📜

𑀤𑀸𑀞𑀸𑀯𑀁𑀲𑁄 ¶

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑁧.

𑀯𑀺𑀲𑀸𑀭𑀤𑀁 𑀯𑀸𑀤𑀧𑀣𑀸𑀢𑀺 𑀯𑀢𑁆𑀢𑀺𑀦𑀁,

𑀢𑀺𑀮𑁄𑀓𑀧𑀚𑁆𑀚𑁄𑀢𑀫𑀲𑀬𑁆𑀳𑀲𑀸𑀳𑀺𑀦𑀁;

𑀅𑀲𑁂𑀲 𑀜𑁂𑀬𑁆𑀬𑀸𑀯𑀭𑀡𑀧𑁆𑀧𑀳𑀸𑀬𑀺𑀦𑀁,

𑀦𑀫𑀸𑀫𑀺 𑀲𑀢𑁆𑀣𑀸𑀭𑀫𑀦𑀦𑁆𑀢𑀕𑁄𑀘𑀭𑀁.

𑁨. ¶

𑀢𑀺𑀮𑁄𑀓 𑀦𑀸𑀣𑀧𑁆𑀧𑀪𑀯𑀁 𑀪𑀬𑀸𑀧𑀳𑀁,

𑀯𑀺𑀲𑀼𑀤𑁆𑀥𑀯𑀺𑀚𑁆𑀚𑀸𑀘𑀭𑀡𑁂𑀳𑀺 𑀲𑁂𑀯𑀺𑀢𑀁;

𑀧𑀧𑀜𑁆𑀘 𑀲𑀁𑀬𑁄𑀚𑀦𑀩𑀦𑁆𑀥𑀦𑀘𑁆𑀙𑀺𑀤𑀁,

𑀦𑀫𑀸𑀫𑀺 𑀥𑀫𑁆𑀫𑀁 𑀦𑀺𑀧𑀼𑀡𑀁 𑀲𑀼𑀤𑀼𑀤𑁆𑀤𑀲𑀁.

𑁩.

𑀧𑀲𑀸𑀤𑀫𑀢𑁆𑀢𑁂𑀦’𑀧𑀺 𑀬𑀢𑁆𑀣 𑀧𑀸𑀡𑀺𑀦𑁄,

𑀨𑀽𑀲𑀦𑁆𑀢𑀺 𑀤𑀼𑀓𑁆𑀔𑀓𑁆𑀔𑀬𑀫𑀘𑁆𑀘𑀼𑀢𑀁 𑀧𑀤𑀁;

𑀢𑀫𑀸𑀳𑀼𑀡𑁂𑀬𑁆𑀬𑀁 𑀲𑀼𑀲𑀫𑀸𑀳𑀺𑀢𑀺𑀦𑁆𑀤𑁆𑀭𑀺𑀬𑀁,

𑀦𑀫𑀸𑀫𑀺 𑀲𑀗𑁆𑀖𑀁 𑀫𑀼𑀦𑀺𑀭𑀸𑀚𑀲𑀸𑀯𑀓𑀁.

𑁪.

𑀯𑀺𑀪𑀼𑀲𑀬𑀁 𑀓𑀸𑀴𑀓𑀦𑀸𑀕𑀭𑀦𑁆𑀯 𑀬𑀁,

𑀧𑀭𑀓𑁆𑀓𑀫𑁄 𑀓𑀸𑀭𑀼𑀡𑀺𑀓𑁄 𑀘𑀫𑀽𑀧𑀢𑀺;

𑀕𑀯𑁂𑀲𑀫𑀸𑀦𑁄 𑀚𑀺𑀦𑀲𑀸𑀲𑀦𑀲𑁆𑀲 𑀬𑁄,

𑀯𑀺𑀭𑀽𑀴𑁆𑀳𑀺𑀫𑀢𑁆𑀣𑀜𑁆𑀘 𑀚𑀦𑀲𑁆𑀲 𑀧𑀢𑁆𑀣𑀬𑀁.

𑁫. ¶

𑀲𑀼𑀥𑀸𑀫𑀬𑀽𑀔𑀸𑀫𑀮 𑀧𑀡𑁆𑀟𑀼𑀯𑀁𑀲𑀚𑀁,

𑀯𑀺𑀭𑀽𑀴𑁆𑀳𑀲𑀤𑁆𑀥𑀁 𑀫𑀼𑀦𑀺𑀭𑀸𑀚𑀲𑀸𑀲𑀦𑁂;

𑀧𑀺𑀬𑀁 𑀯𑀤𑀁 𑀦𑀻𑀢𑀺𑀧𑀣𑀸𑀦𑀼𑀯𑀢𑁆𑀢𑀺𑀦𑀺𑀁,

𑀲𑀤𑀸 𑀧𑀚𑀸𑀦𑀁 𑀚𑀦𑀺𑀓𑀁’𑀯 𑀫𑀸𑀢𑀭𑀁.

𑁬.

𑀧𑀺𑀬𑀁 𑀧𑀭𑀓𑁆𑀓𑀦𑁆𑀢𑀺𑀪𑀼𑀚𑀲𑁆𑀲 𑀭𑀸𑀚𑀺𑀦𑁄,

𑀫𑀳𑁂𑀲𑀺 𑀫𑀘𑁆𑀘𑀼𑀦𑁆𑀦𑀢𑀔𑀼𑀤𑁆𑀥𑀺𑀲𑀫𑁆𑀧𑀤𑀁;

𑀯𑀺𑀥𑀸𑀬 𑀮𑀻𑀮𑀸𑀯𑀢𑀺𑀫𑀺𑀘𑁆𑀙𑀺𑀢𑀢𑁆𑀣𑀤𑀁,

𑀅𑀲𑁂𑀲 𑀮𑀗𑁆𑀓𑀸𑀢𑀮𑀭𑀚𑁆𑀚𑀮𑀓𑁆𑀔𑀺𑀬𑀁.

𑁭.

𑀓𑀼𑀫𑀸𑀭𑀫𑀸𑀭𑀸𑀥𑀺𑀢𑀲𑀸𑀥𑀼𑀫𑀦𑁆𑀢𑀺𑀦𑀁,

𑀫𑀳𑀸𑀤𑀬𑀁 𑀧𑀡𑁆𑀟𑀼𑀦𑀭𑀺𑀦𑁆𑀤 𑀯𑀁𑀲𑀚𑀁;

𑀯𑀺𑀥𑀸𑀬 𑀲𑀤𑁆𑀥𑀁 𑀫𑀥𑀼𑀭𑀺𑀦𑁆𑀤𑀦𑀸𑀫𑀓𑀁,

𑀲𑀼𑀲𑀺𑀓𑁆𑀔𑀻𑀢𑀁 𑀧𑀸𑀯𑀘𑀦𑁂 𑀓𑀮𑀸𑀲𑀼 𑀘.

𑁮. ¶

𑀦𑀭𑀺𑀦𑁆𑀤𑀲𑀼𑀜𑁆𑀜𑀁 𑀲𑀼𑀘𑀺𑀭𑀁 𑀢𑀺𑀲𑀻𑀳𑀴𑀁,

𑀇𑀢𑀺𑀧𑁆𑀧𑀢𑀻𑀢𑀁 𑀅𑀬𑀲𑀁 𑀅𑀧𑀸𑀦𑀼𑀤𑀺;

𑀘𑀺𑀭𑀁 𑀧𑀡𑀻𑀢𑁂𑀦 𑀘 𑀘𑀺𑀯𑀭𑀸𑀤𑀺𑀦𑀸,

𑀲𑀼𑀲𑀜𑁆𑀜𑀢𑁂 𑀲𑀁𑀬𑀫𑀺𑀦𑁄 𑀅𑀢𑀧𑁆𑀧𑀬𑀺.

𑁯.

𑀘𑀺𑀭𑀝𑁆𑀞𑀺𑀢𑀺𑀁 𑀧𑀸𑀯𑀘𑀦𑀲𑁆𑀲 𑀇𑀘𑁆𑀙𑀢𑀸,

𑀓𑀢𑀜𑁆𑀜𑀼𑀦𑀸 𑀯𑀺𑀓𑁆𑀓𑀫 𑀩𑀼𑀤𑁆𑀤𑀺𑀲𑀸𑀮𑀺𑀦𑀸;

𑀲𑀢𑀻𑀫𑀢𑀸 𑀘𑀦𑁆𑀤𑀺𑀫 𑀩𑀦𑁆𑀥𑀼𑀓𑀺𑀢𑁆𑀢𑀺𑀦𑀸,

𑀲𑀕𑀸𑀭𑀯𑀁 𑀢𑁂𑀦’𑀪𑀻𑀬𑀸𑀘𑀺𑀢𑁄 𑀅𑀳𑀁.

𑁧𑁦.

𑀲𑀤𑁂𑀲 𑀪𑀸𑀲𑀸𑀬 𑀓𑀯𑀻𑀳𑀺 𑀲𑀻𑀳𑀴𑁂,

𑀓𑀢𑀫𑁆𑀧𑀺 𑀯𑀁𑀲𑀁 𑀚𑀺𑀦𑀤𑀦𑁆𑀢𑀥𑀸𑀢𑀼𑀬𑀸;

𑀦𑀺𑀭𑀼𑀢𑁆𑀢𑀺𑀬𑀸 𑀫𑀸𑀕𑀥𑀺𑀓𑀸𑀬 𑀯𑀼𑀤𑁆𑀥𑀺𑀬𑀸,

𑀓𑀭𑁄𑀫𑀺 𑀤𑀻𑀧𑀦𑁆𑀢𑀭𑀯𑀸𑀲𑀺𑀦𑀁 𑀅𑀧𑀺.

𑁧𑁧. ¶

𑀚𑀻𑀦𑁄’𑀬𑀫𑀺𑀤𑁆𑀥𑁂 𑀅𑀫𑀭𑀯𑁆𑀳𑀬𑁂 𑀧𑀼𑀭𑁂,

𑀓𑀤𑀸𑀘𑀺 𑀳𑀼𑀢𑁆𑀯𑀸𑀦 𑀲𑀼𑀫𑁂𑀥𑀦𑀸𑀫𑀓𑁄;

𑀲𑀯𑁂𑀤𑀯𑁂𑀤𑀗𑁆𑀕𑀯𑀺𑀪𑀸𑀕𑀓𑁄𑀯𑀺𑀤𑁄,

𑀫𑀳𑀤𑁆𑀥𑀦𑁂 𑀯𑀺𑀧𑁆𑀧𑀓𑀼𑀮𑀫𑁆𑀳𑀺 𑀫𑀸𑀡𑀯𑁄.

𑁧𑁨.

𑀅𑀳𑀜𑁆𑀳𑀺 𑀚𑀸𑀢𑀺𑀩𑁆𑀬𑀲𑀦𑁂𑀦 𑀧𑀻𑀴𑀺𑀢𑁄,

𑀚𑀭𑀸𑀪𑀺𑀪𑀼𑀢𑁄 𑀫𑀭𑀡𑁂𑀦 𑀑𑀢𑁆𑀣𑀝𑁄;

𑀲𑀺𑀯𑀁 𑀧𑀤𑀁 𑀚𑀸𑀢𑀺𑀚𑀭𑀸𑀤𑀺𑀦𑀺𑀲𑁆𑀲𑀝𑀁,

𑀕𑀯𑁂𑀲𑀬𑀺𑀲𑁆𑀲𑀁’𑀢𑀺 𑀭𑀳𑁄 𑀯𑀺𑀘𑀺𑀦𑁆𑀢𑀺𑀬.

𑁧𑁩.

𑀅𑀦𑁂𑀓𑀲𑀗𑁆𑀔𑀁 𑀥𑀦𑀥𑀜𑁆𑀜𑀲𑀫𑁆𑀧𑀤𑀁,

𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀓𑀧𑀡𑁂𑀲𑀺 𑀤𑀼𑀘𑁆𑀘𑀚𑀁;

𑀅𑀦𑀧𑁆𑀧𑀓𑁂 𑀧𑁂𑀫𑀪𑀭𑀸𑀦𑀼𑀩𑀦𑁆𑀥𑀺𑀦𑁄,

𑀯𑀺𑀳𑀸𑀬 𑀫𑀺𑀢𑁆𑀢𑁂 𑀘 𑀲𑀼𑀢𑁂𑀘 𑀩𑀦𑁆𑀥𑀯𑁂.

𑁧𑁪. ¶

𑀧𑀳𑀸𑀬 𑀓𑀸𑀫𑁂 𑀦𑀺𑀔𑀺𑀮𑁂 𑀫𑀦𑁄𑀭𑀫𑁂,

𑀖𑀭𑀸𑀪𑀺𑀦𑀺𑀓𑁆𑀔𑀫𑁆𑀫 𑀳𑀺𑀫𑀸𑀘𑀮𑀦𑁆𑀢𑀺𑀓𑁂;

𑀫𑀳𑀻𑀥𑀭𑀁 𑀥𑀫𑁆𑀫𑀺𑀓𑀦𑀸𑀫 𑀯𑀺𑀲𑁆𑀲𑀼𑀢𑀁,

𑀉𑀧𑁂𑀘𑁆𑀘 𑀦𑀸𑀦𑀸𑀢𑀭𑀼𑀭𑀸𑀚𑀺𑀪𑀼𑀲𑀺𑀢𑀁.

𑁧𑁫.

𑀫𑀦𑁄𑀦𑀼𑀓𑀽𑀮𑁂 𑀲𑀼𑀭𑀭𑀸𑀚𑀦𑀺𑀫𑁆𑀫𑀻𑀢𑁂,

𑀅𑀲𑀫𑁆𑀫𑀺𑀕𑀸𑀦𑀁 𑀅𑀕𑀢𑀺𑀫𑁆𑀳𑀺 𑀅𑀲𑁆𑀲𑀫𑁂;

𑀦𑀺𑀯𑀢𑁆𑀢𑀘𑀻𑀭𑁄 𑀅𑀚𑀺𑀦𑀓𑁆𑀔𑀺𑀧𑀁 𑀯𑀳𑀁,

𑀚𑀝𑀸𑀥𑀭𑁄 𑀢𑀸𑀧𑀲 𑀯𑁂𑀲𑀫𑀕𑁆𑀕𑀳𑀻.

𑁧𑁬.

𑀲𑀼𑀲𑀜𑁆𑀜𑀢𑀢𑁆𑀢𑁄𑀧𑀭𑀺𑀯𑀸𑀭𑀺 𑀢𑀺𑀦𑁆𑀤𑁆𑀭𑀺𑀬𑁄,

𑀨𑀮𑀸𑀨𑀮𑀸𑀤𑀻𑀳𑀺 𑀧𑀯𑀢𑁆𑀢𑀬𑀁 𑀢𑀦𑀼𑀁;

𑀕𑀢𑁄 𑀅𑀪𑀺𑀜𑁆𑀕𑁆𑀜𑀸𑀲𑀼 𑀘 𑀧𑀸𑀭𑀫𑀺𑀁 𑀯𑀲𑀻,

𑀢𑀳𑀺𑀁 𑀲𑀫𑀸𑀧𑀢𑁆𑀢𑀺 𑀲𑀼𑀔𑀁 𑀅𑀯𑀺𑀦𑁆𑀤𑀺 𑀲𑁄.

𑁧𑁭. ¶

𑀲𑀼𑀲𑀚𑁆𑀚𑀺𑀢𑁂 𑀭𑀫𑁆𑀫𑀧𑀼𑀭𑀸𑀥𑀺𑀯𑀸𑀲𑀺𑀦𑀸,

𑀫𑀳𑀸𑀚𑀦𑁂𑀦’𑀢𑁆𑀢𑀫𑀦𑁂𑀦 𑀅𑀜𑁆𑀚𑀲𑁂;

𑀧𑀣𑀧𑁆𑀧𑀤𑁂𑀲𑁂 𑀅𑀪𑀺𑀬𑀦𑁆𑀢𑀫𑀢𑁆𑀢𑀦𑁄,

𑀅𑀦𑀺𑀝𑁆𑀞𑀺𑀢𑁂𑀬𑁂𑀯 𑀲𑀼𑀫𑁂𑀥 𑀢𑀸𑀧𑀲𑁄.

𑁧𑁮.

𑀅𑀕𑀸𑀥𑀜𑁂𑀬𑁆𑀬𑁄𑀤𑀥𑀻𑀧𑀸𑀭𑀤𑀲𑁆𑀲𑀺𑀦𑀁,

𑀪𑀯𑀦𑁆𑀢𑀕𑀼𑀁 𑀦𑀺𑀩𑁆𑀩𑀦𑀣𑀁 𑀯𑀺𑀦𑀸𑀬𑀓𑀁;

𑀅𑀦𑁂𑀓𑀔𑀻𑀡𑀸𑀲𑀯𑀮𑀓𑁆𑀔𑀲𑁂𑀯𑀺𑀢𑀁,

𑀓𑀤𑀸 𑀘𑀺 𑀤𑀻𑀧𑀗𑁆𑀓𑀭𑀩𑀼𑀤𑁆𑀥𑀫𑀤𑁆𑀤𑀲.

𑁧𑁯.

𑀢𑀢𑁄 𑀲𑀲𑀗𑁆𑀖𑀲𑁆𑀲 𑀢𑀺𑀮𑁄𑀓𑀪𑀢𑁆𑀢𑀼𑀦𑁄,

𑀧𑀭𑀺𑀘𑁆𑀘𑀚𑀺𑀢𑁆𑀯𑀸𑀦 𑀢𑀦𑀼𑀫𑁆𑀧𑀺 𑀚𑀻𑀯𑀺𑀢𑀁;

𑀧𑀲𑀸𑀭𑀬𑀺𑀢𑁆𑀯𑀸𑀦 𑀚𑀝𑀸𑀚𑀺𑀦𑀸𑀤𑀺𑀓𑀁,

𑀯𑀺𑀥𑀸𑀬 𑀲𑁂𑀢𑀼𑀁 𑀢𑀦𑀼𑀫𑁂𑀯 𑀧𑀮𑁆𑀮𑀮𑁂.

𑁨𑁦. ¶

𑀅𑀦𑀓𑁆𑀓𑀫𑀺𑀢𑁆𑀯𑀸 𑀓𑀮𑀮𑀁 𑀫𑀳𑀸𑀤𑀬𑁂,

𑀲𑀪𑀺𑀓𑁆𑀔𑀼𑀓𑁄 𑀕𑀘𑁆𑀘𑀢𑀼 𑀧𑀺𑀝𑁆𑀞𑀺𑀬𑀸 𑀇𑀢𑀺;

𑀅𑀥𑀺𑀝𑁆𑀞𑀳𑀺𑀢𑁆𑀯𑀸𑀦 𑀦𑀺𑀧𑀦𑁆𑀦𑀓𑁄 𑀢𑀳𑀺𑀁,

𑀅𑀦𑀸𑀣 𑀫𑁂𑀢𑀁 𑀢𑀺𑀪𑀯𑀁 𑀲𑀫𑁂𑀓𑁆𑀔𑀺𑀬.

𑁨𑁧.

𑀤𑀬𑀸𑀬 𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀚𑀦𑁂,

𑀪𑀯𑀡𑁆𑀡𑀯𑀸 𑀉𑀤𑁆𑀥𑀭𑀺𑀢𑀼𑀁 𑀤𑀼𑀔𑀤𑁆𑀤𑀺𑀢𑁂;

𑀅𑀓𑀸𑀲𑀺 𑀲𑀫𑁆𑀩𑁄𑀥𑀺𑀧𑀤𑀲𑁆𑀲 𑀧𑀢𑁆𑀢𑀺𑀬𑀸,

𑀫𑀳𑀸𑀪𑀺𑀦𑀻𑀳𑀸𑀭𑀫𑀼𑀤𑀕𑁆𑀕𑀯𑀺𑀓𑁆𑀓𑀫𑁄.

𑁨𑁨. ¶

𑀅𑀣𑁄 𑀯𑀺𑀤𑀺𑀢𑁆𑀯𑀸 𑀯𑀲𑀺𑀦𑁄 𑀢𑀫𑀸𑀲𑀬𑀁,

𑀅𑀤𑀸𑀲𑀺 𑀲𑁄 𑀯𑁆𑀬𑀸𑀓𑀭𑀡𑀁 𑀫𑀳𑀸𑀫𑀼𑀦𑀺;

𑀢𑀢𑁄 𑀧𑀼𑀭𑀁 𑀢𑀫𑁆𑀳𑀺 𑀢𑀣𑀸𑀕𑀢𑁂 𑀕𑀢𑁂,

𑀲𑀬𑀁𑀯𑀲𑀻 𑀲𑀫𑁆𑀫𑀲𑀺 𑀧𑀸𑀭𑀫𑀺𑀕𑀼𑀡𑁂.

𑁨𑁩.

𑀢𑀢𑁄 𑀘 𑀓𑀧𑁆𑀧𑀸𑀦𑀫𑀮𑀻𑀦𑀯𑀺𑀓𑁆𑀓𑀫𑁄,

𑀅𑀲𑀁𑀔𑀺𑀬𑁂 𑀲𑁄 𑀘𑀢𑀼𑀭𑁄 𑀲𑀮𑀓𑁆𑀔𑀓𑁂;

𑀢𑀳𑀺𑀁 𑀢𑀳𑀺𑀁 𑀚𑀸𑀢𑀺𑀲𑀼 𑀩𑁄𑀥𑀺𑀧𑀸𑀘𑀦𑁂,

𑀯𑀺𑀲𑀼𑀤𑁆𑀥𑀲𑀫𑁆𑀪𑀸𑀭𑀕𑀼𑀡𑁂 𑀅𑀧𑀽𑀭𑀬𑀺;

𑀅𑀣𑀸𑀪𑀺𑀚𑀸𑀢𑁄 𑀢𑀼𑀲𑀺𑀢𑁂 𑀫𑀳𑀸𑀬𑀲𑁄,

𑀯𑀺𑀲𑀼𑀤𑁆𑀥𑀲𑀫𑁆𑀩𑁄𑀥𑀺𑀧𑀤𑁄𑀧𑀮𑀤𑁆𑀥𑀺𑀬𑀸;

𑀉𑀤𑀺𑀓𑁆𑀔𑀫𑀸𑀦𑁄 𑀲𑀫𑀬𑀁 𑀤𑀬𑀸𑀥𑀦𑁄,

𑀘𑀺𑀭𑀁 𑀯𑀺𑀪𑀼𑀢𑀺𑀁 𑀅𑀦𑀼𑀪𑁄𑀲𑀺 𑀲𑀩𑁆𑀩𑀲𑁄.

𑁨𑁫. ¶

𑀲𑀳𑀲𑁆𑀲𑀲𑀗𑁆𑀔𑀸 𑀤𑀲𑀘𑀓𑁆𑀓𑀯𑀸𑀮𑀢𑁄,

𑀲𑀫𑀸𑀕𑀢𑀸𑀦𑁂𑀓𑀲𑀼𑀭𑀸𑀥𑀺𑀧𑀸𑀤𑀺𑀳𑀺;

𑀉𑀤𑀕𑁆𑀕𑀼𑀤𑀕𑁆𑀕𑁂𑀳𑀺 𑀚𑀺𑀦𑀢𑁆𑀢𑀧𑀢𑁆𑀢𑀺𑀬𑀸,

𑀲𑀕𑀸𑀭𑀯𑀁 𑀲𑁄 𑀅𑀪𑀺𑀕𑀫𑁆𑀫 𑀬𑀸𑀘𑀺𑀢𑁄.

𑁨𑁬.

𑀢𑀢𑁄 𑀘𑀯𑀺𑀢𑁆𑀯𑀸 𑀓𑀧𑀺𑀴𑀯𑁆𑀳𑀬𑁂 𑀧𑀼𑀭𑁂,

𑀲𑀤𑀸 𑀲𑀢𑁄 𑀲𑀓𑁆𑀬𑀓𑀼𑀮𑁂𑀓𑀓𑁂𑀢𑀼𑀦𑁄;

𑀅𑀳𑁄𑀲𑀺 𑀲𑀼𑀤𑁆𑀥𑁄𑀤𑀦𑀪𑀼𑀫𑀺𑀪𑀢𑁆𑀢𑀼𑀦𑁄,

𑀫𑀳𑀸𑀤𑀺𑀫𑀸𑀬𑀸𑀬 𑀫𑀳𑁂𑀲𑀺𑀬𑀸 𑀲𑀼𑀢𑁄.

𑁨𑁭. ¶

𑀯𑀺𑀚𑀸𑀢𑀫𑀢𑁆𑀢𑁄’𑀯 𑀯𑀲𑀼𑀦𑁆𑀥𑀭𑀸𑀬 𑀲𑁄,

𑀧𑀢𑀺𑀝𑁆𑀞𑀳𑀺𑀢𑁆𑀯𑀸𑀦 𑀤𑀺𑀲𑀸 𑀯𑀺𑀮𑁄𑀓𑀬𑀻;

𑀢𑀤𑀸 𑀅𑀳𑁂𑀲𑀼𑀁 𑀯𑀺𑀯𑀝𑀗𑁆𑀕𑀦𑀸 𑀤𑀺𑀲𑀸,

𑀅𑀧𑀽𑀚𑀬𑀼𑀁 𑀢𑀢𑁆𑀣 𑀘 𑀤𑁂𑀯𑀫𑀸𑀦𑀼𑀲𑀸.

𑁨𑁮.

𑀆𑀥𑀸𑀭𑀬𑀼𑀁 𑀆𑀢𑀧𑀯𑀸𑀭𑀡𑀸𑀤𑀺𑀓𑀁,

𑀅𑀤𑀺𑀲𑁆𑀲𑀫𑀸𑀦𑀸𑀯 𑀦𑀪𑀫𑁆𑀪𑀺 𑀤𑁂𑀯𑀢𑀸;

𑀧𑀤𑀸𑀦𑀺 𑀲𑁄 𑀲𑀢𑁆𑀢 𑀘 𑀉𑀢𑁆𑀢𑀭𑀸𑀫𑀼𑀔𑁄,

𑀉𑀧𑁂𑀘𑁆𑀘 𑀦𑀺𑀘𑁆𑀙𑀸𑀭𑀬𑀺 𑀯𑀸𑀘𑀫𑀸𑀲𑀪𑀺𑀁.

𑁨𑁯.

𑀬𑀣𑀢𑁆𑀣𑀲𑀺𑀤𑁆𑀥𑀢𑁆𑀢𑀓𑀼𑀫𑀸𑀭𑀦𑀸𑀫𑀓𑁄,

𑀫𑀳𑀩𑁆𑀩𑀮𑁄 𑀬𑁄𑀩𑁆𑀩𑀦𑀳𑀸𑀭𑀺𑀯𑀺𑀕𑁆𑀕𑀳𑁄;

𑀉𑀢𑀼𑀢𑁆𑀢𑀬𑀸𑀦𑀼𑀘𑁆𑀙𑀯𑀺𑀓𑁂𑀲𑀼 𑀢𑀻𑀲𑀼 𑀲𑁄,

𑀦𑀼𑀪𑁄𑀲𑀺 𑀧𑀸𑀲𑀸𑀤𑀯𑀭𑁂𑀲𑀼 𑀲𑀫𑁆𑀧𑀤𑀁.

𑁩𑁦. ¶

𑀓𑀤𑀸𑀘𑀺 𑀉𑀬𑁆𑀬𑀸𑀦𑀧𑀣𑁂 𑀚𑀭𑀸𑀳𑀢𑀁,

𑀢𑀣𑀸𑀢𑀼𑀭𑀁 𑀓𑀸𑀮𑀓𑀢𑀜𑁆𑀘 𑀲𑀁𑀬𑀫𑀺𑀁;

𑀓𑀫𑁂𑀦 𑀤𑀺𑀲𑁆𑀯𑀸𑀦 𑀯𑀺𑀭𑀢𑁆𑀢𑀫𑀸𑀦𑀲𑁄,

𑀪𑀯𑁂𑀲𑀼 𑀲𑁄 𑀧𑀩𑁆𑀩𑀚𑀺𑀢𑀼𑀁 𑀅𑀓𑀸𑀫𑀬𑀺.

𑁩𑁧.

𑀲𑀧𑀼𑀧𑁆𑀨𑀤𑀻𑀧𑀸𑀤𑀻𑀓𑀭𑁂𑀳𑀺 𑀭𑀢𑁆𑀢𑀺𑀬𑀁,

𑀧𑀼𑀭𑀓𑁆𑀔𑀢𑁄 𑀲𑁄 𑀢𑀺𑀤𑀺𑀯𑀸𑀥𑀺𑀯𑀸𑀲𑀺𑀳𑀺;

𑀲𑀙𑀦𑁆𑀦𑀓𑁄 𑀓𑀦𑁆𑀢𑀓𑀯𑀸𑀚𑀺𑀬𑀸𑀦𑀢𑁄,

𑀢𑀢𑁄 𑀫𑀳𑀸𑀓𑀸𑀭𑀼𑀡𑀺𑀓𑁄’𑀪𑀺𑀦𑀺𑀓𑁆𑀔𑀫𑀺.

𑁩𑁨.

𑀓𑀫𑁂𑀦 𑀧𑀢𑁆𑀯𑀸𑀦 𑀅𑀦𑁄𑀫𑀫𑀸𑀧𑀕𑀁,

𑀲𑀼𑀥𑁄𑀢𑀫𑀼𑀢𑁆𑀢𑀸𑀨𑀮𑀳𑀸𑀭𑀺𑀲𑁂𑀓𑀢𑁂;

𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀯𑀭𑀫𑁄𑀴𑀺𑀩𑀦𑁆𑀥𑀦𑀁,

𑀲𑀺𑀢𑀸𑀲𑀺𑀮𑀽𑀦𑀁 𑀕𑀕𑀦𑁂 𑀲𑀫𑀼𑀓𑁆𑀔𑀺𑀧𑀻.

𑁩𑁩. ¶

𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀺𑀤𑀲𑀸𑀦𑀫𑀺𑀲𑁆𑀲𑀭𑁄,

𑀲𑀼𑀯𑀡𑁆𑀦𑀘𑀗𑁆𑀕𑁄𑀝𑀯𑀭𑁂𑀦 𑀢𑀁 𑀢𑀤𑀸;

𑀢𑀺𑀬𑁄𑀚𑀦𑀁 𑀦𑀻𑀮𑀫𑀡𑀻𑀳𑀺 𑀘𑁂𑀢𑀺𑀬𑀁,

𑀅𑀓𑀸𑀲𑀺 𑀘𑀽𑀴𑀸𑀫𑀡𑀺𑀫𑀢𑁆𑀢𑀦𑁄 𑀧𑀼𑀭𑁂.

𑁩𑁪.

𑀢𑀢𑁄 𑀖𑀝𑀻𑀓𑀸𑀭𑀲𑀭𑁄𑀚𑀬𑁄𑀦𑀺𑀦𑀸,

𑀲𑀫𑀸𑀳𑀝𑀁 𑀥𑀸𑀭𑀬𑀻 𑀘𑀻𑀯𑀭𑀸𑀤𑀺𑀓𑀁;

𑀅𑀣𑁄 𑀲𑀓𑀁 𑀯𑀢𑁆𑀣𑀬𑀼𑀕𑀁 𑀦𑀪𑀢𑁆𑀣𑀮𑁂,

𑀧𑀲𑀢𑁆𑀣𑀯𑁂𑀲𑀕𑁆𑀕𑀳𑀡𑁄 𑀲𑀫𑀼𑀓𑁆𑀔𑀺𑀧𑀻.

𑁩𑁫.

𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀦 𑀢𑀫𑀫𑁆𑀩𑀼𑀚𑀸𑀲𑀦𑁄,

𑀫𑀳𑀺𑀤𑁆𑀥𑀺𑀓𑁄 𑀪𑀢𑁆𑀢𑀺𑀪𑀭𑁂𑀦 𑀘𑁄𑀤𑀺𑀢𑁄;

𑀲𑀓𑁂 𑀪𑀯𑁂 𑀤𑁆𑀯𑀸𑀤𑀲𑀬𑁄𑀚𑀦𑀁 𑀅𑀓𑀸,

𑀫𑀡𑀻𑀳𑀺 𑀦𑀻𑀮𑀸𑀤𑀺𑀳𑀺 𑀤𑀼𑀲𑁆𑀲𑀘𑁂𑀢𑀺𑀬𑀁.

𑁩𑁬. ¶

𑀲𑀼𑀲𑀜𑁆𑀜𑀢𑀢𑁆𑀢𑁄 𑀲𑀢𑀺𑀫𑀸 𑀚𑀺𑀢𑀺𑀦𑁆𑀤𑁆𑀭𑀺𑀬𑁄,

𑀯𑀺𑀦𑀻𑀢𑀯𑁂𑀲𑁄 𑀭𑀲𑀕𑁂𑀥𑀯𑀚𑁆𑀚𑀺𑀢𑁄;

𑀙𑀳𑀸𑀬𑀦𑀸𑀦𑁂𑀯 𑀅𑀦𑁄𑀫𑀯𑀺𑀓𑁆𑀓𑀫𑁄,

𑀫𑀳𑀸𑀧𑀥𑀸𑀦𑀁 𑀧𑀤𑀳𑀺𑀢𑁆𑀣 𑀤𑀼𑀓𑁆𑀓𑀭𑀁.

𑁩𑁭.

𑀯𑀺𑀲𑀸𑀔𑀫𑀸𑀲𑀲𑁆𑀲𑀣 𑀧𑀼𑀡𑁆𑀡𑀫𑀸𑀲𑀺𑀬𑀁,

𑀉𑀧𑁂𑀘𑁆𑀘 𑀫𑀽𑀮𑀁 𑀲𑀳𑀚𑀸𑀬 𑀩𑁄𑀥𑀺𑀬𑀸;

𑀢𑀺𑀡𑀸𑀲𑀦𑁂 𑀘𑀼𑀤𑁆𑀤𑀲𑀳𑀢𑁆𑀣𑀲𑀫𑁆𑀫𑀺𑀢𑁂,

𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀯𑀻𑀭𑀺𑀬𑀁 𑀦𑀺𑀲𑀚𑁆𑀚𑀺 𑀲𑁄.

𑁩𑁮.

𑀅𑀯𑀢𑁆𑀣𑀭𑀦𑁆𑀢𑀺𑀁 𑀯𑀲𑀼𑀥𑀁𑀘 𑀅𑀫𑁆𑀩𑀭𑀁,

𑀯𑀺𑀭𑀽𑀧𑀯𑁂𑀲𑀕𑁆𑀕𑀳𑀡𑁂𑀦 𑀪𑀺𑀁𑀲𑀦𑀁;

𑀧𑀓𑀫𑁆𑀧𑀬𑀦𑁆𑀢𑁄 𑀲𑀥𑀭𑀸𑀥𑀭𑀁 𑀫𑀳𑀺𑀁,

𑀚𑀺𑀦𑁄 𑀧𑀤𑁄𑀲𑁂’𑀚𑀺𑀦𑀺 𑀫𑀸𑀭𑀯𑀸𑀳𑀺𑀡𑀺𑀁.

𑁩𑁯. ¶

𑀲𑀼𑀭𑀸𑀲𑀼𑀭𑀩𑁆𑀭𑀳𑁆𑀫𑀕𑀡𑁂𑀳𑀺 𑀲𑀚𑁆𑀚𑀺𑀢𑁂,

𑀚𑀕𑀢𑁆𑀢𑀬𑁂 𑀧𑀼𑀧𑁆𑀨𑀫𑀬𑀕𑀖𑀺𑀓𑀸𑀤𑀺𑀦𑀸;

𑀧𑀯𑀢𑁆𑀢𑀫𑀸𑀦𑁂 𑀲𑀼𑀭𑀤𑀼𑀦𑁆𑀤𑀼𑀪𑀺𑀲𑁆𑀲𑀭𑁂,

𑀅𑀩𑀼𑀚𑁆𑀛𑀺𑀩𑁄𑀥𑀺𑀁 𑀭𑀚𑀦𑀻𑀧𑀭𑀺𑀓𑁆𑀔𑀬𑁂.

𑁪𑁦.

𑀢𑀤𑀸 𑀧𑀓𑀫𑁆𑀧𑀺𑀁𑀲𑀼 𑀲𑀲𑁂𑀮𑀓𑀸𑀦𑀦𑀸,

𑀲𑀳𑀲𑁆𑀲𑀲𑀁𑀔𑀸 𑀤𑀲𑀮𑁄𑀓𑀥𑀸𑀢𑀼𑀬𑁄;

𑀅𑀕𑀜𑁆𑀚𑀺 𑀲𑁄 𑀮𑁄𑀡𑀧𑀬𑁄𑀥𑀺 𑀲𑀸𑀥𑀼𑀢𑀁,

𑀫𑀳𑀸𑀯𑀪𑀸𑀲𑁄 𑀪𑀼𑀯𑀦𑁂𑀲𑀼 𑀧𑀢𑁆𑀣𑀭𑀻.

𑁪𑁧.

𑀮𑀪𑀺𑀁𑀲𑀼 𑀅𑀦𑁆𑀥𑀸 𑀯𑀺𑀫𑀮𑁂 𑀯𑀺𑀮𑁄𑀘𑀦𑁂,

𑀲𑀼𑀡𑀺𑀁𑀲𑀼 𑀲𑀤𑁆𑀤𑁂 𑀩𑀥𑀺𑀭𑀸𑀧𑀺 𑀚𑀸𑀢𑀺𑀬𑀸;

𑀮𑀧𑀺𑀁𑀲𑀼 𑀫𑀽𑀕𑀸 𑀯𑀘𑀦𑁂𑀦 𑀯𑀕𑁆𑀕𑀼𑀦𑀸,

𑀘𑀭𑀺𑀁𑀲𑀼 𑀔𑁂𑀮𑀁 𑀧𑀤𑀲𑀸’𑀯 𑀧𑀗𑁆𑀕𑀼𑀮𑀸.

