📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀲𑀻𑀫𑀯𑀺𑀲𑁄𑀥𑀦𑀻

𑀯𑀭𑀤𑀁 ¶ 𑀯𑀭𑀤𑀁 𑀅𑀕𑁆𑀕𑀁, 𑀤𑀺𑀘𑁆𑀘𑀁 𑀤𑀺𑀘𑁆𑀘𑀁𑀯 𑀯𑀦𑀚𑀁;

𑀩𑁄𑀥𑀓𑀁 𑀩𑁄𑀥𑀓𑀁 𑀧𑀸𑀡𑀁, 𑀤𑁂𑀯’𑀤𑁂𑀯𑀁 𑀦𑀫𑀸𑀫’𑀳𑀁.

𑀲𑀦𑁆𑀢𑀁 𑀲𑀦𑁆𑀢𑀁 𑀲𑀤𑀸 𑀯𑀝𑁆𑀝𑀁, 𑀧𑀚𑀁’𑀪𑀯𑁂 𑀲𑀼𑀢𑀁;

𑀦𑀺𑀩𑁆𑀩𑀼𑀤𑀁 𑀦𑀺𑀩𑁆𑀩𑀼𑀤𑀁 𑀢𑀸𑀭𑀁, 𑀥𑀫𑁆𑀫𑀯𑀭𑀁 𑀦𑀫𑀸𑀫’𑀳𑀁.

𑀲𑀼𑀢𑀁 𑀲𑀼𑀢𑀁 𑀪𑀯𑀦𑁂 𑀬𑀁, 𑀦𑀢𑀦𑀁 𑀦𑀢𑀦𑀸’𑀭𑀳𑀁;

𑀦𑀭𑀸’𑀦𑀭𑀸 𑀲𑀤𑀸’𑀓𑀁𑀲𑀼, 𑀲𑀗𑁆𑀖𑀯𑀭𑀁 𑀦𑀫𑀸𑀫’𑀳𑀁.

𑀇𑀘𑁆𑀘𑁂𑀯’𑀫𑀘𑁆𑀘𑀦𑁆𑀢𑀦𑀢𑀲𑁆𑀲𑀦𑁂𑀬𑁆𑀬𑀁, 𑀦𑀢𑀬𑁆𑀬𑀫𑀸𑀦𑁄 𑀭𑀢𑀦𑀢𑁆𑀢𑀬𑀁 𑀬𑀁;

𑀧𑀼𑀜𑁆𑀜𑀸𑀪𑀺𑀯𑀟𑁆𑀠𑀺𑀁 𑀫𑀳𑀕𑁆𑀖𑀁 𑀅𑀮𑀢𑁆𑀣𑀁, 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀳𑀢𑀦𑁆𑀢𑀭𑀸𑀬𑁄.

𑀯𑀺𑀦𑀬𑁂 𑀲𑀢𑀺 𑀞𑀺𑀢𑁂 𑀬𑀁, 𑀲𑀸𑀲𑀦𑀁 𑀲𑀡𑁆𑀞𑀺𑀢𑀁 𑀪𑀯𑁂;

𑀯𑀺𑀦𑀬𑁂 𑀲𑀢𑀺 𑀦𑀝𑁆𑀞𑁂 𑀬𑀁, 𑀯𑀺𑀦𑀝𑁆𑀞𑀁 𑀲𑀸𑀲𑀦𑀁 𑀪𑀯𑁂.

𑀢𑀲𑁆𑀫𑀸 𑀤𑀺𑀢𑁆𑀢𑀁 𑀫𑀫𑁂’𑀤𑀸𑀦𑀺, 𑀚𑁄𑀢𑀬𑀺𑀢𑁆𑀯𑀸𑀦 𑀲𑀸𑀲𑀦𑁂;

𑀪𑀺𑀦𑁆𑀤𑀺𑀢𑁆𑀯𑀸 𑀤𑁆𑀯𑁂𑀴𑁆𑀳𑀓𑀁 𑀯𑀸𑀤𑀁, 𑀏𑀓𑀻𑀪𑀸𑀯𑀁 𑀓𑀭𑁄𑀫’𑀳𑀁.

𑀅𑀢𑁆𑀢𑀼𑀓𑁆𑀓𑀁𑀲𑀦-𑀪𑀸𑀯𑀜𑁆𑀘, 𑀧𑀭𑀯𑀫𑁆𑀪𑀦𑀓𑀫𑁆𑀧𑀺𑀘;

𑀢𑁂𑀲𑀼 𑀘𑀺𑀢𑁆𑀢𑀁 𑀅𑀧𑁂𑀲𑁂𑀢𑁆𑀯𑀸, 𑀲𑀸𑀲𑀦𑀲𑁆𑀲 𑀲𑀼𑀯𑀼𑀟𑁆𑀠𑀺𑀬𑀸.

𑀬𑀤𑀺 𑀫𑁂 𑀈𑀤𑀺𑀲𑀁 𑀘𑀺𑀢𑁆𑀢𑀁, 𑀪𑀯𑁂𑀬𑁆𑀬𑀼𑀁 𑀧𑀸𑀧𑀲𑀗𑁆𑀓𑀧𑁆𑀧𑀸;

𑀧𑀘𑁆𑀘𑀺𑀲𑁆𑀲𑀁 𑀦𑀺𑀭𑀬𑁂 𑀪𑀬𑀁, 𑀳𑀻𑀦’𑀚𑁆𑀛𑀸𑀲𑀬𑀓𑀸𑀭𑀡𑀸.

𑀲𑀸𑀲𑀦𑀲𑁆𑀲 ¶ 𑀲𑀼𑀮𑀪𑀁’𑀯 𑀧𑀢𑁆𑀣𑀬𑀦𑁆𑀢𑁄 𑀲𑀢𑀸’𑀘𑀸𑀭𑁄;

𑀲𑀁𑀲𑀦𑁆𑀤𑀺𑀲𑁆𑀲𑀫𑀳𑀁 𑀤𑀸𑀦𑀺, 𑀘𑀺𑀭𑀁 𑀲𑀤𑁆𑀥𑀫𑁆𑀫’𑀲𑀼𑀤𑁆𑀥𑀺𑀬𑀸.

𑀲𑀼𑀤𑀼𑀮𑁆𑀮𑀪𑀁 𑀮𑀪𑀺𑀢𑁆𑀯𑀸𑀦, 𑀧𑀩𑁆𑀩𑀚𑁆𑀚𑀁 𑀚𑀺𑀦𑀲𑀸𑀲𑀦𑁂;

𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀭𑀁 𑀯𑀸𑀤𑀁, 𑀓𑀢𑁆𑀯𑀸 𑀤𑁆𑀯𑁂𑀴𑁆𑀳𑀓’𑀫𑁂𑀓𑀺𑀓𑀁.

𑀲𑀻𑀫𑀯𑀺𑀲𑁄𑀥𑀦𑀺𑀁 𑀦𑀸𑀫, 𑀦𑀸𑀦𑀸𑀕𑀦𑁆𑀣𑀲𑀫𑀸𑀳𑀝𑀁;

𑀓𑀭𑀺𑀲𑁆𑀲𑀁 𑀫𑁂 𑀦𑀺𑀲𑀸𑀫𑁂𑀦𑁆𑀢𑀼, 𑀲𑀸𑀥𑀯𑁄 𑀓𑀯𑀺𑀧𑀼𑀗𑁆𑀕𑀯𑀸.

𑀧𑀸𑀴𑀺𑀁 𑀅𑀝𑁆𑀞𑀓𑀣𑀜𑁆𑀘𑁂𑀯, 𑀫𑀸𑀢𑀺𑀓𑀁 𑀧𑀤𑀪𑀸𑀚𑀦𑀺𑀁;

𑀑𑀕𑀸𑀳𑁂𑀢𑁆𑀯𑀸𑀦 𑀢𑀁 𑀲𑀩𑁆𑀩𑀁, 𑀧𑀼𑀦𑀧𑁆𑀧𑀼𑀦𑀁 𑀅𑀲𑁂𑀲𑀢𑁄.

𑀅𑀢𑁆𑀢𑀦𑁄𑀫𑀢𑀺𑀕𑀦𑁆𑀣𑁂𑀲𑀼, 𑀝𑀻𑀓𑀸𑀕𑀡𑁆𑀞𑀺𑀧𑀤𑁂𑀲𑀼𑀘;

𑀯𑀺𑀦𑀺𑀘𑁆𑀙𑀬𑀯𑀺𑀫𑀢𑀻𑀲𑀼, 𑀫𑀸𑀢𑀺𑀓𑀸’𑀝𑁆𑀞𑀓𑀣𑀸𑀲𑀼𑀧𑀺.

𑀲𑀩𑁆𑀩𑀁 𑀅𑀲𑁂𑀲𑀓𑀁 𑀓𑀢𑁆𑀯𑀸, 𑀲𑀁𑀲𑀦𑁆𑀤𑀺𑀢𑁆𑀯𑀸𑀦 𑀏𑀓𑀢𑁄;

𑀧𑀯𑀢𑁆𑀢𑀸 𑀯𑀡𑁆𑀡𑀦𑀸 𑀏𑀲𑀸, 𑀢𑁄𑀲𑀬𑀦𑁆𑀢𑀻 𑀯𑀺𑀘𑀓𑁆𑀔𑀡𑁂𑀢𑀺.

𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀳𑀺 𑀤𑀼𑀮𑁆𑀮𑀪𑁄, 𑀢𑀢𑁄 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘, 𑀯𑀼𑀢𑁆𑀢𑀜𑁆𑀳𑁂𑀢𑀁

𑀩𑀼𑀤𑁆𑀥𑁄 𑀘 𑀤𑀼𑀮𑁆𑀮𑀪𑁄 𑀮𑁄𑀓𑁂, 𑀲𑀤𑁆𑀥𑀫𑁆𑀫𑀲𑀯𑀦𑀫𑁆𑀧𑀺 𑀘;

𑀲𑀗𑁆𑀖𑁄 𑀘 𑀤𑀼𑀮𑁆𑀮𑀪𑁄 𑀮𑁄𑀓𑁂, 𑀲𑀧𑁆𑀧𑀽𑀭𑀺𑀲𑀸’𑀢𑀺𑀤𑀼𑀮𑁆𑀮𑀪𑀸.

𑀤𑀼𑀮𑁆𑀮𑀪𑀜𑁆𑀘 𑀫𑀦𑀼𑀲𑁆𑀲𑀢𑁆𑀢𑀁, 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀘 𑀤𑀼𑀮𑁆𑀮𑀪𑁄;

𑀤𑀼𑀮𑁆𑀮𑀪𑀸 𑀔𑀡𑀲𑀫𑁆𑀧𑀢𑁆𑀢𑀺, 𑀲𑀤𑁆𑀥𑀫𑁆𑀫𑁄 𑀧𑀭𑀫𑀤𑀼𑀮𑁆𑀮𑀪𑁄’𑀢𑀺.

𑁧. 𑀉𑀧𑀲𑀫𑁆𑀧𑀤𑀸𑀓𑀡𑁆𑀟𑁄

𑀇𑀫𑀲𑁆𑀫𑀺𑀜𑁆𑀳𑀺 𑀞𑀸𑀦𑁂 𑀞𑀢𑁆𑀯𑀸 𑀩𑀼𑀤𑁆𑀥𑀕𑀼𑀡𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀓𑀣𑀸𑀬 𑀯𑀼𑀘𑁆𑀘𑀫𑀸𑀦𑀸𑀬 𑀲𑀸𑀥𑀽𑀦𑀁 𑀘𑀺𑀢𑁆𑀢𑀲𑀫𑁆𑀧𑀳𑀁𑀲𑀦𑀜𑁆𑀘𑁂𑀯, 𑀇𑀫𑀲𑁆𑀲𑁂𑀯 𑀧𑀓𑀭𑀡𑀲𑁆𑀲 𑀅𑀦𑀼𑀫𑁆𑀫𑀢𑁆𑀢𑀯𑀘𑀦𑀪𑀸𑀯𑁄 𑀘 𑀪𑀯𑁂𑀬𑁆𑀬, 𑀅𑀦𑀼𑀫𑁆𑀫𑀢𑁆𑀢𑀯𑀘𑀦𑀢𑁆𑀢𑁂 𑀘 𑀲𑀺𑀤𑁆𑀥𑁂 𑀲𑁄𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀩𑀼𑀤𑁆𑀥𑀕𑀼𑀡𑀁 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀅𑀫𑁆𑀳𑀸𑀓𑀁 𑀓𑀺𑀭 𑀪𑀕𑀯𑀸 𑀩𑁆𑀭𑀳𑁆𑀫𑀤𑁂𑀯𑀩𑀼𑀤𑁆𑀥𑀫𑀸𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀧𑁄𑀭𑀸𑀡𑀲𑀓𑁆𑀬𑀕𑁄𑀢𑀫𑀸 𑀫𑀦𑁄𑀧𑀡𑀺𑀥𑀺𑀯𑀲𑁂𑀦, 𑀓𑀝𑁆𑀞𑀯𑀸𑀳𑀦𑀚𑀸𑀢𑀓𑀁𑀆𑀤𑀺𑀁𑀓𑀢𑁆𑀯𑀸 𑀬𑀸𑀯 𑀫𑀚𑁆𑀛𑀺𑀫𑀤𑀻𑀧𑀗𑁆𑀓𑀭𑀸 𑀯𑀸𑀘𑀗𑁆𑀕𑀯𑀲𑁂𑀦 𑀫𑀚𑁆𑀛𑀺𑀫𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑀢𑁄 𑀧𑀝𑁆𑀞𑀸𑀬 𑀓𑀸𑀬𑀯𑀸𑀘𑀗𑁆𑀕𑀯𑀲𑁂𑀦 𑀲𑀩𑁆𑀩𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀬𑀸𑀯 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑀸 𑀯𑀻𑀲𑀢𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀢𑁆𑀣𑀸𑀬 𑀬𑁂𑀯 𑀅𑀮𑀗𑁆𑀓𑀢𑀁 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀤𑁂𑀦𑁆𑀢𑀲𑁆𑀲 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀻𑀲𑀁 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀁 𑀉𑀤𑁆𑀥𑀦𑀢𑁄𑀧𑀺 𑀩𑀳𑀼𑀢𑀭𑀁, 𑀅𑀜𑁆𑀚𑀺𑀢𑀦𑀬𑀦𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀤𑁂𑀦𑁆𑀢𑀲𑁆𑀲 𑀦𑀬𑀦𑀁 𑀅𑀚𑀝𑀸𑀓𑀸𑀲𑁂 𑀕𑀕𑀦𑀢𑀮𑁂 𑀢𑀸𑀭𑀸𑀕𑀡𑀢𑁄𑀧𑀺 𑀩𑀳𑀼𑀢𑀭𑀁, 𑀳𑀤𑀬𑀫𑀁𑀲𑀁 𑀯𑀸 𑀤𑀓𑁆𑀔𑀺𑀡𑀩𑀸𑀳𑀼𑀁 ¶ 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀤𑁂𑀦𑁆𑀢𑀲𑁆𑀲 𑀫𑀁𑀲𑀁 𑀙𑀦𑀳𑀼𑀢 𑀅𑀝𑁆𑀞𑀲 𑀳𑀲𑁆𑀲𑀸𑀥𑀺𑀓𑀲𑀢𑀲𑀳𑀲𑁆𑀲𑀧𑀫𑀸𑀡𑀲𑀺𑀦𑁂𑀭𑀼𑀭𑀸𑀚𑀢𑁄𑀧𑀺 𑀩𑀳𑀼𑀢𑀭𑀁, 𑀮𑁄𑀳𑀺𑀢𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀤𑁂𑀦𑁆𑀢𑀲𑁆𑀲 𑀭𑀼𑀳𑀺𑀭𑀁 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓𑀢𑁄𑀧𑀺 𑀩𑀳𑀼𑀢𑀭𑀁, 𑀫𑀤𑁆𑀤𑀻𑀲𑀤𑀺𑀲𑁂 𑀘 𑀪𑀭𑀺𑀬𑁂 𑀚𑀸𑀮𑀻𑀓𑀡𑁆𑀳𑀸𑀚𑀺𑀦𑀲𑀤𑀺𑀲𑁂 𑀘 𑀧𑀼𑀢𑁆𑀢𑁂 𑀧𑀭𑁂𑀲𑀁 𑀤𑀸𑀲𑀢𑁆𑀣𑀸𑀬 𑀤𑁂𑀦𑁆𑀢𑀲𑁆𑀲 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸. 𑀏𑀯𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑀲𑁆𑀲𑁂𑀯.

𑀘𑀺𑀦𑁆𑀢𑀺𑀢𑀁 𑀲𑀢𑁆𑀢𑀲𑀗𑁆𑀔𑁆𑀬𑁂𑀬𑁆𑀬𑀁, 𑀦𑀯𑀲𑀗𑁆𑀔𑁆𑀬𑁂𑀬𑁆𑀬’𑀯𑀸𑀘𑀓𑀁;

𑀓𑀸𑀬𑀯𑀸𑀘𑀸 𑀘𑀢𑀼𑀔𑁆𑀬𑀸𑀢𑀁, 𑀩𑀼𑀤𑁆𑀥𑀢𑁆𑀢𑀁 𑀲𑀫𑀼𑀧𑀸𑀕𑀫𑀻𑀢𑀺.

𑀚𑀸𑀢𑀢𑁆𑀢𑀓𑀻𑀲𑁄𑀢𑀢𑁆𑀢𑀓𑀺𑀬𑀸 𑀯𑀼𑀢𑁆𑀢𑀦𑀬𑁂𑀦 𑀅𑀲𑀽𑀭𑁄 𑀳𑀼𑀢𑁆𑀯𑀸 𑀩𑀼𑀤𑁆𑀥𑀢𑁆𑀢𑀁 𑀘𑀺𑀦𑁆𑀢𑁂𑀦𑁆𑀢𑀲𑁆𑀲𑁂𑀯 𑀲𑀢𑁆𑀢𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀯𑀻𑀢𑀺𑀯𑀢𑁆𑀢𑀸𑀦𑀺. 𑀅𑀢𑀺𑀲𑀽𑀭𑁄 𑀅𑀳𑀼𑀢𑁆𑀯𑀸 𑀯𑀸𑀘𑀸𑀫𑀢𑁆𑀢𑀫𑁂𑀯 𑀦𑀯 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀯𑀻𑀢𑀺𑀯𑀢𑁆𑀢𑀸𑀦𑀺. 𑀅𑀢𑀺𑀲𑀽𑀭𑁄 𑀳𑀼𑀢𑁆𑀯𑀸 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀯𑀲𑁂𑀦 𑀧𑀽𑀭𑁂𑀦𑁆𑀢𑀲𑁆𑀲 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀯𑀻𑀢𑀺𑀯𑀢𑁆𑀢𑀸𑀦𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑀢𑁄 𑀧𑀝𑁆𑀞𑀸𑀬 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀢𑀲𑀳𑀲𑁆𑀲𑀓𑀧𑁆𑀧𑀫𑀢𑁆𑀣𑀓𑁂 𑀧𑀦 𑀅𑀚𑁆𑀛𑀢𑁆𑀢𑀧𑀸𑀭𑀫𑀻 𑀧𑀽𑀭𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑁂𑀦 𑀘 𑀲𑀢𑁆𑀢𑀓𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀣𑀯𑀺𑀁 𑀓𑀫𑁆𑀧𑁂𑀢𑁆𑀯𑀸 𑀯𑀗𑁆𑀓𑀧𑀩𑁆𑀩𑀢𑀁 𑀕𑀦𑁆𑀢𑁆𑀯𑀸 𑀦𑀬𑀦𑀲𑀤𑀺𑀲𑁂 𑀤𑁆𑀯𑁂 𑀧𑀼𑀢𑁆𑀢𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀸𑀲𑀢𑁆𑀣𑀸𑀬 𑀤𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀩𑁆𑀭𑀸𑀳𑁆𑀫𑀡𑀯𑀡𑁆𑀡𑁂𑀦 𑀆𑀕𑀢𑀲𑁆𑀲 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀅𑀢𑁆𑀢𑀲𑀫𑀁 𑀫𑀤𑁆𑀤𑀺𑀁 𑀦𑀸𑀫 𑀪𑀭𑀺𑀬𑀁 𑀤𑀢𑁆𑀯𑀸 𑀢𑀲𑁆𑀫𑀺𑀁 𑀪𑀯𑁂 𑀅𑀧𑀭𑀺𑀫𑁂𑀬𑁆𑀬𑀸𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀢𑀼𑀲𑀺𑀢𑀧𑀼𑀭𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀤𑀲𑀳𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀳𑀺 𑀆𑀕𑀦𑁆𑀢𑁆𑀯𑀸 𑀤𑁂𑀯𑀢𑀸𑀯𑀺𑀲𑁂𑀲𑁂𑀳𑀺.

𑀓𑀸𑀮𑁄 𑀤𑁂𑀯 𑀫𑀳𑀸𑀯𑀻𑀭, 𑀉𑀧𑁆𑀧𑀚𑁆𑀚 𑀫𑀸𑀢𑀼𑀓𑀼𑀘𑁆𑀙𑀺𑀬𑀁;

𑀲𑀤𑁂𑀯𑀓𑀁 𑀢𑀸𑀭𑀬𑀦𑁆𑀢𑁄, 𑀩𑀼𑀚𑁆𑀛𑀲𑁆𑀲𑀼 𑀅𑀫𑀢𑀁 𑀧𑀤𑀦𑁆𑀢𑀺.

𑀬𑀸𑀘𑀺𑀬𑀫𑀸𑀦𑁄 𑀓𑀸𑀮𑀁 𑀤𑀻𑀧𑀜𑁆𑀘 𑀤𑁂𑀲𑀜𑁆𑀘 𑀓𑀼𑀮𑀁 𑀫𑀸𑀢𑀭𑀫𑁂𑀯𑀘𑀸𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀫𑀳𑀸𑀯𑀺𑀮𑁄𑀓𑀦𑀸𑀦𑀺 𑀯𑀺𑀮𑁄𑀓𑁂𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑀢𑁄 𑀘𑀯𑀺𑀢𑁆𑀯𑀸 𑀫𑀳𑀸𑀲𑀫𑁆𑀫𑀢𑀯𑀁𑀲𑀚𑀲𑁆𑀲 𑀑𑀓𑁆𑀓𑀸𑀓𑀭𑀜𑁆𑀜𑁄 𑀧𑀼𑀢𑁆𑀢𑀸𑀦𑀁 𑀓𑀼𑀲𑀮𑀫𑁆𑀪𑁂𑀤𑀪𑀬𑁂𑀦 𑀪𑀕𑀺𑀦𑀻𑀳𑀺𑀬𑁂𑀯 𑀲𑀤𑁆𑀥𑀺𑀁 𑀆𑀯𑀸𑀳𑀓𑀭𑀡𑀁 𑀲𑀼𑀢𑁆𑀯𑀸 𑀲𑀓𑁆𑀬𑀸 𑀯𑀢 𑀪𑁄 𑀭𑀸𑀚𑀓𑀼𑀫𑀸𑀭𑀸𑀢𑀺 𑀑𑀓𑁆𑀓𑀸𑀓𑀫𑀳𑀸𑀭𑀸𑀚𑁂𑀦 𑀯𑀼𑀢𑁆𑀢𑀯𑀘𑀦𑀁 𑀧𑀯𑀢𑁆𑀢𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀲𑀓𑁆𑀬𑀸𑀢𑀺 𑀮𑀤𑁆𑀥𑀦𑀸𑀫𑀸𑀦𑀁 𑀭𑀸𑀚𑀽𑀦𑀫𑀩𑁆𑀪𑀦𑁆𑀢𑀭𑁂 𑀧𑀯𑀢𑁆𑀢𑀲𑁆𑀲 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀚𑁂𑀝𑁆𑀞𑀫𑀳𑁂𑀲𑀺𑀬𑀸 𑀲𑀺𑀭𑀺𑀫𑀳𑀸𑀫𑀸𑀬𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀤𑀲𑀫𑀸𑀲𑀘𑁆𑀘𑀬𑁂𑀦 𑀤𑁂𑀯𑀤𑀳𑀦𑀕𑀭𑀲𑁆𑀲 𑀓𑀧𑀺𑀮𑀯𑀢𑁆𑀣𑀼𑀲𑁆𑀲 𑀘 𑀫𑀚𑁆𑀛𑁂 𑀮𑀼𑀫𑁆𑀩𑀺𑀦𑀻𑀯𑀦𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀚𑀸𑀢𑀓𑁆𑀔𑀡𑁂𑀬𑁂𑀯 ¶ 𑀉𑀢𑁆𑀢𑀭𑀸𑀪𑀺𑀫𑀼𑀔𑀁 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀦𑁆𑀢𑁆𑀯𑀸 𑀅𑀙𑀫𑁆𑀪𑀺𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀧𑀺𑀢𑀭𑀁 𑀯𑀦𑁆𑀤𑀸𑀧𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀓𑀸𑀮𑁂 𑀭𑀚𑁆𑀚𑀲𑀺𑀭𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀭𑀸𑀳𑀼𑀮𑀪𑀤𑁆𑀤𑀲𑁆𑀲 𑀚𑀸𑀢𑀤𑀺𑀯𑀲𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀙𑀩𑁆𑀩𑀲𑁆𑀲𑀸𑀦𑀺 𑀤𑀼𑀓𑁆𑀓𑀭𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀯𑁂𑀲𑀸𑀔𑀧𑀼𑀡𑁆𑀡𑀫𑀤𑀺𑀯𑀲𑁂 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀧𑀜𑁆𑀘𑀘𑀢𑁆𑀢𑀸𑀮𑀻𑀲 𑀯𑀲𑁆𑀲𑀸𑀦𑀺 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀭𑀢𑀦𑀤𑀸𑀫𑀁 𑀕𑀦𑁆𑀣𑁂𑀦𑁆𑀢𑁄 𑀯𑀺𑀬 𑀥𑀫𑁆𑀫𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀢𑁆𑀯𑀸 𑀬𑀸𑀯 𑀲𑀼𑀪𑀤𑁆𑀤𑀧𑀭𑀺𑀩𑁆𑀩𑀸𑀚𑀓𑀯𑀺𑀦𑀬𑀦𑀸 𑀓𑀢𑀩𑀼𑀤𑁆𑀥𑀓𑀺𑀘𑁆𑀘𑁂 𑀓𑀼𑀲𑀺𑀦𑀸𑀭𑀸𑀬𑀉𑀧𑀯𑀝𑁆𑀝𑀦𑁂 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑁂 𑀯𑁂𑀲𑀸𑀔𑀧𑀼𑀡𑁆𑀡𑀫𑀤𑀺𑀯𑀲𑁂 𑀧𑀘𑁆𑀘𑀽𑀲𑀲𑀫𑀬𑁂 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺𑀮𑁄𑀓𑀦𑀸𑀣𑁂 𑀲𑀼𑀪𑀤𑁆𑀤𑁂𑀦 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁂𑀦 ‘‘𑀅𑀮𑀁 𑀆𑀯𑀼𑀲𑁄 𑀫𑀸 𑀲𑁄𑀘𑀺𑀢𑁆𑀣 𑀫𑀸 𑀧𑀭𑀺𑀤𑁂𑀯𑀺𑀢𑁆𑀣, 𑀲𑀼𑀫𑀼𑀢𑁆𑀢𑀸 𑀫𑀬𑀁 𑀢𑁂𑀦 𑀫𑀳𑀸𑀲𑀫𑀡𑁂𑀦, 𑀉𑀧𑀤𑁆𑀤𑀼𑀢𑀸 𑀘 𑀳𑁄𑀫’𑀇𑀤𑀁 𑀯𑁄 𑀓𑀧𑁆𑀧𑀢𑀺 𑀇𑀤𑀁 𑀯𑁄 𑀦 𑀓𑀧𑁆𑀧𑀢𑀻’𑀢𑀺. 𑀇𑀤𑀸𑀦𑀺 𑀧𑀦 𑀫𑀬𑀁 𑀬𑀁 𑀇𑀘𑁆𑀙𑀺𑀲𑁆𑀲𑀸𑀫 𑀢𑀁 𑀓𑀭𑀺𑀲𑁆𑀲𑀸𑀫, 𑀬𑀁 𑀦 𑀇𑀘𑁆𑀙𑀺𑀲𑁆𑀲𑀸𑀫 𑀦 𑀢𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑀯𑀘𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀕𑀡𑀧𑀸𑀫𑁄𑀓𑁆𑀔𑀸𑀦𑀁 𑀲𑀢𑁆𑀢𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀁 𑀲𑀗𑁆𑀖𑀢𑁆𑀣𑁂𑀭𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀥𑀫𑁆𑀫𑀲𑀗𑁆𑀕𑀻𑀢𑀺𑀁 𑀓𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑁂 𑀥𑀫𑁆𑀫𑀯𑀺𑀦𑀬𑁂 𑀢𑀢𑁄 𑀅𑀧𑀭𑀪𑀸𑀕𑁂 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀯𑁂𑀲𑀸𑀮𑀺𑀬𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀤𑀲𑀯𑀢𑁆𑀣𑀽𑀦𑀺 𑀤𑀲𑁆𑀲𑁂𑀢𑁆𑀯𑀸 𑀲𑀸𑀲𑀦𑀯𑀺𑀧𑀢𑁆𑀢𑀺𑀁 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 𑀆𑀬𑀲𑁆𑀫𑀢𑀸 𑀬𑀲𑀢𑁆𑀣𑁂𑀭𑁂𑀦 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁂𑀦 𑀲𑀫𑀼𑀲𑁆𑀲𑀸𑀳𑀺𑀬𑀫𑀸𑀦𑁄 𑀤𑀼𑀢𑀺𑀬𑀲𑀗𑁆𑀕𑀻𑀢𑀺𑀁 𑀓𑀢𑁆𑀯𑀸 𑀢𑀢𑁄 𑀅𑀧𑀭𑀪𑀸𑀕𑁂 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀉𑀧𑀭𑀺 𑀅𑀝𑁆𑀞𑀸𑀭𑀲𑀫𑁂 𑀯𑀲𑁆𑀲𑁂 𑀥𑀫𑁆𑀫𑀸𑀲𑁄𑀓𑁄𑀦𑀸𑀫 𑀭𑀸𑀚𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀢𑀮𑁂 𑀏𑀓𑀭𑀚𑁆𑀚𑀸𑀪𑀺𑀲𑁂𑀓𑀁 𑀧𑀸𑀧𑀼𑀡𑀺𑀢𑁆𑀯𑀸 𑀩𑀼𑀤𑁆𑀥𑀲𑀸𑀲𑀦𑁂 𑀫𑀳𑀦𑁆𑀢𑀁 𑀮𑀸𑀪𑀲𑀓𑁆𑀓𑀸𑀭𑀁 𑀧𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀳𑀻𑀦𑀮𑀸𑀪𑀲𑀓𑁆𑀓𑀸𑀭𑀸 𑀢𑀺𑀢𑁆𑀣𑀺𑀬𑀸 𑀅𑀦𑁆𑀢𑀫𑀲𑁄 𑀖𑀸𑀲𑀘𑁆𑀙𑀸𑀤𑀦𑀫𑀢𑁆𑀢𑀫𑁆𑀧𑀺 𑀅𑀮𑀪𑀦𑁆𑀢𑀸 𑀮𑀸𑀪𑀲𑀓𑁆𑀓𑀸𑀭𑀁 𑀧𑀢𑁆𑀣𑀬𑀫𑀸𑀦𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀓𑀸𑀦𑀺 𑀲𑀓𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀤𑀻𑀧𑁂𑀢𑁆𑀯𑀸 𑀲𑀸𑀲𑀦𑁂 𑀫𑀳𑀦𑁆𑀢𑀁 𑀅𑀩𑁆𑀩𑀼𑀤𑀜𑁆𑀘 𑀫𑀮𑀜𑁆𑀘 𑀧𑀯𑀢𑁆𑀢𑁂𑀲𑀼𑀁. 𑀢𑀤𑀸 𑀥𑀫𑁆𑀫𑀸𑀲𑁄𑀓𑀭𑀜𑁆𑀜𑁄 𑀧𑀢𑁆𑀢𑀸𑀪𑀺𑀲𑁂𑀓𑀢𑁄 𑀲𑀢𑁆𑀢𑀭𑀲𑀫𑁂 𑀯𑀲𑁆𑀲𑁂 𑀲𑀝𑁆𑀞𑀺𑀲𑀢𑀲𑀳𑀲𑁆𑀲 𑀪𑀺𑀓𑁆𑀔𑀽𑀲𑀼 𑀲𑀳𑀲𑁆𑀲𑀪𑀺𑀓𑁆𑀔𑀼𑀁 𑀕𑀳𑁂𑀢𑁆𑀯𑀸 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑁄 𑀦𑀸𑀫 𑀲𑀗𑁆𑀖𑀢𑁆𑀣𑁂𑀭𑁄 𑀫𑀳𑀸𑀧𑀯𑀸𑀭𑀡𑀸𑀬 𑀧𑀭𑀧𑁆𑀧𑀯𑀸𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀁 𑀤𑁂𑀲𑁂𑀢𑁆𑀯𑀸 𑀢𑀢𑀺𑀬𑀥𑀫𑁆𑀫𑀲𑀗𑁆𑀕𑀻𑀢𑀺𑀁 𑀓𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑁂 𑀥𑀫𑁆𑀫𑀯𑀺𑀦𑀬𑁂 𑀲𑀸𑀝𑁆𑀞𑀓𑀣𑁂𑀩𑀼𑀤𑁆𑀥𑀯𑀘𑀦𑁂 𑀥𑀭𑀦𑁆𑀢𑁂𑀯 𑀧𑀸𑀴𑀺𑀬𑀝𑁆𑀞𑀓𑀣𑀸𑀲𑀼 𑀅𑀢𑁆𑀣𑀘𑁆𑀙𑀸𑀬𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀫𑀢𑀺𑀯𑀲𑁂𑀦 𑀦𑀸𑀦𑀸𑀕𑀦𑁆𑀣𑀯𑀺𑀲𑁂𑀲𑀸𑀦𑀺 𑀓𑀭𑁄𑀦𑁆𑀢𑀺, 𑀢𑁂𑀲𑀼 𑀅𑀢𑁆𑀢𑀦𑁄𑀫𑀢𑀺𑀯𑀲𑁂𑀦 𑀅𑀢𑁆𑀣𑀘𑁆𑀙𑀸𑀬𑀁 𑀕𑀳𑁂𑀢𑁆𑀯𑀸 𑀓𑀸𑀭𑀡𑀧𑀢𑀺𑀭𑀽𑀧𑀓𑀁 𑀓𑀢𑁆𑀯𑀸 ¶ 𑀯𑀼𑀢𑁆𑀢𑀯𑀘𑀦𑀁 𑀲𑀸𑀭𑀢𑁄 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀼𑀢𑁆𑀢-𑀲𑀼𑀢𑁆𑀢𑀸𑀦𑀼𑀮𑁄𑀫𑀆𑀘𑀭𑀺𑀬𑀯𑀸𑀤𑁂 𑀫𑀼𑀜𑁆𑀘𑀺𑀢𑁆𑀯𑀸 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀁, 𑀅𑀝𑁆𑀞𑀓𑀣𑀸𑀬 𑀘 𑀧𑀸𑀴𑀺𑀁 𑀢𑀩𑁆𑀩𑀺𑀯𑀭𑀡𑀪𑀽𑀢𑀁 𑀲𑀸𑀭𑀢𑁆𑀣𑀤𑀻𑀧𑀦𑀺𑀜𑁆𑀘 𑀅𑀜𑁆𑀜𑀸𑀦𑀺 𑀘 𑀕𑀦𑁆𑀣𑀯𑀺𑀲𑁂𑀲𑀸𑀦𑀺 𑀅𑀲𑀁𑀲𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄𑀫𑀢𑀺𑀬𑀸𑀧𑀺 𑀧𑀼𑀩𑁆𑀩𑀸𑀧𑀭𑀁 𑀅𑀲𑀫𑀸𑀦𑁂𑀢𑁆𑀯𑀸 𑀯𑀸𑀤𑀧𑁆𑀧𑀓𑀸𑀲𑀦𑀫𑀢𑁆𑀢𑀫𑁂𑀯 𑀞𑀧𑁂𑀢𑁆𑀯𑀸 𑀕𑀭𑀼𑀓𑀮𑀳𑀼𑀓𑁂𑀲𑀼 𑀕𑀭𑀼𑀓𑁂𑀬𑁂𑀯 𑀞𑀸𑀢𑀩𑁆𑀩𑁂𑀧𑀺 𑀕𑀭𑀼𑀓𑁂 𑀅𑀝𑁆𑀞𑀢𑁆𑀯𑀸 𑀓𑁂𑀘𑀺 𑀪𑀺𑀓𑁆𑀔𑀽 𑀦𑀤𑀺𑀬𑀸 𑀉𑀤𑀓𑀼𑀓𑁆𑀔𑁂𑀧𑀁 𑀅𑀓𑀢𑁆𑀯𑀸 𑀓𑀭𑁄𑀦𑁆𑀢𑀺. 𑀏𑀯𑀁 𑀲𑀸𑀲𑀦𑁂 𑀤𑁆𑀯𑀺𑀥𑀸 𑀪𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀇𑀤𑀜𑁆𑀘 𑀪𑀺𑀦𑁆𑀤𑀦𑀁 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁂 𑀪𑀺𑀦𑁆𑀦𑀢𑁄𑀧𑀺 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀩𑀮𑀯𑀢𑀭𑀫𑁂𑀯 𑀲𑀸𑀲𑀦𑀲𑁆𑀲 𑀯𑀺𑀧𑀢𑁆𑀢𑀺𑀓𑀸𑀭𑀡𑀢𑁆𑀢𑀸, 𑀢𑀣𑀸 𑀳𑀺 𑀦 𑀇𑀤𑀁 𑀫𑀦𑀼𑀲𑁆𑀲𑀮𑁄𑀓𑁂 𑀪𑀺𑀓𑁆𑀔𑀽𑀦𑀁𑀬𑁂𑀯 𑀳𑁄𑀢𑀺, 𑀪𑀺𑀓𑁆𑀔𑀽𑀦𑀁, 𑀉𑀧𑀸𑀲𑀓𑀫𑀦𑀼𑀲𑁆𑀲𑀸𑀦𑀁, 𑀆𑀭𑀓𑁆𑀔𑀓𑀤𑁂𑀯𑀢𑀸𑀦𑀫𑁆𑀧𑀺, 𑀢𑀸𑀲𑀁 𑀲𑀳𑀸𑀬𑀓𑀸𑀦𑀁 𑀪𑀼𑀫𑁆𑀫𑀦𑀺𑀲𑁆𑀲𑀺𑀢𑀤𑁂𑀯𑀢𑀸𑀦𑀫𑁆𑀧𑀺 𑀢𑀸𑀲𑀁 𑀲𑀳𑀸𑀬𑀓𑀸𑀦𑀁 𑀭𑀼𑀓𑁆𑀔𑀦𑀺𑀲𑁆𑀲𑀺𑀢𑀤𑁂𑀯𑀢𑀸𑀦𑀫𑁆𑀧𑀺 𑀢𑀸𑀲𑀁𑀲𑀳𑀸𑀬𑀓𑀸𑀦𑀁 𑀆𑀓𑀸𑀲𑀝𑁆𑀞𑀓𑀤𑁂𑀯𑀢𑀸𑀦𑀫𑁆𑀧𑀺, 𑀢𑀸𑀲𑀁 𑀲𑀳𑀸𑀬𑀓𑀸𑀦𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑀢𑀸𑀦𑀫𑁆𑀧𑀺, 𑀢𑀸𑀲𑀁 𑀲𑀳𑀸𑀬𑀓𑀸𑀦𑀁 𑀢𑀸𑀯𑀢𑀺𑀁𑀲𑀤𑁂𑀯𑀢𑀸𑀦𑀫𑁆𑀧𑀺, 𑀏𑀯𑀁 𑀫𑀺𑀢𑁆𑀢𑀧𑀭𑀫𑁆𑀧𑀭𑀯𑀲𑁂𑀦 𑀙𑀓𑀸𑀫𑀸𑀯𑀘𑀭𑀤𑁂𑀯𑀢𑀸𑀦𑀫𑁆𑀧𑀺 𑀢𑀸𑀲𑀁 𑀫𑀺𑀢𑁆𑀢𑀸𑀦𑀁 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀦𑀫𑁆𑀧𑀻𑀢𑀺 𑀏𑀯𑀁 𑀬𑀸𑀯𑀅𑀓𑀦𑀺𑀝𑁆𑀞𑀩𑁆𑀭𑀳𑁆𑀫𑀮𑁄𑀓𑀸 𑀅𑀭𑀺𑀬𑀧𑀼𑀕𑁆𑀕𑀮𑁂 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂 𑀧𑀼𑀣𑀼𑀚𑁆𑀚𑀦𑀸 𑀤𑁂𑀯𑀫𑀦𑀼𑀲𑁆𑀲𑀸 𑀪𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀪𑀺𑀦𑁆𑀦𑀢𑁆𑀢𑀸 𑀩𑀳𑀼 𑀘 𑀧𑀸𑀧𑀁 𑀧𑀲𑀯𑀢𑀺, 𑀢𑀲𑁆𑀫𑀸 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀁, 𑀅𑀝𑁆𑀞𑀓𑀣𑀸𑀬 𑀘 𑀧𑀸𑀴𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀢𑀸𑀦𑀺 𑀢𑀸𑀦𑀺 𑀕𑀦𑁆𑀣𑀯𑀺𑀲𑁂𑀲𑀸𑀦𑀺 𑀘 𑀏𑀓𑀢𑁄 𑀓𑀢𑁆𑀯𑀸 𑀕𑀗𑁆𑀕𑁄𑀤𑀓𑁂 𑀦 𑀬𑀫𑀼𑀦𑁄𑀤𑀓𑀁 𑀯𑀺𑀬 𑀫𑀺𑀲𑁆𑀲𑀺𑀢𑁆𑀯𑀸 𑀏𑀓𑀻𑀪𑀸𑀯𑀁 𑀓𑀢𑁆𑀯𑀸 𑀲𑀻𑀫𑀯𑀺𑀲𑁄𑀥𑀦𑀺𑀁 𑀦𑀸𑀫 𑀓𑀭𑀺𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀣 𑀥𑀫𑁆𑀫𑀭𑀸𑀚𑀲𑁆𑀲 𑀲𑀸𑀯𑀓𑀸𑀢𑀺.

𑀢𑀢𑁆𑀣 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀤𑀼𑀮𑁆𑀮𑀪𑁄 𑀢𑀺 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀸𑀤𑀓𑀸𑀮𑁄 𑀤𑀼𑀮𑁆𑀮𑀪𑁄 𑀢𑀣𑀸 𑀳𑀺 𑀅𑀦𑀼𑀧𑁆𑀧𑀦𑁆𑀦𑀓𑀸𑀮𑁂 𑀩𑀼𑀤𑁆𑀥𑁂 𑀩𑀼𑀤𑁆𑀥𑁄𑀢𑀺 𑀲𑀤𑁆𑀤𑀫𑁆𑀧𑀺 𑀅𑀲𑀼𑀢𑁆𑀯𑀸 𑀯𑀻𑀢𑀺𑀯𑀢𑁆𑀢𑀸𑀦𑀁 𑀓𑀧𑁆𑀧𑀸𑀦𑀁 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸. 𑀩𑀼𑀤𑁆𑀥𑀓𑀸𑀭𑀡𑀲𑁆𑀲 𑀤𑀼𑀓𑁆𑀓𑀭𑀢𑁆𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀢𑀢𑁄 𑀧𑀩𑁆𑀩𑀚𑀸 𑀘 𑀉𑀧𑀲𑀫𑁆𑀧𑀤𑀸𑀘𑀸 𑀢𑀺𑀏𑀢𑁆𑀣 𑀢𑁄𑀧𑀘𑁆𑀘𑀬𑁄 𑀮𑀸𑀫𑀓𑀢𑁆𑀣𑁂, 𑀧𑀜𑁆𑀘𑀫𑁆𑀬𑀢𑁆𑀣𑁂 𑀯𑀸. 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀤𑀼𑀮𑁆𑀮𑀪𑁄, 𑀢𑀫𑀦𑀼𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘 𑀤𑀼𑀮𑁆𑀮𑀪𑀸𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀘 𑀮𑁄𑀓𑁂 𑀓𑀺𑀜𑁆𑀘𑀺𑀤𑁂𑀯 𑀫𑀳𑀕𑁆𑀖𑀁 𑀅𑀮𑀪𑀺𑀢𑀩𑁆𑀩𑀁 𑀮𑀪𑀺𑀢𑁆𑀯𑀸 𑀯𑀸 𑀢𑁂𑀦 𑀲𑀳𑀓𑀸𑀭𑀻𑀓𑀸𑀭𑀡𑀪𑀽𑀢𑀁 𑀅𑀧𑁆𑀧𑀕𑁆𑀖𑀫𑁆𑀧𑀺 𑀫𑀳𑀕𑁆𑀖𑀁 𑀫𑀳𑀕𑁆𑀖𑀁 𑀤𑀼𑀮𑁆𑀮𑀪𑀁 𑀤𑀼𑀮𑁆𑀮𑀪𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑁂𑀯 𑀅𑀢𑀺𑀤𑀼𑀮𑁆𑀮𑀪𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀆𑀕𑀫𑁆𑀫 𑀢𑀫𑀦𑀼𑀧𑀩𑁆𑀩𑀚𑀺𑀢𑀫𑁆𑀧𑀺 𑀤𑀼𑀮𑁆𑀮𑀪𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀬𑀣𑀸 𑀘 𑀦𑀺𑀤𑀺𑀬𑀸 𑀉𑀧𑀭𑀺𑀫𑀪𑀸𑀕𑁂 𑀲𑀢𑁆𑀢𑀸𑀳𑀯𑀝𑁆𑀝𑀮𑀺𑀓𑀸𑀤𑀺𑀪𑀸𑀯𑁂𑀦 𑀉𑀤𑀓𑀧𑀽𑀭𑀡𑁂 𑀳𑁂𑀝𑁆𑀞𑀸 𑀓𑀺𑀲𑁆𑀫𑀺𑀜𑁆𑀘𑀺 𑀞𑀸𑀦𑁂 𑀢𑀭𑀺𑀢𑀼𑀁 𑀅𑀯𑀺𑀲𑀳𑀦𑁆𑀢𑀸 𑀇𑀤𑀫𑁂𑀯 𑀞𑀸𑀦𑀁 ¶ 𑀤𑀼𑀓𑁆𑀓𑀭𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑁂𑀯 𑀩𑀼𑀤𑁆𑀥𑀓𑀸𑀭𑀡𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑁂 𑀦 𑀢𑀫𑀦𑀼𑀧𑀩𑁆𑀩𑀚𑁆𑀚𑀼𑀧𑀲𑀫𑁆𑀧𑀤𑀸𑀧𑀺 𑀤𑀼𑀓𑁆𑀓𑀭𑀁 𑀤𑀼𑀮𑁆𑀮𑀪𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀜𑁆𑀜𑀣𑀸 𑀩𑀼𑀤𑁆𑀥𑀪𑀕𑀯𑀢𑁄 𑀧𑀺 𑀧𑀩𑁆𑀩𑀚𑁆𑀚𑀼𑀧𑀲𑀫𑁆𑀧𑀤𑀪𑀸𑀯𑁄𑀬𑁂𑀯 𑀲𑁂𑀝𑁆𑀞𑁄 𑀪𑀯𑁂𑀬𑁆𑀬. 𑀅𑀣𑀯𑀸 𑀓𑀸𑀭𑀡𑀽𑀧𑀘𑀸𑀭𑀯𑀲𑁂𑀦𑀸𑀧𑀺 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀬𑀣𑀸 𑀲𑁂𑀫𑁆𑀳𑁄𑀕𑀼𑀴𑁄𑀢𑀺 𑀢𑀣𑀸 𑀳𑀺 𑀕𑀼𑀴𑀲𑁆𑀲 𑀧𑀺 𑀯𑀦𑀧𑀘𑁆𑀘𑀬𑀸 𑀲𑁂𑀫𑁆𑀳𑁄 𑀉𑀲𑁆𑀲𑀦𑁆𑀦𑁄, 𑀢𑀁 𑀚𑀦𑁄 𑀕𑀼𑀴𑁂𑀦𑀲𑁂𑀫𑁆𑀳𑁄𑀢𑀺 𑀯𑀢𑁆𑀢𑀩𑁆𑀩𑁂𑀧𑀺 𑀓𑀸𑀭𑀡𑀲𑁆𑀫𑀺𑀁 𑀕𑀼𑀴𑁂 𑀨𑀮𑀪𑀽𑀢𑀁 𑀲𑁂𑀫𑁆𑀳𑀁 𑀭𑁄𑀧𑁂𑀢𑁆𑀯𑀸 𑀲𑁂𑀫𑁆𑀳𑁄 𑀕𑀼𑀴𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀓𑀸𑀭𑀡𑀲𑁆𑀲 𑀤𑀼𑀓𑁆𑀓𑀭𑀢𑁆𑀢𑀸 𑀤𑀼𑀮𑁆𑀮𑀪𑁂 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀢𑀫𑀦𑀼𑀓𑁆𑀭𑀺𑀬𑀸 𑀧𑀩𑁆𑀩𑀚𑁆𑀚𑀸𑀧𑀺 𑀢𑀁 𑀫𑀽𑀮𑀓𑀸𑀭𑀡𑀪𑀽𑀢𑁂 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀭𑁄𑀧𑁂𑀢𑁆𑀯𑀸 𑀤𑀼𑀮𑁆𑀮𑀪𑀸 𑀧𑀩𑁆𑀩𑀚𑁆𑀚𑀸𑀢𑀺 𑀯𑀼𑀘𑁆𑀘𑀢𑀺. 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑀸𑀮𑁂𑀧𑀺 𑀩𑀼𑀤𑁆𑀥𑀤𑀲𑁆𑀲𑀦𑀁 𑀤𑀼𑀮𑁆𑀮𑀪𑀫𑁂𑀯, 𑀅𑀦𑀼𑀧𑁆𑀧𑀦𑁆𑀦𑀓𑀸𑀮𑁂 𑀧𑀦 𑀧𑀕𑁂𑀯, 𑀲𑀩𑁆𑀩𑀔𑀡𑁂𑀲𑀼 𑀦𑀯𑀫𑀔𑀡𑀢𑁆𑀢𑀸 𑀘 𑀢𑀣𑀸 𑀳𑀺 𑀫𑀺𑀮𑀓𑁆𑀔𑀼𑀤𑁂𑀲𑀅𑀭𑀽𑀧𑀪𑀽𑀫𑀺𑀅𑀲𑀜𑁆𑀜𑀲𑀢𑁆𑀢𑀦𑀺𑀭𑀬𑀧𑁂𑀢𑀢𑀺𑀭𑀘𑁆𑀙𑀸𑀦𑀪𑀽𑀫𑀻𑀲𑀼 𑀚𑀸𑀬𑀫𑀸𑀦𑁂𑀲𑀼 𑀯𑀸 𑀫𑀚𑁆𑀛𑀺𑀫𑀤𑁂𑀲𑁂 𑀚𑀸𑀬𑀫𑀸𑀦𑁄𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀪𑀽𑀢𑀸 𑀯𑀸, 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀼𑀮𑁂 𑀚𑀸𑀬𑀫𑀸𑀦𑀸𑀧𑀺 𑀘𑀓𑁆𑀔𑀼𑀲𑁄𑀢 𑀯𑀺𑀓𑀮𑀪𑀸𑀯𑁂𑀦 𑀅𑀗𑁆𑀕𑀯𑀺𑀓𑀮𑀸 𑀯𑀸 𑀩𑀼𑀤𑁆𑀥𑀤𑀲𑁆𑀲𑀦𑀁 𑀦 𑀅𑀭𑀳𑀦𑁆𑀢𑀺, 𑀤𑀲𑁆𑀲𑀦𑀫𑁆𑀧𑀺 𑀤𑀲𑁆𑀲𑀦𑀫𑀢𑁆𑀢𑀫𑁂𑀯. 𑀲𑀼𑀧𑀡𑁆𑀡𑀦𑀸𑀕𑀭𑀸𑀚𑀸𑀤𑀻𑀦𑀁 𑀢𑀲𑁆𑀫𑀺𑀁 𑀪𑀯𑁂 𑀫𑀕𑁆𑀕𑀨𑀮𑀪𑀸𑀕𑀺𑀦𑁄 𑀦 𑀳𑁄𑀦𑁆𑀢𑀺, 𑀳𑁄𑀦𑁆𑀢𑀺 𑀘𑁂𑀢𑁆𑀣.

‘‘𑀧𑀘𑁆𑀘𑀦𑁆𑀢𑀚𑁄 𑀅𑀭𑀽𑀧𑀺𑀦𑁄, 𑀯𑀺𑀓𑀮𑀗𑁆𑀕𑁄 𑀅𑀲𑀜𑁆𑀜𑀚𑁄;

𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀢𑀺𑀭𑀘𑁆𑀙𑀸𑀦𑁄, 𑀧𑁂𑀢𑁄 𑀦𑁂𑀭𑀬𑀺𑀓𑁄𑀧𑀺𑀘.

𑀏𑀢𑁂 𑀅𑀝𑁆𑀞𑀓𑁆𑀔𑀡𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀔𑀡𑁄 𑀏𑀓𑁄, 𑀦𑀯𑀫𑁄𑀢𑀺 𑀧𑀯𑀼𑀘𑁆𑀘𑀢𑀻𑀢𑀺’’.

𑀧𑀩𑁆𑀩𑀚𑁆𑀚𑀸 𑀢𑀺𑀘𑁂𑀢𑁆𑀣 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑁂𑀧𑀺 𑀲𑀸𑀫𑀡𑁂𑀭𑀸𑀯 𑀅𑀥𑀺𑀧𑁆𑀧𑁂𑀢𑀸, 𑀉𑀧𑀲𑀫𑁆𑀧𑀤𑀸 𑀘𑀸𑀢𑀺 𑀯𑀺𑀲𑀼𑀁 𑀯𑀼𑀢𑁆𑀢𑀢𑁆𑀢𑀸. 𑀲𑀸𑀫𑀡𑁂𑀭𑀸 𑀘 𑀦𑀸𑀫 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺𑀢𑁆𑀬𑀸𑀤𑀺𑀦𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀯𑀸 𑀉𑀪𑀢𑁄𑀲𑀼𑀤𑁆𑀥𑀺𑀯𑀲𑁂𑀦𑁂𑀯 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀢𑀺𑀝𑁆𑀞𑀦𑁆𑀢𑀺. 𑀤𑀲𑀲𑀻𑀮𑀸𑀦𑀺 𑀧𑀦 𑀢𑁂𑀲𑀁 𑀲𑀺𑀓𑁆𑀔𑀸𑀧𑀤𑀫𑀢𑁆𑀢𑀫𑁂𑀯. 𑀢𑀸𑀦𑀺 𑀧𑀸𑀴𑀺𑀯𑀲𑁂𑀦 𑀅𑀲𑀓𑁆𑀓𑁄𑀦𑁆𑀢𑁄 𑀅𑀢𑁆𑀣𑀯𑀲𑁂𑀦 ‘‘𑀇𑀤𑀜𑁆𑀘 𑀲𑀫𑀸𑀤𑀸𑀬 𑀯𑀢𑁆𑀢𑁂𑀳𑀻’’𑀢𑀺 𑀆𑀘𑀺𑀓𑁆𑀔𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀇𑀥 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺. 𑀉𑀧𑀲𑀫𑁆𑀧𑀤𑀸 𑀧𑀦 𑀅𑀝𑁆𑀞𑀯𑀺𑀥𑀸 𑀳𑁄𑀦𑁆𑀢𑀺 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸, 𑀲𑀭𑀡𑀕𑀫𑀦𑀽𑀧𑀲𑀫𑁆𑀧𑀤𑀸, 𑀑𑀯𑀸𑀤 𑀧𑀝𑀺𑀕𑁆𑀕𑀳𑀡𑀽𑀧𑀲𑀫𑁆𑀧𑀤𑀸, 𑀧𑀜𑁆𑀳𑀸𑀩𑁆𑀬𑀸𑀓𑀭𑀡𑀽𑀧𑀲𑀫𑁆𑀧𑀤𑀸, 𑀅𑀝𑁆𑀞𑀕𑀭𑀼𑀥𑀫𑁆𑀫𑀧𑀝𑀺𑀕𑁆𑀕𑀳𑀡𑀽𑀧𑀲𑀫𑁆𑀧𑀤𑀸, 𑀤𑀽𑀢𑁂𑀦𑀽𑀧𑀲𑀫𑁆𑀧𑀤𑀸, 𑀅𑀝𑁆𑀞𑀯𑀸𑀘𑀺𑀓𑀽𑀧𑀲𑀫𑁆𑀧𑀤𑀸, 𑀜𑀢𑁆𑀢𑀺𑀘𑀢𑀼𑀢𑁆𑀣𑀽𑀧𑀲𑀫𑁆𑀧𑀤𑀸 𑀘𑀸𑀢𑀺. 𑀢𑀢𑁆𑀣 𑀪𑀕𑀯𑀸 𑀏𑀳𑀺 𑀪𑀺𑀓𑁆𑀔𑀼𑀪𑀸𑀯𑀸𑀬 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀁 𑀧𑀼𑀕𑁆𑀕𑀮𑀁 𑀤𑀺𑀲𑁆𑀯𑀸 𑀭𑀢𑁆𑀢𑀧𑀁𑀲𑀼𑀓𑀽𑀮𑀦𑁆𑀢𑀭𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀁 𑀤𑀓𑁆𑀔𑀺𑀡𑀳𑀢𑁆𑀣𑀁 𑀦𑀻𑀳𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀖𑁄𑀲𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 ‘‘𑀏𑀳𑀺 𑀪𑀺𑀓𑁆𑀔𑀼 𑀘𑀭 𑀩𑁆𑀭𑀳𑁆𑀫𑀘𑀭𑀺𑀬𑀁 ¶ 𑀲𑀫𑁆𑀫𑀸 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸𑀬𑀸’’𑀢𑀺 𑀯𑀤𑀢𑀺. 𑀢𑀲𑁆𑀲𑀸𑀦𑀦𑁆𑀢𑀭𑀫𑁂𑀯 𑀕𑀺𑀳𑀺𑀮𑀺𑀗𑁆𑀕𑀁 𑀅𑀦𑁆𑀢𑀭𑀥𑀸𑀬𑀺𑀢𑁆𑀯𑀸.

𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑁄 𑀘, 𑀯𑀸𑀲𑀺 𑀲𑀽𑀘𑀺𑀘 𑀩𑀦𑁆𑀥𑀦𑀁;

𑀧𑀭𑀺𑀲𑁆𑀲𑀸𑀯𑀦𑀫𑀝𑁆𑀞𑁂𑀢𑁂, 𑀬𑀼𑀢𑁆𑀢𑀬𑁄𑀕𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺.

𑀏𑀯𑀁 𑀯𑀼𑀢𑁆𑀢𑁂𑀳𑀺 𑀅𑀝𑁆𑀞𑀳𑀺𑀧𑀭𑀺𑀓𑁆𑀔𑀸𑀭𑁂𑀳𑀺 𑀲𑀭𑀻𑀭𑁂 𑀧𑀝𑀺𑀫𑀼𑀢𑁆𑀢𑁄𑀬𑁂𑀯 𑀯𑀲𑁆𑀲𑀲𑀢𑀺𑀓𑀢𑁆𑀣𑁂𑀭𑁄 𑀯𑀺𑀬 𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁄 𑀩𑀼𑀤𑁆𑀥𑀸𑀘𑀭𑀺𑀬𑀓𑁄 𑀩𑀼𑀤𑁆𑀥𑀼𑀧𑀚𑁆𑀛𑀸𑀬𑀓𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀯𑀦𑁆𑀤𑀫𑀸𑀦𑁄𑀯 𑀢𑀺𑀝𑁆𑀞𑀢𑀺. 𑀅𑀬𑀁 𑀏𑀳𑀺 𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸 𑀦𑀸𑀫. 𑀪𑀕𑀯𑀸 𑀳𑀺 𑀧𑀞𑀫𑀩𑁄𑀥𑀺𑀬𑀁 𑀏𑀢𑀲𑁆𑀫𑀺𑀁 𑀓𑀸𑀮𑁂 𑀏𑀳𑀺 𑀪𑀺𑀓𑁆𑀔𑀼𑀧𑀲𑀫𑁆𑀧𑀤𑀸𑀬 𑀏𑀯 𑀉𑀧𑀲𑀫𑁆𑀧𑀸𑀤𑁂𑀢𑀺. 𑀢𑀸𑀦𑀺 𑀧𑀦 𑀧𑀜𑁆𑀘𑀯𑀕𑁆𑀕𑀺𑀬𑀸𑀤𑀬𑁄 𑀅𑀗𑁆𑀕𑀼𑀮𑀺𑀫𑀸𑀮𑀢𑁆𑀣𑁂𑀭𑀧𑀭𑀺𑀬𑁄𑀲𑀸𑀦𑀸.

𑀢𑀻𑀡𑀺𑀲𑀢𑀁 𑀲𑀳𑀲𑁆𑀲𑀜𑁆𑀘, 𑀘𑀢𑁆𑀢𑀸𑀮𑀻𑀲𑀁 𑀧𑀼𑀦𑀸𑀧𑀭𑁄;

𑀏𑀓𑁄 𑀘 𑀣𑁂𑀭𑁄 𑀲𑀧𑁆𑀧𑀜𑁆𑀜𑁄; 𑀲𑀩𑁆𑀩𑁂 𑀢𑁂 𑀏𑀳𑀺 𑀪𑀺𑀓𑁆𑀔𑀼𑀓𑀸𑀢𑀺.

𑀏𑀢𑁂 𑀯𑀺𑀦𑀬𑀧𑀺𑀝𑀓𑁂 𑀦𑀺𑀤𑁆𑀤𑀺𑀝𑁆𑀞𑀏𑀳𑀺𑀪𑀺𑀓𑁆𑀔𑀽 𑀦𑀸𑀫 𑀯𑀺𑀦𑀬𑀧𑀺𑀝𑀓𑁂 𑀅𑀦𑀺𑀤𑁆𑀤𑀺𑀝𑁆𑀞𑀸 𑀧𑀦 𑀢𑀺𑀲𑀢𑀧𑀭𑀺𑀯𑀸𑀭𑀲𑁂𑀮𑀩𑁆𑀭𑀸𑀳𑁆𑀫𑀡𑀸𑀤𑀬𑁄.

𑀲𑀢𑁆𑀢𑀯𑀻𑀲 𑀲𑀳𑀲𑁆𑀲𑀸𑀦𑀺, 𑀢𑀻𑀡𑀺𑀬𑁂𑀯 𑀲𑀢𑀸𑀦𑀺 𑀘;

𑀏𑀢𑁂 𑀳𑀺 𑀲𑀩𑁆𑀩𑁂 𑀲𑀗𑁆𑀔𑀸𑀢𑀸, 𑀲𑀩𑁆𑀩𑁂 𑀢𑁂 𑀏𑀳𑀺𑀪𑀺𑀓𑁆𑀔𑀼𑀓𑀸𑀢𑀺.

𑀢𑀁 𑀲𑀩𑁆𑀩𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀅𑀝𑁆𑀞𑀯𑀻𑀲𑀲𑀳𑀲𑁆𑀲𑀸𑀦𑀺 𑀙𑀲𑀢𑀸𑀦𑀺 𑀏𑀓𑀘𑀢𑁆𑀢𑀸𑀮𑀻𑀲𑀼𑀢𑁆𑀢𑀭𑀸𑀦𑀺 𑀘 𑀳𑁄𑀦𑁆𑀢𑀺. 𑀧𑀞𑀫𑀩𑁄𑀥𑀺𑀘 𑀦𑀸𑀫𑁂𑀲𑀸 𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀳𑁄𑀦𑁆𑀢𑀺.

𑀪𑀕𑀯𑀸 𑀳𑀺 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑁆𑀯𑀸 𑀅𑀝𑁆𑀞𑀸𑀭𑀲𑀓𑁄𑀝𑀺𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀫𑀢𑀁 𑀧𑀸𑀬𑁂𑀢𑁆𑀯𑀸 𑀧𑀞𑀫𑀯𑀲𑁆𑀲𑀁 𑀯𑀲𑀺. 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀯𑀲𑁆𑀲𑁂𑀲𑀼 𑀭𑀸𑀚𑀕𑀳𑁂 𑀯𑁂𑀴𑀼𑀯𑀦𑀯𑀺𑀳𑀸𑀭𑁂 𑀯𑀲𑁆𑀲𑀁 𑀯𑀲𑀺, 𑀪𑀕𑀯𑀸 𑀳𑀺 𑀆𑀲𑀸𑀴𑁆𑀳𑀺𑀦𑀓𑁆𑀔𑀢𑁆𑀢𑀧𑀼𑀡𑁆𑀡𑀫𑀺𑀬𑀁 𑀩𑀸𑀭𑀸𑀡𑀲𑀺𑀬𑀸 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀧𑀞𑀫𑀯𑀲𑁆𑀲𑀁 𑀯𑀲𑀺𑀢𑁆𑀯𑀸 𑀨𑀕𑁆𑀕𑀼𑀡𑀫𑀸𑀲𑁂 𑀨𑀕𑁆𑀕𑀼𑀡𑀧𑀼𑀡𑁆𑀡𑀫𑀺𑀬𑀁 𑀭𑀸𑀚𑀕𑀳𑀁 𑀧𑀢𑁆𑀯𑀸 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑀸 𑀓𑀸𑀭𑀺𑀢𑁂 𑀯𑁂𑀴𑀼𑀯𑀦 𑀯𑀺𑀳𑀸𑀭𑁂 𑀏𑀓𑀫𑀸𑀲𑀫𑀢𑁆𑀢𑀁 𑀯𑀲𑀺𑀢𑁆𑀯𑀸 𑀘𑀺𑀢𑁆𑀭𑀫𑀸𑀲𑁂 𑀯𑀻𑀲𑀢𑀺𑀔𑀻𑀡𑀸𑀲𑀯𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀓𑀧𑀺𑀮𑀯𑀢𑁆𑀣𑀼𑀁 𑀕𑀦𑁆𑀢𑁆𑀯𑀸 𑀅𑀲𑀻𑀢𑀺𑀬𑀸 𑀜𑀸𑀢𑀺𑀲𑀳𑀲𑁆𑀲𑀸𑀦𑀁 𑀫𑀚𑁆𑀛𑁂 𑀯𑀺𑀧𑁆𑀧𑀝𑀺𑀧𑀦𑁆𑀦𑀸𑀦𑀁 𑀭𑀸𑀚𑀽𑀦𑀁 𑀫𑀢𑁆𑀣𑀓𑁂 𑀧𑀁𑀲𑀼𑀭𑀚𑀁 𑀑𑀓𑀺𑀭𑀺𑀢𑁆𑀯𑀸 𑀢𑁂 𑀯𑀦𑁆𑀤𑀸𑀧𑁂𑀢𑁆𑀯𑀸 𑀧𑁄𑀓𑁆𑀔𑀭𑀯𑀲𑁆𑀲𑀜𑁆𑀘 𑀯𑀲𑁆𑀲𑀸𑀧𑁂𑀢𑁆𑀯𑀸 𑀢𑀫𑀸𑀕𑀫𑁆𑀫 𑀅𑀲𑀻𑀢𑀺𑀬𑀸 𑀜𑀸𑀢𑀺𑀲𑀳𑀲𑁆𑀲𑀸𑀦𑀁 𑀯𑁂𑀲𑁆𑀲𑀦𑁆𑀢𑀭 𑀚𑀸𑀢𑀓𑀁 𑀓𑀣𑁂𑀢𑁆𑀯𑀸 𑀭𑀸𑀳𑀼𑀮𑀫𑀸𑀢𑀭𑀫𑀸𑀕𑀫𑁆𑀫 𑀘𑀦𑁆𑀤𑀓𑀺𑀦𑁆𑀦𑀭𑀻𑀚𑀸𑀢𑀓𑀜𑁆𑀘 𑀓𑀣𑁂𑀢𑁆𑀯𑀸 𑀧𑀺𑀢𑀭𑀁 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀭𑀸𑀚𑀕𑀳𑀫𑁂𑀯 𑀆𑀕𑀦𑁆𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀺, 𑀢𑁂𑀦 𑀯𑀼𑀢𑁆𑀢𑀁 𑀤𑀼𑀢𑀺𑀬 𑀢𑀢𑀺𑀬 𑀘𑀢𑀼𑀢𑁆𑀣 𑀯𑀲𑁆𑀲𑁂𑀲𑀼 𑀭𑀸𑀚𑀕𑀳𑁂 𑀯𑁂𑀴𑀼𑀯𑀦𑀯𑀺𑀳𑀸𑀭𑁂 𑀯𑀲𑁆𑀲𑀁 𑀯𑀲𑀻’’𑀢𑀺 ¶ . 𑀧𑀜𑁆𑀘𑀫𑁂 𑀧𑀦 𑀯𑁂𑀲𑀸𑀮𑀺𑀬𑀁 𑀏𑀓𑀯𑀸𑀲𑀁 𑀯𑀲𑀺. 𑀙𑀝𑁆𑀞𑁂 𑀫𑀓𑀼𑀴𑀧𑀩𑁆𑀩𑀢𑁂 𑀏𑀓𑀯𑀸𑀲𑀁 𑀯𑀲𑀺. 𑀧𑀼𑀡𑁆𑀡𑁄 𑀯𑀸 𑀢𑀢𑁆𑀣. 𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑀲𑀼𑀦𑀸𑀧𑀭𑀦𑁆𑀢𑀭𑀝𑁆𑀞𑁂 𑀓𑀺𑀭 𑀏𑀓𑀲𑁆𑀫𑀺𑀁 𑀯𑀸𑀡𑀺𑀚𑀓𑀕𑀸𑀫𑁂 𑀤𑁆𑀯𑁂 𑀪𑀸𑀢𑀭𑁄. 𑀢𑁂𑀲𑀼 𑀓𑀤𑀸𑀘𑀺 𑀚𑁂𑀝𑁆𑀞𑁄 𑀧𑀜𑁆𑀘𑀲𑀓𑀝𑀲𑀢𑀸𑀦𑀺 𑀕𑀳𑁂𑀢𑁆𑀯𑀸 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀪𑀡𑁆𑀟𑀁 𑀆𑀳𑀭𑀢𑀺, 𑀓𑀤𑀸𑀘𑀺 𑀓𑀦𑀺𑀝𑁆𑀞𑁄. 𑀇𑀫𑀲𑁆𑀫𑀺𑀁 𑀧𑀦 𑀲𑀫𑀬𑁂 𑀓𑀦𑀺𑀝𑁆𑀞𑀁 𑀖𑀭𑁂 𑀞𑀧𑁂𑀢𑁆𑀯𑀸 𑀚𑁂𑀝𑁆𑀞𑀪𑀸𑀢𑀺𑀓𑁄 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀕𑀳𑁂𑀢𑁆𑀯𑀸 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀚𑁂𑀢𑀯𑀦𑀲𑁆𑀲 𑀅𑀯𑀺𑀤𑀽𑀭𑁂 𑀧𑀜𑁆𑀘𑀲𑀓𑀝𑀲𑀢𑀸𑀦𑀺 𑀞𑀧𑁂𑀢𑁆𑀯𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀧𑀭𑀺𑀚𑀦𑀧𑀭𑀺𑀯𑀼𑀢𑁄 𑀨𑀸𑀲𑀼𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀺. 𑀢𑁂𑀦 𑀘 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀪𑀼𑀢𑁆𑀢𑀧𑀸𑀢𑀭𑀸𑀲𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀲𑀼𑀝𑁆𑀞𑀼𑀢𑁆𑀢𑀭𑀸𑀲𑀗𑁆𑀕𑀸 𑀕𑀦𑁆𑀥𑀧𑀼𑀧𑁆𑀨𑀸𑀤𑀺𑀳𑀢𑁆𑀣𑀸 𑀬𑁂𑀦𑀩𑀼𑀤𑁆𑀥𑁄, 𑀬𑁂𑀦𑀥𑀫𑁆𑀫𑁄, 𑀬𑁂𑀦𑀲𑀗𑁆𑀖𑁄, 𑀢𑀦𑁆𑀦𑀺𑀦𑁆𑀦𑀸 𑀢𑀧𑁆𑀧𑁄𑀡𑀸 𑀢𑀧𑁆𑀧𑀩𑁆𑀪𑀭𑀸 𑀳𑀼𑀢𑁆𑀯𑀸 𑀤𑀺𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀚𑁂𑀢𑀯𑀦𑀁 𑀕𑀘𑁆𑀙𑀦𑁆𑀢𑀺. 𑀲𑁄 𑀢𑁂 𑀤𑀺𑀲𑁆𑀯𑀸 ‘‘𑀓𑀳𑀁 𑀇𑀫𑁂 𑀕𑀘𑁆𑀙𑀦𑁆𑀢𑀻’’𑀢𑀺 𑀏𑀓𑀁 𑀫𑀦𑀼𑀲𑁆𑀲𑀁 𑀧𑀼𑀘𑁆𑀙𑀺. 𑀓𑀺𑀁 𑀢𑁆𑀯𑀁 𑀅𑀬𑁆𑀬𑁄 𑀦 𑀚𑀸𑀦𑀸𑀲𑀺, 𑀮𑁄𑀓𑁂 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀭𑀢𑀦𑀸𑀦𑀺 𑀦𑀸𑀫 𑀉𑀧𑁆𑀧𑀦𑁆𑀦𑀸𑀦𑀺, 𑀇𑀘𑁆𑀘𑁂𑀯 𑀫𑀳𑀸𑀚𑀦𑁄 𑀲𑀢𑁆𑀣𑀼𑀲𑀦𑁆𑀢𑀺𑀓𑁂 𑀥𑀫𑁆𑀫𑀓𑀣𑀁 𑀲𑁄𑀢𑀼𑀁 𑀕𑀘𑁆𑀙𑀢𑀻𑀢𑀺. 𑀢𑀲𑁆𑀲 ‘‘𑀩𑀼𑀤𑁆𑀥𑁄’’𑀢𑀺 𑀯𑀘𑀦𑀁 𑀙𑀯𑀺𑀘𑀫𑁆𑀫𑀸𑀤𑀻𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀅𑀝𑁆𑀞𑀸𑀲𑀺. 𑀅𑀣 𑀅𑀢𑁆𑀢𑀦𑁄 𑀧𑀭𑀺𑀚𑀦𑀧𑀭𑀺𑀯𑀼𑀢𑁄 𑀢𑀸𑀬 𑀧𑀭𑀺𑀲𑀸𑀬𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀫𑀥𑀼𑀭𑀲𑁆𑀲𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀧𑀭𑀺𑀲 𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀬 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀅𑀣 𑀢𑀣𑀸𑀕𑀢𑁂𑀦 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀧𑀭𑀺𑀲𑀸𑀬 𑀉𑀬𑁆𑀬𑁄𑀚𑀺𑀢𑀸𑀬 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀫𑀡𑁆𑀟𑀧𑀁 𑀓𑀭𑁂𑀢𑁆𑀯𑀸 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀪𑀕𑀯𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺. 𑀪𑀼𑀢𑁆𑀢𑀧𑀸𑀢𑀭𑀲𑁄 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀪𑀡𑁆𑀟𑀸𑀕𑀸𑀭𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀏𑀢𑁆𑀢𑀓𑀁 𑀪𑀡𑁆𑀟𑀁 𑀯𑀺𑀲𑁆𑀲𑀚𑁆𑀚𑀺𑀢𑀁 𑀏𑀢𑁆𑀢𑀓𑀁 𑀧𑀦 𑀦 𑀯𑀺𑀲𑁆𑀲𑀚𑁆𑀚𑀺𑀢’’𑀦𑁆𑀢𑀺 𑀲𑀩𑁆𑀩𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀇𑀫𑀁 𑀲𑀸𑀧𑀢𑁂𑀬𑁆𑀬𑀁 𑀫𑀬𑁆𑀳𑀁 𑀓𑀦𑀺𑀝𑁆𑀞𑀲𑁆𑀲 𑀤𑁂𑀳𑀻’’𑀢𑀺 𑀲𑀩𑁆𑀩𑀁 𑀦𑀺𑀬𑁆𑀬𑁄𑀢𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦 𑀧𑀭𑀸𑀬𑀡𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀉𑀧𑀝𑁆𑀞𑀸𑀢𑀺, 𑀢𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀚𑀦𑀧𑀤𑁄 𑀫𑀬𑁆𑀳𑀁 𑀅𑀲𑀧𑁆𑀧𑀸𑀬𑁄, 𑀬𑀁𑀦𑀽𑀦𑀸𑀳𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀅𑀣 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀸𑀧𑁂𑀢𑁆𑀯𑀸 𑀲𑀢𑁆𑀣𑀸 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀧𑀓𑁆𑀓𑀫𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀧𑀼𑀡𑁆𑀡𑁄 𑀲𑀽𑀦𑀸𑀧𑀭𑀦𑁆𑀢𑀭𑀝𑁆𑀞𑀁 ¶ 𑀧𑀢𑁆𑀯𑀸 𑀲𑀫𑁆𑀫𑀢𑀧𑀩𑁆𑀩𑀢𑀁 𑀦𑀸𑀫 𑀧𑀯𑀺𑀲𑀺𑀢𑁆𑀯𑀸 𑀯𑀸𑀡𑀺𑀚𑀓𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀣 𑀦𑀁 𑀓𑀦𑀺𑀝𑁆𑀞𑀪𑀸𑀢𑀸 𑀲𑀕𑁂𑀳𑀁 𑀦𑁂𑀢𑁆𑀯𑀸 𑀪𑀺𑀓𑁆𑀔𑀁 𑀤𑀢𑁆𑀯𑀸 ‘‘𑀪𑀦𑁆𑀢𑁂 𑀅𑀜𑁆𑀜𑀢𑁆𑀣 𑀅𑀕𑀦𑁆𑀢𑁆𑀯𑀸 𑀇𑀥𑁂𑀯 𑀯𑀲𑀣𑀸’’𑀢𑀺 𑀧𑀝𑀺𑀜𑁆𑀜𑀁 𑀓𑀸𑀭𑁂𑀢𑁆𑀯𑀸 𑀯𑀲𑀸𑀧𑁂𑀲𑀺. 𑀢𑀢𑁄 𑀲𑀫𑀼𑀤𑁆𑀤𑀕𑀺𑀭𑀺𑀯𑀺𑀳𑀸𑀭𑀁 𑀦𑀸𑀫 𑀅𑀕𑀫𑀸𑀲𑀺. 𑀢𑀢𑁆𑀣 𑀲𑀫𑀼𑀤𑁆𑀤𑀯𑀻𑀘𑀺𑀬𑁄 𑀆𑀕𑀦𑁆𑀢𑁆𑀯𑀸 𑀅𑀬𑀓𑀡𑁆𑀝𑀧𑀸𑀲𑀸𑀡𑁂𑀲𑀼 𑀧𑀳𑀭𑀺𑀢𑁆𑀯𑀸 𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑀺. 𑀣𑁂𑀭𑁄 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀦 𑀨𑀸𑀲𑀼𑀯𑀺𑀳𑀸𑀭𑁄 𑀳𑁄𑀢𑀻𑀢𑀺 𑀲𑀫𑀼𑀤𑁆𑀤𑀁 𑀦𑀺𑀲𑀤𑁆𑀤𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺. 𑀢𑀢𑁄 𑀫𑀸𑀢𑀼𑀮𑀕𑀺𑀭𑀺𑀁 𑀦𑀸𑀫 𑀆𑀕𑀫𑀸𑀲𑀺. 𑀢𑀢𑁆𑀣 𑀲𑀓𑀼𑀡𑀲𑀗𑁆𑀖𑁄 𑀉𑀲𑁆𑀲𑀦𑁆𑀦𑁄 𑀭𑀢𑁆𑀢𑀺𑀜𑁆𑀘 𑀤𑀺𑀯𑀸 𑀘 𑀲𑀤𑁆𑀤𑁄 𑀏𑀓𑁄 𑀩𑀤𑁆𑀥𑁄 𑀳𑁄𑀢𑀺. 𑀣𑁂𑀭𑁄 ‘‘𑀇𑀤𑀁 𑀞𑀸𑀦𑀁 𑀅𑀨𑀸𑀲𑀼𑀓𑀦𑁆𑀢𑀺 𑀢𑀢𑁄 𑀫𑀓𑀼𑀴𑀓𑀸𑀭𑀸𑀫𑀯𑀺𑀳𑀸𑀭𑀁 𑀦𑀸𑀫 𑀕𑀢𑁄. 𑀲𑁄 𑀯𑀸𑀡𑀺𑀚𑀕𑀸𑀫𑀲𑁆𑀲 𑀦𑀸𑀢𑀺𑀤𑀽𑀭𑁄 𑀦𑀸𑀘𑁆𑀘𑀸𑀲𑀦𑁆𑀦𑁄 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑁄 𑀯𑀺𑀯𑀺𑀢𑁆𑀢𑁄 𑀅𑀧𑁆𑀧𑀲𑀤𑁆𑀤𑁄. 𑀣𑁂𑀭𑁄 ‘‘𑀇𑀤𑀁 𑀞𑀸𑀦𑀁 𑀨𑀸𑀲𑀼𑀓’’𑀦𑁆𑀢𑀺 𑀢𑀢𑁆𑀣 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀞𑀸𑀦𑁂 𑀘𑀗𑁆𑀓𑀫𑀦𑀸𑀤𑀻𑀦𑀺 𑀓𑀸𑀭𑁂𑀢𑁆𑀯𑀸 𑀯𑀲𑁆𑀲𑀁 𑀉𑀧𑀕𑀘𑁆𑀙𑀢𑀺. 𑀏𑀯𑀁 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀺𑀳𑀸𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀢𑀲𑁆𑀫𑀺𑀁𑀬𑁂𑀯 𑀅𑀦𑁆𑀢𑁄𑀯𑀲𑁆𑀲𑁂 𑀧𑀜𑁆𑀘 𑀯𑀸𑀡𑀺𑀚𑀓𑀲𑀢𑀸𑀦𑀺 ‘‘𑀧𑀭𑀲𑀫𑀼𑀤𑁆𑀤𑀁 𑀕𑀘𑁆𑀙𑀸𑀫𑀸’’𑀢𑀺 𑀦𑀸𑀯𑀸𑀬 𑀪𑀡𑁆𑀟𑀁 𑀧𑀓𑁆𑀔𑀺𑀧𑀺𑀁𑀲𑀼. 𑀦𑀸𑀯𑀸𑀭𑁄𑀳𑀦𑀤𑀺𑀯𑀲𑁂 𑀣𑁂𑀭𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀸 𑀣𑁂𑀭𑀁 𑀪𑁄𑀚𑁂𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 ‘‘𑀪𑀦𑁆𑀢𑁂 𑀫𑀳𑀸𑀲𑀫𑀼𑀤𑁆𑀤𑁄 𑀦𑀸𑀫 𑀅𑀲𑁆𑀲𑀤𑁆𑀥𑁂𑀬𑁆𑀬𑁄 𑀘𑀸𑀦𑁂𑀓𑀦𑁆𑀢𑀭𑀸𑀬𑁄 𑀘, 𑀅𑀫𑁆𑀳𑁂 𑀆𑀯𑀚𑁆𑀚𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀦𑀸𑀯𑀁 𑀆𑀭𑀽𑀬𑁆𑀳𑀺. 𑀦𑀸𑀯𑀸 𑀊𑀫𑀺𑀚𑀯𑁂𑀦 𑀕𑀘𑁆𑀙𑀫𑀸𑀦𑀸 𑀅𑀜𑁆𑀜𑀢𑀭𑀁 𑀤𑀻𑀧𑀁 𑀧𑀸𑀧𑀼𑀡𑀺. 𑀫𑀦𑀼𑀲𑁆𑀲𑀸 ‘‘𑀧𑀸𑀢𑀭𑀸𑀲𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀤𑀻𑀧𑀓𑁂 𑀑𑀢𑀺𑀡𑁆𑀡𑀸. 𑀢𑀲𑁆𑀫𑀺𑀁 𑀤𑀻𑀧𑀓𑁂 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀦𑀢𑁆𑀣𑀺, 𑀘𑀦𑁆𑀤𑀦𑀯𑀦𑀫𑁂𑀯 𑀅𑀳𑁄𑀲𑀺. 𑀅𑀣𑁂𑀓𑁄 𑀯𑀸 𑀲𑀺𑀬𑀸 𑀭𑀼𑀓𑁆𑀔𑀁 𑀆𑀓𑁄𑀝𑁂𑀢𑁆𑀯𑀸 𑀮𑁄𑀳𑀺𑀢𑀘𑀦𑁆𑀤𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀪𑁄 𑀫𑀬𑀁 𑀮𑀸𑀪𑀢𑁆𑀣𑀸𑀬 𑀧𑀭𑀲𑀫𑀼𑀤𑁆𑀤𑀁 𑀕𑀘𑁆𑀙𑀸𑀫, 𑀇𑀢𑁄 𑀘 𑀉𑀢𑁆𑀢𑀭𑀺 𑀮𑀸𑀪𑀸 𑀦𑀸𑀫 𑀦𑀢𑁆𑀣𑀺, 𑀘𑀢𑀼𑀭𑀗𑁆𑀕𑀼𑀮 𑀫𑀢𑁆𑀢𑀸𑀧𑀺 𑀖𑀝𑀺𑀓𑀸 𑀲𑀢𑀲𑀳𑀲𑁆𑀲𑀁 𑀅𑀕𑁆𑀖𑀢𑀺, 𑀲𑀁𑀳𑀸𑀭𑁂𑀢𑀩𑁆𑀩𑀓𑀬𑀼𑀢𑁆𑀢𑀁 𑀪𑀡𑁆𑀟𑀁 𑀳𑀸𑀭𑁂𑀢𑁆𑀯𑀸 𑀕𑀘𑁆𑀙𑀸𑀫𑀸’’𑀢𑀺. 𑀢𑁂 𑀢𑀣𑀸 𑀓𑀭𑀺𑀁𑀲𑀼 𑀘𑀦𑁆𑀤𑀦𑀯𑀦𑁂 𑀅𑀥𑀺𑀯𑀢𑁆𑀣𑀸 𑀅𑀫𑀦𑀼𑀲𑁆𑀲𑀸 𑀓𑀼𑀚𑁆𑀛𑀺𑀢𑁆𑀯𑀸 𑀇𑀫𑁂𑀳𑀺 𑀅𑀫𑁆𑀳𑀸𑀓𑀁 𑀘𑀦𑁆𑀤𑀦𑀯𑀦𑀁 𑀦𑀸𑀲𑀺𑀢𑀁, 𑀖𑀸𑀢𑁂𑀲𑁆𑀲𑀸𑀫 𑀦𑁂’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦 𑀇𑀫𑁂𑀲𑀼 𑀖𑀸𑀝𑀺𑀢𑁂𑀲𑀼 𑀲𑀩𑁆𑀩𑀁 𑀏𑀓𑀓𑀼𑀡𑀧𑀁 𑀪𑀯𑀺𑀲𑁆𑀲𑀢𑀺, 𑀲𑀫𑀼𑀤𑁆𑀤𑀫𑀚𑁆𑀛𑁂 𑀦𑁂𑀲𑀁 𑀦𑀸𑀯𑀁 𑀑𑀲𑀻𑀤𑁂𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀅𑀣 𑀢𑁂𑀲𑀁 𑀦𑀸𑀯𑀁 𑀆𑀭𑀽𑀬𑁆𑀳 𑀫𑀼𑀳𑀼𑀢𑁆𑀢𑀁 𑀕𑀢𑀓𑀸𑀮𑁂𑀬𑁂𑀯 𑀉𑀧𑁆𑀧𑀸𑀤𑀺𑀓𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀲𑀬𑀫𑁆𑀧𑀺 𑀢𑁂 𑀅𑀫𑀦𑀼𑀲𑁆𑀲𑀸 𑀪𑀬𑀸𑀦𑀓𑀸𑀦𑀺 𑀭𑀽𑀧𑀸𑀦𑀺 𑀤𑀲𑁆𑀲𑀬𑀺𑀁𑀲𑀼. 𑀪𑀻𑀢𑀸 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀤𑁂𑀯𑀢𑀸 𑀦𑀫𑀲𑁆𑀲𑀦𑁆𑀢𑀺. 𑀣𑁂𑀭𑀲𑁆𑀲 𑀓𑀦𑀺𑀝𑁆𑀞𑁄 𑀘𑀽𑀴𑀧𑀼𑀡𑁆𑀡𑀓𑀼𑀝𑀼𑀫𑁆𑀩𑀺𑀓𑁄 ‘‘𑀫𑀬𑁆𑀳𑀁 𑀪𑀸𑀢𑀸 𑀅𑀯𑀲𑁆𑀲𑀬𑁄 𑀳𑁄𑀢𑀽’’𑀢𑀺 𑀣𑁂𑀭𑀲𑁆𑀲 𑀦𑀫𑀲𑁆𑀲𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀣𑁂𑀭𑁄 𑀧𑀺 𑀓𑀺𑀭 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 ¶ 𑀆𑀯𑀚𑁆𑀚𑁂𑀢𑁆𑀯𑀸 𑀢𑁂𑀲𑀁 𑀩𑁆𑀬𑀲𑀦𑀧𑁆𑀧𑀢𑁆𑀢𑀺𑀁 𑀜𑀢𑁆𑀯𑀸 𑀯𑁂𑀳𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀅𑀪𑀺𑀫𑀼𑀔𑁄 𑀅𑀝𑁆𑀞𑀸𑀲𑀺. 𑀅𑀫𑀦𑀼𑀲𑁆𑀲𑀸 𑀣𑁂𑀭𑀁 𑀤𑀺𑀲𑁆𑀯𑀸𑀯 ‘‘𑀅𑀬𑁆𑀬𑀧𑀼𑀡𑁆𑀡𑀢𑁆𑀣𑁂𑀭𑁄 𑀏𑀳𑀻’’ 𑀢𑀺 𑀧𑀓𑁆𑀓𑀫𑀺𑀁𑀲𑀼. 𑀉𑀧𑁆𑀧𑀸𑀤𑀺𑀓𑀁 𑀲𑀦𑁆𑀦𑀺𑀲𑀻𑀤𑀺. 𑀣𑁂𑀭𑁄 ‘‘𑀫𑀸 𑀪𑀸𑀬𑀣𑀸’’𑀢𑀺 𑀢𑁂𑀲𑀁 𑀅𑀲𑁆𑀲𑀸𑀲𑁂𑀢𑁆𑀯𑀸𑀯 𑀓𑀳𑀁 𑀕𑀦𑁆𑀢𑀼𑀓𑀸𑀫𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀪𑀦𑁆𑀢𑁂 𑀅𑀫𑁆𑀳𑀸𑀓𑀁 𑀲𑀓𑀝𑁆𑀞𑀸𑀦𑀫𑁂𑀯 𑀕𑀘𑁆𑀙𑀸𑀫𑀸’’𑀢𑀺 𑀣𑁂𑀭𑁄 𑀦𑀸𑀯𑀁 𑀨𑀮𑁂 𑀅𑀓𑁆𑀓𑀫𑀺𑀢𑁆𑀯𑀸 ‘‘𑀏𑀢𑁂𑀲𑀁 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀘𑁆𑀙𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀢𑀺. 𑀯𑀸𑀡𑀺𑀚𑀸 𑀲𑀓𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀧𑀼𑀢𑁆𑀢𑀤𑀸𑀭𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 ‘‘𑀏𑀣 𑀣𑁂𑀭𑀁 𑀲𑀭𑀡𑀁 𑀕𑀘𑁆𑀙𑀸𑀫𑀸’’𑀢𑀺 𑀧𑀜𑁆𑀘𑀲𑀢𑀸𑀦𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀜𑁆𑀘𑀫𑀸𑀢𑀼𑀕𑀸𑀫𑀲𑀢𑁂𑀳𑀺 𑀲𑀤𑁆𑀥𑀺𑀁 𑀢𑀻𑀲𑀼 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀉𑀧𑀸𑀲𑀓𑀢𑁆𑀢𑀁 𑀧𑀝𑀺𑀯𑁂𑀤𑁂𑀲𑀼𑀁. 𑀢𑀢𑁄 𑀦𑀸𑀯𑀸𑀬 𑀪𑀡𑁆𑀟𑀁 𑀑𑀢𑀸𑀭𑁂𑀢𑁆𑀯𑀸 𑀣𑁂𑀭𑀲𑁆𑀲 𑀏𑀓𑀁 𑀓𑁄𑀝𑁆𑀞𑀸𑀲𑀁 𑀓𑀢𑁆𑀯𑀸 ‘‘𑀅𑀬𑀁 𑀪𑀦𑁆𑀢𑁂 𑀢𑀼𑀫𑁆𑀳𑀸𑀓𑀁 𑀓𑁄𑀝𑁆𑀞𑀸𑀲𑁄’’𑀢𑀺 𑀆𑀳𑀁𑀲𑀼. 𑀣𑁂𑀭𑁄 ‘‘𑀫𑀬𑁆𑀳𑀁 𑀯𑀺𑀲𑀼𑀁 𑀓𑁄𑀝𑁆𑀞𑀸𑀲 𑀓𑀺𑀘𑁆𑀘𑀁 𑀦𑀢𑁆𑀣𑀺’’. 𑀲𑀢𑁆𑀣𑀸 𑀧𑀦 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀧𑀼𑀩𑁆𑀩𑁄’𑀢𑀺. 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄 𑀪𑀦𑁆𑀢𑁂’𑀢𑀺, 𑀢𑁂𑀦𑀳𑀺 𑀇𑀫𑀺𑀦𑀸 𑀲𑀢𑁆𑀣𑀼 𑀫𑀡𑁆𑀟𑀮𑀫𑀸𑀴𑀁 𑀓𑀭𑁄𑀣. 𑀏𑀯𑀁 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀲𑁆𑀲𑀣𑀸𑀢𑀺 𑀢𑁂 𑀲𑀸𑀥𑀼 𑀪𑀦𑁆𑀢𑁂’𑀢𑀺 𑀢𑁂𑀦 𑀘 𑀓𑁄𑀝𑁆𑀞𑀸𑀲𑁂𑀦 𑀅𑀢𑁆𑀢𑀦𑁄 𑀘 𑀓𑁄𑀝𑁆𑀞𑀸𑀲𑁂𑀦 𑀫𑀡𑁆𑀟𑀮𑀫𑀸𑀴𑀁 𑀓𑀸𑀢𑀼𑀁 𑀆𑀭𑀪𑀺𑀁𑀲𑀼. 𑀲𑀢𑁆𑀣𑀸 𑀓𑀺𑀭𑀲𑁆𑀲 𑀆𑀭𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀭𑀺𑀪𑁄𑀕𑀁 𑀅𑀓𑀸𑀲𑀺. 𑀢𑀣𑁄 𑀫𑀦𑀼𑀲𑁆𑀲𑀸 𑀭𑀢𑁆𑀢𑀺𑀁 𑀑𑀪𑀸𑀲𑀁 𑀤𑀺𑀲𑁆𑀯𑀸 ‘‘𑀫𑀳𑁂𑀲𑀓𑁆𑀔𑀸 𑀤𑁂𑀯𑀢𑀸 𑀅𑀢𑁆𑀣𑀻’’𑀢𑀺 𑀲𑀜𑁆𑀜𑀁𑀓𑀭𑀺𑀁𑀲𑀼. 𑀉𑀧𑀸𑀲𑀓𑀸 𑀫𑀡𑁆𑀟𑀮𑀫𑀸𑀴𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑁂𑀦𑀸𑀲𑀦𑀸𑀦𑀺 𑀘 𑀦𑀺𑀝𑁆𑀞𑀧𑁂𑀢𑁆𑀯𑀸 𑀤𑀸𑀦𑀲𑀫𑁆𑀪𑀸𑀭𑀁 𑀲𑀚𑁆𑀚𑁂𑀢𑁆𑀯𑀸 ‘‘𑀓𑀢𑀁 𑀪𑀦𑁆𑀢𑁂 𑀅𑀫𑁆𑀳𑁂𑀳𑀺 𑀅𑀢𑁆𑀢𑀦𑁄𑀓𑀺𑀘𑁆𑀘𑀁, 𑀲𑀢𑁆𑀣𑀸𑀭𑀁 𑀧𑀓𑁆𑀓𑁄𑀲𑀣𑀸’’𑀢𑀺 𑀣𑁂𑀭𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀣𑁂𑀭𑁄 𑀲𑀸𑀬𑀦𑁆𑀳𑀲𑀫𑀬𑁂 𑀇𑀤𑁆𑀥𑀺𑀬𑀸𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 ‘‘𑀪𑀦𑁆𑀢𑁂 𑀯𑀸𑀡𑀺𑀚𑀕𑀸𑀫𑀯𑀸𑀲𑀺𑀦𑁄 𑀢𑀼𑀫𑁆𑀳𑁂 𑀤𑀝𑁆𑀞𑀼𑀓𑀸𑀫𑀸, 𑀢𑁂𑀲𑀁 𑀅𑀦𑀼𑀓𑀫𑁆𑀧𑀁 𑀓𑀭𑁄𑀣𑀸’’𑀢𑀺. 𑀪𑀕𑀯𑀸 𑀅𑀥𑀺𑀯𑀸𑀲𑁂𑀲𑀺. 𑀣𑁂𑀭𑁄 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀧𑀘𑁆𑀘𑀸𑀕𑀢𑁄. 𑀪𑀕𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 ‘‘𑀆𑀦𑀦𑁆𑀤 𑀲𑁆𑀯𑁂 𑀲𑀽𑀦𑀸𑀧𑀭𑀦𑁆𑀢𑁂 𑀯𑀸𑀡𑀺𑀚𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫, 𑀢𑁆𑀯𑀁 𑀏𑀓𑀽𑀦𑀧𑀜𑁆𑀘𑀲𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀮𑀸𑀓𑀁 𑀤𑁂𑀳𑀻’’𑀢𑀺. 𑀣𑁂𑀭𑁄 𑀲𑀸𑀥𑀼 𑀪𑀦𑁆𑀢𑁂’𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀘𑀸𑀭𑀺𑀓𑀸 𑀲𑀮𑀸𑀓𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀆𑀳. 𑀢𑀁 𑀤𑀺𑀯𑀲𑀁 𑀓𑀼𑀡𑁆𑀟𑀥𑀸𑀦𑀢𑁆𑀣𑁂𑀭𑁄 𑀧𑀞𑀫𑀁 𑀲𑀮𑀸𑀓𑀁 𑀅𑀕𑁆𑀕𑀳𑁄𑀢𑀺. 𑀯𑀸𑀡𑀺𑀚𑀕𑀸𑀫𑀯𑀸𑀲𑀺𑀦𑁄𑀧𑀺 ‘‘𑀲𑁆𑀯𑁂 𑀓𑀺𑀭 𑀲𑀢𑁆𑀣𑀸 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀕𑀸𑀫𑀫𑀚𑁆𑀛𑁂 𑀫𑀡𑁆𑀟𑀧𑀁 𑀓𑀢𑁆𑀯𑀸 𑀤𑀸𑀦𑀕𑁆𑀕𑀁 𑀲𑀚𑁆𑀚𑀬𑀺𑀁𑀲𑀼. 𑀪𑀕𑀯𑀸 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀲𑀓𑁆𑀓𑀲𑁆𑀲 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀉𑀡𑁆𑀳𑀁 𑀅𑀳𑁄𑀲𑀺. 𑀲𑁄 𑀓𑀺𑀁 𑀇𑀤𑀦𑁆𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀲𑀢𑁆𑀣𑀼 𑀲𑀽𑀦𑀸𑀧𑀭𑀦𑁆𑀢𑀕𑀫𑀦𑀁 𑀤𑀺𑀲𑁆𑀯𑀸 𑀯𑀺𑀲𑀼𑀓𑀫𑁆𑀫𑀁 𑀆𑀫𑀦𑁆𑀢𑁂𑀲𑀺 ¶ ‘‘𑀢𑀸𑀢 𑀅𑀚𑁆𑀚 𑀪𑀕𑀯𑀸 𑀢𑀻𑀡𑀺𑀫𑀢𑁆𑀢𑀸𑀦𑀺 𑀬𑁄𑀚𑀦𑀲𑀢𑀸𑀦𑀺 𑀧𑀺𑀡𑁆𑀟𑀸𑀘𑀸𑀭𑀁 𑀕𑀫𑀺𑀲𑁆𑀲𑀢𑀺, 𑀧𑀜𑁆𑀘 𑀓𑀽𑀝𑀸𑀕𑀸𑀭𑀲𑀢𑀸𑀦𑀺 𑀫𑀸𑀧𑁂𑀢𑁆𑀯𑀸 𑀚𑁂𑀢𑀯𑀦𑀤𑁆𑀯𑀸𑀭 𑀓𑁄𑀝𑁆𑀞𑀫𑀢𑁆𑀣𑀓𑁂 𑀕𑀫𑀦𑀲𑀚𑁆𑀚𑀸𑀦𑀺𑀁 𑀓𑀢𑁆𑀯𑀸 𑀞𑀧𑁂𑀳𑀻’’𑀢𑀺, 𑀲𑁄 𑀢𑀣𑀸 𑀅𑀓𑀸𑀲𑀺. 𑀪𑀕𑀯𑀢𑁄 𑀓𑀽𑀝𑀸𑀕𑀸𑀭𑀁 𑀘𑀢𑀼𑀫𑀼𑀔𑀁 𑀅𑀳𑁄𑀲𑀺, 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀤𑁆𑀯𑀺𑀫𑀼𑀔𑀁, 𑀲𑁂𑀲𑀸𑀦𑀁 𑀏𑀓𑀫𑀼𑀔𑀁, 𑀲𑀢𑁆𑀣𑀸 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑁆𑀫 𑀧𑀝𑀺𑀧𑀸𑀝𑀺𑀬𑀸 𑀞𑀧𑀺𑀢 𑀓𑀽𑀝𑀸𑀕𑀸𑀭𑁂𑀲𑀼 𑀥𑀼𑀭𑀓𑀽𑀝𑀸𑀕𑀸𑀭𑀁 𑀧𑀸𑀯𑀺𑀲𑀺. 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀆𑀤𑀺𑀁 𑀓𑀢𑁆𑀯𑀸 𑀏𑀓𑀽𑀦𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑀸𑀦𑀺𑀧𑀺 𑀓𑀽𑀝𑀸𑀕𑀸𑀭𑀁 𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀅𑀳𑁂𑀲𑀼𑀁, 𑀏𑀓𑀁 𑀢𑀼𑀘𑁆𑀙𑀓𑀽𑀝𑀸𑀕𑀸𑀭𑀁 𑀅𑀳𑁄𑀲𑀺. 𑀧𑀜𑁆𑀘𑀧𑀺 𑀓𑀽𑀝𑀸𑀕𑀸𑀭𑀲𑀢𑀸𑀦𑀺 𑀆𑀓𑀸𑀲𑁂 𑀉𑀧𑁆𑀧𑀢𑀺𑀁𑀲𑀼. 𑀲𑀢𑁆𑀣𑀸 𑀲𑀘𑁆𑀘𑀩𑀦𑁆𑀥𑀧𑀩𑁆𑀩𑀢𑀁 𑀦𑀸𑀫 𑀧𑀢𑁆𑀯𑀸 𑀓𑀽𑀝𑀸𑀕𑀸𑀭𑀁 𑀆𑀓𑀸𑀲𑁂 𑀞𑀧𑁂𑀢𑁆𑀯𑀸 𑀢𑀲𑁆𑀫𑀺𑀁 𑀧𑀩𑁆𑀩𑀢𑁂 𑀲𑀘𑁆𑀘𑀩𑀦𑁆𑀥𑁄 𑀦𑀸𑀫 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀲𑁄 𑀫𑀳𑀸𑀚𑀦𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀉𑀕𑁆𑀕𑀡𑁆𑀳𑀸𑀧𑁂𑀦𑁆𑀢𑁄 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀯𑀲𑀢𑀺. 𑀅𑀩𑁆𑀪𑀦𑁆𑀢𑀭𑁂 𑀘𑀲𑁆𑀲 𑀅𑀦𑁆𑀢𑁄𑀘𑀸𑀝𑀺𑀬𑀁 𑀧𑀤𑀻𑀧𑁄 𑀯𑀺𑀬 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀚𑀮𑀢𑀺, 𑀢𑀁 𑀤𑀺𑀲𑁆𑀯𑀸 ‘‘𑀥𑀫𑁆𑀫𑀫𑀲𑁆𑀲 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀢𑀸𑀧𑀲𑁄 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀫𑀕𑁆𑀕𑁂𑀦𑁂𑀯𑀲𑁆𑀲 𑀅𑀪𑀺𑀜𑁆𑀜𑀸 𑀆𑀕𑀢𑀸, 𑀏𑀳𑀺 𑀪𑀺𑀓𑁆𑀔𑀼 𑀳𑀼𑀢𑁆𑀯𑀸 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑁄 𑀓𑀽𑀝𑀸𑀕𑀸𑀭𑀁 𑀧𑀸𑀯𑀺𑀲𑀺. 𑀪𑀕𑀯𑀸 𑀓𑀽𑀝𑀸𑀕𑀸𑀭𑀕𑀢𑁂𑀳𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺𑀲𑀤𑁆𑀥𑀺𑀁 𑀯𑀸𑀡𑀺𑀚𑀕𑀸𑀫𑀁 𑀕𑀦𑁆𑀢𑁆𑀯𑀸 𑀓𑀽𑀝𑀸𑀕𑀸𑀭𑀸𑀦𑀺 𑀅𑀤𑀺𑀲𑁆𑀲𑀫𑀸𑀦𑀸𑀦𑀺 𑀓𑀢𑁆𑀯𑀸 𑀯𑀸𑀡𑀺𑀚𑀕𑀸𑀫𑀁 𑀧𑀸𑀯𑀺𑀲𑀺. 𑀯𑀸𑀡𑀺𑀚𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀲𑀢𑁆𑀣𑀸𑀭𑀁 𑀫𑀓𑀼𑀴𑀓𑀸𑀭𑀸𑀫𑀁 𑀦𑀬𑀺𑀁𑀲𑀼. 𑀲𑀢𑁆𑀣𑀸 𑀫𑀡𑁆𑀟𑀮𑀫𑀸𑀴𑀁 𑀧𑀸𑀯𑀺𑀲𑀺. 𑀫𑀳𑀸𑀚𑀦𑁄 𑀬𑀸𑀯 𑀲𑀢𑁆𑀣𑀸 𑀪𑀢𑁆𑀢𑀤𑀭𑀣𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺, 𑀢𑀸𑀯 𑀧𑀸𑀢𑀭𑀸𑀲𑀁 𑀓𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀲𑀫𑀸𑀤𑀸𑀬 𑀕𑀦𑁆𑀥𑀜𑁆𑀘 𑀧𑀼𑀧𑁆𑀨𑀜𑁆𑀘 𑀆𑀤𑀸𑀬 𑀥𑀫𑁆𑀫𑀲𑀯𑀦𑀢𑁆𑀣𑀸𑀬 𑀆𑀭𑀸𑀫𑀁 𑀧𑀘𑁆𑀘𑀸𑀕𑀫𑀸𑀲𑀺. 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀫𑀳𑀸𑀚𑀦𑀲𑁆𑀲 𑀩𑀦𑁆𑀥𑀦𑀸 𑀫𑁄𑀓𑁆𑀔𑁄 𑀚𑀸𑀢𑁄, 𑀫𑀳𑀦𑁆𑀢 𑀩𑀼𑀤𑁆𑀥𑀓𑁄𑀮𑀸𑀳𑀮𑀁 𑀅𑀳𑁄𑀲𑀺. 𑀲𑀢𑁆𑀣𑀸 𑀫𑀳𑀸𑀚𑀦𑀲𑁆𑀲 𑀲𑀗𑁆𑀕𑀳𑀢𑁆𑀣𑀁 𑀓𑀢𑀺𑀧𑀸𑀳𑀁 𑀢𑀢𑁆𑀣𑁂𑀯 𑀯𑀲𑀺, 𑀅𑀭𑀼𑀡𑀁 𑀧𑀦 𑀫𑀳𑀸𑀕𑀦𑁆𑀥𑀓𑀼𑀝𑀺𑀬𑀁𑀬𑁂𑀯 𑀉𑀝𑁆𑀞𑀧𑁂𑀲𑀺. 𑀢𑀢𑁆𑀣 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸 𑀯𑀸𑀡𑀺𑀚𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 ‘‘𑀢𑁆𑀯𑀁 𑀇𑀥𑁂𑀯 𑀯𑀲𑀸𑀳𑀻’’𑀢𑀺 𑀧𑀼𑀡𑁆𑀡𑀢𑁆𑀣𑁂𑀭𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀦𑁆𑀢𑀭𑁂 𑀦𑀫𑁆𑀫𑀤𑀸𑀦𑀤𑀻 𑀦𑀸𑀫 𑀅𑀢𑁆𑀣𑀺, 𑀢𑀲𑁆𑀲𑀸 𑀢𑀻𑀭𑀁 𑀅𑀕𑀫𑀸𑀲𑀺. 𑀦𑀫𑁆𑀫𑀤𑀸𑀦𑀸𑀕𑀭𑀸𑀚𑀸 𑀲𑀢𑁆𑀣𑀼 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀦𑀸𑀕𑀪𑀯𑀦𑀁 𑀧𑀯𑁂𑀲𑁂𑀢𑁆𑀯𑀸 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀲𑀓𑁆𑀓𑀸𑀭𑀁 𑀅𑀓𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀦𑀸𑀕𑀪𑀯𑀦𑀸 𑀦𑀺𑀓𑁆𑀔𑀫𑀺. 𑀲𑁄 ‘‘𑀫𑀬𑁆𑀳𑀁 𑀪𑀦𑁆𑀢𑁂 𑀧𑀭𑀺𑀘𑀭𑀺𑀢𑀩𑁆𑀩𑀁 𑀤𑁂𑀣𑀸’’𑀢𑀺 𑀬𑀸𑀘𑀺. 𑀪𑀕𑀯𑀸 𑀦𑀫𑁆𑀫𑀤𑀸𑀦𑀤𑀻𑀢𑀻𑀭𑁂 𑀧𑀤𑀘𑁂𑀢𑀺𑀬𑀁 𑀤𑀲𑁆𑀲𑁂𑀲𑀺. 𑀢𑀁 𑀯𑀻𑀘𑀻𑀲𑀼 𑀆𑀕𑀳𑀸𑀲𑀼 𑀧𑀺𑀥𑀺𑀬𑀢𑀺 𑀯𑀻𑀘𑀻𑀲𑀼 𑀕𑀢𑀸𑀲𑀼 𑀯𑀺𑀯𑀭𑀢𑀺, 𑀫𑀳𑀸𑀲𑀓𑁆𑀓𑀸𑀭𑀧𑁆𑀧𑀢𑁆𑀢𑀁 𑀅𑀳𑁄𑀲𑀺. 𑀲𑀢𑁆𑀣𑀸 𑀢𑀢𑁄 𑀦𑀺𑀓𑁆𑀔𑀫𑁆𑀫 𑀲𑀘𑁆𑀘𑀩𑀦𑁆𑀥𑀧𑀩𑁆𑀩𑀢𑀁 𑀕𑀦𑁆𑀢𑁆𑀯𑀸 ¶ 𑀲𑀘𑁆𑀘𑀩𑀦𑁆𑀥𑀁 𑀆𑀳 ‘‘𑀢𑀬𑀸 𑀫𑀳𑀸𑀚𑀦𑁄 𑀅𑀧𑀸𑀬𑀫𑀕𑁆𑀕𑁂 𑀑𑀢𑀸𑀭𑀺𑀢𑁄. 𑀢𑁆𑀯𑀁 𑀇𑀥𑁂𑀯 𑀯𑀲𑀺𑀢𑁆𑀯𑀸 𑀏𑀢𑁂𑀲𑀁 𑀮𑀤𑁆𑀥𑀺𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀫𑀕𑁆𑀕𑁂 𑀧𑀢𑀺𑀝𑁆𑀞𑀸𑀧𑁂𑀳𑀻’’𑀢𑀺. 𑀲𑁄𑀧𑀺 𑀧𑀭𑀺𑀘𑀭𑀺𑀢𑀩𑁆𑀩𑀁 𑀬𑀸𑀘𑀺. 𑀲𑀢𑁆𑀣𑀸 𑀖𑀦𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀅𑀮𑁆𑀮𑀫𑀢𑁆𑀢𑀺𑀓𑀧𑀺𑀡𑁆𑀟𑀫𑁆𑀳𑀺 𑀮𑀜𑁆𑀙𑀦𑀁 𑀯𑀺𑀬 𑀧𑀤𑀘𑁂𑀢𑀺𑀬𑀁 𑀤𑀲𑁆𑀲𑁂𑀲𑀺. 𑀏𑀯𑀁 𑀲𑀽𑀦𑀸𑀧𑀭𑀦𑁆𑀢𑀭𑀝𑁆𑀞𑁂𑀬𑁂𑀯 𑀤𑁆𑀯𑁂 𑀘𑀓𑁆𑀓𑀭𑀢𑀦𑀘𑁂𑀢𑀺𑀬𑀸𑀦𑀺 𑀬𑀸𑀯𑀲𑀸𑀲𑀦𑀦𑁆𑀢𑀭𑀥𑀸𑀦𑀁 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀲𑀢𑁆𑀢𑀫𑁂 𑀧𑀦 𑀯𑀲𑁆𑀲𑁂 𑀲𑀸𑀯𑀢𑁆𑀣𑀺𑀬𑀁 𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑁂 𑀢𑀺𑀢𑁆𑀣𑀺 𑀫𑀤𑁆𑀤𑀦𑀁 𑀓𑀭𑁄𑀦𑁆𑀢𑁄 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀤𑀲𑀳𑀺 𑀘𑀓𑁆𑀓𑀯𑀸𑀴 𑀲𑀳𑀲𑁆𑀲𑁂𑀳𑀺 𑀆𑀕𑀢𑀸𑀦𑀁 𑀤𑁂𑀯𑀢𑀸𑀦𑀁 𑀫𑀸𑀢𑀭𑀁 𑀓𑀸𑀬𑀲𑀓𑁆𑀔𑀺𑀁 𑀓𑀢𑁆𑀯𑀸 𑀅𑀪𑀺𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀢𑀸𑀯𑀢𑀺𑀁𑀲𑀪𑀯𑀦𑁂 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁 𑀯𑀲𑁆𑀲𑀁 𑀯𑀲𑀺. 𑀅𑀝𑁆𑀞𑀫𑁂 𑀲𑀁𑀲𑀼𑀫𑀸𑀭𑀦𑀕𑀭𑁂 𑀏𑀓𑀯𑀲𑁆𑀲𑀁 𑀯𑀲𑀺. 𑀦𑀯𑀫𑁂 𑀓𑁄𑀲𑀫𑁆𑀩𑀺𑀬𑀁 𑀏𑀓𑀯𑀲𑁆𑀲𑀁 𑀯𑀲𑀺. 𑀢𑀤𑀸 𑀪𑀤𑁆𑀤𑀺𑀬𑁄, 𑀓𑀺𑀫𑀺𑀮𑁄, 𑀪𑀕𑀼, 𑀆𑀦𑀦𑁆𑀤𑁄, 𑀅𑀦𑀼𑀭𑀼𑀤𑁆𑀥𑁄, 𑀤𑁂𑀯𑀤𑀢𑁆𑀢𑁄, 𑀘𑀸𑀢𑀺 𑀙 𑀔𑀢𑁆𑀢𑀺𑀬𑀸 𑀧𑀩𑁆𑀩𑀚𑀺𑀁𑀲𑀼. 𑀢𑁂𑀲𑀁 𑀯𑀺𑀢𑁆𑀣𑀸𑀭𑁄 𑀥𑀫𑁆𑀫𑀧𑀤𑁂 𑀆𑀕𑀢𑁄. 𑀤𑀲𑀫𑁂 𑀧𑀦 𑀯𑀲𑁆𑀲𑁂 𑀧𑀸𑀮𑀺𑀮𑁂𑀬𑁆𑀬𑀸𑀕𑀸𑀫𑁂 𑀤𑀓𑁆𑀔𑀺𑀡𑀯𑀦𑀲𑀡𑁆𑀟𑁂 𑀪𑀤𑁆𑀤𑀲𑀸𑀮𑀫𑀽𑀮𑁂 𑀧𑀸𑀮𑀺𑀮𑁂𑀬𑁆𑀬𑀓𑁂𑀦 𑀳𑀢𑁆𑀣𑀺𑀦𑀸 𑀉𑀧𑀝𑁆𑀞𑀺𑀬𑀫𑀸𑀦𑁄 𑀨𑀸𑀲𑀼𑀓𑀁 𑀯𑀲𑁆𑀲𑀸𑀯𑀸𑀲𑀁 𑀯𑀲𑀺. 𑀏𑀓𑀸𑀤𑀲𑀫𑁂 𑀦𑀸𑀮𑀦𑁆𑀥𑀩𑁆𑀭𑀸𑀳𑁆𑀫𑀡𑀕𑀸𑀫𑁂 𑀏𑀓𑀯𑀸𑀲𑀁 𑀯𑀲𑀺. 𑀤𑁆𑀯𑀸𑀤𑀲𑀫𑁂 𑀯𑁂𑀭𑀜𑁆𑀚𑀸𑀬𑀁 𑀏𑀓𑀯𑀸𑀲𑀁 𑀯𑀲𑀺 𑀤𑀼𑀘𑁆𑀘𑀭𑀺𑀢𑀲𑁆𑀲 𑀯𑀺𑀧𑀸𑀓𑀁 𑀅𑀦𑀼𑀪𑀯𑀫𑀸𑀦𑁄, 𑀪𑀕𑀯𑀢𑀸 𑀓𑀺𑀭 𑀨𑀼𑀲𑁆𑀲𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑀸𑀯𑀓𑀸𑀦𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀯𑀲𑁂𑀦 𑀓𑀢𑀼𑀧𑀘𑀺𑀢𑀲𑁆𑀲 𑀅𑀓𑀼𑀲𑀮𑀓𑀫𑁆𑀫𑀲𑁆𑀲 𑀢𑀤𑀸 𑀮𑀤𑁆𑀥𑁄𑀓𑀸𑀲𑀯𑀲𑁂𑀦 𑀉𑀧𑀝𑁆𑀞𑀺𑀢𑀢𑁆𑀢𑀸 𑀯𑁂𑀭𑀜𑁆𑀚𑀩𑁆𑀭𑀸𑀳𑁆𑀫𑀡𑁂𑀦 𑀦𑀺𑀫𑀦𑁆𑀢𑀺𑀢𑁄𑀧𑀺 𑀲𑀫𑀸𑀦𑁄 𑀫𑀸𑀭𑀸𑀯𑀝𑁆𑀝𑀦 𑀯𑀲𑁂𑀦 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀲𑁆𑀲𑀯𑀸𑀡𑀺𑀚𑀓𑀸𑀦𑀁 𑀦𑀺𑀩𑀤𑁆𑀥𑀯𑀢𑁆𑀢𑀲𑀗𑁆𑀔𑁂𑀧𑁂𑀦 𑀧𑀜𑁆𑀜𑀢𑁆𑀢𑀁 𑀧𑀢𑁆𑀣𑀧𑀢𑁆𑀣𑀫𑀽𑀮𑀓𑀁 𑀬𑀯𑀢𑀡𑁆𑀟𑀼𑀮𑀫𑁂𑀯 𑀢𑁂𑀫𑀸𑀲𑀁 𑀪𑀼𑀜𑁆𑀚𑀢𑀺, 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀧𑀤𑀸𑀦𑁂.

‘‘𑀨𑀼𑀲𑁆𑀲𑀲𑁆𑀲𑀸𑀳𑀁 𑀧𑀸𑀯𑀘𑀦𑁂, 𑀲𑀸𑀯𑀓𑁂 𑀧𑀭𑀺𑀪𑀸𑀲𑀺𑀲𑁆𑀲𑀁;

𑀬𑀯𑀁 𑀔𑀸𑀤𑀣 𑀪𑀼𑀜𑁆𑀚𑀣, 𑀫𑀸𑀘 𑀪𑀼𑀜𑁆𑀚𑀣 𑀲𑀸𑀮𑀺𑀦𑁄.

𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀢𑁂𑀫𑀸𑀲𑀁 𑀔𑀸𑀤𑀺𑀢𑀁 𑀬𑀯𑀁;

𑀦𑀺𑀫𑀦𑁆𑀢𑀺𑀢𑁄 𑀩𑁆𑀭𑀸𑀳𑁆𑀫𑀡𑁂𑀦, 𑀯𑁂𑀭𑀜𑁆𑀚𑀸𑀬𑀁 𑀯𑀲𑀺𑀁 𑀢𑀤𑀸𑀢𑀺’’.

𑀢𑁂𑀦 𑀯𑀼𑀢𑁆𑀢𑀁 ‘‘𑀤𑁆𑀯𑀸𑀤𑀲𑀫𑁂 𑀯𑁂𑀭𑀜𑁆𑀚𑀸𑀬𑀁 𑀏𑀓𑀯𑀸𑀲𑀁 𑀯𑀲𑀺 𑀤𑀼𑀘𑁆𑀘𑀭𑀺𑀢𑀲𑁆𑀲 𑀯𑀺𑀧𑀸𑀓𑀁 𑀅𑀦𑀼𑀪𑀯𑀫𑀸𑀦𑁄’’𑀢𑀺. 𑀢𑁂𑀭𑀲𑀫𑁂 𑀚𑀸𑀮𑀺𑀬𑀧𑀩𑁆𑀩𑀢𑁂 𑀏𑀓𑀯𑀸𑀲𑀁 𑀯𑀲𑀺. 𑀘𑀢𑀼𑀤𑁆𑀤𑀲𑀫𑁂 𑀲𑀸𑀯𑀢𑁆𑀣𑀺𑀬𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂 𑀚𑁂𑀢𑀯𑀦𑀯𑀺𑀳𑀸𑀭𑁂 𑀧𑀞𑀫𑀯𑀸𑀲𑀁 𑀯𑀲𑀺𑀢𑁆𑀯𑀸 𑀧𑀦𑁆𑀦𑀭𑀲𑀫𑁂 𑀯𑀲𑁆𑀲𑁂 𑀜𑀸𑀢𑀺𑀚𑀦𑀲𑀗𑁆𑀕𑀳𑀢𑁆𑀣𑀁 𑀓𑀧𑀺𑀮𑀯𑀢𑁆𑀣𑀼𑀁 𑀕𑀦𑁆𑀢𑁆𑀯𑀸 𑀏𑀓𑀫𑁂𑀯 𑀯𑀸𑀲𑀁 𑀓𑀧𑁆𑀧𑁂𑀲𑀺 ¶ . 𑀲𑁄𑀴𑀲𑀫𑁂 𑀯𑀲𑁆𑀲𑁂 𑀆𑀴𑀯𑀓𑀬𑀓𑁆𑀔𑀤𑀫𑀦𑀢𑁆𑀣𑀁 𑀅𑀕𑁆𑀕𑀸𑀴𑀯𑀻𑀦𑀕𑀭𑁂 𑀏𑀓𑀯𑀸𑀲𑀁 𑀯𑀲𑀺. 𑀲𑀢𑁆𑀢𑀭𑀲𑀫𑁂 𑀯𑀲𑁆𑀲𑁂 𑀭𑀸𑀚𑀕𑀳𑀫𑁂𑀯 𑀦𑀺𑀯𑀢𑁆𑀢𑀺𑀢𑁆𑀯𑀸 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀅𑀝𑁆𑀞𑀸𑀭𑀲𑀫𑁂 𑀯𑀲𑁆𑀲𑁂 𑀚𑀸𑀮𑀺𑀬𑀧𑀩𑁆𑀩𑀢𑀫𑁂𑀯 𑀦𑀺𑀯𑀢𑁆𑀢𑀺𑀢𑁆𑀯𑀸 𑀯𑀲𑀺. 𑀏𑀓𑀽𑀦𑀯𑀻𑀲𑀢𑀺𑀫𑁂𑀧𑀺 𑀯𑀲𑁆𑀲𑁂 𑀢𑀢𑁆𑀣𑁂𑀯 𑀚𑀸𑀮𑀺𑀬𑀧𑀩𑁆𑀩𑀢𑀫𑁂𑀯 𑀯𑀲𑀺. 𑀯𑀻𑀲𑀢𑀺𑀫𑁂 𑀯𑀲𑁆𑀲𑁂 𑀭𑀸𑀚𑀕𑀳𑀲𑁆𑀲 𑀅𑀯𑀺𑀤𑀽𑀭𑁂 𑀪𑀻𑀲𑀦𑀓𑁂 𑀪𑁂𑀲𑀓𑀮𑀯𑀦𑀲𑀡𑁆𑀟𑁂 𑀯𑀸𑀲𑀁 𑀓𑀧𑁆𑀧𑁂𑀲𑀻’’𑀢𑀺 𑀇𑀫𑀸𑀦𑀺 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀧𑀞𑀫𑀩𑁄𑀥𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑀲𑁆𑀫𑀺𑀁 𑀓𑀸𑀮𑁂 𑀏𑀳𑀺𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸𑀬𑀏𑀯 𑀉𑀧𑀲𑀫𑁆𑀧𑀸𑀤𑁂𑀲𑀻𑀢𑀺 𑀬𑁂𑀪𑀼𑀬𑁆𑀬𑁂𑀦 𑀪𑀕𑀯𑀦𑁆𑀢𑀁𑀬𑁂𑀯 𑀉𑀤𑁆𑀤𑀺𑀲𑁆𑀲 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀁 𑀓𑀢𑁆𑀯𑀸 𑀏𑀳𑀺𑀪𑀺𑀓𑁆𑀔𑀼 𑀪𑀸𑀯𑀫𑀸𑀧𑀦𑁆𑀦𑁂 𑀧𑀼𑀜𑁆𑀜𑀯𑀦𑁆𑀢𑀧𑀼𑀕𑁆𑀕𑀮𑁂𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀜𑁆𑀜𑁂𑀲𑀫𑁆𑀧𑀺 𑀅𑀭𑀺𑀬𑀪𑀸𑀯𑀫𑀦𑀸𑀧𑀦𑁆𑀦𑀸𑀦𑀁 𑀲𑀼𑀤𑀺𑀦𑁆𑀦𑀸𑀤𑀻𑀦𑀁 𑀯𑀸 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑁂 𑀧𑀲𑀻𑀤𑀺𑀢𑁆𑀯𑀸 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀸𑀦𑀁 𑀧𑀼𑀩𑁆𑀩𑁂 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀯𑀕𑁆𑀕𑀼𑀮𑀺𑀪𑀽𑀢𑀧𑀼𑀩𑁆𑀩𑀸𑀦𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀣𑁂𑀭𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀪𑀸𑀯𑀲𑁆𑀲 𑀤𑀺𑀲𑁆𑀲𑀦𑀢𑁄 𑀢𑁂𑀦 𑀯𑀼𑀢𑁆𑀢𑀁 ‘‘𑀪𑀕𑀯𑀸 𑀳𑀺 𑀧𑀞𑀫𑀩𑁄𑀥𑀺𑀬𑀁 𑀏𑀢𑀲𑁆𑀫𑀺𑀁 𑀓𑀸𑀮𑁂 𑀏𑀳𑀺 𑀪𑀺𑀓𑁆𑀔𑀽𑀧𑀲𑀫𑁆𑀧𑀤𑀸𑀬 𑀏𑀯 𑀉𑀧𑀲𑀫𑁆𑀧𑀸𑀤𑁂𑀲𑀻’’𑀢𑀺. 𑀇𑀢𑁄 𑀧𑀭𑁂𑀲𑀼 𑀧𑀦 𑀧𑀜𑁆𑀘𑀯𑀻𑀲𑀢𑀺𑀯𑀲𑁆𑀲𑁂𑀲𑀼 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀓𑀸𑀭𑀺𑀢𑁂 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲𑀸 𑀯𑀸𑀲𑀁 𑀯𑀲𑀺. 𑀯𑀺𑀲𑀸𑀔𑀸𑀬 𑀲𑀢𑁆𑀢𑀯𑀻𑀲𑀢𑀺 𑀓𑁄𑀝𑀺𑀥𑀦𑀧𑀭𑀺𑀘𑁆𑀘𑀸𑀕𑁂𑀦 𑀓𑀸𑀭𑀺𑀢𑁂 𑀧𑀼𑀩𑁆𑀩𑀸𑀭𑀸𑀫𑁂 𑀙𑀩𑁆𑀩𑀲𑁆𑀲𑀸𑀦𑀺 𑀯𑀲𑀺. 𑀤𑁆𑀯𑀺𑀦𑁆𑀦𑀁 𑀓𑀼𑀮𑀸𑀦𑀁 𑀕𑀼𑀡𑀫𑀳𑀢𑁆𑀢𑀁 𑀧𑀝𑀺𑀘𑁆𑀘 𑀲𑀸𑀯𑀢𑁆𑀣𑀺𑀬𑀁 𑀦𑀺𑀲𑁆𑀲𑀸𑀬 𑀧𑀜𑁆𑀘𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀯𑀸𑀲𑀁 𑀯𑀲𑀺. 𑀅𑀦𑁆𑀢𑀺𑀫𑁂 𑀧𑀦 𑀯𑀲𑁆𑀲𑁂 𑀩𑁂𑀴𑀼𑀯𑀕𑀸𑀫𑁂 𑀯𑀲𑀺𑀢𑁆𑀯𑀸 𑀫𑀭𑀡𑀦𑁆𑀢𑀺𑀓𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀺, 𑀆𑀬𑀼𑀲𑀗𑁆𑀔𑀸𑀭𑁄𑀲𑁆𑀲𑀚𑁆𑀚𑀦𑀜𑁆𑀘 𑀢𑀢𑁆𑀣 𑀅𑀓𑀸𑀲𑀺. 𑀇𑀫𑀸𑀦𑀺 𑀇𑀥 𑀦𑀸𑀥𑀺𑀧𑁆𑀧𑁂𑀢𑀸𑀦𑀺, 𑀪𑀕𑀯𑀢𑁄 𑀯𑀲𑁆𑀲𑀓𑁆𑀓𑀫𑀚𑀸𑀦𑀦𑀢𑁆𑀣𑀁𑀬𑁂𑀯 𑀯𑀼𑀢𑁆𑀢𑀦𑁆𑀢𑀺.

𑀲𑀭𑀡𑀕𑀫𑀦𑀽𑀧𑀲𑀫𑁆𑀧𑀤𑀸 𑀦𑀸𑀫 ‘‘𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺’’𑀢𑁆𑀬𑀸𑀤𑀺𑀦𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸𑀘𑀁 𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑁂𑀳𑀺 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀉𑀧𑀲𑀫𑁆𑀧𑀦𑁆𑀦𑁄.

𑀑𑀯𑀸𑀤𑀧𑀝𑀺𑀕𑁆𑀕𑀳𑀡𑀽𑀧𑀲𑀫𑁆𑀧𑀤𑀸 𑀦𑀸𑀫 ‘‘𑀢𑀲𑁆𑀫𑀸 𑀢𑀺𑀳 𑀢𑁂 𑀓𑀲𑁆𑀲𑀧 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑀢𑀺𑀩𑁆𑀩𑀫𑁂𑀯 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀺𑀲𑁆𑀲𑀢𑀺 𑀣𑁂𑀭𑁂𑀲𑀼 𑀦𑀯𑁂𑀲𑀼 𑀫𑀚𑁆𑀛𑀺𑀫𑁂𑀲𑀼 𑀘𑀸𑀢𑀺, 𑀏𑀯𑀜𑁆𑀳𑀺 𑀢𑁂 𑀓𑀲𑁆𑀲𑀧 𑀲𑀺𑀓𑁆𑀔𑀺𑀢𑀩𑁆𑀩𑀁 𑀢𑀲𑁆𑀫𑀸 𑀢𑀺𑀳 𑀢𑁂 𑀓𑀲𑁆𑀲𑀧 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑀬𑀁 𑀓𑀺𑀜𑁆𑀘𑀺 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀺 𑀓𑀼𑀲𑀮𑀽𑀧𑀲𑀜𑁆𑀳𑀺𑀢𑀁 𑀲𑀩𑁆𑀩𑀦𑁆𑀢𑀁 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺𑀓𑀢𑁆𑀯𑀸 𑀲𑀩𑁆𑀩𑀫𑁂𑀯 𑀘𑁂𑀢𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀻𑀢𑀺, 𑀏𑀯𑀜𑁆𑀳𑀺 𑀢𑁂 𑀓𑀲𑁆𑀲𑀧 𑀲𑀺𑀓𑁆𑀔𑀺𑀢𑀩𑁆𑀩𑀁 𑀢𑀲𑁆𑀫𑀸 𑀢𑀺𑀳 𑀢𑁂 𑀓𑀲𑁆𑀲𑀧 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑀲𑀸𑀢𑀲𑀳𑀕𑀢𑀁 𑀫𑁂 𑀓𑀸𑀬𑀕𑀢𑀸 𑀲𑀢𑀺𑀁 𑀦 𑀚𑀳𑀺𑀲𑁆𑀲𑀢𑀻𑀢𑀺 ¶ , 𑀏𑀯𑀜𑁆𑀳𑀺 𑀢𑁂 𑀓𑀲𑁆𑀲𑀧 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀑𑀯𑀸𑀤𑀧𑀝𑀺𑀕𑁆𑀕𑀡𑁂𑀦 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀅𑀦𑀼𑀜𑁆𑀜𑀸𑀢𑀉𑀧𑀲𑀫𑁆𑀧𑀤𑀸 𑀦𑀸𑀫.

𑀧𑀜𑁆𑀳𑀸𑀩𑁆𑀬𑀸𑀓𑀭𑀡𑀽𑀧𑀲𑀫𑁆𑀧𑀤𑀸 𑀦𑀸𑀫 𑀲𑁄𑀧𑀸𑀓𑀲𑁆𑀲 𑀅𑀦𑀼𑀜𑁆𑀜𑀸𑀢𑀉𑀧𑀲𑀫𑁆𑀧𑀤𑀸, 𑀪𑀕𑀯𑀸 𑀓𑀺𑀭 𑀧𑀼𑀩𑁆𑀩𑀸𑀭𑀸𑀫𑁂 𑀅𑀦𑀼𑀘𑀗𑁆𑀓𑀫𑀦𑁆𑀢𑁄 𑀲𑁄𑀧𑀸𑀓𑀲𑀸𑀫𑀡𑁂𑀭𑀁 ‘‘𑀉𑀤𑁆𑀥𑀼𑀫𑀸𑀢𑀓𑀲𑀜𑁆𑀜𑀸𑀢𑀺 𑀯𑀸 𑀲𑁄𑀧𑀸𑀓 𑀭𑀽𑀧𑀲𑀜𑁆𑀜𑀸𑀢𑀺 𑀯𑀸 𑀇𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸 𑀦𑀸𑀦𑀸𑀩𑁆𑀬𑀜𑁆𑀚𑀦𑀸, 𑀉𑀤𑀸𑀳𑀼 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺 𑀤𑀲𑀅𑀲𑀼𑀪𑀦𑀺𑀲𑁆𑀲𑀺𑀢𑁂 𑀧𑀜𑁆𑀳𑁂 𑀧𑀼𑀘𑁆𑀙𑀺. 𑀲𑁄 𑀢𑁂 𑀩𑁆𑀬𑀸𑀓𑀸𑀲𑀺. 𑀪𑀕𑀯𑀸 𑀢𑀲𑁆𑀲 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 ‘‘𑀓𑀢𑀺𑀯𑀲𑁆𑀲𑁄𑀲𑀺 𑀢𑁆𑀯𑀁 𑀲𑁄𑀧𑀸𑀓𑀸’’𑀢𑀺 𑀧𑀼𑀘𑁆𑀙𑀺. ‘‘𑀲𑀢𑁆𑀢𑀯𑀲𑁆𑀲𑁄 𑀅𑀳𑀁 𑀪𑀕𑀯𑀸’’𑀢𑀺, ‘‘𑀲𑁄𑀧𑀸𑀓 𑀢𑁆𑀯𑀁 𑀫𑀫 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀧𑀜𑁆𑀳𑁂 𑀩𑁆𑀬𑀸𑀓𑀸𑀲𑀻’’𑀢𑀺 𑀆𑀭𑀤𑁆𑀥𑀘𑀺𑀢𑁆𑀢𑁄 𑀉𑀧𑀲𑀫𑁆𑀧𑀤𑀁 𑀅𑀦𑀼𑀚𑀸𑀦𑀸𑀢𑀺, 𑀅𑀬𑀁 𑀧𑀜𑁆𑀳𑀸𑀩𑁆𑀬𑀸𑀓𑀭𑀡𑀽𑀧𑀲𑀫𑁆𑀧𑀤𑀸.

𑀅𑀝𑁆𑀞𑀯𑀸𑀘𑀺𑀓𑀽𑀧𑀲𑀫𑁆𑀧𑀤𑀸 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀢𑁄 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑀢𑁄 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦𑀸𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀫𑁆𑀫𑁂𑀳𑀺 𑀉𑀧𑀲𑀫𑁆𑀧𑀤𑀸. 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀽𑀧𑀲𑀫𑁆𑀧𑀤𑀸 𑀦𑀸𑀫 𑀪𑀺𑀓𑁆𑀔𑀽𑀦𑀁 𑀏𑀢𑀭𑀳𑀺 𑀉𑀧𑀲𑀫𑁆𑀧𑀤𑀸, 𑀅𑀬𑀫𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀸, 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀯𑀲𑁂𑀦 𑀲𑀫𑁆𑀪𑀯𑀢𑁄. 𑀓𑀲𑁆𑀫𑀸 𑀳𑁂𑀲 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀫𑀸𑀢𑀺. 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦 𑀉𑀧𑀭𑀺𑀪𑀸𑀯𑀁 𑀲𑀫𑀸𑀧𑀦𑁆𑀦𑁄 𑀧𑀢𑁆𑀢𑁄𑀢𑀺 𑀉𑀧𑀲𑀫𑁆𑀧𑀦𑁆𑀦𑁄, 𑀲𑁂𑀝𑁆𑀞𑀪𑀸𑀯𑀁 𑀧𑀢𑁆𑀢𑁄𑀢𑀺𑀅𑀢𑁆𑀣𑁄 𑀢𑀣𑀸 𑀳𑀺 𑀕𑀺𑀳𑀺𑀪𑀸𑀯𑀢𑁄 𑀲𑀸𑀫𑀡𑁂𑀭𑀪𑀸𑀯𑁄 𑀲𑁂𑀝𑁆𑀞𑁄 𑀦𑀸𑀫, 𑀢𑀢𑁄𑀧𑀺 𑀉𑀧𑀲𑀫𑁆𑀧𑀦𑁆𑀦𑀪𑀸𑀯𑁄𑀬𑁂𑀯 𑀲𑁂𑀝𑁆𑀞𑁄. 𑀢𑀢𑁆𑀣 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦𑀸𑀢𑀺 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀬𑀸𑀬𑁂𑀦 𑀧𑀜𑁆𑀘𑀯𑀕𑁆𑀕𑀓𑀭𑀡𑀻𑀬𑁂 𑀓𑀫𑁆𑀫𑁂 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀓𑀫𑁆𑀫𑀧𑁆𑀧𑀢𑁆𑀢𑀸, 𑀢𑁂𑀲𑀁 𑀆𑀕𑀢𑀢𑁆𑀢𑀸 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑀲𑁆𑀲 𑀆𑀳𑀝𑀢𑁆𑀢𑀸, 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑀜𑁆𑀘 𑀅𑀧𑁆𑀧𑀝𑀺𑀓𑁆𑀓𑁄𑀲𑀦𑀢𑁄 𑀏𑀢𑀲𑁆𑀫𑀺𑀁 𑀓𑀫𑁆𑀫𑁂 𑀲𑀫𑀕𑁆𑀕𑀪𑀸𑀯𑀁 𑀉𑀧𑀕𑀢𑁂𑀦. 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦𑀸𑀢𑀺 𑀢𑀻𑀳𑀺 𑀅𑀦𑀼𑀲𑀸𑀯𑀦𑀸𑀳𑀺 𑀏𑀓𑀸𑀬 𑀘 𑀜𑀢𑁆𑀢𑀺𑀬𑀸 𑀓𑀢𑁆𑀢𑀩𑁆𑀩𑁂𑀦. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀜𑀢𑁆𑀢𑀺 𑀲𑀩𑁆𑀩𑀧𑀞𑀫𑀁 𑀯𑀼𑀢𑁆𑀢𑀸, 𑀢𑀺𑀲𑁆𑀲𑀦𑁆𑀦𑀁 𑀧𑀦 𑀅𑀦𑀼𑀲𑀸𑀯𑀦𑀸𑀦𑀁 𑀅𑀢𑁆𑀣𑀩𑁆𑀬𑀜𑁆𑀚𑀦𑀪𑁂𑀤𑀸𑀪𑀸𑀯𑀢𑁄 𑀅𑀢𑁆𑀣𑀩𑁆𑀬𑀜𑁆𑀚𑀦𑀪𑀺𑀦𑁆𑀦𑀸 𑀜𑀢𑁆𑀢𑀺 𑀢𑀸𑀲𑀁 𑀘𑀢𑀼𑀢𑁆𑀣𑀦𑁆𑀢𑀺 𑀓𑀢𑁆𑀯𑀸 𑀜𑀢𑁆𑀢𑀺𑀘𑀢𑀼𑀢𑁆𑀣𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀫𑁆𑀫𑁂𑀦𑀸 𑀢𑀺 𑀥𑀫𑁆𑀫𑀺𑀓𑁂𑀦 𑀓𑀫𑁆𑀫𑁂𑀦, 𑀯𑀺𑀦𑀬𑀓𑀫𑁆𑀫𑁂𑀦𑀸𑀢𑀺𑀅𑀢𑁆𑀣𑁄. 𑀅𑀓𑀼𑀧𑁆𑀧𑁂𑀦𑀸 𑀢𑀺 𑀯𑀢𑁆𑀣𑀼 𑀜𑀢𑁆𑀢𑀺 𑀅𑀦𑀼𑀲𑀸𑀯𑀦 𑀲𑀻𑀫 𑀧𑀭𑀺𑀲𑀲𑀫𑁆𑀧𑀢𑁆𑀢𑀺 𑀲𑀫𑁆𑀧𑀦𑁆𑀦𑀢𑁆𑀢𑀸 𑀅𑀓𑁄𑀧𑁂𑀢𑀩𑁆𑀩𑀢𑀁 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀢𑀜𑁆𑀘 𑀉𑀧𑀕𑀢𑁂𑀦. 𑀞𑀸𑀦𑀸𑀭𑀳𑁂𑀦𑀸 𑀢𑀺 𑀓𑀸𑀭𑀡𑀸𑀭𑀳𑁂𑀦, 𑀲𑀢𑁆𑀣𑀼𑀲𑀸𑀲𑀦𑀸𑀭𑀳𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀳𑀺 𑀓𑀸𑀭𑀡𑁂𑀳𑀺 𑀲𑁂𑀝𑁆𑀞𑀪𑀸𑀯𑀫𑀸𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀯𑀲𑁂𑀦 𑀲𑀫𑁆𑀪𑀯𑀢𑁄 𑀢𑀺 𑀯𑀢𑁆𑀣𑀼𑀲𑀫𑁆𑀧𑀢𑁆𑀢𑀺 𑀜𑀢𑁆𑀢𑀺𑀲𑀫𑁆𑀧𑀢𑁆𑀢𑀺 𑀅𑀦𑀼𑀲𑀸𑀯𑀦𑀲𑀫𑁆𑀧𑀢𑁆𑀢𑀺𑀲𑀻𑀫𑀲𑀫𑁆𑀧𑀢𑁆𑀢𑀺𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀯𑀲𑁂𑀦 ¶ 𑀧𑀜𑁆𑀘𑀳𑀺 𑀲𑀫𑁆𑀧𑀢𑁆𑀢𑀻𑀳𑀺 𑀉𑀧𑀲𑀫𑁆𑀧𑀤𑀓𑀫𑁆𑀫𑀲𑁆𑀲 𑀲𑀺𑀚𑁆𑀛𑀦𑀢𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀯𑀢𑁆𑀣𑀼 𑀲𑀫𑁆𑀧𑀢𑁆𑀢𑀺𑀦𑀸𑀫 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀪𑀸𑀯𑁄 𑀇𑀤𑀸𑀦𑀺 𑀧𑀼𑀭𑀺𑀲𑀢𑁆𑀢𑀪𑀸𑀯𑁄 𑀘. 𑀉𑀦𑁆𑀦𑀯𑀻𑀲𑀢𑀺𑀯𑀲𑁆𑀲𑀁, 𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑀧𑀼𑀩𑁆𑀩𑀁, 𑀧𑀡𑁆𑀟𑀓𑁄, 𑀣𑁂𑀬𑁆𑀬𑀲𑀁𑀯𑀸𑀲𑀓𑁄, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄, 𑀢𑀺𑀭𑀘𑁆𑀙𑀸𑀦𑀕𑀢𑁄, 𑀫𑀸𑀢𑀼𑀖𑀸𑀢𑀓𑁄, 𑀧𑀺𑀢𑀼𑀖𑀸𑀢𑀓𑁄, 𑀅𑀭𑀳𑀦𑁆𑀢𑀖𑀸𑀢𑀓𑁄, 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄, 𑀲𑀗𑁆𑀖𑀪𑁂𑀤𑀓𑁄, 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄, 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄, 𑀢𑀺 𑀇𑀫𑁂 𑀢𑁂𑀭𑀲 𑀧𑀼𑀕𑁆𑀕𑀮𑀸 𑀉𑀧𑀲𑀫𑁆𑀧𑀤𑀸𑀬 𑀅𑀯𑀢𑁆𑀣𑀼. 𑀢𑀢𑁆𑀣 𑀊𑀦𑀯𑀻𑀲𑀢𑀺𑀯𑀲𑁆𑀲𑀦𑁆𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑁂𑀧𑀺 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑀢𑁄 𑀧𑀝𑁆𑀞𑀸𑀬 𑀏𑀓𑀽𑀦𑀯𑀻𑀲𑀧𑀭𑀺𑀧𑀼𑀡𑁆𑀡𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀉𑀧𑀲𑀫𑁆𑀧𑀤𑀸𑀬 𑀯𑀢𑁆𑀣𑀼, 𑀢𑀢𑁄 𑀑𑀭𑀁 𑀦 𑀉𑀧𑀲𑀫𑁆𑀧𑀤𑀸𑀬 𑀯𑀢𑁆𑀣𑀼 𑀢𑀣𑁄 𑀳𑀺 𑀏𑀓𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀳𑁂𑀫𑀦𑁆𑀢𑀕𑀺𑀫𑁆𑀳𑀯𑀲𑁆𑀲𑀯𑀲𑁂𑀦 𑀢𑀺𑀡𑁆𑀡𑀁 𑀉𑀢𑀽𑀦𑀁 𑀲𑀫𑁆𑀪𑀯𑀢𑁆𑀢𑀸 𑀢𑀬𑁄 𑀉𑀢𑀽 𑀳𑁄𑀦𑁆𑀢𑀺, 𑀳𑁄𑀦𑁆𑀢𑀺 𑀘𑁂𑀢𑁆𑀣.

‘‘𑀓𑀢𑁆𑀢𑀺𑀓𑀦𑁆𑀢𑀺𑀓𑀧𑀓𑁆𑀔𑀫𑁆𑀳𑀸, 𑀳𑁂𑀫𑀁 𑀨𑀕𑁆𑀕𑀼𑀡𑀧𑀼𑀡𑁆𑀡𑀫𑀸;

𑀢𑀲𑁆𑀲𑀦𑁆𑀢𑀺 𑀓𑀧𑀓𑁆𑀔𑀫𑁆𑀳𑀸, 𑀕𑀺𑀫𑁆𑀳𑀁 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸;

𑀯𑀲𑁆𑀲𑀓𑀸𑀮𑀁 𑀢𑀢𑁄 𑀲𑁂𑀲𑀁, 𑀘𑀢𑀼𑀯𑀻𑀲𑀢𑀽𑀧𑁄𑀲𑀣𑀸.

𑀘𑀸𑀢𑀼𑀤𑁆𑀤𑀲𑀻 𑀙 𑀏𑀢𑁂𑀲𑀼, 𑀧𑀓𑁆𑀔𑀸 𑀢𑀢𑀺𑀬𑀲𑀢𑁆𑀢𑀫𑀸;

𑀲𑁂𑀲𑀸 𑀧𑀦𑁆𑀦𑀭𑀲𑀻 𑀜𑁂𑀬𑁆𑀬𑀸, 𑀅𑀝𑁆𑀞𑀸𑀭𑀲 𑀉𑀧𑁄𑀲𑀣𑀸𑀢𑀺’’.

