📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲.

𑀯𑁂𑀲𑁆𑀲𑀦𑁆𑀢𑀭𑀸𑀕𑀻𑀢𑀺

[𑀓]

𑀩𑀸𑀢𑁆𑀢𑀺𑀁𑀲𑀮𑀓𑁆𑀔𑀡𑀽𑀧𑁂𑀢 ¶ ,

𑀤𑀸𑀢𑀩𑁆𑀩𑀁 𑀤𑀤𑀢𑀁 𑀯𑀭;

𑀯𑁂𑀲𑁆𑀲𑀦𑁆𑀢𑀭𑀢𑁆𑀢 𑀫𑀸𑀧𑀸𑀤𑀺,

𑀲𑀜𑁆𑀘𑀭𑀁 𑀪𑀯𑀲𑀸𑀕𑀭𑁂.

[𑀔]

𑀤𑁆𑀯𑀦𑁆𑀤𑀁𑀤𑁆𑀯𑀦𑁆𑀤𑀁 ¶ 𑀲𑀜𑁆𑀘𑀭𑀦𑁆𑀢𑀻,

𑀚𑀦𑀸𑀦𑀦𑁆𑀤𑁂 𑀬𑀲𑁄𑀥𑀻𑀭𑁂;

𑀫𑀤𑁆𑀤𑀺𑀢𑁆𑀢𑀁 𑀲𑀫𑀼𑀧𑀸𑀕𑀜𑁆𑀙𑀺,

𑀢𑁆𑀯𑀁𑀧𑀺𑀢𑁂𑀦 𑀪𑀯𑀡𑁆𑀡𑀯𑁂.

[𑀕]

𑀢𑀼𑀫𑁆𑀳𑀁𑀤𑀸𑀦𑀺 𑀧𑀯𑀓𑁆𑀔𑀸𑀫𑀺,

𑀉𑀧𑀢𑁆𑀢𑀺𑀁 𑀦𑀦𑁆𑀤𑀺𑀦𑀺𑀁 𑀢𑀳𑀺𑀁;

𑀤𑀚𑁆𑀚𑀳𑁆𑀯𑁄𑀯𑁄 𑀫𑀫𑁄𑀓𑀸𑀲𑀁,

𑀓𑀯𑀬𑁄 𑀧𑁆𑀬𑀸𑀪𑀺𑀦𑀦𑁆𑀤𑀣.

𑁧.

𑀏𑀓𑀦𑀯𑀼𑀢𑁂𑀳𑀺𑀢𑁄 𑀓𑀧𑁆𑀧𑁂,

𑀯𑀺𑀧𑀲𑁆𑀲𑀻𑀦𑀸𑀫 𑀦𑀸𑀬𑀓𑁄;

𑀯𑀺𑀦𑁂𑀬𑁆𑀬𑁂 ¶ 𑀢𑀸𑀭𑀬𑀁𑀔𑁂𑀫𑀁,

𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀘𑀓𑁆𑀔𑀼𑀫𑀸.

𑁨.

𑀔𑁂𑀫𑀸𑀭𑀸𑀫𑀫𑁆𑀳𑀺 𑀲𑀫𑁆𑀩𑀼𑀤𑁆𑀥𑁄,

𑀫𑀺𑀕𑀤𑀸𑀬𑁂 𑀫𑀦𑁄𑀭𑀫𑁂;

𑀦𑀺𑀲𑁆𑀲𑀸𑀬 𑀩𑀦𑁆𑀥𑀼𑀫𑀢𑀺𑀁𑀲𑁄,

𑀯𑀺𑀳𑀸𑀲𑀺 𑀦𑀕𑀭𑀁𑀢𑀤𑀸.

𑁩.

𑀭𑀚𑁆𑀚𑀁𑀥𑀫𑁆𑀫𑁂𑀦 𑀓𑀸𑀭𑁂𑀲𑀺,

𑀦𑀕𑀭𑁂𑀢𑀫𑁆𑀳𑀺 𑀩𑀦𑁆𑀥𑀼𑀫𑀸;

𑀭𑀸𑀚𑀸𑀢𑀲𑁆𑀲 𑀤𑀼𑀯𑁂𑀥𑀻𑀢𑀸,

𑀆𑀲𑀼𑀁 𑀲𑀩𑁆𑀩𑀗𑁆𑀕𑀲𑁄𑀪𑀡𑀸.

𑁪.

𑀏𑀓𑁄𑀳𑀺 ¶ 𑀏𑀓𑀤𑀸𑀭𑀸𑀚𑀸,

𑀩𑀦𑁆𑀥𑀼𑀫𑀲𑁆𑀲 𑀲𑀼𑀧𑁂𑀲𑀬𑀺;

𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀲𑁄𑀡𑁆𑀡-

𑀫𑀸𑀮𑀜𑁆𑀘𑀸 𑀦𑀕𑁆𑀖 𑀘𑀦𑁆𑀤𑀦𑀁.

𑁫.

𑀅𑀤𑀸𑀲𑀺 𑀩𑀦𑁆𑀥𑀼𑀫𑀸𑀭𑀸𑀚𑀸,

𑀧𑀺𑀢𑀸𑀚𑁂𑀝𑁆𑀞𑀸𑀬 𑀘𑀦𑁆𑀤𑀦𑀁;

𑀲𑁄𑀡𑁆𑀡𑀫𑀸𑀮𑀁 𑀓𑀦𑀺𑀝𑁆𑀞𑀸𑀬,

𑀢𑀳𑀺𑀁 𑀯𑀺𑀬𑀸𑀬 𑀥𑀻𑀢𑀼𑀬𑀸.

𑁬.

𑀉𑀪𑁄𑀢𑀸𑀧𑀻𑀢𑀺 ¶ 𑀘𑀺𑀦𑁆𑀢𑁂𑀲𑀼𑀁,

𑀦𑀢𑁆𑀣𑀢𑁆𑀣𑁄𑀯𑀢 𑀢𑁂𑀳𑀺𑀦𑁄;

𑀪𑀕𑁆𑀬𑀯𑀦𑁆𑀢𑀲𑁆𑀲 𑀧𑀽𑀚𑁂𑀫,

𑀲𑀁𑀧𑀲𑀸𑀤𑁂𑀦 𑀘𑁂𑀢𑀲𑀸.

𑁭.

𑀢𑀢𑁄𑀲𑀸𑀘𑀦𑁆𑀤𑀦𑀁 𑀘𑀼𑀡𑁆𑀡𑀁-

𑀓𑀸𑀭𑀸𑀧𑁂𑀢𑁆𑀯𑀸𑀦 𑀚𑁂𑀝𑁆𑀞𑀓𑀸;

𑀕𑀦𑁆𑀢𑁆𑀯𑀸𑀦 𑀯𑀺𑀳𑀸𑀭𑀁 𑀲𑁄𑀡𑁆𑀡,

𑀯𑀡𑁆𑀡𑀁𑀧𑀽𑀚𑁂𑀲𑀺 𑀦𑀸𑀬𑀓𑀁.

𑁮.

𑀯𑀺𑀓𑀺𑀭𑀺𑀢𑁆𑀯𑀸 𑀢𑀼 𑀲𑀸𑀕𑀦𑁆𑀥,

𑀓𑀼𑀝𑀺𑀬𑀁 𑀲𑁂𑀲𑀘𑀦𑁆𑀤𑀦𑀁;

𑀏𑀯𑀜𑁆𑀳𑀺 𑀧𑀢𑁆𑀣𑀦𑀁 𑀓𑀸𑀲𑀺,

𑀩𑀼𑀤𑁆𑀥𑀫𑀸𑀢𑀸 𑀪𑀯𑀸𑀫𑀳𑀁.

𑁯.

𑀓𑀸𑀭𑁂𑀢𑁆𑀯𑀸 ¶ 𑀲𑁄𑀡𑁆𑀡𑀫𑀸𑀮𑀁𑀢𑀼,

𑀉𑀭𑀘𑁆𑀙𑀤 𑀧𑀲𑀸𑀤𑀦𑀁;

𑀧𑀽𑀚𑁂𑀲𑀺 𑀳𑁂𑀫𑀯𑀡𑁆𑀡𑀁𑀲𑀸,

𑀪𑀕𑀯𑀦𑁆𑀢𑀁 𑀓𑀦𑀺𑀝𑁆𑀞𑀓𑀸.

𑁧𑁦.

𑀏𑀯𑀫𑁆𑀧𑀺 𑀧𑀢𑁆𑀣𑀦𑀁𑀓𑀸𑀲𑀺,

𑀇𑀤𑀁𑀫𑀫 𑀧𑀲𑀸𑀤𑀦𑀁;

𑀲𑀭𑀻𑀭𑁂 𑀦𑀺𑀘𑁆𑀘𑀮𑀸 𑀞𑀸𑀢𑀼,

𑀘𑀭𑀦𑁆𑀢𑀺𑀬𑀸 𑀪𑀯𑀸𑀪𑀯𑀁.

𑁧𑁧.

𑀉𑀪𑁄𑀧𑀺 ¶ 𑀭𑀸𑀚𑀓𑀜𑁆𑀜𑀸𑀢𑀸,

𑀞𑀢𑁆𑀯𑀸𑀦 𑀬𑀸𑀯𑀢𑀸 𑀬𑀼𑀓𑀁;

𑀉𑀧𑀧𑀚𑁆𑀚𑀺𑀁𑀲𑀼 𑀲𑁄𑀯𑀕𑁆𑀕𑀁,

𑀘𑀼𑀢𑀸𑀲𑀼𑀔 𑀧𑀫𑁄𑀤𑀦𑀁.

𑁧𑁨.

𑀫𑀦𑀼𑀲𑁆𑀲𑀤𑁂𑀯 𑀮𑁄𑀓𑁂𑀲𑀼,

𑀲𑀁𑀲𑀭𑀺𑀁𑀲𑀼 𑀲𑀼𑀔𑀁𑀤𑀼𑀯𑁂;

𑀏𑀓𑀦𑀯𑀼𑀢𑀺 𑀓𑀧𑁆𑀧𑀸𑀦𑀺,

𑀫𑀼𑀘𑁆𑀘𑀺𑀢𑁆𑀯𑀸 𑀧𑀸𑀬𑀤𑀼𑀓𑁆𑀔𑀢𑁄.

𑁧𑁩.

𑀓𑀲𑁆𑀲𑀧𑀲𑁆𑀲 𑀓𑀸𑀮𑁂𑀢𑀸𑀲𑀼,

𑀓𑀦𑀺𑀝𑁆𑀞𑀸 𑀓𑀺𑀓𑀺𑀭𑀸𑀚𑀺𑀦𑁄;

𑀥𑀻𑀢𑀸 𑀉𑀭𑀘𑁆𑀙𑀤𑀸𑀦𑀸𑀫,

𑀳𑀼𑀢𑁆𑀯𑀸𑀦 𑀧𑀭𑀺𑀦𑀺𑀩𑁆𑀩𑀼𑀢𑀸.

𑁧𑁪.

𑀚𑁂𑀝𑁆𑀞𑀓𑀸 ¶ 𑀧𑀦 𑀥𑀻𑀢𑀸𑀲𑀺,

𑀓𑀺𑀓𑀺𑀲𑁆𑀲 𑀭𑀸𑀚𑀺𑀦𑁄 𑀢𑀳𑀺𑀁;

𑀥𑀫𑁆𑀫𑀸𑀦𑀸𑀫 𑀤𑀫𑀺𑀢𑀸 𑀲𑀸,

𑀓𑁄𑀫𑀸𑀭 𑀩𑁆𑀭𑀳𑁆𑀫𑀘𑀸𑀭𑀺𑀦𑀻.

𑁧𑁫.

𑀢𑀢𑁄𑀘 𑀯𑀺𑀢𑁆𑀯𑀸𑀦 𑀲𑀸 𑀤𑁂𑀯,

𑀫𑀦𑀼𑀲𑁆𑀲𑁂𑀲𑀼 𑀧𑀼𑀦𑀧𑁆𑀧𑀼𑀦𑀁;

𑀲𑀁𑀲𑀭𑀦𑁆𑀢𑀻 𑀫𑀳𑁂𑀲𑀻𑀲𑀺,

𑀧𑀽𑀭𑀺𑀦𑁆𑀤𑀤𑀲𑁆𑀲 𑀏𑀓𑀤𑀸.

𑁧𑁬.

𑀭𑀢𑁆𑀢𑀘𑀦𑁆𑀤𑀦 ¶ 𑀮𑁂𑀧𑁂𑀦,

𑀮𑀺𑀫𑁆𑀧𑀺𑀢 𑀤𑁂𑀳𑀺𑀦𑀻 𑀳𑀺𑀲𑀸;

𑀓𑀢𑀧𑀼𑀜𑁆𑀜 𑀯𑀺𑀲𑁂𑀲𑁂𑀦,

𑀦𑀸𑀫𑁂𑀦 𑀨𑀼𑀲𑁆𑀲𑀢𑀻𑀳𑁆𑀯𑀺𑀢𑀸.

𑁧𑁭.

𑀤𑁂𑀯𑀺𑀦𑁆𑀤𑁄 𑀅𑀜𑁆𑀜𑀤𑀸𑀤𑀺𑀲𑁆𑀯𑀸,

𑀧𑀭𑀺𑀓𑁆𑀔𑀻𑀡𑀸𑀬𑀼𑀓𑀁 𑀯𑀺𑀬𑀁;

𑀤𑁂𑀯𑀺𑀁 𑀢𑀁 𑀧𑀭𑀺𑀯𑀸𑀭𑁂𑀦,

𑀫𑀳𑀢𑀸 𑀦𑁂𑀲𑀺𑀦𑀦𑁆𑀤𑀦𑀁.

𑁧𑁮.

𑀲𑀺𑀭𑀻𑀲𑀬𑀦 𑀧𑀺𑀝𑁆𑀞𑀫𑁆𑀳𑀺,

𑀢𑀁𑀲𑀬𑀸𑀯𑀺𑀬 𑀫𑀸𑀖𑀯𑀸;

𑀞𑀺𑀢𑁄 ¶ 𑀲𑀬𑀦𑀧𑀲𑁆𑀲𑀫𑁆𑀳𑀺,

𑀨𑀼𑀲𑁆𑀲𑀢𑀺𑀁 𑀏𑀢𑀤𑀩𑁆𑀭𑀯𑀻.

𑁧𑁯.

𑀯𑀭𑁂𑀢𑁂𑀤𑀲𑀤𑀲𑁆𑀲𑀸𑀫𑀺,

𑀨𑀼𑀲𑁆𑀲𑀢𑁂𑀯𑀭𑀯𑀡𑁆𑀡𑀺𑀓𑁂;

𑀢𑁆𑀯𑀁𑀜𑁆𑀳𑀺𑀇𑀘𑁆𑀙𑀲𑀺𑀬𑁂𑀮𑀤𑁆𑀥𑀼𑀁,

𑀮𑀪𑀸𑀧𑁂𑀲𑁆𑀲𑀸𑀫𑀺𑀢𑁂𑀯𑀭𑁂.

𑁨𑁦.

𑀲𑀼𑀢𑁆𑀯𑀸𑀢𑀁 𑀨𑀼𑀲𑁆𑀲𑀢𑀻𑀤𑁂𑀯𑀻,

𑀮𑁄𑀫𑀳𑀁 𑀲𑀦𑀭𑀽𑀧𑀺𑀦𑀻;

𑀔𑀻𑀡𑀸𑀬𑀼𑀢𑀫𑀚𑀸𑀦𑀦𑁆𑀢𑀻,

𑀅𑀢𑁆𑀢𑀦𑁄 𑀏𑀢𑀤𑀩𑁆𑀭𑀯𑀻.

𑁨𑁧.

𑀧𑀸𑀧𑀁𑀦𑀼 ¶ 𑀢𑁆𑀯𑀬𑀺 𑀤𑁂𑀯𑀺𑀁𑀦𑁆𑀤,

𑀓𑀢𑀁𑀫𑁂 𑀅𑀧𑁆𑀧𑀺𑀬𑀸𑀣𑀢𑁂;

𑀭𑀫𑁆𑀫𑀸𑀫𑁂 𑀘𑀯𑀦𑀁 𑀇𑀘𑁆𑀙𑀁,

𑀫𑀜𑁆𑀜𑁂𑀪𑀡𑀁𑀢𑀺 𑀈𑀤𑀺𑀲𑀁.

𑁨𑁨.

𑀦𑀢𑁂𑀪𑀤𑁆𑀤𑁂 𑀓𑀢𑀁𑀧𑀸𑀧𑀁,

𑀦𑀘𑀫𑁂 𑀅𑀧𑁆𑀧𑀺𑀬𑀸𑀢𑀼𑀯𑀁;

𑀧𑀼𑀜𑁆𑀜𑀁𑀢𑀼𑀢𑁂 𑀧𑀭𑀺𑀓𑁆𑀔𑀻𑀡𑀁,

𑀢𑀲𑁆𑀫𑀸 𑀢𑁂 𑀯𑀁𑀯𑀤𑀸𑀫𑀳𑀁.

𑁨𑁩.

𑀲𑀦𑁆𑀢𑀺𑀓𑁂 ¶ 𑀫𑀭𑀡𑀁 𑀢𑀼𑀬𑁆𑀳𑀁,

𑀯𑀺𑀦𑀸𑀪𑀸𑀯𑁄 𑀪𑀯𑀺𑀲𑁆𑀲𑀢𑀺;

𑀧𑀝𑀺𑀕𑁆𑀕𑀡𑁆𑀳𑀸𑀳𑀺 𑀫𑁂 𑀏𑀢𑁂,

𑀯𑀭𑁂𑀤𑀲 𑀧𑀯𑀘𑁆𑀙𑀢𑁄.

𑁨𑁪.

𑀲𑀓𑁆𑀓𑀲𑁆𑀲𑀯𑀘𑀦𑀁 𑀲𑀼𑀢𑁆𑀯𑀸,

𑀜𑀸𑀢𑁆𑀯𑀸𑀫𑀭𑀡 𑀫𑀢𑁆𑀢𑀦𑁄;

𑀯𑀭𑁂𑀲𑀸 𑀮𑀤𑁆𑀥𑀼𑀫𑀺𑀘𑁆𑀙𑀦𑁆𑀢𑀻,

𑀤𑁂𑀯𑀺𑀦𑁆𑀤𑀫𑁂𑀢 𑀤𑀩𑁆𑀭𑀯𑀻.

𑁨𑁫.

𑀇𑀢𑁄 𑀘𑀼𑀢𑀸𑀲𑀳𑀲𑁆𑀲𑀓𑁆𑀔𑀺,

𑀲𑀻𑀯𑀺𑀭𑀸𑀚𑀦𑀺𑀯𑁂𑀲𑀦𑁂;

𑀫𑀳𑁂𑀲𑀻 𑀨𑀼𑀲𑁆𑀲𑀢𑀻𑀦𑀸𑀫,

𑀦𑀻𑀮𑀦𑁂𑀢𑁆𑀢𑀸 𑀬𑀣𑀸𑀫𑀺𑀕𑀻.

𑁨𑁬.

𑀅𑀲𑁆𑀲𑀁 ¶ 𑀦𑀻𑀮𑀪𑀫𑀼𑀓𑀸𑀳𑀁,

𑀮𑀪𑁂𑀬𑁆𑀬𑀁 𑀧𑀼𑀢𑁆𑀢𑀫𑀼𑀢𑁆𑀢𑀫𑀁;

𑀥𑀸𑀭𑁂𑀦𑁆𑀢𑀺 𑀬𑀸𑀘𑀫𑁂𑀕𑀩𑁆𑀪𑀁,

𑀫𑀚𑁆𑀛𑀺𑀫𑀗𑁆𑀕𑀁 𑀅𑀦𑀼𑀦𑁆𑀦𑀢𑀁.

𑁨𑁭.

𑀧𑀮𑀺𑀢𑀸𑀦 𑀯𑀺𑀭𑀽𑀳𑀦𑁆𑀢𑀼,

𑀅𑀮𑀫𑁆𑀩𑀸𑀘 𑀧𑀬𑁄𑀭𑁄;

𑀓𑀸𑀬𑁂𑀭𑀚𑁄 𑀦𑀮𑀺𑀫𑁆𑀧𑁂𑀣,

𑀯𑀚𑁆𑀛𑀜𑁆𑀘𑀸𑀧𑀺 𑀧𑀫𑁄𑀘𑀬𑁂.

𑁨𑁮.

𑀬𑁂𑀬𑀸𑀘𑀺𑀢𑀸 ¶ 𑀯𑀭𑀸𑀪𑀤𑁆𑀤𑁂,

𑀢𑀬𑀸𑀤𑀲 𑀫𑀬𑀸𑀢𑀯;

𑀤𑀺𑀦𑁆𑀦𑀸𑀢𑁂 𑀢𑀼𑀝𑁆𑀞𑀘𑀺𑀢𑁆𑀢𑁂𑀦,

𑀲𑀩𑁆𑀩𑁂𑀮𑀘𑁆𑀙𑀲𑀺 𑀫𑀸𑀦𑀼𑀲𑁂.

𑁨𑁯.

𑀢𑀢𑁄𑀘𑀯𑀺𑀢𑁆𑀯𑀸𑀦 𑀲𑀸𑀤𑁂𑀯-

𑀮𑁄𑀓𑀸 𑀦𑀺𑀩𑁆𑀩𑀢𑁆𑀢𑀺 𑀇𑀘𑁆𑀙𑀺𑀬𑀁;

𑀫𑀳𑁂𑀲𑀺𑀬𑀸 𑀧𑀝𑀺𑀲𑀦𑁆𑀥𑀺-

𑀯𑀲𑁂𑀦 𑀫𑀤𑁆𑀤𑀭𑀸𑀚𑀺𑀦𑁄.

𑁩𑁦.

𑀤𑀲𑀫𑀸 ¶ 𑀲𑀘𑁆𑀘𑀬𑁂𑀦𑁂𑀲𑀸,

𑀥𑀻𑀢𑀭𑀁 𑀫𑀤𑁆𑀤𑀭𑀸𑀚𑀺𑀦𑀻;

𑀳𑁂𑀝𑁆𑀞𑀸𑀲𑀼𑀲𑁂𑀢𑀘𑁆𑀙𑀢𑁆𑀢𑀲𑁆𑀲,

𑀯𑀺𑀚𑀸𑀬𑀺 𑀲𑁂𑀝𑁆𑀞𑀭𑀽𑀧𑀺𑀦𑀺𑀁.

𑁩𑁧.

𑀭𑀢𑁆𑀢𑀘𑀦𑁆𑀤𑀦 𑀮𑁂𑀧𑁂𑀦,

𑀏𑀲𑀸𑀮𑀺𑀫𑁆𑀧𑀺 𑀢𑀤𑁂𑀳𑀺𑀦𑀻;

𑀢𑁂𑀦𑀲𑁆𑀲𑀸 𑀩𑁆𑀭𑀸𑀳𑁆𑀫𑀡𑀸𑀦𑀸𑀫𑀁,

𑀅𑀓𑀁𑀲𑀼 𑀨𑀼𑀲𑁆𑀲𑀢𑀻𑀇𑀢𑀺.

𑁩𑁨.

𑀲𑀜𑁆𑀜𑀸𑀓𑀸𑀭 𑀤𑁄𑀴𑀸𑀭𑀼𑀴-

𑀫𑀗𑁆𑀕𑀮𑀸𑀤𑀻𑀦𑀺 𑀓𑀸𑀢𑀼𑀦;

𑀫𑀳𑀢𑀸 𑀧𑀭𑀺𑀳𑀸𑀭𑁂𑀦,

𑀧𑁄𑀲𑀺𑀁𑀲𑀼 𑀔𑀢𑁆𑀢𑀺𑀬𑀸𑀦𑀺𑀬𑁄.

𑁩𑁩.

𑀫𑀥𑀽𑀭𑀔𑀻𑀭 ¶ 𑀲𑀫𑁆𑀧𑀦𑁆𑀦𑀸,

𑀲𑀺𑀦𑀺𑀤𑁆𑀥𑀧𑀻𑀡 𑀬𑁄𑀩𑁆𑀩𑀦𑀸;

𑀥𑀸𑀢𑀺𑀬𑁄 𑀔𑀢𑁆𑀢𑀺𑀬𑀸𑀦𑀻𑀢𑀁,

𑀔𑀻𑀭𑀁𑀧𑀸𑀬𑀺𑀁𑀲𑀼 𑀬𑀸𑀧𑀦𑀁.

𑁩𑁪.

𑀲𑀗𑁆𑀓𑀫𑀦𑁆𑀢𑀻𑀯 𑀯𑀼𑀤𑁆𑀥𑀸𑀲𑀸,

𑀅𑀗𑁆𑀓𑀸𑀅𑀗𑁆𑀓𑀁 𑀓𑀭𑀸𑀓𑀭𑀁;

𑀭𑀸𑀚𑀓𑀜𑁆𑀜𑀸𑀘 𑀢𑁄𑀲𑀺𑀁𑀲𑀼,

𑀦𑀘𑁆𑀘𑀕𑀻𑀢𑁂𑀳𑀺 𑀦𑀸𑀝𑀓𑀻.

𑁩𑁫.

𑀤𑁂𑀯𑀘𑁆𑀙𑀭𑀸𑀯𑀭𑀽𑀧𑁂𑀦,

𑀲𑀼𑀪𑀸𑀲𑁄𑀴𑀲 𑀯𑀲𑁆𑀲𑀺𑀓𑀸;

𑀳𑀭𑀦𑁆𑀢𑀻 ¶ 𑀦𑁂𑀢𑁆𑀢𑀭𑀲𑀁𑀲𑀸,

𑀧𑀲𑁆𑀲𑀦𑁆𑀢𑀸𑀦𑀁𑀲𑀼𑀔𑁂𑀥𑀺𑀢𑀸.

𑁩𑁬.

𑀲𑀺𑀯𑀺𑀭𑀝𑁆𑀞𑁂 𑀢𑀤𑀸𑀭𑀚𑁆𑀚𑀁,

𑀲𑀺𑀯𑀺𑀭𑀸𑀚𑀸 𑀚𑁂𑀢𑀼𑀢𑁆𑀢𑀭𑁂;

𑀓𑀸𑀭𑁂𑀲𑀺𑀲𑀺𑀜𑁆𑀘𑀬𑁄𑀦𑀸𑀫,

𑀧𑀼𑀢𑁆𑀢𑁄𑀢𑀲𑁆𑀲 𑀫𑀳𑀸𑀬𑀲𑁄.

𑁩𑁭.

𑀯𑀬𑀧𑁆𑀧𑀢𑁆𑀢𑁄 𑀪𑀺𑀭𑀽𑀧𑁄𑀲𑀺,

𑀤𑁂𑀯𑀧𑀼𑀢𑁆𑀢𑁄𑀯 𑀲𑀺𑀜𑁆𑀘𑀬𑁄;

𑀅𑀭𑁄𑀳 𑀧𑀭𑀺𑀡𑀸𑀳𑁂𑀦,

𑀦𑀸𑀦𑀸𑀲𑀺𑀩𑁆𑀩𑁂𑀲𑀼 𑀓𑁄𑀯𑀺𑀤𑁄.

𑁩𑁮.

𑀲𑀺𑀜𑁆𑀘𑀬𑀲𑁆𑀲 ¶ 𑀦𑀺𑀬𑁆𑀬𑀸𑀤𑁂𑀲𑀺,

𑀭𑀚𑁆𑀚𑀁𑀧𑀼𑀢𑁆𑀢𑀲𑁆𑀲 𑀅𑀢𑁆𑀢𑀦𑁄;

𑀚𑀻𑀯𑀦𑁆𑀢𑁄 𑀧𑀲𑁆𑀲𑀺𑀢𑀼𑀁𑀭𑀸𑀚-

𑀲𑀺𑀭𑀺𑀁𑀇𑀘𑁆𑀙𑀁 𑀫𑀳𑀸𑀭𑀳𑀁.

𑁩𑁯.

𑀆𑀦𑁂𑀢𑁆𑀯𑀸 𑀫𑀤𑁆𑀤𑀭𑀸𑀚𑀲𑁆𑀲,

𑀥𑀻𑀢𑀭𑀁 𑀨𑀼𑀲𑁆𑀲𑀢𑀺𑀁𑀢𑀳𑀺𑀁;

𑀲𑁄𑀴𑀲𑀺𑀢𑁆𑀣𑀺 𑀲𑀳𑀲𑁆𑀲𑀸𑀦𑀁,

𑀫𑀳𑁂𑀲𑀺𑀁𑀓𑀸𑀲𑀺 𑀚𑁂𑀝𑁆𑀞𑀺𑀓𑀁.

𑁪𑁦.

𑀨𑀼𑀲𑁆𑀲𑀢𑀻𑀲𑀺𑀜𑁆𑀘𑀬𑁄𑀜𑁆𑀜𑁄𑀜𑁆𑀜- ¶

𑀫𑀼𑀔𑀁𑀤𑁆𑀯𑁂𑀧𑀺𑀬𑀘𑀓𑁆𑀔𑀼𑀦𑀸;

𑀧𑀲𑁆𑀲𑀫𑀸𑀦𑀸𑀯𑀅𑀘𑁆𑀙𑀺𑀁𑀲𑀼,

𑀅𑀜𑁆𑀜𑀫𑀜𑁆𑀜𑀧𑀺𑀬𑀁𑀯𑀤𑀸.

𑁪𑁧.

𑀅𑀣𑀘𑀺𑀦𑁆𑀢𑀺 𑀬𑀤𑁂𑀯𑀺𑀦𑁆𑀤𑁄,

𑀤𑀺𑀦𑁆𑀦𑀸𑀨𑀼𑀲𑁆𑀲𑀢𑀺𑀬𑀸𑀫𑀬𑀸;

𑀯𑀭𑀸𑀤𑀲 𑀢𑁂𑀲𑀼𑀧𑀼𑀢𑁆𑀢-

𑀯𑀭𑁄𑀦𑀳𑀺𑀲𑀫𑀺𑀚𑁆𑀛𑀢𑀺.

𑁪𑁨.

𑀲𑀫𑀺𑀚𑁆𑀛𑀸 𑀧𑁂𑀲𑀸𑀫𑀺𑀏𑀢𑀁𑀢𑀺,

𑀅𑀚𑁂𑀬𑁆𑀬𑁂𑀪𑀺𑀤𑀲𑀸𑀮𑀬𑁂;

𑀉𑀧𑀥𑀸𑀭𑀺𑀢𑁆𑀣𑀢𑀺𑀲𑁆𑀲𑀸𑀬,

𑀧𑀼𑀢𑁆𑀢𑀪𑀸𑀯𑀸𑀭𑀳𑀁𑀫𑀭𑀼𑀁.

𑁪𑁩.

𑀘𑀯𑀺𑀢𑁆𑀯𑀸𑀳𑀼𑀉𑀤𑁆𑀥𑀁𑀕𑀸𑀫𑀻 ¶ ,

𑀩𑁄𑀥𑀺𑀤𑁂𑀯𑁄𑀢𑀢𑁄𑀢𑀳𑀺𑀁;

𑀩𑁆𑀭𑀳𑁆𑀫𑀁𑀕𑀦𑁆𑀢𑁆𑀯𑀸𑀲𑀳𑀲𑁆𑀲𑀓𑁆𑀔𑀻,

𑀢𑀲𑁆𑀲𑀢𑀁𑀏𑀢𑀤𑀩𑁆𑀭𑀯𑀻.

𑁪𑁪.

𑀇𑀢𑁄 𑀪𑁄 𑀲𑀼𑀕𑀢𑀺𑀁𑀕𑀘𑁆𑀙,

𑀅𑀦𑀼𑀓𑀫𑁆𑀧𑀸𑀳𑀺𑀫𑀭𑀺𑀲;

𑀲𑀺𑀜𑁆𑀘𑀬𑀁𑀤𑁂𑀯𑀺𑀬𑀁𑀢𑀲𑁆𑀲,

𑀲𑀦𑁆𑀥𑀺𑀁 𑀕𑀡𑁆𑀳𑀚𑀼𑀢𑀺𑀦𑁆𑀥𑀭.

𑁪𑁫.

𑀅𑀜𑁆𑀜𑁂𑀧𑀺 ¶ 𑀲𑀝𑁆𑀞𑀺𑀲𑀳𑀲𑁆𑀲-

𑀤𑁂𑀯𑁂 𑀘𑀯𑀦 𑀥𑀫𑁆𑀫𑀺𑀦𑁂;

𑀉𑀧𑀲𑀗𑁆𑀓𑀫𑁆𑀫 𑀲𑁄𑀬𑀸𑀘𑀺,

𑀕𑀘𑁆𑀙𑀳𑁆𑀯𑁄 𑀲𑀼𑀕𑀢𑀺𑀁𑀇𑀢𑀺.

𑁪𑁬.

𑀩𑁄𑀥𑀺𑀲𑀢𑁆𑀢𑁄𑀘 𑀅𑀜𑁆𑀜𑁂𑀘,

𑀲𑀸𑀥𑀽𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀲𑀼𑀁;

𑀢𑀢𑁄𑀘𑀼𑀢𑀸 𑀘𑀢𑁂𑀤𑁂𑀯𑀸,

𑀆𑀕𑀼𑀁 𑀫𑀸𑀦𑀼𑀲𑀓𑀁𑀇𑀫𑀁.

𑁪𑁭.

𑀨𑀼𑀲𑁆𑀲𑀢𑁆𑀬𑀁𑀳𑀺 ¶ 𑀫𑀳𑀸𑀲𑀢𑁆𑀢𑁄,

𑀦𑀺𑀩𑁆𑀩𑀢𑁆𑀢𑀺 𑀧𑀝𑀺𑀲𑀦𑁆𑀥𑀺𑀬𑀸;

𑀓𑀼𑀮𑁂𑀲𑁆𑀯𑀜𑁆𑀜𑁂𑀘 𑀫𑀘𑁆𑀘𑀸𑀦𑀁,

𑀦𑀺𑀩𑁆𑀩𑀢𑁆𑀢𑀺𑀁𑀲𑀼 𑀯𑀺𑀲𑀼𑀁𑀯𑀺𑀲𑀼𑀁.

𑁪𑁮.

𑀓𑀼𑀘𑁆𑀙𑀺𑀗𑁆𑀕𑀢𑁂 𑀫𑀳𑀸𑀲𑀢𑁆𑀢𑁂,

𑀤𑁂𑀯𑀻 𑀤𑁄 𑀳𑀴𑀺𑀦𑀻𑀅𑀳𑀼;

𑀤𑀸𑀢𑀼𑀓𑀸𑀫𑀸 𑀫𑀳𑀸𑀤𑀸𑀦𑀁,

𑀯𑀺𑀲𑀚𑁆𑀚𑀺𑀬 𑀩𑀼𑀳𑀼𑀁𑀥𑀦𑀁.

𑁪𑁯.

𑀭𑀸𑀚𑀫𑀦𑁆𑀤𑀺𑀭𑀤𑁆𑀯𑀸𑀭𑀫𑁆𑀳𑀺,

𑀯𑁂𑀫𑀚𑁆𑀛𑁂𑀦𑀕𑀭𑀲𑁆𑀲𑀘;

𑀘𑀢𑀼𑀤𑁆𑀯𑀸𑀭𑁂𑀲𑀼𑀙𑀤𑁆𑀤𑀸𑀦-

𑀲𑀸𑀮𑀸𑀬𑁄 𑀤𑁂𑀬𑁆𑀬𑀧𑀽𑀭𑀺𑀢𑀸.

𑁫𑁦.

𑀓𑀸𑀭𑀸𑀧𑁂𑀢𑁆𑀯𑀸𑀦 ¶ 𑀙𑀲𑁆𑀲𑀢-

𑀲𑀳𑀲𑁆𑀲𑀸𑀦𑀺 𑀤𑀺𑀦𑁂𑀤𑀺𑀦𑁂;

𑀯𑀺𑀲𑀚𑁆𑀚𑀺𑀢𑁆𑀯𑀸𑀦 𑀲𑀩𑁆𑀩𑁂𑀲𑀁,

𑀇𑀘𑁆𑀙𑀦𑁆𑀢𑀻 𑀆𑀲𑀺𑀤𑀸𑀢𑀯𑁂.

𑁫𑁧.

𑀉𑀢𑁆𑀯𑀸𑀢𑀁 𑀓𑀸𑀭𑀡𑀁𑀭𑀸𑀚𑀸,

𑀧𑀓𑁆𑀓𑁄𑀲𑀸𑀯𑀺𑀬 𑀩𑁆𑀭𑀸𑀳𑁆𑀫𑀡𑁂;

𑀦𑀺𑀫𑀺𑀢𑁆𑀢 𑀧𑀸𑀞𑀓𑁂𑀧𑀼𑀘𑁆𑀙𑀺,

𑀓𑀺𑀁 𑀪𑀯𑀺𑀲𑁆𑀲𑀢𑀻𑀢𑀺𑀜𑀸𑀢𑀯𑁂.

𑁫𑁨.

𑀚𑀸𑀦𑀸𑀫 𑀦𑁄 𑀫𑀳𑀸𑀭𑀸𑀚,

𑀕𑀢𑁄𑀓𑀼𑀘𑁆𑀙𑀺𑀫𑁆𑀳𑀺 𑀤𑁂𑀯𑀺𑀬𑀸;

𑀳𑁂𑀳𑀺𑀢𑁆𑀬 ¶ 𑀪𑀺𑀭𑀢𑁄𑀤𑀸𑀦𑁂,

𑀏𑀯𑀁𑀯𑀤𑀺𑀁𑀲𑀼 𑀩𑁆𑀭𑀸𑀳𑁆𑀫𑀡𑀸.

𑁫𑁩.

𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀘𑁄𑀲𑀼𑀢𑁆𑀯𑀸,

𑀦𑀭𑀺𑀦𑁆𑀤𑁄 𑀢𑀼𑀝𑁆𑀞𑀫𑀸𑀦𑀲𑁄;

𑀤𑀸𑀦𑀁𑀅𑀤𑀸𑀲𑀺 𑀙𑀤𑁆𑀤𑀸𑀦-

𑀲𑀸𑀮𑀸𑀬𑁄 𑀲𑀼𑀝𑁆𑀞𑀼𑀫𑀸𑀯𑀺𑀬.

𑁫𑁪.

𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀫𑁆𑀳𑀸,

𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀺𑀜𑁆𑀜𑀼𑀦𑁄;

𑀧𑀝𑁆𑀞𑀸𑀬𑀡𑁆𑀡𑀯 𑀯𑁂𑀕𑁄𑀯,

𑀮𑀸𑀪𑁄𑀴𑀸𑀭𑁄 𑀅𑀦𑀧𑁆𑀧𑀓𑁄.

𑁫𑁫.

𑀧𑀡𑁆𑀡𑀸𑀓𑀸𑀭𑀁 ¶ 𑀧𑀳𑀺𑀡𑀺𑀁𑀲𑀼,

𑀭𑀸𑀚𑀺𑀦𑁄 𑀚𑀫𑁆𑀩𑀼𑀫𑀡𑁆𑀟𑀮𑁂;

𑀩𑁄𑀥𑀺𑀲𑀢𑁆𑀢𑀸 𑀦𑀼𑀪𑀸𑀯𑁂𑀦,

𑀦𑀸𑀦𑀸𑀭𑀝𑁆𑀞𑀺𑀦𑁆𑀤𑀔𑀢𑁆𑀢𑀺𑀬𑀸.

𑁫𑁬.

𑀧𑀭𑀺𑀳𑀸𑀭𑀁 𑀧𑀯𑀘𑁆𑀙𑁂𑀲𑀺,

𑀫𑀳𑁂𑀲𑀺𑀁 𑀧𑀝𑀺𑀲𑀦𑁆𑀥𑀺𑀦𑀺𑀁;

𑀭𑀸𑀚𑀸𑀲𑀼𑀔𑀁 𑀯𑀲𑀸𑀧𑁂𑀲𑀺,

𑀓𑀸𑀭𑁂𑀲𑀺𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁.

𑁫𑁭.

𑀩𑀼𑀤𑁆𑀥𑀗𑁆𑀓𑀼𑀭𑀸𑀦𑀼𑀪𑀸𑀯𑁂𑀦,

𑀚𑀦𑀸𑀲𑀼𑀁 𑀫𑁄𑀤𑀫𑀸𑀦𑀲𑀸;

𑀓𑀸𑀮𑁂𑀯𑀲𑁆𑀲𑀢𑀺𑀫𑁂𑀖𑁄𑀧𑀺,

𑀲𑀼𑀪𑀺𑀓𑁆𑀔𑁄𑀲𑀫𑀬𑁄𑀅𑀳𑀼.

𑁫𑁮.

𑀲𑀤𑁆𑀥𑀺𑀁𑀧𑀼𑀢𑁆𑀢𑁂𑀦 ¶ 𑀚𑀼𑀡𑁆𑀳𑀸𑀬,

𑀓𑀺𑀴𑀦𑁆𑀢𑀺𑀬𑀸𑀯𑀫𑀸𑀢𑀼𑀬𑀸;

𑀫𑀳𑀦𑁆𑀢𑀻𑀭𑀢𑀺𑀲𑀩𑁆𑀩𑁂𑀲𑀁,

𑀚𑀦𑀸𑀦𑀁𑀯𑀺𑀧𑀼𑀮𑀸𑀢𑀳𑀺𑀁.

𑁫𑁯.

𑀕𑀩𑁆𑀪𑀁𑀳𑀺 𑀥𑀸𑀭𑁂𑀦𑁆𑀢𑀻𑀤𑁂𑀯𑀻,

𑀤𑀲𑀫𑀸𑀲𑀫𑁆𑀳𑀺𑀧𑀽𑀭𑀺𑀢𑁂;

𑀦𑀕𑀭𑀁𑀤𑀝𑁆𑀞𑀼 𑀓𑀸𑀫𑀸𑀲𑀺,

𑀢𑀤𑀸𑀭𑁄𑀘𑁂𑀲𑀺𑀭𑀸𑀚𑀺𑀦𑁄.

𑁬𑁦.

𑀲𑀸𑀥𑀼𑀪𑀤𑁆𑀤𑁂𑀢𑀺 ¶ 𑀯𑀢𑁆𑀯𑀸𑀦,

𑀧𑀼𑀭𑀁𑀤𑁂𑀯 𑀧𑀼𑀭𑀁𑀯𑀺𑀬;

𑀭𑀸𑀚𑀸 𑀅𑀮𑀗𑁆𑀓𑀭𑀸𑀧𑁂𑀲𑀺,

𑀤𑁂𑀯𑀺𑀬𑀸 𑀧𑀺𑀢𑀺𑀯𑀟𑁆𑀠𑀦𑀁.

𑁬𑁧.

𑀆𑀭𑁄𑀧𑀺𑀬 𑀢𑀢𑁄𑀤𑁂𑀯𑀺𑀁,

𑀯𑀺𑀘𑀺𑀢𑁆𑀢𑀁 𑀮𑀓𑁆𑀔𑀺𑀓𑀁𑀭𑀣𑀁;

𑀧𑀤𑀓𑁆𑀔𑀺𑀡𑀁 𑀓𑀸𑀭𑀸𑀧𑁂𑀲𑀺,

𑀦𑀕𑀭𑀁 𑀲𑀩𑁆𑀩𑀮𑀗𑁆𑀓𑀢𑀁.

𑁬𑁨.

𑀯𑁂𑀲𑁆𑀲𑀸𑀦𑀁 ¶ 𑀯𑀻𑀣𑀺𑀬𑀸𑀫𑀚𑁆𑀛𑁂,

𑀞𑀸𑀦𑀸𑀞𑀸𑀦𑀁 𑀧𑀣𑀸𑀧𑀣𑀁;

𑀘𑀮𑀺𑀁𑀲𑀼 𑀓𑀫𑁆𑀫𑀚𑀸𑀯𑀸𑀢𑀸,

𑀘𑀭𑀦𑁆𑀢𑀺𑀬𑀸𑀯 𑀤𑁂𑀯𑀺𑀬𑀸.

𑁬𑁩.

𑀉𑀢𑁆𑀯𑀸𑀫𑀘𑁆𑀘𑀸𑀧𑀯𑀢𑁆𑀢𑀺𑀁𑀢𑀁,

𑀭𑀜𑁆𑀜𑁄𑀭𑁄𑀘𑀺𑀁𑀲𑀼𑀲𑀻𑀖𑀲𑁄;

𑀲𑀼𑀢𑀺𑀕𑁂𑀳𑀁𑀓𑀸𑀭𑀸𑀧𑁂𑀲𑀺,

𑀢𑀁𑀯𑀻𑀣𑀺𑀬𑀁𑀯𑀲𑀺𑀜𑁆𑀘𑀬𑁄.

𑁬𑁪.