𑁪𑁨.

𑀪𑀯𑀺𑀁𑀲𑀼 𑀔𑀼𑀚𑁆𑀚𑀸 𑀉𑀚𑀼𑀲𑁄𑀫𑁆𑀫𑀯𑀺𑀕𑁆𑀕𑀳𑀸,

𑀲𑀺𑀔𑀻’𑀧𑀺 𑀦𑀺𑀩𑁆𑀩𑀸𑀬𑀺 𑀅𑀯𑀻𑀘𑀺𑀆𑀤𑀺𑀲𑀼;

𑀅𑀧𑀸𑀕𑀫𑀼𑀁 𑀩𑀦𑁆𑀥𑀦𑀢𑁄’𑀧𑀺 𑀚𑀦𑁆𑀢𑀯𑁄,

𑀔𑀼𑀤𑀸𑀤𑀺𑀓𑀁 𑀧𑁂𑀢𑀪𑀯𑀸 𑀅𑀧𑀓𑁆𑀓𑀫𑀻.

𑁪𑁩. ¶

𑀲𑀫𑀺𑀁𑀲𑀼 𑀭𑁄𑀕𑀯𑁆𑀬𑀲𑀦𑀸𑀦𑀺 𑀧𑀸𑀡𑀺𑀦𑀁,

𑀪𑀬𑀁 𑀢𑀺𑀭𑀘𑁆𑀘𑀸𑀦𑀕𑀢𑁂 𑀦 𑀧𑀻𑀴𑀬𑀻;

𑀚𑀦𑀸 𑀅𑀳𑁂𑀲𑀼𑀁 𑀲𑀔𑀺𑀮𑀸 𑀧𑀺𑀬𑀁𑀯𑀤𑀸,

𑀧𑀯𑀢𑁆𑀢𑀬𑀼𑀁 𑀓𑁄𑀜𑁆𑀘𑀦𑀤𑀁 𑀫𑀢𑀗𑁆𑀕𑀚𑀸.

𑁪𑁪.

𑀳𑀬𑀸 𑀘 𑀳𑁂𑀲𑀺𑀁𑀲𑀼 𑀧𑀳𑀝𑁆𑀞𑀫𑀸𑀦𑀲𑀸,

𑀦𑀤𑀺𑀁𑀲𑀼 𑀲𑀩𑁆𑀩𑀸 𑀲𑀬𑀫𑁂𑀯 𑀤𑀼𑀦𑁆𑀤𑀼𑀪𑀻;

𑀭𑀯𑀺𑀁𑀲𑀼 𑀤𑁂𑀳𑀸𑀪𑀭𑀡𑀸𑀦𑀺 𑀧𑀸𑀡𑀺𑀦𑀁,

𑀤𑀺𑀲𑀸 𑀧𑀲𑀻𑀤𑀺𑀁𑀲𑀼 𑀲𑀫𑀸 𑀲𑀫𑀦𑁆𑀢𑀢𑁄.

𑁪𑁫.

𑀧𑀯𑀸𑀬𑀺 𑀫𑀦𑁆𑀤𑁄 𑀲𑀼𑀔𑀲𑀻𑀢𑀫𑀸𑀭𑀼𑀢𑁄,

𑀧𑀯𑀲𑁆𑀲𑀺 𑀫𑁂𑀖𑁄’𑀧𑀺 𑀅𑀓𑀸𑀮𑀲𑀫𑁆𑀩𑀯𑁄;

𑀚𑀳𑀺𑀁𑀲𑀼 𑀆𑀓𑀸𑀲𑀕𑀢𑀺𑀁 𑀯𑀺𑀳𑀗𑁆𑀕𑀫𑀸,

𑀫𑀳𑀺𑀁 𑀲𑀫𑀼𑀪𑀺𑀚𑁆𑀚𑀚𑀮𑀁 𑀲𑀫𑀼𑀝𑁆𑀞𑀳𑀻.

𑁪𑁬.

𑀅𑀲𑀦𑁆𑀤𑀫𑀸𑀦𑀸’𑀯 𑀞𑀺𑀢𑀸 𑀲𑀯𑀦𑁆𑀢𑀺𑀬𑁄,

𑀦𑀪𑁂 𑀯𑀺𑀭𑁄𑀘𑀺𑀁𑀲𑀼 𑀅𑀲𑁂𑀲𑀚𑁄𑀢𑀺𑀬𑁄;

𑀪𑀯𑀸 𑀅𑀳𑁂𑀲𑀼𑀁 𑀯𑀺𑀯𑀝𑀸 𑀲𑀫𑀦𑁆𑀢𑀢𑁄,

𑀚𑀦𑀲𑁆𑀲 𑀦𑀸𑀲𑀼𑀁 𑀯𑀘𑀦𑀽𑀧𑀧𑀢𑁆𑀢𑀺𑀬𑁄.

𑁪𑁭. ¶

𑀲𑀫𑁂𑀓𑁆𑀔𑀢𑀁 𑀦𑀸𑀯𑀭𑀡𑀸 𑀦𑀕𑀸𑀤𑀬𑁄,

𑀧𑀯𑀸𑀬𑀺 𑀕𑀦𑁆𑀥𑁄 𑀅𑀧𑀺 𑀤𑀺𑀩𑁆𑀩𑀲𑀫𑁆𑀫𑀢𑁄;

𑀤𑀼𑀫𑀸 𑀅𑀳𑁂𑀲𑀼𑀁 𑀨𑀮𑀧𑀼𑀧𑁆𑀨 𑀥𑀸𑀭𑀺𑀦𑁄,

𑀅𑀳𑁄𑀲𑀺 𑀙𑀦𑁆𑀦𑁄 𑀓𑀫𑀮𑁂𑀳𑀺 𑀅𑀡𑁆𑀡𑀯𑁄.

𑁪𑁮.

𑀣𑀮𑁂𑀲𑀼 𑀢𑁄𑀬𑁂𑀲𑀼 𑀘 𑀧𑀼𑀧𑁆𑀨𑀫𑀸𑀦𑀓𑀸,

𑀯𑀺𑀘𑀺𑀢𑁆𑀢𑀧𑀼𑀧𑁆𑀨𑀸 𑀯𑀺𑀓𑀲𑀺𑀁𑀲𑀼 𑀲𑀩𑁆𑀩𑀣𑀸;

𑀦𑀺𑀭𑀦𑁆𑀢𑀭𑀁 𑀧𑀼𑀧𑁆𑀨𑀲𑀼𑀕𑀦𑁆𑀥𑀯𑀼𑀝𑁆𑀞𑀺𑀬𑀸,

𑀅𑀳𑁄𑀲𑀺 𑀲𑀩𑁆𑀩𑀁 𑀯𑀲𑀼𑀥𑀫𑁆𑀩𑀭𑀦𑁆𑀦𑀭𑀁.

𑁪𑁯.

𑀦𑀺𑀲𑀚𑁆𑀚 𑀧𑀮𑁆𑀮𑀗𑁆𑀓𑀯𑀭𑁂 𑀢𑀳𑀺𑀁 𑀚𑀺𑀦𑁄,

𑀲𑀼𑀔𑀁 𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀲𑀫𑁆𑀪𑀯𑀁;

𑀢𑀢𑁄’𑀦𑀼𑀪𑁄𑀦𑁆𑀢𑁄 𑀲𑀼𑀘𑀺𑀭𑀸𑀪𑀺𑀧𑀢𑁆𑀣𑀺𑀢𑀁,

𑀤𑀺𑀦𑀸𑀦𑀺 𑀲𑀢𑁆𑀢𑁂𑀯 𑀅𑀢𑀺𑀓𑁆𑀓𑀫𑀸𑀧𑀬𑀻.

𑁫𑁦. ¶

𑀲𑀫𑀼𑀧𑁆𑀧𑀢𑀺𑀢𑁆𑀯𑀸 𑀕𑀕𑀡𑀗𑁆𑀕𑀦𑀁 𑀢𑀢𑁄,

𑀧𑀤𑀲𑁆𑀲𑀬𑀺𑀢𑁆𑀯𑀸 𑀬𑀫𑀓𑀁 𑀫𑀳𑀸𑀫𑀼𑀦𑀺;

𑀲𑀧𑀸𑀝𑀺𑀳𑀻𑀭𑀁 𑀢𑀺𑀤𑀺𑀯𑀸𑀥𑀺𑀯𑀸𑀲𑀺𑀦𑀁,

𑀚𑀺𑀦𑀢𑁆𑀢𑀦𑁂 𑀲𑀁𑀲𑀬𑀺𑀢𑀁 𑀦𑀺𑀭𑀸𑀓𑀭𑀺.

𑁫𑁧.

𑀅𑀣𑁄𑀢𑀭𑀺𑀢𑁆𑀯𑀸𑀦 𑀚𑀬𑀸𑀲𑀦𑀲𑁆𑀲 𑀲𑁄,

𑀞𑀺𑀢𑁄’𑀯 𑀧𑀼𑀩𑁆𑀩𑀼𑀢𑁆𑀢𑀭𑀓𑀡𑁆𑀡𑀦𑀺𑀲𑁆𑀲𑀺𑀢𑁄;

𑀤𑀺𑀦𑀸𑀦𑀺 𑀲𑀢𑁆𑀢𑀸𑀦𑀺𑀫𑀺𑀲𑁂𑀦 𑀘𑀓𑁆𑀔𑀼𑀦𑀸,

𑀢𑀫𑀸𑀲𑀦𑀁 𑀩𑁄𑀥𑀺𑀢𑀭𑀼𑀁𑀘’𑀧𑀽𑀚𑀬𑀺.

𑁫𑁨.

𑀅𑀣’𑀦𑁆𑀢𑀭𑀸𑀴𑁂 𑀫𑀡𑀺𑀘𑀗𑁆𑀓𑀫𑁂 𑀚𑀺𑀦𑁄,

𑀞𑀺𑀢𑀧𑁆𑀧𑀤𑁂𑀲𑀲𑁆𑀲 𑀘 𑀆𑀲𑀦𑀲𑁆𑀲 𑀘;

𑀫𑀳𑀸𑀭𑀳𑁂 𑀤𑁂𑀯𑀯𑀭𑀸𑀪𑀺𑀦𑀺𑀫𑁆𑀫𑀺𑀢𑁂,

𑀤𑀺𑀦𑀸𑀦𑀺 𑀲𑀢𑁆𑀢𑁂𑀯 𑀅𑀓𑀸𑀲𑀺 𑀯𑀗𑁆𑀓𑀫𑀁.

𑁫𑁩. ¶

𑀢𑀢𑁄 𑀤𑀺𑀲𑀸𑀬𑀁 𑀅𑀧𑀭𑀸𑀬 𑀩𑁄𑀥𑀺𑀬𑀸,

𑀉𑀧𑀸𑀯𑀺𑀲𑀺𑀢𑁆𑀯𑀸 𑀭𑀢𑀦𑀸𑀮𑀬𑁂 𑀚𑀺𑀦𑁄;

𑀲𑀫𑀦𑁆𑀢𑀧𑀝𑁆𑀞𑀸𑀦𑀦𑀬𑀁 𑀯𑀺𑀘𑀺𑀦𑁆𑀢𑀬𑀁,

𑀤𑀺𑀦𑀸𑀦𑀺 𑀲𑀢𑁆𑀢𑁂𑀯 𑀲𑀯𑀻𑀢𑀺𑀦𑀸𑀫𑀬𑀺.

𑁫𑁪.

𑀯𑀺𑀦𑀺𑀕𑁆𑀕𑀢𑁄 𑀲𑀢𑁆𑀣𑀼𑀲𑀭𑀻𑀭𑀢𑁄 𑀢𑀤𑀸,

𑀚𑀼𑀢𑀺𑀧𑁆𑀧𑀩𑀦𑁆𑀥𑁄 𑀧𑀝𑀺𑀩𑀦𑁆𑀥𑀯𑀚𑁆𑀚𑀺𑀢𑁄;

𑀧𑀫𑀸𑀡𑀲𑀼𑀜𑁆𑀜𑀸𑀲𑀼 𑀘 𑀮𑁄𑀓𑀥𑀸𑀢𑀼𑀲𑀼,

𑀲𑀫𑀦𑁆𑀢𑀢𑁄 𑀉𑀤𑁆𑀥𑀫𑀥𑁄 𑀘 𑀧𑀢𑁆𑀣𑀭𑀻.

𑁫𑁫.

𑀯𑀝𑀲𑁆𑀲 𑀫𑀽𑀮𑁂 𑀅𑀚𑀧𑀸𑀮𑀲𑀜𑁆𑀜𑀺𑀦𑁄,

𑀲𑀼𑀔𑀁 𑀨𑀼𑀲𑀦𑁆𑀢𑁄 𑀧𑀯𑀺𑀯𑁂𑀓𑀲𑀫𑁆𑀪𑀯𑀁;

𑀯𑀺𑀦𑀸𑀬𑀓𑁄 𑀲𑀢𑁆𑀢 𑀯𑀺𑀳𑀸𑀲𑀺 𑀯𑀸𑀲𑀭𑁂,

𑀅𑀦𑀦𑁆𑀢𑀤𑀲𑁆𑀲𑀻 𑀲𑀼𑀭𑀭𑀸𑀚𑀧𑀽𑀚𑀺𑀢𑁄.

𑁫𑁬. ¶

𑀯𑀺𑀳𑀸𑀲𑀺 𑀫𑀽𑀮𑁂 𑀫𑀼𑀘𑀮𑀺𑀦𑁆𑀤𑀲𑀸𑀔𑀺𑀦𑁄,

𑀦𑀺𑀲𑀚𑁆𑀚 𑀪𑁄𑀕𑀸𑀯𑀮𑀺𑀫𑀦𑁆𑀤𑀺𑀭𑁄𑀤𑀭𑁂;

𑀯𑀺𑀓𑀺𑀡𑁆𑀡𑀧𑀼𑀧𑁆𑀨𑁂 𑀫𑀼𑀘𑀮𑀺𑀦𑁆𑀤𑀪𑁄𑀕𑀺𑀦𑁄,

𑀲𑀫𑀸𑀥𑀺𑀦𑀸 𑀯𑀸𑀲𑀭𑀲𑀢𑁆𑀢𑀓𑀁 𑀚𑀺𑀦𑁄.

𑁫𑁭.

𑀤𑀼𑀫𑁂’𑀧𑀺 𑀭𑀸𑀚𑀸𑀬𑀢𑀦𑁂 𑀲𑀫𑀸𑀥𑀺𑀦𑀸,

𑀯𑀺𑀳𑀸𑀲𑀺 𑀭𑀢𑁆𑀢𑀺𑀦𑁆𑀤𑀺𑀯 𑀲𑀢𑁆𑀢𑀓𑀁 𑀫𑀼𑀦𑀺;

𑀲𑀳𑀲𑁆𑀲𑀦𑁂𑀢𑁆𑀢𑁄 𑀅𑀣 𑀤𑀦𑁆𑀢𑀧𑁄𑀡𑀓𑀁,

𑀫𑀼𑀔𑁄𑀤𑀓𑀜𑁆𑀘𑀸𑀧𑀺 𑀅𑀤𑀸𑀲𑀺 𑀲𑀢𑁆𑀣𑀼𑀦𑁄.

𑁫𑁮.

𑀢𑀢𑁄 𑀫𑀳𑀸𑀭𑀸𑀚𑀯𑀭𑁂𑀳𑀺 𑀆𑀪𑀢𑀁,

𑀲𑀺𑀮𑀸𑀫𑀬𑀁 𑀧𑀢𑁆𑀢 𑀘𑀢𑀼𑀓𑁆𑀓𑀫𑁂𑀓𑀓𑀁;

𑀯𑀺𑀥𑀸𑀬 𑀫𑀢𑁆𑀣𑀁 𑀫𑀥𑀼𑀧𑀺𑀡𑁆𑀟𑀺𑀓𑀁 𑀢𑀳𑀺𑀁,

𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀦 𑀲𑀯𑀸𑀡𑀺𑀚𑀸𑀳𑀝𑀸.

𑁫𑁯. ¶

𑀓𑀢𑀦𑁆𑀦𑀓𑀺𑀘𑁆𑀘𑁄 𑀲𑀭𑀡𑁂𑀲𑀼 𑀢𑁂 𑀉𑀪𑁄,

𑀧𑀢𑀺𑀝𑁆𑀞𑀧𑁂𑀢𑁆𑀯𑀸𑀦 𑀢𑀧𑀲𑁆𑀲𑀼𑀪𑀮𑁆𑀮𑀺𑀓𑁂;

𑀅𑀤𑀸𑀲𑀺 𑀢𑁂𑀲𑀁 𑀅𑀪𑀺𑀧𑀽𑀚𑀺𑀢𑀼𑀁 𑀲𑀓𑀁,

𑀧𑀭𑀸𑀫𑀲𑀺𑀢𑁆𑀯𑀸𑀦 𑀲𑀺𑀭𑀁 𑀲𑀺𑀭𑁄𑀭𑀼𑀳𑁂.

𑁬𑁦.

𑀯𑀝𑀲𑁆𑀲𑀫𑀼𑀮𑁂 𑀅𑀚𑀧𑀸𑀮𑀲𑀜𑁆𑀜𑀺𑀦𑁄,

𑀲𑀳𑀫𑁆𑀧𑀢𑀻𑀩𑁆𑀭𑀳𑁆𑀫𑀯𑀭𑁂𑀦 𑀬𑀸𑀘𑀺𑀢𑁄;

𑀚𑀦𑀲𑁆𑀲 𑀓𑀸𑀢𑀼𑀁 𑀯𑀭𑀥𑀫𑁆𑀫𑀲𑀗𑁆𑀕𑀳𑀁,

𑀅𑀕𑀜𑁆𑀙𑀺 𑀩𑀸𑀭𑀸𑀡𑀲𑀺𑀫𑁂𑀓𑀓𑁄 𑀫𑀼𑀦𑀺.

𑁬𑁧. ¶

𑀕𑀦𑁆𑀢𑁆𑀯𑀸 𑀲𑁄 𑀥𑀫𑁆𑀫𑀭𑀸𑀚𑀸 𑀯𑀦𑀫𑀺𑀲𑀺𑀧𑀢𑀦𑀁 𑀲𑀜𑁆𑀜𑀢𑀸𑀦𑀁 𑀦𑀺𑀓𑁂𑀢𑀁,

𑀧𑀮𑁆𑀮𑀗𑁆𑀓𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑁄 𑀢𑀳𑀺𑀫𑀯𑀺𑀘𑀮𑀺𑀢𑀝𑁆𑀞𑀸𑀦𑀲𑀫𑁆𑀧𑀸𑀤𑀺𑀢𑀫𑁆𑀳𑀺;

𑀆𑀲𑀸𑀴𑁆𑀳𑁂 𑀧𑀼𑀡𑁆𑀡𑀫𑀸𑀬𑀁 𑀲𑀺𑀢𑀭𑀼𑀘𑀺𑀭𑀼𑀘𑀺𑀬𑀸 𑀚𑁄𑀢𑀺𑀢𑁂 𑀘𑀓𑁆𑀓𑀯𑀸𑀴𑁂,

𑀤𑁂𑀯𑀩𑁆𑀭𑀳𑁆𑀫𑀸𑀤𑀺𑀓𑀸𑀦𑀁 𑀤𑀼𑀭𑀺𑀢𑀫𑀮𑀳𑀭𑀁 𑀯𑀢𑁆𑀢𑀬𑀺 𑀥𑀫𑁆𑀫𑀘𑀓𑁆𑀓𑀁.

𑁬𑁨.

𑀲𑀼𑀢𑁆𑀯𑀸 𑀲𑀤𑁆𑀥𑀫𑁆𑀫𑀫𑀕𑁆𑀕𑀁 𑀢𑀺𑀪𑀽𑀯𑀦𑀓𑀼𑀳𑀭𑀸𑀪𑁄𑀕𑀯𑀺𑀢𑁆𑀣𑀸𑀭𑀺𑀓𑀁 𑀢𑀁,

𑀅𑀜𑁆𑀜𑀸𑀓𑁄𑀡𑁆𑀟𑀜𑁆𑀜𑀦𑀸𑀫𑀤𑁆𑀯𑀺𑀚𑀫𑀼𑀦𑀺𑀧𑀫𑀼𑀔𑀸𑀝𑁆𑀞𑀸𑀭𑀲𑀩𑁆𑀭𑀳𑁆𑀫𑀓𑁄𑀝𑀻;

𑀅𑀜𑁆𑀜𑀸𑀲𑀼𑀁 𑀫𑀕𑁆𑀕𑀥𑀫𑁆𑀫𑀁 𑀧𑀭𑀺𑀫𑀺𑀢𑀭𑀳𑀺𑀢𑁂 𑀘𑀓𑁆𑀓𑀯𑀸𑀴𑁂 𑀉𑀴𑀸𑀭𑁄,

𑀑𑀪𑀸𑀲𑁄 𑀧𑀸𑀢𑀼𑀪𑀼𑀢𑁄 𑀲𑀧𑀤𑀺 𑀩𑀳𑀼𑀯𑀺𑀥𑀁 𑀆𑀲𑀺 𑀅𑀘𑁆𑀙𑁂𑀭𑀓𑀜𑁆𑀘.

𑀧𑀞𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁬𑁩. ¶

𑀢𑀢𑁄 𑀧𑀝𑁆𑀞𑀸𑀬 𑀲𑁄 𑀲𑀢𑁆𑀣𑀸 𑀯𑀺𑀦𑁂𑀦𑁆𑀢𑁄 𑀤𑁂𑀯𑀫𑀸𑀦𑀼𑀲𑁂,

𑀩𑁄𑀥𑀺𑀢𑁄 𑀨𑀼𑀲𑁆𑀲𑀫𑀸𑀲𑀫𑁆𑀳𑀺 𑀦𑀯𑀫𑁂 𑀧𑀼𑀡𑁆𑀡𑀫𑀸𑀲𑀺𑀬𑀁.

𑁬𑁪.

𑀮𑀗𑁆𑀓𑀫𑀸𑀕𑀫𑁆𑀫 𑀕𑀗𑁆𑀕𑀸𑀬 𑀢𑀻𑀭𑁂 𑀬𑁄𑀚𑀦𑀯𑀺𑀢𑁆𑀣𑀢𑁂,

𑀫𑀳𑀸𑀦𑀸𑀕𑀯𑀦𑀼𑀬𑁆𑀬𑀸𑀦𑁂 𑀆𑀬𑀸𑀫𑁂𑀦 𑀢𑀺𑀬𑁄𑀚𑀦𑁂.

𑁬𑁫.

𑀬𑀓𑁆𑀔𑀸𑀦𑀁 𑀲𑀫𑀺𑀢𑀺𑀁 𑀕𑀦𑁆𑀢𑁆𑀯𑀸 𑀞𑀢𑁆𑀯𑀸𑀦 𑀕𑀕𑀦𑁂 𑀢𑀳𑀺𑀁;

𑀯𑀸𑀢𑀦𑁆𑀥𑀓𑀸𑀭𑀯𑀼𑀝𑁆𑀞𑀺𑀳𑀺 𑀓𑀢𑁆𑀯𑀸 𑀬𑀓𑁆𑀔𑁂 𑀪𑀬𑀤𑁆𑀤𑀺𑀢𑁂.

𑁬𑁬.

𑀮𑀤𑁆𑀥𑀸𑀪𑀬𑁂𑀳𑀺 𑀬𑀓𑁆𑀔𑁂𑀳𑀺 𑀢𑁂𑀳𑀺 𑀤𑀺𑀦𑁆𑀦𑀸𑀬 𑀪𑀼𑀫𑀺𑀬𑀸;

𑀘𑀫𑁆𑀫𑀔𑀡𑁆𑀟𑀁 𑀧𑀲𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸𑀦 𑀢𑀗𑁆𑀔𑀡𑁂.

𑁬𑁭.

𑀘𑀫𑁆𑀫𑀔𑀡𑁆𑀟𑀁 𑀧𑀤𑀺𑀢𑁆𑀢𑀕𑁆𑀕𑀺 𑀚𑀸𑀮𑀸𑀫𑀸𑀮𑀸𑀲𑀫𑀸𑀓𑀼𑀮𑀁;

𑀇𑀤𑁆𑀥𑀺𑀬𑀸 𑀯𑀟𑁆𑀠𑀬𑀺𑀢𑁆𑀯𑀸𑀦 𑀬𑀸𑀯 𑀲𑀺𑀦𑁆𑀥𑀼𑀁 𑀲𑀫𑀦𑁆𑀢𑀢𑁄.

𑁬𑁮. ¶

𑀚𑀯𑁂𑀦 𑀲𑀺𑀦𑁆𑀥𑀼𑀯𑁂𑀮𑀸𑀬 𑀭𑀸𑀲𑀺𑀪𑀼𑀢𑁂 𑀦𑀺𑀲𑀸𑀘𑀭𑁂;

𑀕𑀺𑀭𑀺𑀤𑀻𑀧𑀫𑀺𑀥𑀸𑀦𑁂𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑁂𑀲𑀺 𑀢𑁂 𑀢𑀳𑀺𑀁.

𑁬𑁯.

𑀤𑁂𑀲𑀬𑀺𑀢𑁆𑀯𑀸 𑀚𑀺𑀦𑁄 𑀥𑀫𑁆𑀫𑀁 𑀢𑀤𑀸 𑀤𑁂𑀯𑀲𑀫𑀸𑀕𑀫𑁂;

𑀩𑀳𑀼𑀦𑁆𑀦𑀁 𑀧𑀸𑀡𑀓𑁄𑀝𑀻𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑀁 𑀅𑀓𑀸.

𑁭𑁦.

𑀫𑀳𑀸𑀲𑀼𑀫𑀦𑀤𑁂𑀯𑀲𑁆𑀲 𑀲𑁂𑀮𑁂 𑀲𑀼𑀫𑀦𑀓𑀽𑀝𑀓𑁂;

𑀤𑀢𑁆𑀯𑀸 𑀦𑀫𑀲𑁆𑀲𑀺𑀢𑀼𑀁 𑀓𑁂𑀲𑁂 𑀅𑀕𑀸 𑀚𑁂𑀢𑀯𑀦𑀁 𑀚𑀺𑀦𑁄.

𑁭𑁧.

𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀢𑁂 𑀲𑀢𑁆𑀣𑀼 𑀦𑀺𑀲𑀺𑀦𑁆𑀦𑀸𑀲𑀦𑀪𑀼𑀫𑀺𑀬𑀁;

𑀇𑀦𑁆𑀤𑀦𑀻𑀮𑀫𑀬𑀁 𑀣𑀽𑀧𑀁 𑀓𑀭𑀺𑀢𑁆𑀯𑀸 𑀲𑁄 𑀅𑀧𑀽𑀚𑀬𑀺.

𑁭𑁨.

𑀦𑀺𑀲𑁆𑀲𑀸𑀬 𑀫𑀡𑀺𑀧𑀮𑁆𑀮𑀗𑁆𑀓𑀁 𑀧𑀩𑁆𑀩𑀢𑀡𑁆𑀡𑀯𑀯𑀸𑀲𑀺𑀦𑁄;

𑀤𑀺𑀲𑁆𑀯𑀸 𑀬𑀼𑀤𑁆𑀥𑀢𑁆𑀣𑀺𑀓𑁂 𑀦𑀸𑀕𑁂 𑀘𑀽𑀴𑁄𑀤𑀭 𑀫𑀳𑁄𑀤𑀭𑁂.

𑁭𑁩.

𑀩𑁄𑀥𑀺𑀢𑁄 𑀧𑀜𑁆𑀘𑀫𑁂 𑀯𑀲𑁆𑀲𑁂 𑀘𑀺𑀢𑁆𑀢𑀫𑀸𑀲𑁂 𑀫𑀳𑀸𑀫𑀼𑀦𑀺;

𑀉𑀧𑁄𑀲𑀣𑁂 𑀓𑀸𑀮𑀧𑀓𑁆𑀔𑁂 𑀦𑀸𑀕𑀤𑀻𑀧𑀫𑀼𑀧𑀸𑀕𑀫𑀻.

𑁭𑁪. ¶

𑀢𑀤𑀸 𑀲𑀫𑀺𑀤𑁆𑀥𑀺𑀲𑀼𑀫𑀦𑁄 𑀤𑁂𑀯𑁄 𑀚𑁂𑀢𑀯𑀦𑁂 𑀞𑀺𑀢𑀁;

𑀅𑀢𑁆𑀢𑀦𑁄 𑀪𑀯𑀦𑀁𑀬𑁂𑀯 𑀭𑀸𑀚𑀸𑀬𑀢𑀦𑀧𑀸𑀤𑀧𑀁.

𑁭𑁫.

𑀇𑀦𑁆𑀤𑀦𑀻𑀮𑀤𑁆𑀤𑀺𑀓𑀽𑀝𑀁’𑀯 𑀕𑀳𑁂𑀢𑁆𑀯𑀸𑀢𑀼𑀝𑁆𑀞𑀫𑀸𑀦𑀲𑁄;

𑀥𑀸𑀭𑀬𑀺𑀢𑁆𑀯𑀸 𑀲𑀳𑀸𑀕𑀜𑁆𑀙𑀺 𑀙𑀢𑁆𑀢𑀁 𑀓𑀢𑁆𑀯𑀸𑀦 𑀲𑀢𑁆𑀣𑀼𑀦𑁄.

𑁭𑁬.

𑀉𑀪𑀺𑀦𑁆𑀦𑀁 𑀦𑀸𑀕𑀭𑀸𑀚𑀽𑀦𑀁 𑀯𑀢𑁆𑀢𑀫𑀸𑀦𑁂 𑀫𑀳𑀸𑀳𑀯𑁂;

𑀦𑀺𑀲𑀺𑀦𑁆𑀦𑁄 𑀕𑀕𑀦𑁂 𑀦𑀸𑀣𑁄 𑀫𑀸𑀧𑀬𑀺𑀢𑁆𑀣 𑀫𑀳𑀸𑀢𑀫𑀁.

𑁭𑁭.

𑀆𑀮𑁄𑀓𑀁 𑀤𑀲𑁆𑀲𑀬𑀺𑀢𑁆𑀯𑀸𑀣 𑀅𑀲𑁆𑀲𑀸𑀲𑁂𑀢𑁆𑀯𑀸𑀦 𑀪𑁄𑀕𑀺𑀦𑁄;

𑀲𑀸𑀫𑀕𑁆𑀕𑀺𑀓𑀭𑀡𑀁 𑀥𑀫𑁆𑀫𑀁 𑀅𑀪𑀸𑀲𑀺 𑀧𑀼𑀭𑀺𑀲𑀸𑀲𑀪𑁄.

𑁭𑁮.

𑀅𑀲𑀻𑀢𑀺𑀓𑁄𑀝𑀺𑀬𑁄 𑀦𑀸𑀕𑀸 𑀅𑀘𑀮𑀫𑁆𑀩𑀼𑀥𑀺𑀯𑀸𑀲𑀺𑀦𑁄;

𑀧𑀢𑀺𑀝𑁆𑀞𑀳𑀺𑀁𑀲𑀼 𑀫𑀼𑀤𑀺𑀢𑀸 𑀲𑀻𑀮𑁂𑀲𑀼 𑀲𑀭𑀡𑁂𑀲𑀼 𑀘.

𑁭𑁯. ¶

𑀤𑀢𑁆𑀯𑀸𑀦 𑀫𑀡𑀺𑀧𑀮𑁆𑀮𑀗𑁆𑀓𑀁 𑀲𑀢𑁆𑀣𑀼𑀦𑁄 𑀪𑀼𑀚𑀕𑀸𑀥𑀺𑀧𑀸;

𑀢𑀢𑁆𑀣𑀸𑀲𑀻𑀦𑀁 𑀫𑀳𑀸𑀯𑀻𑀭𑀁 𑀅𑀦𑁆𑀦𑀧𑀸𑀦𑁂𑀳𑀺 𑀢𑀧𑁆𑀧𑀬𑀼𑀁.

𑁮𑁦.

𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀲𑁄 𑀢𑀢𑁆𑀣 𑀭𑀸𑀚𑀸𑀬𑀢𑀦𑀧𑀸𑀤𑀧𑀁;

𑀧𑀮𑁆𑀮𑀗𑁆𑀓𑀁 𑀢𑀜𑁆𑀘 𑀦𑀸𑀕𑀸𑀦𑀁 𑀅𑀤𑀸𑀲𑀺 𑀅𑀪𑀺𑀧𑀽𑀚𑀺𑀢𑀼𑀁.

𑁮𑁧.

𑀩𑁄𑀥𑀺𑀢𑁄 𑀅𑀝𑁆𑀞𑀫𑁂 𑀯𑀲𑁆𑀲𑁂 𑀯𑁂𑀲𑀸𑀔𑁂 𑀧𑀼𑀡𑁆𑀡𑀫𑀸𑀲𑀺𑀬𑀁;

𑀫𑀡𑀺𑀅𑀓𑁆𑀔𑀺𑀓𑀦𑀸𑀫𑁂𑀦 𑀦𑀸𑀕𑀺𑀦𑁆𑀤𑁂𑀦 𑀦𑀺𑀫𑀦𑁆𑀢𑀺𑀢𑁄.

𑁮𑁨.

𑀦𑀸𑀕𑀭𑀸𑀚𑀲𑁆𑀲 𑀢𑀲𑁆𑀲𑁂𑀯 𑀪𑀯𑀦𑀁 𑀲𑀸𑀥𑀼 𑀲𑀚𑁆𑀚𑀻𑀢𑀁;

𑀓𑀮𑁆𑀬𑀸𑀡𑀺𑀬𑀁 𑀧𑀜𑁆𑀘𑀪𑀺𑀓𑁆𑀔𑀽 𑀲𑀢𑁂𑀳𑀺 𑀲𑀳 𑀆𑀕𑀫𑀺.

𑁮𑁩.

𑀓𑀮𑁆𑀬𑀸𑀡𑀺𑀘𑁂𑀢𑀺𑀬𑀝𑁆𑀞𑀸𑀦𑁂 𑀓𑀢𑁂 𑀭𑀢𑀦 𑀫𑀡𑁆𑀟𑀧𑁂;

𑀫𑀳𑀸𑀭𑀳𑀫𑁆𑀳𑀺 𑀧𑀮𑁆𑀮𑀗𑁆𑀓𑁂 𑀉𑀧𑀸𑀯𑀺𑀲𑀺 𑀦𑀭𑀸𑀲𑀪𑁄.

𑁮𑁪.

𑀤𑀺𑀩𑁆𑀩𑁂𑀳𑀺 𑀔𑀚𑁆𑀚𑀪𑁄𑀚𑁆𑀚𑁂𑀳𑀺 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁;

𑀲𑀦𑁆𑀢𑀧𑁆𑀧𑁂𑀲𑀺 𑀨𑀡𑀺𑀦𑁆𑀤𑁄 𑀲𑁄 𑀪𑀼𑀚𑀗𑁆𑀕𑁂𑀳𑀺 𑀧𑀼𑀭𑀓𑁆𑀔𑀢𑁄.

𑁮𑁫. ¶

𑀤𑁂𑀲𑀬𑀺𑀢𑁆𑀯𑀸𑀦 𑀲𑀤𑁆𑀥𑀫𑁆𑀫𑀁 𑀲𑀕𑁆𑀕𑀫𑁄𑀓𑁆𑀔𑀲𑀼𑀔𑀸𑀯𑀳𑀁;

𑀲𑁄 𑀲𑀢𑁆𑀣𑀸 𑀲𑀼𑀫𑀦𑁂 𑀓𑀽𑀝𑁂 𑀤𑀲𑁆𑀲𑁂𑀲𑀺 𑀧𑀤𑀮𑀜𑁆𑀙𑀦𑀁.

𑁮𑁬.

𑀢𑀢𑁄 𑀧𑀩𑁆𑀩𑀢𑀧𑀸𑀤𑀫𑁆𑀳𑀺 𑀲𑀲𑀗𑁆𑀖𑁄 𑀲𑁄 𑀯𑀺𑀦𑀸𑀬𑀓𑁄;

𑀤𑀺𑀯𑀸𑀯𑀺𑀳𑀸𑀭𑀁 𑀓𑀢𑁆𑀯𑀸𑀦 𑀤𑀻𑀖𑀯𑀸𑀧𑀺𑀁 𑀉𑀧𑀸𑀕𑀫𑀺.

𑁮𑁭.

𑀣𑀽𑀧𑀝𑁆𑀞𑀸𑀦𑁂 𑀢𑀳𑀺𑀁 𑀩𑀼𑀤𑁆𑀥𑁄 𑀲𑀲𑀗𑁆𑀖𑁄’𑀪𑀺𑀦𑀺𑀲𑀻𑀤𑀺𑀬;

𑀲𑀫𑀸𑀧𑀢𑁆𑀢𑀺 𑀲𑀫𑀼𑀩𑀪𑀼𑀢𑀁 𑀅𑀯𑀺𑀦𑁆𑀤𑀺 𑀅𑀲𑀫𑀁 𑀲𑀼𑀔𑀁.

𑁮𑁮.

𑀫𑀳𑀸𑀩𑁄𑀥𑀺𑀢𑀭𑀼𑀝𑁆𑀞𑀸𑀦𑁂 𑀲𑀫𑀸𑀥𑀺𑀁 𑀅𑀧𑁆𑀧𑀬𑀺 𑀚𑀺𑀦𑁄;

𑀫𑀳𑀸𑀣𑀽𑀧𑀧𑁆𑀧𑀤𑁂𑀲𑁂 𑀘 𑀯𑀺𑀳𑀭𑀺𑀢𑁆𑀣 𑀲𑀫𑀸𑀥𑀺𑀦𑀸.

𑁮𑁯.

