𑀚𑀸 𑀅𑀫𑀘𑁆𑀘𑁂 𑀏𑀯𑀫𑀸𑀳, 𑀬𑁄 𑀧𑀦𑁂𑀢𑁆𑀣 𑀪𑁄𑀦𑁆𑀢𑁄 𑀩𑀼𑀤𑁆𑀥𑀪𑀸𑀲𑀺𑀢𑁂𑀲𑀼 𑀥𑀫𑁆𑀫𑁂𑀲𑀼 𑀓𑀺𑀜𑁆𑀘𑀺𑀥𑀫𑁆𑀫𑀁 𑀚𑀸𑀦𑀸𑀢𑀺, 𑀲𑁄 𑀪𑀸𑀲𑀢𑀼, 𑀲𑁄𑀢𑀼𑀫𑀺𑀘𑁆𑀙𑀸𑀫𑀺𑀥𑀫𑁆𑀫𑀦𑁆𑀢𑀺, 𑀢𑁂 𑀲𑀩𑁆𑀩𑁂𑀧𑀺 𑀫𑀬𑀁 𑀤𑁂𑀯 𑀦 𑀚𑀸𑀦𑀸𑀫𑀸𑀢𑀺 𑀆𑀳𑀁𑀲𑀼, 𑀢𑀁 𑀲𑀼𑀢𑁆𑀯𑀸 𑀅 𑀦 𑀢𑁆𑀢 𑀫 𑀦𑁄 𑀭𑀸𑀚𑀸 𑀏𑀯𑀁 𑀘𑀺𑀦𑁆𑀢𑁂𑀲𑀺, 𑀬𑀦𑁆𑀦𑀽𑀦𑀸𑀳𑀁 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀲𑀳𑀲𑁆𑀲𑀁 𑀞𑀧𑁂𑀢𑁆𑀯𑀸 𑀦𑀕𑀭𑁂 𑀪𑁂𑀭𑀺𑀁𑀘𑀭𑀸𑀧𑁂𑀬𑁆𑀬𑀁, 𑀬𑀁 𑀅𑀧𑁆𑀧𑁂𑀯𑀦𑀸𑀫 𑀓𑁄𑀘𑀺 𑀥𑀦𑀮𑁄𑀪𑁂𑀦 𑀘𑀸𑀢𑀼𑀧𑁆𑀧𑀤𑀺𑀓𑀸𑀬𑀧𑀺 𑀕𑀸𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬. 𑀢𑀁 𑀫𑁂 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀻𑀢𑀺, 𑀢𑀢𑁄 𑀲𑁄 𑀢𑀣𑀸 𑀓𑀢𑁆𑀯𑀸𑀧𑀺 𑀥𑀫𑁆𑀫𑀤𑁂𑀲𑀓𑀁 𑀅𑀮𑀪𑀦𑁆𑀢𑁄 𑀧𑀼𑀦 𑀤𑁆𑀯𑀺𑀲𑀳𑀲𑁆𑀲𑀁 𑀢𑀺𑀘𑀢𑀼𑀧𑀜𑁆𑀘𑀲𑀳𑀲𑁆𑀲𑀦𑁆𑀢𑀺𑀬𑀸𑀯𑀓𑁄𑀝𑀺𑀧𑁆𑀧𑀓𑁄𑀝𑀺𑀁𑀤𑀫𑁆𑀫𑀻𑀢𑀺, 𑀢𑀢𑁄 𑀕𑀸𑀫 𑀦𑀺𑀕𑀫 𑀚𑀦𑀧𑀤𑁂, 𑀢𑀢𑁄 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀲𑁂𑀦𑀸𑀧𑀢𑀺 𑀉𑀧𑀭𑀸𑀚𑀝𑁆𑀞𑀸𑀦𑀸 𑀤𑀬𑁄𑀧𑀺, 𑀧𑀼𑀦 𑀲𑁂𑀢𑀘𑁆𑀙𑀢𑁆𑀢𑀁 𑀤𑀫𑁆𑀫𑀺, 𑀭𑀸𑀚𑀯𑁂𑀲𑀁 𑀧𑀳𑀸𑀬 𑀅𑀢𑁆𑀢𑀸𑀦𑀁 𑀤𑀸𑀲𑀁 𑀲𑀸𑀯𑁂𑀢𑁆𑀯𑀸 𑀥𑀫𑁆𑀫𑀤𑁂𑀲𑁂𑀦𑁆𑀢𑀲𑁆𑀲 𑀤𑀫𑁆𑀫𑀺𑀢𑀺 𑀯𑀢𑁆𑀯𑀸 𑀪𑁂𑀭𑀺 𑀘𑀭𑀸𑀧𑁂𑀢𑁆𑀯𑀸𑀧𑀺 𑀥𑀫𑁆𑀫 𑀤𑁂𑀲𑀓𑀫𑀮𑀪𑀺𑀢𑁆𑀯𑀸 𑀲𑀁𑀯𑀺𑀕𑁆𑀕𑁄 ¶ 𑀓𑀺𑀫𑁆𑀫𑁂 𑀥𑀫𑁆𑀫𑀯𑀺𑀬𑁄𑀕𑁂𑀦 𑀭𑀚𑁆𑀚𑁂𑀦𑀸𑀢𑀺 𑀅𑀫𑀘𑁆𑀘𑀸𑀦𑀁 𑀭𑀚𑁆𑀚𑀁 𑀦𑀻𑀬𑁆𑀬𑀸𑀢𑁂𑀢𑁆𑀯𑀸 𑀲𑀤𑁆𑀥𑀫𑁆𑀫𑀕𑀯𑁂𑀲𑀓𑁄 𑀥𑀫𑁆𑀫𑀲𑁄𑀡𑁆𑀟𑀓𑀫𑀳𑀸𑀭𑀸𑀚𑀸 𑀫𑀳𑀸𑀯𑀦𑀁 𑀧𑀸𑀯𑀺𑀲𑀺 𑀕𑀸𑀫 𑀦𑀺𑀕𑀫 𑀭𑀸𑀚𑀥𑀸𑀦𑀺 𑀧𑀭𑀫𑁆𑀧𑀭𑀸𑀬, 𑀢𑁂𑀦𑁂𑀢𑁆𑀣.

𑁧𑁧.

𑀧𑀼𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸,

𑀥𑀫𑁆𑀫𑀲𑁄𑀡𑁆𑀟𑁄 𑀦𑀭𑀸𑀥𑀺𑀧𑁄;

𑀲𑀤𑁆𑀥𑀫𑁆𑀫𑀚𑁆𑀛𑁂𑀲𑀓𑀁 𑀲𑀢𑁆𑀣𑀼,

𑀅𑀮𑀤𑁆𑀥𑀸 𑀥𑀦𑀓𑁄𑀝𑀺𑀳𑀺.

𑁧𑁨.

𑀤𑀸𑀲𑁄 𑀳𑁄𑀫𑀺 𑀧𑀳𑀸𑀬𑀸𑀳𑀁,

𑀭𑀸𑀚𑀢𑁆𑀢𑀁 𑀤𑁂𑀲𑀓𑀲𑁆𑀲 𑀫𑁂;

𑀇𑀘𑁆𑀘𑀸𑀳 𑀲𑁄 𑀫𑀳𑀻𑀧𑀸𑀮𑁄,

𑀅𑀳𑁄 𑀥𑀫𑁆𑀫𑁂𑀲𑀼 𑀮𑁄𑀮𑀢𑀸.

𑁧𑁩.

𑀭𑀚𑁆𑀚𑀁 𑀦𑀻𑀬𑁆𑀬𑀸𑀢𑀬𑀺𑀢𑁆𑀯𑀸𑀦, 𑀅𑀫𑀘𑁆𑀘𑀸𑀦𑀁 𑀫𑀦𑁄𑀭𑀫𑀁,

𑀯𑀦𑀁 𑀧𑀸𑀯𑀺𑀲𑀺 𑀲𑁄 𑀭𑀸𑀚𑀸, 𑀕𑀯𑁂𑀲𑀁 𑀥𑀫𑁆𑀫𑀫𑀼𑀢𑁆𑀢𑀫𑀦𑁆𑀢𑀺.

𑀫𑀳𑀸𑀯𑀦𑀁 𑀧𑀯𑀺𑀝𑁆𑀞𑀓𑁆𑀔𑀡𑁂 𑀧𑀦 𑀫𑀳𑀸𑀲𑀢𑁆𑀢𑀲𑁆𑀲 𑀧𑀼𑀜𑁆𑀜𑀢𑁂𑀚𑁂𑀦 𑀲𑀓𑁆𑀓𑀲𑁆𑀲𑀸𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺, 𑀅𑀣 𑀤𑁂𑀯𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑀅𑀓𑀸𑀫𑀁 𑀫𑁂 𑀧𑀡𑁆𑀟𑀼𑀓𑀫𑁆𑀩𑀮 𑀲𑀺𑀮𑀸𑀲𑀦𑀁 𑀉𑀡𑁆𑀳𑀫𑀳𑁄𑀲𑀺, 𑀓𑀺𑀦𑁆𑀦𑀼𑀔𑁄 𑀓𑀸𑀭𑀡𑀦𑁆𑀢𑀺 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀥𑀫𑁆𑀫𑀲𑁄𑀡𑁆𑀟𑀓 𑀫𑀳𑀸𑀭𑀸𑀚𑀸𑀦𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀯𑀺𑀘𑀺𑀦𑀺𑀢𑁆𑀯𑀸 𑀲𑀤𑁆𑀥𑀫𑁆𑀫𑀚𑁆𑀛𑁂𑀲𑀓𑀁 𑀅𑀮𑀪𑀺𑀢𑁆𑀯𑀸 𑀯𑀦𑀁 𑀧𑀯𑀺𑀝𑁆𑀞𑀪𑀸𑀯𑀁 𑀅𑀤𑁆𑀤𑀲, 𑀥𑀫𑁆𑀫𑀲𑁄𑀡𑁆𑀟𑀓𑀫𑀳𑀸𑀭𑀸𑀚𑀸 𑀲𑀤𑁆𑀥𑀫𑁆𑀫𑀢𑁆𑀣𑀸𑀬 𑀭𑀚𑁆𑀚 𑀥𑀦 𑀩𑀦𑁆𑀥𑀼 𑀚𑀻𑀯𑀺𑀢𑀫𑁆𑀧𑀺 𑀧𑀳𑀸𑀬 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄, 𑀦 𑀲𑁄 𑀯𑀢𑀸𑀬𑀁 𑀬𑁄𑀯𑀸 𑀲𑁄𑀯𑀸 𑀲𑀢𑁆𑀢𑁄, 𑀇𑀫𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀩𑀼𑀤𑁆𑀥𑀩𑁄𑀥𑀺𑀲𑀢𑁆𑀢𑁄 𑀘𑀸𑀬𑀁 𑀅𑀚𑁆𑀚𑁂𑀯 𑀫𑀳𑀸𑀭𑀜𑁆𑀜𑀁 𑀧𑀯𑀺𑀝𑁆𑀞𑁄 𑀲𑀤𑁆𑀥𑀫𑁆𑀫𑀁 𑀅𑀮𑀤𑁆𑀥𑀸 𑀫𑀳𑀸𑀤𑀼𑀓𑁆𑀔𑀁 𑀧𑀸𑀧𑀼𑀡𑁂𑀬𑁆𑀬, 𑀦 𑀘𑁂𑀢𑀁 𑀬𑀼𑀢𑁆𑀢𑀁, 𑀅𑀚𑁆𑀚 𑀫𑀬𑀸 𑀢𑀢𑁆𑀣 𑀕𑀦𑁆𑀣𑀩𑁆𑀩𑀁 𑀥𑀫𑁆𑀫𑀸𑀫𑀢𑀭𑀲𑁂𑀦 𑀢𑀫𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀭𑀚𑁆𑀚𑁂 𑀧𑀳𑀺𑀝𑁆𑀞𑀸𑀧𑁂𑀢𑀼𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀪𑀬𑀸𑀦𑀓𑀁 𑀫𑀳𑀦𑁆𑀢𑀁 𑀭𑀓𑁆𑀔𑀲𑀯𑁂𑀲𑀁 𑀦𑀺𑀫𑁆𑀫𑀺𑀡𑀺𑀢𑁆𑀯𑀸 𑀫𑀳𑀸𑀲𑀢𑁆𑀢𑀸𑀪𑀺𑀫𑀼𑀔𑁄 𑀅𑀯𑀺𑀤𑀽𑀭𑁂 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺, 𑀢𑁂𑀦𑁂𑀢𑁆𑀣.

𑁧𑁪.

𑀩𑁆𑀬𑀕𑁆𑀖𑀘𑁆𑀙𑀲𑀻𑀳𑀫𑀳𑀺𑀲𑁄 ¶ 𑀭𑀕𑀳𑀢𑁆𑀣𑀺𑀤𑀻𑀧𑀺,

𑀫𑀺𑀕𑀸𑀓𑀼𑀮𑀁 𑀓𑀡𑁆𑀝𑀓𑀲𑁂𑀮𑀭𑀼𑀓𑁆𑀔𑀁;

𑀦𑀭𑀸𑀦𑀫𑀺𑀦𑁆𑀤𑁄 𑀧𑀯𑀺𑀲𑀺𑀢𑁆𑀯𑀓𑀸𑀦𑀦𑀁,

𑀇𑀢𑁄𑀘𑀺𑀢𑁄 𑀯𑀺𑀩𑁆𑀪𑀫𑀺 𑀥𑀫𑁆𑀫𑀓𑀸𑀫𑁄.

𑁧𑁫.

𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀧𑀼𑀭𑀺𑀦𑁆𑀤𑀤𑀲𑁆𑀲,

𑀲𑀺𑀮𑀸𑀲𑀦𑀁 𑀉𑀡𑁆𑀳𑀫𑀳𑁄𑀲𑀺 𑀓𑀸𑀫𑀁;

𑀢𑁂𑀦𑁂𑀯 𑀲𑁄 𑀮𑁄𑀓𑀫𑀼𑀤𑀺𑀓𑁆𑀔𑀫𑀸𑀦𑁄,

𑀅𑀤𑁆𑀤𑀓𑁆𑀔𑀺 𑀥𑀻𑀭𑀁 𑀯𑀺𑀧𑀺𑀦𑁂 𑀘𑀭𑀦𑁆𑀢𑀁.

𑁧𑁬.

𑀫𑀬𑀚𑁆𑀚 𑀢𑀁 𑀥𑀫𑁆𑀫𑀭𑀲𑁂𑀦 𑀲𑀫𑁆𑀫𑀸,

𑀲𑀦𑁆𑀢𑀧𑁆𑀧𑀬𑀺𑀢𑁆𑀯𑀸 𑀕𑀫𑀦𑀁 𑀯𑀭𑀦𑁆𑀢𑀺;

𑀫𑀦𑁆𑀢𑁆𑀯𑀸 𑀲𑀼𑀪𑀻𑀫𑀜𑁆𑀚𑀦𑀓𑀽𑀝𑀯𑀡𑁆𑀡𑀁,

𑀫𑀳𑀸𑀫𑀼𑀔𑀁 𑀦𑀺𑀕𑁆𑀕𑀢 𑀪𑀻𑀫𑀤𑀸𑀞𑀁.

𑁧𑁭.

𑀤𑀺𑀢𑁆𑀢𑀕𑁆𑀕𑀺𑀲𑀗𑁆𑀓𑀸𑀲 𑀯𑀺𑀲𑀸𑀮𑀦𑁂𑀢𑁆𑀢𑀁,

𑀫𑀚𑁆𑀛𑁂𑀦 𑀪𑀕𑁆𑀕𑀁 𑀘𑀺𑀧𑀺𑀝𑀕𑁆𑀕𑀦𑀸𑀲𑀁;

𑀔𑀭𑀢𑀫𑁆𑀩𑀤𑀸𑀞𑀺𑀁 𑀖𑀦𑀫𑀲𑁆𑀲𑀼𑀯𑀦𑁆𑀢𑀁,

𑀦𑀻𑀮𑁄𑀤𑀭𑀁 𑀕𑀚𑁆𑀚𑀺𑀢𑀪𑀻𑀫𑀖𑁄𑀲𑀁.

𑁧𑁮.

𑀓𑀭𑁄𑀭𑀼𑀳𑀁 𑀢𑀺𑀓𑁆𑀔𑀲𑀮𑁄𑀳𑀺𑀢𑀸𑀬𑀢𑀁,

𑀯𑀺𑀲𑀸𑀮𑀥𑁄𑀢𑀸𑀬𑀢𑀔𑀕𑁆𑀕𑀳𑀢𑁆𑀣𑀁;

𑀕𑀤𑀸𑀬𑀼𑀥𑁂𑀦𑀗𑁆𑀓𑀺𑀢𑀫𑀜𑁆𑀜𑀩𑀸𑀳𑀼𑀁,

𑀤𑀝𑁆𑀞𑁄𑀝𑁆𑀞𑀪𑀻𑀫𑀁 𑀲𑀯𑀮𑀻𑀮𑀮𑀸𑀝𑀁.

𑁧𑁯.

𑀫𑀦𑀼𑀲𑁆𑀲𑀫𑀁𑀲𑀸𑀤𑀦𑀭𑀢𑁆𑀢𑀧𑀸𑀦𑀁,

𑀪𑀬𑀸𑀦𑀓𑀁 𑀓𑀓𑁆𑀔𑀮𑀬𑀓𑁆𑀔𑀯𑀡𑁆𑀡𑀁;

𑀲𑀼𑀫𑀸𑀧𑀬𑀺𑀢𑁆𑀯𑀸𑀦 𑀯𑀦𑀦𑁆𑀢𑀭𑀲𑁆𑀫𑀺𑀁,

𑀤𑀲𑁆𑀲𑁂𑀲𑀺 𑀅𑀢𑁆𑀢𑀁 𑀲 𑀦𑀭𑀸𑀥𑀺𑀧𑀲𑁆𑀲𑀸𑀢𑀺.

𑀅𑀣 𑀫𑀳𑀸𑀲𑀢𑁆𑀢𑁄 𑀅𑀢𑁆𑀢𑀦𑁄 𑀅𑀯𑀺𑀤𑀽𑀭𑁂 𑀞𑀺𑀢𑀁 𑀭𑀓𑁆𑀔𑀲𑀁 𑀅𑀤𑁆𑀤𑀓𑁆𑀔𑀺, 𑀢𑀁 𑀤𑀺𑀲𑁆𑀯𑀸𑀦𑀸𑀲𑁆𑀲 𑀪𑀬𑀁𑀯𑀸 𑀙𑀫𑁆𑀪𑀺𑀢𑀢𑁆𑀢𑀁𑀯𑀸 𑀘𑀺𑀢𑁆𑀣𑀼𑀢𑁆𑀭𑀸𑀲𑀫𑀢𑁆𑀢𑀁𑀯𑀸 𑀦𑀸𑀳𑁄𑀲𑀺, 𑀓𑀺𑀫𑀢𑁆𑀭 𑀘𑀺𑀦𑁆𑀢𑁂𑀲𑀺, 𑀅𑀧𑀺𑀦𑀸𑀫 𑀏𑀯𑀭𑀽𑀧𑁄 𑀧𑀺𑀭𑀓𑁆𑀔𑀲𑁄 𑀥𑀫𑁆𑀫𑀁 ¶ 𑀚𑀸𑀦𑁂𑀬𑁆𑀬, 𑀬𑀦𑁆𑀦𑀽𑀦𑀸𑀳𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀺, 𑀢𑀫𑁆𑀫𑁂 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀻𑀢𑀺 𑀘𑀺𑀦𑁆𑀢𑁂𑀲𑀺. 𑀘𑀺𑀦𑁆𑀢𑁂𑀢𑁆𑀯𑀸 𑀘𑀧𑀦 𑀅𑀚𑁆𑀚 𑀫𑀬𑀸 𑀢𑀫𑀼𑀧𑀲𑀗𑁆𑀓𑀫𑁆𑀫 𑀧𑀼𑀘𑁆𑀙𑀺𑀢𑀁 𑀯𑀝𑁆𑀝𑀢𑀻𑀢𑀺 𑀕𑀦𑁆𑀢𑁆𑀯𑀸 𑀭𑀓𑁆𑀔𑀲𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀆𑀳.

𑁨𑁦.

𑀅𑀲𑁆𑀫𑀺𑀁 𑀯𑀦𑀲𑁆𑀫𑀺𑀁 𑀢𑀭𑀼𑀲𑀡𑁆𑀟 𑀫𑀡𑁆𑀟𑀺𑀢𑁂;

𑀲𑀼𑀨𑀼𑀮𑁆𑀮𑀺𑀢𑀸𑀦𑁂𑀓𑀮𑀢𑀸𑀓𑀼𑀮𑀸𑀓𑀼𑀮𑁂;

𑀅𑀥𑀺𑀕𑁆𑀕𑀳𑀻𑀢𑁄 𑀲𑀺 𑀫𑀳𑀸𑀦𑀼𑀪𑀸𑀯,

𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯 𑀯𑀤𑁂𑀳𑀺 𑀓𑀗𑁆𑀔𑀁.

𑁨𑁧.

𑀥𑀫𑁆𑀫𑀁 𑀕𑀯𑁂𑀲𑀁 𑀯𑀦𑀫𑀸𑀕𑀢𑁄𑀫𑁆𑀳𑀺,

𑀧𑀳𑀸𑀬 𑀭𑀚𑁆𑀚𑀁 𑀅𑀧𑀺 𑀜𑀸𑀢𑀺𑀲𑀗𑁆𑀖𑀁;

𑀚𑀸𑀦𑀸𑀲𑀺 𑀘𑁂 𑀲𑀫𑁆𑀫 𑀯𑀤𑁂𑀳𑀺 𑀫𑀬𑁆𑀳𑀁,

𑀏𑀓𑀫𑁆𑀧𑀺 𑀕𑀸𑀣𑀁 𑀲𑀼𑀕𑀢𑁂𑀦 𑀤𑁂𑀲𑀺𑀢𑀁.

𑀢𑀢𑁄 𑀬𑀓𑁆𑀔𑁄 𑀆𑀳.

𑁨𑁨.

𑀥𑀫𑁆𑀫𑀁 𑀧𑀚𑀸𑀦𑀸𑀫𑀳𑀫𑁂𑀓𑀤𑁂𑀲𑀁,

𑀚𑀺𑀦𑁂𑀭𑀺𑀢𑀁 𑀲𑀸𑀥𑀼𑀢𑀭𑀁 𑀭𑀲𑀸𑀦𑀁,

𑀤𑁂𑀲𑁂𑀫𑀺 𑀘𑁂𑀳𑀁 𑀢𑀯 𑀥𑀫𑁆𑀫 𑀫𑀕𑁆𑀕𑀁,

𑀢𑀼𑀯𑀜𑁆𑀳𑀺 𑀓𑀺𑀁 𑀓𑀸𑀳𑀲𑀺 𑀤𑁂𑀲𑀓𑀲𑁆𑀲𑀸𑀢𑀺.

𑀅𑀣 𑀫𑀳𑀸𑀲𑀢𑁆𑀢𑁄 𑀆𑀳.

𑁨𑁩.

𑀭𑀚𑁆𑀚𑁂 𑀞𑀺𑀢𑁄 𑀅𑀲𑁆𑀲𑀫𑀳𑀁 𑀲𑀘𑁂 𑀪𑁄,

𑀅𑀦𑀧𑁆𑀧𑀭𑀽𑀧𑀁 𑀧𑀓𑀭𑁄𑀫𑀺 𑀧𑀽𑀚𑀁;

𑀇𑀤𑀸𑀦𑀺 𑀏𑀓𑁄 𑀯𑀦𑀫𑀚𑁆𑀛𑀧𑀢𑁆𑀢𑁄,

𑀓𑀭𑁄𑀫𑀺 𑀓𑀺𑀁 𑀤𑁂𑀳𑀫𑀺𑀫𑀁 𑀞𑀧𑁂𑀢𑁆𑀯𑀸.

𑁨𑁪.

𑀬𑀤𑀺𑀘𑁆𑀙𑀲𑀺 𑀢𑁆𑀯𑀁 𑀫𑀫 𑀫𑀁𑀲𑀮𑁄𑀳𑀺𑀢𑀁,

𑀓𑀭𑁄𑀫𑀳𑀁 𑀲𑀗𑁆𑀕𑀳𑀫𑀚𑁆𑀚 𑀢𑁂𑀦,

𑀦 𑀘𑀢𑁆𑀣𑀺 𑀅𑀜𑁆𑀜𑀁 𑀢𑀯 𑀅𑀘𑁆𑀘𑀦𑀻𑀬𑀁,

𑀤𑁂𑀲𑁂𑀳𑀺 𑀥𑀫𑁆𑀫𑀁 𑀲𑀼𑀕𑀢 𑀧𑁆𑀧𑀲𑀢𑁆𑀣𑀦𑁆𑀢𑀺.

𑀢𑀢𑁄 ¶ 𑀬𑀓𑁆𑀔𑁄 𑀆𑀳.

𑁨𑁫.

𑀪𑀼𑀢𑁆𑀯𑀸𑀦 𑀫𑀁𑀲𑀁 𑀲𑀼𑀳𑀺𑀢𑁄𑀯 𑀲𑀦𑁆𑀢𑁄,

𑀳𑀦𑁆𑀢𑁆𑀯𑀸 𑀧𑀺𑀧𑀸𑀲𑀁 𑀭𑀼𑀥𑀺𑀭𑀁 𑀧𑀺𑀯𑀺𑀢𑁆𑀯𑀸;

𑀥𑀫𑁆𑀫𑀁 𑀓𑀣𑁂𑀢𑀼𑀁 𑀧𑀪𑀯𑀸𑀫𑀺 𑀢𑀼𑀬𑁆𑀳𑀁,

𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀫𑀺 𑀔𑀼𑀤𑀸𑀧𑀭𑁂𑀢𑁄𑀢𑀺.

𑀅𑀣 𑀫𑀳𑀸𑀲𑀢𑁆𑀢𑁄 𑀆𑀳.

𑁨𑁬.

𑀪𑀼𑀢𑁆𑀯𑀸 𑀢𑀼𑀯𑀁 𑀫𑀁 𑀧𑀣𑀫𑀜𑁆𑀳𑀺 𑀬𑀓𑁆𑀔,

𑀧𑀘𑁆𑀙𑀸 𑀢𑀼 𑀤𑁂𑀲𑁂𑀲𑁆𑀲𑀲𑀺 𑀓𑀲𑁆𑀲 𑀥𑀫𑁆𑀫𑀁;

𑀥𑀫𑁆𑀫𑀲𑁆𑀲 𑀫𑀬𑁆𑀳𑀁 𑀢𑀯 𑀫𑀁𑀲𑀮𑀸𑀪𑀁,

𑀢𑁆𑀯𑀫𑁂𑀯 𑀚𑀸𑀦𑀸𑀳𑀺 𑀬𑀣𑀸 𑀪𑀯𑁂𑀬𑁆𑀬𑀸𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀸𑀥𑀼 𑀫𑀳𑀸𑀭𑀸𑀚 𑀅𑀳𑀫𑁂𑀯 𑀬𑀼𑀢𑁆𑀢𑀁 𑀚𑀸𑀦𑀸𑀫𑀻𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸𑀯𑀺𑀤𑀽𑀭𑁂 𑀢𑀺𑀕𑀸𑀯𑀼𑀢𑀼𑀩𑁆𑀩𑁂𑀥𑀁 𑀅𑀜𑁆𑀚𑀦𑀯𑀡𑁆𑀡𑀁 𑀫𑀳𑀦𑁆𑀢𑀁 𑀧𑀩𑁆𑀩𑀢𑀁 𑀫𑀸𑀧𑁂𑀢𑁆𑀯𑀸 𑀫𑀳𑀸𑀭𑀸𑀚 𑀇𑀫𑀫𑀸𑀭𑀼𑀬𑁆𑀳 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀝𑁆𑀞𑀺𑀢𑁄 𑀫𑀫 𑀫𑀼𑀔𑁂 𑀧𑀢𑀢𑀼, 𑀅𑀳𑀁 𑀧𑀢𑀦𑁆𑀣𑀲𑁆𑀲 𑀢𑁂 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀏𑀯𑀁 𑀲𑀦𑁆𑀢𑁂 𑀢𑀼𑀬𑁆𑀳𑀁 𑀥𑀫𑁆𑀫𑀧𑀝𑀺𑀮𑀸𑀪𑁄, 𑀫𑀬𑁆𑀳𑀁𑀘 𑀫𑀁𑀲𑀧𑀝𑀺𑀮𑀸𑀪𑁄 𑀪𑀯𑀺𑀲𑁆𑀲𑀢𑀻𑀢𑀺. 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀲𑀁𑀲𑀭𑀢𑁄 𑀫𑁂 𑀲𑀻𑀳𑀩𑁆𑀬𑀕𑁆𑀖𑀘𑁆𑀙𑀫𑀘𑁆𑀙𑀓𑀘𑁆𑀙𑀧𑀯𑀺𑀳𑀗𑁆𑀕𑀸𑀤𑀻𑀦𑀁 𑀪𑀓𑁆𑀔𑀪𑀽𑀢𑀲𑁆𑀲 𑀚𑀸𑀢𑀻𑀲𑀼 𑀧𑀫𑀸𑀡𑀁 𑀦𑀢𑁆𑀢𑀺, 𑀅𑀚𑁆𑀚 𑀫𑀬𑀸 𑀲𑀫𑁆𑀩𑀼𑀤𑁆𑀥𑀲𑁆𑀲 𑀥𑀫𑁆𑀫𑀢𑁆𑀣𑀸𑀬 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳.

𑁨𑁭.

𑀲𑀁𑀲𑀸𑀭𑀯𑀝𑁆𑀝𑁂𑀲𑀼 𑀯𑀺𑀯𑀝𑁆𑀝𑀫𑀸𑀦𑀸,

𑀧𑀧𑁆𑀧𑁄𑀦𑁆𑀢𑀺 𑀤𑀼𑀓𑁆𑀔𑀁 𑀚𑀦𑀢𑀸 𑀅𑀦𑁂𑀓𑀸;

𑀏𑀢𑀜𑁆𑀳𑀺 𑀪𑁄 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲,

𑀅𑀢𑁆𑀣𑀸𑀬 𑀦𑀸𑀳𑁄𑀲𑀺 𑀅𑀳𑁄𑀲𑀺 𑀢𑀼𑀘𑁆𑀙𑀁.

𑁨𑁮.

𑀢𑁆𑀯𑀫𑀤𑀺𑀦𑁆𑀦𑀳𑀸𑀭𑀻 𑀢𑀺𑀘 𑀧𑀸𑀭𑀤𑀸𑀭𑀺𑀓𑁄,

𑀧𑀸𑀡𑀸𑀢𑀺𑀧𑀸𑀢𑀻𑀲𑀺 𑀫𑀼𑀲𑀸 𑀅𑀪𑀸𑀲𑀺;

𑀢𑁆𑀯 𑀫𑀚𑁆𑀚𑀧𑀸𑀬𑀻𑀢𑀺 𑀅𑀓𑀸𑀲𑀺 𑀤𑁄𑀲𑀁,

𑀧𑀕𑁆𑀕𑀬𑁆𑀳 𑀤𑀼𑀓𑁆𑀔𑀁 𑀩𑀳𑀼𑀲𑁄 𑀤𑀤𑀦𑁆𑀢𑀺.

𑁨𑁯.

𑀏𑀢𑀜𑁆𑀳𑀺 ¶ 𑀪𑁄 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲,

𑀅𑀢𑁆𑀣𑀸𑀬 𑀦𑀸𑀳𑁄𑀲𑀺 𑀅𑀳𑁄𑀲𑀺 𑀢𑀼𑀘𑁆𑀙𑀁;

𑀭𑀼𑀓𑁆𑀔𑀸 𑀧𑀧𑀸𑀢𑀸 𑀧𑀧𑀢𑀺𑀢𑁆𑀯𑀓𑁂𑀘𑀺,

𑀤𑀼𑀩𑁆𑀩𑀦𑁆𑀥𑀺𑀬𑀸 𑀤𑀼𑀕𑁆𑀕𑀯𑀺𑀲𑀸𑀤𑀦𑁂𑀦.

𑁩𑁦.

𑀩𑁆𑀬𑀸𑀥𑀻𑀳𑀺 𑀦𑀸𑀦𑀸𑀔𑀭𑀯𑁂𑀤𑀦𑀸𑀳𑀺,

𑀫𑀭𑀦𑁆𑀢𑀺 𑀲𑀢𑁆𑀢𑀸 𑀉𑀢𑀼𑀯𑁂𑀤𑀦𑀸𑀳𑀺;

𑀏𑀢𑀜𑁆𑀳𑀺 𑀪𑁄 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲,

𑀅𑀢𑁆𑀣𑀸𑀬 𑀦𑀸𑀳𑁄𑀲𑀺 𑀅𑀳𑁄𑀲𑀺 𑀢𑀼𑀘𑁆𑀙𑀁.

𑁩𑁧.

𑀩𑁆𑀬𑀕𑁆𑀖𑀘𑁆𑀙𑀫𑀘𑁆𑀙𑁄 𑀭𑀕𑀓𑀼𑀘𑁆𑀙𑀺𑀬𑀜𑁆𑀳𑀺,

𑀫𑀢𑀲𑁆𑀲 𑀫𑁂 𑀦𑀢𑁆𑀣𑀺 𑀧𑀫𑀸𑀡𑀲𑀗𑁆𑀔𑀸;

𑀏𑀢𑀜𑁆𑀳𑀺 𑀪𑁄 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲,

𑀅𑀢𑁆𑀣𑀸𑀬 𑀦𑀸𑀳𑁄𑀲𑀺 𑀅𑀳𑁄𑀲𑀺 𑀢𑀼𑀘𑁆𑀙𑀁.

𑁩𑁨.

𑀏𑀢𑀚𑁆𑀚 𑀫𑁂 𑀤𑀼𑀘𑁆𑀘 𑀚 𑀫𑀢𑁆𑀢𑀤𑀸𑀦𑀁,

𑀦 𑀳𑁄𑀢𑀺 𑀤𑁂𑀯𑀺𑀲𑁆𑀲𑀭𑀺𑀬𑀸𑀤𑀺𑀓𑀸𑀬;

𑀲𑀩𑁆𑀩𑀜𑁆𑀜𑀼𑀪𑀸𑀯𑀁 𑀧𑀦 𑀧𑀸𑀧𑀼𑀡𑀺𑀢𑁆𑀯𑀸,

𑀲𑀁𑀲𑀸𑀭𑀢𑁄 𑀦𑀺𑀢𑁆𑀢𑀭𑀡𑀸𑀬 𑀲𑀢𑁆𑀢𑁂.

𑁩𑁩.

𑀢𑁆𑀯𑀁 𑀲𑀫𑁆𑀫 𑀫𑀬𑁆𑀳𑀁 𑀩𑀳𑀼𑀲𑁄 𑀧𑀓𑀸𑀭𑀻,

𑀢𑀲𑁆𑀫𑀸 𑀢𑀯𑁂𑀢𑀁 𑀯𑀘𑀦𑀁 𑀓𑀭𑁄𑀫𑀺;

𑀅𑀲𑀁𑀓𑀺𑀢𑁄 𑀤𑁂𑀲𑀬 𑀫𑀬𑁆𑀳𑀥𑀫𑁆𑀫𑀁,

𑀲𑀫𑀺𑀚𑁆𑀛𑀢𑁂 𑀤𑀸𑀦𑀺 𑀫𑀦𑁄𑀭𑀣𑁄 𑀢𑁂𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀧𑀩𑁆𑀩𑀢𑀫𑀸𑀭𑀼𑀬𑁆𑀳 𑀞𑀺𑀢𑁄 𑀆𑀳, 𑀅𑀳𑀫𑀚𑁆𑀚 𑀭𑀚𑁆𑀚𑁂𑀦 𑀲𑀤𑁆𑀥𑀺𑀁 𑀚𑀻𑀯𑀺𑀢𑀜𑁆𑀘 𑀲𑀭𑀻𑀭𑀫𑀁𑀲𑀜𑁆𑀘 𑀲𑀤𑁆𑀥𑀫𑁆𑀫𑀢𑁆𑀣𑀸𑀬 𑀤𑀫𑁆𑀫𑀻𑀢𑀺 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀲𑀫𑁆𑀫 𑀥𑀫𑁆𑀫𑀁 𑀤𑁂𑀲𑁂𑀳𑀻𑀢𑀺 𑀯𑀢𑁆𑀯𑀸 𑀢𑀲𑁆𑀫𑀺𑀁 𑀫𑀳𑀸𑀤𑀸𑀞𑀁 𑀫𑀳𑀸𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀞𑀺𑀢𑁂 𑀢𑀲𑁆𑀲𑀸𑀪𑀺𑀫𑀼𑀔𑁄 𑀉𑀧𑀧𑀢𑀺. 𑀅𑀣 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑁄𑀫𑀦𑀲𑁆𑀲𑁄 𑀅𑀘𑁆𑀙𑀭𑀺𑀬𑀧𑁆𑀧𑀢𑁆𑀢𑁄 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀅𑀮𑀗𑁆𑀓𑀢𑀤𑀺𑀩𑁆𑀩𑀢𑁆𑀢𑀪𑀸𑀯𑀁 𑀫𑀸𑀧𑁂𑀢𑁆𑀯𑀸 𑀆𑀓𑀸𑀲𑁂 ¶ 𑀢𑀭𑀼𑀡𑀲𑀼𑀭𑀺𑀬𑁄 𑀯𑀺𑀬 𑀑𑀪𑀸𑀲𑀫𑀸𑀦𑁄 𑀆𑀓𑀸𑀲𑀢𑁄 𑀧𑀢𑀦𑁆𑀢𑀁 𑀫𑀳𑀸𑀲𑀢𑁆𑀢𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀤𑀴𑁆𑀳𑀁 𑀧𑀢𑀺𑀕𑀡𑁆𑀳𑀺𑀢𑁆𑀯𑀸 𑀤𑁂𑀯𑀮𑁄𑀓𑀁 𑀦𑁂𑀢𑁆𑀯𑀸 𑀧𑀡𑁆𑀟𑀼𑀓𑀫𑁆𑀩𑀮 𑀲𑀺𑀮𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀤𑀺𑀩𑁆𑀩𑀫𑀬𑁂𑀳𑀺 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀲𑀬𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑁄 𑀧𑀲𑀦𑁆𑀦𑀸𑀓𑀸𑀭𑀁 𑀓𑀢𑁆𑀯𑀸 𑀓𑀲𑁆𑀲𑀧𑀤𑀲𑀩𑀮𑁂𑀦 𑀤𑁂𑀲𑀺𑀢𑀸𑀬 𑀅𑀦𑀺𑀘𑁆𑀘𑀸𑀤𑀺𑀧𑀭𑀺𑀤𑀻𑀧𑀺𑀓𑀸𑀬.

𑁩𑁪.

𑀅𑀦𑀺𑀘𑁆𑀘𑀸𑀯 𑀢 𑀲𑀗𑁆𑀔𑀸𑀭𑀸, 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄𑀢𑀺.

𑀕𑀸𑀣𑀸𑀬 𑀥𑀫𑁆𑀫𑀤𑁂𑀲𑀦𑁂𑀦 𑀢𑀲𑁆𑀲 𑀫𑀦𑁄𑀭𑀣𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑁂𑀯𑀮𑁄𑀓𑁂 𑀫𑀳𑀦𑁆𑀢𑀁 𑀲𑀺𑀭𑀺𑀯𑀺𑀪𑀯𑀁 𑀤𑀲𑁆𑀲𑁂𑀢𑁆𑀯𑀸 𑀆𑀦𑁂𑀢𑁆𑀯𑀸 𑀲𑀓𑀭𑀚𑁆𑀚𑁂𑀬𑁂𑀯 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑁄 𑀳𑁄𑀢𑀺 𑀫𑀳𑀸𑀭𑀸𑀚𑀸𑀢𑀺 𑀑𑀯𑀤𑀺𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀅𑀕𑀫𑀸𑀲𑀻𑀢𑀺.

𑁩𑁫.

𑀇𑀢𑀺 𑀅𑀫𑀺𑀢𑀲𑀺𑀭𑀺𑀁 𑀯𑀸 𑀚𑀻𑀯𑀺𑀢𑀁 𑀯𑀸𑀧𑀺 𑀲𑀦𑁆𑀢𑁄,

𑀦 𑀲𑀼𑀫𑀭𑀺𑀬 𑀧𑀲𑀢𑁆𑀣𑀁 𑀥𑀫𑁆𑀫𑀫𑁂𑀯𑀸 𑀘𑀭𑀦𑁆𑀢𑀺;

𑀢𑀦𑀼𑀢𑀭 𑀯𑀺𑀪𑀯𑀸𑀦𑀁 𑀅𑀧𑁆𑀧𑀫𑀸𑀬𑀽𑀦𑀫𑀫𑁆𑀪𑁄,

𑀇𑀳 𑀓𑀼𑀲𑀮𑀧𑀫𑀸𑀤𑁄 𑀓𑁄 𑀦𑀼 𑀢𑀼𑀫𑁆𑀳𑀸𑀤𑀺𑀲𑀸𑀦𑀦𑁆𑀢𑀺.

𑀥𑀫𑁆𑀫𑀲𑁄𑀡𑁆𑀟𑀓𑀯𑀢𑁆𑀣𑀼𑀁 𑀧𑀞𑀫𑀁.

𑁨. 𑀫𑀺𑀕𑀮𑀼𑀤𑁆𑀤𑀓𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀺𑀓𑀣𑀸

𑀇𑀢𑁄 𑀓𑀺𑀭 𑀏𑀓 𑀢𑀺𑀁𑀲𑀢𑀺𑀫𑁂 𑀓𑀧𑁆𑀧𑁂 𑀲𑀺𑀔𑀻𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀧𑀭𑀫𑀸𑀢𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀲𑀤𑁂𑀯𑀓𑀁 𑀮𑁄𑀓𑀁 𑀲𑀁𑀲𑀸𑀭𑀓𑀦𑁆𑀢𑀸𑀭𑀸 𑀉𑀢𑁆𑀢𑀸𑀭𑁂𑀦𑁆𑀢𑁄 𑀥𑀫𑁆𑀫𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀦𑁆𑀢𑁄 𑀥𑀫𑁆𑀫𑀪𑁂𑀭𑀺𑀁𑀧𑀳𑀭𑀦𑁆𑀢𑁄 𑀥𑀫𑁆𑀫𑀓𑁂𑀢𑀼𑀁 𑀉𑀲𑁆𑀲𑀸𑀧𑁂𑀦𑁆𑀢𑁄 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀯𑀺𑀯𑁂𑀓 𑀫𑀦𑀼𑀩𑁆𑀭𑀽𑀳𑀦𑁆𑀢𑁄 𑀅𑀭𑀜𑁆𑀜𑀸𑀬𑀢𑀦𑀁 𑀧𑀸𑀯𑀺𑀲𑀺, ¶ 𑀧𑀯𑀺𑀲𑀺𑀢𑁆𑀯𑀸 𑀘𑀧𑀦 𑀲𑀼𑀧𑀼𑀧𑁆𑀨𑀺𑀢𑀦𑀸𑀕𑀧𑀼𑀦𑁆𑀦𑀸𑀕𑀸𑀤𑀺𑀦𑀸𑀦𑀸𑀢𑀭𑀼𑀲𑀡𑁆𑀟𑀫𑀡𑁆𑀟𑀺𑀢𑁂 𑀲𑀼𑀨𑀼𑀮𑁆𑀮𑀲𑀼𑀫𑀦𑀫𑀸𑀮𑀢𑀺𑀧𑁆𑀧𑀪𑀼𑀢𑀺𑀦𑀸𑀦𑀸𑀮𑀢𑀸𑀓𑀼𑀮𑁂 𑀅𑀦𑁂𑀓𑀯𑀺𑀥𑀤𑀺𑀧𑀤𑀘𑀢𑀼𑀧𑁆𑀧𑀤𑀲𑀗𑁆𑀖𑀦𑀺𑀲𑁂𑀯𑀺𑀢𑁂 𑀭𑀫𑀡𑀻𑀬𑁂 𑀲𑀻𑀢𑀮𑀲𑀺𑀮𑀸𑀢𑀮𑁂 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀲𑀻𑀤𑀺 𑀙𑀩𑁆𑀩𑀡𑁆𑀡𑀭𑀁𑀲𑀻𑀳𑀺 𑀤𑀺𑀲𑀁 𑀧𑀽𑀭𑀬𑀦𑁆𑀢𑁄, 𑀢𑀤𑀸 𑀢𑀢𑁆𑀣 𑀤𑁂𑀯𑀩𑁆𑀭𑀳𑁆𑀫𑀦𑀸𑀕𑀲𑀼𑀧𑀡𑁆𑀡𑀸𑀤𑀬𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀤𑀺𑀩𑁆𑀩𑀫𑀬𑁂𑀳𑀺 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀪𑀕𑀯𑀦𑁆𑀢𑀁 𑀧𑀽𑀚𑀬𑀫𑀸𑀦𑀸 𑀣𑁄𑀫𑀬𑀫𑀸𑀦𑀸 𑀦𑀫𑀲𑁆𑀲𑀫𑀸𑀦𑀸 𑀅𑀝𑁆𑀞𑀁𑀲𑀼, 𑀢𑀲𑁆𑀫𑀺𑀁 𑀧𑀦𑀲𑀫𑀸𑀕𑀫𑁂 𑀪𑀕𑀯𑀸 𑀫𑀥𑀼𑀭𑀲𑁆𑀲𑀭𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 𑀩𑁆𑀭𑀳𑁆𑀫𑀖𑁄𑀲𑁂𑀦 𑀘𑀢𑀼𑀲𑀘𑁆𑀘𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀅𑀫𑀢𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀦𑁆𑀢𑁄𑀯𑀺𑀬. 𑀢𑀤𑀸 𑀏𑀓𑁄 𑀫𑀺𑀕𑀮𑀼𑀤𑁆𑀤𑀓𑁄 𑀯𑀦𑀁 𑀧𑀯𑀺𑀝𑁆𑀞𑁄 𑀫𑀺𑀕𑀲𑀽𑀓𑀭𑁂 𑀳𑀦𑁆𑀢𑁆𑀯𑀸 𑀫𑀁𑀲𑀁 𑀔𑀸𑀤𑀦𑁆𑀢𑁄 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀅𑀤𑁆𑀤𑀲 𑀪𑀕𑀯𑀦𑁆𑀢𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁. 𑀤𑀺𑀲𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀙𑀲𑀼 𑀓𑀸𑀫𑀲𑀕𑁆𑀕𑁂𑀲𑀼 𑀫𑀦𑀼𑀲𑁆𑀲𑁂𑀲𑀼𑀘 𑀅𑀧𑀭𑀸𑀧𑀭𑀁 𑀇𑀲𑁆𑀲𑀭𑀺𑀬𑀁 𑀅𑀦𑀼𑀪𑀯𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀲𑀸𑀯𑀢𑁆𑀣𑀺𑀬𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀏𑀓𑀤𑀺𑀯𑀲𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀪𑀕𑀯𑀢𑁄 𑀘𑀢𑀼𑀲𑀘𑁆𑀘𑀧𑀢𑀺 𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀏𑀓𑀤𑀺𑀯𑀲𑀁 𑀪𑀺𑀓𑁆𑀔𑀼𑀲𑀗𑁆𑀖𑀫𑀚𑁆𑀛𑀕𑀢𑁄 𑀅𑀢𑁆𑀢𑀦𑁄 𑀓𑀢𑀓𑀫𑁆𑀫𑀧𑁆𑀧𑀓𑀸𑀲𑀦𑁂𑀦 𑀧𑀻𑀢𑀺𑀯𑀸𑀘𑀫𑀼𑀤𑀸𑀳𑀭𑀺.

𑁧.

𑀏 𑀓 𑀢𑀺𑀁 𑀲𑁂 𑀇𑀢𑁄 𑀓𑀧𑁆𑀧𑁂,

𑀮𑁄𑀓𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄;

𑀧𑀢𑁆𑀢𑀺𑀁𑀲 𑀮𑀓𑁆𑀔𑀡𑀸𑀢𑀺𑀡𑁆𑀡𑁄,

𑀲𑀫𑁆𑀩𑀼𑀤𑁆𑀥𑁄 𑀲 𑀲𑀺𑀔𑀻𑀯𑁆𑀳𑀬𑁄.

𑁨.

𑀚𑀮𑀦𑁆𑀢𑁄 𑀤𑀻𑀧𑀭𑀼𑀓𑁆𑀔𑁄𑀯, 𑀲𑀽𑀭𑀺𑀬𑁄𑀯 𑀦𑀪 𑀫𑀼𑀕𑁆𑀕𑀢𑁄;

𑀫𑁂𑀭𑀼𑀭𑀸𑀚𑀸𑀯 𑀲𑀫𑁆𑀩𑀼𑀤𑁆𑀥𑁄, 𑀚𑀦𑁂𑀲𑀕𑁆𑀕𑁄 𑀧𑀢𑀸𑀧𑀯𑀸.

𑁩.

𑀧𑀽𑀭𑁂𑀢𑁆𑀯𑀸 𑀥𑀫𑁆𑀫𑀦𑀸𑀯𑀸𑀬𑀁, 𑀲 𑀦𑀸𑀣𑁄 𑀲𑀓𑀮𑀁 𑀧𑀚𑀁;

𑀧𑀢𑀺𑀝𑁆𑀞𑀧𑁂𑀦𑁆𑀢𑁄 𑀲𑀁𑀲𑀸𑀭, 𑀓𑀦𑁆𑀢𑀸𑀭𑀸 𑀲𑀦𑁆𑀢𑀺𑀪𑀽𑀫𑀺𑀬𑀁.

𑁪.

𑀥𑀫𑁆𑀫𑀓𑁂𑀢𑀼𑀁 ¶ 𑀲𑀫𑀼𑀲𑁆𑀲𑁂𑀦𑁆𑀢𑁄, 𑀳𑀦𑀦𑁆𑀢𑁄 𑀥𑀫𑁆𑀫𑀤𑀼𑀦𑁆𑀤𑀼𑀪𑀺𑀁;

𑀲𑀢𑁆𑀢𑁂 𑀤𑀼𑀓𑁆𑀔𑀸 𑀧𑀫𑁄𑀘𑁂𑀦𑁆𑀢𑁄, 𑀯𑀲𑀻 𑀢𑀢𑁆𑀣 𑀚𑀺𑀦𑁄 𑀯𑀲𑀻.

𑁫.

𑀏𑀓𑀲𑁆𑀫𑀺𑀁 𑀲𑀫𑀬𑁂 𑀦𑀸𑀣𑁄,

𑀮𑁄𑀓𑀧𑀚𑁆𑀚𑁄𑀢𑀓𑁄 𑀚𑀺𑀦𑁄;

𑀯𑀺𑀯𑁂𑀓𑀓𑀸𑀫𑁄 𑀲𑀫𑁆𑀩𑀼𑀤𑁆𑀥𑁄,

𑀲𑀼𑀭𑀫𑁆𑀫𑀁 𑀓𑀸𑀦𑀦𑀁 𑀕𑀢𑁄.

𑁬.

𑀧𑀼𑀦𑁆𑀦𑀸𑀕𑀦𑀸𑀕𑀧𑀽𑀕𑀸𑀤𑀺, 𑀦𑀸𑀦𑀸𑀧𑀸𑀤𑀧𑀲𑀁𑀓𑀼𑀮𑀁;

𑀮𑀢𑀸 𑀮𑀺𑀗𑁆𑀕𑀺𑀢𑀲𑀸𑀔𑀸𑀳𑀺, 𑀲𑀸 𑀫𑁄𑀤𑀓𑀼𑀲𑀼𑀫𑀸𑀬𑀼𑀢𑀁.

𑁭.

𑀓𑀼𑀲𑀼𑀫𑀸 𑀫𑁄𑀤𑀲𑀫𑁆𑀫𑀢𑁆𑀢, 𑀙𑀧𑁆𑀧𑀤𑀸𑀮𑀺 𑀦𑀺𑀲𑁂𑀯𑀺𑀢𑀁;

𑀦𑀸𑀦𑀸𑀫𑀺𑀕 𑀕𑀡𑀸𑀓𑀺𑀡𑁆𑀡𑀁, 𑀫𑀬𑀽𑀭𑀕𑀡 𑀦𑀘𑁆𑀘𑀺𑀢𑀁.

𑁮.

𑀲𑀻𑀢𑀮𑀘𑁆𑀙𑁄𑀤𑀺𑀓𑀸𑀲𑀸𑀥𑀼, 𑀲𑀼𑀧𑀢𑀺𑀢𑁆𑀣𑀚𑀮𑀸𑀲𑀬𑀁;

𑀆𑀲𑀸𑀭 𑀲𑀸𑀭𑀥𑀸𑀭𑀸𑀳𑀺, 𑀦𑀺𑀚𑁆𑀛𑀭𑀸𑀲𑀢 𑀲𑀁𑀓𑀼𑀮𑀁.

𑁯.

𑀕𑀦𑁆𑀢𑁆𑀯𑀸𑀦 𑀲𑁄 𑀫𑀳𑀸𑀭𑀜𑁆𑀜𑀁,

𑀲𑀻𑀢𑀮𑀁 𑀲𑀺𑀓𑀢𑀸𑀢𑀮𑀁;

𑀲𑀺𑀮𑀸𑀢𑀮𑁂 𑀦𑀺𑀲𑀺𑀦𑁆𑀦𑁄𑀲𑀺,

𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀙𑀭𑀁𑀲𑀺𑀬𑁄.

𑁧𑁦.

𑀤𑁂𑀯𑀸 𑀢𑀢𑁆𑀣 𑀲𑀫𑀸𑀕𑀦𑁆𑀢𑁆𑀯𑀸, 𑀧𑀽𑀚𑁂𑀲𑀼𑀁 𑀤𑁆𑀯𑀺𑀧𑀤𑀼𑀢𑁆𑀢𑀫𑀁;

𑀤𑀺𑀩𑁆𑀩𑁂𑀳𑀺 𑀕𑀦𑁆𑀥𑀫𑀸𑀮𑀸𑀳𑀺, 𑀦𑀘𑁆𑀘𑁂𑀳𑀺 𑀢𑀼𑀭𑀺𑀬𑁂𑀳𑀺𑀘.

𑁧𑁧.

𑀤𑁂𑀯𑀤𑁂𑀯𑁄 𑀢𑀤𑀸 𑀤𑁂𑀯, 𑀲𑀗𑁆𑀖𑀫𑀚𑁆𑀛𑁂 𑀦𑀺𑀲𑀻𑀤𑀺𑀬;

𑀘𑀢𑀼𑀲𑀘𑁆𑀘 𑀫𑀤𑁂𑀲𑁂𑀲𑀺, 𑀦𑀺𑀘𑁆𑀙𑀭𑀁 𑀫𑀥𑀼𑀭𑀁 𑀕𑀺𑀭𑀁.

𑁧𑁨.

𑀢𑀤𑀸𑀳𑀁 𑀮𑀼𑀤𑁆𑀤𑀓𑁄 𑀆𑀲𑀺𑀁, 𑀫𑀺𑀕𑀲𑀽𑀓𑀭𑀫𑀸𑀭𑀓𑁄;

𑀫𑀺𑀕𑀫𑀁𑀲𑁂𑀦 𑀚𑀺𑀯𑀸𑀫𑀺, 𑀢𑁂𑀦 𑀧𑁄𑀲𑁂𑀫𑀺 𑀤𑀸𑀭𑀓𑁂 [𑀧𑁄𑀲𑁂𑀦𑁆𑀢𑁄𑀧𑀼𑀢𑁆𑀢𑀤𑀸𑀭𑀓𑁂 𑀇𑀢𑀺𑀓𑀢𑁆𑀣𑀘𑀺].

𑁧𑁩.

𑀢𑀤𑀸𑀳𑀁 ¶ 𑀫𑀺𑀕𑀯𑀁 𑀬𑀸𑀢𑁄,

𑀲𑀩𑀸𑀡𑁄 𑀲𑀲𑀭𑀸𑀲𑀦𑁄;

𑀅𑀤𑁆𑀤𑀲𑀁 𑀯𑀺𑀭𑀚𑀁 𑀩𑀼𑀤𑁆𑀥𑀁,

𑀤𑁂𑀯𑀲𑀗𑁆𑀖𑀧𑀼𑀭𑀓𑁆𑀔𑀢𑀁.

𑁧𑁪.

𑀘𑀦𑁆𑀤𑀁𑀯 𑀢𑀸𑀭𑀓𑀸𑀓𑀺𑀡𑁆𑀡𑀁, 𑀫𑁂𑀭𑀼𑀁𑀯𑀡𑁆𑀡𑀯𑀫𑀚𑁆𑀛𑀕𑀁;

𑀯𑀺𑀭𑁄𑀘𑀫𑀸𑀦 𑀫𑀸𑀲𑀻𑀦𑀁, 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀓𑀁.

𑁧𑁫.

𑀏𑀓𑀧𑀲𑁆𑀲𑁂 𑀞𑀺𑀢𑁄 𑀢𑀢𑁆𑀣, 𑀅𑀲𑁆𑀲𑁄𑀲𑀺𑀁 𑀥𑀫𑁆𑀫𑀫𑀼𑀢𑁆𑀢𑀫𑀁;

𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸, 𑀲𑁄𑀫𑀦𑀲𑁆𑀲𑀁 𑀧𑀯𑁂𑀤𑀬𑀺𑀁.

𑁧𑁬.

𑀏𑀓𑀢𑀺𑀁𑀲𑁂 𑀇𑀢𑁄 𑀓𑀧𑁆𑀧𑁂,

𑀬𑀁 𑀧𑀼𑀜𑁆𑀜𑀁 𑀧𑀲𑀼𑀢𑀁 𑀫𑀬𑀸;

𑀢𑁂𑀦𑀸𑀳𑀁 𑀧𑀼𑀜𑁆𑀜𑀓𑀫𑁆𑀫𑁂𑀦,

𑀚𑀸𑀢𑁄𑀲𑀺𑀁 𑀤𑁂𑀯𑀬𑁄𑀦𑀺𑀬𑀁.

𑁧𑁭.

𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑀼𑀢𑁆𑀯𑀸𑀦, 𑀙𑀓𑀸𑀫𑀕𑁆𑀕𑁂 𑀧𑀭𑀸𑀧𑀭𑀁;

𑀤𑁂𑀯𑀲𑀗𑁆𑀖𑀧𑀭𑀺𑀩𑁆𑀩𑀽𑀴𑁆𑀳𑁄, 𑀯𑀺𑀫𑀸𑀦𑁂 𑀭𑀢𑀦𑀸𑀫𑀬𑁂.

𑁧𑁮.

𑀫𑀦𑀼𑀲𑁆𑀲𑁂𑀲𑀼𑀘 𑀬𑀁 𑀅𑀕𑁆𑀕𑀁, 𑀢𑀲𑁆𑀲 𑀪𑀸𑀕𑀻 𑀪𑀯𑀸𑀫𑀳𑀁;

𑀪𑁄𑀕𑁂 𑀫𑁂 𑀊𑀦𑀢𑀸 𑀦𑀢𑁆𑀣𑀺, 𑀲𑀤𑁆𑀥𑀫𑁆𑀫𑀲𑀯𑀡𑁂 𑀨𑀮𑀁.

𑁧𑁯.

𑀇𑀫𑀲𑁆𑀫𑀺𑀁 𑀪𑀤𑁆𑀤𑀓𑁂 𑀓𑀧𑁆𑀧𑁂,

𑀲𑀸𑀯𑀢𑁆𑀢𑀺𑀧𑀼𑀭𑀫𑀼𑀢𑁆𑀢𑀫𑁂;

𑀅𑀟𑁆𑀠𑁂 𑀫𑀳𑀤𑁆𑀥𑀦𑁂 𑀲𑀸𑀮𑁂,

𑀚𑀸𑀢𑁄𑀳𑀁 𑀉𑀤𑀺𑀢𑁂 𑀓𑀼𑀮𑁂.

𑁨𑁦.

𑀫𑀳𑀢𑀸 𑀧𑀭𑀺𑀯𑀸𑀭𑁂𑀦, 𑀧𑀢𑁆𑀢𑁄 𑀯𑀼𑀤𑁆𑀥𑀺𑀁𑀘 𑀯𑀺𑀜𑁆𑀜𑀼𑀢𑀁;

𑀘𑀸𑀭𑀺𑀓𑀁 𑀘𑀭𑀫𑀸𑀦𑁄𑀳𑀁, 𑀧𑀢𑁆𑀢𑁄 𑀚𑁂𑀢𑀯𑀦𑀁 𑀯𑀭𑀁.

𑁨𑁧.

𑀅𑀤𑁆𑀤𑀲𑀁 𑀲𑀳 𑀲𑀺𑀲𑁆𑀲𑁂𑀳𑀺, 𑀦𑀺𑀲𑀺𑀦𑁆𑀦𑀁 𑀲𑀼𑀕𑀢𑀁 𑀢𑀤𑀸;

𑀅𑀲𑁆𑀲𑁄𑀲𑀺𑀁 𑀫𑀥𑀼𑀭𑀁 𑀥𑀫𑁆𑀫𑀁, 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀓𑀁.

𑁨𑁨.

𑀲𑀼𑀢𑁆𑀯𑀸𑀦 𑀫𑀥𑀼𑀭𑀁 𑀥𑀫𑁆𑀫𑀁, 𑀧𑀩𑁆𑀩𑀚𑀺𑀢𑁆𑀯𑀸𑀦 𑀲𑀸𑀲𑀦𑁂;

𑀅 𑀚𑀭𑀸 𑀫𑀭𑀁 𑀲𑀻𑀢𑀺𑀪𑀽𑀢𑀁, 𑀧𑀢𑁆𑀢𑁄 𑀦𑀺𑀩𑁆𑀩𑀸𑀡𑀫𑀼𑀢𑁆𑀢𑀫𑀁.

𑁨𑁩.

𑀲𑀼𑀢𑀁 ¶ 𑀏𑀓𑀫𑀼𑀳𑀼𑀢𑁆𑀢𑀁 𑀫𑁂, 𑀢𑀤𑀸 𑀥𑀫𑁆𑀫𑀁 𑀲𑀼𑀤𑁂𑀲𑀺𑀢𑀁;

𑀢𑁂𑀦𑀫𑁆𑀳𑀺 𑀘𑀢𑀼𑀭𑀸𑀧𑀸𑀬𑁂, 𑀦 𑀚𑀸𑀢𑁄 𑀦 𑀓𑀼𑀢𑁄𑀪𑀬𑀁.

𑁨𑁪.

𑀓𑀭𑀫𑀼𑀓𑁆𑀔𑀺𑀧𑁆𑀧 𑀯𑀓𑁆𑀔𑀸𑀫𑀺, 𑀓𑀭𑁄𑀣𑁂 𑀓𑀕𑀺𑀭𑀁 𑀫𑀫;

𑀫𑀫𑁄 𑀧𑀫𑀁 𑀓𑀭𑀺𑀢𑁆𑀯𑀸𑀦, 𑀥𑀫𑁆𑀫𑀁 𑀲𑀼𑀡𑀸𑀣 𑀲𑀸𑀥𑀼𑀓𑀦𑁆𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀲𑀢𑁆𑀢𑁂 𑀥𑀫𑁆𑀫𑀲𑀯𑀡𑁂 𑀦𑀺𑀬𑁄𑀚𑁂𑀲𑀻𑀢𑀺.

𑁨𑁫.

𑀇𑀢𑀺 𑀢𑀦𑀼𑀢𑀭𑀓𑀸𑀮𑀁 𑀲𑀸𑀥𑀼 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸,

𑀅𑀥𑀺𑀕𑀢𑀯𑀺𑀪𑀯𑀸𑀦𑀁 𑀆𑀦𑀼𑀪𑀸𑀯𑀁 𑀲𑀼𑀡𑀺𑀢𑁆𑀯𑀸;

𑀪𑀯𑀯𑀺𑀪𑀯𑀲𑀼𑀔𑀁 𑀪𑁄 𑀧𑀢𑁆𑀣𑀬𑀦𑁆𑀢𑀸 𑀓𑀼𑀲𑀻𑀢𑀁,

𑀚𑀳𑀣 𑀲𑀼𑀡𑀣 𑀥𑀫𑁆𑀫𑀁 𑀤𑀼𑀮𑁆𑀮𑀪𑀁 𑀤𑀼𑀮𑁆𑀮𑀪𑀲𑁆𑀲𑀸𑀢𑀺.

𑀫𑀺𑀕𑀮𑀼𑀤𑁆𑀤𑀓𑀲𑁆𑀲 𑀯𑀢𑁆𑀣𑀼𑀁 𑀤𑀼𑀢𑀺𑀬𑀁.

𑁩. 𑀢𑀺𑀡𑁆𑀡𑀁𑀚𑀦𑀸𑀦𑀁 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀚𑀫𑁆𑀩𑀼𑀤𑀻𑀧𑀲𑁆𑀫𑀺𑀁 𑀓𑀺𑀭 𑀧𑀼𑀩𑁆𑀩𑁂 𑀫𑀳𑀸𑀦𑀺𑀤𑀸𑀖𑁄 𑀅𑀳𑁄𑀲𑀺, 𑀢𑀤𑀸 𑀦𑀺𑀤𑀸𑀖𑀲𑀼𑀭𑀺𑀬𑁂𑀦 𑀲𑀓𑀺𑀭𑀡𑀓𑀭𑀸 𑀯𑀸𑀧𑀺 𑀧𑁄𑀓𑁆𑀔𑀭𑀡𑀺 𑀦𑀤𑀻 𑀕𑀺𑀭𑀺𑀓𑀦𑁆𑀤𑀭𑀦𑀺𑀚𑁆𑀛𑀭𑀸𑀤𑀻𑀲𑀼 𑀉𑀤𑀓𑀁 𑀦𑀺𑀲𑁆𑀲𑁂𑀲𑀁 𑀓𑀢𑁆𑀯𑀸 𑀧𑀻𑀢𑀫𑀺𑀯 𑀉𑀤𑀓𑁂 𑀧𑀭𑀺𑀓𑁆𑀔𑀻𑀡𑁂 𑀫𑀘𑁆𑀙𑀓𑀘𑁆𑀙𑀧𑀸𑀤𑀬𑁄 𑀬𑁂𑀪𑀼𑀬𑁆𑀬𑁂𑀦 𑀯𑀺𑀦𑀸𑀲𑀁 𑀧𑀢𑁆𑀢𑀸. 𑀅𑀣 𑀫𑀳𑀸𑀭𑀜𑁆𑀜𑀪𑀽𑀫𑀺𑀬𑀁 𑀭𑀼𑀓𑁆𑀔𑀢𑀺𑀡𑀮𑀪𑀸𑀤𑀬𑁄 𑀅𑀢𑀻𑀯 𑀫𑀺𑀮𑀸𑀢𑀸 𑀅𑀳𑁂𑀲𑀼𑀁. 𑀫𑀺𑀕𑀧𑀓𑁆𑀔𑀺𑀦𑁄𑀧𑀺𑀖𑀫𑁆𑀫𑀸𑀪𑀺𑀢𑀢𑁆𑀢𑀸 𑀧𑀺𑀧𑀸𑀲𑀺𑀢𑁄 𑀫𑀭𑀻𑀘𑀺𑀁 𑀢𑁄𑀬𑀦𑁆𑀢𑀺𑀫𑀜𑁆𑀜𑀫𑀸𑀦𑀸 𑀇𑀢𑁄𑀘𑀺𑀢𑁄𑀘 𑀥𑀸𑀯𑀦𑁆𑀢𑀸 𑀫𑀳𑀸𑀤𑀼𑀓𑁆𑀔𑀧𑁆𑀧𑀢𑁆𑀢𑀸 𑀅𑀳𑁂𑀲𑀼𑀁. 𑀢𑀤𑀸 𑀏𑀓𑁄 𑀲𑀼𑀯𑀧𑁄𑀢𑀓𑁄 𑀧𑀺𑀧𑀸𑀲𑀺𑀢𑁄 𑀢𑀢𑁆𑀣 𑀢𑀢𑁆𑀣 𑀧𑀸𑀦𑀻𑀬𑀁 𑀧𑀭𑀺𑀬𑁂𑀲𑀦𑁆𑀢𑁄 𑀫𑀳𑀸𑀭𑀜𑁆𑀜𑁂 𑀏𑀓𑀲𑁆𑀫𑀺𑀁 𑀧𑀽𑀢𑀺𑀧𑀸𑀤𑀧𑁂 𑀲𑀝𑁆𑀞𑀺𑀭𑀢𑀦𑁂 𑀦𑀭𑀓𑀸𑀯𑀸𑀝𑁂 𑀧𑀸𑀦𑀻𑀬𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀮𑁄𑀪𑁂𑀦 𑀧𑀸𑀢𑀼𑀁 𑀑𑀢𑀺𑀡𑁆𑀡𑁄 𑀅𑀢𑀺𑀧𑀸𑀦𑁂𑀦 𑀪𑀸𑀭𑁄 𑀢𑀢𑁆𑀣𑁂𑀯 𑀧𑀢𑀺𑀢𑁆𑀯𑀸 𑀉𑀕𑁆𑀕𑀦𑁆𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣𑀸𑀧𑀭𑁄𑀧𑀺 𑀲𑀧𑁆𑀧𑁄𑀘 𑀫𑀦𑀼𑀲𑁆𑀲𑁄𑀘𑀸𑀢𑀺 𑀤𑁆𑀯𑁂 𑀚𑀦𑀸 𑀢𑀢𑁆𑀣𑁂𑀯 𑀧𑀢𑀺𑀁𑀲𑀼, 𑀲𑀧𑁆𑀧𑀸𑀦𑀸𑀫 𑀯𑀺𑀯𑁂𑀓𑀁 𑀮𑀤𑁆𑀥𑀸𑀯 𑀅𑀢𑁆𑀢𑀁 𑀯𑀺𑀚𑀳𑀦𑁆𑀢𑀺. 𑀢𑀲𑁆𑀫𑀸𑀬𑀁 𑀅𑀮𑀤𑁆𑀥𑀸 ¶ 𑀯𑀺𑀯𑁂𑀓𑀢𑁆𑀢𑀁 𑀉𑀕𑁆𑀕𑀦𑁆𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀦𑀸𑀮𑀫𑁆𑀩𑀢𑁆𑀢𑀸 𑀫𑀦𑀼𑀲𑁆𑀲𑁄𑀧𑀺. 𑀢𑁂 𑀉𑀕𑁆𑀕𑀦𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀫𑀭𑀡𑀪𑀬𑀪𑀻𑀢𑀸 𑀅𑀜𑁆𑀜𑀫𑀜𑁆𑀜 𑀫𑀯𑀺𑀳𑁂𑀞𑁂𑀦𑁆𑀢𑀸 𑀢𑀢𑁆𑀣𑁂𑀯 𑀯𑀲𑀺𑀁𑀲𑀼. 𑀅𑀣𑁂𑀓𑁄 𑀩𑀭𑀸𑀡𑀲𑀻𑀯𑀸𑀲𑀺𑀓𑁄 𑀫𑀦𑀼𑀲𑁆𑀲𑁄 𑀯𑀦𑀁 𑀧𑀯𑀺𑀝𑁆𑀞𑁄 𑀢𑀣𑁂𑀯 𑀧𑀸𑀦𑀻𑀬𑀁 𑀧𑀭𑀺𑀬𑁂𑀲𑀫𑀸𑀦𑁄 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀢𑁂 𑀢𑀬𑁄𑀧𑀺 𑀤𑀺𑀲𑁆𑀯𑀸 𑀓𑀫𑁆𑀧𑀫𑀸𑀦𑀳𑀤𑀬𑁄 𑀯𑀮𑁆𑀮𑀺𑀬𑀸 𑀧𑀺𑀝𑀓𑀁 𑀩𑀦𑁆𑀥𑀺𑀢𑁆𑀯𑀸 𑀲𑀺𑀓𑁆𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀑𑀢𑀸𑀭𑁂𑀢𑁆𑀯𑀸 𑀢𑁂 𑀢𑀬𑁄𑀧𑀺 𑀉𑀤𑁆𑀥𑀭𑀺, 𑀅𑀣𑀸𑀦𑁂𑀦 𑀢𑁂 𑀅𑀫𑁆𑀳𑀸𑀓𑀁 𑀚𑀻𑀯𑀺𑀢𑀁 𑀤𑀺𑀦𑁆𑀦𑀦𑁆𑀢𑀺 𑀲𑁄𑀫𑀦𑀲𑁆𑀲𑀸 𑀢𑀲𑁆𑀲𑁂𑀯𑀫𑀸𑀳𑀁𑀲𑀼, 𑀲𑀸𑀫𑀺 𑀫𑀬𑀁 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀚𑀻𑀯𑀺𑀢𑀁 𑀮𑀪𑀺𑀫𑁆𑀳, 𑀢𑀼𑀫𑁆𑀳𑁂 𑀇𑀢𑁄 𑀧𑀝𑁆𑀞𑀸𑀬 𑀅𑀫𑁆𑀳𑀸𑀓𑀁 𑀲𑀳𑀸𑀬𑁄, 𑀫𑀬𑀫𑁆𑀧𑀺 𑀢𑁂 𑀲𑀳𑀸𑀬𑀸, 𑀅𑀫𑁆𑀳𑀸𑀓𑀁 𑀯𑀲𑀦𑀝𑁆𑀞𑀸𑀦𑀸𑀦𑀺 𑀆𑀕𑀦𑁆𑀢𑀼𑀓𑀸𑀫𑀸𑀢𑀺 𑀯𑀢𑁆𑀯𑀸 𑀢𑁂𑀲𑀼 𑀢𑀸𑀯 𑀲𑀼𑀯𑀧𑁄𑀢𑀓𑁄 𑀆𑀳, 𑀲𑀸𑀫𑀺 𑀩𑀸𑀭𑀸𑀡𑀲𑀺𑀬𑀁 𑀤𑀓𑁆𑀔𑀺𑀡𑀤𑁆𑀯𑀸𑀭𑁂 𑀫𑀳𑀸𑀦𑀺𑀕𑁆𑀭𑁄𑀥𑁄 𑀅𑀢𑁆𑀣𑀺, 𑀢𑀢𑁆𑀣𑀸𑀳𑀁 𑀯𑀲𑀸𑀫𑀺, 𑀢𑀯 𑀢𑀣𑀸𑀭𑀽𑀧𑁂 𑀓𑀺𑀘𑁆𑀘𑁂 𑀲𑀢𑀺 𑀫𑀫 𑀲𑀦𑁆𑀢𑀺𑀓𑀫𑀸𑀕𑀫𑁆𑀫 𑀲𑀼𑀯𑀸𑀢𑀺 𑀲𑀤𑁆𑀤𑀁𑀓𑀭𑁄𑀳𑀻𑀢𑀺 𑀯𑀢𑁆𑀯𑀸 𑀫𑁂𑀢𑁆𑀢𑀺𑀣𑀺𑀭𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺, 𑀲𑀧𑁆𑀧𑁄𑀧𑀺 𑀲𑀫𑁆𑀫𑀸𑀳𑀁 𑀢𑀲𑁆𑀲𑁂𑀯 𑀦𑀺𑀕𑁆𑀭𑁄𑀥𑀲𑁆𑀲𑀸 𑀯𑀺𑀤𑀽𑀭𑁂 𑀫𑀳𑀦𑁆𑀢𑀁 𑀯𑀫𑁆𑀫𑀺𑀓𑀁 𑀅𑀢𑁆𑀣𑀺, 𑀢𑀢𑁆𑀣 𑀯𑀲𑀸𑀫𑀺, 𑀢𑀯𑀢𑁆𑀣𑁂 𑀲𑀢𑀺 𑀢𑀢𑁆𑀣𑀸𑀕𑀦𑁆𑀢𑁆𑀯𑀸 𑀤𑀻𑀖𑀸𑀢𑀺𑀲𑀤𑁆𑀤𑀁 𑀓𑀭𑁄𑀳𑀻𑀢𑀺 𑀯𑀢𑁆𑀯𑀸 𑀢𑀣𑁂𑀯𑀧𑀓𑁆𑀓𑀸𑀫𑀺, 𑀫𑀦𑀼𑀲𑁆𑀲𑁄𑀧𑀺 𑀩𑀸𑀭𑀸𑀡𑀲𑀺𑀬𑀁 𑀅𑀲𑀼𑀓𑀸𑀬𑀦𑀸𑀫 𑀯𑀻𑀣𑀺𑀬𑀸 𑀅𑀲𑀼𑀓𑀕𑁂𑀳𑁂 𑀯𑀲𑀸𑀫𑀺, 𑀢𑀯𑀢𑁆𑀣𑁂 𑀲𑀢𑀺 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀸𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺, 𑀅𑀣𑀸 𑀧𑀭𑀪𑀸𑀕𑁂 𑀲𑁄 𑀉𑀧𑀓𑀸𑀭𑀓𑁄 𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂 𑀲𑀜𑁆𑀚𑀸𑀢𑁂 𑀫𑀫 𑀲𑀳𑀸𑀬𑀸𑀦𑀁 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 𑀲𑀗𑁆𑀓𑁂𑀢𑀸𑀦𑀼𑀲𑀸𑀭𑁂𑀦 𑀕𑀦𑁆𑀢𑁆𑀯𑀸 𑀦𑀺𑀕𑁆𑀭𑁄𑀥𑀫𑀽𑀮𑁂 𑀞𑀺𑀢𑁄 𑀲𑀼𑀯𑀲𑁆𑀲 𑀲𑀤𑁆𑀤𑀫𑀓𑀸𑀲𑀺, 𑀢𑀁 𑀲𑀼𑀢𑁆𑀯𑀸 𑀲𑀼𑀯𑀧𑁄𑀢𑀓𑁄 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀝𑀺𑀲𑀫𑁆𑀫𑁄𑀤𑀺𑀢𑁆𑀯𑀸𑀲𑀫𑁆𑀫 𑀘𑀺𑀭𑁂𑀦𑀸 𑀕𑀢𑁄𑀲𑀺, 𑀆𑀕𑀢𑀓𑀸𑀭𑀡𑀁 𑀫𑁂 𑀆𑀘𑀺𑀓𑁆𑀔𑀸𑀢𑀺 𑀆𑀳. 𑀲𑁄𑀧𑀸𑀳 𑀲𑀫𑁆𑀫𑀸𑀳𑀁 𑀚𑀻𑀯𑀺𑀢𑀼 𑀫𑀲𑀓𑁆𑀓𑁄𑀦𑁆𑀢𑁄 𑀧𑀼𑀢𑁆𑀢𑀤𑀸𑀭𑀓𑁂 𑀜𑀸𑀢𑀻𑀦𑀁 𑀧𑀝𑀺𑀧𑀸𑀤𑁂𑀢𑁆𑀯𑀸 𑀢𑀯 𑀲𑀦𑁆𑀢𑀺𑀓𑀫𑀸𑀕𑀢𑁄𑀫𑁆𑀳𑀺𑀢𑀺, 𑀲𑀼𑀯𑀧𑁄𑀢𑀓𑁄𑀧𑀺 𑀲𑀸𑀥𑀼 𑀲𑀫𑁆𑀫 𑀢𑀬𑀸 𑀓𑀢𑀁 𑀫𑀫 𑀲𑀦𑁆𑀢𑀺𑀓𑀫𑀸𑀕𑀘𑁆𑀙𑀦𑁆𑀢𑁂𑀦, 𑀢𑀬𑀸 𑀫𑀫 𑀚𑀻𑀯𑀺𑀢𑀁 𑀤𑀺𑀦𑁆𑀦𑀁, 𑀫𑀬𑀸𑀧𑀺 𑀢𑀯 𑀚𑀻𑀯𑀦𑀼𑀧𑀸𑀬𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀬𑀸𑀯𑀸𑀳𑀁 𑀆𑀕𑀘𑁆𑀙𑀸𑀫𑀺, 𑀢𑀸𑀯𑁂𑀢𑁆𑀣 𑀣𑁄𑀓𑀁 𑀯𑀺𑀲𑁆𑀲𑀫𑀸𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺 𑀚𑀻𑀯𑀦𑀼𑀧𑀸𑀬𑀁 𑀧𑀭𑀺𑀬𑁂𑀲𑀫𑀸𑀦𑁄, ¶ 𑀢𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀩𑀸𑀭𑀸𑀡𑀲𑀻𑀭𑀸𑀚𑀸 𑀦𑀕𑀭𑀢𑁄 𑀦𑀺𑀓𑁆𑀔𑀫𑁆𑀫 𑀲𑀼𑀲𑀚𑁆𑀚𑀺𑀢𑀼𑀬𑁆𑀬𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀲𑀧𑀭𑀺𑀲𑁄 𑀓𑀻𑀴𑀺𑀢𑁆𑀯𑀸 𑀫𑀚𑁆𑀛𑀦𑁆𑀢𑀺𑀓𑀲𑀫𑀬𑁂 𑀲𑀼𑀨𑀼𑀮𑁆𑀮𑀺𑀢𑀁 𑀧𑀜𑁆𑀘𑀧𑀤𑀼𑀫𑀲𑀜𑁆𑀙𑀦𑁆𑀯𑀁 𑀫𑀗𑁆𑀕𑀮𑀧𑁄𑀓𑁆𑀔𑀭𑀡𑀺𑀁 𑀤𑀺𑀲𑁆𑀯𑀸 𑀦𑀳𑀸𑀬𑀺𑀢𑀼𑀓𑀸𑀫𑁄 𑀲𑀩𑁆𑀩𑀸𑀪𑀭𑀡𑀸𑀦𑀺 𑀑𑀫𑀼𑀜𑁆𑀘𑀺𑀢𑁆𑀯𑀸 𑀭𑀸𑀚𑀧𑀼𑀭𑀺𑀲𑁂 𑀧𑀝𑀺𑀧𑀸𑀤𑁂𑀢𑁆𑀯𑀸 𑀦𑀳𑀸𑀬𑀺𑀢𑀼𑀁 𑀑𑀢𑀭𑀺, 𑀢𑀤𑀸 𑀲𑀼𑀯𑀧𑁄𑀢𑀓𑁄 𑀢𑀁 𑀞𑀸𑀦𑀁 𑀧𑀢𑁆𑀢𑁄 𑀲𑀸𑀔𑀦𑁆𑀢𑀭𑁂 𑀦𑀺𑀮𑀻𑀦𑁄 𑀭𑀸𑀚𑀧𑀼𑀭𑀺𑀲𑀸𑀦𑀁 𑀧𑀫𑀸𑀤𑀁 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀫𑀼𑀢𑁆𑀢𑀸𑀳𑀸𑀭𑀁 𑀟𑀲𑀺𑀢𑁆𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀲𑀳𑀸𑀬𑀲𑁆𑀲 𑀤𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑁄 𑀇𑀫𑀁 𑀯𑀮𑀜𑁆𑀚𑁂𑀳𑀺 𑀲𑀫𑁆𑀫𑀸𑀢𑀺 𑀯𑀢𑁆𑀯𑀸 𑀅𑀤𑀸𑀲𑀺, 𑀢𑀢𑁄 𑀲𑁄 𑀦𑀁 𑀕𑀳𑁂𑀢𑁆𑀯𑀸 𑀇𑀫𑀁 𑀓𑀼𑀳𑀺𑀁 𑀧𑀝𑀺𑀲𑀸𑀫𑁂𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁄𑀦𑁆𑀢𑁄 𑀫𑀫𑁂𑀓𑁄 𑀲𑀳𑀸𑀬𑀓𑁄 𑀅𑀦𑁆𑀢𑁄𑀦𑀕𑀭𑁂 𑀯𑀲𑀢𑀺, 𑀢𑀲𑁆𑀫𑀺𑀁 𑀞𑀧𑁂𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀬𑀣𑀸𑀲𑀗𑁆𑀓𑁂𑀢𑀫𑀼𑀧𑀕𑀫𑁆𑀫 𑀢𑀁 𑀤𑀺𑀲𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀲𑀼𑀯𑀧𑁄𑀢𑀓𑁂𑀦 𑀓𑀢𑁄 𑀧𑀓𑀸𑀭𑀁 𑀧𑀓𑀸𑀲𑁂𑀢𑁆𑀯𑀸 𑀇𑀫𑀁 𑀫𑀼𑀢𑁆𑀢𑀸𑀳𑀸𑀭𑀁 𑀲𑀸𑀥𑀼𑀓𑀁 𑀞𑀧𑁂𑀳𑀻𑀢𑀺 𑀯𑀢𑁆𑀯𑀸 𑀅𑀤𑀸𑀲𑀺, 𑀢𑀁𑀔𑀡𑁂 𑀭𑀸𑀚𑀸 𑀦𑀳𑀸𑀢𑁆𑀯𑀸𑀦𑀼𑀮𑀺𑀢𑁆𑀢𑁄 𑀆𑀪𑀭𑀡𑀸𑀦𑀺 𑀧𑀺𑀮𑀦𑁆𑀥𑁂𑀦𑁆𑀢𑁄 𑀫𑀼𑀢𑁆𑀢𑀸𑀳𑀸𑀭𑀁 𑀦𑀸𑀤𑁆𑀤𑀲. 𑀢𑀢𑁄 𑀭𑀸𑀚𑀧𑀼𑀭𑀺𑀲𑀸 𑀅𑀦𑁆𑀢𑁄𑀘 𑀩𑀳𑀺𑀘 𑀧𑀭𑀺𑀚𑀦𑁂 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀫𑀼𑀢𑁆𑀢𑀸𑀳𑀸𑀭𑀁 𑀅𑀧𑀲𑁆𑀲𑀦𑁆𑀢𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀼𑀁, 𑀬𑁄 𑀫𑀼𑀢𑁆𑀢𑀸𑀳𑀸𑀭𑀁 𑀧𑀲𑁆𑀲𑀢𑀺, 𑀢𑀲𑁆𑀲 𑀭𑀸𑀚𑀸 𑀫𑀳𑀦𑁆𑀢𑀁 𑀬𑀲𑀁 𑀤𑀲𑁆𑀲𑀢𑀻𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑁄 𑀫𑀺𑀢𑁆𑀢𑀤𑀽𑀪𑀻 𑀏𑀯𑀁 𑀘𑀺𑀦𑁆𑀢𑁂𑀲𑀺, 𑀅𑀳𑀁𑀘𑀫𑁆𑀳𑀺 𑀤𑀼𑀓𑁆𑀔𑀺𑀢𑁄, 𑀬𑀦𑁆𑀦𑀽𑀦𑀸𑀳𑀁 𑀫𑀼𑀢𑁆𑀢𑀸𑀳𑀸𑀭𑀁 𑀭𑀜𑁆𑀜𑁄 𑀤𑀲𑁆𑀲𑁂𑀢𑁆𑀯𑀸 𑀲𑀼𑀔𑁂𑀦 𑀯𑀲𑁂𑀬𑁆𑀬𑀁, 𑀓𑀺𑀫𑁆𑀫𑁂 𑀏𑀢𑁂𑀦𑀸𑀢𑀺 𑀢𑁂𑀦 𑀓𑀢𑀁 𑀢𑀣𑀸𑀭𑀽𑀧𑀁 𑀉𑀧𑀓𑀸𑀭𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀫𑀳𑀸𑀫𑀺𑀢𑁆𑀢𑀤𑀽𑀪𑀻 𑀧𑀼𑀭𑀺𑀲𑁄 𑀭𑀸𑀚𑀧𑀼𑀭𑀺𑀲𑁂 𑀉𑀧𑀲𑀗𑁆𑀓𑀫𑁆𑀫 𑀫𑀼𑀢𑁆𑀢𑀳𑀸𑀭𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀞𑀧𑀺𑀢𑀪𑀸𑀯𑀁 𑀓𑀣𑁂𑀲𑀺, 𑀪𑁄 𑀫𑀫 𑀲𑀦𑁆𑀢𑀺𑀓𑁂 𑀏𑀓𑁄 𑀧𑀼𑀭𑀺𑀲𑁄 𑀫𑀼𑀢𑁆𑀢𑀳𑀸𑀭𑀁 𑀞𑀧𑁂𑀲𑀻𑀢𑀺. 𑀏𑀯𑀁 𑀅𑀲𑀧𑁆𑀧𑀼𑀭𑀺𑀲𑀲𑀁𑀲𑀕𑁆𑀕𑁄𑀢𑀺, 𑀢𑀣𑀸𑀳𑀺.

𑁧.

𑀬𑀣𑀸 𑀲𑀁𑀯𑀟𑁆𑀠𑀺𑀢𑁄 𑀦𑀺𑀫𑁆𑀩𑁄, 𑀫𑀥𑀼𑀔𑀻𑀭𑁄 𑀤𑀲𑀺𑀜𑁆𑀘𑀦𑀸;

𑀦 𑀬𑀸𑀢𑀺 𑀫𑀥𑀼𑀭𑀁 𑀢𑀁 𑀯𑁄, 𑀧𑀓𑀸𑀭 𑀫𑀲𑀢𑀁 𑀓𑀢𑀁.

𑁨.

𑀲𑀻𑀲𑁂𑀦𑀼 𑀤𑀓 𑀫𑀸𑀤𑀸𑀬, 𑀯𑀟𑁆𑀠𑀺𑀢𑁄𑀧𑀺 𑀦𑀼𑀳𑀻𑀢𑀭𑀼;

𑀦 𑀬𑀸𑀢𑀺 𑀫𑀥𑀼𑀭𑀁 𑀢𑀁𑀯𑁄, 𑀧𑀓𑀸𑀭𑀫𑀲𑀢𑀁 𑀓𑀢𑀁.

𑁩.

𑀦𑀺𑀘𑁆𑀘𑀁 ¶ 𑀔𑀻𑀭𑁄𑀤𑀧𑀸𑀦𑁂𑀦, 𑀯𑀟𑁆𑀠𑀺𑀢𑁄 𑀲𑀺𑀯𑀺𑀲𑁄 𑀬𑀣𑀸;

𑀯𑀺𑀲𑀁𑀯 𑀧𑀭𑀺𑀯𑀢𑁆𑀢𑁂𑀢𑀺, 𑀢𑀣𑀸 𑀦𑀻𑀘𑁄𑀧𑀓𑀸𑀭𑀓𑀁.

𑁪.

𑀬𑀣𑀸𑀢𑁆𑀢𑀦𑀸 𑀓𑀢𑁄 𑀅𑀕𑁆𑀕𑀺, 𑀲𑀻𑀢𑀮𑀁 𑀦 𑀤𑀤𑁂 𑀔𑀮𑀼;

𑀢𑀣𑀸 𑀦𑀻𑀘𑁂 𑀓𑀢𑀁 𑀓𑀸𑀭𑀁, 𑀅𑀕𑁆𑀕𑀻𑀯 𑀤𑀳𑀢𑁂 𑀢𑀦𑀼𑀁.

𑁫.

𑀢𑀲𑁆𑀫𑀸 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸, 𑀳𑀸𑀯𑀪𑀸𑀯𑁂𑀦 𑀩𑀼𑀤𑁆𑀥𑀺𑀬𑀸;

𑀓𑀸𑀢𑀩𑁆𑀩𑀸 𑀫𑁂𑀢𑁆𑀢𑀺 𑀚𑀦𑁆𑀢𑀽𑀳𑀺, 𑀦𑀸𑀫𑀺𑀢𑁆𑀢𑁄 𑀮𑀪𑀢𑁂𑀲𑀼𑀔𑀦𑁆𑀢𑀺.

𑀅𑀣𑀲𑁆𑀲 𑀫𑀺𑀢𑁆𑀢𑀤𑀼𑀪𑀺𑀦𑁄 𑀯𑀘𑀦𑁂𑀦 𑀭𑀸𑀚𑀧𑀼𑀭𑀺𑀲𑀸 𑀫𑀼𑀢𑁆𑀢𑀸𑀳𑀸𑀭𑀁𑀘𑀢𑀁𑀘 𑀕𑀳𑁂𑀢𑁆𑀯𑀸 𑀲𑀪𑀡𑁆𑀟𑀓𑀁 𑀧𑀼𑀭𑀺𑀲𑀁 𑀤𑀲𑁆𑀲𑁂𑀲𑀼𑀁. 𑀅𑀣 𑀭𑀸𑀚𑀸 𑀲𑀪𑀡𑁆𑀟𑀓𑀁 𑀘𑁄𑀭𑀁 𑀤𑀺𑀲𑁆𑀯𑀸 𑀓𑀼𑀤𑁆𑀥𑁄 𑀇𑀫𑀁 𑀦𑁂𑀢𑁆𑀯𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑁂 𑀚𑀻𑀯𑀲𑀽𑀮𑁂 𑀉𑀢𑁆𑀢𑀸𑀲𑁂𑀣𑀸𑀢𑀺 𑀆𑀡𑀸𑀧𑁂𑀲𑀺, 𑀭𑀸𑀚𑀧𑀼𑀭𑀺𑀲𑀸 𑀢𑀲𑁆𑀲 𑀭𑀸𑀚𑀸𑀡𑀁 𑀓𑀭𑁄𑀦𑁆𑀢𑁄 𑀅𑀕𑀫𑀁𑀲𑀼, 𑀢𑁂𑀳𑀺 𑀦𑀻𑀬𑀫𑀸𑀦𑁄 𑀧𑀼𑀭𑀺𑀲𑁄 𑀤𑀓𑁆𑀔𑀺𑀡𑀤𑁆𑀯𑀸𑀭𑀸 𑀦𑀺𑀓𑁆𑀔𑀫𑁆𑀫 𑀲𑀧𑁆𑀧𑀲𑀳𑀸𑀬𑀁 𑀲𑀭𑀺𑀢𑁆𑀯𑀸 𑀅𑀧𑁆𑀧𑁂𑀯𑀦𑀸𑀫𑁂 𑀢𑀲𑁆𑀲 𑀲𑀦𑁆𑀢𑀺𑀓𑀸 𑀓𑀺𑀜𑁆𑀘𑀺 𑀲𑁄𑀢𑁆𑀣𑀺 𑀪𑀯𑁂𑀬𑁆𑀬𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑀗𑁆𑀓𑁂𑀢𑀸 𑀦𑀼𑀲𑀸𑀭𑁂𑀦 𑀯𑀫𑁆𑀫𑀺𑀓𑀁 𑀤𑀺𑀲𑁆𑀯𑀸 𑀲𑀫𑁆𑀫 𑀤𑀻𑀖𑀸𑀢𑀺 𑀲𑀤𑁆𑀤𑀫𑀓𑀸𑀲𑀺, 𑀲𑁄 𑀯𑀫𑁆𑀫𑀺𑀓𑀸 𑀦𑀺𑀓𑁆𑀔𑀫𑁆𑀫𑀢𑀁 𑀢𑀣𑀸 𑀦𑀺𑀬𑀫𑀸𑀦𑀁 𑀤𑀺𑀲𑁆𑀯𑀸 𑀲𑀁𑀯𑀺𑀕𑁆𑀕𑁄 𑀤𑀼𑀓𑁆𑀔𑀧𑁆𑀧𑀢𑁆𑀢𑁄 𑀲𑀳𑀸𑀬𑀲𑁆𑀲𑀫𑁂 𑀅𑀚𑁆𑀚 𑀅𑀯𑀲𑁆𑀲𑀬𑁂𑀦 𑀉𑀧𑀢𑁆𑀣𑀫𑁆𑀪𑀁 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀢𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀅𑀜𑁆𑀜𑀢𑀭𑀯𑁂𑀲𑁂𑀦 𑀭𑀸𑀚𑀧𑀼𑀭𑀺𑀲𑁂 𑀉𑀧𑀲𑀗𑁆𑀓𑀫𑁆𑀫 𑀇𑀫𑀁 𑀧𑀼𑀭𑀺𑀲𑀁 𑀫𑀼𑀳𑀼𑀢𑁆𑀢𑀁𑀫𑀸 𑀫𑀸𑀭𑁂𑀣𑀸𑀢𑀺 𑀤𑀴𑁆𑀳𑀁 𑀯𑀢𑁆𑀯𑀸 𑀫𑀼𑀳𑀼𑀢𑁆𑀢𑁂𑀦 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀧𑁆𑀧𑀯𑀡𑁆𑀡𑁂𑀦 𑀤𑁂𑀯𑀺𑀁 𑀟𑀲𑀺𑀢𑁆𑀯𑀸 𑀢𑀸𑀬 𑀯𑀺𑀲𑁂𑀦 𑀫𑀼𑀘𑁆𑀙𑀺𑀢𑀓𑀸𑀮𑁂 𑀫𑀦𑀼𑀲𑁆𑀲𑀯𑀡𑁆𑀡𑁂𑀦 𑀯𑀚𑁆𑀛𑀧𑁆𑀧𑀢𑁆𑀢𑁄 𑀯𑀺𑀲𑁄𑀲𑀥𑀁 𑀚𑀸𑀦𑀸𑀢𑀺𑀢𑀻 𑀯𑀢𑁆𑀯𑀸 𑀢𑀁𑀔𑀡𑁂𑀯 𑀲𑀳𑀸𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀭𑀜𑁆𑀜𑀸 𑀢𑀯 𑀧𑀓𑁆𑀓𑁄 𑀲𑀺𑀢𑀓𑀸𑀮𑁂 𑀕𑀦𑁆𑀢𑁆𑀯𑀸 𑀉𑀤𑀓𑀧𑁆𑀧𑀲𑀢𑁂𑀦 𑀤𑁂𑀯𑀺𑀬𑀸 𑀲𑀭𑀻𑀭𑁂 𑀧𑀳𑀭𑀺𑀢𑁆𑀯𑀸 𑀦𑀺𑀩𑁆𑀩𑀺𑀲𑀁 𑀓𑀭𑀸𑀳𑀻𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺, 𑀅𑀣 𑀭𑀸𑀚𑀸 𑀯𑀺𑀲𑀯𑁂𑀚𑁆𑀚 𑀧𑀭𑀺𑀬𑁂𑀲𑀦𑁆𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀯𑀚𑁆𑀛𑀧𑁆𑀧𑀢𑁆𑀢𑀁 𑀆𑀦𑁂𑀣𑀸𑀢𑀺 𑀆𑀡𑀸𑀧𑁂𑀢𑁆𑀯𑀸 𑀤𑁂𑀯𑀺𑀬𑀸 𑀦𑀺𑀩𑁆𑀩𑀺𑀲𑀁 𑀓𑀭𑁄𑀣𑀸𑀢𑀺 𑀆𑀳, 𑀲𑁄 𑀦𑀸𑀕𑀭𑀸𑀚𑁂𑀦 𑀯𑀼𑀢𑁆𑀢𑀦𑀬𑁂𑀦 𑀦𑀺𑀩𑁆𑀩𑀺𑀲𑀫𑀓𑀸𑀲𑀺, 𑀲𑀸 𑀲𑀼𑀔𑀺𑀢𑀸 𑀅𑀭𑁄𑀕𑀸 𑀅𑀳𑁄𑀲𑀺, 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑁄 𑀢𑀲𑁆𑀲 𑀔𑁂𑀢𑁆𑀢𑀯𑀢𑁆𑀣𑀼𑀬𑀸𑀦𑀯𑀸𑀳𑀦𑀸𑀤𑀺𑀤𑀸𑀦𑁂𑀦 ¶ 𑀫𑀳𑀸𑀲𑀓𑁆𑀓𑀸𑀭𑀫𑀓𑀸𑀲𑀺, 𑀅𑀣 𑀲𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑁆𑀫 𑀅𑀢𑁆𑀢𑀦𑀸 𑀓𑀢𑀁 𑀲𑀩𑁆𑀩𑀁 𑀧𑀓𑀸𑀲𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁.

𑁬.

𑀏𑀓𑀤𑀸𑀳𑀁 𑀫𑀳𑀸𑀭𑀸𑀚, 𑀯𑀦𑀁 𑀓𑀫𑁆𑀫𑁂𑀦 𑀓𑁂𑀦𑀘𑀺;

𑀕𑀢𑁄𑀤𑁆𑀤𑀲𑀁 𑀫𑀳𑀸𑀯𑀸𑀝𑁂, 𑀧𑀢𑀺𑀢𑀁 𑀲𑀼𑀯𑀧𑁄𑀢𑀓𑀁.

𑁭.

𑀅𑀣𑁄 𑀭𑀕𑀁 𑀫𑀦𑀼𑀲𑁆𑀲𑀁𑀘;

𑀤𑀼𑀓𑁆𑀔𑀧𑁆𑀧𑀢𑁆𑀢𑁂 𑀔𑀼𑀤𑀸𑀧𑀭𑁂;

𑀉𑀓𑁆𑀔𑀺𑀧𑀺𑀁 𑀓𑀭𑀼𑀡𑀸𑀬𑀸𑀳𑀁;

𑀢𑁂 𑀫𑁂 𑀯𑁄𑀘𑀼𑀁 𑀢𑀤𑀸 𑀢𑀬𑁄.

𑁮.

𑀅𑀤𑀸𑀲𑀺 𑀚𑀻𑀯𑀫𑀫𑁆𑀳𑀸𑀓𑀁, 𑀉𑀧𑀓𑀸𑀭𑁄𑀲𑀺 𑀦𑁄 𑀢𑀼𑀯𑀁;

𑀢𑀯 𑀓𑀺𑀘𑁆𑀘𑁂 𑀲𑀫𑀼𑀧𑁆𑀧𑀦𑁆𑀦𑁂, 𑀅𑀫𑁆𑀳𑀸𑀓𑀁 𑀏𑀳𑀺 𑀲𑀦𑁆𑀢𑀺𑀓𑀁.

𑁯.

𑀏𑀯𑀁 𑀢𑁂𑀳𑀺 𑀧𑀯𑀼𑀢𑁆𑀢𑁄𑀳𑀁, 𑀅𑀕𑀜𑁆𑀙𑀺𑀁 𑀲𑀼𑀯𑀲𑀦𑁆𑀢𑀺𑀓𑀁;

𑀢𑁂𑀦 𑀓𑀢𑀽𑀧𑀓𑀸𑀭𑁄𑀳𑀁, 𑀫𑀦𑀼𑀲𑁆𑀲𑀲𑁆𑀲𑀸𑀧𑀺 𑀲𑀦𑁆𑀢𑀺𑀓𑀁.

𑁧𑁦.

𑀢𑁂𑀦𑀸𑀳𑀁 𑀫𑀭𑀡𑀧𑁆𑀧𑀢𑁆𑀢𑁄, 𑀅𑀤𑁆𑀤𑀲𑀁 𑀉𑀭𑀕𑀸𑀥𑀺𑀧𑀁;

𑀲𑁄𑀤𑀸𑀲𑀺 𑀚𑀻𑀯𑀺𑀢𑀁 𑀫𑀬𑁆𑀳𑀁, 𑀅𑀮𑀢𑁆𑀣𑀁 [𑀅𑀮𑀤𑁆𑀥 𑀇𑀢𑀺𑀲𑀩𑁆𑀩𑀢𑁆𑀣] 𑀯𑀺𑀧𑀼𑀮𑀁 𑀥𑀦𑀁.

𑁧𑁧.

𑀲𑀼𑀚𑀦𑁄 𑀦𑀸𑀯𑀫𑀦𑁆𑀢𑀩𑁆𑀩𑁄, 𑀔𑀼𑀤𑁆𑀤𑀓𑁄𑀢𑀺 𑀦𑀭𑀸𑀥𑀺𑀧;

𑀲𑀼𑀯𑁄𑀘 𑀉𑀭𑀕𑁄𑀘𑁂𑀢𑁂, 𑀫𑀺𑀢𑁆𑀢𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑀸.

𑁧𑁨.

𑀓𑀸𑀭𑀡𑀜𑁆𑀜𑀽 𑀫𑀦𑀼𑀲𑁆𑀲𑁂𑀲𑁄,

𑀅𑀫𑁆𑀳𑁂𑀳𑀺 𑀲𑀫𑀚𑀸𑀢𑀺𑀓𑁄;

𑀓𑀢𑀽𑀧𑀓𑀸𑀭𑁄 𑀏𑀯𑀫𑁆𑀧𑀺,

𑀤𑀺𑀲𑁄 𑀚𑀸𑀢𑁄 𑀦𑀭𑀸𑀥𑀫𑁄.

𑁧𑁩.

𑀅𑀓𑀲𑁆𑀫𑀸 𑀤𑁂𑀯 𑀓𑀼𑀧𑁆𑀧𑀦𑁆𑀢𑀺, 𑀧𑀲𑀻𑀤𑀦𑁆𑀢𑀺𑀦𑀺𑀫𑀺𑀢𑁆𑀢𑀢𑁄;

𑀲𑀻𑀮𑀁 𑀳𑁂𑀢𑀫𑀲𑀸𑀥𑀽𑀦𑀁, 𑀩𑀸𑀮𑀸𑀦𑀫𑀯𑀺𑀚𑀸𑀦𑀢𑀁.

𑁧𑁪.

𑀫𑀦𑀼𑀲𑁆𑀲𑀸𑀧𑀺 𑀫𑀳𑀸𑀭𑀸𑀚, 𑀓𑁂𑀘𑀺 𑀯𑀺𑀲𑁆𑀲𑀸𑀲𑀺𑀬𑀸 𑀦 𑀯𑁂;

𑀢𑀺𑀭𑀘𑁆𑀙𑀸𑀦𑀸𑀧𑀺 𑀳𑁄𑀦𑁆𑀢𑁂𑀯, 𑀅𑀚𑀺𑀫𑁆𑀳𑀫𑀦𑀲𑀸𑀲𑀞𑀸𑀢𑀺.

𑀏𑀯𑀁 ¶ 𑀲𑁄 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀁 𑀓𑀣𑁂𑀲𑀺, 𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑁄 𑀇𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀫𑀳𑀦𑁆𑀢𑀁 𑀕𑁂𑀳𑀁 𑀓𑀢𑁆𑀯𑀸 𑀫𑀳𑀸𑀧𑀭𑀺𑀳𑀸𑀭𑀁 𑀓𑀭𑁄𑀣𑀸𑀢𑀺 𑀆𑀡𑀸𑀧𑁂𑀲𑀺, 𑀲𑁄 𑀧𑀦 𑀫𑀫 𑀕𑁂𑀳𑀁 𑀦𑀺𑀕𑁆𑀭𑁄𑀥𑀲𑁆𑀲 𑀘 𑀯𑀫𑁆𑀫𑀺𑀓𑀲𑁆𑀲 𑀘 𑀅𑀦𑁆𑀢𑀭𑁂 𑀓𑀭𑁄𑀣𑀸𑀢𑀺 𑀯𑀢𑁆𑀯𑀸 𑀢𑀣𑀸 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣 𑀯𑀲𑀦𑁆𑀢𑁄 𑀭𑀸𑀚𑀽𑀧𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑁄 𑀢𑁂𑀳𑀺 𑀲𑀳𑀸𑀬𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀫𑀸𑀦𑁄 𑀬𑀸𑀯𑀚𑀻𑀯𑀁 𑀯𑀲𑀺𑀢𑁆𑀯𑀸 𑀆𑀬𑀼 𑀧𑀭𑀺𑀬𑁄𑀲𑀸𑀦𑁂 𑀢𑁂𑀳𑀺 𑀲𑀤𑁆𑀥𑀺𑀁 𑀬𑀣𑀸𑀓𑀫𑁆𑀫𑀁 𑀕𑀢𑁄𑀢𑀺.

𑁧𑁫.

𑀇𑀢𑀺 𑀧𑀢𑀺𑀢𑀲𑀼𑀔𑀫𑁆𑀳𑀸 𑀅𑀗𑁆𑀕𑀢𑁄 𑀯𑀸 𑀥𑀦𑀫𑁆𑀳𑀸,

𑀧𑀭𑀫𑀢𑀭𑀧𑀢𑀺𑀝𑁆𑀞𑀸 𑀳𑁄𑀦𑁆𑀢𑀺 𑀫𑀺𑀢𑁆𑀢𑀸 𑀲𑀔𑀸𑀦𑀁;

𑀯𑀺𑀭𑀳𑀺𑀢𑀲𑀔𑀺𑀦𑀁 𑀪𑁄 𑀦𑀢𑁆𑀣𑀺 𑀬𑀲𑁆𑀫𑀸𑀪𑀺𑀯𑀼𑀤𑁆𑀥𑀺,

𑀘𑀺𑀡𑀼𑀣 𑀓𑀼𑀲𑀮𑀥𑀫𑁆𑀫𑀁 𑀫𑀺𑀢𑁆𑀢𑀯𑀦𑁆𑀢𑀸 𑀫𑀳𑀦𑁆𑀢𑀁.

𑀢𑀺𑀡𑁆𑀡𑀁 𑀚𑀦𑀸𑀦𑀁 𑀯𑀢𑁆𑀣𑀼𑀁 𑀢𑀢𑀺𑀬𑀁.

𑁪. 𑀩𑀼𑀤𑁆𑀥𑁂𑀦𑀺𑀬𑀸 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀚𑀫𑁆𑀩𑀼𑀤𑀻𑀧𑁂 𑀓𑀺𑀭 𑀧𑀼𑀩𑁆𑀩𑁂 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑁂 𑀲𑀢𑁆𑀢𑀸𑀲𑀻𑀢𑀻𑀓𑁄𑀝𑀺𑀦𑀺𑀳𑀺𑀢𑀥𑀦𑀁 𑀏𑀓𑀁 𑀲𑁂𑀝𑁆𑀞𑀺𑀓𑀼𑀮𑀁 𑀅𑀳𑁄𑀲𑀺, 𑀢𑀲𑁆𑀲 𑀧𑀦 𑀲𑁂𑀝𑁆𑀞𑀺𑀦𑁄 𑀏𑀓𑀸𑀬𑁂𑀯 𑀥𑀻𑀢𑀸 𑀅𑀳𑁄𑀲𑀺 𑀦𑀸𑀫𑁂𑀦 𑀩𑀼𑀤𑁆𑀥𑁂𑀦𑀺𑀦𑀸𑀫, 𑀢𑀲𑁆𑀲𑀸 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀫𑀸𑀢𑀸𑀧𑀺𑀢𑀭𑁄 𑀓𑀸𑀮𑀫𑀓𑀁𑀲𑀼, 𑀢𑀲𑁆𑀫𑀺𑀁 𑀓𑀼𑀮𑁂 𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀁 𑀢𑀲𑁆𑀲𑀸𑀬𑁂𑀯 𑀅𑀳𑁄𑀲𑀺, 𑀲𑀸 𑀓𑀺𑀭 𑀅𑀪𑀺𑀭𑀽𑀧𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸 𑀤𑁂𑀯𑀘𑁆𑀙𑀭𑀧𑀝𑀺𑀪𑀸𑀕𑀸 𑀧𑀺𑀬𑀸𑀘 𑀅𑀳𑁄𑀲𑀺 𑀫𑀦𑀸𑀧𑀸, 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀭𑀢𑀦𑀢𑁆𑀢𑀬𑀫𑀸𑀫𑀺𑀓𑀸 𑀧𑀝𑀺𑀯𑀲𑀢𑀺, 𑀢𑀲𑁆𑀫𑀺𑀁 𑀧𑀦 𑀦𑀕𑀭𑁂 𑀲𑁂𑀝𑁆𑀞𑀺𑀲𑁂𑀦𑀸𑀧𑀢𑀺𑀉𑀧𑀭𑀸𑀚𑀸𑀤𑀬𑁄 𑀢𑀁 𑀅𑀢𑁆𑀢𑀦𑁄 𑀧𑀸𑀤𑀧𑀭𑀺𑀘𑀸𑀭𑀺𑀓𑀁 𑀓𑀸𑀫𑀬𑀫𑀸𑀦𑀸 𑀫𑀦𑀼𑀲𑁆𑀲𑁂 𑀧𑁂𑀲𑁂𑀲𑀼𑀁 𑀧𑀡𑁆𑀡𑀸𑀓𑀸𑀭𑁂𑀳𑀺 𑀲𑀤𑁆𑀥𑀺𑀁, 𑀲𑀸 𑀢𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺, 𑀫𑀬𑁆𑀳𑀁 𑀫𑀸𑀢𑀸𑀧𑀺𑀢𑀭𑁄 𑀲𑀩𑁆𑀩𑀁 𑀯𑀺𑀪𑀯𑀁 𑀧𑀳𑀸𑀬 𑀫𑀢𑀸, 𑀫𑀬𑀸 𑀧𑀦 𑀢𑀣𑀸 𑀅𑀕𑀦𑁆𑀢𑀩𑁆𑀩𑀁, 𑀓𑀺𑀁 𑀫𑁂 𑀧𑀢𑀺𑀓𑀼𑀮𑁂𑀦, 𑀓𑁂𑀯𑀮𑀁 ¶ 𑀯𑀺𑀢𑁆𑀢𑀯𑀺𑀦𑀸𑀲𑀸𑀬 𑀪𑀯𑀢𑀺, 𑀫𑀬𑀸 𑀧𑀦𑀺 𑀫𑀁 𑀥𑀦𑀁 𑀩𑀼𑀤𑁆𑀥𑀲𑀸𑀲𑀦𑁂𑀬𑁂𑀯 𑀦𑀺𑀤𑀳𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀘𑀺𑀦𑁆𑀢𑁂𑀲𑀺, 𑀘𑀺𑀦𑁆𑀢𑁂𑀢𑁆𑀯𑀸 𑀘 𑀧𑀦 𑀢𑁂𑀲𑀁 𑀦 𑀫𑀬𑁆𑀳𑀁 𑀧𑀢𑀺𑀓𑀼𑀮𑁂𑀦𑀢𑁆𑀣𑁄𑀢𑀺 𑀧𑀝𑀺𑀓𑁆𑀔𑀺𑀧𑀺, 𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀦𑁆𑀢𑀻 𑀲𑀫𑀡𑀩𑁆𑀭𑀳𑁆𑀫𑀡𑁂 𑀲𑀦𑁆𑀢𑀧𑁆𑀧𑁂𑀲𑀺, 𑀢𑁂𑀦𑁂𑀢𑁆𑀣.

𑁧.

𑀘𑀢𑀼𑀤𑁆𑀤𑀺𑀲𑀸𑀬𑀸𑀢𑀚𑀺𑀦𑀢𑁆𑀭𑀚𑀸𑀦𑀁,

𑀆𑀧𑀸𑀦𑀪𑀽𑀢𑀁 𑀖𑀭𑀫𑀸𑀲𑀺 𑀢𑀲𑁆𑀲𑀸;

𑀬𑀤𑀺𑀘𑁆𑀙𑀺𑀢 𑀧𑁆𑀧𑀘𑁆𑀘𑀬𑀮𑀸𑀪 𑀳𑁂𑀢𑀼,

𑀤𑁂𑀯𑀤𑁆𑀤𑀼𑀫𑁄𑀯𑀸𑀲𑀺 𑀫𑀳𑀸𑀦𑀼𑀪𑀸𑀯𑁄.

𑁨.

𑀧𑀼𑀧𑁆𑀨𑀽𑀧𑀳𑀸𑀭𑀸𑀤𑀺 𑀯𑀺𑀢𑀸𑀦𑀮𑀗𑁆𑀓𑀢𑀸,

𑀧𑀤𑀻𑀧 𑀧𑀜𑁆𑀜𑀢𑁆𑀢 𑀲𑀼𑀪𑀸𑀲𑀦𑀸𑀯𑀮𑀻;

𑀲𑀼𑀔𑀸𑀲𑀦𑀸𑀲𑀻𑀦 𑀯𑀲𑀻𑀳𑀺𑀮𑀗𑁆𑀓𑀢𑀸,

𑀢𑀲𑁆𑀲𑀸𑀲𑀺 𑀢𑀲𑁆𑀫𑀺𑀁 𑀯𑀭𑀤𑀸𑀦𑀲𑀸𑀮𑀸.

𑁩.

𑀲𑀼𑀥𑁄𑀢𑀳𑀢𑁆𑀣𑀸 𑀲𑀼𑀘𑀺𑀧𑀼𑀜𑁆𑀜𑀘𑀺𑀢𑁆𑀢𑀸,

𑀲𑀤𑀸𑀤𑀭𑀸 𑀭𑀓𑁆𑀔𑀺𑀢𑀧𑀜𑁆𑀘𑀲𑀻𑀮𑀸;

𑀩𑀼𑀤𑁆𑀥𑁂𑀦𑀺𑀦𑀸𑀫𑀸 𑀓𑀭𑀼𑀡𑀸 𑀕𑀼𑀡𑀕𑁆𑀕𑀸,

𑀅𑀤𑀸 𑀫𑀳𑀸𑀤𑀸𑀦𑀯𑀭𑀁 𑀧𑀲𑀢𑁆𑀣𑀦𑁆𑀢𑀺.

𑀅𑀣𑀸𑀧𑀭𑀪𑀸𑀕𑁂 𑀏𑀓𑁄 𑀅𑀲𑁆𑀲𑀯𑀸𑀡𑀺𑀚𑀓𑁄 𑀅𑀲𑁆𑀲-𑀯𑀸𑀡𑀺𑀚𑁆𑀚𑀸𑀬 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀁 𑀕𑀘𑁆𑀙𑀦𑁆𑀢𑁄 𑀆𑀕𑀫𑁆𑀫 𑀇𑀫𑀺𑀲𑁆𑀲𑀸 𑀕𑁂𑀳𑁂 𑀦𑀺𑀯𑀸𑀲𑀁 𑀕𑀡𑁆𑀳𑀺, 𑀅𑀣 𑀲𑁄 𑀯𑀸𑀡𑀺𑀚𑁄 𑀢𑀁 𑀤𑀺𑀲𑁆𑀯𑀸 𑀥𑀻𑀢𑀼𑀲𑀺𑀦𑁂𑀳𑀁 𑀧𑀢𑀺 𑀝𑁆𑀞𑀸 𑀧𑁂 𑀢𑁆𑀯𑀸 𑀕𑀦𑁆𑀥𑀫𑀸𑀮𑀯𑀢𑁆𑀣𑀸𑀮𑀗𑁆𑀓𑀸𑀭𑀸𑀤𑀻𑀳𑀺 𑀢𑀲𑁆𑀲𑀸 𑀉𑀧𑀓𑀸𑀭𑀓𑁄 𑀳𑀼𑀢𑁆𑀯𑀸 𑀕𑀫𑀦𑀓𑀸𑀮𑁂 𑀅𑀫𑁆𑀫 𑀏𑀢𑁂𑀲𑀼 𑀅𑀲𑁆𑀲𑁂𑀲𑀼 𑀢𑀯 𑀭𑀼𑀘𑁆𑀘𑀦𑀓𑀁 𑀅𑀲𑁆𑀲𑀁 𑀕𑀡𑁆𑀳𑀸𑀳𑀻𑀢𑀺 𑀆𑀳, 𑀲𑀸𑀧𑀺 𑀅𑀲𑁆𑀲𑁂 𑀑𑀮𑁄𑀓𑁂𑀢𑁆𑀯𑀸 𑀏𑀓𑀁 𑀲𑀺𑀦𑁆𑀥𑀯𑀧𑁄𑀢𑀓𑀁 𑀤𑀺𑀲𑁆𑀯𑀸 𑀏𑀢𑀁 𑀫𑁂 𑀤𑁂𑀳𑀻𑀢𑀺 𑀆𑀳, 𑀯𑀸𑀡𑀺𑀚𑁄 𑀅𑀫𑁆𑀫 𑀏𑀲𑁄 𑀲𑀺𑀦𑁆𑀥𑀯𑀧𑁄𑀢𑀓𑁄, 𑀅𑀧𑁆𑀧𑀫𑀢𑁆𑀢𑀸 𑀳𑀼𑀢𑁆𑀯𑀸 𑀧𑀝𑀺𑀚𑀕𑁆𑀕𑀸𑀳𑀻𑀢𑀺 𑀯𑀢𑁆𑀯𑀸 𑀢𑀁 𑀧𑀝𑀺𑀧𑀸𑀤𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀲𑀸𑀧𑀺 𑀢𑀁 𑀧𑀝𑀺𑀚𑀕𑁆𑀕𑀫𑀸𑀦𑀸 𑀆𑀓𑀸𑀲𑀕𑀸𑀫𑀺𑀪𑀸𑀯𑀁 𑀜𑀢𑁆𑀯𑀸 𑀲𑀫𑁆𑀫𑀸 𑀧𑀝𑀺𑀚𑀕𑁆𑀕𑀦𑁆𑀢𑀻 𑀏𑀯𑀁 𑀘𑀺𑀦𑁆𑀢𑁂𑀲𑀺, 𑀧𑀼𑀜𑁆𑀜𑀓𑀭𑀡𑀲𑁆𑀲 ¶ 𑀫𑁂 𑀲𑀳𑀸𑀬𑁄 𑀮𑀤𑁆𑀥𑁄𑀢𑀺, 𑀅𑀕𑀢𑀧𑀼𑀩𑁆𑀩𑀸𑀘 𑀫𑁂 𑀪𑀕𑀯𑀢𑁄 𑀲𑀫𑀸𑀭𑀁 𑀫𑀸𑀭𑀩𑀮𑀁 𑀯𑀺𑀥𑀫𑁂𑀢𑁆𑀯𑀸 𑀩𑀼𑀤𑁆𑀥𑀪𑀽𑀢𑀲𑁆𑀲 𑀚𑀬𑀫𑀳𑀸𑀩𑁄𑀥𑀺𑀪𑀽𑀫𑀺, 𑀬𑀦𑁆𑀦𑀽𑀦𑀸𑀳𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀚𑀬𑀫𑀳𑀸𑀩𑁄𑀥𑀺𑀁 𑀯𑀦𑁆𑀤𑁂𑀬𑁆𑀬𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀩 𑀳𑀽 𑀭𑀚𑀢𑀲𑀼𑀯𑀡𑁆𑀡𑀫𑀸𑀮𑀸𑀤𑀬𑁄 𑀓𑀸𑀭𑀸𑀧𑁂𑀢𑁆𑀯𑀸 𑀏𑀓𑀤𑀺𑀯𑀲𑀁 𑀅𑀲𑁆𑀲 𑀫𑀪𑀺𑀭𑀼𑀬𑁆𑀳 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀩𑁄𑀥𑀺𑀫𑀸𑀮𑀓𑁂 𑀞𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀼𑀅𑀬𑁆𑀬𑀸 𑀲𑀼𑀯𑀡𑁆𑀡𑀫𑀸𑀮𑀸 𑀧𑀽𑀚𑁂𑀢𑀼𑀁𑀢𑀺 𑀉𑀕𑁆𑀖𑁄𑀲𑁂𑀲𑀺. 𑀢𑁂𑀦𑁂𑀢𑁆𑀣.

𑁪.

𑀬𑀢𑁄 𑀧𑀝𑁆𑀞𑀸𑀬𑀳𑀁 𑀩𑀼𑀤𑁆𑀥, 𑀲𑀸𑀲𑀦𑁂 𑀲𑀼𑀤𑁆𑀥𑀫𑀸𑀦𑀲𑀸;

𑀧𑀲𑀦𑁆𑀦𑀸 𑀢𑁂𑀦 𑀲𑀘𑁆𑀘𑁂𑀦, 𑀫𑀫𑀸𑀦𑀼𑀕𑁆𑀕𑀳𑀩𑀼𑀤𑁆𑀥𑀺𑀬𑀸.

𑁫.

𑀆𑀕𑀘𑁆𑀙𑀦𑁆𑀢𑀼 𑀦𑀫𑀲𑁆𑀲𑀦𑁆𑀢𑀼, 𑀩𑁄𑀥𑀺𑀁 𑀧𑀽𑀚𑁂𑀦𑁆𑀢𑀼 𑀲𑀸𑀥𑀼𑀓𑀁;

𑀲𑁄𑀡𑁆𑀡𑀫𑀸𑀮𑀸𑀳𑀺 𑀲𑀫𑁆𑀩𑀼𑀤𑁆𑀥, 𑀧𑀼𑀢𑁆𑀢𑀸 𑀅𑀭𑀺𑀬𑀲𑀸𑀯𑀓𑀸.

𑁬.

𑀲𑀼𑀢𑁆𑀯𑀸 𑀢𑀁 𑀯𑀘𑀦𑀁 𑀅𑀬𑁆𑀬𑀸, 𑀩𑀳𑀽 𑀲𑀻𑀳𑀴𑀯𑀸𑀲𑀺𑀦𑁄;

𑀆𑀕𑀫𑁆𑀫 𑀦𑀪𑀲𑀸 𑀢𑀢𑁆𑀣, 𑀯𑀦𑁆𑀤𑀺𑀁 𑀲𑀼𑀘 𑀫𑀳𑀺𑀁𑀲𑀼𑀘𑀸𑀢𑀺.

𑀢𑀢𑁄 𑀧𑁆𑀧𑀢𑀼𑀢𑀺 𑀲𑀸 𑀓𑀼𑀫𑀸𑀭𑀺𑀓𑀸 𑀩𑀼𑀤𑁆𑀥𑀲𑀸𑀲𑀦𑁂 𑀅𑀢𑀻𑀯 𑀧𑀲𑀦𑁆𑀦𑀸 𑀦𑀺𑀘𑁆𑀘𑀫𑁂𑀯 𑀅𑀲𑁆𑀲 𑀫𑀪𑀺𑀭𑀼𑀬𑁆𑀳 𑀆𑀕𑀦𑁆𑀢𑁆𑀯𑀸 𑀅𑀭𑀺𑀬𑁂𑀳𑀺 𑀲𑀤𑁆𑀥𑀺𑀁 𑀫𑀳𑀸𑀩𑁄𑀥𑀺𑀁 𑀲𑀼𑀯𑀡𑁆𑀡𑀫𑀸𑀮𑀸𑀳𑀺 𑀧𑀽𑀚𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀅𑀣 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑁄𑀧𑀯𑀦𑁂 𑀯𑀦𑀘𑀭𑀸 𑀢𑀲𑁆𑀲𑀸 𑀅𑀪𑀺𑀡𑁆𑀳𑀁 𑀕𑀘𑁆𑀙𑀦𑁆𑀢𑀺𑀬𑀸 𑀘 𑀆𑀕𑀘𑁆𑀙𑀦𑁆𑀢𑀺𑀬𑀸 𑀘 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀓𑀣𑁂𑀲𑀼𑀁. 𑀫𑀳𑀸𑀭𑀸𑀚 𑀏𑀯𑀭𑀽𑀧𑀸 𑀓𑀼𑀫𑀸𑀭𑀺𑀓𑀸 𑀅𑀲𑁆𑀲 𑀫𑀪𑀺𑀭𑀼𑀬𑁆𑀳 𑀆𑀕𑀦𑁆𑀢𑁆𑀯𑀸 𑀦𑀺𑀩𑀤𑁆𑀥𑀁 𑀯𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀤𑁂𑀯𑀲𑁆𑀲𑀸𑀦𑀼𑀭𑀽𑀧𑀸 𑀅𑀕𑁆𑀕𑀫𑀳𑁂𑀲𑀻 𑀪𑀯𑀺𑀢𑀼𑀦𑁆𑀢𑀺, 𑀭𑀸 𑀚𑀸 𑀢𑀁 𑀲𑀼𑀢𑁆𑀯𑀸 𑀢𑁂𑀦𑀳𑀺 𑀪𑀡𑁂 𑀕𑀡𑁆𑀳𑀣 𑀦𑀁 𑀓𑀼𑀫𑀸𑀭𑀺𑀁, 𑀫𑀫 𑀅𑀕𑁆𑀕𑀫𑀳𑁂𑀲𑀺𑀁 𑀓𑀭𑁄𑀫𑀻𑀢𑀺 𑀧𑀼𑀭𑀺𑀲𑁂 𑀧𑀬𑁄𑀚𑁂𑀲𑀺, 𑀢𑁂𑀦 𑀧𑀬𑀼𑀢𑁆𑀢𑀧𑀼𑀭𑀺𑀲𑀸 𑀩𑁄𑀥𑀺𑀧𑀽𑀚𑀁 𑀓𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀺𑀁 𑀕𑀡𑁆𑀳𑀸𑀫𑀸𑀢𑀺 𑀢𑀢𑁆𑀣 𑀦𑀺𑀮𑀻𑀦𑀸 𑀕𑀳𑀡𑀲𑀚𑁆𑀚𑀸 𑀅𑀝𑁆𑀞𑀁𑀲𑀼, 𑀢𑀤𑀸 𑀲𑀸 𑀓𑀼𑀫𑀸𑀭𑀺𑀓𑀸 𑀅𑀲𑁆𑀲 𑀫𑀪𑀺𑀭𑀼𑀬𑁆𑀳 𑀫𑀳𑀸𑀩𑁄𑀥𑀺𑀫𑀡𑁆𑀟𑀁 𑀕𑀦𑁆𑀢𑁆𑀯𑀸 𑀯𑀻𑀢𑀭𑁄𑀕𑁂𑀳𑀺 𑀲𑀤𑁆𑀥𑀺𑀁 𑀧𑀼𑀧𑁆𑀨𑀧𑀽𑀚𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀯𑀢𑁆𑀢𑀺, 𑀅𑀣 𑀢𑁂𑀲𑀼 𑀏𑀓𑁄 𑀥𑀫𑁆𑀫𑀭𑀓𑁆𑀔𑀺𑀢 𑀢𑁆𑀣𑁂𑀭𑁄𑀦𑀸𑀫 𑀢𑀲𑁆𑀲𑀸 𑀏𑀯 𑀫𑀸𑀳, 𑀪𑀕𑀺𑀦𑀺 𑀢𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘𑁄𑀭𑀸 𑀕𑀡𑁆𑀳𑀺𑀢𑀼𑀓𑀸𑀫𑀸 𑀞𑀺𑀢𑀸, 𑀅𑀲𑀼𑀓𑀝𑁆𑀞𑀸𑀦𑀁 𑀧𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑀸 ¶ 𑀲𑀻𑀖𑀁 𑀕𑀘𑁆𑀙𑀸𑀢𑀺, 𑀲𑀸𑀧𑀺 𑀕𑀘𑁆𑀙𑀦𑁆𑀢𑀻 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀘𑁄𑀭𑁂𑀳𑀺 𑀅𑀦𑀼𑀩𑀦𑁆𑀥𑀺𑀢𑀸 𑀅𑀲𑁆𑀲𑀲𑁆𑀲 𑀧𑀡𑁆𑀳𑀺𑀬𑀸 𑀲𑀜𑁆𑀜𑀁 𑀤𑀢𑁆𑀯𑀸 𑀧𑀓𑁆𑀓𑀸𑀫𑀺, 𑀘𑁄𑀭𑀸 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀅𑀲𑁆𑀲𑁄 𑀯𑁂𑀕𑀁 𑀚 𑀦𑁂 𑀢𑁆𑀯𑀸 𑀆𑀓𑀸𑀲 𑀫𑀼𑀮𑁆𑀮𑀗𑁆𑀖𑀺, 𑀓𑀼𑀫𑀸𑀭𑀺𑀓𑀸 𑀯𑁂𑀕𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀅𑀲𑁆𑀲𑀲𑁆𑀲 𑀧𑀺𑀝𑁆𑀞𑀺𑀢𑁄 𑀧𑀭𑀺𑀕𑀮𑀺𑀢𑁆𑀯𑀸 𑀧𑀢𑀦𑁆𑀢𑀻 𑀫𑀬𑀸 𑀓𑀢𑀽𑀧𑀓𑀸𑀭𑀁 𑀲𑀭 𑀧𑀼𑀢𑁆𑀢𑀸𑀢𑀺 𑀆𑀳, 𑀲𑁄 𑀧𑀢𑀦𑁆𑀢𑀺𑀁 𑀤𑀺𑀲𑁆𑀯𑀸 𑀯𑁂𑀕𑁂𑀦𑀸 𑀕𑀦𑁆𑀢𑁆𑀯𑀸 𑀧𑀺𑀝𑁆𑀞𑀺𑀬𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀆𑀓𑀸𑀲𑀢𑁄 𑀦𑁂𑀢𑁆𑀯𑀸 𑀲 𑀓 𑀝𑁆𑀞𑀸 𑀦𑁂 𑀬𑁂𑀯 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑀲𑁆𑀫𑀸.

𑁭.

𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑁂𑀯𑀁, 𑀲𑀭𑀦𑁆𑀢𑀸 𑀉𑀧𑀓𑀸𑀭𑀓𑀁;

𑀦 𑀚𑀳𑀦𑁆𑀢𑀻𑀢𑀺 𑀫𑀦𑁆𑀢𑁆𑀯𑀸𑀦, 𑀓𑀢𑀜𑁆𑀜𑀽 𑀳𑁄𑀦𑁆𑀢𑀼 𑀧𑀸𑀡𑀺𑀦𑁄𑀢𑀺.

𑀢𑀢𑁄 𑀲𑀸 𑀓𑀼𑀫𑀸𑀭𑀺𑀓𑀸 𑀲𑀢𑁆𑀢𑀸 𑀲𑀻𑀢𑀺𑀓𑁄𑀝𑀺𑀥𑀦𑀁 𑀩𑀼𑀤𑁆𑀥𑀲𑀸𑀲𑀦𑁂𑀬𑁂𑀯 𑀘𑀚𑀺𑀢𑁆𑀯𑀸 𑀬𑀸𑀯𑀚𑀻𑀯𑀁 𑀲𑀻𑀮𑀁 𑀭𑀓𑁆𑀔𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓 𑀢𑁆𑀯𑀸 𑀢 𑀢𑁄 𑀘𑀼𑀢𑀸 𑀲𑀼𑀢𑁆𑀢 𑀧𑁆𑀧𑀩𑀼𑀤𑁆𑀥𑁄 𑀯𑀺𑀬 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀻𑀢𑀺.

𑁮.

𑀅𑀢𑀺𑀢𑀭𑀼𑀡𑀯𑀬𑀸 𑀪𑁄 𑀫𑀸𑀢𑀼𑀕𑀸𑀫𑀸𑀧𑀺 𑀏𑀯𑀁,

𑀯𑀺𑀯𑀺𑀥𑀓𑀼𑀲𑀮𑀓𑀫𑁆𑀫𑀁 𑀓𑀢𑁆𑀯 𑀲𑀕𑁆𑀕𑀁 𑀯𑀚𑀦𑁆𑀢𑀺;

𑀓𑀼𑀲𑀮𑀨𑀮𑀫𑀳𑀦𑁆𑀢𑀁 𑀫𑀜𑁆𑀜𑀫𑀸𑀦𑀸 𑀪𑀯𑀦𑁆𑀢𑀸,

𑀪𑀯𑀣 𑀓𑀣 𑀫𑀼𑀧𑁂𑀓𑁆𑀔𑀸 𑀤𑀸𑀦𑀫𑀸𑀦𑀸𑀤𑀺𑀓𑀫𑁆𑀫𑁂.

𑀩𑀼𑀤𑁆𑀥𑁂𑀦𑀺𑀬𑀸 𑀯𑀢𑁆𑀣𑀼𑀁 𑀘𑀢𑀼𑀢𑁆𑀣𑀁.

𑁫. 𑀅𑀳𑀺𑀢𑀼𑀡𑁆𑀟𑀺𑀓𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀇𑀫𑀲𑁆𑀫𑀺𑀁 𑀓𑀺𑀭 𑀪𑀤𑁆𑀤𑀓𑀧𑁆𑀧𑀫𑁆𑀳𑀺 𑀅𑀫𑁆𑀳𑀸𑀓𑀁 𑀓𑀺𑀭 𑀪𑀕𑀯𑀢𑁄 𑀧𑀼𑀩𑁆𑀩𑁂 𑀓𑀲𑁆𑀲𑀧𑁄𑀦𑀸𑀫 𑀲𑀢𑁆𑀣𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀤𑁂𑀯𑀓𑀁 𑀮𑁄𑀓𑀁 𑀲𑀁𑀲𑀸𑀭𑀲𑀸𑀕𑀭𑀸 𑀢𑀸𑀭𑁂𑀢𑁆𑀯𑀸 𑀲𑀩𑁆𑀩𑀩𑀼𑀤𑁆𑀥𑀓𑀺𑀘𑁆𑀘𑀸𑀦𑀺 𑀦𑀺𑀝𑁆𑀞𑀧𑁂𑀢𑁆𑀯𑀸 𑀅𑀢𑁆𑀣𑀁 𑀕𑀢𑁄 𑀤𑀺𑀯𑀲𑀓𑀭𑁄𑀯𑀺𑀬 𑀲𑁂𑀢𑀩𑁆𑀬𑀫𑁆𑀳𑀺 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀡𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺, 𑀢𑀤𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ¶ 𑀏𑀓𑁂𑀓𑀁 𑀲𑀼𑀯𑀡𑁆𑀡𑀺𑀝𑁆𑀞𑀓𑀁 𑀓𑁄𑀝𑀺𑀅𑀕𑁆𑀖𑀦𑀓𑀁 𑀭𑀢𑀦𑀯𑀺𑀘𑀺𑀢𑁆𑀢𑀁 𑀩𑀳𑀺𑀘𑀺𑀦𑀦𑀢𑁆𑀣𑀸𑀬 𑀏𑀓𑁂𑀓𑀁 𑀅𑀟𑁆𑀠𑀓𑁄𑀝𑀺𑀅𑀕𑁆𑀖𑀦𑀓𑀁 𑀅𑀩𑁆𑀪𑀦𑁆𑀢𑀭𑀽𑀧𑀧𑀽𑀭𑀡𑀢𑁆𑀣𑀁 𑀫𑀦𑁄𑀲𑀺𑀮𑀸𑀬 𑀫𑀢𑁆𑀢𑀺𑀓𑀸𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀸 𑀬𑁄𑀚𑀦𑀩𑁆𑀩𑁂𑀥𑀁 𑀣𑀽𑀧𑀁 𑀓𑀢𑁆𑀯𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺. 𑀢𑀤𑀸 𑀏𑀓𑁄 𑀅𑀳𑀺𑀢𑀼𑀡𑁆𑀟𑀺𑀓𑁄 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀲𑀧𑁆𑀧𑁂 𑀓𑀻𑀴𑀸𑀧𑁂𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁄 𑀏𑀓𑀁 𑀕𑀸𑀫𑀓𑀁 𑀧𑀢𑁆𑀯𑀸 𑀢𑀢𑁆𑀣 𑀲𑀧𑁆𑀧𑁂 𑀓𑀻𑀴𑀸𑀧𑁂𑀢𑁆𑀯𑀸 𑀲𑀦𑁆𑀢𑀼𑀝𑁆𑀞𑁂𑀳𑀺 𑀕𑀸𑀫𑀯𑀸𑀲𑀻𑀳𑀺 𑀤𑀺𑀦𑁆𑀦𑀯𑀺𑀯𑀺𑀥𑁄𑀧𑀸𑀬𑀦𑁄 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀔𑀸 𑀤𑀺 𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀯𑀸𑀲𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀓𑀺𑀭 𑀕𑀸𑀫𑀓𑁂 𑀫𑀦𑀼𑀲𑁆𑀲𑀸 𑀬𑁂𑀪𑀼𑀬𑁆𑀬𑁂𑀦 𑀭𑀢𑀦𑀢𑁆𑀢𑀬𑀫𑀸𑀫𑀓𑀸. 𑀢𑀲𑁆𑀫𑀸 𑀢𑁂 𑀭𑀢𑁆𑀢𑀺𑀪𑀸𑀕𑁂 𑀲𑀬𑀦𑁆𑀢𑀸 ‘‘𑀦𑀫𑁄 𑀩𑀼𑀤𑁆𑀥𑀸𑀬𑀸𑀢𑀺’’ 𑀏𑀯𑀫𑀸𑀤𑀺𑀁 𑀯𑀤𑀦𑁆𑀢𑀺. 𑀲𑁄 𑀧𑀦 𑀅𑀳𑀺𑀢𑀼𑀡𑁆𑀟𑀺𑀓𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑀁 𑀦 𑀚𑀸𑀦𑀸𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀬𑀫𑁆𑀧𑀺 𑀓𑁂 𑀴𑀺𑀁 𑀓𑀼𑀭𑀼𑀫𑀸𑀦𑁄 𑀧𑀭𑀺𑀳𑀸𑀲𑀯𑀲𑁂𑀦 ‘‘𑀦𑀫𑁄 𑀩𑀼𑀤𑁆𑀥𑀸𑀬𑀸𑀢𑀺’’ 𑀯𑀤𑀢𑀺, 𑀅𑀣𑁂𑀓𑀤𑀺𑀯𑀲𑀁 𑀲𑁄 𑀅𑀢𑁆𑀢𑀦𑁄 𑀓𑀻𑀴𑀸𑀧𑀦𑀲𑀫𑀢𑁆𑀣𑀁 𑀏𑀓𑀁 𑀲𑀧𑁆𑀧𑀁 𑀪𑀢𑁆𑀣 𑀢𑀢𑁆𑀣 𑀧𑀭𑀺𑀬𑁂𑀲𑀫𑀸𑀦𑁄 𑀆𑀳𑀺𑀡𑁆𑀟𑀢𑀺. 𑀢𑀤𑀸 𑀏𑀓𑁄 𑀦𑀸𑀕𑀭𑀸𑀚𑀸 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀣𑀽 𑀧𑀁 𑀕 𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀁 𑀯𑀫𑁆𑀫𑀺𑀓𑀁 𑀧𑀯𑀺𑀲𑀢𑀺. 𑀢𑀁 𑀤𑀺 𑀲𑁆𑀯𑀸 𑀅𑀳𑀺𑀢𑀼𑀡𑁆𑀟𑀺𑀓𑁄 𑀯𑁂𑀕𑁂𑀦𑀸 𑀕𑀦𑁆𑀢𑁆𑀯𑀸 𑀦𑀸𑀕𑀭𑀸𑀚𑀁 𑀕𑀡𑁆𑀳𑀺𑀢𑀼𑀁 𑀫𑀦𑁆𑀢𑀁 𑀧𑀭𑀺𑀚𑀧𑀺, 𑀲𑁄 𑀫𑀦𑁆𑀢𑀁 𑀲𑀼𑀢𑁆𑀯𑀸 𑀓𑀼𑀚𑁆𑀛𑀺𑀢𑁆𑀯𑀸 𑀢𑀁 𑀫𑀸𑀭𑁂𑀢𑀼𑀓𑀸𑀫𑁄 𑀅𑀦𑀼𑀩𑀦𑁆𑀥𑀺, 𑀢𑀁 𑀤𑀺 𑀲𑁆𑀯𑀸 𑀅𑀳𑀺𑀢𑀼𑀡𑁆𑀟𑀺𑀓𑁄 𑀯𑁂 𑀕𑁂 𑀦 𑀧𑀮𑀸𑀬𑀦𑁆𑀢𑁄 𑀏𑀓𑀲𑁆𑀫𑀺𑀁 𑀧𑀸𑀲𑀸𑀡𑁂 𑀧𑀓𑁆𑀔𑀮𑀺𑀢𑁆𑀯𑀸 𑀧𑀢𑀫𑀸𑀦𑁄 𑀧𑀼𑀩𑁆𑀩𑁂𑀯𑀼𑀢𑁆𑀢𑀧𑀭𑀺𑀳𑀸𑀲 𑀯𑀘𑀦𑀧𑀭𑀺𑀘𑀬𑁂𑀦 ‘‘𑀦𑀫𑁄 𑀩𑀼𑀤𑁆𑀥𑀸𑀬𑀸𑀢𑀺’’ 𑀯𑀤𑀦𑁆𑀢𑁄 𑀧𑀢𑀺. 𑀢𑀲𑁆𑀲 𑀢𑀁 𑀯𑀘𑀦𑀁 𑀅𑀦𑀼𑀩𑀦𑁆𑀥𑀦𑁆𑀢𑀲𑁆𑀲 𑀦𑀸𑀕𑀭𑀜𑁆𑀜𑁄 𑀲𑁄𑀢𑀧𑀣𑁂 𑀅𑀫𑀢𑀁𑀯𑀺𑀬 𑀧𑀢𑀺. 𑀅𑀣 𑀲𑁄 𑀭𑀢𑀦𑀢𑁆𑀢𑀬𑀕𑀸𑀭𑀯𑁂𑀦 𑀢𑀲𑁆𑀫𑀺𑀁 𑀓𑁄𑀥𑀁 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀲𑀫𑁆𑀫 𑀫𑀸 𑀪𑀸𑀬𑀺. 𑀅𑀳𑀁 𑀭𑀢𑀦𑀢𑁆𑀢𑀬𑀫𑀦𑁆𑀢𑀸𑀦𑀼𑀪𑀸𑀯𑀧𑀸𑀲𑁂𑀦 𑀩𑀤𑁆𑀥𑁄. 𑀢𑀲𑁆𑀫𑀸 𑀢𑀼 𑀯𑀁 𑀟𑀲𑀺𑀢𑀼𑀁 𑀫𑀬𑁆𑀳𑀁 𑀅𑀦𑀦𑀼𑀭𑀽𑀧𑀁. 𑀅𑀚𑁆𑀚 𑀢 𑀬𑀺 𑀧𑀲𑀦𑁆𑀦𑁄𑀫𑁆𑀳𑀺, 𑀧𑀡𑁆𑀡𑀸𑀓𑀸𑀭𑀁 𑀢𑁂𑀤𑀫𑁆𑀫𑀺, 𑀕𑀡𑁆𑀳𑀸𑀢𑀺 𑀢𑀻𑀡𑀺 𑀲𑀼𑀯𑀡𑁆𑀡𑀧𑀼𑀧𑁆𑀨𑀸𑀦𑀺 𑀅𑀤𑀸𑀲𑀺. 𑀏𑀯𑀁 𑀭𑀢𑀦𑀢𑁆𑀢𑀬𑀁 𑀦𑀸𑀫 𑀖𑁄𑀭𑀸𑀲𑀺𑀯𑀺𑀲𑀸𑀦𑀫𑁆𑀧𑀺 𑀲𑀧𑁆𑀧𑀸𑀦𑀁 𑀫𑀦𑀁 𑀧𑀻𑀡𑁂𑀢𑀺. 𑀳𑁄𑀦𑁆𑀢𑀺 𑀘𑁂𑀢𑁆𑀣.

𑁧.

𑀩𑀼𑀤𑁆𑀥𑁄𑀢𑀺 ¶ 𑀯𑀘𑀦𑀁 𑀲𑁂𑀝𑁆𑀞𑀁, 𑀩𑀼𑀤𑁆𑀥𑁄𑀢𑀺 𑀧𑀤 𑀫𑀼𑀢𑁆𑀢𑀫𑀁;

𑀦𑀢𑁆𑀣𑀺 𑀢𑁂𑀦 𑀲𑀫𑀁 𑀮𑁄𑀓𑁂, 𑀅𑀜𑁆𑀜𑀁 𑀲𑁄𑀢𑀭𑀲𑀸𑀬𑀦𑀁.

𑁨.

𑀥𑀫𑁆𑀫𑁄𑀢𑀺𑀯𑀘𑀦𑀁 𑀲𑁂𑀝𑁆𑀞𑀁, 𑀥𑀫𑁆𑀫𑁄𑀢𑀺 𑀧𑀤𑀫𑀼𑀢𑁆𑀢𑀫𑀁;

𑀦𑀢𑁆𑀣𑀺 𑀢𑁂𑀦 𑀲𑀫𑀁 𑀮𑁄𑀓𑁂, 𑀅𑀜𑁆𑀜𑀁 𑀲𑁄𑀢𑀭𑀲𑀸𑀬𑀦𑀁.

𑁩.

𑀲𑀗𑁆𑀖𑁄𑀢𑀺 𑀯𑀘𑀦𑀁 𑀲𑁂𑀝𑁆𑀞𑀁, 𑀲𑀗𑁆𑀖𑁄𑀢𑀺 𑀧𑀤𑀫𑀼𑀢𑁆𑀢𑀫𑀁;

𑀦𑀢𑁆𑀣𑀺 𑀢𑁂𑀦 𑀲𑀫𑀁 𑀮𑁄𑀓𑁂, 𑀅𑀜𑁆𑀜𑀁 𑀲𑁄𑀢𑀭𑀲𑀸𑀬𑀦𑀁.

𑁪.

𑀢𑀲𑁆𑀲 𑀫𑀼𑀔𑀁 𑀫𑀼𑀔𑀁 𑀦𑀸𑀫, 𑀬𑀁 𑀯𑀢𑁆𑀢𑀢𑀺 𑀫𑀼𑀔𑁂 𑀲𑀤𑀸;

𑀤𑀼𑀮𑁆𑀮𑀪𑀁 𑀩𑀼𑀤𑁆𑀥𑀯𑀘𑀦𑀁, 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀤𑀸𑀬𑀓𑀁.

𑁫.

𑀢𑀲𑁆𑀲 𑀫𑀦𑁄 𑀫𑀦𑁄 𑀦𑀸𑀫, 𑀬𑀁 𑀘𑁂 𑀫𑀦𑀲𑀺 𑀯𑀢𑁆𑀢𑀢𑀺;

𑀤𑀼𑀮𑁆𑀮𑀪𑀁 𑀩𑀼𑀤𑁆𑀥𑀯𑀘𑀦𑀁, 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀤𑀸𑀬𑀓𑀁.

𑁬.

𑀢𑀫𑁂𑀯 𑀓𑀯𑀘𑀁 𑀤𑁂𑀳𑁂, 𑀢𑀫𑁂𑀯 𑀫𑀡𑀺 𑀓𑀸𑀫𑀤𑁄;

𑀢𑀫𑁂𑀯 𑀲𑀼𑀭𑀪𑀻 𑀥𑁂𑀦𑀼, 𑀢𑀫𑁂𑀯 𑀲𑀼𑀭𑀧𑀸𑀤𑀧𑁄.

𑁭.

𑀢𑀲𑁆𑀲𑁂𑀯 𑀲𑁄𑀢𑀁 𑀲𑁄𑀢𑀁𑀯, 𑀬𑀁 𑀲𑀼𑀡𑀸𑀢𑀺 𑀚𑀦𑁄 𑀅𑀬𑀁

𑀤𑀼𑀮𑁆𑀮𑀪𑀁 𑀩𑀼𑀤𑁆𑀥𑀯𑀘𑀦𑀁, 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀤𑀸𑀬𑀓𑀁.

𑁮.

𑀏𑀯𑀁 𑀯𑀺𑀥𑁄 𑀭𑀕𑁄 𑀖𑁄𑀭𑁄, 𑀳𑀴𑀸𑀳𑀴𑀯𑀺𑀲𑁄 𑀲𑀤𑀸;

𑀩𑀼𑀤𑁆𑀥𑁄𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸, 𑀲𑀦𑁆𑀢𑀼𑀝𑁆𑀞𑁄 𑀤𑀸𑀲𑀺 𑀚𑀻𑀯𑀺𑀢𑀁.

𑁯.

𑀲𑁄𑀡𑁆𑀡𑀧𑀼𑀧𑁆𑀨𑀢𑁆𑀢𑀬𑀁𑀘𑀸𑀧𑀺, 𑀫𑀳𑀕𑁆𑀖𑀁 𑀩𑀳𑀮𑀁 𑀅𑀤𑀸;

𑀧𑀲𑁆𑀲 𑀩𑀼𑀤𑁆𑀥𑁄𑀢𑀺 𑀯𑀸𑀘𑀸𑀬, 𑀆𑀦𑀼𑀪𑀸𑀯𑀫𑀳𑀦𑁆𑀢𑀢𑀦𑁆𑀢𑀺.

𑀅𑀣 𑀦𑀸𑀕𑀭𑀸𑀚𑀸 𑀢𑀲𑁆𑀲 𑀢𑀸𑀦𑀺 𑀲𑀼𑀯𑀡𑁆𑀡𑀧𑀼𑀧𑁆𑀨𑀸𑀦𑀺 𑀤𑀢𑁆𑀯𑀸 𑀏𑀯𑀫𑀸𑀳. 𑀲𑀫𑁆𑀫 𑀏𑀢𑁂𑀲𑀼 𑀏𑀓𑀁 𑀢𑀯 𑀧𑀼𑀜𑁆𑀜𑀢𑁆𑀢𑀸𑀬 𑀏𑀓𑀁 𑀫𑀫 𑀧𑀼𑀜𑁆𑀜𑀢𑁆𑀣𑀸𑀬 𑀧𑀽𑀚𑁂𑀳𑀺. 𑀇𑀢𑀭𑁂𑀦 𑀬𑀸𑀯𑀚𑀻𑀯𑀁 𑀲𑀼𑀔𑁂𑀦 𑀚𑀻𑀯𑀦𑁆𑀢𑁄 𑀧𑀼𑀢𑁆𑀢𑀤𑀸𑀭𑁂 𑀧𑁄𑀲𑁂𑀦𑁆𑀢𑁄 𑀤𑀸𑀦𑀸𑀤𑀻𑀲𑀼 𑀅𑀧𑁆𑀧𑀫𑀚𑁆𑀚𑀦𑁆𑀢𑁄 𑀚𑀻𑀯𑀺𑀓𑀁 𑀓𑀧𑁆𑀧𑁂𑀳𑀺. 𑀫𑀸 𑀳𑀻𑀦𑀓𑀫𑁆𑀫𑁂 𑀩𑁆𑀬𑀯𑀝𑁄 𑀳𑁄𑀳𑀺, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀜𑁆𑀘 𑀧𑀚𑀳𑀸𑀢𑀺 𑀑𑀯𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀳𑀺𑀢𑀼𑀡𑁆𑀟𑀺𑀓𑁄𑀧𑀺 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀢𑁂𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀤𑁆𑀯𑀺𑀳𑀺 𑀧𑀼𑀧𑁆𑀨𑁂𑀳𑀺 𑀘𑁂𑀢𑀺𑀬𑀁 𑀧𑀽𑀚𑁂𑀢𑁆𑀯𑀸 𑀏𑀓𑁂𑀦 𑀲 𑀳 𑀲𑁆𑀲𑀁 𑀮𑀪𑀺𑀢𑁆𑀯𑀸 𑀢𑁂 𑀦 𑀧𑀼𑀢𑁆𑀢𑀤𑀸𑀭𑁂 ¶ 𑀧𑁄𑀲𑁂𑀦𑁆𑀢𑁄 𑀓𑀧𑀡𑀤𑁆𑀥𑀺𑀓𑀯𑀡𑀺𑀩𑁆𑀩𑀓𑀸𑀤𑀻𑀦𑀁 𑀤𑀸𑀦𑀁 𑀤𑁂𑀦𑁆𑀢𑁄 𑀅𑀳𑀺𑀢𑀼𑀡𑁆𑀟𑀺𑀓𑀓𑀫𑁆𑀫𑀁 𑀧𑀳𑀸𑀳 𑀓𑀼𑀲𑀮𑀫𑁂𑀯 𑀉𑀧𑀘𑀺𑀦𑀦𑁆𑀢𑁄 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀲𑀕𑁆𑀕𑀧𑀭𑀸𑀬𑀦𑁄 𑀅𑀳𑁄𑀲𑀺.

𑁧𑁦.

𑀇𑀢𑀺 𑀅𑀯𑀺𑀤𑀺𑀢𑀲𑀢𑁆𑀢𑁄 𑀓𑀺𑀜𑁆𑀘𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑀁,

𑀮𑀪𑀢𑀺 𑀥𑀦𑀯𑀺𑀲𑁂𑀲𑀁 𑀬𑀲𑁆𑀲 𑀦𑀸𑀫𑀧𑁆𑀧𑀓𑀸𑀲𑀸;

𑀯𑀺𑀤𑀺𑀢𑀚𑀦𑀦𑀺𑀓𑀸𑀬𑁄 𑀓𑀺𑀦𑁆𑀦𑀼 𑀢𑀲𑁆𑀲𑀸𑀦𑀼𑀪𑀸𑀯𑀁,

𑀦 𑀮𑀧𑀢𑀺 𑀚𑀺𑀦𑀦𑀸𑀫𑀁 𑀓𑀺𑀘𑁆𑀘 𑀫𑀜𑁆𑀜𑀧𑁆𑀧𑀳𑀸𑀬𑀸𑀢𑀺.

𑀅𑀳𑀺𑀢𑀼𑀡𑁆𑀟𑀺𑀓𑀲𑁆𑀲 𑀯𑀢𑁆𑀣𑀼𑀁 𑀧𑀜𑁆𑀘𑀫𑀁.

𑁬. 𑀲𑀭𑀡𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀲𑀼𑀫𑀦𑁄 𑀦𑀸𑀫𑁂 𑀓𑁄 𑀕𑀳𑀧𑀢𑀺 𑀅𑀳𑁄𑀲𑀺. 𑀢𑀲𑁆𑀲 𑀪𑀭𑀺𑀬𑀸 𑀲𑀼𑀚𑀫𑁆𑀧𑀢𑀺𑀓𑀸 𑀦𑀸𑀫. 𑀢𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀦𑁆𑀢𑀸 𑀅𑀧𑀭𑀪𑀸𑀕𑁂 𑀧𑀼𑀢𑁆𑀢𑀁𑀘 𑀥𑀻𑀢𑀭𑀁𑀘 𑀮𑀪𑀺𑀁𑀲𑀼. 𑀅𑀣 𑀢𑁂𑀲𑀁 𑀤𑀳𑀭𑀓𑀸𑀮𑁂𑀬𑁂𑀯 𑀫𑀸𑀢𑀸𑀧𑀺𑀢𑀭𑁄 𑀓𑀸𑀮𑀁 𑀓𑀭𑁄𑀦𑁆𑀢𑀸 𑀚𑁂𑀝𑁆𑀞𑀓𑀁𑀧𑀓𑁆𑀓𑁄𑀲𑀺𑀢𑁆𑀯𑀸 𑀫𑀬𑀁 𑀧𑀼𑀢𑁆𑀢 𑀢𑀼𑀯𑀁 𑀧𑀢𑀺𑀭𑀽𑀧𑁂 𑀞𑀸𑀦𑁂 𑀦𑀺𑀯𑁂𑀲𑀺𑀢𑀼𑀁 𑀦𑀸𑀲𑀓𑁆𑀔𑀺𑀫𑁆𑀳, 𑀬𑀁 𑀦𑁄 𑀖𑀭𑁂 𑀯𑀺𑀪𑀯𑀁, 𑀲𑀩𑁆𑀩𑀁 𑀢𑀁 𑀕𑀡𑁆𑀳. 𑀇𑀫𑀸𑀬𑀘 𑀢𑁂 𑀓𑀡𑀺𑀝𑁆𑀞𑀺𑀓𑀸𑀬 𑀯𑀼𑀤𑁆𑀥𑀺𑀁𑀢𑁆𑀯𑀫𑁂𑀯 𑀚𑀸𑀦𑀸𑀳𑀻𑀢𑀺 𑀯𑀢𑁆𑀯𑀸 𑀚𑁂𑀝𑁆𑀞𑀓𑀲𑁆𑀲 𑀳𑀢𑁆𑀣𑁂 𑀓𑀡𑀺𑀝𑁆𑀞𑀺𑀓𑀸𑀬 𑀳𑀢𑁆𑀣𑀁 𑀞𑀧𑁂𑀢𑁆𑀯𑀸 𑀓𑀸𑀮𑀫𑀓𑀁𑀲𑀼. 𑀅𑀣 𑀲𑁄 𑀫𑀸𑀢𑀸𑀧𑀺𑀢𑀼𑀦𑁆𑀦𑀁 𑀅𑀘𑁆𑀘𑀬𑁂𑀦 𑀆𑀴𑀸𑀳𑀦𑀓𑀺𑀘𑁆𑀘𑀁 𑀓𑀢𑁆𑀯𑀸 𑀯𑀲𑀦𑁆𑀢𑁄 𑀓𑀸𑀮𑀦𑁆𑀢𑀭𑁂𑀦 𑀓𑀡𑀺𑀝𑁆𑀞𑀺𑀓𑀁 𑀧𑀢𑀺𑀭𑀽𑀧𑁂𑀦 𑀓𑀼𑀮𑁂𑀦 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀲𑀬𑀫𑁆𑀧𑀺 𑀤𑀸𑀭𑀧𑀭𑀺𑀕𑁆𑀕𑀳𑀫𑀓𑀸𑀲𑀺. 𑀅𑀣𑀸𑀧𑀭𑀪𑀸𑀕𑁂 𑀢𑀲𑁆𑀲 𑀓𑀡𑀺𑀝𑁆𑀞𑀺𑀓𑀸 𑀕𑀩𑁆𑀪𑀺𑀦𑀻 𑀳𑀼𑀢𑁆𑀯𑀸 𑀏𑀓𑀤𑀺𑀯𑀲𑀁 𑀲𑀸𑀫𑀺𑀓𑀁 𑀆𑀳, 𑀲𑀸𑀫𑀺 𑀫𑀫 𑀪𑀸𑀢𑀭𑀁 𑀤𑀝𑁆𑀞𑀼𑀓𑀸𑀫𑀸𑀫𑁆𑀳𑀻𑀢𑀺. 𑀲𑁄𑀧𑀺 𑀲𑀸𑀥𑀼 𑀪𑀤𑁆𑀤𑁂𑀢𑀺 𑀅𑀦𑀼𑀭𑀽𑀧𑁂𑀦 𑀧𑀡𑁆𑀡𑀸𑀓𑀸𑀭𑁂𑀦 𑀢𑀸𑀬 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺. 𑀢𑀤𑀸 𑀧𑀦 𑀪𑀕𑀯𑀸 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀲𑁄 𑀧𑀺𑀡𑁆𑀟𑀸𑀬 𑀦𑀕𑀭𑀁 𑀧𑀸𑀯𑀺𑀲𑀺 𑀙𑀩𑁆𑀩𑀡𑁆𑀡𑀖𑀦𑀩𑀼𑀤𑁆𑀥𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄, 𑀢 𑀢𑁄 𑀢𑁂 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 ¶ 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀁𑀲𑀼, 𑀅𑀣 𑀲𑀢𑁆𑀢𑀸 𑀢𑁂𑀲𑀁 𑀚𑀬𑀫𑁆𑀧𑀢𑀺𑀓𑀸𑀦𑀁 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁𑀤𑀺𑀲𑁆𑀯𑀸 𑀢𑁂 𑀲𑀭𑀡𑁂𑀲𑀼𑀘 𑀲𑀻𑀮𑁂𑀲𑀼𑀘 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀏𑀯𑀫𑀸𑀳, 𑀓𑀤𑀸𑀘𑀺 𑀯𑁄 𑀤𑀼𑀓𑁆𑀔𑁂 𑀉𑀧𑁆𑀧𑀦𑁆𑀦𑁂 𑀢𑀣𑀸𑀕𑀢𑁄 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑁄𑀢𑀺. 𑀢𑀣𑀸𑀳𑀺.