𑀢𑀢𑁆𑀣𑀲𑀸𑀯𑀲𑀫𑀸𑀦𑀸𑀯,

𑀯𑀺𑀚𑀸𑀬𑀺𑀅𑀓𑀼𑀢𑁄𑀪𑀬𑀸;

𑀦𑀺𑀫𑁆𑀫𑀮𑀁𑀲𑀼𑀲𑀼𑀤𑁆𑀥𑀁𑀧𑀼𑀢𑁆𑀢𑀁,

𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑀲𑀦𑁆𑀦𑀺𑀪𑀁.

𑁬𑁫.

𑀅𑀓𑁆𑀔𑀻𑀦𑀺𑀉𑀫𑁆𑀫𑀺𑀮𑀺𑀢𑁆𑀯𑀸𑀦 ¶ ,

𑀦𑀺𑀓𑁆𑀔𑀦𑁆𑀢𑁄𑀫𑀸𑀢𑀼 𑀓𑀼𑀘𑁆𑀙𑀺𑀢𑁄;

𑀧𑀲𑀦𑁆𑀦𑀧𑁆𑀧𑀺𑀬𑀸𑀓𑀸𑀭𑁂𑀦,

𑀧𑀲𑁆𑀲𑀺𑀢𑁆𑀢𑀫𑀸𑀢𑀼𑀬𑀸𑀫𑀼𑀔𑀁.

𑁬𑁬.

𑀅𑀫𑁆𑀫 𑀤𑀸𑀦𑀁 𑀤𑀤𑀺𑀲𑁆𑀲𑀸𑀫𑀺,

𑀅𑀢𑁆𑀣𑀺𑀦𑀼 𑀓𑀺𑀜𑁆𑀘𑀺 𑀢𑁂𑀥𑀦𑀁;

𑀳𑀢𑁆𑀢𑀁𑀲𑁄 𑀧𑀲𑀸𑀭𑁂𑀢𑁆𑀯𑀸𑀦,

𑀇𑀢𑀺𑀩𑁆𑀭𑀯𑀺𑀢𑀳𑀺𑀁 𑀫𑀼𑀳𑀼𑀁.

𑁬𑁭.

𑀲𑀼𑀢𑁆𑀯𑀸𑀫𑁄𑀤𑀺𑀬 ¶ 𑀢𑀁𑀫𑀸𑀢𑀸,

𑀤𑁂𑀳𑀺𑀤𑀸𑀦𑀁 𑀬𑀣𑀺𑀘𑁆𑀙𑀺𑀢𑀁;

𑀢𑀸𑀢𑀸𑀢𑀺 𑀢𑀲𑁆𑀲𑀧𑀸𑀤𑀸𑀲𑀺,

𑀲𑀳𑀲𑁆𑀲𑀢𑁆𑀣𑀯𑀺𑀓𑀁𑀢𑀳𑀺𑀁.

𑁬𑁮.

𑀫𑀳𑁄𑀲𑀥 𑀯𑁂𑀲𑁆𑀲𑀦𑁆𑀢𑀭-

𑀫𑀳𑀸𑀲𑀺𑀤𑁆𑀥𑀢𑁆𑀣 𑀚𑀸𑀢𑀺𑀲𑀼;

𑀓𑀣𑁂𑀲𑀺 𑀫𑀸𑀢𑀭𑀸𑀩𑁄𑀥𑀺-

𑀲𑀲𑀢𑁆𑀢𑁄 𑀚𑀸𑀢𑀓𑁆𑀔𑀡𑁂𑀢𑀺𑀲𑀼.

𑁬𑁯.

𑀅𑀘𑁆𑀙𑁂𑀭 𑀫𑀩𑁆𑀪𑀼𑀢𑀁𑀤𑀺𑀲𑁆𑀯𑀸,

𑀚𑀦𑀸𑀫𑁄𑀤𑀺𑀁 𑀲𑀼𑀢𑀸𑀯𑀤𑁂;

𑀅𑀧𑁆𑀨𑁄𑀝𑁂𑀦𑁆𑀢𑁄 𑀳𑀲𑀦𑁆𑀢𑀸𑀘,

𑀚𑀬𑀦𑀸𑀤𑀁 𑀧𑀦𑀸𑀤𑀬𑀼𑀁.

𑁭𑁦.

𑀯𑁂𑀲𑁆𑀲𑀦𑁆𑀢𑀭𑁄𑀢𑀺 ¶ 𑀳𑁆𑀯𑀸𑀬𑀺𑀁𑀲𑀼,

𑀦𑀸𑀫𑀕𑁆𑀕𑀳𑀡 𑀫𑀗𑁆𑀕𑀮𑀁;

𑀲𑀗𑁆𑀔𑀢𑀸 𑀩𑁆𑀭𑀸𑀳𑁆𑀫𑀡𑀸𑀢𑀲𑁆𑀲,

𑀚𑀸𑀢𑀢𑁆𑀢𑀸 𑀯𑁂𑀲𑁆𑀲𑀯𑀻𑀣𑀺𑀬𑀁.

𑁭𑁧.

𑀯𑀺𑀚𑀸𑀢 𑀤𑀺𑀯𑀲𑁂𑀢𑀲𑁆𑀲,

𑀏𑀓𑀸𑀆𑀓𑀸𑀲𑀘𑀸𑀭𑀺𑀦𑀻;

𑀳𑀢𑁆𑀣𑀺𑀦𑀻𑀳𑀺 𑀲𑀩𑁆𑀩𑀲𑁂𑀢𑀁,

𑀏𑀓𑀁 𑀓𑀼𑀜𑁆𑀚𑀭𑀧𑁄𑀲𑀓𑀁.

𑁭𑁨.

𑀩𑁄𑀥𑀺𑀲𑀢𑁆𑀢𑀸 𑀦𑀼𑀪𑀸𑀯𑁂𑀦,

𑀆𑀦𑁂𑀢𑁆𑀯𑀸 𑀫𑀗𑁆𑀕𑀮𑀲𑀫𑁆𑀫𑀢𑀁;

𑀣𑀧𑁂𑀢𑁆𑀯𑀸𑀦 𑀧𑀓𑁆𑀓𑀸𑀫𑀺,

𑀳𑀢𑁆𑀣𑀺𑀲𑀸𑀮𑀸𑀬 𑀲𑀸𑀥𑀼𑀓𑀁.

𑁭𑁩.

𑀉𑀧𑁆𑀧𑀦𑁆𑀦𑀢𑁆𑀢𑀸𑀫𑀳𑀸𑀲𑀢𑁆𑀢𑀁 ¶ ,

𑀢𑀲𑁆𑀲𑀓𑀢𑁆𑀯𑀸𑀦𑀧𑀘𑁆𑀘𑀬𑀁;

𑀅𑀓𑀁𑀲𑀼𑀦𑀸𑀕𑀭𑀸𑀦𑀸𑀫𑀁,

𑀲𑀫𑀕𑁆𑀕𑀸𑀧𑀘𑁆𑀘𑀬𑁄𑀇𑀢𑀺.

𑁭𑁪.

𑀢𑀤𑁆𑀤𑀺𑀦𑁂𑀯𑀯𑀺𑀚𑀸𑀬𑀺𑀁𑀲𑀼,

𑀅𑀫𑀘𑁆𑀘𑀸𑀦𑀁𑀓𑀼𑀫𑀸𑀭𑀓𑀸;

𑀕𑁂𑀳𑁂𑀲𑀼𑀲𑀞𑀺𑀲𑀳𑀲𑁆𑀲𑀸,

𑀫𑀳𑀸𑀲𑀢𑁆𑀢𑀲𑀚𑀸𑀢𑀓𑀸.

𑁭𑁫.

𑀅𑀢𑀺𑀤𑀻𑀖𑀸𑀤𑀬𑁄𑀤𑁄𑀲𑁂 ¶ ,

𑀯𑀺𑀯𑀚𑁆𑀚𑁂𑀢𑁆𑀯𑀸𑀦𑀲𑀺𑀜𑁆𑀘𑀬𑁄;

𑀓𑀼𑀫𑀸𑀭𑀁𑀘𑀢𑀼𑀲𑁆𑀲𑀞𑀺𑀓𑀸,

𑀉𑀧𑀝𑁆𑀞𑀸𑀧𑁂𑀲𑀺𑀥𑀸𑀢𑀺𑀬𑁄.

𑁭𑁬.

𑀅𑀮𑀫𑁆𑀩𑀢𑁆𑀣𑀦𑀺𑀬𑁄𑀘𑁂𑀢𑀸,

𑀪𑀺𑀭𑀽𑀧𑀸𑀬𑁄𑀩𑁆𑀩𑀦𑁂𑀞𑀺𑀢𑀸;

𑀆𑀲𑀼𑀁𑀫𑀥𑀼𑀭𑀣𑀜𑁆𑀜𑀸𑀬𑁄,

𑀲𑀁𑀲𑀼𑀤𑁆𑀥𑀸𑀲𑁂𑀝𑁆𑀞𑀓𑁄𑀮𑀺𑀬𑁄.

𑁭𑁭.

𑀲𑀼𑀲𑀼𑀲𑀝𑁆𑀞𑀺𑀲𑀳𑀲𑁆𑀲𑀸𑀦𑀁 ¶ ,

𑀏𑀓𑁂𑀓𑀸𑀥𑀸𑀢𑀺𑀬𑁄𑀢𑀣𑀸;

𑀩𑀼𑀤𑁆𑀥𑀗𑁆𑀓𑀼𑀭𑀲𑀚𑀸𑀢𑀸𑀦𑀁,

𑀉𑀧𑀝𑁆𑀞𑀸𑀧𑁂𑀲𑀺𑀲𑀼𑀁𑀦𑁆𑀤𑀭𑀸.

𑁭𑁮.

𑀲𑀤𑁆𑀥𑀺𑀁 𑀲𑀝𑁆𑀞𑀺𑀲𑀳𑀲𑁆𑀲𑁂𑀳𑀺,

𑀓𑀼𑀫𑀸𑀭𑁂𑀳𑀺𑀫𑀳𑀸𑀬𑀲𑁄;

𑀫𑀳𑀢𑀸𑀧𑀭𑀺𑀯𑀸𑀭𑁂𑀦,

𑀲𑀁𑀯𑀟𑁆𑀠𑀺𑀩𑁄𑀥𑀺𑀲𑀢𑁆𑀢𑀯𑁄.

𑁭𑁬.

𑀭𑀸𑀚𑀸𑀲𑀢𑀲𑀳𑀲𑁆𑀲𑀕𑁆𑀖-

𑀦𑀺𑀓𑀁 𑀲𑀼𑀲𑀼𑀧𑀺𑀴𑀦𑁆𑀥𑀦𑀁;

𑀓𑀸𑀭𑀸𑀧𑁂𑀢𑁆𑀯𑀸𑀯𑀺𑀪𑀽𑀲𑁂𑀲𑀺,

𑀅𑀢𑁆𑀢𑀚𑀁𑀤𑀸𑀦𑀦𑀦𑁆𑀤𑀦𑀁.

𑁮𑁦.

𑀑𑀫𑀼𑀜𑁆𑀘𑀺𑀢𑁆𑀯𑀸𑀦𑀥𑀸𑀢𑀻𑀦𑀁 ¶ ,

𑀢𑀁𑀘𑀢𑀼𑀧𑁆𑀧𑀜𑁆𑀘𑀯𑀲𑁆𑀲𑀺𑀓𑁄;

𑀅𑀤𑀸𑀲𑀺𑀲𑁄𑀫𑀳𑀸𑀲𑀢𑁆𑀢𑁄,

𑀩𑁄𑀥𑀺𑀁 𑀅𑀧𑁂𑀓𑁆𑀔𑀫𑀸𑀦𑀲𑁄.

𑁮𑁧.

𑀧𑀼𑀦𑀢𑀁𑀢𑀸𑀳𑀺𑀥𑀸𑀢𑀻𑀳𑀺,

𑀤𑀺𑀬𑁆𑀬𑀫𑀸𑀦𑀁𑀧𑀺𑀲𑀸𑀤𑀭𑀁;

𑀦𑀲𑁄𑀕𑀡𑁆𑀳𑀺𑀢𑁆𑀣𑀓𑀼𑀫𑀸𑀭𑁄,

𑀤𑀺𑀦𑁆𑀦𑁂𑀲𑀼𑀅𑀦𑀧𑁂𑀔𑀯𑀸.

𑁮𑁨.

𑀆𑀭𑁄𑀘𑀺𑀁𑀲𑀼𑀧𑀯𑀢𑁆𑀢𑀺𑀁𑀢𑀁 ¶ ,

𑀭𑀜𑁆𑀜𑁄𑀢𑀸𑀥𑀸𑀢𑀺𑀬𑁄𑀢𑀤𑀸;

𑀲𑀼𑀢𑁆𑀯𑀸𑀫𑀼𑀤𑀺𑀢𑀘𑀺𑀢𑁆𑀢𑁂𑀦,

𑀢𑀁𑀲𑁄𑀣𑁄𑀫𑀺𑀢𑁆𑀣𑀅𑀢𑁆𑀢𑀚𑀁.

𑁮𑁩.

𑀧𑀼𑀢𑁆𑀢𑁂𑀦𑀫𑀫𑀤𑀺𑀦𑁆𑀦𑀁𑀢𑀁,

𑀩𑁆𑀭𑀳𑁆𑀫𑀤𑁂𑀬𑁆𑀬𑀁𑀧𑀺𑀴𑀦𑁆𑀥𑀦𑀁;

𑀢𑀼𑀫𑁆𑀳𑀸𑀓𑀁𑀲𑀦𑁆𑀢𑀓𑀁𑀳𑁄𑀢𑀼,

𑀇𑀘𑁆𑀘𑀸𑀧𑀺𑀩𑁆𑀭𑀯𑀺𑀲𑀺𑀜𑁆𑀘𑀬𑁄.

𑁮𑁪.

𑀧𑀼𑀦𑀸𑀧𑀭𑀁𑀧𑀺𑀓𑀸𑀭𑁂𑀢𑁆𑀯𑀸,

𑀧𑀸𑀤𑀸𑀲𑀺𑀧𑀼𑀢𑁆𑀢𑀦𑀦𑁆𑀤𑀦𑁄;

𑀧𑀼𑀢𑁆𑀢𑀲𑁆𑀲𑀤𑀸𑀢𑀼𑀓𑀸𑀫𑀲𑁆𑀲,

𑀲𑀼𑀯𑀺𑀘𑀺𑀢𑁆𑀢𑀧𑀺𑀴𑀦𑁆𑀥𑀦𑀁.

𑁮𑁫.

𑀑𑀫𑀼𑀜𑁆𑀘𑀺𑀢𑁆𑀯𑀸𑀦𑀏𑀢𑀁𑀧𑀺 ¶ ,

𑀥𑀸𑀢𑀻𑀦𑀁𑀤𑀸𑀲𑀺𑀤𑀸𑀬𑀓𑁄;

𑀤𑀸𑀭𑀓𑁄𑀢𑀼𑀝𑁆𑀞𑀘𑀺𑀢𑁆𑀢𑁂𑀦,

𑀲𑀩𑁆𑀩𑀜𑁆𑀜𑀼𑀢𑀧𑁆𑀧𑀺𑀬𑀸𑀬𑀦𑁄.

𑁮𑁬.

𑀏𑀯𑀁𑀯𑀼𑀢𑁆𑀢 𑀦𑀬𑁂𑀦𑁂𑀯,

𑀦𑀯 𑀯𑀸𑀭𑁂 𑀧𑀺𑀴𑀦𑁆𑀥𑀦𑀁;

𑀤𑀳𑀭𑁄𑀤𑀸𑀲𑀺 𑀥𑀸𑀢𑀻𑀦𑀁,

𑀦𑀸𑀣𑀸𑀦𑀸𑀣 𑀧𑀭𑀸𑀬𑀦𑁄.

𑁮𑁭.

𑀅𑀝𑁆𑀞𑀯𑀲𑁆𑀲𑀺 ¶ 𑀓𑀓𑀸𑀮𑁂𑀢𑀼,

𑀏𑀯𑀁𑀘𑀺𑀦𑁆𑀢𑁂𑀲𑀺 𑀩𑀼𑀤𑁆𑀥𑀺𑀫𑀸;

𑀦𑀺𑀲𑀺𑀦𑁆𑀦𑁄 𑀲𑀺𑀭𑀺𑀲𑀬𑀦𑁄,

𑀧𑀸𑀲𑀸𑀤𑁄 𑀧𑀭𑀺𑀫𑀡𑁆𑀟𑀮𑁂.

𑁮𑁮.

𑀤𑁂𑀫𑀺𑀩𑀸𑀳𑀺𑀭 𑀤𑀸𑀦𑀁𑀯,

𑀦𑀢𑀸𑀯 𑀫𑀫 𑀫𑀸𑀦𑀲𑀁;

𑀧𑀭𑀺𑀢𑁄 𑀲𑁂𑀢𑀺𑀏𑀯𑀜𑁆𑀳𑀺,

𑀅𑀚𑁆𑀛𑀢𑁆𑀢𑀺𑀓𑀁𑀤𑀤𑀸𑀫𑀳𑀁.

𑁮𑁯.

𑀲𑀘𑁂𑀫𑀁 𑀓𑁄𑀘𑀺𑀬𑀸𑀘𑁂𑀬𑁆𑀬,

𑀲𑀻𑀲𑀁𑀲 𑀫𑁄𑀴𑀺𑀫𑀼𑀢𑁆𑀢𑀥𑀁;

𑀙𑀺𑀚𑁆𑀚 𑀢𑀁 𑀢𑀲𑁆𑀲𑀤𑀚𑁆𑀚𑁂𑀬𑁆𑀬𑀁,

𑀦𑀳𑁂𑀬𑁆𑀬𑀁 𑀮𑀻𑀦𑀘𑁂𑀢𑀲𑁄.

𑁯𑁦.

𑀳𑀤𑀬𑀁𑀫𑀫 ¶ 𑀬𑀸𑀘𑁂𑀬𑁆𑀬,

𑀪𑀺𑀦𑁆𑀤𑀺𑀢𑁆𑀯𑀸 𑀅𑀲𑀺𑀦𑀸𑀉𑀭𑀁;

𑀦𑀻𑀳𑀭𑀺𑀢𑁆𑀯𑀸𑀦𑀢𑀁𑀢𑀲𑁆𑀲,

𑀤𑀚𑁆𑀚𑁂𑀬𑁆𑀬𑀁 𑀢𑀼𑀝𑁆𑀞𑀫𑀸𑀦𑀲𑀸.

𑁯𑁧.

𑀅𑀓𑁆𑀔𑀻𑀦𑀺 𑀫𑀫𑀬𑀸𑀘𑁂𑀬𑁆𑀬,

𑀉𑀧𑁆𑀧𑀸𑀝𑁂𑀢𑁆𑀯𑀸𑀦 𑀢𑀸𑀯𑀤𑁂;

𑀲𑀢𑁆𑀣𑁂𑀦 𑀢𑀲𑁆𑀲𑀤𑀚𑁆𑀚𑁂𑀬𑁆𑀬𑀁,

𑀲𑀮𑁄𑀳𑀺𑀢𑀸𑀦𑀺 𑀢𑀸𑀦𑀺𑀫𑁂.

𑁯𑁨.

𑀳𑀢𑁆𑀣𑁂𑀧𑀸𑀤𑁂𑀘𑀓𑀡𑁆𑀡𑁂𑀘 ¶ ,

𑀬𑀸𑀘𑁂𑀬𑁆𑀬𑀫𑀫𑀲𑀸𑀥𑀼𑀓𑀁;

𑀙𑀺𑀦𑁆𑀤𑀺𑀢𑁆𑀯𑀸 𑀢𑀸𑀦𑀺𑀤𑀚𑁆𑀚𑁂𑀬𑁆𑀬𑀁,

𑀢𑀲𑁆𑀲𑀧𑀽𑀭𑁂 𑀫𑀦𑁄𑀭𑀣𑀁.

𑁯𑁩.

𑀫𑀁𑀲𑀁𑀫𑁂𑀓𑁄𑀘𑀺𑀬𑀸𑀘𑁂𑀬𑁆𑀬,

𑀲𑀻𑀖𑀁𑀲𑀩𑁆𑀩𑀲𑀭𑀻𑀭𑀢𑁄;

𑀔𑀡𑁆𑀟𑀸𑀔𑀡𑁆𑀟𑀁 𑀙𑀺𑀦𑁆𑀤𑀺𑀢𑁆𑀯𑀸𑀦,

𑀤𑀚𑁆𑀚𑁂 𑀫𑀁𑀲𑀁 𑀲𑀮𑁄𑀳𑀺𑀢𑀁.

𑁯𑁪.

𑀳𑁄𑀳𑀺𑀢𑁆𑀯𑀁𑀫𑀫𑀤𑀸𑀲𑁄𑀢𑀺,

𑀯𑀤𑁂𑀬𑁆𑀬𑀓𑁄𑀘𑀺𑀘𑁂𑀢𑀳𑀺𑀁;

𑀲𑀬𑀁𑀆𑀫𑀸𑀢𑀺𑀲𑀸𑀯𑁂𑀢𑁆𑀯𑀸,

𑀅𑀢𑁆𑀢𑀸𑀦𑀁𑀧𑀺 𑀤𑀤𑀸𑀫𑀳𑀁.

𑁯𑁫.

𑀢𑀲𑁆𑀲𑁂𑀯𑀁 ¶ 𑀘𑀺𑀦𑁆𑀢𑀬𑀦𑁆𑀢𑀲𑁆𑀲,

𑀓𑀫𑁆𑀧𑀺𑀢𑁆𑀣 𑀧𑀣𑀯𑀻𑀫𑀳𑀸;

𑀲𑀫𑀦𑁆𑀢𑀸𑀕𑀚𑁆𑀚𑀫𑀸𑀦𑀸𑀬𑀁,

𑀫𑀢𑁆𑀢𑁄𑀯 𑀓𑀼𑀜𑁆𑀚𑀭𑁄𑀯𑀦𑁂.

𑁯𑁬.

𑀫𑁂𑀭𑀼𑀭𑀸𑀚𑁄 𑀦𑀫𑀺𑀢𑁆𑀯𑀸𑀦-

𑀪𑀺𑀫𑀼𑀔𑁄𑀯 𑀚𑁂𑀢𑀼𑀢𑁆𑀢𑀭𑀁;

𑀦𑀕𑀭𑀁 𑀞𑀸𑀲𑀺 𑀲𑁂𑀭𑀺𑀢-

𑀯𑁂𑀢𑁆𑀢𑀗𑁆𑀓𑀼𑀭𑁄𑀯 𑀢𑀸𑀯𑀤𑁂.

𑁯𑁭.

𑀫𑀳𑀻𑀲𑀤𑁆𑀤𑀲𑀦𑁆𑀢𑀸𑀲𑁂𑀦 ¶ ,

𑀫𑁂𑀖𑁄𑀧𑀸𑀯𑀲𑁆𑀲𑀺 𑀢𑀸𑀯𑀤𑁂;

𑀖𑀦𑀯𑀲𑁆𑀲𑀁𑀫𑀳𑀸𑀥𑀸𑀭𑀁,

𑀕𑀚𑁆𑀚𑀫𑀸𑀦𑁄 𑀤𑀺𑀲𑁄𑀤𑀺𑀲𑀁.

𑁯𑁮.

𑀦𑀺𑀘𑁆𑀙𑀭𑀺𑀁𑀲𑀼 𑀩𑀳𑀽𑀯𑀺𑀚𑁆𑀚𑀼-

𑀮𑀢𑀸𑀬𑁄𑀘 𑀲𑀫𑀦𑁆𑀢𑀢𑁄;

𑀇𑀦𑁆𑀤𑀘𑀸𑀧𑀸 𑀉𑀝𑁆𑀞𑀳𑀺𑀁𑀲𑀼,

𑀉𑀓𑁆𑀓𑀸𑀧𑀸𑀢𑁄 𑀢𑀤𑀸 𑀅𑀳𑀼.

𑁯𑁯.

𑀅𑀧𑁆𑀨𑁄𑀝𑁂𑀲𑀺 𑀢𑀳𑀺𑀁𑀤𑁂𑀯-

𑀭𑀸𑀚𑀸𑀢𑀼𑀝𑁆𑀞𑁄 𑀲𑀼𑀚𑀫𑁆𑀧𑀢𑀺;

𑀲𑀸𑀥𑀼𑀲𑀸𑀥𑀽𑀢𑀺 𑀲𑀸𑀯𑁂𑀲𑀺,

𑀫𑀳𑀸𑀩𑁆𑀭𑀳𑁆𑀫𑀸 𑀓𑀢𑀜𑁆𑀘𑀮𑀻.

𑁧𑁦𑁦.

𑀩𑁆𑀭𑀳𑁆𑀫𑀮𑁄𑀓𑀸 ¶ 𑀢𑀤𑀸𑀬𑀸𑀯,

𑀇𑀢𑁄𑀧𑀣𑀯𑀺 𑀫𑀡𑁆𑀟𑀮𑀸;

𑀅𑀘𑁆𑀙𑁂𑀭𑀁 𑀅𑀩𑁆𑀪𑀼𑀢𑀁 𑀆𑀲𑀺,

𑀏𑀓𑀓𑁄𑀮𑀸𑀳𑀮𑀁 𑀫𑀳𑀸.

𑁧𑁦𑁧.

𑀏𑀯𑀁𑀜𑁆𑀳𑀺 𑀦𑁂𑀓𑀩𑁆𑀪𑀽𑀢𑀸𑀦𑀺,

𑀚𑀦𑁂𑀢𑁆𑀯𑀸𑀦 𑀫𑀳𑀸𑀚𑀦𑀁;

𑀳𑀸𑀲𑀬𑀁 𑀲𑀼𑀲𑀼𑀔𑀁𑀯𑀟𑁆𑀠-

𑀫𑀸𑀦𑁄𑀲𑁄𑀴𑀲 𑀯𑀲𑁆𑀲𑀺𑀓𑁄.

𑁧𑁦𑁨.

𑀓𑀼𑀫𑀸𑀭𑁄 ¶ 𑀲𑀩𑁆𑀩𑀲𑀺𑀩𑁆𑀩𑁂𑀲𑀼,

𑀓𑁄𑀯𑀺𑀤𑁄𑀘 𑀧𑀸𑀭𑀗𑁆𑀕𑀢𑁄;

𑀨𑀼𑀮𑁆𑀮𑀲𑀸𑀮𑁄𑀯 𑀲𑁄𑀪𑀦𑁆𑀢𑁄,

𑀯𑀡𑁆𑀡𑁂𑀦 𑀯𑀬𑀲𑀸 𑀢𑀤𑀸.

𑁧𑁦𑁩.

𑀅𑀣𑀲𑁆𑀲 𑀤𑀸𑀢𑀼𑀓𑀸𑀫𑁄𑀯,

𑀭𑀚𑁆𑀚𑀁𑀫𑀦𑁆𑀢𑀺𑀬 𑀤𑁂𑀯𑀺𑀬𑀸;

𑀧𑀺𑀢𑀸𑀲𑀺 𑀲𑀺𑀜𑁆𑀘𑀺𑀭𑀸𑀚𑀢𑁆𑀢𑁂,

𑀧𑀼𑀢𑁆𑀢𑀁𑀲𑁄𑀴𑀲 𑀯𑀲𑁆𑀲𑀺𑀓𑀁.

𑁧𑁦𑁪.

𑀫𑀤𑁆𑀤𑀭𑀝𑁆𑀞𑁂 𑀢𑀤𑀸𑀫𑀤𑁆𑀤-

𑀭𑀸𑀚𑀓𑀼𑀮𑀸 𑀪𑀺𑀯𑀡𑁆𑀡𑀺𑀦𑀺𑀁;

𑀦𑁂𑀢𑁆𑀯𑀸𑀫𑀳𑁂 𑀲𑀺𑀢𑁆𑀢𑁂𑀫𑀤𑁆𑀤𑀺𑀁-

𑀪𑀺𑀲𑀺𑀜𑁆𑀘𑀺 𑀥𑀫𑁆𑀫𑀘𑀸𑀭𑀺𑀦𑀺𑀁.

𑁧𑁦𑁫.

𑀫𑀤𑁆𑀤𑀻𑀫𑀸𑀢𑀼𑀮𑀥𑀻𑀢𑀸𑀲𑀸 ¶ ,

𑀪𑀕𑀺𑀦𑀻 𑀫𑀦𑁆𑀤𑀳𑀸𑀲𑀺𑀦𑀻;

𑀯𑁂𑀲𑁆𑀲𑀦𑁆𑀢𑀭𑀓𑀼𑀫𑀸𑀭𑀲𑁆𑀲,

𑀲𑁂𑀝𑁆𑀞𑀮𑀓𑁆𑀔𑀡𑀥𑀸𑀭𑀺𑀦𑀻.

𑁧𑁦𑁬.

𑀧𑀼𑀩𑁆𑀩𑀉𑀝𑁆𑀞𑀸𑀬𑀺𑀦𑀻 𑀫𑀤𑁆𑀤𑀻,

𑀦𑀺𑀘𑁆𑀘𑀁 𑀧𑀘𑁆𑀙𑀸𑀦𑀺𑀧𑀸𑀢𑀺𑀦𑀻;

𑀫𑀦𑀸𑀧𑀘𑀸𑀭𑀺𑀦𑀻 𑀤𑁂𑀯𑀻,

𑀓𑀺𑀁𑀓𑀸𑀭 𑀧𑀝𑀺𑀲𑀸𑀯𑀺𑀦𑀻.

𑁧𑁦𑁭.

𑀲𑁄𑀴𑀲𑀺𑀢𑁆𑀣𑀺 ¶ 𑀲𑀳𑀲𑁆𑀲𑀸𑀢𑀁,

𑀫𑀤𑁆𑀤𑀺𑀁𑀲𑀩𑁆𑀩𑀗𑁆𑀕 𑀲𑁄𑀪𑀡𑀁;

𑀦𑀘𑁆𑀘𑀯𑀸𑀤𑀺𑀢 𑀕𑀻𑀢𑁂𑀳𑀺,

𑀧𑀭𑀺𑀘𑀸𑀭𑀺𑀁𑀲𑀼 𑀲𑀩𑁆𑀩𑀤𑀸.

𑁧𑁦𑁮.

𑀯𑁂𑀲𑁆𑀲𑀦𑁆𑀢𑀭𑁄 𑀫𑀳𑀸𑀭𑀸𑀚𑀸,

𑀭𑀚𑁆𑀚𑁂𑀪𑀺 𑀲𑀺𑀢𑁆𑀢𑀓𑀸𑀮𑀢𑁄;

𑀧𑀞𑀸𑀬 𑀤𑀸𑀦𑀲𑀸𑀮𑀸𑀬𑁄,

𑀙𑀤𑁆𑀤𑀸𑀦𑀁 𑀤𑀸𑀲𑀺𑀓𑀸𑀭𑀺𑀬.

𑁧𑁦𑁯.

𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺,

𑀯𑀺𑀲𑁆𑀲𑀚𑁆𑀚𑀦𑁆𑀢𑁄 𑀤𑀺𑀦𑁂𑀤𑀺𑀦𑁂;

𑀲𑀫𑁆𑀫𑁄𑀤𑀫𑀸𑀦𑁄 𑀙𑀲𑁆𑀲𑀢-

𑀲𑀳𑀲𑁆𑀲𑀸𑀦𑀺 𑀥𑀦𑀸𑀦𑀺𑀲𑁄.

𑁧𑁧𑁦.

𑀏𑀯𑀁𑀤𑀸𑀦𑁂 ¶ 𑀭𑀫𑀦𑁆𑀢𑀲𑁆𑀲,

𑀫𑀳𑁂𑀲𑀻𑀢𑀲𑁆𑀲𑀭𑀸𑀚𑀺𑀦𑁄;

𑀧𑀼𑀢𑁆𑀢𑀁𑀯𑀺𑀚𑀸𑀬𑀺𑀅𑀧𑀭-

𑀪𑀸𑀕𑁂𑀫𑀤𑁆𑀤𑀻 𑀲𑀼𑀤𑀲𑁆𑀲𑀦𑀁.

𑁧𑁧𑁧.

𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼 𑀯𑀺𑀚𑀸𑀢-

𑀓𑀸𑀮𑁂𑀢𑀁 𑀲𑁄𑀡𑁆𑀡𑀲𑀦𑁆𑀦𑀺𑀢𑀁;

𑀲𑁄𑀡𑁆𑀡 𑀚𑀸𑀮𑁂𑀦𑀢𑁂𑀦𑀲𑁆𑀲,

𑀦𑀸𑀫𑀁𑀚𑀸𑀮𑀻𑀢𑀺 𑀯𑁄𑀳𑀭𑀼𑀁.

𑁧𑁧𑁨.

𑀧𑀤𑀲𑀸 ¶ 𑀕𑀫𑀦𑁂 𑀓𑀸𑀮𑁂,

𑀧𑀼𑀢𑁆𑀢𑀲𑁆𑀲 𑀢𑀲𑁆𑀲𑀚𑀸𑀮𑀺𑀦𑁄;

𑀯𑀺𑀚𑀸𑀬𑀺 𑀥𑀻𑀢𑀭𑀁𑀏𑀓𑀁,

𑀦𑀸𑀭𑀻𑀦𑀁 𑀲𑁂𑀝𑁆𑀞𑀁𑀲𑀫𑁆𑀫𑀢𑀁.

𑁧𑁧𑁩.

𑀓𑀡𑁆𑀳𑀸𑀚𑀺𑀦𑁂𑀦 𑀥𑀻𑀢𑀁𑀢𑀁,

𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼 𑀲𑀸𑀤𑀭𑀁;

𑀢𑁂𑀦𑀲𑁆𑀲𑀸 𑀥𑀺𑀢𑀼𑀬𑀸𑀦𑀸𑀫𑀁,

𑀓𑀡𑁆𑀳𑀸𑀚𑀺𑀦𑀸𑀢𑀺 𑀯𑁄𑀳𑀭𑀼𑀁.

𑁧𑁧𑁪.

𑀫𑀳𑀢𑀸 𑀧𑀭𑀺𑀯𑀸𑀭𑁂𑀦,

𑀯𑀼𑀤𑁆𑀥𑀺𑀁𑀦𑁆𑀯𑀸𑀬𑀺𑀁𑀲𑀼 𑀢𑁂𑀤𑀼𑀯𑁂;

𑀲𑀬𑀦𑁆𑀢𑀸 𑀦𑀘𑁆𑀘𑀕𑀻𑀢𑁂𑀦,

𑀦𑀘𑁆𑀘𑀕𑀻𑀢 𑀧𑀩𑁄𑀥𑀦𑀸.

𑁧𑁧𑁫.

𑀫𑀳𑀸𑀲𑀢𑁆𑀢𑁄𑀳𑀺 ¶ 𑀫𑀸𑀲𑀲𑁆𑀲,

𑀙𑀓𑁆𑀔𑀢𑁆𑀢𑀼𑀁 𑀤𑀸𑀦𑀫𑀡𑁆𑀟𑀧𑁂;

𑀑𑀮𑁄𑀓𑁂𑀲𑀺 𑀅𑀮𑀗𑁆𑀓𑀢-

𑀳𑀢𑁆𑀣𑀺𑀓𑁆𑀔𑀦𑁆𑀥 𑀯𑀭𑁂𑀞𑀺𑀢𑁄.

𑁧𑁧𑁬.

𑀢𑀳𑀺𑀁 𑀓𑀮𑀺𑀗𑁆𑀓𑀭𑀝𑁆𑀞𑀫𑁆𑀳𑀺,

𑀤𑀼𑀩𑁆𑀩𑀼𑀝𑁆𑀞𑀺𑀓𑀸 𑀪𑀬𑀸𑀦𑀓𑀸;

𑀲𑀲𑁆𑀲𑀸𑀦𑀺 𑀦𑀲𑀫𑁆𑀧𑀚𑁆𑀚𑀺𑀁𑀲𑀼,

𑀤𑀼𑀩𑁆𑀪𑀺𑀓𑁆𑀔𑁄 𑀲𑀫𑀬𑁄𑀅𑀳𑀼.

𑁧𑁧𑁭.

𑀘𑁄𑀭𑀓𑀫𑁆𑀫𑀁 ¶ 𑀅𑀓𑀭𑀺𑀁𑀲𑀼,

𑀅𑀲𑀓𑁆𑀓𑁄𑀦𑁆𑀢𑀸𑀯 𑀚𑀻𑀯𑀺𑀢𑀼𑀁;

𑀚𑀦𑀸 𑀦𑀺𑀕𑀫𑀕𑀸𑀫𑁂𑀲𑀼,

𑀯𑀺𑀮𑀼𑀫𑁆𑀧𑀦𑁆𑀢𑀺 𑀤𑀸𑀫𑀭𑀺𑀓𑀸.

𑁧𑁧𑁮.

𑀓𑀮𑀺𑀗𑁆𑀓𑀭𑀝𑁆𑀞𑀁 𑀲𑀓𑀮𑀁,

𑀤𑀼𑀩𑁆𑀪𑀺𑀓𑁆𑀔𑀪𑀬𑀧𑀻𑀴𑀺𑀢𑀁;

𑀖𑀝𑁂 𑀯𑀺𑀮𑁄𑀮𑀧𑀸𑀭𑀻𑀯,

𑀲𑀗𑁆𑀔𑀼𑀫𑁆𑀪𑀺𑀢𑁆𑀣 𑀅𑀦𑀸𑀣𑀓𑀁.

𑁧𑁧𑁯.

𑀦𑁂𑀕𑀫𑀸 𑀚𑀸𑀦𑀧𑀤𑀸𑀲𑀩𑁆𑀩𑁂,

𑀦𑀸𑀕𑀭𑀸𑀘 𑀲𑀫𑀕𑁆𑀕𑀢𑀸;

𑀭𑀸𑀚𑀗𑁆𑀕𑀡𑁂 𑀉𑀓𑁆𑀓𑁄𑀲𑀺𑀁𑀲𑀼,

𑀤𑀼𑀩𑁆𑀪𑀺𑀓𑁆𑀔𑀪𑀬 𑀘𑁄𑀤𑀺𑀢𑀸.

𑁧𑁨𑁦.

𑀢𑀤𑀸𑀲𑀼𑀢𑁆𑀯𑀸𑀦 ¶ 𑀢𑀁𑀭𑀸𑀚𑀸,

𑀲𑀻𑀖𑀁𑀉𑀩𑁆𑀩𑀺𑀕𑁆𑀕 𑀫𑀸𑀦𑀲𑀸;

𑀓𑁄𑀬𑀁𑀲𑀤𑁆𑀤𑁄𑀢𑀺 𑀧𑀼𑀘𑁆𑀙𑀺𑀢𑁆𑀣,

𑀫𑀳𑀸𑀫𑀘𑁆𑀘𑁂 𑀲𑀓𑀦𑁆𑀢𑀺𑀓𑁂.

𑁧𑁨𑁧.

𑀆𑀭𑁄𑀘𑀬𑀺𑀁𑀲𑀼 𑀭𑀸𑀚𑀸𑀦𑀁,

𑀧𑀯𑀢𑁆𑀢𑀺𑀁 𑀢𑀁𑀅𑀲𑁂𑀲𑀢𑁄;

𑀭𑀸𑀚𑀸𑀧𑀺 𑀧𑀝𑀺𑀚𑀸𑀦𑀸𑀲𑀺,

𑀫𑁂𑀖𑀁 𑀯𑀲𑁆𑀲𑀸𑀧𑀬𑁂-𑀇𑀢𑀺.

𑁧𑁨𑁨.

𑀢𑀢𑁄𑀲𑁄 𑀧𑀢𑁆𑀣𑀦𑀁𑀓𑀸𑀲𑀺,

𑀲𑀫𑀸𑀤𑀺𑀬 𑀉𑀧𑁄𑀲𑀣𑀁;

𑀤𑁂𑀯𑀁 𑀯𑀲𑁆𑀲𑀸𑀧𑀦𑀢𑁆𑀣𑀸𑀬,

𑀲𑀢𑁆𑀢𑀸𑀳𑀁𑀲𑀢𑁆𑀢𑀓𑀸𑀭𑀼𑀡𑁄.

𑁧𑁨𑁩.

𑀦𑀳𑀺𑀏𑀯𑀁𑀧𑀺𑀲𑁄𑀲𑀓𑁆𑀔𑀺 ¶ ,

𑀯𑀲𑁆𑀲𑀸𑀧𑁂𑀢𑀼𑀁 𑀦𑀭𑀺𑀲𑁆𑀲𑀭𑁄;

𑀫𑁂𑀖𑀁𑀓𑀮𑀺𑀗𑁆𑀓 𑀭𑀝𑁆𑀞𑀫𑁆𑀳𑀺,

𑀤𑀼𑀩𑁆𑀩𑀼𑀝𑁆𑀞𑀺𑀓𑀸𑀯 𑀚𑀸𑀬𑀳𑀺.

𑁧𑁨𑁪.

𑀢𑀢𑁄𑀲𑁄 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸,

𑀦𑀸𑀕𑀭𑁂 𑀏𑀢𑀤𑀩𑁆𑀭𑀯𑀻;

𑀯𑀲𑀸𑀧𑁂𑀢𑀼𑀁 𑀦𑀲𑀓𑁆𑀓𑁄𑀫𑀺,

𑀤𑁂𑀯𑀁 𑀓𑀺𑀁 𑀦𑀼𑀓𑀭𑁂-𑀇𑀢𑀺.

𑁧𑁨𑁫.

𑀢𑀤𑀸𑀏𑀯𑀫𑀯𑁄𑀘𑀺𑀁𑀲𑀼 ¶ ,

𑀦𑀭𑀸𑀓𑀮𑀺𑀗𑁆𑀓𑀭𑀸𑀚𑀺𑀦𑁄;

𑀤𑁂𑀯𑀁 𑀯𑀲𑁆𑀲𑀸𑀧𑀦𑀢𑁆𑀣𑀸𑀬,

𑀲𑀼𑀪𑀺𑀓𑁆𑀔𑀓𑀸𑀮𑀓𑀸𑀫𑀺𑀦𑁄.

𑁧𑁨𑁬.

𑀲𑀺𑀯𑀺𑀭𑀝𑁆𑀞𑁂𑀫𑀳𑀸𑀭𑀸𑀚,

𑀭𑀚𑁆𑀚𑁂𑀥𑀫𑁆𑀫𑁂𑀦𑀬𑁄𑀞𑀺𑀢𑁄;

𑀚𑁂𑀢𑀼𑀢𑁆𑀢𑀭𑁂𑀫𑀳𑀸𑀯𑁂𑀲𑁆𑀲-

𑀦𑁆𑀢𑀭𑁄 𑀲𑀺𑀜𑁆𑀘𑀬𑀑𑀭𑀲𑁄.

𑁧𑁨𑁭.

𑀤𑀸𑀦𑁂𑀲𑀼𑀪𑀺𑀭𑀢𑁄𑀳𑁂𑀲,

𑀓𑀺𑀭𑀫𑀗𑁆𑀕𑀮𑀓𑀼𑀜𑁆𑀚𑀭𑁄;

𑀢𑀲𑁆𑀲𑀢𑁆𑀣𑀺𑀧𑀘𑁆𑀘𑀬𑁄𑀦𑀸𑀫,

𑀧𑀯𑀭𑁄𑀲𑀩𑁆𑀩𑀧𑀡𑁆𑀟𑀭𑁄.

𑁧𑁨𑁮.

𑀕𑀢𑀞𑀸𑀦𑁂𑀓𑀼𑀜𑁆𑀚𑀭𑀲𑁆𑀲 ¶ ,

𑀢𑀲𑁆𑀲𑁂𑀓𑀦𑁆𑀢𑁂𑀦𑀔𑀢𑁆𑀢𑀺𑀬;

𑀧𑀸𑀯𑀲𑁆𑀲𑀺𑀓𑀺𑀭𑀕𑀚𑁆𑀚𑀦𑁆𑀢𑁄,

𑀫𑀳𑀸𑀫𑁂𑀖𑁄𑀲𑀯𑀺𑀚𑁆𑀚𑀼𑀓𑁄.

𑁧𑁨𑁯.

𑀧𑁂𑀲𑁂𑀢𑁆𑀯𑀸𑀩𑁆𑀭𑀸𑀳𑁆𑀫𑀸𑀡𑁂𑀭𑀸𑀚,

𑀬𑀸𑀘𑀸𑀧𑁂𑀢𑀼𑀁𑀲𑀼𑀧𑀡𑁆𑀟𑀭𑀁;

𑀳𑀢𑁆𑀣𑀺𑀁𑀯𑀝𑁆𑀝𑀢𑀺𑀢𑀁𑀢𑁂𑀦,

𑀲𑀻𑀖𑀁𑀧𑁂𑀲𑁂𑀳𑀺𑀩𑁆𑀭𑀸𑀳𑁆𑀫𑀡𑁂.

𑁧𑁩𑁦.