𑀣𑀽𑀧𑀸𑀭𑀸𑀫𑀫𑁆𑀳𑀺 𑀣𑀽𑀧𑀲𑁆𑀲 𑀞𑀸𑀦𑁂 𑀛𑀸𑀦𑀲𑀼𑀔𑁂𑀦 𑀲𑁄;

𑀲𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀫𑁆𑀩𑀼𑀤𑁆𑀥𑁄 𑀫𑀼𑀳𑀼𑀢𑁆𑀢𑀁 𑀯𑀻𑀢𑀺𑀦𑀸𑀫𑀬𑀻.

𑁯𑁦. ¶

𑀲𑀺𑀮𑀸𑀣𑀼𑀧𑀧𑁆𑀧𑀤𑁂𑀲𑀫𑁆𑀳𑀺 𑀞𑀢𑁆𑀯𑀸𑀓𑀸𑀮𑀸𑀯𑀺𑀤𑀽 𑀫𑀼𑀦𑀺;

𑀤𑁂𑀯𑁂 𑀲𑀫𑀦𑀼𑀲𑀸𑀲𑀺𑀢𑁆𑀯𑀸 𑀢𑀢𑁄 𑀚𑁂𑀢𑀯𑀦𑀁 𑀅𑀕𑀸.

𑁯𑁧.

𑀅𑀕𑀺𑀤𑁆𑀥𑁄 𑀮𑀸𑀪𑀲𑀓𑁆𑀓𑀸𑀭𑁂 𑀅𑀲𑀬𑁆𑀳𑀫𑀯𑀫𑀸𑀦𑀦𑀁;

𑀲𑀳𑀦𑁆𑀢𑁄 𑀓𑁂𑀯𑀮𑀁 𑀲𑀩𑁆𑀩 𑀮𑁄𑀓𑀦𑀺𑀢𑁆𑀣𑀭𑀡𑀢𑁆𑀣𑀺𑀓𑁄.

𑁯𑁨.

𑀲𑀁𑀯𑀘𑁆𑀙𑀭𑀸𑀦𑀺 𑀞𑀢𑁆𑀯𑀸𑀦 𑀘𑀢𑁆𑀢𑀸𑀴𑀻𑀲𑀜𑁆𑀘 𑀧𑀜𑁆𑀘 𑀘;

𑀤𑁂𑀲𑀬𑀺𑀢𑁆𑀯𑀸𑀦 𑀲𑀼𑀢𑁆𑀢𑀸𑀤𑀺 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁.

𑁯𑁩.

𑀢𑀸𑀭𑁂𑀢𑁆𑀯𑀸 𑀪𑀯𑀓𑀦𑁆𑀢𑀸𑀭𑀸 𑀚𑀦𑁂 𑀲𑀗𑁆𑀔𑁆𑀬𑀸𑀢𑀺𑀯𑀢𑁆𑀢𑀺𑀦𑁄;

𑀩𑀼𑀤𑁆𑀥𑀓𑀺𑀘𑁆𑀘𑀸𑀦𑀺 𑀲𑀩𑁆𑀩𑀸𑀦𑀺 𑀦𑀺𑀝𑁆𑀞𑀸𑀧𑁂𑀢𑁆𑀯𑀸𑀦 𑀘𑀓𑁆𑀔𑀼𑀫𑀸.

𑁯𑁪. ¶

𑀓𑀼𑀲𑀺𑀦𑀸𑀭𑀸𑀧𑀼𑀭𑁂 𑀭𑀜𑁆𑀜𑀁 𑀫𑀮𑁆𑀮𑀸𑀦𑀫𑀼𑀧𑀯𑀢𑁆𑀢𑀦𑁂;

𑀲𑀸𑀮𑀯𑀦𑀫𑁆𑀳𑀺 𑀬𑀫𑀓𑀲𑀸𑀮𑀭𑀼𑀓𑁆𑀔𑀸𑀦𑀫𑀦𑁆𑀢𑀭𑁂.

𑁯𑁫.

𑀫𑀳𑀸𑀭𑀳𑁂 𑀲𑀼𑀧𑀜𑁆𑀜𑀢𑁆𑀢𑁂 𑀫𑀜𑁆𑀘𑁂 𑀉𑀢𑁆𑀢𑀭𑀲𑀻𑀲𑀓𑀁;

𑀦𑀺𑀧𑀦𑁆𑀦𑁄 𑀲𑀻𑀳𑀲𑁂𑀬𑁆𑀬𑀸𑀬 𑀯𑁂𑀲𑀸𑀔𑁂 𑀧𑀼𑀡𑁆𑀡𑀫𑀸𑀲𑀺𑀬𑀁.

𑁯𑁬.

𑀤𑁂𑀲𑁂𑀢𑁆𑀯𑀸 𑀧𑀞𑀫𑁂 𑀬𑀸𑀫𑁂 𑀫𑀮𑁆𑀮𑀸𑀦𑀁 𑀥𑀫𑁆𑀫𑀫𑀼𑀢𑁆𑀢𑀫𑀁;

𑀲𑀼𑀪𑀤𑁆𑀤𑀁 𑀫𑀚𑁆𑀛𑀺𑀫𑁂 𑀬𑀸𑀫𑁂 𑀧𑀸𑀧𑁂𑀢𑁆𑀯𑀸 𑀅𑀫𑀢𑀁 𑀧𑀤𑀁.

𑁯𑁭.

𑀪𑀺𑀓𑁆𑀔𑀼 𑀧𑀘𑁆𑀙𑀺𑀫𑀬𑀸𑀫𑀫𑁆𑀳𑀺 𑀥𑀫𑁆𑀫𑀓𑁆𑀔𑀦𑁆𑀥𑁂 𑀅𑀲𑁂𑀲𑀓𑁂;

𑀲𑀗𑁆𑀕𑀬𑁆𑀳 𑀑𑀯𑀤𑀺𑀢𑁆𑀯𑀸𑀦 𑀅𑀧𑁆𑀧𑀫𑀸𑀤 𑀧𑀤𑁂𑀦 𑀘.

𑁯𑁮.

𑀧𑀘𑁆𑀘𑀼𑀲𑀲𑀫𑀬𑁂 𑀛𑀸𑀦𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀢𑁄;

𑀉𑀝𑁆𑀞𑀸𑀬 𑀧𑀭𑀺𑀦𑀺𑀩𑁆𑀩𑀸𑀬𑀺 𑀲𑁂𑀲𑁄𑀧𑀸𑀤𑀺𑀯𑀺𑀯𑀚𑁆𑀚𑀺𑀢𑁄.

𑁯𑁯. ¶

𑀫𑀳𑀻𑀓𑀫𑁆𑀧𑀸𑀤𑀬𑁄 𑀆𑀲𑀼𑀁 𑀢𑀤𑀸 𑀅𑀘𑁆𑀙𑀭𑀺𑀬𑀸𑀯𑀳𑀸;

𑀧𑀽𑀚𑀸𑀯𑀺𑀲𑁂𑀲𑀸 𑀯𑀢𑁆𑀢𑀺𑀁𑀲𑀼 𑀤𑁂𑀯𑀫𑀸𑀦𑀼𑀲𑀓𑀸 𑀩𑀳𑀽.

𑁧𑁦𑁦.

𑀧𑀭𑀺𑀦𑀺𑀩𑁆𑀩𑀸𑀡𑀲𑀼𑀢𑁆𑀢𑀦𑁆𑀢𑁂 𑀯𑀼𑀢𑁆𑀢𑀸𑀦𑀼𑀓𑁆𑀓𑀫𑀢𑁄 𑀧𑀦;

𑀧𑀽𑀚𑀸𑀯𑀺𑀲𑁂𑀲𑁄 𑀯𑀺𑀜𑁆𑀜𑁂𑀬𑁆𑀬𑁄 𑀇𑀘𑁆𑀙𑀦𑁆𑀢𑁂𑀳𑀺 𑀅𑀲𑁂𑀲𑀢𑁄.

𑁧𑁦𑁧.

𑀅𑀳𑀢𑁂𑀳𑀺 𑀘 𑀯𑀢𑁆𑀣𑁂𑀳𑀺 𑀯𑁂𑀞𑁂𑀢𑁆𑀯𑀸 𑀧𑀞𑀫𑀁 𑀚𑀺𑀦𑀁;

𑀯𑁂𑀞𑀬𑀺𑀢𑁆𑀯𑀸𑀦 𑀓𑀧𑁆𑀧𑀸𑀲𑀧𑀺𑀘𑀼𑀦𑀸 𑀯𑀺𑀳𑀢𑁂𑀦 𑀘.

𑁧𑁦𑁨.

𑀏𑀯𑀁 𑀧𑀜𑁆𑀘𑀲𑀢𑀓𑁆𑀔𑀢𑁆𑀢𑀼𑀁 𑀯𑁂𑀞𑀬𑀺𑀢𑁆𑀯𑀸𑀦 𑀲𑀸𑀥𑀼𑀓𑀁;

𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀼𑀯𑀡𑁆𑀡𑀸𑀬 𑀢𑁂𑀮𑀧𑀼𑀡𑁆𑀡𑀸𑀬 𑀤𑁄𑀡𑀺𑀬𑀸.

𑁧𑁦𑁩.

𑀯𑀻𑀲𑀁𑀳𑀢𑁆𑀣𑀲𑀢𑀼𑀩𑁆𑀩𑁂𑀥𑀁 𑀕𑀦𑁆𑀥𑀤𑀸𑀭𑀽𑀳𑀺 𑀲𑀗𑁆𑀔𑀢𑀁;

𑀆𑀭𑁄𑀧𑀬𑀺𑀁𑀲𑀼 𑀘𑀺𑀢𑀓𑀁 𑀫𑀮𑁆𑀮𑀸𑀦𑀁 𑀧𑀫𑀼𑀔𑀸 𑀢𑀤𑀸.

𑁧𑁦𑁪.

𑀫𑀳𑀸𑀓𑀲𑁆𑀲𑀧𑀣𑁂𑀭𑁂𑀦 𑀥𑀫𑁆𑀫𑀭𑀸𑀚𑁂 𑀅𑀯𑀦𑁆𑀤𑀺𑀢𑁂;

𑀘𑀺𑀢𑀓𑀁 𑀫𑀸 𑀚𑀮𑀺𑀢𑁆𑀣𑀸𑀢𑀺 𑀤𑁂𑀯𑀥𑀺𑀝𑁆𑀞𑀸𑀦𑀢𑁄 𑀧𑀦.

𑁧𑁦𑁫. ¶

𑀧𑀸𑀫𑁄𑀓𑁆𑀔𑀸 𑀫𑀮𑁆𑀮𑀭𑀸𑀚𑀽𑀦𑀁 𑀯𑀸𑀬𑀫𑀦𑁆𑀢𑁄𑀧’𑀦𑁂𑀓𑀥𑀸;

𑀘𑀺𑀢𑀓𑀁 𑀢𑀁 𑀦 𑀲𑀓𑁆𑀔𑀺𑀁𑀲𑀼 𑀕𑀸𑀳𑀸𑀧𑁂𑀢𑀼𑀁 𑀳𑀼𑀢𑀸𑀲𑀦𑀁.

𑁧𑁦𑁬.

𑀫𑀳𑀸𑀓𑀲𑁆𑀲𑀧𑀣𑁂𑀭𑁂𑀦 𑀅𑀥𑀺𑀝𑁆𑀞𑀸𑀦𑁂𑀦 𑀅𑀢𑁆𑀢𑀦𑁄;

𑀯𑀢𑁆𑀣𑀸𑀤𑀻𑀦𑀺 𑀫𑀳𑀸𑀤𑁄𑀡𑀺𑀁 𑀘𑀺𑀢𑀓𑀜𑁆𑀘 𑀫𑀳𑀸𑀭𑀳𑀁.

𑁧𑁦𑁭.

𑀤𑁆𑀯𑀺𑀥𑀸 𑀓𑀢𑁆𑀯𑀸𑀦 𑀦𑀺𑀓𑁆𑀔𑀫𑁆𑀫 𑀲𑀓𑀲𑀻𑀲𑁂 𑀧𑀢𑀺𑀝𑁆𑀞𑀺𑀢𑀸;

𑀯𑀦𑁆𑀤𑀺𑀢𑀸 𑀲𑀢𑁆𑀣𑀼𑀦𑁄 𑀧𑀸𑀤𑀸 𑀬𑀣𑀸𑀝𑁆𑀞𑀸𑀦𑁂 𑀧𑀢𑀺𑀝𑁆𑀞𑀺𑀢𑀸.

𑁧𑁦𑁮.

𑀢𑀢𑁄 𑀤𑁂𑀯𑀸𑀦𑀼𑀪𑀸𑀯𑁂𑀦 𑀧𑀚𑁆𑀚𑀮𑀺𑀢𑁆𑀣 𑀘𑀺𑀢𑀸𑀦𑀮𑁄;

𑀦 𑀫𑀲𑀺 𑀲𑀢𑁆𑀣𑀼𑀤𑁂𑀳𑀲𑁆𑀲 𑀤𑀟𑁆𑀠𑀲𑁆𑀲𑀸𑀲𑀺 𑀦 𑀙𑀸𑀭𑀺𑀓𑀸.

𑁧𑁦𑁯.

𑀥𑀸𑀢𑀼𑀬𑁄 𑀅𑀯𑀲𑀺𑀲𑁆𑀲𑀺𑀁𑀲𑀼 𑀫𑀼𑀢𑁆𑀢𑀸𑀪𑀸 𑀓𑀜𑁆𑀘𑀦𑀧𑁆𑀧𑀪𑀸;

𑀅𑀤𑀺𑀝𑁆𑀞𑀸𑀦𑁂𑀦 𑀩𑀼𑀤𑁆𑀥𑀲𑁆𑀲 𑀯𑀺𑀧𑁆𑀧𑀓𑀺𑀡𑁆𑀡𑀸 𑀅𑀦𑁂𑀓𑀥𑀸.

𑁧𑁧𑁦. ¶

𑀉𑀡𑁆𑀳𑀻𑀲𑀁 𑀅𑀓𑁆𑀔𑀓𑀸 𑀤𑁆𑀯𑁂 𑀘 𑀘𑀢𑀲𑁆𑀲𑁄 𑀤𑀦𑁆𑀢𑀥𑀸𑀢𑀼𑀬𑁄;

𑀇𑀘𑁆𑀘𑁂𑀢𑀸 𑀥𑀸𑀢𑀼𑀬𑁄 𑀲𑀢𑁆𑀢 𑀯𑀺𑀧𑁆𑀧𑀓𑀺𑀡𑁆𑀡𑀸 𑀦 𑀲𑀢𑁆𑀣𑀼𑀦𑁄.

𑁧𑁧𑁧.

𑀆𑀓𑀸𑀲𑀢𑁄 𑀧𑀢𑀺𑀢𑁆𑀯𑀸𑀧𑀺 𑀉𑀕𑁆𑀕𑀦𑁆𑀢𑁆𑀯𑀸𑀧𑀺 𑀫𑀳𑀻𑀢𑀮𑀸;

𑀲𑀫𑀦𑁆𑀢𑀸 𑀚𑀮𑀥𑀸𑀭𑀸𑀬𑁄 𑀦𑀺𑀩𑁆𑀩𑀸𑀧𑁂𑀲𑀼𑀁 𑀘𑀺𑀢𑀸𑀦𑀮𑀁.

𑁧𑁧𑁨.

𑀣𑁂𑀭𑀲𑁆𑀲 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀅𑀦𑁆𑀢𑁂𑀯𑀸𑀲𑀺 𑀫𑀳𑀺𑀤𑁆𑀥𑀺𑀓𑁄;

𑀲𑀭𑀪𑀼𑀦𑀸𑀫𑀓𑁄 𑀣𑁂𑀭𑁄 𑀧𑀪𑀺𑀦𑁆𑀦 𑀧𑀝𑀺𑀲𑀫𑁆𑀪𑀺𑀤𑁄.

𑁧𑁧𑁩.

𑀕𑀻𑀯𑀸𑀥𑀸𑀢𑀼𑀁 𑀕𑀳𑁂𑀢𑁆𑀯𑀸𑀦 𑀘𑀺𑀢𑀢𑁄 𑀫𑀳𑀺𑀬𑀗𑁆𑀕𑀡𑁂;

𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀣𑀽𑀧𑀫𑁆𑀳𑀺 𑀅𑀓𑀸 𑀓𑀜𑁆𑀘𑀼𑀓𑀘𑁂𑀢𑀺𑀬𑀁.

𑁧𑁧𑁪.

𑀔𑁂𑀫𑀯𑁆𑀳𑀬𑁄 𑀓𑀸𑀭𑀼𑀡𑀺𑀓𑁄 𑀔𑀻𑀡𑀲𑀁𑀬𑁄𑀚𑀦𑁄 𑀫𑀼𑀦𑀺;

𑀘𑀺𑀢𑀓𑀸 𑀢𑁄 𑀢𑀢𑁄 𑀯𑀸𑀫𑀤𑀸𑀞𑀸𑀥𑀸𑀢𑀼𑀁 𑀲𑀫𑀕𑁆𑀕𑀳𑀺.

𑁧𑁧𑁫.

𑀅𑀝𑁆𑀞𑀦𑁆𑀦𑀫𑀣 𑀭𑀸𑀚𑀼𑀦𑀁 𑀥𑀸𑀢𑀼𑀅𑀢𑁆𑀣𑀸𑀬 𑀲𑀢𑁆𑀣𑀼𑀦𑁄;

𑀉𑀧𑁆𑀧𑀦𑁆𑀦𑀁 𑀯𑀺𑀕𑁆𑀕𑀳𑀁 𑀤𑁄𑀡𑁄 𑀲𑀫𑁂𑀢𑁆𑀯𑀸𑀦 𑀤𑁆𑀯𑀺𑀚𑀼𑀢𑁆𑀢𑀫𑁄.

𑁧𑁧𑁬. ¶

𑀓𑀢𑁆𑀯𑀸𑀦 𑀅𑀝𑁆𑀞 𑀓𑁄𑀝𑁆𑀞𑀸𑀲𑁂 𑀪𑀸𑀚𑁂𑀢𑁆𑀯𑀸 𑀲𑁂𑀲𑀥𑀸𑀢𑀼𑀬𑁄;

𑀅𑀤𑀸𑀲𑀺 𑀅𑀝𑁆𑀞𑀭𑀸𑀚𑀽𑀦𑀁 𑀢𑀁 𑀢𑀁 𑀦𑀕𑀭𑀯𑀸𑀲𑀺𑀦𑀁.

𑁧𑁧𑁭.

𑀳𑀝𑁆𑀞𑀢𑀼𑀝𑁆𑀞𑀸 𑀕𑀳𑁂𑀢𑁆𑀯𑀸𑀦 𑀥𑀸𑀢𑀼𑀬𑁄 𑀢𑀸 𑀦𑀭𑀸𑀥𑀺𑀧𑀸;

𑀕𑀦𑁆𑀢𑁆𑀯𑀸 𑀲𑀓𑁂 𑀲𑀓𑁂 𑀭𑀝𑁆𑀞𑁂 𑀘𑁂𑀢𑀺𑀬𑀸𑀦𑀺 𑀅𑀓𑀸𑀭𑀬𑀼𑀁.

𑁧𑁧𑁮.

𑀏𑀓𑀸 𑀤𑀸𑀞𑀸 𑀲𑀼𑀭𑀺𑀦𑁆𑀤𑁂𑀦 𑀏𑀓𑀸 𑀕𑀦𑁆𑀥𑀸𑀭𑀯𑀸𑀲𑀺𑀳𑀺;

𑀏𑀓𑀸 𑀪𑀼𑀚𑀗𑁆𑀕𑀭𑀸𑀚𑀽𑀳𑀺 𑀆𑀲𑀺 𑀲𑀓𑁆𑀓𑀢𑀧𑀽𑀚𑀺𑀢𑀸.

𑁧𑁧𑁯.

𑀤𑀦𑁆𑀢𑀥𑀸𑀢𑀼𑀁 𑀢𑀢𑁄 𑀔𑁂𑀫𑁄 𑀅𑀢𑁆𑀢𑀦𑀸 𑀕𑀳𑀺𑀢𑀁 𑀅𑀤𑀸;

𑀤𑀦𑁆𑀢𑀧𑀼𑀭𑁂 𑀓𑀮𑀺𑀗𑁆𑀕𑀲𑁆𑀲 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀭𑀸𑀚𑀺𑀦𑁄.

𑁧𑁨𑁦.

𑀤𑁂𑀲𑀬𑀺𑀢𑁆𑀯𑀸𑀦 𑀲𑁄 𑀥𑀫𑁆𑀫𑀁 𑀪𑁂𑀢𑁆𑀯𑀸 𑀲𑀩𑁆𑀩𑀸 𑀓𑀼𑀤𑀺𑀝𑁆𑀞𑀺𑀬𑁄;

𑀭𑀸𑀚𑀸𑀦𑀁 𑀢𑀁 𑀧𑀲𑀸𑀤𑁂𑀲𑀺 𑀅𑀕𑁆𑀕𑀫𑁆𑀪𑀻 𑀭𑀢𑀦𑀢𑁆𑀢𑀬𑁂.

𑁧𑁨𑁧. ¶

𑀅𑀚𑁆𑀛𑁄𑀕𑀸𑀴𑁆𑀳𑁄 𑀫𑀼𑀦𑀺𑀦𑁆𑀤𑀲𑁆𑀲 𑀥𑀫𑁆𑀫𑀸𑀫𑀢𑀫𑀳𑀡𑁆𑀡𑀯𑀁;

𑀲𑁄 𑀦𑀭𑀺𑀦𑁆𑀤𑁄𑀧𑀯𑀸𑀳𑁂𑀲𑀺 𑀫𑀮𑀁 𑀫𑀘𑁆𑀙𑀭𑀺𑀬𑀸𑀤𑀺𑀓𑀁.

𑁧𑁨𑁨.

𑀧𑀸𑀯𑀼𑀲𑁆𑀲𑀓𑁄 𑀬𑀣𑀸 𑀫𑁂𑀖𑁄 𑀦𑀸𑀦𑀸 𑀭𑀢𑀦𑀯𑀲𑁆𑀲𑀢𑁄;

𑀤𑀸𑀴𑀺𑀤𑁆𑀤𑀺𑀬𑀦𑀺𑀤𑀸𑀖𑀁 𑀲𑁄 𑀦𑀺𑀩𑁆𑀩𑀸𑀧𑁂𑀲𑀺 𑀦𑀭𑀼𑀢𑁆𑀢𑀫𑁄.

𑁧𑁨𑁩.

𑀲𑀼𑀯𑀡𑁆𑀡𑀔𑀘𑀺𑀢𑀸𑀮𑀫𑁆𑀩 𑀫𑀼𑀢𑁆𑀢𑀸𑀚𑀸𑀮𑁂𑀳𑀺 𑀲𑁄𑀪𑀺𑀢𑀁;

𑀓𑀽𑀝𑀸𑀕𑀸𑀭𑀲𑀢𑀸𑀓𑀻𑀡𑁆𑀡𑀁 𑀢𑀭𑀼𑀡𑀸𑀤𑀺𑀘𑁆𑀘𑀲𑀦𑁆𑀦𑀺𑀪𑀁.

𑁧𑁨𑁪.

𑀦𑀸𑀦𑀸𑀭𑀢𑀦𑀲𑁄𑀪𑀸𑀬 𑀤𑀼𑀤𑀺𑀓𑁆𑀔𑀁 𑀘𑀓𑁆𑀔𑀼𑀫𑀽𑀲𑀦𑀁;

𑀬𑀸𑀦𑀁 𑀲𑀕𑁆𑀕𑀸𑀧𑀯𑀕𑁆𑀕𑀲𑁆𑀲 𑀧𑀲𑀸𑀤𑀸𑀢𑀺𑀲𑀬𑀸𑀯𑀳𑀁.

𑁧𑁨𑁫.

𑀓𑀸𑀭𑀬𑀺𑀢𑁆𑀯𑀸𑀦 𑀲𑁄 𑀭𑀸𑀚𑀸 𑀤𑀸𑀞𑀸𑀥𑀸𑀢𑀼𑀦𑀺𑀯𑁂𑀲𑀦𑀁;

𑀥𑀸𑀢𑀼𑀧𑀻𑀞𑀜𑁆𑀘 𑀢𑀢𑁆𑀣𑁂𑀯 𑀓𑀸𑀭𑁂𑀢𑁆𑀯𑀸 𑀭𑀢𑀦𑀼𑀚𑁆𑀚𑀮𑀁.

𑁧𑁨𑁬.

𑀢𑀳𑀺𑀁 𑀲𑀫𑀧𑁆𑀧𑀬𑀺𑀢𑁆𑀯𑀸𑀦 𑀤𑀸𑀞𑀸𑀥𑀸𑀢𑀼𑀁 𑀫𑀳𑁂𑀲𑀺𑀦𑁄;

𑀧𑀽𑀚𑀸𑀯𑀢𑁆𑀣𑀽𑀳𑀺 𑀧𑀽𑀚𑁂𑀲𑀺 𑀭𑀢𑁆𑀢𑀺𑀦𑁆𑀤𑀺𑀯𑀫𑀢𑀦𑁆𑀤𑀺𑀢𑁄.

𑁧𑁨𑁭. ¶

𑀇𑀢𑀺 𑀲𑁄 𑀲𑀜𑁆𑀘𑀺𑀦𑀺𑀢𑁆𑀯𑀸𑀦 𑀧𑀼𑀜𑁆𑀜𑀲𑀫𑁆𑀪𑀸𑀭 𑀲𑀫𑁆𑀧𑀤𑀁;

𑀚𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁 𑀲𑀕𑁆𑀕𑀓𑀸𑀬𑀫𑀮𑀗𑁆𑀓𑀭𑀺.

𑁧𑁨𑁮.

𑀅𑀦𑀼𑀚𑀸𑀢𑁄 𑀢𑀢𑁄 𑀢𑀲𑁆𑀲 𑀓𑀸𑀲𑀺𑀭𑀸𑀚𑀯𑁆𑀳𑀬𑁄 𑀲𑀼𑀢𑁄;

𑀭𑀚𑁆𑀚𑀁 𑀮𑀤𑁆𑀥𑀸 𑀅𑀫𑀘𑁆𑀘𑀸𑀦𑀁 𑀲𑁄𑀓𑀲𑀮𑁆𑀮𑀫𑀧𑀸𑀦𑀼𑀤𑀻.

𑁧𑁨𑁯.

𑀧𑀼𑀧𑁆𑀨𑀕𑀦𑁆𑀥𑀸𑀤𑀺𑀦𑀸 𑀤𑀦𑁆𑀢𑀥𑀸𑀢𑀼𑀁 𑀢𑀫𑀪𑀺𑀧𑀽𑀚𑀺𑀬;

𑀦𑀺𑀘𑁆𑀘𑀁 𑀫𑀡𑀺𑀧𑁆𑀧𑀤𑀻𑀧𑁂𑀳𑀺 𑀚𑁄𑀢𑀬𑀺 𑀥𑀸𑀢𑀼𑀫𑀦𑁆𑀤𑀺𑀭𑀁.

𑁧𑁩𑁦.

𑀇𑀘𑁆𑀘𑁂𑀯𑀫𑀸𑀤𑀺𑀁 𑀲𑁄 𑀭𑀸𑀚𑀸 𑀓𑀢𑁆𑀯𑀸 𑀓𑀼𑀲𑀮𑀲𑀜𑁆𑀘𑀬𑀁;

𑀚𑀳𑀺𑀢𑁆𑀯𑀸𑀦 𑀦𑀺𑀚𑀁 𑀤𑁂𑀳𑀁 𑀤𑁂𑀯𑀺𑀦𑁆𑀤𑀧𑀼𑀭𑀫𑀚𑁆𑀛𑀕𑀸.

𑁧𑁩𑁧.

𑀲𑀼𑀦𑀦𑁆𑀤𑁄 𑀦𑀸𑀫 𑀭𑀸𑀚𑀺𑀦𑁆𑀤𑁄 𑀆𑀦𑀦𑁆𑀤𑀚𑀦𑀦𑁄 𑀲𑀢𑀁;

𑀢𑀲𑁆𑀲’𑀢𑁆𑀭𑀚𑁄 𑀢𑀢𑁄 𑀆𑀲𑀺 𑀩𑀼𑀤𑁆𑀥𑀲𑀸𑀲𑀦𑀫𑀸𑀫𑀓𑁄.

𑁧𑁩𑁨.

𑀲𑀫𑁆𑀫𑀸𑀦𑁂𑀢𑁆𑀯𑀸𑀦 𑀲𑁄 𑀤𑀦𑁆𑀢𑀥𑀸𑀢𑀼𑀁 𑀜𑁂𑀬𑁆𑀬𑀦𑁆𑀢𑀤𑀲𑁆𑀲𑀺𑀦𑁄;

𑀫𑀳𑀢𑀸 𑀪𑀢𑁆𑀢𑀺𑀬𑁄𑀕𑁂𑀦 𑀅𑀕𑀸 𑀤𑁂𑀯𑀲𑀳𑀯𑁆𑀬𑀢𑀁.

𑁧𑁩𑁩. ¶

𑀢𑀢𑁄 𑀧𑀭𑀜𑁆𑀘 𑀅𑀜𑁆𑀜𑁂’𑀧𑀺 𑀩𑀳𑀯𑁄 𑀯𑀲𑀼𑀥𑀸𑀥𑀺𑀧𑀸;

𑀤𑀦𑁆𑀢𑀥𑀸𑀢𑀼𑀁 𑀫𑀼𑀦𑀺𑀦𑁆𑀤𑀲𑁆𑀲 𑀓𑀫𑁂𑀦 𑀅𑀪𑀺𑀧𑀽𑀚𑀬𑀼𑀁.

𑁧𑁩𑁪.

𑀕𑀼𑀳𑀲𑀻𑀯𑀯𑁆𑀳𑀬𑁄 𑀭𑀸𑀚𑀸 𑀤𑀼𑀭𑀢𑀺𑀓𑁆𑀓𑀫 𑀲𑀸𑀲𑀦𑁄;

𑀢𑀢𑁄 𑀭𑀚𑁆𑀚𑀲𑀺𑀭𑀺𑀁 𑀧𑀢𑁆𑀯𑀸 𑀅𑀦𑀼𑀕𑀡𑁆𑀳𑀺 𑀫𑀳𑀸𑀚𑀦𑀁.

𑁧𑁩𑁫.

𑀲𑀧𑀭𑀢𑁆𑀣𑀸𑀦𑀪𑀺𑀜𑁆𑀜𑁂 𑀲𑁄 𑀮𑀸𑀪𑀲𑀓𑁆𑀓𑀸𑀭𑀮𑁄𑀮𑀼𑀧𑁂;

𑀫𑀸𑀬𑀸𑀯𑀺𑀦𑁄 𑀅𑀯𑀺𑀚𑁆𑀚𑀦𑁆𑀥𑁂 𑀦𑀺𑀕𑀦𑁆𑀞𑁂 𑀲𑀫𑀼𑀧𑀝𑁆𑀞𑀳𑀺.

𑁧𑁩𑁬.

𑀯𑀲𑁆𑀲𑀸𑀭𑀢𑁆𑀢𑁂 𑀬𑀣𑀸 𑀘𑀦𑁆𑀤𑁄 𑀫𑁄𑀳𑀓𑁆𑀔𑀦𑁆𑀥𑁂𑀦 𑀆𑀯𑀝𑁄;

𑀦𑀸𑀲𑀓𑁆𑀔𑀻 𑀕𑀼𑀡𑀭𑀁𑀲𑀻𑀳𑀺 𑀚𑀮𑀺𑀢𑀼𑀁 𑀲𑁄 𑀦𑀭𑀸𑀲𑀪𑁄.

𑁧𑁩𑁭.

𑀥𑀫𑁆𑀫𑀫𑀕𑁆𑀕𑀸 𑀅𑀧𑁂𑀢𑁂’𑀧𑀺 𑀧𑀯𑀺𑀝𑁆𑀞𑁂 𑀤𑀺𑀝𑁆𑀞𑀺𑀓𑀸𑀦𑀦𑀁;

𑀢𑀲𑁆𑀫𑀺𑀁 𑀲𑀸𑀥𑀼𑀧𑀣𑀁 𑀅𑀜𑁆𑀜𑁂 𑀦𑀸𑀢𑀺𑀯𑀢𑁆𑀢𑀺𑀁𑀲𑀼 𑀧𑀸𑀡𑀺𑀦𑁄

𑁧𑁩𑁮. ¶

𑀳𑁂𑀫𑀢𑁄𑀭𑀡𑀫𑀸𑀮𑀸𑀳𑀺 𑀥𑀚𑁂𑀳𑀺 𑀓𑀤𑀮𑀺𑀳𑀺 𑀘;

𑀧𑀼𑀧𑁆𑀨𑀕𑀖𑀺𑀬𑁂𑀳𑀺’𑀦𑁂𑀓𑁂𑀳𑀺 𑀲𑀚𑁆𑀚𑁂𑀢𑁆𑀯𑀸 𑀦𑀸𑀕𑀭𑀸 𑀧𑀼𑀭𑀁

𑁧𑁩𑁯.

𑀫𑀗𑁆𑀕𑀮𑀢𑁆𑀣𑀼𑀢𑀺 𑀖𑁄𑀲𑁂𑀳𑀺 𑀦𑀘𑁆𑀘𑀕𑀻𑀢𑀸𑀤𑀺𑀓𑁂𑀳𑀺 𑀘;

𑀳𑁂𑀫𑀭𑀽𑀧𑀺𑀬𑀧𑀼𑀧𑁆𑀨𑁂𑀳𑀺 𑀕𑀦𑁆𑀥𑀘𑀼𑀡𑁆𑀡𑀸𑀤𑀺𑀓𑁂𑀳𑀺 𑀘.

𑁧𑁪𑁦.

𑀧𑀽𑀚𑁂𑀦𑁆𑀢𑀸 𑀫𑀼𑀦𑀺𑀭𑀸𑀚𑀲𑁆𑀲 𑀤𑀸𑀞𑀸𑀥𑀸𑀢𑀼𑀁 𑀓𑀼𑀤𑀸𑀘𑀦𑀁;

𑀅𑀓𑀁𑀲𑀼 𑀏𑀓𑀦𑀺𑀕𑁆𑀖𑁄𑀲𑀁 𑀲𑀁𑀯𑀝𑁆𑀝𑀫𑁆𑀩𑀼𑀥𑀺𑀲𑀦𑁆𑀦𑀺𑀪𑀁.

𑁧𑁪𑁧.

𑀉𑀕𑁆𑀖𑀸𑀝𑁂𑀢𑁆𑀯𑀸 𑀦𑀭𑀺𑀦𑁆𑀤𑁄 𑀲𑁄 𑀧𑀸𑀲𑀸𑀤𑁂 𑀲𑀺𑀳𑀧𑀜𑁆𑀚𑀭𑀁;

𑀧𑀲𑁆𑀲𑀦𑁆𑀢𑁄 𑀚𑀦𑀫𑀤𑁆𑀤𑀓𑁆𑀔𑀻 𑀧𑀽𑀚𑀸𑀯𑀺𑀥𑀺𑀧𑀭𑀸𑀬𑀡𑀁.

𑁧𑁪𑁨.

𑀅𑀣𑀸𑀫𑀘𑁆𑀘𑀲𑀪𑀸𑀫𑀚𑁂𑀢𑁆𑀥 𑀭𑀸𑀚𑀸 𑀯𑀺𑀫𑁆𑀪𑀻𑀢 𑀫𑀸𑀦𑀲𑁄;

𑀓𑁄𑀢𑀼𑀳𑀮𑀸𑀓𑀼𑀮𑁄 𑀳𑀼𑀢𑁆𑀯𑀸 𑀇𑀤𑀁 𑀯𑀘𑀦𑀫𑀩𑁆𑀭𑀯𑀻.

𑁧𑁪𑁩.

𑀅𑀘𑁆𑀙𑁂𑀭𑀓𑀁 𑀓𑀺𑀫𑁂𑀢𑀦𑁆𑀦𑀼 𑀓𑀻𑀤𑀺𑀲𑀁 𑀧𑀸𑀝𑀺𑀳𑀸𑀭𑀺𑀬𑀁;

𑀫𑀫𑁂𑀢𑀁 𑀦𑀕𑀭𑀁 𑀓𑀲𑁆𑀫𑀸 𑀙𑀡𑀦𑀺𑀲𑁆𑀲𑀺𑀢𑀓𑀁 𑀇𑀢𑀺.

𑁧𑁪𑁪. ¶

𑀢𑀢𑁄 𑀅𑀫𑀘𑁆𑀘𑁄 𑀆𑀘𑀺𑀓𑁆𑀔𑀺 𑀫𑁂𑀥𑀸𑀯𑀻 𑀩𑀼𑀤𑁆𑀥𑀫𑀸𑀫𑀓𑁄;

𑀭𑀸𑀚𑀺𑀦𑁄 𑀢𑀲𑁆𑀲 𑀲𑀫𑁆𑀩𑀼𑀤𑁆𑀥𑀸𑀦𑀼𑀪𑀸𑀯𑀫𑀯𑀺𑀚𑀸𑀦𑀢𑁄.

𑁧𑁪𑁫.

𑀲𑀩𑁆𑀩𑀸𑀪𑀺𑀪𑀼𑀲𑁆𑀲𑀩𑀼𑀤𑁆𑀤𑀲𑁆𑀲 𑀢𑀦𑁆𑀳𑀸𑀲𑀗𑁆𑀓𑀬𑀤𑀲𑁆𑀲𑀺𑀦𑁄;

𑀏𑀲𑀸 𑀥𑀸𑀢𑀼 𑀫𑀳𑀸𑀭𑀸𑀚 𑀔𑁂𑀫𑀢𑁆𑀣𑁂𑀭𑁂𑀦 𑀆𑀳𑀝𑀸.