𑁧.

𑀬𑀁𑀓𑀺𑀜𑁆𑀘𑀺 𑀪𑀬𑀫𑀼𑀧𑁆𑀧𑀦𑁆𑀦𑀁, 𑀭𑀸𑀚𑀘𑁄𑀭𑀸𑀤𑀺𑀲𑀫𑁆𑀪𑀯𑀁;

𑀢𑀤𑀸 𑀲𑀭𑁂𑀬𑁆𑀬 𑀲𑀫𑁆𑀩𑀼𑀤𑁆𑀥𑀁, 𑀦𑀺𑀘𑁆𑀙𑀦𑁆𑀢𑁄𑀢 𑀤𑀼𑀧𑀤𑁆𑀤𑀯𑀁.

𑁨.

𑀬𑀁 𑀯𑁂 𑀉𑀧𑀤𑁆𑀤𑀯𑀁 𑀳𑁄𑀢𑀺, 𑀬𑀓𑁆𑀔𑀧𑁂𑀢𑀸 𑀤𑀺𑀲𑀫𑁆𑀪𑀯𑀁;

𑀢𑀤𑀸 𑀲𑀭𑁂𑀬𑁆𑀬 𑀲𑀫𑁆𑀩𑀼𑀤𑁆𑀥𑀁, 𑀦𑀺𑀘𑁆𑀙𑀦𑁆𑀢𑁄 𑀢𑀤𑀼𑀧𑀤𑁆𑀤𑀯𑀁.

𑁩.

𑀲𑀻𑀳𑀩𑁆𑀬𑀕𑁆𑀖𑀢𑀭𑀘𑁆𑀙𑀸𑀤𑀺, 𑀧𑀼𑀡𑁆𑀟𑀭𑀻𑀓𑀸𑀤𑀺𑀲𑀫𑁆𑀪𑀯𑀁;

𑀢𑀤𑀸 𑀲𑀭𑁂𑀬𑁆𑀬 𑀲𑀫𑁆𑀩𑀼𑀤𑁆𑀥𑀁, 𑀦𑀺𑀘𑁆𑀙𑀦𑁆𑀢𑁄 𑀢𑀤𑀼𑀧𑀤𑁆𑀤𑀯𑀁.

𑁪.

𑀬𑀫𑀸𑀢𑀧𑀕𑁆𑀕𑀺 𑀯𑀸𑀢𑀸𑀤𑀺, 𑀉𑀤𑀓𑀸𑀲𑀦𑀺𑀲𑀫𑁆𑀪𑀯𑀁;

𑀢𑀤𑀸 𑀲𑀭𑁂𑀬𑁆𑀬 𑀲𑀫𑁆𑀩𑀼𑀤𑁆𑀥𑀁, 𑀦𑀺𑀘𑁆𑀙𑀦𑁆𑀢𑁄 𑀢𑀤𑀼𑀧𑀤𑁆𑀤𑀯𑀁.

𑁫.

𑀧𑀚𑁆𑀚𑀭𑀸𑀤𑀻𑀳𑀺 𑀭𑁄𑀕𑁂𑀳𑀺, 𑀯𑀺𑀲𑀫𑁄 𑀢𑀼𑀳𑀺𑀲𑀫𑁆𑀪𑀯𑀁;

𑀢𑀤𑀸 𑀲𑀭𑁂𑀬𑁆𑀬 𑀲𑀫𑁆𑀩𑀼𑀤𑁆𑀥𑀁, 𑀦𑀺𑀘𑁆𑀙𑀦𑁆𑀢𑁄 𑀢𑀤𑀼𑀧𑀤𑁆𑀤𑀯𑀁.

𑁬.

𑀫𑀘𑁆𑀘𑀼𑀦𑀸 𑀘𑁂 𑀬𑀤𑀸 𑀬𑀼𑀤𑁆𑀥𑀁, 𑀓𑀭𑁂 𑀢𑁂𑀦𑀸𑀧𑀺 𑀚𑀦𑁆𑀢𑀼𑀦𑀸;

𑀲𑀭𑀺𑀢𑀩𑁆𑀩𑁄 𑀢𑀤𑀸 𑀩𑀼𑀤𑁆𑀥𑁄, 𑀧𑀢𑁆𑀣𑁂𑀦𑁆𑀢𑁂𑀦𑀢𑁆𑀢𑀦𑁄 𑀚𑀬𑀦𑁆𑀢𑀺.

𑀢𑀢𑁄 𑀢𑁂 𑀪𑀕𑀯𑀢𑁄 𑀯𑀘𑀦𑀁 𑀧𑀝𑀺𑀦𑀦𑁆𑀤𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀕𑀫𑀁𑀲𑀼. 𑀅𑀣 𑀚𑁂𑀝𑁆𑀞𑀓𑁄 𑀆𑀕𑀢𑁂 𑀢𑁂 𑀤𑀺𑀲𑁆𑀯𑀸 𑀬𑀣𑀸𑀦𑀼𑀭𑀽𑀧𑀁 𑀲𑀓𑁆𑀓𑀸𑀭 𑀫𑀓𑀸𑀲𑀺. 𑀢𑀲𑁆𑀲𑀸 𑀲𑀸𑀫𑀺𑀓𑁄 𑀓𑀢𑀺𑀧𑀸𑀳𑀁 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀪𑀭𑀺𑀬𑀁 𑀚𑁂𑀝𑁆𑀞𑀓𑀲𑁆𑀲 𑀧𑀝𑀺𑀧𑀸𑀤𑁂𑀢𑁆𑀯𑀸 𑀫𑀫 𑀕𑀸𑀫𑁂 𑀓𑀺𑀘𑁆𑀘𑀁 𑀅𑀢𑁆𑀣𑀻𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣𑀲𑁆𑀲𑀸 𑀪𑀸𑀢𑀸 𑀪𑀭𑀺𑀬𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀆𑀳 𑀪𑀤𑁆𑀤𑁂 𑀇𑀫𑀺𑀲𑁆𑀲𑀸 𑀲𑀩𑁆𑀩𑀁 𑀓𑀢𑁆𑀢𑀩𑁆𑀩𑀁 𑀓𑀭𑁄𑀳𑀻𑀢𑀺. 𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲𑀸 𑀉𑀤𑀓𑀦𑁆𑀦 𑀧𑀸𑀦𑀸 𑀤𑀺𑀦𑀸 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀼𑀭𑀼𑀫𑀸𑀦𑀸 𑀏𑀢𑀺𑀲𑁆𑀲𑀸 𑀳𑀢𑁆𑀣𑀧𑀸𑀤𑀕𑀻𑀯𑀽𑀧𑀕𑁂𑀲𑀼 𑀆𑀪𑀭𑀡𑁂𑀲𑀼 𑀮𑁄𑀪𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀯𑀽𑀧𑀲𑀫𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀆𑀳𑀸𑀭𑀽 𑀧𑀘𑁆𑀙𑁂𑀤𑀁 𑀓𑀢𑁆𑀯𑀸 𑀕𑀺𑀮𑀸𑀦𑀸𑀯𑀺𑀬 𑀫𑀜𑁆𑀘𑀓𑀁 𑀉𑀧𑀕𑀽𑀳𑀺𑀢𑁆𑀯𑀸 𑀦𑀺𑀧𑀢𑀺. 𑀅𑀣 𑀲𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀢𑀁 𑀢𑀣𑀸 𑀲𑀬𑀺𑀢𑀁 ¶ 𑀤𑀺𑀲𑁆𑀯𑀸 𑀫𑀜𑁆𑀘𑀓𑁂 𑀦𑀺𑀲𑀺𑀦𑁆𑀦𑁄 𑀓𑀺𑀁 𑀪𑀤𑁆𑀤𑁂 𑀅𑀨𑀸𑀲𑀼𑀓𑀦𑁆𑀢𑀺 𑀧𑀼𑀘𑁆𑀙𑀺, 𑀲𑀸 𑀢𑀼𑀡𑁆𑀳𑀻 𑀳𑀼𑀢𑁆𑀯𑀸 𑀓𑀢𑀺𑀧𑀬𑀯𑀸𑀭𑁂 𑀧𑀼𑀘𑁆𑀙𑀺𑀢𑀸 𑀦 𑀲𑀓𑁆𑀓𑀸 𑀓𑀣𑁂𑀢𑀼𑀦𑁆𑀢𑀺 𑀆𑀳. 𑀧𑀼𑀦 𑀲𑀸𑀫𑀺𑀓𑁂𑀦 𑀕𑀸𑀴𑁆𑀳𑀁 𑀦𑀺𑀩𑀦𑁆𑀥𑀺𑀢𑁂 𑀲𑀸 𑀘𑀺𑀦𑁆𑀢𑁂𑀲𑀺, 𑀉𑀚𑀼𑀓𑀁 𑀫𑀬𑀸 𑀢𑀲𑁆𑀲𑀸 𑀧𑀺𑀴𑀦𑁆𑀥𑀦𑀁 𑀧𑀢𑁆𑀣𑁂𑀫𑀻𑀢𑀺 𑀯𑀼𑀢𑁆𑀢𑁂 𑀦 𑀧𑁆𑀧𑀢𑀺𑀭𑀼𑀧𑀁, 𑀢𑀲𑁆𑀲𑀸 𑀧𑀜𑁆𑀘𑀫𑀥𑀼𑀭 𑀫𑀁𑀲𑀁 𑀧𑀢𑁆𑀣𑁂𑀫𑀻𑀢𑀺 𑀯𑀼𑀢𑁆𑀢𑁂 𑀢𑀁 𑀫𑀸𑀭𑁂𑀲𑁆𑀲𑀢𑀺, 𑀢𑀤𑀸 𑀧𑀺𑀴𑀦𑁆𑀥𑀦𑀸𑀦𑀺 𑀫𑀬𑁆𑀳𑀫𑁂𑀯𑀸𑀢𑀺, 𑀢𑀢𑁄 𑀲𑀸𑀫𑀺 𑀢𑀯 𑀓𑀡𑀺𑀝𑁆𑀞𑀺𑀓𑀸𑀬 𑀧𑀜𑁆𑀘𑀫𑀥𑀼𑀭𑀫𑀁𑀲𑀁 𑀧𑀢𑁆𑀣𑁂𑀫𑀺, 𑀅𑀮𑀪𑀫𑀸𑀦𑀸𑀬 𑀫𑁂 𑀚𑀻𑀯𑀺𑀢𑀁 𑀦𑀢𑁆𑀣𑀻𑀢𑀺 𑀆𑀳, 𑀢𑀁 𑀲𑀼𑀢𑁆𑀯𑀸 𑀲𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀫𑀦𑀼𑀲𑁆𑀲𑀫𑀸𑀭𑀡𑀁 𑀦𑀸𑀫 𑀪𑀸𑀭𑀺𑀬𑀦𑁆𑀢𑀺 𑀯𑀢𑁆𑀯𑀸 𑀦𑀺𑀯𑀸𑀭𑁂𑀦𑁆𑀢𑁄𑀧𑀺 𑀦𑀺𑀯𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀅𑀣 𑀢𑀸𑀬 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀓𑀸𑀫𑀫𑀼𑀘𑁆𑀙𑀺𑀢𑁄 𑀫𑁄𑀳𑀫𑀽𑀴𑁆𑀳𑁄 𑀳𑀼𑀢𑁆𑀯𑀸 𑀲𑀸𑀥𑀼 𑀮𑀪𑀺𑀲𑁆𑀲𑀲𑀻𑀢𑀺 𑀢𑀲𑁆𑀲𑀸 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺. 𑀢𑀣𑀸𑀳𑀺.

𑁭.

𑀳𑀸𑀬𑀦𑁆𑀢𑀺 𑀇𑀥𑀮𑁄𑀓𑀢𑁆𑀣𑀸, 𑀳𑀸𑀬𑀦𑁆𑀢𑀺 𑀧𑀸𑀭𑀮𑁄𑀓𑀺𑀓𑀸;

𑀳𑀸𑀬𑀦𑁆𑀢𑀺 𑀫𑀳𑀢𑀸 𑀅𑀢𑁆𑀣𑀸, 𑀬𑁂 𑀇𑀢𑁆𑀣𑀻𑀦𑀁 𑀯𑀲𑀗𑁆𑀕𑀢𑀸.

𑁮.

𑀏𑀲𑀸 𑀫𑀸𑀢𑀸 𑀧𑀺𑀢𑀸 𑀏𑀲𑁄, 𑀪𑀕𑀺𑀦𑀻 𑀪𑀸𑀢𑀭𑁄 𑀇𑀫𑁂;

𑀕𑀭𑀼𑀢𑀩𑁆𑀩𑁂 𑀦 𑀚𑀸𑀦𑀦𑁆𑀢𑀺, 𑀬𑁂 𑀇𑀢𑁆𑀣𑀻𑀦𑀁 𑀯𑀲𑀗𑁆𑀕𑀢𑀸.

𑁯.

𑀓𑀸𑀭𑀡𑀸𑀓𑀸𑀭𑀡𑀦𑁆𑀢𑁂𑀢𑀁, 𑀓𑀢𑁆𑀢𑀩𑁆𑀩𑀁𑀯𑀸 𑀦 𑀯𑀸 𑀇𑀤𑀁;

𑀓𑀸𑀫𑀦𑁆𑀥𑀢𑁆𑀢𑀸 𑀦 𑀚𑀸𑀦𑀦𑁆𑀢𑀺, 𑀬𑁂 𑀇𑀢𑁆𑀣𑀻𑀦𑀁 𑀯𑀲𑀗𑁆𑀕𑀢𑀸.

𑁧𑁦.

𑀧𑀸𑀡𑀁 𑀯𑀸 𑀅𑀢𑀺𑀧𑀸𑀢𑁂𑀦𑁆𑀢𑀺, 𑀳𑁄𑀦𑁆𑀢𑀺 𑀯𑀸 𑀧𑀸𑀭𑀤𑀸𑀭𑀺𑀓𑀸;

𑀪𑀸𑀲𑀦𑁆𑀢𑀺 𑀅𑀮𑀺𑀓𑀁 𑀯𑀸𑀘𑀁, 𑀬𑁂 𑀇𑀢𑁆𑀣𑀻𑀦𑀁 𑀯𑀲𑀗𑁆𑀕𑀢𑀸.

𑁧𑁧.

𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀺𑀓𑀁 𑀣𑁂𑀬𑁆𑀬𑀁, 𑀫𑀚𑁆𑀚𑀧𑀸𑀦𑀁𑀘 𑀧𑁂𑀲𑀼𑀦𑀁;

𑀓𑀭𑁄𑀦𑁆𑀢𑀺 𑀲𑀸𑀳𑀲𑀁 𑀲𑀩𑁆𑀩𑀁, 𑀬𑁂 𑀇𑀢𑁆𑀣𑀻𑀦𑀁 𑀯𑀲𑀗𑁆𑀕𑀢𑀸.

𑁧𑁨.

𑀅𑀳𑁄 𑀅𑀘𑁆𑀙𑀭𑀺𑀬𑀁 𑀮𑁄𑀓𑁂, 𑀲𑀭𑀦𑁆𑀢𑀸𑀦𑀁 𑀪𑀬𑀸 𑀯𑀳𑀁;

𑀪𑀭𑀺𑀬𑀸𑀬 𑀯𑀲𑀁 𑀕𑀦𑁆𑀢𑁆𑀯𑀸, 𑀲𑁄𑀤𑀭𑀺𑀁𑀳𑀦𑁆𑀢𑀼𑀫𑀺𑀘𑁆𑀙𑀢𑀻𑀢𑀺.

𑀅𑀣 𑀲𑁄 𑀲𑀸𑀳𑀲𑀺𑀓𑁄 𑀧𑀼𑀭𑀺𑀲𑁄 𑀪𑀕𑀺𑀦𑀺 𑀏𑀯 𑀫𑀸𑀳, 𑀏𑀳𑀺 𑀅𑀫𑁆𑀫 𑀅𑀫𑁆𑀳𑀸𑀓𑀁 𑀫𑀸𑀢𑀸𑀧𑀺𑀢𑀼𑀦𑁆𑀦𑀁 𑀇𑀡𑀁 𑀲𑀸𑀥𑁂𑀲𑁆𑀲𑀸𑀫, 𑀅𑀧𑁆𑀧𑁂𑀯𑀦𑀸𑀫 𑀦𑁄 𑀤𑀺𑀲𑁆𑀯𑀸 𑀇𑀡𑀸𑀬𑀺𑀓𑀸 𑀇𑀡𑀁 𑀤𑀲𑁆𑀲𑀦𑁆𑀢𑀻𑀢𑀺, 𑀢𑀁 𑀲𑀼𑀢𑁆𑀯𑀸 𑀢𑀸𑀬 𑀲𑀫𑁆𑀧𑀝𑀺𑀘𑁆𑀙𑀺𑀢𑁂 ¶ 𑀲𑀼𑀔𑀬𑀸𑀦𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀇𑀡𑀸𑀬𑀺𑀓𑀸𑀦𑀁 𑀕𑀸𑀫𑀁 𑀕𑀘𑁆𑀙𑀦𑁆𑀢𑁄 𑀯𑀺𑀬 𑀫𑀳𑀸𑀅𑀝𑀯𑀺𑀁𑀧𑀢𑁆𑀯𑀸 𑀬𑀸𑀦𑀁 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀞𑀧𑁂𑀢𑁆𑀯𑀸 𑀯𑀺𑀭𑀯𑀦𑁆𑀢𑀺𑀫𑁂𑀯 𑀦𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀙𑀺𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑁂𑀲𑁂 𑀕𑀳𑁂𑀢𑁆𑀯𑀸 𑀪𑀽𑀫𑀺𑀬𑀁 𑀧𑀸𑀢𑁂𑀲𑀺, 𑀢𑀲𑁆𑀫𑀺𑀁 𑀔𑀡𑁂 𑀢𑀲𑁆𑀲𑀸 𑀓𑀫𑁆𑀫𑀚𑀯𑀸𑀢𑀸 𑀘𑀮𑀺𑀁𑀲𑀼. 𑀲𑀸 𑀪𑀸𑀢𑀼𑀮𑀚𑁆𑀚𑀸𑀬 𑀲𑀸𑀫𑀺 𑀓𑀫𑁆𑀫𑀚𑀯𑀸𑀢𑀸 𑀫𑁂 𑀘𑀮𑀺𑀁𑀲𑀼, 𑀬𑀸 𑀯𑀸 𑀳𑀁 𑀯𑀺𑀚𑀸𑀬𑀸𑀫𑀺, 𑀢𑀸𑀯 𑀉𑀧𑀥𑀸𑀭𑁂𑀳𑀻𑀢𑀺 𑀯𑀤𑀦𑁆𑀢𑀻𑀧𑀺 𑀅𑀧𑀦𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, 𑀅𑀣 𑀲𑁄 𑀢𑀁 𑀲𑀫𑀻𑀧𑁂 𑀯𑀝𑀭𑀼𑀓𑁆𑀔𑀫𑀽𑀮𑁂 𑀫𑀸𑀭𑁂𑀲𑁆𑀲𑀸𑀫𑀻𑀢𑀺 𑀘𑀺𑀓𑀼𑀭𑁂 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺, 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀸 𑀲𑀸𑀫𑀺 𑀢𑀯 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀫𑀼𑀔𑀁 𑀑𑀮𑁄𑀓𑁂𑀢𑁆𑀯𑀸 𑀢𑀲𑁆𑀲 𑀲𑀺𑀦𑁂𑀳𑁂𑀦𑀸𑀧𑀺 𑀫𑀁 𑀦 𑀫𑀸𑀭𑁂𑀳𑀻𑀢𑀺 𑀯𑀤𑀦𑁆𑀢𑀻 𑀬𑀸𑀘𑀺, 𑀅𑀣 𑀲𑁄 𑀓𑀓𑁆𑀔𑀴𑁄 𑀢𑀲𑁆𑀲𑀸 𑀢𑀁 𑀓𑀸𑀭𑀼𑀡𑀺𑀓𑀯𑀘𑀦𑀁 𑀅𑀲𑀼𑀡𑀦𑁆𑀢𑁄 𑀯𑀺𑀬 𑀫𑀸𑀭𑁂𑀢𑀼𑀁 𑀉𑀲𑁆𑀲𑀳𑀢𑁂𑀯, 𑀢𑀢𑁄 𑀲𑀸 𑀓𑀼𑀫𑀸𑀭𑀺𑀓𑀸 𑀅𑀢𑁆𑀢𑀦𑁄 𑀅𑀲𑀭𑀡𑀸 𑀘𑀺𑀦𑁆𑀢𑁂𑀲𑀺, 𑀫𑀫 𑀲𑀤𑁆𑀤𑁂𑀦𑀸 𑀕𑀦𑁆𑀢𑁆𑀯𑀸 𑀬𑁄 𑀓𑁄𑀘𑀺 𑀫𑀫 𑀪𑀸𑀢𑀼 𑀅𑀦𑀬𑀁 𑀓𑀭𑁂𑀬𑁆𑀬, 𑀢𑀁 𑀦 𑀧𑁆𑀧𑀢𑀺𑀭𑀽𑀧𑀦𑁆𑀢𑀺 𑀪𑀸𑀢𑀼𑀲𑀺𑀦𑁂𑀳𑁂𑀦 𑀦𑀺𑀲𑁆𑀲𑀤𑁆𑀤𑀸 𑀅𑀢𑁆𑀢𑀦𑀸 𑀕𑀢𑀺𑀢𑀲𑀭𑀡𑀁 𑀆𑀯𑀚𑁆𑀚𑀫𑀸𑀦𑀸 𑀦𑀺𑀧𑀚𑁆𑀚𑀺, 𑀅𑀣𑀲𑁆𑀲𑀸 𑀪𑀸 𑀢 𑀭𑀺 𑀫𑁂𑀢𑁆𑀢𑀸𑀦𑀼𑀪𑀸𑀯𑁂𑀦𑀘 𑀅𑀦𑀼𑀲𑁆𑀲𑀭𑀺𑀢𑀲𑀭𑀡𑀸𑀦𑀼𑀪𑀸𑀯𑁂𑀦𑀘 𑀢𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀏𑀯𑀭𑀽𑀧𑁄 𑀫𑀸𑀢𑀼𑀕𑀸𑀫𑁄 𑀏𑀢𑁆𑀣 𑀫𑀸𑀭𑀺𑀢𑀸 𑀅𑀪𑀯𑀺𑀲𑁆𑀲𑀸, 𑀅𑀤𑁆𑀥𑀸𑀳𑀁 𑀤𑁂𑀯𑀲𑀫𑀸𑀕𑀫𑀁 𑀧𑀯𑀺𑀲𑀺𑀢𑀼𑀁 𑀦 𑀮𑀪𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀢𑀺𑀲𑁆𑀲𑀸 𑀲𑀸 𑀫𑀺 𑀓𑁄 𑀯𑀺𑀬 𑀢𑀁 𑀢 𑀚𑁆𑀚𑁂 𑀢𑁆𑀯𑀸 𑀧𑀮𑀸𑀧𑁂𑀢𑁆𑀯𑀸 𑀢𑁆𑀯𑀁 𑀫𑀸 𑀪𑀸𑀬𑀻𑀢𑀺 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀬𑀸 𑀦 𑀓𑁂 𑀲 𑀧𑀼 𑀢𑁆𑀢𑀁 𑀓𑀼𑀫𑀸𑀭𑀺𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀢𑀁 𑀤𑀺𑀯𑀲𑀫𑁂𑀯 𑀲𑀸𑀯𑀢𑁆𑀣𑀺𑀫𑀸𑀕𑀫𑁆𑀫 𑀅𑀦𑁆𑀢𑁄𑀦𑀕𑀭𑁂 𑀲𑀸 𑀮𑀸 𑀬 𑀦𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀺. 𑀢𑀣𑀸𑀳𑀺.

𑁧𑁩.

𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀤𑀸𑀢𑀸𑀭𑀁, 𑀲𑀩𑁆𑀩𑀮𑁄𑀓𑁂𑀓𑀦𑀸𑀬𑀓𑀁;

𑀫𑀦𑀲𑀸𑀧𑀺 𑀬𑁄 𑀯𑀺𑀪𑀸𑀯𑁂𑀢𑀺, 𑀢𑀁 𑀯𑁂 𑀧𑀸𑀮𑁂𑀦𑁆𑀢𑀺 𑀤𑁂𑀯𑀢𑀸.

𑁧𑁪.

𑀫𑀼𑀳𑀼𑀢𑁆𑀢𑀫𑁆𑀧𑀺𑀘 𑀬𑁄 𑀫𑁂𑀢𑁆𑀢𑀁, 𑀪𑀸𑀯𑁂𑀢𑀺 𑀬𑀤𑀺 𑀲𑀸𑀥𑀼𑀓𑀁;

𑀢𑀁 𑀯𑁂 𑀧𑀸𑀮𑁂𑀦𑁆𑀢𑀺 𑀤𑁂𑀯𑀸𑀧𑀺, 𑀢𑁄𑀲𑀬𑀦𑁆𑀢𑀺 𑀉𑀧𑀸𑀬𑀦𑀸𑀢𑀺.

𑀢𑀢𑁄 ¶ 𑀢𑀲𑁆𑀲𑀸 𑀧𑀦 𑀲𑀸𑀫𑀺𑀓𑁄 𑀦𑀕𑀭𑀸 𑀦𑀺𑀓𑁆𑀔𑀫𑁆𑀫 𑀕𑀘𑁆𑀙𑀦𑁆𑀢𑁄 𑀅𑀢𑁆𑀢𑀦𑁄 𑀪𑀭𑀺𑀬𑀁 𑀤𑀺𑀲𑁆𑀯𑀸 𑀢𑁆𑀯𑀁 𑀓𑀤𑀸 𑀆𑀕𑀢𑀸, 𑀓𑁂𑀦𑀸𑀦𑀻𑀢𑀸𑀲𑀻𑀢𑀺 𑀧𑀼𑀘𑁆𑀙𑀺. 𑀲𑀸 𑀤𑁂𑀯𑀢𑀸𑀬 𑀆𑀦𑀻𑀢𑀪𑀸𑀯𑀁 𑀅𑀚𑀸𑀦𑀦𑁆𑀢𑀻 𑀓𑀺𑀁 𑀢𑁆𑀯𑀁 𑀪𑀡𑀲𑀺, 𑀦𑀦𑀼 𑀢𑀬𑀸 𑀆𑀦𑀻𑀢𑀸𑀫𑁆𑀳𑀻𑀢𑀺, 𑀲𑁄𑀧𑀺 𑀓𑀺𑀁𑀪𑁄𑀢𑀺 𑀪𑀡𑀲𑀺, 𑀢𑀯 𑀪𑀸𑀢𑀼𑀕𑀸𑀫𑁂 𑀤𑀺𑀝𑁆𑀞𑀓𑀸𑀮𑀢𑁄 𑀧𑁆𑀧𑀢𑀼𑀢𑀺 𑀅𑀚𑁆𑀚 𑀘𑀢𑁆𑀢𑀸𑀭𑁄 𑀫𑀸𑀲𑀸 𑀚𑀸𑀢𑀸, 𑀏𑀢𑁆𑀢𑀓𑀁 𑀓𑀸𑀮𑀁 𑀢𑁆𑀯𑀁 𑀦 𑀤𑀺𑀝𑁆𑀞𑀧𑀼𑀩𑁆𑀩𑀸, 𑀓𑀣𑀁 𑀢𑁆𑀯𑀁 𑀫𑀬𑀸 𑀲𑀤𑁆𑀥𑀺𑀁𑀆𑀕𑀢𑀸𑀢𑀺 𑀧𑀼𑀘𑁆𑀙𑀺. 𑀲𑀸 𑀢𑀁 𑀲𑀼𑀢𑁆𑀯𑀸 𑀢𑁂𑀦𑀳𑀺 𑀫𑀸𑀜𑁆𑀜𑀲𑁆𑀲 𑀇𑀫𑀁 𑀭𑀳𑀲𑁆𑀲𑀁 𑀓𑀣𑁂𑀳𑀺 𑀲𑀸𑀫𑀻𑀢𑀺 𑀯𑀢𑁆𑀯𑀸 𑀪𑀸 𑀢 𑀭𑀸 𑀅𑀢𑁆𑀢𑀦𑁄 𑀓𑀢𑀁 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀲𑀸𑀫𑀺𑀓𑁄 𑀲𑀁𑀯𑀺𑀕𑁆𑀕𑁄 𑀪𑀬𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀕𑁂𑀳𑀁 𑀧𑀸𑀧𑁂𑀲𑀺, 𑀢𑀢𑁄 𑀓𑀢𑀺𑀧𑀸𑀳𑀁 𑀢𑀸𑀬 𑀯𑀺𑀲𑁆𑀲𑀫𑀺𑀢𑁂 𑀢𑁂 𑀉𑀪𑁄𑀧𑀺 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑁂 𑀦𑀺𑀲𑀻𑀤𑀺𑀁𑀲𑀼, 𑀅𑀣 𑀲𑀸 𑀪𑀕𑀯𑀢𑁄 𑀲𑀭𑀡𑀲𑀻𑀮𑀸𑀦𑀼𑀪𑀸𑀯𑁂𑀦 𑀅𑀢𑁆𑀢𑀦𑁄 𑀚𑀻𑀯𑀺𑀢𑀧𑀝𑀺𑀮𑀸𑀪𑀁 𑀧𑀓𑀸𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀪𑀕𑀯𑀦𑁆𑀢𑀁 𑀯𑀦𑁆𑀤𑀸𑀧𑁂𑀢𑁆𑀯𑀸 𑀲𑀭𑀡𑁄𑀢𑀺𑀦𑀸𑀫𑀫𑀓𑀁𑀲𑀼, 𑀲𑀢𑁆𑀣𑀸 𑀢𑁂 𑀲𑀁 𑀅𑀚𑁆𑀛𑀸𑀲𑀬𑀁 𑀜𑀢𑁆𑀯𑀸 𑀢𑀤𑀦𑀼𑀭𑀽𑀧𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀯𑀲𑀸𑀦𑁂 𑀉𑀪𑁄𑀧𑀺 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁, 𑀅𑀣𑀲𑁆𑀲𑀸 𑀧𑀼𑀢𑁆𑀢𑁄 𑀲𑀭𑀡𑀓𑀼𑀫𑀸𑀭𑁄 𑀯𑀻𑀲𑀢𑀺𑀫𑁂 𑀯𑀲𑁆𑀲𑁂 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀲𑀭𑀡𑀢𑁆𑀣𑁂𑀭𑁄𑀦𑀸𑀫 𑀧𑀜𑁆𑀜𑀸𑀬𑀻𑀢𑀺.

𑁧𑁫.

𑀔𑀡𑀫𑀧𑀺 𑀫𑀦𑀲𑁂𑀯𑀁 𑀤𑁂𑀯𑀤𑁂𑀯𑀁 𑀲𑀭𑀦𑁆𑀢𑀸,

𑀧𑀭𑀫𑀢𑀭𑀧𑀢𑀺𑀝𑁆𑀞𑀁 𑀧𑀸𑀧𑀼𑀡𑀦𑁆𑀢𑀻𑀢𑀺 𑀫𑀦𑁆𑀢𑁆𑀯𑀸;

𑀪𑀯𑀕𑀢𑀺 𑀕𑀼𑀡𑀭𑀸𑀲𑀺𑀁 𑀚𑀸𑀦𑀫𑀸𑀦𑀸 𑀚𑀦𑀸 𑀪𑁄;

𑀪𑀚𑀣 𑀲𑀭𑀡𑀲𑀻𑀮𑀁 𑀲𑀩𑁆𑀩𑀣𑀸 𑀲𑀩𑁆𑀩𑀓𑀸𑀮𑀦𑁆𑀢𑀺.

𑀲𑀭𑀡𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼𑀁 𑀙𑀝𑁆𑀞𑀫𑀁.

𑁭. 𑀯𑁂𑀲𑁆𑀲𑀸𑀫𑀺𑀢𑁆𑀢𑀸𑀬 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀚𑀫𑁆𑀩𑀼𑀤𑀻𑀧𑁂 ¶ 𑀓𑀺𑀭 𑀓𑁄𑀲𑀫𑁆𑀩𑀺𑀦𑀕𑀭𑁂 𑀓𑁄𑀲𑀫𑁆𑀩𑀺𑀭𑀜𑁆𑀜𑁄 𑀯𑁂𑀲𑁆𑀲𑀸𑀫𑀺𑀢𑁆𑀢𑀸𑀦𑀸𑀫 𑀅𑀕𑁆𑀕𑀫𑀳𑁂𑀲𑀻 𑀅𑀳𑁄𑀲𑀺. 𑀢𑀤𑀸 𑀪𑀕𑀯𑀸 𑀓𑁄𑀲𑀫𑁆𑀩𑀺𑀬𑀁 𑀧𑀝𑀺𑀯𑀲𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀅𑀦𑁄𑀧𑀫𑀸𑀬 𑀩𑀼𑀤𑁆𑀥𑀮𑀻𑀴𑀸𑀬 𑀫𑀥𑀼𑀭𑁂𑀦 𑀲𑀭𑁂𑀦 𑀤𑁂𑀲𑁂𑀦𑁆𑀢𑀲𑁆𑀲 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀸 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀩𑀼𑀤𑁆𑀥𑀫𑀸𑀫𑀺𑀓𑀸 𑀳𑀼𑀢𑁆𑀯𑀸 𑀯𑀺𑀳𑀭𑀢𑀺. 𑀅𑀣𑀸 𑀧𑀭𑀪𑀸𑀕𑁂 𑀢𑀲𑁆𑀲 𑀭𑀜𑁆𑀜𑁄 𑀭𑀚𑁆𑀚𑀢𑁆𑀣𑀸𑀬 𑀧𑀘𑁆𑀘𑀦𑁆𑀢𑀭𑀸𑀚𑀸 𑀬𑀼𑀤𑁆𑀥𑀲𑀚𑁆𑀚𑁄 𑀭𑀚𑁆𑀚𑀁 𑀯𑀸 𑀤𑁂𑀢𑀼, 𑀬𑀼𑀤𑁆𑀥𑀁𑀯𑀸𑀢𑀺 𑀧𑀡𑁆𑀡𑀁 𑀧𑀳𑀺𑀡𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀧𑀭𑀺𑀯𑀼𑀢𑁄 𑀬𑀼𑀤𑁆𑀥𑀪𑀽𑀫𑀺𑀁 𑀕𑀘𑁆𑀙𑀦𑁆𑀢𑁄 𑀫𑀳𑁂𑀲𑀺𑀬𑀸 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑀸𑀲𑁂𑀢𑁆𑀯𑀸 𑀢𑀲𑁆𑀲𑀸 𑀏𑀯𑀫𑀸𑀳. 𑀪𑀤𑁆𑀤𑁂 𑀲𑀗𑁆𑀕𑀸𑀫𑀲𑀻𑀲𑁂 𑀚𑀬𑀧𑀭𑀸𑀚𑀬𑁄 𑀦𑀸𑀫 𑀦 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀲𑀘𑁂 𑀫𑁂 𑀧𑀭𑀸𑀚𑀬𑁄 𑀅𑀪𑀯𑀺𑀲𑁆𑀲, 𑀧𑀼𑀭𑁂𑀢𑀭𑀫𑁂𑀯 𑀭𑀢𑁆𑀢𑀧𑀢𑀸𑀓𑀁 𑀉𑀲𑁆𑀲𑀸𑀧𑁂𑀲𑁆𑀲𑀸𑀫𑀺, 𑀢𑁂𑀦 𑀅𑀪𑀺𑀜𑁆𑀜𑀸𑀡𑁂𑀦 𑀢𑁆𑀯𑀁 𑀓𑁄𑀲𑀫𑁆𑀩𑀺𑀫𑁂𑀯 𑀕𑀘𑁆𑀙𑀸𑀳𑀻𑀢𑀺 𑀅𑀦𑀼𑀲𑀸𑀲𑀺𑀢𑁆𑀯𑀸 𑀲𑀗𑁆𑀕𑀸𑀫 𑀫𑀡𑁆𑀟𑀮𑀁 𑀕𑀦𑁆𑀢𑁆𑀯𑀸 𑀫𑀳𑀸𑀭𑀡𑀁 𑀓𑀭𑁄𑀦𑁆𑀢𑁄 𑀅𑀢𑁆𑀢𑀦𑁄 𑀧𑀭𑀸𑀚𑀬𑀪𑀸𑀯𑀁 𑀜𑀢𑁆𑀯𑀸 𑀫𑀸𑀢𑀼𑀕𑀸𑀫𑀁 𑀲𑀭𑀺𑀢𑁆𑀯𑀸 𑀭𑀢𑁆𑀢𑀤𑁆𑀥𑀚𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀬𑀼𑀚𑁆𑀛𑀦𑁆𑀢𑁄 𑀭𑀡𑁂 𑀧𑀢𑀺. 𑀅𑀣 𑀲𑀸 𑀭𑀢𑁆𑀢𑀧𑀢𑀸𑀓𑀁 𑀤𑀺𑀲𑁆𑀯𑀸 𑀧𑀭𑀸𑀚𑀺𑀢𑁄 𑀦𑀽𑀦 𑀫𑁂 𑀲𑀸𑀫𑀺𑀓𑁄𑀢𑀺 𑀪𑀬𑁂𑀦 𑀧𑀮𑀸𑀬𑀺𑀢𑀼𑀫𑀸𑀭𑀪𑀺. 𑀅𑀣 𑀢𑀁 𑀘𑁄𑀭𑀭𑀜𑁆𑀜𑁄 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 𑀦𑀽𑀦𑀸𑀬𑀁 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀻𑀢𑀺 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀭𑀸𑀚𑀸𑀦𑀁 𑀤𑀲𑁆𑀲𑁂𑀲𑀼𑀁, 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀫𑀫𑁂𑀢𑀁 𑀅𑀪𑀺𑀲𑁂𑀓𑀁 𑀓𑀭𑁄𑀣𑀸𑀢𑀺 𑀅𑀫𑀘𑁆𑀘𑁂 𑀆𑀡𑀸𑀧𑁂𑀲𑀺. 𑀅𑀫𑀘𑁆𑀘𑀸 𑀢𑀁 𑀅𑀪𑀺𑀲𑁂𑀓𑀢𑁆𑀣𑀸𑀬 𑀬𑀸𑀘𑀺𑀁𑀲𑀼, 𑀲𑀸 𑀦 𑀫𑁂 𑀪𑀡𑁂 𑀅𑀪𑀺𑀲𑁂𑀓𑁂𑀦𑀢𑁆𑀣𑁄𑀢𑀺 𑀦 𑀇𑀘𑁆𑀙𑀺. 𑀅𑀫𑀘𑁆𑀘𑀸 𑀢𑀫𑀢𑁆𑀣𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀦𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀓𑀲𑁆𑀫𑀸 𑀦 𑀇𑀘𑁆𑀙𑀲𑀻𑀢𑀺 𑀧𑀼𑀘𑁆𑀙𑀺. 𑀲𑀸 𑀏𑀯𑀫𑀸𑀳.

𑁧.

𑀲𑀼𑀡𑁄𑀳𑀺 𑀲𑀸𑀥𑀼𑀓𑀁 𑀤𑁂𑀯, 𑀪𑀸𑀲𑀫𑀸𑀦𑀸𑀬 𑀫𑁂 𑀯𑀘𑁄;

𑀪𑀢𑁆𑀢𑀸 𑀫𑀬𑁆𑀳𑀁 𑀫𑀢𑁄 𑀅𑀚𑁆𑀚, 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀤𑀸𑀬𑀓𑁄.

𑁨.

𑀓𑀢𑁆𑀯𑀸𑀦 ¶ 𑀲𑁄𑀪𑀺𑀲𑁂𑀓𑀁 𑀫𑀁, 𑀅𑀢𑁆𑀢𑀦𑁄 𑀳𑀤𑀬𑀁 𑀯𑀺𑀬;

𑀧𑀸𑀮𑁂𑀢𑀺 𑀢𑀁 𑀲𑀭𑀦𑁆𑀢𑀲𑁆𑀲𑀸, 𑀲𑁄𑀓𑀕𑁆𑀕𑀺 𑀤𑀳𑀢𑁂 𑀫𑀦𑀁.

𑁩.

𑀫𑀳𑀸𑀭𑀸𑀚 𑀲𑀘𑀜𑁆𑀜𑀲𑁆𑀲, 𑀅𑀲𑁆𑀲 𑀫𑀕𑁆𑀕𑀫𑀳𑁂𑀲𑀺𑀓𑀸;

𑀢𑀫𑁆𑀳𑀸 𑀤𑀼𑀓𑁆𑀔𑀸 𑀦 𑀫𑀼𑀘𑁆𑀘𑀸𑀫𑀺, 𑀢𑁂𑀦𑀸𑀳𑀁 𑀢𑀁 𑀦 𑀧𑀢𑁆𑀣𑀬𑁂.

𑁪.

𑀲𑁄𑀓𑀕𑁆𑀕𑀺𑀦𑀸 𑀧𑀤𑀺𑀢𑁆𑀢𑀸𑀳𑀁, 𑀲𑁄𑀓𑁂 𑀲𑁄𑀓𑀁 𑀓𑀣𑀁 𑀔𑀺𑀧𑁂;

𑀚𑀮𑀦𑁆𑀢𑀕𑁆𑀕𑀺𑀫𑁆𑀳𑀻 𑀓𑁄 𑀦𑀸𑀫, 𑀧𑀮𑀸𑀮𑀁 𑀧𑀓𑁆𑀔𑀺𑀧𑁂 𑀩𑀼𑀥𑁄.

𑁫.

𑀧𑀺𑀬𑀯𑀺𑀧𑁆𑀧𑀬𑁄𑀕𑀤𑀼𑀓𑁆𑀔𑀁, 𑀢𑀁 𑀘𑀺𑀦𑁆𑀢𑀬𑀦𑁆𑀢𑀻 𑀧𑀼𑀦𑀧𑁆𑀧𑀼𑀦𑀁;

𑀢𑀫𑁆𑀳𑀸 𑀤𑀼𑀓𑁆𑀔𑀸 𑀦 𑀫𑀼𑀘𑁆𑀘𑀸𑀫𑀺, 𑀢𑀲𑁆𑀫𑀸𑀳𑀁 𑀢𑀁 𑀦 𑀧𑀢𑁆𑀣𑀬𑁂𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀓𑁄𑀥𑁂𑀦𑀸𑀪𑀺𑀪𑀽𑀢𑁄 𑀲𑀘𑁂 𑀦𑀸𑀪𑀺𑀲𑀺𑀜𑁆𑀘𑀺𑀲𑁆𑀲𑀲𑀺, 𑀅𑀕𑁆𑀕𑀺𑀫𑁆𑀳𑀺 𑀢𑀁 𑀧𑀓𑁆𑀔𑀺𑀧𑀺𑀲𑁆𑀲𑀸𑀫𑀻𑀢𑀺 𑀯𑀢𑁆𑀯𑀸 𑀫𑀳𑀦𑁆𑀢𑀁 𑀤𑀸𑀭𑀼𑀘𑀺𑀢𑀓𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀏𑀓𑀧𑀚𑁆𑀚𑁄𑀢𑁂 𑀚𑀸𑀢𑁂 𑀏𑀢𑁆𑀢 𑀧𑀯𑀺𑀲𑀸𑀢𑀺 𑀆𑀳. 𑀅𑀣 𑀲𑀸 𑀬𑀸𑀘𑀦𑁆𑀢𑀻 𑀭𑀸𑀚𑀸𑀦𑀁 𑀆𑀳.

𑁬.

𑀧𑀸𑀧𑁄 𑀦𑀺𑀧𑁆𑀧𑀸𑀧𑀺𑀦𑀁 𑀭𑀸𑀚, 𑀧𑀸𑀢𑀦𑀁 𑀔𑀮𑀼 𑀧𑀸𑀯𑀓𑁂;

𑀳𑁄𑀢𑀺 𑀧𑀸𑀧𑀨𑀮𑀁 𑀢𑀲𑁆𑀲, 𑀧𑀘𑁆𑀘𑀢𑁆𑀢𑁂𑀘 𑀧𑀭𑀢𑁆𑀣𑀘.

𑁭.

𑀧𑀼𑀭𑀸𑀢𑀦𑁂𑀳𑀺 𑀪𑀽𑀧𑀸𑀮, 𑀲𑀫𑀡𑀩𑁆𑀭𑀳𑁆𑀫𑀡𑁂𑀲𑀼𑀘;

𑀫𑀸𑀢𑀸𑀧𑀺𑀢𑀼𑀲𑀼 𑀩𑀸𑀮𑁂𑀲𑀼, 𑀭𑁄𑀕𑁂𑀦𑀸 𑀢𑀼𑀭𑀇𑀢𑁆𑀣𑀺𑀲𑀼;

𑀦𑀧𑁆𑀧𑀲𑀢𑁆𑀣𑁄 𑀯𑀥𑁄 𑀤𑁂𑀯, 𑀢𑀲𑁆𑀫𑀸𑀳𑀁 𑀦 𑀯𑀥𑀸𑀭𑀳𑀸𑀢𑀺.

𑀢𑀁 𑀲𑀼𑀢𑁆𑀯𑀸𑀧𑀺 𑀭𑀸𑀚𑀸 𑀅𑀲𑀤𑁆𑀤𑀳𑀦𑁆𑀢𑁄 𑀫𑀦𑀼𑀲𑁆𑀲𑁂 𑀆𑀡𑀸𑀧𑁂𑀲𑀺. 𑀏𑀢𑀸𑀬 𑀳𑀢𑁆𑀣𑀧𑀸𑀤𑁂 𑀕𑀳𑁂𑀢𑁆𑀯𑀸 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀧𑀣𑀸𑀢𑀺 𑀢𑁂 𑀢𑀣𑀸 𑀓𑀭𑀺𑀁𑀲𑀼, 𑀅𑀣 𑀲𑀸 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀧𑀫𑀸𑀦𑀸 𑀦𑀢𑁆𑀣𑁂𑀢𑁆𑀣 𑀫𑁂 𑀓𑁄𑀘𑀺 𑀧𑀝𑀺𑀲𑀭𑀡𑁄𑀢𑀺 𑀲𑀭𑀡𑀫𑁂𑀯 𑀲𑀭𑀡𑀁 𑀓𑀭𑁄𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻𑀢𑀺’’ 𑀯𑀤𑀦𑁆𑀢𑀻 𑀫𑀦𑀲𑀸𑀘 𑀅𑀦𑀼𑀲𑁆𑀲𑀭𑀦𑁆𑀢𑀻 𑀅𑀕𑁆𑀕𑀺𑀫𑁆𑀳𑀺 𑀧𑀢𑀺, 𑀢𑀣𑀸𑀯𑀺𑀥𑁄𑀧𑀺 𑀅𑀕𑁆𑀕𑀺 𑀢𑀲𑁆𑀲𑀸 𑀲𑀭𑀻𑀭𑁂 𑀮𑁄𑀫𑀓𑀽𑀧𑀫𑀢𑁆𑀢𑀫𑁆𑀧𑀺 𑀉𑀡𑁆𑀳𑀸𑀓𑀸𑀭𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀧𑀤𑀼𑀫𑀕𑀩𑁆𑀪𑀁 𑀧𑀯𑀺𑀝𑁆𑀞𑀸 𑀯𑀺𑀬 𑀲𑀻𑀢𑀺𑀪𑀽𑀢𑀲𑀭𑀻𑀭𑀸 𑀅𑀳𑁄𑀲𑀺. 𑀭𑀸𑀚𑀸 𑀢𑀁 𑀅𑀘𑁆𑀙𑀭𑀺𑀬𑀁 ¶ 𑀤𑀺𑀲𑁆𑀯𑀸 𑀲𑀁𑀯𑀺𑀕𑁆𑀕𑁄 𑀮𑁄𑀫𑀳𑀝𑁆𑀞𑀚𑀸𑀢𑁄 𑀯𑁂𑀕𑁂𑀦 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳 𑀉𑀭𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀭𑀸𑀚𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀜𑁆𑀚𑀮𑀺𑀁 𑀕𑀕𑁆𑀕𑀬𑁆𑀳 𑀞𑀺𑀢𑁄 𑀓𑀲𑁆𑀫𑀸 𑀢𑁂 𑀢𑀁 𑀅𑀕𑁆𑀕𑀺 𑀲𑀭𑀻𑀭𑀁 𑀫𑀸 𑀧𑀭𑀺𑀤𑀳𑀻𑀢𑀺 𑀧𑀼𑀘𑁆𑀙𑀺. 𑀲𑀸 𑀢𑀁 𑀓𑀸𑀭𑀡𑀁 𑀓𑀣𑁂𑀦𑁆𑀢𑀻 𑀏𑀯 𑀫𑀸𑀳.

𑁮.

𑀫𑀸𑀢𑀸 𑀧𑀺𑀢𑀸𑀘 𑀜𑀸𑀢𑀻𑀘, 𑀧𑀭𑀺𑀯𑀸𑀭𑀸𑀘 𑀲𑁄𑀳𑀤𑀸;

𑀫𑀦𑁆𑀢𑁄 𑀲𑀥𑀸𑀤𑀬𑁄𑀘𑀸𑀧𑀺, 𑀫𑀳𑁂𑀲𑀓𑁆𑀔𑀸𑀘 𑀤𑁂𑀯𑀢𑀸.

𑁯.

𑀏𑀢𑁂𑀘 𑀜𑁆𑀜𑁂𑀘 𑀪𑀽𑀧𑀸𑀮, 𑀲𑀢𑁆𑀢𑀸𑀦𑀁 𑀪𑀬 𑀫𑀸𑀕𑀢𑁂;

𑀭𑀓𑁆𑀔𑀺𑀢𑀼𑀁 𑀦𑁂𑀯 𑀲𑀓𑁆𑀓𑁄𑀦𑁆𑀢𑀺, 𑀳𑀺𑀢𑁆𑀯𑀸𑀦 𑀲𑀭𑀡𑀢𑁆𑀢𑀬𑀁.

𑁧𑁦.

𑀅𑀕𑀸𑀳𑀁 𑀩𑀼𑀤𑁆𑀥𑀁 𑀲𑀭𑀡𑀁, 𑀩𑀼𑀤𑁆𑀥𑁄 𑀫𑁂 𑀲𑀭𑀡𑀁 𑀇𑀢𑀺;

𑀢𑁂𑀦 𑀢𑁂𑀚𑁂𑀦 𑀫𑀁 𑀭𑀸𑀚, 𑀚𑀮𑀦𑁆𑀢𑁄 𑀅𑀕𑁆𑀕𑀺 𑀦𑁄 𑀤𑀳𑀺.

𑁧𑁧.

𑀅𑀕𑀸𑀳𑀁 𑀥𑀫𑁆𑀫𑀁 𑀲𑀭𑀡𑀁, 𑀥𑀫𑁆𑀫𑁄 𑀫𑁂 𑀲𑀭𑀡𑀁 𑀇𑀢𑀺;

𑀢𑁂𑀦 𑀢𑁂𑀚𑁂𑀦 𑀫𑀁 𑀭𑀸𑀚, 𑀚𑀮𑀦𑁆𑀢𑁄 𑀅𑀕𑁆𑀕𑀺 𑀦𑁄 𑀤𑀳𑀺.

𑁧𑁨.

𑀅𑀕𑀸𑀳𑀁 𑀲𑀗𑁆𑀖𑀁 𑀲𑀭𑀡𑀁, 𑀲𑀗𑁆𑀖𑁄 𑀫𑁂 𑀲𑀭𑀡𑀁 𑀇𑀢𑀺;

𑀢𑁂𑀦 𑀢𑁂𑀚𑁂𑀦 𑀫𑀁 𑀭𑀸𑀚, 𑀚𑀮𑀦𑁆𑀢𑁄 𑀅𑀕𑁆𑀕𑀺 𑀦𑁄 𑀤𑀳𑀺.

𑁧𑁩.

𑀏𑀯𑀁 𑀫𑀳𑀸𑀦𑀼𑀪𑀸𑀯𑀦𑁆𑀢𑀁, 𑀧𑀘𑁆𑀘𑀓𑁆𑀔𑀁 𑀏𑀳𑀺𑀧𑀲𑁆𑀲𑀺𑀓𑀁;

𑀦𑀸𑀦𑁄 𑀧𑀤𑁆𑀤𑀯 𑀯𑀺𑀤𑁆𑀥𑀁𑀲𑀺𑀁, 𑀦𑀸𑀦𑀸𑀲𑀫𑁆𑀧𑀢𑁆𑀢𑀺𑀤𑀸𑀬𑀓𑀁.

𑁧𑁪.

𑀲𑀭𑀡𑀢𑁆𑀢𑀬𑀜𑁆𑀳𑀺 𑀬𑁄 𑀲𑀢𑁆𑀢𑁄, 𑀦 𑀲𑀫𑀸𑀤𑀸𑀬 𑀕𑀡𑁆𑀳𑀢𑀺;

𑀇𑀥𑀯𑀸 𑀧𑀭𑀢𑁆𑀣𑀯𑀸 𑀮𑁄𑀓𑁂, 𑀲𑁄 𑀲𑀼𑀔𑀁 𑀦𑀸𑀦𑀼𑀪𑁄𑀲𑁆𑀲𑀢𑀺.

𑁧𑁫.

𑀲𑀭𑀡𑀢𑁆𑀢𑀬𑀜𑁆𑀳𑀺 𑀬𑁄 𑀲𑀢𑁆𑀢𑁄, 𑀲𑀼𑀲𑀫𑀸𑀤𑀸𑀬 𑀕𑀡𑁆𑀳𑀢𑀺;

𑀇𑀥𑀯𑀸𑀧𑀭𑀢𑁆𑀣𑀯𑀸 𑀮𑁄𑀓𑁂, 𑀲𑁄 𑀲𑀼𑀔𑀸 𑀦 𑀯𑀺𑀳𑀸𑀬𑀢𑀺.

𑁧𑁬.

𑀢𑀲𑁆𑀫𑀸 𑀢𑀼𑀯𑀫𑁆𑀧𑀺 𑀪𑀽𑀧𑀸𑀮, 𑀕𑀡𑁆𑀳𑀸𑀳𑀺 𑀲𑀭𑀡𑀢𑁆𑀢𑀬𑀁;

𑀢𑀁 𑀢𑁂 𑀪𑀯𑀢𑀺 𑀲𑀩𑁆𑀩𑀢𑁆𑀣, 𑀢𑀸𑀡𑀁 𑀮𑁂𑀡𑀁 𑀧𑀭𑀸𑀬𑀡𑀦𑁆𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀅𑀢𑀺𑀯𑀺𑀬 𑀧𑀲𑀦𑁆𑀦𑀫𑀸𑀦𑀲𑁄 𑀢𑀁 𑀔𑀫𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀢𑁆𑀯𑀸 𑀅𑀚𑁆𑀚𑀧𑁆𑀧𑀝𑁆𑀞𑀸𑀬 𑀢𑁆𑀯𑀁 𑀫𑀫 𑀫𑀸𑀢𑀸𑀢𑀺 𑀢𑀁 𑀫𑀸𑀢𑀼𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀲𑀭𑀡 𑀫𑀕𑀫𑀸𑀲𑀺. 𑀢𑀲𑁆𑀫𑀺𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀞𑀺𑀢𑀫𑀳𑀸𑀚𑀦𑀸 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀲𑀭𑀡𑁂𑀲𑀼𑀘 𑀲𑀻𑀮𑁂𑀲𑀼𑀘 𑀧𑀢𑀺𑀝𑁆𑀞𑀸𑀬 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑀸𑀢𑀺.

𑁧𑁭.

𑀇𑀢𑀺 ¶ 𑀲𑀭𑀡𑀯𑀭𑀁 𑀲𑀸 𑀓𑁂𑀯𑀮𑀁 𑀉𑀕𑁆𑀕𑀳𑁂𑀢𑁆𑀯𑀸,

𑀚𑀮𑀺𑀢𑀤𑀳𑀦𑀫𑀚𑁆𑀛𑁂 𑀲𑀻𑀢𑀺𑀪𑀸𑀯𑀁 𑀅𑀮𑀢𑁆𑀣;

𑀧𑀭𑀫𑀲𑀭𑀡𑀲𑀻𑀮𑀁 𑀧𑀸𑀮𑀬𑀦𑁆𑀢𑀸 𑀓𑀣𑀁 𑀯𑁄,

𑀦 𑀮𑀪𑀣 𑀪𑀯𑀪𑁄𑀕𑀁 𑀦𑀺𑀩𑁆𑀩𑀼𑀢𑀺𑀜𑁆𑀘𑀸𑀧𑀺 𑀅𑀦𑁆𑀢𑁂𑀢𑀺.

𑀯𑁂𑀲𑁆𑀲𑀸𑀫𑀺𑀢𑁆𑀢𑀸𑀧 𑀯𑀢𑁆𑀣𑀼𑀁 𑀲𑀢𑁆𑀢𑀫𑀁.

𑁮. 𑀫𑀳𑀸𑀫𑀦𑁆𑀥𑀸𑀢𑀼𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀇𑀢𑁄 𑀓𑀺𑀭 𑀏𑀓𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀯𑀺𑀧𑀲𑁆𑀲𑀻𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀯𑀢𑁆𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀲𑀤𑁂𑀯𑀓𑁂𑀳𑀺 𑀮𑁄𑀓𑁂𑀳𑀺 𑀧𑀽𑀚𑀺𑀬𑀫𑀸𑀦𑁄 𑀩𑀦𑁆𑀥𑀼𑀫𑀢𑀻𑀦𑀕𑀭𑁂 𑀧𑀝𑀺𑀯𑀲𑀢𑀺. 𑀢𑀤𑀸 𑀲𑁄 𑀫𑀦𑁆𑀥𑀸𑀢𑀸 𑀢𑀲𑁆𑀫𑀺𑀁 𑀦𑀕𑀭𑁂 𑀢𑀼𑀦𑁆𑀦𑀓𑀸𑀭𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀼𑀦𑁆𑀦𑀓𑀸𑀭𑀓𑀫𑁆𑀫𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁄 𑀯𑀺𑀳𑀭𑀢𑀺. 𑀢𑀤𑀸 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀩𑀼𑀤𑁆𑀥𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀤𑀸𑀦 𑀫𑀤𑀁𑀲𑀼. 𑀅𑀣 𑀲𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺, 𑀲𑀩𑁆𑀩𑁂𑀧𑀺𑀫𑁂 𑀦𑀕𑀭𑀯𑀸𑀲𑀺𑀦𑁄 𑀤𑀸𑀦𑀁 𑀤𑀤𑀦𑁆𑀢𑀺. 𑀅𑀳𑀫𑁂𑀓𑁄𑀯 𑀲𑁂𑀲𑁄 𑀤𑀼𑀕𑁆𑀕𑀢𑀢𑁆𑀢𑀸, 𑀬𑀚𑁆𑀚𑀸𑀳𑀫𑀚𑁆𑀚 𑀩𑀻𑀚𑀁 𑀦 𑀭𑁄𑀧𑁂𑀫𑀺, 𑀇𑀫𑀫𑁆𑀳𑀸 𑀤𑀼𑀓𑁆𑀔𑀸 𑀦 𑀧𑀭𑀺𑀫𑀼𑀘𑁆𑀘𑀺𑀲𑁆𑀲𑀸𑀫𑀻𑀢𑀺. 𑀲𑁄 𑀯𑁂𑀕𑁂𑀦 𑀢𑀼𑀦𑁆𑀦𑀓𑀸𑀭𑀓𑀫𑁆𑀫𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀓𑀺𑀜𑁆𑀘𑀺𑀫𑀽𑀮𑀁 𑀮𑀪𑀺𑀢𑁆𑀯𑀸 𑀢𑁂𑀦 𑀏𑀓𑀲𑁆𑀲𑀸𑀧𑀺 𑀤𑀸𑀦𑀁 𑀤𑀸𑀢𑀼𑀁 𑀑𑀓𑀸𑀲 𑀫𑀮𑀤𑁆𑀥𑀸 𑀆𑀧𑀡𑀁 𑀕𑀦𑁆𑀢𑁆𑀯𑀸 𑀭𑀸𑀚𑀫𑀸𑀲𑀓𑁂 𑀕𑀳𑁂𑀢𑁆𑀯𑀸 𑀘𑀗𑁆𑀓𑁄𑀝𑀓𑀁 𑀧𑀽𑀭𑁂𑀢𑁆𑀯𑀸 𑀆𑀤𑀸𑀬 𑀩𑀼𑀤𑁆𑀥𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀪𑀢𑁆𑀢𑀕𑁆𑀕𑀁 𑀕𑀦𑁆𑀢𑁆𑀯𑀸 𑀞𑀺𑀢𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺, 𑀦𑀢𑁆𑀣𑀺 𑀤𑀸𑀦𑀺 𑀑𑀓𑀸𑀲𑀁 𑀏𑀓𑀲𑁆𑀲𑀸𑀧𑀺 𑀪𑀺𑀓𑁆𑀔𑀼𑀦𑁄 𑀧𑀢𑁆𑀢𑁂 𑀑𑀓𑀺𑀭𑀺𑀢𑀼𑀁, 𑀅𑀤𑁆𑀥𑀸𑀳𑀁 𑀇𑀫𑁂 𑀆𑀓𑀸𑀲𑁂 𑀯𑀺𑀓𑀺𑀭𑀺𑀲𑁆𑀲𑀸𑀫𑀻𑀢𑀺 𑀅𑀧𑁆𑀧𑁂𑀯𑀦𑀸𑀫 𑀧𑀢𑀫𑀸𑀦𑀸𑀦𑀁 𑀏𑀓𑀲𑁆𑀲𑀸𑀧𑀺 𑀪𑀺𑀓𑁆𑀔𑀼𑀦𑁄 𑀧𑀢𑁆𑀢𑁂 𑀏𑀓𑀫𑁆𑀧𑀺 𑀧𑀢𑁂𑀬𑁆𑀬, 𑀢𑀁 𑀫𑁂 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀪𑀸𑀬 𑀲𑀼𑀔𑀸𑀬𑀸𑀢𑀺 𑀧𑀲𑀦𑁆𑀦𑀫𑀸𑀦𑀲𑁄 𑀉𑀤𑁆𑀥𑀁 𑀔𑀺𑀧𑀺, 𑀢 𑀢𑁄 𑀧𑀢𑀫𑀸𑀦𑀸 𑀢𑁂 𑀧𑀭𑀺𑀯𑀸𑀭𑀺𑀓𑀤𑁂𑀯𑀢𑀸𑀦𑀜𑁆𑀘 𑀪𑀕𑀯𑀢𑁄 𑀆𑀦𑀼𑀪𑀸𑀯𑁂𑀦𑀘 𑀩𑀳𑀺 𑀅𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀫𑀸𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂𑀲𑀁 𑀪𑀺𑀓𑁆𑀔𑀽𑀦𑀁 ¶ 𑀧𑀢𑁆𑀢𑁂𑀬𑁂𑀯 𑀧𑀢𑀺𑀁𑀲𑀼. 𑀅𑀣 𑀲𑁄 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀞𑀺𑀢𑁄 𑀏𑀯𑀁 𑀧𑀢𑁆𑀣𑀦𑀫𑀓𑀸𑀲𑀺.

𑁧.

𑀇𑀫𑀺𑀦𑀸 𑀫𑁂 𑀅𑀥𑀺𑀓𑀸𑀭𑁂𑀦, 𑀧𑀲𑀸𑀤𑁂𑀦 𑀬𑀢𑀺𑀲𑁆𑀲𑀭𑁂;

𑀓𑀸𑀫𑀪𑁄𑀕𑀻𑀦𑀳𑀁 𑀅𑀕𑁆𑀕𑁄, 𑀪𑀯𑁂𑀬𑁆𑀬𑀁 𑀚𑀸𑀢𑀺𑀚𑀸𑀢𑀺𑀬𑀁.

𑁨.

𑀧𑀳𑀭𑀺𑀢𑁆𑀯𑀸 𑀬𑀤𑀸 𑀧𑀸𑀡𑀺𑀁, 𑀑𑀮𑁄𑀓𑁂𑀫𑀺 𑀦𑀪𑁄𑀢𑀮𑀁;

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀁, 𑀯𑀲𑁆𑀲𑀁 𑀯𑀲𑁆𑀲𑀢𑀼 𑀲𑀩𑁆𑀩𑀤𑀸𑀢𑀺.

𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀫𑀳𑀦𑁆𑀢𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀪𑀤𑁆𑀤𑀓𑀧𑁆𑀧𑁂 𑀆𑀤𑀺𑀫𑁆𑀳𑀺 𑀫𑀳𑀸𑀲𑀫𑁆𑀫𑀢𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀢𑀲𑁆𑀲 𑀧𑀼𑀢𑁆𑀢𑁄 𑀭𑁄𑀚𑁄 𑀦𑀸𑀫. 𑀢𑀲𑁆𑀲 𑀧𑀼𑀢𑁆𑀢𑁄 𑀯𑀭𑀭𑁄𑀚𑁄 𑀦𑀸𑀫, 𑀢𑀲𑁆𑀲 𑀧𑀼𑀢𑁆𑀢𑁄 𑀓𑀮𑁆𑀬𑀸𑀡𑁄 𑀦𑀸𑀫, 𑀢𑀲𑁆𑀲 𑀧𑀼𑀢𑁆𑀢𑁄 𑀯𑀭𑀓𑀮𑁆𑀬𑀸𑀡𑁄 𑀦𑀸𑀫. 𑀯𑀭𑀓𑀮𑁆𑀬𑀸𑀡𑀲𑁆𑀲 𑀧𑀼𑀢𑁆𑀢𑁄 𑀉𑀧𑁄𑀲𑀣𑁄 𑀦𑀸𑀫. 𑀉𑀧𑁄𑀲𑀣𑀲𑁆𑀲 𑀧𑀼𑀢𑁆𑀢𑁄 𑀫𑀦𑁆𑀥𑀸𑀢𑀸 𑀦𑀸𑀫 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀘𑀢𑀽𑀳𑀺 𑀘 𑀇𑀤𑁆𑀥𑀻𑀳𑀺 𑀲𑀫𑀦𑁆𑀦𑀸𑀕𑀢𑁄 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀢𑀲𑁆𑀲 𑀯𑀸𑀫𑀳𑀢𑁆𑀣𑀁 𑀲𑀫𑁆𑀫𑀺𑀜𑁆𑀚𑀺𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀅𑀧𑁆𑀧𑁄𑀝𑁆𑀞𑀺𑀢𑁂 𑀆𑀓𑀸𑀲𑀢𑁄 𑀤𑀺𑀩𑁆𑀩𑀫𑁂𑀖𑀸 𑀯𑀺𑀬 𑀚𑀡𑁆𑀡𑀼𑀧𑁆𑀧𑀫𑀸𑀡𑀁 𑀲𑀢𑁆𑀢𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀢𑀺. 𑀏𑀯𑀭𑀽𑀧𑁄 𑀅𑀘𑁆𑀙𑀭𑀺𑀬𑁄 𑀅𑀳𑁄𑀲𑀺. 𑀲𑁄 𑀘𑀢𑀼𑀭𑀸𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀓𑀼𑀫𑀸𑀭𑀓𑀻𑀴𑀁 𑀓𑀻𑀴𑀺. 𑀘𑀢𑀼𑀭𑀸𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀑𑀧𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀘𑀢𑀼𑀭𑀸𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀆𑀬𑀼 𑀧𑀦𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀳𑁄𑀲𑀺. 𑀲𑁄 𑀏𑀓𑀤𑀺𑀯𑀲𑀁 𑀓𑀸𑀫𑀢𑀡𑁆𑀳𑀁 𑀧𑀽𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑀸𑀓𑀸𑀭𑀁 𑀤𑀲𑁆𑀲𑁂𑀲𑀺, 𑀅𑀫𑀘𑁆𑀘𑀸 𑀤𑁂𑀯 𑀓𑀺𑀦𑁆𑀦𑀔𑁄 𑀉𑀓𑁆𑀓𑀡𑁆𑀞𑀸 𑀲𑀻𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀪𑀡𑁂 𑀫𑀬𑁆𑀳𑀁 𑀧𑀼𑀜𑁆𑀜𑀓𑀫𑁆𑀫𑁂 𑀑𑀮𑁄𑀓𑀺𑀬𑀫𑀸𑀦𑁂 𑀇𑀫𑀁 𑀭𑀚𑁆𑀚𑀁 𑀦𑀧𑁆𑀧𑀳𑁄𑀢𑀺, 𑀓𑀢𑀭𑀦𑁆𑀦𑀼 𑀔𑁄 𑀞𑀸𑀦𑀁 𑀭𑀫𑀡𑀻𑀬𑀦𑁆𑀢𑀺. 𑀤𑁂𑀯𑀮𑁄𑀓𑁄 𑀫𑀳𑀸𑀭𑀸𑀚𑀸𑀢𑀺. 𑀲𑁄 𑀘𑀓𑁆𑀓𑀭𑀢𑀦𑀁 𑀅𑀩𑁆𑀪𑀼𑀓𑁆𑀓𑀺𑀭𑀺𑀢𑁆𑀯𑀸 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑀮𑁄𑀓𑀁 𑀅𑀕𑀫𑀸𑀲𑀺, 𑀅𑀣𑀲𑁆𑀲 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀤𑀺𑀩𑁆𑀩𑀫𑀸𑀮𑀕𑀦𑁆𑀥- 𑀳𑀢𑁆𑀣𑀸 ¶ 𑀤𑁂𑀯𑀕𑀡𑀧𑀭𑀺𑀯𑀼𑀢𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀢𑀁 𑀆𑀤𑀸𑀬 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑀮𑁄𑀓𑀁 𑀕𑀦𑁆𑀢𑁆𑀯𑀸 𑀭𑀚𑁆𑀚𑀁 𑀅𑀤𑀁𑀲𑀼, 𑀢𑀲𑁆𑀲 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑀲𑁆𑀲 𑀢𑀲𑁆𑀫𑀺𑀁 𑀭𑀚𑁆𑀚𑀁 𑀓𑀭𑁄𑀦𑁆𑀢𑀲𑁆𑀲 𑀤𑀻𑀖𑁄 𑀅𑀤𑁆𑀥𑀸 𑀯𑀻𑀢𑀺𑀯𑀢𑁆𑀢𑁄. 𑀲𑁄 𑀢𑀢𑁆𑀣𑀧𑀺 𑀢𑀡𑁆𑀳𑀁 𑀧𑀽𑀭𑁂𑀢𑀼 𑀫𑀲𑀓𑁆𑀓𑁄𑀦𑁆𑀢𑁄 𑀉𑀓𑁆𑀓𑀡𑁆𑀞𑀺𑀢𑀸 𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀢𑀢𑁄 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀓𑀺𑀦𑁆𑀦𑀼𑀔𑁄 𑀫𑀳𑀸𑀭𑀸𑀚 𑀉𑀓𑁆𑀓𑀡𑁆𑀞𑀺𑀢𑁄𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀇𑀫𑀫𑁆𑀳𑀸 𑀤𑁂𑀯𑀮𑁄𑀓𑀸 𑀓𑀢𑀭𑀦𑁆𑀦𑀼 𑀔𑁄 𑀞𑀸𑀦𑀁 𑀭𑀫𑀡𑀻𑀬𑀦𑁆𑀢𑀺, 𑀤𑁂𑀯 𑀧𑀭𑁂𑀲𑀁 𑀉𑀧𑀝𑁆𑀞𑀸𑀓𑀫𑀦𑀼𑀲𑁆𑀲𑀲𑀤𑀺𑀲𑀸 𑀫𑀬𑀁. 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑁄 𑀇𑀢𑁄 𑀲𑀢𑀕𑀼𑀡𑁂𑀦 𑀭𑀫𑀡𑀻𑀬𑁄𑀢𑀺. 𑀫𑀦𑁆𑀥𑀸𑀢𑀸 𑀘𑀓𑁆𑀓𑀭𑀢𑀦𑀁 𑀅𑀩𑁆𑀪𑀼𑀓𑁆𑀓𑀺𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀲𑀧𑀭𑀺𑀯𑀼𑀢𑁄 𑀢𑀸𑀯𑀢𑀺𑀁𑀲𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺, 𑀅𑀣𑀲𑁆𑀲 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀤𑀺𑀩𑁆𑀩𑀫𑀸𑀮𑀕𑀦𑁆𑀥𑀳𑀢𑁆𑀣𑁄 𑀤𑁂𑀯𑀕𑀡𑀧𑀭𑀺𑀯𑀼𑀢𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀢𑀁 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀇𑀢𑁄 𑀏𑀳𑀺 𑀫𑀳𑀸𑀭𑀸𑀚𑀸𑀢𑀺 𑀆𑀳. 𑀢𑀢𑁄 𑀭𑀜𑁆𑀜𑁄 𑀤𑁂𑀯𑀕𑀡𑀧𑀭𑀺𑀯𑀼𑀢𑀲𑁆𑀲 𑀕𑀫𑀦𑀓𑀸𑀮𑁂 𑀧𑀭𑀺𑀡𑀸𑀬𑀓𑀭𑀢𑀦𑀁 𑀘𑀓𑁆𑀓𑀭𑀢𑀦𑀁 𑀆𑀤𑀸𑀬 𑀲𑀤𑁆𑀥𑀺𑀁𑀧𑀭𑀺𑀲𑀸𑀬 𑀫𑀦𑀼𑀲𑁆𑀲𑀧𑀣𑀁 𑀑𑀢𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀖𑀭𑀁 𑀧𑀸𑀯𑀺𑀲𑀺. 𑀲𑀓𑁆𑀓𑁄 𑀫𑀦𑁆𑀥𑀸𑀢𑀼𑀁 𑀲𑀓𑁆𑀓𑀪𑀯𑀦𑀁 𑀦𑁂𑀢𑁆𑀯𑀸 𑀤𑁂𑀯𑀢𑀸 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀭𑀚𑁆𑀚𑀁 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀅𑀤𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀤𑁆𑀯𑁂𑀧𑀺 𑀭𑀸𑀚𑀦𑁄 𑀭𑀚𑁆𑀚𑀁 𑀓𑀸𑀭𑁂𑀲𑀼𑀁. 𑀏𑀯𑀁 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀲𑀓𑁆𑀓𑁄 𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀢𑀺𑀲𑁆𑀲𑁄𑀘 𑀯𑀲𑁆𑀲𑀓𑁄𑀝𑀺𑀬𑁄 𑀆𑀬𑀼𑀁 𑀔𑁂𑀧𑁂𑀢𑁆𑀯𑀸 𑀘𑀯𑀺. 𑀅𑀜𑁆𑀜𑁄 𑀲𑀓𑁆𑀓𑁄 𑀦𑀺𑀩𑁆𑀩𑀢𑁆𑀢𑀺, 𑀲𑁄𑀧𑀺 𑀢𑀣𑁂𑀯 𑀤𑁂𑀯𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀆𑀬𑀼𑀓𑁆𑀔𑀬𑁂𑀦 𑀘𑀯𑀺, 𑀏𑀢𑁂𑀦𑀼 𑀧𑀸𑀬𑁂𑀦 𑀙𑀢𑁆𑀢𑀺𑀁𑀲 𑀲𑀓𑁆𑀓𑀸 𑀘𑀯𑀺𑀁𑀲𑀼, 𑀫𑀦𑁆𑀥𑀸𑀢𑀸 𑀧𑀦 𑀫𑀦𑀼𑀲𑁆𑀲𑀧𑀭𑀺𑀳𑀸𑀭𑁂𑀦 𑀤𑁂𑀯𑀭𑀚𑁆𑀚𑀁 𑀓𑀸𑀭𑁂𑀲𑀺𑀬𑁂𑀯, 𑀢𑀲𑁆𑀲𑁂𑀯𑀁 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀪𑀻𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀓𑀸𑀫𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀺, 𑀲𑁄 𑀓𑀺𑀫𑁆𑀫𑁂 𑀉𑀧𑀟𑁆𑀠𑀭𑀚𑁆𑀚𑁂𑀦. 𑀲𑀓𑁆𑀓𑀁 𑀫𑀸𑀭𑁂𑀢𑁆𑀯𑀸 𑀏𑀓𑀭𑀚𑁆𑀚𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀓𑁆𑀓𑀁 𑀧𑀦 𑀫𑀸𑀭𑁂𑀢𑀼𑀁 𑀦 𑀲𑀓𑁆𑀓𑀸, 𑀓𑀸𑀫𑀢𑀡𑁆𑀳𑀸 𑀧𑀦𑁂𑀲𑀸 𑀯𑀺𑀧𑀢𑁆𑀢𑀺𑀫𑀽𑀮𑀸. 𑀢𑀣𑀸𑀳𑀺.

𑁩.

𑀯𑀭𑀫𑀢𑁆𑀭 𑀲𑀼𑀔𑀦𑁆𑀢𑁆𑀬𑀢𑁆𑀭, 𑀅𑀢𑁆𑀭𑀺𑀘𑁆𑀙𑀸𑀯𑀺𑀳𑀢𑁄 𑀦𑀭𑁄;

𑀇𑀥𑀯𑀸 𑀧𑀭𑀢𑁆𑀣𑀯𑀸 𑀓𑀺𑀜𑁆𑀘𑀺, 𑀦 𑀲𑀸𑀢𑀁 𑀯𑀺𑀦𑁆𑀤𑀢𑁂 𑀲𑀤𑀸.

𑁪.

𑀢𑀡𑁆𑀳𑀸𑀬 ¶ 𑀚𑀸𑀬𑀢𑁂 𑀲𑁄𑀓𑁄,

𑀢𑀡𑁆𑀳𑀸𑀬 𑀚𑀸𑀬𑀢𑁂 𑀪𑀬𑀁;

𑀢𑀡𑁆𑀳𑀸𑀬 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲,

𑀦𑀢𑁆𑀣𑀺 𑀲𑁄𑀓𑁄 𑀓𑀼𑀢𑁄 𑀪𑀬𑀁.

𑁫.

𑀢𑀡𑁆𑀳𑀸𑀤𑀸𑀲𑁄 𑀦𑀭𑁄 𑀏𑀢𑁆𑀣, 𑀭𑀸𑀚𑀘𑁄𑀭𑀸𑀤𑀺𑀲𑀫𑁆𑀪𑀯𑀁;

𑀳𑀢𑁆𑀢𑀘𑁆𑀙𑁂𑀤𑀸𑀤𑀺𑀓𑀁 𑀤𑀼𑀓𑁆𑀔𑀁, 𑀧𑀸𑀧𑀼𑀡𑀸𑀢𑀺 𑀯𑀺𑀳𑀜𑁆𑀜𑀢𑀺.

𑁬.

𑀬𑁂𑀦 𑀮𑁄𑀪𑁂𑀦 𑀚𑀸𑀢𑁂𑀦, 𑀲𑀤𑀸 𑀚𑀻𑀬𑀦𑁆𑀢𑀺 𑀧𑀸𑀡𑀺𑀦𑁄;

𑀔𑁂𑀢𑁆𑀢𑀁 𑀯𑀢𑁆𑀣𑀼𑀁 𑀳𑀺𑀭𑀜𑁆𑀜𑀁𑀘, 𑀕𑀯𑀸𑀲𑁆𑀲𑀁 𑀤𑀸𑀲𑀧𑁄𑀭𑀺𑀲𑀁;

𑀲𑀩𑁆𑀩𑀢𑁆𑀣𑀸𑀫𑁂𑀦 𑀲𑁄 𑀮𑁄𑀪𑁄, 𑀧𑀳𑀸𑀢𑀩𑁆𑀩𑁄𑀯 𑀯𑀺𑀜𑁆𑀜𑀼𑀦𑀸𑀢𑀺.

𑀢𑀢𑁄 𑀅𑀢𑁆𑀭𑀺𑀘𑁆𑀙𑀸𑀯𑀺𑀳𑀢𑀲𑁆𑀲 𑀢𑀲𑁆𑀲 𑀆𑀬𑀼𑀲𑀗𑁆𑀔𑀸𑀭𑁄 𑀧𑀭𑀺𑀳𑀸𑀬𑀺, 𑀚𑀭𑀸 𑀲𑀭𑀻𑀭𑀁 𑀧𑀳𑀭𑀺, 𑀫𑀦𑀼𑀲𑁆𑀲𑀲𑀭𑀻𑀭𑀜𑁆𑀳𑀺 𑀦𑀸𑀫 𑀦 𑀤𑁂𑀯𑀮𑁄𑀓𑁂𑀪𑀺𑀚𑁆𑀚𑀢𑀺, 𑀢𑀣 𑀲𑁄 𑀤𑁂𑀯𑀮𑁄𑀓𑀸 𑀪𑀲𑁆𑀲𑀺𑀢𑁆𑀯𑀸 𑀩𑀦𑁆𑀥𑀼𑀫𑀢𑀻𑀦𑀕𑀭𑀼𑀬𑁆𑀬𑀸𑀦𑀁 𑀧𑀸𑀯𑀺𑀲𑀺, 𑀉𑀬𑁆𑀬𑀸𑀦𑀧𑀸𑀮𑁄 𑀢𑀲𑁆𑀲 𑀆𑀕𑀢𑀪𑀸𑀯𑀁 𑀭𑀸𑀚𑀓𑀼𑀮𑀁 𑀦𑀺𑀯𑁂𑀤𑁂𑀲𑀺. 𑀭𑀸𑀚𑀸 𑀭𑀸𑀚𑀓𑀼𑀮𑀸 𑀆𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑁂𑀬𑁂𑀯 𑀆𑀲𑀦𑀁 𑀧𑀜𑁆𑀜𑀸𑀧𑁂𑀲𑀺. 𑀢𑀢𑁄 𑀫𑀦𑁆𑀥𑀸𑀢𑀸 𑀉𑀬𑁆𑀬𑀸𑀦𑁂 𑀧𑀜𑁆𑀜𑀢𑁆𑀢𑀯𑀭𑀸𑀲𑀦𑁂 𑀦𑀺𑀧𑀦𑁆𑀦𑁄 𑀅𑀦𑀼𑀝𑁆𑀞𑀸𑀦𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺. 𑀢𑀢𑁄 𑀅𑀫𑀘𑁆𑀘𑀸 𑀤𑁂𑀯 𑀢𑀼𑀫𑁆𑀳𑀸𑀓𑀁 𑀧𑀭𑀢𑁄 𑀓𑀺𑀦𑁆𑀦𑀼 𑀓𑀣𑁂𑀲𑀸𑀫𑀸𑀢𑀺 𑀧𑀼𑀘𑁆𑀙𑀺𑀁𑀲𑀼, 𑀫𑀫 𑀧𑀭𑀢𑁄 𑀢𑀼𑀫𑁆𑀳𑁂 𑀇𑀫𑀁 𑀲𑀸𑀲𑀦𑀁 𑀫𑀳𑀸𑀚𑀦𑀲𑁆𑀲 𑀓𑀣𑁂𑀬𑁆𑀬𑀸𑀣, 𑀫𑀦𑁆𑀥𑀸𑀢𑀼𑀫𑀳𑀸𑀭𑀸𑀚𑀸 𑀤𑁆𑀯𑀺𑀲𑀳𑀲𑁆𑀲𑀤𑀻𑀧𑀧𑀭𑀺𑀯𑀸𑀭𑁂𑀲𑀼 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂𑀲𑀼 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀙𑀢𑁆𑀢𑀺𑀁𑀲𑀲𑀓𑁆𑀓𑀸𑀦𑀁 𑀆𑀬𑀼𑀧𑀭𑀺𑀫𑀸𑀡𑁂𑀦 𑀤𑁂𑀯𑀮𑁄𑀓𑁂 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀓𑀸𑀮𑀫𑀓𑀸𑀲𑀻𑀢𑀺. 𑀲𑁄 𑀏𑀯𑀁 𑀯𑀢𑁆𑀯𑀸 𑀓𑀸𑀮𑀁𑀓𑀢𑁆𑀯𑀸 𑀬𑀣𑀸𑀓𑀫𑁆𑀫𑀁 𑀕𑀢𑁄𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 𑀪𑀕𑀯𑀸 𑀘𑀢𑀼𑀫𑀳𑀸𑀧𑀭𑀺𑀲𑀫𑀚𑁆𑀛𑁂 𑀇𑀫𑀸 𑀕𑀸𑀣𑀸𑀬𑁄 𑀆𑀳.

𑁭.

𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀼𑀭𑀺𑀬𑀸, 𑀧𑀭𑀺𑀳𑀭𑀦𑁆𑀢𑀺 𑀤𑀺𑀲𑀸 𑀪𑀦𑁆𑀢𑀺 𑀯𑀺𑀭𑁄𑀘𑀦𑀸;

𑀲𑀩𑁆𑀩𑁂𑀯 𑀤𑀸𑀲𑀸 𑀫𑀦𑁆𑀥𑀸𑀢𑀸, 𑀬𑁂 𑀧𑀸𑀡𑀸 𑀧𑀣𑀯𑀺𑀦𑀺𑀲𑁆𑀲𑀺𑀢𑀸.

𑁮.

𑀦 ¶ 𑀓𑀳𑀸𑀧𑀡𑀯𑀲𑁆𑀲𑁂𑀦, 𑀢𑀺𑀢𑁆𑀢𑀺 𑀓𑀸𑀫𑁂𑀲𑀼 𑀯𑀺𑀚𑁆𑀚𑀢𑀺;

𑀅𑀧𑁆𑀧𑀲𑁆𑀲𑀤𑀸 𑀤𑀼𑀔𑀸 𑀓𑀸𑀫𑀸, 𑀇𑀢𑀺 𑀯𑀺𑀜𑁆𑀜𑀸𑀬 𑀧𑀡𑁆𑀟𑀺𑀢𑁄.

𑁯.

𑀅𑀧𑀺 𑀤𑀺𑀩𑁆𑀩𑁂𑀲𑀼 𑀓𑀸𑀫𑁂𑀲𑀼, 𑀭𑀢𑀺𑀁𑀲𑁄 𑀦𑀸𑀥𑀺𑀕𑀘𑁆𑀙𑀢𑀺;

𑀢𑀡𑁆𑀳𑀸𑀓𑁆𑀔𑀬𑀭𑀢𑁄 𑀳𑁄𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀸𑀯𑀓𑁄𑀢𑀺.

𑀢𑀁 𑀲𑀼𑀢𑁆𑀯𑀸 𑀩𑀳𑀽 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀺𑀁𑀲𑀽𑀢𑀺.

𑁧𑁦.

𑀇𑀢𑀺 𑀕𑀢𑀺𑀦𑀺𑀬𑀢𑀸𑀦𑀁 𑀩𑁄𑀥𑀺𑀬𑀸 𑀉𑀢𑁆𑀢𑀫𑀸𑀦𑀁;

𑀲𑀓𑀯𑀲𑀫𑀼𑀧𑀦𑁂𑀢𑁆𑀯𑀸 𑀤𑁂𑀢𑀺 𑀤𑀼𑀓𑁆𑀔𑀸𑀢𑀺𑀢𑀡𑁆𑀳𑀸;

𑀅𑀦𑀺𑀬𑀢𑀕𑀢𑀺𑀓𑀸𑀦𑀁 𑀓𑀸 𑀓𑀣𑀸 𑀫𑀸𑀤𑀺𑀲𑀸𑀦𑀁;

𑀚𑀳𑀣 𑀢𑀫𑀺𑀢𑀺 𑀫𑀦𑁆𑀢𑁆𑀯𑀸 𑀪𑁄 𑀪𑀚𑀯𑁆𑀳𑁄 𑀢𑀺𑀯𑀢𑁆𑀣𑀼𑀁𑀢𑀺.

𑀫𑀳𑀸𑀫𑀦𑁆𑀥𑀸𑀢𑀼𑀯𑀢𑁆𑀣𑀼𑀁 𑀅𑀝𑁆𑀞𑀫𑀁.

𑁯. 𑀩𑀼𑀤𑁆𑀥𑀯𑀫𑁆𑀫𑀯𑀸𑀡𑀺𑀚𑀓𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀚𑀫𑁆𑀩𑀼𑀤𑀻𑀧𑁂 𑀓𑀺𑀭 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑁂 𑀩𑀼𑀤𑁆𑀥𑀯𑀫𑁆𑀫𑁄 𑀦𑀸𑀫 𑀯𑀸𑀡𑀺𑀚𑀓𑁄 𑀅𑀳𑁄𑀲𑀺 𑀯𑀸𑀡𑀺𑀚𑀓𑀓𑀫𑁆𑀫𑁂𑀦 𑀚𑀻𑀯𑀫𑀸𑀦𑁄. 𑀲𑁄 𑀅𑀧𑀭𑀪𑀸𑀕𑁂 𑀲𑀢𑁆𑀣𑀯𑀸𑀳𑁂𑀳𑀺 𑀲𑀤𑁆𑀥𑀺𑀁 𑀕𑀸𑀫𑀦𑀺𑀕𑀫𑀚𑀦𑀧𑀤 𑀭𑀸𑀚𑀥𑀸𑀦𑀻𑀲𑀼 𑀯𑀸𑀡𑀺𑀚𑁆𑀚𑀁 𑀧𑀬𑁄𑀚𑀬𑀫𑀸𑀦𑁄 𑀯𑀺𑀘𑀭𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀕𑀯𑀸𑀦𑁂𑀓𑀪𑀺𑀓𑁆𑀔𑀼𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀢𑀺 𑀩𑀳𑀽 𑀤𑁂𑀯𑀫𑀦𑀼𑀲𑁆𑀲𑁂 𑀲𑀁𑀲𑀸𑀭𑀓𑀦𑁆𑀢𑀸𑀭𑀸 𑀉𑀢𑁆𑀢𑀸𑀭𑁂𑀦𑁆𑀢𑁄. 𑀢𑀤𑀸 𑀲𑁄 𑀪𑀕𑀯𑀦𑁆𑀢𑀁 𑀅𑀤𑁆𑀤𑀲 𑀤𑁆𑀯𑀢𑁆𑀢𑀺𑀁𑀲𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀧𑀢𑀺𑀫𑀡𑁆𑀟𑀺𑀢𑀁 𑀚𑀮𑀫𑀸𑀦𑀲𑀼𑀯𑀡𑁆𑀡𑀫𑁂𑀭𑀼𑀁 𑀯𑀺𑀬𑀯𑀺𑀭𑁄𑀘𑀫𑀸𑀦𑀁 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑀁, 𑀤𑀺𑀲𑁆𑀯𑀸 𑀧𑀭𑀫𑀧𑀻𑀢𑀺𑀬𑀸 𑀨𑀼𑀝𑀲𑀭𑀻𑀭𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀲𑀸𑀬𑀡𑁆𑀳𑁂 𑀪𑀕𑀯𑀦𑁆𑀢𑀁 𑀪𑀢𑁆𑀢𑁂𑀦 𑀦𑀺𑀫𑀦𑁆𑀢𑁂𑀲𑀺 𑀩𑀼𑀤𑁆𑀥𑀲𑀸𑀲𑀦𑁂 𑀅𑀧𑀭𑀺𑀘𑀺𑀢𑀪𑀸𑀯𑁂𑀦. 𑀅𑀣𑀲𑁆𑀲 𑀪𑀕𑀯𑀸 𑀯𑀺𑀓𑀸𑀮𑀪𑁄𑀚𑀦𑀸 𑀧𑀝𑀺𑀯𑀺𑀭𑀢𑀸 𑀢𑀣𑀸𑀕𑀢𑀸𑀢𑀺 𑀆𑀳. 𑀅𑀣 𑀲𑁄 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀓𑀺𑀁 𑀪𑀦𑁆𑀢𑁂 𑀪𑀕𑀯𑀦𑁆𑀢𑀸 𑀯𑀺𑀓𑀸𑀮𑁂 𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀻𑀢𑀺, 𑀅𑀣𑀲𑁆𑀲 𑀓𑀣𑀁 𑀧𑀝𑀺𑀘𑁆𑀘 𑀪𑀕𑀯𑀸 ¶ 𑀅𑀝𑁆𑀞𑀯𑀺𑀥𑀁 𑀧𑀸𑀦𑀁 𑀢𑀣𑀸𑀕𑀢𑀸𑀦𑀁 𑀯𑀺𑀓𑀸𑀮𑁂 𑀪𑀼𑀜𑁆𑀚𑀺𑀢𑀼𑀁 𑀓𑀧𑁆𑀧𑀢𑀺. 𑀲𑁂𑀬𑁆𑀬𑀣𑀺𑀤𑀁, 𑀅𑀫𑁆𑀩𑀧𑀸𑀦𑀁 𑀚𑀫𑁆𑀩𑀼𑀧𑀸𑀦𑀁 𑀘𑁄𑀘𑀧𑀸𑀦𑀁 𑀫𑁄𑀘𑀧𑀸𑀦𑀁 𑀨𑀸𑀭𑀼𑀲𑀓𑀧𑀸𑀦𑀁 𑀫𑀥𑀼𑀧𑀸𑀦𑀁 𑀫𑀼𑀤𑁆𑀤𑀺𑀓𑀧𑀸𑀦𑀁 𑀲𑀸𑀮𑀽𑀓𑀧𑀸𑀦𑀦𑁆𑀢𑀺. 𑀢𑀁 𑀲𑀼𑀢𑁆𑀯𑀸 𑀯𑀸𑀡𑀺𑀚𑁄 𑀲𑀳𑀲𑀓𑁆𑀓𑀸𑀭𑀸𑀭𑀲𑁂𑀳𑀺 𑀫𑀼𑀤𑁆𑀤𑀺𑀓𑀧𑀸𑀦𑀁 𑀓𑀢𑁆𑀯𑀸 𑀩𑀼𑀤𑁆𑀥𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀤𑀸𑀲𑀺, 𑀲𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀢𑁆𑀣𑀸 𑀧𑀭𑀺𑀪𑀼𑀢𑁆𑀢𑀧𑀸𑀦𑀻𑀬𑀭𑀲𑁄 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺. 𑀲𑁄𑀧𑀺 𑀧𑀲𑀦𑁆𑀦𑀫𑀸𑀦𑀲𑁄 𑀳𑀼𑀢𑁆𑀯𑀸 𑀦𑀺𑀯𑀢𑁆𑀢𑁄 𑀲𑀤𑁆𑀥𑀺𑀁 𑀯𑀸𑀡𑀺𑀚𑀓𑁂𑀳𑀺 𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀯𑀸𑀡𑀺𑀚𑁆𑀚𑀁 𑀧𑀬𑁄𑀚𑁂𑀦𑁆𑀢𑁄 𑀫𑀳𑀸𑀯𑀢𑁆𑀢𑀦𑀻𑀬𑀁𑀦𑀸𑀫 𑀓𑀦𑁆𑀢𑀸𑀭𑀁 𑀧𑀸𑀧𑀼𑀡𑀺, 𑀢𑀢𑁆𑀢 𑀢𑁂𑀲𑀁 𑀲𑀩𑁆𑀩𑁂𑀲𑀼𑀬𑁂𑀯 𑀲𑀓𑀝𑁂𑀲𑀼 𑀧𑀸𑀦𑀻𑀬𑀁 𑀧𑀭𑀺𑀓𑁆𑀔𑀬𑀫𑀕𑀫𑀸𑀲𑀺. 𑀢𑀢𑁆𑀣 𑀲𑀩𑁆𑀩𑀫𑀦𑀼𑀲𑁆𑀲𑀸𑀦𑀁𑀘 𑀩𑀮𑀻𑀯𑀤𑁆𑀤𑀸𑀦𑀁𑀘 𑀧𑀸𑀦𑀻𑀬𑀁 𑀦𑀸𑀳𑁄𑀲𑀺. 𑀅𑀣 𑀲𑁄 𑀯𑀸𑀡𑀺𑀚𑁄 𑀧𑀺𑀧𑀸𑀲𑀸𑀪𑀺𑀪𑀽𑀢𑁄 𑀢𑁂𑀲𑀼 𑀢𑁂𑀲𑀼 𑀲𑀓𑀝𑁂𑀲𑀼 𑀧𑀸𑀦𑀻𑀬𑀁 𑀧𑀭𑀺𑀬𑁂𑀲𑀦𑁆𑀢𑁄 𑀯𑀺𑀘𑀭𑀢𑀺. 𑀅𑀣𑁂𑀓𑀲𑁆𑀫𑀺𑀁 𑀲𑀓𑀝𑁂 𑀫𑀦𑀼𑀲𑁆𑀲𑀸 𑀢𑀁 𑀤𑀺𑀲𑁆𑀯𑀸 𑀓𑀸𑀭𑀼𑀜𑁆𑀜𑁂𑀦 𑀏𑀢𑁆𑀣𑀸𑀕𑀘𑁆𑀙, 𑀇𑀫𑀲𑁆𑀫𑀺𑀁 𑀓𑁄𑀴𑀫𑁆𑀩𑁂 𑀣𑁄𑀓𑀁 𑀧𑀸𑀦𑀻𑀬𑀁 𑀅𑀢𑁆𑀣𑀺 𑀧𑀺𑀯𑀸𑀢𑀺 𑀯𑀤𑀺𑀁𑀲𑀼. 𑀢 𑀢𑁄 𑀲𑁄 𑀕𑀦𑁆𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺. 𑀢𑀲𑁆𑀲 𑀢𑀁 𑀭𑀲𑀁 𑀫𑀼𑀤𑁆𑀤𑀺𑀓𑀧𑀸𑀦𑀭𑀲𑀲𑀤𑀺𑀲𑀁 𑀅𑀳𑁄𑀲𑀺, 𑀧𑀺𑀯𑀦𑁆𑀢𑁄𑀯 𑀲𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀤𑀸 𑀫𑁂 𑀤𑀺𑀦𑁆𑀦𑀫𑀼𑀤𑁆𑀤𑀺𑀓𑀧𑀸𑀦𑀲𑁆𑀲 𑀦𑀺𑀲𑁆𑀲𑀦𑁆𑀤𑁄 𑀅𑀚𑁆𑀚 𑀲𑀫𑁆𑀧𑀢𑁆𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑀅𑀘𑁆𑀙𑁂𑀭𑀩𑁆𑀪𑀼𑀢𑀘𑀺𑀢𑁆𑀢𑁄 𑀲𑁄𑀫𑀦𑀲𑁆𑀲𑀚𑀸𑀢𑁄 𑀕𑀦𑁆𑀢𑁆𑀯𑀸 𑀲𑀬𑀫𑁂𑀯 𑀘𑀸𑀝𑀺𑀬𑀸 𑀧𑀺𑀥𑀸𑀦𑀁 𑀯𑀺𑀯𑀭𑀺. 𑀲𑀓𑀮𑀸𑀧𑀺 𑀲𑀸 𑀘𑀸𑀝𑀺 𑀫𑀼𑀤𑁆𑀤𑀺𑀓𑀧𑀸𑀦𑁂𑀦 𑀧𑀭𑀺𑀧𑀼𑀡𑁆𑀡𑀸 𑀅𑀳𑁄𑀲𑀺. 𑀢𑀢𑁄 𑀲𑁄 𑀭 𑀲𑀯 𑀦𑁆𑀢𑀁 𑀑𑀚𑀯𑀦𑁆𑀢𑀁 𑀅𑀧𑀭𑀺𑀓𑁆𑀔𑀬𑀁 𑀤𑀺𑀩𑁆𑀩𑀧𑀸𑀦𑀲𑀤𑀺𑀲𑀁 𑀧𑀸𑀦𑀻𑀬𑀁 𑀤𑀺𑀲𑁆𑀯𑀸 𑀧𑀭𑀫𑀸𑀬 𑀧𑀻𑀢𑀺𑀬𑀸 𑀨𑀼𑀝𑀲𑀭𑀻𑀭𑁄 𑀉𑀕𑁆𑀖𑁄𑀲𑁂𑀲𑀺 𑀲𑀩𑁆𑀩𑁂 𑀧𑀸𑀦𑀻𑀬𑀁 𑀧𑀺𑀯𑀦𑁆𑀢𑀽𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀧𑀸𑀦𑀻𑀬𑀁 𑀤𑀺𑀲𑁆𑀯𑀸 𑀅𑀩𑁆𑀪𑀼𑀢𑀘𑀺𑀢𑁆𑀢𑀸 𑀚𑀸𑀢𑀸. 𑀯𑀸𑀡𑀺𑀚𑁄 𑀢𑁂𑀲𑀁 𑀫𑀚𑁆𑀛𑁂 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀆𑀳.

𑁧.

𑀧𑀲𑁆𑀲𑀣𑁂𑀤𑀁 𑀪𑀯𑀦𑁆𑀢𑁄 𑀪𑁄, 𑀆𑀦𑀼𑀪𑀸𑀯𑀁 𑀫𑀳𑁂𑀲𑀺𑀦𑁄;

𑀅𑀘𑀺𑀦𑁆𑀢𑀦𑀻𑀬𑀫𑀘𑁆𑀙𑁂𑀭𑀁, 𑀲𑀦𑁆𑀤𑀺𑀝𑁆𑀞𑀺𑀓 𑀫𑀓𑀸𑀮𑀺𑀓𑀁.

𑁨.

𑀧𑀲𑀦𑁆𑀦𑀫𑀦𑀲𑀸 𑀩𑀼𑀤𑁆𑀥𑁂, 𑀤𑀺𑀦𑁆𑀦𑀁 𑀧𑀸𑀦𑀻𑀬𑀓𑀁 𑀫𑀬𑀸;

𑀯𑀺𑀧𑀘𑁆𑀘𑀢𑀺 𑀇𑀤𑀸𑀦𑁂𑀯, 𑀢𑀁 𑀤𑀸𑀦𑀁 𑀫𑀼𑀦𑀺𑀯𑀸𑀳𑀲𑀸.

𑁩.

𑀑𑀚𑀯𑀦𑁆𑀢𑀁 ¶ 𑀲𑀼𑀔𑀦𑁆𑀦𑀁𑀯, 𑀲𑀻𑀢𑀮𑀁 𑀫𑀥𑀼𑀭𑁄 𑀤𑀓𑀁;

𑀤𑀺𑀩𑁆𑀩𑀧𑀸𑀦𑀁𑀯 𑀤𑁂𑀯𑀸𑀦𑀁, 𑀚𑀸𑀢𑀫𑀩𑁆𑀪𑀼𑀢𑀫𑀓𑁆𑀔𑀬𑀁.

𑁪.

𑀲𑀻𑀮𑀯𑀦𑁆𑀢𑁂𑀲𑀼 𑀓𑁄 𑀦𑀸𑀫, 𑀦 𑀤𑀤𑁂𑀬𑁆𑀬 𑀯𑀺𑀘𑀓𑁆𑀔𑀡𑁄;

𑀇𑀥 𑀮𑁄𑀓𑁂 𑀧𑀭𑀢𑁆𑀢𑁂𑀘, 𑀲𑀼𑀔𑀤𑀁 𑀤𑀸𑀦 𑀫𑀼𑀢𑁆𑀢𑀫𑀁.

𑁫.

𑀬𑀣𑀺 𑀘𑁆𑀙𑀺𑀢𑀁 𑀕𑀳𑁂𑀢𑁆𑀯𑀸𑀦, 𑀧𑀺𑀯𑀦𑁆𑀢𑀼 𑀫𑀥𑀼𑀭𑁄 𑀤𑀓𑀁;

𑀪𑀸𑀚𑀦𑀸𑀦𑀺𑀘 𑀧𑀽𑀭𑁂𑀢𑁆𑀯𑀸, 𑀬𑀦𑁆𑀢𑀼 𑀲𑀩𑁆𑀩𑁂 𑀬𑀣𑀺𑀘𑁆𑀙𑀺𑀢𑀦𑁆𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀲𑀩𑁆𑀩𑁂 𑀫𑀦𑀼𑀲𑁆𑀲𑁂𑀘 𑀩𑀮𑀻𑀯𑀤𑁆𑀤𑁂𑀘 𑀫𑀼𑀤𑁆𑀤𑀺𑀓𑀭𑀲𑁂𑀦𑁂𑀯 𑀲𑀦𑁆𑀢𑀧𑁆𑀧𑁂𑀲𑀺. 𑀢𑀢𑁄 𑀢𑀢𑁄 𑀆𑀕𑀢𑀸𑀧𑀺 𑀧𑀸𑀦𑀻𑀬𑀁 𑀧𑀺𑀯𑀦𑁆𑀢𑁄𑀘 𑀧𑀸𑀦𑀻𑀬𑀁 𑀅𑀓𑁆𑀔𑀬𑀁 𑀅𑀳𑁄𑀲𑀺. 𑀢𑀢𑁄 𑀯𑀸𑀡𑀺𑀚𑁄 𑀲𑀢𑁆𑀣𑀯𑀸𑀳𑁂𑀳𑀺 𑀲𑀤𑁆𑀥𑀺𑀁 𑀯𑀸𑀡𑀺𑀚𑁆𑀚𑀁 𑀧𑀬𑁄𑀚𑁂𑀢𑁆𑀯𑀸 𑀲𑀓𑀦𑀕𑀭𑀁 𑀆𑀕𑀘𑁆𑀙𑀦𑁆𑀢𑁄 𑀪𑀕𑀯𑀦𑁆𑀢𑀁 𑀧𑀲𑁆𑀲𑀺𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻𑀢𑀺 𑀯𑁂𑀴𑀼𑀯𑀦𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀓𑀢𑀸𑀦𑀼𑀜𑁆𑀜𑁄 𑀏𑀓𑀫𑀦𑁆𑀢𑁂 𑀦𑀺𑀲𑀻𑀤𑀺. 𑀲𑀢𑁆𑀣𑀸𑀧𑀺 𑀢𑁂𑀦 𑀲𑀤𑁆𑀥𑀺𑀁 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀫𑀓𑀸𑀲𑀺. 𑀉𑀧𑀸𑀲𑀓𑁄𑀧𑀺 𑀪𑀦𑁆𑀢𑁂 𑀢𑀼𑀫𑁆𑀳𑀸𑀓𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑁄 𑀯𑀦𑁆𑀤𑀺𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻𑀢𑀺 𑀆𑀕𑀢𑁄𑀫𑁆𑀳𑀺, 𑀏𑀯𑀜𑁆𑀘𑁂 𑀯𑀜𑁆𑀘 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀲𑀺. 𑀅𑀣𑀲𑁆𑀲 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸𑀦 𑀲𑀢𑁆𑀣𑀸𑀭𑀁 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀫𑁂𑀯 𑀅𑀕𑀫𑀸𑀲𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀓𑀦𑀓𑀯𑀺𑀫𑀸𑀦𑁂 𑀤𑁂𑀯𑀘𑁆𑀙𑀭𑀸𑀧𑀭𑀺𑀯𑀼𑀢𑁄 𑀤𑁂𑀯𑀺𑀲𑁆𑀲𑀭𑀺𑀬𑀲𑀫𑀦𑁆𑀦𑀸𑀕𑀢𑁄 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀧𑀓𑀸𑀲𑀦𑀢𑁆𑀣𑀁 𑀢𑀢𑁆𑀣 𑀢𑀢𑁆𑀣 𑀭𑀢𑀦𑀪𑀸𑀚𑀦𑁂𑀲𑀼 𑀤𑀺𑀩𑁆𑀩𑀫𑀬𑁂𑀳𑀺 𑀫𑀼𑀤𑁆𑀤𑀺𑀓𑀧𑀸𑀦𑁂𑀳𑀺 𑀧𑀭𑀺𑀧𑀼𑀡𑁆𑀡𑀁 𑀅𑀳𑁄𑀲𑀺. 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀤𑁂𑀯𑀸 𑀦𑀘𑁆𑀘𑀦𑁆𑀢𑀺 𑀯𑀸𑀤𑁂𑀦𑁆𑀢𑀺 𑀓𑀻𑀴𑀦𑁆𑀢𑀻𑀢𑀺.

𑁬.

𑀦 𑀯𑀺𑀧𑀼𑀮𑀚𑀺𑀦𑀲𑀸𑀭𑀁 𑀚𑀸𑀦𑀫𑀸𑀦𑁄 𑀚𑀦𑁂𑀯𑀁,

𑀮𑀪𑀢𑀺 𑀯𑀺𑀧𑀼𑀮𑀪𑁄𑀕𑀁 𑀢𑁄𑀬𑀫𑀢𑁆𑀢𑀲𑁆𑀲 𑀤𑀸𑀦𑀸;

𑀯𑀺𑀤𑀺𑀢𑀕𑀼𑀡𑀕𑀡𑀸 𑀪𑁄 𑀢𑀻𑀲𑀼 𑀯𑀢𑁆𑀣𑀽𑀲𑀼 𑀢𑀼𑀫𑁆𑀳𑁂,

𑀮𑀪𑀣 𑀔𑀮𑀼 𑀯𑀺𑀲𑁂𑀲𑀁 𑀲𑀻𑀮𑀯𑀦𑁆𑀢𑁂𑀲𑀼 𑀤𑀸𑀦𑀸𑀢𑀺.

𑀩𑀼𑀤𑁆𑀥𑀯𑀫𑁆𑀫𑀯𑀸𑀡𑀺𑀚𑀓𑀲𑁆𑀲 𑀯𑀢𑁆𑀣𑀼𑀁 𑀦𑀯𑀫𑀁.

𑁧𑁦. 𑀭𑀽𑀧𑀤𑁂𑀯𑀺𑀬𑀸 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀅𑀢𑀻𑀢𑁂 ¶ 𑀓𑀺𑀭 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀢𑀲𑁆𑀫𑀺𑀁 𑀦𑀕𑀭𑁂 𑀏𑀓𑀸 𑀕𑀸𑀫𑀤𑀸𑀭𑀺𑀓𑀸 𑀯𑀺𑀳𑀸𑀭𑁂 𑀆𑀳𑀺𑀡𑁆𑀟𑀦𑁆𑀢𑀻 𑀏𑀓𑀁 𑀕𑀺𑀮𑀸𑀦𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀓𑀫𑁆𑀧𑀫𑀸𑀦𑀳𑀤𑀬𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀪𑀦𑁆𑀢𑁂 𑀓𑁄𑀢𑁂 𑀆𑀩𑀸𑀥𑁄 𑀲𑀭𑀻𑀭𑀁 𑀧𑀻𑀴𑁂𑀢𑀻𑀢𑀺 𑀧𑀼𑀘𑁆𑀙𑀺. 𑀢𑁂𑀦𑀸𑀧𑀺 𑀪𑀕𑀺𑀦𑀺 𑀔𑀭𑀸𑀩𑀸𑀥𑁄 𑀫𑁂 𑀧𑀻𑀴𑁂𑀢𑀻𑀢𑀺 𑀯𑀼𑀢𑁆𑀢𑁂 𑀲𑀸 𑀢𑁂𑀦𑀳𑀺 𑀪𑀦𑁆𑀢𑁂 𑀅𑀳𑀁 𑀢𑀁 𑀭𑁄𑀕𑀁 𑀯𑀽𑀧𑀲𑀫𑁂𑀲𑁆𑀲𑀸𑀫𑀻𑀢𑀺 𑀦𑀺𑀫𑀦𑁆𑀢𑁂𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀫𑀸𑀢𑀸𑀧𑀺𑀢𑀼𑀦𑁆𑀦𑀁 𑀓𑀣𑁂𑀢𑁆𑀯𑀸 𑀢𑁂𑀳𑀺 𑀅𑀦𑀼𑀜𑁆𑀜𑀸𑀢𑀸 𑀧𑀼𑀦 𑀤𑀺𑀯𑀲𑁂 𑀦𑀸𑀦𑀕𑁆𑀕𑀭𑀲𑁂𑀦 𑀪𑁂𑀲𑀚𑁆𑀚𑀸𑀳𑀸𑀭𑀁 𑀲𑀫𑁆𑀧𑀸𑀤𑁂𑀲𑀺, 𑀢𑀢𑁄 𑀲𑁄 𑀪𑀺𑀓𑁆𑀔𑀼 𑀧𑀼𑀦𑀤𑀺𑀯𑀲𑁂 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑁄 𑀢𑀲𑁆𑀲𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑀸 𑀣𑁂𑀭𑀁 𑀆𑀕𑀢𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀢𑀢𑁆𑀣 𑀦𑀺𑀲𑀺𑀦𑁆𑀦𑀁 𑀢𑀁 𑀆𑀳𑀸𑀭𑁂𑀦 𑀲𑀸𑀥𑀼𑀓𑀁 𑀧𑀭𑀺𑀯𑀺𑀲𑀺𑀢𑁆𑀯𑀸 𑀲𑀓𑁆𑀓𑀸𑀭 𑀫𑀓𑀸𑀲𑀺. 𑀅𑀣𑀲𑁆𑀲𑀸 𑀲𑀤𑁆𑀥𑀸𑀩𑀮𑁂𑀦 𑀪𑀼𑀢𑁆𑀢𑀫𑀢𑁆𑀢𑁂𑀬𑁂𑀯 𑀲𑁄 𑀆𑀩𑀸𑀥𑁄 𑀯𑀽𑀧𑀲𑀫𑀺. 𑀢𑀢𑁄 𑀲𑁄 𑀯𑀽𑀧𑀲𑀦𑁆𑀢𑀭𑁄𑀕𑁄 𑀤𑀼𑀢𑀺𑀬𑀤𑀺𑀯𑀲𑁂 𑀢𑀲𑁆𑀲𑀸 𑀕𑁂𑀳𑀁 𑀦𑀸 𑀕𑀫𑀸𑀲𑀺. 𑀅𑀣 𑀲𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀓𑀲𑁆𑀫𑀸𑀦𑀸𑀕𑀢𑀢𑁆𑀣𑀸𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 𑀫𑁂 𑀪𑀕𑀺𑀦𑀺 𑀩𑁆𑀬𑀸𑀥𑀺 𑀯𑀽𑀧𑀲𑀫𑀺, 𑀢𑀲𑁆𑀫𑀸 𑀦𑀸𑀕𑀢𑁄𑀲𑁆𑀫𑀻𑀢𑀺 𑀯𑀼𑀢𑁆𑀢𑁂 𑀲𑀸 𑀲𑀸𑀥𑀼 𑀪𑀦𑁆𑀢𑁂𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑀸 𑀕𑁂𑀳𑀫𑁂𑀯 𑀅𑀕𑀫𑀸𑀲𑀺. 𑀲𑀸 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀸 𑀢𑀢𑁆𑀣 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀓𑀦𑀓𑀯𑀺𑀫𑀸𑀦𑀁 𑀦𑀺𑀩𑁆𑀩𑀢𑁆𑀢𑀺. 𑀲𑀸 𑀢𑀢𑁆𑀣 𑀤𑁂𑀯𑀺𑀲𑁆𑀲𑀭𑀺𑀬𑀁 𑀅𑀦𑀼𑀪𑀯𑀦𑁆𑀢𑀻 𑀙𑀩𑀼𑀤𑁆𑀥𑀦𑁆𑀢𑀭𑀁 𑀔𑁂𑀧𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀚𑀫𑁆𑀩𑀼𑀤𑀻𑀧𑁂 𑀤𑁂𑀯𑀧𑀼𑀢𑁆𑀢𑀦𑀕𑀭𑁂 𑀉𑀤𑀺𑀘𑁆𑀘𑀩𑁆𑀭𑀳𑁆𑀫𑀡𑀓𑀼𑀮𑁂 𑀚𑁂𑀝𑁆𑀞𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀭𑀺𑀬𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀲𑀸 𑀧𑀭𑀺𑀧𑀸𑀓 𑀫𑀦𑁆𑀯𑀸𑀬 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀢𑀲𑁆𑀲𑀸 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀤𑀺𑀯𑀲𑁂 𑀤𑀺𑀯𑀲𑁂 𑀅𑀝𑁆𑀞𑀝𑁆𑀞𑀦𑀸𑀮𑀺𑀫𑀢𑁆𑀢𑀁 𑀢𑀡𑁆𑀟𑀼𑀮𑀁 𑀦𑀺𑀩𑁆𑀩𑀢𑁆𑀢𑀢𑀺. 𑀢𑀲𑁆𑀲𑀸 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀸 𑀫𑀸𑀢𑀸𑀧𑀺𑀢𑀭𑁄 𑀭𑀽𑀧𑀤𑁂𑀯𑀻𑀢𑀺 𑀦𑀸𑀫 𑀫𑀓𑀁𑀲𑀼. 𑀧𑀘𑁆𑀙𑀸 𑀢𑀁 𑀧𑀢𑀺𑀭𑀽𑀧𑁂𑀦 𑀤𑀸𑀭𑀓𑁂𑀦 𑀦𑀺𑀬𑁄𑀚𑁂𑀲𑀼𑀁. 𑀅𑀣𑀲𑁆𑀲𑀸 𑀢𑀡𑁆𑀟𑀼𑀮- 𑀦𑀸𑀮𑀺𑀫𑀢𑁆𑀢𑀁 ¶ 𑀕𑀳𑁂𑀢𑁆𑀯𑀸 𑀧𑀘𑀺𑀢𑀼𑀁 𑀆𑀭𑀤𑁆𑀥𑁂 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀫𑀁𑀲𑀸𑀤𑀺𑀩𑁆𑀬𑀜𑁆𑀚𑀦𑀜𑁆𑀚 𑀲𑀧𑁆𑀧𑀺𑀦𑀯𑀦𑀻𑀢𑀤𑀥𑀺𑀔𑀻𑀭𑀸𑀤𑀺𑀕𑁄𑀭𑀲𑀜𑁆𑀘 𑀚𑀻𑀭𑀫𑀭𑀺𑀘𑀸𑀤𑀺𑀓𑀝𑀼𑀓𑀪𑀡𑁆𑀟𑀜𑁆𑀘 𑀓𑀤𑀮𑀺𑀧𑀦𑀲𑀫𑀥𑀼𑀕𑀼𑀴𑀸𑀤𑀺𑀉𑀧𑀓𑀭𑀡𑀜𑁆𑀘 𑀪𑀸𑀚𑀦𑀸𑀦𑀺 𑀧𑀽𑀭𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀸𑀬 𑀳𑀢𑁆𑀣𑁂𑀦 𑀕𑀳𑀺𑀢𑀁 𑀓𑀺𑀜𑁆𑀘𑀺 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁𑀯𑀸 𑀧𑀽𑀢𑀺𑀪𑀸𑀯𑀁 𑀦 𑀕𑀘𑁆𑀙𑀢𑀺, 𑀪𑀢𑁆𑀢𑀼𑀓𑁆𑀔𑀮𑀺𑀁 𑀕𑀳𑁂𑀢𑁆𑀯𑀸 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀪𑁄𑀚𑁂𑀦𑁆𑀢𑀺𑀬𑀸𑀧𑀺 𑀏𑀓𑀓𑀝𑀘𑁆𑀙𑀼𑀫𑀢𑁆𑀢𑀁 𑀪𑀢𑁆𑀢𑀁 𑀕𑀳𑀺𑀢𑀝𑁆𑀞𑀸𑀦𑀁 𑀦 𑀧𑀜𑁆𑀜𑀸𑀬𑀢𑀺. 𑀏𑀯𑀁 𑀅𑀧𑀭𑀺𑀓𑁆𑀔𑀬𑀧𑀼𑀜𑁆𑀜𑀸 𑀅𑀳𑁄𑀲𑀺, 𑀲𑀓𑀮𑀤𑁂𑀯𑀧𑀼𑀢𑁆𑀢𑀦𑀕𑀭𑁂 𑀘𑀦𑁆𑀤𑀲𑀼𑀭𑀺𑀬𑀸𑀯 𑀧𑀸𑀓𑀝𑀸 𑀅𑀳𑁄𑀲𑀺, 𑀅𑀣 𑀲𑀸 𑀧𑀜𑁆𑀘𑀲𑀢𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑁂𑀢𑁆𑀯𑀸 𑀦𑀺𑀘𑁆𑀘𑀁 𑀲𑀓𑀦𑀺𑀯𑁂𑀲𑀦𑁂𑀬𑁂𑀯 𑀪𑁄𑀚𑁂𑀢𑀺, 𑀢𑀤𑀸 𑀢𑁂𑀲𑀁 𑀅𑀦𑁆𑀢𑀭𑁂 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄 𑀫𑀳𑀸𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑁄𑀦𑀸𑀫 𑀇𑀫𑀺𑀲𑁆𑀲𑀸 𑀧𑀼𑀜𑁆𑀜𑀸𑀦𑀼𑀪𑀸𑀯𑀁 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 𑀦 𑀚𑀸𑀦𑀸𑀢𑀺 𑀏𑀲𑀸 𑀅𑀢𑁆𑀣𑀦𑀸 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀁. 𑀬𑀦𑁆𑀦𑀽𑀦𑀸𑀳𑀁 𑀅𑀲𑁆𑀲𑀸 𑀧𑀓𑀸𑀲𑁂𑀬𑁆𑀬𑀦𑁆𑀢𑀺 𑀏𑀓𑀤𑀺𑀯𑀲𑀁 𑀢𑀲𑁆𑀲𑀸 𑀦𑀺𑀯𑁂𑀲𑀦𑁂 𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀓𑀭𑁄𑀦𑁆𑀢𑁄 𑀚𑀸𑀦𑀸𑀲𑀺 𑀪𑀕𑀺𑀦𑀺 𑀢𑀬𑀸 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀦𑁆𑀢𑀺 𑀧𑀼𑀘𑁆𑀙𑀺, 𑀦 𑀚𑀸𑀦𑀸𑀫𑀺 𑀪𑀦𑁆𑀢𑁂. 𑀲𑁄𑀢𑀼𑀫𑀺𑀘𑁆𑀙𑀸𑀫𑀻𑀢𑀺, 𑀅𑀣𑀲𑁆𑀲𑀸 𑀲𑁄 𑀧𑀼𑀩𑁆𑀩𑀓𑀫𑁆𑀫𑀁 𑀧𑀓𑀸𑀲𑁂𑀦𑁆𑀢𑁄.

𑁧.

𑀏𑀓𑀦𑀯𑀼𑀢𑁂 𑀇𑀢𑁄 𑀓𑀧𑁆𑀧𑁂,

𑀯𑀺𑀧𑀲𑁆𑀲𑀻𑀦𑀸𑀫 𑀦𑀸𑀬𑀓𑁄;

𑀅𑀳𑁄𑀲𑀺 𑀮𑁄𑀓𑁂 𑀮𑁄𑀓𑁂𑀓,

𑀦𑀸𑀬𑀓𑁄 𑀙𑀺𑀦𑁆𑀦𑀩𑀦𑁆𑀥𑀦𑁄.

𑁨.

𑀢𑀤𑀸 𑀢𑀲𑁆𑀫𑀺𑀁 𑀧𑀼𑀭𑁂 𑀭𑀫𑁆𑀫𑁂, 𑀆𑀲𑀺 𑀢𑁆𑀯𑀁 𑀕𑀸𑀫𑀤𑀸𑀭𑀺𑀓𑀸;

𑀆𑀳𑀺𑀡𑁆𑀟𑀦𑁆𑀢𑀻 𑀯𑀺𑀳𑀸𑀭𑀲𑁆𑀫𑀺𑀁, 𑀅𑀤𑁆𑀤𑀓𑁆𑀔𑀺 𑀚𑀺𑀦𑀲𑀸𑀯𑀓𑀁.

𑁩.

𑀭𑁄𑀕𑀸𑀢𑀼𑀭𑀁 𑀓𑀺𑀲𑀁 𑀧𑀡𑁆𑀟𑀼𑀁, 𑀅𑀲𑁆𑀲𑀲𑀦𑁆𑀢𑀁 𑀫𑀼𑀳𑀼𑀁 𑀫𑀼𑀳𑀼𑀁;

𑀤𑀺𑀲𑁆𑀯𑀸𑀦 𑀓𑀫𑁆𑀧𑀺𑀢𑀸 𑀘𑀺𑀢𑁆𑀢𑀸, 𑀦𑀺𑀫𑀦𑁆𑀢𑁂𑀢𑁆𑀯𑀸𑀦 𑀢𑀁 𑀫𑀼𑀦𑀺𑀁.

𑁪.

𑀪𑁂𑀲𑀚𑁆𑀚𑀜𑁆𑀘𑁂𑀯 𑀪𑀢𑁆𑀢𑀜𑁆𑀘, 𑀅𑀤𑀸 𑀢𑁆𑀯𑀁 𑀢𑁂𑀦 𑀲𑁄 𑀬𑀢𑀺;

𑀅𑀩𑁆𑀬𑀸𑀩𑀸𑀥𑁄 𑀅𑀦𑀻𑀖𑁄𑀘, 𑀅𑀳𑁄𑀲𑀺 𑀅𑀦𑀼𑀧𑀤𑁆𑀤𑀯𑁄.

𑁫.

𑀢𑀢𑁄 𑀢𑁆𑀯𑀁 𑀢𑁂𑀦 𑀓𑀫𑁆𑀫𑁂𑀦, 𑀲𑀼𑀓𑀢𑁂𑀦 𑀢𑀢𑁄 𑀘𑀼𑀢𑀸;

𑀚𑀸𑀢𑀸𑀲𑀺 𑀤𑁂𑀯𑀮𑁄𑀓𑀲𑁆𑀫𑀺𑀁, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻.

𑁬.

𑀢𑀢𑁆𑀣 ¶ 𑀢𑁂 𑀧𑀼𑀜𑁆𑀜𑀢𑁂𑀚𑁂𑀦, 𑀧𑀸𑀲𑀸𑀤𑁄 𑀭𑀢𑀦𑀸𑀫𑀬𑁄;

𑀫𑀡𑀺𑀣𑀽𑀧𑀺𑀲𑀢𑀸𑀓𑀺𑀡𑁆𑀡𑁄, 𑀓𑀽𑀝𑀸𑀕𑀸𑀭𑁂𑀳𑀺 𑀮𑀗𑁆𑀓𑀢𑁄.

𑁭.

𑀦𑁂𑀓𑀕𑀩𑁆𑀪𑀲𑀢𑀸𑀓𑀺𑀡𑁆𑀡𑁄, 𑀲𑀬𑀦𑀸𑀲𑀦𑀫𑀡𑁆𑀟𑀺𑀢𑁄;

𑀅𑀘𑁆𑀙𑀭𑀸𑀲𑀢𑀲𑀁𑀓𑀺𑀡𑁆𑀡𑁄, 𑀦𑀘𑁆𑀘𑀕𑀻𑀢𑀸𑀤𑀺𑀲𑀁𑀓𑀼𑀮𑁄.

𑁮.

𑀭𑀫𑁆𑀪𑀸𑀫𑁆𑀩𑀚𑀫𑁆𑀩𑀼𑀲𑀦𑁆𑀦𑀻𑀭, 𑀧𑀽𑀕𑀧𑀼𑀦𑁆𑀦𑀸𑀕𑀧𑀸𑀝𑀮𑀻;

𑀦𑀸𑀕𑀸𑀤𑀺𑀢𑀭𑀼𑀲𑀡𑁆𑀟𑁂𑀳𑀺, 𑀫𑀡𑁆𑀟𑀺𑀢𑀼𑀬𑁆𑀬𑀸𑀦𑀧𑀦𑁆𑀢𑀺𑀳𑀺.

𑁯.

𑀧𑀤𑀼𑀫𑀼𑀧𑁆𑀧𑀮𑀓𑀴𑀸𑀭, 𑀓𑀼𑀦𑁆𑀤𑀓𑀸𑀦𑀦𑀫𑀡𑁆𑀟𑀺𑀢𑁂;

𑀫𑀥𑀼𑀫𑀢𑁆𑀢𑀸𑀮𑀺𑀧𑀸𑀮𑀻𑀳𑀺, 𑀲𑀸𑀭𑀲𑀻𑀲𑀭𑀲𑀁𑀓𑀼𑀮𑁂.

𑁧𑁦.

𑀤𑁂𑀯𑀧𑀼𑀢𑁆𑀢𑁂𑀳𑀺 𑀦𑁂𑀓𑁂𑀳𑀺, 𑀢𑀣𑀸 𑀤𑁂𑀯𑀘𑁆𑀙𑀭𑀸𑀳𑀺𑀘;

𑀦𑀺𑀘𑁆𑀘𑀼𑀲𑁆𑀲𑀯𑁂 𑀫𑀳𑀸𑀪𑁄𑀕𑁂, 𑀯𑀺𑀫𑀸𑀦𑁂 𑀫𑀦𑀦𑀦𑁆𑀤𑀦𑁂.

𑁧𑁧.

𑀢𑁆𑀯𑀫𑁂𑀯𑀁 𑀤𑁂𑀯𑀮𑁄𑀓𑀫𑁆𑀳𑀺, 𑀯𑀺𑀦𑁆𑀤𑀫𑀸𑀦𑀸 𑀫𑀳𑀸𑀬𑀲𑀁;

𑀅𑀤𑁆𑀥𑀸𑀦𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸, 𑀦𑀺𑀩𑁆𑀩𑀼𑀢𑁂 𑀕𑁄𑀢𑀫𑁂 𑀚𑀺𑀦𑁂.

𑁧𑁨.

𑀚𑀫𑁆𑀩𑀼𑀤𑀻𑀧𑁂 𑀇𑀤𑀸𑀦𑀺 𑀢𑁆𑀯𑀁, 𑀦𑀺𑀩𑁆𑀩𑀢𑁆𑀢𑀸 𑀉𑀤𑀺𑀢𑁂 𑀓𑀼𑀮𑁂;

𑀧𑀼𑀜𑁆𑀜𑀧𑀜𑁆𑀜𑀸𑀕𑀼𑀡𑀸𑀯𑀸𑀲𑀸, 𑀭𑀽𑀧𑁂𑀦𑀕𑁆𑀕𑀸 𑀧𑀺𑀬𑀁𑀯𑀤𑀸.

𑁧𑁩.

𑀏𑀢𑀁 𑀢𑁂 𑀤𑁂𑀯𑀮𑁄𑀓𑀲𑁆𑀫𑀺𑀁, 𑀤𑁂𑀯𑀺𑀲𑁆𑀲𑀭𑀺𑀬𑀫𑀩𑁆𑀪𑀼𑀢𑀁,

𑀇𑀫𑀁 𑀢𑁂 𑀇𑀥 𑀮𑁄𑀓𑀲𑁆𑀫𑀺𑀁, 𑀲𑀩𑁆𑀩𑀁 𑀫𑀸𑀦𑀼𑀲𑀺𑀓𑀁 𑀲𑀼𑀔𑀁.

𑁧𑁪.

𑀯𑀺𑀧𑀲𑁆𑀲𑀺𑀫𑀼𑀦𑀺𑀦𑁄 𑀓𑀸𑀮𑁂, 𑀢𑁆𑀯𑀁 𑀢𑀲𑁆𑀲𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀅𑀤𑀸 𑀤𑀸𑀦𑀁 𑀕𑀺𑀮𑀸𑀦𑀲𑁆𑀲, 𑀢𑀲𑁆𑀲 𑀢𑀁 𑀨𑀮𑀫𑀻𑀤𑀺𑀲𑀁.

𑁧𑁫.

𑀓𑀸𑀢𑀩𑁆𑀩𑀜𑁆𑀳𑀺 𑀲𑀤𑀸 𑀧𑀼𑀜𑁆𑀜𑀁, 𑀇𑀘𑁆𑀙𑀦𑁆𑀢𑁂𑀦 𑀲𑀼𑀔𑀧𑁆𑀧𑀤𑀁;

𑀢𑀲𑁆𑀫𑀸 𑀢𑁆𑀯𑀁 𑀲𑀩𑁆𑀩𑀤𑀸 𑀪𑀤𑁆𑀤𑁂, 𑀉𑀲𑁆𑀲𑀼𑀓𑁆𑀓𑀸 𑀓𑀼𑀲𑀮𑁂 𑀪𑀯𑀸𑀢𑀺.

𑀏𑀯𑀁 𑀲𑁄 𑀢𑀲𑁆𑀲 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀓𑀢𑀓𑀫𑁆𑀫𑀁 𑀧𑀓𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀼𑀜𑁆𑀜𑀓𑀫𑁆𑀫𑁂 𑀅𑀧𑁆𑀧𑀫𑀸𑀤𑀸 𑀪𑀯𑀸𑀢𑀺 𑀅𑀦𑀼𑀲𑀸𑀲𑀺. 𑀲𑀸 𑀣𑁂𑀭𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀭𑀫𑀲𑁄𑀫𑀦𑀲𑁆𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀤𑀸𑀦𑀸𑀤𑀻𑀲𑀼 𑀦𑀺𑀭𑀢𑀸 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀻 𑀢𑁂𑀦𑁂𑀯 𑀲𑁄𑀫𑀦𑀲𑁆𑀲𑁂𑀦 𑀲𑁄𑀢𑀸𑀧𑀦𑁆𑀦𑀸 𑀅𑀭𑀺𑀬𑀲𑀸𑀯𑀺𑀓𑀸 𑀅𑀳𑁄𑀲𑀻𑀢𑀺.

𑁧𑁬.

𑀇𑀢𑀺 ¶ 𑀢𑀭𑀼𑀡𑀓𑀼𑀫𑀸𑀭𑀻 𑀧𑀼𑀜𑁆𑀜𑀓𑀫𑁆𑀫𑁂𑀲𑀼 𑀲𑀸𑀭𑀁,

𑀅𑀯𑀺𑀤𑀺𑀢𑀕𑀼𑀡𑀫𑀢𑁆𑀢𑀸 𑀤𑀢𑁆𑀯 𑀪𑀺𑀓𑁆𑀔𑀼𑀲𑁆𑀲 𑀤𑀸𑀦𑀁;

𑀤𑀺𑀯𑀺𑀫𑀦𑀼𑀚𑀲𑀼𑀔𑀁 𑀲𑀸𑀮𑀢𑁆𑀣 𑀢𑀼𑀫𑁆𑀳𑁂 𑀪𑀯𑀦𑁆𑀢𑀸,

𑀯𑀺𑀤𑀺𑀢𑀓𑀼𑀲𑀮𑀧𑀸𑀓𑀸 𑀓𑀺𑀁 𑀦 𑀮𑀩𑁆𑀪𑁂𑀣 𑀲𑀦𑁆𑀢𑀺𑀁.

𑀭𑀽𑀧𑀤𑁂𑀯𑀺𑀬𑀸 𑀯𑀢𑁆𑀣𑀼𑀁 𑀤𑀲𑀫𑀁.

𑀥𑀫𑁆𑀫𑀲𑁄𑀡𑁆𑀟𑀓𑀯𑀕𑁆𑀕𑁄 𑀧𑀣𑀫𑁄.

𑀦𑀦𑁆𑀤𑀺𑀬𑀭𑀸𑀚𑀯𑀕𑁆𑀕𑁄

𑁧𑁧. 𑀦𑀦𑁆𑀤𑀺𑀬𑀭𑀸𑀚𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀇𑀢𑁄 ¶ 𑀓𑀺𑀭 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀲𑀢𑁆𑀣𑀸 𑀮𑁄𑀓𑁂 𑀉𑀤𑀧𑀸𑀤𑀺 𑀲𑀤𑁂𑀯𑀓𑀁 𑀮𑁄𑀓𑀁 𑀲𑀁𑀲𑀸𑀭𑀓𑀦𑁆𑀢𑀸𑀭𑀸 𑀉𑀢𑁆𑀢𑀸𑀭𑁂𑀦𑁆𑀢𑁄. 𑀢𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀏𑀓𑁄 𑀓𑀼𑀝𑀼𑀫𑁆𑀩𑀺𑀓𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀩𑀼𑀤𑁆𑀥𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀪𑀯𑀦𑀁 𑀤𑁂𑀯𑀪𑀯𑀦𑀫𑀺𑀯 𑀅𑀮𑀗𑁆𑀓𑀭𑀺𑀢𑁆𑀯𑀸 𑀩𑀼𑀤𑁆𑀥𑀸𑀭𑀳𑀁 𑀫𑀳𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀬𑀸𑀘𑀺 𑀓𑀸𑀮𑁄𑀬𑀁 𑀪𑀦𑁆𑀢𑁂 𑀪𑀕𑀯𑀢𑁄 𑀪𑀢𑁆𑀢𑀕𑁆𑀕𑀲𑁆𑀲 𑀉𑀧𑀲𑀗𑁆𑀓𑀫𑀦𑀸𑀬𑀸𑀢𑀺. 𑀅𑀣 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀫𑀳𑀢𑀸 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀺 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂, 𑀢𑀢𑁄 𑀓𑀼𑀝𑀼𑀫𑁆𑀩𑀺𑀓𑁄 𑀳𑀝𑁆𑀞𑁄 𑀉𑀤𑀕𑁆𑀕𑁄 𑀲𑀧𑀭𑀺𑀲𑁄 𑀪𑀕𑀯𑀦𑁆𑀢𑀁 𑀧𑀭𑀺𑀯𑀺𑀲𑀢𑀺 𑀅𑀦𑁂𑀓𑁂𑀳𑀺 𑀫𑀥𑀼𑀭𑀦𑁆𑀦𑀧𑀸𑀦𑀸𑀤𑀻𑀳𑀺. 𑀢𑀤𑀸 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀥𑀼𑀢𑀗𑁆𑀕𑀥𑀭𑀸𑀦𑀁 𑀅𑀕𑁆𑀕𑁄 𑀯𑀲𑀪𑀢𑁆𑀣𑁂𑀭𑁄𑀦𑀸𑀫 𑀫𑀳𑀸𑀲𑀸𑀯𑀓𑁄 𑀲𑀧𑀤𑀸𑀦𑀯𑀢𑁆𑀢𑁂𑀦 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑁄 𑀢𑀲𑁆𑀲 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀕𑁂𑀳𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺, 𑀅𑀣 𑀲𑁄 𑀣𑁂𑀭𑀁 𑀤𑀺𑀲𑁆𑀯𑀸 𑀪𑀦𑁆𑀢𑁂 𑀲𑀢𑁆𑀣𑀸 𑀅𑀦𑁆𑀢𑁄𑀕𑁂𑀳𑁂 𑀦𑀺𑀲𑀺𑀦𑁆𑀦𑁄, 𑀢𑀼𑀫𑁆𑀳𑁂𑀧𑀺 𑀧𑀯𑀺𑀲𑀣𑀸𑀢𑀺 𑀬𑀸𑀘𑀺, 𑀣𑁂𑀭𑁄 𑀅𑀧𑀯𑀺𑀲𑀺𑀢𑁆𑀯𑀸𑀯 𑀅𑀕𑀫𑀸𑀲𑀺, 𑀓𑀼𑀝𑀼𑀫𑁆𑀩𑀺𑀓𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀫𑀢𑁆𑀢𑀁 𑀯𑀢𑁆𑀯𑀸 𑀓𑀺𑀁 𑀪𑀦𑁆𑀢𑁂 𑀲𑀤𑁂𑀯𑀓𑁂 𑀮𑁄𑀓𑁂 𑀪𑀕𑀯𑀢𑀸𑀧𑀺 𑀉𑀢𑁆𑀢𑀭𑀺𑀢𑀭𑁄 𑀕𑀼𑀡𑁂𑀦 𑀲𑀁𑀯𑀺𑀚𑁆𑀚𑀢𑀻𑀢𑀺 𑀆𑀳. 𑀅𑀣𑀲𑁆𑀲 𑀲𑀢𑁆𑀣𑀸 𑀧𑀼𑀢𑁆𑀢𑁄𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀣𑁂𑀭𑀲𑁆𑀲 𑀕𑀼𑀡𑁂 𑀯𑀡𑁆𑀡𑁂𑀦𑁆𑀢𑁄 𑀏𑀯𑀫𑀸𑀳.

𑁧.

𑀧𑀸𑀮𑁂𑀦𑁆𑀢𑀺 𑀦𑀺𑀫𑁆𑀫𑀮𑀁 𑀓𑀢𑁆𑀯𑀸, 𑀧𑀸𑀢𑀺𑀫𑁄𑀓𑁆𑀔𑀸𑀤𑀺𑀲𑀁𑀯𑀭𑀁;

𑀲𑀫𑀸𑀤𑀺𑀦𑁆𑀦𑀥𑀼𑀢𑀗𑁆𑀕𑀸𑀘, 𑀅𑀧𑁆𑀧𑀺𑀘𑁆𑀙𑀸 𑀫𑀼𑀦𑀺𑀲𑀽𑀦𑀯𑁄.

𑁨.

𑀦𑀺𑀘𑁆𑀘 𑀫𑀦𑁆𑀢𑀓𑀬𑀼𑀤𑁆𑀥𑀫𑁆𑀳𑀺, 𑀦𑀤𑁆𑀥𑀸 𑀬𑁄𑀥𑀸𑀯 𑀤𑀧𑁆𑀧𑀺𑀢𑀸;

𑀧𑀼𑀜𑁆𑀜𑀸𑀦𑀁 𑀯𑀢𑁆𑀣𑀼𑀪𑀽𑀢𑀸 𑀢𑁂, 𑀤𑁂𑀯𑀫𑀸𑀦𑀼𑀲𑀓𑀸 𑀤𑀺𑀦𑀁.

𑁩.

𑀥𑀸𑀭𑁂𑀫𑀳𑀁 𑀯𑀡𑁆𑀡𑀯𑀦𑁆𑀢𑀁, 𑀲𑀻𑀯𑁂𑀬𑁆𑀬𑀫𑁆𑀧𑀺𑀘 𑀘𑀻𑀯𑀭𑀁;

𑀩𑀼𑀤𑁆𑀥𑀧𑀼𑀢𑁆𑀢𑀸 𑀫𑀳𑀸𑀦𑀸𑀕𑀸 𑀦 𑀥𑀸𑀭𑁂𑀦𑁆𑀢𑀺 𑀢𑀣𑀸𑀯𑀺𑀥𑀁.

𑁪.

𑀥𑀸𑀭𑁂𑀦𑁆𑀢𑀺 ¶ 𑀢𑁂 𑀧𑀁𑀲𑀼𑀓𑀽𑀮𑀁, 𑀲𑀗𑁆𑀖𑀸𑀝𑁂𑀢𑁆𑀯𑀸 𑀧𑀺𑀮𑁄𑀢𑀺𑀓𑁂;

𑀯𑀡𑀘𑁆𑀙𑀸𑀤𑀦𑀘𑁄𑀮𑀁𑀯, 𑀇𑀘𑁆𑀙𑀸𑀮𑁄𑀪 𑀯𑀺𑀯𑀚𑁆𑀚𑀺𑀢𑀸.

𑁫.

𑀲𑀸𑀤𑀺𑀬𑀸𑀫𑀺 𑀲𑀤𑀸 𑀳𑀫𑁆𑀪𑁄, 𑀉𑀧𑀸𑀲𑀓𑀦𑀺𑀫𑀦𑁆𑀢𑀦𑀁;

𑀦𑁂𑀯 𑀲𑀸𑀤𑁂𑀦𑁆𑀢𑀺 𑀲𑀫𑁆𑀩𑀼𑀤𑁆𑀥, 𑀧𑀼𑀢𑁆𑀢𑁄 𑀧𑀸𑀲𑀓𑀬𑀸𑀘𑀦𑀁.

𑁬.

𑀲𑀧𑀤𑀸𑀦𑁂𑀦 𑀬𑀁 𑀮𑀤𑁆𑀥𑀁, 𑀮𑀽𑀔𑀁𑀯𑀸𑀧𑀺 𑀧𑀡𑀻𑀢𑀓𑀁;

𑀢𑁂𑀦 𑀢𑀼𑀲𑁆𑀲𑀦𑁆𑀢𑀺 𑀫𑁂 𑀧𑀼𑀢𑁆𑀢𑀸, 𑀭𑀲𑀕𑁂𑀥𑀯𑀺𑀯𑀚𑁆𑀚𑀺𑀢𑀸.

𑁭.

𑀦𑀺𑀧𑀚𑁆𑀚𑀸𑀫𑀺 𑀅𑀳𑀁 𑀲𑀸𑀥𑀼, 𑀲𑀦𑁆𑀣𑀢𑁂 𑀲𑀬𑀦𑁂 𑀲𑀼𑀪𑁂;

𑀦 𑀢𑁂 𑀲𑁂𑀬𑁆𑀬𑀁 𑀧𑀓𑀧𑁆𑀧𑁂𑀦𑁆𑀢𑀺, 𑀲𑀁𑀲𑀸𑀭𑀪𑀬𑀪𑀻𑀭𑀼𑀓𑀸.

𑁮.

𑀞𑀸𑀦𑀸 𑀲𑀦𑀕𑀫𑀦𑁂𑀦, 𑀓𑀧𑁆𑀧𑁂𑀦𑁆𑀢𑀺 𑀇𑀭𑀺𑀬𑀸𑀧𑀣𑀁;

𑀦𑁂𑀓𑀪𑀽𑀫𑀺𑀲𑀫𑀸𑀓𑀺𑀡𑁆𑀡, 𑀧𑀸𑀲𑀸𑀤𑁂𑀲𑀼 𑀯𑀲𑀸𑀫𑀳𑀁.

𑁯.

𑀩𑀼𑀤𑁆𑀥𑀧𑀼𑀢𑁆𑀢𑀸 𑀢𑀣𑀸𑀘𑁆𑀙𑀦𑁆𑀦𑀁, 𑀦 𑀓𑀤𑀸 𑀧𑀯𑀺𑀲𑀦𑁆𑀢𑀺 𑀢𑁂;

𑀭𑀼𑀓𑁆𑀔𑀫𑀽𑀮𑁂 𑀲𑀼𑀲𑀸𑀦𑀲𑁆𑀫𑀺𑀁, 𑀅𑀩𑁆𑀪𑁄𑀓𑀸𑀲𑁂 𑀭𑀫𑀦𑁆𑀢𑀺 𑀢𑁂.

𑁧𑁦.

𑀪𑀸𑀯𑁂𑀢𑁆𑀯𑀸 𑀪𑀯𑀦𑀸𑀲𑀸𑀬, 𑀳𑁂𑀢𑀼𑀁 𑀪𑀸𑀯𑀦𑀫𑀼𑀢𑁆𑀢𑀫𑀁;

𑀅𑀳𑀁 𑀕𑀸𑀫𑁂 𑀯𑀲𑀺𑀲𑁆𑀲𑀸𑀫𑀺, 𑀧𑀸𑀧𑁂𑀦𑁆𑀢𑁄 𑀚𑀦𑀢𑀁 𑀲𑀺𑀯𑀁.

𑁧𑁧.

𑀭𑀫𑀦𑁆𑀢𑀺 𑀫𑀫 𑀧𑀼𑀢𑁆𑀢𑀸 𑀢𑁂, 𑀧𑀦𑁆𑀢𑀲𑁂𑀦𑀸𑀲𑀦𑁂 𑀓𑀓𑀸;

𑀢𑁂𑀲𑀁 𑀫𑀳𑀢𑁆𑀢𑀭𑁄 𑀲𑀦𑁆𑀢𑁄, 𑀣𑁂𑀭𑁄𑀬𑀁 𑀯𑀲𑀪𑁄 𑀫𑀳𑀸;

𑀥𑀼𑀢𑀧𑀸𑀧𑁄 𑀥𑀼𑀢𑀗𑁆𑀕𑀕𑁆𑀕𑁄, 𑀜𑀸𑀢𑁄𑀬𑀁 𑀫𑀫 𑀲𑀸𑀲𑀦𑁂𑀢𑀺.