𑀏𑀢𑁆𑀣 𑀘 𑀓𑀢𑁆𑀢𑀺𑀓𑀲𑁆𑀲 𑀓𑀸𑀴𑀧𑀓𑁆𑀔𑀧𑀸𑀝𑀺𑀧𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀨𑀕𑁆𑀕𑀼𑀡𑀧𑀼𑀡𑁆𑀡𑀫𑀸 𑀘𑀢𑁆𑀢𑀸𑀭𑁄 𑀫𑀸𑀲𑀸 𑀳𑁂𑀫𑀉𑀢𑀼 𑀦𑀸𑀫. 𑀨𑀕𑁆𑀕𑀼𑀡𑀲𑁆𑀲 𑀓𑀸𑀴𑀧𑀓𑁆𑀔𑀧𑀸𑀝𑀺𑀧𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀆𑀲𑀸𑀴𑁆𑀳𑀻𑀧𑀼𑀡𑁆𑀡𑀫𑀸 𑀘𑀢𑁆𑀢𑀸𑀭𑁄 𑀫𑀸𑀲𑀸 𑀕𑀺𑀫𑁆𑀳𑀉𑀢𑀼 𑀦𑀸𑀫. 𑀅𑀲𑀸𑀴𑁆𑀳𑀓𑀸𑀴𑀧𑀓𑁆𑀔𑀧𑀸𑀝𑀺𑀧𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀧𑀭𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸 𑀘𑀢𑁆𑀢𑀸𑀭𑁄 𑀫𑀸𑀲𑀸 𑀯𑀲𑁆𑀲𑀉𑀢𑀼 𑀦𑀸𑀫. 𑀏𑀯𑀁 𑀏𑀓𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀢𑀬𑁄 𑀉𑀢𑀽 𑀳𑁄𑀦𑁆𑀢𑀺. 𑀢𑀢𑁆𑀣 𑀏𑀓𑀲𑁆𑀫𑀺𑀁 𑀉𑀢𑀼𑀫𑁆𑀳𑀺 𑀧𑀓𑁆𑀔𑀲𑁆𑀲 𑀢𑀢𑀺𑀬𑀲𑀢𑁆𑀢𑀫𑁂𑀲𑀼 𑀤𑁆𑀯𑁂 𑀤𑁆𑀯𑁂 𑀓𑀢𑁆𑀯𑀸 𑀙 𑀘𑀢𑀼𑀤𑁆𑀤𑀲𑀺𑀓𑀸, 𑀧𑀞𑀫𑀤𑀼𑀢𑀺𑀬𑀘𑀢𑀼𑀢𑁆𑀣𑀧𑀜𑁆𑀘𑀫𑀙𑀝𑁆𑀞𑀅𑀝𑁆𑀞𑀫𑁂𑀲𑀼 𑀙 𑀙 𑀓𑀢𑁆𑀯𑀸 𑀅𑀝𑁆𑀞𑀸𑀭𑀲 𑀧𑀦𑁆𑀦𑀭𑀲𑀺𑀓𑀸𑀢𑀺 𑀏𑀯𑀁 𑀏𑀓𑀲𑀁𑀯𑀘𑁆𑀙𑀭𑁂 𑀘𑀢𑀼𑀯𑀻𑀲𑀢𑀺 𑀉𑀧𑁄𑀲𑀣𑀸 𑀳𑁄𑀦𑁆𑀢𑀺. 𑀇𑀫𑁂𑀲𑀼 𑀘𑀢𑀼𑀯𑀻𑀲𑀢𑀼𑀧𑁄𑀲𑀣𑁂𑀲𑀼 𑀘𑀸𑀢𑀼𑀤𑁆𑀤𑀲𑀺𑀬𑀸 𑀏𑀓𑀽𑀦𑀢𑀺𑀁𑀲 𑀤𑀺𑀯𑀲𑀸 𑀳𑁄𑀦𑁆𑀢𑀻𑀢𑀺 𑀓𑀢𑁆𑀯𑀸 𑀏𑀓𑀲𑀁𑀯𑀘𑁆𑀙𑀭𑁂 𑀙 𑀊𑀦𑀸 𑀤𑀺𑀯𑀲𑀸 𑀳𑁄𑀦𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀏𑀓𑀽𑀦𑀯𑀻𑀲𑀢𑀺𑀫𑁂 𑀯𑀲𑁆𑀲𑁂 𑀙𑀫𑀸𑀲𑀸𑀥𑀺𑀓𑀸𑀦𑀺 𑀅𑀝𑁆𑀞𑀸𑀭𑀲𑀯𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀫𑀺𑀁 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀓𑀸𑀮𑁂 𑀤𑀲𑀫𑀸𑀲𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀘𑀢𑁆𑀢𑀸𑀭𑀺 𑀫𑀸𑀲𑀸𑀥𑀺𑀓𑀸𑀦𑀺 𑀏𑀓𑀽𑀦𑀯𑀻𑀲𑀯𑀲𑁆𑀲𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺. 𑀭𑀸𑀚𑀸𑀦𑁄 𑀧𑀦 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀫𑀸𑀲𑀁 𑀆𑀓𑀟𑁆𑀠𑀦𑁆𑀢𑀺 ¶ , 𑀤𑀺𑀯𑀲𑁂𑀦 𑀲𑀳 𑀫𑀸𑀲𑀫𑁆𑀧𑀺, 𑀢𑀲𑁆𑀫𑀸 𑀅𑀝𑁆𑀞𑀸𑀭𑀲𑀯𑀲𑁆𑀲𑁂 𑀬𑁂𑀯 𑀙 𑀫𑀸𑀲𑀸𑀥𑀺𑀓𑀸𑀦𑀺 𑀳𑁄𑀦𑁆𑀢𑀺. 𑀢𑀁 𑀳𑁂𑀝𑁆𑀞𑀸𑀘𑀢𑀼𑀫𑀸𑀲𑀸𑀥𑀺𑀓 𑀏𑀓𑀽𑀦𑀯𑀻𑀲𑀢𑀺𑀫𑁂 𑀯𑀲𑁆𑀲𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀫𑀸𑀲𑀸𑀥𑀺𑀓𑀸𑀦𑀺 𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀲𑀩𑁆𑀩𑀲𑁄 𑀧𑀭𑀺𑀧𑀼𑀡𑁆𑀡𑀸𑀦𑀺 𑀳𑁄𑀦𑁆𑀢𑀺. 𑀏𑀯𑀁 𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲𑀢𑁄 𑀧𑀝𑁆𑀞𑀸𑀬 𑀕𑀩𑁆𑀪𑀯𑀻𑀲𑁄 𑀉𑀧𑀲𑀫𑁆𑀧𑀤𑀸𑀬 𑀯𑀢𑁆𑀣𑀽𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀸𑀦𑀺 𑀧𑀼𑀭𑀺𑀲𑀢𑁆𑀢𑀪𑀸𑀯𑁄 𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀅𑀪𑀸𑀯𑀢𑁄 𑀧𑀼𑀭𑀺𑀲𑀧𑀼𑀕𑁆𑀕𑀮𑁄𑀯 𑀇𑀤𑀸𑀦𑀺 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑁂𑀢𑁄 𑀢𑀣𑀸 𑀳𑀺 𑀫𑀸𑀢𑀼𑀕𑀸𑀫𑀲𑁆𑀲 𑀧𑀩𑁆𑀩𑀚𑀺𑀢𑀢𑁆𑀣𑀸 𑀧𑀜𑁆𑀘𑀯𑀲𑁆𑀲𑀲𑀢𑀸𑀦𑀺 𑀲𑀤𑁆𑀥𑀫𑁆𑀫𑁄 𑀢𑀺𑀝𑁆𑀞𑁂𑀬𑁆𑀬, 𑀧𑀜𑁆𑀜𑀢𑁆𑀢𑀢𑁆𑀢𑀸 𑀧𑀦 𑀅𑀧𑀭𑀸𑀦𑀺 𑀧𑀜𑁆𑀘𑀯𑀲𑁆𑀲𑀲𑀢𑀸𑀦𑀺 𑀞𑀲𑁆𑀲𑀢𑀻𑀢𑀺 𑀏𑀯𑀁 𑀯𑀲𑁆𑀲𑀲𑀳𑀲𑁆𑀲𑀫𑁂𑀯 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀲𑀤𑁆𑀥𑀫𑁆𑀫𑀲𑁆𑀲 𑀧𑀢𑀺𑀝𑁆𑀞𑀺𑀢𑀪𑀸𑀯𑁄 𑀯𑀼𑀢𑁆𑀢𑁄. 𑀫𑀸𑀢𑀼𑀕𑀸𑀫𑀸 𑀘 𑀦𑀸𑀫 𑀤𑀼𑀧𑁆𑀧𑀜𑁆𑀜𑀸 𑀢𑀺𑀩𑁆𑀩𑀓𑀺𑀮𑁂𑀲𑀸 𑀮𑀸𑀫𑀓𑀸 𑀘. 𑀪𑀕𑀯𑀢𑀸 𑀘 𑀧𑀞𑀫𑀩𑁄𑀥𑀺𑀬𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬𑀫𑁂𑀯 𑀫𑀳𑀸𑀧𑀚𑀸𑀧𑀢𑀺𑀬𑀸 𑀕𑁄𑀢𑀫𑀺𑀬𑀸 𑀅𑀝𑁆𑀞𑀕𑀭𑀼𑀥𑀫𑁆𑀫𑀧𑀝𑀺𑀕𑁆𑀕𑀳𑀡𑁂𑀦 𑀉𑀧𑀲𑀫𑁆𑀧𑀤𑀢𑁆𑀢𑁂 𑀅𑀦𑀼𑀜𑁆𑀜𑀸𑀢𑁂𑀧𑀺 𑀲𑀸𑀲𑀦𑀲𑁆𑀲 𑀅𑀘𑀺𑀭𑀝𑁆𑀞𑀺𑀢𑀺𑀓𑀪𑀸𑀯𑁄 𑀯𑀼𑀢𑁆𑀢𑁄. 𑀤𑀼𑀧𑁆𑀧𑀜𑁆𑀜𑀢𑁆𑀢𑀸 𑀇𑀢𑁆𑀣𑀺𑀬𑁄 𑀲𑀸𑀲𑀦𑁂 𑀘𑀺𑀭𑀁 𑀦 𑀢𑀺𑀝𑁆𑀞𑀦𑁆𑀢𑀺, 𑀢𑀺𑀩𑁆𑀩𑀓𑀺𑀮𑁂𑀲𑀢𑁆𑀢𑀸 𑀬𑀣𑀸 𑀧𑀜𑁆𑀜𑀢𑁆𑀢 𑀲𑀺𑀓𑁆𑀔𑀸𑀧𑀤𑀸𑀦𑀼𑀭𑀽𑀧𑀁 𑀲𑀁𑀯𑀭𑀫𑁆𑀧𑀺 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀮𑀸𑀫𑀓𑀢𑁆𑀢𑀸𑀧𑀺 𑀢𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀁 𑀮𑀪𑀦𑁆𑀢𑀸𑀧𑀺 𑀩𑁆𑀭𑀸𑀳𑁆𑀫𑀧𑀸𑀭𑀺𑀲𑀚𑁆𑀚𑀁 𑀦𑀸𑀢𑀺𑀓𑁆𑀓𑀫𑀦𑁆𑀢𑀺, 𑀏𑀯𑀁 𑀪𑀺𑀓𑁆𑀔𑀼𑀦𑀺𑀬𑀸 𑀅𑀪𑀸𑀯𑀢𑁄 𑀇𑀤𑀸𑀦𑀺 𑀧𑀼𑀭𑀺𑀲𑀧𑀼𑀕𑁆𑀕𑀮𑁄𑀢𑀺 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀞𑀢𑁆𑀯𑀸 𑀘𑀢𑁆𑀢𑀸𑀭𑀺 𑀔𑁂𑀢𑁆𑀢𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺 𑀢𑀣𑀸 𑀳𑀺 𑀫𑀸𑀢𑀼𑀕𑀸𑀫𑀲𑁆𑀲 𑀧𑀩𑁆𑀩𑀚𑀺𑀢𑀢𑁆𑀢𑀸 𑀯𑀲𑁆𑀲𑀲𑀳𑀲𑁆𑀲𑀫𑁂𑀯 𑀞𑀲𑁆𑀲𑀢𑀻𑀢𑀺 𑀘𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀔𑀻𑀡𑀸𑀲𑀯𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀢𑁄 𑀧𑀭𑀁 𑀉𑀢𑁆𑀢𑀭𑀺𑀧𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑀯𑀲𑁂𑀦 𑀯𑀲𑁆𑀲𑀲𑀳𑀲𑁆𑀲𑀁, 𑀅𑀦𑀸𑀕𑀸𑀫𑀺𑀯𑀲𑁂𑀦 𑀯𑀲𑁆𑀲𑀲𑀳𑀲𑁆𑀲𑀁, 𑀲𑀓𑀤𑀸𑀕𑀸𑀫𑀺𑀯𑀲𑁂𑀦 𑀯𑀲𑁆𑀲𑀲𑀳𑀲𑁆𑀲𑀁, 𑀲𑁄𑀢𑀸𑀧𑀦𑁆𑀦𑀯𑀲𑁂𑀦 𑀯𑀲𑁆𑀲𑀲𑀳𑀲𑁆𑀲𑀦𑁆𑀢𑀺 𑀏𑀯𑀁 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑁄 𑀢𑀺𑀝𑁆𑀞𑀢𑀺. 𑀧𑀭𑀺𑀬𑀢𑁆𑀢𑀺𑀲𑀤𑁆𑀥𑀫𑁆𑀫𑁄𑀧𑀺 𑀢𑀸𑀦𑀺𑀬𑁂𑀯 𑀦 𑀳𑀺 𑀧𑀭𑀺𑀬𑀢𑁆𑀢𑀺𑀬𑀸 𑀅𑀲𑀢𑀺 𑀧𑀝𑀺𑀯𑁂𑀥𑁄 𑀅𑀢𑁆𑀣𑀺. 𑀦𑀸𑀧𑀺 𑀧𑀭𑀺𑀬𑀢𑁆𑀢𑀺𑀬𑀸 𑀲𑀢𑀺 𑀧𑀝𑀺𑀯𑁂𑀥𑁄 𑀦 𑀳𑁄𑀢𑀺. 𑀮𑀺𑀗𑁆𑀕𑀁 𑀧𑀦 𑀧𑀭𑀺𑀬𑀢𑁆𑀢𑀺𑀬𑀸 𑀅𑀦𑁆𑀢𑀭𑀳𑀺𑀢𑀸𑀬 𑀘𑀺𑀭𑀁 𑀧𑀯𑀢𑁆𑀢𑀺𑀲𑁆𑀲𑀢𑀺, 𑀇𑀤𑀁 𑀔𑀦𑁆𑀥𑀓𑀪𑀸𑀡𑀓𑀸𑀦𑀁 𑀫𑀢𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 𑀧𑀦 𑀏𑀯𑀁 𑀯𑀼𑀢𑁆𑀢𑀁 ‘‘𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁂𑀳𑀺 𑀯𑀲𑁆𑀲𑀲𑀳𑀲𑁆𑀲𑀁 𑀅𑀝𑁆𑀞𑀸𑀲𑀺, 𑀙𑀴𑀪𑀺𑀜𑁆𑀜𑁂𑀳𑀺 𑀯𑀲𑁆𑀲𑀲𑀳𑀲𑁆𑀲𑀁, 𑀢𑁂𑀯𑀺𑀚𑁆𑀚𑁂𑀳𑀺 𑀯𑀲𑁆𑀲𑀲𑀳𑀲𑁆𑀲𑀁, 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁂𑀳𑀺 𑀯𑀲𑁆𑀲𑀲𑀳𑀲𑁆𑀲𑀁, 𑀧𑀸𑀢𑀺𑀫𑁄𑀓𑁆𑀔𑁂𑀦 𑀯𑀲𑁆𑀲𑀲𑀳𑀲𑁆𑀲𑀁 𑀅𑀝𑁆𑀞𑀸𑀲𑀻’’𑀢𑀺. 𑀇𑀤𑀫𑁆𑀧𑀺 𑀤𑀻𑀖𑀪𑀸𑀡𑀓𑀢𑁆𑀣𑁂𑀭𑀸𑀦𑀁 𑀫𑀢𑁂𑀦 𑀯𑀼𑀢𑁆𑀢𑀁. 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀯𑀲𑁆𑀲𑀲𑀳𑀲𑁆𑀲𑀫𑁂𑀯 𑀧𑀝𑀺𑀲𑀫𑁆𑀪𑀺𑀤𑀸 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑀢𑁄 𑀧𑀭𑀁 𑀙 𑀅𑀪𑀺𑀜𑁆𑀜𑀸 ¶ , 𑀢𑀢𑁄 𑀢𑀸𑀧𑀺 𑀅𑀲𑀓𑁆𑀓𑁄𑀦𑁆𑀢𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀕𑀘𑁆𑀙𑀦𑁆𑀢𑁂𑀓𑀸𑀮𑁂 𑀢𑀸𑀦𑀺𑀧𑀺 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸 𑀳𑁄𑀦𑁆𑀢𑀺. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀅𑀦𑀸𑀕𑀸𑀫𑀺𑀦𑁄 𑀲𑀓𑀤𑀸𑀕𑀺𑀫𑀺𑀦𑁄, 𑀲𑁄𑀢𑀸𑀧𑀦𑁆𑀦𑀸𑀢𑀺 𑀯𑀼𑀢𑁆𑀢𑀁. 𑀇𑀤𑀫𑁆𑀧𑀺 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂 𑀯𑀼𑀢𑁆𑀢𑀁. 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 𑀧𑀦 𑀧𑀞𑀫𑀩𑁄𑀥𑀺𑀬𑀁 𑀪𑀺𑀓𑁆𑀔𑀽 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀸. 𑀅𑀣 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀧𑀝𑀺𑀲𑀫𑁆𑀪𑀺𑀤𑀸 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀔𑀺𑀁𑀲𑀼, 𑀙𑀴𑀪𑀺𑀜𑁆𑀜𑀸 𑀅𑀳𑁂𑀲𑀼𑀁. 𑀢𑀢𑁄 𑀙𑀧𑀺 𑀅𑀪𑀺𑀜𑁆𑀜𑀸 𑀧𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀧𑀸𑀧𑀼𑀡𑀺𑀁𑀲𑀼. 𑀇𑀤𑀸𑀦𑀺 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀧𑀸𑀧𑀼𑀡𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀆𑀲𑀯𑀓𑁆𑀔𑀬𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺, 𑀢𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑀸 𑀅𑀦𑀸𑀕𑀸𑀫𑀺𑀨𑀮𑀁, 𑀢𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑀸 𑀲𑀓𑀤𑀸𑀕𑀸𑀫𑀺𑀨𑀮𑀁, 𑀢𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁. 𑀕𑀘𑁆𑀙𑀦𑁆𑀢𑁂𑀓𑀸𑀮𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑀫𑁆𑀧𑀺 𑀧𑀢𑁆𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀘𑁂 𑀢𑁂 𑀆𑀘𑀭𑀺𑀬𑀸 𑀪𑀺𑀦𑁆𑀦𑀯𑀸𑀤𑀸, 𑀢𑀲𑁆𑀫𑀸 𑀢𑁂𑀲𑀁 𑀆𑀘𑀭𑀺𑀬𑀸𑀦𑀁 𑀪𑀸𑀡𑀓𑀸𑀦𑀁 𑀫𑀢𑀫𑁂𑀯 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁂𑀦 𑀢𑀢𑁆𑀣 𑀢𑀢𑁆𑀣 𑀮𑀺𑀔𑀺𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀆𑀘𑀭𑀺𑀬𑀲𑁆𑀲𑁂𑀯 𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑀧𑁆𑀧𑀲𑀗𑁆𑀕𑁄 𑀲𑀺𑀬𑀸 𑀆𑀘𑀭𑀺𑀬𑀩𑀼𑀤𑁆𑀥𑀖𑁄𑀲𑁂𑀦𑁂𑀯 𑀳𑀺 𑀲𑀻𑀳𑀴𑀪𑀸𑀲𑀁 𑀅𑀧𑀦𑁂𑀢𑁆𑀯𑀸 𑀫𑀸𑀕𑀥𑀪𑀸𑀲𑀸𑀬 𑀲𑀸𑀝𑁆𑀞𑀓𑀣𑀁 𑀩𑀼𑀤𑁆𑀥𑀯𑀘𑀦𑀁 𑀮𑀺𑀔𑀺𑀢𑀁, 𑀦 𑀅𑀜𑁆𑀜𑁂𑀦 𑀆𑀘𑀭𑀺𑀬𑁂𑀦 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀯𑀘𑀦𑀫𑁂𑀯 𑀧𑀫𑀸𑀡𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀦𑀦𑀼 𑀘𑀢𑁆𑀢𑀸𑀭𑁄𑀧𑀺 𑀦𑀺𑀓𑀸𑀬𑀝𑁆𑀞𑀓𑀣𑀸𑀲𑀗𑁆𑀕𑀻𑀢𑀺𑀁 𑀆𑀭𑀽𑀴𑁆𑀳𑀸, 𑀅𑀣 𑀓𑀲𑁆𑀫𑀸 𑀏𑀯𑀁 𑀪𑀺𑀦𑁆𑀦𑀸𑀢𑀺. 𑀲𑀘𑁆𑀘𑀁, 𑀢𑀣𑀸𑀧𑀺 𑀓𑁂𑀲𑀜𑁆𑀘𑀺 𑀣𑁂𑀭𑀸𑀦𑀁 𑀯𑀸𑀤𑀧𑁆𑀧𑀓𑀸𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀦 𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑀸𑀦𑀁, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀯𑀘𑀦𑀫𑁂𑀯 𑀧𑀫𑀸𑀡𑀦𑁆𑀢𑀺 𑀯𑀼𑀢𑁆𑀢𑀁.

𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑀧𑀼𑀩𑁆𑀩𑀦𑁆𑀢𑀺 𑀧𑀸𑀭𑀸𑀚𑀺𑀓𑀪𑀺𑀓𑁆𑀔𑀼, 𑀲𑁄 𑀅𑀪𑀩𑁆𑀩𑁄 𑀲𑀸𑀲𑀦𑁂 𑀉𑀧𑀲𑀫𑁆𑀧𑀤𑀓𑀫𑁆𑀫𑀲𑁆𑀲 𑀮𑀤𑁆𑀥𑀼𑀁.

𑀧𑀡𑁆𑀟𑀓𑁄𑀢𑀺𑀘𑁂𑀢𑁆𑀢 𑀧𑀜𑁆𑀘𑀯𑀺𑀥𑁄 𑀳𑁄𑀢𑀺 𑀆𑀲𑀺𑀢𑁆𑀢𑀧𑀡𑁆𑀟𑀓𑁄, 𑀉𑀲𑁆𑀲𑀽𑀬𑀧𑀡𑁆𑀟𑀓𑁄, 𑀑𑀧𑀓𑁆𑀓𑀫𑀺𑀓𑀧𑀡𑁆𑀟𑀓𑁄, 𑀦𑀧𑀼𑀁𑀲𑀓𑁄, 𑀧𑀓𑁆𑀔𑀧𑀡𑁆𑀟𑀓𑁄𑀢𑀺. 𑀢𑀢𑁆𑀣 𑀬𑀲𑁆𑀲 𑀧𑀭𑁂𑀲𑀁 𑀅𑀗𑁆𑀕𑀚𑀸𑀢𑀁 𑀫𑀼𑀔𑁂𑀦 𑀕𑀡𑁆𑀳𑀺𑀢𑁆𑀯𑀸 𑀅𑀲𑀼𑀘𑀺𑀦𑀸 𑀆𑀲𑀺𑀢𑁆𑀢𑀲𑁆𑀲 𑀧𑀭𑀺𑀴𑀸𑀳𑁄 𑀯𑀽𑀧𑀲𑀫𑀢𑀺, 𑀅𑀬𑀁 𑀆𑀲𑀺𑀢𑁆𑀢𑀧𑀡𑁆𑀟𑀓𑁄 𑀦𑀸𑀫. 𑀬𑀲𑁆𑀲 𑀧𑀭𑁂𑀲𑀁 𑀅𑀚𑁆𑀛𑀸𑀘𑀸𑀭𑀁 𑀧𑀲𑁆𑀲𑀢𑁄 𑀉𑀲𑁆𑀲𑀽𑀬𑀸𑀬 𑀉𑀧𑁆𑀧𑀦𑁆𑀦𑀸𑀬 𑀧𑀭𑀺𑀴𑀸𑀳𑁄 𑀯𑀽𑀧𑀲𑀫𑀢𑀺, 𑀅𑀬𑀁 𑀉𑀲𑁆𑀲𑀽𑀬𑀧𑀡𑁆𑀟𑀓𑁄 𑀦𑀸𑀫. 𑀬𑀲𑁆𑀲 𑀉𑀧𑀓𑁆𑀓𑀫𑁂𑀦 𑀩𑀻𑀚𑀸𑀦𑀺 𑀅𑀧𑀦𑀻𑀢𑀸𑀦𑀺 𑀳𑁄𑀦𑁆𑀢𑀺, 𑀅𑀬𑀁 𑀑𑀧𑀓𑁆𑀓𑀫𑀺𑀓𑀧𑀡𑁆𑀟𑀓𑁄 𑀦𑀸𑀫. 𑀬𑁄 𑀧𑀦 𑀧𑀝𑀺𑀲𑀦𑁆𑀥𑀺𑀬𑀁 𑀬𑁂𑀯 𑀅𑀪𑀸𑀯𑀓𑁄 𑀉𑀧𑁆𑀧𑀦𑁆𑀦𑁄 𑀳𑁄𑀢𑀺, 𑀅𑀬𑀁 𑀦𑀧𑀼𑀁𑀲𑀓𑁄 𑀦𑀸𑀫. 𑀏𑀓𑀘𑁆𑀘𑁄 𑀧𑀦 𑀅𑀓𑀼𑀲𑀮𑀯𑀺𑀧𑀸𑀓𑀸𑀦𑀼𑀪𑀸𑀯𑁂𑀦 𑀓𑀸𑀴𑀧𑀓𑁆𑀔𑁂 𑀧𑀡𑁆𑀟𑀓𑁄 𑀳𑁄𑀢𑀺, 𑀚𑀼𑀡𑁆𑀳𑀧𑀓𑁆𑀔𑁂 𑀧𑀦𑀲𑁆𑀲 𑀧𑀭𑀺𑀴𑀸𑀳𑁄𑀯𑀽𑀧𑀲𑀫𑀢𑀺 ¶ , 𑀅𑀬𑀁 𑀧𑀓𑁆𑀔𑀧𑀡𑁆𑀟𑀓𑁄 𑀦𑀸𑀫, 𑀓𑁂𑀘𑀺 𑀧𑀦 𑀬𑁄 𑀓𑀸𑀴𑀧𑀓𑁆𑀔𑁂 𑀇𑀢𑁆𑀣𑀻 𑀳𑁄𑀢𑀺, 𑀚𑀼𑀡𑁆𑀳𑀧𑀓𑁆𑀔𑁂 𑀧𑀼𑀭𑀺𑀲𑁄, 𑀅𑀬𑀁 𑀧𑀓𑁆𑀔𑀧𑀡𑁆𑀟𑀓𑁄𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀫𑁂𑀯. 𑀏𑀢𑁂𑀲𑀼 𑀆𑀲𑀺𑀢𑁆𑀢𑀧𑀡𑁆𑀟𑀓𑀲𑁆𑀲 𑀘 𑀉𑀲𑁆𑀲𑀽𑀬𑀧𑀡𑁆𑀟𑀓𑀲𑁆𑀲 𑀘 𑀧𑀩𑁆𑀩𑀚𑁆𑀚𑀸 𑀦 𑀯𑀸𑀭𑀺𑀢𑀸. 𑀑𑀧𑀓𑁆𑀓𑀫𑀺𑀓𑀦𑀧𑀼𑀁𑀲𑀓𑀧𑀓𑁆𑀔𑀧𑀡𑁆𑀟𑀓𑀸𑀦𑀁 𑀧𑀦 𑀯𑀸𑀭𑀺𑀢𑀸. 𑀢𑁂𑀲𑀼𑀧𑀺 𑀧𑀓𑁆𑀔𑀧𑀡𑁆𑀟𑀓𑀲𑁆𑀲 𑀬𑀲𑁆𑀫𑀺𑀁 𑀧𑀓𑁆𑀔𑁂 𑀧𑀡𑁆𑀟𑀓𑁄 𑀳𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀧𑀩𑁆𑀩𑀚𑁆𑀚𑀸 𑀯𑀸𑀭𑀺𑀢𑀸. 𑀏𑀢𑁆𑀣 𑀘 𑀅𑀧𑀡𑁆𑀟𑀓𑀧𑀓𑁆𑀔𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀡𑁆𑀟𑀓𑀧𑀓𑁆𑀔𑁂 𑀦𑀸𑀲𑁂𑀢𑀩𑁆𑀩𑁄𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀅𑀧𑀡𑁆𑀟𑀓𑀧𑀓𑁆𑀔𑁂𑀧𑀩𑁆𑀩𑀚𑀺𑀢𑁄 𑀲𑀢𑁄 𑀓𑀺𑀮𑁂𑀲𑀓𑁆𑀔𑀬𑀁 𑀧𑀸𑀧𑀼𑀡𑀸𑀢𑀺, 𑀦 𑀦𑀸𑀲𑁂𑀢𑀩𑁆𑀩𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀫𑁂𑀯, 𑀧𑀡𑁆𑀟𑀓𑀲𑁆𑀲 𑀓𑀺𑀮𑁂𑀲𑀓𑁆𑀔𑀬𑀸 𑀲𑀫𑁆𑀪𑀯𑀢𑁄 𑀔𑀻𑀡𑀓𑀺𑀮𑁂𑀲𑀲𑁆𑀲 𑀘 𑀧𑀡𑁆𑀟𑀓𑀪𑀸𑀯𑀸𑀦𑀼𑀧𑀧𑀢𑁆𑀢𑀺𑀢𑁄 𑀅𑀳𑁂𑀢𑀼𑀓 𑀧𑀝𑀺𑀲𑀦𑁆𑀥𑀺𑀓𑀣𑀸𑀬𑀜𑁆𑀳𑀺 𑀅𑀯𑀺𑀲𑁂𑀲𑁂𑀦 𑀧𑀡𑁆𑀟𑀓𑀲𑁆𑀲 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺 𑀓𑀢𑀸 𑀯𑀼𑀢𑁆𑀢𑀸, 𑀆𑀲𑀺𑀢𑁆𑀢 𑀉𑀲𑁆𑀲𑀽𑀬𑀧𑀓𑁆𑀔𑀧𑀡𑁆𑀟𑀓𑀸𑀦𑀜𑁆𑀘 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬𑁂𑀯 𑀧𑀡𑁆𑀟𑀓𑀪𑀸𑀯𑁄, 𑀦 𑀧𑀯𑀢𑁆𑀢𑀺𑀬𑀁𑀬𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀢𑁂𑀦𑁂𑀯 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀦𑀺𑀤𑁆𑀤𑁂𑀲𑁂 𑀚𑀘𑁆𑀘𑀦𑁆𑀥-𑀚𑀘𑁆𑀘𑀩𑀥𑀺𑀭𑀸𑀤𑀬𑁄 𑀯𑀺𑀬 𑀧𑀡𑁆𑀟𑀓𑁄 𑀚𑀸𑀢𑀺𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀦𑀺𑀤𑁆𑀤𑀺𑀝𑁆𑀞𑁄. 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀲𑀁𑀯𑀡𑁆𑀡𑀦𑀸𑀬𑀁 𑀧𑀦 𑀅𑀪𑀩𑁆𑀩𑀧𑀼𑀕𑁆𑀕𑀮𑁂 𑀤𑀲𑁆𑀲𑁂𑀦𑁆𑀢𑁂𑀦 𑀧𑀡𑁆𑀟𑀓𑀢𑀺𑀭𑀘𑁆𑀙𑀸𑀦𑀕𑀢𑀉𑀪𑀢𑁄 𑀩𑁆𑀬𑀜𑁆𑀚𑀦𑀓𑀸 𑀢𑀬𑁄 𑀯𑀢𑁆𑀣𑀼𑀯𑀺𑀧𑀦𑁆𑀦𑀸 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸, 𑀢𑁂𑀲𑀁 𑀲𑀕𑁆𑀕𑁄 𑀅𑀯𑀸𑀭𑀺𑀢𑁄𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁, 𑀏𑀯𑀁 𑀧𑀜𑁆𑀘𑀯𑀺𑀥𑀸 𑀧𑀡𑁆𑀟𑀓𑀸 𑀢𑁂 𑀧𑀡𑁆𑀟𑀓𑀲𑀸𑀫𑀜𑁆𑀜𑁂𑀦 𑀅𑀯𑀺𑀲𑁂𑀲𑁂𑀢𑁆𑀯𑀸 ‘‘𑀧𑀡𑁆𑀟𑀓𑀸𑀢𑀺 𑀏𑀯𑀫𑁂𑀯 𑀯𑀢𑁆𑀯𑀸 𑀧𑀡𑁆𑀟𑀓𑁄 𑀪𑀺𑀓𑁆𑀔𑀯𑁂 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀢𑀺 𑀬𑁄 𑀲𑀬𑀫𑁂𑀯 𑀧𑀩𑁆𑀩𑀚𑁆𑀚𑀸𑀮𑀺𑀗𑁆𑀕𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀼𑀯𑀲𑁆𑀲𑀁 𑀕𑀡𑁂𑀢𑁆𑀯𑀸 𑀪𑀺𑀓𑁆𑀔𑀽𑀢𑀺 𑀧𑀝𑀺𑀜𑁆𑀜𑀁 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀬𑀣𑀸𑀯𑀼𑀟𑁆𑀠𑀁 𑀯𑀦𑁆𑀤𑀦𑀁 𑀲𑀸𑀤𑀺𑀬𑀢𑀺, 𑀲𑁄 𑀮𑀺𑀗𑁆𑀕𑀲𑁆𑀲 𑀲𑀁𑀯𑀸𑀲𑀲𑁆𑀲 𑀘 𑀣𑁂𑀦𑀢𑁆𑀢𑀸 𑀉𑀪𑀬𑀢𑁆𑀣𑁂𑀦𑀓𑁄 𑀦𑀸𑀫. 𑀬𑁄 𑀧𑀦 𑀬𑀣𑀸𑀯𑀼𑀟𑁆𑀠𑀁 𑀯𑀦𑁆𑀤𑀦𑀁 𑀦 𑀲𑀸𑀤𑀺𑀬𑀢𑀺, 𑀅𑀲𑀼𑀤𑁆𑀥𑀘𑀺𑀢𑁆𑀢𑀯𑀲𑁂𑀦 𑀮𑀺𑀗𑁆𑀕𑀲𑁆𑀲𑀣𑁂𑀦𑀢𑁆𑀢𑀸𑀮𑀺𑀗𑁆𑀕𑀢𑁆𑀣𑁂𑀦𑀓𑁄 𑀦𑀸𑀫. 𑀬𑁄 𑀯𑀸 𑀧𑀦 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀢𑁆𑀯𑀸 𑀫𑀼𑀲𑀸𑀯𑀸𑀤𑁂𑀦 𑀪𑀺𑀓𑁆𑀔𑀼𑀢𑀺 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀼𑀯𑀲𑁆𑀲𑀕𑁆𑀕𑁂𑀦 𑀯𑀦𑁆𑀤𑀦𑀸𑀤𑀺𑀁 𑀲𑀸𑀤𑀺𑀬𑀢𑀺, 𑀲𑁄 𑀪𑀺𑀓𑁆𑀔𑀽𑀳𑀺 𑀤𑀺𑀦𑁆𑀦𑀮𑀺𑀗𑁆𑀕𑀢𑁆𑀢𑀸 𑀮𑀺𑀗𑁆𑀕𑀢𑁆𑀣𑁂𑀦𑀓𑁄 𑀦 𑀳𑁄𑀢𑀺, 𑀲𑀁𑀯𑀸𑀲𑀲𑁆𑀲 𑀣𑁂𑀦𑀢𑁆𑀢𑀸 𑀲𑀁𑀯𑀸𑀲𑀢𑁆𑀣𑁂𑀦𑀓𑁄 𑀦𑀸𑀫. 𑀏𑀢𑁆𑀣 𑀘 𑀉𑀪𑀬𑀢𑁆𑀣𑁂𑀦𑀓𑁄𑀧𑀺 𑀅𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀮𑀺𑀗𑁆𑀕𑀢𑁆𑀣𑁂𑀦𑀓𑁂𑀏𑀯 𑀧𑀯𑀺𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑁄𑀧𑀺 𑀲𑀸𑀫𑀡𑁂𑀭𑁄 𑀯𑀼𑀟𑁆𑀠𑀲𑀸𑀫𑀡𑁂𑀭𑀸𑀦𑀁 𑀯𑀦𑁆𑀤𑀦𑀁 𑀲𑀸𑀤𑀺𑀬𑀢𑀺, 𑀤𑀳𑀭𑀪𑀺𑀓𑁆𑀔𑀽𑀧𑀺 𑀯𑀼𑀟𑁆𑀠𑀪𑀺𑀓𑁆𑀔𑀽𑀦𑀁 𑀯𑀦𑁆𑀤𑀦𑀁 𑀲𑀸𑀤𑀺𑀬𑀢𑀺, 𑀲𑁄𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦𑀸𑀧𑀺 𑀳𑁄𑀢𑀺, 𑀅𑀣𑁂𑀦𑀢𑁆𑀢𑀸. 𑀬𑁄 𑀯𑀸 𑀧𑀦 𑀪𑀺𑀓𑁆𑀔𑀼𑀧𑀸𑀭𑀸𑀚𑀺𑀓𑀫𑀸𑀧𑀦𑁆𑀦𑁄𑀯 𑀪𑀺𑀓𑁆𑀔𑀼𑀮𑀺𑀗𑁆𑀕𑁂 ¶ 𑀞𑀺𑀢𑁄 𑀬𑀸𑀯 𑀧𑀝𑀺𑀚𑀸𑀦𑀸𑀢𑀺, 𑀢𑀸𑀯 𑀅𑀢𑁆𑀣𑁂𑀯 𑀢𑀲𑁆𑀲 𑀪𑀺𑀓𑁆𑀔𑀼𑀪𑀸𑀯𑁄, 𑀦 𑀲𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀢𑀣𑀸 𑀳𑀺 𑀲𑁄 𑀲𑀁𑀯𑀸𑀲𑀁 𑀲𑀸𑀤𑀺𑀬𑀦𑁆𑀢𑁄𑀧𑀺 𑀣𑁂𑀬𑁆𑀬𑀲𑀁𑀯𑀸𑀲𑀓𑁄 𑀦 𑀳𑁄𑀢𑀺, 𑀲𑁄 𑀲𑀳𑀲𑁂𑀬𑁆𑀬𑀸𑀤𑀺𑀆𑀧𑀢𑁆𑀢𑀺𑀫𑁆𑀧𑀺 𑀦 𑀚𑀦𑁂𑀢𑀺, 𑀑𑀫𑀲𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀜𑁆𑀘 𑀦 𑀚𑀦𑁂𑀢𑀺 𑀢𑁂𑀦𑁂𑀯 ‘‘𑀅𑀲𑀼𑀤𑁆𑀥𑁄 𑀳𑁄𑀢𑀺 𑀧𑀼𑀕𑁆𑀕𑀮𑁄 𑀅𑀜𑁆𑀜𑀢𑀭𑀁 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄, 𑀢𑀜𑁆𑀘𑁂 𑀲𑀼𑀤𑁆𑀥𑀤𑀺𑀝𑁆𑀞𑀺 𑀲𑀫𑀸𑀦𑁄 𑀑𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑁄 𑀯𑀤𑀢𑀺 𑀆𑀧𑀢𑁆𑀢𑀺 𑀑𑀫𑀲𑀯𑀸𑀤𑀲𑁆𑀲𑀸’’𑀢𑀺 𑀑𑀫𑀲𑀯𑀸𑀤𑁂 𑀧𑀸𑀘𑀺𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. 𑀅𑀲𑀢𑀺 𑀳𑀺 𑀪𑀺𑀓𑁆𑀔𑀼𑀪𑀸𑀯𑁂 𑀤𑀼𑀓𑁆𑀓𑀝𑀁 𑀯𑀤𑁂𑀬𑁆𑀬. 𑀬𑁄 𑀧𑀦 𑀲𑀸𑀫𑀡𑁂𑀭𑁄 𑀲𑀸𑀫𑀡𑁂𑀭𑀮𑀺𑀗𑁆𑀕𑁂𑀦𑁂𑀯 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀜𑁆𑀘𑀯𑀺𑀥𑀁 𑀲𑀺𑀮𑀯𑀺𑀧𑀢𑁆𑀢𑀺𑀁 𑀧𑀸𑀧𑀼𑀡𑀸𑀢𑀺, 𑀲𑁄𑀧𑀺 𑀆𑀕𑀢𑁄 𑀮𑀺𑀗𑁆𑀕𑀦𑀸𑀲𑀦𑀸𑀬 𑀦𑀸𑀲𑁂𑀢𑁆𑀯𑀸 𑀲𑀭𑀡𑀲𑀻𑀮𑀁 𑀤𑀸𑀢𑀩𑁆𑀩𑀁, 𑀅𑀣𑁂𑀦𑀢𑁆𑀢𑀸 𑀉𑀧𑀲𑀫𑁆𑀧𑀤𑀸𑀬 𑀅𑀯𑀢𑁆𑀣𑀼𑀪𑀸𑀯𑀫𑁆𑀧𑀺 𑀦 𑀧𑀸𑀧𑀼𑀡𑀸𑀢𑀺. 𑀯𑀺𑀓𑀸𑀮𑀪𑁄𑀚𑀦𑀸𑀤𑀺𑀓𑀁 𑀓𑀭𑁄𑀦𑁆𑀢𑀲𑁆𑀲 𑀧𑀦 ‘‘𑀅𑀘𑁆𑀘𑀬𑁄 𑀫𑀁 𑀪𑀦𑁆𑀢𑁂 𑀅𑀘𑁆𑀘𑀸𑀕𑀫𑀸’’𑀢𑁆𑀬𑀸𑀤𑀺𑀦𑀸 𑀲𑀗𑁆𑀖𑀫𑀚𑁆𑀛𑁂 𑀅𑀘𑁆𑀘𑀬𑀁 𑀤𑁂𑀲𑀸𑀧𑁂𑀢𑁆𑀯𑀸 𑀯𑀸 𑀤𑀡𑁆𑀟𑀓𑀫𑁆𑀫𑀁 𑀯𑀸 𑀓𑀢𑁆𑀯𑀸 𑀲𑀻𑀮𑀁 𑀤𑀸𑀢𑀩𑁆𑀩𑀫𑁂𑀯. 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄 𑀉𑀢𑁆𑀢𑀸𑀦𑁄𑀬𑁂𑀯.

𑀢𑀺𑀭𑀘𑁆𑀙𑀸𑀦𑀕𑀢𑁄𑀢𑀺 𑀬𑁄𑀓𑁄𑀘𑀺 𑀅𑀫𑀦𑀼𑀲𑁆𑀲𑀪𑀽𑀢𑁄 𑀘𑀢𑁆𑀢𑀸𑀭𑁄 𑀅𑀧𑀸𑀬𑀺𑀓𑀸𑀧𑀺 𑀉𑀧𑀲𑀫𑁆𑀧𑀤𑀸𑀬 𑀅𑀯𑀢𑁆𑀣𑀼𑀬𑁂𑀯. 𑀢𑁂 𑀧𑀝𑀺𑀲𑀦𑁆𑀥𑀺𑀬𑀸 𑀮𑀸𑀫𑀓𑀢𑁆𑀢𑀸 𑀅𑀪𑀩𑁆𑀩𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀼𑀁. 𑀬𑀤𑀺 𑀘𑀢𑁆𑀢𑀸𑀭𑁄 𑀅𑀧𑀸𑀬𑀺𑀓𑀸 𑀉𑀧𑀲𑀫𑁆𑀧𑀤𑀸𑀬 𑀅𑀯𑀢𑁆𑀣𑀼 𑀪𑀯𑁂𑀬𑁆𑀬, 𑀅𑀣 𑀓𑀲𑁆𑀫𑀸 𑀲𑁂𑀲𑁂 𑀅𑀦𑀧𑀤𑀺𑀲𑀺𑀢𑁆𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑁄𑀯 𑀅𑀯𑀢𑁆𑀣𑀽𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀲𑁂𑀲𑀸𑀦𑀁 𑀅𑀧𑀸𑀓𑀝𑀯𑀢𑁆𑀣𑀼𑀢𑁆𑀢𑀸, 𑀢𑀣𑀸 𑀳𑀺 𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄 𑀏𑀓𑁄 𑀦𑀸𑀕𑀭𑀸𑀚𑀸 𑀦𑀸𑀕𑀬𑁄𑀦𑀺𑀬𑀸 𑀅𑀝𑁆𑀝𑀻𑀬𑀢𑀺 𑀳𑀭𑀸𑀬𑀢𑀺 𑀚𑀺𑀕𑀼𑀘𑁆𑀙𑀢𑀺. 𑀅𑀣𑀔𑁄 𑀢𑀲𑁆𑀲 𑀦𑀸𑀕𑀲𑁆𑀲 𑀏𑀢𑀤𑀳𑁄𑀲𑀺 𑀓𑁂𑀦𑀦𑀼𑀔𑁄 𑀅𑀳𑀁 𑀉𑀧𑀸𑀬𑁂𑀦 𑀦𑀸𑀕𑀬𑁄𑀦𑀺𑀬𑀸 𑀧𑀭𑀺𑀫𑀼𑀘𑁆𑀘𑁂𑀬𑁆𑀬𑀁 𑀔𑀺𑀧𑁆𑀧𑀜𑁆𑀘 𑀫𑀦𑀼𑀲𑁆𑀲𑀢𑁆𑀢𑀁 𑀮𑀪𑁂𑀬𑁆𑀬𑀦𑁆𑀢𑀺. 𑀅𑀣𑀔𑁄 𑀢𑀲𑁆𑀲 𑀦𑀸𑀕𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀇𑀫𑁂 𑀔𑁄 𑀲𑀫𑀡𑀸𑀲𑀓𑁆𑀬𑀧𑀼𑀢𑁆𑀢𑀺𑀬𑀸 𑀥𑀫𑁆𑀫𑀘𑀸𑀭𑀺𑀦𑁄 𑀲𑀫𑀘𑀸𑀭𑀺𑀦𑁄 𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀲𑀘𑁆𑀘𑀯𑀸𑀤𑀺𑀦𑁄 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸 𑀲𑀘𑁂 𑀔𑁄 𑀅𑀳𑀁 𑀲𑀫𑀡𑁂𑀲𑀼 𑀲𑀓𑁆𑀬𑀧𑀼𑀢𑁆𑀢𑀺𑀬𑁂𑀲𑀼 𑀧𑀩𑁆𑀩𑀚𑁂𑀬𑁆𑀬𑀁, 𑀏𑀯𑀸𑀳𑀁 𑀦𑀸𑀕𑀬𑁄𑀦𑀺𑀬𑀸 𑀧𑀭𑀺𑀫𑀼𑀘𑁆𑀘𑁂𑀬𑁆𑀬𑀁 𑀔𑀺𑀧𑁆𑀧𑀜𑁆𑀘 𑀫𑀦𑀼𑀲𑁆𑀲𑀢𑁆𑀢𑀁 𑀧𑀝𑀺𑀮𑀪𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀲𑁄 𑀦𑀸𑀕𑁄 𑀫𑀸𑀡𑀯𑀓𑀯𑀡𑁆𑀡𑁂𑀦 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺. 𑀢𑀁 𑀪𑀺𑀓𑁆𑀔𑀽 𑀧𑀩𑁆𑀩𑀸𑀚𑁂𑀲𑀼𑀁 𑀉𑀧𑀲𑀫𑁆𑀧𑀸𑀤𑁂𑀲𑀼𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑁄 𑀦𑀸𑀕𑁄 𑀅𑀜𑁆𑀜𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀧𑀘𑁆𑀘𑀦𑁆𑀢𑀺𑀫𑁂 𑀯𑀺𑀳𑀸𑀭𑁂 𑀧𑀝𑀺𑀯𑀲𑀢𑀺. 𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀽𑀝𑁆𑀞𑀸𑀬 𑀅𑀚𑁆𑀛𑁄𑀓𑀸𑀲𑁂 ¶ 𑀘𑀗𑁆𑀓𑀫𑀢𑀺. 𑀅𑀣 𑀔𑁄 𑀲𑁄 𑀦𑀸𑀕𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀓𑁆𑀔𑀦𑁆𑀢𑁂 𑀯𑀺𑀲𑁆𑀲𑀝𑁆𑀞𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑁂𑀲𑀺. 𑀲𑀩𑁆𑀩𑁄 𑀯𑀺𑀳𑀸𑀭𑁄 𑀅𑀳𑀺𑀦𑀸 𑀧𑀼𑀡𑁆𑀡𑁄, 𑀯𑀸𑀢𑀧𑀸𑀦𑁂𑀳𑀺 𑀪𑁄𑀕𑀸 𑀦𑀺𑀓𑁆𑀔𑀦𑁆𑀢𑀸 𑀳𑁄𑀦𑁆𑀢𑀺. 𑀅𑀣𑀔𑁄 𑀲𑁄 𑀪𑀺𑀓𑁆𑀔𑀼 ‘‘𑀯𑀺𑀳𑀸𑀭𑀁 𑀧𑀯𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀓𑀯𑀸𑀝𑀁 𑀧𑀡𑀸𑀫𑁂𑀦𑁆𑀢𑁄 𑀅𑀤𑁆𑀤𑀲 𑀲𑀩𑁆𑀩𑀁 𑀯𑀺𑀳𑀸𑀭𑀁 𑀅𑀳𑀺𑀦𑀸𑀧𑀼𑀡𑁆𑀡𑀁 𑀯𑀸𑀢𑀧𑀸𑀦𑁂𑀳𑀺 𑀪𑁄𑀕𑁂 𑀦𑀺𑀓𑁆𑀔𑀦𑁆𑀢𑁂. 𑀤𑀺𑀲𑁆𑀯𑀸𑀦 𑀪𑀻𑀢𑁄 𑀯𑀺𑀲𑁆𑀲𑀭𑀫𑀓𑀸𑀲𑀺. 𑀪𑀺𑀓𑁆𑀔𑀽 𑀉𑀧𑀥𑀸𑀯𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀼𑀁 ‘‘𑀓𑀺𑀲𑁆𑀲 𑀢𑁆𑀯𑀁 𑀆𑀯𑀼𑀲𑁄 𑀯𑀺𑀲𑁆𑀲𑀭𑀫𑀓𑀸𑀲𑀻’’𑀢𑀺. 𑀅𑀬𑀁 𑀆𑀯𑀼𑀲𑁄 𑀲𑀩𑁆𑀩𑁄 𑀯𑀺𑀳𑀸𑀭𑁄 𑀅𑀳𑀺𑀦𑀸 𑀧𑀼𑀡𑁆𑀡𑁄 𑀯𑀸𑀢𑀧𑀸𑀦𑁂𑀳𑀺 𑀪𑁄𑀕𑀸 𑀦𑀺𑀓𑁆𑀔𑀦𑁆𑀢𑀸𑀢𑀺. 𑀅𑀣 𑀔𑁄 𑀲𑁄 𑀦𑀸𑀕𑁄 𑀢𑁂𑀦 𑀲𑀤𑁆𑀤𑁂𑀦 𑀧𑀩𑀼𑀚𑁆𑀛𑀺𑀢𑁆𑀯𑀸 𑀲𑀓𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 ‘‘𑀓𑁄𑀘𑀺 𑀢𑁆𑀯𑀁 𑀆𑀯𑀼𑀲𑁄’’𑀢𑀺. ‘‘𑀅𑀳𑀁 𑀪𑀦𑁆𑀢𑁂 𑀦𑀸𑀕𑁄’’𑀢𑀺. ‘‘𑀓𑀺𑀲𑁆𑀲 𑀧𑀦 𑀢𑁆𑀯𑀁 𑀆𑀯𑀼𑀲𑁄 𑀏𑀯𑀭𑀽𑀧𑀁 𑀅𑀓𑀸𑀲𑀻’’𑀢𑀺. 𑀅𑀣 𑀔𑁄 𑀲𑁄 𑀦𑀸𑀕𑁄 𑀪𑀺𑀓𑁆𑀔𑀽𑀦𑀁 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀻. 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀏𑀢𑀲𑁆𑀫𑀺𑀁 𑀧𑀓𑀭𑀡𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀢𑀁 𑀦𑀸𑀕𑀁 𑀏𑀢𑀤𑀯𑁄𑀘 ‘‘𑀢𑀼𑀫𑁆𑀳𑁂 𑀔𑁆𑀯𑀢𑁆𑀣 𑀦𑀸𑀕𑀸 𑀅𑀯𑀺𑀭𑀽𑀴𑁆𑀳𑀺𑀥𑀫𑁆𑀫𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂, 𑀕𑀘𑁆𑀙 𑀢𑁆𑀯𑀁 𑀦𑀸𑀕, 𑀢𑀢𑁆𑀣𑁂𑀯 𑀘𑀸𑀢𑀼𑀤𑁆𑀤𑀲𑁂 𑀧𑀦𑁆𑀦𑀭𑀲𑁂 𑀅𑀝𑁆𑀞𑀫𑀺𑀬𑀸 𑀘 𑀧𑀓𑁆𑀔𑀲𑁆𑀲 𑀉𑀧𑁄𑀲𑀣𑀁 𑀉𑀧𑀯𑀲, 𑀏𑀯𑀁 𑀢𑁆𑀯𑀁 𑀦𑀸𑀕𑀬𑁄𑀦𑀺𑀬𑀸 𑀧𑀭𑀺𑀫𑀼𑀘𑁆𑀘𑀺𑀲𑁆𑀲𑀲𑀺 𑀔𑀺𑀧𑁆𑀧𑀜𑁆𑀘 𑀫𑀦𑀼𑀲𑁆𑀲𑀢𑁆𑀢𑀁 𑀧𑀝𑀺𑀮𑀪𑀺𑀲𑁆𑀲𑀲𑀻’’𑀢𑀺. 𑀅𑀣 𑀔𑁄 𑀲𑁄 𑀦𑀸𑀕𑁄 ‘‘𑀅𑀯𑀺𑀭𑀽𑀴𑁆𑀳𑀥𑀫𑁆𑀫𑁄 𑀓𑀺𑀭𑀸𑀳𑀁 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂𑀢𑀺 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀅𑀲𑁆𑀲𑀽𑀦𑀺 𑀧𑀯𑀢𑁆𑀢𑀬𑀫𑀸𑀦𑁄 𑀯𑀺𑀲𑁆𑀲𑀭𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 ‘‘𑀤𑁆𑀯𑁂 𑀫𑁂 𑀪𑀺𑀓𑁆𑀔𑀯𑁂 𑀧𑀘𑁆𑀘𑀬𑀸 𑀦𑀸𑀕𑀲𑁆𑀲 𑀲𑀪𑀸𑀯𑀧𑀸𑀢𑀼𑀓𑀫𑁆𑀫𑀸𑀬. 𑀬𑀤𑀸 𑀘 𑀲𑀚𑀸𑀢𑀺𑀬𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀢𑀺, 𑀬𑀤𑀸 𑀘 𑀯𑀺𑀲𑁆𑀲𑀝𑁆𑀞𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀢𑀺. 𑀇𑀫𑁂 𑀔𑁄 𑀪𑀺𑀓𑁆𑀔𑀯𑁂 𑀤𑁆𑀯𑁂 𑀧𑀘𑁆𑀘𑀬𑀸 𑀦𑀸𑀕𑀲𑁆𑀲 𑀲𑀪𑀸𑀯 𑀧𑀸𑀢𑀼𑀓𑀫𑁆𑀫𑀸𑀬. 𑀢𑀺𑀭𑀘𑁆𑀙𑀸𑀦𑀕𑀢𑁄 𑀪𑀺𑀓𑁆𑀔𑀯𑁂 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄’’𑀢𑀺 𑀏𑀯𑀁 𑀢𑀺𑀭𑀘𑁆𑀙𑀸𑀦𑀲𑁆𑀲𑁂𑀯 𑀧𑀸𑀓𑀝𑀯𑀢𑁆𑀢𑀼𑀢𑁆𑀢𑀸𑀢𑀺. 𑀏𑀢𑁆𑀣 𑀘 𑀧𑀯𑀢𑁆𑀢𑀺𑀬𑀁 𑀅𑀪𑀺𑀡𑁆𑀳𑀁 𑀲𑀪𑀸𑀯𑀧𑀸𑀢𑀼𑀓𑀫𑁆𑀫𑀤𑀲𑁆𑀲𑀦𑀯𑀲𑁂𑀦 ‘‘𑀤𑁆𑀯𑁂 𑀧𑀘𑁆𑀘𑀬𑀸’’𑀢𑀺 𑀯𑀼𑀢𑁆𑀢𑀁. 𑀦𑀸𑀕𑀲𑁆𑀲 𑀧𑀦 𑀧𑀜𑁆𑀘𑀲𑀼 𑀓𑀸𑀮𑁂𑀲𑀼 𑀲𑀪𑀸𑀯𑀧𑀸𑀢𑀼𑀓𑀫𑁆𑀫𑀁 𑀳𑁄𑀢𑀺 𑀧𑀝𑀺𑀲𑀦𑁆𑀥𑀺𑀓𑀸𑀮𑁂, 𑀢𑀘𑀧𑀚𑀳𑀦𑀦𑀓𑀸𑀮𑁂, 𑀲𑀚𑀸𑀢𑀺𑀬𑀸 𑀫𑁂𑀣𑀼𑀦𑀓𑀸𑀮𑁂, 𑀯𑀺𑀲𑁆𑀲𑀝𑁆𑀞 𑀦𑀺𑀤𑁆𑀤𑁄𑀓𑁆𑀓𑀫𑀦𑀓𑀸𑀮𑁂, 𑀘𑀼𑀢𑀺𑀓𑀸𑀮𑁂𑀢𑀺. 𑀦𑀦𑀼 𑀘 𑀤𑁂𑀯𑀸𑀧𑀺 𑀉𑀧𑀲𑀫𑁆𑀧𑀤𑀸𑀬 𑀅𑀯𑀢𑁆𑀣𑀼𑀬𑁂𑀯, 𑀅𑀣 𑀓𑀲𑁆𑀫𑀸 𑀘𑀢𑁆𑀢𑀸𑀭𑁄 𑀅𑀧𑀸𑀬𑀺𑀓𑀸𑀯 𑀉𑀧𑀲𑀫𑁆𑀧𑀤𑀸𑀬 𑀅𑀯𑀢𑁆𑀣𑀽𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀲𑀘𑁆𑀘𑀁, 𑀢𑀣𑀸𑀧𑀺 𑀤𑁂𑀯𑀸𑀦𑀁 𑀅𑀪𑀩𑁆𑀩𑀢𑁆𑀢𑀸 𑀧𑀝𑀺𑀯𑁂𑀥𑀲𑀸𑀲𑀦𑀲𑁆𑀲 𑀞𑀺𑀢𑀢𑁆𑀢𑀸 𑀢𑁂 𑀅𑀪𑀩𑁆𑀩𑀢𑁄 𑀯𑀺𑀲𑀼𑀁 𑀓𑀭𑀡𑀢𑁆𑀣𑀸𑀬 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀓𑁆𑀔𑀢𑀺 𑀳𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀫𑀳𑀸𑀯𑀕𑁆𑀕𑁂 ‘‘𑀢𑀺𑀭𑀘𑁆𑀙𑀸𑀦𑀕𑀢𑁄 𑀪𑀺𑀓𑁆𑀔𑀯𑁂𑀢𑀺 ¶ 𑀏𑀢𑁆𑀣 𑀦𑀸𑀕𑁄 𑀯𑀸 𑀳𑁄𑀢𑀼 𑀲𑀼𑀧𑀡𑁆𑀡𑀫𑀸𑀡𑀯𑀓𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑁄 𑀅𑀦𑁆𑀢𑀫𑀲𑁄 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀉𑀧𑀸𑀤𑀸𑀬 𑀬𑁄 𑀓𑁄𑀘𑀺 𑀅𑀫𑀦𑀼𑀲𑁆𑀲𑀚𑀸𑀢𑀺𑀬𑁄 𑀲𑀩𑁆𑀩𑁄𑀯 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀢𑀺𑀭𑀘𑁆𑀙𑀸𑀦𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄’’𑀢𑀺, 𑀢𑁂𑀦 ‘‘𑀢𑀺𑀭𑀘𑁆𑀙𑀸𑀦𑀕𑀢𑁄𑀢𑀺 𑀬𑁄𑀓𑁄𑀘𑀺 𑀅𑀫𑀦𑀼𑀲𑁆𑀲𑀪𑀽𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀏𑀢𑁆𑀣 𑀘𑀸𑀳 𑀬𑀤𑀺 𑀦𑀸𑀕𑀲𑀼𑀧𑀡𑁆𑀡𑀸 𑀧𑀝𑀺𑀲𑀦𑁆𑀥𑀺𑀬𑀸 𑀮𑀸𑀫𑀓𑀸 𑀪𑀯𑁂𑀬𑁆𑀬, 𑀅𑀣 𑀓𑀲𑁆𑀫𑀸 𑀯𑀺𑀥𑀼𑀭𑀚𑀸𑀢𑀓𑁂 𑀘𑀢𑁆𑀢𑀸𑀭𑁄 𑀚𑀦𑀸 𑀦𑀸𑀕𑀲𑀼𑀧𑀡𑁆𑀡𑀲𑀓𑁆𑀓𑀥𑀦𑀜𑁆𑀘𑀬𑀓𑁄𑀭𑀩𑁆𑀬𑁂𑀲𑀼 𑀪𑀯𑀦𑁂𑀲𑀼 𑀢𑀁 𑀢𑀤𑁂𑀯 𑀞𑀸𑀦𑀁 𑀧𑀢𑁆𑀣𑁂𑀦𑁆𑀢𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀺, 𑀢𑁂𑀲𑀼 𑀏𑀓𑁄 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀲𑀧𑀼𑀢𑁆𑀢𑀤𑀸𑀭𑁄 𑀦𑀸𑀕𑀪𑀯𑀦𑁂 𑀦𑀸𑀕𑀭𑀸𑀚𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀏𑀓𑁄 𑀲𑀼𑀧𑀡𑁆𑀡𑀪𑀯𑀦𑁂 𑀲𑀺𑀫𑁆𑀩𑀮𑀺𑀯𑀺𑀫𑀸𑀦𑁂 𑀲𑀼𑀧𑀡𑁆𑀡𑀭𑀸𑀚𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀏𑀓𑁄 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀓𑁆𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀏𑀓𑁄 𑀥𑀦𑀜𑁆𑀘𑀬𑀓𑁄𑀭𑀩𑁆𑀬𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀻𑀢𑀺 𑀘𑀢𑀼𑀦𑁆𑀦𑀫𑁆𑀧𑀺 𑀚𑀦𑀸𑀦𑀁 𑀧𑀝𑀺𑀲𑀦𑁆𑀥𑀺𑀬𑀁 𑀓𑀼𑀲𑀮𑀓𑀫𑁆𑀫𑁂𑀦𑁂𑀯 𑀧𑀯𑀢𑁆𑀢𑀪𑀸𑀯𑁄 𑀯𑀼𑀢𑁆𑀢𑁄 𑀬𑀤𑀺 𑀓𑀼𑀲𑀮𑀓𑀫𑁆𑀫𑁂𑀦 𑀪𑀯𑁂𑀬𑁆𑀬, ‘‘𑀓𑀼𑀲𑀮𑀸 𑀘𑁂𑀢𑀦𑀸 𑀯𑀺𑀧𑀸𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀇𑀫𑀺𑀲𑁆𑀲𑀸𑀧𑀺 𑀧𑀝𑁆𑀞𑀸𑀦𑀧𑀸𑀴𑀺𑀬𑀸 𑀅𑀳𑁂𑀢𑀼𑀓𑀸𑀦𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄 𑀪𑀯𑁂𑀬𑁆𑀬, 𑀦 𑀧𑀦𑁂𑀯𑀁 𑀯𑀢𑁆𑀢𑀩𑁆𑀩𑀁 𑀅𑀣 𑀓𑀣𑀜𑁆𑀘𑀺𑀤𑀁 𑀧𑀘𑁆𑀘𑁂𑀢𑀩𑁆𑀩𑀦𑁆𑀢𑀺. 𑀯𑀼𑀘𑁆𑀘𑀢𑁂, 𑀦𑀺𑀓𑀦𑁆𑀢𑀺𑀬𑀸 𑀩𑀮𑀯𑀢𑁆𑀢𑀸 𑀲𑀢𑁆𑀢𑀯𑀺𑀥𑀫𑁂𑀣𑀼𑀦𑀲𑀁𑀬𑁄𑀕𑀢𑁆𑀢𑀸 𑀘 𑀅𑀧𑀭𑀺𑀲𑀼𑀤𑁆𑀥𑀸 𑀢𑁂𑀲𑀁 𑀓𑀼𑀲𑀮𑀘𑁂𑀢𑀦𑀸, 𑀅𑀧𑀭𑀺𑀲𑀼𑀤𑁆𑀥𑀸𑀬𑁂𑀯 𑀲𑀼𑀕𑀢𑀺𑀪𑀽𑀫𑀺𑀬𑀁 𑀚𑀦𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀤𑀼𑀕𑁆𑀕𑀢𑀺𑀪𑀽𑀫𑀺𑀬𑀁 𑀧𑀯𑀢𑁆𑀢𑀫𑀸𑀦𑀸𑀧𑀺 𑀓𑀫𑁆𑀫𑀸 𑀬𑀽𑀳𑀦𑀓𑀸𑀮𑁂 𑀢𑀁 𑀢𑀁 𑀪𑀽𑀫𑀺𑀧𑀢𑁆𑀣𑀦𑀸 𑀢𑀡𑁆𑀳𑀸𑀲𑀫𑁆𑀧𑀬𑀼𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀘𑁂𑀢𑀦𑀸 𑀩𑀮𑁂𑀦 𑀢𑁂𑀲𑀼 𑀢𑀺𑀭𑀘𑁆𑀙𑀸𑀦𑀪𑀽𑀫𑀻𑀲𑀼 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀦 𑀅𑀜𑁆𑀜𑁂𑀦 𑀅𑀓𑀼𑀲𑀮𑁂𑀦. 𑀏𑀯𑀜𑁆𑀳𑀺 𑀧𑀢𑁆𑀣𑀺𑀢𑀧𑀢𑁆𑀣𑀦𑀸 𑀲𑀺𑀤𑁆𑀥𑀸𑀧𑀺 𑀪𑀯𑁂𑀬𑁆𑀬. 𑀬𑀤𑀺 𑀅𑀜𑁆𑀜𑁂𑀦 𑀅𑀓𑀼𑀲𑀮𑀓𑀫𑁆𑀫𑁂𑀦 𑀪𑀯𑁂𑀬𑁆𑀬, 𑀇𑀘𑁆𑀙𑀺𑀢𑀧𑀢𑁆𑀣𑀦𑀸𑀧𑀺 𑀅𑀲𑀺𑀤𑁆𑀥𑀸𑀯 𑀪𑀯𑁂𑀬𑁆𑀬. 𑀦𑀺𑀓𑀦𑁆𑀢𑀺𑀘 𑀦𑀸𑀫𑁂𑀲𑀸 𑀩𑀮𑀯𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑀦𑀸𑀧𑀺 𑀧𑀝𑀺𑀩𑀸𑀳𑀺𑀢𑀼𑀁 𑀲𑀓𑁆𑀓𑀸 𑀢𑀣𑀸 𑀳𑀺 𑀕𑁄𑀧𑀓𑀤𑁂𑀯𑀤𑀢𑁆𑀢𑀲𑁆𑀲 𑀆𑀘𑀭𑀺𑀬𑀲𑀫𑀡𑁄 𑀛𑀸𑀦𑀩𑀮𑁂𑀦 𑀩𑁆𑀭𑀳𑁆𑀫𑀪𑀽𑀫𑀻𑀲𑀼 𑀅𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀛𑀸𑀦𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀜𑁆𑀜𑀓𑀫𑁆𑀫𑁂𑀦 𑀕𑀦𑁆𑀥𑀩𑁆𑀩𑀤𑁂𑀯𑁂𑀲𑀼𑀬𑁂𑀯 𑀉𑀧𑁆𑀧𑀚𑁆𑀚𑀢𑀺 ‘‘𑀲𑀻𑀮𑀯𑀢𑁄 𑀳𑀺 𑀪𑀺𑀓𑁆𑀔𑀯𑁂 𑀘𑁂𑀢𑁄𑀧𑀡𑀺𑀥𑀺 𑀲𑀫𑀺𑀚𑁆𑀛𑀢𑀺 𑀯𑀺𑀲𑀼𑀤𑁆𑀥𑀢𑁆𑀢𑀸’’𑀢𑀺 𑀢𑁂𑀲𑀁 𑀯𑀺𑀢𑁆𑀣𑀸𑀭𑁄 𑀤𑀻𑀖𑀦𑀺𑀓𑀸𑀬𑁂 𑀆𑀕𑀢𑁄, 𑀅𑀢𑁆𑀣𑀺𑀓𑁂𑀳𑀺 𑀢𑀢𑁆𑀣 𑀑𑀮𑁄𑀓𑁂𑀢𑀩𑁆𑀩𑁄. 𑀲𑀢𑁆𑀢𑀯𑀺𑀥𑀫𑁂𑀣𑀼𑀦𑀲𑀁𑀬𑁄𑀕𑀯𑀲𑁂𑀦𑀸𑀧𑀺 𑀲𑀢𑁆𑀢𑀸 𑀤𑀼𑀓𑁆𑀔𑀢𑁄 𑀦 𑀫𑀼𑀘𑁆𑀘𑀦𑁆𑀢𑀺 𑀯𑀼𑀢𑁆𑀢𑀜𑁆𑀳𑀺 𑀪𑀕𑀯𑀢𑀸 ‘‘𑀇𑀥 𑀩𑁆𑀭𑀸𑀳𑁆𑀫𑀡 𑀏𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀲𑀫𑁆𑀫𑀸 𑀩𑁆𑀭𑀳𑁆𑀫𑀘𑀸𑀭𑀻 𑀧𑀝𑀺𑀚𑀸𑀦𑀫𑀸𑀦𑁄 𑀦 𑀳𑁂𑀯 𑀔𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀤𑁆𑀯𑀬𑀁𑀤𑁆𑀯𑀬 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀅𑀧𑀺 ¶ 𑀘 𑀔𑁄 𑀫𑀸𑀢𑀼𑀕𑀸𑀫𑀲𑁆𑀲 𑀉𑀘𑁆𑀙𑀸𑀤𑀦𑀁 𑀦𑁆𑀳𑀸𑀧𑀦𑀁 𑀧𑀭𑀺𑀫𑀤𑁆𑀤𑀦𑀁 𑀲𑀫𑁆𑀩𑀸𑀳𑀦𑀁 𑀲𑀸𑀤𑀺𑀬𑀢𑀺, 𑀲𑁄 𑀢𑀤𑀲𑁆𑀲𑀸𑀤𑁂𑀢𑀺 𑀢𑀁 𑀦𑀺𑀓𑀸𑀫𑁂𑀢𑀺, 𑀢𑁂𑀦𑀘𑀯𑀺𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀇𑀤𑀫𑁆𑀧𑀺𑀔𑁄 𑀩𑁆𑀭𑀸𑀳𑁆𑀫𑀡𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀔𑀡𑁆𑀟𑀫𑁆𑀧𑀺 𑀙𑀺𑀤𑁆𑀤𑀫𑁆𑀧𑀺 𑀲𑀩𑀮𑀫𑁆𑀧𑀺 𑀓𑀫𑁆𑀫𑀸𑀲𑀫𑁆𑀧𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀩𑁆𑀭𑀸𑀳𑁆𑀫𑀡 𑀅𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺. 𑀲𑀁𑀬𑀼𑀢𑁆𑀢𑁄 𑀫𑁂𑀣𑀼𑀦𑀲𑀁𑀬𑁄𑀕𑁂𑀦 𑀦 𑀧𑀭𑀺𑀫𑀼𑀘𑁆𑀘𑀢𑀺 𑀚𑀸𑀢𑀺𑀬𑀸 𑀚𑀭𑀸𑀫𑀭𑀡𑁂𑀦…𑀧𑁂… 𑀦 𑀧𑀭𑀺𑀫𑀼𑀘𑁆𑀘𑀢𑀺 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺. 𑀧𑀼𑀦𑀘 𑀧𑀭𑀁 𑀩𑁆𑀭𑀸𑀳𑁆𑀫𑀡 𑀇𑀥𑁂𑀓𑀘𑁆𑀘𑁄 𑀲𑀫𑀡𑁄𑀯𑀸…𑀧𑁂… 𑀧𑀝𑀺𑀚𑀸𑀦𑀫𑀸𑀦𑁄. 𑀦 𑀳𑁂𑀯 𑀔𑁄 𑀫𑀸𑀢𑀼𑀕𑀸𑀫𑁂𑀦𑀲𑀤𑁆𑀥𑀺𑀁 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀦 𑀧𑀺 𑀫𑀸𑀢𑀼𑀕𑀸𑀫𑀲𑁆𑀲 𑀉𑀘𑁆𑀙𑀸𑀤𑀦𑀁…𑀧𑁂… 𑀲𑀸𑀤𑀺𑀬𑀢𑀺, 𑀅𑀧𑀺 𑀘 𑀔𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀲𑀁𑀚𑀕𑁆𑀖𑀢𑀺 𑀲𑀁𑀓𑀻𑀴𑀢𑀺 𑀲𑀁𑀓𑁂𑀴𑀸𑀬𑀢𑀺, 𑀲𑁄 𑀢𑀤𑀲𑁆𑀲𑀸𑀤𑁂𑀢𑀺…𑀧𑁂… 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺. 𑀧𑀼𑀦𑀘 𑀧𑀭𑀁 𑀩𑁆𑀭𑀸𑀳𑁆𑀫𑀡 𑀇𑀥𑁂𑀓𑀘𑁆𑀘𑁄 𑀲𑀫𑀡𑁄 𑀯𑀸…𑀧𑁂… 𑀦 𑀳𑁂𑀯 𑀔𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀲𑀫𑀸𑀧𑀚𑁆𑀚𑀢𑀺. 𑀦𑀧𑀺 𑀫𑀸𑀢𑀼𑀕𑀸𑀫𑀲𑁆𑀲 𑀉𑀘𑁆𑀙𑀸𑀤𑀦𑀁 𑀲𑀸𑀤𑀺𑀬𑀢𑀺. 𑀦𑀧𑀺 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀲𑀁𑀚𑀕𑁆𑀖𑀢𑀺 𑀲𑀁𑀓𑀻𑀴𑀢𑀺 𑀲𑀁𑀓𑁂𑀴𑀸𑀬𑀢𑀺. 𑀅𑀧𑀺𑀘 𑀔𑁄 𑀫𑀸𑀢𑀼𑀕𑀸𑀫𑀲𑁆𑀲 𑀘𑀓𑁆𑀔𑀼𑀁 𑀉𑀧𑀦𑀺𑀚𑁆𑀛𑀸𑀬𑀢𑀺 𑀧𑁂𑀓𑁆𑀔𑀢𑀺, 𑀲𑁄 𑀢𑀤𑀲𑁆𑀲𑀸𑀤𑁂𑀢𑀺…𑀧𑁂… 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺. 𑀧𑀼𑀦𑀘 𑀧𑀭𑀁 𑀩𑁆𑀭𑀸𑀳𑁆𑀫𑀡 𑀇𑀥𑁂𑀓𑀘𑁆𑀘𑁄 𑀲𑀫𑀡𑁄𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸…𑀧𑁂… 𑀦 𑀳𑁂𑀯 𑀔𑁄 𑀫𑀸𑀢𑀼𑀕𑀸𑀫𑁂𑀦, 𑀦 𑀫𑀸𑀢𑀼𑀕𑀸𑀫𑀲𑁆𑀲, 𑀦𑀧𑀺 𑀫𑀸𑀢𑀼𑀕𑀸𑀫𑁂𑀦 𑀧𑁂𑀓𑁆𑀔𑀢𑀺. 𑀅𑀧𑀺 𑀘 𑀔𑁄 𑀫𑀸𑀢𑀼𑀕𑀸𑀫𑀲𑁆𑀲 𑀲𑀤𑁆𑀤𑀁 𑀲𑀼𑀡𑀸𑀢𑀺 𑀢𑀺𑀭𑁄𑀓𑀼𑀝𑁆𑀝𑀁𑀯𑀸 𑀢𑀺𑀭𑁄𑀧𑀸𑀓𑀸𑀭𑀁𑀯𑀸 𑀳𑀲𑀦𑁆𑀢𑀺𑀬𑀸 𑀯𑀸 𑀪𑀡𑀦𑁆𑀢𑀺𑀬𑀸 𑀯𑀸 𑀕𑀸𑀬𑀦𑁆𑀢𑀺𑀬𑀸 𑀯𑀸 𑀭𑁄𑀤𑀦𑁆𑀢𑀺𑀬𑀸 𑀯𑀸, 𑀲𑁄 𑀢𑀤𑀲𑁆𑀲𑀸𑀤𑁂𑀢𑀺…𑀧𑁂… 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺. 𑀧𑀼𑀦𑀘 𑀧𑀭𑀁 𑀩𑁆𑀭𑀸𑀳𑁆𑀫𑀡 𑀇𑀥𑁂𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀳𑁆𑀫𑀡𑁄 𑀯𑀸…𑀧𑁂… 𑀦𑀳𑁂𑀯 𑀔𑁄 𑀫𑀸𑀢𑀼𑀕𑀸𑀫𑁂𑀦, 𑀦𑀧𑀺 𑀫𑀸𑀢𑀼𑀕𑀸𑀫𑀲𑁆𑀲, 𑀦𑀧𑀺 𑀫𑀸𑀢𑀼𑀕𑀸𑀫𑁂𑀦, 𑀦𑀧𑀺 𑀫𑀸𑀢𑀼𑀕𑀸𑀫𑀲𑁆𑀲 𑀭𑁄𑀤𑀦𑁆𑀢𑀺𑀬𑀸 𑀯𑀸…𑀧𑁂… 𑀅𑀧𑀺 𑀘 𑀔𑁄 𑀬𑀸𑀦𑀺𑀢𑀸𑀦𑀺 𑀧𑀼𑀩𑁆𑀩𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀳𑀲𑀺𑀢𑀮𑀧𑀺𑀢𑀓𑀻𑀴𑀺𑀢𑀸𑀦𑀺 𑀅𑀦𑀼𑀲𑁆𑀲𑀭𑀢𑀺. 𑀲𑁄 𑀢𑀤𑀲𑁆𑀲𑀸 𑀤𑁂𑀢𑀺…𑀧𑁂… 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺. 𑀧𑀼𑀦𑀘 𑀧𑀭𑀁 𑀩𑁆𑀭𑀸𑀳𑁆𑀫𑀡 𑀇𑀥𑁂𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀳𑁆𑀫𑀡𑁄 𑀯𑀸…𑀧𑁂… 𑀦 𑀳𑁂𑀯 𑀔𑁄 𑀫𑀸𑀢𑀼𑀕𑀸𑀫𑁂𑀦, 𑀦𑀧𑀺 𑀫𑀸𑀢𑀼𑀕𑀸𑀫𑀲𑁆𑀲…𑀧𑁂… 𑀦 𑀧𑀺 𑀬𑀸𑀦𑀺 𑀢𑀸𑀦𑀺 𑀧𑀼𑀩𑁆𑀩𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀳𑀲𑀺𑀢𑀮𑀧𑀺𑀢𑀓𑀻𑀴𑀺𑀢𑀸𑀦𑀺 𑀅𑀦𑀼𑀲𑁆𑀲𑀭𑀢𑀺, 𑀅𑀧𑀺 𑀘 𑀔𑁄 𑀕𑀳𑀧𑀢𑀺𑀁 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀁 𑀯𑀸 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀳𑀺𑀢𑀁 𑀲𑀫𑀗𑁆𑀕𑀻𑀪𑀽𑀢𑀁 𑀧𑀭𑀺𑀘𑀸𑀭𑀬𑀫𑀸𑀦𑀁, 𑀲𑁄 𑀢𑀤𑀲𑁆𑀲𑀸𑀤𑁂𑀢𑀺…𑀧𑁂… 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺. 𑀧𑀼𑀦𑀘 𑀧𑀭𑀁 𑀩𑁆𑀭𑀸𑀳𑁆𑀫𑀡…𑀧𑁂… 𑀦 𑀳𑁂𑀯 𑀔𑁄 𑀫𑀸𑀢𑀼𑀕𑀸𑀫𑁂𑀦…𑀧𑁂… 𑀦𑀧𑀺 𑀅𑀦𑀼𑀲𑁆𑀲𑀭𑀢𑀺 𑀕𑀳𑀧𑀢𑀺𑀁 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀁 𑀯𑀸 𑀧𑀭𑀺𑀘𑀸𑀭𑀬𑀫𑀸𑀦𑀁, 𑀅𑀧𑀺 𑀘 𑀔𑁄 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀧𑀡𑀺𑀥𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺 𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀢𑀧𑁂𑀦𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄 𑀯𑀸𑀢𑀺, 𑀲𑁄 𑀢𑀤𑀲𑁆𑀲𑀸𑀤𑁂𑀢𑀺 ¶ , 𑀢𑀁 𑀦𑀺𑀓𑀸𑀫𑁂𑀢𑀺, 𑀢𑁂𑀦 𑀘 𑀯𑀺𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀇𑀤𑀁 𑀔𑁄 𑀩𑁆𑀭𑀸𑀳𑁆𑀫𑀡 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀔𑀡𑁆𑀟𑀫𑁆𑀧𑀺 𑀙𑀺𑀤𑁆𑀤𑀫𑁆𑀧𑀺 𑀲𑀩𑀮𑀫𑁆𑀧𑀺 𑀓𑀫𑁆𑀫𑀸𑀲𑀫𑁆𑀧𑀻’’𑀢𑀺 𑀏𑀯𑀁 𑀮𑀸𑀪𑀸𑀤𑀺𑀳𑁂𑀢𑀼𑀓𑁂𑀦 𑀪𑁂𑀤𑁂𑀦 𑀘 𑀲𑀢𑁆𑀢𑀯𑀺𑀥𑀫𑁂𑀣𑀼𑀦𑀲𑀁𑀬𑁄𑀕𑁂𑀦 𑀔𑀡𑁆𑀟𑀸𑀤𑀺𑀪𑀸𑀯𑁄 𑀲𑀗𑁆𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀫𑀸𑀢𑀼𑀖𑀸𑀢𑀓𑁂 𑀧𑀦 𑀬𑁂𑀦 𑀫𑀦𑀼𑀲𑁆𑀲𑀺𑀢𑁆𑀣𑀺𑀪𑀽𑀢𑀸𑀧𑀺 𑀅𑀚𑀦𑀺𑀓𑀸 𑀧𑁄𑀲𑀸 𑀯𑀦𑀺𑀓𑀸 𑀫𑀸𑀢𑀸 𑀯𑀸 𑀫𑀳𑀸𑀫𑀸𑀢𑀸 𑀯𑀸 𑀘𑀽𑀴𑀫𑀸𑀢𑀸 𑀯𑀸 𑀚𑀦𑀺𑀓𑀸𑀧𑀺 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀪𑀽𑀢𑀸 𑀫𑀸𑀢𑀸 𑀖𑀸𑀢𑀺𑀢𑀸, 𑀢𑀲𑁆𑀲 𑀧𑀩𑁆𑀩𑀚𑁆𑀚𑀸 𑀦 𑀯𑀸𑀭𑀺𑀢𑀸, 𑀦 𑀘 𑀅𑀦𑀦𑁆𑀢𑀭𑀺𑀓𑁄 𑀳𑁄𑀢𑀺. 𑀢𑀺𑀭𑀘𑁆𑀙𑀸𑀦𑀺𑀢𑁆𑀣𑀺𑀬𑁄𑀧𑀺 𑀫𑀦𑀼𑀲𑁆𑀲𑀧𑀼𑀭𑀺𑀲𑀫𑀸𑀕𑀫𑁆𑀫 𑀫𑀦𑀼𑀲𑁆𑀲𑀪𑀽𑀢𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀦𑁆𑀢𑀺 𑀓𑁄𑀦𑁆𑀢𑀧𑀼𑀢𑁆𑀢𑀸 𑀤𑁆𑀯𑁂𑀪𑀸𑀢𑀺𑀓𑀢𑁆𑀣𑁂𑀭𑀸 𑀯𑀺𑀬 𑀢𑁂𑀧𑀺 𑀳𑀺 𑀅𑀡𑁆𑀟𑀚𑀸𑀬𑁂𑀯, 𑀢𑀣𑀸 𑀳𑀺 𑀧𑁂𑀢𑀮𑁄𑀓𑁂 𑀢𑀺𑀭𑀘𑁆𑀙𑀸𑀦𑁂 𑀫𑀦𑀼𑀲𑁆𑀲𑁂 𑀘𑀸𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀪𑀽𑀫𑀻𑀲𑀼 𑀘𑀢𑀲𑁆𑀲𑁄 𑀬𑁄𑀦𑀺𑀬𑁄 𑀲𑀫𑁆𑀪𑀯𑀦𑁆𑀢𑀺. 𑀫𑀦𑀼𑀲𑁆𑀲𑁂𑀲𑀼 𑀧𑀦𑁂𑀢𑁆𑀣 𑀓𑁂𑀘𑀺𑀤𑁂𑀯 𑀑𑀧𑀧𑀸𑀢𑀺𑀓𑀸 𑀳𑁄𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀧𑀤𑀼𑀫𑀓𑀼𑀫𑀸𑀭𑀸𑀤𑀬𑁄. 𑀅𑀡𑁆𑀟𑀚𑀸𑀧𑀺 𑀓𑁄𑀦𑁆𑀢 𑀧𑀼𑀢𑁆𑀢𑀸 𑀤𑁆𑀯𑁂𑀪𑀸𑀢𑀺𑀓𑀢𑁆𑀣𑁂𑀭𑀸 𑀯𑀺𑀬. 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀻𑀳𑀴𑀯𑀢𑁆𑀣𑀼𑀲𑁆𑀫𑀺𑀁 𑀑𑀮𑁄𑀓𑁂𑀢𑀩𑁆𑀩𑁄. 𑀏𑀢𑁆𑀣 𑀘 𑀓𑁄𑀦𑁆𑀢𑀸𑀢𑀺 𑀓𑀺𑀦𑁆𑀦𑀭𑀻, 𑀢𑀲𑁆𑀲𑀸 𑀧𑀼𑀢𑁆𑀢𑀸 𑀓𑁄𑀦𑁆𑀢𑀧𑀼𑀢𑁆𑀢𑀸, 𑀲𑀸 𑀳𑀺 𑀭𑀜𑁆𑀜𑁄 𑀅𑀲𑁄𑀓𑀥𑀫𑁆𑀫𑀭𑀸𑀚𑀲𑁆𑀲 𑀓𑀸𑀮𑁂 𑀯𑀦𑀘𑀭𑀓𑁂𑀦 𑀮𑀪𑀺𑀢𑁆𑀯𑀸 𑀫𑀦𑀼𑀲𑁆𑀲𑀲𑀁𑀯𑀸𑀲𑀫𑀸𑀕𑀫𑁆𑀫 𑀤𑁆𑀯𑁂 𑀧𑀼𑀢𑁆𑀢𑁂 𑀯𑀺𑀚𑀸𑀬𑀺𑀢𑁆𑀯𑀸 ‘‘𑀇𑀤𑀸𑀦𑀺 𑀤𑀸𑀭𑀓𑁂 𑀧𑀳𑀸𑀬 𑀦 𑀕𑀫𑀺𑀲𑁆𑀲𑀢𑀻’’𑀢𑀺 𑀲𑀜𑁆𑀜𑀸𑀬 𑀯𑀦𑀘𑀭𑀓𑁄 𑀢𑀲𑁆𑀲𑀸 𑀧𑁄𑀢𑁆𑀣𑀁 𑀅𑀤𑀸𑀲𑀺, 𑀲𑀸 𑀧𑁄𑀢𑁆𑀣𑀁 𑀮𑀪𑀺𑀢𑁆𑀯𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑀸 𑀓𑀺𑀦𑁆𑀦𑀭𑀺𑀬𑁄 𑀳𑀺 𑀧𑁄𑀢𑁆𑀣𑀁 𑀯𑀺𑀦𑀸 𑀧𑀓𑁆𑀔𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑁂𑀦𑁂𑀯 𑀢𑀸𑀧𑀲𑁄 ‘‘𑀫𑀸 𑀧𑁄𑀢𑁆𑀣𑀁 𑀅𑀲𑁆𑀲𑀸 𑀅𑀤𑀸𑀲𑀻’’𑀢𑀺 𑀆𑀳. 𑀓𑀫𑁆𑀫𑀧𑀘𑁆𑀘𑀬 𑀉𑀢𑀼𑀲𑀫𑀼𑀝𑁆𑀞𑀸𑀦𑀜𑁆𑀳𑀺 𑀢𑀸𑀲𑀁 𑀧𑁄𑀢𑁆𑀣𑀁, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀘𑀓𑁆𑀓𑀭𑀢𑀦𑀁 𑀯𑀺𑀬, 𑀢𑀣𑀸 𑀳𑀺 𑀘𑀓𑁆𑀓𑀯𑀢𑁆𑀢𑀺𑀦𑁄 𑀯𑁂𑀳𑀸𑀲𑀕𑀫𑀦𑀸𑀤𑀺 𑀧𑀼𑀜𑁆𑀜𑀯𑀢𑁄 𑀇𑀤𑁆𑀥𑀺𑀦𑀸𑀫, 𑀦 𑀢𑁂𑀦 𑀘𑀓𑁆𑀓𑀭𑀢𑀦𑀁 𑀯𑀸 𑀳𑀢𑁆𑀣𑀺𑀅𑀲𑁆𑀲𑀭𑀢𑀦𑀁 𑀯𑀸 𑀯𑀺𑀦𑀸 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀕𑀦𑁆𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀢𑀢𑁆𑀣 𑀘𑀓𑁆𑀓𑀭𑀢𑀦𑀁 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀓𑀫𑁆𑀫𑀩𑀮𑁂𑀦 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀲𑀫𑀼𑀤𑁆𑀤𑀫𑀚𑁆𑀛𑁂 𑀚𑀸𑀬𑀫𑀸𑀦𑀫𑁆𑀧𑀺 𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀦𑀸𑀫. 𑀳𑀢𑁆𑀣𑀺𑀅𑀲𑁆𑀲𑀭𑀢𑀦𑀸𑀦𑀺 𑀧𑀦 𑀓𑀫𑁆𑀫𑀧𑀘𑁆𑀘𑀬𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀺 𑀦𑀸𑀫. 𑀧𑀓𑁆𑀔𑀻𑀦𑀁 𑀯𑁂𑀳𑀸𑀲𑀕𑀫𑀦𑀸𑀤𑀺𑀓𑀸 𑀓𑀫𑁆𑀫𑀯𑀺𑀧𑀸𑀓𑀚𑀸 𑀇𑀤𑁆𑀥𑀺. 𑀓𑀺𑀦𑁆𑀦𑀭𑀺𑀬𑁄 𑀧𑀦 𑀧𑁄𑀢𑁆𑀣𑀁 𑀯𑀺𑀦𑀸 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀧𑀓𑁆𑀔𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀸𑀲𑀁 𑀧𑁄𑀢𑁆𑀣𑀁 𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑁂𑀘𑀺 𑀧𑀦 𑀤𑁂𑀯𑀸𑀦𑀁 𑀅𑀮𑀗𑁆𑀓𑀸𑀭𑀸 𑀯𑀺𑀬 𑀧𑀝𑀺𑀲𑀦𑁆𑀥𑀺𑀬𑀸 𑀲𑀳 𑀆𑀕𑀢𑁄𑀢𑀺 𑀯𑀤𑀦𑁆𑀢𑀺, 𑀦 𑀢𑀁 𑀧𑀘𑁆𑀘𑁂𑀢𑀩𑁆𑀩𑀁, 𑀅𑀡𑁆𑀟𑀚𑀚𑀮𑀸𑀩𑀼𑀚𑀸𑀦𑀁 𑀢𑀣𑀸 𑀅𑀲𑀫𑁆𑀪𑀯𑀢𑁄. 𑀓𑁂𑀘𑀺𑀧𑀺 𑀧𑀯𑀢𑁆𑀢𑀺 𑀓𑀸𑀮𑁂 𑀓𑀢𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀫𑁆𑀧𑀺 𑀅𑀬𑀼𑀢𑁆𑀢𑀫𑁂𑀯, 𑀲𑀁𑀲𑁂𑀤𑀚𑀸𑀧𑀺 𑀧𑀤𑀼𑀫𑀕𑀩𑁆𑀪𑁂𑀯𑀸 𑀯𑁂𑀴𑀼𑀕𑀩𑁆𑀪𑁂 ¶ 𑀯𑀸 𑀦𑀺𑀩𑁆𑀩𑀢𑁆𑀢𑀸 𑀧𑁄𑀓𑁆𑀔𑀭𑀲𑀸𑀢𑀺𑀩𑁆𑀭𑀸𑀳𑁆𑀫𑀡𑀧𑀤𑀼𑀫𑀯𑀢𑀻𑀯𑁂𑀴𑀼𑀯𑀢𑀻𑀤𑁂𑀯𑀻𑀆𑀤𑀬𑁄 𑀯𑀺𑀬. 𑀚𑀮𑀸𑀩𑀼𑀚𑀸 𑀧𑀦 𑀧𑀸𑀓𑀝𑀸𑀬𑁂𑀯. 𑀬𑁂𑀦 𑀲𑀬𑀁 𑀢𑀺𑀭𑀘𑁆𑀙𑀸𑀦𑀪𑀽𑀢𑁂𑀦 𑀫𑀦𑀼𑀲𑁆𑀲𑀺𑀢𑁆𑀣𑀺𑀪𑀽𑀢𑀸 𑀫𑀸𑀢𑀸 𑀖𑀸𑀢𑀺𑀢𑀸, 𑀲𑁄𑀧𑀺 𑀆𑀦𑀦𑁆𑀢𑀭𑀺𑀓𑁄 𑀦 𑀳𑁄𑀢𑀺 𑀢𑀺𑀭𑀘𑁆𑀙𑀸𑀦𑀕𑀢𑀢𑁆𑀢𑀸 𑀧𑀦𑀲𑁆𑀲 𑀧𑀩𑁆𑀩𑀚𑁆𑀚𑀸 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀓𑀫𑁆𑀫𑀁 𑀧𑀦𑀲𑁆𑀲 𑀪𑀸𑀭𑀺𑀬𑀁 𑀳𑁄𑀢𑀺, 𑀆𑀦𑀦𑁆𑀢𑀭𑀺𑀬𑀁 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺. 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑁄𑀧𑀺 𑀢𑀺𑀭𑀘𑁆𑀙𑀸𑀦𑀫𑀸𑀕𑀫𑁆𑀫 𑀕𑀩𑁆𑀪𑀁 𑀚𑀦𑁂𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀪𑀽𑀭𑀺𑀤𑀢𑁆𑀢𑀲𑁆𑀲 𑀫𑀸𑀢𑀸 𑀇𑀢𑁆𑀣𑀺𑀬𑁄 𑀳𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀺 - 𑀅𑀚𑁆𑀛𑀸𑀘𑀸𑀭𑁂𑀦, 𑀓𑀸𑀬𑀲𑀁𑀲𑀕𑁆𑀕𑁂𑀦, 𑀘𑁄𑀴𑀕𑁆𑀕𑀳𑀡𑁂𑀦, 𑀅𑀲𑀼𑀘𑀺𑀧𑀸𑀦𑁂𑀦, 𑀦𑀸𑀪𑀺𑀧𑀭𑀸𑀫𑀲𑀦𑁂𑀦, 𑀭𑀽𑀧𑀤𑀲𑁆𑀲𑀦𑁂𑀦, 𑀲𑀤𑁆𑀤𑁂𑀦 𑀕𑀦𑁆𑀥𑁂𑀦𑀸𑀢𑀺. 𑀢𑀢𑁆𑀣 𑀅𑀚𑁆𑀛𑀸𑀘𑀸𑀭𑁂𑀦 𑀲𑀼𑀤𑀺𑀦𑁆𑀦𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀕𑀩𑁆𑀪𑀁 𑀕𑀡𑁆𑀳𑀺𑀢𑁆𑀯𑀸 𑀧𑀘𑁆𑀙𑀺𑀫𑀪𑀯𑀺𑀓𑀁 𑀲𑀼𑀯𑀡𑁆𑀡𑀩𑀺𑀫𑁆𑀩𑀲𑀤𑀺𑀲𑀁 𑀩𑀻𑀚𑀓𑀁 𑀦𑀸𑀫 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀓𑀤𑀸𑀘𑀺 𑀏𑀓𑀘𑁆𑀘𑀸 𑀉𑀢𑀼𑀲𑀫𑀬𑁂 𑀙𑀦𑁆𑀤𑀭𑀸𑀕𑀭𑀢𑁆𑀢𑀸 𑀧𑀼𑀭𑀺𑀲𑀸𑀦𑀁 𑀳𑀢𑁆𑀣𑀕𑀸𑀳𑀯𑁂𑀡𑀺𑀕𑀸𑀳𑀅𑀗𑁆𑀕𑀧𑀘𑁆𑀘𑀗𑁆𑀕𑀧𑀭𑀸𑀫𑀲𑀦𑀁 𑀲𑀸𑀤𑀺𑀬𑀦𑁆𑀢𑀺𑀬𑁄𑀧𑀺 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺. 𑀏𑀯𑀁 𑀓𑀸𑀬𑀲𑀁𑀲𑀕𑁆𑀕𑁂𑀦 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀺. 𑀉𑀤𑀸𑀬𑀺𑀢𑁆𑀣𑁂𑀭𑀲𑁆𑀲 𑀧𑀦 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸 𑀪𑀺𑀓𑁆𑀔𑀼𑀦𑀻 𑀢𑀁 𑀅𑀲𑀼𑀘𑀺𑀁 𑀏𑀓𑀤𑁂𑀲𑀁 𑀫𑀼𑀔𑁂𑀦 𑀅𑀕𑁆𑀕𑀳𑁂𑀲𑀺, 𑀏𑀓𑀤𑁂𑀲𑀁 𑀘𑁄𑀴𑀓𑁂𑀦𑁂𑀯 𑀲𑀤𑁆𑀥𑀺𑀁 𑀅𑀗𑁆𑀕𑀚𑀸𑀢𑁂 𑀧𑀓𑁆𑀔𑀺𑀧𑀺, 𑀲𑀸 𑀢𑁂𑀦 𑀕𑀩𑁆𑀪𑀁 𑀕𑀡𑁆𑀳𑀺. 𑀏𑀯𑀁 𑀘𑁄𑀴𑀕𑁆𑀕𑀳𑀡𑁂𑀦 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀺. 𑀫𑀺𑀕𑀲𑀺𑀗𑁆𑀕𑀢𑀸𑀧𑀲𑀲𑁆𑀲 𑀫𑀸𑀢𑀸 𑀫𑀺𑀕𑀻 𑀉𑀢𑀼𑀲𑀫𑀬𑁂 𑀢𑀸𑀧𑀲𑀲𑁆𑀲 𑀧𑀲𑁆𑀲𑀸𑀯𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀲𑀲𑀫𑁆𑀪𑀯𑀁 𑀧𑀺𑀯𑀺, 𑀲𑀸 𑀢𑁂𑀦 𑀕𑀩𑁆𑀪𑀁 𑀕𑀡𑁆𑀳𑀺𑀢𑁆𑀯𑀸 𑀫𑀺𑀕𑀲𑀺𑀗𑁆𑀕𑀁 𑀦𑀸𑀫 𑀢𑀸𑀧𑀲𑀤𑀸𑀭𑀓𑀁 𑀯𑀺𑀚𑀸𑀬𑀺. 𑀏𑀯𑀁 𑀅𑀲𑀼𑀘𑀺𑀧𑀸𑀦𑁂𑀦 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀺. 𑀲𑀸𑀫𑀲𑁆𑀲 𑀧𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀸 𑀉𑀢𑀼𑀲𑀫𑀬𑁂 𑀦𑀸𑀪𑀺𑀧𑀭𑀸𑀫𑀲𑀦𑁂𑀦 𑀕𑀩𑁆𑀪𑀁 𑀕𑀡𑁆𑀳𑀺𑀢𑁆𑀯𑀸 𑀲𑀸𑀫𑀢𑀸𑀧𑀲𑀤𑀸𑀭𑀓𑀁 𑀯𑀺𑀚𑀸𑀬𑀺, 𑀏𑀯𑀁 𑀫𑀡𑁆𑀟𑀩𑁆𑀬𑀲𑁆𑀲 𑀘 𑀘𑀡𑁆𑀟𑀧𑀚𑁆𑀚𑁄 𑀢𑀲𑁆𑀲 𑀘 𑀫𑀸𑀢𑀸 𑀉𑀢𑀼𑀲𑀫𑀬𑁂 𑀦𑀸𑀪𑀺𑀧𑀭𑀸𑀫𑀲𑀦𑀯𑀲𑁂𑀦, 𑀢𑀢𑁆𑀣 𑀘 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀦𑀸𑀪𑀺𑀧𑀭𑀸𑀫𑀲𑀦𑁂𑀦 𑀫𑀡𑁆𑀟𑀩𑁆𑀬𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀅𑀳𑁄𑀲𑀺. 𑀘𑀡𑁆𑀟𑀧𑀚𑁆𑀚𑁄𑀢𑀲𑁆𑀲 𑀫𑀸𑀢𑀼 𑀦𑀸𑀪𑀺𑀬𑀁 𑀯𑀺𑀘𑁆𑀙𑀺𑀓𑁄 𑀨𑀭𑀺𑀢𑁆𑀯𑀸 𑀕𑀢𑁄, 𑀢𑁂𑀦 𑀘𑀡𑁆𑀟𑀧𑀚𑁆𑀚𑁄𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀅𑀳𑁄𑀲𑀺. 𑀇𑀥𑁂𑀓𑀘𑁆𑀘𑀸 𑀇𑀢𑁆𑀣𑀻 𑀉𑀢𑀼𑀲𑀫𑀬𑁂 𑀧𑀼𑀭𑀺𑀲𑀲𑀁𑀲𑀕𑁆𑀕𑀁 𑀅𑀮𑀪𑀫𑀸𑀦𑀸 𑀙𑀦𑁆𑀤𑀭𑀸𑀕𑀯𑀲𑁂𑀦 𑀅𑀦𑁆𑀢𑁄𑀕𑁂𑀳𑁂𑀕𑀢𑀸𑀯 𑀧𑀼𑀭𑀺𑀲𑀁 𑀉𑀧𑀦𑀺𑀚𑁆𑀛𑀸𑀬𑀢𑀺, 𑀭𑀸𑀚𑁄𑀭𑁄𑀥𑁄 𑀯𑀺𑀬, 𑀲𑀸 𑀢𑁂𑀦 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺. 𑀏𑀯𑀁 𑀭𑀽𑀧𑀤𑀲𑁆𑀲𑀦𑁂𑀦 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀺. 𑀩𑀮𑀸𑀓𑀸𑀲𑀼 𑀧𑀦 𑀧𑀼𑀭𑀺𑀲𑁄𑀦𑀸𑀫 𑀦𑀢𑁆𑀣𑀺, 𑀢𑀸 𑀉𑀢𑀼𑀲𑀫𑀬𑁂 𑀫𑁂𑀖𑀲𑀤𑁆𑀤𑀁 𑀲𑀼𑀢𑁆𑀯𑀸 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺. 𑀕𑀸𑀯𑀻𑀏𑀯 𑀯𑀸 𑀓𑀤𑀸𑀘𑀺 𑀉𑀲𑀪𑀕𑀦𑁆𑀥𑁂𑀦 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺. 𑀏𑀯𑀁 𑀕𑀦𑁆𑀥𑁂𑀦 𑀕𑀩𑁆𑀪𑀕𑁆𑀕𑀳𑀡𑀁 𑀳𑁄𑀢𑀺. 𑀏𑀯𑀁 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀇𑀢𑁆𑀣𑀺𑀬𑁄 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺. 𑀏𑀢𑁆𑀣 𑀘 𑀧𑀺𑀢𑀼𑀲𑀤𑀺𑀲𑀸𑀬𑁂𑀯 ¶ 𑀧𑀼𑀢𑁆𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀪𑀽𑀭𑀺𑀤𑀢𑁆𑀢𑀸𑀤𑀬𑁄 𑀥𑀢𑀭𑀝𑁆𑀞𑀁 𑀦𑀸𑀕𑀭𑀸𑀚𑀸𑀦𑀁 𑀧𑀝𑀺𑀘𑁆𑀘 𑀦𑀸𑀕𑀸𑀬𑁂𑀯 𑀳𑁄𑀦𑁆𑀢𑀺. 𑀘𑀡𑁆𑀟𑀧𑀚𑁆𑀚𑁄𑀢𑀲𑁆𑀲 𑀧𑀦 𑀯𑀺𑀘𑁆𑀙𑀺𑀓𑀁 𑀧𑀝𑀺𑀘𑁆𑀘 𑀫𑀦𑀼𑀲𑁆𑀲𑁄 𑀚𑀸𑀢𑁄, 𑀲𑀫𑁆𑀪𑀯𑁂𑀦 𑀅𑀚𑀸𑀢𑀢𑁆𑀢𑀸. 𑀧𑀺𑀢𑀼𑀖𑀸𑀢𑀓𑁂𑀧𑀺 𑀏𑀲𑁂𑀯 𑀦𑀬𑁄.

𑀅𑀭𑀳𑀦𑁆𑀢𑀖𑀸𑀢𑀓𑁄 𑀧𑀦 𑀅𑀫𑀦𑀼𑀲𑁆𑀲 𑀅𑀭𑀳𑀦𑁆𑀢𑀤𑁂𑀯𑀢𑀁 𑀯𑀸 𑀫𑀦𑀼𑀲𑁆𑀲𑀚𑀸𑀢𑀺𑀬𑀁 𑀯𑀸 𑀅𑀯𑀲𑁂𑀲𑀁 𑀅𑀭𑀺𑀬𑀧𑀼𑀕𑁆𑀕𑀮𑀁 𑀖𑀸𑀢𑁂𑀢𑁆𑀯𑀸 𑀅𑀦𑀦𑁆𑀢𑀭𑀺𑀬𑁄 𑀦 𑀳𑁄𑀢𑀺, 𑀧𑀩𑁆𑀩𑀚𑁆𑀚𑀸𑀧𑀺𑀲𑁆𑀲 𑀦 𑀯𑀸𑀭𑀺𑀢𑀸, 𑀓𑀫𑁆𑀫𑀁 𑀧𑀦 𑀩𑀮𑀯𑀁 𑀳𑁄𑀢𑀺. 𑀢𑀺𑀭𑀘𑁆𑀙𑀸𑀦𑁄 𑀧𑀦 𑀅𑀫𑀦𑀼𑀲𑁆𑀲𑀅𑀭𑀳𑀦𑁆𑀢𑀫𑁆𑀧𑀺 𑀖𑀸𑀢𑁂𑀢𑁆𑀯𑀸 𑀆𑀦𑀦𑁆𑀢𑀭𑀺𑀓𑁄 𑀦 𑀳𑁄𑀢𑀺, 𑀓𑀫𑁆𑀫𑀁 𑀧𑀦 𑀪𑀸𑀭𑀺𑀬𑀁 𑀢𑀺𑀭𑀘𑁆𑀙𑀸𑀦𑀕𑀢𑀢𑁆𑀢𑀸 𑀧𑀦𑀲𑁆𑀲 𑀧𑀩𑁆𑀩𑀚𑁆𑀚𑀸 𑀯𑀸𑀭𑀺𑀢𑀸. 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑀲𑀗𑁆𑀖𑀪𑁂𑀤𑀓𑀸𑀦𑀺 𑀧𑀸𑀓𑀝𑀸𑀬𑁂𑀯.

𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄 𑀧𑀦 𑀬𑁄 𑀢𑀣𑀸𑀕𑀢𑀲𑁆𑀲 𑀅𑀪𑁂𑀚𑁆𑀚𑀓𑀸𑀬𑀢𑀸𑀬 𑀧𑀭𑀽𑀧𑀓𑁆𑀓𑀫𑁂𑀦 𑀘𑀫𑁆𑀫𑀁 𑀙𑀺𑀦𑁆𑀤𑀺𑀢𑁆𑀯𑀸 𑀮𑁄𑀳𑀺𑀢𑀁 𑀧𑀕𑁆𑀖𑀭𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀲𑀭𑀻𑀭𑀲𑁆𑀲 𑀧𑀦 𑀅𑀦𑁆𑀢𑁄𑀬𑁂𑀯 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀮𑁄𑀳𑀺𑀢𑀁 𑀲𑀫𑁄𑀲𑀭𑀢𑀺, 𑀆𑀖𑀸𑀢𑁂𑀦 𑀧𑀢𑀼𑀩𑁆𑀩𑀦𑀫𑀸𑀦𑀁 𑀲𑀜𑁆𑀘𑀺𑀢𑀁 𑀳𑁄𑀢𑀺, 𑀢𑀲𑁆𑀲 𑀩𑀳𑀼 𑀅𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀆𑀦𑀦𑁆𑀢𑀭𑀺𑀓𑁄 𑀘 𑀳𑁄𑀢𑀺, 𑀧𑀩𑁆𑀩𑀚𑁆𑀚𑀸𑀧𑀺𑀲𑁆𑀲 𑀯𑀸𑀭𑀺𑀢𑀸, 𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑀤𑀢𑁆𑀢𑁄. 𑀬𑁄 𑀧𑀦 𑀚𑀻𑀯𑀓𑁄 𑀯𑀺𑀬 𑀭𑁄𑀕𑀯𑀽𑀧𑀲𑀫𑀦𑀢𑁆𑀣𑀁 𑀨𑀸𑀮𑁂𑀢𑁆𑀯𑀸 𑀧𑀽𑀢𑀺𑀫𑀁𑀲𑀜𑁆𑀘 𑀮𑁄𑀳𑀺𑀢𑀜𑁆𑀘 𑀦𑀻𑀳𑀭𑀺𑀢𑁆𑀯𑀸 𑀨𑀸𑀲𑀼𑀁 𑀓𑀭𑁄𑀢𑀺, 𑀅𑀬𑀁 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄 𑀦 𑀳𑁄𑀢𑀺, 𑀩𑀳𑀼𑀧𑀼𑀜𑁆𑀜𑀁 𑀧𑀲𑀯𑀢𑀺 𑀩𑁆𑀭𑀳𑁆𑀫𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀚𑀻𑀯𑀓𑁄𑀓𑁄𑀫𑀸𑀭𑀪𑀘𑁆𑀘𑁄.

𑀉𑀩𑁆𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀦 𑀇𑀢𑁆𑀣𑀺-𑀧𑀼𑀭𑀺𑀲𑀯𑀲𑁂𑀦 𑀤𑀼𑀯𑀺𑀥𑁄 𑀢𑀢𑁆𑀣 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀧𑀸𑀓𑀝𑀁, 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀁. 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀧𑀸𑀓𑀝𑀁, 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀁. 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀇𑀢𑁆𑀣𑀻𑀲𑀼 𑀧𑀼𑀭𑀺𑀲𑀢𑁆𑀢𑀁 𑀓𑀭𑁄𑀦𑁆𑀢𑀲𑁆𑀲 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀺, 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀧𑀸𑀓𑀝𑀁 𑀳𑁄𑀢𑀺. 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀧𑀼𑀭𑀺𑀲𑀸𑀦𑀁 𑀇𑀢𑁆𑀣𑀺𑀪𑀸𑀯𑀁 𑀉𑀧𑀕𑀘𑁆𑀙𑀦𑁆𑀢𑀲𑁆𑀲 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀺, 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀧𑀸𑀓𑀝𑀁. 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀲𑀬𑀜𑁆𑀘 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺, 𑀧𑀭𑀜𑁆𑀘 𑀕𑀡𑁆𑀳𑀸𑀧𑁂𑀢𑀺. 𑀧𑀼𑀭𑀺𑀲 𑀉𑀪𑀢𑁄 𑀩𑁆𑀬𑀜𑁆𑀚𑀦𑀓𑁄 𑀧𑀦 𑀲𑀬𑀁 𑀦 𑀕𑀡𑁆𑀳𑀸𑀢𑀺, 𑀧𑀭𑀁 𑀕𑀡𑁆𑀳𑀸𑀧𑁂𑀢𑀺. 𑀇𑀤𑀫𑁂𑀯 𑀢𑁂𑀲𑀁 𑀦𑀸𑀦𑀸𑀓𑀭𑀡𑀁. 𑀉𑀪𑀢𑁄𑀩𑁆𑀬𑀜𑁆𑀚𑀦𑀦𑁆𑀢𑀺 𑀘𑁂𑀢𑁆𑀣 ‘‘𑀩𑁆𑀬𑀜𑁆𑀚𑀦𑀦𑁆𑀢𑀺 𑀦𑀺𑀫𑀺𑀢𑁆𑀢𑀁. 𑀉𑀪𑀢𑁄 𑀩𑁆𑀬𑀜𑁆𑀚𑀦𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀯𑀺𑀕𑁆𑀕𑀳𑁂𑀦 ‘‘𑀉𑀪𑀢𑁄𑀩𑁆𑀬𑀜𑁆𑀚’’𑀦𑁆𑀢𑀺 𑀯𑀓𑁆𑀔𑀣, 𑀏𑀓𑀲𑁆𑀲 𑀤𑁆𑀯𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀅𑀣 𑀏𑀓𑀫𑁂𑀯𑀸𑀢𑀺. 𑀏𑀓𑀫𑁂𑀯 𑀦 𑀤𑁆𑀯𑁂, ‘‘𑀬𑀲𑁆𑀲 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀦𑁄. 𑀬𑀲𑁆𑀲 𑀯𑀸 𑀧𑀦 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 ¶ 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀦𑁄𑀢𑀺 𑀏𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀇𑀦𑁆𑀤𑁆𑀭𑀺𑀬 𑀤𑁆𑀯𑀬𑀲𑁆𑀲 𑀧𑀝𑀺𑀲𑁂𑀯𑀺𑀢𑀢𑁆𑀢𑀸. 𑀢𑀜𑁆𑀘 𑀔𑁄 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀫𑁂𑀯𑀸𑀢𑀺. 𑀬𑀤𑀺 𑀏𑀓𑀫𑁂𑀯 𑀇𑀦𑁆𑀤𑁆𑀭𑀺𑀬𑀁, 𑀏𑀯𑀁 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀪𑀸𑀯𑁄 𑀓𑀣𑀁 𑀲𑀺𑀬𑀸. 𑀇𑀦𑁆𑀤𑁆𑀭𑀺𑀬𑀁 𑀩𑁆𑀬𑀜𑁆𑀚𑀦𑀓𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀜𑁆𑀘 𑀢𑀲𑁆𑀲 𑀦𑀢𑁆𑀣𑀻𑀢𑀺. 𑀯𑀼𑀘𑁆𑀘𑀢𑁂 𑀦 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀼𑀭𑀺𑀲𑀩𑁆𑀬𑀜𑁆𑀚𑀦𑀲𑁆𑀲 𑀓𑀸𑀭𑀡𑀁, 𑀢𑀣𑀸 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀫𑁆𑀧𑀺 𑀇𑀢𑁆𑀣𑀺𑀩𑁆𑀬𑀜𑁆𑀚𑀦𑀓𑀲𑁆𑀲, 𑀓𑀲𑁆𑀫𑀸 𑀲𑀤𑀸 𑀅𑀪𑀸𑀯𑀢𑁄𑀢𑀺, 𑀢𑀣𑀸 𑀳𑀺 𑀇𑀢𑁆𑀣𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀬𑀤𑀸 𑀇𑀢𑁆𑀣𑀺𑀬𑀸 𑀭𑀢𑁆𑀢𑀁 𑀳𑁄𑀢𑀺, 𑀢𑀤𑀸 𑀧𑀼𑀭𑀺𑀲𑀩𑁆𑀬𑀜𑁆𑀚𑀦𑀁 𑀧𑀸𑀓𑀝𑀁 𑀳𑁄𑀢𑀺, 𑀇𑀢𑁆𑀣𑀺𑀩𑁆𑀬𑀜𑁆𑀚𑀦𑀁 𑀧𑀝𑀺𑀘𑁆𑀙𑀦𑁆𑀦𑀁 𑀢𑀣𑀸 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲𑀧𑀺. 𑀬𑀤𑀺 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀤𑁆𑀯𑀬𑀁 𑀩𑁆𑀬𑀜𑁆𑀚𑀦𑀸𑀦𑀁 𑀓𑀸𑀭𑀡𑀁 𑀪𑀯𑁂𑀬𑁆𑀬, 𑀲𑀤𑀸 𑀩𑁆𑀬𑀜𑁆𑀚𑀦 𑀤𑁆𑀯𑀬𑀁 𑀏𑀓𑀢𑁄 𑀢𑀺𑀝𑁆𑀞𑁂𑀬𑁆𑀬 𑀦 𑀧𑀦 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀏𑀓𑀫𑁂𑀯 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀦𑀺𑀝𑁆𑀞𑀫𑁂𑀢𑁆𑀣𑀸𑀯 𑀕𑀦𑁆𑀢𑀩𑁆𑀩𑀁. 𑀩𑁆𑀬𑀜𑁆𑀚𑀦𑀓𑀸𑀭𑀡𑀁 𑀇𑀦𑁆𑀤𑁆𑀭𑀺𑀬𑀁 𑀧𑀳𑀸𑀬 𑀭𑀸𑀕𑀘𑀺𑀢𑁆𑀢𑀫𑁂𑀯𑁂𑀢𑁆𑀣 𑀩𑁆𑀬𑀜𑁆𑀚𑀦𑀤𑁆𑀯𑀬𑀲𑁆𑀲 𑀓𑀸𑀭𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀢𑀲𑁆𑀫𑀸 𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀲𑀬𑀫𑁆𑀧𑀺 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺, 𑀧𑀭𑀫𑁆𑀧𑀺 𑀕𑀡𑁆𑀳𑀸𑀧𑁂𑀢𑀺, 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀭𑀁 𑀕𑀡𑁆𑀳𑀸𑀧𑁂𑀢𑀺, 𑀲𑀬𑀁 𑀧𑀦 𑀦 𑀕𑀡𑁆𑀳𑀸𑀢𑀺, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀲𑀫𑀗𑁆𑀕𑀺𑀲𑁆𑀲𑁂𑀯 𑀕𑀩𑁆𑀪𑀲𑀫𑁆𑀪𑀯𑀢𑁄𑀢𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘‘𑀬𑀤𑀺 𑀧𑀝𑀺𑀲𑀦𑁆𑀥𑀺𑀬𑀁 𑀧𑀼𑀭𑀺𑀲𑀮𑀺𑀗𑁆𑀕𑀁, 𑀧𑀯𑀢𑁆𑀢𑁂 𑀇𑀢𑁆𑀣𑀺𑀮𑀺𑀗𑁆𑀕𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀬𑀤𑀺 𑀧𑀝𑀺𑀲𑀦𑁆𑀥𑀺𑀬𑀁 𑀇𑀢𑁆𑀣𑀺𑀮𑀺𑀗𑁆𑀕𑀁, 𑀧𑀯𑀢𑁆𑀢𑁂 𑀧𑀼𑀭𑀺𑀲𑀮𑀺𑀗𑁆𑀕𑀁 𑀦𑀺𑀩𑁆𑀩𑀢𑀻’’𑀢𑀺 𑀧𑀝𑀺𑀲𑀦𑁆𑀥𑀺𑀬𑀁 𑀮𑀺𑀗𑁆𑀕𑀲𑀫𑁆𑀪𑀯𑁄 𑀯𑀼𑀢𑁆𑀢𑁄, 𑀲𑁄 𑀅𑀬𑀼𑀢𑁆𑀢𑁄𑀯. 𑀓𑀲𑁆𑀫𑀸, 𑀧𑀯𑀢𑁆𑀢𑀺𑀬𑀁𑀬𑁂𑀯 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀦𑀺 𑀲𑀫𑀼𑀝𑁆𑀞𑀳𑀦𑁆𑀢𑀺. 𑀧𑀝𑀺𑀲𑀦𑁆𑀥𑀺𑀬𑀫𑁂𑀯 𑀲𑀫𑀼𑀝𑁆𑀞𑀸𑀢𑀺, 𑀦 𑀮𑀺𑀗𑁆𑀕𑀸𑀤𑀻𑀦𑀺. 𑀇𑀦𑁆𑀤𑁆𑀭𑀺𑀬𑀫𑁂𑀯 𑀮𑀺𑀗𑁆𑀕𑀦𑁆𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀇𑀦𑁆𑀤𑁆𑀭𑀺𑀬𑀮𑀺𑀗𑁆𑀕𑀸𑀦𑀁 𑀪𑀺𑀦𑁆𑀦𑀲𑀪𑀸𑀯𑀢𑁆𑀢𑀸, 𑀬𑀣𑀸 𑀘 𑀩𑀻𑀚𑁂 𑀲𑀢𑀺 𑀭𑀼𑀓𑁆𑀔𑁄 𑀲𑀫𑁆𑀪𑀯𑀢𑀺, 𑀦𑀸𑀲𑀢𑀺, 𑀏𑀯𑀫𑁂𑀯 𑀇𑀦𑁆𑀤𑁆𑀭𑀺𑀬𑁂 𑀲𑀢𑀺 𑀮𑀺𑀗𑁆𑀕𑀸𑀤𑀻𑀦𑀺 𑀲𑀫𑁆𑀪𑀯𑀦𑁆𑀢𑀺 𑀩𑀻𑀚𑀲𑀤𑀺𑀲𑀜𑁆𑀳𑀺 𑀇𑀦𑁆𑀤𑁆𑀭𑀺𑀬𑀁, 𑀭𑀼𑀓𑁆𑀔𑀲𑀤𑀺𑀲𑀸𑀦𑀺 𑀮𑀺𑀗𑁆𑀕𑀸𑀤𑀻𑀦𑀺 𑀏𑀯𑀫𑁂𑀯 𑀢𑁂𑀲𑀼 𑀧𑀼𑀕𑁆𑀕𑀮𑁂𑀲𑀼 𑀧𑀡𑁆𑀟𑀓𑀸𑀤𑀬𑁄 𑀏𑀓𑀸𑀤𑀲𑀧𑀼𑀕𑁆𑀕𑀮𑀸 𑀢𑀲𑁆𑀫𑀺𑀁 𑀬𑁂𑀯 𑀪𑀯𑁂 𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀦 𑀅𑀭𑀳𑀦𑁆𑀢𑀺, 𑀢𑀲𑁆𑀫𑀸 𑀅𑀪𑀩𑁆𑀩𑀸 𑀦𑀸𑀫. 𑀊𑀦𑀯𑀻𑀲𑀢𑀺 𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑀧𑀼𑀩𑁆𑀩𑀸 𑀤𑁆𑀯𑁂 𑀉𑀧𑀲𑀫𑁆𑀧𑀤𑀸𑀬 𑀅𑀯𑀢𑁆𑀣𑀼𑀫𑀢𑁆𑀢𑀫𑁂𑀯, 𑀉𑀧𑀦𑀺𑀲𑁆𑀲𑀬𑁂 𑀲𑀢𑀺 𑀢𑀲𑁆𑀫𑀺𑀁𑀬𑁂𑀯 𑀪𑀯𑁂 𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀅𑀭𑀳𑀦𑁆𑀢𑀺, 𑀢𑀲𑁆𑀫𑀸 𑀪𑀩𑁆𑀩𑀸𑀦𑀸𑀫 𑀳𑁄𑀦𑁆𑀢𑀺.

𑀯𑀢𑁆𑀣𑀼𑀲𑀫𑁆𑀧𑀢𑁆𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀜𑀢𑁆𑀢𑀺𑀲𑀫𑁆𑀧𑀢𑁆𑀢𑀺 𑀦𑀸𑀫.

‘‘𑀲𑀺𑀣𑀺𑀮𑀁 𑀥𑀦𑀺𑀢𑀜𑁆𑀘 𑀤𑀻𑀖𑀭𑀲𑁆𑀲𑀁, 𑀕𑀭𑀼𑀓𑀁 𑀮𑀳𑀼𑀓𑀜𑁆𑀘 𑀦𑀺𑀕𑁆𑀕𑀳𑀺𑀢𑀁;

𑀲𑀫𑁆𑀩𑀦𑁆𑀥𑀁 𑀯𑀯𑀢𑁆𑀣𑀺𑀢𑀁 𑀯𑀺𑀫𑀼𑀢𑁆𑀢𑀁, 𑀤𑀲𑀥𑀸 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸 𑀧𑀪𑁂𑀤𑁄’’𑀢𑀺.

𑀏𑀯𑀁 ¶ 𑀯𑀼𑀢𑁆𑀢𑀁 𑀤𑀲𑀯𑀺𑀥𑀁 𑀩𑁆𑀬𑀜𑁆𑀚𑀦𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀸 𑀏𑀯𑀁 𑀅𑀲𑀓𑁆𑀓𑁄𑀦𑁆𑀢𑁂𑀦𑀸𑀧𑀺 𑀲𑀺𑀣𑀺𑀮𑀥𑀦𑀺𑀢 𑀯𑀺𑀫𑀼𑀢𑁆𑀢𑀦𑀺𑀕𑁆𑀕𑀳𑀺𑀢𑀯𑀲𑁂𑀦 𑀯𑀼𑀢𑁆𑀢𑀸𑀦𑀺 𑀩𑁆𑀬𑀜𑁆𑀚𑀦𑀸𑀦𑀺 𑀅𑀓𑁄𑀧𑁂𑀢𑁆𑀯𑀸 𑀯𑀸 𑀤𑀼𑀭𑀼𑀢𑁆𑀢𑀁 𑀯𑀸 𑀅𑀓𑀢𑁆𑀯𑀸 𑀯𑀼𑀢𑁆𑀢𑀁 𑀜𑀢𑁆𑀢𑀺𑀲𑀫𑁆𑀧𑀢𑁆𑀢𑀺 𑀦𑀸𑀫. 𑀜𑀢𑁆𑀢𑀺𑀯𑀺𑀧𑀢𑁆𑀢𑀺 𑀦𑀸𑀫 𑀲𑀩𑁆𑀩𑀲𑁄 𑀜𑀢𑁆𑀢𑀺𑀁 𑀅𑀝𑁆𑀞𑀧𑁂𑀢𑁆𑀯𑀸 𑀯𑀸 𑀯𑀢𑁆𑀣𑀼𑀲𑀗𑁆𑀖𑀧𑀼𑀕𑁆𑀕𑀮𑀜𑀢𑁆𑀢𑀻𑀦𑀁 𑀅𑀧𑀭𑀸𑀫𑀲𑀦𑀸𑀦𑀺 𑀧𑀘𑁆𑀙𑀸 𑀜𑀢𑁆𑀢𑀺𑀝𑁆𑀞𑀧𑀦𑀜𑁆𑀘𑀸𑀢𑀺 𑀇𑀫𑁂 𑀢𑀸𑀯 𑀧𑀜𑁆𑀘 𑀜𑀢𑁆𑀢𑀺𑀤𑁄𑀲𑀸. 𑀢𑀢𑁆𑀣 𑀅𑀬𑀁 𑀇𑀢𑁆𑀣𑀦𑀸𑀫𑁄𑀢𑀺 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀲𑁆𑀲 𑀅𑀧𑀺 𑀅𑀓𑀺𑀢𑁆𑀢𑀦𑀁 𑀯𑀢𑁆𑀣𑀼𑀅𑀧𑀭𑀸𑀫𑀲𑀦𑀁 𑀦𑀸𑀫. 𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂 𑀲𑀗𑁆𑀖𑁄𑀢𑀺 𑀏𑀢𑁆𑀣 𑀲𑀼𑀡𑀸𑀢𑀼 𑀫𑁂 𑀪𑀦𑁆𑀢𑁂𑀢𑀺 𑀯𑀢𑁆𑀯𑀸 𑀲𑀗𑁆𑀖𑁄𑀢𑀺 𑀅𑀪𑀡𑀦𑀁 𑀲𑀗𑁆𑀖𑀅𑀧𑀭𑀸𑀫𑀲𑀦𑀁 𑀦𑀸𑀫. 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄𑀢𑀺 𑀉𑀧𑀚𑁆𑀛𑀸𑀬𑀲𑁆𑀲 𑀅𑀓𑀺𑀢𑁆𑀢𑀦𑀁 𑀧𑀼𑀕𑁆𑀕𑀮𑀅𑀧𑀭𑀸𑀫𑀲𑀦𑀁 𑀦𑀸𑀫. 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀜𑀢𑁆𑀢𑀺𑀬𑀸 𑀅𑀦𑀼𑀘𑁆𑀘𑀸𑀭𑀡𑀁 𑀜𑀢𑁆𑀢𑀺𑀅𑀧𑀭𑀸𑀫𑀲𑀦𑀁 𑀦𑀸𑀫. 𑀧𑀞𑀫𑀁 𑀓𑀫𑁆𑀫𑀯𑀸𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀏𑀲𑀸 𑀜𑀢𑁆𑀢𑀻𑀢𑀺 𑀯𑀢𑁆𑀯𑀸 𑀔𑀫𑀢𑀺 𑀲𑀗𑁆𑀖𑀲𑁆𑀲𑀸𑀢𑀺 𑀏𑀯𑀁 𑀜𑀢𑁆𑀢𑀺 𑀓𑀺𑀢𑁆𑀢𑀦𑀁 𑀧𑀘𑁆𑀙𑀸 𑀜𑀢𑁆𑀢𑀺𑀝𑁆𑀞𑀧𑀦𑀁 𑀦𑀸𑀫. 𑀇𑀢𑀺 𑀇𑀫𑁂 𑀧𑀜𑁆𑀘 𑀜𑀢𑁆𑀢𑀺𑀤𑁄𑀲𑀸 𑀜𑀢𑁆𑀢𑀺𑀯𑀺𑀧𑀢𑁆𑀢𑀺 𑀦𑀸𑀫. 𑀇𑀫𑁂𑀳𑀺 𑀤𑁄𑀲𑁂𑀳𑀺 𑀯𑀺𑀫𑀼𑀢𑁆𑀢𑀸𑀬 𑀜𑀢𑁆𑀢𑀺𑀬𑀸 𑀲𑀫𑁆𑀧𑀦𑁆𑀦𑀁 𑀜𑀢𑁆𑀢𑀺𑀲𑀫𑁆𑀧𑀢𑁆𑀢𑀺 𑀦𑀸𑀫.

𑀜𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀼𑀲𑀸𑀯𑀦𑀲𑀫𑁆𑀧𑀢𑁆𑀢𑀺 𑀦𑀸𑀫 𑀯𑀢𑁆𑀣𑀼 𑀲𑀗𑁆𑀖𑀧𑀼𑀕𑁆𑀕𑀮𑀸𑀦𑀁 𑀅𑀧𑀭𑀸𑀫𑀲𑀦𑀸𑀦𑀺, 𑀲𑀸𑀯𑀦𑀸𑀬 𑀳𑀸𑀧𑀦𑀁, 𑀅𑀓𑀸𑀮𑁂 𑀲𑀸𑀯𑀦𑀦𑁆𑀢𑀺 𑀇𑀫𑁂 𑀧𑀜𑁆𑀘 𑀅𑀦𑀼𑀲𑀸𑀯𑀦𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸 𑀓𑀣𑀦𑀁 𑀅𑀦𑀼𑀲𑀸𑀯𑀦𑀲𑀫𑁆𑀧𑀢𑁆𑀢𑀺 𑀦𑀸𑀫. 𑀢𑀢𑁆𑀣 𑀯𑀢𑁆𑀣𑀸𑀤𑀻𑀦𑀁 𑀅𑀧𑀭𑀸𑀫𑀲𑀦𑀸𑀦𑀺 𑀜𑀢𑁆𑀢𑀺𑀬𑀁 𑀯𑀼𑀢𑁆𑀢𑀲𑀤𑀺𑀲𑀸𑀦𑁂𑀯. 𑀢𑀻𑀲𑀼 𑀧𑀦 𑀅𑀦𑀼𑀲𑀸𑀯𑀦𑀸𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀏𑀢𑁂𑀲𑀁 𑀅𑀧𑀭𑀸𑀫𑀲𑀦𑀁 𑀅𑀧𑀭𑀸𑀫𑀲𑀦𑀫𑁂𑀯. 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀦 𑀓𑀫𑁆𑀫𑀯𑀸𑀘𑀁 𑀅𑀯𑀢𑁆𑀯𑀸 𑀘𑀢𑀼𑀓𑁆𑀔𑀢𑁆𑀢𑀼𑀁 𑀜𑀢𑁆𑀢𑀺𑀓𑀺𑀢𑁆𑀢𑀦𑀫𑁂𑀯 𑀯𑀸 𑀓𑀫𑁆𑀫𑀯𑀸𑀘𑀩𑁆𑀪𑀦𑁆𑀢𑀭𑁂𑀧𑀺 𑀘𑀢𑁆𑀢𑀸𑀭𑀺 𑀩𑁆𑀬𑀜𑁆𑀚𑀦𑀸𑀦𑀺 𑀓𑁄𑀧𑁂𑀢𑁆𑀯𑀸 𑀯𑀸 𑀅𑀓𑁆𑀔𑀭𑀲𑁆𑀲 𑀯𑀸 𑀧𑀤𑀲𑁆𑀲 𑀯𑀸 𑀤𑀼𑀭𑀼𑀘𑁆𑀘𑀸𑀭𑀡𑀁 𑀯𑀸 𑀓𑀢𑁆𑀯𑀸 𑀲𑀸𑀯𑀦𑀁 𑀲𑀸𑀯𑀦𑀸𑀬 𑀳𑀸𑀧𑀦𑀁 𑀦𑀸𑀫, 𑀢𑀣𑀸 𑀳𑀺 𑀲𑀺𑀣𑀺𑀮𑀥𑀦𑀺𑀢𑀯𑀺𑀫𑀼𑀢𑁆𑀢𑀦𑀺𑀕𑁆𑀕𑀳𑀺𑀢𑀯𑀲𑁂𑀦 𑀘𑀢𑁆𑀢𑀸𑀭𑀺 𑀩𑁆𑀬𑀜𑁆𑀚𑀦𑀸𑀦𑀺 𑀅𑀦𑁆𑀢𑁄𑀓𑀫𑁆𑀫𑀯𑀸𑀘𑀸𑀬 𑀓𑀫𑁆𑀫𑀁 𑀓𑁄𑀧𑁂𑀦𑁆𑀢𑀺. 𑀢𑀢𑁆𑀣 ‘‘𑀲𑀼𑀡𑀸𑀢𑀼 𑀫𑁂 𑀢𑀺 𑀲𑀺𑀣𑀺𑀮𑁂 𑀯𑀢𑁆𑀢𑀩𑁆𑀩𑁂 𑀲𑀼𑀡𑀸𑀣𑀼 𑀫𑁂’’𑀢𑀺 𑀯𑀘𑀦𑀁 𑀲𑀺𑀣𑀺𑀮𑁂 𑀥𑀦𑀺𑀢𑀁 𑀦𑀸𑀫. ‘‘𑀪𑀦𑁆𑀢𑁂’’𑀢𑀺 𑀯𑀢𑁆𑀢𑀩𑁆𑀩𑁂 𑀪𑀦𑁆𑀢𑁂𑀢𑀺 𑀯𑀘𑀦𑀁 𑀥𑀦𑀺𑀢𑁂 𑀲𑀺𑀣𑀺𑀮𑀁 𑀦𑀸𑀫. ‘‘𑀲𑀼𑀡𑀸𑀢𑀼 𑀏𑀲𑀸 𑀜𑀢𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀼𑀡𑀦𑁆𑀢𑀼 𑀏𑀲𑀁 𑀜𑀢𑁆𑀢𑀻’’𑀢𑀺 𑀯𑀘𑀦𑀁 𑀯𑀺𑀫𑀼𑀢𑁆𑀢𑁂 𑀦𑀺𑀕𑁆𑀕𑀳𑀺𑀢𑀁 𑀦𑀸𑀫. ‘‘𑀧𑀢𑁆𑀢𑀓𑀮𑁆𑀮’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀧𑀢𑁆𑀢𑀓𑀮𑁆𑀮𑀸’’𑀢𑀺 𑀯𑀘𑀦𑀁 𑀦𑀺𑀕𑁆𑀕𑀳𑀺𑀢𑁂 𑀯𑀺𑀫𑀼𑀢𑁆𑀢𑀁 𑀦𑀸𑀫. 𑀏𑀯𑀁 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀩𑁆𑀬𑀜𑁆𑀚𑀦𑀸𑀦𑀺 𑀅𑀦𑁆𑀢𑁄𑀓𑀫𑁆𑀫𑀯𑀸𑀘𑀸𑀬 𑀓𑀫𑁆𑀫𑀁 𑀤𑀽𑀲𑁂𑀦𑁆𑀢𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀓𑁄𑀧𑁂𑀢𑁆𑀯𑀸 𑀯𑀤𑀦𑁆𑀢𑁂𑀦𑀸𑀧𑀺 𑀅𑀜𑁆𑀜𑀲𑁆𑀫𑀺𑀁 𑀅𑀓𑁆𑀔𑀭𑁂 ¶ 𑀯𑀢𑁆𑀢𑀩𑁆𑀩𑁂 𑀅𑀜𑁆𑀜𑀁 𑀅𑀓𑁆𑀔𑀭𑀁 𑀯𑀤𑀦𑁆𑀢𑁄 𑀤𑀼𑀭𑀼𑀢𑁆𑀢𑀁 𑀓𑀭𑁄𑀢𑀺 𑀦𑀸𑀫. 𑀇𑀢𑀭𑁂𑀲𑀼 𑀤𑀻𑀖𑀭𑀲𑁆𑀲𑀸𑀤𑀻𑀲𑀼 𑀙𑀲𑀼 𑀞𑀸𑀦𑁂𑀲𑀼 𑀤𑀻𑀖𑀝𑁆𑀞𑀸𑀦𑁂 𑀤𑀻𑀖𑀁, 𑀭𑀲𑁆𑀲𑀝𑁆𑀞𑀸𑀦𑁂 𑀭𑀲𑁆𑀲𑀫𑁂𑀯𑀸𑀢𑀺 𑀏𑀯𑀁 𑀬𑀣𑀸𑀞𑀸𑀦𑁂 𑀢𑀁 𑀢𑀤𑁂𑀯 𑀅𑀓𑁆𑀔𑀭𑀁 𑀪𑀸𑀲𑀦𑁆𑀢𑁂𑀦 𑀅𑀦𑀼𑀓𑁆𑀓𑀫𑀸𑀕𑀢𑀁 𑀧𑀯𑁂𑀡𑀺𑀁 𑀅𑀯𑀺𑀦𑀸𑀲𑁂𑀢𑁆𑀯𑀸 𑀓𑀫𑁆𑀫𑀯𑀸𑀘𑀸 𑀓𑀸𑀢𑀩𑁆𑀩𑀸. 𑀲𑀘𑁂 𑀧𑀦 𑀏𑀯𑀁 𑀅𑀓𑀢𑁆𑀯𑀸 𑀤𑀻𑀖𑁂 𑀯𑀢𑁆𑀢𑀩𑁆𑀩𑁂 𑀭𑀲𑁆𑀲𑀁, 𑀭𑀲𑁆𑀲𑁂 𑀯𑀢𑁆𑀢𑀩𑁆𑀩𑁂 𑀤𑀻𑀖𑀁 𑀯𑀤𑀢𑀺, 𑀢𑀣𑀸 𑀕𑀭𑀼𑀓𑁂 𑀯𑀢𑁆𑀢𑀩𑁆𑀩𑁂 𑀮𑀳𑀼𑀓𑀁, 𑀮𑀳𑀼𑀓𑁂 𑀯𑀢𑁆𑀢𑀩𑁆𑀩𑁂 𑀕𑀭𑀼𑀓𑀁 𑀯𑀤𑀢𑀺. 𑀲𑀫𑁆𑀩𑀦𑁆𑀥𑁂 𑀯𑀸 𑀯𑀢𑁆𑀢𑀩𑁆𑀩𑁂 𑀯𑀯𑀢𑁆𑀣𑀺𑀢𑀁, 𑀯𑀯𑀢𑁆𑀣𑀺𑀢𑁂 𑀯𑀸 𑀯𑀢𑁆𑀢𑀩𑁆𑀩𑁂 𑀲𑀫𑁆𑀩𑀦𑁆𑀥𑀁 𑀯𑀤𑀢𑀺, 𑀏𑀯𑀫𑁆𑀧𑀺 𑀓𑀫𑁆𑀫𑀯𑀸𑀘𑀸 𑀦 𑀓𑀼𑀧𑁆𑀧𑀢𑀺. 𑀇𑀫𑀸𑀦𑀺 𑀙 𑀩𑁆𑀬𑀜𑁆𑀚𑀦𑀸𑀦𑀺 𑀓𑀫𑁆𑀫𑀁 𑀦 𑀓𑁄𑀧𑁂𑀦𑁆𑀢𑀺. 𑀇𑀤𑀫𑁂𑀯 𑀆𑀘𑀭𑀺𑀬𑀸𑀦𑀁 𑀲𑀫𑀸𑀦𑀓𑀣𑀸. 𑀅𑀧𑀭𑁂 𑀧𑀦 𑀇𑀤𑀸𑀦𑀺 𑀩𑁆𑀬𑀜𑁆𑀚𑀦𑀸𑀦𑀺 𑀅𑀦𑁆𑀢𑁄𑀓𑀫𑁆𑀫𑀯𑀸𑀘𑀸𑀬 𑀓𑀫𑁆𑀫𑀁 𑀤𑀽𑀲𑁂𑀦𑁆𑀢𑀻𑀢𑀺 𑀯𑀤𑀦𑁆𑀢𑀺, 𑀏𑀯𑀁 𑀲𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀯 𑀩𑀳𑀼𑀢𑀭𑀸 𑀪𑀯𑁂𑀬𑁆𑀬𑀼𑀁, 𑀯𑀻𑀫𑀁𑀲𑀺𑀢𑁆𑀯𑀸 𑀧𑀦 𑀕𑀳𑁂𑀢𑀩𑁆𑀩𑀁. 𑀲𑀼𑀝𑁆𑀞𑀼𑀢𑀭𑀸 𑀯𑀸 𑀓𑀫𑁆𑀫𑀯𑀸𑀘𑀸 𑀲𑀺𑀓𑁆𑀔𑀺𑀢𑀩𑁆𑀩𑀸. 𑀲𑀸𑀯𑀦𑀸𑀬 𑀅𑀦𑁄𑀓𑀸𑀲𑁂 𑀧𑀞𑀫𑀁 𑀜𑀢𑁆𑀢𑀺𑀁 𑀅𑀝𑁆𑀞𑀧𑁂𑀢𑁆𑀯𑀸 𑀅𑀦𑀼𑀲𑀸𑀯𑀦𑀁 𑀅𑀓𑀸𑀮𑁂 𑀲𑀸𑀯𑀦𑀁 𑀦𑀸𑀫. 𑀇𑀢𑀺 𑀇𑀫𑁂𑀳𑀺 𑀤𑁄𑀲𑁂𑀳𑀺 𑀯𑀺𑀫𑀼𑀢𑁆𑀢𑀸𑀬 𑀅𑀦𑀼𑀲𑀸𑀯𑀦𑀸𑀬 𑀲𑀫𑁆𑀧𑀦𑁆𑀦𑀁 𑀅𑀦𑀼𑀲𑀸𑀯𑀦𑀲𑀫𑁆𑀧𑀢𑁆𑀢𑀺𑀲𑀫𑁆𑀧𑀦𑁆𑀦𑀁 𑀦𑀸𑀫. 𑀬𑀤𑀺 𑀧𑀢𑁆𑀢𑀘𑀻𑀯𑀭𑀭𑀳𑀺𑀢𑀁 𑀧𑀼𑀕𑁆𑀕𑀮𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, ‘‘𑀧𑀭𑀺𑀧𑀼𑀡𑁆𑀡𑀲𑁆𑀲 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀅𑀦𑀼𑀲𑀸𑀯𑀦𑀸𑀬 𑀓𑀢𑀢𑁆𑀢𑀸 𑀓𑀫𑁆𑀫𑀓𑁄𑀧𑁄 𑀦 𑀳𑁄𑀢𑀺, 𑀓𑀸𑀭𑀓𑀲𑀗𑁆𑀖𑁄 𑀧𑀦 𑀲𑀸𑀢𑀺𑀲𑀸𑀭𑁄 𑀢𑁂𑀦𑁂𑀯𑀸𑀳 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀫𑁆𑀧𑀺 𑀧𑀢𑁆𑀢𑀘𑀻𑀯𑀭𑀸𑀦𑀁 𑀅𑀪𑀸𑀯𑁂𑀧𑀺’𑀧𑀭𑀺𑀧𑀼𑀡𑁆𑀡𑀲𑁆𑀲 𑀧𑀢𑁆𑀢𑀘𑀻𑀯𑀭’𑀦𑁆𑀢𑀺 𑀓𑀫𑁆𑀫𑀯𑀸𑀘𑀸𑀬 𑀲𑀸𑀯𑀺𑀢𑀢𑁆𑀢𑀸 𑀓𑀫𑁆𑀫𑀓𑁄𑀧𑀁 𑀅𑀯𑀢𑁆𑀯𑀸 𑀤𑀼𑀓𑁆𑀓𑀝𑀫𑁂𑀯 𑀯𑀼𑀢𑁆𑀢𑀦𑁆𑀢𑀺. 𑀲𑀘𑁂 𑀅𑀦𑀼𑀧𑀚𑁆𑀛𑀸𑀬𑀓𑁄 𑀉𑀧𑀲𑀫𑁆𑀧𑀸𑀤𑁂𑀢𑀺, ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄, 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦𑀸’’𑀢𑀺 𑀯𑀸 𑀉𑀧𑀚𑁆𑀛𑀸𑀬𑀁 𑀲𑀸𑀯𑁂𑀢𑀺, 𑀲𑀽𑀧𑀲𑀫𑁆𑀧𑀦𑁆𑀦𑁄𑀯 𑀳𑁄𑀢𑀺. 𑀉𑀧𑀚𑁆𑀛𑀸𑀬𑀁 𑀦 𑀲𑀸𑀯𑁂𑀢𑀺 𑀦𑀼𑀧𑀲𑀫𑁆𑀧𑀦𑁆𑀦𑁄. 𑀯𑀓𑁆𑀔𑀢𑀺 𑀳𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 ‘‘𑀓𑀫𑁆𑀫𑀁 𑀦 𑀓𑀼𑀧𑁆𑀧𑀢𑀻𑀢𑀺 𑀇𑀤𑀁 𑀉𑀧𑀚𑁆𑀛𑀸𑀬𑀸𑀪𑀸𑀯𑁂𑀧𑀺 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦𑀸’’𑀢𑀺 𑀫𑀢𑀲𑁆𑀲 𑀯𑀸 𑀯𑀺𑀩𑁆𑀪𑀫𑀦𑁆𑀢𑀲𑁆𑀲 𑀯𑀸 𑀧𑀼𑀭𑀸𑀡𑀉𑀧𑀚𑁆𑀛𑀸𑀬𑀲𑁆𑀲 𑀯𑀸 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀯𑀺𑀚𑁆𑀚𑀫𑀸𑀦𑀲𑁆𑀲𑀸𑀧𑀺 𑀦𑀸𑀫𑁂𑀦 𑀲𑀩𑁆𑀩𑀢𑁆𑀣 𑀉𑀧𑀚𑁆𑀛𑀸𑀬𑀓𑀺𑀢𑁆𑀢𑀦𑀲𑁆𑀲 𑀓𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀬𑀤𑀺 𑀳𑀺 𑀉𑀧𑀚𑁆𑀛𑀸𑀬𑀓𑀺𑀢𑁆𑀢𑀦𑀁 𑀦 𑀓𑀭𑁂𑀬𑁆𑀬,’𑀧𑀼𑀕𑁆𑀕𑀮𑀁 𑀦 𑀧𑀭𑀸𑀫𑀲𑀢𑀻’𑀢𑀺 𑀯𑀼𑀢𑁆𑀢𑀓𑀫𑁆𑀫𑀯𑀺𑀧𑀢𑁆𑀢𑀺𑀏𑀯 𑀲𑀺𑀬𑀸, 𑀢𑁂𑀦𑁂𑀯 𑀧𑀸𑀴𑀺𑀬𑀁 ‘‘𑀅𑀦𑀼𑀧𑀚𑁆𑀛𑀸𑀬𑀓𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺. 𑀲𑀘𑁂 𑀲𑀗𑁆𑀖𑀼𑀧𑀚𑁆𑀛𑀸𑀬𑁂𑀦 𑀕𑀡𑀼𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀓𑀸𑀭𑀓𑀲𑀗𑁆𑀖𑁄 𑀲𑀸𑀢𑀺𑀲𑀸𑀭𑁄, 𑀓𑀫𑁆𑀫𑀁 𑀧𑀦 𑀦 𑀓𑀼𑀧𑁆𑀧𑀢𑀺, 𑀯𑀓𑁆𑀔𑀢𑀺 𑀳𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 ‘‘𑀲𑀗𑁆𑀖𑁂𑀦 𑀉𑀧𑀚𑁆𑀛𑀸𑀬𑁂𑀦𑀸’’𑀢𑀺 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄 𑀲𑀗𑁆𑀖𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄, 𑀇𑀢𑁆𑀣𑀦𑁆𑀦𑀸𑀫𑁄 𑀲𑀗𑁆𑀖𑀁 𑀉𑀧𑀲𑀫𑁆𑀧𑀤𑀁 𑀬𑀸𑀘𑀢𑀺. 𑀲𑀗𑁆𑀖𑁂𑀦 𑀉𑀧𑀚𑁆𑀛𑀸𑀬𑁂𑀦𑀸’’𑀢𑀺 𑀏𑀯𑀁 𑀓𑀫𑁆𑀫𑀯𑀸𑀘𑀸𑀬 𑀲𑀗𑁆𑀖𑀫𑁂𑀯 𑀉𑀧𑀚𑁆𑀛𑀸𑀬𑀁 𑀓𑀺𑀢𑁆𑀢𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀁’𑀕𑀡𑁂𑀦 𑀉𑀧𑀚𑁆𑀛𑀸𑀬𑁂𑀦𑀸’𑀢𑀺 𑀏𑀢𑁆𑀣𑀸𑀧𑀺 𑀅𑀬𑀁 𑀇𑀢𑁆𑀣𑀦𑁆𑀦𑀸𑀫𑁄𑀕𑀡𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄’𑀢𑀺 𑀆𑀤𑀺𑀦𑀸 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀓𑀫𑁆𑀫𑀁 𑀦 𑀓𑀼𑀧𑁆𑀧𑀢𑀺 𑀏𑀯, 𑀤𑀼𑀓𑁆𑀓𑀝𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸, 𑀅𑀜𑁆𑀜𑀣𑀸 𑀲𑁄 𑀘 𑀧𑀼𑀕𑁆𑀕𑀮𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀢𑀺 𑀯𑀤𑁂𑀬𑁆𑀬𑀸’𑀢𑀺. 𑀲𑀘𑁂 𑀧𑀡𑁆𑀟𑀓𑀸𑀤𑀺𑀦𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀓𑁂𑀦 𑀉𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀢𑁂 𑀯𑀚𑁆𑀚𑁂𑀢𑁆𑀯𑀸 𑀧𑀜𑁆𑀘𑀯𑀕𑁆𑀕𑀸𑀤𑀺𑀕𑀡𑁄 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀧𑀽𑀭𑀢𑀺, 𑀓𑀫𑁆𑀫𑀁 𑀦 𑀓𑀼𑀧𑁆𑀧𑀢𑀺, 𑀓𑀸𑀭𑀓𑀲𑀗𑁆𑀖𑁄 𑀧𑀦 𑀲𑀸𑀢𑀺𑀲𑀸𑀭𑁄 𑀢𑁂𑀦 𑀯𑀼𑀢𑁆𑀢𑀁 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 ‘‘𑀧𑀡𑁆𑀟𑀓𑀸𑀤𑀻𑀳𑀺 𑀉𑀧𑀚𑁆𑀛𑀸𑀬𑁂𑀳𑀺 𑀓𑀭𑀺𑀬𑀫𑀸𑀦𑁂𑀲𑀼 𑀧𑀡𑁆𑀟𑀓𑀸𑀤𑀺𑀓𑁂𑀦 𑀯𑀺𑀦𑀸𑀯 𑀧𑀜𑁆𑀘𑀯𑀕𑁆𑀕𑀸𑀤𑀺𑀕𑀡𑁄 𑀧𑀽𑀭𑀢𑀺, 𑀓𑀫𑁆𑀫𑀁 𑀦 𑀓𑀼𑀧𑁆𑀧𑀢𑀺. 𑀇𑀢𑀭𑀣𑀸 𑀓𑀼𑀧𑁆𑀧𑀢𑀻’’𑀢𑀺. 𑀲𑀘𑁂 𑀘𑀢𑁆𑀢𑀸𑀭𑁄 𑀆𑀘𑀭𑀺𑀬𑀸 𑀏𑀓𑀢𑁄 𑀅𑀦𑀼𑀲𑀸𑀯𑁂𑀦𑁆𑀢𑀺, 𑀏𑀢𑁆𑀣 𑀧𑀦 𑀓𑀣𑀦𑁆𑀢𑀺 𑀯𑀼𑀘𑁆𑀘𑀢𑁂, 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀤𑁆𑀯𑀻𑀳𑀺 𑀯𑀸 𑀢𑀻𑀳𑀺 𑀯𑀸 𑀆𑀘𑀭𑀺𑀬𑁂𑀳𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀏𑀓𑁂𑀦 𑀏𑀓𑀲𑁆𑀲𑀸𑀢𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀤𑁆𑀯𑁂 𑀢𑀺𑀲𑁆𑀲𑁄 𑀯𑀸 𑀓𑀫𑁆𑀫𑀯𑀸𑀘𑀸 𑀓𑀸𑀢𑀩𑁆𑀩𑀸. 𑀲𑀘𑁂 𑀧𑀦 𑀦𑀸𑀦𑀸𑀘𑀭𑀺𑀬𑀸 𑀦𑀸𑀦𑀼𑀧𑀚𑁆𑀛𑀸𑀬𑀸 𑀳𑁄𑀦𑁆𑀢𑀺, 𑀢𑀺𑀲𑁆𑀲𑀢𑁆𑀣𑁂𑀭𑁄 𑀲𑀼𑀫𑀦𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁, 𑀲𑀼𑀫𑀦𑀢𑁆𑀣𑁂𑀭𑁄 𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀅𑀦𑀼𑀲𑀸𑀯𑁂𑀢𑀺, 𑀕𑀡𑀧𑀽𑀭𑀓𑀸 𑀳𑁄𑀦𑁆𑀢𑀺 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀦𑀸𑀦𑀼𑀧𑀚𑁆𑀛𑀸𑀬𑀸 𑀳𑁄𑀦𑁆𑀢𑀺, 𑀏𑀓𑁄 𑀆𑀘𑀭𑀺𑀬𑁄 𑀳𑁄𑀢𑀺, 𑀦𑀢𑁆𑀯𑁂𑀯’𑀦𑀸𑀦𑀼𑀧𑀚𑁆𑀛𑀸𑀬𑁂𑀦𑀸’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀦 𑀯𑀝𑁆𑀝𑀢𑀻𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀘𑀢𑀼𑀦𑁆𑀦𑀁 𑀧𑀦 𑀚𑀦𑀸𑀦𑀁 𑀯𑀺𑀘𑀸𑀭𑀡𑀓𑀣𑀸𑀬 𑀦𑀸𑀧𑀺 𑀓𑀫𑁆𑀫𑀯𑀺𑀧𑀢𑁆𑀢𑀺𑀙𑀸𑀬𑀸 𑀤𑀺𑀲𑁆𑀲𑀢𑀺, 𑀢𑀣𑀸𑀧𑀺 𑀦 𑀓𑀢𑁆𑀢𑀩𑁆𑀩𑀫𑁂𑀯, 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀅𑀯𑀺𑀘𑀸𑀭𑀺𑀢𑀢𑁆𑀢𑀸. 𑀲𑀘𑁂 𑀯𑀢𑁆𑀣𑀸𑀮𑀗𑁆𑀓𑀸𑀭𑀸𑀤𑀺𑀲𑀳𑀺𑀢𑀧𑀭𑀽𑀴𑁆𑀳𑀓𑁂𑀲𑀫𑀲𑁆𑀲𑀼𑀁 𑀉𑀧𑀲𑀫𑁆𑀧𑀸𑀤𑁂𑀢𑀺, 𑀲𑀽𑀧𑀲𑀫𑁆𑀧𑀦𑁆𑀦𑁄𑀯 𑀳𑁄𑀢𑀺, 𑀧𑀘𑁆𑀙𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑀼𑀁 𑀯𑀝𑁆𑀝𑀢𑀺 𑀢𑁂𑀭𑀲𑀯𑀢𑁆𑀣𑀼𑀯𑀺𑀫𑀼𑀢𑁆𑀢𑀢𑁆𑀢𑀸 𑀲𑀫𑁆𑀧𑀢𑁆𑀢𑀺 𑀬𑁂𑀯𑁂𑀢𑁆𑀣𑀧𑀫𑀸𑀡𑀢𑁆𑀢𑀸 𑀘.