𑁧𑁪𑁬.

𑀢𑀁 𑀥𑀸𑀢𑀼𑀁 𑀧𑀽𑀚𑀬𑀺𑀢𑁆𑀯𑀸𑀦 𑀭𑀸𑀚𑀸𑀦𑁄 𑀧𑀼𑀩𑁆𑀩𑀓𑀸 𑀇𑀥;

𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀦𑀺𑀲𑁆𑀲𑀸𑀬 𑀤𑁂𑀯𑀓𑀸𑀬𑀫𑀼𑀧𑀸𑀕𑀫𑀼𑀁.

𑁧𑁪𑁭.

𑀦𑀸𑀕𑀭𑀸𑀧𑀺 𑀇𑀫𑁂 𑀲𑀩𑁆𑀩𑁂 𑀲𑀫𑁆𑀧𑀭𑀸𑀬 𑀲𑀼𑀓𑀢𑁆𑀣𑀺𑀓𑀸;

𑀧𑀽𑀚𑀬𑀦𑁆𑀢𑀺 𑀲𑀫𑀸𑀕𑀫𑁆𑀫 𑀥𑀸𑀢𑀼𑀁 𑀢𑀁 𑀲𑀢𑁆𑀣𑀼𑀦𑁄 𑀇𑀢𑀺.

𑁧𑁪𑁮.

𑀢𑀲𑁆𑀲𑀸𑀫𑀘𑁆𑀘𑀲𑁆𑀲 𑀲𑁄 𑀭𑀸𑀚𑀸 𑀲𑀼𑀢𑁆𑀯𑀸 𑀥𑀫𑁆𑀫𑀁 𑀲𑀼𑀪𑀸𑀲𑀺𑀢𑀁;

𑀤𑀼𑀮𑁆𑀮𑀤𑁆𑀥𑀻𑀫𑀮𑀫𑀼𑀚𑁆𑀛𑀺𑀢𑁆𑀯𑀸 𑀧𑀲𑀻𑀤𑀺 𑀭𑀢𑀦𑀢𑁆𑀢𑀬𑁂.

𑁧𑁪𑁯. ¶

𑀥𑀸𑀢𑀼𑀧𑀽𑀚𑀁 𑀓𑀭𑁄𑀦𑁆𑀢𑁄 𑀲𑁄 𑀭𑀸𑀚𑀸 𑀅𑀘𑁆𑀙𑀭𑀺𑀬𑀸 𑀯𑀳𑀁;

𑀢𑀺𑀢𑁆𑀣𑀺𑀬𑁂 𑀤𑀼𑀫𑁆𑀫𑀦𑁂’𑀓𑀸𑀲𑀺 𑀲𑀼𑀫𑀦𑁂 𑀘𑁂𑀢𑀭𑁂 𑀚𑀦𑁂.

𑁧𑁫𑁦.

𑀇𑀫𑁂 𑀅𑀳𑀺𑀭𑀺𑀓𑀸 𑀲𑀩𑁆𑀩𑁂 𑀲𑀤𑁆𑀥𑀸𑀤𑀺𑀕𑀼𑀡𑀯𑀚𑁆𑀚𑀺𑀢𑀸;

𑀣𑀤𑁆𑀥𑀸 𑀲𑀞𑀸 𑀘 𑀤𑀼𑀧𑁆𑀧𑀜𑁆𑀜𑀸 𑀲𑀕𑁆𑀕𑀫𑁄𑀓𑁆𑀔𑀯𑀺𑀩𑀦𑁆𑀥𑀓𑀸.

𑁧𑁫𑁧.

𑀇𑀢𑀺 𑀲𑁄 𑀘𑀺𑀦𑁆𑀢𑀬𑀺𑀢𑁆𑀯𑀸𑀦 𑀕𑀼𑀳𑀲𑀻𑀯𑁄 𑀦𑀭𑀸𑀥𑀺𑀧𑁄;

𑀧𑀩𑁆𑀩𑀸𑀚𑁂𑀲𑀺 𑀲𑀓𑀸 𑀭𑀝𑁆𑀞𑀸 𑀦𑀺𑀕𑀡𑁆𑀞𑁂 𑀢𑁂 𑀅𑀲𑁂𑀲𑀓𑁂.

𑁧𑁫𑁨.

𑀢𑀢𑁄 𑀦𑀺𑀕𑁆𑀡𑁆𑀞𑀸 𑀲𑀩𑁆𑀩𑁂’𑀧𑀺 𑀖𑀢𑀲𑀺𑀢𑁆𑀢𑀸𑀦𑀮𑀸 𑀬𑀣𑀸;

𑀓𑁄𑀥𑀕𑁆𑀕𑀺𑀚𑀮𑀺𑀢𑀸’𑀕𑀜𑁆𑀙𑀼𑀁 𑀧𑀼𑀭𑀁 𑀧𑀸𑀝𑀮𑀺𑀧𑀼𑀢𑁆𑀢𑀓𑀁.

𑁧𑁫𑁩.

𑀢𑀢𑁆𑀣 𑀭𑀸𑀚𑀸 𑀫𑀳𑀸𑀢𑁂𑀚𑁄 𑀚𑀫𑁆𑀩𑀼𑀤𑀻𑀧𑀲𑁆𑀲 𑀇𑀲𑁆𑀲𑀭𑁄;

𑀧𑀡𑁆𑀟𑀼𑀦𑀸𑀫𑁄 𑀢𑀤𑀸 𑀆𑀲𑀺 𑀅𑀦𑀦𑁆𑀢𑀩𑀮𑀯𑀸𑀳𑀡𑁄.

𑁧𑁫𑁪. ¶

𑀓𑁄𑀥𑀦𑁆𑀥𑀸𑀣 𑀦𑀺𑀕𑀡𑁆𑀞𑀸 𑀢𑁂 𑀲𑀩𑁆𑀩𑁂 𑀧𑁂𑀲𑀼𑀜𑁆𑀜𑀓𑀸𑀭𑀓𑀸;

𑀉𑀧𑀲𑀗𑁆𑀓𑀫𑁆𑀫 𑀭𑀸𑀚𑀸𑀦𑀁 𑀇𑀤𑀁 𑀯𑀘𑀦𑀫𑀩𑁆𑀭𑀯𑀽𑀁.

𑁧𑁫𑁫.

𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀯𑀦𑁆𑀤𑀦𑀻𑀬𑁂 𑀫𑀳𑀺𑀤𑁆𑀥𑀺𑀓𑁂;

𑀲𑀺𑀯𑀩𑁆𑀭𑀳𑁆𑀫𑀸𑀤𑀬𑁄 𑀤𑁂𑀯𑁂 𑀦𑀺𑀘𑁆𑀘𑀁 𑀢𑀼𑀫𑁆𑀳𑁂 𑀦𑀫𑀲𑁆𑀲𑀣.

𑁧𑁫𑁬.

𑀢𑀼𑀬𑁆𑀳𑀁 𑀲𑀸𑀫𑀦𑁆𑀢𑀪𑀼𑀧𑀸𑀮𑁄 𑀕𑀼𑀳𑀲𑀻𑀯𑁄 𑀧𑀦𑀸𑀥𑀼𑀦𑀸;

𑀦𑀺𑀦𑁆𑀤𑀦𑁆𑀦𑁄 𑀢𑀸𑀤𑀺𑀲𑁂 𑀤𑁂𑀯𑁂 𑀙𑀯𑀝𑁆𑀞𑀺𑀁 𑀯𑀦𑁆𑀤𑀢𑁂 𑀇𑀢𑀺.

𑁧𑁫𑁭.

𑀲𑀼𑀢𑁆𑀯𑀸𑀦 𑀯𑀘𑀦𑀁 𑀢𑁂𑀲𑀁 𑀭𑀸𑀚𑀸 𑀓𑁄𑀥𑀯𑀲𑀸𑀦𑀼𑀕𑁄;

𑀲𑀽𑀭𑀁 𑀲𑀸𑀫𑀦𑁆𑀢𑀪𑀽𑀧𑀸𑀮𑀁 𑀘𑀺𑀢𑁆𑀢𑀬𑀸𑀦𑀫𑀣’𑀩𑁆𑀭𑀯𑀻.

𑁧𑁫𑁮.

𑀓𑀮𑀺𑀗𑁆𑀕𑀭𑀝𑁆𑀞𑀁 𑀕𑀦𑁆𑀢𑁆𑀯𑀸𑀦 𑀕𑀼𑀳𑀲𑀻𑀯𑀫𑀺𑀥𑀸𑀦𑀬;

𑀧𑀽𑀚𑀺𑀢𑀁 𑀢𑀁 𑀙𑀯𑀝𑁆𑀞𑀺𑀜𑁆𑀘 𑀢𑁂𑀦 𑀭𑀢𑁆𑀢𑀺𑀦𑁆𑀤𑀺𑀯𑀁 𑀇𑀢𑀺.

𑁧𑁫𑁯.

𑀘𑀺𑀢𑁆𑀢𑀬𑀸𑀦𑁄 𑀢𑀢𑁄 𑀭𑀸𑀚𑀸 𑀫𑀳𑀢𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀁;

𑀲𑀦𑁆𑀦𑀬𑀳𑀺𑀢𑁆𑀯𑀸 𑀲𑀓𑀁 𑀲𑁂𑀦𑀁 𑀧𑀼𑀭𑀸 𑀢𑀫𑁆𑀳𑀸𑀪𑀺𑀦𑀺𑀓𑁆𑀔𑀫𑀺.

𑁧𑁬𑁦. ¶

𑀕𑀦𑁆𑀢𑁆𑀯𑀸𑀦 𑀲𑁄 𑀫𑀳𑀻𑀧𑀸𑀮𑁄 𑀲𑁂𑀦𑀗𑁆𑀕𑁂𑀳𑀺 𑀧𑀼𑀭𑀓𑁆𑀔𑀢𑁄;

𑀤𑀦𑁆𑀢𑀧𑀼𑀭𑀲𑁆𑀲𑀸𑀯𑀺𑀤𑀽𑀭𑁂 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑁂𑀲𑀬𑀺.

𑁧𑁬𑁧.

𑀲𑀼𑀢𑁆𑀯𑀸 𑀆𑀕𑀫𑀦𑀁 𑀢𑀲𑁆𑀲 𑀓𑀮𑀺𑀗𑁆𑀕𑁄 𑀲𑁄 𑀫𑀳𑀺𑀧𑀢𑀺;

𑀕𑀚𑀺𑀦𑁆𑀤𑀧𑀸𑀪𑀢𑀸𑀤𑀺𑀳𑀺 𑀢𑀁 𑀢𑁄𑀲𑁂𑀲𑀺 𑀦𑀭𑀸𑀥𑀺𑀧𑀁.

𑁧𑁬𑁨.

𑀳𑀺𑀢𑀚𑁆𑀛𑀸𑀲𑀬𑀢𑀁 𑀜𑀢𑁆𑀯𑀸 𑀕𑀼𑀳𑀲𑀻𑀯𑀲𑁆𑀲 𑀭𑀸𑀚𑀺𑀦𑁄;

𑀤𑀦𑁆𑀢𑀧𑀼𑀭𑀁 𑀘𑀺𑀢𑁆𑀢𑀬𑀸𑀦𑁄 𑀲𑀤𑁆𑀥𑀺𑀁 𑀲𑁂𑀦𑀸𑀬 𑀧𑀸𑀯𑀺𑀲𑀺.

𑁧𑁬𑁩.

𑀧𑀸𑀓𑀸𑀭𑀕𑁄𑀧𑀼𑀭𑀝𑁆𑀝𑀸𑀮𑀧𑀸𑀲𑀸𑀤𑀕𑀖𑀺𑀓𑀘𑀺𑀢𑁆𑀢𑀺𑀢𑀁;

𑀤𑀸𑀦𑀲𑀸𑀮𑀸𑀳𑀺 𑀲𑁄 𑀭𑀸𑀚𑀸 𑀲𑀫𑀺𑀤𑁆𑀥𑀁 𑀧𑀼𑀭𑀫𑀤𑁆𑀤𑀲.

𑁧𑁬𑁪.

𑀢𑀢𑁄 𑀲𑁄 𑀲𑀼𑀫𑀦𑁄 𑀕𑀦𑁆𑀢𑁆𑀯𑀸 𑀧𑀯𑀺𑀝𑁆𑀞𑁄 𑀭𑀸𑀚𑀫𑀦𑁆𑀤𑀺𑀭𑀁;

𑀕𑀼𑀳𑀲𑀻𑀯𑀲𑁆𑀲 𑀆𑀘𑀺𑀓𑁆𑀔𑀺 𑀧𑀡𑁆𑀟𑀼𑀭𑀸𑀚𑀲𑁆𑀲 𑀲𑀸𑀲𑀦𑀁.

𑁧𑁬𑁫. ¶

𑀲𑀼𑀢𑁆𑀯𑀸𑀦 𑀲𑀸𑀲𑀦𑀁 𑀢𑀲𑁆𑀲 𑀤𑀸𑀭𑀼𑀡𑀁 𑀤𑀼𑀭𑀢𑀺𑀓𑁆𑀓𑀫𑀁;

𑀧𑀲𑀦𑁆𑀦𑀫𑀼𑀔𑀯𑀡𑁆𑀡𑁄’𑀯 𑀘𑀺𑀢𑁆𑀢𑀬𑀸𑀦𑀁 𑀲𑀫𑀩𑁆𑀭𑀯𑀻.

𑁧𑁬𑁬.

𑀲𑀩𑁆𑀩𑀮𑁄𑀓𑀳𑀺𑀢𑀢𑁆𑀣𑀸𑀬 𑀫𑀁𑀲𑀦𑁂𑀢𑁆𑀢𑀸𑀤𑀺𑀤𑀸𑀦𑀢𑁄;

𑀅𑀦𑀧𑁆𑀧𑀓𑀧𑁆𑀧𑁂 𑀲𑀫𑁆𑀪𑀸𑀭𑁂 𑀲𑀫𑁆𑀪𑀭𑀺𑀢𑁆𑀯𑀸 𑀅𑀢𑀦𑁆𑀤𑀺𑀢𑁄.

𑁧𑁬𑁭.

𑀚𑁂𑀢𑁆𑀯𑀸 𑀦𑀫𑀼𑀘𑀺𑀦𑁄 𑀲𑁂𑀦𑀁 𑀧𑀢𑁆𑀯𑀸 𑀲𑀩𑁆𑀩𑀸𑀲𑀯𑀓𑁆𑀔𑀬𑀁;

𑀅𑀦𑀸𑀯𑀭𑀡𑀜𑀸𑀡𑁂𑀦 𑀲𑀩𑁆𑀩𑀥𑀫𑁆𑀫𑁂𑀲𑀼 𑀧𑀸𑀭𑀕𑀼.

𑁧𑁬𑁮.

𑀤𑀺𑀝𑁆𑀞𑀥𑀫𑁆𑀫𑀲𑀼𑀓𑀲𑁆𑀲𑀸𑀤𑀁 𑀅𑀕𑀡𑁂𑀢𑁆𑀯𑀸𑀦 𑀅𑀢𑁆𑀢𑀦𑁄;

𑀥𑀫𑁆𑀫𑀦𑀸𑀯𑀸𑀬 𑀢𑀸𑀭𑁂𑀲𑀺 𑀚𑀦𑀢𑀁 𑀬𑁄 𑀪𑀯𑀡𑁆𑀡𑀯𑀸.

𑁧𑁬𑁯.

𑀤𑁂𑀯𑀸𑀢𑀺𑀤𑁂𑀯𑀁 𑀢𑀁 𑀩𑀼𑀤𑁆𑀥𑀁 𑀲𑀭𑀡𑀁 𑀲𑀩𑁆𑀩𑀧𑀸𑀡𑀺𑀦𑀁;

𑀚𑀦𑁄 𑀳𑀺 𑀅𑀯𑀚𑀸𑀦𑀦𑁆𑀢𑁄 𑀅𑀤𑁆𑀥𑀸 𑀲𑁄 𑀯𑀜𑁆𑀘𑀺𑀢𑁄 𑀇𑀢𑀺.

𑁧𑁭𑁦. ¶

𑀇𑀘𑁆𑀘𑁂𑀯𑀫𑀸𑀤𑀺𑀁 𑀲𑀼𑀢𑁆𑀯𑀸𑀦 𑀲𑁄 𑀭𑀸𑀚𑀸 𑀲𑀢𑁆𑀣𑀼𑀯𑀡𑁆𑀡𑀦𑀁;

𑀆𑀦𑀦𑁆𑀤𑀲𑁆𑀲𑀼𑀧𑁆𑀧𑀩𑀦𑁆𑀥𑁂𑀳𑀺 𑀧𑀯𑁂𑀤𑁂𑀲𑀺 𑀧𑀲𑀦𑁆𑀦𑀢𑀁.

𑁧𑁭𑁧.

𑀕𑀼𑀳𑀲𑀻𑀯𑁄 𑀧𑀲𑀦𑁆𑀦𑀁 𑀢𑀁 𑀘𑀺𑀢𑁆𑀢𑀬𑀸𑀦𑀁 𑀉𑀤𑀺𑀓𑁆𑀔𑀺𑀬;

𑀢𑁂𑀦 𑀲𑀤𑁆𑀥𑀺𑀁 𑀫𑀳𑀕𑁆𑀖𑀁 𑀢𑀁 𑀅𑀕𑀫𑀸 𑀥𑀸𑀢𑀼𑀫𑀦𑁆𑀤𑀺𑀭𑀁.

𑁧𑁭𑁨.

𑀳𑀭𑀺𑀘𑀦𑁆𑀤𑀦𑀲𑀫𑁆𑀪𑀼𑀢𑀁 𑀤𑁆𑀯𑀸𑀭𑀩𑀸𑀳𑀸𑀤𑀺𑀓𑁂𑀳𑀺 𑀘;

𑀧𑀯𑀸𑀴𑀯𑀸𑀴𑀫𑀸𑀮𑀸𑀳𑀺 𑀮𑀫𑁆𑀩𑀫𑀼𑀢𑁆𑀢𑀸𑀮𑀢𑀸𑀳𑀺 𑀘.

𑁧𑁭𑁩.

𑀇𑀦𑁆𑀤𑀦𑀻𑀮𑀓𑀯𑀸𑀝𑁂𑀳𑀺 𑀫𑀡𑀺𑀓𑀺𑀗𑁆𑀓𑀺𑀡𑀺𑀓𑀸𑀳𑀺 𑀘;

𑀲𑁄𑀯𑀡𑁆𑀡𑀓𑀡𑁆𑀡𑀫𑀸𑀮𑀸𑀳𑀺 𑀲𑁄𑀪𑀺𑀢𑀁 𑀫𑀡𑀺𑀣𑀽𑀧𑀺𑀓𑀁.

𑁧𑁭𑁪.

𑀉𑀘𑁆𑀘𑀁 𑀯𑁂𑀮𑀼𑀭𑀺𑀬𑀼𑀩𑁆𑀪𑀸𑀲𑀺 𑀙𑀤𑀦𑀁 𑀫𑀓𑀭𑀸𑀓𑀼𑀮𑀁;

𑀥𑀸𑀢𑀼𑀫𑀦𑁆𑀤𑀺𑀭𑀫𑀤𑁆𑀤𑀓𑁆𑀔𑀺 𑀭𑀢𑀦𑀼𑀚𑁆𑀚𑀮 𑀧𑀻𑀞𑀓𑀁.

𑁧𑁭𑁫.

𑀢𑀢𑁄 𑀲𑁂𑀢𑀸𑀢𑀧𑀢𑁆𑀢𑀲𑁆𑀲 𑀳𑁂𑀝𑁆𑀞𑀸 𑀭𑀢𑀦𑀘𑀺𑀢𑁆𑀢𑀺𑀢𑀁;

𑀤𑀺𑀲𑁆𑀯𑀸 𑀥𑀸𑀢𑀼𑀓𑀭𑀦𑁆𑀟𑀜𑁆𑀘 𑀢𑀼𑀝𑁆𑀞𑁄 𑀯𑀺𑀫𑁆𑀪𑀬𑀫𑀚𑁆𑀛𑀕𑀸.

𑁧𑁭𑁬. ¶

𑀢𑀢𑁄 𑀓𑀮𑀺𑀗𑁆𑀕𑀦𑀸𑀣𑁄 𑀲𑁄 𑀯𑀺𑀯𑀭𑀺𑀢𑁆𑀯𑀸 𑀓𑀭𑀡𑁆𑀟𑀓𑀁;

𑀫𑀳𑀻𑀢𑀮𑁂 𑀦𑀺𑀳𑀦𑁆𑀢𑁆𑀯𑀸𑀦 𑀤𑀓𑁆𑀔𑀺𑀡𑀁 𑀚𑀸𑀦𑀼𑀫𑀡𑁆𑀟𑀮𑀁.

𑁧𑁭𑁭.

𑀅𑀜𑁆𑀚𑀮𑀺𑀁 𑀧𑀕𑁆𑀕𑀳𑁂𑀢𑁆𑀯𑀸𑀦 𑀕𑀼𑀡𑁂 𑀤𑀲𑀩𑀮𑀸𑀤𑀺𑀓𑁂;

𑀲𑀭𑀺𑀢𑁆𑀯𑀸 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲 𑀅𑀓𑀸𑀲𑀺 𑀅𑀪𑀺𑀬𑀸𑀘𑀦𑀁.

𑁧𑁭𑁮.

𑀕𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑀫𑁆𑀳𑀺 𑀢𑀬𑀸 𑀢𑀺𑀢𑁆𑀣𑀻𑀬𑀫𑀤𑁆𑀤𑀦𑁂;

𑀬𑀫𑀓𑀁 𑀤𑀲𑁆𑀲𑀬𑀦𑁆𑀢𑁂𑀦 𑀧𑀸𑀝𑀺𑀳𑀸𑀭𑀺𑀬𑀫𑀩𑁆𑀪𑀼𑀢𑀁.

𑁧𑁭𑁯.

𑀧𑀼𑀩𑁆𑀩𑀓𑀸𑀬𑀸𑀤𑀺𑀦𑀺𑀓𑁆𑀔𑀦𑁆𑀢𑀚𑀮𑀸𑀦𑀮𑀲𑀫𑀸𑀓𑀼𑀮𑀁;

𑀘𑀓𑁆𑀓𑀯𑀸𑀴𑀗𑁆𑀕𑀡𑀁 𑀓𑀢𑁆𑀯𑀸 𑀚𑀦𑀸 𑀲𑀩𑁆𑀩𑁂 𑀧𑀲𑀸𑀤𑀺𑀢𑀸.

𑁧𑁮𑁦.

𑀤𑁂𑀲𑁂𑀢𑁆𑀯𑀸𑀦 𑀢𑀬𑁄 𑀫𑀸𑀲𑁂 𑀅𑀪𑀺𑀥𑀫𑁆𑀫𑀁 𑀲𑀼𑀥𑀸𑀲𑀺𑀦𑀁;

𑀦𑀕𑀭𑀁 𑀑𑀢𑀭𑀦𑁆𑀢𑁂𑀦 𑀲𑀗𑁆𑀓𑀲𑁆𑀲𑀁 𑀢𑀸𑀯𑀢𑀺𑀁𑀲𑀢𑁄.

𑁧𑁮𑁧. ¶

𑀙𑀢𑁆𑀢𑀯𑀸𑀫𑀭𑀲𑀗𑁆𑀔𑀸𑀤𑀺𑀕𑀸𑀳𑀓𑁂𑀳𑀺 𑀅𑀦𑁂𑀓𑀥𑀸;

𑀩𑁆𑀭𑀳𑁆𑀫𑀤𑁂𑀯𑀸𑀲𑀼𑀭𑀸𑀤𑀻𑀳𑀺 𑀧𑀽𑀚𑀺𑀢𑁂𑀦 𑀢𑀬𑀸 𑀧𑀦.

𑁧𑁮𑁨.

𑀞𑀢𑁆𑀯𑀸𑀦 𑀫𑀡𑀺𑀲𑁄𑀧𑀸𑀡𑁂 𑀯𑀺𑀲𑁆𑀲𑀓𑀫𑁆𑀫𑀸𑀪𑀺𑀦𑀺𑀫𑁆𑀫𑀺𑀢𑁂;

𑀮𑁄𑀓𑀯𑀺𑀯𑀭𑀡𑀁 𑀦𑀸𑀫 𑀤𑀲𑁆𑀲𑀺𑀢𑀁 𑀧𑀸𑀝𑀺𑀳𑀸𑀭𑀺𑀬𑀁.

𑁧𑁮𑁩.

𑀢𑀣𑀸𑀦𑁂𑀓𑁂𑀲𑀼 𑀞𑀸𑀦𑁂𑀲𑀼 𑀫𑀼𑀦𑀺𑀭𑀸𑀚 𑀢𑀬𑀸𑀧𑀼𑀦;

𑀩𑀳𑀽𑀦𑀺 𑀧𑀸𑀝𑀺𑀳𑀺𑀭𑀸𑀦𑀺 𑀤𑀲𑁆𑀲𑀺𑀢𑀸𑀦𑀺 𑀲𑀬𑀫𑁆𑀪𑀼𑀦𑀸.

𑁧𑁮𑁪.

𑀧𑀸𑀝𑀺𑀳𑀸𑀭𑀺𑀬𑀫𑀚𑁆𑀚𑀸𑀧𑀺 𑀲𑀕𑁆𑀕𑀫𑁄𑀓𑁆𑀔𑀲𑀼𑀔𑀸𑀯𑀳𑀁;

𑀧𑀲𑁆𑀲𑀦𑁆𑀢𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀤𑀲𑁆𑀲𑀦𑀻𑀬𑀁 𑀢𑀬𑀸 𑀇𑀢𑀺.

𑁧𑁮𑁫. ¶

𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀕𑀕𑀡 𑀓𑀼𑀳𑀭𑀁 𑀘𑀦𑁆𑀤𑀮𑁂𑀔𑀸𑀪𑀺𑀭𑀸𑀫𑀸,

𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺 𑀭𑀚𑀢 𑀥𑀯𑀮𑀸 𑀭𑀁𑀲𑀺𑀬𑁄 𑀤𑀦𑁆𑀢𑀥𑀸𑀢𑀼;

𑀥𑀽𑀧𑀸𑀬𑀦𑁆𑀢𑀺 𑀲𑀧𑀤𑀺 𑀩𑀳𑀼𑀥𑀸 𑀧𑀚𑁆𑀚𑀮𑀦𑁆𑀢𑀻 𑀫𑀼𑀳𑀼𑀢𑁆𑀢𑀁,

𑀦𑀺𑀩𑁆𑀩𑀸𑀬𑀦𑁆𑀢𑀻 𑀦𑀬𑀦𑀲𑀼𑀪𑀕𑀁 𑀧𑀸𑀝𑀺𑀳𑀻𑀭𑀁 𑀅𑀓𑀸𑀲𑀺.

𑁧𑁮𑁬.

𑀅𑀘𑁆𑀙𑁂𑀭𑀁 𑀢𑀁 𑀧𑀭𑀫 𑀭𑀼𑀘𑀺𑀭𑀁 𑀘𑀺𑀢𑁆𑀢𑀬𑀸𑀦𑁄 𑀦𑀭𑀺𑀦𑁆𑀤𑁄,

𑀤𑀺𑀲𑁆𑀯𑀸 𑀳𑀝𑁆𑀞𑁄 𑀘𑀺𑀭𑀧𑀭𑀺𑀘𑀺𑀢𑀁 𑀤𑀺𑀝𑁆𑀞𑀺𑀚𑀸𑀮𑀁 𑀚𑀳𑀺𑀢𑁆𑀯𑀸;

𑀕𑀦𑁆𑀢𑁆𑀯𑀸 𑀩𑀼𑀤𑁆𑀥𑀁 𑀲𑀭𑀡𑀫𑀲𑀫𑀁 𑀲𑀩𑁆𑀩𑀲𑁂𑀡𑀻𑀳𑀺 𑀲𑀤𑁆𑀥𑀺𑀁,

𑀅𑀕𑁆𑀕𑀁 𑀧𑀼𑀜𑁆𑀜𑀁 𑀧𑀲𑀯𑀺 𑀩𑀳𑀼𑀥𑀸 𑀥𑀸𑀢𑀼𑀲𑀫𑁆𑀫𑀸𑀦𑀦𑀸𑀬.

𑀤𑀼𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄

𑁧𑁮𑁭. ¶

𑀢𑀢𑁄 𑀓𑀮𑀺𑀗𑁆𑀕𑀸𑀥𑀺𑀧𑀢𑀺𑀲𑁆𑀲 𑀢𑀲𑁆𑀲𑀲𑁄𑀘𑀺𑀢𑁆𑀢𑀬𑀸𑀦𑁄𑀧𑀭𑀫𑀧𑁆𑀧𑀢𑀻𑀢𑁄;

𑀢𑀁 𑀲𑀸𑀲𑀦𑀁 𑀧𑀡𑁆𑀟𑀼𑀦𑀭𑀸𑀥𑀺𑀧𑀲𑁆𑀲 𑀜𑀸𑀧𑁂𑀲𑀺 𑀥𑀻𑀭𑁄 𑀤𑀼𑀭𑀢𑀺𑀓𑁆𑀓𑀫𑀁’𑀢𑀺.

𑁧𑁮𑁮.

𑀭𑀸𑀚𑀸𑀢𑀢𑁄 𑀤𑀦𑁆𑀢𑀧𑀼𑀭𑀁 𑀥𑀚𑁂𑀳𑀺 𑀧𑀼𑀧𑁆𑀨𑁂𑀳𑀺 𑀥𑀽𑀧𑁂𑀳𑀺 𑀘 𑀢𑁄𑀭𑀡𑁂𑀳𑀺;

𑀅𑀮𑀗𑁆𑀓𑀭𑀺𑀢𑁆𑀯𑀸𑀦 𑀫𑀳𑀸𑀯𑀺𑀢𑀸𑀦 𑀦𑀺𑀯𑀸𑀭𑀺𑀢𑀸𑀤𑀺𑀘𑁆𑀘𑀫𑀭𑀻𑀘𑀺𑀚𑀸𑀮𑀁.

𑁧𑁮𑁯.

𑀅𑀲𑁆𑀲𑀼𑀧𑁆𑀧𑀩𑀦𑁆𑀥𑀸𑀯𑀼𑀢𑀮𑁄𑀘𑀦𑁂𑀳𑀺 𑀧𑀼𑀭𑀓𑁆𑀔𑀢𑁄 𑀦𑁂𑀕𑀫 𑀦𑀸𑀕𑀭𑁂𑀳𑀺;

𑀲𑀫𑀼𑀩𑁆𑀩𑀳𑀦𑁆𑀢𑁄 𑀲𑀺𑀭𑀲𑀸 𑀦𑀺𑀚𑁂𑀦 𑀫𑀳𑀸𑀭𑀳𑀁 𑀥𑀸𑀢𑀼𑀓𑀭𑀡𑁆𑀟𑀓𑀁 𑀢𑀁.

𑁧𑁯𑁦.

𑀲𑀫𑀼𑀲𑁆𑀲𑀺𑀢𑁄𑀤𑀸𑀭 𑀲𑀺𑀢𑀸𑀢𑀧𑀢𑁆𑀢𑀁 𑀲𑀗𑁆𑀔𑁄𑀤𑀭𑁄𑀤𑀸𑀢 𑀢𑀼𑀭𑀗𑁆𑀕𑀬𑀼𑀢𑁆𑀢𑀁;

𑀭𑀣𑀁 𑀦𑀯𑀸𑀤𑀺𑀘𑁆𑀘𑀲𑀫𑀸𑀦𑀯𑀡𑁆𑀡 𑀫𑀸𑀭𑀼𑀬𑁆𑀳 𑀘𑀺𑀢𑁆𑀢𑀢𑁆𑀣𑀭𑀡𑀸𑀪𑀺𑀭𑀸𑀫𑀁.

𑁧𑁯𑁧.

𑀅𑀦𑁂𑀓𑀲𑀗𑁆𑀔𑁂𑀳𑀺 𑀩𑀮𑁂𑀳𑀺 𑀲𑀤𑁆𑀥𑀺𑀁 𑀯𑁂𑀮𑀸𑀢𑀺𑀯𑀢𑁆𑀢𑀫𑁆𑀩𑀼𑀥𑀺𑀲𑀦𑁆𑀦𑀺𑀪𑁂𑀳𑀻;

𑀦𑀺𑀯𑀢𑁆𑀢𑀫𑀸𑀦𑀲𑁆𑀲 𑀩𑀳𑀼𑀚𑁆𑀚𑀦𑀲𑁆𑀲 𑀯𑀺𑀦𑀸𑀧𑀺 𑀤𑁂𑀳𑀁 𑀫𑀦𑀲𑀸𑀦𑀼𑀬𑀸𑀢𑁄

𑁧𑁯𑁨. ¶

𑀲𑀼𑀲𑀦𑁆𑀣𑀢𑀁 𑀲𑀩𑁆𑀩𑀥𑀺𑀯𑀸𑀮𑀼𑀓𑀸𑀳𑀺 𑀲𑀼𑀲𑀚𑁆𑀚𑀺𑀢𑀁 𑀧𑀼𑀡𑁆𑀡 𑀖𑀝𑀸𑀤𑀺𑀓𑁂𑀳𑀺;

𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑀁 𑀧𑀝𑀺𑀧𑀚𑁆𑀚𑀺 𑀤𑀻𑀖𑀁 𑀲𑀼𑀯𑀺𑀢𑁆𑀣𑀢𑀁 𑀧𑀸𑀝𑀮𑀺𑀧𑀼𑀢𑁆𑀢𑀫𑀕𑁆𑀕𑀁.

𑁧𑁯𑁩.

𑀓𑀮𑀺𑀗𑁆𑀖𑀦𑀸𑀣𑁄 𑀓𑀼𑀲𑀼𑀫𑀸𑀤𑀺𑀓𑁂𑀳𑀺 𑀦𑀘𑁆𑀘𑁂𑀳𑀺 𑀕𑀻𑀢𑁂𑀳𑀺 𑀘 𑀯𑀸𑀤𑀺𑀢𑁂𑀳𑀺;

𑀤𑀺𑀦𑁂 𑀤𑀺𑀦𑁂 𑀅𑀤𑁆𑀥𑀦𑀺 𑀤𑀦𑁆𑀢𑀥𑀸𑀢𑀼𑀁 𑀧𑀽𑀚𑁂𑀲𑀺 𑀲𑀤𑁆𑀥𑀺𑀁 𑀯𑀦𑀤𑁂𑀯𑀢𑀸𑀳𑀺.

𑁧𑁯𑁪.

𑀲𑀼𑀤𑀼𑀕𑁆𑀕𑀫𑀁 𑀲𑀺𑀦𑁆𑀥𑀼𑀫𑀳𑀻𑀥𑀭𑁂𑀳𑀺 𑀓𑀫𑁂𑀦 𑀫𑀤𑁆𑀥𑀸𑀦𑀫𑀢𑀺𑀓𑁆𑀓𑀫𑀺𑀢𑁆𑀯𑀸;

𑀆𑀤𑀸𑀬 𑀥𑀸𑀢𑀼𑀁 𑀫𑀦𑀼𑀚𑀸𑀥𑀺𑀦𑀸𑀣𑁄 𑀅𑀕𑀸 𑀧𑀼𑀭𑀁 𑀧𑀸𑀝𑀮𑀺 𑀧𑀼𑀢𑁆𑀢𑀦𑀸𑀫𑀁.

𑁧𑁯𑁫.

𑀭𑀸𑀚𑀸𑀥𑀺𑀭𑀸𑀚𑁄’𑀣 𑀲𑀪𑀸𑀬 𑀫𑀚𑁆𑀛𑁂 𑀤𑀺𑀲𑁆𑀯𑀸𑀦 𑀢𑀁 𑀯𑀻𑀢𑀪𑀬𑀁 𑀯𑀺𑀲𑀗𑁆𑀓𑀁;

𑀓𑀮𑀺𑀗𑁆𑀕𑀭𑀸𑀚𑀁 𑀧𑀝𑀺𑀖𑀸𑀪𑀺𑀪𑀼𑀢𑁄 𑀅𑀪𑀸𑀲𑀺 𑀧𑁂𑀲𑀼𑀜𑁆𑀜𑀓𑀭𑁂 𑀦𑀺𑀕𑀡𑁆𑀞𑁂

𑁧𑁯𑁬.

𑀤𑁂𑀯𑁂 𑀚𑀳𑀺𑀢𑁆𑀯𑀸𑀦 𑀦𑀫𑀲𑁆𑀲𑀦𑀻𑀬𑁂 𑀙𑀯𑀝𑁆𑀞𑀺𑀫𑁂𑀢𑁂𑀦 𑀦𑀫𑀲𑁆𑀲𑀺𑀢𑀁’𑀢𑀁;

𑀅𑀗𑁆𑀕𑀸𑀭𑀭𑀸𑀲𑀺𑀫𑁆𑀳𑀺 𑀲𑀚𑁄𑀢𑀺𑀪𑀽𑀢𑁂 𑀦𑀺𑀓𑁆𑀔𑀺𑀧𑁆𑀧 𑀔𑀺𑀧𑁆𑀧𑀁 𑀤𑀳𑀣𑀸𑀥𑀼𑀦𑁂𑀢𑀺.