𑀲𑀫𑁆𑀧𑀝𑀺𑀘𑁆𑀙𑀺𑀬𑀲𑀸𑀥𑀽𑀢𑀺,

𑀲𑀼𑀢𑁆𑀯𑀸𑀢𑀁𑀢𑀼𑀝𑁆𑀞𑀫𑀸𑀦𑀲𑁄;

𑀭𑀸𑀚𑀗𑁆𑀕𑀡𑀫𑁆𑀳𑀺𑀭𑀸𑀚𑀸𑀲𑁄,

𑀲𑀦𑁆𑀦𑀺𑀧𑀸𑀢𑁂𑀲𑀺𑀩𑁆𑀭𑀸𑀳𑁆𑀫𑀡𑁂.

𑁧𑁩𑁧.

𑀕𑀼𑀡𑀯𑀡𑁆𑀡𑁂𑀳𑀺𑀲𑀫𑁆𑀧𑀦𑁆𑀦𑁂 ¶ ,

𑀯𑀺𑀘𑀺𑀦𑀺𑀢𑁆𑀯𑀸𑀦𑀩𑁆𑀭𑀳𑁆𑀫𑀡𑁂;

𑀅𑀝𑁆𑀞𑀢𑁂𑀲𑀼𑀭𑀸𑀚𑀸𑀢𑁂𑀲𑀁,

𑀦𑁂𑀓𑀁𑀤𑀸𑀲𑀺𑀧𑀭𑀺𑀩𑁆𑀩𑀬𑀁.

𑁧𑁩𑁨.

𑀆𑀦𑁂𑀣𑀓𑀼𑀜𑁆𑀚𑀭𑀁𑀪𑁄𑀦𑁆𑀢𑁄,

𑀯𑁂𑀲𑁆𑀲𑀦𑁆𑀢𑀭𑀲𑁆𑀲𑀲𑀦𑁆𑀢𑀺𑀓𑀁;

𑀕𑀦𑁆𑀢𑁆𑀯𑀸𑀬𑀸𑀘𑀺𑀬-𑀏𑀯𑀁𑀢𑁂,

𑀭𑀸𑀚𑀸𑀯𑀢𑁆𑀯𑀸𑀦𑀧𑁂𑀲𑀬𑀺𑀁.

𑁧𑁩𑁩.

𑀩𑁆𑀭𑀸𑀳𑁆𑀫𑀸𑀡𑀸 ¶ 𑀅𑀝𑁆𑀞𑀭𑀸𑀚𑀸𑀦𑀁,

𑀢𑁂𑀓𑀢𑁆𑀯𑀸𑀦 𑀧𑀤𑀓𑁆𑀔𑀺𑀡𑀁;

𑀕𑀜𑁆𑀙𑀺𑀁𑀲𑀼 𑀚𑁂𑀢𑀼𑀢𑁆𑀢𑀭𑀁 𑀦𑀸𑀕𑀁,

𑀦𑁂𑀣𑀼𑀁 𑀲𑀩𑁆𑀩𑀗𑁆𑀕𑀲𑀼𑀦𑁆𑀤𑀭𑀁.

𑁧𑁩𑁪.

𑀅𑀦𑀼𑀧𑀼𑀩𑁆𑀩𑁂𑀦 𑀕𑀦𑁆𑀢𑁆𑀯𑀸𑀦,

𑀢𑁂𑀧𑀸𑀧𑀼𑀡𑀺𑀁𑀲𑀼 𑀩𑁆𑀭𑀸𑀳𑁆𑀫𑀡𑀸;

𑀚𑁂𑀢𑀼𑀢𑁆𑀢𑀭𑀁 𑀪𑀼𑀜𑁆𑀚𑀫𑀸𑀦𑀸,

𑀤𑀸𑀦𑀲𑀸𑀮𑀸𑀲𑀼 𑀅𑀘𑁆𑀙𑀬𑀼𑀁.

𑁧𑁩𑁫.

𑀢𑀢𑁄𑀧𑀼𑀡𑁆𑀡 𑀫𑀤𑀺𑀦𑀫𑁆𑀳𑀺,

𑀓𑀢𑁆𑀯𑀸𑀲𑀭𑀻𑀭𑀫𑀢𑁆𑀢𑀦𑁄;

𑀢𑁂𑀧𑀁𑀲𑀼𑀫𑀓𑁆𑀔𑀺𑀢𑀁𑀆𑀕𑀼𑀁,

𑀧𑀸𑀘𑀻𑀦𑀤𑁆𑀯𑀸𑀭𑀫𑀡𑁆𑀟𑀮𑀁.

𑁧𑁩𑁬.

𑀲𑀁𑀬𑀸𑀘𑀺𑀲𑁆𑀲𑀸𑀫𑀦𑀸𑀕𑀦𑁆𑀢𑀺 ¶ ,

𑀘𑀺𑀦𑁆𑀢𑀫𑀸𑀦𑀸𑀯𑀭𑀸𑀚𑀺𑀦𑁄;

𑀆𑀕𑀫𑁂𑀦𑁆𑀢𑀸𑀆𑀕𑀫𑀦𑀁,

𑀢𑀢𑁆𑀣𑀅𑀘𑁆𑀙𑀺𑀁 𑀲𑀼𑀩𑁆𑀭𑀸𑀳𑁆𑀫𑀸𑀡𑀸.

𑁧𑁩𑁭.

𑀤𑀸𑀦𑀕𑁆𑀕𑀁 𑀑𑀮𑁂𑀓𑁂𑀬𑁆𑀬𑀦𑁆𑀢𑀺,

𑀢𑀤𑀸𑀲𑀼𑀭 𑀲𑀪𑁄𑀚𑀦𑁄;

𑀧𑀸𑀢𑁄𑀦𑀽𑀢𑁆𑀯𑀸 𑀫𑀳𑀸𑀲𑀢𑁆𑀢𑁄,

𑀅𑀮𑀗𑁆𑀓𑀸𑀭𑁂𑀦 𑀮𑀗𑁆𑀓𑀭𑀺.

𑁧𑁩𑁮.

𑀅𑀮𑀗𑁆𑀓𑀢 𑀳𑀢𑁆𑀣𑀺𑀓𑁆𑀔𑀦𑁆𑀥𑀁,

𑀅𑀭𑀼𑀬𑁆𑀳 𑀅𑀕𑀫𑀸𑀢𑀢𑁄;

𑀭𑀸𑀚𑀸 ¶ 𑀧𑀼𑀭𑀢𑁆𑀣𑀺𑀫𑀁 𑀤𑁆𑀯𑀸𑀭𑀁,

𑀧𑀭𑀺𑀲𑀸𑀬 𑀫𑀳𑀦𑁆𑀢𑀺𑀬𑀸.

𑁧𑁩𑁯.

𑀫𑀳𑀦𑁆𑀢𑀺𑀁 𑀧𑀭𑀺𑀲𑀁𑀤𑀺𑀲𑁆𑀯𑀸,

𑀪𑀺𑀢𑀸 𑀉𑀩𑁆𑀩𑀺𑀕𑁆𑀕 𑀫𑀸𑀦𑀲𑀸;

𑀢𑀢𑁆𑀣𑁄𑀓𑀸𑀲𑀁 𑀦𑀮𑀪𑀺𑀁𑀲𑀼,

𑀬𑀸𑀘𑀺𑀢𑀼𑀁 𑀩𑁆𑀭𑀸𑀳𑁆𑀫𑀡𑀸 𑀢𑀳𑀺𑀁.

𑁧𑁪𑁦.

𑀢𑀫𑁆𑀳𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑀁 𑀢𑁂,

𑀲𑀗𑁆𑀓𑀫𑀺𑀢𑁆𑀯𑀸𑀦 𑀉𑀦𑁆𑀦𑀢𑁂;

𑀧𑀤𑁂𑀲𑁂 𑀲𑁂𑀝𑁆𑀞𑀭𑀸𑀚𑀸𑀦𑀁,

𑀆𑀕𑀫𑁂𑀲𑀼𑀁 𑀞𑀺𑀢𑀸 𑀢𑀢𑁄.

𑁧𑁪𑁧.

𑀑𑀮𑁄𑀓𑁂𑀢𑁆𑀯𑀸𑀦 ¶ 𑀧𑀸𑀘𑀻𑀦-

𑀤𑀸𑀭𑀫𑁆𑀳𑀺 𑀤𑀸𑀦𑀫𑀡𑁆𑀟𑀧𑁂;

𑀳𑀢𑁆𑀣𑀺𑀓𑁆𑀔𑀦𑁆𑀥𑀕𑀢𑁄 𑀭𑀸𑀚𑀸,

𑀤𑁆𑀯𑀸𑀭𑀫𑀸 𑀕𑀜𑁆𑀘𑀺𑀤𑀓𑁆𑀔𑀺𑀡𑀁.

𑁧𑁪𑁨.

𑀭𑀸𑀚𑀸𑀦𑀁 𑀆𑀕𑀢𑀁 𑀤𑀺𑀲𑁆𑀯𑀸,

𑀧𑀲𑀸𑀭𑁂𑀢𑁆𑀯𑀸𑀦 𑀩𑁆𑀭𑀸𑀳𑁆𑀫𑀡𑀸;

𑀳𑀢𑁆𑀣𑁂 ‘‘𑀯𑁂𑀲𑁆𑀲𑀦𑁆𑀢𑀭𑁄𑀚𑁂𑀢𑀼’’

𑀢𑀺𑀓𑁆𑀔𑀢𑁆𑀢𑀼𑀁 𑀇𑀢𑀺𑀪𑀸𑀲𑀺𑀁𑀲𑀼.

𑁧𑁪𑁩.

𑀚𑀬𑀲𑀤𑁆𑀤𑀁 𑀧𑀦𑀸𑀤𑀦𑁆𑀢𑁂,

𑀭𑀸𑀚𑀸𑀤𑀺𑀲𑁆𑀯𑀸𑀦 𑀩𑁆𑀭𑀸𑀳𑁆𑀫𑀡𑁂;

𑀳𑀢𑁆𑀣𑀺𑀁 𑀢𑁂𑀲𑀁 𑀞𑀺𑀢𑀞𑀸𑀦𑀁,

𑀧𑀸𑀚𑁂𑀲𑀺 𑀤𑀸𑀦𑀫𑀸𑀦𑀲𑀸.

𑁧𑁪𑁪.

𑀳𑀢𑁆𑀣𑀺𑀓𑁆𑀔𑀦𑁆𑀥𑁂 ¶ 𑀦𑀺𑀲𑀺𑀦𑁆𑀦𑁄𑀯,

𑀧𑀲𑀦𑁆𑀦𑁂𑀦 𑀫𑀼𑀔𑁂𑀦𑀲𑁄;

𑀫𑁆𑀳𑀺𑀢𑀧𑀼𑀩𑁆𑀩𑀁 𑀢𑀢𑁄𑀯𑁄𑀘,

𑀕𑀺𑀭𑁂𑀯𑀁 𑀳𑀤𑀬𑀗𑁆𑀕𑀫𑀁.

𑁧𑁪𑁫.

𑀤𑀓𑁆𑀔𑀺𑀡𑀸𑀯𑀝𑁆𑀝𑀲𑀗𑁆𑀔𑁂𑀦,

𑀩𑀸𑀳𑀼𑀁𑀧𑀕𑁆𑀕𑀬𑁆𑀳 𑀤𑀓𑁆𑀔𑀺𑀡;

𑀧𑀼𑀭𑀢𑁄 𑀫𑀫 𑀢𑀺𑀝𑁆𑀞𑀦𑁆𑀢𑀸,

𑀓𑀺𑀁 𑀫𑀁𑀬𑀸𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸.

𑁧𑁪𑁬.

𑀏𑀯𑀁𑀲𑀻𑀖𑀫 ¶ 𑀯𑁄𑀘𑀺𑀁𑀲𑀼,

𑀧𑀳𑀝𑁆𑀞𑀸 𑀩𑁆𑀭𑀸𑀳𑁆𑀫𑀡𑀸 𑀢𑀳𑀺𑀁;

𑀭𑀢𑀦𑀁𑀭𑀸𑀚 𑀬𑀸𑀘𑀸𑀫,

𑀓𑀼𑀜𑁆𑀚𑀭𑀁 𑀲𑀩𑁆𑀩𑀧𑀡𑁆𑀟𑀭𑀁.

𑁧𑁪𑁭.

𑀇𑀤𑀁𑀲𑀼𑀢𑁆𑀯𑀸𑀦𑀲𑁄𑀘𑀺𑀦𑁆𑀢𑀺,

𑀅𑀚𑁆𑀛𑀢𑁆𑀢𑀺𑀓𑀁 𑀧𑀺𑀤𑀸𑀢𑀯𑁂;

𑀅𑀳𑀫𑀺𑀘𑁆𑀙𑀸𑀫𑀺𑀢𑁂𑀤𑀸𑀦𑀺,

𑀫𑀫𑀁 𑀬𑀸𑀘𑀦𑁆𑀢𑀺 𑀩𑀸𑀳𑀺𑀭𑀁.

𑁧𑁪𑁮.

𑀇𑀤𑀸𑀦𑀺 𑀧𑀽𑀭𑀬𑀺𑀲𑁆𑀲𑀸𑀫𑀺,

𑀬𑀸𑀘𑀦𑁆𑀢𑀸𑀦𑀁 𑀫𑀦𑁄𑀭𑀣𑀁;

𑀏𑀯𑀁𑀘𑀺𑀦𑁆𑀢𑀺𑀬𑀲𑁄𑀪𑀸𑀲𑀺 ¶ ,

𑀳𑀢𑁆𑀣𑀺𑀓𑁆𑀔𑀦𑁆𑀥𑀞𑀺𑀢𑁄 𑀇𑀢𑀺.

𑁧𑁪𑁯.

𑀤𑁂𑀫𑀺𑀢𑀁 𑀦𑀯𑀺𑀓𑀫𑁆𑀧𑀸𑀫𑀺,

𑀬𑀁𑀫𑀁𑀬𑀸𑀘𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀸;

𑀓𑁂𑀮𑀸𑀲 𑀲𑀤𑀺𑀲𑀁 𑀲𑁂𑀢𑀁,

𑀅𑀮𑀗𑁆𑀓𑀢𑀁 𑀕𑀚𑀼𑀢𑁆𑀢𑀫𑀁.

𑁧𑁫𑁦.

𑀳𑀢𑁆𑀣𑀺𑀓𑁆𑀔𑀦𑁆𑀥𑀸 𑀢𑀢𑁄 𑀭𑀼𑀬𑁆𑀳,

𑀭𑀸𑀚𑀸 𑀘𑀸𑀕𑀸𑀥𑀺𑀫𑀸𑀦𑀲𑁄;

𑀑𑀮𑁄𑀓𑁂𑀲𑀺𑀢𑀺𑀓𑁆𑀔𑀢𑁆𑀢𑀼𑀁𑀢𑀁,

𑀓𑀢𑁆𑀯𑀸 𑀦𑀸𑀕𑀁 𑀧𑀤𑀓𑁆𑀔𑀺𑀡𑀁.

𑁧𑁫𑁧.

𑀕𑀳𑁂𑀢𑁆𑀯𑀸 ¶ 𑀲𑁄𑀡𑁆𑀡𑀪𑀺𑀗𑁆𑀕𑀸𑀭𑀁,

𑀲𑀼𑀕𑀦𑁆𑀥𑁄𑀤𑀓 𑀧𑀽𑀭𑀺𑀢𑀁;

𑀅𑀳𑁆𑀯𑀸𑀬𑀺 𑀏𑀣 𑀪𑁄𑀦𑁆𑀢𑁄𑀢𑀺,

𑀓𑀼𑀜𑁆𑀚𑀭𑀁𑀏𑀲 𑀤𑀸𑀢𑀯𑁂.

𑁧𑁫𑁨.

𑀕𑀳𑁂𑀢𑁆𑀯𑀸 𑀭𑀚𑀢𑀤𑀸𑀫-

𑀲𑀤𑀺𑀲𑀁 𑀲𑁂𑀢 𑀳𑀢𑁆𑀢𑀺𑀦𑁄;

𑀲𑁄𑀡𑁆𑀟𑀁𑀝𑁆𑀞𑀧𑀺𑀬 𑀳𑀢𑁆𑀣𑁂𑀲𑀼,

𑀩𑁆𑀭𑀸𑀳𑁆𑀫𑀡𑀸𑀦𑀁 𑀕𑀚𑀺𑀲𑁆𑀲𑀭𑁄.

𑁧𑁫𑁩.

𑀲𑀸𑀮𑀗𑁆𑀓𑀢𑀁 𑀫𑀳𑀸𑀦𑀸𑀕𑀁,

𑀧𑀸𑀢𑁂𑀢𑁆𑀯𑀸 𑀤𑀓𑁆𑀔𑀺𑀡𑁄𑀤𑀓𑀁;

𑀅𑀤𑀸𑀲𑀺 𑀲𑁂𑀝𑁆𑀞𑀤𑀦𑁆𑀢𑀺𑀁𑀢𑀁,

𑀅𑀲𑀮𑁆𑀮𑀺𑀦𑁂𑀦 𑀘𑁂𑀢𑀲𑀸.

𑁧𑁫𑁪.

𑀲𑀤𑁆𑀥𑀺𑀁 ¶ 𑀯𑀻𑀲𑀢𑀺𑀮𑀓𑁆𑀔𑁂𑀦,

𑀘𑀢𑀼𑀮𑀓𑁆𑀔𑀸𑀦𑀺 𑀅𑀕𑁆𑀖𑀢𑀺;

𑀅𑀮𑀗𑁆𑀓𑀸𑀭𑁄𑀳𑀺 𑀦𑀸𑀕𑀲𑁆𑀲,

𑀦𑀸𑀦𑀸𑀭𑀢𑀦𑀘𑀺𑀢𑁆𑀢𑀺𑀢𑁄.

𑁧𑁫𑁫.

𑀅𑀣𑀸𑀧𑀺𑀅𑀦𑀕𑁆𑀖𑀸 𑀳𑁄𑀦𑁆𑀢𑀺,

𑀙𑀴𑁂𑀯 𑀅𑀗𑁆𑀓𑀼𑀲𑀸𑀤𑀺𑀲𑀼;

𑀫𑀡𑀬𑁄 𑀯𑀸𑀭𑀡𑁄𑀘𑀸𑀧𑀺,

𑀅𑀦𑀗𑁆𑀖𑁄 𑀲𑀢𑁆𑀢𑀦𑀕𑁆𑀖𑀺𑀓𑀸.

𑁧𑁫𑁬.

𑀬𑀢𑀸𑀯𑀼𑀢𑁆𑀢 𑀭𑀢𑀦𑁂𑀳𑀺,

𑀲𑀤𑁆𑀥𑀺𑀁 𑀅𑀤𑀸𑀲𑀺 𑀓𑀼𑀜𑁆𑀚𑀭𑀁;

𑀦𑀸𑀕𑁄𑀧𑀺𑀬𑁄𑀧𑀺 𑀢𑁂𑀦𑁂𑀯,

𑀢𑀢𑁄 𑀲𑀩𑁆𑀩𑀜𑁆𑀜𑀼𑀢𑀁 𑀧𑀺𑀬𑀁.

𑁧𑁫𑁬.

𑀅𑀣𑀸𑀧𑀺 ¶ 𑀧𑀜𑁆𑀘𑀲𑀢𑀸𑀦𑀺,

𑀧𑀭𑀺𑀘𑀸𑀭𑀸𑀦𑀺 𑀳𑀢𑁆𑀣𑀺𑀦𑁄;

𑀓𑀼𑀮𑀸𑀦𑀺 𑀳𑀢𑁆𑀣𑀺𑀕𑁄𑀧𑁂𑀳𑀺,

𑀲𑀤𑁆𑀥𑀺𑀁 𑀅𑀤𑀸𑀲𑀺 𑀲𑀸𑀤𑀭𑀁.

𑁧𑁫𑁮.

𑀯𑁂𑀲𑁆𑀲𑀦𑁆𑀢𑀭𑁂𑀦 𑀤𑀺𑀦𑁆𑀦𑀫𑁆𑀳𑀺,

𑀲𑁂𑀢 𑀫𑀗𑁆𑀕𑀮 𑀓𑀼𑀜𑁆𑀚𑀭𑁂;

𑀅𑀘𑁂𑀢𑀦𑀸𑀧𑀺𑀦𑀸𑀤𑁂𑀦𑁆𑀢𑀻,

𑀫𑁂𑀤𑀦𑀻 𑀲𑀫𑁆𑀧 𑀓𑀫𑁆𑀧𑀣.

𑁧𑁫𑁯.

𑀢𑀳𑀺𑀁 ¶ 𑀪𑀻𑀲𑀦𑀓𑀁 𑀆𑀲𑀺,

𑀦𑀸𑀦𑀁 𑀮𑁄𑀫𑀳𑀁𑀲𑀦𑀁;

𑀫𑀳𑀦𑁆𑀢𑁄 𑀯𑀺𑀧𑀼𑀮𑁄 𑀖𑁄𑀲𑁄,

𑀔𑀼𑀫𑁆𑀪𑀺𑀢𑁆𑀣 𑀲𑀓𑀮𑀁 𑀧𑀼𑀭𑀁.

𑁧𑁬𑁦.

𑀫𑀳𑀻𑀲𑀤𑁆𑀤𑀲𑀦𑁆𑀢𑀸𑀲𑁂𑀦,

𑀫𑁂𑀖𑁄 𑀧𑀸𑀯𑀲𑁆𑀲𑀺 𑀢𑀸𑀯𑀤𑁂;

𑀖𑀦𑀯𑀲𑁆𑀲𑀁 𑀫𑀳𑀸𑀥𑀸𑀭𑀁,

𑀕𑀚𑁆𑀚𑀫𑀸𑀦𑁄 𑀤𑀺𑀲𑁄 𑀤𑀺𑀲𑀁.

𑁧𑁬𑁧.

𑀦𑀺𑀘𑁆𑀙𑀭𑀺𑀁𑀲𑀼 𑀩𑀳𑀽𑀯𑀺𑀚𑁆𑀚𑀼-

𑀮𑀢𑀸 𑀬𑁄𑀘 𑀲𑀫𑀦𑁆𑀢𑀢𑁄;

𑀇𑀦𑁆𑀤𑀘𑀸𑀧𑀸 𑀉𑀝𑁆𑀞𑀳𑀻𑀁𑀲𑀼,

𑀉𑀓𑁆𑀓𑀸𑀧𑀸𑀢𑁄 𑀢𑀤𑀸 𑀅𑀳𑀼.

𑁧𑁬𑁨.

𑀳𑀢𑁆𑀣𑀺𑀁 ¶ 𑀮𑀤𑁆𑀥𑀸𑀦𑀢𑁂 𑀢𑀼𑀝𑁆𑀞𑀸,

𑀩𑁆𑀭𑀸𑀳𑁆𑀫𑀡𑀸 𑀓𑀺𑀭𑀤𑀓𑁆𑀔𑀺𑀡𑀸-

𑀤𑁆𑀯𑀸𑀭𑀸 𑀦𑀕𑀭 𑀫𑀚𑁆𑀛𑁂𑀦,

𑀕𑀚𑀓𑁆𑀔𑀦𑁆𑀥 𑀕𑀢𑀸𑀦𑀬𑀼𑀁.

𑁧𑁬𑁩.

𑀫𑀳𑀸𑀚𑀦𑀧𑀭𑀺𑀯𑀸𑀭𑁂,

𑀕𑀚𑀸𑀭𑀼𑀴𑁆𑀳𑁂𑀝𑁆𑀞 𑀩𑁆𑀭𑀸𑀳𑁆𑀫𑀡𑁂;

𑀧𑀲𑁆𑀲𑀺𑀁 𑀲𑀼𑀦𑀸𑀕𑀭𑀸 𑀲𑀩𑁆𑀩𑁂,

𑀢𑀤𑀸𑀢𑁂 𑀏𑀢𑀤𑀩𑁆𑀭𑀯𑀼𑀁.

𑁧𑁬𑁪.

𑀅𑀫𑁆𑀳𑀸𑀓𑀁 ¶ 𑀓𑀼𑀜𑁆𑀚𑀭𑀁 𑀳𑀫𑁆𑀪𑁄,

𑀆𑀭𑀼𑀴𑁆𑀳𑀸 𑀯𑁄 𑀇𑀥𑀸𑀕𑀢𑀸;

𑀤𑀺𑀦𑁆𑀦𑁄𑀬𑀁 𑀓𑁂𑀦 𑀢𑀼𑀫𑁆𑀳𑀸𑀓𑀁,

𑀓𑀤𑀸 𑀮𑀤𑁆𑀥𑁄 𑀓𑀼𑀢𑁄-𑀇𑀢𑀺.

𑁧𑁬𑁫.

𑀯𑁂𑀲𑁆𑀲𑀦𑁆𑀢𑀭𑁂𑀦 𑀤𑀺𑀦𑁆𑀦𑁄 𑀦𑁄,

𑀓𑀣𑀁𑀢𑀼𑀫𑁆𑀳𑁂 𑀯𑀤𑀺𑀲𑁆𑀲𑀣;

𑀦𑀓𑀣𑁂𑀬𑁆𑀬𑀸𑀫 𑀯𑀺𑀢𑁆𑀣𑀸𑀭𑀁,

𑀕𑀘𑁆𑀙𑁂𑀫 𑀦𑀕𑀭𑀁 𑀫𑀬𑀁.

𑁧𑁬𑁬.

𑀏𑀯𑀁𑀯𑀢𑁆𑀯𑀸 𑀦𑀺𑀓𑁆𑀔𑀫𑀺𑀁𑀲𑀼,

𑀤𑁆𑀯𑀸𑀭𑁂𑀦 𑀉𑀢𑁆𑀢𑀭𑁂𑀦𑀢𑁂;

𑀘𑀺𑀢𑁆𑀢𑀁𑀯𑀺𑀮𑁄𑀮 ¶ 𑀫𑀸𑀦𑀸𑀯,

𑀦𑀸𑀕𑀭𑀸𑀦𑀁 𑀓𑀮𑀺𑀗𑁆𑀓𑀚𑀸.

𑁧𑁬𑁭.

𑀢𑀤𑀸𑀳𑀺 𑀦𑀸𑀕𑀭𑀸 𑀲𑀩𑁆𑀩𑁂,

𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀼𑀚𑁆𑀛𑀺𑀢𑀸;

𑀭𑀸𑀚𑀤𑁆𑀯𑀸𑀭𑁂 𑀲𑀦𑁆𑀦𑀺𑀧𑀘𑁆𑀘,

𑀉𑀧𑀓𑁆𑀓𑁄𑀲𑀫𑀓𑀁𑀲𑀼 𑀢𑁂.

𑁧𑁬𑁮.

𑀅𑀥𑀫𑁆𑀫𑁂𑀦𑁂𑀯𑀪𑁄𑀦𑁆𑀢𑁆𑀢𑁄𑀦𑁄,

𑀦𑀸𑀕𑀁 𑀭𑀝𑁆𑀞𑀲𑁆𑀲 𑀧𑀽𑀚𑀺𑀢𑀁;

𑀅𑀤𑀸𑀯𑁂𑀲𑁆𑀲𑀦𑁆𑀢𑀭𑁄𑀤𑀼𑀝𑁆𑀞-

𑀩𑁆𑀭𑀸𑀳𑁆𑀫𑀡𑀸𑀦𑀫𑀮𑀗𑁆𑀓𑀢𑀁.

𑁧𑁬𑁯.

𑀲𑀗𑁆𑀔𑀼𑀫𑁆𑀪𑀺𑀢𑀘𑀺𑀢𑁆𑀢𑀸 ¶ 𑀲𑀩𑁆𑀩𑁂,

𑀢𑀢𑁄𑀦𑀕𑀭𑀯𑀸𑀲𑀺𑀦𑁄;

𑀕𑀦𑁆𑀢𑁆𑀯𑀸 𑀲𑀺𑀜𑁆𑀘𑀬𑀭𑀸𑀚𑀲𑁆𑀲,

𑀲𑀦𑁆𑀢𑀺𑀓𑀁 𑀏𑀯𑀫𑀩𑁆𑀭𑀯𑀼𑀁.

𑁧𑁭𑁦.

𑀯𑀺𑀥𑀫𑀁𑀤𑁂𑀯𑀢𑁂𑀭𑀝𑁆𑀞𑀁,

𑀧𑀼𑀢𑁆𑀢𑁄𑀯𑁂𑀲𑁆𑀲𑀦𑁆𑀢𑀭𑁄𑀢𑀯;

𑀓𑀢𑀁𑀲𑁄𑀓𑀼𑀜𑁆𑀚𑀭𑀁𑀤𑀸𑀲𑀺,

𑀲𑀺𑀯𑀺𑀭𑀝𑁆𑀞𑀲𑁆𑀲𑀧𑀽𑀚𑀺𑀢𑀁.

𑁧𑁭𑁧.

𑀓𑀣𑀁𑀲𑁄 ¶ 𑀯𑀸𑀭𑀡𑀁𑀤𑀸𑀲𑀺,

𑀲𑁂𑀢𑀁 𑀓𑁂𑀮𑀸𑀲𑀲𑀦𑁆𑀦𑀺𑀪𑀁;

𑀧𑀡𑁆𑀟𑀼𑀓𑀫𑁆𑀧𑀮𑀲𑀜𑁆𑀙𑀦𑁆𑀦𑀁,

𑀚𑀬 𑀪𑀽𑀫𑀺 𑀯𑀺𑀚𑀦𑀸𑀦𑀁.

𑁧𑁭𑁨.

𑀲𑀘𑁂 𑀲𑁄 𑀤𑀸𑀢𑀼𑀫𑀺𑀘𑁆𑀙𑁂𑀬𑁆𑀬,

𑀅𑀦𑁆𑀦𑀁𑀧𑀸𑀡𑀜𑁆𑀘𑀪𑁄𑀚𑀦𑀁;

𑀯𑀢𑁆𑀣𑀁 𑀲𑁂𑀦𑀸𑀲𑀦𑀁 𑀲𑁄𑀡𑁆𑀡𑀁,

𑀬𑀼𑀢𑁆𑀢𑀁𑀤𑀸𑀢𑀼𑀁 𑀬𑀣𑀺𑀘𑁆𑀙𑀺𑀢𑀁.

𑁧𑁭𑁩.

𑀲𑀘𑁂𑀢𑁆𑀯𑀁 𑀦𑀓𑀭𑀺𑀲𑁆𑀲𑀲𑀺,

𑀲𑀺𑀯𑀻𑀦𑀁 𑀯𑀘𑀦𑀁𑀇𑀤𑀁;

𑀫𑀜𑁆𑀜𑁂𑀢𑀁 𑀲𑀳𑀧𑀼𑀢𑁆𑀢𑁂𑀦,

𑀲𑀺𑀯𑀻𑀳𑀢𑁆𑀣𑁂 𑀓𑀭𑀺𑀲𑁆𑀲𑀭𑁂.

𑁧𑁭𑁪.

𑀢𑀚𑁆𑀚𑀫𑀸𑀦𑀸𑀳𑀺 ¶ 𑀏𑀯𑀜𑁆𑀳𑀺,

𑀲𑀼𑀢𑁆𑀯𑀸 𑀲𑀺𑀯𑀻𑀳𑀺 𑀪𑀸𑀲𑀺𑀢𑀁;

𑀫𑀜𑁆𑀜𑀺𑀢𑁆𑀣 𑀲𑀺𑀜𑁆𑀘𑀬𑁄 𑀧𑀼𑀢𑁆𑀢𑀁,

𑀫𑀸𑀭𑁂𑀢𑀼𑀁 𑀇𑀘𑁆𑀙𑀭𑁂𑀇𑀢𑀺.

𑁧𑁭𑁫.

𑀏𑀯𑀁𑀩𑁆𑀬𑀸𑀓𑀸𑀲𑀺 𑀢𑁂𑀦𑁂𑀯,

𑀲𑀻𑀖𑀁𑀯𑀺𑀩𑁆𑀪𑀦𑁆𑀢 𑀫𑀸𑀦𑀲𑁄;

𑀧𑀼𑀢𑁆𑀢𑀧𑁂𑀫 𑀘𑁄𑀤𑀺𑀢𑁄 𑀲𑁄,

𑀲𑁄𑀓𑀲𑀮𑁆𑀮 𑀲𑀫𑀧𑁆𑀧𑀺𑀢𑁄.

𑁧𑁭𑁬.

𑀓𑀸𑀫𑀁 ¶ 𑀚𑀦𑀧𑀤𑁄 𑀲𑀩𑁆𑀩𑀁,

𑀭𑀝𑁆𑀞𑀜𑁆𑀘𑀸𑀧𑀺 𑀯𑀺𑀦𑀲𑁆𑀲𑀢𑀼;

𑀦𑀸𑀳𑀁 𑀲𑀺𑀯𑀻𑀦𑀁𑀯𑀘𑀦𑀸,

𑀧𑀩𑁆𑀩𑀸𑀚𑁂𑀬𑁆𑀬𑀁 𑀫𑀫𑀢𑁆𑀭𑀚𑀁.

𑁧𑁭𑁭.

𑀓𑀣𑀁 𑀳𑀁 𑀢𑀫𑁆𑀳𑀺 𑀤𑀼𑀩𑁆𑀪𑁂𑀬𑁆𑀬𑀁,

𑀲𑀦𑁆𑀢𑁄𑀲𑁄 𑀲𑀼𑀤𑁆𑀥𑀘𑁂𑀢𑀲𑁄;

𑀧𑀼𑀢𑁆𑀢𑀁𑀓𑀣𑀜𑁆𑀘 𑀦𑀺𑀤𑁆𑀤𑁄𑀲𑀁,

𑀲𑀢𑁆𑀣𑁂𑀦 𑀖𑀸𑀢𑀬𑁂 𑀫𑀫.

𑁧𑁭𑁮.

𑀲𑀺𑀯𑀬𑁄 𑀢𑀲𑁆𑀲 𑀲𑀼𑀢𑁆𑀯𑀸𑀦,

𑀪𑀸𑀲𑀺𑀢𑀁 𑀧𑀼𑀢𑁆𑀢𑀕𑀺𑀤𑁆𑀥𑀺𑀦𑁄;

𑀅𑀯𑁄𑀘𑀼𑀁 𑀯𑀺𑀲𑀝𑁆𑀞𑀸 𑀯𑀻𑀢-

𑀪𑀳𑀸𑀏𑀯𑀁 𑀬𑀣𑀸𑀢𑀣𑀁.

𑁧𑁭𑁯.

𑀫𑀸𑀦𑀁 ¶ 𑀤𑀡𑁆𑀟𑁂𑀦 𑀲𑀢𑁆𑀣𑁂𑀦,

𑀦𑀸𑀧𑀺 𑀲𑁄 𑀩𑀦𑁆𑀥𑀦𑀸𑀭𑀳𑁄;

𑀧𑀩𑁆𑀩𑀸𑀚𑁂𑀳𑀺 𑀯𑀦𑀁 𑀭𑀝𑁆𑀞𑀸,

𑀯𑀗𑁆𑀓𑁂 𑀯𑀲𑀢𑀼 𑀧𑀩𑁆𑀩𑀢𑁂.

𑁧𑁮𑁦.

𑀢𑀤𑀸𑀘𑀺𑀦𑁆𑀢𑀬𑀺 𑀲𑁄𑀭𑀸𑀚𑀸,

𑀦𑀬𑀼𑀢𑁆𑀢𑀁 𑀧𑀦𑀽𑀤𑁂𑀢𑀯𑁂;

𑀙𑀦𑁆𑀤𑀁 𑀳𑀺 𑀲𑀺𑀯𑀺𑀦𑀁 𑀤𑀸𑀦𑀺,

𑀢𑀢𑁄 𑀯𑁄𑀘 𑀲𑀼𑀪𑀸𑀲𑀺𑀢𑀁.

𑁧𑁮𑁧.

𑀬𑀣𑀸𑀙𑀦𑁆𑀤𑀁 ¶ 𑀓𑀭𑁂𑀬𑁆𑀬𑀸𑀫𑀺,

𑀭𑀝𑁆𑀞 𑀧𑀩𑁆𑀩𑀸𑀚𑀬𑁂𑀣 𑀢𑀁;

𑀏𑀓𑁄𑀓𑀸𑀲𑀜𑁆𑀘 𑀬𑀸𑀘𑀸𑀫,

𑀭𑀢𑁆𑀢𑀺𑀁 𑀲𑁄 𑀯𑀲𑀢𑀁 𑀇𑀫𑀁.

𑁧𑁮𑁨.

𑀅𑀫𑀦𑁆𑀢𑁂𑀢𑀼 𑀬𑀣𑀸𑀓𑀸𑀫𑀁,

𑀓𑀡𑁆𑀳𑀸𑀚𑀺𑀦𑀸𑀬 𑀚𑀸𑀮𑀺𑀦𑀸;

𑀢𑀣𑀸𑀘 𑀫𑀤𑁆𑀤𑀺𑀬𑀸 𑀲𑀤𑁆𑀥𑀺𑀁,

𑀓𑀸𑀫𑁂𑀘 𑀧𑀭𑀺𑀪𑀼𑀜𑁆𑀚𑀢𑀼.

𑁧𑁮𑁩.

𑀢𑀢𑁄 𑀭𑀢𑁆𑀬𑀸 𑀯𑀺𑀯𑀲𑀸𑀦𑁂,

𑀲𑀽𑀭𑀺𑀬𑀼𑀕𑁆𑀕𑀫𑀦𑁂𑀲𑀢𑀺;

𑀲𑀫𑀕𑁆𑀕𑀸 𑀲𑀺𑀯𑀬𑁄 𑀳𑀼𑀢𑁆𑀯𑀸,

𑀭𑀝𑁆𑀞𑀸 𑀧𑀩𑁆𑀩𑀚𑀬𑀦𑁆𑀢𑀼 𑀢𑀁.

𑁧𑁮𑁪.

𑀧𑀘𑁆𑀘𑀸𑀕𑀜𑁆𑀙𑀼𑀁 ¶ 𑀢𑀤𑀸 𑀲𑀩𑁆𑀩𑁂,

𑀲𑀺𑀯𑀬𑁄 𑀢𑀼𑀝𑁆𑀞𑀫𑀸𑀦𑀲𑀸;

𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸𑀦 𑀲𑀸𑀥𑀽𑀢𑀺,

𑀯𑀘𑀦𑀁 𑀲𑀺𑀯𑀺𑀭𑀸𑀚𑀺𑀦𑁄.

𑁧𑁮𑁫.

𑀢𑀢𑁄𑀲𑁄 𑀲𑀺𑀜𑁆𑀘𑀬𑁄𑀏𑀓𑀁,

𑀓𑀢𑁆𑀢𑀸𑀭𑀁 𑀧𑀼𑀢𑁆𑀢𑀲𑀦𑁆𑀢𑀺𑀓𑀁;

𑀲𑀸𑀲𑀦𑀁 𑀧𑁂𑀲𑀦𑀢𑁆𑀣𑀸𑀬,

𑀢𑀼𑀭𑀺𑀢𑀁 𑀏𑀯𑀫𑀩𑁆𑀭𑀯𑀻.

𑁧𑁮𑁬.

𑀉𑀝𑁆𑀞𑁂𑀳𑀺 𑀓𑀢𑁆𑀢𑁂 𑀢𑀭𑀫𑀸𑀦𑁄,

𑀕𑀦𑁆𑀢𑁆𑀯𑀸 𑀯𑀲𑁆𑀲𑀦𑁆𑀢𑀭𑀁 𑀯𑀤;

𑀲𑀺𑀯𑀬𑁄 𑀤𑁂𑀯 𑀢𑁂𑀓𑀼𑀤𑁆𑀥𑀸,

𑀦𑁂𑀕𑀫𑀸𑀘 𑀲𑀫𑀸𑀕𑀢𑀸.

𑁧𑁮𑁭.

𑀅𑀲𑁆𑀫𑀸 ¶ 𑀭𑀢𑁆𑀬𑀸 𑀯𑀺𑀯𑀲𑀸𑀦𑁂,

𑀲𑀽𑀭𑀺𑀬𑀼𑀕𑁆𑀕𑀫𑀦𑁂 𑀲𑀢𑀺;

𑀲𑀫𑀕𑁆𑀕𑀸 𑀲𑀺𑀯𑀬𑁄 𑀳𑀼𑀢𑁆𑀯𑀸,

𑀭𑀝𑁆𑀞𑀸 𑀧𑀩𑁆𑀩𑀸𑀚𑀬𑀦𑁆𑀢𑀺𑀢𑀁.

𑁧𑁮𑁮.

𑀲𑀓𑀢𑁆𑀢𑀸 𑀢𑀭𑀫𑀸𑀦𑁄𑀯,

𑀲𑀺𑀯𑀺𑀭𑀸𑀚𑁂𑀦 𑀧𑁂𑀲𑀺𑀢𑁄;

𑀉𑀧𑀸𑀕𑀫𑀺 𑀧𑀼𑀭𑀁𑀭𑀫𑁆𑀫𑀁,

𑀯𑁂𑀲𑁆𑀲𑀦𑁆𑀢𑀭 𑀦𑀺𑀯𑁂𑀲𑀦𑀁.

𑁧𑁮𑁯.

𑀢𑀢𑁆𑀣𑀤𑁆𑀤𑀲 ¶ 𑀓𑀼𑀭𑀁𑀲𑁄,

𑀭𑀫𑀫𑀸𑀦𑀁 𑀲𑀓𑁂 𑀧𑀼𑀭𑁂;

𑀧𑀭𑀺𑀓𑀺𑀡𑁆𑀡𑀁 𑀅𑀫𑀘𑁆𑀘𑁂𑀳𑀺,

𑀢𑀺𑀤𑀲𑀸𑀦𑀁𑀯 𑀯𑀸𑀲𑀯𑀁.

𑁧𑁯𑁦.

𑀯𑀦𑁆𑀤𑀺𑀢𑁆𑀯𑀸 𑀭𑁄𑀤𑀫𑀸𑀦𑁄𑀲𑁄,

𑀓𑀢𑁆𑀢𑀸 𑀯𑁂𑀲𑁆𑀲𑀦𑁆𑀢𑀭𑀁 𑀩𑁆𑀭𑀯𑀻;

𑀤𑀼𑀓𑁆𑀔𑀁 𑀢𑁂 𑀯𑁂𑀤𑀬𑀺𑀲𑁆𑀲𑀸𑀫𑀺,

𑀫𑀸𑀫𑁂𑀓𑀼𑀚𑁆𑀛 𑀭𑀣𑁂𑀲𑀪.

𑁧𑁯𑁧.

𑀅𑀲𑁆𑀫𑀸𑀭𑀢𑁆𑀬𑀸 𑀯𑀺𑀯𑀲𑀸𑀦𑁂,

𑀲𑀽𑀭𑀺𑀬𑀼𑀕𑁆𑀕𑀫𑀦𑁂 𑀲𑀢𑀺;

𑀲𑀺𑀯𑀬𑁄 𑀤𑁂𑀯 𑀢𑁂𑀓𑀼𑀤𑁆𑀥𑀸,

𑀭𑀝𑁆𑀞𑀸 𑀧𑀩𑁆𑀩𑀸𑀚𑀬𑀦𑁆𑀢𑀺𑀢𑀁.

𑁧𑁯𑁨.

𑀲𑀼𑀢𑁆𑀯𑀸𑀦 ¶ 𑀪𑀸𑀲𑀺𑀢𑀁 𑀏𑀢𑀁,

𑀳𑀲𑀫𑀸𑀦𑁄 𑀧𑀫𑁄𑀤𑀬𑀁;

𑀏𑀯𑀁𑀧𑀼𑀘𑁆𑀙𑀺𑀢𑁆𑀣 𑀓𑀢𑁆𑀢𑀸𑀭𑀁,

𑀯𑁂𑀲𑁆𑀲𑀦𑁆𑀢𑀭𑁄 𑀲𑀼𑀥𑀻𑀢𑀺𑀫𑀸.

𑁧𑁯𑁩.

𑀓𑀺𑀲𑁆𑀫𑀺𑀁 𑀫𑁂 𑀲𑀺𑀯𑀬𑁄 𑀓𑀼𑀤𑁆𑀥𑀸,

𑀬𑀁 𑀦𑀧𑀲𑁆𑀲𑀸𑀫𑀺 𑀤𑀼𑀓𑁆𑀓𑀝𑀁;

𑀢𑀁𑀫𑁂 𑀓𑀢𑁆𑀢𑁂 𑀯𑀺𑀬𑀸𑀘𑀺𑀓𑁆𑀔,

𑀓𑀲𑁆𑀫𑀸 𑀧𑀩𑁆𑀩𑀸𑀚𑀬𑀦𑁆𑀢𑀺 𑀫𑀁.

𑁧𑁯𑁪.

𑀢𑀳𑀺𑀁 ¶ 𑀓𑀢𑁆𑀢𑀸 𑀇𑀤𑀁𑀯𑁄𑀘,

𑀳𑀢𑁆𑀣𑀺𑀤𑀸𑀦𑁂𑀦 𑀓𑀼𑀚𑁆𑀛𑀭𑁂;

𑀔𑀻𑀬𑀦𑁆𑀢𑀺 𑀲𑀺𑀯𑀬𑁄 𑀭𑀸𑀚,

𑀢𑀲𑁆𑀫𑀸 𑀧𑀩𑁆𑀩𑀸𑀚𑀬𑀦𑁆𑀢𑀺 𑀢𑀁.