𑀏𑀯𑀁 𑀪𑀕𑀯𑀸 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀘𑀦𑁆𑀤𑀫𑀡𑁆𑀟𑀮𑁂 𑀧𑀳𑀭𑀦𑁆𑀢𑁄 𑀯𑀺𑀬 𑀣𑁂𑀭𑀲𑁆𑀲 𑀕𑀼𑀡𑁂 𑀧𑀓𑀸𑀲𑁂𑀲𑀺, 𑀢𑀢𑁄 𑀲𑁄 𑀢𑀲𑁆𑀲 𑀕𑀼𑀡𑀓𑀣𑀁 𑀲𑀼𑀢𑁆𑀯𑀸 𑀲𑀬𑀫𑁆𑀧𑀺𑀢𑀁 𑀞𑀸𑀦𑀦𑁆𑀢𑀭𑀁 𑀓𑀸𑀫𑀬𑀫𑀸𑀦𑁄 𑀬𑀦𑁆𑀦𑀽𑀦𑀸𑀳𑀁 𑀅𑀦𑀸𑀕𑀢𑁂 𑀅𑀜𑁆𑀜𑀢𑀭𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀥𑀼𑀢𑀗𑁆𑀕𑀥𑀭𑀸𑀦𑀁 𑀅𑀕𑁆𑀕𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀢𑀁 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀦𑁆𑀢𑁄 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺, 𑀲𑀢𑁆𑀣𑀸 𑀢𑀁 𑀓𑀸𑀭𑀡𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀕𑁄𑀢𑀫𑁄 𑀦𑀸𑀫 𑀲𑀢𑁆𑀣𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀢𑁆𑀯𑀁 𑀢𑀤𑀸 𑀥𑀼𑀢𑀗𑁆𑀕𑀥𑀭𑀸𑀦𑀁 𑀅𑀕𑁆𑀕𑁄 𑀳𑀼𑀢𑁆𑀯𑀸 𑀓𑀲𑁆𑀲 𑀧𑁄𑀢𑀺 𑀧𑀜𑁆𑀜𑀸𑀬𑀺𑀲𑁆𑀲𑀢𑀻𑀢𑀺 𑀩𑁆𑀬𑀸𑀓𑀭𑀡 ¶ 𑀫𑀤𑀸𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑁄 𑀲𑁄𑀫𑀦𑀲𑁆𑀲𑁄 𑀧𑀼𑀜𑁆𑀜𑀓𑀫𑁆𑀫𑀁 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀤𑁂𑀯𑀺𑀲𑁆𑀲𑀭𑀺𑀬𑀁 𑀅𑀦𑀼𑀪𑀯𑀦𑁆𑀢𑁄 𑀯𑀺𑀧𑀲𑁆𑀲𑀻𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀏𑀓𑀲𑀸𑀝𑀓𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺. 𑀢𑀢𑁄 𑀘𑀼𑀢𑁄 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀩𑀸𑀭𑀸𑀡𑀲𑀻𑀦𑀕𑀭𑁂 𑀩𑀸𑀭𑀸𑀡𑀲𑀻𑀲𑁂𑀝𑁆𑀞𑀺 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀲𑀁𑀲𑀸𑀭𑁂 𑀲𑀁𑀲𑀭𑀦𑁆𑀢𑁄 𑀤𑀲𑀯𑀲𑁆𑀲𑀲𑀳𑀲𑁆𑀲𑀸 𑀬𑀼𑀓𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀩𑀸𑀭𑀸𑀡𑀲𑀺𑀬𑀁 𑀏𑀓𑁄 𑀓𑀼𑀝𑀼𑀫𑁆𑀩𑀺𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀧𑀦𑀸𑀬𑀁 𑀓𑀼𑀝𑀼𑀫𑁆𑀩𑀺𑀓𑁄 𑀅𑀭𑀜𑁆𑀜𑁂 𑀚𑀗𑁆𑀖𑀸𑀯𑀺𑀳𑀸𑀭𑀁 𑀅𑀦𑀼𑀯𑀺𑀘𑀭𑀦𑁆𑀢𑁄 𑀧𑀘𑁆𑀘𑀦𑁆𑀢𑀺𑀫𑁂 𑀚𑀦𑀧𑀤𑁂 𑀅𑀭𑀜𑁆𑀜𑀸𑀬𑀢𑀦𑁂 𑀅𑀜𑁆𑀜𑀢𑀭𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀅𑀤𑁆𑀤𑀲. 𑀲𑁄 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀢𑁆𑀣 𑀘𑀻𑀯𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀦𑀼𑀯𑀸𑀢𑁂 𑀅𑀧𑁆𑀧𑀳𑁄𑀦𑁆𑀢𑁂 𑀲𑀁𑀳𑀭𑀺𑀢𑁆𑀯𑀸 𑀞𑀧𑁂𑀢𑀼𑀁 𑀆𑀭𑀤𑁆𑀥𑁄. 𑀓𑀼𑀝𑀼𑀫𑁆𑀩𑀺𑀓𑁄 𑀢𑀁 𑀤𑀺𑀲𑁆𑀯𑀸 𑀪𑀦𑁆𑀢𑁂 𑀓𑀺𑀁 𑀓𑀭𑁄𑀣𑀸𑀢𑀺 𑀧𑀼𑀘𑁆𑀙𑀺. 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀅𑀧𑁆𑀧𑀺𑀘𑁆𑀙𑀢𑀸𑀬 𑀢𑁂𑀦 𑀧𑀼𑀝𑁆𑀞𑁄 𑀦 𑀓𑀺𑀜𑁆𑀘𑀺 𑀯𑀼𑀢𑁆𑀢𑁄 𑀳𑁄𑀢𑀺. 𑀲𑁄 𑀘𑀻𑀯𑀭𑀤𑀼𑀲𑁆𑀲𑀁 𑀦𑀧𑁆𑀧𑀳𑁄𑀢𑀻𑀢𑀺 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀉𑀢𑁆𑀢𑀭𑀲𑀸𑀝𑀓𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀸𑀤𑀫𑀽𑀮𑁂 𑀞𑀧𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀁 𑀕𑀳𑁂𑀢𑁆𑀯𑀸 𑀅𑀦𑀼𑀯𑀸𑀢𑀓𑀁 𑀆𑀭𑁄𑀧𑁂𑀦𑁆𑀢𑁄 𑀘𑀻𑀯𑀭𑀁 𑀓𑀢𑁆𑀯𑀸 𑀧𑀸𑀭𑀼𑀧𑀺. 𑀓𑀼𑀝𑀼𑀫𑁆𑀩𑀺𑀓𑁄 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀢𑁄 𑀢𑀺𑀬𑁄𑀚𑀦𑀫𑀢𑁆𑀢𑀓𑁂 𑀞𑀸𑀦𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀦𑀕𑀭𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀦𑀦𑁆𑀤𑀺𑀬𑁄𑀢𑀺 [𑀦𑀦𑁆𑀤𑀻𑀢𑀺𑀦𑀸𑀫𑀁 𑀇𑀢𑀺𑀲𑀩𑁆𑀩𑀢𑁆𑀣] 𑀦𑀸𑀫𑀁 𑀅𑀓𑀁𑀲𑀼, 𑀢𑀲𑁆𑀲 𑀲𑀢𑁆𑀢 𑀪𑀸𑀢𑀭𑁄 𑀅𑀳𑁂𑀲𑀼𑀁, 𑀲𑁂𑀲𑀸 𑀙 𑀪𑀸𑀢𑀭𑁄 𑀦𑀸𑀦𑀸𑀓𑀫𑁆𑀫𑀦𑁆𑀢𑁂𑀲𑀼 𑀩𑁆𑀬𑀸𑀯𑀝𑀸 𑀫𑀸𑀢𑀸𑀧𑀺𑀢𑀼𑀦𑁆𑀦𑀁 𑀧𑁄𑀲𑁂𑀦𑁆𑀢𑀺. 𑀦𑀦𑁆𑀤𑀺𑀬𑁄 𑀧𑀦 𑀅𑀓𑀫𑁆𑀫𑀲𑀻𑀮𑁄 𑀕𑁂𑀳𑁂𑀬𑁂𑀯 𑀯𑀲𑀢𑀺. 𑀢𑀲𑁆𑀫𑀸 𑀢𑀲𑁆𑀲 𑀲𑁂𑀲𑀸 𑀓𑀼𑀚𑁆𑀛𑀦𑁆𑀢𑀺. 𑀫𑀸𑀢𑀸𑀧𑀺𑀢𑀭𑁄𑀧𑀺 𑀦𑀦𑁆𑀤𑀺𑀬𑀁 𑀆𑀫𑀦𑁆𑀢𑁂𑀢𑁆𑀯𑀸 𑀑𑀯𑀤𑀦𑁆𑀢𑀺. 𑀲𑁄 𑀢𑀼𑀡𑁆𑀳𑀻 𑀳𑁄𑀢𑁂𑀯. 𑀅𑀣𑀸𑀧𑀭𑀲𑁆𑀫𑀺𑀁 𑀲𑀫𑀬𑁂 𑀕𑀸𑀫𑁂 𑀦𑀓𑁆𑀔𑀢𑁆𑀢𑀁 𑀲𑀗𑁆𑀖𑀼𑀝𑁆𑀞𑀁, 𑀢𑀤𑀸 𑀲𑁄 𑀫𑀸𑀢𑀭𑀁 𑀆𑀳. 𑀅𑀫𑁆𑀫 𑀲𑀸𑀝𑀓𑀁 𑀤𑁂𑀳𑀺, 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀻𑀢𑀺, 𑀲𑀸 𑀥𑁄𑀢- 𑀯𑀢𑁆𑀣𑀁 ¶ 𑀦𑀻𑀳𑀭𑀺𑀢𑁆𑀯𑀸 𑀅𑀤𑀸𑀲𑀺, 𑀅𑀫𑁆𑀫 𑀣𑀽𑀮𑀁 𑀇𑀤𑀦𑁆𑀢𑀺, 𑀲𑀸 𑀅𑀜𑁆𑀜𑀁 𑀦𑀻𑀳𑀭𑀺𑀢𑁆𑀯𑀸 𑀅𑀤𑀸𑀲𑀺, 𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺. 𑀅𑀣 𑀦𑀁 𑀫𑀸𑀢𑀸 𑀆𑀳. 𑀢𑀸𑀢 𑀬𑀸𑀤𑀺𑀲𑁂 𑀫𑀬𑀁 𑀕𑁂𑀳𑁂 𑀚𑀸𑀢𑀸, 𑀦𑀢𑁆𑀣𑀺 𑀇𑀢𑁄 𑀲𑀼𑀔𑀼𑀫𑀢𑀭𑀲𑁆𑀲 𑀧𑀝𑀺𑀮𑀸𑀪𑀸𑀬 𑀧𑀼𑀜𑁆𑀜𑀦𑁆𑀢𑀺, 𑀮𑀪𑀦𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀸𑀫𑀺 𑀅𑀫𑁆𑀫𑀸𑀢𑀺. 𑀧𑀼𑀢𑁆𑀢 𑀅𑀳𑀁 𑀅𑀚𑁆𑀚𑁂𑀯 𑀢𑀯 𑀩𑀸𑀭𑀸𑀡𑀲𑀻𑀦𑀕𑀭𑁂 𑀭𑀚𑁆𑀚𑀧𑀝𑀺𑀮𑀸𑀪𑀁 𑀇𑀘𑁆𑀙𑀸𑀫𑀻𑀢𑀺 𑀆𑀳. 𑀲𑁄 𑀲𑀸𑀥𑀼 𑀅𑀫𑁆𑀫𑀸𑀢𑀺 𑀫𑀸𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀫𑀸𑀢𑀼𑀬𑀸 𑀧𑀦𑀲𑁆𑀲 𑀏𑀯𑀁 𑀅𑀳𑁄𑀲𑀺. 𑀓𑀳𑀁 𑀲𑁄 𑀕𑀫𑀺𑀲𑁆𑀲𑀢𑀺, 𑀧𑀼𑀩𑁆𑀩𑁂𑀯𑀺𑀬 𑀇𑀥𑀯𑀸 𑀏𑀢𑁆𑀣𑀯𑀸 𑀕𑁂𑀳𑁂 𑀦𑀺𑀲𑀻𑀤𑀺𑀢𑁆𑀯𑀸 𑀆𑀕𑀘𑁆𑀙𑀢𑀻𑀢𑀺, 𑀲𑁄 𑀧𑀦 𑀧𑀼𑀜𑁆𑀜𑀦𑀺𑀬𑀸𑀫𑁂𑀦 𑀘𑁄𑀤𑀺𑀬𑀫𑀸𑀦𑁄 𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀲𑁂𑀦𑀕𑀼𑀢𑁆𑀢𑀲𑁆𑀲 𑀕𑁂𑀳𑁂 𑀧𑀝𑀺𑀯𑀲𑀢𑀺, 𑀅𑀣𑁂𑀓𑀤𑀺𑀯𑀲𑀁 𑀲𑁄 𑀢𑀲𑁆𑀲 𑀓𑀫𑁆𑀫𑀓𑀸𑀭𑁂𑀳𑀺 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀧𑀘𑀮𑀸𑀬𑀦𑁆𑀢𑁄 𑀲𑀼𑀧𑀺𑀦𑀁 𑀅𑀤𑁆𑀤𑀲. 𑀫𑀼𑀔𑁂𑀦 𑀅𑀦𑁆𑀢𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀢𑁆𑀣𑀭𑀺𑀢𑁆𑀯𑀸 𑀅𑀦𑁆𑀢𑁄𑀓𑀼𑀘𑁆𑀙𑀺𑀫𑁂𑀯 𑀧𑀸𑀯𑀺𑀲𑀺. 𑀧𑀩𑀼𑀤𑁆𑀥𑁄 𑀲𑁄 𑀪𑀻𑀢𑁄 𑀫𑀳𑀸𑀲𑀤𑁆𑀤𑀫𑀓𑀸𑀲𑀺. 𑀅𑀣 𑀦𑀁 𑀫𑀳𑀸𑀲𑁂𑀦𑀕𑀼𑀢𑁆𑀢𑁄 𑀧𑀼𑀘𑁆𑀙𑀺. 𑀦𑀦𑁆𑀤𑀺𑀬𑁄 𑀲𑀼𑀧𑀺𑀦𑀁 𑀅𑀤𑁆𑀤𑀲𑀦𑁆𑀢𑀺 𑀆𑀳. 𑀅𑀣 𑀢𑁂𑀦 𑀓𑀻𑀤𑀺𑀲𑀦𑁆𑀢𑀺 𑀧𑀼𑀝𑁆𑀞𑁄 𑀓𑀣𑁂𑀲𑀺, 𑀢𑀢𑁄 𑀲𑁂𑀦𑀕𑀼𑀢𑁆𑀢𑁄 𑀢𑀁 𑀅𑀢𑁆𑀢𑀦𑁄 𑀓𑀼𑀮𑀽𑀧𑀕𑀁 𑀧𑀭𑀺𑀩𑁆𑀩𑀸𑀚𑀺𑀓𑀁 𑀧𑀼𑀘𑁆𑀙𑀺 𑀓𑁄 𑀢𑀲𑁆𑀲 𑀯𑀺𑀧𑀸𑀓𑁄𑀢𑀺. 𑀧𑀭𑀺𑀩𑁆𑀩𑀸𑀚𑀺𑀓𑀸 𑀬𑀤𑀺 𑀪𑁄 𑀇𑀢𑁆𑀣𑀻 𑀧𑀲𑁆𑀲𑀢𑀺. 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑁂𑀬𑁂𑀯 𑀅𑀪𑀺𑀲𑁂𑀓𑀁 𑀮𑀪𑀢𑀺, 𑀬𑀤𑀺 𑀧𑀼𑀭𑀺𑀲𑁄 𑀧𑀲𑁆𑀲𑀢𑀺, 𑀢𑀣𑁂𑀯 𑀭𑀸𑀚𑀸 𑀳𑁄𑀢𑀻𑀢𑀺 𑀓𑀣𑁂𑀲𑀺. 𑀲𑁂𑀦𑀕𑀼𑀢𑁆𑀢𑁄 𑀢𑀲𑁆𑀲𑀸 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀇𑀫𑀁 𑀫𑀫 𑀜𑀸𑀢𑀺𑀁 𑀓𑀭𑁄𑀫𑀻𑀢𑀺 𑀅𑀢𑁆𑀢𑀦𑁄 𑀲𑀢𑁆𑀢 𑀥𑀻𑀢𑀭𑁂 𑀧𑀓𑁆𑀓𑁄𑀲𑀺𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀧𑀼𑀘𑁆𑀙𑀺. 𑀦𑀦𑁆𑀤𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀯𑀲𑀣𑀸𑀢𑀺, 𑀲𑁂𑀲𑀸 𑀲𑀩𑁆𑀩𑀸 𑀦 𑀇𑀘𑁆𑀙𑀺𑀁𑀲𑀼, 𑀦 𑀫𑀬𑀁 𑀚𑀸𑀦𑀸𑀫 𑀏𑀢𑀁 𑀅𑀥𑀼𑀦𑀸𑀕𑀢𑀁 𑀓𑀼𑀮𑀯𑀦𑁆𑀢𑀁 𑀯𑀸 𑀤𑀼𑀓𑁆𑀓𑀼𑀮𑀯𑀦𑁆𑀢𑀁𑀯𑀸𑀢𑀺. 𑀅𑀣 𑀓𑀡𑀺𑀝𑁆𑀞𑀺𑀓𑀁 𑀧𑀼𑀘𑁆𑀙𑀺. 𑀲𑀸 𑀬𑀲𑁆𑀲 𑀫𑀁 𑀫𑀸𑀢𑀸𑀧𑀺𑀢𑀭𑁄 𑀤𑀲𑁆𑀲𑀦𑁆𑀢𑀺. 𑀢𑁂𑀲𑀁 𑀯𑀘𑀦𑀁 𑀦 𑀪𑀺𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀲𑀫𑁆𑀧𑀝𑀺𑀘𑁆𑀙𑀺, 𑀅𑀣 𑀲𑁂𑀦𑀕𑀼𑀢𑁆𑀢𑁄 𑀦𑀦𑁆𑀤𑀺𑀬𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀤𑀢𑁆𑀯𑀸 𑀢𑀲𑁆𑀲 𑀫𑀳𑀸𑀲𑀫𑁆𑀧𑀢𑁆𑀢𑀺 𑀫𑀤𑀸𑀲𑀺. 𑀢𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀦𑀦𑁆𑀤𑀺𑀬𑁄 𑀢𑀢𑁆𑀣 𑀢𑀢𑁆𑀣 𑀆𑀳𑀺𑀡𑁆𑀟𑀦𑁆𑀢𑁄 𑀭𑀜𑁆𑀜𑁄 𑀫𑀗𑁆𑀕𑀮𑀼𑀬𑁆𑀬𑀸𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺 𑀕𑀦𑁆𑀢𑁆𑀯𑀸 𑀥𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀧𑀚𑁆𑀚𑀺, 𑀲𑁄 𑀘 𑀩𑀸𑀭𑀸𑀡𑀲𑀻𑀭𑀜𑁆𑀜𑁄 𑀓𑀸𑀮𑀗𑁆𑀓𑀢𑀲𑁆𑀲 𑀲𑀢𑁆𑀢𑀫𑁄 ¶ 𑀤𑀺𑀯𑀲𑁄 𑀳𑁄𑀢𑀺. 𑀅𑀫𑀘𑁆𑀘𑀸𑀘 𑀧𑀼𑀭𑁄𑀳𑀺𑀢𑁄𑀘 𑀭𑀜𑁆𑀜𑁄 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀦𑀺𑀲𑀻𑀤𑀺𑀢𑁆𑀯𑀸 𑀫𑀦𑁆𑀢𑀬𑀺𑀁𑀲𑀼. 𑀭𑀜𑁆𑀜𑁄 𑀏𑀓𑀸𑀯 𑀥𑀻𑀢𑀸 𑀅𑀢𑁆𑀣𑀺, 𑀧𑀼𑀢𑁆𑀢𑁄 𑀧𑀦𑀲𑁆𑀲 𑀦𑀢𑁆𑀣𑀺. 𑀅𑀭𑀸𑀚𑀺𑀓𑀁 𑀭𑀚𑁆𑀚𑀁 𑀦 𑀢𑀺𑀝𑁆𑀞𑀢𑀺. 𑀨𑀼𑀲𑁆𑀲𑀭𑀣𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀸𑀢𑀺. 𑀢𑁂 𑀓𑀼𑀫𑀼𑀤𑀧𑀢𑁆𑀢𑀯𑀡𑁆𑀡𑁂 𑀘𑀢𑁆𑀢𑀸𑀭𑁄 𑀲𑀺𑀦𑁆𑀥𑀯𑁂 𑀬𑁄𑀚𑁂𑀢𑁆𑀯𑀸 𑀲𑁂𑀢𑀘𑁆𑀙𑀢𑁆𑀢𑀧𑀫𑀼𑀔𑀁𑀧𑀜𑁆𑀘𑀯𑀺𑀥𑀭𑀸𑀚𑀓𑀓𑀼𑀥𑀪𑀡𑁆𑀟𑀁 𑀭𑀣𑀲𑁆𑀫𑀺𑀁𑀬𑁂𑀯 𑀞𑀧𑁂𑀢𑁆𑀯𑀸 𑀭𑀣𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀘𑁆𑀙𑀢𑁄 𑀢𑀼𑀭𑀺𑀬𑀸𑀦𑀺 𑀧𑀕𑁆𑀕𑀡𑁆𑀳𑀸𑀧𑁂𑀲𑀼𑀁. 𑀭𑀣𑁄 𑀧𑀸𑀘𑀻𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀉𑀬𑁆𑀬𑀸𑀦𑀸𑀪𑀺𑀫𑀼𑀔𑁄 𑀅𑀳𑁄𑀲𑀺. 𑀧𑀭𑀺𑀘𑀬𑁂𑀦 𑀉𑀬𑁆𑀬𑀸𑀦𑀸𑀪𑀺𑀫𑀼𑀔𑁄 𑀕𑀘𑁆𑀙𑀢𑀺. 𑀦𑀺𑀯𑀢𑁆𑀢𑁂𑀫𑀸𑀢𑀺 𑀓𑁂𑀘𑀺 𑀆𑀳𑀁𑀲𑀼. 𑀧𑀼𑀭𑁄𑀳𑀺𑀢𑁄 𑀫𑀸 𑀦𑀺𑀯𑀸𑀭𑀬𑀺𑀢𑁆𑀣𑀸𑀢𑀺 𑀆𑀳. 𑀭𑀣𑁄 𑀓𑀼𑀫𑀸𑀭𑀓𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀆𑀭𑁄𑀳𑀡𑀲𑀚𑁆𑀚𑁄 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀧𑀼𑀭𑁄𑀳𑀺𑀢𑁄 𑀧𑀸𑀭𑀼𑀧𑀡𑀓𑀡𑁆𑀡𑀁 𑀅𑀧𑀦𑁂𑀢𑁆𑀯𑀸 𑀧𑀸𑀤𑀢𑀮𑀸𑀦𑀺 𑀑𑀮𑁄𑀓𑁂𑀦𑁆𑀢𑁄 𑀢𑀺𑀝𑁆𑀞𑀢𑀼 𑀅𑀬𑀁 𑀤𑀻𑀧𑁄. 𑀤𑁆𑀯𑀺𑀲𑀳𑀲𑁆𑀲𑀤𑀻𑀧 𑀧𑀭𑀺𑀯𑀸𑀭𑁂𑀲𑀼 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀏𑀓𑀭𑀚𑁆𑀚𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄𑀢𑀺𑀯𑀢𑁆𑀯𑀸 𑀢𑀲𑁆𑀲 𑀥𑀺𑀢𑀺𑀁 𑀉𑀧𑀥𑀸𑀭𑁂𑀢𑀼𑀁 𑀢𑀺𑀓𑁆𑀔𑀢𑁆𑀢𑀼𑀁 𑀢𑀼𑀭𑀺𑀬𑀸𑀦𑀺 𑀧𑀕𑁆𑀕𑀡𑁆𑀳𑀸𑀧𑁂𑀲𑀺. 𑀅𑀣 𑀓𑀼𑀫𑀸𑀭𑁄 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀑𑀮𑁄𑀓𑁂𑀢𑁆𑀯𑀸 𑀓𑁂𑀦 𑀓𑀸𑀭𑀡𑁂𑀦 𑀆𑀕𑀢𑀢𑁆𑀣𑀸𑀢𑀺 𑀆𑀳, 𑀤𑁂𑀯 𑀢𑀼𑀫𑁆𑀳𑀸𑀓𑀁 𑀭𑀚𑁆𑀚𑀁 𑀧𑀸𑀧𑀼𑀡𑀸𑀢𑀻𑀢𑀺, 𑀭𑀸𑀚𑀸 𑀓𑀳𑀦𑁆𑀢𑀺, 𑀤𑁂𑀯𑀢𑁆𑀢𑀁 𑀕𑀢𑁄 𑀲𑀸𑀫𑀻𑀢𑀺, 𑀓𑀢𑀺 𑀤𑀺𑀯𑀲𑀸 𑀅𑀢𑀺𑀓𑁆𑀓𑀦𑁆𑀢𑀸𑀢𑀺, 𑀅𑀚𑁆𑀚 𑀲𑀢𑁆𑀢𑀫𑁄 𑀤𑀺𑀯𑀲𑁄𑀢𑀺. 𑀧𑀼𑀢𑁆𑀢𑁄 𑀯𑀸 𑀥𑀻𑀢𑀸 𑀯𑀸 𑀦𑀢𑁆𑀣𑀻𑀢𑀺, 𑀥𑀻𑀢𑀸 𑀅𑀢𑁆𑀣𑀺 𑀤𑁂𑀯. 𑀧𑀼𑀢𑁆𑀢𑁄 𑀦 𑀯𑀺𑀚𑁆𑀚𑀢𑀻𑀢𑀺, 𑀢𑁂𑀦𑀳𑀺 𑀓𑀭𑀺𑀲𑁆𑀲𑀸𑀫𑀺 𑀭𑀚𑁆𑀚𑀦𑁆𑀢𑀺, 𑀢𑁂 𑀢𑀸𑀯𑀤𑁂𑀯 𑀅𑀪𑀺𑀲𑁂𑀓𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀭𑀸𑀚𑀥𑀻𑀢𑀭𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀸𑀭𑀺𑀢𑁆𑀯𑀸 𑀉𑀬𑁆𑀬𑀸𑀦𑀁 𑀦𑁂𑀢𑁆𑀯𑀸 𑀓𑀼𑀫𑀸𑀭𑀲𑁆𑀲 𑀅𑀪𑀺𑀲𑁂𑀓𑀁 𑀅𑀓𑀁𑀲𑀼, 𑀅𑀣𑀲𑁆𑀲 𑀓𑀢𑀸𑀪𑀺𑀲𑁂𑀓𑀲𑁆𑀲 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀯𑀢𑁆𑀣𑀁 𑀆𑀦𑁂𑀲𑀼𑀁, 𑀲𑁄 𑀓𑀺𑀫𑀺𑀤𑀁 𑀢𑀸𑀢𑀸𑀢𑀺 𑀆𑀳, 𑀦𑀺𑀯𑀸𑀲𑀦𑀯𑀢𑁆𑀣𑀁 𑀤𑁂𑀯𑀸𑀢𑀺, 𑀦𑀦𑀼 𑀢𑀸𑀢𑀸 𑀣𑀽𑀮𑀁𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀪𑁄𑀕𑀯𑀢𑁆𑀣𑁂𑀲𑀼 𑀇𑀢𑁄 𑀲𑀼𑀔𑀼𑀫𑀢𑀭𑀁 𑀦𑀢𑁆𑀣𑀺 𑀤𑁂𑀯𑀸𑀢𑀺, 𑀢𑀼𑀫𑁆𑀳𑀸𑀓𑀁 𑀭𑀸𑀚𑀸 𑀏𑀯𑀭𑀽𑀧𑀁 𑀦𑀺𑀯𑀸𑀲𑁂𑀲𑀻𑀢𑀺, 𑀆𑀫 𑀤𑁂𑀯𑀸𑀢𑀺. 𑀦 𑀫𑀜𑁆𑀜𑁂 𑀧𑀼𑀜𑁆𑀜𑀯𑀸 𑀢𑀼𑀫𑁆𑀳𑀸𑀓𑀁 𑀭𑀸𑀚𑀸𑀢𑀺 𑀯𑀢𑁆𑀯𑀸 𑀳𑀦𑁆𑀤 𑀲𑀼𑀯𑀡𑁆𑀡𑀪𑀺𑀗𑁆𑀓𑀸𑀭𑀁 𑀆𑀳𑀭𑀣, 𑀮𑀪𑀺𑀲𑁆𑀲𑀸𑀫 𑀯𑀢𑁆𑀣𑀦𑁆𑀢𑀺, 𑀢𑁂 𑀲𑀼𑀯𑀡𑁆𑀡𑀪𑀺𑀗𑁆𑀓𑀸𑀭𑀁 𑀆𑀳𑀭𑀺𑀁𑀲𑀼, 𑀲𑁄 𑀉𑀝𑁆𑀞𑀸𑀬 𑀳𑀢𑁆𑀣𑁂 𑀥𑁄𑀯𑀺𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀳𑀢𑁆𑀣𑁂𑀦 𑀉𑀤𑀓𑀁 𑀆𑀤𑀸𑀬 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬 𑀅𑀩𑁆𑀪𑀼𑀓𑁆𑀓𑀺𑀭𑀺, ¶ 𑀢𑀸𑀯𑀤𑁂𑀯 𑀖𑀦𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑁄𑀴𑀲𑀓𑀧𑁆𑀧𑀭𑀼𑀓𑁆𑀔𑀸 𑀉𑀝𑁆𑀞𑀳𑀺𑀁𑀲𑀼, 𑀧𑀼𑀦 𑀉𑀤𑀓𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑀁 𑀧𑀘𑁆𑀙𑀺𑀫𑀁 𑀉𑀢𑁆𑀢𑀭𑀦𑁆𑀢𑀺 𑀏𑀯𑀁 𑀘𑀢𑀲𑁆𑀲𑁄𑀧𑀺 𑀤𑀺𑀲𑀸 𑀅𑀩𑁆𑀪𑀼𑀓𑁆𑀓𑀺𑀭𑀺, 𑀲𑀩𑁆𑀩𑀤𑀺𑀲𑀸𑀲𑀼 𑀲𑁄𑀴𑀲 𑀲𑁄𑀴𑀲 𑀳𑀼𑀢𑁆𑀯𑀸 𑀘𑀢𑀼𑀲𑀝𑁆𑀞𑀺𑀓𑀧𑁆𑀧𑀭𑀼𑀓𑁆𑀔𑀸 𑀉𑀝𑁆𑀞𑀳𑀺𑀁𑀲𑀼, 𑀲𑁄 𑀏𑀓𑀁 𑀤𑀺𑀩𑁆𑀩𑀤𑀼𑀲𑁆𑀲𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀦𑁆𑀤𑀺𑀬𑀭𑀜𑁆𑀜𑁄 𑀯𑀺𑀚𑀺𑀢𑁂 𑀲𑀼𑀢𑁆𑀢𑀓𑀦𑁆𑀢𑀺𑀓𑀸 𑀇𑀢𑁆𑀣𑀺𑀬𑁄 𑀫𑀸 𑀲𑀼𑀢𑁆𑀢𑀁 𑀓𑀦𑁆𑀢𑀦𑁆𑀢𑀽𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀣𑀸𑀢𑀺 𑀯𑀢𑁆𑀯𑀸 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀸𑀲𑀸𑀤𑀫𑀪𑀺𑀭𑀼𑀬𑁆𑀳 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺. 𑀅𑀳𑁄 𑀢𑀤𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀤𑀺𑀦𑁆𑀦𑀸𑀦𑀼𑀯𑀸𑀢𑀓𑀲𑁆𑀲 𑀯𑀺𑀧𑀸𑀓𑁄. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸.

𑁧𑁨.

𑀬𑀣𑀸 𑀲𑀸𑀲𑀧𑀫𑀢𑁆𑀢𑀫𑁆𑀳𑀸, 𑀩𑀻𑀚𑀸 𑀦𑀺𑀕𑁆𑀭𑁄𑀥𑀧𑀸𑀤𑀧𑁄;

𑀚𑀸𑀬𑀢𑁂 𑀲𑀢𑀲𑀸𑀔𑀟𑁆𑀠𑁄, 𑀫𑀳𑀸𑀦𑀻𑀮𑀫𑁆𑀩𑀼𑀤𑁄𑀧𑀫𑁄.

𑁧𑁩.

𑀢𑀣𑁂𑀯 𑀧𑀼𑀜𑁆𑀜𑀓𑀫𑁆𑀫𑀫𑁆𑀳𑀸, 𑀅𑀡𑀼𑀫𑁆𑀳𑀸 𑀯𑀺𑀧𑀼𑀮𑀁 𑀨𑀮𑀁;

𑀳𑁄𑀢𑀻𑀢𑀺 𑀅𑀧𑁆𑀧𑀧𑀼𑀜𑁆𑀜𑀦𑁆𑀢𑀺, 𑀦𑀸𑀯𑀫𑀜𑁆𑀜𑁂𑀬𑁆𑀬 𑀧𑀡𑁆𑀟𑀺𑀢𑁄𑀢𑀺.

𑀏𑀯𑀁 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀏𑀓𑀤𑀺𑀯𑀲𑀁 𑀤𑁂𑀯𑀻 𑀭𑀜𑁆𑀜𑁄 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀅𑀳𑁄 𑀢𑀧𑀲𑁆𑀲𑀻𑀢𑀺 𑀓𑀸𑀭𑀼𑀜𑁆𑀜𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀓𑀺𑀫𑀺𑀤𑀁 𑀤𑁂𑀯𑀻𑀢𑀺 𑀘 𑀧𑀼𑀝𑁆𑀞𑀸 𑀅𑀢𑀺𑀫𑀳𑀢𑀻 𑀢𑁂 𑀤𑁂𑀯 𑀲𑀫𑁆𑀧𑀢𑁆𑀢𑀺. 𑀅𑀢𑀻𑀢𑀫𑀤𑁆𑀥𑀸𑀦𑀁 𑀓𑀮𑁆𑀬𑀸𑀡𑀁 𑀓𑀢𑀢𑁆𑀢𑀸. 𑀇𑀤𑀸𑀦𑀺 𑀅𑀦𑀸𑀕𑀢𑀲𑁆𑀲𑀢𑁆𑀣𑀸𑀬 𑀓𑀼𑀲𑀮𑀁 𑀓𑀭𑁄𑀣𑀸𑀢𑀺 𑀆𑀳. 𑀓𑀲𑁆𑀲 𑀤𑀲𑁆𑀲𑀸𑀫. 𑀲𑀻𑀮𑀯𑀦𑁆𑀢𑀸 𑀦𑀢𑁆𑀣𑀻𑀢𑀺. 𑀅𑀲𑀼𑀜𑁆𑀜𑁄 𑀤𑁂𑀯 𑀚𑀫𑁆𑀩𑀼𑀤𑀻𑀧𑁄 𑀅𑀭𑀳𑀦𑁆𑀢𑁂𑀳𑀺, 𑀢𑀼𑀫𑁆𑀳𑁂 𑀤𑀸𑀦𑀁 𑀲𑀚𑁆𑀚𑁂𑀣, 𑀅𑀳𑀁 𑀅𑀭𑀳𑀦𑁆𑀢𑁂 𑀮𑀘𑁆𑀙𑀸𑀫𑀻𑀢𑀺 𑀆𑀳. 𑀧𑀼𑀦𑀤𑀺𑀯𑀲𑁂 𑀭𑀸𑀚𑀸 𑀫𑀳𑀸𑀭𑀳𑀁 𑀤𑀸𑀦𑀁 𑀲𑀚𑁆𑀚𑀸𑀧𑁂𑀲𑀺. 𑀤𑁂𑀯𑀻 𑀲𑀘𑁂 𑀇𑀫𑀺𑀲𑁆𑀲𑀸 𑀤𑀺𑀲𑀸𑀬 𑀅𑀭𑀳𑀦𑁆𑀢𑁄 𑀅𑀢𑁆𑀣𑀺, 𑀇𑀥𑀸 𑀕𑀦𑁆𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀺𑀓𑁆𑀔𑀁 𑀕𑀡𑁆𑀳𑀦𑁆𑀢𑀽𑀢𑀺 𑀉𑀢𑁆𑀢𑀭𑀳𑀺𑀫𑀯𑀦𑁆𑀢𑀸𑀪𑀺𑀫𑀼𑀔𑀻 𑀧𑀼𑀧𑁆𑀨𑀸𑀦𑀺 𑀉𑀤𑁆𑀥𑀁 𑀔𑀺𑀧𑀺𑀢𑁆𑀯𑀸 𑀉𑀭𑁂𑀦 𑀦𑀺𑀧𑀚𑁆𑀚𑀺. 𑀅𑀣 𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀆𑀓𑀸𑀲𑀢𑁄 𑀕𑀦𑁆𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀯𑀲𑀦𑁆𑀢𑀸𑀦𑀁 𑀧𑀤𑀼𑀫𑀯𑀢𑀺𑀬𑀸 𑀧𑀼𑀢𑁆𑀢𑀸𑀦𑀁 𑀧𑀜𑁆𑀘𑀲𑀢𑀸𑀦𑀁𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀚𑁂𑀝𑁆𑀞𑀓𑀫𑀳𑀸𑀧𑀤𑀼𑀫𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀸𑀤𑀫𑀽𑀮𑁂 𑀧𑀢𑀺𑀁𑀲𑀼. 𑀢𑀣𑀸𑀳𑀺.

𑁧𑁪.

𑀅𑀳𑁄 ¶ 𑀧𑀲𑁆𑀲𑀣 𑀪𑁄 𑀤𑀸𑀦𑀺, 𑀯𑀺𑀫𑁆𑀳𑀬𑀁 𑀧𑀼𑀜𑁆𑀜𑀓𑀫𑁆𑀫𑀼𑀦𑁄;

𑀅𑀘𑁂𑀢𑀦𑀸𑀧𑀺 𑀧𑀼𑀧𑁆𑀨𑀸𑀦𑀺, 𑀤𑀽𑀢𑀓𑀺𑀘𑁆𑀘𑁂𑀲𑀼 𑀩𑁆𑀬𑀸𑀯𑀝𑀸.

𑁧𑁫.

𑀓𑀢𑁆𑀢𑀼𑀓𑀸𑀫𑁂𑀦 𑀮𑁄𑀓𑀲𑁆𑀫𑀺𑀁, 𑀲𑀓𑀮𑀁 𑀅𑀢𑁆𑀢𑀦𑁄 𑀯𑀲𑀁;

𑀲𑀩𑁆𑀩𑀢𑁆𑀣𑀸𑀫𑁂𑀦 𑀓𑀢𑁆𑀢𑀩𑁆𑀩𑀁, 𑀧𑀼𑀜𑁆𑀜𑀁 𑀧𑀜𑁆𑀜𑀯𑀢𑀸 𑀲𑀤𑀸𑀢𑀺.

𑀢𑀢𑁄 𑀫𑀳𑀸𑀧𑀤𑀼𑀫𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀁 𑀜𑀢𑁆𑀯𑀸 𑀲𑁂𑀲𑀪𑀸𑀢𑀭𑁂 𑀆𑀫𑀦𑁆𑀢𑁂𑀲𑀺. 𑀫𑀸𑀭𑀺𑀲𑀸 𑀦𑀦𑁆𑀤𑀺𑀬𑀭𑀸𑀚𑀸 𑀢𑀼𑀫𑁆𑀳𑁂 𑀦𑀺𑀫𑀦𑁆𑀢𑁂𑀲𑀺. 𑀅𑀥𑀺𑀯𑀸𑀲𑁂𑀣 𑀢𑀲𑁆𑀲 𑀦𑀺𑀫𑀦𑁆𑀢𑀦𑀦𑁆𑀢𑀺. 𑀢𑁂 𑀅𑀥𑀺𑀯𑀸𑀲𑁂𑀢𑁆𑀯𑀸 𑀢𑀸𑀯𑀤𑁂𑀯 𑀆𑀓𑀸𑀲𑁂𑀦𑀸 𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑀤𑁆𑀯𑀸𑀭𑁂 𑀑𑀢𑀭𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀧𑀜𑁆𑀘𑀲𑀢𑀸 𑀤𑁂𑀯 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀆𑀕𑀢𑀸𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁, 𑀭𑀸𑀚𑀸 𑀲𑀤𑁆𑀥𑀺𑀁 𑀤𑁂𑀯𑀺𑀬𑀸 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑁂 𑀕𑀳𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀧𑀸𑀲𑀸𑀤𑀁 𑀆𑀭𑁄𑀧𑁂𑀢𑁆𑀯𑀸 𑀢𑀢𑁆𑀣 𑀢𑁂𑀲𑀁 𑀤𑀸𑀦𑀁 𑀤𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀭𑀸𑀚𑀸 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀤𑁂𑀯𑀻 𑀲𑀗𑁆𑀖𑀦𑀯𑀓𑀲𑁆𑀲 𑀘 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀅𑀬𑁆𑀬𑀸 𑀧𑀘𑁆𑀘𑀬𑁂𑀳𑀺 𑀦 𑀓𑀺𑀮𑀫𑀺𑀲𑁆𑀲𑀦𑁆𑀢𑀼, 𑀫𑀬𑀁 𑀧𑀼𑀜𑁆𑀜𑁂𑀦 𑀦 𑀳𑀸𑀬𑀺𑀲𑁆𑀲𑀸𑀫, 𑀅𑀫𑁆𑀳𑀸𑀓𑀁 𑀇𑀥 𑀯𑀸𑀲𑀸𑀬 𑀧𑀝𑀺𑀜𑁆𑀜𑀁 𑀤𑁂𑀣𑀸𑀢𑀺 𑀧𑀝𑀺𑀜𑁆𑀜𑀁 𑀓𑀸𑀭𑁂𑀢𑁆𑀯𑀸 𑀉𑀬𑁆𑀬𑀸𑀦𑁂 𑀦𑀺𑀯𑀸𑀲𑀝𑁆𑀞𑀸𑀦𑀸𑀤𑀬𑁄 𑀓𑀸𑀭𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀧𑀘𑁆𑀘𑀓𑀩𑀼𑀤𑁆𑀥𑁂 𑀉𑀧𑀝𑁆𑀞𑀳𑀺𑀢𑁆𑀯𑀸 𑀢𑁂𑀲𑀼 𑀧𑀭𑀺𑀦𑀺𑀩𑁆𑀩𑀼𑀢𑁂𑀲𑀼 𑀲𑀸𑀥𑀼𑀓𑀻𑀴𑀦𑀁 𑀓𑀸𑀭𑁂𑀢𑁆𑀯𑀸 𑀘𑀦𑁆𑀤𑀦𑀸 𑀕𑀭𑀼𑀆𑀤𑀻𑀳𑀺 𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀏𑀯𑀭𑀽𑀧𑀸𑀦𑀫𑁆𑀧𑀺 𑀫𑀳𑀸𑀦𑀼𑀪𑀸𑀯𑀸𑀦𑀁 𑀫𑀳𑁂𑀲𑀻𑀦𑀁 𑀫𑀭𑀡𑀁 𑀪𑀯𑀺𑀲𑁆𑀲𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀫𑀸𑀤𑀺𑀲𑀸𑀦𑀦𑁆𑀢𑀺 𑀲𑀁𑀯𑁂𑀕𑀚𑀸𑀢𑁄 𑀚𑁂𑀝𑁆𑀞𑀧𑀼𑀢𑁆𑀢𑀁 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀬𑀁 𑀧𑀩𑁆𑀩𑀚𑀁 𑀧𑀩𑁆𑀩𑀚𑀺, 𑀤𑁂𑀯𑀻𑀧𑀺 𑀭𑀜𑁆𑀜𑁂 𑀧𑀩𑁆𑀩𑀚𑀺𑀢𑁂 𑀅𑀳𑀁 𑀓𑀺𑀁𑀓𑀭𑀺𑀲𑁆𑀲𑀸𑀫𑀻𑀢𑀺 𑀧𑀩𑁆𑀩𑀚𑀺𑀢𑁆𑀯𑀸 𑀤𑁆𑀯𑁂𑀧𑀺 𑀉𑀬𑁆𑀬𑀸𑀦𑁂 𑀯𑀲𑀦𑁆𑀢𑀸 𑀛𑀸𑀦𑀸𑀪𑀺𑀜𑁆𑀜𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀦𑁆𑀢𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀩𑀼𑀤𑁆𑀥𑀲𑀸𑀲𑀦𑁂 𑀧𑀩𑁆𑀩𑀚𑀺𑀁𑀲𑀼, 𑀢𑀤𑀸 𑀦𑀦𑁆𑀤𑀺𑀬𑀭𑀸𑀚𑀸 𑀥𑀼𑀢𑀗𑁆𑀕𑀥𑀭𑀸𑀦𑀁 𑀅𑀕𑁆𑀕𑁄 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄𑀦𑀸𑀫 𑀳𑀼𑀢𑁆𑀯𑀸 𑀘𑀦𑁆𑀤𑁄 𑀯𑀺𑀬 𑀲𑀼𑀭𑀺𑀬𑁄 𑀯𑀺𑀬𑀘 𑀮𑁄𑀓𑁂 𑀧𑀸𑀓𑀝𑁄 𑀳𑀼𑀢𑁆𑀯𑀸 𑀪𑀕𑀯𑀢𑀺 𑀧𑀭𑀺- 𑀦𑀺𑀩𑁆𑀩𑀼𑀢𑁂 ¶ 𑀩𑀼𑀤𑁆𑀥𑀲𑀸𑀲𑀦𑀁 𑀅𑀢𑀺𑀯𑀺𑀬 𑀲𑁄𑀪𑁂𑀢𑀺. 𑀪𑀭𑀺𑀬𑀸𑀧𑀺𑀲𑁆𑀲 𑀪𑀤𑁆𑀤𑀓𑀸𑀧𑀺𑀴𑀸𑀦𑀻 𑀦𑀸𑀫 𑀅𑀳𑁄𑀲𑀻𑀢𑀺.

𑁧𑁬.

𑀤𑀢𑁆𑀯𑀸 𑀧𑀼𑀭𑁂𑀓𑁄 𑀯𑀺𑀧𑀺𑀦𑁂 𑀘𑀭𑀦𑁆𑀢𑁄,

𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲𑀦𑀼𑀯𑀸𑀢𑀫𑀢𑁆𑀢𑀁;

𑀓𑀢𑁆𑀯𑀸 𑀲𑀭𑀝𑁆𑀞𑀁 𑀓𑀼𑀭𑀼𑀤𑀻𑀧𑀲𑁄𑀪𑀁,

𑀫𑀳𑀸𑀦𑀼𑀪𑀸𑀯𑁄 𑀯𑀲𑀼𑀥𑀸 𑀥𑀺𑀧𑁄𑀲𑀺.

𑁧𑁭.

𑀢𑀼𑀫𑁆𑀳𑁂𑀘 𑀪𑁄𑀦𑁆𑀢𑁄 𑀔𑀮𑀼 𑀲𑀻𑀮𑀯𑀦𑁆𑀢𑁂,

𑀤𑀤𑀸𑀣 𑀤𑀸𑀦𑀸𑀦𑀺 𑀅𑀦𑀧𑁆𑀧𑀓𑀸𑀦𑀺;

𑀢𑀁 𑀯𑁄 𑀧𑀢𑀺𑀝𑁆𑀞𑀸𑀘 𑀪𑀯𑀦𑁆𑀢𑀭𑀲𑁆𑀫𑀺𑀁,

𑀘𑀺𑀦𑁆𑀢𑀸𑀫𑀡𑀺𑀁 𑀓𑀧𑁆𑀧𑀢𑀭𑀼𑀁𑀯 𑀲𑀸𑀭𑀦𑁆𑀢𑀺.

𑀦𑀦𑁆𑀤𑀺𑀬𑀭𑀸𑀚𑀲𑁆𑀲 𑀯𑀢𑁆𑀣𑀼𑀁 𑀧𑀣𑀫𑀁.

𑁧𑁨. 𑀅𑀜𑁆𑀜𑀢𑀭𑀫𑀦𑀼𑀲𑁆𑀲𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀅𑀫𑁆𑀳𑀸𑀓𑀁 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀧𑀸𑀝𑀮𑀺𑀧𑀼𑀢𑁆𑀢𑀲𑀫𑀻𑀧𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑁂 𑀅𑀜𑁆𑀜𑀢𑀭𑁄 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑁄 𑀯𑀲𑀢𑀺, 𑀲𑁄 𑀧𑀦𑁂𑀓𑀤𑀺𑀯𑀲𑀁 𑀅𑀜𑁆𑀜𑀢𑀭𑀁 𑀕𑀸𑀫𑀁 𑀕𑀘𑁆𑀙𑀦𑁆𑀢𑁄 𑀤𑁆𑀯𑁂 𑀲𑀸𑀝𑀓𑁂 𑀦𑀺𑀯𑀸𑀲𑁂𑀢𑁆𑀯𑀸 𑀫𑀳𑀦𑁆𑀢𑀁 𑀅𑀝𑀯𑀺𑀁𑀧𑀸𑀧𑀼𑀡𑀺, 𑀢𑀤𑁂𑀯𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀏𑀢𑀲𑁆𑀲 𑀯𑀢𑁆𑀣𑀁 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀏𑀓𑁄 𑀘𑁄𑀭𑁄 𑀅𑀦𑀼𑀩𑀦𑁆𑀥𑀺, 𑀲𑁄 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀘𑁄𑀭𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺, 𑀅𑀳𑀫𑁂𑀢𑀲𑁆𑀫𑀸 𑀧𑀮𑀸𑀬𑀺𑀢𑀼𑀁 𑀯𑀸 𑀢𑁂𑀦 𑀲𑀤𑁆𑀥𑀺𑀁𑀬𑀼𑀚𑁆𑀛𑀺𑀢𑀼𑀁 𑀯𑀸 𑀦 𑀲𑀓𑁆𑀓𑁄𑀫𑀺, 𑀅𑀬𑀫𑀸𑀕𑀦𑁆𑀢𑁆𑀯𑀸 𑀅𑀯𑀲𑁆𑀲𑀁 𑀅𑀦𑀺𑀘𑁆𑀙𑀦𑁆𑀢𑀲𑁆𑀲𑀸𑀧𑀺 𑀫𑁂 𑀯𑀢𑁆𑀣𑀁 𑀕𑀡𑁆𑀳𑀺𑀲𑁆𑀲𑀢𑀺. 𑀫𑀬𑀸𑀧𑀺𑀲𑁆𑀲 𑀦𑀺𑀭𑀢𑁆𑀣𑀓𑁂𑀦 𑀳𑀭𑀺𑀢𑀼𑀁 𑀦 𑀲𑀓𑁆𑀓𑀸, 𑀤𑀸𑀦𑀯𑀲𑁂𑀦𑀲𑁆𑀲 𑀤𑀲𑁆𑀲𑀸𑀫𑀻𑀢𑀺 𑀲𑀦𑁆𑀦𑀺𑀝𑁆𑀞𑀸𑀦 𑀫𑀓𑀸𑀲𑀺, 𑀅𑀣 𑀘𑁄𑀭𑁄 𑀆𑀕𑀦𑁆𑀢𑁆𑀯𑀸 𑀯𑀢𑁆𑀣𑀓𑀁 𑀧𑀭𑀸𑀫𑀲𑀺, 𑀅𑀣 𑀲𑁄 𑀧𑀼𑀭𑀺𑀲𑁄 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀇𑀫𑀁 𑀫𑀫 𑀯𑀢𑁆𑀣𑀤𑀸𑀦𑀁 𑀪𑀯𑀪𑁄𑀕𑀲𑀼𑀔𑀢𑁆𑀣𑀸𑀬 𑀧𑀘𑁆𑀘𑀬𑁄 𑀳𑁄𑀢𑀽𑀢𑀺 𑀯𑀢𑁆𑀣𑀁 𑀤𑀢𑁆𑀯𑀸 𑀤𑀼𑀘𑁆𑀙𑀸𑀤𑀺𑀢𑀢𑁆𑀢𑀸 𑀫𑀳𑀸𑀫𑀕𑁆𑀕𑀁 𑀧𑀳𑀸𑀬 𑀅𑀜𑁆𑀜𑁂𑀦 𑀚𑀗𑁆𑀖𑀸𑀫𑀕𑁆𑀕𑁂𑀦 𑀕𑀘𑁆𑀙𑀦𑁆𑀢𑁄 𑀆𑀲𑀺𑀯𑀺𑀲𑁂𑀦 𑀤𑀝𑁆𑀞𑁄 𑀓𑀸𑀮𑀁 𑀓𑀢𑁆𑀯𑀸 𑀳𑀺𑀫𑀯𑀦𑁆𑀢𑀧𑁆𑀧𑀤𑁂𑀲𑁂 ¶ 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁂 𑀓𑀦𑀓𑀯𑀺𑀫𑀸𑀦𑁂 𑀦𑁂𑀓𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀦𑀺𑀩𑁆𑀩𑀢𑁆𑀢𑀺. 𑀯𑀺𑀫𑀸𑀦𑀁 𑀧𑀦𑀲𑁆𑀲 𑀧𑀭𑀺𑀯𑀸𑀭𑁂𑀢𑁆𑀯𑀸 𑀢𑀺𑀬𑁄𑀚𑀦𑀺𑀓𑁂 𑀞𑀸𑀦𑁂 𑀓𑀧𑁆𑀧𑀭𑀼𑀓𑁆𑀔𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼, 𑀲𑁄 𑀫𑀳𑀦𑁆𑀢𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀁 𑀧𑀯𑁂𑀤𑁂𑀦𑁆𑀢𑁄 𑀆𑀳.

𑁧.

𑀧𑀭𑀺𑀡𑀸𑀫𑀺𑀢𑀫𑀢𑁆𑀢𑁂𑀦, 𑀤𑀸𑀦𑀲𑁆𑀲 𑀲𑀓𑀲𑀦𑁆𑀢𑀓𑀁;

𑀤𑀤𑀸𑀢𑀺 𑀯𑀺𑀧𑀼𑀮𑀁 𑀪𑁄𑀕𑀁, 𑀤𑀺𑀩𑁆𑀩𑀫𑀺𑀲𑁆𑀲𑀭𑀺𑀬𑀁 𑀯𑀭𑀁.

𑁨.

𑀤𑁆𑀯𑀸𑀤𑀲𑀬𑁄𑀚𑀦𑀼𑀩𑁆𑀩𑁂𑀥𑀁, 𑀤𑀼𑀤𑁆𑀤𑀺𑀓𑁆𑀔𑀁 𑀘𑀓𑁆𑀔𑀼𑀫𑀽𑀲𑀦𑀁;

𑀓𑀽𑀝𑀸 𑀕𑀸𑀭𑀯𑀭𑀼𑀧𑁂𑀢𑀁, 𑀲𑀩𑁆𑀩𑀲𑁄𑀯𑀡𑁆𑀡𑀬𑀁 𑀲𑀼𑀪𑀁.

𑁩.

𑀫𑀫 𑀧𑀼𑀜𑁆𑀜𑁂𑀦 𑀦𑀺𑀩𑁆𑀩𑀢𑁆𑀢𑀁, 𑀦𑁂𑀓𑀭𑀸𑀕𑀤𑁆𑀥𑀚𑀸𑀓𑀼𑀮𑀁,

𑀢𑀣𑁂𑀯 𑀧𑀭𑀺𑀲𑀼𑀤𑁆𑀥𑁂𑀳𑀺, 𑀯𑀺𑀢𑀸𑀦𑁂𑀳𑀺 𑀘 𑀮𑀗𑁆𑀓𑀢𑀁.

𑁪.

𑀧𑀸𑀲𑀸𑀤𑀧𑀭𑀺𑀬𑀦𑁆𑀢𑀫𑁆𑀳𑀺, 𑀤𑀺𑀩𑁆𑀩𑀯𑀢𑁆𑀣𑀸𑀦𑀺 𑀮𑀫𑁆𑀩𑀭𑁂;

𑀯𑀸𑀢𑁂𑀭𑀺𑀢𑀸 𑀢𑁂 𑀲𑁄𑀪𑀦𑁆𑀢𑀺, 𑀅𑀯𑁆𑀳𑁂𑀦𑁆𑀢𑀸𑀯 𑀲𑀼𑀥𑀸𑀲𑀺𑀦𑁄.

𑁫.

𑀧𑀸𑀲𑀸𑀤𑀲𑁆𑀲 𑀲𑀫𑀦𑁆𑀢𑀸 𑀫𑁂, 𑀪𑀽𑀫𑀺𑀪𑀸𑀕𑁂 𑀢𑀺𑀬𑁄𑀚𑀦𑁂;

𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀤𑀸𑀢𑀸𑀭𑁄, 𑀚𑀸𑀢𑀸𑀲𑀼𑀁 𑀲𑀼𑀭𑀧𑀸𑀤𑀧𑀸.

𑁬.

𑀢𑀢𑁆𑀣 𑀦𑀘𑁆𑀘𑁂𑀳𑀺 𑀕𑀻𑀢𑁂𑀳𑀺, 𑀯𑀸𑀤𑁂𑀳𑀺 𑀢𑀼𑀭𑀺𑀬𑁂𑀳𑀺 𑀘;

𑀦𑁂 𑀓𑀘𑁆𑀙𑀭𑀸𑀲𑀳𑀲𑁆𑀲𑁂𑀳𑀺, 𑀫𑁄𑀤𑀸𑀫𑀺 𑀪𑀯𑀦𑁂 𑀫𑀫.

𑁭.

𑀦 𑀲𑀫𑁆𑀫𑀸 𑀤𑀺𑀦𑁆𑀦𑀯𑀢𑁆𑀣𑀲𑁆𑀲, 𑀅𑀓𑁆𑀔𑁂𑀢𑁆𑀢𑁂 𑀨𑀮𑀫𑀻 𑀤𑀺𑀲𑀁;

𑀔𑁂𑀢𑁆𑀢𑁂 𑀲𑀫𑁆𑀫𑀸 𑀤𑀤𑀦𑁆𑀢𑀲𑁆𑀲, 𑀓𑁄 𑀨𑀮𑀁 𑀯𑀡𑁆𑀡𑀬𑀺𑀲𑁆𑀲𑀢𑀻𑀢𑀺.

𑁮.

𑀏𑀯𑀁 𑀯𑀺𑀥𑀫𑁆𑀧𑀺 𑀓𑀼𑀲𑀮𑀁 𑀫𑀦𑀼𑀚𑁄 𑀓𑀭𑀺𑀢𑁆𑀯𑀸,

𑀧𑀧𑁆𑀧𑁄𑀢𑀺 𑀤𑀺𑀩𑁆𑀩𑀯𑀺𑀪𑀯𑀁 𑀫𑀼𑀦𑀺𑀯𑀡𑁆𑀡𑀦𑀻𑀬𑀁;

𑀫𑀦𑁆𑀢𑁆𑀯𑀸𑀦 𑀪𑁄 𑀤𑀤𑀣 𑀤𑀸𑀦𑀯𑀭𑀁 𑀲𑀼𑀲𑀻𑀮𑁂,

𑀲𑀤𑁆𑀥𑀸𑀬 𑀲𑀼𑀤𑁆𑀥𑀫𑀦𑀲𑀸𑀲𑁆𑀲 𑀯𑀺𑀲𑁂𑀲𑀪𑀸𑀕𑀻𑀢𑀺.

𑀅𑀜𑁆𑀜𑀢𑀭𑀫𑀦𑀼𑀲𑁆𑀲𑀲𑁆𑀲 𑀯𑀢𑁆𑀣𑀼𑀁 𑀤𑀼𑀢𑀺𑀬𑀁.

𑁧𑁩. 𑀯𑀺𑀲𑀫𑀮𑁄𑀫𑀓𑀼𑀫𑀸𑀭𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀅𑀢𑀻𑀢𑁂 ¶ 𑀓𑀺𑀭 𑀇𑀫𑀲𑁆𑀫𑀺𑀁 𑀚𑀫𑁆𑀩𑀼𑀤𑀻𑀧𑁂 𑀓𑀲𑁆𑀲𑀧𑁄 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀮𑁄𑀓𑀲𑁆𑀲 𑀤𑀼𑀓𑁆𑀔𑀸𑀧𑀦𑀼𑀤𑁄 𑀲𑀼𑀔𑀸𑀯𑀳𑁄 𑀧𑀝𑀺𑀯𑀲𑀢𑀺 𑀮𑁄𑀓𑀁 𑀦𑀺𑀩𑁆𑀩𑀸𑀡𑀫𑀳𑀸𑀦𑀕𑀭𑀯𑀭𑁂 𑀧𑀭𑀺𑀧𑀽𑀭𑁂𑀦𑁆𑀢𑁄. 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑁂𑀦𑁆𑀢𑁄 𑀲𑀻𑀮𑀁 𑀭𑀓𑁆𑀔𑀦𑁆𑀢𑁄 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀸𑀦𑀸𑀯𑀺𑀥𑀸𑀦𑀺 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄𑀯𑀺𑀬 𑀕𑀦𑁆𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺 𑀲𑀩𑁆𑀩𑀭𑀢𑀦𑀫𑀬𑁂 𑀤𑀺𑀩𑁆𑀩𑀯𑀺𑀥𑀸𑀦𑁂 𑀤𑁂𑀯𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀼𑀢𑁄. 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀅𑀫𑁆𑀳𑀸𑀓𑀁 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀚𑀫𑁆𑀩𑀼𑀤𑀻𑀧𑁂 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑁂 𑀆𑀡𑀸𑀘𑀓𑁆𑀓𑀯𑀢𑁆𑀢𑀺𑀥𑀫𑁆𑀫𑀸𑀲𑁄𑀓𑀫𑀳𑀸𑀦𑀭𑀺𑀦𑁆𑀤𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀦𑀸𑀫𑀁 𑀓𑀭𑁄𑀦𑁆𑀢𑁄 𑀲𑀻𑀲𑁂 𑀮𑁄𑀫𑀁 𑀯𑀺𑀲𑀫𑀁 𑀳𑀼𑀢𑁆𑀯𑀸 𑀚𑀸𑀢𑀢𑁆𑀣𑀸 𑀯𑀺𑀲𑀫𑀮𑁄𑀫𑀓𑀼𑀫𑀸𑀭𑁄𑀢𑀺 𑀲𑀜𑁆𑀚𑀸𑀦𑀺𑀁𑀲𑀼. 𑀲𑁄 𑀓𑀫𑁂𑀦 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀩𑀮𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺. 𑀫𑀳𑀸𑀣𑀸𑀫𑁄 𑀅𑀪𑀺𑀭𑀽𑀧𑁄𑀘 𑀅𑀳𑁄𑀲𑀺. 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀬𑀲𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑁄 𑀧𑀝𑀺𑀯𑀲𑀢𑀺. 𑀢𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀥𑀫𑁆𑀫𑀸𑀲𑁄𑀓𑀫𑀳𑀸𑀦𑀭𑀺𑀦𑁆𑀤𑁄 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀭𑀸𑀚𑀧𑀭𑀺𑀯𑀼𑀢𑁄 𑀅𑀦𑀦𑁆𑀢𑀩𑀮𑀯𑀸𑀳𑀦𑁄 𑀓𑀻 𑀴𑀸 𑀧 𑀭𑁄 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀬𑀣𑀸𑀪𑀺𑀭𑀦𑁆𑀢𑀁 𑀓𑀻𑀴𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀘𑀦𑁆𑀤𑀪𑀸𑀕𑀁 𑀦𑀸𑀫 𑀕𑀗𑁆𑀕𑀁 𑀲𑀫𑁆𑀧𑀸𑀧𑀼𑀡𑀺. 𑀲𑀸 𑀧𑀦 𑀬𑁄𑀚𑀦𑀯𑀺𑀢𑁆𑀣𑀢𑀸 𑀢𑀺𑀕𑀸𑀯𑀼𑀢𑀕𑀫𑁆𑀪𑀻𑀭𑀸 𑀅𑀳𑁄𑀲𑀺. 𑀢𑀤𑀸 𑀲𑀸 𑀅𑀥𑀼𑀦𑀸𑀕𑀢𑁂𑀳𑀺 𑀑𑀖𑁂𑀳𑀺 𑀫𑀳𑀸𑀨𑁂𑀡𑀲𑀫𑀸𑀓𑀼𑀮𑀸 𑀩𑀳𑀽𑀫𑀺𑀬𑁄 𑀉𑀪𑁄𑀓𑀽𑀮𑁂 𑀉𑀢𑁆𑀢𑀭𑀦𑁆𑀢𑀻 𑀫𑀳𑀸𑀯𑁂𑀕𑀸 [𑀫𑀳𑀸𑀯𑁂𑀕𑀸𑀕𑀘𑁆𑀙𑀦𑁆𑀢𑀻 𑀇𑀢𑀺𑀲𑀩𑁆𑀩𑀢𑁆𑀣] 𑀕𑀘𑁆𑀙𑀦𑁆𑀢𑀺. 𑀢𑀤𑀸 𑀭𑀸𑀚𑀸 𑀕𑀗𑁆𑀕𑀁 𑀤𑀺𑀲𑁆𑀯𑀸 𑀓𑁄 𑀦𑀸𑀫𑁂𑀢𑁆𑀣 𑀧𑀼𑀭𑀺𑀲𑁄 𑀏𑀯𑀁𑀯𑀺𑀥𑀁 𑀫𑀳𑀸𑀕𑀗𑁆𑀕𑀁 𑀢𑀭𑀺𑀢𑀼𑀁 𑀲𑀫𑀢𑁆𑀣𑁄 𑀪𑀯𑀺𑀲𑁆𑀲𑀢𑀻𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀯𑀺𑀲𑀫𑀮𑁄𑀫 𑀓𑀼𑀫𑀸𑀭𑁄 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀳𑀁 𑀤𑁂𑀯 𑀕𑀗𑁆𑀕𑀁 𑀢𑀭𑀺𑀢𑁆𑀯𑀸 𑀕𑀦𑁆𑀢𑀼𑀜𑁆𑀘 𑀆𑀕𑀦𑁆𑀢𑀼𑀜𑁆𑀘 𑀲𑀓𑁆𑀓𑁄𑀫𑀻𑀢𑀺 𑀆𑀳. 𑀭𑀸𑀚𑀸 𑀲𑀸𑀥𑀽𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀅𑀣 𑀓𑀼𑀫𑀸𑀭𑁄 𑀕𑀸𑀴𑁆𑀳𑀁 𑀦𑀺𑀯𑀸𑀲𑁂𑀢𑁆𑀯𑀸 𑀫𑀓𑀭𑀤𑀦𑁆𑀢𑀺𑀬𑀸 ¶ 𑀓𑁂𑀲𑁂 𑀩𑀦𑁆𑀥𑀺𑀢𑁆𑀯𑀸 𑀕𑀗𑁆𑀕𑀸𑀓𑀽𑀮𑁂 𑀞𑀺𑀢𑁄 𑀅𑀝𑁆𑀞𑀸𑀭𑀲𑀳𑀢𑁆𑀣𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀉𑀲𑀪𑀫𑀢𑁆𑀢𑀝𑁆𑀞𑀸𑀦𑁂 𑀧𑀢𑀺𑀢𑁆𑀯𑀸 𑀢𑀭𑀺𑀢𑀼 𑀫𑀸𑀭𑀪𑀺. 𑀢𑀢𑁄 𑀘𑀡𑁆𑀟𑀲𑁄𑀢𑀁 𑀙𑀺𑀦𑁆𑀤𑀺𑀢𑁆𑀯𑀸 𑀢𑀭𑀦𑁆𑀢𑁄 𑀕𑀫𑀦𑀸 𑀕𑀫𑀦𑀓𑀸𑀮𑁂 𑀕𑀡𑁆𑀳𑀦𑀢𑁆𑀣𑀸𑀬 𑀆𑀕𑀢𑁂 𑀘𑀡𑁆𑀟𑀲𑀼𑀁𑀲𑀼𑀫𑀸𑀭𑁂 𑀧𑀸𑀡𑀺𑀦𑀸 𑀧𑀳𑀭𑀺𑀢𑁆𑀯𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀭𑁄𑀦𑁆𑀢𑁄 𑀯𑀻𑀲𑀲𑀢𑀁 𑀫𑀸𑀭𑁂𑀢𑁆𑀯𑀸 𑀉𑀢𑁆𑀢𑀸𑀭𑁂𑀢𑁆𑀯𑀸 𑀢𑀮𑀫𑀼𑀕𑁆𑀕𑀫𑁆𑀫 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀢𑀁 𑀓𑀸𑀭𑀡𑀁 𑀤𑀺𑀲𑁆𑀯𑀸 𑀪𑀬𑀧𑁆𑀧𑀢𑁆𑀢𑁄 𑀏𑀲𑁄 𑀔𑁄 𑀫𑀁 𑀫𑀸𑀭𑁂𑀢𑁆𑀯𑀸 𑀭𑀚𑁆𑀚𑀫𑁆𑀧𑀺 𑀕𑀳𑀺𑀢𑀼𑀁 𑀲𑀫𑀢𑁆𑀣𑁄. 𑀏𑀢𑀁 𑀫𑀸𑀭𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀕𑀭𑀁 𑀲𑀫𑁆𑀧𑀢𑁆𑀢𑁄 𑀓𑀼𑀫𑀸𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀅𑀫𑀘𑁆𑀘𑁂 𑀆𑀳. 𑀇𑀫𑀁 𑀪𑀡𑁂 𑀩𑀦𑁆𑀥𑀦𑀸𑀕𑀸𑀭𑁂 𑀓𑀭𑁄𑀣𑀸𑀢𑀺. 𑀢𑁂 𑀢𑀣𑀸 𑀓𑀭𑀺𑀁𑀲𑀼, 𑀅𑀣𑀲𑁆𑀲 𑀩𑀦𑁆𑀥𑀦𑀸𑀕𑀸𑀭𑁂 𑀯𑀲𑀦𑁆𑀢𑀲𑁆𑀲 𑀘𑀢𑁆𑀢𑀸𑀭𑁄 𑀫𑀸𑀲𑀸 𑀅𑀢𑀺𑀓𑁆𑀓𑀦𑁆𑀢𑀸. 𑀢𑀢𑁄 𑀭𑀸𑀚𑀸 𑀘𑀢𑀼𑀫𑀸𑀲𑀘𑁆𑀘𑀬𑁂𑀦 𑀤𑀻𑀖𑀢𑁄 𑀲𑀝𑁆𑀞𑀺𑀳𑀢𑁆𑀣𑀧𑁆𑀧𑀫𑀸𑀡𑁂 𑀲𑀝𑁆𑀞𑀺𑀯𑁂𑀴𑀼𑀓𑀮𑀸𑀧𑁂 𑀆𑀳𑀭𑀸𑀧𑁂𑀢𑁆𑀯𑀸 𑀕𑀡𑁆𑀞𑀺𑀬𑁄 𑀲𑁄𑀥𑀸𑀧𑁂𑀢𑁆𑀯𑀸 𑀅𑀦𑁆𑀢𑁄 𑀅𑀬𑁄𑀲𑀸𑀭𑀁 𑀧𑀽𑀭𑁂𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀞𑀧𑀸𑀧𑁂𑀢𑁆𑀯𑀸 𑀯𑀺𑀲𑀫𑀮𑁄𑀫𑀓𑀼𑀫𑀸𑀭𑀁 𑀩𑀦𑁆𑀥𑀦𑀸𑀕𑀸𑀭𑀢𑁄 𑀆𑀳𑀸𑀭𑀸𑀧𑁂𑀢𑁆𑀯𑀸 [𑀆𑀡𑀸𑀧𑁂𑀢𑁆𑀯𑀸 𑀇𑀢𑀺𑀲𑀩𑁆𑀩𑀢𑁆𑀣] 𑀅𑀫𑀘𑁆𑀘𑁂 𑀏𑀯𑀫𑀸𑀳. 𑀪𑀡𑁂 𑀲𑁆𑀯𑀸𑀬𑀁 𑀓𑀼𑀫𑀸𑀭𑁄 𑀇𑀫𑀺𑀦𑀸 𑀔𑀕𑁆𑀕𑁂𑀦 𑀇𑀫𑁂 𑀯𑁂𑀴𑀼𑀓𑀮𑀸𑀧𑁂 𑀘𑀢𑀼𑀭𑀗𑁆𑀕𑀼𑀮𑀁 𑀓𑀢𑁆𑀯𑀸 𑀙𑀺𑀦𑁆𑀤𑀢𑀼. 𑀦𑁄 𑀘𑁂 𑀙𑀺𑀦𑁆𑀤𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀁 𑀫𑀸𑀭𑁂𑀣𑀸𑀢𑀺 𑀆𑀳, 𑀢𑀁 𑀲𑀼𑀢𑁆𑀯𑀸 𑀓𑀼𑀫𑀸𑀭𑁄 𑀅𑀳𑀁 𑀩𑀦𑁆𑀥𑀦𑀸𑀕𑀸𑀭𑁂 𑀘𑀺 𑀭 𑀯𑀼 𑀢𑁆𑀣𑁄 𑀚𑀺𑀖𑀘𑁆𑀙𑀸𑀧𑀻𑀴𑀺𑀢𑁄 𑀆𑀳𑀸𑀭𑁂𑀦 𑀓𑀺𑀮𑀫𑀺𑀁, 𑀬𑀦𑁆𑀦𑀽𑀦𑀸𑀳𑀁 𑀆𑀳𑀸𑀭𑀁 𑀪𑀼𑀜𑁆𑀘𑀺𑀢𑁆𑀯𑀸 𑀙𑀺𑀦𑁆𑀤𑁂𑀬𑁆𑀬𑀦𑁆𑀢𑀺. 𑀢𑁂 𑀦𑀢𑁆𑀣𑀺 𑀤𑀸𑀦𑀺 𑀢𑀼𑀬𑁆𑀳𑀁 𑀆𑀳𑀸𑀭𑀦𑁆𑀢𑀺 𑀆𑀳𑀁𑀲𑀼. 𑀢𑁂𑀦𑀳𑀺 𑀧𑁄𑀓𑁆𑀔𑀭𑀡𑀺𑀬𑀸 𑀧𑀸𑀦𑀻𑀬𑀁 𑀧𑀺𑀯𑀺𑀲𑁆𑀲𑀸𑀫𑀻𑀢𑀺 𑀆𑀳. 𑀢𑁂 𑀲𑀸𑀥𑀽𑀢𑀺 𑀧𑁄𑀓𑁆𑀔𑀭𑀡𑀺𑀁 𑀦𑁂𑀲𑀼𑀁. 𑀓𑀼𑀫𑀸𑀭𑁄 𑀧𑁄𑀓𑁆𑀔𑀭𑀡𑀺𑀁 𑀑𑀢𑀭𑀺𑀢𑁆𑀯𑀸 𑀦𑀳𑀸𑀬𑀺𑀢𑁆𑀯𑀸 𑀦𑀺𑀫𑀼𑀕𑁆𑀕𑁄 𑀬𑀸𑀯𑀤𑀢𑁆𑀣𑀁 𑀓𑀮𑀮𑀁 𑀪𑀼𑀜𑁆𑀘𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀉𑀝𑁆𑀞𑀸𑀬 𑀅𑀲𑀺𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀫𑀳𑀸𑀚𑀦𑀸𑀦𑀁 [𑀫𑀳𑀸𑀚𑀦𑀸𑀦𑀁𑀧𑀲𑁆𑀲𑀦𑁆𑀢𑀫𑁂𑀯 𑀇𑀢𑀺𑀲𑀩𑁆𑀩𑀢𑁆𑀣] 𑀧𑀲𑁆𑀲𑀦𑁆𑀢𑀸𑀦𑀫𑁂𑀯 𑀅𑀝𑁆𑀞𑀸𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀆𑀓𑀸𑀲𑀁 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀲𑀩𑁆𑀩𑀯𑁂𑀴𑀼𑀓𑀮𑀸𑀧𑁂 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑁂𑀦 𑀔𑀡𑁆𑀟𑀸𑀔𑀡𑁆𑀟𑀁 𑀓𑀼𑀭𑀼𑀫𑀸𑀦𑁄 𑀑𑀢𑀭𑀺𑀢𑁆𑀯𑀸 𑀫𑀽𑀮𑁂 𑀣𑀽𑀮𑀅𑀬𑀲𑀮𑀸𑀓𑀁 𑀧𑀢𑁆𑀯𑀸 𑀓𑀺𑀡𑀻𑀢𑀺 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀅𑀲𑀺𑀧𑀢𑁆𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀭𑁄𑀤𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀢𑀢𑁄 𑀭𑀸𑀚𑀧𑀼𑀭𑀺𑀲𑁂𑀳𑀺 𑀓𑀺𑀫𑀢𑁆𑀢𑀁 𑀭𑁄𑀤𑀲𑀻𑀢𑀺 𑀯𑀼𑀢𑁆𑀢𑁂 ¶ 𑀏𑀢𑁆𑀢𑀓𑀸𑀦𑀁 𑀧𑀼𑀭𑀺𑀲𑀸𑀦𑀫𑀦𑁆𑀢𑀭𑁂 𑀫𑀬𑁆𑀳𑀁 𑀏𑀓𑁄𑀧𑀺 𑀲𑀼𑀳𑀤𑁄 𑀦𑀢𑁆𑀢𑀺. 𑀲𑀘𑁂 𑀪𑀯𑁂𑀬𑁆𑀬, 𑀇𑀫𑁂𑀲𑀁 𑀯𑁂𑀴𑀼𑀓𑀮𑀸𑀧𑀸𑀦𑀫𑀦𑁆𑀢𑀭𑁂 𑀅𑀬𑁄 𑀲𑀸𑀭𑀁 𑀅𑀢𑁆𑀣𑀺𑀪𑀸𑀯𑀁 𑀓𑀣𑁂𑀬𑁆𑀬, 𑀅𑀳𑀁 𑀧𑀦 𑀚𑀸𑀦𑀫𑀸𑀦𑁄 𑀇𑀫𑁂 𑀯𑁂𑀴𑀼 𑀓𑀮𑀸𑀧𑁂 𑀅𑀗𑁆𑀕𑀼𑀮𑀗𑁆𑀕𑀼𑀮𑁂𑀲𑀼 𑀙𑀺𑀦𑁆𑀤𑁂𑀬𑁆𑀬𑀦𑁆𑀢𑀺 𑀆𑀳. 𑀢𑀢𑁄 𑀭𑀸𑀚𑀸 𑀓𑀼𑀫𑀸𑀭𑁂𑀦 𑀓𑀢𑀓𑀫𑁆𑀫𑀁 𑀑𑀮𑁄𑀓𑁂𑀢𑁆𑀯𑀸 𑀧𑀲𑀦𑁆𑀦𑁄 𑀉𑀧𑀭𑀸𑀚𑀝𑁆𑀞𑀸𑀦𑀁 𑀩𑀳𑀼𑀜𑁆𑀘 𑀯𑀺𑀪𑀯𑀁 𑀤𑀸𑀧𑁂𑀲𑀺, 𑀏𑀯𑀫𑀲𑁆𑀲 𑀩𑀮𑀲𑀫𑁆𑀧𑀢𑁆𑀢𑀺𑀮𑀸𑀪𑁄 𑀦𑀸𑀫 𑀦 𑀚𑀸𑀢𑀺𑀕𑁄𑀢𑁆𑀢𑀓𑀼𑀮𑀧𑀤𑁂𑀲𑀸𑀤𑀻𑀦𑀁 𑀩𑀮𑀁. 𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀤𑀼𑀘𑁆𑀘𑀭𑀺𑀢𑀸𑀦𑀁 𑀩𑀮𑀁. 𑀓𑀲𑁆𑀲𑁂𑀢𑀁 𑀩𑀮𑀦𑁆𑀢𑀺. 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀤𑀸𑀦𑀸𑀤𑀺𑀲𑀼𑀘𑀭𑀺𑀢𑀓𑀫𑁆𑀫𑀯𑀺𑀧𑀸𑀓𑀁. 𑀢𑁂𑀦 𑀯𑀼𑀢𑁆𑀢𑀁.

𑁧.

𑀓𑀲𑁆𑀲𑀧𑀲𑁆𑀲 𑀫𑀼𑀦𑀺𑀦𑁆𑀤𑀲𑁆𑀲, 𑀓𑀸𑀮𑁂 𑀅𑀜𑁆𑀜𑀢𑀭𑁄 𑀦𑀭𑁄;

𑀲𑀫𑁆𑀩𑀼𑀤𑁆𑀥𑀫𑀼𑀧𑀲𑀁𑀓𑀫𑁆𑀫, 𑀲𑀼𑀢𑁆𑀯𑀸 𑀥𑀫𑁆𑀫𑀁 𑀲𑀼𑀤𑁂𑀲𑀺𑀢𑀁.

𑁨.

𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀳𑀼𑀢𑁆𑀯𑀸, 𑀲𑀻𑀮𑀯𑀦𑁆𑀢𑀸𑀦 𑀪𑀺𑀓𑁆𑀔𑀼𑀦𑀁;

𑀫𑀥𑀼𑀭𑀦𑁆𑀦𑀧𑀸𑀦𑁂 𑀧𑀘𑀼𑀭𑁂, 𑀅𑀤𑀸𑀲𑀺 𑀲𑀼𑀫𑀦𑁄 𑀢𑀤𑀸.

𑁩.

𑀅𑀤𑀸𑀲𑀺 𑀘𑀻𑀯𑀭𑁂 𑀧𑀢𑁆𑀢𑁂, 𑀢𑀣𑁂𑀯 𑀓𑀸𑀬𑀩𑀦𑁆𑀥𑀦𑁂;

𑀅𑀤𑀸 𑀔𑀻𑀭𑀲𑀮𑀸𑀓𑀜𑁆𑀘, 𑀩𑀳𑀽 𑀓𑀢𑁆𑀢𑀭𑀬𑀝𑁆𑀞𑀺𑀬𑁄.

𑁪.

𑀅𑀤𑀸 𑀲𑀼𑀧𑀲𑁆𑀲𑀬𑀁 𑀤𑀸𑀦𑀁, 𑀫𑀜𑁆𑀘𑀧𑀻𑀞𑀸𑀤𑀺𑀓𑀁 𑀢𑀣𑀸;

𑀧𑀸𑀯𑀸𑀭 𑀓𑀫𑁆𑀩𑀮𑀸𑀤𑀻𑀦𑀺, 𑀅𑀤𑀸 𑀲𑀻𑀢𑀦𑀺𑀯𑀸𑀭𑀡𑁂.

𑁫.

𑀅𑀤𑀸 𑀪𑁂𑀲𑀚𑁆𑀚𑀤𑀸𑀦𑀸𑀦𑀺, 𑀆𑀭𑁄𑀕𑁆𑀬𑀢𑁆𑀣𑀸𑀬 𑀪𑀺𑀓𑁆𑀔𑀼𑀦𑀁;

𑀏𑀯𑀁 𑀦𑀸𑀦𑀸𑀯𑀺𑀥𑀁 𑀧𑀼𑀜𑁆𑀜𑀁, 𑀓𑀢𑁆𑀯𑀸𑀦 𑀢𑀺𑀤𑀺𑀯𑀁 𑀕𑀢𑁄.

𑁬.

𑀢𑀢𑁆𑀣 𑀤𑀺𑀩𑁆𑀩𑀯𑀺𑀫𑀸𑀦𑀫𑁆𑀳𑀺, 𑀉𑀧𑁆𑀧𑀦𑁆𑀦𑁄 𑀲𑁄 𑀫𑀳𑀺𑀤𑁆𑀥𑀺𑀓𑁄;

𑀤𑁂𑀯𑀘𑁆𑀙𑀭𑀸𑀧𑀭𑀺𑀯𑀼𑀢𑁄, 𑀤𑁂𑀯𑀲𑁂𑀦𑀸𑀧𑀼𑀭𑀓𑁆𑀔𑀢𑁄.

𑁭.

𑀤𑀺𑀩𑁆𑀩𑁂𑀳𑀺 𑀦𑀘𑁆𑀘𑀕𑀻𑀢𑁂𑀳𑀺, 𑀤𑀺𑀩𑁆𑀩𑀯𑀸𑀤𑀺𑀢𑀢𑀦𑁆𑀢𑀺𑀳𑀺;

𑀫𑁄𑀤𑀫𑀸𑀦𑁄 𑀅𑀦𑁂𑀓𑁂𑀳𑀺, 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀲𑀳.

𑁮.

𑀬𑀸𑀯𑀢𑀸𑀬𑀼𑀁 𑀢𑀳𑀺𑀁 𑀞𑀢𑁆𑀯𑀸, 𑀚𑀫𑁆𑀩𑀼𑀤𑀻𑀧𑁂 𑀫𑀦𑁄𑀭𑀫𑁂;

𑀧𑀼𑀭𑁂 𑀧𑀸𑀝𑀮𑀺𑀧𑀼𑀢𑁆𑀢𑀫𑁆𑀳𑀺, 𑀥𑀫𑁆𑀫𑀸𑀲𑁄𑀓𑀲𑁆𑀲 𑀭𑀸𑀚𑀺𑀦𑁄.

𑁯.

𑀧𑀼𑀢𑁆𑀢𑁄 ¶ 𑀳𑀼𑀢𑁆𑀯𑀸𑀦 𑀦𑀺𑀩𑁆𑀩𑀢𑁆𑀢𑀺, 𑀫𑀳𑀸𑀣𑀸𑀫𑁄 𑀫𑀳𑀸𑀩𑀮𑁄;

𑀫𑀳𑀸𑀬𑀲𑁄 𑀫𑀳𑀸𑀪𑁄𑀕𑁄, 𑀆𑀲𑀺 𑀩𑀼𑀤𑁆𑀥𑀸𑀤𑀺𑀫𑀸𑀫𑀓𑁄.

𑁧𑁦.

𑀓𑀸𑀢𑀩𑁆𑀩𑀁 𑀓𑀼𑀲𑀮𑀁 𑀢𑀲𑁆𑀫𑀸, 𑀪𑀯𑀲𑀫𑁆𑀧𑀢𑁆𑀢𑀺 𑀫𑀺𑀘𑁆𑀙𑀢𑀸;

𑀧𑀸𑀮𑁂𑀢𑀩𑁆𑀩 𑀫𑀣𑁄 𑀲𑀻𑀮𑀁, 𑀪𑀸𑀯𑁂𑀢𑀩𑁆𑀩𑀜𑁆𑀘 𑀪𑀸𑀯𑀦𑀦𑁆𑀢𑀺.

𑀢𑀢𑁄 𑀓𑀼𑀫𑀸𑀭𑁄 𑀉𑀧𑀭𑀸𑀚𑀝𑁆𑀞𑀸𑀦𑀁 𑀮𑀪𑀺𑀢𑁆𑀯𑀸 𑀲𑀫𑁆𑀧𑀢𑁆𑀢𑀺𑀁𑀅𑀦𑀼𑀪𑀯𑀫𑀸𑀦𑁄 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀫𑀸𑀤𑀺𑀁 𑀓𑀢𑁆𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀤𑀸𑀦𑀸 𑀤𑀺𑀯𑀲𑁂𑀦 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀬𑀣𑀸𑀓𑀫𑁆𑀫𑀁 𑀕𑀢𑁄𑀢𑀺.

𑁧𑁧.

𑀏𑀯𑀁𑀯𑀺𑀥𑀁 𑀲𑀼𑀘𑀭𑀺𑀢𑀁 𑀲𑀼𑀫𑀦𑁄 𑀓𑀭𑀺𑀢𑁆𑀯𑀸,

𑀪𑀸𑀕𑀺𑀲𑁆𑀲 𑀦𑁂𑀓𑀯𑀺𑀪𑀯𑀲𑁆𑀲 𑀪𑀯𑀸𑀪𑀯𑁂𑀲𑀼;

𑀢𑀼𑀫𑁆𑀳𑁂𑀧𑀺 𑀪𑁄 𑀲𑀼𑀘𑀭𑀺𑀢𑀁 𑀯𑀺𑀪𑀯𑀸𑀦𑀼𑀭𑀽𑀧𑀁,

𑀓𑀢𑁆𑀯𑀸𑀦 𑀦𑀺𑀩𑁆𑀩𑀼𑀢𑀺𑀧𑀤𑀁 𑀓𑀭𑀕𑀁 𑀓𑀭𑁄𑀣𑀸𑀢𑀺.

𑀯𑀺𑀲𑀫𑀮𑁄𑀫𑀓𑀼𑀫𑀸𑀭𑀲𑁆𑀲 𑀯𑀢𑁆𑀣𑀼𑀁 𑀢𑀢𑀺𑀬𑀁.

𑁧𑁪. 𑀓𑀜𑁆𑀘𑀦𑀤𑁂𑀯𑀺𑀬𑀸 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀚𑀫𑁆𑀩𑀼𑀤𑀻𑀧𑁂 𑀓𑀺𑀭 𑀤𑁂𑀯𑀧𑀼𑀢𑁆𑀢𑀦𑀕𑀭𑀁 𑀦𑀸𑀫 𑀤𑀲𑁆𑀲𑀦𑀻𑀬𑀁 𑀏𑀓𑀁 𑀦𑀕𑀭𑀁 𑀅𑀳𑁄𑀲𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀦𑀼𑀲𑁆𑀲𑀸 𑀬𑁂𑀪𑀼𑀬𑁆𑀬𑁂𑀦 𑀧𑀢𑁆𑀢𑀫𑀳𑀁 𑀦𑀸𑀫 𑀧𑀽𑀚𑀁 𑀓𑀭𑁄𑀦𑁆𑀢𑀺, 𑀪𑀕𑀯𑀢𑀸 𑀧𑀭𑀺𑀪𑀼𑀢𑁆𑀢𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀢𑀸𑀦𑁂𑀓𑀧𑀽𑀚𑀸𑀯𑀺𑀥𑀸𑀦𑀸 𑀉𑀲𑁆𑀲𑀯𑀁 𑀓𑀭𑁄𑀦𑁆𑀢𑀺. 𑀢𑀁 𑀧𑀢𑁆𑀢𑀫𑀳𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀤𑁂𑀯𑀧𑀼𑀢𑁆𑀢𑀦𑀕𑀭𑁂 𑀭𑀸𑀚𑀸 𑀲𑀩𑁆𑀩𑀭𑀢𑀦𑀫𑀬𑀁 𑀭𑀣𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀓𑀼𑀫𑀼𑀤𑀧𑀢𑁆𑀢𑀯𑀡𑁆𑀡𑁂 𑀘𑀢𑁆𑀢𑀸𑀭𑁄 𑀲𑀺𑀦𑁆𑀥𑀯𑁂 𑀬𑁄𑀚𑁂𑀢𑁆𑀯𑀸 𑀲𑀼𑀲𑀺𑀓𑁆𑀔𑀺𑀢𑀲𑀺𑀧𑁆𑀧𑀸𑀘𑀭𑀺𑀬𑁂𑀳𑀺 𑀲𑀢𑁆𑀢𑀭𑀢𑀦𑀧𑀭𑀺𑀦𑀺𑀝𑁆𑀞𑀺𑀢𑁂 𑀅𑀲𑀻𑀢𑀺𑀳𑀢𑁆𑀣𑀯𑁂𑀴𑀕𑁆𑀕𑁂 𑀲𑀢𑁆𑀣𑀼𑀦𑀸 𑀧𑀭𑀺𑀪𑀼𑀢𑁆𑀢𑀁 𑀲𑁂𑀮𑀫𑀬𑀧𑀢𑁆𑀢𑀁 𑀫𑀼𑀢𑁆𑀢𑀸𑀚𑀸𑀮𑀸𑀤𑀻𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀯𑁂𑀴𑀕𑁆𑀕𑀁 𑀆𑀭𑁄𑀧𑁂𑀢𑁆𑀯𑀸 𑀯𑁂𑀴𑀼𑀁 ¶ 𑀭𑀣𑁂 𑀞𑀧𑀸𑀧𑁂𑀢𑁆𑀯𑀸 𑀦𑀕𑀭𑀁 𑀤𑁂𑀯𑀦𑀕𑀭𑀁 𑀯𑀺𑀬 𑀅𑀮𑀗𑁆𑀓𑀭𑀺𑀢𑁆𑀯𑀸 𑀥𑀚𑀧𑀢𑀸𑀓𑀸𑀤𑀬𑁄 𑀉𑀲𑁆𑀲𑀸𑀧𑁂𑀢𑁆𑀯𑀸 𑀢𑁄𑀭𑀡𑀕𑁆𑀖 𑀓𑀧𑀦𑁆𑀢𑀺𑀬𑁄𑀘 𑀧𑀼𑀡𑁆𑀡𑀖𑀝𑀤𑀻𑀧𑀫𑀸𑀮𑀸𑀤𑀬𑁄𑀘 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀦𑁂𑀓𑁂𑀳𑀺 𑀧𑀽𑀚𑀸𑀯𑀺𑀥𑀸𑀦𑁂𑀳𑀺 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀸𑀭𑁂𑀢𑁆𑀯𑀸 𑀦𑀕𑀭𑀫𑀚𑁆𑀛𑁂 𑀲𑀼𑀲𑀚𑁆𑀚𑀺𑀢𑀭𑀢𑀦𑀫𑀡𑁆𑀟𑀧𑁂 𑀧𑀢𑁆𑀢𑀥𑀸𑀢𑀼𑀁 𑀞𑀧𑁂𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀳𑀸𑀥𑀫𑁆𑀫𑀲𑀯𑀡𑀁 𑀓𑀸𑀭𑀸𑀧𑁂𑀲𑀺. 𑀢𑀤𑀸 𑀢𑀲𑁆𑀫𑀺𑀁 𑀚𑀦𑀧𑀤𑁂 𑀩𑀳𑀽 𑀫𑀦𑀼𑀲𑁆𑀲𑀸𑀘 𑀤𑁂𑀯𑀢𑀸𑀘 𑀬𑀓𑁆𑀔𑀭𑀓𑁆𑀔𑀲𑀦𑀸𑀕𑀲𑀼𑀧𑀡𑁆𑀡𑀸𑀤𑀬𑁄𑀘 𑀫𑀦𑀼𑀲𑁆𑀲𑀯𑁂𑀲𑁂𑀦 𑀬𑁂𑀪𑀼𑀬𑁆𑀬𑁂𑀦 𑀢𑀁 𑀲𑀫𑀸𑀕𑀫𑀁 𑀑𑀢𑀭𑀦𑁆𑀢𑀺, 𑀏𑀯𑀫𑀘𑁆𑀙𑀭𑀺𑀬𑀁 𑀢𑀁 𑀧𑀽𑀚𑀸𑀯𑀺𑀥𑀸𑀦𑀁 𑀅𑀳𑁄𑀲𑀺.

𑀢𑀤𑀸 𑀏𑀓𑁄 𑀦𑀸𑀕𑀭𑀸𑀚𑀸 𑀉𑀢𑁆𑀢𑀫𑀭𑀽𑀧𑀥𑀭𑀁 𑀅𑀕𑀢𑀧𑀼𑀩𑁆𑀩𑀧𑀼𑀭𑀺𑀲𑀁 𑀏𑀓𑀁 𑀓𑀼𑀫𑀸𑀭𑀺𑀓𑀁 𑀥𑀫𑁆𑀫𑀧𑀭𑀺𑀲𑀦𑁆𑀢𑀭𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀢𑀲𑁆𑀲𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀅𑀦𑁂𑀓𑀸𑀓𑀸𑀭𑁂𑀳𑀺 𑀢𑀁 𑀬𑀸 𑀘𑀺 𑀢𑁆𑀯𑀸 𑀢𑀲𑁆𑀲𑀸 𑀅𑀮𑀤𑁆𑀥𑀫𑀸𑀦𑁄 𑀓𑀼𑀚𑁆𑀛𑀺𑀢𑁆𑀯𑀸 𑀦𑀸𑀲𑀸𑀯𑀸𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑀺 𑀇𑀫𑀁 𑀫𑀸𑀭𑁂𑀲𑁆𑀲𑀸𑀫𑀻𑀢𑀺. 𑀢𑀁 𑀢𑀲𑁆𑀲𑀸 𑀲𑀤𑁆𑀥𑀸𑀩𑀮𑁂𑀦 𑀓𑀺𑀜𑁆𑀘𑀺 𑀉𑀧𑀤𑁆𑀤𑀯𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀳𑁄𑀲𑀺. 𑀅𑀣𑀲𑁆𑀲𑀸 𑀦𑀸𑀕𑁄 𑀧𑀸𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯𑀲𑀓𑀮𑀲𑀭𑀻𑀭𑀁 𑀪𑁄𑀕𑁂𑀦 𑀯𑁂𑀞𑁂𑀢𑁆𑀯𑀸 𑀲𑀻𑀲𑁂 𑀨𑀡𑀁 𑀓𑀢𑁆𑀯𑀸 𑀪𑀸𑀬𑀸𑀧𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀅𑀦𑀜𑁆𑀜𑀯𑀺𑀳𑀺𑀢𑀸𑀬 𑀢𑀸𑀬 𑀥𑀫𑁆𑀫𑀲𑀯𑀡𑀩𑀮𑁂𑀦 𑀅𑀡𑀼𑀫𑀢𑁆𑀢𑀫𑁆𑀧𑀺 𑀤𑀼𑀓𑁆𑀔𑀁 𑀦𑀸𑀳𑁄𑀲𑀺. 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀓𑀺𑀫𑁂𑀢𑀦𑁆𑀢𑀺 𑀓𑀸𑀭𑀡𑀁 𑀧𑀼𑀘𑁆𑀙𑀺𑀁𑀲𑀼, 𑀲𑀸𑀧𑀺 𑀢𑁂𑀲𑀁 𑀓𑀣𑁂𑀢𑁆𑀯𑀸 𑀏𑀯𑀁 𑀲𑀘𑁆𑀘𑀓𑀺𑀭𑀺𑀬𑀫𑀓𑀸𑀲𑀺. 𑀢𑀣𑀸𑀳𑀺.

𑁧.

𑀩𑁆𑀭𑀳𑁆𑀫𑀘𑀸𑀭𑀻 𑀅𑀳𑁄𑀲𑀸𑀳𑀁, 𑀲𑀜𑁆𑀚𑀸𑀢𑀸 𑀇𑀥 𑀫𑀸𑀦𑀼𑀲𑁂;

𑀢𑁂𑀦 𑀲𑀘𑁆𑀘𑁂𑀦 𑀫𑀁 𑀦𑀸𑀕𑁄, 𑀔𑀺𑀧𑁆𑀧𑀫𑁂𑀯 𑀧𑀫𑀼𑀜𑁆𑀘𑀢𑀼.

𑁨.

𑀓𑀸𑀫𑀸𑀢𑀼𑀭𑀲𑁆𑀲 𑀦𑀸𑀕𑀲𑁆𑀲, 𑀦𑁄𑀓𑀸𑀲𑀫𑀓𑀭𑀺𑀁𑀬𑀢𑁄;

𑀢𑁂𑀦 𑀲𑀘𑁆𑀘𑁂𑀦 𑀫𑀁 𑀦𑀸𑀕𑁄, 𑀔𑀺𑀧𑁆𑀧𑀫𑁂𑀯 𑀫𑀼𑀜𑁆𑀘𑀢𑀼.

𑁩.

𑀯𑀺𑀲𑀯𑀸𑀢𑁂𑀦 𑀔𑀺𑀢𑁆𑀢𑀲𑁆𑀲, 𑀓𑀼𑀧𑀺𑀢𑀲𑁆𑀲𑁄𑀭𑀕𑀲𑁆𑀲𑀳𑀁;

𑀅𑀓𑀼𑀤𑁆𑀥𑀸 𑀢𑁂𑀦 𑀲𑀘𑁆𑀘𑁂𑀦, 𑀲𑁄 𑀫𑀁 𑀔𑀺𑀧𑁆𑀧𑀁 𑀧𑀫𑀼𑀜𑁆𑀘𑀢𑀼.

𑁪.

𑀲𑀤𑁆𑀥𑀫𑁆𑀫𑀁 𑀲𑀼𑀡𑀫𑀸𑀦𑀸𑀳𑀁, 𑀕𑀭𑀼𑀕𑀸𑀭𑀯𑀪𑀢𑁆𑀢𑀺𑀬𑀸;

𑀅𑀲𑁆𑀲𑁄𑀲𑀺𑀁 𑀢𑁂𑀦 𑀲𑀘𑁆𑀘𑁂𑀦, 𑀔𑀺𑀧𑁆𑀧𑀁 𑀦𑀸𑀕𑁄 𑀧𑀫𑀼𑀜𑁆𑀘𑀢𑀼.

𑁫.

𑀅𑀓𑁆𑀔𑀭𑀁𑀯𑀸 ¶ 𑀧𑀤𑀁𑀯𑀸𑀧𑀺, 𑀅𑀯𑀺𑀦𑀸𑀲𑁂𑀢𑁆𑀯𑀸𑀯 𑀆𑀤𑀺𑀢𑁄;

𑀅𑀲𑁆𑀲𑁄𑀲𑀺𑀁 𑀢𑁂𑀦 𑀲𑀘𑁆𑀘𑁂𑀦, 𑀔𑀺𑀧𑁆𑀧𑀁 𑀦𑀸𑀕𑁄 𑀧𑀫𑀼𑀜𑁆𑀘𑀢𑀽𑀢𑀺.

𑀲𑀘𑁆𑀘𑀓𑀺𑀭𑀺𑀬𑀸𑀯𑀲𑀸𑀦𑁂 𑀦𑀸𑀕𑀭𑀸𑀚𑀸 𑀢𑀲𑁆𑀲𑀸 𑀅𑀢𑀻𑀯 𑀧𑀲𑀦𑁆𑀦𑁄 𑀪𑁄𑀕𑀁 𑀯𑀺𑀦𑀺𑀯𑁂𑀞𑁂𑀢𑁆𑀯𑀸 𑀨𑀡𑀲𑀢𑀁 𑀫𑀸𑀧𑁂𑀢𑁆𑀯𑀸 𑀢𑀁 𑀨𑀡𑀕𑀩𑁆𑀪𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀩𑀳𑀽𑀳𑀺 𑀦𑀸𑀕𑀫𑀸𑀦𑀯𑀓𑁂𑀳𑀺 𑀲𑀤𑁆𑀥𑀺𑀁 𑀉𑀤𑀓𑀧𑀽𑀚𑀁 𑀦𑀸𑀫 𑀧𑀽𑀚 𑀫𑀓𑀸𑀲𑀺, 𑀢𑀁 𑀤𑀺𑀲𑁆𑀯𑀸 𑀩𑀳𑀽 𑀦𑀕𑀭𑀯𑀸𑀲𑀺𑀦𑁄 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀚𑀸𑀢𑀸 𑀅𑀝𑁆𑀞𑀸𑀭𑀲𑀓𑁄𑀝𑀺𑀥𑀦𑁂𑀦 𑀧𑀽𑀚 𑀫𑀓𑀁𑀲𑀼. 𑀢𑀣𑀸𑀳𑀺.

𑁬.

𑀦𑀢𑁆𑀣𑀺 𑀲𑀤𑁆𑀥𑀸𑀲𑀫𑁄 𑀮𑁄𑀓𑁂, 𑀲𑀼𑀳𑀤𑁄 𑀲𑀩𑁆𑀩𑀓𑀸𑀫𑀤𑁄;

𑀧𑀲𑁆𑀲𑀣𑀲𑁆𑀲𑀸 𑀩𑀮𑀁 𑀲𑀤𑁆𑀥𑀸, 𑀧𑀽𑀚𑁂𑀦𑁆𑀢𑁂𑀯𑀁 𑀦𑀭𑁄 𑀭𑀕𑀸.

𑁭.

𑀇𑀥 𑀮𑁄𑀓𑁂𑀯 𑀲𑀸𑀮𑀢𑁆𑀣, 𑀪𑀯𑀪𑁄𑀕 𑀫𑀦𑀧𑁆𑀧𑀓𑀁;

𑀢𑀲𑁆𑀫𑀸 𑀲𑀤𑁆𑀥𑁂𑀦 𑀓𑀸𑀢𑀩𑁆𑀩𑀁, 𑀭𑀢𑀦𑀢𑁆𑀢𑀬𑀕𑀸𑀭𑀯𑀦𑁆𑀢𑀺.

𑀅𑀣𑁂𑀯𑀁 𑀲𑀸 𑀧𑀝𑀺𑀮𑀤𑁆𑀥𑀫𑀳𑀸𑀯𑀺𑀪𑀯𑀸 𑀬𑀸𑀯𑀚𑀻𑀯𑀁 𑀓𑁄𑀫𑀸𑀭𑀺𑀬 𑀩𑁆𑀭𑀳𑁆𑀫𑀘𑀸𑀭𑀺𑀡𑀻 𑀳𑀼𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀢𑁆𑀯𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀦𑀺𑀓𑁆𑀔𑀦𑁆𑀢𑀤𑀺𑀯𑀲𑁂 𑀧𑀦𑀲𑁆𑀲𑀸 𑀲𑀓𑀮𑀤𑁂𑀯𑀧𑀼𑀢𑁆𑀢𑀦𑀕𑀭𑁂 𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀺. 𑀢𑁂𑀦𑀲𑁆𑀲𑀸 𑀓𑀜𑁆𑀚𑀦𑀤𑁂𑀯𑀻𑀢𑀺 𑀦𑀸𑀫𑀁 𑀓𑀭𑀺𑀁𑀲𑀼. 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸 𑀅𑀳𑁄𑀲𑀺. 𑀅𑀪𑀺𑀭𑀽𑀧𑀸 𑀤𑁂𑀯𑀘𑁆𑀙𑀭𑀧𑀝𑀺𑀪𑀸𑀕𑀸. 𑀫𑀼𑀔𑀢𑁄 𑀉𑀧𑁆𑀧𑀮𑀕𑀦𑁆𑀥𑁄 𑀯𑀸𑀬𑀢𑀺. 𑀲𑀭𑀻𑀭𑀢𑁄 𑀘𑀦𑁆𑀤𑀦𑀕𑀦𑁆𑀥𑁄 𑀯𑀸𑀬𑀢𑀺. 𑀲𑀓𑀮𑀲𑀭𑀻𑀭𑀢𑁄 𑀩𑀸𑀮𑀲𑀼𑀭𑀺𑀬𑁄 𑀯𑀺𑀬 𑀭𑀁𑀲𑀺𑀬𑁄 𑀦𑀺𑀘𑁆𑀙𑀸𑀭𑁂𑀦𑁆𑀢𑀻 𑀘𑀢𑀼𑀭𑀢𑀦𑀕𑀩𑁆𑀪𑁂 𑀧𑀤𑀻𑀧𑀓𑀺𑀘𑁆𑀘𑀁 𑀦𑀸𑀫 𑀦𑀢𑁆𑀣𑀺. 𑀲𑀩𑁆𑀩𑁄 𑀕𑀩𑁆𑀪𑁄 𑀲𑀭𑀻𑀭𑀸 𑀮𑁄𑀓𑁂𑀦 𑀏𑀓𑁄 𑀪𑀸𑀲𑁄 𑀳𑁄𑀢𑀺, 𑀢𑀲𑁆𑀲𑀸 𑀭𑀽𑀧𑀲𑀫𑁆𑀧𑀢𑁆𑀢𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀸𑀓𑀝𑀸 𑀅𑀳𑁄𑀲𑀺. 𑀢𑀢𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀻 𑀭𑀸𑀚𑀸𑀦𑁄 𑀢𑀲𑁆𑀲𑀸 𑀅𑀢𑁆𑀣𑀸𑀬 𑀧𑀺𑀢𑀼𑀭𑀜𑁆𑀜𑁄 𑀧𑀡𑁆𑀡𑀸𑀓𑀸𑀭𑀸𑀦𑀺 𑀧𑀳𑀺𑀡𑀺𑀁𑀲𑀼. 𑀲𑀸 𑀧𑀦 𑀧𑀜𑁆𑀘𑀓𑀸𑀫𑁂 𑀅𑀦𑀦𑀼𑀮𑀺𑀢𑁆𑀢𑀸 𑀧𑀺𑀢𑀭𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀽 𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺.

𑁮.

𑀲𑀼𑀢𑁆𑀯𑀸𑀦 ¶ 𑀲𑀸𑀤𑀭𑀯𑀲𑁂𑀦 𑀓𑀼𑀫𑀸𑀭𑀺𑀓𑁂𑀯𑀁;

𑀥𑀫𑁆𑀫𑀜𑁆𑀳𑀺 𑀲𑀻𑀮𑀫𑀫𑀮𑀁 𑀧𑀭𑀺𑀧𑀸𑀮𑀬𑀦𑁆𑀢𑀻;

𑀮𑀤𑁆𑀥𑀸𑀦 𑀦𑁂𑀓𑀯𑀺𑀪𑀯𑀁 𑀯𑀺𑀪𑀯𑀁 𑀧𑀬𑀸𑀢𑀸,

𑀫𑀸 𑀪𑁄 𑀧𑀫𑀚𑁆𑀚𑀣 𑀲𑀤𑀸 𑀓𑀼𑀲𑀮𑀧𑁆𑀧𑀬𑁄𑀕𑁂𑀢𑀺.

𑀓𑀜𑁆𑀘𑀦𑀤𑁂𑀯𑀺𑀬𑀸 𑀯𑀢𑁆𑀣𑀼𑀁 𑀘𑀢𑀼𑀢𑁆𑀣𑀁.

𑁧𑁫. 𑀩𑁆𑀬𑀕𑁆𑀖𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀚𑀫𑁆𑀩𑀼𑀤𑀻𑀧𑁂 𑀘𑀽𑀮𑀭𑀝𑁆𑀞𑀸 𑀲𑀦𑁆𑀦𑁂 𑀩𑀸𑀭𑀸𑀡𑀲𑀻𑀦𑀕𑀭𑁂 𑀏𑀓𑀁 𑀧𑀁𑀲𑀼𑀧𑀩𑁆𑀩𑀢𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀫𑀳𑀸𑀫𑀕𑁆𑀕𑁄 𑀳𑁄𑀢𑀺, 𑀢𑀢𑁆𑀣 𑀯𑁂𑀫𑀚𑁆𑀛𑁂 𑀏𑀓𑁄 𑀩𑁆𑀬𑀕𑁆𑀖𑁄 𑀅𑀢𑁆𑀢𑀦𑁄 𑀅𑀦𑁆𑀥𑀧𑀺𑀢𑀭𑀁 𑀧𑀩𑁆𑀩𑀢𑀕𑀼𑀳𑀸𑀬𑀁 𑀓𑀢𑁆𑀯𑀸 𑀧𑁄𑀲𑁂𑀦𑁆𑀢𑁄 𑀯𑀲𑀢𑀺. 𑀢𑀲𑁆𑀲𑁂𑀯 𑀧𑀩𑁆𑀩𑀢𑀲𑁆𑀲 𑀯𑀦𑀤𑁆𑀯𑀸𑀭𑁂 𑀢𑀼𑀡𑁆𑀟𑀺𑀮𑁄 𑀦𑀸𑀫 𑀏𑀓𑁄 𑀲𑀼𑀯𑀧𑁄𑀢𑀓𑁄 𑀭𑀼𑀓𑁆𑀔𑀲𑁆𑀫𑀺𑀁 𑀯𑀲𑀢𑀺. 𑀢𑁂 𑀉𑀪𑁄𑀧𑀺 𑀅𑀜𑁆𑀜𑀫𑀜𑁆𑀜𑀁 𑀧𑀺𑀬𑀲𑀳𑀸𑀬𑀸 𑀅𑀳𑁂𑀲𑀼𑀁, 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀘𑁆𑀘𑀦𑁆𑀢𑀕𑀸𑀫𑀯𑀸𑀲𑀻 𑀏𑀓𑁄 𑀫𑀦𑀼𑀲𑁆𑀲𑁄 𑀅𑀢𑁆𑀢𑀦𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀓𑀮𑀳𑀁 𑀓𑀢𑁆𑀯𑀸 𑀩𑀸𑀭𑀸𑀡𑀲𑀺𑀁 𑀕𑀘𑁆𑀙𑀦𑁆𑀢𑁄 𑀢𑀁 𑀯𑀦𑀤𑁆𑀯𑀸𑀭𑀁 𑀲𑀫𑁆𑀧𑀸𑀧𑀼𑀡𑀺. 𑀅𑀣 𑀲𑀼𑀯𑀧𑁄𑀢𑀓𑁄 𑀧𑀭𑀺𑀳𑀻𑀦𑀢𑁆𑀢𑀪𑀸𑀯𑀁 𑀤𑀼𑀓𑁆𑀔𑀺𑀢𑀁 𑀢𑀁 𑀤𑀺𑀲𑁆𑀯𑀸 𑀓𑀫𑁆𑀧𑀫𑀸𑀦𑀳𑀤𑀬𑁄 𑀢𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀪𑁄 𑀓𑀼𑀳𑀺𑀁 𑀕𑀘𑁆𑀙𑀲𑀻𑀢𑀺 𑀆𑀳, 𑀢𑁂𑀦 𑀧𑀭𑀔𑀡𑁆𑀟𑀁 𑀕𑀘𑁆𑀙𑀸𑀫𑀻𑀢𑀺 𑀯𑀼𑀢𑁆𑀢𑁂 𑀢𑀼𑀡𑁆𑀟𑀺𑀮𑁄 𑀪𑁄 𑀇𑀫𑀲𑁆𑀫𑀺𑀁 𑀯𑀦𑀔𑀡𑁆𑀟𑀫𑀚𑁆𑀛𑁂 𑀏𑀓𑁄 𑀩𑁆𑀬𑀕𑁆𑀖𑁄 𑀯𑀲𑀢𑀺. 𑀓𑀓𑁆𑀔𑀮𑁄 𑀨𑀭𑀼𑀲𑁄 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑁂 𑀫𑀸𑀭𑁂𑀢𑁆𑀯𑀸 𑀔𑀸𑀤𑀢𑀺. 𑀫𑀸 𑀢𑁆𑀯𑀁 𑀢𑁂𑀦 𑀕𑀘𑁆𑀙𑀸𑀢𑀺 𑀆𑀳. 𑀲𑁆𑀯𑀸𑀬𑀁 𑀤𑀼𑀩𑁆𑀪𑀕𑁄 𑀫𑀦𑀼𑀲𑁆𑀲𑁄 𑀳𑀺𑀢𑀓𑀸𑀫𑀲𑁆𑀲 𑀢𑀲𑁆𑀲 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀕𑀘𑁆𑀙𑀸𑀫𑁂𑀯𑀸𑀢𑀺 𑀆𑀳. 𑀢𑀼𑀡𑁆𑀟𑀺𑀮𑁄 𑀢𑁂𑀦𑀳𑀺 𑀲𑀫𑁆𑀫 𑀬𑀤𑀺 𑀅𑀦𑀺𑀯𑀢𑁆𑀢𑀫𑀸𑀦𑁄 𑀕𑀘𑁆𑀙𑀲𑀺. 𑀏𑀲𑁄 𑀩𑁆𑀬𑀕𑁆𑀖𑁄 𑀫𑀫 𑀲𑀳𑀸𑀬𑁄. 𑀫𑁂 𑀯𑀘𑀦𑀁 𑀢𑀯 𑀲𑀦𑁆𑀢𑀺𑀓𑀸 𑀲𑀼𑀢𑁆𑀯𑀸 𑀦 𑀕𑀡𑁆𑀳𑀸𑀢𑀻𑀢𑀺. 𑀢𑀲𑁆𑀲 𑀢𑀁 𑀅𑀦𑀸𑀤𑀺𑀬𑀦𑁆𑀢𑁄 𑀲𑁄 𑀲𑀼𑀯𑀭𑀸𑀚𑁂 𑀧𑀤𑀼𑀝𑁆𑀞𑀘𑀺𑀢𑁆𑀢𑁄 𑀫𑀼𑀕𑁆𑀕𑀭𑁂𑀦 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀢𑁆𑀯𑀸 𑀅𑀭𑀡𑀺𑀁 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀫𑀁𑀲𑀁 𑀔𑀸𑀤𑀺. 𑀅𑀲𑀧𑁆𑀧𑀼𑀭𑀺𑀲𑀲𑀁𑀲𑀕𑁆𑀕𑁄 𑀦𑀸𑀫𑁂 𑀲 𑀇𑀥 𑀮𑁄𑀓𑀧𑀭𑀮𑁄𑀓𑁂𑀲𑀼 𑀤𑀼𑀓𑁆𑀔𑀸𑀯𑀳𑁄𑀬𑁂𑀯. 𑀢𑀣𑀸𑀳𑀺.

𑁧.

𑀫𑀬𑀸 ¶ 𑀓𑀢𑀁 𑀫𑀬𑁆𑀳𑀫𑀺𑀤𑀁, 𑀇𑀢𑀺 𑀯𑁂𑀲𑁆𑀲𑀸𑀦𑀭𑀁 𑀦𑀭𑁄;

𑀲𑀫𑀸𑀮𑀺𑀗𑁆𑀕𑀢𑀺 𑀲𑀧𑁆𑀧𑁂𑀫𑁄, 𑀤𑀳𑀢𑁂𑀯𑀲𑁆𑀲 𑀯𑀺𑀕𑁆𑀕𑀳𑀁.

𑁨.

𑀫𑀥𑀼𑀔𑀻𑀭𑀸𑀤𑀺𑀤𑀸𑀦𑁂𑀦, 𑀧𑁂𑀫𑀲𑀸 𑀧𑀭𑀺𑀧𑀸𑀮𑀺𑀢𑁄;

𑀲𑁄𑀭𑀕𑁄 𑀓𑀼𑀧𑀺𑀢𑁄𑀯𑀲𑁆𑀲, 𑀟𑀲𑀢𑁂𑀯𑀲𑁆𑀲 𑀯𑀺𑀕𑁆𑀕𑀳𑀁.

𑁩.

𑀏𑀯𑀁 𑀦𑀺𑀳𑀻𑀦𑀚𑀘𑁆𑀘𑁂𑀦, 𑀧𑀸𑀧𑁂𑀦 𑀅𑀓𑀢𑀜𑁆𑀜𑀼𑀦𑀸;

𑀦𑀭𑀸 𑀥𑀫𑁂𑀦 𑀤𑀻𑀦𑁂𑀦, 𑀓𑀢𑁄𑀧𑀺 𑀔𑀡𑀲𑀗𑁆𑀕𑀫𑁄.

𑁪.

𑀅𑀲𑀸𑀥𑀼𑀓𑁄 𑀅𑀬𑀁𑀢𑁂𑀯𑀁, 𑀚𑀸𑀦𑀫𑀸𑀦𑁂𑀦 𑀚𑀦𑁆𑀢𑀼𑀦𑀸;

𑀫𑀼𑀳𑀼𑀢𑁆𑀢𑀫𑁆𑀧𑀺 𑀦 𑀓𑀸𑀢𑀩𑁆𑀩𑁄, 𑀲𑀗𑁆𑀕𑀫𑁄 𑀲𑁄 𑀅𑀦𑀢𑁆𑀣𑀤𑁄𑀢𑀺.

𑀢𑀢𑁄 𑀲𑁄 𑀅𑀲𑀧𑁆𑀧𑀼𑀭𑀺𑀲𑁄 𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀯𑀦𑀔𑀡𑁆𑀟𑀫𑀚𑁆𑀛𑀁 𑀲𑀫𑁆𑀧𑀸𑀧𑀼𑀡𑀺. 𑀅𑀣 𑀩𑁆𑀬𑀕𑁆𑀖𑁄 𑀢𑀁 𑀤𑀺𑀲𑁆𑀯𑀸 𑀫𑀳𑀸𑀦𑀸𑀤𑀁 𑀓𑀭𑁄𑀦𑁆𑀢𑁄 𑀕𑀳𑀡𑀢𑁆𑀣𑀸𑀬 𑀉𑀝𑁆𑀞𑀸𑀲𑀺. 𑀲𑁄 𑀩𑁆𑀬𑀕𑁆𑀖𑀁 𑀤𑀺𑀲𑁆𑀯𑀸 𑀪𑀬𑀧𑁆𑀧𑀢𑁆𑀢𑁄 𑀢𑀼𑀡𑁆𑀟𑀺𑀮𑀲𑁆𑀲 𑀯𑀘𑀦𑀁 𑀲𑀭𑀺𑀢𑁆𑀯𑀸 𑀅𑀳𑀁 𑀪𑁄 𑀢𑀯 𑀲𑀳𑀸𑀬𑀢𑀼𑀡𑁆𑀟𑀺𑀮𑀲𑁆𑀲 𑀲𑀦𑁆𑀢𑀺𑀓𑀸 𑀆𑀕𑀢𑁄𑀫𑁆𑀳𑀻𑀢𑀺 𑀆𑀳, 𑀢𑀁 𑀲𑀼𑀢𑁆𑀯𑀸 𑀩𑁆𑀬𑀕𑁆𑀖𑁄 𑀅𑀢𑁆𑀢𑀫𑀦𑁄 𑀏𑀳𑀺 𑀲𑀫𑁆𑀫𑀸𑀢𑀺 𑀢𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀦𑁂𑀢𑁆𑀯𑀸 𑀔𑀸𑀤𑀺𑀢𑀩𑁆𑀩𑀸𑀳𑀸𑀭𑁂𑀦 𑀢𑀁 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀧𑀺𑀢𑀼𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀼𑀦 𑀯𑀦𑀔𑀡𑁆𑀟 𑀫𑀕𑀫𑀸𑀲𑀺. 𑀅𑀣𑀲𑁆𑀲 𑀧𑀺𑀢𑀸 𑀧𑀼𑀢𑁆𑀢𑀲𑁆𑀲 𑀕𑀢𑀓𑀸𑀮𑁂 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀢𑀲𑁆𑀲 𑀯𑀘𑀦𑀸𑀦𑀼𑀲𑀸𑀭𑁂𑀦 𑀢𑀼𑀡𑁆𑀟𑀺𑀮𑀁 𑀫𑀸𑀭𑁂𑀢𑁆𑀯𑀸 𑀔𑀸𑀤𑀺𑀢𑀪𑀸𑀯𑀁 𑀅𑀜𑁆𑀜𑀸𑀲𑀺. 𑀢𑀢𑁄 𑀲𑁄 𑀧𑀼𑀢𑁆𑀢𑀲𑁆𑀲 𑀆𑀕𑀢𑀓𑀸𑀮𑁂 𑀢𑀯 𑀲𑀳𑀸𑀬𑁄 𑀢𑁂𑀦 𑀫𑀸𑀭𑀺𑀢𑁄𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀩𑁆𑀬𑀕𑁆𑀖𑁄 𑀅𑀦𑀢𑁆𑀢𑀫𑀦𑁄 𑀯𑁂𑀕𑁂𑀦 𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀫𑁆𑀫 𑀢𑀼𑀡𑁆𑀟𑀺𑀮𑀸𑀢𑀺 𑀲𑀤𑁆𑀤𑀁 𑀓𑀢𑁆𑀯𑀸 𑀅𑀧𑀲𑁆𑀲𑀦𑁆𑀢𑁄 𑀮𑀼𑀜𑁆𑀘𑀺𑀢𑀧𑀢𑁆𑀢𑀁𑀘𑀲𑁆𑀲 𑀤𑀺𑀲𑁆𑀯𑀸 𑀦𑀺𑀲𑁆𑀲𑀁𑀲𑀬𑀁 𑀢𑁂𑀦 𑀫𑀸𑀭𑀺𑀢𑁄 𑀫𑁂 𑀲𑀳𑀸𑀬𑁄𑀢𑀺 𑀲𑁄𑀘𑀦𑁆𑀢𑁄 𑀧𑀭𑀺𑀤𑁂𑀯𑀦𑁆𑀢𑁄 𑀆𑀕𑀜𑁆𑀙𑀺. 𑀅𑀣 𑀲𑁄 𑀅𑀲𑀧𑁆𑀧𑀼𑀭𑀺𑀲𑁄 𑀢𑀲𑁆𑀫𑀺𑀁 𑀢𑀢𑁆𑀣 𑀕𑀢𑁂 𑀢𑀲𑁆𑀲 𑀧𑀺𑀢𑀭𑀁 𑀧𑀸𑀲𑀸𑀡𑁂𑀦 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀢𑁆𑀯𑀸 𑀩𑁆𑀬𑀕𑁆𑀖𑀁𑀘 𑀤𑀸𑀦𑀺 𑀫𑀸𑀭𑁂𑀲𑁆𑀲𑀸𑀫𑀻𑀢𑀺 𑀩𑁆𑀬𑀕𑁆𑀖𑀸𑀕𑀫𑀦𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀦𑀺𑀮𑀻𑀦𑁄 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀩𑁆𑀬𑀕𑁆𑀖𑁄𑀧𑀺 𑀆𑀕𑀜𑁆𑀙𑀺. 𑀲𑁄 𑀢𑀲𑁆𑀲𑀸 𑀕𑀢𑀓𑀸𑀮𑁂 𑀢𑀲𑁆𑀲 𑀢𑁂𑀚𑁂𑀦 𑀪𑀻𑀢𑁄 𑀕𑀦𑁆𑀢𑁆𑀯𑀸 ¶ 𑀚𑀻𑀯𑀺𑀢𑀁 𑀫𑁂 𑀲𑀸𑀫𑀺 𑀤𑁂𑀳𑀻𑀢𑀺 𑀧𑀸𑀤𑀫𑀽𑀮𑁂 𑀉𑀭𑁂𑀦 𑀦𑀺𑀧𑀚𑁆𑀚𑀺, 𑀩𑁆𑀬𑀕𑁆𑀖𑁄 𑀧𑀦 𑀢𑁂𑀦 𑀓𑀢𑀓𑀫𑁆𑀫𑀁 𑀤𑀺𑀲𑁆𑀯𑀸 𑀢𑀲𑁆𑀫𑀺𑀁 𑀘𑀺𑀢𑁆𑀢𑀁 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀫𑀫 𑀲𑀳𑀸𑀬𑀲𑁆𑀲 𑀲𑀸𑀲𑀦𑀫𑀸𑀤𑀸𑀬𑀸𑀕𑀢𑀲𑁆𑀲 𑀤𑀼𑀩𑁆𑀪𑀺𑀢𑀼𑀁 𑀦 𑀬𑀼𑀢𑁆𑀢𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀢𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀕𑀘𑁆𑀙 𑀲𑀫𑁆𑀫𑀸𑀢𑀺 𑀲𑀼𑀔𑀁 𑀧𑁂𑀲𑁂𑀲𑀺. 𑀏𑀯𑀜𑁆𑀳𑀺 𑀲𑀧𑁆𑀧𑀼𑀭𑀺𑀲𑀲𑀫𑀸𑀕𑀫𑁄 𑀦𑀸𑀫 𑀇𑀥 𑀮𑁄𑀓𑀧𑀭𑀮𑁄𑀓𑁂𑀲𑀼 𑀲𑀼𑀔𑀸𑀯𑀳𑁄𑀬𑁂𑀯, 𑀯𑀼𑀢𑁆𑀢𑀁𑀳𑀺.

𑁫.

𑀲𑀩𑁆𑀪𑀺𑀭𑁂𑀯 𑀲𑀫𑀸𑀲𑁂𑀣, 𑀲𑀩𑁆𑀪𑀺 𑀓𑀼𑀩𑁆𑀩𑁂𑀣 𑀲𑀦𑁆𑀣𑀯𑀁;

𑀲𑀩𑁆𑀩𑀢𑁆𑀣 𑀲𑀦𑁆𑀣𑀯𑁄 𑀢𑁂𑀦, 𑀲𑁂𑀬𑁆𑀬𑁄 𑀳𑁄𑀢𑀺 𑀦 𑀧𑀸𑀧𑀺𑀬𑁄.

𑁬.

𑀲𑀼𑀔𑀸𑀯𑀳𑁄 𑀤𑀼𑀓𑁆𑀔𑀦𑀼𑀤𑁄, 𑀲𑀤𑀸 𑀲𑀩𑁆𑀪𑀺 𑀲𑀫𑀸𑀕𑀫𑁄;

𑀢𑀲𑁆𑀫𑀸 𑀲𑀧𑁆𑀧𑀼𑀭𑀺𑀲𑁂𑀳𑁂𑀯, 𑀲𑀗𑁆𑀕𑀫𑁄 𑀳𑁄𑀢𑀼 𑀚𑀦𑁆𑀢𑀼𑀦𑀁.

𑀢𑀢𑁄 𑀲𑁄 𑀩𑁆𑀬𑀕𑁆𑀖𑁄 𑀢𑁂𑀦 𑀫𑁂𑀢𑁆𑀢𑀘𑀺𑀢𑁆𑀢𑀸𑀦𑀼𑀪𑀸𑀯𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁄𑀢𑀺.

𑁭.

𑀏𑀯𑀁𑀯𑀺𑀥𑁄𑀧𑀺 𑀨𑀭𑀼𑀲𑁄 𑀧𑀭𑀫𑀁𑀲𑀪𑁄𑀚𑀻;

𑀩𑁆𑀬𑀕𑁆𑀖𑁄 𑀤𑀬𑀸𑀬𑀼𑀧𑀕𑀢𑁄 𑀲𑀼𑀕𑀢𑀺𑀁 𑀲𑀼𑀫𑁂𑀥𑁄;

𑀢𑀲𑁆𑀫𑀸 𑀓𑀭𑁄𑀣 𑀓𑀭𑀼𑀡𑀁 𑀲𑀢𑀢𑀁 𑀚𑀦𑀸𑀦𑀁,

𑀢𑀁 𑀯𑁄 𑀤𑀤𑀸𑀢𑀺 𑀯𑀺𑀪𑀯𑀜𑁆𑀘 𑀪𑀯𑁂𑀲𑀼 𑀪𑁄𑀕𑀦𑁆𑀢𑀺.

𑀩𑁆𑀬𑀕𑁆𑀖𑀲𑁆𑀲 𑀯𑀢𑁆𑀣𑀼𑀁 𑀧𑀜𑁆𑀘𑀫𑀁.

𑁧𑁬. 𑀨𑀮𑀓𑀔𑀡𑁆𑀟𑀤𑀺𑀦𑁆𑀦𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭𑁂𑀓𑁄 𑀫𑀦𑀼𑀲𑁆𑀲𑁄 𑀉𑀢𑁆𑀢𑀭𑀸𑀧𑀣𑀁 𑀕𑀘𑁆𑀙𑀸𑀫𑀻𑀢𑀺 𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑁄 𑀕𑀺𑀫𑁆𑀳𑀸𑀦𑀫𑀸𑀲𑁂 𑀫𑀚𑁆𑀛𑀡𑁆𑀳𑁂 𑀩𑀳𑀮𑀸𑀢𑀧𑁂𑀦 𑀓𑀺𑀮𑀦𑁆𑀢𑁄 𑀳𑀼𑀢𑁆𑀯𑀸 𑀭𑀼𑀓𑁆𑀔𑀘𑁆𑀙𑀸𑀬𑀁 𑀧𑀯𑀺𑀲𑀺𑀢𑁆𑀯𑀸 𑀢𑀫𑁆𑀩𑀼𑀮𑀁 𑀔𑀸𑀤𑀦𑁆𑀢𑁄 𑀨𑀮𑀓𑁂 𑀦𑀺𑀲𑀻𑀤𑀺. 𑀅𑀣 𑀉𑀢𑁆𑀢𑀭𑀸𑀧𑀣𑁂𑀦𑀸𑀕𑀘𑁆𑀙𑀸𑀦𑁆𑀢𑁄 𑀏𑀓𑁄 𑀢𑀣𑁂𑀯 𑀆𑀢𑀧𑁂𑀦 𑀓𑀺𑀮𑀦𑁆𑀢𑁄 𑀆𑀕𑀦𑁆𑀢𑁆𑀯𑀸 𑀧𑀼𑀭𑀺𑀫𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑁄 𑀧𑀸𑀦𑀻𑀬𑀁 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀺. 𑀇𑀢𑀭𑁄 𑀧𑀸𑀦𑀻𑀬𑀁 𑀦𑀢𑁆𑀣𑀻𑀢𑀺 𑀆𑀳. 𑀅𑀣𑀲𑁆𑀲 ¶ 𑀲𑁄 𑀫𑀬𑁆𑀳𑀫𑁆𑀧𑀺 𑀪𑁄 𑀢𑀫𑁆𑀩𑀼𑀮𑀁 𑀤𑁂𑀳𑀺 𑀧𑀺𑀧𑀸𑀲𑀺𑀢𑁄𑀫𑁆𑀳𑀺𑀢𑀺 𑀯𑀢𑁆𑀯𑀸𑀧𑀺 𑀦 𑀮𑀪𑀺. 𑀘𑀢𑀼𑀓𑀳𑀸𑀧𑀡𑁂𑀦 𑀏𑀓𑀁 𑀢𑀫𑁆𑀩𑀼𑀮𑀧𑀡𑁆𑀡𑀁 𑀓𑀺𑀡𑀺𑀢𑁆𑀯𑀸 𑀮𑀤𑁆𑀥𑁄 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀔𑀸𑀤𑀺𑀢𑁆𑀯𑀸 𑀧𑀺𑀧𑀸𑀲𑀁 𑀯𑀺𑀦𑁄𑀤𑁂𑀢𑁆𑀯𑀸 𑀢𑁂𑀦 𑀉𑀧𑀓𑀸𑀭𑁂𑀦 𑀢𑀲𑁆𑀲 𑀲𑀺𑀦𑁂𑀳𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀕𑀫𑀦𑀝𑁆𑀞𑀸𑀦 𑀫𑀕𑀫𑀸𑀲𑀺, 𑀅𑀣𑀸 𑀧𑀭𑀪𑀸𑀕𑁂 𑀲𑁄 𑀧𑀝𑁆𑀝𑀦𑀁 𑀕𑀦𑁆𑀢𑁆𑀯𑀸 𑀦𑀸𑀯𑀸𑀬 𑀯𑀡𑀺𑀚𑁆𑀚𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑁄 𑀲𑀫𑀼𑀤𑁆𑀤𑀫𑀚𑁆𑀛𑀁 𑀧𑀸𑀧𑀼𑀡𑀺. 𑀢𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀦𑀸𑀯𑀸 𑀪𑀺𑀚𑁆𑀚𑀺. 𑀫𑀦𑀼𑀲𑁆𑀲𑀸 𑀫𑀘𑁆𑀙𑀓𑀘𑁆𑀙𑀧𑀸𑀦𑀁 𑀪𑀓𑁆𑀔𑀸 𑀚𑀸𑀢𑀸. 𑀲𑁄 𑀏𑀯 𑀧𑀼𑀭𑀺𑀲𑁄 𑀅𑀭𑁄𑀕𑁄 𑀳𑀼𑀢𑁆𑀯𑀸 𑀏𑀓𑀁 𑀨𑀮𑀓𑀔𑀡𑁆𑀟𑀁 𑀉𑀭𑁂 𑀓𑀢𑁆𑀯𑀸 𑀲𑀫𑀼𑀤𑁆𑀤𑀁 𑀢𑀭𑀢𑀺. 𑀅𑀣𑁂 𑀢𑀭𑁄𑀧𑀺 𑀢𑀣𑁂𑀯 𑀦𑀸𑀯𑀸𑀬 𑀪𑀺𑀦𑁆𑀦𑀸𑀬 𑀲𑁂𑀲𑁄 𑀳𑀼𑀢𑁆𑀯𑀸 𑀲𑀫𑀼𑀤𑁆𑀤𑀁 𑀢𑀭𑀦𑁆𑀢𑁄 𑀧𑀼𑀭𑀺𑀫𑁂𑀦 𑀲𑀫𑀸𑀕𑀫𑀺. 𑀅𑀣 𑀢𑁂 𑀲𑀢𑁆𑀢𑀤𑀺𑀯𑀲𑀁 𑀲𑀫𑀼𑀤𑁆𑀤𑁂 𑀢𑀭𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀁 𑀲𑀜𑁆𑀚𑀸𑀦𑀺𑀁𑀲𑀼. 𑀢𑁂𑀲𑀼 𑀓𑀳𑀸𑀧𑀡𑁂 𑀤𑀢𑁆𑀯𑀸 𑀢𑀫𑁆𑀩𑀼𑀮𑀁 𑀕𑀳𑀺𑀢𑁄 𑀏𑀓𑀁 𑀨𑀮𑀓𑀔𑀡𑁆𑀟𑀁 𑀉𑀭𑁂 𑀓𑀢𑁆𑀯𑀸 𑀢𑀭𑀢𑀺. 𑀇𑀢𑀭𑀲𑁆𑀲𑁂𑀢𑀁 𑀦𑀢𑁆𑀣𑀺. 𑀅𑀣 𑀲𑁄 𑀓𑀳𑀸𑀧𑀡𑁂 𑀕𑀳𑁂𑀢𑁆𑀯𑀸 𑀤𑀺𑀦𑁆𑀦𑀢𑀫𑁆𑀩𑀼𑀮𑀫𑀢𑁆𑀢𑀲𑁆𑀲𑁄 𑀧𑀓𑀸𑀭𑀁 𑀲𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀨𑀮𑀓𑀔𑀡𑁆𑀟𑀁 𑀢𑀲𑁆𑀲 𑀅𑀤𑀸𑀲𑀺. 𑀲𑁄 𑀢𑀲𑁆𑀫𑀺𑀁 𑀲𑀬𑀺𑀢𑁆𑀯𑀸 𑀢𑀭𑀦𑁆𑀢𑁄 𑀢𑀁 𑀧𑀳𑀸𑀬 𑀅𑀕𑀫𑀸𑀲𑀺, 𑀅𑀧𑀭𑁄 𑀅𑀦𑀸𑀥𑀸𑀭𑀓𑁂𑀦 𑀢𑀭𑀦𑁆𑀢𑁄 𑀑𑀲𑁆𑀲𑀝𑁆𑀞𑀯𑀺𑀭𑀺𑀬𑁄 𑀉𑀤𑀓𑁂 𑀑𑀲𑀻𑀤𑀺𑀢𑀼𑀫𑀸𑀭𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀫𑀼𑀤𑁆𑀤𑁂 𑀅𑀥𑀺𑀯𑀢𑁆𑀣𑀸 𑀫𑀡𑀺𑀫𑁂𑀔𑀮𑀸 𑀦𑀸𑀫 𑀤𑁂𑀯𑀥𑀻𑀢𑀸 𑀑𑀲𑀻𑀤𑀦𑁆𑀢𑀁 𑀢𑀁 𑀤𑀺𑀲𑁆𑀯𑀸 𑀲𑀧𑁆𑀧𑀼𑀭𑀺𑀲𑁄𑀢𑀺 𑀢𑀲𑁆𑀲 𑀕𑀼𑀡𑀸𑀦𑀼𑀲𑁆𑀲𑀭𑀦𑁆𑀢𑀻 𑀯𑁂𑀕𑁂𑀦𑀸 𑀕𑀦𑁆𑀢𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀲𑀫𑀼𑀤𑁆𑀤𑀢𑀻𑀭𑀁 𑀧𑀸𑀧𑁂𑀲𑀺. 𑀇𑀢𑀭𑀁𑀧𑀺 𑀲𑀸 𑀏𑀢𑀲𑁆𑀲𑁂𑀯 𑀕𑀼𑀡𑀸𑀦𑀼𑀪𑀸𑀯𑁂𑀦 𑀢𑀻𑀭𑀁 𑀧𑀸𑀧𑁂𑀲𑀺. 𑀅𑀣 𑀨𑀮𑀓𑁂𑀦𑁄𑀢𑀺𑀡𑁆𑀡𑀧𑀼𑀭𑀺𑀲𑁄 𑀢𑀁 𑀤𑀺𑀲𑁆𑀯𑀸 𑀯𑀺𑀫𑁆𑀳𑀺𑀢𑁄 𑀓𑀣𑀁 𑀧𑀼𑀭𑀢𑁄 𑀅𑀳𑁄𑀲𑀺 𑀲𑀫𑁆𑀫𑀸𑀢𑀺 𑀧𑀼𑀘𑁆𑀙𑀺. 𑀲𑁄 𑀦 𑀚𑀸𑀦𑀸𑀫𑀺. 𑀅𑀧𑀺𑀘 𑀔𑁄 𑀲𑀼𑀔𑁂𑀦𑁂𑀯 𑀢𑀻𑀭𑀁 𑀧𑀢𑁆𑀢𑁄𑀲𑁆𑀫𑀻𑀢𑀺 𑀆𑀳. 𑀅𑀣 𑀤𑁂𑀯𑀥𑀻𑀢𑀸 𑀤𑀺𑀲𑁆𑀲𑀫𑀸𑀦𑀓𑀲𑀭𑀻𑀭𑁂𑀦𑁂𑀯 𑀅𑀢𑁆𑀢𑀦𑀸 𑀆𑀦𑀻𑀢𑀪𑀸𑀯𑀁 𑀆𑀭𑁄𑀘𑁂𑀦𑁆𑀢𑀻 𑀆𑀳.

𑁧.

𑀬𑁄 𑀫𑀸𑀢𑀭𑀁 𑀧𑀺𑀢𑀭𑀁𑀯𑀸, 𑀥𑀫𑁆𑀫𑁂𑀦 𑀇𑀥 𑀧𑁄𑀲𑀢𑀺;

𑀭𑀓𑁆𑀔𑀦𑁆𑀢𑀺 𑀢𑀁 𑀲𑀤𑀸 𑀤𑁂𑀯𑀸, 𑀲𑀫𑀼𑀤𑁆𑀤𑁂 𑀯𑀸 𑀣𑀮𑁂𑀧𑀺 𑀯𑀸.

𑁨.

𑀬𑁄 𑀘𑁂 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘, 𑀲𑀁𑀖𑀜𑁆𑀘 𑀲𑀭𑀡𑀁 𑀕𑀢𑁄;

𑀭𑀓𑁆𑀔𑀦𑁆𑀢𑀺 𑀢𑀁 𑀲𑀤𑀸 𑀤𑁂𑀯𑀸, 𑀲𑀫𑀼𑀤𑁆𑀤𑁂 𑀯𑀸 𑀣𑀮𑁂𑀧𑀺 𑀯𑀸.

𑁩.

𑀧𑀜𑁆𑀘𑀯𑀺𑀥𑀁 ¶ 𑀅𑀝𑁆𑀞𑀯𑀺𑀥𑀁, 𑀧𑀸𑀢𑀺𑀫𑁄𑀓𑁆𑀔𑀜𑁆𑀘 𑀲𑀁𑀯𑀭𑀁;

𑀧𑀸𑀮𑁂𑀢𑀺 𑀬𑁄 𑀢𑀁 𑀧𑀸𑀮𑁂𑀦𑁆𑀢𑀺, 𑀤𑁂𑀯𑀸 𑀲𑀩𑁆𑀩𑀢𑁆𑀣 𑀲𑀩𑁆𑀩𑀤𑀸.

𑁪.

𑀓𑀸𑀬𑁂𑀦 𑀯𑀸𑀘𑀸 𑀫𑀦𑀲𑀸, 𑀲𑀼𑀘𑀭𑀺𑀢𑁆𑀢𑀁 𑀘𑀭𑀢𑀻 𑀥 𑀬𑁄;

𑀧𑀸𑀮𑁂𑀦𑁆𑀢𑀺 𑀢𑀁 𑀲𑀤𑀸 𑀤𑁂𑀯𑀸, 𑀲𑀫𑀼𑀤𑁆𑀤𑁂 𑀯𑀸 𑀣𑀮𑁂𑀧𑀺 𑀯𑀸.

𑁫.

𑀬𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂𑀲𑀼, 𑀞𑀺𑀢𑁄 𑀥 𑀓𑀢𑀯𑁂𑀤𑀺𑀓𑁄;

𑀧𑀸𑀮𑁂𑀦𑁆𑀢𑀺 𑀢𑀁 𑀲𑀤𑀸 𑀤𑁂𑀯𑀸, 𑀲𑀫𑀼𑀤𑁆𑀤𑁂 𑀯𑀸 𑀣𑀮𑁂𑀧𑀺 𑀯𑀸.

𑀢𑀢𑁄 𑀲𑁄 𑀆𑀳.

𑁬.

𑀦𑁂𑀯 𑀤𑀸𑀦𑀁 𑀅𑀤𑀸𑀲𑀸𑀳𑀁, 𑀦 𑀲𑀻𑀮𑀁 𑀧𑀭𑀺𑀧𑀸𑀮𑀬𑀺𑀁;

𑀓𑁂𑀦 𑀫𑁂 𑀧𑀼𑀜𑁆𑀜𑀓𑀫𑁆𑀫𑁂𑀦, 𑀫𑀫𑀁 𑀭𑀓𑁆𑀔𑀦𑁆𑀢𑀺 𑀤𑁂𑀯𑀢𑀸;

𑀧𑀼𑀘𑁆𑀙𑀸𑀫𑀺 𑀲𑀁𑀲𑀬𑀁 𑀢𑀼𑀬𑁆𑀳𑀁, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀤𑁂𑀯𑀢𑁂𑀢𑀺.

𑀤𑁂𑀯𑀢𑀸 𑀆𑀳.

𑁭.

𑀅𑀕𑀸𑀥𑀸 𑀧𑀸𑀭𑀕𑁂 𑀪𑀻𑀫𑁂, 𑀲𑀸𑀕𑀭𑁂 𑀤𑀼𑀭𑀺𑀢𑀸 𑀓𑀭𑁂;

𑀪𑀺𑀦𑁆𑀦𑀦𑀸𑀯𑁄 𑀢𑀭𑀦𑁆𑀢𑁄 𑀢𑁆𑀯𑀁, 𑀳𑀤𑀬𑁂 𑀓𑀢𑁆𑀯𑀸 𑀓𑀮𑀺𑀗𑁆𑀕𑀭𑀁.

𑁮.

𑀞𑀢𑁆𑀯𑀸 𑀲𑀧𑁆𑀧𑀼𑀭𑀺𑀲𑁂 𑀥𑀫𑁆𑀫𑁂, 𑀅𑀢𑁆𑀢𑀸𑀦 𑀫𑀦𑀯𑁂𑀓𑁆𑀔𑀺𑀬;

𑀔𑀡𑀲𑀦𑁆𑀣𑀯𑀲𑁆𑀲 𑀧𑀼𑀭𑀺𑀲𑀲𑁆𑀲, 𑀅𑀤𑀸𑀲𑀺 𑀨𑀮𑀓𑀁 𑀲𑀓𑀁.

𑁯.

𑀢𑀁 𑀢𑀼𑀬𑁆𑀳𑀁 𑀫𑀺𑀢𑁆𑀢𑀥𑀫𑁆𑀫𑀜𑁆𑀘, 𑀤𑀸𑀦𑀜𑁆𑀘 𑀨𑀮𑀓𑀲𑁆𑀲 𑀢𑁂;

𑀧𑀢𑀺𑀝𑁆𑀞𑀸𑀲𑀺 𑀲𑀫𑀼𑀤𑁆𑀤𑀲𑁆𑀫𑀺𑀁, 𑀏𑀯𑀁 𑀚𑀸𑀦𑀸𑀳𑀺 𑀫𑀸𑀭𑀺𑀲𑀸𑀢𑀺.

𑀏𑀯𑀜𑁆𑀘 𑀯𑀢𑁆𑀯𑀸 𑀲𑀸 𑀢𑁂 𑀤𑀺𑀩𑁆𑀩𑀸𑀳𑀸𑀭𑁂𑀦 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀤𑀺𑀩𑁆𑀩𑀯𑀢𑁆𑀣𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀲𑀸𑀯𑀢𑁆𑀣𑀺𑀦𑀕𑀭𑁂𑀬𑁂𑀯 𑀢𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀢𑀫𑁂𑀯 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀢𑁂 𑀤𑀸𑀦𑀁 𑀤𑀤𑀦𑁆𑀢𑀸 𑀲𑀻𑀮𑀁 𑀭𑀓𑁆𑀔𑀦𑁆𑀢𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀲𑀕𑁆𑀕𑀧𑀭𑀸𑀬𑀡𑀸 𑀅𑀳𑁂𑀲𑀼𑀁.

𑁧𑁦.

𑀏𑀯𑀁 𑀧𑀭𑀺𑀢𑁆𑀢𑀓𑀼𑀲𑀮𑁂𑀦𑀧𑀺 𑀲𑀸𑀕𑀭𑀲𑁆𑀫𑀺𑀁,

𑀲𑀢𑁆𑀢𑀸 𑀮𑀪𑀦𑁆𑀢𑀺 𑀲𑀭𑀡𑀁 𑀔𑀮𑀼 𑀤𑁂𑀯𑀢𑀸𑀳𑀺;

𑀢𑀼𑀫𑁆𑀳𑁂𑀧𑀺 𑀲𑀧𑁆𑀧𑀼𑀭𑀺𑀲𑀢𑀁 𑀦 𑀯𑀺𑀦𑀸𑀲𑀬𑀦𑁆𑀢𑀸,

𑀫𑀸 𑀪𑁄 𑀧𑀫𑀚𑁆𑀚𑀣 𑀲𑀤𑀸 𑀓𑀼𑀲𑀮𑀧𑁆𑀧𑀬𑁄𑀕𑁂𑀢𑀺.

𑀨𑀮𑀓𑀔𑀡𑁆𑀟𑀤𑀺𑀦𑁆𑀦𑀲𑁆𑀲 𑀯𑀢𑁆𑀣𑀼𑀁 𑀙𑀝𑁆𑀞𑀫𑀁.

𑁧𑁭. 𑀘𑁄𑀭𑀲𑀳𑀸𑀬𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀅𑀫𑁆𑀳𑀸𑀓𑀁 ¶ 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀚𑀫𑁆𑀩𑀼𑀤𑀻𑀧𑁂 𑀤𑁂𑀯𑀤𑀳𑀦𑀕𑀭𑁂 𑀏𑀓𑁄 𑀫𑀦𑀼𑀲𑁆𑀲𑁄 𑀤𑀼𑀓𑁆𑀔𑀺𑀢𑁄 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀭𑀦𑁆𑀢𑁄 𑀧𑀘𑁆𑀘𑀦𑁆𑀢𑁂 𑀅𑀜𑁆𑀜𑀢𑀭𑀁 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀏𑀓𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀢𑀲𑁆𑀲 𑀬𑀸𑀕𑀼𑀪𑀢𑁆𑀢𑀁 𑀤𑀢𑁆𑀯𑀸 𑀧𑁄𑀲𑁂𑀲𑀼𑀁, 𑀢𑀢𑁄 𑀲𑁄 𑀢𑀢𑁆𑀣 𑀫𑀦𑀼𑀲𑁆𑀲𑁂𑀳𑀺 𑀫𑀺𑀢𑁆𑀢𑀲𑀦𑁆𑀣𑀯𑀁 𑀓𑀢𑁆𑀯𑀸 𑀓𑀢𑀺𑀧𑀸𑀳𑀁 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀅𑀜𑁆𑀜𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀅𑀧𑀭𑀪𑀸𑀕𑁂 𑀘𑁄𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀘𑁄𑀭𑁂𑀦𑁆𑀢𑀁 𑀢𑀁 𑀭𑀸𑀚𑀧𑀼𑀭𑀺𑀲𑀸 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀭𑀸𑀚𑀸 𑀢𑀁 𑀩𑀦𑁆𑀥𑀦𑀸𑀕𑀸𑀭𑁂 𑀓𑀭𑁄𑀣𑀸𑀢𑀺 𑀆𑀡𑀸𑀧𑁂𑀲𑀺, 𑀢𑁂 𑀢𑀁 𑀩𑀦𑁆𑀥𑀦𑀸𑀕𑀸𑀭𑀁 𑀦𑁂𑀢𑁆𑀯𑀸 𑀲𑀗𑁆𑀔𑀮𑀺𑀓𑀸𑀳𑀺 𑀩𑀦𑁆𑀥𑀺𑀢𑁆𑀯𑀸 𑀆𑀭𑀓𑁆𑀔𑀓𑀸𑀦𑀁 𑀧𑀝𑀺𑀧𑀸𑀤𑁂𑀢𑁆𑀯𑀸 𑀅𑀕𑀫𑀁𑀲𑀼, 𑀩𑀦𑁆𑀥𑀦𑀸𑀕𑀸𑀭𑁂 𑀯𑀲𑀦𑁆𑀢𑀲𑁆𑀲 𑀢𑀲𑁆𑀲 𑀤𑁆𑀯𑀸𑀤𑀲𑀲𑀁𑀯𑀘𑁆𑀙𑀭𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺. 𑀢𑀢𑁄 𑀅𑀧𑀭𑀪𑀸𑀕𑁂 𑀢𑀲𑁆𑀲 𑀧𑀼𑀩𑁆𑀩𑀲𑀳𑀸𑀬𑁄 𑀧𑀘𑁆𑀘𑀦𑁆𑀢𑀕𑀸𑀫𑀯𑀸𑀲𑀻 𑀫𑀦𑀼𑀲𑁆𑀲𑁄 𑀓𑁂𑀦𑀘𑀺 𑀓𑀫𑁆𑀫𑁂𑀦 𑀤𑁂𑀯𑀤𑀳 𑀫𑀸𑀕𑀢𑁄 𑀢𑀢𑁆𑀣 𑀢𑀢𑁆𑀣 𑀆𑀳𑀺𑀡𑁆𑀟𑀦𑁆𑀢𑁄 𑀩𑀦𑁆𑀥𑀦𑀸𑀕𑀸𑀭𑁂 𑀩𑀤𑁆𑀥𑀁 𑀢𑀁 𑀅𑀤𑁆𑀤𑀲. 𑀤𑀺𑀲𑁆𑀯𑀸 𑀢𑀲𑁆𑀲 𑀳𑀤𑀬𑀁 𑀓𑀫𑁆𑀧𑀺, 𑀲𑁄 𑀭𑁄𑀤𑀺𑀢𑁆𑀯𑀸 𑀧𑀭𑀺𑀤𑁂𑀯𑀺𑀢𑁆𑀯𑀸 𑀓𑀺𑀁 𑀢𑁂 𑀫𑀬𑀸 𑀓𑀢𑁆𑀢𑀩𑁆𑀩𑀁 𑀲𑀫𑁆𑀫𑀸𑀢𑀺 𑀧𑀼𑀘𑁆𑀙𑀺. 𑀢𑀢𑁄 𑀢𑁂𑀦 𑀲𑀫𑁆𑀫 𑀩𑀦𑁆𑀥𑀦𑀸𑀕𑀸𑀭𑁂 𑀯𑀲𑀦𑁆𑀢𑀲𑁆𑀲 𑀫𑁂 𑀇𑀤𑀸𑀦𑀺 𑀤𑁆𑀯𑀸𑀤𑀲𑀲𑀁𑀯𑀘𑁆𑀙𑀭𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺, 𑀏𑀢𑁆𑀢𑀓𑀁 𑀓𑀸𑀮𑀁 𑀤𑀼𑀩𑁆𑀪𑁄𑀚𑀦𑀸𑀤𑀺𑀦𑀸 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑁄𑀫𑀺. 𑀬𑀸𑀯𑀸𑀳𑀁 𑀆𑀳𑀸𑀭𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀺. 𑀢𑀸𑀯 𑀫𑀁 𑀇𑀢𑁄 𑀫𑀼𑀜𑁆𑀘𑀦𑀼𑀧𑀸𑀬𑀁 𑀚𑀸𑀦𑀸𑀳𑀻𑀢𑀺 𑀯𑀼𑀢𑁆𑀢𑁂 𑀲𑁄 𑀲𑀧𑁆𑀧𑀼𑀭𑀺𑀲𑁄.

𑁧.

𑀭𑀽𑀧𑁂𑀦 𑀓𑀺𑀦𑁆𑀢𑀼 𑀕𑀼𑀡𑀲𑀻𑀮𑀯𑀺𑀯𑀚𑁆𑀚𑀺𑀢𑁂𑀦,

𑀫𑀺𑀘𑁆𑀙𑀸𑀮𑀬𑀲𑁆𑀲 𑀓𑀺𑀢𑀯𑀲𑁆𑀲 𑀥𑀺𑀬𑀸 𑀓𑀺𑀫𑀢𑁆𑀣𑀁;

𑀤𑀸𑀦𑀸 𑀤𑀺𑀘𑀸𑀕𑀯𑀺𑀕𑀢𑁂𑀦 𑀥𑀦𑁂𑀦 𑀓𑀺𑀁 𑀯𑀸;

𑀫𑀺𑀢𑁆𑀢𑁂𑀦 𑀓𑀺𑀁 𑀩𑁆𑀬𑀲𑀦𑀓𑀸𑀮𑀧𑀭𑀫𑁆𑀫𑀼𑀔𑁂𑀦𑀸𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀲𑀸𑀥𑀼 𑀲𑀫𑁆𑀫 𑀓𑀭𑁄𑀫𑀺 𑀢𑁂 𑀯𑀘𑀦𑀦𑁆𑀢𑀺 𑀆𑀭𑀓𑁆𑀔𑀓𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀪𑁄𑀦𑁆𑀢𑁄 𑀬𑀸𑀯𑁂𑀲𑁄 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀆𑀕𑀘𑁆𑀙𑀢𑀺. 𑀢𑀸𑀯𑀸𑀳𑀁 𑀢𑀲𑁆𑀲 𑀧𑀸𑀝𑀺𑀪𑁄𑀕𑁄 𑀪𑀯𑀺𑀲𑁆𑀲𑀸𑀫𑀺. 𑀯𑀺𑀲𑁆𑀲𑀚𑁆𑀚𑁂𑀣 ¶ 𑀦𑀦𑁆𑀢𑀺 𑀆𑀳, 𑀢𑁂𑀳𑀺 𑀦 𑀲𑀓𑁆𑀓𑀸 𑀪𑁄 𑀏𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁, 𑀅𑀧𑀺 𑀘 𑀔𑁄 𑀬𑀸𑀯𑀸𑀬𑀁 𑀆𑀕𑀘𑁆𑀙𑀢𑀺. 𑀢𑀸𑀯 𑀢𑁆𑀯𑀁 𑀅𑀬𑀲𑀗𑁆𑀔𑀮𑀺𑀓𑀸𑀬 𑀩𑀤𑁆𑀥𑁄 𑀦𑀺𑀲𑀻𑀤𑀺𑀲𑁆𑀲𑀲𑀺, 𑀏𑀯𑀁 𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫, 𑀦𑁄 𑀘𑁂 𑀦 𑀲𑀓𑁆𑀓𑀸𑀢𑀺 𑀆𑀳𑀁𑀲𑀼, 𑀲𑁄 𑀏𑀯𑀫𑁆𑀧𑀺 𑀳𑁄𑀢𑀼 𑀲𑀫𑁆𑀫𑀸𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀧𑀸𑀤𑀢𑁄 𑀲𑀗𑁆𑀔𑀮𑀺𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀸𑀤𑁂 𑀓𑀢𑁆𑀯𑀸 𑀩𑀦𑁆𑀥𑀦𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀇𑀢𑀭𑀁 𑀫𑀼𑀜𑁆𑀘𑀸𑀧𑁂𑀲𑀺. 𑀲𑁄𑀧𑀺 𑀅𑀲𑀧𑁆𑀧𑀼𑀭𑀺𑀲𑁄 𑀩𑀦𑁆𑀥𑀦𑀸 𑀫𑀼𑀢𑁆𑀢𑁄 𑀦 𑀧𑀼𑀦 𑀢𑀁 𑀞𑀸𑀦 𑀫𑀕𑀫𑀸𑀲𑀺, 𑀅𑀳𑁄 𑀅𑀓𑀢𑀜𑁆𑀜𑀼𑀦𑁄 𑀧𑀓𑀢𑀺𑀁 𑀜𑀸𑀢𑀼𑀁 𑀪𑀸𑀭𑀺𑀬𑀁. 𑀬𑀣𑀸𑀳.

𑁨.

𑀯𑀸𑀭𑀺𑀧𑀽𑀭𑁂 𑀬𑀣𑀸 𑀲𑁄𑀩𑁆𑀪𑁂, 𑀦𑁂𑀯𑀦𑁆𑀢𑁄 𑀯𑀺𑀲𑀫𑀁 𑀲𑀫𑀁;

𑀧𑀜𑁆𑀜𑀸𑀬𑀢𑁂𑀯𑀁𑀲𑀸𑀥𑀼𑀲𑁆𑀲, 𑀪𑀸𑀯𑀁 𑀫𑀦𑀲𑀺 𑀲𑀫𑁆𑀪𑀯𑀁.

𑁩.

𑀪𑀸𑀲𑀦𑁆𑀢𑀺 𑀫𑀼𑀔𑀢𑁄 𑀏𑀓𑀁, 𑀘𑀺𑀦𑁆𑀢𑁂𑀦𑁆𑀢𑀺 𑀫𑀦𑀲𑀸 𑀧𑀭𑀁;

𑀓𑀸𑀬𑁂𑀦𑁂𑀓𑀁 𑀓𑀭𑁄𑀦𑁆𑀢𑁂𑀯𑀁, 𑀧𑀓𑀢𑀸𑀬𑀫𑀲𑀸𑀥𑀼𑀦𑀁.

𑁪.

𑀢𑁂𑀲𑀁 𑀬𑁄 𑀪𑀸𑀯𑀫𑀜𑁆𑀜𑀸𑀲𑀺, 𑀲𑁄𑀯 𑀧𑀡𑁆𑀟𑀺𑀢𑀚𑀸𑀢𑀺𑀓𑁄;

𑀩𑀳𑀼𑀲𑁆𑀲𑀼𑀢𑁄𑀧𑀺 𑀲𑁄𑀬𑁂𑀯, 𑀧𑀭𑀘𑀺𑀢𑁆𑀢𑀯𑀺𑀤𑀽𑀧𑀺 𑀲𑁄.

𑀅𑀣𑀲𑁆𑀲 𑀩𑀦𑁆𑀥𑀦𑀸𑀕𑀸𑀭𑁂 𑀯𑀲𑀦𑁆𑀢𑀲𑁆𑀲 𑀤𑁆𑀯𑀸𑀤𑀲𑀲𑀁𑀯𑀘𑁆𑀙𑀭𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺. 𑀏𑀢𑁆𑀢𑀓𑀁 𑀓𑀸𑀮𑀁 𑀚𑀺𑀖𑀘𑁆𑀙𑀸𑀧𑀻𑀴𑀺𑀢𑁂𑀦 𑀢𑁂𑀦 𑀆𑀳𑀸𑀭𑀢𑁆𑀢𑀸𑀬 𑀧𑀭𑁄 𑀦 𑀬𑀸𑀘𑀺𑀢𑀧𑀼𑀩𑁆𑀩𑁄, 𑀅𑀦𑀼𑀘𑁆𑀙𑀺𑀝𑁆𑀞𑀸𑀳𑀸𑀭𑀁 𑀮𑀪𑀦𑀤𑀺𑀯𑀲𑀢𑁄 𑀅𑀮𑀪𑀦𑀤𑀺𑀯𑀲𑀸𑀬𑁂𑀯 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀅𑀣 𑀤𑁆𑀯𑀸𑀤𑀲𑀲𑀁𑀯𑀘𑁆𑀙𑀭𑀸𑀢𑀺𑀓𑁆𑀓𑀫𑁂 𑀭𑀜𑁆𑀜𑁄 𑀧𑀼𑀢𑁆𑀢𑁄 𑀦𑀺𑀩𑁆𑀩𑀢𑁆𑀢𑀺. 𑀢𑀤𑀸 𑀭𑀸𑀚𑀸 𑀅𑀢𑁆𑀢𑀦𑁄 𑀯𑀺𑀚𑀺𑀢𑁂 𑀲𑀩𑁆𑀩𑀩𑀦𑁆𑀥𑀦𑀸𑀕𑀸𑀭𑀸𑀦𑀺 𑀯𑀺𑀯𑀭𑀸𑀧𑁂𑀲𑀺. 𑀅𑀦𑁆𑀢𑀫𑀲𑁄 𑀫𑀺𑀕𑀧𑀓𑁆𑀔𑀺𑀦𑁄𑀧𑀺 𑀩𑀦𑁆𑀥𑀦𑀸 𑀫𑀼𑀜𑁆𑀘𑀸𑀧𑁂𑀲𑀺. 𑀤𑁆𑀯𑀸𑀭𑁂 𑀯𑀺𑀯𑀝𑀫𑀢𑁆𑀢𑁂𑀬𑁂𑀯 𑀩𑀦𑁆𑀥𑀦𑀸𑀕𑀸𑀭𑁂 𑀫𑀦𑀼𑀲𑁆𑀲𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀅𑀕𑀫𑀁𑀲𑀼. 𑀲𑁄 𑀧𑀦𑁂𑀓𑁄𑀯 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀕𑀦𑁆𑀢𑁆𑀯𑀸 𑀑𑀳𑀻𑀬𑀺. 𑀆𑀭𑀓𑁆𑀔𑀓𑁂𑀳𑀺 𑀢𑁆𑀯𑀁 𑀪𑁄 𑀓𑀲𑁆𑀫𑀸 𑀦 𑀕𑀘𑁆𑀙𑀲𑀻𑀢𑀺 𑀯𑀼𑀢𑁆𑀢𑁂 𑀅𑀳𑀁 𑀪𑁄 𑀧𑀜𑁆𑀜𑀸𑀢𑀪𑀸𑀯𑁂𑀦 𑀇𑀤𑀸𑀦𑀺 𑀦 𑀕𑀫𑀺𑀲𑁆𑀲𑀸𑀫𑀺. 𑀅𑀢𑀻𑀯 𑀧𑀭𑀺𑀳𑀻𑀦𑀕𑀢𑁆𑀢𑁄𑀲𑁆𑀫𑀺. 𑀅𑀦𑁆𑀥𑀓𑀸𑀭𑁂 𑀕𑀫𑀺𑀲𑁆𑀲𑀸𑀫𑀻𑀢𑀺 𑀯𑀢𑁆𑀯𑀸 𑀅𑀦𑁆𑀥𑀓𑀸𑀭𑁂 𑀆𑀕𑀢𑁂 𑀦𑀺𑀓𑁆𑀔𑀫𑁆𑀫 𑀅𑀦𑁆𑀢𑁄𑀦𑀕𑀭𑁂 𑀯𑀺𑀲𑁆𑀲𑀸𑀲𑀺𑀓𑀸𑀦𑀁 𑀅𑀪𑀸𑀯𑁂𑀦 𑀓𑀼𑀢𑁄 𑀆𑀳𑀸𑀭𑀁 𑀮𑀪𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀦𑀺𑀓𑁆𑀔𑀫𑁆𑀫 𑀭𑀢𑁆𑀢𑀦𑁆𑀥𑀓𑀸𑀭𑁂 𑀆𑀫𑀓𑀲𑀼𑀲𑀸𑀦 ¶ 𑀫𑀕𑀫𑀸𑀲𑀺. 𑀏𑀢𑁆𑀣𑀸𑀳𑀸𑀭𑀁 𑀮𑀪𑀺𑀲𑁆𑀲𑀸𑀫𑀻𑀢𑀺. 𑀢𑀢𑁆𑀣 𑀲𑁄 𑀅𑀥𑀼𑀦𑀸 𑀦𑀺𑀓𑁆𑀔𑀺𑀢𑁆𑀢𑀫𑀢𑀫𑀦𑀼𑀲𑁆𑀲𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀝𑁆𑀞𑀺𑀦𑀸 𑀫𑀁𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀻𑀲𑀓𑀧𑀸𑀮𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀻𑀳𑀺 𑀫𑀦𑀼𑀲𑁆𑀲𑀲𑀻𑀲𑁂𑀳𑀺 𑀓𑀢𑀉𑀤𑁆𑀥𑀦𑁂 𑀞𑀧𑁂𑀢𑁆𑀯𑀸 𑀘𑀺𑀢𑀓𑀢𑁄 𑀑𑀫𑀼𑀓𑁆𑀓𑀅𑀮𑀸𑀢𑁂𑀳𑀺 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀲𑀼𑀲𑀸𑀦𑀁 𑀦𑀺𑀩𑁆𑀩𑀸𑀧𑀦𑀢𑁆𑀣𑀸𑀬𑀸 𑀪𑀢𑀉𑀤𑀓𑁂𑀦 𑀫𑀦𑀼𑀲𑁆𑀲𑀝𑁆𑀞𑀺𑀦𑀸 𑀆𑀮𑁄𑀮𑁂𑀦𑁆𑀢𑁄 𑀫𑀁𑀲𑀁 𑀧𑀘𑀺𑀢𑁆𑀯𑀸 𑀑𑀢𑀸𑀭𑁂𑀢𑁆𑀯𑀸 𑀲𑀸𑀔𑀸𑀪𑀗𑁆𑀕𑁂𑀦 𑀳𑀺𑀭𑀺𑀓𑁄𑀧𑀻𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀦𑀺𑀯𑀢𑁆𑀣𑀧𑀺𑀮𑁄𑀓𑀺𑀓𑀁 𑀯𑀸𑀢𑀸𑀯𑀭𑀡𑀁 𑀓𑀢𑁆𑀯𑀸𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀢𑀢𑁆𑀣 𑀧𑀺𑀧𑁆𑀧𑀮𑀻𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀢𑀲𑁆𑀲 𑀢𑀁 𑀓𑀺𑀭𑀺𑀬𑀁 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀢𑀸𑀯 𑀦𑀦𑁆𑀢𑀺 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳. 𑀪𑁄 𑀢𑁆𑀯𑀁 𑀖𑀦𑀢𑀭𑀢𑀺𑀫𑀺𑀭𑀸𑀓𑀼𑀮𑁂 𑀫𑀳𑀸𑀭𑀢𑁆𑀢𑀺𑀬𑀁 𑀢𑀢𑁆𑀣 𑀢𑀢𑁆𑀣 𑀯𑀺𑀓𑀺𑀡𑁆𑀡𑀦𑀭𑀝𑁆𑀞𑀺𑀲𑀫𑀸𑀓𑀺𑀡𑁆𑀡𑁂 𑀲𑁄𑀡𑀲𑀺𑀕𑀸𑀮𑀸𑀤𑀺𑀓𑀼𑀡𑀧𑀸𑀤𑀓𑀸𑀓𑀼𑀮𑁂 𑀫𑀦𑀼𑀲𑁆𑀲𑀫𑀁𑀲𑀪𑀓𑁆𑀔𑀬𑀓𑁆𑀔𑀭𑀓𑁆𑀔𑀲𑀸𑀓𑀼𑀮𑁂 𑀢𑀢𑁆𑀣 𑀢𑀢𑁆𑀣 𑀧𑀚𑁆𑀚𑀮𑀦𑁆𑀢𑀸𑀦𑁂𑀓𑀘𑀺𑀢𑀓𑀪𑀬𑀸𑀦𑀓𑁂 𑀲𑀼𑀲𑀸𑀦𑁂 𑀫𑀦𑀼𑀲𑁆𑀲𑀫𑀁𑀲𑀁 𑀧𑀘𑀺𑀢𑁆𑀯𑀸 𑀓𑀺𑀁𑀓𑀭𑁄𑀲𑀻𑀢𑀺 𑀧𑀼𑀘𑁆𑀙𑀦𑁆𑀢𑀻 𑀆𑀳.