𑁧𑁯𑁭. ¶

𑀧𑀳𑀝𑁆𑀞𑀘𑀺𑀢𑁆𑀢𑀸’𑀯𑀢𑀢𑁄 𑀦𑀺𑀕𑀡𑁆𑀞𑀸𑀭𑀸𑀚𑀗𑁆𑀕𑀡𑁂 𑀢𑁂 𑀫𑀳𑀢𑀺𑀁 𑀕𑀪𑀻𑀭𑀁;

𑀯𑀻𑀢𑀘𑁆𑀘𑀺𑀓𑀗𑁆𑀕𑀸𑀭𑀓 𑀭𑀸𑀲𑀺 𑀧𑀼𑀡𑁆𑀡𑀁 𑀅𑀗𑁆𑀕𑀸𑀭𑀓𑀸𑀲𑀼𑀁 𑀅𑀪𑀺𑀲𑀗𑁆𑀔𑀭𑀺𑀁𑀲𑀼.

𑁧𑁯𑁮.

𑀲𑀫𑀦𑁆𑀢𑀢𑁄 𑀧𑀚𑁆𑀚𑀮𑀺𑀢𑀸𑀬 𑀢𑀸𑀬 𑀲𑀚𑁄𑀢𑀺𑀬𑀸 𑀭𑁄𑀭𑀼𑀯𑀪𑁂𑀭𑀯𑀸𑀬;

𑀫𑁄𑀳𑀦𑁆𑀥𑀪𑀼𑀢𑀸 𑀅𑀣 𑀢𑀺𑀢𑁆𑀣𑀺𑀬𑀸 𑀢𑁂 𑀢𑀁 𑀤𑀦𑁆𑀢𑀥𑀸𑀢𑀼𑀁 𑀅𑀪𑀺𑀦𑀺𑀓𑁆𑀔𑀺𑀧𑀺𑀁𑀲𑀼.

𑁧𑁯𑁯.

𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀢𑀫𑀕𑁆𑀕𑀻𑀭𑀸𑀲𑀺𑀁 𑀳𑁂𑀢𑁆𑀯𑀸 𑀲𑀭𑁄𑀚𑀁 𑀭𑀣𑀘𑀓𑁆𑀓𑀫𑀢𑁆𑀢𑀁;

𑀲𑀫𑀦𑁆𑀢𑀢𑁄 𑀉𑀕𑁆𑀕𑀢𑀭𑁂𑀡𑀼𑀚𑀸𑀮 𑀫𑀼𑀝𑁆𑀞𑀸𑀲𑀺 𑀓𑀺𑀜𑁆𑀚𑀓𑁆𑀔 𑀪𑀭𑀸𑀪𑀺𑀭𑀸𑀫𑀁.

𑁨𑁦𑁦.

𑀢𑀲𑁆𑀫𑀺𑀁 𑀔𑀡𑁂 𑀧𑀗𑁆𑀓𑀚 𑀓𑀡𑁆𑀡𑀺𑀓𑀸𑀬 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀚𑀺𑀦𑀤𑀦𑁆𑀢𑀥𑀸𑀢𑀼;

𑀓𑀼𑀦𑁆𑀤𑀸𑀯𑀤𑀸𑀢𑀸𑀳𑀺 𑀧𑀪𑀸𑀳𑀺 𑀲𑀩𑁆𑀩𑀸 𑀤𑀺𑀲𑀸 𑀧𑀪𑀸𑀲𑁂𑀲𑀺 𑀧𑀪𑀲𑁆𑀲𑀭𑀸𑀳𑀺.

𑁨𑁦𑁧. ¶

𑀤𑀺𑀲𑁆𑀯𑀸𑀦 𑀢𑀁 𑀅𑀘𑁆𑀙𑀭𑀺𑀬𑀁 𑀫𑀦𑀼𑀲𑁆𑀲𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀭𑀢𑀦𑀸𑀤𑀺𑀓𑁂𑀳𑀺;

𑀲𑀫𑁆𑀧𑀽𑀚𑀬𑀺𑀢𑁆𑀯𑀸 𑀚𑀺𑀦𑀤𑀦𑁆𑀢𑀥𑀸𑀢𑀼𑀁 𑀲𑀓𑀁 𑀲𑀓𑀁 𑀤𑀺𑀝𑁆𑀞𑀺𑀫𑀯𑁄𑀲𑁆𑀲𑀚𑀺𑀁𑀲𑀼.

𑁨𑁦𑁨.

𑀲𑁄 𑀧𑀡𑁆𑀟𑀼𑀭𑀸𑀚𑀸 𑀧𑀦 𑀤𑀺𑀝𑁆𑀞𑀺𑀚𑀸𑀮𑀁 𑀘𑀺𑀭𑀸𑀦𑀼𑀩𑀤𑁆𑀥𑀁 𑀅𑀧𑀭𑀺𑀘𑁆𑀘𑀚𑀦𑁆𑀢𑁄;

𑀧𑀢𑀺𑀝𑁆𑀞𑀧𑁂𑀢𑁆𑀯𑀸’𑀥𑀺𑀓𑀭𑀜𑁆𑀜𑀫𑁂𑀢𑀁 𑀓𑀼𑀝𑁂𑀦 𑀖𑀸𑀢𑀸𑀧𑀬𑀺 𑀤𑀦𑁆𑀢𑀥𑀸𑀢𑀼𑀁.

𑁨𑁦𑁩.

𑀢𑀲𑁆𑀲𑀁 𑀦𑀺𑀫𑀼𑀕𑁆𑀕𑀸’𑀥𑀺𑀓𑀭𑀜𑁆𑀜𑀫𑁂𑀲𑀸 𑀉𑀧𑀟𑁆𑀠𑀪𑀸𑀕𑁂 𑀦𑀘 𑀤𑀺𑀲𑁆𑀲𑀫𑀸𑀦𑀸;

𑀧𑀼𑀩𑁆𑀩𑀸𑀘𑀮𑀝𑁆𑀞𑁄’𑀯 𑀲𑀼𑀥𑀸𑀫𑀭𑀻𑀘𑀺 𑀚𑁄𑀢𑁂𑀲𑀺 𑀭𑀁𑀲𑀻𑀳𑀺 𑀤𑀺𑀲𑀸 𑀲𑀫𑀦𑁆𑀢𑀸.

𑁨𑁦𑁪.

𑀤𑀺𑀲𑁆𑀯𑀸𑀦𑀼𑀪𑀸𑀯𑀁 𑀚𑀺𑀦𑀤𑀦𑁆𑀢𑀥𑀸𑀢𑀼 𑀬𑀸𑀧𑀚𑁆𑀚𑀺 𑀲𑁄 𑀯𑀺𑀫𑁆𑀪𑀬 𑀫𑀕𑁆𑀕𑀭𑀸𑀚𑀸;

𑀏𑀓𑁄’𑀣 𑀇𑀲𑁆𑀲𑀸𑀧𑀲𑀼𑀢𑁄 𑀦𑀺𑀕𑀡𑁆𑀞𑁄 𑀢𑀁 𑀭𑀸𑀚𑀭𑀸𑀚𑀸𑀦𑀫𑀺𑀤𑀁 𑀅𑀯𑁄𑀘.

𑁨𑁦𑁫.

𑀭𑀸𑀫𑀸𑀤𑀬𑁄 𑀤𑁂𑀯 𑀚𑀦𑀤𑁆𑀤𑀦𑀲𑁆𑀲 𑀦𑀸𑀦𑀸𑀯𑀢𑀸𑀭𑀸 𑀪𑀼𑀯𑀦𑁂 𑀅𑀳𑁂𑀲𑀼𑀁;

𑀢𑀲𑁆𑀲𑁂𑀓𑀤𑁂𑀲𑁄’𑀘 𑀇𑀤𑀁 𑀙𑀯𑀝𑁆𑀞𑀺𑀦𑁄𑀘𑁂’𑀦𑀼𑀪𑀸𑀯𑁄𑀓𑀣𑀫𑀻𑀤𑀺𑀲𑁄𑀢𑀺.

𑁨𑁦𑁬. ¶

𑀅𑀤𑁆𑀥𑀸 𑀫𑀦𑀼𑀲𑁆𑀲𑀢𑁆𑀢𑀫𑀼𑀧𑀸𑀕𑀢𑀲𑁆𑀲 𑀤𑁂𑀯𑀲𑁆𑀲 𑀧𑀘𑁆𑀙𑀸 𑀢𑀺𑀤𑀺𑀯𑀁 𑀕𑀢𑀲𑁆𑀲;

𑀤𑁂𑀳𑁂𑀓𑀤𑁂𑀲𑁄 𑀞𑀧𑀺𑀢𑁄 𑀳𑀺𑀢𑀢𑁆𑀣𑀫𑁂𑀢𑀦𑁆𑀢𑀺 𑀲𑀘𑁆𑀘𑀁𑀯𑀘𑀦𑀁𑀪𑀯𑁂𑀬𑁆𑀬.

𑁨𑁦𑁭.

𑀲𑀁𑀯𑀡𑁆𑀡𑀬𑀺𑀢𑁆𑀯𑀸𑀦 𑀕𑀼𑀡𑁂 𑀧𑀳𑀽𑀢𑁂 𑀦𑀸𑀭𑀸𑀬𑀡𑀲𑁆𑀲’𑀲𑁆𑀲𑀫𑀳𑀺𑀤𑁆𑀥𑀺𑀓𑀲𑁆𑀲;

𑀦𑀺𑀫𑀼𑀕𑁆𑀕𑀫𑁂𑀢𑁆𑀢𑀸’𑀥𑀺𑀓𑀭𑀜𑁆𑀜𑀫𑁂𑀢𑀁𑀲𑀫𑁆𑀧𑀲𑁆𑀲𑀢𑁄 𑀫𑁂𑀩𑀳𑀺𑀦𑀻𑀳𑀭𑀺𑀢𑁆𑀯𑀸.

𑁨𑁦𑁮.

𑀲𑀫𑁆𑀧𑀸𑀤𑀬𑀺𑀢𑁆𑀯𑀸𑀦 𑀫𑀳𑀸𑀚𑀦𑀸𑀦𑀁 𑀫𑀼𑀔𑀸𑀦𑀺 𑀧𑀗𑁆𑀓𑁂𑀭𑀼𑀳𑀲𑀼𑀦𑁆𑀤𑀭𑀸𑀦𑀺;

𑀬𑀝𑀺𑀘𑁆𑀙𑀺𑀢𑀁 𑀕𑀡𑁆𑀳𑀣 𑀯𑀢𑁆𑀣𑀼𑀚𑀸𑀢𑀁 𑀇𑀘𑁆𑀘𑀸𑀳 𑀭𑀸𑀚𑀸 𑀫𑀼𑀔𑀭𑁂 𑀦𑀺𑀕𑀡𑁆𑀞𑁂.

𑁨𑁦𑁯.

𑀢𑁂 𑀢𑀺𑀢𑁆𑀣𑀺𑀬𑀸 𑀯𑀺𑀡𑀳𑀼𑀲𑀼𑀭𑀁 𑀕𑀼𑀡𑁂𑀳𑀺 𑀯𑀺𑀘𑀺𑀢𑁆𑀢 𑀭𑀽𑀧𑁂𑀳𑀺 𑀅𑀪𑀺𑀢𑁆𑀣𑀯𑀺𑀢𑁆𑀯𑀸;

𑀢𑁄𑀬𑁂𑀦 𑀲𑀺𑀜𑁆𑀘𑀺𑀁𑀲𑀼 𑀲𑀞𑀸 𑀢𑀣𑀸𑀧𑀺 𑀞𑀺𑀢𑀧𑁆𑀧𑀤𑁂𑀲𑀸 𑀦 𑀘𑀮𑀺𑀢𑁆𑀣 𑀥𑀸𑀢𑀼.

𑁨𑁧𑁦.

𑀚𑀺𑀕𑀼𑀘𑁆𑀙𑀫𑀸𑀦𑁄 𑀅𑀣 𑀢𑁂 𑀦𑀺𑀕𑀡𑁆𑀞𑁂 𑀲𑁄 𑀥𑀸𑀢𑀼𑀬𑀸𑀦𑀻𑀳𑀭𑀡𑁂 𑀉𑀧𑀸𑀬𑀁;

𑀅𑀦𑁆𑀯𑁂𑀲𑀫𑀸𑀦𑁄 𑀯𑀲𑀼𑀥𑀸𑀥𑀺𑀦𑀸𑀣𑁄 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 𑀲𑀓𑁂 𑀧𑀼𑀭𑀫𑁆𑀳𑀺.

𑁨𑁧𑁧. ¶

𑀦𑀺𑀫𑀼𑀕𑁆𑀕𑀫𑁂𑀢𑁆𑀣𑀸’𑀥𑀺𑀓𑀭𑀜𑁆𑀜𑀫𑀚𑁆𑀚𑀺 𑀬𑁄 𑀥𑀸𑀢𑀼𑀫𑁂𑀢𑀁 𑀩𑀳𑀺 𑀦𑀻𑀳𑀭𑁂𑀬𑁆𑀬;

𑀮𑀤𑁆𑀥𑀸𑀦 𑀲𑁄 𑀇𑀲𑁆𑀲𑀭𑀺𑀬𑀁 𑀫𑀳𑀦𑁆𑀢𑀁 𑀭𑀜𑁆𑀜𑁄𑀲𑀓𑀸𑀲𑀸𑀲𑀼𑀔𑀫𑁂𑀲𑁆𑀲𑀢𑀻𑀢𑀺

𑁨𑁧𑁨.

𑀲𑀼𑀢𑁆𑀯𑀸 𑀦 𑀢𑀁 𑀪𑁂𑀭𑀺𑀭𑀯𑀁𑀉𑀴𑀸𑀭𑀁𑀧𑀼𑀜𑀜𑁆𑀜𑀢𑁆𑀣𑀺𑀓𑁄𑀩𑀼𑀤𑁆𑀥𑀩𑀮𑁂𑀧𑀲𑀦𑁆𑀦𑁄;

𑀢𑀲𑁆𑀫𑀺𑀁 𑀧𑀼𑀭𑁂 𑀲𑁂𑀝𑁆𑀞𑀺𑀲𑀼𑀢𑁄 𑀲𑀼𑀪𑀤𑁆𑀤𑁄 𑀧𑀸𑀯𑁂𑀓𑁆𑀔𑀺𑀭𑀜𑁆𑀜𑁄 𑀲𑀫𑀺𑀢𑀺𑀁 𑀧𑀕𑀩𑁆𑀪𑁄.

𑁨𑁧𑁩.

𑀢𑀫𑀕𑁆𑀕𑀭𑀸𑀚𑀁 𑀅𑀣 𑀲𑁄 𑀦𑀫𑀺𑀢𑁆𑀯𑀸 𑀲𑀸𑀫𑀸𑀚𑀺𑀓𑀸𑀦𑀁 𑀳𑀤𑀬𑀗𑁆𑀕𑀫𑀸𑀬;

𑀪𑀸𑀲𑀸𑀬 𑀲𑀩𑁆𑀩𑀜𑁆𑀜𑀼𑀕𑀼𑀡𑀧𑁆𑀧𑀪𑀸𑀯𑀁 𑀯𑀡𑁆𑀡𑁂𑀲𑀺 𑀲𑀸𑀭𑀚𑁆𑀚𑀯𑀺𑀫𑀼𑀢𑁆𑀢 𑀘𑀺𑀢𑁆𑀢𑁄.

𑁨𑁧𑁪.

𑀪𑀼𑀫𑀺𑀁 𑀓𑀺𑀡𑀺𑀢𑁆𑀯𑀸 𑀫𑀳𑀢𑀸 𑀥𑀦𑁂𑀦 𑀫𑀦𑁄𑀭𑀫𑀁 𑀚𑁂𑀢𑀯𑀦𑀁 𑀯𑀺𑀳𑀸𑀭𑀁;

𑀬𑁄 𑀓𑀸𑀭𑀬𑀺𑀢𑁆𑀯𑀸𑀦 𑀚𑀺𑀦𑀲𑁆𑀲 𑀤𑀢𑁆𑀯𑀸 𑀉𑀧𑀝𑁆𑀞𑀳𑀺 𑀢𑀁 𑀘𑀢𑀼𑀧𑀘𑁆𑀘𑀬𑁂𑀳𑀺.

𑁨𑁧𑁫. ¶

𑀅𑀦𑀸𑀣𑀧𑀺𑀡𑁆𑀟𑀺𑀧𑁆𑀧𑀤𑀲𑁂𑀝𑁆𑀞𑀺𑀲𑁂𑀝𑁆𑀞𑁄𑀲𑁄𑀤𑀺𑀝𑁆𑀞𑀥𑀫𑁆𑀫𑁄𑀧𑀧𑀺𑀢𑀸𑀫𑀳𑁄𑀫𑁂;

𑀢𑀺𑀮𑁄𑀓𑀦𑀸𑀣𑁂 𑀫𑀫 𑀥𑀫𑁆𑀫𑀭𑀸𑀚𑁂 𑀢𑀼𑀫𑁆𑀳𑁂’𑀥𑀼𑀦𑀸𑀧𑀲𑁆𑀲𑀣𑀪𑀢𑁆𑀢𑀺𑀪𑀸𑀭𑀁.

𑁨𑁧𑁬.

𑀇𑀢𑁆𑀣𑀁 𑀦𑀤𑀺𑀢𑁆𑀯𑀸𑀦 𑀧𑀳𑀽𑀢𑀧𑀜𑁂𑀜𑁆𑀜𑀸 𑀓𑀢𑁆𑀯𑀸𑀦 𑀏𑀓𑀁𑀲𑀫𑀣𑀼𑀢𑁆𑀢𑀭𑀻𑀬𑀁;

𑀫𑀳𑀻𑀢𑀮𑀁 𑀤𑀓𑁆𑀔𑀺𑀡𑀚𑀸𑀦𑀼𑀓𑁂𑀦 𑀆𑀳𑀘𑁆𑀘 𑀩𑀤𑁆𑀥𑀜𑁆𑀚𑀮𑀺𑀓𑁄 𑀅𑀯𑁄𑀘.

𑁨𑁧𑁭.

𑀙𑀤𑁆𑀤𑀦𑁆𑀢𑀦𑀸𑀕𑁄 𑀲𑀯𑀺𑀲𑁂𑀦 𑀯𑀺𑀤𑁆𑀥𑁄 𑀲𑀮𑁆𑀮𑁂𑀦 𑀬𑁄 𑀮𑁄𑀳𑀺𑀢𑀫𑀓𑁆𑀔𑀺 𑀢𑀗𑁆𑀕𑁄;

𑀙𑀩𑁆𑀩𑀡𑁆𑀡𑀭𑀁𑀲𑀻𑀳𑀺 𑀲𑀫𑀼𑀚𑁆𑀚𑀮𑀦𑁆𑀢𑁂 𑀙𑁂𑀢𑁆𑀯𑀸𑀦 𑀮𑀼𑀤𑁆𑀤𑀸𑀬 𑀅𑀤𑀸𑀲𑀺 𑀤𑀦𑁆𑀢𑁂.

𑁨𑁧𑁮.

𑀲𑀲𑁄’𑀧𑀺 𑀳𑀼𑀢𑁆𑀯𑀸𑀦 𑀯𑀺𑀲𑀼𑀤𑁆𑀥𑀲𑀻𑀮𑁄 𑀅𑀚𑁆𑀛𑀢𑁆𑀢𑀤𑀸𑀦𑀸𑀪𑀺𑀭𑀢𑁄 𑀤𑁆𑀯𑀺𑀚𑀸𑀬;

𑀬𑁄’𑀤𑀚𑁆𑀚𑀺𑀤𑁂𑀳𑀫𑁆𑀧𑀺 𑀲𑀓𑀁 𑀦𑀺𑀧𑀘𑁆𑀘 𑀅𑀗𑁆𑀕𑀸𑀭𑀭𑀸𑀲𑀺𑀫𑁆𑀳𑀺 𑀩𑀼𑀪𑀼𑀓𑁆𑀔𑀺𑀢𑀸𑀬.

𑁨𑁧𑁯. ¶

𑀬𑁄 𑀩𑁄𑀥𑀺𑀬𑀸 𑀩𑀸𑀳𑀺𑀭𑀯𑀢𑁆𑀣𑀼𑀤𑀸𑀦𑀸 𑀅𑀢𑀺𑀢𑁆𑀢𑀭𑀽𑀧𑁄 𑀲𑀺𑀯𑀺𑀭𑀸𑀚 𑀲𑁂𑀝𑁆𑀞𑁄;

𑀅𑀤𑀸𑀲𑀺 𑀘𑀓𑁆𑀔𑀽𑀦𑀺 𑀧𑀪𑀲𑁆𑀲𑀭𑀸𑀦𑀺 𑀤𑁆𑀯𑀺𑀚𑀸𑀬 𑀚𑀺𑀡𑁆𑀡𑀸𑀬 𑀅𑀘𑀓𑁆𑀔𑀼𑀓𑀸𑀬.

𑁨𑁨𑁦.

𑀬𑁄𑀔𑀦𑁆𑀢𑀺𑀯𑀸𑀤𑀻’𑀧𑀺 𑀓𑀮𑀸𑀩𑀼𑀭𑀸𑀚𑁂 𑀙𑁂𑀤𑀸𑀧𑀬𑀦𑁆𑀢𑁂’𑀧𑀺 𑀲𑀳𑀢𑁆𑀣𑀧𑀸𑀤𑀁;

𑀧𑀭𑀺𑀧𑁆𑀮𑀼𑀢𑀗𑁆𑀕𑁄𑀭𑀼𑀥𑀺𑀭𑁂 𑀢𑀺𑀢𑀺𑀓𑁆𑀔𑀺𑀫𑁂𑀢𑁆𑀢𑀸𑀬𑀫𑀸𑀦𑁄 𑀬𑀲𑀤𑀸𑀬𑀓𑁂’𑀯.

𑁨𑁨𑁧.

𑀬𑁄 𑀥𑀫𑁆𑀫𑀧𑀸𑀮𑁄 𑀅𑀧𑀺 𑀲𑀢𑁆𑀢𑀫𑀸𑀲 𑀚𑀸𑀢𑁄𑀧𑀤𑀼𑀝𑁆𑀞𑁂 𑀚𑀦𑀓𑁂𑀲𑀓𑀫𑁆𑀳𑀺;

𑀓𑀸𑀭𑀸𑀧𑀬𑀦𑁆𑀢𑁂 𑀅𑀲𑀺𑀫𑀸𑀮𑀓𑀫𑁆𑀫𑀁 𑀘𑀺𑀢𑁆𑀢𑀁 𑀦 𑀤𑀽𑀲𑁂𑀲𑀺 𑀧𑀢𑀸𑀧𑀭𑀸𑀚𑁂.

𑁨𑁨𑁨.

𑀲𑀸𑀔𑀸𑀫𑀺𑀕𑁄 𑀬𑁄 𑀅𑀲𑀢𑀸 𑀧𑀼𑀫𑁂𑀦 𑀯𑀦𑁂 𑀧𑀧𑀸𑀢𑀸 𑀲𑀬𑀫𑀼𑀤𑁆𑀥𑀝𑁂𑀦;

𑀲𑀺𑀮𑀸𑀬 𑀪𑀺𑀦𑁆𑀦𑁂’𑀧𑀺 𑀲𑀓𑁂 𑀮𑀮𑀸𑀝𑁂 𑀢𑀁 𑀔𑁂𑀫𑀪𑀼𑀫𑀺𑀁 𑀅𑀦𑀬𑀺𑀢𑁆𑀣𑀫𑀽𑀴𑁆𑀳𑀁.

𑁨𑁨𑁩.

𑀭𑀼𑀝𑁆𑀞𑁂𑀦 𑀫𑀸𑀭𑁂𑀦’𑀪𑀺𑀦𑀺𑀫𑁆𑀫𑀺𑀢𑀫𑁆𑀧𑀺 𑀅𑀗𑁆𑀕𑀸𑀭𑀓𑀸𑀲𑀼𑀁 𑀚𑀮𑀺𑀢𑀁 𑀯𑀺𑀳𑀺𑀚𑁆𑀚;

𑀲𑀫𑀼𑀝𑁆𑀞𑀺𑀢𑁂 𑀲𑀚𑁆𑀚𑀼𑀫𑀳𑀸𑀭𑀯𑀺𑀦𑁆𑀤𑁂 𑀞𑀢𑁆𑀯𑀸𑀦 𑀬𑁄 𑀲𑁂𑀝𑁆𑀞𑀺 𑀅𑀤𑀸𑀲𑀺 𑀤𑀸𑀦𑀁.

𑁨𑁨𑁪. ¶

𑀫𑀺𑀕𑁂𑀦 𑀬𑁂𑀦𑀸𑀧𑁂𑀯𑀺𑀚𑀜𑁆𑀜𑀫𑁂𑀓𑀁 𑀪𑀻𑀢𑀁𑀯𑀥𑀸𑀫𑁄𑀘𑀬𑀺𑀢𑀼𑀁𑀓𑀼𑀭𑀗𑁆𑀕𑀺𑀁;

𑀆𑀖𑀸𑀢𑀦𑁂 𑀅𑀢𑁆𑀢𑀲𑀺𑀭𑀁𑀞𑀧𑁂𑀢𑁆𑀯𑀸𑀧𑀫𑁄𑀘𑀺𑀢𑀸’𑀜𑁆𑀜𑁆𑀜𑀧𑀺𑀧𑀸𑀡𑀺𑀲𑀗𑁆𑀖𑀸.

𑁨𑁨𑁫.

𑀬𑁄 𑀲𑀢𑁆𑀢𑀯𑀲𑁆𑀲𑁄 𑀯𑀺𑀲𑀺𑀔𑀸𑀬 𑀧𑀁𑀲𑀼 𑀓𑀻𑀴𑀸𑀧𑀭𑁄 𑀲𑀫𑁆𑀪𑀯𑀦𑀸𑀫𑀓𑁄’𑀧𑀺;

𑀲𑀩𑁆𑀩𑀜𑁆𑀜𑀼𑀮𑀻𑀴𑁆𑀳𑀸𑀬 𑀦𑀺𑀕𑀼𑀴𑁆𑀳𑀧𑀜𑁆𑀳𑀁 𑀧𑀼𑀝𑁆𑀞𑁄 𑀯𑀺𑀬𑀸𑀓𑀸𑀲𑀺 𑀲𑀼𑀘𑀻𑀭𑀢𑁂𑀦.

𑁨𑁨𑁬.

𑀳𑀺𑀢𑁆𑀯𑀸 𑀦𑀺𑀓𑀦𑁆𑀢𑀺𑀁 𑀲𑀓𑀚𑀻𑀯𑀺𑀢𑁂’𑀧𑀺 𑀩𑀤𑁆𑀥𑀸𑀲𑀓𑀼𑀘𑁆𑀙𑀺𑀫𑁆𑀳𑀺 𑀘 𑀯𑁂𑀢𑁆𑀢𑀯𑀮𑁆𑀮𑀺𑀁;

𑀲𑀸𑀔𑀸𑀫𑀺𑀕𑁂 𑀦𑁂𑀓𑀲𑀳𑀲𑁆𑀲𑀲𑀗𑁆𑀔𑁂 𑀯𑀥𑀸𑀧𑀫𑁄𑀘𑁂𑀲𑀺 𑀓𑀧𑀺𑀲𑁆𑀲𑀭𑁄𑀬𑁄.

𑁨𑁨𑁭.

𑀲𑀦𑁆𑀢𑀧𑁆𑀧𑀬𑀁 𑀥𑀫𑁆𑀫𑀲𑀼𑀥𑀸𑀭𑀲𑁂𑀦 𑀬𑁄 𑀫𑀸𑀦𑀼𑀲𑁂 𑀢𑀼𑀡𑁆𑀟𑀺𑀮𑀲𑀽𑀓𑀭𑁄’𑀧𑀺;

𑀇𑀲𑀻’𑀯 𑀓𑀢𑁆𑀯𑀸 𑀅𑀣 𑀜𑀸𑀬𑀕𑀦𑁆𑀣𑀁 𑀦𑀺𑀚𑀁 𑀧𑀯𑀢𑁆𑀢𑁂𑀲𑀺 𑀘𑀺𑀭𑀸𑀬 𑀥𑀫𑁆𑀫𑀁.

𑁨𑁨𑁮. ¶

𑀧𑀘𑁆𑀘𑀢𑁆𑀣𑀺𑀓𑀁 𑀧𑀼𑀡𑁆𑀡𑀓𑀬𑀓𑁆𑀔𑀫𑀼𑀕𑁆𑀕𑀁 𑀫𑀳𑀺𑀤𑁆𑀥𑀺𑀓𑀁 𑀓𑀸𑀫𑀕𑀼𑀡𑁂𑀲𑀼 𑀕𑀺𑀤𑁆𑀥𑀁;

𑀬𑁄 𑀢𑀺𑀓𑁆𑀔𑀧𑀜𑁆𑀜𑁄𑀯𑀺𑀥𑀼𑀭𑀸𑀪𑀺𑀥𑀸𑀦𑁄𑀤𑀫𑁂𑀲𑀺 𑀓𑀸𑀴𑀸𑀕𑀺𑀭𑀺𑀫𑀢𑁆𑀢𑀓𑀫𑁆𑀳𑀺.

𑁨𑁨𑁯.

𑀓𑀼𑀮𑀸𑀯𑀲𑀸𑀬𑀺 𑀅𑀯𑀺𑀭𑀽𑀴𑁆𑀳𑀧𑀓𑁆𑀔𑁄 𑀬𑁄 𑀩𑀼𑀤𑁆𑀥𑀺𑀫𑀸 𑀯𑀝𑁆𑀝𑀓𑀧𑁄𑀢𑀓𑁄’𑀧𑀺;

𑀲𑀘𑁆𑀘𑁂𑀦 𑀤𑀸𑀯𑀕𑁆𑀕𑀺𑀫𑀪𑀺𑀚𑁆𑀚𑀮𑀦𑁆𑀢𑀁 𑀯𑀲𑁆𑀲𑁂𑀦 𑀦𑀺𑀩𑁆𑀩𑀸𑀧𑀬𑀺 𑀯𑀸𑀭𑀺𑀤𑁄’𑀯.

𑁨𑁩𑁦.

𑀬𑁄 𑀫𑀘𑁆𑀙𑀭𑀸𑀚𑀸𑀧𑀺 𑀅𑀯𑀼𑀝𑁆𑀞𑀺𑀓𑀸𑀮𑁂𑀤𑀺𑀲𑁆𑀯𑀸𑀦𑀫𑀘𑁆𑀙𑁂 𑀢𑀲𑀺𑀢𑁂𑀓𑀺𑀮𑀦𑁆𑀢𑁂;

𑀲𑀘𑁆𑀘𑁂𑀦𑀯𑀸𑀓𑁆𑀬𑁂𑀦𑀫𑀳𑁄𑀖𑀧𑀼𑀡𑁆𑀡𑀁𑀫𑀼𑀳𑀼𑀢𑁆𑀢𑀫𑀢𑁆𑀢𑁂𑀦𑀅𑀓𑀸𑀲𑀺𑀭𑀝𑁆𑀞𑀁.

𑁨𑁩𑁧.

𑀯𑀺𑀘𑀺𑀢𑁆𑀢𑀳𑀢𑁆𑀣𑀲𑁆𑀲 𑀭𑀣𑀸𑀤𑀺𑀓𑀸𑀦𑀺 𑀯𑀲𑀼𑀦𑁆𑀥𑀭𑀸 𑀓𑀫𑁆𑀧𑀦 𑀓𑀸𑀭𑀡𑀸𑀦𑀺;

𑀧𑀼𑀢𑁆𑀢𑁂’𑀦𑀼𑀚𑀸𑀢𑁂 𑀲𑀤𑀺𑀲𑁂𑀘𑀤𑀸𑀭𑁂𑀬𑁄’𑀤𑀚𑁆𑀚𑀺𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀺𑀬𑀫𑁆𑀧𑀺.

𑁨𑁩𑁨. ¶

𑀩𑀼𑀤𑁆𑀥𑁄 𑀪𑀯𑀺𑀢𑁆𑀯𑀸 𑀅𑀧𑀺 𑀤𑀺𑀝𑁆𑀞𑀥𑀫𑁆𑀫 𑀲𑀼𑀔𑀸𑀦𑀧𑁂𑀓𑁆𑀔𑁄 𑀓𑀭𑀼𑀡𑀸𑀦𑀼𑀯𑀢𑁆𑀢𑀻;

𑀲𑀩𑁆𑀩𑀁 𑀲𑀳𑀦𑁆𑀢𑁄 𑀅𑀯𑀫𑀸𑀦𑀦𑀸𑀤𑀺𑀁 𑀬𑁄𑀤𑀼𑀓𑁆𑀓𑀭𑀁 𑀮𑁄𑀓𑀳𑀺𑀢𑀁𑀅𑀓𑀸𑀲𑀺.

𑁨𑁩𑁩.

𑀩𑀮𑁂𑀦 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀓𑁂𑀦 𑀅𑀪𑀺𑀤𑁆𑀤𑀯𑀦𑁆𑀢𑀁 𑀅𑀢𑀺𑀪𑀺𑀁𑀲𑀦𑁂𑀦;

𑀅𑀚𑁂𑀬𑁆𑀬𑀲𑀢𑁆𑀣𑀁 𑀧𑀭𑀫𑀺𑀤𑁆𑀥𑀺𑀧𑀢𑁆𑀢𑀁 𑀤𑀫𑁂𑀲𑀺 𑀬𑁄 𑀆𑀮𑀯𑀓𑀫𑁆𑀧𑀻 𑀬𑀓𑁆𑀔𑀁.

𑁨𑁩𑁪.

𑀤𑁂𑀳𑀸𑀪𑀺𑀦𑀺𑀓𑁆𑀔𑀦𑁆𑀢 𑀳𑀼𑀢𑀸𑀲𑀦𑀘𑁆𑀘𑀺 𑀫𑀸𑀮𑀸𑀓𑀼𑀮𑀁 𑀩𑁆𑀭𑀳𑁆𑀫𑀪𑀯𑀁 𑀓𑀭𑀺𑀢𑁆𑀯𑀸;

𑀪𑁂𑀢𑁆𑀯𑀸𑀦 𑀤𑀺𑀝𑁆𑀞𑀺𑀁 𑀲𑀼𑀘𑀺𑀭𑀸𑀦𑀼𑀩𑀤𑁆𑀥𑀁 𑀤𑀫𑁂𑀲𑀺 𑀬𑁄 𑀩𑁆𑀭𑀳𑁆𑀫𑀯𑀭𑀁 𑀫𑀼𑀦𑀺𑀦𑁆𑀤𑁄.

𑁨𑁩𑁫.

𑀅𑀘𑁆𑀘𑀗𑁆𑀓𑀼𑀲𑀁 𑀤𑀸𑀦𑀲𑀼𑀥𑁄𑀢 𑀕𑀡𑁆𑀟𑀁 𑀦𑀺𑀧𑀸𑀢𑀺𑀢𑀝𑁆𑀞𑀸𑀮𑀓 𑀕𑁄𑀧𑀼𑀭𑀸𑀤𑀺𑀁;

𑀥𑀸𑀯𑀦𑁆𑀢𑀫𑀕𑁆𑀕𑁂 𑀥𑀦𑀧𑀸𑀮𑀳𑀢𑁆𑀣𑀺𑀁 𑀤𑀫𑁂𑀲𑀺 𑀬𑁄 𑀤𑀸𑀭𑀼𑀡𑀫𑀦𑁆𑀢𑀓𑀁’𑀯.

𑁨𑁩𑁬. ¶

𑀫𑀦𑀼𑀲𑁆𑀲𑀭𑀢𑁆𑀢𑀸𑀭𑀼𑀡𑀧𑀸𑀡𑀺𑀧𑀸𑀤𑀫𑀼𑀓𑁆𑀔𑀺𑀧𑁆𑀧 𑀔𑀕𑁆𑀕𑀁 𑀅𑀦𑀼𑀩𑀦𑁆𑀥𑀫𑀸𑀦𑀁;

𑀫𑀳𑀸𑀤𑀬𑁄 𑀤𑀼𑀧𑁆𑀧𑀲𑀳𑀁 𑀧𑀭𑁂𑀳𑀺 𑀤𑀫𑁂𑀲𑀺 𑀬𑁄 𑀅𑀗𑁆𑀕𑀼𑀮𑀺𑀫𑀸𑀮𑀘𑁄𑀭𑀁.

𑁨𑁩𑁭.

𑀬𑁄 𑀥𑀫𑁆𑀫𑀭𑀸𑀚𑀸 𑀯𑀺𑀚𑀺𑀢𑀸𑀭𑀺𑀲𑀗𑁆𑀖𑁄 𑀧𑀯𑀢𑁆𑀢𑀬𑀦𑁆𑀢𑁄 𑀯𑀭𑀥𑀫𑁆𑀫𑀘𑀓𑁆𑀓𑀁;

𑀲𑀤𑁆𑀥𑀫𑁆𑀫 𑀲𑀜𑁆𑀜𑀁 𑀭𑀢𑀦𑀸𑀓𑀭𑀜𑁆𑀘 𑀑𑀕𑀸𑀳𑀬𑀻 𑀲𑀁 𑀧𑀭𑀺𑀲𑀁 𑀲𑀫𑀕𑁆𑀕𑀁.

𑁨𑁩𑁮.

𑀢𑀲𑁆𑀲𑁂𑀯 𑀲𑀤𑁆𑀥𑀫𑁆𑀫 𑀯𑀭𑀸𑀥𑀺𑀧𑀲𑁆𑀲𑀢𑀣𑀸𑀕𑀢𑀲𑁆𑀲’𑀧𑁆𑀧𑀝𑀺𑀧𑀼𑀕𑁆𑀕𑀮𑀲𑁆𑀲;

𑀅𑀦𑀦𑁆𑀢𑀜𑀸𑀡𑀲𑁆𑀲 𑀯𑀺𑀲𑀸𑀭𑀤𑀲𑁆𑀲 𑀏𑀲𑀸 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀥𑀸𑀢𑀼.

𑁨𑁩𑁯.