𑁧𑁯𑁫.

𑀢𑀁𑀲𑀼𑀢𑁆𑀯𑀸𑀦 𑀫𑀳𑀸𑀲𑀢𑁆𑀢𑁄,

𑀤𑀸𑀦𑁂𑀲𑀼 𑀣𑀻𑀭𑀫𑀸𑀦𑀲𑁄;

𑀯𑀘𑀦𑀁 𑀫𑁆𑀳𑀺𑀢𑀧𑀼𑀩𑁆𑀩𑀁 𑀲𑁄,

𑀓𑀢𑁆𑀢𑀸𑀭𑀁 𑀏𑀢𑀤𑀩𑁆𑀭𑀯𑀻.

𑁧𑁯𑁬.

𑀳𑀤𑀬𑀁 ¶ 𑀘𑀓𑁆𑀔𑀼𑀫𑀳𑀁 𑀤𑀚𑁆𑀚𑀁,

𑀩𑀸𑀳𑀼𑀁𑀧𑀺 𑀤𑀓𑁆𑀔𑀺𑀡𑀁 𑀫𑀫;

𑀳𑀺𑀭𑀜𑁆𑀜 𑀫𑀡𑀺𑀲𑁄𑀡𑁆𑀡𑀸𑀤𑀺𑀁,

𑀦𑀓𑀺𑀁 𑀩𑀸𑀳𑀺𑀭𑀓𑀁 𑀥𑀦𑀁.

𑁧𑁯𑁭.

𑀓𑀸𑀫𑀁𑀫𑀁𑀲𑀺 𑀯𑀬𑁄𑀲𑀩𑁆𑀩𑁂,

𑀧𑀩𑁆𑀩𑀸𑀚𑁂𑀦𑁆𑀢𑀼 𑀳𑀦𑀦𑁆𑀢𑀼𑀯𑀸;

𑀦𑁂𑀯𑀤𑀸𑀦𑀸 𑀯𑀺𑀭𑀫𑀺𑀲𑁆𑀲𑀁,

𑀓𑀸𑀫𑀁𑀙𑀺𑀦𑁆𑀤𑀦𑁆𑀢𑀼 𑀲𑀢𑁆𑀢𑀥𑀸.

𑁧𑁯𑁮

𑀢𑀢𑁄𑀲𑁄 𑀤𑁂𑀯𑀢𑀸𑀯𑀺𑀝𑁆𑀞𑁄,

𑀓𑀢𑁆𑀢𑀸𑀫𑀕𑁆𑀕𑀫 𑀤𑁂𑀲𑀬𑀺;

𑀧𑀩𑁆𑀩𑀸𑀚𑀺𑀢𑀸𑀦𑀁 𑀲𑀩𑁆𑀩𑁂𑀲𑀁,

𑀕𑀢𑀧𑀼𑀩𑁆𑀩𑀁 𑀧𑀼𑀭𑀸𑀡𑀓𑀁.

𑁧𑁯𑁯.

𑀓𑁄𑀦𑁆𑀢𑀻𑀫𑀸𑀭𑀸𑀬 ¶ 𑀢𑀻𑀭𑁂𑀦,

𑀕𑀻𑀭𑀺𑀫𑀸 𑀭𑀜𑁆𑀘𑀭𑀁 𑀧𑀢𑀺;

𑀬𑁂𑀦𑀧𑀩𑁆𑀩𑀸𑀚𑀺𑀢𑀸𑀬𑀦𑁆𑀢𑀺,

𑀢𑁂𑀦𑀕𑀘𑁆𑀙𑀢𑀼 𑀲𑀼𑀩𑁆𑀩𑀢𑁄.

𑁨𑁦𑁦.

𑀢𑀁𑀲𑀼𑀢𑁆𑀯𑀸𑀦 𑀩𑁄𑀥𑀺𑀲𑀢𑁆𑀢𑁄,

𑀲𑀸𑀥𑀽𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀬;

𑀏𑀓𑁄𑀓𑀸𑀲𑀁 𑀦𑀸𑀕𑀭𑀸𑀦𑀁,

𑀬𑀸𑀘𑁂𑀢𑀼𑀁 𑀏𑀯𑀫𑀩𑁆𑀭𑀯𑀻.

𑁨𑁦𑁧.

𑀤𑀸𑀦𑀁𑀲𑀢𑁆𑀢𑀲𑀢𑀓𑀁𑀳𑀁 ¶ ,

𑀓𑀢𑁆𑀢𑁂𑀤𑀚𑁆𑀚𑀁 𑀲𑀼𑀯𑁂𑀢𑀢𑁄;

𑀧𑀭𑀲𑁆𑀯𑁂 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺,

𑀭𑀢𑁆𑀢𑀺𑀁𑀤𑀺𑀯𑀁 𑀔𑀫𑀦𑁆𑀢𑀼𑀫𑁂.

𑁨𑁦𑁨.

𑀲𑀸𑀥𑀼𑀤𑁂𑀯𑀧𑀯𑀓𑁆𑀔𑀸𑀫𑀺,

𑀔𑀫𑀸𑀧𑁂𑀢𑀼𑀁𑀦𑀺𑀲𑀸𑀤𑀺𑀯𑀁;

𑀦𑀸𑀕𑀭𑀸𑀦𑀁𑀢𑀺𑀯𑀢𑁆𑀯𑀸𑀦,

𑀢𑀤𑀸𑀓𑀢𑁆𑀢𑀸𑀧𑀺𑀧𑀓𑁆𑀓𑀫𑀺.

𑁨𑁦𑁩.

𑀫𑀳𑀸𑀲𑀢𑁆𑀢𑁄𑀫𑀳𑀸𑀬𑁂𑀦- ¶

𑀓𑀼𑀢𑁆𑀢𑀁𑀲𑀓𑀮𑀓𑀫𑁆𑀫𑀺𑀓𑀁;

𑀧𑀓𑁆𑀓𑁄𑀲𑀸𑀯𑀺𑀬𑀲𑁆𑀯𑁂𑀤𑀸𑀦𑀁,

𑀏𑀯𑀁𑀩𑁆𑀬𑀸𑀓𑀸𑀲𑀺𑀤𑀸𑀢𑀯𑁂.

𑁨𑁦𑁪.

𑀳𑀢𑁆𑀣𑀻𑀅𑀲𑁆𑀲𑁂𑀭𑀢𑁂𑀇𑀢𑁆𑀣𑀻,

𑀤𑀸𑀲𑀻𑀤𑀸𑀲𑁂𑀘𑀥𑁂𑀦𑀼𑀬𑁄;

𑀧𑀝𑀺𑀬𑀸𑀤𑁂𑀳𑀺𑀢𑁆𑀯𑀁𑀲𑀢𑁆𑀢-

𑀲𑀢𑁂𑀘𑀸𑀕𑀸𑀬𑀫𑀸𑀭𑀺𑀲.

𑁨𑁦𑁫.

𑀅𑀣𑁄𑀦𑀸𑀦𑀧𑁆𑀧𑀓𑀸𑀭𑀸𑀦𑀺,

𑀅𑀦𑁆𑀦𑀧𑀸𑀦𑀸𑀦𑀺𑀲𑀩𑁆𑀩𑀲𑁄;

𑀲𑀼𑀭𑀁𑀧𑀺 𑀧𑀝𑀺𑀬𑀸𑀤𑁂𑀳𑀺,

𑀲𑀩𑁆𑀩𑀁𑀤𑀸𑀢𑀩𑁆𑀩𑀬𑀼𑀢𑁆𑀢𑀓𑀁.

𑁨𑁦𑁬.

𑀏𑀯𑀁𑀲𑁄𑀩𑁆𑀬𑀸𑀓𑀭𑀺𑀢𑁆𑀯𑀸𑀦 ¶ ,

𑀧𑁂𑀫𑀘𑀺𑀢𑁆𑀢𑁂𑀦𑀘𑁄𑀤𑀺𑀢𑁄;

𑀏𑀓𑁄𑀯𑀫𑀤𑁆𑀤𑀺𑀬𑀸𑀭𑀫𑁆𑀫𑀁,

𑀧𑀸𑀲𑀸𑀤𑀫𑀪𑀺𑀭𑀽𑀳𑀣.

𑁨𑁦𑁭.

𑀭𑀢𑁆𑀢𑀘𑀦𑁆𑀤𑀦 𑀕𑀦𑁆𑀥𑁂𑀳𑀺,

𑀕𑀦𑁆𑀥𑁄𑀤𑀓𑁂𑀳𑀺𑀯𑀸𑀲𑀺𑀢𑀁;

𑀲𑁄𑀧𑀸𑀯𑁂𑀓𑁆𑀔𑀺𑀲𑀺𑀭𑀻𑀕𑀩𑁆𑀪𑀁,

𑀫𑀤𑁆𑀤𑀻𑀤𑁂𑀯𑀻𑀦𑀺𑀯𑀸𑀲𑀦𑀁.

𑁨𑁦𑁮.

𑀫𑀤𑁆𑀤𑀻𑀤𑀺𑀲𑁆𑀯𑀸𑀦𑀆𑀬𑀦𑁆𑀢𑀁 ¶ ,

𑀫𑁆𑀳𑀺𑀢𑀸𑀦𑀦𑁂𑀦𑀲𑀸𑀫𑀺𑀓𑀁;

𑀉𑀝𑁆𑀞𑀸𑀲𑀺𑀆𑀲𑀦𑀸𑀲𑀻𑀖𑀁,

𑀭𑁂𑀡𑀼𑀫𑀢𑁆𑀢𑀸𑀯𑀓𑀺𑀦𑁆𑀦𑀭𑀻.

𑁨𑁦𑁯.

𑀉𑀝𑁆𑀞𑀸𑀳𑀺𑀢𑁆𑀯𑀸𑀦𑀲𑀸𑀫𑀤𑁆𑀤𑀻,

𑀯𑀸𑀫𑀳𑀢𑁆𑀣𑁂𑀲𑀼 𑀭𑀸𑀚𑀺𑀦𑁄;

𑀤𑀓𑁆𑀔𑀺𑀡𑁂 𑀦𑀲𑀳𑀢𑁆𑀣𑁂𑀦,

𑀕𑀡𑁆𑀳𑀺𑀢𑁆𑀣𑀫𑀦𑁆𑀤𑀳𑀸𑀲𑀺𑀦𑀻.

𑁨𑁧𑁦.

𑀢𑀢𑁄𑀲𑀺𑀭𑀺𑀲𑀬𑀦𑀫𑁆𑀳𑀺 ¶ ,

𑀦𑀲𑀺𑀦𑁆𑀦𑀁𑀲𑀓𑀲𑀸𑀫𑀺𑀓𑀁;

𑀩𑀻𑀚𑀬𑀦𑁆𑀢𑀻𑀯𑀲𑀸𑀝𑁆𑀞𑀸𑀲𑀺,

𑀫𑀤𑁆𑀤𑀻𑀲𑀜𑁆𑀜𑀢𑀯𑀸𑀲𑀺𑀦𑀻.

𑁨𑁧𑁧.

𑀫𑀤𑁆𑀤𑀺𑀁𑀅𑀗𑁆𑀓𑁂𑀝𑁆𑀞𑀧𑁂𑀢𑁆𑀯𑀸𑀣,

𑀕𑀡𑁆𑀳𑀁𑀳𑀢𑁆𑀢𑁂𑀲𑀼𑀤𑁂𑀯𑀺𑀬𑀸;

𑀫𑀼𑀔𑀁𑀫𑀼𑀔𑁂𑀦𑀓𑀢𑁆𑀯𑀸𑀦,

𑀭𑀸𑀚𑀸𑀫𑀦𑁆𑀤𑀫𑀪𑀸𑀲𑀣.

𑁨𑁧𑁨.

𑀬𑀁𑀢𑁂𑀲𑀘𑁂𑀫𑀬𑀸𑀤𑀺𑀦𑁆𑀦𑀁,

𑀬𑀜𑁆𑀘𑀢𑁂𑀧𑁂𑀢𑁆𑀢𑀺𑀓𑀁𑀥𑀦𑀁;

𑀲𑀩𑁆𑀩𑀁𑀢𑀁𑀦𑀺𑀤𑀳𑁂𑀬𑁆𑀬𑀸𑀲𑀺,

𑀪𑀤𑁆𑀤𑁂𑀓𑁄𑀫𑀸𑀭𑀧𑁂𑀫𑀺𑀓𑁂.

𑁨𑁧𑁩.

𑀢𑀳𑀺𑀁𑀦𑀯𑀼𑀢𑁆𑀢𑀧𑀼𑀩𑁆𑀩𑀁𑀫𑁂 ¶ ,

𑀲𑀸𑀫𑀺𑀓𑁂𑀦𑀫𑀫𑀻𑀤𑀺𑀲𑀁;

𑀓𑀤𑀸𑀘𑀺𑀏𑀢𑁆𑀣𑀓𑀁𑀓𑀸𑀮𑀁,

𑀫𑀤𑁆𑀤𑀻𑀏𑀯𑀜𑁆𑀳𑀺𑀘𑀺𑀦𑁆𑀢𑀬𑀺.

𑁨𑁧𑁪.

𑀢𑀢𑁄 𑀉𑀩𑁆𑀩𑀺𑀕𑁆𑀕𑀘𑀺𑀢𑁆𑀢𑁂𑀦,

𑀫𑀤𑁆𑀤𑀻𑀏𑀯 𑀫𑀪𑀸𑀲𑀣;

𑀓𑀼𑀳𑀺𑀁 𑀤𑁂𑀯 𑀦𑀺𑀤𑀳𑀸𑀫𑀺,

𑀢𑀁𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄.

𑁨𑁧𑁫.

𑀲𑀻𑀮𑀯𑀦𑁆𑀢𑁂𑀲𑀼 ¶ 𑀤𑀼𑀚𑁆𑀚𑀸𑀲𑀺,

𑀤𑀸𑀦𑀁 𑀫𑀤𑁆𑀤𑀻 𑀬𑀣𑀸𑀭𑀳𑀁;

𑀦𑀳𑀺𑀤𑀸𑀦𑀸 𑀧𑀭𑀁𑀅𑀢𑁆𑀣𑀺,

𑀧𑀢𑀺𑀝𑁆𑀞𑀸 𑀲𑀩𑁆𑀩𑀧𑀸𑀡𑀺𑀦𑀁.

𑁨𑁧𑁬.

𑀦𑀺𑀥𑀸𑀦𑀁 𑀦𑀸𑀫 𑀏𑀢𑀁𑀯,

𑀥𑀦𑀸𑀦𑀁 𑀦𑀦𑁆𑀤𑀺𑀯𑀟𑁆𑀠𑀦𑁂;

𑀤𑀸𑀦𑀁𑀳𑀺 𑀦𑀺𑀥𑀺 𑀲𑀢𑁆𑀢𑀸𑀦𑀁,

𑀏𑀯𑀁𑀩𑁆𑀬𑀸𑀓𑀸𑀲𑀺 𑀔𑀢𑁆𑀢𑀺𑀬𑁄.

𑁨𑁧𑁭.

𑀫𑀤𑁆𑀤𑀻𑀯𑀢𑁆𑀯𑀸𑀦 ¶ 𑀲𑀸𑀥𑀽𑀢𑀺,

𑀑𑀦𑀫𑀺𑀢𑁆𑀯𑀸 𑀲𑀺𑀭𑀼𑀢𑁆𑀢𑀫𑀁;

𑀲𑀫𑁆𑀧𑀝𑀺𑀘𑁆𑀙𑀺 𑀢𑀢𑁄 𑀭𑀸𑀚𑀸,

𑀧𑀼𑀦𑀸𑀧𑀺 𑀏𑀯𑀫𑀩𑁆𑀭𑀯𑀻.

𑁨𑁧𑁮.

𑀚𑀸𑀮𑀺𑀫𑁆𑀳𑀺𑀫𑀤𑁆𑀤𑀺𑀤𑀬𑁂𑀲𑀺,

𑀲𑀸𑀥𑀼𑀓𑀡𑁆𑀳𑀸𑀚𑀺𑀦𑀸𑀬𑀘;

𑀕𑀸𑀭𑀯𑀁𑀦𑀺𑀯𑀸𑀢𑀁𑀓𑀸𑀲𑀺,

𑀲𑀲𑁆𑀲𑀼𑀬𑀸𑀲𑀲𑁆𑀲𑀼𑀭𑀫𑁆𑀳𑀺𑀘.

𑁨𑁧𑁯.

𑀬𑁄𑀳𑀺𑀢𑀁 𑀧𑁂𑀫 𑀘𑀺𑀢𑁆𑀢𑁂𑀦,

𑀫𑀬𑀸𑀯𑀺𑀧𑁆𑀧𑀯𑀲𑁂𑀦 𑀢𑁂;

𑀇𑀘𑁆𑀙𑁂 𑀘𑁂𑀪𑀯𑀺𑀢𑀼𑀁 𑀅𑀢𑁆𑀢𑀸,

𑀲𑀓𑁆𑀓𑀘𑁆𑀘𑀁 𑀢𑀁𑀉𑀧𑀝𑁆𑀞𑀳𑁂.

𑁨𑁨𑁦.

𑀲𑀘𑁂 ¶ 𑀏𑀯𑀁 𑀦𑀪𑀯𑁂𑀬𑁆𑀬,

𑀪𑀢𑁆𑀢𑀸𑀭𑀁 𑀫𑀸𑀤𑀺𑀲𑀁 𑀯𑀺𑀬𑀁;

𑀧𑀭𑀺𑀭𑁂 𑀲𑁂𑀳𑀺 𑀅𑀜𑁆𑀜𑀁 𑀢𑁆𑀯𑀁,

𑀫𑀸𑀓𑀺 𑀲𑁆𑀲𑀺𑀢𑁆𑀣𑁄 𑀫𑀬𑀸𑀯𑀺𑀦𑀸.

𑁨𑁨𑁧.

𑀢𑀤𑀸𑀳𑀺 𑀤𑀼𑀫𑁆𑀫𑀼𑀔𑀻 𑀫𑀤𑁆𑀤𑀻,

𑀭𑀸𑀚𑀸𑀦 𑀫𑁂𑀯 𑀫𑀩𑁆𑀭𑀯𑀻;

𑀤𑀼𑀲𑁆𑀲𑀼𑀢𑀁 𑀯𑀢 𑀲𑀼𑀡𑁄𑀫𑀺,

𑀈𑀤𑀺𑀲𑀁 𑀓𑀺𑀦𑁆𑀦𑀼𑀪𑀸𑀲𑀲𑀺.

𑁨𑁨𑁨.

𑀯𑀺𑀬𑀸𑀘𑀺𑀓𑁆𑀔𑀸𑀫𑀺 ¶ 𑀫𑁂𑀪 𑀤𑁆𑀤𑁂,

𑀲𑀓𑀮𑀁 𑀤𑀸𑀦𑀺 𑀓𑀸𑀭𑀺𑀡𑀁;

𑀳𑀢𑁆𑀣𑀺𑀤𑀸𑀦𑁂𑀦𑀓𑀼𑀚𑁆𑀛𑀦𑁆𑀢𑀺,

𑀲𑀫𑀕𑁆𑀕𑀸 𑀲𑀺𑀯𑀬𑁄 𑀫𑀫.

𑁨𑁨𑁩.

𑀧𑀩𑁆𑀩𑀸𑀚𑁂𑀦𑁆𑀢𑀺 𑀫𑀫𑀁 𑀢𑁂𑀦,

𑀲𑀺𑀯𑀬𑁄 𑀲𑀺𑀯𑀺𑀭𑀝𑁆𑀞𑀢𑁄;

𑀫𑀳𑀸𑀤𑀸𑀦𑀁 𑀤𑀤𑀺𑀲𑁆𑀲𑀸𑀫𑀺,

𑀲𑀼𑀯𑁂 𑀓𑁄𑀫𑀸𑀭𑀲𑀗𑁆𑀕𑀫𑁂.

𑁨𑁨𑁪.

𑀧𑀭𑀲𑁆𑀯𑁂 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺,

𑀭𑀝𑁆𑀞𑀸 𑀏𑀓𑁄𑀯 𑀲𑁄𑀪𑀡𑁂;

𑀦𑀸𑀦𑀸𑀪𑀬𑁂𑀳𑀺 𑀲𑀁𑀓𑀺𑀡𑁆𑀡𑀁

𑀯𑀗𑁆𑀓𑀁 𑀕𑀘𑁆𑀙𑀸𑀫𑀺 𑀧𑀩𑁆𑀩𑀢.

𑁨𑁨𑁫.

𑀧𑀸𑀡𑀻𑀓𑀢𑀧𑀺𑀬𑁂 ¶ 𑀚𑀸𑀮𑀺𑀁,

𑀓𑀡𑁆𑀳𑀸𑀚𑀺𑀦𑀜𑁆𑀘 𑀅𑀢𑁆𑀢𑀚𑀁;

𑀢𑀜𑁆𑀘𑀑𑀳𑀸𑀬 𑀕𑀘𑁆𑀙𑁂𑀬𑁆𑀬𑀁,

𑀯𑀲𑁂𑀬𑁆𑀬𑀁 𑀏𑀓𑀓𑁄𑀯𑀦𑁂.

𑁨𑁨𑁬.

𑀭𑀜𑁆𑀜𑁄 𑀲𑀼𑀢𑁆𑀯𑀸𑀦 𑀲𑀗𑁆𑀓𑀫𑁆𑀧𑀺,

𑀯𑀘𑀦𑀁𑀲𑁄𑀓𑀯𑀟𑁆𑀠𑀦𑀁;

𑀫𑀸𑀮𑀼𑀢𑁂𑀭𑀺𑀢𑀧𑀢𑁆𑀢𑀁𑀯,

𑀫𑀤𑁆𑀤𑀻𑀬𑀸 𑀳𑀤𑀬𑀁 𑀢𑀤𑀸.

𑁨𑁨𑁭.

𑀫𑀸𑀫𑀫𑁂𑀯𑀫𑀯𑀘𑀼𑀢𑁆𑀣 ¶ ,

𑀓𑀫𑁆𑀧𑁂𑀲𑀺 𑀳𑀤𑀬𑀁 𑀫𑀫;

𑀢𑀢𑁆𑀢𑀢𑁂𑀮𑁂𑀦𑀲𑀺𑀢𑁆𑀢𑀁𑀯,

𑀲𑀭𑀺𑀭𑀁 𑀭𑀸𑀚 𑀤𑀬𑁆𑀳𑀢𑁂.

𑁨𑁨𑁮.

𑀦𑁂𑀲𑀥𑀫𑁆𑀫𑁄 𑀫𑀳𑀸𑀭𑀸𑀚,

𑀬𑀁 𑀢𑁆𑀯𑀁 𑀕𑀘𑁆𑀙𑁂𑀬𑁆𑀬 𑀏𑀓𑀓𑁄;

𑀅𑀳𑀁𑀧𑀺 𑀢𑁂𑀦 𑀕𑀘𑁆𑀙𑀸𑀫𑀺,

𑀬𑁂𑀦𑀕𑀘𑁆𑀙𑀲𑀺 𑀔𑀢𑁆𑀢𑀺𑀬.

𑁨𑁨𑁯.

𑀫𑀭𑀡𑀁𑀯𑀸 ¶ 𑀢𑀬𑀸 𑀲𑀤𑁆𑀥𑀺𑀁,

𑀚𑀻𑀯𑀺𑀢𑀁𑀯𑀸 𑀢𑀬𑀸 𑀯𑀺𑀦𑀸;

𑀢𑀤𑁂𑀯 𑀫𑀭𑀡𑀁 𑀲𑁂𑀬𑁆𑀬𑁄,

𑀬𑀜𑁆𑀘𑁂𑀚𑀻𑀯𑁂 𑀢𑀬𑀸𑀧𑀺𑀦𑀸.

𑁨𑁩𑁦.

𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑀬𑀺𑀢𑁆𑀯𑀸𑀦,

𑀏𑀓𑀚𑀸𑀮 𑀲𑀫𑀸𑀳𑀺𑀢𑀁;

𑀢𑀢𑁆𑀣𑁂 𑀯𑀫𑀭𑀡𑀁 𑀲𑁂𑀬𑁆𑀬𑁄,

𑀬𑀜𑁆𑀘𑁂 𑀚𑀻𑀯𑁂 𑀢𑀬𑀸 𑀯𑀺𑀦𑀸.

𑁨𑁩𑁧.

𑀘𑀭𑀦𑁆𑀢𑀸 𑀭𑀜𑁆𑀜𑀦𑀸𑀕𑀁𑀯,

𑀤𑀼𑀕𑁆𑀕𑁂𑀲𑁆𑀯𑀦𑁆𑀯𑁂𑀢𑁆𑀢𑀺 𑀳𑀢𑁆𑀣𑀺𑀦𑀻;

𑀏𑀯𑀁𑀢𑀁 ¶ 𑀅𑀦𑀼𑀕𑀘𑁆𑀙𑀸𑀫𑀺,

𑀧𑀼𑀢𑁆𑀢𑁂𑀆𑀤𑀸𑀬𑀧𑀘𑁆𑀙𑀢𑁄.

𑁨𑁩𑁨.

𑀯𑀺𑀫𑀁𑀲𑁂𑀢𑀼𑀁 𑀢𑀤𑀸 𑀭𑀸𑀚𑀸,

𑀫𑀸𑀦𑀲𑀁 𑀫𑀤𑁆𑀤𑀺𑀤𑁂𑀯𑀺𑀬𑀸;

𑀦𑀸𑀦𑀸𑀪𑀬𑀁 𑀧𑀓𑀸𑀲𑁂𑀦𑁆𑀢𑁄,

𑀏𑀯𑀁𑀩𑁆𑀭𑀯𑀺 𑀪𑀬𑀸𑀧𑀬𑀁.

𑁨𑁩𑁩.

𑀯𑀺𑀬𑀸𑀘𑀺𑀓𑁆𑀔𑀸𑀫𑀺 ¶ 𑀢𑁂𑀲𑀘𑁆𑀘𑀁,

𑀯𑀦𑀫𑁆𑀳𑀺 𑀫𑀼𑀤𑀼𑀫𑀸𑀦𑀲𑁂;

𑀦𑀸𑀦𑀸𑀪𑀬𑀁 𑀔𑀭𑀁 𑀖𑁄𑀭𑀁,

𑀳𑁂𑀲𑁆𑀫𑀁 𑀳𑀤𑀬𑀓𑀫𑁆𑀧𑀦𑀁.

𑁨𑁩𑁪.

𑀓𑁂𑀲𑀭𑀻𑀦𑀸𑀫 𑀬𑁂𑀪𑀤𑁆𑀤𑁂,

𑀫𑀺𑀕𑀭𑀸𑀚𑀸 𑀔𑀭𑀲𑁆𑀲𑀭𑀸;

𑀳𑀺𑀁 𑀲𑀦𑁆𑀢𑀺𑀁 𑀢𑁂 𑀲𑀲𑀤𑁆𑀤𑁂𑀦,

𑀫𑀺𑀕𑁂𑀢𑀺𑀓𑁆𑀔𑀕𑁆𑀕 𑀤𑀸𑀞𑀺𑀦𑁄.

𑁨𑁩𑁫.

𑀤𑀻𑀧𑀻𑀩𑁆𑀬𑀕𑁆𑀖𑀸𑀓𑀡𑁆𑀳𑀸𑀘𑁆𑀙𑀸𑀘,

𑀢𑀺𑀓𑁆𑀔𑀕𑁆𑀕 𑀦𑀔 𑀥𑀸𑀭𑀺𑀦𑁄;

𑀔𑀕𑁆𑀕𑀸 ¶ 𑀯𑀦𑀫𑀳𑀺𑀁𑀲𑀸𑀘,

𑀢𑀺𑀓𑁆𑀔𑀕𑁆𑀕𑀲𑀺𑀗𑁆𑀕𑀥𑀸𑀭𑀺𑀦𑁄.

𑁨𑁩𑁬.

𑀢𑀺𑀓𑁆𑀔𑀕𑁆𑀕 𑀦𑀔 𑀲𑀺𑀗𑁆𑀕𑁂𑀳𑀺,

𑀏𑀢𑁂 𑀧𑁄𑀲𑀁𑀧𑀺 𑀙𑀺𑀦𑁆𑀤𑀺𑀬;

𑀔𑀡𑁆𑀟𑀸𑀔𑀡𑁆𑀟𑀁 𑀓𑀭𑀺𑀢𑁆𑀯𑀸𑀦,

𑀫𑀽𑀮𑀸𑀮𑀁𑀯𑀺𑀬 𑀪𑀓𑁆𑀔𑀭𑁂.

𑁨𑁩𑁭.

𑀬𑀸𑀘𑀬𑀓𑁆𑀔𑀺𑀦𑀺𑀬𑁄𑀬𑀓𑁆𑀔𑀸,

𑀩𑀳𑀽𑀫𑀦𑀼𑀲𑁆𑀲𑀔𑀸𑀤𑀓𑀸;

𑀦𑀭𑀁𑀦𑀸𑀭𑀺𑀁 𑀕𑀯𑁂𑀲𑀦𑁆𑀢𑀺,

𑀤𑀼𑀫𑁆𑀫𑀼𑀔𑀸 𑀔𑀕𑁆𑀕𑀧𑀸𑀡𑀺𑀦𑁄.

𑁨𑁩𑁮.

𑀅𑀣𑁄 ¶ 𑀅𑀚𑀕𑀭𑀸𑀲𑀧𑁆𑀧𑀸,

𑀖𑁄𑀭𑀯𑀻𑀲𑀸𑀘 𑀯𑀺𑀚𑁆𑀚𑀭𑁂;

𑀯𑀺𑀁𑀲𑀸𑀘𑀸 𑀭𑀓𑁆𑀔𑀲𑀸𑀯𑀸𑀴𑀸,

𑀲𑀚𑁆𑀚𑀼𑀮𑁄𑀳𑀺𑀢𑀪𑁄𑀚𑀦𑀸.

𑁧𑁩𑁯.

𑀅𑀜𑁆𑀜𑁂𑀧𑀺 𑀩𑀳𑀯𑁄𑀲𑀦𑁆𑀢𑀺,

𑀪𑀬𑀸𑀪𑁂𑀲𑁆𑀫𑀓𑀸𑀭𑀓𑀸;

𑀓𑀺𑀁𑀦𑀪𑀸𑀬𑀲𑀺 𑀏𑀢𑁂𑀲𑀁,

𑀪𑀬𑀸𑀦𑀁 𑀪𑀬𑀫𑀸𑀦𑀲𑁂.

𑁨𑁪𑁦.

𑀫𑀸 ¶ 𑀫𑀫𑀁 𑀢𑁆𑀯𑀁 𑀦𑀼𑀕𑀘𑁆𑀙𑀸𑀳𑀺,

𑀕𑀘𑁆𑀙𑀦𑁆𑀢𑀁 𑀪𑀬𑀲𑀁𑀬𑀼𑀢𑀁;

𑀯𑀦𑀁 𑀇𑀥𑁂𑀯 𑀅𑀘𑁆𑀙𑀸𑀳𑀺,

𑀯𑀼𑀢𑁆𑀢𑁂𑀳𑀺𑀲𑀳𑀪𑀻𑀭𑀼𑀓𑁂.

𑁧𑁪𑁧.

𑀢𑁆𑀯𑁂𑀓𑀤𑀸𑀲𑀺𑀭𑀺𑀕𑀩𑁆𑀪𑀫𑁆𑀳𑀺,

𑀯𑀲𑀦𑁆𑀢𑀻 𑀲𑀳𑀫𑁂 𑀲𑀼𑀪𑁂;

𑀲𑀼𑀢𑁆𑀯𑀸𑀕𑀯𑁂𑀲𑀺𑀢𑀸𑀡𑀗𑁆𑀓𑁂,

𑀓𑀺𑀁𑀫𑁂 𑀫𑀜𑁆𑀚𑀸𑀭𑀕𑀚𑁆𑀚𑀺𑀢𑀁.

𑁨𑁪𑁨.

𑀢𑁆𑀯𑁂𑀓𑀤𑀸𑀓𑀺𑀁𑀯𑀺𑀩𑁄𑀥𑁂𑀲𑀺 ¶ ,

𑀪𑁂𑀫𑀺𑀪𑁂𑀫𑀻𑀢𑀺 𑀪𑀸𑀲𑀺𑀬;

𑀭𑀢𑁆𑀢𑀺𑀬𑀁 𑀳𑀺 𑀲𑀬𑀦𑁆𑀢𑀁 𑀫𑀁,

𑀲𑀼𑀢𑁆𑀯𑀸 𑀦𑀼𑀮𑀼𑀗𑁆𑀓𑀯𑀲𑁆𑀲𑀺𑀢𑀁.

𑁨𑁪𑁩.

𑀢𑁆𑀯𑁂𑀓𑀤𑀸 𑀫𑁂𑀖𑀲𑀤𑁆𑀤𑀁𑀳𑀺,

𑀲𑀼𑀢𑁆𑀯𑀸𑀤𑀺𑀯𑀸 𑀫𑀫𑀦𑁆𑀢𑀺𑀓𑀁;

𑀥𑀸𑀯𑀺𑀢𑁆𑀯𑀸𑀫𑀁 𑀧𑀭𑀺𑀲𑁆𑀲𑀚𑁆𑀚,

𑀓𑀺𑀁 𑀫𑀼𑀘𑁆𑀙𑀺𑀮𑁄𑀫𑀳𑀁𑀲𑀻𑀦𑀻.

𑁧𑁪𑁪.

𑀏𑀯𑀁𑀪𑀬 ¶ 𑀘𑀜𑁆𑀘𑀮𑀸𑀬,

𑀲𑀼𑀔𑀼𑀫𑀸𑀮𑀸𑀬 𑀤𑁂𑀯𑀺𑀬𑀸;

𑀦𑀸𑀮𑀁𑀳𑀺 𑀯𑀲𑀺𑀢𑀼𑀁𑀭𑀜𑁆𑀜𑁂,

𑀪𑁂𑀲𑁆𑀫𑁂 𑀅𑀯𑀦𑀯𑀸𑀲𑀺𑀓𑁂.

𑁨𑁪𑁫.

𑀫𑀤𑁆𑀤𑀻𑀲𑀼𑀢𑁆𑀯𑀸𑀦 𑀭𑀸𑀚𑀲𑁆𑀲,

𑀪𑀸𑀲𑀺𑀢𑁆𑀢𑀁 𑀣𑀻𑀭𑀫𑀸𑀦𑀲𑀸;

𑀯𑀺𑀲𑀸𑀭𑀤𑁂𑀦 𑀘𑀺𑀢𑁆𑀢𑁂𑀦,

𑀲𑀸𑀫𑀺𑀓𑀁 𑀏𑀯𑀫𑀩𑁆𑀭𑀯𑀻.

𑁨𑁪𑁬.

𑀢𑀬𑀺𑀫𑁂 𑀧𑁂𑀫 𑀘𑀺𑀢𑁆𑀢𑀜𑁆𑀘,

𑀅𑀭𑀜𑁆𑀜𑁂 𑀪𑀬𑀫𑀸𑀦𑀲𑀁;

𑀢𑀬𑀺𑀢𑁂𑀲𑀼𑀫𑀳𑀸𑀭𑀸𑀚 ¶ ,

𑀲𑀼𑀢𑀺𑀓𑁆𑀔𑀁 𑀧𑁂𑀫 𑀘𑁂𑀢𑀲𑀁.

𑁨𑁪𑁭.

𑀲𑀦𑁆𑀤𑀢𑁂 𑀲𑀻𑀖𑀲𑁄𑀢𑀁𑀫𑁂,

𑀢𑀬𑀺𑀲𑀸𑀕𑀭 𑀲𑀦𑁆𑀦𑀺𑀪𑁂;

𑀦𑀺𑀘𑁆𑀘𑀁𑀧𑁂𑀫𑁄𑀤𑀓𑀁𑀭𑀸𑀚,

𑀕𑀗𑁆𑀕𑁄𑀤𑀓𑀁𑀯 𑀲𑀸𑀕𑀭𑁂.

𑁨𑁪𑁮.

𑀫𑀭𑀡𑀁𑀧𑁂𑀫𑀘𑀺𑀢𑁆𑀢𑁂𑀦,

𑀚𑀻𑀯𑀺𑀢𑀁 𑀪𑀬 𑀘𑁂𑀢𑀲𑀸;

𑀢𑀤𑁂𑀯 𑀫𑀭𑀡𑀁𑀲𑁂𑀬𑁆𑀬𑁄,

𑀬𑀜𑁆𑀘𑁂𑀢𑀁 𑀚𑀻𑀯𑀺𑀢𑀁𑀘𑀺𑀭𑀁.

𑁨𑁪𑁯.

𑀧𑀸𑀓𑀸𑀭𑀁 ¶ 𑀫𑀫𑀽𑀭𑀁𑀭𑀸𑀚,

𑀓𑀢𑁆𑀯𑀸𑀦 𑀧𑀼𑀭𑀢𑁄𑀯𑀦𑀁;

𑀦𑀸𑀦𑀸𑀪𑀬𑀁 𑀦𑀺𑀯𑀸𑀭𑁂𑀦𑁆𑀢𑀻,

𑀕𑀘𑁆𑀙𑀁 𑀳𑀁𑀯𑁂𑀭𑀳𑀺𑀁𑀲𑀺𑀦𑀻.

𑁨𑁫𑁦.

𑀢𑀬𑀺𑀳𑀁 𑀧𑁂𑀫𑀘𑀺𑀢𑁆𑀢𑀸𑀲𑀺𑀁,

𑀕𑀳𑁂𑀢𑁆𑀢𑁆𑀯𑀸 𑀯𑀗𑁆𑀓𑀧𑀩𑁆𑀩𑀢𑁂;

𑀨𑀮𑀸𑀨𑀮𑀁𑀕𑀯𑁂𑀲𑀦𑁆𑀢𑀻,

𑀯𑀲𑁂𑀬𑁆𑀬𑀸𑀫𑀺 𑀢𑀬𑀸𑀲𑀳.

𑁨𑁫𑁧.

𑀏𑀯𑀁𑀜𑁆𑀳𑀺 ¶ 𑀲𑀽𑀭𑀪𑀸𑀯𑀁 𑀲𑀸,

𑀤𑀲𑁆𑀲𑀬𑀺𑀢𑁆𑀯𑀸𑀦 𑀅𑀢𑁆𑀢𑀦𑁄;

𑀳𑀺𑀫𑀯𑀦𑁆𑀢 𑀯𑀸𑀲𑀺𑀦𑀻𑀯-

𑀭𑀸𑀚𑀸𑀦𑀁 𑀯𑀻𑀢𑀺𑀢𑁄𑀲𑀬𑀺.

𑁨𑁫𑁨.

𑀬𑀤𑀸𑀤𑀓𑁆𑀔𑀲𑀺𑀦𑀘𑁆𑀘𑀦𑁆𑀢𑁂,

𑀓𑀼𑀫𑀸𑀭𑁂 𑀫𑀸𑀮𑀥𑀸𑀭𑀺𑀦𑁂;

𑀓𑀻𑀴𑀦𑁆𑀢𑁂 𑀅𑀲𑁆𑀲𑀫𑁂𑀭𑀫𑁆𑀫𑁂,

𑀦𑀭𑀚𑁆𑀚𑀲𑁆𑀲 𑀲𑀭𑀺𑀲𑁆𑀲𑀲𑀺.

𑁨𑁫𑁩.

𑀬𑀤𑀸𑀤𑀓𑁆𑀔𑀲𑀺𑀕𑀸𑀬𑀦𑁆𑀢𑁂 ¶ ,

𑀅𑀜𑁆𑀜𑁄𑀜𑁆𑀜𑀫𑀼𑀔𑀤𑀲𑁆𑀲𑀺𑀦𑁂;

𑀓𑀼𑀫𑀸𑀭𑁂𑀯𑀦𑀕𑀼𑀫𑁆𑀩𑀫𑁆𑀳𑀺,

𑀦𑀭𑀚𑁆𑀚𑀲𑁆𑀲 𑀲𑀭𑀺𑀲𑁆𑀲𑀲𑀺.

𑁨𑁫𑁪.

𑀬𑀤𑀸𑀤𑀓𑁆𑀔𑀲𑀺𑀫𑀸𑀢𑀗𑁆𑀕𑀁,

𑀲𑀸𑀬𑀁𑀧𑀸𑀢𑀁𑀩𑁆𑀭𑀳𑀸𑀯𑀦𑁂;

𑀅𑀲𑀳𑀸𑀬𑀁𑀯𑀺𑀘𑀭𑀦𑁆𑀢𑀁,

𑀦𑀭𑀚𑁆𑀚𑀲𑁆𑀲 𑀲𑀭𑀺𑀲𑁆𑀲𑀲𑀺.

𑁨𑁫𑁫.

𑀦𑀸𑀤𑀁𑀓𑀭𑁂𑀡𑀼𑀲𑀗𑁆𑀖𑀲𑁆𑀲 ¶ ,

𑀦𑀤𑀫𑀸𑀦𑀲𑁆𑀲𑀧𑀽𑀭𑀢𑁄;

𑀦𑀸𑀕𑀲𑁆𑀲𑀯𑀚𑀢𑁄𑀲𑀼𑀢𑁆𑀯𑀸,

𑀦𑀭𑀚𑁆𑀚𑀲𑁆𑀲𑀲𑀭𑀺𑀲𑁆𑀲𑀲𑀺.

𑁨𑁫𑁬.

𑀫𑀺𑀕𑀁𑀤𑀺𑀲𑁆𑀯𑀸𑀦𑀲𑀸𑀬𑀦𑁆𑀳𑀁,

𑀧𑀜𑁆𑀘𑀫𑀸𑀮𑀺𑀦𑀫𑀸𑀕𑀢𑀁;

𑀓𑀺𑀁 𑀧𑀽𑀭𑀺𑀲𑁂𑀘𑀦𑀘𑁆𑀘𑀦𑁆𑀢𑁂,

𑀦𑀭𑀚𑁆𑀛𑀲𑁆𑀲𑀲𑀭𑀺𑀲𑁆𑀲𑀲𑀺.

𑁨𑁫𑁭.

𑀬𑀤𑀸𑀲𑀼𑀲𑁆𑀲𑀲𑀺𑀦𑀺𑀕𑁆𑀖𑁄𑀲𑀁 ¶ ,

𑀲𑀦𑁆𑀤𑀫𑀸𑀦𑀸𑀬𑀲𑀺𑀦𑁆𑀥𑀼𑀬𑀸;

𑀕𑀻𑀢𑀁𑀓𑀺𑀁𑀧𑀼𑀭𑀺𑀲𑀸𑀦𑀜𑁆𑀘,

𑀦𑀭𑀚𑁆𑀚𑀲𑁆𑀲𑀲𑀭𑀺𑀲𑁆𑀲𑀲𑀺.

𑁨𑁫𑁮.

𑀲𑀭𑀢𑀲𑁆𑀲𑀘𑀲𑀻𑀳𑀲𑁆𑀲,

𑀩𑁆𑀬𑀕𑁆𑀖𑀲𑁆𑀲𑀘𑁆𑀙𑀲𑁆𑀲𑀤𑀺𑀯𑀺𑀦𑁄;

𑀲𑀤𑁆𑀤𑀁 𑀲𑀼𑀢𑁆𑀯𑀸𑀦𑀔𑀕𑁆𑀕𑀲𑁆𑀲,

𑀦𑀭𑀚𑁆𑀚𑀲𑁆𑀲𑀲𑀭𑀺𑀲𑁆𑀲𑀲𑀺.

𑁨𑁫𑁯.

𑀬𑀤𑀸𑀫𑁄𑀭𑀻𑀳𑀺𑀧𑀭𑀺𑀓𑀺𑀡𑁆𑀡𑀁 ¶ ,

𑀯𑀺𑀘𑀺𑀢𑁆𑀭𑀧𑀼𑀘𑁆𑀙𑀧𑀓𑁆𑀔𑀺𑀦𑀁;

𑀫𑁄𑀭𑀁𑀤𑀓𑁆𑀔𑀲𑀺𑀦𑀘𑁆𑀘𑀦𑁆𑀢𑀁,

𑀦𑀭𑀚𑁆𑀚𑀲𑁆𑀲 𑀲𑀭𑀺𑀲𑁆𑀲𑀲𑀺.

𑁨𑁬𑁦.

𑀬𑀤𑀸𑀤𑀓𑁆𑀔𑀲𑀺 𑀳𑁂𑀫𑀦𑁆𑀢𑁂,

𑀧𑀼𑀧𑁆𑀨𑀺𑀢𑁂𑀥𑀭𑀡𑀻𑀭𑀼𑀳𑁂;

𑀲𑀼𑀭𑀩𑁆𑀪𑀺𑀲𑀫𑁆𑀧𑀯𑀸𑀬𑀦𑁆𑀢𑁂,

𑀦𑀭𑀚𑁆𑀚𑀲𑁆𑀲 𑀲𑀭𑀺𑀲𑁆𑀲𑀲𑀺.