𑀅𑀦𑀼𑀲𑀸𑀯𑀦𑀲𑀫𑁆𑀧𑀢𑁆𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀇𑀤𑀸𑀦𑀺 𑀲𑀻𑀫𑀯𑀺𑀲𑁄𑀥𑀦𑀺𑀁 𑀦𑀸𑀫, 𑀦𑀸𑀦𑀸𑀕𑀦𑁆𑀣𑀲𑀫𑀸𑀳𑀦𑁆𑀢𑀺 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄 𑀅𑀦𑀼𑀧𑁆𑀧𑀢𑁆𑀢𑁄.

𑀧𑀜𑁆𑀜𑀸𑀯 𑀲𑀩𑁆𑀩𑀜𑁂𑀬𑁆𑀬𑁂𑀲𑀼, 𑀤𑀬𑀸 𑀬𑀲𑁆𑀲 𑀫𑀳𑁂𑀲𑀺𑀦𑁄;

𑀅𑀦𑀦𑁆𑀢𑁂𑀲𑀼𑀧𑀺 𑀲𑀢𑁆𑀢𑁂𑀲𑀼, 𑀧𑀯𑀢𑁆𑀢𑀺𑀢𑁆𑀣 𑀬𑀣𑀸𑀭𑀼𑀘𑀺.

𑀢𑀸𑀬 𑀉𑀲𑁆𑀲𑀸𑀳𑀺𑀢𑁄 𑀲𑀢𑁆𑀣𑀸, 𑀪𑀺𑀓𑁆𑀔𑀽𑀦𑀁 𑀳𑀺𑀢𑀓𑀸𑀭𑀡𑀁;

𑀬𑀁 𑀲𑀻𑀫𑀁 𑀅𑀦𑀼𑀚𑀸𑀦𑀸𑀢𑀺, 𑀢𑀢𑁆𑀣 𑀧𑀜𑁆𑀳𑁄 𑀧𑀯𑀢𑁆𑀢𑀢𑀺.

𑀤𑁆𑀯𑁂𑀴𑁆𑀳𑀓𑀸 ¶ 𑀲𑀁𑀲𑀬𑀸 𑀳𑁄𑀦𑁆𑀢𑀺, 𑀤𑁂𑀲𑁂 𑀲𑀩𑁆𑀩𑀢𑁆𑀣 𑀪𑀺𑀓𑁆𑀔𑀯𑁄;

𑀕𑀦𑁆𑀣𑀸𑀧𑀺 𑀯𑀺𑀲𑀫𑀸 𑀳𑁄𑀦𑁆𑀢𑀺, 𑀅𑀢𑁆𑀢𑀦𑁄𑀫𑀢𑀺𑀓𑀸𑀭𑀡𑀸.

𑀬𑀤𑀺 𑀫𑁂 𑀈𑀤𑀺𑀲𑀁 𑀯𑀸𑀤𑀁, 𑀲𑀼𑀢𑁆𑀯𑀸𑀯𑀼𑀧𑁂𑀓𑁆𑀔𑀓𑁄 𑀪𑀯𑁂;

𑀧𑀩𑁆𑀩𑀚𑁆𑀚𑀸 𑀦𑀺𑀧𑁆𑀨𑀮𑀸 𑀫𑀬𑁆𑀳𑀁, 𑀯𑀭𑁂 𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑁂;

𑀕𑀫𑁆𑀪𑀻𑀭𑁄 𑀦𑀺𑀧𑀼𑀡𑁄 𑀅𑀢𑁆𑀣𑁄, 𑀲𑀩𑁆𑀩𑀜𑁆𑀜𑀼𑀚𑀺𑀦𑀕𑁄𑀘𑀭𑁄.

𑀲𑀸𑀭𑀺𑀧𑀼𑀢𑁆𑀢𑁄 𑀫𑀳𑀸𑀧𑀜𑁆𑀜𑁄, 𑀣𑁂𑀭𑀲𑁆𑀲𑀧𑀺 𑀅𑀯𑀺𑀲𑀬𑁄;

𑀓𑀣𑀁 𑀢𑁆𑀯𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀲𑀺, 𑀲𑀩𑁆𑀩𑀜𑁆𑀜𑀼𑀚𑀺𑀦𑀕𑁄𑀘𑀭𑁂;

𑀇𑀢𑀺 𑀫𑁂 𑀉𑀧𑀯𑀤𑁂𑀬𑁆𑀬𑀼𑀁, 𑀥𑀭𑀢𑁂𑀯 𑀫𑀳𑀸𑀫𑀼𑀦𑀺.

𑀧𑀸𑀮𑀺𑀨𑀼𑀮𑁆𑀮𑁄 𑀫𑀳𑀸𑀲𑀸𑀮𑁄, 𑀉𑀘𑁆𑀘𑁄 𑀫𑁂𑀭𑀼𑀦𑀕𑀽𑀧𑀫𑁄;

𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑀫𑁆𑀳𑀺, 𑀲𑀫𑁆𑀩𑀼𑀤𑁆𑀥𑁄 𑀇𑀘𑁆𑀘𑀫𑀩𑁆𑀭𑀯𑀺.

𑀫𑀸 𑀢𑁆𑀯𑀁 𑀆𑀦𑀦𑁆𑀤 𑀭𑁄𑀤𑀲𑀺, 𑀫𑀸 𑀢𑁆𑀯𑀁 𑀆𑀦𑀦𑁆𑀤 𑀲𑁄𑀘𑀲𑀺;

𑀅𑀳𑀫𑁂𑀓𑁄𑀯 𑀦𑀺𑀩𑁆𑀩𑀸𑀬𑀺, 𑀥𑀭𑀦𑁆𑀢𑁂𑀯 𑀩𑀳𑀽 𑀩𑀼𑀤𑁆𑀥𑀸.

𑀲𑀫𑁆𑀩𑀼𑀤𑁆𑀥𑀸 𑀘𑀢𑀼𑀭𑀸𑀲𑀻𑀢𑀺, 𑀲𑀳𑀲𑁆𑀲𑀸𑀦𑀺 𑀇𑀫𑀸𑀦𑀺 𑀢𑁂;

𑀑𑀯𑀤𑀺𑀲𑁆𑀲𑀦𑁆𑀢𑀺 𑀢𑁆𑀯𑀁 𑀪𑀺𑀓𑁆𑀔𑀼, 𑀓𑀢𑀧𑀼𑀜𑁆𑀜𑁄𑀲𑀺 𑀳𑁄𑀳𑀺𑀲𑀺.

𑀯𑀭𑁂 𑀲𑀸𑀝𑁆𑀞𑀓𑀣𑁂 𑀧𑀸𑀴𑀺, 𑀞𑀺𑀢𑁂 𑀲𑀩𑁆𑀩𑀜𑁆𑀜𑀼𑀕𑁄𑀘𑀭𑁂;

𑀦𑀺𑀩𑁆𑀩𑀼𑀢𑁄𑀧𑀺 𑀲𑀫𑁆𑀩𑀼𑀤𑁆𑀥𑁄, 𑀅𑀲𑀼𑀜𑁆𑀜𑁄𑀯 𑀧𑀚𑀁 𑀇𑀫𑀁.

𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀭𑀢𑁆𑀢𑀺𑀤𑀺𑀯𑀁 𑀅𑀢𑀦𑁆𑀤𑀺𑀢𑁄;

𑀥𑀭𑀦𑁆𑀢𑁂𑀬𑁂𑀯 𑀲𑀫𑁆𑀩𑀼𑀤𑁆𑀥𑁂, 𑀪𑀺𑀦𑁆𑀦𑀯𑀸𑀤𑁄 𑀅𑀯𑀺𑀲𑀬𑁄.

𑀢𑀁 𑀯𑀸𑀤𑀁 𑀪𑀺𑀦𑁆𑀤𑀬𑀺𑀢𑁆𑀯𑀸𑀦, 𑀚𑀳𑀺𑀢𑁆𑀯𑀸 𑀯𑀢𑁆𑀢𑀦𑁄𑀫𑀢𑀺𑀁;

𑀯𑀺𑀲𑁆𑀲𑀚𑁆𑀚𑀺𑀲𑁆𑀲𑀫𑀳𑀁 𑀤𑀸𑀦𑀺, 𑀘𑀺𑀭𑀁 𑀲𑀤𑁆𑀥𑀫𑁆𑀫𑀲𑀼𑀤𑁆𑀥𑀺𑀬𑀸𑀢𑀺.

𑀢𑀢𑁆𑀣 𑀲𑀻𑀫𑀯𑀺𑀲𑁄𑀥𑀦𑀺'𑀦𑁆𑀢𑀺 𑀲𑀻𑀫𑀯𑀺𑀧𑀢𑁆𑀢𑀺𑀚𑀳𑀦𑀁 𑀲𑀻𑀫𑀯𑀺𑀧𑀢𑁆𑀢𑀺𑀁 𑀧𑀳𑀸𑀬 𑀲𑀫𑁆𑀧𑀢𑁆𑀢𑀺𑀮𑀓𑁆𑀔𑀡𑀧𑁆𑀧𑀓𑀸𑀲𑀓𑀁 𑀧𑀓𑀭𑀡𑀁 𑀓𑀭𑀺𑀲𑁆𑀲𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀲𑀻𑀫𑀸𑀢𑀺 𑀧𑀦𑁆𑀦𑀭𑀲𑀯𑀺𑀥𑀸 𑀲𑀻𑀫𑀸. 𑀓𑀢𑀫𑁂 𑀧𑀦𑁆𑀦𑀭𑀲. 𑀔𑀡𑁆𑀟𑀲𑀻𑀫𑀸, 𑀉𑀧𑀘𑀸𑀭𑀲𑀻𑀫𑀸, 𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀸, 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸, 𑀮𑀸𑀪𑀲𑀻𑀫𑀸, 𑀕𑀸𑀫𑀲𑀻𑀫𑀸, 𑀦𑀺𑀕𑀫𑀲𑀻𑀫𑀸, 𑀦𑀕𑀭𑀲𑀻𑀫𑀸, 𑀅𑀩𑁆𑀪𑀦𑁆𑀢𑀭𑀲𑀻𑀫𑀸, 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸, 𑀚𑀦𑀧𑀤𑀲𑀻𑀫𑀸, 𑀭𑀝𑁆𑀞𑀲𑀻𑀫𑀸, 𑀭𑀚𑁆𑀚𑀲𑀻𑀫𑀸, 𑀤𑀻𑀧𑀲𑀻𑀫𑀸, 𑀘𑀓𑁆𑀓𑀯𑀸𑀴𑀲𑀻𑀫𑀸’𑀢𑀺. 𑀢𑀢𑁆𑀣 𑀔𑀡𑁆𑀟𑀲𑀻𑀫𑀸 𑀦𑀸𑀫 𑀧𑀩𑁆𑀩𑀚𑁆𑀚𑀼𑀧𑀲𑀫𑁆𑀧𑀤𑀸𑀤𑀻𑀦𑀁 𑀲𑀗𑁆𑀖𑀓𑀫𑁆𑀫𑀸𑀦𑀁 𑀲𑀼𑀔𑀓𑀭𑀡𑀢𑁆𑀣𑀁 𑀫𑀳𑀸𑀲𑀻𑀫𑀸𑀬 𑀯𑀸 𑀕𑀸𑀫𑀔𑁂𑀢𑁆𑀢𑁂 𑀯𑀸 𑀔𑀡𑁆𑀟𑀺𑀢𑁆𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀫𑁆𑀫𑀢𑀸. 𑀢𑀲𑁆𑀲𑀸𑀯𑀺𑀢𑁆𑀣𑀸𑀭𑁄 ''𑀧𑀞𑀫𑀁 𑀦𑀺𑀫𑀺𑀢𑁆𑀢𑀸 𑀓𑀺𑀢𑁆𑀢𑁂𑀢𑀩𑁆𑀩𑀸''𑀢𑀺 𑀆𑀤𑀺𑀦𑀸 𑀤𑁆𑀯𑀸𑀲𑀢𑁆𑀢𑀢𑀺𑀧𑁆𑀧𑀪𑁂𑀤𑀸𑀬 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀫𑀳𑀸𑀯𑀕𑁆𑀕𑁂 𑀯𑀼𑀢𑁆𑀢𑁄, 𑀇𑀥 𑀯𑀼𑀢𑁆𑀢𑁄𑀧𑀺 𑀢𑀣𑁂𑀯 𑀯𑀼𑀢𑁆𑀢𑁄 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀦 ¶ 𑀯𑀓𑁆𑀔𑀸𑀫, 𑀤𑀼𑀯𑀺𑀜𑁆𑀜𑁂𑀬𑁆𑀬𑀝𑁆𑀞𑀸𑀦𑀫𑁂𑀯 𑀓𑀺𑀜𑁆𑀘𑀺𑀞𑀸𑀦𑀁 𑀦𑀻𑀳𑀭𑀺𑀢𑁆𑀯𑀸 𑀧𑀸𑀓𑀝𑀁 𑀓𑀭𑀺𑀲𑁆𑀲𑀸𑀫. 𑀢𑀢𑁆𑀣 𑀲𑀘𑁂 𑀧𑀦 𑀳𑁂𑀝𑁆𑀞𑀸 𑀉𑀧𑀭𑀺𑀫𑀲𑁆𑀲 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀲𑁆𑀲 𑀧𑀭𑀢𑁄 𑀅𑀦𑁆𑀢𑁄 𑀮𑁂𑀡𑀁 𑀳𑁄𑀢𑀺, 𑀩𑀳𑀺 𑀲𑀻𑀫𑀸 𑀦 𑀑𑀢𑀭𑀢𑀺. 𑀅𑀣𑀸𑀧𑀺 𑀉𑀧𑀭𑀺𑀫𑀲𑁆𑀲 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀲𑁆𑀲 𑀑𑀭𑀢𑁄 𑀩𑀳𑀺 𑀮𑁂𑀡𑀁 𑀳𑁄𑀢𑀺, 𑀅𑀦𑁆𑀢𑁄𑀲𑀻𑀫𑀸 𑀦 𑀑𑀢𑀭𑀢𑀻𑀢𑀺 𑀇𑀫𑁂 𑀤𑁆𑀯𑁂 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀅𑀬𑀜𑁆𑀳𑁂𑀢𑁆𑀣𑀢𑁆𑀣𑁄𑀉𑀧𑀭𑀺𑀫𑀲𑁆𑀲 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀲𑁆𑀲 𑀑𑀭𑀺𑀫𑀪𑀸𑀕𑀢𑁄 𑀳𑁂𑀝𑁆𑀞𑀸 𑀧𑀩𑁆𑀩𑀢𑀧𑀸𑀤𑁂 𑀉𑀫𑀗𑁆𑀕𑀲𑀡𑁆𑀞𑀸𑀦𑁂𑀦 𑀧𑀩𑁆𑀩𑀢𑀧𑀲𑁆𑀲𑁂 𑀯𑀺𑀚𑁆𑀛𑀺𑀢𑁆𑀯𑀸 𑀮𑁂𑀡𑀁 𑀳𑁄𑀢𑀺, 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀲𑁆𑀲 𑀧𑀭𑀢𑁄 𑀮𑁂𑀡𑁂 𑀘 𑀮𑁂𑀡𑀲𑁆𑀲 𑀩𑀳𑀺𑀪𑀽𑀢𑁂 𑀳𑁂𑀝𑁆𑀞𑀸 𑀧𑀩𑁆𑀩𑀢𑁂 𑀘 𑀪𑀽𑀫𑀺𑀪𑀸𑀕𑁂 𑀲𑀻𑀫𑀸 𑀦 𑀑𑀢𑀭𑀢𑀺, 𑀮𑁂𑀡𑀲𑁆𑀲 𑀉𑀧𑀭𑀺𑀬𑁂𑀯 𑀲𑀻𑀫𑀸 𑀳𑁄𑀢𑀻𑀢𑀺. 𑀢𑀲𑁆𑀲 𑀉𑀧𑀭𑀺𑀫𑀲𑁆𑀲 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀲𑁆𑀲 𑀑𑀭𑀺𑀫𑀪𑀸𑀕𑀢𑁄 𑀩𑀳𑀺𑀪𑀽𑀢𑁂 𑀳𑁂𑀝𑁆𑀞𑀸 𑀧𑀩𑁆𑀩𑀢𑀧𑀸𑀤𑁂 𑀉𑀫𑀗𑁆𑀕𑀲𑀡𑁆𑀞𑀸𑀦𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀧𑀩𑁆𑀩𑀢𑀧𑀲𑁆𑀲𑁂 𑀮𑁂𑀡𑀁 𑀅𑀣𑀸𑀧𑀺 𑀳𑁄𑀢𑀺, 𑀮𑁂𑀡𑁂 𑀘 𑀮𑁂𑀡𑀲𑁆𑀲 𑀧𑀭𑀪𑀽𑀢𑁂 𑀳𑁂𑀝𑁆𑀞𑀸 𑀧𑀩𑁆𑀩𑀢𑁂 𑀘 𑀪𑀽𑀫𑀺𑀪𑀸𑀕𑁂 𑀲𑀻𑀫𑀸 𑀦 𑀑𑀢𑀭𑀢𑀺, 𑀮𑁂𑀡𑀲𑁆𑀲 𑀉𑀧𑀭𑀺𑀪𑀸𑀕𑁂 𑀯 𑀲𑀻𑀫𑀸 𑀳𑁄𑀢𑀻𑀢𑀺. 𑀏𑀲𑀸 𑀘 𑀯𑀺𑀘𑀸𑀭𑀡𑀸 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀫𑁆𑀧𑀺 𑀓𑀢𑀸. 𑀅𑀦𑁆𑀢𑁄 𑀢𑀺 𑀧𑀩𑁆𑀩𑀢𑀲𑁆𑀲 𑀅𑀦𑁆𑀢𑁄, 𑀧𑀩𑁆𑀩𑀢𑀫𑀽𑀮𑁂𑀢𑀺 𑀅𑀢𑁆𑀣𑁄. 𑀢𑀫𑁂𑀯 𑀅𑀦𑁆𑀢𑁄𑀲𑀤𑁆𑀤𑀁 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑁂𑀦 𑀯𑀺𑀲𑁂𑀲𑁂𑀢𑀼𑀁 ‘‘𑀉𑀧𑀭𑀺𑀫𑀲𑁆𑀲 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀲𑁆𑀲 𑀧𑀭𑀢𑁄’’𑀢𑀺 𑀯𑀼𑀢𑁆𑀢𑀁. 𑀧𑀩𑁆𑀩𑀢𑀧𑀸𑀤𑀁 𑀧𑀦 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀑𑀭𑀢𑁄’’𑀢𑀺 𑀯𑀢𑁆𑀢𑀩𑁆𑀩𑁂𑀧𑀺 𑀲𑀻𑀫𑀸𑀦𑀺𑀲𑁆𑀲𑀬𑀁 𑀧𑀩𑁆𑀩𑀢𑀕𑁆𑀕𑀁 𑀲𑀦𑁆𑀥𑀸𑀬 ‘‘𑀧𑀭𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁 𑀢𑁂𑀦𑁂𑀯 𑀩𑀳𑀺𑀮𑁂𑀡𑀦𑁆𑀢𑀺 𑀏𑀢𑁆𑀣 𑀩𑀳𑀺𑀲𑀤𑁆𑀤𑀁 𑀯𑀺𑀲𑁂𑀲𑁂𑀦𑁆𑀢𑁄 ‘‘𑀉𑀧𑀭𑀺𑀫𑀲𑁆𑀲 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀲𑁆𑀲 𑀑𑀭𑀢𑁄’’𑀢𑀺 𑀆𑀳. 𑀩𑀳𑀺 𑀲𑀻𑀫𑀸 𑀦 𑀑𑀢𑀭𑀢𑀻𑀢𑀺 𑀏𑀢𑁆𑀣 𑀩𑀳𑀻 𑀢𑀺 𑀧𑀩𑁆𑀩𑀢𑀧𑀸𑀤𑁂𑀮𑁂𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀮𑁂𑀡𑀲𑁆𑀲 𑀩𑀳𑀺𑀪𑀽𑀢𑁂 𑀉𑀧𑀭𑀺 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀲𑁆𑀲 𑀳𑁂𑀝𑁆𑀞𑀸𑀪𑀸𑀕𑁂 𑀲𑀻𑀫𑀸 𑀦 𑀑𑀢𑀭𑀢𑀻𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁄𑀲𑀻𑀫𑀸𑀢𑀺 𑀮𑁂𑀡𑀲𑁆𑀲 𑀘 𑀧𑀩𑁆𑀩𑀢𑀧𑀸𑀤𑀲𑁆𑀲 𑀘 𑀅𑀦𑁆𑀢𑁄 𑀅𑀢𑁆𑀢𑀦𑁄 𑀑𑀢𑀭𑀡𑀸𑀭𑀳𑀝𑁆𑀞𑀸𑀦𑁂 𑀦 𑀑𑀢𑀭𑀢𑀻𑀢𑀺 𑀅𑀢𑁆𑀣𑁄. 𑀩𑀳𑀺 𑀲𑀻𑀫𑀸 𑀦 𑀑𑀢𑀭𑀢𑀻𑀢𑀺 𑀅𑀢𑁆𑀣𑁄, 𑀲𑀻𑀫𑀸 𑀦 𑀑𑀢𑀭𑀢𑀻 𑀢𑀺 𑀘𑁂𑀢𑁆𑀣 𑀅𑀢𑁆𑀢𑀦𑁄 𑀑𑀢𑀭𑀡𑀸𑀭𑀳𑀝𑁆𑀞𑀸𑀦𑁂 𑀮𑁂𑀡𑀪𑀸𑀯𑁂𑀦 𑀲𑀻𑀫𑀸 𑀲𑀩𑁆𑀩𑀣𑀸 ‘‘𑀅𑀦𑁄𑀢𑀭𑀡𑀫𑁂𑀯 𑀤𑀲𑁆𑀲𑀺𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀢𑀢𑁆𑀣 𑀧𑀺 𑀅𑀦𑁄𑀢𑀭𑀡𑀦𑁆𑀢𑀺 𑀉𑀧𑀭𑀺𑀏𑀯 𑀲𑀻𑀫𑀸 𑀳𑁄𑀢𑀻’’𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀻. 𑀓𑁂𑀘𑀺 𑀧𑀦 𑀯𑁂𑀴𑀼𑀲𑀼𑀲𑀺𑀭𑁄 𑀯𑀺𑀬 𑀲𑀼𑀲𑀺𑀭𑀫𑁂𑀯 𑀮𑁂𑀡𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀬𑀼𑀢𑁆𑀢𑀁.

𑀉𑀧𑀘𑀸𑀭𑀲𑀻𑀫𑀸 𑀦𑀸𑀫 𑀕𑀸𑀫𑀸𑀭𑀜𑁆𑀜𑀦𑀺𑀕𑀫𑀸𑀤𑀺𑀯𑀲𑀸 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀦𑀺𑀯𑀸𑀲𑀕𑁂𑀳𑀲𑁆𑀲 𑀯𑀸 𑀤𑁂𑀯𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑀸𑀤𑀻𑀦𑀁 𑀯𑀸 𑀉𑀧𑀘𑀸𑀭𑀸𑀭𑀳𑀝𑁆𑀞𑀸𑀦𑀫𑁂𑀯 𑀉𑀧𑀘𑀸𑀭𑀲𑀻𑀫𑀸 𑀢𑁂 𑀇𑀥 𑀦𑀸𑀥𑀺𑀧𑁆𑀧𑁂𑀢𑀸, 𑀪𑀺𑀓𑁆𑀔𑀽𑀦𑀁 𑀅𑀯𑀺𑀲𑀬𑀢𑀸𑀬 ¶ . 𑀬𑀁 𑀧𑀦 𑀧𑀤𑁂𑀲𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀯𑁂𑀡𑀁 𑀓𑀢𑁆𑀯𑀸 𑀧𑀸𑀓𑀸𑀭𑀸𑀤𑀺𑀧𑀭𑀺𑀓𑁆𑀔𑀺𑀢𑁆𑀢𑀁 𑀯𑀸 𑀓𑀢𑁆𑀯𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑁂𑀧𑀺 𑀉𑀧𑀘𑀸𑀭𑀸𑀭𑀳𑀝𑁆𑀞𑀸𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀸 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀪𑀺𑀓𑁆𑀔𑀽 𑀯𑀲𑀦𑁆𑀢𑀺, 𑀅𑀬𑀫𑁂𑀯 𑀉𑀧𑀘𑀸𑀭𑀲𑀻𑀫𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀪𑀺𑀓𑁆𑀔𑀽𑀦𑀁 𑀯𑀲𑁆𑀲𑀽𑀧𑀕𑀫𑀦𑀓𑀣𑀺𑀦𑀢𑁆𑀣𑀸𑀭𑀓𑀭𑀡𑀝𑁆𑀞𑀸𑀦𑀢𑁆𑀢𑀸, 𑀢𑀣𑀸 𑀳𑀺 ‘‘𑀓𑀣𑀺𑀦𑀢𑁆𑀣𑀢𑀲𑀻𑀫𑀸𑀬’’𑀦𑁆𑀢𑀺 𑀉𑀧𑀘𑀸𑀭𑀲𑀻𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀔𑀦𑁆𑀥𑀲𑀻𑀫𑀸𑀬 𑀢𑀢𑁆𑀭𑀼𑀧𑁆𑀧𑀸𑀤𑀸𑀪𑀸𑀯𑀢𑁄𑀢𑀺 𑀢𑀻𑀲𑀼𑀧𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀢𑀢𑁆𑀭𑀼𑀧𑁆𑀧𑀸𑀤𑁂𑀦𑀸 𑀪𑀢𑀦𑁆𑀢𑀺 𑀯𑀺𑀳𑀸𑀭𑀲𑀦𑁆𑀢𑀓𑁂𑀦 𑀔𑁂𑀢𑁆𑀢𑀯𑀢𑁆𑀣𑀼𑀆𑀤𑀺𑀦𑀸 𑀆𑀪𑀢𑀁 𑀓𑀺𑀜𑁆𑀘𑀺 𑀲𑀗𑁆𑀖𑀺𑀓𑀁 𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀢𑁂𑀲𑀁 𑀓𑀣𑀺𑀦𑀢𑁆𑀣𑀸𑀭𑀓𑀪𑀺𑀓𑁆𑀔𑀽𑀦𑀁 𑀬𑁂𑀯 𑀪𑀯𑀺𑀲𑁆𑀲𑀢𑀻𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀔𑁂𑀢𑁆𑀢𑀯𑀢𑁆𑀣𑀼𑀆𑀤𑀺𑀦𑀸 𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀫𑀢𑀓𑀘𑀻𑀯𑀭𑀁 𑀯𑀸 𑀳𑁄𑀢𑀼 𑀲𑀁𑀖𑀁 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑀁 𑀯𑀸 𑀲𑀗𑁆𑀖𑀺𑀓𑁂𑀦 𑀯𑀸 𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀁 𑀉𑀧𑀘𑀸𑀭𑀲𑀻𑀫𑁂 𑀧𑀯𑀢𑁆𑀢𑀘𑀻𑀯𑀭𑀁 𑀲𑀩𑁆𑀩𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀢𑁂𑀦𑁂𑀯 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁂𑀦 𑀉𑀧𑀸𑀲𑀓𑁂𑀦 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀸𑀭𑁄 𑀓𑀸𑀭𑀺𑀢𑁄 𑀳𑁄𑀢𑀺, 𑀲𑁄 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀓𑀢𑁂 𑀉𑀪𑀢𑁄𑀲𑀗𑁆𑀖𑀲𑁆𑀲 𑀅𑀓𑀸𑀮𑀘𑀻𑀯𑀭𑀁 𑀤𑀸𑀢𑀼𑀓𑀸𑀫𑁄 𑀳𑁄𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀪𑀢𑁄𑀲𑀗𑁆𑀖𑀲𑁆𑀲 𑀓𑀣𑀺𑀦𑀁 𑀅𑀢𑁆𑀣𑀢𑀁 𑀳𑁄𑀢𑀺. 𑀅𑀣 𑀔𑁄 𑀲𑁄 𑀉𑀧𑀸𑀲𑀓𑁄 𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀣𑀺𑀦𑀼𑀤𑁆𑀥𑀸𑀭𑀁 𑀬𑀸𑀘𑀻’’𑀢𑀺 𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀆𑀦𑀺𑀲𑀁𑀲𑀧𑀲𑀫𑁆𑀪𑀦𑀢𑁆𑀣𑀁 𑀓𑀣𑀺𑀦𑀼𑀤𑁆𑀥𑀸𑀭𑀁 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁, 𑀢𑁂𑀦𑁂𑀯 𑀣𑀼𑀮𑁆𑀮𑀦𑀦𑁆𑀤𑀸 𑀪𑀺𑀓𑁆𑀔𑀼𑀦𑀻 𑀆𑀦𑀺𑀲𑀁𑀲𑀁 𑀅𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑀸 𑀘𑀻𑀯𑀭𑀁 𑀅𑀫𑁆𑀳𑀸𑀓𑀁 𑀪𑀯𑀺𑀲𑁆𑀲𑀢𑀻𑀢𑀺 𑀓𑀣𑀺𑀦𑀼𑀤𑁆𑀥𑀸𑀭𑀁 𑀧𑀝𑀺𑀩𑀸𑀳𑀺, 𑀢𑀲𑁆𑀫𑀸 𑀓𑀣𑀺𑀦𑀢𑁆𑀣𑀢𑀲𑀻𑀫𑀸𑀬𑀁 𑀅𑀦𑀼𑀤𑁆𑀥𑀝𑁂 𑀓𑀣𑀺𑀦𑁂 𑀬𑀸𑀯 𑀨𑀕𑁆𑀕𑀼𑀡𑀧𑀼𑀡𑁆𑀡𑀫𑀸 𑀧𑀜𑁆𑀘 𑀫𑀸𑀲𑀸 𑀏𑀢𑁆𑀣𑀦𑁆𑀢𑀭𑁂 𑀫𑀢𑀓𑀘𑀻𑀯𑀭𑀁 𑀯𑀸 𑀳𑁄𑀢𑀼 𑀘𑀸𑀢𑀼𑀤𑁆𑀤𑀺𑀲𑀁 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀫𑀢𑀸𑀦𑀁 𑀜𑀸𑀢𑀺𑀚𑀦𑀸𑀦𑀁 𑀯𑀸, 𑀪𑀺𑀓𑁆𑀔𑀸𑀧𑀜𑁆𑀜𑀢𑁆𑀢𑀺𑀬𑀸 𑀯𑀸 𑀯𑀺𑀳𑀸𑀭𑀫𑀳𑀸𑀤𑀺𑀓𑀺𑀘𑁆𑀘𑁂𑀦 𑀯𑀸 𑀬𑁂𑀦𑀓𑁂𑀦𑀘𑀺 𑀆𑀓𑀸𑀭𑁂𑀦 𑀲𑀗𑁆𑀖𑀺𑀓𑀁 𑀘𑀻𑀯𑀭𑀁 𑀤𑀺𑀦𑁆𑀦𑀁 𑀳𑁄𑀢𑀺, 𑀢𑀁 𑀲𑀩𑁆𑀩𑀁 𑀢𑁂𑀲𑀁 𑀓𑀣𑀺𑀦𑀢𑁆𑀣𑀸𑀭𑀓𑀪𑀺𑀓𑁆𑀔𑀽𑀦𑀁𑀬𑁂𑀯 𑀳𑁄𑀢𑀺. 𑀙𑀺𑀦𑁆𑀦𑀯𑀲𑁆𑀲𑀸𑀦𑀁 𑀯𑀸 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀕𑀢𑀸𑀦𑀁 𑀯𑀸 𑀢𑀢𑁆𑀣 𑀲𑀫𑁆𑀧𑀢𑁆𑀢𑀸𑀦𑀁 𑀲𑀻𑀫𑀝𑁆𑀞𑀓𑀪𑀺𑀓𑁆𑀔𑀽𑀦𑀁 𑀯𑀸 𑀦 𑀳𑁄𑀢𑀺. 𑀅𑀚𑀸𑀦𑀺𑀢𑁆𑀯𑀸 𑀘𑁂 𑀕𑀡𑁆𑀳𑀦𑁆𑀢𑀺 𑀤𑀸𑀢𑀩𑁆𑀩𑀫𑁂𑀯. 𑀬𑀤𑀺 𑀢𑀁 𑀘𑀻𑀯𑀭𑀁 𑀢𑀡𑁆𑀟𑀼𑀮𑀸𑀤𑀺𑀔𑀸𑀤𑀦𑀻𑀬𑀪𑁄𑀚𑀦𑀁 𑀓𑀭𑁄𑀢𑀺, 𑀇𑀢𑀭𑁂𑀲𑀫𑁆𑀧𑀺 𑀳𑁄𑀢𑀺𑀬𑁂𑀯. 𑀓𑀲𑁆𑀫𑀸𑀢𑀺 𑀘𑁂 𑀆𑀦𑀺𑀲𑀁𑀲 𑀯𑀺𑀕𑀢𑀢𑁆𑀢𑀸. 𑀢𑁂𑀦𑁂𑀯 𑀕𑀡𑀧𑀽𑀭𑀡𑀯𑀲𑁂𑀦 𑀲𑀫𑁆𑀧𑀢𑁆𑀢𑀸𑀦𑀁 𑀙𑀺𑀦𑁆𑀦𑀁 𑀯𑀲𑁆𑀲𑀸𑀦𑀁 𑀯𑀸 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀕𑀢𑀸𑀦𑀁 𑀯𑀸 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀼𑀢𑁆𑀣𑀯𑀲𑁆𑀲𑀦𑀁 𑀯𑀸 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀤𑀻𑀦𑀺 𑀧𑀸𑀧𑀼𑀡𑀦𑁆𑀢𑀺. 𑀓𑀣𑀺𑀦𑀢𑁆𑀣𑀢𑀲𑀸𑀝𑀓𑀲𑁆𑀲 𑀤𑀸𑀦𑀓𑀫𑁆𑀫𑀯𑀸𑀘𑀸 𑀧𑀦 𑀔𑀡𑁆𑀟𑀲𑀻𑀫𑀸𑀬𑀫𑁂𑀯 𑀯𑀝𑁆𑀝𑀲𑀺. 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀅𑀲𑀢𑀺 𑀅𑀜𑁆𑀜𑀯𑀺𑀳𑀸𑀭𑁂 𑀩𑀤𑁆𑀥𑀲𑀻𑀫𑀸𑀬 𑀯𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀤𑀻𑀲𑀼 𑀯𑀸 𑀓𑀸𑀢𑀩𑁆𑀩𑀫𑁂𑀯.

𑀓𑀲𑁆𑀫𑀸𑀢𑀺 𑀘𑁂 ¶ , 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀧𑀼𑀭𑀺𑀫𑀺𑀓𑀸𑀬 𑀉𑀧𑀕𑀢𑀸 𑀓𑀣𑀺𑀦𑀢𑁆𑀣𑀸𑀭𑀓𑀼𑀲𑀮𑀸 𑀦 𑀳𑁄𑀦𑁆𑀢𑀺. 𑀅𑀢𑁆𑀣𑀸𑀭𑀓𑀼𑀲𑀮𑀸 𑀔𑀦𑁆𑀥𑀓𑀪𑀸𑀡𑀓𑀢𑁆𑀣𑁂𑀭𑀸 𑀧𑀭𑀺𑀬𑁂𑀲𑀺𑀢𑁆𑀯𑀸 𑀆𑀦𑁂𑀢𑀩𑁆𑀩𑀸. 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑁆𑀯𑀸 𑀓𑀣𑀺𑀦𑀁 𑀅𑀢𑁆𑀣𑀭𑀸𑀧𑁂𑀢𑁆𑀯𑀸 𑀤𑀸𑀦𑀜𑁆𑀘 𑀪𑀼𑀜𑁆𑀚𑀺𑀢𑁆𑀯𑀸 𑀕𑀫𑀺𑀲𑁆𑀲𑀦𑁆𑀢𑀺, 𑀆𑀦𑀺𑀲𑀁𑀲𑁄 𑀧𑀦 𑀇𑀢𑀭𑁂𑀲𑀁 𑀯𑀳𑁄𑀢𑀻’𑀢𑀺. 𑀅𑀜𑁆𑀜𑀲𑀻𑀫𑀝𑁆𑀞𑀓𑀪𑀺𑀓𑁆𑀔𑀽𑀦𑀫𑁆𑀧𑀺 𑀓𑀫𑁆𑀫𑀯𑀸𑀘 𑀲𑀸𑀯𑀦𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸. 𑀙𑀺𑀦𑁆𑀦𑀯𑀲𑁆𑀲𑀸𑀯𑀸 𑀧𑀘𑁆𑀙𑀺𑀫𑀺𑀓𑀸𑀬 𑀉𑀧𑀕𑀢𑀸 𑀯𑀸 𑀅𑀜𑁆𑀜𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀼𑀢𑁆𑀣𑀯𑀲𑁆𑀲𑀸𑀧𑀺 𑀯𑀸 𑀧𑀼𑀭𑀺𑀫𑀺𑀓𑀸𑀬 𑀉𑀧𑀕𑀢𑀸𑀦𑀁 𑀕𑀡𑀧𑀽𑀭𑀡𑀫𑀢𑁆𑀢𑀫𑁂𑀯 𑀮𑀪𑀦𑁆𑀢𑀺, 𑀆𑀦𑀺𑀲𑀁𑀲𑁄 𑀇𑀢𑀭𑁂𑀲𑀁𑀬𑁂𑀯 𑀳𑁄𑀢𑀺. 𑀲𑀘𑁂𑀧𑀺 𑀢𑁂 𑀙𑀺𑀦𑁆𑀦𑀯𑀲𑁆𑀲𑀸𑀤𑀬𑁄 𑀅𑀦𑀼𑀫𑁄𑀤𑁂𑀦𑁆𑀢𑀺, 𑀪𑀺𑀦𑁆𑀦𑁄 𑀓𑀣𑀺𑀦𑀢𑁆𑀣𑀸𑀭𑁄, 𑀇𑀤𑀁 𑀅𑀝𑁆𑀞𑀓𑀣𑀸𑀬𑀁 𑀯𑀺𑀘𑀸𑀭𑀺𑀢𑀁. 𑀅𑀧𑀭𑁂 𑀧𑀦 ‘‘𑀓𑀣𑀺𑀦𑀢𑁆𑀣𑀢𑀲𑀻𑀫𑀦𑁆𑀢𑀺 𑀉𑀧𑀘𑀸𑀭𑀲𑀻𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀉𑀧𑀘𑀸𑀭𑀲𑀻𑀫𑀸𑀬𑀫𑁂𑀯 𑀓𑀣𑀺𑀦𑀦𑀢𑁆𑀣𑀸𑀭𑀓 𑀜𑀢𑁆𑀢𑀺𑀁 𑀓𑀭𑁄𑀦𑁆𑀢𑀺, 𑀢𑀁 𑀅𑀬𑀼𑀢𑁆𑀢𑀁, 𑀲𑁄𑀥𑁂𑀢𑀼𑀁 𑀤𑀼𑀓𑁆𑀓𑀭𑀢𑁆𑀢𑀸. 𑀢𑀣𑀸 𑀳𑀺 𑀉𑀧𑀘𑀸𑀭𑀲𑀻𑀫𑀸𑀬𑀫𑁂𑀯 𑀧𑀯𑀺𑀝𑁆𑀞𑀕𑀸𑀫𑀲𑀻𑀫𑀸𑀬𑀁 𑀢𑀢𑁆𑀣 𑀑𑀢𑀺𑀡𑁆𑀡𑁂 𑀪𑀺𑀓𑁆𑀔𑀽 𑀢𑀢𑁆𑀣 𑀧𑀸𑀲𑀸𑀦𑀬𑀦𑀁 𑀯𑀸 𑀩𑀳𑀺𑀲𑀻𑀫𑀓𑀭𑀡𑀁 𑀯𑀸 𑀓𑁄 𑀲𑀓𑁆𑀔𑀺𑀲𑁆𑀲𑀢𑀺. ‘‘𑀓𑀣𑀺𑀦𑀢𑁆𑀣𑀢𑀲𑀻𑀫𑀸𑀬’’𑀦𑁆𑀢𑀺 𑀇𑀫𑀺𑀦𑀸𑀧𑀺𑀧𑀤𑁂𑀦 𑀓𑀣𑀺𑀦𑀢𑁆𑀣𑀢𑀪𑀸𑀯𑁄𑀬𑁂𑀯 𑀯𑀼𑀢𑁆𑀢𑁄, 𑀦 𑀓𑀣𑀺𑀦𑀢𑁆𑀣𑀢𑀲𑀸𑀝𑀓𑀲𑁆𑀲 𑀤𑀸𑀦𑀓𑀫𑁆𑀫𑀯𑀸𑀘𑀸, 𑀲𑀸 𑀘 𑀯𑀺𑀘𑀸𑀭𑀡𑀸 𑀓𑀫𑁆𑀫𑀘𑀢𑀼𑀓𑁆𑀓𑁂𑀦 𑀤𑀻𑀧𑁂𑀢𑀩𑁆𑀩𑀸. 𑀢𑀢𑁆𑀣 𑀅𑀧𑀮𑁄𑀓𑀦𑀓𑀫𑁆𑀫𑀁 𑀜𑀢𑁆𑀢𑀺𑀓𑀫𑁆𑀫𑀁 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀦𑁆𑀢𑀺. 𑀢𑀢𑁆𑀣 𑀅𑀧𑀮𑁄𑀓𑀦𑀓𑀫𑁆𑀫𑀁 𑀦𑀸𑀫 𑀲𑀻𑀫𑀝𑁆𑀞𑀓𑀲𑀗𑁆𑀖𑀁 𑀲𑁄𑀥𑁂𑀢𑁆𑀯𑀸 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑀁 𑀆𑀳𑀭𑀺𑀢𑁆𑀯𑀸 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀲𑀗𑁆𑀖𑀁 𑀓𑀺𑀢𑁆𑀢𑁂𑀢𑁆𑀯𑀸 ‘‘𑀭𑀼𑀘𑁆𑀘𑀢𑀺 𑀲𑀗𑁆𑀖𑀲𑁆𑀲𑀸’’𑀢𑀺 𑀢𑀺𑀓𑁆𑀔𑀼𑀢𑁆𑀢𑀼𑀁 𑀅𑀦𑀼𑀲𑀸𑀯𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑀁 𑀯𑀼𑀘𑁆𑀘𑀢𑀺. 𑀜𑀢𑁆𑀢𑀺𑀓𑀫𑁆𑀫𑀁 𑀦𑀸𑀫 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀏𑀓𑀸𑀬 𑀜𑀢𑁆𑀢𑀺𑀬𑀸 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁. 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀦𑀸𑀫 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀏𑀓𑀸𑀬 𑀜𑀢𑁆𑀢𑀺𑀬𑀸 𑀏𑀓𑀸𑀬 𑀘 𑀅𑀦𑀼𑀲𑀸𑀯𑀦𑀸𑀬𑀸𑀢𑀺 𑀏𑀯𑀁 𑀜𑀢𑁆𑀢𑀺𑀤𑀼𑀢𑀺𑀬𑀸𑀬 𑀅𑀦𑀼𑀲𑀸𑀯𑀦𑀸𑀬 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁. 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑀦𑀸𑀫 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀏𑀓𑀸𑀬 𑀜𑀢𑁆𑀢𑀺𑀬𑀸 𑀢𑀻𑀳𑀺 𑀘 𑀅𑀦𑀼𑀲𑀸𑀯𑀦𑀸𑀳𑀻𑀢𑀺 𑀏𑀯𑀁 𑀜𑀢𑁆𑀢𑀺𑀘𑀢𑀼𑀢𑁆𑀣𑀸𑀳𑀺 𑀢𑀻𑀳𑀺 𑀅𑀦𑀼𑀲𑀸𑀯𑀦𑀸𑀳𑀺 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁. 𑀢𑀢𑁆𑀣 𑀅𑀧𑀮𑁄𑀓𑀦𑀓𑀫𑁆𑀫𑀁 𑀨𑀮𑀪𑀸𑀚𑀦𑀓𑀸𑀮𑀸𑀤𑀻𑀲𑀼 𑀮𑀳𑀼𑀓𑀓𑀫𑁆𑀫𑁂𑀬𑁂𑀯 𑀮𑀩𑁆𑀪𑀢𑀺. 𑀓𑀣𑀺𑀦𑀢𑁆𑀣𑀢𑀲𑀸𑀝𑀓𑀤𑀸𑀦𑁂𑀧𑀺 𑀅𑀦𑀢𑁆𑀣𑀢𑁂𑀬𑁂𑀯 𑀓𑀣𑀺𑀦𑁂 𑀢𑀢𑁄 𑀩𑀳𑀼𑀆𑀦𑀺𑀲𑀁𑀲𑀘𑀻𑀯𑀭𑀲𑀸𑀝𑀓𑀁 𑀮𑀪𑀺𑀢𑁆𑀯𑀸 𑀢𑁂𑀦𑁂𑀯 𑀲𑀸𑀝𑀓𑁂𑀦 𑀅𑀢𑁆𑀣𑀭𑀺𑀢𑀩𑁆𑀩𑀸, 𑀧𑀼𑀦 𑀓𑀫𑁆𑀫𑀯𑀸𑀘𑀸𑀬 𑀤𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺 𑀅𑀧𑀮𑁄𑀓𑀦𑀓𑀫𑁆𑀫𑁂𑀦 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸 𑀤𑀸𑀢𑀩𑁆𑀩𑀁. 𑀓𑀣𑀺𑀦𑀢𑁆𑀣𑀢𑀲𑀸𑀝𑀓𑀤𑀸𑀦𑀓𑀫𑁆𑀫𑀯𑀸𑀘𑀸 𑀏𑀓𑀸 𑀘𑁂 𑀯𑀝𑁆𑀝𑀢𑀺. 𑀧𑀼𑀦 𑀓𑀫𑁆𑀫 𑀯𑀸𑀘𑀸𑀬𑀓𑀺𑀘𑁆𑀘𑀁 ¶ 𑀦𑀢𑁆𑀣𑀺. 𑀜𑀢𑁆𑀢𑀺𑀓𑀫𑁆𑀫𑀁 𑀧𑀦 𑀥𑀫𑁆𑀫𑀲𑀗𑁆𑀕𑀸𑀳𑀓𑀓𑀸𑀮𑁂 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀸𑀤𑀻𑀳𑀺 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑁆𑀦𑀦𑀓𑀸𑀮𑁂 𑀮𑀳𑀼𑀓𑀓𑀫𑁆𑀫𑁂𑀬𑁂𑀯 𑀮𑀩𑁆𑀪𑀢𑀺. 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀧𑀦 𑀲𑀻𑀫𑀸𑀲𑀫𑁆𑀫𑀼𑀢𑀺, 𑀲𑀻𑀫𑀸𑀲𑀫𑀽𑀳𑀦𑀁, 𑀓𑀣𑀺𑀦𑀤𑀸𑀦𑀁, 𑀓𑀣𑀺𑀦𑀼𑀤𑁆𑀥𑀸𑀭𑁄, 𑀓𑀼𑀝𑀺𑀯𑀢𑁆𑀣𑀼𑀤𑁂𑀲𑀦𑀸, 𑀯𑀺𑀳𑀸𑀭𑀯𑀢𑁆𑀣𑀼𑀤𑁂𑀲𑀦𑀸𑀢𑀺 𑀇𑀫𑀸𑀦𑀺 𑀙 𑀕𑀭𑀼𑀓𑀫𑁆𑀫𑀸𑀦𑀺 𑀅𑀧𑀮𑁄𑀓𑁂𑀢𑁆𑀯𑀸 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀁. 𑀇𑀢𑁄 𑀧𑀭𑁂𑀲𑀼 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺𑀆𑀤𑀻𑀲𑀼 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂𑀲𑀼 𑀅𑀧𑀮𑁄𑀓𑁂𑀢𑁆𑀯𑀸𑀧𑀺 𑀓𑀸𑀢𑀩𑁆𑀩𑀁, 𑀮𑀳𑀼𑀓𑀓𑀫𑁆𑀫𑀢𑁆𑀢𑀸. 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀁 𑀧𑀦 𑀇𑀤𑀸𑀦𑀺 𑀉𑀧𑀲𑀫𑁆𑀧𑀤𑀸𑀓𑀫𑁆𑀫𑀁 𑀇𑀤𑀸𑀦𑀺 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀩𑀤𑁆𑀥𑀲𑀻𑀫𑀸𑀬 𑀯𑀸, 𑀢𑀲𑁆𑀫𑀺𑀁 𑀅𑀲𑀢𑀺 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀯𑀸 𑀲𑁄𑀥𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂 𑀲𑀢𑀺 𑀅𑀩𑀤𑁆𑀥𑀲𑀻𑀫𑀸𑀬 𑀯𑀸 𑀓𑀸𑀢𑀩𑁆𑀩𑀫𑁂𑀯. 𑀅𑀧𑀭𑁂 𑀏𑀯𑀁 𑀯𑀤𑀦𑁆𑀢𑀺 ‘‘𑀓𑀼𑀝𑀺𑀯𑀢𑁆𑀣𑀼𑀓𑀸𑀭𑀯𑀺𑀳𑀸𑀭𑀯𑀢𑁆𑀣𑀼𑀓𑀸𑀭𑀓𑀸𑀮𑁂 𑀢𑀸𑀦𑀺 𑀓𑀼𑀝𑀺𑀯𑀺𑀳𑀸𑀭𑀯𑀢𑁆𑀣𑀽𑀦𑀺 𑀓𑀣𑀁 𑀲𑀻𑀫𑀝𑁆𑀞𑀸 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀓𑀼𑀝𑀺𑀯𑀺𑀳𑀸𑀭𑀓𑀭𑀡𑀝𑁆𑀞𑀸𑀦𑁂𑀬𑁂𑀯 𑀓𑀸𑀢𑀩𑁆𑀩’’𑀦𑁆𑀢𑀺, 𑀢𑀁 𑀢𑁂𑀲𑀁 𑀯𑀘𑀦𑀫𑀢𑁆𑀢𑀫𑁂𑀯, 𑀦 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁. 𑀯𑀢𑁆𑀣𑀼𑀧𑀭𑀸𑀫𑀲𑀦𑀫𑁂𑀯𑁂𑀢𑁆𑀣 𑀧𑀫𑀸𑀡𑀁, 𑀢𑀣𑀸 𑀳𑀺 𑀲𑀗𑁆𑀖𑀓𑀼𑀝𑀺𑀯𑀢𑁆𑀣𑀼𑀁 𑀑𑀮𑁄𑀓𑁂𑀦𑁆𑀢𑀁 𑀬𑀸𑀘𑀢𑀺𑀢𑁆𑀬𑀸𑀤𑀺𑀦𑀸 𑀯𑀢𑁆𑀣𑀼𑀧𑀭𑀸𑀫𑀲𑀦𑀁 𑀓𑀢𑁆𑀯𑀸 𑀳𑁂𑀝𑁆𑀞𑀸 𑀯𑀢𑁆𑀣𑀼𑀜𑀢𑁆𑀢𑀺𑀤𑁄𑀲𑁂 𑀘 𑀯𑀺𑀧𑀢𑁆𑀢𑀺 𑀮𑀓𑁆𑀔𑀡𑁂 𑀘 𑀯𑀚𑁆𑀚𑁂𑀢𑁆𑀯𑀸 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑁂𑀦 𑀲𑀫𑁆𑀫𑀢𑀪𑀺𑀓𑁆𑀔𑀽𑀳𑀺 𑀢𑀢𑁆𑀣 𑀓𑀼𑀝𑀺𑀯𑀺𑀳𑀸𑀭𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀑𑀮𑁄𑀓𑁂𑀢𑀩𑁆𑀩𑀁 𑀢𑁂𑀦𑁂𑀯 𑀧𑀸𑀴𑀺𑀬𑀁 ‘‘𑀢𑁂𑀳𑀺 𑀲𑀫𑁆𑀫𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀓𑀼𑀝𑀺𑀯𑀢𑁆𑀣𑀼 𑀑𑀮𑁄𑀓𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀧𑀢𑁆𑀢𑀘𑀻𑀯𑀭𑀯𑀺𑀭𑀳𑀺𑀢𑀁 𑀧𑀼𑀕𑁆𑀕𑀮𑀁 𑀯𑀸 𑀅𑀦𑀼𑀧𑀚𑁆𑀛𑀸𑀬𑀓𑀁 𑀯𑀸 𑀓𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑁂𑀳𑀺 ‘‘𑀧𑀭𑀺𑀧𑀼𑀡𑁆𑀡𑀲𑁆𑀲 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀯𑀸 ‘‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄, 𑀇𑀢𑁆𑀣𑀦𑁆𑀦𑀸𑀫𑁂𑀦 𑀉𑀧𑀚𑁆𑀛𑀸𑀬𑁂𑀦𑀸’’𑀢𑀺 𑀓𑀫𑁆𑀫𑀯𑀸𑀘𑀸𑀬 𑀲𑀸𑀯𑀺𑀢𑁂𑀧𑀺 𑀓𑀫𑁆𑀫𑀲𑁆𑀲 𑀅𑀲𑀺𑀚𑁆𑀛𑀦𑀁 𑀪𑀯𑁂𑀬𑁆𑀬. 𑀅𑀧𑀭𑁂 𑀏𑀯𑀁 𑀯𑀤𑀦𑁆𑀢𑀺 ‘‘𑀲𑀻𑀫𑀸𑀲𑀫𑁆𑀫𑀼𑀢𑀺𑀓𑀸𑀮𑁂 𑀧𑀦 𑀓𑀢𑀁, 𑀢𑀣𑀸 𑀳𑀺 𑀲𑀻𑀫𑀸𑀲𑀫𑁆𑀫𑀼𑀢𑀺𑀓𑀸𑀮𑁂 𑀪𑀺𑀓𑁆𑀔𑀽 𑀢𑀲𑁆𑀫𑀺𑀁 𑀬𑁂𑀯 𑀞𑀸𑀦𑁂 𑀞𑀢𑁆𑀯𑀸 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀦𑁆𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀞𑀸𑀦𑁂 𑀅𑀩𑀤𑁆𑀥𑀲𑀻𑀫𑀸𑀯 𑀳𑁄𑀢𑀺. 𑀬𑀤𑀺 𑀩𑀤𑁆𑀥𑀲𑀻𑀫𑀸 𑀪𑀯𑁂𑀬𑁆𑀬, 𑀲𑀻𑀫𑀚𑁆𑀛𑁄𑀢𑁆𑀣𑀭𑀡𑀁 𑀯𑀸 𑀲𑀻𑀫𑀲𑀫𑁆𑀪𑁂𑀤𑁄 𑀯𑀸 𑀲𑀺𑀬𑀸’’𑀢𑀺. 𑀲𑀘𑁆𑀘𑀁, 𑀢𑀣𑀸𑀧𑀺 𑀢𑀁 𑀲𑀻𑀫𑀸𑀲𑀫𑁆𑀫𑀼𑀢𑀺𑀝𑁆𑀞𑀸𑀦𑀁 𑀪𑀼𑀚𑀺𑀲𑁆𑀲𑀁 𑀓𑀢𑁆𑀯𑀸 𑀲𑀻𑀫𑀲𑀫𑁆𑀫𑀼𑀢𑀺𑀓𑀫𑁆𑀫𑀲𑁆𑀲𑀓𑀢𑀢𑁆𑀢𑀸 𑀯𑀺𑀲𑀼𑀁𑀕𑀸𑀫𑁂 𑀲𑀫𑁆𑀫𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀕𑀸𑀫𑀲𑀻𑀫𑁂 𑀞𑀺𑀢𑀸 𑀪𑀺𑀓𑁆𑀔𑀽 𑀓𑀫𑁆𑀫𑀁 𑀓𑁄𑀧𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀬𑀤𑀺 𑀲𑀻𑀫𑀲𑀫𑁆𑀫𑀼𑀢𑀺𑀝𑁆𑀞𑀸𑀦𑀁 𑀪𑀼𑀚𑀺𑀲𑁆𑀲𑀁 𑀓𑀢𑁆𑀯𑀸𑀯 𑀲𑀻𑀫𑀁 𑀲𑀫𑁆𑀫𑀦𑁆𑀦𑁂𑀬𑁆𑀬, 𑀓𑀣𑀁 𑀪𑀕𑀯𑀢𑁄 𑀥𑀭𑀫𑀸𑀦𑀓𑀸𑀮𑁂 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀼 𑀬𑀣𑀸𑀲𑀼𑀔𑀁 𑀲𑀻𑀫𑀁 𑀲𑀫𑁆𑀫𑀦𑁆𑀦𑀺𑀲𑁆𑀲𑀦𑁆𑀢𑀻𑀢𑀺 𑀦 𑀧𑀦𑁂𑀯𑀁 𑀤𑀝𑁆𑀞𑀩𑁆𑀩𑀁 𑀢𑀣𑀸 𑀳𑀺 𑀯𑀸𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸𑀧𑀺 𑀦𑀯𑀓𑁄𑀝𑀻𑀳𑀺 𑀪𑀽𑀫𑀺𑀁 𑀕𑀡𑁆𑀳𑀺𑀢𑁆𑀯𑀸 𑀧𑀼𑀩𑁆𑀩𑀸𑀭𑀸𑀫𑀁 𑀦𑀸𑀫 𑀫𑀳𑀸 𑀯𑀺𑀳𑀸𑀭𑀁 ¶ 𑀓𑀸𑀭𑁂𑀲𑀺, 𑀢𑀣𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀓𑀳𑀸𑀧𑀡𑀲𑀦𑁆𑀣𑀢𑁂𑀦 𑀚𑁂𑀢𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀉𑀬𑁆𑀬𑀸𑀦𑀝𑁆𑀞𑀸𑀦𑀁 𑀓𑀺𑀡𑀸𑀧𑁂𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀚𑁂𑀢𑀯𑀦𑀁 𑀦𑀸𑀫 𑀫𑀳𑀸𑀯𑀺𑀳𑀸𑀭𑀁 𑀓𑀸𑀭𑁂𑀲𑀺 𑀏𑀯𑀁 𑀧𑀼𑀜𑁆𑀜𑀓𑀸𑀫𑀸 𑀧𑀭𑀺𑀯𑁂𑀡𑀁 𑀓𑀢𑁆𑀯𑀸 𑀯𑀺𑀳𑀸𑀭𑀁 𑀓𑀭𑁄𑀦𑁆𑀢𑀺 𑀢𑀲𑁆𑀫𑀸 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀬𑀣𑀸𑀲𑀼𑀔𑀁 𑀲𑀻𑀫𑀁 𑀩𑀦𑁆𑀥𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀦𑁆𑀢𑀺. 𑀅𑀬𑀁 𑀉𑀧𑀘𑀸𑀭𑀲𑀻𑀫𑀸𑀬 𑀯𑀺𑀘𑀸𑀭𑀡𑀸.

𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀸 𑀦𑀸𑀫 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑀲𑀗𑁆𑀖𑀸𑀢𑀲𑀗𑁆𑀔𑀸𑀢𑁂𑀳𑀺 𑀪𑀺𑀓𑁆𑀔𑀼𑀕𑀡𑁂𑀳𑀺 𑀉𑀧𑁄𑀲𑀣𑀸𑀤𑀺𑀲𑀗𑁆𑀖𑀓𑀫𑁆𑀫𑁂𑀦 𑀲𑀫𑀸𑀦𑀁 𑀏𑀓𑀻𑀪𑀸𑀯𑀁 𑀳𑀼𑀢𑁆𑀯𑀸 𑀯𑀲𑀺𑀢𑀼𑀁 𑀲𑀫𑁆𑀫𑀢𑀸 𑀲𑀻𑀫𑀸. 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸 𑀦𑀸𑀫 𑀢𑀺𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑀺𑀢𑀼𑀁 𑀲𑀫𑁆𑀫𑀢𑀸 𑀲𑀻𑀫𑀸, 𑀏𑀢𑀸 𑀤𑁆𑀯𑁂𑀲𑀻𑀫𑀸 𑀢𑀺𑀬𑁄𑀚𑀦𑀧𑀭𑀫𑀢𑀸𑀬𑀧𑀺 𑀲𑀫𑁆𑀪𑀯𑀢𑁄 𑀫𑀳𑀸𑀲𑀻𑀫𑀸 𑀢𑀺𑀧𑀺 𑀦𑀸𑀫𑀁 𑀮𑀪𑀦𑁆𑀢𑀺, 𑀢𑀸𑀲𑀁 𑀯𑀺𑀘𑀸𑀭𑀡𑀸 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀲𑀩𑁆𑀩𑀲𑁄 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀇𑀥 𑀦 𑀯𑀓𑁆𑀔𑀸𑀫 𑀯𑀼𑀘𑁆𑀘𑀫𑀸𑀦𑀫𑁆𑀧𑀺 𑀅𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀦 𑀯𑀓𑁆𑀔𑀸𑀫.

𑀮𑀸𑀪𑀲𑀻𑀫𑀸 𑀦𑀸𑀫 𑀬𑀁 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑁄𑀓𑁆𑀔𑀭𑀡𑀻𑀢𑀴𑀸𑀓𑀯𑀦𑀸𑀤𑀺𑀓𑀁 𑀯𑀸 𑀬𑀁 𑀬𑀁 𑀧𑀤𑁂𑀲𑀁 𑀲𑀗𑁆𑀖𑀲𑁆𑀲 𑀘𑀢𑀼𑀘𑁆𑀘𑀧𑁆𑀧𑀬𑀢𑁆𑀣𑀸𑀬 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀞𑀧𑀺𑀢𑀸, 𑀏𑀲𑀸 𑀮𑀸𑀪𑀲𑀻𑀫𑀸 𑀦𑀸𑀫. 𑀦𑁂𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀦𑀼𑀜𑁆𑀜𑀸𑀢𑀸, 𑀦 𑀥𑀫𑁆𑀫𑀲𑀗𑁆𑀕𑀳𑀓𑀢𑁆𑀣𑁂𑀭𑁂𑀳𑀺 𑀞𑀧𑀺𑀢𑀸, 𑀅𑀧𑀺 𑀘 𑀔𑁄 𑀮𑀸𑀪𑀤𑀸𑀬𑀓𑁂𑀳𑀺 𑀞𑀧𑀺𑀢𑀸𑀯. 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀺𑀬𑀫𑁆𑀧𑀺 𑀮𑀸𑀪𑀲𑀻𑀫𑀸𑀢𑀺 𑀬𑀁 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀬𑁄 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀕𑀸𑀯𑀼𑀢𑀁 𑀯𑀸 𑀅𑀟𑁆𑀠𑀬𑁄𑀚𑀦𑀁 𑀯𑀸 𑀬𑁄𑀚𑀦𑀁 𑀯𑀸 𑀲𑀫𑀦𑁆𑀢𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀯𑀺𑀳𑀸𑀭𑀲𑁆𑀲 𑀮𑀸𑀪𑀲𑀻𑀫𑀸, 𑀬𑀁 𑀏𑀢𑁆𑀣𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀩𑁆𑀩𑀁 𑀅𑀫𑁆𑀳𑀸𑀓𑀁 𑀯𑀺𑀳𑀸𑀭𑀲𑁆𑀲 𑀤𑁂𑀫𑀸’’𑀢𑀺 𑀞𑀧𑁂𑀦𑁆𑀢𑀺, 𑀅𑀬𑀁 𑀮𑀸𑀪𑀲𑀻𑀫𑀸 𑀦𑀸𑀫𑀸’𑀢𑀺 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀮𑀸𑀪𑀲𑀻𑀫𑀸𑀥𑀺𑀓𑀸𑀭𑁂 𑀭𑀜𑁆𑀜𑁄 𑀫𑀳𑀸𑀘𑁂𑀢𑀺𑀬𑀤𑀸𑀬𑀓𑀲𑁆𑀲 𑀤𑀺𑀯𑀗𑁆𑀕𑀢𑀓𑀸𑀮𑀢𑁄 𑀏𑀓𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀅𑀢𑀻𑀢𑁂 𑀢𑀲𑁆𑀲 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀥𑀫𑁆𑀫𑀭𑀜𑁆𑀜𑁄 𑀓𑀸𑀮𑁂 𑀈𑀤𑀺𑀲𑀁 𑀧𑀼𑀜𑁆𑀜𑀁 𑀪𑀽𑀢𑀧𑀼𑀩𑁆𑀩𑀁. 𑀬𑀤𑀺 𑀳𑀺 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀲𑀼 𑀬𑁄 𑀓𑁄𑀘𑀺 𑀬𑀲𑁆𑀲 𑀯𑀺𑀳𑀸𑀭𑀲𑁆𑀲 𑀬𑀸𑀦𑀺 𑀢𑀴𑀸𑀓𑀔𑁂𑀢𑁆𑀢𑀯𑀢𑁆𑀣𑀸𑀤𑀻𑀦𑀺 𑀤𑀢𑁆𑀯𑀸 𑀢𑀁 𑀲𑀳𑀺𑀢𑀯𑀺𑀳𑀸𑀭𑀁 𑀧𑀼𑀕𑁆𑀕𑀮𑀲𑁆𑀲 𑀤𑁂𑀢𑀺, 𑀏𑀯𑀁 𑀲𑀢𑀺 𑀓𑀺𑀁 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀢𑀁 𑀲𑀳𑀺𑀢𑀯𑀺𑀳𑀸𑀭𑀁 𑀧𑀼𑀕𑁆𑀕𑀮𑀺𑀓𑀪𑀸𑀯𑁂𑀦 𑀧𑀝𑀺𑀕𑁆𑀕𑀳𑁂𑀢𑀼𑀁 𑀯𑀝𑁆𑀝𑀢𑀺, 𑀉𑀤𑀸𑀳𑀼 𑀲𑀗𑁆𑀖𑀺𑀓𑀪𑀸𑀯𑁂𑀦𑁂𑀯𑀸𑀢𑀺 𑀢𑀴𑀸𑀓𑀔𑁂𑀢𑁆𑀢𑀯𑀢𑁆𑀣𑀸𑀤𑀺𑀯𑀺𑀭𑀳𑀺𑀢𑁄 𑀧𑀦 𑀓𑁂𑀯𑀮𑁄 𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑁄 𑀅𑀜𑁆𑀜𑁂𑀲𑀁 𑀤𑀫𑁆𑀫𑀻𑀢𑀺 𑀅𑀤𑀢𑁆𑀯𑀸 𑀧𑀼𑀕𑁆𑀕𑀮𑁂 𑀫𑀢𑁂 𑀲𑀗𑁆𑀖𑀺𑀓𑁄 𑀳𑁄𑀢𑀺, 𑀉𑀤𑀸𑀳𑀼 𑀧𑀼𑀕𑁆𑀕𑀮𑀺𑀓𑁄𑀬𑁂𑀯𑀸𑀢𑀺. 𑀢𑀢𑁆𑀭𑀸𑀬𑀁 𑀯𑀺𑀲𑁆𑀲𑀚𑁆𑀚𑀦𑀸, 𑀬𑀤𑀺 𑀳𑀺 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀲𑀼 𑀬𑁄𑀓𑁄𑀘𑀺 𑀯𑀺𑀳𑀸𑀭𑀲𑁆𑀲 𑀢𑀴𑀸𑀓𑀔𑁂𑀢𑁆𑀢𑀸𑀯𑀢𑁆𑀣𑀸𑀤𑀻𑀦𑀺 ¶ 𑀤𑁂𑀢𑀺, 𑀏𑀯𑀁 𑀲𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺𑀤𑀝𑁆𑀞𑀩𑁆𑀩𑀁 𑀢𑁂𑀦 𑀯𑀼𑀢𑁆𑀢𑀁 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 ‘‘𑀇𑀫𑀁 𑀢𑀴𑀸𑀓𑀁, 𑀇𑀫𑀁 𑀔𑁂𑀢𑁆𑀢𑀁, 𑀇𑀫𑀁 𑀯𑀢𑁆𑀣𑀼𑀁 𑀯𑀺𑀳𑀸𑀭𑀲𑁆𑀲 𑀤𑁂𑀫𑀸𑀢𑀺 𑀯𑀼𑀢𑁆𑀢𑁂 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀦 𑀮𑀩𑁆𑀪𑀢𑀻’’𑀢𑀺. ‘‘𑀧𑀸𑀲𑀸𑀤𑀲𑁆𑀲 𑀤𑀸𑀲𑀺𑀁, 𑀤𑀸𑀲𑀁, 𑀔𑁂𑀢𑁆𑀢𑀁, 𑀯𑀢𑁆𑀣𑀼𑀁, 𑀕𑁄𑀫𑀳𑀺𑀁𑀲𑀁 𑀤𑁂𑀫𑀸𑀢𑀺 𑀯𑀤𑀦𑁆𑀢𑀺, 𑀧𑀸𑀝𑁂𑀓𑁆𑀓𑀁 𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀧𑀸𑀲𑀸𑀤𑁂 𑀧𑀝𑀺𑀕𑁆𑀕𑀳𑀺𑀢𑁂 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀻’’𑀢𑀺 𑀘. 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀧𑀓𑀭𑀡𑁂 𑀘.

‘‘𑀔𑁂𑀢𑁆𑀢𑀯𑀢𑁆𑀣𑀼𑀢𑀴𑀸𑀓𑀁 𑀯𑀸, 𑀤𑁂𑀫 𑀕𑁄𑀅𑀚𑀺𑀓𑀸𑀤𑀺𑀓𑀁;

𑀯𑀺𑀳𑀸𑀭𑀲𑁆𑀲𑀸𑀢𑀺 𑀯𑀼𑀢𑁆𑀢𑁂𑀧𑀺, 𑀦𑀺𑀲𑁂𑀥𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺.

𑀔𑀼𑀤𑁆𑀤𑀲𑀺𑀓𑁆𑀔𑀸𑀧𑀓𑀭𑀡𑁂 𑀘 ‘‘𑀔𑁂𑀢𑁆𑀢𑀸𑀤𑀻𑀦𑀺 𑀯𑀺𑀳𑀸𑀭𑀲𑁆𑀲, 𑀯𑀼𑀢𑁆𑀢𑁂 𑀤𑀫𑁆𑀫𑀻𑀢𑀺 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀯𑀺𑀳𑀸𑀭𑀲𑁆𑀲 𑀤𑁂𑀫𑀸’’𑀢𑀺 𑀘𑁂𑀢𑁆𑀣 𑀲𑀗𑁆𑀖𑀺𑀓𑀯𑀺𑀳𑀸𑀭𑀲𑁆𑀲𑁂𑀯, 𑀦 𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑀲𑁆𑀲𑀸𑀢𑀺 𑀤𑀝𑁆𑀞𑀩𑁆𑀩𑀁, 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 𑀯𑀺𑀳𑀸𑀭𑀲𑁆𑀲 𑀤𑁂𑀫𑀸𑀢𑀺 𑀲𑀗𑁆𑀖𑀺𑀓𑀯𑀺𑀳𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺. ‘‘𑀧𑀸𑀲𑀸𑀤𑀲𑁆𑀲𑀸’’𑀢𑀺 𑀘 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑁂𑀧𑀺 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀲𑀗𑁆𑀖𑀲𑁆𑀲 𑀅𑀢𑁆𑀣𑀸𑀬 𑀲𑀸𑀴𑀺𑀦𑁆𑀤𑀁 𑀧𑀸𑀲𑀸𑀤𑀁 𑀓𑀸𑀭𑀸𑀧𑁂𑀢𑀼𑀓𑀸𑀫𑁄 𑀳𑁄𑀢𑀺 𑀳𑀢𑁆𑀣𑀺𑀦𑀔𑀓’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀸𑀲𑀸𑀤𑀧𑀭𑀺𑀪𑁄𑀕𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀲𑀗𑁆𑀖𑀺𑀓𑀁𑀬𑁂𑀯 𑀧𑀸𑀲𑀸𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 𑀲𑀩𑁆𑀩𑀁 𑀧𑀸𑀲𑀸𑀤𑀧𑀭𑀺𑀪𑁄𑀕’𑀦𑁆𑀢𑀺. 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬 𑀯𑀡𑁆𑀡𑀦𑀸𑀥𑀺𑀓𑀸𑀭𑁂 ‘‘𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀯𑀺𑀘𑀺𑀢𑁆𑀭𑀸𑀦𑀻’’𑀢𑀺𑀆𑀤𑀺 𑀲𑀗𑁆𑀖𑀺𑀓𑀲𑁂𑀦𑀸𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀼𑀕𑁆𑀕𑀮𑀺𑀓𑀁 𑀧𑀦 𑀲𑀼𑀯𑀡𑁆𑀡𑀸𑀤𑀺𑀯𑀺𑀘𑀺𑀢𑁆𑀭𑀁 𑀪𑀺𑀓𑁆𑀔𑀼𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀫𑁂𑀯 𑀦 𑀯𑀝𑁆𑀝𑀢𑀺, ‘‘𑀦 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀚𑀸𑀢𑀭𑀽𑀧𑀚𑀢𑀁 𑀲𑀸𑀤𑀺𑀬𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀢𑁂𑀦𑁂𑀯𑁂𑀢𑁆𑀣 𑀅𑀝𑁆𑀞𑀓𑀣𑀸𑀬𑀁 𑀲𑀗𑁆𑀖𑀺𑀓𑀯𑀺𑀳𑀸𑀭𑁂 𑀯𑀸 𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑁂 𑀯𑀸𑀢𑀺 𑀦 𑀯𑀼𑀢𑁆𑀢’𑀦𑁆𑀢𑀺. ‘‘𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀯𑀺𑀦𑀬𑀯𑀡𑁆𑀡𑀦𑀝𑁆𑀞𑀸𑀦𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀗𑁆𑀖𑀺𑀓𑀫𑁂𑀯 𑀲𑀼𑀯𑀡𑁆𑀡𑀸𑀤𑀺𑀫𑀬𑀁 𑀲𑁂𑀦𑀸𑀲𑀦𑀁 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀸 𑀘 𑀯𑀝𑁆𑀝𑀦𑁆𑀢𑀺, 𑀦 𑀧𑀼𑀕𑁆𑀕𑀮𑀺𑀓𑀸𑀦𑀻𑀢𑀺 𑀕𑀳𑁂𑀢𑀩𑁆𑀩𑀦𑁆𑀢𑀺 𑀘, 𑀢𑀲𑁆𑀫𑀸 𑀢𑀴𑀸𑀓𑀔𑁂𑀢𑁆𑀢𑀯𑀢𑁆𑀣𑀸𑀤𑀺𑀲𑀳𑀺𑀢𑀯𑀺𑀳𑀸𑀭𑁄 𑀲𑀗𑁆𑀖𑀺𑀓𑁄𑀬𑁂𑀯 𑀳𑁄𑀢𑀺, 𑀦 𑀧𑀼𑀕𑁆𑀕𑀮𑀺𑀓𑁄𑀢𑀺 𑀯𑀺𑀦𑀬𑀓𑁄𑀯𑀺𑀤𑁂𑀳𑀺 𑀤𑀝𑁆𑀞𑀩𑁆𑀩𑁄. 𑀲𑀘𑁂 𑀧𑀦 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀲𑀼 𑀬𑁄𑀓𑁄𑀘𑀺 𑀢𑀴𑀸𑀓𑀔𑁂𑀢𑁆𑀢𑀯𑀢𑁆𑀣𑀸𑀤𑀺𑀲𑀳𑀺𑀢𑀁 𑀯𑀺𑀳𑀸𑀭𑀁 𑀧𑀼𑀕𑁆𑀕𑀮𑀲𑁆𑀲 𑀢𑀁 𑀲𑀳𑀺𑀢𑀯𑀺𑀳𑀸𑀭𑀪𑀸𑀯𑀫𑀸𑀭𑁄𑀘𑁂𑀢𑁆𑀯𑀸 𑀤𑁂𑀢𑀺, 𑀏𑀯𑀁 𑀲𑀢𑀺 𑀧𑀼𑀕𑁆𑀕𑀮𑀲𑁆𑀲 𑀲𑀗𑁆𑀖𑀺𑀓𑀯𑀺𑀳𑀸𑀭𑀪𑀸𑀯𑁂𑀦𑁂𑀯 𑀧𑀝𑀺𑀕𑁆𑀕𑀳𑁂𑀢𑀼𑀁 𑀯𑀝𑁆𑀝𑀢𑀺, 𑀦 𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑀪𑀸𑀯𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀓𑀲𑁆𑀫𑀸, 𑀯𑀺𑀳𑀸𑀭𑀲𑁆𑀲 𑀤𑁂𑀫𑀸’’𑀢𑀺 𑀯𑀢𑁆𑀯𑀸 𑀤𑀺𑀦𑁆𑀦𑀸𑀦𑀁 𑀢𑀴𑀸𑀓𑀔𑁂𑀢𑁆𑀢𑀯𑀢𑁆𑀣𑀸𑀤𑀻𑀦𑀁 𑀲𑀗𑁆𑀖𑀲𑁆𑀲𑁂𑀯 𑀯𑀝𑁆𑀝𑀫𑀸𑀦𑀢𑁆𑀢𑀸. 𑀢𑁂𑀦𑁂𑀯𑀸𑀳 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 ‘‘𑀯𑀺𑀳𑀸𑀭𑀲𑁆𑀲 𑀤𑁂𑀫𑀸𑀢𑀺 𑀯𑀼𑀢𑁆𑀢𑀁 𑀲𑀗𑁆𑀖𑀲𑁆𑀲 𑀯𑀝𑁆𑀝𑀢𑀺, 𑀦 𑀧𑀼𑀕𑁆𑀕𑀮𑀲𑁆𑀲, 𑀔𑁂𑀢𑁆𑀢𑀸𑀤𑀺 𑀯𑀺𑀬 𑀤𑀝𑁆𑀞𑀩𑁆𑀩’’𑀦𑁆𑀢𑀺. 𑀢𑀢𑁆𑀭𑀸𑀬𑀁 𑀬𑁄𑀚𑀦𑀸 ¶ 𑀯𑀺𑀳𑀸𑀭𑀲𑁆𑀲𑀸𑀤𑁂𑀫𑀸𑀢𑀺 𑀯𑀢𑁆𑀯𑀸 𑀤𑀺𑀦𑁆𑀦𑀁 𑀔𑁂𑀢𑁆𑀢𑀸𑀤𑀺 𑀲𑀗𑁆𑀖𑀲𑁆𑀲 𑀯𑀝𑁆𑀝𑀢𑀺, 𑀦 𑀧𑀼𑀕𑁆𑀕𑀮𑀲𑁆𑀲, 𑀏𑀯𑀁 𑀯𑀺𑀳𑀸𑀭𑀲𑁆𑀲 𑀤𑁂𑀫𑀸𑀢𑀺 𑀯𑀼𑀢𑁆𑀢𑀁 𑀲𑀼𑀯𑀡𑁆𑀡𑀸𑀤𑀺𑀯𑀺𑀘𑀺𑀢𑁆𑀢𑀁 𑀅𑀓𑀧𑁆𑀧𑀺𑀬𑀫𑀜𑁆𑀘𑀁 𑀲𑀗𑁆𑀖𑀲𑁆𑀲 𑀯𑀝𑁆𑀝𑀢𑀺, 𑀦 𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀤𑀝𑁆𑀞𑀩𑁆𑀩𑀦𑁆𑀢𑀺. 𑀲𑀗𑁆𑀖𑀲𑁆𑀲𑁂𑀯 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀔𑁂𑀢𑁆𑀢𑀸𑀤𑀻𑀦𑀺 𑀧𑀝𑀺𑀕𑁆𑀕𑀳𑁂𑀢𑀼𑀁 𑀯𑀝𑁆𑀝𑀢𑀺, 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 ‘‘𑀘𑀢𑁆𑀢𑀸𑀭𑁄𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀢𑀽𑀢𑀺 𑀤𑁂𑀢𑀺 𑀯𑀝𑁆𑀝𑀢𑀻𑀢𑀺𑀏𑀢𑁆𑀣 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘𑀢𑀼𑀧𑀘𑁆𑀘𑀬𑀧𑀭𑀺𑀪𑁄𑀕𑀢𑁆𑀣𑀸𑀬 𑀢𑀴𑀸𑀓𑀁 𑀤𑀫𑁆𑀫𑀻𑀢𑀺 𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑁄 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀢𑀴𑀸𑀓𑀁 𑀤𑀫𑁆𑀫𑀻𑀢𑀺 𑀯𑀸 𑀇𑀢𑁄 𑀢𑀴𑀸𑀓𑀢𑁄 𑀉𑀧𑁆𑀧𑀦𑁆𑀦𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀤𑀫𑁆𑀫𑀻𑀢𑀺 𑀯𑀸 𑀯𑀼𑀢𑁆𑀢𑀫𑁆𑀧𑀺 𑀯𑀝𑁆𑀝𑀢𑀺. 𑀇𑀤𑀜𑁆𑀘 𑀲𑀗𑁆𑀖𑀲𑁆𑀲 𑀤𑀺𑀬𑁆𑀬𑀫𑀸𑀦𑀜𑁆𑀜𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀧𑀼𑀕𑁆𑀕𑀮𑀲𑁆𑀲 𑀧𑀦 𑀏𑀯𑀫𑁆𑀧𑀺 𑀤𑀺𑀦𑁆𑀦𑀁 𑀢𑀴𑀸𑀓𑀔𑁂𑀢𑁆𑀢𑀸𑀤𑀺 𑀦 𑀯𑀝𑁆𑀝𑀢𑀺. 𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀧𑀦 𑀉𑀤𑀓𑀧𑀭𑀺𑀪𑁄𑀕𑀢𑁆𑀣𑀁 𑀓𑀽𑀧𑀧𑁄𑀓𑁆𑀔𑀭𑀡𑀻𑀆𑀤𑀬𑁄 𑀯𑀝𑁆𑀝𑀦𑁆𑀢𑀺. 𑀲𑀗𑁆𑀖𑀲𑁆𑀲𑀢𑀴𑀸𑀓𑀁𑀅𑀢𑁆𑀣𑀺, 𑀢𑀁𑀓𑀣𑀦𑁆𑀢𑀺𑀆𑀤𑀺𑀦𑀸𑀳𑀺𑀲𑀩𑁆𑀩𑀢𑁆𑀣 𑀲𑀗𑁆𑀖𑀲𑁆𑀲𑀯𑀲𑁂𑀦𑁂𑀯 𑀯𑀼𑀢𑁆𑀢𑀦𑁆𑀢𑀺. ‘‘𑀔𑁂𑀢𑁆𑀢𑀸𑀤𑀬𑁄 𑀧𑀦 𑀲𑀩𑁆𑀩𑁂𑀲𑀗𑁆𑀖𑀲𑁆𑀲𑁂𑀯 𑀯𑀝𑁆𑀝𑀦𑁆𑀢𑀺, 𑀧𑀸𑀴𑀺𑀬𑀁 𑀧𑀼𑀕𑁆𑀕𑀮𑀺𑀓𑀯𑀲𑁂𑀦 𑀕𑀳𑁂𑀢𑀼𑀁 𑀅𑀦𑀦𑀼𑀜𑁆𑀜𑀸𑀢𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀘. 𑀧𑀼𑀕𑁆𑀕𑀮𑀲𑁆𑀲 𑀧𑀦 𑀧𑀼𑀕𑁆𑀕𑀮𑀸𑀦𑀜𑁆𑀘 𑀔𑁂𑀢𑁆𑀢𑀯𑀢𑁆𑀣𑀸𑀤𑀻𑀦𑀺 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦𑀸𑀧𑀺 𑀧𑀝𑀺𑀕𑁆𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀏𑀯𑀜𑁆𑀘𑀓𑀢𑁆𑀯𑀸 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 ‘‘𑀔𑁂𑀢𑁆𑀢𑀯𑀢𑁆𑀣𑀸𑀤𑀻𑀦𑀺𑀧𑀺 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦𑀸𑀧𑀺 𑀧𑀼𑀕𑁆𑀕𑀮𑀸𑀦𑀁 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀣𑀸 𑀅𑀦𑀼𑀜𑁆𑀜𑀸𑀢𑀢𑁆𑀢𑀸𑀢𑀺 𑀯𑀺𑀜𑁆𑀜𑀸𑀬𑀢𑀺 𑀔𑁂𑀢𑁆𑀢𑀯𑀢𑁆𑀣𑀼𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺 𑀆𑀤𑀺𑀦𑀸 𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀲𑀼 𑀏𑀓𑀲𑁆𑀲𑁂𑀯 𑀧𑀼𑀕𑁆𑀕𑀮𑀺𑀓𑀯𑀲𑁂𑀦 𑀕𑀳𑀡𑁂 𑀅𑀦𑀦𑀼𑀜𑁆𑀜𑀸𑀢𑁂 𑀢𑀤𑀺𑀢𑀭𑀸𑀦𑀁 𑀢𑀣𑀸𑀕𑀳𑁂𑀢𑀩𑁆𑀩𑀢𑀸 𑀲𑀺𑀤𑁆𑀥𑀸𑀯 𑀳𑁄𑀢𑀻’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀴𑀸𑀓𑀔𑁂𑀢𑁆𑀢𑀯𑀢𑁆𑀣𑀸𑀤𑀺𑀲𑀳𑀺𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀲𑀗𑁆𑀖𑀺𑀓𑀪𑀸𑀯𑁂𑀦𑁂𑀯 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀢𑀸 𑀲𑀺𑀤𑁆𑀥𑀸 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀸. 𑀅𑀬𑀁 𑀧𑀞𑀫𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑀦𑀸.

𑀢𑀴𑀸𑀓𑀔𑁂𑀢𑁆𑀢𑀯𑀢𑁆𑀣𑀸𑀤𑀺𑀯𑀺𑀭𑀳𑀺𑀢𑀁 𑀧𑀦 𑀯𑀺𑀳𑀸𑀭𑀁 𑀧𑀼𑀕𑁆𑀕𑀮𑀺𑀓𑀪𑀸𑀯𑁂𑀦𑀸𑀧𑀺 𑀧𑀝𑀺𑀕𑁆𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀲𑁄 𑀘 𑀯𑀺𑀳𑀸𑀭𑁄 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀚𑀻𑀯𑀦𑁆𑀢𑁂 𑀧𑀼𑀕𑁆𑀕𑀮𑀺𑀓𑁄 𑀳𑁄𑀢𑀺. 𑀅𑀜𑁆𑀜𑁂𑀲𑀁 𑀤𑀫𑁆𑀫𑀻𑀢𑀺 𑀅𑀤𑀢𑁆𑀯𑀸 𑀫𑀢𑁂 𑀅𑀯𑀺𑀲𑁆𑀲𑀚𑁆𑀚𑀦𑀻𑀬𑁄 𑀅𑀯𑁂𑀪𑀗𑁆𑀕𑀺𑀬𑁄, 𑀲𑀗𑁆𑀖𑀺𑀓𑁄𑀬𑁂𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀬𑀣𑀸𑀳, 𑀪𑀺𑀓𑁆𑀔𑀼𑀲𑁆𑀲 𑀪𑀺𑀓𑁆𑀔𑀯𑁂 𑀓𑀸𑀮𑀗𑁆𑀓𑀢𑁂 𑀲𑀗𑁆𑀖𑁄 𑀲𑀸𑀫𑀺 𑀧𑀢𑁆𑀢𑀘𑀻𑀯𑀭𑁂. 𑀅𑀧𑀺 𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸 𑀩𑀳𑀽𑀧𑀓𑀸𑀭𑀸, 𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀲𑀗𑁆𑀖𑁂𑀦 𑀢𑀺𑀘𑀻𑀯𑀭𑀜𑁆𑀘 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸𑀦𑀁 𑀤𑀸𑀢𑀼𑀁. 𑀬𑀁 𑀢𑀢𑁆𑀣 𑀮𑀳𑀼𑀪𑀡𑁆𑀟𑀁 𑀮𑀳𑀼𑀧𑀭𑀺𑀓𑁆𑀔𑀸𑀭𑀁, 𑀢𑀁 𑀲𑀫𑁆𑀫𑀼𑀔𑀻𑀪𑀽𑀢𑁂𑀦 𑀲𑀗𑁆𑀖𑁂𑀦 𑀪𑀸𑀚𑁂𑀢𑀩𑁆𑀩𑀁. 𑀬𑀁 𑀢𑀢𑁆𑀣 𑀕𑀭𑀼𑀪𑀡𑁆𑀟𑀁𑀕𑀭𑀼𑀧𑀭𑀺𑀓𑁆𑀔𑀸𑀭𑀁 𑀢𑀁 𑀆𑀕𑀢𑀸𑀦𑀸𑀕𑀢𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀲𑀗𑁆𑀖𑀲𑁆𑀲 𑀅𑀯𑀺𑀲𑁆𑀲𑀚𑁆𑀚𑀺𑀬𑀁 𑀅𑀯𑁂𑀪𑀗𑁆𑀕𑀺𑀬𑀦𑁆𑀢𑀺. 𑀯𑀺𑀦𑀬𑀝𑁆𑀞𑀓𑀣𑀸𑀬𑀜𑁆𑀘 ‘‘𑀢𑀲𑁆𑀫𑀺𑀁 ¶ 𑀚𑀻𑀯𑀦𑁆𑀢𑁂 𑀧𑀼𑀕𑁆𑀕𑀮𑀺𑀓𑁄, 𑀫𑀢𑁂 𑀲𑀗𑁆𑀖𑀺𑀓𑁄𑀬𑁂𑀯𑀸𑀢𑀺 𑀅𑀜𑁆𑀜𑁂𑀲𑀁 𑀅𑀤𑀢𑁆𑀯𑀸 𑀞𑀧𑀺𑀢𑀧𑀭𑀺𑀓𑁆𑀔𑀸𑀭𑀸𑀧𑀺 𑀢𑀢𑁆𑀣 𑀲𑀗𑁆𑀖𑀲𑁆𑀲𑁂𑀯 𑀳𑁄𑀦𑁆𑀢𑀺. 𑀤𑁆𑀯𑀺𑀦𑁆𑀦𑀁 𑀲𑀦𑁆𑀢𑀓𑀁 𑀳𑁄𑀢𑀺 𑀅𑀯𑀺𑀪𑀢𑁆𑀢𑀁, 𑀏𑀓𑀲𑁆𑀫𑀺𑀁 𑀓𑀸𑀮𑀗𑁆𑀓𑀢𑁂 𑀇𑀢𑀭𑁄 𑀲𑀸𑀫𑀺. 𑀩𑀳𑀽𑀦𑀁 𑀲𑀦𑁆𑀢𑀓𑁂𑀧𑀺 𑀏𑀲𑁂𑀯 𑀦𑀬𑁄, 𑀲𑀩𑁆𑀩𑁂𑀲𑀼 𑀫𑀢𑁂𑀲𑀼 𑀲𑀗𑁆𑀖𑀺𑀓𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁.

𑀏𑀢𑁆𑀣 𑀘 𑀬𑀁 𑀢𑀢𑁆𑀣 𑀕𑀭𑀼𑀪𑀡𑁆𑀟’𑀦𑁆𑀢𑀺 𑀆𑀤𑀻𑀲𑀼 𑀕𑀭𑀼𑀪𑀡𑁆𑀟𑀁 𑀦𑀸𑀫 𑀭𑀸𑀲𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑀁, 𑀲𑀭𑀽𑀧𑀯𑀲𑁂𑀦 𑀧𑀦 𑀧𑀜𑁆𑀘𑀯𑀻𑀲𑀢𑀺𑀯𑀺𑀥𑀁 𑀳𑁄𑀢𑀺, 𑀢𑀲𑁆𑀫𑀸 𑀫𑀢𑀓𑀲𑀦𑁆𑀢𑀓𑀪𑀽𑀢𑀲𑁆𑀲𑀸𑀧𑀺 𑀯𑀺𑀳𑀸𑀭𑀲𑁆𑀲 𑀕𑀭𑀼𑀪𑀡𑁆𑀟𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀬𑀁 𑀢𑀢𑁆𑀣 𑀮𑀳𑀼𑀪𑀡𑁆𑀟𑀁 𑀬𑀁 𑀢𑀢𑁆𑀣 𑀕𑀭𑀼𑀪𑀡𑁆𑀟’’𑀦𑁆𑀢𑀺.

𑀇𑀢𑀺 𑀧𑀜𑁆𑀘𑀳𑀺 𑀭𑀸𑀲𑀻𑀳𑀺, 𑀧𑀜𑁆𑀘𑀦𑀺𑀫𑁆𑀫𑀮𑀮𑁄𑀘𑀦𑁄;

𑀧𑀜𑁆𑀘𑀯𑀻𑀲𑀯𑀺𑀥𑀁 𑀦𑀸𑀣𑁄, 𑀕𑀭𑀼𑀪𑀡𑁆𑀟𑀁 𑀧𑀓𑀸𑀲𑀬𑀻𑀢𑀺.

𑀏𑀢𑁆𑀣 𑀯𑀺𑀳𑀸𑀭𑀲𑁆𑀲 𑀕𑀭𑀼𑀪𑀡𑁆𑀟𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀤𑀼𑀢𑀺𑀬𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑀦𑀸.

𑀅𑀬𑀁 𑀳𑀁𑀲𑀸𑀯𑀢𑀺𑀬𑀸 𑀧𑀸𑀫𑁄𑀓𑁆𑀔𑀫𑀳𑀸𑀣𑁂𑀭𑀸𑀦𑀁 𑀯𑀺𑀲𑁆𑀲𑀚𑁆𑀚𑀦𑀸. 𑀭𑀸𑀫𑀜𑁆𑀜𑀭𑀝𑁆𑀞𑀯𑀸𑀲𑀺𑀦𑁄 𑀧𑀦 𑀫𑀳𑀸𑀣𑁂𑀭𑀸 𑀧𑀼𑀕𑁆𑀕𑀮𑀺𑀓𑀪𑀸𑀯𑁂𑀦𑀸𑀧𑀺 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀫𑁂𑀯𑀸𑀢𑀺 𑀯𑀤𑀦𑁆𑀢𑀺, 𑀢𑀣𑀸 𑀚𑀁𑀫𑀸𑀬𑀭𑀝𑁆𑀞𑀯𑀸𑀲𑀺𑀦𑁄𑀧𑀺 𑀫𑀳𑀸𑀣𑁂𑀭𑀸, 𑀢𑀣𑀸 𑀲𑀽𑀦𑀸𑀧𑀭𑀦𑁆𑀢𑀭𑀝𑁆𑀞𑀯𑀸𑀲𑀺𑀦𑁄𑀧𑀺 𑀫𑀳𑀸𑀣𑁂𑀭𑀸 𑀢𑀣𑀸 𑀇𑀲𑀺𑀦𑀕𑀭𑀯𑀸𑀲𑀺𑀦𑁄𑀧𑀺 𑀫𑀳𑀸𑀣𑁂𑀭𑀸 𑀧𑀼𑀕𑁆𑀕𑀮𑀺𑀓𑀪𑀸𑀯𑁂𑀦 𑀧𑀝𑀺𑀕𑁆𑀕𑀳𑀡𑁂 𑀤𑁄𑀲𑁄 𑀦𑀢𑁆𑀣𑀻’𑀢𑀺 𑀯𑀤𑀦𑁆𑀢𑀺 𑀢𑁂𑀲𑀁 𑀫𑀳𑀸𑀣𑁂𑀭𑀸𑀦𑀁 𑀅𑀬𑀫𑀥𑀺𑀧𑁆𑀧𑀸𑀬𑁄 𑀮𑀸𑀪𑀲𑀻𑀫𑀸𑀦𑀸𑀫𑁂𑀲𑀸 𑀦𑁂𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀦𑀼𑀜𑁆𑀜𑀸𑀢𑀸. 𑀦 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺𑀧𑀺 𑀞𑀧𑀺𑀢𑀸. 𑀅𑀧𑀺 𑀘 𑀔𑁄 𑀧𑀼𑀜𑁆𑀜𑀢𑁆𑀣𑀺𑀓𑁂𑀳𑀺 𑀮𑀸𑀪𑀤𑀸𑀬𑀓𑁂𑀳𑀺 𑀞𑀧𑀺𑀢𑀸 𑀢𑀲𑁆𑀫𑀸 𑀧𑀼𑀜𑁆𑀜𑀢𑁆𑀣𑀺𑀓𑀸 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀬𑁄 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀮𑀸𑀪𑀢𑁆𑀣𑀸𑀬 𑀧𑀤𑁂𑀲𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀞𑀧𑁂𑀦𑁆𑀢𑀺 ‘‘𑀬𑀁 𑀏𑀢𑁆𑀣𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀩𑁆𑀩𑀁 𑀅𑀫𑁆𑀳𑀸𑀓𑀁 𑀯𑀺𑀳𑀸𑀭𑀲𑁆𑀲 𑀤𑁂𑀫𑀸’’𑀢𑀺. 𑀢𑀁 𑀧𑀦 𑀯𑀺𑀳𑀸𑀭𑀁 𑀅𑀢𑁆𑀢𑀦𑁄 𑀭𑀼𑀘𑀺𑀢𑀲𑁆𑀲 𑀬𑀲𑁆𑀲𑀓𑀲𑁆𑀲𑀘𑀺 𑀧𑀼𑀕𑁆𑀕𑀮𑀲𑁆𑀲 ‘‘𑀇𑀫𑀁 𑀯𑀺𑀳𑀸𑀭𑀁 𑀢𑀼𑀬𑁆𑀳𑀁 𑀤𑀫𑁆𑀫𑀺, 𑀢𑀯 𑀯𑀺𑀳𑀸𑀭𑁄 𑀳𑁄𑀢𑀽’’𑀢𑀺𑀯𑀸 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀤𑁂𑀢𑀺 𑀲𑁄𑀧𑀺 𑀧𑀼𑀕𑁆𑀕𑀮𑁄 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀧𑀜𑁆𑀘𑀮𑁂𑀡𑀸𑀦𑀺 𑀯𑀺𑀳𑀸𑀭’’𑀦𑁆𑀢𑀺 𑀆𑀤𑀺𑀦𑀸 𑀅𑀦𑀼𑀜𑁆𑀜𑀸𑀢𑀯𑀺𑀳𑀸𑀭𑀫𑁂𑀯 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀪𑀕𑀯𑀢𑁄 𑀅𑀦𑀼𑀜𑁆𑀜𑀸𑀢𑀯𑀺𑀳𑀸𑀭𑀫𑀢𑁆𑀢𑀲𑁆𑀲𑁂𑀯 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸𑀢𑀺. 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀔𑁂𑀢𑁆𑀢𑀯𑀢𑁆𑀣𑀸𑀤𑀻𑀦𑀺 𑀅𑀢𑁆𑀣𑀻𑀢𑀺 𑀘𑁂. ‘‘𑀔𑁂𑀢𑁆𑀢𑀯𑀢𑁆𑀣𑀼𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺 𑀆𑀤𑀺𑀦𑀸 𑀬𑀁 𑀔𑁂𑀢𑁆𑀢𑀸𑀤𑀺𑀯𑀢𑁆𑀣𑀼𑀧𑀝𑀺𑀕𑁆𑀕𑀳𑀡𑀁 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀲 𑀔𑁂𑀢𑁆𑀢𑀸𑀤𑀺𑀯𑀢𑁆𑀣𑀼𑀲𑁆𑀲 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀯𑀺𑀳𑀸𑀭𑀫𑀢𑁆𑀢𑀫𑁂𑀯 𑀳𑀺 𑀧𑀝𑀺𑀕𑁆𑀕𑀳𑀺𑀢𑁂 𑀢𑀧𑁆𑀧𑀝𑀺𑀩𑀤𑁆𑀥𑀸 𑀔𑁂𑀢𑁆𑀢𑀸𑀤𑀺𑀯𑀢𑁆𑀣𑀼𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑀘𑀻𑀯𑀭 𑀧𑀺𑀡𑁆𑀟𑀧𑀸𑀢𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀧𑀺 ¶ 𑀢𑀲𑁆𑀲𑁂𑀯 𑀧𑀼𑀕𑁆𑀕𑀮𑀲𑁆𑀲 𑀓𑀧𑁆𑀧𑀺𑀬𑀪𑀸𑀯𑁂𑀦𑁂𑀯 𑀧𑀯𑀢𑁆𑀢𑀦𑁆𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀧𑀝𑀺𑀕𑁆𑀕𑀳𑀡𑁂 𑀯𑀸 𑀧𑀭𑀺𑀪𑀼𑀢𑁆𑀢𑁂 𑀯𑀸 𑀤𑁄𑀲𑁄 𑀦𑀢𑁆𑀣𑀺, 𑀪𑀕𑀯𑀢𑀸 𑀏𑀯 𑀅𑀦𑀼𑀜𑁆𑀜𑀸𑀢𑀲𑁆𑀲 𑀓𑀧𑁆𑀧𑀺𑀬𑀧𑀘𑁆𑀘𑀬𑀲𑁆𑀲 𑀧𑀭𑀺𑀪𑀼𑀜𑁆𑀚𑀺𑀢𑀢𑁆𑀢𑀸. 𑀲𑀼𑀢𑁆𑀢𑀁 𑀆𑀳𑀭𑀸𑀢𑀺 𑀘𑁂, ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀲𑀩𑁆𑀩𑀁 𑀧𑀸𑀲𑀸𑀤𑀧𑀭𑀺𑀪𑁄𑀕’’𑀦𑁆𑀢𑀺. 𑀦𑀦𑀼 𑀘 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸 𑀲𑀗𑁆𑀖𑀲𑁆𑀲𑁂𑀯 𑀅𑀢𑁆𑀣𑀸𑀬 𑀲𑀸𑀴𑀺𑀦𑁆𑀤𑀁 𑀧𑀸𑀲𑀸𑀤𑀁 𑀳𑀢𑁆𑀣𑀺𑀦𑀔𑀓𑀦𑁆𑀢𑀺. 𑀲𑀘𑁆𑀘𑀁, 𑀢𑀣𑀸𑀧𑀺 𑀧𑀼𑀕𑁆𑀕𑀮𑁄 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑁄 𑀲𑀗𑁆𑀖𑀲𑁆𑀲 𑀧𑀸𑀲𑀸𑀤𑀧𑀭𑀺𑀪𑁄𑀕𑁂 𑀅𑀦𑀼𑀜𑁆𑀜𑀸𑀢𑁂 𑀢𑀤𑀦𑁆𑀢𑁄𑀕𑀥𑀲𑁆𑀲𑀧𑀺 𑀧𑀼𑀕𑁆𑀕𑀮𑀲𑁆𑀲 𑀅𑀦𑀼𑀜𑁆𑀜𑀸𑀢𑀫𑁂𑀯 𑀳𑁄𑀢𑀺. 𑀅𑀜𑁆𑀜𑀣𑀸 𑀧𑀼𑀕𑁆𑀕𑀮𑁂 𑀅𑀦𑁆𑀢𑁄𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑁄𑀬𑁂𑀯 𑀲𑀗𑁆𑀖𑁄 𑀢𑀲𑁆𑀫𑀺𑀁 𑀬𑁂𑀯 𑀯𑀺𑀳𑀸𑀭𑀲𑀻𑀫𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺 𑀓𑀫𑁆𑀫𑀓𑁄𑀧𑁄 𑀦 𑀪𑀯𑁂𑀬𑁆𑀬, 𑀅𑀯𑀕𑁆𑀕𑀸𑀭𑀳𑀢𑁆𑀢𑀸𑀢𑀺 𑀯𑀓𑁆𑀔𑀢𑀺 𑀘 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀲𑀩𑁆𑀩𑀁 𑀧𑀸𑀲𑀸𑀤𑀧𑀭𑀺𑀪𑁄𑀕’’𑀦𑁆𑀢𑀺 𑀯𑀘𑀦𑀢𑁄 𑀧𑀼𑀕𑁆𑀕𑀮𑀺𑀓𑁂𑀧𑀺 𑀲𑁂𑀦𑀸𑀲𑀦𑁂 𑀲𑁂 𑀦𑀸𑀲𑀦𑀧𑀭𑀺𑀪𑁄𑀕𑀯𑀲𑁂𑀦 𑀦𑀺𑀬𑀫𑀺𑀢𑀁 𑀲𑀼𑀯𑀡𑁆𑀡𑀖𑀝𑀸𑀤𑀺𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀫𑀸𑀦𑀫𑁆𑀧𑀺 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺, 𑀇𑀫𑀺𑀦𑀸𑀧𑀺 𑀯𑀘𑀦𑁂𑀦 𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑀲𑁆𑀲𑀧𑀺 𑀲𑀩𑁆𑀩𑀓𑀧𑁆𑀧𑀺𑀬𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀺 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀲𑀩𑁆𑀩𑀁 𑀧𑀸𑀲𑀸𑀤𑀧𑀭𑀺𑀪𑁄𑀕’’𑀦𑁆𑀢𑀺 𑀜𑀸𑀧𑀓𑀲𑁆𑀲 𑀤𑀲𑁆𑀲𑀦𑀢𑁄. 𑀲𑀼𑀯𑀡𑁆𑀡𑀖𑀝𑀸𑀤𑀺𑀓𑀦𑁆𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁄 𑀫𑀭𑀺𑀬𑀸𑀤𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄 𑀯𑀸, 𑀢𑁂𑀦 𑀭𑀚𑀢𑀳𑀸𑀭𑀓𑀽𑀝-𑀚𑀸𑀢𑀺𑀨𑀮𑀺𑀓𑀸𑀤𑀻𑀦𑀺 𑀅𑀓𑀧𑁆𑀧𑀺𑀬𑀖𑀝𑀸𑀦𑀺 𑀲𑀼𑀯𑀡𑁆𑀡𑀭𑀚𑀢𑀳𑀸𑀭𑀓𑀽𑀝 𑀚𑀸𑀢𑀺𑀨𑀮𑀺𑀓𑀸𑀤𑀺𑀪𑀸𑀚𑀦𑀲𑀭𑀯𑀸𑀤𑀻𑀦𑀺 𑀘 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺, 𑀢𑀸𑀦𑀺 𑀪𑀺𑀓𑁆𑀔𑀼𑀲𑁆𑀲 𑀧𑀭𑀺𑀓𑁆𑀔𑀸𑀭𑀪𑀸𑀯𑁂𑀦 𑀦 𑀯𑀝𑁆𑀝𑀦𑁆𑀢𑀺 𑀢𑀣𑀸 𑀤𑀸𑀲𑀺𑀤𑀸𑀲𑀕𑁄𑀫𑀳𑀺𑀁𑀲𑀸𑀧𑀺, 𑀢𑀣𑀸 𑀔𑁂𑀢𑁆𑀢𑀸𑀤𑀺𑀯𑀢𑁆𑀣𑀼𑀫𑁆𑀧𑀺 𑀪𑀺𑀓𑁆𑀔𑀼𑀲𑁆𑀲 𑀅𑀢𑁆𑀢𑀦𑁄 𑀲𑀦𑁆𑀢𑀓𑀪𑀸𑀯𑁂𑀦 𑀧𑀝𑀺𑀕𑁆𑀕𑀳𑁂𑀢𑀼𑀁 𑀦 𑀯𑀝𑁆𑀝𑀦𑁆𑀢𑀺, 𑀯𑀺𑀳𑀸𑀭𑀲𑁆𑀲 𑀧𑀦 𑀧𑀝𑀺𑀲𑁂𑀥𑁂𑀢𑀩𑁆𑀩𑀁 𑀦𑀢𑁆𑀣𑀺, 𑀲𑀩𑁆𑀩𑀲𑀤𑁆𑀤𑀲𑁆𑀲 𑀤𑀲𑁆𑀲𑀦𑀢𑁄 𑀢𑁂𑀦𑁂𑀯𑀸𑀳 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 ‘‘𑀲𑁂𑀦𑀸𑀲𑀦𑁂 𑀧𑀦 𑀤𑁆𑀯𑀸𑀭𑀓𑀯𑀸𑀝 𑀯𑀸𑀢𑀧𑀸𑀦𑀓𑀯𑀸𑀝𑀸𑀤𑀻𑀲𑀼 𑀲𑀩𑁆𑀩𑀁 𑀭𑀢𑀦𑀫𑀬𑀫𑁆𑀧𑀺 𑀯𑀡𑁆𑀡𑀫𑀝𑁆𑀞𑀓𑀫𑁆𑀫𑀁 𑀯𑀝𑁆𑀝𑀢𑀺. 𑀲𑁂𑀦𑀸𑀲𑀦𑁂 𑀓𑀺𑀜𑁆𑀘𑀺 𑀧𑀝𑀺𑀲𑁂𑀥𑁂𑀢𑀩𑁆𑀩𑀁 𑀦𑀢𑁆𑀣𑀺 𑀅𑀜𑁆𑀜𑀢𑁆𑀭 𑀯𑀺𑀭𑀼𑀤𑁆𑀥𑀲𑁂𑀦𑀸𑀲𑀦𑀸’’𑀢𑀺, 𑀇𑀫𑀺𑀦𑀸 𑀞𑀧𑁂𑀢𑁆𑀯𑀸’𑀕𑀸𑀫𑀜𑁆𑀘 𑀕𑀸𑀫𑀽𑀧𑀘𑀸𑀭𑀜𑁆𑀘𑀸’𑀢𑀺 𑀏𑀢𑁆𑀣 𑀯𑀺𑀭𑀼𑀤𑁆𑀥𑀲𑁂𑀦𑀸𑀲𑀦𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀯𑀺𑀳𑀸𑀭𑀲𑁆𑀲 𑀓𑀧𑁆𑀧𑀢𑀺, 𑀓𑀺𑀜𑁆𑀘𑀺𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀧𑀝𑀺𑀲𑁂𑀥𑁂𑀢𑀩𑁆𑀩𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀢𑁂𑀦𑁂𑀯𑀸𑀳 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂.

‘‘𑀔𑁂𑀢𑁆𑀢𑀯𑀢𑁆𑀣𑀼 𑀢𑀴𑀸𑀓𑀁𑀯𑀸, 𑀤𑁂𑀫 𑀕𑁄𑀅𑀚𑀺𑀓𑀸𑀤𑀺𑀓𑀁;

𑀯𑀺𑀳𑀸𑀭𑀲𑁆𑀲𑀸𑀢𑀺 𑀯𑀼𑀢𑁆𑀢𑁂𑀧𑀺, 𑀦𑀺𑀲𑁂𑀥𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺.

𑀦𑀦𑀼𑀘 ¶ 𑀯𑀺𑀳𑀸𑀭𑀲𑁆𑀲 𑀤𑁂𑀫𑀸𑀢𑀺 𑀲𑀗𑁆𑀖𑀺𑀓𑀯𑀺𑀳𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 𑀯𑀼𑀢𑁆𑀢𑀦𑁆𑀢𑀺. 𑀯𑀼𑀢𑁆𑀢𑀁 𑀏𑀢𑁆𑀣 𑀳𑀺 𑀆𑀘𑀭𑀺𑀬𑀲𑁆𑀲𑀅𑀥𑀺𑀧𑁆𑀧𑀸𑀬𑁂𑀦 𑀪𑀯𑀺𑀢𑀩𑁆𑀩𑀁 ‘‘𑀔𑁂𑀢𑁆𑀢𑀯𑀢𑁆𑀢𑀸𑀤𑀻𑀦𑀺𑀧𑀼𑀕𑁆𑀕𑀮𑀺𑀓𑀯𑀺𑀳𑀸𑀭𑀲𑁆𑀲 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀦 𑀓𑀧𑁆𑀧𑀢𑀺 𑀉𑀧𑀸𑀲𑀓𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀓𑀲𑁆𑀫𑀸 𑀧𑀼𑀕𑁆𑀕𑀮𑁄 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀲𑀸𑀫𑀺, 𑀯𑀺𑀳𑀸𑀭𑀲𑁆𑀲 𑀤𑀺𑀦𑁆𑀦𑁂 𑀧𑀼𑀕𑁆𑀕𑀮𑀲𑁆𑀲 𑀤𑀺𑀦𑁆𑀦𑀫𑁂𑀯 𑀳𑁄𑀢𑀺, 𑀏𑀯𑀁 𑀲𑀢𑀺 𑀘 ‘‘𑀔𑁂𑀢𑁆𑀢𑀯𑀢𑁆𑀣𑀼𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺 𑀆𑀤𑀺𑀦𑀸 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑁂𑀦 𑀓𑀸𑀭𑁂𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺. 𑀲𑀗𑁆𑀖𑀺𑀓𑀯𑀺𑀳𑀸𑀭𑀲𑁆𑀲 𑀧𑀦 𑀦 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀓𑀲𑁆𑀫𑀸 𑀲𑁄 𑀧𑀼𑀕𑁆𑀕𑀮𑁄 𑀢𑀲𑁆𑀲 𑀲𑀗𑁆𑀖𑀺𑀓𑀯𑀺𑀳𑀸𑀭𑀲𑁆𑀲 𑀅𑀦𑀺𑀲𑁆𑀲𑀭𑁄. 𑀘𑀸𑀢𑀼𑀤𑁆𑀤𑀺𑀲𑀁 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑀁 𑀬𑀁𑀓𑀺𑀜𑁆𑀘𑀺 𑀔𑀼𑀤𑁆𑀤𑀓𑀁 𑀯𑀸 𑀫𑀳𑀦𑁆𑀢𑀁 𑀯𑀸 𑀧𑀤𑁂𑀲𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀲𑁆𑀲𑀧𑀺 𑀧𑀸𑀭𑀸𑀚𑀺𑀓𑁄 𑀦 𑀳𑁄𑀢𑀺, 𑀲𑀩𑁆𑀩𑀲𑁆𑀲𑁂𑀯 𑀘𑀸𑀢𑀼𑀤𑁆𑀤𑀺𑀲𑀺𑀓𑀲𑁆𑀲 𑀲𑀗𑁆𑀖𑀲𑁆𑀲 𑀥𑀼𑀭𑀦𑀺𑀓𑁆𑀔𑁂𑀧𑀲𑁆𑀲 𑀅𑀲𑀫𑁆𑀪𑀯𑀢𑁄 𑀢𑀲𑁆𑀫𑀸 𑀲𑀗𑁆𑀖𑀺𑀓𑀯𑀺𑀳𑀸𑀭𑀲𑁆𑀲 𑀤𑀺𑀦𑁆𑀦𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀲𑀗𑁆𑀖𑀲𑁆𑀲 𑀮𑀸𑀪𑀦𑁆𑀢𑀭𑀸𑀬𑀓𑀭𑁄 𑀳𑁄𑀢𑀻𑀢𑀺. 𑀇𑀫𑀫𑁂𑀯𑀢𑁆𑀣𑀁 𑀲𑀦𑁆𑀥𑀸𑀬 𑀯𑀺𑀳𑀸𑀭𑀲𑁆𑀲 𑀤𑁂𑀫𑀸𑀢𑀺 𑀲𑀗𑁆𑀖𑀺𑀓𑀯𑀺𑀳𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’𑀦𑁆𑀢𑀺 𑀯𑀼𑀢𑁆𑀢𑀁 𑀪𑀯𑁂𑀬𑁆𑀬, 𑀦 𑀧𑀼𑀕𑁆𑀕𑀮𑀺𑀓𑀪𑀸𑀯𑁂𑀦𑀸𑀧𑀺 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀦𑁆𑀢𑀺. 𑀏𑀯𑀜𑁆𑀘 𑀲𑀢𑀺 𑀲𑀸𑀫𑀺𑀓𑀸𑀦𑀁 𑀥𑀼𑀭𑀦𑀺𑀓𑁆𑀔𑁂𑀧𑁂𑀦𑀸’𑀢𑀺 𑀏𑀢𑁆𑀣 𑀏𑀓𑀲𑁆𑀲 𑀲𑀦𑁆𑀢𑀓𑁂 𑀢𑀴𑀸𑀓𑁂 𑀔𑁂𑀢𑁆𑀢𑁂 𑀘 𑀚𑀸𑀢𑁂 𑀢𑀲𑁆𑀲𑁂𑀯 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀧𑀸𑀭𑀸𑀚𑀺𑀓𑀁. 𑀬𑀤𑀺 𑀧𑀦 𑀢𑀁 𑀢𑀴𑀸𑀓𑀁 𑀲𑀩𑁆𑀩𑀲𑀸𑀥𑀸𑀭𑀡𑀁, 𑀔𑁂𑀢𑁆𑀢𑀸𑀦𑀺 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸𑀦𑀺, 𑀢𑀲𑁆𑀲 𑀘 𑀥𑀼𑀭𑀦𑀺𑀓𑁆𑀔𑁂𑀧𑁂 𑀅𑀯𑀳𑀸𑀭𑁄. 𑀅𑀣 𑀔𑁂𑀢𑁆𑀢𑀸𑀦𑀺𑀧𑀺 𑀲𑀩𑁆𑀩𑀲𑀸𑀥𑀸𑀭𑀡𑀸𑀦𑀺, 𑀲𑀩𑁆𑀩𑁂𑀲𑀁 𑀥𑀼𑀭𑀦𑀺𑀓𑁆𑀔𑁂𑀧𑁂𑀬𑁂𑀯 𑀧𑀸𑀭𑀸𑀚𑀺𑀓𑀁, 𑀦𑀸𑀲𑀢𑀻𑀢𑀺 𑀤𑀝𑁆𑀞𑀩𑁆𑀩𑀦𑁆𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 𑀯𑀼𑀢𑁆𑀢𑀯𑀘𑀦𑁂𑀦 𑀅𑀯𑀺𑀭𑁄𑀥𑁄 𑀲𑀺𑀬𑀸, 𑀢𑀣𑀸 𑀳𑀺 𑀔𑁂𑀢𑁆𑀢𑀯𑀢𑁆𑀣𑀸𑀤𑀺𑀲𑀳𑀺𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀼𑀕𑁆𑀕𑀮𑀺𑀓𑀪𑀸𑀯𑁂𑀦 𑀅𑀓𑀧𑁆𑀧𑀺𑀬𑁂 𑀲𑀢𑀺. 𑀓𑀣𑀁 𑀧𑀼𑀕𑁆𑀕𑀮𑀲𑁆𑀲 𑀔𑁂𑀢𑁆𑀢𑀯𑀢𑁆𑀣𑀸𑀤𑀺𑀓𑀫𑀸𑀭𑀩𑁆𑀪 𑀅𑀪𑀺𑀬𑀼𑀜𑁆𑀚𑀪𑀸𑀯𑁄 𑀪𑀯𑁂𑀬𑁆𑀬, 𑀏𑀯𑀜𑁆𑀘 𑀧𑀦 𑀯𑀤𑁂𑀬𑁆𑀬 ‘‘𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀻𑀢𑀺 𑀏𑀢𑁆𑀣 𑀏𑀓𑀲𑁆𑀲 𑀲𑀦𑁆𑀢𑀓𑁂 𑀢𑀴𑀸𑀓𑁂 𑀔𑁂𑀢𑁆𑀢𑁂 𑀘𑀸𑀢𑀺𑀏𑀢𑁆𑀣 𑀕𑀺𑀳𑀺𑀲𑀦𑁆𑀢𑀓𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀢𑀣𑀸𑀧𑀺 𑀦 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸 ‘‘𑀥𑀼𑀭𑀁 𑀦𑀺𑀓𑁆𑀔𑀺𑀧𑀢𑀻𑀢𑀺 𑀬𑀤𑀸 𑀧𑀦 𑀲𑀸𑀫𑀺𑀓𑁄 𑀅𑀬𑀁 𑀣𑀤𑁆𑀥𑁄 𑀓𑀓𑁆𑀔𑀴𑁄, 𑀚𑀻𑀯𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑀫𑁆𑀧𑀺 𑀫𑁂 𑀓𑀭𑁂𑀬𑁆𑀬, 𑀅𑀮𑀁 𑀤𑀸𑀦𑀺 𑀫𑀬𑁆𑀳𑀁 𑀇𑀫𑀺𑀦𑀸’’𑀢𑀺 𑀧𑀤𑀲𑁆𑀲 𑀤𑀺𑀲𑁆𑀲𑀦𑀢𑁄 𑀢𑁂𑀦𑁂𑀯 ‘‘𑀔𑁂𑀢𑁆𑀢𑀸𑀦𑀺 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸𑀦𑀺, 𑀢𑀲𑁆𑀲 𑀘 𑀥𑀼𑀭𑀦𑀺𑀓𑁆𑀔𑁂𑀧𑁂’’𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 𑀯𑀼𑀢𑁆𑀢𑀁. 𑀢𑀣𑀸 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀲𑀩𑁆𑀩𑀁 𑀧𑀸𑀲𑀸𑀤𑀧𑀭𑀺𑀪𑁄𑀕’’𑀦𑁆𑀢𑀺 𑀯𑀘𑀦𑀢𑁄 𑀧𑀼𑀕𑁆𑀕𑀮𑀺𑀓𑁂𑀧𑀺 𑀲𑁂𑀦𑀸𑀲𑀦𑁂 𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑀯𑀲𑁂𑀦 𑀦𑀺𑀬𑀫𑀺𑀢𑀁 𑀲𑀼𑀯𑀡𑁆𑀡𑀖𑀝𑀸𑀤𑀺𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀫𑀸𑀦𑀫𑁆𑀧𑀺 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀯𑀼𑀢𑁆𑀢 𑀯𑀘𑀦𑁂𑀦𑀸𑀧𑀺 𑀅𑀯𑀺𑀭𑁄𑀥𑁄 𑀲𑀺𑀬𑀸, 𑀢𑀣𑀸 ‘‘𑀲𑁂𑀦𑀸𑀲𑀦𑁂 𑀓𑀺𑀜𑁆𑀘𑀺 𑀧𑀝𑀺𑀲𑁂𑀥𑁂𑀢𑀩𑁆𑀩𑀁 ¶ 𑀦𑀢𑁆𑀣𑀺 𑀅𑀜𑁆𑀜𑀢𑁆𑀭 𑀯𑀺𑀭𑀼𑀤𑁆𑀥𑀲𑁂𑀦𑀸𑀲𑀦𑀦𑀸’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑁂𑀦𑀸𑀧𑀺 𑀲𑀁𑀲𑀦𑁆𑀤𑀫𑁂𑀯. 𑀢𑀣𑀸 ‘‘𑀬𑀁 𑀪𑀺𑀓𑁆𑀔𑀯𑁂 𑀫𑀬𑀸 𑀇𑀤𑀁 𑀦 𑀓𑀧𑁆𑀧𑀢𑀻𑀢𑀺 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀁 𑀘𑁂 𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺, 𑀅𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺, 𑀢𑀁 𑀯𑁄 𑀓𑀧𑁆𑀧𑀢𑀻’’𑀢𑀺 𑀇𑀫𑀺𑀦𑀸 𑀲𑀼𑀢𑁆𑀢𑀸𑀦𑀼𑀮𑁄𑀫𑁂𑀦𑀧𑀺𑀲𑀁𑀦𑁆𑀤𑀫𑁂𑀯. 𑀓𑀣𑀁 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀧𑀜𑁆𑀘𑀮𑁂𑀡𑀸𑀦𑀺 𑀯𑀺𑀳𑀸𑀭𑀦𑁆𑀢𑁆𑀬𑀸’’𑀤𑀺𑀦𑀸 𑀅𑀦𑀼𑀜𑁆𑀜𑀸𑀢𑀯𑀺𑀳𑀸𑀭𑀲𑁆𑀲 𑀧𑀝𑀺𑀕𑁆𑀕𑀳𑀺𑀢𑀢𑁆𑀣𑀸. 𑀢𑀧𑁆𑀧𑀝𑀺𑀩𑀤𑁆𑀥𑀘𑀻𑀯𑀭𑀸𑀤𑀺𑀓𑀧𑁆𑀧𑀺𑀬𑀧𑀘𑁆𑀘𑀬𑀲𑁆𑀲𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀢𑁆𑀢𑀸 𑀘 𑀯𑀺𑀳𑀸𑀭𑀧𑀺𑀡𑁆𑀟𑀧𑀸𑀢𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀧𑀺 𑀪𑀺𑀓𑁆𑀔𑀼𑀲𑁆𑀲 𑀲𑀩𑁆𑀩𑀓𑀧𑁆𑀧𑀺𑀬𑀸 𑀓𑀧𑁆𑀧𑀺𑀬𑀸𑀦𑀼𑀮𑁄𑀫𑀸 𑀘 𑀳𑁄𑀦𑁆𑀢𑀺. 𑀏𑀯𑀁 𑀲𑀼𑀢𑁆𑀢𑀲𑀼𑀢𑁆𑀢𑀸𑀦𑀼𑀮𑁄𑀫𑀆𑀘𑀭𑀺𑀬𑀯𑀸𑀤𑀅𑀢𑁆𑀢𑀦𑁄𑀫𑀢𑀻𑀳𑀺 𑀲𑀁𑀲𑀦𑁆𑀤𑀦𑀢𑁄 𑀅𑀜𑁆𑀜𑀤𑀢𑁆𑀣𑀼 𑀕𑀗𑁆𑀕𑁄𑀤𑀓𑁂𑀦 𑀬𑀫𑀼𑀦𑁄𑀤𑀓𑀁 𑀯𑀺𑀬 𑀔𑁂𑀢𑁆𑀢𑀯𑀢𑁆𑀣𑀸𑀤𑀺𑀲𑀳𑀺𑀢𑀯𑀺𑀳𑀸𑀭𑁄 𑀧𑀼𑀕𑁆𑀕𑀮𑀺𑀓𑀪𑀸𑀯𑁂𑀦𑀸𑀧𑀺 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑁄𑀢𑀺 𑀓𑀧𑁆𑀧𑀺𑀬𑀸 𑀓𑀧𑁆𑀧𑀺𑀬𑀸𑀦𑀺 𑀯𑀺𑀦𑀬𑀓𑁄𑀯𑀺𑀤𑁂𑀳𑀺 𑀤𑀝𑁆𑀞𑀩𑁆𑀩𑁄. 𑀅𑀬𑀁 𑀇𑀲𑀺𑀦𑀕𑀭𑀯𑀸𑀲𑀻𑀦𑀁 𑀫𑀳𑀸𑀣𑁂𑀭𑀸𑀦𑀁 𑀲𑀫𑀸𑀦𑀯𑀺𑀲𑁆𑀲𑀚𑁆𑀚𑀦𑀸.

‘‘𑀬𑁂 𑀘 𑀚𑀦𑀸 𑀕𑀭𑀼𑀪𑀡𑁆𑀟𑀁 𑀲𑀁𑀯𑀺𑀥𑀸𑀬 𑀅𑀯𑀳𑀭𑀼𑀁. 𑀥𑀼𑀭𑀦𑀺𑀓𑁆𑀔𑁂𑀧𑁄 𑀘 𑀳𑁄𑀢𑀺, 𑀧𑀸𑀭𑀸𑀚𑀺𑀓𑀫𑀦𑀸𑀧𑀦𑁆𑀦𑀸, 𑀧𑀜𑁆𑀳𑀸𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺.

𑀅𑀬𑀁 𑀧𑀜𑁆𑀳𑀸 𑀲𑀗𑁆𑀖𑀺𑀓𑀪𑀽𑀫𑀺𑀣𑁂𑀦𑀓𑁂 𑀪𑀺𑀓𑁆𑀔𑀼 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸, 𑀢𑀢𑁆𑀣 𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀗𑁆𑀖𑀲𑁆𑀲 𑀥𑀼𑀭𑀦𑀺𑀓𑁆𑀔𑁂𑀧𑁂𑀦 𑀘𑀸𑀢𑀼𑀤𑁆𑀤𑀺𑀲𑀺𑀓𑀲𑀗𑁆𑀖𑀲𑁆𑀲 𑀥𑀼𑀭𑀦𑀺𑀓𑁆𑀔𑁂𑀧𑀸𑀪𑀸𑀯𑀢𑁄 𑀅𑀯𑀳𑀸𑀭𑁄 𑀦𑀢𑁆𑀣𑀻𑀢𑀺. 𑀅𑀬𑀁 𑀮𑀸𑀪𑀲𑀺𑀫𑀸𑀬 𑀯𑀺𑀘𑀸𑀭𑀡𑀸.

𑀕𑀸𑀫𑀲𑀻𑀫𑀸𑀦𑀺𑀕𑀫𑀲𑀻𑀫𑀸𑀦𑀕𑀭𑀲𑀻𑀫𑀸 𑀧𑀦 𑀧𑀸𑀓𑀝𑀸𑀬𑁂𑀯. 𑀢𑀸𑀲𑀁 𑀧𑀦 𑀯𑀺𑀲𑁂𑀲𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑀬𑀲𑁆𑀫𑀺𑀁 𑀧𑀦 𑀧𑀤𑁂𑀲𑁂 𑀆𑀧𑀡𑀫𑁂𑀯 𑀅𑀢𑁆𑀣𑀺, 𑀦 𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑀁 𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑀫𑁂𑀯 𑀯𑀸 𑀅𑀢𑁆𑀣𑀺 𑀦 𑀆𑀧𑀡𑀁 𑀅𑀬𑀁 𑀧𑀤𑁂𑀲𑁄 𑀕𑀸𑀫𑁄 𑀦𑀸𑀫. 𑀬𑀲𑁆𑀫𑀺𑀁 𑀧𑀦 𑀝𑁆𑀞𑀸𑀦𑁂 𑀕𑀸𑀫𑁄𑀬𑁂𑀯 𑀅𑀢𑁆𑀣𑀺, 𑀦 𑀧𑀦 𑀆𑀧𑀡𑀧𑀸𑀓𑀸𑀭𑀸 𑀲𑀦𑁆𑀢𑀺, 𑀅𑀬𑀁 𑀧𑀤𑁂𑀲𑁄 𑀦𑀺𑀕𑀫𑁄 𑀦𑀸𑀫. 𑀬𑀢𑁆𑀣 𑀧𑀦 𑀆𑀧𑀡𑀫𑁆𑀧𑀺 𑀅𑀢𑁆𑀣𑀺 𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑀫𑁆𑀧𑀺, 𑀅𑀬𑀁 𑀧𑀤𑁂𑀲𑁄 𑀦𑀕𑀭𑀁 𑀦𑀸𑀫. 𑀅𑀬𑀁 𑀧𑀤𑁂𑀲𑁄 𑀦𑀸𑀕𑀸𑀭𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀘𑀦𑀢𑁆𑀣𑁂𑀦 𑀭𑀸𑀚𑀽𑀦𑀁 𑀯𑀸 𑀫𑀳𑀸𑀫𑀢𑁆𑀢𑀸𑀦𑀁 𑀯𑀸 𑀦𑀺𑀯𑀸𑀲𑀦𑀬𑁄𑀕𑁆𑀬𑀝𑁆𑀞𑀸𑀦𑀢𑁆𑀢𑀸 𑀦𑀕𑀭𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀮𑁄𑀓𑀺𑀬𑀲𑀢𑁆𑀣𑁂 𑀧𑀦.

‘‘𑀯𑀺𑀘𑀺𑀢𑁆𑀢𑀤𑁂𑀯𑀸𑀬𑀢𑀦𑀁, 𑀧𑀸𑀲𑀸𑀤𑀸𑀧𑀡𑀫𑀦𑁆𑀤𑀺𑀭𑀁;

𑀦𑀕𑀭𑀁 𑀤𑀲𑁆𑀲𑀬𑁂 𑀯𑀺𑀤𑁆𑀯𑀸, 𑀭𑀸𑀚𑀫𑀕𑁆𑀕𑁄 𑀧𑀲𑁄𑀪𑀺𑀢’’𑀦𑁆𑀢𑀺.

𑀯𑀼𑀢𑁆𑀢𑀁. 𑀏𑀯𑀁 𑀕𑀸𑀫𑀦𑀺𑀕𑀫𑀦𑀕𑀭𑀸𑀦𑀁 𑀯𑀺𑀲𑁂𑀲𑀁 𑀜𑀢𑁆𑀯𑀸 𑀕𑀸𑀫𑁄𑀬𑁂𑀯 𑀕𑀸𑀫𑀲𑀻𑀫𑀸, 𑀦𑀺𑀕𑀫𑁄𑀬𑁂𑀯 𑀦𑀺𑀕𑀫𑀲𑀻𑀫𑀸, 𑀦𑀕𑀭𑀫𑁂𑀯 𑀦𑀕𑀭𑀲𑀻𑀫𑀸𑀢𑀺 𑀢𑀸𑀲𑀁 𑀯𑀘𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀬𑀁 𑀧𑀤𑁂𑀲𑀁 𑀅𑀲𑀫𑁆𑀫𑀢𑀸𑀬 𑀪𑀺𑀓𑁆𑀔𑀯𑁂 𑀲𑀻𑀫𑀸𑀬 𑀅𑀞𑀧𑀺𑀢𑀸𑀬 𑀬𑀁 ¶ 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺, 𑀬𑀸 𑀢𑀲𑁆𑀲 𑀕𑀸𑀫𑀲𑁆𑀲 𑀯𑀸 𑀕𑀸𑀫𑀲𑀻𑀫𑀸 𑀦𑀺𑀕𑀫𑀲𑁆𑀲 𑀯𑀸 𑀦𑀺𑀕𑀫𑀲𑀻𑀫𑀸, 𑀅𑀬𑀁 𑀢𑀢𑁆𑀣 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸’𑀢𑀺 𑀅𑀦𑀼𑀜𑁆𑀜𑀸𑀢𑀁, 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀲𑀩𑁆𑀩𑁄𑀧𑀺 𑀯𑀸 𑀕𑀸𑀫𑀧𑀤𑁂𑀲𑁄. 𑀬𑀫𑁆𑀧𑀺 𑀏𑀓𑀲𑁆𑀫𑀺𑀁𑀬𑁂𑀯 𑀕𑀸𑀫𑀔𑁂𑀢𑁆𑀢𑁂 𑀏𑀓𑀁 𑀧𑀤𑁂𑀲𑀁 ‘‘𑀅𑀬𑀁 𑀯𑀺𑀲𑀼𑀁 𑀕𑀸𑀫𑁄 𑀳𑁄𑀢𑀽’’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀭𑀸𑀚𑀸 𑀓𑀲𑁆𑀲𑀘𑀺 𑀤𑁂𑀢𑀺 𑀲𑁄𑀧𑀺 𑀯𑀺𑀲𑀼𑀁𑀕𑀸𑀫𑀲𑀻𑀫𑀸 𑀳𑁄𑀢𑀺𑀬𑁂𑀯 𑀢𑀲𑁆𑀫𑀸 𑀲𑀸 𑀘 𑀇𑀢𑀭𑀸 𑀘 𑀧𑀓𑀢𑀺𑀕𑀸𑀫𑀦𑀕𑀭𑀦𑀺𑀕𑀫𑀲𑀻𑀫𑀸 𑀩𑀤𑁆𑀥𑀲𑀻𑀫𑀸𑀲𑀤𑀺𑀲𑀸𑀬𑁂𑀯 𑀳𑁄𑀦𑁆𑀢𑀺. 𑀓𑁂𑀯𑀮𑀁 𑀧𑀦 𑀢𑀺𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀧𑀭𑀺𑀳𑀸𑀭𑀁 𑀦 𑀮𑀪𑀦𑁆𑀢𑀺. 𑀏𑀢𑁆𑀣 𑀘 𑀅𑀧𑀭𑁂 𑀏𑀯𑀁 𑀯𑀤𑀦𑁆𑀢𑀺, ‘‘𑀭𑀸𑀚𑀸 𑀧𑀲𑁂𑀦𑀤𑀻𑀓𑁄𑀲𑀮𑀸𑀤𑀬𑁄 𑀧𑁄𑀓𑁆𑀔𑀭𑀲𑀸𑀢𑀺𑀧𑀪𑀼𑀢𑀻𑀦𑀁 𑀤𑀓𑁆𑀔𑀺𑀡𑁄𑀤𑀓𑀧𑀸𑀢𑀦𑀯𑀲𑁂𑀦 𑀤𑁂𑀦𑁆𑀢𑀺 𑀯𑀺𑀬 𑀩𑁆𑀭𑀳𑁆𑀫𑀤𑁂𑀬𑁆𑀬𑀯𑀲𑁂𑀦 𑀤𑀺𑀦𑁆𑀦𑀫𑁂𑀯 𑀯𑀺𑀲𑀼𑀁 𑀕𑀸𑀫𑀲𑀻𑀫𑀸 𑀳𑁄𑀢𑀺, 𑀦 𑀆𑀬𑀫𑀢𑁆𑀢𑀲𑁆𑀲, 𑀙𑁂𑀚𑁆𑀚𑀪𑁂𑀚𑁆𑀚𑀲𑁆𑀲 𑀅𑀦𑀺𑀲𑁆𑀲𑀭𑀢𑁆𑀢𑀸’’𑀢𑀺 𑀢𑀁 𑀦 𑀧𑀦𑁂𑀯𑀁 𑀤𑀝𑁆𑀞𑀩𑁆𑀩𑀁, 𑀙𑁂𑀚𑁆𑀚𑀪𑁂𑀚𑁆𑀚𑀲𑁆𑀲 𑀭𑀸𑀚𑀸𑀭𑀳𑀢𑁆𑀢𑀸 𑀢𑀣𑀸 𑀳𑀺 𑀮𑁄𑀓𑀯𑁄𑀳𑀸𑀭𑀲𑀗𑁆𑀓𑁂𑀢𑀯𑀲𑁂𑀦 𑀅𑀬𑀁 𑀧𑀤𑁂𑀲𑁄 𑀇𑀫𑀲𑁆𑀲 𑀕𑀸𑀫𑀲𑁆𑀲 𑀧𑀭𑀺𑀘𑁆𑀙𑁂𑀤𑁄’’𑀢𑀺 𑀇𑀲𑁆𑀲𑀭𑁂𑀳𑀺 𑀓𑀢𑀧𑀭𑀺𑀘𑁆𑀙𑀺𑀦𑁆𑀦𑀫𑁂𑀯 𑀧𑀫𑀸𑀡𑀁 𑀳𑁄𑀢𑀺. 𑀬𑀤𑀺 𑀙𑁂𑀚𑁆𑀚𑀪𑁂𑀚𑁆𑀚𑀓𑀭𑁄 𑀪𑀯𑁂𑀬𑁆𑀬, 𑀭𑀸𑀚𑀸𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀲𑁄𑀧𑀺 𑀕𑀸𑀫𑀤𑁂𑀲𑁄 𑀦𑀕𑀭𑀭𑀚𑁆𑀚𑀲𑀻𑀫𑀸 𑀪𑀯𑁂𑀬𑁆𑀬, 𑀦 𑀧𑀦 𑀕𑀸𑀫𑀲𑀻𑀫𑀸𑀫𑀢𑁆𑀢𑀫𑁂𑀯, 𑀢𑁂𑀦𑁂𑀯𑀸𑀳 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 ‘‘𑀬𑀢𑁆𑀢𑀓𑁂 𑀧𑀤𑁂𑀲𑁂 𑀢𑀲𑁆𑀲 𑀕𑀸𑀫𑀲𑁆𑀲 𑀕𑀸𑀫𑀪𑁄𑀚𑀓𑀸 𑀩𑀮𑀺𑀁 𑀮𑀪𑀦𑁆𑀢𑀺, 𑀲𑁄 𑀧𑀤𑁂𑀲𑁄 𑀅𑀧𑁆𑀧𑁄 𑀯𑀸 𑀳𑁄𑀢𑀼 𑀫𑀳𑀦𑁆𑀢𑁄 𑀯𑀸, 𑀕𑀸𑀫𑀲𑀻𑀫𑀸𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀦𑀕𑀭𑀦𑀺𑀕𑀫𑀲𑀻𑀫𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺. 𑀅𑀬𑀁 𑀕𑀸𑀫 𑀦𑀺𑀕𑀫𑀦𑀕𑀭𑀲𑀻𑀫𑀸𑀦𑀁 𑀯𑀺𑀘𑀸𑀭𑀡𑀸.

𑀅𑀩𑁆𑀪𑀦𑁆𑀢𑀭𑀲𑀻𑀫𑀸 𑀦𑀸𑀫 𑀬𑀁 𑀧𑀝𑀧𑀤𑁂𑀲𑀁 𑀅𑀕𑀸𑀫𑀓𑁂 𑀪𑀺𑀓𑁆𑀔𑀯𑁂 𑀅𑀭𑀜𑁆𑀜𑁂 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸, 𑀅𑀬𑀁 𑀢𑀢𑁆𑀣 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸’𑀢𑀺 𑀅𑀦𑀼𑀜𑁆𑀜𑀸𑀢𑀸 𑀅𑀩𑁆𑀪𑀦𑁆𑀢𑀭𑀲𑀻𑀫𑀸 𑀦𑀸𑀫. 𑀢𑀢𑁆𑀣 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸𑀢𑀺 𑀬𑀲𑁆𑀫𑀺𑀁 𑀯𑀺𑀜𑁆𑀛𑀸𑀝𑀯𑀺𑀲𑀤𑀺𑀲𑁂 𑀅𑀭𑀜𑁆𑀜𑁂 𑀪𑀺𑀓𑁆𑀔𑀼 𑀯𑀲𑀢𑀺, 𑀅𑀣𑀲𑁆𑀲 𑀞𑀺𑀢𑁄𑀓𑀸𑀲𑀢𑁄 𑀲𑀫𑀦𑁆𑀢𑀸 𑀧𑀼𑀭𑀢𑁆𑀣𑀺𑀫𑀸𑀬 𑀲𑀢𑁆𑀢𑀩𑁆𑀪𑀦𑁆𑀢𑀭𑀸 𑀧𑀘𑁆𑀙𑀺𑀫𑀸𑀬 𑀲𑀢𑁆𑀢𑀩𑁆𑀪𑀦𑁆𑀢𑀭𑀸 𑀤𑀓𑁆𑀔𑀺𑀡𑀸𑀬 𑀲𑀢𑁆𑀢𑀩𑁆𑀪𑀦𑁆𑀢𑀭𑀸 𑀉𑀢𑁆𑀢𑀭𑀸𑀬 𑀲𑀢𑁆𑀢𑀩𑁆𑀪𑀦𑁆𑀢𑀭𑀸𑀢𑀺 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸. 𑀯𑀺𑀦𑀺𑀩𑁆𑀩𑁂𑀥𑁂𑀦 𑀘𑀼𑀤𑁆𑀤𑀲𑀸 𑀢𑀺 𑀧𑀼𑀭𑀢𑁆𑀣𑀺𑀫𑀧𑀘𑁆𑀙𑀺𑀫𑀯𑀲𑁂𑀦 𑀘𑀼𑀤𑁆𑀤𑀲𑀩𑁆𑀪𑀦𑁆𑀢𑀭𑀸, 𑀤𑀓𑁆𑀔𑀺𑀡𑀼𑀢𑁆𑀢𑀭𑀯𑀲𑁂𑀦𑀧𑀺 𑀘𑀼𑀤𑁆𑀤𑀲𑀩𑁆𑀪𑀦𑁆𑀢𑀭𑀸𑀢𑀺 𑀏𑀯𑀁 𑀦𑀺𑀩𑁆𑀩𑁂𑀥𑁂𑀦 𑀘𑀼𑀤𑁆𑀤𑀲 𑀘𑀼𑀤𑁆𑀤𑀲 𑀓𑀢𑁆𑀯𑀸 𑀲𑀫𑀦𑁆𑀢𑀸 𑀅𑀝𑁆𑀞𑀯𑀻𑀲𑀢𑀺 𑀅𑀩𑁆𑀪𑀦𑁆𑀢𑀭𑀸 𑀳𑁄𑀦𑁆𑀢𑀺. 𑀏𑀢𑁆𑀣 𑀘 𑀏𑀓𑀁 𑀅𑀩𑁆𑀪𑀦𑁆𑀢𑀭𑀁 𑀅𑀝𑁆𑀞𑀯𑀻𑀲𑀢𑀺 𑀳𑀢𑁆𑀣𑀧𑁆𑀧𑀫𑀸𑀡𑀁 𑀳𑁄𑀢𑀺, 𑀢𑀲𑁆𑀫𑀸 𑀧𑀼𑀭𑀢𑁆𑀣𑀺𑀫𑀸𑀬 𑀲𑀢𑁆𑀢𑀩𑁆𑀪𑀦𑁆𑀢𑀭𑁂 𑀙𑀦𑁆𑀦𑀯𑀼𑀢𑀺𑀲𑀢𑀳𑀢𑁆𑀣𑀧𑁆𑀧𑀫𑀸𑀡𑀁 𑀳𑁄𑀢𑀺, 𑀏𑀯𑀁 𑀤𑀓𑁆𑀔𑀺𑀡𑀼𑀢𑁆𑀢𑀭𑀧𑀘𑁆𑀙𑀺𑀫𑁂𑀲𑀼𑀧𑀻𑀢𑀺 𑀲𑀩𑁆𑀩𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺𑀲𑀢𑁆𑀢𑀲𑀢𑀳𑀢𑁆𑀣𑀧𑁆𑀧𑀫𑀸𑀡𑀁 ¶ 𑀳𑁄𑀢𑀺. 𑀧𑀭𑀺𑀫𑀡𑁆𑀟𑀮𑀯𑀲𑁂𑀦 𑀧𑀦 𑀲𑀩𑁆𑀩𑀁 𑀙𑀲𑀢𑁆𑀢𑀢𑀺𑀏𑀓𑀲𑀢𑀼𑀢𑁆𑀢𑀭𑀸𑀦𑀺 𑀘 𑀏𑀓𑀁 𑀲𑀳𑀲𑁆𑀲𑀜𑁆𑀘 𑀳𑁄𑀢𑀺. 𑀧𑀓𑀢𑀺𑀅𑀬𑀦𑀯𑀲𑁂𑀦 𑀫𑀺𑀦𑀺𑀢𑁂 𑀧𑀦 𑁋

‘‘𑀧𑀜𑁆𑀘𑀳𑀢𑁆𑀣𑁄 𑀫𑀢𑁄 𑀤𑀡𑁆𑀟𑁄, 𑀯𑀻𑀲𑀤𑀡𑁆𑀟𑁄 𑀉𑀲𑀪𑁄;

𑀅𑀣𑀻𑀢𑀺𑀉𑀲𑀪𑀸 𑀕𑀸𑀯𑀻, 𑀘𑀢𑀼𑀕𑀸𑀯𑀻 𑀬𑁄𑀚𑀦’’𑀦𑁆𑀢𑀺.