𑀅𑀦𑁂𑀦 𑀲𑀘𑁆𑀘𑁂𑀦 𑀚𑀺𑀦𑀲𑁆𑀲 𑀥𑀸𑀢𑀼 𑀔𑀺𑀧𑁆𑀧𑀁 𑀲𑀫𑀸𑀭𑀼𑀬𑁆𑀳 𑀦𑀪𑀦𑁆𑀢𑀭𑀸𑀴𑀁;

𑀲𑀼𑀥𑀁𑀲𑀼𑀮𑁂𑀔𑁂𑀯 𑀲𑀫𑀼𑀚𑁆𑀚𑀮𑀦𑁆𑀢𑀺 𑀓𑀗𑁆𑀔𑀁 𑀯𑀺𑀦𑁄𑀤𑁂𑀢𑀼 𑀫𑀳𑀸𑀚𑀦𑀲𑁆𑀲.

𑁨𑁪𑁦. ¶

𑀢𑀲𑁆𑀫𑀺𑀁 𑀔𑀡𑁂 𑀲𑀸 𑀚𑀺𑀦𑀤𑀦𑁆𑀢𑀥𑀸𑀢𑀼 𑀦𑀪𑀁 𑀲𑀫𑀼𑀕𑁆𑀕𑀫𑁆𑀫 𑀧𑀪𑀸𑀲𑀬𑀦𑁆𑀢𑀻;

𑀲𑀩𑁆𑀩𑀸 𑀤𑀺𑀲𑀸 𑀑𑀲𑀥𑀺𑀢𑀸𑀭𑀓𑀸’𑀯 𑀚𑀦𑀁 𑀧𑀲𑀸𑀤𑁂𑀲𑀺 𑀯𑁆𑀢𑀺𑀡𑁆𑀡𑀓𑀗𑁆𑀔𑀁.

𑁨𑁪𑁧.

𑀅𑀣𑁄𑀢𑀭𑀺𑀢𑁆𑀯𑀸 𑀕𑀕𑀦𑀗𑁆𑀕𑀡𑀫𑁆𑀳𑀸 𑀲𑀸 𑀫𑀢𑁆𑀣𑀓𑁂 𑀲𑁂𑀝𑁆𑀞𑀺𑀲𑀼𑀢𑀲𑁆𑀲 𑀢𑀲𑁆𑀲;

𑀧𑀢𑀺𑀝𑁆𑀞𑀳𑀺𑀢𑁆𑀯𑀸𑀦 𑀲𑀼𑀥𑀸𑀪𑀺𑀲𑀺𑀢𑁆𑀢𑀕𑀢𑁆𑀢𑀁’𑀯 𑀢𑀁 𑀧𑀻𑀡𑀬𑀺 𑀪𑀢𑁆𑀢𑀺𑀢𑀺𑀦𑁆𑀦𑀁.

𑁨𑁪𑁨.

𑀤𑀲𑁆𑀯𑀸𑀦 𑀢𑀁 𑀅𑀘𑁆𑀙𑀭𑀺𑀬𑀁 𑀦𑀺𑀕𑀡𑁆𑀞𑀸 𑀇𑀘𑁆𑀘𑀩𑁆𑀭𑀯𑀼𑀁 𑀧𑀡𑁆𑀟𑀼𑀦𑀭𑀸𑀥𑀺𑀧𑀁 𑀢𑀁;

𑀯𑀺𑀚𑁆𑀚𑀸𑀩𑀮𑀁 𑀲𑁂𑀝𑁆𑀞𑀺𑀲𑀼𑀢𑀲𑁆𑀲 𑀏𑀢𑀁 𑀦 𑀥𑀸𑀢𑀼𑀬𑀸 𑀤𑁂𑀯 𑀅𑀬𑀫𑁆𑀧𑀪𑀸𑀯𑁄.

𑁨𑁪𑁩.

𑀦𑀺𑀲𑀫𑁆𑀫 𑀢𑁂𑀲𑀁 𑀯𑀘𑀦𑀁 𑀦𑀭𑀺𑀦𑁆𑀤𑁄 𑀇𑀘𑁆𑀘𑀩𑁆𑀭𑀯𑀻 𑀲𑁂𑀝𑁆𑀞𑀺𑀲𑀼𑀢𑀁 𑀲𑀼𑀪𑀤𑁆𑀤𑀁;

𑀬𑀣𑀸 𑀘 𑀏𑀢𑁂 𑀅𑀪𑀺𑀲𑀤𑁆𑀤𑀳𑁂𑀬𑁆𑀬𑀼𑀁 𑀢𑀣𑀸𑀯𑀺𑀥𑀁 𑀤𑀲𑁆𑀲𑀬 𑀇𑀤𑁆𑀥𑀺𑀫𑀜𑁆𑀜𑀁.

𑁨𑁪𑁪.

𑀢𑀢𑁄 𑀲𑀼𑀪𑀤𑁆𑀤𑁄 𑀢𑀧𑀦𑀻𑀬𑀧𑀢𑁆𑀢𑁂 𑀲𑀼𑀕𑀦𑁆𑀥𑀺𑀲𑀻𑀢𑁄𑀤𑀓𑀧𑀽𑀭𑀺𑀢𑀫𑁆𑀳𑀺;

𑀯𑀟𑁆𑀠𑁂𑀲𑀺 𑀥𑀸𑀢𑀼𑀁 𑀫𑀼𑀦𑀺𑀧𑀼𑀗𑁆𑀕𑀯𑀲𑁆𑀲 𑀅𑀦𑀼𑀲𑁆𑀲𑀭𑀦𑁆𑀢𑁄 𑀘𑀭𑀺𑀢𑀩𑁆𑀪𑀼𑀢𑀸𑀦𑀺.

𑁨𑁪𑁫. ¶

𑀲𑀸 𑀭𑀸𑀚𑀳𑀁 𑀲𑀻’𑀯 𑀯𑀺𑀥𑀸𑀯𑀫𑀸𑀦𑀸 𑀲𑀼𑀕𑀦𑁆𑀥𑀺𑀢𑁄𑀬𑀫𑁆𑀳𑀺 𑀧𑀤𑀓𑁆𑀔𑀺𑀡𑁂𑀦;

𑀉𑀫𑁆𑀫𑀼𑀚𑁆𑀚𑀫𑀸𑀦𑀸 𑀘 𑀦𑀺𑀫𑀼𑀚𑁆𑀚𑀫𑀸𑀦𑀸 𑀚𑀦𑁂 𑀧𑀫𑁄𑀤𑀲𑁆𑀲𑀼𑀥𑀭𑁂 𑀅𑀓𑀸𑀲𑀺.

𑁨𑁪𑁬.

𑀢𑀢𑁄 𑀘 𑀓𑀸𑀲𑀼𑀁 𑀯𑀺𑀲𑀺𑀔𑀸𑀬𑀫𑀚𑁆𑀛𑁂 𑀓𑀢𑁆𑀯𑀸 𑀢𑀳𑀺𑀁 𑀥𑀸𑀢𑀼𑀫𑀪𑀺𑀓𑁆𑀔𑀺𑀧𑀺𑀢𑁆𑀯𑀸;

𑀧𑀁𑀲𑀽𑀳𑀺 𑀲𑀫𑁆𑀫𑀸 𑀅𑀪𑀺𑀧𑀽𑀭𑀬𑀺𑀢𑁆𑀯𑀸 𑀩𑀳𑀽𑀳𑀺 𑀫𑀤𑁆𑀤𑀸𑀧𑀬𑀺 𑀓𑀼𑀜𑁆𑀚𑀭𑁂𑀳𑀺.

𑁨𑁪𑁭.

𑀪𑁂𑀢𑁆𑀯𑀸 𑀫𑀳𑀺𑀁𑀉𑀝𑁆𑀞𑀳𑀺 𑀘𑀓𑁆𑀓𑀫𑀢𑁆𑀢𑀁 𑀯𑀺𑀭𑀸𑀚𑀫𑀸𑀦𑀁 𑀫𑀡𑀺𑀓𑀡𑁆𑀡𑀺𑀓𑀸𑀬;

𑀧𑀪𑀲𑁆𑀲𑀭𑀁 𑀭𑀽𑀧𑀺𑀬𑀓𑁂𑀲𑀭𑁂𑀳𑀺 𑀲𑀭𑁄𑀭𑀼𑀳𑀁 𑀓𑀜𑁆𑀘𑀦𑀧𑀢𑁆𑀢𑀧𑀸𑀴𑀺𑀁.

𑁨𑁪𑁮.

𑀧𑀢𑀺𑀝𑁆𑀞𑀪𑀺𑀢𑁆𑀯𑀸𑀦 𑀢𑀳𑀺𑀁 𑀲𑀭𑁄𑀚𑁂 𑀫𑀦𑁆𑀤𑀸𑀦𑀺𑀮𑀸𑀯𑀢𑁆𑀢𑀺𑀢𑀭𑁂𑀡𑀼 𑀚𑀸𑀮𑁂;

𑀑𑀪𑀸𑀲𑀬𑀦𑁆𑀢𑀺’𑀯 𑀤𑀺𑀲𑀸 𑀧𑀪𑀸𑀳𑀺 𑀤𑀺𑀝𑁆𑀞𑀸 𑀫𑀼𑀳𑀼𑀢𑁆𑀢𑁂𑀦 𑀚𑀺𑀦𑀲𑁆𑀲𑀥𑀸𑀢𑀼.

𑁨𑁪𑁯.

𑀔𑀺𑀧𑀺𑀁𑀲𑀼 𑀯𑀢𑁆𑀣𑀸𑀪𑀭𑀡𑀸𑀦𑀺 𑀫𑀘𑁆𑀘𑀸 𑀧𑀯𑀲𑁆𑀲𑀬𑀼𑀁 𑀧𑀼𑀧𑁆𑀨𑀫𑀬𑀜𑁆𑀘 𑀯𑀲𑁆𑀲𑀁;

𑀉𑀓𑁆𑀓𑀼𑀝𑁆𑀞𑀺𑀲𑀤𑁆𑀤𑁂𑀳𑀺 𑀘 𑀲𑀥𑀼𑀓𑀸𑀭𑀦𑀸𑀤𑁂𑀳𑀺 𑀧𑀼𑀡𑁆𑀡𑀁 𑀦𑀕𑀭𑀁 𑀅𑀓𑀁𑀲𑀼.

𑁨𑁫𑁦. ¶

𑀢𑁂 𑀢𑀺𑀢𑁆𑀣𑀺𑀬𑀸 𑀢𑀁 𑀅𑀪𑀺𑀯𑀜𑁆𑀘𑀦𑀁’𑀢𑀺 𑀭𑀸𑀚𑀸𑀥𑀺𑀭𑀸𑀚𑀁 𑀅𑀣 𑀲𑀜𑁆𑀜𑀧𑁂𑀢𑁆𑀯𑀸;

𑀚𑀺𑀕𑀼𑀘𑁆𑀙𑀦𑀻𑀬𑁂 𑀓𑀼𑀡𑀧𑀸𑀤𑀺𑀓𑁂𑀳𑀺 𑀔𑀺𑀧𑀺𑀁𑀲𑀼 𑀥𑀸𑀢𑀼𑀁 𑀧𑀭𑀺𑀔𑀸𑀬 𑀧𑀺𑀝𑁆𑀞𑁂.

𑁨𑁫𑁧.

𑀢𑀲𑁆𑀫𑀺𑀁 𑀔𑀡𑁂 𑀧𑀜𑁆𑀘𑀯𑀺𑀥𑀫𑁆𑀩𑀼𑀚𑁂𑀳𑀺𑀲𑀜𑁆𑀙𑀸𑀤𑀺𑀢𑀸𑀳𑀁𑀲𑀕𑀡𑁄𑀧𑀪𑀼𑀢𑁆𑀢𑀸;

𑀫𑀥𑀼𑀩𑁆𑀩𑀢𑀸𑀮𑀻 𑀯𑀺𑀭𑀼𑀢𑀸𑀪𑀺𑀭𑀸𑀫𑀸 𑀅𑀳𑁄𑀲𑀺 𑀲𑀸 𑀧𑁄𑀓𑁆𑀔𑀭𑀡𑀻’𑀯 𑀦𑀦𑁆𑀤𑀸.

𑁨𑁫𑁨.

𑀕𑀚𑀸𑀥𑀺𑀧𑀸 𑀓𑁄𑀜𑁆𑀜𑁆𑀘𑀭𑀯𑀁 𑀭𑀯𑀺𑀁𑀲𑀼 𑀓𑀭𑀺𑀁𑀲𑀼 𑀳𑁂𑀲𑀸𑀦𑀺𑀦𑀤𑀁 𑀢𑀼𑀭𑀗𑁆𑀕𑀸;

𑀉𑀓𑁆𑀓𑀼𑀝𑁆𑀞𑀺𑀦𑀸𑀤𑀁 𑀅𑀓𑀭𑀺𑀁𑀲𑀼 𑀫𑀘𑁆𑀘𑀸 𑀲𑀼𑀯𑀸𑀤𑀺𑀢𑀸 𑀤𑀼𑀦𑁆𑀤𑀼𑀪𑀺𑀆𑀤𑀬𑁄’𑀧𑀺.

𑁨𑁫𑁩.

𑀣𑁄𑀫𑀺𑀁𑀲𑀼 𑀫𑀘𑁆𑀘𑀸 𑀣𑀼𑀢𑀺𑀕𑀻𑀢𑀓𑁂𑀳𑀺 𑀦𑀘𑁆𑀘𑀺𑀁𑀲𑀼 𑀑𑀢𑁆𑀢𑀧𑁆𑀧𑀯𑀺𑀪𑀼𑀲𑀦𑀸’𑀧𑀺;

𑀯𑀢𑁆𑀣𑀸𑀦𑀺 𑀲𑀻𑀲𑁂 𑀪𑀫𑀬𑀺𑀁𑀲𑀼 𑀫𑀢𑁆𑀢𑀸 𑀪𑀼𑀚𑀸𑀦𑀺 𑀧𑁄𑀞𑁂𑀲𑀼𑀫𑀼𑀤𑀕𑁆𑀕𑀘𑀺𑀢𑁆𑀢𑀸.

𑁨𑁫𑁪. ¶

𑀥𑀽𑀧𑁂𑀳𑀺 𑀓𑀸𑀮𑀸𑀕𑀭𑀼𑀲𑀫𑁆𑀪𑀯𑁂𑀳𑀺 𑀖𑀦𑀸𑀯𑀦𑀤𑁆𑀥𑀁’𑀯 𑀦𑀪𑀁 𑀅𑀳𑁄𑀲𑀺;

𑀲𑀫𑀼𑀲𑁆𑀲𑀺𑀢𑀸𑀦𑁂𑀓𑀥𑀚𑀸𑀯𑀮𑀻𑀳𑀺 𑀧𑀼𑀭𑀁 𑀢𑀤𑀸 𑀯𑀢𑁆𑀣𑀫𑀬𑀁’𑀯 𑀆𑀲𑀺.

𑁨𑁫𑁫.

𑀤𑀺𑀲𑁆𑀯𑀸 𑀢𑀫𑀘𑁆𑀙𑁂𑀭𑀫𑀘𑀺𑀦𑁆𑀢𑀦𑀻𑀬𑀁 𑀆𑀫𑁄𑀤𑀺𑀢𑀸𑀫𑀘𑁆𑀘𑀕𑀡𑀸 𑀲𑀫𑀕𑁆𑀕𑀸;

𑀅𑀢𑁆𑀣𑁂 𑀦𑀺𑀬𑁄𑀚𑁂𑀢𑀼 𑀫𑀼𑀧𑁂𑀘𑁆𑀘 𑀢𑀲𑁆𑀲 𑀯𑀤𑀺𑀁𑀲𑀼 𑀧𑀡𑁆𑀟𑀼𑀲𑁆𑀲 𑀦𑀭𑀸𑀥𑀺𑀧𑀲𑁆𑀲.

𑁨𑁫𑁬.

𑀤𑀺𑀲𑁆𑀯𑀸𑀦 𑀬𑁄 𑀈𑀤𑀺𑀲𑀓𑀫𑁆𑀧𑀺 𑀭𑀸𑀚 𑀇𑀤𑁆𑀥𑀸𑀦𑀼𑀪𑀸𑀯𑀁 𑀫𑀼𑀦𑀺𑀧𑀼𑀗𑁆𑀕𑀯𑀲𑁆𑀲;

𑀧𑀲𑀸𑀤𑀫𑀢𑁆𑀢𑀫𑁆𑀧𑀺 𑀓𑀭𑁂𑀬𑁆𑀬 𑀦𑁄𑀘𑁂 𑀓𑀺𑀫𑀢𑁆𑀣𑀺𑀬𑀸 𑀢𑀲𑁆𑀲 𑀪𑀯𑁂𑀬𑁆𑀬 𑀧𑀜𑁆𑀜𑀸.

𑁨𑁫𑁭.

𑀧𑀲𑀸𑀤𑀦𑀻𑀬𑁂𑀲𑀼 𑀕𑀼𑀡𑁂𑀲𑀼 𑀭𑀸𑀚 𑀧𑀲𑀸𑀤𑀦𑀁 𑀲𑀸𑀥𑀼𑀚𑀦𑀲𑁆𑀲 𑀥𑀫𑁆𑀫𑁄;

𑀧𑀼𑀧𑁆𑀨𑀦𑁆𑀢𑀺 𑀲𑀩𑁆𑀩𑁂 𑀲𑀬𑀫𑁂𑀯 𑀯𑀦𑁆𑀤𑁂 𑀲𑀫𑀼𑀕𑁆𑀕𑀢𑁂 𑀓𑁄𑀫𑀼𑀤𑀓𑀸𑀦𑀦𑀸𑀦𑀺.

𑁨𑁫𑁮. ¶

𑀯𑀸𑀘𑀸𑀬 𑀢𑁂𑀲𑀁 𑀧𑀦 𑀤𑀼𑀫𑁆𑀫𑀢𑀻𑀦𑀁 𑀫𑀸 𑀲𑀕𑁆𑀕𑀫𑀕𑁆𑀕𑀁 𑀧𑀚𑀳𑀺𑀢𑁆𑀣 𑀭𑀸𑀚;

𑀅𑀦𑁆𑀥𑁂 𑀕𑀳𑁂𑀢𑁆𑀯𑀸 𑀯𑀺𑀘𑀭𑁂𑀬𑁆𑀬 𑀓𑁄 𑀳𑀺 𑀅𑀦𑁆𑀯𑁂𑀲𑀫𑀸𑀦𑁄 𑀲𑀼𑀧𑀣𑀁 𑀅𑀫𑀽𑀴𑁆𑀳𑁄.

𑁨𑁫𑁯.

𑀦𑀭𑀸𑀥𑀺𑀧𑀸 𑀓𑀧𑁆𑀧𑀺𑀡 𑀩𑀺𑀫𑁆𑀩𑀺𑀲𑀸𑀭 𑀲𑀼𑀤𑁆𑀥𑁄𑀤𑀦𑀸𑀤𑀺 𑀅𑀧𑀺 𑀢𑁂𑀚𑀯𑀦𑁆𑀢𑀸;

𑀢𑀁 𑀥𑀫𑁆𑀫𑀭𑀸𑀚𑀁 𑀲𑀭𑀡𑀁 𑀉𑀧𑁂𑀘𑁆𑀘 𑀧𑀺𑀯𑀺𑀁𑀲𑀼 𑀥𑀫𑁆𑀫𑀸𑀫𑀢𑀫𑀸𑀤𑀭𑁂𑀦.

𑁨𑁬𑁦.

𑀲𑀳𑀲𑁆𑀲𑀦𑁂𑀢𑁆𑀢𑁄 𑀢𑀺𑀤𑀲𑀸𑀥𑀺𑀧𑁄’𑀧𑀺 𑀔𑀻𑀡𑀸𑀬𑀼𑀓𑁄 𑀔𑀺𑀡𑀪𑀯𑀁 𑀫𑀼𑀦𑀺𑀦𑁆𑀤𑀁;

𑀉𑀧𑁂𑀘𑁆𑀘 𑀥𑀫𑁆𑀫𑀁 𑀯𑀺𑀫𑀮𑀁 𑀦𑀺𑀲𑀫𑁆𑀫 𑀅𑀮𑀢𑁆𑀣 𑀆𑀬𑀼𑀁 𑀅𑀧𑀺 𑀤𑀺𑀝𑁆𑀞𑀥𑀫𑁆𑀫𑁄.

𑁨𑁬𑁧.

𑀢𑀼𑀯𑀫𑁆𑀧𑀺 𑀢𑀲𑁆𑀫𑀺𑀁 𑀚𑀺𑀢𑀧𑀜𑁆𑀘𑀫𑀸𑀭𑁂 𑀤𑁂𑀯𑀸𑀢𑀺𑀤𑁂𑀯𑁂 𑀯𑀭𑀥𑀫𑁆𑀫𑀭𑀸𑀚𑁂;

𑀲𑀕𑁆𑀕𑀸𑀧𑀯𑀕𑁆𑀕𑀸𑀥𑀺𑀕𑀫𑀸𑀬 𑀔𑀺𑀧𑁆𑀧𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀳𑀺 𑀦𑀭𑀸𑀥𑀺𑀭𑀸𑀚.

𑁨𑁬𑁨. ¶

𑀲𑀼𑀢𑁆𑀯𑀸𑀦𑀢𑁂𑀲𑀁 𑀯𑀘𑀦𑀁 𑀦𑀭𑀺𑀦𑁆𑀤𑁄 𑀯𑀺𑀓𑀺𑀡𑁆𑀡𑀓𑀗𑁆𑀔𑁄 𑀭𑀢𑀦𑀢𑁆𑀢𑀬𑀫𑁆𑀳𑀺;

𑀲𑁂𑀦𑀸𑀧𑀢𑀺𑀁 𑀅𑀢𑁆𑀣𑀯𑀭𑀁 𑀅𑀯𑁄𑀘 𑀧𑀳𑀝𑁆𑀞𑀪𑀸𑀯𑁄 𑀧𑀭𑀺𑀲𑀸𑀬 𑀫𑀚𑁆𑀛𑁂.

𑁨𑁬𑁩.

𑀅𑀲𑀤𑁆𑀤𑀳𑀸𑀦𑁄 𑀭𑀢𑀦𑀢𑁆𑀢𑀬𑀲𑁆𑀲 𑀕𑀼𑀡𑁂 𑀪𑀯𑀘𑁆𑀙𑁂𑀤𑀦𑀓𑀸𑀭𑀡𑀲𑁆𑀲;

𑀘𑀺𑀭𑀸𑀬 𑀤𑀼𑀮𑁆𑀮𑀤𑁆𑀥𑀺𑀧𑀣𑁂 𑀘𑀭𑀦𑁆𑀢𑁄 𑀞𑀺𑀢𑁄 𑀲𑀭𑀚𑁆𑀚𑁂 𑀅𑀧𑀺 𑀯𑀜𑁆𑀘𑀺𑀢𑁄𑀳𑀁.

𑁨𑁬𑁪.

𑀫𑁄𑀳𑁂𑀦 𑀔𑀚𑁆𑀚𑁄𑀧𑀦𑀓𑀁 𑀥𑀫𑁂𑀲𑀺𑀁 𑀲𑀻𑀢𑀤𑁆𑀤𑀺𑀢𑁄 𑀥𑀼𑀫𑀲𑀺𑀔𑁂 𑀚𑀮𑀦𑁆𑀢𑁂;

𑀧𑀺𑀧𑀸𑀲𑀺𑀢𑁄 𑀲𑀺𑀦𑁆𑀥𑀼𑀚𑀮𑀁 𑀧𑀳𑀸𑀬 𑀧𑀺𑀯𑀺𑀁 𑀧𑀫𑀸𑀤𑁂𑀦 𑀫𑀭𑀻𑀘𑀺𑀢𑁄𑀬𑀁.

𑁨𑁬𑁫.

𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀅𑀫𑀢𑀁 𑀘𑀺𑀭𑀸𑀬 𑀚𑀺𑀯𑀢𑁆𑀣𑀺𑀓𑁄 𑀢𑀺𑀓𑁆𑀔𑀯𑀺𑀲𑀁 𑀅𑀔𑀸𑀤𑀺𑀁;

𑀯𑀺𑀳𑀸𑀬’𑀳𑀁 𑀘𑀫𑁆𑀧𑀓𑀧𑀼𑀧𑁆𑀨𑀤𑀸𑀫𑀁 𑀅𑀥𑀸𑀭𑀬𑀺𑀁 𑀚𑀢𑁆𑀢𑀼𑀲𑀼 𑀦𑀸𑀕𑀪𑀸𑀭𑀁.

𑁨𑁬𑁬. ¶

𑀕𑀦𑁆𑀢𑁆𑀯𑀸𑀦 𑀔𑀺𑀧𑁆𑀧𑀁 𑀧𑀭𑀺𑀔𑀸 𑀲𑀫𑀻𑀧𑀁 𑀆𑀭𑀸𑀥𑀬𑀺𑀢𑁆𑀯𑀸 𑀚𑀺𑀦𑀤𑀦𑁆𑀢𑀥𑀸𑀢𑀼𑀁;

𑀆𑀦𑁂𑀳𑀺 𑀧𑀽𑀚𑀸𑀯𑀺𑀥𑀺𑀦𑀸 𑀓𑀭𑀺𑀲𑁆𑀲𑀁 𑀧𑀼𑀜𑁆𑀜𑀸𑀦𑀺 𑀲𑀩𑁆𑀩𑀢𑁆𑀣 𑀲𑀼𑀔𑀸𑀯𑀳𑀸𑀦𑀺.

𑁨𑁬𑁭.

𑀕𑀦𑁆𑀢𑁆𑀯𑀸𑀢𑀢𑁂𑀲𑁄𑀧𑀭𑀺𑀔𑀸𑀲𑀫𑀻𑀧𑀁 𑀲𑁂𑀦𑀸𑀥𑀺𑀦𑀸𑀣𑁄 𑀧𑀭𑀫𑀧𑁆𑀧𑀢𑀻𑀢𑁄;

𑀥𑀸𑀢𑀼𑀁 𑀫𑀼𑀦𑀺𑀦𑁆𑀤𑀲𑁆𑀲 𑀦𑀫𑀲𑁆𑀲𑀫𑀸𑀦𑁄 𑀅𑀚𑁆𑀛𑁂𑀲𑀺 𑀭𑀜𑁆𑀜𑁄 𑀳𑀺𑀢𑀫𑀸 𑀘𑀭𑀦𑁆𑀢𑁄

𑁨𑁬𑁮.

𑀘𑀺𑀭𑀸𑀕𑀢𑀁 𑀤𑀺𑀝𑁆𑀞𑀺𑀫𑀮𑀁 𑀧𑀳𑀸𑀬 𑀅𑀮𑀢𑁆𑀣 𑀲𑀤𑁆𑀥𑀁 𑀲𑀼𑀕𑀢𑁂 𑀦𑀭𑀺𑀦𑁆𑀤𑁄;

𑀧𑀸𑀲𑀸𑀤𑀫𑀸𑀕𑀫𑁆𑀫 𑀧𑀲𑀸𑀤𑀫𑀲𑁆𑀲 𑀯𑀟𑁆𑀠𑁂𑀳𑀺 𑀭𑀜𑁆𑀜𑁄 𑀭𑀢𑀦𑀢𑁆𑀢𑀬𑀫𑁆𑀳𑀺.

𑁨𑁬𑁯.

𑀢𑀲𑁆𑀫𑀺𑀁 𑀔𑀡𑁂 𑀧𑁄𑀓𑁆𑀔𑀭𑀡𑀻 𑀯𑀺𑀘𑀺𑀢𑁆𑀢𑀸 𑀨𑀼𑀮𑁆𑀮𑁂𑀳𑀺 𑀲𑁄𑀯𑀡𑁆𑀡𑀲𑀭𑁄𑀭𑀼𑀳𑁂𑀳𑀺;

𑀅𑀮𑀗𑁆𑀓𑀭𑁄𑀦𑁆𑀢𑀻 𑀕𑀕𑀦𑀁 𑀅𑀳𑁄𑀲𑀺 𑀫𑀦𑁆𑀤𑀸𑀓𑀺𑀦𑀻𑀯𑀸𑀪𑀺𑀦𑀯𑀸𑀯𑀢𑀸𑀭𑀸.

𑁨𑁭𑁦.

𑀳𑀁𑀲𑀗𑁆𑀕𑀡𑁂𑀯𑀸𑀣 𑀫𑀼𑀦𑀺𑀦𑁆𑀤𑀥𑀸𑀢𑀼 𑀲𑀸 𑀧𑀗𑁆𑀓𑀚𑀸 𑀧𑀗𑁆𑀓𑀚𑀫𑁄𑀓𑁆𑀓𑀫𑀦𑁆𑀢𑀺;

𑀓𑀼𑀦𑁆𑀤𑀸𑀯𑀤𑀸𑀢𑀸𑀳𑀺 𑀧𑀪𑀸𑀳𑀺 𑀲𑀩𑁆𑀩𑀁 𑀔𑀺𑀭𑁄𑀤𑀓𑀼𑀘𑁆𑀙𑀺𑀁’𑀯 𑀧𑀼𑀭𑀁 𑀅𑀓𑀸𑀲𑀺.

𑁨𑁭𑁧. ¶

𑀢𑀢𑁄 𑀲𑀼𑀭𑀢𑁆𑀢𑀜𑁆𑀚𑀮𑀺𑀧𑀗𑁆𑀓𑀚𑀫𑁆𑀳𑀺 𑀧𑀢𑀺𑀝𑁆𑀞𑀳𑀺𑀢𑁆𑀯𑀸𑀦 𑀘𑀫𑀼𑀧𑀢𑀺𑀲𑁆𑀲;

𑀲𑀦𑁆𑀤𑀺𑀲𑁆𑀲𑀫𑀸𑀦𑀸 𑀫𑀳𑀢𑀸 𑀚𑀦𑁂𑀦 𑀫𑀳𑀧𑁆𑀨𑀮𑀁 𑀫𑀸𑀦𑀼𑀲𑀓𑀁 𑀅𑀓𑀢𑁆𑀣.

𑁨𑁭𑁨.

𑀲𑀼𑀢𑁆𑀯𑀸𑀦 𑀯𑀼𑀢𑁆𑀢𑀦𑁆𑀢𑀫𑀺𑀫𑀁 𑀦𑀭𑀺𑀦𑁆𑀤𑁄 𑀧𑀳𑀝𑁆𑀞𑀪𑀸𑀯𑁄𑀧𑀤𑀲𑀸’𑀯 𑀕𑀦𑁆𑀢𑁆𑀯𑀸;

𑀲𑀁𑀲𑀽𑀘𑀬𑀦𑁆𑀢𑁄 𑀤𑀺𑀕𑀼𑀡𑀁 𑀧𑀲𑀸𑀤𑀁 𑀲𑀼𑀯𑀺𑀫𑁆𑀳𑀺𑀢𑁄𑀧𑀜𑁆𑀚𑀮𑀺𑀓𑁄𑀅𑀯𑁄𑀘.

𑁨𑁭𑁩.

𑀯𑁄𑀳𑀸𑀭𑀤𑀓𑁆𑀔𑀸 𑀫𑀦𑀼𑀚𑀸 𑀫𑀼𑀦𑀺𑀦𑁆𑀤 𑀲𑀗𑁆𑀖𑀝𑁆𑀝𑀬𑀺𑀢𑁆𑀯𑀸 𑀦𑀺𑀓𑀲𑁄𑀧𑀮𑀫𑁆𑀳𑀺;

𑀓𑀭𑁄𑀦𑁆𑀢𑀺𑀅𑀕𑁆𑀖𑀁 𑀯𑀭𑀓𑀜𑁆𑀘𑀦𑀲𑁆𑀲 𑀏𑀲𑁄𑀳𑀺 𑀥𑀫𑁆𑀫𑁄 𑀘𑀭𑀺𑀢𑁄𑀧𑀼𑀭𑀸𑀡𑁄.

𑁨𑁭𑁪.

𑀫𑀡𑀺𑀁 𑀧𑀲𑀢𑁆𑀣𑀸𑀓𑀭𑀲𑀫𑁆𑀪𑀯𑀫𑁆𑀧𑀺 𑀳𑀼𑀢𑀸𑀲𑀓𑀫𑁆𑀫𑁂𑀳𑀪𑀻𑀲𑀗𑁆𑀔𑀭𑀺𑀢𑁆𑀯𑀸;

𑀧𑀸𑀧𑁂𑀦𑁆𑀢𑀺𑀭𑀸𑀚𑀜𑁆𑀜𑀓𑀺𑀭𑀻𑀝𑀓𑁄𑀝𑀺𑀁 𑀯𑀺𑀪𑀼𑀲𑀦𑀢𑁆𑀢𑀁 𑀯𑀺𑀤𑀼𑀦𑁄𑀫𑀦𑀼𑀲𑁆𑀲𑀸.

𑁨𑁭𑁫. ¶

𑀯𑀻𑀫𑀁𑀲𑀦𑀢𑁆𑀣𑀸𑀬 𑀢𑀯𑀸𑀥𑀼𑀦𑀸𑀧𑀺 𑀫𑀬𑀸 𑀓𑀢𑀁 𑀲𑀩𑁆𑀩𑀫𑀺𑀤𑀁 𑀫𑀼𑀦𑀺𑀦𑁆𑀤;

𑀆𑀕𑀼𑀁 𑀫𑀳𑀦𑁆𑀢𑀁 𑀔𑀫 𑀪𑀼𑀭𑀺𑀧𑀜𑁆𑀜 𑀔𑀺𑀧𑁆𑀧𑀁 𑀫𑀫𑀸𑀮𑀗𑁆𑀓𑀼𑀭𑀼 𑀉𑀢𑁆𑀢𑀫𑀗𑁆𑀕𑀁.

𑁨𑁭𑁬.

𑀧𑀢𑀺𑀝𑁆𑀞𑀺𑀢𑀸 𑀢𑀲𑁆𑀲 𑀢𑀢𑁄 𑀓𑀺𑀭𑀻𑀝𑁂 𑀫𑀡𑀺𑀧𑁆𑀧𑀪𑀸 𑀪𑀸𑀲𑀺𑀦𑀺 𑀤𑀦𑁆𑀢𑀥𑀸𑀢𑀼;

𑀅𑀫𑀼𑀜𑁆𑀘𑀺 𑀭𑀁𑀲𑀻 𑀥𑀯𑀮𑀸 𑀧𑀚𑀸𑀲𑀼 𑀲𑀺𑀦𑁂𑀳𑀚𑀸𑀢𑀸 𑀇𑀯 𑀔𑀻𑀭𑀥𑀸𑀭𑀸.

𑁨𑁭𑁭.

𑀲𑁄 𑀤𑀦𑁆𑀢𑀥𑀸𑀢𑀼𑀁 𑀲𑀺𑀭𑀲𑀸𑀯𑀳𑀦𑁆𑀢𑁄 𑀧𑀤𑀓𑁆𑀔𑀺𑀡𑀁𑀢𑀁𑀦𑀕𑀭𑀁 𑀓𑀭𑀺𑀢𑁆𑀯𑀸;

𑀲𑀫𑁆𑀧𑀽𑀚𑀬𑀦𑁆𑀢𑁄 𑀓𑀼𑀲𑀼𑀫𑀸𑀤𑀺𑀓𑁂𑀳𑀺 𑀲𑀼𑀲𑀚𑁆𑀚𑀺𑀢𑀦𑁆𑀢𑁂 𑀧𑀼𑀭𑀫𑀸𑀳𑀭𑀺𑀢𑁆𑀣.

𑁨𑁭𑁮.

𑀲𑀫𑀼𑀲𑁆𑀲𑀺𑀢𑁄𑀤𑀸𑀭𑀲𑀺𑀢𑀸𑀢𑀧𑀢𑁆𑀢𑁂 𑀧𑀮𑁆𑀮𑀗𑁆𑀓𑀲𑁂𑀝𑁆𑀞𑁂 𑀭𑀢𑀦𑀼𑀚𑁆𑀚𑀮𑀫𑁆𑀳𑀺;

𑀧𑀢𑀺𑀝𑁆𑀞𑀧𑁂𑀢𑁆𑀯𑀸𑀦 𑀚𑀺𑀦𑀲𑁆𑀲 𑀥𑀸𑀢𑀼𑀁 𑀧𑀽𑀚𑁂𑀲𑀺 𑀭𑀸𑀚𑀸 𑀭𑀢𑀦𑀸𑀤𑀺𑀓𑁂𑀳𑀺.

𑁨𑁭𑁯.

𑀩𑀼𑀤𑁆𑀥𑀸𑀤𑀺𑀯𑀢𑁆𑀣𑀼𑀢𑁆𑀢𑀬𑀫𑁂𑀯 𑀭𑀸𑀚𑀸 𑀆𑀧𑀸𑀡𑀓𑁄𑀝𑀺𑀁 𑀲𑀭𑀡𑀁 𑀉𑀧𑁂𑀘𑁆𑀘;

𑀳𑀺𑀢𑁆𑀯𑀸 𑀯𑀺𑀳𑀺𑀁𑀲𑀁 𑀓𑀭𑀼𑀡𑀸𑀥𑀺𑀯𑀸𑀲𑁄 𑀆𑀭𑀸𑀥𑀬𑀻 𑀲𑀩𑁆𑀩𑀚𑀦𑀁 𑀕𑀼𑀡𑁂𑀳𑀺.