𑁨𑁬𑁧.

𑀬𑀤𑀸 ¶ 𑀳𑁂𑀫𑀦𑁆𑀢𑀺 𑀓𑁂𑀫𑀸𑀲𑁂,

𑀳𑀭𑀺𑀢𑀁 𑀤𑀓𑁆𑀔𑀲𑀺 𑀫𑁂𑀤𑀦𑀺𑀁;

𑀇𑀦𑁆𑀤𑀕𑁄𑀧𑀓 𑀲𑀜𑁆𑀙𑀦𑁆𑀦𑀁,

𑀦𑀭𑀚𑁆𑀚𑀲𑁆𑀲 𑀲𑀭𑀺𑀲𑁆𑀲𑀲𑀺.

𑁧𑁬𑁨.

𑀢𑀤𑀸𑀳𑀺𑀨𑀼𑀲𑁆𑀲𑀢𑀻𑀤𑁂𑀯𑀻,

𑀞𑀺𑀢𑀸𑀲𑀺 𑀧𑀼𑀢𑁆𑀢𑀲𑁄𑀓𑀺𑀦𑀻;

𑀲𑀻𑀭𑀻𑀧𑀕𑀩𑁆𑀪𑀲𑁆𑀲𑀤𑁆𑀯𑀸𑀭𑀫𑁆𑀳𑀺,

𑀯𑀺𑀫𑀁𑀲𑀦𑁆𑀢𑀻𑀓𑀣𑀸𑀓𑀣𑀁.

𑁨𑁬𑁩.

𑀓𑀮𑀼𑀦𑀁𑀧𑀭𑀺𑀤𑁂𑀯𑀺𑀢𑁆𑀣 ¶ ,

𑀅𑀜𑁆𑀜𑁄𑀜𑁆𑀜𑀸𑀪𑀸𑀲𑀺𑀢𑀁𑀕𑀺𑀭𑀁;

𑀲𑀼𑀢𑁆𑀯𑀸𑀦𑀨𑀼𑀲𑁆𑀲𑀢𑀻𑀤𑁂𑀯𑀻,

𑀯𑀼𑀢𑁆𑀢𑀲𑁆𑀲𑀲𑀼𑀡𑀺𑀲𑀸𑀬𑀘.

𑁨𑁬𑁪.

𑀯𑀺𑀲𑀁𑀫𑁂𑀔𑀸𑀤𑀺𑀢𑀁𑀲𑁂𑀬𑁆𑀬𑁄,

𑀧𑀩𑁆𑀩𑀢𑀸𑀘 𑀧𑀧𑀸𑀢𑀦𑀁;

𑀫𑀢𑀜𑁆𑀘𑀭𑀚𑁆𑀚𑀼𑀬𑀸𑀩𑀚𑁆𑀛,

𑀦𑀢𑁆𑀣𑀢𑁆𑀣𑁄𑀚𑀻𑀯𑀺𑀢𑁂𑀦𑀫𑁂.

𑁨𑁬𑁫.

𑀅𑀚𑁆𑀛𑀸𑀬𑀓𑀁 ¶ 𑀤𑀸𑀦 𑀧𑀢𑀺𑀁,

𑀬𑀲𑀲𑁆𑀲𑀺𑀦𑀁 𑀅𑀫𑀘𑁆𑀙𑀭𑀺𑀁;

𑀓𑀲𑁆𑀫𑀸 𑀯𑁂𑀲𑁆𑀲𑀭𑀁 𑀧𑀼𑀢𑁆𑀢𑀁,

𑀧𑀩𑁆𑀩𑀸𑀚𑀦𑁆𑀢𑀺 𑀅𑀤𑀽𑀲𑀓𑀁.

𑁨𑁬𑁬.

𑀧𑀽𑀚𑀺𑀢𑀁 𑀧𑀢𑀺𑀭𑀸 𑀚𑀽𑀳𑀺,

𑀲𑀩𑁆𑀩𑀮𑁄𑀓𑀳𑀺 𑀢𑁂𑀲𑀺𑀦𑀁;

𑀓𑀲𑁆𑀫𑀸 𑀯𑁂𑀲𑁆𑀲𑀦𑁆𑀢𑀭𑀁 𑀯𑀼𑀢𑁆𑀢𑀁,

𑀧𑀩𑁆𑀩𑀸𑀚𑁂𑀦𑁆𑀢𑀺𑀅𑀤𑀽𑀲𑀓𑀁.

𑁨𑁬𑁭.

𑀓𑀮𑀼𑀦𑀁 𑀧𑀭𑀺 𑀤𑁂𑀯𑀺𑀢𑁆𑀯𑀸,

𑀅𑀲𑁆𑀲𑀸 𑀲𑁂𑀢𑁆𑀯𑀸𑀦 𑀨𑀼𑀲𑁆𑀲𑀢𑀻;

𑀯𑀼𑀢𑁆𑀢𑀜𑁆𑀘 𑀲𑀼𑀡𑀺𑀲𑀁 𑀲𑀻𑀖𑀁,

𑀅𑀕𑀸 𑀲𑀺𑀜𑁆𑀘𑀬 𑀲𑀦𑁆𑀢𑀺𑀓𑀁.

𑁨𑁬𑁮.

𑀢𑀢𑁄𑀢𑀁 ¶ 𑀲𑀺𑀜𑁆𑀘𑀬𑀁𑀤𑁂𑀯𑀻,

𑀯𑀺𑀲𑀝𑁆𑀞𑀸 𑀏𑀢𑀤𑀩𑁆𑀭𑀯𑀻;

𑀦𑀸𑀦𑀽𑀧𑀸𑀬𑀁 𑀧𑀓𑀸𑀲𑁂𑀦𑁆𑀢𑀻,

𑀯𑀺𑀘𑀺𑀢𑁆𑀢 𑀯𑀸𑀤 𑀯𑀺𑀜𑁆𑀜𑀼𑀦𑀻.

𑁨𑁬𑁯.

𑀫𑀥𑀽𑀦𑀺𑀯 𑀧𑀮𑀸 𑀢𑀸𑀦𑀺,

𑀅𑀫𑁆𑀩𑀸𑀯𑀧𑀢𑀺 𑀢𑀸𑀙𑀫𑀸;

𑀏𑀯𑀁𑀳𑁂 𑀲𑁆𑀲𑀢𑀺𑀢𑁂 𑀭𑀝𑁆𑀞𑀁,

𑀧𑀩𑁆𑀩𑀸𑀚𑀺𑀢𑁂𑀅𑀤𑀽𑀲𑀓𑁂.

𑁨𑁭𑁦.

𑀳𑀁𑀲𑁄 ¶ 𑀦𑀺𑀔𑀻𑀡 𑀧𑀢𑁆𑀢𑁄𑀯,

𑀧𑀮𑁆𑀮𑀲𑁆𑀫𑀺𑀁 𑀅𑀦𑀽𑀤𑀓𑁂;

𑀅𑀧𑀯𑀺𑀝𑁆𑀞𑁄 𑀅𑀫𑀘𑁆𑀘𑁂𑀳𑀺,

𑀏𑀓𑁄𑀭𑀸𑀚𑀸𑀯𑀺𑀳𑀺𑀬𑁆𑀬𑀲𑀺.

𑁨𑁭𑁦.

𑀢𑀦𑁆𑀢𑀁𑀩𑁆𑀭𑀽𑀫𑀺 𑀫𑀳𑀸𑀭𑀸𑀚,

𑀅𑀢𑁆𑀣𑁄𑀢𑁂𑀫𑀸 𑀉𑀧𑀘𑁆𑀘𑀕𑀸;

𑀫𑀸𑀦𑀁𑀲𑀺𑀯𑀻𑀦𑀁𑀯𑀘𑀦𑀸,

𑀧𑀩𑁆𑀩𑀸𑀚𑁂𑀲𑀺𑀅𑀤𑀽𑀲𑀓𑀁.

𑁧𑁭𑁨.

𑀤𑁂𑀯𑀺𑀬𑀸𑀯𑀘𑀦𑀁𑀲𑀼𑀢𑁆𑀯𑀸 ¶ ,

𑀥𑀫𑁆𑀫𑀭𑀸𑀚𑀸𑀥𑀫𑁆𑀫𑀜𑁆𑀘𑀭𑁄;

𑀥𑀫𑁆𑀫𑁂𑀦𑀥𑀫𑁆𑀫𑀺𑀓𑀁𑀩𑁆𑀭𑀽𑀲𑀺,

𑀫𑀳𑁂𑀲𑀺𑀁 𑀧𑀼𑀢𑁆𑀢𑀲𑁄𑀓𑀺𑀦𑀺𑀁.

𑁨𑁭𑁩.

𑀏𑀲𑁄𑀯𑁂𑀲𑁆𑀲𑀦𑁆𑀢𑀭𑁄𑀪𑀤𑁆𑀤𑁂,

𑀧𑀸𑀡𑀸𑀧𑀺𑀬𑀢𑀭𑁄𑀳𑀺𑀫𑁂;

𑀢𑀣𑀸𑀧𑀺𑀦𑀁 𑀧𑀩𑁆𑀩𑀸𑀚𑁂𑀫𑀺,

𑀥𑀫𑁆𑀫𑀲𑀢𑁆𑀣𑀯𑀲𑀸𑀦𑀼𑀕𑁄.

𑁨𑁭𑁪.

𑀲𑀻𑀯𑀺𑀭𑀝𑁆𑀞𑀫𑁆𑀳𑀺𑀧𑁄𑀭𑀸𑀡- ¶

𑀭𑀸𑀚𑀽𑀦𑀁𑀥𑀫𑁆𑀫𑀢𑀦𑁆𑀢𑀺𑀬𑀸;

𑀅𑀳𑀜𑁆𑀳𑀺𑀧𑀘𑀺𑀢𑀺𑀁𑀓𑀼𑀫𑁆𑀫𑀺,

𑀯𑀺𑀦𑀬𑀦𑁆𑀢𑁄𑀫𑀫𑁄𑀭𑀲𑀁.

𑁨𑁭𑁫.

𑀭𑀜𑁆𑀜𑁄𑀢𑀁 𑀯𑀘𑀦𑀁𑀲𑀼𑀢𑁆𑀯𑀸,

𑀔𑀺𑀦𑁆𑀦𑀸𑀳𑀤𑀬𑀓𑀫𑁆𑀧𑀺𑀦𑀻;

𑀧𑀼𑀦𑀲𑀸𑀧𑀭𑀺𑀤𑁂𑀯𑀦𑁆𑀢𑀻,

𑀏𑀯𑀁𑀯𑀺𑀮𑀯𑀺𑀨𑀼𑀲𑁆𑀲𑀢𑀻.

𑁨𑁭𑁬.

𑀬𑀲𑁆𑀲𑀧𑀼𑀩𑁆𑀩𑁂𑀥𑀚𑀕𑁆𑀕𑀸𑀦𑀺,

𑀓𑀡𑀺𑀓𑀸𑀭𑀸𑀯𑀧𑀼𑀧𑁆𑀨𑀺𑀢𑀸;

𑀬𑀸𑀬𑀦𑁆𑀢𑀫𑀦𑀼𑀬𑀸𑀬𑀦𑁆𑀢𑀺,

𑀲𑁆𑀯𑀚𑁆𑀚𑁂𑀓𑁄𑀯𑀕𑀫𑀺𑀲𑁆𑀲𑀢𑀺.

𑁨𑁭𑁭.

𑀇𑀦𑁆𑀤𑀕𑁄𑀧𑀓𑀯𑀡𑁆𑀡𑀸𑀪𑀸 ¶ ,

𑀕𑀦𑁆𑀥𑀸𑀭𑀸 𑀧𑀡𑁆𑀟𑀼𑀓𑀫𑁆𑀧𑀮𑀸;

𑀬𑀸𑀬𑀦𑁆𑀢𑀫𑀦𑀼𑀬𑀸𑀬𑀦𑁆𑀢𑀺,

𑀲𑁆𑀯𑀚𑁆𑀚𑁂𑀓𑁄𑀯𑀕𑀫𑀺𑀲𑁆𑀲𑀲𑀺.

𑁨𑁭𑁮.

𑀬𑁄𑀧𑀼𑀩𑁆𑀩𑁂𑀳𑀢𑁆𑀣𑀺𑀦𑀸𑀬𑀸𑀢𑀺,

𑀲𑀺𑀯𑀺𑀓𑀸𑀬𑀭𑀣𑁂𑀦𑀘;

𑀲𑁆𑀯𑀚𑁆𑀚𑀯𑁂𑀲𑁆𑀲𑀭𑁄𑀭𑀸𑀚𑀸,

𑀓𑀣𑀁𑀕𑀘𑁆𑀙𑀢𑀺𑀧𑀢𑁆𑀣𑀺𑀓𑀸.

𑁨𑁭𑁯.

𑀓𑀣𑀁𑀘𑀦𑁆𑀤𑀦𑀮𑀺𑀢𑁆𑀢𑀗𑁆𑀕𑁄 ¶ ,

𑀦𑀘𑁆𑀘𑀕𑀻𑀢𑀧𑀩𑁄𑀥𑀦𑁄;

𑀔𑀼𑀭𑀸𑀚𑀺𑀦𑀁 𑀨𑀭𑀼𑀲𑀜𑁆𑀘,

𑀔𑀸𑀭𑀺𑀓𑀸𑀚𑀜𑁆𑀘𑀳𑀸𑀳𑀺𑀢𑀺.

𑁨𑁮𑁦.

𑀧𑀯𑀻𑀲𑀦𑁆𑀢𑁄 𑀩𑁆𑀭𑀳𑀸𑀭𑀜𑁆𑀜𑀁,

𑀓𑀸𑀲𑀸𑀯𑀁 𑀅𑀚𑀺𑀦𑀸 𑀦𑀺𑀯𑀸;

𑀔𑀭𑀁 𑀓𑀼𑀲 𑀫𑀬𑀁 𑀘𑀻𑀭𑀁,

𑀓𑀣𑀁 𑀧𑀭𑀺 𑀤𑀳𑀺𑀲𑁆𑀲𑀢𑀺.

𑁨𑁮𑁧.

𑀓𑀸𑀲𑀺𑀬𑀸𑀦𑀺𑀘 ¶ 𑀥𑀭𑁂𑀢𑁆𑀯𑀸,

𑀔𑁄𑀫𑀓𑁄 𑀝𑀼𑀫𑁆𑀧𑀭𑀸𑀦𑀺𑀘;

𑀓𑀼𑀲𑀘𑀻𑀭𑀸𑀦𑀺 𑀥𑀸𑀭𑁂𑀦𑁆𑀢𑀻,

𑀓𑀣𑀁𑀫𑀤𑁆𑀤𑀻𑀓𑀭𑀺𑀲𑁆𑀲𑀢𑀺.

𑁨𑁮𑁨.

𑀯𑀬𑁆𑀳𑀸𑀳𑀺 𑀧𑀭𑀺𑀬𑀸𑀬𑀺𑀢𑁆𑀯𑀸,

𑀲𑀺𑀯𑀺𑀓𑀸𑀬 𑀭𑀣𑁂𑀦𑀘,

𑀲𑀸𑀓𑀣𑀚𑁆𑀚 𑀅𑀦𑀼𑀚𑁆𑀛𑀗𑁆𑀕𑀻,

𑀧𑀣𑀁 𑀕𑀘𑁆𑀙𑀢𑀺 𑀧𑀢𑁆𑀣𑀺𑀓𑀸.

𑁨𑁮𑁩.

𑀲𑀼𑀔𑁂𑀥𑀺𑀢𑀸𑀳𑀺𑀳𑀺𑀭𑀜𑁆𑀜- ¶

𑀧𑀸𑀤𑀼𑀓𑀸𑀭𑀼𑀴𑁆𑀳𑀕𑀸𑀫𑀺𑀦𑀻,

𑀲𑀸𑀓𑀣𑀚𑁆𑀚𑀲𑀼𑀔𑀸𑀦𑀦𑁆𑀤𑀻,

𑀧𑀣𑀁𑀕𑀘𑁆𑀙𑀢𑀺𑀧𑀢𑁆𑀣𑀺𑀓𑀸.

𑁨𑁮𑁪.

𑀕𑀦𑁆𑀢𑁆𑀯𑀸𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀁,

𑀧𑀽𑀭𑀢𑁄𑀬𑀸𑀳𑀺𑀫𑀸𑀮𑀺𑀦𑀻;

𑀲𑀸𑀓𑀣𑀚𑁆𑀚𑀬𑀲𑀸𑀦𑀦𑁆𑀤𑀻,

𑀯𑀦𑀁𑀕𑀘𑁆𑀙𑀢𑀺𑀏𑀓𑀺𑀓𑀸.

𑁨𑁮𑁫.

𑀲𑀤𑁆𑀤𑀁𑀲𑀺𑀯𑀸𑀬𑀲𑀼𑀢𑁆𑀯𑀸𑀬𑀸 ¶ ,

𑀫𑀼𑀳𑀼𑀁𑀉𑀢𑁆𑀢𑀲𑁆𑀲𑀢𑁂𑀧𑀼𑀭𑁂;

𑀯𑀲𑀦𑁆𑀢𑀻𑀲𑀸𑀩𑁆𑀭𑀳𑀸𑀭𑀜𑁆𑀜𑁂,

𑀓𑀣𑀁 𑀯𑀘𑁆𑀙𑀢𑀺𑀪𑀻𑀭𑀼𑀓𑀸.

𑁨𑁮𑁯.

𑀲𑀤𑁆𑀤𑀁𑀲𑀼𑀢𑁆𑀯𑀸𑀦𑀼𑀮𑀼𑀗𑁆𑀓𑀲𑁆𑀲,

𑀫𑀼𑀳𑀼𑀁𑀉𑀢𑁆𑀢𑀲𑀢𑁂𑀧𑀼𑀭𑁂;

𑀯𑀲𑀦𑁆𑀢𑀻𑀲𑀸𑀩𑁆𑀭𑀳𑀸𑀭𑀜𑁆𑀜𑁂,

𑀓𑀣𑀁𑀯𑀘𑁆𑀙𑀢𑀺𑀪𑀻𑀭𑀼𑀓𑀸.

𑁨𑁮𑁭.

𑀲𑀓𑀼𑀡𑀻𑀳𑀢 ¶ 𑀧𑀼𑀢𑁆𑀢𑀸𑀯,

𑀲𑀼𑀜𑁆𑀜𑀁𑀤𑀺𑀲𑁆𑀯𑀸 𑀓𑀼𑀮𑀸𑀯𑀓𑀁;

𑀘𑀻𑀭𑀁𑀤𑀼𑀓𑁆𑀔𑁂𑀦 𑀛𑀸𑀬𑀺𑀲𑁆𑀲𑀁,

𑀲𑀼𑀜𑁆𑀜𑀁𑀆𑀕𑀫𑁆𑀫𑀺𑀫𑀁𑀧𑀼𑀭𑀁.

𑁨𑁮𑁮.

𑀓𑀼𑀭𑀼𑀭𑀻 𑀳𑀢𑀙𑀸𑀧𑀸𑀯,

𑀲𑀼𑀜𑁆𑀜𑀁𑀤𑀺𑀲𑁆𑀯𑀸 𑀓𑀼𑀮𑀸𑀯𑀓𑀁;

𑀢𑁂𑀦𑀢𑁂𑀦 𑀧𑀥𑀸𑀯𑀺𑀲𑁆𑀲𑀁,

𑀧𑀺𑀬𑁂𑀧𑀼𑀢𑁆𑀢𑁂𑀅𑀧𑀲𑁆𑀲𑀢𑀻.

𑁨𑁮𑁯.

𑀏𑀯𑀁𑀫𑁂𑀯𑀺𑀮 ¶ 𑀧𑀦𑁆𑀢𑀺𑀬𑀸,

𑀭𑀸𑀚𑀧𑀼𑀢𑁆𑀢𑀁 𑀅𑀤𑀽𑀲𑀓𑀁;

𑀧𑀩𑁆𑀩𑀸𑀚𑁂𑀲𑀺 𑀯𑀦𑀁𑀭𑀝𑁆𑀞𑀸,

𑀫𑀜𑁆𑀜𑁂𑀳𑀺𑀲𑁆𑀲𑀸𑀫𑀺𑀚𑀻𑀯𑀺𑀢𑀁.

𑁨𑁯𑁦.

𑀨𑀼𑀲𑁆𑀲𑀢𑁆𑀬𑀸 𑀮𑀯𑀺𑀢𑀁𑀲𑀼𑀢𑁆𑀯𑀸,

𑀲𑀩𑁆𑀩𑀸 𑀲𑀺𑀜𑁆𑀘𑀬𑀭𑀸 𑀚𑀺𑀦𑁄;

𑀩𑀸𑀳𑀸𑀧𑀕𑁆𑀕𑀬𑁆𑀳 𑀧𑀓𑁆𑀓𑀦𑁆𑀤𑀼𑀁,

𑀲𑀺𑀯𑀺𑀓𑀜𑁆𑀜𑀸 𑀲𑀫𑀸𑀕𑀢𑀸.

𑁨𑁯𑁧.

𑀧𑀓𑁆𑀓𑀦𑁆𑀤𑀺𑀢𑀭𑀯𑀁𑀢𑀸𑀲𑀁 ¶ ,

𑀲𑀼𑀢𑁆𑀯𑀸 𑀲𑁄𑀓𑀧𑀫𑀤𑁆𑀤𑀺𑀢𑀸;

𑀲𑀺𑀯𑀺𑀓𑀜𑁆𑀜𑀸𑀘 𑀧𑀓𑁆𑀓𑀦𑁆𑀤𑀼𑀁,

𑀯𑁂𑀲𑁆𑀲𑀦𑁆𑀢𑀭𑀦𑀺𑀯𑁂𑀲𑀦𑁂.

𑁨𑁯𑁨.

𑀑𑀭𑁄𑀥𑀸𑀘 𑀓𑀼𑀫𑀸𑀭𑀸𑀘,

𑀯𑁂𑀲𑀺𑀬𑀸𑀦𑀸 𑀩𑁆𑀭𑀳𑁆𑀫𑀡𑀸;

𑀩𑀸𑀳𑀸𑀧𑀕𑁆𑀕𑀬𑁆𑀳𑀧𑀓𑁆𑀓𑀦𑁆𑀤𑀼𑀁,

𑀯𑁂𑀲𑁆𑀲𑀦𑁆𑀢𑀭𑀦𑀺𑀯𑁂𑀲𑀦𑁂.

𑁨𑁯𑁩.

𑀳𑀢𑁆𑀣𑀸𑀭𑁄𑀳𑀸𑀅𑀦𑀻𑀓𑀝𑁆𑀞𑀸 ¶ ,

𑀭𑀣𑀺𑀓𑀸 𑀧𑀢𑁆𑀣𑀺𑀓𑀸𑀭𑀓𑀸;

𑀩𑀸𑀳𑀸𑀧𑀕𑁆𑀕𑀬𑁆𑀳 𑀧𑀓𑁆𑀓𑀦𑁆𑀤𑀼𑀁,

𑀯𑁂𑀲𑁆𑀲𑀦𑁆𑀢𑀭 𑀦𑀺𑀯𑁂𑀲𑀦𑁂.

𑁨𑁯𑁪.

𑀢𑀲𑁆𑀲𑀸𑀭𑀢𑁆𑀬𑀸 𑀅𑀘𑁆𑀘𑀬𑁂𑀦,

𑀲𑀽𑀭𑀺𑀬𑁂 𑀉𑀕𑁆𑀕𑀢𑁂𑀲𑀢𑀺;

𑀆𑀭𑁄𑀘𑀬𑀺𑀁𑀲𑀼 𑀭𑀸𑀚𑀸𑀦𑀁,

𑀤𑀸𑀦𑀕𑁆𑀕𑀁 𑀉𑀧𑀕𑀦𑁆𑀢𑀯𑁂.

𑁨𑁯𑁫.

𑀅𑀣𑀧𑀸𑀢𑁄𑀯 𑀲𑁄𑀭𑀸𑀚𑀸,

𑀦𑁆𑀳𑀢𑁆𑀯𑀸𑀪𑀽𑀲𑀦 𑀪𑀽𑀲𑀺𑀢𑁄;

𑀤𑀸𑀦𑀲𑀸𑀮 𑀫𑀼𑀧𑀸𑀕𑀜𑁆𑀙𑀺,

𑀫𑀳𑀸𑀚𑀦 𑀧𑀼𑀭𑀓𑁆𑀔𑀢𑁄.

𑁨𑁯𑁬.

𑀤𑀸𑀦𑀲𑀸𑀮𑀸𑀲𑀼 ¶ 𑀤𑀸𑀢𑀩𑁆𑀩𑀁,

𑀤𑀺𑀲𑁆𑀯𑀸𑀦 𑀧𑀝𑀺𑀬𑀸𑀤𑀺𑀢𑀁;

𑀅𑀫𑀘𑁆𑀘𑁂𑀯 𑀫𑀸𑀡𑀸𑀧𑁂𑀲𑀺,

𑀭𑀸𑀚𑀸𑀪𑀺 𑀢𑀼𑀝𑁆𑀞𑀫𑀸𑀦𑀢𑁄.

𑁨𑁯𑁭.

𑀯𑀢𑁆𑀢𑀸𑀦𑀺𑀯𑀢𑁆𑀣𑀓𑀸𑀫𑀸𑀦𑀁,

𑀲𑁄𑀡𑁆𑀟𑀸𑀦𑀁 𑀤𑁂𑀣𑀯𑀸𑀭𑀼𑀡𑀺𑀁;

𑀪𑁄𑀚𑀦𑀁 𑀪𑁄𑀚𑀦𑀢𑁆𑀣𑀺𑀦𑀁,

𑀲𑀫𑁆𑀫𑀤𑁂𑀯 𑀧𑀯𑀘𑁆𑀙𑀣.

𑁨𑁯𑁮.

𑀬𑁂𑀬𑀁𑀬𑀁 ¶ 𑀮𑀤𑁆𑀥𑀼𑀫𑀺𑀘𑁆𑀙𑀦𑁆𑀢𑀺,

𑀢𑀁𑀢𑀁𑀢𑀲𑁆𑀲𑀧𑀯𑀘𑁆𑀙𑀣;

𑀫𑀸𑀬𑀸𑀘𑀓𑁂 𑀦𑀺𑀯𑀸𑀭𑁂𑀣,

𑀤𑀸𑀦𑀲𑀸𑀮𑀸𑀲𑀼 𑀆𑀕𑀢𑁂.

𑁨𑁯𑁯.

𑀢𑀤𑀸𑀲𑀺𑀬𑀁 𑀪𑀻𑀲𑀦𑀓𑀁,

𑀢𑀤𑀸𑀲𑀺 𑀮𑁄𑀫𑀳𑀁𑀲𑀦𑀁;

𑀫𑀳𑀸𑀤𑀸𑀦𑁂 𑀧𑀤𑀺𑀦𑁆𑀦𑀫𑁆𑀳𑀺

𑀫𑁂𑀤𑀺𑀦𑀻 𑀲𑀫𑁆𑀧𑀓𑀫𑁆𑀧𑀣.

𑁩𑁦𑁦.

𑀧𑀭𑀺𑀤𑁂𑀯𑀺𑀁𑀲𑀼 𑀯𑁂𑀲𑁆𑀲𑀦𑁆𑀢𑁆𑀢-

𑀭𑀭𑀸𑀚𑀁 𑀧𑀢𑀺𑀢𑀸𑀯𑀤𑁂;

𑀧𑀓𑀺𑀢𑁆𑀢𑁂𑀢𑁆𑀯𑀸𑀦 𑀦𑀸𑀦𑀧𑁆𑀧-

𑀓𑀸𑀭𑀁 𑀏𑀯𑀁 𑀯𑀡𑀺𑀩𑁆𑀩𑀓𑀸.

𑁩𑁦𑁧.

𑀅𑀫𑁆𑀳𑁂𑀳𑀺𑀢𑁆𑀯𑀸𑀦 ¶ 𑀯𑁂𑀲𑁆𑀲𑀦𑁆𑀢-

𑀭𑀭𑀸𑀚𑀸 𑀤𑀸𑀦𑀤𑀸𑀬𑀓𑁄;

𑀅𑀘𑀺𑀭𑁂 𑀦𑁂𑀯 𑀭𑀝𑁆𑀞𑀫𑁆𑀳𑀸,

𑀦𑀺𑀓𑁆𑀔𑀫𑀺𑀲𑁆𑀲𑀢𑀺𑀓𑀸𑀦𑀦𑀁.

𑁩𑁦𑁨.

𑀲𑀢𑁆𑀢𑀳𑀢𑁆𑀣𑀺𑀲𑀢𑁂𑀤𑀢𑁆𑀯𑀸,

𑀲𑀩𑁆𑀩𑀸𑀮𑀗𑁆𑀓𑀸𑀭 𑀪𑀽𑀲𑀺𑀢𑁂;

𑀏𑀲𑀯𑁂𑀲𑁆𑀲𑀦𑁆𑀢𑀭𑁄 𑀲𑀫𑁆𑀳𑀸,

𑀭𑀝𑁆𑀞𑀫𑁆𑀳𑀸 𑀦𑀺𑀓𑁆𑀔𑀫𑀺𑀲𑁆𑀲𑀢𑀺.

𑁩𑁦𑁩.

𑀲𑀢𑁆𑀢𑀅𑀲𑁆𑀲 𑀲𑀢𑁂 𑀤𑀢𑁆𑀯𑀸,

𑀲𑀺𑀦𑁆𑀥𑀯𑁂 𑀲𑀻𑀖 𑀯𑀸𑀳𑀦𑁂;

𑀏𑀲 𑀯𑁂𑀲𑁆𑀲𑀦𑁆𑀢𑀭𑁄𑀲𑀫𑁆𑀳𑀸,

𑀭𑀝𑁆𑀞𑀫𑁆𑀳𑀸 𑀦𑀺𑀓𑁆𑀔𑀫𑀺𑀲𑁆𑀲𑀢𑀺.

𑁩𑁦𑁪.

𑀭𑀣𑁂𑀲𑀢𑁆𑀢𑀲𑀢𑁂𑀤𑀢𑁆𑀯𑀸 ¶ ,

𑀲𑀦𑁆𑀦𑀦𑁆𑀥𑁂 𑀉𑀲𑁆𑀲𑀺𑀢𑀤𑁆𑀥𑀚𑁂;

𑀏𑀲 𑀯𑁂𑀲𑁆𑀲𑀦𑁆𑀢𑀭𑁄𑀲𑀫𑁆𑀳𑀸,

𑀭𑀝𑁆𑀞𑀫𑁆𑀳𑀸 𑀦𑀺𑀓𑁆𑀔𑀫𑀺𑀲𑁆𑀲𑀢𑀺.

𑁩𑁦𑁫.

𑀲𑀢𑁆𑀢𑀓𑀜𑁆𑀜𑀸 𑀲𑀢𑁂𑀤𑀢𑁆𑀯𑀸,

𑀲𑀼𑀭𑀽𑀧𑀺𑀦𑀻 𑀯𑀺𑀪𑀽𑀲𑀺𑀢𑀸;

𑀏𑀲 𑀯𑁂𑀲𑁆𑀲𑀦𑁆𑀢𑀭𑁄𑀲𑀫𑁆𑀳𑀸,

𑀭𑀝𑁆𑀞𑀫𑁆𑀳𑀸 𑀦𑀺𑀓𑁆𑀔𑀫𑀺𑀲𑁆𑀲𑀢𑀺.

𑁩𑁦𑁬.

𑀲𑀢𑁆𑀢𑀥𑁂𑀦𑀼 ¶ 𑀲𑀢𑁂 𑀤𑀢𑁆𑀯𑀸,

𑀲𑀩𑁆𑀩𑀸𑀓𑀁𑀲𑀼 𑀧𑀥𑀸𑀭𑀡𑀸;

𑀏𑀲𑀯𑁂𑀲𑁆𑀲𑀦𑁆𑀢𑀭𑁄𑀭𑀸𑀚𑀸,

𑀲𑀫𑁆𑀳𑀸𑀭𑀝𑁆𑀞𑀸𑀦𑀺𑀭𑀘𑁆𑀙𑀢𑀺.

𑁩𑁦𑁭.

𑀲𑀢𑁆𑀢𑀤𑀸𑀲𑀺 𑀲𑀢𑁂 𑀤𑀢𑁆𑀯𑀸,

𑀲𑀢𑁆𑀢𑀤𑀸𑀲 𑀲𑀢𑀸𑀦𑀺𑀘;

𑀏𑀲𑀯𑁂𑀲𑁆𑀲𑀦𑁆𑀢𑀭𑁄𑀭𑀸𑀚𑀸,

𑀲𑀫𑁆𑀳𑀸𑀭𑀝𑁆𑀞𑀸𑀦𑀺𑀭𑀘𑁆𑀙𑀢𑀺.

𑁩𑁦𑁮.

𑀅𑀣𑁂𑀢𑁆𑀣𑀯𑀢𑁆𑀢𑀢𑁂𑀲𑀤𑁆𑀤𑁄,

𑀢𑀼𑀫𑀼𑀮𑁄𑀪𑁂 𑀭𑀯𑁄𑀫𑀳𑀸;

𑀲𑀫𑀸𑀓𑀼𑀮𑀁 𑀧𑀼𑀭𑀁𑀆𑀲𑀺,

𑀅𑀳𑁄𑀲𑀺 𑀮𑁄𑀫𑀳𑀁𑀲𑀦𑀁.

𑁩𑁦𑁯.

𑀲𑁄𑀤𑀢𑁆𑀯𑀸𑀦 ¶ 𑀫𑀳𑀸𑀤𑀸𑀦𑀁,

𑀯𑁂𑀲𑁆𑀲𑀦𑁆𑀢𑀭𑁄 𑀅𑀫𑀘𑁆𑀙𑀭𑀻;

𑀧𑀼𑀭𑀓𑁆𑀔𑀢𑁄 𑀅𑀫𑀘𑁆𑀘𑁂𑀳𑀺,

𑀅𑀕𑀸𑀲𑀓𑀦𑀺𑀯𑁂𑀲𑀦𑀁.

𑁩𑁧𑁦.

𑀢𑀢𑁄𑀳𑀺 𑀫𑀤𑁆𑀤𑀺𑀬𑀸𑀲𑀤𑁆𑀥𑀺𑀁,

𑀫𑀸𑀢𑀸𑀧𑀺𑀢𑀽𑀦 𑀲𑀦𑁆𑀢𑀺𑀓𑀁;

𑀯𑀦𑁆𑀤𑀦𑀢𑁆𑀣𑀸𑀬 𑀅𑀕𑀜𑁆𑀙𑀺,

𑀅𑀮𑀗𑁆𑀓𑀢 𑀭𑀣𑁂𑀦𑀲𑁄.

𑁩𑁧𑁧.

𑀯𑀦𑁆𑀤𑀺𑀢𑁆𑀯𑀸 ¶ 𑀧𑀺𑀢𑀭𑀁𑀩𑁄𑀥𑀺-

𑀲𑀢𑁆𑀢𑁄𑀩𑁆𑀭𑀯𑀺𑀓𑀢𑀜𑁆𑀚𑀮𑀻;

𑀏𑀯𑀁𑀆𑀯𑀻𑀓𑀭𑁄𑀦𑁆𑀢𑁄𑀯,

𑀕𑀫𑀺𑀲𑁆𑀲𑀫𑀸𑀦𑀅𑀜𑁆𑀚𑀲𑀁.

𑁩𑁧𑁨.

𑀫𑀫𑀁𑀢𑀸𑀢 𑀧𑀩𑁆𑀩𑀸𑀚𑁂𑀲𑀺,

𑀬𑀫𑁆𑀳𑀸𑀭𑀝𑁆𑀞𑀸 𑀅𑀤𑀽𑀲𑀓𑀁;

𑀲𑀺𑀯𑀻𑀦𑀁 𑀯𑀘𑀦𑀢𑁆𑀣𑁂𑀦,

𑀢𑁂𑀦𑀁-𑀕𑀘𑁆𑀙𑀸𑀫𑀺 𑀓𑀸𑀦𑀦𑀁.

𑁩𑁧𑁩.

𑀲𑀼𑀯𑁂𑀅𑀳𑀁 𑀫𑀳𑀸𑀭𑀸𑀚,

𑀲𑀽𑀭𑀺𑀬𑀼𑀕𑁆𑀕 𑀫𑀦𑁂 𑀲𑀢𑀺,

𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺 𑀭𑀝𑁆𑀞𑀫𑁆𑀳𑀸,

𑀯𑀗𑁆𑀓𑀁 𑀕𑀘𑁆𑀙𑀸𑀫𑀺 𑀧𑀩𑁆𑀩𑀢𑀁.

𑁩𑁧𑁪.

𑀯𑀦𑁂𑀯𑀸𑀴 ¶ 𑀫𑀺𑀕𑀸𑀓𑀺𑀡𑁆𑀡𑁂,

𑀔𑀕𑁆𑀕𑀤𑀻𑀧𑀺𑀦𑀺𑀇𑀲𑁂 𑀯𑀺𑀢𑁂;

𑀅𑀳𑀁𑀧𑀼𑀜𑁆𑀜𑀸𑀦𑀺 𑀓𑀭𑁄𑀫𑀺,

𑀢𑀼𑀫𑁆𑀳𑁂 𑀧𑀗𑁆𑀓𑀫𑁆𑀳𑀻 𑀲𑀻𑀤𑀣.

𑁩𑁧𑁫.

𑀢𑀢𑁄𑀲𑁄𑀢𑀭𑀫𑀸𑀦𑁄𑀯,

𑀕𑀦𑁆𑀢𑁆𑀯𑀸𑀦𑀫𑀸𑀓𑀼𑀲𑀦𑁆𑀢𑀺𑀓𑀁;

𑀯𑀦𑁆𑀤𑀫𑀸𑀦𑁄𑀆𑀭𑁄𑀘𑀺𑀢𑁆𑀢,

𑀏𑀯𑀁𑀜𑁆𑀳𑀺𑀲𑀓𑀫𑀸𑀢𑀼𑀬𑀸.

𑁩𑁧𑁬.

𑀅𑀦𑀼𑀚𑀸𑀦𑀸𑀳𑀺𑀫𑀁𑀅𑀫𑁆𑀫𑀸,

𑀕𑀘𑁆𑀙𑀸𑀫𑀺𑀯𑀗𑁆𑀓𑀧𑀩𑁆𑀩𑀢𑀁;

𑀯𑀦𑁂𑀧𑀼𑀜𑁆𑀜𑀸𑀦𑀺𑀓𑀸𑀳𑀸𑀫𑀺 ¶ ,

𑀧𑀩𑁆𑀩𑀚𑁆𑀚𑀸𑀫𑀫𑀭𑀼𑀘𑁆𑀘𑀢𑀺.

𑁩𑁧𑁭.

𑀢𑀁𑀲𑀼𑀢𑁆𑀢𑁆𑀯𑀸𑀭𑀼𑀡𑁆𑀡𑀫𑀼𑀔𑁂𑀦,

𑀚𑀦𑀦𑀻𑀏𑀯𑀫𑀩𑁆𑀭𑀯𑀻;

𑀅𑀦𑀼𑀚𑀸𑀦𑀸𑀫𑀺𑀢𑀁𑀯𑀼𑀢𑁆𑀢𑀁,

𑀧𑀩𑁆𑀩𑀚𑁆𑀚𑀸𑀢𑁂𑀲𑀫𑀺𑀚𑁆𑀛𑀪𑀼.

𑁩𑁧𑁮.

𑀅𑀬𑀜𑁆𑀳𑀺𑀯𑀼𑀢𑁆𑀢 𑀫𑁂𑀫𑀤𑁆𑀤𑀻,

𑀲𑀼𑀡𑁆𑀳𑀸 𑀲𑀼𑀔𑀼𑀫𑀯𑀤𑁆𑀥𑀺𑀦𑀻;

𑀅𑀘𑁆𑀙𑀢𑀁 𑀲𑀳 𑀯𑀼𑀢𑁆𑀢𑁂𑀳𑀺,

𑀓𑀺𑀁 𑀅𑀭𑀜𑁆𑀜𑁂𑀓𑀭𑀺𑀲𑁆𑀲𑀢𑀺.

𑁩𑁧𑁯.

𑀫𑀸𑀢𑀼𑀬𑀸𑀯𑀘𑀦𑀁𑀲𑀼𑀢𑁆𑀯𑀸 ¶ ,

𑀯𑁂𑀲𑁆𑀲𑀦𑁆𑀢𑀭𑁄 𑀓𑀢𑀜𑁆𑀚𑀮𑀻;

𑀫𑁆𑀳𑀺𑀢𑀧𑀼𑀩𑁆𑀩𑀫𑀪𑀸 𑀲𑀺𑀢𑁆𑀢,

𑀜𑀸𑀧𑁂𑀦𑁆𑀢𑁄𑀅𑀢𑁆𑀢𑀦𑁄𑀫𑀢𑀺𑀁.

𑁩𑁨𑁦.

𑀦𑀸𑀳𑀁𑀅𑀓𑀸 𑀫𑀸𑀤𑀸𑀲𑀁𑀯𑀺,

𑀅𑀭𑀜𑁆𑀜𑀁𑀦𑁂𑀢𑀼 𑀫𑀼𑀲𑁆𑀲𑀳𑁂;

𑀲𑀘𑁂𑀇𑀘𑁆𑀙 𑀢𑀺𑀅𑀦𑁆𑀯𑁂𑀢𑀼,

𑀲𑀘𑁂𑀦𑀺𑀘𑁆𑀙𑀢𑀺 𑀅𑀘𑁆𑀙𑀢𑀼.

𑁩𑁨𑁧.

𑀢𑀢𑁄𑀲𑀼𑀡𑁆𑀳𑀁𑀫𑀳𑀸𑀭𑀸𑀚𑀸 ¶ ,

𑀬𑀸𑀘𑀺𑀢𑀼𑀁𑀧𑀝𑀺𑀧𑀚𑁆𑀚𑀣;

𑀫𑀸𑀘𑀦𑁆𑀤𑀦𑀲𑀫𑀸𑀘𑀸𑀭𑁂,

𑀭𑀚𑁄𑀚𑀮𑁆𑀮𑀁𑀫𑀥𑀸𑀭𑀬𑀺.

𑁩𑁨𑁨.

𑀓𑀸𑀲𑀺𑀬𑀸𑀦𑀺𑀘𑀥𑀸𑀭𑁂𑀢𑁆𑀯𑀸,

𑀓𑀼𑀲𑀘𑀻𑀭𑀫𑀥𑀸𑀭𑀬𑀺;

𑀤𑀼𑀓𑁆𑀔𑁄𑀯𑀸𑀲𑁄𑀅𑀭𑀜𑁆𑀜𑀲𑁆𑀫𑀺𑀁,

𑀫𑀸𑀳𑀺𑀢𑁆𑀯𑀁𑀮𑀓𑁆𑀔𑀡𑁂𑀕𑀫𑀺.

𑁩𑁨𑁩.

𑀢𑀢𑁄 ¶ 𑀧𑀢𑀺𑀩𑁆𑀩𑀢𑀸 𑀲𑀼𑀡𑁆𑀳𑀸,

𑀲𑀲𑁆𑀲𑀼𑀭𑀁 𑀏𑀯𑀫𑀩𑁆𑀭𑀯𑀻;

𑀦𑀸𑀳𑀁 𑀢𑀁𑀲𑀼𑀔𑀫𑀺𑀘𑁆𑀙𑀬𑁆𑀬𑀁,

𑀬𑀁𑀫𑁂 𑀯𑁂𑀲𑁆𑀲𑀦𑁆𑀢𑀭𑀁 𑀯𑀺𑀦𑀸.

𑁩𑁨𑁪.

𑀢𑀢𑁄 𑀲𑀼𑀡𑁆𑀳𑀁 𑀫𑀳𑀸𑀭𑀸𑀚𑀸,

𑀤𑀼𑀲𑁆𑀲𑀳𑀸𑀦𑀺 𑀩𑁆𑀭𑀳𑀸𑀯𑀦𑁂;

𑀦𑀸𑀦𑀸𑀪𑀬𑀸𑀦𑀺 𑀜𑀸𑀧𑁂𑀦𑁆𑀢𑁄,

𑀯𑀦𑀁 𑀬𑀸𑀘𑀺 𑀅𑀕𑀦𑁆𑀢𑀯𑁂.

𑁩𑁨𑁫.