𑁫.

𑀭𑀢𑁆𑀢𑀦𑁆𑀥𑀓𑀸𑀭𑁂 𑀓𑀼𑀡𑀧𑀸𑀤𑀓𑁂𑀳𑀺,

𑀲𑀫𑀸𑀓𑀼𑀮𑁂 𑀲𑀻𑀯𑀣𑀺𑀓𑀸𑀬 𑀫𑀚𑁆𑀛𑁂;

𑀫𑀦𑀼𑀲𑁆𑀲𑀫𑀁𑀲𑀁 𑀧𑀘𑀲𑀻 𑀥 𑀲𑀻𑀲𑁂,

𑀯𑀤𑁂𑀳𑀺 𑀓𑀺𑀁 𑀢𑁂𑀦 𑀧𑀬𑁄𑀚𑀦𑀁 𑀢𑁂𑀢𑀺.

𑀅𑀣 𑀲𑁄 𑀆𑀳.

𑁬.

𑀦 𑀬𑀸𑀕𑀳𑁂𑀢𑀼 𑀦 𑀘 𑀤𑀸𑀦𑀳𑁂𑀢𑀼,

𑀲𑀼𑀲𑀸𑀦𑀫𑀚𑁆𑀛𑀫𑁆𑀳𑀺 𑀧𑀘𑀸𑀫𑀺 𑀫𑀁𑀲𑀁;

𑀔𑀼𑀤𑀸𑀲𑀫𑀁 𑀦𑀢𑁆𑀣𑀺 𑀦𑀭𑀲𑁆𑀲 𑀅𑀜𑁆𑀜𑀁,

𑀔𑀼𑀤𑀸𑀯𑀺𑀦𑀸𑀲𑀸𑀬 𑀧𑀘𑀸𑀫𑀺𑀫𑀫𑁆𑀪𑁄𑀢𑀺.

𑀢𑀢𑁄 𑀤𑁂𑀯𑀢𑀸 𑀢𑀁 𑀢𑀣𑀸 𑀳𑁄𑀢𑀼, 𑀇𑀫𑀺𑀦𑀸 𑀧𑀺𑀮𑁄𑀢𑀺𑀓𑁂𑀦 𑀯𑀸𑀢𑀸𑀯𑀭𑀡𑀁 𑀓𑀭𑁄𑀲𑀺. 𑀓𑀺𑀫𑀢𑁆𑀣𑀫𑁂𑀢𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑀻.

𑁭.

𑀦𑀺𑀯𑀢𑁆𑀣𑀲𑀸𑀔𑁄 ¶ 𑀳𑀺𑀭𑀺𑀲𑀁𑀯𑀭𑀸𑀬,

𑀧𑀺𑀮𑁄𑀢𑀺𑀓𑀁 𑀢𑀢𑁆𑀣 𑀧𑀲𑀸𑀭𑀬𑀦𑁆𑀢𑁄;

𑀓𑀭𑁄𑀲𑀺 𑀯𑀸𑀢𑀸𑀯𑀭𑀡𑀜𑁆𑀘 𑀲𑀫𑁆𑀫,

𑀓𑀺𑀫𑀢𑁆𑀣𑀫𑁂𑀢𑀁 𑀯𑀤 𑀧𑀼𑀘𑁆𑀙𑀺𑀢𑁄 𑀫𑁂𑀢𑀺.

𑀲𑁄 𑀢𑀲𑁆𑀲𑀸 𑀘𑀺𑀓𑁆𑀔𑀦𑁆𑀢𑁄 𑀆𑀳.

𑁮.

𑀲𑀼𑀪𑀸 𑀲𑀼𑀪𑀸𑀫𑀺𑀲𑁆𑀲𑀺𑀢𑀲𑀻𑀢𑀯𑀸𑀢𑁄,

𑀲𑀬𑀁 𑀅𑀘𑀺𑀢𑁆𑀢𑁄𑀯 𑀅𑀘𑀺𑀢𑁆𑀢𑀪𑀸𑀯𑀸;

𑀤𑁂𑀳𑀁 𑀨𑀼𑀲𑀺𑀢𑁆𑀯𑀸𑀦 𑀅𑀲𑀸𑀥𑀼𑀓𑀲𑁆𑀲,

𑀅𑀓𑀢𑀜𑁆𑀜𑀼𑀦𑁄 𑀫𑀺𑀢𑁆𑀢𑀧𑀥𑀁𑀲𑀓𑀲𑁆𑀲.

𑁯.

𑀲𑀫𑀸𑀯𑀳𑀦𑁆𑀢𑁄 𑀬𑀤𑀺 𑀫𑁂 𑀲𑀭𑀻𑀭𑁂,

𑀨𑀼𑀲𑀸𑀢𑀺 [𑀨𑀼𑀲𑀸𑀢𑀺𑀲𑀸𑀲𑀗𑁆𑀕𑀢𑀺𑀫𑀚𑁆𑀚𑀤𑀸𑀦𑀺 𑀇𑀢𑀺𑀓𑀢𑁆𑀢𑀘𑀺] 𑀢𑀁 𑀯𑀸𑀬𑀼 𑀫𑀫𑀸 𑀯𑀺𑀲𑀺𑀢𑁆𑀯𑀸;

𑀤𑀼𑀓𑁆𑀔𑀁 𑀤𑀤𑀸𑀢𑀻𑀢𑀺 𑀯𑀺𑀲𑀁𑀯 𑀢𑀁 𑀪𑁄,

𑀧𑀭𑀺𑀯𑀚𑁆𑀚𑀺𑀢𑀼𑀁 𑀩𑀤𑁆𑀥𑀫𑀺𑀫𑀁 𑀓𑀼𑀘𑁂𑀮𑀦𑁆𑀢𑀺.

𑀤𑁂𑀯𑀢𑀸 𑀆𑀳.

𑁧𑁦.

𑀓𑀺 𑀫𑀓𑀸𑀲𑀺 𑀪𑁄 𑀲𑁄 𑀓𑀢𑀦𑀸𑀲𑀓𑁄 𑀢𑁂,

𑀥𑀦𑀜𑁆𑀘 𑀥𑀜𑁆𑀜𑀁 𑀢𑀯 𑀦𑀸𑀲𑀬𑀻 𑀘;

𑀫𑀸𑀢𑀸 𑀧𑀺𑀢𑀸 𑀩𑀦𑁆𑀥𑀯𑁄 𑀔𑁂𑀢𑁆𑀢 𑀯𑀢𑁆𑀣𑀽,

𑀯𑀺𑀦𑀸𑀲𑀺𑀢𑀸 𑀢𑁂𑀦 𑀯𑀤𑁂𑀳𑀺 𑀓𑀺𑀁 𑀢𑁂𑀢𑀺.

𑀢𑀢𑁄 𑀲𑁄 𑀆𑀳.

𑁧𑁧.

𑀬𑀁 𑀭𑀸𑀚𑀢𑁄 𑀳𑁄𑀢𑀺 𑀪𑀬𑀁 𑀫𑀳𑀦𑁆𑀢𑀁,

𑀲𑀩𑁆𑀩𑀲𑁆𑀲 𑀳𑀭𑀡𑀸𑀤𑀺𑀯𑀥𑀸𑀤𑀺𑀓𑀜𑁆𑀘;

𑀅𑀓𑀢𑀜𑁆𑀜𑀼𑀦𑀸 𑀲𑀧𑁆𑀧𑀼𑀭𑀺𑀲𑁂𑀦 𑀳𑁄𑀢𑀺,

𑀆𑀭𑀸𑀯 𑀲𑁄 𑀪𑁄 𑀧𑀭𑀺𑀯𑀚𑁆𑀚𑀦𑀻𑀬𑁄.

𑁧𑁨.

𑀬𑀫𑀢𑁆𑀣𑀺 ¶ 𑀘𑁄𑀭𑀸𑀭𑀺𑀪𑀬𑀜𑁆𑀳𑀺 𑀮𑁄𑀓𑁂,

𑀅𑀣𑁄 𑀤𑀓𑁂𑀦𑀸𑀧𑀺 𑀘 𑀧𑀸𑀯𑀓𑁂𑀦;

𑀅𑀓𑀢𑀜𑁆𑀜𑀼𑀦𑀸 𑀢𑀁 𑀲𑀓𑀮𑀫𑁆𑀧𑀺 𑀳𑁄𑀢𑀺,

𑀆𑀭𑀸𑀯 𑀲𑁄 𑀪𑁄 𑀧𑀭𑀺𑀯𑀚𑁆𑀚𑀦𑀻𑀬𑁄.

𑁧𑁩.

𑀧𑀸𑀡𑀸𑀢𑀺𑀧𑀸𑀢𑀫𑁆𑀧𑀺 𑀅𑀤𑀺𑀦𑁆𑀦𑀤𑀸𑀦𑀁,

𑀧𑀭𑀲𑁆𑀲 𑀤𑀸𑀭𑀽𑀧𑀕𑀫𑀁 𑀫𑀼𑀲𑀸 𑀘;

𑀫𑀚𑁆𑀚𑀲𑁆𑀲 𑀧𑀸𑀦𑀁 𑀓𑀮𑀳𑀜𑁆𑀘 𑀧𑁂𑀲𑀼𑀦𑀁,

𑀲𑀫𑁆𑀨𑀁 𑀕𑀺𑀭𑀁 𑀥𑀼𑀢𑁆𑀢𑀚𑀦𑁂𑀳𑀺 [𑀅𑀓𑁆𑀔𑀥𑀼𑀢𑁆𑀢𑀸𑀤𑀺𑀬𑁄𑀕𑀁 𑀇𑀢𑀺𑀓𑀢𑁆𑀣𑀘𑀺] 𑀬𑁄𑀕𑀁.

𑁧𑁪.

𑀲𑀩𑁆𑀩𑀁 𑀅𑀦𑀢𑁆𑀣𑀁 𑀅𑀲𑀺𑀯𑀁 𑀅𑀦𑀺𑀝𑁆𑀞𑀁,

𑀅𑀧𑀸𑀬𑀺𑀓𑀁 [𑀅𑀧𑀸𑀬𑀺𑀓𑀁 𑀇𑀢𑀺𑀓𑀢𑁆𑀣𑀘𑀺] 𑀤𑀼𑀓𑁆𑀔𑀫𑀦𑀦𑁆𑀢 𑀫𑀜𑁆𑀜𑀁;

𑀅𑀓𑀢𑀜𑁆𑀜𑀼𑀦𑀸 𑀲𑀧𑁆𑀧𑀼𑀭𑀺𑀲𑁂𑀦 𑀳𑁄𑀢𑀺;

𑀆𑀭𑀸𑀯 𑀲𑁄 𑀪𑁄 𑀧𑀭𑀺𑀯𑀚𑁆𑀚𑀦𑀻𑀬𑁄𑀢𑀺.

𑀯𑀢𑁆𑀯𑀸 𑀅𑀢𑁆𑀢𑀦𑀸 𑀅𑀲𑀧𑁆𑀧𑀼𑀭𑀺𑀲𑀲𑀁𑀲𑀕𑁆𑀕𑁂𑀦𑀸𑀦𑀼𑀪𑀽𑀢𑀁 𑀲𑀩𑁆𑀩𑀁 𑀤𑀼𑀓𑁆𑀔𑀁 𑀓𑀣𑁂𑀲𑀺, 𑀢𑀢𑁄 𑀤𑁂𑀯𑀢𑀸 𑀅𑀳𑀫𑁆𑀧𑀺 𑀪𑁄 𑀲𑀢𑁆𑀣𑀼𑀦𑁄 𑀫𑀗𑁆𑀕𑀮𑀲𑀼𑀢𑁆𑀢𑀤𑁂𑀲𑀦𑀸𑀤𑀺𑀯𑀲𑁂 𑀇𑀫𑀲𑁆𑀫𑀺𑀁𑀬𑁂𑀯 𑀭𑀼𑀓𑁆𑀔𑁂 𑀦𑀺𑀲𑀺𑀦𑁆𑀦𑁄.

𑀅𑀲𑁂𑀯𑀦𑀸 𑀘 𑀩𑀸𑀮𑀸𑀦𑀁, 𑀧𑀡𑁆𑀟𑀺𑀢𑀸𑀦𑀜𑁆𑀘 𑀲𑁂𑀯𑀦𑀸;

𑀧𑀽𑀚𑀸 𑀘 𑀧𑀽𑀚𑀦𑀻𑀬𑁆𑀬𑀸𑀦𑀁, 𑀏𑀢𑀁 𑀫𑀗𑁆𑀕𑀮 𑀫𑀼𑀢𑁆𑀢𑀫𑀦𑁆𑀢𑀺.

𑀕𑀸𑀣𑀸𑀬 𑀩𑀸𑀮𑀲𑁆𑀲 𑀤𑁄𑀲𑁂 𑀅𑀲𑁆𑀲𑁄𑀲𑀺𑀁𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀧𑀲𑀦𑁆𑀦𑁄 𑀢𑀁 𑀅𑀢𑁆𑀢𑀦𑁄 𑀯𑀺𑀫𑀸𑀦𑀁 𑀦𑁂𑀢𑁆𑀯𑀸 𑀦𑀳𑀸𑀧𑁂𑀢𑁆𑀯𑀸 𑀤𑀺𑀩𑁆𑀩𑀯𑀢𑁆𑀣𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀤𑀺𑀩𑁆𑀩𑀦𑁆𑀦𑀧𑀸𑀦𑀁 𑀤𑀢𑁆𑀯𑀸 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀢𑀲𑁆𑀫𑀺𑀁 𑀦𑀕𑀭𑁂 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀸𑀧𑁂𑀲𑀺. 𑀲𑁄 𑀢𑀢𑁆𑀣 𑀭𑀚𑁆𑀚𑀁 𑀓𑀭𑁄𑀦𑁆𑀢𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀬𑀣𑀸𑀓𑀫𑁆𑀫𑀁 𑀕𑀢𑁄𑀢𑀺.

𑁧𑁫.

𑀏𑀯𑀁 ¶ 𑀅𑀲𑀸𑀥𑀼𑀚𑀦𑀲𑀗𑁆𑀕𑀫𑀲𑀦𑁆𑀦𑀺𑀯𑀸𑀲𑀁,

𑀲𑀜𑁆𑀘𑀚𑁆𑀚 𑀲𑀸𑀥𑀼𑀲𑀼𑀘𑀺𑀲𑀚𑁆𑀚𑀦𑀲𑀗𑁆𑀕𑀫𑁂𑀦;

𑀤𑀸𑀦𑀸𑀤𑀺 𑀦𑁂𑀓𑀓𑀼𑀲𑀮𑀁 𑀧𑀭𑀺𑀧𑀽𑀭𑀬𑀦𑁆𑀢𑀸,

𑀲𑀕𑁆𑀕𑀸 𑀧𑀯𑀕𑁆𑀕𑀯𑀺𑀪𑀯𑀁 𑀅𑀪𑀺𑀲𑀫𑁆𑀪𑀼𑀦𑀸𑀣𑀸𑀢𑀺.

𑀘𑁄𑀭𑀲𑀳𑀸𑀬𑀲𑁆𑀲 𑀯𑀢𑁆𑀣𑀼𑀁 𑀲𑀢𑁆𑀢𑀫𑀁.

𑁧𑁮. 𑀫𑀭𑀼𑀢𑁆𑀢𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀚𑀫𑁆𑀩𑀼𑀤𑀻𑀧𑁂 𑀘𑀦𑁆𑀤𑀪𑀸𑀕𑀸 𑀦𑀸𑀫 𑀕𑀗𑁆𑀕𑀸𑀢𑀻𑀭𑁂 𑀳𑁄𑀫𑀕𑀸𑀫𑀁 𑀦𑀸𑀫 𑀅𑀢𑁆𑀣𑀺. 𑀢𑀲𑁆𑀫𑀺𑀁 𑀏𑀓𑁄 𑀫𑀭𑀼𑀢𑁆𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀝𑀺𑀯𑀲𑀢𑀺. 𑀢𑀤𑀸 𑀲𑁄 𑀯𑁄𑀳𑀸𑀭𑀢𑁆𑀣𑀸𑀬 𑀢𑀓𑁆𑀓𑀲𑀻𑀮𑀁 𑀕𑀦𑁆𑀢𑁆𑀯𑀸 𑀕𑁂𑀳𑀁 𑀆𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀸𑀬 𑀲𑀸𑀮𑀸𑀬 𑀓𑀼𑀝𑁆𑀞𑀭𑁄𑀕𑀸 𑀢𑀼𑀭𑀁 𑀲𑀼𑀦𑀔𑀁 𑀤𑀺𑀲𑁆𑀯𑀸 𑀢𑀲𑁆𑀫𑀺𑀁 𑀓𑀸𑀭𑀼𑀜𑁆𑀜𑁂𑀦 𑀦𑀻𑀮𑀯𑀮𑁆𑀮𑀺𑀢𑀓𑁆𑀓𑀫𑁆𑀩𑀺𑀮𑁂𑀦 𑀫𑀤𑁆𑀤𑀺𑀢𑁆𑀯𑀸 𑀧𑀸𑀬𑁂𑀲𑀺. 𑀲𑀼𑀦𑀔𑁄 𑀯𑀽𑀧𑀲𑀦𑁆𑀢𑀭𑁄𑀕𑁄 𑀧𑀸𑀓𑀢𑀺𑀓𑁄 𑀳𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀅𑀢𑁆𑀢𑀦𑁄 𑀓𑀢𑀽𑀧𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀅𑀕𑀫𑀸𑀲𑀺. 𑀅𑀧𑀭𑀪𑀸𑀕𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀭𑀺𑀬𑀸 𑀕𑀩𑁆𑀪𑀁 𑀧𑀝𑀺𑀮𑀪𑀺, 𑀧𑀭𑀺𑀧𑀼𑀡𑁆𑀡𑀕𑀩𑁆𑀪𑀸𑀬 𑀢𑀸𑀬 𑀯𑀺𑀚𑀸𑀬𑀦𑀓𑀸𑀮𑁂 𑀤𑀸𑀭𑀓𑁄 𑀢𑀺𑀭𑀺𑀬𑀫𑁆𑀧𑀢𑀺𑀢𑁆𑀯𑀸 𑀅𑀦𑁆𑀢𑁄𑀕𑀩𑁆𑀪𑁂𑀬𑁂𑀯 𑀫𑀢𑁄. 𑀢𑀤𑀸 𑀢𑀁 𑀲𑀢𑁆𑀣𑁂𑀦 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀦𑀻𑀳𑀭𑀺𑀁𑀲𑀼, 𑀅𑀣 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀤𑀺𑀲𑁆𑀯𑀸 𑀦𑀺𑀩𑁆𑀩𑀺𑀦𑁆𑀤𑀳𑀤𑀬𑁄 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀜𑁆𑀜𑁂 𑀯𑀺𑀳𑀭𑀢𑀺. 𑀅𑀣𑀲𑁆𑀲 𑀪𑀭𑀺𑀬𑀸 𑀅𑀜𑁆𑀜𑁂𑀦 𑀲𑀤𑁆𑀥𑀺𑀁 𑀲𑀁𑀯𑀲𑀦𑁆𑀢𑀻 𑀅𑀬𑀁 𑀫𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁄𑀢𑀺 𑀩𑁆𑀭𑀸𑀳𑁆𑀫𑀡𑁂 𑀧𑀤𑀼𑀝𑁆𑀞𑀘𑀺𑀢𑁆𑀢𑀸 𑀪𑁄 𑀩𑁆𑀭𑀸𑀳𑁆𑀫𑀡𑀁 𑀫𑀸𑀭𑁂𑀳𑀻𑀢𑀺 𑀲𑀸𑀫𑀺𑀓𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀲𑀺. 𑀢𑁂𑀲𑀁 𑀫𑀦𑁆𑀢𑀦𑀁 𑀲𑀼𑀦𑀔𑁄 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁂𑀦𑁂𑀯 𑀲𑀤𑁆𑀥𑀺𑀁 𑀘𑀭𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀢𑀲𑁆𑀲𑀸 𑀲𑀸𑀫𑀺𑀓𑁄 𑀢𑀸 𑀧 𑀲𑀁 𑀫𑀸𑀭𑁂𑀲𑁆𑀲𑀸𑀫𑀻𑀢𑀺 𑀥𑀦𑀼 𑀓𑀮𑀸𑀧𑀁 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀫𑀺, 𑀢𑀤𑀸 𑀢𑀸𑀧𑀲𑁄 𑀨𑀮𑀸𑀨𑀮𑀢𑁆𑀣𑀸𑀬 𑀅𑀭𑀜𑁆𑀜𑀁 𑀕𑀢𑁄. 𑀲𑀼 𑀦 𑀔𑁄 𑀅𑀲𑁆𑀲𑀫𑁂𑀬𑁂𑀯 𑀑 𑀳𑀻 𑀬𑀺. 𑀧𑀼𑀭𑀺𑀲𑁄 𑀢𑀸𑀧𑀲𑀲𑁆𑀲𑀸𑀕𑀫𑀦𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀕𑀘𑁆𑀙𑀦𑁆𑀢𑀭𑁂 ¶ 𑀦𑀺𑀮𑀻𑀦𑁄 𑀅𑀘𑁆𑀙𑀺. 𑀲𑀼𑀦𑀔𑁄 𑀢𑀲𑁆𑀲 𑀧𑀫𑀸𑀤𑀁 𑀑𑀮𑁄𑀓𑁂𑀢𑁆𑀯𑀸 𑀥𑀦𑀼𑀦𑁄 𑀕𑀼𑀡𑀁 𑀔𑀸𑀤𑀺𑀢𑁆𑀯𑀸 𑀙𑀺𑀦𑁆𑀤𑀺. 𑀲𑁄 𑀧𑀼𑀦 𑀕𑀼𑀡𑀁 𑀧𑀸𑀓𑀢𑀺𑀓𑀁 𑀓𑀢𑁆𑀯𑀸 𑀆𑀭𑁄𑀧𑁂𑀲𑀺. 𑀏𑀯𑀁 𑀲𑁄 𑀆𑀭𑁄𑀧𑀺𑀢𑀁 𑀆𑀭𑁄𑀧𑀺𑀢𑀁 𑀔𑀸𑀤𑀢𑁂𑀯, 𑀅𑀣 𑀲𑁄 𑀧𑀸𑀧𑀧𑀼𑀭𑀺𑀲𑁄 𑀢𑀸𑀧𑀲𑀲𑁆𑀲𑀸𑀕𑀫𑀦𑀁 𑀜𑀢𑁆𑀯𑀸 𑀢𑀁 𑀫𑀸𑀭𑁂𑀲𑁆𑀲𑀸𑀫𑀻𑀢𑀺 𑀥𑀦𑀼𑀦𑀸 𑀲𑀤𑁆𑀥𑀺𑀁 𑀅𑀕𑀫𑀸𑀲𑀺. 𑀅𑀣𑀲𑁆𑀲 𑀲𑀼𑀦𑀔𑁄 𑀧𑀸𑀤𑁂 𑀟𑀲𑀺𑀢𑁆𑀯𑀸 𑀧𑀸𑀢𑁂𑀢𑁆𑀯𑀸 𑀢𑀲𑁆𑀲 𑀫𑀼𑀔𑀁 𑀔𑀸𑀤𑀺𑀢𑁆𑀯𑀸 𑀤𑀼𑀩𑁆𑀩𑀮𑀁 𑀓𑀢𑁆𑀯𑀸 𑀪𑀼𑀗𑁆𑀓𑀸𑀭𑀫𑀓𑀸𑀲𑀺, 𑀏𑀯𑀜𑁆𑀳𑀺 𑀲𑀧𑁆𑀧𑀼𑀭𑀺𑀲𑀸 𑀅𑀢𑁆𑀢𑀦𑁄 𑀉𑀧𑀓𑀸𑀭𑀓𑀸𑀦𑀁 𑀧𑀘𑁆𑀘𑀼𑀧𑀓𑀸𑀭𑀁 𑀓𑀭𑁄𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑀺.

𑁧.

𑀉𑀧𑀓𑀸𑀭𑀁 𑀓𑀭𑁄𑀦𑁆𑀢𑁄 𑀲𑁄, 𑀲𑀼𑀦𑀔𑁄 𑀓𑀢𑀯𑁂𑀤𑀺𑀓𑁄;

𑀲𑀢𑁆𑀢𑀽𑀧𑀖𑀸𑀢𑀓𑀁 𑀓𑀢𑁆𑀯𑀸, 𑀇𑀲𑀺𑀦𑁄 𑀤𑀸𑀲𑀺 𑀚𑀻𑀯𑀺𑀢𑀁.

𑁨.

𑀢𑀺𑀭𑀘𑁆𑀙𑀸𑀦𑀸𑀧𑀺 𑀚𑀸𑀦𑀦𑁆𑀢𑀺, 𑀕𑀼𑀡𑀫𑀢𑁆𑀢𑀦𑀺 𑀓𑀢𑀁 𑀲𑀤𑀸;

𑀇𑀢𑀺 𑀉𑀢𑁆𑀯𑀸𑀦 𑀫𑁂𑀥𑀸𑀯𑀻, 𑀓𑀢𑀜𑁆𑀜𑀽 𑀳𑁄𑀦𑁆𑀢𑀼 𑀧𑀸𑀡𑀺𑀦𑁄𑀢𑀺.

𑀢𑀢𑁄 𑀢𑀸𑀧𑀲𑁄 𑀲𑀼𑀦𑀔𑀲𑁆𑀲 𑀲𑀤𑁆𑀤𑁂𑀦𑀸 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀢𑀁 𑀯𑀺𑀧𑁆𑀧𑀓𑀸𑀭𑀁 𑀤𑀺𑀲𑁆𑀯𑀸 𑀓𑀸𑀭𑀼𑀜𑁆𑀜𑁂𑀦 𑀧𑀝𑀺𑀚𑀺𑀕𑁆𑀕𑀺𑀢𑁆𑀯𑀸 𑀯𑀽𑀧𑀲𑀦𑁆𑀢𑀯𑀡𑀁 𑀩𑀮𑀧𑁆𑀧𑀢𑁆𑀢𑀁 𑀧𑁄𑀲𑁂𑀢𑁆𑀯𑀸 𑀢𑀢𑁆𑀣𑁂𑀯 𑀯𑀲𑀦𑁆𑀢𑁄 𑀛𑀸𑀦𑀸𑀪𑀺𑀜𑁆𑀜𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀩𑁆𑀭𑀸𑀳𑁆𑀫𑀮𑁄𑀓𑀧𑀭𑀸𑀬𑀡𑁄 𑀅𑀳𑁄𑀲𑀻𑀢𑀺.

𑁩.

𑀲𑀼𑀢𑁆𑀯𑀸𑀦 𑀲𑀸𑀥𑀼 𑀲𑀼𑀦𑀔𑁂𑀦 𑀓𑀢𑀽𑀧𑀓𑀸𑀭𑀁,

𑀫𑁂𑀢𑁆𑀢𑀺𑀁𑀤𑀺𑀲𑀲𑁆𑀲 𑀧𑀓𑀢𑀁 𑀇𑀲𑀺𑀦𑀸 𑀘 𑀲𑀼𑀢𑁆𑀯𑀸;

𑀲𑀫𑁆𑀫𑀸 𑀓𑀭𑁄𑀣 𑀓𑀭𑀼𑀡𑀜𑁆𑀘 𑀧𑀭𑀽𑀧𑀓𑀸𑀭𑀁,

𑀢𑀁 𑀲𑀩𑁆𑀩𑀤𑀸 𑀪𑀯𑀢𑀺 𑀯𑁄 𑀪𑀯𑀪𑁄𑀕𑀳𑁂𑀢𑀽𑀢𑀺.

𑀫𑀭𑀼𑀢𑁆𑀢𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀢𑁆𑀣𑀼𑀁 𑀅𑀝𑁆𑀞𑀫𑀁.

𑁧𑁯. 𑀧𑀸𑀦𑀻𑀬𑀤𑀺𑀦𑁆𑀦𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀚𑀫𑁆𑀩𑀼𑀤𑀻𑀧𑁂 ¶ 𑀅𑀜𑁆𑀜𑀢𑀭𑀲𑁆𑀫𑀺𑀁 𑀚𑀦𑀧𑀤𑁂 𑀓𑀺𑀭𑁂 𑀓𑁄 𑀫𑀦𑀼𑀲𑁆𑀲𑁄 𑀭𑀝𑁆𑀞𑀢𑁄 𑀭𑀝𑁆𑀞𑀁 𑀚𑀦𑀧𑀤𑀢𑁄 𑀚𑀦𑀧𑀤𑀁 𑀯𑀺𑀘𑀭𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀘𑀦𑁆𑀤𑀪𑀸𑀕𑀸𑀦𑀤𑀻𑀢𑀻𑀭𑀁 𑀧𑀢𑁆𑀯𑀸 𑀦𑀸𑀯𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀭𑀢𑀻𑀭𑀁 𑀕𑀘𑁆𑀙𑀢𑀺. 𑀅𑀣𑀸𑀧𑀭𑀸 𑀕𑀩𑁆𑀪𑀺𑀦𑀺𑀢𑁆𑀣𑀻 𑀢𑀸𑀬 𑀏𑀯 𑀦𑀸𑀯𑀸𑀬 𑀕𑀘𑁆𑀙𑀢𑀺, 𑀅𑀣 𑀦𑀸𑀯𑀸 𑀕𑀗𑁆𑀕𑀸𑀫𑀚𑁆𑀛𑀧𑁆𑀧𑀢𑁆𑀢𑀓𑀸𑀮𑁂 𑀢𑀲𑁆𑀲𑀸 𑀓𑀫𑁆𑀫𑀚𑀯𑀸𑀢𑀸 𑀘𑀮𑀺𑀁𑀲𑀼. 𑀢𑀢𑁄 𑀲𑀸 𑀯𑀺𑀚𑀸𑀬𑀺𑀢𑀼𑀫𑀲𑀓𑁆𑀓𑁄𑀦𑁆𑀢𑀻 𑀓𑀺𑀮𑀦𑁆𑀢𑀸 𑀧𑀸𑀦𑀻𑀬𑀁 𑀫𑁂 𑀤𑁂𑀣, 𑀧𑀺𑀧𑀸𑀲𑀺𑀢𑀸𑀫𑁆𑀳𑀺𑀢𑀺 𑀫𑀦𑀼𑀲𑁆𑀲𑁂 𑀬𑀸𑀘𑀺. 𑀢𑁂 𑀢𑀲𑁆𑀲𑀸 𑀯𑀘𑀦𑀁 𑀅𑀲𑀼𑀡𑀦𑁆𑀢𑀸 𑀯𑀺𑀬 𑀧𑀸𑀦𑀻𑀬𑀁 𑀦𑀸𑀤𑀁𑀲𑀼, 𑀅𑀣 𑀲𑁄 𑀚𑀸𑀦𑀧𑀤𑀺𑀓𑁄 𑀢𑀲𑁆𑀲𑀸 𑀓𑀭𑀼𑀡𑀸𑀬𑀦𑁆𑀢𑁄 [𑀓𑀭𑀼𑀡𑀸𑀬𑀧𑀸𑀦𑀻𑀬𑀁, 𑀓𑀭𑀼𑀡𑀸𑀬𑀦𑁆𑀢𑁄𑀧𑀸𑀦𑀻𑀬𑀁, 𑀓𑀭𑀼𑀡𑀸𑀬𑀢𑁄𑀬𑀁 𑀇𑀢𑀺𑀘𑀓𑀢𑁆𑀣𑀘𑀺] 𑀢𑁄𑀬𑀁 𑀕𑀳𑁂𑀢𑁆𑀯𑀸 𑀫𑀼𑀔𑁂 𑀆𑀲𑀺𑀜𑁆𑀘𑀺, 𑀢𑀲𑁆𑀫𑀺𑀁 𑀔𑀡𑁂 𑀲𑀸 𑀮𑀤𑁆𑀥𑀲𑁆𑀲𑀸𑀲𑀸 𑀲𑀼𑀔𑁂𑀦 𑀤𑀸𑀭𑀓𑀁 𑀯𑀺𑀚𑀸𑀬𑀺, 𑀅𑀣 𑀢𑁂 𑀢𑀻𑀭𑀁 𑀧𑀢𑁆𑀯𑀸 𑀓𑀢𑀺𑀧𑀬𑀤𑀺𑀯𑀲𑁂𑀦 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀞𑀸𑀦𑀁 𑀧𑀸𑀧𑀼𑀡𑀺𑀁𑀲𑀼. 𑀅𑀣𑀸𑀧𑀭𑀪𑀸𑀕𑁂 𑀲𑁄 𑀚𑀸𑀦𑀧𑀤𑀺𑀓𑁄 𑀅𑀜𑁆𑀜𑀢𑀭𑀓𑀺𑀘𑁆𑀘𑀁 𑀧𑀝𑀺𑀘𑁆𑀘 𑀢𑀲𑁆𑀲𑀸 𑀇𑀢𑁆𑀣𑀺𑀬𑀸 𑀯𑀲𑀦𑀦𑀕𑀭𑀁 𑀧𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀆𑀳𑀺𑀡𑁆𑀟𑀦𑁆𑀢𑁄 𑀦𑀺𑀯𑀸𑀲𑀦𑀝𑁆𑀞𑀸𑀦𑀁 𑀅𑀮𑀪𑀺𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀲𑀸𑀮𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀦𑀺𑀧𑀚𑁆𑀚𑀺. 𑀢𑀲𑁆𑀫𑀺𑀁𑀬𑁂𑀯 𑀤𑀺𑀯𑀲𑁂 𑀘𑁄𑀭𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀕𑁂𑀳𑁂 𑀲𑀦𑁆𑀥𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀥𑀦𑀲𑀸𑀭𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀸 𑀭𑀸𑀚𑀧𑀼𑀭𑀺𑀲𑁂𑀳𑀺 𑀅𑀦𑀼𑀩𑀦𑁆𑀥𑀸 𑀕𑀦𑁆𑀢𑁆𑀯𑀸 𑀢𑀸𑀬𑁂𑀯 𑀲𑀸𑀮𑀸𑀬 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺𑀁𑀲𑀼. 𑀅𑀣 𑀭𑀸𑀚𑀧𑀼𑀭𑀺𑀲𑀸 𑀆𑀕𑀦𑁆𑀢𑁆𑀯𑀸 𑀘𑁄𑀭𑁂 𑀅𑀧𑀲𑁆𑀲𑀦𑁆𑀢𑀸 𑀢𑀁 𑀚𑀸𑀦𑀧𑀤𑀺𑀓𑀁 𑀤𑀺𑀲𑁆𑀯𑀸 𑀅𑀬𑀁 𑀘𑁄𑀭𑁄𑀢𑀺 𑀕𑀳𑁂𑀢𑁆𑀯𑀸 𑀧𑀘𑁆𑀙𑀸𑀩𑀸𑀳𑀁 𑀕𑀸𑀴𑁆𑀳𑀁 𑀩𑀦𑁆𑀥𑀺𑀢𑁆𑀯𑀸 𑀧𑀼𑀦 𑀤𑀺𑀯𑀲𑁂 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀭𑀜𑁆𑀜𑀸 𑀓𑀲𑁆𑀫𑀸 𑀪𑀡𑁂 𑀘𑁄𑀭𑀓𑀫𑁆𑀫 𑀫𑀓𑀸𑀲𑀻𑀢𑀺 𑀧𑀼𑀘𑁆𑀙𑀺𑀢𑁄 𑀦𑀸𑀳𑀁 𑀤𑁂𑀯 𑀘𑁄𑀭𑁄, 𑀆𑀕𑀦𑁆𑀢𑀼𑀓𑁄𑀫𑁆𑀳𑀻𑀢𑀺 𑀯𑀼𑀢𑁆𑀢𑁂 𑀭𑀸𑀚𑀸 𑀘𑁄𑀭𑁂 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀮𑀪𑀦𑁆𑀢𑁄 𑀅𑀬𑀫𑁂𑀯 𑀘𑁄𑀭𑁄, 𑀇𑀫𑀁 𑀫𑀸𑀭𑁂𑀣𑀸𑀢𑀺 𑀆𑀡𑀸𑀧𑁂𑀲𑀺. 𑀭𑀸𑀚𑀧𑀼𑀭𑀺𑀲𑁂𑀳𑀺 𑀢𑀁 𑀕𑀸𑀴𑁆𑀳𑀁 𑀩𑀦𑁆𑀥𑀺𑀢𑁆𑀯𑀸 𑀆𑀖𑀸𑀢𑀦𑀁 𑀦𑀻𑀢𑁂 𑀲𑀸 𑀇𑀢𑁆𑀣𑀻 𑀢𑀁 𑀢𑀣𑀸 𑀦𑀻𑀬𑀫𑀸𑀦𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀦𑀺𑀢𑁆𑀯𑀸 𑀓𑀫𑁆𑀧𑀫𑀸𑀦𑀳𑀤𑀬𑀸 𑀫𑀼𑀳𑀼𑀢𑁆𑀢𑁂𑀦 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀤𑁂𑀯 𑀏𑀲𑁄 ¶ 𑀦 𑀘𑁄𑀭𑁄 𑀆𑀕𑀦𑁆𑀢𑀼𑀓𑁄 𑀫𑀼𑀜𑁆𑀘𑀣𑁂𑀢𑀁 𑀤𑁂𑀯𑀸𑀢𑀺 𑀆𑀳. 𑀭𑀸𑀚𑀸 𑀢𑀲𑁆𑀲𑀸 𑀓𑀣𑀁 𑀅𑀲𑀤𑁆𑀤𑀳𑀦𑁆𑀢𑁄 𑀬𑀚𑁆𑀚𑁂𑀢𑀁 𑀫𑁄𑀘𑁂𑀢𑀼 𑀫𑀺𑀘𑁆𑀙𑀲𑀺. 𑀢𑀲𑁆𑀲𑀕𑁆𑀖𑀦𑀓𑀁 𑀥𑀦𑀁 𑀤𑀢𑁆𑀯𑀸 𑀫𑀼𑀜𑁆𑀘𑀸𑀧𑁂𑀳𑀻𑀢𑀺, 𑀲𑀸 𑀲𑀸𑀫𑀺 𑀫𑀫 𑀕𑁂𑀳𑁂 𑀥𑀦𑀁 𑀦𑀢𑁆𑀣𑀺. 𑀅𑀧𑀺𑀘 𑀫𑀫 𑀲𑀢𑁆𑀢𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀫𑀁 𑀤𑀸𑀲𑀺𑀁 𑀓𑀭𑁄𑀳𑀺, 𑀏𑀢𑀁 𑀫𑀼𑀜𑁆𑀘 𑀤𑁂𑀯𑀸𑀢𑀺 𑀆𑀳, 𑀅𑀣 𑀭𑀸𑀚𑀸 𑀢𑁆𑀯𑀁 𑀏𑀢𑀁 𑀅𑀥𑀼𑀦𑀸𑀕𑀢𑁄𑀢𑀺 𑀯𑀤𑀲𑀺. 𑀏𑀢𑀁 𑀦𑀺𑀲𑁆𑀲𑀸𑀬 𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀅𑀢𑁆𑀢𑀸𑀦𑀁 𑀤𑀸𑀲𑀢𑁆𑀢𑀁 𑀲𑀸𑀯𑁂𑀲𑀺. 𑀓𑀺𑀫𑁂𑀲𑁄 𑀢𑁂 𑀜𑀸𑀢𑀺 𑀯𑀸, 𑀉𑀤𑀸𑀳𑀼 𑀉𑀧𑀓𑀸𑀭𑀓𑁄𑀢𑀺 𑀧𑀼𑀘𑁆𑀙𑀦𑁆𑀢𑁄 𑀆𑀳.

𑁧.

𑀓𑀺𑀁𑀢𑁂 𑀪𑁄𑀢𑀺 𑀅𑀬𑀁 𑀧𑁄𑀲𑁄, 𑀢𑀼𑀯𑀁 𑀧𑀼𑀘𑁆𑀙𑀸𑀫𑀺 𑀲𑀁𑀲𑀬𑀁;

𑀪𑀸𑀢𑀸 𑀯𑀸 𑀢𑁂 𑀧𑀺𑀢𑀸 𑀳𑁄𑀢𑀺, 𑀧𑀢𑀺 𑀯𑀸 𑀤𑁂𑀯𑀭𑁄 𑀢𑀯.

𑁨.

𑀜𑀸𑀢𑀺 𑀲𑀸𑀮𑁄𑀳𑀺𑀢𑁄 𑀓𑀺𑀦𑁆𑀦𑀼, 𑀉𑀤𑀸𑀳𑀼 𑀇𑀡𑀤𑀸𑀬𑀓𑁄;

𑀅𑀣𑁄𑀧𑀓𑀸𑀭𑀓𑁄 𑀓𑀺𑀦𑁆𑀦𑀼, 𑀓𑀲𑁆𑀫𑀸𑀲𑁆𑀲 𑀤𑁂𑀲𑀺 𑀚𑀻𑀯𑀺𑀢𑀁𑀢𑀺.

𑀢𑀢𑁄 𑀲𑀸 𑀆𑀳.

𑁩.

𑀏𑀲𑁄 𑀫𑁂 𑀧𑀼𑀭𑀺𑀲𑁄 𑀤𑁂𑀯, 𑀓𑀢𑀧𑀼𑀩𑁆𑀩𑁄𑀧𑀓𑀸𑀭𑀓𑁄;

𑀅𑀢𑀸𑀡𑀫𑁂𑀓𑀺𑀓𑀁 [𑀅𑀢𑁆𑀢𑀸𑀦𑀫𑁂𑀓𑀺𑀓𑀁 𑀇𑀢𑀺𑀓𑀢𑁆𑀣𑀘𑀺] 𑀘𑁂𑀲𑁄, 𑀤𑀼𑀓𑁆𑀔𑀺𑀢𑀁 𑀫𑀭𑀡𑁂 𑀞𑀺𑀢𑀁.

𑁪.

𑀯𑀺𑀚𑀸𑀬𑀺𑀢𑀼 𑀫𑀲𑀓𑁆𑀓𑁄𑀦𑁆𑀢𑀺𑀁, 𑀕𑀩𑁆𑀪𑀺𑀦𑀺𑀁 𑀤𑀼𑀓𑁆𑀔𑀯𑁂𑀤𑀺𑀦𑀺𑀁;

𑀢𑁄𑀬𑁂𑀦 𑀫𑀁 𑀉𑀧𑀝𑁆𑀞𑀸𑀲𑀺, 𑀢𑁂𑀦𑀸𑀳𑀁 𑀲𑀼𑀔𑀺𑀢𑀸 𑀢𑀤𑀸.

𑁫.

𑀪𑀗𑁆𑀕𑀓𑀮𑁆𑀮𑁄𑀮𑀫𑀸𑀮𑀸𑀬, 𑀉𑀢𑁆𑀢𑀭𑀦𑁆𑀢𑀁 𑀫𑀳𑀡𑁆𑀡𑀯𑀁;

𑀧𑀳𑀸𑀬 𑀧𑀸𑀢𑀼𑀁 𑀓𑀽𑀧𑀲𑁆𑀲, 𑀬𑀸𑀢𑀺 𑀮𑁄𑀓𑁄 𑀧𑀺𑀧𑀸𑀲𑀺𑀢𑁄.

𑁬.

𑀢𑀣𑁂𑀯 𑀯𑀺𑀚𑁆𑀚𑀫𑀸𑀦𑁂𑀲𑀼, 𑀚𑀦𑁂𑀲𑀼 𑀫𑀦𑀼𑀚𑀸𑀥𑀺𑀧,

𑀏𑀓𑀲𑁆𑀲𑁂𑀯 𑀫𑀦𑀲𑁆𑀫𑀺𑀁𑀳𑀺, 𑀕𑀼𑀡𑀁 𑀢𑀺𑀝𑁆𑀞𑀢𑀺 𑀲𑀸𑀥𑀼𑀓𑀁.

𑁭.

𑀧𑀳𑀢𑁆𑀯𑀸𑀦 𑀫𑀢𑀁 𑀳𑀢𑁆𑀣𑀺𑀁, 𑀫𑀁𑀲𑀢𑁆𑀣𑀻 𑀓𑁂𑀘𑀺 𑀚𑀦𑁆𑀢𑀼𑀦𑁄;

𑀅𑀦𑀼𑀩𑀦𑁆𑀥𑀦𑁆𑀢𑀺 𑀫𑀁𑀲𑀢𑁆𑀣𑀁, 𑀲𑀲𑀁 𑀥𑀸𑀯𑀦𑁆𑀢 𑀫𑁂𑀓𑀓𑀁.

𑁮.

𑀢𑀣𑁂𑀯 ¶ 𑀯𑀺𑀚𑁆𑀚𑀫𑀸𑀦𑁂𑀲𑀼, 𑀚𑀦𑁂𑀲𑀼 𑀫𑀦𑀼𑀚𑀸𑀥𑀺𑀧;

𑀕𑀼𑀡𑀯𑀦𑁆𑀢 𑀫𑀦𑀼𑀩𑀦𑁆𑀥𑀦𑁆𑀢𑀺, 𑀲𑀧𑁆𑀧𑀼𑀭𑀺𑀲𑀁 𑀓𑀢𑀯𑁂𑀤𑀺𑀓𑀁.

𑁯.

𑀢𑀲𑁆𑀫𑀸 𑀲𑀧𑁆𑀧𑀼𑀭𑀺𑀲𑁂 𑀥𑀫𑁆𑀫𑁂, 𑀧𑀢𑀺𑀝𑁆𑀞𑀸𑀲𑁆𑀫𑀺 𑀦𑀭𑀸𑀥𑀺𑀧;

𑀅𑀦𑀼𑀲𑁆𑀲𑀭𑀦𑁆𑀢𑀺 𑀏𑀢𑁂𑀦, 𑀓𑀢𑀧𑀼𑀩𑁆𑀩𑀽 𑀧𑀓𑀸𑀭𑀓𑀁.

𑁧𑁦.

𑀅𑀳𑀜𑁆𑀘 𑀫𑀫 𑀧𑀼𑀢𑁆𑀢𑀸 𑀘, 𑀏𑀢𑁂𑀦𑀫𑁆𑀳 𑀲𑀼𑀔𑀸𑀧𑀺𑀢𑀸;

𑀚𑀻𑀯𑀺𑀢𑀫𑁆𑀧𑀺 𑀧𑀭𑀺𑀘𑁆𑀘𑀚𑁆𑀚, 𑀫𑀼𑀘𑁆𑀘𑀦𑀻𑀬𑁄 𑀅𑀬𑀁 𑀫𑀬𑀸𑀢𑀺.

𑀢𑀢𑁄 𑀭𑀸𑀚𑀸 𑀤𑁄𑀯𑀸𑀭𑀺𑀓𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀢𑀫𑁆𑀧𑀺 𑀧𑀼𑀘𑁆𑀙𑀺𑀢𑁆𑀯𑀸 𑀅𑀥𑀼𑀦𑀸𑀕𑀢𑀪𑀸𑀯𑀁 𑀜𑀢𑁆𑀯𑀸 𑀢𑀲𑁆𑀲𑀸 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀲𑀦𑁆𑀢𑀼𑀝𑁆𑀞𑁄 𑀢𑁂𑀲𑀁 𑀉𑀪𑀺𑀦𑁆𑀦𑀫𑁆𑀧𑀺 𑀫𑀳𑀦𑁆𑀢𑀁 𑀬𑀲𑀁 𑀅𑀦𑀼𑀧𑁆𑀧𑀤𑀸𑀲𑀺. 𑀢𑁂 𑀮𑀤𑁆𑀥𑀬𑀲𑀸 𑀢 𑀢𑁄 𑀧𑀝𑁆𑀞𑀸𑀬 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀓𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑀸 𑀅𑀳𑁂𑀲𑀼𑀦𑁆𑀢𑀺.

𑁧𑁧.

𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑀫𑀦𑀸 𑀅𑀧𑀺 𑀫𑀸𑀢𑀼𑀕𑀸𑀫𑀸,

𑀏𑀯𑀁 𑀮𑀪𑀦𑁆𑀢𑀺 𑀯𑀺𑀪𑀯𑀜𑁆𑀘 𑀧𑀲𑀁𑀲𑀦𑀜𑁆𑀘;

𑀥𑀫𑁆𑀫𑀜𑁆𑀘 𑀲𑀸𑀥𑀼𑀘𑀭𑀺𑀢𑀁 𑀫𑀦𑀲𑀻𑀓𑀭𑁄𑀦𑁆𑀢𑁄,

𑀥𑀫𑁆𑀫𑁂𑀲𑀼 𑀯𑀢𑁆𑀢𑀣 𑀲𑀤𑀸 𑀲𑀼𑀘𑀺𑀲𑀚𑁆𑀚𑀦𑀸𑀢𑀺.

𑀧𑀸𑀦𑀻𑀬𑀤𑀺𑀦𑁆𑀦𑀲𑁆𑀲 𑀯𑀢𑁆𑀣𑀼𑀁 𑀦𑀯𑀫𑀁.

𑁨𑁦. 𑀲𑀳𑀸𑀬𑀲𑁆𑀲 𑀧𑀭𑀺𑀘𑁆𑀘𑀢𑁆𑀢𑀚𑀻𑀯𑀺𑀢𑀓𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀸𑀯𑀢𑁆𑀣𑀺𑀬𑀁 𑀲𑁄𑀫𑀩𑁆𑀭𑀸𑀳𑁆𑀫𑀡𑁄 𑀲𑁄𑀫𑀤𑀢𑁆𑀢𑀩𑁆𑀭𑀸𑀳𑁆𑀫𑀡𑁄𑀢𑀺 𑀤𑁆𑀯𑁂 𑀩𑁆𑀭𑀸𑀳𑁆𑀫𑀡𑀸 𑀯𑀲𑀦𑁆𑀢𑀺. 𑀢𑀢𑁆𑀣 𑀲𑁄𑀫𑀤𑀢𑁆𑀢𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀲𑁄𑀫𑀩𑁆𑀭𑀸𑀳𑁆𑀫𑀡𑁄 𑀬𑁂𑀪𑀼𑀬𑁆𑀬𑁂𑀦 𑀤𑀽𑀢𑀁 𑀓𑀻𑀴𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀲𑁄𑀫𑀤𑀢𑁆𑀢𑁄 𑀲𑁄𑀫𑀩𑁆𑀭𑀸𑀳𑁆𑀫𑀡𑀁 𑀢𑁂𑀦 𑀧𑀭𑀸𑀚𑁂𑀢𑁆𑀯𑀸 𑀢𑀲𑁆𑀲 𑀉𑀢𑁆𑀢𑀭𑀸𑀲𑀗𑁆𑀕𑀜𑁆𑀘 𑀮𑀜𑁆𑀙𑀦𑀫𑀼𑀤𑁆𑀤𑀺𑀓𑀜𑁆𑀘 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑁂𑀳𑀁 𑀕𑀘𑁆𑀙𑀦𑁆𑀢𑁄 𑀲𑁄𑀫𑀩𑁆𑀭𑀸𑀳𑁆𑀫𑀡𑀲𑁆𑀲 𑀏𑀳𑀺 𑀕𑁂𑀳𑀁 𑀕𑀘𑁆𑀙𑀸- 𑀫𑀸𑀢𑀺 ¶ 𑀆𑀳. 𑀢𑀢𑁄 𑀲𑁄𑀫𑁄 𑀦𑀸𑀳𑀁 𑀲𑀫𑁆𑀫 𑀏𑀓𑀲𑀸𑀝𑀓𑁄 𑀳𑀼𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀁 𑀑𑀢𑀭𑀺𑀢𑀼𑀁 𑀲𑀓𑁆𑀓𑁄𑀫𑀺. 𑀕𑀫𑀦𑀢𑁄 𑀏𑀢𑁆𑀣𑁂𑀯 𑀫𑁂 𑀞𑀸𑀦𑀁 𑀯𑀭𑀢𑀭𑀦𑁆𑀢𑀺 𑀆𑀳, 𑀲𑁄𑀫𑀤𑀢𑁆𑀢𑁂𑀦 𑀏𑀯𑀁 𑀲𑀢𑀺 𑀲𑀫𑁆𑀫 𑀇𑀫𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀕𑀡𑁆𑀳𑀸𑀢𑀺 𑀢𑀲𑁆𑀲 𑀢𑀁 𑀤𑀢𑁆𑀯𑀸 𑀇𑀤𑀸𑀦𑀺 𑀲𑀫𑁆𑀫 𑀏𑀳𑀻𑀢𑀺 𑀯𑀼𑀢𑁆𑀢𑁄𑀧𑀺 𑀦𑀸𑀕𑀘𑁆𑀙𑀢𑀺. 𑀧𑀼𑀦 𑀢𑁂𑀦 𑀪𑁄 𑀓𑀲𑁆𑀫𑀸 𑀦𑀸𑀕𑀘𑁆𑀙𑀲𑀻𑀢𑀺 𑀧𑀼𑀝𑁆𑀞𑁄 𑀲𑀫𑁆𑀫 𑀫𑀫 𑀳𑀢𑁆𑀣𑁂 𑀫𑀼𑀤𑁆𑀤𑀺𑀓𑀁 𑀅𑀧𑀲𑁆𑀲𑀦𑁆𑀢𑀸 𑀫𑁂 𑀧𑀼𑀢𑁆𑀢𑀤𑀸𑀭𑀸𑀤𑀬𑁄 𑀫𑀬𑀸 𑀲𑀤𑁆𑀥𑀺𑀁 𑀓𑀮𑀳𑀁 𑀓𑀭𑁄𑀦𑁆𑀢𑀻𑀢𑀺 𑀆𑀳, 𑀅𑀣 𑀲𑁄 𑀏𑀯𑀁 𑀲𑀦𑁆𑀢𑁂 𑀬𑀤𑀸 𑀢𑁂 𑀧𑀳𑁄𑀢𑀺. 𑀢𑀤𑀸 𑀫𑀬𑁆𑀳𑀁 𑀤𑁂𑀳𑀻𑀢𑀺 𑀫𑀼𑀤𑁆𑀤𑀺𑀓𑀫𑁆𑀧𑀺 𑀤𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀕𑁂𑀳𑀁 𑀅𑀕𑀫𑀸𑀲𑀺. 𑀅𑀣 𑀢𑁂 𑀏𑀢𑁆𑀢𑀓𑁂𑀦 𑀲𑀳𑀸𑀬𑀸 𑀅𑀳𑁂𑀲𑀼𑀁. 𑀅𑀧𑀭𑀪𑀸𑀕𑁂 𑀲𑁄𑀫𑀤𑀢𑁆𑀢𑀩𑁆𑀭𑀸𑀳𑁆𑀫𑀡𑀁 𑀅𑀬𑀁 𑀧𑀭𑀤𑀸𑀭𑀓𑀫𑁆𑀫𑀁 𑀅𑀓𑀸𑀲𑀻𑀢𑀺 𑀫𑀦𑀼𑀲𑁆𑀲𑀸 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀭𑀸𑀚𑀸 𑀢𑀲𑁆𑀲 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀭𑀸𑀚𑀸𑀡𑀁 𑀅𑀓𑀢𑁆𑀯𑀸 𑀫𑀸 𑀪𑁄 𑀧𑀼𑀦 𑀏𑀯𑀫𑀓𑀸𑀲𑀻𑀢𑀺 𑀑𑀯𑀤𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀭𑀸𑀚𑀸 𑀦𑀁 𑀬𑀸𑀯𑀢𑀢𑀺𑀬𑀯𑀸𑀭𑀁 𑀑𑀯𑀤𑀦𑁆𑀢𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀘𑀢𑀼𑀢𑁆𑀣𑁂𑀯𑀸𑀭𑁂 𑀕𑀘𑁆𑀙𑀣𑁂𑀢𑀁 𑀆𑀖𑀸𑀢𑀦𑀁 𑀦𑁂𑀢𑁆𑀯𑀸 𑀫𑀸𑀭𑁂𑀣𑀸𑀢𑀺 𑀆𑀡𑀸𑀧𑁂𑀲𑀺. 𑀏𑀯𑀁 𑀧𑀸𑀧𑀓𑀫𑁆𑀫𑁂 𑀦𑀺𑀭𑀢𑀸 𑀅𑀦𑁂𑀓𑀸𑀓𑀸𑀭𑁂𑀦 𑀑𑀯𑀤𑀦𑁆𑀢𑀸𑀧𑀺 𑀦 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁. 𑀢𑀣𑀸𑀳𑀺.

𑁧.

𑀲𑁄𑀡𑀸 𑀘𑁂𑀯 𑀲𑀺𑀕𑀸𑀮𑀸 𑀘, 𑀯𑀸𑀬𑀲𑀸 𑀦𑀻𑀮𑀫𑀓𑁆𑀔𑀺𑀓𑀸;

𑀇𑀘𑁆𑀘𑁂𑀢𑁂 𑀓𑀼𑀡𑀧𑁂 𑀲𑀢𑁆𑀢𑀸, 𑀦 𑀲𑀓𑁆𑀓𑀸 𑀢𑁂 𑀦𑀺𑀲𑁂𑀥𑀺𑀢𑀼𑀁.

𑁨.

𑀢𑀣𑀸 𑀧𑀸𑀡𑀸𑀢𑀺𑀧𑀸𑀢𑁂𑀲𑀼, 𑀧𑀭𑀤𑀸𑀭𑁂 𑀲𑀼𑀭𑀸𑀬 𑀘;

𑀫𑀼𑀲𑀸𑀯𑀸𑀤𑁂𑀲𑀼 𑀣𑁂𑀬𑁆𑀬𑁂𑀲𑀼, 𑀲𑀢𑁆𑀢𑀲𑀢𑁆𑀢𑀸 𑀦 𑀯𑀸𑀭𑀺𑀬𑀸𑀢𑀺.

𑀢𑀢𑁄 𑀭𑀸𑀚𑀧𑀼𑀭𑀺𑀲𑀸 𑀢𑀁 𑀩𑀦𑁆𑀥𑀺𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀢𑀤𑀸 𑀲𑁄𑀫𑀩𑁆𑀭𑀸𑀳𑁆𑀫𑀡𑁄 𑀲𑁄𑀫𑀤𑀢𑁆𑀢𑀁 𑀢𑀣𑀸 𑀦𑀻𑀬𑀫𑀸𑀦𑀁 𑀤𑀺𑀲𑁆𑀯𑀸 𑀓𑀫𑁆𑀧𑀫𑀸𑀦𑀳𑀤𑀬𑁄 𑀭𑀸𑀚𑀧𑀼𑀭𑀺𑀲𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀇𑀫𑀁 𑀪𑁄 𑀫𑀼𑀳𑀼𑀢𑁆𑀢𑀁 𑀫𑀸 𑀫𑀸𑀭𑁂𑀣. 𑀬𑀸𑀯 𑀭𑀸𑀚𑀸𑀦𑀁 𑀚𑀸𑀦𑀸𑀧𑁂𑀲𑁆𑀲𑀸𑀫𑀻𑀢𑀺 𑀯𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑁄 𑀤𑁂𑀯 𑀫𑀫 𑀚𑀻𑀯𑀺𑀢𑀁 𑀲𑁄𑀫𑀤𑀢𑁆𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀲𑁆𑀲𑀸𑀫𑀺. 𑀏𑀢𑀁 𑀫𑀼𑀜𑁆𑀘𑀣. 𑀬𑀤𑀺 𑀫𑀸𑀭𑁂𑀢𑀼𑀓𑀸𑀫𑀸, 𑀫𑀁 𑀫𑀸𑀭𑁂𑀣𑀸𑀢𑀺 𑀆𑀳. 𑀭𑀸𑀚𑀸 𑀢𑀼𑀡𑁆𑀳𑀻 [𑀢𑀼𑀝𑁆𑀞𑁄 𑀇𑀢𑀺𑀓𑀢𑁆𑀣𑀘𑀺] 𑀅𑀳𑁄𑀲𑀺, 𑀭𑀸𑀚𑀧𑀼𑀭𑀺𑀲𑀸 𑀲𑁄𑀫𑀤𑀢𑁆𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 ¶ 𑀲𑁄𑀫𑀩𑁆𑀭𑀸𑀳𑁆𑀫𑀡𑀁 𑀆𑀖𑀸𑀢𑀦𑀁 𑀦𑁂𑀢𑁆𑀯𑀸 𑀫𑀸𑀭𑁂𑀲𑀼𑀁, 𑀅𑀳𑁄 𑀓𑀢𑀜𑁆𑀜𑀼𑀦𑁄 𑀓𑀢𑀯𑁂𑀤𑀺𑀢𑀸.

𑀳𑁄𑀢𑀺 𑀘𑁂𑀢𑁆𑀣.

𑁩.

𑀓𑀓𑀽𑀧𑀓𑀸𑀭 𑀫𑀢𑁆𑀢𑀸𑀦𑀁, 𑀲𑀭𑀦𑁆𑀢𑀸 𑀓𑁂𑀘𑀺 𑀫𑀸𑀦𑀼𑀲𑀸;

𑀚𑀻𑀯𑀺𑀢𑀁 𑀤𑁂𑀦𑁆𑀢𑀺 𑀲𑁄𑀫𑁄𑀯, 𑀲𑁄𑀫𑀤𑀢𑁆𑀢𑀲𑁆𑀲 𑀅𑀢𑁆𑀢𑀦𑁄𑀢𑀺.

𑀲𑁄 𑀢𑁂𑀦 𑀚𑀻𑀯𑀺𑀢𑀤𑀸𑀦𑁂𑀦 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑀳𑀦𑁆𑀢𑁂 𑀓𑀦𑀓𑀯𑀺𑀫𑀸𑀦𑁂 𑀤𑁂𑀯𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑁄𑀦𑁆𑀢𑁄 𑀧𑀝𑀺𑀯𑀲𑀢𑀺. 𑀢𑀤𑀸 𑀲𑁄𑀫𑀤𑀢𑁆𑀢𑀩𑁆𑀭𑀸𑀳𑁆𑀫𑀡𑁄 𑀏𑀲𑁄 𑀫𑀁 𑀫𑀭𑀡𑀧𑁆𑀧𑀢𑁆𑀢𑀁 𑀫𑁄𑀘𑁂𑀲𑀻𑀢𑀺 𑀯𑀢𑁆𑀯𑀸 𑀢𑀲𑁆𑀲𑀢𑁆𑀣𑀸𑀬 𑀤𑀸𑀦𑀁 𑀤𑀢𑁆𑀯𑀸 𑀧𑀢𑁆𑀢𑀺𑀁 𑀅𑀤𑀸𑀲𑀺. 𑀢𑀸𑀯𑀤𑁂𑀯𑀲𑁆𑀲 𑀢𑀢𑁄 𑀩𑀳𑀼𑀢𑀭𑀁 𑀤𑁂𑀯𑀺𑀲𑁆𑀲𑀭𑀺𑀬𑀁 𑀅𑀳𑁄𑀲𑀺 𑀤𑁂𑀯𑀸𑀦𑀼𑀪𑀸𑀯𑀜𑁆𑀘. 𑀢𑀢𑁄 𑀲𑁄 𑀲𑁄𑀫𑀤𑁂𑀯𑁄 𑀅𑀢𑁆𑀢𑀦𑁄 𑀤𑁂𑀯𑀺𑀲𑁆𑀲𑀭𑀺𑀬𑀁 𑀑𑀮𑁄𑀓𑁂𑀦𑁆𑀢𑁄 𑀲𑀳𑀸𑀬𑀲𑁆𑀲 𑀅𑀢𑁆𑀢𑀦𑁄 𑀚𑀻𑀯𑀺𑀢𑀤𑀸𑀦𑀁 𑀅𑀤𑁆𑀤𑀲. 𑀤𑀺𑀲𑁆𑀯𑀸 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀫𑀸𑀡𑀯𑀓𑀯𑀡𑁆𑀡𑁂𑀦 𑀲𑁄𑀫𑀤𑀢𑁆𑀢𑀩𑁆𑀭𑀸𑀳𑁆𑀫𑀡𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀅𑀢𑁆𑀢𑀸𑀦𑀁 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀤𑁂𑀯𑀮𑁄𑀓𑀁 𑀦𑁂𑀢𑁆𑀯𑀸 𑀬𑀣𑀸𑀓𑀸𑀫𑀁 𑀲𑀫𑁆𑀧𑀢𑁆𑀢𑀺 𑀫𑀦𑀼𑀪𑀯𑀸𑀢𑀺 𑀯𑀢𑁆𑀯𑀸 𑀲𑀢𑁆𑀢𑀸𑀳𑀁 𑀤𑁂𑀯𑀲𑁆𑀲𑀭𑀺𑀬𑀁 𑀤𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀦𑁂𑀢𑁆𑀯𑀸 𑀢𑀲𑁆𑀲 𑀕𑁂𑀳𑁂𑀬𑁂𑀯 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑀢𑁆𑀣 𑀳𑀺 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺 𑀫𑀦𑀼𑀪𑀽𑀢𑀲𑁆𑀲 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺 𑀧𑀝𑀺𑀓𑁆𑀓𑀼𑀮𑀸 𑀳𑁄𑀢𑀺. 𑀢𑀢𑁄 𑀲𑁄 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀫𑀦𑀼𑀲𑁆𑀲𑀭𑀦𑁆𑀢𑁄 𑀓𑀺𑀲𑁄 𑀤𑀼𑀩𑁆𑀩𑀮𑁄 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑁄 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀤𑁂𑀯𑀧𑀼𑀢𑁆𑀢𑁄 𑀢𑀁 𑀑𑀮𑁄𑀓𑁂𑀦𑁆𑀢𑁄 𑀢𑀣𑀸 𑀤𑀼𑀓𑁆𑀔𑀧𑁆𑀧𑀢𑁆𑀢𑀁 𑀤𑀺𑀲𑁆𑀯𑀸 𑀦 𑀲𑀓𑁆𑀓𑀸 𑀫𑀦𑀼𑀲𑁆𑀲𑁂𑀦 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑀯𑀺𑀢𑀼𑀦𑁆𑀢𑀺 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀲𑀫𑁆𑀧𑀢𑁆𑀢𑀺𑀤𑀸𑀬𑀓𑀁 𑀏𑀓𑀁 𑀘𑀺𑀦𑁆𑀢𑀸𑀫𑀡𑀺𑀁 𑀤𑀢𑁆𑀯𑀸 𑀢𑀲𑁆𑀲 𑀪𑀭𑀺𑀬𑀫𑁆𑀧𑀺 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀭𑀽𑀧𑀯𑀦𑁆𑀣𑀁 𑀬𑀲𑀯𑀦𑁆𑀢𑀁 𑀯𑀡𑁆𑀡𑀯𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀫𑀦𑀼𑀲𑁆𑀲𑀺𑀢𑁆𑀣𑀺𑀯𑀡𑁆𑀡𑀁 𑀅𑀓𑀸𑀲𑀺, 𑀅𑀧𑀭𑀪𑀸𑀕𑁂 𑀢𑁂 𑀚𑀬𑀫𑁆𑀧𑀢𑀺𑀓𑀸 𑀧𑀘𑁆𑀘𑀓𑁆𑀔𑀢𑁄 𑀤𑀺𑀝𑁆𑀞𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀯𑀺𑀪𑀯𑀸 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀺𑀢𑁆𑀯𑀸 𑀲𑀳𑀸𑀬𑀤𑁂𑀯𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀺𑀁𑀲𑀽𑀢𑀺.

𑁪.

𑀫𑀦𑁆𑀤𑁂𑀦 ¶ 𑀦𑀦𑁆𑀤𑀺𑀢𑀫𑀦𑀸 𑀉𑀧𑀓𑀸𑀭𑀓𑁂𑀦,

𑀧𑀸𑀡𑀫𑁆𑀧𑀺 𑀤𑁂𑀦𑁆𑀢𑀺 𑀲𑀼𑀚𑀦𑀸 𑀇𑀢𑀺 𑀘𑀺𑀦𑁆𑀢𑀬𑀺𑀢𑁆𑀯𑀸;

𑀫𑀺𑀢𑁆𑀢𑀤𑁆𑀤𑀼 𑀫𑀸 𑀪𑀯𑀣 𑀪𑁄 𑀉𑀧𑀓𑀸𑀭𑀓𑀲𑁆𑀲;

𑀧𑀸𑀲𑀁𑀲𑀺𑀬𑀸 𑀪𑀯𑀣 𑀲𑀸𑀥𑀼𑀚𑀦𑁂𑀳𑀺 𑀦𑀺𑀘𑁆𑀘𑀁𑀢𑀺.

𑀲𑀳𑀸𑀬𑀲𑁆𑀲 𑀧𑀭𑀺𑀘𑁆𑀘𑀢𑁆𑀢𑀚𑀻𑀯𑀺𑀢𑀓𑀲𑁆𑀲 𑀯𑀢𑁆𑀣𑀼𑀁 𑀤𑀲𑀫𑀁.

𑀦𑀦𑁆𑀤𑀺𑀬𑀭𑀸𑀚𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀬𑀓𑁆𑀔𑀯𑀜𑁆𑀘𑀺𑀢𑀯𑀕𑁆𑀕𑁄

𑁨𑁧. 𑀬𑀓𑁆𑀔𑀯𑀜𑁆𑀘𑀺𑀢 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀪𑀕𑀯𑀢𑀺 ¶ 𑀧𑀭𑀺𑀦𑀺𑀩𑁆𑀩𑀼𑀢𑀫𑁆𑀳𑀺 𑀓𑁄𑀲𑀮𑀭𑀜𑁆𑀜𑁄 𑀓𑀺𑀭 𑀚𑀦𑀧𑀤𑁂 𑀢𑀼𑀡𑁆𑀟𑀕𑀸𑀫𑁄𑀦𑀸𑀫 𑀅𑀳𑁄𑀲𑀺. 𑀢𑀢𑁆𑀣𑁂𑀓𑁄 𑀩𑀼𑀤𑁆𑀥𑀤𑀸𑀲𑁄 𑀦𑀸𑀫 𑀫𑀦𑀼𑀲𑁆𑀲𑁄 ‘‘𑀬𑀸𑀯𑀚𑀻𑀯𑀁 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺. 𑀩𑀼𑀤𑁆𑀥𑁄 𑀫𑁂 𑀲𑀭𑀡𑀁 𑀢𑀸𑀡𑀁 𑀮𑁂𑀡𑀁 𑀧𑀭𑀸𑀬𑀡𑀦𑁆𑀢𑀺’’ 𑀏𑀯𑀁 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀁 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄 𑀧𑀝𑀺𑀯𑀲𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀏𑀓𑁄 𑀚𑀦𑀧𑀤𑀯𑀸𑀲𑀺𑀓𑁄 𑀢𑀢𑁆𑀣 𑀢𑀢𑁆𑀣 𑀆𑀳𑀺𑀡𑁆𑀟𑀦𑁆𑀢𑁄 𑀢𑀁 𑀢𑀼𑀡𑁆𑀟𑀕𑀸𑀫𑀁 𑀧𑀢𑁆𑀯𑀸 𑀢𑀲𑁆𑀲𑁂𑀯 𑀖𑀭𑁂 𑀦𑀺𑀯𑀸𑀲𑀁 𑀓𑀧𑁆𑀧𑁂𑀲𑀺, 𑀢𑀲𑁆𑀲 𑀧𑀦 𑀚𑀸𑀦𑀧𑀤𑀺𑀓𑀲𑁆𑀲 𑀲𑀭𑀻𑀭𑁂 𑀏𑀓𑁄 𑀬𑀓𑁆𑀔𑁄 𑀆𑀯𑀺𑀲𑀺𑀢𑁆𑀯𑀸 𑀧𑀻𑀴𑁂𑀢𑀺, 𑀢𑀤𑀸 𑀢𑀲𑁆𑀲 𑀕𑀸𑀫𑀲𑁆𑀲 𑀧𑀯𑀺𑀲𑀦𑀓𑀸𑀮𑁂 𑀬𑀓𑁆𑀔𑁄 𑀩𑀼𑀤𑁆𑀥𑀤𑀸𑀲𑁄 𑀧𑀸𑀲𑀓𑀲𑁆𑀲 𑀕𑀼𑀡𑀢𑁂𑀚𑁂𑀦 𑀢𑀲𑁆𑀲 𑀕𑁂𑀳𑀁 𑀧𑀯𑀺𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀩𑀳𑀺𑀕𑀸𑀫𑁂 𑀲𑀢𑁆𑀢𑀸𑀳𑀁 𑀅𑀝𑁆𑀞𑀸𑀲𑀺 𑀢𑀲𑁆𑀲𑀸𑀕𑀫𑀦𑀁 𑀑𑀮𑁄𑀓𑁂𑀦𑁆𑀢𑁄. 𑀢𑀢𑁄 𑀲𑁄 𑀚𑀸𑀦𑀧𑀤𑀺𑀓𑁄 𑀲𑀢𑁆𑀢𑀤𑀺𑀯𑀲𑀁 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀓𑀭𑀝𑁆𑀞𑀁 𑀕𑀦𑁆𑀢𑀼𑀓𑀸𑀫𑁄 𑀕𑀸𑀫𑀸 𑀦𑀺𑀓𑁆𑀔𑀫𑀺. 𑀅𑀣 𑀢𑀁 𑀢𑀣𑀸 𑀦𑀺𑀓𑁆𑀔𑀦𑁆𑀢𑀁 𑀤𑀺𑀲𑁆𑀯𑀸 𑀬𑀓𑁆𑀔𑁄 𑀅𑀕𑁆𑀕𑀳𑁂𑀲𑀺, 𑀅𑀣 𑀲𑁄 𑀢𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀓𑀼𑀳𑀺𑀁𑀕𑀢𑁄𑀲𑀻𑀢𑀺 𑀧𑀼𑀘𑁆𑀙𑀺. 𑀬𑀓𑁆𑀔𑁄 𑀪𑁄 𑀢𑀯𑀢𑁆𑀣𑀸𑀬 𑀏𑀢𑁆𑀣 𑀯𑀲𑀦𑁆𑀢𑀲𑁆𑀲 𑀫𑁂 𑀲𑀢𑁆𑀢𑀸𑀳𑀁 𑀅𑀢𑀺𑀓𑁆𑀓𑀦𑁆𑀢𑀦𑁆𑀢𑀺. 𑀢𑀢𑁄 𑀲𑁄 𑀓𑁄 𑀢𑁂 𑀫𑀬𑀸 𑀅𑀢𑁆𑀣𑁄, 𑀓𑀺𑀁 𑀢𑁂 𑀤𑀫𑁆𑀫𑀻𑀢𑀺, 𑀅𑀣 𑀬𑀓𑁆𑀔𑁂𑀦 𑀪𑁄 𑀅𑀳𑀁 𑀔𑀼𑀤𑀸𑀬 𑀧𑀻𑀴𑀺𑀢𑁄 𑀪𑀢𑁆𑀢𑁂𑀦 𑀫𑁂 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑁄 𑀲𑁄 𑀏𑀯𑀁 𑀲𑀢𑀺 𑀓𑀲𑁆𑀫𑀸 𑀫𑀁 𑀅𑀦𑁆𑀢𑁄𑀕𑁂𑀳𑁂 𑀯𑀲𑀦𑁆𑀢𑀁 𑀦 𑀕𑀡𑁆𑀳𑀻𑀢𑀺 𑀆𑀳. 𑀬𑀓𑁆𑀔𑁂𑀦 𑀪𑁄 𑀢𑀲𑁆𑀫𑀺𑀁 𑀖𑀭𑁂 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄 𑀏𑀓𑁄 𑀉𑀧𑀲𑀓𑁄 𑀅𑀢𑁆𑀣𑀺, 𑀢𑀲𑁆𑀲 𑀲𑀻𑀮𑀢𑁂𑀚𑁂𑀦 𑀕𑁂𑀳𑀁 𑀧𑀯𑀺𑀲𑀺𑀢𑀼𑀫𑀲𑀓𑁆𑀓𑁄𑀦𑁆𑀢𑁄 𑀅𑀝𑁆𑀞𑀸𑀲𑀺𑀦𑁆𑀢𑀺 𑀯𑀼𑀢𑁆𑀢𑁄 𑀚𑀸𑀦𑀧𑀤𑀺𑀓𑁄 𑀲𑀭𑀡𑀁 𑀦𑀸𑀫 𑀓𑀺𑀦𑁆𑀢𑀺 𑀅𑀚𑀸𑀦𑀦𑁆𑀢𑁄 𑀓𑀺𑀦𑁆𑀢𑀺 𑀯𑀢𑁆𑀯𑀸 𑀲𑁄 𑀲𑀭𑀡𑀁 𑀅𑀕𑁆𑀕𑀳𑁂𑀲𑀻𑀢𑀺 𑀬𑀓𑁆𑀔𑀁 𑀧𑀼𑀘𑁆𑀙𑀺. 𑀬𑀓𑁆𑀔𑁄 ‘‘𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀯𑀢𑁆𑀯𑀸 𑀲𑀭𑀡𑀁 𑀅𑀕𑁆𑀕𑀳𑁂𑀲𑀻𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀚𑀸𑀦𑀧𑀤𑀺𑀓𑁄 𑀇𑀤𑀸𑀦𑀺 𑀇𑀫𑀁 𑀯𑀜𑁆𑀘𑁂𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂𑀦𑀳𑀺 𑀬𑀓𑁆𑀔 𑀅𑀳𑀫𑁆𑀧𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻𑀢𑀺 𑀆𑀳. 𑀏𑀯𑀁 𑀯𑀼𑀢𑁆𑀢𑀫𑀢𑁆𑀢𑁂𑀬𑁂𑀯 𑀬𑀓𑁆𑀔𑁄 𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑁄 𑀪 𑀬𑁂 𑀦 𑀪𑀫𑀦𑁆𑀢𑁄 ¶ 𑀧𑀮𑀸𑀬𑀺, 𑀏𑀯𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀭𑀡𑀁 𑀇𑀥𑀮𑁄𑀓𑁂 𑀪𑀬𑁄 𑀧𑀤𑁆𑀤𑀯 𑀦𑀺𑀯𑀸𑀭𑀡𑀢𑁆𑀣𑀁 𑀳𑁄𑀢𑀺, 𑀧𑀭𑀮𑁄𑀓𑁂 𑀲𑀕𑁆𑀕𑀫𑁄𑀓𑁆𑀔𑀸𑀯𑀳𑀁. 𑀢𑀣𑀸𑀳𑀺.

𑁧.

𑀩𑀼𑀤𑁆𑀥𑁄𑀢𑀺 𑀯𑀘𑀦𑀁 𑀏𑀢𑀁, 𑀅𑀫𑀦𑀼𑀲𑁆𑀲𑀸𑀦𑀁 𑀪𑀬𑀸𑀯𑀳𑀁;

𑀩𑀼𑀤𑁆𑀥𑀪𑀢𑁆𑀢𑀺𑀓𑀚𑀦𑁆𑀢𑀽𑀦𑀁, 𑀲𑀩𑁆𑀩𑀤𑀸 𑀫𑀼𑀤𑀫𑀸𑀯𑀳𑀁.

𑁨.

𑀲𑀩𑁆𑀩𑁄𑀧𑀤𑁆𑀤𑀯𑀦𑀸𑀲𑀸𑀬, 𑀧𑀘𑁆𑀘𑀓𑁆𑀔𑀤𑀺𑀩𑁆𑀩𑀫𑁄𑀲𑀥𑀁;

𑀤𑀺𑀩𑁆𑀩𑀫𑀦𑁆𑀢𑀁 𑀫𑀳𑀸𑀢𑁂𑀚𑀁, 𑀫𑀳𑀸𑀬𑀦𑁆𑀢𑀁 𑀫𑀳𑀩𑁆𑀪𑀼𑀢𑀁.

𑁩.

𑀢𑀲𑁆𑀫𑀸 𑀲𑁄 𑀤𑀸𑀭𑀼𑀡𑁄 𑀬𑀓𑁆𑀔𑁄,

𑀤𑀺𑀲𑁆𑀯𑀸 𑀢𑀁 𑀲𑀭𑀡𑁂 𑀞𑀺𑀣𑀁;

𑀉𑀩𑁆𑀩𑀺𑀕𑁆𑀕𑁄 𑀘 𑀪𑀬𑀧𑁆𑀧𑀢𑁆𑀢𑁄,

𑀮𑁄𑀫𑀳𑀝𑁆𑀞𑁄 𑀘 𑀙𑀫𑁆𑀪𑀻𑀢𑁄.

𑁪.

𑀪𑀫𑀦𑁆𑀢𑁄 𑀥𑀸𑀯𑀺𑀢𑀁 𑀤𑀺𑀲𑁆𑀯𑀸, 𑀢𑀺𑀫𑀺𑀭𑁄𑀯 𑀲𑀼𑀭𑀺𑀬𑀼𑀕𑁆𑀕𑀢𑁂,

𑀲𑀺𑀫𑁆𑀩𑀮𑀺𑀢𑀽𑀮𑀪𑀝𑁆𑀞𑀁𑀯, 𑀘𑀡𑁆𑀟𑀯𑀸𑀢𑁂𑀦 𑀔𑀡𑁆𑀟𑀺𑀢𑀁.

𑁫.

𑀬𑀁 𑀤𑀼𑀓𑁆𑀔𑀁 𑀭𑀸𑀚𑀘𑁄𑀭𑀸𑀭𑀺, 𑀬𑀓𑁆𑀔𑀧𑁂𑀢𑀸 𑀤𑀺𑀲𑀫𑁆𑀪𑀯𑀁;

𑀦𑀺𑀘𑁆𑀙𑀦𑁆𑀢𑁂𑀦 𑀫𑀦𑀼𑀲𑁆𑀲𑁂𑀦, 𑀕𑀦𑁆𑀢𑀩𑁆𑀩𑀁 𑀲𑀭𑀡𑀢𑁆𑀢𑀬𑀁𑀢𑀺.

𑀢𑀢𑁄 𑀚𑀸𑀦𑀧𑀤𑀺𑀓𑁄 𑀲𑀭𑀡𑀸𑀕𑀫𑀦𑁂 𑀫𑀳𑀸𑀕𑀼𑀡𑀁 𑀫𑀳𑀸𑀦𑀺𑀲𑀁𑀲𑀁 𑀑𑀮𑁄𑀓𑁂𑀢𑁆𑀯𑀸 𑀩𑀼𑀤𑁆𑀥𑁂 𑀲𑀕𑀸𑀭𑀯𑁄 𑀲𑀧𑁆𑀧𑁂𑀫𑁄 ‘‘𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀁 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀲𑀭𑀡𑀁 𑀕𑀦𑁆𑀢𑁆𑀯𑀸 𑀢𑁂𑀦𑁂𑀯 𑀲𑀭𑀡𑀸𑀕𑀫𑀦𑀸𑀦𑀼𑀪𑀸𑀯𑁂𑀦 𑀚𑀻𑀯𑀺𑀢𑀧𑀭𑀺𑀬𑁄𑀲𑀸𑀦𑁂 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄𑀯𑀺𑀬 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀻𑀢𑀺.

𑁬.

𑀤𑀺𑀲𑁆𑀯𑀸𑀦 𑀏𑀯𑀁 𑀲𑀭𑀡𑀁 𑀕𑀢𑀁 𑀢𑀁,

𑀅𑀧𑁂𑀦𑁆𑀢𑀺 𑀬𑀓𑁆𑀔𑀸𑀧𑀺 𑀫𑀳𑀩𑁆𑀪𑀬𑁂𑀦;

𑀧𑀸𑀮𑁂𑀣 𑀲𑀻𑀮𑀁 𑀲𑀭𑀡𑀜𑁆𑀘 𑀢𑀲𑁆𑀫𑀸,

𑀚𑀳𑀸𑀣 𑀤𑀼𑀭𑀺𑀢𑀁 𑀲𑀼𑀕𑀢𑀺𑀁 𑀪𑀚𑀯𑁆𑀳𑁄𑀢𑀺.

𑀬𑀓𑁆𑀔𑀯𑀜𑁆𑀘𑀺𑀢𑀯𑀢𑁆𑀣𑀼𑀁 𑀧𑀣𑀫𑀁.

𑁨𑁨. 𑀫𑀺𑀘𑁆𑀙𑀤𑀺𑀝𑁆𑀞𑀺𑀓𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀪𑀕𑀯𑀢𑀺 ¶ 𑀥𑀭𑀫𑀸𑀦𑁂 𑀭𑀸𑀚𑀕𑀳𑀦𑀕𑀭𑁂 𑀓𑀺𑀭 𑀏𑀓𑁄 𑀩𑁆𑀭𑀳𑁆𑀫𑀪𑀢𑁆𑀢𑀺𑀓𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀧𑀝𑀺𑀯𑀲𑀢𑀺, 𑀢𑀢𑁆𑀣𑁂𑀯 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄𑀧𑀺. 𑀢𑁂𑀲𑀁 𑀉𑀪𑀺𑀦𑁆𑀦𑀫𑁆𑀧𑀺 𑀤𑁆𑀯𑁂 𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀢𑁂 𑀏𑀓𑀢𑁄 𑀓𑀻𑀴𑀦𑁆𑀢𑀸 𑀯𑀟𑁆𑀠𑀦𑁆𑀢𑀺. 𑀅𑀣𑀸𑀧𑀭𑀪𑀸𑀕𑁂 𑀕𑀼𑀴𑀓𑀻𑀴𑀁𑀓𑀻𑀴𑀦𑁆𑀢𑀸𑀦𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀲𑁆𑀲 𑀧𑀼𑀢𑁆𑀢𑁄 ‘‘𑀦𑀫𑁄 𑀩𑀼𑀤𑁆𑀥𑀬𑀸’’𑀢𑀺 𑀯𑀢𑁆𑀯𑀸 𑀕𑀼𑀴𑁆𑀳𑀁 𑀔𑀺𑀧𑀦𑁆𑀢𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀚𑀺𑀦𑀸𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀧𑀼𑀢𑁆𑀢𑁄 ‘‘𑀦𑀫𑁄 𑀩𑁆𑀭𑀳𑁆𑀫𑀼𑀦𑁄’’𑀢𑀺 𑀯𑀢𑁆𑀯𑀸 𑀔𑀺𑀧𑀦𑁆𑀢𑁄 𑀧𑀭𑀸𑀚𑁂𑀢𑀺, 𑀢𑀢𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀧𑀼𑀢𑁆𑀢𑁄 𑀦𑀺𑀘𑁆𑀘𑀁 𑀚𑀺𑀦𑀦𑁆𑀢𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀁 𑀓𑀼𑀫𑀸𑀭𑀁 𑀤𑀺𑀲𑁆𑀯𑀸 𑀲𑀫𑁆𑀫 𑀢𑁆𑀯𑀁 𑀦𑀺𑀘𑁆𑀘𑀫𑁂𑀯 𑀚𑀺𑀦𑀸𑀲𑀺, 𑀓𑀺𑀁 𑀯𑀢𑁆𑀯𑀸 𑀕𑀼𑀴𑀁 𑀔𑀺𑀧𑀲𑀻𑀢𑀺 𑀧𑀼𑀘𑁆𑀙𑀺. 𑀲𑁄𑀳𑀁 𑀲𑀫𑁆𑀫 ‘‘𑀦𑀫𑁄 𑀩𑀼𑀤𑁆𑀥𑀸𑀬𑀸’’𑀢𑀺 𑀯𑀢𑁆𑀯𑀸 𑀔𑀺𑀧𑀸𑀫𑀻𑀢𑀺 𑀆𑀳. 𑀲𑁄𑀧𑀺 𑀢𑀢𑁄 𑀧𑀝𑁆𑀞𑀸𑀬 ‘‘𑀦𑀫𑁄 𑀩𑀼𑀤𑁆𑀥𑀸𑀬𑀸’’𑀢𑀺 𑀯𑀢𑁆𑀯𑀸 𑀔𑀺𑀧𑀢𑀺, 𑀅𑀣 𑀢𑁂 𑀬𑁂𑀪𑀼𑀬𑁆𑀬𑁂𑀦 𑀤𑀽𑀢𑁂 𑀲𑀫𑀲𑀫𑀸𑀯 𑀳𑁄𑀦𑁆𑀢𑀺. 𑀅𑀧𑀭𑀪𑀸𑀕𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀧𑀼𑀢𑁆𑀢𑁄 𑀧𑀺𑀢𑀭𑀸 𑀲𑀤𑁆𑀥𑀺𑀁 𑀤𑀸𑀭𑀽𑀦𑀫𑀢𑁆𑀣𑀸𑀬 𑀯𑀦𑀁 𑀕𑀦𑁆𑀢𑁆𑀯𑀸 𑀲𑀓𑀝𑁂𑀦 𑀤𑀸𑀭𑀼𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀦𑀕𑀭𑀤𑁆𑀯𑀸𑀭𑀲𑀫𑀻𑀧𑁂 𑀲𑀓𑀝𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀺𑀡𑁂 𑀔𑀸𑀤𑀦𑀢𑁆𑀣𑀸𑀬 𑀕𑁄𑀡𑁂 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀕𑁄𑀡𑀸 𑀢𑀺𑀡𑀁 𑀔𑀸𑀤𑀦𑁆𑀢𑁄 𑀅𑀜𑁆𑀜𑁂𑀳𑀺 𑀕𑁄𑀭𑀽𑀧𑁂𑀳𑀺 𑀲𑀤𑁆𑀥𑀺𑀁 𑀅𑀦𑁆𑀢𑁄𑀦𑀕𑀭𑀁 𑀧𑀯𑀺𑀲𑀺𑀁𑀲𑀼. 𑀅𑀣𑀲𑁆𑀲 𑀧𑀺𑀢𑀸 𑀕𑁄𑀡𑁂 𑀧𑀭𑀺𑀬𑁂𑀲𑀦𑁆𑀢𑁄 𑀲𑀓𑀝𑀁 𑀑𑀮𑁄𑀓𑁂𑀳𑀻𑀢𑀺 𑀧𑀼𑀢𑁆𑀢𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀦𑀕𑀭𑀁 𑀧𑀯𑀺𑀝𑁆𑀞𑁄 𑀅𑀳𑁄𑀲𑀺, 𑀅𑀣 𑀲𑀸𑀬𑀡𑁆𑀳𑁂 𑀚𑀸𑀢𑁂 𑀫𑀦𑀼𑀲𑁆𑀲𑀸 𑀦𑀕𑀭𑀤𑁆𑀯𑀸𑀭𑀁 𑀧𑀺𑀤𑀳𑀺𑀁𑀲𑀼, 𑀢𑀢𑁄 𑀓𑀼𑀫𑀸𑀭𑁄 𑀩𑀳𑀺𑀦𑀕𑀭𑁂 𑀤𑀸𑀭𑀼𑀲𑀓𑀝𑀲𑁆𑀲 𑀳𑁂𑀝𑁆𑀞𑀸 𑀲𑀬𑀦𑁆𑀢𑁄 𑀦𑀺𑀤𑁆𑀤𑀽𑀧𑀕𑀢𑁄 𑀅𑀳𑁄𑀲𑀺. 𑀅𑀣 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀘𑀸𑀢𑀺 𑀤𑁆𑀯𑁂 𑀬𑀓𑁆𑀔𑀸 𑀕𑁄𑀘𑀭𑀁 𑀧𑀭𑀺𑀬𑁂𑀲𑀫𑀸𑀦𑀸 𑀲𑀓𑀝𑀲𑁆𑀲 𑀳𑁂𑀝𑁆𑀞𑀸 𑀦𑀺𑀧𑀦𑁆𑀦𑀁 𑀓𑀼𑀫𑀸𑀭𑀁 𑀅𑀤𑁆𑀤𑀲𑀁𑀲𑀼, 𑀢𑁂𑀲𑀼 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀇𑀫𑀁 𑀔𑀸𑀤𑀸𑀫𑀻𑀢𑀺 𑀆𑀳. 𑀅𑀣𑀸𑀧𑀭𑁄 𑀫𑀸 𑀏𑀯 𑀫𑀓𑀸𑀲𑀺, ‘‘𑀦𑀫𑁄 𑀩𑀼𑀤𑁆𑀥𑀸𑀬𑀸’’𑀢𑀺 𑀯𑀸𑀘𑀓𑁄 𑀏𑀲𑁄𑀢𑀺, 𑀔𑀸𑀤𑀸𑀫𑁂𑀯𑁂𑀢𑀦𑁆𑀢𑀺 𑀯𑀢𑁆𑀯𑀸 𑀇𑀢𑀭𑁂𑀦 𑀬𑀸𑀯𑀢𑀢𑀺𑀬𑀁 𑀯𑀸𑀭𑀺𑀬𑀫𑀸𑀦𑁄𑀧𑀺 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺. 𑀢𑀲𑁆𑀫𑀺𑀁 𑀔𑀡𑁂 𑀤𑀸𑀭𑀓𑁄 𑀧𑀼𑀩𑁆𑀩𑀧𑀭𑀺𑀘𑀬𑁂𑀦 ‘‘𑀦𑀫𑁄 𑀩𑀼𑀤𑁆𑀥𑀸𑀬𑀸’’𑀢𑀺 𑀆𑀳 𑀢𑀁 𑀲𑀼𑀢𑁆𑀯𑀸 𑀬𑀓𑁆𑀔𑁄 𑀪𑀬𑀧𑁆𑀧𑀢𑁆𑀢𑁄 𑀮𑁄𑀫𑀳𑀝𑁆𑀞𑁄 ¶ 𑀳𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀝𑀺𑀓𑁆𑀓𑀫𑁆𑀫 𑀅𑀝𑁆𑀞𑀸𑀲𑀺. 𑀅𑀳𑁄 𑀅𑀘𑁆𑀙𑀭𑀺𑀬𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀅𑀩𑁆𑀪𑀼𑀢𑀁, 𑀏𑀯𑀁 𑀅𑀢𑁆𑀢𑀁 𑀅𑀦𑀻𑀬𑁆𑀬𑀸𑀢𑁂𑀢𑁆𑀯𑀸 𑀧𑀭𑀺𑀘𑀬𑁂𑀦 ‘‘𑀦𑀫𑁄 𑀩𑀼𑀤𑁆𑀥𑀸𑀬𑀸’’𑀢𑀺 𑀯𑀼𑀢𑁆𑀢𑀲𑁆𑀲𑀧𑀺 𑀪𑀬𑀁 𑀙𑀫𑁆𑀪𑀺𑀢𑀢𑁆𑀢𑀁 𑀉𑀧𑀤𑁆𑀤𑀯𑀁 𑀯𑀸 𑀦 𑀳𑁄𑀢𑀺. 𑀧𑀕𑁂𑀯 𑀅𑀢𑁆𑀢𑀁 𑀦𑀻𑀬𑁆𑀬𑀸𑀢𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀲𑁆𑀲𑀸𑀢𑀺. 𑀯𑀼𑀢𑁆𑀢𑀜𑁆𑀳𑀺.

𑁧.

𑀬𑀣𑀸𑀧𑀺 𑀲𑀺𑀔𑀺𑀦𑁄 𑀦𑀸𑀤𑀁, 𑀪𑀼𑀚𑀗𑁆𑀕𑀸𑀦𑀁 𑀪𑀬𑀸𑀯𑀳𑀁;

𑀏𑀯𑀁 𑀩𑀼𑀤𑁆𑀥𑁄𑀢𑀺 𑀯𑀘𑀦𑀁, 𑀅𑀫𑀦𑀼𑀲𑁆𑀲𑀸𑀦𑀁 𑀪𑀬𑀸𑀯𑀳𑀁.

𑁨.

𑀬𑀣𑀸 𑀫𑀦𑁆𑀢𑀲𑁆𑀲 𑀚𑀧𑁆𑀧𑁂𑀦, 𑀯𑀺𑀮𑀬𑀁 𑀬𑀸𑀢𑀺 𑀓𑀺𑀩𑁆𑀩𑀺𑀲𑀁;

𑀏𑀯𑀁 𑀩𑀼𑀤𑁆𑀥𑁄𑀢𑀺 𑀯𑀘𑀦𑁂𑀦, 𑀅𑀧𑀬𑀦𑁆𑀢𑀺 [𑀧𑀳𑀸𑀬𑀦𑁆𑀢𑀺 𑀇𑀢𑀺𑀲𑀩𑁆𑀩𑀢𑁆𑀣] 𑀧𑀺𑀲𑀸𑀘𑀓𑀸.

𑁩.

𑀅𑀕𑁆𑀕𑀺𑀁 𑀤𑀺𑀲𑁆𑀯𑀸 𑀬𑀣𑀸 𑀲𑀺𑀢𑁆𑀣𑀁, 𑀤𑀽𑀭𑀢𑁄𑀯 𑀯𑀺𑀮𑀻𑀬𑀢𑀺;

𑀤𑀺𑀲𑁆𑀯𑀸𑀦𑁂𑀯𑀁 𑀲𑀭𑀡𑀕𑀢𑀁, 𑀧𑁂𑀢𑀸 𑀧𑁂𑀦𑁆𑀢𑀺𑀯 [𑀧𑁂𑀢𑀸𑀧𑁂𑀦𑁆𑀢𑀸𑀯 𑀇𑀢𑀺𑀓𑀢𑁆𑀣𑀘𑀺] 𑀤𑀽𑀭𑀢𑁄.

𑁪.

𑀧𑀯𑀭𑀁 𑀩𑀼𑀤𑁆𑀥𑀇𑀘𑁆𑀘𑁂𑀢, 𑀫𑀓𑁆𑀔𑀭𑀤𑁆𑀯𑀬𑀫𑀩𑁆𑀪𑀼𑀢𑀁;

𑀲𑀩𑁆𑀩𑁄 𑀧𑀤𑁆𑀤𑀯𑀦𑀸𑀲𑀸𑀬, 𑀣𑀺𑀭𑀧𑀸𑀓𑀸𑀭 𑀫𑀼𑀕𑁆𑀕𑀢𑀁.

𑁫.

𑀲𑀢𑁆𑀢𑀭𑀢𑀦𑀧𑀸𑀲𑀸𑀤𑀁, 𑀢𑀫𑁂𑀯 𑀯𑀚𑀺𑀭𑀁 𑀕𑀼𑀳𑀁;

𑀢𑀫𑁂𑀯 𑀦𑀸𑀯𑀁 𑀤𑀻𑀧𑀁 𑀢𑀁, 𑀢𑀫𑁂𑀯 𑀓𑀯𑀘𑀁 𑀲𑀼𑀪𑀁.

𑁬.

𑀢𑀫𑁂𑀯 𑀲𑀺𑀭𑀲𑀺 𑀪𑀸𑀲𑀦𑁆𑀢𑀁, 𑀓𑀺𑀭𑀻𑀝𑀁 𑀭𑀢𑀦𑀸𑀫𑀬𑀁;

𑀮𑀮𑀸𑀝𑁂 𑀢𑀺𑀮𑀓𑀁 𑀭𑀫𑁆𑀫𑀁, 𑀓𑀧𑁆𑀧𑀽𑀭𑀁 𑀦𑀬𑀦𑀤𑁆𑀯𑀬𑁂.

𑁭.

𑀢𑀸𑀟𑀗𑁆𑀓𑀁 𑀓𑀡𑁆𑀡𑀬𑀼𑀕𑀮𑁂, 𑀲𑁄𑀡𑁆𑀡𑀫𑀸𑀮𑀸 𑀕𑀮𑁂 𑀲𑀼𑀪𑀸;

𑀏𑀓𑀸𑀯𑀴𑀺 𑀢𑀸𑀭𑀳𑀸𑀭, 𑀪𑀸𑀭𑀸 𑀚𑀢𑁆𑀢𑀼𑀲𑀼 𑀮𑀗𑁆𑀓𑀢𑀸.

𑁮.

𑀅𑀗𑁆𑀕𑀤𑀁 𑀩𑀸𑀳𑀼𑀫𑀽𑀮𑀲𑁆𑀲, 𑀓𑀭𑀕𑁆𑀕𑁂 𑀯𑀮𑀬𑀁 𑀢𑀣𑀸;

𑀅𑀗𑁆𑀕𑀼𑀮𑀺𑀲𑁆𑀯𑀗𑁆𑀕𑀼𑀮𑀺𑀬𑀜𑁆𑀘, 𑀔𑀕𑁆𑀕𑀁 𑀫𑀗𑁆𑀕𑀮𑀲𑀫𑁆𑀫𑀢𑀁.

𑁯.

𑀲𑁄𑀡𑁆𑀡𑀸 𑀢𑀧𑀢𑁆𑀢 𑀫𑀼𑀡𑁆𑀳𑀻𑀲𑀁, 𑀲𑀩𑀸𑀡𑀁𑀯 𑀲𑀭𑀸𑀲𑀦𑀁;

𑀢𑀫𑁂𑀯 𑀲𑀩𑁆𑀩𑀸𑀮𑀗𑁆𑀓𑀸𑀭𑀁, 𑀢𑀫𑁂𑀯 𑀤𑀼𑀭𑀺𑀢𑀸𑀧𑀳𑀁.

𑁧𑁦.

𑀢𑀲𑁆𑀫𑀸 ¶ 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄,

𑀮𑁄𑀓𑀮𑁄𑀘𑀦𑀲𑀢𑁆𑀣𑀼𑀦𑁄;

𑀲𑀭𑀡𑀁 𑀢𑀲𑁆𑀲 𑀕𑀦𑁆𑀢𑁂𑀯,

𑀕𑀼𑀡𑀦𑀸𑀫𑀁 𑀏𑀳𑀺𑀧𑀲𑁆𑀲𑀺𑀓𑀁.

𑁧𑁧.

𑀦𑀫𑁄𑀢𑀺 𑀯𑀘𑀦𑀁 𑀧𑀼𑀩𑁆𑀩𑀁, 𑀩𑀼𑀤𑁆𑀥𑀸𑀬𑁂𑀢𑀺 𑀕𑀺𑀭𑀁 𑀢𑀤𑀸;

𑀲𑀼𑀧𑀦𑁆𑀢𑁂𑀦 𑀓𑀼𑀫𑀸𑀭𑁂𑀦, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑀽𑀦𑀼𑀦𑀸.

𑁧𑁨.

𑀲𑀼𑀢𑁆𑀯𑀸 𑀯𑀼𑀢𑁆𑀢𑀁 𑀧𑀺𑀲𑀸 𑀘𑀸𑀧𑀺, 𑀫𑀦𑀼𑀲𑁆𑀲𑀓𑀼𑀡𑀧𑁂 𑀭𑀢𑀸;

𑀦 𑀳𑀺𑀁𑀲𑀦𑁆𑀢𑀺 𑀅𑀳𑁄 𑀩𑀼𑀤𑁆𑀥, 𑀕𑀼𑀡𑀲𑀸𑀭𑀫𑀳𑀦𑁆𑀢𑀢𑀸𑀢𑀺.

𑀅𑀣 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀬𑀓𑁆𑀔𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀬𑀓𑁆𑀔𑀲𑁆𑀲 𑀏𑀯𑀫𑀸𑀳, 𑀅𑀬𑀼𑀢𑁆𑀢𑀁 𑀪𑁄 𑀢𑀬𑀸 𑀓𑀢𑀁. 𑀩𑀼𑀤𑁆𑀥𑀕𑀼𑀡𑁂 𑀧𑀳𑀸𑀭𑁄 𑀤𑀺𑀦𑁆𑀦𑁄, 𑀤𑀡𑁆𑀟𑀓𑀫𑁆𑀫𑀁 𑀢𑀬𑀸 𑀓𑀸𑀢𑀩𑁆𑀩𑀁𑀢𑀺, 𑀢𑁂𑀦 𑀓𑀺𑀁𑀫𑀬𑀸 𑀲𑀫𑁆𑀫 𑀓𑀸𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑁂 𑀩𑀼𑀪𑀼𑀓𑁆𑀔𑀺𑀢𑀲𑁆𑀲 𑀆𑀳𑀸𑀭𑀁 𑀤𑁂𑀳𑀻𑀢𑀺 𑀆𑀳. 𑀢𑀢𑁄 𑀲𑁄 𑀲𑀸𑀥𑀽𑀢𑀺 𑀯𑀢𑁆𑀯𑀸 𑀬𑀸𑀯𑀸𑀳𑀁 𑀆𑀕𑀘𑁆𑀙𑀸𑀫𑀺, 𑀢𑁆𑀯𑀁 𑀢𑀸𑀯𑁂𑀢𑁆𑀣 𑀯𑀘𑁆𑀙𑀸𑀳𑀻𑀢𑀺 𑀯𑀢𑁆𑀯𑀸 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄 𑀓𑀜𑁆𑀘𑀦𑀢𑀝𑁆𑀝𑀓𑁂 𑀯𑀟𑁆𑀠𑀺𑀢𑀁 𑀭𑀲𑀪𑁄𑀚𑀦𑀁 𑀆𑀳𑀭𑀺𑀢𑁆𑀯𑀸 𑀓𑀼𑀫𑀸𑀭𑀲𑁆𑀲 𑀧𑀺𑀢𑀼𑀯𑀡𑁆𑀡𑁂𑀦 𑀤𑀸𑀭𑀓𑀁 𑀪𑁄𑀚𑁂𑀢𑁆𑀯𑀸 𑀧𑀼𑀦 𑀓𑀼𑀫𑀸𑀭𑁂𑀦 𑀯𑀼𑀢𑁆𑀢𑀩𑀼𑀤𑁆𑀥𑀯𑀘𑀦𑀜𑁆𑀘 𑀅𑀢𑁆𑀢𑀦𑀸 𑀓𑀢𑀯𑀸𑀬𑀸𑀫𑀁 𑀘𑀸𑀢𑀺 𑀲𑀩𑁆𑀩𑀁 𑀢𑀝𑁆𑀝𑀓𑁂 𑀮𑀺𑀔𑀺𑀢𑁆𑀯𑀸 𑀇𑀤𑀁 𑀭𑀜𑁆𑀜𑁄𑀬𑁂𑀯 𑀧𑀜𑁆𑀜𑀸𑀬𑀢𑀽𑀢𑀺 𑀅𑀥𑀺𑀝𑁆𑀞𑀸𑀬 𑀅𑀕𑀫𑀁𑀲𑀼, 𑀅𑀣 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀭𑀜𑁆𑀜𑁄 𑀪𑁄𑀚𑀦𑀓𑀸𑀮𑁂 𑀭𑀸𑀚𑀧𑀼𑀭𑀺𑀲𑀸 𑀢𑀢𑁆𑀣 𑀢𑀝𑁆𑀝𑀓𑀁 𑀅𑀤𑀺𑀲𑁆𑀯𑀸 𑀦𑀕𑀭𑀁 𑀉𑀧𑀧𑀭𑀺𑀓𑁆𑀔𑀦𑁆𑀢𑀸 𑀲𑀓𑀝𑁂 𑀤𑀸𑀭𑀓𑀜𑁆𑀘 𑀢𑀝𑁆𑀝𑀓𑀜𑁆𑀘 𑀤𑀺𑀲𑁆𑀯𑀸 𑀢𑀝𑁆𑀝𑀓𑁂𑀦 𑀲𑀤𑁆𑀥𑀺𑀁 𑀢𑀁 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁. 𑀭𑀸𑀚𑀸 𑀢𑀝𑁆𑀝𑀓𑁂 𑀅𑀓𑁆𑀔𑀭𑀸𑀤𑀻𑀦𑀺 𑀤𑀺𑀲𑁆𑀯𑀸 𑀯𑀸𑀘𑁂𑀢𑁆𑀯𑀸 𑀢𑀲𑁆𑀲 𑀕𑀼𑀡𑁂 𑀧𑀲𑀦𑁆𑀦𑁄 𑀫𑀳𑀦𑁆𑀢𑁂𑀦 𑀬𑀲𑁂𑀦 𑀲𑀤𑁆𑀥𑀺𑀁 𑀲𑁂𑀝𑁆𑀞𑀺𑀝𑁆𑀞𑀸𑀦𑀫𑀤𑀸𑀲𑀺.

𑁧𑁩.

𑀚𑀺𑀦𑀲𑁆𑀲 𑀦𑀸𑀫𑀁 𑀲𑀼𑀧𑀺𑀦𑁂𑀦 𑀧𑁂𑀯𑀁,

𑀦 𑀳𑁄𑀢𑀺 𑀪𑀻𑀢𑀺𑀁 𑀮𑀧𑀦𑁂𑀦 𑀬𑀲𑁆𑀫𑀸;

𑀢𑀲𑁆𑀫𑀸 𑀫𑀼𑀦𑀺𑀦𑁆𑀤𑀁 𑀲𑀢𑀢𑀁 𑀲𑀭𑀸𑀣,

𑀕𑀼𑀡𑁂 𑀲𑀭𑀦𑁆𑀢𑀸 𑀲𑀭𑀡𑀜𑁆𑀘 𑀬𑀸𑀣𑀸𑀢𑀺.

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀯𑀢𑁆𑀣𑀼𑀁 𑀤𑀼𑀢𑀺𑀬𑀁.

𑁨𑁩. 𑀧𑀸𑀤𑀧𑀻𑀞𑀺𑀓𑀸𑀬 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀚𑀫𑁆𑀩𑀼𑀤𑀻𑀧𑁂 ¶ 𑀫𑀳𑀸𑀩𑁄𑀥𑀺𑀢𑁄 𑀓𑀺𑀭 𑀤𑀓𑁆𑀔𑀺𑀡𑀧𑀲𑁆𑀲𑁂 𑀏𑀢𑀁 𑀧𑀘𑁆𑀘𑀦𑁆𑀢𑀦𑀕𑀭𑀁 𑀅𑀳𑁄𑀲𑀺. 𑀢𑀢𑁆𑀣 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀭𑀢𑀦𑀢𑁆𑀢𑀬𑀫𑀸𑀫𑀓𑁄 𑀏𑀓𑁄 𑀉𑀧𑀸𑀲𑀓𑁄 𑀧𑀝𑀺𑀯𑀲𑀢𑀺. 𑀢𑀤𑀸 𑀏𑀓𑁄 𑀔𑀻𑀡𑀸𑀲𑀯𑁄 𑀪𑀕𑀯𑀢𑀸 𑀧𑀭𑀺𑀪𑀼𑀢𑁆𑀢𑀁 𑀧𑀸𑀤𑀧𑀻𑀞𑀁 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀢𑀕𑀢𑀝𑁆𑀞𑀸𑀦𑁂 𑀧𑀽𑀚𑁂𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀢𑀁 𑀦𑀕𑀭𑀁 𑀲𑀫𑁆𑀧𑀸𑀧𑀼𑀡𑀺𑀢𑁆𑀯𑀸 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀺 𑀬𑀼𑀕𑀫𑀢𑁆𑀢𑀤𑀲𑁄 𑀧𑀩𑁆𑀩𑀚𑁆𑀚𑀸𑀮𑀻𑀮𑀸𑀬 𑀚𑀦𑀁 𑀧𑀭𑀺𑀢𑁄𑀲𑁂𑀦𑁆𑀢𑁄. 𑀅𑀣 𑀲𑁄 𑀉𑀧𑀸𑀲𑀓𑁄 𑀢𑀣𑀸 𑀕𑀘𑁆𑀙𑀦𑁆𑀢𑀁 𑀣𑁂𑀭𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀉𑀧𑀕𑀦𑁆𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀦𑀺𑀩𑀤𑁆𑀥𑀁 𑀫𑀫 𑀕𑁂𑀳𑀁 𑀆𑀕𑀫𑀦𑀫𑀺𑀘𑁆𑀙𑀸𑀫𑀺, 𑀫𑀫𑀸𑀦𑀼𑀓𑀫𑁆𑀧𑀸𑀬 𑀏𑀢𑁆𑀣𑁂𑀯 𑀯𑀲𑀣 𑀲𑀸𑀫𑀻𑀢𑀺 𑀬𑀸𑀘𑀺𑀢𑁆𑀯𑀸 𑀦𑀕𑀭𑀸𑀲𑀦𑁆𑀦𑁂 𑀭𑀫𑀡𑀻𑀬𑁂 𑀯𑀦𑀲𑀡𑁆𑀟𑁂 𑀦𑀤𑀻𑀓𑀽𑀮𑁂 𑀧𑀡𑁆𑀡𑀲𑀸𑀮𑀁 𑀓𑀢𑁆𑀯𑀸 𑀣𑁂𑀭𑀲𑁆𑀲 𑀢𑀁 𑀦𑀻𑀬𑁆𑀬𑀸𑀢𑁂𑀢𑁆𑀯𑀸 𑀘𑀢𑀼𑀧𑀘𑁆𑀘𑀬𑁂𑀳𑀺 𑀧𑀝𑀺𑀚𑀕𑁆𑀕𑀦𑁆𑀢𑁄 𑀫𑀸𑀦𑁂𑀦𑁆𑀢𑁄 𑀧𑀽𑀚𑁂𑀦𑁆𑀢𑁄 𑀯𑀲𑀢𑀺. 𑀣𑁂𑀭𑁄𑀧𑀺 𑀢𑀢𑁆𑀣 𑀨𑀸𑀲𑀼𑀓𑀝𑁆𑀞𑀸𑀦𑁂 𑀪𑀕𑀯𑀢𑀸 𑀧𑀭𑀺𑀪𑀼𑀢𑁆𑀢𑀧𑀸𑀤𑀧𑀻𑀞𑀥𑀸𑀢𑀼𑀁 𑀦𑀺𑀥𑀸𑀬 𑀯𑀸𑀮𑀼𑀓𑀸𑀳𑀺 𑀣𑀽𑀧𑀁 𑀓𑀢𑁆𑀯𑀸 𑀦𑀺𑀘𑁆𑀘𑀁 𑀕𑀦𑁆𑀥𑀥𑀽𑀧𑀤𑀻𑀧𑀧𑀼𑀧𑁆𑀨𑀧𑀽𑀚𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑁄 𑀯𑀸𑀲𑀁 𑀓𑀧𑁆𑀧𑁂𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀲𑁆𑀲𑁄 𑀧𑀸𑀲𑀓𑀲𑁆𑀲 𑀅𑀦𑀦𑁆𑀢𑀭𑀕𑁂𑀳𑀯𑀸𑀲𑀺𑀓𑁄 𑀏𑀓𑁄 𑀇𑀲𑁆𑀲𑀭𑀪𑀢𑁆𑀢𑀺𑀓𑁄 𑀅𑀢𑁆𑀢𑀦𑁄 𑀤𑁂𑀯𑀢𑀁 𑀦𑀺𑀩𑀤𑁆𑀥𑀁 𑀦𑀫𑀲𑁆𑀲𑀢𑀺. 𑀢𑀁 𑀤𑀺𑀲𑁆𑀯𑀸𑀲𑁆𑀲 𑀉𑀧𑀸𑀲𑀓𑁄 𑀩𑀼𑀤𑁆𑀥𑀕𑀼𑀡𑁂 𑀯𑀢𑁆𑀯𑀸 𑀅𑀔𑁂𑀢𑁆𑀢𑁂 𑀲𑀫𑁆𑀫 𑀫𑀸 𑀯𑀺𑀭𑀺𑀬𑀁 𑀓𑀭𑁄𑀳𑀺. 𑀧𑀚𑀳𑁂𑀢𑀁 𑀤𑀺𑀝𑁆𑀞𑀺𑀁𑀢𑀺 𑀆𑀳. 𑀢𑀢𑁄 𑀲𑁄 𑀓𑁂𑀭𑀸𑀝𑀺𑀓𑁄 𑀇𑀲𑁆𑀲𑀭𑀪𑀢𑁆𑀢𑀺𑀓𑁄 𑀓𑁄 𑀢𑁂 𑀲𑀢𑁆𑀣𑀼 𑀕𑀼𑀡𑀸𑀦𑀼𑀪𑀸𑀯𑁄, 𑀅𑀫𑁆𑀳𑀸𑀓𑀁 𑀇𑀲𑁆𑀲𑀭𑀲𑁆𑀲 𑀕𑀼𑀡𑁄𑀯 𑀫𑀳𑀦𑁆𑀢𑁄𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀅𑀕𑀼𑀡𑀁 𑀕𑀼𑀡𑀦𑁆𑀢𑀺 𑀓𑀣𑁂𑀦𑁆𑀢𑁄 𑀆𑀳.

𑁧.

𑀢𑀺𑀧𑀼𑀭𑀁 𑀲𑁄 𑀯𑀺𑀦𑀸𑀲𑁂𑀲𑀺, 𑀮𑀮𑀸𑀝𑀦𑀬𑀦𑀕𑁆𑀕𑀺𑀦𑀸;

𑀅𑀲𑀼𑀭𑁂𑀘 𑀯𑀺𑀦𑀸𑀲𑁂𑀲𑀺, 𑀢𑀺𑀲𑀽𑀮𑁂𑀦 𑀫𑀳𑀺𑀲𑁆𑀲𑀭𑁄.

𑁨.

𑀚𑀝𑀸𑀓𑀮𑀸𑀧𑀫𑀸𑀯𑀢𑁆𑀢𑀁, 𑀦𑀘𑁆𑀘𑀢𑀻 𑀤𑀺𑀦𑀲𑀦𑁆𑀥𑀺𑀬𑀁;

𑀯𑀸𑀤𑁂𑀢𑀺 𑀪𑁂𑀭𑀺𑀯𑀻𑀡𑀸𑀤𑀺𑀁, 𑀕𑀻𑀢𑀁𑀘𑀸𑀧𑀺 𑀲 𑀕𑀸𑀬𑀢𑀺.

𑁩.

𑀪𑀭𑀺𑀬𑀸𑀬𑁄 ¶ 𑀢𑀲𑁆𑀲 𑀢𑀺𑀲𑁆𑀲𑁄, 𑀚𑀝𑀸𑀬𑁂𑀓𑀁 𑀲𑀫𑀼𑀩𑁆𑀩𑀳𑁂;

𑀏𑀓𑀫𑁂𑀓𑁂𑀦 𑀧𑀲𑁆𑀲𑁂𑀦, 𑀧𑀲𑁆𑀲𑀫𑀸𑀦𑁄 𑀘𑀭𑁂𑀓𑀓𑀁.

𑁪.

𑀳𑀢𑁆𑀣𑀺𑀘𑀫𑁆𑀫𑀫𑁆𑀩𑀭𑀥𑀭𑁄, 𑀢𑁂𑀦𑁂𑀯 𑀯𑀸𑀭𑀺𑀢𑀸 𑀢𑀧𑁄;

𑀅𑀲𑀸𑀤𑀺𑀲𑁂𑀳𑀺 𑀧𑀼𑀢𑁆𑀢𑁂𑀳𑀺, 𑀭𑀽𑀧𑁂𑀦 𑀘 𑀲𑀼𑀧𑀸𑀓𑀝𑁄.

𑁫.

𑀭𑀢𑀺𑀬𑀸 𑀘 𑀫𑀥𑀼𑀧𑀸𑀦𑁂 𑀘, 𑀩𑁆𑀬𑀸𑀯𑀝𑁄 𑀲𑀩𑁆𑀩𑀤𑀸 𑀘 𑀲𑁄;

𑀫𑀦𑀼𑀲𑁆𑀲𑀝𑁆𑀞𑀺𑀥𑀭𑁄 𑀲𑀻𑀲, 𑀓𑀧𑀸𑀮𑁂𑀦𑁂𑀲 𑀪𑀼𑀜𑁆𑀚𑀓𑀺.

𑁬.

𑀦 𑀚𑀸𑀢𑁄 𑀦 𑀪𑀬𑀁 𑀢𑀲𑁆𑀲, 𑀫𑀭𑀡𑀁 𑀦𑀢𑁆𑀣𑀺 𑀲𑀲𑁆𑀲𑀢𑁄;

𑀈𑀤𑀺𑀲𑁄 𑀫𑁂 𑀫𑀳𑀸𑀤𑁂𑀯𑁄, 𑀦𑀢𑁆𑀣𑀜𑁆𑀜𑀲𑁆𑀲𑀻𑀤𑀺𑀲𑁄 𑀕𑀼𑀡𑁄𑀢𑀺.

𑀢𑀁 𑀲𑀼𑀢𑁆𑀯𑀸 𑀉𑀧𑀸𑀲𑀓𑁄 𑀲𑀫𑁆𑀫 𑀢𑀼𑀬𑁆𑀳𑀁 𑀇𑀲𑁆𑀲𑀭𑀲𑁆𑀲 𑀏𑀢𑁂 𑀕𑀼𑀡𑀸 𑀦𑀸𑀫 𑀢𑀸𑀯 𑀳𑁄𑀦𑁆𑀢𑀼. 𑀅𑀕𑀼𑀡𑀸 𑀦𑀸𑀫 𑀓𑀺𑀢𑁆𑀢𑀓𑀸 𑀳𑁄𑀦𑁆𑀢𑀻𑀢𑀺 𑀯𑀢𑁆𑀯𑀸 𑀪𑀕𑀯𑀢𑁄 𑀲𑀓𑀮𑀕𑀼𑀡𑁂 𑀲𑀁𑀳𑀭𑀺𑀢𑁆𑀯𑀸 𑀓𑀣𑁂𑀦𑁆𑀢𑁄 𑀆𑀳.

𑁭.

𑀮𑁄𑀓𑁂 𑀲𑀩𑁆𑀩𑀲𑀯𑀦𑁆𑀢𑀻𑀦𑀁, 𑀆𑀥𑀸𑀭𑁄 𑀲𑀸𑀕𑀭𑁄 𑀬𑀣𑀸;

𑀲𑀩𑁆𑀩𑁂𑀲𑀁 𑀕𑀼𑀡𑀭𑀸𑀲𑀻𑀦𑀁, 𑀆𑀥𑀸𑀭𑁄𑀯 𑀢𑀣𑀸𑀕𑀢𑁄.

𑁮.

𑀘𑀭𑀸𑀘𑀭𑀸𑀦𑀁 𑀲𑀩𑁆𑀩𑁂𑀲𑀁, 𑀆𑀥𑀸𑀭𑀸𑀯 𑀥𑀭𑀸 𑀅𑀬𑀁;

𑀢𑀣𑀸 𑀕𑀼𑀡𑀸𑀦𑀁 𑀲𑀩𑁆𑀩𑁂𑀲𑀁, 𑀆𑀥𑀸𑀭𑁄𑀯 𑀢𑀣𑀸𑀕𑀢𑁄.

𑁯.

𑀏𑀯𑀁 𑀲𑀦𑁆𑀢𑁄 𑀯𑀺𑀬𑀢𑁆𑀢𑁄𑀘 [𑀯𑀺𑀬𑀦𑁆𑀢𑁄 𑀇𑀢𑀺𑀓𑀢𑁆𑀣𑀘𑀺], 𑀏𑀯𑀁 𑀲𑁄 𑀓𑀭𑀼𑀡𑀸𑀧𑀭𑁄;

𑀏𑀯 𑀫𑀺𑀤𑁆𑀥𑀺𑀯𑀺𑀥𑀸 𑀢𑀲𑁆𑀲, 𑀏𑀯𑀫𑁂𑀯𑀁 𑀕𑀼𑀡𑀸 𑀇𑀢𑀺.

𑁧𑁦.

𑀩𑀼𑀤𑁆𑀥𑁄𑀧𑀺 𑀲𑀓𑁆𑀓𑁄𑀢𑀺 𑀦 𑀬𑀲𑁆𑀲 𑀯𑀡𑁆𑀡𑁂,

𑀓𑀧𑁆𑀧𑀫𑁆𑀧𑀺 𑀯𑀢𑁆𑀯𑀸 𑀔𑀬𑀢𑀁 𑀕𑀫𑁂𑀢𑀼𑀁;

𑀧𑀕𑁂𑀯 𑀘 𑀩𑁆𑀭𑀳𑁆𑀫𑀲𑀼𑀭𑀸 𑀲𑀼𑀭𑁂𑀳𑀺,

𑀯𑀢𑁆𑀢𑀼𑀁 𑀦 𑀳𑀸𑀦𑀦𑁆𑀢𑀕𑀼𑀡𑀲𑁆𑀲 𑀯𑀡𑁆𑀡𑀦𑁆𑀢𑀺.

𑀏𑀯𑀁 𑀯𑀤𑀦𑁆𑀢𑀸 𑀧𑀦 𑀢𑁂 𑀉𑀪𑁄𑀧𑀺 𑀅𑀫𑁆𑀳𑀸𑀓𑀁 𑀤𑁂𑀯𑁄 𑀉𑀢𑁆𑀢𑀫𑁄 𑀅𑀫𑁆𑀳𑀸𑀓𑀁 𑀤𑁂𑀯𑁄 𑀉𑀢𑁆𑀢𑀫𑁄𑀢𑀺 𑀓𑀮𑀳𑀁 𑀯𑀟𑁆𑀠𑁂𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀫𑀕𑀫𑀁𑀲𑀼, 𑀭𑀸𑀚𑀸 ¶ 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 𑀢𑁂𑀦𑀳𑀺 𑀢𑀼𑀫𑁆𑀳𑀸𑀓𑀁 𑀤𑁂𑀯𑀢𑀸𑀦𑀁 𑀫𑀳𑀦𑁆𑀢𑀪𑀸𑀯𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑁂𑀦 𑀚𑀸𑀦𑀺𑀲𑁆𑀲𑀸𑀫. 𑀤𑀲𑁆𑀲𑁂𑀣 𑀢𑁂𑀳𑀺 𑀦𑁄 𑀇𑀤𑁆𑀥𑀺𑀁𑀢𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀇𑀢𑁄 𑀓𑀺𑀭 𑀲𑀢𑁆𑀢𑀸𑀳𑀘𑁆𑀘𑀬𑁂𑀦 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀢𑁆𑀣𑀸𑀭𑀸𑀦𑀁 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺. 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀦𑁆𑀢𑀽𑀢𑀺 𑀢𑀁 𑀲𑀼𑀢𑁆𑀯𑀸 𑀦𑀸𑀦𑀸𑀤𑀺𑀲𑀸𑀲𑀼 𑀩𑀳𑀽 𑀫𑀦𑀼𑀲𑁆𑀲𑀸 𑀲𑀫𑀸𑀕𑀫𑀺𑀁𑀲𑀼, 𑀅𑀣 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀅𑀚𑁆𑀚 𑀅𑀫𑁆𑀳𑀸𑀓𑀁 𑀤𑁂𑀯𑀲𑁆𑀲 𑀆𑀦𑀼𑀪𑀸𑀯𑀁 𑀧𑀲𑁆𑀲𑀸𑀫𑀸𑀢𑀺 𑀫𑀳𑀦𑁆𑀢𑀁 𑀧𑀽𑀚𑀁 𑀓𑀭𑁄𑀦𑁆𑀢𑁄 𑀢𑀢𑁆𑀣 𑀲𑀸𑀭𑀁 𑀦𑀸𑀤𑁆𑀤𑀲𑀁𑀲𑀼, 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸𑀧𑀺 𑀅𑀚𑁆𑀚 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀆𑀦𑀼𑀪𑀸𑀯𑀁 𑀧𑀲𑁆𑀲𑀺𑀲𑁆𑀲𑀸𑀫𑀸𑀢𑀺 𑀯𑀸𑀴𑀼𑀓𑀸𑀣𑀽𑀧𑀁 𑀕𑀦𑁆𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀜𑁆𑀚𑀮𑀺𑀫𑁆𑀧𑀕𑁆𑀕𑀬𑁆𑀳 𑀅𑀝𑁆𑀞𑀁𑀲𑀼. 𑀅𑀣 𑀭𑀸𑀚𑀸𑀧𑀺 𑀩𑀮𑀯𑀸𑀳𑀦𑀧𑀭𑀺𑀯𑀼𑀢𑁄 𑀏𑀓𑀫𑀦𑁆𑀢𑁂 𑀅𑀝𑁆𑀞𑀸𑀲𑀺. 𑀦𑀸𑀦𑀸𑀲𑀫𑀬𑀯𑀸𑀤𑀺𑀦𑁄𑀧𑀺 𑀅𑀚𑁆𑀚 𑀢𑁂𑀲𑀁 𑀧𑀸𑀝𑀺𑀳𑀸𑀭𑀺𑀬𑀁 𑀧𑀲𑁆𑀲𑀺𑀲𑁆𑀲𑀸𑀫𑀸𑀢𑀺 𑀫𑀜𑁆𑀘𑀸𑀢𑀺𑀫𑀜𑁆𑀘𑀁 𑀓𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀢𑁂𑀲𑀁 𑀲𑀫𑀸𑀕𑀫𑁂 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀯𑀸𑀴𑀼𑀓𑀸𑀣𑀽𑀧 𑀫𑀪𑀺𑀫𑀼𑀔𑀁 𑀓𑀢𑁆𑀯𑀸 𑀅𑀜𑁆𑀚𑀮𑀺𑀫𑁆𑀧𑀕𑁆𑀕𑀬𑁆𑀳 𑀲𑀸𑀫𑀺 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀲𑀩𑁆𑀩𑀩𑀼𑀤𑁆𑀥𑀓𑀺𑀘𑁆𑀘𑀸𑀦𑀺 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀡𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀲𑀸𑀭𑀺𑀧𑀼𑀢𑁆𑀢𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀬𑁄 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸𑀧𑀺 𑀧𑀭𑀺𑀦𑀺𑀩𑁆𑀩𑀸𑀬𑀺𑀁𑀲𑀼, 𑀦𑀢𑁆𑀣𑁂𑀢𑁆𑀣 𑀅𑀫𑁆𑀳𑀸𑀓𑀁 𑀅𑀜𑁆𑀜𑀁 𑀧𑀝𑀺𑀲𑀭𑀡𑀦𑁆𑀢𑀺 𑀯𑀢𑁆𑀯𑀸 𑀲𑀘𑁆𑀘𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑀸 𑀆𑀳𑀁𑀲𑀼.

𑁧𑁧.

𑀆𑀧𑀸𑀡𑀓𑁄𑀝𑀺𑀁 𑀩𑀼𑀤𑁆𑀥𑀲𑁆𑀲, 𑀲𑀭𑀡𑀁 𑀦𑁄 𑀕𑀢𑀸 𑀬𑀤𑀺;

𑀢𑁂𑀦 𑀲𑀘𑁆𑀘𑁂𑀦 𑀬𑀁 𑀥𑀸𑀢𑀼, 𑀤𑀲𑁆𑀲𑁂𑀢𑀼 𑀧𑀸𑀝𑀺𑀳𑀸𑀭𑀺𑀬𑀁.

𑁧𑁨.

𑀆𑀧𑀸𑀡𑀓𑁄𑀝𑀺𑀁 𑀥𑀫𑁆𑀫𑀲𑁆𑀲, 𑀲𑀭𑀡𑀁 𑀦𑁄 𑀕𑀢𑀸 𑀬𑀤𑀺;

𑀢𑁂𑀦 𑀲𑀘𑁆𑀘𑁂𑀦 𑀬𑀁 𑀥𑀸𑀢𑀼, 𑀤𑀲𑁆𑀲𑁂𑀢𑀼 𑀧𑀸𑀝𑀺𑀳𑀸𑀭𑀺𑀬𑀁.

𑁧𑁩.

𑀆𑀧𑀸𑀡𑀓𑁄𑀝𑀺𑀁 𑀲𑀗𑁆𑀖𑀲𑁆𑀲, 𑀲𑀭𑀡𑀁 𑀦𑁄 𑀕𑀢𑀸 𑀬𑀤𑀺;

𑀢𑁂𑀦 𑀲𑀘𑁆𑀘𑁂𑀦 𑀬𑀁 𑀥𑀸𑀢𑀼, 𑀤𑀲𑁆𑀲𑁂𑀢𑀼 𑀧𑀸𑀝𑀺𑀳𑀸𑀭𑀺𑀬𑀁.

𑁧𑁪.

𑀭𑀸𑀫𑀓𑀸𑀮𑁂 𑀫𑀼𑀦𑀺𑀦𑁆𑀤𑀲𑁆𑀲, 𑀧𑀸𑀤𑀼𑀓𑀸 𑀘𑀸𑀲𑀺 𑀅𑀩𑁆𑀪𑀼𑀢𑀸;

𑀢𑁂𑀦 𑀲𑀘𑁆𑀘𑁂𑀦 𑀬𑀁 𑀥𑀸𑀢𑀼, 𑀤𑀲𑁆𑀲𑁂𑀢𑀼 𑀧𑀸𑀝𑀺𑀳𑀸𑀭𑀺𑀬𑀁.

𑁧𑁫.

𑀙𑀤𑁆𑀤𑀦𑁆𑀢𑀓𑀸𑀮𑁂 ¶ 𑀫𑀼𑀦𑀺𑀦𑁄, 𑀤𑀸𑀞𑀸 𑀙𑀭𑀁𑀲𑀺𑀭𑀜𑁆𑀚𑀺𑀢𑀸;

𑀢𑁂𑀦 𑀲𑀘𑁆𑀘𑁂𑀦𑀬𑀁 𑀥𑀸𑀢𑀼, 𑀦𑀺𑀘𑁆𑀙𑀸𑀭𑁂𑀢𑀼 𑀙 𑀭𑀁𑀲𑀺𑀬𑁄.

𑁧𑁬.

𑀚𑀸𑀢𑀫𑀢𑁆𑀢𑁄 𑀢𑀤𑀸 𑀩𑀼𑀤𑁆𑀥𑁄, 𑀞𑀺𑀢𑁄 𑀧𑀗𑁆𑀓𑀚𑀫𑀼𑀤𑁆𑀥𑀦𑀺;

𑀦𑀺𑀘𑁆𑀙𑀸𑀭𑁂𑀲𑀸𑀲𑀪𑀺𑀁𑀯𑀸𑀘𑀁, 𑀅𑀕𑁆𑀕𑁄 𑀲𑁂𑀝𑁆𑀞𑁄𑀢𑀺𑀆𑀤𑀺𑀦𑀸;

𑀢𑁂𑀦 𑀲𑀘𑁆𑀘𑁂𑀦𑀬𑀁 𑀥𑀸𑀢𑀼, 𑀤𑀲𑁆𑀲𑁂𑀢𑀼 𑀧𑀸𑀝𑀺𑀳𑀸𑀭𑀺𑀬𑀁.

𑁧𑁭.

𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀤𑀺𑀲𑁆𑀯𑀸, 𑀦𑀺𑀓𑁆𑀔𑀦𑁆𑀢𑁄 𑀅𑀪𑀺𑀦𑀺𑀓𑁆𑀔𑀫𑀁;

𑀢𑁂𑀦 𑀲𑀘𑁆𑀘𑁂𑀦 𑀬𑀁 𑀥𑀸𑀢𑀼, 𑀤𑀲𑁆𑀲𑁂𑀢𑀼 𑀧𑀸𑀝𑀺𑀳𑀸𑀭𑀺𑀬𑀁.

𑁧𑁮.

𑀫𑀸𑀭𑀲𑁂𑀦𑀁 𑀧𑀮𑀸𑀧𑁂𑀢𑁆𑀯𑀸, 𑀦𑀺𑀲𑀺𑀦𑁆𑀦𑁄 𑀩𑀼𑀚𑁆𑀛𑀺 𑀩𑁄𑀥𑀺𑀬𑀁;

𑀢𑁂𑀦 𑀲𑀘𑁆𑀘𑁂𑀦 𑀬𑀁 𑀥𑀸𑀢𑀼 𑀤𑀲𑁆𑀲𑁂𑀢𑀼 𑀧𑀸𑀝𑀺𑀳𑀸𑀭𑀺𑀬𑀁.

𑁧𑁯.

𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺, 𑀚𑀺𑀦𑁄 𑀲𑀺𑀧𑀢𑀦𑁂 𑀢𑀤𑀸;

𑀢𑁂𑀦 𑀲𑀘𑁆𑀘𑁂𑀦 𑀬𑀁 𑀥𑀸𑀢𑀼, 𑀤𑀲𑁆𑀲𑁂𑀢𑀼 𑀧𑀸𑀝𑀺𑀳𑀸𑀭𑀺𑀬𑀁.

𑁨𑁦.

𑀦𑀦𑁆𑀤𑁄𑀧𑀦𑀦𑁆𑀤𑀪𑁄𑀕𑀺𑀦𑁆𑀤𑀁, 𑀦𑀸𑀕𑀁 𑀦𑀸𑀮𑀸𑀕𑀺𑀭𑀺𑀯𑁆𑀳𑀬𑀁;

𑀆𑀴𑀯𑀓𑀸 𑀤𑀬𑁄 𑀬𑀓𑁆𑀔𑁂, 𑀩𑁆𑀭𑀳𑁆𑀫𑀸𑀦𑁄 𑀘 𑀩𑀓𑀸 𑀤𑀬𑁄.

𑁨𑁧.

𑀲𑀘𑁆𑀘𑀓𑀸𑀤𑀺𑀦𑀺𑀕𑀡𑁆𑀞𑁂𑀘, 𑀓𑀽𑀝𑀤𑀦𑁆𑀢𑀸 𑀤𑀬𑁄 𑀤𑁆𑀯𑀺𑀚𑁂;

𑀤𑀫𑁂𑀲𑀺 𑀢𑁂𑀦 𑀲𑀘𑁆𑀘𑁂𑀦, 𑀤𑀲𑁆𑀲𑁂𑀢𑀼 𑀧𑀸𑀝𑀺𑀳𑀸𑀭𑀺𑀬𑀁𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀉𑀧𑀸𑀲𑀓𑀸 𑀅𑀫𑁆𑀳𑀸𑀓𑀁 𑀅𑀦𑀼𑀓𑀫𑁆𑀫𑀁 𑀧𑀝𑀺𑀘𑁆𑀘 𑀫𑀳𑀸𑀚𑀦𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀪𑁂𑀤𑀦𑀢𑁆𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀣 𑀲𑀸𑀫𑀻𑀢𑀺 𑀆𑀭𑀸𑀥𑁂𑀲𑀼𑀁. 𑀅𑀣 𑀩𑀼𑀤𑁆𑀥𑀸𑀦𑀼𑀪𑀸𑀯𑀜𑁆𑀘 𑀣𑁂𑀭𑀸𑀦𑀼𑀪𑀸𑀯𑀜𑁆𑀘 𑀉𑀧𑀸𑀲𑀓𑀸𑀦𑀁 𑀲𑀘𑁆𑀘𑀓𑀺𑀭𑀺𑀬𑀸𑀦𑀼𑀪𑀸𑀯𑀜𑁆𑀘 𑀧𑀝𑀺𑀘𑁆𑀘 𑀯𑀸𑀴𑀼𑀓𑀸𑀣𑀽𑀧𑀁 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀧𑀸𑀤𑀧𑀻𑀞𑀥𑀸𑀢𑀼 𑀆𑀓𑀸𑀲 𑀫𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀻 𑀯𑀺𑀮𑀸𑀲𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀅𑀣 𑀫𑀳𑀸𑀚𑀦𑀸 𑀘𑁂𑀮𑀼𑀓𑁆𑀔𑁂𑀧𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑁂𑀦𑁆𑀢𑀸 𑀲𑀸𑀥𑀼𑀓𑀻𑀴𑁆𑀳𑀁 𑀓𑀻𑀴𑀦𑁆𑀢𑀸 𑀫𑀳𑀸𑀦𑀸𑀤𑀁 𑀧𑀯𑀢𑁆𑀢𑁂𑀦𑁆𑀢𑀸 𑀫𑀳𑀦𑁆𑀢𑀁 𑀧𑀽𑀚𑀫𑀓𑀁𑀲𑀼. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀧𑀺 𑀇𑀫𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀯𑀺𑀫𑁆𑀳𑀺𑀢𑀫𑀸𑀦𑀲𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀭𑀢𑀦𑀢𑁆𑀢𑀬𑀧𑀭𑀸𑀬𑀡𑀸 𑀲𑀭𑀡 𑀫𑀕𑀫𑀁𑀲𑀽𑀢𑀺.

𑁨𑁨.

𑀨𑀼𑀝𑁆𑀞𑁄𑀧𑀺 ¶ 𑀧𑀸𑀤𑁂𑀦 𑀚𑀺𑀦𑀲𑁆𑀲 𑀏𑀯𑀁,

𑀓𑀮𑀺𑀗𑁆𑀕𑀭𑁄 𑀧𑀸 𑀲𑀺 𑀫𑀳𑀸𑀦𑀼𑀪𑀸𑀯𑁄;

𑀮𑁄𑀓𑁂𑀓𑀦𑀸𑀣𑀲𑁆𑀲 𑀅𑀦𑀸𑀲𑀯𑀲𑁆𑀲,

𑀫𑀳𑀸𑀦𑀼𑀪𑀸𑀯𑁄 𑀳𑀺 𑀅𑀘𑀺𑀦𑁆𑀢𑀦𑀻𑀬𑁄𑀢𑀺.

𑀧𑀸𑀤𑀧𑀻𑀞𑀺𑀓𑀸𑀬 𑀯𑀢𑁆𑀣𑀼𑀁 𑀢𑀢𑀺𑀬𑀁.

𑁨𑁪. 𑀉𑀢𑁆𑀢𑀭𑀲𑀸𑀫𑀡𑁂𑀭𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀲𑁄 𑀓𑀺𑀭 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 [𑀧𑀼𑀭𑀺𑀫𑀩𑀼𑀤𑁆𑀥𑁂 𑀇𑀢𑀺𑀲𑀩𑁆𑀩𑀢𑁆𑀣] 𑀓𑀢𑀸𑀥𑀺𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀁 𑀧𑀼𑀜𑁆𑀜𑀁 𑀉𑀧𑀘𑀺𑀦𑀦𑁆𑀢𑁄 𑀲𑀼𑀫𑁂𑀥𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀯𑀺𑀚𑁆𑀚𑀸𑀥𑀭𑁄 𑀳𑀼𑀢𑁆𑀯𑀸 𑀳𑀺𑀫𑀯𑀢𑀺 𑀧𑀝𑀺𑀯𑀲𑀢𑀺. 𑀢𑀤𑀸 𑀲𑀼𑀫𑁂𑀥𑁄 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀯𑁂𑀓 𑀫𑀦𑀼𑀩𑁆𑀭𑀽𑀳𑀦𑁆𑀢𑁄 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀭𑀫𑀡𑀻𑀬𑁂 𑀧𑀤𑁂𑀲𑁂 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀢𑀤𑀸 𑀯𑀺𑀚𑁆𑀚𑀸𑀥𑀭𑁄 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀙𑀩𑁆𑀩𑀡𑁆𑀡𑀭𑀁𑀲𑀻𑀳𑀺 𑀯𑀺𑀭𑀸𑀚𑀫𑀸𑀦𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀢𑀻𑀳𑀺 𑀓𑀡𑀺𑀓𑀸𑀭𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀲𑀺, 𑀧𑀼𑀧𑁆𑀨𑀸𑀦𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀲𑀢𑁆𑀣𑀼 𑀉𑀧𑀭𑀺 𑀙𑀢𑁆𑀢𑀸𑀓𑀸𑀭𑁂𑀦 𑀅𑀝𑁆𑀞𑀁𑀲𑀼, 𑀲𑁄 𑀢𑁂𑀦 𑀪𑀻𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀧𑀲𑀦𑁆𑀦𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀅𑀧𑀭𑀪𑀸𑀕𑁂 𑀓𑀸𑀮𑀁𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀉𑀴𑀸𑀭𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑀯𑀦𑁆𑀢𑁄 𑀬𑀸𑀯𑀢𑀸𑀬𑀼𑀓𑀁 𑀢𑀢𑁆𑀣 𑀞𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑁄 𑀇𑀫𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑀸𑀚𑀕𑀳𑀦𑀕𑀭𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀉𑀢𑁆𑀢𑀭𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀉𑀢𑁆𑀢𑀫𑀭𑀽𑀧𑀥𑀭𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀯𑀺𑀚𑁆𑀚𑀸𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀯𑀸 𑀚𑀸𑀢𑀺𑀬𑀸 𑀭𑀽𑀧𑁂𑀦 𑀯𑀺𑀚𑁆𑀚𑀸𑀬 𑀲𑀻𑀮𑀸𑀘𑀸𑀭𑁂𑀦 𑀘 𑀮𑁄𑀓𑀲𑁆𑀲 𑀫𑀳𑀦𑀻𑀬𑁄 𑀚𑀸𑀢𑁄, 𑀢𑀲𑁆𑀲 𑀢𑀁 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀁𑀤𑀺𑀲𑁆𑀯𑀸 𑀯𑀲𑁆𑀲𑀓𑀸𑀭𑁄 𑀫𑀕𑀥𑀫𑀳𑀸𑀫𑀢𑁆𑀢𑁄 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀤𑀸𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀧𑀯𑁂𑀤𑁂𑀲𑀺. 𑀲𑁄 𑀦𑀺𑀲𑁆𑀲𑀭𑀡𑀚𑁆𑀛𑀸𑀲𑀬𑀢𑀸𑀬 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀓𑀸𑀮𑁂𑀦𑀓𑀸𑀮𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀧𑀬𑀺𑀭𑀼𑀧𑀸𑀲𑀦𑁆𑀢𑁄 𑀢𑀲𑁆𑀲 ¶ 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸 𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀣𑁂𑀭𑀁 𑀉𑀧𑀝𑁆𑀞𑀳𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀣𑁂𑀭𑀲𑁆𑀲 𑀅𑀜𑁆𑀜𑀢𑀭𑁄 𑀆𑀩𑀸𑀥𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺, 𑀢𑀲𑁆𑀲 𑀪𑁂𑀲𑀚𑁆𑀚𑀢𑁆𑀣𑀸𑀬 𑀉𑀢𑁆𑀢𑀭𑀲𑀸𑀫𑀡𑁂𑀭𑁄 𑀧𑀸𑀢𑁄𑀯 𑀧𑀢𑁆𑀢𑀘𑀻𑀯𑀭 𑀫𑀸𑀤𑀸𑀬 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀫𑁆𑀫 𑀅𑀦𑁆𑀢𑀭𑀸𑀫𑀕𑁆𑀕𑁂 𑀢𑀴𑀸𑀓𑀲𑁆𑀲 𑀢𑀻𑀭𑁂 𑀧𑀢𑁆𑀢𑀁 𑀞𑀧𑁂𑀢𑁆𑀯𑀸 𑀉𑀤𑀓𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀫𑀼𑀔𑀁 𑀥𑁄𑀯𑀢𑀺, 𑀢𑀤𑀸 𑀅𑀜𑁆𑀜𑀢𑀭𑁄 𑀉𑀫𑁆𑀫𑀕𑁆𑀕𑀘𑁄𑀭𑁄 𑀓𑀢𑀓𑀫𑁆𑀫𑁄 𑀆𑀭𑀓𑁆𑀔𑀧𑀼𑀭𑀺𑀲𑁂𑀳𑀺 𑀅𑀦𑀼𑀩𑀤𑁆𑀥𑁄 𑀅𑀕𑁆𑀕𑀤𑁆𑀯𑀸𑀭𑁂𑀦𑁂𑀯 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀮𑀸𑀬𑀦𑁆𑀢𑁄 𑀅𑀢𑁆𑀢𑀦𑀸 𑀕𑀳𑀺𑀢𑀁 𑀭𑀢𑀦𑀪𑀡𑁆𑀟𑀺𑀓𑀁 𑀲𑀸𑀫𑀡𑁂𑀭𑀲𑁆𑀲 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀮𑀸𑀬𑀺. 𑀲𑁄 𑀲𑀸𑀫𑀡𑁂𑀭𑁄𑀧𑀺 𑀧𑀢𑁆𑀢𑀲𑀫𑀻𑀧𑀁 [𑀲𑀢𑁆𑀢𑀼𑀲𑀫𑀻𑀧𑀁 𑀇𑀢𑀺𑀧𑀺 𑀓𑀢𑁆𑀣𑀘𑀺] 𑀉𑀧𑀕𑀢𑁄 𑀳𑁄𑀢𑀺, 𑀘𑁄𑀭𑀁 𑀅𑀦𑀼𑀩𑀦𑁆𑀥𑀦𑁆𑀢𑀸 𑀭𑀸𑀚𑀧𑀼𑀭𑀺𑀲𑀸 𑀲𑀸𑀫𑀡𑁂𑀭𑀲𑁆𑀲 𑀧𑀢𑁆𑀢𑁂 𑀪𑀡𑁆𑀟𑀺𑀓𑀁 𑀤𑀺𑀲𑁆𑀯𑀸 𑀅𑀬𑀁 𑀘𑁄𑀭𑁄, 𑀇𑀫𑀺𑀦𑀸 𑀘𑁄𑀭𑀺𑀬𑀁 𑀓𑀢𑀦𑁆𑀢𑀺 𑀲𑀸𑀫𑀡𑁂𑀭𑀁 𑀧𑀘𑁆𑀙𑀸𑀩𑀸𑀳𑀁 𑀩𑀦𑁆𑀥𑀺𑀢𑁆𑀯𑀸 𑀯𑀲𑁆𑀲𑀓𑀸𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀲𑁆𑀲𑁂𑀲𑀼𑀁. 𑀯𑀲𑁆𑀲𑀓𑀸𑀭𑁄 𑀘 𑀢𑀤𑀸 𑀭𑀜𑁆𑀜𑁄 𑀯𑀺𑀦𑀺𑀘𑁆𑀙𑀬𑁂 𑀦𑀺𑀬𑀼𑀢𑁆𑀢𑁄 𑀳𑀼𑀢𑁆𑀯𑀸 𑀙𑁂𑀚𑁆𑀚𑀪𑁂𑀚𑁆𑀚𑀁 𑀅𑀦𑀼𑀲𑀸𑀲𑀢𑀺. 𑀲𑁄 𑀏𑀲𑁄 𑀧𑀼𑀩𑁆𑀩𑁂 𑀫𑀫 𑀯𑀘𑀦𑀁 𑀦𑀸𑀤𑀺𑀬𑀺. 𑀲𑀼𑀤𑁆𑀥𑀧𑀸𑀲𑀡𑁆𑀟𑀺𑀬𑁂𑀲𑀼 𑀧𑀩𑁆𑀩𑀚𑀻𑀢𑀺 𑀘 𑀩𑀤𑁆𑀥𑀸𑀖𑀸𑀢𑀢𑁆𑀢𑀸 𑀢𑀁 𑀓𑀫𑁆𑀫𑀁 𑀅𑀲𑁄𑀥𑁂𑀢𑁆𑀯𑀸𑀯 𑀚𑀻𑀯𑀦𑁆𑀢𑀫𑁂𑀯𑁂𑀢𑀁 𑀲𑀽𑀮𑁂 𑀉𑀢𑁆𑀢𑀸𑀲𑁂𑀣𑀸𑀢𑀺 𑀆𑀡𑀸 𑀧𑁂𑀲𑀺, 𑀭𑀸𑀚𑀧𑀼𑀭𑀺𑀲𑀸 𑀢𑀁 𑀦𑀺𑀫𑁆𑀩𑀲𑀽𑀮𑁂 𑀉𑀢𑁆𑀢𑀸𑀲𑁂𑀲𑀼𑀁. 𑀲𑀸𑀫𑀡𑁂𑀭𑁄 𑀲𑀽𑀮𑀕𑁆𑀕𑁂 𑀦𑀺𑀲𑀺𑀦𑁆𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀫𑁂 𑀓𑁄 𑀪𑁂𑀲𑀚𑁆𑀚𑀁 𑀆𑀳𑀭𑀺𑀲𑁆𑀲𑀢𑀻𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀲𑀭𑀺. 𑀢𑀢𑁄 𑀣𑁂𑀭𑁄 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀓𑀣𑁂𑀲𑀺, 𑀪𑀕𑀯𑀸𑀧𑀺 𑀫𑀳𑀸𑀲𑀸𑀯𑀓𑀧𑀭𑀺𑀯𑀼𑀢𑁄 𑀢𑀲𑁆𑀲 𑀜𑀸𑀡𑀧𑀭𑀺𑀧𑀸𑀓𑀁 𑀑𑀮𑁄𑀓𑁂𑀢𑁆𑀯𑀸 𑀢𑀁 𑀞𑀸𑀦𑀫𑀕𑀫𑀸𑀲𑀺. 𑀢𑀢𑁄 𑀪𑀕𑀯𑀢𑁄 𑀦𑀺𑀓𑁆𑀔𑀦𑁆𑀢𑀪𑀸𑀯𑀸 𑀲𑀓𑀮𑀦𑀕𑀭𑁂 𑀓𑁄𑀮𑀸𑀳𑀮𑀁 𑀅𑀳𑁄𑀲𑀺, 𑀫𑀳𑀸𑀚𑀦𑀓𑀸𑀬𑁄 𑀲𑀦𑁆𑀦𑀺𑀧𑀢𑀺. 𑀅𑀣 𑀪𑀕𑀯𑀸 𑀯𑀺𑀧𑁆𑀨𑀼𑀭𑀦𑁆𑀢𑀳𑀢𑁆𑀣𑀢𑀮𑁂 𑀦𑀔𑀫𑀡𑀺𑀫𑀬𑀽𑀔𑀲𑀫𑁆𑀪𑀺𑀦𑁆𑀦𑀧𑀻𑀢𑀸𑀪𑀸𑀲𑀢𑀸𑀬 𑀧𑀕𑁆𑀖𑀭𑀦𑁆𑀢𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑀲𑀼𑀯𑀡𑁆𑀡𑀭𑀲𑀥𑀸𑀭𑀸𑀯𑀺𑀬 𑀚𑀸𑀮𑀸𑀯𑀕𑀼𑀡𑁆𑀞𑀺𑀢𑀫𑀼𑀤𑀼𑀢𑀮𑀼𑀦𑀗𑁆𑀕𑀼𑀮𑀁 𑀳𑀢𑁆𑀣𑀁 𑀉𑀢𑁆𑀢𑀭𑀲𑁆𑀲 𑀲𑀻𑀲𑁂 𑀞𑀧𑁂𑀢𑁆𑀯𑀸 𑀉𑀢𑁆𑀢𑀭 𑀇𑀤𑀁 𑀢𑁂 𑀧𑀼𑀩𑁆𑀩𑁂 𑀓𑀢𑀧𑀸𑀧𑀓𑀫𑁆𑀫𑀲𑁆𑀲 𑀨𑀮𑀁 𑀉𑀧𑁆𑀧𑀦𑁆𑀦𑀁, 𑀢𑀢𑁆𑀣 𑀢𑀬𑀸 𑀧𑀘𑁆𑀘𑀯𑁂𑀓𑁆𑀔𑀡𑀩𑀮𑁂𑀦 𑀅𑀥𑀺𑀯𑀸𑀲𑀦𑀸 𑀓𑀸𑀢𑀩𑁆𑀩𑀸𑀢𑀺 𑀆𑀳. 𑀢𑁂𑀦𑁂𑀯 𑀆𑀳.

𑁧.

𑀅𑀢𑀻𑀢𑁂 ¶ 𑀓𑀺𑀭 𑀏𑀓𑀲𑁆𑀫𑀺𑀁, 𑀕𑀸𑀫𑁂 𑀢𑁆𑀯 𑀫𑀲𑀺 𑀤𑀸𑀭𑀓𑁄;

𑀤𑀸𑀭𑁂𑀓𑁂𑀳𑀺 𑀲𑀫𑀸𑀕𑀫𑁆𑀫, 𑀓𑀻𑀴𑀦𑁆𑀢𑁄 𑀓𑁂𑀴𑀺𑀫𑀡𑁆𑀟𑀮𑁂.

𑁨.

𑀕𑀳𑁂𑀢𑁆𑀯𑀸 𑀲𑀼𑀔𑀼𑀫𑀁 𑀲𑀽𑀓𑀁, 𑀢𑀤𑀸 𑀢𑁆𑀯𑀁 𑀦𑀺𑀫𑁆𑀩𑀚𑀮𑁆𑀮𑀺𑀬𑀸;

𑀉𑀢𑁆𑀢𑀸𑀲𑁂𑀲𑀺 𑀢𑀢𑁆𑀣 𑀲𑀽𑀮𑁂, 𑀚𑀻𑀯𑀫𑀸𑀦𑀓𑀫𑀓𑁆𑀔𑀺𑀓𑀁.

𑁩.

𑀅𑀧𑀭𑀫𑁆𑀧𑀺 𑀢𑁂 𑀧𑀸𑀧𑀓𑀫𑁆𑀫𑀁, 𑀧𑀯𑀓𑁆𑀔𑀸𑀫𑀺 𑀲𑀼𑀡𑁄𑀳𑀺 𑀫𑁂;

𑀑𑀯𑀤𑀦𑁆𑀢𑀺𑀁 𑀳𑀺𑀢𑁂𑀦 𑀢𑁆𑀯𑀁, 𑀅𑀢𑀻𑀢𑁂 𑀲𑀓𑀫𑀸𑀢𑀭𑀁.

𑁪.

𑀚𑀻𑀯𑀲𑀽𑀮𑁂 𑀦𑀺𑀲𑀻𑀤𑀸𑀢𑀺, 𑀓𑁄𑀧𑁂𑀦𑀸𑀪𑀺𑀲𑀧𑀻 𑀢𑀼𑀯𑀁;

𑀇𑀫𑁂𑀳𑀺 𑀤𑁆𑀯𑀻𑀳𑀺 𑀧𑀸𑀧𑁂𑀳𑀺, 𑀲𑀭𑀁 𑀲𑀁𑀲𑀸𑀭𑀲𑀸𑀕𑀭𑁂.

𑁫.

𑀧𑀜𑁆𑀘𑀚𑀸𑀢𑀺𑀲𑀢𑁂 𑀅𑀘𑁆𑀙𑀺, 𑀚𑀻𑀯𑀲𑀽𑀮𑀫𑁆𑀳𑀺 𑀦𑀺𑀫𑁆𑀩𑀚𑁂;

𑀅𑀬𑀁 𑀢𑁂 𑀘𑀭𑀺𑀫𑀸 𑀚𑀸𑀢𑀺, 𑀏𑀢𑁆𑀣𑀸𑀧𑀺𑀘 𑀯𑀺𑀧𑀘𑁆𑀘𑀺 𑀲𑁄𑀢𑀺.

𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀢𑀲𑁆𑀲 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀉𑀢𑁆𑀢𑀭𑁄 𑀅𑀫𑀢𑀸𑀪𑀺𑀲𑁂𑀓𑀲𑀤𑀺𑀲𑁂𑀦 𑀲𑀢𑁆𑀣𑀼𑀦𑁄 𑀳𑀢𑁆𑀣𑀲𑀫𑁆𑀨𑀲𑁆𑀲𑀲𑀜𑁆𑀚𑀸𑀢𑀧𑀲𑀸𑀤𑀲𑁄𑀫𑀦𑀲𑁆𑀲𑀢𑀸𑀬 𑀉𑀴𑀸𑀭𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀧𑀝𑀺𑀮𑀪𑀺𑀢𑁆𑀯𑀸 𑀬𑀣𑀸𑀧𑀭𑀺𑀘𑀺𑀢𑀁 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀁 𑀲𑀫𑀸𑀭𑀽𑀴𑁆𑀳𑁄 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀁 𑀕𑀢𑀢𑁆𑀢𑀸 𑀲𑀢𑁆𑀣𑀼 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀲𑀩𑁆𑀩𑀓𑀺𑀮𑁂𑀲𑁂 𑀔𑁂𑀧𑁂𑀢𑁆𑀯𑀸 𑀙𑀴𑀪𑀺𑀜𑁆𑀜𑁄 𑀅𑀳𑁄𑀲𑀺. 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀢𑁆𑀣 𑀲𑀫𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀻𑀢𑀺 𑀯𑀤𑀦𑁆𑀢𑀺. 𑀉𑀢𑁆𑀢𑀭𑁄 𑀧𑀦 𑀙𑀴𑀪𑀺𑀜𑁆𑀜𑁄 𑀳𑀼𑀢𑁆𑀯𑀸 𑀲𑀽𑀮𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀆𑀓𑀸𑀲𑁂 𑀞𑀢𑁆𑀯𑀸 𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀲𑀺. 𑀫𑀳𑀸𑀚𑀦𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀸 𑀚𑀸𑀢𑀸 𑀅𑀳𑁂𑀲𑀼𑀁. 𑀢𑀸𑀯𑀤𑁂𑀯𑀲𑁆𑀲 𑀯𑀡𑁄𑀭𑀼𑀦𑁆𑀥𑀺, 𑀲𑁄 𑀪𑀺𑀓𑁆𑀔𑀽𑀳𑀺 𑀆𑀯𑀼𑀲𑁄 𑀢𑀸𑀤𑀺𑀲𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑁄 𑀓𑀣𑀁 𑀢𑁆𑀯𑀁 𑀯𑀺𑀧𑀲𑁆𑀲𑀦𑀁 𑀅𑀦𑀼𑀬𑀼𑀜𑁆𑀚𑀺𑀢𑀼𑀁 𑀲𑀓𑁆𑀔𑀻𑀢𑀺 𑀧𑀼𑀝𑁆𑀞𑁄 𑀧𑀕𑁂𑀯 𑀫𑁂 𑀆𑀯𑀼𑀲𑁄 𑀲𑀁𑀲𑀸𑀭𑁂 𑀆𑀤𑀻𑀦𑀯𑁄 𑀲𑀗𑁆𑀔𑀸𑀭𑀸𑀦𑀜𑁆𑀘 𑀲𑀪𑀸𑀯𑁄 𑀲𑀼𑀤𑀺𑀝𑁆𑀞𑁄. 𑀢𑀲𑁆𑀫𑀸𑀳𑀁 𑀢𑀸𑀤𑀺𑀲𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑁄𑀧𑀺 𑀅𑀲𑀓𑁆𑀔𑀺𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀯𑀺𑀲𑁂𑀲𑀁 𑀅𑀥𑀺𑀕𑀦𑁆𑀢𑀼𑀁𑀢𑀺 𑀆𑀳. 𑀅𑀣𑀸𑀧𑀭𑀪𑀸𑀕𑁂 𑀲𑁄 𑀪𑀺𑀓𑁆𑀔𑀼𑀲𑀗𑁆𑀖𑀫𑀚𑁆𑀛𑁂 𑀅𑀢𑁆𑀢𑀦𑁄 𑀧𑀼𑀩𑁆𑀩𑀘𑀭𑀺𑀢𑀸 𑀧𑀤𑀸𑀦𑀁 𑀧𑀓𑀸𑀲𑁂𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺.

𑁬.

𑀲𑀼𑀫𑁂𑀥𑁄 ¶ 𑀦𑀸𑀫 𑀲𑀫𑁆𑀩𑀼𑀤𑁆𑀥𑁄, 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑁄;

𑀯𑀺𑀯𑁂𑀓𑀓𑀸𑀫𑁄 𑀲𑀫𑁆𑀩𑀼𑀤𑁆𑀥𑁄, 𑀳𑀺𑀫𑀯𑀦𑁆𑀢 𑀫𑀼𑀧𑀸𑀕𑀫𑀺.

𑁭.

𑀅𑀚𑁆𑀛𑁄𑀕𑀳𑁂𑀢𑁆𑀯𑀸 𑀳𑀺𑀫𑀯𑀦𑁆𑀢𑀁, 𑀅𑀕𑁆𑀕𑁄 𑀓𑀸𑀭𑀼𑀡𑀺𑀓𑁄 𑀫𑀼𑀦𑀺;

𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸𑀦, 𑀦𑀺𑀲𑀻𑀤𑀺 𑀧𑀼𑀭𑀺𑀲𑀼𑀢𑁆𑀢𑀫𑁄.

𑁮.

𑀯𑀺𑀚𑁆𑀚𑀸𑀥𑀭𑁄 𑀢𑀤𑀸 𑀆𑀲𑀺𑀁, 𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀅𑀳𑀁;

𑀢𑀺𑀲𑀽𑀮𑀁 𑀲𑀼𑀓𑀢𑀁 𑀕𑀬𑁆𑀳, 𑀕𑀘𑁆𑀙𑀸𑀫𑀺 𑀅𑀫𑁆𑀩𑀭𑁂 𑀢𑀤𑀸.

𑁯.

𑀧𑀩𑁆𑀩𑀢𑀕𑁆𑀕𑁂 𑀬𑀣𑀸 𑀅𑀕𑁆𑀕𑀺, 𑀧𑀼𑀡𑁆𑀡𑀫𑀸𑀲𑁂𑀯 𑀘𑀦𑁆𑀤𑀺𑀫𑀸;

𑀯𑀦𑀁 𑀑𑀪𑀸𑀲𑀢𑁂 𑀩𑀼𑀤𑁆𑀥𑁄, 𑀲𑀸𑀮𑀭𑀸𑀚𑀸𑀯 𑀨𑀼𑀮𑁆𑀮𑀺𑀢𑁄.

𑁧𑁦.

𑀯𑀦𑀕𑁆𑀕𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀩𑀼𑀤𑁆𑀥𑀭𑀁𑀲𑀻 𑀯𑀺𑀥𑀸𑀯𑀭𑁂;

𑀦𑀮𑀕𑁆𑀕𑀺𑀯𑀡𑁆𑀡𑀲𑀗𑁆𑀓𑀸𑀲𑀸, 𑀤𑀺𑀲𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀁.

𑁧𑁧.

𑀯𑀺𑀘𑀺𑀦𑀁 𑀅𑀤𑁆𑀤𑀲𑀁 𑀧𑀼𑀧𑁆𑀨𑀁, 𑀓𑀡𑀺𑀓𑀸𑀭𑀁 𑀤𑁂𑀯𑀕𑀦𑁆𑀥𑀺𑀓𑀁;

𑀢𑀻𑀡𑀺 𑀧𑀼𑀧𑁆𑀨𑀸𑀦𑀺 𑀆𑀤𑀸𑀬, 𑀩𑀼𑀤𑁆𑀥𑀲𑁂𑀝𑁆𑀞𑀁 𑀅𑀧𑀽𑀚𑀬𑀺𑀁.

𑁧𑁨.

𑀩𑀼𑀤𑁆𑀥𑀲𑁆𑀲 𑀆𑀦𑀼𑀪𑀸𑀯𑁂𑀦, 𑀢𑀻𑀡𑀺 𑀧𑀼𑀧𑁆𑀨𑀸𑀦𑀺 𑀫𑁂 𑀢𑀤𑀸;

𑀉𑀤𑁆𑀥𑀯𑀡𑁆𑀝𑀸 𑀅𑀥𑁄𑀧𑀢𑁆𑀢𑀸, 𑀙𑀸𑀬𑀁 𑀓𑀼𑀩𑁆𑀩𑀦𑁆𑀢𑀺 𑀲𑀢𑁆𑀣𑀼𑀦𑁄.

𑁧𑁩.

𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀫𑀕𑀜𑁆𑀙𑀳𑀁.

𑁧𑁪.

𑀢𑀢𑁆𑀣 𑀫𑁂 𑀲𑀼𑀓𑀢𑀁 𑀩𑁆𑀬𑀫𑁆𑀳𑀁, 𑀓𑀡𑀺𑀓𑀸𑀭𑀻𑀢𑀺 𑀜𑀸𑀬𑀢𑀺;

𑀲𑀝𑁆𑀞𑀺𑀬𑁄𑀚𑀦 𑀫𑀼𑀩𑁆𑀩𑁂𑀥𑀁, 𑀢𑀺𑀁𑀲𑀬𑁄𑀚𑀦𑀯𑀺𑀢𑁆𑀣𑀢𑀁.

𑁧𑁫.

𑀲𑀳𑀲𑁆𑀲𑀔𑀡𑁆𑀟𑀁 𑀲𑀢𑀪𑁂𑀡𑁆𑀟𑀼, 𑀥𑀚𑀸𑀮𑀼 𑀳𑀭𑀺𑀢𑀸𑀫𑀬𑀁;

𑀲𑀢𑀲𑀳𑀲𑁆𑀲𑀸𑀦𑀺 𑀩𑁆𑀬𑀽𑀳𑀸𑀦𑀺, 𑀩𑁆𑀬𑀫𑁆𑀳𑁂 𑀧𑀸𑀢𑀼𑀭𑀳𑀁𑀲𑀼 𑀫𑁂.

𑁧𑁬.

𑀲𑁄𑀡𑁆𑀡𑀫𑀬𑀸 𑀫𑀡𑀺𑀫𑀬𑀸, 𑀮𑁄𑀳𑀺𑀢𑀗𑁆𑀓𑀫𑀬𑀸 𑀧𑀺𑀘;

𑀨𑀮𑀺𑀓𑀸 𑀧𑀺𑀘 𑀧𑀮𑁆𑀮𑀗𑁆𑀓𑀸, 𑀬𑀤𑀺𑀘𑁆𑀙𑀓 𑀬𑀤𑀺𑀘𑁆𑀙𑀓𑀸.

𑁧𑁭.

𑀫𑀳𑀸𑀭𑀳𑀜𑁆𑀘 𑀲𑀬𑀦𑀁, 𑀢𑀽𑀮𑀺𑀓𑀁 𑀯𑀺𑀓𑀢𑀻𑀬𑀓𑀁;

𑀉𑀤𑁆𑀤𑀮𑁄𑀫𑀺𑀓𑀏𑀓𑀦𑁆𑀢𑀁, 𑀩𑀺𑀫𑁆𑀩𑁄𑀳𑀦𑀲𑀫𑀸𑀬𑀼𑀢𑀁.

𑁧𑁮.

𑀪𑀯𑀦𑀸 ¶ 𑀦𑀺𑀓𑁆𑀔𑀫𑀺𑀢𑁆𑀯𑀸𑀦, 𑀘𑀭𑀦𑁆𑀢𑁄 𑀤𑁂𑀯𑀘𑀸𑀭𑀺𑀓𑀁;

𑀬𑀤𑀸 𑀇𑀘𑁆𑀙𑀸𑀫𑀺 𑀕𑀫𑀦𑀁, 𑀤𑁂𑀯𑀲𑀁𑀖𑀧𑀼𑀭𑀓𑁆𑀔𑀢𑁄.

𑁧𑁯.

𑀧𑀼𑀧𑁆𑀨𑀲𑁆𑀲 𑀳𑁂𑀝𑁆𑀞𑀸 𑀢𑀺𑀝𑁆𑀞𑀸𑀫𑀺, 𑀉𑀧𑀭𑀺𑀘𑁆𑀙𑀤𑀦𑀁 𑀫𑀫;

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁, 𑀓𑀡𑀺𑀓𑀸𑀭𑁂𑀳𑀺 𑀙𑀸𑀤𑀺𑀢𑀁.

𑁨𑁦.

𑀲𑀝𑁆𑀞𑀺𑀢𑀼𑀭𑀺𑀬𑀲𑀳𑀲𑁆𑀲𑀸𑀦𑀺, 𑀲𑀸𑀬𑀁 𑀧𑀸𑀢𑀁 𑀉𑀧𑀝𑁆𑀞𑀳𑀼𑀁;

𑀧𑀭𑀺𑀯𑀸𑀭𑁂𑀦𑁆𑀢𑀺 𑀫𑀁 𑀦𑀺𑀘𑁆𑀘𑀁, 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑀸.

𑁨𑁧.

𑀢𑀢𑁆𑀣 𑀦𑀘𑁆𑀘𑁂𑀳𑀺 𑀕𑀻𑀢𑁂𑀳𑀺, 𑀢𑀸𑀮𑁂𑀳𑀺 𑀯𑀸𑀤𑀺𑀢𑁂𑀳𑀺 𑀘;

𑀭𑀫𑀸𑀫𑀺 𑀔𑀺𑀟𑁆𑀟𑀸𑀭𑀢𑀺𑀬𑀸, 𑀫𑁄𑀤𑀸𑀫𑀺 𑀓𑀸𑀫𑀓𑀸𑀫𑀳𑀁.

𑁨𑁨.

𑀢𑀢𑁆𑀣 𑀪𑀼𑀢𑁆𑀯𑀸 𑀘 𑀧𑀺𑀢𑁆𑀯𑀸 𑀘, 𑀫𑁄𑀤𑀸𑀫𑀺 𑀢𑀺𑀤𑀲𑁂 𑀢𑀤𑀸;

𑀦𑀸𑀭𑀻𑀕𑀡𑁂𑀳𑀺 𑀲𑀳𑀺𑀢𑁄, 𑀫𑁄𑀤𑀸𑀫𑀺 𑀩𑁆𑀬𑀫𑁆𑀳𑀫𑀼𑀢𑁆𑀢𑀫𑁂.

𑁨𑁩.

𑀲𑀢𑀸𑀦𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀜𑁆𑀘, 𑀤𑁂𑀯𑀭𑀚𑁆𑀚 𑀫𑀓𑀸𑀭𑀬𑀺𑀁;

𑀲𑀢𑀸𑀦𑀁 𑀢𑀻𑀡𑀺𑀓𑁆𑀔𑀢𑁆𑀢𑀼𑀁𑀘, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁;

𑀧𑀤𑁂𑀲𑀭𑀚𑁆𑀚𑀁 𑀯𑀺𑀧𑀼𑀮𑀁, 𑀕𑀡𑀦𑀸𑀢𑁄 𑀅𑀲𑀁𑀔𑀺𑀬𑀁.

𑁨𑁪.

𑀪𑀯𑀸𑀪𑀯𑁂 𑀲𑀁𑀲𑀭𑀦𑁆𑀢𑁄, 𑀫𑀳𑀸𑀪𑁄𑀕𑀁 𑀮𑀪𑀸𑀫𑀳𑀁;

𑀪𑁄𑀕𑁂 𑀫𑁂 𑀊𑀦𑀢𑀸 𑀦𑀢𑁆𑀣𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺 𑀤𑀁 𑀨𑀮𑀁.

𑁨𑁫.

𑀤𑁆𑀯𑁂 𑀫𑁂 𑀪𑀯𑁂 𑀲𑀁𑀲𑀭𑀸𑀫𑀺, 𑀤𑁂𑀯𑀢𑁆𑀢𑁂 𑀅𑀣 𑀫𑀸𑀦𑀼𑀲𑁂;

𑀅𑀜𑁆𑀜𑀁 𑀕𑀢𑀺𑀁 𑀦 𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁬.

𑀤𑁆𑀯𑁂 𑀫𑁂 𑀓𑀼𑀮𑁂 𑀧𑀚𑀸𑀦𑀸𑀫𑀺, 𑀔𑀢𑁆𑀢𑀺𑀬𑁂 𑀘𑀸𑀧𑀺 𑀩𑁆𑀭𑀸𑀳𑁆𑀫𑀡𑁂;

𑀦𑀻𑀘𑁂 𑀓𑀼𑀮𑁂 𑀦 𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁭.

𑀳𑀢𑁆𑀣𑀺𑀬𑀸𑀦𑀁 𑀅𑀲𑁆𑀲𑀬𑀸𑀦𑀁, 𑀲𑀺𑀯𑀺𑀓𑀁 𑀲𑀦𑁆𑀤𑀫𑀸𑀦𑀺𑀓𑀁;

𑀮𑀪𑀸𑀫𑀺 𑀲𑀩𑁆𑀩𑀫𑁂𑀯𑁂 𑀢𑀁, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁮.

𑀤𑀸𑀲𑀻𑀕𑀡𑀁 𑀤𑀸𑀲𑀕𑀡𑀁, 𑀦𑀸𑀭𑀺𑀬𑁄 𑀘 𑀅𑀮𑀗𑁆𑀓𑀢𑀸;

𑀮𑀪𑀸𑀫𑀺 𑀲𑀩𑁆𑀩 𑀫𑁂𑀯𑁂 𑀢𑀁, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁨𑁯.

𑀓𑁄𑀲𑁂𑀬𑁆𑀬𑀓𑀫𑁆𑀩𑀮𑀺𑀬𑀸𑀦𑀺, 𑀔𑁄𑀫𑀓𑀧𑁆𑀧𑀸𑀲𑀺𑀓𑀸𑀦𑀺𑀘;

𑀮𑀪𑀸𑀫𑀺 𑀲𑀩𑁆𑀩𑀫𑁂𑀯𑁂𑀢𑀁, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁦.

𑀦𑀯𑀯𑀢𑁆𑀣𑀁 ¶ 𑀦𑀯𑀨𑀮𑀁, 𑀦𑀯𑀕𑁆𑀕𑀭𑀲𑀪𑁄𑀚𑀦𑀁;

𑀮𑀪𑀸𑀫𑀺 𑀲𑀩𑁆𑀩𑀫𑁂𑀯𑁂𑀢𑀁, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁧.

𑀇𑀫𑀁 𑀔𑀸𑀤 𑀇𑀫𑀁 𑀪𑀼𑀜𑁆𑀚, 𑀇𑀫𑀫𑁆𑀳𑀺 𑀲𑀬𑀦𑁂 𑀲𑀬;

𑀮𑀪𑀸𑀫𑀺 𑀲𑀩𑁆𑀩𑀫𑁂𑀯𑁂𑀢𑀁, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁨.

𑀲𑀩𑁆𑀩𑀢𑁆𑀣 𑀧𑀽𑀚𑀺𑀢𑁄 𑀳𑁄𑀫𑀺, 𑀬𑀲𑁄 𑀅𑀘𑁆𑀘𑀼𑀕𑁆𑀕𑀢𑁄 𑀫𑀫;

𑀫𑀳𑁂𑀲𑀓𑁆𑀔𑁄 𑀖𑀤𑀸 𑀳𑁄𑀫𑀺, 𑀅𑀪𑁂𑀚𑁆𑀚𑀧𑀭𑀺𑀲𑁄 𑀲𑀤𑀸;

𑀜𑀸𑀢𑀻𑀦𑀁 𑀉𑀢𑁆𑀢𑀫𑁄 𑀳𑁄𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁩.

𑀲𑀻𑀢𑀁 𑀉𑀡𑁆𑀳𑀁 𑀦 𑀚𑀸𑀦𑀸𑀫𑀺, 𑀧𑀭𑀺𑀴𑀸𑀳𑁄 𑀦 𑀯𑀺𑀚𑁆𑀚𑀢𑀺;

𑀅𑀣𑁄 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁, 𑀳𑀤𑀬𑁂 𑀫𑁂 𑀦 𑀯𑀺𑀚𑁆𑀚𑀢𑀺.

𑁩𑁪.

𑀲𑀼𑀯𑀡𑁆𑀡𑀯𑀡𑁆𑀡𑁄 𑀳𑀼𑀢𑁆𑀯𑀸𑀦, 𑀲𑀁𑀲𑀭𑀸𑀫𑀺 𑀪𑀯𑀸𑀪𑀯𑁂;

𑀯𑁂𑀯𑀡𑁆𑀡𑀺𑀬𑀁 𑀦 𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁫.

𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸𑀦, 𑀲𑀼𑀓𑁆𑀓𑀫𑀽𑀮𑁂𑀦 𑀘𑁄𑀤𑀺𑀢𑁄;

𑀲𑀸𑀯𑀢𑁆𑀣𑀺𑀬𑀁 𑀧𑀼𑀭𑁂 𑀚𑀸𑀢𑁄, 𑀫𑀳𑀸𑀲𑀸𑀮𑁂 𑀲𑀼𑀅𑀟𑁆𑀠𑀓𑁂.

𑁩𑁬.

𑀧𑀜𑁆𑀘𑀓𑀸𑀫𑀕𑀼𑀡𑁂 𑀳𑀺𑀢𑁆𑀯𑀸, 𑀧𑀩𑁆𑀩𑀚𑀺𑀁𑀅𑀦𑀕𑀸𑀭𑀺𑀬𑀁;

𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄𑀳𑀁, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁩𑁭.

𑀉𑀧𑀲𑀫𑁆𑀧𑀸𑀤𑀬𑀻 𑀩𑀼𑀤𑁆𑀥𑁄, 𑀕𑀼𑀡𑀫𑀜𑁆𑀜𑀸𑀬 𑀘𑀓𑁆𑀔𑀼𑀫𑀸;

𑀢𑀭𑀼𑀡𑁄𑀯 𑀧𑀽𑀚𑀦𑀻𑀬𑁄 𑀳𑀁, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁮.

𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑀼𑀤𑁆𑀥𑀁 𑀫𑁂, 𑀲𑀫𑀸𑀥𑀺𑀓𑀼𑀲𑀮𑁄 𑀅𑀳𑀁;

𑀅𑀪𑀺𑀜𑁆𑀜𑀸𑀧𑀸𑀭𑀫𑀺𑀧𑁆𑀧𑀢𑁆𑀢𑁄, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁩𑁯.

𑀧𑀝𑀺𑀲𑀫𑁆𑀪𑀺𑀤𑀸 𑀅𑀦𑀼𑀧𑁆𑀧𑀢𑁆𑀢𑁄, 𑀇𑀤𑁆𑀥𑀺𑀧𑀸𑀤𑁂𑀲𑀼 𑀓𑁄𑀯𑀺𑀤𑁄;

𑀲𑀤𑁆𑀥𑀫𑁆𑀫𑁂 𑀧𑀸𑀭𑀫𑀺𑀧𑁆𑀧𑀢𑁆𑀢𑁄, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁪𑁦.

𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀫𑁆𑀳𑀺, 𑀬𑀁 𑀩𑀼𑀤𑁆𑀥𑀫𑀪𑀺𑀧𑀽𑀚𑀬𑀺𑀁;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀩𑀼𑀤𑁆𑀥𑀧𑀽𑀚𑀸𑀬𑀺𑀤𑀁 𑀨𑀮𑀁.

𑁪𑁧.

𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁨.

𑀲𑁆𑀯𑀸𑀕𑀢𑀁 ¶ 𑀯𑀢 𑀫𑁂 𑀆𑀲𑀺, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀦𑁆𑀢𑀺𑀓𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑁄, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁩.

𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄 𑀘, 𑀯𑀺𑀫𑁂𑀓𑁆𑀔𑀸 𑀧𑀺𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁𑀢𑀺;

𑀢𑀁 𑀲𑀼𑀢𑁆𑀯𑀸 𑀩𑀳𑀽 𑀓𑀼𑀲𑀮𑀓𑀫𑁆𑀫𑀧𑀭𑀸𑀬𑀡𑀸 𑀅𑀳𑁂𑀲𑀼𑀁.

𑁪𑁪.

𑀲𑀳𑁂𑀢𑀼𑀓𑀸 𑀧𑀘𑁆𑀙𑀺𑀫𑀺𑀓𑀸𑀧𑀺 𑀲𑀢𑁆𑀢𑀸,

𑀧𑀸𑀧𑀁 𑀦 𑀲𑀓𑁆𑀓𑁄𑀦𑁆𑀢𑀺 𑀚𑀳𑀸𑀢𑀼𑀫𑁂𑀯𑀁;

𑀅𑀦𑀺𑀘𑁆𑀙𑀫𑀸𑀦𑁂𑀳𑀺 𑀚𑀦𑁂𑀳𑀺 𑀤𑀼𑀓𑁆𑀔𑀁,

𑀆𑀭𑀸𑀯 𑀧𑀸𑀧𑀁 𑀧𑀭𑀺𑀯𑀚𑁆𑀚𑀦𑀻𑀬𑀁𑀢𑀺.

𑀉𑀢𑁆𑀢𑀭𑀲𑀸𑀫𑀡𑁂𑀭𑀲𑁆𑀲 𑀯𑀢𑁆𑀣𑀼𑀁 𑀘𑀢𑀼𑀢𑁆𑀣𑀁.

𑁨𑁫. 𑀓𑀯𑀻𑀭𑀧𑀝𑁆𑀝𑀦 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀚𑀫𑁆𑀩𑀼𑀤𑀻𑀧𑁂 𑀓𑀺𑀭 𑀘𑁄𑀴𑀭𑀝𑁆𑀞𑁂 𑀓𑀸𑀯𑀻𑀭𑀧𑀝𑁆𑀝𑀦𑀁 𑀦𑀸𑀫 𑀅𑀳𑁄𑀲𑀺. 𑀢𑀢𑁆𑀣 𑀫𑀸𑀳𑀺𑀲𑁆𑀲𑀭𑀺𑀓𑀸 𑀩𑀳𑀽 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀯𑀲𑀦𑁆𑀢𑀺. 𑀢𑀢𑁆𑀣𑁂𑀓𑀲𑁆𑀫𑀺𑀁 𑀤𑁂𑀯𑀸𑀮𑀬𑁂 𑀘𑀺𑀢𑁆𑀢𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀏𑀓𑀲𑁆𑀫𑀺𑀁 𑀨𑀮𑀓𑁂 𑀇𑀲𑁆𑀲𑀭𑀲𑁆𑀲 𑀑𑀦𑀫𑀺𑀢𑁆𑀯𑀸 𑀯𑀦𑁆𑀤𑀦𑀸𑀓𑀸𑀭𑀁 𑀪𑀕𑀯𑀢𑁄 𑀭𑀽𑀧𑀁 𑀅𑀓𑀁𑀲𑀼. 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀢𑁆𑀣 𑀩𑀳𑀽 𑀉𑀧𑀸𑀲𑀓𑀸 𑀢𑀁 𑀤𑁂𑀯𑀓𑀼𑀮𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀘𑀺𑀢𑁆𑀢𑀓𑀫𑁆𑀫𑀸𑀦𑀺 𑀑𑀮𑁄𑀓𑁂𑀦𑁆𑀢𑀸 𑀢𑀲𑁆𑀫𑀺𑀁 𑀨𑀮𑀓𑁂 𑀢𑀁 𑀘𑀺𑀢𑁆𑀢𑀓𑀫𑁆𑀫𑀁 𑀅𑀤𑁆𑀤𑀲𑀁𑀲𑀼. 𑀤𑀺𑀲𑁆𑀯𑀸𑀦 𑀢𑁂 𑀅𑀳𑁄 𑀅𑀫𑁆𑀳𑁂𑀳𑀺 𑀅𑀧𑀲𑁆𑀲𑀺𑀢𑀩𑁆𑀩𑀁 𑀧𑀲𑁆𑀲𑀺𑀢𑀁. 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀧𑀚𑀸𑀬 𑀘 𑀅𑀧𑀭𑀺𑀫𑀸𑀡𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀪𑀕𑀯𑀢𑁄 𑀉𑀢𑁆𑀢𑀭𑀺𑀢𑀭𑀁 𑀞𑀧𑁂𑀢𑁆𑀯𑀸 𑀲𑀫𑀲𑀫𑁄𑀧𑀺 𑀦𑀢𑁆𑀣𑀺. 𑀲𑀓𑀮𑁂𑀳𑀺 𑀲𑀢𑁆𑀢𑀦𑀺𑀓𑀸𑀬𑁂𑀳𑀺 𑀯𑀦𑁆𑀤𑀦𑀻𑀬𑁄 𑀧𑀽𑀚𑀦𑀻𑀬𑁄 𑀪𑀕𑀯𑀸. 𑀅𑀦𑀦𑀼𑀭𑀽𑀧𑀁 𑀢𑀲𑁆𑀲 𑀏𑀢𑁂𑀳𑀺 𑀓𑀢𑀁𑀢𑀺 𑀭𑁄𑀤𑀦𑁆𑀢𑀸 𑀧𑀭𑀺𑀤𑁂𑀯𑀦𑁆𑀢𑀸 𑀭𑀸𑀚𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀉𑀕𑁆𑀖𑁄𑀲𑁂𑀲𑀼𑀁, 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀓𑀲𑁆𑀫𑀸 𑀢𑀼𑀫𑁆𑀳𑁂 ¶ 𑀉𑀕𑁆𑀖𑁄𑀲𑁂𑀣𑀸𑀢𑀺 𑀧𑀼𑀘𑁆𑀙𑀺, 𑀢𑁂 𑀏𑀯 𑀫𑀸𑀳𑀁𑀲𑀼. 𑀤𑁂𑀯 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀤𑁂𑀯𑀸𑀢𑀺𑀤𑁂𑀯𑁄 𑀲𑀓𑁆𑀓𑀸𑀢𑀺𑀲𑀓𑁆𑀓𑁄 𑀩𑁆𑀭𑀳𑁆𑀫𑀸𑀢𑀺𑀩𑁆𑀭𑀳𑁆𑀫𑀸 𑀫𑁂𑀭𑀼𑀯 𑀅𑀘𑀮𑁄 𑀲𑀸𑀕𑀭𑁄 𑀕𑀫𑁆𑀪𑀻𑀭𑁄 𑀆𑀓𑀸𑀲𑁄𑀯 𑀅𑀦𑀦𑁆𑀢𑁄 𑀧𑀣𑀯𑀻𑀯 𑀧𑀢𑁆𑀣𑀝𑁄𑀢𑀺𑀆𑀤𑀻𑀳𑀺 𑀪𑀕𑀯𑀢𑁄 𑀕𑀼𑀡𑀁 𑀯𑀡𑁆𑀡𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂.

𑁧.

𑀩𑀢𑁆𑀢𑀺𑀁𑀲𑀮𑀓𑁆𑀔𑀡𑀥𑀭𑁄, 𑀲𑀼𑀦𑀓𑁆𑀔𑀢𑁆𑀢𑁄𑀯 𑀘𑀦𑁆𑀤𑀺𑀫𑀸;

𑀅𑀦𑀼𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑁄, 𑀲𑀸𑀮𑀭𑀸𑀚𑀸𑀯 𑀨𑀼𑀮𑁆𑀮𑀺𑀢𑁄.

𑁨.

𑀭𑀁𑀲𑀺𑀚𑀸𑀮𑀧𑀭𑀺𑀓𑁆𑀔𑀺𑀢𑁆𑀢𑁄, 𑀤𑀺𑀢𑁆𑀢𑁄𑀯 𑀓𑀦𑀓𑀸𑀘𑀮𑁄;

𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀯𑀼𑀢𑁄, 𑀲𑀢𑀭𑀁𑀲𑀺 𑀤𑀺𑀯𑀸𑀓𑀭𑁄.

𑁩.

𑀲𑁄𑀡𑁆𑀡𑀸 𑀦𑀦𑁄 𑀚𑀺𑀦𑀯𑀭𑁄, 𑀲𑀫𑀡𑀻𑀯 𑀲𑀺𑀮𑀼𑀘𑁆𑀘𑀬𑁄;

𑀓𑀭𑀼𑀡𑀸𑀧𑀼𑀡𑁆𑀡𑀳𑀤𑀬𑁄, 𑀯𑀺𑀯𑀝𑁆𑀝𑁄 𑀯𑀺𑀬 𑀲𑀸𑀕𑀭𑁄.

𑁪.

𑀮𑁄𑀓𑀯𑀺𑀲𑁆𑀲𑀼𑀢𑀓𑀺𑀢𑁆𑀢𑀻𑀯, 𑀲𑀺𑀦𑁂𑀭𑀼𑀯 𑀦𑀕𑀼𑀢𑁆𑀢𑀫𑁄;

𑀬𑀲𑀲𑀸 𑀯𑀺𑀢𑀢𑁄 𑀥𑀻𑀭𑁄, 𑀆𑀓𑀸𑀲𑀲𑀤𑀺𑀲𑁄 𑀫𑀼𑀦𑀺.

𑁫.

𑀅𑀲𑀗𑁆𑀕𑀘𑀺𑀢𑁆𑀢𑁄 𑀲𑀩𑁆𑀩𑀢𑁆𑀣, 𑀅𑀦𑀺𑀮𑁄 𑀯𑀺𑀬 𑀦𑀸𑀬𑀓𑁄;

𑀧𑀢𑀺𑀝𑁆𑀞𑀸 𑀲𑀩𑁆𑀩𑀪𑀽𑀢𑀸𑀦𑀁, 𑀫𑀳𑀻𑀯 𑀫𑀼𑀦𑀺𑀲𑀼𑀢𑁆𑀢𑀫𑁄.

𑁬.

𑀅𑀦𑀽𑀧𑀮𑀺𑀢𑁆𑀢𑁄 𑀮𑁄𑀓𑁂𑀦, 𑀢𑁄𑀬𑁂𑀦 𑀧𑀤𑀼𑀫𑀁 𑀬𑀣𑀸;

𑀓𑀼𑀯𑀸𑀤𑀕𑀘𑁆𑀙𑀤𑀳𑀦𑁄, 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯 𑀲𑁄𑀪𑀢𑀺.

𑁭.

𑀅𑀕𑀤𑁄 𑀯𑀺𑀬 𑀲𑀩𑁆𑀩𑀢𑁆𑀣, 𑀓𑀺𑀮𑁂𑀲𑀯𑀺𑀲𑀦𑀸𑀲𑀓𑁄;

𑀕𑀦𑁆𑀥𑀫𑀸𑀤𑀦𑀲𑁂𑀮𑁄𑀯, 𑀕𑀼𑀡𑀕𑀦𑁆𑀥𑀯𑀺𑀪𑀽𑀲𑀺𑀢𑁄.

𑁮.

𑀕𑀼𑀡𑀸𑀦𑀁 𑀆𑀓𑀭𑁄 𑀥𑀻𑀭𑁄, 𑀭𑀢𑀦𑀸𑀦𑀁𑀯 𑀲𑀸𑀕𑀭𑁄;

𑀲𑀺𑀦𑁆𑀥𑀽𑀯 𑀯𑀦𑀭𑀸𑀚𑀻𑀦𑀁, 𑀓𑀺𑀮𑁂𑀲𑀫𑀮𑀳𑀸𑀭𑀓𑁄.

𑁯.

𑀯𑀺𑀚𑀬𑀻𑀯 𑀫𑀳𑀸𑀬𑁄𑀥𑁄, 𑀫𑀸𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑁄;

𑀘𑀓𑁆𑀓𑀯𑀢𑁆𑀢𑀻𑀯 𑀲𑁄 𑀭𑀸𑀚𑀸, 𑀩𑁄𑀚𑁆𑀛𑀗𑁆𑀕𑀭𑀢𑀦𑀺𑀲𑁆𑀲𑀭𑁄.

𑁧𑁦.

𑀫𑀳𑀸𑀪𑀺𑀲𑀓𑁆𑀓𑀲𑀗𑁆𑀓𑀸𑀲𑁄, 𑀤𑁄𑀲𑀩𑁆𑀬𑀸𑀥𑀺𑀢𑀺𑀓𑀺𑀘𑁆𑀙𑀓𑁄;

𑀲𑀮𑁆𑀮𑀓𑀢𑁆𑀢𑁄 𑀬𑀣𑀸 𑀯𑁂𑀚𑁆𑀚𑀸, 𑀤𑀺𑀝𑁆𑀞𑀺𑀕𑀡𑁆𑀟𑀯𑀺𑀨𑀸𑀮𑀓𑁄.

𑁧𑁧.

𑀲𑀢𑁆𑀣𑀸 ¶ 𑀦𑁄 𑀪𑀕𑀯𑀸 𑀤𑁂𑀯, 𑀫𑀳𑀸𑀩𑁆𑀭𑀳𑁆𑀫𑁂𑀳𑀺 𑀯𑀦𑁆𑀤𑀺𑀢𑁄;

𑀤𑁂𑀯𑀺𑀦𑁆𑀤𑀲𑀼𑀭𑀲𑀺𑀤𑁆𑀥𑁂𑀳𑀺, 𑀯𑀦𑁆𑀤𑀦𑀻𑀬𑁄 𑀲𑀤𑀸 𑀤𑀭𑀸.

𑁧𑁨.

𑀲𑀩𑁆𑀩𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼, 𑀬𑁂 𑀅𑀕𑁆𑀕𑀸 𑀬𑁂 𑀘 𑀧𑀽𑀚𑀺𑀢𑀸;

𑀢𑁂𑀲𑀫𑀕𑁆𑀕𑁄 𑀫𑀳𑀸𑀭𑀸𑀚, 𑀪𑀕𑀯𑀸 𑀦𑁄 𑀧𑀢𑀸𑀧𑀯𑀸𑀢𑀺.

𑀅𑀬𑀼𑀢𑁆𑀢𑀁 𑀤𑁂𑀯 𑀤𑁂𑀯𑀓𑀼𑀮𑁂𑀳𑀺 𑀓𑀢𑀁𑀢𑀺 𑀆𑀳𑀁𑀲𑀼. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀪𑁄 𑀲𑀩𑁆𑀩𑁂𑀧𑀺 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀤𑁂𑀯𑀢𑀸𑀦𑀁 𑀫𑀳𑀦𑁆𑀢𑀪𑀸𑀯𑀁 𑀓𑀣𑁂𑀦𑁆𑀢𑀺. 𑀢𑀼𑀫𑁆𑀳𑀸𑀓𑀁 𑀧𑀦 𑀲𑀢𑁆𑀣𑀼𑀦𑁄 𑀫𑀳𑀦𑁆𑀢𑀪𑀸𑀯𑀁 𑀓𑀣𑀁 𑀅𑀫𑁆𑀳𑀸𑀓𑀁 𑀚𑀸𑀦𑀸𑀧𑁂𑀣𑀸𑀢𑀺, 𑀉𑀧𑀸𑀲𑀓𑀸 𑀦 𑀕𑀭𑀼 𑀢𑁆𑀯𑀁 𑀫𑀳𑀸𑀭𑀸𑀚 𑀨𑀮𑀓𑀁 𑀆𑀳𑀭𑀸𑀧𑁂𑀢𑁆𑀯𑀸 𑀲𑀼𑀤𑁆𑀥𑀯𑀢𑁆𑀣𑁂𑀦 𑀯𑁂𑀞𑁂𑀢𑁆𑀯𑀸 𑀢𑀁 𑀅𑀢𑁆𑀢𑀦𑁄 𑀫𑀼𑀤𑁆𑀤𑀺𑀓𑀸𑀬 𑀮𑀜𑁆𑀙𑀺𑀢𑁆𑀯𑀸 𑀲𑀼𑀭𑀓𑁆𑀔𑀺𑀢𑀲𑀼𑀕𑁄𑀧𑀺𑀢𑁂 𑀏𑀓𑀲𑁆𑀫𑀺𑀁 𑀤𑁂𑀯𑀓𑀼𑀮𑁂 𑀞𑀧𑁂𑀢𑁆𑀯𑀸 𑀲𑀢𑁆𑀢𑀸𑀳𑀘𑁆𑀘𑀬𑁂𑀦 𑀆𑀳𑀭𑀸𑀧𑁂𑀢𑁆𑀯𑀸 𑀢𑀁 𑀑𑀮𑁄𑀓𑁂𑀣, 𑀢𑀤𑀸 𑀦𑁄 𑀲𑀢𑁆𑀣𑀼𑀦𑁄 𑀫𑀳𑀦𑁆𑀢𑀸𑀦𑀼𑀪𑀸𑀯𑀁 𑀚𑀸𑀦𑀸𑀣𑀸𑀢𑀺 𑀆𑀳𑀁𑀲𑀼, 𑀅𑀣 𑀭𑀸𑀚𑀸 𑀢𑁂𑀲𑀁 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀓𑀸𑀭𑀸𑀧𑁂𑀢𑁆𑀯𑀸 𑀅𑀦𑁆𑀢𑁄𑀤𑁂𑀯𑀓𑀼𑀮𑁂 𑀞𑀧𑁂𑀢𑁆𑀯𑀸 𑀲𑀩𑁆𑀩𑀤𑁆𑀯𑀸𑀭𑀸𑀦𑀺 𑀧𑀺𑀤𑀳𑀺𑀢𑁆𑀯𑀸 𑀮𑀜𑁆𑀙𑁂𑀢𑁆𑀯𑀸 𑀭𑀓𑁆𑀔𑁂𑀬𑁆𑀬𑀸𑀣𑀸𑀢𑀺 𑀦𑀺𑀬𑁄𑀚𑁂𑀲𑀺. 𑀢𑀢𑁄 𑀢𑁂 𑀉𑀧𑀸𑀲𑀓𑀸 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀤𑀸𑀦𑀁 𑀤𑁂𑀦𑁆𑀢𑀸 𑀲𑀻𑀮𑀁 𑀭𑀓𑁆𑀔𑀦𑁆𑀢𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀲𑀩𑁆𑀩𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀺𑀁 𑀪𑀸𑀯𑁂𑀦𑁆𑀢𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀢𑁆𑀢𑀦𑀸 𑀓𑀢𑀧𑀼𑀜𑁆𑀜𑁂𑀲𑀼 𑀧𑀢𑁆𑀢𑀺𑀁 𑀤𑁂𑀦𑁆𑀢𑀸 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀧𑀽𑀚𑀁 𑀓𑀭𑁄𑀦𑁆𑀢𑀸 𑀏𑀯𑀁 𑀉𑀕𑁆𑀖𑁄𑀲𑁂𑀲𑀼𑀁. 𑀅𑀫𑁆𑀳𑀸𑀓𑀁 𑀓𑀢𑀓𑀼𑀲𑀮𑀦𑀺𑀲𑁆𑀲𑀦𑁆𑀤𑁂𑀦 𑀮𑁄𑀓𑁂 𑀫𑀳𑀺𑀤𑁆𑀥𑀺𑀓𑀸 𑀫𑀳𑀸𑀦𑀼𑀪𑀸𑀯𑀸 𑀲𑀩𑁆𑀩𑁂 𑀤𑁂𑀯𑀸 𑀘 𑀮𑁄𑀓𑀁 𑀧𑀸𑀮𑁂𑀦𑁆𑀢𑀸 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀘 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼𑀦𑁄 𑀉𑀧𑀝𑁆𑀞𑀸𑀦𑀸𑀬 [𑀉𑀧𑀝𑁆𑀞𑀸𑀬 𑀇𑀢𑀺𑀲𑀩𑁆𑀩𑀢𑁆𑀣] 𑀞𑀺𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑀽𑀢𑀺 𑀲𑀘𑁆𑀘𑀓𑀺𑀭𑀺𑀬𑀁 𑀅𑀓𑀁𑀲𑀼. 𑀅𑀣 𑀢𑁂𑀲𑀁 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀢𑀲𑁆𑀫𑀺𑀁 𑀔𑀡𑁂 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀢𑀢𑁄 𑀲𑁄 𑀫𑀦𑀼𑀲𑁆𑀲𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀳𑀺 𑀓𑀢𑀁 𑀢𑀁 𑀯𑀺𑀧𑁆𑀧𑀓𑀸𑀭𑀁 𑀤𑀺𑀲𑁆𑀯𑀸 𑀲𑀁𑀯𑀺𑀕𑁆𑀕𑁄 𑀆𑀕𑀦𑁆𑀢𑁆𑀯𑀸 𑀇𑀲𑁆𑀲𑀭𑀁 𑀪𑀕𑀯𑀢𑁄 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀲𑀬𑀺𑀢𑀸𑀓𑀸𑀭𑀁 ¶ 𑀓𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀉𑀧𑀸𑀲𑀓𑀸𑀦𑀁 𑀓𑀣𑁂𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀅𑀕𑀫𑀸𑀲𑀺. 𑀢𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂𑀧𑀸𑀢𑁄𑀯 𑀢𑁂 𑀲𑀩𑁆𑀩𑁂𑀧𑀺 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼. 𑀤𑁂𑀯 𑀇𑀲𑁆𑀲𑀭𑁄 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀧𑀦𑁆𑀦𑁄𑀢𑀺. 𑀅𑀣 𑀭𑀸𑀚𑀸 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀢𑁂𑀳𑀺 𑀧𑀭𑀺𑀯𑀼𑀢𑁄 𑀤𑁂𑀯𑀓𑀼𑀮𑀁 𑀕𑀦𑁆𑀢𑁆𑀯𑀸 𑀮𑀜𑁆𑀙𑀁 𑀪𑀺𑀦𑁆𑀤𑀸𑀧𑁂𑀢𑁆𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀨𑀮𑀓𑀁 𑀆𑀳𑀭𑀸𑀧𑁂𑀢𑁆𑀯𑀸 𑀯𑁂𑀞𑀺𑀢𑀲𑀸𑀝𑀓𑁂 𑀫𑁄𑀘𑀸𑀧𑁂𑀲𑀺. 𑀅𑀣 𑀭𑀸𑀚𑀸 𑀘 𑀫𑀳𑀸𑀚𑀦𑁄 𑀘 𑀢𑀁 𑀫𑀳𑀦𑁆𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀳𑀸𑀬 𑀲𑀩𑁆𑀩𑁂 𑀲𑀢𑁆𑀣𑀼𑀦𑁄 𑀲𑀭𑀡 𑀫𑀕𑀫𑀁𑀲𑀼. 𑀅𑀣 𑀭𑀸𑀚𑀸 𑀢𑀁 𑀤𑁂𑀯𑀓𑀼𑀮𑀁 𑀪𑀺𑀦𑁆𑀤𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑀁 𑀭𑀫𑀡𑀻𑀬𑀁 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀧𑀼𑀜𑁆𑀜𑀓𑀫𑁆𑀫𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺.

𑁧𑁩.

𑀅𑀦𑀩𑁆𑀪𑀼𑀢𑀁 𑀲𑀢𑁆𑀣𑀼 𑀥𑀭𑀻𑀬𑀫𑀸𑀦𑁂,

𑀓𑀭𑁄𑀦𑁆𑀢𑀺 𑀤𑀺𑀲𑁆𑀯𑀸 𑀓𑀼𑀲𑀮𑀸𑀦𑀺 𑀇𑀤𑁆𑀥𑀺𑀁;

𑀬𑁂 𑀢𑀁 𑀫𑀼𑀦𑀺𑀦𑁆𑀤𑁂 𑀧𑀭𑀺𑀦𑀺𑀩𑁆𑀩𑀼𑀢𑀫𑁆𑀳𑀺,

𑀓𑀭𑁄𑀦𑁆𑀢𑀺 𑀧𑀼𑀜𑁆𑀜𑀸𑀦𑀺 𑀫𑀳𑀩𑁆𑀪𑀽𑀢𑀁 𑀬𑁂𑀢𑀺.

𑀓𑀸𑀯𑀻𑀭𑀧𑀝𑁆𑀝𑀦𑀯𑀢𑁆𑀣𑀼𑀁 𑀧𑀜𑁆𑀘𑀫𑀁.

𑁨𑁬. 𑀘𑁄𑀭𑀖𑀸𑀢𑀓𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀏𑀓𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀉𑀧𑀦𑀺𑀲𑁆𑀲𑀸𑀬 𑀚𑁂𑀢𑀯𑀦𑁂 𑀯𑀺𑀳𑀭𑀢𑀺 𑀥𑀫𑁆𑀫𑀤𑁂𑀲𑀦𑀸𑀬 𑀫𑀳𑀸𑀚𑀦𑀲𑁆𑀲 𑀲𑀕𑁆𑀕𑀫𑁄𑀓𑁆𑀔𑀲𑀫𑁆𑀧𑀤𑀁 𑀤𑀤𑀫𑀸𑀦𑁄. 𑀢𑀲𑁆𑀫𑀺𑀁𑀲𑀫𑀬𑁂 𑀧𑀜𑁆𑀘𑀲𑀢𑀸 𑀘𑁄𑀭𑀸 𑀅𑀝𑀯𑀺𑀢𑁄 𑀦𑀕𑀭𑀁 𑀆𑀕𑀦𑁆𑀢𑁆𑀯𑀸 𑀭𑀢𑁆𑀢𑀺𑀪𑀸𑀕𑁂 𑀘𑁄𑀭𑀓𑀫𑁆𑀫𑀁 𑀓𑀢𑁆𑀯𑀸 𑀢𑁂𑀦 𑀧𑀼𑀢𑁆𑀢𑀤𑀸𑀭𑁂 𑀧𑁄𑀲𑁂𑀦𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀘𑁄𑀭𑀸 𑀘𑁄𑀭𑀓𑀫𑁆𑀫𑀢𑁆𑀣𑀸𑀬 𑀦𑀕𑀭𑀁 𑀧𑀯𑀺𑀲𑀦𑁆𑀢𑀸 𑀦𑀕𑀭𑀤𑁆𑀯𑀸𑀭𑁂 𑀏𑀓𑀁 𑀤𑀼𑀓𑁆𑀔𑀺𑀢𑀁 𑀚𑀦𑀧𑀤𑀫𑀦𑀼𑀲𑁆𑀲𑀁 𑀧𑀲𑁆𑀲𑀺𑀢𑁆𑀯𑀸 𑀳𑀫𑁆𑀪𑁄 ¶ 𑀓𑀢𑁆𑀣 𑀯𑀲𑀢𑀻𑀢𑀺 𑀧𑀼𑀘𑁆𑀙𑀺𑀁𑀲𑀼, 𑀲𑁄 𑀅𑀢𑁆𑀢𑀚𑀦𑀸 𑀚𑀦𑀧𑀤𑀯𑀸𑀲𑀺𑀪𑀸𑀯𑀁 𑀧𑀓𑀸𑀲𑁂𑀲𑀺. 𑀅𑀣𑀲𑁆𑀲 𑀢𑁂 𑀓𑀲𑁆𑀫𑀸 𑀪𑁄 𑀇𑀫𑀺𑀦𑀸 𑀤𑀼𑀓𑁆𑀔𑀯𑀸𑀲𑁂𑀦 𑀯𑀲𑀺𑀲𑁆𑀲𑀲𑀺, 𑀏𑀳𑀺 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀘𑁄𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀢𑁆𑀣𑀸𑀮𑀗𑁆𑀓𑀸𑀭𑀲𑀫𑁆𑀧𑀦𑁆𑀦𑁄 𑀧𑀼𑀢𑁆𑀢𑀤𑀸𑀭𑀁 𑀧𑁄𑀲𑁂𑀳𑀺. 𑀇𑀫𑀺𑀦𑀸 𑀓𑀧𑀡𑀯𑀸𑀲𑁂𑀦 𑀦 𑀯𑀲𑀸𑀢𑀺 𑀆𑀳𑀁𑀲𑀼. 𑀲𑁄 𑀧𑀦𑀺𑀫𑁂 𑀬𑀼𑀢𑁆𑀢𑀁 𑀓𑀣𑁂𑀦𑁆𑀢𑀻𑀢𑀺 𑀢𑁂𑀲𑀁 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺. 𑀅𑀣 𑀢𑁂 𑀏𑀯𑀁 𑀲𑀢𑀺 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀆𑀕𑀘𑁆𑀙𑀸𑀳𑀻𑀢𑀺 𑀯𑀢𑁆𑀯𑀸 𑀦𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑀁 𑀧𑀯𑀺𑀝𑁆𑀞𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀮𑀼𑀫𑁆𑀧𑀦𑁆𑀢𑀸 𑀘𑁄𑀭𑀓𑀫𑁆𑀫𑀁 𑀅𑀓𑀁𑀲𑀼. 𑀢𑀤𑀸 𑀚𑀸𑀦𑀧𑀤𑀺𑀓𑁄 𑀮𑀤𑁆𑀥𑀯𑀺𑀪𑀯𑁄 𑀇𑀫𑀫𑁂𑀯 𑀯𑀭𑀢𑀭𑀦𑁆𑀢𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀘𑁄𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺, 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀧𑀼𑀭𑀺𑀲𑀸 𑀓𑀢𑀓𑀫𑁆𑀫𑁂 𑀢𑁂 𑀲𑀩𑁆𑀩𑁂𑀯 𑀕𑀳𑁂𑀢𑁆𑀯𑀸 𑀧𑀘𑁆𑀙𑀸𑀩𑀸𑀳𑀁 𑀕𑀸𑀴𑁆𑀳𑀁 𑀩𑀦𑁆𑀥𑀺𑀢𑁆𑀯𑀸 𑀓𑁄𑀲𑀮𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁, 𑀭𑀸𑀚𑀸 𑀢𑁂 𑀤𑀺𑀲𑁆𑀯𑀸 𑀏𑀯𑀫𑀸𑀳, 𑀪𑀡𑁂 𑀢𑀼𑀫𑁆𑀳𑀸𑀓𑀁 𑀅𑀦𑁆𑀢𑀭𑁂 𑀬𑁄 𑀏𑀢𑁂𑀲𑀁 𑀫𑀸𑀭𑁂𑀢𑁆𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀲𑁆𑀲𑀢𑀺, 𑀢𑀲𑁆𑀲 𑀚𑀻𑀯𑀺𑀢𑀤𑀸𑀦𑀁 𑀤𑀫𑁆𑀫𑀻𑀢𑀺, 𑀢𑀁 𑀲𑀼𑀢𑁆𑀯𑀸 𑀢𑁂 𑀘𑁄𑀭𑀸 𑀲𑀩𑁆𑀩𑁂 𑀅𑀜𑁆𑀜𑀫𑀜𑁆𑀜𑀜𑀸𑀢𑀺𑀲𑀼𑀳𑀤𑀲𑀫𑁆𑀩𑀦𑁆𑀥𑀪𑀸𑀯𑁂𑀦 𑀢𑀁 𑀦 𑀇𑀘𑁆𑀙𑀺𑀁𑀲𑀼. 𑀲𑁄 𑀧𑀦 𑀚𑀦𑀧𑀤𑀯𑀸𑀲𑀻 𑀫𑀦𑀼𑀲𑁆𑀲𑁄 𑀅𑀳𑀫𑁂𑀢𑁂 𑀲𑀩𑁆𑀩𑁂 𑀫𑀸𑀭𑁂𑀲𑁆𑀲𑀸𑀫𑀻𑀢𑀺 𑀭𑀜𑁆𑀜𑁄 𑀯𑀢𑁆𑀯𑀸 𑀢𑁂𑀦𑀸𑀦𑀼𑀜𑁆𑀜𑀸𑀢𑁄 𑀢𑁂 𑀲𑀩𑁆𑀩𑁂 𑀫𑀸𑀭𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑁄 𑀭𑀸𑀚𑀸 𑀢𑀲𑁆𑀲 𑀘𑁄𑀭𑀖𑀸𑀢𑀓𑀫𑁆𑀫𑀁 𑀅𑀤𑀸𑀲𑀺. 𑀲𑁄 𑀘𑁄𑀭𑁂 𑀘 𑀯𑀚𑁆𑀛𑀧𑁆𑀧𑀢𑁆𑀢𑁂 𑀘 𑀫𑀸𑀭𑁂𑀦𑁆𑀢𑁄 𑀧𑀜𑁆𑀘𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀯𑀲𑀦𑁆𑀢𑁄 𑀅𑀧𑀭𑀪𑀸𑀕𑁂 𑀫𑀳𑀮𑁆𑀮𑀓𑁄 𑀅𑀳𑁄𑀲𑀺. 𑀅𑀣 𑀲𑁄 𑀫𑀦𑁆𑀤𑀩𑀮𑀢𑁆𑀢𑀸 𑀓𑀢𑀺𑀧𑀬𑀧𑀳𑀸𑀭𑁂𑀦𑀸𑀧𑀺 𑀘𑁄𑀭𑀁 𑀫𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀭𑀸𑀚𑀸 𑀢𑀁 𑀜𑀢𑁆𑀯𑀸 𑀅𑀜𑁆𑀜𑀲𑁆𑀲 𑀘𑁄𑀭𑀖𑀸𑀢𑀓𑀫𑁆𑀫𑀁 𑀅𑀤𑀸𑀲𑀺. 𑀅𑀣 𑀲𑁄 𑀘𑁄𑀭𑀖𑀸𑀢𑀓𑀫𑁆𑀫𑀸 [𑀘𑁄𑀭𑀖𑀸𑀢𑀓𑀫𑁆𑀫 𑀇𑀢𑀺𑀧𑀺𑀓𑀢𑁆𑀣𑀘𑀺] 𑀧𑀭𑀺𑀳𑀻𑀦𑁄 𑀅𑀢𑁆𑀢𑀦𑁄 𑀕𑁂𑀳𑁂 𑀯𑀲𑀢𑀺. 𑀢𑀤𑀸 𑀅𑀜𑁆𑀜𑀢𑀭𑁄 𑀫𑀦𑀼𑀲𑁆𑀲𑁄 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀦𑀸𑀲𑀸𑀯𑀸𑀢𑁂𑀦 𑀫𑀦𑀼𑀲𑁆𑀲𑀫𑀸𑀭𑀡𑀓𑀫𑀦𑁆𑀢𑀁 𑀚𑀸𑀦𑀸𑀢𑀺. 𑀢𑀣𑀸𑀳𑀺 𑀳𑀢𑁆𑀣𑀧𑀸𑀤𑀓𑀡𑁆𑀡𑀦𑀸𑀲𑀲𑀻𑀲𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀙𑁂𑀚𑁆𑀚𑀪𑁂𑀚𑁆𑀚𑀁 𑀓𑀢𑁆𑀢𑀼𑀓𑀸𑀫𑁄 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀦𑀸𑀲𑀸𑀯𑀸𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀢𑀁 𑀢𑀁 𑀞𑀸𑀦𑀁 𑀙𑀺𑀚𑁆𑀚𑀢𑀺 𑀪𑀺𑀚𑁆𑀚𑀢𑀺, 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄 𑀲𑁄 𑀫𑀦𑁆𑀢𑁄, 𑀅𑀣 𑀲𑁄 𑀢𑀁 𑀧𑀼𑀭𑀺𑀲𑀁 𑀉𑀧𑀝𑁆𑀞𑀳𑀺𑀢𑁆𑀯𑀸 𑀫𑀦𑁆𑀢𑀁 𑀮𑀪𑀺𑀢𑁆𑀯𑀸 𑀭𑀜𑁆𑀜𑁄 𑀲𑀸𑀲𑀦𑀁 𑀧𑁂𑀲𑁂𑀲𑀺 ¶ . 𑀅𑀳𑀁 𑀇𑀢𑁄 𑀧𑀼𑀩𑁆𑀩𑁂 𑀫𑀳𑀮𑁆𑀮𑀓𑀢𑁆𑀢𑀸 𑀘𑁄𑀭𑀸𑀦𑀁 𑀳𑀢𑁆𑀣𑀧𑀸𑀤𑀸𑀤𑀬𑁄 𑀤𑀼𑀓𑁆𑀔𑁂𑀦 𑀙𑁂𑀚𑁆𑀚 𑀪𑁂𑀚𑁆𑀚𑀁 𑀓𑀭𑁄𑀫𑀺, 𑀫𑀸𑀭𑁂𑀢𑀩𑁆𑀩𑁂𑀧𑀺 𑀤𑀼𑀓𑁆𑀔𑁂𑀦 𑀫𑀸𑀭𑁂𑀫𑀺. 𑀇𑀤𑀸𑀦𑀺 𑀧𑀦𑀸𑀳𑀁 𑀢𑀣𑀸 𑀦 𑀓𑀭𑁄𑀫𑀺, 𑀫𑀫 𑀫𑀦𑁆𑀢𑀸𑀦𑀼𑀪𑀸𑀯𑁂𑀦 𑀙𑁂𑀚𑁆𑀚𑀪𑁂𑀚𑁆𑀚𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻𑀢𑀺. 𑀭𑀸𑀚𑀸 𑀢𑀁 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀲𑀸𑀥𑀽𑀢𑀺 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀞𑀸𑀦𑀦𑁆𑀢𑀭𑀁 𑀢𑀲𑁆𑀲𑁂𑀯 𑀧𑀸𑀓𑀢𑀺𑀓 𑀫𑀓𑀸𑀲𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀧𑀼𑀦 𑀧𑀜𑁆𑀘𑀯𑀲𑁆𑀲𑀸𑀦𑀺 𑀅𑀢𑀺𑀓𑁆𑀓𑀸𑀫𑁂𑀲𑀺. 𑀲𑁄 𑀫𑀳𑀮𑁆𑀮𑀓𑁄 𑀔𑀻𑀡𑀸𑀬𑀼𑀓𑁄 𑀤𑀼𑀩𑁆𑀩𑀮𑁄 𑀫𑀭𑀡𑀫𑀜𑁆𑀘𑀧𑀭𑀸𑀬𑀡𑁄 𑀳𑀼𑀢𑁆𑀯𑀸 𑀫𑀭𑀡𑀯𑁂𑀤𑀦𑀸𑀤𑀼𑀓𑁆𑀔𑁂𑀦 𑀫𑀳𑀦𑁆𑀢𑁂𑀦 𑀪𑀬𑀸𑀦𑀓𑁂𑀦 𑀲𑀤𑁆𑀤𑁂𑀦 𑀯𑀺𑀲𑁆𑀲𑀭𑀁 𑀯𑀺𑀭𑀯𑀦𑁆𑀢𑁄 𑀦𑀺𑀫𑀻𑀮𑀺𑀢𑁂𑀦 𑀘𑀓𑁆𑀔𑀼𑀦𑀸 𑀪𑀬𑀸𑀦𑀓𑀁 𑀦𑀭𑀓𑀕𑁆𑀕𑀺𑀚𑀸𑀮𑀸𑀧𑀚𑁆𑀚𑀮𑀦𑁆𑀢𑀅𑀬𑀓𑀽𑀝𑀫𑀼𑀕𑁆𑀕𑀭𑀥𑀭𑁂 𑀦𑀺𑀭𑀬𑀧𑀸𑀮𑁂 𑀘 𑀧𑀲𑁆𑀲𑀦𑁆𑀢𑁄 𑀦𑀺𑀧𑀦𑁆𑀦𑁄 𑀳𑁄𑀢𑀺, 𑀢𑀢𑁄 𑀢𑀲𑁆𑀲 𑀧𑀝𑀺𑀯𑀺𑀲𑁆𑀲𑀓𑀕𑁂𑀳𑁂 𑀫𑀦𑀼𑀲𑁆𑀲𑀸 𑀢𑀲𑁆𑀲 𑀪𑀬𑀸𑀦𑀓𑀲𑀤𑁆𑀤𑀲𑀯𑀡𑁂𑀦 𑀕𑁂𑀳𑀁 𑀙𑀝𑁆𑀝𑁂𑀢𑁆𑀯𑀸 𑀧𑀮𑀸𑀬𑀺𑀁𑀲𑀼. 𑀢𑀲𑁆𑀫𑀺𑀁 𑀓𑀺𑀭 𑀤𑀺𑀯𑀲𑁂 𑀫𑀳𑀸𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑀸 𑀢𑀁 𑀘𑁄𑀭𑀖𑀸𑀢𑀓𑀁 𑀢𑀤𑀳𑁂𑀯 𑀓𑀸𑀮𑀁𑀓𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑀁 𑀤𑀺𑀲𑁆𑀯𑀸 𑀫𑀬𑀺 𑀢𑀢𑁆𑀣 𑀕𑀢𑁂 𑀧𑀦𑁂𑀲 𑀫𑀬𑀺 𑀧𑀲𑀸𑀤𑁂𑀦 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀜𑀢𑁆𑀯𑀸 𑀅𑀚𑁆𑀚 𑀫𑀬𑀸 𑀢𑀲𑁆𑀲𑀸𑀦𑀼𑀕𑁆𑀕𑀳𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀢𑀲𑁆𑀲 𑀖𑀭𑀤𑁆𑀯𑀸𑀭 𑀫𑀕𑀫𑀸𑀲𑀺. 𑀅𑀣 𑀲𑁄 𑀣𑁂𑀭𑀁 𑀤𑀺𑀲𑁆𑀯𑀸 𑀓𑀼𑀤𑁆𑀥𑁄 𑀓𑁄𑀧𑁂𑀦 𑀢𑀝𑀢𑀝𑀸𑀬𑀫𑀸𑀦𑀤𑁂𑀳𑁄 𑀅𑀚𑁆𑀚 𑀢𑀁 𑀯𑀺𑀚𑁆𑀛𑀺𑀢𑁆𑀯𑀸 𑀨𑀸𑀮𑁂𑀢𑁆𑀯𑀸 𑀫𑀸𑀭𑁂𑀲𑁆𑀲𑀸𑀫𑀻𑀢𑀺 𑀦𑀺𑀧𑀦𑁆𑀦𑁄𑀯 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀦𑀸𑀲𑀸𑀯𑀸𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀣𑁂𑀭𑁄 𑀢𑀲𑁆𑀫𑀺𑀁 𑀔𑀡𑁂 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁄 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀬 𑀲𑀼𑀭𑀺𑀬𑁄 𑀯𑀺𑀬 𑀯𑀺𑀭𑁄𑀘𑀫𑀸𑀦𑁄 𑀅𑀝𑁆𑀞𑀸𑀲𑀺, 𑀅𑀣 𑀲𑁄 𑀣𑁂𑀭𑀲𑁆𑀲 𑀢𑀬𑁄 𑀯𑀸𑀭𑁂 𑀢𑀣𑁂𑀯 𑀓𑀢𑁆𑀯𑀸 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀢𑀺𑀯𑀺𑀬 𑀯𑀺𑀫𑁆𑀳𑀺𑀢𑀘𑀺𑀢𑁆𑀢𑁄 𑀣𑁂𑀭𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀬𑀢𑁆𑀢𑀁 𑀧𑀸𑀬𑀲𑀁 𑀣𑁂𑀭𑀲𑁆𑀲 𑀤𑀸𑀧𑁂𑀲𑀺, 𑀣𑁂𑀭𑁄 𑀫𑀗𑁆𑀕𑀮𑀁 𑀯𑀟𑁆𑀠𑁂𑀢𑁆𑀯𑀸 𑀯𑀺𑀳𑀸𑀭𑀫𑁂𑀯 𑀅𑀕𑀫𑀸𑀲𑀺, 𑀘𑁄𑀭𑀖𑀸𑀢𑀓𑁄 𑀣𑁂𑀭𑀲𑁆𑀲 𑀤𑀺𑀦𑁆𑀦𑀤𑀸𑀦𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀢𑀲𑁆𑀫𑀺𑀁 𑀔𑀡𑁂 𑀓𑀸𑀮𑀁 𑀓𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺. 𑀅𑀳𑁄 𑀯𑀻𑀢𑀭𑀸𑀕𑀸𑀦𑀁 𑀩𑀼𑀤𑁆𑀥𑀧𑀼𑀢𑁆𑀢𑀸𑀦𑀁 𑀆𑀦𑀼𑀪𑀸𑀯𑁄. 𑀏𑀯𑀁 𑀦𑀭𑀓𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑁄𑀧𑀺𑀲𑁆𑀲 𑀩𑀮𑁂𑀦 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁄𑀢𑀺. 𑀢𑀣𑀸𑀳𑀺.

𑁧.

𑀤𑀸𑀦𑀁 ¶ 𑀢𑀸𑀡𑀁 𑀫𑀦𑀼𑀲𑁆𑀲𑀸𑀦𑀁, 𑀤𑀸𑀦𑀁 𑀤𑀼𑀕𑁆𑀕𑀢𑀺𑀯𑀸𑀭𑀡𑀁;

𑀤𑀸𑀦𑀁 𑀲𑀕𑁆𑀕𑀲𑁆𑀲 𑀲𑁄𑀧𑀸𑀦𑀁, 𑀤𑀸𑀦𑀁 𑀲𑀦𑁆𑀢𑀺𑀓𑀭𑀁 𑀧𑀭𑀁.

𑁨.

𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀤𑀸𑀦𑁂𑀦, 𑀤𑀸𑀦𑀁 𑀘𑀺𑀦𑁆𑀢𑀸𑀫𑀡𑀻 𑀯𑀺𑀬;

𑀓𑀧𑁆𑀧𑀭𑀼𑀓𑁆𑀔𑁄𑀯 𑀲𑀢𑁆𑀢𑀸𑀦𑀁, 𑀤𑀸𑀦𑀁 𑀪𑀤𑁆𑀤𑀖𑀝𑁄𑀯𑀺𑀬.

𑁩.

𑀲𑀻𑀮𑀯𑀦𑁆𑀢𑀲𑁆𑀲 𑀤𑀸𑀦𑁂𑀦, 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀫𑁆𑀧𑀺 𑀘;

𑀮𑀪𑀦𑁆𑀢𑀺 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀁, 𑀢𑀣𑀸 𑀮𑁄𑀓𑀼𑀢𑁆𑀢𑀭𑀁 𑀲𑀼𑀔𑀁.

𑁪.

𑀧𑀸𑀧𑀓𑀫𑁆𑀫𑁂𑀲𑀼 𑀦𑀺𑀭𑀢𑁄, 𑀞𑀺𑀢𑁄𑀬𑀁 𑀦𑀭𑀓𑀸𑀬𑀦𑁂 [𑀦𑀭𑀓𑀸𑀯𑀦𑁂 𑀇𑀢𑀺𑀧𑀺𑀓𑀢𑁆𑀣𑀘𑀺];

𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀣𑁂𑀭𑀲𑁆𑀲, 𑀧𑀺𑀡𑁆𑀟𑀧𑀸𑀢𑀲𑁆𑀲 𑀯𑀸𑀳𑀲𑀸.

𑁫.

𑀅𑀧𑀸𑀬𑀁 𑀧𑀭𑀺𑀯𑀚𑁆𑀚𑁂𑀢𑁆𑀯𑀸, 𑀦𑁂𑀓𑀤𑀼𑀓𑁆𑀔𑀲𑀫𑀸𑀓𑀼𑀮𑀁;

𑀤𑁂𑀯𑀲𑀗𑁆𑀖𑀧𑀭𑀺𑀩𑁆𑀩𑀽𑀴𑁆𑀳𑁄, 𑀕𑀢𑁄 𑀤𑁂𑀯𑀧𑀼𑀭𑀁 𑀯𑀭𑀁.

𑁬.

𑀢𑀲𑁆𑀫𑀸 𑀲𑀼𑀔𑁂𑀢𑁆𑀢𑁂 𑀲𑀤𑁆𑀥𑀸𑀬, 𑀤𑁂𑀣 𑀤𑀸𑀦𑀸𑀦𑀺 𑀓𑀸𑀫𑀤𑀁;

𑀤𑀸𑀦𑀁 𑀤𑁂𑀦𑁆𑀢𑁂𑀳𑀺 𑀲𑀻𑀮𑀫𑁆𑀧𑀺, 𑀧𑀸𑀮𑀦𑀻𑀬𑀁𑀢𑀺𑀲𑀼𑀦𑁆𑀤𑀭𑀦𑁆𑀢𑀺 [𑀧𑀸𑀮𑀦𑀁𑀘𑀸𑀢𑀺𑀲𑀼𑀦𑁆𑀤𑀭𑀁 𑀇𑀢𑀺𑀧𑀺𑀓𑀢𑁆𑀣𑀘𑀺].

𑀅𑀣 𑀪𑀺𑀓𑁆𑀔𑀽 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺𑀁𑀲𑀼, 𑀓𑀺𑀁𑀪𑀦𑁆𑀢𑁂 𑀲𑁄 𑀧𑀸𑀧𑁄 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀓𑀢𑀭𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑁄𑀢𑀺. 𑀅𑀣 𑀲𑀢𑁆𑀣𑀸 𑀅𑀚𑁆𑀚𑁂𑀲 𑀪𑀺𑀓𑁆𑀔𑀯𑁂 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀤𑀺𑀦𑁆𑀦𑀤𑀸𑀦𑀸𑀦𑀼𑀪𑀸𑀯𑁂𑀦 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄, 𑀢𑀲𑁆𑀲𑁂𑀯 𑀦𑀺𑀲𑁆𑀲𑀦𑁆𑀤𑁂𑀦 𑀅𑀦𑀸𑀕𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻𑀢𑀺 𑀩𑁆𑀬𑀸𑀓𑀸𑀲𑀻𑀢𑀺.

𑁭.

𑀪𑁄 𑀲𑀸𑀭𑀺𑀧𑀼𑀢𑁆𑀢𑁂 𑀦𑀺𑀳𑀺𑀢𑀧𑁆𑀧𑀤𑀸𑀦𑀁,

𑀔𑀡𑁂𑀦 𑀧𑀸𑀧𑁂𑀢𑀺 𑀳𑀺 𑀲𑀕𑁆𑀕𑀫𑀕𑁆𑀕𑀁;

𑀢𑀲𑁆𑀫𑀸 𑀲𑀼𑀔𑁂𑀢𑁆𑀢𑁂𑀲𑀼 𑀤𑀤𑀸𑀣 𑀤𑀸𑀦𑀁,

𑀓𑀸𑀫𑀢𑁆𑀣 𑀘𑁂 𑀲𑀕𑁆𑀕𑀫𑁄𑀓𑁆𑀔𑀁 𑀧𑀭𑀢𑁆𑀣.

𑀘𑁄𑀭𑀖𑀸𑀢𑀓𑀯𑀢𑁆𑀣𑀼𑀁 𑀙𑀝𑁆𑀞𑀫𑀁.

𑁨𑁭. 𑀲𑀤𑁆𑀥𑁄𑀧𑀸𑀲𑀓𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀅𑀢𑀻𑀢𑁂 ¶ 𑀓𑀺𑀭 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀓𑀸𑀮𑁂 𑀏𑀓𑁄 𑀧𑀼𑀭𑀺𑀲𑁄 𑀲𑀤𑁆𑀥𑁄 𑀭𑀢𑀦𑀢𑁆𑀢𑀬𑁂𑀲𑀼 𑀧𑀲𑀦𑁆𑀦𑁄 𑀉𑀘𑁆𑀙𑀼𑀬𑀦𑁆𑀢𑀓𑀫𑁆𑀫𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁄 𑀧𑀝𑀺𑀯𑀲𑀢𑀺. 𑀅𑀣 𑀲𑁄 𑀏𑀓𑀁 𑀕𑀺𑀮𑀸𑀦𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀉𑀴𑀼𑀗𑁆𑀓𑀫𑀢𑁆𑀢𑀁 𑀲𑀧𑁆𑀧𑀺𑀁 𑀅𑀤𑀸𑀲𑀺, 𑀢𑀣𑁂𑀯𑁂𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀏𑀓𑀁 𑀕𑀼𑀴𑀧𑀺𑀡𑁆𑀟𑀁 𑀅𑀤𑀸𑀲𑀺, 𑀅𑀣𑀸𑀧𑀭𑀲𑁆𑀫𑀺𑀁𑀤𑀺𑀯𑀲𑁂 𑀏𑀓𑀁 𑀙𑀸𑀢𑀚𑁆𑀛𑀢𑁆𑀢𑀁 𑀲𑀼𑀦𑀔𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀪𑀢𑁆𑀢𑀧𑀺𑀡𑁆𑀟𑁂𑀦 𑀲𑀗𑁆𑀕𑀳 𑀫𑀓𑀸𑀲𑀺, 𑀅𑀣𑁂𑀓𑀲𑁆𑀲 𑀇𑀡𑀝𑁆𑀞𑀓𑀲𑁆𑀲 𑀏𑀓𑀁 𑀓𑀳𑀸𑀧𑀡𑀁 𑀅𑀤𑀸𑀲𑀺, 𑀅𑀣𑁂𑀓𑀤𑀺𑀯𑀲𑀁 𑀥𑀫𑁆𑀫𑀁 𑀲𑀼𑀡𑀫𑀸𑀦𑁄 𑀥𑀫𑁆𑀫𑀤𑁂𑀲𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀲𑀸𑀝𑀓𑀁 𑀧𑀽𑀚𑁂𑀲𑀺, 𑀲𑁄 𑀏𑀢𑁆𑀢𑀓𑀁 𑀧𑀼𑀜𑁆𑀜𑀓𑀫𑁆𑀫𑀁 𑀓𑀢𑁆𑀯𑀸 𑀪𑀯𑁂𑀲𑀼 𑀘𑀭𑀫𑀸𑀦𑁄𑀳𑀁 𑀲𑀫𑀼𑀤𑁆𑀤𑀧𑀩𑁆𑀩𑀢𑀸𑀤𑀻𑀲𑀼𑀧𑀺 𑀬𑀁 𑀬𑀁 𑀇𑀘𑁆𑀙𑀸𑀫𑀺. 𑀢𑀁 𑀢𑀁 𑀲𑀫𑀺𑀚𑁆𑀛𑀢𑀽𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺, 𑀲𑁄 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑁂𑀳𑁂𑀯 𑀓𑀼𑀲𑀮𑀫𑀽𑀮𑁂𑀳𑀺 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄 𑀯𑀺𑀬 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀫𑀳𑀦𑁆𑀢𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀲𑀸𑀯𑀢𑁆𑀣𑀺𑀬𑀁 𑀫𑀳𑀤𑁆𑀥𑀦𑁂 𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀲𑁄 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑁄 𑀓𑀸𑀮𑁂𑀦 𑀓𑀸𑀮𑀁 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀖𑀭𑀸𑀯𑀸𑀲𑁂 𑀆𑀤𑀻𑀦𑀯𑀁 𑀧𑀩𑁆𑀩𑀚𑁆𑀚𑀸𑀬 𑀘 𑀆𑀦𑀺𑀲𑀁𑀲𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦 𑀘𑀺𑀭𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑁄 𑀅𑀧𑀭𑀪𑀸𑀕𑁂 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 𑀉𑀕𑁆𑀕𑀦𑀕𑀭𑀁 𑀅𑀕𑀫𑀸𑀲𑀺, 𑀢𑀢𑁆𑀣 𑀲𑁂𑀝𑁆𑀞𑀺𑀦𑁄 𑀪𑀭𑀺𑀬𑀸 𑀲𑀤𑁆𑀥𑀸 𑀅𑀳𑁄𑀲𑀺 𑀧𑀲𑀦𑁆𑀦𑀸. 𑀲𑀸 𑀣𑁂𑀭𑀁 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀢𑀼𑀭𑀺𑀢𑀢𑀼𑀭𑀺𑀢𑀸 𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀤𑁆𑀥𑀺𑀁 𑀧𑀜𑁆𑀘𑀲𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀪𑁄𑀚𑁂𑀢𑁆𑀯𑀸 𑀣𑁂𑀭𑀁 𑀢𑀢𑁆𑀣 𑀦𑀺𑀩𑀤𑁆𑀥𑀯𑀸𑀲𑀢𑁆𑀣𑀁 𑀬𑀸𑀘𑀺𑀢𑁆𑀯𑀸 𑀧𑀜𑁆𑀘𑀲𑀢𑀓𑀽𑀝𑀸𑀕𑀸𑀭𑀸𑀦𑀺 𑀓𑀸𑀭𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀧𑀜𑁆𑀘𑀲𑀢𑀪𑀺𑀓𑁆𑀔𑀽 𑀢𑀢𑁆𑀣 𑀯𑀸𑀲𑁂𑀦𑁆𑀢𑀻 𑀦𑀺𑀩𑀤𑁆𑀥𑀁 𑀘𑀢𑀼𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀸𑀦𑀫𑀓𑀸𑀲𑀺. 𑀢𑀢𑁄 𑀣𑁂𑀭𑁄 𑀢𑀁 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀢𑁆𑀣 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀅𑀜𑁆𑀜𑀢𑁆𑀢 𑀕𑀦𑁆𑀢𑀼𑀓𑀸𑀫𑁄 𑀅𑀦𑀼𑀧𑀼𑀩𑁆𑀩𑁂𑀦 𑀧𑀝𑁆𑀝𑀦𑀕𑀸𑀫𑀁 𑀅𑀕𑀫𑀸𑀲𑀺, 𑀢𑀢𑁆𑀣 𑀯𑀲𑀺𑀢𑁆𑀯𑀸 𑀢𑀢𑁄 𑀦𑀸𑀯𑀁 𑀅𑀪𑀺𑀭𑀼𑀬𑁆𑀳 𑀧𑀜𑁆𑀘𑀲𑀢𑀪𑀺𑀓𑁆𑀔𑀽𑀳𑀺 𑀧𑀭𑀺𑀯𑀼𑀢𑁄 𑀲𑀫𑀼𑀤𑁆𑀤𑀧𑀺𑀝𑁆𑀞𑁂𑀦 𑀕𑀘𑁆𑀙𑀢𑀺, 𑀲𑀫𑀼𑀤𑁆𑀤𑀁 𑀢𑀭𑀦𑁆𑀢𑀲𑁆𑀲 ¶ 𑀢𑀲𑁆𑀲 𑀲𑀸𑀕𑀭𑀫𑀚𑁆𑀛𑁂 𑀉𑀤𑀭𑀯𑀸𑀢𑁄 𑀲𑀫𑀼𑀝𑁆𑀞𑀳𑀺𑀢𑁆𑀯𑀸 𑀧𑀻𑀴𑁂𑀢𑀺, 𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀪𑀦𑁆𑀢𑁂 𑀇𑀤𑀁 𑀧𑀼𑀩𑁆𑀩𑁂 𑀓𑁂𑀦 𑀯𑀽𑀧𑀲𑀫𑁂𑀲𑁆𑀲𑀢𑀻𑀢𑀺 𑀧𑀼𑀘𑁆𑀙𑀺𑀁𑀲𑀼, 𑀣𑁂𑀭𑁄 𑀧𑀼𑀩𑁆𑀩𑁂 𑀫𑁂 𑀆𑀯𑀼𑀲𑁄 𑀉𑀮𑀼𑀗𑁆𑀓𑀫𑀢𑁆𑀢𑁂 𑀲𑀧𑁆𑀧𑀺𑀧𑀻𑀢𑁂 𑀭𑁄𑀕𑁄 𑀯𑀽𑀧𑀲𑀫𑁆𑀫𑀢𑀻𑀢𑀺 𑀆𑀳, 𑀪𑀺𑀓𑁆𑀔𑀽 𑀪𑀦𑁆𑀢𑁂 𑀲𑀫𑀼𑀤𑁆𑀤𑀧𑀺𑀝𑁆𑀞𑁂 𑀓𑀣𑀁 𑀲𑀧𑁆𑀧𑀺𑀁 𑀮𑀪𑀺𑀲𑁆𑀲𑀸𑀫, 𑀅𑀥𑀺𑀯𑀸𑀲𑁂𑀣𑀸𑀢𑀺 𑀆𑀳𑀁𑀲𑀼, 𑀢𑀁 𑀲𑀼𑀢𑁆𑀯𑀸 𑀣𑁂𑀭𑁂𑀦 [𑀣𑁂𑀭𑁄𑀦𑀦𑁄𑀆𑀬𑀲𑁆𑀫𑀦𑁆𑀢𑀸 𑀇𑀢𑀺𑀲𑀩𑁆𑀩𑀢𑁆𑀣] 𑀦 𑀦𑁄 𑀆𑀬𑀲𑁆𑀫𑀦𑁆𑀢𑀸 𑀲𑀧𑁆𑀧𑀺 𑀤𑀼𑀮𑁆𑀮𑀪𑀸, 𑀫𑀫 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀫𑀼𑀤𑁆𑀤𑁄𑀤𑀓𑀁 𑀉𑀤𑁆𑀥𑀭𑀺𑀢𑁆𑀯𑀸 𑀆𑀦𑁂𑀣𑀸𑀢𑀺 𑀯𑀼𑀢𑁆𑀢𑁂 𑀪𑀺𑀓𑁆𑀔𑀽 𑀢𑀣𑀸 𑀅𑀓𑀁𑀲𑀼. 𑀉𑀤𑁆𑀥𑀝𑀫𑀢𑁆𑀢𑀫𑁂𑀯 𑀢𑀁𑀉𑀤𑀓𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀲𑀧𑁆𑀧𑀺 𑀅𑀳𑁄𑀲𑀺, 𑀅𑀣 𑀪𑀺𑀓𑁆𑀔𑀽 𑀢𑀁 𑀤𑀺𑀲𑁆𑀯𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀸 𑀚𑀸𑀢𑀸 𑀣𑁂𑀭𑀲𑁆𑀲 𑀲𑀧𑁆𑀧𑀺𑀁 𑀉𑀧𑀦𑀸𑀫𑁂𑀲𑀼𑀁, 𑀣𑁂𑀭𑁂𑀦 𑀲𑀧𑁆𑀧𑀺𑀦𑁄 [𑀲𑀧𑁆𑀧𑀺𑀦𑀸 𑀇𑀢𑀺𑀲𑀩𑁆𑀩𑀢𑁆𑀣] 𑀧𑀻𑀢𑀫𑀢𑁆𑀢𑁂 𑀲𑁄 𑀆𑀩𑀸𑀥𑁄 𑀯𑀽𑀧𑀲𑀫𑀺, 𑀅𑀣𑀲𑁆𑀲 𑀪𑀺𑀓𑁆𑀔𑀽𑀳𑀺 𑀓𑀺 𑀫𑁂𑀢𑀁 𑀪𑀦𑁆𑀢𑁂 𑀅𑀘𑁆𑀙𑀭𑀺𑀬𑀁, 𑀦 𑀦𑁄 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑀁 𑀤𑀺𑀝𑁆𑀞𑀧𑀼𑀩𑁆𑀩𑀁𑀢𑀺 𑀯𑀼𑀢𑁆𑀢𑁂 𑀣𑁂𑀭𑁄 𑀢𑁂𑀦𑀳𑀺 𑀓𑀢𑀧𑀼𑀜𑁆𑀜𑀸𑀦𑀁 𑀧𑀼𑀜𑁆𑀜𑀯𑀺𑀧𑀸𑀓𑀁 𑀧𑀲𑁆𑀲𑀺𑀲𑁆𑀲𑀣𑀸𑀢𑀺 𑀯𑀢𑁆𑀯𑀸 𑀲𑀫𑀼𑀤𑁆𑀤𑀁 𑀑𑀮𑁄𑀓𑁂𑀲𑀺 𑀇𑀤𑀁 𑀲𑀧𑁆𑀧𑀺 𑀳𑁄𑀢𑀽𑀢𑀺. 𑀅𑀣𑀲𑁆𑀲 𑀘𑀓𑁆𑀔𑀼𑀧𑀣𑁂 𑀲𑀫𑀼𑀤𑁆𑀤𑁂 𑀲𑀩𑁆𑀩𑁄𑀤𑀓𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀲𑀧𑁆𑀧𑀺 𑀅𑀳𑁄𑀲𑀺. 𑀅𑀣𑀲𑁆𑀲 𑀪𑀺𑀓𑁆𑀔𑀽 𑀅𑀩𑁆𑀪𑀼𑀢𑀘𑀺𑀢𑁆𑀢𑀸 𑀅𑀜𑁆𑀜𑀫𑁆𑀧𑀺 𑀈𑀤𑀺𑀲𑀁 𑀧𑀼𑀜𑁆𑀜𑀁 𑀅𑀢𑁆𑀣𑀺 𑀪𑀦𑁆𑀢𑁂𑀢𑀺 𑀧𑀼𑀘𑁆𑀙𑀺𑀁𑀲𑀼, 𑀢𑀢𑁄 𑀣𑁂𑀭𑁄 𑀢𑁂𑀦𑀳𑀺 𑀧𑀲𑁆𑀲𑀣𑀸𑀬𑀲𑁆𑀫𑀦𑁆𑀢𑀸 𑀫𑀫 𑀧𑀼𑀜𑁆𑀜𑀦𑁆𑀢𑀺 𑀯𑀢𑁆𑀯𑀸 𑀲𑀫𑀦𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀖𑀦𑀲𑁂𑀮𑀧𑀩𑁆𑀩𑀢𑁂 𑀑𑀮𑁄𑀓𑁂𑀲𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀕𑀼𑀴𑀧𑀺𑀡𑁆𑀟𑀸𑀦𑀺 𑀅𑀳𑁂𑀲𑀼𑀁, 𑀢𑀢𑁄 𑀘𑀓𑁆𑀔𑀼𑀧𑀣𑁂 𑀲𑀫𑀦𑁆𑀢𑀸 𑀪𑀢𑁆𑀢𑀪𑀸𑀚𑀦𑀸𑀦𑀺 𑀤𑀲𑁆𑀲𑁂𑀲𑀺 𑀲𑀩𑁆𑀬𑀜𑁆𑀚𑀦𑀁 𑀲𑁄𑀧𑀓𑀭𑀡𑀁. 𑀢𑀢𑁄 𑀳𑀺𑀫𑀯𑀦𑁆𑀢𑀁 𑀑𑀮𑁄𑀓𑁂𑀲𑀺, 𑀲𑀩𑁆𑀩𑀁 𑀢𑀁 𑀲𑀼𑀯𑀡𑁆𑀡𑀫𑀬𑀁 𑀅𑀳𑁄𑀲𑀺. 𑀅𑀣𑀸𑀪𑀺𑀫𑀼𑀔𑀝𑁆𑀞𑀸𑀦𑁂 𑀫𑀳𑀦𑁆𑀢𑀁 𑀯𑀦𑀲𑀡𑁆𑀟𑀁 𑀑𑀮𑁄𑀓𑁂𑀲𑀺, 𑀲𑀓𑀮𑀯𑀦𑀲𑀡𑁆𑀟𑀁𑀦𑀸𑀦𑀸𑀯𑀺𑀭𑀸𑀕𑀯𑀢𑁆𑀣𑁂𑀳𑀺 𑀲𑀜𑁆𑀙𑀦𑁆𑀦𑀁 𑀅𑀳𑁄𑀲𑀺, 𑀪𑀺𑀓𑁆𑀔𑀽 𑀢𑀁 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀅𑀢𑀻𑀯 𑀯𑀺𑀫𑁆𑀳𑀺𑀢𑀸 𑀪𑀦𑁆𑀢𑁂 𑀓𑁂𑀦 𑀢𑁂 𑀧𑀼𑀜𑁆𑀜𑀓𑀫𑁆𑀫𑁂𑀦 𑀏𑀢𑀸𑀤𑀺𑀲𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀧𑀼𑀘𑁆𑀙𑀺𑀁𑀲𑀼, 𑀣𑁂𑀭𑁄 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀓𑀸𑀮𑁂 𑀅𑀢𑁆𑀢𑀦𑀸 𑀓𑀢𑀁 𑀲𑀩𑁆𑀩𑀁 𑀢𑀁 𑀓𑀼𑀲𑀮𑀁 𑀧𑀓𑀸𑀲𑁂𑀲𑀺. 𑀢𑁂𑀦𑁂𑀢𑁆𑀣.

𑁧.

𑀇𑀫𑀲𑁆𑀫𑀺𑀁 ¶ 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀓𑀲𑁆𑀲𑀧𑁄 𑀦𑀸𑀫 𑀦𑀸𑀬𑀓𑁄;

𑀲𑀩𑁆𑀩𑀮𑁄𑀓𑀳𑀺𑀢𑀢𑁆𑀣𑀸𑀬, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺 𑀘𑀓𑁆𑀔𑀼𑀫𑀸.

𑁨.

𑀢𑀤𑀸𑀳𑀁 𑀉𑀘𑁆𑀙𑀼𑀬𑀦𑁆𑀢𑀫𑁆𑀳𑀺, 𑀦𑀺𑀬𑀼𑀢𑁆𑀢𑁄 𑀕𑀼𑀴𑀓𑀸𑀭𑀓𑁄;

𑀢𑁂𑀦 𑀓𑀫𑁆𑀫𑁂𑀦 𑀚𑀻𑀯𑀸𑀫𑀺, 𑀧𑁄𑀲𑁂𑀦𑁆𑀢𑁄 𑀧𑀼𑀢𑁆𑀢𑀤𑀸𑀭𑀓𑁂.

𑁩.

𑀓𑀺𑀮𑀦𑁆𑀢𑀺𑀦𑁆𑀤𑁆𑀭𑀺𑀬𑀫𑀤𑁆𑀤𑀓𑁆𑀔𑀺𑀁, 𑀪𑀺𑀓𑁆𑀔𑀼𑀁 𑀭𑁄𑀕𑀸𑀢𑀼𑀭𑀁 𑀢𑀤𑀸;

𑀪𑀺𑀓𑁆𑀔𑀸𑀘𑀸𑀭𑀓𑀯𑀢𑁆𑀢𑁂𑀦, 𑀖𑀢𑀢𑁆𑀣𑀁 [𑀖𑀢𑀫𑀢𑁆𑀢𑀫𑀼𑀧𑀸𑀕𑀢𑀁 𑀇𑀢𑀺𑀲𑀩𑁆𑀩𑀢𑁆𑀣] 𑀲𑀫𑀼𑀧𑀸𑀕𑀢𑀁.

𑁪.

𑀉𑀮𑀼𑀗𑁆𑀓𑀫𑀢𑁆𑀢𑀁 𑀲𑀧𑁆𑀧𑀺𑀲𑁆𑀲, 𑀅𑀤𑀤𑀁 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀲𑀤𑁆𑀤𑀳𑀦𑁆𑀢𑁄 𑀤𑀸𑀦𑀨𑀮𑀁, 𑀤𑀬𑀸𑀬𑀼 𑀤𑀕𑁆𑀕𑀫𑀸𑀦𑀲𑁄.

. 𑁫

𑀢𑁂𑀦 𑀓𑀫𑁆𑀫𑁂𑀦 𑀲𑀁𑀲𑀸𑀭𑁂, 𑀲𑀁𑀲𑀭𑀦𑁆𑀢𑁄 𑀪𑀯𑀸𑀪𑀯𑁂;

𑀬𑀢𑁆𑀣𑀺𑀘𑁆𑀙𑀸𑀫𑀺 𑀖𑀢𑀁 𑀢𑀢𑁆𑀣, 𑀉𑀧𑁆𑀧𑀚𑁆𑀚𑀢𑀺 𑀅𑀦𑀧𑁆𑀧𑀓𑀁.

𑁬.

𑀇𑀘𑁆𑀙𑀸𑀫𑀳𑀁 𑀲𑀫𑀼𑀤𑁆𑀤𑀲𑁆𑀫𑀺𑀁, 𑀨𑀮𑀫𑁆𑀧𑀺 𑀖𑀢𑀫𑀢𑁆𑀢𑀦𑁄;

𑀢𑀁 𑀢𑀁 𑀲𑀩𑁆𑀩𑀁 𑀖𑀢𑀁 𑀳𑁄𑀢𑀺, 𑀖𑀢𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁭.

𑀲𑀼𑀡𑀸𑀣 𑀫𑀬𑁆𑀳𑀁 𑀅𑀜𑁆𑀜𑀫𑁆𑀧𑀺, 𑀧𑀼𑀜𑁆𑀜𑀓𑀫𑁆𑀫𑀁 𑀫𑀦𑁄𑀭𑀫𑀁;

𑀢𑀤𑀸 𑀤𑀺𑀲𑁆𑀯𑀸𑀦𑀳𑀁 𑀪𑀺𑀓𑁆𑀔𑀼𑀁, 𑀭𑁄𑀕𑁂𑀦 𑀧𑀭𑀺𑀧𑀻𑀴𑀺𑀢𑀁.

𑁮.

𑀕𑀼𑀴𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸𑀦, 𑀧𑀢𑁆𑀢𑁂 𑀢𑀲𑁆𑀲 𑀲𑀫𑀸𑀓𑀺𑀭𑀺𑀁;

𑀢𑁂𑀦 𑀲𑁄 𑀲𑀼𑀔𑀺𑀢𑁄 𑀆𑀲𑀺, 𑀭𑁄𑀕𑀁 𑀩𑁆𑀬𑀧𑀕𑀢𑀁 𑀢𑀤𑀸.

𑁯.

𑀢𑁂𑀦 𑀫𑁂 𑀕𑀼𑀴𑀤𑀸𑀦𑁂𑀦, 𑀲𑀁𑀲𑀭𑀁 𑀤𑁂𑀯𑀫𑀸𑀦𑀼𑀲𑁂;

𑀬𑀢𑁆𑀣𑀢𑁆𑀣𑁄𑀲𑁆𑀫𑀺 𑀕𑀼𑀴𑁂𑀦𑀸𑀳𑀁, 𑀢𑀢𑁆𑀣 𑀢𑀁 𑀲𑀼𑀮𑀪𑀁 𑀫𑀫.

𑁧𑁦.

𑀲𑁂𑀮𑀸𑀘 𑀯𑀺𑀧𑀼𑀮𑀸 𑀫𑀬𑁆𑀳𑀁, 𑀳𑁄𑀦𑁆𑀢𑀺 𑀘𑀺𑀢𑁆𑀢𑀸𑀦𑀼𑀯𑀢𑁆𑀢𑀓𑀸;

𑀫𑀳𑀦𑁆𑀢𑀕𑀼𑀴𑀧𑀺𑀡𑁆𑀟𑀸𑀯, 𑀕𑀼𑀴𑀤𑀸𑀦𑁂 𑀇𑀤𑀁 𑀨𑀮𑀁.

𑁧𑁧.

𑀅𑀣𑀸𑀧𑀺 𑀫𑁂 𑀓𑀢𑀁 𑀧𑀼𑀜𑁆𑀜𑀁, 𑀲𑀼𑀡𑀸𑀣 𑀲𑀸𑀥𑀼 𑀪𑀺𑀓𑁆𑀔𑀯𑁄;

𑀙𑀸𑀢𑀚𑁆𑀛𑀢𑁆𑀢𑀁 𑀨𑀦𑁆𑀤𑀫𑀸𑀦𑀁, 𑀤𑀺𑀲𑁆𑀯𑀸𑀦 𑀲𑀼𑀦𑀔𑀁 𑀢𑀤𑀸.

𑁧𑁨.

𑀪𑀢𑁆𑀢𑀧𑀻𑀡𑁆𑀟𑁂𑀦 ¶ 𑀲𑀗𑁆𑀕𑀡𑁆𑀳𑀺𑀁, 𑀢𑀫𑁆𑀧𑀺 𑀤𑀸𑀦𑀁 𑀨𑀮𑀸𑀯𑀳𑀁;

𑀢𑀢𑁄 𑀧𑀝𑁆𑀞𑀸𑀬 𑀦𑀸𑀳𑁄𑀲𑀺, 𑀅𑀦𑁆𑀦𑀧𑀸𑀦𑁂𑀦 𑀊𑀦𑀢𑀸.

𑁧𑁩.

𑀲𑀼𑀮𑀪𑀦𑁆𑀦𑀧𑀸𑀦𑁄 𑀲𑀼𑀔𑀺𑀢𑁄, 𑀅𑀳𑁄𑀲𑀺𑀁𑀚𑀸𑀢𑀺𑀚𑀸𑀢𑀺𑀬𑀁;

𑀅𑀚𑁆𑀚𑀸𑀧𑀺 𑀬𑀤𑀺 𑀇𑀘𑁆𑀙𑀸𑀫𑀺, 𑀪𑁄𑀚𑀦𑁂𑀦 𑀧𑀬𑁄𑀚𑀦𑀁.

𑁧𑁪.

𑀘𑀓𑁆𑀔𑀼𑀧𑀣𑁂 𑀲𑀫𑀦𑁆𑀢𑀸 𑀫𑁂, 𑀚𑀸𑀬𑀦𑁆𑀢𑀼𑀓𑁆𑀔𑀮𑀺𑀬𑁄 𑀩𑀳𑀽;

𑀅𑀣𑀸𑀧𑀭𑀫𑁆𑀧𑀺 𑀓𑀼𑀲𑀮𑀁, 𑀅𑀓𑀸𑀲𑀺𑀁𑀢𑀁 𑀲𑀡𑀸𑀣 𑀫𑁂.

𑁧𑁫.

𑀇𑀡𑀝𑁆𑀞𑀓𑀲𑁆𑀲 𑀧𑁄𑀲𑀲𑁆𑀲, 𑀅𑀤𑀸𑀲𑁂𑀓𑀁 𑀓𑀳𑀸𑀧𑀡𑀁;

𑀢𑁂𑀦 𑀫𑁂 𑀧𑀼𑀜𑁆𑀜𑀓𑀫𑁆𑀫𑁂𑀦, 𑀅𑀦𑁄𑀫𑀪𑀯𑀲𑀫𑁆𑀧𑀤𑀁.

𑁧𑁬.

𑀧𑀘𑀼𑀭𑀁 𑀚𑀸𑀢𑀭𑀽𑀧𑀜𑁆𑀘, 𑀮𑀪𑀸𑀫𑀺 𑀚𑀸𑀢𑀺𑀚𑀸𑀢𑀺𑀬𑀁;

𑀲𑀘𑀚𑁆𑀚 𑀥𑀦𑀓𑀸𑀫𑁄𑀳𑀁, 𑀖𑀦𑀲𑁂𑀮𑁄𑀧𑀺 𑀧𑀩𑁆𑀩𑀢𑁄;

𑀳𑁄𑀢𑀺 𑀳𑁂𑀫𑀫𑀬𑀁 𑀲𑀩𑁆𑀩𑀁, 𑀇𑀡𑀢𑁄 𑀫𑁄𑀘𑀦𑁂 𑀨𑀮𑀁.

𑁧𑁭.

𑀅𑀜𑁆𑀜𑀫𑁆𑀧𑀺 𑀫𑀫 𑀧𑀼𑀜𑁆𑀜𑀁 𑀪𑁄, 𑀲𑀼𑀡𑀸𑀣 𑀲𑀼𑀢𑀺𑀲𑁄𑀪𑀦𑀁;

𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄, 𑀲𑀸𑀲𑀦𑁂𑀓𑀁 𑀩𑀳𑀼𑀲𑁆𑀲𑀼𑀢𑀁.

𑁧𑁮.

𑀤𑁂𑀲𑁂𑀦𑁆𑀢𑀁 𑀫𑀼𑀦𑀺𑀦𑁄 𑀥𑀫𑁆𑀫𑀁, 𑀲𑀼𑀢𑁆𑀯𑀸 𑀧𑀻𑀡𑀺𑀢𑀫𑀸𑀦𑀲𑁄;

𑀧𑀽𑀚𑁂𑀲𑀺𑀁𑀲𑀸𑀝𑀓𑀁 𑀫𑀬𑁆𑀳𑀁, 𑀥𑀫𑁆𑀫𑀲𑁆𑀲 𑀥𑀫𑁆𑀫𑀲𑀸𑀫𑀺𑀦𑁄.

𑁧𑁯.

𑀢𑁂𑀦𑀸𑀳𑀁 𑀧𑀼𑀜𑁆𑀜𑀓𑀫𑁆𑀫𑁂𑀦, 𑀲𑀁𑀲𑀭𑀁 𑀤𑁂𑀯𑀫𑀸𑀦𑀼𑀲𑁂;

𑀮𑀪𑀸𑀫𑀺 𑀧𑀘𑀼𑀭𑀁 𑀯𑀢𑁆𑀣𑀁, 𑀬𑀁 𑀮𑁄𑀓𑀲𑁆𑀫𑀺𑀁 𑀯𑀭𑀁 𑀧𑀭𑀁.

𑁨𑁦.

𑀇𑀘𑁆𑀙𑀫𑀸𑀦𑁄 𑀲𑀘𑁂 𑀅𑀚𑁆𑀚 [𑀚𑀸𑀦𑀫𑀸𑀦𑁄𑀧𑀳𑀁𑀅𑀚𑁆𑀚; 𑀚𑀸𑀦𑀥𑀸𑀦𑁄𑀘𑀳𑀁𑀅𑀚𑁆𑀚 𑀇𑀢𑀺𑀓𑀢𑁆𑀣𑀘𑀺], 𑀳𑀺𑀫𑀯𑀦𑁆𑀢𑀫𑁆𑀧𑀺 𑀧𑀩𑁆𑀩𑀢𑀁;

𑀦𑀸𑀦𑀸𑀯𑀺𑀭𑀸𑀕𑀯𑀢𑁆𑀣𑁂𑀳𑀺, 𑀙𑀸𑀤𑀬𑀺𑀲𑁆𑀲𑀁 𑀲𑀫𑀦𑁆𑀢𑀢𑁄.

𑁨𑁧.

𑀲𑀘𑁂 𑀇𑀘𑁆𑀙𑀸𑀫𑀺 𑀅𑀚𑁆𑀚𑁂𑀯, 𑀯𑀢𑁆𑀣𑁂𑀦𑀘𑁆𑀙𑀸𑀤𑀬𑀸 𑀫𑀺𑀢𑁂;

𑀚𑀦𑁆𑀢𑀯𑁄 𑀘𑀢𑀼𑀤𑀻𑀧𑀲𑁆𑀫𑀺𑀁, 𑀯𑀢𑁆𑀣𑀤𑀸𑀦𑀲𑁆𑀲𑀺𑀤𑀁 𑀨𑀮𑀁.

𑁨𑁨.

𑀏𑀢𑁂𑀲𑀁 𑀧𑀼𑀜𑁆𑀜𑀓𑀫𑁆𑀫𑀸𑀦𑀁, 𑀯𑀸𑀳𑀲𑀸 𑀓𑀸𑀫𑀪𑀽𑀫𑀺𑀬𑀁;

𑀲𑀫𑁆𑀧𑀢𑁆𑀢𑀺 𑀫𑀦𑀼𑀪𑀼𑀢𑁆𑀯𑀸𑀦, 𑀲𑀸𑀯𑀢𑁆𑀣𑀺𑀧𑀼𑀭 𑀫𑀼𑀢𑁆𑀢𑀫𑁂.

𑁨𑁩.

𑀚𑀸𑀢𑁄 𑀓𑀼𑀮𑁂 𑀫𑀳𑀸𑀪𑁄𑀕𑁂,

𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀼𑀔𑁂𑀥𑀺𑀢𑁄;

𑀢𑀲𑁆𑀲 𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦,

𑀧𑀩𑁆𑀩𑀚𑀺𑀢𑁆𑀯𑀸𑀦 𑀲𑀸𑀲𑀦𑁂.

𑁨𑁪.

𑀮𑁄𑀓𑀼𑀢𑁆𑀢𑀭𑀁 𑀅𑀕𑁆𑀕𑀭𑀲𑀁, 𑀪𑀼𑀜𑁆𑀘𑀦𑁆𑀢𑁄 𑀫𑀼𑀦𑀺𑀯𑀸𑀳𑀲𑀸;

𑀓𑀺𑀮𑁂𑀲𑁂 𑀧𑀚𑀳𑀺𑀢𑁆𑀯𑀸𑀦, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁨𑁫.

𑀓𑀼𑀲𑀮𑀁 𑀦𑀸 𑀯𑀫𑀦𑁆𑀢𑀩𑁆𑀩𑀁, 𑀔𑀼𑀤𑁆𑀤𑀓𑀦𑁆𑀢𑀺 𑀓𑀤𑀸𑀘𑀺𑀧𑀺;

𑀅𑀦𑀦𑁆𑀢𑀨𑀮𑀤𑀁 𑀳𑁄𑀢𑀺, 𑀦𑀺𑀩𑁆𑀩𑀸𑀡𑀫𑁆𑀧𑀺 𑀤𑀤𑀸𑀢𑀺 𑀢𑀁.

𑀅𑀣𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀘 𑀫𑀳𑀸𑀚𑀦𑁄 𑀘 𑀤𑀸𑀦𑀸𑀤𑀺𑀓𑀼𑀲𑀮𑀓𑀫𑁆𑀫𑀁 𑀓𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀲𑀕𑁆𑀕𑀧𑀭𑀸𑀬𑀡𑀸 𑀅𑀳𑁂𑀲𑀼𑀁𑀢𑀺.

𑁨𑁬.

𑀫𑀦𑁄𑀧𑀲𑀸𑀤𑁂𑀦𑀧𑀺 𑀅𑀧𑁆𑀧𑀧𑀼𑀜𑁆𑀜𑀁,

𑀏𑀯𑀁 𑀫𑀳𑀦𑁆𑀢𑀁 𑀪𑀯𑀢𑀻𑀢𑀺 𑀜𑀢𑁆𑀯𑀸;

𑀫𑀸 𑀅𑀧𑁆𑀧𑀧𑀼𑀜𑁆𑀜𑀦𑁆𑀢𑀺 𑀧𑀫𑀚𑁆𑀚𑀣𑀫𑁆𑀪𑁄;

𑀲𑀭𑀸𑀣 𑀤𑁂𑀯𑀺𑀁 𑀇𑀥 𑀮𑀸𑀚𑀤𑀸𑀬𑀺𑀁.

𑀲𑀤𑁆𑀥𑁄𑀧𑀸𑀲𑀓𑀲𑁆𑀲 𑀯𑀢𑁆𑀣𑀼𑀁 𑀲𑀢𑁆𑀢𑀫𑀁.

𑁨𑁮. 𑀓𑀧𑀡𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀅𑀫𑁆𑀳𑀸𑀓𑀁 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀩𑀸𑀭𑀸𑀡𑀲𑀻𑀦𑀕𑀭𑀯𑀸𑀲𑀻 𑀏𑀓𑁄 𑀤𑀼𑀕𑁆𑀕𑀢𑀧𑀼𑀭𑀺𑀲𑁄 𑀧𑀭𑀕𑁂𑀳𑁂 𑀪𑀢𑀺𑀁𑀓𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀦𑀕𑀭𑀯𑀸𑀲𑀺𑀦𑁄 𑀬𑁂𑀪𑀼𑀬𑁆𑀬𑁂𑀦 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀫𑀡𑁆𑀟𑀧𑀸𑀤𑀬𑁄 𑀓𑀸𑀭𑀸𑀧𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑁂𑀦𑁆𑀢𑀺, 𑀢𑀁 𑀤𑀺𑀲𑁆𑀯𑀸 𑀤𑀼𑀕𑁆𑀕𑀢𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺, 𑀅𑀳𑀁 𑀧𑀼𑀩𑁆𑀩𑁂 𑀅𑀓𑀢𑀧𑀼𑀜𑁆𑀜𑀢𑁆𑀢𑀸 𑀧𑀭𑀕𑁂𑀳𑁂 𑀪𑀢𑀺𑀁 𑀓𑀢𑁆𑀯𑀸 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀚𑀻𑀯𑀸𑀫𑀺. 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀫𑁆𑀧𑀺 𑀯𑀸𑀲𑀝𑁆𑀞𑀸𑀦𑀫𑀢𑁆𑀢𑀫𑁆𑀫𑀺 𑀤𑀼𑀓𑁆𑀔𑀢𑁄 𑀮𑀪𑀸𑀫𑀺. 𑀇𑀤𑀸𑀦𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀯𑀢𑁆𑀢𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺.

𑀲𑀩𑁆𑀩𑁂 ¶ 𑀇𑀫𑁂 𑀤𑀸𑀦𑀁 𑀤𑀢𑁆𑀯𑀸 𑀲𑀕𑁆𑀕𑀫𑀕𑁆𑀕𑀁 𑀲𑁄𑀥𑁂𑀦𑁆𑀢𑀺. 𑀫𑀬𑀸𑀧𑀺 𑀤𑀸𑀦𑀁 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀢𑀫𑁆𑀫𑁂 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀺. 𑀅𑀧𑀺 𑀘 𑀫𑀬𑁆𑀳𑀁 𑀢𑀡𑁆𑀟𑀼𑀮𑀦𑀸𑀮𑀺𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, 𑀅𑀓𑀢𑀯𑀻𑀭𑀺𑀬𑁂𑀦 𑀢𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑀼𑀁 𑀦 𑀲𑀓𑁆𑀓𑀸, 𑀏𑀢𑀤𑀢𑁆𑀣𑀸𑀬𑀸𑀳𑀁 𑀉𑀬𑁆𑀬𑁄𑀕𑀁 𑀓𑀢𑁆𑀯𑀸 𑀤𑀸𑀦𑀁 𑀤𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀪𑀢𑀺𑀁 𑀧𑀭𑀺𑀬𑁂𑀲𑀫𑀸𑀦𑁄 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀪𑀢𑀺𑀁 𑀓𑀢𑁆𑀯𑀸 𑀮𑀤𑁆𑀥𑀦𑀺𑀯𑀸𑀧𑁂 𑀘 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀮𑀤𑁆𑀥𑀢𑀺𑀮𑀢𑀡𑁆𑀟𑀼𑀮𑀸𑀤𑀬𑁄 𑀘 𑀏𑀓𑀢𑁆𑀣 𑀲𑀁𑀳𑀭𑀺𑀢𑁆𑀯𑀸 𑀫𑀦𑀼𑀲𑁆𑀲𑁂 𑀲𑀫𑀸𑀤𑀸𑀧𑁂𑀢𑁆𑀯𑀸 𑀢𑀲𑁆𑀫𑀺𑀁 𑀫𑀡𑁆𑀟𑀧𑀁 𑀓𑀸𑀭𑀸𑀧𑁂𑀢𑁆𑀯𑀸 𑀯𑀦𑀓𑀼𑀲𑀫𑀸𑀤𑀻𑀳𑀺 𑀢𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑁂𑀢𑁆𑀯𑀸 𑀫𑀡𑁆𑀟𑀧𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀩𑁆𑀩𑁂𑀲𑀁 𑀧𑀸𑀬𑀲𑀁 [𑀧𑀸𑀬𑀸𑀲𑀁 𑀇𑀢𑀺𑀲𑀩𑁆𑀩𑀢𑁆𑀣] 𑀧𑀝𑀺𑀬𑀸𑀤𑁂𑀢𑁆𑀯𑀸 𑀪𑁄𑀚𑁂𑀲𑀺. 𑀅𑀣 𑀲𑁄 𑀫𑀭𑀡𑀓𑀸𑀮𑁂 𑀅𑀢𑁆𑀢𑀦𑀸 𑀓𑀢𑀁 𑀢𑀁 𑀤𑀸𑀦𑀯𑀭𑀁 𑀅𑀦𑀼𑀲𑁆𑀲𑀭𑀺. 𑀲𑁄 𑀢𑁂𑀦 𑀓𑀼𑀲𑀮𑀓𑀫𑁆𑀫𑁂𑀦 𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄 𑀯𑀺𑀬 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀫𑀺𑀁 𑀢𑁂𑀦 𑀓𑀢𑀧𑀼𑀜𑁆𑀜𑀸𑀦𑀼𑀭𑀽𑀧𑀁 𑀫𑀳𑀦𑁆𑀢𑀁 𑀓𑀦𑀓𑀯𑀺𑀫𑀸𑀦𑀁 𑀦𑀺𑀩𑁆𑀩𑀢𑁆𑀢𑀺. 𑀲𑀫𑀦𑁆𑀢𑀸 𑀢𑀺𑀕𑀸𑀯𑀼𑀢𑀝𑁆𑀞𑀸𑀦𑁂 𑀤𑁂𑀯𑀢𑀸 𑀦𑀸𑀦𑀸 𑀯𑀺𑀥𑀸𑀦𑀺 𑀢𑀼𑀭𑀺𑀬𑀸𑀦𑀺 𑀕𑀳𑁂𑀢𑁆𑀯𑀸 𑀉𑀧𑀳𑀸𑀭𑀁 𑀓𑀭𑁄𑀦𑁆𑀢𑀺. 𑀦𑀺𑀘𑁆𑀘𑀁 𑀤𑁂𑀯𑀘𑁆𑀙𑀭𑀸𑀲𑀳𑀲𑁆𑀲𑀸𑀦𑀺 [𑀤𑁂𑀯𑀘𑁆𑀙𑀭𑀸𑀲𑀳𑀲𑁆𑀲𑀁 𑀇𑀢𑀺𑀲𑀩𑁆𑀩𑀢𑁆𑀣] 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀏𑀯𑀁 𑀲𑁄 𑀫𑀳𑀦𑁆𑀢𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀲𑀼𑀯𑀡𑁆𑀡𑀲𑁂𑀮𑀯𑀺𑀳𑀸𑀭𑀯𑀸𑀲𑀻 𑀫𑀳𑀸𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑁄 𑀧𑀢𑁆𑀢𑀧𑀝𑀺𑀲𑀫𑁆𑀪𑀺𑀤𑁄 𑀤𑁂𑀯𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀢𑀁 𑀤𑁂𑀯𑀧𑀼𑀢𑁆𑀢𑀁 𑀅𑀦𑀼𑀧𑀫𑀸𑀬 𑀤𑁂𑀯𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀭𑁄𑀘𑀫𑀸𑀦𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑁆𑀫 𑀞𑀺𑀢𑁄 𑀢𑁂𑀦 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀺. 𑀲𑁄𑀧𑀺𑀲𑁆𑀲 𑀬𑀣𑀸𑀪𑀽𑀢𑀁 𑀩𑁆𑀬𑀸𑀓𑀸𑀲𑀺, 𑀢𑁂𑀦𑀢𑁆𑀣.

𑁧.

𑀲𑀩𑁆𑀩𑀲𑁄𑀯𑀡𑁆𑀡𑀬𑁄 𑀆𑀲𑀺, 𑀧𑀸𑀲𑀸𑀤𑁄 𑀭𑀢𑀦𑀸𑀫𑀬𑁄;

𑀲𑁄𑀡𑁆𑀡𑀲𑀺𑀗𑁆𑀕𑀲𑀢𑀸𑀓𑀺𑀡𑁆𑀡𑁄, 𑀤𑀼𑀤𑁆𑀤𑀺𑀓𑁆𑀔𑁄 𑀘 𑀧𑀪𑀲𑁆𑀲𑀭𑁄.

𑁨.

𑀓𑀽𑀝𑀸𑀕𑀸𑀭 𑀲𑀢𑀸𑀓𑀺𑀡𑁆𑀡𑁄, 𑀲𑁄𑀡𑁆𑀡𑀫𑀸𑀮𑀸𑀲𑀫𑀸𑀓𑀼𑀮𑁄;

𑀫𑀼𑀢𑁆𑀢𑀸𑀓𑀮𑀸𑀧𑀸𑀮𑀫𑁆𑀩𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣 𑀫𑀦𑁄𑀭𑀫𑀸.

𑁩.

𑀦𑁂𑀓𑀕𑀩𑁆𑀪𑀲𑀢𑀸𑀓𑀺𑀡𑁆𑀡𑁄, 𑀲𑀬𑀦𑀸𑀲𑀦𑀫𑀡𑁆𑀟𑀺𑀢𑁄;

𑀯𑀺𑀪𑀢𑁆𑀢𑁄 𑀪𑀩𑁆𑀩𑀪𑀸𑀕𑁂𑀳𑀺, 𑀧𑀼𑀜𑁆𑀜𑀯𑀟𑁆𑀠𑀓𑀺𑀦𑀸 𑀓𑀢𑁄.

𑁪.

𑀦𑀘𑁆𑀘𑀦𑁆𑀢𑀺 ¶ 𑀧𑀫𑀤𑀸 𑀢𑀢𑁆𑀣, 𑀪𑁂𑀭𑀺𑀫𑀡𑁆𑀟𑀮𑀫𑀚𑁆𑀛𑀕𑀸;

𑀕𑀸𑀬𑀦𑁆𑀢𑀺 𑀓𑀸𑀘𑀺 𑀓𑀻𑀴𑀦𑁆𑀢𑀺, 𑀯𑀸𑀤𑁂𑀦𑁆𑀢𑀺 𑀓𑀸𑀘𑀺 𑀢𑀦𑁆𑀢𑀺𑀬𑁄.

𑁫.

𑀢𑀢𑁄 𑀢𑀺𑀕𑀸𑀯𑀼𑀢𑁂 𑀞𑀸𑀦𑁂, 𑀧𑀸𑀲𑀸𑀤𑀲𑁆𑀲 𑀲𑀫𑀦𑁆𑀢𑀢𑁄;

𑀲𑀳𑀘𑁆𑀙𑀭𑀸 𑀤𑁂𑀯𑀧𑀼𑀢𑁆𑀢𑀸, 𑀕𑀳𑁂𑀢𑁆𑀯𑀸 𑀆𑀢𑀢𑀸𑀤𑀬𑁄.

𑁬.

𑀫𑁄𑀤𑀦𑁆𑀢𑀺 𑀧𑀭𑀺𑀯𑀸𑀭𑁂𑀢𑁆𑀯𑀸, 𑀦𑀘𑁆𑀘𑀕𑀻𑀢𑀸𑀤𑀺𑀦𑀸 𑀲𑀤𑀸;

𑀉𑀮𑁆𑀮𑀗𑁆𑀖𑀦𑁆𑀢𑀺𑀘 𑀲𑁂𑀮𑁂𑀦𑁆𑀢𑀺, 𑀲𑀺𑀮𑀸𑀖𑀦𑁆𑀢𑀺 𑀲𑀫𑀦𑁆𑀢𑀢𑁄.

𑁭.

𑀏𑀯𑀁 𑀫𑀳𑀺𑀤𑁆𑀥𑀺𑀓𑁄 𑀤𑀸𑀦𑀺, 𑀢𑀼𑀯𑀁 𑀯𑀦𑁆𑀤𑁄𑀯 𑀪𑀸𑀲𑀢𑀺;

𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀧𑀼𑀢𑁆𑀢, 𑀓𑀺𑀁 𑀓𑀫𑁆𑀫𑀫𑀓𑀭𑀻 𑀧𑀼𑀭𑀸.

𑀤𑁂𑀯𑀧𑀼𑀢𑁆𑀢𑁄 𑀆𑀳.

𑁮.

𑀅𑀳𑁄𑀲𑀺𑀁 𑀤𑀼𑀕𑁆𑀕𑀢𑁄 𑀧𑀼𑀩𑁆𑀩𑁂, 𑀩𑀸𑀭𑀸𑀡𑀲𑀻𑀧𑀼𑀭𑀼𑀢𑁆𑀢𑀫𑁂;

𑀤𑀸𑀦𑀁 𑀤𑁂𑀦𑁆𑀢𑀺 𑀦𑀭𑀸 𑀢𑀢𑁆𑀣, 𑀦𑀺𑀫𑀦𑁆𑀢𑁂𑀢𑁆𑀯𑀸𑀦 𑀪𑀺𑀓𑁆𑀔𑀯𑁄.

𑁯.

𑀚𑀻𑀯𑀦𑁆𑀢𑁄 𑀪𑀢𑀺𑀬𑀸 𑀲𑁄𑀳𑀁, 𑀤𑀸𑀦𑀁 𑀤𑁂𑀦𑁆𑀢𑁂 𑀫𑀳𑀸𑀚𑀦𑁂;

𑀢𑀼𑀝𑁆𑀞𑀳𑀝𑁆𑀞𑁂 𑀧𑀫𑀼𑀤𑀺𑀢𑁂, 𑀏𑀯𑀁 𑀘𑀺𑀦𑁆𑀢𑁂𑀲𑀳𑀁 𑀢𑀤𑀸.

𑁧𑁦.

𑀲𑀫𑁆𑀧𑀦𑁆𑀦𑀯𑀢𑁆𑀣𑀸𑀮𑀗𑁆𑀓𑀸𑀭𑀸, 𑀤𑀸𑀦𑀁 𑀤𑁂𑀦𑁆𑀢𑀺 𑀇𑀫𑁂 𑀚𑀦𑀸;

𑀧𑀭𑀢𑁆𑀣𑀧𑀺 𑀧𑀳𑀝𑁆𑀞𑀸𑀯, 𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑁄𑀦𑁆𑀢𑀺 𑀢𑁂.

𑁧𑁧.

𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀅𑀬𑀁 𑀤𑀸𑀦𑀺, 𑀥𑀫𑁆𑀫𑁄 𑀮𑁄𑀓𑁂 𑀧𑀯𑀢𑁆𑀢𑀢𑀺;

𑀲𑀼𑀲𑀻𑀮𑀸 𑀤𑀸𑀦𑀺 𑀯𑀢𑁆𑀢𑀦𑁆𑀢𑀺, 𑀤𑀓𑁆𑀔𑀺𑀡𑁂𑀬𑁆𑀬𑀸 𑀚𑀺𑀦𑁄𑀭𑀲𑀸.

𑁧𑁨.

𑀅𑀦𑀸𑀯𑀝𑁆𑀞𑀺𑀢𑁄 [𑀅𑀯𑀝𑁆𑀞𑀺𑀢𑁄𑀘; 𑀅𑀦𑁆𑀥𑀝𑁆𑀞𑀺𑀢𑁄𑀘 𑀇𑀢𑀺𑀧𑀺𑀓𑀢𑁆𑀢𑀘𑀺] 𑀲𑀁𑀲𑀸𑀭𑁄, 𑀅𑀧𑀸𑀬𑀸 𑀔𑀮𑀼 𑀧𑀽𑀭𑀺𑀢𑀸;

𑀓𑀮𑁆𑀬𑀸𑀡𑀯𑀺𑀫𑀼𑀔𑀸 𑀲𑀢𑁆𑀢𑀸, 𑀓𑀸𑀫𑀁 𑀕𑀘𑁆𑀙𑀦𑁆𑀢𑀺 𑀤𑀼𑀕𑁆𑀕𑀢𑀺𑀁.

𑁧𑁩.

𑀇𑀤𑀸𑀦𑀺 𑀤𑀼𑀓𑁆𑀔𑀺𑀢𑁄 𑀳𑀼𑀢𑁆𑀯𑀸, 𑀚𑀻𑀯𑀸𑀫𑀺 𑀓𑀲𑀺𑀭𑁂𑀦𑀳𑀁;

𑀤𑀮𑀺𑀤𑁆𑀤𑁄 𑀓𑀧𑀡𑁄 𑀤𑀻𑀦𑁄, 𑀅𑀧𑁆𑀧𑀪𑁄𑀕𑁄 𑀅𑀦𑀸𑀮𑀬𑁄.

𑁧𑁪.

𑀇𑀤𑀸𑀦𑀺 𑀩𑀻𑀚𑀁 𑀭𑁄𑀧𑁂𑀫𑀺, 𑀲𑀼𑀔𑁂𑀢𑁆𑀢𑁂 𑀲𑀸𑀥𑀼𑀲𑀫𑁆𑀫𑀢𑁂;

𑀅𑀧𑁆𑀧𑁂𑀯𑀦𑀸𑀫 𑀢𑁂𑀦𑀸𑀳𑀁, 𑀧𑀭𑀢𑁆𑀣 𑀲𑀼𑀔𑀺𑀢𑁄 𑀲𑀺𑀬𑀸.

𑁧𑁫.

𑀇𑀢𑀺 𑀘𑀺𑀦𑁆𑀢𑀺𑀬 𑀪𑀺𑀓𑁆𑀔𑀺𑀢𑁆𑀯𑀸, 𑀪𑀢𑀺𑀁 𑀓𑀢𑁆𑀯𑀸𑀦 𑀦𑁂𑀓𑀥𑀸;

𑀫𑀡𑁆𑀟𑀧𑀁 𑀢𑀢𑁆𑀣 𑀓𑀸𑀭𑁂𑀢𑁆𑀯𑀸, 𑀦𑀺𑀫𑀦𑁆𑀢𑁂𑀢𑁆𑀯𑀸𑀦 𑀪𑀺𑀓𑁆𑀔𑀯𑁄.

𑁧𑁬.

𑀆𑀬𑀸𑀲𑁂𑀦 ¶ 𑀅𑀤𑀸𑀲𑀸𑀳𑀁, 𑀧𑀸𑀬𑀲𑀁 𑀅𑀫𑀢𑀸𑀬 𑀲𑁄;

𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀤𑁂𑀯𑀮𑁄𑀓𑁂 𑀫𑀦𑁄𑀭𑀫𑁂.

𑁧𑁭.

𑀚𑀸𑀢𑁄𑀫𑁆𑀳𑀺 𑀤𑀺𑀩𑁆𑀩𑀓𑀸𑀫𑁂𑀳𑀺, 𑀫𑁄𑀤𑀫𑀸𑀦𑁄 𑀅𑀦𑁂𑀓𑀥𑀸;

𑀤𑀻𑀖𑀸𑀬𑀼𑀓𑁄 𑀯𑀡𑁆𑀡𑀯𑀦𑁆𑀢𑁄, 𑀢𑁂𑀚𑀲𑁆𑀲𑀻𑀘 𑀅𑀳𑁄𑀲𑀳𑀦𑁆𑀢𑀺.

𑀏𑀯𑀁 𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀢𑀦𑀸 𑀓𑀢𑀧𑀼𑀜𑁆𑀜𑀓𑀫𑁆𑀫𑀁 𑀯𑀺𑀢𑁆𑀢𑀸𑀭𑁂𑀦 𑀓𑀣𑁂𑀲𑀺, 𑀣𑁂𑀭𑁄𑀧𑀺 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀅𑀢𑁆𑀢𑀦𑀸 𑀧𑀘𑁆𑀘𑀓𑁆𑀔𑀢𑁄 𑀤𑀺𑀝𑁆𑀞𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀧𑀓𑀸𑀲𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀫𑀳𑀸𑀚𑀦𑁄 𑀓𑀼𑀲𑀮𑀓𑀫𑁆𑀫𑀁 𑀓𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁄𑀢𑀺.

𑁧𑁮.

𑀅𑀦𑀸𑀮𑀬𑁄 𑀤𑀼𑀕𑁆𑀕𑀢𑀤𑀻𑀦𑀓𑁄𑀧𑀺,

𑀤𑀸𑀦𑀁 𑀤𑀤𑀦𑁆𑀢𑁄 𑀥𑀺𑀕𑀢𑁄 𑀯𑀺𑀲𑁂𑀲𑀁;

𑀲𑀕𑁆𑀕𑀸 𑀧𑀯𑀕𑁆𑀕𑀁 𑀬𑀤𑀺 𑀧𑀢𑁆𑀣𑀬𑀯𑁆𑀳𑁄,

𑀳𑀦𑁆𑀢𑁆𑀯𑀸𑀦 𑀫𑀘𑁆𑀙𑁂𑀭𑀫𑀮𑀁 𑀤𑀤𑀸𑀣𑀸𑀢𑀺.

𑀓𑀧𑀡𑀲𑁆𑀲 𑀯𑀢𑁆𑀣𑀼𑀁 𑀅𑀝𑁆𑀞𑀫𑀁.

𑁨𑁯. 𑀤𑁂𑀯𑀧𑀼𑀢𑁆𑀢𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀇𑀢𑁄 𑀧𑀼𑀩𑁆𑀩𑁂 𑀦𑀸𑀭𑀤𑀲𑁆𑀲 𑀓𑀺𑀭 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀓𑀸𑀮𑁂 𑀅𑀬𑀁 𑀤𑀻𑀧𑁄 𑀅𑀜𑁆𑀜𑀢𑀭𑁂𑀦 𑀦𑀸𑀫𑁂𑀦 𑀧𑀸𑀓𑀝𑁄 𑀅𑀳𑁄𑀲𑀺, 𑀲𑁄 𑀧𑀦𑁂𑀓𑀲𑁆𑀫𑀺𑀁 𑀓𑀸𑀮𑁂 𑀤𑀼𑀩𑁆𑀪𑀺𑀓𑁆𑀔𑁄 𑀅𑀳𑁄𑀲𑀺 𑀤𑀼𑀲𑁆𑀲𑀲𑁆𑀲𑁄, 𑀫𑀳𑀸𑀙𑀸𑀢𑀓𑀪𑀬𑀁 𑀲𑀢𑁆𑀢𑁂 𑀧𑀻𑀴𑁂𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀦𑀸𑀭𑀤𑀲𑁆𑀲 𑀪𑀕𑀯𑀢𑁄 𑀏𑀓𑁄 𑀲𑀸𑀲𑀦𑀺𑀓𑁄 𑀲𑀸𑀯𑀓𑁄 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀬𑀣𑀸 𑀥𑁄𑀢𑀧𑀢𑁆𑀢𑁄𑀯 𑀦𑀺𑀓𑁆𑀔𑀫𑀺. 𑀅𑀣𑀜𑁆𑀜𑀢𑀭𑀲𑁆𑀫𑀺𑀁 𑀕𑁂𑀳𑁂 𑀫𑀦𑀼𑀲𑁆𑀲𑀸 𑀏𑀓𑀁 𑀢𑀡𑁆𑀟𑀼𑀮𑀦𑀸𑀴𑀺𑀁𑀧𑁄𑀝𑀮𑀺𑀓𑀸𑀬 𑀩𑀦𑁆𑀥𑀺𑀢𑁆𑀯𑀸 𑀉𑀤𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑀺𑀢𑁆𑀯𑀸 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀧𑀺𑀯𑀦𑁆𑀢𑁄 𑀚𑀻𑀯𑀦𑁆𑀢𑀺, 𑀢𑀤𑀸 𑀣𑁂𑀭𑀁 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀢𑁂𑀦 𑀢𑀡𑁆𑀟𑀼𑀮𑁂𑀦 𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀣𑁂𑀭𑀲𑁆𑀲 𑀅𑀤𑀁𑀲𑀼. 𑀅𑀣 ¶ 𑀢𑁂𑀲𑀁 𑀲𑀤𑁆𑀥𑀸𑀩𑀮𑁂𑀦 𑀲𑀸 𑀉𑀓𑁆𑀔𑀮𑀺 𑀪𑀢𑁆𑀢𑁂𑀦 𑀧𑀭𑀺𑀧𑀼𑀡𑁆𑀡𑀸 𑀅𑀳𑁄𑀲𑀺, 𑀢𑁂 𑀢𑀁 𑀅𑀩𑁆𑀪𑀼𑀢𑀁 𑀤𑀺𑀲𑁆𑀯𑀸 𑀅𑀬𑁆𑀬𑀲𑁆𑀲 𑀤𑀺𑀦𑁆𑀦𑀤𑀸𑀦𑁂 𑀯𑀺𑀧𑀸𑀓𑁄 𑀅𑀚𑁆𑀚𑁂𑀯 𑀦𑁄 𑀤𑀺𑀝𑁆𑀞𑁄𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑀸 𑀫𑀳𑀸𑀚𑀦𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀢𑁂 𑀪𑀢𑁆𑀢𑀁 𑀪𑁄𑀚𑁂𑀢𑁆𑀯𑀸 𑀧𑀘𑁆𑀙𑀸 𑀲𑀬𑀁 𑀪𑀼𑀜𑁆𑀚𑀺𑀁𑀲𑀼. 𑀪𑀢𑁆𑀢𑀲𑁆𑀲 𑀕𑀳𑀺𑀢𑀕𑀳𑀺𑀢𑀝𑁆𑀞𑀸𑀦𑀁 𑀧𑀽𑀭𑀢𑁂𑀯. 𑀢𑀢𑁄 𑀧𑀝𑁆𑀞𑀸𑀬 𑀢𑁂 𑀲𑀫𑁆𑀧𑀢𑁆𑀢𑀫𑀳𑀸𑀚𑀦𑀲𑁆𑀲 𑀤𑀸𑀦𑀁 𑀤𑀤𑀦𑁆𑀢𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼, 𑀅𑀣 𑀲𑁄 𑀣𑁂𑀭𑁄 𑀪𑀢𑁆𑀢𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀫𑀸𑀭𑀢𑀺. 𑀢𑀲𑁆𑀫𑀺𑀁 𑀓𑀺𑀭 𑀭𑀼𑀓𑁆𑀔𑁂 𑀦𑀺𑀩𑁆𑀩𑀢𑁆𑀢𑁄 𑀏𑀓𑁄 𑀤𑁂𑀯𑀧𑀼𑀢𑁆𑀢𑁄 𑀆𑀳𑀸𑀭𑁂𑀦 𑀓𑀺𑀮𑀦𑁆𑀢𑁄 𑀪𑀼𑀜𑁆𑀚𑀫𑀸𑀦𑀁 𑀣𑁂𑀭𑀁 𑀤𑀺𑀲𑁆𑀯𑀸 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀫𑀳𑀮𑁆𑀮𑀓𑀯𑁂𑀲𑁂𑀦 𑀢𑀲𑁆𑀲 𑀲𑀫𑀻𑀧𑁂 𑀅𑀝𑁆𑀞𑀸𑀲𑀺. 𑀣𑁂𑀭𑁄 𑀅𑀦𑀸𑀯𑀚𑁆𑀚𑀺𑀢𑁆𑀯𑀸𑀯 𑀪𑀼𑀜𑁆𑀚𑀢𑀺. 𑀤𑁂𑀯𑀧𑀼𑀢𑁆𑀢𑁄 𑀘𑀭𑀺𑀫𑀸𑀮𑁄𑀧𑀁 𑀞𑀧𑁂𑀢𑁆𑀯𑀸 𑀪𑀼𑀢𑁆𑀢𑀓𑀸𑀮𑁂 𑀉𑀓𑁆𑀓𑀸𑀲𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀞𑀺𑀢𑀪𑀸𑀯𑀁 𑀚𑀸𑀦𑀸𑀧𑁂𑀲𑀺. 𑀣𑁂𑀭𑁄 𑀢𑀁 𑀤𑀺𑀲𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀺 𑀳𑀼𑀢𑁆𑀯𑀸 𑀘𑀭𑀺𑀫𑀁 𑀪𑀢𑁆𑀣𑀧𑀺𑀡𑁆𑀟𑀁 𑀢𑀲𑁆𑀲 𑀳𑀢𑁆𑀣𑁂 𑀞𑀧𑁂𑀲𑀺, 𑀢𑀢𑁄 𑀲𑁄 𑀪𑀢𑁆𑀢𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸 𑀞𑀺𑀢𑁄 𑀘𑀺𑀦𑁆𑀢𑁂𑀲𑀺. 𑀇𑀢𑁄 𑀓𑀺𑀭 𑀫𑀬𑀸 𑀧𑀼𑀩𑁆𑀩𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀸 𑀓𑀧𑀡𑀤𑁆𑀥𑀺𑀓𑀸𑀦𑀁 𑀯𑀸 𑀅𑀦𑁆𑀢𑀫𑀲𑁄 𑀓𑀸𑀓𑀲𑀼𑀦𑀔𑀸 𑀤𑀻𑀦𑀫𑁆𑀧𑀺 𑀆𑀳𑀸𑀭𑀁 𑀅𑀤𑀺𑀦𑁆𑀦𑀧𑀼𑀩𑁆𑀩𑀁 𑀪𑀯𑀺𑀲𑁆𑀲𑀢𑀺, 𑀢𑁂𑀦𑀯𑀸𑀳𑀁 𑀤𑁂𑀯𑁄 𑀳𑀼𑀢𑁆𑀯𑀸𑀧𑀺 𑀪𑀢𑁆𑀢𑀁 𑀦 𑀮𑀪𑀸𑀫𑀺. 𑀳𑀦𑁆𑀤𑀸𑀳𑀁 𑀇𑀫𑀁 𑀪𑀢𑁆𑀢𑀧𑀺𑀡𑁆𑀟𑀁 𑀣𑁂𑀭𑀲𑁆𑀲𑁂𑀯 𑀤𑀲𑁆𑀲𑀸𑀫𑀺, 𑀢𑀁 𑀫𑁂 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀘𑀸𑀢𑀺. 𑀏𑀯𑀜𑁆𑀘 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀪𑀢𑁆𑀢𑀧𑀺𑀡𑁆𑀟𑁂 𑀆𑀲𑀁 𑀧𑀳𑀸𑀬 𑀣𑁂𑀭𑀁 𑀉𑀧𑀲𑀗𑁆𑀓𑀫𑁆𑀫 𑀲𑀸𑀫𑀺 𑀤𑀸𑀲𑀲𑁆𑀲 𑀯𑁄 𑀅𑀮𑀁 𑀇𑀥 𑀮𑁄𑀓𑁂𑀦 𑀲𑀗𑁆𑀕𑀳𑀁. 𑀧𑀭𑀮𑁄𑀓𑁂𑀦 𑀫𑁂 𑀲𑀗𑁆𑀕𑀳𑀁 𑀓𑀭𑁄𑀣𑀸𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀧𑀢𑁆𑀢𑁂 𑀑𑀓𑀺𑀭𑀺. 𑀅𑀣𑀲𑁆𑀲 𑀪𑀢𑁆𑀣𑀧𑀺𑀡𑁆𑀟𑀁 [𑀪𑀢𑁆𑀣𑀧𑀺𑀡𑁆𑀟𑀁 𑀇𑀢𑀺𑀲𑀩𑁆𑀩𑀢𑁆𑀣] 𑀧𑀢𑁆𑀢𑁂 𑀧𑀢𑀺𑀢𑀫𑀢𑁆𑀢𑁂𑀬𑁂𑀯 𑀢𑀺𑀕𑀸𑀯𑀼𑀢𑀝𑁆𑀞𑀸𑀦𑁂 𑀤𑀺𑀩𑁆𑀩𑀫𑀬𑀸𑀦𑀺 𑀪𑀢𑁆𑀢𑀪𑀸𑀚𑀦𑀸𑀦𑀺𑀧𑀜𑁆𑀜𑀸𑀬𑀺𑀁𑀲𑀼. 𑀤𑁂𑀯𑀧𑀼𑀢𑁆𑀢𑁄 𑀣𑁂𑀭𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀢𑀢𑁄 𑀤𑀺𑀩𑁆𑀩𑀪𑁄𑀚𑀦𑀁 𑀕𑀳𑁂𑀢𑁆𑀯𑀸 𑀧𑀣𑀫𑀁 𑀤𑀸𑀦𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀲𑀬𑀁 𑀪𑀼𑀜𑁆𑀘𑀺. 𑀢𑀢𑁄 𑀤𑁂𑀧𑀼𑀢𑁆𑀢𑁄 𑀤𑀼𑀢𑀺𑀬𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀣𑁂𑀭𑀲𑁆𑀲 𑀘 𑀲𑀫𑁆𑀧𑀢𑁆𑀢𑀫𑀳𑀸𑀚𑀦𑀲𑁆𑀲 𑀘 𑀫𑀳𑀸𑀤𑀸𑀦𑀁 𑀤𑁂𑀦𑁆𑀢𑁄 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 ¶ 𑁦 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀙𑀲𑀼 𑀓𑀸𑀫𑀲𑀕𑁆𑀕𑁂𑀲𑀼 𑀅𑀧𑀭𑀸𑀧𑀭𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺 𑀫𑀦𑀼𑀪𑀯𑀫𑀸𑀦𑁄 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀢𑀢𑁄 𑀘𑀼𑀢𑁄 𑀩𑀸𑀭𑀸𑀡𑀲𑀺𑀬𑀁 𑀅𑀦𑁂𑀓𑀯𑀺𑀪𑀯𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺. 𑀤𑁂𑀯𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀅𑀧𑀭𑀪𑀸𑀕𑁂 𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀲𑁆𑀲 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀓𑀸𑀮𑀫𑀓𑀁𑀲𑀼. 𑀲𑁄𑀯𑀡𑁆𑀡𑀫𑀡𑀺𑀫𑀼𑀢𑁆𑀢𑀸𑀤𑀺𑀧𑀽𑀭𑀺𑀢𑀓𑁄𑀝𑁆𑀞𑀸𑀕𑀸𑀭𑀸𑀤𑀬𑁄 𑀑𑀮𑁄𑀓𑁂𑀢𑁆𑀯𑀸 𑀫𑀫 𑀫𑀸𑀢𑀸𑀧𑀺𑀢𑀭𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀢𑁆𑀢𑀸 𑀇𑀢𑁄 𑀤𑀸𑀦𑀸𑀤𑀺𑀓𑀺𑀜𑁆𑀘𑀺𑀓𑀫𑁆𑀫𑀁 𑀅𑀓𑀭𑀺𑀢𑁆𑀯𑀸 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑀸 𑀓𑀸𑀓𑀡𑀺𑀓𑀫𑀢𑁆𑀢𑀫𑁆𑀧𑀺 𑀅𑀕𑀳𑁂𑀢𑁆𑀯𑀸 𑀕𑀢𑀸, 𑀅𑀳𑀁 𑀧𑀦 𑀢𑀁 𑀕𑀳𑁂𑀢𑁆𑀯𑀸𑀯 𑀕𑀫𑀺𑀲𑁆𑀲𑀸𑀫𑀻𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀓𑀧𑀡𑀤𑁆𑀥𑀺𑀓𑀯𑀦𑀺𑀩𑁆𑀩𑀓𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀁 𑀤𑀸𑀦𑀫𑀼𑀔𑁂𑀦 𑀤𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀇𑀲𑀺𑀧𑁆𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀜𑁆𑀘 𑀪𑀺𑀜𑁆𑀜𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀆𑀓𑀸𑀲𑀘𑀸𑀭𑀻 𑀅𑀳𑁄𑀲𑀺. 𑀅𑀣 𑀢𑀲𑁆𑀫𑀺𑀁𑀲𑀫𑀬𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀪𑀕𑀯𑀸 𑀳𑀁𑀲𑀯𑀢𑀻𑀦𑀕𑀭𑁂 𑀧𑀝𑀺𑀯𑀲𑀦𑁆𑀢𑁄 𑀤𑁂𑀯𑀩𑁆𑀭𑀳𑁆𑀫𑀸𑀤𑀺𑀧𑀭𑀺𑀯𑀼𑀢𑁄 𑀘𑀢𑀼𑀲𑀘𑁆𑀘𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀢𑀤𑀸 𑀲𑁄 𑀢𑀸𑀧𑀲𑁄 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀫𑀳𑀸𑀚𑀦𑀲𑀫𑀸𑀕𑀫𑀜𑁆𑀘 𑀪𑀕𑀯𑀢𑁄 𑀲𑀭𑀻𑀭𑀢𑁄 𑀦𑀺𑀓𑁆𑀔𑀦𑁆𑀢𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀘 𑀤𑀺𑀲𑁆𑀯𑀸 𑀓𑀺𑀫𑁂𑀢𑀁𑀢𑀺 𑀯𑀺𑀫𑁆𑀳𑀺𑀢𑁄 𑀆𑀓𑀸𑀲𑀸 𑀑𑀢𑀭𑀺𑀢𑁆𑀯𑀸 𑀫𑀳𑀢𑀺𑀬𑀸 𑀩𑀼𑀤𑁆𑀥𑀮𑀻𑀴𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀧𑀭𑀺𑀲𑀦𑁆𑀢𑀭𑁂 𑀦𑀺𑀲𑀺𑀦𑁆𑀦𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀲𑁆𑀲𑀫𑀫𑁂𑀯 𑀅𑀕𑀫𑀸𑀲𑀺. 𑀅𑀣 𑀲𑁄 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑁄 𑀢𑀺𑀁𑀲𑀓𑀧𑁆𑀧𑁂 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀫𑀦𑀼𑀪𑀯𑀦𑁆𑀢𑁄 𑀙𑀲𑀼 𑀓𑀸𑀫𑀲𑀕𑁆𑀕𑁂𑀲𑀼 𑀅𑀧𑀭𑀸𑀧𑀭𑀺𑀬𑀯𑀲𑁂𑀦 𑀲𑀁𑀲𑀭𑀺. 𑀏𑀓𑀧𑀜𑁆𑀜𑀸𑀲𑀅𑀢𑁆𑀢𑀪𑀸𑀯𑁂 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀅𑀳𑁄𑀲𑀺, 𑀏𑀓𑀓𑀯𑀻𑀲𑀢𑀺𑀅𑀢𑁆𑀢𑀪𑀸𑀯𑁂 𑀘𑀓𑁆𑀓𑀯𑀢𑁆𑀢𑀺 𑀳𑀼𑀢𑁆𑀯𑀸 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺 𑀫𑀦𑀼𑀪𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀸𑀯𑀢𑁆𑀣𑀺𑀬𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀢𑁆𑀢𑀯𑀲𑁆𑀲𑀺𑀓𑁄 𑀏𑀓𑀁 𑀪𑀺𑀓𑁆𑀔𑀼𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀁 𑀅𑀤𑁆𑀤𑀲. 𑀤𑀺𑀲𑁆𑀯𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀅𑀦𑀺𑀘𑁆𑀘𑀲𑀜𑁆𑀜𑀁 ¶ 𑀧𑀝𑀺𑀮𑀪𑀺𑀢𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑁄𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺, 𑀢𑀢𑁄 𑀲𑁄 𑀧𑀢𑁆𑀢𑀧𑀝𑀺𑀲𑀫𑁆𑀪𑀺𑀤𑁄 𑀅𑀢𑁆𑀢𑀦𑀸 𑀓𑀢𑀧𑀼𑀜𑁆𑀜𑀓𑀫𑁆𑀫𑀁 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀧𑀼𑀩𑁆𑀩𑀘𑀭𑀺𑀬𑀁 𑀪𑀺𑀓𑁆𑀔𑀽𑀦𑀁 𑀫𑀚𑁆𑀛𑁂 𑀧𑀓𑀸𑀲𑁂𑀦𑁆𑀢𑁄 𑀆𑀳. 𑀢𑀲𑁆𑀫𑀸.

𑁧.

𑀦𑀸𑀭𑀤𑁄 𑀓𑀺𑀭 𑀲𑀫𑁆𑀩𑀼𑀤𑁆𑀥𑁄, 𑀧𑀼𑀩𑁆𑀩𑁂 𑀆𑀲𑀺 𑀦𑀭𑀼𑀢𑁆𑀢𑀫𑁄;

𑀮𑁄𑀓𑀁 𑀤𑀼𑀓𑁆𑀔𑀸 𑀧𑀫𑁄𑀘𑁂𑀦𑁆𑀢𑁄, 𑀤𑀤𑀦𑁆𑀢𑁄 𑀅𑀫𑀢𑀁 𑀧𑀤𑀁.

𑁨.

𑀢𑀲𑁆𑀫𑀺𑀁 𑀢𑀼 𑀲𑀫𑀬𑁂 𑀢𑀲𑁆𑀲, 𑀲𑀸𑀯𑀓𑁄 𑀙𑀺𑀦𑁆𑀦𑀩𑀦𑁆𑀥𑀦𑁄;

𑀪𑀺𑀓𑁆𑀔𑀺𑀢𑁆𑀯𑀸 𑀤𑀻𑀧𑀓𑁂 𑀮𑀤𑁆𑀥, 𑀫𑀸𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁.

𑁩.

𑀭𑀼𑀓𑁆𑀔𑀫𑀽𑀮 𑀫𑀼𑀧𑀸 𑀕𑀜𑁆𑀙𑀺, 𑀢𑀢𑁆𑀣𑀸𑀲𑀺𑀁 𑀭𑀼𑀓𑁆𑀔𑀤𑁂𑀯𑀢𑀸;

𑀩𑀼𑀪𑀼𑀓𑁆𑀔𑀺𑀢𑀸 𑀉𑀤𑀺𑀓𑁆𑀔𑀦𑁆𑀢𑀻, 𑀅𑀝𑁆𑀞𑀸𑀲𑀺𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂.

𑁪.

𑀅𑀤𑀸𑀲𑀺 𑀫𑁂 𑀪𑀢𑁆𑀢𑀧𑀺𑀡𑁆𑀟𑀁, 𑀓𑀭𑀼𑀡𑀸𑀧𑀽𑀭𑀺𑀢𑀦𑁆𑀢𑀭𑁄;

𑀕𑀳𑁂𑀢𑁆𑀯𑀸𑀦 𑀞𑀺𑀢𑁄 𑀧𑀺𑀡𑁆𑀟𑀁, 𑀲𑀳𑀫𑀸𑀦𑁄 𑀔𑀼𑀤𑀁 𑀢𑀤𑀸.

𑁫.

𑀅𑀤𑀺𑀦𑁆𑀦𑀢𑁆𑀢𑀸 𑀫𑀬𑀸 𑀧𑀼𑀩𑁆𑀩𑁂, 𑀓𑀺𑀜𑁆𑀘𑀺 𑀤𑀸𑀦𑀁 𑀲𑀼𑀧𑁂𑀲𑀮𑁂;

𑀚𑀺𑀖𑀘𑁆𑀙𑀸𑀧𑀻𑀴𑀺𑀢𑁄 𑀳𑁄𑀫𑀺, 𑀚𑀸𑀢𑁄𑀧𑀺 𑀤𑁂𑀯𑀬𑁄𑀦𑀺𑀬𑀁.

𑁬.

𑀅𑀚𑁆𑀚 𑀔𑁂𑀢𑁆𑀢𑀁 𑀲𑀼𑀮𑀤𑁆𑀥𑀁𑀫𑁂, 𑀤𑁂𑀬𑁆𑀬𑀥𑀫𑁆𑀫𑁄𑀧𑀺 𑀯𑀺𑀚𑁆𑀚𑀢𑀺;

𑀩𑀻𑀚𑀫𑁂𑀢𑁆𑀣 𑀘 𑀭𑁄𑀧𑁂𑀫𑀺, 𑀪𑀯𑀢𑁄 𑀧𑀭𑀺𑀫𑀼𑀢𑁆𑀢𑀺𑀬𑀸.

𑁭.

𑀇𑀢𑀺 𑀘𑀺𑀦𑁆𑀢𑀺𑀬 𑀯𑀦𑁆𑀤𑀺𑀢𑁆𑀯𑀸, 𑀤𑀸𑀲𑀲𑁆𑀲 𑀲𑀸𑀫𑀺 𑀯𑁄 𑀅𑀮𑀁;

𑀲𑀗𑁆𑀕𑀳𑀁 𑀇𑀥 𑀮𑁄𑀓𑀲𑁆𑀫𑀺𑀁, 𑀓𑀭𑁄𑀣 𑀧𑀸𑀭𑀮𑁄𑀓𑀺𑀓𑀁.

𑁮.

𑀇𑀢𑀺 𑀯𑀢𑁆𑀯𑀸 𑀅𑀤𑀸𑀲𑀸𑀳𑀁, 𑀪𑀼𑀜𑁆𑀘𑀺 𑀲𑁄𑀧𑀺 𑀤𑀬𑀸𑀧𑀭𑁄;

𑀢𑁂𑀦𑀸𑀳𑀁 𑀧𑀼𑀜𑁆𑀜𑀓𑀫𑁆𑀫𑁂𑀦, 𑀲𑀼𑀥𑀦𑁆𑀦𑀫𑀮𑀪𑀺𑀁 𑀔𑀡𑁂.

𑁯.

𑀢𑀢𑁄 𑀘𑀼𑀢𑁄 𑀙𑀤𑁂𑀯𑁂𑀲𑀼, 𑀯𑀺𑀦𑁆𑀤𑀦𑁆𑀢𑁄 𑀫𑀳𑀢𑀺𑀁𑀲𑀺𑀭𑀺𑀁;

𑀘𑀺𑀭𑀓𑀸𑀮𑀁 𑀯𑀲𑀺𑀁 𑀢𑀢𑁆𑀣, 𑀤𑁂𑀯𑀺𑀤𑁆𑀥𑀻𑀳𑀺 𑀲𑀫𑀗𑁆𑀕𑀺𑀢𑀸.

𑁧𑁦.

𑀲𑀢𑀲𑀳𑀲𑁆𑀲𑁂 𑀇𑀢𑁄 𑀓𑀧𑁆𑀧𑁂, 𑀧𑀤𑀼𑀫𑀼𑀢𑁆𑀢𑀭𑀦𑀸𑀫𑀓𑁄;

𑀉𑀧𑁆𑀧𑀚𑁆𑀚𑀺 𑀮𑁄𑀓𑀦𑀸𑀬𑀓𑁄, 𑀥𑀫𑁆𑀫𑀭𑀸𑀚𑀸 𑀢𑀣𑀸𑀕𑀢𑁄.

𑁧𑁧.

𑀫𑀳𑀺𑀤𑁆𑀥𑀺𑀓𑁄 ¶ 𑀢𑀤𑀸 𑀆𑀲𑀺𑀁, 𑀢𑀸𑀧𑀲𑁄 𑀓𑀸𑀦𑀦𑁂 𑀯𑀦𑁂;

𑀲𑀫𑁆𑀧𑀢𑁆𑀢𑀧𑀜𑁆𑀘𑀸 𑀪𑀺𑀜𑁆𑀜𑀸𑀡𑁄, 𑀆𑀓𑀸𑀲𑁂𑀦 𑀘𑀭𑀸𑀫𑀳𑀁.

𑁧𑁨.

𑀢𑀤𑀸 𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄, 𑀭𑀫𑁆𑀫𑁂 𑀳𑀁𑀲𑀯𑀢𑀻𑀧𑀼𑀭𑁂;

𑀩𑀼𑀤𑁆𑀥𑀭𑀁𑀲𑀺𑀧𑀭𑀺𑀓𑁆𑀔𑀺𑀢𑁆𑀢𑀁, 𑀓𑁂𑀢𑀼𑀫𑀸𑀮𑀸𑀯𑀺𑀮𑀸𑀲𑀺𑀢𑀁.

𑁧𑁩.

𑀤𑁂𑀯𑀲𑀗𑁆𑀖𑀧𑀭𑀺𑀩𑁆𑀩𑀽𑀴𑁆𑀳𑀁, 𑀤𑁂𑀲𑁂𑀦𑁆𑀢𑀁 𑀅𑀤𑁆𑀤𑀲𑀁 𑀚𑀺𑀦𑀁;

𑀲𑁄 𑀢𑀁 𑀤𑀺𑀲𑁆𑀯𑀸𑀦 𑀦𑀪𑀲𑀸, 𑀞𑀺𑀢𑁄𑀳𑀁 𑀧𑀭𑀺𑀲𑀦𑁆𑀢𑀭𑁂.

𑁧𑁪.

𑀥𑀫𑁆𑀫𑀁 𑀲𑀼𑀢𑁆𑀯𑀸 𑀉𑀤𑀕𑁆𑀕𑁄𑀳𑀁, 𑀓𑀸𑀮𑀁 𑀓𑀢𑁆𑀯𑀸𑀦 𑀲𑀢𑁆𑀣𑀼𑀦𑁄;

𑀢𑀢𑁄 𑀘𑀼𑀢𑁄 𑀧𑀧𑀦𑁆𑀦𑁄𑀲𑁆𑀫𑀺, 𑀢𑀸𑀯𑀢𑀺𑀁𑀲𑁂 𑀫𑀦𑁄𑀭𑀫𑁂.

𑁧𑁫.

𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀘𑀭𑀦𑁆𑀢𑁄 𑀤𑁂𑀯𑀫𑀸𑀦𑀼𑀲𑁂;

𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀺, 𑀮𑀪𑀸𑀫𑀺 𑀯𑀺𑀧𑀼𑀮𑀁 𑀲𑀼𑀔𑀁.

𑁧𑁬.

𑀏𑀓𑀧𑀜𑁆𑀜𑀸𑀲𑀢𑀺𑀓𑁆𑀔𑀢𑁆𑀢𑀼𑀁, 𑀤𑁂𑀯𑀭𑀚𑁆𑀚𑀫𑀓𑀸𑀭𑀬𑀺𑀁;

𑀅𑀣𑁂𑀓𑀯𑀻𑀲𑀢𑀺𑀓𑁆𑀔𑀢𑁆𑀢𑀼𑀁, 𑀘𑀓𑁆𑀓𑀯𑀢𑁆𑀢𑀻 𑀅𑀳𑁄𑀲𑀳𑀁.

𑁧𑁭.

𑀧𑀤𑁂𑀲𑀭𑀚𑁆𑀚𑀁 𑀓𑀸𑀲𑀸𑀳𑀁, 𑀩𑀳𑀼𑀓𑁆𑀔𑀢𑁆𑀢𑀼𑀁 𑀢𑀳𑀺𑀁 𑀢𑀳𑀺𑀁;

𑀇𑀫𑀲𑁆𑀫𑀺𑀁 𑀪𑀤𑁆𑀤𑀓𑁂 𑀓𑀧𑁆𑀧𑁂, 𑀦𑀺𑀩𑁆𑀩𑀼𑀢𑁂𑀢𑀼 [𑀦𑀺𑀩𑁆𑀩𑀼𑀢𑁂𑀲𑀼 𑀇𑀢𑀺𑀲𑀩𑁆𑀩𑀢𑁆𑀣] 𑀢𑀣𑀸𑀕𑀢𑁂.

𑁧𑁮.

𑀘𑁄𑀤𑀺𑀢𑁄 𑀧𑀼𑀜𑁆𑀜𑀓𑀫𑁆𑀫𑁂𑀦, 𑀲𑀸𑀯𑀢𑁆𑀣𑀺𑀧𑀼𑀭𑀫𑀼𑀢𑁆𑀢𑀫𑁂;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀓𑀼𑀮𑁂 𑀲𑁂𑀝𑁆𑀞𑁂, 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑀺𑀓𑁄.

𑁧𑁯.

𑀲𑀼𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀦𑁆𑀢𑀲𑁆𑀲, 𑀪𑀺𑀓𑁆𑀔𑀼𑀲𑁆𑀲𑀜𑁆𑀜𑀢𑀭𑀲𑁆𑀲𑀳𑀁;

𑀪𑀯𑀲𑁆𑀲𑀦𑁆𑀢𑀁 𑀓𑀭𑀺𑀢𑁆𑀯𑀸𑀦, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺𑀁.

𑁨𑁦.