𑁨𑁮𑁦. ¶

𑀓𑀸𑀭𑁂𑀲𑀺 𑀦𑀸𑀦𑀸𑀭𑀢𑀦𑀧𑁆𑀧𑀪𑀸𑀳𑀺 𑀲𑀳𑀲𑁆𑀲𑀭𑀁𑀲𑀻𑀁’𑀯 𑀯𑀺𑀭𑁄𑀘𑀫𑀸𑀦𑀁;

𑀦𑀭𑀸𑀥𑀺𑀧𑁄 𑀪𑀢𑁆𑀢𑀺𑀪𑀭𑀸𑀦𑀼𑀭𑀽𑀧𑀁 𑀲𑀼𑀘𑀺𑀢𑁆𑀢𑀺𑀢𑀁 𑀥𑀸𑀢𑀼𑀦𑀺𑀯𑁂𑀲𑀦𑀫𑁆𑀧𑀺.

𑁨𑁮𑁧.

𑀯𑀟𑁆𑀠𑁂𑀲𑀺 𑀲𑁄 𑀥𑀸𑀢𑀼𑀖𑀭𑀫𑁆𑀳𑀺 𑀥𑀸𑀢𑀼𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀓𑀮𑀁 𑀧𑀼𑀭𑀫𑁆𑀧𑀺;

𑀲𑁂𑀲𑁂𑀦 𑀧𑀽𑀚𑀸𑀯𑀺𑀥𑀺𑀦𑀸 𑀅𑀢𑀺𑀢𑁆𑀢𑁄 𑀧𑀽𑀚𑁂𑀲𑀺 𑀭𑀝𑁆𑀞𑀁 𑀲𑀥𑀦𑀁 𑀲𑀪𑁄𑀕𑁆𑀕𑀁.

𑁨𑁮𑁨.

𑀆𑀫𑀦𑁆𑀢𑀬𑀺𑀢𑁆𑀯𑀸 𑀕𑀼𑀳𑀲𑀻𑀯𑀭𑀸𑀚𑀁 𑀲𑀫𑁆𑀫𑀸𑀦𑀺𑀢𑀁 𑀅𑀢𑁆𑀢𑀲𑀫𑀁 𑀓𑀭𑀺𑀢𑁆𑀯𑀸;

𑀤𑀸𑀦𑀸𑀤𑀺𑀓𑀁 𑀧𑀼𑀜𑁆𑀜𑀫𑀦𑁂𑀓𑀭𑀽𑀧𑀁 𑀲𑀤𑁆𑀥𑀸𑀥𑀦𑁄 𑀲𑀜𑁆𑀘𑀺𑀡𑀺𑀭𑀸𑀚𑀲𑁂𑀝𑁆𑀞𑁄.

𑁨𑁮𑁩.

𑀢𑀢𑁄 𑀲𑁄 𑀪𑀼𑀧𑀸𑀮𑁄 𑀓𑀼𑀫𑀢𑀺𑀚𑀦𑀲𑀁𑀲𑀕𑁆𑀕𑀫𑀦𑀬𑀁,

𑀦𑀺𑀭𑀸𑀓𑀢𑁆𑀯𑀸 𑀫𑀕𑁆𑀕𑁂 𑀲𑀼𑀕𑀢𑀯𑀘𑀦𑀼𑀚𑁆𑀚𑁄𑀢𑀲𑀼𑀕𑀫𑁂;

𑀧𑀥𑀸𑀯𑀦𑁆𑀢𑁄 𑀲𑀫𑁆𑀫𑀸 𑀲𑀧𑀭𑀳𑀺𑀢𑀲𑀫𑁆𑀧𑀢𑁆𑀢𑀺𑀘𑀢𑀼𑀭𑁄,

𑀧𑀲𑀢𑁆𑀣𑀁 𑀮𑁄𑀓𑀢𑁆𑀣𑀁 𑀅𑀘𑀭𑀺 𑀘𑀭𑀺𑀢𑀸𑀯𑀚𑁆𑀚𑀺𑀢𑀚𑀦𑁄.

𑀢𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.

𑁨𑁮𑁪. ¶

𑀘𑀭𑀢𑀺 𑀥𑀭𑀡𑀺 𑀧𑀸𑀮𑁂 𑀭𑀸𑀚𑀥𑀫𑁆𑀫𑁂𑀲𑀼 𑀢𑀲𑁆𑀫𑀺𑀁,

𑀲𑀫𑀭𑀘𑀢𑀼𑀭𑀲𑁂𑀦𑁄 𑀔𑀻𑀭𑀥𑀸𑀭𑁄 𑀦𑀭𑀺𑀦𑁆𑀤𑁄;

𑀦𑀺𑀚𑀪𑀼𑀚𑀩𑀮𑀮𑀻𑀮𑀸’𑀭𑀸𑀢𑀺𑀤𑀧𑁆𑀧𑀧𑁆𑀧𑀫𑀸𑀣𑀻,

𑀯𑀺𑀪𑀯𑀚𑀦𑀺𑀢𑀫𑀸𑀦𑁄 𑀬𑀼𑀤𑁆𑀥𑀲𑀚𑁆𑀚𑁄’𑀪𑀺𑀕𑀜𑁆𑀙𑀺.

𑁨𑁮𑁫.

𑀓𑀭𑀺𑀯𑀭𑀫𑀣 𑀤𑀺𑀲𑁆𑀯𑀸 𑀲𑁄 𑀕𑀼𑀳𑀸𑀤𑁆𑀯𑀸𑀭𑀬𑀸𑀢𑀁,

𑀧𑀝𑀺𑀪𑀬𑀭𑀳𑀺𑀢𑀢𑁆𑀢𑁄 𑀲𑀻𑀳𑀭𑀸𑀚𑀸’𑀯 𑀭𑀸𑀚𑀸;

𑀦𑀺𑀚𑀦𑀕𑀭𑀲𑀫𑀻𑀧𑀸𑀬𑀸𑀢𑀫𑁂𑀢𑀁 𑀦𑀭𑀺𑀦𑁆𑀤𑀁,

𑀅𑀫𑀺𑀢𑀩𑀮𑀫𑀫𑀳𑁄𑀖𑁂𑀦𑁄𑀢𑁆𑀣𑀭𑀦𑁆𑀢𑀸’𑀪𑀺𑀬𑀸𑀬𑀺.

𑁨𑁮𑁬.

𑀉𑀤𑀺𑀢𑀩𑀳𑀴𑀥𑀽𑀮𑀻𑀧𑀸𑀴𑀺𑀭𑀼𑀤𑁆𑀥𑀦𑁆𑀢𑀴𑀺𑀓𑁆𑀔𑁄,

𑀲𑀫𑀤𑀯𑀺𑀯𑀺𑀥𑀬𑁄𑀥𑀸𑀭𑀸𑀯𑀲𑀁𑀭𑀫𑁆𑀪𑀪𑀻𑀫𑁂;

𑀦𑀺𑀲𑀺𑀢𑀲𑀭𑀲𑀢𑀸𑀮𑀻𑀯𑀲𑁆𑀲𑀥𑀸𑀭𑀸𑀓𑀭𑀸𑀴𑁂,

𑀅𑀚𑀺𑀦𑀺 𑀫𑀳𑀢𑀺 𑀬𑀼𑀤𑁆𑀥𑁂 𑀧𑀡𑁆𑀟𑀼𑀓𑁄 𑀔𑀻𑀭𑀥𑀸𑀭𑀁.

𑁨𑁮𑁭. ¶

𑀅𑀣 𑀦𑀭𑀧𑀢𑀺𑀲𑁂𑀝𑁆𑀞𑁄 𑀲𑀗𑁆𑀕𑀳𑁂𑀢𑁆𑀯𑀸𑀦 𑀭𑀝𑁆𑀞𑀁,

𑀦𑀺𑀚 𑀢𑀦𑀼𑀚 𑀯𑀭𑀲𑁆𑀫𑀺𑀁 𑀭𑀚𑁆𑀚𑀪𑀸𑀭𑀁 𑀦𑀺𑀥𑀸𑀬;

𑀲𑀼𑀕𑀢 𑀤𑀲𑀦 𑀥𑀸𑀢𑀼𑀁 𑀲𑀫𑁆𑀧𑀝𑀺𑀘𑁆𑀙𑀸𑀧𑀬𑀺𑀢𑁆𑀯𑀸,

𑀧𑀳𑀺𑀡𑀺 𑀘 𑀕𑀼𑀳𑀲𑀻𑀯𑀁 𑀲𑀓𑁆𑀓𑀭𑀺𑀢𑁆𑀯𑀸 𑀲𑀭𑀝𑁆𑀞𑀁.

𑁨𑁮𑁮.

𑀲𑀼𑀯𑀺𑀭𑀫𑀯𑀦𑀻𑀧𑀸𑀮𑁄 𑀲𑀜𑁆𑀜𑀫𑀁 𑀅𑀚𑁆𑀛𑀼𑀧𑁂𑀢𑁄,

𑀯𑀺𑀯𑀺𑀥 𑀯𑀺𑀪𑀯 𑀤𑀸𑀦𑀸𑀬𑀸𑀘𑀓𑁂 𑀢𑀧𑁆𑀧𑀬𑀺𑀢𑁆𑀯𑀸;

𑀢𑀺𑀤𑀲𑀧𑀼𑀭 𑀲𑀫𑀸𑀚𑀁 𑀤𑁂𑀳𑀪𑁂𑀤𑀸 𑀧𑀬𑀸𑀢𑁄,

𑀓𑀼𑀲𑀮 𑀨𑀮𑀫𑀦𑀧𑁆𑀧𑀁 𑀧𑀢𑁆𑀣𑀺𑀢𑀁 𑀧𑀘𑁆𑀘𑀮𑀢𑁆𑀣.

𑁨𑁮𑁯.

𑀦𑀭𑀧𑀢𑀺 𑀕𑀼𑀳𑀲𑀻𑀯𑁄 𑀢𑀁 𑀫𑀼𑀦𑀺𑀦𑁆𑀤𑀲𑁆𑀲 𑀥𑀸𑀢𑀼𑀁,

𑀲𑀓𑀧𑀼𑀭𑀫𑀼𑀧𑀦𑁂𑀢𑁆𑀯𑀸 𑀲𑀸𑀥𑀼 𑀲𑀫𑁆𑀫𑀸𑀦𑀬𑀦𑁆𑀢𑁄;

𑀲𑀼𑀕𑀢𑀺 𑀕𑀫𑀦 𑀫𑀕𑁆𑀕𑁂 𑀧𑀸𑀡𑀺𑀦𑁄 𑀬𑁄𑀚𑀬𑀦𑁆𑀢𑁄,

𑀲𑀼𑀘𑀭𑀺𑀢 𑀫𑀪𑀺𑀭𑀽𑀧𑀁 𑀲𑀜𑁆𑀘𑀺𑀡𑀦𑁆𑀢𑁄 𑀯𑀺𑀳𑀸𑀲𑀺.

𑁨𑁯𑁦. ¶

𑀅𑀕𑀡𑀺𑀢𑀫𑀳𑀺𑀫𑀲𑁆𑀲𑀼𑀚𑁆𑀚𑁂 𑀦𑀺𑀭𑀜𑁆𑀜𑁄 𑀢𑀦𑀽𑀚𑁄,

𑀧𑀼𑀭𑀺𑀫 𑀯𑀬𑀲𑀺 𑀬𑁂𑀯𑀸𑀭𑀤𑁆𑀥𑀲𑀤𑁆𑀥𑀸𑀪𑀺𑀬𑁄𑀕𑁄;

𑀤𑀲𑀩𑀮 𑀢𑀦𑀼𑀥𑀸𑀢𑀼𑀁 𑀧𑀽𑀚𑀺𑀢𑀼𑀁 𑀢𑀲𑁆𑀲 𑀭𑀜𑁆𑀜𑁄,

𑀧𑀼𑀭𑀯𑀭 𑀫𑀼𑀧𑀸𑀬𑀸𑀢𑁄 𑀤𑀦𑁆𑀢𑀦𑀸𑀫𑁄 𑀓𑀼𑀫𑀸𑀭𑁄.

𑁨𑁯𑁧.

𑀕𑀼𑀡𑀚𑀦𑀺𑀢 𑀧𑀲𑀸𑀤𑀁 𑀢𑀁 𑀓𑀮𑀺𑀗𑁆𑀕𑀸𑀥𑀺𑀦𑀸𑀣𑀁,

𑀦𑀺𑀔𑀺𑀮 𑀕𑀼𑀡 𑀦𑀺𑀯𑀸𑀲𑁄 𑀲𑁄 𑀓𑀼𑀫𑀸𑀭𑁄 𑀓𑀭𑀺𑀢𑁆𑀯𑀸;

𑀯𑀺𑀯𑀺𑀥 𑀫𑀳𑀯𑀺𑀥𑀸𑀦𑀁 𑀲𑀸𑀥𑀼𑀲𑀫𑁆𑀧𑀸𑀤𑀬𑀦𑁆𑀢𑁄,

𑀅𑀯𑀲𑀺 𑀲𑀼𑀕𑀢𑀥𑀸𑀢𑀼𑀁 𑀅𑀦𑁆𑀯𑀳𑀁 𑀯𑀦𑁆𑀤𑀫𑀸𑀦𑁄.

𑁨𑁯𑁨.

𑀅𑀪𑀯𑀺 𑀘 𑀕𑀼𑀳𑀲𑀻𑀯𑀲𑁆𑀲𑀸𑀯𑀦𑀻𑀲𑀲𑁆𑀲 𑀥𑀺𑀢𑀸,

𑀯𑀺𑀓𑀘 𑀓𑀼𑀯𑀮𑀬𑀓𑁆𑀔𑀻 𑀳𑀁𑀲𑀓𑀦𑁆𑀢𑀸𑀪𑀺𑀬𑀸𑀢𑀸;

𑀯𑀤𑀦 𑀚𑀺𑀢 𑀲𑀭𑁄𑀚𑀸 𑀳𑀸𑀭𑀺𑀥𑀫𑁆𑀫𑀺𑀮𑁆𑀮𑀪𑀸𑀭𑀸,

𑀓𑀼𑀘𑀪𑀭𑀦𑀫𑀺𑀢𑀗𑁆𑀕𑀺 𑀳𑁂𑀫 𑀫𑀸𑀮𑀸𑀪𑀺𑀥𑀸𑀦𑀸.

𑁨𑁯𑁩. ¶

𑀅𑀔𑀺𑀮𑀕𑀼𑀡𑀦𑀺𑀥𑀸𑀦𑀁 𑀩𑀦𑁆𑀥𑀼𑀪𑀸𑀯𑀸𑀦𑀼𑀭𑀽𑀧𑀁,

𑀲𑀼𑀯𑀺𑀫𑀮𑀓𑀼𑀮𑀚𑀸𑀢𑀁 𑀢𑀁 𑀓𑀼𑀫𑀸𑀭𑀁 𑀯𑀺𑀤𑀺𑀢𑁆𑀯𑀸;

𑀦𑀭𑀧𑀢𑀺 𑀕𑀼𑀳𑀲𑀻𑀯𑁄 𑀅𑀢𑁆𑀢𑀦𑁄 𑀥𑀻𑀢𑀭𑀁 𑀢𑀁,

𑀅𑀤𑀤𑀺 𑀲𑀩𑀳𑀼𑀫𑀸𑀦𑀁 𑀭𑀸𑀚𑀧𑀼𑀢𑁆𑀢𑀲𑁆𑀲 𑀢𑀲𑁆𑀲.

𑁨𑁯𑁪.

𑀫𑀦𑀼𑀚𑀧𑀢𑀺 𑀓𑀼𑀫𑀸𑀭𑀁 𑀥𑀸𑀢𑀼𑀭𑀓𑁆𑀔𑀸𑀥𑀺𑀓𑀸𑀭𑁂,

𑀧𑀘𑀼𑀭𑀧𑀭𑀺𑀚𑀦𑀁 𑀢𑀁 𑀲𑀩𑁆𑀩𑀣𑀸 𑀬𑁄𑀚𑀬𑀺𑀢𑁆𑀯𑀸;

𑀕𑀯 𑀫𑀳𑀺𑀲 𑀲𑀳𑀲𑁆𑀲𑀸𑀤𑀻𑀳𑀺 𑀲𑀫𑁆𑀧𑀻𑀡𑀬𑀺𑀢𑁆𑀯𑀸,

𑀲𑀓 𑀯𑀺𑀪𑀯 𑀲𑀭𑀺𑀓𑁆𑀔𑁂 𑀇𑀲𑁆𑀲𑀭𑀢𑁆𑀢𑁂 𑀞𑀧𑁂𑀲𑀺.

𑁨𑁯𑁫.

𑀲𑀫𑀭𑀪𑀼𑀯𑀺 𑀯𑀺𑀦𑀝𑁆𑀞𑁂 𑀔𑀻𑀭𑀥𑀸𑀭𑁂 𑀦𑀭𑀺𑀦𑁆𑀤𑁂,

𑀫𑀮𑀬𑀯𑀦𑀫𑀼𑀧𑁂𑀢𑀸 𑀪𑀸𑀕𑀺𑀦𑁂𑀬𑁆𑀬𑀸 𑀓𑀼𑀫𑀸𑀭𑀸;

𑀧𑀩𑀮 𑀫𑀢𑀺 𑀫𑀳𑀦𑁆𑀢𑀁 𑀲𑀁𑀳𑀭𑀺𑀢𑁆𑀯𑀸 𑀩𑀮𑀕𑁆𑀕𑀁,

𑀉𑀧𑀧𑀼𑀭𑀫𑀼𑀧𑀕𑀜𑁆𑀙𑀼𑀁 𑀥𑀸𑀢𑀼𑀬𑀸 𑀕𑀡𑁆𑀳𑀦𑀢𑁆𑀣𑀁.

𑁨𑁯𑁬.

𑀅𑀣 𑀦𑀕𑀭𑀲𑀫𑀻𑀧𑁂 𑀢𑁂 𑀦𑀺𑀯𑁂𑀲𑀁 𑀓𑀭𑀺𑀢𑁆𑀯𑀸,

𑀲𑀯𑀡𑀓𑀝𑀼𑀓𑀫𑁂𑀢𑀁 𑀲𑀸𑀲𑀦𑀁 𑀧𑁂𑀲𑀬𑀺𑀁𑀲𑀼;

𑀲𑀼𑀕𑀢𑀤𑀲𑀦𑀥𑀸𑀢𑀼𑀁 𑀤𑁂𑀳𑀺 𑀯𑀸 𑀔𑀺𑀧𑁆𑀧𑀫𑀫𑁆𑀳𑀁,

𑀬𑀲𑀲𑀺𑀭𑀺𑀚𑀦𑀦𑀺𑀁 𑀯𑀸 𑀓𑀻𑀴 𑀲𑀗𑁆𑀕𑀸𑀫𑀓𑁂𑀴𑀺𑀁.

𑁨𑁯𑁭. ¶

𑀲𑀧𑀤𑀺 𑀥𑀭𑀡𑀺𑀧𑀸𑀮𑁄 𑀲𑀸𑀲𑀦𑀁 𑀢𑀁 𑀲𑀼𑀡𑀺𑀢𑁆𑀯𑀸,

𑀅𑀯𑀤𑀺 𑀭𑀳𑀲𑀺 𑀯𑀸𑀘𑀁 𑀭𑀸𑀚𑀧𑀼𑀢𑁆𑀢𑀲𑁆𑀲 𑀢𑀲𑁆𑀲;

𑀦𑀳𑀺 𑀲𑀢𑀺 𑀫𑀫 𑀤𑁂𑀳𑁂 𑀥𑀸𑀢𑀼𑀫𑀜𑁆𑀜𑀲𑁆𑀲 𑀤𑀲𑁆𑀲𑀁,

𑀅𑀳𑀫𑀧𑀺 𑀬𑀤𑀺 𑀚𑁂𑀢𑀼𑀁 𑀦𑁂𑀯 𑀢𑁂 𑀲𑀓𑁆𑀓𑀼𑀡𑁂𑀬𑁆𑀬𑀁.

𑁨𑁯𑁮.

𑀲𑀼𑀭𑀦𑀭 𑀦𑀫𑀺𑀢𑀁 𑀢𑀁 𑀤𑀦𑁆𑀢𑀥𑀸𑀢𑀼𑀁 𑀕𑀳𑁂𑀢𑁆𑀯𑀸,

𑀕𑀳𑀺𑀢 𑀤𑀺𑀚𑀯𑀺𑀮𑀸𑀲𑁄 𑀲𑀻𑀳𑀴𑀁 𑀬𑀸𑀳𑀺 𑀤𑀻𑀧𑀁;

𑀇𑀢𑀺 𑀯𑀘𑀦𑀫𑀼𑀤𑀸𑀭𑀁 𑀫𑀸𑀢𑀼𑀮𑀲𑁆𑀲𑀸𑀣 𑀲𑀼𑀢𑁆𑀯𑀸,

𑀢𑀫𑀯𑀘 𑀕𑀼𑀳𑀲𑀻𑀯𑀁 𑀤𑀦𑁆𑀢𑀦𑀸𑀫𑁄 𑀓𑀼𑀫𑀸𑀭𑁄.

𑁨𑁯𑁯.

𑀢𑀯𑀘 𑀫𑀫𑀘 𑀓𑁄 𑀯𑀸 𑀲𑀻𑀳𑀴𑁂 𑀩𑀦𑁆𑀥𑀼𑀪𑀽𑀢𑁄,

𑀚𑀺𑀦𑀯𑀭𑀡𑀲𑀭𑁄𑀚𑁂 𑀪𑀢𑁆𑀢𑀺𑀬𑀼𑀢𑁆𑀢𑁄 𑀘 𑀓𑁄𑀯𑀸;

𑀚𑀮𑀦𑀻𑀥𑀺𑀧𑀭𑀢𑀻𑀭𑁂 𑀲𑀻𑀳𑀴𑀁 𑀔𑀼𑀤𑁆𑀤𑀤𑁂𑀲𑀁,

𑀓𑀣𑀫𑀳𑀫𑀢𑀺𑀦𑁂𑀲𑁆𑀲𑀁 𑀤𑀦𑁆𑀢𑀥𑀸𑀢𑀼𑀁 𑀚𑀺𑀦𑀲𑁆𑀲.

𑁩𑁦𑁦. ¶

𑀢𑀫𑀯𑀤𑀺 𑀕𑀼𑀳𑀲𑀻𑀯𑁄 𑀪𑀸𑀕𑀺𑀦𑁂𑀬𑁆𑀬𑀁 𑀓𑀼𑀫𑀸𑀭𑀁,

𑀤𑀲𑀩𑀮𑀢𑀦𑀼𑀥𑀸𑀢𑀼 𑀲𑀡𑁆𑀞𑀺𑀢𑀸 𑀲𑀻𑀳𑀴𑀲𑁆𑀫𑀺𑀁;

𑀪𑀯𑀪𑀬𑀳𑀢𑀺𑀤𑀓𑁆𑀔𑁄 𑀯𑀢𑁆𑀢𑀢𑁂 𑀲𑀢𑁆𑀣𑀼𑀥𑀫𑁆𑀫𑁄,

𑀕𑀡𑀦𑀧𑀣𑀫𑀢𑀻𑀢𑀸 𑀪𑀺𑀓𑁆𑀔𑀯𑁄 𑀘𑀸𑀯𑀲𑀺𑀁𑀲𑀼.

𑁩𑁦𑁧.

𑀫𑀫 𑀘 𑀧𑀺𑀬𑀲𑀳𑀸𑀬𑁄 𑀲𑁄 𑀫𑀳𑀸𑀲𑁂𑀦 𑀭𑀸𑀚𑀸,

𑀚𑀺𑀦𑀘𑀭𑀡𑀲𑀭𑁄𑀚𑀤𑁆𑀯𑀦𑁆𑀤𑀲𑁂𑀯𑀸𑀪𑀺𑀬𑀼𑀢𑁆𑀢𑁄;

𑀲𑀮𑀺𑀮𑀫𑀧𑀺 𑀘 𑀨𑀼𑀝𑁆𑀞𑀁 𑀥𑀸𑀢𑀼𑀬𑀸 𑀧𑀢𑁆𑀣𑀬𑀦𑁆𑀢𑁄,

𑀯𑀺𑀯𑀺𑀥𑀭𑀢𑀦𑀚𑀸𑀢𑀁 𑀧𑀸𑀪𑀢𑀁 𑀧𑁂𑀲𑀬𑀺𑀢𑁆𑀣.

𑁩𑁦𑁨.

𑀧𑀪𑀯𑀢𑀺 𑀫𑀦𑀼𑀚𑀺𑀦𑁆𑀤𑁄 𑀲𑀩𑁆𑀩𑀤𑀸 𑀩𑀼𑀤𑁆𑀥𑀺𑀫𑀸 𑀲𑁄,

𑀲𑀼𑀕𑀢𑀤𑀲𑀦𑀥𑀸𑀢𑀼𑀁 𑀧𑀽𑀚𑀺𑀢𑀼𑀁 𑀧𑀽𑀚𑀦𑁂𑀬𑁆𑀬𑀁;

𑀧𑀭𑀺𑀘𑀺𑀢𑀯𑀺𑀲𑀬𑀫𑁆𑀳𑀸 𑀯𑀺𑀧𑁆𑀧𑀯𑀼𑀢𑁆𑀣𑀁 𑀪𑀯𑀦𑁆𑀢𑀁,

𑀯𑀺𑀯𑀺𑀥𑀯𑀺𑀪𑀯𑀤𑀸𑀦𑀸 𑀲𑀸𑀥𑀼 𑀲𑀗𑁆𑀕𑀡𑁆𑀳𑀺𑀢𑀼𑀜𑁆𑀘.

𑁩𑁦𑁩. ¶

𑀦𑀺𑀚 𑀤𑀼𑀳𑀺𑀢𑀼𑀧𑀢𑀺𑀁 𑀢𑀁 𑀇𑀢𑁆𑀣𑀫𑀸𑀭𑀸𑀥𑀬𑀺𑀢𑁆𑀯𑀸,

𑀦𑀭𑀧𑀢𑀺 𑀕𑀼𑀳𑀲𑀻𑀯𑁄 𑀲𑀗𑁆𑀕𑀳𑁂𑀢𑁆𑀯𑀸𑀦 𑀲𑁂𑀦𑀁;

𑀭𑀡𑀥𑀭𑀡𑀺𑀫𑀼𑀧𑁂𑀢𑁄 𑀲𑁄 𑀓𑀼𑀫𑀸𑀭𑁂𑀳𑀺 𑀲𑀤𑁆𑀥𑀺𑀁,

𑀫𑀭𑀡𑀧𑀭𑀯𑀲𑀢𑁆𑀢𑀁 𑀅𑀚𑁆𑀛𑀕𑀸 𑀬𑀼𑀚𑁆𑀛𑀫𑀸𑀦𑁄.

𑁩𑁦𑁪.

𑀅𑀣 𑀦𑀭𑀧𑀢𑀺 𑀧𑀼𑀢𑁆𑀢𑁄 𑀤𑀦𑁆𑀢𑀦𑀸𑀫𑁄 𑀲𑀼𑀡𑀺𑀢𑁆𑀯𑀸,

𑀲𑀯𑀡 𑀓𑀝𑀼𑀓𑀫𑁂𑀢𑀁 𑀫𑀸𑀢𑀼𑀮𑀲𑁆𑀲𑀧𑁆𑀧𑀯𑀢𑁆𑀢𑀺𑀁;

𑀕𑀳𑀺𑀢 𑀤𑀺𑀚𑀯𑀺𑀮𑀸𑀲𑁄 𑀤𑀦𑁆𑀢𑀥𑀸𑀢𑀼𑀁 𑀕𑀳𑁂𑀢𑁆𑀯𑀸,

𑀢𑀼𑀭𑀺𑀢 𑀢𑀼𑀭𑀺𑀢 𑀪𑀽𑀢𑁄 𑀲𑁄 𑀧𑀼𑀭𑀫𑁆𑀳𑀸 𑀧𑀴𑀸𑀬𑀺.

𑁩𑁦𑁫.

𑀲𑀭𑀪𑀲 𑀫𑀼𑀧𑀕𑀦𑁆𑀢𑁆𑀯𑀸 𑀤𑀓𑁆𑀔𑀺𑀡𑀁 𑀘𑀸𑀣 𑀤𑁂𑀲𑀁,

𑀅𑀯𑀺𑀘𑀮𑀺𑀢𑀲𑀪𑀸𑀯𑁄 𑀇𑀤𑁆𑀥𑀺𑀬𑀸 𑀤𑁂𑀯𑀢𑀸𑀦𑀁;

𑀦𑀤𑀺𑀫𑀢𑀺𑀫𑀳𑀢𑀺𑀁 𑀲𑁄 𑀉𑀢𑁆𑀢𑀭𑀺𑀢𑁆𑀯𑀸𑀦 𑀧𑀼𑀡𑁆𑀡𑀁,

𑀦𑀺𑀤𑀳𑀺 𑀤𑀲𑀦𑀥𑀸𑀢𑀼𑀁 𑀯𑀸𑀮𑀼𑀓𑀸𑀭𑀸𑀲𑀺𑀫𑀚𑁆𑀛𑁂.

𑁩𑁦𑁬.

𑀧𑀼𑀦 𑀧𑀼𑀭𑀫𑀼𑀧𑀕𑀦𑁆𑀢𑁆𑀯𑀸 𑀢𑀁 𑀕𑀳𑀻𑀢𑀜𑁆𑀜𑀯𑁂𑀲𑀁,

𑀪𑀭𑀺𑀬𑀫𑀧𑀺 𑀕𑀳𑁂𑀢𑁆𑀯𑀸 𑀆𑀕𑀢𑁄 𑀢𑀢𑁆𑀣 𑀔𑀺𑀧𑁆𑀧𑀁;

𑀲𑀼𑀕𑀢𑀤𑀲𑀦𑀥𑀸𑀢𑀼𑀁 𑀯𑀸𑀮𑀼𑀓𑀸𑀣𑀼𑀧𑀓𑀼𑀘𑁆𑀙𑀺𑀁,

𑀞𑀧𑀺𑀢𑀫𑀼𑀧𑀘𑀭𑀦𑁆𑀢𑁄 𑀅𑀘𑁆𑀙𑀺 𑀕𑀼𑀫𑁆𑀩𑀦𑁆𑀢𑀭𑀲𑁆𑀫𑀺𑀁.

𑁩𑁦𑁭. ¶

𑀲𑀧𑀤𑀺 𑀦𑀪𑀲𑀺 𑀣𑁂𑀭𑁄 𑀕𑀘𑁆𑀙𑀫𑀸𑀦𑁄 𑀧𑀦𑁂𑀓𑁄,

𑀯𑀺𑀯𑀺𑀥𑀓𑀺𑀭𑀡𑀚𑀸𑀮𑀁 𑀯𑀸𑀮𑀼𑀓𑀸𑀭𑀸𑀲𑀺𑀣𑀽𑀧𑀸;

𑀅𑀯𑀺𑀭𑀴𑀺𑀢𑀫𑀼𑀤𑁂𑀦𑁆𑀢𑀁 𑀥𑀸𑀢𑀼𑀬𑀸 𑀢𑀸𑀬 𑀤𑀺𑀲𑁆𑀯𑀸,

𑀧𑀡𑀫𑀺 𑀲𑀼𑀕𑀢𑀥𑀸𑀢𑀼𑀁 𑀑𑀢𑀭𑀺𑀢𑁆𑀯𑀸𑀦 𑀢𑀢𑁆𑀣.

𑁩𑁦𑁮.

𑀫𑀼𑀦𑀺𑀲𑀼𑀢𑀫𑀣 𑀤𑀺𑀲𑁆𑀯𑀸 𑀚𑀫𑁆𑀧𑀢𑀻 𑀢𑁂 𑀧𑀢𑀻𑀢𑀸,

𑀦𑀺𑀚𑀕𑀫𑀦𑀯𑀺𑀥𑀸𑀦𑀁 𑀲𑀩𑁆𑀩𑀫𑀸𑀭𑁄𑀘𑀬𑀺𑀁𑀲𑀼;

𑀤𑀲𑀩𑀮𑀢𑀦𑀼𑀚𑁄 𑀲𑁄 𑀥𑀸𑀢𑀼𑀭𑀓𑁆𑀔𑀸 𑀦𑀺𑀬𑀼𑀢𑁆𑀢𑁄,

𑀧𑀭𑀳𑀺𑀢𑀦𑀺𑀭𑀢𑀢𑁆𑀢𑁄 𑀢𑁂 𑀉𑀪𑁄 𑀅𑀚𑁆𑀛𑀪𑀸𑀲𑀺.

𑁩𑁦𑁯.

𑀤𑀲𑀩𑀮𑀢𑀦𑀼𑀥𑀸𑀢𑀼𑀁 𑀲𑀻𑀳𑀴𑀁 𑀦𑁂𑀣 𑀢𑀼𑀫𑁆𑀳𑁂,

𑀅𑀕𑀡𑀺𑀢 𑀢𑀦𑀼𑀔𑁂𑀤𑀸 𑀯𑀻𑀢𑀲𑀸𑀭𑀚𑁆𑀚𑀫𑁂𑀢𑀁;

𑀅𑀧𑀺 𑀘 𑀕𑀫𑀦𑀫𑀕𑁆𑀕𑁂 𑀚𑀸𑀢𑀫𑀢𑁆𑀢𑁂 𑀯𑀺𑀖𑀸𑀢𑁂,

𑀲𑀭𑀣 𑀫𑀫𑀫𑀦𑁂𑀓𑁄𑀧𑀤𑁆𑀤𑀯𑀘𑁆𑀙𑁂𑀤𑀤𑀓𑁆𑀔𑀁.

𑁩𑁧𑁦. ¶

𑀇𑀢𑀺 𑀲𑀼𑀕𑀢𑀦𑀦𑀽𑀚𑁄 𑀚𑀫𑁆𑀧𑀢𑀻𑀦𑀁 𑀓𑀣𑁂𑀢𑁆𑀯𑀸,

𑀧𑀼𑀦’𑀧𑀺 𑀢𑀤𑀦𑀼𑀭𑀽𑀧𑀁 𑀤𑁂𑀲𑀬𑀺𑀢𑁆𑀯𑀸𑀦 𑀥𑀫𑁆𑀫𑀁;

𑀧𑀼𑀣𑀼𑀢𑀭𑀫𑀧𑀦𑁂𑀢𑁆𑀯𑀸 𑀲𑁄𑀓𑀲𑀮𑁆𑀮𑀜𑁆𑀘 𑀕𑀸𑀴𑁆𑀳𑀁,

𑀲𑀓𑀯𑀲𑀢𑀺𑀫𑀼𑀧𑁂𑀢𑁄 𑀅𑀦𑁆𑀢𑀮𑀺𑀓𑁆𑀔𑁂𑀦 𑀥𑀻𑀭𑁄.

𑁩𑁧𑁧.

𑀪𑀼𑀚𑀕𑀪𑀯𑀦𑀯𑀸𑀲𑀻 𑀦𑀺𑀦𑁆𑀦𑀕𑀸𑀬𑀸𑀣 𑀢𑀲𑁆𑀲𑀸,

𑀪𑀼𑀚𑀕𑀧𑀢𑀺 𑀫𑀳𑀺𑀤𑁆𑀥𑀺 𑀧𑀡𑁆𑀟𑀼𑀳𑀸𑀭𑀸𑀪𑀺𑀥𑀸𑀦𑁄;

𑀲𑀓𑀧𑀼𑀭𑀧𑀯𑀭𑀫𑁆𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀭𑀦𑁆𑀢𑁄,

𑀲𑀫𑀼𑀧𑀕𑀫𑀺 𑀢𑀤𑀸 𑀢𑀁 𑀞𑀸𑀦𑀫𑀺𑀘𑁆𑀙𑀸𑀯𑀲𑁂𑀦.

𑁩𑁧𑁨.

𑀯𑀺𑀫𑀮𑀧𑀼𑀮𑀺𑀦𑀣𑀽𑀧𑀸 𑀲𑁄 𑀲𑀫𑀼𑀕𑁆𑀕𑀘𑁆𑀙𑀫𑀸𑀦𑀁,

𑀲𑀲𑀺𑀭𑀼𑀘𑀺𑀭𑀫𑀭𑀻𑀘𑀺𑀚𑁆𑀚𑀸𑀮𑀫𑀸𑀮𑁄𑀓𑀬𑀺𑀢𑁆𑀯𑀸;

𑀞𑀺𑀢𑀫𑀣 𑀫𑀼𑀦𑀺𑀥𑀸𑀢𑀼𑀁 𑀯𑀸𑀮𑀼𑀓𑀸𑀭𑀲𑀺𑀕𑀩𑁆𑀪𑁂,

𑀓𑀺𑀫𑀺𑀤𑀫𑀺𑀢𑀺 𑀲𑀓𑀗𑁆𑀔𑀁 𑀧𑁂𑀓𑁆𑀔𑀫𑀸𑀦𑁄 𑀅𑀯𑁂𑀤𑀺.

𑁩𑁧𑁩. ¶

𑀲𑀧𑀤𑀺 𑀲𑀩𑀳𑀼𑀫𑀸𑀦𑁄 𑀲𑁄 𑀅𑀲𑀦𑁆𑀤𑀺𑀲𑁆𑀲𑀫𑀸𑀦𑁄,

𑀭𑀢𑀦𑀫𑀬𑀓𑀭𑀡𑁆𑀟𑀁 𑀥𑀸𑀢𑀼𑀬𑀼𑀢𑁆𑀢𑀁 𑀕𑀺𑀮𑀺𑀢𑁆𑀯𑀸;

𑀯𑀺𑀢𑀢𑀧𑀼𑀣𑀼𑀮𑀤𑁂𑀳𑁄 𑀪𑁄𑀕𑀫𑀸𑀮𑀸𑀳𑀺 𑀢𑀼𑀗𑁆𑀕𑀁,

𑀓𑀡𑀓𑀲𑀺𑀔𑀭𑀺𑀭𑀸𑀚𑀁 𑀯𑁂𑀞𑀬𑀺𑀢𑁆𑀯𑀸 𑀲𑀬𑀺𑀢𑁆𑀣.