𑀬𑀸𑀦 𑀲𑀦𑁆𑀢𑀺 𑀫𑀳𑀸𑀭𑀸𑀚,

𑀪𑀬𑀸𑀦𑀺𑀢𑀸𑀦𑀺 𑀓𑀸𑀦𑀦𑁂;

𑀲𑀩𑁆𑀩𑀸𑀦𑀺 ¶ 𑀳𑀁 𑀲𑀳𑀺𑀲𑁆𑀲𑀫𑀺,

𑀅𑀦𑀼𑀕𑀘𑁆𑀙𑀸𑀫𑀺 𑀫𑁂𑀧𑀢𑀺𑀁.

𑁩𑁨𑁬.

𑀧𑀽𑀭𑀢𑁄𑀳𑀁 𑀕𑀫𑀺𑀲𑁆𑀲𑀸𑀫𑀺,

𑀤𑀤𑀦𑁆𑀢𑀻 𑀪𑀢𑁆𑀣𑀼𑀦𑁄 𑀧𑀣𑀁;

𑀉𑀭𑀲𑀸 𑀧𑀦𑀼𑀤𑀳𑀺𑀢𑁆𑀯𑀸𑀦,

𑀓𑀼𑀲 𑀦𑀴 𑀯𑀦𑀸𑀤𑀬𑁄.

𑁩𑁨𑁭.

𑀩𑀳𑀽𑀳𑀺 𑀯𑀢𑀯𑀭𑀺𑀬𑀸𑀳𑀺,

𑀓𑀼𑀫𑀸𑀭𑀻 𑀯𑀺𑀦𑁆𑀤𑀢𑁂 𑀧𑀢𑀺𑀁;

𑀯𑁂𑀥𑀩𑁆𑀬𑀁 𑀓𑀝𑀼𑀓𑀁 𑀮𑁄𑀓𑁂,

𑀕𑀘𑁆𑀙𑀜𑁆𑀜𑁂𑀯 𑀭𑀣𑁂𑀲𑀪.

𑁩𑁨𑁮.

𑀦𑀸𑀦𑀸𑀓𑀸𑀭𑁂𑀳𑀺 ¶ 𑀧𑀻𑀴𑁂𑀦𑁆𑀢𑀺,

𑀅𑀦𑀸𑀣𑀁𑀯𑀺𑀥𑀯𑀁 𑀚𑀦𑀸;

𑀅𑀢𑀺𑀯𑀸𑀓𑁆𑀬𑁂𑀦 𑀪𑀸𑀲𑀦𑁆𑀢𑀺,

𑀫𑀺𑀢𑁆𑀢𑀸𑀘𑀸𑀧𑀺 𑀲𑀮𑁄𑀳𑀺𑀢𑀸.

𑁩𑁨𑁯.

𑀦𑀕𑁆𑀕𑀸 𑀦𑀤𑀻 𑀅𑀦𑀽𑀤𑀓𑀸,

𑀦𑀕𑁆𑀕𑀁 𑀭𑀝𑁆𑀞𑀁 𑀅𑀭𑀸𑀚𑀓𑀁;

𑀇𑀢𑁆𑀣𑀻𑀧𑀺 𑀯𑀺𑀥𑀯𑀸 𑀦𑀕𑁆𑀕𑀸,

𑀬𑀲𑁆𑀲𑀸𑀲𑀼𑀁𑀤𑀲 𑀪𑀸𑀢𑀭𑁄.

𑁩𑁩𑁦.

𑀥𑀚𑁄 ¶ 𑀭𑀣𑀲𑁆𑀲 𑀧𑀜𑁆𑀜𑀸𑀦𑀁,

𑀥𑀼𑀫𑁄 𑀧𑀜𑁆𑀜𑀸 𑀦𑀫𑀕𑁆𑀕𑀺𑀦𑁄;

𑀭𑀸𑀚𑀸 𑀭𑀝𑁆𑀞𑀲𑁆𑀲 𑀧𑀜𑁆𑀜𑀸𑀦𑀁,

𑀪𑀢𑁆𑀢𑀸 𑀧𑀜𑁆𑀜𑀸𑀦𑀫𑀺𑀢𑁆𑀣𑀺𑀬𑀸.

𑁩𑁩𑁧.

𑀬𑀸 𑀤𑀮𑀺𑀤𑁆𑀤𑀲𑁆𑀲 𑀧𑁄𑀲𑀲𑁆𑀲,

𑀤𑀮𑀺𑀤𑁆𑀤𑀻 𑀪𑀭𑀺𑀬𑀸 𑀲𑀺𑀬𑀸;

𑀅𑀟𑁆𑀠𑀸 𑀅𑀟𑁆𑀠𑀲𑁆𑀲 𑀭𑀸𑀚𑀺𑀦𑁆𑀤,

𑀢𑀁 𑀯𑁂 𑀤𑁂𑀯𑀸 𑀧𑀲𑀁𑀲𑀭𑁂.

𑁩𑁩𑁨.

𑀓𑀣𑀁 𑀦𑀼𑀢𑀸𑀲𑀁 𑀳𑀤𑀬𑀁,

𑀲𑀼𑀔𑀭𑀸𑀯𑀢 𑀇𑀢𑁆𑀣𑀺𑀬𑁄;

𑀬𑀸 ¶ 𑀲𑀸𑀫𑀺𑀓𑁂 𑀤𑀼𑀓𑁆𑀔𑀺𑀢𑀫𑁆𑀳𑀺,

𑀲𑀼𑀔𑀫𑀺𑀘𑁆𑀙𑀦𑁆𑀢𑀺 𑀅𑀢𑁆𑀢𑀦𑁄.

𑁩𑁩𑁩.

𑀅𑀧𑀺𑀲𑀸𑀕𑀭𑀧𑀭𑀺𑀬𑀦𑁆𑀢𑀁,

𑀩𑀳𑀼𑀯𑀺𑀢𑁆𑀢𑀥𑀭𑀁𑀫𑀳𑀺𑀁;

𑀦𑀸𑀦𑀸𑀭𑀢𑀦𑀧𑀭𑀺𑀧𑀽𑀭𑀁,

𑀦𑀺𑀘𑁆𑀙𑁂𑀯𑁂𑀲𑁆𑀲𑀦𑁆𑀢𑀭𑀁𑀯𑀺𑀦𑀸.

𑁩𑁩𑁪.

𑀲𑀸𑀫𑀺𑀓𑀁 𑀅𑀦𑀼𑀕𑀘𑁆𑀙𑀺𑀲𑁆𑀲𑀁,

𑀅𑀳𑀁 𑀓𑀸𑀲𑀸𑀬𑀯𑀸𑀲𑀺𑀦𑀻;

𑀥𑀻𑀭𑀢𑁆𑀣𑀼𑀢𑀁 ¶ 𑀦𑀺𑀲𑁆𑀲𑀻𑀭𑀺𑀓𑀁,

𑀯𑁂𑀥𑀩𑁆𑀬𑀁𑀬𑀜𑁆𑀘 𑀦𑀸𑀭𑀺𑀬𑀸.

𑁩𑁩𑁫.

𑀲𑀼𑀡𑁆𑀳𑀸𑀬 𑀪𑀸𑀲𑀺𑀢𑀁 𑀲𑀼𑀢𑁆𑀯𑀸,

𑀲𑀲𑁆𑀲𑀼𑀭𑁄 𑀦𑀺𑀓𑁆𑀔𑀺𑀧𑁂𑀢𑀯𑁂;

𑀤𑀼𑀯𑁂 𑀇𑀥𑁂𑀯 𑀦𑀢𑁆𑀢𑀸𑀭𑁄,

𑀲𑀼𑀡𑁆𑀳𑀁𑀲𑁄 𑀏𑀯 𑀫𑀩𑁆𑀭𑀯𑀻.

𑁩𑁩𑁬.

𑀇𑀫𑁂𑀢𑁂 𑀤𑀳𑀭𑀸𑀧𑀼𑀢𑁆𑀢𑀸,

𑀚𑀸𑀮𑀻𑀓𑀡𑁆𑀳𑀸𑀚𑀺𑀦𑀸 𑀘𑀼𑀪𑁄;

𑀦𑀺𑀓𑁆𑀔𑀺𑀧𑁆𑀧 𑀮𑀓𑁆𑀔𑀡𑁂 𑀕𑀘𑁆𑀙,

𑀫𑀬𑀁𑀢𑁂 𑀧𑁄𑀲𑀺𑀲𑀸𑀫𑀲𑁂.

𑁩𑁩𑁭.

𑀧𑀺𑀬𑀸𑀫𑁂 ¶ 𑀧𑀼𑀢𑁆𑀢𑀓𑀸 𑀤𑁂𑀯,

𑀚𑀸𑀮𑀻 𑀓𑀡𑁆𑀳𑀸𑀚𑀺𑀦𑀸 𑀘𑀼𑀪𑁄;

𑀢𑁆𑀬𑀫𑁆𑀳𑀁 𑀢𑀢𑁆𑀣 𑀭𑀫𑁂𑀲𑁆𑀲𑀦𑁆𑀢𑀺,

𑀅𑀭𑀜𑁆𑀜𑁂 𑀚𑀻𑀯𑀺𑀲𑁄 𑀓𑀺𑀦𑀁.

𑁩𑁩𑁮.

𑀧𑀼𑀢𑁆𑀢𑁂𑀦𑁂𑀢𑁆𑀯𑀸𑀦 𑀕𑀘𑁆𑀙𑀸𑀫,

𑀤𑁆𑀯𑁂𑀫𑀬𑀁 𑀯𑀗𑁆𑀓𑀧𑀩𑁆𑀩𑀢𑀁,

𑀤𑀓𑁆𑀔𑀫𑀸𑀦𑀸 𑀯𑀲𑀺𑀲𑁆𑀲𑀸𑀫,

𑀏𑀢𑁂 𑀧𑀫𑁄𑀤𑀫𑀸𑀦𑀲𑀸.

𑁩𑁩𑁯.

𑀲𑀼𑀡𑀫𑀸𑀦𑀸 ¶ 𑀯𑀲𑀺𑀲𑁆𑀲𑀸𑀫,

𑀕𑀻𑀢𑀜𑁆𑀘 𑀯𑀺𑀬𑀪𑀸𑀡𑀺𑀦𑀁;

𑀏𑀢𑁂𑀲𑀁 𑀦𑀘𑁆𑀘𑀫𑀸𑀦𑀸𑀦𑀁,

𑀅𑀭𑀜𑁆𑀜𑁂 𑀫𑀸𑀮𑀥𑀸𑀭𑀺𑀦𑀁.

𑁩𑁪𑁦.

𑀲𑀼𑀡𑁆𑀳𑀸𑀬 𑀪𑀸𑀲𑀺𑀢𑀁𑀲𑀼𑀢𑁆𑀯𑀸,

𑀲𑀲𑁆𑀲𑀼𑀭𑁄𑀔𑀺𑀦𑁆𑀦 𑀫𑀸𑀦𑀲𑁄;

𑀏𑀯𑀜𑁆𑀳𑀺𑀲𑁄 𑀯𑀺𑀮𑀯𑀺𑀢𑁆𑀣,

𑀧𑀝𑀺𑀘𑁆𑀘𑀤𑀸𑀭𑀓𑁂 𑀤𑀼𑀯𑁂.

𑁩𑁪𑁧.

𑀲𑀸𑀮𑀺𑀦𑀁 ¶ 𑀑𑀤𑀦𑀁 𑀪𑀼𑀢𑁆𑀯𑀸,

𑀲𑀼𑀘𑀺𑀁 𑀫𑀁𑀲𑀼𑀧𑀲𑁂𑀘𑀦𑀁;

𑀭𑀼𑀓𑁆𑀔𑀨𑀮𑀸𑀦𑀺 𑀪𑀼𑀜𑁆𑀚𑀦𑁆𑀢𑀸,

𑀓𑀣𑀁𑀓𑀸𑀳𑀦𑁆𑀢𑀺 𑀤𑀸𑀭𑀓𑀸.

𑁩𑁪𑁨.

𑀪𑀼𑀢𑁆𑀯𑀸 𑀲𑀢𑀧𑀮𑁂 𑀓𑀁𑀲𑁂,

𑀲𑁄𑀯𑀡𑁆𑀡𑁂 𑀲𑀢𑀭𑀸𑀚𑀺𑀢𑁂;

𑀭𑀼𑀓𑁆𑀔𑀧𑀢𑁆𑀢𑁂𑀲𑀼 𑀪𑀼𑀜𑁆𑀚𑀦𑁆𑀢𑀸,

𑀓𑀣𑀁𑀓𑀸𑀳𑀦𑁆𑀢𑀺 𑀤𑀸𑀭𑀓𑀸.

𑁩𑁪𑁩.

𑀓𑀸𑀲𑀺𑀬𑀸𑀦𑀺𑀘 𑀥𑀸𑀭𑁂𑀢𑁆𑀯𑀸,

𑀔𑁄𑀫 𑀓𑁄𑀝𑀼𑀫𑁆𑀧𑀭𑀸𑀦𑀺𑀘;

𑀓𑀼𑀲𑀘𑀻𑀭𑀸𑀦𑀺 ¶ 𑀥𑀸𑀭𑁂𑀦𑁆𑀢𑀸,

𑀓𑀣𑀁 𑀓𑀸𑀳𑀦𑁆𑀢𑀺 𑀤𑀸𑀭𑀓𑀸.

𑁩𑁪𑁪.

𑀯𑀬𑁆𑀳𑀸𑀳𑀺𑀧𑀭𑀺𑀬𑀸𑀬𑀺𑀢𑁆𑀯𑀸,

𑀲𑀺𑀯𑀺𑀓𑀸𑀬 𑀭𑀣𑁂𑀦𑀘;

𑀧𑀢𑁆𑀣𑀺𑀓𑀸 𑀧𑀭𑀺𑀥𑀸𑀯𑀦𑁆𑀢𑀸,

𑀓𑀣𑀁 𑀓𑀸𑀳𑀦𑁆𑀢𑀺 𑀤𑀸𑀭𑀓𑀸.

𑁩𑁪𑁫.

𑀓𑀼𑀝𑀸𑀕𑀸𑀭𑁂 𑀲𑀬𑀺𑀢𑁆𑀯𑀸𑀦,

𑀦𑀺𑀯𑀸𑀢𑁂 𑀨𑀼𑀲𑀺𑀢𑀕𑁆𑀕𑀮𑁂;

𑀲𑀬𑀦𑁆𑀢𑀸 𑀭𑀼𑀓𑁆𑀔𑀫𑀽𑀮𑀲𑁆𑀫𑀺𑀁,

𑀓𑀣𑀁𑀓𑀸𑀳𑀦𑁆𑀢𑀺 𑀤𑀸𑀭𑀓𑀸.

𑁩𑁪𑁬.

𑀧𑀮𑁆𑀮𑀗𑁆𑀓𑁂𑀲𑀼 ¶ 𑀲𑀬𑀺𑀢𑁆𑀯𑀸𑀦,

𑀕𑁄𑀦𑀓𑁂 𑀘𑀺𑀢𑁆𑀢𑀲𑀦𑁆𑀣𑀢𑁂;

𑀲𑀬𑀦𑁆𑀢𑀸 𑀢𑀺𑀡𑀲𑀦𑁆𑀣𑀸𑀭𑁂,

𑀓𑀣𑀁𑀓𑀸𑀳𑀦𑁆𑀢𑀺 𑀤𑀸𑀭𑀓𑀸.

𑁩𑁪𑁭.

𑀕𑀦𑁆𑀥𑀓𑁂𑀦 𑀯𑀺𑀮𑀺𑀫𑁆𑀧𑁂𑀢𑁆𑀯𑀸,

𑀅𑀕𑀮𑀼𑀘𑀦𑁆𑀤𑀦𑁂𑀦𑀘;

𑀭𑀚𑁄𑀚𑀮𑁆𑀮𑀸𑀦𑀺 𑀥𑀸𑀭𑁂𑀦𑁆𑀢𑀸,

𑀓𑀣𑀁𑀓𑀸𑀳𑀦𑁆𑀢𑀺 𑀤𑀸𑀭𑀓𑀸.

𑁩𑁪𑁮.

𑀘𑀸𑀫𑀭𑀻 ¶ 𑀫𑁄𑀭 𑀳𑀢𑁆𑀣𑁂𑀳𑀺,

𑀩𑀻𑀚𑀺𑀢𑀗𑁆𑀕𑀸 𑀲𑀼𑀔𑁂𑀥𑀺𑀢𑀸;

𑀨𑀼𑀝𑁆𑀞𑀸 𑀟𑀁𑀲𑁂𑀳𑀺 𑀫𑀓𑀲𑁂𑀳𑀺,

𑀓𑀣𑀁𑀓𑀸𑀳𑀦𑁆𑀢𑀺 𑀤𑀸𑀭𑀓𑀸.

𑁩𑁪𑁯.

𑀢𑀳𑀺𑀁𑀯𑀁𑀩𑁆𑀭𑀯𑀺 𑀭𑀸𑀚𑀸𑀦𑀁,

𑀯𑀺𑀮𑀧𑀦𑁆𑀢𑀁 𑀲𑁄𑀓𑀝𑁆𑀝𑀺𑀢𑀁;

𑀧𑀝𑀺𑀘𑁆𑀘 𑀤𑀸𑀭𑀓𑁂 𑀲𑀼𑀡𑁆𑀳𑀸,

𑀯𑁂𑀲𑁆𑀲𑀦𑁆𑀢𑀭𑀧𑀺𑀬𑀜𑁆𑀚𑀦𑀸.

𑁩𑁫𑁦.

𑀫𑀸 ¶ 𑀤𑁂𑀯 𑀧𑀭𑀺𑀤𑁂𑀯𑁂𑀲𑀺,

𑀫𑀸𑀘 𑀢𑁆𑀯𑀁 𑀯𑀺𑀫𑀦𑁄𑀅𑀳𑀼;

𑀬𑀣𑀸𑀫𑀬𑀁 𑀪𑀯𑀺𑀲𑁆𑀲𑀸𑀫,

𑀢𑀣𑀸 𑀳𑁂𑀲𑁆𑀲𑀦𑁆𑀢𑀺 𑀤𑀸𑀭𑀓𑀸.

𑁩𑁫𑁧.

𑀏𑀯𑀜𑁆𑀳𑀺 𑀲𑀮𑁆𑀮𑀧𑀦𑁆𑀢𑀸𑀦𑀁,

𑀢𑁂𑀲𑀁 𑀔𑀢𑁆𑀢𑀺𑀬𑀚𑀸𑀢𑀺𑀦𑀁;

𑀅𑀜𑁆𑀜𑁄𑀜𑁆𑀜𑀁 𑀯𑀺𑀪𑀸𑀢𑀸 𑀭𑀢𑁆𑀢𑀺,

𑀲𑀫𑀼𑀕𑁆𑀕𑀜𑁆𑀙𑀺𑀢𑁆𑀣 𑀲𑀽𑀭𑀺𑀬𑁄.

𑁩𑁫𑁨.

𑀢𑀤𑀸𑀦𑁂𑀢𑁆𑀯𑀸 ¶ 𑀞𑀧𑀬𑀺𑀁𑀲𑀼,

𑀘𑀢𑀼𑀲𑀺𑀦𑁆𑀥𑀯𑀬𑀼𑀜𑁆𑀚𑀺𑀢𑀁;

𑀅𑀮𑀗𑁆𑀓𑀢 𑀭𑀣𑀁𑀭𑀸𑀚-

𑀤𑁆𑀯𑀸𑀭𑁂 𑀫𑀗𑁆𑀕𑀮𑀲𑀫𑁆𑀫𑀢𑀁.

𑁩𑁫𑁩.

𑀯𑀦𑁆𑀤𑀺𑀢𑁆𑀯𑀸 𑀲𑀲𑁆𑀲𑀼𑀭𑁂 𑀫𑀤𑁆𑀤𑀻,

𑀆𑀤𑀸𑀬 𑀧𑀼𑀢𑁆𑀢𑀓𑁂 𑀤𑀼𑀯𑁂;

𑀪𑀢𑁆𑀢𑀼𑀦𑁄 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸,

𑀧𑀣𑀫𑀁 𑀭𑀣𑀫𑀸𑀭𑀼𑀳𑀺.

𑁩𑁫𑁪.

𑀢𑀢𑁄𑀯𑁂𑀲𑁆𑀲𑀦𑁆𑀢𑀭𑁄𑀫𑀸𑀢𑀸-

𑀧𑀺𑀢𑀭𑁄 𑀅𑀢𑀺𑀯𑀦𑁆𑀤𑀺𑀬;

𑀧𑀤𑀓𑁆𑀔𑀺𑀡𑀜𑁆𑀘 𑀓𑀢𑁆𑀯𑀸𑀦,

𑀲𑀻𑀖𑀲𑁄 𑀭𑀣𑀫𑀸𑀭𑀼𑀳𑀺.

𑁩𑁫𑁫.

𑀢𑀢𑁄 ¶ 𑀫𑀗𑁆𑀕𑀮𑀤𑁆𑀯𑀸𑀭𑁂𑀦,

𑀭𑀣𑀁 𑀧𑁂𑀲𑁂𑀲𑀺 𑀮𑀗𑁆𑀓𑀢𑀁;

𑀢𑁄𑀲𑀸𑀧𑀬𑀁 𑀫𑀳𑀸𑀲𑀢𑁆𑀢𑁄,

𑀫𑀤𑁆𑀤𑀺𑀁 𑀚𑀸𑀮𑀺𑀲𑁆𑀲 𑀫𑀸𑀢𑀭𑀁.

𑁩𑁫𑁬.

𑀧𑀣𑀦𑁆𑀢𑁂𑀲𑀼 𑀪𑀺𑀯𑀦𑁆𑀤𑀦𑁆𑀢𑀺,

𑀲𑀓𑁆𑀓𑀘𑁆𑀘𑀁 𑀩𑀳𑀯𑁄 𑀚𑀦𑀸;

𑀯𑁂𑀲𑁆𑀲𑀦𑁆𑀢𑀭𑀜𑁆𑀘 𑀫𑀤𑁆𑀤𑀺𑀜𑁆𑀘,

𑀧𑀲𑁆𑀲𑀫𑀸𑀦𑀸 𑀓𑀢𑀜𑁆𑀘𑀮𑀻.

𑁩𑁫𑁭.

𑀆𑀧𑀼𑀘𑁆𑀙𑀦𑁆𑀢𑁄𑀘 ¶ 𑀧𑀓𑁆𑀓𑀸𑀫𑀺,

𑀕𑀘𑁆𑀙𑀺𑀲𑁆𑀲𑀸𑀫𑀻𑀳𑀺 𑀧𑀢𑁆𑀣𑀬𑀁;

𑀦𑀺𑀤𑀼𑀓𑁆𑀔𑀸 𑀲𑀼𑀔𑀺𑀢𑀸𑀳𑁄𑀣,

𑀇𑀢𑀺𑀲𑁄 𑀯𑀦𑁆𑀤𑀓𑁂 𑀚𑀦𑁂.

𑁩𑁫𑁮.

𑀭𑀣𑁂 𑀞𑀺𑀢𑁄𑀯 𑀲𑁄𑀭𑀸𑀚𑀸,

𑀑𑀯𑀤𑀦𑁆𑀢𑁄 𑀅𑀧𑀓𑁆𑀓𑀫𑀺;

𑀤𑀸𑀦𑀆𑀤𑀻𑀦𑀺 𑀧𑀼𑀜𑁆𑀜𑀸𑀦𑀺,

𑀓𑀭𑁄𑀣𑀸𑀢𑀺 𑀫𑀳𑀸𑀚𑀦𑀁.

𑁩𑁫𑁯.

𑀕𑀘𑁆𑀙𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑀫𑁆𑀳𑀺,

𑀫𑀸𑀢𑀸 𑀏𑀯𑀜𑁆𑀳𑀺 𑀘𑀺𑀦𑁆𑀢𑀬𑀺;

𑀤𑀸𑀢𑀼𑀓𑀸𑀫𑁄𑀲𑀺 𑀫𑁂𑀯𑀼𑀢𑁆𑀢𑁄,

𑀧𑀝𑁆𑀞𑀸𑀬 𑀚𑀸𑀢𑀓𑀸𑀮𑀢𑁄.

𑁩𑁬𑁦.

𑀢𑀢𑁄𑀤𑀸𑀦𑀁 ¶ 𑀤𑀤𑁄𑀧𑁂𑀢𑀼𑀁,

𑀧𑀼𑀢𑁆𑀢𑀁𑀭𑀢𑀦 𑀧𑀽𑀭𑀺𑀢𑁂;

𑀧𑀼𑀢𑁆𑀢𑀲𑁆𑀲𑀼𑀪𑁄𑀲𑀼 𑀧𑀲𑁆𑀲𑁂𑀲𑀼,

𑀧𑁂𑀲𑁂𑀲𑀺 𑀲𑀓𑀝𑁂𑀩𑀳𑀽.

𑁩𑁬𑁧.

𑀯𑁂𑀲𑁆𑀲𑀦𑁆𑀢𑀭𑁄𑀳𑀺 𑀲𑀫𑁆𑀧𑀭𑁄𑀳𑀺 𑀲𑀫𑁆𑀧𑀢𑁆𑀢-

𑀬𑀸𑀘𑀓𑀸𑀦𑀁 𑀅𑀲𑁂𑀲𑀓𑀁;

𑀅𑀝𑁆𑀞𑀸𑀭𑀲𑀯𑀸𑀭𑁂 𑀤𑀸𑀲𑀺,

𑀓𑀸𑀬𑀸𑀭𑀼𑀴𑁆𑀳𑀁𑀧𑀺𑀅𑀢𑁆𑀢𑀦𑁄.

𑁩𑁬𑁨.

𑀦𑀕𑀭𑀸 ¶ 𑀦𑀺𑀓𑁆𑀔𑀫𑀦𑁆𑀢𑀫𑁆𑀳𑀺,

𑀯𑁂𑀲𑁆𑀲𑀦𑁆𑀢𑀭𑁂𑀲 𑀧𑁂𑀢𑁆𑀢𑀺𑀓𑀁;

𑀦𑀕𑀭𑀁 𑀤𑀝𑁆𑀞𑀼𑀓𑀸𑀫𑁄𑀲𑀺,

𑀢𑀤𑀸 𑀲𑀗𑁆𑀓𑀫𑁆𑀧𑀺 𑀫𑁂𑀤𑀦𑀻.

𑁩𑁬𑁩.

𑀢𑀳𑀺𑀁 𑀭𑀣𑀧𑁆𑀧𑀫𑀸𑀡𑀫𑁆𑀳𑀺,

𑀞𑀸𑀦𑁂 𑀪𑀺𑀚𑁆𑀚𑀺𑀬 𑀫𑁂𑀤𑀦𑀻,

𑀧𑀭𑀺𑀯𑀢𑁆𑀢𑀺𑀢𑁆𑀣 𑀓𑀼𑀮𑀸𑀮-

𑀘𑀓𑁆𑀓𑀁𑀯𑀦𑀕𑀭𑀸𑀫𑀼𑀔𑀻.

𑁩𑁬𑁪.

𑀦𑀕𑀭𑀁 𑀑𑀮𑁄𑀓𑁂𑀢𑁆𑀯𑀸𑀦,

𑀦𑀕𑀭𑀸𑀪𑀺𑀫𑀼𑀔𑁂 𑀭𑀣𑁂,

𑀞𑀺𑀢𑁄𑀫𑀤𑁆𑀤𑀺𑀁𑀧𑀺 𑀤𑀓𑁆𑀔𑁂𑀢𑀼𑀁,

𑀏𑀯𑀁𑀲𑁄𑀩𑁆𑀭𑀯𑀺 𑀳𑀸𑀲𑀬𑀁.

𑁩𑁬𑁫.

𑀇𑀗𑁆𑀖 ¶ 𑀫𑀤𑁆𑀤𑀺 𑀦𑀺𑀲𑀸𑀫𑁂𑀳𑀺,

𑀭𑀫𑁆𑀫𑀭𑀽𑀧𑀁𑀯 𑀤𑀺𑀲𑁆𑀲𑀢𑀺;

𑀆𑀯𑀸𑀲𑁄 𑀲𑀺𑀯𑀺𑀲𑁂𑀝𑁆𑀞𑀲𑁆𑀲,

𑀧𑁂𑀢𑁆𑀢𑀺𑀓𑀁 𑀪𑀯𑀦𑀁 𑀫𑀫.

𑁩𑁬𑁬.

𑀲𑀳𑀚𑀸𑀢𑀅𑀫𑀘𑁆𑀘𑁂𑀘,

𑀦𑀺𑀯𑀢𑁆𑀢𑁂𑀢𑁆𑀯𑀸 𑀫𑀳𑀸𑀚𑀦𑀁;

𑀭𑀣𑀁 𑀧𑀸𑀚𑁂𑀲𑀺 𑀲𑁄 𑀲𑀻𑀖𑀁,

𑀫𑁄𑀤𑀦𑁆𑀢𑁄𑀫𑀤𑁆𑀤𑀺𑀬𑀸𑀢𑀢𑁄.

𑁩𑁬𑁭.

𑀅𑀦𑁆𑀯𑀸𑀕𑀫𑀺𑀁𑀲𑀼 ¶ 𑀧𑀸𑀚𑁂𑀦𑁆𑀢𑀁,

𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀡𑀸 𑀢𑀳𑀺𑀁;

𑀬𑀸𑀘𑀺𑀢𑀼𑀁 𑀲𑀺𑀦𑁆𑀥𑀯𑁂 𑀏𑀢𑁂,

𑀫𑀤𑁆𑀤𑀻 𑀧𑀲𑁆𑀲𑀺𑀢𑁆𑀣 𑀢𑀸𑀯𑀤𑁂.

𑁩𑁬𑁮.

𑀫𑀤𑁆𑀤𑀻𑀧𑀺 𑀫𑀦𑁆𑀤𑀲𑀤𑁆𑀤𑁂𑀦,

𑀬𑀸𑀘𑀓𑀸 𑀯𑀺𑀬 𑀆𑀕𑀢𑀸;

𑀇𑀢𑁆𑀬𑀸𑀭𑁄𑀘𑁂𑀲𑀺 𑀪𑀢𑁆𑀢𑀸𑀭𑀁,

𑀕𑀡𑁆𑀳𑀦𑁆𑀢𑀻 𑀢𑀲𑁆𑀲 𑀧𑀺𑀝𑁆𑀞𑀺𑀬𑀁.

𑁩𑁬𑁯.

𑀲𑀸𑀥𑀼 ¶ 𑀪𑀤𑁆𑀤𑁂𑀢𑀺 𑀯𑀢𑁆𑀯𑀸𑀦,

𑀭𑀣𑀲𑁆𑀲𑀸𑀕𑀫𑀦𑀁 𑀅𑀓𑀸;

𑀩𑁆𑀭𑀳𑁆𑀫𑀡𑀸 𑀉𑀧𑀕𑀦𑁆𑀢𑁆𑀯𑀸𑀦,

𑀬𑀸𑀘𑀺𑀁𑀲𑀼 𑀲𑀺𑀦𑁆𑀥𑀯𑁂 𑀢𑀳𑀺𑀁.

𑁩𑁭𑁦.

𑀫𑁄𑀤𑀫𑀸𑀦𑁄𑀯 𑀲𑁄𑀤𑀸𑀲𑀺,

𑀩𑁆𑀭𑀳𑁆𑀫𑀡𑀸𑀦𑀁 𑀲𑀼𑀲𑀺𑀦𑁆𑀥𑀯𑁂;

𑀩𑁆𑀭𑀳𑁆𑀫𑀡𑀸𑀤𑀸𑀬 𑀕𑀜𑁆𑀙𑀺𑀁𑀲𑀼,

𑀅𑀲𑁆𑀲𑁂𑀲𑀓 𑀦𑀺𑀯𑁂𑀲𑀦𑀁.

𑁩𑁭𑁧.

𑀅𑀲𑁆𑀲𑁂𑀲𑀼 𑀧𑀦 𑀤𑀺𑀦𑁆𑀦𑁂𑀲𑀼,

𑀘𑀢𑁆𑀢𑀸𑀭𑁄 𑀤𑁂𑀯𑀧𑀼𑀢𑁆𑀢𑀓𑀸;

𑀭𑁄𑀳𑀺𑀘𑁆𑀘𑀫𑀺𑀕𑀯𑀡𑁆𑀡𑁂𑀦,

𑀭𑀣𑀁 𑀯𑀳𑀺𑀬 𑀕𑀜𑁆𑀙𑀺𑀲𑀼𑀁.

𑁩𑁭𑁨.

𑀤𑁂𑀯𑀸 ¶ 𑀭𑁄𑀳𑀺𑀘𑁆𑀘𑀯𑀡𑁆𑀡𑁂𑀦,

𑀯𑀳𑀦𑁆𑀢𑀻𑀢𑀺 𑀲𑀼𑀩𑀼𑀤𑁆𑀥𑀺𑀫𑀸;

𑀯𑀺𑀚𑀸𑀦𑀺𑀢𑁆𑀯𑀸𑀦 𑀫𑀤𑁆𑀤𑀺𑀁𑀧𑀺,

𑀜𑀸𑀧𑁂𑀦𑁆𑀢𑁄 𑀏𑀯𑀫𑀩𑁆𑀭𑀯𑀻.

𑁩𑁭𑁩.

𑀇𑀗𑁆𑀖𑀧𑁆𑀫𑀤𑁆𑀤𑀺 𑀦𑀺𑀲𑀸𑀫𑁂𑀳𑀺,

𑀘𑀺𑀢𑁆𑀢𑀭𑀽𑀧𑀁𑀯 𑀤𑀺𑀲𑁆𑀲𑀢𑀺;

𑀫𑀺𑀕𑀭𑁄 𑀳𑀺𑀘𑁆𑀘𑀯𑀡𑁆𑀡𑁂𑀦,

𑀤𑀓𑁆𑀔𑀺𑀡𑀲𑁆𑀲𑀸𑀯𑀳𑀦𑁆𑀢𑀺𑀫𑀁.

𑁩𑁭𑁪.

𑀫𑀤𑁆𑀤𑀻𑀘𑁂𑀯𑀁 ¶ 𑀦𑀺𑀘𑁆𑀙𑀸𑀭𑁂𑀲𑀺,

𑀕𑀺𑀭𑀁 𑀅𑀘𑁆𑀙𑁂𑀭𑀭𑀽𑀧𑀺𑀦𑀻;

𑀯𑁂𑀲𑁆𑀲𑀦𑁆𑀢𑀭𑀲𑁆𑀲𑀢𑁂𑀚𑁂𑀦,

𑀭𑀣𑀁𑀯𑀳𑀦𑁆𑀢𑀺𑀤𑁂𑀯𑀢𑀸.

𑁩𑁭𑁫.

𑀆𑀕𑀦𑁆𑀢𑁆𑀯𑀸𑀦 𑀭𑀣𑀁 𑀬𑀸𑀘𑀺,

𑀅𑀧𑀭𑁄 𑀩𑁆𑀭𑀸𑀳𑁆𑀫𑀡𑁄 𑀢𑀢𑁄;

𑀩𑁄𑀥𑀺𑀲𑀢𑁆𑀢𑁄𑀧𑀺𑀲𑁄𑀤𑀸𑀲𑀺,

𑀭𑀣𑀁 𑀢𑀲𑁆𑀲 𑀅𑀦𑀺𑀕𑁆𑀖𑀺𑀬𑀁.

𑁩𑁭𑁬.

𑀲𑀓𑀧𑁆𑀧𑀺𑀬𑁂 𑀤𑀤𑀦𑁆𑀢𑀫𑁆𑀳𑀺,

𑀫𑀤𑁆𑀤𑀻 𑀧𑀳𑀝𑁆𑀞𑀫𑀸𑀦𑀲𑀸;

𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑁂𑀲𑀺,

𑀲𑀤𑀸 𑀫𑀘𑁆𑀙𑁂𑀭𑀳𑀺𑀁𑀲𑀺𑀦𑀻.

𑁩𑁭𑁭.

𑀤𑀺𑀦𑁆𑀦𑁂 ¶ 𑀭𑀣𑀫𑁆𑀳𑀺 𑀅𑀦𑁆𑀢𑀭-

𑀥𑀸𑀭𑀺𑀬𑀺𑀁𑀲𑀼 𑀤𑁂𑀯𑀧𑀼𑀢𑁆𑀢𑀓𑀸;

𑀲𑀩𑁆𑀩𑁂 𑀢𑁂 𑀧𑀢𑁆𑀣𑀺𑀓𑀸 𑀆𑀲𑀼𑀁,

𑀭𑀸𑀚𑀸𑀫𑀤𑁆𑀤𑀺𑀁 𑀢𑀤𑀸𑀩𑁆𑀭𑀯𑀻.

𑁩𑁭𑁮.

𑀢𑁆𑀯𑀁 𑀫𑀤𑁆𑀤𑀺 𑀓𑀡𑁆𑀳𑀁𑀕𑀡𑁆𑀳𑀸𑀳𑀺,

𑀮𑀳𑀼𑀏𑀲𑀸 𑀓𑀦𑀺𑀝𑁆𑀞𑀓𑀸;

𑀅𑀳𑀁 𑀚𑀸𑀮𑀺𑀁 𑀕𑀳𑁂𑀲𑁆𑀲𑀸𑀫𑀺,

𑀕𑀭𑀼𑀓𑁄 𑀪𑀸𑀢𑀺𑀓𑁄𑀳𑀺𑀲𑁄.

𑁩𑁭𑁯.

𑀭𑀸𑀚𑀸 ¶ 𑀓𑀼𑀫𑀸𑀭𑀫𑀸𑀤𑀸𑀬,

𑀭𑀸𑀚𑀧𑀼𑀢𑁆𑀢𑀻𑀘 𑀤𑀸𑀭𑀺𑀓𑀁;

𑀲𑀫𑁆𑀫𑁄𑀤𑀫𑀸𑀦𑀸 𑀧𑀓𑁆𑀓𑀸𑀫𑀼𑀁,

𑀅𑀜𑁆𑀜𑀫𑀜𑁆𑀜 𑀧𑀺𑀬𑀁 𑀯𑀤𑀸.

𑁩𑁮𑁦.

𑀆𑀕𑀘𑁆𑀙𑀦𑁆𑀢𑁂 𑀧𑀝𑀺𑀧𑀣𑀁,

𑀤𑀺𑀲𑁆𑀯𑀸𑀦 𑀅𑀤𑁆𑀥𑀺𑀓𑁂𑀚𑀦𑁂;

𑀏𑀯𑀁 𑀧𑀼𑀘𑁆𑀙𑀺𑀬𑀕𑀜𑁆𑀙𑀺𑀁𑀲𑀼,

𑀓𑀼𑀳𑀺𑀁 𑀯𑀗𑁆𑀓𑀢𑀧𑀩𑁆𑀩𑀢𑁄.

𑁩𑁮𑁧.

𑀓𑀮𑀼𑀡𑀁 ¶ 𑀧𑀭𑀺𑀤𑁂𑀯𑀺𑀢𑁆𑀯𑀸,

𑀧𑀼𑀘𑁆𑀙𑀺𑀢𑀸 𑀅𑀤𑁆𑀥𑀺𑀓𑀸𑀚𑀦𑀸;

𑀏𑀯𑀁 𑀢𑁂 𑀧𑀝𑀺𑀯𑁂𑀤𑁂𑀲𑀼𑀁,

𑀤𑀽𑀭𑁂𑀯𑀗𑁆𑀓𑀢𑀧𑀩𑁆𑀩𑀢𑁄.

𑁩𑁮𑁨.

𑀫𑀕𑁆𑀕𑀸𑀲𑀦𑁆𑀦𑁂𑀲𑀼 𑀧𑀲𑁆𑀲𑀦𑁆𑀢𑀸,

𑀤𑀸𑀭𑀓𑀸 𑀨𑀮𑀺𑀦𑁂 𑀤𑀼𑀫𑁂;

𑀢𑁂𑀲𑀁𑀨𑀮𑀸𑀦𑀁 𑀳𑁂𑀢𑀼𑀫𑁆𑀳𑀺,

𑀧𑀺𑀢𑀭𑁄 𑀉𑀧𑀭𑁄𑀤𑀭𑁂.

𑁩𑁮𑁩.

𑀭𑁄𑀤𑀦𑁆𑀢𑁂 𑀤𑀸𑀭𑀓𑁂 𑀤𑀺𑀲𑁆𑀯𑀸,

𑀉𑀩𑁆𑀩𑀺𑀕𑁆𑀕𑀸 𑀯𑀺𑀧𑀼𑀮𑀸 𑀤𑀼𑀫𑀸;

𑀬𑀲𑀫𑁂𑀯𑁄𑀦𑀫𑀺𑀢𑁆𑀯𑀸𑀦,

𑀉𑀧𑀕𑀘𑁆𑀙𑀦𑁆𑀢𑀺 𑀤𑀸𑀭𑀓𑁂.

𑁩𑁮𑁪.

𑀇𑀤𑀁 ¶ 𑀅𑀘𑁆𑀙𑁂𑀭𑀓𑀁 𑀤𑀺𑀲𑁆𑀯𑀸,

𑀫𑀤𑁆𑀤𑀻 𑀲𑀲𑀗𑁆𑀓𑀲𑀦𑁆𑀦𑀺𑀪𑀸;

𑀧𑀺𑀢𑀺𑀧𑀼𑀡𑁆𑀡𑁂𑀦 𑀓𑀸𑀬𑁂𑀦,

𑀏𑀯𑀁𑀕𑀸𑀬𑀺𑀢𑁆𑀣 𑀦𑀦𑁆𑀤𑀦𑀸.

𑁩𑁮𑁫.

𑀅𑀘𑁆𑀙𑁂𑀭𑀁 𑀯𑀢 𑀮𑁄𑀓𑀲𑁆𑀫𑀺𑀁,

𑀅𑀩𑁆𑀪𑀽𑀢𑀁 𑀮𑁄𑀫𑀳𑀁𑀲𑀦𑀁,

𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀢𑁂𑀚𑁂𑀦;

𑀲𑀬𑀫𑁂 𑀯𑁄𑀦𑀢𑀸 𑀤𑀼𑀫𑀸.

𑁩𑁮𑁬.

𑀲𑀁𑀔𑀺𑀧𑀺𑀁𑀲𑀼 ¶ 𑀧𑀣𑀁 𑀬𑀓𑁆𑀔𑀸,

𑀅𑀦𑀼𑀓𑀫𑁆𑀧𑀸𑀬 𑀤𑀸𑀭𑀓𑁂;

𑀦𑀺𑀓𑁆𑀔𑀦𑁆𑀢𑀤𑀺𑀯𑀲𑁂𑀦𑁂𑀯,

𑀚𑁂𑀢𑀭𑀝𑁆𑀞𑀫𑀼𑀧𑀸𑀕𑀫𑀼𑀁.

𑁩𑁮𑁭.

𑀏𑀓𑀸𑀳𑁂𑀦𑁂𑀯𑀢𑁂 𑀢𑀺𑀁𑀲-

𑀬𑁄𑀚𑀦𑀸𑀦𑀺 𑀅𑀢𑀺𑀓𑁆𑀓𑀫𑀼𑀁;

𑀲𑀸𑀬𑀦𑁆𑀳𑁂 𑀫𑀸𑀢𑀼𑀮𑀁𑀦𑀸𑀫,

𑀲𑀫𑁆𑀧𑀢𑁆𑀢𑀸 𑀦𑀕𑀭𑀁 𑀲𑀼𑀪𑀁.

𑁩𑁮𑁮.

𑀦𑀕𑀭𑀲𑁆𑀲𑀲𑁆𑀲 𑀤𑁆𑀯𑀸𑀭𑀫𑁆𑀳𑀺,

𑀲𑀸𑀮𑀸𑀬𑀁 𑀦𑀺𑀲𑀺𑀤𑀺𑀁 𑀲𑀼𑀢𑁂;

𑀔𑁂𑀤𑀁 𑀯𑀺𑀦𑁄𑀤𑀫𑀸𑀦𑀸𑀯,

𑀢𑁄𑀲𑁂𑀦𑁆𑀢𑀸 𑀤𑀸𑀭𑀓𑁂 𑀤𑀼𑀯𑁂.

𑁩𑁮𑁯.

𑀫𑀤𑁆𑀤𑀻𑀧𑀺 ¶ 𑀩𑁄𑀥𑀺𑀲𑀢𑁆𑀢𑀲𑁆𑀲,

𑀭𑀚𑀁 𑀧𑀸𑀤𑁂𑀲𑀼 𑀧𑀼𑀜𑁆𑀙𑀺𑀬;

𑀲𑀫𑁆𑀩𑀳𑀺𑀢𑁆𑀯𑀸𑀦 𑀧𑀸𑀤𑁂𑀘,

𑀯𑀺𑀚𑀬𑀦𑁆𑀢𑀻 𑀞𑀺𑀢𑀸 𑀢𑀤𑀸.

𑁩𑁯𑁦.

𑀲𑀸𑀮𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸𑀦,

𑀪𑀢𑁆𑀢𑀼𑀘𑀓𑁆𑀔𑀼𑀧𑀣𑁂 𑀞𑀺𑀢𑀸;

𑀤𑀺𑀲𑁄𑀤𑀺𑀲𑀁 𑀑𑀮𑁄𑀓𑁂𑀲𑀺,

𑀫𑀤𑁆𑀤𑀻 𑀓𑀦𑁆𑀢𑀸𑀭𑀔𑁂𑀤𑀺𑀦𑀻.