𑀯𑀼𑀢𑁆𑀢𑀢𑁆𑀢𑀸 𑀅𑀬𑀦𑀯𑀲𑁂𑀦 𑀯𑀺𑀦𑀺𑀩𑁆𑀩𑁂𑀥𑁂 𑀘𑀼𑀤𑁆𑀤𑀲𑀩𑁆𑀪𑀦𑁆𑀢𑀭𑁂 𑀤𑁆𑀯𑁂𑀳𑀢𑁆𑀣𑀸𑀥𑀺𑀓𑀅𑀝𑁆𑀞𑀲𑀢𑁆𑀢𑀢𑀺 𑀳𑁄𑀢𑀺. 𑀲𑀩𑁆𑀩𑀁 𑀅𑀝𑁆𑀞𑀯𑀻𑀲𑀢𑀺 𑀅𑀩𑁆𑀪𑀦𑁆𑀢𑀭𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀘𑀢𑀼𑀳𑀢𑁆𑀣𑀸𑀥𑀺𑀓𑀙𑀧𑁆𑀧𑀜𑁆𑀜𑀸𑀲𑀼𑀢𑁆𑀢𑀭 𑀏𑀓𑀲𑀢𑀁 𑀳𑁄𑀢𑀺. 𑀧𑀭𑀺𑀫𑀡𑁆𑀟𑀮𑀯𑀲𑁂𑀦 𑀧𑀦 𑀙𑀳𑀢𑁆𑀣𑀸𑀥𑀺𑀓𑀘𑀢𑀼𑀢𑀺𑀁𑀲𑀼𑀢𑁆𑀢𑀭𑀤𑁆𑀯𑁂𑀲𑀢𑀸𑀦𑀺 𑀳𑁄𑀦𑁆𑀢𑀺, 𑀉𑀲𑀪𑀯𑀲𑁂𑀦 𑀧𑀦 𑀯𑀺𑀦𑀺𑀩𑁆𑀩𑁂𑀥𑁂𑀦 𑀘𑀼𑀤𑁆𑀤𑀲 𑀅𑀩𑁆𑀪𑀦𑁆𑀢𑀭𑁂 𑀤𑁆𑀯𑁂𑀳𑀺 𑀊𑀦𑀸𑀦𑀺 𑀘𑀢𑁆𑀢𑀸𑀭𑀺 𑀉𑀲𑀪𑀸𑀦𑀺 𑀘 𑀤𑁆𑀯𑁂𑀭𑀢𑀦𑀜𑁆𑀘 𑀳𑁄𑀦𑁆𑀢𑀺. 𑀲𑀩𑁆𑀩𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀅𑀝𑁆𑀞𑀯𑀻𑀲𑀢𑀺𑀬𑀸 𑀅𑀩𑁆𑀪𑀦𑁆𑀢𑀭𑁂 𑀘𑀢𑀼𑀭𑀢𑀦𑀜𑁆𑀘 𑀲𑁄𑀴𑀲 𑀅𑀬𑀦𑀸𑀦𑀺 𑀅𑀥𑀺𑀓𑀸𑀦𑀺 𑀲𑀢𑁆𑀢 𑀉𑀲𑀪𑀸𑀦𑀺 𑀳𑁄𑀦𑁆𑀢𑀺. 𑀧𑀭𑀺𑀫𑀡𑁆𑀟𑀮𑀯𑀲𑁂𑀦 𑀧𑀦 𑀙𑀭𑀢𑀦𑀜𑁆𑀘 𑀘𑀼𑀤𑁆𑀤𑀲𑀅𑀬𑀦𑀸𑀦𑀺 𑀘 𑀅𑀥𑀺𑀓𑀸𑀦𑀺 𑀏𑀓𑀸𑀤𑀲 𑀉𑀲𑀪𑀸𑀦𑀺 𑀳𑁄𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀲𑀸𑀭𑀢𑁄 𑀯𑀺𑀦𑀺𑀘𑁆𑀙𑀬𑁄. 𑀓𑁂𑀘𑀺 𑀧𑀦 𑀅𑀩𑁆𑀪𑀦𑁆𑀢𑀭𑀲𑀤𑁆𑀤𑀁 𑀳𑀢𑁆𑀣𑀭𑀢𑀦𑀯𑀸𑀘𑀓𑀁 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀏𑀯𑀁 𑀯𑀤𑀦𑁆𑀢𑀺 𑀫𑀚𑁆𑀛𑁂 𑀞𑀺𑀢𑀲𑁆𑀲 𑀲𑀫𑀦𑁆𑀢𑀸 𑀲𑀢𑁆𑀢 𑀯𑀺𑀦𑀺𑀩𑁆𑀩𑁂𑀥𑁂𑀦 𑀘𑀼𑀤𑁆𑀤𑀲𑀸’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀼𑀭𑀢𑁆𑀣𑀺𑀫𑀸𑀬 𑀲𑀢𑁆𑀢 𑀳𑀢𑁆𑀣𑀸 𑀤𑀓𑁆𑀔𑀺𑀡𑀼𑀢𑁆𑀢𑀭𑀧𑀘𑁆𑀙𑀺𑀫𑁂𑀲𑀼𑀧𑀺 𑀲𑀢𑁆𑀢 𑀲𑀢𑁆𑀢 𑀳𑀢𑁆𑀣𑀸𑀢𑀺 𑀓𑀢𑁆𑀯𑀸 𑀏𑀯𑀁 𑀦𑀺𑀩𑁆𑀩𑁂𑀥𑁂𑀦 𑀘𑀼𑀤𑁆𑀤𑀲 𑀳𑀢𑁆𑀣𑀸 𑀳𑁄𑀦𑁆𑀢𑀺. 𑀲𑀩𑁆𑀩𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀅𑀝𑁆𑀞𑀯𑀻𑀲𑀢𑀺𑀳𑀢𑁆𑀣𑀁 𑀅𑀩𑁆𑀪𑀦𑁆𑀢𑀭𑀦𑁆𑀢𑀺 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀫𑁂𑀯, 𑀦 𑀲𑀸𑀭𑀢𑁄 𑀧𑀘𑁆𑀘𑁂𑀢𑀩𑁆𑀩𑀁. 𑀓𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 𑀢𑀢𑁆𑀣 𑀏𑀓𑀁 𑀅𑀩𑁆𑀪𑀦𑁆𑀢𑀭𑀁 𑀅𑀝𑁆𑀞𑀯𑀻𑀲𑀢𑀺𑀳𑀢𑁆𑀣’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀬𑀤𑀺 𑀢𑁂𑀲𑀁 𑀫𑀢𑁂𑀦 𑀲𑀩𑁆𑀩𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀅𑀝𑁆𑀞𑀯𑀻𑀲𑀢𑀺𑀳𑀢𑁆𑀣𑀩𑁆𑀪𑀦𑁆𑀢𑀭𑀁 𑀪𑀯𑁂𑀬𑁆𑀬, 𑀅𑀝𑁆𑀞𑀓𑀣𑀸𑀬𑀁 𑀢𑀢𑁆𑀣 𑀅𑀩𑁆𑀪𑀦𑁆𑀢𑀭𑀁 𑀦𑀸𑀫 𑀅𑀝𑁆𑀞𑀯𑀻𑀲𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑀁 𑀳𑁄𑀢𑀺, 𑀫𑀚𑁆𑀛𑁂 𑀞𑀺𑀢𑀲𑁆𑀲 𑀲𑀫𑀦𑁆𑀢𑀸 𑀲𑀢𑁆𑀢𑀯𑀺𑀦𑀺𑀩𑁆𑀩𑁂𑀥𑁂𑀦 𑀘𑀼𑀤𑁆𑀤𑀲𑀸 𑀳𑁄𑀦𑁆𑀢𑀻’𑀢𑀺 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬, 𑀦 𑀧𑀦𑁂𑀯𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀅𑀬𑀜𑁆𑀳𑁂𑀢𑁆𑀣𑀢𑁆𑀣𑁄 𑀢𑀢𑁆𑀣 𑀢𑀢𑁆𑀣𑀸’𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀏𑀓𑀦𑁆𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀅𑀩𑁆𑀪𑀦𑁆𑀢𑀭𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀦𑀺𑀤𑁆𑀤𑁂𑀲𑁄, 𑀦𑀺𑀬𑀫𑀺𑀢𑀧𑀭𑀺𑀤𑀻𑀧𑀦𑀁 𑀯𑀸. 𑀅𑀝𑁆𑀞𑀯𑀻𑀲𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀥𑀫𑁆𑀫𑀲𑀫𑀼𑀤𑀸𑀬𑀦𑀺𑀤𑁆𑀤𑁂𑀲𑁄 𑀢𑀢𑁆𑀣 𑀢𑁂𑀲𑀼 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑁂𑀲𑀼 𑀏𑀓𑀁 𑀅𑀩𑁆𑀪𑀦𑁆𑀢𑀭𑀁 𑀦𑀸𑀫 𑀅𑀝𑁆𑀞𑀯𑀻𑀲𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀣 𑀧𑀦 𑀲𑀗𑁆𑀔𑁆𑀬𑀸 𑀓𑀣𑁂𑀢𑀩𑁆𑀩𑀸. 𑀲𑀸 𑀤𑀼𑀯𑀺𑀥𑀸 𑀧𑀭𑀺𑀫𑀸𑀡𑀫𑀺𑀦𑀦𑀯𑀲𑁂𑀦. 𑀢𑀢𑁆𑀣 𑀧𑀭𑀺𑀫𑀸𑀡 𑀲𑀗𑁆𑀔𑁆𑀬𑀸 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑀘𑀢𑀲𑁆𑀲𑁄 𑀫𑀼𑀝𑁆𑀞𑀺𑀬𑁄 𑀏𑀓𑁄 𑀓𑀼𑀟𑀼𑀯𑁄. 𑀘𑀢𑁆𑀢𑀸𑀭𑁄 𑀓𑀼𑀟𑀼𑀯𑀸 𑀏𑀓𑁄 𑀧𑀢𑁆𑀣𑁄, 𑀘𑀢𑁆𑀢𑀸𑀭𑁄 𑀧𑀢𑁆𑀣𑀸 𑀏𑀓𑁄 𑀆𑀴𑁆𑀳𑀓𑁄. 𑀘𑀢𑁆𑀢𑀸𑀭𑁄 𑀆𑀴𑁆𑀳𑀓𑀸 𑀏𑀓𑀁 𑀤𑁄𑀡𑀁, 𑀘𑀢𑁆𑀢𑀸𑀭𑀺 𑀤𑁄𑀡𑀸𑀦𑀺 𑀏𑀓𑀸 𑀫𑀸𑀦𑀺𑀓𑀸. 𑀘𑀢𑀲𑁆𑀲𑁄 𑀫𑀸𑀦𑀺𑀓𑀸 ¶ 𑀏𑀓𑀸 𑀔𑀸𑀭𑀻. 𑀯𑀻𑀲𑀢𑀺 𑀔𑀸𑀭𑀺𑀓𑀸 𑀏𑀓𑁄 𑀯𑀸𑀳𑁄. 𑀢𑀤𑁂𑀯 𑀏𑀓𑀁 𑀲𑀓𑀝𑀦𑁆𑀢𑀺 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀤𑀻𑀲𑀼 𑀯𑀼𑀢𑁆𑀢𑀁. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀧𑀦 𑀦𑀯 𑀯𑀸𑀳𑀲𑀳𑀲𑁆𑀲𑀸𑀦𑀻𑀢𑀺 𑀏𑀢𑁆𑀣 𑀘𑀢𑀲𑁆𑀲𑁄 𑀫𑀼𑀝𑁆𑀞𑀺𑀬𑁄 𑀓𑀼𑀟𑀼𑀯𑁄, 𑀘𑀢𑁆𑀢𑀸𑀭𑁄 𑀓𑀼𑀟𑀼𑀯𑀸 𑀏𑀓𑁄 𑀧𑀢𑁆𑀣𑁄, 𑀘𑀢𑁆𑀢𑀸𑀭𑁄 𑀧𑀢𑁆𑀣𑀸 𑀏𑀓𑁄 𑀆𑀴𑁆𑀳𑀓𑁄. 𑀘𑀢𑁆𑀢𑀸𑀭𑁄 𑀆𑀴𑁆𑀳𑀓𑀸 𑀏𑀓𑀁 𑀤𑁄𑀡𑀁, 𑀘𑀢𑁆𑀢𑀸𑀭𑀺 𑀤𑁄𑀡𑀸𑀦𑀺 𑀏𑀓𑀸 𑀫𑀸𑀦𑀺𑀓𑀸, 𑀘𑀢𑁆𑀢𑀲𑁆𑀲𑁄 𑀫𑀸𑀦𑀺𑀓𑀸 𑀏𑀓𑀸 𑀔𑀸𑀭𑀻. 𑀯𑀻𑀲𑀢𑀺𑀔𑀸𑀭𑀺𑀓𑀸 𑀏𑀓𑁄 𑀯𑀸𑀳𑁄. 𑀢𑀤𑁂𑀯 𑀏𑀓𑀁 𑀲𑀓𑀝𑀦𑁆𑀢𑀺 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀤𑀻𑀲𑀼 𑀯𑀼𑀢𑁆𑀢’𑀦𑁆𑀢𑀺 𑀯𑀢𑁆𑀯𑀸 ‘‘𑀇𑀥 𑀧𑀦 𑀤𑁆𑀯𑁂 𑀲𑀓𑀝𑀸𑀦𑀺 𑀏𑀓𑁄 𑀯𑀸𑀳𑁄𑀢𑀺 𑀯𑀤𑀦𑁆𑀢𑀻’’𑀢𑀺 𑀮𑀺𑀔𑀺𑀢𑀁 𑀧𑀘𑁆𑀘𑀦𑁆𑀢𑀯𑁄𑀳𑀸𑀭𑁂𑀦 𑀫𑀺𑀦𑀺𑀢𑁂 𑀧𑀦 𑀲𑀝𑁆𑀞𑀺𑀲𑀢𑀁 𑀏𑀓𑁄 𑀯𑀸𑀳𑁄𑀢𑀺 𑀭𑀜𑁆𑀜𑁄 𑀥𑀫𑁆𑀫𑀸𑀲𑁄𑀓𑀲𑁆𑀲 𑀲𑀽𑀯𑀓𑀸𑀳𑀢𑀲𑀸𑀮𑀺𑀬𑀸 𑀫𑀺𑀦𑀺𑀢𑁂 𑀧𑀦 𑀧𑀘𑁆𑀘𑀦𑁆𑀢𑀯𑁄𑀳𑀸𑀭𑁂𑀦 𑀯𑀻𑀲𑀸𑀥𑀺𑀓𑀢𑀺𑀲𑀢𑀁 𑀳𑁄𑀢𑀺 𑀏𑀓𑁄 𑀯𑀸𑀳𑁄𑀢𑀺 𑀯𑀤𑀦𑁆𑀢𑀺. 𑀫𑀺𑀦𑀦 𑀲𑀗𑁆𑀔𑁆𑀬𑀸 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀳𑀺 𑁋

‘‘𑀙𑀢𑁆𑀢𑀺𑀁𑀲 𑀧𑀭𑀫𑀸𑀡𑀽𑀦𑀁, 𑀅𑀡𑀼𑀫𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀙𑀢𑁆𑀢𑀺𑀁 𑀲𑀅𑀡𑀼𑀫𑀢𑁆𑀢𑀁, 𑀢𑀚𑁆𑀚𑀸𑀭𑀻𑀢𑀺 𑀧𑀯𑀼𑀘𑁆𑀘𑀢𑀺.

𑀙𑀢𑁆𑀢𑀺𑀁 𑀲𑀫𑀢𑁆𑀢𑀸𑀢𑀚𑁆𑀚𑀸𑀭𑀻, 𑀭𑀣𑀭𑁂𑀡𑀼𑀧𑀫𑀸𑀡𑀁;

𑀙𑀢𑁆𑀢𑀺𑀁𑀲 𑀭𑀣𑀭𑁂𑀡𑀽 𑀘, 𑀏𑀓𑀸 𑀮𑀺𑀓𑁆𑀔𑀸𑀢𑀺 𑀯𑀼𑀘𑁆𑀘𑀢𑀺.

𑀲𑀢𑁆𑀢𑀮𑀺𑀓𑁆𑀔𑀸 𑀘 𑀏𑀓𑀽𑀓𑀸, 𑀲𑀢𑁆𑀢𑀽𑀓𑀸 𑀥𑀜𑁆𑀜𑀫𑀸𑀲𑀓𑁄;

𑀲𑀢𑁆𑀢𑀥𑀜𑁆𑀜𑀗𑁆𑀕𑀼𑀮𑀺 𑀏𑀓𑀸, 𑀯𑀺𑀤𑀢𑁆𑀣𑀺 𑀤𑁆𑀯𑀸𑀤𑀲𑀗𑁆𑀕𑀼𑀮𑀺.

𑀤𑁆𑀯𑁂 𑀯𑀺𑀤𑀢𑁆𑀣𑀺𑀢𑀼 𑀭𑀢𑀦𑀁, 𑀲𑀢𑁆𑀢𑀳𑀢𑁆𑀣𑀁 𑀏𑀓𑀬𑀝𑁆𑀞𑀺;

𑀯𑀻𑀲𑀬𑀝𑁆𑀞𑀺𑀢𑀼 𑀉𑀲𑀪𑀁, 𑀉𑀲𑀪𑀸𑀲𑀻𑀢𑀺 𑀕𑀸𑀯𑀼𑀢𑀁;

𑀕𑀸𑀯𑀼𑀢𑀸𑀦𑀺 𑀘𑀢𑁆𑀢𑀸𑀭𑀺, 𑀫𑁂𑀭𑀼𑀬𑁄𑀚𑀦𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀯𑀼𑀢𑁆𑀢𑀢𑁆𑀢𑀸 𑀏𑀓𑀸 𑀭𑀚𑁄 𑀧𑀭𑀫𑀸𑀡𑀼 𑀅𑀢𑀺𑀲𑀼𑀔𑀼𑀫𑀸 𑀅𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸, 𑀲𑀭𑀻𑀭𑀫𑁆𑀧𑀺 𑀖𑀦𑀲𑁂𑀮𑀫𑀬𑀁 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀫𑁆𑀧𑀺 𑀯𑀺𑀦𑀺𑀚𑁆𑀛𑀺𑀢𑁆𑀯𑀸 𑀕𑀢𑀸. 𑀢𑀲𑁆𑀲𑀸 𑀙𑀢𑁆𑀢𑀺𑀁𑀲𑀧𑀭𑀺𑀫𑀸𑀡𑀁 𑀏𑀓𑁄𑀅𑀡𑀼 𑀢𑀚𑁆𑀚𑀸𑀭𑀺𑀢𑀲𑁆𑀲 𑀙𑀢𑁆𑀢𑀺𑀁𑀲𑀧𑀭𑀺𑀫𑀸𑀡𑀁 𑀏𑀓𑀸𑀭𑀣𑀭𑁂𑀡𑀼. 𑀢𑀲𑁆𑀲𑀸 𑀙𑀢𑁆𑀢𑀺𑀁𑀲𑀧𑀭𑀺𑀫𑀸𑀡𑀁 𑀏𑀓𑀮𑀺𑀓𑁆𑀔𑀸. 𑀲𑀢𑁆𑀢𑀮𑀺𑀓𑁆𑀔𑀸 𑀏𑀓𑀸 𑀊𑀓𑀸. 𑀲𑀢𑁆𑀢 𑀊𑀓𑀸 𑀏𑀓𑀁 𑀥𑀜𑁆𑀜𑀁. 𑀲𑀢𑁆𑀢𑀥𑀜𑁆𑀜𑀁 𑀏𑀓𑀸 𑀅𑀗𑁆𑀕𑀼𑀮𑀺, 𑀤𑁆𑀯𑀸𑀤𑀲𑀅𑀗𑁆𑀕𑀼𑀮𑀺 𑀏𑀓𑀸 𑀯𑀺𑀤𑀢𑁆𑀣𑀺. 𑀤𑁆𑀯𑁂 𑀯𑀺𑀤𑀢𑁆𑀣𑀺 𑀏𑀓𑀭𑀢𑀦𑀁. 𑀲𑀢𑁆𑀢𑀳𑀢𑁆𑀣𑀁 𑀏𑀓𑀬𑀝𑁆𑀞𑀺, 𑀯𑀻𑀲𑀬𑀝𑁆𑀞𑀺 𑀏𑀓𑀸 𑀉𑀲𑀪𑀸, 𑀅𑀲𑀻𑀢𑀺 𑀉𑀲𑀪𑀸 𑀕𑀸𑀯𑀼𑀢𑀁. 𑀘𑀢𑁆𑀢𑀸𑀭𑀺 𑀕𑀸𑀯𑀼𑀢𑀸𑀦𑀺 𑀫𑁂𑀭𑀼𑀬𑁄𑀚𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀅𑀡𑀼𑀭𑀚𑁄 𑀓𑀺𑀴𑀜𑁆𑀚𑀓𑀼𑀝𑁆𑀝𑀙𑀺𑀤𑁆𑀤𑀸𑀤𑀻𑀲𑀼 𑀯𑀸𑀢𑁂 𑀧𑀳𑀝𑀓𑀸𑀮𑁂 𑀲𑀽𑀭𑀺𑀬𑀸𑀮𑁄𑀓𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀚𑁆𑀚𑀸𑀭𑀻 𑀧𑀦 𑀲𑀓𑀝𑀫𑀕𑁆𑀕𑀸𑀤𑀻𑀲𑀼 𑀤𑀓𑁆𑀔𑀺𑀡𑀯𑀸𑀫 𑀧𑀲𑁆𑀲𑀸𑀤𑀻𑀲𑀼 𑀤𑀺𑀲𑁆𑀲𑀢𑀺 ¶ . 𑀭𑀣𑀭𑁂𑀡𑀼 𑀧𑀦 𑀢𑀲𑁆𑀲𑀸 𑀅𑀮𑁆𑀮𑀻𑀬𑀦𑀝𑁆𑀞𑀸𑀦𑁂𑀲𑀼 𑀤𑀺𑀲𑁆𑀲𑀢𑀺. 𑀮𑀺𑀓𑁆𑀔𑀸 𑀧𑀦 𑀅𑀢𑀺𑀑𑀴𑀸𑀭𑀺𑀓𑀸 𑀧𑀸𑀓𑀝𑀸 𑀳𑁄𑀢𑀺. 𑀅𑀬𑀁 𑀫𑁂𑀭𑀼𑀅𑀬𑀦𑀯𑀲𑁂𑀦 𑀯𑀼𑀢𑁆𑀢𑀁.

𑀅𑀧𑀭𑀫𑁆𑀧𑀺

‘‘𑀤𑀲 𑀓𑁂𑀲𑀸 𑀏𑀓𑀢𑀺𑀮𑀁, 𑀙𑀢𑀺𑀮𑀁 𑀬𑀯𑀓𑀁 𑀪𑀯𑁂;

𑀘𑀢𑀼𑀬𑀯𑀜𑁆𑀘 𑀅𑀗𑁆𑀕𑀼𑀮𑀺, 𑀧𑀜𑁆𑀘𑀤𑀲 𑀏𑀓𑀧𑀸𑀤’’𑀦𑁆𑀢𑀺.

𑀯𑀼𑀢𑁆𑀢𑀢𑁆𑀢𑀸 𑀤𑀲 𑀓𑁂𑀲𑀸 𑀏𑀓𑀢𑀺𑀮𑀁 𑀦𑀸𑀫. 𑀙𑀢𑀺𑀮𑀁 𑀏𑀓𑀁 𑀬𑀯𑀁 𑀦𑀸𑀫. 𑀘𑀢𑀼𑀬𑀯𑀁 𑀏𑀓𑁄 𑀅𑀗𑁆𑀕𑀼𑀮𑀺 𑀦𑀸𑀫. 𑀧𑀜𑁆𑀘𑀤𑀲𑀗𑁆𑀕𑀼𑀮𑀺𑀬𑁄 𑀏𑀓𑁄 𑀧𑀸𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀁 𑀢𑀻𑀲𑀼 𑀯𑁂𑀤𑁂𑀲𑀼 𑀆𑀕𑀢𑀯𑀲𑁂𑀦 𑀯𑀼𑀢𑁆𑀢𑀁.

𑀅𑀧𑀭𑀫𑁆𑀧𑀺

‘‘𑀤𑀲 𑀓𑁂𑀲𑀸 𑀏𑀓𑀢𑀺𑀮𑀁, 𑀙𑀢𑀺𑀮𑀁 𑀬𑀯𑀓𑀁 𑀪𑀯𑁂;

𑀘𑀢𑀼𑀬𑀯𑀜𑁆𑀘 𑀅𑀗𑁆𑀕𑀼𑀮𑀺, 𑀅𑀝𑁆𑀞𑀗𑁆𑀕𑀼𑀮𑀺 𑀏𑀓𑀸 𑀫𑀼𑀝𑁆𑀞𑀺, 𑀭𑀢𑀦𑀁 𑀢𑀺𑀫𑀼𑀝𑁆𑀞𑀺 𑀪𑀯𑁂’’𑀢𑀺.

𑀯𑀼𑀢𑁆𑀢𑀢𑁆𑀢𑀸 𑀤𑀲𑀓𑁂𑀲𑀸 𑀏𑀓𑀁 𑀢𑀺𑀮𑀁 𑀦𑀸𑀫. 𑀙𑀢𑀺𑀮𑀁 𑀏𑀓𑀁 𑀬𑀯𑀁 𑀦𑀸𑀫. 𑀘𑀢𑀼𑀬𑀯𑀁 𑀏𑀓𑀸𑀅𑀗𑁆𑀕𑀼𑀮𑀺 𑀦𑀸𑀫. 𑀅𑀝𑁆𑀞𑀗𑁆𑀕𑀼𑀮𑀁 𑀏𑀓𑀸𑀫𑀼𑀝𑁆𑀞𑀺. 𑀢𑁆𑀭𑀺𑀫𑀼𑀝𑁆𑀞𑀺 𑀏𑀓𑀭𑀢𑀦𑀁. 𑀧𑀜𑁆𑀘 𑀭𑀢𑀦𑀸𑀦𑀺 𑀏𑀓𑁄𑀤𑀡𑁆𑀟𑁄. 𑀯𑀻𑀲𑀢𑀺 𑀤𑀡𑁆𑀟𑀸𑀦𑀺 𑀏𑀓𑁄𑀉𑀲𑀪𑁄. 𑀅𑀲𑀻𑀢𑀺 𑀉𑀲𑀪𑀸 𑀏𑀓𑀸 𑀕𑀸𑀯𑀻. 𑀘𑀢𑀲𑁆𑀲𑁄 𑀕𑀸𑀯𑀺𑀬𑁄 𑀏𑀓𑀬𑁄𑀚𑀦𑀦𑁆𑀢𑀺 𑀯𑀼𑀢𑁆𑀢𑀁, 𑀢𑁂𑀦𑁂𑀯𑀸𑀳.

‘‘𑀧𑀜𑁆𑀘𑀳𑀢𑁆𑀣𑁄 𑀫𑀢𑁄 𑀤𑀡𑁆𑀟𑁄, 𑀯𑀻𑀲𑀤𑀡𑁆𑀟𑁄 𑀘 𑀉𑀲𑀪𑁄;

𑀅𑀲𑀻𑀢𑀺 𑀉𑀲𑀪𑀸 𑀕𑀸𑀯𑀻, 𑀘𑀢𑀼𑀕𑀸𑀯𑀻 𑀘 𑀬𑁄𑀚𑀦’’𑀦𑁆𑀢𑀺.

𑀇𑀤𑀁 𑀧𑀓𑀢𑀺𑀅𑀬𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀘𑀓𑁆𑀓𑀯𑀸𑀴𑀅𑀬𑀦𑀬𑁄𑀚𑀦𑀯𑀲𑁂𑀦 𑀧𑀦

‘‘𑀲𑀢𑁆𑀢𑀳𑀢𑁆𑀣𑁄 𑀫𑀢𑁄 𑀤𑀡𑁆𑀟𑁄, 𑀯𑀻𑀲𑀤𑀡𑁆𑀟𑁄 𑀘 𑀉𑀲𑀪𑁄;

𑀅𑀲𑀻𑀢𑀺 𑀉𑀲𑀪𑀸 𑀕𑀸𑀯𑀻, 𑀘𑀢𑀼𑀕𑀸𑀯𑀻 𑀘 𑀬𑁄𑀚𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀅𑀧𑀭𑀫𑁆𑀧𑀺.

‘‘𑀤𑀲 𑀓𑁂𑀲𑀸 𑀏𑀓𑀢𑀺𑀮𑀁; 𑀙𑀢𑀺𑀮𑀁 𑀏𑀓𑀁 𑀬𑀯𑀁;

𑀘𑀢𑀼𑀬𑀯𑀁 𑀏𑀓𑀗𑁆𑀕𑀼𑀮𑀺; 𑀅𑀝𑁆𑀞𑀗𑁆𑀕𑀼𑀮𑀁 𑀏𑀓𑀸𑀫𑀼𑀝𑁆𑀞𑀺;

𑀢𑁆𑀭𑀺𑀫𑀼𑀝𑁆𑀞𑀺 𑀏𑀓𑀭𑀢𑀦𑀁, 𑀅𑀝𑁆𑀞𑀯𑀻𑀲𑀢𑀺𑀭𑀢𑀦𑀁 𑀏𑀓𑀁𑀅𑀩𑁆𑀪𑀦𑁆𑀢𑀭𑀦𑁆𑀢𑀺.

𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀢𑀢𑁆𑀣 𑀏𑀓𑀁 𑀅𑀝𑁆𑀞𑀯𑀻𑀲𑀢𑀺𑀳𑀢𑁆𑀢𑀧𑁆𑀧𑀫𑀸𑀡𑀁 𑀳𑁄𑀢𑀻’’𑀢𑀺. 𑀏𑀢𑁆𑀣 𑀘 𑀅𑀕𑀸𑀫𑀓𑁂 𑀘𑁂𑀢𑀺 𑀏𑀢𑁆𑀣 𑀅𑀓𑀸𑀭𑁄 𑀓𑀢𑀭𑀢𑁆𑀣𑁄𑀢𑀺, 𑀢𑀣𑀸 𑀳𑀺 𑀅𑀓𑀸𑀭𑁄.

𑀧𑀝𑀺𑀲𑁂𑀥𑁂 𑀯𑀼𑀤𑁆𑀥𑀺𑀢𑀩𑁆𑀪𑀸𑀯𑁂, 𑀅𑀜𑁆𑀜𑀢𑁆𑀣𑁂 𑀲𑀤𑀺𑀲𑁂𑀧𑀺𑀘;

𑀯𑀺𑀭𑀼𑀤𑁆𑀥𑁂 𑀕𑀭𑀳𑁂 𑀲𑀼𑀜𑁆𑀜𑁂, 𑀅𑀓𑀸𑀭𑁄 𑀯𑀺𑀭𑀳’𑀧𑁆𑀧𑀓𑁂’𑀢𑀺.

𑀯𑀼𑀢𑁆𑀢𑁂𑀲𑀼 𑀤𑀺𑀲𑁆𑀲𑀢𑀺 𑀢𑀣𑀸 𑀳𑀺 𑀅𑀚𑀦𑁂𑀢𑁆𑀯𑀸 𑀢𑀺𑀆𑀤𑀻𑀲𑀼 𑀧𑀝𑀺𑀲𑁂𑀥𑁂 𑀤𑀺𑀲𑁆𑀲𑀢𑀺. ‘‘𑀅𑀧𑀭𑀺𑀳𑀸𑀦𑀻𑀬𑀸 𑀥𑀫𑁆𑀫𑀸’’𑀢𑀺 𑀆𑀤𑀻𑀲𑀼 𑀯𑀼𑀤𑁆𑀥𑀺𑀫𑁆𑀳𑀺. ‘‘𑀅𑀦𑀯𑀚𑁆𑀚𑀁 𑀪𑀦𑁆𑀢𑁂’’𑀢𑀺 𑀆𑀤𑀻𑀲𑀼 𑀢𑀩𑁆𑀪𑀸𑀯𑁂 𑀅𑀓𑁆𑀔𑀭𑀸’𑀢𑀺 𑀆𑀤𑀻𑀲𑀼 ¶ 𑀅𑀜𑁆𑀜𑀢𑁆𑀣𑁂. ‘‘𑀅𑀫𑀭𑀼 𑀭𑀸𑀚𑀸’’𑀢𑀺𑀆𑀤𑀻𑀲𑀼 𑀲𑀤𑀺𑀲𑁂. ‘‘𑀅𑀫𑀮’’𑀦𑁆𑀢𑀺 𑀆𑀤𑀻𑀲𑀼 𑀯𑀺𑀭𑀼𑀤𑁆𑀥𑁂. ‘‘𑀅𑀲𑁂𑀝𑁆𑀞𑁄𑀬𑀁 𑀩𑁆𑀭𑀸𑀳𑁆𑀫𑀡𑁄 𑀅𑀩𑁆𑀭𑀳𑁆𑀫𑀘𑀸𑀭𑀻’’𑀢𑀺 𑀆𑀤𑀻𑀲𑀼 𑀕𑀭𑀳𑁂. ‘‘𑀅𑀕𑀸𑀫𑁄’’𑀢𑀺 𑀆𑀤𑀻𑀲𑀼 𑀲𑀼𑀜𑁆𑀜𑁂. ‘‘𑀅𑀧𑀢𑀺𑀓𑀸𑀬𑀁𑀇𑀢𑁆𑀣𑀻’’𑀢𑀺 𑀆𑀤𑀻𑀲𑀼 𑀯𑀺𑀭𑀳𑁂. ‘‘𑀅𑀣 𑀦𑀸𑀬𑀁 𑀓𑀜𑁆𑀜𑀸’’𑀢𑀺 𑀆𑀤𑀻𑀲𑀼 𑀅𑀧𑁆𑀧𑀓𑁂. 𑀇𑀥 𑀧𑀦 𑀲𑀼𑀜𑁆𑀜𑁂 𑀯𑀺𑀭𑀳𑁂 𑀯𑀸 𑀤𑀝𑁆𑀞𑀩𑁆𑀩𑁄. 𑀲𑀼𑀜𑁆𑀜𑀢𑁆𑀣𑁂𑀦 𑀧𑀦 𑀅𑀕𑀸𑀫𑀓𑁂 𑀦𑀺𑀫𑀦𑀼𑀲𑁆𑀲𑁂 𑀓𑁂𑀯𑀮𑀸𑀭𑀜𑁆𑀜𑁂𑀢𑀺 𑀅𑀢𑁆𑀣𑁄. 𑀯𑀺𑀭𑀳𑀢𑁆𑀣𑁄 𑀯𑀸 𑀅𑀕𑀸𑀫𑀓𑁂 𑀕𑀸𑀫𑀯𑀺𑀭𑀳𑀺𑀢𑁂 𑀧𑀤𑁂𑀲𑁂𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦𑁂𑀯 𑀲𑀼𑀜𑁆𑀜𑀢𑁆𑀣𑁂𑀦 𑀯𑀺𑀭𑀳𑀢𑁆𑀣𑁂𑀦 ‘‘𑀅𑀕𑀸𑀫𑀓𑁂’’𑀢𑀺𑀫𑀺𑀦𑀸𑀧𑀤𑁂𑀦 𑀕𑀸𑀫𑀦𑀤𑀻𑀚𑀸𑀢𑀲𑁆𑀲𑀭𑀲𑀫𑀼𑀤𑁆𑀤𑁂 𑀫𑀼𑀜𑁆𑀘𑀺𑀢𑁆𑀯𑀸 𑀬𑀁 𑀅𑀦𑀯𑀲𑁂𑀲𑀁 𑀳𑁂𑀝𑁆𑀞𑀸 𑀧𑀣𑀯𑀻𑀲𑀦𑁆𑀥𑀸𑀭𑀓𑀉𑀤𑀓𑀫𑁆𑀧𑀺𑀉𑀤𑀓𑀲𑀦𑁆𑀥𑀸𑀭𑀓𑁄 𑀯𑀸𑀢𑁄𑀧𑀺 𑀅𑀚𑀝𑀸𑀓𑀸𑀲𑀫𑁆𑀧𑀺, 𑀢𑀣𑀸 𑀬𑀸𑀯 𑀉𑀧𑀭𑀺𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀸𑀤𑀸𑀬 𑀲𑀩𑁆𑀩𑀁 𑀅𑀲𑀼𑀭𑀬𑀓𑁆𑀔𑀲𑀼𑀭𑀸𑀤𑀺𑀆𑀓𑀸𑀲𑀝𑁆𑀞𑀓𑀤𑁂𑀯𑀩𑁆𑀭𑀳𑁆𑀫𑀯𑀺𑀫𑀸𑀦𑀸𑀦𑀺𑀧𑀺 𑀅𑀭𑀜𑁆𑀜𑀦𑁆𑀢𑁆𑀯𑁂𑀯 𑀲𑀗𑁆𑀕𑀳𑀺𑀢𑀸. 𑀦𑀤𑀻𑀲𑀫𑀼𑀤𑁆𑀤𑀦𑁆𑀢𑀭𑁂𑀲𑀼𑀧𑀺 𑀫𑀘𑁆𑀙𑀩𑀦𑁆𑀥𑀸𑀦𑀁 𑀅𑀕𑀫𑀦𑀧𑀣𑁄 𑀤𑀻𑀧𑀓𑁄 𑀯𑀸 𑀧𑀩𑁆𑀩𑀢𑁄 𑀯𑀸, 𑀲𑁄𑀧𑀺 𑀅𑀭𑀜𑁆𑀜𑀲𑀻𑀫𑀸𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀅𑀬𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀦𑀺𑀫𑀦𑀼𑀲𑁆𑀲𑁂 𑀓𑁂𑀯𑀮𑀸𑀭𑀜𑁆𑀜𑁂 𑀧𑀣𑀯𑀻𑀫𑀡𑁆𑀟𑀮𑁂𑀧𑀺 𑀤𑁂𑀯𑀮𑁄𑀓𑁂 𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑀸𑀤𑀻𑀲𑀼𑀧𑀺 𑀮𑀩𑁆𑀪𑀢𑁂𑀯. 𑀧𑀣𑀯𑀺𑀬𑀁 𑀧𑀦 𑀬𑀲𑁆𑀫𑀺𑀁 𑀕𑀸𑀫𑀔𑁂𑀢𑁆𑀢𑁂 𑀳𑁂𑀝𑁆𑀞𑀸 𑀧𑀣𑀯𑀺𑀬𑀸 𑀬𑀢𑁆𑀣 𑀯𑀸 𑀲𑀼𑀯𑀡𑁆𑀡𑀫𑀡𑀺𑀆𑀤𑀻𑀦𑀺 𑀔𑀡𑀺𑀢𑁆𑀯𑀸 𑀕𑀳𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑀁 𑀧𑀤𑁂𑀲𑀁 𑀕𑀸𑀫𑀔𑁂𑀢𑁆𑀢𑀫𑁂𑀯. 𑀢𑀢𑁄 𑀧𑀭𑀸 𑀬𑀸𑀯 𑀧𑀣𑀯𑀻𑀲𑀦𑁆𑀥𑀸𑀭𑀓𑀉𑀤𑀓𑀸 𑀅𑀚𑀝𑀸𑀓𑀸𑀲𑁂𑀧𑀺 𑀮𑀩𑁆𑀪𑀢𑁂𑀯. 𑀦𑀦𑀼 𑀙𑀓𑀸𑀫𑀸𑀯𑀘𑀭 𑀤𑁂𑀯𑀮𑁄𑀓𑁂𑀲𑀼𑀧𑀺 𑀤𑁂𑀯𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑀕𑀸𑀫𑀦𑀺𑀕𑀫𑀸𑀤𑀬𑁄𑀧𑀺 𑀅𑀢𑁆𑀣𑁂𑀯. 𑀅𑀣 𑀓𑀲𑁆𑀫𑀸 ‘‘𑀅𑀭𑀜𑁆𑀜𑀸’’𑀢𑀺 𑀓𑀣𑀺𑀢𑀸𑀢𑀺 𑀅𑀫𑀦𑀼𑀲𑁆𑀲𑀸 𑀯𑀸 𑀲𑀢𑁆𑀢𑀸 𑀚𑀸𑀢𑀺𑀪𑀺𑀦𑁆𑀦𑀢𑁆𑀢𑀸 𑀘 𑀢𑁂 𑀅𑀕𑀸𑀫𑀸𑀬𑁂𑀯, 𑀢𑁂𑀦𑁂𑀯 ‘‘𑀦𑀺𑀫𑀦𑀼𑀲𑁆𑀲𑀫𑁆𑀳𑀺 𑀅𑀭𑀜𑁆𑀜𑀫𑁆𑀳𑀻’’𑀢𑀺 𑀯𑀼𑀢𑁆𑀢𑀁. 𑀢𑀺𑀭𑀘𑁆𑀙𑀸𑀦𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 ‘‘𑀦𑀸𑀕𑁄 𑀯𑀸 𑀳𑁄𑀢𑀼 𑀲𑀼𑀧𑀡𑁆𑀡𑀫𑀸𑀡𑀯𑀓𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑁄 𑀅𑀦𑁆𑀢𑀫𑀲𑁄 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀉𑀧𑀸𑀤𑀸𑀬 𑀬𑁄 𑀓𑁄𑀘𑀺 𑀅𑀫𑀦𑀼𑀲𑁆𑀲𑀚𑀸𑀢𑀺𑀓𑁄 𑀲𑀩𑁆𑀩𑁄𑀯 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀢𑀺𑀭𑀘𑁆𑀙𑀸𑀦𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀚𑀸𑀢𑀺𑀪𑀺𑀦𑁆𑀦𑀢𑀸𑀬 𑀅𑀫𑀦𑀼𑀲𑁆𑀲𑀸𑀯𑀸𑀲𑁄 𑀅𑀭𑀜𑁆𑀜𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀯𑀺𑀘𑀸𑀭𑀡𑀸.

𑀇𑀤𑀸𑀦𑀺 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄 𑀲𑀫𑁆𑀧𑀢𑁆𑀢𑁄. 𑀢𑀢𑁆𑀣 ‘‘𑀲𑀩𑁆𑀩𑀸 𑀪𑀺𑀓𑁆𑀔𑀯𑁂 𑀦𑀤𑀻 𑀅𑀲𑀻𑀫𑀸. 𑀲𑀩𑁆𑀩𑁄 𑀲𑀫𑀼𑀤𑁆𑀤𑁄 𑀅𑀲𑀻𑀫𑁄. 𑀲𑀩𑁆𑀩𑁄 𑀚𑀸𑀢𑀲𑁆𑀲𑀭𑁄 𑀅𑀲𑀻𑀫𑁄. 𑀦𑀤𑀺𑀬𑀸 𑀯𑀸 𑀪𑀺𑀓𑁆𑀔𑀯𑁂 𑀲𑀫𑀼𑀤𑁆𑀤𑁂 𑀯𑀸 𑀚𑀸𑀢𑀲𑁆𑀲𑀭𑁂 𑀯𑀸 𑀬𑀁 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀫𑀦𑁆𑀢𑀸 𑀉𑀤𑀓𑀼𑀓𑁆𑀔𑁂𑀧𑀸, 𑀅𑀬𑀁 𑀢𑀢𑁆𑀣 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸’’𑀢𑀺 𑀧𑀜𑁆𑀜𑀢𑁆𑀢𑀸, 𑀅𑀬𑀁 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀦𑀸𑀫. 𑀢𑀢𑁆𑀣 ‘‘𑀲𑀩𑁆𑀩𑀸 𑀪𑀺𑀓𑁆𑀔𑀯𑁂 𑀦𑀤𑀻 𑀅𑀲𑀻𑀫𑀸’’𑀢𑀺 𑀏𑀢𑁆𑀣 ¶ 𑀅𑀲𑀻𑀫𑀲𑀤𑁆𑀤𑁂 𑀅𑀓𑀸𑀭𑁄 𑀯𑀺𑀭𑀳𑀢𑁆𑀣𑁄, 𑀅𑀲𑀻𑀫𑀸 𑀩𑀤𑁆𑀥𑀲𑀻𑀫𑀸 𑀯𑀺𑀭𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀢𑁆𑀯𑀸𑀧𑀺 𑀩𑀦𑁆𑀥𑀲𑀻𑀫𑀸𑀯𑀺𑀭𑀳𑀺𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀝𑀺𑀲𑁂𑀥𑀢𑁆𑀣𑁄 𑀯𑀸, 𑀅𑀲𑀫𑁆𑀫𑀦𑁆𑀦𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀯𑀼𑀟𑁆𑀠𑀺𑀅𑀢𑁆𑀣𑁄 𑀯𑀸, ‘‘𑀅𑀲𑁂𑀓𑁆𑀔𑀸 𑀥𑀫𑁆𑀫𑀸’’𑀢𑀺 𑀬𑀣𑀸 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀸 𑀦𑀺𑀝𑁆𑀞𑀺𑀢𑀲𑀺𑀓𑁆𑀔𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀅𑀲𑀻𑀫𑀸𑀲𑀻𑀫𑀓𑀺𑀘𑁆𑀘𑀦𑀺𑀝𑁆𑀞𑀧𑁆𑀧𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫 𑀯𑀸𑀘𑀁 𑀲𑀸𑀯𑁂𑀢𑁆𑀯𑀸 𑀲𑀫𑁆𑀫𑀢𑀸𑀧𑀺 𑀅𑀲𑀫𑁆𑀫𑀢𑀸𑀬𑁂𑀯, 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀕𑀸𑀫𑀲𑀻𑀫𑀸 𑀯𑀺𑀬 𑀩𑀤𑁆𑀥𑀲𑀻𑀫𑀸𑀲𑀤𑀺𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁂𑀦 𑀦𑀤𑀻𑀚𑀸𑀢𑀲𑁆𑀲𑀭𑀲𑀫𑀼𑀤𑁆𑀤𑀸𑀦𑀁 𑀩𑀤𑁆𑀥𑀲𑀻𑀫𑀸𑀬 𑀅𑀔𑁂𑀢𑁆𑀢𑀪𑀸𑀯𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀏𑀯𑀁 ‘‘𑀲𑀩𑁆𑀩𑀸 𑀪𑀺𑀓𑁆𑀔𑀯𑁂 𑀦𑀤𑀻 𑀅𑀲𑀻𑀫𑀸’’𑀢𑀺𑀆𑀤𑀺𑀦𑀸 𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑀸𑀦𑀁 𑀩𑀤𑁆𑀥𑀲𑀻𑀫𑀸𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀢𑁆𑀣 𑀮𑁄𑀓𑀯𑁄𑀳𑀸𑀭𑀲𑀺𑀤𑁆𑀥𑀸𑀲𑀼 𑀏𑀢𑀸𑀲𑀼 𑀦𑀤𑀻𑀆𑀤𑀻𑀲𑀼 𑀅𑀩𑀤𑁆𑀥𑀲𑀻𑀫𑀸𑀲𑀼 𑀧𑀼𑀦 𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀁 𑀯𑀸𑀮𑀺𑀓𑀸𑀤𑀻𑀳𑀺 𑀲𑀻𑀫𑀧𑀭𑀺𑀘𑁆𑀙𑀺𑀦𑁆𑀤𑀦𑀁 𑀓𑀢𑁆𑀢𑀼𑀓𑀸𑀫𑁄 𑀪𑀕𑀯𑀸 ‘‘𑀦𑀤𑀺𑀬𑀸 𑀯𑀸 𑀪𑀺𑀓𑁆𑀔𑀯𑁂 𑀲𑀫𑀼𑀤𑁆𑀤𑁂 𑀯𑀸 𑀚𑀸𑀢𑀲𑁆𑀲𑀭𑁂 𑀯𑀸 𑀬𑀁 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀫𑀦𑁆𑀢𑀸 𑀉𑀤𑀓𑀼𑀓𑁆𑀔𑁂𑀧𑀸’’𑀢𑀺 𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲𑀢𑀺 𑀣𑀸𑀫𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑁂𑀦𑁂𑀯𑀸𑀳 𑀲𑀫𑀦𑁆𑀢𑀧𑀸𑀓𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 ‘‘𑀣𑀸𑀫𑀫𑀚𑁆𑀛𑀺𑀫𑁂𑀦 𑀧𑀼𑀭𑀺𑀲𑁂𑀦𑀸’’𑀢𑀺. 𑀬𑀤𑀺 𑀯𑀟𑁆𑀠𑀓𑀻𑀧𑀼𑀭𑀺𑀲𑀫𑀺𑀘𑁆𑀙𑁂𑀬𑁆𑀬, ‘‘𑀯𑀟𑁆𑀠𑀓𑀻𑀧𑀼𑀭𑀺𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁 𑀪𑀯𑁂𑀬𑁆𑀬, 𑀦 𑀧𑀦𑁂𑀯𑀁 𑀯𑀼𑀢𑁆𑀢𑀁, 𑀢𑁂𑀦 𑀜𑀸𑀬𑀢𑀺 ‘‘𑀣𑀸𑀫𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲𑀸’’𑀢𑀺. 𑀢𑀺𑀯𑀺𑀥𑀸 𑀳𑀺 𑀧𑀼𑀭𑀺𑀲𑀸 𑀉𑀢𑁆𑀢𑀫𑀧𑀼𑀭𑀺𑀲𑁄 𑀫𑀚𑁆𑀛𑀺𑀫𑀧𑀼𑀭𑀺𑀲𑁄 𑀧𑀓𑀢𑀺𑀧𑀼𑀭𑀺𑀲𑁄𑀢𑀺. 𑀢𑀢𑁆𑀣 𑀉𑀢𑁆𑀢𑀫𑀧𑀼𑀭𑀺𑀲𑁄 𑀦𑀸𑀫 𑀲𑀩𑁆𑀩𑀜𑁆𑀜𑀼 𑀪𑀕𑀯𑀸, 𑀲𑁄 𑀳𑀺 𑀪𑀕𑀯𑀸 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑁄 𑀣𑀸𑀫𑀬𑀲𑀲𑀫𑁆𑀧𑀢𑁆𑀢𑀺𑀇𑀲𑁆𑀲𑀭𑀺𑀬𑀸𑀤𑀻𑀳𑀺 𑀢𑀣𑀸 𑀳𑀺 𑀢𑀣𑀸𑀕𑀢𑀲𑁆𑀲 𑀣𑀸𑀫𑁄.

‘‘𑀓𑀸𑀴𑀸𑀯𑀓𑀜𑁆𑀘 𑀕𑀗𑁆𑀕𑁂𑀬𑁆𑀬𑀁, 𑀧𑀡𑁆𑀟𑀭𑀁 𑀢𑀫𑁆𑀩𑀧𑀺𑀗𑁆𑀕𑀮𑀁;

𑀕𑀦𑁆𑀥𑀫𑀗𑁆𑀕𑀮𑀳𑁂𑀫𑀜𑁆𑀘, 𑀉𑀧𑁄𑀲𑀣𑀁 𑀙𑀤𑁆𑀤𑀦𑁆𑀢𑀺𑀫𑁂’’𑀢𑀺.

𑀯𑀼𑀢𑁆𑀢𑀸𑀦𑀁 𑀤𑀲𑀦𑁆𑀦𑀁 𑀳𑀢𑁆𑀣𑀺𑀓𑀼𑀮𑀸𑀦𑀁 𑀩𑀮𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀓𑀸𑀴𑀸𑀯𑀓 𑀦𑁆𑀢𑀺 𑀧𑀓𑀢𑀺𑀳𑀢𑁆𑀣𑀺𑀓𑀼𑀮𑀁 𑀬𑀁 𑀤𑀲𑀦𑁆𑀦𑀁 𑀧𑀼𑀭𑀺𑀲𑀸𑀦𑀁 𑀓𑀸𑀬𑀩𑀮𑀁, 𑀢𑀁 𑀏𑀓𑀲𑁆𑀲 𑀓𑀸𑀴𑀸𑀯𑀓𑀲𑁆𑀲 𑀳𑀢𑁆𑀣𑀺𑀦𑁄 𑀩𑀮𑀁. 𑀬𑀁 𑀤𑀲𑀦𑁆𑀦𑀁 𑀓𑀸𑀴𑀸𑀯𑀓𑀸𑀦𑀁 𑀩𑀮𑀁, 𑀢𑀁 𑀏𑀓𑀲𑁆𑀲 𑀕𑀗𑁆𑀕𑁂𑀬𑁆𑀬𑀲𑁆𑀲 𑀩𑀮𑀁. 𑀬𑀁 𑀤𑀲𑀦𑁆𑀦𑀁 𑀕𑀗𑁆𑀕𑁂𑀬𑁆𑀬𑀸𑀦𑀁 𑀩𑀮𑀁, 𑀢𑀁 𑀏𑀓𑀲𑁆𑀲 𑀧𑀡𑁆𑀟𑀭𑀲𑁆𑀲 𑀩𑀮𑀁, 𑀬𑀁 𑀤𑀲𑀦𑁆𑀦𑀁 𑀧𑀡𑁆𑀟𑀭𑀸𑀦𑀁 𑀩𑀮𑀁, 𑀢𑀁 𑀏𑀓𑀲𑁆𑀲 𑀢𑀫𑁆𑀩𑀲𑁆𑀲 𑀩𑀮𑀁. 𑀬𑀁 𑀤𑀲𑀦𑁆𑀦𑀁 𑀢𑀫𑁆𑀩𑀸𑀦𑀁 𑀩𑀮𑀁, 𑀢𑀁 𑀏𑀓𑀲𑁆𑀲 𑀧𑀺𑀗𑁆𑀕𑀮𑀲𑁆𑀲 𑀩𑀮𑀁. 𑀬𑀁 𑀤𑀲𑀦𑁆𑀦𑀁 𑀧𑀺𑀗𑁆𑀕𑀮𑀸𑀦𑀁 𑀩𑀮𑀁, 𑀢𑀁 𑀏𑀓𑀲𑁆𑀲 𑀕𑀦𑁆𑀥𑀳𑀢𑁆𑀣𑀺𑀦𑁄 𑀩𑀮𑀁. 𑀬𑀁 𑀤𑀲𑀦𑁆𑀦𑀁 𑀕𑀦𑁆𑀥𑀳𑀢𑁆𑀣𑀻𑀦𑀁 𑀩𑀮𑀁, 𑀢𑀁 𑀏𑀓𑀲𑁆𑀲 𑀫𑀗𑁆𑀕𑀮𑀲𑁆𑀲 𑀩𑀮𑀁. 𑀬𑀁 𑀤𑀲𑀦𑁆𑀦𑀁 𑀫𑀗𑁆𑀕𑀮𑀸𑀦𑀁 𑀩𑀮𑀁, 𑀢𑀁 𑀏𑀓𑀲𑁆𑀲 𑀳𑁂𑀫𑀲𑁆𑀲 𑀩𑀮𑀁. 𑀬𑀁 𑀤𑀲𑀦𑁆𑀦𑀁 𑀳𑁂𑀫𑀯𑀢𑀸𑀦𑀁 𑀩𑀮𑀁, 𑀢𑀁 𑀏𑀓𑀲𑁆𑀲 ¶ 𑀉𑀧𑁄𑀲𑀣𑀲𑁆𑀲 𑀩𑀮𑀁. 𑀬𑀁 𑀤𑀲𑀦𑁆𑀦𑀁 𑀉𑀧𑁄𑀲𑀣𑀸𑀦𑀁 𑀩𑀮𑀁, 𑀢𑀁 𑀏𑀓𑀲𑁆𑀲 𑀙𑀤𑁆𑀤𑀦𑁆𑀢𑀲𑁆𑀲 𑀩𑀮𑀁. 𑀬𑀁 𑀤𑀲𑀦𑁆𑀦𑀁 𑀙𑀤𑁆𑀤𑀦𑁆𑀢𑀸𑀦𑀁 𑀩𑀮𑀁, 𑀢𑀁 𑀏𑀓𑀲𑁆𑀲 𑀢𑀣𑀸𑀕𑀢𑀲𑁆𑀲 𑀓𑀸𑀬𑀩𑀮𑀁. ‘‘𑀦𑀸𑀭𑀸𑀬𑀦𑀲𑀗𑁆𑀔𑀸𑀢𑀁 𑀩𑀮’’𑀦𑁆𑀢𑀺𑀧𑀺 𑀇𑀤𑀫𑁂𑀯 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀦𑀸𑀭𑀸 𑀯𑀼𑀘𑁆𑀘𑀦𑁆𑀢𑀺 𑀭𑀲𑁆𑀫𑀺𑀬𑁄, 𑀢𑀸 𑀩𑀳𑀽 𑀦𑀸𑀦𑀸𑀯𑀺𑀥𑀸 𑀢𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀦𑀸𑀭𑀬𑀦𑀁, 𑀯𑀚𑀺𑀭𑀁, 𑀢𑀲𑁆𑀫𑀸 𑀯𑀚𑀺𑀭𑀲𑀗𑁆𑀔𑀸𑀢𑀁 𑀩𑀮𑀦𑁆𑀢𑀺 𑀧𑀺 𑀅𑀢𑁆𑀣𑁄, 𑀢𑀤𑁂𑀢𑀁 𑀧𑀓𑀢𑀺𑀳𑀢𑁆𑀣𑀺𑀕𑀡𑀦𑀸𑀬 𑀳𑀢𑁆𑀣𑀺𑀓𑁄𑀝𑀺𑀲𑀳𑀲𑁆𑀲𑀁, 𑀧𑀼𑀭𑀺𑀲𑀕𑀡𑀦𑀸𑀬 𑀤𑀲𑀦𑁆𑀦𑀁 𑀧𑀼𑀭𑀺𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀩𑀮𑀁 𑀳𑁄𑀢𑀺, 𑀇𑀤𑀁 𑀢𑀣𑀸𑀕𑀢𑀲𑁆𑀲 𑀓𑀸𑀬𑀩𑀮𑀁. 𑀇𑀲𑁆𑀲𑀭𑀺𑀬𑀸𑀤𑀺𑀩𑀮𑀯𑀺𑀥𑀸𑀦𑀁 𑀧𑀦 𑀢𑀁𑀢𑀁 𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀫𑀚𑁆𑀛𑀺𑀫𑀧𑀼𑀭𑀺𑀲𑁄 𑀦𑀸𑀫 𑀯𑀟𑁆𑀠𑀓𑀺𑀧𑀼𑀭𑀺𑀲𑁄 𑀲𑁄 𑀳𑀺 𑀢𑀣𑀸𑀕𑀢𑀲𑁆𑀲 𑀩𑀮𑀁 𑀧𑀝𑀺𑀘𑁆𑀘 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀁 𑀲𑀸𑀲𑀧𑀩𑀻𑀚𑁂𑀦 𑀫𑀺𑀦𑀦𑁆𑀢𑁄 𑀯𑀺𑀬 𑀲𑀢𑁂𑀦𑀧𑀺𑀲𑀳𑀲𑁆𑀲𑁂𑀦𑀧𑀺 𑀲𑀢𑀲𑀳𑀲𑁆𑀲𑁂𑀦𑀧𑀺 𑀫𑀺𑀦𑁂𑀢𑀼𑀁 𑀅𑀪𑀩𑁆𑀩𑁄, 𑀅𑀦𑁆𑀢𑀫𑀲𑁄 𑀧𑀸𑀤𑀗𑁆𑀕𑀼𑀝𑁆𑀞 𑀲𑁄 𑀧𑀸𑀤𑀗𑁆𑀕𑀼𑀝𑁆𑀞𑀓𑀫𑁆𑀧𑀺 𑀕𑀡𑁆𑀳𑁂𑀢𑀼𑀁 𑀅𑀪𑀩𑁆𑀩𑁄𑀯. 𑀢𑀲𑁆𑀲 𑀧𑀓𑀢𑀺𑀧𑀼𑀭𑀺𑀲𑀢𑁄 𑀫𑀳𑀦𑁆𑀢𑀪𑀸𑀯𑁂𑀦 𑀫𑀚𑁆𑀛𑁂 𑀪𑀯𑀢𑁆𑀢𑀸 𑀫𑀚𑁆𑀛𑀺𑀫𑀧𑀼𑀭𑀺𑀲𑁄 𑀦𑀸𑀫 𑀚𑀸𑀢𑁄, 𑀢𑀣𑀸 𑀳𑀺 𑀲𑀼𑀕𑀢𑀯𑀺𑀤𑀢𑁆𑀣𑀺 𑀯𑀟𑁆𑀠𑀓𑀺𑀲𑁆𑀲 𑀢𑀺𑀲𑁆𑀲𑁄 𑀯𑀺𑀤𑀢𑁆𑀣𑀺𑀬𑁄, 𑀯𑀟𑁆𑀠𑀓𑀺𑀳𑀢𑁆𑀣𑁂𑀦 𑀤𑀺𑀬𑀟𑁆𑀠𑀳𑀢𑁆𑀣𑁄 𑀳𑁄𑀢𑀺, 𑀢𑀣𑀸 𑀯𑀟𑁆𑀠𑀓𑀺𑀯𑀺𑀤𑀢𑁆𑀣𑀺 𑀧𑀓𑀢𑀺𑀧𑀼𑀭𑀺𑀲𑀲𑁆𑀲 𑀤𑁆𑀯𑁂 𑀯𑀺𑀤𑀢𑁆𑀣𑀺𑀬𑁄, 𑀧𑀓𑀢𑀺𑀧𑀼𑀭𑀺𑀲𑀳𑀢𑁆𑀣𑁂𑀦 𑀧𑀭𑀺𑀧𑀼𑀡𑁆𑀡𑀳𑀢𑁆𑀣𑁄 𑀳𑁄𑀢𑀺 𑀢𑀣𑀸 𑀳𑀺 𑀲𑀼𑀕𑀢𑀯𑀺𑀤𑀢𑁆𑀣𑀺 𑀦𑀸𑀫 𑀇𑀤𑀸𑀦𑀺 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀺𑀲𑁆𑀲𑁄 𑀯𑀺𑀤𑀢𑁆𑀣𑀺𑀬𑁄, 𑀯𑀟𑁆𑀠𑀓𑀺𑀳𑀢𑁆𑀣𑁂𑀦 𑀤𑀺𑀬𑀟𑁆𑀠𑁄 𑀳𑀢𑁆𑀣𑁄 𑀳𑁄𑀢𑀻𑀢𑀺 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀅𑀬𑀁 𑀇𑀥 𑀫𑀚𑁆𑀛𑀺𑀫𑀧𑀼𑀭𑀺𑀲𑁄𑀢𑀺 𑀦𑀸𑀥𑀺𑀧𑁆𑀧𑁂𑀢𑀸. 𑀓𑀲𑁆𑀫𑀸 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑁂𑀬𑁂𑀯 𑀢𑀺𑀳𑀢𑁆𑀣𑀸𑀢𑀺 𑀯𑀟𑁆𑀠𑀓𑀺𑀳𑀢𑁆𑀣𑁂𑀦 𑀢𑀺𑀳𑀢𑁆𑀣𑀸. 𑀧𑀫𑀸𑀡𑀬𑀼𑀢𑁆𑀢𑁄 𑀫𑀜𑁆𑀘𑁄𑀢𑀺 𑀧𑀓𑀢𑀺𑀯𑀺𑀤𑀢𑁆𑀣𑀺𑀬𑀸 𑀦𑀯𑀯𑀺𑀤𑀢𑁆𑀣𑀺𑀧𑁆𑀧𑀫𑀸𑀡𑁄 𑀫𑀜𑁆𑀘𑁄𑀢𑀺 𑀯𑀼𑀘𑁆𑀘𑀢𑀺 𑀬𑀣𑀸, 𑀏𑀯𑀁 𑀫𑀚𑁆𑀛𑀺𑀫𑀧𑀼𑀭𑀺𑀲𑁂𑀦𑀸’𑀢𑀺 𑀇𑀥 𑀅𑀯𑀢𑁆𑀯𑀸’𑀣𑀸𑀫𑀫𑀚𑁆𑀛𑀺𑀫𑁂𑀦 𑀧𑀼𑀭𑀺𑀲𑁂𑀦𑀸’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸. 𑀧𑀓𑀢𑀺𑀧𑀼𑀭𑀺𑀲𑁄 𑀦𑀸𑀫’𑀬𑀁 𑀤𑀲𑀦𑁆𑀦𑀁 𑀧𑀼𑀭𑀺𑀲𑀸𑀦𑀁 𑀓𑀸𑀬𑀩𑀮𑀁, 𑀢𑀁 𑀏𑀓𑀲𑁆𑀲 𑀓𑀸𑀴𑀸𑀯𑀓𑀲𑁆𑀲 𑀳𑀢𑁆𑀣𑀺𑀦𑁄 𑀩𑀮’𑀦𑁆𑀢𑀺 𑀯𑀼𑀢𑁆𑀢𑀧𑀼𑀭𑀺𑀲𑁄 𑀧𑀓𑀢𑀺𑀧𑀼𑀭𑀺𑀲𑁄 𑀦𑀸𑀫. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀏𑀓𑀘𑁆𑀘𑁂 𑀧𑀼𑀜𑁆𑀜𑀯𑀦𑁆𑀢𑀸 𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀇𑀢𑁆𑀣𑀺𑀬𑀸𑀧𑀺 𑀯𑀺𑀲𑀸𑀔𑀸 𑀫𑀺𑀕𑀸𑀭𑀫𑀸𑀢𑀸𑀢𑀺 𑀏𑀯𑀫𑀸𑀤𑀬𑁄 𑀧𑀜𑁆𑀘𑀦𑁆𑀦𑀁 𑀳𑀢𑁆𑀣𑀻𑀦𑀁 𑀩𑀮𑀁 𑀥𑀸𑀭𑁂𑀦𑁆𑀢𑀺, 𑀦 𑀧𑀦 𑀢𑁂 𑀫𑀚𑁆𑀛𑀺𑀫𑀧𑀼𑀭𑀺𑀲𑀸 𑀦𑀸𑀫 𑀳𑁄𑀦𑁆𑀢𑀺, 𑀧𑀓𑀢𑀺𑀧𑀼𑀭𑀺𑀲𑁄 𑀬𑁂𑀯, 𑀧𑀼𑀜𑁆𑀜𑀯𑀦𑁆𑀢𑀪𑀸𑀯𑁂𑀦 𑀯𑀺𑀲𑁂𑀲𑀧𑀼𑀭𑀺𑀲𑀢𑁆𑀢𑀸. 𑀇𑀥 𑀧𑀦 𑀧𑀓𑀢𑀺𑀧𑀼𑀭𑀺𑀲𑁄𑀬𑁂𑀯 𑀣𑀸𑀫 𑀫𑀚𑁆𑀛𑀺𑀫𑀧𑀼𑀭𑀺𑀲𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀉𑀤𑀓𑀼𑀓𑁆𑀔𑁂𑀧𑀸𑀢𑀺 𑀉𑀤𑀓𑀼𑀓𑁆𑀔𑁂𑀧𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸, 𑀢𑁂𑀦𑁂𑀯𑀸𑀳 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀺𑀬𑀁 𑀉𑀤𑀓𑀼𑀓𑁆𑀔𑁂𑀧𑀸𑀢𑀺 𑀓𑀭𑀡𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀆𑀳. 𑀉𑀤𑀓𑀼𑀓𑁆𑀔𑁂𑀧𑁂𑀦𑀸’𑀢𑀺 𑀅𑀬𑀜𑁆𑀳𑁂𑀢𑁆𑀣𑀢𑁆𑀣𑁄 ¶ . 𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑁂𑀲𑀼 𑀬𑀁𑀞𑀸𑀦𑀁 𑀫𑀚𑁆𑀚𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀫𑀦𑁆𑀢𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑁄 𑀉𑀤𑀓𑀼𑀓𑁆𑀔𑁂𑀧𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁, 𑀅𑀬𑀁 𑀢𑀢𑁆𑀣 𑀦𑀤𑀻𑀆𑀤𑀻𑀲𑀼 𑀮𑁄𑀓𑀯𑁄𑀳𑀸𑀭 𑀲𑀺𑀤𑁆𑀥𑀸𑀲𑀼 𑀢𑀸𑀲𑀼𑀏𑀯 𑀅𑀩𑀤𑁆𑀥𑀲𑀻𑀫𑀸𑀲𑀼 𑀅𑀧𑀭𑀸𑀧𑀺 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 𑀧𑀦 𑀬𑀁 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀫𑀦𑁆𑀢𑀸 𑀉𑀤𑀓𑀼𑀓𑁆𑀔𑁂𑀧𑀸𑀢𑀺 𑀬𑀁 𑀞𑀸𑀦𑀁 𑀣𑀸𑀫𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀫𑀦𑁆𑀢𑀢𑁄 𑀉𑀤𑀓𑀼𑀓𑁆𑀔𑁂𑀧𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁. 𑀢𑀢𑁆𑀣 𑀬𑀣𑀸 𑀅𑀓𑁆𑀔𑀥𑀼𑀢𑁆𑀢𑀸 𑀤𑀸𑀭𑀼𑀕𑀼𑀴𑀁 𑀔𑀺𑀧𑀦𑁆𑀢𑀺, 𑀏𑀯𑀁 𑀉𑀤𑀓𑀁 𑀯𑀸 𑀯𑀸𑀮𑀺𑀓𑀁 𑀯𑀸 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀫𑀚𑁆𑀛𑀺𑀫𑁂𑀦 𑀧𑀼𑀭𑀺𑀲𑁂𑀦 𑀲𑀩𑁆𑀩𑀣𑀸𑀫𑁂𑀦 𑀔𑀺𑀧𑀺𑀢𑀩𑁆𑀩𑀁. 𑀬𑀢𑁆𑀣 𑀏𑀯𑀁 𑀔𑀺𑀢𑁆𑀢𑀁 𑀉𑀤𑀓𑀁 𑀯𑀸 𑀯𑀸𑀮𑀺𑀓𑀸 𑀧𑀢𑀢𑀺, 𑀅𑀬𑀁 𑀉𑀤𑀓𑀼𑀓𑁆𑀔𑁂𑀧𑁄 𑀦𑀸𑀫. 𑀅𑀬𑀁 𑀢𑀢𑁆𑀣 𑀲𑀫𑀸𑀦 𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸𑀢𑀺, 𑀅𑀬𑀁 𑀢𑁂𑀲𑀼 𑀦𑀤𑀻𑀆𑀤𑀻𑀲𑀼 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑀺𑀦𑁆𑀦𑀸 𑀲𑀻𑀫𑀸 𑀲𑀫𑀸𑀦𑀲𑀁𑀯𑀸𑀲𑀸𑀘𑁂𑀯 𑀏𑀓𑀽𑀧𑁄𑀲𑀣𑀸𑀘𑀸’𑀢𑀺 𑀅𑀢𑁆𑀣𑀬𑁄𑀚𑀦𑀁 𑀓𑀢𑁆𑀯𑀸 𑀅𑀬𑀁 𑀏𑀢𑁂𑀲𑀁 𑀦𑀤𑀻𑀆𑀤𑀻𑀦𑀁 𑀅𑀦𑁆𑀢𑁄𑀬𑁂𑀯 𑀮𑀩𑁆𑀪𑀢𑀺, 𑀦 𑀩𑀳𑀺, 𑀢𑀲𑁆𑀫𑀸 𑀦𑀤𑀺𑀬𑀸 𑀯𑀸 𑀚𑀸𑀢𑀲𑁆𑀲𑀭𑁂 𑀯𑀸 𑀬𑀢𑁆𑀢𑀓𑀁 𑀧𑀤𑁂𑀲𑀁 𑀧𑀓𑀢𑀺𑀯𑀲𑁆𑀲𑀓𑀸𑀮𑁂 𑀘𑀢𑀽𑀲𑀼 𑀫𑀸𑀲𑁂𑀲𑀼 𑀉𑀤𑀓𑀁 𑀑𑀢𑁆𑀣𑀭𑀢𑀺, 𑀲𑀫𑀼𑀤𑁆𑀤𑁂 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀧𑀓𑀢𑀺𑀯𑀻𑀘𑀺𑀬𑁄 𑀑𑀲𑀭𑀺𑀢𑁆𑀯𑀸 𑀲𑀡𑁆𑀞𑀳𑀦𑁆𑀢𑀺, 𑀢𑀢𑁄𑀧𑀝𑁆𑀞𑀸𑀬 𑀓𑀧𑁆𑀧𑀺𑀬𑀪𑀽𑀫𑀺. 𑀤𑀼𑀩𑁆𑀩𑀼𑀝𑁆𑀞𑀺𑀓𑀸𑀮𑁂 𑀯𑀸 𑀕𑀺𑀫𑁆𑀳𑁂 𑀯𑀸 𑀦𑀤𑀻𑀚𑀸𑀢𑀲𑁆𑀲𑀭𑁂𑀲𑀼 𑀲𑀼𑀓𑁆𑀔𑁂𑀲𑀼𑀧𑀺 𑀲𑀸𑀏𑀯 𑀓𑀧𑁆𑀧𑀺𑀬𑀪𑀽𑀫𑀺. 𑀲𑀘𑁂 𑀧𑀦 𑀲𑀼𑀓𑁆𑀔𑁂 𑀚𑀸𑀢𑀲𑁆𑀲𑀭𑁂 𑀯𑀸𑀧𑀺𑀁 𑀯𑀸 𑀔𑀡𑀦𑁆𑀢𑀺 𑀯𑀧𑁆𑀧𑀁 𑀯𑀸 𑀓𑀭𑁄𑀦𑁆𑀢𑀺, 𑀢𑀁 𑀞𑀸𑀦𑀁 𑀕𑀸𑀫𑀔𑁂𑀢𑁆𑀢𑀁 𑀳𑁄𑀢𑀺. 𑀬𑀸 𑀧𑀦𑁂𑀲𑀸 𑀓𑀧𑁆𑀧𑀺𑀬𑀪𑀽𑀫𑀻𑀢𑀺 𑀯𑀼𑀢𑁆𑀢𑀸, 𑀢𑀢𑁄 𑀩𑀳𑀺 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀦 𑀕𑀘𑁆𑀙𑀢𑀺, 𑀅𑀦𑁆𑀢𑁄𑀬𑁂𑀯 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀅𑀦𑁆𑀢𑁄𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑁄 𑀧𑀝𑁆𑀞𑀸𑀬 𑀲𑀫𑀦𑁆𑀢𑀸𑀉𑀤𑀓𑀼𑀓𑁆𑀔𑁂𑀧 𑀧𑀭𑀺𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀕𑀡𑁆𑀞𑀺𑀧𑀤𑁂 𑀧𑀦 𑀬𑀁 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀫𑀦𑁆𑀢𑀸 𑀉𑀤𑀓𑀼𑀓𑁆𑀔𑁂𑀧𑀸𑀢𑀺 𑀧𑀦 𑀏𑀢𑀺𑀲𑁆𑀲𑀸 𑀦𑀤𑀺𑀬𑀸 𑀘𑀢𑀼𑀯𑀕𑁆𑀕𑀸𑀤𑀻𑀦𑀁 𑀲𑀗𑁆𑀖𑀸𑀦𑀁 𑀯𑀺𑀲𑀼𑀁 𑀘𑀢𑀼𑀯𑀕𑁆𑀕𑀓𑀭𑀡𑀻𑀬𑀸𑀤𑀺𑀓𑀫𑁆𑀫𑀓𑀭𑀡𑀓𑀸𑀮𑁂 𑀲𑀻𑀫𑀸𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀢𑀺𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀸𑀲𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀫𑁆𑀧𑀺 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀁 𑀯𑀺𑀬𑀸𑀢𑀺 𑀆𑀘𑀭𑀺𑀬𑀸, 𑀢𑀲𑁆𑀫𑀸 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑀸𑀪𑀸𑀯𑁂𑀧𑀺 𑀅𑀦𑁆𑀢𑁄𑀦𑀤𑀺𑀬𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥’𑀦𑁆𑀢𑀺 𑀮𑀺𑀔𑀺𑀢𑀁. 𑀢𑀢𑁆𑀣 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑀸𑀪𑀸𑀯𑁂𑀧𑀻’𑀢𑀺 𑀇𑀤𑀁 𑀧𑀤𑀁 𑀲𑀫𑀦𑁆𑀢𑀢𑁄 𑀉𑀤𑀓𑀼𑀓𑁆𑀔𑁂𑀧𑁂𑀦 𑀧𑀭𑀺𑀘𑁆𑀙𑀺𑀦𑁆𑀦’𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀯𑀸 𑀲𑀫𑀦𑁆𑀢𑀸 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄’𑀢𑀺 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬 𑀓𑀗𑁆𑀔𑀸 𑀯𑀺𑀢𑀭𑀡𑀺𑀬𑀜𑁆𑀘 𑀯𑀼𑀢𑁆𑀢𑀯𑀘𑀦𑁂𑀦 𑀯𑀸, ‘‘𑀢𑀢𑁆𑀣𑀸𑀧𑀺 𑀳𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑁄 𑀦 𑀜𑀸𑀬𑀢𑀺, 𑀢𑀣𑀸 𑀲𑀩𑁆𑀩𑀣𑀸𑀫𑁂𑀦 𑀔𑀺𑀧𑀦’’𑀦𑁆𑀢𑀺 𑀯𑀸, ‘‘𑀏𑀢𑀤𑀢𑁆𑀣𑀫𑁂𑀯 𑀳𑀺 𑀯𑀸𑀮𑀺𑀓𑀸𑀤𑀻𑀳𑀺 𑀲𑀻𑀫𑀧𑀭𑀺𑀘𑁆𑀙𑀺𑀦𑁆𑀤𑀦’’𑀦𑁆𑀢𑀺 𑀯𑀸 𑀯𑀺𑀫𑀢𑀺𑀯𑀺𑀦𑁄𑀤𑀦𑀻𑀯𑀘𑀦𑁂𑀳𑀺 𑀯𑀸 𑀦 𑀲𑀫𑁂𑀢𑀺. 𑀕𑀦𑁆𑀣𑀓𑀸𑀭𑁂𑀦𑀸𑀧𑀺 𑀧𑀭𑀽𑀧𑀯𑀸𑀤𑀯𑀺𑀯𑀚𑁆𑀚𑀦𑀢𑁆𑀣𑀁 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀔𑀦𑁆𑀢𑀻’’𑀢𑀺 𑀅𑀯𑀢𑁆𑀯𑀸’𑀅𑀘𑀭𑀺𑀬𑀸’𑀢𑀺 ¶ 𑀅𑀜𑁆𑀜𑀓𑀢𑁆𑀢𑀸𑀭𑁂 𑀦𑀺𑀤𑀲𑁆𑀲𑀺𑀢𑁆𑀯𑀸 𑀧𑀭𑀢𑁄 𑀦𑀺𑀕𑀫𑀦𑁂 ‘‘𑀇𑀤𑀁 𑀲𑀩𑁆𑀩𑀁 𑀲𑀼𑀝𑁆𑀞𑀼 𑀯𑀺𑀘𑀸𑀭𑁂𑀢𑁆𑀯𑀸 𑀕𑀭𑀼𑀓𑀼𑀮𑁂 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁 𑀬𑀼𑀢𑁆𑀢𑀁 𑀕𑀳𑁂𑀢𑀩𑁆𑀩𑀁, 𑀇𑀢𑀭𑀁 𑀙𑀟𑁆𑀟𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁 𑀢𑀲𑁆𑀫𑀸 𑀅𑀜𑁆𑀜𑁂𑀲𑀁 𑀆𑀘𑀭𑀺𑀬𑀸𑀦𑀁 𑀫𑀢𑁂𑀦 𑀮𑀺𑀔𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀜𑀣𑀸 𑀢𑀺𑀲𑁆𑀲𑁄𑀧𑀺 𑀲𑀗𑁆𑀕𑀻𑀢𑀺𑀬𑁄 𑀆𑀭𑀽𑀴𑁆𑀳𑁂 𑀅𑀝𑁆𑀞𑀓𑀣𑀸𑀯𑀘𑀦𑁂 𑀘 𑀓𑀗𑁆𑀔𑀸𑀯𑀺𑀢𑀭𑀡𑀻-𑀯𑀺𑀫𑀢𑀺𑀯𑀺𑀦𑁄𑀤𑀦𑀻𑀯𑀘𑀦𑀸𑀦𑀺 𑀘 𑀫𑀓𑁆𑀔𑁂𑀢𑀩𑁆𑀩𑀸𑀦𑀺 𑀪𑀯𑁂𑀬𑁆𑀬𑀼𑀁, 𑀕𑀦𑁆𑀣𑀸𑀧𑀺 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀸 𑀪𑀯𑁂𑀬𑁆𑀬𑀼𑀁, 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀫𑁆𑀧𑀺 𑀲𑀸𑀯𑀓𑀸𑀦𑀁 𑀫𑀢𑁂𑀦 𑀧𑀝𑀺𑀲𑀗𑁆𑀔𑀭𑀺𑀢𑀩𑁆𑀩𑀁 𑀪𑀯𑁂𑀬𑁆𑀬 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀁 𑀧𑀦 𑀦 𑀫𑀓𑁆𑀔𑁂𑀢𑀩𑁆𑀩𑀁, 𑀬𑀣𑀸 𑀧𑀜𑁆𑀜𑀢𑁆𑀢𑁂𑀬𑁂𑀯 𑀯𑀢𑁆𑀢𑀺𑀢𑀩𑁆𑀩𑀁 𑀯𑀓𑁆𑀔𑀢𑀺 𑀳𑀺 𑀯𑀢𑁆𑀣𑀼𑀁 𑀚𑀸𑀦𑀺𑀢𑁆𑀯𑀸𑀧𑀺 𑀫𑀚𑁆𑀚𑀁 𑀧𑀺𑀯𑀢𑁄 𑀪𑀺𑀓𑁆𑀔𑀼𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁, 𑀲𑀸𑀫𑀡𑁂𑀭𑀲𑁆𑀲 𑀧𑀦 𑀚𑀸𑀦𑀺𑀢𑁆𑀯𑀸 𑀧𑀺𑀯𑀢𑁄 𑀲𑀻𑀮𑀪𑁂𑀤𑁄, 𑀦 𑀅𑀚𑀸𑀦𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀢𑀢𑁆𑀣 𑀓𑀸𑀭𑀡𑀁 𑀫𑀕𑁆𑀕𑀺𑀢𑀩𑁆𑀩𑀁, 𑀲𑀺𑀓𑁆𑀔𑀸𑀧𑀤 𑀧𑀜𑁆𑀜𑀢𑁆𑀢𑀺𑀬𑀸 𑀩𑀼𑀤𑁆𑀥𑀸𑀦𑀫𑁂𑀯 𑀯𑀺𑀲𑀬𑀢𑁆𑀢𑀸 𑀦 𑀯𑀸 𑀫𑀕𑁆𑀕𑀺𑀢𑀩𑁆𑀩𑀁, 𑀬𑀣𑀸 𑀧𑀜𑁆𑀜𑀢𑁆𑀢𑁂𑀬𑁂𑀯 𑀯𑀢𑁆𑀢𑀺𑀢𑀩𑁆𑀩’𑀦𑁆𑀢𑀺 𑀢𑀲𑁆𑀫𑀸 𑀲𑀫𑀦𑁆𑀢𑀸 𑀉𑀤𑀓𑀼𑀓𑁆𑀔𑁂𑀧𑀸𑀢𑀺 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀼𑀭𑀽𑀧𑀁 𑀲𑀫𑀦𑁆𑀢𑀢𑁄 𑀉𑀤𑀓𑀼𑀓𑁆𑀔𑁂𑀧𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀸 𑀉𑀤𑀓𑀁 𑀉𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀯𑀸 𑀉𑀤𑀓𑀼𑀓𑁆𑀔𑁂𑀧𑁂𑀦 𑀧𑀺 𑀧𑀭𑀺𑀘𑁆𑀙𑀺𑀦𑁆𑀦𑀸 𑀲𑀻𑀫𑀸𑀢𑀺𑀯𑀸 𑀲𑀫𑀦𑁆𑀢𑀸 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄𑀢𑀺 𑀯𑀸 𑀯𑀼𑀢𑁆𑀢𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑀸𑀦𑀁 𑀯𑀘𑀦𑀫𑁂𑀯 𑀧𑀫𑀸𑀡𑀁 𑀢𑁂 𑀳𑀺 𑀩𑀼𑀤𑁆𑀥𑀫𑀢𑀜𑁆𑀜𑀼𑀦𑁄, 𑀇𑀤𑀜𑁆𑀘 𑀯𑀘𑀦𑀁 𑀪𑀕𑀯𑀢𑁄 𑀦 𑀧𑀘𑁆𑀘𑀓𑁆𑀔𑀯𑀘𑀦𑀁 𑀦𑀸𑀧𑀺𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑀸𑀦𑀁 𑀯𑀘𑀦𑀁 𑀅𑀣𑀯𑀸 ‘‘𑀬𑀁 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀫𑀦𑁆𑀢𑀸 𑀉𑀤𑀓𑀼𑀓𑁆𑀔𑁂𑀧𑀸’’𑀢𑀺 𑀧𑀦 𑀏𑀢𑀺𑀲𑁆𑀲𑀸 𑀦𑀤𑀺𑀬𑀸…𑀧𑁂… 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀁 𑀯𑀺𑀬 𑀲𑀻𑀫𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢’𑀦𑁆𑀢𑀺 𑀆𑀘𑀭𑀺𑀬𑀸 𑀬𑀲𑁆𑀫𑀸 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑀸𑀪𑀸𑀯𑁂𑀧𑀺 𑀅𑀦𑁆𑀢𑁄𑀦𑀤𑀺𑀬𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀦𑁆𑀢𑀺 𑀇𑀫𑀺𑀲𑁆𑀲𑀸 𑀅𑀢𑁆𑀣𑀬𑁄𑀚𑀦𑀸𑀬 𑀦 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑀸𑀧𑀺 𑀧𑀯𑀺𑀝𑁆𑀞𑀸, 𑀕𑀦𑁆𑀣𑀓𑀸𑀭𑁄𑀧𑀺 𑀅𑀧𑀯𑀺𑀝𑁆𑀞𑁄. 𑀓𑀲𑁆𑀫𑀸𑀢𑀺 𑀘𑁂 𑀢𑀺𑀲𑁆𑀲𑁄𑀧𑀺 𑀲𑀗𑁆𑀕𑀻𑀢𑀺𑀬𑁄 𑀆𑀭𑀽𑀴𑁆𑀳𑁂𑀲𑀼 𑀯𑀺𑀦𑀬𑀝𑁆𑀞𑀓𑀣𑀸𑀲𑀼𑀘𑁂𑀯 𑀢𑀩𑁆𑀩𑀺𑀯𑀭𑀡𑀪𑀽𑀢𑀸𑀲𑀼 𑀲𑀺𑀮𑁄𑀓𑀝𑀻𑀓𑀸𑀲𑀼 𑀘 ‘‘𑀉𑀤𑀓𑀼𑀓𑁆𑀔𑁂𑀧𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁, 𑀉𑀤𑀓𑀁 𑀉𑀓𑁆𑀔𑀺𑀧𑀺𑀢𑀩𑁆𑀩𑀁, 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄’’𑀢𑀺 𑀆𑀤𑀺𑀦𑀸 𑀩𑀳𑀽𑀳𑀺 𑀆𑀓𑀸𑀭𑁂𑀳𑀺 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑀫𑁂𑀯 𑀮𑀺𑀔𑀦𑁆𑀢𑀺, 𑀢𑀲𑁆𑀫𑀸 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑀸𑀧𑀺 𑀅𑀧𑁆𑀧𑀯𑀺𑀝𑁆𑀞𑀸𑀢𑀺 𑀯𑀺𑀜𑁆𑀜𑀸𑀬𑀢𑀺 𑀕𑀦𑁆𑀣𑀓𑀸𑀭𑁄 𑀧𑀺 𑀧𑀭𑀽𑀧𑀯𑀸𑀤𑀯𑀺𑀯𑀚𑁆𑀚𑀦𑀢𑁆𑀣𑀁 ‘‘𑀆𑀘𑀭𑀺𑀬𑀸’’𑀢𑀺 𑀅𑀜𑁆𑀜𑀓𑀢𑁆𑀢𑀸𑀭𑁂 𑀦𑀺𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀕𑀦𑁆𑀢𑁆𑀣𑀓𑀸𑀭𑁄𑀧𑀺 𑀅𑀧𑁆𑀧𑀯𑀺𑀝𑁆𑀞𑁄𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀇𑀤𑀜𑁆𑀘 𑀯𑀘𑀦𑀁 𑀓𑁂𑀲𑀜𑁆𑀘𑀺 𑀣𑁂𑀭𑀸𑀦𑀁 𑀅𑀢𑁆𑀢𑀦𑁄𑀫𑀢𑀺, 𑀅𑀢𑁆𑀢𑀦𑁄𑀫𑀢𑀺𑀘 𑀦𑀸𑀫𑁂𑀲𑀸 𑀲𑀩𑁆𑀩𑀤𑀼𑀩𑁆𑀩𑀮𑀸, 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀁 𑀲𑀸𑀲𑀧𑀩𑀻𑀚𑁂𑀦 𑀫𑀺𑀦𑁂𑀦𑁆𑀢𑁄 𑀯𑀺𑀬 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁂𑀦 𑀧𑀜𑁆𑀜𑀢𑁆𑀢𑀲𑁆𑀲 𑀉𑀤𑀓𑀼𑀓𑁆𑀔𑁂𑀧𑀸𑀢𑀺 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀢𑁆𑀣𑀁 𑀯𑀤𑀦𑁆𑀢𑀸𑀦𑀁 𑀫𑀳𑀸𑀓𑀲𑁆𑀲𑀧𑀬𑀲𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀧𑀪𑀼𑀢𑀻𑀦𑀜𑁆𑀘 ¶ 𑀢𑁂𑀲𑀁 𑀲𑀺𑀲𑁆𑀲𑀸𑀦𑀼𑀲𑀺𑀲𑁆𑀲𑀸𑀦𑀁 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀜𑁆𑀘 𑀯𑀘𑀦𑀁 𑀓𑁄 𑀦𑀸𑀫 𑀧𑀼𑀕𑁆𑀕𑀮𑁄 𑀫𑀓𑁆𑀔𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀉𑀧𑀲𑀫𑁆𑀧𑀤𑀸𑀤𑀺𑀓𑀫𑁆𑀫𑀲𑁆𑀲 𑀘 𑀕𑀭𑀼𑀓𑀫𑁆𑀫𑀢𑁆𑀢𑀸 𑀲𑀸𑀲𑀦𑀲𑁆𑀲 𑀫𑀽𑀮𑀢𑁆𑀢𑀸 𑀘 𑀕𑀭𑀼𑀓𑁂𑀬𑁂𑀯 𑀞𑀸𑀢𑀩𑁆𑀩𑀁. ‘‘𑀬𑀁 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀫𑀦𑁆𑀢𑀸 𑀉𑀤𑀓𑀼𑀓𑁆𑀔𑁂𑀧𑀸’’𑀢𑀺 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀁, 𑀓𑀣𑀁 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀉𑀤𑀓𑀼𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀫𑁂𑀯 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸, 𑀉𑀤𑀸𑀳𑀼 𑀉𑀤𑀓𑀼𑀓𑁆𑀔𑁂𑀧𑁂𑀦𑁂𑀯 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀢𑀺 𑀘𑁄𑀤𑀦𑀁 𑀧𑀭𑀺𑀳𑀭𑀦𑁆𑀢𑁄 𑀅𑀝𑁆𑀞𑀓𑀣𑀸𑀘𑀭𑀺𑀬𑁄 𑀓𑀣𑀁 𑀧𑀦 𑀉𑀤𑀓𑀁 𑀉𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑁆𑀬𑀸𑀤𑀺𑀫𑀸𑀳. 𑀢𑀢𑁆𑀣 𑀓𑀣𑀦𑁆𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸 𑀧𑀼𑀘𑁆𑀙𑀸, 𑀓𑀣𑀁 𑀓𑁂𑀦 𑀓𑀸𑀭𑀡𑁂𑀦 𑀉𑀤𑀓𑀁 𑀉𑀓𑁆𑀔𑀺𑀧𑀺𑀢𑀩𑁆𑀩𑀁 𑀉𑀤𑀓𑀸𑀲𑀺𑀜𑁆𑀘𑀦𑀲𑀗𑁆𑀔𑁂𑀧𑁂𑀦 𑀉𑀓𑁆𑀔𑀺𑀧𑀺𑀢𑀩𑁆𑀩𑀁 𑀅𑀣 𑀔𑁄 𑀮𑁂𑀟𑁆𑀟𑀼𑀔𑀺𑀧𑀦𑀤𑀸𑀭𑀼𑀕𑀼𑀴𑀔𑀺𑀧𑀦𑀸𑀓𑀸𑀭𑁂𑀦 𑀉𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀅𑀓𑁆𑀔𑀥𑀼𑀢𑁆𑀢𑀸𑀢𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑁂𑀧𑀺 ‘‘𑀲𑀻𑀳𑁄 𑀕𑀸𑀬𑀢𑀺 𑀦𑀗𑁆𑀕𑀼𑀝𑁆𑀞𑀁, 𑀲𑀻𑀳𑁄 𑀘𑀸𑀮𑁂𑀢𑀺 𑀯𑀸𑀮𑀥𑀺’’𑀦𑁆𑀢𑀺 𑀏𑀢𑁆𑀣 𑀯𑀺𑀬 𑀤𑀸𑀭𑀼𑀕𑀼𑀴𑀁 𑀔𑀺𑀧𑀦𑁆𑀢𑀺 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀢𑁄 𑀅𑀢𑁆𑀣𑀯𑀲𑁂𑀦 𑀤𑀸𑀭𑀼𑀕𑀼𑀴𑀓𑀻𑀴𑀓𑀸 𑀥𑀼𑀢𑁆𑀢𑀚𑀦𑀸𑀢𑀺 𑀯𑀺𑀜𑁆𑀜𑀸𑀬𑀢𑀺 𑀅𑀓𑁆𑀔𑀲𑀤𑁆𑀤𑁄 𑀳𑀺 𑀚𑀽𑀢𑁂𑀧𑀺 𑀦𑀺𑀭𑀽𑀴𑁆𑀳𑁄. 𑀤𑀸𑀭𑀼𑀕𑀼𑀴𑀦𑁆𑀢𑀺 𑀪𑀫𑀁 𑀆𑀭𑁄𑀧𑁂𑀢𑁆𑀯𑀸 𑀆𑀭𑀕𑁆𑀕𑁂𑀦 𑀓𑀢𑀤𑀸𑀭𑀼𑀯𑀺𑀓𑀢𑀺 𑀅𑀬𑀜𑁆𑀳𑁂𑀢𑁆𑀣𑀢𑁆𑀣𑁄… 𑀬𑀣𑀸 𑀅𑀓𑁆𑀔𑀥𑀼𑀢𑁆𑀢𑀸 𑀤𑀸𑀭𑀼𑀕𑀼𑀴𑀓𑀸 𑀥𑀼𑀢𑁆𑀢𑀚𑀦𑀸 𑀤𑀸𑀭𑀼𑀕𑀼𑀴𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀩𑀮𑀁 𑀤𑀲𑁆𑀲𑁂𑀦𑁆𑀢𑀸 𑀯𑀺𑀬 𑀲𑀩𑁆𑀩𑀣𑀸𑀫𑁂𑀦 𑀅𑀢𑁆𑀢𑀸𑀦𑀁 𑀑𑀦𑀫𑀺𑀢𑁆𑀯𑀸 𑀔𑀺𑀧𑀦𑁆𑀢𑀺, 𑀏𑀯𑀫𑁂𑀯 𑀣𑀸𑀫𑀫𑀚𑁆𑀛𑀺𑀫𑁂𑀦 𑀧𑀼𑀭𑀺𑀲𑁂𑀦 𑀉𑀤𑀓𑀁 𑀯𑀸 𑀯𑀸𑀮𑀺𑀓𑀁 𑀯𑀸 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀩𑀮𑀁 𑀤𑀲𑁆𑀲𑁂𑀦𑁆𑀢𑀸𑀯𑀺𑀬 𑀑𑀦𑀫𑀺𑀢𑁆𑀯𑀸 𑀲𑀩𑁆𑀩𑀣𑀸𑀫𑁂𑀦 𑀦𑀺𑀲𑀺𑀦𑁆𑀦𑀲𑁆𑀲 𑀯𑀸 𑀞𑀺𑀢𑀲𑁆𑀲 𑀯𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑁄 𑀅𑀦𑀼𑀧𑀭𑀺𑀬𑀸𑀬𑀺𑀢𑁆𑀯𑀸 𑀔𑀺𑀧𑀺𑀢𑀩𑁆𑀩𑀁, 𑀏𑀯𑀁 𑀘𑀺𑀢𑁆𑀢𑀁 𑀉𑀤𑀓𑀁 𑀯𑀸 𑀯𑀸𑀮𑀺𑀓𑀁 𑀯𑀸 𑀬𑀢𑁆𑀣 𑀬𑀲𑁆𑀫𑀺𑀁 𑀞𑀸𑀦𑁂 𑀧𑀢𑀢𑀺, 𑀅𑀬𑀫𑁂𑀓𑁄 𑀉𑀤𑀓𑀼𑀓𑁆𑀔𑁂𑀧𑁄 𑀦𑀸𑀫𑀸𑀢𑀺 ‘‘𑀅𑀬𑀫𑁂𑀓𑁄 𑀉𑀤𑀓𑀼𑀓𑁆𑀔𑁂𑀧𑁄’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀦𑀁 𑀯𑀺𑀲𑀼𑀁𑀯𑀺𑀲𑀼𑀁 𑀓𑀫𑁆𑀫𑀓𑀭𑀡𑀸𑀥𑀺𑀓𑀸𑀭𑁂 𑀲𑀻𑀫𑀦𑁆𑀢𑀭𑀺𑀓𑀢𑁆𑀢𑀸 𑀅𑀜𑁆𑀜𑀲𑁆𑀲𑀸𑀧𑀺 𑀉𑀤𑀓𑀼𑀓𑁆𑀔𑁂𑀧𑀲𑁆𑀲 𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑀺, 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 ‘‘𑀲𑀘𑁂 𑀧𑀦 𑀤𑁆𑀯𑁂 𑀲𑀗𑁆𑀖𑀸 𑀯𑀺𑀲𑀼𑀁𑀯𑀺𑀲𑀼𑀁 𑀉𑀧𑁄𑀲𑀣𑀸𑀤𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀤𑁆𑀯𑀺𑀦𑁆𑀦𑀁 𑀉𑀤𑀓𑀼𑀓𑁆𑀔𑁂𑀧𑀸𑀦𑀁 𑀅𑀦𑁆𑀢𑀭𑁂 𑀅𑀜𑁆𑀜𑁄 𑀏𑀓𑁄 𑀉𑀤𑀓𑀼𑀓𑁆𑀔𑁂𑀧𑁄 𑀉𑀧𑀘𑀸𑀭𑀢𑁆𑀣𑀸𑀬 𑀞𑀧𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁, 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀫𑁆𑀧𑀺 ‘‘𑀢𑀲𑁆𑀲 𑀅𑀦𑁆𑀢𑁄𑀢𑀺 𑀢𑀲𑁆𑀲 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑀺𑀦𑁆𑀦𑀲𑁆𑀲 𑀞𑀸𑀦𑀲𑁆𑀲 𑀅𑀦𑁆𑀢𑁄 𑀦 𑀓𑁂𑀯𑀮𑀜𑁆𑀘 𑀢𑀲𑁆𑀲𑁂𑀯 𑀅𑀦𑁆𑀢𑁄, 𑀢𑀢𑁄 𑀩𑀳𑀺𑀧𑀺 𑀏𑀓𑀲𑁆𑀲 𑀉𑀤𑀓𑀼𑀓𑁆𑀔𑁂𑀧𑀲𑁆𑀲 𑀅𑀦𑁆𑀢𑁄 𑀞𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀯𑀘𑀦𑀁 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑀲𑁆𑀲 𑀤𑀼𑀩𑁆𑀩𑀺𑀚𑀸𑀦𑀢𑁄 𑀓𑀫𑁆𑀫𑀓𑁄𑀧𑀲𑀗𑁆𑀓𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀧𑀦 ‘‘𑀢𑀲𑁆𑀲 𑀅𑀦𑁆𑀢𑁄 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁄 𑀓𑀫𑁆𑀫𑀁 𑀓𑁄𑀧𑁂𑀢𑀻𑀢𑀺 𑀇𑀫𑀺𑀦𑀸 𑀧𑀭𑀺𑀘𑁆𑀙𑁂𑀤𑀢𑁄 𑀩𑀳𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀺𑀢𑁄 𑀓𑀫𑁆𑀫𑀁 𑀦 𑀓𑁄𑀧𑁂𑀢𑀻𑀢𑀺 𑀤𑀻𑀧𑁂𑀢𑀻’’𑀢𑀺 𑀯𑀢𑁆𑀯𑀸 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀯𑀘𑀦𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺, 𑀢𑀁 𑀏𑀓𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀁 ¶ 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀬𑀣𑀸 𑀘 𑀫𑀳𑀸𑀲𑀻𑀫𑀸𑀬 𑀔𑀡𑁆𑀟𑀺𑀢𑁆𑀯𑀸 𑀩𑀤𑁆𑀥𑀸𑀦𑀁 𑀔𑀡𑁆𑀟𑀲𑀻𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀯𑀺𑀯𑀚𑁆𑀚𑀦𑀢𑁆𑀣𑀁 𑀲𑀻𑀫𑀦𑁆𑀢𑀭𑀺𑀓𑀸 𑀞𑀧𑀺𑀢𑀸, 𑀏𑀯𑀫𑁂𑀯 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀕𑀸𑀫𑀲𑀻𑀫𑀸 𑀯𑀺𑀬 𑀲𑀬𑀁 𑀚𑀸𑀢𑀲𑀻𑀫𑀸𑀬𑀁 𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑀸𑀦𑀁 𑀅𑀢𑀺𑀫𑀳𑀦𑁆𑀢𑀪𑀸𑀯𑁂𑀦 𑀉𑀤𑀓𑀼𑀓𑁆𑀔𑁂𑀧𑁂𑀦 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀸, 𑀢𑀣𑀸𑀧𑀺 𑀤𑁆𑀯𑀺𑀦𑁆𑀦𑀁 𑀩𑀤𑁆𑀥𑀲𑀻𑀫𑀸𑀦𑀫𑀺𑀯 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀯𑀺𑀯𑀚𑁆𑀚𑀦𑀢𑁆𑀣𑀁 𑀤𑁆𑀯𑀺𑀦𑁆𑀦𑀁 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀦𑀁 𑀅𑀦𑁆𑀢𑀭𑁂 𑀲𑀻𑀫𑀦𑁆𑀢𑀭𑀺𑀓𑀢𑁆𑀣𑀸𑀬 𑀅𑀜𑁆𑀜𑁄 𑀉𑀤𑀓𑀼𑀓𑁆𑀔𑁂𑀧𑁄 𑀞𑀧𑁂𑀢𑀩𑁆𑀩𑁄’𑀢𑀺 𑀯𑀼𑀢𑁆𑀢𑀁, 𑀲𑀦𑀺𑀫𑀺𑀢𑁆𑀢𑀸 𑀩𑀤𑁆𑀥𑀲𑀻𑀫𑀸, 𑀲𑀉𑀤𑀓𑀼𑀓𑁆𑀔𑁂𑀧𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸, 𑀲𑀻𑀫𑀦𑁆𑀢𑀭𑀺𑀓𑀸 𑀯𑀺𑀬 𑀏𑀓𑁄 𑀉𑀤𑀓𑀼𑀓𑁆𑀔𑁂𑀧𑁄 𑀤𑀝𑁆𑀞𑀩𑁆𑀩𑁄, 𑀢𑁂𑀦𑁂𑀯 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 ‘‘𑀇𑀤𑀜𑁆𑀘𑁂𑀢𑁆𑀣 𑀲𑀻𑀫𑀦𑁆𑀢𑀭𑀺𑀓𑀸𑀯𑀺𑀥𑀸𑀦𑀁 𑀤𑁆𑀯𑀺𑀦𑁆𑀦𑀁 𑀩𑀤𑁆𑀥𑀲𑀻𑀫𑀸𑀦𑀁 𑀲𑀻𑀫𑀦𑁆𑀢𑀭𑀺𑀓𑀸𑀅𑀦𑀼𑀚𑀸𑀦𑀦𑀲𑀼𑀢𑁆𑀢𑀸𑀦𑀼𑀮𑁄𑀫𑀢𑁄 𑀲𑀺𑀤𑁆𑀥𑀦𑁆𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀓𑀲𑁆𑀫𑀺𑀁 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑁂 𑀧𑀦 𑀏𑀓𑀲𑁆𑀲 𑀉𑀤𑀓𑀼𑀓𑁆𑀔𑁂𑀧𑀲𑁆𑀲 𑀩𑀳𑀺 𑀢𑀺𑀝𑁆𑀞𑀦𑁆𑀢𑁄𑀧𑀺 𑀓𑀫𑁆𑀫𑀁 𑀦 𑀓𑁄𑀧𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁 𑀯𑀼𑀢𑁆𑀢𑀜𑁆𑀳𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 𑀪𑀕𑀯𑀢𑀸 𑀦𑀺𑀤𑀸𑀦𑀯𑀲𑁂𑀦 𑀏𑀓𑀕𑀸𑀫𑀲𑀻𑀫𑀦𑀺𑀲𑁆𑀲𑀺𑀢𑀸𑀦𑀁 𑀏𑀓𑀲𑀪𑀸𑀕𑀸𑀦𑀜𑁆𑀘 𑀤𑁆𑀯𑀺𑀦𑁆𑀦𑀁 𑀩𑀤𑁆𑀥𑀲𑀻𑀫𑀸𑀦𑀫𑁂𑀯 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀪𑁂𑀤𑀚𑁆𑀛𑁄𑀢𑁆𑀣𑀭𑀡𑀁 𑀲𑀻𑀫𑀦𑁆𑀢𑀭𑀺𑀓𑀁 𑀯𑀺𑀦𑀸 𑀅𑀩𑁆𑀬𑀯𑀥𑀸𑀦𑁂 𑀞𑀸𑀦𑀜𑁆𑀘 𑀪𑀕𑀯𑀢𑀸 𑀅𑀦𑀼𑀫𑀢𑀫𑁂𑀯𑀸𑀢𑀺 𑀜𑀢𑁆𑀯𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀇𑀥𑀸𑀧𑀺 𑀲𑀻𑀫𑀦𑁆𑀢𑀭𑀺𑀓𑀸𑀯𑀺𑀥𑀸𑀦𑀫𑀓𑀁𑀲𑀼 𑀯𑀺𑀲𑀪𑀸𑀕𑀲𑀻𑀫𑀸𑀦𑀫𑁆𑀧𑀺 𑀳𑀺 𑀏𑀓𑀲𑀻𑀫𑀦𑀺𑀲𑁆𑀲𑀺𑀢𑀢𑁆𑀢𑀁 𑀏𑀓𑀲𑀪𑀸𑀯𑀢𑁆𑀢𑀜𑁆𑀘𑀸𑀢𑀺 𑀤𑁆𑀯𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂 𑀲𑀢𑀺 𑀏𑀯 𑀲𑀻𑀫𑀦𑁆𑀢𑀭𑀺𑀓𑀁 𑀯𑀺𑀦𑀸 𑀞𑀸𑀦𑀁 𑀲𑀫𑁆𑀪𑁂𑀤𑀸𑀬 𑀳𑁄𑀢𑀺, 𑀦𑀸𑀲𑀢𑀻𑀢𑀺 𑀤𑀝𑁆𑀞𑀩𑁆𑀩’𑀦𑁆𑀢𑀺. 𑀏𑀯𑀁 𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑁂𑀲𑀼 𑀲𑀫𑀦𑁆𑀢𑀸𑀉𑀤𑀓𑀼𑀓𑁆𑀔𑁂𑀧𑀸𑀢𑀺 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀼𑀭𑀽𑀧𑀁 𑀉𑀤𑀓𑀼𑀓𑁆𑀔𑁂𑀧𑁂𑀦 𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀭𑀲𑁆𑀲𑀧𑀪𑀯𑁂 𑀦𑀤𑀻𑀚𑀸𑀢𑀲𑁆𑀲𑀭𑀧𑀤𑁂𑀲𑁂 𑀉𑀤𑀓𑀼𑀓𑁆𑀔𑁂𑀧𑁂𑀦 𑀯𑀺𑀦𑀸𑀯 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀕𑀸𑀫𑀲𑀻𑀫𑀸𑀬𑀫𑀺𑀯 𑀲𑀩𑁆𑀩𑀣𑀸 𑀓𑀧𑁆𑀧𑀺𑀬𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀲𑀘𑁂 𑀧𑀦 𑀦𑀸𑀢𑀺𑀤𑀻𑀖𑀸 𑀳𑁄𑀢𑀺, 𑀧𑀪𑀯𑀢𑁄 𑀧𑀝𑁆𑀞𑀸𑀬 𑀢𑁆𑀬𑀸𑀤𑀺𑀫𑀸𑀳. 𑀢𑀢𑁆𑀣 𑀧𑀪𑀯𑀢𑁄 𑀧𑀝𑁆𑀞𑀸𑀬𑀸𑀢𑀺 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀘𑀢𑀼𑀫𑀸𑀲𑀧𑀭𑀫𑀸 𑀦𑀤𑀻 𑀲𑀦𑁆𑀤𑀢𑀺, 𑀢𑀲𑁆𑀲 𑀉𑀧𑀭𑀺𑀫𑀪𑀸𑀕𑀢𑁄 𑀧𑀝𑁆𑀞𑀸𑀬𑀸𑀢𑀺 𑀅𑀢𑁆𑀣𑁄. 𑀬𑀸𑀯 𑀫𑀼𑀔𑀤𑁆𑀯𑀸𑀭𑀸 𑀢𑀺 𑀬𑀸𑀯 𑀦𑀤𑀻𑀢𑀻𑀭𑀫𑁂𑀯𑁂𑀢𑁆𑀣 𑀫𑀼𑀔𑀤𑁆𑀯𑀸𑀭𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀲𑀩𑁆𑀩𑀢𑁆𑀣𑀸’𑀢𑀺 𑀲𑀩𑁆𑀩𑀲𑁆𑀫𑀺𑀁 𑀦𑀤𑀻𑀧𑀤𑁂𑀲𑁂 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀓𑀫𑁆𑀫𑀁 𑀦𑀢𑁆𑀣𑀻 𑀢𑀺 𑀉𑀤𑀓𑀼𑀓𑁆𑀔𑁂𑀧𑁂𑀦 𑀧𑀯𑀢𑁆𑀢𑀸 𑀲𑀻𑀫𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸. 𑀓𑀭𑀺𑀢𑀩𑁆𑀩𑀦𑁆𑀢𑀺 𑀓𑀫𑁆𑀫𑀁, 𑀓𑀭𑀓𑀭𑀡𑁂𑀢𑀺 𑀥𑀸𑀢𑀼, 𑀭𑀫𑁆𑀫𑀧𑀘𑁆𑀘𑀬𑁄. 𑀓𑀭𑀡𑁂𑀢𑀺 𑀫𑀦𑁄𑀤𑁆𑀯𑀸𑀭𑀯𑀻𑀣𑀺𑀬𑀸 𑀲𑀢𑁆𑀢𑀫𑀓𑀼𑀲𑀮𑀚𑀯𑀦𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀧𑀺𑀢𑀯𑀸𑀬𑁄𑀥𑀸𑀢𑀼𑀬𑀸 𑀯𑀺𑀓𑀸𑀭𑀪𑀽𑀢𑁄 𑀓𑀸𑀬𑀧𑀬𑁄𑀕𑁄, 𑀢𑁂𑀦 𑀓𑀸𑀬𑀧𑀬𑁄𑀕𑁂𑀦 𑀔𑀺𑀧𑀺𑀢𑀩𑁆𑀩𑀁 𑀉𑀤𑁆𑀥𑀝𑀁 𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺 𑀧𑀭𑀫𑀢𑁆𑀣𑀯𑀲𑁂𑀦 𑀧𑀦 𑀓𑀸𑀬𑀧𑀬𑁄𑀕𑀲𑀗𑁆𑀔𑀸𑀢𑀸𑀬 𑀘𑀺𑀢𑁆𑀢𑀁 𑀚𑀯𑀸𑀬𑁄𑀥𑀸𑀢𑀼𑀬𑀸 𑀯𑀺𑀧𑁆𑀨𑀸𑀭𑁂𑀦 𑀤𑁂𑀲𑀦𑁆𑀢𑀭𑀧𑁆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀺𑀓𑀸 ¶ 𑀅𑀝𑁆𑀞𑀓𑀮𑀸𑀧𑀧𑀼𑀜𑁆𑀚𑀸𑀬𑁂𑀯. 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀓𑀫𑁆𑀫𑀁 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀓𑀫𑁆𑀫𑀁 𑀢𑀁 𑀏𑀢𑁆𑀣 𑀭𑀲𑁆𑀲𑀧𑀪𑀯𑀦𑀤𑀺𑀬𑀸 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀳𑁂𑀢𑁆𑀣𑀢𑁆𑀣𑁄 𑀲𑀘𑁂 𑀦𑀤𑀻 𑀦𑀸𑀢𑀺𑀤𑀻𑀖𑀸 𑀳𑁄𑀢𑀺 𑀅𑀟𑁆𑀠𑀬𑁄𑀚𑀦𑀁 𑀯𑀸 𑀕𑀸𑀯𑀼𑀢𑀁 𑀯𑀸 𑀅𑀟𑁆𑀠𑀕𑀸𑀯𑀼𑀢𑀁 𑀯𑀸, 𑀢𑀲𑁆𑀲𑀸 𑀧𑀯𑀢𑁆𑀢𑀦𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀦𑀤𑀻𑀢𑀻𑀭𑀸 𑀲𑀩𑁆𑀩𑀢𑁆𑀣 𑀦𑀤𑀻𑀧𑀤𑁂𑀲𑁂 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀲𑀗𑁆𑀖𑁄 𑀦𑀺𑀲𑀻𑀤𑀢𑀺, 𑀢𑀢𑁆𑀣 𑀢𑀲𑁆𑀫𑀺𑀁 𑀦𑀤𑀻𑀧𑀤𑁂𑀲𑁂 𑀲𑀫𑀦𑁆𑀢𑀢𑁄 𑀅𑀯𑀲𑁂𑀲𑀦𑀤𑀺𑀬𑀸 𑀅𑀪𑀸𑀯𑀸 𑀯𑀕𑁆𑀕𑀓𑀫𑁆𑀫𑀲𑀗𑁆𑀓𑀸𑀪𑀸𑀯𑁂𑀦 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀓𑀫𑁆𑀫𑀁 𑀦𑀢𑁆𑀣𑀺, 𑀓𑁂𑀯𑀮𑀸 𑀦𑀤𑀻 𑀲𑀻𑀫𑀸𑀬𑁂𑀯𑀸𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀫𑁆𑀧𑀺 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀺𑀬𑀫𑁆𑀧𑀺 𑀏𑀢𑀤𑁂𑀯 𑀲𑀦𑁆𑀦𑀺𑀝𑁆𑀞𑀸𑀦𑀁 𑀯𑀼𑀢𑁆𑀢𑀁 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 𑀧𑀦 𑀬𑀢𑁆𑀣 𑀔𑀼𑀤𑁆𑀤𑀓𑁂 𑀅𑀭𑀜𑁆𑀜𑁂 𑀫𑀳𑀦𑁆𑀢𑁂𑀳𑀺 𑀯𑀸 𑀪𑀺𑀓𑁆𑀔𑀽𑀳𑀺 𑀧𑀭𑀺𑀧𑀼𑀡𑁆𑀡𑀢𑀸𑀬 𑀯𑀕𑁆𑀕𑀓𑀫𑁆𑀫𑀲𑀗𑁆𑀓𑀸𑀪𑀸𑀯𑁂𑀦 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀧𑁂𑀓𑁆𑀔𑀸 𑀦𑀢𑁆𑀣𑀺, 𑀢𑀢𑁆𑀣 𑀲𑀢𑁆𑀣𑀩𑁆𑀪𑀦𑁆𑀢𑀭𑀲𑀻𑀫𑀸 𑀦 𑀉𑀧𑁆𑀧𑀚𑁆𑀚𑀢𑀺, 𑀓𑁂𑀯𑀮𑀸𑀭𑀜𑁆𑀜𑀲𑀻𑀫𑀸𑀬𑁂𑀯 𑀢𑀢𑁆𑀣 𑀲𑀗𑁆𑀖𑁂𑀦 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑀦𑀤𑀻𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄 𑀯𑀓𑁆𑀔𑀢𑀺 𑀳𑀺 𑀲𑀘𑁂 𑀦𑀤𑀻 𑀦𑀸𑀢𑀺𑀤𑀻𑀖𑀸 𑀳𑁄𑀢𑀺, 𑀧𑀪𑀯𑀢𑁄 𑀧𑀝𑁆𑀞𑀸𑀬 𑀬𑀸𑀯𑀫𑀼𑀔𑀤𑁆𑀯𑀸𑀭𑀸 𑀲𑀩𑁆𑀩𑀢𑁆𑀣 𑀲𑀗𑁆𑀖𑁄 𑀦𑀺𑀲𑀻𑀤𑀢𑀺, 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀓𑀫𑁆𑀫𑀁 𑀦𑀢𑁆𑀣𑀻’𑀢𑀺 𑀆𑀤𑀺 𑀘 𑀉𑀪𑀬𑀢𑁆𑀣𑀸𑀧𑀺 𑀘. 𑀬𑀲𑁆𑀲𑀁 𑀤𑀺𑀲𑀸𑀬𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑁆𑀲 𑀯𑀸 𑀉𑀤𑀓𑀼𑀓𑁆𑀔𑁂𑀧𑀲𑁆𑀲 𑀯𑀸 𑀑𑀓𑀸𑀲𑁄 𑀦𑀧𑁆𑀧𑀳𑁄𑀢𑀺, 𑀢𑀢𑁆𑀣 𑀓𑀣𑀁 𑀫𑀺𑀦𑀦𑀁 𑀔𑀺𑀧𑀦𑀁 𑀯𑀸 𑀪𑀯𑁂𑀬𑁆𑀬, 𑀕𑀸𑀫𑀔𑁂𑀢𑁆𑀢𑀸𑀤𑀻𑀲𑀼 𑀧𑀯𑀺𑀲𑀦𑀢𑁄 𑀅𑀔𑁂𑀢𑁆𑀢𑁂 𑀲𑀻𑀫𑀸 𑀧𑀯𑀺𑀝𑁆𑀞𑀸 𑀦𑀸𑀫𑀸𑀢𑀺𑀲𑀻𑀫𑀸 𑀯𑀺𑀧𑀚𑁆𑀚𑁂𑀬𑁆𑀬, 𑀅𑀧𑁂𑀓𑁆𑀔𑀸𑀬 𑀲𑀻𑀫𑀼𑀧𑁆𑀧𑀢𑁆𑀢𑀺𑀬𑀁 𑀧𑀦 𑀬𑀢𑁄 𑀧𑀳𑁄𑀢𑀺, 𑀢𑀢𑁆𑀣 𑀲𑀢𑁆𑀢𑀩𑁆𑀪𑀦𑁆𑀢𑀭𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀲𑀬𑀫𑁂𑀯 𑀧𑀭𑀺𑀧𑀼𑀡𑁆𑀡𑀸 𑀚𑀸𑀬𑀦𑁆𑀢𑀺. 𑀬𑀢𑁄 𑀧𑀦 𑀦𑀧𑁆𑀧𑀳𑁄𑀢𑀺, 𑀢𑀢𑁆𑀣 𑀅𑀢𑁆𑀢𑀦𑁄 𑀔𑁂𑀢𑁆𑀢𑀧𑁆𑀧𑀫𑀸𑀡𑁂𑀦𑁂𑀯 𑀚𑀸𑀬𑀦𑁆𑀢𑀺, 𑀦 𑀩𑀳𑀻𑀢𑀺 𑀯𑀼𑀢𑁆𑀢𑀁, 𑀏𑀢𑁆𑀣 𑀘’𑀲𑀻𑀫𑀸𑀧𑁂𑀓𑁆𑀔𑀸𑀬 𑀲𑀢𑁆𑀢𑀩𑁆𑀪𑀦𑁆𑀢𑀭𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀲𑀬𑀫𑁂𑀯 𑀧𑀭𑀺𑀧𑀼𑀡𑁆𑀡𑀸 𑀚𑀸𑀬𑀦𑁆𑀢𑀻’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀉𑀤𑀓𑀼𑀓𑁆𑀔𑁂𑀧𑀁 𑀯𑀺𑀦𑀸𑀬𑁂𑀯 𑀅𑀧𑁂𑀓𑁆𑀔𑀸𑀬 𑀲𑀻𑀫𑀸𑀬 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀉𑀧𑁆𑀧𑀚𑁆𑀚𑀢𑀻’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑀁 𑀅𑀬𑀼𑀢𑁆𑀢𑀭𑀽𑀧𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀓𑀲𑁆𑀫𑀸𑀢𑀺 𑀘𑁂 𑀧𑀸𑀴𑀺𑀦𑀬𑀯𑀺𑀭𑁄𑀥𑀢𑁄 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 𑀧𑀭𑀢𑁄 𑀯𑀼𑀢𑁆𑀢𑀯𑀘𑀦𑁂𑀦𑀸𑀧𑀺 𑀯𑀺𑀭𑁄𑀥𑀢𑁄 𑀘. 𑀇𑀤𑀜𑁆𑀘 𑀯𑀘𑀦𑀁 𑀆𑀘𑀭𑀺𑀬𑀲𑁆𑀲 𑀓𑁂𑀲𑀜𑁆𑀘𑀺 𑀧𑀼𑀕𑁆𑀕𑀮𑀸𑀦𑀁 𑀯𑀸𑀤𑀧𑁆𑀧𑀓𑀸𑀲𑀦𑀢𑁆𑀣𑀁 𑀯𑀼𑀢𑁆𑀢𑀁 𑀪𑀯𑁂𑀬𑁆𑀬. 𑀓𑀲𑁆𑀫𑀸 𑀧𑀭𑀢𑁄 𑀯𑀼𑀢𑁆𑀢𑀯𑀘𑀦𑁂𑀦 𑀅𑀖𑀝𑀺𑀬𑀢𑁆𑀢𑀸 𑀘 𑀧𑀸𑀴𑀺𑀬𑀝𑁆𑀞𑀓𑀣𑀸𑀝𑀻𑀓𑀸𑀯𑀘𑀦𑁂𑀳𑀺𑀧𑀺 𑀯𑀺𑀭𑀼𑀚𑁆𑀛𑀦𑀢𑁄 𑀘, 𑀢𑀁 𑀧𑀭𑀢𑁄 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀬𑀣𑀸 𑀘 𑀮𑁄𑀓𑁂 𑀯𑀢𑀺𑀁 𑀅𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀇𑀤𑀁 𑀯𑀢𑀺𑀬𑀸 𑀞𑀸𑀦’’𑀦𑁆𑀢𑀺 𑀘 𑀬𑀣𑀸 𑀘 𑀦𑀗𑁆𑀕𑀮𑀓𑁄𑀝𑀺𑀬𑀸 𑀅𑀓𑀲𑀺𑀢𑁆𑀯𑀸 ‘‘𑀇𑀤𑀁 𑀓𑀲𑀺𑀓𑀝𑁆𑀞𑀸𑀦’’𑀦𑁆𑀢𑀺 𑀘 𑀬𑀣𑀸 𑀘 𑀯𑀢𑁆𑀣𑀼𑀁 𑀓𑀭𑁄𑀦𑁆𑀢𑀸 𑀫𑀦𑀼𑀲𑁆𑀲𑀸 𑀓𑀼𑀥𑀸𑀭𑀻𑀨𑀭𑀲𑀼𑀆𑀤𑀺𑀦𑀸 𑀭𑀼𑀓𑁆𑀔𑁂 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀇𑀤𑀁 𑀫𑀫 𑀓𑀼𑀥𑀸𑀭𑀺𑀧𑀢𑀦𑀝𑁆𑀞𑀸𑀦’’𑀦𑁆𑀢𑀺 𑀘 𑀬𑀣𑀸 𑀘 𑀤𑀸𑀢𑁆𑀢𑁂𑀦 𑀅𑀮𑀸𑀬𑀺𑀢𑁆𑀯𑀸 ‘‘𑀇𑀤𑀁 𑀫𑀫 𑀮𑀸𑀬𑀺𑀢𑀝𑁆𑀞𑀸𑀦’’𑀦𑁆𑀢𑀺 ¶ 𑀘 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀏𑀯𑀫𑁂𑀯 𑀉𑀤𑀓𑀁 𑀯𑀸 𑀯𑀸𑀮𑀺𑀓𑀁 𑀯𑀸 𑀳𑀢𑁆𑀣𑁂𑀦 𑀅𑀔𑀺𑀧𑀺𑀢𑁆𑀯𑀸 ‘‘𑀅𑀬𑀫𑁂𑀓𑁄 𑀉𑀤𑀓𑀼𑀓𑁆𑀔𑁂𑀧𑁄𑀢𑀺 𑀘, 𑀉𑀤𑀓𑀧𑀢𑀦𑀝𑁆𑀞𑀸𑀦𑀦𑁆𑀢𑀺 𑀘 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀏𑀢𑁆𑀣 𑀘 𑀤𑁆𑀯𑁂 𑀪𑀺𑀓𑁆𑀔𑀽 𑀏𑀯𑀁 𑀯𑀺𑀯𑀸𑀤𑀁 𑀓𑀭𑁄𑀦𑁆𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 ‘‘𑀬𑀢𑁆𑀣 𑀔𑀼𑀤𑁆𑀤𑀓𑁂 𑀅𑀭𑀜𑁆𑀜𑁂 𑀫𑀳𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀧𑀭𑀺𑀧𑀼𑀡𑁆𑀡𑀢𑀸𑀬 𑀯𑀕𑁆𑀕𑀓𑀫𑁆𑀫𑀲𑀗𑁆𑀓𑀸𑀪𑀸𑀯𑁂𑀦 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀧𑁂𑀓𑁆𑀔𑀸 𑀦𑀢𑁆𑀣𑀺, 𑀢𑀢𑁆𑀣 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀦 𑀉𑀧𑁆𑀧𑀚𑁆𑀚𑀢𑀺, 𑀓𑁂𑀯𑀮𑀸𑀭𑀜𑁆𑀜𑀲𑀻𑀫𑀸𑀬𑁂𑀯 𑀢𑀢𑁆𑀣 𑀲𑀗𑁆𑀖𑁂𑀦 𑀓𑀫𑁆𑀫𑀁 𑀓𑀢𑁆𑀢𑀩𑁆𑀩𑀁 𑀦𑀤𑀻 𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀓𑁆𑀔𑀢𑀺 𑀳𑀺 𑀲𑀘𑁂 𑀦𑀤𑀻 𑀦𑀸𑀢𑀺𑀤𑀻𑀖𑀸 𑀳𑁄𑀢𑀺. 𑀧𑀪𑀯𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀼𑀔𑀤𑁆𑀯𑀸𑀭𑀸 𑀲𑀩𑁆𑀩𑀢𑁆𑀣 𑀲𑀗𑁆𑀖𑁄 𑀦𑀺𑀲𑀻𑀤𑀢𑀺, 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀓𑀫𑁆𑀫𑀁 𑀦𑀢𑁆𑀣𑀻’𑀢𑀺𑀆𑀤𑀺𑀁, 𑀇𑀫𑀺𑀦𑀸 𑀏𑀯 𑀯𑀘𑀦𑁂𑀦 𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀁 𑀲𑀻𑀫𑀸𑀧𑁂𑀓𑁆𑀔𑀸𑀬 𑀲𑀢𑀺 𑀏𑀯 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑀸𑀲𑀢𑀻𑀢𑀺 𑀤𑀝𑁆𑀞𑀩𑁆𑀩’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀉𑀤𑀓𑀼𑀓𑁆𑀔𑁂𑀧𑀁 𑀯𑀺𑀦𑀸𑀯 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑁄 𑀧𑀝𑁆𑀞𑀸𑀬 𑀲𑀻𑀫𑀸𑀧𑁂𑀓𑁆𑀔𑀸𑀬 𑀲𑀳𑁂𑀯 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀉𑀧𑁆𑀧𑀚𑁆𑀚𑀢𑀺 𑀢𑀲𑁆𑀫𑀸 𑀉𑀤𑀓𑀼𑀓𑁆𑀔𑁂𑀧𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑁂𑀯𑀸𑀢𑀺 𑀢𑁂 𑀏𑀯𑀁 𑀯𑀢𑁆𑀢𑀩𑁆𑀩𑀸 ‘‘𑀫𑀸 𑀲𑀧𑁆𑀧𑀼𑀭𑀺𑀲𑀸 𑀏𑀯𑀁 𑀯𑀤𑁂𑀬𑁆𑀬𑀸𑀣 𑀆𑀘𑀭𑀺𑀬𑀯𑀭𑀜𑁆𑀘 𑀫𑀸 𑀅𑀩𑁆𑀪𑀸𑀘𑀺𑀓𑁆𑀔𑀣 𑀇𑀤𑀜𑁆𑀘 𑀯𑀘𑀦𑀁 𑀆𑀘𑀭𑀺𑀬𑀯𑀭𑀲𑁆𑀲 𑀦𑁂𑀬𑁆𑀬𑀯𑀘𑀦𑀁, 𑀧𑀭𑀢𑁄𑀧𑀺 𑀆𑀘𑀭𑀺𑀬𑀯𑀭𑁄 𑀲𑀦𑁆𑀦𑀺𑀝𑁆𑀞𑀸𑀦𑀁 𑀯𑀓𑁆𑀔𑀢𑀺 𑀯𑀺𑀦𑀬𑀝𑁆𑀞𑀓𑀣𑀸𑀲𑀼𑀘𑁂𑀯 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀜𑁆𑀘 𑀯𑀼𑀢𑁆𑀢𑀯𑀘𑀦𑁂𑀳𑀺𑀧𑀺 𑀢𑀯 𑀯𑀘𑀦𑀁 𑀅𑀲𑀁𑀲𑀦𑁆𑀤𑁂𑀯, 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀫𑁂𑀯 𑀧𑀭𑀢𑁄 𑀯𑀼𑀢𑁆𑀢𑀯𑀘𑀦𑁂𑀦𑀸𑀧𑀺 𑀦 𑀖𑀝𑀺𑀬𑀢𑀺. 𑀓𑀣𑀁 𑀦𑁂𑀬𑁆𑀬𑀯𑀘𑀦𑀁 𑀳𑁄𑀢𑀻𑀢𑀺. ‘‘𑀲𑀻𑀫𑀸𑀧𑁂𑀓𑁆𑀔𑀸𑀬 𑀲𑀢𑀺 𑀏𑀯…𑀧𑁂… 𑀦𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀲𑀻𑀫𑀸𑀧𑁂𑀓𑁆𑀔𑀸𑀬 𑀯𑀺𑀦𑀸 𑀫𑀕𑁆𑀕𑀕𑀫𑀦𑀦𑁆𑀳𑀸𑀦𑀸𑀤𑀺 𑀅𑀢𑁆𑀣𑁂𑀳𑀺 𑀪𑀺𑀓𑁆𑀔𑀽𑀳𑀺 𑀅𑀭𑀜𑁆𑀜𑁂 𑀯𑀸 𑀦𑀤𑀻𑀆𑀤𑀻𑀲𑀼𑀧𑀺𑀯𑀸 𑀧𑀯𑀺𑀝𑁆𑀞𑀓𑁆𑀔𑀡𑁂𑀬𑁂𑀯 𑀦𑀼𑀧𑁆𑀧𑀚𑁆𑀚𑀢𑀺, 𑀲𑀻𑀫𑀸𑀧𑁂𑀓𑁆𑀔𑀸𑀬 𑀲𑀢𑀺𑀏𑀯 𑀅𑀭𑀜𑁆𑀜𑁂 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸’𑀢𑀺 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀼𑀭𑀽𑀧𑀁 𑀅𑀩𑁆𑀪𑀦𑁆𑀢𑀭𑀲𑀻𑀫𑀸 𑀉𑀧𑁆𑀧𑀚𑁆𑀚𑀢𑀺’ 𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑁂𑀲𑀼𑀧𑀺 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀫𑀦𑁆𑀢𑀸 𑀉𑀤𑀓𑀼𑀓𑁆𑀔𑁂’𑀧𑀸𑀢𑀺 𑀧𑀜𑁆𑀜𑀢𑁆𑀢 𑀲𑀺𑀓𑁆𑀔𑀸𑀧𑀤𑀸𑀦𑀼𑀭𑀽𑀧𑀁 𑀉𑀤𑀓𑀼𑀓𑁆𑀔𑁂𑀧𑁂𑀦 𑀲𑀳 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀉𑀧𑁆𑀧𑀚𑁆𑀚𑀢𑀺, 𑀦 𑀉𑀤𑀓𑀼𑀓𑁆𑀔𑁂𑀧𑁂𑀦 𑀯𑀺𑀦𑀸𑀢𑀺 𑀅𑀬𑀁 𑀦𑁂𑀬𑁆𑀬𑀢𑁆𑀣𑁄. 𑀦𑀸𑀲𑀢𑀻𑀢𑀺𑀏𑀢𑁆𑀣 𑀉𑀤𑀓𑀼𑀓𑁆𑀔𑁂𑀧𑁂𑀦 𑀯𑀺𑀦𑀸𑀢𑀺 𑀅𑀢𑁆𑀣𑁄𑀧𑀺 𑀦 𑀮𑀩𑁆𑀪𑀢𑁂. 𑀏𑀯𑀜𑁆𑀘 𑀲𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁 𑀬𑁂𑀯 𑀧𑀼𑀦 𑀢𑀢𑁆𑀣𑀸𑀢𑀺 𑀮𑁄𑀓𑀯𑁄𑀳𑀸𑀭𑀲𑀺𑀤𑁆𑀥𑀸𑀲𑀼 𑀏𑀢𑀸𑀲𑀼 𑀦𑀤𑀻𑀆𑀤𑀻𑀲𑀼 𑀢𑀻𑀲𑀼 𑀅𑀩𑀤𑁆𑀥𑀲𑀻𑀫𑀸𑀲𑀼 𑀧𑀼𑀦𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀁 𑀲𑀸𑀲𑀦𑀯𑁄𑀳𑀸𑀭𑀲𑀺𑀤𑁆𑀥𑀸𑀬 𑀅𑀩𑀤𑁆𑀥𑀲𑀻𑀫𑀸𑀬 𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀸𑀴𑀺𑀬𑀁 ‘‘𑀬𑀁 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲𑀸’’𑀢𑀺 𑀆𑀤𑀻𑀲𑀼 𑀉𑀤𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀔𑀺𑀧𑀺𑀬𑀢𑀺 𑀏𑀢𑁆𑀣𑀸𑀢𑀺 𑀉𑀤𑀓𑀼𑀓𑁆𑀔𑁂𑀧𑁄, 𑀉𑀤𑀓𑀲𑁆𑀲 𑀧𑀣𑀦𑁄𑀓𑀸𑀲𑁄, 𑀢𑀲𑁆𑀫𑀸 𑀉𑀤𑀓𑀼𑀓𑁆𑀔𑁂𑀧𑀸. 𑀅𑀬𑀜𑁆𑀳𑁂𑀢𑁆𑀣 𑀧𑀤𑀲𑀫𑁆𑀩𑀦𑁆𑀥𑀯𑀲𑁂𑀦 𑀅𑀢𑁆𑀣𑁄… ‘‘𑀧𑀭𑀺𑀲 𑀧𑀭𑀺𑀬𑀦𑁆𑀢𑀢𑁄 𑀧𑀝𑁆𑀞𑀸𑀬 𑀲𑀫𑀦𑁆𑀢𑀸 𑀬𑀸𑀯 𑀫𑀚𑁆𑀛𑀺𑀫𑀲𑁆𑀲 ¶ 𑀧𑀼𑀭𑀺𑀲𑀲𑁆𑀲 𑀉𑀤𑀓𑀼𑀓𑁆𑀔𑁂𑀧𑁄 𑀉𑀤𑀓𑀧𑀢𑀦𑀝𑁆𑀞𑀸𑀦𑀁, 𑀢𑀸𑀯 𑀬𑀁 𑀢𑀁 𑀧𑀭𑀺𑀘𑁆𑀙𑀺𑀦𑁆𑀦𑀁 𑀝𑁆𑀞𑀸𑀦𑀁, 𑀅𑀬𑀁 𑀢𑀢𑁆𑀣 𑀦𑀤𑀻𑀆𑀤𑀻𑀲𑀼 𑀅𑀧𑀭𑀸 𑀲𑀫𑀸𑀦𑀲𑀁𑀯𑀸𑀲𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸’’𑀢𑀺 𑀯𑀼𑀢𑁆𑀢𑀅𑀢𑁆𑀣𑀧𑀤𑁂𑀳𑀺𑀧𑀺 𑀲𑀫𑀸𑀦𑀁 𑀪𑀯𑁂𑀬𑁆𑀬 𑀆𑀘𑀭𑀺𑀬𑀫𑁂𑀯 𑀳𑀺 𑀓𑁂𑀘𑀺𑀧𑀦 𑀲𑀫𑀦𑁆𑀢𑀸 𑀅𑀩𑁆𑀪𑀦𑁆𑀢𑀭𑀁 𑀫𑀺𑀦𑀺𑀢𑁆𑀯𑀸 𑀧𑀭𑀺𑀘𑁆𑀙𑁂𑀤𑀓𑀭𑀡𑁂𑀦𑁂𑀯 𑀲𑀻𑀫𑀸 𑀲𑀜𑁆𑀚𑀸𑀬𑀢𑀺, 𑀦 𑀲𑀬𑀫𑁂𑀯𑀸𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀪𑀦𑁆𑀢𑁆𑀬𑀸𑀤𑀺𑀦𑀸 𑀓𑁂𑀘𑀺𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀺𑀦𑀦𑀔𑀺𑀧𑀦𑁂 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀘 𑀬𑀁 𑀧𑀦𑁂𑀢𑁆𑀣 𑀅𑀩𑁆𑀪𑀦𑁆𑀢𑀭𑀫𑀺𑀦𑀦𑀧𑁆𑀧𑀫𑀸𑀡𑀲𑁆𑀲 𑀯𑀸𑀮𑀺𑀓𑀸𑀤𑀺𑀔𑀺𑀧𑀦𑀓𑀫𑁆𑀫𑀲𑁆𑀲 𑀘 𑀤𑀲𑁆𑀲𑀦𑀁, 𑀢𑀁 𑀲𑀬𑀁𑀚𑀸𑀢𑀲𑀻𑀫𑀸𑀦𑀁 𑀞𑀺𑀢𑀝𑁆𑀞𑀸𑀦𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁆𑀣𑀁 𑀓𑀢𑀁, 𑀕𑀸𑀫𑀽𑀧𑀘𑀸𑀭𑀖𑀭𑀽𑀧𑀘𑀸𑀭𑀚𑀸𑀦𑀦𑀢𑁆𑀣𑀁 𑀮𑁂𑀟𑁆𑀟𑀼𑀲𑀼𑀧𑁆𑀧𑀸𑀤𑀺𑀔𑀺𑀧𑀦𑀯𑀺𑀚𑀸𑀦𑀦𑀤𑀲𑁆𑀲𑀦𑀁 𑀯𑀺𑀬, 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 𑀲𑀻𑀫𑀁 𑀯𑀸 𑀩𑀦𑁆𑀥𑀦𑁆𑀢𑀺 𑀉𑀤𑀓𑀼𑀓𑁆𑀔𑁂𑀧𑀁 𑀯𑀸 𑀧𑀭𑀺𑀘𑁆𑀙𑁂𑀤’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀓𑀢𑁂𑀧𑀺 𑀢𑀲𑁆𑀲 𑀧𑀭𑀺𑀘𑁆𑀙𑁂𑀤𑀲𑁆𑀲 𑀧𑀪𑀯𑀢𑁄 𑀜𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑁂𑀦 𑀣𑀽𑀮𑀢𑁄 𑀜𑀢𑁆𑀯𑀸 𑀅𑀦𑁆𑀢𑁄𑀢𑀺𑀝𑁆𑀞𑀦𑁆𑀢𑁂𑀳𑀺 𑀦𑀺𑀭𑀸𑀲𑀗𑁆𑀓𑀝𑁆𑀞𑀸𑀦𑁂 𑀞𑀸𑀢𑀩𑁆𑀩𑀁 𑀅𑀜𑁆𑀜𑀁 𑀩𑀳𑀺𑀓𑀭𑁄𑀦𑁆𑀢𑁂𑀳𑀺 𑀅𑀢𑀺𑀤𑀽𑀭𑁂 𑀦𑀺𑀭𑀸𑀲𑀗𑁆𑀓𑀝𑁆𑀞𑀸𑀦𑁂 𑀧𑁂𑀲𑁂𑀢𑀩𑁆𑀩𑀦𑁆𑀢𑀺 𑀯𑀸, 𑀢𑀲𑁆𑀫𑀸 𑀬𑀣𑀸 𑀯𑀼𑀢𑁆𑀢𑀲𑀻𑀫𑀸𑀧𑁂𑀓𑁆𑀔𑀯𑀲𑁂𑀦𑁂𑀯 𑀢𑀸𑀲𑀁 𑀲𑀢𑁆𑀢𑀩𑁆𑀪𑀦𑁆𑀢𑀭𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀦𑀁 𑀉𑀧𑁆𑀧𑀢𑁆𑀢𑀺, 𑀢𑀩𑁆𑀩𑀺𑀕𑀫𑁂𑀦 𑀯𑀺𑀦𑀸𑀲𑁄 𑀘 𑀕𑀳𑁂𑀢𑀩𑁆𑀩𑁄𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁, 𑀅𑀜𑁆𑀜𑁄 𑀯𑀸 𑀧𑀓𑀸𑀭𑁄 𑀇𑀢𑁄 𑀬𑀼𑀢𑁆𑀢𑀢𑀭𑁄 𑀕𑀯𑁂𑀲𑀺𑀢𑀩𑁆𑀩𑁄’𑀢𑀺 𑀆𑀳. 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀅𑀜𑁆𑀜𑁄 𑀯𑀸 𑀧𑀓𑀸𑀭𑁄 𑀇𑀢𑁄 𑀬𑀼𑀢𑁆𑀢𑀢𑀭𑁄 𑀕𑀯𑁂𑀲𑀺𑀢𑀩𑁆𑀩𑁄’𑀢𑀺 𑀇𑀫𑀺𑀦𑀸 𑀆𑀘𑀭𑀺𑀬𑀲𑁆𑀲 𑀯𑀘𑀦𑁂𑀦 𑀇𑀫𑀲𑁆𑀲 𑀯𑀘𑀦𑀲𑁆𑀲 𑀅𑀢𑁆𑀢𑀦𑁄𑀫𑀢𑀺𑀪𑀸𑀯𑀜𑁆𑀘 𑀆𑀘𑀭𑀺𑀬𑀲𑁆𑀲 𑀅𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀺. 𑀇𑀤𑀜𑁆𑀘 𑀯𑀘𑀦𑀁 𑀦 𑀪𑀕𑀯𑀢𑁄 𑀧𑀘𑁆𑀘𑀓𑁆𑀔𑀯𑀘𑀦𑀁, 𑀦𑀸𑀧𑀺𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑀸𑀦𑀁 𑀯𑀘𑀦𑀁, 𑀢𑀺𑀲𑁆𑀲𑁄𑀧𑀺 𑀲𑀗𑁆𑀕𑀻𑀢𑀺𑀬𑁄 𑀅𑀦𑀸𑀭𑀽𑀴𑁆𑀳𑀸, 𑀦𑀸𑀧𑀺 𑀅𑀝𑁆𑀞𑀓𑀣𑀸𑀬 𑀲𑀁𑀯𑀡𑁆𑀡𑀦𑀸𑀘𑀭𑀺𑀬𑀲𑁆𑀲 𑀯𑀸𑀤𑀧𑁆𑀧𑀓𑀸𑀲𑀦𑀫𑁂𑀯 𑀢𑀲𑁆𑀫𑀸 𑀅𑀲𑀮𑁆𑀮𑀓𑁆𑀔𑀺𑀢𑀩𑁆𑀩𑀫𑁂𑀯 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀫𑁆𑀧𑀺 𑀲𑀘𑁂 𑀦𑀤𑀻 𑀦𑀸𑀢𑀺𑀤𑀻𑀖𑀸 𑀳𑁄𑀢𑀻𑀢𑀺 𑀇𑀫𑀺𑀲𑁆𑀲𑀸 𑀲𑀁𑀯𑀡𑁆𑀡𑀦𑀸𑀥𑀺𑀓𑀸𑀭𑁂 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀓𑀫𑁆𑀫𑀁 𑀦𑀢𑁆𑀣𑀻𑀢𑀺 𑀬𑀲𑁆𑀫𑀸 𑀲𑀩𑁆𑀩𑁄𑀧𑀺 𑀦𑀤𑀻𑀧𑀤𑁂𑀲𑁄 𑀪𑀺𑀓𑁆𑀔𑀽𑀳𑀺 𑀅𑀚𑁆𑀛𑁄𑀢𑁆𑀣𑀝𑁄, 𑀢𑀲𑁆𑀫𑀸 𑀲𑀫𑀦𑁆𑀢𑀢𑁄 𑀦𑀤𑀺𑀬𑀸 𑀅𑀪𑀸𑀯𑀸 𑀉𑀤𑀓𑀼𑀓𑁆𑀔𑁂𑀧𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀻’𑀢𑀺 𑀯𑀼𑀢𑁆𑀢𑀁 𑀢𑀣𑀸 𑀳𑀺 𑀲𑀫𑀦𑁆𑀢𑀢𑁄 𑀦𑀤𑀺𑀬𑀸 𑀅𑀪𑀸𑀯𑀸 𑀉𑀤𑀓𑀼𑀓𑁆𑀔𑁂𑀧𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀻’𑀢𑀺𑀇𑀫𑀲𑁆𑀲 𑀅𑀦𑁆𑀯𑀬𑀯𑀲𑁂𑀦 𑀯𑀸 𑀅𑀢𑁆𑀣𑀸𑀧𑀢𑁆𑀢𑀺𑀯𑀲𑁂𑀦 𑀯𑀸 𑀲𑀫𑀦𑁆𑀢𑀢𑁄 𑀦𑀤𑀺𑀬𑀸 𑀪𑀸𑀯𑁂 𑀲𑀢𑀺 𑀉𑀤𑀓𑀼𑀓𑁆𑀔𑁂𑀧𑁂𑀦 𑀧𑀬𑁄𑀚𑀦𑀁 𑀅𑀢𑁆𑀣𑁂𑀯 𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀦𑁆𑀢𑀺 𑀅𑀢𑁆𑀣𑁄 𑀮𑀩𑁆𑀪𑀢𑁂 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀺𑀬𑀫𑁆𑀧𑀺 ‘‘𑀲𑀫𑀦𑁆𑀢𑀸 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄𑀢𑀺 𑀧𑀳𑁄𑀦𑀓𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀬𑀢𑁆𑀣 𑀧𑀦 𑀓𑀼𑀦𑁆𑀦𑀤𑀺𑀬𑀁 𑀦𑀧𑁆𑀧𑀳𑁄𑀢𑀺. 𑀢𑀢𑁆𑀣 𑀧𑀳𑁄𑀦𑀓𑀝𑁆𑀞𑀸𑀦𑁂 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑁄 ¶ 𑀓𑀸𑀢𑀩𑁆𑀩𑁄’𑀢𑀺𑀯𑀼𑀢𑁆𑀢𑀁. 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀲𑀻𑀫𑀸𑀧𑁂𑀓𑁆𑀔𑀸𑀬 𑀲𑀳 𑀉𑀤𑀓𑀼𑀓𑁆𑀔𑁂𑀧𑀁 𑀯𑀺𑀦𑀸 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀢𑀣𑀸 𑀳𑀺 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑀓𑁂 𑀓𑀢𑁆𑀢𑀸𑀭𑁂 𑀅𑀲𑀢𑀺 𑀓𑀣𑀁 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄 𑀪𑀯𑁂𑀬𑁆𑀬 𑀢𑀲𑁆𑀫𑀸 ‘‘𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀁 𑀲𑀻𑀫𑀸𑀧𑁂𑀓𑁆𑀔𑀸𑀬 𑀲𑀢𑀺 𑀏𑀯 𑀉𑀤𑀓𑀼𑀓𑁆𑀔𑁂𑀧𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑀸𑀲𑀢𑀻’𑀢𑀺 𑀇𑀤𑀁 𑀯𑀘𑀦𑀁 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀜𑁆𑀘 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀜𑁆𑀘 𑀯𑀼𑀢𑁆𑀢𑀯𑀘𑀦𑁂𑀳𑀺 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀁 𑀯𑀺𑀬 𑀤𑀺𑀲𑁆𑀲𑀢𑀺 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁𑀬𑁂𑀯 𑀘 ‘‘𑀫𑀳𑁄𑀖𑁂𑀦 𑀧𑀦 𑀉𑀦𑁆𑀦𑀢𑀝𑁆𑀞𑀸𑀦𑀢𑁄 𑀦𑀺𑀦𑁆𑀦𑀝𑁆𑀞𑀸𑀦𑁂 𑀧𑀢𑀦𑁆𑀢𑁂𑀦 𑀔𑀢𑁄 𑀔𑀼𑀤𑁆𑀤𑀓𑁄 𑀯𑀸 𑀫𑀳𑀦𑁆𑀢𑁄 𑀯𑀸 𑀮𑀓𑁆𑀔𑀡𑀬𑀼𑀢𑁆𑀢𑁄 𑀚𑀸𑀢𑀲𑁆𑀲𑀭𑁄𑀯 𑀏𑀢𑁆𑀣𑀸𑀧𑀺 𑀔𑀼𑀤𑁆𑀤𑀓𑁂 𑀉𑀤𑀓𑀼𑀓𑁆𑀔𑁂𑀧𑀓𑀺𑀘𑁆𑀘𑀁 𑀦𑀢𑁆𑀣𑀺 𑀲𑀫𑀼𑀤𑁆𑀤𑁂 𑀧𑀦 𑀲𑀩𑁆𑀩𑀣𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬𑀫𑁂𑀯 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀲𑁄𑀥𑁂𑀢𑀼𑀁 𑀤𑀼𑀓𑁆𑀓𑀭𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁 𑀢𑀣𑀸 𑀳𑀺 𑀅𑀬𑀫𑀸𑀘𑀭𑀺𑀬𑀯𑀭𑁄 𑀧𑀼𑀩𑁆𑀩𑁂 ‘‘𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀁 𑀲𑀻𑀫𑀸𑀧𑁂𑀓𑁆𑀔𑀸𑀬 𑀲𑀢𑀺 𑀏𑀯 𑀉𑀤𑀓𑀼𑀓𑁆𑀔𑁂𑀧𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑀸𑀲𑀢𑀻’’𑀢𑀺 𑀯𑀢𑁆𑀯𑀸 𑀧𑀭𑀢𑁄 𑀓𑀣𑀫𑀸𑀘𑀭𑀺𑀬𑀯𑀭𑁂𑀦 ‘‘𑀏𑀢𑁆𑀣𑀸𑀧𑀺 𑀔𑀼𑀤𑁆𑀤𑀓𑁂 𑀉𑀤𑀓𑀼𑀓𑁆𑀔𑁂𑀧𑀓𑀺𑀘𑁆𑀘𑀁 𑀦𑀢𑁆𑀣𑀺’’𑀢𑁆𑀬𑀸𑀤𑀺𑀯𑀘𑀦𑀫𑀼𑀘𑁆𑀘𑀢𑁂, 𑀢𑀢𑁆𑀣𑀸𑀬𑀁 𑀯𑀺𑀕𑁆𑀕𑀳𑁄 𑀉𑀤𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀔𑀺𑀧𑀻𑀬𑀢𑀺 𑀏𑀢𑁆𑀣𑀸𑀢𑀺 𑀉𑀤𑀓𑀼𑀓𑁆𑀔𑁂𑀧𑁄 𑀉𑀤𑀓𑀲𑁆𑀲 𑀧𑀢𑀦𑁄𑀓𑀸𑀲𑁄 𑀓𑀺𑀦𑁆𑀢𑀼𑀁, 𑀞𑀸𑀦𑀁 𑀓𑀭𑀺𑀢𑀩𑁆𑀩𑀁 𑀓𑀺𑀘𑁆𑀘𑀁 𑀓𑀭 𑀓𑀭𑀡𑁂𑀢𑀺 𑀥𑀸𑀢𑀼 𑀭𑀺𑀘𑁆𑀘𑀧𑀘𑁆𑀘𑀬𑁄 𑀬𑀁. ‘‘𑀅𑀚𑁆𑀚𑁂𑀯 𑀓𑀺𑀘𑁆𑀘𑀁 𑀆𑀢𑀧𑁆𑀧’’𑀦𑁆𑀢𑀺 𑀬𑀣𑀸, 𑀉𑀤𑀓𑀼𑀓𑁆𑀔𑁂𑀧𑀲𑁆𑀲 𑀓𑀺𑀘𑁆𑀘𑀁 𑀓𑀭𑀡𑀁 𑀉𑀤𑀓𑀼𑀓𑁆𑀔𑁂𑀧𑀓𑀺𑀘𑁆𑀘𑀁. 𑀲𑀫𑀼𑀤𑁆𑀤𑁂 𑀧𑀦𑀸 𑀢𑀺 𑀏𑀢𑁆𑀣 𑀧𑀦 𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑁄, 𑀧𑀓𑁆𑀔𑀦𑁆𑀢𑀭𑀢𑁆𑀣𑁄𑀢𑀺𑀧𑀺 𑀅𑀧𑀭𑁂 𑀯𑀺𑀲𑁂𑀲𑀢𑁆𑀣𑁂 𑀧𑀦 𑀦𑀤𑀻𑀚𑀸𑀢𑀲𑁆𑀲𑀭𑁂𑀲𑀼 𑀫𑀳𑀦𑁆𑀢𑁂𑀲𑀼 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬𑀫𑁂𑀯 𑀓𑀸𑀢𑀩𑁆𑀩𑀁, 𑀔𑀼𑀤𑁆𑀤𑀓𑁂 𑀧𑀦 𑀓𑁂𑀯𑀮𑁂 𑀦𑀤𑀻𑀚𑀸𑀢𑀲𑁆𑀲𑀭𑁂𑀧𑀺 𑀓𑀸𑀢𑀩𑁆𑀩𑀁 𑀲𑀫𑀼𑀤𑁆𑀤𑁂 𑀧𑀦 𑀯𑀺𑀲𑁂𑀲𑀢𑁄 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬𑀫𑁂𑀯 𑀓𑀸𑀢𑀩𑁆𑀩𑀦𑁆𑀢𑀺 𑀅𑀬𑀁 𑀧𑀦 𑀲𑀤𑁆𑀤𑀲𑁆𑀲 𑀯𑀺𑀲𑁂𑀲𑀢𑁆𑀣𑁄. 𑀲𑀩𑁆𑀩𑀣𑀸 𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁. 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬𑀫𑁂𑀯𑀸 𑀢𑀺 𑀏𑀢𑁆𑀣 𑀏𑀯𑀓𑀸𑀭𑁄 𑀲𑀦𑁆𑀦𑀺𑀝𑁆𑀞𑀸𑀦𑀢𑁆𑀣𑁄, 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬𑀫𑁂𑀯 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀦 𑀲𑀫𑀼𑀤𑁆𑀤𑀲𑀻𑀫𑀸𑀬 𑀓𑀤𑀸𑀘𑀻𑀢𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑁂𑀯. 𑀦𑀤𑀻𑀚𑀸𑀢𑀲𑁆𑀲𑀭𑁂𑀲𑀼 𑀧𑀦 𑀫𑀳𑀦𑁆𑀢𑁂𑀲𑀼 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀓𑀸𑀢𑀩𑁆𑀩𑀁, 𑀔𑀼𑀤𑁆𑀤𑀓𑁂 𑀦𑀤𑀻𑀚𑀸𑀢𑀲𑁆𑀲𑀭𑁂𑀬𑁂𑀯 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀅𑀬𑀁 𑀅𑀢𑁆𑀣𑁄 𑀲𑀸𑀫𑀢𑁆𑀣𑀺𑀬𑀢𑁄 𑀮𑀩𑁆𑀪𑀢𑁂𑀯 𑀦𑀤𑀻𑀚𑀸𑀢𑀲𑁆𑀲𑀭𑁂𑀲𑀼 𑀔𑀼𑀤𑁆𑀤𑀓𑀫𑀳𑀦𑁆𑀢𑀪𑀸𑀯𑁂𑀦 𑀦𑀤𑀻𑀚𑀸𑀢𑀲𑁆𑀲𑀭𑀉𑀤𑀓𑀼𑀓𑁆𑀔𑁂𑀧𑀸𑀢𑀺 𑀤𑁆𑀯𑁂 𑀤𑁆𑀯𑁂 𑀲𑀻𑀫𑀸 𑀮𑀩𑁆𑀪𑀦𑁆𑀢𑀺 𑀲𑀫𑀼𑀤𑁆𑀤𑁂 𑀧𑀦 𑀓𑀲𑁆𑀫𑀸 𑀲𑀫𑀼𑀤𑁆𑀤𑀉𑀤𑀓𑀼𑀓𑁆𑀔𑁂𑀧𑀯𑀲𑁂𑀦 𑀤𑁆𑀯𑁂 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀲𑀫𑀼𑀤𑁆𑀤𑁂 𑀧𑀦 𑀓𑀲𑁆𑀫𑀸 𑀲𑀫𑀼𑀤𑁆𑀤𑀉𑀤𑀓𑀼𑀓𑁆𑀔𑁂𑀧𑀯𑀲𑁂𑀦 𑀤𑁆𑀯𑁂 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀘𑁄𑀤𑀦𑀁 𑀫𑀦𑀲𑀺𑀲𑀦𑁆𑀥𑀸𑀬𑀸𑀳 ‘‘𑀲𑁄𑀥𑁂𑀢𑀼𑀁 𑀤𑀼𑀓𑁆𑀓𑀭𑀢𑁆𑀢𑀸’’𑀢𑀺. 𑀢𑀢𑁆𑀣 𑀲𑁄𑀥𑁂𑀢𑀼𑀁 𑀤𑀼𑀓𑁆𑀓𑀭𑀢𑁆𑀢𑀸 𑀢𑀺 𑀲𑀫𑀼𑀤𑁆𑀤𑀲𑁆𑀲 𑀅𑀢𑀺𑀫𑀳𑀦𑁆𑀢𑀪𑀸𑀯𑁂𑀦 𑀲𑀫𑀼𑀤𑁆𑀤𑀫𑁄𑀢𑀺𑀡𑁆𑀡𑁂 𑀪𑀺𑀓𑁆𑀔𑀽 ¶ 𑀳𑀢𑁆𑀣𑀧𑀸𑀲𑀦𑀬𑀦𑀁 𑀯𑀸 𑀩𑀳𑀺𑀲𑀫𑀼𑀤𑁆𑀤𑀓𑀭𑀡𑀁 𑀯𑀸 𑀓𑀸𑀢𑀼𑀁 𑀅𑀢𑀺𑀤𑀼𑀓𑁆𑀓𑀭𑀁 𑀢𑀲𑁆𑀫𑀸 𑀲𑀩𑁆𑀩𑀣𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬𑀫𑁂𑀯 𑀓𑀸𑀢𑀩𑁆𑀩𑀦𑁆𑀢𑀺 𑀅𑀬𑀫𑀸𑀘𑀭𑀺𑀬𑀯𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀬𑀤𑀺 𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀁 𑀲𑀻𑀫𑀸𑀧𑁂𑀓𑁆𑀔𑀸𑀬 𑀲𑀢𑀺 𑀏𑀯 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀏𑀯𑀁 𑀲𑀢𑀺 𑀲𑀫𑀼𑀤𑁆𑀤𑀫𑁄𑀢𑀺𑀡𑁆𑀡𑁂 𑀪𑀺𑀓𑁆𑀔𑀼𑀲𑀫𑀽𑀳𑁂𑀯 𑀳𑀢𑁆𑀣𑀧𑀸𑀲𑀢𑁄 𑀩𑀳𑀺 𑀓𑀭𑁂𑀬𑁆𑀬, 𑀏𑀯𑀜𑁆𑀘 𑀲𑀢𑀺 𑀲𑁄𑀥𑁂𑀢𑀼𑀁 𑀤𑀼𑀓𑁆𑀓𑀭𑀢𑁆𑀢𑀸’𑀢𑀺 𑀳𑁂𑀢𑀼𑀧𑀤𑀫𑁆𑀧𑀺 𑀦𑀺𑀭𑀢𑁆𑀣𑀓𑀁 𑀪𑀯𑁂𑀬𑁆𑀬 𑀦 𑀧𑀦𑁂𑀯𑀁 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀢𑁂𑀦 𑀜𑀸𑀬𑀢𑀺 ‘‘𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀁 𑀉𑀤𑀓𑀼𑀓𑁆𑀔𑁂𑀧𑀧𑀬𑁄𑀚𑀦’’𑀦𑁆𑀢𑀺. 𑀅𑀧𑀺𑀘 𑀢𑁂𑀲𑀁 𑀆𑀘𑀭𑀺𑀬𑀸𑀦𑀁 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀫𑀬𑀁 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀦 𑀓𑀭𑁄𑀫, 𑀓𑁂𑀯𑀮𑀁 𑀲𑀫𑀼𑀤𑁆𑀤𑁂𑀬𑁂𑀯 𑀓𑀭𑁄𑀫𑀸’’𑀢𑀺 𑀇𑀘𑁆𑀙𑀫𑀸𑀦𑁂 𑀲𑀢𑀺 𑀓𑀣𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀫𑀢𑁂𑀦 𑀲𑀻𑀫𑀸𑀧𑁂𑀓𑁆𑀔𑀸𑀬 𑀲𑀳𑁂𑀯 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀲𑀫𑁆𑀪𑀯𑀢𑁄 𑀕𑀢𑀕𑀢𑀝𑁆𑀞𑀸𑀦𑁂 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀪𑀯𑁂𑀬𑁆𑀬 𑀏𑀯𑀜𑁆𑀘 𑀲𑀢𑀺 ‘‘𑀲𑀫𑀼𑀤𑁆𑀤𑁂 𑀧𑀦 𑀲𑀩𑁆𑀩𑀣𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬𑀫𑁂𑀯 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀲𑁄𑀥𑁂𑀢𑀼𑀁 𑀤𑀼𑀓𑁆𑀓𑀭𑀢𑁆𑀢𑀸’’𑀢𑀺 𑀯𑀘𑀦𑀫𑁆𑀧𑀺 𑀦𑀺𑀭𑀢𑁆𑀣𑀓𑀁 𑀪𑀯𑁂𑀬𑁆𑀬 𑀏𑀯𑀜𑁆𑀘 𑀧𑀦 𑀯𑀤𑁂𑀬𑁆𑀬… 𑀲𑀩𑁆𑀩𑀲𑁄 𑀲𑀫𑀼𑀤𑁆𑀤𑀲𑀻𑀫𑀸𑀬 𑀅𑀮𑀩𑁆𑀪𑀫𑀸𑀦𑀢𑀁 𑀲𑀦𑁆𑀥𑀸𑀬 ‘‘𑀲𑀫𑀼𑀤𑁆𑀤𑁂 𑀧𑀦𑀸’’𑀢𑁆𑀬𑀸𑀤𑀺𑀯𑀘𑀦𑀁 𑀆𑀘𑀭𑀺𑀬𑀯𑀭𑁂𑀦 𑀯𑀼𑀢𑁆𑀢𑀦𑁆𑀢𑀺 𑀢𑀣𑀸𑀧𑀺 𑀦 𑀯𑀢𑁆𑀢𑀩𑁆𑀩𑀁 𑀓𑀲𑁆𑀫𑀸 𑀏𑀯𑀜𑁆𑀘 𑀅𑀢𑁆𑀣𑁂 𑀇𑀘𑁆𑀙𑀫𑀸𑀦𑁂 𑀲𑀢𑀺 ‘‘𑀲𑀫𑀼𑀤𑁆𑀤𑁂 𑀧𑀦 𑀲𑀩𑁆𑀩𑀢𑁆𑀣 𑀉𑀤𑀓𑀼𑀓𑁆𑀔𑁂 𑀧𑀲𑀻𑀫𑀸𑀯 𑀮𑀩𑁆𑀪𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 𑀦𑀦𑁂𑀯𑀁 𑀯𑀼𑀢𑁆𑀢𑀁. 𑀅𑀣𑀯𑀸 𑀧𑀓𑀭𑀡𑀸𑀤𑀺𑀯𑀲𑁂𑀦 𑀲𑀤𑁆𑀤𑀢𑁆𑀣𑁂 𑀯𑀺𑀪𑀚𑁆𑀚𑀻𑀬𑀫𑀸𑀦𑁂𑀧𑀺 𑀯𑀺𑀭𑀼𑀚𑁆𑀛𑀢𑁂𑀯 𑀓𑀣𑀁 𑀲𑀁𑀬𑁄𑀕𑀯𑀲𑁂𑀦 ‘‘𑀲𑀯𑀘𑁆𑀙𑀁 𑀥𑁂𑀦𑀼𑀫𑀸𑀦𑁂𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀕𑀸𑀯𑀻’’𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀦 𑀯𑀴𑀯𑀸. ‘‘𑀅𑀯𑀘𑁆𑀙𑀁 𑀥𑁂𑀦𑀼’’𑀦𑁆𑀢𑀺 𑀯𑀼𑀢𑁆𑀢𑁂 𑀕𑀸𑀯𑀻𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀦 𑀯𑀴𑀯𑀸𑀢𑀺 𑀏𑀢𑁆𑀣 𑀯𑀺𑀬 𑀓𑀤𑀸𑀘𑀺𑀧𑀺 𑀏𑀯𑀲𑀤𑁆𑀤𑁂𑀦 𑀦𑀺𑀯𑀢𑁆𑀢𑁂𑀢𑀩𑁆𑀩𑀲𑁆𑀲 𑀲𑀫𑀼𑀤𑁆𑀤𑀲𑁆𑀲 𑀦𑀤𑀺𑀬𑀫𑀺𑀯 𑀦𑀸𑀢𑀺𑀤𑀻𑀖𑀪𑀸𑀯𑁂 𑀅𑀮𑀩𑁆𑀪𑀫𑀸𑀦𑁂 𑀲𑀢𑀺 ‘‘𑀲𑀫𑀼𑀤𑁆𑀤𑁂 𑀧𑀦 𑀲𑀩𑁆𑀩𑀣𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬𑀫𑁂𑀯 𑀓𑀫𑁆𑀫𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀏𑀯𑀓𑀸𑀭𑁂𑀦 𑀅𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀣𑀸 𑀳𑀺 𑀲𑀁𑀬𑁄𑀕𑀯𑀺𑀧𑁆𑀧𑀬𑁄𑀕𑀯𑀲𑁂𑀦 ‘‘𑀲𑀯𑀘𑁆𑀙𑀁 𑀥𑁂𑀦𑀼𑀁, 𑀅𑀯𑀘𑁆𑀙𑀁 𑀥𑁂𑀦𑀼’’𑀦𑁆𑀢𑀺 𑀯𑀼𑀢𑁆𑀢𑁂 𑀕𑀸𑀯𑀻𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀦 𑀯𑀴𑀯𑀸. 𑀯𑀴𑀯𑀸 𑀘 𑀦𑀸𑀫 𑀬𑁄𑀦𑀺𑀫𑀕𑁆𑀕𑀲𑁆𑀲 𑀅𑀢𑀺𑀲𑀫𑁆𑀩𑀸𑀥𑀢𑁆𑀢𑀸 𑀯𑀺𑀚𑀸𑀬𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀕𑀩𑁆𑀪𑀲𑁆𑀲 𑀧𑀭𑀺𑀡𑀢𑀓𑀸𑀮𑁂 𑀓𑀼𑀘𑁆𑀙𑀺𑀁 𑀨𑀸𑀮𑁂𑀢𑁆𑀯𑀸 𑀆𑀚𑀜𑁆𑀜𑀧𑁄𑀢𑀓𑀁 𑀕𑀡𑁆𑀳𑀦𑁆𑀢𑀺 𑀏𑀯𑀁 𑀏𑀓𑀕𑀩𑁆𑀪𑁂𑀦𑁂𑀯 𑀫𑀭𑀦𑁆𑀢𑀺 𑀢𑀲𑁆𑀫𑀸 ‘‘𑀯𑀴𑀯𑀁 𑀲𑀯𑀘𑁆𑀙’’𑀦𑁆𑀢𑀺𑀯𑀸 𑀅𑀯𑀘𑁆𑀙’’𑀦𑁆𑀢𑀺 𑀯𑀸 𑀯𑀢𑁆𑀢𑀼𑀁 𑀦𑀸𑀭𑀳𑀢𑀺 𑀏𑀯𑀫𑁂𑀯 𑀓𑀤𑀸𑀘𑀺𑀧𑀺 𑀦𑀸𑀢𑀺𑀤𑀻𑀖𑀲𑀫𑀼𑀤𑁆𑀤𑀲𑁆𑀲𑀧𑀺 𑀅𑀦𑀼𑀧𑀮𑀩𑁆𑀪𑀫𑀸𑀦𑀢𑁆𑀢𑀸 𑀢𑀁 𑀦𑀺𑀯𑀢𑁆𑀢𑀸𑀧𑀓𑁂𑀦 𑀏𑀯𑀲𑀤𑁆𑀤𑁂𑀦 ‘‘𑀲𑀫𑀼𑀤𑁆𑀤𑁂 𑀧𑀦 𑀲𑀩𑁆𑀩𑀣𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬𑀫𑁂𑀯 𑀓𑀫𑁆𑀫𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀅𑀧𑀤𑀺𑀲𑀺𑀢𑀼𑀁 𑀦𑀸𑀭𑀳𑀢𑀺𑀬𑁂𑀯 𑀢𑀲𑁆𑀫𑀸 𑀉𑀤𑀓𑀼𑀓𑁆𑀔𑁂𑀧𑁂𑀦 𑀲𑀻𑀫𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀦𑀺𑀝𑁆𑀞𑀫𑁂𑀢𑁆𑀣𑀸𑀯 𑀕𑀦𑁆𑀢𑀩𑁆𑀩𑀁 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀯𑀜𑁆𑀘 𑀅𑀢𑁆𑀣𑁂 𑀇𑀘𑁆𑀙𑀫𑀸𑀦𑁂 𑀲𑀢𑀺 𑀲𑀫𑀼𑀤𑁆𑀤𑁂 𑀧𑀦 ¶ 𑀲𑀩𑁆𑀩𑀣𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀯 𑀮𑀩𑁆𑀪𑀢𑀻𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 𑀦 𑀧𑀦𑁂𑀯𑀁 𑀯𑀼𑀢𑁆𑀢’’𑀦𑁆𑀢𑀺 𑀢𑁂𑀦 𑀜𑀸𑀬𑀢𑀺 𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀁 𑀯𑀸𑀮𑀺𑀓𑀸𑀤𑀻𑀳𑀺 𑀔𑀺𑀧𑀦𑀦𑁆𑀢𑀺 𑀅𑀧𑀺𑀘 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀁𑀬𑁂𑀯 ‘‘𑀕𑀘𑁆𑀙𑀦𑁆𑀢𑀺𑀬𑀸 𑀧𑀦 𑀦𑀸𑀯𑀸𑀬 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀓𑀲𑁆𑀫𑀸 𑀉𑀤𑀓𑀼𑀓𑁆𑀔𑁂𑀧𑀫𑀢𑁆𑀢𑀫𑁂𑀯 𑀳𑀺 𑀲𑀻𑀫𑀸, 𑀢𑀁 𑀦𑀸𑀯𑀸 𑀲𑀻𑀖𑀫𑁂𑀯 𑀅𑀢𑀺𑀓𑁆𑀓𑀫𑁂𑀢𑀺 𑀏𑀯𑀁 𑀲𑀢𑀺 𑀅𑀜𑁆𑀜𑀺𑀲𑁆𑀲𑀸 𑀲𑀻𑀫𑀸𑀬 𑀜𑀢𑁆𑀢𑀺, 𑀅𑀜𑁆𑀜𑀺𑀲𑁆𑀲𑀸 𑀅𑀦𑀼𑀲𑀸𑀯𑀦𑀸 𑀳𑁄𑀢𑀻’’𑀢𑀺 𑀇𑀫𑀲𑁆𑀲 𑀲𑀁𑀯𑀡𑁆𑀡𑀦𑀸𑀥𑀺𑀓𑀸𑀭𑁂 𑀢𑀦𑁆𑀢𑀺 𑀲𑀻𑀫𑀁. 𑀲𑀻𑀖𑀫𑁂𑀯 𑀅𑀢𑀺𑀓𑁆𑀓𑀫𑁂𑀢𑀻𑀢𑀺 𑀇𑀫𑀺𑀦𑀸 𑀢𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀦𑁆𑀢𑁄 𑀏𑀯 𑀧𑀭𑀺𑀯𑀢𑁆𑀢𑀫𑀸𑀦𑀸𑀬 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑀤𑀢𑁆𑀣𑀫𑁂𑀯 𑀳𑀺 𑀯𑀸𑀮𑀺𑀓𑀸𑀤𑀻𑀳𑀺 𑀲𑀻𑀫𑀸𑀧𑀭𑀺𑀘𑁆𑀙𑀺𑀦𑁆𑀤𑀦𑀁. 𑀇𑀢𑀭𑀣𑀸 ‘‘𑀩𑀳𑀺𑀧𑀭𑀺𑀯𑀢𑁆𑀢𑀸 𑀦𑀼𑀔𑁄 𑀦𑁄 𑀯𑀸’’𑀢𑀺 𑀓𑀫𑁆𑀫𑀓𑁄𑀧𑀲𑀗𑁆𑀓𑀸 𑀪𑀯𑁂𑀬𑁆𑀬. 𑀅𑀜𑁆𑀜𑀺𑀲𑁆𑀲𑀸 𑀅𑀦𑀼𑀲𑀸𑀯𑀦𑀸𑀢𑀺 𑀓𑁂𑀯𑀮𑀸𑀬 𑀦𑀤𑀻𑀲𑀻𑀫𑀸𑀬 𑀅𑀦𑀼𑀲𑀸𑀯𑀦𑀸’𑀢𑀺 𑀆𑀘𑀭𑀺𑀬𑀯𑀭𑁂𑀦 𑀯𑀼𑀢𑁆𑀢𑀁. 𑀬𑀤𑀺𑀲𑀻 𑀫𑀸𑀧𑁂𑀓𑁆𑀔𑀸𑀬 𑀲𑀳 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀏𑀯𑀁 𑀲𑀢𑀺 𑀦𑀸𑀯𑀸𑀬 𑀕𑀢𑀕𑀢𑀝𑁆𑀞𑀸𑀦𑁂 𑀲𑀫𑀦𑁆𑀢𑀢𑁄 𑀲𑀪𑀸 𑀯𑀺𑀬 𑀧𑀭𑀺𑀔𑀺𑀧𑀺𑀢𑁆𑀯𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀉𑀧𑁆𑀧𑀚𑁆𑀚𑀫𑀸𑀦𑁂𑀧𑀺 𑀘 𑀅𑀜𑁆𑀜𑀺𑀲𑁆𑀲𑀸 𑀅𑀦𑀼𑀲𑀸𑀯𑀦𑀸𑀢𑀺 𑀘 𑀅𑀧𑀭𑀸𑀬 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀅𑀦𑀼𑀲𑀸𑀯𑀦𑀸𑀢𑀺 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬 𑀦 𑀧𑀦𑁂𑀯𑀁 𑀯𑀼𑀢𑁆𑀢𑀁 𑀅𑀣𑀸𑀧𑀺 𑀯𑀤𑁂𑀬𑁆𑀬 ‘‘𑀧𑀞𑀫𑁄𑀢𑀺𑀡𑁆𑀡𑀝𑁆𑀞𑀸𑀦𑁂𑀬𑁂𑀯 𑀲𑀻𑀫𑀸𑀧𑁂𑀓𑁆𑀔𑀸 𑀳𑁄𑀢𑀺, 𑀕𑀢𑀕𑀢𑀝𑁆𑀞𑀸𑀦𑁂 𑀦𑀢𑁆𑀣𑀻’’𑀢𑀺, 𑀢𑀫𑁆𑀧𑀺 𑀯𑀘𑀦𑀁 𑀅𑀬𑀼𑀢𑁆𑀢𑀫𑁂𑀯. 𑀓𑀲𑁆𑀫𑀸 𑀬𑀸𑀯 𑀓𑀫𑁆𑀫𑀁 𑀦 𑀦𑀺𑀧𑁆𑀨𑀦𑁆𑀦𑀁, 𑀢𑀸𑀯 𑀲𑀻𑀫𑀸𑀧𑁂𑀓𑁆𑀔𑀸𑀬 𑀯𑀺𑀦𑀸 𑀅𑀲𑀫𑁆𑀪𑀯𑀢𑁄 𑀢𑁂𑀦 𑀜𑀸𑀬𑀢𑀺 ‘‘𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀁 𑀉𑀤𑀓𑀼𑀓𑁆𑀔𑁂𑀧𑀁 𑀯𑀺𑀦𑀸 𑀲𑀻𑀫𑀸𑀧𑁂𑀓𑁆𑀔𑀸𑀬 𑀲𑀳𑁂𑀯 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺 𑀦𑀺𑀝𑁆𑀞𑀫𑁂𑀢𑁆𑀣𑀸𑀯 𑀕𑀦𑁆𑀢𑀩𑁆𑀩𑀁 𑀢𑀲𑁆𑀫𑀸 𑀦𑀸𑀯𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂𑀳𑀺 𑀣𑀺𑀭𑀢𑀭𑀁 𑀓𑀢𑁆𑀯𑀸 𑀦𑀸𑀯𑀁 𑀅𑀕𑀫𑀦𑀻𑀬𑀁 𑀓𑀢𑁆𑀯𑀸𑀯 𑀓𑀸𑀢𑀩𑁆𑀩𑀁. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀫𑁆𑀧𑀺 ‘‘𑀕𑀘𑁆𑀙𑀦𑁆𑀢𑀺𑀬𑀸 𑀧𑀦 𑀦𑀸𑀯𑀸𑀬 𑀓𑀸𑀢𑀼𑀁𑀦𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀉𑀤𑀓𑀼𑀓𑁆𑀔𑁂𑀧𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀺𑀯𑀢𑁆𑀢𑀫𑀸𑀦𑀸𑀬 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀧𑀦 𑀯𑀤𑁂𑀬𑁆𑀬 ‘‘𑀬𑀸𑀯 𑀧𑀭𑀺𑀲𑀸 𑀯𑀟𑁆𑀠𑀢𑀺, 𑀢𑀸𑀯 𑀲𑀻𑀫𑀸𑀧𑀺 𑀯𑀟𑁆𑀠𑀢𑀺 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑁄 𑀉𑀤𑀓𑀼𑀓𑁆𑀔𑁂𑀧𑁄𑀬𑁂𑀯 𑀧𑀫𑀸𑀡𑀦𑁆𑀢𑀺 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀧𑀭𑀺𑀲𑀯𑀲𑁂𑀦 𑀯𑀟𑁆𑀠𑀫𑀸𑀦𑀸 𑀉𑀤𑀓𑀔𑀺𑀧𑀦𑀁 𑀯𑀺𑀦𑀸𑀬𑁂𑀯 𑀯𑀟𑁆𑀠𑀢𑀺 𑀉𑀧𑀘𑀸𑀭𑀲𑀻𑀫𑀸 𑀯𑀺𑀬 𑀢𑀲𑁆𑀫𑀸 𑀉𑀤𑀓𑀼𑀓𑁆𑀔𑁂𑀧𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑁂𑀯𑀸’’𑀢𑀺. 𑀢𑀁 𑀦𑀼, 𑀅𑀬𑀜𑁆𑀳𑁂𑀢𑁆𑀣𑀢𑁆𑀣𑁄… 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀦𑀸𑀫𑁂𑀲𑀸 𑀯𑀟𑁆𑀠𑀫𑀸𑀦𑀸 𑀧𑀭𑀺𑀲𑀯𑀲𑁂𑀦𑁂𑀯 𑀯𑀟𑁆𑀠𑀢𑀺 𑀩𑀤𑁆𑀥𑀲𑀻𑀫𑀸𑀬𑀁 𑀧𑀦 𑀯𑀟𑁆𑀠𑀫𑀸𑀦𑀸 𑀲𑀫𑀽𑀳𑀯𑀲𑁂𑀦 𑀯𑀟𑁆𑀠𑀢𑀺. 𑀓𑀲𑁆𑀫𑀸 𑀧𑀭𑀺𑀲𑀯𑀲𑁂𑀦 𑀯𑀟𑁆𑀠𑀫𑀸𑀦𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑁄 𑀉𑀤𑀓𑀼𑀓𑁆𑀔𑁂𑀧𑁄 𑀓𑀸𑀢𑀩𑁆𑀩𑁄𑀢𑀺. 𑀅𑀧𑀭𑁂 𑀏𑀯𑀁 𑀯𑀤𑀦𑁆𑀢𑀺 𑀧𑀼𑀩𑁆𑀩𑁂 𑀉𑀤𑀓𑀼𑀓𑁆𑀔𑁂𑀧𑁄𑀬𑁂𑀯 𑀧𑀫𑀸𑀡𑀁, 𑀧𑀼𑀦 𑀉𑀤𑀓𑀼𑀓𑁆𑀔𑁂𑀧𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀓𑀣𑀺𑀦𑀢𑁆𑀣𑀢𑀲𑀸𑀝𑀓𑀤𑀸𑀦𑀓𑀫𑁆𑀫𑀯𑀸𑀘𑀸𑀯𑀺𑀬 ¶ 𑀢𑀣𑀸 𑀳𑀺 𑀓𑀣𑀺𑀦𑀢𑁆𑀣𑀢𑀲𑀸𑀝𑀓𑀤𑀸𑀦𑀓𑀸𑀮𑁂 𑀯𑀼𑀢𑁆𑀢𑀓𑀫𑁆𑀫𑀯𑀸𑀘𑀸 𑀏𑀓𑀸𑀬𑁂𑀯𑀯𑀝𑁆𑀝𑀢𑀺, 𑀅𑀢𑁆𑀣𑀢𑁂𑀬𑁂𑀯 𑀓𑀣𑀺𑀦𑁂 𑀧𑀼𑀦 𑀯𑀭𑀲𑀸𑀝𑀓𑀁 𑀮𑀪𑀺𑀢𑁆𑀯𑀸 𑀓𑀫𑁆𑀫𑀯𑀸𑀘𑀸𑀬 𑀤𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺 𑀏𑀯𑀫𑁂𑀯 𑀏𑀢𑁆𑀣𑀸𑀧𑀺 𑀧𑀼𑀩𑁆𑀩𑁂 𑀉𑀤𑀓𑀼𑀓𑁆𑀔𑁂𑀧𑁄𑀬𑁂𑀯 𑀧𑀫𑀸𑀡𑀁, 𑀧𑀼𑀦 𑀉𑀤𑀓𑀼𑀓𑁆𑀔𑁂𑀧𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀢𑁂 𑀉𑀧𑀘𑀸𑀭𑀲𑀻𑀫𑀸𑀬𑀫𑀺𑀯 𑀫𑀜𑁆𑀜𑀺𑀢𑁆𑀯𑀸 𑀯𑀤𑀦𑁆𑀢𑀺 𑀉𑀧𑀘𑀸𑀭𑀲𑀻𑀫𑀸𑀬𑀜𑁆𑀳𑀺 𑀧𑀼𑀭𑀺𑀲𑀸𑀬 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀫𑁂𑀯 𑀉𑀧𑀘𑀸𑀭𑀲𑀻𑀫𑀸𑀪𑀸𑀯𑁂𑀦 𑀯𑀟𑁆𑀠𑀢𑀺 𑀇𑀥 𑀧𑀦 𑀧𑀭𑀺𑀲𑀧𑀭𑀺𑀬𑀦𑁆𑀢𑀢𑁄 𑀉𑀤𑀓𑀼𑀓𑁆𑀔𑁂𑀧𑀧𑁆𑀧𑀫𑀸𑀡𑁂𑀦 𑀯𑀟𑁆𑀠𑀢𑀺𑀬𑁂𑀯 𑀦 𑀉𑀤𑀓𑀼𑀓𑁆𑀔𑁂𑀧𑀁 𑀯𑀺𑀦𑀸𑀯 𑀇𑀚𑁆𑀛𑀢𑁂 ‘‘𑀓𑀣𑀁 𑀧𑀦 𑀉𑀤𑀓𑀁 𑀉𑀓𑁆𑀔𑀺𑀧𑀺𑀢𑀩𑁆𑀩𑀁 𑀬𑀣𑀸 𑀅𑀓𑁆𑀔𑀥𑀼𑀢𑁆𑀢𑀸 𑀤𑀸𑀭𑀼𑀕𑀼𑀴𑀁 𑀔𑀺𑀧𑀦𑁆𑀢𑀺, 𑀏𑀯𑀁 𑀉𑀤𑀓𑀁 𑀯𑀸 𑀯𑀸𑀮𑀺𑀓𑀁 𑀯𑀸 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀣𑀸𑀫𑀫𑀚𑁆𑀛𑀺𑀫𑁂𑀦 𑀧𑀼𑀭𑀺𑀲𑁂𑀦 𑀲𑀩𑁆𑀩𑀣𑀸𑀫𑁂𑀦 𑀔𑀺𑀧𑀺𑀢𑀩𑁆𑀩𑀁, 𑀬𑀢𑁆𑀣 𑀏𑀯𑀁 𑀔𑀺𑀢𑁆𑀢𑀁 𑀉𑀤𑀓𑀁 𑀯𑀸 𑀯𑀸𑀮𑀺𑀓𑀁 𑀯𑀸 𑀧𑀢𑀢𑀺, 𑀅𑀬𑀫𑁂𑀓𑁄 𑀉𑀤𑀓𑀼𑀓𑁆𑀔𑁂𑀧𑁄’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀁 𑀪𑀺𑀦𑁆𑀤𑀦𑁆𑀢𑀺 𑀦𑀸𑀫. 𑀓𑀺𑀫𑀺𑀯𑀸𑀢𑀺 𑀘𑁂, 𑀬𑁂 𑀧𑀦 ‘‘𑀓𑀫𑁆𑀫𑀫𑁂𑀯 𑀓𑀫𑁆𑀫𑀓𑀭𑀡𑀁 𑀓𑀭𑁄𑀢𑀺, 𑀦𑀢𑁆𑀣𑀺 𑀦𑀺𑀭𑀬𑀧𑀸𑀮𑀸’’𑀢𑀺 𑀯𑀤𑀦𑁆𑀢𑀺, 𑀢𑁂 ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂 𑀦𑀺𑀭𑀬𑁂 𑀦𑀺𑀭𑀬𑀧𑀸𑀮𑀸’’𑀢𑀺 𑀤𑁂𑀯𑀤𑀽𑀢𑀲𑀼𑀢𑁆𑀢𑀁 𑀪𑀺𑀦𑁆𑀤𑀦𑁆𑀢𑀺 𑀯𑀺𑀬𑀸𑀢𑀺. 𑀏𑀯𑀜𑁆𑀘𑀧𑀦 𑀯𑀤𑁂𑀬𑁆𑀬 𑀬𑁂 𑀉𑀤𑀓𑀼𑀓𑁆𑀔𑁂𑀧𑁂𑀦 𑀲𑀳 𑀇𑀚𑁆𑀛𑀦𑁆𑀢𑀺, 𑀢𑁂𑀧𑀺 ‘‘𑀲𑀘𑁂𑀧𑀺 𑀳𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀁 𑀢𑀺𑀝𑁆𑀞𑀢𑀺, 𑀢𑀲𑁆𑀲 𑀞𑀺𑀢𑁄𑀓𑀸𑀲𑀲𑁆𑀲 𑀩𑀸𑀳𑀺𑀭𑀦𑁆𑀢𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀽𑀦𑀁 𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀁 𑀲𑀻𑀫𑀸𑀧𑁂𑀓𑁆𑀔𑀸𑀬 𑀉𑀧𑁆𑀧𑀦𑁆𑀦𑀸𑀬 𑀢𑀸𑀬 𑀲𑀳 𑀲𑀬𑀫𑁂𑀯 𑀲𑀜𑁆𑀚𑀸𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀲𑀫𑀸𑀦𑀲𑀁𑀯𑀸𑀲𑀓𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀢𑁆𑀣 𑀧𑀦 𑀔𑀼𑀤𑁆𑀤𑀓𑁂 𑀅𑀭𑀜𑁆𑀜𑁂 𑀫𑀳𑀦𑁆𑀢𑁂𑀳𑀺 𑀯𑀸 𑀪𑀺𑀓𑁆𑀔𑀽𑀳𑀺 𑀧𑀭𑀺𑀧𑀼𑀡𑁆𑀡𑀢𑀸𑀬 𑀯𑀕𑁆𑀕𑀓𑀫𑁆𑀫𑀲𑀗𑁆𑀓𑀸𑀪𑀸𑀯𑁂𑀦 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀧𑁂𑀓𑁆𑀔𑀸 𑀦𑀢𑁆𑀣𑀺, 𑀢𑀢𑁆𑀣 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀦 𑀉𑀧𑁆𑀧𑀚𑁆𑀚𑀢𑀺, 𑀓𑁂𑀯𑀮𑀸𑀭𑀜𑁆𑀜𑀲𑀻𑀫𑀸𑀬𑀫𑁂𑀯 𑀢𑀢𑁆𑀣 𑀲𑀗𑁆𑀖𑁂𑀦 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑀦𑀤𑀻𑀆𑀤𑀻𑀲𑀼𑀧𑀺 𑀏𑀲𑁂𑀯𑀦𑀬𑁄’’𑀢𑀺 𑀯𑀺𑀫𑀢𑀺 𑀯𑀺𑀦𑁄𑀤𑀦𑀺𑀬𑀁 𑀯𑀼𑀢𑁆𑀢𑀯𑀘𑀦𑀁 𑀪𑀺𑀦𑁆𑀤𑀦𑁆𑀢𑀺 𑀦𑀸𑀫𑀸𑀢𑀺. 𑀢𑀁 𑀦, 𑀢𑁂𑀦 𑀦𑁄 𑀓𑀸 𑀳𑀸𑀦𑀺 𑀏𑀯𑀫𑁆𑀧𑀺 𑀅𑀫𑁆𑀳𑀸𑀓𑀁 𑀯𑀸𑀤𑁂 𑀓𑁄𑀘𑀺 𑀯𑀺𑀭𑁄𑀥𑁄 𑀦 𑀯𑀺𑀚𑁆𑀚𑀢𑁂𑀯. 𑀓𑀲𑁆𑀫𑀸𑀢𑀺 𑀘𑁂, 𑀇𑀫𑁂 𑀤𑁆𑀯𑁂 𑀲𑀤𑁆𑀤𑀭𑀘𑀦𑀸𑀧𑀺 𑀅𑀲𑀫𑁆𑀩𑀦𑁆𑀥𑀸𑀯 𑀪𑀺𑀦𑁆𑀦𑀮𑀓𑁆𑀔𑀡𑀸 𑀪𑀺𑀦𑁆𑀦𑀯𑀺𑀲𑀬𑀸 𑀘𑁂𑀢𑀸 𑀲𑀻𑀫𑀸. 𑀓𑀣𑀁 𑀲𑀤𑁆𑀤𑀭𑀘𑀦𑀸 𑀅𑀲𑀫𑁆𑀩𑀦𑁆𑀥𑀸. 𑀬𑀣𑀸 𑀅𑀭𑀜𑁆𑀜𑁂 𑀢𑀢𑁆𑀣 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀦 𑀉𑀧𑁆𑀧𑀚𑁆𑀚𑀢𑀺, 𑀓𑁂𑀯𑀮𑀸𑀭𑀜𑁆𑀜𑀫𑁂𑀯𑀸𑀢𑀺 𑀯𑀼𑀘𑁆𑀘𑀢𑀺, 𑀏𑀯 𑀫𑁂𑀯 ‘‘𑀦𑀤𑀺𑀬𑀸𑀧𑀺 𑀲𑀩𑁆𑀩𑀢𑁆𑀣 𑀲𑀗𑁆𑀖𑁄 𑀦𑀺𑀲𑀻𑀤𑀢𑀺, 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺 𑀅𑀯𑀢𑁆𑀯𑀸 ‘‘𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀓𑀫𑁆𑀫𑀁 𑀦𑀢𑁆𑀣𑀻’’𑀢𑀺 𑀓𑁆𑀭𑀺𑀬𑀸𑀧𑀭𑀸𑀫𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀓𑀭𑀺𑀢𑀩𑁆𑀩𑀁 𑀓𑀫𑁆𑀫𑀁. 𑀓𑀺𑀁 𑀢𑀁, 𑀔𑀺𑀧𑀦𑀁. 𑀏𑀯𑀫𑁆𑀧𑀺 𑀲𑀤𑁆𑀤𑀭𑀘𑀦𑀸 𑀅𑀲𑀫𑁆𑀩𑀦𑁆𑀥𑀸𑀯. ‘‘𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀁…𑀧𑁂… 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀉𑀧𑁆𑀧𑀚𑁆𑀚𑀢𑀺, 𑀦𑀸𑀲𑀢𑀻’’𑀢𑀺 𑀏𑀢𑁆𑀣 ‘‘𑀦𑀸𑀲𑀢𑀻’’𑀢𑀺 𑀇𑀫𑀲𑁆𑀲 𑀉𑀤𑀓𑀼𑀓𑁆𑀔𑁂𑀧𑁂𑀦 𑀯𑀺𑀦𑀸𑀧𑀻𑀢𑀺 𑀅𑀢𑁆𑀣𑁄𑀧𑀺 𑀬𑀼𑀚𑁆𑀚𑀢𑁂𑀯. 𑀓𑀲𑁆𑀫𑀸𑀢𑀺 𑀘𑁂 ‘‘𑀲𑀻𑀫𑀸𑀧𑁂𑀓𑁆𑀔𑀸𑀬 𑀲𑀢𑀺𑀏𑀯𑀸’’𑀢𑀺 𑀇𑀫𑀺𑀦𑀸 𑀅𑀦𑀼𑀮𑁄𑀫𑀦𑀬𑀯𑀲𑁂𑀦 ‘‘𑀲𑀻𑀫𑀸𑀧𑁂𑀓𑁆𑀔𑀸𑀬 𑀅𑀲𑀢𑀺 ¶ 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑁂𑀯. 𑀓𑁂𑀘𑀺𑀧𑀦 ‘‘𑀲𑀫𑀦𑁆𑀢𑀸 𑀅𑀩𑁆𑀪𑀦𑁆𑀢𑀭𑀁 𑀫𑀺𑀦𑀺𑀢𑁆𑀯𑀸 𑀧𑀭𑀺𑀘𑁆𑀙𑁂𑀤𑀓𑀭𑀡𑁂𑀦𑁂𑀯 𑀲𑀻𑀫𑀸 𑀲𑀜𑁆𑀚𑀸𑀬𑀢𑀺, 𑀦 𑀲𑀬𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀬𑀤𑀺 𑀳𑀺…𑀧𑁂… 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬𑀧𑀺 𑀦𑀤𑀻𑀆𑀤𑀻𑀲𑀼𑀧𑀺 𑀢𑀢𑁆𑀣𑀸𑀧𑀺 𑀳𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑁄 𑀦 𑀜𑀸𑀬𑀢𑀺, 𑀢𑀣𑀸 𑀲𑀩𑁆𑀩𑀣𑀸𑀫𑁂𑀦 𑀔𑀺𑀧𑀦𑀦𑁆𑀢𑀺 𑀇𑀫𑀺𑀦𑀸𑀧𑀺 𑀯𑀘𑀦𑁂𑀦 𑀆𑀘𑀭𑀺𑀬𑀯𑀭𑀲𑁆𑀲 𑀉𑀤𑀓𑀼𑀓𑁆𑀔𑁂𑀧𑁂𑀦 𑀲𑀳𑁂𑀯 𑀲𑀻𑀫𑀸𑀧𑁂𑀓𑁆𑀔𑀸𑀬 𑀲𑀢𑀺 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀉𑀧𑁆𑀧𑀚𑁆𑀚𑀢𑀺, 𑀦𑀸𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑀜𑀸𑀬𑀢𑀺. 𑀓𑀣𑀁 𑀪𑀺𑀦𑁆𑀦𑀮𑀓𑁆𑀔𑀡𑀸, 𑀕𑀸𑀫𑀲𑀻𑀫𑀲𑀢𑁆𑀢𑀩𑁆𑀪𑀦𑁆𑀢𑀭𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀓𑀺𑀜𑁆𑀘𑀸𑀧𑀺 𑀅𑀩𑀤𑁆𑀥𑀲𑀻𑀫𑀲𑀸𑀫𑀜𑁆𑀜𑁂𑀦 𑀲𑀫𑀸𑀦𑀸, 𑀦 𑀧𑀦 𑀲𑀫𑀸𑀦𑀮𑀓𑁆𑀔𑀡𑀸 𑀢𑀣𑀸 𑀳𑀺 ‘‘𑀅𑀲𑀫𑁆𑀫𑀢𑀸𑀬 𑀪𑀺𑀓𑁆𑀔𑀯𑁂 𑀲𑀻𑀫𑀸𑀬 𑀅𑀝𑁆𑀞𑀧𑀺𑀢𑀸𑀬 𑀬𑀁 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺, 𑀬𑀸 𑀢𑀲𑁆𑀲 𑀕𑀸𑀫𑀲𑁆𑀲 𑀯𑀸 𑀕𑀸𑀫𑀲𑀻𑀫𑀸, 𑀦𑀺𑀕𑀫𑀲𑁆𑀲 𑀯𑀸 𑀦𑀺𑀕𑀫𑀲𑀻𑀫𑀸, 𑀅𑀬𑀁 𑀢𑀢𑁆𑀣 𑀲𑀫𑀸𑀦𑀲𑀁𑀯𑀸𑀲𑀸 𑀏𑀓𑀽𑀧𑁄𑀲𑀣𑀸’’𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀔𑀼𑀤𑁆𑀤𑀓𑁄 𑀯𑀸 𑀫𑀳𑀦𑁆𑀢𑁄 𑀯𑀸 𑀲𑀩𑁆𑀩𑁄𑀧𑀺 𑀕𑀸𑀫𑀧𑀤𑁂𑀲𑁄 𑀕𑀸𑀫𑀲𑀻𑀫𑀸𑀢𑀺 𑀅𑀦𑀼𑀜𑁆𑀜𑀸𑀢𑀸, 𑀦 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬 𑀯𑀺𑀬 𑀲𑀫𑀦𑁆𑀢𑀸 𑀮𑁂𑀟𑁆𑀟𑀼𑀧𑀸𑀢𑀼𑀓𑁆𑀔𑁂𑀧𑁂𑀦 𑀅𑀦𑀼𑀜𑁆𑀜𑀸𑀢𑀸 𑀅𑀩𑁆𑀪𑀦𑁆𑀢𑀭𑀲𑀻𑀫𑀸𑀬𑀧𑀺 𑀅𑀕𑀸𑀫𑀓𑁂 𑀘𑁂 𑀅𑀭𑀜𑁆𑀜𑁂 𑀬𑀁 𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺, 𑀢𑀲𑁆𑀲 𑀅𑀭𑀜𑁆𑀜𑀲𑁆𑀲 𑀅𑀭𑀜𑁆𑀜𑀲𑀻𑀫𑀸𑀢𑀺 𑀦𑀸𑀦𑀼𑀜𑁆𑀜𑀸𑀢𑀸 𑀢𑀣𑀸 𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑁂𑀲𑀼𑀧𑀺 𑀕𑀸𑀫𑀲𑀻𑀫𑀸𑀬𑀫𑀺𑀯 𑀲𑀩𑁆𑀩𑁄 𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑀧𑀤𑁂𑀲𑁄 𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲 𑀭𑀲𑀻𑀫𑀸𑀢𑀺 𑀏𑀯𑀫𑁂𑀯 𑀦 𑀅𑀦𑀼𑀜𑁆𑀜𑀸𑀢𑀸 𑀢𑀣𑀸 𑀅𑀩𑁆𑀪𑀦𑁆𑀢𑀭𑀲𑀻𑀫𑀸𑀬𑀫𑀺𑀯 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸𑀢𑀺 𑀯𑀸 𑀦𑀸𑀦𑀼𑀜𑁆𑀜𑀸𑀢𑀸 𑀏𑀯𑀫𑀺𑀫𑀸 𑀕𑀸𑀫𑀲𑀻𑀫𑀲𑀢𑁆𑀢𑀩𑁆𑀪𑀦𑁆𑀢𑀭𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀪𑀺𑀦𑁆𑀦𑀮𑀓𑁆𑀔𑀡𑀸, 𑀢𑀲𑁆𑀫𑀸 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀼𑀲𑀸𑀭𑁂𑀦𑁂𑀯 𑀕𑀸𑀫𑀲𑀻𑀫𑀸𑀬𑀧𑀺 𑀔𑀼𑀤𑁆𑀤𑀓𑁄 𑀯𑀸 𑀫𑀳𑀦𑁆𑀢𑁄 𑀯𑀸 𑀲𑀩𑁆𑀩𑁄 𑀕𑀸𑀫𑀧𑀤𑁂𑀲𑁄 𑀕𑀸𑀫𑀲𑀻𑀫𑀸𑀯 𑀳𑁄𑀢𑀺, 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸𑀬𑀧𑀺 ‘‘𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀸’’𑀢𑀺 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀼𑀲𑀸𑀭𑁂𑀦 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀲𑀻𑀫𑀸𑀧𑁂𑀓𑁆𑀔𑀸𑀬 𑀲𑀳 𑀲𑀬𑀫𑁂𑀯 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀫𑀺𑀦𑀦𑀸𑀫𑀺𑀦𑀦𑀯𑀺𑀘𑀸𑀭𑀡𑀸 𑀧𑀦 𑀦𑀺𑀭𑀢𑁆𑀣𑀓𑀸𑀯 𑀢𑀣𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬𑀧𑀺 ‘‘𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀫𑀦𑁆𑀢𑀸 𑀉𑀤𑀓𑀼𑀓𑁆𑀔𑁂𑀧𑀸’’𑀢𑀺 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀼𑀭𑀽𑀧𑀁 𑀉𑀤𑀓𑀼𑀓𑁆𑀔𑁂𑀧𑁂𑀦 𑀲𑀳𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀦𑀢𑁆𑀣𑀺 𑀔𑀺𑀧𑀦𑀸𑀔𑀺𑀧𑀦 𑀯𑀺𑀘𑀸𑀭𑀡𑀸𑀬 𑀧𑀬𑁄𑀚𑀦𑀦𑁆𑀢𑀺. 𑀓𑀣𑀁 𑀪𑀺𑀦𑁆𑀦𑀯𑀺𑀲𑀬𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀅𑀭𑀜𑁆𑀜𑀯𑀺𑀲𑀬𑀸, 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑀯𑀺𑀲𑀬𑀸, 𑀏𑀯𑀫𑁆𑀧𑀺 𑀏𑀢𑀸 𑀕𑀸𑀫𑀲𑀻𑀫𑀲𑀢𑁆𑀢𑀩𑁆𑀪𑀦𑁆𑀢𑀭𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀪𑀺𑀦𑁆𑀦𑀯𑀺𑀲𑀬𑀸𑀯 𑀢𑀲𑁆𑀫𑀸 ‘‘𑀦𑀤𑀻𑀆𑀤𑀻𑀲𑀼 𑀏𑀲𑁂𑀯 𑀦𑀬𑁄’’𑀢𑀺 𑀯𑀼𑀢𑁆𑀢𑁂𑀧𑀺 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀅𑀧𑁂𑀓𑁆𑀔𑀸𑀬 𑀲𑀳𑁂𑀯 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀉𑀧𑁆𑀧𑀚𑁆𑀚𑀢𑀺 𑀬𑀣𑀸. 𑀏𑀯𑀫𑁂𑀯 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬𑀧𑀺 ¶ 𑀅𑀧𑁂𑀓𑁆𑀔𑀸𑀬 𑀲𑀳 𑀉𑀤𑀓𑀼𑀓𑁆𑀔𑁂𑀧𑀁 𑀓𑀢𑁆𑀯𑀸𑀯 𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀁 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀉𑀧𑁆𑀧𑀚𑁆𑀚𑀢𑀺, 𑀦 𑀯𑀺𑀦𑀸𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀸𑀢𑀩𑁆𑀩𑀁. 𑀦𑀦𑀼 𑀘 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 𑀧𑀭𑀺𑀘𑁆𑀙𑁂𑀤𑀩𑁆𑀪𑀦𑁆𑀢𑀭𑁂 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁄𑀧𑀺, 𑀧𑀭𑀺𑀘𑁆𑀙𑁂𑀤𑀸 𑀩𑀳𑀺 𑀅𑀜𑁆𑀜𑀁 𑀢𑀢𑁆𑀢𑀓𑀁𑀬𑁂𑀯 𑀧𑀭𑀺𑀘𑁆𑀙𑁂𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄𑀧𑀺 𑀓𑀫𑁆𑀫𑀁 𑀓𑁄𑀧𑁂𑀢𑀺, 𑀇𑀤𑀁 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀲𑀺𑀦𑁆𑀦𑀺𑀝𑁆𑀞𑀸𑀦’𑀦𑁆𑀢𑀺 𑀯𑀼𑀢𑁆𑀢𑀯𑀘𑀦𑁂 𑀦𑀯𑀺𑀭𑀼𑀚𑁆𑀛𑀢𑀻𑀢𑀺 𑀘𑁂. 𑀢𑀁 𑀦, 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 ‘‘𑀲𑀘𑁂 𑀧𑀦 𑀤𑁆𑀯𑁂𑀲𑀗𑁆𑀖𑀸 𑀯𑀺𑀲𑀼𑀁𑀯𑀺𑀲𑀼𑀁 𑀉𑀧𑁄𑀲𑀣𑀸𑀤𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀤𑁆𑀯𑀺𑀦𑁆𑀦𑀁 𑀉𑀤𑀓𑀼𑀓𑁆𑀔𑁂𑀧𑀸𑀦𑀁 𑀅𑀦𑁆𑀢𑀭𑁂 𑀅𑀜𑁆𑀜𑁄 𑀏𑀓𑁄 𑀉𑀤𑀓𑀼𑀓𑁆𑀔𑁂𑀧𑁄 𑀉𑀧𑀘𑀸𑀭𑀢𑁆𑀣𑀸𑀬 𑀞𑀧𑁂𑀢𑀩𑁆𑀩𑁄’’𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀦𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀫𑁆𑀫𑀓𑀭𑀡𑀸𑀥𑀺𑀓𑀸𑀭𑁂 𑀯𑀼𑀢𑁆𑀢𑀢𑁆𑀢𑀸. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀫𑁆𑀧𑀺 ‘‘𑀢𑀢𑁆𑀣 𑀅𑀜𑁆𑀜𑀁 𑀢𑀢𑁆𑀢𑀓𑀁𑀬𑁂𑀯 𑀧𑀭𑀺𑀘𑁆𑀙𑁂𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄𑀧𑀺 𑀓𑀫𑁆𑀫𑀁 𑀓𑁄𑀧𑁂𑀢𑀻𑀢𑀺 𑀇𑀤𑀁 𑀦𑁂𑀯 𑀧𑀸𑀴𑀺𑀬𑀁, 𑀦 𑀅𑀝𑁆𑀞𑀓𑀣𑀸𑀬𑀁 𑀉𑀧𑀮𑀩𑁆𑀪𑀢𑀺. 𑀬𑀤𑀺 𑀘𑁂𑀢𑀁 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀦𑀁 𑀯𑀺𑀲𑀼𑀁𑀯𑀺𑀲𑀼𑀁 𑀉𑀧𑁄𑀲𑀣𑀸𑀤𑀺𑀓𑀫𑁆𑀫𑀓𑀭𑀡𑀸𑀥𑀺𑀓𑀸𑀭𑁂 𑀯𑀼𑀢𑁆𑀢𑀢𑁆𑀢𑀸 𑀉𑀤𑀓𑀼𑀓𑁆𑀔𑁂𑀧𑀢𑁄 𑀩𑀳𑀺 𑀅𑀜𑁆𑀜𑀁 𑀉𑀤𑀓𑀼𑀓𑁆𑀔𑁂𑀧𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀉𑀧𑁄𑀲𑀣𑀸𑀤𑀺𑀓𑀭𑀡𑀢𑁆𑀣𑀁. 𑀞𑀺𑀢𑁄 𑀲𑀗𑁆𑀖𑁄 𑀲𑀻𑀫𑀸𑀲𑀫𑁆𑀪𑁂𑀤𑀲𑀫𑁆𑀪𑀯𑀢𑁄 𑀓𑀫𑁆𑀫𑀁 𑀓𑁄𑀧𑁂𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁 𑀲𑀺𑀬𑀸. 𑀏𑀯𑀁 𑀲𑀢𑀺 𑀬𑀼𑀚𑁆𑀚𑁂𑀬𑁆𑀬, 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀺𑀬𑀁 𑀅𑀜𑁆𑀜𑀁 𑀢𑀢𑁆𑀢𑀓𑀁𑀬𑁂𑀯 𑀧𑀭𑀺𑀘𑁆𑀙𑁂𑀤𑀦𑁆𑀢𑀺 𑀤𑀼𑀢𑀺𑀬𑀁 𑀉𑀤𑀓𑀼𑀓𑁆𑀔𑁂𑀧𑀁 𑀅𑀦𑀢𑀺𑀓𑁆𑀓𑀫𑀦𑁆𑀢𑁄𑀧𑀺 𑀓𑁄𑀧𑁂𑀢𑀺. 𑀓𑀲𑁆𑀫𑀸, 𑀅𑀢𑁆𑀢𑀦𑁄 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀧𑀭𑁂𑀲𑀁 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀅𑀚𑁆𑀛𑁄𑀢𑁆𑀣𑀢𑀢𑁆𑀢𑀸 𑀲𑀻𑀫𑀸𑀲𑀫𑁆𑀪𑁂𑀤𑁄 𑀳𑁄𑀢𑀺, 𑀢𑀲𑁆𑀫𑀸 𑀓𑁄𑀧𑁂𑀢𑀻’𑀢𑀺 ‘‘𑀇𑀤𑀁 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀲𑀦𑁆𑀦𑀺𑀝𑁆𑀞𑀸𑀦’’𑀦𑁆𑀢𑀺 𑀘 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀲𑀩𑁆𑀩𑀸𑀲𑀼𑀧𑀺 𑀅𑀝𑁆𑀞𑀓𑀣𑀸𑀲𑀼 𑀲𑀻𑀫𑀸𑀲𑀫𑁆𑀪𑁂𑀤𑀲𑁆𑀲 𑀅𑀦𑀺𑀘𑁆𑀙𑀺𑀢𑀢𑁆𑀢𑀸 𑀢𑁂𑀦𑁂𑀯 𑀅𑀢𑁆𑀢𑀦𑁄 𑀘 𑀅𑀜𑁆𑀜𑁂𑀲𑀜𑁆𑀘 𑀉𑀤𑀓𑀼𑀓𑁆𑀔𑁂𑀧𑀧𑀭𑀺𑀘𑁆𑀙𑁂𑀤𑀲𑁆𑀲 𑀅𑀦𑁆𑀢𑀭𑀸 𑀅𑀜𑁆𑀜𑁄 𑀉𑀤𑀓𑀼𑀓𑁆𑀔𑁂𑀧𑁄 𑀲𑀻𑀫𑀦𑁆𑀢𑀭𑀺𑀓𑀢𑁆𑀣𑀸𑀬 𑀞𑀧𑁂𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑁂 𑀧𑀦𑁂𑀢𑁆𑀣 𑀅𑀜𑁆𑀜𑀣𑀸𑀧𑀺 𑀧𑀧𑀜𑁆𑀘𑁂𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩’𑀦𑁆𑀢𑀺 𑀯𑀢𑁆𑀯𑀸 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀢𑀲𑁆𑀲 ‘‘𑀅𑀦𑁆𑀢𑁄𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁄 𑀓𑀫𑁆𑀫𑀁 𑀓𑁄𑀧𑁂𑀢𑀻’’𑀢𑀺 𑀇𑀫𑀺𑀦𑀸 𑀧𑀭𑀺𑀘𑁆𑀙𑁂𑀤𑀢𑁄 𑀩𑀳𑀺 𑀬𑀢𑁆𑀣𑀓𑀢𑁆𑀣𑀘𑀺 𑀞𑀺𑀢𑁄 𑀓𑀫𑁆𑀫𑀁 𑀦 𑀓𑁄𑀧𑁂𑀢𑀻𑀢𑀺 𑀤𑀻𑀧𑁂𑀢𑀻𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀻𑀯𑀘𑀦𑁂𑀦𑀸𑀧𑀺 𑀏𑀓𑀲𑁆𑀫𑀺𑀁 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑁂 𑀧𑀭𑀺𑀘𑁆𑀙𑁂𑀤𑀢𑁄 𑀩𑀳𑀺 𑀅𑀜𑁆𑀜𑀁 𑀢𑀢𑁆𑀢𑀓𑀁𑀬𑁂𑀯 𑀧𑀭𑀺𑀘𑁆𑀙𑁂𑀤𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄𑀧𑀺 𑀓𑀫𑁆𑀫𑀁 𑀦 𑀓𑁄𑀧𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀫𑁂𑀢𑀁 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁𑀬𑁂𑀯 𑀇𑀫𑀫𑀢𑁆𑀣𑀁 𑀤𑀴𑁆𑀳𑀺𑀓𑀭𑀡𑀯𑀲𑁂𑀦 𑀉𑀤𑀓𑀼𑀓𑁆𑀔𑁂𑀧𑀧𑁆𑀧𑀫𑀸𑀡𑀸 𑀲𑀻𑀫𑀦𑁆𑀢𑀭𑀺𑀓𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑀭𑀸 𑀳𑁄𑀢𑀺, 𑀲𑀻𑀫𑀸𑀲𑀫𑁆𑀪𑁂𑀤𑀲𑀗𑁆𑀓𑀸 𑀘 𑀦 𑀲𑀺𑀬𑀸𑀢𑀺 𑀲𑀸𑀫𑀺𑀘𑀺𑀤𑀲𑁆𑀲𑀦𑀢𑁆𑀣𑀁 𑀅𑀜𑁆𑀜𑁄 𑀉𑀤𑀓𑀼𑀓𑁆𑀔𑁂𑀧𑁄 𑀲𑀻𑀫𑀦𑁆𑀢𑀭𑀺𑀓𑀢𑁆𑀣𑀸𑀬 𑀞𑀧𑁂𑀢𑀩𑁆𑀩𑁄’𑀢𑀺 𑀯𑀼𑀢𑁆𑀢𑀁. 𑀬𑀢𑁆𑀢𑀓𑁂𑀦 𑀧𑀦 𑀲𑀻𑀫𑀸𑀲𑀫𑁆𑀪𑁂𑀤𑁄 𑀦 ¶ 𑀳𑁄𑀢𑀺, 𑀢𑀢𑁆𑀢𑀓𑀁 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯, 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 ‘‘𑀬𑀢𑁆𑀢𑀓𑁂𑀦 𑀲𑀻𑀫𑀲𑀗𑁆𑀓𑀭𑁄 𑀦 𑀳𑁄𑀢𑀺, 𑀢𑀢𑁆𑀢𑀓𑀫𑁆𑀧𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀔𑀼𑀤𑁆𑀤𑀓𑀁 𑀧𑀦 𑀦 𑀯𑀝𑁆𑀝𑀢𑀻’’𑀢𑀺 𑀇𑀤𑀫𑁆𑀧𑀺 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀧𑀭𑀺𑀲𑀯𑀲𑁂𑀦 𑀯𑀟𑁆𑀠𑀦𑀢𑁄 𑀲𑀻𑀫𑀲𑀫𑁆𑀪𑁂𑀤𑀲𑀗𑁆𑀓𑀸 𑀲𑀺𑀬𑀸. 𑀢𑀁 𑀦𑀺𑀯𑀸𑀭𑀡𑀢𑁆𑀣𑀫𑁂𑀯 𑀯𑀼𑀢𑁆𑀢𑀦𑁆𑀢𑀺.