𑀲𑀼𑀤𑀺𑀦𑁆𑀦𑀁 𑀫𑁂 𑀢𑀤𑀸 𑀤𑀸𑀦𑀁, 𑀲𑀼𑀲𑁆𑀲𑀼𑀢𑀁 𑀥𑀫𑁆𑀫𑀫𑀼𑀢𑁆𑀢𑀫𑀁;

𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀅𑀓𑀸𑀲𑀸𑀳𑀁, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀸𑀳𑀲𑀸𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀩𑀳𑀽 𑀚𑀦𑁂 𑀓𑀼𑀲𑀮𑀓𑀫𑁆𑀫𑁂 𑀦𑀺𑀬𑁄𑀚𑁂𑀲𑀻𑀢𑀺.

𑁨𑁧.

𑀤𑀸𑀦𑁂𑀦𑀧𑁂𑀯𑀁 ¶ 𑀘𑀭𑀺𑀫𑀸𑀬 𑀧𑀺𑀡𑁆𑀟𑀺𑀬𑀸,

𑀲𑀯𑀡𑀸𑀬 𑀥𑀫𑁆𑀫𑀲𑁆𑀲 𑀫𑀼𑀳𑀼𑀢𑁆𑀢𑀓𑁂𑀦;

𑀮𑀪𑀦𑁆𑀢𑀺 𑀲𑀢𑁆𑀢𑀸 𑀢𑀺𑀯𑀺𑀥𑀫𑁆𑀧𑀺 𑀲𑀫𑁆𑀧𑀤𑀁,

𑀨𑀮𑀁 𑀯𑀤𑁂 𑀓𑁄 𑀩𑀳𑀼𑀤𑀸𑀬𑀓𑀲𑁆𑀲 𑀪𑁄.

𑀤𑁂𑀯𑀧𑀼𑀢𑁆𑀢𑀲𑁆𑀲 𑀯𑀢𑁆𑀣𑀼𑀁 𑀦𑀯𑀫𑀁.

𑁩𑁦. 𑀲𑀻𑀯𑀮𑀺𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀇𑀢𑁄 𑀓𑀺𑀭 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀲𑀢𑁆𑀣𑀸 𑀮𑁄𑀓𑁂 𑀉𑀤𑀧𑀸𑀤𑀺 𑀥𑀫𑁆𑀫𑀤𑁂𑀲𑀦𑀸𑀬 𑀲𑀢𑁆𑀢𑁂 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀡𑀁 𑀧𑀸𑀧𑁂𑀦𑁆𑀢𑁄, 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀕𑀯𑀸 𑀳𑀁𑀲𑀸𑀯𑀢𑀺𑀬𑀁 𑀲𑀭𑀸𑀚𑀺𑀓𑀸𑀬 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀏𑀓𑀁 𑀪𑀺𑀓𑁆𑀔𑀼𑀁 𑀮𑀸𑀪𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀢𑀤𑀸 𑀭𑀸𑀚𑀸 𑀢𑀁 𑀤𑀺𑀲𑁆𑀯𑀸 𑀢𑀁 𑀞𑀸𑀦𑀁 𑀓𑀸𑀫𑀬𑀫𑀸𑀦𑁄 𑀩𑀼𑀤𑁆𑀥𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀲𑀺𑀭𑀲𑀸 𑀦𑀺𑀧𑀚𑁆𑀚𑀺, 𑀢𑀤𑀸𑀲𑁆𑀲 𑀪𑀕𑀯𑀸 𑀅𑀦𑀸𑀕𑀢𑁂 𑀕𑁄𑀢𑀫𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀢𑀁 𑀞𑀸𑀦𑀁 𑀮𑀪𑀺𑀲𑁆𑀲𑀲𑀻𑀢𑀺 𑀯𑀢𑁆𑀯𑀸 𑀩𑁆𑀬𑀸𑀓𑀸𑀲𑀺. 𑀢𑀁 𑀲𑀼𑀢𑁆𑀯𑀸 𑀫𑀼𑀤𑀺𑀢𑁄 𑀭𑀸𑀚𑀸 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁄 𑀅𑀧𑀭𑀪𑀸𑀕𑁂 𑀩𑀸𑀭𑀸𑀡𑀲𑀺𑀬𑀁 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀳𑀲𑁆𑀲𑀁 𑀘𑀢𑀼𑀧𑀘𑁆𑀘𑀬𑀤𑀸𑀦𑁂𑀦 𑀬𑀸𑀯𑀚𑀻𑀯𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀫𑀳𑀦𑁆𑀢𑀁 𑀲𑀫𑁆𑀧𑀢𑁆𑀢𑀺 𑀫𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀩𑀦𑁆𑀥𑀼𑀫𑀢𑀻𑀦𑀕𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀲𑁂𑀦𑀕𑀼𑀢𑁆𑀢𑀝𑁆𑀞𑀸𑀦𑁂 𑀞𑀢𑁆𑀯𑀸 𑀭𑀜𑁆𑀜𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀤𑀸 𑀦𑀕𑀭𑀯𑀸𑀲𑀺𑀦𑁄 𑀉𑀧𑀸𑀲𑀓𑀕𑀡𑀸 𑀯𑀺𑀧𑀲𑁆𑀲𑀻𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑁆𑀫 𑀯𑀦𑁆𑀤𑀺𑀢𑁆𑀯𑀸 𑀪𑀕𑀯𑀸 𑀪𑀦𑁆𑀢𑁂 𑀲𑀲𑀸𑀯𑀓𑁄 𑀅𑀫𑁆𑀳𑀸𑀓𑀁 𑀅𑀦𑀼𑀕𑁆𑀕𑀳𑀁 𑀓𑀭𑁄𑀢𑀽𑀢𑀺 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀩𑁆𑀩𑁂 𑀏𑀓𑀘𑁆𑀙𑀦𑁆𑀤𑀸 𑀪𑀕𑀯𑀦𑁆𑀢 𑀫𑀼𑀤𑁆𑀤𑀺𑀲𑁆𑀲 𑀫𑀳𑀸𑀭𑀳𑀁 𑀫𑀳𑀸𑀧𑀭𑀺𑀯𑁂𑀡𑀁 𑀓𑀸𑀭𑀸𑀧𑁂𑀢𑁆𑀯𑀸 𑀧𑀭𑀺𑀯𑁂𑀡𑀫𑀳𑁂 𑀫𑀳𑀸𑀤𑀸𑀦𑀁 𑀤𑀤𑀦𑁆𑀢𑀸 𑀤𑀸𑀦𑀕𑁆𑀕𑁂 𑀅𑀲𑀼𑀓𑀁 𑀦𑀸𑀫 ¶ 𑀦𑀢𑁆𑀣𑀻𑀢𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀯𑀢𑁆𑀯𑀸 𑀤𑀸𑀦𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀤𑀸𑀦𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑀸 𑀦𑀯𑀤𑀥𑀺𑀜𑁆𑀘 𑀧𑀝𑀮𑀫𑀥𑀼𑀜𑁆𑀘 𑀅𑀧𑀲𑁆𑀲𑀦𑁆𑀢𑀸 𑀧𑀼𑀭𑀺𑀲𑁂 𑀧𑀓𑁆𑀓𑁄𑀲𑀺𑀢𑁆𑀯𑀸 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀤𑀥𑀺𑀫𑀥𑀼𑀁 𑀔𑀺𑀧𑁆𑀧𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀆𑀦𑁂𑀣𑀸𑀢𑀺 𑀧𑁂𑀲𑁂𑀲𑀼𑀁, 𑀢𑁂 𑀲𑀳𑀲𑁆𑀲𑀁 𑀕𑀳𑁂𑀢𑁆𑀯𑀸 𑀤𑀥𑀺𑀫𑀥𑀼𑀁 𑀉𑀧𑀥𑀸𑀭𑁂𑀢𑀼𑀁 𑀢𑀢𑁆𑀣 𑀢𑀢𑁆𑀣 𑀯𑀺𑀘𑀭𑀦𑁆𑀢𑀸 𑀤𑁆𑀯𑀸𑀭𑀦𑁆𑀢𑀭𑁂 𑀅𑀝𑁆𑀞𑀁𑀲𑀼, 𑀢𑀤𑀸 𑀅𑀬𑀁 𑀲𑁂𑀦𑀕𑀼𑀢𑁆𑀢𑁄 𑀭𑀜𑁆𑀜𑁄 𑀲𑀪𑀢𑁆𑀢𑀁 𑀤𑀥𑀺𑀫𑀥𑀼𑀁 𑀆𑀤𑀸𑀬 𑀕𑀘𑁆𑀙𑀦𑁆𑀢𑁄 𑀫𑀳𑀸𑀤𑁆𑀯𑀸𑀭𑀁 𑀲𑀫𑁆𑀧𑀸𑀧𑀼𑀡𑀺, 𑀅𑀣 𑀢𑁂 𑀤𑀥𑀺𑀫𑀥𑀼𑀁 𑀤𑀺𑀲𑁆𑀯𑀸 𑀪𑁄 𑀓𑀳𑀸𑀧𑀡𑀁 𑀕𑀳𑁂𑀢𑁆𑀯𑀸 𑀇𑀫𑀁 𑀤𑁂𑀳𑀻𑀢𑀺 𑀬𑀸𑀘𑀺𑀁𑀲𑀼. 𑀢𑁂𑀦 [𑀢𑁂𑀦𑀤𑀲𑁆𑀲𑀸𑀫𑀺 𑀇𑀢𑀺𑀧𑀺𑀓𑀢𑁆𑀢𑀘𑀺] 𑀦 𑀤𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑁂 𑀬𑀸𑀯𑀲𑀳𑀲𑁆𑀲𑀁 𑀯𑀟𑁆𑀠𑁂𑀢𑁆𑀯𑀸 𑀬𑀸𑀘𑀺𑀁𑀲𑀼. 𑀢𑀢𑁄 𑀲𑁂𑀦𑀕𑀼𑀢𑁆𑀢𑁄 𑀇𑀫𑀁 𑀅𑀧𑁆𑀧𑀕𑁆𑀖𑀁 𑀲𑀳𑀲𑁆𑀲𑁂𑀦 𑀬𑀸𑀘𑀣, 𑀓𑀺 𑀫𑀦𑁂𑀦 𑀓𑀭𑁄𑀣𑀸𑀢𑀺 𑀧𑀼𑀘𑁆𑀙𑀺, 𑀢𑁂𑀳𑀺 𑀲𑀫𑁆𑀩𑀼𑀤𑁆𑀥𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑁂 𑀢𑁂𑀦𑀳𑀺 𑀅𑀳𑀫𑁂𑀯 𑀤𑀲𑁆𑀲𑀸𑀫𑀻𑀢𑀺 𑀚𑀻𑀭𑀫𑀭𑀺𑀘𑀸𑀤𑀻𑀳𑀺 𑀲𑀓𑁆𑀔𑀭𑀫𑀥𑀼𑀨𑀸𑀡𑀺𑀢𑀸𑀤𑀬𑁄 𑀬𑁄𑀚𑁂𑀢𑁆𑀯𑀸 𑀤𑀸𑀦𑀕𑁆𑀕𑀁 𑀉𑀧𑀦𑀸𑀫𑁂𑀲𑀺. 𑀢𑀁 𑀲𑀢𑁆𑀣𑀼 𑀆𑀦𑀼𑀪𑀸𑀯𑁂𑀦 𑀩𑀼𑀤𑁆𑀥𑀧𑀫𑀼𑀔𑀲𑁆𑀲 𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀲𑁆𑀲 𑀧𑀳𑁄𑀡𑀓𑀁 𑀅𑀳𑁄𑀲𑀺. 𑀢𑀢𑁄 𑀲𑁄 𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂𑀲𑀼 𑀲𑀫𑁆𑀧𑀢𑁆𑀢𑀺 𑀫𑀦𑀼𑀪𑀯𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀓𑁄𑀮𑀺𑀬𑀦𑀕𑀭𑁂 𑀫𑀳𑀸𑀮𑀺𑀮𑀺𑀘𑁆𑀙𑀯𑀺𑀭𑀜𑁆𑀜𑁄 𑀉𑀧𑀦𑀺𑀲𑁆𑀲𑀸𑀬 𑀲𑀼𑀧𑁆𑀧𑀺𑀬𑀸𑀬 𑀦𑀸𑀫 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀲𑁄 𑀲𑀢𑁆𑀢𑀫𑀸𑀲𑀲𑀢𑁆𑀢𑀲𑀁𑀯𑀘𑁆𑀙𑀭𑀸𑀦𑀺 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀯𑀲𑀺𑀢𑁆𑀯𑀸 𑀲𑀢𑁆𑀢𑀤𑀺𑀯𑀲𑀸𑀦𑀺 𑀫𑀽𑀴𑁆𑀳𑀕𑀩𑁆𑀪𑁄 𑀤𑀼𑀓𑁆𑀔𑀫𑀦𑀼𑀪𑀯𑀺. 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀲𑀻𑀯𑀮𑀻𑀢𑀺 𑀦𑀸𑀫 𑀫𑀓𑀁𑀲𑀼. 𑀏𑀯𑀁 𑀫𑀳𑀸𑀧𑀼𑀜𑁆𑀜𑀲𑁆𑀲 𑀏𑀢𑁆𑀢𑀓𑀁 𑀓𑀸𑀮𑀁 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀤𑀼𑀓𑁆𑀔𑀸𑀦𑀼𑀪𑀯𑀦𑀁 𑀅𑀢𑁆𑀢𑀦𑀸𑀯 𑀓𑀢𑁂𑀦 𑀧𑀸𑀧𑀩𑀮𑁂𑀦 𑀅𑀳𑁄𑀲𑀺, 𑀲𑁄 𑀓𑀺𑀭 𑀅𑀢𑀻𑀢𑁂 𑀭𑀸𑀚𑀸 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀲𑀧𑀢𑁆𑀢𑀭𑀜𑁆𑀜𑀸 𑀲𑀤𑁆𑀥𑀺𑀁 𑀲𑀗𑁆𑀕𑀸𑀫𑁂𑀦𑁆𑀢𑁄 𑀫𑀸𑀢𑀭𑀸 𑀲𑀤𑁆𑀥𑀺𑀁 𑀫𑀦𑁆𑀢𑁂𑀲𑀺. 𑀲𑀸 𑀦𑀕𑀭𑀁 𑀭𑀼𑀦𑁆𑀥𑀺𑀢𑁆𑀯𑀸 𑀅𑀫𑀺𑀢𑁆𑀢𑁂 𑀕𑀡𑁆𑀳𑀺𑀢𑀼𑀁 𑀲𑀓𑁆𑀓𑀸𑀢𑀺 𑀉𑀧𑀸𑀬 𑀫𑀤𑀸𑀲𑀺, 𑀲𑁄𑀧𑀺 𑀢𑀲𑁆𑀲𑀸 𑀯𑀘𑀦𑁂𑀦 𑀦𑀕𑀭𑀁 𑀭𑀼𑀦𑁆𑀥𑀺𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀅𑀕𑁆𑀕𑀳𑁂𑀲𑀺, 𑀢𑁂𑀦 𑀧𑀸𑀧𑀓𑀫𑁆𑀫𑀩𑀮𑁂𑀦 𑀫𑀸𑀢𑀸𑀧𑀼𑀢𑁆𑀢𑀸𑀦𑀁 𑀏𑀯𑀁 𑀫𑀳𑀦𑁆𑀢𑀁 𑀤𑀼𑀓𑁆𑀔𑀁 𑀅𑀳𑁄𑀲𑀻𑀢𑀺. 𑀢𑀢𑁄 ¶ 𑀲𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀦𑀓𑀸𑀮𑁂 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀪𑀕𑀯𑀦𑁆𑀢𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀲𑀼𑀔𑁂𑀦 𑀪𑀸𑀭𑀁 𑀫𑀼𑀜𑁆𑀘𑀺. 𑀢𑀼𑀝𑁆𑀞𑀸 𑀲𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀩𑀼𑀤𑁆𑀥𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀅𑀤𑀸𑀲𑀺, 𑀅𑀣𑀲𑁆𑀲𑀸 𑀧𑀼𑀢𑁆𑀢𑁄 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀕𑁂𑀳𑀸 𑀦𑀺𑀓𑁆𑀔𑀫𑁆𑀫 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀲𑀢𑁆𑀣𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀦𑀺𑀬𑁄𑀚𑁂𑀲𑀺, 𑀢𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀉𑀧𑀚𑁆𑀛𑀸𑀬𑁂𑀦 𑀫𑁄𑀕𑁆𑀕𑀮𑁆𑀮𑀸𑀦𑀫𑀸𑀘𑀭𑀺𑀬𑀁 𑀓𑀢𑁆𑀯𑀸 𑀧𑀩𑁆𑀩𑀚𑀺, 𑀅𑀣 𑀲𑁄 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀩𑀼𑀤𑁆𑀥𑀲𑀸𑀲𑀦𑀁 𑀲𑁄𑀪𑁂𑀲𑀺, 𑀲𑁄 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀫𑀳𑀸𑀧𑀼𑀜𑁆𑀜𑁄 𑀅𑀳𑁄𑀲𑀺 𑀮𑀸𑀪𑀻𑀦𑀜𑁆𑀘 𑀅𑀕𑁆𑀕𑁄. 𑀅𑀣𑁂𑀓𑀲𑁆𑀫𑀺𑀁 𑀲𑀫𑀬𑁂 𑀪𑀕𑀯𑀸 𑀭𑁂𑀯𑀢𑀢𑁆𑀣𑁂𑀭𑀁 𑀤𑀲𑁆𑀲𑀦𑀸𑀬 𑀔𑀤𑀺𑀭𑀯𑀦𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑁄 𑀢𑀺𑀁𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀢𑀺𑀁𑀲𑀬𑁄𑀚𑀦𑀺𑀓𑀁 𑀙𑀝𑁆𑀝𑀺𑀢𑀓𑀦𑁆𑀢𑀸𑀭𑀁 𑀲𑀫𑁆𑀧𑀸𑀧𑀼𑀡𑀺 𑀦𑀺𑀭𑀽𑀤𑀓𑀁 𑀅𑀧𑁆𑀧𑀪𑀓𑁆𑀔𑀁. 𑀬𑁂𑀪𑀼𑀬𑁆𑀬𑁂𑀦 𑀤𑁂𑀯𑀢𑀸 𑀲𑀻𑀯𑀮𑀺𑀢𑁆𑀣𑁂𑀭𑁂 𑀧𑀲𑀦𑁆𑀦𑀸. 𑀢𑀲𑁆𑀫𑀸 𑀪𑀕𑀯𑀸 𑀲𑀻𑀯𑀮𑀺𑀢𑁆𑀣𑁂𑀭𑀁 𑀧𑀼𑀭𑀢𑁄 𑀘𑀸𑀭𑀺𑀓𑀁 𑀓𑀢𑁆𑀯𑀸 𑀤𑁂𑀯𑀢𑀸𑀳𑀺 𑀓𑀸𑀭𑀸𑀧𑀺𑀢𑁂 𑀯𑀺𑀳𑀸𑀭𑁂 𑀯𑀲𑀦𑁆𑀢𑁄 𑀤𑁂𑀯𑀢𑀸𑀳𑀺 𑀲𑀚𑁆𑀚𑀺𑀢𑀤𑀸𑀦𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀭𑁂𑀯𑀢𑀢𑁆𑀣𑁂𑀭𑀁 𑀲𑀁𑀧𑀸𑀧𑀼𑀡𑀺𑀢𑁆𑀯𑀸 𑀕𑀢𑀓𑀫𑁆𑀫𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀚𑁂𑀢𑀯𑀦𑀫𑀸𑀕𑀫𑁆𑀫 𑀮𑀸𑀪𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀢𑀁 𑀞𑀧𑁂𑀲𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀧𑀤𑀸𑀦𑁂.

𑁧.

𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀚𑀺𑀦𑁄, 𑀲𑀩𑁆𑀩𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀫𑀸;

𑀇𑀢𑁄 𑀲𑀢𑀲𑀳𑀲𑁆𑀲𑀫𑁆𑀳𑀺, 𑀓𑀧𑁆𑀧𑁂 𑀉𑀧𑁆𑀧𑀚𑁆𑀚𑀺 𑀦𑀸𑀬𑀓𑁄.

𑁨.

𑀲𑀻𑀮𑀁 𑀢𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀁, 𑀲𑀫𑀸𑀥𑀺 𑀯𑀚𑀺𑀭𑀽𑀧𑀫𑁄 [𑀯𑀚𑀺𑀭𑀽𑀧𑀫𑀸 𑀇𑀢𑀺𑀓𑀢𑁆𑀣𑀘𑀺];

𑀅𑀲𑀁𑀔𑀺𑀬𑀁 𑀜𑀸𑀡𑀯𑀭𑀁, 𑀯𑀺𑀫𑀼𑀢𑁆𑀢𑀺 𑀘 𑀅𑀦𑁄𑀧𑀫𑀸.

𑁩.

𑀫𑀦𑀼𑀚𑀸𑀫𑀭𑀦𑀸𑀕𑀸𑀦𑀁, 𑀩𑁆𑀭𑀳𑁆𑀫𑀸𑀦𑀜𑁆𑀘 𑀲𑀫𑀸𑀕𑀫𑁂;

𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀓𑀺𑀡𑁆𑀡𑁂, 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀦𑀸𑀬𑀓𑁄.

𑁪.

𑀲𑀲𑀸𑀯𑀓𑀁 𑀫𑀳𑀸𑀮𑀸𑀪𑀺𑀁, 𑀧𑀼𑀜𑁆𑀜𑀯𑀦𑁆𑀢𑀁 𑀚𑀼𑀢𑀺𑀦𑁆𑀥𑀭𑀁,

𑀞𑀧𑁂𑀲𑀺 𑀏𑀢𑀤𑀕𑁆𑀕𑀫𑁆𑀳𑀺, 𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑁄.

𑁫.

𑀢𑀤𑀸𑀳𑀁 ¶ 𑀔𑀢𑁆𑀢𑀺𑀬𑁄 𑀆𑀲𑀺𑀁, 𑀧𑀼𑀭𑁂 𑀳𑀁𑀲𑀯𑀢𑀻𑀯𑁆𑀳𑀬𑁂 [𑀳𑀁𑀲𑀸𑀯𑀢𑀯𑁆𑀳𑀬𑁂 𑀇𑀢𑀺𑀲𑀩𑁆𑀩𑀢𑁆𑀣];

𑀲𑀼𑀢𑁆𑀯𑀸 𑀚𑀺𑀦𑀲𑁆𑀲 𑀢𑀁 𑀯𑀸𑀓𑁆𑀬𑀁, 𑀲𑀸𑀯𑀓𑀲𑁆𑀲 𑀕𑀼𑀡𑀁 𑀩𑀳𑀼𑀁.

𑁬.

𑀦𑀺𑀫𑀦𑁆𑀢𑀬𑀺𑀢𑁆𑀯𑀸 𑀲𑀢𑁆𑀢𑀸𑀳𑀁, 𑀪𑁄𑀚𑀬𑀺𑀢𑁆𑀯𑀸 𑀲𑀲𑀸𑀯𑀓𑀁;

𑀫𑀳𑀸𑀤𑀸𑀦𑀁 𑀤𑀤𑀺𑀢𑁆𑀯𑀸𑀦, 𑀢𑀁 𑀞𑀸𑀦𑀫𑀪𑀺𑀧𑀢𑁆𑀣𑀬𑀺𑀁.

𑁭.

𑀢𑀤𑀸 𑀫𑀁 𑀯𑀺𑀦𑀢𑀁 𑀧𑀸𑀤𑁂, 𑀤𑀺𑀲𑁆𑀯𑀸𑀦 𑀧𑀼𑀭𑀺𑀲𑀸𑀲𑀪𑁄;

𑀲𑁄 𑀲𑀭𑁂𑀦 𑀫𑀳𑀸𑀯𑀻𑀭𑁄, 𑀇𑀫𑀁 𑀯𑀘𑀦𑀫𑀩𑁆𑀭𑀯𑀻.

𑁮.

𑀢𑀢𑁄 𑀚𑀺𑀦𑀲𑁆𑀲 𑀯𑀘𑀦𑀁, 𑀲𑁄𑀢𑀼𑀓𑀸𑀫𑀸 𑀫𑀳𑀸𑀚𑀦𑀸;

𑀤𑁂𑀯𑀤𑀸𑀦𑀯𑀕𑀦𑁆𑀥𑀩𑁆𑀩𑀸, 𑀩𑁆𑀭𑀳𑁆𑀫𑀸𑀦𑁄𑀘 𑀫𑀳𑀺𑀤𑁆𑀥𑀺𑀓𑀸.

𑁯.

𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀘𑀸𑀧𑀺, 𑀦𑀫𑀲𑁆𑀲𑀺𑀲𑀼𑀁 𑀓𑀢𑀜𑁆𑀚𑀮𑀻;

𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫.

𑁧𑁦.

𑀔𑀢𑁆𑀢𑀺𑀬𑁂𑀦 𑀫𑀳𑀸𑀤𑀸𑀦𑀁, 𑀤𑀺𑀦𑁆𑀦𑀁 𑀲𑀢𑁆𑀢𑀸𑀳𑀓𑀫𑁆𑀧𑀺 [𑀲𑀢𑁆𑀢𑀸𑀳𑀓𑀁𑀧𑀺𑀢𑁄 𑀇𑀢𑀺𑀧𑀺𑀓𑀢𑁆𑀣𑀘𑀺] 𑀦𑁄;

𑀲𑁄𑀢𑀼𑀓𑀸𑀫𑀸 𑀨𑀮𑀁 𑀢𑀲𑁆𑀲, 𑀩𑁆𑀬𑀸𑀓𑀭𑁄𑀳𑀺 𑀫𑀳𑀸𑀫𑀼𑀦𑁂.

𑁧𑁧.

𑀢𑀢𑁄 𑀅𑀯𑁄𑀘 𑀪𑀕𑀯𑀸, 𑀲𑀼𑀡𑁄𑀣 𑀫𑀫 𑀪𑀸𑀲𑀺𑀢𑀁;

𑀅𑀧𑁆𑀧𑀫𑁂𑀬𑁆𑀬𑀫𑁆𑀳𑀺 𑀩𑀼𑀤𑁆𑀥𑀲𑁆𑀫𑀺𑀁, 𑀕𑀼𑀡𑀫𑁆𑀳𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸.

𑁧𑁨.

𑀤𑀓𑁆𑀔𑀺𑀡𑀸 𑀤𑀸𑀬𑀓𑀁 𑀧𑀢𑁆𑀯𑀸, 𑀅𑀧𑁆𑀧𑀫𑁂𑀬𑁆𑀬𑀨𑀮𑀸𑀯𑀳𑀸;

𑀅𑀧𑀺 𑀘𑁂 𑀲 𑀫𑀳𑀸𑀪𑁄𑀕𑁄, 𑀞𑀸𑀦𑀁 𑀧𑀢𑁆𑀣𑁂𑀢𑀺 𑀫𑀼𑀢𑁆𑀢𑀫𑀁.

𑁧𑁩.

𑀮𑀸𑀪𑀻 𑀯𑀺𑀧𑀼𑀮𑀮𑀸𑀪𑀻𑀦𑀁, 𑀬𑀣𑀸 𑀪𑀺𑀓𑁆𑀔𑀼 𑀲𑀼𑀤𑀲𑁆𑀲𑀦𑁄;

𑀢𑀣𑀸𑀳𑀁𑀧𑀺 𑀪𑀯𑁂𑀬𑁆𑀬𑀦𑁆𑀢𑀺, 𑀮𑀘𑁆𑀙𑀢𑁂 𑀢𑀁 𑀅𑀦𑀸𑀕𑀢𑁂.

𑁧𑁪.

𑀲𑀢𑀲𑀳𑀲𑁆𑀲𑀺𑀢𑁄 𑀓𑀧𑁆𑀧𑁂, 𑀑𑀓𑁆𑀓𑀸𑀓𑀓𑀼𑀮𑀲𑀫𑁆𑀪𑀯𑁄;

𑀕𑁄𑀢𑀫𑁄𑀦𑀸𑀫 𑀦𑀸𑀫𑁂𑀦, 𑀲𑀢𑁆𑀣𑀸 𑀮𑁄𑀓𑁂 𑀪𑀯𑀺𑀲𑁆𑀲𑀢𑀺.

𑁧𑁫.

𑀢𑀲𑁆𑀲 𑀥𑀫𑁆𑀫𑁂𑀲𑀼 𑀤𑀸𑀬𑀸𑀤𑁄, 𑀑𑀭𑀲𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄;

𑀲𑀻𑀯𑀮𑀺 𑀦𑀸𑀫 𑀦𑀸𑀫𑁂𑀦, 𑀳𑁂𑀲𑁆𑀲𑀢𑀺 𑀲𑀢𑁆𑀣𑀼𑀲𑀸𑀯𑀓𑁄.

𑁧𑁬.

𑀢𑁂𑀦 ¶ 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲𑀽𑀧𑀕𑁄 𑀅𑀳𑀁.

𑁧𑁭.

𑀢𑀢𑁄𑀧𑀭𑀲𑁆𑀫𑀺𑀁𑀲𑀫𑀬𑁂, 𑀩𑀸𑀭𑀸𑀡𑀲𑀺𑀧𑀼𑀭𑀼𑀢𑁆𑀢𑀫𑁂;

𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀅𑀳𑀁 𑀆𑀲𑀺𑀁, 𑀅𑀟𑁆𑀠𑀧𑁆𑀧𑀢𑁆𑀢𑁄 𑀫𑀳𑀸𑀥𑀦𑁄.

𑁧𑁮.

𑀲𑀳𑀲𑁆𑀲𑀫𑀢𑁆𑀢𑁂 𑀧𑀘𑁆𑀘𑁂𑀓, 𑀦𑀸𑀬𑀓𑁂 𑀘 𑀦𑀺𑀫𑀦𑁆𑀢𑀺𑀬;

𑀫𑀥𑀼𑀭𑁂𑀦𑀦𑁆𑀦𑀧𑀸𑀦𑁂𑀦, 𑀲𑀦𑁆𑀢𑀧𑁆𑀧𑁂𑀲𑀺𑀁𑀢𑀤𑀸𑀤𑀭𑁄.

𑁧𑁯.

𑀢𑀢𑁄 𑀘𑀼𑀢𑁄 𑀙𑀓𑀸𑀫𑀕𑁆𑀕𑁂, 𑀅𑀦𑀼𑀪𑁄𑀲𑀺𑀁𑀫𑀳𑀸𑀬𑀲𑀁;

𑀤𑁂𑀯𑀘𑁆𑀙𑀭𑀸𑀧𑀭𑀺𑀯𑀼𑀢𑁄, 𑀧𑀸𑀲𑀸𑀤𑁂 𑀭𑀢𑀦𑀸𑀫𑀬𑁂.

𑁨𑁦.

𑀏𑀯𑀁 𑀅𑀘𑀺𑀦𑁆𑀢𑀺𑀬𑀸 𑀩𑀼𑀤𑁆𑀥𑀸, 𑀩𑀼𑀤𑁆𑀥𑀥𑀫𑁆𑀫𑀸 𑀅𑀘𑀺𑀦𑁆𑀢𑀺𑀬𑀸;

𑀅𑀘𑀺𑀦𑁆𑀢𑀺𑀬𑁂 𑀧𑀲𑀦𑁆𑀦𑀸𑀦𑀁, 𑀯𑀺𑀧𑀸𑀓𑁄𑀧𑀺 𑀅𑀘𑀺𑀦𑁆𑀢𑀺𑀬𑁄.

𑁨𑁧.

𑀏𑀓𑀦𑀯𑀼𑀢𑀺𑀢𑁄 𑀓𑀧𑁆𑀧𑁂, 𑀯𑀺𑀧𑀲𑁆𑀲𑀻𑀦𑀸𑀫 𑀦𑀸𑀬𑀓𑁄;

𑀉𑀧𑁆𑀧𑀚𑁆𑀚𑀺 𑀘𑀸𑀭𑀼𑀦𑀬𑀦𑁄, 𑀲𑀩𑁆𑀩𑀥𑀫𑁆𑀫𑀯𑀺𑀧𑀲𑁆𑀲𑀓𑁄.

𑁨𑁨.

𑀢𑀤𑀸𑀳𑀁 𑀩𑀦𑁆𑀥𑀼𑀫𑀢𑀺𑀬𑀸, 𑀓𑀼𑀮𑀲𑁆𑀲𑀜𑁆𑀜𑀢𑀭𑀲𑁆𑀲 𑀘;

𑀤𑀬𑀺𑀢𑁄 𑀧𑀢𑁆𑀣𑀺𑀢𑁄 𑀧𑀼𑀢𑁆𑀢𑁄, 𑀆𑀲𑀺𑀁 𑀓𑀫𑁆𑀫𑀦𑁆𑀢𑀩𑁆𑀬𑀸𑀯𑀝𑁄.

𑁨𑁩.

𑀢𑀤𑀸 𑀅𑀜𑁆𑀜𑀢𑀭𑁄 𑀧𑀽𑀕𑁄, 𑀯𑀺𑀧𑀲𑁆𑀲𑀺𑀲𑁆𑀲 𑀫𑀳𑁂𑀲𑀺𑀦𑁄;

𑀧𑀭𑀺𑀯𑁂𑀡𑀁 𑀅𑀓𑀸𑀭𑁂𑀲𑀺, 𑀫𑀳𑀦𑁆𑀢 𑀫𑀺𑀢𑀺 𑀯𑀺𑀲𑁆𑀲𑀼𑀢𑀁.

𑁨𑁪.

𑀦𑀺𑀝𑁆𑀞𑀺𑀢𑁂 𑀘 𑀫𑀳𑀸𑀤𑀸𑀦𑀁, 𑀤𑀤𑀁 𑀔𑀚𑁆𑀚𑀓𑀲𑀁𑀬𑀼𑀢𑀁;

𑀦𑀯𑀁 𑀤𑀥𑀺 𑀫𑀥𑀼𑀜𑁆𑀘𑁂𑀯, 𑀯𑀺𑀘𑀺𑀦𑀁 𑀦 𑀘 𑀫𑀤𑁆𑀤𑀲.

𑁨𑁫.

𑀢𑀤𑀸𑀳𑀁 𑀢𑀁 𑀕𑀳𑁂𑀢𑁆𑀯𑀸𑀦, 𑀦𑀯𑀁 𑀤𑀥𑀺 𑀫𑀥𑀼𑀫𑁆𑀧𑀺𑀘,

𑀓𑀫𑁆𑀫𑀲𑀸𑀫𑀺𑀖𑀭𑀁 𑀕𑀘𑁆𑀙𑀁, 𑀢𑀫𑁂𑀦𑀁 [𑀢𑀫𑁂𑀲𑀁 𑀇𑀢𑀺𑀲𑀩𑁆𑀩𑀢𑁆𑀣] 𑀤𑀸𑀦 𑀫𑀤𑁆𑀤𑀲𑀁.

𑁨𑁬.

𑀲𑀳𑀲𑁆𑀲𑀫𑁆𑀧𑀺 𑀘 𑀤𑀢𑁆𑀯𑀸𑀦, 𑀦 𑀮𑀢𑀺𑀁𑀲𑀼 𑀘 𑀢𑀁 𑀤𑁆𑀯𑀬𑀁;

𑀢𑀢𑁄 𑀏𑀯𑀁 𑀯𑀺𑀘𑀺𑀦𑁆𑀢𑁂𑀲𑀺𑀁, 𑀦𑁂𑀢𑀁 𑀳𑁂𑀲𑁆𑀲𑀢𑀺 𑀑𑀭𑀓𑀁.

𑁨𑁭.

𑀬𑀣𑀸 ¶ 𑀇𑀫𑁂 𑀚𑀦𑀸 𑀲𑀩𑁆𑀩𑁂, 𑀲𑀓𑁆𑀓𑀭𑁄𑀦𑁆𑀢𑀺 𑀢𑀣𑀸𑀕𑀢𑀁;

𑀅𑀳𑀫𑁆𑀧𑀺 𑀓𑀸𑀭𑀁 𑀓𑀲𑁆𑀲𑀸𑀫𑀺, 𑀲𑀲𑀗𑁆𑀖𑁂 𑀮𑁄𑀓𑀦𑀸𑀬𑀓𑁂.

𑁨𑁮.

𑀢𑀤𑀸𑀳𑀫𑁂𑀯𑀁 𑀘𑀺𑀦𑁆𑀢𑁂𑀢𑁆𑀯𑀸, 𑀤𑀥𑀺𑀁𑀫𑀥𑀼𑀜𑁆𑀘 𑀏𑀓𑀢𑁄;

𑀬𑁄𑀚𑁂𑀢𑁆𑀯𑀸 𑀮𑁄𑀓𑀦𑀸𑀣𑀲𑁆𑀲, 𑀲𑀲𑀗𑁆𑀖𑀲𑁆𑀲 𑀅𑀤𑀸𑀲𑀳𑀁.

𑁨𑁯.

𑀢𑁂𑀦 𑀓𑀫𑁆𑀫𑁂𑀦 𑀲𑀼𑀓𑀢𑁂𑀦, 𑀘𑁂𑀢𑀦𑀸𑀧𑀡𑀺𑀥𑀻𑀳𑀺 𑀘;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀢𑀸𑀯𑀢𑀺𑀁𑀲 𑀫𑀕𑀜𑁆𑀙𑀳𑀁.

𑁩𑁦.

𑀧𑀼𑀦𑀸𑀳𑀁 𑀩𑀸𑀭𑀸𑀡𑀲𑀺𑀬𑀁, 𑀭𑀸𑀚𑀸 𑀳𑀼𑀢𑁆𑀯𑀸 𑀫𑀳𑀸𑀬𑀲𑁄;

𑀲𑀢𑁆𑀢𑀼𑀓𑀲𑁆𑀲 𑀢𑀤𑀸 𑀭𑀼𑀤𑁆𑀥𑁄, 𑀤𑁆𑀯𑀸𑀭𑀭𑁄𑀥𑀁 𑀅𑀓𑀸𑀭𑀬𑀺𑀁.

𑁩𑁧.

𑀢𑀢𑁄 𑀲𑀧𑀢𑁆𑀢𑀺𑀦𑁄 [𑀲𑀫𑁆𑀧𑀢𑁆𑀢𑀺𑀦𑁄; 𑀲𑀧𑀢𑁆𑀢𑀸𑀦𑁄 𑀇𑀢𑀺𑀘𑀓𑀢𑁆𑀣𑀘𑀺] 𑀭𑀼𑀤𑁆𑀥𑀸, 𑀏𑀓𑀸𑀳𑀁 𑀭𑀓𑁆𑀔𑀺𑀢𑀸 𑀅𑀳𑀼𑀁;

𑀢𑀢𑁄 𑀢𑀲𑁆𑀲 𑀯𑀺𑀧𑀸𑀓𑁂𑀦, 𑀧𑀸𑀧𑀼𑀡𑀺𑀁 𑀦𑀺𑀭𑀬𑀁 𑀪𑀼𑀲𑀁.

𑁩𑁨.

𑀧𑀘𑁆𑀙𑀺𑀫𑁂 𑀘 𑀪𑀯𑁂 𑀤𑀸𑀦𑀺, 𑀚𑀸𑀢𑁄𑀳𑀁 𑀓𑁄𑀮𑀺𑀬𑁂 𑀧𑀼𑀭𑁂;

𑀲𑀼𑀧𑁆𑀧𑀯𑀸𑀲𑀸 𑀘 𑀫𑁂 𑀫𑀸𑀢𑀸, 𑀫𑀳𑀸𑀮𑀺 𑀮𑀺𑀘𑁆𑀙𑀯𑀻 𑀧𑀺𑀢𑀸.

𑁩𑁩.

𑀔𑀢𑁆𑀢𑀺𑀬𑁂 𑀧𑀼𑀜𑁆𑀜𑀓𑀫𑁆𑀫𑁂𑀦, 𑀤𑁆𑀯𑀸𑀭𑀭𑁄𑀥𑀲𑁆𑀲 𑀯𑀸𑀳𑀲𑀸;

𑀲𑀢𑁆𑀢𑀫𑀸𑀲𑁂 𑀲𑀢𑁆𑀢𑀯𑀲𑁆𑀲𑁂, 𑀯𑀲𑀺𑀁𑀓𑀼𑀘𑁆𑀙𑀺𑀫𑁆𑀳𑀺 𑀤𑀼𑀓𑁆𑀔𑀺𑀢𑁄.

𑁩𑁪.

𑀲𑀢𑁆𑀢𑀸𑀳𑀁 𑀤𑁆𑀯𑀸𑀭𑀫𑀽𑀴𑁆𑀳𑁄𑀳𑀁, 𑀫𑀳𑀸𑀤𑀼𑀓𑁆𑀔𑀲𑀫𑀧𑁆𑀧𑀺𑀢𑁄;

𑀫𑀸𑀢𑀸 𑀫𑁂 𑀙𑀦𑁆𑀤𑀤𑀸𑀦𑁂𑀦, 𑀏𑀯 𑀫𑀸𑀲𑀺 𑀲𑀼𑀤𑀼𑀓𑁆𑀔𑀺𑀢𑀸.

𑁩𑁫.

𑀲𑀼𑀯𑀢𑁆𑀣𑀺𑀢𑁄𑀳𑀁 𑀦𑀺𑀓𑁆𑀔𑀦𑁆𑀢𑁄, 𑀩𑀼𑀤𑁆𑀥𑁂𑀦 𑀅𑀦𑀼𑀓𑀫𑁆𑀧𑀺𑀢𑁄;

𑀦𑀺𑀓𑁆𑀔𑀦𑁆𑀢𑀤𑀺𑀯𑀲𑁂𑀬𑁂𑀯, 𑀧𑀩𑁆𑀩𑀚𑀺𑀁 𑀅𑀦𑀕𑀸𑀭𑀺𑀬𑀁.

𑁩𑁬.

𑀉𑀧𑀚𑁆𑀛𑀸 𑀲𑀸𑀭𑀺𑀧𑀼𑀢𑁆𑀢𑁄 𑀫𑁂, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀫𑀳𑀺𑀤𑁆𑀥𑀺𑀓𑁄;

𑀓𑁂𑀲𑁂 𑀑𑀭𑁄𑀧𑀬𑀦𑁆𑀢𑁄 𑀫𑁂, 𑀅𑀦𑀼𑀲𑀸𑀲𑀺 𑀫𑀳𑀸𑀫𑀢𑀺.

𑁩𑁭.

𑀓𑁂𑀲𑁂𑀲𑀼 𑀙𑀺𑀚𑁆𑀚𑀫𑀸𑀦𑁂𑀲𑀼 [𑀙𑀦𑁆𑀦𑀫𑀦𑁂𑀲𑀼 𑀇𑀢𑀺𑀧𑀺𑀓𑀢𑁆𑀣𑀘𑀺], 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀻𑀁;

𑀤𑁂𑀯𑁄 𑀦𑀸𑀕𑀸 𑀫𑀦𑀼𑀲𑁆𑀲𑀸 𑀘, 𑀧𑀘𑁆𑀘𑀬𑀸𑀦𑀼 𑀧𑀦𑁂𑀦𑁆𑀢𑀺 𑀫𑁂.

𑁩𑁮.

𑀧𑀤𑀼𑀫𑀼𑀢𑁆𑀢𑀭𑀦𑀸𑀫𑀜𑁆𑀘, 𑀯𑀺𑀧𑀲𑁆𑀲𑀺𑀁𑀘 𑀯𑀺𑀦𑀸𑀬𑀓𑀁;

𑀲𑀁𑀧𑀽𑀚𑀬𑀺𑀁 𑀧𑀫𑀼𑀤𑀺𑀢𑁄, 𑀧𑀘𑁆𑀘𑀬𑁂𑀳𑀺 𑀯𑀺𑀲𑁂𑀲𑀢𑁄.

𑁩𑁯.

𑀢𑀢𑁄 ¶ 𑀢𑁂𑀲𑀁 𑀯𑀺𑀧𑀸𑀓𑁂𑀦, 𑀓𑀫𑁆𑀫𑀸𑀦𑀁 𑀯𑀺𑀧𑀼𑀮𑀼𑀢𑁆𑀢𑀫𑀁;

𑀮𑀸𑀪𑀁 𑀮𑀪𑀸𑀫𑀺 𑀲𑀩𑁆𑀩𑀢𑁆𑀣, 𑀯𑀦𑁂 𑀕𑀸𑀫𑁂 𑀚𑀮𑁂 𑀣𑀮𑁂.

𑁪𑁦.

𑀭𑁂𑀯𑀢𑀁 𑀤𑀲𑁆𑀲𑀦𑀢𑁆𑀣𑀸𑀬, 𑀬𑀤𑀸 𑀬𑀸𑀢𑀺 𑀯𑀺𑀦𑀸𑀬𑀓𑁄;

𑀢𑀺𑀁𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀳𑀺, 𑀲𑀳 𑀮𑁄𑀓𑀕𑁆𑀕𑀦𑀸𑀬𑀓𑁄.

𑁪𑁧.

𑀢𑀤𑀸 𑀤𑁂𑀯𑁄 𑀧𑀦𑀻𑀢𑁂𑀳𑀺 [𑀧𑀡𑀻𑀢𑁂𑀳𑀺 𑀇𑀢𑀺𑀲𑀩𑁆𑀩𑀢𑁆𑀣], 𑀫𑀫𑀢𑁆𑀣𑀸𑀬 𑀫𑀳𑀸𑀫𑀢𑀺;

𑀧𑀘𑁆𑀘𑀬𑁂𑀳𑀺 𑀫𑀳𑀸𑀯𑀻𑀭𑁄, 𑀲𑀲𑀗𑁆𑀖𑁄 𑀮𑁄𑀓𑀦𑀸𑀬𑀓𑁄.

𑁪𑁨.

𑀉𑀧𑀝𑁆𑀞𑀺𑀢𑁄 𑀫𑀬𑀸 𑀩𑀼𑀤𑁆𑀥𑁄, 𑀕𑀦𑁆𑀢𑁆𑀯𑀸 𑀭𑁂𑀯𑀢𑀫𑀤𑁆𑀤𑀲;

𑀢𑀢𑁄 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺𑀫𑀁.

𑁪𑁩.

𑀮𑀸𑀪𑀻𑀦𑀁 𑀲𑀻𑀯𑀮𑀺 𑀅𑀕𑁆𑀕𑁄, 𑀫𑀫 𑀲𑀺𑀲𑁆𑀲𑁂𑀲𑀼 𑀪𑀺𑀓𑁆𑀔𑀯𑁄;

𑀲𑀩𑁆𑀩𑁂𑀮𑁄𑀓𑀳𑀺𑀢𑁄 𑀲𑀢𑁆𑀣𑀸, 𑀓𑀺𑀢𑁆𑀢𑀬𑀻 𑀧𑀭𑀺𑀲𑀸𑀲𑀼𑀫𑀁.

𑁪𑁪.

𑀓𑀺𑀮𑁂𑀲𑀸 𑀛𑀸𑀧𑀺𑀢𑀸 𑀫𑀬𑁆𑀳𑀁, 𑀪𑀯𑀸 𑀲𑀩𑁆𑀩𑁂 𑀲𑀫𑀽𑀳𑀢𑀸;

𑀦𑀸𑀕𑁄𑀯 𑀩𑀦𑁆𑀥𑀦𑀁 𑀙𑁂𑀢𑁆𑀯𑀸, 𑀯𑀺𑀳𑀭𑀸𑀫𑀺 𑀅𑀦𑀸𑀲𑀯𑁄.

𑁪𑁫.

𑀲𑁆𑀯𑀸𑀕𑀢𑀁 𑀯𑀢 𑀫𑁂 𑀆𑀲𑀺, 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀲𑀦𑁆𑀢𑀺𑀓𑀁;

𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑁄, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁪𑁬.

𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄𑀧𑀺, 𑀯𑀺𑀫𑁄𑀓𑁆𑀔𑀸 𑀧𑀺𑀘 𑀅𑀝𑁆𑀞𑀺𑀫𑁂;

𑀙𑀴𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑀸, 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀦𑁆𑀢𑀺.

𑀇𑀢𑁆𑀣𑀁 𑀲𑀼𑀤𑀁 𑀆𑀬𑀲𑁆𑀫𑀸 𑀲𑀻𑀯𑀮𑀺𑀢𑁆𑀣𑁂𑀭𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺𑀢𑁆𑀣𑀸𑀢𑀺.

𑁪𑁭.

𑀲𑀼𑀢𑁆𑀯𑀸𑀦 𑀏𑀢𑀁 𑀘𑀭𑀺𑀢𑀁 𑀫𑀳𑀩𑁆𑀪𑀼𑀢𑀁,

𑀧𑀼𑀜𑁆𑀜𑀸𑀦𑀼𑀪𑀸𑀯𑀜𑁆𑀘 𑀲𑀺𑀭𑀺𑀁 𑀲𑀺𑀭𑀻𑀫𑀢𑀁;

𑀳𑀺𑀢𑁆𑀯𑀸 𑀓𑀼𑀲𑀻𑀢𑀁 𑀓𑀼𑀲𑀮𑀁 𑀓𑀭𑁄𑀣,

𑀓𑀸𑀫𑀸𑀢𑁆𑀣 𑀓𑀸𑀫𑀁 𑀪𑀯𑀪𑁄𑀕𑀦𑀺𑀩𑁆𑀩𑀼𑀢𑀺𑀁.

𑀲𑀻𑀯𑀮𑀺𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼𑀁 𑀤𑀲𑀫𑀁.

𑀬𑀓𑁆𑀔𑀯𑀜𑁆𑀘𑀺𑀢𑀯𑀕𑁆𑀕𑁄 𑀢𑀢𑀺𑀬𑁄.

𑀫𑀳𑀸𑀲𑁂𑀦𑀯𑀕𑁆𑀕𑁄

𑁩𑁧. 𑀫𑀳𑀸𑀲𑁂𑀦𑀭𑀜𑁆𑀜𑁄 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀪𑀕𑀯𑀢𑀺 ¶ 𑀧𑀭𑀺𑀦𑀺𑀩𑁆𑀩𑀼𑀢𑁂 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑁂 𑀫𑀳𑀸𑀲𑁂𑀦𑁄 𑀦𑀸𑀫 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸. 𑀲𑁄 𑀧𑀦 𑀧𑀺𑀢𑀼𑀧𑀺𑀢𑀸𑀫𑀳𑀸𑀤𑀻𑀦𑀁 𑀥𑀦𑀭𑀸𑀲𑀺𑀁 𑀑𑀮𑁄𑀓𑁂𑀢𑁆𑀯𑀸 𑀇𑀫𑁂 𑀇𑀫𑀁 𑀲𑀸𑀧𑀢𑁂𑀬𑁆𑀬𑀁 𑀧𑀳𑀸𑀬 𑀫𑀘𑁆𑀘𑀼𑀦𑁄 𑀫𑀼𑀔𑀫𑀼𑀧𑀕𑀢𑀸. 𑀅𑀳𑁄 𑀲𑀁𑀲𑀸𑀭𑀺𑀓𑀸𑀦𑀁 𑀅𑀜𑁆𑀜𑀸𑀡𑀢𑀸. 𑀥𑀦𑀁 𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀦𑀸𑀲𑀜𑁆𑀘 𑀅𑀢𑁆𑀢𑀸𑀦𑀁 𑀞𑀧𑁂𑀢𑁆𑀯𑀸 𑀥𑀦𑀯𑀺𑀦𑀸𑀲𑀜𑁆𑀘 𑀦 𑀚𑀸𑀦𑀦𑁆𑀢𑀻𑀢𑀺 𑀲𑀫𑁆𑀧𑀢𑁆𑀢𑀺𑀬𑀸 𑀅𑀥𑀺𑀕𑀫𑀜𑁆𑀘 𑀯𑀺𑀦𑀸𑀲𑀁 𑀘𑀸𑀢𑀺 𑀲𑀩𑁆𑀩𑀁 𑀘𑀺𑀦𑁆𑀢𑁂𑀢𑁆𑀯𑀸 𑀥𑀫𑁆𑀫𑀜𑁆𑀘 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀤𑀲𑀲𑀳𑀲𑁆𑀲𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀥𑀼𑀭𑁂𑀦 𑀅𑀦𑁆𑀦𑀧𑀸𑀦𑁂𑀦 𑀲𑀦𑁆𑀢𑀧𑁆𑀧𑁂𑀦𑁆𑀢𑁄 𑀅𑀦𑁂𑀓𑀸𑀦𑀺 𑀧𑀼𑀜𑁆𑀜𑀸𑀦𑀺 𑀉𑀧𑀘𑀺𑀦𑀦𑁆𑀢𑁄 𑀏𑀓𑀤𑀺𑀯𑀲𑀁 𑀭𑀳𑁄 𑀧𑀝𑀺𑀲𑀮𑁆𑀮𑀺𑀦𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺. 𑀏𑀯𑀁 𑀭𑀸𑀚𑀦𑀺𑀬𑁄𑀕𑁂𑀦 𑀚𑀦𑀲𑁆𑀲 𑀧𑀻𑀴𑀦𑀁 𑀓𑀢𑁆𑀯𑀸 𑀤𑀺𑀦𑁆𑀦𑀤𑀸𑀦𑀢𑁄 𑀲𑀳𑀢𑁆𑀣𑁂𑀦 𑀓𑀫𑁆𑀫𑀁 𑀓𑀢𑁆𑀯𑀸 𑀮𑀤𑁆𑀥𑁂𑀦 𑀤𑀺𑀦𑁆𑀦𑀤𑀸𑀦𑀁 𑀫𑀳𑀧𑁆𑀨𑀮𑀁 𑀫𑀳𑀸𑀦𑀺𑀲𑀁𑀲𑀁 𑀪𑀯𑀺𑀲𑁆𑀲𑀢𑀺, 𑀏𑀯𑀁 𑀫𑀬𑀸 𑀓𑀸𑀢𑀩𑁆𑀩𑀦𑁆𑀢𑀺 𑀲𑁄 𑀲𑀼𑀳𑀤𑀸 𑀫𑀘𑁆𑀘𑀲𑁆𑀲 𑀭𑀚𑁆𑀚𑀁 𑀦𑀻𑀬𑁆𑀬𑀸𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀡𑀺𑀝𑁆𑀞𑀺𑀓𑀁 𑀆𑀤𑀸𑀬 𑀓𑀺𑀜𑁆𑀘𑀺 𑀅𑀚𑀸𑀦𑀸𑀧𑁂𑀢𑁆𑀯𑀸 𑀅𑀜𑁆𑀜𑀢𑀭𑀯𑁂𑀲𑁂𑀦 𑀦𑀕𑀭𑀸 𑀦𑀺𑀓𑁆𑀔𑀫𑁆𑀫 𑀉𑀢𑁆𑀢𑀭𑀫𑀥𑀼𑀭𑀁 𑀦𑀸𑀫 𑀦𑀕𑀭𑀁 𑀅𑀕𑀫𑀸𑀲𑀺, 𑀢𑀢𑁆𑀣 𑀫𑀳𑀸𑀯𑀺𑀪𑀯𑁄 𑀏𑀓𑁄 𑀲𑁂𑀝𑁆𑀞𑀺 𑀧𑀝𑀺𑀯𑀲𑀢𑀺, 𑀢𑁂 𑀲𑁂𑀝𑁆𑀞𑀺𑀦𑁄 𑀲𑀫𑀻𑀧 𑀫𑀼𑀧𑀕𑀫𑁆𑀫 𑀞𑀺𑀢𑀸. 𑀢𑁂𑀦 𑀓𑀺𑀫𑀢𑁆𑀣𑀸𑀬𑀸𑀕𑀢𑀸𑀢𑀺 𑀯𑀼𑀢𑁆𑀢𑁂 𑀭𑀸𑀚𑀸 𑀢𑀯 𑀕𑁂𑀳𑁂 𑀪𑀢𑀺𑀬𑀸 𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀯𑀢𑁆𑀯𑀸 𑀢𑁂𑀦𑀸𑀦𑀼𑀜𑁆𑀜𑀸𑀢𑁄 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀓𑀫𑁆𑀫 𑀫𑀓𑀸𑀲𑀺, 𑀢𑀢𑁄 𑀏𑀓𑀤𑀺𑀯𑀲𑀁 𑀲𑁂𑀝𑁆𑀞𑀺 𑀢𑁂 𑀤𑀺𑀲𑁆𑀯𑀸 𑀧𑀓𑁆𑀓𑁄𑀲𑀺𑀢𑁆𑀯𑀸 𑀅𑀢𑀻𑀯 𑀢𑀼𑀫𑁆𑀳𑁂 𑀲𑀼𑀔𑀼𑀫𑀸𑀮𑀢𑀭𑀸. 𑀢𑀣𑀸𑀧𑀺 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀓𑀫𑁆𑀫𑀓𑀭𑀡𑁂𑀦 𑀘𑀺𑀭𑀁 𑀯𑀲𑀺𑀢𑁆𑀣, 𑀏𑀢𑁆𑀢𑀓𑀁 𑀓𑀸𑀮𑀁 𑀓𑀺𑀲𑁆𑀫𑀺𑀜𑁆𑀘𑀺 𑀓𑀫𑁆𑀫𑁂𑀧𑀺 𑀓𑀼𑀲𑀻𑀢𑀢𑁆𑀢𑀁 𑀦 𑀧𑀜𑁆𑀜𑀸𑀬𑀢𑀺. 𑀧𑀕𑁂𑀯 𑀅𑀦𑀸𑀘𑀸𑀭𑀫𑁆𑀧𑀺, 𑀬𑀸𑀕𑀼𑀪𑀢𑁆𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀉𑀧𑀓𑀸𑀭𑀫𑁆𑀧𑀺 𑀫𑀫 𑀲𑀦𑁆𑀢𑀺𑀓𑀸 𑀦𑀢𑁆𑀣𑀺, 𑀓𑁂𑀦𑀢𑁆𑀣𑁂𑀦 𑀓𑀫𑁆𑀫𑀁 𑀓𑀭𑁄𑀣𑀸𑀢𑀺 𑀧𑀼𑀘𑁆𑀙𑀺. 𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀇𑀫𑀲𑁆𑀫𑀺𑀁 𑀚𑀦𑀧𑀤𑁂 𑀲𑀸𑀮𑀺𑀦𑁄 𑀫𑀦𑀸𑀧𑀪𑀸𑀯𑁄 𑀩𑀳𑀼𑀲𑁄 𑀲𑀽𑀬𑀢𑀺. 𑀢𑀲𑁆𑀫𑀸 𑀲𑀸𑀮𑀻𑀦𑀫𑀢𑁆𑀣𑀸𑀬 𑀇𑀥𑀸 𑀕𑀢𑀫𑁆𑀳𑀸𑀢𑀺 𑀆𑀳, 𑀢𑀁 𑀲𑀼𑀢𑁆𑀯𑀸 𑀢𑁂𑀲𑀁 𑀢𑀼𑀝𑁆𑀞𑁄 𑀲𑁂𑀝𑁆𑀞𑀺 𑀲𑀸𑀮𑀻𑀦𑀁 𑀲𑀓𑀝𑀲𑀳𑀲𑁆𑀲𑀁 𑀅𑀤𑀸𑀲𑀺, 𑀭𑀸𑀚𑀸 𑀲𑀸𑀮𑀺𑀁𑀮𑀪𑀺𑀢𑁆𑀯𑀸 𑀲𑁂𑀝𑁆𑀞𑀺𑀦𑁄 ¶ 𑀏𑀯𑀫𑀸𑀳, 𑀪𑁄 𑀇𑀫𑀁 𑀅𑀫𑁆𑀳𑀸𑀓𑀁 𑀦𑀕𑀭𑀁 𑀧𑀸𑀧𑁂𑀣𑀸𑀢𑀺, 𑀢𑀁 𑀲𑀼𑀢𑁆𑀯𑀸 𑀲𑁂𑀝𑁆𑀞𑀺 𑀲𑀸𑀥𑀽𑀢𑀺 𑀯𑀢𑁆𑀯𑀸 𑀲𑀸𑀮𑀺𑀧𑀭𑀺𑀧𑀼𑀡𑁆𑀡𑀲𑀓𑀝𑀲𑀳𑀲𑁆𑀲𑀁 𑀭𑀜𑁆𑀜𑁄 𑀦𑀕𑀭𑀁 𑀧𑀸𑀧𑁂𑀲𑀺, 𑀭𑀸𑀚𑀸 𑀦𑀕𑀭𑀁 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲 𑀦𑀸𑀦𑀸𑀯𑀡𑁆𑀡𑀯𑀢𑁆𑀣𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀻𑀳𑀺 𑀲𑀓𑀝𑁂 𑀧𑀽𑀭𑁂𑀢𑁆𑀯𑀸 𑀧𑀝𑀺𑀧𑁂𑀲𑁂𑀢𑁆𑀯𑀸 𑀫𑁂𑀢𑁆𑀢𑀺𑀁 𑀣𑀺𑀭𑀁 𑀓𑀢𑁆𑀯𑀸 𑀆𑀪𑀢𑀯𑀻𑀳𑀬𑁄 𑀭𑀸𑀚𑀕𑁂𑀳𑁂 𑀲𑀦𑁆𑀦𑀺𑀘𑀬𑀫𑀓𑀸𑀲𑀺, 𑀅𑀣 𑀭𑀸𑀚𑀸 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀫𑀼𑀲𑀮𑀁 𑀧𑀕𑁆𑀕𑀬𑁆𑀳 𑀲𑀳𑀢𑁆𑀣𑁂𑀦𑁂𑀯 𑀯𑀻𑀳𑀺𑀁 𑀓𑁄𑀝𑁆𑀝𑁂𑀢𑀺, 𑀓𑁄𑀝𑁆𑀝𑀺𑀢𑀓𑁄𑀝𑁆𑀝𑀺𑀢𑀁 𑀓𑀡𑀺𑀝𑁆𑀞𑀺𑀓𑀸 𑀧𑀧𑁆𑀨𑁄𑀝𑁂𑀢𑀺. 𑀏𑀯𑀁 𑀉𑀪𑁄𑀧𑀺 𑀢𑀡𑁆𑀟𑀼𑀮𑀸𑀦𑀁 𑀫𑀳𑀦𑁆𑀢𑀁 𑀭𑀸𑀲𑀺𑀁 𑀓𑀢𑁆𑀯𑀸 𑀤𑀸𑀭𑀽𑀤𑀓𑀸𑀤𑀬𑁄 𑀆𑀳𑀭𑀺𑀢𑁆𑀯𑀸 𑀅𑀫𑁆𑀩𑀺𑀮𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀭𑀸𑀚𑀕𑁂𑀳𑁂 𑀧𑀜𑁆𑀘𑀲𑀢𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀓𑀸𑀮𑀁 𑀉𑀕𑁆𑀖𑁄𑀲𑁂𑀲𑀼𑀁, 𑀆𑀕𑀘𑁆𑀙𑀦𑁆𑀢𑀼 𑀅𑀬𑁆𑀬𑀸 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 𑀫𑀫 𑀕𑁂𑀳𑁂 𑀪𑀼𑀜𑁆𑀚𑀦𑁆𑀢𑀽𑀢𑀺. 𑀢𑀁 𑀲𑀼𑀢𑁆𑀯𑀸 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀆𑀓𑀸𑀲𑁂𑀦 𑀆𑀕𑀫𑀺𑀁𑀲𑀼, 𑀭𑀸𑀚𑀸 𑀢𑁂 𑀬𑀸𑀯𑀤𑀢𑁆𑀣𑀁 𑀧𑀭𑀺𑀯𑀺𑀲𑀺, 𑀢𑀢𑁄 𑀢𑁂𑀲𑀁 𑀅𑀦𑁆𑀢𑀭𑁂 𑀧𑀺𑀬𑀁𑀕𑀼𑀤𑀻𑀧𑀯𑀸𑀲𑀻 𑀏𑀓𑁄 𑀫𑀳𑀸𑀲𑀺𑀯𑀢𑁆𑀣𑁂𑀭𑁄 𑀦𑀸𑀫 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀏𑀢𑁂 𑀫𑀁 𑀧𑀲𑁆𑀲𑀦𑁆𑀢𑀽𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀆𑀓𑀸𑀲𑁂𑀦 𑀧𑀺𑀬𑀁𑀕𑀼𑀤𑀻𑀧𑀁 𑀕𑀦𑁆𑀢𑁆𑀯𑀸 𑀪𑀢𑁆𑀢𑀁 𑀧𑀜𑁆𑀘𑀲𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀤𑀢𑁆𑀯𑀸 𑀧𑀭𑀺𑀪𑀼𑀜𑁆𑀘𑀺. 𑀢𑀁 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀲𑀩𑁆𑀩𑁂𑀲𑀁 𑀬𑀸𑀯𑀤𑀢𑁆𑀣𑀁 𑀅𑀳𑁄𑀲𑀺. 𑀏𑀯𑀁 𑀅𑀧𑁆𑀧𑀓𑁂𑀦𑀸𑀧𑀺 𑀤𑁂𑀬𑁆𑀬𑀥𑀫𑁆𑀫𑁂𑀦 𑀲𑀧𑁆𑀧𑀼𑀭𑀺𑀲𑀸 𑀤𑀸𑀬𑀓𑀸𑀦𑀁 𑀫𑀦𑀁 𑀧𑀲𑀸𑀤𑁂𑀢𑁆𑀯𑀸 𑀧𑀢𑀺𑀝𑁆𑀞𑀁 𑀓𑀭𑁄𑀦𑁆𑀢𑀻𑀢𑀺. 𑀯𑀼𑀢𑁆𑀢𑀜𑁆𑀳𑀺.

𑁧.

𑀅𑀧𑁆𑀧𑀓𑁂𑀦𑀧𑀺 𑀫𑁂𑀥𑀸𑀯𑀻, 𑀤𑀸𑀬𑀓𑀸𑀦𑀁 𑀫𑀦𑀁 𑀧𑀢𑀺;

𑀲𑀤𑁆𑀥𑀁 𑀯𑀟𑁆𑀠𑁂𑀦𑁆𑀢𑀺 𑀘𑀦𑁆𑀤𑁄𑀯, 𑀭𑀁𑀲𑀺𑀦𑀸 𑀔𑀻𑀭𑀲𑀸𑀕𑀭𑀁.

𑁨.

𑀅𑀝𑁆𑀞𑀸𑀦𑁂 𑀦 𑀦𑀺𑀬𑁄𑀚𑁂𑀦𑁆𑀢𑀸, 𑀓𑀭𑁄𑀦𑁆𑀢𑀸 𑀦𑁂𑀯 𑀲𑀦𑁆𑀦𑀺𑀥𑀺𑀁;

𑀧𑀭𑀺𑀪𑁄𑀕 𑀫𑀓𑀢𑁆𑀯𑀸𑀦, 𑀦𑁂𑀯 𑀦𑀸𑀲𑁂𑀦𑁆𑀢𑀺 𑀧𑀘𑁆𑀘𑀬𑀁.

𑁩.

𑀦 𑀧𑀸𑀧𑁂𑀦𑁆𑀢𑀸𑀘 𑀣𑁂𑀬𑁆𑀬𑀲𑁆𑀲, 𑀦 𑀓𑀭𑁄𑀦𑁆𑀢𑀸 𑀢𑀣𑁂𑀯𑀺𑀡𑀁;

𑀯𑀺𑀪𑀚𑀦𑁆𑀢𑀺 𑀲𑀼𑀲𑀻𑀮𑁂𑀲𑀼, 𑀲𑀬𑀁 𑀪𑀼𑀢𑁆𑀯𑀸𑀦 𑀲𑀻𑀮𑀯𑀸𑀢𑀺.

𑀅𑀣 𑀭𑀸𑀚𑀸 𑀓𑀡𑀺𑀝𑁆𑀞𑀺𑀓𑀸𑀬 𑀲𑀤𑁆𑀥𑀺𑀁 𑀣𑀢𑁆𑀣𑁂𑀯 𑀞𑀺𑀢𑁄 𑀧𑀺𑀬𑀁𑀕𑀼𑀤𑀻𑀧𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑁂 𑀧𑀜𑁆𑀘𑀲𑀢𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀳𑀝𑁆𑀞𑁄 𑀉𑀤𑀕𑁆𑀕𑁄 𑀅𑀳𑁄𑀲𑀺. 𑀅𑀣 ¶ 𑀢𑁂 𑀅𑀧𑀭𑀪𑀸𑀕𑁂 𑀅𑀢𑁆𑀢𑀦𑀸 𑀓𑀢𑀁 𑀤𑀸𑀦𑀯𑀭𑀁 𑀅𑀦𑀼𑀲𑁆𑀲𑀭𑀦𑁆𑀢𑀸 𑀦 𑀘𑀺𑀭𑁂𑀦𑁂𑀯 𑀉𑀪𑁄𑀧𑀺 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁𑀢𑀺.

𑁪.

𑀦 𑀕𑀡𑁂𑀦𑁆𑀢𑀸𑀢𑁆𑀢𑀦𑁄 𑀤𑀼𑀓𑁆𑀔𑀁, 𑀯𑀺𑀳𑀸𑀬 𑀫𑀳𑀢𑀺𑀁 𑀲𑀺𑀭𑀺𑀁;

𑀆𑀬𑀢𑀺𑀁𑀪𑀯𑀫𑀺𑀘𑁆𑀙𑀦𑁆𑀢𑀸, 𑀲𑀼𑀚𑀦𑁂𑀯𑀁 𑀲𑀼𑀪𑁂 𑀭𑀢𑀸.

𑁫.

𑀆𑀬𑀸𑀲𑁂𑀦 𑀓𑀢𑀁 𑀧𑀼𑀜𑁆𑀜𑀁, 𑀫𑀳𑀦𑁆𑀢𑀨𑀮𑀤𑀸𑀬𑀓𑀁;

𑀇𑀢𑀺 𑀫𑀦𑁆𑀢𑁆𑀯𑀸𑀦 𑀫𑁂𑀥𑀸𑀯𑀻, 𑀲𑀳𑀢𑁆𑀣𑁂𑀦𑁂𑀯 𑀢𑀁 𑀓𑀭𑁂𑀢𑀺.

𑀫𑀳𑀸𑀲𑁂𑀦𑀭𑀜𑁆𑀜𑁄 𑀯𑀢𑁆𑀣𑀼𑀁 𑀧𑀣𑀫𑀁.

𑁩𑁨. 𑀲𑀼𑀯𑀡𑁆𑀡𑀢𑀺𑀮𑀓𑀸𑀬 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀮𑀗𑁆𑀓𑀸𑀤𑀻𑀧𑁂 𑀓𑀺𑀭 𑀅𑀦𑀼𑀭𑀸𑀥𑀧𑀼𑀭𑀦𑀕𑀭𑁂 𑀏𑀓𑁄 𑀫𑀸𑀢𑀼𑀕𑀸𑀫𑁄 [𑀏𑀓𑀸𑀫𑀸𑀢𑀼𑀕𑀸𑀫𑀸𑀢𑀺𑀯𑀸 𑀏𑀓𑀸𑀫𑀸𑀢𑀼𑀕𑀸𑀫𑁄𑀢𑀺𑀯𑀸 𑀓𑀢𑁆𑀣𑀘𑀺] 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸 𑀦𑀺𑀘𑁆𑀘𑀁 𑀅𑀪𑀬𑀼𑀢𑁆𑀢𑀭𑀘𑁂𑀢𑀺𑀬𑁂 𑀧𑀼𑀧𑁆𑀨𑀧𑀽𑀚𑀁 𑀓𑀭𑁄𑀢𑀺, 𑀅𑀣𑁂𑀓𑀤𑀺𑀯𑀲𑀁 𑀲𑀸 𑀅𑀢𑁆𑀢𑀦𑁄 𑀥𑀻𑀢𑀼𑀬𑀸 𑀲𑀤𑁆𑀥𑀺𑀁 𑀢𑀲𑁆𑀫𑀺𑀁 𑀘𑁂𑀢𑀺𑀬𑁂 𑀧𑀼𑀧𑁆𑀨𑀧𑀽𑀚𑀦𑀢𑁆𑀣𑀸𑀬 [𑀧𑀼𑀧𑁆𑀨𑀧𑀽𑀚𑀢𑁆𑀣𑀸𑀬 𑀇𑀢𑀺𑀓𑀢𑁆𑀣𑀘𑀺] 𑀕𑀦𑁆𑀢𑁆𑀯𑀸 𑀧𑀼𑀧𑁆𑀨𑀸𑀲𑀦𑀲𑀸𑀮𑀸𑀬 𑀉𑀤𑀓𑀁 𑀅𑀧𑀲𑁆𑀲𑀦𑁆𑀢𑀻 𑀥𑀻𑀢𑀼 𑀳𑀢𑁆𑀣𑁂 𑀧𑀼𑀧𑁆𑀨𑀘𑀗𑁆𑀕𑁄𑀝𑀓𑀁 𑀞𑀧𑁂𑀢𑁆𑀯𑀸 𑀖𑀝 𑀫𑀸𑀤𑀸𑀬 𑀧𑁄𑀓𑁆𑀔𑀭𑀡𑀺𑀁 𑀅𑀕𑀫𑀸𑀲𑀺, 𑀢𑀢𑁄 𑀲𑀸 𑀤𑀸𑀭𑀺𑀓𑀸 𑀫𑀸𑀢𑀭𑀺 𑀅𑀦𑀸𑀕𑀢𑀸𑀬𑀬𑁂𑀯 [𑀅𑀦𑀸𑀕𑀢𑁂𑀬𑁂𑀯 𑀇𑀢𑀺𑀲𑀩𑁆𑀩𑀢𑁆𑀣] 𑀅𑀥𑁄𑀢𑀸𑀲𑀦𑁂 𑀧𑀼𑀧𑁆𑀨𑀫𑀼𑀝𑁆𑀞𑀺𑀁𑀕𑀳𑁂𑀢𑁆𑀯𑀸 𑀫𑀡𑁆𑀟𑀮𑀁 𑀓𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀏𑀯𑀁 𑀧𑀢𑁆𑀣𑀦𑀫𑀓𑀸𑀲𑀺. 𑀢𑀣𑀸 𑀳𑀺.

𑁧.

𑀫𑀳𑀸𑀯𑀻𑀭𑀲𑁆𑀲 𑀥𑀻𑀭𑀲𑁆𑀲, 𑀲𑀬𑀫𑁆𑀪𑀼𑀲𑁆𑀲 𑀫𑀳𑁂𑀲𑀺𑀦𑁄;

𑀢𑀺𑀮𑁄𑀓𑀕𑁆𑀕𑀲𑁆𑀲 𑀦𑀸𑀣𑀲𑁆𑀲, 𑀪𑀕𑀯𑀦𑁆𑀢𑀲𑁆𑀲 𑀲𑀢𑁆𑀣𑀼𑀦𑁄.

𑁨.

𑀬 𑀫𑀳𑀁 𑀧𑀽𑀚𑀬𑀺𑀁 𑀧𑀼𑀧𑁆𑀨𑀁, 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀸𑀳𑀲𑀸;

𑀭𑀽𑀧𑀻𑀦𑀁 𑀧𑀯𑀭𑀸 𑀳𑁂𑀲𑁆𑀲𑀁, 𑀆𑀭𑁄𑀳𑀧𑀭𑀺𑀡𑀸𑀳𑀯𑀸.

𑁩.

𑀫𑀁 ¶ 𑀤𑀺𑀲𑁆𑀯𑀸 𑀧𑀼𑀭𑀺𑀲𑀸 𑀲𑀩𑁆𑀩𑁂, 𑀫𑀼𑀘𑁆𑀙𑀦𑁆𑀢𑀼 𑀓𑀸𑀫𑀫𑀼𑀘𑁆𑀙𑀺𑀢𑀸;

𑀦𑀺𑀘𑁆𑀙𑀭𑀦𑁆𑀢𑀼 𑀲𑀭𑀻𑀭𑀸 𑀫𑁂, 𑀭𑀁𑀲𑀺𑀫𑀸𑀮𑀻𑀯 𑀭𑀁𑀲𑀺𑀬𑁄.

𑁪.

𑀳𑀤𑀬𑀗𑁆𑀕𑀫𑀸 𑀓𑀡𑁆𑀡𑀲𑀼𑀔𑀸, 𑀫𑀜𑁆𑀚𑀼𑀪𑀸𑀡𑀻 𑀲𑀼𑀪𑀸 𑀫𑀫;

𑀓𑀺𑀦𑁆𑀦𑀭𑀸𑀦𑀁 𑀬𑀣𑀸 𑀯𑀸𑀡𑀻, 𑀏𑀯𑀫𑁂𑀯 𑀧𑀯𑀢𑁆𑀢𑀢𑀽𑀢𑀺.

𑀅𑀣𑀲𑁆𑀲𑀸 𑀫𑀸𑀢𑀸 𑀆𑀕𑀫𑁆𑀫 𑀅𑀥𑁄𑀢𑀸𑀲𑀦𑁂 𑀧𑀽𑀚𑀺𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀤𑀺𑀲𑁆𑀯𑀸 𑀓𑀲𑁆𑀫𑀸 𑀘𑀡𑁆𑀟𑀸𑀮𑀻 𑀅𑀥𑁄𑀢𑀸𑀲𑀦𑁂 𑀪𑀕𑀯𑀢𑁄 𑀧𑀼𑀧𑁆𑀨𑀸𑀦𑀺 𑀧𑀽𑀚𑁂𑀲𑀺, 𑀅𑀬𑀼𑀢𑁆𑀢𑀁 𑀢𑀬𑀸 𑀓𑀢𑀦𑁆𑀢𑀺 𑀆𑀳, 𑀢𑀁 𑀲𑀼𑀢𑁆𑀯𑀸 𑀲𑀸 𑀫𑀸𑀢𑀼𑀬𑀸 𑀓𑀼𑀚𑁆𑀛𑀺𑀢𑁆𑀯𑀸 𑀢𑁆𑀯𑀁 𑀘𑀡𑁆𑀟𑀸𑀮𑀻𑀢𑀺 𑀅𑀓𑁆𑀓𑁄𑀲𑀺, 𑀲𑀸 𑀏𑀢𑁆𑀢𑀓𑀁 𑀧𑀼𑀜𑁆𑀜𑀸𑀧𑀼𑀜𑁆𑀜𑀁 𑀓𑀢𑁆𑀯𑀸 𑀅𑀧𑀭𑀪𑀸𑀕𑁂 𑀢𑀢𑁄 𑀘𑀼𑀢𑀸 𑀚𑀫𑁆𑀩𑀼𑀤𑀻𑀧𑁂 𑀉𑀢𑁆𑀢𑀭𑀫𑀥𑀼𑀭𑀸𑀬𑀁 𑀏𑀓𑀲𑁆𑀲 𑀘𑀡𑁆𑀟𑀸𑀮𑀕𑀦𑁆𑀥𑀩𑁆𑀩𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀉𑀢𑁆𑀢𑀫𑀭𑀽𑀧𑀥𑀭𑀸 𑀅𑀳𑁄𑀲𑀺, 𑀢𑀲𑁆𑀲𑀸 𑀲𑀭𑀻𑀭𑀢𑁄 𑀫𑁂𑀖𑀫𑀼𑀔𑀢𑁄 𑀯𑀺𑀚𑁆𑀚𑀼𑀮𑁆𑀮𑀢𑀸𑀯𑀺𑀬 𑀭𑀁𑀲𑀺𑀬𑁄 𑀦𑀺𑀘𑁆𑀙𑀭𑀦𑁆𑀢𑀺. 𑀲𑀫𑀦𑁆𑀢𑀸 𑀘𑀢𑀼𑀳𑀢𑁆𑀣𑀝𑁆𑀞𑀸𑀦𑁂 𑀲𑀭𑀻𑀭𑀧𑁆𑀧𑀪𑀸𑀬 𑀅𑀦𑁆𑀥𑀓𑀸𑀭𑁂 𑀯𑀺𑀥𑀫𑀢𑀺. 𑀫𑀼𑀔𑀢𑁄 𑀉𑀧𑁆𑀧𑀮𑀕𑀦𑁆𑀥𑁄 𑀯𑀸𑀬𑀢𑀺, 𑀓𑀸𑀬𑀢𑁄 𑀘𑀦𑁆𑀤𑀦𑀕𑀦𑁆𑀥𑁄, 𑀢𑀲𑁆𑀲𑀸 𑀤𑁆𑀯𑀺𑀦𑁆𑀦𑀁 𑀣𑀦𑀸𑀦 𑀫𑀦𑁆𑀢𑀭𑁂 𑀲𑀼𑀯𑀡𑁆𑀡𑀯𑀡𑁆𑀡𑀁 𑀏𑀓𑀁 𑀢𑀺𑀮𑀓𑀁 𑀅𑀳𑁄𑀲𑀺, 𑀢𑁂𑀦 𑀩𑀸𑀮𑀲𑀼𑀭𑀺𑀬𑀲𑁆𑀲 𑀯𑀺𑀬 𑀧𑀪𑀸 𑀦𑀺𑀘𑁆𑀙𑀭𑀢𑀺. 𑀤𑀺𑀝𑁆𑀞𑀤𑀺𑀝𑁆𑀞𑀸 𑀬𑁂𑀪𑀼𑀬𑁆𑀬𑁂𑀦 𑀉𑀫𑁆𑀫𑀢𑁆𑀢𑀸 𑀯𑀺𑀬 𑀓𑀸𑀫𑀫𑀤𑁂𑀦 𑀯𑀺𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀺, 𑀅𑀳𑁄 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀆𑀦𑀼𑀪𑀸𑀯𑁄. 𑀢𑀣𑀸 𑀳𑀺.

𑁫.

𑀬𑁂𑀦 𑀲𑀸 𑀓𑁄𑀥𑀲𑀸𑀫𑀸𑀢𑀼, 𑀘𑀡𑁆𑀟𑀸𑀮𑀻 𑀇𑀢𑀺 𑀪𑀸𑀲𑀺𑀢𑀸;

𑀢𑁂𑀦 𑀲𑀸 𑀆𑀲𑀺 𑀘𑀡𑁆𑀟𑀸𑀮𑀻, 𑀚𑁂𑀕𑀼𑀘𑁆𑀙𑀸 𑀳𑀻𑀦𑀚𑀸𑀢𑀺𑀓𑀸.

𑁬.

𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥, 𑀕𑀼𑀡𑀁 𑀧𑀽𑀚𑁂𑀲𑀺 𑀬𑀁 𑀢𑀤𑀸;

𑀢𑁂𑀦 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦, 𑀲𑀸 𑀪𑀺𑀭𑀽𑀧𑀻 𑀫𑀦𑁄𑀭𑀫𑀸.

𑁭.

𑀬𑁂𑀦 𑀬𑁂𑀦 𑀧𑀓𑀸𑀭𑁂𑀦, 𑀧𑀼𑀜𑁆𑀜𑀧𑀸𑀧𑀸𑀦𑀺 𑀬𑁄 𑀓𑀭𑁂;

𑀢𑀲𑁆𑀲 𑀢𑀲𑁆𑀲𑀸𑀦𑀼𑀭𑀽𑀧𑁂𑀦, 𑀫𑁄𑀭𑁄𑀯 𑀮𑀪𑀢𑁂 𑀨𑀮𑀁.

𑁮.

𑀧𑀸𑀧𑁂𑀦 𑀘 𑀢𑀺𑀭𑀘𑁆𑀙𑀸𑀦𑁂, 𑀚𑀸𑀬𑀦𑁆𑀢𑀺 𑀓𑀼𑀲𑀮𑁂𑀦 𑀢𑁂;

𑀯𑀡𑁆𑀡𑀧𑁄𑀓𑁆𑀔𑀭𑀢𑀸 𑀳𑁄𑀢𑀺, 𑀫𑁄𑀭𑀸𑀦𑀁 𑀓𑀫𑁆𑀫 𑀫𑀻𑀤𑀺𑀲𑀦𑁆𑀢𑀺.

𑀢𑀢𑁄 ¶ 𑀢𑀲𑁆𑀲𑀸 𑀫𑀸𑀢𑀸𑀧𑀺𑀢𑀭𑁄 𑀲𑀼𑀯𑀡𑁆𑀡𑀢𑀺𑀮𑀓𑀸𑀢𑀺 𑀦𑀸𑀫 𑀫𑀓𑀁𑀲𑀼. 𑀢𑀲𑁆𑀫𑀺𑀁𑀓𑀺𑀭 𑀦𑀕𑀭𑁂 𑀫𑀦𑀼𑀲𑁆𑀲𑀸 𑀢𑀲𑁆𑀲𑀸 𑀭𑀼𑀧𑀤𑀲𑁆𑀲𑀦𑁂𑀦𑀘 𑀲𑀯𑀡𑁂𑀦𑀘 𑀲𑀫𑁆𑀧𑀢𑁆𑀢𑀸𑀧𑀺 𑀘𑀡𑁆𑀟𑀸𑀮𑀥𑀻𑀢𑀸 𑀅𑀬𑀦𑁆𑀢𑀺 𑀧𑀭𑀺𑀪𑀯𑀪𑀬𑁂𑀦 𑀆𑀯𑀸𑀳𑀁 𑀦 𑀓𑀭𑁄𑀦𑁆𑀢𑀺. 𑀅𑀣 𑀢𑀲𑁆𑀫𑀺𑀁 𑀦𑀕𑀭𑁂 𑀚𑁂𑀝𑁆𑀞𑀘𑀡𑁆𑀟𑀸𑀮𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁄 𑀏𑀢𑀫𑀢𑁆𑀣𑀸𑀬 𑀢𑀲𑁆𑀲𑀸 𑀫𑀸𑀢𑀸𑀧𑀺𑀢𑀼𑀦𑁆𑀦𑀁 𑀲𑀦𑁆𑀢𑀺𑀓𑀁 𑀯𑀢𑁆𑀣𑀸𑀪𑀭𑀡𑀕𑀦𑁆𑀥𑀫𑀸𑀮𑀸𑀤𑀬𑁄 𑀧𑁂𑀲𑁂𑀲𑀺 𑀲𑀼𑀯𑀡𑁆𑀡𑀢𑀺𑀮𑀓𑀁 𑀅𑀫𑁆𑀳𑀸𑀓𑀁 𑀤𑀤𑀦𑁆𑀢𑀽𑀢𑀺, 𑀢𑁂 𑀢𑀁 𑀧𑀯𑀢𑁆𑀢𑀺𑀁 𑀢𑀲𑁆𑀲𑀸 𑀆𑀭𑁄𑀘𑁂𑀲𑀼𑀁. 𑀲𑀸𑀲𑁆𑀲 𑀚𑀺𑀕𑀼𑀘𑁆𑀙𑀦𑁆𑀢𑀻 𑀧𑀭𑀺𑀳𑀸𑀲 𑀫𑀓𑀸𑀲𑀺. 𑀢𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁄 𑀮𑀚𑁆𑀚𑀺𑀢𑁄 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀻𑀡𑀁 𑀫𑀼𑀜𑁆𑀘𑁂𑀢𑁆𑀯𑀸 𑀕𑀸𑀬𑀫𑀸𑀦𑁄 𑀏𑀯𑀫𑀸𑀳.

𑁯.

𑀮𑀮𑀦𑀸 𑀦𑀦𑀸𑀦𑀻 𑀘𑀮𑀮𑁄𑀘𑀦𑀸𑀦𑀻,

𑀢𑀭𑀼𑀡𑀸 𑀭𑀼𑀡𑀸𑀦𑀻 𑀘𑀮𑀺𑀢𑀸𑀥𑀭𑀸𑀡𑀻;

𑀫𑀦𑀼𑀚𑁄 𑀳𑀺 𑀬𑁄 𑀦𑁂𑀢𑁆𑀢𑀧𑀺𑀬𑀁 𑀓𑀭𑁄𑀢𑀺,

𑀲 𑀢𑀼 𑀦𑀻𑀘𑀚𑀸𑀢𑀺𑀁 𑀅𑀧𑀺 𑀦𑁄 𑀚𑀳𑀸𑀢𑀺.

𑀓𑀺𑀫𑀺𑀤𑀦𑁆𑀢𑀺 𑀭𑀜𑁆𑀜𑀸 𑀧𑀼𑀝𑁆𑀞𑁄 𑀆𑀳.

𑁧𑁦.

𑀲𑀫𑁂𑀢𑀺 𑀓𑀺𑀁 𑀤𑁂𑀯 𑀙𑀫𑀸𑀬 𑀫𑀢𑁆𑀢𑀺𑀓𑀸,

𑀓𑀤𑀸𑀘𑀺 𑀘𑀸𑀫𑀻𑀓𑀭𑀚𑀸𑀢𑀺𑀓𑀸𑀬;

𑀲𑀺𑀕𑀸𑀮𑀥𑁂𑀦𑀼 𑀅𑀧𑀺 𑀦𑀻𑀘𑀚𑀸𑀢𑀺𑀓𑀸,

𑀲𑀫𑁂𑀢𑀺 𑀓𑀺𑀁𑀲𑀻𑀳𑀯𑀭𑁂𑀦 𑀤𑁂𑀯𑀸𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀤𑁂𑀯 𑀇𑀫𑀲𑁆𑀫𑀺𑀁𑀦𑀕𑀭𑁂 𑀲𑀼𑀯𑀡𑁆𑀡𑀢𑀺𑀮𑀓𑀸 𑀦𑀸𑀫𑁂𑀓𑀸 𑀘𑀡𑁆𑀟𑀸𑀮𑀥𑀻𑀢𑀸 𑀅𑀢𑁆𑀣𑀺, 𑀲𑀸 𑀲𑀫𑀸𑀦𑀚𑀸𑀢𑀺𑀓𑁂𑀳𑀺 𑀧𑁂𑀲𑀺𑀢𑀧𑀡𑁆𑀡𑀸𑀓𑀸𑀭𑀁 𑀦 𑀕𑀡𑁆𑀳𑀸𑀢𑀺, 𑀓𑀼𑀮𑀯𑀦𑁆𑀢𑁂𑀬𑁂𑀯 𑀧𑀢𑁆𑀣𑁂𑀢𑀺, 𑀓𑀤𑀸 𑀦𑀸𑀫 𑀓𑀸𑀓𑀻 𑀲𑀼𑀯𑀡𑁆𑀡𑀳𑀁𑀲𑁂𑀦 𑀲𑀫𑀸𑀕𑀘𑁆𑀙𑀢𑀺 𑀤𑁂𑀯𑀸𑀢𑀺. 𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 𑀢𑀲𑁆𑀲𑀸 𑀧𑀺𑀢𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀫𑀢𑁆𑀣𑀁 𑀯𑀢𑁆𑀯𑀸 𑀲𑀘𑁆𑀘𑀁 𑀪𑀡𑁂𑀢𑀺 𑀧𑀼𑀘𑁆𑀙𑀺, 𑀲𑁄𑀧𑀺 𑀲𑀘𑁆𑀘𑀁 𑀤𑁂𑀯, 𑀲𑀸 𑀚𑀸𑀢𑀺𑀲𑀫𑁆𑀧𑀦𑁆𑀦𑀫𑁂𑀯 𑀓𑀸𑀫𑁂𑀢𑀻𑀢𑀺 𑀆𑀳. 𑀭𑀸𑀚𑀸 𑀏𑀯𑀁 𑀲𑀢𑀺 𑀪𑀡𑁂 𑀧𑀜𑁆𑀘𑀫𑀥𑀼𑀭𑀦𑀕𑀭𑁂 𑀉𑀤𑁆𑀤𑀸𑀴𑀩𑁆𑀭𑀸𑀳𑁆𑀫𑀡𑁄 𑀦𑀸𑀫 𑀅𑀢𑁆𑀣𑀺, 𑀲𑁄 𑀚𑀸𑀢𑀺𑀲𑀫𑁆𑀧𑀦𑁆𑀦𑁄 𑀫𑀸𑀢𑀺𑀢𑁄𑀘 𑀧𑀺𑀢𑀺𑀢𑁄𑀘 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 ¶ , 𑀚𑁂𑀕𑀼𑀘𑁆𑀙𑀸 𑀧𑀝𑀺𑀓𑁆𑀓𑀽𑀮𑀸 𑀏𑀢𑀸𑀢𑀺 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀦 𑀲𑀁𑀯𑀲𑀢𑀺. 𑀅𑀢𑁆𑀢𑀦𑁄 𑀕𑁂𑀳𑀢𑁄 𑀭𑀸𑀚𑀕𑁂𑀳𑀁 𑀕𑀘𑁆𑀙𑀦𑁆𑀢𑁄𑀘 𑀆𑀕𑀘𑁆𑀙𑀦𑁆𑀢𑁄 𑀘 𑀲𑁄𑀴𑀲𑀔𑀻𑀭𑁄𑀤𑀓𑀖𑀝𑁂𑀳𑀺 𑀫𑀕𑁆𑀕𑁂 𑀲𑀺𑀜𑁆𑀘𑀸𑀧𑁂𑀲𑀺. 𑀫𑀸𑀢𑀼𑀕𑀸𑀫𑁂 𑀤𑀺𑀲𑁆𑀯𑀸 𑀓𑀸𑀮𑀓𑀡𑁆𑀡𑀻 𑀫𑀬𑀸 𑀤𑀺𑀝𑁆𑀞𑀸𑀢𑀺 𑀔𑀻𑀭𑁄𑀤𑀓𑁂𑀦 𑀫𑀼𑀔𑀁 𑀥𑁄𑀯𑀢𑀺. 𑀢𑀯 𑀥𑀻𑀢𑀸 𑀲𑀓𑁆𑀓𑁄𑀦𑁆𑀢𑀻 𑀢𑁂𑀦 𑀲𑀤𑁆𑀥𑀺𑀁 𑀲𑀁𑀯𑀲𑀢𑀼, 𑀏𑀢𑀫𑀢𑁆𑀣𑀁 𑀢𑀯 𑀥𑀻𑀢𑀭𑀁 𑀓𑀣𑁂𑀳𑀻𑀢𑀺 𑀆𑀳, 𑀲𑁄𑀧𑀺 𑀢𑀁 𑀲𑀼𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀥𑀻𑀢𑀭𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀭𑀜𑁆𑀜𑀸 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀢𑀲𑁆𑀲𑀸 𑀓𑀣𑁂𑀲𑀺. 𑀢𑀸𑀬 𑀢𑀁 𑀲𑀼𑀢𑁆𑀯𑀸 𑀲𑀓𑁆𑀓𑁄𑀦𑁆𑀢𑀻 𑀅𑀳𑀁 𑀉𑀤𑁆𑀤𑀸𑀴𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀯𑀲𑀺𑀲𑁆𑀲𑀸𑀫𑀺, 𑀫𑀸 𑀢𑀼𑀫𑁆𑀳𑁂 𑀘𑀺𑀦𑁆𑀢𑁂𑀣, 𑀧𑀧𑀜𑁆𑀘𑀫𑁆𑀧𑀺 𑀫𑀸 𑀓𑀭𑁄𑀣, 𑀧𑀸𑀢𑁄𑀯 𑀕𑀫𑀺𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑁂 𑀧𑀺𑀢𑀸 𑀧𑀦𑀲𑁆𑀲𑀸 𑀲𑀸𑀥𑀽𑀢𑀺 𑀲𑀳𑀲𑁆𑀲𑀕𑁆𑀖𑀦𑀓𑀘𑀺𑀢𑁆𑀢𑀓𑀫𑁆𑀩𑀮𑀓𑀜𑁆𑀘𑀼𑀓𑁂𑀦 𑀥𑀻𑀢𑀼 𑀲𑀭𑀻𑀭𑀁 𑀧𑀸𑀭𑀼𑀧𑀸𑀧𑁂𑀢𑁆𑀯𑀸 𑀯𑀻𑀡𑀸𑀤𑀺𑀢𑀼𑀭𑀺𑀬𑀪𑀡𑁆𑀟𑀸𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀥𑀻𑀢𑀼𑀬𑀸 𑀲𑀤𑁆𑀥𑀺𑀁 𑀅𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀦𑀕𑀭𑁂 𑀭𑀜𑁆𑀜𑁄 𑀕𑀦𑁆𑀥𑀩𑁆𑀩𑀁 𑀓𑀭𑁄𑀦𑁆𑀢𑁄 𑀥𑀻𑀢𑀭𑀁 𑀧𑀺𑀝𑁆𑀞𑀺𑀧𑀲𑁆𑀲𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀕𑀦𑁆𑀥𑀩𑁆𑀩𑀫𑀓𑀸𑀲𑀺. 𑀅𑀣𑀲𑁆𑀲 𑀧𑀺𑀝𑁆𑀞𑀺𑀧𑀲𑁆𑀲𑀦𑀺𑀲𑀺𑀦𑁆𑀦𑀸 𑀲𑀼𑀯𑀡𑁆𑀡𑀢𑀺𑀮𑀓𑀸 𑀦𑀬𑀦𑀓𑁄𑀝𑀺𑀬𑀸 𑀤𑀺𑀝𑁆𑀞𑀺𑀁 𑀧𑀸𑀧𑁂𑀦𑁆𑀢𑀻 𑀲𑀭𑀲𑁂𑀦 𑀢𑀁 𑀑𑀮𑁄𑀓𑁂𑀢𑁆𑀯𑀸 𑀧𑀸𑀭𑀼𑀢𑀓𑀜𑁆𑀘𑀼𑀓𑀁 𑀓𑀺𑀜𑁆𑀘𑀺 𑀅𑀧𑀦𑁂𑀢𑁆𑀯𑀸 𑀲𑀭𑀻𑀭𑀧𑁆𑀧𑀪𑀁 𑀧𑀜𑁆𑀜𑀸𑀧𑁂𑀲𑀺, 𑀭𑀸𑀚𑀸 𑀧𑀦𑀲𑁆𑀲𑀸 𑀲𑀭𑀻𑀭𑀧𑁆𑀧𑀪𑀁𑀘 𑀭𑀽𑀧𑀲𑀫𑁆𑀧𑀤𑀁𑀘 𑀤𑀺𑀲𑁆𑀯𑀸 𑀓𑀸𑀫𑀸𑀢𑀼𑀭𑁄 𑀯𑀺𑀕𑀢𑀲𑀜𑁆𑀜𑁄 𑀲𑀫𑁆𑀫𑀽𑀴𑁆𑀳𑁄 𑀳𑀼𑀢𑁆𑀯𑀸 𑀫𑀼𑀳𑀼𑀢𑁆𑀢𑁂𑀦 𑀧𑀝𑀺𑀮𑀤𑁆𑀥𑀲𑁆𑀲𑀸𑀲𑁄 𑀢𑀲𑁆𑀲𑀸 𑀲𑀲𑁆𑀲𑀸𑀫𑀺𑀓𑀸𑀲𑁆𑀲𑀸𑀫𑀺𑀓𑀪𑀸𑀯𑀁 𑀧𑀼𑀘𑁆𑀙𑀺𑀢𑁆𑀯𑀸 𑀘𑀡𑁆𑀟𑀸𑀮𑀥𑀻𑀢𑀸𑀢𑀺 𑀲𑀼𑀢𑁆𑀯𑀸 𑀧𑀭𑀺𑀪𑀯𑀪𑀬𑁂𑀦 𑀢𑀁 𑀆𑀦𑁂𑀢𑀼 𑀫𑀲𑀓𑁆𑀓𑁄𑀦𑁆𑀢𑁄 𑀏𑀯𑀭𑀽𑀧𑀁 𑀯𑀡𑁆𑀡𑀧𑁄𑀓𑁆𑀔𑀭𑀲𑀫𑁆𑀧𑀦𑁆𑀦𑀁 𑀇𑀢𑁆𑀣𑀺𑀭𑀢𑀦𑀁 𑀅𑀮𑀪𑀦𑁆𑀢𑀲𑁆𑀲 𑀫𑁂 𑀓𑁄 𑀅𑀢𑁆𑀣𑁄 𑀚𑀻𑀯𑀺𑀢𑁂𑀦𑀸𑀢𑀺 𑀲𑁄𑀘𑀦𑁆𑀢𑁄 𑀧𑀭𑀺𑀤𑁂𑀯𑀦𑁆𑀢𑁄 𑀓𑀸𑀫𑀫𑀼𑀘𑁆𑀙𑀺𑀢𑁄 𑀓𑀢𑁆𑀢𑀩𑁆𑀩𑀸 𑀓𑀢𑁆𑀢𑀩𑁆𑀩𑀁 𑀅𑀚𑀸𑀦𑀦𑁆𑀢𑁄 𑀅𑀲𑀺𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀻𑀲𑀁 𑀲𑀬𑀫𑁂𑀯 𑀙𑀺𑀦𑁆𑀤𑀺𑀢𑁆𑀯𑀸 𑀓𑀸𑀮 𑀫𑀓𑀸𑀲𑀺. 𑀏𑀯𑀫𑁂𑀯 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀜𑁆𑀘𑀭𑀸𑀚𑀸𑀦𑁄 𑀢𑀲𑁆𑀲𑀸 𑀭𑀽𑀧𑀲𑀫𑁆𑀧𑀢𑁆𑀢𑀺𑀫𑀤𑀫𑀢𑁆𑀢𑀸 𑀅𑀲𑀺𑀦𑀸 𑀙𑀺𑀦𑁆𑀦𑀲𑀻𑀲𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀣𑀸 𑀳𑀺 𑀲𑀢𑁆𑀢𑀸 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀤𑀸𑀲𑀺𑀤𑀸𑀲 𑀧𑀼𑀢𑁆𑀢𑀤𑀸𑀭𑀸𑀤𑀻𑀲𑀼 [𑀧𑀼𑀢𑁆𑀢𑀤𑀸𑀭𑀸𑀤𑀻𑀳𑀺 𑀇𑀢𑀺𑀲𑀩𑁆𑀩𑀢𑁆𑀣] 𑀧𑀺𑀬𑀁 𑀦𑀺𑀲𑁆𑀲𑀸𑀬 𑀓𑀸𑀫𑁂𑀦 𑀫𑀼𑀘𑁆𑀙𑀺𑀢𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑀦𑁆𑀢𑀻𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸.

𑁧𑁧.

𑀧𑀺𑀬𑀢𑁄 ¶ 𑀚𑀸𑀬𑀢𑁂 𑀲𑁄𑀓𑁄,

𑀧𑀺𑀬𑀢𑁄 𑀚𑀸𑀬𑀢𑁂 𑀪𑀬𑀁;

𑀧𑀺𑀬𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲,

𑀦𑀢𑁆𑀣𑀺 𑀲𑁄𑀓𑁄 𑀓𑀼𑀢𑁄 𑀪𑀬𑀁.

𑁧𑁨.

𑀧𑁂𑀫𑀢𑁄 𑀚𑀸𑀬𑀢𑁂 𑀲𑁄𑀓𑁄,

𑀧𑁂𑀫𑀢𑁄 𑀚𑀸𑀬𑀢𑁂 𑀪𑀬𑀁;

𑀧𑁂𑀫𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲,

𑀦𑀢𑁆𑀣𑀺 𑀲𑁄𑀓𑁄 𑀓𑀼𑀢𑁄 𑀪𑀬𑀁.

𑁧𑁩.

𑀭𑀢𑀺𑀬𑀸 𑀚𑀸𑀬𑀢𑁂 𑀲𑁄𑀓𑁄,

𑀭𑀢𑀺𑀬𑀸 𑀚𑀸𑀬𑀢𑁂 𑀪𑀬𑀁;

𑀭𑀢𑀺𑀬𑀸 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲,

𑀦𑀢𑁆𑀣𑀺 𑀲𑁄𑀓𑁄 𑀓𑀼𑀢𑁄 𑀪𑀬𑀁.

𑁧𑁪.

𑀓𑀸𑀫𑀢𑁄 𑀚𑀸𑀬𑀢𑁂 𑀲𑁄𑀓𑁄,

𑀓𑀸𑀫𑀢𑁄 𑀚𑀸𑀬𑀢𑁂 𑀪𑀬𑀁;

𑀓𑀸𑀫𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲,

𑀦𑀢𑁆𑀣𑀺 𑀲𑁄𑀓𑁄 𑀓𑀼𑀢𑁄 𑀪𑀬𑀁.

𑁧𑁫.

𑀢𑀡𑁆𑀳𑀸𑀬 𑀚𑀸𑀬𑀢𑁂 𑀲𑁄𑀓𑁄,

𑀢𑀡𑁆𑀳𑀸𑀬 𑀚𑀸𑀬𑀢𑁂 𑀪𑀬𑀁;

𑀢𑀡𑁆𑀳𑀸𑀬 𑀯𑀺𑀧𑁆𑀧𑀫𑀼𑀢𑁆𑀢𑀲𑁆𑀲,

𑀦𑀢𑁆𑀣𑀺 𑀲𑁄𑀓𑁄 𑀓𑀼𑀢𑁄 𑀪𑀬𑀁.

𑀢𑀢𑁄 𑀲𑁄 𑀅𑀦𑀼𑀓𑁆𑀓𑀫𑁂𑀦 𑀧𑀜𑁆𑀘𑀫𑀥𑀼𑀭𑀦𑀕𑀭𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀭𑀜𑁆𑀜𑀸 𑀓𑀣𑀸𑀧𑁂𑀢𑁆𑀯𑀸 𑀢𑁂𑀦 𑀅𑀦𑀼𑀜𑁆𑀜𑀸𑀢𑁄 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀅𑀤𑁆𑀤𑀲. 𑀢𑀤𑀸 𑀉𑀤𑁆𑀤𑀸𑀴𑀩𑁆𑀭𑀸𑀳𑁆𑀫𑀡𑁄 𑀭𑀜𑁆𑀜𑁄 𑀅𑀯𑀺𑀤𑀽𑀭𑁂 𑀓𑀫𑁆𑀩𑀮𑀪𑀤𑁆𑀤𑀧𑀻𑀞𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀕𑀦𑁆𑀥𑀩𑁆𑀩𑀩𑁆𑀭𑀸𑀳𑁆𑀫𑀡𑁄𑀧𑀺 𑀥𑀻𑀢𑀼𑀬𑀸 𑀲𑀤𑁆𑀥𑀺𑀁 𑀕𑀦𑁆𑀥𑀩𑁆𑀩𑀁 𑀓𑀼𑀭𑀼𑀫𑀸𑀦𑁄 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁𑀔𑀡𑁂 𑀧𑀺𑀢𑀼 𑀧𑀺𑀝𑁆𑀞𑀺𑀧𑀲𑁆𑀲𑁂 𑀦𑀺𑀲𑀺𑀦𑁆𑀦𑀸 𑀲𑀼𑀯𑀡𑁆𑀡𑀢𑀺𑀮𑀓𑀸 𑀉𑀤𑁆𑀤𑀸𑀴𑀩𑁆𑀭𑀸𑀳𑁆𑀫𑀡𑁄 𑀓𑀢𑀫𑁄𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀏𑀢𑀲𑁆𑀫𑀺𑀁 𑀪𑀤𑁆𑀤𑀧𑀻𑀞𑁂 𑀦𑀺𑀲𑀺𑀦𑁆𑀦𑁄𑀁 𑀏𑀲𑁄𑀢𑀺 𑀲𑀼𑀢𑁆𑀯𑀸 𑀦𑀺𑀮𑀸𑀫𑀮𑀮𑁄𑀘𑀦𑁂𑀳𑀺 𑀢𑀁 𑀑𑀮𑁄𑀓𑀦𑁆𑀢𑀺 𑀤𑀲𑀦𑀭𑀁𑀲𑀺𑀦𑀸 𑀲𑀫𑁆𑀪𑀺𑀦𑁆𑀦𑀲𑀼𑀭𑀢𑁆𑀢𑀸𑀥𑀭𑁂𑀦 𑀫𑀦𑁆𑀤𑀳𑀲𑀺𑀢𑀁 ¶ 𑀓𑀭𑁄𑀦𑁆𑀢𑀻 𑀢𑀁 𑀑𑀮𑁄𑀓𑁂𑀢𑁆𑀯𑀸 𑀧𑀸𑀭𑀼𑀢𑀓𑀜𑁆𑀘𑀼𑀓𑀁 𑀅𑀧𑀦𑁂𑀢𑁆𑀯𑀸 𑀲𑀭𑀻𑀭𑀧𑁆𑀧𑀪𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀉𑀫𑁆𑀫𑀢𑁆𑀢𑁄 𑀲𑁄𑀓𑁂𑀦 𑀧𑀭𑀺𑀤𑀟𑁆𑀠𑀕𑀢𑁆𑀢𑁄 𑀉𑀡𑁆𑀳𑀯𑀸𑀢𑁂𑀦 𑀧𑀽𑀭𑀺𑀢𑀫𑀼𑀔𑀦𑀸𑀲𑁄 𑀅𑀲𑁆𑀲𑀼𑀦𑀸 𑀓𑀺𑀮𑀺𑀦𑁆𑀦𑀦𑁂𑀢𑁆𑀢𑁄 𑀯𑀺𑀲𑀜𑁆𑀜𑀻 𑀅𑀳𑁄𑀲𑀺. 𑀢𑀢𑁄 𑀲𑁄 𑀫𑀼𑀳𑀼𑀢𑁆𑀢𑁂𑀦 𑀮𑀤𑁆𑀥𑀲𑁆𑀲𑀸𑀲𑁄 𑀭𑁄𑀕𑀻𑀯𑀺𑀬 𑀭𑀜𑁆𑀜𑁄 𑀲𑀓𑀸𑀲𑀸 𑀅𑀧𑀲𑀭𑀦𑁆𑀢𑁄 𑀅𑀢𑁆𑀢𑀦𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀲𑀼𑀳𑀤𑁂 𑀧𑀓𑁆𑀓𑁄𑀲𑀺𑀢𑁆𑀯𑀸 𑀢𑁂𑀲𑀁 𑀏𑀯𑀫𑀸𑀳. 𑀪𑀯𑀦𑁆𑀢𑁂𑀢𑁆𑀣.

𑁧𑁬.

𑀬𑁄 𑀆𑀧𑀤𑁂 𑀲𑀫𑀼𑀧𑁆𑀧𑀦𑁆𑀦𑁂,

𑀉𑀧𑀢𑀺𑀝𑁆𑀞𑀢𑀺 𑀲𑀦𑁆𑀢𑀺𑀓𑁂;

𑀲𑀼𑀔𑀤𑀼𑀓𑁆𑀔𑁂 𑀲𑀫𑁄 𑀳𑁄𑀢𑀺,

𑀲𑁄 𑀫𑀺𑀢𑁆𑀢𑁄 𑀲𑁄𑀘 𑀜𑀸𑀢𑀓𑁄.

𑁧𑁭.

𑀬𑁄 𑀕𑀼𑀡𑀁 𑀪𑀸𑀲𑀢𑁂 𑀬𑀲𑁆𑀲, 𑀅𑀕𑀼𑀡𑀜𑁆𑀘 𑀦𑀺𑀕𑀽𑀳𑀢𑀺;

𑀧𑀝𑀺𑀲𑁂𑀥𑁂𑀢𑁆𑀬 [𑀧𑀝𑀺𑀲𑁂𑀥𑁂𑀢𑀺𑀓𑀢𑁆𑀢𑀩𑁆𑀩𑀸 𑀇𑀢𑀺𑀲𑀩𑁆𑀩𑀢𑁆𑀣] 𑀓𑀢𑁆𑀢𑀩𑁆𑀩𑀸, 𑀲𑁄 𑀫𑀺𑀢𑁆𑀢𑁄 𑀲𑁄𑀘 𑀜𑀸𑀢𑀓𑁄.

𑁧𑁮.

𑀲𑀼𑀯𑀡𑁆𑀡𑀢𑀺𑀮𑀓𑀸𑀦𑀸𑀫, 𑀮𑀮𑀦𑀸 𑀓𑀸𑀫𑀮𑀸𑀮𑀬𑀸;

𑀦𑀻𑀮𑀓𑁆𑀔𑀺𑀘𑀡𑁆𑀟𑀓𑀡𑁆𑀟𑁂𑀳𑀺, 𑀯𑀺𑀔𑀡𑁆𑀟𑁂𑀲𑀺 𑀫𑀦𑁄 𑀫𑀫.

𑁧𑁯.

𑀢𑀲𑁆𑀲𑀸 𑀫𑀼𑀔𑀫𑁆𑀩𑀼𑀚𑁂 𑀲𑀢𑁆𑀢𑀸, 𑀫𑀫 𑀦𑁂𑀢𑁆𑀢𑀫𑀥𑀼𑀩𑁆𑀩𑀢𑀸,

𑀅𑀧𑁆𑀧𑀫𑁆𑀧𑀺𑀦 𑀲𑀭𑀦𑁆𑀢𑀸𑀫𑀁, 𑀢𑀢𑁆𑀣𑁂𑀯𑀸 𑀪𑀺𑀭𑀫𑀦𑁆𑀢𑀺 𑀢𑁂.

𑁨𑁦.

𑀲𑀳𑁂𑀯 𑀢𑁂𑀳𑀺 𑀫𑁂 𑀘𑀺𑀢𑁆𑀢𑀁, 𑀕𑀢𑀁 𑀉𑀮𑁆𑀮𑀁𑀖𑀺𑀬𑀼𑀤𑁆𑀥𑀢𑁄;

𑀮𑀚𑁆𑀚𑀸𑀕𑀫𑁆𑀪𑀻𑀭𑀧𑀭𑀺𑀔𑀁, 𑀥𑀺𑀢𑀺𑀧𑀸𑀓𑀸𑀭𑀫𑀼𑀕𑁆𑀕𑀢𑀁.

𑁨𑁧.

𑀲𑀫𑁆𑀫𑀼𑀬𑁆𑀳𑀸𑀫𑀺 𑀧𑀫𑀼𑀬𑁆𑀳𑀸𑀫𑀺, 𑀲𑀩𑁆𑀩𑀸 𑀫𑀼𑀬𑁆𑀳𑀦𑁆𑀢𑀺 𑀫𑁂 𑀤𑀺𑀲𑀸;

𑀢𑀲𑁆𑀲 𑀫𑁂 𑀲𑀭𑀡𑀁 𑀳𑁄𑀣, 𑀓𑀭𑁄𑀣 𑀫𑀫 𑀲𑀗𑁆𑀕𑀳𑀦𑁆𑀢𑀺.

𑀢𑀁 𑀲𑀼𑀢𑁆𑀯𑀸 𑀢𑁂 𑀏𑀯𑀫𑀸𑀳𑀁𑀲𑀼.

𑁨𑁨.

𑀬𑀁 𑀢𑁆𑀯𑀫𑀸𑀘𑀭𑀺𑀬 𑀧𑀢𑁆𑀣𑁂𑀲𑀺, 𑀘𑀡𑁆𑀟𑀸𑀮𑀻 𑀲𑀸 𑀅𑀲𑀗𑁆𑀕𑀫𑀸;

𑀓𑀺𑀦𑁆𑀦𑀼 𑀫𑀻𑀴𑁆𑀳𑁂𑀦 𑀲𑀁𑀬𑁄𑀕𑁄, 𑀘𑀦𑁆𑀤𑀦𑀲𑁆𑀲 𑀓𑀤𑀸 𑀲𑀺𑀬𑀸.

𑁨𑁩.

𑀅𑀕𑀫𑁆𑀫𑀕𑀫𑀦𑀸 ¶ 𑀬𑀸𑀢𑀺, 𑀦𑀭𑀸𑀦𑀁 𑀤𑀽𑀭𑀢𑁄 𑀲𑀺𑀭𑀻;

𑀓𑀺𑀢𑁆𑀢𑀺𑀘𑀸𑀬𑀼 𑀩𑀮𑀁 𑀩𑀼𑀤𑁆𑀥𑀺, 𑀅𑀬𑀲𑀁𑀘 𑀲 𑀕𑀘𑁆𑀙𑀢𑀻𑀢𑀺.

𑀅𑀣 𑀢𑁂𑀲𑀁 𑀩𑁆𑀭𑀳𑁆𑀫𑀡𑁄 𑀆𑀳.

𑁨𑁪.

𑀦 𑀧𑀭𑀺𑀘𑁆𑀘𑀚𑀢𑀺 𑀮𑁄𑀓𑁄𑀬𑀁, 𑀅𑀫𑁂𑀚𑁆𑀛𑁂 𑀫𑀡𑀺𑀫𑀼𑀢𑁆𑀢𑀫𑀁;

𑀣𑀻𑀭𑀢𑀦𑀁 𑀬𑀼𑀯𑀸𑀡𑀻 𑀘, 𑀤𑀼𑀓𑁆𑀓𑀼𑀮𑀸 𑀅𑀧𑀺 𑀕𑀸𑀳𑀺𑀬𑀸𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀢𑀲𑁆𑀲𑀸 𑀲𑀲𑁆𑀲𑀸𑀫𑀺𑀓𑀸𑀲𑁆𑀲𑀸𑀫𑀺𑀓𑀪𑀸𑀯𑀁 𑀜𑀢𑁆𑀯𑀸 𑀆𑀦𑁂𑀣𑀸𑀢𑀺 𑀆𑀳, 𑀢𑁂 𑀢𑀣𑀸 𑀅𑀓𑀁𑀲𑀼. 𑀢𑀢𑁄 𑀩𑁆𑀭𑀸𑀳𑁆𑀫𑀡𑁄 𑀢𑀸𑀬 𑀕𑁂𑀳𑀁 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀭𑀜𑁆𑀜𑁄 𑀉𑀧𑀝𑁆𑀞𑀸𑀦𑀁 𑀦𑁂𑀯 𑀅𑀕𑀫𑀸𑀲𑀺. 𑀢𑀲𑁆𑀲 𑀧𑀦 𑀩𑁆𑀭𑀳𑁆𑀫𑀡𑀲𑁆𑀲 𑀲𑀦𑁆𑀢𑀺𑀓𑁂 𑀧𑀜𑁆𑀘𑀲𑀢𑀭𑀸𑀚𑀓𑀼𑀫𑀸𑀭𑀸 𑀦𑀸𑀦𑀸𑀯𑀺𑀥𑀸𑀦𑀺 𑀲𑀺𑀧𑁆𑀧𑀸𑀦𑀺 𑀉𑀕𑁆𑀕𑀡𑁆𑀳𑀦𑁆𑀢𑀺. 𑀢𑁂 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀲𑀼𑀯𑀡𑁆𑀡𑀢𑀺𑀮𑀓𑀸𑀬 𑀯𑀺𑀚𑁆𑀚𑀫𑀸𑀦𑀸𑀬 𑀅𑀫𑁆𑀳𑀸𑀓𑀁 𑀲𑀺𑀧𑁆𑀧𑀼𑀕𑁆𑀕𑀳𑀡𑀲𑁆𑀲 𑀅𑀦𑁆𑀢𑀭𑀸𑀬𑁄 𑀪𑀯𑀺𑀲𑁆𑀲𑀢𑀺, 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀏𑀢𑀁 𑀫𑀸𑀭𑁂𑀢𑀼𑀁 𑀯𑀝𑁆𑀝𑀢𑀻𑀢𑀺, 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂 𑀳𑀢𑁆𑀣𑀸 𑀘𑀭𑀺𑀬𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀮𑀜𑁆𑀚𑀁 𑀤𑀢𑁆𑀯𑀸 𑀏𑀯𑀫𑀸𑀳𑀁𑀲𑀼, 𑀳𑀢𑁆𑀣𑀺𑀁 𑀲𑀼𑀭𑀸𑀬 𑀫𑀢𑁆𑀢𑀁 𑀓𑀢𑁆𑀯𑀸 𑀲𑀼𑀯𑀡𑁆𑀡𑀢𑀺𑀮𑀓𑀁 𑀫𑀸𑀭𑁂𑀳𑀻𑀢𑀺. 𑀢𑀢𑁄 𑀢𑁂 𑀲𑀩𑁆𑀩𑁂 𑀭𑀸𑀚𑀗𑁆𑀕𑀡𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀤𑀽𑀢𑀁 𑀧𑀸𑀳𑁂𑀲𑀼𑀁, 𑀆𑀘𑀭𑀺𑀬𑀁 𑀤𑀝𑁆𑀞𑀼𑀓𑀸𑀫𑀫𑁆𑀳𑀸𑀢𑀺. 𑀢𑀢𑁄 𑀩𑁆𑀭𑀸𑀳𑁆𑀫𑀡𑁂𑀦 𑀆𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀦 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀆𑀘𑀭𑀺𑀬 𑀆𑀘𑀭𑀺𑀬𑀸𑀦𑀺𑀁 𑀧𑀲𑁆𑀲𑀺𑀢𑀼𑀓𑀸𑀫𑀫𑁆𑀳𑀸𑀢𑀺 𑀆𑀳𑀁𑀲𑀼. 𑀅𑀣 𑀲𑁄 𑀲𑀼𑀯𑀡𑁆𑀡𑀢𑀺𑀮𑀓𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀣𑀸𑀢𑀺 𑀫𑀦𑀼𑀲𑁆𑀲𑁂 𑀧𑁂𑀲𑁂𑀲𑀺. 𑀢𑁂 𑀢𑀣𑀸 𑀓𑀭𑀺𑀁𑀲𑀼, 𑀅𑀣 𑀢𑀲𑁆𑀲𑀸 𑀯𑀻𑀣𑀺𑀫𑀚𑁆𑀛𑀁 𑀲𑀫𑁆𑀧𑀢𑁆𑀢𑀓𑀸𑀮𑁂 𑀳𑀢𑁆𑀣𑀺𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀼𑀁. 𑀲𑁄 𑀲𑁄𑀡𑁆𑀟𑀸𑀬 𑀪𑀽𑀫𑀺𑀬𑀁 𑀧𑀳𑀭𑀦𑁆𑀢𑁄 [𑀧𑀳𑀭𑀦𑁆𑀢𑁄𑀉𑀧𑀥𑀸𑀯𑀺𑀢𑁆𑀯𑀸 𑀇𑀢𑀺𑀓𑀢𑁆𑀣𑀘𑀺] 𑀕𑀘𑁆𑀙𑀦𑁆𑀢𑁄 𑀉𑀧𑀥𑀸𑀯𑀺𑀢𑁆𑀯𑀸 𑀲𑁄𑀡𑁆𑀟𑁂𑀦 𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀓𑀼𑀫𑁆𑀪𑁂 𑀦𑀺𑀲𑀻𑀤𑀸𑀧𑁂𑀲𑀺. 𑀢𑀢𑁄 𑀭𑀸𑀚𑀸𑀦𑁄 𑀢𑀣𑀸 𑀢𑀁 𑀫𑀸𑀭𑀸𑀧𑁂𑀢𑀼 𑀫𑀲𑀓𑁆𑀓𑁄𑀦𑁆𑀢𑀸 𑀧𑀼𑀦 𑀤𑀺𑀯𑀲𑁂 𑀫𑀦𑀼𑀲𑁆𑀲𑁂 𑀧𑀬𑁄𑀚𑁂𑀢𑁆𑀯𑀸 𑀭𑀢𑁆𑀢𑀺𑀬𑀁 𑀫𑀸𑀭𑀸𑀧𑁂𑀲𑀼𑀁. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀏𑀯𑀭𑀽𑀧𑀁 𑀇𑀢𑁆𑀣𑀺𑀁 𑀅𑀮𑀲𑀺𑀢𑁆𑀯𑀸 𑀚𑀻𑀯𑀦𑀢𑁄 𑀫𑀢𑀫𑁂𑀯 [𑀫𑀢𑀁𑀫𑁂𑀲𑁂𑀬𑁆𑀬𑁄 𑀇𑀢𑀺𑀓𑀢𑁆𑀣𑀘𑀺] 𑀲𑁂𑀬𑁆𑀬𑁄𑀢𑀺 𑀲𑁄𑀘𑀦𑁆𑀢𑁄 𑀧𑀭𑀺𑀤𑁂𑀯𑀦𑁆𑀢𑁄 𑀭𑀸𑀚𑀗𑁆𑀕𑀡𑁂 𑀤𑀸𑀭𑀼𑀘𑀺𑀢𑀓𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀕𑁆𑀕𑀺𑀁𑀧𑀯𑀺𑀲𑀺𑀢𑁆𑀯𑀸 ¶ 𑀫𑀢𑁄𑀢𑀺. 𑀏𑀯𑀁 𑀫𑀸𑀢𑀼𑀕𑀸𑀫𑀯𑀲𑀗𑁆𑀕𑀢𑀸 𑀫𑀳𑀦𑁆𑀢𑀁 𑀅𑀦𑀬𑀩𑁆𑀬𑀲𑀦𑀜𑁆𑀘 𑀫𑀭𑀡𑀜𑁆𑀘 𑀧𑀸𑀧𑀼𑀡𑀦𑁆𑀢𑀻𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸.

𑁨𑁫.

𑀫𑀸𑀬𑀸𑀯𑁂𑀲𑀸 [𑀫𑀸𑀬𑀸𑀘𑁂𑀲𑀸 𑀇𑀢𑀺𑀓𑀢𑁆𑀣𑀘𑀺] 𑀫𑀭𑀻𑀘𑀻𑀯,

𑀲𑁄𑀓𑁄 𑀭𑁄𑀕𑁄 𑀘𑀼𑀧𑀤𑁆𑀤𑀯𑁄;

𑀔𑀭𑀸𑀯 𑀩𑀦𑁆𑀥𑀦𑀸 𑀘𑁂𑀲𑀸,

𑀫𑀘𑁆𑀘𑀼𑀧𑀸𑀲𑁄 𑀕𑀼𑀳𑀸𑀲𑀬𑁄;

𑀢𑀸𑀲𑀼 𑀬𑁄 𑀯𑀺𑀲𑁆𑀲𑀲𑁂 𑀧𑁄𑀲𑁄,

𑀲𑁄 𑀦𑀭𑁂𑀲𑀼 𑀦𑀭𑀸𑀥𑀫𑁄𑀢𑀺.

𑁨𑁬.

𑀅𑀬𑁄𑀦𑀺𑀲𑁄 𑀲𑀸 𑀧𑀼𑀭𑀺𑀫𑀸𑀬 𑀚𑀸𑀢𑀺𑀬𑀸,

𑀧𑀼𑀜𑁆𑀜𑀁 𑀓𑀭𑀺𑀢𑁆𑀯𑀸 𑀅𑀮𑀪𑀻𑀤𑀺𑀲𑀁 𑀕𑀢𑀺𑀁;

𑀥𑀻𑀲𑀫𑁆𑀧𑀬𑀼𑀢𑁆𑀢𑀁 [𑀥𑀺𑀢𑀺𑀲𑀫𑁆𑀧𑀬𑀼𑀢𑁆𑀢𑀁 𑀇𑀢𑀺𑀓𑀢𑁆𑀣𑀘𑀺] 𑀓𑀼𑀲𑀮𑀁 𑀓𑀭𑁄𑀦𑁆𑀢𑀸,

𑀦𑀺𑀩𑁆𑀩𑀸𑀡𑀫𑁂𑀯𑀸𑀪𑀺𑀫𑀼𑀔𑀁 𑀓𑀭𑁄𑀣𑀸𑀢𑀺.

𑀲𑀼𑀯𑀡𑁆𑀡𑀢𑀺𑀮𑀓𑀸𑀬 𑀯𑀢𑁆𑀣𑀼𑀁 𑀤𑀼𑀢𑀺𑀬𑀁.

𑁩𑁩. 𑀓𑀧𑀡𑀸𑀬 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀚𑀫𑁆𑀩𑀼𑀤𑀻𑀧𑁂 𑀢𑀢𑁆𑀣 𑀢𑀢𑁆𑀣 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀡𑀺𑀬𑁄 𑀘 𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀬𑁄 𑀘 𑀚𑀬𑀫𑀳𑀸𑀩𑁄𑀥𑀺𑀁 𑀯𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀬𑁂𑀪𑀼𑀬𑁆𑀬𑁂𑀦 𑀕𑀦𑁆𑀢𑁆𑀯𑀸 𑀯𑀦𑁆𑀤𑀦𑁆𑀢𑀺. 𑀅𑀣𑀸 𑀧𑀭𑀪𑀸𑀕𑁂 𑀩𑀳𑀽 𑀪𑀺𑀓𑁆𑀔𑀽 𑀲𑀗𑁆𑀕𑀫𑁆𑀫 𑀫𑀳𑀸𑀩𑁄𑀥𑀺𑀁 𑀯𑀦𑁆𑀤𑀦𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀸𑀫𑀓𑁂 𑀪𑀺𑀓𑁆𑀔𑀸𑀬 𑀘𑀭𑀺𑀢𑁆𑀯𑀸 𑀆𑀲𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀸 𑀣𑁄𑀓𑀁 𑀯𑀺𑀲𑁆𑀲𑀫𑀺𑀁𑀲𑀼, 𑀢𑀤𑀸 𑀢𑀢𑁆𑀣 𑀏𑀓𑀸 𑀓𑀧𑀡𑀸 𑀤𑀼𑀕𑁆𑀕𑀢𑀺𑀢𑁆𑀣𑀻 𑀢𑀣𑀸 𑀦𑀺𑀲𑀺𑀦𑁆𑀦𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑁂 𑀞𑀺𑀢𑀸 𑀅𑀬𑁆𑀬𑀸 𑀓𑀼𑀳𑀺𑀁 𑀕𑀘𑁆𑀙𑀦𑁆𑀢𑀻𑀢𑀺 𑀧𑀼𑀘𑁆𑀙𑀺. 𑀪𑀺𑀓𑁆𑀔𑀽 𑀢𑀁 𑀲𑀼𑀢𑁆𑀯𑀸 𑀚𑀬𑀫𑀳𑀸𑀩𑁄𑀥𑀺𑀲𑁆𑀲 𑀆𑀦𑀼𑀪𑀸𑀯𑀜𑁆𑀘 𑀢𑀁 𑀯𑀦𑁆𑀤𑀦𑀢𑁆𑀣𑀸𑀬 𑀅𑀢𑁆𑀢𑀸𑀦𑀁 𑀕𑀫𑀦𑀜𑁆𑀘 𑀓𑀣𑁂𑀦𑁆𑀢𑀸 𑀏𑀯𑀫𑀸𑀳𑀁𑀲𑀼.

𑁧.

𑀬𑀢𑁆𑀣𑀸𑀲𑀻𑀦𑁄 ¶ 𑀚𑀺𑀦𑁄 𑀚𑁂𑀲𑀺, 𑀲𑀲𑁂𑀦𑀁 𑀫𑀓𑀭𑀤𑁆𑀥𑀚𑀁;

𑀳𑀦𑁆𑀢𑁆𑀯𑀸 𑀓𑀺𑀮𑁂𑀲𑀲𑁂𑀦𑀜𑁆𑀘, 𑀩𑀼𑀤𑁆𑀥𑁄 𑀆𑀲𑀺 𑀦𑀺𑀭𑀼𑀢𑁆𑀢𑀭𑁄.

𑁨.

𑀬𑀁 𑀧𑀽𑀚𑁂𑀲𑀺 𑀫𑀳𑀸𑀯𑀻𑀭𑁄, 𑀞𑀺𑀢𑁄 𑀧𑀤 𑀫𑀓𑁄𑀧𑀬𑀁;

𑀲𑀢𑁆𑀢𑀭𑀢𑁆𑀢𑀺𑀦𑁆𑀤𑀺𑀯𑀁 𑀦𑁂𑀢𑁆𑀢, 𑀦𑀻𑀮𑀦𑀻𑀭𑀚𑀭𑀁𑀲𑀺𑀦𑀸.

𑁩.

𑀲𑀼𑀭𑀸𑀲𑀼𑀭𑀦𑀭𑀸𑀤𑀻𑀦𑀁, 𑀦𑁂𑀢𑁆𑀢𑀸𑀮𑀺 𑀧𑀸𑀴𑀺𑀧𑀸𑀢𑀦𑀸;

𑀫𑁂𑀘𑀓𑀸𑀓𑀸𑀭𑀧𑀢𑁆𑀢𑁂𑀳𑀺, 𑀲𑀺𑀔𑀡𑁆𑀟𑀻𑀯𑀺𑀬 𑀪𑀸𑀢𑀺 𑀬𑁄.

𑁪.

𑀲𑀼𑀭𑀧𑀸𑀤𑀧𑁄𑀯 𑀲𑀢𑁆𑀢𑀸𑀦𑀁, 𑀬𑀁 𑀢𑀺𑀝𑁆𑀞𑀢𑀺 𑀫𑀳𑀻𑀢𑀮𑁂;

𑀇𑀳 𑀮𑁄𑀓𑁂 𑀧𑀭𑀢𑁆𑀢𑁂 𑀘, 𑀤𑀤𑀦𑁆𑀢𑁄 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁.

𑁫.

𑀬𑀲𑁆𑀲 𑀧𑀼𑀭𑀸𑀡𑀧𑀡𑁆𑀡𑀫𑁆𑀧𑀺, 𑀧𑀢𑀺𑀢𑀁 𑀬𑁄 𑀦𑀭𑁄 𑀇𑀥;

𑀧𑀽𑀚𑁂𑀢𑀺 𑀢𑀲𑁆𑀲 𑀲𑁄 𑀤𑁂𑀢𑀺, 𑀪𑀯𑀪𑁄𑀕𑀁 𑀫𑀳𑀻𑀭𑀼𑀳𑁄.

𑁬.

𑀕𑀦𑁆𑀥𑀫𑀸𑀮𑁂𑀳𑀺 𑀲𑀮𑀺𑀮𑁂𑀳𑀺, 𑀬𑀫𑀼𑀧𑀸𑀲𑀢𑀺 𑀲𑀤𑀸 𑀦𑀭𑁄;

𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘, 𑀤𑀼𑀭𑀺𑀢𑀁 𑀲𑁄 𑀦𑀺𑀳𑀜𑁆𑀜𑀢𑀺.

𑁭.

𑀬𑁄 𑀤𑁂𑀢𑀺 𑀇𑀳𑀮𑁄𑀓𑀢𑁆𑀣𑀁,

𑀬𑁄 𑀤𑁂𑀢𑀺 𑀧𑀸𑀭𑀮𑁄𑀓𑀺𑀓𑀁,

𑀲𑀫𑁆𑀧𑀤𑀁 𑀚𑀬𑀩𑁄𑀥𑀺𑀁𑀢𑀁,

𑀪𑁄𑀢𑀺 𑀕𑀘𑁆𑀙𑀸𑀫 𑀯𑀦𑁆𑀤𑀺𑀢𑀼𑀁.

𑀢𑀁 𑀲𑀼𑀢𑁆𑀯𑀸 𑀉𑀤𑀕𑁆𑀕𑀸 𑀲𑁄𑀫𑀦𑀲𑁆𑀲𑀚𑀸𑀢𑀸 𑀪𑀺𑀓𑁆𑀔𑀽𑀦𑀁 𑀏𑀯𑀫𑀸𑀳. 𑀅𑀳𑀁 𑀪𑀦𑁆𑀢𑁂 𑀧𑀭𑀓𑀼𑀮𑁂 𑀪𑀢𑀺𑀬𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀫𑀺. 𑀲𑁆𑀯𑀸𑀢𑀦𑀸𑀬 𑀫𑁂 𑀢𑀡𑁆𑀟𑀼𑀮𑀦𑀸𑀮𑀺𑀧𑀺 [𑀪𑀡𑁆𑀟𑀼𑀮𑀦𑀸𑀫𑁆𑀧 𑀇𑀢𑀺𑀲𑀩𑁆𑀩𑀢𑁆𑀣] 𑀦𑀢𑁆𑀣𑀺, 𑀧𑀕𑁂𑀯 𑀅𑀜𑁆𑀜𑀁 𑀥𑀦𑀁, 𑀇𑀫𑀁 𑀯𑀺𑀦𑀸 𑀅𑀜𑁆𑀜𑀁 𑀲𑀸𑀝𑀓𑀫𑁆𑀧𑀺 𑀦𑀢𑁆𑀣𑀺, 𑀓𑀲𑁆𑀫𑀸 𑀧𑀼𑀩𑁆𑀩𑁂 𑀅𑀓𑀢𑀧𑀼𑀜𑁆𑀜𑀢𑁆𑀢𑀸, 𑀢𑀲𑁆𑀫𑀸 𑀇𑀫𑀁 𑀪𑀦𑁆𑀢𑁂 𑀲𑀸𑀝𑀓𑀁 𑀫𑀫𑀸𑀦𑀼𑀕𑁆𑀕𑀳𑀸𑀬 𑀩𑁄𑀥𑀺𑀫𑁆𑀳𑀺 𑀥𑀚𑀁 𑀩𑀦𑁆𑀥𑀣𑀸𑀢𑀺 𑀬𑀸𑀘𑀺𑀢𑁆𑀯𑀸 𑀲𑀸𑀝𑀓𑀁 𑀥𑁄𑀯𑀺𑀢𑁆𑀯𑀸 𑀢𑁂𑀲𑀁 𑀅𑀤𑀸𑀲𑀺. 𑀪𑀺𑀓𑁆𑀔𑀽𑀧𑀺 𑀢𑀲𑁆𑀲𑀸𑀦𑀼𑀕𑁆𑀕𑀳𑀸𑀬 𑀢𑀁 𑀕𑀳𑁂𑀢𑁆𑀯𑀸 𑀅𑀕𑀫𑀁𑀲𑀼. 𑀲𑀸 𑀲𑀸𑀝𑀓𑀁 𑀤𑀢𑁆𑀯𑀸 𑀧𑀻𑀢𑀺𑀧𑀸𑀫𑁄𑀚𑁆𑀚𑀫𑀸𑀦𑀲𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀢𑀤𑀳𑁂𑀯 𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑀬𑀸𑀫𑁂 𑀲𑀢𑁆𑀣𑀓𑀯𑀸𑀢𑁂𑀦 𑀉𑀧𑀳𑀢𑀸 𑀓𑀸𑀮𑀁 𑀓𑀢𑁆𑀯𑀸 𑀢𑁂𑀲𑀁 ¶ 𑀪𑀺𑀓𑁆𑀔𑀽𑀦𑀁 𑀕𑀫𑀦𑀫𑀕𑁆𑀕𑁂 𑀏𑀓𑀲𑁆𑀫𑀺𑀁 𑀭𑀫𑀡𑀻𑀬𑁂 𑀯𑀦𑀲𑀡𑁆𑀟𑁂 𑀪𑀼𑀫𑁆𑀫𑀤𑁂𑀯𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀻, 𑀅𑀣𑀲𑁆𑀲𑀸 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀢𑀺𑀬𑁄𑀚𑀦𑀺𑀓𑁂 𑀞𑀸𑀦𑁂 𑀤𑀺𑀩𑁆𑀩𑀓𑀧𑁆𑀧𑀭𑀼𑀓𑁆𑀔𑀸 𑀧𑀸𑀢𑀼𑀭𑀳𑀁𑀲𑀼, 𑀢𑀢𑁆𑀢 𑀢𑀢𑁆𑀢 𑀦𑀸𑀦𑀸𑀯𑀺𑀭𑀸𑀕𑀥𑀚𑀧𑀢𑀸𑀓𑀸 𑀑𑀮𑀫𑁆𑀩𑀦𑁆𑀢𑀺. 𑀤𑁂𑀯𑀧𑀼𑀢𑁆𑀢𑀸 𑀘 𑀤𑁂𑀯𑀥𑀻𑀢𑀭𑁄 𑀘 𑀲𑀩𑁆𑀩𑀸𑀪𑀭𑀡𑀯𑀺𑀪𑀽𑀲𑀺𑀢𑀸 𑀢𑀣𑁂𑀯 𑀥𑀚𑀧𑀢𑀸𑀓𑀸𑀤𑀬𑁄 𑀕𑀳𑁂𑀢𑁆𑀯𑀸 𑀓𑀻𑀴𑀦𑁆𑀢𑀺. 𑀦𑀘𑁆𑀘𑀕𑀻𑀢𑀸𑀤𑀺𑀦𑁂𑀓𑀸𑀦𑀺 𑀅𑀘𑁆𑀙𑀭𑀺𑀬𑀸𑀦𑀺 𑀧𑀬𑁄𑀚𑁂𑀦𑁆𑀢𑀺. 𑀅𑀣 𑀤𑀼𑀢𑀺𑀬𑀤𑀺𑀯𑀲𑁂 𑀢𑁂𑀧𑀺 𑀪𑀺𑀓𑁆𑀔𑀽 𑀩𑁄𑀥𑀺𑀫𑀡𑁆𑀟𑀮𑀁 𑀕𑀘𑁆𑀙𑀦𑁆𑀢𑀸 𑀲𑀸𑀬𑀡𑁆𑀳𑁂 𑀢𑀁 𑀞𑀸𑀦𑀁 𑀧𑀢𑁆𑀯𑀸 𑀅𑀚𑁆𑀚 𑀇𑀫𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀯𑀲𑀺𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀸𑀢𑀺 𑀢𑀢𑁆𑀣 𑀯𑀸𑀲𑀁 𑀉𑀧𑀕𑀫𑀺𑀁𑀲𑀼, 𑀢𑀢𑁄 𑀢𑁂 𑀭𑀢𑁆𑀢𑀺𑀪𑀸𑀕𑁂 𑀦𑀸𑀦𑀸𑀯𑀡𑁆𑀡𑀥𑀚𑁂 𑀘 𑀤𑁂𑀯𑀢𑀸𑀳𑀺 𑀧𑀬𑁄𑀚𑀺𑀬𑀫𑀸𑀦𑀸 𑀕𑀻𑀢𑀯𑀸𑀤𑀺𑀢𑀸𑀤𑀬𑁄 𑀘 𑀢𑀺𑀬𑁄𑀚𑀦𑀝𑁆𑀞𑀸𑀦𑁂 𑀓𑀧𑁆𑀧𑀭𑀼𑀓𑁆𑀔𑀸𑀦𑀺 𑀘 𑀇𑀤𑀁 𑀲𑀩𑁆𑀩𑀁 𑀤𑁂𑀯𑀺𑀲𑁆𑀲𑀭𑀺𑀬𑀁 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀪𑀸𑀯𑀁 𑀤𑀺𑀲𑁆𑀯𑀸 𑀯𑀺𑀫𑁆𑀳𑀺𑀢𑀫𑀸𑀦𑀲𑀸 𑀤𑁂𑀯𑀥𑀻𑀢𑀭𑀁 𑀆𑀫𑀦𑁆𑀢𑁂𑀢𑁆𑀯𑀸 𑀢𑁆𑀯𑀁 𑀓𑁂𑀦 𑀓𑀫𑁆𑀫𑁂𑀦 𑀇𑀥 𑀦𑀺𑀩𑁆𑀩𑀢𑁆𑀢𑀸𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑀸 𑀪𑀺𑀓𑁆𑀔𑀽 𑀯𑀦𑁆𑀤𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀞𑀺𑀢𑀸 𑀪𑀦𑁆𑀢𑁂 𑀫𑀁 𑀦 𑀲𑀜𑁆𑀚𑀸𑀦𑀺𑀢𑁆𑀣𑀸𑀢𑀺 𑀆𑀳. 𑀪𑀺𑀓𑁆𑀔𑀽𑀳𑀺 𑀦 𑀫𑀬𑀁 𑀲𑀜𑁆𑀚𑀸𑀦𑀸𑀫 𑀪𑀕𑀺𑀦𑀻𑀢𑀺 𑀯𑀼𑀢𑁆𑀢𑁂 𑀲𑀸 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀓𑀣𑁂𑀦𑁆𑀢𑀻 𑀏𑀯𑀫𑀸𑀳.

𑁮.

𑀳𑀻𑀬𑁆𑀬𑁄 𑀆𑀲𑀦𑀲𑀸𑀮𑀸𑀬, 𑀦𑀺𑀲𑀻𑀤𑀺𑀢𑁆𑀣 𑀲𑀫𑀸𑀕𑀢𑀸;

𑀢𑀼𑀫𑁆𑀳𑀓𑀁 𑀲𑀦𑁆𑀢𑀺𑀓𑀁 𑀕𑀫𑁆𑀫, 𑀬𑀸 𑀯𑀭𑀸𑀓𑀻𑀪𑀺𑀯𑀸𑀤𑀬𑀺.

𑁯.

𑀬𑀸 𑀩𑁄𑀥𑀺𑀁 𑀧𑀽𑀚𑀦𑀢𑁆𑀣𑀸𑀬, 𑀯𑀢𑁆𑀣𑀓𑀁 𑀧𑀝𑀺𑀧𑀸𑀤𑀬𑀺;

𑀲𑀸𑀳𑀁 𑀳𑀻𑀬𑁆𑀬𑁄 𑀘𑀼𑀢𑀸 𑀆𑀲𑀺𑀁, 𑀭𑀢𑁆𑀢𑀺𑀬𑀁 𑀩𑁆𑀬𑀸𑀥𑀺𑀧𑀻𑀴𑀺𑀢𑀸.

𑁧𑁦.

𑀦𑀸𑀦𑀸𑀲𑀫𑁆𑀧𑀢𑁆𑀢𑀺𑀲𑀁𑀬𑀼𑀢𑁆𑀢𑀸, 𑀦𑀸𑀦𑀸𑀪𑀽𑀲𑀦𑀪𑀽𑀲𑀺𑀢𑀸;

𑀯𑀺𑀫𑀸𑀦𑁂 𑀭𑀢𑀦𑀸 𑀓𑀺𑀡𑁆𑀡𑁂, 𑀚𑀸𑀢𑀸𑀳𑀁 𑀏𑀢𑁆𑀣 𑀓𑀸𑀦𑀦𑁂.

𑁧𑁧.

𑀳𑀻𑀬𑁆𑀬𑁄 𑀧𑀲𑁆𑀲𑀺𑀢𑁆𑀣 𑀫𑁂 𑀕𑀢𑁆𑀢𑀁, 𑀭𑀚𑁄𑀚𑀮𑁆𑀮𑁂𑀳𑀺 𑀲𑀁𑀓𑀼𑀮𑀁;

𑀅𑀚𑁆𑀚 𑀧𑀲𑁆𑀲𑀣 𑀫𑁂 𑀕𑀢𑁆𑀢𑀁, 𑀯𑀡𑁆𑀡𑀯𑀦𑁆𑀢𑀁 𑀧𑀪𑀲𑁆𑀲𑀭𑀁.

𑁧𑁨.

𑀳𑀻𑀬𑁆𑀬𑁄 𑀧𑀲𑁆𑀲𑀺𑀢𑁆𑀣 𑀫𑁂 𑀪𑀦𑁆𑀢𑁂, 𑀦𑀺𑀯𑀢𑁆𑀣𑀁 𑀫𑀮𑀺𑀦𑀫𑁆𑀩𑀭𑀁;

𑀅𑀚𑁆𑀚 𑀧𑀲𑁆𑀲𑀣 𑀫𑁂 𑀪𑀦𑁆𑀢𑁂, 𑀤𑀺𑀩𑁆𑀩𑀫𑀫𑁆𑀩𑀭𑀫𑀼𑀢𑁆𑀢𑀫𑀁.

𑁧𑁩.

𑀯𑀺𑀓𑀺𑀡𑁆𑀡𑀨𑀮𑀺𑀢𑀕𑁆𑀕𑁂𑀳𑀺 ¶ , 𑀓𑁂𑀲𑁂𑀳𑀺 𑀯𑀺𑀭𑀮𑀸 𑀓𑀼𑀮𑀁;

𑀊𑀓𑀸𑀕𑀽𑀣𑀧𑀝𑀺𑀓𑁆𑀓𑀽𑀮𑀁, 𑀳𑀻𑀬𑁆𑀬𑁄 𑀆𑀲𑀺𑀲𑀺𑀭𑀁 𑀫𑀫.

𑁧𑁪.

𑀅𑀚𑁆𑀚 𑀢𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸, 𑀫𑀫 𑀧𑀼𑀜𑁆𑀜𑀸𑀦𑀼𑀪𑀸𑀯𑀢𑁄;

𑀲𑀼𑀦𑀻𑀮𑀫𑀼𑀤𑀼𑀥𑀫𑁆𑀫𑀺𑀮𑁆𑀮𑀁, 𑀓𑀼𑀲𑀼𑀫𑀸 𑀪𑀭𑀡𑀪𑀽𑀲𑀺𑀢𑀁.

𑁧𑁫.

𑀧𑀼𑀭𑀸 𑀫𑁂 𑀲𑀓𑀲𑀻𑀲𑁂𑀦, 𑀯𑀳𑀺𑀢𑀁 𑀤𑀸𑀭𑀽 𑀤𑀓𑀸𑀤𑀺𑀓𑀁;

𑀧𑀼𑀜𑁆𑀜𑁂𑀦𑀸𑀳𑀁 𑀅𑀚𑁆𑀚 𑀫𑀸𑀮𑀸, 𑀪𑀸𑀭𑀁 𑀲𑀻𑀲𑁂 𑀲𑀫𑀼𑀩𑁆𑀩𑀳𑁂.

𑁧𑁬.

𑀥𑀚𑀢𑁆𑀣𑀸𑀬 𑀫𑀬𑀸 𑀳𑀻𑀬𑁆𑀬𑁄, 𑀧𑀤𑀺𑀦𑁆𑀦𑀁 𑀣𑀽𑀮𑀲𑀸𑀝𑀓𑀁;

𑀅𑀚𑁆𑀚 𑀦𑀺𑀩𑁆𑀩𑀢𑁆𑀢𑀺 𑀫𑁂 𑀪𑁄𑀦𑁆𑀢𑁄, 𑀫𑀳𑀦𑁆𑀢𑀁 𑀤𑀺𑀩𑁆𑀩𑀲𑀫𑁆𑀧𑀤𑀁.

𑁧𑁭.

𑀚𑀸𑀦𑀫𑀸𑀦𑁂𑀦 𑀓𑀢𑁆𑀢𑀩𑁆𑀩𑀁, 𑀤𑀸𑀦𑀸𑀤𑀻𑀲𑀼 𑀫𑀳𑀧𑁆𑀨𑀮𑀁;

𑀤𑁂𑀯𑀮𑁄𑀓𑁂 𑀫𑀦𑀼𑀲𑁆𑀲𑁂𑀲𑀼, 𑀲𑀼𑀔𑀤𑀁 𑀤𑀸𑀦 𑀫𑀼𑀢𑁆𑀢𑀫𑀦𑁆𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀩𑁆𑀩𑁂 𑀪𑀺𑀓𑁆𑀔𑀽 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀸 𑀅𑀳𑁂𑀲𑀼𑀁. 𑀲𑀸 𑀤𑁂𑀯𑀢𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀺𑀩𑁆𑀩𑁂𑀳𑀺 𑀔𑀚𑁆𑀚𑀪𑁄𑀚𑁆𑀚𑁂𑀳𑀺 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀆𑀕𑀘𑁆𑀙𑀦𑁆𑀢𑀻 𑀅𑀦𑁆𑀢𑀭𑀸𑀫𑀕𑁆𑀕𑁂 𑀤𑀸𑀦𑀁 𑀤𑀤𑀫𑀸𑀦𑀸 𑀫𑀳𑀸𑀩𑁄𑀥𑀺𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑁂𑀳𑀺 𑀥𑀚𑀧𑀢𑀸𑀓𑀸 𑀤𑀻𑀳𑀺 𑀘 𑀦𑀸𑀦𑀸𑀯𑀺𑀥𑀯𑀡𑁆𑀡𑀕𑀦𑁆𑀥𑀲𑀫𑁆𑀧𑀦𑁆𑀦𑀧𑀼𑀧𑁆𑀨𑁂𑀳𑀺 𑀘 𑀤𑀻𑀧𑀥𑀽𑀧𑁂𑀳𑀺 𑀘 𑀩𑁄𑀥𑀺𑀁 𑀧𑀽𑀚𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑀢𑁆𑀣𑀸𑀬 𑀤𑀺𑀩𑁆𑀩𑀯𑀢𑁆𑀣𑀸𑀦𑀺 𑀤𑀢𑁆𑀯𑀸 𑀆𑀕𑀫𑁆𑀫 𑀢𑀲𑁆𑀫𑀺𑀁𑀬𑁂𑀯 𑀯𑀦𑀲𑀡𑁆𑀟𑁂 𑀯𑀲𑀦𑁆𑀢𑀻 𑀦𑀸𑀦𑀸𑀯𑀺𑀥𑀸𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀪𑀺𑀓𑁆𑀔𑀽𑀧𑀺 𑀢𑀁 𑀅𑀘𑁆𑀙𑀭𑀺𑀬𑀁 𑀢𑀢𑁆𑀣 𑀢𑀢𑁆𑀣 𑀧𑀓𑀸𑀲𑁂𑀦𑁆𑀢𑀸 𑀩𑀳𑀽𑀚𑀦𑁂 𑀧𑀼𑀜𑁆𑀜𑀓𑀫𑁆𑀫𑁂 𑀦𑀺𑀬𑁄𑀚𑁂𑀲𑀼𑀁𑀢𑀺.

𑁧𑁮.

𑀏𑀯𑀁 𑀯𑀺𑀥𑀸𑀧𑀺 𑀓𑀧𑀡𑀸 𑀚𑀺𑀦𑀲𑀸𑀲𑀦𑀫𑁆𑀳𑀺,

𑀓𑀢𑁆𑀯𑀸 𑀧𑀲𑀸𑀤 𑀫𑀣 𑀣𑀽𑀮𑀓𑀼𑀘𑁂𑀮𑀓𑁂𑀦;

𑀧𑀽𑀚𑁂𑀢𑁆𑀯 𑀤𑀺𑀩𑁆𑀩𑀯𑀺𑀪𑀯𑀁 𑀅𑀮𑀪𑀻𑀢𑀺 𑀜𑀢𑁆𑀯𑀸,

𑀧𑀽𑀚𑀸𑀧𑀭𑀸 𑀪𑀯𑀣 𑀯𑀢𑁆𑀣𑀼𑀲𑀼 𑀢𑀻𑀲𑀼 𑀲𑀫𑁆𑀫𑀸𑀢𑀺.

𑀓𑀧𑀡𑀸𑀬 𑀯𑀢𑁆𑀣𑀼𑀁 𑀢𑀢𑀺𑀬𑀁.

𑁩𑁪. 𑀇𑀦𑁆𑀤𑀕𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀡𑀢𑁄 𑀑𑀭𑀪𑀸𑀕𑁂 𑀚𑀫𑁆𑀩𑀼𑀤𑀻𑀧𑁂 𑀓𑀺𑀭 𑀧𑀸𑀝𑀮𑀺𑀧𑀼𑀢𑁆𑀢𑀁 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺. 𑀢𑀢𑁆𑀣 𑀥𑀫𑁆𑀫𑀸𑀲𑁄𑀓𑁄 𑀦𑀸𑀫 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄 𑀆𑀡𑀸𑀘𑀓𑁆𑀓𑀯𑀢𑁆𑀢𑀺 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀢𑀺. 𑀉𑀤𑁆𑀥𑀁 𑀆𑀓𑀸𑀲𑀢𑁄 𑀳𑁂𑀝𑁆𑀞𑀸 𑀧𑀣𑀯𑀺𑀬𑀸 𑀬𑁄𑀚𑀦𑀧𑁆𑀧𑀫𑀸𑀡𑁂 𑀲𑀓𑀮𑀚𑀫𑁆𑀩𑀽𑀤𑀻𑀧𑁂 𑀢𑀲𑁆𑀲 𑀆𑀡𑀸 𑀧𑀯𑀢𑁆𑀢𑀢𑀺, 𑀢𑀤𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀘 𑀘𑀢𑀼𑀭𑀸𑀲𑀻𑀢𑀺 𑀦𑀕𑀭𑀲𑀳𑀲𑁆𑀲𑁂 𑀭𑀸𑀚𑀸𑀦𑁄 𑀘 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀩𑀮𑀯𑀸𑀳𑀦𑁂 𑀕𑀳𑁂𑀢𑁆𑀯𑀸 𑀆𑀕𑀫𑁆𑀫 𑀥𑀫𑁆𑀫𑀸𑀲𑁄𑀓𑀫𑀳𑀸𑀭𑀜𑁆𑀜𑁄 𑀉𑀧𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀤𑁂𑀯𑀧𑀼𑀢𑁆𑀢𑀦𑀕𑀭𑁂 𑀤𑁂𑀯𑀧𑀼𑀢𑁆𑀢𑁄 𑀦𑀸𑀫 𑀫𑀳𑀸𑀭𑀸𑀚𑀸 𑀅𑀢𑁆𑀢𑀦𑁄 𑀩𑀮𑀯𑀸𑀳𑀦𑀁 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀉𑀧𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀥𑀫𑁆𑀫𑀸𑀲𑁄𑀓𑁄 𑀤𑁂𑀯𑀧𑀼𑀢𑁆𑀢𑀫𑀳𑀸𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀭𑀝𑁆𑀞𑁂 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀫𑀳𑀸𑀕𑀼𑀡𑀯𑀦𑁆𑀢𑀸 𑀅𑀬𑁆𑀬𑀸 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀺. 𑀢𑀁 𑀲𑀼𑀢𑁆𑀯𑀸 𑀤𑁂𑀯𑀧𑀼𑀢𑁆𑀢𑀭𑀸𑀚𑀸 𑀅𑀢𑁆𑀣𑀺 𑀤𑁂𑀯 𑀢𑀲𑁆𑀫𑀺𑀁 𑀦𑀕𑀭𑁂 𑀲𑀻𑀳𑀓𑀼𑀫𑁆𑀪𑀓𑀁 𑀦𑀸𑀫 𑀫𑀳𑀸𑀯𑀺𑀳𑀸𑀭𑀁. 𑀢𑀢𑁆𑀣 𑀅𑀦𑁂𑀓𑀲𑀳𑀲𑁆𑀲𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 𑀲𑀻𑀮𑀯𑀦𑁆𑀢𑀸 𑀅𑀧𑁆𑀧𑀺𑀘𑁆𑀙𑀸 𑀲𑀦𑁆𑀢𑀼𑀝𑁆𑀞𑀸 𑀯𑀺𑀯𑁂𑀓𑀓𑀸𑀫𑀺𑀦𑁄. 𑀢𑁂𑀲𑀼 𑀲𑀸𑀝𑁆𑀞𑀓𑀣𑀸𑀢𑀺𑀧𑀺𑀝𑀓𑀥𑀭𑁄 𑀇𑀦𑁆𑀤𑀕𑀼𑀢𑁆𑀢𑀢𑁆𑀣𑁂𑀭𑁄 𑀦𑀸𑀫 𑀢𑁂𑀲𑀁 𑀧𑀸𑀫𑁄𑀓𑁆𑀔𑁄 𑀅𑀳𑁄𑀲𑀺. 𑀲𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀲𑀦𑀭𑀸𑀫𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁𑀯𑀡𑁆𑀡𑁂𑀢𑀺. 𑀕𑀼𑀡𑀯𑀸 𑀅𑀢𑁆𑀢𑀦𑁄 𑀕𑀼𑀡𑀁 𑀦𑀺𑀲𑁆𑀲𑀸𑀬 𑀮𑁄𑀓𑁂 𑀧𑀸𑀓𑀝𑁄𑀢𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀼𑀝𑁆𑀞𑀫𑀸𑀦𑀲𑁄 𑀣𑁂𑀭𑀁 𑀧𑀲𑁆𑀲𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀲𑀫𑁆𑀫 𑀢𑁆𑀯𑀫𑁂𑀯 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀬𑀸𑀘𑀺𑀢𑁆𑀯𑀸 𑀇𑀥𑀸 𑀦𑁂𑀳𑀻𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀤𑁂𑀯𑀧𑀼𑀢𑁆𑀢𑀭𑀸𑀚𑀸 𑀅𑀢𑁆𑀢𑀦𑁄 𑀳𑀢𑁆𑀣𑀲𑁆𑀲𑀩𑀮𑀯𑀸𑀳𑀦𑀸 𑀤𑀺𑀫𑀳𑀸 𑀲𑁂𑀦𑀗𑁆𑀕𑀧𑀭𑀺𑀯𑀼𑀢𑁄 𑀇𑀦𑁆𑀤𑀕𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀬𑁆𑀬 𑀅𑀬𑁆𑀬𑀁 𑀥𑀫𑁆𑀫𑀸𑀲𑁄𑀓𑀫𑀳𑀸𑀭𑀸𑀚𑀸 𑀤𑀝𑁆𑀞𑀼𑀓𑀸𑀫𑁄𑀢𑀺 𑀆𑀳. 𑀣𑁂𑀭𑁂𑀦 𑀲𑀸𑀥𑀽𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁂 𑀭𑀸𑀚𑀸 𑀣𑁂𑀭𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀪𑀸𑀯𑀁 𑀥𑀫𑁆𑀫𑀸𑀲𑁄𑀓𑀫𑀳𑀸𑀭𑀸𑀚𑀺𑀦𑁄 𑀧𑁂𑀲𑁂𑀲𑀺. 𑀢𑀢𑁄 𑀥𑀫𑁆𑀫𑀸𑀲𑁄𑀓𑀫𑀳𑀸𑀭𑀸𑀚𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀅𑀢𑁆𑀢𑀦𑁄 𑀆𑀡𑀸𑀧𑀯𑀢𑁆𑀢𑀺𑀢𑀝𑁆𑀞𑀸𑀦𑁂 𑀭𑀸𑀚𑀽𑀦𑀁 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀲𑀩𑁆𑀩𑁂𑀯 𑀣𑁂𑀭𑀸𑀕𑀫𑀦𑀫𑀕𑁆𑀕𑀁 ¶ 𑀅𑀮𑀗𑁆𑀓𑀭𑁄𑀦𑁆𑀢𑀽𑀢𑀺. 𑀅𑀣 𑀢𑁂 𑀭𑀸𑀚𑀸𑀦𑁄 𑀢𑀼𑀝𑁆𑀞𑀧𑀳𑀝𑁆𑀞𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀤𑁂𑀯𑀧𑀼𑀢𑁆𑀢𑀦𑀕𑀭𑀢𑁄 𑀬𑀸𑀯 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑀁 𑀏𑀢𑁆𑀣𑀦𑁆𑀢𑀭𑁂 𑀧𑀜𑁆𑀘𑀧𑀡𑁆𑀡𑀸𑀲𑀬𑁄𑀚𑀦𑀺𑀓𑀁 𑀫𑀕𑁆𑀕𑀁 𑀯𑀺𑀲𑀫𑀁 𑀲𑀫𑀁 𑀓𑀭𑁄𑀦𑁆𑀢𑁄 𑀤𑁂𑀯𑀢𑀸𑀦𑀁 𑀤𑀺𑀩𑁆𑀩𑀯𑀻𑀣𑀺𑀫𑀺𑀯 𑀅𑀮𑀗𑁆𑀓𑀭𑀺𑀢𑁆𑀯𑀸 𑀥𑀫𑁆𑀫𑀸𑀲𑁄𑀓𑀫𑀳𑀸𑀦𑀭𑀺𑀦𑁆𑀤𑀲𑁆𑀲 𑀏𑀯𑀁 𑀲𑀸𑀲𑀦𑀁 𑀧𑁂𑀲𑁂𑀲𑀼𑀁. 𑀪𑀯𑀦𑁆𑀢𑁂𑀢𑁆𑀣.