𑁩𑁯𑁧.

𑀚𑁂𑀢𑀺𑀬𑁄 ¶ 𑀧𑀭𑀺𑀯𑀸𑀭𑀺𑀁𑀲𑀼,

𑀤𑀺𑀲𑁆𑀯𑀸𑀦 𑀅𑀲𑀳𑀸𑀬𑀺𑀓𑀁

𑀫𑀤𑁆𑀤𑀺𑀁 𑀏𑀯𑀁𑀉𑀕𑁆𑀖𑁄𑀲𑀺𑀁𑀲𑀼,

𑀇𑀢𑁆𑀣𑀻 𑀇𑀘𑁆𑀙𑁂𑀭𑀭𑀽𑀯𑀺𑀦𑀻.

𑁩𑁯𑁨.

𑀯𑀬𑁆𑀳𑀸𑀳𑀺 𑀧𑀭𑀺𑀬𑀸𑀬𑀺𑀢𑁆𑀯𑀸,

𑀲𑀺𑀯𑀺𑀓𑀸𑀬 𑀭𑀣𑁂𑀦𑀘;

𑀲𑀸𑀚𑁆𑀚 𑀫𑀤𑁆𑀤𑀻𑀅𑀭𑀜𑁆𑀜𑀲𑁆𑀫𑀺,

𑀧𑀢𑁆𑀣𑀺𑀓𑀸 𑀧𑀭𑀺𑀥𑀸𑀯𑀢𑀺.

𑁩𑁯𑁩.

𑀅𑀦𑀸𑀣𑀸𑀕𑀫𑀦𑀁 𑀫𑀤𑁆𑀤𑀺𑀁,

𑀪𑀢𑁆𑀢𑀸𑀭𑀸 𑀧𑀼𑀢𑁆𑀢𑀓𑁂𑀳𑀺𑀘,

𑀤𑀺𑀲𑁆𑀯𑀸𑀕𑀦𑁆𑀢𑁆𑀯𑀸𑀦𑀸 𑀘𑀺𑀓𑁆𑀔𑀁𑀲𑀼,

𑀚𑁂𑀢𑀺𑀦𑁆𑀤𑀸𑀦𑀁 𑀔𑀡𑁂𑀦 𑀢𑀸.

𑁩𑁯𑁪.

𑀢𑀁 ¶ 𑀲𑀼𑀢𑁆𑀯𑀸 𑀚𑁂𑀢𑀧𑀸𑀫𑁄𑀓𑁆𑀔𑀸,

𑀭𑁄𑀤𑀫𑀸𑀦𑀸 𑀉𑀧𑀸𑀕𑀫𑀼𑀁;

𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀧𑀸𑀤𑁂𑀲,

𑀦𑀺𑀧𑀘𑁆𑀘 𑀇𑀢𑀺 𑀧𑀼𑀘𑁆𑀙𑀺𑀲𑀼𑀁.

𑁩𑁯𑁫.

𑀓𑀺𑀘𑁆𑀘𑀺𑀦𑀼 𑀤𑁂𑀯 𑀓𑀼𑀲𑀮𑀁,

𑀓𑀺𑀘𑁆𑀘𑀺 𑀤𑁂𑀯 𑀅𑀦𑀸𑀫𑀬𑀁;

𑀓𑀺𑀘𑁆𑀘𑀺𑀧𑀺𑀢𑀸 𑀅𑀭𑁄𑀕𑁄𑀢𑁂,

𑀲𑀺𑀯𑀻𑀦𑀜𑁆𑀘 𑀅𑀦𑀸𑀫𑀬𑀁;

𑀓𑁄 𑀢𑁂 𑀩𑀮𑀁 𑀫𑀳𑀸𑀭𑀸𑀚,

𑀓𑁄𑀦𑀼 𑀢𑁂 𑀭𑀣𑀫𑀡𑁆𑀟𑀮𑀁.

𑁩𑁯𑁬.

𑀅𑀦𑀲𑁆𑀲𑀓𑁄 ¶ 𑀅𑀭𑀣𑀓𑁄,

𑀤𑀻𑀖𑀫𑀤𑁆𑀥𑀸𑀦 𑀫𑀸𑀕𑀢𑁄;

𑀓𑀺𑀘𑁆𑀘𑀸𑀫𑀺𑀢𑁆𑀢𑁂𑀳𑀺 𑀧𑀓𑀢𑁄,

𑀅𑀦𑀼𑀧𑁆𑀧𑀢𑁆𑀢𑁄 𑀲𑀺𑀫𑀁𑀤𑀺𑀲𑀁.

𑁩𑁯𑁭.

𑀅𑀣 𑀯𑁂𑀲𑁆𑀲𑀦𑁆𑀢𑀭𑁄𑀭𑀸𑀚𑀸,

𑀆𑀕𑀢𑀳𑁂𑀢𑀼𑀫𑀢𑁆𑀢𑀦𑁄;

𑀜𑀸𑀧𑁂𑀢𑀼𑀁 𑀚𑁂𑀢𑀭𑀸𑀚𑀽𑀦𑀁,

𑀇𑀫𑀸𑀕𑀸𑀣𑀸 𑀅𑀪𑀸𑀲𑀣.

𑁩𑁯𑁮.

𑀓𑀼𑀲𑀮𑀜𑁆𑀘𑁂𑀯 ¶ 𑀫𑁂𑀲𑀫𑁆𑀫,

𑀅𑀣𑁄 𑀲𑀫𑁆𑀫 𑀅𑀦𑀸𑀫𑀬𑀁;

𑀅𑀣𑁄 𑀯𑀺𑀪𑀸 𑀅𑀭𑁄𑀕𑁄𑀫𑁂,

𑀲𑀺𑀯𑀻𑀦𑀜𑁆𑀘 𑀆𑀦𑀸𑀫𑀬𑀁.

𑁩𑁯𑁯.

𑀅𑀳𑀜𑁆𑀳𑀺𑀓𑀼𑀜𑁆𑀚𑀭𑀁 𑀤𑀚𑁆𑀚𑀁,

𑀲𑀩𑁆𑀩𑀲𑁂𑀢𑀁 𑀕𑀚𑀼𑀢𑁆𑀢𑀫𑀁;

𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀸𑀮𑀗𑁆𑀓𑀸𑀭𑀁,

𑀔𑁂𑀢𑁆𑀢𑀜𑁆𑀜𑀼𑀁 𑀭𑀞𑀧𑀽𑀚𑀺𑀢𑀁.

𑁪𑁦𑁦.

𑀢𑀲𑁆𑀫𑀺𑀁 𑀫𑁂 𑀲𑀺𑀯𑀬𑁄𑀓𑀼𑀤𑁆𑀥𑀸,

𑀯𑀺𑀪𑀸 𑀉𑀧𑀳𑀢𑁄𑀫𑀦𑁄;

𑀅𑀯𑀭𑀼𑀤𑁆𑀥𑀲𑀺 𑀫𑀁 𑀭𑀸𑀚𑀸,

𑀯𑀗𑁆𑀓𑀁𑀕𑀘𑁆𑀙𑀸𑀫𑀺𑀧𑀩𑁆𑀩𑀢𑀁.

𑁪𑁦𑁧.

𑀢𑀤𑀸 ¶ 𑀢𑁂 𑀚𑁂𑀢𑀭𑀸𑀚𑀸𑀦𑁄,

𑀩𑀮𑀸𑀦𑀼𑀧𑁆𑀧𑀤𑀫𑀸𑀦𑀲𑀸;

𑀏𑀯𑀁 𑀢𑁄𑀲𑀺𑀁𑀲𑀼 𑀭𑀸𑀚𑀸𑀦𑀁,

𑀦𑀺𑀓𑁆𑀔𑀦𑁆𑀢𑀁 𑀲𑀓𑀭𑀞𑀢𑁄.

𑁪𑁦𑁨.

𑀲𑁆𑀯𑀸𑀕𑀢𑀦𑁆𑀢𑁂 𑀫𑀳𑀸𑀭𑀸𑀚,

𑀅𑀣𑁄𑀢𑁂𑀅𑀤𑀼𑀭𑀸𑀕𑀢𑀁;

𑀇𑀲𑁆𑀲𑀭𑁄 𑀲𑀺𑀅𑀦𑀼𑀧𑁆𑀧𑀢𑁆𑀢𑁄,

𑀬𑀁𑀇𑀥𑀢𑁆𑀣𑀺𑀧𑀯𑁂𑀤𑀬.

𑁪𑁦𑁩.

𑀇𑀥𑁂𑀯 ¶ 𑀢𑀸𑀯 𑀅𑀘𑁆𑀙𑀲𑁆𑀲𑀼,

𑀚𑁂𑀢𑀭𑀝𑁆𑀞𑁂 𑀭𑀣𑁂𑀲𑀪;

𑀬𑀸𑀯 𑀚𑁂𑀢𑀸 𑀕𑀫𑀺𑀲𑁆𑀲𑀦𑁆𑀢𑀺,

𑀭𑀜𑁆𑀜𑁄 𑀲𑀦𑁆𑀢𑀺𑀓 𑀬𑀸𑀘𑀺𑀢𑀼𑀁.

𑁪𑁦𑁪.

𑀢𑀤𑀸 𑀯𑁂𑀲𑁆𑀲𑀦𑁆𑀢𑀭𑁄 𑀆𑀳,

𑀫𑀸𑀯𑁄𑀕𑀫𑀺𑀢𑁆𑀣 𑀲𑀦𑁆𑀢𑀺𑀓𑀁;

𑀬𑀸𑀘𑀺𑀢𑀼𑀁 𑀫𑀫 𑀧𑀺𑀢𑀼𑀲𑁆𑀲,

𑀭𑀸𑀚𑀸𑀧𑀺 𑀢𑀢𑁆𑀣 𑀦𑀺𑀲𑁆𑀲𑀭𑁄.

𑁪𑁦𑁫.

𑀅𑀘𑁆𑀘𑀼𑀕𑁆𑀕𑀢𑀸𑀳𑀺 𑀲𑀺𑀯𑀬𑁄,

𑀩𑀮𑀕𑁆𑀕𑀸𑀦𑁂 𑀕𑀫𑀸𑀘𑀬𑁂,

𑀢𑁂𑀧𑀅𑀥𑀁𑀲𑀺 𑀢𑀼𑀫𑀺𑀘𑁆𑀙𑀦𑁆𑀢𑀺,

𑀭𑀸𑀚𑀸𑀦𑀁 𑀫𑀫 𑀓𑀸𑀭𑀡𑀸.

𑁪𑁦𑁬.

𑀲𑀘𑁂𑀏𑀯𑀁 ¶ 𑀫𑀳𑀸𑀭𑀸𑀚,

𑀲𑀺𑀬𑀸 𑀚𑁂𑀢𑀼𑀢𑁆𑀢𑀭𑁂 𑀧𑀼𑀭𑁂;

𑀇𑀥𑁂𑀯𑀭𑀚𑁆𑀚𑀁 𑀓𑀸𑀭𑁂𑀳𑀺,

𑀚𑁂𑀢𑁂𑀳𑀺 𑀧𑀭𑀺𑀯𑀸𑀭𑀺𑀢𑁄.

𑁪𑁦𑁭.

𑀇𑀤𑁆𑀥𑀁 𑀨𑀺𑀢𑀜𑁆𑀘𑀺𑀤𑀁𑀭𑀝𑁆𑀞𑀁,

𑀇𑀤𑁆𑀥𑁄 𑀚𑀦𑀧𑀤𑁄 𑀫𑀳𑀸;

𑀫𑀢𑀺𑀁 𑀓𑀭𑁄𑀳𑀺 𑀢𑁆𑀯𑀁 𑀤𑁂𑀯,

𑀭𑀚𑁆𑀚𑀲𑁆𑀲 𑀫𑀦𑀼𑀲𑁆𑀲𑀢𑀺𑀢𑀼𑀁.

𑁪𑁦𑁮.

𑀅𑀮𑀁 ¶ 𑀫𑁂 𑀭𑀚𑁆𑀚𑀲𑀼𑀔𑁂𑀦,

𑀧𑀩𑁆𑀩𑀸𑀚𑀺𑀢𑀲𑁆𑀲 𑀭𑀝𑁆𑀞𑀢𑁄;

𑀅𑀢𑀼𑀝𑁆𑀞𑀸 𑀲𑀺𑀯𑀬𑁄𑀘𑀸𑀲𑀼𑀁,

𑀫𑀜𑁆𑀘𑁂𑀭𑀚𑁆𑀚𑁂𑀪𑀺𑀲𑁂𑀘𑀬𑁆𑀬𑀽𑀁.

𑁪𑁦𑁯.

𑀅𑀲𑀫𑁆𑀫𑁄𑀤𑀦𑀻 𑀬𑀫𑁆𑀧𑀺𑀯𑁄𑀅𑀲𑁆𑀲,

𑀅𑀘𑁆𑀘𑀦𑁆𑀢𑀁 𑀫𑀫𑀓𑀸𑀭𑀡𑀸;

𑀲𑀺𑀯𑀻𑀳𑀺 𑀪𑀡𑁆𑀟𑀦𑀜𑁆𑀘𑀸𑀯𑀺,

𑀯𑀺𑀕𑁆𑀕𑀳𑁄 𑀫𑁂 𑀦𑀭𑀼𑀘𑁆𑀘𑀢𑀺.

𑁪𑁧𑁦.

𑀧𑀝𑀺𑀕𑁆𑀕𑀳𑀺𑀢𑀁 𑀬𑀁 𑀤𑀺𑀦𑁆𑀦𑀁,

𑀲𑀩𑁆𑀩𑀲𑁆𑀲 𑀅𑀕𑁆𑀖𑀺𑀬𑀁 𑀓𑀢𑀁;

𑀅𑀯𑀭𑀼𑀤𑁆𑀥𑀲𑀺 𑀫𑀁 𑀭𑀸𑀚𑀸,

𑀯𑀗𑁆𑀓 𑀕𑀘𑁆𑀙𑀸𑀫𑀺𑀧𑀩𑁆𑀩𑀢𑀁.

𑁪𑁧𑁧.

𑀅𑀦𑁂𑀓 ¶ 𑀧𑀭𑀺𑀬𑀸𑀬𑁂𑀦,

𑀚𑁂𑀢𑀭𑀸𑀚𑀽𑀳𑀺 𑀬𑀸𑀘𑀺𑀢𑁄;

𑀅𑀦𑀺𑀘𑁆𑀙𑀦𑁆𑀢𑁄 𑀧𑀝𑀺𑀓𑁆𑀔𑀻𑀧𑀺,

𑀭𑀚𑁆𑀚𑀁 𑀲𑁄 𑀚𑁂𑀢𑀭𑀝𑁆𑀞𑀓𑁂.

𑁪𑁧𑁨.

𑀦𑀕𑀭𑀁 𑀅𑀧𑀯𑀻𑀲𑀺𑀢𑁆𑀯𑀸,

𑀲𑀸𑀮𑀁 𑀲𑀸𑀡𑀺𑀧𑀭𑀺𑀓𑁆𑀔𑀺𑀧𑀁;

𑀓𑀸𑀭𑁂𑀢𑁆𑀯𑀸 𑀏𑀓𑀭𑀢𑁆𑀢𑀺𑀁𑀲𑁄,

𑀲𑀬𑀻 𑀲𑀧𑀼𑀢𑁆𑀢𑀤𑀸𑀭𑀓𑁄.

𑁪𑁧𑁩.

𑀧𑀼𑀩𑁆𑀩𑀡𑁆𑀳𑀲𑀫𑀬𑁂 ¶ 𑀪𑀼𑀢𑁆𑀯𑀸,

𑀦𑀸𑀦𑀕𑁆𑀕𑀁 𑀭𑀲𑀪𑁄𑀚𑀦𑀁;

𑀦𑀽𑀢𑁆𑀯𑀸 𑀲𑁄 𑀚𑁂𑀢𑀭𑀸𑀚𑀽𑀳𑀺,

𑀧𑀭𑀺𑀯𑀼𑀢𑁄𑀯 𑀦𑀺𑀓𑁆𑀔𑀫𑀺.

𑁪𑁧𑁪.

𑀚𑁂𑀢𑀭𑀸𑀚𑀸 𑀧𑀦𑁆𑀦𑀭𑀲-

𑀬𑁄𑀚𑀦𑀁 𑀚𑁂𑀢𑀭𑀝𑁆𑀞𑀢𑁄;

𑀕𑀦𑁆𑀢𑁆𑀯𑀸𑀦 𑀯𑀦𑀤𑁆𑀯𑀸𑀭𑀫𑁆𑀳𑀺

𑀞𑀺𑀢𑀸𑀫𑀕𑁆𑀕 𑀫𑀪𑀸𑀲𑀺𑀲𑀼𑀁.

𑁪𑁧𑁫.

𑀏𑀲𑀲𑁂𑀮𑁄𑀫𑀳𑀸𑀭𑀸𑀚,

𑀧𑀩𑁆𑀩𑀢𑁄 𑀕𑀦𑁆𑀥𑀫𑀸𑀤𑀦𑁄;

𑀬𑀢𑁆𑀢 𑀢𑁆𑀯𑀁 𑀲𑀳 𑀧𑀼𑀢𑁆𑀢𑁂𑀳𑀺,

𑀲𑀳𑀪𑀭𑀺𑀬𑀸𑀬 𑀯𑀘𑁆𑀙𑀲𑀺.

𑁪𑁧𑁬.

𑀢𑀁 ¶ 𑀚𑁂𑀢𑀸 𑀅𑀦𑀼𑀲𑀸𑀲𑀺𑀁𑀲𑀼,

𑀅𑀲𑁆𑀲𑀼𑀦𑁂𑀢𑁆𑀢𑀸 𑀭𑀼𑀤𑀫𑁆𑀫𑀼𑀔𑀸;

𑀇𑀢𑁄 𑀕𑀘𑁆𑀙𑀁𑀫𑀳𑀸𑀭𑀸𑀚,

𑀉𑀚𑀼𑀁 𑀬𑁂𑀦𑀼𑀢𑁆𑀢𑀭𑀸𑀪𑀺𑀫𑀼𑀔𑁄.

𑁪𑁧𑁭.

𑀅𑀣 𑀤𑀓𑁆𑀔𑀲𑀺 𑀪𑀤𑁆𑀤𑀦𑁆𑀢𑁂,

𑀯𑁂𑀧𑀼𑀮𑁆𑀮𑀁𑀦𑀸𑀫 𑀧𑀩𑁆𑀩𑀢𑀁;

𑀦𑀸𑀦𑀸𑀤𑀼𑀫𑀕𑀡𑀸𑀓𑀺𑀡𑁆𑀡𑀁,

𑀲𑀻𑀢𑀘𑁆𑀙𑀸𑀬𑀁 𑀫𑀦𑁄𑀭𑀫𑀁.

𑁪𑁧𑁮.

𑀢𑀫𑀢𑀺𑀓𑁆𑀓𑀫𑀪𑀤𑁆𑀤𑀦𑁆𑀢𑁂 ¶ ,

𑀅𑀣𑀤𑀓𑁆𑀔𑀲𑀺𑀆𑀧𑀕𑀁;

𑀦𑀤𑀺𑀁𑀓𑁂𑀢𑀼𑀫𑀤𑀺𑀁𑀦𑀸𑀫,

𑀕𑀫𑁆𑀪𑀻𑀭𑀁𑀕𑀺𑀭𑀺𑀕𑀩𑁆𑀪𑀭𑀁.

𑁪𑁧𑁯.

𑀧𑀼𑀣𑀼𑀮𑁄𑀫𑀘𑁆𑀙𑀆𑀓𑀺𑀡𑁆𑀡𑀁,

𑀲𑀼𑀧𑁆𑀧𑀢𑀺𑀢𑁆𑀣𑀁𑀫𑀳𑁄𑀤𑀓𑀁;

𑀣𑀢𑁆𑀢𑀦𑀽𑀢𑁆𑀯𑀸𑀧𑀺𑀯𑀺𑀢𑁆𑀯𑀸𑀘,

𑀅𑀲𑁆𑀲𑀸𑀲𑁂𑀢𑁆𑀯𑀸𑀲𑀧𑀼𑀢𑁆𑀢𑀓𑁂.

𑁪𑁨𑁦.

𑀅𑀣𑀤𑀓𑁆𑀔𑀲𑀺𑀪𑀤𑁆𑀤𑀦𑁆𑀢𑁂,

𑀦𑀕𑁆𑀭𑁄𑀥𑀁𑀫𑀥𑀼𑀯𑀺𑀧𑁆𑀨𑀮𑀁;

𑀭𑀫𑁆𑀫𑀓𑁂 𑀲𑀺𑀔𑀭𑁂𑀚𑀸𑀢𑀁,

𑀲𑀻𑀢𑀘𑁆𑀙𑀸𑀬𑀁𑀫𑀦𑁄𑀭𑀫𑀁.

𑁪𑁨𑁧.

𑀅𑀣 ¶ 𑀤𑀓𑁆𑀔𑀲𑀺 𑀪𑀤𑁆𑀤𑀦𑁆𑀢𑁂,

𑀦𑀸𑀴𑀺𑀓𑀁𑀦𑀸𑀫 𑀧𑀩𑁆𑀩𑀢𑀁;

𑀦𑀸𑀦𑀸𑀤𑀺𑀚 𑀕𑀡𑀸𑀓𑀺𑀡𑁆𑀡𑀁,

𑀲𑁂𑀮𑀁 𑀓𑀺𑀁 𑀧𑀼𑀭𑀺𑀲𑀸𑀬𑀼𑀢𑀁.

𑁪𑁨𑁨.

𑀢𑀲𑁆𑀲𑀉𑀢𑁆𑀢𑀭𑀧𑀼𑀩𑁆𑀩𑁂𑀦,

𑀫𑀼𑀘𑀮𑀺𑀦𑁆𑀤𑁄𑀦𑀸𑀫𑀲𑁄𑀲𑀭𑁄;

𑀧𑀼𑀡𑁆𑀟𑀭𑀺𑀓𑁂𑀳𑀺𑀲𑀜𑁆𑀙𑀦𑁆𑀦𑁄,

𑀲𑁂𑀢𑀲𑁄𑀕𑀦𑁆𑀥𑀺𑀓𑁂𑀳𑀺𑀘.

𑁪𑁨𑁩.

𑀲𑁄𑀯𑀦𑀁 𑀫𑁂𑀖𑀲𑀗𑁆𑀓𑀸𑀲𑀁,

𑀥𑀼𑀯𑀁 𑀳𑀭𑀺𑀢𑀲𑀤𑁆𑀤𑀮𑀁;

𑀲𑀻𑀳𑁄𑀯𑀸 𑀫𑀺𑀲𑀧𑁂𑀓𑁆𑀔𑀻𑀯,

𑀯𑀦𑀲𑀡𑁆𑀟𑀁 𑀯𑀺𑀕𑀸𑀳𑀬.

𑁪𑁨𑁪.

𑀢𑀢𑁆𑀣 ¶ 𑀩𑀺𑀦𑁆𑀤𑀼𑀲𑁆𑀲𑀭𑀸 𑀯𑀕𑁆𑀕𑀽,

𑀦𑀸𑀦𑀸𑀯𑀡𑁆𑀡𑀸 𑀩𑀳𑀽𑀤𑀺𑀚𑀸;

𑀓𑀽𑀚𑀦𑁆𑀢𑀺 𑀫𑀼𑀧𑀓𑀽𑀚𑀦𑁆𑀢𑀺,

𑀉𑀢𑀼𑀲𑀁𑀧𑀼𑀧𑁆𑀨𑀺𑀢𑁂 𑀤𑀼𑀫𑁂.

𑁪𑁨𑁫.

𑀕𑀦𑁆𑀢𑁆𑀯𑀸 𑀕𑀺𑀭𑀺𑀯𑀺𑀤𑀼𑀕𑁆𑀕𑀸𑀦𑀁,

𑀦𑀤𑀻𑀦𑀁 𑀧𑀪𑀯𑀸𑀦𑀺𑀘;

𑀲𑁄 𑀅𑀤𑁆𑀤𑀲 𑀧𑁄𑀓𑁆𑀔𑀭𑀡𑀺𑀁,

𑀓𑀭𑀜𑁆𑀘-𑀓 𑀓𑀼𑀥𑀸𑀬𑀼𑀢𑀁.

𑁪𑁨𑁬.

𑀧𑀼𑀣𑀼𑀮𑁄 𑀫𑀘𑁆𑀙𑀆𑀓𑀺𑀡𑁆𑀡𑀁,

𑀲𑀼𑀧𑁆𑀧𑀢𑀺𑀢𑁆𑀣𑀁 𑀫𑀳𑁄𑀤𑀓𑀁;

𑀲𑀫𑀜𑁆𑀘 𑀘𑀢𑀼𑀭𑀁 𑀲𑀜𑁆𑀘,

𑀲𑀸𑀤𑀼𑀁 𑀅𑀧𑁆𑀧𑀢𑀺𑀕𑀦𑁆𑀥𑀺𑀬𑀁.

𑁪𑁨𑁭.

𑀢𑀲𑁆𑀲𑀸 ¶ 𑀉𑀢𑁆𑀢𑀭𑀧𑀼𑀩𑁆𑀩𑁂𑀦,

𑀧𑀡𑁆𑀡𑀲𑀸𑀮𑀁 𑀅𑀫𑀸𑀧𑀬;

𑀧𑀡𑁆𑀡𑀲𑀸𑀮𑀁 𑀅𑀫𑀸𑀧𑁂𑀢𑁆𑀯𑀸,

𑀉𑀜𑁆𑀙𑀸𑀘𑀭𑀺𑀬𑀸𑀬 𑀈𑀳𑀣.

𑁪𑁨𑁮.

𑀏𑀯𑀜𑁆𑀳𑀺 𑀚𑁂𑀢𑀭𑀸𑀚𑀸𑀦𑁄,

𑀆𑀘𑀺𑀓𑁆𑀔𑀺𑀢𑁆𑀯𑀸𑀦 𑀅𑀜𑁆𑀚𑀲𑀁;

𑀏𑀓𑀁 𑀚𑁂𑀢𑀧𑀼𑀢𑁆𑀢𑀁 𑀩𑁆𑀬𑀢𑁆𑀢𑀁,

𑀆𑀫𑀦𑁆𑀢𑁂𑀲𑀼𑀁 𑀲𑀼𑀲𑀺𑀓𑁆𑀔𑀺𑀢𑀁.

𑁪𑁨𑁯.

𑀕𑀘𑁆𑀙𑀦𑁆𑀢𑁂𑀘𑀸 ¶ 𑀕𑀘𑁆𑀙𑀦𑁆𑀢𑁂𑀘,

𑀧𑀭𑀺𑀕𑁆𑀕𑀡𑁆𑀳𑀲𑁆𑀲𑀼 𑀮𑀼𑀤𑁆𑀥𑀓;

𑀇𑀘𑁆𑀘𑁂𑀯𑀁 𑀲𑀜𑁆𑀜𑀸𑀧𑁂𑀢𑁆𑀯𑀸𑀦,

𑀯𑀦𑀤𑁆𑀯𑀸𑀭𑁂 𑀞𑀧𑀺𑀁 𑀲𑀼𑀢𑀁.

𑁪𑁩𑁦.

𑀦𑀸𑀦𑀸𑀪𑀬 𑀯𑀺𑀦𑁄𑀤𑀸𑀬,

𑀯𑁂𑀲𑁆𑀲𑀦𑁆𑀢𑀭𑀲𑁆𑀲 𑀭𑀸𑀚𑀺𑀦𑁄;

𑀆𑀭𑀓𑁆𑀔𑀁 𑀢𑁂 𑀞𑀧𑁂𑀢𑁆𑀯𑀸𑀦,

𑀆𑀕𑀫𑀺𑀁𑀲𑀼 𑀲𑀓𑀁𑀧𑀼𑀭𑀁.

𑁪𑁩𑁧.

𑀯𑁂𑀲𑁆𑀲𑀦𑁆𑀢𑀭𑁄𑀘 𑀕𑀘𑁆𑀙𑀦𑁆𑀢𑁄,

𑀕𑀦𑁆𑀥 𑀫𑀸𑀤𑀦𑀧𑀩𑁆𑀩𑀢𑀁;

𑀲𑀧𑀼𑀢𑁆𑀢 ¶ 𑀤𑀸𑀭𑀓𑁄 𑀧𑀢𑁆𑀢𑁄;

𑀯𑀺𑀲𑁆𑀲𑀫𑀻 𑀤𑀺𑀯𑀲𑀁 𑀢𑀳𑀺𑀁.

𑁪𑁩𑁨.

𑀢𑀢𑁄𑀢𑁆𑀢𑀭𑀸𑀳𑀺 𑀫𑀼𑀔𑁄𑀲𑁄,

𑀕𑀘𑁆𑀙 𑀯𑁂𑀧𑀼𑀮𑁆𑀮 𑀧𑀩𑁆𑀩𑀢𑀁;

𑀧𑀢𑁆𑀯𑀸 𑀢𑀧𑁆𑀧𑀸𑀤 𑀫𑀕𑁆𑀕𑁂𑀦,

𑀧𑀢𑁆𑀢𑁄 𑀓𑁂𑀢𑀼𑀫𑀢𑀺𑀁 𑀦𑀤𑀺𑀁.

𑁪𑁩𑁩.

𑀢𑀺𑀲𑁆𑀲𑀸 𑀢𑀻𑀭𑁂 𑀦𑀺𑀲𑀻𑀤𑀺𑀢𑁆𑀯𑀸,

𑀫𑀁𑀲𑀁𑀔𑀸𑀤𑀺𑀬 𑀲𑀼𑀦𑁆𑀤𑀭𑀁;

𑀤𑀺𑀦𑁆𑀦𑀫𑁂𑀓𑁂𑀦 𑀮𑀼𑀤𑁆𑀥𑁂𑀦,

𑀦𑀽𑀢𑁆𑀯𑀸 𑀧𑀺𑀢𑁆𑀯𑀸𑀘 𑀯𑀺𑀲𑁆𑀲𑀫𑀻.

𑁪𑁩𑁪.

𑀲𑁄𑀡𑁆𑀡𑀲𑀽𑀘𑀺𑀁 ¶ 𑀮𑀼𑀤𑁆𑀥𑀓𑀲𑁆𑀲,

𑀤𑀢𑁆𑀯𑀸𑀦 𑀲𑁄 𑀢𑀢𑁄𑀧𑀭𑀁;

𑀕𑀘𑁆𑀙𑀦𑁆𑀢𑁄 𑀤𑀓𑁆𑀔𑀺𑀦𑀺𑀕𑁆𑀭𑁄𑀥𑀁,

𑀧𑀩𑁆𑀩𑀢𑀲𑀺𑀔𑀭𑁂 𑀞𑀺𑀢𑀁.

𑁪𑁩𑁫.

𑀢𑀲𑁆𑀲𑀫𑀽𑀮𑁂 𑀦𑀺𑀲𑀻𑀤𑀺𑀢𑁆𑀯𑀸,

𑀣𑁄𑀓𑀁𑀨𑀮𑀸𑀦𑀺 𑀪𑀼𑀜𑁆𑀚𑀺𑀬;

𑀢𑀢𑁄𑀧𑀭𑀁 𑀲 𑀕𑀘𑁆𑀙𑀦𑁆𑀢𑁄,

𑀧𑀢𑁆𑀢𑁄 𑀦𑀸𑀴𑀺𑀓𑀧𑀩𑁆𑀩𑀢𑀁.

𑁪𑁩𑁬.

𑀦𑀸𑀴𑀺𑀓𑀁 𑀧𑀭𑀺𑀳𑀭𑀺𑀢𑁆𑀯𑀸,

𑀕𑀘𑁆𑀙𑀦𑁆𑀢𑁄 𑀲𑁄 𑀫𑀳𑀸𑀲𑀭𑀁;

𑀫𑀼𑀘𑀮𑀺𑀦𑁆𑀤𑀁 𑀉𑀧𑀸𑀕𑀜𑁆𑀙𑀺,

𑀦𑀸𑀦𑀸𑀓𑀫𑀮 𑀪𑀽𑀲𑀺𑀢𑀁.

𑁪𑁩𑁭.

𑀢𑀲𑁆𑀲 ¶ 𑀧𑀼𑀩𑁆𑀩𑀉𑀢𑁆𑀢𑀭𑁂𑀦,

𑀔𑀼𑀤𑁆𑀤𑀫𑀕𑁆𑀕𑁂𑀦 𑀕𑀘𑁆𑀙𑀢𑀸;

𑀤𑀺𑀝𑁆𑀞𑀁 𑀩𑁆𑀭𑀳𑀸𑀯𑀦𑀁 𑀭𑀫𑁆𑀫𑀁,

𑀨𑀮 𑀧𑀼𑀧𑁆𑀨𑀸𑀦 𑀧𑀽𑀭𑀺𑀢𑀁.

𑁪𑁩𑁮.

𑀢𑀫𑀢𑀺𑀓𑁆𑀓𑀫𑁆𑀫 𑀕𑀘𑁆𑀙𑀦𑁆𑀢𑁄,

𑀅𑀦𑀼𑀧𑀼𑀩𑁆𑀩𑁂𑀦 𑀔𑀢𑁆𑀣𑀺𑀬𑁄;

𑀘𑀢𑀼𑀭𑀁𑀲 𑀧𑁄𑀓𑁆𑀔𑀭𑀡𑀺𑀁,

𑀲𑀫𑁆𑀧𑀢𑁆𑀢𑁄, 𑀲𑀺 𑀫𑀳𑁄𑀤𑀓𑀁.

𑁪𑁩𑁯.

𑀯𑁂𑀲𑁆𑀲𑀦𑁆𑀢𑀭𑁄𑀘 ¶ 𑀫𑀤𑁆𑀤𑀻𑀘,

𑀚𑀸𑀮𑀻𑀓𑀡𑁆𑀳𑀸𑀚𑀺𑀦𑀸 𑀘𑀼𑀪𑁄;

𑀢𑀢𑁆𑀣𑁂𑀯 𑀢𑁂 𑀯𑀺𑀲𑁆𑀲𑀫𑀺𑀁𑀲𑀼,

𑀅𑀜𑁆𑀜𑀫𑀜𑁆𑀜𑀧𑀺𑀬𑀁𑀯𑀤𑀸.

𑁪𑁪𑁦.

𑀆𑀯𑀚𑁆𑀚𑀦𑁆𑀢𑁄 𑀢𑀤𑀸 𑀲𑀓𑁆𑀓𑁄,

𑀧𑀲𑁆𑀲𑀺𑀢𑁆𑀣 𑀤𑁂𑀯𑀓𑀼𑀜𑁆𑀚𑀭𑁄;

𑀳𑀺𑀫𑀯𑀦𑁆𑀢𑀁 𑀫𑀳𑀸𑀲𑀢𑁆𑀢𑀁,

𑀧𑀯𑀺𑀝𑁆𑀞𑀁𑀪𑀬𑀪𑁂𑀭𑀯𑀁.

𑁪𑁪𑁧.

𑀯𑀺𑀲𑁆𑀲𑀼𑀓𑀫𑁆𑀫𑀁 𑀤𑁂𑀯𑀧𑀼𑀢𑁆𑀢𑀁,

𑀧𑀓𑁆𑀓𑁄𑀲𑀸𑀧𑀺𑀬 𑀲𑁄 𑀢𑀢𑁄;

𑀅𑀲𑁆𑀲𑀫𑀁 𑀫𑀸𑀧𑀦𑀢𑁆𑀣𑀸𑀬,

𑀧𑁂𑀲𑁂𑀲𑀺 𑀯𑀗𑁆𑀓𑀧𑀩𑁆𑀩𑀢𑀁.

𑁪𑁪𑁨.

𑀯𑀺𑀲𑁆𑀲𑀼𑀓𑀫𑁆𑀫𑁄𑀧𑀺 ¶ 𑀲𑁄 𑀲𑀻𑀖𑀁,

𑀑𑀢𑀭𑀺𑀢𑁆𑀯𑀸 𑀤𑁂𑀯𑀮𑁄𑀓𑀢𑁄;

𑀯𑀗𑁆𑀓𑀧𑀩𑁆𑀩𑀢 𑀓𑀼𑀘𑁆𑀙𑀺𑀫𑁆𑀳𑀺,

𑀫𑀸𑀧𑁂𑀲𑀺 𑀅𑀲𑁆𑀲𑀫𑁂 𑀤𑀼𑀯𑁂.

𑁪𑁪𑁩.

𑀤𑀼𑀯𑁂𑀘 𑀘𑀗𑁆𑀓𑀫𑁂𑀭𑀢𑁆𑀢𑀺-

𑀤𑀺𑀯𑀸 𑀞𑀸𑀦𑀸𑀦𑀺𑀫𑀸𑀧𑀬𑀺;

𑀧𑀝𑀺𑀭𑀽𑀧𑁂𑀲𑀼 𑀞𑀸𑀦𑁂𑀲𑀼,

𑀧𑀼𑀧𑁆𑀨𑀺𑀢𑁂 𑀨𑀮𑀺𑀢𑁂 𑀤𑀼𑀫𑁂.

𑁪𑁪𑁪.

𑀧𑀝𑀺𑀬𑀸𑀤𑀺𑀬𑀺𑀢𑁆𑀯𑀸 𑀲𑀫𑀡-

𑀧𑀭𑀺𑀓𑁆𑀔𑀸𑀭𑁂 𑀅𑀲𑁂𑀲𑀢𑁄;

𑀅𑀓𑁆𑀔𑀭𑀸𑀦𑀺𑀧𑀺 𑀲𑁄𑀓𑀸𑀲𑀺,

𑀏𑀯𑀁𑀅𑀲𑁆𑀲𑀫 𑀪𑀺𑀢𑁆𑀢𑀺𑀬𑀁.

𑁪𑁪𑁫.

𑀧𑀩𑁆𑀩𑀚𑁆𑀚𑀁 ¶ 𑀇𑀘𑁆𑀙𑀫𑀸𑀦𑀸𑀘𑁂,

𑀬𑁄𑀢𑁂 𑀇𑀫𑁂 𑀕𑀡𑁆𑀳𑀦𑁆𑀢𑀼𑀯𑁂;

𑀧𑀩𑁆𑀩𑀚𑀺𑀢𑁆𑀯𑀸𑀦 𑀅𑀘𑁆𑀙𑀦𑁆𑀢𑀼,

𑀇𑀫𑀫𑁆𑀳𑀺𑀅𑀲𑁆𑀲𑀫𑁂 𑀲𑀼𑀔𑀁.

𑁪𑁪𑁬.

𑀏𑀯𑀁𑀮𑀺𑀔𑀺𑀢𑁆𑀯𑀸𑀦 𑀲𑁄𑀤𑁂𑀯𑁄,

𑀅𑀫𑀦𑀼𑀲𑁆𑀲𑁂𑀘 𑀪𑁂𑀭𑀯𑁂;

𑀫𑀺𑀕𑁂 𑀔𑀕𑁂 𑀧𑀮𑀸𑀧𑁂𑀢𑁆𑀯𑀸,

𑀲𑀓𑀞𑀸𑀦 𑀕𑀢𑁄 𑀅𑀳𑀼.

𑁪𑁪𑁭.

𑀲𑁄 ¶ 𑀏𑀓𑀧𑀤𑀺𑀓𑀁 𑀫𑀕𑁆𑀕𑀁,

𑀤𑀺𑀲𑁆𑀯𑀸 𑀯𑁂𑀲𑁆𑀲𑀦𑁆𑀢𑀭𑁄 𑀢𑀢𑁄;

𑀧𑀩𑁆𑀩𑀚𑀺𑀢𑀸𑀦 𑀫𑀸𑀯𑀸𑀲𑁄,

𑀅𑀬𑀁 𑀳𑁂𑀳𑀻𑀢𑀺 𑀘𑀺𑀦𑁆𑀢𑀺𑀬.

𑁪𑁪𑁮.

𑀫𑀤𑁆𑀤𑀺𑀁 𑀅𑀲𑁆𑀲𑀫 𑀤𑁆𑀯𑀸𑀭𑀫𑁆𑀳𑀺,

𑀞𑀧𑁂𑀢𑁆𑀯𑀸 𑀧𑀼𑀢𑁆𑀢𑀓𑁂𑀧𑀺𑀘;

𑀅𑀲𑁆𑀲𑀫𑀁 𑀧𑀯𑀺𑀲𑀺𑀢𑁆𑀯𑀸𑀦,

𑀧𑀲𑁆𑀲𑀺𑀢𑁆𑀣 𑀅𑀓𑁆𑀔𑀭𑀸𑀦𑀺𑀲𑁄.

𑁪𑁪𑁯.

𑀇𑀤𑀁𑀲𑀓𑁆𑀓𑁂𑀦 𑀤𑀺𑀦𑁆𑀦𑀁𑀢𑀺,

𑀉𑀢𑁆𑀯𑀸 𑀲𑁄 𑀢𑀼𑀝𑁆𑀞𑀫𑀸𑀦𑀲𑁄;

𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀣,

𑀏𑀓𑀓𑁄 𑀧𑀩𑁆𑀩𑀚𑁂𑀢𑀯𑁂.

𑁪𑁫𑁦.

𑀢𑀳𑀺𑀁 ¶ 𑀥𑀦𑀼𑀜𑁆𑀘 𑀔𑀕𑁆𑀕𑀜𑁆𑀘,

𑀅𑀧𑀦𑁂𑀢𑁆𑀯𑀸 𑀲𑀲𑀸𑀝𑀓𑁂;

𑀑𑀫𑀼𑀜𑁆𑀘𑀺𑀢𑁆𑀯𑀸𑀦 𑀲𑁄𑀭𑀢𑁆𑀢-

𑀯𑀸𑀓𑀘𑀻𑀭𑀁 𑀦𑀺𑀯𑀸𑀲𑀬𑀺.

𑁪𑁫𑁧.

𑀅𑀁𑀲𑁂 𑀓𑀢𑁆𑀯𑀸𑀦 𑀅𑀚𑀺𑀦-

𑀘𑀫𑁆𑀫𑀜𑁆𑀘 𑀲𑀓𑁆𑀓𑀤𑀢𑁆𑀢𑀺𑀬𑀁;

𑀕𑀡𑁆𑀳𑀺𑀢𑁆𑀣 𑀇𑀲𑀺𑀯𑁂𑀲𑀁𑀲𑁄,

𑀩𑀦𑁆𑀥𑀺𑀢𑁆𑀯𑀸 𑀚𑀝𑀫𑀡𑁆𑀟𑀮𑀁.

𑁪𑁫𑁨.

𑀤𑀡𑁆𑀟𑀫𑀸𑀤𑀸𑀬 ¶ 𑀦𑀺𑀓𑁆𑀔𑀫𑁆𑀫,

𑀧𑀡𑁆𑀡𑀲𑀸𑀮𑀸𑀬 𑀘𑀗𑁆𑀓𑀫𑀁;

𑀆𑀭𑀼𑀬𑁆𑀳 𑀉𑀤, 𑀦𑁂𑀢𑁆𑀯𑀸𑀦𑀁,

𑀘𑀗𑁆𑀓𑀫𑀻 𑀅𑀧𑀭𑀸𑀧𑀭𑀁.

𑁪𑁫𑁩.

𑀢𑀢𑁄𑀲𑁄 𑀧𑀼𑀢𑁆𑀢𑀤𑀸𑀭𑀸𑀦𑀁,

𑀲𑀦𑁆𑀢𑀺𑀓𑀁 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁄;

𑀆𑀕𑀜𑁆𑀙𑀺 𑀲𑀝𑁆𑀞𑀺 𑀯𑀲𑁆𑀲𑁄𑀯,

𑀣𑁂𑀭𑁄 𑀑𑀭𑀼𑀬𑁆𑀳 𑀘𑀗𑁆𑀓𑀫𑀸.

𑁪𑁫𑁪.

𑀫𑀤𑁆𑀤𑀻𑀤𑀺𑀲𑁆𑀯𑀸 𑀫𑀳𑀸𑀲𑀢𑁆𑀢𑀁,

𑀓𑀮𑀼𑀦𑀁 𑀧𑀭𑀺𑀤𑁂𑀯𑀬𑀺;

𑀦𑀺𑀧𑀘𑁆𑀘 𑀢𑀲𑁆𑀲 𑀧𑀸𑀤𑁂𑀲𑀼,

𑀧𑀼𑀭𑀸𑀡𑀸𑀦𑀺 𑀅𑀦𑀼𑀢𑁆𑀣𑀼𑀦𑀁.

𑁪𑁫𑁫.