𑀧𑀸𑀴𑀺𑀁 𑀅𑀝𑁆𑀞𑀓𑀣𑀜𑁆𑀘𑁂𑀯, 𑀝𑀻𑀓𑀸𑀯𑀺𑀫𑀢𑀺𑀆𑀤𑀺𑀓𑁂;

𑀑𑀮𑁄𑀓𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁, 𑀫𑀜𑁆𑀜𑀦𑁆𑀢𑀼 𑀓𑀯𑀺𑀧𑀼𑀗𑁆𑀕𑀯𑀸𑀢𑀺;

𑀅𑀬𑀫𑁂𑀢𑁆𑀣 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀯𑀺𑀘𑀸𑀭𑀡𑀸.

𑀚𑀦𑀧𑀤𑀲𑀻𑀫𑀸 𑀦𑀸𑀫 𑀏𑀓𑀲𑁆𑀲 𑀭𑀜𑁆𑀜𑁄 𑀯𑀺𑀚𑀺𑀢𑁂 𑀧𑀯𑀢𑁆𑀢𑁄 𑀫𑀳𑀸𑀫𑀘𑁆𑀘𑀸𑀦𑀁 𑀦𑀺𑀯𑀸𑀲𑀪𑀽𑀢𑁄 𑀏𑀓𑀫𑁂𑀓𑁄 𑀧𑀤𑁂𑀲𑁄 𑀚𑀦𑀧𑀤𑀲𑀻𑀫𑀸 𑀦𑀸𑀫.

𑀭𑀝𑁆𑀞𑀲𑀻𑀫𑀸 𑀦𑀸𑀫 𑀓𑀸𑀲𑀺𑀓𑁄𑀲𑀮𑀸𑀤𑀺𑀓𑀸 𑀲𑁄𑀴𑀲 𑀫𑀳𑀸𑀚𑀦𑀧𑀤𑀸. ‘‘𑀲𑁄𑀴𑀲𑀫𑀳𑀸𑀦𑀕𑀭’’𑀦𑁆𑀢𑀺𑀧𑀺 𑀢𑁂𑀲𑀁 𑀦𑀸𑀫𑀁. 𑀢𑀢𑁆𑀣 𑀲𑁄𑀴𑀲 𑀫𑀳𑀸𑀚𑀦𑀧𑀤𑀸𑀦𑀺 𑀦𑀸𑀫. 𑀅𑀗𑁆𑀕𑀭𑀝𑁆𑀞𑀁, 𑀫𑀕𑀥𑀭𑀝𑁆𑀞𑀁, 𑀓𑁄𑀲𑀮𑀭𑀝𑁆𑀞𑀁, 𑀯𑀚𑁆𑀚𑀺𑀭𑀝𑁆𑀞𑀁, 𑀘𑁂𑀢𑀺𑀬𑀭𑀝𑁆𑀞𑀁, 𑀓𑀼𑀭𑀼𑀭𑀝𑁆𑀞𑀁, 𑀧𑀜𑁆𑀘𑀸𑀮𑀭𑀝𑁆𑀞𑀁, 𑀫𑀚𑁆𑀛𑀭𑀝𑁆𑀞𑀁, 𑀲𑀼𑀭𑀲𑁂𑀦𑀭𑀝𑁆𑀞𑀁, 𑀅𑀲𑁆𑀲𑀓𑀭𑀝𑁆𑀞𑀁, 𑀅𑀯𑀦𑁆𑀢𑀺𑀭𑀝𑁆𑀞𑀁, 𑀕𑀦𑁆𑀥𑀸𑀮𑀭𑀝𑁆𑀞𑀁, 𑀫𑀮𑁆𑀮𑀭𑀝𑁆𑀞𑀁, 𑀓𑀫𑁆𑀩𑁄𑀚𑀭𑀝𑁆𑀞𑀦𑁆𑀢𑀺 𑀇𑀫𑀸𑀦𑀺 𑀲𑁄𑀴𑀲𑀫𑀳𑀸𑀚𑀦𑀧𑀤𑀸𑀦𑀺 𑀦𑀸𑀫. 𑀇𑀫𑁂 𑀲𑁄𑀴𑀲𑀫𑀳𑀸𑀚𑀦𑀧𑀤𑀸 𑀫𑀚𑁆𑀛𑀺𑀫𑀧𑀤𑁂𑀲𑁂𑀬𑁂𑀯 𑀧𑀯𑀢𑁆𑀢𑀸 𑀫𑀳𑀸𑀭𑀝𑁆𑀞𑀸 𑀦𑀸𑀫 𑀢𑀤𑀜𑁆𑀜𑁂𑀧𑀺 𑀲𑀼𑀦𑀸𑀧𑀭𑀦𑁆𑀢𑀭𑀝𑁆𑀞𑀸𑀤𑀺𑀓𑀸 𑀩𑀳𑀼𑀢𑀭𑀸𑀯. 𑀢𑀣𑀸 𑀧𑀘𑁆𑀘𑀦𑁆𑀢𑀯𑀺𑀲𑀬𑁂𑀧𑀺 𑀭𑀸𑀫𑀜𑁆𑀜𑀸𑀤𑀺𑀓𑀸 𑀅𑀦𑁂𑀓𑀧𑁆𑀧𑀪𑁂𑀤𑀸 𑀫𑀳𑀸𑀭𑀝𑁆𑀞𑀸 𑀅𑀢𑁆𑀣𑁂𑀯 𑀢𑁂𑀧𑀺 𑀲𑀩𑁆𑀩𑁂 𑀭𑀝𑁆𑀞𑀲𑀻𑀫𑀸 𑀦𑀸𑀫. 𑀮𑁄𑀓𑀺𑀬𑀲𑀢𑁆𑀣𑁂𑀲𑀼 𑀧𑀦 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀯𑁂𑀲𑁆𑀲𑀲𑀼𑀤𑁆𑀤𑀯𑀲𑁂𑀦 𑀘𑀢𑀼𑀯𑀡𑁆𑀡𑀸𑀦𑀺 𑀯𑀲𑀦𑁆𑀢𑀺, 𑀲𑁄 𑀧𑀤𑁂𑀲𑁄 ‘‘𑀫𑀳𑀸𑀭𑀝𑁆𑀞𑁄’’𑀢𑀺 𑀧𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑁂 𑀢𑀁 𑀧𑁄𑀭𑀸𑀡𑁂𑀳𑀺.

‘‘𑀧𑀯𑀢𑁆𑀢𑀸 𑀘𑀢𑀼𑀯𑀡𑁆𑀡𑀸𑀦𑀁, 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀦 𑀯𑀺𑀚𑁆𑀚𑀢𑁂;

𑀲𑁄 𑀫𑀺𑀮𑀓𑁆𑀔𑀼𑀤𑁂𑀲𑁄 𑀯𑀼𑀢𑁆𑀢𑁄, 𑀧𑀼𑀜𑁆𑀜𑀪𑀽𑀫𑀺 𑀢𑀢𑁄 𑀧𑀭’’𑀦𑁆𑀢𑀺.

𑀭𑀚𑁆𑀚𑀲𑀻𑀫𑀸 𑀦𑀸𑀫 𑀏𑀓𑀲𑁆𑀲 𑀭𑀜𑁆𑀜𑁄 𑀆𑀡𑀸𑀧𑀯𑀢𑁆𑀢𑀝𑁆𑀞𑀸𑀦𑀁 𑀭𑀚𑁆𑀚𑀲𑀻𑀫𑀸 𑀦𑀸𑀫.

𑀤𑀻𑀧𑀲𑀻𑀫𑀸 𑀦𑀸𑀫 𑀲𑀫𑀼𑀤𑁆𑀤𑀦𑁆𑀢𑀭𑁂 𑀯𑀸 𑀦𑀤𑀺𑀫𑀚𑁆𑀛𑁂 𑀯𑀸 𑀧𑀯𑀢𑁆𑀢𑀸 𑀤𑀻𑀧𑀸 𑀤𑀻𑀧𑀲𑀻𑀫𑀸 𑀦𑀸𑀫. 𑀬𑀲𑁆𑀫𑀺𑀁 𑀧𑀦 𑀤𑀻𑀧𑁂 𑀕𑀸𑀫𑀸 𑀯𑀲𑀦𑁆𑀢𑀺, 𑀲𑁄 𑀕𑀸𑀫𑀲𑀻𑀫𑀸𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀯𑀓𑁆𑀔𑀢𑀺 𑀳𑀺 𑀲𑀼𑀓𑁆𑀔𑁂 𑀚𑀸𑀢𑀲𑁆𑀲𑀭𑁂 𑀯𑀸𑀧𑀺𑀁 𑀯𑀸 𑀔𑀡𑀦𑁆𑀢𑀺 𑀯𑀧𑁆𑀧𑀁 𑀯𑀸 𑀓𑀭𑁄𑀦𑁆𑀢𑀺, 𑀢𑀁 𑀞𑀸𑀦𑀁 𑀕𑀸𑀫𑀔𑁂𑀢𑁆𑀢𑀁 𑀳𑁄𑀢𑀻𑀢𑀺.

𑀘𑀓𑁆𑀓𑀯𑀸𑀴𑀲𑀻𑀫𑀸 𑀦𑀸𑀫 ‘‘𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀬𑁄𑀚𑀦𑀸𑀦𑀁 𑀤𑁆𑀯𑀸𑀤𑀲𑀲𑀢𑀲𑀳𑀲𑁆𑀲𑀸𑀦𑀺 𑀢𑀻𑀡𑀺𑀲𑀳𑀲𑁆𑀲𑀸𑀦𑀺 𑀘𑀢𑁆𑀢𑀸𑀭𑀺𑀲𑀢𑀸𑀦𑀺 𑀧𑀜𑁆𑀜𑀸𑀲𑀜𑁆𑀘𑀬𑁄𑀚𑀦𑀸𑀦𑀺.

𑀧𑀭𑀺𑀓𑁆𑀔𑁂𑀧𑀢𑁄

‘‘𑀲𑀩𑁆𑀩𑀁 ¶ 𑀲𑀢𑀲𑀳𑀲𑁆𑀲𑀸𑀦𑀺, 𑀙𑀢𑁆𑀢𑀺𑀁𑀲𑀧𑀭𑀺𑀫𑀡𑁆𑀟𑀮𑀁;

𑀤𑀲𑀜𑁆𑀘𑁂𑀯 𑀲𑀳𑀲𑁆𑀲𑀸𑀦𑀺, 𑀅𑀟𑁆𑀠𑀼𑀟𑁆𑀠𑀸𑀦𑀺 𑀲𑀢𑀸𑀦𑀺𑀘𑀸’’𑀢𑀺.

𑀯𑀼𑀢𑁆𑀢𑀁 𑀏𑀓𑀁 𑀘𑀓𑁆𑀓𑀯𑀸𑀴𑀁 𑀘𑀓𑁆𑀓𑀯𑀸𑀴𑀲𑀻𑀫𑀸 𑀦𑀸𑀫. 𑀏𑀯𑀁 𑀧𑀦𑁆𑀦𑀭𑀲𑀧𑁆𑀧𑀪𑁂𑀤𑀸 𑀳𑁄𑀢𑀺 𑀲𑀻𑀫𑀸. 𑀢𑀢𑁆𑀣 𑀇𑀤𑁆𑀥𑀺𑀫𑀸 𑀧𑀼𑀕𑁆𑀕𑀮𑁄 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀯𑀸 𑀲𑀻𑀫𑁂 𑀉𑀧𑁄𑀲𑀣𑀸𑀤𑀺𑀲𑀗𑁆𑀖𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀕𑀢𑁂 𑀪𑀺𑀓𑁆𑀔𑀽 𑀳𑀢𑁆𑀣𑀧𑀸𑀲𑀦𑀬𑀦𑀁 𑀯𑀸 𑀩𑀳𑀺𑀲𑀻𑀫𑀓𑀭𑀡𑀁 𑀯𑀸 𑀓𑀸𑀢𑀼𑀁 𑀙𑀦𑁆𑀤𑀸𑀭𑀳𑀸𑀦𑀁, 𑀙𑀦𑁆𑀤𑀁 𑀆𑀳𑀭𑀺𑀢𑁆𑀯𑀸 𑀓𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑁄𑀬𑁂𑀯 𑀧𑀫𑀸𑀡𑀁. 𑀏𑀯𑀫𑀲𑀓𑁆𑀓𑁄𑀦𑁆𑀢𑁂 𑀅𑀦𑀺𑀤𑁆𑀥𑀺𑀫𑀧𑀼𑀕𑁆𑀕𑀮𑁂 𑀲𑀦𑁆𑀥𑀸𑀬 𑀅𑀢𑀺𑀫𑀳𑀦𑁆𑀢𑀸𑀭𑀜𑁆𑀜𑁂 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀅𑀦𑀼𑀜𑁆𑀜𑀸𑀢𑀸. 𑀢𑀢𑁆𑀣 𑀲𑀻𑀫𑀸𑀧𑁂𑀓𑁆𑀔𑀸𑀬 𑀲𑀳 𑀲𑀫𑀦𑁆𑀢𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑀲𑀻𑀫𑀸 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀚𑀸𑀢𑀸 𑀢𑀣𑀸 𑀦𑀤𑀻𑀲𑀫𑀼𑀤𑁆𑀤𑀚𑀸𑀢𑀲𑁆𑀲𑀭𑁂𑀲𑀼𑀧𑀺 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀫𑀦𑁆𑀢𑀸 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀅𑀦𑀼𑀜𑁆𑀜𑀸𑀢𑀸 𑀢𑀢𑁆𑀣𑀧𑀺 𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀁 𑀲𑀻𑀫𑀸𑀧𑁂𑀓𑁆𑀔𑀁 𑀓𑀢𑁆𑀯𑀸 𑀉𑀤𑀓𑀼𑀓𑁆𑀔𑁂𑀧𑁂𑀦 𑀲𑀳 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀉𑀧𑁆𑀧𑀚𑁆𑀚𑀢𑀺 𑀢𑀣𑀸 𑀕𑀸𑀫𑀦𑀺𑀕𑀫𑀚𑀦𑀧𑀤𑀦𑀕𑀭𑀭𑀝𑁆𑀞𑀭𑀚𑁆𑀚𑀲𑀻𑀫𑀸𑀲𑀼𑀧𑀺 𑀯𑀕𑁆𑀕𑀓𑀫𑁆𑀫𑀧𑀭𑀺𑀳𑀸𑀭𑀢𑁆𑀣𑀁 𑀩𑀤𑁆𑀥𑀲𑀻𑀫𑀸 𑀅𑀦𑀼𑀜𑁆𑀜𑀸𑀢𑀸. 𑀢𑀢𑁄 𑀧𑀭𑁂𑀲𑀼 𑀧𑀦 𑀕𑀸𑀫𑀲𑀻𑀫𑀲𑀢𑁆𑀢𑀩𑁆𑀪𑀦𑁆𑀢𑀭𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸 𑀦𑀼𑀜𑁆𑀜𑀸𑀢𑀲𑀼𑀢𑁆𑀢𑀸𑀦𑀼𑀮𑁄𑀫𑀦𑀬𑀲𑀸𑀫𑀢𑁆𑀣𑀺𑀬𑀢𑁄 𑀔𑀼𑀤𑁆𑀤𑀓𑁂𑀲𑀼 𑀕𑀸𑀫𑀦𑀺𑀕𑀫𑀚𑀦𑀧𑀤𑀦𑀕𑀭𑁂𑀲𑀼 𑀢𑀢𑁆𑀣 𑀢𑀢𑁆𑀣 𑀕𑀢𑁂 𑀪𑀺𑀓𑁆𑀔𑀽 𑀲𑁄𑀥𑁂𑀢𑁆𑀯𑀸 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑀁 𑀆𑀳𑀭𑀺𑀢𑁆𑀯𑀸 𑀲𑀫𑀕𑁆𑀕𑀲𑁆𑀲 𑀲𑀗𑁆𑀖𑀲𑁆𑀲 𑀅𑀦𑀼𑀫𑀢𑀺𑀬𑀸𑀯 𑀉𑀧𑁄𑀲𑀣𑀸𑀤𑀺𑀲𑀗𑁆𑀖𑀓𑀫𑁆𑀫𑀁 𑀓𑀸𑀢𑀩𑁆𑀩𑀫𑁂𑀯 𑀢𑀣𑀸 𑀔𑀼𑀤𑁆𑀤𑀓𑁂 𑀅𑀭𑀜𑁆𑀜𑁂𑀧𑀺 𑀦𑀤𑀻𑀚𑀸𑀢𑀲𑁆𑀲𑀭𑁂𑀧𑀺 𑀬𑀣𑀸𑀲𑀼𑀔𑀁 𑀉𑀧𑁄𑀲𑀣𑀸𑀤𑀺𑀲𑀗𑁆𑀖𑀓𑀫𑁆𑀫𑀁 𑀓𑀸𑀢𑀩𑁆𑀩𑀫𑁂𑀯𑀸𑀢𑀺.

𑀏𑀯𑀁 𑀧𑀭𑀺𑀘𑁆𑀙𑀺𑀦𑁆𑀤𑀦𑀮𑀓𑁆𑀔𑀡𑁂𑀦 𑀅𑀪𑁂𑀤𑁂𑀧𑀺 𑀩𑀤𑁆𑀥𑀸𑀩𑀤𑁆𑀥𑀯𑀲𑁂𑀦 𑀤𑀼𑀯𑀺𑀥𑀸. 𑀢𑀧𑁆𑀧𑀪𑁂𑀤𑁂𑀦 𑀧𑀦𑁆𑀦𑀭𑀲𑀯𑀺𑀥𑀸, 𑀲𑀭𑀽𑀧𑀯𑀲𑁂𑀦 𑀧𑀦 𑀔𑀡𑁆𑀟𑀲𑀻𑀫𑀸, 𑀉𑀧𑀘𑀸𑀭𑀲𑀻𑀫𑀸, 𑀲𑀫𑀸𑀦𑀲𑀁𑀯𑀸𑀲𑀲𑀻𑀫𑀸, 𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸, 𑀮𑀸𑀪𑀲𑀻𑀫𑀸, 𑀕𑀸𑀫𑀲𑀻𑀫𑀸. 𑀦𑀺𑀕𑀫𑀲𑀻𑀫𑀸, 𑀦𑀕𑀭𑀲𑀻𑀫𑀸, 𑀅𑀩𑁆𑀪𑀦𑁆𑀢𑀭𑀲𑀻𑀫𑀸, 𑀅𑀭𑀜𑁆𑀜𑀲𑀻𑀫𑀸, 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸, 𑀦𑀤𑀻𑀲𑀻𑀫𑀸, 𑀚𑀸𑀢𑀲𑁆𑀲𑀭𑀲𑀻𑀫𑀸, 𑀲𑀫𑀼𑀤𑁆𑀤𑀲𑀻𑀫𑀸, 𑀚𑀦𑀧𑀤𑀲𑀻𑀫𑀸, 𑀭𑀝𑁆𑀞𑀲𑀻𑀫𑀸, 𑀭𑀚𑁆𑀚𑀲𑀻𑀫𑀸, 𑀤𑀻𑀧𑀲𑀻𑀫𑀸, 𑀘𑀓𑁆𑀓𑀯𑀸𑀴𑀲𑀻𑀫𑀸𑀢𑀺𑀏𑀓𑀽𑀦𑀯𑀻𑀲𑀧𑁆𑀧𑀪𑁂𑀤𑁂 𑀧𑀺 𑀲𑀻𑀫𑁂 𑀯𑀺𑀧𑀢𑁆𑀢𑀺𑀮𑀓𑁆𑀔𑀡𑀁 𑀧𑀳𑀸𑀬 𑀲𑀫𑁆𑀧𑀢𑁆𑀢𑀺𑀮𑀓𑁆𑀔𑀡𑀧𑁆𑀧𑀓𑀸𑀲𑀓𑀁 𑀲𑀻𑀫𑀯𑀺𑀲𑁄𑀥𑀦𑀻𑀦𑀸𑀫 𑀧𑀓𑀭𑀡𑀁 𑀲𑀫𑀢𑁆𑀢𑀁.

𑀇𑀢𑀺

‘‘𑀲𑀻𑀫𑀯𑀺𑀲𑁄𑀥𑀦𑀺𑀁 𑀦𑀸𑀫, 𑀦𑀸𑀦𑀸𑀕𑀦𑁆𑀣𑀲𑀫𑀸𑀳𑀝𑀁;

𑀓𑀭𑀺𑀲𑁆𑀲𑀁 𑀫𑁂 𑀦𑀺𑀲𑀸𑀫𑁂𑀦𑁆𑀢𑀼, 𑀲𑀸𑀥𑀯𑁄 𑀓𑀯𑀺𑀧𑀼𑀗𑁆𑀕𑀯𑀸.

𑀧𑀸𑀴𑀺𑀁 ¶ 𑀅𑀝𑁆𑀞𑀓𑀣𑀜𑁆𑀘𑁂𑀯, 𑀫𑀸𑀢𑀺𑀓𑀸𑀧𑀤𑀪𑀸𑀚𑀦𑀺𑀁;

𑀑𑀕𑀸𑀳𑁂𑀢𑁆𑀯𑀸𑀦 𑀢𑀁 𑀲𑀩𑁆𑀩𑀁, 𑀧𑀼𑀦𑀧𑁆𑀧𑀼𑀦𑀫𑀲𑁂𑀲𑀢𑁄.

𑀅𑀢𑁆𑀢𑀦𑁄𑀫𑀢𑀺𑀕𑀦𑁆𑀣𑁂𑀲𑀼, 𑀝𑀻𑀓𑀸𑀕𑀡𑁆𑀞𑀺𑀧𑀤𑁂𑀲𑀼 𑀘;

𑀯𑀺𑀦𑀺𑀘𑁆𑀙𑀬𑀯𑀺𑀫𑀢𑀻𑀲𑀼, 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀲𑀼𑀧𑀺.

𑀲𑀩𑁆𑀩𑀁 𑀅𑀲𑁂𑀲𑀓𑀁 𑀓𑀢𑁆𑀯𑀸, 𑀲𑀁𑀲𑀦𑁆𑀤𑀺𑀢𑁆𑀯𑀸𑀦 𑀏𑀓𑀢𑁄;

𑀧𑀯𑀢𑁆𑀢𑀸 𑀯𑀡𑁆𑀡𑀦𑀸 𑀏𑀲𑀸, 𑀢𑁄𑀲𑀬𑀦𑁆𑀢𑀻 𑀯𑀺𑀘𑀓𑁆𑀔𑀡𑁂’’𑀢𑀺.

𑀇𑀫𑁂𑀲𑀁 𑀕𑀸𑀣𑀸𑀧𑀤𑀸𑀦𑀁 𑀅𑀢𑁆𑀣𑁄 𑀲𑀩𑁆𑀩𑀲𑁄 𑀲𑀁𑀯𑀡𑁆𑀡𑀺𑀢𑁄 𑀳𑁄𑀢𑀺.

𑀲𑀻𑀫𑀲𑀫𑁆𑀧𑀢𑁆𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀦𑀸𑀫 𑀏𑀓𑀯𑀻𑀲𑀢𑀺𑀯𑀚𑁆𑀚𑀦𑀻𑀬𑀧𑀼𑀕𑁆𑀕𑀮𑁂 𑀯𑀚𑁆𑀚𑁂𑀢𑁆𑀯𑀸 𑀏𑀢𑀭𑀳𑀺 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑁂𑀦 𑀉𑀧𑀲𑀫𑁆𑀧𑀦𑁆𑀦𑀸 𑀪𑀺𑀓𑁆𑀔𑀽 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀧𑀜𑁆𑀘𑀯𑀕𑁆𑀕𑀢𑁄 𑀧𑀝𑁆𑀞𑀸𑀬, 𑀫𑀚𑁆𑀛𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀤𑀲𑀯𑀕𑁆𑀕𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑁂 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀅𑀬𑀁 𑀧𑀭𑀺𑀲𑀲𑀫𑁆𑀧𑀢𑁆𑀢𑀺 𑀦𑀸𑀫. 𑀢𑀢𑁆𑀣 𑀏𑀓𑀯𑀻𑀲𑀢𑀺 𑀯𑀚𑁆𑀚𑀦𑀻𑀬𑀸 𑀦𑀸𑀫 ‘‘𑀦 𑀪𑀺𑀓𑁆𑀔𑀯𑁂 𑀲𑀕 𑀝𑁆𑀞𑀸𑀬 𑀧𑀭𑀺𑀲𑀸𑀬𑀸’’𑀢𑀺 𑀯𑀘𑀦𑀢𑁄 𑀳𑁂𑀝𑁆𑀞𑀸 ‘‘𑀦 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼𑀦𑀺𑀬𑀸 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩’’𑀦𑁆𑀢𑀺 𑀆𑀤𑀺𑀦𑀸𑀦𑀬𑁂𑀦 𑀯𑀼𑀢𑁆𑀢𑀸 𑀪𑀺𑀓𑁆𑀔𑀼𑀦𑀻, 𑀲𑀺𑀓𑁆𑀔𑀫𑀸𑀦𑀸, 𑀲𑀸𑀫𑀡𑁂𑀭𑁄, 𑀲𑀸𑀫𑀡𑁂𑀭𑀻, 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑁄, 𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑀓𑁄, 𑀆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑁂 𑀉𑀓𑁆𑀔𑀺𑀢𑁆𑀢𑀓𑁄, 𑀆𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀓𑀫𑁆𑀫𑁂 𑀉𑀓𑁆𑀔𑀺𑀢𑁆𑀢𑀓𑁄, 𑀧𑀸𑀧𑀺𑀓𑀸𑀬 𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑁂 𑀉𑀓𑁆𑀔𑀺𑀢𑁆𑀢𑀓𑁄, 𑀧𑀡𑁆𑀟𑀓𑁄, 𑀣𑁂𑀬𑁆𑀬𑀲𑀁𑀯𑀸𑀲𑀓𑁄, 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁄, 𑀢𑀺𑀭𑀘𑁆𑀙𑀸𑀦𑀕𑀢𑁄, 𑀫𑀸𑀖𑀸𑀢𑀼𑀢𑀓𑁄, 𑀧𑀺𑀢𑀼𑀖𑀸𑀢𑀓𑁄, 𑀅𑀭𑀳𑀦𑁆𑀢𑀖𑀸𑀢𑀓𑁄, 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄, 𑀲𑀗𑁆𑀖𑀪𑁂𑀤𑀓𑁄, 𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄, 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄𑀢𑀺 𑀢𑁂 𑀩𑀳𑀺𑀲𑀻𑀫𑀓𑀭𑀡𑀯𑀲𑁂𑀦 𑀦𑀺𑀲𑀺𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀬𑀤𑀺 𑀢𑁂 𑀳𑀢𑁆𑀣𑀧𑀸𑀲𑁂 𑀯𑀸 𑀲𑀻𑀫𑁂𑀬𑁂𑀯 𑀯𑀸 𑀳𑁄𑀦𑁆𑀢𑀺, 𑀢𑁂 𑀅𑀯𑀚𑁆𑀚𑁂𑀢𑁆𑀯𑀸 𑀧𑀜𑁆𑀘𑀯𑀕𑁆𑀕𑀸𑀤𑀺𑀓𑁄 𑀧𑀓𑀢𑀢𑁆𑀢𑀕𑀡𑁄 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀓𑀸𑀭𑀓𑀲𑀗𑁆𑀖𑁄 𑀲𑀸𑀯𑀚𑁆𑀚𑁄, 𑀓𑀫𑁆𑀫𑀁𑀧𑀦 𑀦 𑀓𑀼𑀧𑁆𑀧𑀢𑀺 𑀓𑀲𑁆𑀫𑀸 𑀅𑀯𑀕𑁆𑀕𑀸𑀭𑀳𑀢𑁆𑀢𑀸. 𑀅𑀧𑀭𑁂𑀧𑀦 𑀏𑀯𑀁 𑀯𑀤𑀦𑁆𑀢𑀺 𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑀲𑁆𑀲 𑀅𑀯𑀦𑁆𑀤𑀦𑀻𑀬𑁂𑀲𑀼 𑀅𑀯𑀼𑀢𑁆𑀢𑀢𑁆𑀢𑀸, 𑀢𑁂𑀦 𑀲𑀤𑁆𑀥𑀺𑀁 𑀲𑀬𑀦𑁆𑀢𑀲𑁆𑀲 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀢𑀲𑁆𑀲 𑀘 𑀧𑀝𑀺𑀕𑁆𑀕𑀳𑀡𑀲𑁆𑀲 𑀭𑀽𑀳𑀦𑀢𑁄𑀢𑀺 𑀢𑀤𑁂𑀯 𑀬𑀼𑀢𑁆𑀢𑀢𑀭𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀓𑀺𑀜𑁆𑀘𑀸𑀧𑀺 𑀬𑀸𑀯 𑀲𑁄 𑀪𑀺𑀓𑁆𑀔𑀼𑀪𑀸𑀯𑀁 𑀧𑀝𑀺𑀚𑀸𑀦𑀸𑀢𑀺, 𑀢𑀸𑀯 𑀯𑀦𑁆𑀤𑀺𑀢𑀩𑁆𑀩𑁄. 𑀬𑀤𑀸 𑀧𑀦 ‘‘𑀅𑀲𑁆𑀲𑀫𑀡𑁄𑀫𑁆𑀳𑀻’’𑀢𑀺 ¶ 𑀧𑀝𑀺𑀚𑀸𑀦𑀸𑀢𑀺, 𑀢𑀤𑀸 𑀦 𑀯𑀦𑁆𑀤𑀺𑀢𑀩𑁆𑀩𑁄𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑀲𑁆𑀲 𑀳𑀺 𑀪𑀺𑀓𑁆𑀔𑀼𑀪𑀸𑀯𑀁 𑀧𑀝𑀺𑀚𑀸𑀦𑀦𑁆𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀪𑀸𑀯𑁄, 𑀦 𑀢𑀢𑁄𑀧𑀭𑀁. 𑀪𑀺𑀓𑁆𑀔𑀼𑀪𑀸𑀯𑀁 𑀅𑀧𑁆𑀧𑀝𑀺𑀚𑀸𑀦𑀦𑁆𑀢𑁄 𑀳𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀧𑀓𑁆𑀔𑀁 𑀪𑀚𑀢𑀻𑀢𑀺 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀜𑁆𑀘 𑀯𑀼𑀢𑁆𑀢𑀢𑁆𑀢𑀸 𑀅𑀦𑁆𑀢𑀺𑀫𑀯𑀢𑁆𑀣𑀼 𑀅𑀚𑁆𑀛𑀸𑀧𑀦𑁆𑀦𑀧𑀼𑀩𑁆𑀩𑁄 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀓𑀸𑀭𑀡𑀁 𑀅𑀚𑀸𑀦𑀺𑀢𑁆𑀯𑀸𑀯 𑀢𑁂𑀦 𑀲𑀳 𑀧𑀜𑁆𑀘𑀯𑀕𑁆𑀕𑀕𑀡𑁄 𑀉𑀧𑁄𑀲𑀣𑀸𑀤𑀺𑀲𑀗𑁆𑀖𑀓𑀫𑁆𑀫𑀁 𑀓𑀭𑁄𑀢𑀺, 𑀓𑀸𑀭𑀓𑀲𑀗𑁆𑀖𑁄 𑀅𑀦𑀯𑀚𑁆𑀚𑁄, 𑀓𑀫𑁆𑀫𑀫𑁆𑀧𑀺 𑀦 𑀓𑀼𑀧𑁆𑀧𑀢𑀻𑀢𑀺, 𑀢𑁂𑀲𑀁 𑀫𑀢𑀺𑀫𑀢𑁆𑀢𑀫𑁂𑀯. 𑀓𑀲𑁆𑀫𑀸 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺 𑀅𑀪𑀸𑀯𑁄𑀧𑀺 𑀢𑀲𑁆𑀲 𑀪𑀺𑀓𑁆𑀔𑀼𑀲𑀜𑁆𑀜𑀸𑀬 𑀧𑀢𑀺𑀝𑁆𑀞𑀺𑀢𑀢𑁆𑀢𑀸, 𑀧𑀝𑀺𑀕𑁆𑀕𑀳𑀡𑀭𑀼𑀳𑀡𑀲𑁆𑀲 𑀘 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀪𑀺𑀓𑁆𑀔𑀽𑀢𑀺 𑀲𑀤𑁆𑀤𑀳𑀺𑀢𑀢𑁆𑀢𑀸 𑀢𑁂𑀦 𑀧𑀼𑀕𑁆𑀕𑀮𑁂𑀦 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺𑀧𑀺 𑀦𑀢𑁆𑀣𑀺, 𑀧𑀝𑀺𑀕𑁆𑀕𑀳𑀡𑀜𑁆𑀘 𑀭𑀼𑀳𑀢𑀺, 𑀏𑀓𑀯𑀻𑀲𑀢𑀺𑀯𑀚𑁆𑀚𑀦𑀻𑀬𑀧𑀼𑀕𑁆𑀕𑀮𑁂𑀧𑀺 𑀢𑀣𑀸𑀯𑀺𑀥𑀲𑁆𑀲 𑀅𑀯𑀺𑀘𑀸𑀭𑀺𑀓𑀢𑁆𑀢𑀸 𑀢𑁂𑀦 𑀲𑀳 𑀧𑀜𑁆𑀘𑀯𑀕𑁆𑀕𑀕𑀡𑁄 𑀉𑀧𑁄𑀲𑀣𑀸𑀤𑀺𑀲𑀗𑁆𑀖𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀓𑀸𑀭𑀓𑀲𑀗𑁆𑀖𑁄 𑀅𑀲𑀜𑁆𑀘𑀺𑀘𑁆𑀘 𑀅𑀦𑀼𑀧𑀯𑀚𑁆𑀚𑁄. 𑀓𑀫𑁆𑀫𑀁 𑀧𑀦 𑀓𑀼𑀧𑁆𑀧𑀢𑀻𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺, 𑀇𑀢𑁄 𑀬𑀼𑀢𑁆𑀢𑀢𑀭𑁄 𑀮𑀩𑁆𑀪𑀫𑀸𑀦𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄𑀯.

𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀏𑀯𑀁 𑀯𑀢𑁆𑀣𑀼𑀜𑀢𑁆𑀢𑀺𑀅𑀦𑀼𑀲𑀸𑀯𑀦𑀲𑀻𑀫𑀧𑀭𑀺𑀲𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑁆𑀧𑀦𑁆𑀦𑁄𑀢𑀺 𑀧𑀜𑁆𑀘𑀗𑁆𑀕𑁄𑀢𑀺 𑀯𑀸 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀅𑀓𑀼𑀧𑁆𑀧𑁂𑀦 𑀞𑀸𑀦𑀸𑀭𑀳𑁂𑀦 𑀉𑀧𑀭𑀺𑀪𑀸𑀯𑀁 𑀲𑀫𑀸𑀧𑀦𑁆𑀦𑁄𑀢𑀺 𑀯𑀸 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀮𑀤𑁆𑀥𑀦𑀸𑀫𑁄 𑀜𑀢𑁆𑀢𑀺 𑀘𑀢𑀼𑀢𑁆𑀣𑀉𑀧𑀲𑀫𑁆𑀧𑀦𑁆𑀦𑀪𑀸𑀯𑁄 𑀅𑀢𑀺𑀤𑀼𑀮𑁆𑀮𑀪𑁄𑀯.

𑀏𑀯𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀤𑀼𑀮𑁆𑀮𑀪𑁄, 𑀢𑀢𑁄 𑀧𑀩𑁆𑀩𑀚𑁆𑀚𑀸 𑀘 𑀉𑀧𑀲𑀫𑁆𑀧𑀤𑀸 𑀘𑀸 𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀧𑀤𑀸𑀦𑀁 𑀅𑀢𑁆𑀢𑁄 𑀯𑀼𑀢𑁆𑀢𑁄𑀬𑁂𑀯 𑀳𑁄𑀢𑀺.

𑀇𑀢𑀺 𑀲𑀸𑀕𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑀯𑀺𑀭𑀘𑀺𑀢𑁂 𑀲𑀻𑀫𑀯𑀺𑀲𑁄𑀥𑀦𑁂

𑀉𑀧𑀲𑀫𑁆𑀧𑀤𑀸𑀓𑀡𑁆𑀟𑁄 𑀧𑀞𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁨. 𑀓𑀧𑁆𑀧𑀯𑀺𑀦𑀸𑀲𑀓𑀡𑁆𑀟𑁄

𑀇𑀤𑀸𑀦𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑀤𑀼𑀮𑁆𑀮𑀪𑀓𑀣𑀸

‘‘𑀩𑀼𑀤𑁆𑀥𑁄 𑀘 𑀤𑀼𑀮𑁆𑀮𑀪𑁄 𑀮𑁄𑀓𑁂, 𑀲𑀤𑁆𑀥𑀫𑁆𑀫𑀲𑀯𑀦𑀫𑁆𑀧𑀺 𑀘;

𑀲𑀗𑁆𑀖𑁄 𑀘 𑀤𑀼𑀮𑁆𑀮𑀪𑁄 𑀮𑁄𑀓𑁂, 𑀲𑀧𑁆𑀧𑀼𑀭𑀺𑀲𑀸𑀢𑀺 𑀤𑀼𑀮𑁆𑀮𑀪𑀸’’𑀢𑀺.

𑀇𑀫𑀺𑀲𑁆𑀲𑀸 ¶ 𑀕𑀸𑀣𑀸𑀬 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄 𑀲𑀫𑁆𑀧𑀢𑁆𑀢𑁄. 𑀢𑀢𑁆𑀣 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂 𑀑𑀓𑀸𑀲𑀮𑁄𑀓𑁂 𑀯𑀸 𑀲𑀩𑁆𑀩𑀜𑁆𑀜𑀼𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀤𑀼𑀮𑁆𑀮𑀪𑁄𑀯 𑀢𑀣𑀸 𑀳𑁂𑀲 𑀮𑁄𑀓𑁄 𑀲𑀗𑁆𑀔𑀸𑀭𑀮𑁄𑀓𑁄, 𑀲𑀢𑁆𑀢𑀮𑁄𑀓𑁄, 𑀑𑀓𑀸𑀲𑀮𑁄𑀓𑁄𑀢𑀺 𑀢𑀺𑀧𑁆𑀧𑀪𑁂𑀤𑁄 𑀳𑁄𑀢𑀺 𑀢𑁂𑀲𑀁 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺 𑀘 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑀢𑀢𑁆𑀣 𑀮𑀼𑀚𑁆𑀚𑀢𑀺 𑀧𑀮𑀼𑀚𑁆𑀚𑀢𑀻𑀢𑀺 𑀮𑁄𑀓𑁄𑀢𑀺 𑀯𑀘𑀦𑀢𑁆𑀣𑁂𑀦 𑀲𑀢𑁆𑀢𑀮𑁄𑀓𑁄 𑀯𑁂𑀤𑀺𑀢𑀩𑁆𑀩𑁄. 𑀮𑁄𑀓𑀺𑀬𑀦𑁆𑀢𑀺 𑀧𑀢𑀺𑀝𑁆𑀞𑀳𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀦𑀺𑀓𑀸𑀬𑀸𑀢𑀺 𑀯𑀘𑀦𑀢𑁆𑀣𑁂𑀦 𑀑𑀓𑀸𑀲𑀮𑁄𑀓𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀳𑁂𑀲 𑀲𑀢𑁆𑀢𑀸 𑀅𑀯𑀓𑀲𑀦𑁆𑀢𑀺 𑀏𑀢𑁆𑀣𑀸𑀢𑀺𑀑𑀓𑀸𑀲𑁄𑀢𑀺 𑀯𑀼𑀘𑁆𑀘𑀢𑀺 𑀲𑁄 𑀪𑀽𑀫𑀺𑀯𑀲𑁂𑀦 𑀅𑀧𑀸𑀬𑀪𑀽𑀫𑀺, 𑀓𑀸𑀫𑀲𑀼𑀕𑀢𑀺𑀪𑀽𑀫𑀺, 𑀭𑀽𑀧𑀸𑀯𑀘𑀭𑀪𑀽𑀫𑀺, 𑀅𑀭𑀽𑀧𑀸𑀯𑀘𑀭𑀪𑀽𑀫𑀺𑀘𑁂𑀢𑀺 𑀘𑀢𑀼𑀩𑁆𑀩𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀦𑀺𑀭𑀬𑀁, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺, 𑀧𑁂𑀢𑁆𑀢𑀺𑀯𑀺𑀲𑀬𑁄, 𑀅𑀲𑀼𑀭𑀓𑀸𑀬𑁄, 𑀢𑀺 𑀘𑀢𑀲𑁆𑀲𑁄 𑀅𑀧𑀸𑀬𑀪𑀽𑀫𑀺 𑀦𑀸𑀫. 𑀫𑀦𑀼𑀲𑁆𑀲𑀸, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸, 𑀢𑀸𑀯𑀢𑀺𑀁𑀲𑀸, 𑀬𑀸𑀫𑀸, 𑀢𑀼𑀲𑀺𑀢𑀸, 𑀦𑀺𑀫𑁆𑀫𑀸𑀦𑀭𑀢𑀺, 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻 𑀘𑁂𑀢𑀺 𑀲𑀢𑁆𑀢𑀯𑀺𑀥𑀸 𑀳𑁄𑀢𑀺 𑀓𑀸𑀫𑀲𑀼𑀕𑀢𑀺𑀪𑀽𑀫𑀺 𑀲𑀸𑀧𑀦𑀸𑀬𑀁 𑀏𑀓𑀸𑀤𑀲𑀯𑀺𑀥𑀸𑀧𑀺 𑀓𑀸𑀫𑀢𑀡𑁆𑀳𑀸 𑀅𑀯𑀘𑀭𑀢𑀺 𑀏𑀢𑁆𑀣𑀸𑀢𑀺 𑀯𑀘𑀦𑀢𑁆𑀣𑁂𑀦 𑀓𑀸𑀫𑀸𑀯𑀘𑀭𑀪𑀽𑀫𑀺 𑀦𑀸𑀫. 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸, 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸, 𑀫𑀳𑀸𑀩𑁆𑀭𑀳𑁆𑀫𑀸 𑀘 𑀧𑀞𑀫𑀚𑁆𑀛𑀸𑀦𑀪𑀽𑀫𑀺 𑀇𑀤𑀁 𑀅𑀕𑁆𑀕𑀺𑀦𑀸 𑀧𑀭𑀺𑀕𑁆𑀕𑀳𑀺𑀢𑀝𑁆𑀞𑀸𑀦𑀁. 𑀧𑀭𑀺𑀢𑁆𑀢𑀸𑀪𑀸, 𑀅𑀧𑁆𑀧𑀫𑀸𑀡𑀸𑀪𑀸, 𑀆𑀪𑀲𑁆𑀲𑀭𑀸 𑀘 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺 𑀇𑀤𑀁 𑀆𑀧𑁂𑀦 𑀧𑀭𑀺𑀕𑁆𑀕𑀳𑀺𑀢𑀝𑁆𑀞𑀸𑀦𑀁. 𑀧𑀭𑀺𑀢𑁆𑀢𑀲𑀼𑀪𑀸, 𑀅𑀧𑁆𑀧𑀫𑀸𑀡𑀲𑀼𑀪𑀸, 𑀲𑀼𑀪𑀓𑀺𑀡𑁆𑀳𑀸 𑀘 𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀺 𑀇𑀤𑀁 𑀯𑀸𑀢𑁂𑀦 𑀧𑀭𑀺𑀕𑁆𑀕𑀳𑀺𑀢𑀝𑁆𑀞𑀸𑀦𑀁, 𑀢𑁂𑀲𑀁 𑀯𑀺𑀧𑀢𑁆𑀢𑀺𑀁 𑀧𑀭𑀢𑁄 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀯𑁂𑀳𑀧𑁆𑀨𑀮𑀸, 𑀅𑀲𑀜𑁆𑀜𑀲𑀢𑁆𑀢𑀸, 𑀲𑀼𑀤𑁆𑀥𑀸𑀯𑀸𑀲𑀸 𑀘 𑀘𑀢𑀼𑀢𑁆𑀣𑀚𑁆𑀛𑀸𑀦𑀪𑀽𑀫𑀺𑀘𑁂𑀢𑀺 𑀭𑀽𑀧𑀸𑀯𑀘𑀭𑀪𑀽𑀫𑀺 𑀲𑁄𑀴𑀲𑀯𑀺𑀥𑀸 𑀳𑁄𑀢𑀺. 𑀅𑀯𑀺𑀳𑀸, 𑀅𑀢𑀧𑁆𑀧𑀸, 𑀲𑀼𑀤𑀲𑁆𑀲𑀸, 𑀲𑀼𑀤𑀲𑁆𑀲𑀻, 𑀅𑀓𑀦𑀺𑀝𑁆𑀞𑀸𑀘𑁂𑀢𑀺 𑀲𑀼𑀤𑁆𑀥𑀸𑀯𑀸𑀲𑀪𑀽𑀫𑀺 𑀧𑀜𑁆𑀘𑀯𑀺𑀥𑀸 𑀳𑁄𑀢𑀺. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀪𑀽𑀫𑀺, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀪𑀽𑀫𑀺, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀪𑀽𑀫𑀺, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀪𑀽𑀫𑀺𑀘𑁂𑀢𑀺 𑀘𑀢𑀼𑀩𑁆𑀩𑀺𑀥𑀸 𑀳𑁄𑀢𑀺 𑀅𑀭𑀽𑀧𑀪𑀽𑀫𑀺. 𑀏𑀢𑁆𑀢𑀸𑀯𑀢𑀸 𑀏𑀓𑀢𑀺𑀁𑀲𑀧𑁆𑀧𑀪𑁂𑀤𑀸𑀧𑀺 𑀪𑀽𑀫𑀺 𑀅𑀯𑀓𑀲𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀦𑀺𑀓𑀸𑀬𑀸𑀢𑀺 𑀯𑀘𑀦𑀢𑁆𑀣𑁂𑀦 𑀑𑀓𑀸𑀲𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀅𑀝𑁆𑀞 𑀫𑀳𑀸𑀦𑀺𑀭𑀬𑀸𑀦𑀺 𑀅𑀧𑀸𑀬𑀪𑀽𑀫𑀺 𑀦𑀸𑀫. 𑀢𑀺𑀭𑀘𑁆𑀙𑀸𑀦𑀁 𑀧𑁂𑀢𑁆𑀢𑀺𑀯𑀺𑀲𑀬𑁄 𑀅𑀲𑀼𑀭𑀓𑀸𑀬𑁄𑀢𑀺 𑀇𑀫𑁂𑀲𑀁 𑀯𑀺𑀲𑀼𑀁 𑀪𑀽𑀫𑀺 𑀦𑀸𑀫 𑀦𑀢𑁆𑀣𑀺, 𑀫𑀦𑀼𑀲𑁆𑀲𑀪𑀽𑀫𑀺𑀬𑀁𑀬𑁂𑀯 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀤𑀻𑀲𑀼 𑀦𑀺𑀩𑀤𑁆𑀥𑀯𑀸𑀲𑀁 𑀯𑀲𑀦𑁆𑀢𑀺 𑀲𑁄𑀬𑁂𑀯 𑀧𑀤𑁂𑀲𑁄 𑀢𑁂𑀲𑀁 𑀪𑀽𑀫𑀺. 𑀫𑀦𑀼𑀲𑁆𑀲𑀪𑀽𑀫𑀺𑀢𑁄 𑀤𑁆𑀯𑀺𑀢𑀸𑀮𑀻𑀲𑀲𑀳𑀲𑁆𑀲𑀬𑁄𑀚𑀦𑁄 𑀬𑀼𑀕𑀦𑁆𑀥𑀭𑀧𑁆𑀧𑀫𑀸𑀡𑁄 𑀲𑀺𑀦𑁂𑀭𑀼𑀦𑁄 𑀧𑀜𑁆𑀘𑀫𑀸𑀴𑀺𑀦𑁆𑀥𑁄 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀪𑀽𑀫𑀺. 𑀢𑀢𑀼𑀧𑀭𑀺 𑀤𑁆𑀯𑀺𑀢𑀸𑀮𑀻𑀲𑀲𑀳𑀲𑁆𑀲𑀬𑁄𑀚𑀦𑀁 𑀲𑀺𑀦𑁂𑀭𑀼𑀫𑀢𑁆𑀣𑀓𑀁 𑀢𑀸𑀯𑀢𑀺𑀁𑀲𑀸𑀦𑀁 ¶ 𑀪𑀽𑀫𑀺. 𑀢𑀢𑀼𑀧𑀭𑀺 𑀤𑁆𑀯𑁂𑀢𑀸𑀮𑀻𑀲𑀲𑀳𑀲𑁆𑀲𑀬𑁄𑀚𑀦𑀁 𑀞𑀸𑀦𑀁 𑀬𑀸𑀫𑀸𑀦𑀁 𑀪𑀽𑀫𑀺. 𑀇𑀫𑀺𑀦𑀸 𑀦𑀬𑁂𑀦 𑀬𑀸𑀯 𑀯𑀲𑀯𑀢𑁆𑀢𑀺𑀪𑀽𑀫𑀺 𑀤𑁆𑀯𑀺𑀢𑀸𑀮𑀻𑀲𑀲𑀳𑀲𑁆𑀲𑀬𑁄𑀚𑀦𑁂 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀫𑀦𑀼𑀲𑁆𑀲𑀪𑀽𑀫𑀺𑀢𑁄 𑀬𑀸𑀯 𑀯𑀲𑀯𑀢𑁆𑀢𑀺𑀪𑀽𑀫𑀺 𑀤𑁆𑀯𑁂𑀲𑀳𑀲𑁆𑀲𑀸𑀦𑀺𑀧𑀜𑁆𑀘𑀦 𑀳𑀼𑀢𑀸𑀦𑀺 𑀤𑀼𑀯𑁂𑀲𑀢𑀲𑀳𑀲𑁆𑀲𑀸𑀦𑀺 𑀬𑁄𑀚𑀦𑀸𑀦𑀺 𑀳𑁄𑀦𑁆𑀢𑀺, 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺.

‘‘𑀫𑀦𑀼𑀲𑁆𑀲𑀪𑀽𑀫𑀺𑀢𑁄 𑀬𑀸𑀯, 𑀪𑀽𑀫𑀺 𑀯𑀲𑀯𑀢𑁆𑀢𑀦𑁆𑀢𑀭𑀸;

𑀤𑀼𑀯𑁂 𑀲𑀢𑀲𑀳𑀲𑁆𑀲𑀸𑀦𑀺, 𑀧𑀜𑁆𑀘𑀦𑀳𑀼𑀢𑀫𑁂𑀯 𑀘.

𑀤𑁆𑀯𑁂𑀲𑀳𑀲𑁆𑀲𑀜𑁆𑀘 𑀫𑀥𑀺𑀓𑀁, 𑀬𑁄𑀚𑀦𑀸𑀦𑀁 𑀧𑀫𑀸𑀡𑀢𑁄;

𑀕𑀡𑀦𑀸 𑀦𑀸𑀫 𑀪𑀽𑀫𑀻𑀲𑀼, 𑀲𑀗𑁆𑀔𑁆𑀬𑀸 𑀏𑀯𑀁 𑀧𑀓𑀸𑀲𑀺𑀢𑀸’’𑀢𑀺.

𑀢𑀢𑀼𑀧𑀭𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀬𑁄 𑀢𑀬𑁄 𑀩𑁆𑀭𑀳𑁆𑀫𑀼𑀦𑁄 𑀧𑀜𑁆𑀘𑀧𑀜𑁆𑀜𑀸𑀲𑀲𑀢𑀲𑀳𑀲𑁆𑀲 𑀅𑀝𑁆𑀞𑀲𑀳𑀲𑁆𑀲𑀬𑁄𑀚𑀦𑁂 𑀲𑀫𑀢𑀮𑁂 𑀞𑀸𑀦𑁂 𑀢𑀺𑀝𑁆𑀞𑀦𑁆𑀢𑀺. 𑀤𑀼𑀢𑀺𑀬𑀢𑀢𑀺𑀬𑀪𑀽𑀫𑀻𑀩𑁆𑀭𑀳𑁆𑀫𑀼𑀦𑁄𑀧𑀺 𑀢𑀧𑁆𑀧𑀫𑀸𑀡𑁂𑀲𑀼 𑀲𑀫𑀢𑀮𑁂𑀲𑀼 𑀢𑀺𑀝𑁆𑀞𑀦𑁆𑀢𑀺. 𑀘𑀢𑀼𑀢𑁆𑀣𑀪𑀽𑀫𑀺𑀬𑀁 𑀧𑀦 𑀯𑁂𑀳𑀧𑁆𑀨𑀮𑀅𑀲𑀜𑁆𑀜𑀲𑀢𑁆𑀢𑀸 𑀢𑀧𑁆𑀧𑀫𑀸𑀡𑁂 𑀲𑀫𑀢𑀮𑁂 𑀞𑀸𑀦𑁂 𑀢𑀺𑀝𑁆𑀞𑀦𑁆𑀢𑀺. 𑀢𑀢𑀼𑀧𑀭𑀺𑀲𑀼𑀤𑁆𑀥𑀸𑀯𑀸𑀲𑀪𑀽𑀫𑀺𑀬𑁄 𑀢𑀁𑀢𑀁 𑀧𑀫𑀸𑀡𑁂 𑀞𑀸𑀦𑁂 𑀉𑀧𑀭𑀽𑀧𑀭𑀺 𑀢𑀺𑀝𑁆𑀞𑀦𑁆𑀢𑀺. 𑀘𑀢𑀲𑁆𑀲𑁄𑀧𑀺 𑀅𑀭𑀽𑀧𑀪𑀽𑀫𑀺𑀬𑁄 𑀢𑀧𑁆𑀧𑀫𑀸𑀡𑁂 𑀞𑀸𑀦𑁂 𑀉𑀧𑀭𑀽𑀧𑀭𑀺 𑀢𑀺𑀝𑁆𑀞𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑀫𑀦𑀼𑀲𑁆𑀲𑀪𑀽𑀫𑀺𑀢𑁄 𑀬𑀸𑀯 𑀪𑀯𑀕𑁆𑀕𑀸 𑀬𑁄𑀚𑀦𑀸𑀦𑀁 𑀲𑀢𑁆𑀢𑀓𑁄𑀝𑀺 𑀘 𑀅𑀝𑁆𑀞𑀸𑀭𑀲𑀮𑀓𑁆𑀔𑀸 𑀘 𑀧𑀜𑁆𑀘𑀦𑀳𑀼𑀢𑀸𑀦𑀺 𑀘 𑀙𑀲𑀳𑀲𑁆𑀲𑀸𑀦𑀺 𑀘 𑀳𑁄𑀦𑁆𑀢𑀺 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑀧𑁄𑀭𑀸𑀡𑁂𑀳𑀺.

‘‘𑀳𑁂𑀝𑁆𑀞𑀺𑀫𑀸 𑀩𑁆𑀭𑀳𑁆𑀫𑀮𑁄𑀓𑀫𑁆𑀳𑀸, 𑀧𑀢𑀺𑀢𑀸 𑀫𑀳𑀢𑀻 𑀲𑀺𑀮𑀸;

𑀅𑀳𑁄𑀭𑀢𑁆𑀢𑁂𑀦 𑀏𑀓𑁂𑀦, 𑀉𑀕𑁆𑀕𑀢𑀸 𑀅𑀝𑁆𑀞𑀢𑀸𑀮𑀻𑀲𑀁.

𑀬𑁄𑀚𑀦𑀸𑀦𑀁 𑀲𑀳𑀲𑁆𑀲𑀸𑀦𑀺, 𑀘𑀸𑀢𑀼𑀫𑀸𑀲𑁂𑀳𑀺 𑀪𑀽𑀫𑀺;

𑀏𑀯𑀁 𑀯𑀼𑀢𑁆𑀢𑀧𑁆𑀧𑀫𑀸𑀡𑁂𑀦, 𑀲𑀸𑀬𑀁 𑀳𑁂𑀝𑁆𑀞𑀺𑀫𑀪𑀽𑀫𑀺.

𑀇𑀢𑁄 𑀲𑀢𑀲𑀳𑀲𑁆𑀲𑀸𑀦𑀺, 𑀲𑀢𑁆𑀢𑀧𑀜𑁆𑀜𑀸𑀲 𑀘𑀸𑀧𑀭𑀁;

𑀲𑀝𑁆𑀞𑀺 𑀘𑁂𑀯 𑀲𑀳𑀲𑁆𑀲𑀸𑀦𑀺, 𑀉𑀩𑁆𑀩𑁂𑀥𑁂𑀦 𑀧𑀓𑀸𑀲𑀺𑀢𑀸.

𑀬𑁄𑀚𑀦𑁂𑀲𑀼𑀧𑀺 𑀯𑀼𑀢𑁆𑀢𑁂𑀲𑀼, 𑀳𑀺𑀢𑁆𑀯𑀸 𑀓𑀸𑀫𑀧𑁆𑀧𑀫𑀸𑀡𑀓𑀁;

𑀲𑁂𑀲𑀸𑀦𑀺 𑀯𑀲𑀯𑀢𑁆𑀢𑀻𑀦𑀁, 𑀧𑀸𑀭𑀺𑀲𑀚𑁆𑀚𑀸𑀦 𑀫𑀦𑁆𑀢𑀭𑀁.

𑀢𑀜𑁆𑀘 𑀧𑀜𑁆𑀘𑀳𑀺 𑀧𑀜𑁆𑀜𑀸𑀲, 𑀲𑀢𑀲𑀳𑀲𑁆𑀲𑀸𑀦𑀺 𑀘𑀸𑀧𑀭𑀁;

𑀅𑀝𑁆𑀞 𑀘𑁂𑀯 𑀲𑀳𑀲𑁆𑀲𑀸𑀦𑀺, 𑀬𑁄𑀚𑀦𑀸𑀦𑀺 𑀧𑀯𑀼𑀘𑁆𑀘𑀭𑁂.

𑀇𑀢𑁄 𑀧𑀭𑀸𑀲𑀼 𑀲𑀩𑁆𑀩𑀸𑀲𑀼, 𑀩𑁆𑀭𑀳𑁆𑀫𑀪𑀽𑀫𑀻𑀲𑀼 𑀬𑁄𑀚𑀦𑀸;

𑀢𑀧𑁆𑀧𑀫𑀸𑀡𑀸𑀯 𑀤𑀝𑁆𑀞𑀩𑁆𑀩𑀸, 𑀦𑀬𑀕𑁆𑀕𑀸𑀳𑁂𑀦 𑀥𑀻𑀫𑀢𑀸.

𑀪𑀽𑀫𑀺𑀢𑁄 ¶ 𑀆𑀪𑀯𑀕𑁆𑀕𑀫𑁆𑀳𑀸, 𑀲𑀢𑁆𑀢𑀓𑁄𑀝𑀺 𑀅𑀝𑁆𑀞𑀸𑀭𑀲;

𑀮𑀓𑁆𑀔𑀸 𑀧𑀜𑁆𑀘 𑀦𑀳𑀼𑀢𑀸𑀦𑀺, 𑀙𑀲𑀳𑀲𑁆𑀲𑀸𑀦𑀺 𑀲𑀩𑁆𑀩𑀤𑀸𑀢𑀺.

𑀏𑀲𑀸 𑀘 𑀯𑀺𑀘𑀸𑀭𑀡𑀸 𑀝𑀻𑀓𑀸 𑀘𑀭𑀺𑀬𑀫𑀢𑁂𑀦 𑀓𑀢𑀸;

𑀇𑀤𑀫𑁂𑀯 𑀲𑀦𑁆𑀥𑀸𑀬, 𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸.

𑀧𑀭𑀺𑀳𑀭𑀦𑁆𑀢𑀺 𑀤𑀺𑀲𑀸 𑀪𑀦𑁆𑀢𑀺, 𑀯𑀺𑀭𑁄𑀘𑀫𑀸𑀦𑀸 𑀬𑀸𑀯𑀢𑀸;

𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁂, 𑀏𑀢𑁆𑀣 𑀢𑁂 𑀯𑀢𑁆𑀢𑀢𑀻 𑀯𑀲𑁄’’𑀢𑀺.

𑀯𑀼𑀢𑁆𑀢𑀁. 𑀏𑀢𑁆𑀣𑀦𑁆𑀢𑀭𑁂 𑀲𑀢𑁆𑀢𑀸 𑀢𑀺𑀝𑁆𑀞𑀦𑁆𑀢𑀺, 𑀢𑁂𑀲𑀁 𑀯𑀺𑀢𑁆𑀣𑀸𑀭𑁄 𑀅𑀧𑀼𑀩𑁆𑀩𑀁 𑀓𑀢𑁆𑀯𑀸 𑀓𑀣𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀦 𑀯𑀓𑁆𑀔𑀸𑀫 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂 𑀑𑀓𑀸𑀲𑀮𑁄𑀓𑁂 𑀘 𑀲𑀩𑁆𑀩𑀜𑁆𑀜𑀼𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀯 𑀤𑀼𑀮𑁆𑀮𑀪𑁄, 𑀢𑀣𑀸 𑀳𑀺 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀅𑀦𑀼𑀩𑀼𑀤𑁆𑀥𑁄, 𑀲𑀸𑀯𑀓𑀩𑀼𑀤𑁆𑀥𑁄, 𑀧𑀘𑁆𑀘𑁂𑀓𑀩𑀼𑀤𑁆𑀥𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺. 𑀢𑀢𑁆𑀣 𑀩𑀳𑀼𑀲𑁆𑀲𑀼𑀢𑀁 𑀪𑀺𑀓𑁆𑀔𑀼𑀁 𑀧𑀲𑀁𑀲𑀦𑁆𑀢𑁂𑀦 𑀘 𑀦 𑀲𑁄 𑀢𑀼𑀫𑁆𑀳𑀸𑀓𑀁 𑀲𑀸𑀯𑀓𑁄 𑀦𑀸𑀫, 𑀩𑀼𑀤𑁆𑀥𑁄𑀦𑀸𑀫𑁂𑀲 𑀘𑀼𑀦𑁆𑀤𑀸𑀢𑀺 𑀩𑀳𑀼𑀲𑁆𑀲𑀼𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑀼𑀤𑁆𑀥𑀪𑀸𑀯𑀁 𑀅𑀦𑀼𑀚𑀸𑀦𑀦𑁆𑀢𑁂𑀦 𑀘.

𑀥𑀫𑁆𑀫𑀓𑀸𑀬𑁄 𑀬𑀢𑁄 𑀲𑀢𑁆𑀣𑀸, 𑀥𑀫𑁆𑀫𑁄 𑀲𑀢𑁆𑀣𑀼𑀓𑀸𑀬𑁄 𑀫𑀢𑁄;

𑀥𑀫𑁆𑀫𑀸𑀲𑀺𑀓𑁄𑀲𑁄 𑀲𑀗𑁆𑀖𑁄 𑀘, 𑀲𑀢𑁆𑀣𑀼𑀲𑀗𑁆𑀔𑁆𑀬𑀫𑁆𑀧𑀺 𑀕𑀘𑁆𑀙𑀢𑀻𑀢𑀺.

𑀯𑀼𑀢𑁆𑀢𑁂 𑀧𑀼𑀣𑀼𑀚𑁆𑀚𑀦𑁄𑀧𑀺 𑀉𑀧𑀘𑀸𑀭𑀯𑀲𑁂𑀦 𑀯𑀸𑀘𑀦𑀸𑀫𑀕𑁆𑀕𑀲𑁆𑀲 𑀩𑁄𑀥𑀢𑁆𑀢𑀸 𑀅𑀦𑀼𑀩𑀼𑀤𑁆𑀥𑁄 𑀦𑀸𑀫. 𑀅𑀭𑀺𑀬𑀲𑀸𑀯𑀓𑁄 𑀧𑀦 𑀧𑀭𑀢𑁄 𑀬𑁄𑀲𑀯𑀲𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀢𑀺 𑀩𑀼𑀚𑁆𑀛𑀦𑀫𑀢𑁆𑀢𑀫𑁂𑀯 𑀯𑀸𑀢𑀺 𑀯𑀘𑀦𑀢𑁆𑀣𑁂𑀦 𑀩𑀼𑀚𑁆𑀛𑀦𑀲𑀪𑀸𑀯𑀢𑁆𑀢𑀸 𑀲𑀸𑀯𑀓𑀩𑀼𑀤𑁆𑀥𑁄 𑀦𑀸𑀫. 𑀬𑁄 𑀧𑀦 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄 𑀲𑀬𑀫𑁆𑀪𑀽𑀜𑀸𑀡𑁂𑀦 𑀅𑀦𑀜𑁆𑀜𑀩𑁄𑀥𑀓𑁄 𑀳𑀼𑀢𑁆𑀯𑀸 𑀲𑀸𑀫𑀁 𑀩𑀼𑀚𑁆𑀛𑀦𑀢𑁆𑀣𑁂𑀦 𑀧𑀘𑁆𑀘𑁂𑀓𑀩𑀼𑀚𑁆𑀛𑀢𑁆𑀢𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀦𑀸𑀫. 𑀲𑀫𑁆𑀩𑀼𑀤𑁆𑀥𑁄𑀢𑀺𑀧𑀺 𑀏𑀢𑀲𑁆𑀲𑁂𑀯 𑀦𑀸𑀫𑀁. 𑀬𑁄 𑀧𑀦 𑀲𑀗𑁆𑀔𑀢𑀸𑀲𑀗𑁆𑀔𑀢𑀧𑁆𑀧𑀪𑁂𑀤𑀁 𑀲𑀓𑀮𑀫𑁆𑀧𑀺 𑀥𑀫𑁆𑀫𑀚𑀸𑀢𑀁 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑀯𑀲𑁂𑀦 𑀲𑀫𑁆𑀫𑀸 𑀧𑀓𑀸𑀭𑁂𑀦 𑀲𑀬𑀁 𑀧𑀘𑀺𑀢𑀼𑀧𑀸𑀭𑀫𑀺𑀢𑀸𑀲𑀬𑀫𑁆𑀪𑀽𑀢𑁂𑀦 𑀲𑀬𑀫𑁆𑀪𑀽𑀜𑀸𑀡𑁂𑀦 𑀲𑀬𑀫𑁂𑀯 𑀅𑀦𑀜𑁆𑀜𑀩𑁄𑀥𑀺𑀢𑁄 𑀳𑀼𑀢𑁆𑀯𑀸 𑀲𑀯𑀸𑀲𑀦𑀲𑀫𑁆𑀫𑁄𑀳𑀦𑀺𑀤𑁆𑀤𑀸𑀬 𑀅𑀘𑁆𑀘𑀦𑁆𑀢𑀁 𑀯𑀺𑀕𑀢𑁄 𑀤𑀺𑀦𑀓𑀭𑀓𑀺𑀭𑀡𑀲𑀫𑀸𑀕𑀫𑁂𑀦 𑀧𑀭𑀫𑀭𑀼𑀘𑀺𑀭𑀲𑀺𑀭𑀻𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀺𑀬𑀸 𑀯𑀺𑀓𑀲𑀺𑀢𑀫𑀺𑀯 𑀧𑀤𑀼𑀫𑀁 𑀅𑀕𑁆𑀕𑀫𑀕𑁆𑀕𑀜𑀸𑀡𑀲𑀫𑀸𑀕𑀫𑁂𑀦 𑀅𑀧𑀭𑀺𑀫𑀺𑀢𑀕𑀼𑀡𑀕𑀡𑀸𑀮𑀗𑁆𑀓𑀢𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑁆𑀧𑀢𑁆𑀢𑀺𑀬𑀸 𑀲𑀩𑁆𑀩𑀥𑀫𑁆𑀫𑁂 𑀩𑀼𑀚𑁆𑀛𑀺 𑀅𑀩𑀼𑀚𑁆𑀛𑀺 𑀅𑀜𑁆𑀜𑀸𑀲𑀻𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀪𑀕𑀯𑀸, 𑀲𑁄𑀯 𑀮𑁄𑀓𑁂 𑀤𑀼𑀮𑁆𑀮𑀪𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸𑀦𑀫𑁆𑀧𑀺 𑀳𑀺 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀲𑀢𑀲𑀳𑀲𑁆𑀲𑀸𑀤𑀺𑀯𑀲𑁂𑀦 𑀏𑀓𑀢𑁄 𑀧𑀯𑀢𑁆𑀢𑀢𑁆𑀢𑀸 𑀢𑁂 𑀤𑀼𑀮𑁆𑀮𑀪𑀸𑀧𑀺 𑀅𑀦𑀘𑁆𑀙𑀭𑀺𑀬𑀚𑀸𑀢𑀢𑁆𑀢𑀸 𑀧𑀭𑁂𑀲𑀁 𑀫𑀕𑁆𑀕𑀨𑀮𑀸𑀥𑀺𑀕𑀫𑀸𑀬 𑀉𑀧𑀦𑀺𑀲𑁆𑀲𑀬𑀭𑀳𑀺𑀢𑀢𑁆𑀢𑀸 𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀯 𑀮𑁄𑀓𑁂 𑀤𑀼𑀮𑁆𑀮𑀪𑁄, 𑀅𑀬𑀁 𑀮𑁄𑀓𑀲𑀫𑁆𑀧𑀢𑁆𑀢𑀺𑀯𑀺𑀘𑀸𑀭𑀡𑀸.

𑀓𑀣𑀁 ¶ 𑀮𑁄𑀓𑀲𑁆𑀲 𑀯𑀺𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸 𑀢𑀣𑀸 𑀳𑁂𑀲 𑀮𑁄𑀓𑁄 𑀯𑀺𑀦𑀲𑁆𑀲𑀫𑀸𑀦𑁄 𑀢𑁂𑀚𑁂𑀦𑀧𑀺 𑀆𑀧𑁂𑀦𑀧𑀺 𑀯𑀸𑀬𑀼𑀦𑀸𑀧𑀺 𑀯𑀺𑀦𑀲𑁆𑀲𑀢𑀺. 𑀢𑀲𑁆𑀲 𑀯𑀺𑀢𑁆𑀣𑀸𑀭𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀤𑀻𑀲𑀼 𑀯𑀼𑀘𑁆𑀘𑀫𑀸𑀦𑁄𑀧𑀺 𑀓𑁂𑀲𑀜𑁆𑀘𑀺 𑀧𑀼𑀕𑁆𑀕𑀮𑀸𑀦𑀁 𑀫𑀢𑁂𑀦 𑀫𑀺𑀘𑁆𑀙𑀸𑀕𑀸𑀳𑀢𑁆𑀢𑀸 𑀩𑁆𑀭𑀳𑁆𑀫𑀽𑀦𑀁 𑀆𑀬𑀼𑀦𑀸 𑀫𑀺𑀦𑀺𑀢𑁂𑀧𑀺 𑀅𑀲𑀫𑀸𑀦𑀁 𑀲𑀁𑀯𑀝𑁆𑀝𑀲𑀻𑀫𑀸𑀧𑀺 𑀯𑀺𑀭𑀼𑀤𑁆𑀥𑀸, 𑀢𑀲𑁆𑀫𑀸 𑀢𑁂𑀲𑀁 𑀯𑀸𑀤𑀁 𑀅𑀧𑀦𑁂𑀢𑁆𑀯𑀸 𑀕𑀦𑁆𑀣𑀢𑁄 𑀲𑀫𑀸𑀦𑁂𑀢𑁆𑀯𑀸 𑀯𑀓𑁆𑀔𑀸𑀫. 𑀢𑀢𑁆𑀣 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀲𑀁𑀯𑀝𑁆𑀝𑁄, 𑀲𑀁𑀯𑀝𑁆𑀝𑀝𑁆𑀞𑀸𑀬𑀻, 𑀯𑀺𑀯𑀝𑁆𑀝𑁄, 𑀯𑀝𑁆𑀝𑀝𑁆𑀞𑀸𑀬𑀻𑀢𑀺. 𑀢𑀬𑁄 𑀲𑀁𑀯𑀝𑁆𑀝𑀸 𑀆𑀧𑁄𑀲𑀁𑀯𑀝𑁆𑀝𑁄, 𑀢𑁂𑀚𑁄𑀲𑀁𑀯𑀝𑁆𑀝𑁄, 𑀯𑀸𑀬𑁄𑀲𑀁𑀯𑀝𑁆𑀝𑁄. 𑀢𑀺𑀲𑁆𑀲𑁄 𑀲𑀁𑀯𑀝𑁆𑀝𑀲𑀻𑀫𑀸 𑀆𑀪𑀲𑁆𑀲𑀭𑀸, 𑀲𑀼𑀪𑀓𑀺𑀡𑁆𑀳𑀸, 𑀯𑁂𑀳𑀧𑁆𑀨𑀮𑀸𑀢𑀺. 𑀅𑀬𑀫𑁂𑀢𑁆𑀣 𑀉𑀤𑁆𑀤𑁂𑀲𑁄. 𑀢𑀢𑁆𑀣 𑀲𑀁𑀯𑀝𑁆𑀝𑁄 𑀦𑀸𑀫 𑀧𑀭𑀺𑀳𑀸𑀬𑀫𑀸𑀦𑁄 𑀓𑀧𑁆𑀧𑁄. 𑀢𑁂𑀦 𑀲𑀁𑀯𑀝𑁆𑀝𑀝𑁆𑀞𑀸𑀬𑀻𑀧𑀺 𑀕𑀳𑀺𑀢𑁄 𑀳𑁄𑀢𑀺, 𑀢𑀁 𑀫𑀽𑀮𑀓𑀢𑁆𑀢𑀸. 𑀯𑀟𑁆𑀠𑀬𑀫𑀸𑀦𑁄 𑀯𑀺𑀯𑀝𑁆𑀝𑀓𑀧𑁆𑀧𑁄 𑀦𑀸𑀫. 𑀢𑁂𑀦 𑀯𑀺𑀯𑀝𑁆𑀝𑀝𑁆𑀞𑀸𑀬𑀻𑀧𑀺 𑀕𑀳𑀺𑀢𑁄 𑀢𑀁 𑀫𑀽𑀮𑀓𑀢𑁆𑀢𑀸. 𑀢𑀢𑁆𑀣 𑀲𑀁𑀯𑀝𑁆𑀝𑁄𑀢𑀺 𑀯𑀺𑀦𑀸𑀲𑁄. 𑀬𑀤𑀸 𑀓𑀧𑁆𑀧𑁄 𑀯𑀺𑀦𑀲𑁆𑀲𑀫𑀸𑀦𑁄 𑀢𑁂𑀚𑁂𑀦 𑀲𑀁𑀯𑀝𑁆𑀝𑀢𑀺, 𑀆𑀪𑀲𑁆𑀲𑀭𑀢𑁄 𑀳𑁂𑀝𑁆𑀞𑀸 𑀧𑀞𑀫𑀚𑁆𑀛𑀸𑀦𑀪𑀽𑀫𑀺 𑀅𑀕𑁆𑀕𑀺𑀦𑀸 𑀤𑀬𑁆𑀳𑀢𑀺. 𑀬𑀤𑀸 𑀆𑀧𑁂𑀦 𑀲𑀁𑀯𑀝𑁆𑀝𑀢𑀺, 𑀲𑀼𑀪𑀓𑀺𑀡𑁆𑀳𑀢𑁄 𑀳𑁂𑀝𑁆𑀞𑀸 𑀬𑀸𑀯 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺 𑀉𑀤𑀓𑁂𑀦 𑀯𑀺𑀮𑀻𑀬𑀢𑀺. 𑀬𑀤𑀸 𑀯𑀸𑀬𑀼𑀦𑀸 𑀲𑀁𑀯𑀝𑁆𑀝𑀢𑀺, 𑀯𑁂𑀳𑀧𑁆𑀨𑀮𑀢𑁄 𑀳𑁂𑀝𑁆𑀞𑀸 𑀬𑀸𑀯 𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀺 𑀯𑀸𑀢𑁂𑀦 𑀲𑀁𑀯𑀝𑁆𑀝𑀢𑀺. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀚𑀸𑀢𑀺𑀔𑁂𑀢𑁆𑀢 𑀆𑀡𑀸𑀔𑁂𑀢𑁆𑀢𑀯𑀺𑀲𑀬𑀔𑁂𑀢𑁆𑀢𑀯𑀲𑁂𑀦 𑀢𑀺𑀡𑁆𑀡𑀁 𑀩𑀼𑀤𑁆𑀥𑀔𑁂𑀢𑁆𑀢𑀸𑀦𑀁 𑀆𑀡𑀸𑀔𑁂𑀢𑁆𑀢𑀁 𑀯𑀺𑀦𑀲𑁆𑀲𑀢𑀺. 𑀢𑀲𑁆𑀫𑀺𑀁 𑀯𑀺𑀦𑀝𑁆𑀞𑁂 𑀚𑀸𑀢𑀺𑀔𑁂𑀢𑁆𑀢𑀫𑁆𑀧𑀺 𑀯𑀺𑀦𑀲𑁆𑀲𑀢𑁂𑀯. 𑀢𑀢𑁆𑀣 𑀚𑀸𑀢𑀺𑀔𑁂𑀢𑁆𑀢𑀁 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁 𑀳𑁄𑀢𑀺. 𑀢𑀁 𑀢𑀣𑀸𑀕𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀆𑀬𑀼𑀲𑀗𑁆𑀔𑀸𑀭𑁄𑀲𑁆𑀲𑀚𑁆𑀚𑀦𑀸𑀤𑀺𑀓𑀸𑀮𑁂𑀲𑀼𑀧𑀺 𑀓𑀫𑁆𑀧𑀢𑀺. 𑀆𑀡𑀸𑀔𑁂𑀢𑁆𑀢𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁. 𑀬𑀢𑁆𑀣 𑀭𑀢𑀦𑀲𑀼𑀢𑁆𑀢𑀁 𑀔𑀦𑁆𑀥𑀧𑀭𑀺𑀢𑁆𑀢𑀁 𑀥𑀚𑀕𑁆𑀕𑀧𑀭𑀺𑀢𑁆𑀢𑀁 𑀆𑀝𑀸𑀦𑀸𑀝𑀺𑀬𑀧𑀭𑀺𑀢𑁆𑀢𑀁 𑀫𑁄𑀭𑀧𑀭𑀺𑀢𑁆𑀢𑀦𑁆𑀢𑀺 𑀇𑀫𑁂𑀲𑀁 𑀧𑀭𑀺𑀢𑁆𑀢𑀸𑀦𑀁 𑀆𑀦𑀼𑀪𑀸𑀯𑁄 𑀧𑀯𑀢𑁆𑀢𑀢𑀺. 𑀯𑀺𑀲𑀬𑀔𑁂𑀢𑁆𑀢𑀁 𑀅𑀦𑀦𑁆𑀢𑀁 𑀅𑀧𑀭𑀺𑀫𑀸𑀡𑀁. 𑀢𑀢𑁆𑀣 𑀚𑀸𑀢𑀺𑀔𑁂𑀢𑁆𑀢𑀆𑀡𑀸𑀔𑁂𑀢𑁆𑀢𑀸𑀯𑀲𑁂𑀦 𑀤𑁆𑀯𑁂 𑀔𑁂𑀢𑁆𑀢𑀸𑀦𑀺 𑀏𑀓𑀢𑁄 𑀯𑀺𑀦𑀲𑁆𑀲𑀦𑁆𑀢𑀺. 𑀲𑀡𑁆𑀞𑀳𑀦𑁆𑀢𑀫𑁆𑀧𑀺 𑀏𑀓𑀢𑁄 𑀲𑀡𑁆𑀞𑀳𑀢𑀺. 𑀢𑀲𑁆𑀲 𑀯𑀺𑀦𑀸𑀲𑁄𑀘 𑀲𑀡𑁆𑀞𑀳𑀦𑁆𑀢𑀜𑁆𑀘 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀧𑁆𑀧𑁄 𑀅𑀕𑁆𑀕𑀺𑀦𑀸 𑀦𑀲𑁆𑀲𑀢𑀺, 𑀢𑀤𑀸 𑀆𑀤𑀺𑀢𑁄 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀁 𑀏𑀓𑀫𑁂𑀖𑀯𑀲𑁆𑀲𑀁 𑀯𑀲𑀺, 𑀢𑀼𑀝𑁆𑀞𑀸 𑀫𑀦𑀼𑀲𑁆𑀲𑀸 𑀩𑀻𑀚𑀸𑀦𑀺 𑀯𑀧𑁆𑀧𑁂𑀦𑁆𑀢𑀺, 𑀲𑀲𑁆𑀲𑁂𑀲𑀼 𑀕𑁄𑀔𑀸𑀬𑀺𑀢𑀫𑀢𑁆𑀢𑁂𑀲𑀼 𑀚𑀸𑀢𑁂𑀲𑀼 𑀕𑀤𑁆𑀭𑀪𑀭𑀯𑀁 𑀯𑀺𑀭𑀯𑀦𑁆𑀢𑁄 𑀏𑀓𑀩𑀺𑀦𑁆𑀤𑀼𑀧𑀺 𑀦 𑀧𑀢𑀢𑀺. 𑀬𑀤𑀸 𑀧𑀘𑁆𑀙𑀺𑀦𑁆𑀦𑀫𑁂𑀯 𑀳𑁄𑀢𑀺 𑀢𑀤𑀸 𑀯𑀲𑁆𑀲𑀽𑀧𑀚𑀻𑀯𑀺𑀦𑁄 𑀲𑀢𑁆𑀢𑀸 𑀓𑀸𑀮𑀁 𑀓𑀢𑁆𑀯𑀸 𑀧𑀭𑀺𑀢𑁆𑀢𑀸𑀪𑁂𑀲𑀼 𑀩𑁆𑀭𑀳𑁆𑀫𑀪𑀽𑀫𑀻𑀲𑀼 ¶ 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀼𑀜𑁆𑀜𑀨𑀮𑀽𑀧𑀚𑀻𑀯𑀺𑀦𑁄𑀧𑀺 𑀤𑁂𑀯𑀢𑀸 𑀢𑀢𑁆𑀣𑁂𑀯 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀢𑀢𑁆𑀣 𑀢𑀢𑁆𑀣 𑀉𑀤𑀓𑀁 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀢𑀺, 𑀫𑀘𑁆𑀙𑀓𑀘𑁆𑀙𑀧𑀸𑀤𑀺 𑀉𑀤𑀓𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀓𑀸𑀮𑀁 𑀓𑀢𑁆𑀯𑀸 𑀫𑀦𑀼𑀲𑁆𑀲𑀤𑁂𑀯𑀮𑁄𑀓𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀦𑁂𑀭𑀬𑀺𑀓𑀲𑀢𑁆𑀢𑀸𑀧𑀺 𑀲𑀢𑁆𑀢𑀫𑀲𑀽𑀭𑀺𑀬𑀧𑀸𑀢𑀼𑀪𑀸𑀯𑀸 𑀯𑀺𑀦𑀲𑁆𑀲𑀦𑁆𑀢𑀺, 𑀢𑁂𑀧𑀺 𑀤𑁂𑀯𑀮𑁄𑀓𑁂 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀯𑀲𑁂𑀦 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀳𑀺 𑀮𑁄𑀓𑀩𑁆𑀬𑀽𑀳𑀸 𑀦𑀸𑀫 𑀓𑀸𑀫𑀸𑀯𑀘𑀭𑀤𑁂𑀯𑀸 𑀉𑀓𑁆𑀔𑀺𑀢𑁆𑀢𑀲𑀺𑀭𑀸 𑀯𑀺𑀓𑀺𑀡𑁆𑀡𑀓𑁂𑀲𑀸 𑀭𑀼𑀤𑀫𑀼𑀔𑀸 𑀅𑀲𑁆𑀲𑀽𑀦𑀺 𑀳𑀢𑁆𑀣𑁂𑀳𑀺 𑀫𑀼𑀜𑁆𑀘𑀫𑀸𑀦𑀸 𑀭𑀢𑁆𑀢𑀯𑀢𑁆𑀣𑀦𑀺𑀯𑀢𑁆𑀣𑀸 𑀅𑀢𑀺𑀯𑀺𑀬 𑀯𑀺𑀭𑀽𑀧𑀯𑁂𑀲𑀥𑀸𑀭𑀺𑀦𑁄 𑀳𑀼𑀢𑁆𑀯𑀸 𑀫𑀦𑀼𑀲𑁆𑀲𑀧𑀣𑁂 𑀯𑀺𑀘𑀭𑀦𑁆𑀢𑀸 𑀏𑀯𑀁 𑀆𑀭𑁄𑀘𑁂𑀦𑁆𑀢𑀺 ‘‘𑀫𑀸𑀭𑀺𑀲𑀸 𑀪𑁄 𑀇𑀢𑁄 𑀯𑀲𑁆𑀲𑀲𑀢 𑀲𑀳𑀲𑁆𑀲𑀘𑁆𑀘𑀬𑁂𑀦 𑀓𑀧𑁆𑀧𑀯𑀼𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀺 𑀅𑀬𑀁 𑀮𑁄𑀓𑁄 𑀯𑀺𑀦𑀲𑁆𑀲𑀺𑀲𑁆𑀲𑀢𑀺 𑀫𑀳𑀸𑀲𑀫𑀼𑀤𑁆𑀤𑁄𑀧𑀺𑀲𑀼𑀲𑁆𑀲𑀺𑀲𑁆𑀲𑀢𑀺 𑀅𑀬𑀜𑁆𑀘 𑀫𑀳𑀸𑀧𑀣𑀯𑀻 𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀸 𑀟𑀬𑁆𑀳𑀺𑀲𑁆𑀲𑀢𑀺 𑀯𑀺𑀦𑀲𑁆𑀲𑀺𑀲𑁆𑀲𑀢𑀺 𑀬𑀸𑀯𑀩𑁆𑀭𑀳𑁆𑀫𑀮𑁄𑀓𑀸 𑀯𑀺𑀦𑀸𑀲𑁄 𑀪𑀯𑀺𑀲𑁆𑀲𑀢𑀺 𑀫𑁂𑀢𑁆𑀢𑀁 𑀫𑀸𑀭𑀺𑀲𑀸 𑀪𑀸𑀯𑁂𑀣. 𑀓𑀭𑀼𑀡𑀁, 𑀫𑀼𑀤𑀺𑀢𑀁, 𑀉𑀧𑁂𑀓𑁆𑀔𑀁 𑀫𑀸𑀭𑀺𑀲𑀸 𑀪𑀸𑀯𑁂𑀣 𑀫𑀸𑀢𑀭𑀁 𑀉𑀧𑀝𑁆𑀞𑀳𑀣, 𑀧𑀺𑀢𑀭𑀁 𑀉𑀧𑀝𑁆𑀞𑀳𑀣, 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄 𑀳𑁄𑀣𑀸’’𑀢𑀺. 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀫𑀦𑀼𑀲𑁆𑀲𑀸 𑀘 𑀪𑀼𑀫𑁆𑀫𑀤𑁂𑀯𑀢𑀸 𑀘 𑀲𑀁𑀯𑁂𑀕𑀚𑀸𑀢𑀸 𑀅𑀜𑁆𑀜𑀫𑀜𑁆𑀜𑀁 𑀫𑀼𑀤𑀼𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀫𑁂𑀢𑁆𑀢𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑀺𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀢𑀢𑁆𑀣 𑀲𑀼𑀥𑀸𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀸𑀬𑁄 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀛𑀸𑀦𑀁 𑀧𑀝𑀺𑀮𑀪𑀦𑁆𑀢𑀺, 𑀏𑀯𑀁 𑀦𑁂𑀭𑀬𑀺𑀓𑀲𑀢𑁆𑀢𑀸𑀧𑀺 𑀅𑀧𑀭𑀸𑀧𑀭𑀺𑀬𑀓𑀫𑁆𑀫𑁂𑀦 𑀤𑁂𑀯𑀮𑁄𑀓𑀁 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀬𑁂 𑀧𑀦 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀢𑁂𑀲𑀁 𑀓𑀫𑁆𑀫𑀲𑁆𑀲 𑀅𑀧𑀭𑀺𑀓𑁆𑀔𑀬𑀸 𑀅𑀜𑁆𑀜𑀘𑀓𑁆𑀓𑀯𑀸𑀴𑁂𑀲𑀼 𑀅𑀢𑁆𑀢𑀦𑁄 𑀓𑀫𑁆𑀫𑀸𑀦𑀼𑀭𑀽𑀧𑀁 𑀯𑀺𑀧𑀸𑀓𑀫𑀦𑀼𑀪𑁄𑀦𑁆𑀢𑀺. 𑀢𑁂𑀦𑁂𑀯 𑀅𑀳𑁄𑀲𑀺𑀓𑀫𑁆𑀫𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦 𑀅𑀓𑀢𑁆𑀢𑀩𑁆𑀩𑀁 𑀦𑀸𑀫 𑀧𑀸𑀧𑀁 𑀦𑀢𑁆𑀣𑀺, 𑀬𑀢𑁄 𑀲𑀁𑀲𑀸𑀭𑀔𑀸𑀡𑀼𑀪𑀸𑀯𑁄𑀯 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀤𑀺𑀝𑁆𑀞𑀺 𑀧𑀭𑀫𑀸𑀦𑀺 𑀪𑀺𑀓𑁆𑀔𑀯𑁂 𑀯𑀚𑁆𑀚𑀸𑀦𑀻’’𑀢𑀺. ‘‘𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀓𑀫𑁆𑀫𑀭𑀳𑀺𑀢𑁄𑀧𑀺 𑀲𑀁𑀲𑀭𑀦𑁆𑀢𑁄 𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸. ‘‘𑀅𑀧𑀭𑀸𑀧𑀭𑀺𑀬𑀓𑀫𑁆𑀫𑀯𑀲𑁂𑀦 𑀬𑀢𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀫𑀸𑀤𑀸𑀦𑀢𑁄 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀯𑀺𑀭𑀸𑀚𑁂𑀢𑁆𑀯𑀸 𑀪𑀯𑀢𑁄 𑀯𑀼𑀝𑁆𑀞𑀸𑀦𑀁 𑀦𑀸𑀫 𑀪𑀯𑁂𑀬𑁆𑀬𑀸𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺. 𑀏𑀯𑀁 𑀤𑁂𑀯𑀮𑁄𑀓𑁂 𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑀯𑀲𑁂𑀦 𑀲𑀩𑁆𑀩𑁂𑀧𑀺 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀯𑀲𑁆𑀲𑀼𑀧𑀘𑁆𑀙𑁂𑀤𑀢𑁄 𑀧𑀦 𑀉𑀤𑁆𑀥𑀁 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀤𑀼𑀢𑀺𑀬𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺. 𑀧𑀸𑀢𑀼𑀪𑀽𑀢𑁂 𑀘 𑀢𑀲𑁆𑀫𑀺𑀁 𑀦𑁂𑀯 𑀭𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑁄, 𑀦 𑀤𑀺𑀯𑀸 𑀧𑀭𑀺𑀘𑁆𑀙𑁂𑀤𑁄 𑀧𑀜𑁆𑀜𑀸𑀬𑀢𑀺, 𑀏𑀓𑁄 𑀲𑀽𑀭𑀺𑀬𑁄 𑀉𑀝𑁆𑀞𑁂𑀢𑀺, 𑀏𑀓𑁄 𑀲𑀽𑀭𑀺𑀬𑁄 𑀅𑀢𑁆𑀣𑀁 𑀕𑀘𑁆𑀙𑀢𑀺. 𑀅𑀯𑀺𑀘𑁆𑀙𑀺𑀦𑁆𑀦𑀲𑀽𑀭𑀺𑀬𑀲𑀦𑁆𑀢𑀸𑀧𑁄𑀯 𑀮𑁄𑀓𑁄 𑀳𑁄𑀢𑀺.