𑁧.

𑀇𑀦𑁆𑀤𑀕𑀼𑀢𑁆𑀢𑀫𑀳𑀸𑀣𑁂𑀭, 𑀲𑀸𑀫𑀺𑀦𑁄 𑀕𑀫𑀦𑀸𑀬 𑀦𑁄;

𑀫𑀕𑁆𑀕𑀁 𑀅𑀮𑀗𑁆𑀓𑀭𑁄𑀦𑁆𑀢𑀽𑀢𑀺, 𑀫𑀳𑀸𑀭𑀸𑀚𑁂𑀦 𑀧𑁂𑀲𑀺𑀢𑀁.

𑁨.

𑀢𑀢𑁄 𑀢𑁂 𑀅𑀧𑀦𑁂𑀢𑁆𑀯𑀸𑀦, 𑀧𑀸𑀲𑀸𑀡𑀓𑀡𑁆𑀝𑀓𑀸𑀤𑀺𑀓𑀁;

𑀯𑀺𑀲𑀫𑀁 𑀲𑀫𑀁 𑀓𑀭𑀺𑀢𑁆𑀯𑀸𑀦, 𑀲𑀫𑁆𑀫𑀚𑁆𑀚𑀺𑀢𑁆𑀯𑀸𑀦 𑀲𑀸𑀥𑀼𑀓𑀁.

𑁩.

𑀥𑁄𑀢𑀫𑀼𑀢𑁆𑀢𑀸 𑀲𑀫𑀸𑀪𑀸𑀲𑀸, 𑀑𑀓𑀺𑀭𑀺𑀢𑁆𑀯𑀸𑀦 𑀯𑀸𑀮𑀼𑀓𑀸;

𑀉𑀲𑁆𑀲𑀸𑀧𑀺𑀢𑀸 𑀢𑀢𑁆𑀣 𑀢𑀢𑁆𑀣, 𑀤𑀼𑀲𑁆𑀲𑀢𑁄𑀭𑀡𑀧𑀦𑁆𑀢𑀺𑀬𑁄.

𑁪.

𑀓𑀮𑀥𑁄𑀢𑀳𑁂𑀫𑀭𑀫𑁆𑀪𑀸𑀤𑀺, 𑀦𑀸𑀦𑀸𑀢𑁄𑀭𑀡𑀧𑀦𑁆𑀢𑀺𑀬𑁄;

𑀢𑀣𑀸 𑀧𑀼𑀧𑁆𑀨𑀫𑀬𑀸 𑀦𑁂𑀓, 𑀢𑁄𑀭𑀡𑀽𑀧𑀭𑀺𑀢𑁄𑀭𑀡𑀸.

𑁫.

𑀢𑁂𑀲𑀼 𑀢𑁂𑀲𑀼𑀘 𑀞𑀸𑀦𑁂𑀲𑀼, 𑀲𑀗𑁆𑀔𑀢𑀸 𑀓𑀼𑀲𑀼𑀫𑀕𑁆𑀖𑀺𑀓𑀸;

𑀢𑀣𑁂𑀯 𑀕𑀦𑁆𑀥𑀢𑁂𑀮𑁂𑀳𑀺, 𑀤𑀻𑀧𑀺𑀢𑀸 𑀤𑀻𑀧𑀧𑀦𑁆𑀢𑀺𑀬𑁄.

𑁬.

𑀧𑀤𑀼𑀫𑀼𑀧𑁆𑀧𑀮𑀲𑀦𑁆𑀦𑀻𑀭, 𑀧𑀼𑀧𑁆𑀨𑀧𑀮𑁆𑀮𑀯 𑀮𑀗𑁆𑀓𑀢𑀸;

𑀞𑀧𑀺𑀢𑀸 𑀖𑀝𑀫𑀸𑀮𑀸𑀬𑁄, 𑀧𑀼𑀡𑁆𑀡𑀸 𑀲𑁄𑀕𑀦𑁆𑀥𑀯𑀸𑀭𑀺𑀳𑀺.

𑁭.

𑀦𑀺𑀮𑀧𑀻𑀢𑀸 𑀤𑀺𑀲𑀫𑁆𑀪𑀺𑀦𑁆𑀦, 𑀧𑀢𑀸𑀓𑀸𑀳𑀺 𑀥𑀚𑁂𑀳𑀺 𑀘;

𑀫𑀕𑁆𑀕𑀲𑁆𑀲 𑀉𑀪𑀢𑁄 𑀧𑀲𑁆𑀲𑁂, 𑀯𑀦𑀫𑀸𑀲𑀺 𑀲𑀫𑀸𑀓𑀼𑀮𑀁.

𑁮.

𑀓𑁂𑀢𑀯𑁄 𑀉𑀕𑁆𑀕𑀢𑀸 𑀢𑀢𑁆𑀣, 𑀫𑀦𑁆𑀤𑀫𑀦𑁆𑀤𑀲𑀫𑀻𑀭𑀡𑀸;

𑀅𑀯𑁆𑀳𑀬𑀦𑁆𑀢𑀸𑀯 𑀲𑁄𑀪𑀦𑁆𑀢𑀺, 𑀩𑁆𑀭𑀳𑁆𑀫𑁄𑀭𑀕𑀲𑀼𑀭𑀸𑀤𑀬𑁄.

𑁯.

𑀦𑀸𑀕𑀘𑀫𑁆𑀧𑀧𑀼𑀦𑁆𑀦𑀸𑀕, 𑀓𑁂𑀢𑀓𑀻𑀯𑀓𑀼𑀮𑀸𑀤𑀺𑀳𑀺;

𑀧𑀤𑀼𑀫𑀼𑀧𑁆𑀧𑀮𑀸 𑀤𑀺𑀚𑀮𑀚𑁂𑀳𑀺, 𑀫𑀸𑀮𑀢𑀻 𑀓𑀼𑀲𑀼𑀫𑀸 𑀤𑀺𑀳𑀺.

𑁧𑁦.

𑀫𑀸𑀮𑀸𑀤𑀸𑀫𑁂𑀳𑀺 ¶ 𑀦𑁂𑀓𑁂𑀳𑀺, 𑀫𑀕𑁆𑀕𑀫𑀸𑀲𑀺 𑀯𑀺𑀘𑀺𑀢𑁆𑀢𑀓𑀁;

𑀧𑀢𑁆𑀣𑀭𑀺𑀢𑁆𑀯𑀸 𑀧𑀸𑀤𑀧𑀝𑁂, 𑀲𑀺𑀢𑁆𑀢𑀲𑀫𑁆𑀫𑀢𑁆𑀢𑀪𑀽𑀫𑀺𑀬𑀁.

𑁧𑁧.

𑀮𑀸𑀚𑀸𑀤𑀺𑀧𑀜𑁆𑀘𑀧𑀼𑀧𑁆𑀨𑀸𑀦𑀺, 𑀯𑀺𑀓𑀺𑀭𑀺𑀁𑀲𑀼 𑀫𑀦𑁄𑀭𑀫𑀁;

𑀅𑀮𑀗𑁆𑀓𑀭𑀺𑀢𑁆𑀯𑀸 𑀳𑀢𑁆𑀢𑀲𑁆𑀲𑀸, 𑀓𑀼𑀲𑀼𑀫𑀸 𑀪𑀭𑀡𑀸𑀤𑀺𑀳𑀺.

𑁧𑁨.

𑀫𑀕𑁆𑀕𑀸𑀮𑀗𑁆𑀓𑀭𑀡𑀢𑁆𑀣𑀸𑀬, 𑀞𑀧𑀺𑀢𑀸𑀲𑀼𑀁 𑀢𑀢𑁄 𑀢𑀢𑁄;

𑀢𑁂𑀲𑀼 𑀢𑁂𑀲𑀼 𑀘 𑀞𑀸𑀦𑁂𑀲𑀼, 𑀪𑁂𑀭𑀺𑀫𑀡𑁆𑀟𑀮𑀫𑀚𑁆𑀛𑀕𑀸.

𑁧𑁩.

𑀦𑀘𑁆𑀘𑀦𑁆𑀢𑀺 𑀘𑀸𑀢𑀼𑀭𑀸 𑀦𑀸𑀭𑀻, 𑀭𑀲𑀪𑀸𑀯𑀦𑀺𑀭𑀦𑁆𑀢𑀭𑀸;

𑀓𑀁𑀲𑀯𑀁𑀲𑀸𑀤𑀺𑀧𑀕𑁆𑀕𑀬𑁆𑀳, 𑀯𑀚𑁆𑀚𑁂𑀦𑁆𑀢𑀸𑀦𑁂𑀓𑀢𑀦𑁆𑀢𑀺𑀬𑁄.

𑁧𑁪.

𑀕𑀸𑀬𑀦𑁆𑀢𑀺 𑀫𑀥𑀼𑀭𑀁 𑀕𑀻𑀢𑀁, 𑀕𑀸𑀬𑀦𑁆𑀢𑁂𑀢𑁆𑀣 𑀮𑀬𑀸𑀦𑁆𑀯𑀺𑀢𑀁;

𑀫𑀕𑁆𑀕𑁄𑀲𑁄 𑀲𑀸𑀥𑀼𑀯𑀸𑀤𑁂𑀳𑀺, 𑀪𑁂𑀭𑀺𑀢𑀦𑁆𑀢𑀺𑀦𑀤𑁂𑀳𑀺𑀘.

𑁧𑁫.

𑀓𑀭𑀻𑀦𑀁 𑀓𑁄𑀜𑁆𑀘𑀦𑀸𑀤𑁂𑀳𑀺, 𑀳𑀬𑀸𑀦𑀁 𑀳𑁂𑀲𑀺𑀢𑁂𑀳𑀺 𑀘;

𑀦𑁂𑀓𑀯𑀺𑀝𑀗𑁆𑀓𑀲𑀗𑁆𑀖𑁂𑀳𑀺, 𑀲𑁄 𑀓𑀭𑀻𑀳𑀺 𑀲𑀫𑀸𑀓𑀼𑀮𑁄.

𑁧𑁬.

𑀫𑀕𑁆𑀕𑀲𑁆𑀲 𑀉𑀪𑀢𑁄 𑀧𑀲𑁆𑀲𑁂, 𑀤𑁂𑀯𑀓𑀜𑁆𑀜𑀽𑀧𑀫𑀸 𑀲𑀼𑀪𑀸;

𑀫𑀸𑀮𑀸𑀓𑀮𑀸𑀧𑁂 𑀧𑀕𑁆𑀕𑀬𑁆𑀳, 𑀢𑀺𑀝𑁆𑀞𑀦𑁆𑀢𑀺 𑀢𑀼𑀝𑁆𑀞𑀫𑀸𑀦𑀲𑀸.

𑁧𑁭.

𑀢𑀣𑀸 𑀧𑀼𑀡𑁆𑀡𑀖𑀝𑁂 𑀕𑀬𑁆𑀳, 𑀧𑀤𑀼𑀫𑀼𑀧𑁆𑀧𑀮𑀲𑀁𑀓𑀼𑀮𑁂,

𑀅𑀝𑁆𑀞𑀫𑀗𑁆𑀕𑀮𑀫𑀼𑀕𑁆𑀕𑀬𑁆𑀳, 𑀢𑀺𑀝𑁆𑀞𑀦𑁆𑀢𑀺 𑀧𑀫𑀤𑀸 𑀢𑀳𑀺𑀁.

𑁧𑁮.

𑀲𑀻𑀢𑀮𑀽𑀤𑀓𑀲𑀫𑁆𑀧𑀦𑁆𑀦, 𑀧𑀧𑀸𑀳𑀺 𑀲𑀫𑀮𑀗𑁆𑀓𑀢𑀸;

𑀲𑀺𑀦𑀸𑀦𑀢𑁆𑀣𑀁 𑀔𑀢𑀸 𑀆𑀲𑀼𑀁, 𑀧𑁄𑀓𑁆𑀔𑀭𑀜𑁆𑀜𑁄 𑀢𑀳𑀺𑀁𑀢𑀳𑀺𑀁.

𑁧𑁯.

𑀢𑀳𑀺𑀁𑀢𑀳𑀺𑀁𑀓𑀢𑀸 𑀆𑀲𑀼𑀁, 𑀤𑀸𑀦𑀲𑀸𑀮𑀸 𑀫𑀦𑁄𑀭𑀫𑀸;

𑀦𑀺𑀘𑀺𑀢𑀸𑀲𑀼𑀫𑀦𑁂𑀓𑀸𑀦𑀺, 𑀤𑀸𑀦𑁄𑀧𑀓𑀭𑀡𑀸 𑀢𑀳𑀺𑀁.

𑁨𑁦.

𑀏𑀯𑀁 𑀦𑁂𑀓𑀯𑀺𑀥𑀸 𑀧𑀽𑀚𑀸, 𑀅𑀫𑁆𑀳𑁂𑀳𑀺 𑀧𑀝𑀺𑀧𑀸𑀤𑀺𑀢𑀸;

𑀞𑀧𑁂𑀢𑁆𑀯𑀸𑀦 𑀫𑀳𑀸𑀕𑀗𑁆𑀕𑀁, 𑀢𑀁 𑀚𑀸𑀦𑀸𑀢𑀼 𑀫𑀳𑀻𑀧𑀢𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀅𑀲𑁄𑀓𑀫𑀳𑀸𑀭𑀸𑀚𑀸 𑀕𑀗𑁆𑀕𑀁 𑀅𑀮𑀗𑁆𑀓𑀭𑁄𑀣𑀸𑀢𑀺 𑀲𑁄𑀴𑀲𑀬𑀓𑁆𑀔𑁂 𑀧𑁂𑀲𑁂𑀲𑀺, 𑀢𑁂 𑀲𑀧𑀭𑀺𑀯𑀸𑀭𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 ¶ 𑀆𑀦𑀼𑀪𑀸𑀯𑁂𑀦 𑀕𑀗𑁆𑀕𑀸𑀬 𑀅𑀦𑁆𑀢𑁄 𑀢𑀺𑀕𑀸𑀯𑀼𑀢𑀝𑁆𑀞𑀸𑀦𑁂 𑀉𑀤𑀼𑀓𑁆𑀔𑀮𑀧𑀸𑀲𑀸𑀡𑁂 𑀞𑀧𑁂𑀲𑀼𑀁. 𑀞𑀧𑁂𑀢𑁆𑀯𑀸 𑀣𑀫𑁆𑀪𑁂 𑀉𑀲𑁆𑀲𑀸𑀧𑁂𑀢𑁆𑀯𑀸 𑀢𑀼𑀮𑀸𑀲𑀁𑀖𑀸𑀝𑁂 𑀤𑀢𑁆𑀯𑀸 𑀳𑀺𑀫𑀯𑀦𑁆𑀢𑀢𑁄 𑀭𑀢𑁆𑀢𑀘𑀦𑁆𑀤𑀦𑀲𑀸𑀭𑁂 𑀆𑀳𑀭𑀺𑀢𑁆𑀯𑀸 𑀧𑀤𑀭𑁂 𑀲𑀦𑁆𑀣𑀭𑀺𑀢𑁆𑀯𑀸 𑀅𑀦𑁂𑀓𑁂𑀳𑀺 𑀧𑀽𑀚𑀸𑀯𑀺𑀥𑀸𑀦𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀭𑀜𑁆𑀜𑁄 𑀏𑀯𑀁 𑀲𑀸𑀲𑀦𑀁 𑀧𑁂𑀲𑁂𑀲𑀼𑀁. 𑀪𑀯𑀦𑁆𑀢𑁂𑀢𑁆𑀣.

𑁨𑁧.

𑀬𑀫𑀢𑁆𑀣𑀸𑀬 𑀫𑀬𑀁 𑀲𑀩𑁆𑀩𑁂, 𑀫𑀳𑀸𑀭𑀸𑀚𑁂𑀦 𑀧𑁂𑀲𑀺𑀢𑀸;

𑀅𑀫𑁆𑀳𑁂𑀳𑀺 𑀤𑀸𑀦𑀺 𑀢𑀁 𑀲𑀩𑁆𑀩𑀁, 𑀓𑀢𑀫𑁂𑀯 𑀲𑀼𑀡𑁄𑀣 𑀢𑀁.

𑁨𑁨.

𑀕𑀸𑀯𑀼𑀢𑀢𑁆𑀢𑀬𑀕𑀫𑁆𑀪𑀻𑀭𑀁, 𑀕𑀗𑁆𑀕𑀁 𑀬𑁄𑀚𑀦𑀯𑀺𑀢𑁆𑀣𑀢𑀁;

𑀣𑀫𑁆𑀪𑁂 𑀧𑀢𑀺𑀝𑁆𑀞𑀧𑁂𑀢𑁆𑀯𑀸𑀦, 𑀅𑀦𑀕𑁆𑀖𑀁 𑀭𑀢𑁆𑀢𑀘𑀦𑁆𑀤𑀦𑀁.

𑁨𑁩.

𑀳𑀺𑀫𑀯𑀦𑁆𑀢𑀢𑁄 𑀳𑀭𑀺𑀢𑁆𑀯𑀸𑀦, 𑀲𑁂𑀢𑀼𑀁 𑀢𑀢𑁆𑀣 𑀲𑀼𑀫𑀸𑀧𑀺𑀢𑀁;

𑀢𑁄𑀭𑀡𑀸 𑀘 𑀉𑀪𑁄 𑀧𑀲𑁆𑀲𑁂, 𑀭𑀢𑀦𑁂𑀳𑀺 𑀲𑀼𑀦𑀺𑀫𑁆𑀫𑀺𑀢𑀸.

𑁨𑁪.

𑀧𑀼𑀡𑁆𑀡𑀓𑀼𑀫𑁆𑀪𑀤𑁆𑀥𑀚𑀸 𑀘𑁂𑀯, 𑀧𑀤𑀻𑀧𑀸𑀯𑀮𑀺𑀬𑁄 𑀢𑀣𑀸;

𑀉𑀪𑁄 𑀧𑀲𑁆𑀲𑁂𑀲𑀼 𑀭𑀢𑀦𑀸𑀦𑀺, 𑀫𑀸𑀧𑁂𑀢𑁆𑀯𑀸𑀮𑀫𑁆𑀩𑀦𑀸𑀦𑀺𑀘.

𑁨𑁫.

𑀲𑀼𑀯𑀡𑁆𑀡𑀫𑀡𑀺𑀫𑀼𑀢𑁆𑀢𑀸𑀤𑀺, 𑀤𑀸𑀫𑁂𑀳𑀺 𑀲𑀫𑀮𑀗𑁆𑀓𑀢𑀸;

𑀯𑀸𑀮𑀼𑀓𑀢𑁆𑀣𑀸𑀬 𑀑𑀓𑀺𑀡𑁆𑀡𑀸, 𑀥𑁄𑀢𑀫𑀼𑀢𑁆𑀢𑀸 𑀧𑀪𑀲𑁆𑀲𑀭𑀸.

𑁨𑁬.

𑀢𑁂𑀲𑀼 𑀢𑁂𑀲𑀼 𑀘 𑀞𑀸𑀦𑁂𑀲𑀼, 𑀞𑀧𑀺𑀢𑀸𑀲𑀼𑀁 𑀫𑀳𑀸𑀫𑀡𑀻;

𑀦𑀸𑀦𑀸𑀭𑀸𑀕𑀯𑀺𑀢𑀸𑀦𑁂𑀳𑀺, 𑀲𑁄𑀪𑀺𑀢𑀸 𑀲𑁂𑀢𑀼𑀦𑁄 𑀧𑀭𑀺.

𑁨𑁭.

𑀑𑀮𑀫𑁆𑀩𑀺𑀢𑀸𑀲𑀼𑀁 𑀢𑀢𑁆𑀣𑁂𑀯, 𑀤𑀺𑀩𑁆𑀩𑀸𑀤𑀺𑀓𑀼𑀲𑀼𑀫𑀸𑀤𑀬𑁄;

𑀦𑀺𑀝𑁆𑀞𑀺𑀢𑀁 𑀇𑀥 𑀓𑀸𑀢𑀩𑁆𑀩, 𑀬𑀼𑀢𑁆𑀢𑀁 𑀧𑀽𑀚𑀸𑀯𑀺𑀥𑀺𑀁𑀢𑀼 𑀦𑁄;

𑀤𑁂𑀯𑁄𑀢𑀁 𑀧𑀝𑀺𑀚𑀸𑀦𑀸𑀢𑀼, 𑀇𑀢𑀺 𑀯𑀢𑁆𑀯𑀸𑀦 𑀧𑁂𑀲𑀬𑀼𑀁𑀢𑀺.

𑀢𑀫𑁆𑀧𑀺 𑀲𑀼𑀢𑁆𑀯𑀸 𑀅𑀲𑁄𑀓𑁄 𑀫𑀳𑀸𑀭𑀸𑀚𑀸 𑀢𑀼𑀫𑁆𑀳𑁂𑀯 𑀣𑁂𑀭𑀁 𑀇𑀥𑀸𑀦𑁂𑀣𑀸𑀢𑀺 𑀢𑁂𑀲𑀁𑀬𑁂𑀯 𑀲𑀸𑀲𑀦𑀁 𑀧𑀝𑀺𑀧𑁂𑀲𑁂𑀲𑀺, 𑀢𑁂 𑀲𑀸𑀥𑀽𑀢𑀺 𑀇𑀦𑁆𑀤𑀕𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀪𑀦𑁆𑀢𑁂 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑀲𑁆𑀲 𑀕𑀫𑀦𑀸𑀬 𑀓𑀸𑀮𑁄𑀢𑀺 𑀆𑀳𑀁𑀲𑀼, 𑀢𑀢𑁄 𑀣𑁂𑀭𑁄 𑀲𑀝𑁆𑀞𑀺𑀲𑀳𑀲𑁆𑀲𑀫𑀢𑁆𑀢𑁂𑀳𑀺 ¶ 𑀪𑀺𑀓𑁆𑀔𑀼𑀲𑀗𑁆𑀖𑁂𑀳𑀺 𑀧𑀭𑀺𑀯𑀼𑀢𑁄 𑀧𑀜𑁆𑀘𑀧𑀡𑁆𑀡𑀸𑀲𑀬𑁄𑀚𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀅𑀣𑀸𑀧𑀭𑀁 𑀤𑁂𑀯𑀧𑀼𑀢𑁆𑀢𑀦𑀕𑀭𑀯𑀸𑀲𑀺𑀦𑁄 𑀅𑀦𑁂𑀓𑀯𑀺𑀥𑀫𑀸𑀮𑀸𑀕𑀦𑁆𑀥𑀯𑀸𑀲𑀘𑀼𑀡𑁆𑀡𑀤𑁆𑀥𑀚𑀧𑀢𑀸𑀓𑀸𑀤𑀻𑀳𑀺 𑀅𑀦𑁂𑀓𑁂𑀳𑀺 𑀢𑀸𑀮𑀸𑀯𑀘𑀭𑁂𑀳𑀺 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑁂𑀳𑀺 𑀧𑀽𑀚𑁂𑀢𑁆𑀯𑀸 𑀅𑀕𑀫𑀁𑀲𑀼. 𑀅𑀣 𑀣𑁂𑀭𑁄 𑀫𑀳𑀦𑁆𑀢𑁂𑀦 𑀧𑀽𑀚𑀸𑀯𑀺𑀥𑀸𑀦𑁂𑀦 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀳𑀺 𑀧𑀽𑀚𑀺𑀬𑀫𑀸𑀦𑁄 𑀅𑀦𑀼𑀓𑁆𑀓𑀫𑁂𑀦 𑀘𑀦𑁆𑀤𑀪𑀸𑀕𑀸𑀬 𑀕𑀗𑁆𑀕𑀸𑀬 𑀲𑁂𑀢𑀼𑀁 𑀧𑀢𑁆𑀯𑀸 𑀢𑀢𑁆𑀣 𑀫𑀳𑀦𑁆𑀢𑀁 𑀧𑀽𑀚𑀸𑀯𑀺𑀥𑀸𑀦𑀁 𑀑𑀮𑁄𑀓𑁂𑀦𑁆𑀢𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺, 𑀏𑀯𑀁 𑀉𑀴𑀸𑀭𑀁 𑀧𑀽𑀚𑀸𑀯𑀺𑀥𑀸𑀦𑀁 𑀇𑀤𑀸𑀦𑀺 𑀚𑀫𑁆𑀩𑀼𑀤𑀻𑀧𑁂 𑀦𑀸𑀜𑁆𑀜𑀲𑁆𑀲 𑀳𑁄𑀢𑀺, 𑀫𑀬𑁆𑀳𑀫𑁂𑀯𑁂𑀢𑀁 𑀓𑀢𑀁. 𑀅𑀳𑀫𑁂𑀯𑁂𑀢𑁆𑀢 𑀉𑀢𑁆𑀢𑀫𑁄 𑀅𑀧𑁆𑀧𑀝𑀺𑀫𑁄𑀢𑀺 𑀏𑀯𑀁 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀏𑀓𑁄 𑀔𑀻𑀡𑀸𑀲𑀯𑀢𑁆𑀣𑁂𑀭𑁄 𑀢𑀁 𑀫𑀸𑀦𑁂𑀦𑀼𑀧𑀢𑁆𑀣𑀤𑁆𑀥𑀘𑁂𑀢𑀲𑀸 𑀞𑀺𑀢𑀁 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀣𑁂𑀭𑀲𑁆𑀲 𑀑𑀯𑀤𑀦𑁆𑀢𑁄 𑀏𑀯𑀫𑀸𑀳. 𑀢𑀲𑁆𑀫𑀸.

𑁨𑁮.

𑀫𑀸 𑀫𑀸𑀦𑀲𑁆𑀲 𑀯𑀲𑀻 𑀳𑁄𑀣, 𑀫𑀸𑀦𑁄 𑀪𑀦𑁆𑀢𑁂 𑀯𑀲𑀁𑀕𑀢𑀁 [𑀫𑀸𑀦𑀁𑀪𑀦𑁆𑀢𑁂𑀯𑀲𑀻𑀓𑀢𑀁 𑀇𑀢𑀺𑀲𑀩𑁆𑀩𑀢𑁆𑀣];

𑀅𑀦𑀢𑁆𑀣𑀤𑁄 𑀲𑀤𑀸 𑀳𑁄𑀢𑀺, 𑀧𑀸𑀢𑁂𑀢𑁆𑀯𑀸𑀦 𑀪𑀯𑀸 𑀯𑀝𑁂.

𑁨𑁯.

𑀫𑀸𑀦𑁄 𑀧𑀮𑀸𑀮𑀺𑀢𑁄 𑀲𑀢𑁆𑀢𑁄, 𑀢𑀡𑁆𑀳𑀸𑀧𑀝𑀺𑀖𑀲𑀗𑁆𑀕𑀢𑁄;

𑀫𑀓𑁆𑀓𑀝𑁄𑀭𑀕𑀲𑁄𑀡𑀸𑀤𑀺, 𑀳𑀼𑀢𑁆𑀯𑀸 𑀚𑀸𑀬𑀢𑀺 𑀚𑀸𑀢𑀺𑀲𑀼.

𑁩𑁦.

𑀫𑀸 𑀫𑀸𑀦𑀁 𑀲𑀸𑀫𑀺 𑀧𑀽𑀭𑁂𑀳𑀺, 𑀅𑀢𑁆𑀢𑀸𑀦𑀁 𑀧𑀭𑀺𑀲𑁄𑀥𑀬;

𑀅𑀧𑀭𑀺𑀲𑀼𑀤𑁆𑀥𑀸 𑀲𑀬𑁄 𑀪𑀺𑀓𑁆𑀔𑀼, 𑀤𑀸𑀬𑀓𑀁 𑀦 𑀧𑀭𑀺𑀢𑁄𑀲𑀢𑀺.

𑁩𑁧.

𑀤𑀤𑀦𑁆𑀢𑀸𑀦𑀁 𑀲𑀭𑀦𑁆𑀢𑀸𑀦𑀁, 𑀧𑀽𑀚𑁂𑀦𑁆𑀢𑀸𑀦𑀁 𑀲𑀘𑁂 𑀢𑀼𑀯𑀁;

𑀫𑀳𑀧𑁆𑀨𑀮𑀁 𑀫𑀳𑀸𑀪𑀽𑀢𑀺𑀁, 𑀓𑀸𑀫𑀢𑁆𑀣 𑀳𑁄𑀣 𑀦𑀺𑀩𑁆𑀩𑀡𑀸𑀢𑀺 [𑀦𑀺𑀫𑁆𑀫𑀦𑀸 𑀇𑀢𑀺𑀓𑀢𑁆𑀢𑀘𑀺].

𑀢𑀁 𑀲𑀼𑀢𑁆𑀯𑀸 𑀣𑁂𑀭𑁄 𑀲𑀁𑀲𑀸𑀭𑁂 𑀦𑀺𑀩𑁆𑀩𑀺𑀦𑁆𑀤𑁄 𑀢𑀢𑁆𑀣𑁂𑀯 𑀞𑀺𑀢𑁄 𑀢𑀺𑀮𑀓𑁆𑀔𑀡𑀁 𑀧𑀝𑁆𑀞𑀧𑁂𑀢𑁆𑀯𑀸 𑀓𑀭𑀚𑀓𑀸𑀬𑀁 𑀲𑀫𑁆𑀫𑀲𑀦𑁆𑀢𑁄 𑀲𑀳𑀧𑀝𑀺 𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸𑀯 𑀦𑀺𑀓𑁆𑀔𑀫𑀺. 𑀢𑀢𑁄 𑀥𑀫𑁆𑀫𑀸𑀲𑁄𑀓𑀫𑀳𑀸𑀭𑀸𑀚𑀸 𑀩𑀮𑀯𑀸𑀳𑀦𑀧𑀭𑀺𑀯𑀼𑀢𑁄 𑀫𑀳𑀦𑁆𑀢𑁂𑀦 𑀧𑀽𑀚𑀸𑀯𑀺𑀥𑀸𑀦𑁂𑀦 𑀧𑀝𑀺𑀫𑀕𑁆𑀕𑀁 𑀆𑀕𑀫𑁆𑀫 𑀯𑀦𑁆𑀤𑀺𑀢𑁆𑀯𑀸 ¶ 𑀢𑀢𑁄 𑀤𑀺𑀕𑀼𑀡𑀁 𑀧𑀽𑀚𑀸𑀲𑀓𑁆𑀓𑀸𑀭𑀁 𑀓𑀼𑀭𑀼𑀫𑀸𑀦𑁄 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀣𑁂𑀭𑀁 𑀅𑀢𑁆𑀢𑀦𑁄 𑀦𑀕𑀭𑀁 𑀦𑁂𑀢𑁆𑀯𑀸 𑀢𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑁄 𑀧𑀜𑁆𑀘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀫𑀳𑀦𑁆𑀢𑀁 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀣𑁂𑀭𑁂𑀦 𑀲𑀳𑀸𑀕𑀢𑀸𑀦𑀁 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑀢𑀼𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀸𑀦 𑀫𑀓𑀸𑀲𑀺, 𑀅𑀣 𑀣𑁂𑀭𑁄 𑀲𑀸𑀝𑁆𑀞𑀓𑀣𑀁 𑀧𑀺𑀝𑀓𑀢𑁆𑀢𑀬𑀁 𑀧𑀓𑀸𑀲𑁂𑀦𑁆𑀢𑁄 𑀢𑀲𑁆𑀫𑀺𑀁 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑀢𑁄 𑀭𑀸𑀚𑀸 𑀲𑀧𑀭𑀺𑀲𑁄 𑀢𑀲𑁆𑀲 𑀲𑀭𑀻𑀭𑀦𑀺𑀓𑁆𑀔𑁂𑀧𑀁 𑀓𑀸𑀭𑁂𑀢𑁆𑀯𑀸 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀫𑀳𑀦𑁆𑀢𑀁 𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀲𑀻𑀢𑀺.

𑁩𑁨.

𑀧𑀼𑀭𑀸𑀢𑀦𑀸𑀦𑀁 𑀪𑀼𑀯𑀺 𑀧𑀼𑀜𑁆𑀜𑀓𑀫𑁆𑀫𑀺𑀦𑀁,

𑀕𑀼𑀡𑀸𑀦𑀼𑀪𑀸𑀯𑁂𑀦 𑀫𑀳𑁂𑀦𑁆𑀢𑀺 𑀏𑀯𑀁;

𑀲𑀤𑁂𑀯𑀓𑀸 𑀦𑀁 𑀫𑀦𑀲𑀻𑀓𑀭𑁄𑀦𑁆𑀢𑀸,

𑀧𑀼𑀜𑁆𑀜𑀁 𑀓𑀭𑁄𑀣𑀸 𑀬𑀢𑀦𑁂 𑀲𑀤𑀸 𑀤𑀭𑀸𑀢𑀺.

𑀇𑀦𑁆𑀤𑀕𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼𑀁 𑀘𑀢𑀼𑀢𑁆𑀣𑀁.

𑁩𑁫. 𑀲𑀸𑀔𑀫𑀸𑀮𑀧𑀽𑀚𑀺𑀓𑀸𑀬 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀅𑀫𑁆𑀳𑀸𑀓𑀁 𑀪𑀕𑀯𑀸 𑀤𑀲𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀢𑀼𑀲𑀺𑀢𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑁄 𑀤𑁂𑀯𑁂𑀳𑀺 𑀆𑀭𑀸𑀥𑀺𑀢𑁄 𑀲𑀓𑁆𑀓𑀭𑀸𑀚𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀧𑀭𑀫𑀸𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀲𑀁𑀯𑀘𑁆𑀙𑀭𑀸𑀦𑀺 𑀞𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀺 𑀤𑁂𑀲𑁂𑀢𑁆𑀯𑀸 𑀕𑀡𑀦𑀧𑀣𑀫𑀢𑀻𑀢𑁂 𑀲𑀢𑁆𑀢𑁂 𑀪𑀯𑀓𑀦𑁆𑀢𑀸𑀭𑀢𑁄 𑀲𑀦𑁆𑀢𑀸𑀭𑁂𑀢𑁆𑀯𑀸 𑀲𑀩𑁆𑀩𑀩𑀼𑀤𑁆𑀥𑀓𑀺𑀘𑁆𑀘𑀸𑀦𑀺 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀓𑀼𑀲𑀺𑀦𑀸𑀭𑀸𑀬𑀁 𑀉𑀧𑀯𑀢𑁆𑀢𑀦𑁂 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑁂 𑀬𑀫𑀓𑀲𑀸𑀮𑀸𑀦 𑀫𑀦𑁆𑀢𑀭𑁂 𑀉𑀢𑁆𑀢𑀭𑀲𑀻𑀲𑀓𑀁 𑀧𑀜𑁆𑀜𑀢𑁆𑀢𑁂 𑀫𑀜𑁆𑀘𑀓𑁂 𑀯𑁂𑀲𑀸𑀔𑀧𑀼𑀡𑁆𑀡𑀤𑀺𑀯𑀲𑁂 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀅𑀦𑀼𑀝𑁆𑀞𑀸𑀦𑀲𑁂𑀬𑁆𑀬𑀸𑀬 𑀦𑀺𑀧𑀦𑁆𑀦𑁄 𑀧𑀘𑁆𑀙𑀺𑀫𑀬𑀸𑀫𑁂 𑀪𑀺𑀓𑁆𑀔𑀽 𑀑𑀯𑀤𑀺𑀢𑁆𑀯𑀸 𑀩𑀮𑀯𑀧𑀘𑁆𑀘𑀽-𑀲 ¶ 𑀲𑀫𑀬𑁂 𑀫𑀳𑀸𑀧𑀣𑀯𑀺𑀁𑀓𑀫𑁆𑀧𑁂𑀦𑁆𑀢𑁄 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀡𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺, 𑀦𑀺𑀩𑁆𑀩𑀼𑀢𑁂 𑀧𑀦 𑀪𑀕𑀯𑀢𑀺 𑀮𑁄𑀓𑀦𑀸𑀣𑁂 𑀆𑀦𑀦𑁆𑀤𑀢𑁆𑀣𑁂𑀭𑁄 𑀫𑀮𑁆𑀮𑀭𑀸𑀚𑀽𑀦𑀁 𑀏𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀢𑀢𑁄 𑀓𑁄𑀲𑀺𑀦𑀸𑀭𑀓𑀸 𑀘 𑀤𑁂𑀯𑀩𑁆𑀭𑀳𑁆𑀫𑀸𑀤𑀬𑁄 𑀘 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑁂𑀳𑀺 𑀫𑀸𑀮𑀸𑀕𑀦𑁆𑀥𑀸𑀤𑀻𑀳𑀺 𑀘 𑀲𑀓𑁆𑀓𑀭𑁄𑀦𑁆𑀢𑀸 𑀕𑀭𑀼𑀓𑀭𑁄𑀦𑁆𑀢𑀸 𑀫𑀸𑀦𑁂𑀦𑁆𑀢𑀸 𑀧𑀽𑀚𑁂𑀦𑁆𑀢𑀸 𑀘𑁂𑀮𑀯𑀺𑀢𑀸𑀦𑀸𑀤𑀬𑁄 𑀓𑀭𑁄𑀦𑁆𑀢𑀸 𑀪𑀕𑀯𑀢𑁄 𑀲𑀭𑀻𑀭𑀁 𑀦𑀕𑀭𑀫𑀚𑁆𑀛𑁂 𑀬𑀢𑁆𑀣 𑀫𑀓𑀼𑀝𑀩𑀦𑁆𑀥𑀦𑀁 𑀦𑀸𑀫 𑀫𑀮𑁆𑀮𑀸𑀦𑀁 𑀘𑁂𑀢𑀺𑀬𑀁, 𑀢𑀢𑁆𑀣 𑀦𑁂𑀢𑁆𑀯𑀸 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀲𑀭𑀻𑀭𑀁 𑀯𑀺𑀬 𑀅𑀳𑀢𑁂𑀦 𑀯𑀢𑁆𑀣𑁂𑀦 𑀯𑁂𑀞𑁂𑀢𑁆𑀯𑀸 𑀢𑀢𑁄 𑀯𑀺𑀳𑀢𑁂𑀦 𑀓𑀧𑁆𑀧𑀸𑀲𑁂𑀦 𑀯𑁂𑀞𑁂𑀢𑁆𑀯𑀸𑀢𑀺 𑀏𑀯𑀁 𑀧𑀜𑁆𑀘𑀤𑀼𑀲𑁆𑀲𑀬𑀼𑀕𑀲𑀢𑁂𑀳𑀺 𑀯𑁂𑀞𑁂𑀢𑁆𑀯𑀸 𑀆𑀬𑀲𑀸𑀬 𑀢𑁂𑀮𑀤𑁄𑀡𑀺𑀬𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑀺𑀲𑁆𑀲𑀸𑀬 𑀆𑀬𑀲𑀸𑀬 𑀤𑁄𑀡𑀺𑀬𑀸 𑀧𑀝𑀺𑀓𑀼𑀚𑁆𑀚𑀺𑀢𑁆𑀯𑀸 𑀲𑀩𑁆𑀩𑀕𑀦𑁆𑀥𑀸𑀦𑀁 𑀘𑀺𑀢𑀓𑀁 𑀓𑀭𑀺𑀢𑁆𑀯𑀸 𑀪𑀕𑀯𑀢𑁄 𑀲𑀭𑀻𑀭𑀁 𑀘𑀺𑀢𑀓𑀁 𑀆𑀭𑁄𑀧𑁂𑀲𑀼𑀁. 𑀅𑀣 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀺𑀢𑁂 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀘𑀺𑀢𑀓𑁄 𑀲𑀫𑀦𑁆𑀢𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀧𑀚𑁆𑀚𑀮𑀺. 𑀪𑀕𑀯𑀢𑁄 𑀧𑀦 𑀲𑀭𑀻𑀭𑁂 𑀤𑀟𑁆𑀠𑁂 𑀲𑀼𑀫𑀦𑀫𑀓𑀼𑀴𑀲𑀤𑀺𑀲𑀸 𑀥𑀸𑀢𑀼𑀬𑁄 𑀅𑀯𑀲𑀺𑀲𑁆𑀲𑀺𑀁𑀲𑀼. 𑀢𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀓𑁄𑀲𑀮𑀭𑀜𑁆𑀜𑁄 𑀚𑀦𑀧𑀤𑁂 𑀅𑀜𑁆𑀜𑀢𑀭𑀸 𑀕𑀸𑀫𑀯𑀸𑀲𑀺𑀓𑀸 𑀇𑀢𑁆𑀣𑀻 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀸𑀥𑀼𑀓𑀻𑀴𑁆𑀳𑀁 𑀆𑀕𑀘𑁆𑀙𑀫𑀸𑀦𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀢𑁆𑀢𑀦𑁄 𑀲𑀭𑀻𑀭𑁂 𑀉𑀧𑁆𑀧𑀦𑁆𑀦𑀯𑀸𑀢𑀭𑁄𑀕𑁂𑀦 𑀉𑀧𑀤𑁆𑀤𑀼𑀢𑀸 𑀲𑀸𑀥𑀼𑀓𑀻𑀴𑁆𑀳𑀁 𑀲𑀫𑁆𑀧𑀸𑀧𑀼𑀡𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀲𑀢𑁆𑀣𑀼 𑀆𑀴𑀸𑀳𑀦𑀁 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀥𑀸𑀢𑀼𑀲𑀭𑀻𑀭𑁂 𑀢𑀻𑀡𑀺 𑀲𑀸𑀔𑀧𑀼𑀧𑁆𑀨𑀸𑀦𑀺 𑀧𑀽𑀚𑁂𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀕𑀢𑀸 𑀢𑀸𑀬 𑀏𑀯 𑀭𑀢𑁆𑀢𑀺𑀬𑀸 𑀫𑀚𑁆𑀛𑀺𑀫𑀬𑀸𑀫𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀢𑀺𑀁𑀲𑀬𑁄𑀚𑀦𑀺𑀓𑁂 𑀓𑀦𑀓𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀸 𑀧𑀼𑀩𑁆𑀩𑀓𑀫𑁆𑀫𑀧𑀓𑀸𑀲𑀦𑀢𑁆𑀣𑀁 𑀘𑀓𑁆𑀓𑀫𑀢𑁆𑀢𑀸𑀦𑀺 𑀲𑀸𑀔𑀧𑀼𑀧𑁆𑀨𑀸𑀦𑀺 𑀢𑀢𑁆𑀢 𑀢𑀢𑁆𑀣 𑀑𑀮𑀫𑁆𑀩𑀦𑁆𑀢𑀺. 𑀢𑁂𑀳𑁂𑀯 𑀲𑀩𑁆𑀩𑀁 𑀯𑀺𑀫𑀸𑀦𑀁 𑀏𑀓𑁄𑀪𑀸𑀲𑀻 [𑀏𑀓𑁄𑀪𑀸𑀲𑀺 𑀢𑀢𑁄 𑀇𑀢𑀺𑀲𑀩𑁆𑀩𑀢𑁆𑀣] 𑀅𑀳𑁄𑀲𑀺. 𑀢𑀢𑁄 𑀲𑀼𑀕𑀦𑁆𑀥𑀓𑀭𑀡𑁆𑀟𑀓𑀁 𑀯𑀺𑀬 𑀘 𑀅𑀳𑁄𑀲𑀺, 𑀲𑀸 𑀧𑀦 𑀅𑀢𑁆𑀢𑀦𑁄 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀅𑀢𑁆𑀢𑀪𑀸𑀯𑀜𑁆𑀘 𑀯𑀺𑀫𑀸𑀦𑀲𑀫𑁆𑀧𑀤𑀜𑁆𑀘 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀬𑁄 𑀘 𑀤𑀺𑀲𑁆𑀯𑀸 𑀯𑀺𑀫𑁆𑀳𑀺𑀢𑀫𑀸𑀦𑀲𑀸 𑀧𑀼𑀩𑁆𑀩𑁂 𑀓𑀢𑁂𑀦 [𑀧𑀼𑀩𑁆𑀩𑁂𑀓𑀺𑀲𑁆𑀲𑀫𑁂. 𑀧𑀼𑀩𑁆𑀩𑁂𑀓𑀢𑁂𑀦𑀫𑁂 𑀇𑀢𑀺𑀘𑀓𑀢𑁆𑀣𑀘𑀺] ¶ 𑀓𑁂𑀦 𑀫𑁂 𑀧𑀼𑀜𑁆𑀜𑀓𑀫𑁆𑀫𑁂𑀦𑀸 𑀬𑀁 𑀮𑀤𑁆𑀥𑀸𑀢𑀺 𑀑𑀮𑁄𑀓𑀦𑁆𑀢𑀻 𑀪𑀕𑀯𑀢𑁄 𑀥𑀸𑀢𑀼𑀲𑀭𑀻𑀭𑀲𑁆𑀫𑀺𑀁 𑀧𑀽𑀚𑀺𑀢𑀸𑀦𑀺 𑀢𑀻𑀡𑀺 𑀲𑀸𑀔𑀧𑀼𑀧𑁆𑀨𑀸𑀦𑀺 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑀸 𑀫𑀳𑀸𑀘𑀓𑁆𑀓𑀧𑁆𑀧𑀫𑀸𑀡𑀁 𑀲𑀸𑀔𑀫𑀸𑀮𑀁 𑀳𑀢𑁆𑀣𑁂𑀦 𑀥𑀸𑀭𑁂𑀦𑁆𑀢𑀻 𑀥𑀸𑀢𑀼𑀧𑀽𑀚𑀦𑀢𑁆𑀣𑀸𑀬 𑀅𑀕𑀫𑀸𑀲𑀺. 𑀢𑀤𑀸 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀸 𑀫𑀦𑀼𑀲𑁆𑀲𑀸 𑀢𑀲𑁆𑀲𑀸 𑀭𑀽𑀧𑀲𑀫𑁆𑀧𑀤𑀜𑁆𑀘 𑀳𑀢𑁆𑀢𑁂 𑀫𑀳𑀦𑁆𑀢𑀁 𑀲𑀸𑀔𑀫𑀸𑀮𑀜𑁆𑀘 𑀤𑀺𑀲𑁆𑀯𑀸 𑀯𑀺𑀫𑁆𑀳𑀺𑀢𑀫𑀸𑀦𑀲𑀸 𑀅𑀫𑁆𑀫 𑀢𑁆𑀯𑀁 𑀓𑀢𑁆𑀣 𑀯𑀸𑀲𑀺𑀓𑀸. 𑀓𑀢𑁆𑀣 𑀧𑀦𑀺𑀫𑀁 𑀧𑀼𑀧𑁆𑀨𑀁 𑀧𑀝𑀺𑀮𑀤𑁆𑀥𑀦𑁆𑀢𑀺 𑀧𑀼𑀘𑁆𑀙𑀺𑀁𑀲𑀼, 𑀢𑀁 𑀲𑀼𑀢𑁆𑀯𑀸 𑀤𑁂𑀯𑀥𑀻𑀢𑀸 𑀅𑀢𑁆𑀢𑀦𑀸 𑀪𑀕𑀯𑀢𑁄 𑀥𑀸𑀢𑀼𑀲𑀭𑀻𑀭𑀲𑁆𑀲 𑀧𑀽𑀚𑀺𑀢𑀲𑀸𑀔𑀫𑀸𑀮𑀢𑁆𑀢𑀬𑀸𑀦𑀼𑀪𑀸𑀯𑁂𑀦 𑀧𑀝𑀺𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀬𑁄 𑀘 𑀤𑀺𑀩𑁆𑀩𑀯𑀺𑀫𑀸𑀦𑀜𑁆𑀘 𑀧𑀼𑀩𑁆𑀩𑁂 𑀫𑀢𑀓𑀮𑁂𑀯𑀭𑀁 𑀘𑀸𑀢𑀺 𑀲𑀩𑁆𑀩𑀁 𑀢𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀯𑀲𑀸𑀦𑁂 𑀆𑀳.

𑁧.

𑀲𑀫𑀸𑀕𑀢𑀸 𑀪𑀯𑀦𑁆𑀢𑀸 𑀪𑁄, 𑀧𑀲𑁆𑀲𑀦𑁆𑀢𑀼 𑀫𑀫 𑀲𑀫𑁆𑀧𑀤𑀁;

𑀓𑀢𑀫𑀧𑁆𑀧𑁂𑀦 𑀓𑀸𑀭𑁂𑀦, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀥𑀸𑀢𑀼𑀬𑀸.

𑁨.

𑀲𑀸𑀔𑀫𑀸𑀮𑀸𑀦𑀺 𑀢𑀻𑀡𑁂𑀯, 𑀳𑀻𑀬𑁆𑀬𑁄𑀳𑀁 𑀫𑀼𑀦𑀺𑀥𑀸𑀢𑀼𑀬𑀸;

𑀧𑀽𑀚𑀬𑀺𑀢𑁆𑀯𑀸𑀦 𑀲𑀦𑁆𑀢𑀼𑀝𑁆𑀞𑀸, 𑀦𑀺𑀯𑀢𑁆𑀢𑀸 𑀢𑀸𑀬 𑀭𑀢𑁆𑀢𑀺𑀬𑀸.

𑁩.

𑀫𑀭𑀦𑁆𑀢𑀻 𑀔𑀭𑀯𑀸𑀢𑁂𑀦, 𑀢𑀫𑀳𑀁 𑀲𑀼𑀘𑀭𑀺𑀢𑀁 𑀲𑀭𑀺𑀁;

𑀢𑁂𑀦𑀸𑀳𑀁 𑀧𑀼𑀜𑁆𑀜𑀓𑀫𑁆𑀫𑁂𑀦, 𑀢𑀸𑀯𑀢𑀺𑀁𑀲𑀽𑀧𑀕𑀸𑀅𑀳𑀼𑀁.

𑁪.

𑀢𑀢𑁆𑀣 𑀫𑁂 𑀆𑀲𑀺 𑀧𑀸𑀲𑀸𑀤𑁄, 𑀢𑀺𑀁𑀲𑀬𑁄𑀚𑀦𑀫𑀼𑀕𑁆𑀕𑀢𑁄;

𑀓𑀽𑀝𑀸𑀕𑀸𑀭𑀯𑀭𑀸𑀓𑀺𑀡𑁆𑀡𑁄, 𑀲𑀸𑀔𑀫𑀸𑀮𑀸𑀢𑀺 [𑀲𑀸𑀥𑀫𑀸𑀮𑁄 𑀇𑀢𑀺𑀧𑀺𑀓𑀢𑁆𑀣𑀘𑀺], 𑀯𑀺𑀲𑁆𑀲𑀼𑀢𑁄.

𑁫.

𑀬𑀣𑀸 𑀲𑀩𑁆𑀩𑀲𑀼𑀕𑀦𑁆𑀥𑁂𑀳𑀺, 𑀓𑀭𑀡𑁆𑀟𑀁 𑀧𑀭𑀺𑀪𑀸𑀯𑀺𑀢𑀁;

𑀢𑀣𑀸 𑀤𑀺𑀩𑁆𑀩𑀲𑀼𑀕𑀦𑁆𑀥𑁂𑀳𑀺, 𑀕𑀦𑁆𑀥𑀺𑀢𑀁 𑀪𑀯𑀦𑀁 𑀫𑀫.

𑁬.

𑀘𑀓𑁆𑀓𑀫𑀢𑁆𑀢𑀸 𑀲𑀸𑀔𑀧𑀼𑀧𑁆𑀨𑀸, 𑀢𑀢𑁆𑀣 𑀢𑀢𑁆𑀣𑀽𑀧𑀮𑀫𑁆𑀩𑀭𑁂 [𑀢𑀢𑀯𑀢𑁆𑀣𑀼𑀧𑀮𑀩𑁆𑀩𑀭𑁂 𑀇𑀢𑀺𑀧𑀺𑀓𑀢𑁆𑀣𑀘𑀺];

𑀤𑀺𑀩𑁆𑀩𑀕𑀦𑁆𑀥𑀸 𑀧𑀯𑀸𑀬𑀦𑁆𑀢𑀺, 𑀫𑀥𑀼𑀩𑁆𑀩𑀪𑀦𑀺𑀲𑁂𑀯𑀺𑀢𑀸.

𑁭.

𑀪𑀲𑁆𑀲𑀦𑁆𑀢𑀺 𑀏𑀓𑀧𑀼𑀧𑁆𑀨𑀲𑁆𑀫𑀸, 𑀢𑀼𑀫𑁆𑀩𑀫𑀢𑁆𑀢𑀸 𑀳𑀺 𑀭𑁂𑀡𑀯𑁄;

𑀢𑁂𑀳𑀺 𑀧𑀺𑀜𑁆𑀚𑀭𑀺𑀢𑀸 𑀤𑁂𑀯𑀸, 𑀓𑀻𑀴𑀦𑁆𑀢𑀺 𑀘 𑀮𑀮𑀦𑁆𑀢𑀺𑀘.

𑁮.

𑀧𑀻𑀴𑀦𑁆𑀥𑀺𑀢𑁆𑀯𑀸𑀦 ¶ 𑀫𑀸𑀮𑀸𑀥𑀬𑀸, 𑀲𑀼𑀤𑀺𑀩𑁆𑀩𑀸 𑀪𑀭𑀡𑀸𑀦𑀺𑀘;

𑀲𑀳𑀘𑁆𑀙𑀭𑀸 𑀤𑁂𑀯𑀧𑀼𑀢𑁆𑀢𑀸, 𑀦𑀘𑁆𑀘𑀕𑀻𑀢𑀸𑀤𑀺𑀩𑁆𑀬𑀸𑀯𑀝𑀸.

𑁯.

𑀧𑀲𑁆𑀲𑀣𑁂𑀫𑀁 𑀪𑀼𑀚𑀗𑁆𑀕𑀸 𑀪𑁄, 𑀲𑀢𑁆𑀢𑀸 𑀫𑁄𑀳𑁂𑀦 𑀧𑀸𑀭𑀼𑀢𑀸;

𑀳𑀻𑀬𑁆𑀬𑁄 𑀫𑀢𑀁 𑀧𑀯𑀺𑀤𑁆𑀥𑀁 𑀫𑁂, 𑀧𑀽𑀢𑀺𑀪𑀽𑀢𑀁 𑀓𑀮𑁂𑀯𑀭𑀁.

𑁧𑁦.

𑀧𑀼𑀴𑀯𑁂𑀳𑀺 𑀲𑀫𑀸𑀓𑀺𑀡𑁆𑀡𑀁, 𑀫𑀓𑁆𑀔𑀺𑀓𑀸𑀕𑀡𑀓𑀻𑀴𑀺𑀢𑀁;

𑀓𑀸𑀓𑀲𑁄𑀡𑀸𑀤𑀺𑀲𑀢𑁆𑀢𑀸𑀦, 𑀫𑀸𑀳𑀸𑀭𑀁 𑀓𑀼𑀡𑀧𑀸𑀮𑀬𑀁.

𑁧𑁧.

𑀧𑀢𑁆𑀣𑁂𑀦𑁆𑀢𑀺 𑀧𑀼𑀭𑀺𑀲𑀸 𑀧𑀼𑀩𑁆𑀩𑁂, 𑀅𑀦𑁂𑀓𑁄𑀧𑀸𑀬𑀦𑁂𑀦 𑀢𑀁;

𑀤𑀝𑁆𑀞𑀼𑀫𑁆𑀧𑀺𑀤𑀸𑀦𑀺 𑀦𑀺𑀘𑁆𑀙𑀦𑁆𑀢𑀺, 𑀢𑀡𑁆𑀳𑀸𑀬𑀜𑁆𑀜𑀸𑀡𑀢𑀸 𑀅𑀳𑁄.

𑁧𑁨.

𑀮𑁄𑀓𑀧𑀚𑁆𑀚𑁄𑀢𑀓𑀲𑁆𑀲𑀸𑀳𑀁, 𑀯𑀺𑀫𑀮𑀲𑁆𑀲 𑀬𑀲𑀲𑁆𑀲𑀺𑀦𑁄;

𑀥𑀸𑀢𑀼𑀁 𑀳𑀻𑀬𑁆𑀬𑁄 𑀫𑀳𑀺𑀁 𑀲𑀫𑁆𑀫𑀸, 𑀅𑀚𑁆𑀚 𑀲𑀕𑁆𑀕𑁂 𑀧𑀢𑀺𑀝𑁆𑀞𑀺𑀢𑀸.

𑁧𑁩.

𑀳𑀺𑀢𑁆𑀯𑀸𑀦𑁂 𑀢𑀸𑀤𑀺𑀲𑀁 𑀓𑀸𑀬𑀁, 𑀮𑀤𑁆𑀥𑀁𑀤𑀸𑀦𑀺 𑀫𑀫𑁂𑀤𑀺𑀲𑀁;

𑀤𑀺𑀩𑁆𑀩𑀢𑁆𑀢𑀪𑀸𑀯𑀁 𑀲𑁄𑀪𑀸𑀳𑀺, 𑀪𑀸𑀲𑀫𑀸𑀦 𑀫𑀼𑀤𑀺𑀓𑁆𑀔𑀣.

𑁧𑁪.

𑀪𑀸𑀲𑀫𑀸𑀦𑀸𑀬 𑀫𑁂 𑀯𑀸𑀘𑀁, 𑀲𑀼𑀡𑁄𑀣𑁂𑀢𑁆𑀣 𑀲𑀫𑀸𑀕𑀢𑀸;

𑀦𑀢𑁆𑀣𑁂𑀯𑀸𑀓𑀢𑀧𑀼𑀜𑁆𑀜𑀲𑁆𑀲, 𑀅𑀡𑀼𑀫𑀢𑁆𑀢𑀁 𑀪𑀯𑁂 𑀲𑀼𑀔𑀁.

𑁧𑁫.

𑀩𑀺𑀦𑁆𑀤𑀼𑀫𑀢𑁆𑀢𑀫𑁆𑀧𑀺 𑀬𑁄 𑀧𑀼𑀜𑁆𑀜, 𑀩𑀻𑀚𑀁 𑀭𑁄𑀧𑁂𑀢𑀺 𑀲𑀸𑀲𑀦𑁂;

𑀦 𑀳𑀸 𑀦𑀢𑁆𑀣𑀨𑀮𑀁 [𑀦𑀳𑀧𑀦𑀦𑁆𑀢𑀨𑀮𑀁 𑀇𑀢𑀺𑀧𑀺𑀓𑀢𑁆𑀣𑀘𑀺] 𑀳𑁄𑀢𑀺, 𑀬𑀸𑀯 𑀦𑀺𑀩𑁆𑀩𑀸𑀡𑀧𑀢𑁆𑀢𑀺𑀬𑀸𑀢𑀺.

𑀏𑀯𑀁 𑀲𑀸 𑀤𑁂𑀯𑀢𑀸 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀤𑀺𑀩𑁆𑀩𑀯𑀺𑀪𑀯𑀁 𑀤𑀲𑁆𑀲𑁂𑀢𑁆𑀯𑀸 𑀚𑀦𑀓𑀸𑀬𑀁 𑀑𑀯𑀤𑀺𑀢𑁆𑀯𑀸 𑀤𑀺𑀩𑁆𑀩𑀲𑀸𑀔𑀧𑀼𑀧𑁆𑀨𑁂𑀳𑀺 𑀚𑀺𑀦𑀥𑀸𑀢𑀼𑀁 𑀧𑀽𑀚𑁂𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀧𑀲𑁆𑀲𑀦𑁆𑀢𑀸𑀦𑀁𑀬𑁂𑀯 𑀲𑀤𑁆𑀥𑀺𑀁 𑀯𑀺𑀫𑀸𑀦𑁂𑀦 𑀤𑁂𑀯𑀮𑁄𑀓𑀫𑁂𑀯 𑀅𑀕𑀫𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀫𑀳𑀸𑀚𑀦𑁄 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀤𑁂𑀯𑀮𑁄𑀓𑀁 𑀧𑀽𑀭𑁂𑀲𑀻𑀢𑀺.

𑁧𑁬.

𑀏𑀯𑀜𑁆𑀳𑀺 ¶ 𑀲𑀸 𑀧𑀼𑀧𑁆𑀨𑀫𑀢𑁆𑀢𑁂𑀦 𑀥𑀸𑀢𑀼𑀁,

𑀧𑀽𑀚𑁂𑀢𑁆𑀯 𑀤𑁂𑀯𑁂𑀲𑀼 𑀅𑀮𑀢𑁆𑀣 𑀪𑀽𑀢𑀺𑀁;

𑀢𑀼𑀫𑁆𑀳𑁂𑀧𑀺 𑀪𑁄𑀦𑁆𑀢𑁄 𑀢𑀺𑀤𑀺𑀯𑁂𑀲𑀼 𑀲𑀸𑀢𑀁,

𑀓𑀸𑀫𑀢𑁆𑀣 𑀘𑁂 𑀓𑀢𑁆𑀣 𑀧𑀼𑀜𑁆𑀜𑀸𑀦𑀺 𑀲𑀸𑀥𑀼𑀁𑀢𑀺.

𑀲𑀸𑀔𑀫𑀸𑀮𑀧𑀽𑀚𑀺𑀓𑀸𑀬 𑀯𑀢𑁆𑀣𑀼𑀁 𑀧𑀜𑁆𑀘𑀫𑀁.

𑁩𑁬. 𑀫𑁄𑀭𑀺𑀬𑀩𑁆𑀭𑀳𑁆𑀫𑀡𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀅𑀫𑁆𑀳𑀸𑀓𑀁 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀫𑀕𑀥𑀭𑀝𑁆𑀞𑁂 𑀫𑀘𑀮𑀁 𑀦𑀸𑀫 𑀫𑀳𑀸𑀕𑀸𑀫𑀁 𑀅𑀳𑁄𑀲𑀺. 𑀢𑀢𑁆𑀣 𑀫𑁄𑀭𑀺𑀬𑁄𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀝𑀺𑀯𑀲𑀢𑀺 𑀲𑀤𑁆𑀥𑁄 𑀧𑀲𑀦𑁆𑀦𑁄, 𑀢𑀲𑁆𑀲 𑀲𑁂𑀦𑀸𑀦𑀸𑀫𑁂 𑀓𑀸 𑀪𑀭𑀺𑀬𑀸 𑀅𑀢𑁆𑀣𑀺. 𑀲𑀸𑀧𑀺 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀭𑀢𑀦𑀢𑁆𑀢𑀬𑁂𑀲𑀼. 𑀢𑁂 𑀉𑀪𑁄𑀧𑀺 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀦𑀺𑀘𑁆𑀘𑀁 𑀤𑀸𑀦𑀁 𑀧𑀯𑀢𑁆𑀢𑁂𑀦𑁆𑀢𑀸 𑀘𑀻𑀯𑀭𑀸𑀤𑀺𑀘𑀢𑀼𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀦𑁆𑀢𑀸 𑀲𑀻𑀮𑀁 𑀭𑀓𑁆𑀔𑀦𑁆𑀢𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀤𑀺𑀯𑀲𑀁 𑀯𑀻𑀢𑀺𑀦𑀸𑀫𑁂𑀦𑁆𑀢𑀺. 𑀅𑀣𑀲𑁆𑀲 𑀕𑁂𑀳𑁂 𑀯𑀺𑀪𑀯𑀁 𑀬𑁂𑀪𑀼𑀬𑁆𑀬𑁂𑀦 𑀤𑀸𑀦𑀸𑀤𑀻𑀲𑀼 𑀧𑀭𑀺𑀓𑁆𑀔𑀬𑀫𑀕𑀫𑀸𑀲𑀺. 𑀢𑀢𑁄 𑀩𑁆𑀭𑀸𑀳𑁆𑀫𑀡𑀻 𑀲𑀸𑀫𑀺 𑀦𑁄 𑀕𑁂𑀳𑁂 𑀥𑀦𑀁 𑀧𑀭𑀺𑀓𑁆𑀔𑀻𑀡𑀁. 𑀓𑀣𑀁 𑀤𑀸𑀦𑀁 𑀧𑀯𑀢𑁆𑀢𑁂𑀬𑁆𑀬𑀸𑀫𑀸𑀢𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀆𑀭𑁄𑀘𑁂𑀲𑀺, 𑀢𑀢𑁄 𑀩𑁆𑀭𑀸𑀳𑁆𑀫𑀡𑁄 𑀫𑀸 𑀪𑀤𑁆𑀤𑁂 𑀘𑀺𑀦𑁆𑀢𑁂𑀲𑀺. 𑀬𑁂𑀦𑀓𑁂𑀦𑀘𑀺 𑀉𑀧𑀸𑀬𑁂𑀦 𑀤𑀸𑀦𑀁 𑀧𑀢𑀺𑀝𑁆𑀞𑀧𑁂𑀲𑁆𑀲𑀸𑀫𑀸𑀢𑀺 𑀯𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀦𑁄 𑀲𑀉𑀲𑁆𑀲𑀸𑀳𑀢𑀁 𑀧𑀓𑀸𑀲𑁄𑀦𑁆𑀢𑁄 𑀆𑀳.

𑁧.

𑀚𑀸𑀦𑀫𑀸𑀦𑁄 𑀳𑀺 𑀮𑁄𑀓𑀲𑁆𑀫𑀺𑀁, 𑀤𑀸𑀦𑀲𑁆𑀲𑁂𑀤𑀁 𑀨𑀮𑀁 𑀇𑀢𑀺;

𑀦 𑀤𑀚𑁆𑀚𑀸 𑀓𑁄 𑀲𑀼𑀲𑀻𑀮𑁂𑀲𑀼, 𑀅𑀧𑁆𑀧𑀫𑁆𑀧𑀺 𑀤𑀺𑀯𑀲𑀫𑁆𑀧𑀢𑀺.

𑁨.

𑀲𑀕𑁆𑀕𑀮𑁄𑀓𑀦𑀺𑀤𑀸𑀦𑀸𑀦𑀺, 𑀤𑀸𑀦𑀸𑀦𑀺 𑀫𑀢𑀺𑀫𑀸 𑀇𑀥;

𑀓𑁄𑀳𑀺𑀦𑀸𑀫 𑀦𑀭𑁄 𑀮𑁄𑀓𑁂, 𑀦 𑀤𑀤𑁂𑀬𑁆𑀬 𑀳𑀺𑀢𑁂 𑀭𑀢𑁄𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀪𑀤𑁆𑀤𑁂 𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀅𑀦𑁂𑀓𑀯𑀺𑀥𑀸𑀦𑀺 𑀧𑀡𑁆𑀡𑀸𑀦𑀺 𑀘 𑀨𑀮𑀸𑀦𑀺 𑀘 𑀧𑀘𑁆𑀙𑀺𑀧𑀽𑀭𑀁 𑀆𑀳𑀭𑀺𑀢𑁆𑀯𑀸 𑀯𑀺𑀓𑁆𑀓𑀺𑀡𑀺𑀢𑁆𑀯𑀸𑀧𑀺 𑀤𑀸𑀦𑀁 𑀦 𑀉𑀧𑀘𑁆𑀙𑀺𑀦𑁆𑀤𑀺𑀲𑁆𑀲𑀸𑀫𑀸𑀢𑀺 ¶ 𑀯𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀯𑀦𑀁 𑀕𑀦𑁆𑀢𑁆𑀯𑀸 𑀧𑀡𑁆𑀡𑀸𑀦𑀺 𑀘 𑀨𑀮𑀸𑀦𑀺 𑀘 𑀆𑀳𑀭𑀺𑀢𑁆𑀯𑀸 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀤𑀸𑀦𑀁 𑀤𑁂𑀦𑁆𑀢𑁄 𑀧𑀝𑀺𑀯𑀲𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀩𑁆𑀭𑀸𑀳𑁆𑀫𑀡𑁄 𑀯𑀦𑀁 𑀧𑀯𑀺𑀝𑁆𑀞𑁄 𑀧𑀡𑁆𑀡𑁂𑀳𑀺 𑀘 𑀨𑀮𑁂𑀳𑀺 𑀘 𑀧𑀘𑁆𑀙𑀺𑀁 𑀧𑀽𑀭𑁂𑀢𑁆𑀯𑀸 𑀲𑀻𑀲𑁂𑀦𑀸 𑀤𑀸𑀬 𑀕𑁂𑀳𑀁 𑀆𑀕𑀘𑁆𑀙𑀦𑁆𑀢𑁄 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑁂𑀳𑀺 𑀯𑀺𑀦𑀢𑀁 𑀦𑁂𑀓𑀢𑀭𑀼𑀕𑀡𑀦𑀺𑀘𑀺𑀢𑀁 𑀲𑀫𑁆𑀫𑀢𑁆𑀢𑀸𑀦𑁂𑀓𑀘𑀸𑀢𑀓𑀘𑀢𑀼𑀧𑁆𑀧𑀤𑀦𑀺𑀲𑁂𑀯𑀺𑀢𑀁 𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀦𑁆𑀢𑀧𑀼𑀧𑁆𑀨𑀧𑀢𑁆𑀢𑀓𑀺𑀜𑁆𑀚𑀓𑁆𑀔𑀘𑁆𑀙𑀦𑁆𑀦𑀯𑀸𑀴𑀼𑀓𑀸𑀢𑀮𑀁 𑀲𑀦𑁆𑀤𑀫𑀸𑀦𑀲𑀻𑀢𑀮𑀸 𑀫𑀮𑀚𑀮𑀧𑁆𑀧𑀯𑀸𑀳𑀁 𑀅𑀓𑀤𑁆𑀤𑀫𑀸𑀦𑀺𑀦𑁆𑀦𑀲𑀼𑀧𑀢𑀺𑀢𑁆𑀢𑁂𑀳𑀺 𑀲𑀼𑀦𑁆𑀤𑀭𑀁 𑀓𑀦𑁆𑀤𑀭𑀁 𑀤𑀺𑀲𑁆𑀯𑀸 𑀧𑀘𑁆𑀙𑀺𑀁 𑀢𑀻𑀭𑁂 𑀞𑀧𑁂𑀢𑁆𑀯𑀸 𑀑𑀢𑀺𑀡𑁆𑀡𑁄 𑀦𑀳𑀸𑀬𑀢𑀺, 𑀢𑀲𑁆𑀫𑀺𑀁 𑀔𑀡𑁂 𑀢𑀢𑁆𑀣 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑁄 𑀤𑁂𑀯𑀧𑀼𑀢𑁆𑀢𑁄 𑀢𑀁 𑀢𑀢𑁆𑀣 𑀦𑀳𑀸𑀬𑀦𑁆𑀢𑀁 𑀤𑀺𑀲𑁆𑀯𑀸 𑀓𑀺𑀦𑁆𑀦𑀼 𑀔𑁄 𑀏𑀲 𑀓𑀮𑁆𑀬𑀸𑀡𑀚𑁆𑀛𑀸𑀲𑀬𑁄 𑀯𑀸 𑀉𑀤𑀸𑀳𑀼 𑀧𑀸𑀧𑀚𑁆𑀛𑀸𑀲𑀬𑁄 𑀲𑀢𑁆𑀢𑁄𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀉𑀧𑀥𑀸𑀭𑀦𑁆𑀢𑁄 𑀅𑀘𑁆𑀙𑀭𑀺𑀬𑀧𑀼𑀭𑀺𑀲𑁄 𑀏𑀲𑁄 𑀤𑀼𑀕𑁆𑀕𑀢𑁄𑀧𑀺 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀤𑀸𑀦𑀧𑁆𑀧𑀯𑁂𑀡𑀺𑀬𑀸 𑀉𑀧𑀘𑁆𑀙𑀺𑀚𑁆𑀚𑀦𑀪𑀬𑁂𑀦 𑀯𑀦𑀁 𑀕𑀦𑁆𑀢𑁆𑀯𑀸 𑀧𑀡𑁆𑀡𑀸𑀦𑀺 𑀘 𑀨𑀮𑀸𑀦𑀺 𑀘 𑀆𑀳𑀭𑀺𑀢𑁆𑀯𑀸 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁄 𑀤𑀸𑀦𑀥𑀫𑁆𑀫𑀁 𑀦 𑀉𑀧𑀘𑁆𑀙𑀺𑀦𑁆𑀤𑀢𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀲 𑀕𑀼𑀡𑀸𑀤𑀬𑁄 𑀧𑀝𑀺𑀘𑁆𑀘 𑀧𑀘𑁆𑀙𑀺𑀬𑀁 𑀞𑀧𑀺𑀢𑀧𑀡𑁆𑀡𑀸𑀦𑀺 𑀘 𑀨𑀮𑀸𑀦𑀺 𑀘 𑀲𑀩𑁆𑀩𑀸𑀦𑀺 𑀲𑀼𑀯𑀡𑁆𑀡𑀸𑀦𑀺 𑀳𑁄𑀦𑁆𑀢𑀽𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀅𑀣𑀲𑁆𑀲𑀸𑀦𑀼𑀪𑀸𑀯𑁂𑀦 𑀲𑀩𑁆𑀩𑀁 𑀲𑀼𑀯𑀡𑁆𑀡𑀁 𑀅𑀳𑁄𑀪𑀺, 𑀅𑀣 𑀲𑁄 𑀲𑀼𑀯𑀡𑁆𑀡𑀧𑀼𑀡𑁆𑀡𑀧𑀘𑁆𑀙𑀺𑀬𑀁 𑀉𑀧𑀭𑀺 𑀲𑀼𑀯𑀡𑁆𑀡𑀭𑀸𑀲𑀺𑀫𑀢𑁆𑀣𑀓𑁂 𑀲𑀩𑁆𑀩𑀓𑀸𑀫𑀤𑀤𑀁 𑀫𑀳𑀦𑁆𑀢𑀁 𑀫𑀡𑀺𑀭𑀢𑀦𑀁 𑀞𑀧𑁂𑀢𑁆𑀯𑀸 𑀅𑀦𑁆𑀢𑀭𑀳𑀺𑀢𑁄 𑀧𑀝𑀺𑀓𑁆𑀓𑀫𑁆𑀫 𑀅𑀝𑁆𑀞𑀸𑀲𑀺, 𑀢𑀢𑁄 𑀩𑁆𑀭𑀸𑀳𑁆𑀫𑀡𑁄 𑀦𑀳𑀸𑀢𑁆𑀯𑀸 𑀉𑀢𑁆𑀢𑀺𑀡𑁆𑀡𑁄 𑀧𑀘𑁆𑀙𑀺𑀬𑀁 𑀲𑀫𑁆𑀧𑀼𑀡𑁆𑀡𑀲𑀼𑀯𑀡𑁆𑀡𑀯𑀡𑁆𑀡𑀭𑀁𑀲𑀺𑀦𑀸 𑀲𑀫𑁆𑀪𑀺𑀦𑁆𑀦𑀯𑀺𑀚𑁆𑀚𑁄𑀢𑀫𑀸𑀦𑀫𑀡𑀺𑀭𑀢𑀦𑀁 𑀤𑀺𑀲𑁆𑀯𑀸 𑀓𑀺𑀫𑁂𑀢𑀁𑀢𑀺 𑀆𑀲𑀗𑁆𑀓𑀺𑀢𑀧𑀭𑀺𑀲𑀗𑁆𑀓𑀺𑀢𑁄 𑀧𑀘𑁆𑀙𑀺𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀳𑀢𑁆𑀣𑀁 𑀧𑀲𑀸𑀭𑁂𑀢𑀼𑀁 𑀅𑀯𑀺𑀲𑀳𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀤𑁂𑀯𑀧𑀼𑀢𑁆𑀢𑁄 𑀤𑀺𑀲𑁆𑀲𑀫𑀸𑀦𑀲𑀭𑀻𑀭𑁂𑀦 𑀞𑀢𑁆𑀯𑀸 𑀫𑀸 𑀢𑁆𑀯𑀁 𑀪𑀸𑀬𑀺 𑀩𑁆𑀭𑀸𑀳𑁆𑀫𑀡. 𑀫𑀬𑀸 𑀏𑀢𑀸𑀦𑀺 𑀦𑀺𑀫𑁆𑀫𑀺𑀢𑀸𑀦𑀺, 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸𑀳𑀻𑀢𑀺 𑀆𑀳, 𑀅𑀣 𑀩𑁆𑀭𑀸𑀳𑁆𑀫𑀡𑁄 𑀤𑁂𑀯𑀧𑀼𑀢𑁆𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀅𑀬𑀁 𑀤𑁂𑀯𑀧𑀼𑀢𑁆𑀢𑁄 𑀇𑀫𑀁 𑀫𑀬𑀸 𑀦𑀺𑀫𑁆𑀫𑀺𑀢𑀁, 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸𑀢𑀺 𑀯𑀤𑀢𑀺. 𑀓𑀺𑀦𑁆𑀦𑀼 𑀔𑁄 𑀲𑁄 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀤𑁂𑀢𑀺, 𑀉𑀤𑀸𑀳𑀼 𑀫𑀬𑀸 𑀓𑀢𑀧𑀼𑀜𑁆𑀜𑁂𑀦𑀸𑀢𑀺 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀢𑀁𑀢𑀺 𑀧𑀜𑁆𑀚𑀮𑀺𑀓𑁄𑀯 𑀤𑁂𑀯𑀧𑀼𑀢𑁆𑀢𑀁 𑀧𑀼𑀘𑁆𑀙𑀦𑁆𑀢𑁄 𑀆𑀳.

𑁩.

𑀧𑀼𑀘𑁆𑀙𑀸𑀫𑀺 ¶ 𑀧𑀜𑁆𑀚𑀮𑀻 𑀤𑀸𑀦𑀺, 𑀤𑁂𑀯𑀧𑀼𑀢𑁆𑀢 𑀫𑀳𑀺𑀤𑁆𑀥𑀺𑀓;

𑀤𑀤𑀸𑀲𑀺 𑀫𑁂 𑀲𑀼𑀯𑀡𑁆𑀡𑀜𑁆𑀘, 𑀓𑀸𑀫𑀤𑀁 𑀫𑀡𑀺𑀫𑀼𑀢𑁆𑀢𑀫𑀁.

𑁪.

𑀦𑀸𑀧𑀺 𑀓𑁄 𑀦𑁄 𑀢𑀼𑀯𑀁 𑀜𑀸𑀢𑀺,

𑀦 𑀫𑀺𑀢𑁆𑀢𑁄 𑀦𑁄𑀧𑀓𑀸𑀭𑀓𑁄;

𑀓𑀺𑀁 𑀢𑁆𑀯𑀁 𑀅𑀢𑁆𑀣𑀯𑀲𑀁 𑀤𑀺𑀲𑁆𑀯𑀸,

𑀫𑀫 𑀤𑀚𑁆𑀚𑀸𑀲𑀺𑀫𑀁 𑀥𑀦𑀁.

𑁫.

𑀓𑁂𑀦 𑀢𑀧𑁂𑀦 𑀲𑀻𑀮𑁂𑀦, 𑀓𑁂𑀦𑀸𑀘𑀸𑀭𑀕𑀼𑀡𑁂𑀦 𑀘;

𑀬𑁂𑀦 𑀤𑀚𑁆𑀚𑀸𑀲𑀺 𑀫𑁂 𑀤𑁂𑀯, 𑀓𑀺𑀁 𑀫𑁂 𑀲𑀼𑀘𑀭𑀺𑀢𑀁 𑀘𑀺𑀢𑀁.

𑁬.

𑀓𑀺𑀦𑁆𑀦𑀼 𑀧𑀼𑀭𑀸𑀢𑀦𑀁 𑀓𑀫𑁆𑀫𑀁, 𑀓𑁂𑀦 𑀓𑀫𑁆𑀫𑁂𑀦 𑀤𑀲𑁆𑀲𑀲𑀺;

𑀅𑀣𑀯𑀸 𑀢𑀯𑀺𑀤𑁆𑀥𑀺𑀬𑀸 𑀤𑁂𑀲𑀺, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄𑀢𑀺.

𑀢𑀢𑁄 𑀤𑁂𑀯𑀧𑀼𑀢𑁆𑀢𑁄 𑀦 𑀔𑁄 𑀧𑀦𑀸𑀳𑀁 𑀩𑁆𑀭𑀸𑀳𑁆𑀫𑀡 𑀤𑁂𑀯𑁄𑀢𑀺 𑀧𑀭𑁂𑀲𑀁 𑀓𑀺𑀜𑁆𑀘𑀺 𑀤𑀸𑀢𑀼𑀁 𑀲𑀓𑁆𑀓𑁄𑀫𑀺, 𑀢𑀬𑀸 𑀧𑀼𑀩𑁆𑀩𑁂 𑀓𑀢𑀲𑀼𑀘𑀭𑀺𑀢𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀯𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀧𑀓𑀸𑀲𑁂𑀦𑁆𑀢𑁄 𑀆𑀳.

𑁭.

𑀓𑀲𑁆𑀲𑀧𑁂 𑀮𑁄𑀓𑀧𑀚𑁆𑀚𑁄𑀢𑁂, 𑀲𑀫𑁆𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂;

𑀲𑀩𑁆𑀩𑀢𑁆𑀣 𑀧𑀢𑁆𑀣𑀝𑀁 𑀆𑀲𑀺, 𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑁮.

𑀢𑀤𑀸 𑀧𑀘𑁆𑀘𑀦𑁆𑀢𑀺𑀫𑁂 𑀕𑀸𑀫𑁂, 𑀢𑁆𑀯𑀫𑀸𑀲𑀺 𑀓𑀼𑀮𑀤𑀸𑀭𑀓𑁄;

𑀲𑀤𑁆𑀥𑁄 𑀆𑀲𑀺 𑀧𑀲𑀦𑁆𑀦𑁄 𑀘, 𑀤𑀸𑀬𑀓𑁄 𑀓𑀼𑀲𑀮𑁂 𑀭𑀢𑁄.

𑁯.

𑀢𑀤𑀸 𑀧𑀩𑁆𑀩𑀚𑀺𑀢𑁄 𑀏𑀓𑁄, 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀧𑀣𑁂;

𑀘𑁄𑀭𑁂𑀳𑀺 𑀅𑀦𑀼𑀩𑀤𑁆𑀥𑁄𑀲𑀺, 𑀅𑀘𑁆𑀙𑀺𑀦𑁆𑀦𑀧𑀢𑁆𑀢𑀘𑀻𑀯𑀭𑁄.

𑁧𑁦.

𑀲𑀸𑀔𑀸𑀪𑀗𑁆𑀕𑀁 𑀦𑀺𑀯𑀸𑀲𑁂𑀢𑁆𑀯𑀸, 𑀧𑀸𑀭𑀼𑀧𑀺𑀢𑁆𑀯𑀸 𑀢𑀣𑁂𑀯 𑀢𑀁;

𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀝𑁆𑀞𑁄𑀲𑀺, 𑀏𑀲𑀫𑀸𑀦𑁄 𑀧𑀺𑀮𑁄𑀢𑀺𑀓𑁂.

𑁧𑁧.

𑀢𑀢𑁄 𑀢𑁆𑀯𑀁 𑀘𑀭𑀫𑀸𑀦𑀁 𑀢𑀁, 𑀤𑀺𑀲𑁆𑀯𑀸 𑀓𑀫𑁆𑀧𑀺𑀢𑀫𑀸𑀦𑀲𑁄;

𑀯𑀢𑁆𑀣𑀬𑀼𑀕𑀁 𑀅𑀤𑀸𑀲𑀺 𑀢𑁆𑀯𑀁, 𑀲𑀤𑁆𑀤𑀳𑀁 𑀤𑀸𑀦𑀢𑁄 𑀨𑀮𑀁.

𑁧𑁨.

𑀧𑀢𑁆𑀣𑁄𑀤𑀦𑁂𑀦 ¶ 𑀢𑀁 𑀪𑀺𑀓𑁆𑀔𑀼𑀁, 𑀧𑀭𑀺𑀯𑀺𑀲𑀺𑀢𑁆𑀯𑀸 𑀬𑀣𑀸𑀩𑀮𑀁;

𑀧𑁂𑀲𑁂𑀲𑀺 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀲𑀤𑁆𑀥𑀸𑀬 𑀲𑀼𑀤𑁆𑀥𑀫𑀸𑀦𑀲𑁄.

𑁧𑁩.

𑀇𑀫𑀁 𑀢𑁆𑀯𑀁 𑀅𑀓𑀭𑀻 𑀧𑀼𑀜𑁆𑀜𑀁, 𑀢𑀼𑀬𑁆𑀳𑁂𑀢𑀁 𑀘𑀭𑀺𑀢𑀁 𑀇𑀫𑀁;

𑀢𑀲𑁆𑀲 𑀢𑁂 𑀧𑀼𑀜𑁆𑀜𑀓𑀫𑁆𑀫𑀲𑁆𑀲, 𑀅𑀫𑀼𑀔𑁆𑀬𑀨𑀮 𑀫𑀻𑀤𑀺𑀲𑀁𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀇𑀤𑀁 𑀢𑁂 𑀩𑁆𑀭𑀸𑀳𑁆𑀫𑀡 𑀥𑀦𑀁 𑀭𑀸𑀚𑀸𑀤𑀻𑀳𑀺 𑀫𑀬𑀸 𑀅𑀦𑀸𑀳𑀭𑀡𑀻𑀬𑀁 𑀓𑀢𑀁, 𑀢𑁆𑀯𑀁 𑀅𑀧𑀭𑀺𑀲𑀗𑁆𑀓𑀦𑁆𑀢𑁄 𑀕𑀳𑁂𑀢𑁆𑀯𑀸 𑀬𑀣𑀸𑀥𑀺𑀧𑁆𑀧𑀸𑀬𑀁 𑀓𑀭𑁄𑀳𑀺, 𑀇𑀫𑀁 𑀔𑁄 𑀧𑀦 𑀫𑀡𑀺𑀭𑀢𑀦𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀧𑀲𑀯𑀢𑀺, 𑀢𑁂𑀦𑀸𑀧𑀺 𑀆𑀦𑀼𑀪𑀸𑀯𑁂𑀦 𑀢𑀯 𑀤𑀸𑀦𑀁 𑀅𑀦𑀼𑀧𑀘𑁆𑀙𑀺𑀦𑁆𑀤𑀦𑁆𑀢𑁄 𑀧𑀼𑀢𑁆𑀢𑀤𑀸𑀭𑀸𑀤𑀬𑁄 𑀧𑁄𑀲𑁂𑀳𑀻𑀢𑀺 𑀅𑀦𑀼𑀲𑀸𑀲𑀺, 𑀢𑀁 𑀲𑀼𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁄 𑀢𑁂𑀦 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀤𑀦𑁆𑀢𑁄 𑀲𑀻𑀮𑀁 𑀭𑀓𑁆𑀔𑀦𑁆𑀢𑁄 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀻𑀢𑀺.

𑁧𑁪.

𑀏𑀯𑀁 𑀦𑀺𑀳𑀻𑀦𑀸𑀧𑀻 𑀥𑀦𑁂𑀦 𑀲𑀦𑁆𑀢𑁄,

𑀤𑀸𑀦𑀦𑁆𑀯𑀬𑀁 𑀦𑁂𑀯 𑀧𑀭𑀺𑀘𑁆𑀘𑀚𑀦𑁆𑀢𑀺;

𑀢𑀲𑁆𑀫𑀸 𑀳𑀺 𑀪𑁄𑀦𑁆𑀢𑁄 𑀲𑀢𑀺 𑀤𑁂𑀬𑁆𑀬𑀥𑀫𑁆𑀫𑁂,

𑀫𑀸 𑀓𑀢𑁆𑀣 𑀤𑀸𑀦𑁂𑀲𑀼 𑀧𑀫𑀸𑀤𑀪𑀸𑀯𑀁𑀢𑀺.

𑀫𑁄𑀭𑀺𑀬𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀢𑁆𑀣𑀼𑀁 𑀙𑀝𑁆𑀞𑀫𑀁.

𑁩𑁭. 𑀧𑀼𑀢𑁆𑀢𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀏𑀓𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀮𑀗𑁆𑀓𑀸𑀤𑀻𑀧𑀯𑀸𑀲𑀺𑀦𑁄 𑀲𑀝𑁆𑀞𑀺𑀫𑀢𑁆𑀢𑀸 𑀪𑀺𑀓𑁆𑀔𑀽 𑀚𑀬𑀫𑀳𑀸𑀩𑁄𑀥𑀺𑀁 𑀯𑀦𑁆𑀤𑀺𑀢𑀼𑀓𑀸𑀫𑀸 𑀏𑀓𑀢𑁄 𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀢𑀺𑀢𑁆𑀣𑁂𑀦 𑀦𑀸𑀯𑀁 𑀆𑀭𑀼𑀬𑁆𑀳 𑀚𑀫𑁆𑀩𑀼𑀤𑀻𑀧𑀁 𑀧𑀢𑁆𑀯𑀸 𑀢𑀸𑀫𑀮𑀺𑀢𑁆𑀢𑀺𑀧𑀝𑁆𑀞𑁂𑀦𑁂 [𑀢𑀫𑀮𑀺𑀢𑁆𑀢𑀧𑀝𑁆𑀝𑀦𑁂 𑀇𑀢𑀺𑀓𑀢𑁆𑀣𑀘𑀺] 𑀑𑀢𑀭𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑀁 𑀧𑀸𑀧𑀼𑀡𑀺𑀁𑀲𑀼. 𑀅𑀣 𑀢𑀲𑁆𑀫𑀺𑀁 ¶ 𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁂 𑀢𑁂 𑀪𑀺𑀓𑁆𑀔𑀽 𑀏𑀓𑁄 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑁄 𑀤𑀺𑀲𑁆𑀯𑀸 𑀘𑀺𑀭𑁂𑀦 [𑀘𑀺𑀭𑁂𑀦𑀸𑀳𑀁𑀤𑀺𑀝𑁆𑀞𑀸 𑀇𑀢𑀺𑀲𑀩𑁆𑀩𑀢𑁆𑀣] 𑀫𑀬𑀸 𑀤𑀺𑀝𑁆𑀞𑀸 𑀩𑀼𑀤𑁆𑀥𑀧𑀼𑀢𑁆𑀢𑀸𑀢𑀺 𑀲𑁄𑀫𑀦𑀲𑁆𑀲𑁄 𑀪𑀭𑀺𑀬𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀪𑀤𑁆𑀤𑁂 𑀇𑀫𑁂𑀲𑀁 𑀅𑀬𑁆𑀬𑀸𑀦𑀁 𑀤𑀸𑀦𑀁 𑀤𑀸𑀢𑀼𑀓𑀸𑀫𑁄𑀫𑁆𑀳𑀺, 𑀧𑀼𑀩𑁆𑀩𑁂 𑀦𑁄 𑀅𑀓𑀢𑀧𑀼𑀜𑁆𑀜𑀢𑁆𑀢𑀸 𑀇𑀤𑀸𑀦𑀺 𑀤𑀼𑀕𑁆𑀕𑀢𑀸 𑀚𑀸𑀢𑀸, 𑀇𑀫𑁂𑀲𑀼 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑁂𑀲𑀼 𑀩𑀻𑀚𑀁 𑀦𑁄 𑀘𑁂 𑀭𑁄𑀧𑁂𑀲𑁆𑀲𑀸𑀫, 𑀧𑀼𑀦𑀧𑀺 𑀏𑀯𑀫𑁂𑀯 𑀪𑀯𑀺𑀲𑁆𑀲𑀸𑀫𑀸𑀢𑀺 𑀯𑀢𑁆𑀯𑀸 𑀓𑀺𑀁 𑀫𑁂 𑀕𑁂𑀳𑁂 𑀤𑁂𑀬𑁆𑀬𑀥𑀫𑁆𑀫𑀁 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀺. 𑀲𑀸 𑀢𑀁 𑀲𑀼𑀢𑁆𑀯𑀸 𑀖𑀭𑁂 𑀦𑁄 𑀲𑀸𑀫𑀺 𑀅𑀬𑁆𑀬𑀸𑀦𑀁 𑀓𑀺𑀜𑁆𑀘𑀺 𑀤𑀸𑀢𑀩𑁆𑀩𑀁 𑀦 𑀧𑀲𑁆𑀲𑀸𑀫𑀺. 𑀅𑀧𑀺 𑀘 𑀫𑀫 𑀧𑀼𑀢𑁆𑀢𑀁 𑀫𑀸𑀭𑁂𑀢𑁆𑀯𑀸 𑀤𑀸𑀦𑀁 𑀤𑀸𑀢𑀼𑀁 𑀲𑀓𑁆𑀓𑀸𑀢𑀺. 𑀲𑁄 𑀢𑀲𑁆𑀲𑀸 𑀓𑀣𑀁 𑀲𑀼𑀢𑁆𑀯𑀸 𑀪𑀤𑁆𑀤𑁂 𑀧𑀼𑀢𑁆𑀢𑀁 𑀫𑀸𑀭𑁂𑀢𑁆𑀯𑀸 𑀓𑀺𑀁 𑀤𑀸𑀦𑀁 𑀤𑁂𑀫𑀸𑀢𑀺 𑀆𑀳. 𑀢𑀸𑀬 𑀢𑀁 𑀲𑀼𑀢𑁆𑀯𑀸 𑀲𑀸𑀫𑀺 𑀓𑀺𑀁 𑀦 𑀚𑀸𑀦𑀸𑀲𑀺, 𑀧𑀼𑀢𑁆𑀢𑁂 𑀦𑁄 𑀫𑀢𑁂 𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑀸 𑀜𑀸𑀢𑀺𑀫𑀺𑀢𑁆𑀢𑀲𑀼𑀳𑀚𑁆𑀚𑀸 𑀘 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀸𑀦𑁆𑀢𑀸 𑀓𑀺𑀜𑁆𑀘𑀺 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀺. 𑀫𑀬𑀁 𑀢𑁂𑀦 𑀧𑀡𑁆𑀡𑀸𑀓𑀸𑀭𑁂𑀦 𑀤𑀸𑀦𑀁 𑀤𑀲𑁆𑀲𑀸𑀫𑀸𑀢𑀺 𑀯𑀼𑀢𑁆𑀢𑁂 𑀉𑀧𑀸𑀲𑀓𑁄 𑀲𑀸𑀥𑀼 𑀢𑀣𑀸 𑀓𑀭𑁄𑀳𑀻𑀢𑀺 𑀫𑀸𑀢𑀼𑀬𑀸 𑀏𑀯 𑀪𑀸𑀭𑀫𑀓𑀸𑀲𑀺, 𑀲𑀸 𑀧𑀼𑀢𑁆𑀢𑀁 𑀫𑀸𑀭𑁂𑀢𑀼𑀁 𑀅𑀯𑀺𑀲𑀳𑀦𑁆𑀢𑀻 𑀆𑀳. 𑀢𑀣𑀸 𑀳𑀺.

𑁧.

𑀓𑀺𑀘𑁆𑀙𑀸 𑀮𑀤𑁆𑀥𑀁 𑀧𑀺𑀬𑀁 𑀧𑀼𑀢𑁆𑀢𑀁, 𑀅𑀫𑁆𑀫𑀫𑁆𑀫𑀸𑀢𑀺 𑀧𑀺𑀬𑀁 𑀯𑀤𑀁;

𑀲𑀼𑀦𑀻𑀮𑀦𑁂𑀢𑁆𑀢𑀁 𑀲𑀼𑀪𑀫𑀼𑀁, 𑀓𑁄 𑀧𑀓𑁆𑀓𑀫𑀺𑀢𑀼𑀫𑀺𑀘𑁆𑀙𑀢𑀺.

𑁨.

𑀫𑀸𑀢𑀭𑀸 𑀫𑀸𑀭𑀺𑀬𑀦𑁆𑀢𑁄𑀧𑀺, 𑀫𑀸𑀢𑀭𑀫𑁂𑀯 𑀭𑁄𑀤𑀢𑀺;

𑀫𑀸𑀭𑁂𑀢𑀼𑀁 𑀢𑀁 𑀦 𑀲𑀓𑁆𑀓𑁄𑀫𑀺, 𑀳𑀤𑀬𑀁 𑀫𑁂 𑀧𑀯𑁂𑀥𑀢𑀻𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀅𑀳𑀁 𑀲𑀸𑀫𑀺 𑀦 𑀲𑀓𑁆𑀓𑁄𑀫𑀺 𑀧𑀼𑀢𑁆𑀢𑀁 𑀫𑀸𑀭𑁂𑀢𑀼𑀁. 𑀢𑁆𑀯𑀁 𑀫𑀸𑀭𑁂𑀳𑀻𑀢𑀺 𑀧𑀼𑀢𑁆𑀢𑀁 𑀧𑀺𑀢𑀼𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺. 𑀅𑀣 𑀲𑁄𑀧𑀺 𑀢𑀁 𑀫𑀸𑀭𑁂𑀢𑀼 𑀫𑀲𑀓𑁆𑀓𑁄𑀦𑁆𑀢𑁄 𑀏𑀯𑀫𑀸𑀳. 𑀯𑀼𑀢𑁆𑀢𑀜𑁆𑀳𑀺.

𑁩.

𑀢𑀸𑀬𑀦𑁆𑀢𑀺 𑀧𑀺𑀢𑀼𑀦𑁄 𑀤𑀼𑀓𑁆𑀔𑀁, 𑀧𑀼𑀢𑁆𑀢𑀸 𑀧𑀼𑀢𑁆𑀢𑀸𑀢𑀺 𑀓𑀺𑀢𑁆𑀢𑀺𑀢𑀸;

𑀧𑀺𑀢𑀼 𑀤𑀼𑀓𑁆𑀔𑀁 𑀲𑀼𑀔𑀁 𑀧𑀼𑀢𑁆𑀢𑀸, 𑀤𑀸𑀬𑀸𑀤𑀸 𑀳𑁄𑀦𑁆𑀢𑀺 𑀲𑀩𑁆𑀩𑀤𑀸.

𑁪.

𑀢𑀲𑁆𑀫𑀸 ¶ 𑀫𑁂 𑀲𑀤𑀺𑀲𑀁 𑀧𑀼𑀢𑁆𑀢𑀁, 𑀧𑀺𑀮𑁆𑀮𑀓𑀁 𑀫𑀜𑁆𑀚𑀼𑀪𑀸𑀲𑀦𑀁;

𑀦 𑀲𑀓𑁆𑀓𑁄𑀫𑀺 𑀅𑀳𑀁 𑀪𑀤𑁆𑀤𑁂, 𑀚𑀻𑀯𑀺𑀢𑀸 𑀢𑀁 𑀯𑀺𑀬𑁄𑀚𑀺𑀢𑀼𑀁.

𑁫.

𑀅𑀬𑀲𑀜𑁆𑀘 𑀅𑀓𑀺𑀢𑁆𑀢𑀺𑀜𑁆𑀘, 𑀧𑀧𑁆𑀧𑁄𑀢𑀺 𑀧𑀼𑀢𑁆𑀢𑀖𑀸𑀢𑀓𑁄;

𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀫𑁆𑀧𑀺, 𑀓𑀸𑀫𑀁 𑀲𑁄 𑀨𑀼𑀲𑀢𑁂 𑀦𑀭𑁄𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀲𑁄 𑀢𑁆𑀯𑀫𑁂𑀯 𑀢𑀯 𑀧𑀼𑀢𑁆𑀢𑀁 𑀫𑀸𑀭𑁂𑀳𑀻𑀢𑀺 𑀧𑁂𑀲𑁂𑀲𑀺, 𑀏𑀯𑀁 𑀢𑁂𑀦 𑀯𑀼𑀢𑁆𑀢𑁂 𑀧𑀼𑀢𑁆𑀣𑀲𑁆𑀲 𑀫𑀸𑀭𑀧𑀸𑀡𑀽𑀧𑀸𑀬𑀁 𑀧𑀭𑀺𑀬𑁂𑀲𑀦𑁆𑀢𑀸 𑀏𑀯𑀫𑀸𑀳𑀁𑀲𑀼, 𑀅𑀫𑁆𑀳𑁂 𑀧𑀦𑀺𑀫𑀁 𑀫𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀅𑀫𑁆𑀳𑀸𑀓𑀁 𑀧𑀘𑁆𑀙𑀸𑀕𑁂𑀳𑁂 𑀫𑀳𑀦𑁆𑀢𑁄 𑀯𑀫𑁆𑀫𑀺𑀓𑁄 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀏𑀓𑁄 𑀦𑀸𑀕𑀭𑀸𑀚𑀸 𑀧𑀝𑀺𑀯𑀲𑀢𑀺. 𑀓𑀼𑀫𑀸𑀭𑀁 𑀢𑀢𑁆𑀣 𑀧𑁂𑀲𑁂𑀲𑁆𑀲𑀸𑀫, 𑀲𑁄 𑀢𑀁 𑀟𑀲𑀺𑀢𑁆𑀯𑀸 𑀫𑀸𑀭𑁂𑀲𑁆𑀲𑀢𑀻𑀢𑀺. 𑀇𑀘𑁆𑀘𑁂𑀢𑁂 𑀏𑀲𑁄 𑀔𑁄 𑀉𑀧𑀸𑀬𑁄 𑀏𑀯𑀸𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀼𑀫𑀸𑀭𑀁 𑀧𑀓𑁆𑀓𑁄𑀲𑀺𑀢𑁆𑀯𑀸 𑀅𑀜𑁆𑀘𑀦𑀸 𑀯𑀮𑀺𑀯𑀮𑀬𑀸𑀤𑀻𑀳𑀺 𑀫𑀡𑁆𑀟𑁂𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑁂 𑀕𑁂𑀡𑁆𑀟𑀼𑀁 [𑀢𑁂𑀡𑁆𑀟𑀼𑀁 𑀇𑀢𑀺𑀲𑀩𑁆𑀩𑀢𑁆𑀣] 𑀞𑀧𑁂𑀢𑁆𑀯𑀸 𑀢𑀸𑀢 𑀧𑀘𑁆𑀙𑀸𑀕𑁂𑀳𑁂 𑀯𑀫𑁆𑀫𑀺𑀓𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀓𑀻𑀴𑀸𑀢𑀺 𑀧𑁂𑀲𑁂𑀲𑀼𑀁. 𑀢𑀢𑁄 𑀤𑀸𑀭𑀓𑁄 𑀕𑀦𑁆𑀢𑁆𑀯𑀸 𑀕𑁂𑀡𑁆𑀟𑀼𑀓𑁂𑀦 𑀓𑀻𑀴𑀦𑁆𑀢𑁄 𑀯𑀫𑁆𑀫𑀺𑀓𑀩𑀺𑀮𑁂 𑀕𑁂𑀡𑁆𑀟𑀼𑀓𑀁 𑀧𑀸𑀢𑁂𑀲𑀺. 𑀅𑀣 𑀲𑁄 𑀕𑁂𑀡𑁆𑀟𑀼𑀓𑀁 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀯𑀫𑁆𑀫𑀺𑀓𑀲𑀼𑀲𑀺𑀭𑁂 𑀳𑀢𑁆𑀣𑀁 𑀧𑀯𑁂𑀲𑁂𑀲𑀺. 𑀢𑀢𑁄 𑀲𑀧𑁆𑀧𑁄 𑀓𑀼𑀚𑁆𑀛𑀺𑀢𑁆𑀯𑀸 𑀲𑀼𑀲𑀽𑀢𑀺𑀲𑀤𑁆𑀤𑀁 𑀓𑀭𑁄𑀦𑁆𑀢𑁄 𑀫𑀳𑀦𑁆𑀢𑀁 𑀨𑀡𑀁 𑀓𑀢𑁆𑀯𑀸 𑀩𑀺𑀮𑀢𑁄 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺 𑀓𑀼𑀫𑀸𑀭𑀲𑁆𑀲 𑀳𑀢𑁆𑀣𑀢𑁄 𑀧𑀭𑀺𑀕𑀮𑀺𑀢𑀧𑀸𑀲𑀁𑀯𑀺𑀬. 𑀅𑀣𑀲𑁆𑀲 𑀓𑀼𑀫𑀸𑀭𑁄 𑀓𑀺𑀜𑁆𑀘𑀺 𑀅𑀚𑀸𑀦𑀦𑁆𑀢𑁄 𑀲𑀧𑁆𑀧𑀲𑁆𑀲 𑀕𑀻𑀯𑀁 𑀤𑀴𑁆𑀳𑀁 𑀕𑀡𑁆𑀳𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺𑀢𑀼𑀦𑁆𑀦𑀁 𑀲𑀤𑁆𑀥𑀸𑀩𑀮𑁂𑀦 𑀦𑀸𑀕𑀭𑀸𑀚𑀸 𑀓𑀼𑀫𑀸𑀭𑀲𑁆𑀲 𑀓𑀭𑀢𑀮𑁂 𑀅𑀝𑁆𑀞𑀁𑀲𑀁 𑀇𑀘𑁆𑀙𑀸𑀤𑀸𑀬𑀓𑀁 𑀓𑀡𑁆𑀞𑀫𑀡𑀺𑀭𑀢𑀦𑀁 𑀧𑀸𑀢𑁂𑀲𑀺. 𑀓𑀼𑀫𑀸𑀭𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀤𑁆𑀯𑀸𑀭𑀁 𑀦𑀺𑀲𑁆𑀲𑀸𑀬 𑀞𑀺𑀢𑀸 𑀢𑀲𑁆𑀲 𑀓𑀺𑀭𑀺𑀬𑀁 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀫𑀡𑀺𑀭𑀢𑀦𑀁 𑀤𑀺𑀲𑁆𑀯𑀸 𑀲𑀻𑀖𑀁 𑀕𑀦𑁆𑀢𑁆𑀯𑀸 𑀧𑀼𑀢𑁆𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀳𑀢𑁆𑀣𑀢𑁄 𑀫𑀡𑀺𑀭𑀢𑀦𑀁 𑀕𑀡𑁆𑀳𑀺𑀁𑀲𑀼. 𑀢𑀢𑁄 𑀢𑁂 𑀢𑀁 𑀫𑀡𑀺𑀭𑀢𑀦𑀁 𑀧𑀭𑀺𑀲𑀼𑀤𑁆𑀥𑀸𑀲𑀦𑁂 𑀞𑀧𑁂𑀢𑁆𑀯𑀸 𑀉𑀧𑀘𑀸𑀭𑀁 𑀓𑀢𑁆𑀯𑀸 𑀅𑀫𑁆𑀳𑀸𑀓𑀁 𑀇𑀤𑀜𑁆𑀘𑀺𑀤𑀜𑁆𑀘 𑀤𑁂𑀣𑀸𑀢𑀺 𑀅𑀩𑁆𑀪𑀼𑀓𑁆𑀓𑀺𑀭𑀺𑀁𑀲𑀼. 𑀅𑀣 𑀢𑁂 𑀫𑀡𑀺𑀭𑀢𑀦𑀸𑀦𑀼𑀪𑀸𑀯𑁂𑀦 𑀕𑁂𑀳𑀤𑁆𑀯𑀸𑀭𑁂 𑀫𑀳𑀦𑁆𑀢𑀁 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀯𑀺𑀢𑀸𑀦𑀸𑀤𑀺𑀦𑀸 𑀫𑀡𑁆𑀟𑀧𑀁 ¶ 𑀅𑀮𑀗𑁆𑀓𑀭𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑁂 𑀲𑀝𑁆𑀞𑀺𑀫𑀢𑁆𑀢𑁂 𑀪𑀺𑀓𑁆𑀔𑀽 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀅𑀤𑀁𑀲𑀼. 𑀢𑀢𑁄 𑀦𑀕𑀭𑀯𑀸𑀲𑀺𑀦𑁄 𑀫𑀡𑀺𑀭𑀢𑀦𑀸𑀦𑀼𑀪𑀸𑀯𑀁 𑀲𑀼𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀅𑀣 𑀢𑁂 𑀢𑁂𑀲𑀁 𑀫𑀚𑁆𑀛𑁂 𑀅𑀢𑁆𑀢𑀦𑁄 𑀲𑀤𑁆𑀥𑀸𑀩𑀮𑁂𑀦 𑀫𑀡𑀺𑀭𑀢𑀦𑀲𑁆𑀲 𑀮𑀸𑀪𑀁 𑀧𑀓𑀸𑀲𑁂𑀢𑁆𑀯𑀸 𑀇𑀫𑀜𑁆𑀳𑀺 𑀤𑀸𑀦𑀢𑁆𑀣𑀸𑀬𑁂𑀯 𑀧𑀭𑀺𑀘𑁆𑀘𑀚𑁆𑀚𑀸𑀫𑀸𑀢𑀺 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑁂𑀦𑀸𑀦𑀼𑀪𑀸𑀯𑁂𑀦 𑀬𑀸𑀯𑀚𑀻𑀯𑀁 𑀤𑀸𑀦𑀁 𑀤𑀤𑀦𑁆𑀢𑀸 𑀲𑀻𑀮𑀁 𑀭𑀓𑁆𑀔𑀦𑁆𑀢𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀽𑀢𑀺.

𑁬.

𑀙𑁂𑀢𑁆𑀯𑀸𑀦 𑀧𑁂𑀫𑀁 𑀅𑀧𑀺 𑀅𑀢𑁆𑀭𑀚𑁂𑀲𑀼,

𑀤𑀤𑀦𑁆𑀢𑀺 𑀤𑀸𑀦𑀁 𑀇𑀥 𑀫𑀸𑀦𑀼𑀲𑁂𑀯𑀁;

𑀦 𑀤𑀤𑀸𑀢𑀺 𑀓𑁄 𑀦𑀸𑀫 𑀦𑀭𑁄 𑀲𑀫𑀺𑀤𑁆𑀥𑁄,

𑀤𑀸𑀦𑀜𑁆𑀳𑀺 𑀤𑀸𑀦𑀲𑁆𑀲 𑀨𑀮𑀁 𑀲𑀭𑀦𑁆𑀢𑁄𑀢𑀺.

𑀧𑀼𑀢𑁆𑀢𑀯𑀢𑁆𑀣𑀼𑀁 𑀲𑀢𑁆𑀢𑀫𑀁.

𑁩𑁮. 𑀢𑁂𑀪𑀸𑀢𑀺𑀓𑀫𑀥𑀼𑀯𑀸𑀡𑀺𑀚𑀓𑀸𑀦𑀁 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀅𑀢𑀻𑀢𑁂 𑀓𑀺𑀭 𑀩𑀸𑀭𑀸𑀡𑀲𑀺𑀬𑀁 𑀢𑁂 𑀪𑀸𑀢𑀺𑀓𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀫𑀥𑀼𑀁 𑀯𑀺𑀓𑁆𑀓𑀺𑀡𑀦𑁆𑀢𑀸 𑀧𑀼𑀢𑁆𑀢𑀤𑀸𑀭𑁂 𑀧𑁄𑀲𑁂𑀦𑁆𑀢𑀺. 𑀢𑀢𑁄 𑀢𑁂𑀲𑀼 𑀏𑀓𑁄 𑀧𑀘𑁆𑀘𑀦𑁆𑀢𑀁 𑀕𑀦𑁆𑀢𑁆𑀯𑀸 𑀫𑀮𑀬𑀯𑀸𑀲𑀻𑀦𑀁 [𑀫𑀮𑀯𑀸𑀲𑀻𑀦𑀁 𑀇𑀢𑀺𑀧𑀺𑀓𑀢𑁆𑀣𑀘𑀺] 𑀳𑀢𑁆𑀣𑀢𑁄 𑀫𑀥𑀼𑀁 𑀓𑀺𑀡𑀺𑀢𑁆𑀯𑀸 [𑀯𑀓𑁆𑀓𑀺𑀡𑀺𑀢𑁆𑀯𑀸 𑀇𑀢𑀺𑀲𑀩𑁆𑀩𑀢𑁆𑀣] 𑀕𑀡𑁆𑀳𑀸𑀢𑀺, 𑀏𑀓𑁄 𑀕𑀳𑀺𑀢𑀕𑀳𑀺𑀢𑀫𑀥𑀼𑀁 𑀦𑀕𑀭𑀁 𑀆𑀳𑀭𑀢𑀺. 𑀏𑀓𑁄 𑀢𑁂𑀦 𑀆𑀳𑀝𑀸𑀳𑀝𑀫𑀥𑀽𑀦𑀺 𑀩𑀸𑀭𑀸𑀡𑀲𑀺𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀯𑀺𑀓𑁆𑀓𑀺𑀡𑀸𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑁂 𑀏𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀯𑀡𑀭𑁄𑀕𑁂𑀦𑀸 𑀢𑀼𑀭𑁄 𑀅𑀳𑁄𑀲𑀺. 𑀅𑀣𑀜𑁆𑀜𑀢𑀭𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀲𑁆𑀲 𑀫𑀥𑀼𑀦𑀸 𑀨𑀸𑀲𑀼 𑀪𑀯𑀺𑀲𑁆𑀲𑀢𑀻𑀢𑀺 𑀜𑀢𑁆𑀯𑀸 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑁂𑀬𑁂𑀯 𑀞𑀺𑀢𑁄 ¶ 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀆𑀓𑀸𑀲𑁂𑀦𑀸 𑀕𑀦𑁆𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀑𑀢𑀭𑀺𑀢𑁆𑀯𑀸 𑀓𑀢𑁆𑀣 𑀫𑀥𑀼𑀁 𑀮𑀪𑀸𑀫𑀻𑀢𑀺 [𑀮𑀩𑁆𑀪𑀢𑀺 𑀇𑀢𑀺𑀲𑀩𑁆𑀩𑀢𑁆𑀣] 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀻, 𑀢𑀤𑀸 𑀢𑀲𑁆𑀫𑀺𑀁𑀧𑀭𑀓𑀼𑀮𑁂 𑀪𑀢𑀺𑀁 𑀓𑀢𑁆𑀯𑀸 𑀚𑀻𑀯𑀫𑀸𑀦𑀸 𑀏𑀓𑀸 𑀘𑁂𑀝𑀺𑀓𑀸 𑀖𑀝𑀫𑀸𑀤𑀸𑀬 𑀉𑀤𑀓𑀢𑁆𑀣𑀁 𑀢𑀺𑀢𑁆𑀣𑀁 𑀕𑀘𑁆𑀙𑀦𑁆𑀢𑀻 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀖𑀝𑀁 𑀞𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺, 𑀢𑀤𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀕𑀺𑀦𑀻 𑀏𑀢𑁆𑀣 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑀸𑀦𑀁 𑀓𑀢𑀭𑀲𑁆𑀫𑀺𑀁 𑀞𑀸𑀦𑁂 𑀫𑀥𑀼 𑀮𑀩𑁆𑀪𑀢𑀻𑀢𑀺 𑀧𑀼𑀘𑁆𑀙𑀺. 𑀲𑀸 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀫𑀥𑀼𑀆𑀧𑀡𑀲𑁆𑀲 𑀧𑀜𑁆𑀜𑀸𑀬𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀏𑀲 𑀪𑀦𑁆𑀢𑁂 𑀫𑀥𑀼𑀆𑀧𑀡𑁄𑀢𑀺 𑀤𑀲𑁆𑀲𑁂𑀢𑁆𑀯𑀸 𑀬𑀚𑁆𑀚𑀸𑀬𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀆𑀧𑀡𑀢𑁄 𑀫𑀥𑀼𑀁 𑀦 𑀮𑀪𑀢𑀺. 𑀫𑀫 𑀦𑀺𑀯𑀢𑁆𑀣𑀯𑀢𑁆𑀣𑀓𑀁 𑀤𑀢𑁆𑀯𑀸𑀧𑀺 𑀫𑀥𑀼𑀁 𑀤𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀻 𑀢𑀢𑁆𑀣𑁂𑀯 𑀅𑀝𑁆𑀞𑀸𑀲𑀺, 𑀅𑀣 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀅𑀦𑀼𑀧𑀼𑀩𑁆𑀩𑁂𑀦 𑀯𑀺𑀘𑀭𑀦𑁆𑀢𑁄 [𑀘𑀭𑀦𑁆𑀢𑁄 𑀇𑀢𑀺𑀧𑀺𑀓𑀢𑁆𑀣𑀘𑀺] 𑀫𑀥𑀼𑀆𑀧𑀡𑀁 𑀲𑀫𑁆𑀧𑀸𑀧𑀼𑀡𑀺, 𑀢𑀢𑁄 𑀓𑀼𑀝𑀺𑀫𑁆𑀩𑀺𑀓𑁄 [𑀓𑀼𑀝𑀺𑀫𑁆𑀩 𑀓𑁄 𑀇𑀢𑀺𑀧𑀺𑀓𑀢𑁆𑀣𑀘𑀺] 𑀢𑀁 𑀤𑀺𑀲𑁆𑀯𑀸 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀥𑀸𑀭𑀓𑁂 𑀞𑀧𑁂𑀢𑁆𑀯𑀸 𑀫𑀥𑀼𑀖𑀝𑀁 𑀆𑀤𑀸𑀬 𑀧𑀢𑁆𑀢𑀲𑁆𑀲 𑀉𑀧𑀦𑀸𑀫𑁂𑀦𑁆𑀢𑁄 𑀲𑀳𑀲𑀸 𑀦𑀺𑀓𑁆𑀓𑀼𑀚𑁆𑀚𑀺. 𑀢𑀢𑁄 𑀫𑀥𑀼 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀉𑀢𑁆𑀢𑀭𑀦𑁆𑀢𑁄 𑀧𑀼𑀦 𑀪𑀽𑀫𑀺𑀬𑀁 𑀧𑀕𑁆𑀖𑀭𑀺. 𑀢𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑁄 𑀯𑀸𑀡𑀺𑀚𑁄 𑀏𑀯𑀁 𑀧𑀢𑁆𑀣𑀦𑀫𑀓𑀸𑀲𑀺.

𑀯𑀼𑀢𑁆𑀢𑀜𑁆𑀳𑀺 𑀫𑀳𑀸𑀯𑀁𑀲𑁂.

𑁧.

𑀢𑀢𑁆𑀣 𑀧𑀢𑁆𑀢𑀲𑁆𑀲 𑀩𑀼𑀤𑁆𑀥𑀲𑁆𑀲, 𑀯𑀸𑀡𑀺𑀚𑁄 𑀲𑁄 𑀧𑀲𑀸𑀤𑀯𑀸;

𑀯𑀺𑀲𑁆𑀲𑀦𑁆𑀤𑀬𑀦𑁆𑀢𑁄 𑀫𑀼𑀔𑀢𑁄, 𑀧𑀢𑁆𑀢𑀧𑀽𑀭𑀁 𑀫𑀥𑀼𑀁 𑀅𑀤𑀸.

𑁨.

𑀧𑀼𑀡𑁆𑀡𑀜𑁆𑀘 𑀉𑀧𑁆𑀧𑀢𑀻𑀢𑀜𑁆𑀘, 𑀧𑀢𑀺𑀢𑀜𑁆𑀘 𑀫𑀳𑀻𑀢𑀮𑁂;

𑀤𑀺𑀲𑁆𑀯𑀸 𑀫𑀥𑀼𑀁 𑀧𑀲𑀦𑁆𑀦𑁄 𑀲𑁄, 𑀏𑀯𑀁 𑀧𑀡𑀺𑀤𑀳𑀻 𑀢𑀤𑀸.

𑁩.

𑀚𑀫𑁆𑀩𑀼𑀤𑀻𑀧𑁂 𑀏𑀓𑀭𑀚𑁆𑀚𑀁, 𑀤𑀸𑀦𑁂𑀦𑀸𑀦𑁂𑀦 𑀳𑁄𑀢𑀼 𑀫𑁂;

𑀆𑀓𑀸𑀲𑁂 𑀬𑁄𑀚𑀦𑁂 𑀆𑀡𑀸, 𑀪𑀽𑀫𑀺𑀬𑀁 𑀬𑁄𑀚𑀦𑁂𑀧𑀺𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀧𑀢𑁆𑀢𑀁 𑀅𑀤𑀸𑀲𑀺, 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀧𑀢𑁆𑀢𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀢𑁆𑀣𑁂𑀯 𑀞𑀺𑀢𑁄.

𑁪.

𑀇𑀘𑁆𑀙𑀺𑀢𑀁 ¶ 𑀧𑀢𑁆𑀣𑀺𑀢𑀁 𑀢𑀼𑀬𑁆𑀳𑀁, 𑀔𑀺𑀧𑁆𑀧𑀫𑁂𑀯 𑀲𑀫𑀺𑀚𑁆𑀛𑀢𑀼;

𑀧𑀽𑀭𑁂𑀦𑁆𑀢𑀼 𑀘𑀺𑀢𑁆𑀣𑀲𑀁𑀓𑀧𑁆𑀧𑀸, 𑀘𑀦𑁆𑀤𑁄 𑀧𑀡𑁆𑀡𑀭𑀲𑁄 𑀬𑀣𑀸.

𑁫.

𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀁 𑀢𑀼𑀬𑁆𑀳𑀁, 𑀲𑀩𑁆𑀩𑀫𑁂𑀯 𑀲𑀫𑀺𑀚𑁆𑀛𑀢𑀼;

𑀧𑀽𑀭𑁂𑀦𑁆𑀢𑀼 𑀘𑀺𑀢𑁆𑀢𑀲𑀁𑀓𑀧𑁆𑀧𑀸, 𑀫𑀡𑀺𑀚𑁄𑀢𑀺𑀭𑀲𑁄 𑀬𑀣𑀸𑀢𑀺.

𑀯𑀢𑁆𑀯𑀸 𑀫𑀗𑁆𑀕𑀮𑀁 𑀯𑀟𑁆𑀠𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀅𑀣𑀦𑁆𑀢𑀭𑀸𑀫𑀕𑁆𑀕𑁂 𑀞𑀺𑀢𑀸 𑀖𑀝𑀘𑁂𑀝𑀺𑀓𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀪𑀺𑀫𑀼𑀔𑀁 𑀕𑀦𑁆𑀢𑁆𑀯𑀸 𑀫𑀥𑀼𑀁 𑀮𑀪𑀺𑀢𑁆𑀣 𑀪𑀦𑁆𑀢𑁂𑀢𑀺 𑀧𑀼𑀘𑁆𑀙𑀺. 𑀢𑁂𑀦 𑀮𑀤𑁆𑀥𑀁 𑀪𑀕𑀺𑀦𑀻𑀢𑀺 𑀯𑀼𑀢𑁆𑀢𑁂 𑀓𑀺𑀁 𑀯𑀢𑁆𑀯𑀸 𑀲𑁄 𑀅𑀤𑀸𑀲𑀻𑀢𑀺 𑀧𑀼𑀘𑁆𑀙𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀲𑀩𑁆𑀩𑀁 𑀓𑀣𑁂𑀲𑀺. 𑀲𑀸 𑀢𑀁 𑀲𑀼𑀢𑁆𑀯𑀸 𑀣𑁄𑀓𑀁 𑀪𑀦𑁆𑀢𑁂 𑀇𑀥𑁂𑀯 𑀳𑁄𑀣 𑀤𑀸𑀲𑀺𑀬𑀸 𑀅𑀦𑀼𑀕𑁆𑀕𑀳𑀢𑁆𑀣𑀸𑀬𑀸𑀢𑀺 𑀲𑀻𑀖𑀁 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀣𑀧𑀺𑀴𑁄𑀢𑀺𑀓𑀸 𑀅𑀢𑁆𑀢𑀦𑁄 𑀲𑀸𑀝𑀓𑀁 𑀥𑁄𑀯𑀺𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀘𑀼𑀫𑁆𑀩𑀝𑀓𑀁 𑀓𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀅𑀤𑀸𑀲𑀺, 𑀬𑀤𑀸 𑀲𑁄 𑀪𑀦𑁆𑀢𑁂 𑀫𑀥𑀼𑀤𑀸𑀬𑀓𑁄 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀏𑀓𑀭𑀚𑁆𑀚𑀁 𑀓𑀸𑀭𑁂𑀢𑀺. 𑀢𑀤𑀸𑀳𑀁 𑀢𑀲𑁆𑀲 𑀅𑀕𑁆𑀕𑀫𑀳𑁂𑀲𑀻 𑀪𑀯𑁂𑀬𑁆𑀬𑀁𑀢𑀺 𑀯𑀢𑁆𑀯𑀸 𑀧𑀢𑁆𑀣𑀦𑀁 𑀓𑀭𑁄𑀦𑁆𑀢𑀻𑀏𑀯𑀫𑀸𑀳.

𑁬.

𑀬𑀤𑀸 𑀢𑁂 𑀫𑀥𑀼𑀤𑁄 𑀪𑀦𑁆𑀢𑁂, 𑀪𑀽𑀪𑀼𑀚𑁄 𑀳𑁄𑀢𑀺 𑀪𑀽𑀢𑀮𑁂;

𑀢𑀲𑁆𑀲 𑀳𑁂𑀲𑁆𑀲𑀁 𑀢𑀤𑀸 𑀪𑀦𑁆𑀢𑁂, 𑀧𑀺𑀬𑀸 𑀅𑀕𑁆𑀕𑀫𑀳𑁂𑀲𑀺𑀓𑀸.

𑁭.

𑀲𑀼𑀭𑀽𑀧𑀸𑀘 𑀲𑀼𑀯𑀸𑀡𑀻𑀘, 𑀲𑀼𑀬𑀲𑀸 𑀲𑀼𑀩𑁆𑀩𑀢𑀸 𑀲𑀼𑀪𑀸;

𑀅𑀲𑁆𑀲𑀁 𑀢𑀲𑁆𑀲 𑀧𑀺𑀬𑀸𑀘𑀸𑀣, 𑀫𑀦𑀸𑀧𑀸 𑀇𑀘𑁆𑀙𑀤𑀸 [𑀇𑀘𑁆𑀙𑀺𑀤𑀸 𑀇𑀢𑀺𑀧𑀺𑀓𑀢𑁆𑀣𑀘𑀺] 𑀲𑀤𑀸𑀢𑀺.

𑀢𑀲𑁆𑀲𑀸𑀧𑀺 𑀢𑀤𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀣𑁂𑀯 𑀳𑁄𑀢𑀽𑀢𑀺 𑀫𑀗𑁆𑀕𑀮𑀁 𑀯𑀢𑁆𑀯𑀸 𑀆𑀓𑀸𑀲𑁂𑀦 𑀕𑀦𑁆𑀥𑀫𑀸𑀤𑀦𑀫𑁂𑀯 𑀅𑀕𑀫𑀸𑀲𑀺, 𑀅𑀣𑀸𑀧𑀭𑀪𑀸𑀕𑁂 𑀢𑁂 𑀢𑀬𑁄𑀧𑀺 𑀏𑀓𑀢𑁄 𑀳𑀼𑀢𑁆𑀯𑀸 𑀫𑀥𑀼𑀮𑁄𑀓𑀦𑀁 𑀓𑀭𑁄𑀦𑁆𑀢𑀸 𑀢𑀁 𑀫𑀥𑀼𑀖𑀝𑀁 𑀓𑀼𑀳𑀺𑀁𑀢𑀺 𑀧𑀼𑀘𑁆𑀙𑀺𑀁𑀲𑀼, 𑀲𑁄 𑀢𑁂𑀦𑀢𑁆𑀢𑀦𑀸 𑀓𑀢𑀓𑀫𑁆𑀫𑀁 𑀯𑀢𑁆𑀯𑀸 𑀲𑀘𑁂 𑀢𑀼𑀫𑁆𑀳𑁂 𑀢𑀲𑁆𑀫𑀺𑀁 𑀧𑀢𑁆𑀢𑀺𑀁 𑀅𑀦𑀼𑀫𑁄𑀤𑁂𑀬𑁆𑀬𑀸𑀣, 𑀢𑀁 𑀲𑀸𑀥𑀼. 𑀦𑁄 𑀘𑁂. 𑀫𑀥𑀼𑀅𑀕𑁆𑀖𑀦𑀓𑀁 𑀫𑀫 𑀳𑀢𑁆𑀣𑀢𑁄 𑀕𑀡𑁆𑀳𑀣𑀸𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀢𑀢𑁄 𑀦 𑀦𑁄 𑀅𑀢𑁆𑀣𑁄 [𑀦𑀦𑁄𑀳𑀢𑁆𑀣𑁄 𑀇𑀢𑀺𑀲𑀩𑁆𑀩𑀢𑁆𑀣] 𑀫𑀥𑀼𑀦𑀸, 𑀓𑀻𑀤𑀺𑀲𑀲𑁆𑀲𑁂𑀢𑀁 𑀅𑀤𑀸𑀲𑀻𑀢𑀺 𑀯𑀼𑀢𑁆𑀢𑁂 𑀢𑀁 𑀲𑀼𑀢𑁆𑀯𑀸 𑀇𑀢𑀭𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀦𑀸𑀫𑁂 𑀢𑁂 𑀕𑀦𑁆𑀥𑀫𑀸𑀤𑀦𑁂 𑀯𑀲𑀦𑁆𑀢𑀺 𑀓𑀸𑀲𑀸𑀯𑀁 ¶ 𑀧𑀸𑀭𑀼𑀧𑀺𑀢𑁆𑀯𑀸 𑀓𑀼𑀮𑁂 𑀓𑀼𑀮𑁂 𑀪𑀺𑀓𑁆𑀔𑀁 𑀘𑀭𑀦𑁆𑀢𑀺, 𑀲𑀦𑁆𑀢𑁄 𑀏𑀢𑁂 𑀲𑀻𑀮𑀯𑀦𑁆𑀢𑀸𑀢𑀺 𑀓𑀣𑁂𑀲𑀺, 𑀅𑀣 𑀢𑁂𑀲𑀼 𑀚𑁂𑀝𑁆𑀞𑁄 𑀩𑁆𑀭𑀸𑀳𑁆𑀫𑀡𑀘𑀡𑁆𑀟𑀸𑀮𑀓𑀸𑀧𑀺 𑀓𑀸𑀲𑀸𑀯𑀁 𑀧𑀭𑀺𑀤𑀳𑀺𑀢𑁆𑀯𑀸 𑀘𑀭𑀦𑁆𑀢𑀺. 𑀦𑀽𑀦𑀸𑀬𑀁 𑀘𑀡𑁆𑀟𑀸𑀮𑀓𑁄𑀢𑀺 𑀫𑀜𑁆𑀜𑀸𑀫𑀻𑀢𑀺 𑀆𑀳, 𑀫𑀚𑁆𑀛𑀺𑀫𑁄 𑀓𑀼𑀚𑁆𑀛𑀺𑀢𑁆𑀯𑀸 𑀢𑀯 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀧𑀭𑀲𑀫𑀼𑀤𑁆𑀤𑁂 𑀔𑀺𑀧𑀸𑀳𑀻𑀢𑀺 𑀅𑀯𑁄𑀘, 𑀅𑀣 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 𑀫𑀥𑀼𑀤𑀸𑀬𑀓𑁄 𑀫𑀸 𑀪𑁄 𑀢𑀼𑀫𑁆𑀳𑁂 𑀅𑀭𑀺𑀬𑀸𑀦𑀁 𑀫𑀳𑁂𑀲𑀓𑁆𑀔𑀸𑀦𑀁 𑀫𑀳𑀸𑀦𑀼𑀪𑀸𑀯𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀨𑀭𑀼𑀲𑀁 𑀓𑀣𑁂𑀣. 𑀦𑀺𑀭𑀬𑀤𑀼𑀓𑁆𑀔𑀸 𑀦 𑀪𑀸𑀬𑀣𑀸𑀢𑀺𑀆𑀤𑀺𑀦𑀸 𑀅𑀦𑁂𑀓𑀸 𑀓𑀸𑀭𑁂𑀦 𑀦𑀺𑀯𑀸𑀭𑁂𑀢𑁆𑀯𑀸 𑀢𑁂𑀲𑀁 𑀕𑀼𑀡𑀁 𑀧𑀓𑀸𑀲𑁂𑀲𑀺, 𑀢𑀁 𑀲𑀼𑀢𑁆𑀯𑀸 𑀢𑁂 𑀉𑀪𑁄𑀧𑀺 𑀲𑀸𑀥𑀽𑀢𑀺 𑀧𑀲𑀦𑁆𑀦𑀸𑀘𑀺𑀢𑁆𑀢𑀸 𑀅𑀦𑀼𑀫𑁄𑀤𑀺𑀁𑀲𑀼, 𑀅𑀧𑀭𑀪𑀸𑀕𑁂 𑀢𑁂 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀁𑀲𑀭𑀦𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀫𑀳𑀸𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑀼𑀪𑀯𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼 𑀧𑀭𑀺𑀦𑀺𑀩𑁆𑀩𑀸𑀡𑀢𑁄 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀅𑀘𑁆𑀘𑀬𑁂𑀦 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁.

𑁮.

𑀅𑀲𑁄𑀓𑁄 𑀫𑀥𑀼𑀤𑁄 𑀲𑀦𑁆𑀥𑀺, 𑀫𑀺𑀢𑁆𑀢𑀸𑀤𑁂𑀯𑀻 𑀢𑀼 𑀘𑁂𑀝𑀺𑀓𑀸;

𑀘𑀡𑁆𑀟𑀸𑀮𑀯𑀸𑀤𑀻 𑀦𑀺𑀕𑁆𑀭𑁄𑀥𑁄, 𑀢𑀺𑀲𑁆𑀲𑁄 𑀲𑁄 𑀧𑀸𑀭𑀯𑀸𑀤𑀺𑀓𑁄𑀢𑀺.

𑀢𑁂𑀲𑀼 𑀘𑀡𑁆𑀟𑀸𑀮𑀯𑀸𑀤𑀻 𑀚𑁂𑀝𑁆𑀞𑀯𑀸𑀡𑀺𑀚𑁄 𑀩𑀺𑀦𑁆𑀤𑀼𑀲𑀸𑀭𑀭𑀜𑁆𑀜𑁄 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀲𑀼𑀫𑀦𑀭𑀸𑀚𑀓𑀼𑀫𑀸𑀭𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑀸𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸. 𑀩𑀺𑀦𑁆𑀤𑀼𑀲𑀸𑀭𑀭𑀜𑁆𑀜𑁄 𑀓𑀺𑀭 𑀤𑀼𑀩𑁆𑀩𑀮𑀓𑀸𑀮𑁂𑀬𑁂𑀯 𑀅𑀲𑁄𑀓𑀓𑀼𑀫𑀸𑀭𑁄 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀉𑀚𑁆𑀚𑁂𑀦𑀺𑀬𑀸 𑀭𑀚𑁆𑀚𑀁 𑀧𑀳𑀸𑀬 𑀆𑀕𑀦𑁆𑀢𑁆𑀯𑀸 𑀲𑀩𑁆𑀩𑀦𑀕𑀭𑀁 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑀁 𑀓𑀢𑁆𑀯𑀸 𑀲𑀼𑀫𑀦𑀭𑀸𑀚𑀓𑀼𑀫𑀸𑀭𑀁 𑀅𑀕𑁆𑀕𑀳𑁂𑀲𑀺. 𑀢𑀁 𑀤𑀺𑀯𑀲𑀫𑁂𑀯 𑀲𑀼𑀫𑀦𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀲𑀼𑀫𑀦𑀸 𑀦𑀸𑀫 𑀤𑁂𑀯𑀻 𑀧𑀭𑀺𑀧𑀼𑀡𑁆𑀡𑀕𑀩𑁆𑀪𑀸 𑀅𑀳𑁄𑀲𑀺. 𑀲𑀸 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀁 𑀘𑀡𑁆𑀟𑀸𑀮𑀕𑀸𑀫𑀁 𑀲𑀦𑁆𑀥𑀸𑀬 𑀕𑀘𑁆𑀙𑀦𑁆𑀢𑀻 𑀚𑁂𑀝𑁆𑀞𑀓𑀘𑀡𑁆𑀟𑀸𑀮𑀲𑁆𑀲 𑀕𑁂𑀳𑀢𑁄 𑀅𑀯𑀺𑀤𑀽𑀭𑁂 𑀦𑀺𑀕𑁆𑀭𑁄𑀥𑁄 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸𑀬 𑀤𑁂𑀯𑀢𑀸𑀬 𑀇𑀢𑁄 𑀏𑀳𑀺 𑀲𑀼𑀫𑀦𑁂𑀢𑀺 𑀯𑀤𑀦𑁆𑀢𑀺𑀬𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀢𑀲𑁆𑀲𑀸 𑀲𑀫𑀻𑀧𑀁 𑀕𑀢𑀸, 𑀤𑁂𑀯𑀢𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀏𑀓𑀁 𑀲𑀸𑀮𑀁 𑀦𑀺𑀫𑁆𑀫𑀺𑀡𑀺𑀢𑁆𑀯𑀸 𑀏𑀢𑁆𑀣 𑀯𑀲𑀸𑀳𑀻𑀢𑀺 𑀧𑀸𑀤𑀸𑀲𑀺. 𑀲𑀸 ¶ 𑀢𑀁 𑀲𑀸𑀮𑀁 𑀧𑀸𑀯𑀺𑀲𑀺, 𑀕𑀢𑀤𑀺𑀯𑀲𑁂𑀬𑁂𑀯 𑀲𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀲𑀸 𑀢𑀲𑁆𑀲 𑀦𑀺𑀕𑁆𑀭𑁄𑀥𑀤𑁂𑀯𑀢𑀸𑀬 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀦𑀺𑀕𑁆𑀭𑁄𑀥𑁄𑀢𑁆𑀯𑁂𑀯 𑀦𑀸𑀫𑀁 𑀅𑀓𑀸𑀲𑀺. 𑀚𑁂𑀝𑁆𑀞𑀓𑀘𑀡𑁆𑀟𑀸𑀮𑁄 𑀤𑀺𑀝𑁆𑀞𑀤𑀺𑀯𑀲𑀢𑁄𑀧𑁆𑀧𑀪𑀼𑀢𑀺 𑀢𑀁 𑀅𑀢𑁆𑀢𑀦𑁄 𑀲𑀸𑀫𑀺𑀥𑀻𑀢𑀭𑀁 𑀯𑀺𑀬 𑀫𑀜𑁆𑀜𑀫𑀸𑀦𑁄 𑀦𑀺𑀩𑀤𑁆𑀥𑀯𑀢𑁆𑀢𑀁 𑀧𑀝𑁆𑀞𑀧𑁂𑀲𑀺. 𑀭𑀸𑀚𑀥𑀻𑀢𑀸 𑀢𑀢𑁆𑀣 𑀲𑀢𑁆𑀢𑀯𑀲𑁆𑀲𑀸𑀦𑀺 𑀯𑀲𑀺, 𑀦𑀺𑀕𑁆𑀭𑁄𑀥𑀓𑀼𑀫𑀸𑀭𑁄𑀧𑀺 𑀲𑀢𑁆𑀢𑀯𑀲𑁆𑀲𑀺𑀓𑁄 𑀚𑀸𑀢𑁄, 𑀢𑀤𑀸 𑀫𑀳𑀸𑀯𑀭𑀼𑀡𑀢𑁆𑀣𑁂𑀭𑁄 𑀦𑀸𑀫 𑀏𑀓𑁄 𑀅𑀭𑀳𑀸 𑀤𑀸𑀭𑀓𑀲𑁆𑀲 𑀳𑁂𑀢𑀼𑀲𑀫𑁆𑀧𑀤𑀁 𑀤𑀺𑀲𑁆𑀯𑀸 𑀯𑀺𑀳𑀭𑀫𑀸𑀦𑁄 𑀲𑀢𑁆𑀢𑀯𑀲𑁆𑀲𑀺𑀓𑁄 𑀤𑀸𑀦𑀺 𑀤𑀸𑀭𑀓𑁄. 𑀓𑀸𑀮𑁄 𑀦𑀁 𑀧𑀩𑁆𑀩𑀸𑀚𑁂𑀢𑀼𑀁𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀭𑀸𑀚𑀥𑀻𑀢𑀸𑀬 𑀆𑀭𑁄𑀘𑀸𑀧𑁂𑀢𑁆𑀯𑀸 𑀦𑀺𑀕𑁆𑀭𑁄𑀥𑀓𑀼𑀫𑀸𑀭𑀁 𑀧𑀩𑁆𑀩𑀸𑀚𑁂𑀲𑀺, 𑀓𑀼𑀫𑀸𑀭𑁄 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑀫𑀳𑀸𑀯𑀁𑀲𑁂.

𑁯.

𑀢𑀁 𑀫𑀳𑀸𑀯𑀭𑀼𑀡𑁄 𑀣𑁂𑀭𑁄, 𑀢𑀤𑀸 𑀤𑀺𑀲𑁆𑀯𑀸 𑀓𑀼𑀫𑀸𑀭𑀓𑀁;

𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀁, 𑀅𑀭𑀳𑀸 𑀧𑀼𑀘𑁆𑀙𑀺 𑀫𑀸𑀢𑀭𑀁;

𑀧𑀩𑁆𑀩𑀸𑀚𑁂𑀲𑀺 𑀔𑀼𑀭𑀕𑁆𑀕𑁂 𑀲𑁄, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀻𑀢𑀺.

𑀲𑁄 𑀓𑀺𑀭 𑀏𑀓𑀤𑀺𑀯𑀲𑀁 𑀧𑀸𑀢𑁄𑀯 𑀲𑀭𑀻𑀭𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀯𑀢𑁆𑀢𑀁 𑀓𑀢𑁆𑀯𑀸 𑀧𑀢𑁆𑀢𑀘𑀻𑀯𑀭 𑀫𑀸𑀤𑀸𑀬 𑀫𑀸𑀢𑀼𑀉𑀧𑀸𑀲𑀺𑀓𑀸𑀬 𑀕𑁂𑀳𑀤𑁆𑀯𑀸𑀭𑀁 𑀕𑀘𑁆𑀙𑀸𑀫𑀻𑀢𑀺 𑀦𑀺𑀓𑁆𑀔𑀫𑀺. 𑀫𑀸𑀢𑀼𑀦𑀺𑀯𑀸𑀲𑀝𑁆𑀞𑀸𑀦𑀜𑁆𑀘𑀲𑁆𑀲 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀦𑀕𑀭𑀫𑀚𑁆𑀛𑁂𑀦 𑀕𑀦𑁆𑀢𑁆𑀯𑀸 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀅𑀲𑁄𑀓𑁄 𑀥𑀫𑁆𑀫𑀭𑀸𑀚𑀸 𑀧𑀸𑀘𑀻𑀦𑀤𑀺𑀲𑀸𑀪𑀺𑀫𑀼𑀔𑁄 𑀲𑀻𑀳𑀧𑀜𑁆𑀚𑀭𑁂 𑀘𑀗𑁆𑀓𑀫𑀢𑀺. 𑀢𑀁 𑀔𑀡𑀁𑀬𑁂𑀯 𑀦𑀺𑀕𑁆𑀭𑁄𑀥𑁄 𑀭𑀸𑀚𑀗𑁆𑀕𑀡𑀁 𑀲𑀫𑁆𑀧𑀸𑀧𑀼𑀡𑀺 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑁄 𑀲𑀦𑁆𑀢𑀫𑀸𑀦𑀲𑁄 𑀬𑀼𑀕𑀫𑀢𑁆𑀢𑀁 𑀧𑁂𑀓𑁆𑀔𑀫𑀸𑀦𑁄, 𑀢𑁂𑀦 𑀯𑀼𑀢𑁆𑀢𑀁 𑀏𑀓𑀤𑀺𑀯𑀲𑀁 𑀲𑀻𑀳𑀧𑀜𑁆𑀚𑀭𑁂 𑀞𑀺𑀢𑁄 𑀅𑀤𑁆𑀤𑀲 𑀦𑀺𑀕𑁆𑀭𑁄𑀥𑀁 𑀲𑀸𑀫𑀡𑁂𑀭𑀁 𑀭𑀸𑀚𑀗𑁆𑀕𑀡𑁂𑀦 𑀕𑀘𑁆𑀙𑀦𑁆𑀢𑀁 𑀤𑀦𑁆𑀢𑀁 𑀕𑀼𑀢𑁆𑀢𑀁 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀁 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑀦𑁆𑀢𑀺. 𑀤𑀺𑀲𑁆𑀯𑀸 𑀧𑀦𑀲𑁆𑀲 𑀏𑀢𑀤𑀳𑁄𑀲𑀺. 𑀅𑀬𑀁 𑀚𑀦𑁄 𑀲𑀩𑁆𑀩𑁄𑀧𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀪𑀦𑁆𑀢𑀫𑀺𑀕𑀧𑀝𑀺𑀪𑀸𑀕𑁄. 𑀅𑀬𑀁 𑀧𑀦 𑀤𑀳𑀭𑀓𑁄 𑀅𑀯𑀺𑀓𑁆𑀔𑀺𑀢𑁆𑀢𑁄 𑀅𑀢𑀺𑀯𑀺𑀬𑀲𑁆𑀲 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀁 𑀲𑀫𑁆𑀫𑀺𑀜𑁆𑀚𑀦𑀧𑀲𑀸𑀭𑀡𑀜𑁆𑀘 𑀲𑁄𑀪𑀢𑀺. 𑀅𑀤𑁆𑀥𑀸 𑀏𑀢𑀲𑁆𑀲𑀩𑁆𑀪𑀦𑁆𑀢𑀭𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀪𑀯𑀺𑀲𑁆𑀲𑀢𑀻𑀢𑀺 𑀭𑀜𑁆𑀜𑁄 𑀲𑀳 ¶ 𑀤𑀲𑁆𑀲𑀦𑁂𑀦𑁂𑀯 𑀲𑀸𑀫𑀡𑁂𑀭𑁂 𑀘𑀺𑀢𑁆𑀢𑀁 𑀧𑀲𑀻𑀤𑀺, 𑀧𑁂𑀫𑀁 𑀲𑀡𑁆𑀞𑀳𑀺, 𑀓𑀲𑁆𑀫𑀸. 𑀧𑀼𑀩𑁆𑀩𑁂 𑀓𑀺𑀭 𑀧𑀼𑀜𑁆𑀜𑀓𑀭𑀡𑀓𑀸𑀮𑁂 𑀭𑀜𑁆𑀜𑁄 𑀚𑁂𑀝𑁆𑀞𑀓𑀪𑀸𑀢𑀸 𑀯𑀸𑀡𑀺𑀚𑀓𑁄𑀬𑀁.

𑁧𑁦.

𑀧𑀼𑀩𑁆𑀩𑁂𑀯 [𑀧𑀼𑀩𑁆𑀩𑁂𑀦 𑀇𑀢𑀺𑀓𑀢𑁆𑀣𑀘𑀺] 𑀲𑀦𑁆𑀦𑀺𑀯𑀸𑀲𑁂𑀦, 𑀧𑀘𑁆𑀘𑀼𑀧𑁆𑀧𑀦𑁆𑀦𑀳𑀺𑀢𑁂𑀦 𑀯𑀸;

𑀏𑀯𑀁 𑀢𑀁 𑀚𑀸𑀬𑀢𑁂 𑀧𑁂𑀫𑀁, 𑀉𑀧𑁆𑀧𑀮𑀁𑀯 𑀬𑀣𑁄𑀤𑀓𑁂𑀢𑀺.

𑀅𑀣 𑀭𑀸𑀚𑀸 𑀲𑀜𑁆𑀚𑀸𑀢𑀧𑁂𑀫𑁄 𑀲𑀩𑀳𑀼𑀫𑀸𑀦𑁄 𑀲𑀸𑀫𑀡𑁂𑀭𑀁 𑀧𑀓𑁆𑀓𑁄𑀲𑀣𑀸𑀢𑀺 𑀅𑀫𑀘𑁆𑀘𑁂 𑀧𑁂𑀲𑁂𑀲𑀺, 𑀢𑁂 𑀅𑀢𑀺𑀘𑀺𑀭𑀸𑀬𑀦𑁆𑀢𑀻𑀢𑀺 𑀧𑀼𑀦 𑀤𑁆𑀯𑁂 𑀢𑀬𑁄 𑀧𑁂𑀲𑁂𑀲𑀺 𑀢𑀼𑀭𑀺𑀢𑀁 𑀆𑀕𑀘𑁆𑀙𑀢𑀽𑀢𑀺. 𑀲𑀸𑀫𑀡𑁂𑀭𑁄 𑀅𑀢𑁆𑀢𑀦𑁄 𑀧𑀓𑀢𑀺𑀬𑀸 𑀏𑀯 𑀅𑀕𑀫𑀸𑀲𑀺. 𑀭𑀸𑀚𑀸 𑀧𑀢𑀺𑀭𑀽𑀧𑀸𑀲𑀦𑀁 𑀜𑀢𑁆𑀯𑀸 𑀦𑀺𑀲𑀻𑀤𑀣𑀸𑀢𑀺 𑀆𑀳. 𑀲𑁄 𑀇𑀢𑁄𑀘𑀺𑀢𑁄 𑀘 𑀯𑀺𑀮𑁄𑀓𑁂𑀢𑁆𑀯𑀸 𑀦𑀢𑁆𑀣𑀺 𑀤𑀸𑀦𑀺 𑀅𑀜𑁆𑀜𑁄 𑀪𑀺𑀓𑁆𑀔𑀽𑀢𑀺 𑀲𑀫𑀼𑀲𑁆𑀲𑀺𑀢𑀲𑁂𑀢𑀘𑁆𑀙𑀢𑁆𑀢𑀁 𑀭𑀸𑀚𑀧𑀮𑁆𑀮𑀗𑁆𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀢𑁆𑀢𑀁 𑀕𑀡𑁆𑀳𑀦𑀢𑁆𑀣𑀸𑀬 𑀭𑀜𑁆𑀜𑁄 𑀆𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀭𑀸𑀚𑀸 𑀢𑀁 𑀧𑀮𑁆𑀮𑀗𑁆𑀓𑀲𑀫𑀻𑀧𑀁 𑀕𑀘𑁆𑀙𑀦𑁆𑀢𑀁 𑀏𑀯 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑀅𑀚𑁆𑀚𑁂𑀯 𑀤𑀸𑀦𑀺 𑀅𑀬𑀁 𑀲𑀸𑀫𑀡𑁂𑀭𑁄 𑀇𑀫𑀲𑁆𑀲 𑀕𑁂𑀳𑀲𑁆𑀲 𑀲𑀸𑀫𑀺𑀓𑁄 𑀪𑀯𑀺𑀲𑁆𑀲𑀢𑀻𑀢𑀺, 𑀲𑀸𑀫𑀡𑁂𑀭𑁄 𑀭𑀜𑁆𑀜𑁄 𑀳𑀢𑁆𑀣𑁂 𑀧𑀢𑁆𑀢𑀁 𑀤𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀭𑀸𑀚𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀲𑀫𑁆𑀧𑀸𑀤𑀺𑀢𑀁 𑀲𑀩𑁆𑀩𑀁 𑀬𑀸𑀕𑀼𑀔𑀚𑁆𑀚𑀓𑀪𑀢𑁆𑀢𑀯𑀺𑀓𑀢𑀺𑀁 𑀉𑀧𑀦𑀸𑀫𑁂𑀲𑀺. 𑀲𑀸𑀫𑀡𑁂𑀭𑁄 𑀅𑀢𑁆𑀢𑀦𑁄 𑀬𑀸𑀧𑀦𑀫𑀢𑁆𑀢𑀫𑁂𑀯 𑀲𑀫𑁆𑀧𑀝𑀺𑀘𑁆𑀙𑀺. 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀭𑀸𑀚𑀸 𑀆𑀳 𑀲𑀢𑁆𑀣𑀸𑀭𑀸 𑀢𑀼𑀫𑁆𑀳𑀸𑀓𑀁 𑀤𑀺𑀦𑁆𑀦𑀑𑀯𑀸𑀤𑀁 𑀚𑀸𑀦𑀸𑀣𑀸𑀢𑀺. 𑀚𑀸𑀦𑀸𑀫𑀺 𑀫𑀳𑀸𑀭𑀸𑀚 𑀏𑀓𑀤𑁂𑀲𑁂𑀦𑀸𑀢𑀺. 𑀢𑀸𑀢 𑀫𑀬𑁆𑀳𑀫𑁆𑀧𑀻 𑀦𑀁 𑀓𑀣𑁂𑀳𑀻𑀢𑀺. 𑀲𑀸𑀥𑀼 𑀫𑀳𑀸𑀭𑀸𑀚𑀸𑀢𑀺 𑀭𑀜𑁆𑀜𑁄 𑀅𑀦𑀼𑀭𑀽𑀧𑀁 𑀥𑀫𑁆𑀫𑀧𑀏𑀤 𑀅𑀧𑁆𑀧𑀫𑀸𑀤𑀯𑀕𑁆𑀕𑀁 𑀅𑀦𑀼𑀫𑁄𑀤𑀦𑀢𑁆𑀣𑀸𑀬 𑀅𑀪𑀸𑀲𑀺. 𑀭𑀸𑀚𑀸 𑀧𑀦 𑀅𑀧𑁆𑀧𑀫𑀸𑀤𑁄 𑀅𑀫𑀢𑀧𑀤𑀁, 𑀧𑀫𑀸𑀤𑁄 𑀫𑀘𑁆𑀘𑀼𑀦𑁄 𑀧𑀤𑀁𑀢𑀺 𑀲𑀼𑀢𑁆𑀯𑀸𑀯 𑀅𑀜𑁆𑀜𑀸𑀢𑀁 𑀢𑀸𑀢, 𑀧𑀭𑀺𑀬𑁄𑀲𑀸𑀧𑁂𑀳𑀻𑀢𑀺 𑀆𑀳. 𑀲𑀸𑀫𑀡𑁂𑀭𑁄 𑀅𑀦𑀼𑀫𑁄𑀤𑀦𑀸 𑀯𑀲𑀸𑀦𑁂 𑀤𑁆𑀯𑀢𑁆𑀢𑀺𑀁𑀲𑀥𑀼𑀯𑀪𑀢𑁆𑀢𑀸𑀦𑀺 [𑀤𑁆𑀯𑀺𑀢𑁆𑀢𑀺𑀁𑀲𑀥𑀼𑀭𑀪𑀢𑁆𑀢𑀸𑀦𑀺 𑀇𑀢𑀺𑀲𑀩𑁆𑀩𑀢𑁆𑀣] 𑀮𑀪𑀺𑀢𑁆𑀯𑀸 𑀧𑀼𑀦 𑀤𑀺𑀯𑀲𑁂 𑀤𑁆𑀯𑀢𑁆𑀢𑀺𑀁𑀲𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀭𑀸𑀚𑀦𑁆𑀢𑁄𑀧𑀼𑀭𑀁 𑀧𑀯𑀺𑀲𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘 𑀫𑀓𑀸𑀲𑀺. 𑀭𑀸𑀚𑀸 𑀅𑀜𑁆𑀜𑁂𑀧𑀺 𑀤𑁆𑀯𑀢𑁆𑀢𑀺𑀁𑀲𑀪𑀺𑀓𑁆𑀔𑀽 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁𑀲𑁆𑀯𑁂 𑀪𑀺𑀓𑁆𑀔𑀁 𑀕𑀡𑁆𑀳𑀦𑁆𑀢𑀽𑀢𑀺 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀤𑀺𑀯𑀲𑁂 ¶ 𑀤𑀺𑀯𑀲𑁂 𑀯𑀟𑁆𑀠𑀸𑀧𑁂𑀦𑁆𑀢𑁄 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀁 𑀩𑁆𑀭𑀸𑀳𑁆𑀫𑀡𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀪𑀢𑁆𑀢𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀁 𑀪𑀺𑀓𑁆𑀔𑀽𑀦𑀁 𑀦𑀺𑀘𑁆𑀘𑀪𑀢𑁆𑀢𑀁 𑀧𑀝𑁆𑀞𑀧𑁂𑀲𑀺 𑀦𑀺𑀕𑁆𑀭𑁄𑀥𑀢𑁆𑀣𑁂𑀭𑀕𑀢𑁂𑀦𑁂𑀯 𑀧𑀲𑀸𑀤𑁂𑀦. 𑀦𑀺𑀕𑁆𑀭𑁄𑀥𑀢𑁆𑀣𑁂𑀭𑁄𑀧𑀺 𑀭𑀸𑀚𑀸𑀦𑀁 𑀲𑀧𑀭𑀺𑀲𑀁 𑀢𑀻𑀲𑀼 𑀲𑀭𑀡𑁂𑀲𑀼 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀩𑀼𑀤𑁆𑀥𑀲𑀸𑀲𑀦𑁂 𑀧𑁄𑀣𑀼𑀚𑁆𑀚𑀦𑀺𑀓𑁂𑀦 𑀧𑀲𑀸𑀤𑁂𑀦 𑀅𑀘𑀮𑀧𑁆𑀧𑀲𑀸𑀤𑀁 𑀓𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀭𑀸𑀚𑀸𑀧𑀺 𑀅𑀲𑁄𑀓𑀸𑀭𑀸𑀫𑀁 𑀦𑀸𑀫 𑀫𑀳𑀸𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀁 𑀪𑀺𑀓𑁆𑀔𑀽𑀦𑀁 𑀦𑀺𑀘𑁆𑀘𑀪𑀢𑁆𑀢𑀁 𑀧𑀝𑁆𑀞𑀧𑁂𑀲𑀺. 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀦𑀕𑀭𑀲𑀳𑀲𑁆𑀲𑁂𑀲𑀼 𑀘𑀢𑀼𑀭𑀸𑀲𑀻𑀢𑀺𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀺 𑀓𑀸𑀭𑀸𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁.

𑁧𑁧.

𑀘𑀡𑁆𑀟𑀸𑀮𑀯𑀸𑀤𑀺𑀤𑁄𑀲𑁂𑀦,

𑀚𑀸𑀢𑁄 𑀘𑀡𑁆𑀟𑀸𑀮𑀕𑀸𑀫𑀓𑁂;

𑀧𑀢𑁆𑀢𑀸𑀦𑀼𑀫𑁄𑀤𑀦𑀸 𑀧𑀸𑀓𑀸,

𑀆𑀲𑁂 𑀲𑁄 [𑀅𑀲𑁂𑀲𑁄 𑀇𑀢𑀺𑀧𑀺𑀓𑀢𑁆𑀣𑀘𑀺] 𑀳𑀺 𑀅𑀦𑀸𑀲𑀯𑁄𑀢𑀺.