𑀢𑀢𑁄 ¶ 𑀲𑀸 𑀩𑁄𑀥𑀺𑀲𑀢𑁆𑀢𑁂𑀦,

𑀲𑀤𑁆𑀥𑀺𑀁 𑀧𑀯𑀺𑀲𑀺 𑀅𑀲𑁆𑀲𑀫𑀁;

𑀕𑀦𑁆𑀢𑁆𑀯𑀸 𑀲𑀓𑀧𑀡𑁆𑀡𑀲𑀸𑀮𑀁,

𑀇𑀲𑀺𑀯𑁂𑀲𑀕𑁆𑀕𑀳𑀸 𑀅𑀳𑀼.

𑁪𑁫𑁬.

𑀧𑀘𑁆𑀙𑀸𑀧𑀼𑀢𑁆𑀢𑁂𑀧𑀺 𑀢𑀸𑀧𑀲-

𑀓𑀼𑀫𑀸𑀭𑀓𑁂 𑀓𑀭𑀺𑀁𑀲𑀼𑀢𑁂;

𑀯𑀲𑀺𑀁𑀲𑀼 𑀯𑀗𑁆𑀓𑀓𑀼𑀘𑁆𑀙𑀺𑀫𑁆𑀳𑀺,

𑀘𑀢𑁆𑀢𑀸𑀭𑁄 𑀔𑀢𑁆𑀢𑀺𑀬𑀸𑀚𑀦𑀸.

𑁪𑁫𑁭.

𑀅𑀣𑀫𑀤𑁆𑀤𑀻 𑀯𑀭𑀁𑀬𑀸𑀘𑀺,

𑀫𑀳𑀸𑀲𑀢𑁆𑀢𑀁 𑀫𑀳𑀸𑀇𑀲𑀺𑀁;

𑀫𑀸𑀢𑀼𑀫𑁆𑀳𑁂 𑀤𑁂𑀯𑀕𑀜𑁆𑀙𑀺𑀢𑁆𑀣,

𑀨𑀮𑀸𑀨𑀮 𑀕𑀯𑁂𑀲𑀦𑀁.

𑁪𑁫𑁮.

𑀇𑀥𑀧𑀼𑀢𑁆𑀢𑁂 ¶ 𑀕𑀳𑁂𑀢𑁆𑀯𑀸𑀦,

𑀯𑀲𑁂𑀬𑁆𑀬𑀸𑀣 𑀬𑀣𑀸𑀲𑀼𑀔𑀁;

𑀅𑀳𑀫𑁂𑀯𑀸 𑀳𑀭𑀺𑀲𑁆𑀲𑀸𑀫𑀺,

𑀫𑀽𑀮𑀸𑀮𑁂𑀘 𑀨𑀮𑀸𑀨𑀮𑁂.

𑁪𑁫𑁯.

𑀏𑀯𑀁𑀯𑀭𑀁 𑀬𑀸𑀘𑀺𑀢𑁆𑀯𑀸𑀦,

𑀅𑀭𑀜𑁆𑀜𑀢𑁄 𑀨𑀮𑀸𑀨𑀮𑀁;

𑀆𑀳𑀭𑀺𑀢𑁆𑀯𑀸𑀦 𑀧𑁄𑀲𑁂𑀲𑀺,

𑀚𑀝𑀺𑀦𑀻𑀲𑀸 𑀢𑀬𑁄𑀚𑀦𑁂.

𑁪𑁬𑁦.

𑀩𑁄𑀥𑀺𑀲𑀢𑁆𑀢𑁄𑀧𑀺 ¶ 𑀬𑀸𑀘𑀺𑀢𑁆𑀢,

𑀯𑀭𑀁𑀫𑀤𑁆𑀤𑀺𑀁 𑀲𑀼𑀘𑀸𑀭𑀺𑀦𑀺𑀁;

𑀫𑀸𑀕𑀘𑁆𑀙 𑀆𑀓𑀸𑀮𑁂𑀪𑀤𑁆𑀤𑁂,

𑀧𑀝𑁆𑀞𑀸𑀬𑀺𑀢𑁄 𑀫𑀫𑀦𑁆𑀢𑀺𑀓𑀁.

𑁪𑁬𑁧.

𑀇𑀢𑁆𑀣𑀻𑀘 𑀩𑁆𑀭𑀳𑁆𑀫𑀘𑀭𑀺𑀬-

𑀫𑀮𑀁𑀦𑀸𑀫 𑀲𑀼𑀫𑁂𑀥𑀲𑁂;

𑀩𑁆𑀭𑀳𑁆𑀫𑀘𑀸𑀭𑀺𑀁𑀳𑀺 𑀦𑀸𑀲𑁂𑀦𑁆𑀢𑀺,

𑀢𑀲𑁆𑀫𑀸 𑀬𑀸𑀘𑀸𑀫𑀺 𑀫𑀁𑀯𑀭𑀁.

𑁪𑁬𑁨.

𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀣 𑀲𑀸𑀥𑀽𑀢𑀺,

𑀲𑀸𑀫𑀤𑁆𑀤𑀻 𑀩𑁆𑀭𑀳𑁆𑀫𑀘𑀸𑀭𑀺𑀦𑀻;

𑀲𑀓𑀝𑁆𑀞𑀸𑀦𑁂 𑀢𑁂 𑀯𑀲𑀺𑀁𑀲𑀼,

𑀪𑀸𑀯𑁂𑀦𑁆𑀢𑀸 𑀧𑀺𑀬 𑀪𑀸𑀯𑀦𑀁.

𑁪𑁬𑁪.

𑀫𑁂𑀢𑁆𑀢𑀸𑀬 ¶ 𑀆𑀦𑀼𑀪𑀸𑀯𑁂𑀦,

𑀫𑀳𑁂𑀲𑀺𑀲𑁆𑀲 𑀢𑀺𑀬𑁄𑀚𑀦𑁂;

𑀅𑀜𑁆𑀜𑀫𑀜𑁆𑀜𑀁 𑀫𑁂𑀢𑁆𑀢𑀸𑀬𑀺𑀁𑀲𑀼,

𑀲𑀫𑀦𑁆𑀢𑀸 𑀲𑀩𑁆𑀩𑀧𑀸𑀡𑀺𑀦𑁄.

𑁪𑁬𑁪.

𑀧𑀸𑀢𑁄𑀯𑀼𑀝𑁆𑀞𑀸𑀬 𑀫𑀤𑁆𑀤𑀻𑀧𑀺,

𑀉𑀧𑀝𑁆𑀞𑀸𑀧𑀺𑀬 𑀧𑀸𑀦𑀺𑀬𑀁;

𑀧𑀭𑀺𑀪𑁄𑀚𑀦𑀺𑀬𑀜𑁆𑀘𑁂𑀯,

𑀫𑀼𑀔𑁄𑀤𑀓𑀜𑁆𑀘 𑀆𑀳𑀭𑀺.

𑁪𑁬𑁫.

𑀤𑀦𑁆𑀢𑀓𑀝𑁆𑀞𑀜𑁆𑀘 ¶ 𑀧𑀸𑀤𑀸𑀲𑀺,

𑀢𑀢𑁄 𑀅𑀲𑁆𑀲𑀫𑀫𑀡𑁆𑀟𑀮𑀁;

𑀲𑀫𑁆𑀫𑀚𑀺𑀢𑁆𑀯𑀸𑀦 𑀤𑁆𑀯𑁂𑀧𑀼𑀢𑁆𑀢𑁂,

𑀞𑀧𑁂𑀢𑁆𑀯𑀸 𑀧𑀺𑀢𑀼𑀲𑀦𑁆𑀢𑀺𑀓𑁂.

𑁪𑁬𑁬.

𑀔𑀡𑀺𑀢𑁆𑀢𑀺𑀁 𑀧𑀘𑁆𑀙𑀺 𑀫𑀸𑀤𑀸𑀬,

𑀅𑀗𑁆𑀓𑀼𑀲𑀜𑁆𑀘𑀸𑀧𑀺 𑀕𑀡𑁆𑀳𑀺𑀬;

𑀯𑀦𑀫𑀽𑀮𑀨𑀮𑀢𑁆𑀣𑀸𑀬,

𑀧𑀸𑀯𑁂𑀓𑁆𑀔𑀺 𑀏𑀓𑀺𑀓𑀸𑀯𑀦𑀁.

𑁪𑁯𑁭.

𑀲𑀸𑀬𑀦𑁆𑀳𑀲𑀫𑀬𑁂 𑀧𑀘𑁆𑀙𑀺𑀁,

𑀫𑀽𑀮𑀸𑀮𑁂𑀳𑀺 𑀨𑀮𑁂𑀳𑀺𑀘;

𑀧𑀽𑀭𑀸𑀧𑁂𑀢𑁆𑀯𑀸𑀦 𑀲𑀸𑀕𑀜𑁆𑀙𑀺,

𑀧𑀡𑁆𑀡𑀲𑀸𑀮𑀁 𑀅𑀭𑀜𑁆𑀜𑀢𑁄.

𑁪𑁬𑁮.

𑀨𑀮𑀧𑀘𑁆𑀙𑀺𑀁 ¶ 𑀦𑀺𑀓𑁆𑀔𑀺𑀧𑁂𑀢𑁆𑀯𑀸,

𑀲𑀬𑀁 𑀦𑁆𑀳𑀸𑀢𑁆𑀯𑀸𑀦 𑀧𑀼𑀢𑁆𑀢𑀓𑁂;

𑀦𑁆𑀳𑀸𑀧𑁂𑀢𑁆𑀯𑀸𑀘 𑀪𑀼𑀜𑁆𑀚𑀺𑀁𑀲𑀼,

𑀫𑁄𑀤𑁂𑀦𑁆𑀢𑀸 𑀘𑀢𑀼𑀭𑁄𑀚𑀦𑀸.

𑁪𑁬𑁯.

𑀪𑀼𑀢𑁆𑀯𑀸 𑀦𑀮𑁆𑀮𑀸𑀧 𑀲𑀮𑁆𑀮𑀸𑀧𑀁,

𑀓𑀢𑁆𑀯𑀸𑀦 𑀧𑀼𑀢𑁆𑀢𑀓𑁂 𑀤𑀼𑀯𑁂;

𑀫𑀤𑁆𑀤𑀻𑀆𑀤𑀸𑀬 𑀧𑀸𑀯𑀻𑀲𑀺,

𑀲𑀸𑀧𑀡𑁆𑀡𑀲𑀸𑀮𑀫𑀢𑁆𑀢𑀦𑁄.

𑁪𑁭𑁦.

𑀏𑀯𑀁𑀯𑀼𑀢𑁆𑀢𑀦𑀺𑀬𑀸𑀫𑁂𑀦,

𑀘𑀢𑁆𑀢𑀸𑀭𑁄𑀔𑀢𑁆𑀢𑀺𑀬𑀸𑀚𑀦𑀸;

𑀯𑀗𑁆𑀓𑀧𑀩𑁆𑀩𑀢𑀓𑀼𑀘𑁆𑀙𑀺𑀫𑁆𑀳𑀺,

𑀲𑀢𑁆𑀢𑀫𑀸𑀲𑁂𑀯𑀲𑀺𑀁𑀲𑀼𑀢𑁂.

𑁪𑁭𑁧.

𑀢𑀤𑀸𑀓𑀮𑀺𑀗𑁆𑀕𑀭𑀝𑁆𑀞𑀫𑁆𑀳𑀺 ¶ ,

𑀕𑀸𑀫𑀫𑁆𑀳𑀺𑀤𑀼𑀦𑁆𑀦𑀺𑀯𑀺𑀝𑁆𑀞𑀓𑁂;

𑀩𑁆𑀭𑀳𑁆𑀫𑀡𑁄𑀚𑀽𑀘𑀓𑁄𑀦𑀸𑀫,

𑀪𑀺𑀓𑁆𑀔𑀸𑀘𑀸𑀭𑁄 𑀅𑀮𑀓𑁆𑀔𑀺𑀓𑁄.

𑁪𑁭𑁨.

𑀓𑀳𑀸𑀧𑀡𑀲𑀢𑀁𑀮𑀤𑁆𑀥𑀸,

𑀪𑀺𑀓𑁆𑀔𑀸𑀘𑀸𑀭𑁂𑀦𑀩𑁆𑀭𑀸𑀳𑁆𑀫𑀡𑁄;

𑀏𑀓𑀩𑁆𑀭𑀸𑀳𑁆𑀫𑀡𑀓𑀼𑀮𑀫𑁆𑀳𑀺,

𑀣𑀧𑁂𑀢𑁆𑀯𑀸𑀧𑀼𑀦𑀲𑁄𑀕𑀢𑁄.

𑁪𑁭𑁩.

𑀅𑀦𑀸𑀕𑀦𑁆𑀢𑁆𑀯𑀸𑀘𑀺𑀭𑀸𑀬𑀦𑁆𑀢𑁂,

𑀚𑀽𑀘𑀓𑀫𑁆𑀳𑀺𑀕𑀳𑀸𑀧𑀡𑀁,

𑀔𑀻𑀡𑀁𑀩𑁆𑀭𑀸𑀳𑁆𑀫𑀡𑀕𑁂𑀳𑀫𑁆𑀳𑀺,

𑀯𑀮𑀜𑁆𑀚𑁂𑀢𑁆𑀯𑀸𑀅𑀲𑁂𑀲𑀢𑁄.

𑁪𑁭𑁪.

𑀘𑁄𑀤𑁂𑀲𑀺𑀕𑀳𑀸𑀧𑀡𑀁𑀲𑁄 ¶ ,

𑀧𑀘𑁆𑀙𑀸𑀕𑀦𑁆𑀢𑁆𑀯𑀸𑀦𑀚𑀽𑀘𑀓𑁄;

𑀓𑀳𑀸𑀧𑀡𑀲𑁆𑀲𑀔𑀻𑀡𑀢𑁆𑀢𑀸,

𑀤𑀸𑀢𑀼𑀁𑀦𑀸𑀲𑀓𑁆𑀔𑀺𑀩𑁆𑀭𑀸𑀳𑁆𑀫𑀡𑁄.

𑁪𑁭𑁫.

𑀥𑀻𑀢𑀸 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲,

𑀦𑀸𑀫𑁂𑀦𑀸𑀫𑀺𑀢𑁆𑀢𑀢𑀸𑀧𑀦𑀸;

𑀬𑀼𑀯𑀢𑀻𑀭𑀽𑀧𑀯𑀦𑁆𑀢𑀻𑀘,

𑀚𑀽𑀘𑀓𑀲𑁆𑀲𑀅𑀤𑀁𑀲𑀼𑀢𑀁.

𑁪𑁭𑁬.

𑀯𑀲𑀺𑀢𑁆𑀣𑀤𑀼𑀦𑁆𑀦𑀺𑀯𑀺𑀝𑁆𑀞𑀫𑁆𑀳𑀺 ¶ ,

𑀆𑀤𑀸𑀬𑀸𑀫𑀺𑀢𑁆𑀢𑀢𑀸𑀧𑀦𑀁;

𑀤𑀳𑀭𑀺𑀁𑀚𑀺𑀡𑁆𑀡𑀓𑁄𑀧𑀸𑀧𑁄,

𑀚𑀽𑀘𑀓𑁄𑀬𑀸𑀘𑀚𑀻𑀯𑀓𑁄.

𑁪𑁭𑁭.

𑀅𑀫𑀺𑀢𑁆𑀢𑀢𑀸𑀧𑀦𑀸𑀲𑀫𑁆𑀫𑀸,

𑀕𑀭𑀼𑀁𑀓𑀢𑁆𑀯𑀸𑀦𑀩𑁆𑀭𑀸𑀳𑁆𑀫𑀡𑀁;

𑀧𑀝𑀺𑀚𑀕𑁆𑀕𑀢𑀺𑀇𑀦𑁆𑀤𑀁𑀯,

𑀲𑀽𑀚𑀸𑀉𑀝𑁆𑀞𑀸𑀦𑀲𑀻𑀮𑀺𑀦𑀻.

𑁪𑁭𑁮.

𑀬𑀼𑀯𑀸𑀦𑁄𑀩𑁆𑀭𑀸𑀳𑁆𑀫𑀡𑀸𑀅𑀜𑁆𑀜𑁂,

𑀤𑀺𑀲𑁆𑀯𑀸𑀦𑀸𑀫𑀺𑀢𑁆𑀢𑀢𑀸𑀧𑀦𑀁;

𑀚𑀸𑀬𑀸𑀯𑀢𑁆𑀢𑁂𑀦𑀲𑀫𑁆𑀧𑀦𑁆𑀦𑀁,

𑀲𑀤𑀸𑀭𑁂𑀇𑀢𑀺𑀢𑀚𑁆𑀚𑀭𑁂.

𑁪𑁭𑁯.

𑀅𑀬𑀁𑀫𑀳𑀮𑁆𑀮𑀓𑀁𑀲𑀫𑁆𑀫𑀸 ¶ ,

𑀧𑀝𑀺𑀚𑀕𑁆𑀕𑀢𑀺𑀚𑀽𑀘𑀓𑀁;

𑀓𑀺𑀁 𑀧𑀫𑀚𑁆𑀚𑀣 𑀅𑀫𑁆𑀳𑀸𑀓𑀁,

𑀬𑀼𑀯𑀸𑀦𑀸𑀦𑀁𑀢𑀼 𑀯𑁄 𑀲𑀢𑀁.

𑁪𑁮𑁦.

𑀧𑀝𑀺𑀚𑀕𑁆𑀕𑀣𑀦𑁄𑀩𑀸𑀮𑀸,

𑀧𑀲𑁆𑀲𑀺𑀢𑁆𑀯𑀸 𑀫𑀺𑀢𑁆𑀢𑀢𑀸𑀧𑀦𑀁;

𑀦𑁄𑀘𑁂𑀧𑀝𑀺𑀚𑀕𑁆𑀕𑁂𑀬𑁆𑀬𑀸𑀣,

𑀤𑀡𑁆𑀟𑁂𑀲𑁆𑀲𑀸𑀫𑀔𑀭𑀁𑀪𑀼𑀲𑀁.

𑁪𑁮𑁧.

𑀢𑀚𑁆𑀚𑀺𑀢𑀸 ¶ 𑀪𑀭𑀺𑀬𑀸𑀲𑀩𑁆𑀩𑀸,

𑀧𑀢𑀻𑀳𑀺 𑀪𑀬𑀫𑀸𑀦𑀲𑀸;

𑀲𑀦𑁆𑀦𑀺𑀲𑀺𑀦𑁆𑀦𑀸 𑀫𑀦𑁆𑀢𑀮𑀺𑀁𑀲𑀼;

𑀆𑀭𑀩𑁆𑀪𑀸𑀫𑀺𑀢𑁆𑀢𑀢𑀸𑀧𑀦𑀁.

𑁪𑁮𑁨.

𑀧𑀮𑀸𑀧𑁂𑀲𑁆𑀲𑀸𑀫 𑀅𑀬𑁆𑀬𑀸𑀬𑁄,

𑀇𑀫𑀫𑁆𑀳𑀸𑀤𑀼𑀦𑁆𑀦𑀺 𑀯𑀺𑀝𑁆𑀞𑀢𑁄;

𑀏𑀯𑀁𑀲𑀼𑀔𑀁 𑀯𑀺𑀳𑀺𑀲𑁆𑀲𑀸𑀫,

𑀚𑀽𑀘𑀓𑀲𑁆𑀲 𑀧𑀚𑀸𑀧𑀢𑀺𑀁.

𑁪𑁮𑁩.

𑀫𑀦𑁆𑀢𑀬𑀺𑀢𑁆𑀯𑀸𑀦𑀢𑀸 𑀏𑀯𑀁,

𑀦𑀤𑀺𑀁 𑀉𑀤𑀓𑀳𑀸𑀭𑀺𑀬𑀸;

𑀲𑀫𑀸𑀕𑀦𑁆𑀢𑀸 𑀉𑀚𑁆𑀛𑀸𑀬𑀺𑀁𑀲𑀼,

𑀢𑀺𑀢𑁆𑀣𑁂 𑀅𑀫𑀺𑀢𑁆𑀢𑀢𑀸𑀧𑀦𑀁.

𑁪𑁮𑁪.

𑀅𑀫𑀺𑀢𑁆𑀢𑀸𑀦𑀼𑀦𑀢𑁂𑀫𑀸𑀢𑀸 ¶ ,

𑀅𑀫𑀺𑀢𑁆𑀢𑁄𑀦𑀼𑀦𑀢𑁂𑀧𑀺𑀢𑀸;

𑀬𑁂𑀲𑀁𑀚𑀺𑀡𑁆𑀡𑀲𑁆𑀲𑀧𑀸𑀤𑀁𑀲𑀼,

𑀏𑀯𑀁 𑀤𑀳𑀭𑀺𑀬𑀁 𑀲𑀢𑀺𑀁.

𑁪𑁮𑁫.

𑀅𑀳𑀺𑀢𑀁𑀯𑀢𑀢𑁂𑀜𑁆𑀜𑀸𑀢𑀻,

𑀫𑀦𑁆𑀢𑀬𑀺𑀁𑀲𑀼 𑀭𑀳𑁄𑀕𑀢𑀸;

𑀬𑁂𑀢𑀁𑀚𑀺𑀡𑁆𑀡𑀲𑁆𑀲 𑀧𑀸𑀤𑀁𑀲𑀼,

𑀏𑀯𑀁 𑀤𑀳𑀭𑀺𑀬𑀁𑀲𑀢𑀺𑀁.

𑁪𑁮𑁬.

𑀅𑀫𑀦𑀸𑀧𑀯𑀸𑀲𑀁𑀯𑀲𑀢𑀺 ¶ ,

𑀚𑀺𑀡𑁆𑀡𑁂𑀦𑀧𑀢𑀺𑀦𑀸𑀲𑀳;

𑀬𑀸𑀢𑁆𑀯𑀁𑀯𑀲𑀲𑀺𑀚𑀺𑀡𑁆𑀡𑀲𑁆𑀲,

𑀫𑀢𑀦𑁆𑀢𑁂𑀚𑀻𑀯𑀺𑀢𑀸𑀯𑀭𑀁.

𑁪𑁮𑁭.

𑀦𑀳𑀺𑀦𑀼𑀦𑀢𑁂𑀯𑀺𑀦𑁆𑀤𑀺𑀁𑀲𑀼,

𑀫𑀸𑀢𑀸𑀧𑀺𑀢𑀸𑀘𑀲𑁄𑀪𑀡𑁂;

𑀢𑀼𑀬𑁆𑀳𑀢𑁆𑀣𑀸𑀬𑀚𑀽𑀘𑀓𑀫𑁆𑀳𑀸,

𑀧𑀢𑀺𑀁𑀅𑀜𑁆𑀜𑀁𑀲𑀼𑀬𑁄𑀩𑁆𑀩𑀦𑀁.

𑁪𑁮𑁮.

𑀤𑀼𑀬𑀺𑀝𑁆𑀞𑀁𑀢𑁂𑀦𑀯𑀫𑀺𑀬𑀸,

𑀅𑀓𑀢𑀁𑀅𑀕𑁆𑀕𑀺𑀳𑀼𑀢𑀓𑀁;

𑀬𑁂𑀢𑀁𑀚𑀺𑀡𑁆𑀡𑀲𑁆𑀲𑀧𑀸𑀤𑀁𑀲𑀼,

𑀏𑀯𑀁𑀤𑀳𑀭𑀺𑀬𑀁𑀲𑀢𑀺𑀁.

𑁪𑁮𑁯.

𑀲𑀫𑀡𑁂 ¶ 𑀩𑁆𑀭𑀸𑀳𑁆𑀫𑀡𑁂 𑀲𑀼𑀤𑁆𑀥𑁂,

𑀅𑀓𑁆𑀓𑁄𑀲𑀺 𑀩𑁆𑀭𑀸𑀳𑁆𑀫𑀘𑀸𑀭𑀺𑀦𑁂;

𑀬𑁂𑀦𑀢𑁂𑀦𑀤𑀳𑀭𑀻𑀢𑁆𑀯𑀁,

𑀫𑀜𑁆𑀜𑁂𑀚𑀺𑀡𑁆𑀡𑁂𑀦𑀲𑀗𑁆𑀕𑀫𑀻.

𑁪𑁯𑁦.

𑀦𑀤𑀼𑀓𑁆𑀔𑀁𑀅𑀳𑀺𑀦𑀸𑀤𑀝𑁆𑀞𑀁,

𑀦𑀤𑀼𑀓𑁆𑀔𑀁𑀲𑀢𑁆𑀢𑀺𑀬𑀸𑀳𑀢𑀁;

𑀢𑀜𑁆𑀘𑀤𑀼𑀓𑁆𑀔𑀜𑁆𑀘𑀢𑀺𑀩𑁆𑀩𑀜𑁆𑀘,

𑀬𑀁𑀧𑀲𑁆𑀲𑁂𑀚𑀺𑀡𑁆𑀡𑀓𑀁𑀧𑀢𑀺𑀁.

𑁪𑁯𑁧.

𑀦𑀢𑁆𑀣𑀺𑀔𑀺𑀝𑁆𑀝𑀸𑀦𑀢𑁆𑀣𑀺𑀭𑀢𑀺 ¶ ,

𑀚𑀺𑀡𑁆𑀡𑁂𑀦𑀧𑀢𑀺𑀦𑀸𑀲𑀳;

𑀦𑀢𑁆𑀣𑀺𑀅𑀮𑁆𑀮𑀸𑀧𑀲𑀮𑁆𑀮𑀸𑀧𑁄,

𑀚𑀕𑁆𑀖𑀺𑀢𑀼𑀁𑀯𑀺𑀦𑀲𑁄𑀪𑀢𑀺.

𑁪𑁯𑁨.

𑀬𑀤𑀸𑀤𑀳𑀭𑁄𑀤𑀳𑀭𑀻,

𑀫𑀦𑁆𑀢𑀬𑀺𑀁𑀲𑀼𑀭𑀳𑁄𑀕𑀢𑀸;

𑀲𑀩𑁆𑀩𑀲𑁄𑀓𑀸𑀯𑀺𑀦𑀲𑁆𑀲𑀦𑁆𑀢𑀺,

𑀬𑁂𑀓𑁂𑀘𑀺𑀳𑀤𑀬𑀲𑁆𑀲𑀺𑀢𑀸.

𑁪𑁯𑁩.

𑀤𑀳𑀭𑀻𑀢𑁆𑀯𑀁𑀭𑀽𑀧𑀸𑀢𑀻,

𑀧𑀼𑀭𑀺𑀲𑀸𑀢𑁆𑀯𑀫𑀪𑀺𑀧𑀢𑁆𑀣𑀺𑀢𑀸;

𑀕𑀘𑁆𑀙 𑀜𑀸𑀢𑀺𑀓𑀼𑀮𑁂 𑀅𑀘𑁆𑀙,

𑀓𑀺𑀁 𑀚𑀺𑀡𑁆𑀡𑁄 𑀭𑀫𑀬𑀺𑀲𑁆𑀲𑀢𑀺.

𑁪𑁯𑁪.

𑀭𑁄𑀤𑀫𑀸𑀦𑀸𑀯𑀆𑀕𑀜𑁆𑀙𑀺 ¶ ,

𑀲𑀸𑀖𑀭𑀁𑀧𑀭𑀺𑀪𑀸𑀲𑀺𑀢𑀸;

𑀩𑁆𑀭𑀸𑀳𑁆𑀫𑀡𑀻𑀳𑀺 𑀳𑀺𑀭𑀸𑀬𑀦𑁆𑀢𑀻,

𑀖𑀝𑀫𑀸𑀤𑀸𑀬𑀲𑀻𑀖𑀲𑁄.

𑁪𑁯𑁫.

𑀭𑁄𑀤𑀦𑁆𑀢𑀺𑀁 𑀆𑀕𑀢𑀁𑀚𑀸𑀬𑀁,

𑀤𑀺𑀲𑁆𑀯𑀸𑀓𑀺𑀁 𑀪𑁄𑀢𑀺𑀭𑁄𑀤𑀺𑀬;

𑀆𑀕𑀘𑁆𑀙 𑀲𑀻𑀢𑀺𑀧𑀼𑀘𑁆𑀙𑀺𑀢𑁆𑀣,

𑀧𑀘𑁆𑀘𑀼𑀕𑁆𑀕𑀘𑁆𑀙𑀁 𑀯𑀚𑀽𑀘𑀓𑁄.

𑁪𑁯𑁬.

𑀦𑀢𑁂𑀩𑁆𑀭𑀸𑀳𑁆𑀫𑀡 ¶ 𑀕𑀘𑁆𑀙𑀸𑀫𑀺,

𑀦𑀤𑀺𑀁 𑀉𑀤𑀓𑀳𑀸𑀭𑀺𑀬𑀸;

𑀣𑀺𑀬𑁄𑀫𑀁𑀧𑀭𑀺𑀪𑀸𑀲𑀺𑀁𑀲𑀼,

𑀢𑀬𑀸𑀚𑀺𑀡𑁆𑀡𑁂𑀦𑀩𑁆𑀭𑀸𑀳𑁆𑀫𑀡.

𑁪𑁯𑁭.

𑀩𑁆𑀭𑀸𑀳𑁆𑀫𑀡𑁆𑀬𑀸𑀪𑀸𑀲𑀫𑀸𑀦𑀸𑀬,

𑀓𑀣𑀁𑀲𑀼𑀢𑁆𑀯𑀸𑀦𑀩𑁆𑀭𑀸𑀳𑁆𑀫𑀡𑁄;

𑀢𑁄𑀲𑁂𑀦𑁆𑀢𑁄𑀪𑀭𑀺𑀬𑀁𑀭𑀼𑀡𑁆𑀡𑀁,

𑀚𑀺𑀡𑁆𑀡𑁄𑀲𑁄𑀏𑀢𑀤𑀩𑁆𑀭𑀯𑀻.

𑁪𑁯𑁮.

𑀫𑀸𑀫𑁂𑀢𑁆𑀯𑀁𑀅𑀓𑀭𑀸𑀓𑀫𑁆𑀫𑀁,

𑀫𑀫𑁂𑀉𑀤𑀓𑀫𑀸𑀳𑀭𑀺;

𑀅𑀳𑀁𑀉𑀤𑀓𑀫𑀸𑀳𑀺𑀲𑁆𑀲𑀁,

𑀫𑀸𑀪𑁄𑀢𑀺𑀓𑀼𑀧𑀺𑀢𑀸𑀅𑀳𑀼.

𑁪𑁯𑁯.

𑀦𑀸𑀳𑀁𑀢𑀫𑁆𑀳𑀺𑀓𑀼𑀮𑁂𑀚𑀸𑀢𑀸 ¶ ,

𑀬𑀁𑀢𑁆𑀯𑀁𑀉𑀤𑀓𑀫𑀸𑀳𑀭𑀺;

𑀏𑀯𑀁𑀩𑁆𑀭𑀸𑀳𑁆𑀫𑀡𑀚𑀸𑀦𑀸𑀳𑀺,

𑀦𑀢𑁂𑀯𑀘𑁆𑀙𑀸𑀫𑀺𑀳𑀁𑀖𑀭𑁂.

𑁫𑁦𑁦.

𑀲𑀘𑁂𑀫𑁂𑀤𑀸𑀲𑀁𑀤𑀸𑀲𑀺𑀁 𑀯𑀸,

𑀦𑀸𑀦𑀬𑀺𑀲𑁆𑀲𑀲𑀺𑀩𑁆𑀭𑀸𑀳𑁆𑀫𑀡;

𑀏𑀯𑀁𑀩𑁆𑀭𑀸𑀳𑁆𑀫𑀡𑀚𑀸𑀦𑀸𑀳𑀺,

𑀦𑀢𑁂𑀯𑀘𑁆𑀙𑀸𑀫𑀲𑀦𑁆𑀢𑀺𑀓𑁂.

𑁫𑁦𑁧.

𑀦𑀢𑁆𑀣𑀺𑀫𑁂 ¶ 𑀲𑀺𑀩𑁆𑀩𑀝𑁆𑀞𑀸𑀦𑀁𑀯𑀸,

𑀥𑀦𑀥𑀜𑁆𑀜𑀜𑁆𑀘 𑀩𑁆𑀭𑀳𑁆𑀫𑀡𑀺;

𑀓𑀼𑀢𑁄𑀢𑀁 𑀤𑀸𑀲𑀁𑀤𑀸𑀲𑀺𑀁 𑀯𑀸,

𑀆𑀦𑀬𑀺𑀲𑁆𑀲𑀸𑀫𑀺 𑀪𑁄𑀢𑀺𑀬𑀸,

𑀅𑀳𑀁𑀪𑁄𑀢𑀺𑀁 𑀉𑀧𑀝𑁆𑀞𑀺𑀲𑁆𑀲𑀁,

𑀫𑀸𑀪𑁄𑀢𑀺𑀓𑀼 𑀧𑀺𑀢𑀸𑀅𑀳𑀼.

𑁫𑁦𑁨.

𑀏𑀳𑀺𑀢𑁂 𑀅𑀳 𑀫𑀓𑁆𑀔𑀺𑀲𑁆𑀲𑀁,

𑀬𑀣𑀸𑀫𑁂𑀯𑀘𑀦𑀁𑀲𑀼𑀢𑀁;

𑀏𑀲𑀯𑁂𑀲𑁆𑀲𑀦𑁆𑀢𑀭𑁄 𑀭𑀸𑀚𑀸,

𑀯𑀗𑁆𑀓𑁂𑀯𑀲𑀢𑀺 𑀧𑀩𑁆𑀩𑀢𑁂.

𑁫𑁦𑁩.

𑀢𑀁𑀢𑁆𑀯𑀁𑀕𑀦𑁆𑀢𑁆𑀯𑀸𑀦 𑀬𑀸𑀘𑀲𑁆𑀲𑀼,

𑀤𑀸𑀲𑀁𑀤𑀸𑀲𑀺𑀜𑁆𑀘 𑀩𑁆𑀭𑀳𑁆𑀫𑀡;

𑀲𑁄𑀢𑁂𑀤𑀲𑁆𑀲𑀢𑀺 𑀬𑀸𑀘𑀺𑀢𑁄,

𑀤𑀸𑀲𑀁𑀤𑀸𑀲𑀺𑀜𑁆𑀘 𑀔𑀢𑁆𑀣𑀺𑀬𑁄.

𑁫𑁦𑁪.

𑀚𑀺𑀡𑁆𑀡𑁄𑀳𑀲𑁆𑀫𑀺 ¶ 𑀤𑀼𑀩𑁆𑀩𑀮𑁄,

𑀤𑀻𑀖𑁄𑀘𑀤𑁆𑀥𑀸𑀲𑀼 𑀤𑀼𑀕𑁆𑀕𑀫𑁄;

𑀓𑀣𑀁𑀕𑀦𑁆𑀢𑀼𑀁 𑀲𑀓𑁆𑀔𑀺𑀲𑁆𑀲𑀫𑀺,

𑀉𑀧𑀞𑀺𑀲𑁆𑀲𑀸𑀫𑀺 𑀢𑀁 𑀅𑀳𑀁.

𑁫𑁦𑁫.

𑀬𑀣𑀸𑀅𑀕𑀦𑁆𑀢𑁆𑀯𑀸 𑀲𑀗𑁆𑀕𑀸𑀫𑀁,

𑀅𑀬𑀼𑀤𑁆𑀥𑁄𑀯 𑀧𑀭𑀸𑀚𑀺𑀢𑁄,

𑀏𑀯𑀫𑁂𑀯 𑀢𑀼𑀯𑀁𑀩𑁆𑀭𑀳𑁆𑀫𑁂,

𑀅𑀕𑀦𑁆𑀢𑁆𑀯𑀸𑀯 𑀧𑀭𑀸𑀚𑀺𑀢𑁄.

𑁫𑁦𑁬.

𑀲𑀘𑁂𑀫𑁂 ¶ 𑀤𑀸𑀲𑀁𑀤𑀸𑀲𑀺𑀁 𑀯𑀸,

𑀦𑀸𑀦𑀬𑀺𑀲𑁆𑀲𑀲𑀺 𑀩𑁆𑀭𑀳𑁆𑀫𑀡;

𑀏𑀯𑀁 𑀩𑁆𑀭𑀳𑁆𑀫𑀡 𑀚𑀸𑀦𑀸𑀳𑀺,

𑀦𑀢𑁂𑀯𑀘𑁆𑀙𑀸 𑀫𑀳𑀁𑀖𑀭𑁂;

𑀅𑀫𑀦𑀸𑀧𑀁 𑀢𑁂𑀓𑀭𑀺𑀲𑁆𑀲𑀸𑀫𑀺,

𑀢𑀁𑀢𑁂𑀤𑀼𑀓𑁆𑀔𑀁 𑀪𑀯𑀺𑀲𑁆𑀲𑀢𑀺.

𑁫𑁦𑁭.

𑀦𑀓𑁆𑀔𑀢𑁆𑀢𑁂 𑀉𑀢𑀼𑀧𑀼𑀧𑁆𑀨𑁂𑀲𑀼,

𑀬𑀤𑀸𑀫𑀁𑀤𑀓𑁆𑀔𑀲𑀺 𑀮𑀗𑁆𑀓𑀢𑀁;

𑀅𑀜𑁆𑀜𑁂𑀳𑀺 𑀲𑀤𑁆𑀥𑀺𑀁 𑀭𑀫𑀫𑀸𑀦𑀁,

𑀢𑀦𑁆𑀢𑁂𑀤𑀼𑀓𑁆𑀔𑀁 𑀪𑀯𑀺𑀲𑁆𑀲𑀢𑀺.

𑁫𑁦𑁮.

𑀅𑀤𑀲𑁆𑀲𑀦𑁂𑀦 ¶ 𑀫𑀬𑁆𑀳𑀁𑀢𑁂,

𑀚𑀺𑀡𑁆𑀡𑀲𑁆𑀲 𑀧𑀭𑀺𑀤𑁂𑀯𑀢𑁄;

𑀪𑀺𑀬𑁆𑀬𑁄𑀯𑀗𑁆𑀓𑀸 𑀧𑀮𑀺𑀢𑀸𑀘,

𑀩𑀳𑀽𑀳𑁂𑀲𑁆𑀲𑀦𑁆𑀢𑀺 𑀩𑁆𑀭𑀳𑁆𑀫𑀡.

𑁫𑁦𑁯.

𑀢𑀢𑁄 𑀲𑁄 𑀩𑁆𑀭𑀳𑁆𑀫𑀡𑁄 𑀪𑀻𑀢𑁄,

𑀩𑁆𑀭𑀳𑁆𑀫𑀡𑀺𑀬𑀸𑀯 𑀲𑀸𑀦𑀼𑀕𑁄;

𑀅𑀝𑁆𑀝𑀺𑀢𑁄 𑀓𑀸𑀫𑀭𑀸𑀕𑁂𑀦,

𑀩𑁆𑀭𑀳𑁆𑀫𑀡𑀺𑀁 𑀏𑀢𑀤𑀩𑁆𑀭𑀯𑀻.

𑁫𑁧𑁦.

𑀧𑀸𑀣𑁂𑀬𑁆𑀬𑀁𑀫𑁂𑀓𑀭𑁄𑀳𑀺𑀢𑁆𑀯𑀁 ¶ ,

𑀲𑀁𑀓𑀼𑀮𑁆𑀬𑀸𑀲𑀓𑀮𑀸𑀦𑀺𑀘;

𑀫𑀥𑀼𑀧𑀺𑀡𑁆𑀟𑀺𑀓𑀸𑀘𑀲𑀼𑀓𑀢𑀸𑀬𑁄,

𑀲𑀢𑁆𑀣𑀼 𑀪𑀢𑁆𑀢𑀜𑁆𑀘𑀩𑁆𑀭𑀳𑁆𑀫𑀡𑀺.

𑁫𑁧𑁧.

𑀆𑀦𑀬𑀺𑀲𑁆𑀲𑀁 𑀫𑁂𑀣𑀼𑀦𑀓𑁂,

𑀉𑀪𑁄𑀤𑀸𑀲𑀓𑀼𑀫𑀸𑀭𑀓𑁂;

𑀢𑁂𑀢𑀁𑀧𑀭𑀺𑀘𑀭𑀺𑀲𑁆𑀲𑀦𑁆𑀢𑀺,

𑀭𑀢𑁆𑀢𑀺𑀁𑀤𑀺𑀯𑀫𑀢𑀦𑁆𑀤𑀺𑀢𑀸.

𑁫𑁧𑁨.

𑀲𑀸𑀔𑀺𑀧𑁆𑀧𑀁𑀧𑀝𑀺𑀬𑀸𑀤𑁂𑀲𑀺 ¶ ,

𑀧𑀸𑀣𑁂𑀬𑁆𑀬𑀁𑀫𑀺𑀢𑁆𑀢𑀢𑀸𑀧𑀦𑀸;

𑀧𑀝𑀺𑀬𑀸𑀤𑀺𑀢𑀦𑁆𑀢𑀺 𑀆𑀘𑀺𑀓𑁆𑀔𑀺,

𑀩𑁆𑀭𑀳𑁆𑀫𑀡𑀲𑁆𑀲𑀅𑀮𑀓𑁆𑀔𑀺𑀦𑁄.

𑁫𑁧𑁩.

𑀕𑁂𑀳𑁂𑀤𑀼𑀩𑁆𑀩𑀮𑀞𑀸𑀦𑀁𑀲𑁄,

𑀣𑀺𑀭𑀁𑀓𑀢𑁆𑀯𑀸𑀦𑀩𑁆𑀭𑀳𑁆𑀫𑀡𑁄;

𑀪𑀭𑀺𑀬𑀸𑀬𑀕𑁄𑀧𑀦𑀢𑁆𑀣𑀁,

𑀕𑀼𑀢𑁆𑀢𑀤𑁆𑀯𑀸𑀭𑀜𑁆𑀘𑀲𑀗𑁆𑀔𑀭𑀺.

𑁫𑁧𑁪.

𑀤𑀸𑀭𑀽𑀦𑀺𑀆𑀳𑀭𑀺𑀢𑁆𑀯𑀸𑀦,

𑀖𑀝𑁂𑀧𑀽𑀭𑁂𑀲𑀺𑀯𑀸𑀭𑀺𑀦𑀸;

𑀚𑀸𑀬𑀸𑀬𑀲𑀼𑀔𑀯𑀸𑀲𑀢𑁆𑀣𑀁,

𑀅𑀦𑀺𑀓𑁆𑀔𑀦𑁆𑀢𑀼𑀁𑀘𑀕𑁂𑀳𑀢𑁄.

𑁫𑁧𑁫.

𑀧𑀘𑁆𑀘𑀓𑁆𑀔𑁂𑀬𑁂𑀯 ¶ 𑀚𑀸𑀬𑀸𑀬,

𑀇𑀲𑀺𑀯𑁂𑀲𑀁𑀲𑀫𑀸𑀤𑀺𑀬;

𑀧𑀲𑁆𑀲𑀺𑀢𑁆𑀯𑀸𑀪𑀭𑀺𑀬𑀁𑀏𑀯𑀁,

𑀑𑀯𑀤𑁂𑀲𑀺𑀲𑀚𑀽𑀘𑀓𑁄.

𑁫𑁧𑁬.

𑀇𑀢𑁄𑀧𑀞𑀸𑀬𑀢𑁆𑀯𑀁𑀪𑀤𑁆𑀤𑁂,

𑀯𑀺𑀓𑀸𑀮𑁂𑀫𑀸𑀲𑁆𑀲𑀼𑀦𑀺𑀓𑁆𑀔𑀫𑀺;

𑀫𑀫𑀆𑀕𑀫𑀦𑀸𑀬𑀸𑀯,

𑀯𑀲𑁂𑀲𑀺𑀅𑀧𑁆𑀧𑀫𑀢𑁆𑀢𑀓𑀸.

𑁫𑁧𑁭.

𑀇𑀤𑀁𑀯𑀢𑁆𑀯𑀸𑀦𑀮𑀕𑁆𑀕𑀺𑀢𑁆𑀯𑀸 ¶ ,

𑀲𑁄𑀧𑀸𑀣𑁂𑀬𑁆𑀬𑀧𑀲𑀺𑀩𑁆𑀩𑀳𑀁;

𑀉𑀧𑀸𑀳𑀦𑀜𑁆𑀘𑀆𑀭𑀼𑀬𑁆𑀳,

𑀕𑀡𑁆𑀳𑀻𑀓𑀢𑁆𑀢𑀭𑀤𑀡𑁆𑀟𑀓𑀁.

𑁫𑁧𑁮.

𑀢𑀢𑁄𑀲𑁄𑀭𑀼𑀡𑁆𑀡𑀫𑀼𑀔𑁂𑀦,

𑀪𑀭𑀺𑀬𑀁𑀓𑀢𑁆𑀯𑀸𑀧𑀤𑀓𑁆𑀔𑀺𑀡𑀁;

𑀲𑁄𑀘𑀫𑀸𑀦𑁄 𑀯𑀧𑀓𑁆𑀓𑀸𑀫𑀺,

𑀤𑀸𑀲𑀓𑁂 𑀧𑀭𑀺𑀬𑁂𑀲𑀺𑀢𑀼𑀁.