𑀧𑀓𑀢𑀺𑀲𑀽𑀭𑀺𑀬𑁂 ¶ 𑀲𑀽𑀭𑀺𑀬𑀤𑁂𑀯𑀧𑀼𑀢𑁆𑀢𑁄 𑀅𑀢𑁆𑀣𑀺 𑀓𑀧𑁆𑀧𑀯𑀺𑀦𑀸𑀲𑀓𑀲𑀽𑀭𑀺𑀬𑁂 𑀧𑀦 𑀦𑀢𑁆𑀣𑀺. 𑀧𑀓𑀢𑀺𑀲𑀽𑀭𑀺𑀬𑁄𑀪𑀸𑀲𑁂𑀦 𑀆𑀓𑀸𑀲𑁂 𑀯𑀮𑀸𑀳𑀓𑀸 𑀥𑀽𑀫𑀲𑀺𑀔𑀸𑀧𑀺 𑀘𑀭𑀦𑁆𑀢𑀺. 𑀓𑀧𑁆𑀧𑀯𑀺𑀦𑀸𑀲𑀓𑀲𑀽𑀭𑀺𑀬𑁄𑀪𑀸𑀲𑁂𑀦 𑀯𑀺𑀕𑀢𑀥𑀽𑀫𑀯𑀮𑀸𑀳𑀓𑀁 𑀆𑀤𑀸𑀲𑀫𑀡𑁆𑀟𑀮𑀁 𑀯𑀺𑀬 𑀦𑀺𑀫𑁆𑀫𑀮𑀁 𑀳𑁄𑀢𑀺 𑀦𑀪𑀁 𑀞𑀧𑁂𑀢𑁆𑀯𑀸 𑀕𑀗𑁆𑀕𑀸, 𑀬𑀫𑀼𑀦𑀸, 𑀲𑀭𑀪𑀽, 𑀅𑀘𑀺𑀭𑀯𑀢𑀻, 𑀫𑀳𑀻𑀢𑀺, 𑀇𑀫𑀸 𑀧𑀜𑁆𑀘 𑀫𑀳𑀸𑀦𑀤𑀺𑀬𑁄 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀧𑀜𑁆𑀘𑀲𑀢𑀓𑀼𑀦𑁆𑀦𑀤𑀻𑀆𑀤𑀻𑀲𑀼 𑀉𑀤𑀓𑀁 𑀲𑀼𑀲𑁆𑀲𑀢𑀺 𑀢𑀢𑁄 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀢𑀢𑀺𑀬𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺 𑀢𑀲𑁆𑀫𑀺𑀁 𑀧𑀸𑀢𑀼𑀪𑀽𑀢𑁂 𑀧𑀜𑁆𑀘 𑀫𑀳𑀸𑀦𑀤𑀺𑀬𑁄𑀧𑀺 𑀲𑀼𑀲𑁆𑀲𑀦𑁆𑀢𑀺. 𑀢𑀢𑁄 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀘𑀢𑀼𑀢𑁆𑀣𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺. 𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀳𑀺𑀫𑀯𑀢𑀻 𑀫𑀳𑀸𑀦𑀤𑀻𑀦𑀁 𑀧𑀪𑀯𑀸 𑀲𑀻𑀳𑀧𑀢𑀦𑁄, 𑀳𑀁𑀲𑀧𑀢𑀦𑁄, 𑀫𑀦𑁆𑀤𑀸𑀓𑀺𑀦𑀻, 𑀓𑀡𑁆𑀡𑀫𑀼𑀡𑁆𑀟𑀓𑁄, 𑀭𑀣𑀓𑀸𑀭𑀤𑀳𑁄, 𑀅𑀦𑁄𑀢𑀢𑁆𑀢𑀤𑀳𑁄, 𑀙𑀤𑁆𑀤𑀦𑁆𑀢𑀤𑀳𑁄, 𑀓𑀼𑀡𑀸𑀮𑀤𑀳𑁄𑀢𑀺 𑀇𑀫𑁂 𑀲𑀢𑁆𑀢 𑀫𑀳𑀸𑀲𑀭𑀸 𑀲𑀼𑀲𑁆𑀲𑀦𑁆𑀢𑀺. 𑀢𑀢𑁄 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀧𑀜𑁆𑀘𑀫𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺, 𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀫𑀳𑀸𑀲𑀫𑀼𑀤𑁆𑀤𑁄 𑀅𑀗𑁆𑀕𑀼𑀮𑀺𑀧𑀩𑁆𑀩𑀢𑁂𑀫𑀦𑀫𑀢𑁆𑀢𑀫𑁆𑀧𑀺 𑀉𑀤𑀓𑀁 𑀦 𑀲𑀡𑁆𑀞𑀸𑀢𑀺. 𑀢𑀢𑁄 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀙𑀝𑁆𑀞𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺, 𑀬𑀲𑁆𑀫𑀺𑀁 𑀧𑀸𑀢𑀼𑀪𑀸𑀯𑁂 𑀲𑀓𑀮𑀘𑀓𑁆𑀓𑀯𑀸𑀴𑀁 𑀏𑀓𑀥𑀽𑀫𑀁 𑀳𑁄𑀢𑀺, 𑀧𑀭𑀺𑀬𑀸𑀤𑀺𑀦𑁆𑀦𑀲𑀺𑀦𑁂𑀳𑀥𑀽𑀫𑁂𑀦 𑀬𑀣𑀸 𑀘 𑀏𑀯𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀫𑁆𑀧𑀺. 𑀢𑀢𑁄𑀧𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀲𑀢𑁆𑀢𑀫𑁄 𑀲𑀽𑀭𑀺𑀬𑁄 𑀧𑀸𑀢𑀼𑀪𑀯𑀢𑀺, 𑀬𑀲𑁆𑀲 𑀧𑀸𑀢𑀼𑀪𑀸𑀯𑀸 𑀲𑀓𑀮𑀘𑀓𑁆𑀓𑀯𑀸𑀴𑀁 𑀏𑀓𑀚𑀸𑀮𑀁 𑀳𑁄𑀢𑀺 𑀲𑀤𑁆𑀥𑀺𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀳𑀺 𑀬𑁄𑀚𑀦𑀲𑀢𑀺𑀓𑀸𑀤𑀺𑀪𑁂𑀤𑀸 𑀲𑀺𑀦𑁂𑀭𑀼𑀓𑀽𑀝𑀸𑀦𑀺 𑀧𑀮𑀼𑀚𑁆𑀚𑀺𑀢𑁆𑀯𑀸 𑀆𑀓𑀸𑀲𑁂𑀬𑁂𑀯 𑀅𑀦𑁆𑀢𑀭𑀥𑀸𑀬𑀦𑁆𑀢𑀺. 𑀲𑀸𑀧𑀺 𑀅𑀕𑁆𑀕𑀺𑀚𑀸𑀮𑀸 𑀉𑀝𑁆𑀞𑀳𑀺𑀢𑁆𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂 𑀕𑀡𑁆𑀳𑀸𑀢𑀺, 𑀢𑀢𑁆𑀣 𑀓𑀦𑀓𑀯𑀺𑀫𑀸𑀦𑀭𑀢𑀦𑀯𑀺𑀫𑀸𑀦𑀸𑀦𑀺 𑀛𑀸𑀧𑁂𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑀁 𑀕𑀡𑁆𑀳𑀸𑀢𑀺 𑀏𑀢𑁂𑀦𑀽𑀧𑀸𑀬𑁂𑀦 𑀬𑀸𑀯 𑀧𑀞𑀫𑀚𑁆𑀛𑀸𑀦𑀪𑀽𑀫𑀺 𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀢𑀬𑁄𑀧𑀺 𑀩𑁆𑀭𑀳𑁆𑀫𑀮𑁄𑀓𑁂 𑀛𑀸𑀧𑁂𑀢𑁆𑀯𑀸 𑀆𑀪𑀲𑁆𑀲𑀭𑁂 𑀆𑀳𑀘𑁆𑀘 𑀅𑀝𑁆𑀞𑀸𑀲𑀺. 𑀲𑀸 𑀬𑀸𑀯 𑀅𑀡𑀼𑀫𑀢𑁆𑀢𑀫𑁆𑀧𑀺 𑀲𑀗𑁆𑀔𑀸𑀭𑀕𑀢𑀁 𑀅𑀢𑁆𑀣𑀺, 𑀢𑀸𑀯 𑀦𑀦𑀺𑀩𑁆𑀩𑀸𑀬𑀺. 𑀲𑀩𑁆𑀩𑀲𑀗𑁆𑀔𑀸𑀭𑀧𑀭𑀺𑀓𑁆𑀔𑀬𑀸 𑀧𑀦 𑀲𑀧𑁆𑀧𑀺𑀢𑁂𑀮𑀛𑀸𑀧𑀦𑀅𑀕𑁆𑀕𑀺𑀲𑀺𑀔𑀸 𑀯𑀺𑀬 𑀙𑀸𑀭𑀺𑀓𑀫𑁆𑀧𑀺 𑀅𑀦𑀯𑀲𑁂𑀲𑁂𑀢𑁆𑀯𑀸 𑀦𑀺𑀩𑁆𑀩𑀸𑀬𑀺. 𑀳𑁂𑀝𑁆𑀞𑀸 𑀆𑀓𑀸𑀲𑁂𑀦 𑀲𑀳 𑀉𑀧𑀭𑀺 𑀆𑀓𑀸𑀲𑁄 𑀏𑀓𑁄 𑀳𑁄𑀢𑀺 𑀫𑀳𑀦𑁆𑀥𑀓𑀸𑀭𑁄. 𑀏𑀯𑀁 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑀢𑁄 𑀬𑀸𑀯𑀚𑀸𑀮𑀧𑀭𑀺𑀘𑁆𑀙𑁂𑀤𑀸 𑀲𑀁𑀯𑀝𑁆𑀝𑁄 𑀦𑀸𑀫 𑀏𑀓𑀫𑀲𑀗𑁆𑀔𑁆𑀬𑁂𑀬𑁆𑀬𑀁 𑀦𑀸𑀫. 𑀅𑀣 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀫𑀳𑀸𑀫𑁂𑀖𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀧𑀞𑀫𑀁 𑀲𑀼𑀔𑀼𑀫𑀁 𑀯𑀲𑁆𑀲𑀢𑀺. 𑀅𑀦𑀼𑀧𑀼𑀩𑁆𑀩𑁂𑀦 𑀓𑀼𑀫𑀼𑀤𑀦𑀸𑀴𑀬𑀝𑁆𑀞𑀺𑀫𑀼𑀲𑀮𑀢𑀸𑀮𑀓𑁆𑀔𑀦𑁆𑀥𑀸𑀤𑀺𑀧𑁆𑀧𑀫𑀸𑀡𑀸𑀳𑀺 𑀥𑀸𑀭𑀸𑀳𑀺 𑀯𑀲𑁆𑀲𑀦𑁆𑀢𑁄 ¶ 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀲𑀩𑁆𑀩𑀟𑀟𑁆𑀠𑀝𑁆𑀞𑀸𑀦𑀁 𑀧𑀽𑀭𑁂𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀢𑀺. 𑀢𑀁 𑀉𑀤𑀓𑀁 𑀳𑁂𑀝𑁆𑀞𑀸 𑀘 𑀢𑀺𑀭𑀺𑀬𑀜𑁆𑀘 𑀯𑀸𑀢𑁄 𑀲𑀫𑀼𑀝𑁆𑀞𑀳𑀺𑀢𑁆𑀯𑀸 𑀖𑀦𑀁 𑀓𑀭𑁄𑀢𑀺. 𑀧𑀭𑀺𑀯𑀝𑀼𑀫𑀁 𑀧𑀤𑀼𑀫𑀺𑀦𑀺𑀧𑀢𑁆𑀢𑁂 𑀉𑀤𑀓𑀩𑀺𑀦𑁆𑀤𑀼𑀲𑀤𑀺𑀲𑀁. 𑀏𑀯𑀁 𑀅𑀕𑁆𑀕𑀺𑀚𑀸𑀮𑀦𑀺𑀩𑁆𑀩𑀸𑀬𑀦𑀢𑁄 𑀬𑀸𑀯 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑀭𑀺𑀧𑀽𑀭𑀢𑁄 𑀲𑀫𑁆𑀧𑀢𑁆𑀢𑀺𑀫𑀳𑀸𑀫𑁂𑀖𑁄, 𑀇𑀤𑀁 𑀲𑀁𑀯𑀝𑁆𑀝𑀝𑁆𑀞𑀸𑀬𑀻 𑀦𑀸𑀫, 𑀤𑀼𑀢𑀺𑀬𑀫𑀲𑀗𑁆𑀔𑁆𑀬𑁂𑀬𑁆𑀬𑀁 𑀦𑀸𑀫. 𑀓𑀣𑀁 𑀢𑀸𑀯 𑀫𑀳𑀦𑁆𑀢𑀁 𑀉𑀤𑀓𑀭𑀸𑀲𑀺𑀁 𑀯𑀸𑀢𑁄 𑀖𑀦𑀁 𑀓𑀭𑁄𑀢𑀻𑀢𑀺 𑀘𑁂. 𑀯𑀺𑀯𑀭𑀲𑀫𑁆𑀧𑀤𑀸𑀦𑀢𑁄 𑀢𑀁 𑀯𑀸 𑀢𑁂𑀦 𑀧𑀺𑀡𑁆𑀟𑀺𑀬𑀫𑀸𑀦𑀁 𑀖𑀦𑀁 𑀓𑀭𑀺𑀬𑀫𑀸𑀦𑀁 𑀧𑀭𑀺𑀓𑁆𑀔𑀬𑀫𑀸𑀦𑀁 𑀅𑀦𑀼𑀧𑀼𑀩𑁆𑀩𑁂𑀦 𑀳𑁂𑀝𑁆𑀞𑀸 𑀑𑀢𑀭𑀢𑀺. 𑀑𑀢𑀺𑀡𑁆𑀡𑁄𑀢𑀺𑀡𑁆𑀡𑁂 𑀉𑀤𑀓𑁂 𑀧𑀼𑀩𑁆𑀩𑁂 𑀩𑁆𑀭𑀳𑁆𑀫𑀮𑁄𑀓𑀝𑁆𑀞𑀸𑀦𑁂 𑀩𑁆𑀭𑀳𑁆𑀫𑀧𑀸𑀭𑀺 𑀲𑀚𑁆𑀚-𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀫𑀳𑀸𑀩𑁆𑀭𑀳𑁆𑀫𑀸𑀯𑀲𑁂𑀦 𑀧𑀞𑀫𑀚𑁆𑀛𑀸𑀦𑀪𑀽𑀫𑀺 𑀧𑀞𑀫𑀁 𑀧𑀸𑀢𑀼𑀪𑀯𑀢𑀺. 𑀢𑀢𑁄 𑀑𑀢𑀺𑀡𑁆𑀡𑁄𑀢𑀺𑀡𑁆𑀡𑁂 𑀉𑀤𑀓𑁂 𑀘𑀢𑀼𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑀝𑁆𑀞𑀸𑀦𑁂 𑀅𑀦𑀼𑀓𑁆𑀓𑀫𑁂𑀦 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻, 𑀦𑀺𑀫𑁆𑀫𑀸𑀦𑀭𑀢𑀻, 𑀢𑀼𑀲𑀺𑀢𑀸, 𑀬𑀸𑀫𑀸𑀢𑀺 𑀘𑀢𑁆𑀢𑀸𑀭𑁄 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑀸 𑀧𑀸𑀢𑀼𑀪𑀯𑀦𑁆𑀢𑀺. 𑀢𑀢𑁄 𑀧𑀼𑀭𑀺𑀫𑀧𑀣𑀯𑀺𑀝𑁆𑀞𑀸𑀦𑀁 𑀑𑀢𑀺𑀡𑁆𑀡𑁂 𑀧𑀦 𑀉𑀤𑀓𑁂 𑀩𑀮𑀯𑀯𑀸𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂 𑀢𑀁 𑀧𑀺𑀤𑀳𑀺𑀢𑀤𑁆𑀯𑀸𑀭𑁂 𑀥𑀫𑀓𑀭𑀡𑁂 𑀞𑀺𑀢𑀉𑀤𑀓𑀫𑀺𑀯 𑀦𑀺𑀭𑀼𑀲𑁆𑀲𑀸𑀲𑀁 𑀓𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀫𑀥𑀼𑀭𑁄𑀤𑀓𑀁 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀫𑀸𑀦𑀁 𑀉𑀧𑀭𑀺 𑀭𑀲𑀧𑀣𑀯𑀺𑀁 𑀲𑀫𑀼𑀝𑁆𑀞𑀸𑀧𑁂𑀢𑀺 𑀲𑀸 𑀯𑀡𑁆𑀡𑀲𑀫𑁆𑀧𑀦𑁆𑀦𑀸𑀘𑁂𑀯 𑀳𑁄𑀢𑀺 𑀕𑀦𑁆𑀥𑀭𑀲𑀲𑀫𑁆𑀧𑀦𑁆𑀦𑀸 𑀘, 𑀦𑀺𑀭𑀼𑀤𑀓𑀧𑀸𑀬𑀸𑀲𑀲𑁆𑀲 𑀉𑀧𑀭𑀺 𑀧𑀝𑀮𑀁 𑀯𑀺𑀬 𑀢𑀤𑀸 𑀘 𑀆𑀪𑀲𑁆𑀲𑀭𑀩𑁆𑀭𑀳𑁆𑀫𑀮𑁄𑀓𑁂 𑀧𑀞𑀫𑀢𑀭𑀸𑀪𑀺𑀦𑀺𑀩𑁆𑀩𑀢𑁆𑀢𑀸 𑀲𑀢𑁆𑀢𑀸 𑀆𑀬𑀼𑀓𑁆𑀔𑀬𑀸 𑀯𑀸 𑀧𑀼𑀜𑁆𑀜𑀓𑁆𑀔𑀬𑀸 𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀇𑀥𑀽𑀧𑀧𑀚𑁆𑀚𑀦𑁆𑀢𑀺. ‘‘𑀧𑀼𑀜𑁆𑀜𑀓𑁆𑀔𑀬𑀸 𑀯𑀸’’𑀢𑀺 𑀇𑀫𑀺𑀦𑀸 𑀩𑁆𑀭𑀳𑁆𑀫𑀽𑀦𑀁 𑀆𑀬𑀼𑀧𑀭𑀺𑀘𑁆𑀙𑁂𑀤𑀁 𑀅𑀧𑁆𑀧𑀢𑁆𑀯𑀸𑀯 𑀓𑀫𑁆𑀫𑀓𑁆𑀔𑀬𑁂𑀦 𑀫𑀭𑀡𑀁 𑀯𑀺𑀜𑁆𑀜𑀸𑀬𑀢𑀺. 𑀢𑁂 𑀳𑁄𑀦𑁆𑀢𑀺 𑀲𑀬𑀁𑀧𑀪𑀸 𑀅𑀦𑁆𑀢𑀮𑀺𑀓𑁆𑀔𑀘𑀭𑀸. 𑀢𑁂 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀢𑀁 𑀭𑀲𑀧𑀣𑀯𑀺𑀁 𑀲𑀸𑀬𑀺𑀢𑁆𑀯𑀸 𑀢𑀡𑁆𑀳𑀸𑀪𑀺𑀪𑀽𑀢𑀸 𑀆𑀮𑀼𑀧𑁆𑀧𑀓𑀸𑀭𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀉𑀧𑀓𑁆𑀓𑀫𑀦𑁆𑀢𑀺. 𑀅𑀣 𑀦𑁂𑀲𑀁 𑀲𑀬𑀁 𑀧𑀪𑀸 𑀅𑀦𑁆𑀢𑀭𑀥𑀸𑀬𑀢𑀺, 𑀅𑀦𑁆𑀥𑀓𑀸𑀭𑁄 𑀳𑁄𑀢𑀺 𑀢𑁂 𑀅𑀦𑁆𑀥𑀓𑀸𑀭𑀁 𑀤𑀺𑀲𑁆𑀯𑀸 𑀪𑀸𑀬𑀦𑁆𑀢𑀺. 𑀢𑀢𑁄 𑀦𑁂𑀲𑀁 𑀪𑀬𑀁 𑀦𑀸𑀲𑁂𑀢𑁆𑀯𑀸 𑀲𑀽𑀭𑀪𑀸𑀯𑀁 𑀚𑀦𑀬𑀦𑁆𑀢𑀁 𑀧𑀭𑀺𑀧𑀼𑀡𑁆𑀡𑀧𑀡𑁆𑀡𑀸𑀲𑀬𑁄𑀚𑀦𑀁 𑀲𑀽𑀭𑀺𑀬𑀫𑀡𑁆𑀟𑀮𑀁 𑀯𑀸 𑀧𑀸𑀢𑀼𑀪𑀯𑀢𑀺. 𑀢𑁂 𑀢𑀁 𑀤𑀺𑀲𑁆𑀯𑀸 ‘‘𑀆𑀮𑁄𑀓𑀁 𑀧𑀝𑀺𑀮𑀪𑀺𑀫𑁆𑀳𑀸’’𑀢𑀺 𑀳𑀝𑁆𑀞𑀢𑀼𑀝𑁆𑀞𑀸 𑀳𑀼𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀪𑀬𑀁 𑀦𑀸𑀲𑁂𑀢𑁆𑀯𑀸 𑀲𑀽𑀭𑀪𑀸𑀯𑀁 𑀚𑀦𑀬𑀦𑁆𑀢𑁄 𑀉𑀝𑁆𑀞𑀺𑀢𑁄, 𑀢𑀲𑁆𑀫𑀸 𑀲𑀽𑀭𑀺𑀬𑁄 𑀳𑁄𑀢𑀽’’𑀢𑀺 𑀲𑀽𑀭𑀺𑀬𑁄 𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀓𑀭𑁄𑀦𑁆𑀢𑀺. 𑀅𑀣 𑀲𑀽𑀭𑀺𑀬𑁂 𑀤𑀺𑀯𑀲𑀁 𑀆𑀮𑁄𑀓𑀁 𑀓𑀢𑁆𑀯𑀸 𑀅𑀢𑁆𑀣𑀗𑁆𑀕𑀢𑁂 ‘‘𑀬𑀫𑁆𑀧𑀺 𑀆𑀮𑁄𑀓𑀁 𑀮𑀪𑀺𑀫𑁆𑀳𑀸, 𑀲𑁄𑀧𑀺 𑀦𑁄 𑀦𑀝𑁆𑀞𑁄’’𑀢𑀺 𑀧𑀼𑀦 𑀪𑀻𑀢𑀸 𑀳𑁄𑀦𑁆𑀢𑀺. 𑀢𑁂𑀲𑀁 𑀏𑀯𑀁 𑀳𑁄𑀢𑀺 ‘‘𑀲𑀸𑀥𑀼𑀯𑀢𑀲𑁆𑀲 𑀅𑀜𑁆𑀜𑀁 𑀆𑀮𑁄𑀓𑀁 𑀮𑀪𑁂𑀬𑁆𑀬𑀸𑀫𑀸’’𑀢𑀺. 𑀢𑁂𑀲𑀁 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀯𑀺𑀬 𑀏𑀓𑀽𑀦𑀧𑀜𑁆𑀜𑀸𑀲𑀬𑁄𑀚𑀦𑀁 𑀘𑀦𑁆𑀤𑀫𑀡𑁆𑀟𑀮𑀁 𑀧𑀸𑀢𑀼𑀪𑀯𑀢𑀺 ¶ . 𑀢𑁂 𑀢𑀁 𑀤𑀺𑀲𑁆𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀳𑀝𑁆𑀞𑀢𑀼𑀝𑁆𑀞𑀸 𑀳𑀼𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀙𑀦𑁆𑀤𑀁 𑀜𑀢𑁆𑀯𑀸 𑀯𑀺𑀬 𑀉𑀝𑁆𑀞𑀺𑀢𑁄, 𑀢𑀲𑁆𑀫𑀸 𑀘𑀦𑁆𑀤𑁄 𑀳𑁄𑀢𑀽’’𑀢𑀺 𑀘𑀦𑁆𑀤𑁄𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀓𑀭𑁄𑀦𑁆𑀢𑀺. 𑀢𑀢𑁄 𑀧𑀪𑀼𑀢𑀺 𑀭𑀢𑁆𑀢𑀺𑀤𑀺𑀯𑀸 𑀧𑀜𑁆𑀜𑀸𑀬𑀦𑁆𑀢𑀺. 𑀅𑀦𑀼𑀓𑁆𑀓𑀫𑁂𑀦 𑀘 𑀫𑀸𑀲𑀤𑁆𑀥𑀫𑀸𑀲𑀉𑀢𑀼𑀲𑀁𑀯𑀘𑁆𑀙𑀭𑀸. 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀧𑀦 𑀧𑀸𑀢𑀼𑀪𑀽𑀢𑀤𑀺𑀯𑀲𑁂𑀬𑁂𑀯 𑀲𑀺𑀦𑁂𑀭𑀼𑀘𑀓𑁆𑀓𑀯𑀸𑀴𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀸 𑀧𑀸𑀢𑀼𑀪𑀯𑀦𑁆𑀢𑀺, 𑀢𑁂 𑀘 𑀔𑁄 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀨𑀕𑁆𑀕𑀼𑀡𑀧𑀼𑀡𑁆𑀡𑀫𑀤𑀺𑀯𑀲𑁂𑀬𑁂𑀯 𑀧𑀸𑀢𑀼𑀪𑀯𑀦𑁆𑀢𑀺. 𑀓𑀣𑀁 𑀬𑀣𑀸𑀦𑀸𑀫 𑀓𑀗𑁆𑀕𑀼𑀪𑀢𑁆𑀢𑁂 𑀧𑀘𑁆𑀘𑀫𑀸𑀦𑁂 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀩𑀼𑀩𑁆𑀩𑀼𑀴𑀓𑀸𑀦𑀺 𑀉𑀝𑁆𑀞𑀳𑀦𑁆𑀢𑀺. 𑀏𑀓𑁂 𑀧𑀤𑁂𑀲𑀸 𑀣𑀽𑀧𑀣𑀽𑀧𑀸 𑀳𑁄𑀦𑁆𑀢𑀺, 𑀏𑀓𑁂 𑀦𑀺𑀦𑁆𑀦𑀦𑀺𑀦𑁆𑀦𑀸, 𑀏𑀓𑁂 𑀲𑀫𑀲𑀫𑀸 𑀏𑀯𑀫𑁂𑀯 𑀣𑀽𑀧𑀣𑀽𑀧𑀝𑁆𑀞𑀸𑀦𑁂 𑀧𑀩𑁆𑀩𑀢𑀸 𑀳𑁄𑀦𑁆𑀢𑀺, 𑀦𑀺𑀦𑁆𑀦𑀦𑀺𑀦𑁆𑀦𑀝𑁆𑀞𑀸𑀦𑁂 𑀲𑀫𑀼𑀤𑁆𑀤𑀸, 𑀲𑀫𑀲𑀫𑀝𑁆𑀞𑀸𑀦𑁂 𑀤𑀻𑀧𑀸𑀢𑀺 𑀏𑀯𑀁 𑀫𑀦𑀼𑀲𑁆𑀲𑀮𑁄𑀓𑁂 𑀲𑀡𑁆𑀞𑀺𑀢𑁂 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸, 𑀢𑀸𑀯𑀢𑀺𑀁𑀲𑀸𑀢𑀺 𑀤𑁆𑀯𑁂 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑀸 𑀧𑀘𑁆𑀙𑀢𑁄 𑀧𑀸𑀢𑀼𑀪𑀯𑀦𑁆𑀢𑀺. 𑀪𑀽𑀫𑀦𑀺𑀲𑁆𑀲𑀺𑀢𑀸 𑀦𑀸𑀫 𑀳𑁂𑀢𑁂 𑀤𑁆𑀯𑁂 𑀤𑁂𑀯𑀮𑁄𑀓𑀸. 𑀏𑀯𑀁 𑀲𑀫𑁆𑀧𑀢𑁆𑀢𑀺𑀫𑀳𑀸𑀫𑁂𑀖𑀢𑁄 𑀬𑀸𑀯 𑀘𑀦𑁆𑀤𑀺𑀫𑀲𑀽𑀭𑀺𑀬𑀧𑀸𑀢𑀼𑀪𑀸𑀯𑁄, 𑀇𑀤𑀁 𑀯𑀺𑀯𑀝𑁆𑀝𑁄 𑀦𑀸𑀫 𑀢𑀢𑀺𑀬𑀫𑀲𑀗𑁆𑀔𑁆𑀬𑁂𑀬𑁆𑀬𑀁 𑀦𑀸𑀫. 𑀅𑀣 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀭𑀲𑀧𑀣𑀯𑀺𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸𑀦𑀁 𑀓𑀫𑁆𑀫𑁂𑀦 𑀏𑀓𑀘𑁆𑀘𑁂 𑀯𑀡𑁆𑀡𑀯𑀦𑁆𑀢𑁄, 𑀏𑀓𑀘𑁆𑀘𑁂 𑀤𑀼𑀩𑁆𑀩𑀡𑁆𑀡𑀸 𑀳𑁄𑀦𑁆𑀢𑀺 𑀢𑀢𑁆𑀣 𑀯𑀡𑁆𑀡𑀯𑀦𑁆𑀢𑁄 𑀤𑀼𑀩𑁆𑀩𑀡𑁆𑀡𑁂 𑀅𑀢𑀺𑀫𑀜𑁆𑀜𑀦𑁆𑀢𑀺. 𑀢𑁂𑀲𑀁 𑀫𑀸𑀦𑀸𑀢𑀺𑀫𑀸𑀦𑀧𑀘𑁆𑀘𑀬𑀸 𑀲𑀸𑀧𑀺 𑀭𑀲𑀧𑀣𑀯𑀻 𑀅𑀦𑁆𑀢𑀭𑀥𑀸𑀬𑀢𑀺. 𑀪𑀽𑀫𑀺𑀧𑀧𑁆𑀧𑀝𑀓𑁄 𑀧𑀸𑀢𑀼𑀪𑀯𑀢𑀺 𑀅𑀣 𑀦𑁂𑀲𑀁 𑀢𑁂𑀦𑁂𑀯 𑀦𑀬𑁂𑀦 𑀲𑁄𑀧𑀺 𑀅𑀦𑁆𑀢𑀭𑀥𑀸𑀬𑀢𑀺, 𑀧𑀢𑀸𑀮𑀢𑀸 𑀧𑀸𑀢𑀼𑀪𑀯𑀢𑀺, 𑀢𑁂𑀦𑁂𑀯 𑀦𑀬𑁂𑀦 𑀲𑀸𑀧𑀺 𑀅𑀦𑁆𑀢𑀭𑀥𑀸𑀬𑀢𑀺. 𑀅𑀓𑀝𑁆𑀞𑀧𑀸𑀓𑁄 𑀲𑀸𑀮𑀺 𑀧𑀸𑀢𑀼𑀪𑀯𑀢𑀺 𑀅𑀓𑀡𑁄 𑀅𑀣𑀼𑀲𑁄 𑀲𑀼𑀤𑁆𑀥𑁄 𑀲𑀼𑀕𑀦𑁆𑀥𑁄 𑀢𑀡𑁆𑀟𑀼𑀮𑀧𑁆𑀨𑀮𑁄. 𑀢𑀢𑁄 𑀦𑁂𑀲𑀁 𑀪𑀸𑀚𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑀢𑁂 𑀲𑀸𑀮𑀻 𑀪𑀸𑀚𑀦𑁂 𑀞𑀧𑁂𑀢𑁆𑀯𑀸 𑀧𑀸𑀲𑀸𑀡𑀧𑀺𑀝𑁆𑀞𑀺𑀬𑀸 𑀞𑀧𑁂𑀦𑁆𑀢𑀺, 𑀲𑀬𑀫𑁂𑀯 𑀚𑀸𑀮𑀲𑀺𑀔𑀸 𑀉𑀝𑁆𑀞𑀳𑀺𑀢𑁆𑀯𑀸 𑀧𑀘𑀢𑀺. 𑀲𑁄 𑀳𑁄𑀢𑀺 𑀑𑀤𑀦𑁄 𑀲𑀼𑀫𑀦𑀚𑀸𑀢𑀺𑀧𑀼𑀧𑁆𑀨𑀲𑀤𑀺𑀲𑁄, 𑀦 𑀢𑀲𑁆𑀲 𑀲𑀽𑀧𑁂𑀦 𑀯𑀸 𑀩𑁆𑀬𑀜𑁆𑀚𑀦𑁂𑀦 𑀯𑀸 𑀓𑀭𑀡𑀻𑀬𑀁 𑀅𑀢𑁆𑀣𑀺. 𑀬𑀁𑀬𑀁 𑀭𑀲𑀁 𑀪𑀼𑀜𑁆𑀚𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀁𑀢𑀁 𑀭𑀲𑁄𑀯 𑀳𑁄𑀢𑀺. 𑀢𑁂𑀲𑀁 𑀢𑀁 𑀑𑀴𑀸𑀭𑀺𑀓𑀁 𑀆𑀳𑀸𑀭𑀁 𑀆𑀳𑀭𑀢𑀁 𑀢𑀢𑁄 𑀧𑀪𑀼𑀢𑀺 𑀫𑀼𑀢𑁆𑀢𑀓𑀭𑀻𑀲𑀁 𑀲𑀜𑁆𑀚𑀸𑀬𑀢𑀺. 𑀅𑀣 𑀦𑁂𑀲𑀁 𑀢𑀲𑁆𑀲 𑀦𑀺𑀓𑁆𑀔𑀫𑀦𑀢𑁆𑀣𑀸𑀬 𑀯𑀡𑀫𑀼𑀔𑀸𑀦𑀺 𑀧𑀪𑀺𑀚𑁆𑀚𑀦𑁆𑀢𑀺. 𑀧𑀼𑀭𑀺𑀲𑀲𑁆𑀲 𑀧𑀼𑀭𑀺𑀲𑀪𑀸𑀯𑁄, 𑀇𑀢𑁆𑀣𑀺𑀬𑀸 𑀇𑀢𑁆𑀣𑀺𑀪𑀸𑀯𑁄 𑀧𑀸𑀢𑀼𑀪𑀯𑀢𑀺. 𑀢𑀢𑁆𑀭𑀲𑀼𑀤𑀁 𑀇𑀢𑁆𑀣𑀻 𑀧𑀼𑀭𑀺𑀲𑀁, 𑀧𑀼𑀭𑀺𑀲𑁄 𑀘 𑀇𑀢𑁆𑀣𑀺𑀁 𑀅𑀢𑀺𑀯𑁂𑀮𑀁 𑀉𑀧𑀦𑀺𑀚𑁆𑀛𑀸𑀬𑀢𑀺. 𑀢𑁂𑀲𑀁 𑀅𑀢𑀺𑀯𑁂𑀮𑀁 𑀉𑀧𑀦𑀺𑀚𑁆𑀛𑀸𑀬𑀦𑀪𑀸𑀯𑀸 𑀓𑀸𑀫𑀧𑀭𑀺𑀴𑀸𑀳𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁄 𑀫𑁂𑀣𑀼𑀦𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀺. 𑀢𑁂 𑀅𑀲𑀤𑁆𑀥𑀫𑁆𑀫𑀧𑀝𑀺𑀲𑁂𑀯𑀦𑀧𑀘𑁆𑀘𑀬𑀸 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀬𑀫𑀸𑀦𑀸 𑀯𑀺𑀳𑁂𑀞𑀺𑀬𑀫𑀸𑀦𑀸 𑀢𑀲𑁆𑀲 𑀅𑀲𑀤𑁆𑀥𑀫𑁆𑀫𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀳𑁂𑀢𑀼 𑀅𑀕𑀸𑀭𑀸𑀦𑀺 𑀓𑀭𑁄𑀦𑁆𑀢𑀺.

𑀢𑁂 ¶ 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀫𑀸𑀦𑀸 𑀅𑀦𑀼𑀓𑁆𑀓𑀫𑁂𑀦 𑀅𑀜𑁆𑀜𑀢𑀭𑀲𑁆𑀲 𑀅𑀮𑀲𑀚𑀸𑀢𑀺𑀓𑀲𑁆𑀲 𑀲𑀢𑁆𑀢𑀲𑁆𑀲 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀦𑁆𑀢𑀸 𑀲𑀦𑁆𑀦𑀺𑀥𑀺𑀁 𑀓𑀭𑁄𑀦𑁆𑀢𑀺. 𑀢𑀢𑁄 𑀧𑀪𑀼𑀢𑀺 𑀓𑀡𑁄𑀧𑀺 𑀣𑀼𑀲𑁄𑀧𑀺 𑀢𑀡𑁆𑀟𑀼𑀮𑀁 𑀧𑀭𑀺𑀬𑁄𑀦𑀤𑁆𑀥𑀦𑁆𑀢𑀺, 𑀮𑀸𑀬𑀺𑀢𑀝𑁆𑀞𑀸𑀦𑀫𑁆𑀧𑀺 𑀦𑀧𑁆𑀧𑀝𑀺𑀯𑀺𑀭𑀽𑀳𑀢𑀺. 𑀢𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀦𑀼𑀝𑁆𑀞𑀼𑀦𑀦𑁆𑀢𑀺 ‘‘𑀧𑀸𑀧𑀓𑀸 𑀯𑀢 𑀪𑁄 𑀥𑀫𑁆𑀫𑀸 𑀲𑀢𑁆𑀢𑁂𑀲𑀼 𑀧𑀸𑀢𑀼𑀪𑀽𑀢𑀸, 𑀫𑀬𑀁 𑀧𑀼𑀩𑁆𑀩𑁂 𑀫𑀦𑁄𑀫𑀬𑀸 𑀅𑀳𑀼𑀫𑁆𑀳𑀸’’𑀢𑀺. 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦 𑀯𑀺𑀢𑁆𑀣𑀭𑁂𑀢𑀩𑁆𑀩𑀁. 𑀢𑀢𑁄 𑀫𑀭𑀺𑀬𑀸𑀤𑀁 𑀞𑀧𑁂𑀦𑁆𑀢𑀺. 𑀅𑀣𑀜𑁆𑀜𑀢𑀭𑁄 𑀲𑀢𑁆𑀢𑁄 𑀅𑀜𑁆𑀜𑀲𑁆𑀲 𑀪𑀸𑀕𑀁 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺. 𑀢𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀭𑀺𑀪𑀸𑀲𑀺𑀢𑁆𑀯𑀸 𑀢𑀢𑀺𑀬𑀯𑀸𑀭𑁂 𑀮𑁂𑀟𑁆𑀟𑀼𑀤𑀡𑁆𑀟𑁂𑀳𑀺 𑀧𑀳𑀭𑀦𑁆𑀢𑀺. 𑀢𑁂 𑀏𑀯𑀁 𑀅𑀤𑀺𑀦𑁆𑀦𑀸𑀤𑀸𑀦𑀓𑀮𑀳𑀫𑀼𑀲𑀸𑀯𑀸𑀤𑀤𑀡𑁆𑀟𑀤𑀸𑀦𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀘𑀺𑀦𑁆𑀢𑀬𑀦𑁆𑀢𑀺, ‘‘𑀬𑀁𑀦𑀽𑀦 𑀫𑀬𑀁 𑀏𑀓𑀁 𑀲𑀢𑁆𑀢𑀁 𑀲𑀫𑁆𑀫𑀦𑁆𑀦𑁂𑀬𑁆𑀬𑀸𑀫, 𑀬𑁄 𑀦𑁄 𑀲𑀫𑁆𑀫𑀸 𑀔𑀺𑀬𑀺𑀢𑀩𑁆𑀩𑀁 𑀔𑀺𑀬𑁂𑀬𑁆𑀬, 𑀕𑀭𑀳𑀺𑀢𑀩𑁆𑀩𑀁 𑀕𑀭𑀳𑁂𑀬𑁆𑀬, 𑀧𑀩𑁆𑀩𑀸𑀚𑁂𑀢𑀩𑁆𑀩𑀁 𑀧𑀩𑁆𑀩𑀸𑀚𑁂𑀬𑁆𑀬, 𑀫𑀬𑀁 𑀧𑀦𑀲𑁆𑀲 𑀲𑀸𑀮𑀻𑀦𑀁 𑀪𑀸𑀕𑀁 𑀅𑀦𑀼𑀧𑀤𑀲𑁆𑀲𑀸𑀫𑀸’’𑀢𑀺. 𑀏𑀯𑀁 𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑁂𑀲𑀼 𑀧𑀦 𑀲𑀢𑁆𑀢𑁂𑀲𑀼 𑀇𑀫𑀲𑁆𑀫𑀺𑀁 𑀢𑀸𑀯 𑀓𑀧𑁆𑀧𑁂 𑀅𑀬𑀫𑁂𑀯 𑀪𑀕𑀯𑀸 𑀩𑁄𑀥𑀺𑀲𑀢𑁆𑀢𑀪𑀽𑀢𑁄 𑀢𑁂𑀦 𑀲𑀫𑀬𑁂𑀦 𑀢𑁂𑀲𑀼 𑀲𑀢𑁆𑀢𑁂𑀲𑀼 𑀅𑀪𑀺𑀭𑀽𑀧𑀢𑀭𑁄 𑀘 𑀤𑀲𑁆𑀲𑀦𑀻𑀬𑀢𑀭𑁄 𑀘 𑀫𑀳𑁂𑀲𑀓𑁆𑀔𑀢𑀭𑁄 𑀘 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁄 𑀧𑀝𑀺𑀩𑀮𑁄 𑀦𑀺𑀕𑁆𑀕𑀳𑀧𑀕𑁆𑀕𑀳𑀁 𑀓𑀸𑀢𑀼𑀁 𑀢𑁂 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀬𑀸𑀘𑀺𑀢𑁆𑀯𑀸 𑀲𑀫𑁆𑀫𑀦𑀺𑀁𑀲𑀼. 𑀲𑁄 𑀢𑁂𑀦 𑀫𑀳𑀸𑀚𑀦𑁂𑀦 𑀲𑀫𑁆𑀫𑀢𑁄𑀢𑀺𑀧𑀺 𑀫𑀳𑀸𑀲𑀫𑁆𑀫𑀢𑁄, 𑀔𑁂𑀢𑁆𑀢𑀸𑀦𑀁 𑀅𑀥𑀺𑀧𑀢𑀻𑀢𑀺 𑀔𑀢𑁆𑀢𑀺𑀬𑁄, 𑀥𑀫𑁆𑀫𑁂𑀦 𑀲𑀫𑁂𑀦 𑀧𑀭𑁂𑀲𑀁 𑀭𑀜𑁆𑀚𑁂𑀢𑀻𑀢𑀺 𑀭𑀸𑀚𑀸𑀢𑀺, 𑀢𑀻𑀳𑀺 𑀦𑀸𑀫𑁂𑀳𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀬𑀜𑁆𑀳𑀺 𑀮𑁄𑀓𑁂 𑀅𑀘𑁆𑀙𑀭𑀺𑀬𑀁 𑀞𑀸𑀦𑀁 𑀩𑁄𑀥𑀺𑀲𑀢𑁆𑀢𑁄𑀯 𑀢𑀢𑁆𑀣 𑀆𑀤𑀺 𑀧𑀼𑀭𑀺𑀲𑁄𑀢𑀺 𑀏𑀯𑀁 𑀩𑁄𑀥𑀺𑀲𑀢𑁆𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀔𑀢𑁆𑀢𑀺𑀬𑀫𑀡𑁆𑀟𑀮𑁂 𑀲𑀡𑁆𑀞𑀺𑀢𑁂 𑀅𑀦𑀼𑀧𑀼𑀩𑁆𑀩𑁂𑀦 𑀩𑁆𑀭𑀸𑀳𑁆𑀫𑀡𑀸𑀤𑀬𑁄𑀧𑀺 𑀯𑀡𑁆𑀡𑀸 𑀲𑀡𑁆𑀞𑀳𑀺𑀁𑀲𑀼. 𑀏𑀯𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀧𑀸𑀢𑀼 𑀪𑀸𑀯𑀢𑁄 𑀬𑀸𑀯 𑀧𑀼𑀦 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑁄, 𑀇𑀤𑀁 𑀯𑀺𑀯𑀝𑁆𑀝𑀝𑁆𑀞𑀸𑀬𑀻 𑀦𑀸𑀫 𑀘𑀢𑀼𑀢𑁆𑀣𑀫𑀲𑀗𑁆𑀔𑁆𑀬𑁂𑀬𑁆𑀬𑀁 𑀦𑀸𑀫. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑀫𑁂𑀖𑁄 𑀚𑀸𑀮𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀁𑀯𑀝𑁆𑀝𑁄𑀢𑀺 𑀚𑀸𑀮𑀸 𑀫𑁂𑀖𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀁𑀯𑀝𑁆𑀝𑀝𑁆𑀞𑀸𑀬𑀻𑀢𑀺 𑀯𑀼𑀘𑁆𑀘𑀢𑀺. 𑀫𑁂𑀖𑀸 𑀲𑀽𑀭𑀺𑀬𑀧𑀭𑀺𑀘𑁆𑀙𑀺𑀦𑁆𑀦𑁄 𑀯𑀺𑀯𑀝𑁆𑀝𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀽𑀭𑀺𑀬𑀸 𑀫𑁂𑀖𑀧𑀭𑀺𑀘𑁆𑀙𑀺𑀦𑁆𑀦𑁄 𑀯𑀺𑀯𑀝𑁆𑀝𑀝𑁆𑀞𑀸𑀬𑀻𑀢𑀺 𑀯𑀼𑀘𑁆𑀘𑀢𑀺. 𑀘𑀢𑁆𑀢𑀸𑀭𑀺 𑀇𑀫𑀸𑀦𑀺 𑀓𑀧𑁆𑀧𑀸𑀦𑀺 𑀫𑀳𑀸𑀓𑀧𑁆𑀧𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀯𑀝𑁆𑀝𑀝𑁆𑀞𑀸𑀬𑀺𑀓𑀧𑁆𑀧𑁂𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺 𑀩𑀼𑀤𑁆𑀥𑀸𑀤𑀬𑁄𑀢𑀺. 𑀢𑀣𑀸 𑀳𑀺 𑀇𑀫𑀲𑁆𑀫𑀺𑀁𑀬𑁂𑀯 𑀯𑀺𑀯𑀝𑁆𑀝𑀝𑁆𑀞𑀸𑀬𑀺𑀅𑀲𑀗𑁆𑀔𑁆𑀬𑀬𑁆𑀬𑀓𑀧𑁆𑀧𑁂 𑀩𑀼𑀤𑁆𑀥𑀧𑀘𑁆𑀘𑁂𑀓 𑀩𑀼𑀤𑁆𑀥𑀲𑀸𑀯𑀓𑀘𑀓𑁆𑀓𑀯𑀢𑁆𑀢𑀺𑀦𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀢𑀻𑀲𑀼 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁂𑀲𑀼. 𑀢𑀜𑁆𑀘 𑀔𑁄 𑀅𑀲𑀼𑀜𑁆𑀜𑀓𑀧𑁆𑀧𑁂𑀬𑁂𑀯, 𑀦 𑀲𑀼𑀜𑁆𑀜𑀓𑀧𑁆𑀧𑁂. 𑀢𑀢𑁆𑀣 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀘𑀓𑁆𑀓𑀯𑀢𑁆𑀢𑀻𑀳𑀺 𑀧𑀼𑀜𑁆𑀜𑀯𑀦𑁆𑀢𑀧𑀼𑀕𑁆𑀕𑀮𑁂𑀳𑀺 𑀅𑀲𑀼𑀜𑁆𑀜𑀢𑁆𑀢𑀸 𑀅𑀲𑀼𑀜𑁆𑀜𑀓𑀧𑁆𑀧𑁄 𑀦𑀸𑀫. 𑀢𑀩𑁆𑀩𑀺𑀕𑀫𑁂𑀦 𑀲𑀼𑀜𑁆𑀜𑀓𑀧𑁆𑀧𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀲𑀼𑀧𑀺 𑀅𑀲𑀼𑀜𑁆𑀜𑀓𑀧𑁆𑀧𑁄 𑀧𑀜𑁆𑀘𑀯𑀺𑀥𑁄 𑀳𑁄𑀢𑀺 𑀲𑀸𑀭𑀓𑀧𑁆𑀧𑁄 ¶ , 𑀫𑀡𑁆𑀟𑀓𑀧𑁆𑀧𑁄, 𑀯𑀭𑀓𑀧𑁆𑀧𑁄, 𑀲𑀸𑀭𑀫𑀡𑁆𑀟𑀓𑀧𑁆𑀧𑁄, 𑀪𑀤𑁆𑀤𑀓𑀧𑁆𑀧𑁄𑀢𑀺, 𑀢𑁂𑀲𑀼 𑀬𑀲𑁆𑀫𑀺𑀁 𑀓𑀧𑁆𑀧𑁂 𑀏𑀓𑁄𑀯 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀲𑀸𑀭𑀓𑀧𑁆𑀧𑁄 𑀦𑀸𑀫. 𑀬𑀲𑁆𑀫𑀺𑀁 𑀓𑀧𑁆𑀧𑁂 𑀤𑁆𑀯𑁂 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑁄 𑀫𑀡𑁆𑀟𑀓𑀧𑁆𑀧𑁄 𑀦𑀸𑀫. 𑀬𑀲𑁆𑀫𑀺𑀁 𑀓𑀧𑁆𑀧𑁂 𑀢𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑁄 𑀯𑀭𑀓𑀧𑁆𑀧𑁄 𑀦𑀸𑀫. 𑀬𑀲𑁆𑀫𑀺𑀁 𑀓𑀧𑁆𑀧𑁂 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑁄 𑀲𑀸𑀭𑀫𑀡𑁆𑀟𑀓𑀧𑁆𑀧𑁄 𑀦𑀸𑀫. 𑀬𑀲𑁆𑀫𑀺𑀁 𑀓𑀧𑁆𑀧𑁂 𑀧𑀜𑁆𑀘 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑁄 𑀪𑀤𑁆𑀤𑀓𑀧𑁆𑀧𑁄𑀦𑀸𑀫. 𑀇𑀫𑀸𑀦𑀺 𑀧𑀜𑁆𑀘𑀓𑀧𑁆𑀧𑀸𑀦𑀺𑀬𑁂𑀯 𑀲𑀳𑁂𑀯 𑀲𑀫𑁄𑀥𑀸𑀦𑁂𑀢𑁆𑀯𑀸 𑀚𑀸𑀢𑀢𑁆𑀢𑀓𑀻𑀲𑁄𑀢𑀢𑁆𑀢𑀓𑀺𑀬𑀸 𑀦𑀺𑀤𑀸𑀦𑁂.

‘‘𑀦𑀦𑁆𑀤𑁄 𑀲𑀼𑀦𑀦𑁆𑀤𑁄 𑀧𑀣𑀯𑀻, 𑀫𑀡𑁆𑀟𑁄 𑀥𑀭𑀡𑀻 𑀲𑀸𑀕𑀭𑁄;

𑀧𑀼𑀡𑁆𑀟𑀭𑀻𑀓𑁄 𑀇𑀫𑁂 𑀲𑀢𑁆𑀢, 𑀅𑀲𑀗𑁆𑀔𑁆𑀬𑁂𑀬𑁆𑀬𑀸 𑀧𑀓𑀸𑀲𑀺𑀢𑀸.

𑀧𑀜𑁆𑀘 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀳𑁄𑀦𑁆𑀢𑀺 𑀦𑀦𑁆𑀤𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑁂;

𑀦𑀯 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀲𑀼𑀦𑀦𑁆𑀤𑀫𑁆𑀳𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑁂.

𑀤𑀲 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀧𑀣𑀯𑀺𑀫𑁆𑀳𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑁂;

𑀏𑀓𑀸𑀤𑀲 𑀲𑀳𑀲𑁆𑀲𑀸𑀦𑀺, 𑀢𑀫𑁆𑀳𑀺 𑀫𑀡𑁆𑀟𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑁂.

𑀯𑀻𑀲𑀢𑀺 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀥𑀭𑀡𑀺𑀫𑁆𑀳𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑁂;

𑀢𑀺𑀁𑀲 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀲𑀸𑀕𑀭𑀫𑁆𑀳𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑁂.

𑀘𑀢𑁆𑀢𑀸𑀮𑀻𑀲 𑀲𑀳𑀲𑁆𑀲𑀸𑀦𑀺, 𑀧𑀼𑀡𑁆𑀟𑀭𑀻𑀓𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑁂;

𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀲𑀼 𑀲𑀢𑁆𑀢𑀲𑀼, 𑀏𑀢𑁆𑀢𑀓𑀸𑀢𑀺 𑀧𑀯𑀼𑀘𑁆𑀘𑀢𑀺.

𑀏𑀓𑀁𑀲𑀢𑀲𑀳𑀲𑁆𑀲𑀸𑀦𑀺, 𑀯𑀻𑀲𑀢𑀺 𑀘 𑀲𑀳𑀲𑁆𑀲𑀜𑁆𑀘;

𑀲𑁂𑀲𑀸 𑀧𑀜𑁆𑀘𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀩𑀼𑀤𑁆𑀥𑁂𑀳𑀺 𑀫𑀡𑁆𑀟𑀺𑀢𑀸’’𑀢𑀺.

𑀯𑀼𑀢𑁆𑀢𑀁. 𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁.

‘‘𑀪𑀤𑁆𑀤𑁄 𑀲𑀩𑁆𑀩𑀨𑀼𑀮𑁆𑀮𑁄, 𑀲𑀩𑁆𑀩𑀭𑀢𑀦𑁄 𑀉𑀲𑀪𑀓𑁆𑀔𑀦𑁆𑀥𑁄;

𑀫𑀸𑀦𑀺𑀢𑀪𑀤𑁆𑀤𑁄 𑀘 𑀧𑀤𑀼𑀫𑁄, 𑀉𑀲𑀪𑀓𑁆𑀔𑀦𑁆𑀢𑀼𑀢𑁆𑀢𑀫𑁂𑀯 𑀘;

𑀲𑀩𑁆𑀩𑀪𑀸𑀲𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑁄, 𑀦𑀯𑀫𑁄𑀢𑀺 𑀧𑀯𑀼𑀘𑁆𑀘𑀢𑀺.

𑀧𑀡𑁆𑀡𑀸𑀲 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀪𑀤𑁆𑀤𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑁂;

𑀲𑀝𑁆𑀞𑀺 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀨𑀼𑀮𑁆𑀮𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑁂.

𑀲𑀢𑁆𑀢𑀢𑀺 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀭𑀢𑀦𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑁂;

𑀅𑀲𑀻𑀢𑀺 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀉𑀲𑀪𑀓𑁆𑀔𑀦𑁆𑀥𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑁂.

𑀦𑀯𑀼𑀢𑀺 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀫𑀸𑀦𑀺𑀢𑀪𑀤𑁆𑀤𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑁂;

𑀯𑀻𑀲𑀢𑀺 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀧𑀤𑀼𑀫𑀫𑁆𑀳𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑁂.

𑀤𑀲 ¶ 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺 𑀉𑀲𑀪𑀫𑁆𑀳𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑁂;

𑀧𑀜𑁆𑀘 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀔𑀦𑁆𑀢𑀼𑀢𑁆𑀢𑀫𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑁂.

𑀤𑁆𑀯𑁂 𑀘 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺, 𑀲𑀩𑁆𑀩𑀪𑀸𑀲𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑁂;

𑀅𑀗𑁆𑀔𑁆𑀬𑁂𑀬𑁂 𑀦𑀯𑀲𑁆𑀫𑀺𑀁, 𑀏𑀢𑁆𑀢𑀓𑀸𑀢𑀺 𑀧𑀯𑀼𑀘𑁆𑀘𑀢𑀺.

𑀢𑀻𑀡𑀺 𑀲𑀢𑀲𑀳𑀲𑁆𑀲𑀸𑀦𑀺, 𑀲𑀢𑁆𑀢𑀸𑀲𑀻𑀢𑀺𑀲𑀳𑀲𑁆𑀲𑀜𑁆𑀘;

𑀕𑀡𑀦𑀸𑀦𑀜𑁆𑀘 𑀩𑀼𑀤𑁆𑀥𑀸𑀦𑀁, 𑀲𑀩𑁆𑀩𑀩𑀼𑀤𑁆𑀥𑁂𑀳𑀺 𑀫𑀡𑁆𑀟𑀺𑀢𑀸’’𑀢𑀺.

𑀢𑁂 𑀲𑀩𑁆𑀩𑁂𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀬𑀸𑀯 𑀅𑀭𑀺𑀫𑁂𑀢𑁆𑀢𑁂𑀬𑁆𑀬𑀸 𑀲𑀫𑁄𑀥𑀸𑀦𑁂𑀢𑁆𑀯𑀸

‘‘𑀲𑀫𑁆𑀩𑀼𑀤𑁆𑀥𑁂 𑀅𑀝𑁆𑀞𑀯𑀻𑀲𑀜𑁆𑀘, 𑀤𑁆𑀯𑀸𑀤𑀲𑀜𑁆𑀘 𑀲𑀳𑀲𑁆𑀲𑀓𑁂;

𑀧𑀜𑁆𑀘𑀲𑀢𑀲𑀳𑀲𑁆𑀲𑀸𑀦𑀺, 𑀦𑀫𑀸𑀫𑀺 𑀲𑀺𑀭𑀲𑀸 𑀫𑀳𑀁;

𑀢𑁂𑀲𑀁 𑀥𑀫𑁆𑀫𑀜𑁆𑀘 𑀲𑀗𑁆𑀖𑀜𑁆𑀘, 𑀆𑀤𑀭𑁂𑀦 𑀦𑀫𑀸𑀫𑀳𑀁.

𑀦𑀫𑀓𑁆𑀓𑀸𑀭𑀸𑀦𑀼𑀪𑀸𑀯𑁂𑀦, 𑀳𑀺𑀢𑁆𑀯𑀸 𑀲𑀩𑁆𑀩𑁂 𑀉𑀧𑀤𑁆𑀤𑀯𑁂;

𑀅𑀦𑁂𑀓𑀅𑀦𑁆𑀢𑀭𑀸𑀬𑀸𑀧𑀺, 𑀯𑀺𑀦𑀲𑁆𑀲𑀦𑁆𑀢𑀼 𑀅𑀲𑁂𑀲𑀢𑁄’’𑀢𑀺.

𑀦𑀫𑀲𑁆𑀲𑀦𑀕𑀸𑀣𑀸 𑀧𑀯𑀢𑁆𑀢𑀸 𑀲𑀸 𑀊𑀦𑀲𑀗𑁆𑀔𑁆𑀬𑀸𑀯𑀲𑁂𑀦𑁂𑀯 𑀓𑀢𑀸𑀯 𑀪𑀯𑀺𑀢𑀩𑁆𑀩𑀁, 𑀢𑀣𑀸 𑀳𑀺 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀧𑁄𑀭𑀸𑀡𑀩𑁆𑀭𑀳𑁆𑀫𑀤𑁂𑀯𑀩𑀼𑀤𑁆𑀥𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀧𑁄𑀭𑀸𑀡𑀲𑀓𑁆𑀬𑀕𑁄𑀢𑀫𑀸 𑀫𑀦𑀲𑀸𑀯 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀲𑀢𑁆𑀢𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀯𑀻𑀢𑀺𑀯𑀢𑁆𑀢𑀸𑀦𑀺 𑀧𑁄𑀭𑀸𑀡𑀲𑀓𑁆𑀬𑀕𑁄𑀢𑀫𑀩𑀼𑀤𑁆𑀥𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀫𑀚𑁆𑀛𑀺𑀫𑀤𑀻𑀧𑀗𑁆𑀓𑀭𑀸 𑀯𑀸𑀘𑀸𑀫𑀢𑁆𑀢𑁂𑀦 𑀦𑀯 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀯𑀻𑀢𑀺𑀯𑀢𑁆𑀢𑀸𑀦𑀺. 𑀫𑀚𑁆𑀛𑀺𑀫𑀤𑀻𑀧𑀗𑁆𑀓𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀸 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀯𑀲𑁂𑀦 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀯𑀻𑀢𑀺𑀯𑀢𑁆𑀢𑀸𑀦𑀺. 𑀧𑀤𑀼𑀫𑀼𑀢𑁆𑀢𑀭𑀩𑀼𑀤𑁆𑀥𑀢𑁄 𑀬𑀸𑀯 𑀓𑀓𑀼𑀲𑀦𑁆𑀥𑀸 𑀏𑀓𑀫𑀲𑀗𑁆𑀔𑁆𑀬𑁂𑀬𑁆𑀬𑀁 𑀯𑀻𑀢𑀺𑀯𑀢𑁆𑀢𑀁. 𑀏𑀯𑀫𑀺𑀫𑁂𑀲𑀼 𑀯𑀻𑀲𑀢𑀺𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀲𑀼 𑀩𑁆𑀭𑀳𑁆𑀫𑀤𑁂𑀯𑀧𑁄𑀭𑀸𑀡𑀲𑀓𑁆𑀬𑀕𑁄𑀢𑀫𑀩𑀼𑀤𑁆𑀥𑀸𑀦𑀫𑀦𑁆𑀢𑀭𑁂 𑀲𑀢𑁆𑀢 𑀅𑀲𑀗𑁆𑀔𑁆𑀬𑁂𑀬𑁆𑀬𑁂 𑀲𑀩𑁆𑀩𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀏𑀓𑀲𑀢𑀲𑀳𑀲𑁆𑀲𑀜𑁆𑀘 𑀯𑀻𑀲𑀢𑀺 𑀲𑀳𑀲𑁆𑀲𑀜𑁆𑀘 𑀧𑀜𑁆𑀘𑀲𑀳𑀲𑁆𑀲𑀸𑀦𑀺 𑀘 𑀳𑁄𑀦𑁆𑀢𑀺. 𑀧𑁄𑀭𑀸𑀡𑀲𑀓𑁆𑀬𑀕𑁄𑀢𑀫𑀫𑀚𑁆𑀛𑀺𑀫𑀤𑀻𑀧𑀗𑁆𑀓𑀭𑀸𑀦𑀫𑀦𑁆𑀢𑀭𑁂 𑀦𑀯 𑀅𑀲𑀗𑁆𑀔𑁆𑀬𑁂𑀬𑁆𑀬𑁂 𑀲𑀩𑁆𑀩𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀢𑀻𑀡𑀺𑀲𑀢𑀲𑀳𑀲𑁆𑀲𑀸𑀦𑀺 𑀲𑀢𑁆𑀢𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺 𑀘 𑀳𑁄𑀦𑁆𑀢𑀺. 𑀫𑀚𑁆𑀛𑀺𑀫𑀤𑀻𑀧𑀗𑁆𑀓𑀭𑀢𑁄 𑀬𑀸𑀯 𑀫𑁂𑀢𑁆𑀢𑁂𑀬𑁆𑀬𑀸 𑀅𑀝𑁆𑀞𑀯𑀻𑀲𑀸𑀢𑀺 𑀲𑀩𑁆𑀩𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀅𑀝𑁆𑀞𑀯𑀻𑀲𑀜𑁆𑀘 𑀤𑁆𑀯𑀸𑀤𑀲𑀲𑀳𑀲𑁆𑀲𑀜𑁆𑀘 𑀧𑀜𑁆𑀘𑀲𑀢𑀲𑀳𑀲𑁆𑀲𑀸𑀦𑀺 𑀘 𑀳𑁄𑀦𑁆𑀢𑀺 𑀢𑀲𑁆𑀫𑀸 𑀊𑀦𑀲𑀗𑁆𑀔𑁆𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀺𑀧𑀼𑀡𑁆𑀡𑀲𑀗𑁆𑀔𑁆𑀬𑀸𑀯𑀲𑁂𑀦 𑀇𑀘𑁆𑀙𑀫𑀸𑀦𑁂𑀳𑀺 𑀘𑀺𑀦𑁆𑀢𑁂𑀢𑀩𑁆𑀩𑀸𑀯. 𑀏𑀲𑀸 𑀘 𑀲𑀗𑁆𑀔𑁆𑀬𑀸𑀯𑀺𑀘𑀸𑀭𑀡𑀸 𑀦𑀺𑀤𑀸𑀦𑁂 𑀯𑀼𑀢𑁆𑀢𑀸𑀯.

𑀏𑀯𑀁 ‘‘𑀘𑀺𑀦𑁆𑀢𑀺𑀢𑀁 𑀲𑀢𑁆𑀢𑀲𑀗𑁆𑀔𑁆𑀬𑁂𑀬𑁆𑀬𑀁, 𑀦𑀯𑀲𑀗𑁆𑀔𑁆𑀬𑁂𑀬𑁆𑀬𑀯𑀸𑀘𑀓𑀁;

𑀓𑀸𑀬𑀯𑀸𑀘𑀸 𑀘𑀢𑀼𑀲𑀗𑁆𑀔𑁆𑀬𑁂𑀬𑁆𑀬𑀁, 𑀩𑀼𑀤𑁆𑀥𑀢𑁆𑀢𑀁𑀲𑀫𑀼𑀧𑀸𑀕𑀫𑀻’’𑀢𑀺.

𑀯𑀼𑀢𑁆𑀢𑁂𑀲𑀼 ¶ 𑀯𑀻𑀲𑀢𑀺𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀲𑀼 𑀧𑀯𑀢𑁆𑀢𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀯𑀲𑁂𑀦𑁂𑀯 𑀓𑀢𑀸. 𑀅𑀢𑁆𑀣𑀢𑁄 𑀧𑀦 𑀲𑀸𑀭𑀓𑀧𑁆𑀧𑀫𑀡𑁆𑀟𑀓𑀧𑁆𑀧𑀯𑀭𑀓𑀧𑁆𑀧𑀲𑀸𑀭𑀫𑀡𑁆𑀟𑀓𑀧𑁆𑀧𑀪𑀤𑁆𑀤𑀓𑀧𑁆𑀧𑀯𑀲𑁂𑀦 𑀧𑀜𑁆𑀘𑀯𑀺𑀥𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀸𑀦𑀺 𑀧𑀜𑁆𑀘𑀦𑀸𑀫𑀸𑀦𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑀧𑁆𑀧𑁂𑀬𑁂𑀯 𑀮𑀩𑁆𑀪𑀦𑁆𑀢𑀺, 𑀅𑀦𑀼𑀧𑁆𑀧𑀦𑁆𑀦𑀓𑀧𑁆𑀧𑁂 𑀧𑀦 𑀲𑀼𑀜𑁆𑀜𑀓𑀧𑁆𑀧𑁄𑀢𑁆𑀯𑁂𑀯 𑀦𑀸𑀫𑀁 𑀮𑀩𑁆𑀪𑀢𑀺 𑀢𑀣𑀸 𑀳𑀺 𑀓𑀧𑁆𑀧𑀲𑀡𑁆𑀞𑀳𑀦𑀓𑀸𑀮𑁂 𑀲𑀩𑁆𑀩𑀧𑀞𑀫𑀁 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀝𑁆𑀞𑀸𑀦𑁂𑀬𑁂𑀯 𑀧𑀤𑀼𑀫𑀺𑀦𑀺𑀕𑀩𑁆𑀪𑀸 𑀉𑀧𑁆𑀧𑀚𑁆𑀚𑀢𑀺. 𑀲𑀸 𑀬𑀲𑁆𑀫𑀺𑀁 𑀓𑀸𑀮𑁂 𑀏𑀓𑁄 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀏𑀓𑁄 𑀧𑀤𑀼𑀫𑀺𑀦𑀺𑀕𑀩𑁆𑀪𑁄 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑁂𑀳𑀺 𑀲𑀳 𑀉𑀧𑁆𑀧𑀚𑁆𑀚𑀢𑀺. 𑀢𑀁 𑀤𑀺𑀲𑁆𑀯𑀸 𑀲𑀼𑀤𑁆𑀥𑀸𑀯𑀸𑀲𑀩𑁆𑀭𑀳𑁆𑀫𑀼𑀦𑁄 𑀦𑁂𑀫𑀺𑀢𑁆𑀢𑀧𑀸𑀞𑀓𑀸 𑀅𑀭𑀳𑀦𑁆𑀢𑁄 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀏𑀓𑁄 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀲𑀜𑁆𑀚𑀸𑀢𑀧𑀻𑀢𑀺𑀲𑁄𑀫𑀦𑀲𑁆𑀲𑀸 𑀳𑀼𑀢𑁆𑀯𑀸 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑁂 𑀕𑀳𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀞𑀧𑁂𑀦𑁆𑀢𑀺 ‘‘𑀬𑀤𑀸 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀤𑀸 𑀤𑀲𑁆𑀲𑀸𑀫𑀸’’𑀢𑀺. 𑀏𑀯𑀁 𑀤𑁆𑀯𑁂 𑀢𑀬𑁄 𑀘𑀢𑁆𑀢𑀸𑀭𑁄 𑀧𑀜𑁆𑀘 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀤𑁆𑀯𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀧𑀤𑀼𑀫𑀺𑀦𑀺𑀕𑀩𑁆𑀪𑀸 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑁂𑀳𑀺 𑀲𑀳 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀜𑁆𑀘 𑀔𑁄 𑀏𑀓𑀲𑁆𑀫𑀺𑀁 𑀬𑁂𑀯 𑀦𑀸𑀴𑁂𑀓𑁂𑀓 𑀩𑀤𑁆𑀥𑀸 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀁 𑀓𑀧𑁆𑀧𑀲𑀡𑁆𑀞𑀳𑀦𑀓𑀸𑀮𑀢𑁄 𑀧𑀝𑁆𑀞𑀸𑀬𑁂𑀯 𑀇𑀫𑀸𑀦𑀺 𑀧𑀜𑁆𑀘 𑀦𑀸𑀫𑀸𑀦𑀺 𑀮𑀩𑁆𑀪𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑁆𑀢𑀸𑀯𑀢𑀸 𑀇𑀫𑀲𑁆𑀫𑀺𑀁𑀬𑁂𑀯 𑀯𑀺𑀯𑀝𑁆𑀝𑀝𑁆𑀞𑀸𑀬𑀻𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁂 𑀩𑀼𑀤𑁆𑀥𑀸𑀤𑀬𑁄 𑀫𑀳𑁂𑀲𑀓𑁆𑀔𑀸 𑀧𑀼𑀜𑁆𑀜𑀯𑀦𑁆𑀢𑁄 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀣𑀸 𑀆𑀬𑀼𑀓𑀧𑁆𑀧𑀦𑁆𑀢𑀭𑀓𑀧𑁆𑀧𑀸𑀦𑀺𑀧𑀺. 𑀢𑀢𑁆𑀣 𑀆𑀬𑀼𑀓𑀧𑁆𑀧𑁄 𑀦𑀸𑀫 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀆𑀬𑀼𑀧𑀭𑀺𑀘𑁆𑀙𑁂𑀤𑁄. 𑀅𑀦𑁆𑀢𑀭𑀓𑀧𑁆𑀧𑁄 𑀦𑀸𑀫 𑀢𑀢𑁆𑀣 𑀲𑀢𑁆𑀣𑀭𑁄𑀕𑀤𑀼𑀩𑁆𑀪𑀺𑀓𑁆𑀔𑀸𑀦𑀁 𑀅𑀜𑁆𑀜𑀢𑀭𑀲𑀁𑀯𑀝𑁆𑀝𑀦𑁂𑀦 𑀩𑀳𑀽𑀲𑀼 𑀯𑀺𑀦𑀸𑀲𑀫𑀼𑀧𑀕𑀢𑁂𑀲𑀼 𑀅𑀯𑀲𑀺𑀝𑁆𑀞𑀲𑀢𑁆𑀢𑀲𑀦𑁆𑀢𑀸 𑀦𑀧𑁆𑀧𑀯𑀢𑁆𑀢𑀓𑀼𑀲𑀮𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀤𑀲𑀯𑀲𑁆𑀲𑀢𑁄 𑀧𑀝𑁆𑀞𑀸𑀬 𑀅𑀦𑀼𑀓𑁆𑀓𑀫𑁂𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀬𑀼𑀓𑀧𑁆𑀧𑀧𑁆𑀧𑀫𑀸𑀡𑁂𑀲𑀼 𑀲𑀢𑁆𑀢𑁂𑀲𑀼 𑀧𑀦 𑀅𑀥𑀫𑁆𑀫𑀲𑀫𑀸𑀤𑀸𑀦𑀯𑀲𑁂𑀦 𑀓𑀫𑁂𑀦 𑀧𑀭𑀺𑀳𑀸𑀬𑀺𑀢𑁆𑀯𑀸 𑀤𑀲𑀯𑀲𑁆𑀲𑀸𑀬𑀼𑀓𑁂𑀲𑀼 𑀚𑀸𑀢𑁂𑀲𑀼 𑀭𑁄𑀕𑀸𑀤𑀻𑀦𑀫𑀜𑁆𑀜𑀢𑀭𑀲𑀁𑀯𑀝𑁆𑀝𑀦𑁂𑀦 𑀲𑀢𑁆𑀢𑀸𑀦𑀁 𑀯𑀺𑀦𑀸𑀲𑀧𑁆𑀧𑀢𑁆𑀢𑀺 𑀬𑀸𑀯 𑀅𑀬𑀫𑁂𑀓𑁄 𑀅𑀦𑁆𑀢𑀭𑀓𑀧𑁆𑀧𑁄. 𑀏𑀯𑀁 𑀧𑀭𑀺𑀘𑁆𑀙𑀺𑀦𑁆𑀦𑀅𑀦𑁆𑀢𑀭𑀓𑀧𑁆𑀧𑀯𑀲𑁂𑀦 𑀘𑀢𑀼𑀲𑀝𑁆𑀞𑀺𑀅𑀦𑁆𑀢𑀭𑀓𑀧𑁆𑀧𑁄 𑀏𑀓𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁄 𑀯𑀻𑀲𑀢𑀺 𑀅𑀦𑁆𑀢𑀭𑀓𑀧𑁆𑀧𑀧𑁆𑀧𑀫𑀸𑀡𑁄𑀢𑀺 𑀅𑀧𑀭𑁂 𑀯𑀤𑀦𑁆𑀢𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀸𑀦𑀺 𑀏𑀓𑁄 𑀫𑀳𑀸𑀓𑀧𑁆𑀧𑁄 𑀦𑀸𑀫. 𑀏𑀯𑀁 𑀢𑁂𑀚𑁄 𑀲𑀁𑀯𑀝𑁆𑀝𑀯𑀲𑁂𑀦 𑀢𑀸𑀯 𑀫𑀳𑀸𑀓𑀧𑁆𑀧𑀸𑀦𑀁 𑀅𑀦𑁆𑀢𑀭𑀁 𑀅𑀕𑁆𑀕𑀺𑀦𑀸𑀯 𑀯𑀺𑀦𑀲𑁆𑀲𑀢𑀺. 𑀬𑀲𑁆𑀫𑀺𑀁 𑀧𑀦 𑀲𑀫𑀬𑁂 𑀓𑀧𑁆𑀧𑁄 𑀉𑀤𑀓𑁂𑀦 𑀦𑀲𑁆𑀲𑀢𑀺, 𑀢𑀤𑀸 𑀆𑀤𑀺𑀢𑁄𑀯 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑁄 𑀯𑀼𑀝𑁆𑀞𑀳𑀺𑀢𑁆𑀯𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑀬𑀣𑀸 𑀢𑀢𑁆𑀣 𑀤𑀼𑀢𑀺𑀬𑀲𑀽𑀭𑀺𑀬𑁄, 𑀏𑀯𑀫𑀺𑀥𑀧𑀺 𑀓𑀧𑁆𑀧𑀯𑀺𑀦𑀸𑀲𑀓𑁄 𑀔𑀸𑀭𑀼𑀤𑀓𑀫𑀳𑀸𑀫𑁂𑀖𑁄 𑀯𑀼𑀝𑁆𑀞𑀸𑀢𑀺 𑀲𑁄 𑀆𑀤𑀺𑀢𑁄 𑀲𑀼𑀔𑀼𑀫𑀁 𑀯𑀲𑁆𑀲𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀫𑀳𑀸𑀥𑀸𑀭𑀸𑀳𑀺 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀁 ¶ 𑀧𑀽𑀭𑁂𑀦𑁆𑀢𑁄 𑀯𑀲𑁆𑀲𑀢𑀺. 𑀔𑀸𑀭𑀼𑀤𑀓𑁂𑀦 𑀨𑀼𑀝𑁆𑀞𑀨𑀼𑀝𑁆𑀞𑀸 𑀧𑀣𑀯𑀻𑀧𑀩𑁆𑀩𑀢𑀸𑀤𑀬𑁄 𑀯𑀺𑀮𑀻𑀬𑀦𑁆𑀢𑀺 𑀢𑀁 𑀉𑀤𑀓𑀁 𑀯𑀸𑀢𑁂𑀦 𑀲𑀫𑀦𑁆𑀢𑀢𑁄 𑀥𑀸𑀭𑀺𑀢𑀁 𑀧𑀣𑀯𑀺𑀢𑁄 𑀬𑀸𑀯 𑀧𑀭𑀺𑀢𑁆𑀢𑀸𑀪𑀸 𑀅𑀧𑁆𑀧𑀫𑀸𑀡𑀸𑀪𑀸 𑀆𑀪𑀲𑁆𑀲𑀭𑀸𑀢𑀺 𑀢𑀬𑁄𑀧𑀺 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺 𑀉𑀤𑀓𑀁 𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀢𑀬𑁄𑀧𑀺 𑀩𑁆𑀭𑀳𑁆𑀫𑀮𑁄𑀓𑁂 𑀯𑀺𑀮𑀻𑀬𑀸𑀧𑁂𑀢𑁆𑀯𑀸 𑀲𑀼𑀪 𑀓𑀺𑀡𑁆𑀳𑁂 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺 𑀬𑀸𑀯 𑀅𑀡𑀼𑀫𑀢𑁆𑀢𑀁 𑀲𑀗𑁆𑀔𑀸𑀭𑀕𑀢𑀁 𑀅𑀢𑁆𑀣𑀺, 𑀢𑀸𑀯 𑀦 𑀯𑀽𑀧𑀲𑀫𑀢𑀺. 𑀉𑀤𑀓𑀸𑀦𑀼𑀕𑀢𑀁 𑀧𑀦 𑀲𑀩𑁆𑀩𑀲𑀗𑁆𑀔𑀸𑀭𑀕𑀢𑀁 𑀅𑀪𑀺𑀪𑀯𑀺𑀢𑁆𑀯𑀸 𑀲𑀳𑀲𑀸 𑀯𑀽𑀧𑀲𑀫𑀢𑀺 𑀅𑀦𑁆𑀢𑀭𑀥𑀸𑀦𑀁 𑀕𑀘𑁆𑀙𑀢𑀺, 𑀳𑁂𑀝𑁆𑀞𑀸 𑀆𑀓𑀸𑀲𑁂𑀦 𑀲𑀳 𑀉𑀧𑀭𑀺 𑀆𑀓𑀸𑀲𑁄 𑀏𑀓𑁄 𑀳𑁄𑀢𑀺 𑀫𑀳𑀦𑁆𑀥𑀓𑀸𑀭𑁄𑀢𑀺 𑀲𑀩𑁆𑀩𑀁 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀓𑁂𑀯𑀮𑀁 𑀧𑀦𑀺𑀥 𑀑𑀢𑀺𑀡𑁆𑀡𑁄𑀢𑀺𑀡𑁆𑀡𑁂 𑀉𑀤𑀓𑁂 𑀆𑀪𑀲𑁆𑀲𑀭𑀩𑁆𑀭𑀳𑁆𑀫𑀮𑁄𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀮𑁄𑀓𑀧𑀸𑀢𑀼𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀪𑀓𑀺𑀡𑁆𑀳𑀢𑁄 𑀘𑀯𑀺𑀢𑁆𑀯𑀸 𑀆𑀪𑀲𑁆𑀲𑀭𑀝𑁆𑀞𑀸𑀦𑀸𑀤𑀻𑀲𑀼 𑀲𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀧𑀺 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀫𑁂𑀖𑀢𑁄 𑀬𑀸𑀯 𑀓𑀧𑁆𑀧𑀯𑀺𑀦𑀸𑀲𑀓𑀉𑀤𑀓𑀧𑀭𑀺𑀘𑁆𑀙𑁂𑀤𑁄 𑀲𑀁𑀯𑀝𑁆𑀝𑁄 𑀦𑀸𑀫 𑀧𑀞𑀫𑀫𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁄 𑀦𑀸𑀫𑀸𑀢𑀺 𑀘𑀢𑁆𑀢𑀸𑀭𑀺𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀸𑀦𑀺 𑀯𑀼𑀢𑁆𑀢𑀲𑀤𑀺𑀲𑀸𑀦𑀺 𑀏𑀯𑀁 𑀲𑀢𑁆𑀢 𑀫𑀳𑀸𑀓𑀧𑁆𑀧𑀸𑀦𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀅𑀕𑁆𑀕𑀺𑀦𑀸 𑀯𑀺𑀮𑀻𑀬𑀺𑀢𑁆𑀯𑀸 𑀅𑀝𑁆𑀞𑀫𑁂 𑀫𑀳𑀸𑀓𑀧𑁆𑀧𑁂 𑀉𑀤𑀓𑁂𑀦𑀧𑀺 𑀯𑀺𑀦𑀸𑀲𑁄 𑀘 𑀲𑀡𑁆𑀞𑀳𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀁, 𑀏𑀯𑀁 𑀲𑀢𑁆𑀢𑀲𑀢𑁆𑀢𑀫𑀳𑀸𑀓𑀧𑁆𑀧𑁄 𑀲𑀢𑁆𑀢𑀲𑀢𑁆𑀢𑀯𑀸𑀭𑀁 𑀅𑀕𑁆𑀕𑀺𑀦𑀸 𑀯𑀺𑀮𑀻𑀬𑀺𑀢𑁆𑀯𑀸 𑀅𑀝𑁆𑀞𑀫𑁂 𑀅𑀝𑁆𑀞𑀫𑁂 𑀯𑀸𑀭𑁂 𑀆𑀧𑁂𑀦 𑀯𑀺𑀮𑀻𑀬𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀢𑁂𑀲𑀝𑁆𑀞𑀺𑀫𑀳𑀸𑀓𑀧𑁆𑀧𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀢𑀤𑀸 𑀆𑀧𑀯𑀸𑀭𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀘𑀢𑀼𑀲𑀝𑁆𑀞𑀺𑀫𑁂 𑀫𑀳𑀸𑀓𑀧𑁆𑀧𑁂 𑀯𑀸𑀢𑁂𑀦 𑀯𑀺𑀦𑀲𑁆𑀲𑀢𑀺 𑀢𑀤𑀸 𑀆𑀤𑀺𑀢𑁄 𑀓𑀧𑁆𑀧𑀯𑀺𑀦𑀸𑀲𑀓𑀫𑀳𑀸𑀯𑀸𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸𑀢𑀺 𑀲𑀩𑁆𑀩𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑀬𑀣𑀸 𑀅𑀕𑁆𑀕𑀺𑀦𑀸 𑀯𑀺𑀦𑀸𑀲𑀓𑀧𑁆𑀧𑁂 𑀤𑀼𑀢𑀺𑀬𑀲𑀽𑀭𑀺𑀬𑁄, 𑀏𑀯𑀫𑀺𑀥𑀸𑀧𑀺 𑀓𑀧𑁆𑀧𑀯𑀺𑀦𑀸𑀲𑀦𑀢𑁆𑀣𑀁 𑀯𑀸𑀢𑁄 𑀲𑀫𑀼𑀝𑁆𑀞𑀸𑀢𑀺 𑀲𑁄 𑀧𑀞𑀫𑀁 𑀲𑀼𑀔𑀼𑀫𑀭𑀚𑀁 𑀉𑀝𑁆𑀞𑀸𑀧𑁂𑀢𑀺, 𑀢𑀢𑁄 𑀣𑀽𑀮𑀭𑀚𑀁 𑀲𑀡𑁆𑀳𑀭𑀚𑀁 𑀲𑀼𑀔𑀼𑀫𑀯𑀸𑀮𑀺𑀓𑀁 𑀲𑀓𑁆𑀔𑀭𑀧𑀸𑀲𑀸𑀡𑀸𑀤𑀬𑁄𑀢𑀺 𑀬𑀸𑀯 𑀓𑀽𑀝𑀸𑀕𑀸𑀭𑀫𑀢𑁆𑀢𑁂 𑀧𑀸𑀲𑀸𑀡𑁂𑀧𑀺 𑀯𑀺𑀲𑀫𑀝𑁆𑀞𑀸𑀦𑁂 𑀞𑀺𑀢𑀫𑀳𑀸𑀭𑀼𑀓𑁆𑀔𑁂𑀘 𑀉𑀝𑁆𑀞𑀸𑀧𑁂𑀢𑀺, 𑀢𑁂 𑀧𑀣𑀯𑀺𑀢𑁄 𑀦𑀪𑀫𑀼𑀕𑁆𑀕𑀢𑀸 𑀦 𑀧𑀼𑀦 𑀧𑀢𑀦𑁆𑀢𑀺, 𑀢𑀢𑁆𑀣𑁂𑀯 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸 𑀳𑀼𑀢𑁆𑀯𑀸 𑀅𑀪𑀸𑀯𑀁 𑀕𑀘𑁆𑀙𑀦𑁆𑀢𑀺. 𑀬𑀣𑀸𑀦𑀼𑀓𑁆𑀓𑀫𑁂𑀦 𑀳𑁂𑀝𑁆𑀞𑀸 𑀫𑀳𑀸𑀧𑀣𑀯𑀺𑀬𑀸 𑀯𑀸𑀢𑁄 𑀲𑀫𑀼𑀝𑁆𑀞𑀳𑀺𑀢𑁆𑀯𑀸 𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀉𑀤𑁆𑀥𑀁𑀫𑀽𑀮𑀁 𑀓𑀢𑁆𑀯𑀸 𑀆𑀓𑀸𑀲𑁂 𑀔𑀺𑀧𑀢𑀺 𑀬𑁄𑀚𑀦𑀲𑀢𑀧𑁆𑀧𑀫𑀸𑀡𑀸𑀧𑀺 𑀧𑀣𑀯𑀺𑀧𑁆𑀧𑀤𑁂𑀲𑀸 𑀤𑁆𑀯𑀺𑀬𑁄𑀚𑀦𑀢𑀺𑀬𑁄𑀚𑀦𑀘𑀢𑀼𑀬𑁄𑀚𑀦𑀧𑀜𑁆𑀘𑀬𑁄𑀚𑀦𑀙𑀬𑁄𑀚𑀦𑀲𑀢𑁆𑀢𑀬𑁄𑀚𑀦𑀧𑁆𑀧𑀫𑀸𑀡𑀸𑀧𑀺 𑀪𑀺𑀚𑁆𑀚𑀺𑀢𑁆𑀯𑀸 𑀢𑁂 𑀯𑁂𑀕𑀓𑁆𑀔𑀺𑀢𑁆𑀢𑀸 𑀆𑀓𑀸𑀲𑁂𑀬𑁂𑀯 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸 𑀳𑀼𑀢𑁆𑀯𑀸 𑀅𑀪𑀸𑀯𑀁 𑀕𑀘𑁆𑀙𑀦𑁆𑀢𑀺 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀫𑁆𑀧𑀺 𑀯𑀸𑀢𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 𑀆𑀓𑀸𑀲𑁂 𑀔𑀺𑀧𑀢𑀺 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀖𑀝𑁆𑀝𑀬𑀦𑁆𑀢𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸 ¶ 𑀳𑀼𑀢𑁆𑀯𑀸 𑀯𑀺𑀦𑀲𑁆𑀲𑀦𑁆𑀢𑀺 𑀏𑀢𑁂𑀦𑁂𑀯 𑀪𑀽𑀫𑀝𑁆𑀞𑀓𑀯𑀺𑀫𑀸𑀦𑀸𑀦𑀺 𑀆𑀓𑀸𑀲𑀝𑁆𑀞𑀓𑀯𑀺𑀫𑀸𑀦𑀸𑀦𑀺 𑀘 𑀯𑀺𑀦𑀸𑀲𑁂𑀦𑁆𑀢𑁄 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀦𑀸𑀲𑁂𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀸𑀦𑀺 𑀯𑀺𑀦𑀸𑀲𑁂𑀢𑀺. 𑀢𑀢𑁆𑀣 𑀘𑀓𑁆𑀓𑀯𑀸𑀴𑀸 𑀘𑀓𑁆𑀓𑀯𑀸𑀴𑁂𑀳𑀺, 𑀳𑀺𑀫𑀯𑀦𑁆𑀢𑀸 𑀳𑀺𑀫𑀯𑀦𑁆𑀢𑁂𑀳𑀺, 𑀲𑀺𑀦𑁂𑀭𑀽 𑀲𑀺𑀦𑁂𑀭𑀽𑀳𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑀸𑀕𑀦𑁆𑀢𑁆𑀯𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀸 𑀳𑀼𑀢𑁆𑀯𑀸 𑀯𑀺𑀦𑀲𑁆𑀲𑀦𑁆𑀢𑀺. 𑀧𑀣𑀯𑀺𑀢𑁄 𑀬𑀸𑀯 𑀧𑀭𑀺𑀢𑁆𑀢𑀲𑀼𑀪𑀸, 𑀅𑀧𑁆𑀧𑀫𑀸𑀡𑀲𑀼𑀪𑀸, 𑀲𑀼𑀪𑀡𑀺𑀡𑁆𑀳𑀸𑀢𑀺 𑀢𑀬𑁄𑀧𑀺 𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀻 𑀯𑀸𑀢𑁄 𑀕𑀡𑁆𑀳𑀸𑀢𑀺 𑀢𑀢𑁆𑀣 𑀢𑀬𑁄𑀧𑀺 𑀩𑁆𑀭𑀳𑁆𑀫𑀮𑁄𑀓𑁂 𑀯𑀺𑀦𑀸𑀲𑁂𑀢𑁆𑀯𑀸 𑀯𑁂𑀳𑀧𑁆𑀨𑀮𑀁 𑀆𑀳𑀘𑁆𑀘 𑀅𑀝𑁆𑀞𑀸𑀲𑀺. 𑀏𑀯𑀁 𑀲𑀩𑁆𑀩𑀁 𑀲𑀗𑁆𑀔𑀸𑀭𑀕𑀢𑀁 𑀯𑀺𑀦𑀸𑀲𑁂𑀢𑁆𑀯𑀸 𑀲𑀬𑀁 𑀯𑀺𑀦𑀲𑁆𑀲𑀢𑀺, 𑀳𑁂𑀝𑁆𑀞𑀸 𑀆𑀓𑀸𑀲𑁂𑀦 𑀲𑀳 𑀉𑀧𑀭𑀺 𑀆𑀓𑀸𑀲𑁄 𑀏𑀓𑁄 𑀳𑁄𑀢𑀺 𑀫𑀳𑀦𑁆𑀥𑀓𑀸𑀭𑁄𑀢𑀺 𑀲𑀩𑁆𑀩𑀁 𑀯𑀼𑀢𑁆𑀢𑀲𑀤𑀺𑀲𑀁. 𑀇𑀥 𑀧𑀦 𑀲𑀼𑀪𑀓𑀺𑀡𑁆𑀳𑀩𑁆𑀭𑀳𑁆𑀫𑀮𑁄𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀮𑁄𑀓𑁄 𑀧𑀸𑀢𑀼𑀪𑀯𑀢𑀺. 𑀯𑁂𑀳𑀧𑁆𑀨𑀮𑀢𑁄 𑀘𑀯𑀺𑀢𑁆𑀯𑀸 𑀲𑀼𑀪𑀓𑀺𑀡𑁆𑀳𑀸𑀤𑀻𑀲𑀼 𑀲𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀢𑀢𑁆𑀣𑀓𑀧𑁆𑀧𑀯𑀺𑀦𑀸 𑀲𑀓𑀫𑀳𑀸𑀫𑁂𑀖𑀢𑁄 𑀬𑀸𑀯 𑀓𑀧𑁆𑀧𑀯𑀺𑀦𑀸𑀲𑀓𑀯𑀸𑀢𑀼𑀧𑀘𑁆𑀙𑁂𑀤𑁄, 𑀇𑀤𑀁 𑀲𑀁𑀯𑀝𑁆𑀝𑁄 𑀦𑀸𑀫, 𑀧𑀞𑀫𑀫𑀲𑀗𑁆𑀔𑁆𑀬𑁂𑀬𑁆𑀬𑀁 𑀦𑀸𑀫𑀸𑀢𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀸𑀦𑀺 𑀏𑀓𑁄 𑀫𑀳𑀸𑀓𑀧𑁆𑀧𑁄 𑀦𑀸𑀫𑀸𑀢𑀺 𑀲𑀩𑁆𑀩𑀁 𑀢𑁂𑀚𑁄𑀲𑀁𑀯𑀝𑁆𑀝𑁂 𑀯𑀼𑀢𑁆𑀢𑀦𑀬𑀫𑁂𑀯.

𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁.

‘‘𑀲𑀢𑁆𑀢 𑀲𑀢𑁆𑀢 𑀕𑁆𑀕𑀺𑀦𑀸 𑀯𑀸𑀭𑀸, 𑀅𑀝𑁆𑀞𑀫𑁂 𑀅𑀝𑁆𑀞𑀫𑁂 𑀤𑀓𑀸;

𑀘𑀢𑀼𑀲𑀝𑁆𑀞𑀺 𑀬𑀤𑀸 𑀧𑀼𑀡𑁆𑀡𑀸, 𑀏𑀓𑁄 𑀯𑀸𑀬𑀼𑀯𑀭𑁄 𑀲𑀺𑀬𑀸.

𑀅𑀕𑁆𑀕𑀺𑀦𑀸’𑀪𑀲𑁆𑀲𑀭𑀸 𑀳𑁂𑀝𑁆𑀞𑀸, 𑀆𑀧𑁂𑀦 𑀲𑀼𑀪𑀓𑀺𑀡𑁆𑀳𑀢𑁄;

𑀯𑁂𑀳𑀧𑁆𑀨𑀮𑀢𑁄 𑀯𑀸𑀢𑁂𑀦, 𑀏𑀯𑀁 𑀮𑁄𑀓𑁄 𑀯𑀺𑀦𑀲𑁆𑀲𑀢𑀻’’𑀢𑀺.

𑀢𑀲𑁆𑀫𑀸 𑀢𑀺𑀡𑁆𑀡𑀫𑁆𑀧𑀺 𑀧𑀞𑀫𑀚𑁆𑀛𑀸𑀦𑀢𑀮𑀸𑀦𑀁 𑀏𑀓𑀓𑀧𑁆𑀧𑁂𑀧𑀺 𑀅𑀯𑀺𑀦𑀸𑀲𑀸𑀪𑀸𑀯𑀢𑁄 𑀲𑀓𑀮𑀓𑀧𑁆𑀧𑁂 𑀢𑁂𑀲𑀁 𑀲𑀫𑁆𑀪𑀯𑁄 𑀦𑀢𑁆𑀣𑀻𑀢𑀺 𑀅𑀲𑀗𑁆𑀔𑁆𑀬𑁂𑀬𑁆𑀬 𑀓𑀧𑁆𑀧𑀯𑀲𑁂𑀦 𑀢𑁂𑀲𑀁 𑀆𑀬𑀼𑀧𑀭𑀺𑀘𑁆𑀙𑁂𑀤𑁄 𑀤𑀝𑁆𑀞𑀩𑁆𑀩𑁄. 𑀤𑀼𑀢𑀺𑀬𑀚𑁆𑀛𑀸𑀦𑀢𑀮𑀢𑁄 𑀧𑀝𑁆𑀞𑀸𑀬 𑀧𑀦 𑀧𑀭𑀺𑀧𑀼𑀡𑁆𑀡𑀫𑀳𑀸𑀓𑀧𑁆𑀧𑀯𑀲𑁂𑀦 𑀆𑀬𑀼𑀧𑀭𑀺𑀘𑁆𑀙𑁂𑀤𑁄 𑀤𑀝𑁆𑀞𑀩𑁆𑀩𑁄, 𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀯𑀲𑁂𑀦. 𑀬𑀤𑀺 𑀤𑀼𑀢𑀺𑀬𑀚𑁆𑀛𑀸𑀦𑀢𑀮𑀢𑁄 𑀧𑀝𑁆𑀞𑀸𑀬 𑀧𑀭𑀺𑀧𑀼𑀡𑁆𑀡𑀫𑀳𑀸𑀓𑀧𑁆𑀧𑀯𑀲𑁂𑀦 𑀆𑀬𑀼𑀧𑀭𑀺𑀘𑁆𑀙𑁂𑀤𑁄 𑀲𑀺𑀬𑀸, 𑀓𑀣𑀁 𑀆𑀪𑀲𑁆𑀲𑀭𑀸𑀤𑀻𑀲𑀼 𑀩𑁆𑀭𑀳𑁆𑀫𑀽𑀦𑀁 𑀅𑀝𑁆𑀞𑀫𑀳𑀸𑀓𑀧𑁆𑀧𑀸𑀤𑀺𑀯𑀲𑁂𑀦 𑀆𑀬𑀼 𑀧𑀭𑀺𑀧𑀼𑀡𑁆𑀡𑀁 𑀲𑀺𑀬𑀸, 𑀢𑀣𑀸 𑀳𑀺 𑀧𑀞𑀫𑀚𑁆𑀛𑀸𑀦𑀢𑀮𑀁 𑀲𑀢𑁆𑀢𑀲𑀼 𑀯𑀸𑀭𑁂𑀲𑀼 𑀅𑀕𑁆𑀕𑀺𑀦𑀸 𑀯𑀺𑀦𑀲𑁆𑀲𑀢𑀺. 𑀅𑀝𑁆𑀞𑀫𑁂 𑀯𑀸𑀭𑁂 𑀬𑀸𑀯 𑀆𑀪𑀲𑁆𑀲𑀭𑀸 𑀉𑀤𑀓𑁂𑀦 𑀯𑀺𑀦𑀲𑁆𑀲𑀢𑀺 𑀧𑀼𑀦 𑀲𑀢𑁆𑀢𑀯𑀸𑀭𑁂𑀲𑀼 𑀅𑀕𑁆𑀕𑀺𑀦𑀸 𑀧𑀞𑀫𑀚𑁆𑀛𑀸𑀦𑀢𑀮𑀁, 𑀧𑀼𑀦 𑀅𑀝𑁆𑀞𑀫𑁂𑀯𑀸𑀭𑁂 𑀉𑀤𑀓𑁂𑀦 𑀤𑀼𑀢𑀺𑀬𑀚𑁆𑀛𑀸𑀦𑀢𑀮𑀁 𑀯𑀺𑀦𑀲𑁆𑀲𑀢𑀻𑀢𑀺 𑀏𑀯𑀁 𑀅𑀝𑁆𑀞𑀫𑁂 𑀯𑀸𑀭𑁂 𑀆𑀧𑀯𑀸𑀭𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀬𑀸𑀯 𑀲𑀼𑀪𑀓𑀺𑀡𑁆𑀳𑀸 𑀯𑀸𑀢𑁂𑀦 𑀯𑀺𑀦𑀲𑁆𑀲𑀢𑀺 𑀏𑀯𑀁 𑀘𑀢𑀼𑀲𑀝𑁆𑀞𑀺 𑀧𑀭𑀺𑀧𑀼𑀡𑁆𑀡𑀸 𑀳𑁄𑀢𑀻𑀢𑀺 𑀲𑀘𑁆𑀘𑀁 ¶ , 𑀳𑁂𑀝𑁆𑀞𑀸𑀯𑀺𑀯𑀝𑁆𑀝𑀝𑁆𑀞𑀸𑀬𑀻 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀯𑀲𑁂𑀦 𑀏𑀓𑁄 𑀲𑀢𑁆𑀢 𑀫𑀳𑀸𑀓𑀧𑁆𑀧𑀸𑀦𑀺 𑀘𑀸𑀢𑀺 𑀅𑀝𑁆𑀞 𑀓𑀧𑁆𑀧𑀸𑀦𑀺 𑀆𑀪𑀲𑁆𑀲𑀭𑀩𑁆𑀭𑀳𑁆𑀫𑀽𑀦𑀁 𑀆𑀬𑀼𑀧𑁆𑀧𑀫𑀸𑀡𑀁 𑀳𑁄𑀢𑀺. 𑀘𑀢𑀼𑀲𑀝𑁆𑀞𑀺𑀓𑀧𑁆𑀧𑁂𑀲𑀼𑀧𑀺 𑀯𑀺𑀯𑀝𑁆𑀝𑀝𑁆𑀞𑀸𑀬𑀻𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀯𑀲𑁂𑀦 𑀏𑀓𑁄 𑀢𑁂 𑀲𑀝𑁆𑀞𑀺𑀫𑀳𑀸𑀓𑀧𑁆𑀧𑀸𑀦𑀺 𑀘𑀸𑀢𑀺 𑀘𑀢𑀼𑀲𑀝𑁆𑀞𑀺𑀓𑀧𑁆𑀧𑀸𑀦𑀺 𑀲𑀼𑀪𑀓𑀺𑀡𑁆𑀳𑀸𑀦𑀁 𑀩𑁆𑀭𑀳𑁆𑀫𑀽𑀦𑀁 𑀆𑀬𑀼𑀧𑁆𑀧𑀫𑀸𑀡𑀁 𑀳𑁄𑀢𑀺 𑀢𑁂𑀦 𑀯𑀼𑀢𑁆𑀢𑀁 𑀧𑁄𑀭𑀸𑀡𑁂𑀳𑀺.

𑀲𑀢𑁆𑀢 𑀲𑀢𑁆𑀢’𑀕𑁆𑀕𑀺𑀦𑀸 𑀯𑀸𑀭𑀸, 𑀅𑀝𑁆𑀞𑀫𑁂 𑀅𑀝𑁆𑀞𑀫𑁂 𑀤𑀓𑀸;

𑀘𑀢𑀼𑀲𑀝𑁆𑀞𑀺 𑀬𑀤𑀸 𑀧𑀼𑀡𑁆𑀡𑀸, 𑀏𑀓𑁄 𑀯𑀸𑀬𑀼𑀯𑀭𑁄 𑀲𑀺𑀬𑀸’𑀢𑀺.

𑀓𑁂𑀘𑀺 𑀧𑀦.

‘‘𑀅𑀕𑁆𑀕𑀺𑀦𑀸’𑀪𑀲𑁆𑀲𑀭𑀸 𑀳𑁂𑀝𑁆𑀞𑀸, 𑀆𑀧𑁂𑀦 𑀲𑀼𑀪𑀓𑀺𑀡𑁆𑀳𑀢𑁄;

𑀯𑁂𑀳𑀧𑁆𑀨𑀮𑀢𑁄 𑀯𑀸𑀢𑁂𑀦, 𑀏𑀯𑀁 𑀮𑁄𑀓𑁄 𑀯𑀺𑀦𑀲𑁆𑀲𑀢𑀻’’𑀢𑀺.

𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 ‘‘𑀆𑀪𑀲𑁆𑀲𑀭𑀸𑀢𑀺’’𑀘 ‘‘𑀲𑀼𑀪𑀓𑀺𑀡𑁆𑀳𑀢𑁄’’𑀢𑀺 𑀘 ‘‘𑀯𑁂𑀳𑀧𑁆𑀨𑀮𑀢𑁄’’𑀢𑀺 𑀘 𑀅𑀪𑀺𑀯𑀺𑀥𑀺𑀯𑀲𑁂𑀦 𑀯𑀼𑀢𑁆𑀢𑀪𑀸𑀯𑀜𑁆𑀘 𑀲𑀫𑀢𑀮𑀪𑀸𑀯𑁂𑀧𑀺 𑀲𑁂𑀝𑁆𑀞𑀪𑀽𑀫𑀺𑀢𑁆𑀢𑀸 𑀧𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀪𑀸𑀯𑀜𑁆𑀘 𑀅𑀫𑀜𑁆𑀜𑀺𑀢𑁆𑀯𑀸 𑀲𑀼𑀤𑁆𑀥𑀸𑀯𑀸𑀲𑀪𑀽𑀫𑀻𑀲𑀼 𑀯𑀺𑀬 𑀉𑀧𑀭𑀽𑀧𑀭𑀺𑀯𑀲𑁂𑀦 𑀪𑀽𑀫𑀺𑀓𑁆𑀓𑀫𑁄𑀢𑀺 𑀫𑀜𑁆𑀜𑀺𑀢𑁆𑀯𑀸.

‘‘𑀧𑀜𑁆𑀘𑀪𑀽𑀫𑀺 𑀦𑀝𑁆𑀞𑀸 𑀅𑀕𑁆𑀕𑀺, 𑀅𑀝𑁆𑀞 𑀪𑀽𑀫𑀺 𑀦𑀝𑁆𑀞𑀸 𑀤𑀓𑀸;

𑀦𑀯𑀪𑀽𑀫𑀺 𑀦𑀝𑁆𑀞𑀸 𑀯𑀸𑀢𑀸, 𑀮𑁄𑀓𑀦𑀝𑁆𑀞𑀸 𑀢𑀤𑀸 𑀲𑀺𑀬𑀼𑀁.

𑀧𑀞𑀫𑁂 𑀅𑀕𑁆𑀕𑀺 𑀤𑁆𑀯𑀢𑁆𑀢𑀺𑀁𑀲, 𑀤𑀼𑀢𑀺𑀬𑁂 𑀆𑀤𑀺 𑀲𑁄𑀴𑀲;

𑀤𑀼𑀢𑀺𑀬𑀪𑀽𑀫𑁂 𑀫𑀚𑁆𑀛𑁂 𑀅𑀝𑁆𑀞𑀫𑀁, 𑀢𑀁 𑀙𑀧𑁆𑀧𑀜𑁆𑀜𑀸𑀲 𑀯𑀸𑀭𑀓𑀁.

𑀆𑀪𑀲𑁆𑀲𑀭𑀫𑁆𑀳𑀺 𑀘𑀢𑀼𑀢𑁆𑀣𑀁, 𑀧𑀭𑀺𑀢𑁆𑀢𑀲𑀼𑀪𑀫𑁆𑀳𑀺 𑀤𑁆𑀯𑁂 𑀚𑀮𑀁;

𑀅𑀧𑁆𑀧𑀫𑀸𑀡𑀲𑀼𑀪𑀁 𑀏𑀓𑀯𑀸𑀭𑀁, 𑀫𑀢𑀁 𑀉𑀤𑀓𑀲𑀢𑁆𑀢𑀫’’𑀦𑁆𑀢𑀺.

𑀯𑀤𑀦𑁆𑀢𑀺 𑀢𑁂𑀲𑀁 𑀯𑀸𑀤𑁂 𑀆𑀪𑀲𑁆𑀲𑀭𑀢𑁄 𑀳𑁂𑀝𑁆𑀞𑀸 𑀧𑀜𑁆𑀘𑀪𑀽𑀫𑀺 𑀅𑀕𑁆𑀕𑀺𑀦𑀝𑁆𑀞𑀸, 𑀲𑀼𑀪𑀓𑀺𑀡𑁆𑀳𑀢𑁄 𑀳𑁂𑀝𑁆𑀞𑀸 𑀅𑀝𑁆𑀞𑀪𑀽𑀫𑀺 𑀉𑀤𑀓𑀦𑀝𑁆𑀞𑀸𑀢𑀺 𑀯𑀤𑀦𑁆𑀢𑀺. 𑀲𑀫𑀢𑀮𑀤𑀻𑀧𑀦𑀢𑁆𑀣𑀁 𑀲𑀦𑁆𑀤𑁂𑀳𑀘𑁆𑀙𑁂𑀤𑀦𑀢𑁆𑀣𑀁 𑀏𑀯𑀁 𑀕𑀳𑀺𑀢𑀸𑀢𑀺 𑀏𑀓𑀪𑀯𑀧𑀭𑀺𑀬𑁄𑀲𑀸𑀦𑀁 𑀲𑀦𑁆𑀥𑀸𑀬 𑀧𑀝𑀺𑀲𑀦𑁆𑀥𑀺𑀪𑀯𑀜𑁆𑀘𑀸𑀢𑀺 𑀆𑀤𑀺 𑀯𑀼𑀢𑁆𑀢𑀦𑁆𑀢𑀺. 𑀇𑀫𑀺𑀲𑁆𑀲𑀸𑀧𑀺 𑀅𑀢𑁆𑀣𑀁 𑀤𑀼𑀕𑁆𑀕𑀳𑀺𑀢𑁂𑀦 𑀕𑀳𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀯𑀲𑁂𑀦 𑀲𑀤𑀺𑀲𑀪𑀸𑀯𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀧𑀭𑀺𑀓𑀧𑁆𑀧𑁂𑀦𑁆𑀢𑀺 𑀲𑁄 𑀅𑀬𑀼𑀢𑁆𑀢𑀭𑀽𑀧𑁄 𑀯𑀺𑀬 𑀤𑀺𑀲𑁆𑀲𑀢𑀺 𑀅𑀢𑀺𑀯𑀺𑀬 𑀫𑀺𑀘𑁆𑀙𑀸𑀕𑀸𑀳𑁄 𑀘 𑀳𑁄𑀢𑀺 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀤𑀻𑀳𑀺 𑀯𑀺𑀭𑀼𑀚𑁆𑀛𑀦𑀢𑁄 𑀲𑀁𑀯𑀝𑁆𑀝𑀲𑀻𑀫𑀸𑀧𑀺 𑀯𑀺𑀭𑀼𑀤𑁆𑀥𑀸 𑀢𑀢𑁆𑀣 𑀧𑀞𑀫𑀚𑁆𑀛𑀸𑀦𑀢𑀮𑀁 𑀉𑀧𑀸𑀤𑀸𑀬 𑀅𑀕𑁆𑀕𑀺𑀦𑀸, 𑀤𑀼𑀢𑀺𑀬𑀚𑁆𑀛𑀸𑀦𑀢𑀮𑀁 𑀉𑀧𑀸𑀤𑀸𑀬 𑀉𑀤𑀓𑁂𑀦, 𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑀮𑀁 𑀉𑀧𑀸𑀤𑀸𑀬 𑀯𑀸𑀢𑁂𑀦 𑀯𑀺𑀦𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀯𑀘𑀦𑁂𑀦𑀸𑀧𑀺 𑀯𑀺𑀭𑀼𑀚𑁆𑀛𑀢𑁂𑀯 𑀢𑀲𑁆𑀫𑀸 ¶ ‘‘𑀆𑀪𑀲𑁆𑀲𑀭𑀸’’𑀢𑀺 𑀘 ‘‘𑀲𑀼𑀪𑀓𑀺𑀡𑁆𑀳𑀢𑁄’’𑀢𑀺 𑀘 ‘‘𑀯𑁂𑀳𑀧𑁆𑀨𑀮𑀢𑁄’’𑀢𑀺 𑀘 𑀏𑀢𑁆𑀣𑀸𑀪𑀺𑀯𑀺𑀥𑀺𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀜𑁆𑀜𑀣𑀸 ‘‘𑀉𑀧𑀭𑀺 𑀧𑀩𑁆𑀩𑀢𑀸 𑀤𑁂𑀯𑁄 𑀯𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀯𑀺𑀬 𑀆𑀪𑀲𑁆𑀲𑀭𑀲𑀼𑀪𑀓𑀺𑀡𑁆𑀳𑀯𑁂𑀳𑀧𑁆𑀨𑀮𑀸𑀦𑀁 𑀢𑁂𑀦 𑀢𑁂𑀦 𑀲𑀁𑀯𑀝𑁆𑀝𑁂𑀦 𑀯𑀺𑀦𑀸𑀲𑁄𑀧𑀺 𑀦 𑀪𑀯𑁂𑀬𑁆𑀬. 𑀅𑀬𑀁 𑀮𑁄𑀓𑀯𑀺𑀧𑀢𑁆𑀢𑀺𑀧𑀭𑀺𑀘𑁆𑀙𑁂𑀤𑁄. 𑀏𑀯𑀁 𑀩𑀼𑀤𑁆𑀥𑁄 𑀘 𑀤𑀼𑀮𑁆𑀮𑀪𑁄 𑀮𑁄𑀓𑁂 𑀢𑀺 𑀇𑀫𑀲𑁆𑀲 𑀅𑀢𑁆𑀣𑁄 𑀯𑀼𑀢𑁆𑀢𑁄𑀬𑁂𑀯.

𑀇𑀢𑀺 𑀲𑀸𑀕𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑀯𑀺𑀭𑀘𑀺𑀢𑁂 𑀲𑀻𑀫𑀯𑀺𑀲𑁄𑀥𑀦𑁂

𑀓𑀧𑁆𑀧𑀯𑀺𑀦𑀸𑀲𑀓𑀡𑁆𑀟𑁄 𑀤𑀼𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.

𑁩. 𑀦𑀺𑀩𑁆𑀩𑀸𑀦𑀓𑀡𑁆𑀟𑁄

𑀇𑀤𑀸𑀦𑀺 ‘‘𑀲𑀤𑁆𑀥𑀫𑁆𑀫𑀲𑀯𑀦𑀫𑁆𑀧𑀺 𑀘𑀸𑀢𑀺 𑀇𑀫𑀲𑁆𑀲 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄 𑀲𑀫𑁆𑀧𑀢𑁆𑀢𑁄 𑀢𑀢𑁆𑀣 𑀲𑀤𑁆𑀥𑀫𑁆𑀫𑀲𑀯𑀦𑀫𑁆𑀧𑀺 𑀘 𑀮𑁄𑀓𑁂 𑀤𑀼𑀮𑁆𑀮𑀪𑀫𑁂𑀯 𑀢𑀣𑀸 𑀳𑀺 𑀲𑀤𑁆𑀥𑀫𑁆𑀫𑁄 𑀦𑀸𑀫 𑀢𑀺𑀯𑀺𑀥𑁄 𑀳𑁄𑀢𑀺. 𑀧𑀭𑀺𑀬𑀢𑁆𑀢𑀺𑀲𑀤𑁆𑀥𑀫𑁆𑀫𑁄, 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑁄, 𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑁄𑀢𑀺. 𑀢𑀢𑁆𑀣 𑀧𑀭𑀺𑀬𑀢𑁆𑀢𑀺𑀲𑀤𑁆𑀥𑀫𑁆𑀫𑁄 𑀦𑀸𑀫 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁. 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑁄 𑀦𑀸𑀫 𑀢𑁂𑀭𑀲𑀥𑀼𑀢𑀗𑁆𑀕𑀸𑀦𑀺 𑀅𑀲𑀻𑀢𑀺 𑀔𑀦𑁆𑀥𑀓𑀯𑀢𑁆𑀢𑀸𑀤𑀬𑁄 𑀅𑀪𑀺𑀲𑀫𑀸𑀘𑀸𑀭𑀯𑀢𑁆𑀢𑀸𑀤𑀻𑀦𑀺. 𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑁄 𑀦𑀸𑀫 𑀘𑀢𑀼𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄. 𑀢𑁂𑀲𑀼 𑀧𑀭𑀺𑀬𑀢𑁆𑀢𑀺𑀲𑀤𑁆𑀥𑀫𑁆𑀫𑁄 𑀤𑁆𑀯𑀺𑀦𑁆𑀦𑀁 𑀲𑀤𑁆𑀥𑀫𑁆𑀫𑀸𑀦𑀁 𑀧𑀼𑀩𑁆𑀩𑀗𑁆𑀕𑀫𑁄𑀬𑁂𑀯 𑀧𑀤𑀝𑁆𑀞𑀸𑀦𑀜𑁆𑀘. 𑀓𑀲𑁆𑀫𑀸 𑀢𑀁𑀫𑀽𑀮𑀓𑀢𑁆𑀢𑀸 𑀢𑀣𑀸 𑀳𑀺 𑀧𑀭𑀺𑀬𑀢𑁆𑀢𑀺𑀬𑀸 𑀅𑀲𑀢𑀺 𑀧𑀝𑀺𑀯𑁂𑀥𑁄 𑀦𑀸𑀫 𑀦𑀢𑁆𑀣𑀺. 𑀧𑀭𑀺𑀬𑀢𑁆𑀢𑀺𑀬𑀸 𑀅𑀦𑁆𑀢𑀭𑀳𑀺𑀢𑀸𑀬 𑀧𑀝𑀺𑀧𑀢𑁆𑀢𑀺, 𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑁆𑀢𑀭𑀳𑀺𑀢𑀸𑀬 𑀅𑀥𑀺𑀕𑀫𑁄 𑀅𑀦𑁆𑀢𑀭𑀥𑀸𑀬𑀢𑀺. 𑀓𑀺𑀁 𑀓𑀸𑀭𑀡𑀸 𑀅𑀬𑀜𑁆𑀳𑀺 𑀧𑀭𑀺𑀬𑀢𑁆𑀢𑀺 𑀧𑀝𑀺𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀧𑀝𑀺𑀧𑀢𑁆𑀢𑀺𑀅𑀥𑀺𑀕𑀫𑀲𑁆𑀲𑀸𑀧𑀺 𑀧𑀭𑀺𑀬𑀢𑁆𑀢𑀺𑀬𑁂𑀯 𑀧𑀫𑀸𑀡𑀁. 𑀢𑀢𑁆𑀣 𑀧𑀝𑀺𑀯𑁂𑀥𑁄 𑀘 𑀧𑀝𑀺𑀧𑀢𑁆𑀢𑀺 𑀘 𑀳𑁄𑀢𑀺𑀧𑀺 𑀦𑀳𑁄𑀢𑀺𑀧𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀧𑀝𑀺𑀯𑁂𑀥𑀥𑀭𑀸 𑀪𑀺𑀓𑁆𑀔𑀽 𑀩𑀳𑀽 𑀳𑁄𑀦𑁆𑀢𑀺, ‘‘𑀏𑀲 𑀪𑀺𑀓𑁆𑀔𑀼 𑀧𑀼𑀣𑀼𑀚𑁆𑀚𑀦𑁄’’𑀢𑀺 𑀅𑀗𑁆𑀕𑀼𑀮𑀺𑀁 𑀧𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑁄 𑀳𑁄𑀢𑀺. 𑀇𑀫𑀲𑁆𑀫𑀺𑀁 𑀬𑁂𑀯 𑀤𑀻𑀧𑁂 𑀏𑀓𑀯𑀸𑀭𑀁 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀼𑀦𑀸𑀫 𑀦𑀸𑀳𑁄𑀲𑀺. 𑀧𑀝𑀺𑀧𑀢𑁆𑀢𑀺𑀧𑀽𑀭𑀓𑀸𑀧𑀺 𑀓𑀤𑀸𑀘𑀺 𑀩𑀳𑀽 𑀳𑁄𑀦𑁆𑀢𑀺 𑀓𑀤𑀸𑀘𑀺 𑀅𑀧𑁆𑀧𑀸. 𑀇𑀢𑀺 𑀧𑀝𑀺𑀯𑁂𑀥𑁄 𑀘 𑀧𑀝𑀺𑀧𑀢𑁆𑀢𑀺 𑀘 𑀳𑁄𑀢𑀺𑀧𑀺 𑀦 𑀳𑁄𑀢𑀺𑀧𑀺. 𑀲𑀸𑀲𑀦𑀲𑁆𑀲 𑀞𑀺𑀢𑀺𑀬𑀸 𑀧𑀦 𑀧𑀭𑀺𑀬𑀢𑁆𑀢𑀺𑀬𑁂𑀯 𑀧𑀫𑀸𑀡𑀁 𑀧𑀡𑁆𑀟𑀺𑀢𑁄 𑀳𑀺 𑀢𑁂𑀧𑀺𑀝𑀓𑀁 𑀲𑀼𑀢𑁆𑀯𑀸 𑀤𑁆𑀯𑁂𑀧𑀺 𑀧𑀽𑀭𑁂𑀢𑀺, 𑀬𑀣𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀆𑀴𑀸𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀜𑁆𑀘 𑀅𑀪𑀺𑀜𑁆𑀜𑀸 𑀲𑀢𑁆𑀢 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦 𑀲𑀫𑀸𑀧𑀢𑁆𑀢𑀺𑀬𑀸 𑀧𑀭𑀺𑀓𑀫𑁆𑀫𑀁 𑀧𑀼𑀘𑁆𑀙𑀺. 𑀲𑁄 ‘‘𑀦 𑀚𑀸𑀦𑀸𑀫𑀻’’𑀢𑀺 𑀆𑀳. 𑀢𑀢𑁄 𑀉𑀤𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀥𑀺𑀕𑀢𑀯𑀺𑀲𑁂𑀲𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑁆𑀲 𑀧𑀭𑀺𑀓𑀫𑁆𑀫𑀁 𑀧𑀼𑀘𑁆𑀙𑀺. 𑀲𑁄 𑀆𑀘𑀺𑀓𑁆𑀔𑀺, 𑀢𑀲𑁆𑀲 𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯 𑀫𑀳𑀸𑀲𑀢𑁆𑀢𑁄 𑀢𑀁 ¶ 𑀲𑀫𑁆𑀧𑀸𑀤𑁂𑀲𑀺 𑀏𑀯𑀫𑁂𑀯 𑀧𑀜𑁆𑀜𑀯𑀸 𑀪𑀺𑀓𑁆𑀔𑀼 𑀧𑀭𑀺𑀬𑀢𑁆𑀢𑀺𑀁 𑀲𑀼𑀢𑁆𑀯𑀸 𑀤𑁆𑀯𑁂𑀧𑀺 𑀧𑀽𑀭𑁂𑀢𑀺 𑀢𑀲𑁆𑀫𑀸 𑀧𑀭𑀺𑀬𑀢𑁆𑀢𑀺𑀬𑀸 𑀞𑀺𑀢𑀸𑀬 𑀲𑀸𑀲𑀦𑀁 𑀞𑀺𑀢𑀁 𑀳𑁄𑀢𑀺 𑀬𑀣𑀸 𑀫𑀳𑀸𑀢𑀴𑀸𑀓𑀲𑁆𑀲 𑀧𑀸𑀴𑀺𑀬𑀸 𑀣𑀺𑀭𑀸𑀬 𑀉𑀤𑀓𑀁 𑀦 𑀞𑀲𑁆𑀲𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀉𑀤𑀓𑁂 𑀲𑀢𑀺 𑀧𑀤𑀼𑀫𑀸𑀤𑀻𑀦𑀺 𑀧𑀼𑀧𑁆𑀨𑀸𑀦𑀺 𑀦 𑀧𑀼𑀧𑁆𑀨𑀺𑀲𑁆𑀲𑀦𑁆𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀏𑀯𑀫𑁂𑀯 𑀫𑀳𑀸𑀢𑀴𑀸𑀓𑀲𑁆𑀲 𑀣𑀺𑀭𑀧𑀸𑀴𑀺𑀲𑀤𑀺𑀲𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀲𑀢𑀺 𑀫𑀳𑀸𑀢𑀴𑀸𑀓𑁂 𑀉𑀤𑀓𑀲𑀤𑀺𑀲𑀸 𑀧𑀝𑀺𑀧𑀢𑁆𑀢𑀺𑀧𑀽𑀭𑀓𑀸 𑀓𑀼𑀮𑀧𑀼𑀢𑁆𑀢𑀸 𑀦𑀢𑁆𑀣𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀢𑁂𑀲𑀼 𑀲𑀢𑀺 𑀫𑀳𑀸𑀢𑀴𑀸𑀓𑁂𑀲𑀼 𑀧𑀤𑀼𑀫𑀸𑀤𑀻𑀦𑀺 𑀧𑀼𑀧𑁆𑀨𑀸𑀦𑀺 𑀯𑀺𑀬 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀅𑀭𑀺𑀬𑀧𑀼𑀕𑁆𑀕𑀮𑀸 𑀦𑀢𑁆𑀣𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀏𑀓𑀦𑁆𑀢𑀢𑁄 𑀧𑀭𑀺𑀬𑀢𑁆𑀢𑀺𑀬𑁂𑀯 𑀧𑀫𑀸𑀡𑀁 𑀧𑀭𑀺𑀬𑀢𑁆𑀢𑀺𑀬𑀸 𑀅𑀦𑁆𑀢𑀭𑀳𑀺𑀢𑀸𑀬 𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀸𑀦𑀁 𑀅𑀦𑁆𑀢𑀭𑀥𑀸𑀦𑀢𑁄. 𑀢𑀢𑁆𑀣 𑀧𑀭𑀺𑀬𑀢𑁆𑀢𑀺𑀦𑀸𑀫 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀲𑀸𑀝𑁆𑀞𑀓𑀣𑀸 𑀧𑀸𑀴𑀺𑀬𑀸𑀯 𑀲𑀸 𑀢𑀺𑀝𑁆𑀞𑀢𑀺, 𑀢𑀸𑀯 𑀧𑀭𑀺𑀬𑀢𑁆𑀢𑀺 𑀧𑀭𑀺𑀧𑀼𑀡𑁆𑀡𑀸 𑀳𑁄𑀢𑀺. 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀓𑀮𑀺𑀬𑀼𑀕𑀭𑀸𑀚𑀸𑀦𑁄 𑀅𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺 𑀢𑁂𑀲𑀼 𑀅𑀥𑀫𑁆𑀫𑀺𑀓𑁂𑀲𑀼 𑀭𑀸𑀚𑀸𑀫𑀘𑁆𑀘𑀸𑀤𑀬𑁄 𑀅𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺 𑀢𑀣𑀸 𑀭𑀝𑁆𑀞𑀚𑀦𑀧𑀤𑀯𑀸𑀲𑀺𑀦𑁄𑀧𑀺 𑀅𑀥𑀫𑁆𑀫𑀺𑀓𑀸 𑀏𑀢𑁂𑀲𑀁 𑀅𑀥𑀫𑁆𑀫𑀺𑀓𑀢𑀸𑀬 𑀦 𑀤𑁂𑀯𑁄 𑀲𑀫𑁆𑀫𑀸 𑀯𑀲𑁆𑀲𑀢𑀺, 𑀢𑀢𑁄 𑀲𑀲𑁆𑀲𑀸𑀦𑀺 𑀦 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀢𑁂𑀲𑀼 𑀲𑀫𑁆𑀧𑀚𑁆𑀚𑀦𑁆𑀢𑁂𑀲𑀼 𑀧𑀘𑁆𑀘𑀬𑀤𑀸𑀬𑀓𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀘𑁆𑀘𑀬𑁂 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀪𑀺𑀓𑁆𑀔𑀽 𑀧𑀘𑁆𑀘𑀬𑁂𑀳𑀺 𑀓𑀺𑀮𑀫𑀦𑁆𑀢𑀸 𑀅𑀦𑁆𑀢𑁂𑀯𑀸𑀲𑀺𑀓𑁂 𑀲𑀗𑁆𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀧𑀭𑀺𑀬𑀢𑁆𑀢𑀺 𑀧𑀭𑀺𑀳𑀸𑀬𑀢𑀺, 𑀅𑀢𑁆𑀣𑀯𑀲𑁂𑀦 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀧𑀸𑀴𑀺𑀯𑀲𑁂𑀦𑁂𑀯 𑀥𑀸𑀭𑁂𑀦𑁆𑀢𑀺. 𑀢𑀢𑁄 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀧𑀸𑀴𑀺𑀫𑁆𑀧𑀺 𑀲𑀓𑀮𑀁 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺 𑀧𑀞𑀫𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀧𑀭𑀺𑀳𑀸𑀬𑀢𑀺. 𑀧𑀭𑀺𑀳𑀸𑀬𑀫𑀸𑀦𑀁 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀧𑀭𑀺𑀬𑀢𑁆𑀢𑀺 𑀳𑀸𑀬𑀢𑀺 𑀧𑀞𑀫𑀜𑁆𑀳𑀺 𑀫𑀳𑀸𑀧𑀓𑀭𑀡𑀁 𑀧𑀭𑀺𑀳𑀸𑀬𑀢𑀺. 𑀢𑀲𑁆𑀫𑀺𑀁 𑀧𑀭𑀺𑀳𑀸𑀬𑀫𑀸𑀦𑁂 𑀬𑀫𑀓𑀁, 𑀓𑀣𑀸𑀯𑀢𑁆𑀣𑀼, 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺, 𑀥𑀸𑀢𑀼𑀓𑀣𑀸, 𑀯𑀺𑀪𑀗𑁆𑀕𑁄, 𑀥𑀫𑁆𑀫𑀲𑀗𑁆𑀕𑀳𑁄𑀢𑀺 𑀏𑀯𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀧𑀭𑀺𑀳𑀻𑀦𑁂 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀧𑀭𑀺𑀳𑀸𑀬𑀢𑀺. 𑀧𑀞𑀫𑀜𑁆𑀳𑀺 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄 𑀧𑀭𑀺𑀳𑀸𑀬𑀢𑀺. 𑀢𑀲𑁆𑀫𑀺𑀫𑁆𑀧𑀺 𑀧𑀞𑀫𑀁 𑀏𑀓𑀸𑀤𑀲𑀦𑀺𑀧𑀸𑀢𑁄…𑀧𑁂… 𑀢𑀢𑁄 𑀏𑀓𑀦𑀺𑀧𑀸𑀢𑁄𑀢𑀺 𑀏𑀯𑀁 𑀅𑀗𑁆𑀕𑀼𑀢𑁆𑀢𑀭𑁂 𑀧𑀭𑀺𑀳𑀻𑀦𑁂 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄 𑀧𑀭𑀺𑀳𑀸𑀬𑀢𑀺, 𑀧𑀞𑀫𑀁 𑀫𑀳𑀸𑀯𑀕𑁆𑀕𑁄 𑀧𑀭𑀺𑀳𑀸𑀬𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑀴𑀸𑀬𑀢𑀦𑀯𑀕𑁆𑀕𑁄, 𑀔𑀦𑁆𑀥𑀯𑀕𑁆𑀕𑁄, 𑀦𑀺𑀤𑀸𑀦𑀯𑀕𑁆𑀕𑁄, 𑀲𑀕𑀸𑀣𑀸𑀯𑀕𑁆𑀕𑁄𑀢𑀺 𑀏𑀯𑀁 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂 𑀧𑀭𑀺𑀳𑀻𑀦𑁂 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀫𑀚𑁆𑀛𑀺𑀫𑀦𑀺𑀓𑀸𑀬𑁄 𑀧𑀭𑀺𑀳𑀸𑀬𑀢𑀺 𑀧𑀞𑀫𑀜𑁆𑀳𑀺 𑀉𑀧𑀭𑀺𑀧𑀡𑁆𑀡𑀸𑀲𑀓𑁄 𑀧𑀭𑀺𑀳𑀸𑀬𑀢𑀺. 𑀢𑀢𑁄 𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑀓𑁄, 𑀢𑀢𑁄 𑀫𑀽𑀮𑀧𑀡𑁆𑀡𑀸𑀲𑀓𑁄𑀢𑀺 𑀏𑀯𑀁 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀧𑀭𑀺𑀳𑀻𑀦𑁂 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀤𑀻𑀖𑀦𑀺𑀓𑀸𑀬𑁄 𑀧𑀭𑀺𑀳𑀸𑀬𑀢𑀺, 𑀧𑀞𑀫𑀜𑁆𑀳𑀺 𑀧𑀸𑀣𑀺𑀬𑀯𑀕𑁆𑀕𑁄 ¶ 𑀧𑀭𑀺𑀳𑀸𑀬𑀢𑀺 𑀢𑀢𑁄 𑀫𑀳𑀸𑀯𑀕𑁆𑀕𑁄, 𑀢𑀢𑁄 𑀔𑀦𑁆𑀥𑀓𑀯𑀕𑁆𑀕𑁄𑀢𑀺 𑀤𑀻𑀖𑀦𑀺𑀓𑀸𑀬𑁂 𑀧𑀭𑀺𑀳𑀻𑀦𑁂 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀧𑀭𑀺𑀳𑀻𑀦𑀁 𑀦𑀸𑀫 𑀳𑁄𑀢𑀺. 𑀯𑀺𑀦𑀬𑀧𑀺𑀝𑀓𑁂𑀦 𑀲𑀤𑁆𑀥𑀺𑀁 𑀚𑀸𑀢𑀓𑀫𑁂𑀯 𑀥𑀸𑀭𑁂𑀦𑁆𑀢𑀺. 𑀯𑀺𑀦𑀬𑀧𑀺𑀝𑀓𑀁 𑀮𑀚𑁆𑀚𑀺𑀦𑁄 𑀥𑀸𑀭𑁂𑀦𑁆𑀢𑀺. 𑀮𑀸𑀪𑀓𑀸𑀫𑀸 𑀧𑀦 𑀲𑀼𑀢𑁆𑀢𑀦𑁆𑀢𑁂 𑀓𑀣𑀺𑀢𑁂𑀧𑀺 𑀲𑀮𑁆𑀮𑀓𑁆𑀔𑁂𑀦𑁆𑀢𑀸 𑀦𑀢𑁆𑀣𑀻𑀢𑀺 𑀚𑀸𑀢𑀓𑀫𑁂𑀯 𑀥𑀸𑀭𑁂𑀦𑁆𑀢𑀺. 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀚𑀸𑀢𑀓𑀫𑁆𑀧𑀺 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀣 𑀦𑁂𑀲𑀁 𑀧𑀞𑀫𑀁 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑀁 𑀧𑀭𑀺𑀳𑀸𑀬𑀢𑀺. 𑀢𑀢𑁄 𑀧𑀝𑀺𑀮𑁄𑀫𑀓𑁆𑀓𑀫𑁂𑀦 𑀧𑀼𑀡𑁆𑀡𑀓𑀚𑀸𑀓𑀢𑀓𑀁, 𑀫𑀳𑀸𑀦𑀸𑀭𑀤𑀓𑀲𑁆𑀲𑀧𑀚𑀸𑀢𑀓𑀁 𑀧𑀭𑀺𑀳𑀸𑀬𑀢𑀺. 𑀯𑀺𑀦𑀬𑀧𑀺𑀝𑀓𑀫𑁂𑀯 𑀥𑀸𑀭𑁂𑀦𑁆𑀢𑀺. 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀢𑀫𑁆𑀧𑀺 𑀫𑀢𑁆𑀣𑀓𑀢𑁄 𑀧𑀭𑀺𑀳𑀸𑀬𑀢𑀺 𑀧𑀞𑀫𑀜𑁆𑀳𑀺 𑀧𑀭𑀺𑀯𑀸𑀭𑁄 𑀧𑀭𑀺𑀳𑀸𑀬𑀢𑀺, 𑀢𑀢𑁄 𑀔𑀦𑁆𑀥𑀓𑁄 𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑁄 𑀫𑀳𑀸𑀯𑀺𑀪𑀗𑁆𑀕𑁄𑀢𑀺 𑀅𑀦𑀼𑀓𑁆𑀓𑀫𑁂𑀦 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑀫𑀢𑁆𑀢𑀫𑁂𑀯 𑀥𑀸𑀭𑁂𑀦𑁆𑀢𑀺, 𑀢𑀤𑀸 𑀧𑀭𑀺𑀬𑀢𑁆𑀢𑀺 𑀅𑀦𑀦𑁆𑀢𑀭𑀳𑀺𑀢𑀸𑀯 𑀳𑁄𑀢𑀺. 𑀬𑀸𑀯 𑀧𑀦 𑀫𑀦𑀼𑀲𑁆𑀲𑁂𑀲𑀼 𑀘𑀢𑀼𑀧𑁆𑀧𑀤𑀺𑀓𑀕𑀸𑀣𑀸𑀧𑀺 𑀧𑀯𑀢𑁆𑀢𑀢𑀺, 𑀢𑀸𑀯 𑀧𑀭𑀺𑀬𑀢𑁆𑀢𑀺 𑀅𑀦𑀦𑁆𑀢𑀭𑀳𑀺𑀢𑀸𑀯 𑀳𑁄𑀢𑀺. 𑀬𑀤𑀸 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀭𑀸𑀚𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀲𑀼𑀯𑀡𑁆𑀡𑀘𑀗𑁆𑀓𑁄𑀝𑀓𑀫𑁆𑀳𑀺 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀞𑀧𑀸𑀧𑁂𑀢𑁆𑀯𑀸 ‘‘𑀩𑀼𑀤𑁆𑀥𑁂𑀳𑀺 𑀓𑀣𑀺𑀢𑀁 𑀘𑀢𑀼𑀧𑁆𑀧𑀤𑀺𑀓𑀁 𑀕𑀸𑀣𑀁 𑀚𑀸𑀦𑀦𑁆𑀢𑁄 𑀇𑀫𑀁 𑀲𑀳𑀲𑁆𑀲𑀁 𑀕𑀡𑁆𑀳𑀢𑀽’’𑀢𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀕𑀡𑁆𑀳𑀓𑀁 𑀅𑀮𑀪𑀺𑀢𑁆𑀯𑀸 𑀏𑀓𑀯𑀸𑀭𑀁 𑀘𑀭𑀸𑀧𑀺𑀢𑁂 𑀦 𑀲𑀼𑀡𑀦𑁆𑀢𑀸𑀧𑀺 𑀳𑁄𑀦𑁆𑀢𑀺 𑀅𑀲𑀼𑀡𑀦𑁆𑀢𑀸𑀧𑀺, 𑀬𑀸𑀯 𑀢𑀢𑀺𑀬𑀁 𑀘𑀭𑀸𑀧𑁂𑀢𑁆𑀯𑀸 𑀕𑀡𑁆𑀳𑀓𑀁 𑀅𑀮𑀪𑀺𑀢𑁆𑀯𑀸 𑀭𑀸𑀚𑀧𑀼𑀭𑀺𑀲𑀸 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀧𑀼𑀦 𑀭𑀸𑀚𑀓𑀼𑀮𑀁 𑀧𑀯𑁂𑀲𑁂𑀦𑁆𑀢𑀺, 𑀢𑀤𑀸 𑀧𑀭𑀺𑀬𑀢𑁆𑀢𑀺𑀅𑀦𑁆𑀢𑀭𑀳𑀺𑀢𑀸 𑀦𑀸𑀫 𑀳𑁄𑀢𑀺. 𑀏𑀯𑀁 𑀧𑀭𑀺𑀬𑀢𑁆𑀢𑀺𑀬𑀸 𑀅𑀦𑁆𑀢𑀭𑀳𑀺𑀢𑀸𑀬 𑀧𑀝𑀺𑀧𑀢𑁆𑀢𑀺𑀧𑀺 𑀧𑀝𑀺𑀯𑁂𑀥𑁄𑀧𑀺 𑀅𑀦𑁆𑀢𑀭𑀳𑀺𑀢𑁄𑀯 𑀳𑁄𑀢𑀺. 𑀲𑀤𑁆𑀥𑀫𑁆𑀫𑀲𑀯𑀦𑀲𑁆𑀲 𑀤𑀼𑀮𑁆𑀮𑀪𑀪𑀸𑀯𑁄 𑀥𑀫𑁆𑀫𑀲𑁄𑀡𑁆𑀟𑀓𑀯𑀢𑁆𑀣𑀼𑀦𑀸 𑀤𑀻𑀧𑁂𑀢𑀩𑁆𑀩𑁄 𑀅𑀫𑁆𑀳𑀸𑀓𑀁 𑀓𑀺𑀭 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀥𑀫𑁆𑀫𑀭𑀸𑀚𑀲𑁆𑀲 𑀲𑀸𑀲𑀦𑀦𑁆𑀢𑀭𑀥𑀸𑀦𑀢𑁄 𑀦𑀘𑀺𑀭𑁂𑀦𑁂𑀯 𑀓𑀸𑀮𑁂𑀦 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀧𑀼𑀢𑁆𑀢𑁄 𑀥𑀫𑁆𑀫𑀲𑁄𑀡𑁆𑀟𑀓𑀭𑀸𑀚𑀓𑀼𑀫𑀸𑀭𑁄 𑀳𑀼𑀢𑁆𑀯𑀸 𑀧𑀺𑀢𑀼𑀅𑀘𑁆𑀘𑀬𑁂𑀦 𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀬 𑀓𑀲𑁆𑀲𑀧𑀤𑀲𑀩𑀮𑁂𑀦 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀫𑀸𑀲𑀫𑀢𑁆𑀢𑀁 𑀭𑀚𑁆𑀚𑀁 𑀓𑀢𑁆𑀯𑀸 𑀅𑀫𑁆𑀳𑀸𑀓𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀇𑀫𑀲𑁆𑀫𑀺𑀁 𑀬𑁂𑀯 𑀪𑀤𑁆𑀤𑀓𑀧𑁆𑀧𑁂 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀤𑁂𑀯𑀦𑀕𑀭𑀲𑀤𑀺𑀲𑁂 𑀩𑀸𑀭𑀸𑀡𑀲𑀺𑀦𑀕𑀭𑁂 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀲𑀤𑀺𑀲𑀁 𑀭𑀚𑁆𑀚𑀁 𑀓𑀭𑁄𑀦𑁆𑀢𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺… ‘‘𑀫𑀬𑁆𑀳𑀁 𑀏𑀯𑀭𑀽𑀧𑀁 𑀭𑀚𑁆𑀚𑀁 𑀓𑀺𑀁 𑀯𑀺𑀮𑀸𑀲𑀁 𑀭𑀚𑁆𑀚𑀸𑀦𑀼𑀪𑀸𑀯𑀁 𑀲𑀤𑁆𑀥𑀫𑁆𑀫𑀯𑀺𑀬𑁄𑀕𑁂𑀦, 𑀤𑀺𑀯𑀸𑀓𑀭𑀯𑀺𑀭𑀳𑀺𑀢𑁄 𑀆𑀓𑀸𑀲𑁄 𑀯𑀺𑀬, 𑀲𑀲𑀗𑁆𑀓𑀯𑀺𑀭𑀳𑀺𑀢𑀭𑀢𑁆𑀢𑀺 𑀯𑀺𑀬, 𑀤𑀸𑀞𑀸𑀯𑀺𑀭𑀳𑀺𑀢𑀕𑀚𑁄 𑀯𑀺𑀬, 𑀯𑁂𑀮𑀦𑁆𑀢𑀯𑀺𑀭𑀳𑀺𑀢𑀫𑀳𑀸𑀲𑀫𑀼𑀤𑁆𑀤𑁄 𑀯𑀺𑀬 𑀘𑀓𑁆𑀔𑀼𑀯𑀺𑀭𑀳𑀺𑀢 𑀲𑀼𑀲𑀚𑁆𑀚𑀺𑀢𑀯𑀤𑀦𑀁 𑀯𑀺𑀬, 𑀲𑀼𑀕𑀦𑁆𑀥𑀯𑀺𑀭𑀳𑀺𑀢𑀧𑀸𑀭𑀺𑀙𑀢𑁆𑀢𑀧𑀼𑀧𑁆𑀨𑀁 𑀯𑀺𑀬, 𑀘𑀢𑀼𑀅𑀓𑁆𑀔𑀭𑀦𑀺𑀬𑀫𑀺𑀢𑀥𑀫𑁆𑀫𑀤𑁂𑀲𑀦𑀸𑀯𑀺𑀬𑁄𑀕𑁂𑀦 𑀫𑀬𑁆𑀳𑀁 𑀇𑀤𑀁 𑀭𑀚𑁆𑀚𑀁 𑀦 𑀲𑁄𑀪𑀢𑀻’’𑀢𑀺 ¶ 𑀘𑀺𑀦𑁆𑀢𑁂𑀢𑁆𑀯𑀸 𑀲𑀼𑀯𑀡𑁆𑀡𑀘𑀗𑁆𑀓𑁄𑀝𑀓𑁂𑀦 𑀲𑀳𑀲𑁆𑀲𑀢𑁆𑀣𑀯𑀺𑀓𑀁 𑀪𑀡𑁆𑀟𑀓𑀁 𑀲𑀼𑀲𑀚𑁆𑀚𑀺𑀢𑀁 𑀫𑀗𑁆𑀕𑀮𑀳𑀢𑁆𑀣𑀺𑀓𑀼𑀫𑁆𑀪𑁂 𑀞𑀧𑁂𑀢𑁆𑀯𑀸 𑀩𑀸𑀭𑀸𑀡𑀲𑀻𑀦𑀕𑀭𑁂 𑀫𑀳𑀸𑀯𑀻𑀣𑀺𑀬𑀁 𑀪𑁂𑀭𑀺𑀁 𑀘𑀭𑀸𑀧𑁂𑀢𑀺 ‘‘𑀏𑀓𑀧𑀤𑀺𑀓𑀁 𑀯𑀸 𑀤𑁆𑀯𑀺𑀧𑀤𑀺𑀓𑀁 𑀯𑀸 𑀢𑀺𑀧𑀤𑀺𑀓𑀁 𑀯𑀸 𑀘𑀢𑀼𑀧𑁆𑀧𑀤𑀺𑀓𑀁 𑀯𑀸 𑀥𑀫𑁆𑀫𑀧𑀤𑀁 𑀚𑀸𑀦𑀦𑁆𑀢𑀲𑁆𑀲 𑀤𑀫𑁆𑀫𑀻’’𑀢𑀺 𑀏𑀯𑀁 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀥𑀫𑁆𑀫𑀚𑀸𑀦𑀦𑀓𑀁 𑀅𑀮𑀪𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀤𑁆𑀯𑀺𑀲𑀳𑀲𑁆𑀲𑀁 𑀢𑀺𑀲𑀳𑀲𑁆𑀲𑀁 𑀬𑀸𑀯 𑀲𑀢𑀲𑀳𑀲𑁆𑀲𑀁 𑀓𑁄𑀝𑀺 𑀤𑁆𑀯𑁂 𑀲𑀳𑀲𑁆𑀲𑀓𑁄𑀝𑀺, 𑀲𑀢𑀲𑀳𑀲𑁆𑀲𑀓𑁄𑀝𑀺 𑀕𑀸𑀫𑀦𑀺𑀕𑀫𑀚𑀦𑀧𑀤𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀉𑀧𑀭𑀸𑀚𑀝𑁆𑀞𑀸𑀦𑀁. 𑀧𑀭𑀺𑀬𑁄𑀲𑀸𑀦𑁂 𑀥𑀫𑁆𑀫𑀤𑁂𑀲𑀓𑀁 𑀅𑀮𑀪𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀼𑀯𑀡𑁆𑀡𑀧𑀻𑀞𑀓𑀁 𑀲𑁂𑀢𑀘𑁆𑀙𑀢𑁆𑀢𑀁 𑀘𑀚𑀺𑀢𑁆𑀯𑀸𑀧𑀺 𑀥𑀫𑁆𑀫𑀤𑁂𑀲𑀓𑀁 𑀅𑀮𑀪𑀺𑀢𑁆𑀯𑀸 𑀭𑀚𑁆𑀚𑀲𑀺𑀭𑀺𑀁 𑀧𑀳𑀸𑀬 𑀅𑀢𑁆𑀢𑀸𑀦𑀁 𑀘𑀚𑀺𑀢𑁆𑀯𑀸 ‘‘𑀥𑀫𑁆𑀫𑀤𑁂𑀲𑀓𑀲𑁆𑀲 𑀤𑀸𑀲𑁄 𑀳𑀼𑀢𑁆𑀯𑀸𑀧𑀺 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀏𑀯𑀫𑁆𑀧𑀺 𑀥𑀫𑁆𑀫 𑀤𑁂𑀲𑀓𑀁 𑀅𑀮𑀪𑀺𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 ‘‘𑀓𑀺𑀁 𑀫𑁂 𑀲𑀤𑁆𑀥𑀫𑁆𑀫𑀯𑀺𑀬𑁄𑀕𑁂𑀦 𑀭𑀚𑁆𑀚𑁂𑀦𑀸𑀢𑀺 𑀅𑀫𑀘𑁆𑀘𑀸𑀦𑀁 𑀭𑀚𑁆𑀚𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀲𑀤𑁆𑀥𑀫𑁆𑀫𑀕𑀯𑁂𑀲𑀓𑁄 𑀳𑀼𑀢𑁆𑀯𑀸 𑀥𑀫𑁆𑀫𑀲𑁄𑀡𑁆𑀟𑀓𑀫𑀳𑀸𑀭𑀸𑀚𑀸 𑀫𑀳𑀸𑀯𑀦𑀁 𑀧𑀸𑀯𑀺𑀲𑀺 𑀥𑀫𑁆𑀫𑀲𑁄𑀡𑁆𑀟𑀓𑀫𑀳𑀸𑀭𑀸𑀚𑀲𑁆𑀲 𑀲𑀤𑁆𑀥𑀫𑁆𑀫𑀲𑀯𑀦𑀁 𑀲𑀦𑁆𑀥𑀸𑀬 𑀧𑀯𑀺𑀝𑁆𑀞𑀓𑁆𑀔𑀓𑁂 𑀲𑀓𑁆𑀓𑀤𑁂𑀯𑀫𑀳𑀸𑀭𑀸𑀚𑀲𑁆𑀲 𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑁄 𑀲𑀳𑁂𑀯 𑀓𑀺𑀡𑁆𑀡𑀺𑀓𑀸𑀬 𑀓𑀫𑁆𑀧𑁄 𑀅𑀳𑁄𑀲𑀺, 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀅𑀳𑁄𑀲𑀺. 𑀲𑀓𑁆𑀓𑁄𑀤𑁂𑀯𑀭𑀸𑀚𑀸 𑀓𑁂𑀦𑀓𑀸𑀭𑀡𑁂𑀦 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀉𑀡𑁆𑀳𑀸𑀓𑀸𑀭𑀁 𑀅𑀳𑁄𑀲𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀳𑀲𑁆𑀲𑀦𑁂𑀢𑁆𑀢𑁂𑀦 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀥𑀫𑁆𑀫𑀕𑀯𑁂𑀲𑀓𑁄 𑀳𑀼𑀢𑁆𑀯𑀸 𑀯𑀦𑀁 𑀧𑀯𑀺𑀝𑁆𑀞𑀁 𑀥𑀫𑁆𑀫𑀲𑁄𑀡𑁆𑀟𑀓𑀫𑀳𑀸𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺… ‘‘𑀅𑀚𑁆𑀚 𑀫𑁂 𑀅𑀢𑁆𑀢𑀸𑀦𑀫𑁆𑀧𑀺 𑀚𑀳𑀸𑀬 𑀭𑀓𑁆𑀔𑀲𑀯𑁂𑀲𑀁 𑀫𑀸𑀧𑁂𑀢𑁆𑀯𑀸 𑀏𑀢𑀁 𑀅𑀦𑀺𑀘𑁆𑀘𑀧𑀭𑀺𑀤𑀻𑀧𑀦𑀁 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀁 𑀲𑀓𑀮𑀲𑀭𑀻𑀭𑁂 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀏𑀢𑀁 𑀲𑀓𑀭𑀚𑁆𑀚𑁂𑀬𑁂𑀯 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀬𑀓𑁆𑀔𑀲𑀭𑀽𑀧𑀁 𑀫𑀸𑀧𑁂𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀪𑀺𑀫𑀼𑀔𑁄 𑀅𑀯𑀺𑀤𑀽𑀭𑁂 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀥𑀫𑁆𑀫𑀲𑁄𑀡𑁆𑀟𑀓𑀫𑀳𑀸𑀭𑀸𑀚𑀸 𑀏𑀯𑀁 𑀘𑀺𑀦𑁆𑀢𑁂𑀲𑀺… ‘‘𑀏𑀯𑀁𑀭𑀽𑀧𑁄 𑀦𑀸𑀫 𑀭𑀓𑁆𑀔𑀲𑁄 𑀥𑀫𑁆𑀫𑀁 𑀚𑀸𑀦𑁂𑀬𑁆𑀬𑀸’’𑀢𑀺, 𑀘𑀺𑀦𑁆𑀢𑁂𑀢𑁆𑀯𑀸 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀞𑀢𑁆𑀯𑀸 𑀧𑀼𑀘𑁆𑀙𑀸𑀫𑀻𑀢𑀺 𑀭𑀓𑁆𑀔𑀲𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀦𑁆𑀢𑁄 𑀆𑀳 ‘‘𑀲𑀸𑀫𑀺𑀧𑀼𑀜𑁆𑀜𑀤𑁂𑀯𑀭𑀸𑀚 𑀇𑀫𑀲𑁆𑀫𑀺𑀁 𑀧𑀦 𑀯𑀦𑀖𑀦𑁂 𑀯𑀲𑀦𑀓𑀤𑁂𑀯𑀭𑀸𑀚𑀸 𑀓𑀺𑀁 𑀦𑀼𑀔𑁄 𑀥𑀫𑁆𑀫𑀁 𑀚𑀸𑀦𑀸𑀲𑀻’’𑀢𑀺, 𑀤𑁂𑀯𑀢𑀸 ‘‘𑀫𑀳𑀸𑀭𑀸𑀚 𑀥𑀫𑁆𑀫𑀁 𑀚𑀸𑀦𑀸𑀫𑀻’’𑀢𑀺 𑀆𑀳. ‘‘𑀬𑀤𑀺 𑀥𑀫𑁆𑀫𑀁 𑀚𑀸𑀦𑀸𑀲𑀺, 𑀫𑀬𑁆𑀳𑀁 𑀥𑀫𑁆𑀫𑀓𑀣𑀁 𑀓𑀣𑁂𑀣𑀸’’𑀢𑀺 𑀆𑀳. ‘‘𑀅𑀳𑀁 𑀢𑀼𑀬𑁆𑀳𑀁 𑀥𑀫𑁆𑀫𑀁 𑀓𑀣𑁂𑀲𑁆𑀲𑀸𑀫𑀺, 𑀢𑁆𑀯𑀁 𑀫𑀬𑁆𑀳𑀁 𑀓𑀻𑀤𑀺𑀲𑀁 𑀥𑀫𑁆𑀫𑀓𑀣𑀺𑀓𑀲𑁆𑀲 𑀲𑀓𑁆𑀓𑀸𑀭𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀆𑀳. ‘‘𑀏𑀯𑀁 𑀲𑀦𑁆𑀢𑁂 𑀫𑀬𑁆𑀳𑀁 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀧𑀘𑁆𑀙𑀸 𑀫𑀬𑁆𑀳𑀁 𑀲𑀭𑀻𑀭𑁂 𑀫𑀁𑀲𑀁 𑀔𑀸𑀤𑀺𑀲𑁆𑀲𑀲𑀻’’𑀢𑀺 𑀆𑀳. ‘‘𑀅𑀳𑀁 𑀫𑀳𑀸𑀭𑀸𑀚 𑀙𑀸𑀢𑁄 𑀳𑀼𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀆𑀳. ‘‘𑀬𑀤𑀺 𑀢𑀼𑀫𑁆𑀳𑁂 ¶ 𑀧𑀞𑀫𑀁 𑀫𑀁𑀲𑀁 𑀔𑀸𑀤𑀣, 𑀥𑀫𑁆𑀫𑀁 𑀓𑁄 𑀲𑀼𑀡𑀺𑀲𑁆𑀲𑀢𑀻’’𑀢𑀺 𑀆𑀳. 𑀧𑀼𑀦 𑀲𑁄 𑀭𑀓𑁆𑀔𑀲𑁄 ‘‘𑀦𑀸𑀳𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀲𑀓𑁆𑀓𑁄𑀫𑀻’’𑀢𑀺. 𑀧𑀼𑀦 𑀭𑀸𑀚𑀸 ‘‘𑀫𑀬𑁆𑀳𑀁 𑀥𑀫𑁆𑀫𑀧𑀝𑀺𑀮𑀸𑀪𑀜𑁆𑀘 𑀢𑀼𑀫𑁆𑀳𑀸𑀓𑀁 𑀫𑀁𑀲𑀧𑀝𑀺𑀮𑀸𑀪𑀜𑁆𑀘 𑀢𑀼𑀫𑁆𑀳𑁂 𑀚𑀸𑀦𑀺𑀢𑁆𑀯𑀸 𑀫𑀬𑁆𑀳𑀁 𑀥𑀫𑁆𑀫𑀁 𑀤𑁂𑀲𑁂𑀣𑀸’’𑀢𑀺 𑀆𑀳. 𑀅𑀣 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 ‘‘𑀲𑀸𑀥𑀼 𑀳𑁄𑀣𑀸’’𑀢𑀺 𑀯𑀢𑁆𑀯𑀸 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀉𑀩𑁆𑀩𑁂𑀥𑁂𑀦 𑀢𑀺𑀕𑀸𑀯𑀼𑀢𑀫𑀢𑁆𑀢𑀁 𑀫𑀳𑀦𑁆𑀢𑀁 𑀅𑀜𑁆𑀚𑀦𑀧𑀩𑁆𑀩𑀢𑀁 𑀫𑀸𑀧𑁂𑀢𑁆𑀯𑀸 𑀏𑀯𑀫𑀸𑀳… ‘‘𑀲𑀘𑁂 𑀫𑀳𑀸𑀭𑀸𑀚 𑀇𑀫𑀁 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀁 𑀆𑀭𑀽𑀬𑁆𑀳 𑀆𑀓𑀸𑀲𑀸 𑀉𑀧𑁆𑀧𑀢𑀺𑀢𑁆𑀯𑀸 𑀢𑁆𑀯𑀁 𑀫𑀫 𑀫𑀼𑀔𑁂 𑀧𑀢𑀺𑀲𑁆𑀲𑀲𑀺, 𑀅𑀳𑀁 𑀢𑁂 𑀆𑀓𑀸𑀲𑀕𑀢𑀓𑀸𑀮𑁂 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀏𑀯𑀁 𑀲𑀦𑁆𑀢𑁂 𑀢𑀼𑀬𑁆𑀳𑀜𑁆𑀘 𑀥𑀫𑁆𑀫𑀧𑁆𑀧𑀮𑀸𑀪𑁄 𑀫𑀬𑁆𑀳𑀜𑁆𑀘 𑀫𑀁𑀲𑀧𑀝𑀺𑀮𑀸𑀪𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳. 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀥𑀫𑁆𑀫𑀲𑁄𑀡𑁆𑀟𑀓𑀫𑀳𑀸𑀭𑀸𑀚𑀸 ‘‘𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀧𑀼𑀭𑀺𑀲𑁄 𑀳𑀼𑀢𑁆𑀯𑀸 𑀅𑀥𑀫𑁆𑀫𑀲𑀫𑀗𑁆𑀕𑀻 𑀳𑀼𑀢𑁆𑀯𑀸 𑀅𑀥𑀫𑁆𑀫𑀲𑁆𑀲𑁂𑀯 𑀅𑀢𑁆𑀣𑀸𑀬 𑀧𑀸𑀡𑀸𑀢𑀺𑀧𑀸𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑁄 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄 𑀲𑀽𑀓𑀭𑀺𑀓𑁄 𑀑𑀭𑀩𑁆𑀪𑀺𑀓𑁄 𑀲𑀸𑀓𑀼𑀡𑀺 𑀓𑁄 𑀘𑁄𑀭𑁄 𑀧𑀭𑀤𑀸𑀭𑀺𑀓𑁄 𑀢𑀁 𑀕𑀳𑁂𑀢𑁆𑀯𑀸 𑀲𑀻𑀲𑀘𑁆𑀙𑀺𑀦𑁆𑀦𑀸𑀦𑀁 𑀮𑁄𑀳𑀺𑀢𑀁 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓𑀢𑁄𑀧𑀺 𑀩𑀳𑀼𑀢𑀭𑀁 𑀫𑀸𑀢𑀸𑀧𑀺𑀢𑀼𑀆𑀤𑀻𑀦𑀫𑁆𑀧𑀺 𑀫𑀦𑀸𑀧𑀸𑀦𑀁 𑀅𑀢𑁆𑀣𑀸𑀬 𑀭𑁄𑀤𑀦𑁆𑀢𑀸𑀦𑀁 𑀅𑀲𑁆𑀲𑀼 𑀘𑀢𑀽𑀲𑀼𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓𑀢𑁄𑀧𑀺 𑀩𑀳𑀼𑀢𑀭𑀁, 𑀇𑀫𑀁 𑀧𑀦 𑀲𑀭𑀻𑀭𑀁 𑀥𑀫𑁆𑀫𑀲𑁆𑀲 𑀅𑀢𑁆𑀣𑀸𑀬 𑀯𑀺𑀓𑁆𑀓𑀺𑀡𑀸𑀫𑀺 𑀢𑀁 𑀫𑀳𑀧𑁆𑀨𑀮𑀜𑁆𑀘 𑀫𑀦𑀸𑀧𑀜𑁆𑀘𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀲𑀸𑀥𑀼 𑀫𑀸𑀭𑀺𑀲 𑀏𑀯𑀁 𑀓𑀭𑁄𑀫𑀻’’𑀢𑀺 𑀧𑀩𑁆𑀩𑀢𑀁 𑀆𑀭𑀽𑀬𑁆𑀳 𑀧𑀩𑁆𑀩𑀢𑀕𑁆𑀕𑁂 𑀞𑀺𑀢𑁄 ‘‘𑀫𑀫 𑀭𑀚𑁆𑀚𑁂𑀦 𑀲𑀤𑁆𑀥𑀺𑀁 𑀫𑀬𑁆𑀳𑀁 𑀲𑀚𑀻𑀯𑀲𑀭𑀻𑀭𑀁 𑀲𑀤𑁆𑀥𑀫𑁆𑀫𑀲𑁆𑀲𑀢𑁆𑀣𑀸𑀬 𑀤𑀲𑁆𑀲𑀸𑀫𑀻’’𑀢𑀺 𑀲𑁄𑀫𑀦𑀲𑁆𑀲𑁄 𑀳𑀼𑀢𑁆𑀯𑀸 ‘‘𑀥𑀫𑁆𑀫𑀁 𑀓𑀣𑁂𑀣𑀸’’𑀢𑀺 𑀲𑀤𑁆𑀥𑀫𑁆𑀫𑀢𑁆𑀣𑀸𑀬 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀆𑀓𑀸𑀲𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀣𑀸𑀢𑀺 𑀆𑀳. 𑀅𑀣 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀲𑀓𑀢𑁆𑀢𑀪𑀸𑀯𑁂𑀦 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑁄 𑀅𑀢𑀺𑀯𑀺𑀬 𑀲𑁄𑀢𑀼𑀁 𑀲𑁄𑀫𑀦𑀲𑁆𑀲𑁄 𑀆𑀓𑀸𑀲𑀢𑁄 𑀧𑀢𑀦𑁆𑀢𑀁 𑀤𑀺𑀩𑁆𑀩𑀨𑀲𑁆𑀲𑁂𑀦 𑀧𑀭𑀸𑀫𑀲𑀦𑁆𑀢𑁄 𑀉𑀭𑁂𑀦 𑀧𑀝𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀤𑁂𑀯𑀮𑁄𑀓𑀁 𑀦𑁂𑀢𑁆𑀯𑀸 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀫𑀸𑀮𑀸𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀥𑀫𑁆𑀫𑀲𑁄𑀡𑁆𑀟𑀓𑀫𑀳𑀸𑀭𑀸𑀚𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳.