𑀅𑀬𑀁 𑀦𑀺𑀕𑁆𑀭𑁄𑀥𑀢𑁆𑀣𑁂𑀭𑀲𑁆𑀲 𑀓𑀣𑀸𑀦𑀬𑁄.

𑀫𑀥𑀼𑀤𑀸𑀬𑀓𑁄 𑀧𑀦 𑀯𑀸𑀡𑀺𑀚𑁄 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀧𑀼𑀧𑁆𑀨𑀧𑀼𑀭𑁂 𑀭𑀸𑀚𑀓𑀼𑀮𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀺𑀬𑀤𑀸𑀲𑁄 𑀦𑀸𑀫 𑀓𑀼𑀫𑀸𑀭𑁄 𑀳𑀼𑀢𑁆𑀯𑀸 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀏𑀓𑀭𑀚𑁆𑀚𑀁 𑀅𑀓𑀸𑀲𑀺. 𑀓𑀣𑀁.

𑀩𑀺𑀦𑁆𑀤𑀼𑀲𑀸𑀭𑀭𑀸𑀚𑀲𑁆𑀲 𑀏𑀓𑀲𑀢𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀢𑁂 𑀲𑀩𑁆𑀩𑁂 𑀅𑀲𑁄𑀓𑁄 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀏𑀓𑀫𑀸𑀢𑀺𑀓𑀁 𑀢𑀺𑀲𑁆𑀲𑀓𑀼𑀫𑀸𑀭𑀁 𑀞𑀧𑁂𑀢𑁆𑀯𑀸 𑀖𑀸𑀢𑁂𑀲𑀺. 𑀖𑀸𑀢𑁂𑀦𑁆𑀢𑁄 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺 𑀅𑀦𑀪𑀺𑀲𑀺𑀢𑁆𑀢𑁄𑀯 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀘𑀢𑀼𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀡𑀢𑁄 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀲𑀢𑀦𑀁 𑀉𑀧𑀭𑀺 𑀅𑀝𑁆𑀞𑀸𑀭𑀲𑀫𑁂 𑀯𑀲𑁆𑀲𑁂 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀏𑀓𑀭𑀚𑁆𑀚𑀸𑀪𑀺𑀲𑁂𑀓𑀁 𑀧𑀸𑀧𑀼𑀡𑀺. 𑀅𑀣 𑀢𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀘𑀢𑀼𑀭𑀸𑀲𑀻𑀢𑀺𑀦𑀕𑀭𑀲𑀳𑀲𑁆𑀲𑁂 𑀭𑀸𑀚𑀸𑀦𑁄 𑀆𑀕𑀦𑁆𑀢𑁆𑀯𑀸 𑀉𑀧𑀝𑁆𑀞𑀳𑀺𑀲𑁆𑀲𑀦𑁆𑀢𑀺. 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀅𑀦𑀼𑀘𑁆𑀙𑀯𑀺𑀓𑀸 𑀢𑀬𑁄 𑀧𑀸𑀲𑀸𑀤𑀸 𑀅𑀳𑁂𑀲𑀼𑀁. 𑀏𑀓𑁄 𑀫𑀳𑀸𑀲𑀧𑁆𑀧𑀺𑀓𑁄 ¶ , 𑀏𑀓𑁄 𑀫𑁄𑀭𑀕𑀻𑀯𑁄, 𑀏𑀓𑁄 𑀫𑀗𑁆𑀕𑀮𑁄 𑀦𑀸𑀫, 𑀢𑁂𑀲𑀼 𑀦𑁂𑀓𑀦𑀸𑀝𑀓𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀧𑀝𑀺𑀯𑀲𑀢𑀺. 𑀬𑀸𑀲𑁆𑀲 𑀫𑀥𑀼𑀆𑀧𑀡𑀁 𑀤𑀲𑁆𑀲𑁂𑀲𑀺, 𑀲𑀸 𑀅𑀲𑀦𑁆𑀥𑀺𑀫𑀺𑀢𑁆𑀢𑀸 𑀦𑀸𑀫 𑀤𑁂𑀯𑀘𑁆𑀙𑀭𑀧𑀭𑀺𑀪𑀸𑀕𑀸 𑀭𑀸𑀚𑀥𑀻𑀢𑀸 𑀳𑀼𑀢𑁆𑀯𑀸 𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀁 𑀇𑀢𑁆𑀣𑀻𑀦𑀁 𑀚𑁂𑀝𑁆𑀞𑀺𑀓𑀸 𑀥𑀫𑁆𑀫𑀸𑀲𑁄𑀓𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀻 𑀅𑀳𑁄𑀲𑀺. 𑀅𑀪𑀺𑀲𑁂𑀓𑀸𑀦𑀦𑁆𑀢𑀭𑀁 𑀢𑀲𑁆𑀲 𑀇𑀫𑀸 𑀭𑀸𑀚𑀺𑀤𑁆𑀥𑀺𑀬𑁄 𑀆𑀕𑀢𑀸, 𑀧𑀣𑀯𑀺𑀬𑀸 𑀘 𑀳𑁂𑀝𑁆𑀞𑀸 𑀬𑁄𑀚𑀦𑀧𑁆𑀧𑀫𑀸𑀡𑁂 𑀆𑀡𑀸 𑀧𑀯𑀢𑁆𑀢𑀢𑀺. 𑀢𑀣𑀸 𑀉𑀧𑀭𑀺 𑀆𑀓𑀸𑀲𑁂. 𑀅𑀦𑁄𑀢𑀢𑁆𑀢𑀤𑀳𑀢𑁄 𑀅𑀝𑁆𑀞𑀳𑀺 𑀓𑀸𑀚𑁂𑀳𑀺 𑀲𑁄𑀴𑀲𑀧𑀸𑀦𑀻𑀬𑀖𑀝𑁂 𑀤𑀺𑀯𑀲𑁂 𑀤𑀺𑀯𑀲𑁂 𑀤𑁂𑀯𑀢𑀸 𑀆𑀳𑀭𑀦𑁆𑀢𑀺. 𑀬𑀢𑁄 𑀲𑀸𑀲𑀦𑁂 𑀉𑀧𑁆𑀧𑀦𑁆𑀦𑀲𑀤𑁆𑀥𑁄 𑀳𑀼𑀢𑁆𑀯𑀸 𑀅𑀝𑁆𑀞𑀖𑀝𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀤𑀸𑀲𑀺. 𑀤𑁆𑀯𑁂 𑀖𑀝𑁂 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀢𑁂𑀧𑀺𑀝𑀓𑀪𑀺𑀓𑁆𑀔𑀽𑀦𑀁 𑀤𑁆𑀯𑁂 𑀖𑀝𑁂 𑀅𑀕𑁆𑀕𑀫𑀳𑁂𑀲𑀺𑀬𑀸 𑀅𑀲𑀦𑁆𑀥𑀺𑀫𑀺𑀢𑁆𑀢𑀸𑀬. 𑀘𑀢𑁆𑀢𑀸𑀭𑁄 𑀖𑀝𑁂 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀘𑀺 𑀤𑁂𑀯𑀢𑀸 [𑀤𑁂𑀯𑀢𑀸𑀏𑀯𑀁 𑀇𑀢𑀺𑀲𑀩𑁆𑀩𑀢𑁆𑀣], 𑀏𑀯 𑀳𑀺𑀫𑀯𑀦𑁆𑀢𑀢𑁄 𑀦𑀸𑀕𑀮𑀢𑀸𑀤𑀦𑁆𑀢𑀓𑀝𑁆𑀞𑀁 𑀲𑀺𑀦𑀺𑀤𑁆𑀥𑀁 𑀫𑀼𑀤𑀼𑀓𑀁 𑀭𑀲𑀯𑀦𑁆𑀢𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀆𑀳𑀭𑀦𑁆𑀢𑀺, 𑀢𑁂𑀦 𑀭𑀜𑁆𑀜𑁄 𑀘 𑀫𑀳𑁂𑀲𑀺𑀬𑀸 𑀘 𑀲𑁄𑀴𑀲𑀦𑁆𑀦𑀁 𑀦𑀸𑀝𑀓𑀲𑀳𑀲𑁆𑀲𑀸𑀦𑀜𑁆𑀘 𑀲𑀝𑁆𑀞𑀺𑀫𑀢𑁆𑀢𑀸𑀦𑀜𑁆𑀘 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀁 𑀤𑁂𑀯𑀲𑀺𑀓𑀁 𑀤𑀦𑁆𑀢𑀧𑁄𑀡𑀓𑀺𑀘𑁆𑀘𑀁 𑀦𑀺𑀧𑁆𑀨𑀚𑁆𑀚𑀢𑀺. 𑀤𑁂𑀯𑀲𑀺𑀓𑀫𑁂𑀯𑀲𑁆𑀲 𑀤𑁂𑀯𑀢𑀸 𑀅𑀕𑀤𑀸𑀫𑀮𑀓𑀁 𑀅𑀕𑀤𑀳𑀭𑀻𑀝𑀓𑀁 𑀲𑀼𑀯𑀡𑁆𑀡𑀯𑀡𑁆𑀡𑀜𑁆𑀘 𑀕𑀦𑁆𑀥𑀭𑀲𑀲𑀫𑁆𑀧𑀦𑁆𑀦𑀁 𑀅𑀫𑁆𑀩𑀧𑀓𑁆𑀓𑀁 𑀆𑀳𑀭𑀦𑁆𑀢𑀺. 𑀙𑀤𑁆𑀤𑀦𑁆𑀢𑀤𑀳𑀢𑁄 𑀧𑀜𑁆𑀘𑀯𑀡𑁆𑀡𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀧𑀻𑀢𑀓𑀯𑀡𑁆𑀡𑀁 𑀳𑀢𑁆𑀣𑀧𑀼𑀜𑁆𑀙𑀦𑀓𑀧𑀝𑀁 [𑀳𑀢𑁆𑀣𑀧𑀼𑀘𑁆𑀙𑀦𑀓𑀧𑀝𑁆𑀝𑀁 𑀇𑀢𑀺𑀲𑀩𑁆𑀩𑀢𑁆𑀣] 𑀤𑀺𑀩𑁆𑀩𑀜𑁆𑀘 𑀧𑀸𑀦𑀁 𑀆𑀳𑀭𑀦𑁆𑀢𑀺. 𑀤𑁂𑀯𑀲𑀺𑀓𑀫𑁂𑀯𑀲𑁆𑀲 𑀅𑀦𑀼𑀮𑁂𑀧𑀦𑀕𑀦𑁆𑀥𑀁 𑀧𑀸𑀭𑀼𑀧𑀦𑀢𑁆𑀣𑀸𑀬 𑀅𑀲𑀼𑀢𑁆𑀢𑀫𑀬𑀺𑀓𑀁 𑀲𑀼𑀫𑀦𑀧𑀼𑀧𑁆𑀨𑀧𑀝𑀁 𑀫𑀳𑀸𑀭𑀳𑀜𑁆𑀚 𑀅𑀜𑁆𑀚𑀦𑀁 𑀦𑀸𑀕𑀪𑀯𑀦𑀢𑁄 𑀦𑀸𑀕𑀭𑀸𑀚𑀸𑀦𑁄 𑀆𑀳𑀭𑀦𑁆𑀢𑀺. 𑀙𑀤𑁆𑀤𑀦𑁆𑀢𑀤𑀳𑀢𑁄𑀬𑁂𑀯 𑀉𑀝𑁆𑀞𑀺𑀢𑀲𑁆𑀲 𑀲𑀸𑀮𑀺𑀦𑁄 𑀦𑀯𑀯𑀸𑀳𑀲𑀳𑀲𑁆𑀲𑀦𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀼𑀯𑀸 𑀆𑀳𑀭𑀦𑁆𑀢𑀺. 𑀢𑁂 𑀫𑀽𑀲𑀺𑀓𑀸 𑀦𑀺𑀢𑁆𑀣𑀼𑀲𑀓𑀸𑀦𑀺 𑀓𑀭𑁄𑀦𑁆𑀢𑀺. 𑀏𑀓𑁄𑀧𑀺 𑀔𑀡𑁆𑀟𑀢𑀡𑁆𑀟𑀼𑀮𑁄 𑀦𑀸𑀳𑁄𑀲𑀺. 𑀭𑀜𑁆𑀜𑁄 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀅𑀬𑀫𑁂𑀯 𑀢𑀡𑁆𑀟𑀼𑀮𑁄 𑀧𑀭𑀺𑀪𑁄𑀕𑀁 𑀕𑀘𑁆𑀙𑀢𑀺. 𑀫𑀥𑀼𑀫𑀓𑁆𑀔𑀺𑀓𑀸 𑀫𑀥𑀼𑀁 𑀓𑀭𑁄𑀦𑁆𑀢𑀺. 𑀓𑀫𑁆𑀫𑀸𑀭𑀲𑀸𑀮𑀸𑀲𑀼 𑀅𑀘𑁆𑀙𑀸 𑀓𑀽𑀝𑀁 𑀧𑀳𑀭𑀦𑁆𑀢𑀺. 𑀓𑀭𑀯𑀻𑀓𑀲𑀓𑀼𑀡𑀸 𑀆𑀕𑀦𑁆𑀢𑁆𑀯𑀸 𑀫𑀥𑀼𑀭𑀲𑁆𑀲𑀭𑀁 𑀯𑀺𑀓𑀽𑀚𑁂𑀦𑁆𑀢𑀸 𑀭𑀜𑁆𑀜𑁄 𑀩𑀮𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀇𑀫𑀸𑀳𑀺 𑀇𑀤𑁆𑀥𑀻𑀳𑀺 𑀲𑀫𑀦𑁆𑀦𑀸𑀕𑀢𑁄 𑀭𑀸𑀚𑀸 𑀏𑀓𑀤𑀺𑀯𑀲𑀁 𑀲𑀼𑀯𑀡𑁆𑀡𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑀁 ¶ 𑀧𑁂𑀲𑁂𑀢𑁆𑀯𑀸 𑀘𑀢𑀼𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀅𑀥𑀺𑀕𑀢𑀭𑀽𑀧𑀤𑀲𑁆𑀲𑀦𑀁 𑀓𑀧𑁆𑀧𑀸 𑀬𑀼𑀓𑀁 𑀫𑀳𑀸𑀓𑀸𑀮𑀦𑀸𑀕𑀭𑀸𑀚𑀸𑀦𑀁 𑀆𑀦𑀬𑀺𑀢𑁆𑀯𑀸 𑀲𑁂𑀢𑀘𑁆𑀙𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀫𑀳𑀸𑀭𑀳𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀦𑁂𑀓𑀲𑀢 𑀯𑀡𑁆𑀡𑁂𑀳𑀺 𑀚𑀮𑀚𑀣𑀮𑀚𑀧𑀼𑀧𑁆𑀨𑁂𑀳𑀺 𑀲𑀼𑀯𑀡𑁆𑀡𑀧𑀼𑀧𑁆𑀨𑁂𑀳𑀺 𑀘 𑀧𑀽𑀚𑀁 𑀓𑀢𑁆𑀯𑀸 𑀲𑀩𑁆𑀩𑀸 𑀮𑀗𑁆𑀓𑀸𑀭𑀧𑀢𑀺𑀫𑀡𑁆𑀟𑀺𑀢𑁂𑀳𑀺 𑀲𑁄𑀴𑀲𑀳𑀺 𑀦𑀸𑀝𑀓𑀲𑀳𑀲𑁆𑀲𑁂𑀳𑀺 𑀲𑀫𑀦𑁆𑀢𑀢𑁄 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑀦𑁆𑀢𑀜𑀸𑀡𑀲𑁆𑀲 𑀢𑀸𑀯 𑀫𑁂 𑀲𑀤𑁆𑀥𑀫𑁆𑀫𑀯𑀭𑀘𑀓𑁆𑀓𑀯𑀢𑁆𑀢𑀺𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 [𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀭𑀽𑀧𑀁 𑀇𑀢𑀺𑀲𑀩𑁆𑀩𑀢𑁆𑀣] 𑀭𑀽𑀧𑀁 𑀇𑀫𑁂𑀲𑀁 𑀅𑀓𑁆𑀔𑀻𑀦𑀁 𑀆𑀧𑀸𑀣𑀁 𑀓𑀭𑁄𑀳𑀻𑀢𑀺 𑀯𑀢𑁆𑀯𑀸 𑀢𑁂𑀦 𑀦𑀺𑀫𑁆𑀫𑀺𑀢𑀁 𑀲𑀓𑀮𑀲𑀭𑀻𑀭𑁂 𑀯𑀺𑀧𑁆𑀧𑀓𑀺𑀡𑁆𑀡𑀧𑀼𑀜𑁆𑀜𑀧𑁆𑀧𑀪𑀸𑀯𑀦𑀺𑀩𑁆𑀩𑀢𑁆𑀢𑀸𑀲𑀻𑀢𑀺 𑀅𑀦𑀼𑀩𑁆𑀬𑀜𑁆𑀚𑀦𑀧𑀢𑀺𑀫𑀡𑁆𑀟𑀺𑀢 𑀤𑁆𑀯𑀢𑁆𑀢𑀺𑀁𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡 𑀲𑀲𑁆𑀲𑀺𑀭𑀻𑀓𑀢𑀸𑀬 𑀯𑀺𑀓𑀘𑀓𑀫𑀮𑀼𑀧𑁆𑀧𑀮𑀧𑀼𑀡𑁆𑀟𑀭𑀻𑀓𑀧𑀢𑀺𑀫𑀡𑁆𑀟𑀺𑀢𑀫𑀺𑀯 𑀲𑀮𑀺𑀮𑀢𑀮𑀁 𑀢𑀸𑀭𑀸𑀕𑀡𑀭𑀁𑀲𑀺𑀚𑀸𑀮𑀯𑀺𑀲𑀭𑀯𑀺𑀧𑁆𑀨𑀼𑀭𑀺𑀢𑀲𑁄𑀪𑀸𑀲𑀫𑀼𑀚𑁆𑀚𑀮𑀫𑀺𑀯 𑀕𑀕𑀦𑀢𑀮𑀁 𑀦𑀻𑀮𑀧𑀻𑀢𑀮𑁄𑀳𑀺𑀢𑀸 𑀤𑀺𑀪𑁂𑀤𑀁 𑀯𑀺𑀘𑀺𑀢𑁆𑀢𑀯𑀡𑁆𑀡𑀭𑀁𑀲𑀺𑀯𑀺𑀦𑀤𑁆𑀥𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑁂𑀧𑀯𑀺𑀮𑀸𑀲𑀺𑀢𑀸𑀬 𑀲𑀜𑁆𑀘𑁆𑀬𑀸𑀧𑁆𑀧𑀪𑀸𑀦𑀼𑀭𑀸𑀕𑀇𑀦𑁆𑀤𑀥𑀦𑀼𑀯𑀺𑀚𑁆𑀚𑀼𑀮𑁆𑀮𑀢𑀸𑀧𑀭𑀺𑀓𑁆𑀔𑀺𑀢𑁆𑀢𑀫𑀺𑀯 𑀓𑀡𑀓𑀕𑀺𑀭𑀺𑀲𑀺𑀔𑀭𑀁 𑀦𑀸𑀦𑀸𑀯𑀺𑀭𑀸𑀕𑀯𑀺𑀫𑀮𑀓𑁂𑀢𑀼𑀫𑀸𑀮𑀸𑀲𑀫𑀼𑀚𑁆𑀚𑀮𑀺𑀢𑀘𑀸𑀭𑀼𑀫𑀢𑁆𑀣𑀓𑀲𑁄𑀪𑀦𑀁 𑀦𑀬𑀦𑀭𑀲𑀸𑀬𑀦𑀫𑀺𑀯 𑀘 𑀩𑁆𑀭𑀳𑁆𑀫𑀤𑁂𑀯𑀫𑀦𑀼𑀚𑀦𑀸𑀕𑀬𑀓𑁆𑀔𑀕𑀡𑀸𑀦𑀁 𑀩𑀼𑀤𑁆𑀥𑀭𑀽𑀧𑀁 𑀧𑀲𑁆𑀲𑀦𑁆𑀢𑁄 𑀲𑀢𑁆𑀢𑀤𑀺𑀯𑀲𑀸𑀦𑀺 𑀅𑀓𑁆𑀔𑀺𑀧𑀽𑀚𑀁 𑀦𑀸𑀫 𑀅𑀓𑀸𑀲𑀺. 𑀭𑀸𑀚𑀸 𑀓𑀺𑀭 𑀅𑀪𑀺𑀲𑁂𑀓𑀁 𑀧𑀸𑀧𑀼𑀡𑀺𑀢𑁆𑀯𑀸 𑀢𑀻𑀡𑀺𑀬𑁂𑀯 𑀲𑀁𑀯𑀘𑁆𑀙𑀭𑀸𑀦𑀺 𑀩𑀸𑀳𑀺𑀭𑀓𑀧𑀸𑀲𑀡𑁆𑀟𑀁 𑀧𑀭𑀺𑀕𑀡𑁆𑀳𑀺, 𑀘𑀢𑀼𑀢𑁆𑀣𑁂 𑀲𑀁𑀯𑀘𑁆𑀙𑀭𑁂 𑀩𑀼𑀤𑁆𑀥𑀲𑀸𑀲𑀦𑁂 𑀧𑀲𑀻𑀤𑀺, 𑀢𑀲𑁆𑀲 𑀧𑀦 𑀧𑀺𑀢𑀸 𑀩𑀺𑀦𑁆𑀤𑀼𑀲𑀸𑀭𑁄 𑀩𑁆𑀭𑀸𑀳𑁆𑀫𑀡𑀪𑀢𑁆𑀢𑁄 𑀅𑀳𑁄𑀲𑀺. 𑀲𑁄 𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀘 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀧𑀸𑀲𑀡𑁆𑀟𑀸𑀦𑀁 𑀧𑀡𑁆𑀟𑀭𑀗𑁆𑀕𑀧𑀭𑀺𑀩𑁆𑀩𑀸𑀚𑀓𑀸𑀦𑀜𑁆𑀘 𑀲𑀝𑁆𑀞𑀺𑀲𑀳𑀲𑁆𑀲𑀫𑀢𑁆𑀢𑀸𑀦𑀁 𑀦𑀺𑀘𑁆𑀘𑀪𑀢𑁆𑀢𑀁 𑀧𑀝𑁆𑀞𑀧𑁂𑀲𑀺. 𑀅𑀲𑁄𑀓𑁄𑀧𑀺 𑀧𑀺𑀢𑀭𑀸 𑀧𑀯𑀢𑁆𑀢𑀺𑀢𑀁 𑀤𑀸𑀦𑀁 𑀅𑀢𑁆𑀢𑀦𑁄 𑀅𑀦𑁆𑀢𑁄𑀧𑀼𑀭𑁂 [𑀅𑀦𑁆𑀢𑁂𑀧𑀼𑀭𑁂 𑀇𑀢𑀺𑀲𑀩𑁆𑀩𑀢𑁆𑀣] 𑀢𑀣𑁂𑀯 𑀤𑀤𑀫𑀸𑀦𑁄 𑀏𑀓𑀤𑀺𑀯𑀲𑀁 𑀲𑀻𑀳𑀧𑀜𑁆𑀚𑀭𑁂 𑀞𑀺𑀢𑁄 𑀢𑁂 𑀉𑀧𑀲𑀫𑀧𑀭𑀺𑀩𑀸𑀳𑀺𑀭𑁂𑀦 𑀆𑀘𑀸𑀭𑁂𑀦 𑀪𑀼𑀜𑁆𑀚𑀫𑀸𑀦𑁂 𑀅𑀲𑀁𑀬𑀢𑀺𑀦𑁆𑀤𑁆𑀭𑀺𑀬𑁂 𑀅𑀯𑀺𑀦𑀻𑀢𑀇𑀭𑀺𑀬𑀸𑀧𑀣𑁂 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺, 𑀈𑀤𑀺𑀲𑀁 𑀤𑀸𑀦𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀬𑀼𑀢𑁆𑀢𑀝𑁆𑀞𑀸𑀦𑁂 𑀤𑀸𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀅𑀫𑀘𑁆𑀘𑁂 𑀆𑀳, 𑀕𑀘𑁆𑀙𑀣 𑀪𑀡𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀸𑀥𑀼𑀲𑀫𑁆𑀫𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀅𑀦𑁆𑀢𑁄𑀧𑀼𑀭𑀁 𑀅𑀪𑀺𑀳𑀭𑀣 𑀤𑀸𑀦𑀁 𑀤𑀲𑁆𑀲𑀸𑀫𑀻𑀢𑀺, 𑀅𑀫𑀘𑁆𑀘𑀸 𑀲𑀸𑀥𑀼 𑀤𑁂𑀯𑀸𑀢𑀺 𑀭𑀜𑁆𑀜𑁄 ¶ 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑁂 𑀢𑁂 𑀧𑀡𑁆𑀟𑀭𑀗𑁆𑀕𑀧𑀭𑀺𑀩𑁆𑀩𑀸𑀚𑀓𑀸 𑀚𑀻𑀯𑀓 𑀦𑀺𑀕𑀡𑁆𑀞𑀸𑀤𑀬𑁄 𑀆𑀦𑁂𑀢𑁆𑀯𑀸 𑀇𑀫𑁂 𑀫𑀳𑀸𑀭𑀸𑀚 𑀅𑀫𑁆𑀳𑀸𑀓𑀁 𑀅𑀭𑀳𑀦𑁆𑀢𑁄𑀢𑀺 𑀆𑀳𑀁𑀲𑀼, 𑀅𑀣 𑀭𑀸𑀚𑀸 𑀅𑀦𑁆𑀢𑁄𑀧𑀼𑀭𑁂 𑀉𑀘𑁆𑀘𑀸𑀯𑀘𑀸𑀦𑀺 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀽𑀢𑀺 𑀯𑀢𑁆𑀯𑀸 𑀆𑀕𑀢𑀸𑀕𑀢𑁂 𑀆𑀳 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑁂 𑀆𑀲𑀦𑁂 𑀦𑀺𑀲𑀻𑀤𑀣𑀸𑀢𑀺, 𑀏𑀓𑀘𑁆𑀘𑁂 𑀪𑀤𑁆𑀤𑀧𑀻𑀞𑀓𑁂𑀲𑀼 𑀏𑀓𑀘𑁆𑀘𑁂 𑀨𑀮𑀓𑀧𑀻𑀞𑀓𑁂𑀲𑀼 𑀦𑀺𑀲𑀻𑀤𑀺𑀁𑀲𑀼, 𑀢𑀁 𑀤𑀺𑀲𑁆𑀯𑀸 𑀭𑀸𑀚𑀸 𑀦𑀢𑁆𑀣𑀺 𑀏𑀢𑁂𑀲𑀁 𑀅𑀦𑁆𑀢𑁄 𑀲𑀸𑀭𑁄𑀢𑀺 𑀜𑀢𑁆𑀯𑀸 𑀢𑁂𑀲𑀁 𑀅𑀦𑀼𑀭𑀽𑀧𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀤𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀏𑀯𑀁 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀏𑀓𑀤𑀺𑀯𑀲𑀁 𑀲𑀻𑀳𑀧𑀜𑁆𑀚𑀭𑁂 𑀞𑀺𑀢𑁄 𑀦𑀺𑀕𑁆𑀭𑁄𑀥𑀲𑀸𑀫𑀡𑁂𑀭𑀁 𑀤𑀺𑀲𑁆𑀯𑀸 𑀢𑀲𑁆𑀫𑀺𑀁 𑀕𑀢𑁂𑀦 𑀧𑀲𑀸𑀤𑁂𑀦 𑀩𑀼𑀤𑁆𑀥𑀲𑀸𑀲𑀦𑁂 𑀧𑀲𑀦𑁆𑀦𑁄 𑀲𑀝𑁆𑀞𑀺𑀲𑀳𑀲𑁆𑀲𑀫𑀢𑁆𑀢𑁂 𑀧𑀸𑀲𑀡𑁆𑀟𑀺𑀬𑁂 𑀅𑀧𑀦𑁂𑀢𑁆𑀯𑀸 𑀲𑀝𑁆𑀞𑀺𑀲𑀳𑀲𑁆𑀲𑀫𑀢𑁆𑀢𑁂 𑀪𑀺𑀓𑁆𑀔𑀽 𑀪𑁄𑀚𑁂𑀦𑁆𑀢𑁄 𑀩𑀼𑀤𑁆𑀥𑀲𑀸𑀲𑀦𑁂 𑀧𑀲𑀻𑀤𑀺𑀢𑁆𑀯𑀸 𑀅𑀲𑁄𑀓𑀸𑀭𑀸𑀫𑀁 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣 𑀢𑁂 𑀯𑀲𑀸𑀧𑁂𑀦𑁆𑀢𑁄 𑀏𑀓𑀤𑀺𑀯𑀲𑀁 𑀅𑀲𑁄𑀓𑀸𑀭𑀸𑀫𑁂 𑀲𑀝𑁆𑀞𑀺𑀲𑀳𑀲𑁆𑀲𑀪𑀺𑀓𑁆𑀔𑀽𑀦𑀁 𑀤𑀸𑀦𑀁 𑀤𑀢𑁆𑀯𑀸 𑀢𑁂𑀲𑀁 𑀫𑀚𑁆𑀛𑁂 𑀦𑀺𑀲𑀚𑁆𑀚 𑀲𑀗𑁆𑀖𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀧𑀯𑀸𑀭𑁂𑀢𑁆𑀯𑀸 𑀇𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺, 𑀪𑀦𑁆𑀢𑁂 𑀪𑀕𑀯𑀢𑀸 𑀤𑁂𑀲𑀺𑀢𑀥𑀫𑁆𑀫𑁄 𑀦𑀸𑀫 𑀓𑀺𑀢𑁆𑀢𑀓𑁄 𑀳𑁄𑀢𑀻𑀢𑀺, 𑀫𑀳𑀸𑀭𑀸𑀚 𑀦𑀯 𑀅𑀗𑁆𑀕𑀸𑀦𑀺, 𑀔𑀦𑁆𑀥𑀢𑁄 𑀘𑀢𑀼𑀭𑀸𑀲𑀻𑀢𑀺𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻𑀢𑀺. 𑀭𑀸𑀚𑀸 𑀥𑀫𑁆𑀫𑁂 𑀧𑀲𑀻𑀤𑀺𑀢𑁆𑀯𑀸 𑀏𑀓𑁂𑀓𑀁 𑀥𑀫𑁆𑀫𑀓𑁆𑀔𑀦𑁆𑀥𑀁 𑀏𑀓𑁂𑀓𑀯𑀺𑀳𑀸𑀭𑁂𑀦 𑀧𑀽𑀚𑁂𑀲𑁆𑀲𑀸𑀫𑀻𑀢𑀺 𑀏𑀓𑀤𑀺𑀯𑀲𑀫𑁂𑀯 𑀙𑀦𑁆𑀦𑀯𑀼𑀢𑀺𑀓𑁄𑀝𑀺𑀔𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀫𑀘𑁆𑀘𑁂 𑀆𑀡𑀸𑀧𑁂𑀲𑀺, 𑀏𑀓𑀫𑁂𑀓𑀲𑁆𑀫𑀺𑀁 𑀦𑀕𑀭𑁂 𑀏𑀓𑀫𑁂𑀓𑀁 𑀯𑀺𑀳𑀸𑀭𑀁 𑀓𑀸𑀭𑁂𑀦𑁆𑀢𑀸 𑀘𑀢𑀼𑀭𑀸𑀲𑀻𑀢𑀺𑀬𑀸 𑀦𑀕𑀭𑀲𑀳𑀲𑁆𑀲𑁂𑀲𑀼 𑀘𑀢𑀼𑀭𑀸𑀲𑀻𑀢𑀺𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀺 𑀓𑀸𑀭𑀸𑀧𑁂𑀣𑀸𑀢𑀺, 𑀲𑀬𑀜𑁆𑀘 𑀅𑀲𑁄𑀓𑀸𑀭𑀸𑀫𑁂 𑀅𑀲𑁄𑀓𑀫𑀳𑀸𑀯𑀺𑀳𑀸𑀭𑀢𑁆𑀣𑀸𑀬 [𑀲𑀬𑀁𑀘𑀅𑀲𑁄𑀓𑀳𑁄𑀯𑀺𑀳𑀸𑀭𑀢𑁆𑀣𑀸𑀬 𑀇𑀢𑀺𑀧𑀺𑀓𑀢𑁆𑀣𑀘𑀺] 𑀓𑀫𑁆𑀫𑀁 𑀧𑀝𑁆𑀞𑀧𑁂𑀲𑀺, 𑀲𑀗𑁆𑀖𑁄 𑀇𑀦𑁆𑀤𑀕𑀼𑀢𑁆𑀢𑀢𑁆𑀣𑁂𑀭𑀁 𑀦𑀸𑀫 𑀫𑀳𑀺𑀤𑁆𑀥𑀺𑀓𑀁 𑀫𑀳𑀸𑀦𑀼𑀪𑀸𑀯𑀁 𑀔𑀻𑀡𑀸𑀲𑀯𑀁 𑀦𑀯𑀓𑀫𑁆𑀫𑀸𑀥𑀺𑀝𑁆𑀞𑀸𑀬𑀓𑀁 𑀅𑀤𑀸𑀲𑀺, 𑀣𑁂𑀭𑁄 𑀬𑀁 𑀬𑀁 𑀦 𑀦𑀺𑀝𑁆𑀞𑀸𑀢𑀺, 𑀢𑀁 𑀢𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀦𑀺𑀝𑁆𑀞𑀸𑀧𑁂𑀲𑀺, 𑀏𑀯𑀁𑀧𑀺𑀢𑀻𑀳𑀺 𑀲𑀁𑀯𑀘𑁆𑀙𑀭𑁂𑀳𑀺 𑀯𑀺𑀳𑀸𑀭𑀓𑀫𑁆𑀫𑀁 𑀦𑀺𑀝𑁆𑀞𑀸𑀧𑁂𑀲𑀺, 𑀏𑀓𑀤𑀺𑀯𑀲𑀫𑁂𑀯 𑀲𑀩𑁆𑀩𑀦𑀕𑀭𑁂𑀳𑀺 𑀧𑀡𑁆𑀡𑀸𑀦𑀺 𑀆𑀕𑀫𑀺𑀁𑀲𑀼, 𑀅𑀫𑀘𑁆𑀘𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁 𑀦𑀺𑀝𑁆𑀞𑀺𑀢𑀸𑀦𑀺 𑀤𑁂𑀯 𑀘𑀢𑀼𑀭𑀸𑀲𑀻𑀢𑀺𑀫𑀳𑀸𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀻𑀢𑀺. 𑀅𑀣 𑀭𑀸𑀚𑀸 ¶ 𑀪𑀺𑀓𑁆𑀔𑀼𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀦𑁆𑀢𑁂 𑀫𑀬𑀸 𑀘𑀢𑀼𑀭𑀸𑀲𑀻𑀢𑀺𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀺 𑀓𑀸𑀭𑀺𑀢𑀸𑀦𑀺, 𑀥𑀸𑀢𑀼𑀬𑁄 𑀓𑀼𑀢𑁄 𑀮𑀘𑁆𑀙𑀸𑀫𑀻𑀢𑀺 𑀧𑀼𑀘𑁆𑀙𑀺, 𑀫𑀳𑀸𑀭𑀸𑀚 𑀥𑀸𑀢𑀼𑀦𑀺𑀥𑀸𑀦𑀁 𑀦𑀸𑀫 𑀅𑀢𑁆𑀣𑀻𑀢𑀺 𑀲𑀼𑀡𑁄𑀫, 𑀦 𑀧𑀦 𑀧𑀜𑁆𑀜𑀸𑀬𑀢𑀺 𑀅𑀲𑀼𑀓𑀝𑁆𑀞𑀸𑀦𑁂𑀢𑀺. 𑀭𑀸𑀚𑀸 𑀭𑀸𑀚𑀕𑀳𑁂 𑀘𑁂𑀢𑀺𑀬𑀁 𑀪𑀺𑀦𑁆𑀤𑀸𑀧𑁂𑀢𑁆𑀯𑀸 𑀥𑀸𑀢𑀼𑀁 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀧𑀸𑀓𑀢𑀺𑀓𑀁 𑀓𑀸𑀭𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀡𑀺𑀬𑁄 𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀬𑁄𑀢𑀺 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀕𑀳𑁂𑀢𑁆𑀯𑀸 𑀯𑁂𑀲𑀸𑀮𑀺𑀬𑀁 𑀕𑀢𑁄. 𑀢𑀢𑁆𑀭𑀸𑀧𑀺 𑀅𑀮𑀪𑀺𑀢𑁆𑀯𑀸 𑀓𑀧𑀺𑀮𑀯𑀢𑁆𑀣𑀼𑀁 𑀕𑀢𑁄, 𑀢𑀢𑁆𑀭𑀸𑀧𑀺 𑀅𑀮𑀪𑀺𑀢𑁆𑀯𑀸 𑀭𑀸𑀫𑀕𑀸𑀫𑀁 𑀕𑀢𑁄, 𑀭𑀸𑀫𑀕𑀸𑀫𑁂 𑀦𑀸𑀕𑀸 𑀘𑁂𑀢𑀺𑀬𑀁 𑀪𑀺𑀦𑁆𑀤𑀺𑀢𑀼𑀁 𑀦𑀸𑀤𑀁𑀲𑀼. 𑀘𑁂𑀢𑀺𑀬𑁂 𑀦𑀺𑀧𑀢𑀺𑀢𑀓𑀼𑀤𑁆𑀤𑀸𑀮𑁄 𑀔𑀡𑁆𑀟𑀸𑀯𑀡𑁆𑀟𑀁 𑀳𑁄𑀢𑀺, 𑀏𑀯𑀁 𑀢𑀢𑁆𑀭𑀸𑀧𑀺 𑀅𑀮𑀪𑀺𑀢𑁆𑀯𑀸 𑀅𑀮𑁆𑀮𑀓𑀧𑁆𑀧𑀁 𑀧𑀸𑀯𑀁 𑀓𑀼𑀲𑀺𑀦𑀸𑀭𑀁𑀢𑀺 𑀲𑀩𑁆𑀩𑀘𑁂𑀢𑀺𑀬𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀥𑀸𑀢𑀼𑀁 𑀅𑀮𑀪𑀺𑀢𑁆𑀯𑀸 𑀧𑀝𑀺𑀧𑀸𑀓𑀢𑀺𑀓𑀸𑀦𑀺 𑀓𑀢𑁆𑀯𑀸 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀅𑀢𑁆𑀣𑀺 𑀓𑁂𑀦𑀘𑀺 𑀲𑀼𑀢𑀧𑀼𑀩𑁆𑀩𑀁 𑀅𑀲𑀼𑀓𑀝𑁆𑀞𑀸𑀦𑁂 𑀥𑀸𑀢𑀼𑀦𑀺𑀥𑀸𑀦𑀁𑀢𑀺 𑀧𑀼𑀘𑁆𑀙𑀺. 𑀢𑀢𑁆𑀣𑁂𑀓𑁄 𑀯𑀻𑀲𑀁𑀯𑀲𑁆𑀲 𑀲𑀢𑀺𑀓𑁄 𑀣𑁂𑀭𑁄 𑀅𑀲𑀼𑀓𑀝𑁆𑀞𑀸𑀦𑁂 𑀥𑀸𑀢𑀼𑀦𑀺𑀥𑀸𑀦𑀁𑀢𑀺 𑀦 𑀚𑀸𑀦𑀸𑀫𑀺, 𑀫𑀬𑁆𑀳𑀁 𑀧𑀦 𑀧𑀺𑀢𑀸𑀫𑀳𑀢𑁆𑀣𑁂𑀭𑁄 𑀫𑀬𑀺 𑀲𑀢𑁆𑀢𑀯𑀲𑁆𑀲𑀺𑀓𑀸𑀮𑁂 𑀫𑀸𑀮𑀸𑀘𑀗𑁆𑀕𑁄𑀝𑀓𑀁 𑀕𑀸𑀳𑀸𑀧𑁂𑀢𑁆𑀯𑀸 𑀏𑀳𑀺 𑀲𑀸𑀫𑀡𑁂𑀭 𑀅𑀲𑀼𑀓𑀕𑀘𑁆𑀙𑀦𑁆𑀢𑀭𑁂 𑀧𑀸𑀲𑀸𑀡𑀣𑀽𑀧𑁄 𑀅𑀢𑁆𑀣𑀺. 𑀢𑀢𑁆𑀣 𑀕𑀘𑁆𑀙𑀸𑀫𑀸𑀢𑀺 𑀕𑀦𑁆𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀇𑀫𑀁 𑀞𑀸𑀦𑀁 𑀉𑀧𑀥𑀸𑀭𑁂𑀢𑀼𑀁 𑀯𑀝𑁆𑀝𑀢𑀺 𑀲𑀸𑀫𑀡𑁂𑀭𑀸𑀢𑀺 𑀆𑀳. 𑀅𑀳𑀁 𑀏𑀢𑀫𑁂𑀯 𑀚𑀸𑀦𑀸𑀫𑀺 𑀫𑀳𑀸𑀭𑀸𑀚𑀸𑀢𑀺 𑀆𑀳. 𑀭𑀸𑀚𑀸 𑀏𑀢𑀤𑁂𑀯 𑀞𑀸𑀦𑀁𑀢𑀺 𑀯𑀢𑁆𑀯𑀸 𑀕𑀘𑁆𑀙𑁂 𑀳𑀭𑀸𑀧𑁂𑀢𑁆𑀯𑀸 𑀧𑀸𑀲𑀸𑀡𑀣𑀽𑀧𑀁 𑀧𑀁𑀲𑀼𑀁𑀘 𑀅𑀧𑀦𑁂𑀢𑁆𑀯𑀸 𑀳𑁂𑀝𑁆𑀞𑀸 𑀲𑀼𑀥𑀸𑀪𑀽𑀫𑀺𑀁 𑀅𑀤𑁆𑀤𑀲, 𑀢𑀢𑁄 𑀲𑀼𑀥𑀸 𑀘 𑀇𑀝𑁆𑀞𑀓𑀸𑀬𑁄 𑀘 𑀳𑀭𑀸𑀧𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀧𑀭𑀺𑀯𑁂𑀡𑀁 𑀑𑀭𑀼𑀬𑁆𑀳 𑀲𑀢𑁆𑀢𑀭𑀢𑀦𑀯𑀸𑀮𑀺𑀓𑀁 𑀅𑀲𑀺𑀳𑀢𑁆𑀣𑀸𑀦𑀺 𑀘 𑀓𑀝𑁆𑀞𑀭𑀽𑀧𑀓𑀸𑀦𑀺 𑀲𑀫𑁆𑀧𑀭𑀺𑀯𑀢𑁆𑀢𑀦𑁆𑀢𑀸𑀦𑀺 𑀅𑀤𑁆𑀤𑀲, 𑀲𑁄 𑀬𑀓𑁆𑀔𑀤𑀸𑀲𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀩𑀮𑀺𑀓𑀫𑁆𑀫𑀁 𑀓𑀸𑀭𑀸𑀧𑁂𑀢𑁆𑀯𑀸𑀧𑀺 𑀦𑁂𑀯 𑀅𑀦𑁆𑀢𑀁 𑀧𑀲𑁆𑀲𑀦𑁆𑀢𑁄 𑀤𑁂𑀯𑀢𑀸 𑀦𑀫𑀲𑁆𑀲𑀫𑀸𑀦𑁄 𑀅𑀳𑀁 𑀇𑀫𑀸 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺𑀯𑀺𑀳𑀸𑀭𑀲𑀳𑀲𑁆𑀲𑁂 𑀦𑀺𑀤𑀳𑀺𑀢𑁆𑀯𑀸 𑀲𑀓𑁆𑀓𑀸𑀭𑀁 𑀓𑀭𑁄𑀫𑀺. 𑀫𑀸 𑀫𑁂 𑀤𑁂𑀯𑀢𑀸 𑀅𑀦𑁆𑀢𑀭𑀸𑀬𑀁 𑀓𑀭𑁄𑀦𑁆𑀢𑀽𑀢𑀺 𑀆𑀳, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀯𑀺𑀲𑁆𑀲𑀓𑀫𑁆𑀫𑀁 𑀆𑀫𑀦𑁆𑀢𑁂𑀢𑁆𑀯𑀸 𑀢𑀸𑀢 𑀅𑀲𑁄𑀓𑀥𑀫𑁆𑀫𑀭𑀸𑀚𑀸 𑀥𑀸𑀢𑀼𑀬𑁄 ¶ 𑀦𑀻𑀳𑀭𑀺𑀲𑁆𑀲𑀸𑀫𑀻𑀢𑀺 𑀧𑀭𑀺𑀯𑁂𑀡𑀁 𑀑𑀢𑀺𑀡𑁆𑀡𑁄. 𑀕𑀦𑁆𑀢𑁆𑀯𑀸 𑀓𑀝𑁆𑀞𑀭𑀽𑀧𑀸𑀦𑀺 𑀦𑀻𑀳𑀭𑀸𑀧𑁂𑀳𑀻𑀢𑀺. 𑀲𑁄 𑀧𑀜𑁆𑀘𑀘𑀽𑀮𑀓𑀕𑀸𑀫𑀤𑀸𑀭𑀓𑀯𑁂𑀲𑁂𑀦 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀧𑀼𑀭𑀢𑁄 𑀥𑀦𑀼𑀓𑀳𑀢𑁆𑀣𑁄 𑀞𑀢𑁆𑀯𑀸 𑀳𑀸𑀭𑁂𑀫𑀺 𑀫𑀳𑀸𑀭𑀸𑀚𑀸𑀢𑀺 𑀆𑀳, 𑀳𑀭 𑀢𑀸𑀢𑀸𑀢𑀺 𑀲𑀭𑀁 𑀕𑀳𑁂𑀢𑁆𑀯𑀸 𑀲𑀦𑁆𑀥𑀺𑀫𑁆𑀳𑀺𑀬𑁂𑀯 𑀯𑀺𑀚𑁆𑀛𑀺, 𑀲𑀩𑁆𑀩𑀁 𑀯𑀺𑀧𑁆𑀧𑀓𑀺𑀭𑀻𑀬𑀺𑀢𑁆𑀣, 𑀅𑀣 𑀭𑀸𑀚𑀸 𑀆𑀯𑀺𑀜𑁆𑀚𑀦𑁂 [𑀅𑀯𑀺𑀜𑁆𑀘𑀺𑀦𑁂 𑀇𑀢𑀺𑀧𑀺𑀓𑀢𑁆𑀣𑀘𑀺] 𑀩𑀦𑁆𑀥𑀓𑀼𑀜𑁆𑀘𑀺𑀓𑀫𑀼𑀤𑁆𑀤𑀺𑀓𑀁 𑀕𑀡𑁆𑀳𑀺, 𑀫𑀡𑀺𑀓𑁆𑀔𑀦𑁆𑀥𑀁 𑀧𑀲𑁆𑀲𑀺𑀢𑁆𑀯𑀸 𑀅𑀦𑀸𑀕𑀢𑁂 𑀤𑀴𑀺𑀤𑁆𑀤𑀭𑀸𑀚𑀸𑀦𑁄 𑀇𑀫𑀁 𑀫𑀡𑀺𑀁 𑀕𑀳𑁂𑀢𑁆𑀯𑀸 𑀥𑀸𑀢𑀽𑀦𑀁 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀽𑀢𑀺 𑀧𑀡𑁆𑀡𑁂 𑀅𑀓𑁆𑀔𑀭𑀸𑀦𑀺 𑀤𑀺𑀲𑁆𑀯𑀸 𑀓𑀼𑀚𑁆𑀛𑀺𑀢𑁆𑀯𑀸 𑀫𑀸𑀤𑀺𑀲𑀸𑀦𑀁 𑀧𑀦 𑀭𑀸𑀚𑀽𑀦𑀁 [𑀭𑀸𑀚𑀸𑀦𑀁 𑀇𑀢𑀺𑀲𑀩𑁆𑀩𑀢𑁆𑀣] 𑀤𑀴𑀺𑀤𑁆𑀤𑀭𑀸𑀚𑀸𑀢𑀺 𑀯𑀢𑁆𑀢𑀼𑀁 𑀅𑀬𑀼𑀢𑁆𑀢𑀁𑀢𑀺 𑀧𑀼𑀦𑀧𑁆𑀧𑀼𑀦𑀁 𑀖𑀝𑁂𑀢𑁆𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀅𑀦𑁆𑀢𑁄𑀕𑁂𑀳𑀁 𑀧𑀯𑀺𑀝𑁆𑀞𑁄 𑀅𑀝𑁆𑀞𑀸𑀭𑀲𑀯𑀲𑁆𑀲𑀸𑀥𑀺𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀉𑀧𑀭𑀺 𑀆𑀭𑁄𑀧𑀺𑀢𑀤𑀻𑀧𑀸 𑀢𑀣𑁂𑀯 𑀧𑀚𑁆𑀚𑀮𑀦𑁆𑀢𑀺, 𑀦𑀻𑀮𑀼𑀧𑁆𑀧𑀮𑀧𑀼𑀧𑁆𑀨𑀸𑀦𑀺 𑀢𑀁𑀔𑀡𑀁𑀬𑁂𑀯 𑀆𑀳𑀭𑀺𑀢𑁆𑀯𑀸 𑀆𑀭𑁄𑀧𑀺𑀢𑀸𑀦𑀺 𑀯𑀺𑀬 𑀧𑀼𑀧𑁆𑀨𑀲𑀦𑁆𑀣𑀸𑀭𑁄 𑀢𑀁 𑀔𑀡𑀁 𑀲𑀦𑁆𑀣𑀢𑁄 𑀯𑀺𑀬 𑀕𑀦𑁆𑀥𑀸 𑀢𑀁 𑀫𑀼𑀳𑀼𑀢𑁆𑀢𑀁 𑀧𑀺𑀁𑀲𑀺𑀢𑁆𑀯𑀸 𑀞𑀧𑀺𑀢𑀸 𑀯𑀺𑀬 𑀅𑀳𑁂𑀲𑀼𑀁. 𑀭𑀸𑀚𑀸 𑀲𑀼𑀯𑀡𑁆𑀡𑀧𑀝𑁆𑀝𑀁 𑀕𑀳𑁂𑀢𑁆𑀯𑀸 𑀅𑀦𑀸𑀕𑀢𑁂 𑀧𑀺𑀬𑀤𑀸𑀲𑁄 𑀦𑀸𑀫 𑀓𑀼𑀫𑀸𑀭𑁄 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀅𑀲𑁄𑀓𑁄 𑀦𑀸𑀫 𑀥𑀫𑁆𑀫𑀭𑀸𑀚𑀸 𑀪𑀯𑀺𑀲𑁆𑀲𑀢𑀺, 𑀲𑁄 𑀇𑀫𑀸 𑀥𑀸𑀢𑀼𑀬𑁄 𑀯𑀺𑀢𑁆𑀣𑀸𑀭𑀺𑀢𑀸 𑀓𑀭𑀺𑀲𑁆𑀲𑀢𑀻𑀢𑀺 𑀯𑀸𑀘𑁂𑀢𑁆𑀯𑀸 𑀤𑀺𑀝𑁆𑀞𑁄𑀳𑀁 𑀅𑀬𑁆𑀬𑁂𑀦 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦𑀸𑀢𑀺 𑀯𑀢𑁆𑀯𑀸 𑀯𑀸𑀫𑀳𑀢𑁆𑀣𑀁 𑀆𑀪𑀼𑀚𑀺𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀅𑀧𑁆𑀨𑁄𑀝𑁂𑀲𑀺. 𑀲𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀭𑀺𑀘𑀭𑀡𑀓𑀥𑀸𑀢𑀼𑀫𑀢𑁆𑀢𑀫𑁂𑀯 𑀞𑀧𑁂𑀢𑁆𑀯𑀸 𑀲𑁂𑀲𑀥𑀸𑀢𑀼𑀬𑁄 𑀲𑀩𑁆𑀩𑀸 𑀕𑀳𑁂𑀢𑁆𑀯𑀸 𑀥𑀸𑀢𑀼𑀖𑀭𑀁 𑀧𑀼𑀩𑁆𑀩𑁂 𑀧𑀺𑀳𑀺𑀢𑀦𑀬𑁂𑀦𑁂𑀯 𑀧𑀺𑀤𑀳𑀺𑀢𑁆𑀯𑀸 𑀲𑀩𑁆𑀩𑀸 𑀬𑀣𑀸 𑀧𑀓𑀢𑀺𑀬𑀸𑀬𑁂𑀯 𑀓𑀸𑀭𑁂𑀢𑁆𑀯𑀸 𑀉𑀧𑀭𑀺𑀧𑀸𑀲𑀸𑀡𑀘𑁂𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺𑀬𑀸 𑀯𑀺𑀳𑀸𑀭𑀲𑀳𑀲𑁆𑀲𑁂𑀲𑀼 𑀥𑀸𑀢𑀼𑀬𑁄 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀭𑀸𑀚𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀲𑀁𑀖𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑁂 𑀦𑀺𑀲𑀺𑀦𑁆𑀦𑁄 𑀬𑀤𑀺 𑀪𑀦𑁆𑀢𑁂 𑀙𑀦𑁆𑀦𑀯𑀼𑀢𑀺𑀓𑁄𑀝𑀺𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀺𑀲𑀘𑁂𑀢𑀺𑀬𑀸𑀦𑀺 𑀓𑀸𑀭𑀸𑀧𑁂𑀢𑁆𑀯𑀸𑀧𑀺 𑀅𑀳𑀁 𑀦 𑀤𑀸𑀬𑀸𑀤𑁄. 𑀅𑀜𑁆𑀜𑁄 𑀓𑁄 𑀤𑀸𑀬𑀸𑀤𑁄𑀢𑀺, 𑀧𑀘𑁆𑀘𑀬𑀤𑀸𑀬𑀓𑁄 𑀦𑀸𑀫 𑀢𑁆𑀯𑀁 𑀫𑀳𑀸𑀭𑀸𑀚, 𑀬𑁄 𑀧𑀦 𑀅𑀢𑁆𑀢𑀦𑁄 𑀧𑀼𑀢𑁆𑀢𑀜𑁆𑀘 𑀥𑀻𑀢𑀭𑀜𑁆𑀘 𑀧𑀩𑁆𑀩𑀸𑀚𑁂𑀢𑀺, 𑀅𑀬𑀁 𑀲𑀸𑀲𑀦𑁂 𑀤𑀸𑀬𑀸𑀤𑁄 𑀦𑀸𑀫𑀸𑀢𑀺 𑀏𑀯𑀁 𑀯𑀼𑀢𑁆𑀢𑁂 ¶ 𑀅𑀲𑁄𑀓𑁄 𑀭𑀸𑀚𑀸 𑀲𑀸𑀲𑀦𑁂 𑀤𑀸𑀬𑀸𑀤𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑀅𑀯𑀺𑀤𑀽𑀭𑁂 𑀞𑀺𑀢𑀁 𑀫𑀳𑀺𑀦𑁆𑀤𑀓𑀼𑀫𑀸𑀭𑀁 𑀤𑀺𑀲𑁆𑀯𑀸 𑀲𑀓𑁆𑀔𑀺𑀲𑁆𑀲𑀲𑀺 𑀢𑀸𑀢 𑀢𑁆𑀯𑀁 𑀧𑀩𑁆𑀩𑀚𑀺𑀢𑀼𑀁𑀢𑀺 𑀆𑀳. 𑀓𑀼𑀫𑀸𑀭𑁄 𑀧𑀓𑀢𑀺𑀬𑀸 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀭𑀜𑁆𑀜𑁄 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀢𑀺𑀯𑀺𑀬 𑀧𑀸𑀫𑁄𑀚𑁆𑀚𑀚𑀸𑀢𑁄 𑀧𑀼𑀩𑁆𑀩𑀚𑀸𑀫𑀺 [𑀧𑀩𑁆𑀩𑀚𑁆𑀚𑀸𑀫𑀺 𑀇𑀢𑀺𑀲𑀩𑁆𑀩𑀢𑁆𑀣] 𑀤𑁂𑀯. 𑀫𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀲𑀸𑀲𑀦𑁂 𑀤𑀸𑀬𑀸𑀤𑁄 𑀳𑁄𑀣𑀸𑀢𑀺 𑀆𑀳. 𑀢𑁂𑀦 𑀘 𑀲𑀫𑀬𑁂𑀦 𑀭𑀸𑀚𑀥𑀻𑀢𑀸 𑀲𑀁𑀖𑀫𑀺𑀢𑁆𑀢𑀸𑀧𑀺 𑀢𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑀸 𑀳𑁄𑀢𑀺. 𑀢𑀁 𑀤𑀺𑀲𑁆𑀯𑀸 𑀆𑀳 𑀢𑁆𑀯𑀫𑁆𑀧𑀺 𑀅𑀫𑁆𑀫 𑀧𑀩𑁆𑀩𑀚𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻𑀢𑀺, 𑀲𑀸𑀥𑀼 𑀢𑀸𑀢𑀸𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀭𑀸𑀚𑀸 𑀧𑀼𑀢𑁆𑀢𑀸𑀦𑀁 𑀫𑀦𑀁 𑀮𑀪𑀺𑀢𑁆𑀯𑀸 𑀧𑀳𑀝𑁆𑀞𑀘𑀺𑀢𑁆𑀢𑁄 𑀪𑀺𑀓𑁆𑀔𑀼𑀲𑀁𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀦𑁆𑀢𑁂 𑀇𑀫𑁂 𑀤𑀸𑀭𑀓𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀫𑀁 𑀲𑀸𑀲𑀦𑁂 𑀤𑀸𑀬𑀸𑀤𑀁 𑀓𑀭𑁄𑀣𑀸𑀢𑀺. 𑀲𑀗𑁆𑀖𑁄 𑀭𑀜𑁆𑀜𑁄 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀓𑀼𑀫𑀸𑀭𑀁 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁂𑀦 𑀉𑀧𑀚𑁆𑀛𑀸𑀬𑁂𑀦 𑀫𑀳𑀸𑀤𑁂𑀯𑀢𑁆𑀣𑁂𑀭𑁂𑀦 𑀆𑀘𑀭𑀺𑀬𑁂𑀦 𑀧𑀩𑁆𑀩𑀚𑀸𑀧𑁂𑀲𑀺 [𑀧𑀩𑁆𑀩𑀚𑁆𑀚𑀸𑀧𑁂𑀲𑀺 𑀇𑀢𑀺𑀲𑀩𑁆𑀩𑀢𑁆𑀣]. 𑀫𑀚𑁆𑀛𑀦𑁆𑀢𑀺𑀓𑀢𑁆𑀣𑁂𑀭𑁂𑀦 𑀆𑀘𑀭𑀺𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀲𑀺, 𑀲𑁄 𑀉𑀧𑀲𑀫𑁆𑀧𑀤𑀸𑀫𑀸𑀮𑀓𑁂𑀬𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑀗𑁆𑀖𑀫𑀺𑀢𑁆𑀢𑀸𑀬𑀧𑀺 𑀭𑀸𑀚𑀥𑀻𑀢𑀸𑀬 𑀆𑀘𑀭𑀺𑀬𑀸𑀡𑀻 𑀆𑀬𑀼𑀧𑀸𑀮𑀢𑁆𑀣𑁂𑀭𑀻 𑀦𑀸𑀫 [𑀅𑀘𑀸𑀭𑀺𑀬𑀸 𑀆𑀬𑀼𑀧𑀸𑀮𑀢𑁆𑀣𑁂𑀭𑀻𑀦𑀸𑀫 𑀇𑀢𑀺𑀲𑀩𑁆𑀩𑀢𑁆𑀣]. 𑀉𑀧𑀚𑁆𑀛𑀸𑀬𑀸 𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑀻 𑀦𑀸𑀫 𑀅𑀳𑁄𑀲𑀺. 𑀭𑀸𑀚𑀸 𑀧𑀦 𑀅𑀦𑁂𑀓𑀸𑀓𑀸𑀭𑁂𑀦 𑀩𑀼𑀤𑁆𑀥𑀲𑀸𑀲𑀦𑀁 𑀲𑁄𑀪𑁂𑀢𑁆𑀯𑀸 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀲𑀳𑀸𑀬𑁂𑀦 [𑀲𑀳𑀬𑁆𑀬𑁂𑀦. 𑀲𑀸𑀳𑀸𑀬𑁆𑀬𑁂𑀦. 𑀲𑀸𑀳𑀬𑁆𑀬𑁂𑀦 𑀇𑀢𑀺𑀧𑀺𑀓𑀢𑁆𑀣𑀘𑀺] 𑀲𑀝𑁆𑀞𑀺𑀲𑀳𑀲𑁆𑀲𑀫𑀢𑁆𑀢𑁂 𑀤𑀼𑀲𑁆𑀲𑀻𑀮𑁂 𑀢𑀺𑀢𑁆𑀣𑀺𑀬𑁂 𑀩𑀼𑀤𑁆𑀥𑀲𑀸𑀲𑀦𑀸 𑀉𑀧𑁆𑀧𑀩𑁆𑀩𑀸𑀚𑁂𑀢𑁆𑀯𑀸 𑀢𑀢𑀺𑀬𑀥𑀫𑁆𑀫𑀲𑀁𑀕𑀻𑀢𑀺𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀢𑀲𑁆𑀫𑀺𑀁 𑀓𑀺𑀭 𑀲𑀫𑀸𑀕𑀫𑁂 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀡𑀺𑀬𑁄 𑀓𑀺𑀢𑁆𑀢𑀓𑀸𑀢𑀺 [𑀓𑀺𑀢𑁆𑀢𑀓𑀸𑀦𑀻𑀢𑀺 𑀇𑀢𑀺𑀲𑀩𑁆𑀩𑀢𑁆𑀣], 𑀯𑀼𑀢𑁆𑀢𑀜𑁆𑀳𑀺.

𑁧𑁨.

𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀆𑀲𑀼𑀁, 𑀅𑀲𑀻𑀢𑀺𑀪𑀺𑀓𑁆𑀔𑀼𑀓𑁄𑀝𑀺𑀬𑁄;

𑀅𑀳𑁂𑀲𑀼𑀁 𑀲𑀢𑀲𑀳𑀲𑁆𑀲𑀸𑀦𑀺, 𑀢𑁂𑀲𑀼 𑀔𑀻𑀡𑀸𑀲𑀯𑀸 𑀬𑀢𑀻.

𑁧𑁩.

𑀦𑀯𑀼𑀢𑀺𑀲𑀢𑀲𑀳𑀲𑁆𑀲𑀸𑀦𑀺, 𑀅𑀳𑀽 𑀪𑀺𑀓𑁆𑀔𑀼𑀡𑀺𑀬𑁄 𑀢𑀳𑀺𑀁;

𑀔𑀻𑀡𑀸𑀲𑀯𑀸 𑀲𑀺𑀓𑁆𑀔𑀼𑀡𑀺𑀬𑁄, 𑀲𑀳𑀲𑁆𑀲𑀁 𑀆𑀲𑀼 𑀢𑀸𑀲𑀼 𑀘𑀸𑀢𑀺.

𑀏𑀯𑀁 ¶ 𑀲𑁄 𑀅𑀲𑁄𑀓𑁄 𑀥𑀫𑁆𑀫𑀭𑀸𑀚𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀭𑀸𑀚𑀸 𑀳𑀼𑀢𑁆𑀯𑀸 𑀩𑀼𑀤𑁆𑀥𑀲𑀸𑀲𑀦𑀁 𑀲𑁄𑀪𑁂𑀦𑁆𑀢𑁄 𑀯𑀺𑀳𑀸𑀲𑀺. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀫𑀳𑀸𑀯𑀁𑀲𑁂 𑀯𑀼𑀢𑁆𑀢𑁄𑀢𑀺. 𑀯𑀼𑀢𑁆𑀢𑀜𑁆𑀳𑀺.

𑁧𑁪.

𑀲𑀫𑁆𑀧𑀼𑀡𑁆𑀡𑀢𑁆𑀢𑀸 𑀅𑀬𑀁 𑀢𑀺𑀲𑁆𑀲𑁄, 𑀘𑁂𑀢𑀦𑀸𑀬𑁄 𑀫𑀥𑀼𑀧𑁆𑀧𑀤𑁄;

𑀲𑀩𑁆𑀩𑀢𑁆𑀣 𑀲𑀩𑁆𑀩𑀤𑀸 𑀲𑀩𑁆𑀩, 𑀲𑀫𑁆𑀧𑀢𑁆𑀢𑀺𑀫𑀪𑀺𑀲𑀫𑁆𑀪𑀼𑀡𑀻𑀢𑀺.

𑀫𑀚𑁆𑀛𑀺𑀫𑁄 𑀧𑀦 𑀯𑀸𑀡𑀺𑀚𑁄 𑀅𑀢𑁆𑀢𑀦𑁄 𑀧𑀸𑀭𑀯𑀸𑀤𑀺𑀤𑁄𑀲𑁂𑀦 𑀧𑀭𑀲𑀫𑀼𑀤𑁆𑀤𑁂 𑀮𑀗𑁆𑀓𑀸𑀬𑀁 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲𑁂𑀯𑀁 𑀓𑀣𑀸𑀧𑀝𑀺𑀧𑀸𑀝𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀓𑀺𑀭 𑀫𑀼𑀝𑀲𑀻𑀯𑁄 𑀦𑀸𑀫 𑀭𑀸𑀚𑀸 𑀲𑀝𑁆𑀞𑀺𑀯𑀲𑁆𑀲𑀸𑀦𑀺 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀢𑀲𑁆𑀲 𑀧𑀼𑀜𑁆𑀜𑀧𑀜𑁆𑀜𑀸𑀕𑀼𑀡𑁄𑀧𑁂𑀢𑀸 𑀅𑀜𑁆𑀜𑀫𑀜𑁆𑀜𑀁 𑀳𑀺𑀢𑁂𑀲𑀺𑀦𑁄 𑀤𑀲 𑀧𑀼𑀢𑁆𑀢𑀸 𑀅𑀳𑁂𑀲𑀼𑀁. 𑀤𑁆𑀯𑁂 𑀘 𑀥𑀻𑀢𑀭𑁄. 𑀲𑀩𑁆𑀩𑁂 𑀢𑁂 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀯𑀲𑀦𑁆𑀢𑀺. 𑀅𑀣𑀸𑀧𑀭𑀲𑁆𑀫𑀺𑀁 𑀲𑀫𑀬𑁂 𑀅𑀫𑀘𑁆𑀘𑀸 𑀫𑀼𑀝𑀲𑀻𑀯𑀭𑀜𑁆𑀜𑁂 𑀓𑀸𑀮𑀓𑀢𑁂 𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑀓𑀼𑀫𑀸𑀭𑀁 𑀅𑀪𑀺𑀲𑀺𑀜𑁆𑀘𑀺𑀁𑀲𑀼, 𑀅𑀪𑀺𑀲𑁂𑀓𑀲𑀫𑀓𑀸𑀮𑀫𑁂𑀯𑀲𑁆𑀲 𑀅𑀦𑁂𑀓𑀸𑀦𑀺 𑀅𑀘𑁆𑀙𑀭𑀺𑀬𑀸𑀦𑀺 𑀅𑀳𑁂𑀲𑀼𑀁. 𑀢𑀸𑀦𑀺 𑀧𑀓𑀸𑀲𑁂𑀦𑁆𑀢𑀸 𑀫𑀳𑀸𑀯𑀁𑀲𑀓𑀣𑀸𑀘𑀭𑀺𑀬𑀸 𑀆𑀳𑀁𑀲𑀼.

𑁧𑁫.

𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁄𑀢𑀺, 𑀯𑀺𑀲𑁆𑀲𑀼𑀢𑁄 𑀤𑀼𑀢𑀺𑀬𑁄 𑀲𑀼𑀢𑁄;

𑀢𑁂𑀲𑀼 [𑀅𑀳𑁄𑀲𑀺𑀫𑀼𑀝𑀲𑀻𑀯𑀲𑁆𑀲, 𑀤𑀲𑀧𑀼𑀢𑁆𑀢𑁂𑀲𑀼𑀧𑀼𑀜𑁆𑀜𑀯𑀸 𑀇𑀢𑀺𑀓𑀢𑁆𑀣𑀘𑀺] 𑀪𑀸𑀢𑀼𑀲𑀼 𑀲𑀩𑁆𑀩𑁂𑀲𑀼, 𑀧𑀼𑀜𑁆𑀜𑀧𑀜𑁆𑀜𑀸𑀥𑀺𑀓𑁄 𑀅𑀳𑀼.

𑁧𑁬.

𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁄 𑀲𑁄, 𑀭𑀸𑀚𑀸𑀲𑀺 𑀧𑀺𑀢𑀼𑀅𑀘𑁆𑀘𑀬𑁂;

𑀢𑀲𑁆𑀲𑀸𑀪𑀺𑀲𑁂𑀓𑁂𑀦 𑀲𑀫𑀁, 𑀩𑀳𑀽𑀦𑀘𑁆𑀙𑀭𑀺𑀬𑀸𑀦𑀳𑀽.

𑁧𑁭.

𑀮𑀗𑁆𑀓𑀸𑀤𑀻𑀧𑀫𑁆𑀳𑀺 𑀲𑀓𑀮𑁂, 𑀦𑀺𑀥𑀬𑁄 𑀭𑀢𑀦𑀸𑀦𑀺𑀘;

𑀅𑀦𑁆𑀢𑁄𑀞𑀺𑀢𑀸𑀦𑀺 𑀉𑀕𑁆𑀕𑀦𑁆𑀢𑁆𑀯𑀸, 𑀧𑀣𑀯𑀻𑀢𑀮𑀫𑀸𑀭𑀼𑀳𑀼𑀁.

𑁧𑁮.

𑀮𑀗𑁆𑀓𑀸𑀤𑀻𑀧𑀲𑀫𑀻𑀧𑀫𑁆𑀳𑀺, 𑀪𑀺𑀦𑁆𑀦𑀦𑀸𑀯𑀸 𑀕𑀢𑀸𑀦𑀺 𑀘;

𑀢𑀢𑁆𑀭 𑀚𑀸𑀢𑀸𑀦𑀺 𑀘 𑀣𑀮𑀁, 𑀭𑀢𑀦𑀸𑀦𑀺 𑀲𑀫𑀸𑀭𑀼𑀳𑀼𑀁.

𑁧𑁯.

𑀙𑀸𑀢𑀧𑀩𑁆𑀩𑀢𑀧𑀸𑀤𑀫𑁆𑀳𑀺, 𑀢𑀺𑀲𑁆𑀲𑁄 𑀘 𑀯𑁂𑀴𑀼𑀬𑀝𑁆𑀞𑀺𑀬𑁄;

𑀚𑀸𑀢𑀸 𑀭𑀣𑀧𑀢𑁄𑀤𑁂𑀦, 𑀲𑀫𑀸𑀦𑀸 𑀧𑀭𑀺𑀫𑀸𑀡𑀢𑁄.

𑁨𑁦.

𑀢𑀸𑀲𑀼 ¶ 𑀏𑀓𑀸 𑀮𑀢𑀸𑀬𑀝𑁆𑀞𑀺, 𑀭𑀚𑀢𑀸𑀪𑀸 𑀢𑀳𑀺𑀁 𑀮𑀢𑀸;

𑀲𑀼𑀯𑀡𑁆𑀡𑀯𑀡𑁆𑀡𑀸 𑀭𑀼𑀘𑀺𑀭𑀸; 𑀤𑀺𑀲𑁆𑀲𑀦𑁆𑀢𑁂𑀢𑀸 𑀫𑀦𑁄𑀭𑀫𑀸.

𑁨𑁧.

𑀏𑀓𑀸 𑀓𑀼𑀲𑀼𑀫𑀬𑀝𑁆𑀞𑀻𑀢𑀼; 𑀓𑀼𑀲𑀼𑀫𑀸𑀦𑀺 𑀢𑀳𑀺𑀁𑀧𑀦;

𑀦𑀸𑀦𑀸𑀦𑀺 𑀦𑀸𑀦𑀸𑀯𑀡𑁆𑀡𑀸𑀦𑀺; 𑀤𑀺𑀲𑁆𑀲𑀦𑁆𑀢𑁂𑀢𑀺𑀨𑀼𑀝𑀸𑀦𑀺 𑀘.

𑁨𑁨.

𑀏𑀓𑀸 𑀲𑀓𑀼𑀡𑀬𑀝𑁆𑀞𑀻 𑀢𑀼, 𑀢𑀳𑀺𑀁𑀧𑀓𑁆𑀔𑀺𑀫𑀺𑀕𑀸 𑀩𑀳𑀽;

𑀦𑀸𑀦𑀸 𑀘 𑀦𑀸𑀦𑀸𑀯𑀡𑁆𑀡𑀸 𑀘, 𑀲𑀚𑀻𑀯𑀸𑀯𑀺𑀬 𑀤𑀺𑀲𑁆𑀲𑀭𑁂.

𑁨𑁩.

𑀳𑀬𑀕𑀚𑀭𑀣𑀸 𑀫𑀮𑀓𑁆𑀬𑀸, 𑀯𑀮𑀬𑀗𑁆𑀕𑀼𑀮𑀺𑀯𑁂𑀞𑀓𑀸 𑀘𑁂𑀯;

𑀓𑀓𑀼𑀥𑀨𑀮𑀸 𑀧𑀸𑀓𑀢𑀺𑀓𑀸, 𑀇𑀘𑁆𑀘𑁂 𑀢𑀸 𑀅𑀝𑁆𑀞 𑀚𑀸𑀢𑀺𑀬𑀸.

𑁨𑁪.

𑀫𑀼𑀢𑁆𑀢𑀸 𑀲𑀫𑀼𑀤𑁆𑀤𑀸 𑀉𑀕𑁆𑀕𑀦𑁆𑀢𑁆𑀯𑀸; 𑀢𑀻𑀭𑁂 𑀯𑀝𑁆𑀝𑀺𑀯𑀺𑀬𑀝𑁆𑀞𑀺𑀢𑀸;

𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑀲𑁆𑀲; 𑀲𑀩𑁆𑀩𑀁 𑀧𑀼𑀜𑁆𑀜𑀯𑀺𑀚𑀫𑁆𑀪𑀺𑀢𑀁.

𑁨𑁫.

𑀇𑀦𑁆𑀤𑀦𑀻𑀮𑀁 𑀯𑁂𑀴𑀼𑀭𑀺𑀬𑀁, 𑀮𑁄𑀳𑀺𑀢𑀗𑁆𑀓𑀫𑀡𑀻 𑀘𑀺 𑀫𑁂;

𑀭𑀢𑀦𑀸𑀦𑀺 𑀧𑀦𑁂 𑀢𑀸𑀦𑀺, 𑀫𑀼𑀢𑁆𑀢𑀸 𑀢𑀸 𑀢𑀸𑀘 𑀬𑀝𑁆𑀞𑀺𑀬𑁄;

𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂𑀬𑁂𑀯, 𑀭𑀜𑁆𑀜𑁄 𑀲𑀦𑁆𑀢𑀺𑀓𑀫𑀸𑀳𑀭𑀼𑀁𑀢𑀺.

𑀢𑁂𑀦 𑀘 𑀲𑀫𑀬𑁂𑀦 𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑀫𑀳𑀸𑀭𑀸𑀚𑀸 𑀘 𑀅𑀲𑁄𑀓𑁄 𑀥𑀫𑁆𑀫𑀭𑀸𑀚𑀸 𑀘 𑀅𑀤𑁆𑀤𑀺𑀝𑁆𑀞𑀲𑀳𑀸𑀬𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀲𑁄 𑀏𑀢𑀸𑀦𑀺 𑀭𑀢𑀦𑀸𑀦𑀺 𑀘 𑀅𑀜𑁆𑀜𑀸𑀦𑀺 𑀩𑀳𑀽𑀦𑀺 𑀉𑀧𑀸𑀬𑀦𑀸𑀦𑀺 𑀫𑀫 𑀲𑀳𑀸𑀬𑀲𑁆𑀲 𑀤𑁂𑀣𑀸𑀢𑀺 𑀥𑀫𑁆𑀫𑀸𑀲𑁄𑀓𑀫𑀳𑀸𑀦𑀭𑀺𑀦𑁆𑀤𑀲𑁆𑀲 𑀧𑀡𑁆𑀡𑀸𑀓𑀸𑀭𑀢𑁆𑀣𑀸𑀬 𑀧𑁂𑀲𑁂𑀲𑀺. 𑀲𑁄𑀧𑀺 𑀢𑀁 𑀤𑀺𑀲𑁆𑀯𑀸 𑀧𑀲𑀻𑀤𑀺𑀢𑁆𑀯𑀸 𑀧𑀜𑁆𑀘𑀭𑀸𑀚𑀓𑀓𑀼𑀥𑀪𑀡𑁆𑀟𑀸𑀦𑀺 𑀘 𑀅𑀜𑁆𑀜𑀜𑁆𑀘 𑀩𑀳𑀼𑀧𑀡𑁆𑀡𑀸𑀓𑀸𑀭𑀜𑁆𑀘 𑀅𑀪𑀺𑀲𑁂𑀓𑀢𑁆𑀣𑀸𑀬 𑀧𑁂𑀲𑁂𑀲𑀺. 𑀫𑀬𑁆𑀳𑀁 𑀲𑀳𑀸𑀬𑀁 𑀅𑀪𑀺𑀲𑁂𑀓𑀁 𑀓𑀭𑁄𑀦𑁆𑀢𑀽𑀢𑀺. 𑀦 𑀓𑁂𑀯𑀮𑀜𑁆𑀘𑁂𑀢𑀁 𑀆𑀫𑀺𑀲𑀧𑀡𑁆𑀡𑀸𑀓𑀸𑀭𑀁. 𑀇𑀫𑀁 𑀓𑀺𑀭 𑀥𑀫𑁆𑀫𑀧𑀡𑁆𑀡𑀸𑀓𑀸𑀭𑀫𑁆𑀧𑀺 𑀧𑁂𑀲𑁂𑀲𑀺.

𑁨𑁬.

𑀅𑀳𑀁 𑀩𑀼𑀤𑁆𑀥𑀁𑀘 𑀥𑀫𑁆𑀫𑀁𑀘; 𑀲𑀁𑀖𑀁𑀘 𑀲𑀭𑀡𑀁 𑀕𑀢𑁄;

𑀉𑀧𑀲𑀓𑀢𑁆𑀢𑀁 𑀯𑁂𑀤𑁂𑀲𑀺𑀁; 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑁂.

𑁨𑁭.

𑀇𑀫𑁂𑀲𑀼 𑀢𑀻𑀲𑀼 𑀯𑀢𑁆𑀣𑀽𑀲𑀼; 𑀉𑀢𑁆𑀢𑀫𑁂𑀲𑀼 𑀦𑀭𑀼𑀢𑁆𑀢𑀫;

𑀘𑀺𑀢𑁆𑀢𑀁 𑀧𑀲𑀸𑀤𑀬𑀺𑀢𑁆𑀯𑀸𑀦, 𑀲𑀤𑁆𑀥𑀸𑀬 𑀲𑀭𑀡𑀁 𑀯𑀚𑀸𑀢𑀺.

𑀅𑀫𑀘𑁆𑀘𑀸 ¶ 𑀧𑀼𑀦 𑀮𑀗𑁆𑀓𑀫𑀸𑀕𑀫𑁆𑀫 𑀭𑀸𑀚𑀸𑀦𑀁 𑀅𑀪𑀺𑀲𑀺𑀜𑁆𑀘𑀺𑀁𑀲𑀼, 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑁄 𑀓𑀢𑁆𑀣 𑀦𑀼𑀔𑁄 𑀅𑀦𑀸𑀕𑀢𑁂 𑀲𑀸𑀲𑀦𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁 𑀪𑀯𑁂𑀬𑁆𑀬𑀸𑀢𑀺 𑀉𑀧𑀧𑀭𑀺𑀓𑁆𑀔𑀦𑁆𑀢𑁄 𑀧𑀘𑁆𑀘𑀦𑁆𑀢𑀺𑀫𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁 𑀪𑀯𑀺𑀲𑁆𑀲𑀢𑀻𑀢𑀺 𑀜𑀢𑁆𑀯𑀸 𑀢𑁂 𑀢𑁂 𑀣𑁂𑀭𑁂 𑀢𑀢𑁆𑀣 𑀢𑀢𑁆𑀣 𑀧𑁂𑀲𑁂𑀢𑁆𑀯𑀸 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑀁 𑀕𑀦𑁆𑀢𑁆𑀯𑀸 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀧𑀲𑀸𑀤𑁂𑀳𑀻𑀢𑀺 𑀦𑀺𑀬𑁄𑀚𑁂𑀲𑀺, 𑀲𑀓𑁆𑀓𑁄 𑀘 𑀤𑁂𑀯𑀸𑀦𑀫𑀺𑀦𑁆𑀤𑁄 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑀁 𑀉𑀧𑀲𑀁𑀓𑀫𑀺𑀢𑁆𑀯𑀸 𑀓𑀸𑀮𑀓𑀢𑁄 𑀪𑀦𑁆𑀢𑁂 𑀫𑀼𑀝𑀲𑀻𑀯𑁄 𑀭𑀸𑀚𑀸. 𑀇𑀤𑀸𑀦𑀺 𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑀫𑀳𑀸𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀘 𑀢𑀼𑀫𑁆𑀳𑁂 𑀩𑁆𑀬𑀸𑀓𑀢𑀸 𑀅𑀦𑀸𑀕𑀢𑁂 𑀫𑀳𑀺𑀦𑁆𑀤𑁄 𑀦𑀸𑀫 𑀪𑀺𑀓𑁆𑀔𑀼 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀧𑀲𑀸𑀤𑁂𑀲𑁆𑀲𑀢𑀻𑀢𑀺. 𑀢𑀲𑁆𑀫𑀸 𑀢𑀺𑀳 𑀔𑁄 𑀪𑀦𑁆𑀢𑁂 𑀓𑀸𑀮𑁄 𑀤𑀻𑀧𑀯𑀭𑀁 𑀕𑀫𑀦𑀸𑀬, 𑀅𑀳𑀫𑁆𑀧𑀺 𑀲𑀳𑀸𑀬𑁄 𑀪𑀯𑀺𑀲𑁆𑀲𑀸𑀫𑀻𑀢𑀺, 𑀣𑁂𑀭𑁄 𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀢𑁆𑀢𑀲𑀢𑁆𑀢𑀫𑁄 𑀘𑁂𑀢𑀺𑀬𑀧𑀩𑁆𑀩𑀢𑀯𑀺𑀳𑀸𑀭𑀢𑁄 𑀯𑁂𑀳𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬 𑀫𑀺𑀲𑁆𑀲𑀓𑀧𑀩𑁆𑀩𑀢𑁂 𑀧𑀢𑀺𑀝𑁆𑀞𑀳𑀺, 𑀇𑀫𑀁 𑀏𑀢𑀭𑀳𑀺 𑀘𑁂𑀢𑀺𑀬𑀧𑀩𑁆𑀩𑀢𑁄𑀢𑀺𑀧𑀺 𑀲𑀜𑁆𑀚𑀸𑀦𑀦𑁆𑀢𑀺. 𑀢𑀤𑀸 𑀢𑀫𑁆𑀩𑀧𑀡𑁆𑀡𑀺𑀬𑀁 𑀉𑀲𑁆𑀲𑀯𑀤𑀺𑀯𑀲𑁄 𑀳𑁄𑀢𑀺, 𑀭𑀸𑀚𑀸 𑀙𑀡𑀁 𑀓𑀭𑁄𑀣𑀸𑀢𑀺 𑀅𑀫𑀘𑁆𑀘𑁂 𑀆𑀡𑀸𑀧𑁂𑀢𑁆𑀯𑀸 𑀘𑀢𑁆𑀢𑀸𑀴𑀻𑀲𑀲𑀳𑀲𑁆𑀲𑀧𑀼𑀭𑀺𑀲𑁂𑀳𑀺 𑀧𑀭𑀺𑀯𑀸𑀭𑀺𑀢𑁄 𑀦𑀕𑀭𑀫𑁆𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀺𑀲𑁆𑀲𑀓𑀧𑀩𑁆𑀩𑀢𑀁 𑀧𑀸𑀬𑀸𑀲𑀺 𑀫𑀺𑀕𑀯𑀁 𑀓𑀻𑀴𑀺𑀢𑀼𑀓𑀸𑀫𑁄. 𑀅𑀣 𑀢𑀲𑁆𑀫𑀺𑀁 𑀧𑀩𑁆𑀩𑀢𑁂 𑀅𑀥𑀺𑀯𑀢𑁆𑀣𑀸 𑀏𑀓𑀸 𑀤𑁂𑀯𑀢𑀸 𑀭𑀜𑁆𑀜𑁄 𑀣𑁂𑀭𑁂 𑀤𑀲𑁆𑀲𑁂𑀲𑁆𑀲𑀸𑀫𑀻𑀢𑀺 𑀭𑁄𑀳𑀺𑀢𑀫𑀻𑀕𑀯𑀡𑁆𑀡𑁂𑀦 𑀅𑀯𑀺𑀤𑀽𑀭𑁂 𑀢𑀺𑀡𑀧𑀡𑁆𑀡𑀸𑀦𑀺 𑀔𑀸𑀤𑀫𑀸𑀦𑀸 𑀯𑀺𑀬 𑀘𑀭𑀢𑀺, 𑀭𑀸𑀚𑀸 𑀅𑀬𑀼𑀢𑁆𑀢𑀁 𑀤𑀸𑀦𑀺 𑀧𑀫𑀢𑁆𑀢𑀁 𑀯𑀺𑀚𑁆𑀛𑀺𑀢𑀼𑀁𑀢𑀺 𑀚𑀺𑀬𑀁 𑀧𑁄𑀞𑁂𑀲𑀺, 𑀫𑀺𑀕𑁄 𑀅𑀫𑁆𑀩𑀢𑁆𑀣𑀮𑀫𑀕𑁆𑀕𑀁 𑀕𑀳𑁂𑀢𑁆𑀯𑀸 𑀧𑀮𑀸𑀬𑀺𑀢𑀼𑀁 𑀆𑀭𑀪𑀺, 𑀭𑀸𑀚𑀸 𑀢𑀁 𑀅𑀦𑀼𑀩𑀦𑁆𑀥𑀦𑁆𑀢𑁄 𑀅𑀫𑁆𑀩𑀢𑁆𑀣𑀮𑀫𑁂𑀯 𑀅𑀪𑀺𑀭𑀼𑀳𑀺, 𑀫𑀺𑀕𑁄𑀧𑀺 𑀣𑁂𑀭𑀸𑀦𑀁 𑀅𑀯𑀺𑀤𑀽𑀭𑁂 𑀅𑀦𑁆𑀢𑀭𑀥𑀸𑀬𑀺, 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀭𑀸𑀚𑀸𑀦𑀁 𑀅𑀯𑀺𑀤𑀽𑀭𑁂 𑀆𑀕𑀘𑁆𑀙𑀦𑁆𑀢 𑀫𑀁𑀬𑁂𑀯 𑀭𑀸𑀚𑀸 𑀧𑀲𑁆𑀲𑀢𑀼, 𑀫𑀸 𑀇𑀢𑀭𑁂𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀢𑀺𑀲𑁆𑀲 𑀢𑀺𑀲𑁆𑀲 𑀇𑀢𑁄 𑀏𑀳𑀻𑀢𑀺 𑀆𑀳, 𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺. 𑀇𑀫𑀲𑁆𑀫𑀺𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀚𑀸𑀢𑁄 𑀫𑀁 𑀢𑀺𑀲𑁆𑀲𑁄𑀢𑀺 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀆𑀮𑀧𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀅𑀬𑀁 𑀧𑀦 𑀙𑀺𑀦𑁆𑀦𑀪𑀺𑀦𑁆𑀦𑀧𑀝𑀥𑀭𑁄 𑀪𑀡𑁆𑀟𑀼𑀓𑀸𑀲𑀸𑀯 𑀯𑀲𑀦𑁄 𑀫𑀁 𑀦𑀸𑀫𑁂𑀦𑀸 𑀮𑀧𑀢𑀺, 𑀓𑁄 𑀦𑀼𑀔𑁄 𑀬𑀁 𑀪𑀯𑀺𑀲𑁆𑀲𑀢𑀺 𑀫𑀦𑀼𑀲𑁆𑀲𑁄 𑀅𑀫𑀦𑀼𑀲𑁆𑀲𑁄 𑀯𑀸𑀢𑀺. 𑀣𑁂𑀭𑁄 𑀆𑀳.

𑁨𑁮.

𑀲𑀫𑀡𑀸 ¶ 𑀫𑀬𑀁 𑀫𑀳𑀸𑀭𑀸𑀚, 𑀥𑀫𑁆𑀫𑀭𑀸𑀚𑀲𑁆𑀲 𑀲𑀸𑀯𑀓𑀸;

𑀢𑀯𑁂𑀯 𑀅𑀦𑀼𑀓𑀫𑁆𑀧𑀸𑀬, 𑀚𑀫𑁆𑀩𑀼𑀤𑀻𑀧𑀸 𑀇𑀥𑀸𑀕𑀢𑀸𑀢𑀺.

𑀭𑀸𑀚𑀸 𑀥𑀫𑁆𑀫𑀸𑀲𑁄𑀓𑀦𑀭𑀺𑀦𑁆𑀤𑁂𑀦 𑀧𑁂𑀲𑀺𑀢𑀲𑀸𑀲𑀦𑀸𑀦𑀼𑀲𑀸𑀭𑁂𑀦 𑀅𑀦𑀼𑀲𑁆𑀲𑀭𑀫𑀸𑀦𑁄 𑀅𑀬𑁆𑀬𑀸 𑀦𑀼𑀔𑁄 𑀆𑀕𑀢𑀸𑀢𑀺 𑀢𑀸𑀯𑀤𑁂𑀯 𑀆𑀬𑀼𑀥𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀓𑀣𑀬𑀫𑀸𑀦𑁄 𑀲𑀸𑀭𑀡𑀻𑀬𑀁 [𑀲𑀫𑁆𑀫𑁄𑀤𑀦𑀻𑀬𑀁-𑀇𑀢𑀺𑀲𑀩𑁆𑀩𑀢𑁆𑀣] 𑀓𑀣𑀁 𑀓𑀼𑀭𑀼𑀫𑀸𑀦𑁄. 𑀢𑀲𑁆𑀫𑀺𑀁 𑀢𑀸𑀦𑀺𑀧𑀺 𑀘𑀢𑁆𑀢𑀸𑀴𑀻𑀲𑀧𑀼𑀭𑀺𑀲𑀲𑀳𑀲𑁆𑀲𑀸𑀦𑀺 𑀆𑀕𑀦𑁆𑀢𑁆𑀯𑀸 𑀢𑀁 𑀧𑀭𑀺𑀯𑀸𑀭𑁂𑀲𑀼𑀁, 𑀢𑀤𑀸 𑀣𑁂𑀭𑁄 𑀇𑀢𑀭𑁂𑀧𑀺 𑀚𑀦𑁂 𑀤𑀲𑁆𑀲𑁂𑀲𑀺, 𑀭𑀸𑀚𑀸 𑀤𑀺𑀲𑁆𑀯𑀸 𑀇𑀫𑁂 𑀓𑀤𑀸 𑀆𑀕𑀢𑀸𑀢𑀺 𑀧𑀼𑀘𑁆𑀙𑀺, 𑀫𑀬𑀸 𑀲𑀤𑁆𑀥𑀺𑀁𑀬𑁂𑀯 𑀫𑀳𑀸𑀭𑀸𑀚𑀸𑀢𑀺. 𑀇𑀤𑀸𑀦𑀺 𑀧𑀦 𑀚𑀫𑁆𑀩𑀼𑀤𑀻𑀧𑁂 𑀅𑀜𑁆𑀜𑁂𑀧𑀺 𑀏𑀯𑀭𑀽𑀧𑀸 𑀲𑀫𑀡𑀸 𑀲𑀦𑁆𑀢𑀻𑀢𑀺. 𑀫𑀳𑀸𑀭𑀸𑀚 𑀏𑀢𑀭𑀳𑀺 𑀚𑀫𑁆𑀩𑀼𑀤𑀻𑀧𑁄 𑀓𑀸𑀲𑀸𑀯𑀧𑀚𑁆𑀚𑁄𑀢𑁄 𑀇𑀲𑀺𑀯𑀸𑀢𑀧𑀝𑀺𑀯𑀸𑀢𑁄, 𑀢𑀲𑁆𑀫𑀺𑀁.

𑁨𑁯.

𑀢𑁂𑀯𑀺𑀚𑁆𑀚𑀸 𑀇𑀤𑁆𑀥𑀺𑀧𑁆𑀧𑀢𑁆𑀢𑀸 𑀘, 𑀘𑁂𑀢𑁄𑀧𑀭𑀺𑀜𑁆𑀜𑀓𑁄𑀯𑀺𑀤𑀸;

𑀔𑀻𑀡𑀸𑀲𑀯𑀸 𑀅𑀭𑀳𑀦𑁆𑀢𑁄, 𑀩𑀳𑀽 𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑀸𑀢𑀺.

𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑁄 𑀅𑀳𑁄𑀲𑀺, 𑀅𑀣 𑀣𑁂𑀭𑁄 𑀭𑀼𑀓𑁆𑀔𑁄𑀧𑀫𑀸𑀤𑀺𑀦𑀸 𑀢𑀲𑁆𑀲 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀁 𑀜𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺 𑀲𑀦𑀭𑀸𑀫𑀭𑁂𑀳𑀺 𑀲𑀸𑀥𑀼𑀓𑀸𑀭𑀁 𑀓𑀸𑀭𑀬𑀫𑀸𑀦𑁄. 𑀢𑁂𑀦 𑀯𑀼𑀢𑁆𑀣𑀁.

𑁩𑁦.

𑀧𑀡𑁆𑀟𑀺𑀢𑁄𑀢𑀺 𑀯𑀺𑀤𑀺𑀢𑁆𑀯𑀸𑀦, 𑀘𑀼𑀮𑁆𑀮𑀳𑀢𑁆𑀣𑀺𑀧𑀤𑁄𑀧𑀫𑀁;

𑀲𑀼𑀢𑁆𑀢𑀦𑁆𑀢𑀁 𑀤𑁂𑀲𑀬𑀻 𑀣𑁂𑀭𑁄, 𑀫𑀳𑀻𑀧𑀲𑁆𑀲 𑀫𑀳𑀸𑀫𑀢𑀺 [𑀫𑀳𑀻𑀫𑀢𑀻 𑀇𑀢𑀺𑀧𑀺𑀓𑀢𑁆𑀣𑀘𑀺].

𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑁄 𑀲𑀤𑁆𑀥𑀺𑀁 𑀢𑁂𑀳𑀺 𑀦𑀭𑁂𑀳𑀺 𑀘𑀢𑁆𑀢𑀸𑀴𑀻𑀲𑀲𑀳𑀲𑁆𑀲𑁂𑀳𑀺 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀳𑀻𑀢𑀺. 𑀅𑀣𑀲𑁆𑀲 𑀭𑀸𑀚𑀸 𑀲𑁆𑀯𑁂 𑀪𑀦𑁆𑀢𑁂 𑀫𑀫 𑀕𑁂𑀳𑁂 𑀪𑀺𑀓𑁆𑀔𑀁 𑀕𑀡𑁆𑀳𑀸𑀣𑀸𑀢𑀺 𑀬𑀸𑀘𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀦𑀕𑀭𑀜𑁆𑀘 𑀭𑀸𑀚𑀕𑁂𑀳𑀜𑁆𑀘 𑀅𑀮𑀗𑁆𑀓𑀭𑀺𑀢𑁆𑀯𑀸 𑀣𑁂𑀭𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀡𑀻𑀢𑁂𑀦𑀸𑀳𑀸𑀭𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸 𑀅𑀦𑀼𑀴𑀸𑀤𑁂𑀯𑀺𑀧𑁆𑀧𑀫𑀼𑀔𑀸𑀳𑀺 𑀧𑀜𑁆𑀘𑀲𑀢𑀇𑀢𑁆𑀣𑀻𑀳𑀺 𑀲𑀤𑁆𑀥𑀺𑀁 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀣𑁂𑀭𑁄 𑀥𑀫𑁆𑀫𑀭𑀢𑀦 𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀲𑀺. 𑀢𑀢𑁄 ¶ 𑀢𑀸 𑀧𑀜𑁆𑀘𑀲𑀢𑀇𑀢𑁆𑀣𑀺𑀬𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀢𑁄 𑀳𑀢𑁆𑀣𑀺𑀲𑀸𑀮𑀸𑀬𑀁 𑀲𑀳𑀲𑁆𑀲𑀁, 𑀦𑀦𑁆𑀤𑀦𑀯𑀦𑁂 𑀲𑀳𑀲𑁆𑀲𑀁𑀢𑀺 𑀏𑀯𑀁 𑀤𑀼𑀢𑀺𑀬𑀤𑀺𑀯𑀲𑁂 𑀅𑀟𑁆𑀠𑀢𑁂𑀬𑁆𑀬𑀸𑀦𑀺 𑀧𑀸𑀡𑀲𑀳𑀲𑁆𑀲𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑀢𑀺𑀬𑀤𑀺𑀯𑀲𑁂 𑀅𑀟𑁆𑀠𑀦𑀯𑀧𑁆𑀧𑀫𑀸𑀡𑀁 𑀧𑀸𑀡𑀲𑀳𑀲𑁆𑀲𑀁𑀢𑀺 𑀏𑀯𑀁 𑀅𑀦𑁂𑀓𑀲𑀢𑀸𑀦𑀁 𑀅𑀦𑁂𑀓𑀲𑀳𑀲𑁆𑀲𑀸𑀦𑀁 𑀅𑀦𑁂𑀓𑀲𑀢 𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸 𑀫𑀢𑀁 𑀧𑀸𑀬𑁂𑀲𑀺. 𑀯𑀼𑀢𑁆𑀢𑀜𑁆𑀳𑀺.

𑁩𑁧.

𑀫𑀳𑀸𑀫𑀳𑀺𑀦𑁆𑀤𑀲𑀼𑀭𑀺𑀬𑁄, 𑀮𑀗𑁆𑀓𑀸𑀯𑁂𑀳𑀸𑀲𑀫𑀚𑁆𑀛𑀕𑁄;

𑀩𑁄𑀥𑀦𑁂𑀬𑁆𑀬𑀫𑁆𑀩𑀼𑀚𑁂 𑀓𑀸𑀲𑀺, 𑀯𑀺𑀓𑀸𑀲𑀁 𑀥𑀫𑁆𑀫𑀭𑀁𑀲𑀺𑀦𑀸.

𑁩𑁨.

𑀫𑀳𑀸𑀫𑀳𑀺𑀦𑁆𑀤𑀘𑀦𑁆𑀤𑁄 𑀲𑁄, 𑀮𑀗𑁆𑀓𑀸𑀯𑁂𑀳𑀸𑀲𑀫𑀚𑁆𑀛𑀕𑁄;

𑀩𑁄𑀥𑁂𑀲𑀺 𑀥𑀫𑁆𑀫𑀭𑀁𑀲𑀻𑀳𑀺, 𑀯𑁂𑀦𑁂𑀬𑁆𑀬𑀓𑀼𑀫𑀼𑀤𑀸𑀓𑀭𑁂.

𑁩𑁩.

𑀫𑀳𑀸𑀫𑀳𑀺𑀦𑁆𑀤𑀫𑁂𑀖𑁄 𑀲𑁄, 𑀯𑀲𑁆𑀲𑀁 𑀥𑀫𑁆𑀫𑀫𑁆𑀩𑀼𑀯𑀼𑀝𑁆𑀞𑀺𑀬𑀸;

𑀲𑀸𑀥𑀽𑀦𑀁 𑀘𑀺𑀢𑁆𑀢𑀩𑀻𑀚𑁂𑀲𑀼, 𑀚𑀦𑁂𑀲𑀺 𑀓𑀼𑀲𑀮𑀗𑁆𑀓𑀼𑀭𑁂𑀢𑀺.

𑀅𑀣 𑀭𑀸𑀚𑀸 𑀲𑀼𑀫𑀦𑀲𑀸𑀫𑀡𑁂𑀭𑁂𑀦 𑀥𑀫𑁆𑀫𑀸𑀲𑁄𑀓𑀲𑁆𑀲 𑀳𑀢𑁆𑀣𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀭𑀺𑀪𑀼𑀢𑁆𑀢𑀧𑀢𑁆𑀢𑀧𑀽𑀭𑀥𑀸𑀢𑀼𑀬𑁄 𑀘 𑀲𑀓𑁆𑀓𑀲𑁆𑀲 𑀲𑀦𑁆𑀢𑀺𑀓𑀸 𑀤𑀓𑁆𑀔𑀺𑀡𑀓𑁆𑀔𑀓𑀥𑀸𑀢𑀼𑀁𑀘 𑀆𑀳𑀭𑀸𑀧𑁂𑀢𑁆𑀯𑀸 [𑀆𑀳𑀸𑀭𑀺𑀢𑁆𑀯𑀸-𑀇𑀢𑀺𑀲𑀩𑁆𑀩𑀢𑁆𑀣] 𑀘𑁂𑀢𑀺𑀬𑀧𑀩𑁆𑀩𑀢𑁂 𑀣𑀽𑀧𑀁 𑀆𑀤𑀺𑀁𑀓𑀢𑁆𑀯𑀸 𑀲𑀓𑀮𑀮𑀗𑁆𑀓𑀸𑀤𑀻𑀧𑁂 𑀬𑁄𑀚𑀦𑁂 𑀬𑁄𑀚𑀦𑁂 𑀣𑀽𑀧𑀸𑀦𑀺 𑀓𑀸𑀭𑁂𑀢𑁆𑀯𑀸 𑀤𑀓𑁆𑀔𑀺𑀡𑀓𑀥𑀸𑀢𑀼𑀁 𑀦𑀺𑀤𑀳𑀺𑀢𑁆𑀯𑀸 𑀣𑀽𑀧𑀸𑀭𑀸𑀫𑀣𑀽𑀧𑀜𑁆𑀘 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀅𑀣 𑀲𑀗𑁆𑀖𑀫𑀺𑀢𑁆𑀢𑀸𑀬 𑀣𑁂𑀭𑀺𑀬𑀸 𑀆𑀦𑀻𑀢𑀁 𑀚𑀬𑀫𑀳𑀸𑀩𑁄𑀥𑀺𑀦𑁄 𑀤𑀓𑁆𑀔𑀺𑀡𑀫𑀳𑀸𑀲𑀸𑀔𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀽𑀚𑀁 𑀓𑀸𑀭𑁂𑀲𑀺. 𑀲𑀩𑁆𑀩𑁄 𑀧𑀦𑁂𑀢𑁆𑀣 𑀓𑀣𑀸𑀯𑀺𑀢𑁆𑀣𑀭𑁄 𑀫𑀳𑀸𑀯𑀁𑀲𑀢𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁪.

𑀧𑀸𑀭𑀯𑀸𑀤𑀺𑀓𑀤𑁄𑀲𑁂𑀦, 𑀚𑀸𑀢𑁂𑀯𑀁 𑀧𑀭𑀲𑀸𑀕𑀭𑁂;

𑀧𑀢𑁆𑀢𑀸𑀦𑀼𑀫𑁄𑀤𑀦𑀸 𑀏𑀯𑀁, 𑀮𑀗𑁆𑀓𑀸𑀬𑀁 𑀆𑀲𑀺 𑀇𑀲𑁆𑀲𑀭𑁄.

𑁩𑁫.

𑀧𑀸𑀧𑀫𑁆𑀧𑀺 𑀏𑀯𑀁 𑀨𑀮𑀢𑀻𑀢𑀺 𑀫𑀦𑁆𑀢𑁆𑀯𑀸,

𑀜𑀢𑁆𑀯𑀸𑀦 𑀧𑀼𑀜𑁆𑀜𑀲𑁆𑀲 𑀨𑀮𑀁 𑀇𑀤𑀦𑁆𑀢𑀺;

𑀪𑁄 𑀬𑁄𑀦𑀺𑀲𑁄 𑀓𑀼𑀩𑁆𑀩𑀣 𑀧𑀼𑀜𑁆𑀜𑀓𑀫𑁆𑀫𑁂,

𑀕𑀦𑁆𑀢𑁆𑀯𑀸𑀦 𑀬𑁂 𑀬𑀢𑁆𑀣 𑀦 𑀲𑁄𑀘𑀬𑀦𑁆𑀢𑀻𑀢𑀺.

𑀢𑁂𑀪𑀸𑀢𑀺𑀓𑀫𑀥𑀼𑀯𑀸𑀡𑀺𑀚𑀓𑀸𑀦𑀁 𑀯𑀢𑁆𑀣𑀼𑀁 𑀅𑀝𑁆𑀞𑀫𑀁.

𑁩𑁯. 𑀩𑁄𑀥𑀺𑀭𑀸𑀚𑀥𑀻𑀢𑀼𑀬𑀸 [𑀩𑁄𑀥𑀺𑀭𑀸𑀚𑀥𑀻𑀢𑀸𑀬 𑀇𑀢𑀺𑀲𑀩𑁆𑀩𑀢𑁆𑀣] 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀮𑀗𑁆𑀓𑀸𑀬𑀁 𑀲𑀸𑀲𑀦𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁂 𑀢𑀢𑁆𑀣 𑀳𑀓𑀼𑀭𑁂𑀴𑀻𑀢𑀺 𑀏𑀓𑁄 𑀕𑀸𑀫𑁄 𑀅𑀳𑁄𑀲𑀺, 𑀢𑀢𑁆𑀣𑁂𑀓𑀸 𑀤𑀸𑀭𑀺𑀓𑀸 𑀕𑀸𑀫𑀸𑀤𑀸𑀭𑀺𑀓𑀸𑀳𑀺 𑀲𑀤𑁆𑀥𑀺𑀁 𑀢𑀢𑁆𑀣 𑀢𑀢𑁆𑀣 𑀓𑀻𑀴𑀦𑁆𑀢𑀻 𑀯𑀺𑀳𑀭𑀢𑀺, 𑀢𑀤𑀸 𑀕𑀸𑀫𑀲𑀫𑀻𑀧𑁂 𑀫𑀳𑀸𑀲𑁄𑀩𑁆𑀪𑀁 𑀳𑁄𑀢𑀺. 𑀢𑀢𑁆𑀣𑁂𑀓𑁄 𑀫𑀭𑀼𑀢𑁆𑀣𑀭𑀼𑀓𑁆𑀔𑁄 𑀲𑀩𑁆𑀩𑀤𑀸 𑀧𑀸𑀴𑀺𑀨𑀼𑀮𑁆𑀮𑁄𑀯 𑀢𑀺𑀝𑁆𑀞𑀢𑀺. 𑀫𑀦𑀼𑀲𑁆𑀲𑀸 𑀩𑀼𑀤𑁆𑀥𑀧𑀽𑀚𑀦𑀢𑁆𑀣𑀁 𑀧𑀼𑀧𑁆𑀨𑀸𑀦𑀺 𑀯𑀺𑀘𑀺𑀡𑀦𑁆𑀢𑀸 𑀉𑀤𑀓𑀁 𑀑𑀕𑀳𑁂𑀢𑁆𑀯𑀸 𑀭𑀼𑀓𑁆𑀔𑀫𑀪𑀺𑀭𑀼𑀬𑁆𑀳 𑀧𑀼𑀧𑁆𑀨𑀸𑀦𑀺 𑀑𑀘𑀺𑀡𑀦𑁆𑀢𑀺, 𑀓𑀼𑀫𑀸𑀭𑀺𑀓𑀸 𑀢𑁂 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀲𑀼𑀔𑁂𑀦 𑀕𑀦𑁆𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀑𑀘𑀺𑀡𑀦𑁆𑀢𑀽𑀢𑀺 𑀏𑀓𑀁 𑀲𑀼𑀓𑁆𑀔𑀧𑀸𑀮𑀺𑀪𑀤𑁆𑀤𑀤𑀡𑁆𑀟𑀓𑀁 𑀆𑀳𑀭𑀺𑀢𑁆𑀯𑀸 𑀲𑁂𑀢𑀼𑀁 𑀓𑀢𑁆𑀯𑀸 𑀞𑀧𑁂𑀲𑀺, 𑀢𑀢𑁄 𑀧𑀝𑁆𑀞𑀸𑀬 𑀫𑀦𑀼𑀲𑁆𑀲𑀸 𑀢𑁂𑀦𑀕𑀦𑁆𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀑𑀘𑀺𑀡𑀦𑁆𑀢𑀺. 𑀅𑀣 𑀲𑀸 𑀢𑀢𑁄 𑀘𑀼𑀢𑀸 𑀢𑁂𑀦𑁂𑀯 𑀓𑀼𑀲𑀮𑀓𑀫𑁆𑀫𑁂𑀦 𑀚𑀫𑁆𑀩𑀼𑀤𑀻𑀧𑁂 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑁂 𑀲𑁄𑀫𑀤𑀢𑁆𑀢𑀭𑀜𑁆𑀜𑁄 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀉𑀢𑁆𑀢𑀫𑀭𑀽𑀧𑀥𑀭𑀸 𑀤𑁂𑀯𑀘𑁆𑀙𑀭𑀧𑀝𑀺𑀪𑀸𑀕𑀸 𑀅𑀳𑁄𑀲𑀺. 𑀫𑀸𑀢𑀸𑀧𑀺𑀢𑀭𑁄 𑀧𑀦𑀲𑁆𑀲𑀸 𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑀺𑀓𑀸𑀢𑀺 𑀯𑁄𑀳𑀭𑀺𑀁𑀲𑀼. 𑀧𑀼𑀩𑁆𑀩𑁂 𑀓𑀢𑀲𑁂𑀢𑀼𑀆𑀦𑀼𑀪𑀸𑀯𑁂𑀦 𑀢𑀲𑁆𑀲𑀸 𑀲𑀼𑀯𑀻𑀭𑀓𑁄 𑀦𑀸𑀫𑁂𑀓𑁄 𑀆𑀓𑀸𑀲𑀕𑀸𑀫𑀻 𑀲𑀺𑀦𑁆𑀥𑀯𑀧𑁄𑀢𑀓𑁄 𑀦𑀺𑀩𑁆𑀩𑀢𑁆𑀢𑀺. 𑀭𑀸𑀚𑀥𑀻𑀢𑀼𑀬𑀸 𑀧𑀦 𑀧𑀺𑀢𑀸 𑀩𑀼𑀤𑁆𑀥𑀫𑀸𑀫𑀓𑁄 𑀥𑀫𑁆𑀫𑀫𑀸𑀫𑀓𑁄 𑀲𑀗𑁆𑀖𑀫𑀸𑀫𑀓𑁄 𑀳𑀼𑀢𑁆𑀯𑀸 𑀫𑀳𑀦𑁆𑀢𑀁 𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑁄 𑀲𑀺𑀦𑁆𑀥𑀯𑀧𑁄𑀢𑀓𑀁 𑀤𑀺𑀲𑁆𑀯𑀸 𑀧𑀼𑀜𑁆𑀜𑀓𑀭𑀡𑀲𑁆𑀲 𑀫𑁂 𑀲𑀳𑀸𑀬𑁄 𑀮𑀤𑁆𑀥𑁄𑀢𑀺 𑀢𑀼𑀝𑁆𑀞𑀫𑀸𑀦𑀲𑁄 𑀅𑀲𑁆𑀲𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀕𑀦𑁆𑀢𑁆𑀯𑀸 𑀫𑀳𑀸𑀩𑁄𑀥𑀺𑀁 ¶ 𑀯𑀦𑁆𑀤𑀢𑀺. 𑀭𑀸𑀚𑀥𑀻𑀢𑀸 𑀦𑀁 𑀤𑀺𑀲𑁆𑀯𑀸 𑀧𑀺𑀢𑀼𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀪𑀺𑀡𑁆𑀳𑀁 𑀢𑀸𑀢 𑀓𑀼𑀳𑀺𑀁 𑀕𑀘𑁆𑀙𑀲𑀻𑀢𑀺 𑀧𑀼𑀘𑁆𑀙𑀺. 𑀭𑀸𑀚𑀸 𑀦 𑀓𑀺𑀜𑁆𑀘𑀺 𑀓𑀣𑁂𑀲𑀺, 𑀅𑀣 𑀲𑀸 𑀧𑀼𑀦𑀧𑁆𑀧𑀼𑀦𑀁 𑀧𑀺𑀢𑀭𑀁 𑀦𑀺𑀩𑀦𑁆𑀥𑀦𑁆𑀢𑀻 𑀧𑀼𑀘𑁆𑀙𑀺. 𑀢𑀢𑁄 𑀭𑀸𑀚𑀸 𑀢𑀲𑁆𑀲𑀸𑀯𑀺 𑀓𑀭𑁄𑀦𑁆𑀢𑁄 𑀏𑀯𑀫𑀸𑀳.

𑁧.

𑀅𑀫𑁆𑀳𑀸𑀓𑀁 𑀪𑀕𑀯𑀸 𑀧𑀼𑀩𑁆𑀩𑁂, 𑀧𑀽𑀭𑁂𑀦𑁆𑀢𑁄 𑀤𑀲𑀧𑀸𑀭𑀫𑀻;

𑀅𑀤𑀸𑀲𑀺 𑀲𑀻𑀲𑀭𑀢𑁆𑀢𑀓𑁆𑀔𑀺, 𑀫𑀁𑀲𑀁 𑀚𑀻𑀯𑀺𑀢𑀫𑁂𑀯 𑀘.

𑁨.

𑀧𑀼𑀢𑁆𑀢𑀤𑀸𑀭𑁂 𑀘 𑀭𑀚𑁆𑀚𑁂 𑀘, 𑀧𑀢𑁆𑀯𑀸 [𑀤𑀢𑁆𑀯𑀸 𑀇𑀢𑀺𑀧𑀺𑀓𑀢𑁆𑀣𑀘𑀺] 𑀧𑀸𑀭𑀫𑀺𑀫𑀢𑁆𑀣𑀓𑀁;

𑀅𑀦𑀧𑁆𑀧𑀓𑀧𑁆𑀧𑀓𑁄𑀝𑀻𑀦𑀁, 𑀔𑁂𑀧𑁂𑀢𑁆𑀯𑀸 𑀓𑀧𑀺𑀮𑀯𑀼𑀬𑁂.

𑁩.

𑀲𑀓𑁆𑀓𑀭𑀸𑀚𑀓𑀼𑀮𑁂 𑀚𑀸𑀢𑁄, 𑀮𑁄𑀓𑁂 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄;

𑀲𑀫𑁆𑀧𑀢𑁆𑀢𑀘𑀓𑁆𑀓𑀯𑀢𑁆𑀢𑀺𑀢𑁆𑀢𑀁, 𑀧𑀳𑀦𑁆𑀢𑁆𑀯𑀸𑀦 𑀦𑀭𑀸𑀥𑀺𑀧𑁄.

𑁪.

𑀤𑀺𑀲𑁆𑀯𑀸 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄, 𑀦𑀺𑀓𑁆𑀔𑀫𑁆𑀫 𑀅𑀪𑀺𑀦𑀺𑀓𑁆𑀔𑀫𑀁;

𑀩𑁄𑀥𑀺𑀫𑀽𑀮𑀫𑀼𑀧𑀸𑀕𑀫𑁆𑀫, 𑀦𑀺𑀲𑀺𑀦𑁆𑀦𑁄 𑀯𑀚𑀺𑀭𑀸𑀲𑀦𑁂.

𑁫.

𑀲𑀳𑀲𑁆𑀲𑀩𑀸𑀳𑀼𑀁 𑀫𑀸𑀧𑁂𑀢𑁆𑀯𑀸, 𑀦𑀸𑀦𑀸𑀬𑀼𑀥𑀲𑀫𑀸𑀓𑀼𑀮𑀁 [𑀦𑀸𑀦𑀸𑀯𑀼𑀥𑀲𑀫𑀸𑀓𑀼𑀮𑀁-𑀇𑀢𑀺𑀲𑀩𑁆𑀩𑀢𑁆𑀣];

𑀫𑀳𑀸𑀪𑀻𑀢𑀺𑀓𑀭𑀁 𑀯𑁂𑀲𑀁, 𑀓𑀸𑀴𑀧𑀩𑁆𑀩𑀢𑀲𑀸𑀤𑀺𑀲𑀁.

𑁬.

𑀫𑀸𑀧𑁂𑀢𑁆𑀯𑀸𑀦 𑀲𑀫𑀸𑀭𑀼𑀬𑁆𑀳, 𑀕𑀺𑀭𑀺𑀫𑁂𑀔𑀮𑀯𑀸𑀭𑀡𑀁;

𑀫𑀸𑀭𑀲𑁂𑀦𑀁 𑀲𑀫𑀸𑀦𑁂𑀢𑁆𑀯𑀸, 𑀆𑀕𑀢𑀁 𑀫𑀓𑀭𑀤𑁆𑀥𑀚𑀁.

𑁭.

𑀧𑀸𑀭𑀫𑀺𑀢𑀸𑀩𑀮𑁂𑀦 𑀢𑀁, 𑀫𑀸𑀭𑀲𑁂𑀦𑀁 𑀧𑀮𑀸𑀧𑀺𑀬;

𑀬𑀢𑁆𑀣𑀸𑀲𑀻𑀦𑁄 𑀓𑀺𑀮𑁂𑀲𑀸𑀭𑀺, 𑀲𑀳𑀲𑁆𑀲𑀁 𑀖𑀸𑀢𑀬𑀻 𑀚𑀺𑀦𑁄.

𑁮.

𑀦𑀬𑀦𑀁 𑀲𑀼𑀚𑀮𑀲𑁂𑀓𑁂𑀳𑀺, 𑀲𑀢𑁆𑀢𑀸𑀳𑀁 𑀚𑀺𑀦𑀲𑁂𑀯𑀺𑀢𑀁;

𑀧𑀽𑀚𑀺𑀢𑀁 𑀤𑁂𑀯𑀩𑁆𑀭𑀳𑁆𑀫𑁂𑀳𑀺, 𑀲𑀺𑀤𑁆𑀥𑁄𑀭𑀕𑀦𑀭𑀸𑀤𑀺𑀳𑀺;

𑀯𑀦𑁆𑀤𑀺𑀢𑀼𑀁 𑀚𑀬𑀩𑁄𑀥𑀺𑀁𑀢𑀁, 𑀕𑀘𑁆𑀙𑀸𑀫𑀺 𑀲𑀢𑀢𑀁 𑀅𑀳𑀁.

𑁯.

𑀉𑀧𑀸𑀲𑀢𑀺 𑀲𑀤𑀸 𑀕𑀦𑁆𑀢𑁆𑀯𑀸, 𑀬𑁄 𑀦𑀭𑁄 𑀩𑁄𑀥𑀺𑀧𑀸𑀤𑀧𑀁;

𑀕𑀦𑁆𑀥𑁄𑀤𑀤𑀻𑀧𑀥𑀽𑀧𑀸𑀤𑀺, 𑀦𑀸𑀦𑀸𑀧𑀽𑀚𑀸𑀳𑀺 𑀲𑀸𑀥𑀼𑀓𑀁.

𑁧𑁦.

𑀲 𑀦𑀭𑁄 𑀦𑀺𑀭𑀸𑀫𑀬𑁄 𑀳𑁄𑀢𑀺, 𑀧𑀘𑁆𑀘𑀢𑁆𑀢𑁂 𑀘 𑀧𑀭𑀢𑁆𑀣 𑀘;

𑀧𑀽𑀚𑀺𑀢𑁄 𑀫𑀸𑀦𑀺𑀢𑁄 𑀳𑁄𑀢𑀺, 𑀤𑀻𑀖𑀸𑀬𑀼 𑀩𑀮𑀯𑀸 𑀲𑀼𑀔𑀻.

𑁧𑁧.

𑀢𑀤𑀢𑁆𑀣𑀁 𑀧𑀢𑁆𑀣𑀬𑀦𑁆𑀢𑁂𑀦, 𑀅𑀢𑁆𑀣𑀓𑀸𑀫𑁂𑀦 𑀚𑀦𑁆𑀢𑀼𑀦𑀸;

𑀉𑀧𑀸𑀲𑀦𑀻𑀬𑀁 𑀲𑀤𑁆𑀥𑀸𑀬, 𑀦𑀺𑀘𑁆𑀘𑀁 𑀢𑀁 𑀩𑁄𑀥𑀺𑀧𑀸𑀤𑀧𑀁𑀢𑀺.

𑀢𑀁 𑀲𑀼𑀢𑁆𑀯𑀸 𑀓𑀼𑀫𑀸𑀭𑀺𑀓𑀸 𑀧𑀻𑀢𑀺𑀬𑀸 𑀨𑀼𑀝𑀲𑀭𑀻𑀭𑀸 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀅𑀳𑀫𑁆𑀧𑀺 𑀢𑀸𑀢 𑀕𑀘𑁆𑀙𑀸𑀫𑀻𑀢𑀺 𑀆𑀳. 𑀭𑀸𑀚𑀸 𑀧𑀦𑀲𑁆𑀲𑀸 𑀉𑀧𑀤𑁆𑀤𑀯𑀪𑀬𑁂𑀦 𑀕𑀫𑀦𑀁 𑀦 𑀇𑀘𑁆𑀙𑀺. 𑀢𑀢𑁄 𑀲𑀸 𑀬𑀸𑀯𑀢𑀢𑀺𑀬𑀁 𑀧𑀺𑀢𑀭𑀁 𑀬𑀸𑀘𑀺𑀢𑁆𑀯𑀸 𑀭𑀜𑁆𑀜𑀸 𑀅𑀦𑀼𑀜𑁆𑀜𑀸𑀢𑀸. 𑀢𑀢𑁄 𑀧𑀝𑁆𑀞𑀸𑀬 𑀧𑀺𑀢𑀭𑀸 𑀲𑀤𑁆𑀥𑀺𑀁 𑀲𑀺𑀦𑁆𑀥𑀯𑀫𑀸𑀭𑀼𑀬𑁆𑀳 𑀩𑁄𑀥𑀺𑀁 𑀯𑀦𑁆𑀤𑀺𑀢𑀼𑀁 𑀲𑀢𑀢𑀁 𑀕𑀘𑁆𑀙𑀢𑀺. 𑀅𑀣𑀸𑀧𑀭𑀪𑀸𑀕𑁂 𑀭𑀸𑀚𑀸 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑁄 𑀘𑀺𑀦𑁆𑀢𑁂𑀲𑀺. 𑀥𑀻𑀢𑀸 𑀫𑁂 𑀦𑀺𑀭𑀦𑁆𑀢𑀭𑀁 𑀩𑁄𑀥𑀺𑀉𑀧𑀝𑁆𑀞𑀸𑀦𑀁𑀕𑀘𑁆𑀙𑀢𑀺, 𑀏𑀢𑀺𑀲𑁆𑀲𑀸 𑀅𑀦𑀸𑀕𑀢𑁂 𑀬𑀁𑀓𑀺𑀜𑁆𑀘𑀺 𑀪𑀬𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀢𑀢𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣 𑀫𑁂 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺. 𑀢𑀢𑁄 𑀲𑀺𑀦𑁆𑀥𑀯𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀲𑁆𑀲 𑀓𑀡𑁆𑀡𑀫𑀽𑀮𑁂 𑀫𑀦𑁆𑀢𑁂𑀦𑁆𑀢𑁄 𑀏𑀯𑀫𑀸𑀳, 𑀢𑀸𑀢 𑀫𑀫 𑀥𑀻𑀢𑀸 𑀅𑀪𑀺𑀡𑁆𑀳𑀁 𑀢𑀯 𑀲𑀳𑀸𑀬𑀁 𑀓𑀢𑁆𑀯𑀸 𑀩𑁄𑀥𑀺𑀁 𑀯𑀦𑁆𑀤𑀺𑀢𑀼𑀁 𑀕𑀘𑁆𑀙𑀢𑀺. 𑀢𑀢𑁆𑀣𑀲𑁆𑀲𑀸 𑀬𑀁𑀓𑀺𑀜𑁆𑀘𑀺 𑀪𑀬𑀁 𑀪𑀯𑁂𑀬𑁆𑀬. 𑀢𑀁 𑀦𑀧𑁆𑀧𑀢𑀺𑀭𑀽𑀧𑀁. 𑀢𑀢𑁆𑀣 𑀕𑀫𑀦𑀸𑀕𑀫𑀦𑁂 𑀫𑀫 𑀥𑀻𑀢𑀭𑀁 𑀭𑀓𑁆𑀔𑁂𑀬𑁆𑀬𑀸𑀲𑀻𑀢𑀺 𑀢𑀲𑁆𑀲 𑀥𑀻𑀢𑀭𑀁 𑀧𑀝𑀺𑀧𑀸𑀤𑁂𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀢𑀢𑁄 𑀭𑀸𑀚𑀥𑀻𑀢𑀸 𑀧𑀺𑀢𑀼𑀲𑀭𑀻𑀭𑀓𑀺𑀘𑁆𑀘𑀁 𑀓𑀸𑀭𑁂𑀢𑁆𑀯𑀸 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀅𑀲𑁆𑀲𑀫𑀪𑀺𑀭𑀼𑀬𑁆𑀳 𑀩𑁄𑀥𑀺𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺. 𑀫𑀦𑀼𑀲𑁆𑀲𑀸 𑀧𑀦𑀲𑁆𑀲𑀸 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀯𑀺𑀫𑁆𑀳𑀺𑀢𑀫𑀸𑀦𑀲𑀸 𑀭𑀸𑀚𑀸𑀭𑀳𑀁 𑀯𑀢 𑀦𑁄 𑀇𑀤𑀁 𑀧𑀡𑁆𑀡𑀸𑀓𑀸𑀭𑀁 𑀤𑀺𑀝𑁆𑀞𑀁. 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀘𑀺𑀓𑁆𑀔𑀺𑀲𑁆𑀲𑀸𑀫. 𑀅𑀧𑁆𑀧𑁂𑀯 𑀦𑀸𑀫 𑀭𑀸𑀚𑀸 𑀲𑁄 𑀓𑀺𑀜𑁆𑀘𑀺 𑀦𑁄 𑀤𑀤𑁂𑀬𑁆𑀬𑀸𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑀸 𑀏𑀯𑀫𑀸𑀳𑀁𑀲𑀼.

𑁧𑁨.

𑀩𑁄𑀥𑀺𑀫𑀡𑁆𑀟𑀁 𑀲𑀫𑀸𑀕𑀫𑁆𑀫, 𑀅𑀪𑀺𑀡𑁆𑀳𑀁 𑀢𑀼𑀝𑁆𑀞𑀫𑀸𑀦𑀲𑀸;

𑀯𑀦𑁆𑀤𑀦𑁆𑀢𑀻 𑀬𑀸𑀢𑀺 𑀓𑀜𑁆𑀜𑁂𑀓𑀸, 𑀯𑀺𑀚𑁆𑀚𑀽𑀯 𑀲𑀺𑀭𑀺𑀬𑀸 𑀚𑀮𑀁.

𑁧𑁩.

𑀦𑀻𑀮𑀥𑀫𑁆𑀧𑀺𑀮𑁆𑀮𑀪𑀸𑀭𑀸 𑀲𑀸, 𑀯𑀺𑀲𑀸𑀮𑀸𑀬𑀢𑀮𑁄𑀘𑀦𑀸;

𑀲𑁄𑀡𑁆𑀡𑀤𑁄𑀮𑀸𑀪𑀲𑀯𑀡𑀸, 𑀲𑀸𑀫𑀸 𑀲𑀼𑀪𑀧𑀬𑁄𑀥𑀭𑀸.

𑁧𑁪.

𑀲𑀢𑀭𑀁𑀲𑀻𑀳𑀺 𑀲𑀫𑁆𑀫𑀺𑀲𑁆𑀲, 𑀲𑀜𑁆𑀘𑁆𑀬𑀸𑀫𑁆𑀩𑀼𑀤𑀲𑀫𑀸𑀥𑀭𑀸;

𑀢𑀼𑀗𑁆𑀕𑀦𑀸𑀲𑀸 𑀦𑀻𑀮𑀪𑀫𑀼, 𑀳𑀸𑀲𑀪𑀸𑀲𑀸 𑀫𑀦𑁄𑀭𑀫𑀸.

𑁧𑁫.

𑀈𑀤𑀺𑀲𑀁 ¶ 𑀦𑁄 𑀫𑀳𑀸𑀭𑀸𑀚𑀸 [𑀫𑀳𑀸𑀭𑀸𑀚𑀤𑀺𑀝𑁆𑀞𑀧𑀼𑀩𑁆𑀩 𑀇𑀢𑀺𑀧𑀺𑀓𑀢𑁆𑀣𑀘𑀺], 𑀤𑀺𑀝𑁆𑀞𑀧𑀼𑀩𑁆𑀩𑀁 𑀓𑀼𑀤𑀸𑀘𑀦𑀁;

𑀏𑀳𑀺 𑀢𑀲𑁆𑀲𑀸 𑀲𑀺𑀭𑀺𑀁𑀤𑁂𑀯, 𑀩𑁄𑀥𑀺𑀫𑀡𑁆𑀟𑀫𑁆𑀳𑀺 𑀤𑀓𑁆𑀔𑀲𑀻𑀢𑀺.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀲𑀯𑀡𑀲𑀁𑀲𑀕𑁆𑀕𑁂𑀦𑁂𑀯 𑀢𑀸𑀬 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀘𑀢𑀼𑀭𑀗𑁆𑀕𑀺𑀦𑀺𑀁𑀲𑁂𑀦𑀁 𑀕𑀳𑁂𑀢𑁆𑀯𑀸 𑀭𑀸𑀚𑀥𑀻𑀢𑀭𑀁 𑀩𑁄𑀥𑀺𑀯𑀦𑁆𑀤𑀦𑀢𑁆𑀣𑀸𑀬 𑀆𑀕𑀢𑀓𑀸𑀮𑁂 𑀩𑀳𑀺𑀧𑀸𑀓𑀸𑀭𑁂 𑀲𑁂𑀦𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀕𑀡𑁆𑀳𑀣𑁂𑀢𑀦𑁆𑀢𑀺 𑀫𑀦𑀼𑀲𑁆𑀲𑁂 𑀦𑀺𑀬𑁄𑀚𑁂𑀲𑀺. 𑀢𑀢𑁄 𑀲𑁂𑀦𑀸𑀧𑀺 𑀢𑀁 𑀕𑀳𑀡𑀲𑀚𑁆𑀚𑀸 𑀅𑀝𑁆𑀞𑀸𑀲𑀺. 𑀭𑀸𑀚𑀥𑀻𑀢𑀸 𑀢𑁂 𑀤𑀺𑀲𑁆𑀯𑀸 𑀲𑀻𑀖𑀁 𑀲𑀺𑀦𑁆𑀥𑀯𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀲𑁆𑀲 𑀧𑀺𑀝𑁆𑀞𑀺𑀬𑀁 𑀦𑀺𑀲𑀺𑀦𑁆𑀦𑀸 𑀧𑀡𑁆𑀳𑀺𑀬𑀸 𑀲𑀜𑁆𑀜𑀁 𑀅𑀤𑀸𑀲𑀺. 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀯𑁂𑀕𑁂𑀦 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺. 𑀲𑀸 𑀧𑀦 𑀤𑀼𑀦𑁆𑀦𑀺𑀲𑀺𑀦𑁆𑀦𑀪𑀸𑀯𑁂𑀦 𑀅𑀲𑁆𑀲𑀲𑁆𑀲 𑀯𑁂𑀕𑀁 𑀲𑀦𑁆𑀥𑀸𑀭𑁂𑀢𑀼𑀫𑀲𑀓𑁆𑀓𑁄𑀦𑁆𑀢𑀻 𑀅𑀲𑁆𑀲𑀧𑀺𑀝𑁆𑀞𑀺𑀢𑁄 𑀧𑀭𑀺𑀕𑀮𑀺. 𑀲𑀺𑀦𑁆𑀥𑀯𑁄 𑀭𑀸𑀚𑀥𑀻𑀢𑀭𑀁 𑀧𑀢𑀫𑀸𑀦𑀁 𑀤𑀺𑀲𑁆𑀯𑀸 𑀭𑀸𑀚𑁄𑀯𑀸𑀤𑀁 𑀲𑀭𑀫𑀸𑀦𑁄 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 𑀢𑀲𑁆𑀲𑀸 𑀓𑁂𑀲𑁂 𑀟𑀁𑀲𑀺𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀢𑀫𑀸𑀦𑀸𑀬 𑀢𑀲𑁆𑀲𑀸 𑀧𑀺𑀝𑁆𑀞𑀺𑀁𑀤𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀆𑀓𑀸𑀲𑁂𑀦 𑀢𑀁 𑀦𑁂𑀢𑁆𑀯𑀸 𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑁂𑀬𑁂𑀯 𑀧𑀢𑀺𑀝𑁆𑀞𑀸𑀧𑁂𑀲𑀺 [𑀧𑀸𑀢𑀮𑀺𑀧𑀼𑀢𑁆𑀢𑀦𑀕𑀭𑁂𑀬𑁂𑀯𑀢𑀁 𑀧𑀯𑀺𑀞𑀸𑀧𑁂𑀲𑀺𑀇𑀢𑀺𑀧𑀺𑀓𑀢𑁆𑀣𑀘𑀺].

𑁧𑁬.

𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑁂𑀯𑀁, 𑀲𑀭𑀦𑁆𑀢𑀸 𑀉𑀧𑀓𑀸𑀭𑀓𑀁;

𑀦 𑀚𑀳𑀦𑁆𑀢𑀻𑀢𑀺 𑀫𑀦𑁆𑀢𑁆𑀯𑀸𑀦, 𑀓𑀢𑀜𑁆𑀜𑀽 𑀳𑁄𑀦𑁆𑀢𑀼 [𑀳𑁄𑀦𑁆𑀢𑀺𑀧𑀸𑀡𑀺𑀦𑁄-𑀇𑀢𑀺𑀧𑀺𑀓𑀢𑁆𑀣𑀘𑀺] 𑀧𑀸𑀡𑀺𑀦𑁄𑀢𑀺.

𑀢𑀢𑁄 𑀧𑀝𑁆𑀞𑀸𑀬 𑀲𑀸 𑀧𑀼𑀜𑁆𑀜𑀓𑀫𑁆𑀫𑀁 𑀓𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀦𑀸 𑀅𑀳𑁄𑀲𑀻𑀢𑀺.

𑁧𑁭.

𑀬𑁄 𑀬𑀁 𑀤𑀼𑀫𑀺𑀦𑁆𑀤𑀁𑀬𑀢𑀺𑀦𑀦𑁆𑀤𑀦𑁂𑀦;

𑀲𑀫𑁆𑀧𑀽𑀚𑀺𑀢𑀁 𑀧𑀽𑀚𑀬𑀢𑁂 𑀲 𑀧𑀜𑁆𑀜𑁄;

𑀲 𑀪𑁄𑀕𑀯𑀸 𑀳𑁄𑀢𑀺 𑀅𑀦𑀻𑀢𑀺𑀓𑁄 𑀘,

𑀲𑀩𑁆𑀩𑀢𑁆𑀣 𑀲𑁄 𑀳𑁄𑀢𑀺 𑀧𑀲𑀢𑁆𑀣𑀭𑀽𑀧𑁄.

𑀩𑁄𑀥𑀺𑀭𑀸𑀚𑀥𑀻𑀢𑀼𑀬𑀸 𑀯𑀢𑁆𑀣𑀼𑀁 𑀦𑀯𑀫𑀁.

𑁪𑁦. 𑀓𑀼𑀡𑁆𑀟𑀮𑀺𑀬𑀸 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑀸𑀦𑀼𑀧𑀼𑀩𑁆𑀩𑀻𑀓𑀣𑀸

𑀮𑀗𑁆𑀓𑀸𑀤𑀻𑀧𑁂 ¶ 𑀭𑁄𑀳𑀡𑀚𑀧𑀤𑁂 𑀫𑀳𑀸𑀕𑀸𑀫𑁄 𑀦𑀸𑀫 𑀅𑀳𑁄𑀲𑀺, 𑀢𑀢𑁆𑀣 𑀢𑀺𑀲𑁆𑀲𑀯𑀺𑀳𑀸𑀭𑀁 𑀦𑀸𑀫 𑀅𑀦𑁂𑀓𑀲𑀢𑀪𑀺𑀓𑁆𑀔𑀽𑀳𑀺 𑀲𑀫𑀸𑀓𑀺𑀡𑁆𑀡𑀁 𑀅𑀦𑁂𑀓𑀧𑀭𑀺𑀯𑁂𑀡𑀧𑀢𑀺𑀫𑀡𑁆𑀟𑀺𑀢𑀁 𑀯𑀺𑀳𑀸𑀭𑀁 𑀅𑀳𑁄𑀲𑀺. 𑀢𑀢𑁆𑀣𑁂𑀓𑁄 𑀢𑀺𑀲𑁆𑀲𑁄 𑀦𑀸𑀫 𑀲𑀸𑀫𑀡𑁂𑀭𑁄 𑀧𑀝𑀺𑀯𑀲𑀢𑀺. 𑀲𑁄 𑀏𑀓𑀲𑁆𑀫𑀺𑀁𑀲𑀫𑀬𑁂 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀧𑀸𑀲𑀸𑀡𑀯𑀸𑀧𑀺𑀕𑀸𑀫𑁂 𑀪𑀺𑀓𑁆𑀔𑀁 𑀘𑀭𑀺𑀢𑁆𑀯𑀸 𑀬𑀸𑀧𑀦𑀫𑀢𑁆𑀢𑀁 𑀪𑀢𑁆𑀢𑀁 𑀲𑀧𑁆𑀧𑀺𑀦𑀸 𑀲𑀤𑁆𑀥𑀺𑀁 𑀮𑀪𑀺𑀢𑁆𑀯𑀸 𑀦𑀺𑀓𑁆𑀔𑀫𑁆𑀫 𑀕𑀸𑀫𑀤𑁆𑀯𑀸𑀭𑀁 𑀧𑀢𑁆𑀯𑀸 𑀫𑀳𑀸𑀕𑀸𑀫𑀸𑀪𑀺𑀫𑀼𑀔𑁄 𑀕𑀘𑁆𑀙𑀦𑁆𑀢𑁄 𑀫𑀦𑀼𑀲𑁆𑀲𑁂 𑀉𑀤𑀓𑀨𑀸𑀲𑀼𑀓𑀝𑁆𑀞𑀸𑀦𑀁 𑀧𑀼𑀘𑁆𑀙𑀺. 𑀢𑁂𑀳𑀺 𑀪𑀦𑁆𑀢𑁂 𑀢𑀼𑀫𑁆𑀳𑀸𑀓𑀁 𑀅𑀪𑀺𑀫𑀼𑀔𑁂 𑀅𑀯𑀺𑀤𑀽𑀭𑀝𑁆𑀞𑀸𑀦𑁂 𑀓𑀓𑀼𑀩𑀦𑁆𑀤𑀓𑀦𑁆𑀤𑀭𑀁 𑀦𑀸𑀫 𑀲𑀦𑁆𑀤𑀫𑀸𑀦𑀲𑀻𑀢𑀮𑁄𑀤𑀓𑀁 𑀥𑀯𑀮𑀯𑀸𑀮𑀼𑀓𑀸𑀢𑀮𑀁 𑀢𑀢𑁆𑀣 𑀢𑀼𑀫𑁆𑀳𑁂 𑀕𑀦𑁆𑀢𑁆𑀯𑀸 𑀦𑀳𑀸𑀢𑁆𑀯𑀸 𑀲𑀻𑀢𑀮𑀘𑁆𑀙𑀸𑀬𑀸𑀬 𑀯𑀸𑀮𑀼𑀓𑀸𑀢𑀮𑁂 𑀦𑀺𑀲𑀺𑀦𑁆𑀦𑁄 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀕𑀘𑁆𑀙𑀣𑀸𑀢𑀺 𑀯𑀼𑀢𑁆𑀢𑁂 𑀲𑀸𑀫𑀡𑁂𑀭𑁄 ¶ 𑀲𑀸𑀥𑀽𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀨𑀸𑀲𑀼𑀓𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑀼𑀫𑀸𑀭𑀪𑀺. 𑀢𑀤𑀸 𑀏𑀓𑁂𑀦 𑀯𑀦𑀓𑀫𑁆𑀫𑀺𑀓𑁂𑀦 𑀲𑀤𑁆𑀥𑀺𑀁𑀅𑀭𑀜𑁆𑀜𑀁 𑀕𑀢𑀸 𑀏𑀓𑀸 𑀲𑀼𑀦𑀔𑀻 𑀢𑀲𑁆𑀫𑀺𑀁 𑀓𑀦𑁆𑀤𑀭𑁂 𑀏𑀓𑀲𑁆𑀫𑀺𑀁 𑀧𑀩𑁆𑀪𑀸𑀭𑀝𑁆𑀞𑀸𑀦𑁂 𑀤𑀸𑀭𑀓𑁂 𑀯𑀺𑀚𑀸𑀬𑀺𑀢𑁆𑀯𑀸 𑀙𑀸𑀢𑀚𑁆𑀛𑀢𑁆𑀢𑀸 𑀧𑀯𑁂𑀥𑀫𑀸𑀦𑀕𑀢𑁆𑀢𑀸 𑀤𑀸𑀭𑀓𑀸𑀦𑀁 𑀲𑀫𑀻𑀧𑁂𑀦𑀺𑀧𑀦𑁆𑀦𑀸 𑀲𑀸𑀫𑀡𑁂𑀭𑀲𑁆𑀲 𑀧𑀢𑁆𑀢𑁂 𑀆𑀳𑀸𑀭𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀦𑀺𑀧𑀦𑁆𑀦𑀝𑁆𑀞𑀸𑀦𑀢𑁄 𑀯𑀼𑀝𑁆𑀞𑀸𑀬 𑀧𑀯𑁂𑀥𑀫𑀸𑀦𑀸 𑀢𑀲𑁆𑀲 𑀲𑀫𑀻𑀧𑀁 𑀆𑀕𑀫𑁆𑀫 𑀦𑀗𑁆𑀕𑀼𑀝𑁆𑀞𑀁 𑀘𑀸𑀮𑁂𑀦𑁆𑀢𑀻 𑀅𑀝𑁆𑀞𑀸𑀲𑀺, 𑀲𑀸𑀫𑀡𑁂𑀭𑁄 𑀢𑀁 𑀤𑀺𑀲𑁆𑀯𑀸 𑀓𑀫𑁆𑀧𑀺𑀢𑀫𑀸𑀦𑀲𑁄 𑀅𑀢𑁆𑀢𑀦𑁄 𑀪𑁄𑀚𑀦𑀢𑁆𑀣𑀸𑀬 𑀯𑀝𑁆𑀝𑀺𑀢𑀁 𑀧𑀣𑀫𑀸𑀮𑁄𑀧𑀁 𑀢𑀲𑁆𑀲𑀸 𑀧𑀼𑀭𑀢𑁄 𑀞𑀧𑁂𑀲𑀺, 𑀢𑀢𑁄 𑀲𑀸 𑀲𑁄𑀫𑀦𑀲𑁆𑀲𑀸 𑀢𑀁 𑀪𑀼𑀜𑁆𑀚𑀺. 𑀢𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑁄 𑀧𑀼𑀦𑀧𑁆𑀧𑀼𑀦𑀁 𑀆𑀮𑁄𑀧𑀁 𑀓𑀭𑁄𑀦𑁆𑀢𑁄 𑀢𑀲𑁆𑀲𑀸 𑀪𑀢𑁆𑀢𑀁 𑀤𑀢𑁆𑀯𑀸 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀕𑀫𑀸𑀲𑀺. 𑀢𑀢𑁄 𑀲𑀸 𑀲𑀼𑀦𑀔𑀻 𑀲𑀸𑀫𑀡𑁂𑀭𑀕𑀢𑁂𑀦 𑀧𑀲𑀸𑀤𑁂𑀦 𑀢𑀢𑁄 𑀘𑀼𑀢𑀸 𑀚𑀫𑁆𑀩𑀼𑀤𑀻𑀧𑁂 𑀤𑁂𑀯𑀧𑀼𑀢𑁆𑀢𑀦𑀕𑀭𑁂 𑀭𑀸𑀚𑀸𑀦𑀁 𑀧𑀝𑀺𑀘𑁆𑀘 𑀢𑀲𑁆𑀲 𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀢𑁆𑀯𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺, 𑀅𑀣𑀲𑁆𑀲𑀸 𑀲𑀺𑀔𑀸𑀫𑀗𑁆𑀕𑀮𑀤𑀺𑀯𑀲𑁂 𑀲𑀫𑁆𑀧𑀢𑁆𑀢𑁂 𑀫𑀸𑀢𑀸𑀧𑀺𑀢𑀭𑁄 𑀧𑀦𑀲𑁆𑀲𑀸 𑀓𑀼𑀡𑁆𑀟𑀮𑀸𑀯𑀝𑁆𑀝𑀓𑁂𑀲𑀢𑁆𑀢𑀸 𑀓𑀼𑀡𑁆𑀟𑀮𑀸𑀢𑀺 𑀦𑀸𑀫 𑀫𑀓𑀁𑀲𑀼. 𑀲𑀸 𑀅𑀦𑀼𑀓𑁆𑀓𑀫𑁂𑀦 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀅𑀳𑁄𑀲𑀺, 𑀢𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀢𑀺𑀲𑁆𑀲𑁄 𑀲𑀸𑀫𑀡𑁂𑀭𑁄 𑀫𑀳𑀸𑀩𑁄𑀥𑀺𑀁 𑀯𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀦𑀸𑀯𑀁 𑀅𑀪𑀺𑀭𑀼𑀬𑁆𑀳 𑀚𑀫𑁆𑀩𑀼𑀤𑀻𑀧𑀁 𑀕𑀦𑁆𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀤𑁂𑀯𑀧𑀼𑀢𑁆𑀢𑀦𑀕𑀭𑀁 𑀧𑀢𑁆𑀯𑀸 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄 𑀬𑀼𑀕𑀫𑀢𑁆𑀢𑀤𑀲𑁄 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑁄 𑀫𑀳𑀸𑀯𑀻𑀣𑀺𑀁 𑀲𑀫𑁆𑀧𑀸𑀧𑀼𑀡𑀺. 𑀭𑀸𑀚𑀥𑀻𑀢𑀸 𑀲𑀻𑀳𑀧𑀜𑁆𑀚𑀭𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀁 𑀑𑀮𑁄𑀓𑁂𑀦𑁆𑀢𑀻 𑀪𑀺𑀓𑁆𑀔𑀦𑁆𑀢𑀁 𑀲𑀸𑀫𑀡𑁂𑀭𑀁 𑀤𑀺𑀲𑁆𑀯𑀸 𑀧𑀼𑀩𑁆𑀩𑀲𑀺𑀦𑁂𑀳𑀁 𑀧𑀝𑀺𑀮𑀪𑀺, 𑀢𑀲𑁆𑀫𑀺𑀁𑀔𑀡𑁂 𑀢𑀲𑁆𑀲𑀸 𑀚𑀸𑀢𑀺𑀲𑁆𑀲𑀭𑀜𑀸𑀡𑀁 𑀅𑀳𑁄𑀲𑀺. 𑀲𑀸 𑀓𑀺𑀭 𑀧𑀼𑀩𑁆𑀩𑁂 𑀪𑀺𑀓𑁆𑀔𑀼𑀡𑀻 𑀳𑀼𑀢𑁆𑀯𑀸 𑀧𑀡𑁆𑀡𑀲𑀽𑀘𑀺𑀬𑀸 𑀲𑀤𑁆𑀥𑀺𑀁 𑀧𑁄𑀢𑁆𑀣𑀓𑀜𑁆𑀘 𑀧𑀤𑀻𑀧𑀺𑀬𑀢𑁂𑀮𑀜𑁆𑀘 𑀤𑀢𑁆𑀯𑀸 𑀚𑀸𑀢𑀺𑀲𑁆𑀲𑀭𑀸 𑀪𑀯𑁂𑀬𑁆𑀬𑀁𑀢𑀺 𑀧𑀢𑁆𑀣𑀦𑀁 𑀞𑀧𑁂𑀲𑀺, 𑀢𑀢𑁄 𑀲𑀸𑀚𑀸𑀢𑀺𑀁 𑀅𑀦𑀼𑀲𑁆𑀲𑀭𑀦𑁆𑀢𑀻 𑀲𑀸𑀫𑀡𑁂𑀭𑁂𑀦 𑀅𑀢𑁆𑀢𑀦𑁄 𑀓𑀢𑀽𑀧𑀓𑀸𑀭𑀁 𑀤𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀸 𑀦𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀭𑀸𑀚𑀕𑁂𑀳𑁂 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑀁 𑀦𑀸𑀦𑀕𑁆𑀕𑀭𑀲 𑀪𑁄𑀚𑀦𑁂𑀦 𑀧𑀭𑀺𑀯𑀺𑀲𑀺𑀢𑁆𑀯𑀸 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀲𑀸𑀫𑀡𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑀻 𑀏𑀯𑀫𑀸𑀳.

𑁧.

𑀦 𑀲𑀜𑁆𑀚𑀸𑀦𑀸𑀲𑀺 𑀫𑀁 𑀥𑀻𑀭, 𑀧𑀼𑀩𑁆𑀩𑁂𑀳𑀁 𑀢𑀯 𑀤𑀸𑀲𑀺𑀓𑀸;

𑀢𑁂𑀦𑀸𑀳𑀁 𑀲𑀼𑀔𑀺𑀢𑀸 𑀆𑀲𑀺𑀁, 𑀢𑀲𑁆𑀫𑀸 𑀢𑁆𑀯𑀫𑀲𑀺 𑀇𑀲𑁆𑀲𑀭𑁄𑀢𑀺.

𑀢𑀁 𑀲𑀼𑀢𑁆𑀯𑀸 𑀲𑀸𑀫𑀡𑁂𑀭𑁄 𑀆𑀳.

𑁨.

𑀦𑀢𑁆𑀣𑀺 𑀫𑁂 𑀢𑀸𑀤𑀺𑀲𑀻 𑀤𑀸𑀲𑀻, 𑀦 𑀲𑀜𑁆𑀚𑀸𑀦𑀸𑀫𑀺 𑀢𑀁 𑀅𑀳𑀁;

𑀓𑀸𑀲𑀺 𑀢𑁆𑀯𑀁 𑀓𑀲𑁆𑀲 𑀯𑀸 𑀥𑀻𑀢𑀸, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑀸𑀢𑀺.

𑀢𑀢𑁄 𑀲𑀸 𑀢𑀁 𑀲𑀸𑀭𑀸𑀧𑁂𑀦𑁆𑀢𑀻 𑀆𑀳.

𑁩.

𑀲𑀸𑀭𑀸𑀧𑁂𑀫𑀺 𑀢𑀼𑀯𑀁 𑀅𑀚𑁆𑀚, 𑀬𑀣𑀸 𑀚𑀸𑀦𑀸𑀲𑀺𑀫𑀁 𑀇𑀲𑁂;

𑀩𑀼𑀚𑁆𑀛𑀲𑁆𑀲𑀼 𑀩𑁄𑀥𑀺𑀢𑁄 𑀤𑀸𑀦𑀺, 𑀫𑀬𑀸 𑀚𑀸𑀢𑀺𑀁𑀲𑀭𑀦𑁆𑀢𑀺𑀬𑀸.

𑁪.

𑀧𑀸𑀲𑀸𑀡𑀯𑀸𑀧𑀺𑀕𑀸𑀫𑀫𑁆𑀳𑀺, 𑀢𑀫𑁆𑀩𑀧𑀡𑁆𑀡𑀺𑀫𑁆𑀳𑀺 𑀭𑁄𑀳𑀡𑁂;

𑀪𑀺𑀓𑁆𑀔𑀺𑀢𑁆𑀯𑀸𑀦 𑀢𑀼𑀯𑀁 𑀪𑀦𑁆𑀢𑁂, 𑀬𑀤𑀸 𑀓𑀓𑀼𑀩𑀦𑁆𑀤𑀓𑀦𑁆𑀤𑀭𑁂.

𑁫.

𑀦𑀺𑀲𑀻𑀤𑀺𑀢𑁆𑀯𑀸𑀦 𑀢𑁆𑀯𑀁 𑀪𑀢𑁆𑀢𑀁, 𑀪𑀼𑀢𑁆𑀢𑀓𑀸𑀮𑀁 𑀲𑀭𑀺𑀲𑁆𑀲𑀲𑀺;

𑀢𑀤𑀸𑀳𑀁 𑀲𑀼𑀦𑀔𑀻 𑀆𑀲𑀺𑀁, 𑀯𑀺𑀚𑀸𑀢𑀸 𑀮𑀤𑁆𑀥𑀕𑁄𑀘𑀭𑀸.

𑁬.

𑀤𑀸𑀭𑀓𑁂 ¶ 𑀔𑀸𑀤𑀺𑀢𑀼𑀁 𑀫𑀬𑁆𑀳, 𑀫𑀸𑀲𑀦𑁆𑀦𑀸 𑀔𑀼𑀤𑀧𑀻𑀴𑀺𑀢𑀸;

𑀧𑀯𑁂𑀥𑀫𑀸𑀦𑀲𑀩𑁆𑀩𑀗𑁆𑀕𑀸, 𑀅𑀝𑁆𑀞𑀸𑀲𑀺𑀁 𑀢𑀯 𑀲𑀦𑁆𑀢𑀺𑀓𑁂.

𑁭.

𑀤𑀺𑀲𑁆𑀯𑀸 𑀢𑀁 𑀫𑀁 𑀢𑀤𑀸 𑀪𑀦𑁆𑀢𑁂, 𑀯𑁂𑀥𑀫𑀸𑀦𑀁 𑀩𑀼𑀪𑀼𑀓𑁆𑀔𑀺𑀢𑀁;

𑀙𑀺𑀦𑁆𑀦𑀪𑀢𑁆𑀢𑁄 𑀢𑀼𑀯𑀁 𑀳𑀼𑀢𑁆𑀯𑀸, 𑀫𑀫𑀁 𑀪𑀢𑁆𑀢𑁂𑀦 𑀢𑁄𑀲𑀬𑀻.

𑁮.

𑀢𑀤𑀸𑀳𑀁 𑀫𑀼𑀤𑀼𑀘𑀺𑀢𑁆𑀢𑁂𑀦, 𑀘𑀺𑀢𑁆𑀢𑀁 𑀢𑀬𑀺 𑀧𑀲𑀸𑀤𑀬𑀺𑀁;

𑀢𑁂𑀦𑀸𑀳𑀁 𑀧𑀼𑀜𑁆𑀜𑀓𑀫𑁆𑀫𑁂𑀦, 𑀤𑀼𑀢𑀺𑀬𑁂 𑀅𑀢𑁆𑀢𑀲𑀫𑁆𑀪𑀯𑁂.

𑁯.

𑀇𑀥 𑀭𑀸𑀚𑀓𑀼𑀮𑁂 𑀚𑀸𑀢𑀸, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀦𑀻;

𑀘𑀺𑀢𑁆𑀢𑀧𑁆𑀧𑀲𑀸𑀤𑀫𑀢𑁆𑀢𑁂𑀦, 𑀮𑁄𑀓𑀦𑀸𑀣𑀲𑁆𑀲 𑀲𑀸𑀲𑀦𑁂.

𑁧𑁦.

𑀢𑀤𑀳𑀼𑀧𑀩𑁆𑀩𑀚𑀺𑀢𑀲𑁆𑀲𑀸𑀧𑀺, 𑀈𑀤𑀺𑀲𑀸 𑀳𑁄𑀦𑁆𑀢𑀺 𑀲𑀫𑁆𑀧𑀤𑀸;

𑀓𑀻𑀤𑀺𑀲𑀁 𑀳𑁄𑀢𑀺 𑀲𑀫𑁆𑀩𑀼𑀤𑁆𑀥𑁂, 𑀧𑀲𑀸𑀤𑁂𑀦 𑀨𑀮𑀁 𑀅𑀳𑁄.

𑁧𑁧.

𑀅𑀜𑁆𑀜𑀸𑀦𑀺 𑀧𑀦 𑀓𑀺𑀘𑁆𑀘𑀸𑀦𑀺, 𑀧𑀳𑀸𑀬𑀸𑀢𑁆𑀢𑀳𑀺𑀢𑁂 𑀭𑀢𑁄;

𑀅𑀢𑀦𑁆𑀤𑀺𑀢𑁄 𑀤𑀺𑀯𑀸𑀭𑀢𑁆𑀢𑀺𑀁, 𑀲𑀭𑀸𑀢𑀼 𑀭𑀢𑀦𑀢𑁆𑀢𑀬𑀁𑀢𑀺.

𑀏𑀯𑀁 𑀲𑀸𑀫𑀡𑁂𑀭𑁂𑀦 𑀓𑀢𑀽𑀧𑀓𑀸𑀭𑀁 𑀲𑀸𑀭𑀸𑀧𑁂𑀢𑁆𑀯𑀸 𑀪𑀦𑁆𑀢𑁂 𑀢𑀯 𑀤𑀸𑀲𑀺𑀬𑀸 𑀅𑀦𑀼𑀕𑁆𑀕𑀳𑀁 𑀧𑀝𑀺𑀘𑁆𑀘 𑀇𑀥𑁂𑀯 𑀯𑀲𑀣𑀸𑀢𑀺 𑀦𑀺𑀫𑀦𑁆𑀢𑀺𑀢𑁆𑀯𑀸 𑀢𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑁂 𑀫𑀳𑀦𑁆𑀢𑀁 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑀸𑀫𑀡𑁂𑀭𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀦𑁂𑀓𑀪𑀺𑀓𑁆𑀔𑀼𑀲𑀢𑁂 𑀦𑀺𑀫𑀦𑁆𑀢𑁂𑀢𑁆𑀯𑀸 𑀯𑀺𑀳𑀸𑀭𑁂 𑀯𑀲𑀸𑀧𑁂𑀢𑁆𑀯𑀸 𑀲𑀼𑀮𑀪𑀁 𑀓𑀢𑁆𑀯𑀸 𑀘𑀢𑀼𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀸𑀲𑀺. 𑀲𑀸𑀫𑀡𑁂𑀭𑁄𑀧𑀺 𑀲𑀼𑀦𑀔𑀺𑀬𑀸 𑀤𑀺𑀦𑁆𑀦𑀤𑀸𑀦𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀢𑀼𑀝𑁆𑀞𑁄 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀦 𑀘𑀺𑀭𑁂𑀦𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀯𑀺𑀳𑀸𑀭𑁂 𑀯𑀲𑀦𑁆𑀢𑁄 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺.

𑁧𑁨.

𑀢𑀺𑀬𑀤𑁆𑀥𑁂𑀲𑀼 𑀢𑀺𑀮𑁄𑀓𑀲𑁆𑀫𑀺𑀁, 𑀦𑀢𑁆𑀣𑀺 𑀯𑀢𑁆𑀣𑀼𑀢𑁆𑀢𑀬𑀁 𑀯𑀺𑀦𑀸;

𑀲𑀢𑁆𑀢𑀸𑀦 𑀫𑀜𑁆𑀜 𑀫𑀺𑀘𑁆𑀙𑀢𑁆𑀣, 𑀤𑀸𑀬𑀓𑀁 𑀲𑀼𑀭𑀧𑀸𑀤𑀧𑀁.

𑀓𑀼𑀡𑁆𑀟𑀮𑀺𑀬𑀸 𑀯𑀢𑁆𑀣𑀼𑀁 𑀤𑀲𑀫𑀁.

𑀫𑀳𑀸𑀲𑁂𑀦𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑀏𑀢𑁆𑀢𑀸𑀯𑀢𑀸 𑀚𑀫𑁆𑀩𑀼𑀤𑀻𑀧𑀼𑀧𑁆𑀧𑀢𑁆𑀢𑀺𑀓𑀣𑀸 𑀲𑀫𑀢𑁆𑀢𑀸.