‘‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸, 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄’’𑀢𑀺.

𑀏𑀯𑀁 𑀲𑀓𑁆𑀓𑁄 𑀥𑀫𑁆𑀫𑀲𑁄𑀡𑁆𑀟𑀓𑀫𑀳𑀸𑀭𑀸𑀚𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀤𑁂𑀯𑀮𑁄𑀓𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀤𑁂𑀯𑀮𑁄𑀓𑀢𑁄 𑀆𑀦𑁂𑀢𑁆𑀯𑀸 𑀲𑀓𑀭𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀧𑁆𑀧𑀫𑀸𑀤𑁂𑀦 𑀑𑀯𑀤𑀺𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀅𑀕𑀫𑀸𑀲𑀺 𑀏𑀯𑀁 𑀲𑀤𑁆𑀥𑀫𑁆𑀫𑀲𑀯𑀦𑀲𑁆𑀲𑀸𑀧𑀺 𑀤𑀼𑀮𑁆𑀮𑀪𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀧𑀭𑀺𑀬𑀢𑁆𑀢𑀺𑀅𑀦𑁆𑀢𑀭𑀥𑀸𑀦𑁂𑀦 𑀧𑀝𑀺𑀧𑀢𑁆𑀢𑀺 𑀧𑀝𑀺𑀯𑁂𑀥𑀸𑀧𑀺 ¶ 𑀅𑀦𑁆𑀢𑀭𑀥𑀸𑀬𑀦𑁆𑀢𑀺. 𑀏𑀢𑁆𑀣 𑀘 𑀢𑀻𑀡𑀺 𑀧𑀭𑀺𑀦𑀺𑀩𑁆𑀩𑀸𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺 𑀓𑀢𑀫𑀸𑀦𑀺 𑀢𑀻𑀡𑀺 𑀧𑀭𑀺𑀦𑀺𑀩𑁆𑀩𑀸𑀦𑀸𑀦𑀺. 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀁, 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀁, 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺. 𑀢𑀢𑁆𑀣 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀁 𑀩𑁄𑀥𑀺𑀫𑀡𑁆𑀟𑁂𑀬𑁂𑀯 𑀳𑁄𑀢𑀺, 𑀪𑀕𑀯𑀸 𑀳𑀺 𑀩𑁄𑀥𑀺𑀫𑀡𑁆𑀟𑁂𑀬𑁂𑀯 𑀯𑀻𑀭𑀺𑀬𑀧𑀸𑀤𑁂𑀳𑀺 𑀲𑀻𑀮𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬 𑀲𑀤𑁆𑀥𑀸𑀳𑀢𑁆𑀣𑁂𑀦 𑀓𑀫𑁆𑀫𑀓𑁆𑀔𑀬𑀓𑀭𑀁 𑀜𑀸𑀡𑀨𑀭𑀲𑀼𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑁄 𑀮𑁄𑀪𑀤𑁄𑀲𑀫𑁄𑀳𑀯𑀺𑀧𑀭𑀻𑀢𑀫𑀦𑀲𑀺𑀓𑀸𑀭𑀅𑀳𑀺𑀭𑀻𑀓𑀸𑀦𑁄𑀢𑁆𑀢𑀧𑁆𑀧𑀓𑁄𑀥𑀽𑀧𑀦𑀸𑀳𑀫𑀓𑁆𑀔𑀧𑀴𑀸𑀲- 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀫𑀸𑀬𑀸𑀲𑀸𑀞𑁂𑀬𑁆𑀬𑀣𑀫𑁆𑀪𑀲𑀸𑀭𑀫𑁆𑀪𑀫𑀸𑀦𑀸𑀢𑀺 𑀫𑀸𑀦𑀫𑀤𑀧𑀫𑀸𑀤𑀢𑀡𑁆𑀳𑀸’𑀯𑀺𑀚𑁆𑀚𑀸𑀢𑀺𑀯𑀺𑀥𑀸𑀓𑀼𑀲𑀮𑀫𑀽𑀮𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀫𑀮𑀯𑀺𑀲𑀫𑀲𑀜𑁆𑀜𑀸𑀯𑀺𑀢𑀓𑁆𑀓 𑀧𑀧𑀜𑁆𑀘𑀘𑀢𑀼𑀩𑁆𑀩𑀺𑀥𑀯𑀺𑀧𑀭𑀺𑀬𑁂𑀲𑀆𑀲𑀯𑀕𑀦𑁆𑀣𑀑𑀖𑀬𑁄𑀕𑀸’𑀕𑀢𑀺𑀕𑀦𑁆𑀣𑀼’ 𑀧𑀸𑀤𑀸𑀦𑀧𑀜𑁆𑀘𑀘𑁂𑀢𑁄𑀔𑀺𑀮𑀯𑀺𑀦𑀺𑀩𑀦𑁆𑀥𑀦𑀻𑀯𑀭𑀡𑀸’𑀪𑀺𑀦𑀦𑁆𑀤𑀦 𑀙𑀯𑀺𑀯𑀸𑀤𑀫𑀽𑀮𑀢𑀡𑁆𑀳𑀸𑀓𑀸𑀬𑀲𑀢𑁆𑀢𑀸𑀦𑀼𑀲𑀬 𑀅𑀝𑁆𑀞𑀫𑀺𑀘𑁆𑀙𑀢𑁆𑀢𑀦𑀯𑀢𑀡𑁆𑀳𑀸𑀫𑀽𑀮𑀓𑀤𑀲𑀸𑀓𑀼𑀲𑀮𑀓𑀫𑁆𑀫𑀧𑀣 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀧𑁆𑀧 𑀪𑁂𑀤 𑀲𑀩𑁆𑀩𑀤𑀭𑀣𑀧𑀭𑀺𑀴𑀸𑀳𑀓𑀺𑀮𑁂𑀲𑀲𑀢𑀲𑀳𑀲𑁆𑀲𑀸𑀦𑀺, 𑀲𑀗𑁆𑀔𑁂𑀧𑀢𑁄 𑀯𑀸 𑀧𑀜𑁆𑀘 𑀓𑀺𑀮𑁂𑀲𑀅𑀪𑀺𑀲𑀗𑁆𑀔𑀸𑀭𑀔𑀦𑁆𑀥𑀫𑀘𑁆𑀘𑀼𑀤𑁂𑀯𑀧𑀼𑀢𑁆𑀢𑀫𑀸𑀭𑁂 𑀅𑀲𑁂𑀲𑀢𑁄 𑀳𑀢𑀸 𑀯𑀺𑀳𑀢𑀸 𑀅𑀦𑀪𑀸𑀯𑀁𑀓𑀢𑀸 𑀢𑀲𑁆𑀫𑀸 𑀲𑀩𑁆𑀩𑁂𑀧𑀺 𑀓𑀺𑀮𑁂𑀲𑀸 𑀩𑁄𑀥𑀺𑀫𑀡𑁆𑀟𑁂𑀬𑁂𑀯 𑀦𑀺𑀩𑁆𑀩𑀸𑀦𑀁 𑀦𑀺𑀭𑁄𑀥𑀁 𑀕𑀘𑁆𑀙𑀦𑁆𑀢𑀻𑀢𑀺 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑀁 𑀩𑁄𑀥𑀺𑀫𑀡𑁆𑀟𑁂𑀬𑁂𑀯 𑀳𑁄𑀢𑀺 𑀏𑀢𑁆𑀣 𑀘 𑀩𑁄𑀥𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑁆𑀜𑀸𑀡𑀁 𑀅𑀥𑀺𑀧𑁆𑀧𑁂𑀢𑀁 𑀢𑀣𑀸 𑀳𑀺 𑀲𑀩𑁆𑀩𑁂𑀲𑀫𑁆𑀧𑀺 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀅𑀭𑀺𑀬𑀲𑀸𑀯𑀓𑀸𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑀓𑁆𑀔𑀡𑁂𑀬𑁂𑀯 𑀲𑀩𑁆𑀩𑁂𑀧𑀺 𑀓𑀺𑀮𑁂𑀲𑀸 𑀅𑀲𑁂𑀲𑀁 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀦𑁆𑀢𑀺 𑀢𑁂𑀧𑀺 𑀩𑀼𑀤𑁆𑀥𑀸 𑀉𑀕𑁆𑀖𑀝𑀺𑀢𑀯𑀺𑀜𑁆𑀜𑀽𑀯𑀺𑀪𑀚𑁆𑀚𑀺𑀢𑀜𑁆𑀜𑀽𑀦𑁂𑀬𑁆𑀬𑀯𑀲𑁂𑀦 𑀢𑀺𑀯𑀺𑀥𑀸 𑀳𑁄𑀦𑁆𑀢𑀺 𑀯𑀼𑀢𑁆𑀢𑀜𑁆𑀳𑁂𑀢𑀁 𑀚𑀸𑀢𑀢𑁆𑀢𑀓𑀻𑀲𑁄𑀢𑀢𑁆𑀢𑀓𑀻𑀦𑀺𑀤𑀸𑀦𑁂.

‘‘𑀉𑀕𑁆𑀖𑀝𑀺𑀢𑀜𑁆𑀜𑀼𑀦𑀸𑀫𑀓𑁄, 𑀯𑀺𑀪𑀚𑁆𑀚𑀺𑀢𑀜𑁆𑀜𑀼𑀦𑁄 𑀤𑀼𑀯𑁂;

𑀢𑀢𑀺𑀬𑁄 𑀦𑁂𑀬𑁆𑀬𑁄 𑀦𑀸𑀫𑁂𑀦, 𑀩𑁄𑀥𑀺𑀲𑀢𑁆𑀢𑁄 𑀢𑀺𑀥𑀸 𑀫𑀢𑁄.

𑀉𑀕𑁆𑀖𑀝𑀺𑀢𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑁄, 𑀧𑀜𑁆𑀜𑀸𑀥𑀺𑀓𑁄𑀢𑀺 𑀦𑀸𑀫𑀲𑁄;

𑀯𑀺𑀪𑀚𑁆𑀚𑀺𑀢𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑁄, 𑀯𑀼𑀢𑁆𑀢𑁄 𑀯𑀻𑀭𑀺𑀬𑀸𑀥𑀺𑀓𑁄.

𑀫𑀢𑁄 𑀦𑁂𑀬𑁆𑀬𑁄 𑀲𑀤𑁆𑀥𑀸𑀥𑀺𑀓𑁄 𑀦𑀸𑀫, 𑀩𑁄𑀥𑀺𑀲𑀢𑁆𑀢𑀸 𑀇𑀫𑁂 𑀢𑀬𑁄;

𑀓𑀧𑁆𑀧𑁂𑀘 𑀲𑀢𑀲𑀳𑀲𑁆𑀲𑁂, 𑀘𑀢𑀼𑀭𑁄 𑀘 𑀅𑀲𑀗𑁆𑀔𑁆𑀬𑁂𑀬𑁆𑀬𑁂.

𑀧𑀽𑀭𑁂𑀢𑁆𑀯𑀸 𑀩𑁄𑀥𑀺𑀲𑀫𑁆𑀪𑀸𑀭𑁂, 𑀮𑀤𑁆𑀥𑀩𑁆𑀬𑀸𑀓𑀭𑀡𑁄 𑀧𑀼𑀭𑁂;

𑀉𑀕𑁆𑀖𑀝𑀺𑀢𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑁄, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁.

𑀅𑀝𑁆𑀞𑀫𑁂 ¶ 𑀘 𑀅𑀲𑀗𑁆𑀔𑁆𑀬𑁂𑀬𑁆𑀬𑁂, 𑀓𑀧𑁆𑀧𑁂 𑀘 𑀲𑀢𑀲𑀳𑀲𑁆𑀲𑁂;

𑀧𑀽𑀭𑁂𑀢𑁆𑀯𑀸 𑀩𑁄𑀥𑀺𑀲𑀫𑁆𑀪𑀸𑀭𑁂, 𑀮𑀤𑁆𑀥𑀩𑁆𑀬𑀸𑀓𑀭𑀡𑁄 𑀧𑀼𑀭𑁂.

𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑁄, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁;

𑀦𑁂𑀬𑁆𑀬𑁄 𑀢𑀼 𑀩𑁄𑀥𑀺𑀲𑀢𑁆𑀢𑁄 𑀘, 𑀲𑁄𑀴𑀲𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑁂.

𑀓𑀧𑁆𑀧𑁂 𑀘 𑀲𑀢𑀲𑀳𑀲𑁆𑀲𑁂, 𑀮𑀤𑁆𑀥𑀩𑁆𑀬𑀸𑀓𑀭𑀡𑁄 𑀧𑀼𑀭𑁂;

𑀧𑀽𑀭𑁂𑀢𑁆𑀯𑀸 𑀩𑁄𑀥𑀺𑀲𑀫𑁆𑀪𑀸𑀭𑁂, 𑀧𑀢𑁆𑀢𑁄 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫’’ 𑀦𑁆𑀢𑀺.

𑀲𑀼𑀢𑁆𑀢𑀦𑀺𑀧𑀸𑀢𑀅𑀧𑀤𑀸𑀦𑀝𑁆𑀞𑀓𑀣𑀸𑀲𑀼 𑀧𑀦 ‘‘𑀩𑀼𑀤𑁆𑀥𑀸𑀦𑀁 𑀆𑀦𑀦𑁆𑀤 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘, 𑀫𑀚𑁆𑀛𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀅𑀝𑁆𑀞 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘, 𑀉𑀧𑀭𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀲𑁄𑀴𑀲𑀸𑀲𑀗𑁆𑀔𑁆𑀬𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘. 𑀏𑀢𑁂𑀘 𑀧𑀜𑁆𑀜𑀸𑀥𑀺𑀓𑀲𑀤𑁆𑀥𑀸𑀥𑀺𑀓𑀯𑀻𑀭𑀺𑀬𑀸𑀥𑀺𑀓𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 𑀢𑁂𑀲𑀼 𑀧𑀜𑁆𑀜𑀸𑀥𑀺𑀓𑁄 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘, 𑀲𑀤𑁆𑀥𑀸𑀥𑀺𑀓𑁄 𑀅𑀝𑁆𑀞𑀅𑀲𑀗𑁆𑀔𑁂𑀬𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘, 𑀯𑀻𑀭𑀺𑀬𑀸𑀥𑀺𑀓𑁄 𑀲𑁄𑀴𑀲𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀧𑀜𑁆𑀜𑀸𑀥𑀺𑀓𑁄 𑀬𑁄𑀦𑀺𑀕𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑁂𑀲𑀼 𑀲𑀁𑀲𑀭𑀦𑁆𑀢𑁄𑀧𑀺 𑀧𑀜𑁆𑀜𑀸𑀩𑀳𑀼𑀮𑁆𑀮𑀯𑀲𑁂𑀦 𑀲𑀫𑁆𑀧𑀦𑁆𑀦𑀚𑁆𑀛𑀸𑀲𑀬 𑀲𑀫𑁆𑀪𑀯𑀢𑁄 𑀔𑀺𑀧𑁆𑀧𑀜𑁆𑀜𑁂𑀯 𑀢𑀲𑁆𑀲 𑀲𑀫𑁆𑀩𑁄𑀥𑀺. 𑀲𑀤𑁆𑀥𑀸𑀥𑀺𑀓𑁄 𑀧𑀦 𑀫𑀦𑁆𑀤𑀧𑀜𑁆𑀜𑀢𑁆𑀢𑀸 𑀅𑀲𑁆𑀲𑀤𑁆𑀤𑀳𑀺𑀢𑀩𑁆𑀩𑁂𑀧𑀺 𑀲𑀤𑁆𑀤𑀳𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀫𑀦𑁆𑀤𑀜𑁆𑀜𑁂𑀯 𑀲𑀫𑁆𑀩𑁄𑀥𑀺. 𑀯𑀻𑀭𑀺𑀬𑀸𑀥𑀺𑀓𑁄 𑀧𑀦 𑀉𑀪𑀬𑀫𑀦𑁆𑀤𑁄 𑀅𑀲𑁆𑀲𑀤𑁆𑀤𑀳𑀺𑀢𑀩𑁆𑀩𑀫𑁆𑀧𑀺 𑀲𑀤𑁆𑀤𑀳𑀢𑀺, 𑀅𑀓𑀢𑁆𑀢𑀩𑁆𑀩𑀫𑁆𑀧𑀺 𑀓𑀭𑁄𑀢𑀺, 𑀭𑀸𑀚𑀸 𑀧𑀲𑁆𑀲𑁂𑀦𑀤𑀻𑀓𑁄𑀲𑀮𑁄 𑀬𑀣𑀸 𑀲𑁄 𑀳𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁂 𑀥𑀭𑀫𑀸𑀦𑁂𑀬𑁂𑀯 𑀅𑀕𑀫𑀦𑀻𑀬𑀫𑁆𑀧𑀺 𑀧𑀭𑀤𑀸𑀭𑀁 𑀕𑀦𑁆𑀢𑀼𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁 𑀆𑀭𑀤𑁆𑀥𑁄 𑀦𑁂𑀭𑀬𑀺𑀓𑀸𑀦𑀁 𑀯𑀺𑀭𑀯𑀦𑁆𑀢𑀸𑀦𑀁 𑀤𑀼-𑀲-𑀦-𑀲𑁄𑀢𑀺 𑀲𑀤𑁆𑀤𑀫𑁆𑀧𑀺 𑀲𑀼𑀢𑁆𑀯𑀸 𑀅𑀢𑀺𑀯𑀺𑀫𑀽𑀴𑁆𑀳𑁄 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀁 𑀞𑀧𑁂𑀢𑁆𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀩𑁆𑀭𑀸𑀳𑁆𑀫𑀡𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀲𑁆𑀲 𑀯𑀘𑀦𑁂𑀦 𑀲𑀩𑁆𑀩𑀚𑀦𑀸𑀦𑀁 𑀬𑀜𑁆𑀜𑀢𑁆𑀣𑀸𑀬 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀲𑀺 𑀓𑁄 𑀧𑀦𑀯𑀸𑀤𑁄 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂, 𑀢𑀣𑀸 𑀳𑀺 𑀏𑀲 𑀓𑀲𑁆𑀲𑀧𑀪𑀕𑀯𑀢𑁄 𑀲𑀸𑀲𑀦𑀦𑁆𑀢𑀭𑀥𑀸𑀦𑁂𑀦 𑀅𑀦𑁆𑀥𑀪𑀽𑀢𑁂 𑀮𑁄𑀓𑁂 𑀩𑀸𑀭𑀸𑀡𑀲𑀺𑀬𑀁 𑀭𑀸𑀚𑀸 𑀳𑀼𑀢𑁆𑀯𑀸𑀧𑀺 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀤𑁂𑀯𑀢𑀸𑀬 𑀬𑀜𑁆𑀜𑀢𑁆𑀣𑀸𑀬 𑀏𑀓𑀲𑀢𑀭𑀸𑀚𑀸𑀦𑁄 𑀫𑀳𑁂𑀲𑀻𑀳𑀺 𑀲𑀤𑁆𑀥𑀺𑀁 𑀫𑀸𑀭𑁂𑀢𑀼𑀁 𑀆𑀭𑀤𑁆𑀥𑁄. 𑀏𑀯𑀁 𑀯𑀻𑀭𑀺𑀬𑀸𑀥𑀺𑀓𑁄 𑀉𑀪𑀬𑀫𑀦𑁆𑀤𑁄, 𑀢𑀲𑁆𑀫𑀸 𑀢𑀲𑁆𑀲 𑀲𑀫𑁆𑀩𑁄𑀥𑀺 𑀅𑀢𑀺𑀫𑀦𑁆𑀤𑁄𑀢𑀺 𑀏𑀯𑀁 𑀧𑀜𑁆𑀜𑀸𑀥𑀺𑀓𑀲𑀤𑁆𑀥𑀸𑀥𑀺𑀓𑀯𑀻𑀭𑀺𑀬𑀸𑀥𑀺𑀓𑀯𑀲𑁂𑀦 𑀓𑀸𑀮𑀲𑁆𑀲𑀸𑀧𑀺 𑀭𑀲𑁆𑀲𑀤𑀻𑀖𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀧𑀘𑁆𑀙𑀺𑀫𑀦𑀬𑁄𑀏𑀯 𑀧𑀲𑀁𑀲𑀺𑀢𑀩𑁆𑀩𑁄𑀢𑀺 𑀅𑀬𑀫𑁂𑀢𑁆𑀣 𑀅𑀫𑁆𑀳𑀸𑀓𑀁 𑀅𑀢𑁆𑀢𑀦𑁄𑀫𑀢𑀺. 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀦 𑀓𑀼𑀲𑀺𑀦𑀸𑀭𑀸𑀬 𑀉𑀧𑀯𑀢𑁆𑀢𑀦𑁂 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑁂 𑀬𑀫𑀓𑀲𑀸𑀮𑀸𑀦𑀫𑀦𑁆𑀢𑀭𑁂 ¶ 𑀯𑁂𑀲𑀸𑀔𑀧𑀼𑀡𑁆𑀡𑀫𑀤𑀺𑀯𑀲𑁂 𑀧𑀘𑁆𑀘𑀽𑀲𑀲𑀫𑀬𑁂 𑀏𑀓𑀽𑀦𑀯𑀻𑀲𑀢𑀺𑀬𑀸 𑀘𑀼𑀢𑀺𑀘𑀺𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀲𑁆𑀲 𑀲𑁄𑀫𑀦𑀲𑁆𑀲𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀅𑀲𑀗𑁆𑀔𑀸𑀭𑀺𑀓𑀓𑀼𑀲𑀮𑀘𑀺𑀢𑁆𑀢𑀲𑀤𑀺𑀲𑁂𑀦 𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑁂𑀦 𑀅𑀩𑁆𑀬𑀸𑀓𑀢𑁂𑀦 𑀘𑀭𑀺𑀫𑀓𑀁 𑀓𑀢𑁆𑀯𑀸 𑀓𑀢𑁆𑀣𑀘𑀺 𑀪𑀯𑁂 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀓𑀫𑁆𑀫𑀢𑀡𑁆𑀳𑀸𑀓𑀺𑀮𑁂𑀲𑁂𑀳𑀺 𑀅𑀦𑀼𑀧𑀸𑀤𑀸𑀦𑁄 𑀲𑀩𑁆𑀩𑀼𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀉𑀧𑀸𑀤𑀺𑀦𑁆𑀦𑀓𑀓𑁆𑀔𑀦𑁆𑀥𑀧𑀭𑀺𑀘𑁆𑀘𑀸𑀕𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀢𑁆𑀣𑀸𑀭𑁄 𑀧𑀦 𑀤𑀻𑀖𑀦𑀺𑀓𑀸𑀬𑁂 𑀫𑀳𑀸𑀯𑀕𑁆𑀕𑁂 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀑𑀮𑁄𑀓𑁂𑀢𑀩𑁆𑀩𑁄. 𑀢𑀢𑁆𑀣 𑀯𑀺𑀤𑁂𑀲𑀁 𑀕𑀘𑁆𑀙𑀦𑁆𑀢𑁄 𑀧𑀼𑀭𑀺𑀲𑁄 𑀲𑀩𑁆𑀩𑀁 𑀜𑀸𑀢𑀺𑀚𑀦𑀁 𑀆𑀮𑀺𑀗𑁆𑀕𑁂𑀢𑁆𑀯𑀸 𑀲𑀻𑀲𑁂 𑀘𑀼𑀫𑁆𑀩𑀺𑀢𑁆𑀯𑀸 𑀕𑀘𑁆𑀙𑀢𑀺 𑀯𑀺𑀬 𑀪𑀕𑀯𑀸𑀧𑀺 𑀦𑀺𑀩𑁆𑀩𑀸𑀦𑀧𑀼𑀭𑀁 𑀧𑀯𑀺𑀲𑀦𑁆𑀢𑁄 𑀲𑀩𑁆𑀩𑁂𑀧𑀺 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀫𑀸𑀧𑀢𑁆𑀢𑀺𑀬𑁄 𑀅𑀦𑀯𑀲𑁂𑀲𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀬𑀸𑀯 𑀲𑀜𑁆𑀜𑀸𑀯𑁂𑀤𑀬𑀺𑀢𑀁, 𑀢𑀢𑁄𑀧𑀺 𑀯𑀼𑀝𑁆𑀞𑀸𑀬 𑀬𑀸𑀯 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀛𑀸𑀦𑀗𑁆𑀕𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀪𑀯𑀗𑁆𑀕𑀘𑀺𑀢𑁆𑀢𑁂𑀦 𑀅𑀩𑁆𑀬𑀸𑀓𑀢𑁂𑀦 𑀤𑀼𑀓𑁆𑀔𑀲𑀘𑁆𑀘𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀧𑀸𑀴𑀺𑀬𑀁 𑀧𑀦 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀲𑀫𑀦𑀦𑁆𑀢𑀭𑀸 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻’’𑀢𑀺 𑀯𑀼𑀢𑁆𑀢𑀁 𑀢𑀢𑁆𑀣 𑀤𑁆𑀯𑁂 𑀲𑀫𑀦𑀦𑁆𑀢𑀭𑀸 𑀛𑀸𑀦𑀲𑀫𑀦𑀦𑁆𑀢𑀭𑀸, 𑀧𑀘𑁆𑀘𑀯𑁂𑀓𑁆𑀔𑀡𑀲𑀫𑀦𑀦𑁆𑀢𑀭𑀸𑀢𑀺. 𑀢𑀢𑁆𑀣 𑀛𑀸𑀦𑀸 𑀯𑀼𑀝𑁆𑀞𑀸𑀬 𑀪𑀯𑀗𑁆𑀕𑀁 𑀑𑀢𑀺𑀡𑁆𑀡𑀲𑁆𑀲 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀦𑀁 𑀛𑀸𑀦𑀲𑀫𑀦𑀦𑁆𑀢𑀭𑀁 𑀦𑀸𑀫. 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀧𑀼𑀦 𑀛𑀸𑀦𑀗𑁆𑀕𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀺𑀡𑁆𑀡𑀲𑁆𑀲 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀲𑀫𑀦𑀦𑁆𑀢𑀭𑀁 𑀦𑀸𑀫. 𑀪𑀕𑀯𑀸 𑀧𑀦 𑀛𑀸𑀦𑀲𑀫𑀦𑀦𑁆𑀢𑀭𑀸 𑀅𑀧𑀭𑀺 𑀦𑀺𑀩𑁆𑀩𑀸𑀬𑀺𑀢𑁆𑀢𑀸 𑀧𑀘𑁆𑀘𑀯𑁂𑀓𑁆𑀔𑀡𑀲𑀫𑀦𑀦𑁆𑀢𑀭𑀫𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀢𑁂𑀦𑁂𑀯𑀸𑀳 ‘‘𑀪𑀕𑀯𑀸 𑀧𑀦 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀛𑀸𑀦𑀸 𑀯𑀼𑀝𑁆𑀞𑀸𑀬 𑀛𑀸𑀦𑀗𑁆𑀕𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀪𑀯𑀗𑁆𑀕𑀘𑀺𑀢𑁆𑀢𑁂𑀦 𑀅𑀩𑁆𑀬𑀸𑀓𑀢𑁂𑀦 𑀤𑀼𑀓𑁆𑀔𑀲𑀘𑁆𑀘𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀻’’𑀢𑀺. 𑀏𑀢𑁆𑀣 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀘𑀺𑀢𑁆𑀢𑀲𑁆𑀲 𑀓𑀺𑀁 𑀆𑀭𑀫𑁆𑀫𑀡𑀁 𑀓𑀫𑁆𑀫𑀁 𑀯𑀸 𑀳𑁄𑀢𑀺, 𑀉𑀤𑀸𑀳𑀼 𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀸𑀦𑀺, 𑀅𑀣 𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀧𑀭𑁂 𑀏𑀯𑀁 𑀯𑀤𑀦𑁆𑀢𑀺.

𑀦𑀸𑀳𑀼 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸, 𑀞𑀺𑀢𑀘𑀺𑀢𑁆𑀢𑀲𑁆𑀲 𑀢𑀸𑀤𑀺𑀦𑁄;

𑀅𑀦𑁂𑀚𑁄 𑀲𑀦𑁆𑀢𑀺’𑀫𑀸𑀭𑀩𑁆𑀪, 𑀬𑀁𑀓𑀸𑀮’𑀫𑀓𑀭𑀻 𑀫𑀼𑀦𑀺.

𑀅𑀲𑀮𑁆𑀮𑀻𑀦𑁂𑀦 𑀘𑀺𑀢𑁆𑀢𑁂𑀦, 𑀯𑁂𑀤𑀦𑀁 𑀅𑀚𑁆𑀛𑀯𑀸𑀲𑀬𑀺;

𑀧𑀚𑁆𑀚𑁄𑀢𑀲𑁆𑀲𑁂’𑀯 𑀦𑀺𑀩𑁆𑀩𑀸𑀦𑀁, 𑀯𑀺𑀫𑁄𑀓𑁆𑀔𑁄 𑀘𑁂𑀢𑀲𑁄 𑀅𑀳𑀽’𑀢𑀺.

𑀇𑀫𑀺𑀲𑁆𑀲𑀸𑀕𑀸𑀣𑀸𑀬 ‘‘𑀬𑀁 𑀬𑁄 𑀫𑀼𑀦𑀺 𑀅𑀦𑁂𑀚𑁄 𑀲𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀓𑀸𑀮𑀁 𑀅𑀓𑀭𑀻’’𑀢𑀺 𑀬𑁄𑀚𑁂𑀢𑁆𑀯𑀸 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀘𑀺𑀢𑁆𑀢𑀲𑁆𑀲 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀦𑁆𑀢𑀺 𑀢𑀫𑀬𑀼𑀢𑁆𑀢𑀁, 𑀧𑀝𑀺𑀲𑀦𑁆𑀥𑀺𑀪𑀯𑀗𑁆𑀕𑀘𑀼𑀢𑀻𑀦𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀲𑁆𑀲 𑀅𑀦𑀸𑀭𑀳𑀢𑁆𑀢𑀸 ‘‘𑀦𑀺𑀩𑁆𑀩𑀸𑀦𑀁 𑀕𑁄𑀢𑁆𑀭𑀪𑀼𑀲𑁆𑀲 𑀯𑁄𑀤𑀸𑀦𑀲𑁆𑀲 𑀫𑀕𑁆𑀕𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦𑀧𑀘𑁆𑀘𑀬𑁄, 𑀦𑀺𑀩𑁆𑀩𑀸𑀦𑀁 𑀨𑀮𑀲𑁆𑀲 ¶ 𑀆𑀯𑀚𑁆𑀚𑀦𑀸𑀬𑀸’’𑀢𑀺 𑀧𑀝𑁆𑀞𑀸𑀦𑀧𑀸𑀴𑀺𑀬𑀸 𑀚𑀯𑀦𑀆𑀯𑀚𑁆𑀚𑀦𑀸𑀦𑀫𑁂𑀯 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀢𑀲𑁆𑀫𑀸 𑀏𑀢𑁆𑀣 ‘‘𑀬𑀁 𑀬𑁄 𑀫𑀼𑀦𑀺 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑁂𑀚𑁄 𑀅𑀦𑁂𑀚𑀲𑀗𑁆𑀔𑀸𑀢𑁄 𑀢𑀡𑁆𑀳𑀸𑀭𑀳𑀺𑀢𑁄 𑀲𑀦𑁆𑀢𑀺𑀁 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀓𑀸𑀮𑀁 𑀅𑀲𑀻𑀢𑀺𑀯𑀲𑁆𑀲𑀧𑀭𑀺𑀫𑀸𑀡𑀁 𑀅𑀓𑀭𑀺 𑀅𑀢𑀺𑀓𑁆𑀓𑀫𑀻’’𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀓𑁂𑀘𑀺 𑀧𑀦 𑀏𑀯𑀁 𑀯𑀤𑀦𑁆𑀢𑀺… ‘‘𑀓𑀢𑁆𑀣𑀘𑀺 𑀧𑀦 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀬𑀣𑁄𑀧𑀝𑁆𑀞𑀺𑀢𑀁 𑀦𑀸𑀫𑀭𑀽𑀧𑀥𑀫𑁆𑀫𑀸𑀤𑀺𑀓𑀫𑁂𑀯 𑀘𑀼𑀢𑀺𑀧𑀭𑀺𑀬𑁄𑀲𑀸𑀦𑀸𑀦𑀁 𑀕𑁄𑀘𑀭𑀪𑀸𑀯𑀁 𑀕𑀘𑁆𑀙𑀢𑀺, 𑀦 𑀓𑀫𑁆𑀫-𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀤𑀬𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀫𑁆𑀫𑀦𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀸𑀦𑀺 𑀅𑀭𑀳𑀢𑁄 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀪𑀸𑀯𑀁 𑀦 𑀕𑀘𑁆𑀙𑀦𑁆𑀢𑀻𑀢𑀺 𑀢𑀫𑁆𑀧𑀺 𑀅𑀬𑀼𑀢𑁆𑀢𑀫𑁂𑀯 𑀅𑀬𑀜𑁆𑀳𑁂𑀢𑁆𑀣𑀢𑁆𑀣𑁄 𑀓𑀢𑁆𑀣𑀘𑀺 𑀧𑀦 𑀪𑀯𑁂 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀅𑀭𑀳𑀢𑁄 𑀬𑀣𑀸 𑀬𑀣𑀸 𑀬𑁂𑀦 𑀬𑁂𑀦 𑀧𑀓𑀸𑀭𑁂𑀦 𑀉𑀧𑀝𑁆𑀞𑀺𑀢𑀁 𑀦𑀸𑀫𑀭𑀽𑀧𑀥𑀫𑁆𑀫𑀸𑀤𑀺𑀓𑀫𑁂𑀯 𑀘𑀼𑀢𑀺𑀧𑀭𑀺𑀬𑁄𑀲𑀸𑀦𑀁 𑀆𑀯𑀚𑁆𑀚𑀦𑀚𑀯𑀦𑀘𑀺𑀢𑁆𑀢𑀸𑀦𑀁 𑀕𑁄𑀘𑀭𑀪𑀸𑀯𑀁 𑀕𑀘𑁆𑀙𑀢𑀺, 𑀧𑀼𑀦 𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸 𑀅𑀪𑀸𑀯𑀢𑁄. 𑀓𑀺𑀁 𑀓𑀸𑀭𑀡𑀁 𑀪𑀽𑀢𑀸𑀦𑀺 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀸𑀦𑀺 𑀕𑁄𑀘𑀭𑀪𑀸𑀯𑀁 𑀦 𑀕𑀘𑁆𑀙𑀦𑁆𑀢𑀻𑀢𑀺. 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀧𑀦 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀕𑀳𑀺𑀢𑀁 𑀅𑀢𑀻𑀢𑀸𑀭𑀫𑁆𑀫𑀡𑀫𑁂𑀯 𑀕𑁄𑀘𑀭𑀪𑀸𑀯𑀁 𑀕𑀘𑁆𑀙𑀢𑀺. ‘‘𑀦𑀸𑀫𑀭𑀽𑀧𑀸𑀤𑀺𑀓𑀫𑁂𑀯𑀸 𑀢𑀺 𑀏𑀢𑁆𑀣 𑀦𑀸𑀫’’𑀦𑁆𑀢𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀦𑀺𑀩𑁆𑀩𑀸𑀦𑀁 𑀭𑀽𑀧𑀦𑁆𑀢𑀺 𑀅𑀝𑁆𑀞𑀸𑀭𑀲𑀯𑀺𑀥𑀁 𑀭𑀽𑀧𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀸. 𑀦𑀸𑀫𑀭𑀽𑀧𑀸 𑀘 𑀢𑁂 𑀥𑀫𑁆𑀫𑀸 𑀘𑁂𑀢𑀺 𑀢𑀣𑀸. 𑀢𑁂 𑀆𑀤𑀺 𑀬𑁂𑀲𑀁 𑀢𑁂𑀢𑀺 𑀦𑀸𑀫𑀭𑀽𑀧𑀥𑀫𑁆𑀫𑀸𑀤𑀺 𑀢𑀫𑁂𑀯 𑀦𑀸𑀫𑀭𑀽𑀧𑀥𑀫𑁆𑀫𑀸𑀤𑀺𑀓𑀁. 𑀆𑀤𑀺𑀲𑀤𑁆𑀤𑁂𑀦 𑀙 𑀧𑀜𑁆𑀜𑀢𑁆𑀢𑀺𑀬𑁄 𑀲𑀗𑁆𑀕𑀡𑁆𑀳𑀸𑀢𑀺, 𑀢𑁂𑀦 𑀦𑀺𑀩𑁆𑀩𑀸𑀦𑀫𑁆𑀧𑀺 𑀅𑀭𑀳𑀢𑁄 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀓𑁆𑀭𑀺𑀬𑀚𑀯𑀦𑀲𑁆𑀲𑀧𑀺 𑀆𑀭𑀫𑁆𑀫𑀡𑀪𑀸𑀯𑁄 𑀪𑀯𑁂𑀬𑁆𑀬𑀸𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺 𑀯𑀻𑀫𑀁𑀲𑀺𑀢𑁆𑀯𑀸 𑀧𑀦 𑀕𑀳𑁂𑀢𑀩𑁆𑀩𑀁. 𑀪𑀕𑀯𑀢𑁄 𑀦𑀺𑀩𑁆𑀩𑀸𑀦𑀘𑀺𑀢𑁆𑀢𑀲𑁆𑀲 𑀧𑀦 𑀢𑀼𑀲𑀺𑀢𑀧𑀼𑀭𑀢𑁄 𑀘𑀯𑀺𑀢𑁆𑀯𑀸 𑀲𑀺𑀭𑀻𑀫𑀳𑀸𑀫𑀸𑀬𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀯𑀲𑀺𑀢𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀕𑀳𑀺𑀢𑀸𑀭𑀫𑁆𑀫𑀡𑀫𑁂𑀯 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁 𑀢𑀜𑁆𑀘 𑀔𑁄 𑀕𑀢𑀺𑀦𑀺𑀫𑀺𑀢𑁆𑀢𑀫𑁂𑀯, 𑀦 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀦𑀺. 𑀬𑀼𑀢𑁆𑀢𑀺𑀢𑁄𑀧𑀺 𑀆𑀕𑀫𑀢𑁄𑀧𑀺 𑀕𑀢𑀺𑀦𑀺𑀫𑀺𑀢𑁆𑀢𑀫𑁂𑀯 𑀬𑀼𑀚𑁆𑀚𑀢𑀺 𑀢𑀣𑀸 𑀳𑀺 𑀢𑀼𑀲𑀺𑀢𑀧𑀼𑀭𑁂𑀬𑁂𑀯 𑀲𑁂𑀢𑀓𑁂𑀢𑀼𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀤𑀺𑀩𑁆𑀩𑀕𑀡𑀦𑀸𑀬 𑀘𑀢𑁆𑀢𑀸𑀭𑀺 𑀲𑀳𑀲𑁆𑀲𑀸𑀦𑀺, 𑀫𑀦𑀼𑀲𑁆𑀲𑀕𑀡𑀦𑀸𑀬 𑀲𑀢𑁆𑀢𑀧𑀜𑁆𑀜𑀸𑀲𑀯𑀲𑁆𑀲𑀓𑁄𑀝𑀺,𑀲𑀝𑁆𑀞𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀞𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑁂 𑀧𑀜𑁆𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀲𑀼𑀤𑁆𑀥𑀸𑀯𑀸𑀲𑁂 𑀅𑀭𑀳𑀦𑁆𑀢𑀩𑁆𑀭𑀳𑁆𑀫𑀼𑀦𑀸 𑀤𑀲𑀳𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀳𑀺 𑀆𑀕𑀫𑁆𑀫 𑀤𑁂𑀯𑀢𑀸𑀯𑀺𑀲𑁂𑀲𑁂𑀳𑀺 𑀘.

‘‘𑀓𑀸𑀮𑁄 𑀤𑁂𑀯 𑀫𑀳𑀸𑀯𑀻𑀭, 𑀉𑀧𑁆𑀧𑀚𑁆𑀚 𑀫𑀸𑀢𑀼𑀓𑀼𑀘𑁆𑀙𑀬𑀁;

𑀲𑀤𑁂𑀯𑀓𑀁 𑀢𑀸𑀭𑀬𑀦𑁆𑀢𑁄, 𑀩𑀼𑀚𑁆𑀛𑀲𑁆𑀲𑀼 𑀅𑀫𑀢𑀁 𑀧𑀤’’𑀦𑁆𑀢𑀺.

𑀬𑀸𑀘𑀺𑀬𑀫𑀸𑀦𑁄 ¶ ‘‘𑀓𑀸𑀮𑀁 𑀤𑀻𑀧𑀜𑁆𑀘 𑀤𑁂𑀲𑀜𑁆𑀘, 𑀓𑀼𑀮𑀁 𑀫𑀸𑀢𑀭𑀫𑁂𑀯 𑀘𑀸’’𑀢𑀺 𑀯𑀼𑀢𑁆𑀢𑀸𑀦𑀺 𑀧𑀜𑁆𑀘 𑀫𑀳𑀸𑀯𑀺𑀮𑁄𑀓𑀦𑀸𑀦𑀺 𑀯𑀺𑀮𑁄𑀓𑁂𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑀢𑁄 𑀘𑀯𑀺𑀢𑁆𑀯𑀸 𑀆𑀲𑀸𑀴𑁆𑀳𑀻𑀧𑀼𑀡𑁆𑀡𑀫𑀸𑀬𑀁 𑀉𑀢𑁆𑀢𑀭𑀸𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑁂𑀦𑁂𑀯 𑀲𑀤𑁆𑀥𑀺𑀁 𑀏𑀓𑀽𑀦𑀯𑀻𑀲𑀢𑀺𑀬𑀸 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀫𑀲𑁆𑀲 𑀲𑁄𑀫𑀦𑀲𑁆𑀲𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀅𑀲𑀗𑁆𑀔𑀸𑀭𑀺𑀓𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀲𑀤𑀺𑀲𑁂𑀦 𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑁂𑀦 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀢𑀤𑀸𑀭𑀫𑁆𑀫𑀡𑀸𑀲𑀦𑁆𑀦𑀯𑀻𑀣𑀺𑀢𑁄 𑀧𑀼𑀩𑁆𑀩𑀪𑀸𑀕𑁂 𑀆𑀮𑁄𑀓𑀺𑀢𑀸𑀦𑀺 𑀓𑀸𑀮𑀤𑀻𑀧𑀤𑁂𑀲𑀓𑀼𑀮𑀫𑀸𑀢𑀭𑀯𑀲𑁂𑀦 𑀇𑀫𑀸𑀦𑀺 𑀧𑀜𑁆𑀘 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀕𑀢𑀺𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀪𑀸𑀯𑁂𑀦 𑀕𑁄𑀘𑀭𑀪𑀸𑀯𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺 𑀢𑀦𑁆𑀦𑀺𑀦𑁆𑀦𑀢𑀧𑁆𑀧𑁄𑀡𑀢𑀧𑁆𑀧𑀩𑁆𑀪𑀸𑀭𑀯𑀲𑁂𑀦 𑀩𑀸𑀳𑀼𑀮𑁆𑀮𑀧𑁆𑀧𑀯𑀢𑁆𑀢𑀺𑀢𑁄 𑀢𑁂𑀦𑁂𑀯 𑀅𑀪𑀺𑀥𑀫𑁆𑀫𑀢𑁆𑀣𑀲𑀗𑁆𑀕𑀳𑀸𑀤𑀻𑀲𑀼 𑀅𑀪𑀺𑀥𑀫𑁆𑀫𑀢𑁆𑀣 𑀯𑀺𑀪𑀸𑀯𑀦𑀺𑀬𑀁 ‘‘𑀫𑀭𑀡𑀓𑀸𑀮𑁂 𑀬𑀣𑀸𑀭𑀳𑀁 𑀅𑀪𑀺𑀫𑀼𑀔𑀻𑀪𑀽𑀢𑀁 𑀪𑀯𑀦𑁆𑀢𑀭𑁂 𑀧𑀝𑀺𑀲𑀦𑁆𑀥𑀺𑀚𑀦𑀓𑀁 𑀓𑀫𑁆𑀫𑀁 𑀯𑀸 𑀢𑀁 𑀓𑀫𑁆𑀫𑀓𑀭𑀡𑀓𑀸𑀮𑁂 𑀭𑀽𑀧𑀸𑀤𑀺𑀓𑀫𑀼𑀧𑀮𑀤𑁆𑀥𑀧𑀼𑀩𑁆𑀩𑀫𑀼𑀧𑀓𑀭𑀡𑀪𑀽𑀢𑀜𑁆𑀘 𑀓𑀫𑁆𑀫𑀦𑀺𑀫𑀺𑀢𑁆𑀢𑀁 𑀯𑀸 𑀅𑀦𑀦𑁆𑀢𑀭𑀫𑀼𑀧𑁆𑀧𑀚𑁆𑀚𑀫𑀸𑀦𑀪𑀯𑁂 𑀉𑀧𑀮𑀪𑀺𑀢𑀩𑁆𑀩𑀁 𑀉𑀧𑀪𑁄𑀕𑀪𑀽𑀢𑀁 𑀕𑀢𑀺𑀦𑀺𑀫𑀺𑀢𑁆𑀢𑀁 𑀯𑀸 𑀓𑀫𑁆𑀫𑀩𑀮𑁂𑀦 𑀙𑀦𑁆𑀦𑀁 𑀤𑁆𑀯𑀸𑀭𑀸𑀦𑀫𑀜𑁆𑀜𑀢𑀭𑀲𑁆𑀫𑀺𑀁 𑀧𑀘𑁆𑀘𑀼𑀧𑀝𑁆𑀞𑀸𑀲𑀺, 𑀢𑀢𑁄 𑀧𑀭𑀁 𑀢𑀫𑁂𑀯 𑀢𑀣𑁄𑀧𑀝𑁆𑀞𑀺𑀢𑀫𑀸𑀮𑀫𑁆𑀩𑀡𑀁 𑀆𑀭𑀩𑁆𑀪 𑀯𑀺𑀧𑀘𑁆𑀘𑀫𑀸𑀦𑀓𑀓𑀫𑁆𑀫𑀸𑀦𑀼𑀭𑀽𑀧𑀁 𑀧𑀭𑀺𑀲𑀼𑀤𑁆𑀥𑀁 𑀯𑀸, 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀯𑀸 𑀉𑀧𑀧𑀚𑁆𑀚𑀺𑀢𑀩𑁆𑀩𑀪𑀯𑀸𑀦𑀼𑀭𑀽𑀧𑀁 𑀢𑀢𑁆𑀣𑁄𑀡𑀢𑀁𑀯 𑀘𑀺𑀢𑁆𑀢𑀲𑀦𑁆𑀢𑀸𑀦𑀫𑀪𑀺𑀡𑁆𑀳𑀁 𑀧𑀯𑀢𑁆𑀢𑀢𑀺 𑀩𑀸𑀳𑀼𑀮𑁆𑀮𑁂𑀦. 𑀢𑀫𑁂𑀯 𑀯𑀸 𑀧𑀦 𑀚𑀦𑀓𑀪𑀽𑀢𑀁 𑀓𑀫𑁆𑀫𑀁 𑀅𑀪𑀺𑀦𑀯𑀓𑀭𑀡𑀯𑀲𑁂𑀦 𑀤𑁆𑀯𑀸𑀭𑀧𑁆𑀧𑀢𑁆𑀢𑀁 𑀳𑁄𑀢𑀺. 𑀧𑀘𑁆𑀘𑀸𑀲𑀦𑁆𑀦𑀫𑀭𑀡𑀲𑁆𑀲 𑀧𑀦 𑀢𑀲𑁆𑀲 𑀯𑀻𑀣𑀺𑀘𑀺𑀢𑁆𑀢𑀸𑀯𑀲𑀸𑀦𑁂 𑀪𑀯𑀗𑁆𑀕𑀓𑁆𑀔𑀬𑁂𑀯𑀸 𑀘𑀯𑀦𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑀧𑀭𑀺𑀬𑁄𑀲𑀸𑀦𑀪𑀽𑀢𑀁 𑀘𑀼𑀢𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺. 𑀢𑀲𑁆𑀫𑀺𑀁 𑀦𑀺𑀭𑀼𑀤𑁆𑀥𑀸𑀯𑀲𑀸𑀦𑁂 𑀢𑀲𑁆𑀲𑀸𑀦𑀦𑁆𑀢𑀭𑀫𑁂𑀯 𑀢𑀣𑀸 𑀕𑀳𑀺𑀢𑀫𑀸𑀮𑀫𑁆𑀩𑀡𑀫𑀸𑀭𑀩𑁆𑀪 𑀲𑀯𑀢𑁆𑀣𑀼𑀓𑀫𑀯𑀢𑁆𑀣𑀼𑀓𑀫𑁂𑀯 𑀯𑀸 𑀬𑀣𑀸𑀭𑀳𑀁 𑀅𑀯𑀺𑀚𑁆𑀚𑀸𑀦𑀼𑀲𑀬𑀧𑀭𑀺𑀓𑁆𑀔𑀺𑀢𑁆𑀢𑁂𑀦 𑀢𑀡𑁆𑀳𑀸𑀦𑀼𑀲𑀬𑀫𑀽𑀮𑀓𑁂𑀦 𑀲𑀗𑁆𑀔𑀸𑀭𑁂𑀦 𑀚𑀦𑀺𑀬𑀫𑀸𑀦𑀁 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀧𑀭𑀺𑀕𑁆𑀕𑀬𑁆𑀳𑀫𑀸𑀦𑀁 𑀲𑀳𑀚𑀸𑀢𑀸𑀦𑀫𑀥𑀺𑀝𑁆𑀞𑀸𑀦𑀪𑀸𑀯𑁂𑀦 𑀧𑀼𑀩𑁆𑀩𑀗𑁆𑀕𑀫𑀪𑀽𑀢𑀁 𑀪𑀯𑀦𑁆𑀢𑀭𑀧𑀝𑀺𑀲𑀦𑁆𑀥𑀸𑀦𑀯𑀲𑁂𑀦 𑀧𑀝𑀺𑀲𑀦𑁆𑀥𑀺𑀲𑀗𑁆𑀔𑀸𑀢𑀁 𑀫𑀸𑀦𑀲𑀫𑀼𑀧𑁆𑀧𑀚𑁆𑀚𑀫𑀸𑀦𑀫𑁂𑀯 𑀧𑀢𑀺𑀝𑁆𑀞𑀸𑀢𑀺 𑀪𑀯𑀦𑁆𑀢𑀭𑁂’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀢𑀢𑁆𑀣𑁄𑀡𑀢𑀁𑀯 𑀘𑀺𑀢𑁆𑀢𑀲𑀦𑁆𑀢𑀸𑀦𑀫𑀪𑀺𑀡𑁆𑀳𑀁 𑀧𑀯𑀢𑁆𑀢𑀢𑀺 𑀩𑀸𑀳𑀼𑀮𑁆𑀮𑁂𑀦𑀸’’𑀢𑀺 𑀇𑀫𑀺𑀦𑀸 𑀓𑀫𑁆𑀫𑀩𑀮𑁂𑀦 𑀉𑀧𑀝𑁆𑀞𑀺𑀢𑀁 𑀕𑀢𑀺𑀦𑀺𑀫𑀺𑀢𑁆𑀢𑀁 𑀫𑀭𑀡𑀸𑀲𑀦𑁆𑀦𑀯𑀻𑀣𑀺𑀢𑁄 𑀧𑀼𑀩𑁆𑀩𑁂 𑀏𑀓𑀸𑀳𑀤𑁆𑀯𑀻𑀳𑀸𑀤𑀺𑀯𑀲𑁂𑀦 𑀲𑀢𑁆𑀢𑀸𑀳𑀫𑁆𑀧𑀺, 𑀲𑀢𑁆𑀢𑀸𑀳𑀢𑁄 𑀉𑀢𑁆𑀢𑀭𑀺𑀧𑀺 𑀉𑀧𑁆𑀧𑀚𑁆𑀚𑀢𑁂 𑀯𑀸𑀢𑀺 𑀤𑀲𑁆𑀲𑁂𑀢𑀺 𑀢𑀣𑀸 𑀳𑀺 𑀧𑀭𑀺𑀲𑀼𑀤𑁆𑀥𑀁 𑀯𑀸 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀯𑀸 𑀯𑀺𑀧𑀘𑁆𑀘𑀫𑀸𑀦𑀓𑀓𑀫𑁆𑀫𑀸𑀦𑀼𑀭𑀽𑀧𑀁 𑀕𑀢𑀺𑀦𑀺𑀫𑀺𑀢𑁆𑀢𑀁 𑀘𑀺𑀭𑀓𑀸𑀮𑀫𑁆𑀧𑀺 𑀢𑀺𑀝𑁆𑀞𑀢𑀺, 𑀅𑀭𑀺𑀬𑀕𑀸𑀮𑀢𑀺𑀲𑁆𑀲𑀘𑁄𑀭𑀖𑀸𑀢𑀓𑀸𑀤𑀬𑁄 𑀯𑀺𑀬 𑀢𑀣𑀸 𑀳𑀺 𑀅𑀭𑀺𑀬𑀕𑀸𑀮𑀢𑀺𑀲𑁆𑀲𑁄 𑀦𑀸𑀫 𑀉𑀧𑀸𑀲𑀓𑁄 𑀲𑀻𑀳𑀴𑀤𑀻𑀧𑁂 𑀅𑀢𑁆𑀢𑀦𑁄 𑀪𑀭𑀺𑀬𑀸𑀬 𑀲𑀼𑀫𑀦𑀸𑀬 𑀲𑀤𑁆𑀥𑀺𑀁 𑀬𑀸𑀯𑀚𑀻𑀯𑀁 𑀤𑀸𑀦𑀸𑀤𑀺 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 ¶ 𑀓𑀢𑁆𑀯𑀸 𑀆𑀬𑀽𑀳𑀧𑀭𑀺𑀬𑁄𑀲𑀸𑀦𑁂 𑀅𑀭𑀺𑀬𑀕𑀸𑀮𑀢𑀺𑀲𑁆𑀲𑀲𑁆𑀲 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑀲𑁆𑀲 𑀙𑀤𑁂𑀯𑀮𑁄𑀓𑀢𑁄 𑀭𑀣𑀁 𑀆𑀦𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀤𑁂𑀯𑀮𑁄𑀓𑀁 𑀯𑀡𑁆𑀡𑁂𑀲𑀼𑀁. 𑀉𑀧𑀸𑀲𑀓𑁄 𑀤𑁂𑀯𑀢𑀸𑀦𑀁 𑀓𑀣𑀁 𑀲𑀼𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑀢𑁄 𑀆𑀳𑀝𑀭𑀣𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀭𑀣𑁂 ‘‘𑀕𑀳𑁂𑀢𑁆𑀯𑀸 𑀕𑀘𑁆𑀙𑀣𑀸’’𑀢𑀺 𑀆𑀳. 𑀲𑀼𑀫𑀦𑀸 𑀧𑀦 𑀅𑀢𑁆𑀢𑀦𑁄 𑀲𑀸𑀫𑀺𑀓𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀓𑀺𑀁 𑀢𑀺𑀲𑁆𑀲 𑀫𑀭𑀡𑀸𑀲𑀦𑁆𑀦𑁂 𑀯𑀺𑀮𑀸𑀧𑀁 𑀅𑀓𑀸𑀲𑀻’’𑀢𑀺 𑀆𑀳. 𑀢𑀺𑀲𑁆𑀲𑁄 𑀅𑀢𑁆𑀢𑀦𑁄 𑀪𑀭𑀺𑀬𑀸𑀬 𑀓𑀣𑀁 𑀲𑀼𑀢𑁆𑀯𑀸 𑀆𑀳… ‘‘𑀅𑀳𑀁 𑀯𑀺𑀮𑀸𑀧𑀁 𑀦 𑀓𑀭𑁄𑀫𑀺, 𑀤𑁂𑀯𑀮𑁄𑀓𑀢𑁄 𑀤𑁂𑀯𑀢𑀸 𑀙 𑀭𑀣𑁂 𑀆𑀦𑁂𑀲𑀼𑀁 𑀢𑀸𑀳𑀺 𑀤𑁂𑀯𑀢𑀸𑀳𑀺 𑀲𑀤𑁆𑀥𑀁 𑀓𑀣𑁂𑀫𑀻’’𑀢𑀺. 𑀢𑀁 𑀦𑀧𑀲𑁆𑀲𑀸𑀫𑀺 𑀓𑀼𑀳𑀺’’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀼𑀧𑁆𑀨𑀤𑀸𑀫𑀁 𑀆𑀳𑀭𑀸𑀧𑁂𑀢𑁆𑀯𑀸 𑀆𑀓𑀸𑀲𑁂 𑀔𑀺𑀧𑀸𑀧𑁂𑀲𑀺. 𑀲𑀸 𑀢𑀁 𑀧𑀼𑀧𑁆𑀨𑀤𑀸𑀫𑀁 𑀭𑀣𑀲𑀻𑀲𑁂 𑀑𑀮𑀫𑁆𑀩𑀫𑀸𑀦𑀁 𑀤𑀺𑀲𑁆𑀯𑀸 𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀲𑀬𑀦𑁂 𑀲𑀬𑀺𑀢𑁆𑀯𑀸 𑀦𑀸𑀲𑀺𑀓𑀯𑀸𑀢𑀁 𑀲𑀦𑁆𑀦𑀺𑀭𑀼𑀚𑁆𑀛𑀺𑀢𑁆𑀯𑀸 𑀘𑀯𑀺𑀢𑁆𑀯𑀸 𑀧𑀸𑀢𑀼𑀭𑀳𑁄𑀲𑀺. 𑀲𑀸 𑀅𑀢𑁆𑀢𑀦𑁄 𑀲𑀸𑀫𑀺𑀓𑀲𑁆𑀲 𑀲𑀸𑀲𑀦𑀁 𑀧𑁂𑀲𑁂𑀲𑀺… ‘‘𑀅𑀳𑀁 𑀧𑀦 𑀧𑀞𑀫𑀁 𑀆𑀕𑀢𑁄𑀫𑁆𑀳𑀺, 𑀢𑁆𑀯𑀁 𑀓𑀲𑁆𑀫𑀸 𑀘𑀺𑀭𑀸𑀬𑀲𑀻’’𑀢𑀺. 𑀉𑀪𑁄𑀧𑀺 𑀭𑀣𑁂 𑀞𑀢𑁆𑀯𑀸 𑀲𑀩𑁆𑀩𑁂 𑀑𑀮𑁄𑀓𑁂𑀦𑁆𑀢𑀸𑀦𑀁𑀬𑁂𑀯 𑀢𑀼𑀲𑀺𑀢𑀧𑀼𑀭𑀁 𑀅𑀕𑀫𑀁𑀲𑀼. 𑀇𑀫𑀲𑁆𑀫𑀺𑀜𑁆𑀳𑀺 𑀯𑀢𑁆𑀣𑀼𑀲𑁆𑀫𑀺𑀁 𑀲𑀸𑀫𑀺𑀓𑀲𑁆𑀲 𑀉𑀧𑀝𑁆𑀞𑀺𑀢𑀕𑀢𑀺𑀦𑀺𑀫𑀺𑀢𑁆𑀢𑀁 𑀪𑀭𑀺𑀬𑀸𑀬 𑀧𑀸𑀓𑀝𑀁 𑀳𑀼𑀢𑁆𑀯𑀸 𑀧𑀼𑀭𑁂𑀢𑀭𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀲𑀸𑀲𑀦𑀁 𑀧𑁂𑀲𑁂𑀲𑀺 𑀢𑁂𑀦 𑀅𑀭𑀺𑀬𑀕𑀸𑀮𑀢𑀺𑀲𑁆𑀲𑀲𑁆𑀲 𑀘𑀺𑀭𑀓𑀸𑀮𑀁 𑀕𑀢𑀺𑀦𑀺𑀫𑀺𑀢𑁆𑀢𑀁 𑀉𑀧𑀝𑁆𑀞𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀦𑀼𑀲𑁆𑀲𑀮𑁄𑀓𑁂 𑀳𑀺 𑀘𑀺𑀭𑀓𑀸𑀮𑀁 𑀢𑀼𑀲𑀺𑀢𑀧𑀼𑀭𑁂 𑀫𑀼𑀳𑀼𑀢𑁆𑀢𑀁𑀯 𑀳𑁄𑀢𑀺. 𑀏𑀯𑀁 𑀧𑀭𑀺𑀲𑀼𑀤𑁆𑀥𑀁 𑀯𑀺𑀧𑀘𑁆𑀘𑀫𑀸𑀦𑀓𑀓𑀫𑁆𑀫𑀸𑀦𑀼𑀭𑀽𑀧𑀁 𑀕𑀢𑀺𑀦𑀺𑀫𑀺𑀢𑁆𑀢𑀁 𑀘𑀺𑀭𑀓𑀸𑀮𑀁 𑀧𑀯𑀢𑁆𑀢𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀤𑀼𑀝𑁆𑀞𑀕𑀸𑀫𑀡𑀺𑀅𑀪𑀬𑀥𑀫𑁆𑀫𑀺𑀓𑀉𑀧𑁆𑀲𑀓𑀸𑀤𑀻𑀦𑀫𑁆𑀧𑀺 𑀯𑀢𑁆𑀣𑀼 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀘𑁄𑀭𑀖𑀸𑀢𑀓𑀲𑁆𑀲 𑀧𑀦 𑀫𑀳𑀸𑀦𑀺𑀭𑀬𑁂 𑀯𑀺𑀧𑀘𑁆𑀘𑀫𑀸𑀦𑀓𑀓𑀫𑁆𑀫𑀸𑀦𑀼𑀭𑀽𑀧𑀁 𑀦𑁂𑀭𑀬𑀕𑁆𑀕𑀺𑀚𑀸𑀮𑀸𑀤𑀺𑀓𑀁 𑀲𑀢𑁆𑀢𑀸𑀳𑀁 𑀉𑀧𑀝𑁆𑀞𑀸𑀢𑀺. 𑀲𑀸𑀯𑀢𑁆𑀣𑀺𑀦𑀕𑀭𑁂 𑀓𑀺𑀭 𑀧𑀜𑁆𑀘𑀲𑀢𑀸 𑀘𑁄𑀭𑀸 𑀩𑀳𑀺𑀦𑀕𑀭𑁂 𑀘𑁄𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀚𑀦𑀧𑀤𑀧𑀼𑀭𑀺𑀲𑁄 𑀢𑁂𑀲𑀁 𑀅𑀩𑁆𑀪𑀦𑁆𑀢𑀭𑁄 𑀳𑀼𑀢𑁆𑀯𑀸 𑀘𑁄𑀭𑀓𑀫𑁆𑀫𑀁 𑀅𑀓𑀸𑀲𑀺, 𑀢𑀤𑀸 𑀢𑁂 𑀲𑀩𑁆𑀩𑁂𑀧𑀺 𑀭𑀸𑀚𑀧𑀼𑀭𑀺𑀲𑀸 𑀅𑀕𑁆𑀕𑀳𑁂𑀲𑀼𑀁. 𑀭𑀸𑀚𑀸 𑀢𑁂 𑀤𑀺𑀲𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀅𑀦𑁆𑀢𑀭𑁂 𑀇𑀫𑁂 𑀲𑀩𑁆𑀩𑁂 𑀫𑀸𑀭𑁂𑀢𑀼𑀁 𑀲𑀫𑀢𑁆𑀣𑀲𑁆𑀲 𑀚𑀻𑀯𑀺𑀢𑀁 𑀤𑀫𑁆𑀫𑀻’’𑀢𑀺 𑀆𑀳. 𑀧𑀜𑁆𑀘𑀲𑀢𑀸 𑀘𑁄𑀭𑀸 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀩𑀦𑁆𑀥𑀸 𑀅𑀜𑁆𑀜𑀫𑀜𑁆𑀜𑀁 𑀲𑀳𑀸𑀬𑀓𑀸𑀢𑀺 𑀅𑀜𑁆𑀜𑀫𑀜𑁆𑀜𑀁 𑀫𑀸𑀭𑁂𑀢𑀼𑀁 𑀦 𑀇𑀘𑁆𑀙𑀺𑀁𑀲𑀼, 𑀚𑀦𑀧𑀤𑀫𑀦𑀼𑀲𑁆𑀲𑁄 𑀧𑀦 ‘‘𑀅𑀳𑀁 𑀫𑀸𑀭𑁂𑀫𑀻’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑁂 𑀫𑀸𑀭𑁂𑀲𑀺. 𑀭𑀸𑀚𑀸 𑀢𑀲𑁆𑀲 𑀢𑀼𑀲𑁆𑀲𑀺𑀢𑁆𑀯𑀸 𑀘𑁄𑀭𑀖𑀸𑀢𑀓𑀓𑀫𑁆𑀫𑀁 𑀅𑀤𑀸𑀲𑀺. 𑀲𑁄 𑀧𑀜𑁆𑀘𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀘𑁄𑀭𑀖𑀸𑀢𑀓𑀓𑀫𑁆𑀫𑀁 𑀆𑀓𑀸𑀲𑀺. 𑀭𑀸𑀚𑀸 𑀢𑀲𑁆𑀲 𑀫𑀳𑀮𑁆𑀮𑀓𑁄𑀢𑀺 𑀯𑀢𑁆𑀯𑀸 𑀅𑀜𑁆𑀜𑀲𑁆𑀲 𑀘𑁄𑀭𑀖𑀸𑀢𑀓 𑀓𑀫𑁆𑀫𑀁 𑀤𑀸𑀧𑁂𑀲𑀺. 𑀲𑁄 𑀘𑁄𑀭𑀖𑀸𑀢𑀓𑀓𑀫𑁆𑀫𑀸 𑀅𑀧𑀦𑀻𑀢𑁄 𑀅𑀜𑁆𑀜𑀢𑀭𑀲𑁆𑀲 𑀲𑀦𑁆𑀢𑀺𑀓𑁂 ¶ 𑀦𑀸𑀲𑀺𑀓𑀯𑀸𑀢𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀳𑀢𑁆𑀣𑀧𑀸𑀤𑀓𑀡𑁆𑀡𑀦𑀸𑀲𑀸𑀤𑀻𑀳𑀺 𑀙𑀺𑀦𑁆𑀤𑀺𑀢𑀩𑁆𑀩𑀸𑀦𑀁 𑀊𑀭𑀽𑀣𑀦𑀓𑀝𑁆𑀞𑀸𑀦𑀁 𑀪𑀺𑀦𑁆𑀤𑀦𑁆𑀢𑀫𑀸𑀭𑁂𑀢𑀩𑁆𑀩𑀬𑀼𑀢𑁆𑀢𑀸𑀦𑀁 𑀦𑀸𑀲𑀺𑀓𑀯𑀸𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀸𑀭𑁂𑀢𑀩𑁆𑀩𑀁 𑀫𑀦𑁆𑀢𑀁 𑀮𑀪𑀺. 𑀲𑁄 𑀭𑀸𑀚𑀸𑀦𑀁 𑀆𑀭𑁄𑀘𑁂𑀢𑁆𑀯𑀸 𑀦𑀸𑀲𑀺𑀓𑀯𑀸𑀢𑁂𑀦 𑀘𑁄𑀭𑀖𑀸𑀢𑀓𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲𑁂𑀯 𑀢𑀺𑀁𑀲 𑀯𑀲𑁆𑀲𑀸𑀦𑀺 𑀅𑀢𑀺𑀓𑁆𑀓𑀫𑀺. 𑀲𑁄 𑀧𑀘𑁆𑀙𑀸 𑀫𑀳𑀮𑁆𑀮𑀓𑁄 𑀳𑀼𑀢𑁆𑀯𑀸 𑀫𑀭𑀡𑀫𑀜𑁆𑀘𑁂 𑀦𑀺𑀧𑀚𑁆𑀚𑀺 ‘‘𑀲𑀢𑁆𑀢𑀤𑀺𑀯𑀲𑁂𑀦 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻’’𑀢𑀺. 𑀫𑀭𑀡𑀓𑀸𑀮𑁂 𑀫𑀳𑀦𑁆𑀢𑀁 𑀯𑁂𑀤𑀦𑀁 𑀅𑀳𑁄𑀲𑀺. 𑀲𑁄 𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀬 𑀫𑀳𑀸𑀲𑀤𑁆𑀤𑀁 𑀓𑀢𑁆𑀯𑀸 𑀤𑀼𑀓𑁆𑀔𑀺𑀢𑁄 𑀳𑁄𑀢𑀺. 𑀢𑀲𑁆𑀲 𑀲𑀤𑁆𑀤𑁂𑀦 𑀪𑀻𑀢𑀸 𑀫𑀦𑀼𑀲𑁆𑀲𑀸 𑀉𑀪𑀢𑁄𑀧𑀲𑁆𑀲𑁂 𑀕𑁂𑀳𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺𑀁𑀲𑀼. 𑀢𑀲𑁆𑀲 𑀫𑀭𑀡𑀤𑀺𑀯𑀲𑁂 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀏𑀢𑀲𑁆𑀲 𑀓𑀸𑀮𑀁 𑀓𑀢𑁆𑀯𑀸 𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀅𑀦𑀼𑀓𑀫𑁆𑀧𑀁 𑀧𑀝𑀺𑀘𑁆𑀘 𑀕𑁂𑀳𑀤𑁆𑀯𑀸𑀭𑁂 𑀧𑀸𑀓𑀝𑁄 𑀅𑀳𑁄𑀲𑀺. 𑀲𑁄 𑀓𑀼𑀚𑁆𑀛𑀺𑀢𑁆𑀯𑀸 𑀦𑀸𑀲𑀺𑀓𑀯𑀸𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀬𑀸𑀯 𑀢𑀢𑀺𑀬𑀁 𑀯𑀺𑀲𑁆𑀲𑀚𑁆𑀚𑀫𑀸𑀦𑁄𑀧𑀺 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀣𑁂𑀭𑀁 𑀅𑀢𑀺𑀭𑁂𑀓𑁂𑀦 𑀯𑀺𑀭𑁄𑀘𑀫𑀸𑀦𑀁 𑀤𑀺𑀲𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀧𑀸𑀬𑀸𑀲𑀁 𑀣𑁂𑀭𑀲𑁆𑀲 𑀤𑀸𑀧𑁂𑀲𑀺. 𑀣𑁂𑀭𑁄 𑀫𑀗𑁆𑀕𑀮𑀁 𑀯𑀟𑁆𑀠𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀘𑁄𑀭𑀖𑀸𑀢𑀓𑁄 𑀣𑁂𑀭𑀲𑁆𑀲 𑀤𑀺𑀦𑁆𑀦𑀤𑀸𑀦𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀘𑀯𑀺𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺, 𑀦𑀺𑀭𑀬𑀚𑀸𑀮𑀸𑀤𑀬𑁄 𑀅𑀦𑁆𑀢𑀭𑀥𑀸𑀬𑀦𑁆𑀢𑀺. 𑀲𑁄 𑀅𑀦𑀸𑀕𑀢𑁂𑀧𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺. 𑀏𑀯𑀁 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀯𑀸 𑀯𑀺𑀧𑀘𑁆𑀘𑀫𑀸𑀦 𑀓𑀓𑀫𑁆𑀫𑀸𑀦𑀼𑀭𑀽𑀧𑀁 𑀕𑀢𑀺𑀦𑀺𑀫𑀺𑀢𑁆𑀢𑀫𑁆𑀧𑀺 𑀲𑀢𑁆𑀢𑀸𑀳𑀧𑀭𑀫𑀁 𑀉𑀧𑀝𑁆𑀞𑀸𑀢𑀺. 𑀅𑀢𑁆𑀣𑀺𑀓𑁂𑀳𑀺 𑀧𑀦 𑀲𑀳𑀲𑁆𑀲𑀯𑀢𑁆𑀣𑀼 𑀲𑀕𑀸𑀣𑀸𑀯𑀕𑁆𑀕𑁂𑀲𑀼 𑀑𑀮𑁄𑀓𑁂𑀢𑀩𑁆𑀩𑁄. 𑀪𑀕𑀯𑀢𑁄 𑀧𑀦 𑀧𑀭𑀺𑀲𑀼𑀤𑁆𑀥𑀁 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀲𑁆𑀲 𑀲𑁄𑀫𑀦𑀲𑁆𑀲 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀼𑀲𑀮𑀲𑁆𑀲 𑀓𑀫𑁆𑀫𑀲𑁆𑀲 𑀯𑁂𑀕𑁂𑀦 𑀓𑀸𑀮𑀤𑀻𑀧𑀤𑁂𑀲𑀓𑀼𑀮𑀫𑀸𑀢𑀭𑀯𑀲𑁂𑀦 𑀇𑀫𑀸𑀦𑀺 𑀧𑀜𑁆𑀘𑀕𑀢𑀺𑀦𑀺𑀫𑀺𑀢𑁆𑀢𑀸𑀦𑀺 𑀘𑀺𑀭𑀓𑀸𑀮𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺. 𑀘𑀺𑀭𑀓𑀸𑀮𑀦𑁆𑀢𑀺 𑀫𑀦𑀼𑀲𑁆𑀲𑀮𑁄𑀓𑁂 𑀲𑀢𑁆𑀢𑀸𑀳𑀫𑀢𑁆𑀢𑀁, 𑀢𑀼𑀲𑀺𑀢𑀧𑀼𑀭𑁂𑀫𑀼𑀳𑀼𑀢𑁆𑀢𑀫𑁂𑀯, 𑀢𑀣𑀸𑀧𑀺 𑀫𑀦𑀼𑀲𑁆𑀲𑀮𑁄𑀓𑁂 𑀲𑀢𑁆𑀢𑀸𑀳𑀫𑀢𑁆𑀢𑁂 𑀓𑀸𑀮𑁂 𑀤𑁂𑀯𑀢𑀸𑀦𑀁 𑀧𑀜𑁆𑀘𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺 𑀢𑀜𑁆𑀘 𑀔𑁄 𑀧𑀼𑀜𑁆𑀜𑀯𑀦𑁆𑀢𑀸𑀦𑀁𑀬𑁂𑀯 𑀧𑀜𑁆𑀜𑀸𑀬𑀦𑁆𑀢𑀺, 𑀦 𑀲𑀩𑁆𑀩𑁂𑀲𑀁 𑀫𑀦𑀼𑀲𑁆𑀲𑀮𑁄𑀓𑁂 𑀧𑀼𑀜𑁆𑀜𑀯𑀦𑁆𑀢𑀸𑀦𑀁 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀦𑀁 𑀯𑀺𑀬 𑀢𑀁 𑀤𑀺𑀲𑁆𑀯𑀸 𑀫𑀳𑁂𑀲𑀓𑁆𑀔𑀸 𑀤𑁂𑀯𑀢𑀸 𑀚𑀸𑀦𑀦𑁆𑀢𑀺, 𑀦 𑀅𑀧𑁆𑀧𑁂𑀲𑀓𑁆𑀔𑀸, 𑀫𑀦𑀼𑀲𑁆𑀲𑀮𑁄𑀓𑁂 𑀦𑁂𑀫𑀺𑀢𑁆𑀢𑀓𑀸 𑀩𑁆𑀭𑀸𑀳𑁆𑀫𑀡𑀧𑀡𑁆𑀟𑀺𑀢𑀸𑀤𑀬𑁄𑀯𑀺𑀬. 𑀫𑀳𑁂𑀲𑀓𑁆𑀔𑀸 𑀤𑁂𑀯𑀢𑀸 𑀢𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀤𑀺𑀲𑁆𑀯𑀸 𑀦𑀦𑁆𑀤𑀯𑀦𑀁 𑀦𑁂𑀢𑁆𑀯𑀸 ‘‘𑀓𑀸𑀮𑁄 𑀤𑁂𑀯𑀸’’𑀢𑀺 𑀆𑀤𑀻𑀳𑀺 𑀬𑀸𑀘𑀦𑁆𑀢𑀺. 𑀫𑀳𑀸𑀲𑀓𑁆𑀓𑁄 𑀢𑀢𑁆𑀣𑁂𑀯 𑀦𑀦𑁆𑀤𑀯𑀦𑀼𑀬𑁆𑀬𑀸𑀦𑁂 𑀓𑀸𑀮𑀤𑀻𑀧𑀤𑁂𑀲𑀓𑀼𑀮𑀫𑀸𑀢𑀭𑀯𑀲𑁂𑀦 𑀧𑀜𑁆𑀘 𑀯𑀺𑀮𑁄𑀓𑁂𑀢𑁆𑀯𑀸 𑀘𑀯𑀺𑀢𑁆𑀯𑀸 𑀢𑀫𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀫𑀳𑀸𑀫𑀸𑀬𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀻𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀫𑀯𑀕𑀦𑁆𑀢𑀩𑁆𑀩𑀁.

𑀢𑀢𑁆𑀣 ¶ 𑀓𑀸𑀮𑀦𑁆𑀢𑀺 𑀫𑀦𑀼𑀲𑁆𑀲𑀮𑁄𑀓𑁂 𑀏𑀓𑀽𑀦𑀢𑀺𑀁𑀲𑀢𑀺𑀫𑁂 𑀯𑀲𑁆𑀲𑁂 𑀯𑁂𑀲𑀸𑀔𑀧𑀼𑀡𑁆𑀡𑀫𑀤𑀺𑀯𑀲𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀓𑀸𑀮𑀁 𑀑𑀮𑁄𑀓𑁂𑀲𑀺. 𑀤𑀻𑀧𑀦𑁆𑀢𑀺 𑀚𑀫𑁆𑀩𑀼𑀤𑀻𑀧𑁂𑀬𑁂𑀯 𑀪𑀯𑀺𑀲𑁆𑀲𑀸𑀫𑀺, 𑀦 𑀅𑀜𑁆𑀜𑀤𑀻𑀧𑁂𑀲𑀽𑀢𑀺 𑀤𑀻𑀧𑀁 𑀑𑀮𑁄𑀓𑁂𑀲𑀺. 𑀤𑁂𑀲𑀦𑁆𑀢𑀺 𑀫𑀚𑁆𑀛𑀺𑀫𑀤𑁂𑀲𑁂𑀬𑁂𑀯, 𑀢𑀜𑁆𑀘 𑀔𑁄 𑀫𑀳𑀸𑀩𑁄𑀥𑀺𑀫𑀡𑁆𑀟𑁂𑀬𑁂𑀯, 𑀦 𑀅𑀜𑁆𑀜𑀤𑁂𑀲𑁂𑀢𑀺 𑀤𑁂𑀲𑀁 𑀑𑀮𑁄𑀓𑁂𑀲𑀺. 𑀓𑀼𑀮𑀦𑁆𑀢𑀺 𑀤𑁆𑀯𑁂 𑀓𑀼𑀮𑀸𑀦𑀺 𑀔𑀢𑁆𑀢𑀺𑀬𑀓𑀼𑀮𑀩𑁆𑀭𑀸𑀳𑁆𑀫𑀡𑀓𑀼𑀮𑀯𑀲𑁂𑀦. 𑀢𑀢𑁆𑀣 𑀬𑀲𑁆𑀫𑀺𑀁 𑀓𑀸𑀮𑁂 𑀔𑀢𑁆𑀢𑀺𑀬𑀓𑀼𑀮𑀁 𑀮𑁄𑀓𑁂 𑀲𑁂𑀝𑁆𑀞𑀪𑀸𑀯𑁂𑀦 ‘‘𑀅𑀬𑀫𑁂𑀯 𑀮𑁄𑀓𑁂 𑀅𑀕𑁆𑀕𑁄’’𑀢𑀺 𑀲𑀫𑁆𑀫𑀦𑁆𑀦𑀢𑀺, 𑀢𑀤𑀸 𑀔𑀢𑁆𑀢𑀺𑀬𑀓𑀼𑀮𑁂𑀬𑁂𑀯 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀬𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀓𑀼𑀮𑀁 𑀅𑀬𑀫𑁂𑀯 𑀮𑁄𑀓𑁂 𑀅𑀕𑁆𑀕𑁄𑀢𑀺, 𑀢𑀤𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑁂𑀬𑁂𑀯 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀇𑀤𑀸𑀦𑀺 𑀧𑀦 𑀔𑀢𑁆𑀢𑀺𑀬𑀓𑀼𑀮𑀫𑁂𑀯 𑀅𑀕𑁆𑀕𑁄𑀢𑀺 𑀲𑀫𑁆𑀫𑀦𑁆𑀦𑀦𑁆𑀢𑀺. 𑀔𑀢𑁆𑀢𑀺𑀬𑀓𑀼𑀮𑁂𑀧𑀺 𑀲𑀓𑁆𑀬𑀭𑀸𑀚𑀸𑀦𑁄𑀯 𑀮𑁄𑀓𑁂 𑀉𑀢𑁆𑀢𑀫𑀸, 𑀅𑀲𑀫𑁆𑀪𑀺𑀦𑁆𑀦𑀔𑀢𑁆𑀢𑀺𑀬𑀓𑀼𑀮𑀢𑁆𑀢𑀸 𑀢𑀲𑁆𑀫𑀸 𑀲𑀓𑁆𑀬𑀭𑀸𑀚𑀓𑀼𑀮𑁂𑀬𑁂𑀯 𑀪𑀯𑀺𑀲𑁆𑀲𑀸𑀫𑀻𑀢𑀺 𑀓𑀼𑀮𑀁 𑀑𑀮𑁄𑀓𑁂𑀲𑀺. 𑀫𑀸𑀢𑀭𑀦𑁆𑀢𑀺 𑀫𑀫 𑀫𑀸𑀢𑀭𑀁 𑀤𑀲 𑀫𑀸𑀲𑀸𑀦𑀺 𑀲𑀢𑁆𑀢 𑀘 𑀤𑀺𑀯𑀲𑀸𑀦𑀺 𑀞𑀲𑁆𑀲𑀢𑀺, 𑀏𑀢𑁆𑀣𑀦𑁆𑀢𑀭𑁂 𑀫𑀫 𑀫𑀸𑀢𑀼𑀬𑀸 𑀅𑀭𑁄𑀕𑁄 𑀪𑀯𑀺𑀲𑁆𑀲𑀢𑀻𑀢𑀺 𑀫𑀸𑀢𑀭𑀫𑁆𑀧𑀺 𑀑𑀮𑁄𑀓𑁂𑀲𑀺. 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀧𑀦 𑀧𑀘𑁆𑀙𑀺𑀫𑀯𑀬𑁂 𑀞𑀺𑀢𑀸. 𑀏𑀯𑀁 𑀬𑀼𑀢𑁆𑀢𑀺𑀢𑁄𑀧𑀺 𑀆𑀕𑀫𑀢𑁄𑀧𑀺 𑀪𑀕𑀯𑀢𑁄 𑀦𑀺𑀩𑁆𑀩𑀸𑀦𑀘𑀺𑀢𑁆𑀢𑀲𑁆𑀲 𑀧𑀝𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀕𑀳𑀺𑀢𑀦𑀺𑀫𑀺𑀢𑁆𑀢𑀫𑁂𑀯 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀩𑁆𑀩𑀜𑁆𑀜𑀼𑀚𑀺𑀦𑀦𑀺𑀩𑁆𑀩𑀸𑀦, 𑀘𑀺𑀢𑁆𑀢𑀲𑁆𑀲 𑀕𑁄𑀘𑀭𑀁 𑀲𑀼𑀪𑀁;

𑀯𑀺𑀜𑁆𑀜𑁂𑀬𑁆𑀬𑀁 𑀕𑀢𑀺𑀦𑀺𑀫𑀺𑀢𑁆𑀢𑀁, 𑀕𑀦𑁆𑀣𑁂𑀳𑀺 𑀅𑀯𑀺𑀭𑁄𑀥𑀢𑁄.

𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑀫𑁆𑀧𑀺 𑀩𑁄𑀥𑀺𑀫𑀡𑁆𑀟𑁂𑀬𑁂𑀯 𑀪𑀯𑀺𑀲𑁆𑀲𑀢𑀺 𑀯𑀼𑀢𑁆𑀢𑀜𑁆𑀳𑁂𑀢𑀁 𑀉𑀧𑀭𑀺𑀧𑀡𑁆𑀡𑀸𑀲𑀓𑁂 ‘‘𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀦𑀸𑀕𑀢𑁂 𑀪𑀯𑀺𑀲𑁆𑀲𑀢𑀺 𑀲𑀸𑀲𑀦𑀲𑁆𑀲 𑀳𑀺 𑀑𑀲𑀓𑁆𑀓𑀦𑀓𑀸𑀮𑁂 𑀇𑀫𑀲𑁆𑀫𑀺𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀥𑀸𑀢𑀼𑀬𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀳𑀸𑀘𑁂𑀢𑀺𑀬𑀢𑁄 𑀦𑀸𑀕𑀤𑀻𑀧𑁂 𑀭𑀸𑀚𑀸𑀬𑀢𑀦𑀘𑁂𑀢𑀺𑀬𑀁, 𑀢𑀢𑁄 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀁 𑀕𑀫𑀺𑀲𑁆𑀲𑀦𑁆𑀢𑀺. 𑀦𑀸𑀕𑀪𑀯𑀦𑀢𑁄𑀧𑀺 𑀤𑁂𑀯𑀮𑁄𑀓𑀢𑁄𑀧𑀺 𑀥𑀸𑀢𑀼𑀬𑁄 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀫𑁂𑀯 𑀕𑀫𑀺𑀲𑁆𑀲𑀦𑁆𑀢𑀺 𑀲𑀸𑀲𑀧𑀫𑀢𑁆𑀢𑀸𑀧𑀺 𑀥𑀸𑀢𑀼𑀬𑁄 𑀅𑀦𑁆𑀢𑀭𑀸 𑀦 𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑀸 𑀥𑀸𑀢𑀼𑀬𑁄 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀭𑀸𑀲𑀺𑀪𑀽𑀢𑀸 𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑀸 𑀯𑀺𑀬 𑀏𑀓𑀕𑁆𑀖𑀦𑀸 𑀳𑀼𑀢𑁆𑀯𑀸 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑀺𑀲𑁆𑀲𑀦𑁆𑀢𑀺, 𑀢𑀸 𑀤𑀲𑀲𑀳𑀲𑁆𑀲𑀮𑁄𑀓𑀥𑀸𑀢𑀼𑀁 𑀨𑀭𑀺𑀲𑁆𑀲𑀦𑁆𑀢𑀺. 𑀢𑀢𑁄 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ''𑀅𑀚𑁆𑀚 𑀲𑀢𑁆𑀣𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑀅𑀚𑁆𑀚 𑀲𑀸𑀲𑀦𑀁 𑀑𑀲𑀓𑁆𑀓𑀢𑀺 𑀧𑀘𑁆𑀙𑀺𑀫𑀤𑀲𑁆𑀲𑀦𑀁 𑀇𑀤𑀁 𑀅𑀫𑁆𑀳𑀸𑀓’’𑀦𑁆𑀢𑀺 𑀤𑀲𑀩𑀮𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀤𑀺𑀯𑀲𑀢𑁄 𑀫𑀳𑀦𑁆𑀢𑀢𑀭𑀁 𑀓𑀸𑀭𑀼𑀜𑁆𑀜𑀁 𑀓𑀭𑀺𑀲𑁆𑀲𑀦𑁆𑀢𑀺 𑀞𑀧𑁂𑀢𑁆𑀯𑀸 𑀅𑀦𑀸𑀕𑀸𑀫𑀺𑀔𑀻𑀡𑀸𑀲𑀯𑁂 𑀅𑀯𑀲𑁂𑀲𑀸 𑀲𑀓𑀢𑁆𑀢𑀪𑀸𑀯𑁂𑀦 𑀲𑀦𑁆𑀥𑀸𑀭𑁂𑀢𑀼𑀁 ¶ 𑀦𑀸𑀲𑀓𑁆𑀔𑀺𑀁𑀲𑀼, 𑀥𑀸𑀢𑀼𑀲𑀭𑀻𑀭𑀢𑁄 𑀢𑁂𑀚𑁄𑀥𑀸𑀢𑀼 𑀉𑀝𑁆𑀞𑀳𑀺𑀢𑁆𑀯𑀸 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀉𑀕𑁆𑀕𑀘𑁆𑀙𑀺𑀲𑁆𑀲𑀢𑀺. 𑀲𑀸𑀲𑀧𑀫𑀢𑁆𑀢𑀸𑀬𑀧𑀺 𑀥𑀸𑀢𑀼𑀬𑀸 𑀲𑀢𑀺 𑀏𑀓𑀚𑀸𑀮𑀸 𑀪𑀯𑀺𑀲𑁆𑀲𑀢𑀺 𑀥𑀸𑀢𑀽𑀲𑀼 𑀧𑀭𑀺𑀬𑀸𑀤𑀸𑀦𑀁 𑀕𑀢𑀸𑀲𑀼 𑀧𑀘𑁆𑀙𑀺𑀚𑁆𑀚𑀺𑀲𑁆𑀲𑀢𑀺. 𑀏𑀯𑀁 𑀫𑀳𑀦𑁆𑀢𑀁 𑀆𑀦𑀼𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀥𑀸𑀢𑀽𑀲𑀼 𑀅𑀦𑁆𑀢𑀭𑀳𑀺𑀢𑀸𑀲𑀼 𑀲𑀸𑀲𑀦𑀁 𑀅𑀦𑁆𑀢𑀭𑀳𑀺𑀢𑀁 𑀦𑀸𑀫 𑀳𑁄𑀢𑀺. 𑀬𑀸𑀯 𑀏𑀯𑀁 𑀦 𑀅𑀦𑁆𑀢𑀭𑀥𑀸𑀬𑀢𑀺, 𑀢𑀸𑀯 𑀅𑀦𑀦𑁆𑀢𑀭𑀥𑀸𑀦𑀫𑁂𑀯 𑀲𑀸𑀲𑀦𑀁. 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀸𑀲𑀧𑀫𑀢𑁆𑀢𑀸 𑀥𑀸𑀢𑀼 𑀢𑀺𑀝𑁆𑀞𑀢𑀺, 𑀢𑀸𑀯 𑀩𑀼𑀤𑁆𑀥𑀓𑀸𑀮𑀢𑁄 𑀧𑀘𑁆𑀙𑀸𑀢𑀺 𑀦 𑀯𑁂𑀤𑀺𑀢𑀩𑁆𑀩𑀁 𑀥𑀸𑀢𑀽𑀲𑀼 𑀳𑀺 𑀞𑀺𑀢𑀸𑀲𑀼 𑀩𑀼𑀤𑁆𑀥𑀸 𑀞𑀺𑀢𑀸 𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀏𑀢𑁆𑀣𑀦𑁆𑀢𑀭𑁂 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦𑀺𑀯𑀸𑀭𑀺𑀢𑀸𑀯 𑀳𑁄𑀢𑀺. 𑀢𑁂𑀦𑁂𑀯 𑀯𑀤𑀸𑀫.

𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑀢𑁄, 𑀧𑀘𑁆𑀙𑀸 𑀥𑀭𑀦𑁆𑀢𑀺 𑀥𑀸𑀢𑀼𑀬𑁄;

𑀅𑀦𑀺𑀩𑁆𑀩𑀼𑀢𑁄𑀯 𑀲𑀫𑁆𑀩𑀼𑀤𑁆𑀥𑁄, 𑀅𑀜𑁆𑀜𑀩𑀼𑀤𑁆𑀥𑀲𑁆𑀲 𑀯𑀸𑀭𑀺𑀢𑀸.

𑀚𑀻𑀯𑀫𑀸𑀦𑁂𑀧𑀺 𑀲𑀫𑁆𑀩𑀼𑀤𑁆𑀥𑁂, 𑀦𑀺𑀩𑁆𑀩𑀼𑀢𑁂 𑀯𑀸 𑀢𑀣𑀸𑀕𑀢𑁂;

𑀬𑁄 𑀓𑀭𑁄𑀢𑀺 𑀲𑀫𑀁 𑀧𑀽𑀚𑀁, 𑀨𑀮𑀁 𑀢𑀸𑀲 𑀲𑀫𑀁 𑀲𑀺𑀬𑀸’𑀢𑀺.

𑀇𑀢𑀺 𑀲𑀸𑀕𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑀯𑀺𑀘𑀭𑀺𑀢𑁂 𑀲𑀻𑀫𑀯𑀺𑀲𑁄𑀥𑀦𑁂 𑀥𑀫𑁆𑀫𑀯𑀡𑁆𑀡𑀦𑀸𑀬

𑀦𑀺𑀩𑁆𑀩𑀸𑀦𑀓𑀡𑁆𑀟𑁄 𑀢𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.

𑁪. 𑀲𑀫𑀲𑀻𑀲𑀺𑀓𑀡𑁆𑀟𑁄

𑀇𑀤𑀸𑀦𑀺 𑀲𑀗𑁆𑀖𑁄 𑀘 𑀤𑀼𑀮𑁆𑀮𑀪𑁄 𑀮𑁄𑀓𑁂𑀢𑀺 𑀧𑀤𑀲𑁆𑀲 𑀯𑀡𑁆𑀡𑀦𑀸𑀓𑁆𑀓𑀫𑁄 𑀲𑀫𑁆𑀧𑀢𑁆𑀢𑁄. 𑀢𑀢𑁆𑀣 𑀲𑀗𑁆𑀖𑁄𑀢𑀺 𑀧𑀭𑀫𑀢𑁆𑀣𑀲𑀫𑁆𑀫𑀼𑀢𑀺𑀯𑀲𑁂𑀦 𑀤𑀼𑀯𑀺𑀥𑁄 𑀳𑁄𑀢𑀺. 𑀢𑁂𑀲𑀼 𑀧𑀭𑀫𑀢𑁆𑀣𑀲𑀗𑁆𑀖𑁄 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺, 𑀅𑀝𑁆𑀞𑀧𑀼𑀭𑀺𑀲𑀧𑀼𑀕𑁆𑀕𑀮𑀸, 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀧𑀼𑀕𑁆𑀕𑀮𑀸, 𑀅𑀝𑁆𑀞𑀲𑀢𑀫𑁆𑀧𑀺 𑀧𑀼𑀭𑀺𑀲𑀧𑀼𑀕𑁆𑀕𑀮𑀸𑀢𑀺 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀲𑀗𑁆𑀔𑁂𑀧𑀯𑀲𑁂𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑁄 𑀨𑀮𑀝𑁆𑀞𑁄𑀢𑀺 𑀏𑀓𑀁 𑀬𑀼𑀕𑀁, 𑀲𑀓𑀤𑀸𑀫𑀺𑀫𑀕𑁆𑀕𑀝𑁆𑀞𑁄 𑀨𑀮𑀝𑁆𑀞𑁄𑀢𑀺 𑀏𑀓𑀁, 𑀅𑀦𑀸𑀕𑀸𑀫𑀺𑀫𑀕𑁆𑀕𑀝𑁆𑀞𑁄 𑀨𑀮𑀝𑁆𑀞𑁄𑀢𑀺 𑀏𑀓𑀁, 𑀅𑀭𑀳𑀢𑁆𑀢𑀫𑀕𑁆𑀕𑀝𑁆𑀞𑁄 𑀨𑀮𑀝𑁆𑀞𑁄𑀢𑀺 𑀏𑀓𑀦𑁆𑀢𑀺 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺 𑀳𑁄𑀦𑁆𑀢𑀺. 𑀘𑀢𑁆𑀢𑀸𑀭𑁄 𑀫𑀕𑁆𑀕𑀝𑁆𑀞𑀸 𑀘𑀢𑁆𑀢𑀸𑀭𑁄 𑀨𑀮𑀝𑁆𑀞𑀸𑀢𑀺 𑀅𑀝𑁆𑀞𑀧𑀼𑀭𑀺𑀲𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺. 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀧𑀼𑀕𑁆𑀕𑀮𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑁄 𑀧𑀞𑀫𑀛𑀸𑀦𑀺𑀓𑀸𑀤𑀺𑀯𑀲𑁂𑀦 𑀧𑀜𑁆𑀘, 𑀢𑀣𑀸 𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀅𑀭𑀳𑀢𑁆𑀢𑀫𑀕𑁆𑀕𑀝𑁆𑀞𑀸𑀧𑀺 𑀧𑀜𑁆𑀘 𑀧𑀜𑁆𑀘𑀸𑀢𑀺 𑀯𑀻𑀲𑀢𑀺 𑀫𑀕𑁆𑀕𑀝𑁆𑀞𑀧𑀼𑀕𑁆𑀕𑀮𑀸, 𑀢𑀣𑀸 𑀨𑀮𑀝𑁆𑀞𑀸𑀧𑀺 𑀲𑁄𑀢𑀧𑀢𑁆𑀢𑀺𑀨𑀮𑀝𑁆𑀞𑀸𑀤𑀺𑀯𑀲𑁂𑀦 𑀧𑀜𑁆𑀘 𑀧𑀜𑁆𑀘𑀸𑀢𑀺 𑀯𑀻𑀲𑀢𑀺 𑀨𑀮𑀝𑁆𑀞𑀸𑀢𑀺 𑀘𑀢𑁆𑀢𑀸𑀮𑀻𑀲𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺. 𑀏𑀢𑁆𑀣 𑀘 𑀫𑀕𑁆𑀕𑀲𑁆𑀲 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑁆𑀢𑀸 𑀓𑀣𑀁 𑀯𑀻𑀲𑀢𑀺𑀫𑀕𑁆𑀕𑀝𑁆𑀞𑀸 𑀧𑀼𑀕𑁆𑀕𑀮𑀸 𑀪𑀯𑁂𑀬𑁆𑀬𑀼𑀦𑁆𑀢𑀺.

𑀯𑀼𑀘𑁆𑀘𑀢𑁂𑀧𑀸𑀤𑀓𑀚𑁆𑀛𑀸𑀦𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁂𑀲𑀼𑀧𑀺 ¶ 𑀳𑀺 𑀅𑀜𑁆𑀜𑀢𑀭𑀯𑀲𑁂𑀦 𑀢𑀁 𑀢𑀁 𑀛𑀸𑀦𑀲𑀤𑀺𑀲𑀯𑀺𑀢𑀓𑁆𑀓𑀸𑀤𑀺𑀅𑀗𑁆𑀕𑀧𑀸𑀢𑀼𑀪𑀸𑀯𑁂𑀦 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀝𑁆𑀞𑀸 𑀧𑀞𑀫𑀚𑁆𑀛𑀸𑀦𑀺𑀓𑀸𑀤𑀺𑀯𑁄𑀳𑀸𑀭𑀁 𑀮𑀪𑀦𑁆𑀢𑀸 𑀧𑀘𑁆𑀘𑁂𑀓𑀁 𑀧𑀜𑁆𑀘𑀧𑀜𑁆𑀘𑀥𑀸 𑀯𑀺𑀪𑀚𑀺𑀬𑀦𑁆𑀢𑀺, 𑀢𑀲𑁆𑀫𑀸 𑀯𑀻𑀲𑀢𑀺 𑀫𑀕𑁆𑀕𑀝𑁆𑀞𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀬𑀁 𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑀲𑁆𑀲 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀯𑀺𑀧𑀲𑁆𑀲𑀦𑀸 𑀧𑀯𑀢𑁆𑀢𑀸, 𑀢𑀁 𑀧𑀸𑀤𑀓𑀚𑁆𑀛𑀸𑀦𑀁 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀬 𑀧𑀤𑀝𑁆𑀞𑀸𑀦𑀪𑀸𑀯𑀢𑁄. 𑀬𑀁 𑀬𑀁 𑀛𑀸𑀦𑀁 𑀲𑀫𑁆𑀫𑀲𑀦𑁆𑀢𑀲𑁆𑀲 𑀲𑀸 𑀧𑀯𑀢𑁆𑀢𑀸, 𑀢𑀁 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀁. ‘‘𑀅𑀳𑁄 𑀯𑀢 𑀫𑁂 𑀧𑀞𑀫𑀚𑁆𑀛𑀸𑀦𑀲𑀤𑀺𑀲𑁄 𑀫𑀕𑁆𑀕𑁄 𑀧𑀜𑁆𑀘𑀗𑁆𑀕𑀺𑀓𑁄, 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀲𑀤𑀺𑀲𑁄 𑀘𑀢𑀼𑀭𑀗𑁆𑀕𑀺𑀓𑀸𑀤𑀺𑀪𑁂𑀤𑁄 𑀫𑀕𑁆𑀕𑁄 𑀪𑀯𑁂𑀬𑁆𑀬𑀸’’𑀢𑀺 𑀏𑀯𑀁 𑀬𑁄𑀕𑀸𑀯𑀘𑀭𑀲𑁆𑀲 𑀉𑀧𑁆𑀧𑀦𑁆𑀦𑀚𑁆𑀛𑀸𑀲𑀬𑁄 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁄 𑀦𑀸𑀫. 𑀢𑀢𑁆𑀣 𑀬𑁂𑀦 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀧𑀓𑀺𑀡𑁆𑀡𑀓𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀫𑀕𑁆𑀕𑁄 𑀉𑀧𑁆𑀧𑀸𑀤𑀺𑀢𑁄 𑀳𑁄𑀢𑀺, 𑀢𑀲𑁆𑀲 𑀲𑁄 𑀫𑀕𑁆𑀕𑁄 𑀧𑀞𑀫𑀚𑁆𑀛𑀸𑀦𑀸𑀤𑀺 𑀢𑀁 𑀢𑀁 𑀧𑀸𑀤𑀓𑀚𑁆𑀛𑀸𑀦𑀲𑀤𑀺𑀲𑁄 𑀳𑁄𑀢𑀺. 𑀲𑀘𑁂 𑀧𑀦 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀁 𑀓𑀺𑀜𑁆𑀘𑀺𑀛𑀸𑀦𑀁 𑀦𑀢𑁆𑀣𑀺, 𑀓𑁂𑀯𑀮𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀛𑀸𑀦𑀁 𑀲𑀫𑁆𑀫𑀲𑀺𑀢𑁆𑀯𑀸 𑀫𑀕𑁆𑀕𑁄 𑀉𑀧𑁆𑀧𑀸𑀤𑀺𑀢𑁄 𑀳𑁄𑀢𑀺, 𑀢𑀲𑁆𑀲 𑀲𑁄 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀲𑀤𑀺𑀲𑁄 𑀳𑁄𑀢𑀺. 𑀬𑀤𑀸 𑀧𑀦𑀬𑀁 𑀓𑀺𑀜𑁆𑀘𑀺 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀅𑀜𑁆𑀜𑀁 𑀲𑀫𑁆𑀫𑀲𑀺𑀢𑁆𑀯𑀸 𑀫𑀕𑁆𑀕𑁄 𑀉𑀧𑁆𑀧𑀸𑀤𑀺𑀢𑁄 𑀳𑁄𑀢𑀺, 𑀢𑀤𑀸 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦 𑀤𑁆𑀯𑀻𑀲𑀼 𑀅𑀜𑁆𑀜𑀢𑀭𑀲𑀤𑀺𑀲𑁄 𑀳𑁄𑀢𑀺. 𑀏𑀯𑀁 𑀲𑀫𑀣𑀬𑀸𑀦𑀺𑀓𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀭𑀺𑀬𑀸𑀦𑀁 𑀯𑀸 𑀧𑀸𑀤𑀓𑀚𑁆𑀛𑀸𑀦𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀅𑀜𑁆𑀜𑀢𑀭𑀛𑀸𑀦𑀲𑀤𑀺𑀲𑀲𑁆𑀲 𑀫𑀕𑁆𑀕𑀗𑁆𑀕𑀺𑀓𑀲𑁆𑀲 𑀧𑀯𑀢𑁆𑀢𑀦𑀢𑁄 𑀧𑀼𑀕𑁆𑀕𑀮𑀪𑁂𑀤𑀯𑀲𑁂𑀦 𑀯𑀻𑀲𑀢𑀺 𑀫𑀕𑁆𑀕𑀝𑁆𑀞𑀸 𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺, 𑀢𑀣𑀸 𑀨𑀮𑀝𑁆𑀞𑀸𑀧𑀺 𑀯𑀻𑀲𑀢𑀻𑀢𑀺 𑀘𑀢𑁆𑀢𑀸𑀮𑀻𑀲𑀅𑀭𑀺𑀬𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺. 𑀅𑀧𑀭𑀫𑁆𑀧𑀺 𑀲𑀘𑁂 𑀧𑀦 𑀧𑀼𑀕𑁆𑀕𑀮𑀲𑁆𑀲 𑀢𑀣𑀸 𑀯𑀺𑀥𑁄 𑀅𑀚𑁆𑀛𑀸𑀲𑀬𑁄 𑀦𑀢𑁆𑀣𑀺, 𑀅𑀦𑀼𑀮𑁄𑀫𑀯𑀲𑁂𑀦 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀉𑀧𑀭𑀽𑀧𑀭𑀺𑀛𑀸𑀦𑀥𑀫𑁆𑀫𑁂 𑀲𑀫𑁆𑀫𑀲𑀺𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑁄 𑀧𑀸𑀤𑀓𑀚𑁆𑀛𑀸𑀦𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀲𑀤𑀺𑀲𑁄 𑀳𑁄𑀢𑀺. 𑀧𑀝𑀺𑀮𑁄𑀫𑀯𑀲𑁂𑀦 𑀉𑀧𑀭𑀽𑀧𑀭𑀺𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑀛𑀸𑀦𑀥𑀫𑁆𑀫𑁂 𑀲𑀫𑁆𑀫𑀲𑀺𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀫𑀕𑁆𑀕𑁄 𑀲𑀫𑁆𑀫𑀲𑀺𑀢𑀚𑁆𑀛𑀸𑀦𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀧𑀸𑀤𑀓𑀚𑁆𑀛𑀸𑀦𑀲𑀤𑀺𑀲𑁄 𑀳𑁄𑀢𑀺, 𑀳𑁂𑀝𑁆𑀞𑀺𑀫𑀳𑁂𑀝𑁆𑀞𑀺𑀫𑀛𑀸𑀦𑀢𑁄 𑀳𑀺 𑀉𑀧𑀭𑀽𑀧𑀭𑀺𑀛𑀸𑀦𑀁 𑀩𑀮𑀯𑀢𑀭𑀦𑁆𑀢𑀺, 𑀅𑀝𑁆𑀞𑀲𑀢𑀫𑁆𑀧𑀺 𑀧𑀼𑀭𑀺𑀲𑀧𑀼𑀕𑁆𑀕𑀮𑀸𑀢𑀺 𑀢𑀢𑁆𑀣 𑀏𑀓𑀩𑀻𑀚𑀻, 𑀓𑁄𑀮𑀁𑀓𑁄𑀮𑁄, 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄𑀢𑀺 𑀢𑀬𑁄 𑀲𑁄𑀢𑀸𑀧𑀦𑁆𑀦𑀸. 𑀓𑀸𑀫𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀅𑀥𑀺𑀕𑀢𑀨𑀮𑀸 𑀢𑀬𑁄 𑀲𑀓𑀤𑀸𑀕𑀸𑀫𑀺𑀦𑁄𑀢𑀺 𑀢𑁂 𑀲𑀩𑁆𑀩𑁂𑀧𑀺 𑀤𑀼𑀓𑁆𑀔𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀁, 𑀤𑀼𑀓𑁆𑀔𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀁, 𑀲𑀼𑀔𑀸𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀁, 𑀲𑀼𑀔𑀸𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀦𑁆𑀢𑀺 ¶ 𑀘𑀢𑀼𑀦𑁆𑀦𑀁 𑀧𑀝𑀺𑀧𑀤𑀸𑀦𑀁 𑀯𑀲𑁂𑀦 𑀘𑀢𑀼𑀯𑀻𑀲𑀢𑀺, 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻, 𑀉𑀧𑀳𑀘𑁆𑀘𑀧𑀭𑀺 𑀦𑀺𑀩𑁆𑀩𑀸𑀬𑀻, 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺 𑀅𑀯𑀺𑀳𑀸𑀲𑀼 𑀧𑀜𑁆𑀘 𑀅𑀦𑀸𑀫𑀺𑀕𑀸𑀦𑁄, 𑀢𑀣𑀸 𑀅𑀢𑀧𑁆𑀧𑀸𑀲𑀼𑀤𑀲𑁆𑀲𑀸𑀲𑀼𑀤𑀲𑁆𑀲𑀻𑀲𑀼𑀧𑀺 𑀧𑀜𑁆𑀘. 𑀅𑀓𑀦𑀺𑀝𑁆𑀞𑁂𑀲𑀼 𑀧𑀦 𑀉𑀤𑁆𑀥𑀁𑀲𑁄𑀢𑀯𑀚𑁆𑀚𑀸 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻, 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻, 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀅𑀲𑀗𑁆𑀔𑀸𑀭𑀧𑀭𑀺𑀩𑁆𑀩𑀸𑀬𑀻𑀢𑀺 𑀘𑀢𑁆𑀢𑀸𑀭𑁄𑀢𑀺 𑀘𑀢𑀼𑀯𑀻𑀲𑀢𑀺 𑀅𑀦𑀸𑀕𑀸𑀫𑀺𑀦𑁄. 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄, 𑀲𑀫𑀣𑀬𑀸𑀦𑀺𑀓𑁄𑀢𑀺 𑀤𑁆𑀯𑁂 𑀅𑀭𑀳𑀦𑁆𑀢𑁄, 𑀘𑀢𑁆𑀢𑀸𑀭𑁄 𑀫𑀕𑁆𑀕𑀝𑁆𑀞𑀸𑀢𑀺 𑀘𑀢𑀼𑀧𑀜𑁆𑀜𑀸𑀲 𑀢𑁂 𑀲𑀩𑁆𑀩𑁂𑀧𑀺 𑀲𑀤𑁆𑀥𑀸𑀥𑀼𑀭𑀧𑀜𑁆𑀜𑀸𑀥𑀼𑀭𑀸𑀦𑀁𑀯𑀲𑁂𑀦 𑀤𑁆𑀯𑁂𑀕𑀼𑀡𑁂 𑀳𑀼𑀢𑁆𑀯𑀸 𑀅𑀝𑁆𑀞𑀲𑀢𑀁 𑀅𑀭𑀺𑀬𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀺. 𑀢𑁂 𑀲𑀩𑁆𑀩𑁂𑀧𑀺 ‘‘𑀅𑀝𑁆𑀞𑀲𑀢𑀁 𑀯𑀸’’𑀢𑀺 𑀯𑀺𑀢𑁆𑀣𑀸𑀭𑀯𑀲𑁂𑀦 𑀉𑀤𑁆𑀤𑀺𑀝𑁆𑀞𑀸 𑀅𑀭𑀺𑀬𑀧𑀼𑀕𑁆𑀕𑀮𑀸 𑀢𑁂 𑀲𑀗𑁆𑀔𑁂𑀧𑀢𑁄 𑀬𑀼𑀕𑀯𑀲𑁂𑀦 𑀲𑁄𑀢𑀸𑀧𑀢𑁆𑀢𑀺 𑀫𑀕𑁆𑀕𑀝𑁆𑀞𑁄 𑀨𑀮𑀝𑁆𑀞𑁄𑀢𑀺 𑀏𑀓𑀁 𑀬𑀼𑀕𑀦𑁆𑀢𑁆𑀬𑀸𑀤𑀺𑀦𑀸 𑀘𑀢𑁆𑀢𑀸𑀭𑁄𑀯 𑀳𑁄𑀦𑁆𑀢𑀺. 𑀢𑁂𑀦𑁂𑀯𑀸𑀳 𑀭𑀢𑀦𑀧𑀭𑀺𑀢𑁆𑀢𑁂 ‘‘𑀬𑁂 𑀧𑀼𑀕𑁆𑀕𑀮𑀸 𑀅𑀝𑁆𑀞𑀲𑀢𑀁 𑀧𑀲𑀢𑁆𑀣𑀸, 𑀘𑀢𑁆𑀢𑀸𑀭𑀺 𑀏𑀢𑀸𑀦𑀺 𑀬𑀼𑀕𑀸𑀦𑀺 𑀳𑁄𑀦𑁆𑀢𑀻’’𑀢𑀺 𑀅𑀬𑀁 𑀧𑀪𑁂𑀤𑁄𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑁂𑀲𑀼 𑀫𑀺𑀲𑁆𑀲𑀓𑀯𑀲𑁂𑀦 𑀮𑀩𑁆𑀪𑀢𑀺 𑀛𑀸𑀦𑀺𑀓𑀯𑀺𑀧𑀲𑁆𑀲𑀓𑀧𑀪𑁂𑀤𑁄 𑀧𑀦 𑀨𑀮𑀝𑁆𑀞𑁂𑀬𑁂𑀯 𑀮𑀩𑁆𑀪𑀢𑀺 𑀫𑀕𑁆𑀕𑀲𑁆𑀲 𑀏𑀓𑀘𑀺𑀢𑁆𑀢𑀓𑁆𑀔𑀢𑀺𑀓𑀢𑁆𑀢𑀸 𑀫𑀕𑁆𑀕𑀝𑁆𑀞𑁂𑀲𑀼 𑀦 𑀮𑀩𑁆𑀪𑀢𑀺. 𑀢𑀢𑁆𑀣 𑀲𑁄𑀢𑀸𑀧𑀢𑁆𑀢𑀺𑀨𑀮𑀝𑁆𑀞𑁄 𑀛𑀸𑀦𑀺𑀓𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀯𑀲𑁂𑀦 𑀤𑀼𑀯𑀺𑀥𑁄. 𑀢𑁂𑀲𑀼 𑀛𑀸𑀦𑀺𑀓𑁄 𑀧𑀼𑀕𑁆𑀕𑀮𑁄 𑀢𑀲𑁆𑀫𑀺𑀁 𑀪𑀯𑁂 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀅𑀧𑁆𑀧𑀢𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀕𑀢𑁄 𑀳𑁄𑀢𑀺, 𑀲𑁄 𑀛𑀸𑀦𑀺𑀓𑁄 𑀦𑀸𑀫. 𑀫𑀽𑀮𑀝𑀻𑀓𑀸𑀬𑀁 𑀧𑀦 𑀦𑀺𑀓𑀦𑁆𑀢𑀺𑀬𑀸 𑀲𑀢𑀺 𑀧𑀼𑀣𑀼𑀚𑁆𑀚𑀦𑀸𑀤𑀬𑁄 𑀬𑀣𑀸𑀮𑀤𑁆𑀥𑀚𑁆𑀛𑀸𑀦𑀲𑁆𑀲 𑀪𑀽𑀫𑀺𑀪𑀽𑀢𑁂 𑀲𑀼𑀤𑁆𑀥𑀸𑀯𑀸𑀲𑀯𑀚𑁆𑀚𑀺𑀢𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀢𑀣𑀸 𑀓𑀸𑀫𑀪𑀯𑁂𑀧𑀺 𑀓𑀸𑀫𑀸𑀯𑀘𑀭𑀓𑀫𑁆𑀫𑀩𑀮𑁂𑀦 ‘‘𑀇𑀚𑁆𑀛𑀢𑀺 𑀳𑀺 𑀪𑀺𑀓𑁆𑀔𑀯𑁂 𑀲𑀻𑀮𑀯𑀢𑁄 𑀘𑁂𑀢𑁄𑀧𑀡𑀺𑀥𑀺 𑀯𑀺𑀲𑀼𑀤𑁆𑀥𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀅𑀦𑀸𑀕𑀸𑀫𑀺𑀦𑁄 𑀧𑀦 𑀓𑀸𑀫𑀭𑀸𑀕𑀲𑁆𑀲 𑀲𑀩𑁆𑀩𑀲𑁄 𑀧𑀳𑀻𑀦𑀢𑁆𑀢𑀸 𑀓𑀸𑀫𑀪𑀯𑁂𑀲𑀼 𑀦𑀺𑀓𑀦𑁆𑀢𑀺𑀁 𑀦 𑀉𑀧𑁆𑀧𑀸𑀤𑁂𑀦𑁆𑀢𑀻𑀢𑀺 𑀓𑀸𑀫𑀮𑁄𑀓𑀯𑀚𑁆𑀚𑀺𑀢𑁂 𑀬𑀣𑀸𑀮𑀤𑁆𑀥𑀲𑁆𑀲 𑀪𑀽𑀫𑀺 𑀪𑀽𑀢𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’𑀢𑀺 𑀯𑀼𑀢𑁆𑀢𑀁 𑀢𑀣𑀸 𑀳𑀺 𑀅𑀦𑀸𑀕𑀸𑀫𑀺𑀲𑁆𑀲𑁂𑀯 𑀓𑀸𑀫𑀪𑀯𑁂 𑀦𑀺𑀓𑀦𑁆𑀢𑀺𑀬𑀸 𑀧𑀳𑀻𑀦𑀢𑁆𑀢𑀸 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀻𑀦𑀫𑁆𑀧𑀺 𑀦𑀺𑀓𑀦𑁆𑀢𑀺𑀬𑀸 𑀲𑀢𑀺 𑀓𑀸𑀫𑀪𑀯𑁂 𑀓𑀸𑀫𑀸𑀯𑀘𑀭𑀓𑀫𑁆𑀫𑀩𑀮𑁂𑀦 𑀉𑀧𑁆𑀧𑀢𑁆𑀢𑀺𑀪𑀸𑀯𑁄 𑀅𑀯𑀸𑀭𑀺𑀢𑁄𑀯 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺 𑀢𑀲𑁆𑀫𑀸 ‘‘𑀅𑀧𑁆𑀧𑀢𑁆𑀢𑁂 𑀩𑁆𑀭𑀳𑁆𑀫𑀮𑁄𑀓𑀕𑀢𑁄 𑀳𑁄𑀢𑀺, 𑀲𑁄 𑀛𑀸𑀦𑀺𑀓𑁄 𑀦𑀸𑀫𑀸𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀧𑀦 𑀢𑀺𑀯𑀺𑀥𑁄 𑀏𑀓𑀩𑀻𑀚𑀻, 𑀓𑁄𑀮𑀁𑀓𑁄𑀮𑁄, 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄𑀢𑀺. 𑀢𑀢𑁆𑀣 𑀏𑀓𑁄 𑀫𑀦𑀼𑀲𑁆𑀲𑀮𑁄𑀓𑁂 𑀯𑀸 𑀳𑁄𑀢𑀼 𑀙𑀤𑁂𑀯𑀮𑁄𑀓𑁂 𑀯𑀸, 𑀏𑀓𑀧𑀝𑀺𑀲𑀦𑁆𑀥𑀺𑀓𑁄 𑀳𑀼𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀬𑀁 𑀏𑀓𑀩𑀻𑀚𑀻 𑀦𑀸𑀫 𑀏𑀓𑁄 ¶ 𑀫𑀦𑀼𑀲𑁆𑀲𑀮𑁄𑀓𑁂 𑀏𑀓𑀸 𑀧𑀝𑀺𑀲𑀦𑁆𑀥𑀺 𑀤𑁂𑀯𑀮𑁄𑀓𑁂 𑀏𑀓𑀸𑀢𑀺 𑀤𑁆𑀯𑁂𑀧𑀝𑀺𑀲𑀦𑁆𑀥𑀺𑀓𑁄 𑀯𑀸, 𑀏𑀯𑀁 𑀢𑀺𑀘𑀢𑀼𑀧𑀜𑁆𑀘𑀙𑀧𑀭𑀫𑁄 𑀳𑀼𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀬𑀁 𑀓𑁄𑀮𑀁𑀓𑁄𑀮𑁄 𑀦𑀸𑀫. 𑀏𑀓𑁄 𑀫𑀦𑀼𑀲𑁆𑀲𑀮𑁄𑀓𑁂 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀤𑁂𑀯𑀮𑁄𑀓𑁂 𑀏𑀓𑀸 𑀧𑀝𑀺𑀲𑀦𑁆𑀥𑀺 𑀢𑀢𑁄 𑀧𑀼𑀦𑀸𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀏𑀓𑀸𑀢𑀺 𑀏𑀯𑀁 𑀫𑀦𑀼𑀲𑁆𑀲𑀤𑁂𑀯𑀮𑁄𑀓𑀫𑀺𑀲𑁆𑀲𑀓𑀯𑀲𑁂𑀦 𑀢𑀢𑁆𑀣 𑀘𑀢𑁆𑀢𑀸𑀭𑀺 𑀇𑀥 𑀢𑀻𑀡𑀺𑀢𑁆𑀬𑀸𑀤𑀺𑀦𑀸 𑀢𑀢𑁆𑀣 𑀙, 𑀇𑀥 𑀏𑀓𑁄𑀢𑀺 𑀬𑀸𑀯 𑀲𑀢𑁆𑀢𑀧𑀝𑀺𑀲𑀦𑁆𑀥𑀺𑀓𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀬𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀦𑀸𑀫. 𑀓𑁂𑀯𑀮𑀁 𑀧𑀦 𑀫𑀦𑀼𑀲𑁆𑀲𑀮𑁄𑀓𑁂 𑀬𑁂𑀯 𑀲𑀢𑁆𑀢 𑀤𑁂𑀯𑀮𑁄𑀓𑁂𑀬𑁂𑀯 𑀯𑀸 𑀲𑀢𑁆𑀢𑀸𑀢𑀺 𑀏𑀯𑀁 𑀅𑀫𑀺𑀲𑁆𑀲𑁄 𑀳𑀼𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀓𑁄 𑀕𑀳𑁂𑀢𑀩𑁆𑀩𑁄 𑀅𑀧𑀭𑁂 𑀧𑀦 ‘‘𑀇𑀢𑁄 𑀲𑀢𑁆𑀢, 𑀢𑀢𑁄 𑀲𑀢𑁆𑀢 𑀲𑀁𑀲𑀸𑀭𑁂 𑀯𑀺𑀘𑀭𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀫𑀦𑀼𑀲𑁆𑀲𑀮𑁄𑀓𑀲𑀢𑁆𑀢𑀧𑀝𑀺𑀲𑀦𑁆𑀥𑀺𑀤𑁂𑀯𑀮𑁄𑀓 𑀲𑀢𑁆𑀢𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀁 𑀯𑀤𑀦𑁆𑀢𑀺. 𑀢𑀁 𑀅𑀬𑀼𑀢𑁆𑀢𑀁 𑀓𑀲𑁆𑀫𑀸 ‘‘𑀓𑀺𑀜𑁆𑀘𑀸𑀧𑀺 𑀢𑁂 𑀳𑁄𑀦𑁆𑀢𑀺 𑀪𑀼𑀲𑀁𑀧𑀫𑀢𑁆𑀢𑀸, 𑀦 𑀢𑁂 𑀪𑀯𑀁 𑀅𑀝𑁆𑀞𑀫𑀫𑀸𑀤𑀺𑀬𑀦𑁆𑀢𑀻’’𑀢𑀺 𑀧𑀸𑀴𑀺𑀬𑀸 𑀯𑀺𑀭𑁄𑀥𑀢𑁆𑀢𑀸. 𑀅𑀧𑀺𑀘 𑀤𑁆𑀯𑀺𑀪𑀯𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀓𑀤𑀸𑀕𑀸𑀫𑀻𑀧𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀢𑁄 𑀪𑀯𑁂𑀬𑁆𑀬, 𑀢𑀲𑁆𑀲𑀧𑀺 𑀢𑀢𑁆𑀣 𑀏𑀓𑀁, 𑀇𑀥 𑀏𑀓𑀦𑁆𑀢𑀺 𑀯𑀸𑀭𑀲𑁆𑀲 𑀮𑀩𑁆𑀪𑀺𑀢𑀩𑁆𑀩𑀢𑁄 𑀦 𑀧𑀦𑁂𑀯𑀁 𑀤𑀝𑁆𑀞𑀩𑁆𑀩𑀁. 𑀲𑀓𑀺𑀁 𑀇𑀫𑀁 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀘𑁆𑀙𑀢𑀻𑀢𑀺 𑀲𑀓𑀤𑀸𑀕𑀸𑀫𑀻 𑀇𑀥 𑀧𑀢𑁆𑀯𑀸 𑀇𑀥 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀢𑀢𑁆𑀣 𑀧𑀢𑁆𑀯𑀸 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀢𑀢𑁆𑀣 𑀧𑀢𑁆𑀯𑀸 𑀇𑀥 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀇𑀥 𑀧𑀢𑁆𑀯𑀸 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀧𑀜𑁆𑀘𑀲𑀼 𑀲𑀓𑀤𑀸𑀕𑀸𑀫𑀻𑀲𑀼 𑀧𑀜𑁆𑀘𑀫𑀓𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀬𑀤𑀺 𑀏𑀯𑀁 𑀇𑀥 𑀧𑀢𑁆𑀯𑀸 𑀇𑀥 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀆𑀤𑀬𑁄 𑀘𑀢𑁆𑀢𑀸𑀭𑁄 𑀓𑀣𑀁 𑀲𑀓𑀤𑀸𑀕𑀸𑀫𑀻𑀦𑀸𑀫𑀸𑀢𑀺. 𑀢𑁂 𑀲𑀓𑀺𑀁 𑀧𑀼𑀦 𑀆𑀕𑀘𑁆𑀙𑀢𑀻𑀢𑀺 𑀯𑀘𑀦𑀢𑁆𑀣𑁂𑀦 𑀲𑀓𑀤𑀸𑀕𑀸𑀫𑀻 𑀦𑀸𑀫. 𑀓𑀸𑀫𑀢𑀡𑁆𑀳𑀸𑀬 𑀲𑀩𑁆𑀩𑀲𑁄 𑀧𑀳𑀻𑀦𑀢𑁆𑀢𑀸 𑀇𑀫𑀁 𑀓𑀸𑀫𑀥𑀸𑀢𑀼𑀁 𑀅𑀦𑀸𑀕𑀘𑁆𑀙𑀢𑀻𑀢𑀺 𑀅𑀦𑀸𑀕𑀸𑀫𑀻, 𑀦𑀺𑀘𑁆𑀘𑀁 𑀩𑁆𑀭𑀳𑁆𑀫𑀮𑁄𑀓𑁂𑀬𑁂𑀯 𑀧𑀝𑀺𑀲𑀦𑁆𑀥𑀺 𑀯𑀲𑁂𑀦 𑀆𑀕𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀛𑀸𑀦𑀺𑀓𑀲𑁆𑀲 𑀏𑀯𑀁 𑀳𑁄𑀢𑀼, 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲 𑀓𑀣𑀦𑁆𑀢𑀺 𑀲𑁄𑀧𑀺 𑀛𑀸𑀦𑀺𑀓𑁄𑀯 𑀳𑀼𑀢𑁆𑀯𑀸 𑀕𑀘𑁆𑀙𑀢𑀺 𑀢𑀲𑁆𑀲 𑀳𑀺 𑀫𑀕𑁆𑀕𑀦𑁆𑀢𑀭𑁂 𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀳𑀺 𑀳𑀢𑀲𑁆𑀲𑀸𑀧𑀺 𑀮𑀓𑁆𑀔𑀡𑀢𑁆𑀢𑀬𑀁 𑀆𑀭𑁄𑀧𑁂𑀢𑁆𑀯𑀸 𑀛𑀸𑀦𑀺𑀓𑁄 𑀳𑀼𑀢𑁆𑀯𑀸𑀯 𑀫𑀭𑀡𑀁 𑀳𑁄𑀢𑀺 𑀅𑀬𑀁 𑀧𑀦 𑀭𑀽𑀧𑀸𑀭𑀽𑀧𑀪𑀯𑁂𑀦 𑀏𑀓𑀓𑁆𑀔𑀢𑁆𑀢𑀼𑀧𑀭𑀫𑁄 𑀦𑀸𑀫. 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀸𑀤𑀬𑁄 𑀅𑀭𑀺𑀬𑀸 𑀭𑀽𑀧𑀸𑀭𑀽𑀧𑀮𑁄𑀓𑁂𑀲𑀼 𑀅𑀦𑁂𑀓𑀓𑁆𑀔𑀢𑁆𑀢𑀼𑀧𑀝𑀺𑀲𑀦𑁆𑀥𑀺𑀓𑀸𑀧𑀺 𑀩𑁆𑀭𑀳𑁆𑀫𑀮𑁄𑀓𑀲𑀸𑀫𑀜𑁆𑀜𑁂𑀦 𑀏𑀓𑀧𑀝𑀺𑀲𑀦𑁆𑀥𑀺𑀓𑀸 𑀦𑀸𑀫 𑀳𑁄𑀦𑁆𑀢𑀺. 𑀅𑀭𑀳𑀸 𑀧𑀦 𑀧𑀸𑀧𑀓𑀭𑀡𑁂 𑀭𑀳𑀸𑀪𑀸𑀯𑀸 𑀤𑀓𑁆𑀔𑀺𑀡𑀁 𑀅𑀭𑀳𑀢𑁆𑀢𑀸 𑀧𑀼𑀦 𑀪𑀯𑀸 𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸𑀭𑀳𑀸𑀪𑀸𑀯𑀸𑀢𑁆𑀬𑀸𑀤𑀺𑀦𑀸 𑀯𑀘𑀦𑀢𑁆𑀣𑁂𑀦 𑀅𑀭𑀳𑀸 𑀦𑀸𑀫. 𑀲𑁄𑀧𑀺 𑀢𑀺𑀯𑀺𑀥𑁄 𑀛𑀸𑀦𑀺𑀓 𑀲𑀼𑀓𑁆𑀔𑀯𑀺𑀧𑀲𑁆𑀲𑀓 𑀲𑀫𑀲𑀻𑀲𑀻𑀯𑀲𑁂𑀦. 𑀢𑀢𑁆𑀣 𑀛𑀸𑀦𑀺𑀓𑁄 𑀫𑀕𑁆𑀕𑁂𑀦𑁂𑀯 𑀆𑀕𑀢𑁄 ¶ , 𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁄 𑀦𑀸𑀫. 𑀅𑀧𑀭𑁄𑀧𑀺 𑀧𑀼𑀣𑀼𑀚𑁆𑀚𑀦𑀲𑁂𑀓𑁆𑀔𑀲𑀦𑁆𑀢𑀸𑀦𑁂 𑀛𑀸𑀦𑀺𑀓𑁄 𑀳𑀼𑀢𑁆𑀯𑀸 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑀺, 𑀲𑁄𑀧𑀺 𑀛𑀸𑀦𑀺𑀓𑁄𑀯. 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀧𑀦 𑀓𑀺𑀮𑁂𑀲𑀓𑁆𑀔𑀬𑀫𑀢𑁆𑀢𑀫𑁂𑀯 𑀫𑀕𑁆𑀕𑁂𑀦 𑀲𑀳 𑀅𑀦𑀸𑀕𑀢𑀛𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀢𑀁 𑀧𑀘𑁆𑀙𑀸 𑀧𑀭𑀺𑀳𑀸𑀬𑀢𑀻𑀢𑀺𑀧𑀺 𑀯𑀤𑀦𑁆𑀢𑀺. 𑀲𑀫𑀲𑀻𑀲𑀻 𑀧𑀦 𑀢𑀺𑀯𑀺𑀥𑁄 𑀳𑁄𑀢𑀺 𑀇𑀭𑀺𑀬𑀸𑀧𑀣𑀲𑀫𑀲𑀻𑀲𑀻, 𑀭𑁄𑀕𑀲𑀫𑀲𑀻𑀲𑀻, 𑀚𑀻𑀯𑀺𑀢𑀲𑀫𑀲𑀻𑀲𑀻𑀢𑀺. 𑀢𑀢𑁆𑀣 𑀬𑁄 𑀞𑀸𑀦𑀸𑀤𑀻𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀬𑁂𑀦𑁂𑀯 𑀇𑀭𑀺𑀬𑀧𑀣𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀢𑀺, 𑀢𑁂𑀦𑁂𑀯 𑀇𑀭𑀺𑀬𑀸𑀧𑀣𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑀅𑀬𑀁 𑀇𑀭𑀺𑀬𑀸𑀧𑀣𑀲𑀫𑀲𑀻𑀲𑀻 𑀦𑀸𑀫. 𑀬𑁄 𑀧𑀦 𑀏𑀓𑀁 𑀭𑁄𑀕𑀁 𑀧𑀢𑁆𑀯𑀸 𑀅𑀦𑁆𑀢𑁄𑀭𑁄𑀕𑁂 𑀏𑀯 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑁂𑀦𑁂𑀯 𑀭𑁄𑀕𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑀅𑀬𑀁 𑀭𑁄𑀕𑀲𑀫𑀲𑀻𑀲𑀺 𑀦𑀸𑀫. 𑀬𑁄 𑀧𑀦 𑀢𑁂𑀭𑀲𑀲𑀼 𑀲𑀻𑀲𑁂𑀲𑀼 𑀓𑀺𑀮𑁂𑀲𑀲𑀻𑀲𑀁 𑀅𑀯𑀺𑀚𑁆𑀚𑀁 𑀅𑀭𑀳𑀢𑁆𑀢𑀫𑀕𑁆𑀕𑁄 𑀧𑀭𑀺𑀬𑀸𑀤𑀺𑀬𑀢𑀺, 𑀧𑀯𑀢𑁆𑀢𑀺𑀲𑀻𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀘𑀼𑀢𑀺𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀢𑀺, 𑀅𑀬𑀁 𑀚𑀻𑀯𑀺𑀢𑀲𑀫𑀲𑀻𑀲𑀻𑀦𑀸𑀫. 𑀢𑀢𑁆𑀣 𑀢𑁂𑀭𑀲 𑀲𑀻𑀲𑀸𑀦𑀺 𑀓𑀢𑀫𑀸𑀦𑀺 𑀢𑁂𑀭𑀲 𑀲𑀻𑀲𑀸𑀦𑀺. 𑀧𑀮𑀺𑀩𑁄𑀥𑀲𑀻𑀲𑀁, 𑀢𑀡𑁆𑀳𑀸𑀩𑀦𑁆𑀥𑀦𑀲𑀻𑀲𑀁, 𑀫𑀸𑀦𑀧𑀭𑀸𑀫𑀸𑀲𑀲𑀻𑀲𑀁, 𑀤𑀺𑀝𑁆𑀞𑀺𑀯𑀺𑀓𑁆𑀔𑁂𑀧𑀲𑀻𑀲𑀁, 𑀉𑀤𑁆𑀥𑀘𑁆𑀘𑀓𑀺𑀮𑁂𑀲𑀲𑀻𑀲𑀁, 𑀅𑀯𑀺𑀚𑁆𑀚𑀸𑀅𑀥𑀺𑀫𑁄𑀓𑁆𑀔𑀲𑀻𑀲𑀁, 𑀲𑀤𑁆𑀥𑀸𑀧𑀕𑁆𑀕𑀳𑀲𑀻𑀲𑀁, 𑀯𑀻𑀭𑀺𑀬𑀉𑀧𑀝𑁆𑀞𑀸𑀦𑀲𑀻𑀲𑀁, 𑀲𑀢𑀺𑀅𑀯𑀺𑀓𑁆𑀔𑁂𑀧𑀲𑀻𑀲𑀁, 𑀲𑀫𑀸𑀥𑀺𑀤𑀲𑁆𑀲𑀦𑀲𑀻𑀲𑀁, 𑀧𑀜𑁆𑀜𑀸𑀧𑀯𑀢𑁆𑀢𑀺𑀲𑀻𑀲𑀁, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀕𑁄𑀘𑀭𑀲𑀻𑀲𑀁, 𑀯𑀺𑀫𑁄𑀓𑁆𑀔𑀲𑀗𑁆𑀔𑀸𑀭𑀲𑀻𑀲𑀦𑁆𑀢𑀺. 𑀏𑀢𑁆𑀣 𑀘 𑀅𑀯𑀺𑀚𑁆𑀚𑀸 𑀧𑀭𑀺𑀬𑀸𑀤𑀸𑀬𑀓𑀁 𑀫𑀕𑁆𑀕𑀘𑀺𑀢𑁆𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀧𑀭𑀺𑀬𑀸𑀤𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀬𑀓𑀁 𑀘𑀼𑀢𑀺𑀘𑀺𑀢𑁆𑀢𑀁 𑀅𑀯𑀺𑀚𑁆𑀚𑀁 𑀧𑀭𑀺𑀬𑀸𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀯𑀺𑀚𑁆𑀚𑀸 𑀧𑀭𑀺𑀬𑀸𑀤𑀸𑀬𑀓𑀁 𑀘𑀺𑀢𑁆𑀢𑀁 𑀅𑀜𑁆𑀜𑀁, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀭𑀺𑀬𑀸𑀤𑀸𑀬𑀓𑀁 𑀘𑀺𑀢𑁆𑀢𑀁 𑀅𑀜𑁆𑀜𑀁. 𑀓𑀣𑀁 𑀧𑀦𑀺𑀤𑀁 𑀲𑀻𑀲𑀁 𑀲𑀫𑀁 𑀳𑁄𑀢𑀻𑀢𑀺. 𑀯𑀸𑀭𑀲𑀫𑀢𑀸𑀬, 𑀬𑀲𑁆𑀫𑀺𑀜𑁆𑀳𑀺 𑀯𑀸𑀭𑁂 𑀫𑀕𑁆𑀕𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑀳𑀻𑀦𑀲𑁂𑀲𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑀸𑀯𑀲𑁂𑀦 𑀧𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺, 𑀢𑀣𑀸 𑀲𑀓𑀤𑀸𑀫𑀺𑀫𑀕𑁆𑀕𑁂 𑀧𑀜𑁆𑀘, 𑀅𑀦𑀸𑀕𑀸𑀫𑀺𑀫𑀕𑁆𑀕𑁂 𑀧𑀜𑁆𑀘, 𑀅𑀭𑀳𑀢𑁆𑀢𑀫𑀕𑁆𑀕𑁂 𑀲𑁂𑀲𑀓𑀺𑀮𑁂𑀲𑀸𑀪𑀸𑀯𑀸 𑀘𑀢𑁆𑀢𑀸𑀭𑀻𑀢𑀺 𑀏𑀓𑀽𑀦𑀯𑀻𑀲𑀢𑀺𑀫𑁂 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂 𑀧𑀢𑀺𑀝𑁆𑀞𑀸𑀬 𑀪𑀯𑀗𑁆𑀕𑀁 𑀑𑀢𑀭𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑁄 𑀇𑀫𑀸𑀬 𑀯𑀸𑀭𑀲𑀫𑀢𑀸𑀬 𑀇𑀤𑀁 𑀉𑀪𑀬𑀲𑀻𑀲 𑀧𑀭𑀺𑀬𑀸𑀤𑀸𑀦𑀫𑁆𑀧𑀺 𑀲𑀫𑀁 𑀳𑁄𑀢𑀺 𑀦𑀸𑀫. 𑀅𑀭𑀳𑀢𑁆𑀢𑀫𑀕𑁆𑀕𑁂 𑀘 𑀧𑀯𑀢𑁆𑀢𑀺𑀲𑀻𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀧𑀯𑀢𑁆𑀢𑀺𑀢𑁄 𑀯𑀼𑀝𑁆𑀞𑀳𑀦𑁆𑀢𑁄 𑀫𑀕𑁆𑀕𑁄 𑀘𑀼𑀢𑀺𑀢𑁄 𑀉𑀤𑁆𑀥𑀁 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀯𑀲𑁂𑀦 𑀬𑀤𑀺𑀧𑀺 𑀧𑀭𑀺𑀬𑀸𑀤𑀺𑀬𑀢𑀺. 𑀬𑀸𑀯 𑀧𑀦 𑀘𑀼𑀢𑀺, 𑀢𑀸𑀯 𑀧𑀯𑀢𑁆𑀢𑀺𑀲𑀪𑀸𑀯𑀢𑁄 𑀧𑀯𑀢𑁆𑀢𑀺𑀲𑀻𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀘𑀼𑀢𑀺𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀢𑀺 𑀦𑀸𑀫. 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑁂𑀦 𑀫𑀕𑁆𑀕𑀘𑀺𑀢𑁆𑀢𑁂𑀦 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀁 𑀯𑀺𑀬 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀸 𑀧𑀘𑁆𑀘𑀯𑁂𑀓𑁆𑀔𑀡𑀯𑀸𑀭𑀸𑀯 ¶ 𑀧𑀭𑀺𑀧𑀼𑀡𑁆𑀡𑀸. 𑀧𑀭𑀺𑀧𑀼𑀡𑁆𑀡𑀯𑀲𑁂𑀦 𑀧𑀳𑀻𑀦𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀡𑀢𑁄 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀲𑁆𑀲𑁂𑀯 𑀯𑀸𑀭𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀦𑁆𑀢𑀺, 𑀢𑁂𑀦𑁂𑀯 𑀓𑀺𑀮𑁂𑀲𑀲𑀻𑀲𑀁 𑀅𑀯𑀺𑀚𑁆𑀚𑀸𑀧𑀭𑀺𑀬𑀸𑀤𑀸𑀦𑀜𑁆𑀘 𑀧𑀯𑀢𑁆𑀢𑀺𑀲𑀻𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀭𑀺𑀬𑀸𑀤𑀸𑀦𑀜𑁆𑀘 𑀲𑀫𑀁 𑀓𑀢𑁆𑀯𑀸 𑀇𑀫𑀸𑀬 𑀯𑀸𑀭𑀲𑀫𑀢𑀸𑀬 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸𑀦𑀁 𑀅𑀧𑀼𑀩𑁆𑀩𑀘𑀭𑀺𑀫𑀢𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁. 𑀲𑀁𑀬𑀼𑀢𑁆𑀢𑀞𑀓𑀣𑀸𑀬𑀁 𑀧𑀦 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀆𑀲𑀯𑀧𑀭𑀺𑀬𑀸𑀤𑀸𑀦𑀜𑁆𑀘 𑀳𑁄𑀢𑀺 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀜𑁆𑀘, 𑀅𑀬𑀁𑀢𑀺 𑀧𑀼𑀕𑁆𑀕𑀮𑁄 𑀲𑀫𑀲𑀻𑀲𑀻. 𑀏𑀢𑁆𑀣 𑀘 𑀧𑀯𑀢𑁆𑀢𑀺𑀲𑀻𑀲𑀁 𑀓𑀺𑀮𑁂𑀲𑀲𑀻𑀲𑀦𑁆𑀢𑀺 𑀤𑁆𑀯𑁂 𑀲𑀻𑀲𑀸𑀦𑀺. 𑀢𑀢𑁆𑀣 𑀧𑀯𑀢𑁆𑀢𑀺𑀲𑀻𑀲𑀁 𑀦𑀸𑀫 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀓𑀺𑀮𑁂𑀲𑀲𑀻𑀲𑀁 𑀦𑀸𑀫 𑀅𑀯𑀺𑀚𑁆𑀚𑀸. 𑀢𑁂𑀲𑀼 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀘𑀼𑀢𑀺𑀘𑀺𑀢𑁆𑀢𑀁 𑀔𑁂𑀧𑁂𑀢𑀺. 𑀅𑀯𑀺𑀚𑁆𑀚𑀁 𑀫𑀕𑁆𑀕𑀘𑀺𑀢𑁆𑀢𑀁. 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀏𑀓𑀢𑁄 𑀉𑀧𑁆𑀧𑀸𑀤𑁄 𑀦𑀢𑁆𑀣𑀺. 𑀫𑀕𑁆𑀕𑀸𑀦𑀦𑁆𑀢𑀭𑀁 𑀧𑀦 𑀨𑀮𑀁, 𑀨𑀮𑀸𑀦𑀦𑁆𑀢𑀭𑀁 𑀪𑀯𑀗𑁆𑀕𑀁, 𑀪𑀯𑀗𑁆𑀕𑀢𑁄 𑀯𑀼𑀝𑁆𑀞𑀸𑀬 𑀧𑀘𑁆𑀘𑀯𑁂𑀓𑁆𑀔𑀡𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺, 𑀢𑀁 𑀅𑀧𑀭𑀺𑀧𑀼𑀡𑁆𑀡𑀁 𑀯𑀸𑀢𑀺. 𑀢𑀺𑀔𑀺𑀡𑁂𑀦 𑀅𑀲𑀺𑀦𑀸 𑀲𑀻𑀲𑁂 𑀙𑀺𑀦𑁆𑀤𑀦𑁆𑀢𑁂𑀧𑀺 𑀳𑀺 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀯𑀸𑀭𑀸 𑀅𑀯𑀲𑁆𑀲𑀁 𑀉𑀧𑁆𑀧𑀚𑁆𑀚𑀦𑁆𑀢𑀺𑀬𑁂𑀯, 𑀘𑀺𑀢𑁆𑀢𑀸𑀦𑀁 𑀧𑀦 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸𑀬 𑀆𑀲𑀯𑀓𑁆𑀔𑀬𑁄 𑀘 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀜𑁆𑀘 𑀏𑀓𑀓𑁆𑀔𑀡𑁂 𑀯𑀺𑀬 𑀲𑀜𑁆𑀚𑀸𑀬𑀢𑀻’𑀢𑀺 𑀯𑀼𑀢𑁆𑀢𑀁. 𑀢𑀝𑁆𑀝𑀻𑀓𑀸𑀬𑀜𑁆𑀘 ‘‘𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀦𑁆𑀢𑀺 𑀘𑀼𑀢𑀺𑀘𑀺𑀢𑁆𑀢𑀫𑀕𑁆𑀕𑀘𑀺𑀢𑁆𑀢𑀸𑀦𑀁. 𑀢𑀦𑁆𑀢𑀺 𑀧𑀘𑁆𑀘𑀬𑀯𑁂𑀓𑀮𑁆𑀮𑀁. 𑀧𑀭𑀺𑀧𑀼𑀡𑁆𑀡𑀁 𑀚𑀯𑀦𑀘𑀺𑀢𑁆𑀢𑀸𑀦𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀬𑀸. 𑀅𑀧𑀭𑀺𑀧𑀼𑀡𑁆𑀡𑀁 𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀬𑀸. 𑀓𑀺𑀜𑁆𑀘𑀸𑀧𑀺 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀦 𑀯𑀘𑀦 𑀲𑀺𑀮𑀺𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀁. 𑀬𑀸𑀯 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀸𑀦𑀻𑀢𑀺 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀤𑁆𑀯𑁂 𑀧𑀯𑀢𑁆𑀢𑀦𑁆𑀢𑀻𑀢𑀺 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 ‘‘𑀧𑀭𑀺𑀧𑀼𑀡𑁆𑀡𑀁 𑀚𑀯𑀦𑀘𑀺𑀢𑁆𑀢𑀸𑀦𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀬𑀸, 𑀅𑀧𑀭𑀺𑀧𑀼𑀡𑁆𑀡𑀁 𑀧𑀜𑁆𑀙𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀬𑀸’’𑀢𑀺 𑀇𑀫𑀺𑀦𑀸 𑀅𑀝𑁆𑀞𑀓𑀣𑀸𑀝𑀻𑀓𑀸𑀯𑀘𑀦𑁂𑀦 𑀲𑀫𑀲𑀻𑀲𑀻𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀯𑀲𑁂𑀦 𑀫𑀭𑀡𑀸𑀲𑀦𑁆𑀦𑀯𑀻𑀣𑀺𑀬𑀁 𑀧𑀭𑀺𑀧𑀼𑀡𑁆𑀡𑀯𑀲𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀁, 𑀅𑀧𑀭𑀺𑀧𑀼𑀡𑁆𑀡𑀯𑀲𑁂𑀦 𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀓𑁆𑀭𑀺𑀬𑀚𑀯𑀦𑀸𑀦𑀺 𑀚𑀯𑀦𑁆𑀢𑀻𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀫𑁂𑀢𑁆𑀣𑀸𑀯 𑀕𑀦𑁆𑀢𑀩𑁆𑀩𑀁. ‘‘𑀅𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘 𑀯𑀺𑀜𑁆𑀜𑀸𑀬𑀢𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀭𑀺𑀧𑀼𑀡𑁆𑀡𑀯𑀲𑁂𑀦 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀚𑀯𑀦𑀧𑀯𑀢𑁆𑀢𑀺. 𑀏𑀯𑀜𑁆𑀘 𑀲𑀢𑀺 ‘‘𑀫𑀦𑁆𑀤𑀧𑁆𑀧𑀯𑀢𑁆𑀢𑀺𑀬𑀁 𑀧𑀦 𑀫𑀭𑀡𑀓𑀸𑀮𑀸𑀤𑀻𑀲𑀼 𑀧𑀜𑁆𑀘𑀯𑀸𑀭𑀫𑁂𑀯𑀸’’𑀢𑀺 𑀏𑀢𑁆𑀣 ‘‘𑀫𑀦𑁆𑀤𑀧𑁆𑀧𑀯𑀢𑁆𑀢𑀺𑀬’’𑀦𑁆𑀢𑀺 𑀯𑀺𑀲𑁂𑀲𑀦𑀁 𑀲𑀸𑀢𑁆𑀣𑀓𑀁 𑀲𑀺𑀬𑀸. ‘‘𑀧𑀜𑁆𑀘𑀯𑀸𑀭𑀫𑁂𑀯𑀸’’𑀢𑀺 𑀏𑀢𑁆𑀣 𑀏𑀯𑀓𑀸𑀭𑁂𑀦 𑀫𑀦𑁆𑀤𑀧𑁆𑀧𑀯𑀢𑁆𑀢𑀺𑀓𑀸𑀮𑁂 𑀙𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀦𑀺𑀯𑀢𑁆𑀢𑁂𑀢𑀺. 𑀅𑀲𑀫𑁆𑀫𑀽𑀴𑁆𑀳𑀓𑀸𑀮𑁂 𑀧𑀦 𑀙𑀲𑀢𑁆𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀅𑀦𑀼𑀚𑀸𑀦𑀸𑀢𑀺. 𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀜𑁆𑀘 𑀅𑀦𑀺𑀬𑀢𑀧𑀭𑀺𑀫𑀸𑀡𑀸 𑀩𑀮𑀯𑀓𑀸𑀮𑁂𑀧𑀺 𑀧𑀭𑀺𑀲𑀫𑁆𑀧𑀼𑀡𑁆𑀡𑀪𑀸𑀯𑀸 𑀢𑀣𑀸 𑀳𑀺 ‘‘𑀓𑀸𑀫𑀸𑀯𑀘𑀭𑀚𑀯𑀦𑀸𑀦𑀺𑀩𑀮𑀯𑀓𑀸𑀮𑁂 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀙𑀓𑁆𑀔𑀢𑁆𑀢𑀼𑀁 𑀯𑀸, 𑀫𑀦𑁆𑀤𑀧𑁆𑀧𑀯𑀢𑁆𑀢𑀺𑀬𑀁 𑀧𑀦 𑀫𑀭𑀡𑀓𑀸𑀮𑀸𑀤𑀻𑀲𑀼 𑀧𑀜𑁆𑀘𑀯𑀸𑀭𑀫𑁂𑀯. 𑀪𑀕𑀯𑀢𑁄 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀓𑀸𑀮𑀸𑀤𑀻𑀲𑀼 𑀮𑀳𑀼𑀓𑀧𑁆𑀧𑀯𑀢𑁆𑀢𑀺𑀬𑀁 𑀘𑀢𑁆𑀢𑀸𑀭𑀺 𑀧𑀜𑁆𑀘𑀯𑀸 ¶ 𑀧𑀘𑁆𑀘𑀯𑁂𑀓𑁆𑀔𑀡𑀚𑀯𑀦𑀘𑀺𑀢𑁆𑀢𑀸𑀦𑀺 𑀪𑀯𑀦𑁆𑀢𑀻’’𑀢𑀺 𑀅𑀦𑀺𑀬𑀫𑀺𑀢𑀧𑁆𑀧𑀫𑀸𑀡𑀯𑀲𑁂𑀦 𑀉𑀧𑁆𑀧𑀢𑁆𑀢𑀺𑀪𑀸𑀯𑁄 𑀆𑀕𑀢𑁄 𑀇𑀫𑀲𑁆𑀫𑀺𑀁 𑀲𑀫𑀲𑀻𑀲𑀺𑀦𑀺𑀤𑁆𑀤𑁂𑀲𑀯𑀸𑀭𑁂𑀧𑀺 𑀫𑀭𑀡𑀸𑀲𑀦𑁆𑀦𑀯𑀻𑀣𑀺𑀘𑀺𑀢𑁆𑀢𑀲𑁆𑀲 𑀯𑀺𑀲𑀼𑀁 𑀅𑀮𑀩𑁆𑀪𑀦𑀢𑁄 𑀧𑀘𑁆𑀘𑀯𑁂𑀓𑁆𑀔𑀡𑀦𑁆𑀢𑁂𑀬𑁂𑀯 𑀪𑀯𑀗𑁆𑀕𑀘𑀺𑀢𑁆𑀢𑁂𑀦 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀧𑀭𑀺𑀧𑀼𑀡𑁆𑀡𑀯𑀲𑁂𑀦 𑀲𑀢𑁆𑀢 𑀚𑀯𑀦𑀘𑀺𑀢𑁆𑀢𑀸𑀦𑀺 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸𑀦𑀻𑀢𑀺 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑁄 𑀇𑀢𑁄 𑀬𑀼𑀢𑁆𑀢𑀢𑀭𑁄 𑀯𑀸 𑀧𑀓𑀸𑀭𑁄 𑀮𑀩𑁆𑀪𑀫𑀸𑀦𑁄 𑀕𑀯𑁂𑀲𑀺𑀢𑀩𑁆𑀩𑁄. 𑀏𑀯𑀁 𑀧𑀭𑀫𑀢𑁆𑀣𑀲𑀗𑁆𑀖𑀯𑀲𑁂𑀦 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺, 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸, 𑀘𑀢𑁆𑀢𑀸𑀮𑀻𑀲𑀫𑁆𑀧𑀺𑀧𑀼𑀕𑁆𑀕𑀮𑀸 𑀅𑀝𑁆𑀞𑀲𑀢𑀫𑁆𑀧𑀺 𑀧𑀼𑀭𑀺𑀲𑀧𑀼𑀕𑁆𑀕𑀮𑀸𑀢𑀺 𑀲𑀩𑁆𑀩𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀗𑁆𑀖𑁄𑀧𑀺 𑀤𑀼𑀮𑁆𑀮𑀪𑁄𑀢𑀺 𑀯𑁂𑀤𑀺𑀢𑀩𑁆𑀩𑁄 𑀢𑀣𑀸 𑀳𑀺 𑀅𑀭𑀺𑀬𑀧𑀼𑀕𑁆𑀕𑀮𑀸 𑀅𑀢𑀺𑀤𑀼𑀮𑁆𑀮𑀪𑀸𑀯 𑀲𑀸𑀲𑀦𑀲𑁆𑀲 𑀯𑀺𑀚𑁆𑀚𑀫𑀸𑀦𑀓𑀸𑀮𑁂𑀧𑀺 𑀇𑀤𑀸𑀦𑀺 𑀲𑁄𑀢𑀸𑀧𑀦𑁆𑀦𑀲𑁆𑀲𑀸𑀧𑀺 𑀅𑀯𑀺𑀚𑁆𑀚𑀫𑀸𑀦𑀢𑁄 𑀅𑀬𑀁 𑀧𑀭𑀫𑀢𑁆𑀣𑀲𑀗𑁆𑀖𑀯𑀺𑀘𑀸𑀭𑀡𑀸. 𑀲𑀫𑁆𑀫𑀼𑀢𑀺𑀲𑀗𑁆𑀖𑁄 𑀧𑀦 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀉𑀧𑀲𑀫𑁆𑀧𑀦𑁆𑀦𑁄 𑀧𑀼𑀣𑀼𑀚𑁆𑀚𑀦𑀲𑀗𑁆𑀖𑁄𑀯, 𑀲𑁄𑀧𑀺 𑀤𑀼𑀮𑁆𑀮𑀪𑁄𑀬𑁂𑀯. 𑀓𑀲𑁆𑀫𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑀸𑀮𑁂𑀬𑁂𑀯 𑀮𑀩𑁆𑀪𑀦𑀢𑁄 𑀢𑀣𑀸 𑀳𑀺 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀢𑀲𑀳𑀲𑁆𑀲𑀸𑀤𑀺𑀕𑀡𑀦𑁂 𑀉𑀧𑁆𑀧𑀚𑁆𑀚𑀫𑀸𑀦𑁂𑀧𑀺 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀤𑀸𑀪𑀸𑀯𑀲𑁆𑀲 𑀅𑀮𑀩𑁆𑀪𑀫𑀸𑀦𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀜𑁆𑀳𑀺 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀲𑀭𑀡𑀕𑀫𑀦𑀓𑀫𑁆𑀫𑀝𑁆𑀞𑀸𑀦𑀲𑁆𑀲𑀸𑀧𑀺 𑀤𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀦𑀸𑀫 𑀫𑀽𑀕𑀲𑁆𑀲 𑀲𑀼𑀧𑀺𑀦𑀤𑀲𑁆𑀲𑀦𑀁 𑀯𑀺𑀬 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀲𑀘𑁆𑀘𑀥𑀫𑁆𑀫𑁂 𑀧𑀭𑁂𑀲𑀁 𑀆𑀘𑀺𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑁂 𑀦𑀺𑀬𑁄𑀚𑁂𑀢𑀼𑀁 𑀅𑀲𑀫𑀢𑁆𑀣𑀸 ‘‘𑀏𑀯𑀁 𑀢𑁂 𑀦𑀺𑀯𑀸𑀲𑁂𑀢𑀩𑁆𑀩𑀁, 𑀏𑀯𑀁 𑀢𑁂 𑀧𑀸𑀭𑀼𑀧𑀺𑀢𑀩𑁆𑀩’’𑀦𑁆𑀢𑀺 𑀆𑀤𑀺𑀦𑀸𑀦𑀬𑁂𑀦 𑀅𑀪𑀺𑀲𑀫𑀸𑀘𑀸𑀭𑀺𑀓𑀫𑁂𑀯 𑀲𑀺𑀓𑁆𑀔𑀸𑀧𑁂𑀲𑀼𑀁 𑀢𑀲𑁆𑀫𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑀸𑀮𑁂𑀬𑁂𑀯 𑀲𑀫𑁆𑀫𑀼𑀢𑀺𑀲𑀗𑁆𑀖𑁄 𑀮𑀩𑁆𑀪𑀢𑀺. 𑀅𑀧𑀺𑀘 𑀦 𑀢𑁂 𑀤𑀼𑀮𑁆𑀮𑀪𑀸𑀬𑁂𑀯 𑀳𑁄𑀦𑁆𑀢𑀺, 𑀅𑀣 𑀔𑁄 𑀢𑀲𑁆𑀫𑀺𑀁 𑀉𑀤𑁆𑀤𑀺𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑀲𑁆𑀲𑀸𑀧𑀺 𑀓𑀢𑀸𑀓𑀸𑀭𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀨𑀮𑀸𑀧𑀺 𑀳𑁄𑀦𑁆𑀢𑀺 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀪𑀯𑀺𑀲𑁆𑀲𑀦𑁆𑀢𑀺 𑀔𑁄 𑀧𑀦𑀸𑀦𑀦𑁆𑀤 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀕𑁄𑀢𑁆𑀭𑀪𑀼𑀦𑁄 𑀓𑀸𑀲𑀸𑀯𑀓𑀡𑁆𑀞𑀸 𑀤𑀼𑀲𑁆𑀲𑀻𑀮𑀸 𑀧𑀸𑀧𑀥𑀫𑁆𑀫𑀸 𑀢𑁂𑀲𑀼 𑀤𑀼𑀲𑁆𑀲𑀻𑀮𑁂𑀲𑀼 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀤𑀸𑀦𑀁 𑀤𑀲𑁆𑀲𑀦𑁆𑀢𑀺, 𑀢𑀤𑀸 𑀧𑀸𑀳𑀁 𑀆𑀦𑀦𑁆𑀤 𑀲𑀗𑁆𑀖𑀕𑀢𑀁 𑀤𑀓𑁆𑀔𑀺𑀡𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀧𑁆𑀧𑀫𑁂𑀬𑁆𑀬𑀁 𑀯𑀤𑀸𑀫𑀺 𑀦 𑀢𑁆𑀯𑁂𑀯𑀸𑀳𑀁 𑀆𑀦𑀦𑁆𑀤 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀲𑀗𑁆𑀖𑀕𑀢𑀸 𑀤𑀓𑁆𑀔𑀺𑀡𑀸 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀁 𑀤𑀓𑁆𑀔𑀺𑀡𑀁 𑀫𑀳𑀧𑁆𑀨𑀮𑀦𑁆𑀢𑀺 𑀯𑀤𑀸𑀫𑀻’’𑀢𑀺. 𑀢𑀣𑀸 𑀳𑀺 𑀉𑀧𑀭𑀺𑀧𑀡𑁆𑀡𑀸𑀲𑀓𑁂 𑀤𑀓𑁆𑀔𑀺𑀡𑀯𑀺𑀪𑀗𑁆𑀕𑀯𑀡𑁆𑀡𑀦𑀸𑀬𑀁 ‘‘𑀓𑀸𑀲𑀸𑀯𑀓𑀡𑁆𑀞𑀸𑀦𑀁 𑀲𑀗𑁆𑀖𑁂 𑀤𑀺𑀦𑁆𑀦𑁂 𑀤𑀓𑁆𑀔𑀺𑀡𑀸𑀧𑀺 𑀕𑀼𑀡𑀸𑀲𑀗𑁆𑀔𑁆𑀬𑀸𑀬 𑀅𑀲𑀗𑁆𑀔𑁆𑀬𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁. 𑀲𑀗𑁆𑀖𑀕𑀢𑀤𑀓𑁆𑀔𑀺𑀡𑀸 𑀳𑀺 𑀲𑀗𑁆𑀖𑁂 𑀘𑀺𑀢𑁆𑀢𑀻𑀓𑀸𑀭𑀁 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀲𑁆𑀲 𑀳𑁄𑀢𑀺. 𑀲𑀗𑁆𑀖𑁂 𑀧𑀦 𑀘𑀺𑀢𑁆𑀢𑀻𑀓𑀸𑀭𑁄 𑀤𑀼𑀓𑁆𑀓𑀭𑁄 𑀬𑁄 𑀳𑀺 ‘‘𑀲𑀗𑁆𑀖𑀕𑀢𑀁 𑀤𑀓𑁆𑀔𑀺𑀡𑀁 𑀤𑀲𑁆𑀲𑀸𑀫𑀻’’𑀢𑀺 𑀤𑁂𑀬𑁆𑀬𑀥𑀫𑁆𑀫𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 ¶ 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀦𑁆𑀢𑁂 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀏𑀓𑀁 𑀣𑁂𑀭𑀁 𑀤𑁂𑀣𑀸’𑀢𑀺 𑀯𑀤𑀢𑀺, 𑀅𑀣 𑀲𑀗𑁆𑀖𑀢𑁄 𑀲𑀸𑀫𑀡𑁂𑀭𑀁 𑀮𑀪𑀺𑀢𑁆𑀯𑀸 ‘‘𑀲𑀸𑀫𑀡𑁂𑀭𑁄 𑀫𑁂 𑀮𑀤𑁆𑀥𑁄’’𑀢𑀺 𑀅𑀜𑁆𑀜𑀣𑀢𑁆𑀢𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀲 𑀤𑀓𑁆𑀔𑀺𑀡𑀸 𑀲𑀗𑁆𑀖𑀕𑀢𑀸 𑀦 𑀳𑁄𑀢𑀺. 𑀫𑀳𑀸𑀣𑁂𑀭𑀁 𑀮𑀪𑀺𑀢𑁆𑀯𑀸 𑀧𑀺 ‘‘𑀫𑀳𑀸𑀣𑁂𑀭𑁄 𑀫𑁂 𑀮𑀤𑁆𑀥𑁄’’𑀢𑀺 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲𑀸𑀧𑀺 𑀦 𑀳𑁄𑀢𑀺𑀬𑁂𑀯. 𑀢𑀲𑁆𑀲 𑀤𑀓𑁆𑀔𑀺𑀡𑀸 𑀲𑀗𑁆𑀖𑀕𑀢𑀸 𑀦 𑀳𑁄𑀢𑀺. 𑀬𑁄 𑀧𑀦 𑀲𑀸𑀫𑀡𑁂𑀭𑀁 𑀉𑀧𑀲𑀫𑁆𑀧𑀦𑁆𑀦𑀁 𑀯𑀸 𑀤𑀳𑀭𑀁 𑀯𑀸 𑀣𑁂𑀭𑀁 𑀯𑀸 𑀩𑀸𑀮𑀁 𑀯𑀸 𑀧𑀡𑁆𑀟𑀺𑀢𑀁 𑀯𑀸 𑀬𑀁𑀓𑀺𑀜𑁆𑀘𑀺 𑀲𑀗𑁆𑀖𑀢𑁄 𑀮𑀪𑀺𑀢𑁆𑀯𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀳𑀼𑀢𑁆𑀯𑀸 ‘‘𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺 𑀲𑀗𑁆𑀖𑁂 𑀘𑀺𑀢𑁆𑀢𑀻𑀓𑀸𑀭𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀤𑀓𑁆𑀔𑀺𑀡𑀸 𑀲𑀗𑁆𑀖𑀕𑀢𑀸 𑀦𑀸𑀫 𑀳𑁄𑀢𑀺. 𑀧𑀭𑀲𑀫𑀼𑀤𑁆𑀤𑀯𑀸𑀲𑀺𑀦𑁄 𑀓𑀺𑀭 𑀏𑀯𑀁 𑀓𑀭𑁄𑀦𑁆𑀢𑀺 𑀢𑀢𑁆𑀣 𑀳𑀺 𑀏𑀓𑁄 𑀯𑀺𑀳𑀸𑀭𑀲𑁆𑀲𑀸𑀫𑀺𑀓𑀼𑀝𑀼𑀫𑁆𑀩𑀺𑀓𑁄 ‘‘𑀲𑀗𑁆𑀖𑀕𑀢𑀁 𑀤𑀓𑁆𑀔𑀺𑀡𑀁 𑀤𑀲𑁆𑀲𑀸𑀫𑀻’’𑀢𑀺 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀏𑀓𑀁 𑀪𑀺𑀓𑁆𑀔𑀼𑀁 𑀤𑁂𑀣𑀸’’𑀢𑀺 𑀬𑀸𑀘𑀺𑀢𑁆𑀯𑀸 𑀲𑁄 𑀏𑀓𑀁 𑀤𑀼𑀲𑁆𑀲𑀻𑀮𑀪𑀺𑀓𑁆𑀔𑀼𑀁 𑀮𑀪𑀺𑀢𑁆𑀯𑀸 𑀦𑀺𑀲𑀻𑀤𑀦𑀝𑁆𑀞𑀸𑀦𑀁 𑀑𑀧𑀼𑀜𑁆𑀚𑀸𑀧𑁂𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀉𑀧𑀭𑀺 𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀕𑀦𑁆𑀥𑀥𑀽𑀫𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀢𑁆𑀯𑀸 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀫𑀓𑁆𑀔𑁂𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀲𑀗𑁆𑀖𑁂 𑀘𑀺𑀢𑁆𑀢𑀻𑀓𑀸𑀭𑁂𑀦 𑀤𑁂𑀬𑁆𑀬𑀥𑀫𑁆𑀫𑀁 𑀅𑀤𑀸𑀲𑀺 𑀲𑁄 𑀪𑀺𑀓𑁆𑀔𑀼 𑀧𑀘𑁆𑀙𑀸𑀪𑀢𑁆𑀢𑀁 𑀯𑀺𑀳𑀸𑀭𑀁 𑀚𑀕𑁆𑀕𑀦𑀢𑁆𑀣𑀸𑀬 ‘‘𑀓𑀼𑀤𑀸𑀮𑀓𑀁 𑀤𑁂𑀣𑀸’’𑀢𑀺 𑀖𑀭𑀤𑁆𑀯𑀸𑀭𑀁 𑀆𑀕𑀢𑁄 𑀉𑀧𑀸𑀲𑀓𑁄 𑀦𑀺𑀲𑀺𑀦𑁆𑀦𑁄𑀯 𑀓𑀼𑀤𑀸𑀮𑀁 𑀧𑀸𑀤𑁂𑀦 𑀔𑀺𑀧𑀺𑀢𑁆𑀯𑀸 ‘‘𑀕𑀡𑁆𑀳𑀸’’𑀢𑀺 𑀅𑀤𑀸𑀲𑀺 𑀢𑀫𑁂𑀦𑀁 𑀫𑀦𑀼𑀲𑁆𑀲𑀸 𑀆𑀳𑀁𑀲𑀼 ‘‘𑀢𑀼𑀫𑁆𑀳𑁂𑀳𑀺 𑀧𑀸𑀢𑁄𑀯 𑀏𑀢𑀲𑁆𑀲 𑀓𑀢𑀲𑀓𑁆𑀓𑀸𑀭𑁄 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸, 𑀇𑀤𑀸𑀦𑀺 𑀅𑀧𑀘𑀬𑀫𑀢𑁆𑀢𑀓𑀫𑁆𑀧𑀺 𑀦𑀢𑁆𑀣𑀺, 𑀓𑀺𑀁 𑀦𑀸𑀫𑁂𑀢’’𑀦𑁆𑀢𑀺. 𑀉𑀧𑀸𑀲𑀓𑁄 ‘‘𑀲𑀗𑁆𑀖𑀲𑁆𑀲 𑀲𑁄 𑀅𑀬𑁆𑀬𑁄 𑀘𑀺𑀢𑁆𑀢𑀻𑀓𑀸𑀭𑁄, 𑀦 𑀏𑀢𑀲𑁆𑀲𑀸’’𑀢𑀺 𑀆𑀳. 𑀓𑀸𑀲𑀸𑀯𑀓𑀡𑁆𑀞𑀲𑀗𑁆𑀖𑀤𑀺𑀦𑁆𑀦𑀤𑀓𑁆𑀔𑀺𑀡𑀁 𑀧𑀦 𑀓𑁄 𑀲𑁄𑀥𑁂𑀢𑀺, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑀸𑀦𑀸𑀤𑀬𑁄 𑀅𑀲𑀻𑀢𑀺𑀫𑀳𑀸𑀣𑁂𑀭𑀸 𑀲𑁄𑀥𑁂𑀦𑁆𑀢𑀺 𑀅𑀧𑀺 𑀘 𑀣𑁂𑀭𑀸 𑀘𑀺𑀭𑀧𑀭𑀺𑀦𑀺𑀩𑁆𑀩𑀼𑀢𑀸, 𑀣𑁂𑀭𑁂 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯𑀚𑁆𑀚𑀢𑀦𑀸 𑀥𑀭𑀫𑀸𑀦𑀔𑀻𑀡𑀸𑀲𑀯𑀸 𑀲𑁄𑀥𑁂𑀦𑁆𑀢𑀺𑀬𑁂𑀯, 𑀢𑀣𑀸 𑀳𑀺 𑀤𑀸𑀬𑀓𑀢𑁄 𑀧𑀝𑀺𑀕𑁆𑀕𑀸𑀳𑀢𑁄𑀧𑀺 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀤𑀸𑀦𑀁. 𑀤𑀸𑀬𑀓𑀢𑁄 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑀁 𑀓𑀣𑁂𑀢𑀩𑁆𑀩𑀁 𑀯𑁂𑀲𑁆𑀲𑀦𑁆𑀢𑀭𑁄 𑀳𑀺 𑀤𑀼𑀲𑁆𑀲𑀻𑀮𑀲𑁆𑀲 𑀚𑀽𑀚𑀓𑀸𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀬𑀦𑀲𑀤𑀺𑀲𑁂 𑀤𑁆𑀯𑁂 𑀚𑀸𑀮𑀻𑀓𑀡𑁆𑀳𑀸𑀚𑀺𑀦𑁂 𑀧𑀼𑀢𑁆𑀢𑁂 𑀤𑀢𑁆𑀯𑀸 𑀧𑀣𑀯𑀺𑀁 𑀓𑀫𑁆𑀧𑁂𑀲𑀺. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀆𑀭𑀩𑁆𑀪 𑀧𑀯𑀢𑁆𑀢𑀘𑁂𑀢𑀦𑀸𑀬 𑀫𑀳𑀦𑁆𑀢𑀪𑀸𑀯𑁂𑀦 𑀧𑀣𑀯𑀺𑀁 𑀓𑀫𑁆𑀧𑁂𑀲𑀺. 𑀏𑀯𑀁 𑀤𑀸𑀬𑀓𑀢𑁄𑀧𑀺 𑀫𑀳𑀧𑁆𑀨𑀮𑀁 𑀳𑁄𑀢𑀺. 𑀧𑀝𑀺𑀕𑁆𑀕𑀸𑀳𑀓𑀢𑁄 𑀧𑀦 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀤𑀺𑀦𑁆𑀦𑀘𑁄𑀭𑀖𑀸𑀢𑀓𑀯𑀢𑁆𑀣𑀼 𑀓𑀣𑁂𑀢𑀩𑁆𑀩𑀁 𑀘𑁄𑀭𑀖𑀸𑀢𑀓𑁄 𑀦𑀸𑀫 𑀳𑀺 𑀲𑀸𑀯𑀢𑁆𑀣𑀺𑀬𑀁 𑀏𑀓𑁄 𑀚𑀦𑀧𑀤𑀧𑀼𑀭𑀺𑀲𑁄 𑀧𑀜𑁆𑀘𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀘𑁄𑀭𑀖𑀸𑀢𑀓𑀓𑀫𑁆𑀫𑀁 𑀓𑀢𑁆𑀯𑀸 𑀫𑀳𑀮𑁆𑀮𑀓𑀓𑀸𑀮𑁂𑀧𑀺 𑀢𑀺𑀁𑀲 𑀯𑀲𑁆𑀲𑀸𑀦𑀺 𑀦𑀸𑀲𑀺𑀓𑀯𑀸𑀢𑁂𑀦𑁂𑀯 𑀓𑀡𑁆𑀡𑀦𑀸𑀲𑀸𑀤𑀻𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀘𑁄𑀭𑀖𑀸𑀢𑀓𑀓𑀫𑁆𑀫𑀁 ¶ 𑀓𑀭𑁄𑀦𑁆𑀢𑀲𑁆𑀲𑁂𑀯 𑀧𑀜𑁆𑀘𑀧𑀜𑁆𑀜𑀸𑀲 𑀯𑀲𑁆𑀲𑀸𑀦𑀺 𑀯𑀻𑀢𑀺𑀯𑀢𑁆𑀢𑀸𑀦𑀺. 𑀲𑁄 𑀫𑀭𑀡 𑀫𑀜𑁆𑀘𑁂 𑀦𑀺𑀧𑀦𑁆𑀦𑁄𑀯 𑀅𑀢𑁆𑀢𑀦𑁄 𑀓𑀫𑁆𑀫𑀩𑀮𑁂𑀦 𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄 𑀯𑀺𑀬 𑀫𑀳𑀸𑀲𑀤𑁆𑀤𑀁 𑀓𑀢𑁆𑀯𑀸 𑀤𑀼𑀓𑁆𑀔𑀺𑀢𑁄 𑀳𑁄𑀢𑀺, 𑀢𑀲𑁆𑀲 𑀲𑀤𑁆𑀤𑁂𑀦 𑀪𑀻𑀢𑀸 𑀫𑀦𑀼𑀲𑁆𑀲𑀸 𑀉𑀪𑀢𑁄 𑀧𑀲𑁆𑀲𑁂 𑀕𑁂𑀳𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺𑀁𑀲𑀼. 𑀢𑀤𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀤𑀺𑀩𑁆𑀩𑀘𑀓𑁆𑀔𑀼 𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀅𑀦𑀼𑀓𑀫𑁆𑀧𑀁 𑀧𑀝𑀺𑀘𑁆𑀘 𑀢𑀲𑁆𑀲 𑀕𑁂𑀳𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀲𑁄 𑀓𑀼𑀚𑁆𑀛𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀦𑀸𑀲𑀺𑀓𑀯𑀸𑀢𑁂𑀦 𑀯𑀺𑀲𑁆𑀲𑀚𑁆𑀚𑀫𑀸𑀦𑁄𑀧𑀺 𑀯𑀺𑀲𑁆𑀲𑀚𑁆𑀚𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀢𑀺𑀯𑀺𑀭𑁄𑀘𑀫𑀸𑀦𑀁 𑀣𑁂𑀭𑀁 𑀤𑀺𑀲𑁆𑀯𑀸 𑀅𑀢𑀺𑀯𑀺𑀬 𑀧𑀲𑀻𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀲𑀫𑁆𑀧𑀸𑀤𑀺𑀢𑀁 𑀧𑀸𑀬𑀸𑀲𑀁 𑀅𑀤𑀸𑀲𑀺. 𑀣𑁂𑀭𑁄𑀧𑀺 𑀫𑀗𑁆𑀕𑀮𑀁 𑀯𑀟𑁆𑀠𑁂𑀢𑁆𑀯𑀸 𑀧𑀓𑁆𑀓𑀫𑀺. 𑀘𑁄𑀭𑀖𑀸𑀢𑀓𑁄 𑀣𑁂𑀭𑀲𑁆𑀲 𑀤𑀺𑀦𑁆𑀦𑀤𑀸𑀦𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺, 𑀏𑀯𑀁 𑀧𑀝𑀺𑀕𑁆𑀕𑀸𑀳𑀓𑀢𑁄𑀧𑀺 𑀫𑀳𑀧𑁆𑀨𑀮𑀁 𑀳𑁄𑀢𑀺. 𑀉𑀪𑀬𑀢𑁄𑀧𑀺 𑀫𑀳𑀧𑁆𑀨𑀮𑀁, 𑀅𑀦𑀸𑀣𑀧𑀺𑀡𑁆𑀟𑀺𑀓𑀯𑀺𑀲𑀸𑀔𑀸𑀤𑀬𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀤𑀺𑀦𑁆𑀦𑀤𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸.

‘‘𑀢𑀣𑀸𑀕𑀢𑁂 𑀘 𑀲𑀫𑁆𑀩𑀼𑀤𑁆𑀥𑁂, 𑀅𑀣𑀯𑀸 𑀢𑀲𑁆𑀲 𑀲𑀸𑀯𑀓𑁂;

𑀦𑀢𑁆𑀣𑀺 𑀘𑀺𑀢𑁆𑀢𑁂 𑀧𑀲𑀦𑁆𑀦𑀫𑁆𑀳𑀺, 𑀅𑀧𑁆𑀧𑀓𑀸 𑀦𑀸𑀫 𑀤𑀓𑁆𑀔𑀺𑀡𑀸.

𑀏𑀯𑀁 𑀅𑀘𑀺𑀦𑁆𑀢𑀺𑀬𑀸 𑀩𑀼𑀤𑁆𑀥𑀸, 𑀩𑀼𑀤𑁆𑀥𑀥𑀫𑁆𑀫𑀸 𑀅𑀘𑀺𑀦𑁆𑀢𑀺𑀬𑀸;

𑀅𑀘𑀺𑀦𑁆𑀢𑀺𑀬𑁂 𑀧𑀲𑀦𑁆𑀦𑀸𑀦𑀁, 𑀯𑀺𑀧𑀸𑀓𑁄 𑀳𑁄𑀢𑀺 𑀅𑀘𑀺𑀦𑁆𑀢𑀺𑀬𑁄’’𑀢𑀺.

𑀏𑀯𑀁 𑀉𑀪𑀬𑀯𑀲𑁂𑀦 𑀫𑀳𑀧𑁆𑀨𑀮𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀸𑀬𑀓𑀢𑁄𑀧𑀺 𑀧𑀝𑀺𑀕𑁆𑀕𑀸𑀳𑀓𑀢𑁄𑀧𑀺 𑀦𑀺𑀧𑁆𑀨𑀮𑀫𑁂𑀯. 𑀲𑁂𑀬𑁆𑀬𑀣𑀸𑀧𑀺 𑀫𑀓𑁆𑀔𑀮𑀺𑀕𑁄𑀲𑀸𑀮𑀙𑀲𑀢𑁆𑀣𑀸𑀭𑀸𑀤𑀻𑀦𑀁 𑀅𑀢𑁆𑀢𑀦𑁄 𑀉𑀧𑀸𑀲𑀓𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀳𑀺 𑀧𑀽𑀚𑀸𑀯𑀺𑀲𑁂𑀲𑀸 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸.

‘‘𑀫𑀸𑀲𑁂 𑀫𑀸𑀲𑁂 𑀓𑀼𑀲𑀕𑁆𑀕𑁂𑀦, 𑀩𑀸𑀮𑁄 𑀪𑀼𑀜𑁆𑀚𑁂𑀬𑁆𑀬 𑀪𑁄𑀚𑀦𑀁;

𑀦 𑀲𑁄 𑀲𑀗𑁆𑀔𑀢𑀥𑀫𑁆𑀫𑀸𑀦𑀁, 𑀓𑀮𑀁 𑀦𑀸𑀕𑁆𑀖𑀢𑀺 𑀲𑁄𑀴𑀲𑀺’’𑀦𑁆𑀢𑀺.

𑀢𑁂𑀦𑁂𑀯𑀸𑀳 𑀪𑀕𑀯𑀸 𑀘𑀢𑁆𑀢𑀸𑀭𑀺𑀫𑀸𑀦𑀺 𑀆𑀦𑀦𑁆𑀤 𑀤𑀓𑁆𑀔𑀺𑀡𑀯𑀺𑀲𑀼𑀤𑁆𑀥𑀺𑀬𑁄’’𑀢𑀺. 𑀇𑀫𑀸𑀦𑀺 𑀢𑀻𑀡𑀺 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀭𑀢𑀦𑀸𑀦𑀺 𑀲𑀸𑀥𑀽𑀦𑀁 𑀭𑀢𑀺𑀚𑀦𑀦𑀢𑁆𑀣𑁂𑀦 𑀭𑀢𑀦𑀸𑀦𑀺 𑀦𑀸𑀫.

𑀯𑀼𑀢𑁆𑀢𑀜𑁆𑀳𑁂𑀢𑀁.

‘‘𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀁 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺.

𑀭𑀢𑀦𑀜𑁆𑀘 𑀦𑀸𑀫 𑀤𑀼𑀯𑀺𑀥𑀁 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑀯𑀲𑁂𑀦. 𑀢𑀢𑁆𑀣 𑀅𑀯𑀺𑀜𑁆𑀜𑀸𑀡𑀓𑀁 𑀘𑀓𑁆𑀓𑀭𑀢𑀦𑀁, 𑀫𑀡𑀺𑀭𑀢𑀦𑀁 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑀼𑀯𑀡𑁆𑀡𑀭𑀚𑀢𑀸𑀤𑀺. 𑀲𑀯𑀺𑀜𑁆𑀜𑀸𑀡𑀓𑀁 𑀳𑀢𑁆𑀣𑀺𑀅𑀲𑁆𑀲𑀭𑀢𑀦𑀸𑀤𑀺𑀧𑀭𑀺𑀡𑀸𑀬𑀓𑀭𑀢𑀦𑀧𑀭𑀺𑀬𑁄𑀲𑀸𑀦𑀁, 𑀬𑀁 𑀯𑀸 ¶ 𑀧𑀦𑀜𑁆𑀜𑀫𑁆𑀧𑀺 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀁. 𑀏𑀯𑀁 𑀤𑀼𑀯𑀺𑀥𑁂 𑀘𑁂𑀢𑁆𑀣 𑀲𑀯𑀺𑀜𑁆𑀜𑀸𑀡𑀓𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀓𑀲𑁆𑀫𑀸 𑀬𑀲𑁆𑀫𑀸 𑀅𑀯𑀺𑀜𑁆𑀜𑀸𑀡𑀓𑀁 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀼𑀢𑁆𑀢𑀸𑀤𑀺𑀭𑀢𑀦𑀁 𑀲𑀯𑀺𑀜𑁆𑀜𑀸𑀡𑀓𑀸𑀦𑀁 𑀳𑀢𑁆𑀢𑀺𑀭𑀢𑀦𑀸𑀤𑀻𑀦𑀁 𑀅𑀮𑀗𑁆𑀓𑀸𑀭𑀢𑁆𑀣𑀸𑀬 𑀉𑀧𑀦𑀻𑀬𑀢𑀺. 𑀲𑀯𑀺𑀜𑁆𑀜𑀸𑀡𑀓𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀢𑀺𑀭𑀘𑁆𑀙𑀸𑀦𑀕𑀢𑀭𑀢𑀦𑀁 𑀫𑀦𑀼𑀲𑁆𑀲𑀭𑀢𑀦𑀜𑁆𑀘. 𑀢𑀢𑁆𑀣 𑀫𑀦𑀼𑀲𑁆𑀲𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸 𑀬𑀲𑁆𑀫𑀸 𑀢𑀺𑀭𑀘𑁆𑀙𑀸𑀦𑀕𑀢𑀭𑀢𑀦𑀁 𑀫𑀦𑀼𑀲𑁆𑀲𑀭𑀢𑀦𑀲𑁆𑀲 𑀑𑀧𑀯𑀬𑁆𑀳𑀁 𑀳𑁄𑀢𑀺. 𑀫𑀦𑀼𑀲𑁆𑀲𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀇𑀢𑁆𑀣𑀺𑀭𑀢𑀦𑀁 𑀧𑀼𑀭𑀺𑀲𑀭𑀢𑀦𑀜𑁆𑀘. 𑀢𑀢𑁆𑀣 𑀧𑀼𑀭𑀺𑀲𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸 𑀬𑀲𑁆𑀫𑀸 𑀇𑀢𑁆𑀣𑀺𑀭𑀢𑀦𑀁 𑀧𑀼𑀭𑀺𑀲𑀭𑀢𑀦𑀲𑁆𑀲 𑀧𑀭𑀺𑀘𑀸𑀭𑀺𑀓𑀢𑁆𑀢𑀁 𑀆𑀧𑀚𑁆𑀚𑀢𑀺. 𑀧𑀼𑀭𑀺𑀲𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀅𑀕𑀸𑀭𑀺𑀓𑀭𑀢𑀦𑀁 𑀅𑀦𑀕𑀸𑀭𑀺𑀓𑀭𑀢𑀦𑀜𑁆𑀘 𑀢𑀢𑁆𑀣 𑀅𑀦𑀕𑀸𑀭𑀺𑀓𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸 𑀬𑀲𑁆𑀫𑀸 𑀅𑀕𑀸𑀭𑀺𑀓𑀭𑀢𑀦𑁂𑀲𑀼 𑀅𑀕𑁆𑀕𑁄 𑀘𑀓𑁆𑀓𑀯𑀢𑁆𑀢𑀻𑀧𑀺 𑀲𑀻𑀮𑀸𑀤𑀺𑀕𑀼𑀡𑀬𑀼𑀢𑁆𑀢𑀁 𑀅𑀦𑀕𑀸𑀭𑀺𑀓𑀭𑀢𑀦𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀉𑀧𑀝𑁆𑀞𑀳𑀺𑀢𑁆𑀯𑀸 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀤𑀺𑀩𑁆𑀩𑀫𑀸𑀦𑀼𑀲𑁆𑀲𑀺𑀓𑀸 𑀲𑀫𑁆𑀧𑀢𑁆𑀢𑀺𑀬𑁄 𑀧𑀸𑀧𑀼𑀡𑀺𑀢𑁆𑀯𑀸 𑀅𑀦𑁆𑀢𑁂 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀸𑀢𑀺. 𑀅𑀦𑀕𑀸𑀭𑀺𑀓𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀅𑀭𑀺𑀬𑀧𑀼𑀣𑀼𑀚𑁆𑀚𑀦𑀯𑀲𑁂𑀦. 𑀅𑀭𑀺𑀬𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀲𑁂𑀓𑁆𑀔𑀸𑀲𑁂𑀓𑁆𑀔𑀯𑀲𑁂𑀦. 𑀅𑀲𑁂𑀓𑁆𑀔𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑀫𑀣𑀬𑀸𑀦𑀺𑀓𑀯𑀲𑁂𑀦. 𑀲𑀫𑀣𑀬𑀸𑀦𑀺𑀓𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀲𑀸𑀯𑀓𑀧𑀸𑀭𑀫𑀺𑀧𑁆𑀧𑀢𑁆𑀢𑀫𑀧𑀢𑁆𑀢𑀜𑁆𑀘. 𑀢𑀢𑁆𑀣 𑀲𑀸𑀯𑀓𑀧𑀸𑀭𑀫𑀺𑀧𑁆𑀧𑀢𑁆𑀢𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸 𑀕𑀼𑀡𑀫𑀳𑀢𑁆𑀢𑀢𑀸𑀬. 𑀲𑀸𑀯𑀓𑀧𑀸𑀭𑀫𑀺𑀧𑁆𑀧𑀢𑁆𑀢𑀭𑀢𑀦𑀢𑁄𑀧𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸 𑀕𑀼𑀡𑀫𑀳𑀢𑁆𑀢𑀢𑀸𑀬. 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑀸𑀦𑀲𑀤𑀺𑀲𑀸𑀧𑀺 𑀳𑀺 𑀅𑀦𑁂𑀓𑀲𑀢𑀸 𑀲𑀸𑀯𑀓𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀕𑀼𑀡𑀸𑀦𑀁 𑀲𑀢𑀪𑀸𑀕𑀫𑁆𑀧𑀺 𑀦 𑀉𑀧𑀦𑁂𑀦𑁆𑀢𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑀢𑁄 𑀲𑀫𑁆𑀩𑀼𑀤𑁆𑀥𑀭𑀢𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀓𑀲𑁆𑀫𑀸 𑀕𑀼𑀡𑀫𑀳𑀢𑁆𑀢𑀢𑀸𑀬 𑀲𑀓𑀮𑀫𑁆𑀧𑀺 𑀚𑀫𑁆𑀩𑀼𑀤𑀻𑀧𑀁 𑀧𑀮𑁆𑀮𑀗𑁆𑀓𑁂 𑀦 𑀧𑀮𑁆𑀮𑀗𑁆𑀓𑀁 𑀖𑀝𑁆𑀝𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑀸 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸 𑀏𑀓𑀲𑁆𑀲 𑀕𑀼𑀡𑀸𑀦𑀁 𑀦𑁂𑀯 𑀲𑀗𑁆𑀔𑁆𑀬𑀁 𑀓𑀮𑀁 𑀕𑀡𑀦𑀪𑀸𑀕𑀁 𑀉𑀧𑀦𑁂𑀦𑁆𑀢𑀺, 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀬𑀸𑀯𑀢𑀸 𑀪𑀺𑀓𑁆𑀔𑀯𑁂 𑀲𑀢𑁆𑀢𑀸 𑀅𑀧𑀤𑀸 𑀯𑀸…𑀧𑁂… 𑀢𑀣𑀸𑀕𑀢𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 𑀆𑀤𑀺. 𑀏𑀯𑀁 ‘‘𑀩𑀼𑀤𑁆𑀥𑁄 𑀘 𑀤𑀼𑀮𑁆𑀮𑀪𑁄 𑀮𑁄𑀓𑁂, 𑀲𑀤𑁆𑀥𑀫𑁆𑀫𑀲𑀯𑀦𑀫𑁆𑀧𑀺 𑀘, 𑀲𑀗𑁆𑀖𑁄 𑀘 𑀤𑀼𑀮𑁆𑀮𑀪𑁄 𑀮𑁄𑀓𑁂’’𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀧𑀤𑀸𑀦𑀁 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀲𑀩𑁆𑀩𑀲𑁄 𑀅𑀢𑁆𑀣𑁄 𑀯𑀼𑀢𑁆𑀢𑁄𑀬𑁂𑀯 𑀳𑁄𑀢𑀺.

𑀇𑀢𑀺 𑀲𑀸𑀕𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑀯𑀺𑀭𑀘𑀺𑀢𑁂 𑀲𑀻𑀫𑀯𑀺𑀲𑁄𑀥𑀦𑁂 𑀲𑀗𑁆𑀖𑀯𑀡𑁆𑀡𑀦𑀸𑀬

𑀲𑀫𑀲𑀻𑀲𑀺𑀓𑀡𑁆𑀟𑁄 𑀘𑀢𑀼𑀢𑁆𑀣𑁄 𑀧𑀭𑀺𑀘𑁆𑀙𑁂𑀤𑁄.

𑀧𑀓𑀺𑀡𑁆𑀡𑀓𑀓𑀡𑁆𑀟𑁄

𑀇𑀤𑀸𑀦𑀺 ¶ 𑀲𑀧𑁆𑀧𑀼𑀭𑀺𑀲𑀸𑀢𑀺 𑀤𑀼𑀮𑁆𑀮𑀪𑀸𑀢𑀺 𑀇𑀫𑀲𑁆𑀲 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄 𑀲𑀫𑁆𑀧𑀢𑁆𑀢𑁄 𑀢𑀣𑀸 𑀳𑀺 𑀮𑁄𑀓𑁂 𑀲𑀧𑁆𑀧𑀼𑀭𑀺𑀲𑀸𑀧𑀺 𑀅𑀢𑀺𑀤𑀼𑀮𑁆𑀮𑀪𑀸𑀬𑁂𑀯. 𑀲𑀧𑁆𑀧𑀼𑀭𑀺𑀲𑀸𑀢𑀺 𑀓𑀮𑁆𑀬𑀸𑀡𑀕𑀼𑀡𑀲𑀫𑁆𑀧𑀦𑁆𑀦𑀸 𑀉𑀢𑁆𑀢𑀫𑀧𑀼𑀭𑀺𑀲𑀸. 𑀢𑁂 𑀦𑀺𑀲𑁆𑀲𑀸𑀬 𑀚𑀸𑀢𑀺𑀥𑀫𑁆𑀫𑀸 𑀲𑀢𑁆𑀢𑀸 𑀚𑀸𑀢𑀺𑀬𑀸, 𑀫𑀭𑀡𑀥𑀫𑁆𑀫𑀸 𑀲𑀢𑁆𑀢𑀸 𑀫𑀭𑀡𑀢𑁄 𑀫𑀼𑀘𑁆𑀘𑀦𑁆𑀢𑀺 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀫𑀫𑀜𑁆𑀳𑀺 𑀆𑀦𑀦𑁆𑀤 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀆𑀕𑀫𑁆𑀫 𑀚𑀸𑀢𑀺𑀬𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀺, 𑀚𑀭𑀸𑀥𑀫𑁆𑀫𑀸 𑀲𑀢𑁆𑀢𑀸 𑀚𑀭𑀸𑀬 𑀫𑀼𑀘𑁆𑀘𑀦𑁆𑀢𑀻’’𑀢𑀺 𑀆𑀤𑀺 𑀯𑀘𑀦𑀢𑁄 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀬𑁂𑀯 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀦𑀸𑀫. 𑀢𑀁 𑀅𑀮𑀪𑀦𑁆𑀢𑁂𑀦 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑀸𑀦𑀸𑀤𑀬𑁄 𑀅𑀭𑀺𑀬𑀧𑀼𑀕𑁆𑀕𑀮𑀸 𑀯𑀸. 𑀢𑁂𑀧𑀺 𑀅𑀮𑀪𑀦𑁆𑀢𑁂𑀦 𑀏𑀓𑀦𑁆𑀢𑀚𑀳𑀺𑀢𑀁 𑀲𑀺𑀯𑀝𑁆𑀞𑀺𑀓𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀮𑀪𑀺𑀢𑀩𑁆𑀩𑀁, 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑁄𑀭𑀸𑀡𑁂𑀳𑀺.

‘‘𑀧𑀺𑀬𑁄 𑀕𑀭𑀼 𑀪𑀸𑀯𑀦𑀻𑀬𑁄, 𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄;

𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸, 𑀦𑁄𑀘𑀸𑀞𑀸𑀦𑁂 𑀦𑀺𑀬𑁄𑀚𑀬𑁂’’𑀢𑀺.

𑀏𑀯𑀫𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑁄 𑀯𑀟𑁆𑀠𑀺𑀧𑀓𑁆𑀔𑁂 𑀞𑀺𑀢𑀧𑀡𑁆𑀟𑀺𑀢𑀧𑀼𑀕𑁆𑀕𑀮𑁄 𑀮𑁄𑀓𑁂 𑀤𑀼𑀮𑁆𑀮𑀪𑁄𑀯. 𑀓𑀢𑀫𑁄 𑀧𑀡𑁆𑀟𑀺𑀢𑀧𑀼𑀕𑁆𑀕𑀮𑁄 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀅𑀲𑀻𑀢𑀺 𑀘 𑀫𑀳𑀸𑀲𑀸𑀯𑀓𑀸 𑀅𑀜𑁆𑀜𑁂 𑀘 𑀢𑀣𑀸𑀕𑀢𑀲𑁆𑀲 𑀲𑀸𑀯𑀓𑀸 𑀲𑀼𑀦𑁂𑀢𑁆𑀢𑀫𑀳𑀸𑀕𑁄𑀯𑀺𑀦𑁆𑀤𑀯𑀺𑀥𑀼𑀭𑀲𑀭𑀪𑀗𑁆𑀕𑀫𑀳𑁄𑀲𑀥𑀲𑀼𑀢𑀲𑁄𑀫𑀦𑀺𑀫𑀺𑀭𑀸𑀚𑀅𑀬𑁄𑀖𑀭𑀓𑀼𑀫𑀸𑀭𑀓 𑀅𑀓𑀢𑁆𑀢𑀺𑀧𑀡𑁆𑀟𑀺𑀢𑀸𑀤𑀬𑁄 𑀘 𑀧𑀡𑁆𑀟𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀪𑀬𑁂 𑀯𑀺𑀬 𑀭𑀓𑁆𑀔𑀸, 𑀅𑀦𑁆𑀥𑀓𑀸𑀭𑁂 𑀯𑀺𑀬 𑀧𑀤𑀻𑀧𑀸, 𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀤𑀼𑀓𑁆𑀔𑀸𑀪𑀺𑀪𑀯𑁂 𑀯𑀺𑀬 𑀅𑀦𑁆𑀦𑀧𑀸𑀦𑀸𑀤𑀺𑀧𑀝𑀺𑀮𑀸𑀪𑁄, 𑀅𑀢𑁆𑀢𑀦𑁄 𑀯𑀘𑀦𑀓𑀭𑀸𑀦𑀁 𑀲𑀩𑁆𑀩𑀪𑀬𑀉𑀧𑀤𑁆𑀤𑀯𑀽𑀧𑀲𑀕𑁆𑀕𑀯𑀺𑀤𑁆𑀥𑀁𑀲𑀦𑀲𑀫𑀢𑁆𑀣𑀸 𑀳𑁄𑀦𑁆𑀢𑀺 𑀢𑀣𑀸 𑀳𑀺 𑀢𑀣𑀸𑀕𑀢𑀁 𑀆𑀕𑀫𑁆𑀫 𑀅𑀲𑀗𑁆𑀔𑁆𑀬𑁂𑀬𑁆𑀬𑀸 𑀅𑀧𑀭𑀺𑀫𑀸𑀡𑀸 𑀤𑁂𑀯𑀫𑀦𑀼𑀲𑁆𑀲𑀸 𑀆𑀲𑀯𑀓𑁆𑀔𑀬𑀁 𑀧𑀢𑁆𑀢𑀸 𑀩𑁆𑀭𑀳𑁆𑀫𑀮𑁄𑀓𑁂 𑀧𑀢𑀺𑀝𑁆𑀞𑀺𑀢𑀸, 𑀤𑁂𑀯𑀮𑁄𑀓𑁂 𑀉𑀧𑁆𑀧𑀦𑁆𑀦𑀸. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀘𑀢𑀽𑀳𑀺 𑀘 𑀧𑀘𑁆𑀘𑀬𑁂𑀳𑀺 𑀣𑁂𑀭𑀁 𑀉𑀧𑀝𑁆𑀞𑀳𑀺𑀢𑁆𑀯𑀸 𑀅𑀲𑀻𑀢𑀺 𑀓𑀼𑀲𑀮𑀳𑀲𑁆𑀲𑀸𑀦𑀺 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀸𑀦𑀺, 𑀢𑀣𑀸 𑀫𑀳𑀸𑀫𑁄𑀕𑁆𑀕𑀮𑀸𑀦𑀫𑀳𑀸𑀓𑀲𑁆𑀲𑀧𑀧𑀪𑀼𑀢𑀺 𑀲𑀼𑀦𑁂𑀢𑁆𑀢𑀲𑁆𑀲 𑀲𑀢𑁆𑀣𑀼𑀦𑁄 𑀲𑀸𑀯𑀓𑀸 𑀅𑀧𑁆𑀧𑁂𑀓𑀘𑁆𑀘𑁂 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑀧𑀚𑁆𑀚𑀺𑀁𑀲𑀼, 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁…𑀧𑁂… 𑀅𑀧𑁆𑀧𑁂𑀓𑀘𑁆𑀘𑁂 𑀕𑀳𑀧𑀢𑀺𑀫𑀳𑀸𑀲𑀸𑀮𑀓𑀼𑀮𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺𑀁𑀲𑀼, 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀦𑀢𑁆𑀣𑀺 𑀪𑀺𑀓𑁆𑀔𑀯𑁂 𑀧𑀡𑁆𑀟𑀺𑀢𑀢𑁄 𑀪𑀬𑀁, 𑀦𑀢𑁆𑀣𑀺 𑀧𑀡𑁆𑀟𑀺𑀢𑀢𑁄 𑀉𑀧𑀤𑁆𑀤𑀯𑁄, 𑀦𑀢𑁆𑀣𑀺 𑀧𑀡𑁆𑀟𑀺𑀢𑀢𑁄 𑀉𑀧𑀲𑀕𑁆𑀕𑁄’’𑀢𑀺. 𑀅𑀧𑀺𑀘 𑀢𑀕𑁆𑀕𑀭𑀫𑀸𑀮𑀸𑀤𑀺𑀕𑀦𑁆𑀥𑀪𑀡𑁆𑀟𑀲𑀤𑀺𑀲𑁄 𑀧𑀡𑁆𑀟𑀺𑀢𑁄, 𑀢𑀕𑁆𑀕𑀭𑀫𑀸𑀮𑀸𑀤𑀺𑀕𑀦𑁆𑀥𑀪𑀡𑁆𑀟𑀧𑀮𑀺𑀯𑁂𑀞𑀦𑀧𑀢𑁆𑀢𑀲𑀤𑀺𑀲𑁄 𑀢𑀤𑀼𑀧𑀲𑁂𑀯𑀻 𑀯𑀼𑀢𑁆𑀢𑀜𑁆𑀳𑁂𑀢𑀁 𑀦𑀸𑀭𑀤𑀚𑀸𑀢𑀓𑁂.

‘‘𑀢𑀕𑁆𑀕𑀭𑀜𑁆𑀘 ¶ 𑀧𑀮𑀸𑀲𑁂𑀦, 𑀬𑁄 𑀦𑀭𑁄 𑀉𑀧𑀦𑀬𑁆𑀳𑀢𑀺;

𑀧𑀢𑁆𑀢𑀸𑀧𑀺 𑀲𑀼𑀭𑀪𑀺 𑀯𑀸𑀬𑀦𑁆𑀢𑀺, 𑀏𑀯𑀁 𑀥𑀻𑀭𑀽𑀧𑀲𑁂𑀯𑀦𑀸’’𑀢𑀺.

𑀅𑀓𑀺𑀢𑁆𑀢𑀺𑀧𑀡𑁆𑀟𑀺𑀢𑁄 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀯𑀭𑁂 𑀤𑀺𑀬𑁆𑀬𑀫𑀸𑀦𑁂 𑀏𑀯𑀫𑀸𑀳

‘‘𑀥𑀻𑀭𑀁 𑀧𑀲𑁆𑀲𑁂 𑀲𑀼𑀡𑁂 𑀥𑀻𑀭𑀁, 𑀥𑀻𑀭𑁂𑀦 𑀲𑀳 𑀲𑀁𑀯𑀲𑁂;

𑀥𑀻𑀭𑁂𑀦𑀸’𑀮𑀸𑀧𑀲𑀮𑁆𑀮𑀸𑀧𑀁, 𑀢𑀁 𑀓𑀭𑁂 𑀢𑀜𑁆𑀘 𑀭𑁄𑀘𑀬𑁂.

𑀓𑀺𑀁 𑀦𑀼 𑀢𑁂 𑀅𑀓𑀭𑀁 𑀥𑀻𑀭𑁄, 𑀯𑀤 𑀓𑀲𑁆𑀲𑀧 𑀓𑀸𑀭𑀡𑀁;

𑀓𑁂𑀦 𑀓𑀲𑁆𑀲𑀧 𑀥𑀻𑀭𑀲𑁆𑀲, 𑀤𑀲𑁆𑀲𑀦𑀁 𑀅𑀪𑀺𑀓𑀗𑁆𑀔𑀲𑀺.

𑀦𑀬𑀁 𑀦𑀬𑀢𑀺 𑀫𑁂𑀥𑀸𑀯𑀻, 𑀅𑀤𑀼𑀭𑀸𑀬𑀁 𑀦 𑀬𑀼𑀜𑁆𑀚𑀢𑀺;

𑀲𑀦𑀭𑁄 𑀲𑁂𑀬𑁆𑀬𑀲𑁄 𑀳𑁄𑀢𑀺, 𑀲𑀫𑁆𑀫𑀸 𑀯𑀼𑀢𑁆𑀢𑁄 𑀦 𑀓𑀼𑀧𑁆𑀧𑀢𑀺;

𑀯𑀺𑀦𑀬𑀁 𑀲𑁄 𑀧𑀚𑀸𑀦𑀸𑀢𑀺, 𑀲𑀸𑀥𑀼 𑀢𑁂𑀦 𑀲𑀫𑀸𑀕𑀫𑁄’’𑀢𑀺.

𑀅𑀧𑀺𑀘 𑀢𑁂𑀧𑀺 𑀲𑀧𑁆𑀧𑀼𑀭𑀺𑀲𑁂 𑀲𑀗𑁆𑀕𑀫𑁆𑀫 𑀅𑀲𑁆𑀲𑀼𑀢𑀧𑀼𑀩𑁆𑀩𑀫𑁆𑀧𑀺 𑀉𑀪𑀬𑀮𑁄𑀓𑀳𑀺𑀢𑀸𑀯𑀳𑀁 𑀯𑀸𑀘𑀁 𑀲𑀼𑀬𑁆𑀬𑀢𑁂𑀯, 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁.

‘‘𑀲𑀼𑀪𑀸𑀲𑀺𑀢𑀁 𑀉𑀢𑁆𑀢𑀫𑀫𑀸𑀳𑀼 𑀲𑀦𑁆𑀢𑁄, 𑀥𑀫𑁆𑀫𑀁 𑀪𑀡𑁂 𑀦𑀸𑀥𑀫𑁆𑀫𑀁 𑀢𑀁 𑀤𑀼𑀢𑀺𑀬𑀁;

𑀧𑀺𑀬𑀁 𑀪𑀡𑁂 𑀦𑀸𑀧𑁆𑀧𑀺𑀬𑀁 𑀢𑀁 𑀢𑀢𑀺𑀬𑀁, 𑀲𑀘𑁆𑀘𑀁 𑀪𑀡𑁂 𑀦𑀸𑀮𑀻𑀓𑀁 𑀢𑀁 𑀘𑀢𑀼𑀢𑁆𑀣’’𑀦𑁆𑀢𑀺 𑀘.

‘‘𑀬𑀁 𑀩𑀼𑀤𑁆𑀥𑁄 𑀪𑀸𑀲𑀢𑀺 𑀯𑀸𑀘𑀁, 𑀔𑁂𑀫𑀁 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸;

𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀺𑀭𑀺𑀬𑀸𑀬, 𑀲𑀸 𑀯𑁂 𑀯𑀸𑀘𑀸𑀦𑀫𑀼𑀢𑁆𑀢𑀫𑀸’’𑀢𑀺.

𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀲𑁂𑀯𑀦𑀧𑀘𑁆𑀘𑀬𑀸𑀬𑁂𑀯 𑀤𑀸𑀦𑀸𑀤𑀺𑀓𑀼𑀲𑀮𑀲𑀫𑀸𑀬𑁄𑀕𑁂𑀦 𑀅𑀧𑀸𑀬𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀦𑁆𑀢𑀺 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀅𑀧𑀺𑀘 𑀦𑁂𑀭𑀬𑀺𑀓𑀸𑀤𑀺𑀤𑀼𑀓𑁆𑀔𑀧𑀭𑀺𑀢𑁆𑀢𑀸𑀡𑀢𑁄 𑀧𑀼𑀜𑁆𑀜𑀸𑀦𑀺 𑀏𑀯 𑀧𑀸𑀡𑀻𑀦𑀁 𑀩𑀳𑀽𑀧𑀓𑀸𑀭𑀸𑀦𑀺, 𑀬𑀢𑁄 𑀢𑁂𑀲𑀫𑁆𑀧𑀺 𑀉𑀧𑀓𑀸𑀭𑀸𑀦𑀼𑀲𑁆𑀲𑀭𑀡𑀢𑀸 𑀓𑀢𑀜𑁆𑀜𑀼𑀢𑀸 𑀲𑀧𑁆𑀧𑀼𑀭𑀺𑀲𑁂𑀳𑀺 𑀧𑀲𑀁𑀲𑀦𑀻𑀬𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀯𑀺𑀲𑁂𑀲𑀸𑀥𑀺𑀕𑀫𑀳𑁂𑀢𑀽𑀘 𑀳𑁄𑀦𑁆𑀢𑀺 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, ‘‘𑀤𑁆𑀯𑁂 𑀫𑁂 𑀪𑀺𑀓𑁆𑀔𑀯𑁂 𑀧𑀼𑀕𑁆𑀕𑀮𑀸 𑀤𑀼𑀮𑁆𑀮𑀪𑀸 𑀮𑁄𑀓𑀲𑁆𑀫𑀺𑀁, 𑀓𑀢𑀫𑁂 𑀤𑁆𑀯𑁂, 𑀬𑁄 𑀘 𑀧𑀼𑀩𑁆𑀩𑀓𑀸𑀭𑀻, 𑀬𑁄 𑀘 𑀓𑀢𑀜𑁆𑀜𑀼 𑀓𑀢𑀯𑁂𑀤𑀻’’𑀢𑀺. 𑀅𑀧𑀺𑀘 𑀯𑀺𑀥𑀼𑀭𑀫𑀳𑁄𑀲𑀥𑀚𑀸𑀢𑀓𑀸𑀤𑀺𑀓𑀸𑀮𑁂𑀧𑀺 𑀇𑀥𑀮𑁄𑀓𑀧𑀭𑀮𑁄𑀓𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑀫𑁂𑀯 𑀅𑀢𑁆𑀢𑀦𑁄 𑀯𑀘𑀦𑀓𑀭𑁂 𑀲𑀫𑁆𑀫𑀸 𑀬𑁄𑀚𑁂𑀦𑁆𑀢𑀺. 𑀅𑀦𑀸𑀓𑀼𑀮𑀓𑀫𑁆𑀫𑀦𑁆𑀢𑀸𑀥𑀺𑀝𑁆𑀞𑀸𑀦𑁂𑀦 𑀓𑀸𑀮𑀜𑁆𑀜𑀼𑀢𑀸𑀬 𑀧𑀢𑀺𑀭𑀽𑀧𑀓𑀸𑀭𑀺𑀢𑀸𑀬 𑀅𑀦𑀮𑀲𑀢𑀸𑀬 𑀉𑀝𑁆𑀞𑀸𑀦𑀯𑀻𑀭𑀺𑀬𑀲𑀫𑀢𑀸𑀬 𑀅𑀩𑁆𑀬𑀲𑀦𑀺𑀬𑀢𑀸𑀘 𑀓𑀸𑀮𑀸𑀦𑀢𑀺𑀓𑁆𑀓𑀫𑀦𑀅𑀧𑁆𑀧𑀢𑀺𑀭𑀽𑀧𑀓𑀭𑀡𑀅𑀓𑀭𑀡𑀲𑀺𑀣𑀺𑀮𑀓𑀭𑀡𑀸𑀳𑀺 𑀅𑀓𑀼𑀲𑀮𑀸𑀤𑀻𑀳𑀺 𑀭𑀳𑀺𑀢𑀓𑀲𑀺𑀕𑁄𑀭𑀓𑁆𑀔𑀯𑀸𑀡𑀺𑀚𑁆𑀚𑀸𑀤𑀬𑁄 𑀓𑀫𑁆𑀫𑀦𑁆𑀢𑀸, 𑀏𑀢𑁂 𑀅𑀢𑁆𑀢𑀦𑁄 𑀯𑀸 𑀧𑀼𑀢𑁆𑀢𑀤𑀸𑀭𑀲𑁆𑀲 𑀯𑀸 𑀤𑀸𑀲𑀓𑀫𑁆𑀫𑀓𑀭𑀸𑀦𑀁 𑀯𑀸 𑀩𑁆𑀬𑀢𑁆𑀢𑀢𑀸𑀬 𑀏𑀯𑀁 𑀧𑀬𑁄𑀚𑀺𑀢𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀥𑀦𑀥𑀜𑁆𑀜𑀯𑀺𑀢𑁆𑀢𑀺 𑀧𑀝𑀺𑀮𑀸𑀪𑀳𑁂𑀢𑀽 𑀳𑁄𑀦𑁆𑀢𑀺, 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸.

𑀧𑀢𑀺𑀭𑀽𑀧𑀓𑀸𑀭𑀻𑀭𑀺 ¶ 𑀥𑀼𑀭𑀯𑀸, 𑀉𑀝𑁆𑀞𑀸𑀦𑀢𑀸 𑀯𑀺𑀦𑁆𑀤𑀢𑁂 𑀥𑀦𑀦𑁆𑀢𑀺 𑀘;

𑀦 𑀤𑀺𑀯𑀸 𑀲𑁄𑀧𑁆𑀧𑀲𑀻𑀮𑁂, 𑀭𑀢𑁆𑀢𑀺𑀁 𑀉𑀝𑁆𑀞𑀸𑀦𑀤𑀲𑁆𑀲𑀺𑀦𑀸;

𑀦𑀺𑀘𑁆𑀘𑀧𑁆𑀧𑀫𑀢𑁆𑀢𑁂𑀦 𑀲𑁄𑀡𑁆𑀟𑁂𑀦, 𑀲𑀓𑁆𑀓𑀸 𑀆𑀯𑀲𑀺𑀢𑀼𑀁 𑀖𑀭𑀁.

𑀅𑀢𑀻𑀲𑀺𑀢𑀁 𑀅𑀢𑀺𑀉𑀡𑁆𑀳𑀁, 𑀅𑀢𑀺𑀲𑀸𑀭𑀫𑀺𑀤𑀁 𑀅𑀳𑀼;

𑀇𑀢𑀺 𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀦𑁆𑀢𑁂, 𑀅𑀢𑁆𑀣𑀸 𑀅𑀘𑁆𑀘𑁂𑀦𑁆𑀢𑀺 𑀫𑀸𑀡𑀯𑁂.

𑀬𑁄 𑀘 𑀲𑀻𑀢𑀜𑁆𑀘 𑀉𑀡𑁆𑀳𑀜𑁆𑀘; 𑀢𑀺𑀡𑀸𑀦𑀺 𑀬𑁄 𑀦 𑀫𑀜𑁆𑀜𑀢𑀺;

𑀲𑀧𑁆𑀧𑀼𑀭𑀺𑀲𑀓𑀺𑀘𑁆𑀘𑀸𑀦𑀺, 𑀲𑁄 𑀲𑀼𑀔𑀁 𑀦 𑀯𑀺𑀳𑀸𑀬𑀢𑀻’’𑀢𑀺 𑀘.

𑀪𑁄𑀕𑁂 𑀲𑀁𑀳𑀭𑀫𑀸𑀦𑀲𑁆𑀲, 𑀧𑀭𑀲𑁆𑀲𑁂𑀯 𑀇𑀭𑀬𑀢𑁄;

𑀪𑁄𑀕𑀸 𑀲𑀦𑁆𑀦𑀺𑀘𑀬𑀁 𑀬𑀦𑁆𑀢𑀺, 𑀯𑀫𑁆𑀫𑀺𑀓𑁄𑀯𑀽𑀧𑀘𑀻𑀬𑀢𑀻𑀢𑀺.

𑀏𑀯𑀫𑀸𑀤𑀺𑀧𑁆𑀧𑀪𑁂𑀤𑀸 𑀲𑀧𑁆𑀧𑀼𑀭𑀺𑀲𑀸 𑀮𑁄𑀓𑁂 𑀅𑀢𑀺𑀤𑀼𑀮𑁆𑀮𑀪𑀸𑀯. 𑀢𑀩𑁆𑀩𑀺𑀕𑀫𑁂𑀦 𑀤𑀼𑀧𑁆𑀧𑀼𑀭𑀺𑀲𑀸 𑀩𑀸𑀮𑀚𑀦𑀸 𑀅𑀕𑀯𑁂𑀲𑀦𑁆𑀢𑁄𑀧𑀺 𑀮𑀩𑁆𑀪𑀦𑁆𑀢𑁂𑀯 𑀢𑁂 𑀩𑀸𑀮𑀸 𑀅𑀢𑁆𑀢𑀸𑀦𑀁 𑀲𑁂𑀯𑀫𑀸𑀦𑁂 𑀧𑀭𑀚𑀦𑁂 𑀲𑀁𑀲𑀸𑀭𑀤𑀼𑀓𑁆𑀔𑁂𑀬𑁂𑀯 𑀑𑀲𑀻𑀤𑁂𑀦𑁆𑀢𑀺 𑀪𑀯𑀢𑁄 𑀯𑀼𑀝𑁆𑀞𑀸𑀦𑀁 𑀦 𑀤𑁂𑀦𑁆𑀢𑀺 𑀢𑀣𑀸 𑀳𑀺 𑀧𑀽𑀭𑀡𑀓𑀲𑁆𑀲𑀧𑀸𑀤𑀬𑁄 𑀙𑀲𑀢𑁆𑀣𑀸𑀭𑀸 𑀤𑁂𑀯𑀤𑀢𑁆𑀢𑀓𑁄𑀓𑀸𑀮𑀺𑀓-𑀫𑁄𑀤𑀓𑀢𑀺𑀲𑁆𑀲 𑀔𑀡𑁆𑀟𑀤𑁂𑀯𑀺𑀬𑀸𑀧𑀼𑀢𑁆𑀢𑀲𑀫𑀼𑀤𑁆𑀤𑀤𑀢𑁆𑀢𑀘𑀺𑀜𑁆𑀘𑀫𑀸𑀡𑀯𑀺𑀓𑀸𑀤𑀬𑁄 𑀅𑀢𑀻𑀢𑀓𑀸𑀮𑁂 𑀘 𑀤𑀻𑀖𑀤𑀼𑀓𑁆𑀔𑀲𑁆𑀲 𑀮𑀸𑀪𑀸𑀢𑀺 𑀇𑀫𑁂 𑀅𑀜𑁆𑀜𑁂 𑀘 𑀏𑀯𑀭𑀽𑀧𑀸 𑀲𑀢𑁆𑀢𑀸 𑀩𑀸𑀮𑀸 𑀅𑀕𑁆𑀕𑀺𑀧𑀤𑀺𑀢𑁆𑀢𑀫𑀺𑀯 𑀅𑀕𑀸𑀭𑀁 𑀅𑀢𑁆𑀢𑀦𑀸 𑀤𑀼𑀕𑁆𑀕𑀳𑀺𑀢𑁂𑀦 𑀅𑀢𑁆𑀢𑀸𑀦𑀜𑁆𑀘 𑀅𑀢𑁆𑀢𑀦𑁄 𑀯𑀘𑀦𑀓𑀸𑀭𑀓𑁂 𑀘 𑀯𑀺𑀦𑀸𑀲𑁂𑀦𑁆𑀢𑀺 𑀢𑀣𑀸 𑀳𑀺 𑀤𑁂𑀯𑀤𑀢𑁆𑀢𑀫𑀸𑀕𑀫𑁆𑀫 𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼-𑀓𑁄𑀓𑀸𑀮𑀺𑀓𑀸𑀤𑀬𑁄 𑀢𑀤𑀜𑁆𑀜𑁂𑀧𑀺 𑀧𑀼𑀕𑁆𑀕𑀮𑀸 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀦𑁆𑀢𑀲𑀯𑀦𑀓𑀸𑀮𑁂 𑀬𑀤𑀺 𑀧𑀺𑀢𑀭𑀁 𑀅𑀖𑀸𑀢𑁂𑀬𑁆𑀬, 𑀲𑁄𑀢𑀸𑀧𑀦𑁆𑀦𑁄 𑀪𑀯𑁂𑀬𑁆𑀬 𑀧𑀺𑀢𑀭𑀁 𑀖𑀸𑀢𑀺𑀢𑀢𑁆𑀢𑀸 𑀫𑀕𑁆𑀕𑀨𑀮𑀫𑁆𑀧𑀺 𑀅𑀧𑁆𑀧𑀢𑁆𑀯𑀸 𑀮𑁄𑀳𑀓𑀼𑀫𑁆𑀪𑀺𑀬𑀁 𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀧𑀘𑁆𑀘𑀺𑀢𑁆𑀯𑀸 𑀫𑀼𑀘𑁆𑀘𑀺𑀲𑁆𑀲𑀢𑀺 𑀅𑀦𑀸𑀕𑀢𑁂𑀧𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺. 𑀓𑁄𑀓𑀸𑀮𑀺𑀓𑁄𑀧𑀺 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑀸𑀦𑀢𑁆𑀣𑁂𑀭𑁂 𑀅𑀦𑀧𑀘𑀸𑀬𑀺𑀢𑁆𑀯𑀸 𑀫𑀳𑀸𑀦𑀺𑀭𑀬𑁂 𑀧𑀤𑀼𑀫𑀕𑀡𑀦𑀸𑀬 𑀧𑀘𑁆𑀘𑀦𑁄𑀓𑀸𑀲𑁂 𑀦𑀺𑀭𑀬𑀧𑀤𑁂𑀲𑁂 𑀧𑀤𑀼𑀫𑀦𑀺𑀭𑀬𑁂…𑀧𑁂… 𑀧𑀤𑀼𑀫𑀁 𑀔𑁄 𑀧𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀦𑀺𑀭𑀬𑀁 𑀓𑁄𑀓𑀸𑀮𑀺𑀓𑁄 𑀪𑀺𑀓𑁆𑀔𑀼 𑀉𑀧𑀧𑀦𑁆𑀦𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑀸𑀦𑁂𑀲𑀼 𑀘𑀺𑀢𑁆𑀢𑀁 𑀆𑀖𑀸𑀢𑁂𑀢𑁆𑀯𑀸’’𑀢𑀺 𑀆𑀳. 𑀢𑀢𑁆𑀣 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀽𑀢𑀺 𑀦𑀸𑀫𑀕𑁄𑀢𑁆𑀢𑁂𑀦 𑀅𑀧𑀸𑀓𑀝𑀁 ‘‘𑀓𑀺𑀁 𑀯 𑀤𑀻𑀖𑀁 𑀦𑀼𑀔𑁄 𑀪𑀦𑁆𑀢𑁂 𑀧𑀤𑀼𑀫𑁂 𑀦𑀺𑀭𑀬𑁂 𑀆𑀬𑀼𑀧𑁆𑀧𑀫𑀸𑀡’’𑀦𑁆𑀢𑀺 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀏𑀯𑀫𑀸𑀳 ‘‘𑀤𑀻𑀖𑀁 𑀔𑁄 𑀪𑀺𑀓𑁆𑀔𑀼 𑀦𑀺𑀭𑀬𑁂 𑀆𑀬𑀼𑀧𑁆𑀧𑀫𑀸𑀡𑀁, 𑀢𑀁 𑀦 𑀲𑀼𑀓𑀭𑀁 𑀲𑀗𑁆𑀔𑀸𑀢𑀼𑀁 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀻’’𑀢𑀺 ¶ 𑀯𑀸 𑀲𑀓𑁆𑀓𑀸 𑀧𑀦 𑀪𑀦𑁆𑀢𑁂 𑀉𑀧𑀫𑀁 𑀓𑀸𑀢𑀼𑀦𑁆𑀢𑀺. ‘‘𑀲𑀓𑁆𑀓𑀸 𑀪𑀺𑀓𑁆𑀔𑀽’’𑀢𑀺 𑀪𑀕𑀯𑀸 𑀅𑀯𑁄𑀘. 𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀼 𑀯𑀻𑀲𑀢𑀺𑀔𑀸𑀭𑀺𑀓𑁄 𑀓𑁄𑀲𑀮𑀓𑁄 𑀢𑀺𑀮𑀯𑀸𑀳𑁄 𑀳𑁄𑀢𑀺, 𑀢𑀢𑁄 𑀧𑀼𑀭𑀺𑀲𑁄 𑀯𑀲𑁆𑀲𑀲𑀢𑀲𑁆𑀲 𑀯𑀲𑁆𑀲𑀲𑀳𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦 𑀏𑀓𑀫𑁂𑀓𑀁 𑀢𑀺𑀮𑀁 𑀉𑀤𑁆𑀥𑀭𑁂𑀬𑁆𑀬, 𑀔𑀺𑀧𑁆𑀧𑀢𑀭𑀁 𑀔𑁄 𑀲𑁄 𑀪𑀺𑀓𑁆𑀔𑀼 𑀯𑀻𑀲𑀢𑀺𑀔𑀸𑀭𑀺𑀓𑁄 𑀓𑁄𑀲𑀮𑀓𑁄 𑀢𑀺𑀮𑀯𑀸𑀳𑁄 𑀇𑀫𑀺𑀦𑀸 𑀉𑀧𑀓𑁆𑀓𑀫𑁂𑀦 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑁂𑀬𑁆𑀬, 𑀦 𑀢𑁆𑀯𑁂𑀯 𑀏𑀓𑁄 𑀅𑀩𑁆𑀩𑀼𑀤𑁄 𑀦𑀺𑀭𑀬𑁄. 𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀼 𑀯𑀻𑀲 𑀅𑀩𑁆𑀩𑀼𑀤𑁄 𑀦𑀺𑀭𑀬𑁄, 𑀏𑀯𑀫𑁂𑀓𑁄 𑀦𑀺𑀭𑀩𑁆𑀩𑀼𑀤𑁄 𑀦𑀺𑀭𑀬𑁄’’𑀢𑀺 𑀆𑀤𑀺. 𑀯𑀻𑀲𑀢𑀺𑀔𑀸𑀭𑀺𑀓𑁄 𑀢𑀺 𑀫𑀸𑀕𑀥𑀺𑀓𑁂𑀦 𑀧𑀢𑁆𑀣𑁂𑀦 𑀘𑀢𑁆𑀢𑀸𑀭𑁄 𑀧𑀢𑁆𑀣𑀸 𑀓𑁄𑀲𑀮𑀭𑀝𑁆𑀞𑁂 𑀏𑀓𑁄 𑀧𑀢𑁆𑀣𑁄 𑀳𑁄𑀢𑀺. 𑀢𑁂𑀦 𑀧𑀢𑁆𑀣𑁂𑀦 𑀘𑀢𑁆𑀢𑀸𑀭𑁄 𑀧𑀢𑁆𑀣𑀸 𑀆𑀴𑁆𑀳𑀓𑀁. 𑀘𑀢𑁆𑀢𑀸𑀭𑀺 𑀆𑀴𑁆𑀳𑀓𑀸𑀦𑀺 𑀤𑁄𑀡𑀁. 𑀘𑀢𑀼𑀤𑁄𑀡𑀸 𑀫𑀸𑀦𑀺𑀓𑀸. 𑀘𑀢𑀼𑀫𑀸𑀦𑀺𑀓𑀸 𑀔𑀸𑀭𑀻. 𑀢𑀸𑀬𑀔𑀸𑀭𑀺𑀬𑀸 𑀯𑀻𑀲𑀢𑀺𑀔𑀸𑀭𑀺𑀓𑁄 𑀢𑀺𑀮𑀯𑀸𑀳𑁄. 𑀢𑀺𑀮𑀯𑀸𑀳𑁄𑀢𑀺 𑀢𑀺𑀮𑀲𑀓𑀝𑀁. 𑀅𑀩𑁆𑀩𑀼𑀤𑁄 𑀦𑀺𑀭𑀬𑁄𑀢𑀺 𑀅𑀩𑁆𑀩𑀼𑀤𑁄 𑀦𑀸𑀫 𑀏𑀓𑁄 𑀧𑀘𑁆𑀘𑁂𑀓𑀦𑀺𑀭𑀬𑁄 𑀦𑀢𑁆𑀣𑀺, 𑀅𑀯𑀻𑀘𑀺𑀫𑁆𑀳𑀺 𑀏𑀯 𑀧𑀦 𑀅𑀩𑁆𑀩𑀼𑀤𑀕𑀡𑀦𑀸𑀬 𑀧𑀘𑁆𑀘𑀦𑁄𑀓𑀸𑀲𑁄 ‘‘𑀅𑀩𑁆𑀩𑀼𑀤𑁄 𑀦𑀺𑀭𑀬𑁄’’𑀢𑀺 𑀯𑀼𑀢𑁆𑀢𑁄. 𑀏𑀲 𑀦𑀬𑁄 𑀦𑀺𑀭𑀩𑁆𑀩𑀼𑀤𑀸𑀤𑀻𑀲𑀼𑀧𑀺. 𑀢𑀢𑁆𑀣 𑀯𑀲𑁆𑀲𑀕𑀡𑀦𑀸𑀧𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑀬𑀣𑀸𑀳 ‘‘𑀲𑀢𑀁𑀲𑀢𑀲𑀳𑀲𑁆𑀲𑀸𑀦𑀺 𑀓𑁄𑀝𑀺 𑀳𑁄𑀢𑀺 𑀏𑀯𑀁 𑀲𑀢𑀁𑀲𑀳𑀲𑁆𑀲𑀓𑁄𑀝𑀺𑀬𑁄 𑀧𑀓𑁄𑀝𑀺 𑀦𑀸𑀫. 𑀲𑀢𑀁𑀲𑀢𑀲𑀳𑀲𑁆𑀲𑀧𑀓𑁄𑀝𑀺𑀬𑁄 𑀓𑁄𑀝𑀺𑀧𑀓𑁄𑀝𑀺 𑀦𑀸𑀫. 𑀲𑀢𑀁 𑀲𑀢𑀲𑀳𑀲𑁆𑀲𑀓𑁄𑀝𑀺𑀧𑀓𑁄𑀝𑀺𑀬𑁄 𑀦𑀳𑀼𑀢𑀁. 𑀲𑀢𑀁𑀲𑀢𑀲𑀳𑀲𑁆𑀲𑀦𑀳𑀼𑀢𑀸𑀦𑀺 𑀦𑀺𑀦𑁆𑀦𑀳𑀼𑀢𑀁. 𑀲𑀢𑀁𑀲𑀢𑀲𑀳𑀲𑁆𑀲𑀦𑀺𑀦𑁆𑀦𑀳𑀼𑀢𑀸𑀦𑀺 𑀏𑀓𑁄 𑀅𑀩𑁆𑀩𑀼𑀤𑁄. 𑀢𑀢𑁄 𑀯𑀻𑀲𑀢𑀺𑀕𑀼𑀡𑁄 𑀦𑀺𑀭𑀩𑁆𑀩𑀼𑀤𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣 𑀅𑀬𑀜𑁆𑀘 𑀕𑀡𑀦𑀸 𑀅𑀧𑀭𑀺𑀘𑀺𑀢𑀸𑀦𑀁 𑀤𑀼𑀓𑁆𑀓𑀭𑀸’’𑀢𑀺 𑀯𑀼𑀢𑁆𑀢𑀁 𑀢𑀁 𑀦 𑀲𑀼𑀓𑀭𑀁 𑀲𑀗𑁆𑀔𑀸𑀢𑀼’𑀦𑁆𑀢𑀺 𑀓𑁂𑀘𑀺 𑀧𑀦 𑀢𑀢𑁆𑀣 𑀧𑀭𑀺𑀤𑁂𑀯𑀦𑀸𑀦𑀢𑁆𑀢𑁂𑀦𑀧𑀺 𑀓𑀫𑁆𑀫𑀓𑀭𑀡𑀦𑀸𑀦𑀢𑁆𑀢𑁂𑀦𑀧𑀺 𑀇𑀫𑀸𑀦𑀺 𑀦𑀸𑀫𑀸𑀦𑀺 𑀮𑀤𑁆𑀥𑀸𑀦𑀻𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂𑀧𑀺 𑀯𑀸𑀦𑀓𑀸𑀭𑀡𑁂𑀳𑀻𑀢𑀺 𑀝𑀻𑀓𑀸𑀦𑁂𑀢𑁆𑀢𑀺. 𑀬𑀣𑀸 𑀘 𑀤𑀻𑀖𑀯𑀺𑀤𑀲𑁆𑀲𑀆𑀖𑀸𑀢𑀸 𑀘 𑀩𑀼𑀤𑁆𑀥𑀦𑁆𑀢𑀭𑀁 𑀲𑀝𑁆𑀞𑀺𑀬𑁄𑀚𑀦𑀫𑀢𑁆𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀉𑀢𑁆𑀢𑀸𑀦𑁄 𑀧𑀢𑀺𑀢𑁄 𑀫𑀳𑀸𑀦𑀺𑀭𑀬𑁂 𑀧𑀘𑁆𑀘𑀢𑀺 𑀬𑀣𑀸 𑀘, 𑀢𑀲𑁆𑀲 𑀤𑀺𑀝𑁆𑀞𑀺𑀅𑀪𑀺𑀭𑀼𑀘𑀺𑀢𑀸𑀦𑀺 𑀧𑀜𑁆𑀘 𑀓𑀼𑀮𑀲𑀢𑀸𑀦𑀺 𑀢𑀲𑁆𑀲𑁂𑀯 𑀲𑀳𑀩𑁆𑀬𑀢𑀁 𑀉𑀧𑁆𑀧𑀦𑁆𑀦𑀸𑀦𑀺 𑀫𑀳𑀸𑀦𑀺𑀭𑀬𑁂 𑀧𑀘𑁆𑀘𑀦𑁆𑀢𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 𑀪𑀕𑀯𑀢𑀸 ‘‘𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂 𑀦𑀴𑀸𑀕𑀸𑀭𑀁 𑀯𑀸 𑀢𑀺𑀡𑀸𑀕𑀸𑀭𑀁 𑀯𑀸 𑀅𑀕𑁆𑀕𑀺𑀨𑀼𑀝𑁆𑀞𑁄 𑀓𑀽𑀝𑀸𑀕𑀸𑀭𑀸𑀦𑀺 𑀤𑀳𑀢𑀺 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀸𑀦𑀺 𑀦𑀺𑀯𑀸𑀢𑀸𑀦𑀺 𑀨𑀼𑀲𑀺𑀢𑀕𑁆𑀕𑀴𑀸𑀦𑀺 𑀧𑀺𑀳𑀺𑀢 𑀯𑀸𑀢𑀧𑀸𑀦𑀸𑀦𑀺 𑀏𑀯𑀫𑁂𑀯 𑀔𑁄 𑀪𑀺𑀓𑁆𑀔𑀯𑁂 𑀬𑀸𑀦𑀺𑀓𑀸𑀦𑀺𑀘𑀺 𑀪𑀬𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀩𑁆𑀩𑀸𑀦𑀺 𑀩𑀸𑀮𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑁄 𑀧𑀡𑁆𑀟𑀺𑀢𑀢𑁄 𑀬𑁂𑀓𑁂𑀘𑀺 𑀉𑀧𑀤𑁆𑀤𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑁄 𑀧𑀡𑁆𑀟𑀺𑀢𑀢𑁄, 𑀬𑁂𑀓𑁂𑀘𑀺 𑀉𑀧𑀲𑀕𑁆𑀕𑀸…𑀧𑁂… 𑀦𑁄 𑀧𑀡𑁆𑀟𑀺𑀢𑀢𑁄. 𑀇𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀲𑀧𑁆𑀧𑀝𑀺𑀪𑀬𑁄 ¶ 𑀩𑀸𑀮𑁄 𑀅𑀧𑁆𑀧𑀝𑀺𑀪𑀬𑁄 𑀧𑀡𑁆𑀟𑀺𑀢𑁄 𑀲𑀉𑀧𑀤𑁆𑀤𑀯𑁄 𑀩𑀸𑀮𑁄 𑀅𑀦𑀼𑀧𑀤𑁆𑀤𑀯𑁄 𑀧𑀡𑁆𑀟𑀺𑀢𑁄, 𑀲𑀉𑀧𑀲𑀕𑁆𑀕𑁄 𑀩𑀸𑀮𑁄 𑀅𑀦𑀼𑀧𑀲𑀕𑁆𑀕𑁄 𑀧𑀡𑁆𑀟𑀺𑀢𑁄𑀢𑀺. 𑀅𑀧𑀺 𑀘 𑀧𑀽𑀢𑀺𑀫𑀘𑁆𑀙𑀲𑀤𑀺𑀲𑁄 𑀩𑀸𑀮𑁄, 𑀧𑀽𑀢𑀺𑀫𑀘𑁆𑀙𑀩𑀤𑁆𑀥𑀧𑀢𑁆𑀢 𑀧𑀼𑀢𑀺𑀲𑀤𑀺𑀲𑁄 𑀳𑁄𑀢𑀺 𑀢𑀤𑀼𑀧𑀲𑁂𑀯𑀻. 𑀙𑀟𑁆𑀟𑀦𑀻𑀬𑀢𑀁 𑀚𑀺𑀕𑀼𑀘𑁆𑀙𑀦𑀻𑀬𑀢𑀜𑁆𑀘 𑀆𑀧𑀚𑁆𑀚𑀢𑀺 𑀯𑀺𑀜𑁆𑀜𑀽𑀦𑀁 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀦𑀸𑀭𑀤𑀚𑀸𑀢𑀓𑁂.

‘‘𑀧𑀽𑀢𑀺𑀫𑀘𑁆𑀙𑀁 𑀓𑀼𑀲𑀕𑁆𑀕𑁂𑀦, 𑀬𑁄 𑀦𑀭𑁄 𑀉𑀧𑀦𑀬𑁆𑀳𑀢𑀺;

𑀓𑀼𑀲𑀸𑀧𑀺 𑀧𑀽𑀢𑀺 𑀯𑀸𑀬𑀦𑁆𑀢𑀺, 𑀏𑀯𑀁 𑀩𑀸𑀮𑀽𑀧𑀲𑁂𑀯𑀦𑀸’’𑀢𑀺.

𑀅𑀓𑀢𑁆𑀢𑀺𑀧𑀡𑁆𑀟𑀺𑀢𑁄𑀘𑀸𑀧𑀺 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀯𑀭𑁂 𑀤𑀺𑀬𑁆𑀬𑀫𑀸𑀦𑁂 𑀏𑀯𑀫𑀸𑀳

‘‘𑀩𑀸𑀮𑀁 𑀦 𑀧𑀲𑁆𑀲𑁂 𑀦 𑀲𑀼𑀡𑁂, 𑀦 𑀘 𑀩𑀸𑀮𑁂𑀦 𑀲𑀁𑀯𑀲𑁂;

𑀩𑀸𑀮𑁂𑀦𑀸’𑀮𑁆𑀮𑀸𑀧𑀲𑀮𑁆𑀮𑀸𑀧𑀁, 𑀦 𑀓𑀭𑁂 𑀦 𑀘 𑀭𑁄𑀘𑀬𑁂.

𑀓𑀺𑀁𑀦𑀼 𑀢𑁂 𑀅𑀓𑀭𑀁 𑀩𑀸𑀮𑁄, 𑀯𑀤 𑀓𑀲𑁆𑀲𑀧 𑀓𑀸𑀭𑀡𑀁;

𑀓𑁂𑀦 𑀓𑀲𑁆𑀲𑀧 𑀩𑀸𑀮𑀲𑁆𑀲, 𑀤𑀲𑁆𑀲𑀦𑀁 𑀦𑀸𑀪𑀺𑀓𑀗𑁆𑀔𑀲𑀺.

𑀅𑀦𑀬𑀁 𑀦𑀬𑀢𑀺 𑀤𑀼𑀫𑁆𑀫𑁂𑀥𑁄, 𑀅𑀥𑀼𑀭𑀸𑀬𑀁 𑀦𑀺𑀬𑀼𑀜𑁆𑀚𑀢𑀺;

𑀤𑀼𑀦𑁆𑀦𑀬𑁄 𑀲𑁂𑀬𑁆𑀬𑀲𑁄 𑀳𑁄𑀢𑀺, 𑀲𑀫𑁆𑀫𑀸 𑀯𑀼𑀢𑁆𑀢𑁄 𑀧𑀓𑀼𑀧𑁆𑀧𑀢𑀺;

𑀯𑀺𑀦𑀬𑀁 𑀲𑁄 𑀦 𑀚𑀸𑀦𑀸𑀢𑀺, 𑀲𑀸𑀥𑀼 𑀢𑀲𑁆𑀲 𑀅𑀤𑀲𑁆𑀲𑀦’’𑀦𑁆𑀢𑀺.

𑀏𑀯𑀁 𑀩𑀸𑀮𑀤𑀼𑀚𑁆𑀚𑀦𑀲𑀁𑀲𑀕𑁆𑀕𑀯𑀲𑁂𑀦𑁂𑀯 𑀲𑀩𑁆𑀩𑀸𑀦𑀺 𑀪𑀬𑀼𑀧𑀤𑁆𑀤𑀯𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑁄 𑀧𑀡𑁆𑀟𑀺𑀢𑀲𑁂𑀯𑀦𑀯𑀲𑁂𑀦𑀸𑀢𑀺𑀲𑀩𑁆𑀩𑀲𑁄 𑀲𑀧𑁆𑀧𑀼𑀭𑀺𑀲𑀸 𑀅𑀢𑀺𑀤𑀼𑀮𑁆𑀮𑀪𑀸𑀯.

𑀇𑀤𑀸𑀦𑀺.

‘‘𑀤𑀼𑀮𑁆𑀮𑀪𑀜𑁆𑀘 𑀫𑀦𑀼𑀲𑁆𑀲𑀢𑁆𑀢𑀁, 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀘 𑀤𑀼𑀮𑁆𑀮𑀪𑁄;

𑀤𑀼𑀮𑁆𑀮𑀪𑀸 𑀔𑀡𑀲𑀫𑁆𑀧𑀢𑁆𑀢𑀺, 𑀲𑀤𑁆𑀥𑀫𑁆𑀫𑁄 𑀧𑀭𑀫𑀤𑀼𑀮𑁆𑀮𑀪𑁄’’𑀢𑀺.

𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀯𑀡𑁆𑀡𑀦𑀸𑀓𑁆𑀓𑀫𑁄 𑀲𑀫𑁆𑀧𑀢𑁆𑀢𑁄. 𑀢𑀢𑁆𑀣 𑀤𑀼𑀮𑁆𑀮𑀪𑀜𑁆𑀘 𑀫𑀦𑀼𑀲𑁆𑀲𑀢𑁆𑀢𑀦𑁆𑀢𑀺 𑀫𑀦𑀼𑀲𑁆𑀲𑀪𑀸𑀯𑁄𑀧𑀺 𑀤𑀼𑀮𑁆𑀮𑀪𑁄𑀬𑁂𑀯 𑀫𑀦𑀼𑀲𑁆𑀲𑀲𑁆𑀲 𑀤𑀼𑀮𑁆𑀮𑀪𑀪𑀸𑀯𑁄 𑀓𑀸𑀡𑀓𑀘𑁆𑀙𑀧𑁄𑀧𑀫𑀸𑀤𑀻𑀳𑀺 𑀯𑁂𑀤𑀺𑀢𑀩𑁆𑀩𑁄 𑀏𑀓𑁄 𑀓𑀺𑀭 𑀓𑀲𑁆𑀲𑀓𑁄 𑀕𑀗𑁆𑀕𑀸𑀢𑀻𑀭𑁂 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀓𑀲𑀺𑀢𑁆𑀯𑀸 𑀓𑀺𑀜𑁆𑀘𑀺𑀫𑀢𑁆𑀢𑀫𑁆𑀧𑀺 𑀅𑀮𑀪𑀺𑀢𑁆𑀯𑀸 𑀦𑀗𑁆𑀕𑀮𑀨𑀸𑀮𑀁 𑀤𑁆𑀯𑁂𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀕𑀗𑁆𑀕𑀸𑀬𑀁 𑀔𑀺𑀧𑀺 𑀢𑁂𑀦 𑀕𑀗𑁆𑀕𑀸𑀦𑀤𑀺𑀬𑀸 𑀯𑀸𑀳𑁂𑀦 𑀏𑀓𑁄 𑀉𑀤𑁆𑀥𑀁 𑀏𑀓𑁄 𑀳𑁂𑀝𑁆𑀞𑀸𑀢𑀺 𑀏𑀯𑀁 𑀤𑁆𑀯𑁂 𑀦𑀗𑁆𑀕𑀮𑀨𑀸𑀮𑀓𑀸 𑀕𑀗𑁆𑀕𑀸𑀬𑀁 𑀯𑀼𑀬𑁆𑀳𑀦𑁆𑀢𑀸 𑀘𑀺𑀭𑁂𑀦 𑀏𑀓𑁄 𑀉𑀤𑁆𑀥𑀁 𑀏𑀓𑁄 𑀳𑁂𑀝𑁆𑀞𑀸𑀢𑀺 𑀤𑁆𑀯𑁂 𑀏𑀓𑀢𑁄 𑀳𑀼𑀢𑁆𑀯𑀸 𑀧𑀸𑀓𑀢𑀺𑀓𑀸 𑀬𑀼𑀚𑁆𑀚𑀦𑁆𑀢𑀺 𑀢𑀲𑁆𑀫𑀺𑀁 𑀔𑀡𑁂 𑀯𑀲𑁆𑀲𑀲𑀢𑀯𑀲𑁆𑀲𑀲𑀳𑀲𑁆𑀲𑀘𑁆𑀘𑀬𑁂𑀦 𑀏𑀓𑀯𑀸𑀭𑀁 𑀉𑀫𑁆𑀫𑀼𑀚𑁆𑀚𑀫𑀸𑀦𑁄 𑀓𑀸𑀡𑀓𑀘𑁆𑀙𑀧𑁄 𑀉𑀫𑁆𑀫𑀼𑀚𑁆𑀚𑀫𑀸𑀦𑀓𑁆𑀔𑀡𑁂 𑀢𑀲𑁆𑀲 𑀕𑀻𑀯𑀸 𑀤𑁆𑀯𑀺𑀦𑁆𑀦𑀁 𑀦𑀗𑁆𑀕𑀮𑀨𑀸𑀮𑀸𑀦𑀫𑀦𑁆𑀢𑀭𑁂 𑀳𑁄𑀢𑀺 𑀅𑀬𑀁 𑀓𑀸𑀮𑁄 ¶ 𑀤𑀼𑀮𑁆𑀮𑀪𑁄𑀯 𑀏𑀯𑀫𑁂𑀯 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁄𑀧𑀺 𑀤𑀼𑀮𑁆𑀮𑀪𑁄𑀬𑁂𑀯 𑀢𑀣𑀸𑀳𑀺 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀁 𑀅𑀮𑀪𑀺𑀢𑁆𑀯𑀸𑀯 𑀦𑀺𑀭𑀬𑀧𑁂𑀢𑀅𑀲𑀼𑀭𑀓𑀸𑀬𑀢𑀺𑀭𑀘𑁆𑀙𑀸𑀦𑀪𑀽𑀫𑀻𑀲𑀼𑀬𑁂𑀯 𑀲𑀁𑀲𑀭𑀺𑀢𑁆𑀯𑀸 𑀲𑀻𑀲𑀫𑁆𑀧𑀺 𑀉𑀓𑁆𑀔𑀺𑀧𑀺𑀢𑀼𑀁 𑀅𑀮𑀪𑀦𑁆𑀢𑀸 𑀏𑀓𑀩𑀼𑀤𑁆𑀥𑀦𑁆𑀢𑀭𑀸 𑀤𑁆𑀯𑁂 𑀩𑀼𑀤𑁆𑀥𑀦𑁆𑀢𑀭𑀸 𑀢𑀬𑁄 𑀩𑀼𑀤𑁆𑀥𑀦𑁆𑀢𑀭𑀸 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀦𑁆𑀢𑀭𑀸 𑀏𑀓𑀸𑀲𑀗𑁆𑀔𑁆𑀬𑁂𑀬𑁆𑀬𑀯𑀲𑁂𑀦 𑀦𑀺𑀭𑀬𑁂 𑀧𑀘𑁆𑀘𑀦𑀓𑀲𑀢𑁆𑀢𑀸𑀦𑀁 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸, 𑀢𑀣𑀸 𑀧𑁂𑀢𑀅𑀲𑀼𑀭𑀓𑀸𑀬𑀢𑀺𑀭𑀘𑁆𑀙𑀸𑀦𑀪𑀽𑀫𑀻𑀲𑀼𑀧𑀺 𑀅𑀢𑀺𑀔𑀼𑀤𑁆𑀤𑀓𑁂𑀦 𑀅𑀢𑁆𑀢𑀪𑀸𑀯𑁂𑀦 𑀢𑀺𑀮𑀩𑀻𑀚𑀲𑀸𑀲𑀧𑀩𑀻𑀚𑀲𑁆𑀲 𑀘𑀢𑀼𑀧𑀜𑁆𑀘𑀙𑀲𑀢𑁆𑀢𑀅𑀝𑁆𑀞𑀓𑀮𑀪𑀸𑀕𑀫𑀢𑁆𑀢𑁂𑀦𑁂𑀯 𑀅𑀗𑁆𑀕𑀼𑀮𑀺𑀬𑀸 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀫𑀢𑁆𑀢𑁂𑀬𑁂𑀯 𑀪𑀽𑀫𑀺𑀧𑀤𑁂𑀲𑁂 𑀦𑀺𑀲𑀺𑀦𑁆𑀦𑀸𑀦𑀁 𑀅𑀢𑀺𑀔𑀼𑀤𑁆𑀤𑀓𑀲𑀢𑁆𑀢𑀸𑀦𑀁 𑀕𑀡𑀦𑀧𑀣𑀫𑁆𑀧𑀺 𑀯𑀻𑀢𑀺𑀯𑀢𑁆𑀢𑀸 𑀢𑁂 𑀳𑀺 𑀕𑀡𑀺𑀢𑀼𑀁 𑀇𑀤𑁆𑀥𑀺𑀫𑀦𑁆𑀢𑀧𑀼𑀕𑁆𑀕𑀮𑁂 𑀞𑀧𑁂𑀢𑁆𑀯𑀸 𑀅𑀜𑁆𑀜𑁄 𑀓𑁄 𑀦𑀸𑀫 𑀲𑀓𑁆𑀔𑀺𑀲𑁆𑀲𑀢𑀺 𑀢𑁂𑀳𑀺 𑀫𑁄𑀳𑀦𑁆𑀥𑀪𑀸𑀯𑁂𑀦 𑀓𑀡𑁆𑀳𑀲𑀼𑀓𑁆𑀓𑀧𑀓𑁆𑀔𑀫𑁆𑀧𑀺 𑀅𑀚𑀸𑀦𑀦𑁆𑀢𑀸 𑀅𑀦𑁂𑀓𑁂𑀲𑀼 𑀩𑀼𑀤𑁆𑀥𑀲𑀢𑁂𑀲𑀼 𑀯𑀸 𑀩𑀼𑀤𑁆𑀥𑀲𑀳𑀲𑁆𑀲𑁂𑀲𑀼 𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼𑀧𑀺 𑀩𑀼𑀤𑁆𑀥𑁄𑀢𑀺𑀲𑀤𑁆𑀤𑀁 𑀅𑀲𑀼𑀢𑁆𑀯𑀸 𑀯𑀻𑀢𑀺𑀯𑀢𑁆𑀢𑀸, 𑀏𑀯𑀁 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁄𑀧𑀺 𑀤𑀼𑀮𑁆𑀮𑀪𑁄𑀬𑁂𑀯. 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀮𑀪𑀫𑀸𑀦𑁂𑀧𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑀸𑀮𑁄 𑀅𑀢𑀺𑀤𑀼𑀮𑁆𑀮𑀪𑁄𑀯. 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑀸𑀮𑁂𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀳𑀼𑀢𑁆𑀯𑀸 𑀓𑀼𑀲𑀮𑀽𑀧𑀧𑀢𑁆𑀢𑀺𑀲𑀗𑁆𑀔𑀸𑀢𑀸 𑀔𑀡𑀲𑀫𑁆𑀧𑀢𑁆𑀢𑀺 𑀤𑀼𑀮𑁆𑀮𑀪𑀸𑀯, 𑀲𑀤𑁆𑀥𑀫𑁆𑀫𑀤𑁂𑀲𑀓𑀲𑁆𑀲𑀸𑀧𑀺 𑀤𑀼𑀮𑁆𑀮𑀪𑀢𑁆𑀢𑀸, 𑀢𑀲𑁆𑀫𑀺𑀫𑁆𑀧𑀺 𑀲𑀢𑀺 𑀅𑀗𑁆𑀕𑀯𑀺𑀓𑀮𑀪𑀸𑀯𑁂𑀦 𑀲𑀤𑁆𑀥𑀫𑁆𑀫𑀲𑀯𑀦𑀲𑁆𑀲𑀸𑀧𑀺 𑀤𑀼𑀮𑁆𑀮𑀪𑀢𑁆𑀢𑀸𑀢𑀺 𑀏𑀯𑀫𑀸𑀤𑀺𑀧𑁆𑀧𑀪𑁂𑀤𑀸 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀸𑀤𑀺𑀓𑀸 𑀔𑀡𑀲𑀫𑁆𑀧𑀢𑁆𑀢𑀺𑀬𑁄 𑀤𑀼𑀮𑁆𑀮𑀪𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀤𑀼𑀮𑁆𑀮𑀪𑀸 𑀔𑀡𑀲𑀫𑁆𑀧𑀢𑁆𑀢𑀻𑀢𑀺 𑀓𑀼𑀲𑀮𑀽𑀧𑀧𑀢𑁆𑀢𑀺𑀲𑀗𑁆𑀔𑀸𑀢𑀸 𑀔𑀡𑀲𑀫𑁆𑀧𑀢𑁆𑀢𑀺 𑀤𑀼𑀮𑁆𑀮𑀪𑀸𑀬𑁂𑀯 𑀢𑀣𑀸 𑀳𑀺 𑀧𑀘𑁆𑀘𑀦𑁆𑀢𑀯𑀺𑀲𑀬 𑀅𑀭𑀽𑀧𑀅𑀲𑀜𑁆𑀜𑀲𑀢𑁆𑀢𑀢𑀺𑀭𑀘𑁆𑀙𑀸𑀦𑀧𑁂𑀢𑀦𑁂𑀭𑀬𑀺𑀓𑀓𑀸𑀮𑁂 𑀯𑀸 𑀫𑀚𑁆𑀛𑀺𑀫𑀤𑁂𑀲𑁂𑀧𑀺 𑀘𑀓𑁆𑀔𑀸𑀤𑀺𑀅𑀗𑁆𑀕𑀯𑀺𑀓𑀮𑁂𑀯𑀸 𑀧𑀭𑀺𑀧𑀼𑀡𑁆𑀡𑀅𑀗𑁆𑀕𑀪𑀸𑀯𑁂𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀪𑀽𑀢𑀸 𑀯𑀸 𑀓𑀼𑀲𑀮𑀽𑀧𑀧𑀢𑁆𑀢𑀺𑀲𑀗𑁆𑀔𑀸𑀢𑀸 𑀔𑀡𑀸 𑀦 𑀳𑁄𑀦𑁆𑀢𑀺 𑀧𑀘𑁆𑀘𑀦𑁆𑀢𑀯𑀺𑀲𑀬𑁂 𑀳𑀺 𑀧𑀯𑀢𑁆𑀢𑀸 𑀚𑀦𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀤𑀲𑀅𑀓𑀼𑀲𑀮𑀓𑀫𑁆𑀫𑀧𑀣𑁂𑀬𑁂𑀯 𑀭𑀫𑀦𑁆𑀢𑀺 𑀅𑀪𑀺𑀭𑀫𑀦𑁆𑀢𑀺, 𑀘𑀡𑁆𑀟𑀲𑀪𑀸𑀯𑀸 𑀘 𑀢𑁂 𑀳𑁄𑀦𑁆𑀢𑀺, 𑀭𑀢𑀦𑀢𑁆𑀢𑀬𑀕𑀼𑀡𑀫𑁆𑀧𑀺 𑀦 𑀚𑀸𑀦𑀦𑁆𑀢𑀺. 𑀅𑀭𑀽𑀧𑀺𑀦𑁄𑀧𑀺 𑀧𑀼𑀕𑁆𑀕𑀮𑀸 𑀧𑀭𑀢𑁄𑀖𑁄𑀲𑀯𑀺𑀭𑀳𑀺𑀢𑀢𑁆𑀢𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀧𑀝𑀺𑀮𑀸𑀪𑁄𑀧𑀺 𑀢𑁂𑀲𑀁 𑀦𑀢𑁆𑀣𑀺, 𑀩𑀼𑀤𑁆𑀥𑀤𑀲𑁆𑀲𑀦𑀸𑀤𑀻𑀦𑀺𑀧𑀺 𑀦 𑀮𑀪𑀦𑁆𑀢𑀺. 𑀅𑀲𑀜𑁆𑀜𑀲𑀢𑁆𑀢𑀢𑀺𑀭𑀘𑁆𑀙𑀸𑀦𑀧𑁂𑀢𑀦𑁂𑀭𑀬𑀺𑀓𑀓𑀸𑀮𑁂𑀲𑀼 𑀧𑀦 𑀧𑀕𑁂𑀯 𑀧𑀽𑀭𑀺𑀢𑀧𑀸𑀭𑀫𑀻𑀦𑀁 𑀲𑀢𑁆𑀢𑀸𑀦𑀁 𑀧𑀯𑀢𑁆𑀢𑀦𑀫𑁆𑀧𑀺 𑀅𑀩𑁆𑀩𑁄𑀳𑀸𑀭𑀺𑀓𑀁, 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀼𑀮𑁂 𑀚𑀸𑀬𑀫𑀸𑀦𑀸𑀧𑀺 𑀘𑀓𑁆𑀔𑀼𑀯𑀺𑀓𑀮𑁂𑀦 𑀩𑀼𑀤𑁆𑀥𑀲𑀗𑁆𑀖𑀭𑀢𑀦𑀸𑀦𑀁 𑀅𑀤𑀲𑁆𑀲𑀦𑀁, 𑀲𑁄𑀢𑀯𑀺𑀓𑀮𑁂𑀦 𑀥𑀫𑁆𑀫𑀲𑀯𑀦𑀢𑁄𑀧𑀺 𑀳𑀸𑀬𑀢𑀺 𑀏𑀴𑀫𑀽𑀕𑀸𑀤𑀺𑀪𑀸𑀯𑁂𑀦 𑀓𑀼𑀲𑀮𑀲𑀫𑀸𑀤𑀸𑀦𑀸 𑀦 𑀳𑁄𑀦𑁆𑀢𑀺. 𑀅𑀗𑁆𑀕𑀲𑀫𑁆𑀧𑀦𑁆𑀦𑁂𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀪𑀸𑀯𑁂𑀦 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑀺𑀢𑁆𑀢𑀁 𑀲𑀩𑁆𑀩𑀚𑀦𑀸𑀦𑀁 ¶ 𑀦𑀬𑀦𑀭𑀲𑀸𑀬𑀢𑀦𑀪𑀽𑀢𑀁 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀫𑁆𑀧𑀺 𑀤𑀺𑀲𑁆𑀯𑀸 𑀧𑀲𑀸𑀤𑀲𑁄𑀫𑁆𑀫𑁂𑀦 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀢𑀩𑁆𑀩𑀫𑁆𑀧𑀺 𑀦 𑀫𑀜𑁆𑀜𑀦𑁆𑀢𑀺 𑀫𑀦𑁄𑀧𑀤𑁄𑀲𑀯𑀲𑁂𑀦𑁂𑀯 𑀬𑀼𑀕𑀕𑁆𑀕𑀸𑀳𑀸 𑀳𑀼𑀢𑁆𑀯𑀸 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀓𑀸𑀮𑀸𑀤𑀻𑀲𑀼 𑀅𑀦𑁂𑀓𑁂𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑁄 𑀫𑀳𑀸𑀦𑀺𑀭𑀬𑁂 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀁 𑀓𑀼𑀲𑀮𑀽𑀧𑀧𑀢𑁆𑀢𑀺𑀔𑀡𑀲𑀫𑁆𑀧𑀢𑁆𑀢𑀺𑀧𑀺 𑀤𑀼𑀮𑁆𑀮𑀪𑀸𑀬𑁂𑀯.

‘‘𑀤𑀼𑀮𑁆𑀮𑀪𑀜𑁆𑀘 𑀫𑀦𑀼𑀲𑁆𑀲𑀢𑁆𑀢𑀁, 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀘 𑀤𑀼𑀮𑁆𑀮𑀪𑁄;

𑀤𑀼𑀮𑁆𑀮𑀪𑀸 𑀔𑀡𑀲𑀫𑁆𑀧𑀢𑁆𑀢𑀺, 𑀲𑀤𑁆𑀥𑀫𑁆𑀫𑁄 𑀧𑀭𑀫𑀤𑀼𑀮𑁆𑀮𑀪𑁄’’𑀢𑀺.

𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑁄 𑀯𑀼𑀢𑁆𑀢𑁄𑀬𑁂𑀯.

𑀇𑀢𑀺 𑀲𑀸𑀕𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑀯𑀺𑀭𑀘𑀺𑀢𑁂 𑀲𑀻𑀫𑀯𑀺𑀲𑁄𑀥𑀦𑁂

𑀧𑀓𑀺𑀡𑁆𑀡𑀓𑀓𑀡𑁆𑀟𑁄 𑀦𑀸𑀫 𑀧𑀜𑁆𑀘𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀏𑀯𑀁 𑀲𑀢𑁆𑀣𑀼𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀯𑀲𑁆𑀲𑀲𑀢𑀘𑁆𑀘𑀬𑁂𑀦 𑀧𑀢𑀺𑀝𑁆𑀞𑀺𑀢𑁂 𑀇𑀲𑀺𑀦𑀸 𑀓𑀸𑀭𑀺𑀢𑀢𑁆𑀢𑀸’ 𑀇𑀲𑀺𑀦𑀕𑀭’𑀦𑁆𑀢𑀺 𑀮𑀤𑁆𑀥𑀦𑀸𑀫𑁂 𑀤𑁆𑀯𑀢𑁆𑀢𑀧𑀸𑀤𑀺𑀪𑀽𑀧𑀸𑀮𑀸𑀦𑀁 𑀦𑀺𑀯𑀸𑀲𑀝𑁆𑀞𑀸𑀦𑀪𑀽𑀢𑁂 𑀲𑀻𑀭𑀺𑀔𑁂𑀢𑁆𑀢𑀦𑀕𑀭𑁂 𑀏𑀭𑀸𑀯𑀢𑀺𑀬𑀸 𑀦𑀤𑀺𑀬𑀸 𑀧𑀸𑀭𑀺𑀫𑀢𑀻𑀭𑀪𑀽𑀢𑁂 𑀧𑀩𑁆𑀩𑀢𑀲𑀸𑀦𑀼𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑀲𑁆𑀲 𑀓𑀜𑁆𑀘𑀦𑀯𑀭𑀫𑀳𑀸𑀣𑀽𑀧𑀲𑁆𑀲 𑀤𑀸𑀬𑀓𑀲𑁆𑀲 𑀲𑀢𑁆𑀯𑀺𑀯𑀫𑀳𑀸𑀥𑀫𑁆𑀫𑀭𑀜𑁆𑀜𑁄 𑀓𑀸𑀮𑁂 𑀲𑀸𑀲𑀦𑀲𑁆𑀲 𑀤𑁆𑀯𑀺𑀲𑀳𑀲𑁆𑀲𑀲𑀢𑀸𑀥𑀺𑀓𑀏𑀓𑀢𑀺𑀁𑀲𑀢𑀺𑀫𑁂 𑀯𑀲𑁆𑀲𑁂 𑀲𑀸𑀲𑀦𑁂 𑀧𑀝𑀺𑀮𑀤𑁆𑀥𑀲𑀤𑁆𑀥𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀫𑀳𑀸𑀚𑀸𑀦𑀺𑀓𑀭𑀡𑀯𑀲𑁂𑀦 𑀯𑀺𑀫𑀢𑀺𑀯𑀺𑀦𑁄𑀤𑀦𑀺𑀬𑀸 𑀯𑀼𑀢𑁆𑀢𑀯𑀘𑀦𑀁 𑀲𑀤𑁆𑀤𑀬𑀼𑀢𑁆𑀢𑀺𑀅𑀢𑁆𑀣𑀬𑀼𑀢𑁆𑀢𑀺𑀯𑀲𑁂𑀦 𑀲𑀸𑀥𑀼𑀓𑀁 𑀅𑀯𑀺𑀘𑀺𑀦𑀺𑀢𑁆𑀯𑀸 𑀦𑀤𑀺𑀬𑀸 𑀉𑀤𑀓𑀼𑀓𑁆𑀔𑁂𑀧𑀁 𑀅𑀓𑀢𑁆𑀯𑀸 𑀉𑀧𑀲𑀫𑁆𑀧𑀤𑀸 𑀓𑀫𑁆𑀫𑀲𑁆𑀲 𑀓𑀸𑀭𑀺𑀢𑀢𑁆𑀢𑀸 𑀲𑀸𑀲𑀦𑁂 𑀧𑀭𑀸𑀚𑀬𑀫𑀸𑀧𑀦𑁆𑀦𑁂 𑀓𑀼𑀮𑀧𑀼𑀢𑁆𑀢𑁂 𑀉𑀧𑀸𑀭𑀫𑁆𑀪𑀓𑀭𑀡𑀯𑀲𑁂𑀦 𑀲𑀻𑀫𑀯𑀺𑀧𑀢𑁆𑀢𑀺𑀳𑀸𑀭𑀓𑁄 𑀲𑀻𑀫𑀲𑀫𑁆𑀧𑀢𑁆𑀢𑀺𑀧𑁆𑀧𑀓𑀸𑀲𑀓𑁄 𑀕𑀦𑁆𑀣𑁄 𑀧𑀯𑀢𑁆𑀢𑀢𑀺.

𑀏𑀢𑁆𑀢𑀸𑀯𑀢𑀸 𑀘 𑀲𑀺𑀭𑀺𑀔𑁂𑀢𑁆𑀢𑀦𑀕𑀭𑀕𑁄𑀘𑀭𑀕𑀸𑀫𑁂𑀦 𑀲𑀢𑁆𑀯𑀺𑀯𑀫𑀳𑀸𑀥𑀫𑁆𑀫𑀭𑀸𑀚𑀕𑀼𑀭𑀼𑀪𑀽𑀢𑁂𑀦 𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁂𑀦 𑀢𑀺𑀧𑀺𑀝𑀓𑀥𑀭𑁂𑀦’𑀲𑀤𑁆𑀥𑀫𑁆𑀫𑀓𑁄𑀯𑀺𑀤𑁄’𑀢𑀺 𑀧𑀸𑀓𑀝 𑀦𑀸𑀫𑀥𑁂𑀬𑁆𑀬𑁂𑀦 𑀫𑀳𑀸𑀣𑁂𑀭𑁂𑀦 𑀉𑀧𑀚𑁆𑀛𑀸𑀬𑁄 𑀳𑀼𑀢𑁆𑀯𑀸 𑀧𑀜𑁆𑀜𑀸𑀥𑀺𑀧𑀢𑀻𑀦𑀁 𑀦𑀺𑀯𑀸𑀲𑀪𑀽𑀢𑁂 𑀧𑀘𑁆𑀙𑀺𑀫𑀚𑀺𑀦𑀘𑀓𑁆𑀓𑀲𑀸𑀲𑀦𑀯𑀭𑁂 𑀯𑀸𑀲𑀺𑀕𑀡𑀸𑀘𑀭𑀺𑀬𑁂𑀦 𑀕𑀡𑀯𑀸𑀘𑀓𑁂𑀦 𑀯𑀺𑀦𑀬𑀥𑀭𑁂𑀦 𑀫𑀳𑀸𑀲𑀸𑀫𑀺𑀦𑀸 𑀘, 𑀭𑀸𑀚𑀕𑀼𑀭𑀼𑀦𑀸 𑀢𑀺𑀧𑀺𑀝𑀓𑀦𑀸𑀕𑀢𑁆𑀣𑁂𑀭𑁂𑀦 𑀘 𑀆𑀘𑀭𑀺𑀬𑁄 𑀳𑀼𑀢𑁆𑀯𑀸 𑀯𑁂𑀚𑁆𑀚𑀓𑀫𑁆𑀫𑀚𑀗𑁆𑀖𑀧𑁂𑀲𑀦𑀓𑀫𑁆𑀫𑀸𑀤𑀺𑀯𑀲𑁂𑀦 𑀅𑀦𑁂𑀲𑀦𑀁 𑀧𑀳𑀸𑀬 𑀲𑀫𑁆𑀫𑀸 𑀆𑀚𑀻𑀯𑁂𑀦 𑀯𑀺𑀲𑀼𑀤𑁆𑀥𑀸𑀚𑀻𑀯𑁂𑀳𑀺 𑀲𑀗𑁆𑀖𑀕𑀡𑁂𑀳𑀺 𑀓𑀸𑀭𑀓𑀲𑀗𑁆𑀖𑀸 𑀳𑀼𑀢𑁆𑀯𑀸 𑀲𑀺𑀭𑀺𑀔𑁂𑀢𑁆𑀢𑀦𑀕𑀭𑀲𑁆𑀲 𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁂 𑀤𑀻𑀖𑀧𑀩𑁆𑀩𑀢𑀲𑀸𑀦𑀼𑀫𑁆𑀳𑀺 𑀏𑀭𑀸𑀯𑀢𑀺𑀬𑀸 𑀦𑀤𑀺𑀬𑀸 𑀢𑀻𑀭𑁂 𑀯𑀸𑀮𑀺𑀓𑀧𑀼𑀴𑀺𑀦𑁂 𑀲𑀻𑀫𑀸𑀧𑁂𑀓𑁆𑀔𑀸𑀬 𑀲𑀳 𑀉𑀤𑀓𑀼𑀓𑁆𑀔𑁂𑀧𑀁 ¶ 𑀓𑀢𑁆𑀯𑀸 𑀧𑀯𑀢𑁆𑀢𑀸𑀬 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬 𑀤𑀲𑀥𑀸 𑀩𑁆𑀬𑀜𑁆𑀚𑀦𑀯𑀺𑀧𑀢𑁆𑀢𑀺𑀁 𑀅𑀓𑀢𑁆𑀯𑀸 𑀞𑀸𑀦𑀸𑀭𑀳𑁂𑀦 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀉𑀧𑀲𑀫𑁆𑀧𑀤𑀸𑀬 𑀯𑀻𑀲𑀢𑀺𑀯𑀲𑁆𑀲𑁂𑀦 𑀲𑀸𑀕𑀭𑀩𑀼𑀤𑁆𑀥𑀻𑀢𑀺 𑀕𑀭𑀽𑀳𑀺 𑀕𑀳𑀺𑀢𑀦𑀸𑀫𑀥𑁂𑀬𑁆𑀬𑁂𑀦 𑀪𑀺𑀓𑁆𑀔𑀼𑀦𑀸 𑀭𑀘𑀺𑀢𑁄 𑀲𑀸𑀲𑀦𑀯𑀺𑀧𑀢𑁆𑀢𑀺𑀳𑀸𑀭𑀓𑁄 𑀲𑀻𑀫𑀯𑀺𑀲𑁄𑀥𑀦𑀻 𑀦𑀸𑀫 𑀕𑀦𑁆𑀣𑁄 𑀲𑀫𑀢𑁆𑀢𑁄.

𑀏𑀢𑁆𑀢𑀸𑀯𑀢𑀸 𑀯𑀺𑀪𑀢𑁆𑀢𑀸 𑀳𑀺, 𑀲𑀧𑁆𑀧𑀪𑁂𑀤𑀧𑁆𑀧𑀯𑀢𑁆𑀢𑀺𑀓𑀸;

𑀲𑀻𑀫𑀯𑀺𑀲𑁄𑀥𑀦𑀻𑀳𑁂𑀲𑀸, 𑀦𑀺𑀧𑀼𑀡𑀸 𑀲𑀸𑀥𑀼𑀘𑀺𑀦𑁆𑀢𑀺𑀢𑀸.

𑀲𑀺𑀭𑀺𑀔𑁂𑀢𑁆𑀢𑀸𑀢𑀺 𑀧𑀜𑁆𑀜𑀸𑀢𑁂, 𑀧𑀼𑀭𑁂 𑀅𑀧𑀭𑀦𑀸𑀫𑀓𑁂;

𑀤𑀓𑁆𑀔𑀺𑀡𑁂𑀬𑁆𑀬𑀤𑀺𑀲𑀸𑀪𑀸𑀕𑁂, 𑀉𑀘𑁆𑀘𑀦𑁂𑀦 𑀓𑀢𑀸𑀮𑀬𑁂.

𑀯𑀲𑀦𑁆𑀢𑁄 𑀪𑀺𑀓𑁆𑀔𑀼 𑀦𑀸𑀫𑁂𑀦, 𑀲𑀸𑀕𑀭𑀩𑀼𑀤𑁆𑀥𑀻𑀢𑀺 𑀯𑀺𑀲𑁆𑀲𑀼𑀢𑁄;

𑀧𑀼𑀡𑁆𑀡𑁂 𑀯𑀻𑀲𑀢𑀺𑀯𑀲𑁆𑀲𑀫𑁆𑀳𑀺, 𑀕𑀦𑁆𑀣𑁄𑀬𑀁 𑀲𑀸𑀥𑀼𑀘𑀺𑀦𑁆𑀢𑀺𑀢𑁄.

𑀫𑀬𑀸𑀬𑀁 𑀭𑀘𑀺𑀢𑁄 𑀕𑀦𑁆𑀣𑁄, 𑀦𑀺𑀝𑁆𑀞𑀧𑁆𑀧𑀢𑁆𑀢𑁄 𑀅𑀦𑀸𑀓𑀼𑀮𑁄;

𑀏𑀯𑀁 𑀧𑀸𑀡𑀺𑀦𑀁 𑀲𑀩𑁆𑀩𑁂, 𑀲𑀻𑀖𑀁 𑀲𑀺𑀚𑁆𑀛𑀦𑁆𑀢𑀼 𑀲𑀗𑁆𑀓𑀧𑁆𑀧𑀸.

𑀬𑀸𑀯 𑀩𑀼𑀤𑁆𑀥𑁄𑀢𑀺𑀦𑀸𑀫𑀫𑁆𑀧𑀺 𑀮𑁄𑀓𑀚𑁂𑀝𑁆𑀞𑀲𑁆𑀲 𑀢𑀸𑀤𑀺𑀦𑁄;

𑀢𑀸𑀯 𑀢𑀺𑀝𑁆𑀞𑀢𑀼 𑀬𑀁 𑀕𑀦𑁆𑀣𑁄, 𑀲𑀸𑀲𑀦𑁂 𑀳𑀸𑀭𑀬𑀁 𑀢𑀫𑀁.

𑀉𑀤𑁆𑀥𑀁 𑀬𑀸𑀯 𑀪𑀯𑀕𑁆𑀕𑀸 𑀘, 𑀅𑀥𑁄 𑀬𑀸𑀯 𑀅𑀯𑀻𑀘𑀺𑀢𑁄;

𑀲𑀫𑀦𑁆𑀢𑀸 𑀘𑀓𑁆𑀓𑀯𑀸𑀴𑁂𑀲𑀼, 𑀬𑁂 𑀲𑀢𑁆𑀢𑀸 𑀧𑀣𑀯𑀻𑀘𑀭𑀸.

𑀢𑁂𑀧𑀺 𑀲𑀩𑁆𑀩𑁂 𑀫𑀬𑀸 𑀳𑁄𑀦𑁆𑀢𑀼, 𑀲𑀫𑀲𑀫𑀯𑀺𑀧𑀸𑀓𑀺𑀦𑁄;

𑀘𑀺𑀭𑀁 𑀚𑀻𑀯𑀢𑀼 𑀦𑁄 𑀭𑀸𑀚𑀸, 𑀲𑀸𑀲𑀦𑀲𑁆𑀲 𑀉𑀚𑁆𑀚𑁄𑀢𑀓𑁄.

𑀤𑀺𑀩𑁆𑀩𑀦𑁆𑀢𑁄 𑀭𑀸𑀚𑀥𑀫𑁆𑀫𑁂𑀦, 𑀅𑀭𑁄𑀕𑁄 𑀲𑀳 𑀜𑀸𑀢𑀺𑀪𑀺;

𑀅𑀦𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦, 𑀪𑀯𑁂𑀬𑁆𑀬𑀁 𑀚𑀸𑀢𑀺𑀚𑀸𑀢𑀺𑀬𑀁.

𑀲𑀸𑀲𑀦𑀁 𑀚𑁄𑀢𑀬𑀦𑁆𑀢𑁄𑀯, 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀸𑀲𑀦𑁂;

𑀬𑀤𑀸 𑀦𑀲𑁆𑀲𑀢𑀺 𑀲𑀤𑁆𑀥𑀫𑁆𑀫𑁄, 𑀅𑀦𑁆𑀥𑀻𑀪𑀽𑀢𑁄 𑀫𑀳𑀻𑀢𑀮𑁂;

𑀤𑁂𑀯𑀮𑁄𑀓𑁂 𑀢𑀤𑀸 𑀳𑁂𑀲𑁆𑀲𑀁, 𑀢𑀼𑀲𑀺𑀢𑁂 𑀞𑀸𑀦𑀫𑀼𑀢𑁆𑀢𑀫𑁂𑀢𑀺.

𑀲𑀻𑀫𑀯𑀺𑀲𑁄𑀥𑀦𑀻 𑀦𑀺𑀝𑁆𑀞𑀺𑀢𑀸.