𑁩𑁧𑁪.

𑀲𑀮𑀺𑀮𑀦𑀺𑀥𑀺𑀲𑀫𑀻𑀧𑀁 𑀚𑀫𑁆𑀧𑀢𑀻 𑀕𑀦𑁆𑀢𑀼𑀓𑀸𑀫𑀸,

𑀧𑀼𑀮𑀺𑀦𑀢𑀮𑀕𑀢𑀁 𑀢𑀁 𑀤𑀦𑁆𑀢𑀥𑀸𑀢𑀼𑀁 𑀅𑀤𑀺𑀲𑁆𑀯𑀸;

𑀦𑀬𑀦𑀲𑀮𑀺𑀮𑀥𑀸𑀭𑀁 𑀲𑁄𑀓𑀚𑀸𑀢𑀁 𑀓𑀺𑀭𑀦𑁆𑀢𑀸,

𑀲𑀼𑀕𑀢𑀲𑀼𑀢𑀯𑀭𑀁 𑀢𑀁 𑀢𑀗𑁆𑀔𑀡𑁂’𑀦𑀼𑀲𑁆𑀲𑀭𑀺𑀁𑀲𑀼.

𑁩𑁧𑁫.

𑀅𑀣 𑀲𑀼𑀕𑀢𑀲𑀼𑀢𑁄 𑀲𑁄 𑀘𑀺𑀦𑁆𑀢𑀺𑀢𑀁 𑀲𑀁𑀯𑀺𑀤𑀺𑀢𑁆𑀯𑀸,

𑀅𑀕𑀫𑀺 𑀲𑀯𑀺𑀥𑀫𑁂𑀲𑀁 𑀲𑁄𑀓𑀤𑀺𑀦𑀸𑀦𑀦𑀸𑀦𑀁;

𑀅𑀲𑀼𑀡𑀺 𑀘 𑀚𑀺𑀦𑀥𑀸𑀢𑀼𑀁 𑀯𑀸𑀮𑀼𑀓𑀸𑀭𑀸𑀲𑀺𑀫𑀚𑁆𑀛𑁂,

𑀦𑀻𑀳𑀺𑀢𑀫𑀧𑀺 𑀅𑀤𑀺𑀝𑁆𑀞𑀁 𑀧𑀽𑀚𑀺𑀢𑀁 𑀚𑀫𑁆𑀧𑀢𑀻𑀳𑀺.

𑁩𑁧𑁬.

𑀲𑀬𑀺𑀢𑀫𑀣 𑀬𑀢𑀻𑀲𑁄 𑀤𑀺𑀩𑁆𑀩𑀘𑀓𑁆𑀔𑀼𑀧𑁆𑀧𑀪𑀸𑀯𑀸,

𑀭𑀢𑀦𑀕𑀺𑀭𑀺𑀦𑀺𑀓𑀼𑀜𑁆𑀚𑁂 𑀦𑀸𑀕𑀭𑀸𑀚𑀁 𑀅𑀧𑀲𑁆𑀲𑀺;

𑀯𑀺𑀳𑀕𑀧𑀢𑀺𑀲𑀭𑀻𑀭𑀁 𑀫𑀸𑀧𑀬𑀺 𑀢𑀫𑁆𑀫𑀼𑀳𑀼𑀢𑁆𑀢𑁂,

𑀯𑀺𑀢𑀢𑀧𑀼𑀣𑀼𑀮𑀧𑀓𑁆𑀔𑁂𑀦’𑀦𑁆𑀢𑀴𑀺𑀓𑁆𑀔𑀁 𑀣𑀓𑁂𑀦𑁆𑀢𑀁.

𑁩𑁧𑁭. ¶

𑀚𑀮𑀥𑀺𑀫𑀢𑀺𑀕𑀪𑀻𑀭𑀁 𑀢𑀁 𑀤𑁆𑀯𑀺𑀥𑀸 𑀲𑁄 𑀓𑀭𑀺𑀢𑁆𑀯𑀸,

𑀧𑀩𑀮𑀧𑀯𑀦𑀯𑁂𑀕𑁂𑀦’𑀢𑁆𑀢𑀦𑁄 𑀧𑀓𑁆𑀔𑀚𑁂𑀦;

𑀲𑀭𑀪𑀲 𑀫𑀳𑀺𑀥𑀸𑀯𑀁 𑀪𑀻𑀫𑀲𑀁𑀭𑀫𑁆𑀪𑀬𑁄𑀕𑀸,

𑀅𑀪𑀺𑀕𑀫𑀺 𑀪𑀼𑀚𑀕𑀺𑀦𑁆𑀤𑀁 𑀫𑁂𑀭𑀼𑀧𑀸𑀤𑁂 𑀦𑀺𑀧𑀦𑁆𑀦𑀁.

𑁩𑁧𑁮.

𑀚𑀳𑀺𑀢𑀪𑀼𑀚𑀕𑀯𑁂𑀲𑁄 𑀢𑀗𑁆𑀔𑀡𑁂 𑀲𑁄 𑀨𑀡𑀺𑀦𑁆𑀤𑁄,

𑀧𑀝𑀺𑀪𑀬𑀘𑀓𑀺𑀢𑀢𑁆𑀢𑁄 𑀲𑀁𑀔𑀺𑀧𑀺𑀢𑁆𑀯𑀸𑀦 𑀪𑁄𑀕𑁂;

𑀲𑀭𑀪𑀲 𑀫𑀼𑀧𑀕𑀦𑁆𑀢𑁆𑀯𑀸 𑀢𑀲𑁆𑀲 𑀧𑀸𑀤𑁂 𑀦𑀫𑀺𑀢𑁆𑀯𑀸,

𑀯𑀺𑀦𑀬𑀫𑀥𑀼𑀭𑀫𑀺𑀢𑁆𑀣𑀁 𑀢𑀁 𑀫𑀼𑀦𑀻𑀲𑀁 𑀅𑀯𑁄𑀘.

𑁩𑁧𑁯.

𑀲𑀓𑀮𑀚𑀦𑀳𑀺𑀢𑀢𑁆𑀣𑀁 𑀏𑀯 𑀚𑀸𑀬𑀦𑁆𑀢𑀺 𑀩𑀼𑀤𑁆𑀥𑀸,

𑀪𑀯𑀢𑀺 𑀚𑀦𑀳𑀺𑀢𑀢𑁆𑀣𑀁 𑀥𑀸𑀢𑀼𑀫𑀢𑁆𑀢𑀲𑁆𑀲 𑀧𑀽𑀚𑀸;

𑀅𑀳𑀫𑀧𑀺 𑀚𑀺𑀦𑀥𑀸𑀢𑀼𑀁 𑀧𑀽𑀚𑀬𑀺𑀢𑁆𑀯𑀸 𑀫𑀳𑀕𑁆𑀖𑀁,

𑀓𑀼𑀲𑀮𑀨𑀮𑀫𑀦𑀧𑁆𑀧𑀁 𑀲𑀜𑁆𑀘𑀺𑀡𑀺𑀲𑁆𑀲𑀁’𑀢𑀺 𑀕𑀡𑁆𑀳𑀺𑀁.

𑁩𑁨𑁦. ¶

𑀅𑀣 𑀫𑀦𑀼𑀚𑀕𑀡𑀸𑀦𑀁 𑀲𑀘𑁆𑀘𑀩𑁄𑀥𑀸𑀭𑀳𑀸𑀦𑀁,

𑀯𑀲𑀢𑀺𑀪𑀯𑀦𑀫𑁂𑀲𑀸 𑀦𑀻𑀬𑁆𑀬𑀢𑁂 𑀲𑀻𑀳𑀴𑀁 𑀢𑀁;

𑀫𑀼𑀦𑀺𑀯𑀭𑀢𑀦𑀼𑀥𑀸𑀢𑀼𑀁 𑀢𑁂𑀦 𑀤𑁂𑀳𑀻𑀢𑀺 𑀯𑀼𑀢𑁆𑀢𑁄,

𑀪𑀼𑀚𑀕𑀧𑀢𑀺 𑀓𑀭𑀡𑁆𑀟𑀁 𑀥𑀸𑀢𑀼𑀕𑀩𑁆𑀪𑀁 𑀅𑀤𑀚𑁆𑀚𑀺.

𑁩𑁨𑁧.

𑀯𑀺𑀳𑀕𑀧𑀢𑀺𑀢𑀦𑀼𑀁 𑀢𑀁 𑀲𑀁𑀳𑀭𑀺𑀢𑁆𑀯𑀸𑀦 𑀣𑁂𑀭𑁄,

𑀚𑀮𑀘𑀭𑀲𑀢𑀪𑀻𑀫𑀸 𑀅𑀡𑁆𑀡𑀯𑀸 𑀉𑀧𑁆𑀧𑀢𑀺𑀢𑁆𑀯𑀸;

𑀲𑀓𑀮𑀧𑀣𑀯𑀺𑀘𑀓𑁆𑀓𑁂 𑀭𑀚𑁆𑀚𑀮𑀓𑁆𑀔𑀺𑀁’𑀯 𑀥𑀸𑀢𑀼𑀁,

𑀦𑀭𑀧𑀢𑀺𑀢𑀦𑀼𑀚𑀸𑀦𑀁 𑀚𑀫𑁆𑀧𑀢𑀻𑀦𑀁 𑀅𑀤𑀸𑀲𑀺.

𑁩𑁨𑁨.

𑀇𑀢𑀺 𑀓𑀢𑀩𑀳𑀼𑀓𑀸𑀭𑁂 𑀲𑀁𑀬𑀫𑀺𑀦𑁆𑀤𑁂 𑀧𑀬𑀸𑀢𑁂,

𑀲𑀼𑀕𑀢𑀤𑀲𑀦𑀥𑀸𑀢𑀼𑀁 𑀫𑀼𑀤𑁆𑀥𑀦𑀸 𑀉𑀩𑁆𑀩𑀳𑀦𑁆𑀢𑀸;

𑀫𑀳𑀢𑀺 𑀯𑀺𑀧𑀺𑀦𑀤𑁂𑀯𑀸𑀤𑀻𑀳𑀺 𑀫𑀕𑁆𑀕𑁂 𑀧𑀬𑀼𑀢𑁆𑀢𑁂,

𑀯𑀺𑀯𑀺𑀥𑀫𑀳𑀯𑀺𑀥𑀸𑀦𑁂 𑀢𑁂 𑀢𑀢𑁄 𑀦𑀺𑀓𑁆𑀔𑀫𑀺𑀁𑀲𑀼.

𑁩𑁨𑁩. ¶

𑀫𑀼𑀤𑀼𑀲𑀼𑀭𑀪𑀻𑀲𑀫𑀻𑀭𑁄 𑀓𑀡𑁆𑀝𑀓𑀸𑀤𑀺𑀯𑁆𑀬𑀧𑁂𑀢𑁄,

𑀯𑀺𑀫𑀮𑀧𑀼𑀮𑀺𑀦𑀳𑀸𑀭𑀻 𑀆𑀲𑀻 𑀲𑀩𑁆𑀩𑀢𑁆𑀣 𑀫𑀕𑁆𑀕𑁄;

𑀅𑀬𑀦𑀫𑀼𑀧𑀕𑀢𑁂 𑀢𑁂 𑀤𑀦𑁆𑀢𑀥𑀸𑀢𑀼𑀧𑁆𑀧𑀪𑀸𑀯𑀸,

𑀦𑀺𑀕𑀫𑀦𑀕𑀭𑀯𑀸𑀲𑀻 𑀲𑀸𑀥𑀼 𑀲𑀫𑁆𑀫𑀸𑀦𑀬𑀺𑀁𑀲𑀼.

𑁩𑁨𑁪.

𑀓𑀼𑀲𑀼𑀫𑀲𑀼𑀭𑀪𑀺𑀘𑀼𑀡𑁆𑀡𑀸𑀓𑀺𑀡𑁆𑀡𑀳𑀢𑁆𑀣𑀸𑀳𑀺 𑀦𑀺𑀘𑁆𑀘𑀸,

𑀲𑀓𑀼𑀢𑀼𑀓𑀫𑀦𑀼𑀬𑀸𑀢𑀸 𑀓𑀸𑀦𑀦𑁂 𑀤𑁂𑀯𑀢𑀸𑀳𑀻;

𑀅𑀘𑀮𑀕𑀳𑀡𑀤𑀼𑀕𑁆𑀕𑀁 𑀔𑁂𑀧𑀬𑀺𑀢𑁆𑀯𑀸𑀦 𑀫𑀕𑁆𑀕𑀁,

𑀅𑀕𑀫𑀼𑀫𑀢𑀼𑀭𑀺𑀢𑀸 𑀢𑁂 𑀧𑀝𑁆𑀝𑀦𑀁 𑀢𑀸𑀫𑀮𑀺𑀢𑁆𑀢𑀺𑀁.

𑁩𑁨𑁫.

𑀅𑀘𑀮𑀧𑀤𑀭𑀩𑀤𑁆𑀥𑀁 𑀲𑀼𑀝𑁆𑀞𑀺𑀢𑁄𑀤𑀸𑀭𑀓𑀽𑀧𑀁,

𑀉𑀤𑀺𑀢𑀧𑀼𑀣𑀼𑀮𑀓𑀸𑀭𑀁 𑀤𑀓𑁆𑀔𑀦𑀻𑀬𑀸𑀫𑀓𑀜𑁆𑀘;

𑀲𑀬𑀫𑀪𑀺𑀫𑀢𑀮𑀗𑁆𑀓𑀸𑀕𑀸𑀫𑀺𑀦𑀺𑀁 𑀦𑀸𑀯𑀫𑁂𑀢𑁂,

𑀲𑀧𑀤𑀺 𑀲𑀫𑀼𑀧𑀭𑀽𑀴𑁆𑀳𑀁 𑀅𑀤𑁆𑀤𑀲𑀼𑀁 𑀯𑀸𑀡𑀺𑀚𑁂𑀳𑀺.

𑁩𑁨𑁬. ¶

𑀅𑀣 𑀤𑀺𑀚𑀧𑀯𑀭𑀸 𑀢𑁂 𑀲𑀻𑀳𑀴𑀁 𑀕𑀦𑁆𑀢𑀼𑀫𑀺𑀘𑁆𑀙𑀁,

𑀲𑀭𑀪𑀲 𑀫𑀼𑀧𑀕𑀦𑁆𑀢𑁆𑀯𑀸 𑀦𑀸𑀯𑀺𑀓𑀲𑁆𑀲𑀸𑀯𑀤𑀺𑀁𑀲𑀼;

𑀲𑀼𑀢𑀺𑀲𑀼𑀔𑀯𑀘𑀲𑀸 𑀲𑁄 𑀲𑀸𑀥𑀼𑀯𑀼𑀢𑁆𑀢𑁂𑀦 𑀘𑁂𑀲𑀁,

𑀧𑀫𑀼𑀤𑀺𑀢𑀳𑀤𑀬𑁄 𑀢𑁂 𑀦𑀸𑀯𑀫𑀸𑀭𑁄𑀧𑀬𑀺𑀢𑁆𑀣.

𑁩𑁨𑁭.

𑀚𑀮𑀦𑀺𑀥𑀺𑀫𑀪𑀺𑀭𑀽𑀴𑁆𑀳𑁂𑀲𑁆𑀯𑁂𑀲𑀼 𑀆𑀤𑀸𑀬 𑀥𑀸𑀢𑀼𑀁,

𑀲𑀫𑀪𑀯𑀼𑀫𑀼𑀧𑀲𑀦𑁆𑀦𑀸 𑀮𑁄𑀮𑀓𑀮𑁆𑀮𑁄𑀮𑀫𑀸𑀮𑀸;

𑀲𑀫𑀲𑀼𑀭𑀪𑀺𑀫𑀦𑀼𑀜𑁆𑀜𑁄 𑀉𑀢𑁆𑀢𑀭𑁄 𑀯𑀸𑀬𑀺 𑀯𑀸𑀢𑁄,

𑀯𑀺𑀫𑀮𑀭𑀼𑀘𑀺𑀭𑀲𑁄𑀪𑀸 𑀲𑀩𑁆𑀩𑀣𑀸’𑀲𑀼𑀁 𑀤𑀺𑀲𑀸’𑀧𑀺.

𑁩𑁨𑁮.

𑀦𑀪𑀲𑀺 𑀅𑀲𑀺𑀢𑀲𑁄𑀪𑁂 𑀯𑁂𑀦𑀢𑁂𑀬𑁆𑀬𑁄’𑀯 𑀦𑀸𑀯𑀸,

𑀧𑀩𑀮𑀧𑀯𑀦𑀯𑁂𑀕𑀸 𑀲𑀢𑁆𑀢𑀢𑀁 𑀥𑀸𑀯𑀫𑀸𑀦𑀸;

𑀦𑀬𑀦𑀯𑀺𑀲𑀬𑀪𑀸𑀯𑀸𑀢𑀻𑀢𑀢𑀻𑀭𑀸𑀘𑀮𑀸𑀤𑀺𑀁,

𑀧𑀯𑀺𑀲𑀺 𑀚𑀮𑀥𑀺𑀫𑀚𑁆𑀛𑀁 𑀨𑁂𑀡𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑀁.

𑁩𑁨𑁯. ¶

𑀅𑀣 𑀅𑀪𑀯𑀺 𑀲𑀫𑀼𑀤𑁆𑀤𑁄 𑀪𑀻𑀫𑀲𑀁𑀯𑀝𑁆𑀝𑀯𑀸𑀢𑀸,

𑀪𑀻𑀳𑀢𑀲𑀺𑀔𑀭𑀺𑀓𑀽𑀝𑀸𑀓𑀸𑀭𑀯𑀻𑀘𑀺𑀧𑁆𑀧𑀩𑀦𑁆𑀥𑁄;

𑀲𑀯𑀦𑀪𑀺𑀤𑀼𑀭𑀖𑁄𑀭𑀸𑀭𑀸𑀯𑀭𑀼𑀦𑁆𑀥𑀦𑁆𑀢𑀮𑀺𑀓𑁆𑀔𑁄,

𑀪𑀬𑀘𑀓𑀺𑀢𑀫𑀦𑀼𑀲𑁆𑀲𑀓𑁆𑀓𑀦𑁆𑀤𑀺𑀢𑁄 𑀲𑀩𑁆𑀩𑀭𑀢𑁆𑀢𑀺𑀁.

𑁩𑁩𑁦.

𑀉𑀤𑀬𑀲𑀺𑀔𑀭𑀺𑀲𑀻𑀲𑀁 𑀦𑀽𑀢𑀦𑀸𑀤𑀺𑀘𑁆𑀘𑀩𑀺𑀫𑁆𑀩𑁂,

𑀉𑀧𑀕𑀢𑀯𑀢𑀺 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑀫𑁆𑀳𑀺;

𑀲𑀮𑀺𑀮𑀦𑀺𑀥𑀺𑀚𑀮𑀁 𑀢𑀁 𑀲𑀦𑁆𑀢𑀓𑀮𑁆𑀮𑁄𑀮𑀫𑀸𑀮𑀁,

𑀅𑀲𑀺𑀢𑀫𑀡𑀺𑀯𑀺𑀘𑀺𑀢𑁆𑀢𑀁 𑀓𑁄𑀝𑁆𑀝𑀺𑀫𑀁’𑀯𑀸𑀯𑀪𑀸𑀲𑀺.

𑁩𑁩𑁧.

𑀅𑀣 𑀯𑀺𑀢𑀢𑀨𑀡𑀸𑀮𑀻 𑀪𑀺𑀁𑀲𑀦𑀸 𑀓𑁂𑀘𑀺 𑀦𑀸𑀕𑀸,

𑀲𑀼𑀭𑀪𑀺𑀓𑀼𑀲𑀼𑀫𑀳𑀢𑁆𑀣𑀸 𑀓𑁂𑀘𑀺 𑀤𑀺𑀩𑁆𑀩𑀢𑁆𑀢𑀪𑀸𑀯𑀸;

𑀭𑀼𑀘𑀺𑀭𑀫𑀡𑀺𑀧𑀤𑀻𑀧𑁂 𑀓𑁂𑀘𑀺 𑀲𑀦𑁆𑀥𑀸𑀭𑀬𑀦𑁆𑀢𑀸,

𑀦𑀺𑀚𑀲𑀺𑀭𑀲𑀺 𑀓𑀭𑁄𑀦𑁆𑀢𑀸 𑀓𑁂𑀘𑀺 𑀓𑀡𑁆𑀟𑀼𑀧𑁆𑀧𑀮𑀸𑀦𑀻.

𑁩𑁩𑁨. ¶

𑀨𑀼𑀝𑀓𑀼𑀫𑀼𑀤𑀓𑀮𑀸𑀧𑁂 𑀚𑀢𑁆𑀢𑀼𑀦𑁂𑀓𑁂 𑀯𑀳𑀦𑁆𑀢𑀸,

𑀓𑀡𑀓𑀓𑀮𑀲𑀫𑀸𑀮𑀸 𑀉𑀓𑁆𑀔𑀺𑀧𑀢𑁆𑀢𑀸 𑀘 𑀓𑁂𑀘𑀺;

𑀧𑀯𑀦𑀘𑀮𑀺𑀢𑀓𑁂𑀢𑀼𑀕𑁆𑀕𑀸𑀳𑀓𑀸 𑀓𑁂𑀘𑀺 𑀏𑀓𑁂,

𑀭𑀼𑀘𑀺𑀭 𑀓𑀡𑀓 𑀘𑀼𑀡𑁆𑀡𑀸𑀧𑀼𑀡𑁆𑀡𑀘𑀗𑁆𑀕𑁄𑀝𑀳𑀢𑁆𑀣𑀸.

𑁩𑁩𑁩.

𑀲𑀮𑀴𑀺𑀢𑀭𑀫𑀡𑀺𑀬𑀁 𑀓𑁂𑀘𑀺 𑀦𑀘𑁆𑀘𑀁 𑀓𑀭𑁄𑀦𑁆𑀢𑀸,

𑀲𑀮𑀬𑀫𑀥𑀼𑀭𑀕𑀻𑀢𑀁 𑀕𑀸𑀬𑀫𑀸𑀦𑀸’𑀯 𑀓𑁂𑀘𑀺;

𑀧𑀘𑀼𑀭𑀢𑀼𑀭𑀺𑀬𑀪𑀡𑁆𑀟𑁂 𑀆𑀳𑀦𑀦𑁆𑀢𑀸’𑀯 𑀏𑀓𑁂,

𑀫𑀼𑀦𑀺𑀯𑀭𑀢𑀦𑀼𑀥𑀸𑀢𑀼𑀁 𑀧𑀽𑀚𑀺𑀢𑀼𑀁 𑀉𑀝𑁆𑀞𑀳𑀺𑀁𑀲𑀼.

𑁩𑁩𑁪.

𑀭𑀼𑀘𑀺𑀭𑀓𑀘𑀓𑀮𑀸𑀧𑀸 𑀭𑀸𑀚𑀓𑀜𑁆𑀜𑀸𑀬 𑀢𑀲𑁆𑀲𑀸,

𑀫𑀼𑀦𑀺𑀯𑀭𑀤𑀲𑀦𑀁 𑀢𑀁 𑀦𑀺𑀕𑁆𑀕𑀢𑁂𑀯𑀺𑀦𑁆𑀤𑀼𑀮𑁂𑀔𑀸;

𑀉𑀚𑀼𑀭𑀚𑀢𑀲𑀮𑀸𑀓𑀸 𑀲𑀦𑁆𑀦𑀺𑀪𑁂 𑀫𑀼𑀜𑁆𑀘𑀺 𑀭𑀁𑀲𑀻.

𑁩𑁩𑁫. ¶

𑀅𑀢𑀼𑀮𑀺𑀢𑀫𑀦𑀼𑀪𑀸𑀯𑀁 𑀥𑀸𑀢𑀼𑀬𑀸 𑀧𑁂𑀓𑁆𑀔𑀢𑀁 𑀢𑀁,

𑀧𑀫𑀼𑀤𑀺𑀢𑀳𑀤𑀬𑀸𑀦𑀁 𑀢𑀗𑁆𑀔𑀡𑁂 𑀧𑀦𑁆𑀦𑀕𑀸𑀦𑀁;

𑀧𑀝𑀺𑀭𑀯𑀳𑀭𑀺𑀢𑀸𑀦𑀁 𑀲𑀸𑀥𑀼𑀯𑀸𑀤𑀸𑀤𑀺𑀓𑀸𑀦𑀁,

𑀕𑀕𑀦𑀫𑀧𑀭𑀺𑀬𑀦𑁆𑀢𑀁’𑀯𑀸𑀲𑀺 𑀯𑀺𑀢𑁆𑀣𑀸𑀭𑀺𑀢𑀸𑀦𑀁.

𑁩𑁩𑁬.

𑀧𑀯𑀺𑀲𑀺 𑀲𑀼𑀕𑀢 𑀤𑀸𑀞𑀸𑀥𑀸𑀢𑀼 𑀲𑀸 𑀫𑁄𑀴𑀺𑀕𑀩𑁆𑀪𑀁,

𑀧𑀼𑀦 𑀕𑀕𑀦𑀢𑀮𑀫𑁆𑀳𑀸 𑀑𑀢𑀭𑀺𑀢𑁆𑀯𑀸𑀦 𑀢𑀲𑁆𑀲𑀸;

𑀨𑀡𑀥𑀭𑀦𑀺𑀯𑀳𑀸 𑀢𑁂 𑀢𑀁 𑀢𑀭𑀺𑀁 𑀯𑀸𑀭𑀬𑀺𑀢𑁆𑀯𑀸,

𑀫𑀳𑀫𑀓𑀭𑀼𑀫𑀼𑀤𑀸𑀭𑀁 𑀲𑀢𑁆𑀢𑀭𑀢𑁆𑀢𑀺𑀦𑁆𑀤𑀺𑀯𑀁𑀳𑀺.

𑁩𑁩𑁭.

𑀅𑀘𑀮𑀫𑀺𑀯 𑀯𑀺𑀫𑀸𑀦𑀁 𑀅𑀦𑁆𑀢𑀮𑀺𑀓𑁆𑀔𑀫𑁆𑀳𑀺 𑀦𑀸𑀯𑀁,

𑀕𑀢𑀺𑀯𑀺𑀭𑀳𑀺𑀢𑀫𑀫𑁆𑀳𑁄𑀭𑀸𑀲𑀺𑀫𑀚𑁆𑀛𑀫𑁆𑀳𑀺 𑀤𑀺𑀲𑁆𑀯𑀸;

𑀪𑀬𑀯𑀺𑀮𑀼𑀮𑀺𑀢𑀘𑀺𑀢𑁆𑀢𑀸 𑀚𑀫𑁆𑀧𑀢𑀻 𑀢𑁂 𑀲𑀫𑀕𑁆𑀕𑀸,

𑀤𑀲𑀩𑀮𑀢𑀦𑀼𑀚𑀁 𑀢𑀁 𑀇𑀤𑁆𑀥𑀺𑀫𑀦𑁆𑀢𑀁 𑀲𑀭𑀺𑀁𑀲𑀼.

𑁩𑁩𑁮.

𑀲𑀧𑀤𑀺 𑀫𑀼𑀦𑀺𑀲𑀼𑀢𑁄 𑀲𑁄 𑀘𑀺𑀢𑁆𑀢𑀫𑁂𑀲𑀁 𑀯𑀺𑀤𑀺𑀢𑁆𑀯𑀸,

𑀦𑀪𑀲𑀺 𑀚𑀮𑀥𑀭𑀸𑀮𑀻 𑀫𑀤𑁆𑀤𑀫𑀸𑀦𑁄’𑀪𑀺𑀕𑀦𑁆𑀢𑁆𑀯𑀸;

𑀯𑀺𑀳𑀕𑀧𑀢𑀺𑀲𑀭𑀻𑀭𑀁 𑀫𑀸𑀧𑀬𑀺𑀢𑁆𑀯𑀸 𑀫𑀳𑀦𑁆𑀢𑀁,

𑀪𑀬𑀘𑀓𑀺𑀢𑀪𑀼𑀚𑀗𑁆𑀕𑁂 𑀢𑁂 𑀧𑀴𑀸𑀧𑁂𑀲𑀺 𑀔𑀺𑀧𑁆𑀧𑀁.

𑁩𑁩𑁯. ¶

𑀇𑀢𑁆𑀣𑀁 𑀩𑀼𑀤𑁆𑀥𑀺𑀲𑀼𑀢𑁂 𑀪𑀼𑀚𑀗𑁆𑀕𑀚𑀦𑀺𑀢𑀁 𑀪𑀻𑀢𑀺𑀁 𑀲𑀫𑁂𑀢𑁆𑀯𑀸 𑀕𑀢𑁂,

𑀲𑀸 𑀦𑀸𑀯𑀸 𑀧𑀯𑀦𑀸 𑀧𑀓𑀫𑁆𑀧𑀺𑀢𑀥𑀚𑀸 𑀢𑀼𑀗𑁆𑀕𑀁 𑀢𑀭𑀗𑁆𑀕𑀸𑀯𑀮𑀺𑀁;

𑀪𑀻𑀦𑁆𑀤𑀦𑁆𑀢𑀻 𑀕𑀢𑀺𑀯𑁂𑀕𑀲𑀸 𑀧𑀼𑀣𑀼𑀢𑀭𑀁 𑀫𑁂𑀖𑀸𑀯𑀮𑀻𑀲𑀦𑁆𑀦𑀺𑀪𑀁,

𑀮𑀗𑁆𑀓𑀸𑀧𑀝𑁆𑀝𑀦𑀫𑁄𑀢𑀭𑀺𑀢𑁆𑀣 𑀲𑀳𑀲𑀸 𑀣𑁂𑀭𑀲𑁆𑀲 𑀢𑀲𑁆𑀲𑀺𑀤𑁆𑀥𑀺𑀬𑀸.

𑀘𑀢𑀼𑀢𑁆𑀣𑁄 𑀧𑀭𑀺𑀘𑁆𑀙𑁂𑀤𑁄.

𑁩𑁪𑁦.

𑀲𑀁𑀯𑀘𑁆𑀙𑀭𑀫𑁆𑀳𑀺 𑀦𑀯𑀫𑀫𑁆𑀳𑀺 𑀫𑀳𑀸𑀤𑀺𑀲𑁂𑀦,

𑀧𑀼𑀢𑁆𑀢𑀲𑁆𑀲 𑀓𑀺𑀢𑁆𑀢𑀺𑀲𑀺𑀭𑀺𑀫𑁂𑀖𑀦𑀭𑀸𑀥𑀺𑀧𑀲𑁆𑀲;

𑀢𑁂 𑀚𑀫𑁆𑀧𑀢𑀻 𑀢𑀫𑀣 𑀧𑀝𑁆𑀝𑀦𑀫𑁄𑀢𑀭𑀺𑀢𑁆𑀯𑀸,

𑀤𑁂𑀯𑀸𑀮𑀬𑁂 𑀧𑀝𑀺𑀯𑀲𑀺𑀁𑀲𑀼 𑀫𑀦𑁄𑀪𑀺𑀭𑀸𑀫𑁂.

𑁩𑁪𑁧. ¶

𑀤𑀺𑀲𑁆𑀯𑀸𑀦 𑀢𑁂 𑀤𑁆𑀯𑀺𑀚𑀯𑀭𑁄 𑀧𑀣𑀺𑀓𑁂 𑀦𑀺𑀲𑀸𑀬𑀁,

𑀲𑀦𑁆𑀢𑀧𑁆𑀧𑀬𑀺𑀢𑁆𑀣 𑀫𑀥𑀼𑀭𑀸𑀲𑀦𑀧𑀸𑀦𑀓𑁂𑀳𑀺;

𑀭𑀢𑁆𑀢𑀺𑀓𑁆𑀔𑀬𑁂 𑀘 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀫𑀕𑁆𑀕𑀁,

𑀙𑀸𑀬𑀸𑀧𑀢𑀻𑀦𑀫𑀣 𑀲𑁄 𑀅𑀪𑀺𑀯𑁂𑀤𑀬𑀺𑀢𑁆𑀣.

𑁩𑁪𑁨.

𑀆𑀤𑀸𑀬 𑀢𑁂 𑀤𑀲𑀦𑀥𑀸𑀢𑀼𑀯𑀭𑀁 𑀚𑀺𑀦𑀲𑁆𑀲,

𑀲𑀫𑁆𑀫𑀸𑀦𑀺𑀢𑀸 𑀤𑁆𑀯𑀺𑀚𑀯𑀭𑁂𑀦’𑀣 𑀧𑀝𑁆𑀝𑀦𑀫𑁆𑀳𑀸;

𑀦𑀺𑀓𑁆𑀔𑀫𑁆𑀫 𑀤𑀽𑀭𑀢𑀭𑀫𑀕𑁆𑀕𑀫𑀢𑀺𑀓𑁆𑀓𑀫𑀺𑀢𑁆𑀯𑀸,

𑀧𑀤𑁆𑀯𑀸𑀭𑀕𑀸𑀫𑀫𑀦𑀼𑀭𑀸𑀥𑀧𑀼𑀭𑀲𑁆𑀲’𑀕𑀜𑁆𑀙𑀼𑀁.

𑁩𑁪𑁩.

𑀬𑀁 𑀥𑀫𑁆𑀫𑀺𑀓𑀁 𑀦𑀭𑀯𑀭𑀁 𑀅𑀪𑀺𑀢𑀓𑁆𑀓𑀬𑀺𑀢𑁆𑀯𑀸,

𑀚𑀸𑀬𑀸𑀧𑀢𑀻 𑀯𑀺𑀲𑀬𑀫𑁂𑀢𑀫𑀼𑀧𑀸𑀕𑀫𑀺𑀁𑀲𑀼;

𑀢𑀁 𑀯𑁆𑀬𑀸𑀥𑀺𑀦𑀸 𑀲𑀫𑀼𑀤𑀺𑀢𑁂𑀦 𑀫𑀳𑀸𑀤𑀺𑀲𑁂𑀦,

𑀮𑀗𑁆𑀓𑀺𑀲𑁆𑀲𑀭𑀁𑀲𑀼𑀘𑀺𑀭𑀓𑀸𑀮𑀓𑀢𑀁 𑀲𑀼𑀡𑀺𑀁𑀲𑀼.

𑁩𑁪𑁪.

𑀲𑁄𑀓𑁂𑀦 𑀢𑁂 𑀲𑀺𑀔𑀭𑀺𑀦𑁂𑀯 𑀲𑀫𑀼𑀕𑁆𑀕𑀢𑁂𑀦,

𑀅𑀚𑁆𑀛𑁄𑀢𑁆𑀣𑀝𑀸 𑀩𑀳𑀼𑀢𑀭𑀁 𑀯𑀺𑀮𑀧𑀻𑀁𑀲𑀼 𑀫𑀼𑀴𑁆𑀳𑀸;

𑀓𑀸𑀬𑀺𑀁𑀲𑀼 𑀢𑁂𑀲𑀫𑀣 𑀫𑀼𑀘𑁆𑀙𑀺𑀢𑀫𑀸𑀦𑀲𑀸𑀦𑀁,

𑀲𑀩𑁆𑀩𑀸 𑀤𑀺𑀲𑀸 𑀘 𑀯𑀺𑀤𑀺𑀲𑀸 𑀘 𑀖𑀦𑀦𑁆𑀥𑀓𑀸𑀭𑀸

𑁩𑁪𑁫. ¶

𑀲𑀼𑀢𑁆𑀯𑀸𑀦 𑀓𑀺𑀢𑁆𑀢𑀺𑀲𑀺𑀭𑀺𑀫𑁂𑀖𑀦𑀭𑀸𑀥𑀺𑀧𑀲𑁆𑀲,

𑀭𑀚𑁆𑀚𑁂𑀞𑀺𑀢𑀲𑁆𑀲 𑀭𑀢𑀦𑀢𑁆𑀢𑀬𑀫𑀸𑀫𑀓𑀢𑁆𑀢𑀁;

𑀯𑀲𑁆𑀲𑁂𑀦 𑀦𑀺𑀩𑁆𑀩𑀼𑀢𑀫𑀳𑀸𑀤𑀳𑀦𑀸’𑀯 𑀓𑀘𑁆𑀙𑀸,

𑀢𑁂 𑀚𑀫𑁆𑀧𑀢𑀻 𑀲𑀫𑀪𑀯𑀼𑀁 𑀳𑀢𑀲𑁄𑀓𑀢𑀸𑀧𑀸.

𑁩𑁪𑁬.

𑀲𑀼𑀢𑁆𑀯𑀸𑀦 𑀫𑁂𑀖𑀕𑀺𑀭𑀺𑀦𑀸𑀫𑀫𑀳𑀸𑀯𑀺𑀳𑀸𑀭𑁂,

𑀪𑀺𑀓𑁆𑀔𑀼𑀲𑁆𑀲 𑀓𑀲𑁆𑀲𑀘𑀺 𑀦𑀭𑀸𑀥𑀺𑀧𑀯𑀮𑁆𑀮𑀪𑀢𑁆𑀢𑀁;

𑀢𑀲𑁆𑀲’𑀦𑁆𑀢𑀺𑀓𑀁 𑀲𑀫𑀼𑀧𑀕𑀫𑁆𑀫 𑀓𑀢𑀸𑀢𑀺𑀣𑁂𑀬𑁆𑀬𑀸,

𑀥𑀸𑀢𑀼𑀧𑁆𑀧𑀯𑀢𑁆𑀢𑀺𑀫𑀯𑀤𑀺𑀁𑀲𑀼 𑀉𑀪𑁄 𑀲𑀫𑁂𑀘𑁆𑀘.

𑁩𑁪𑁭.

𑀲𑀼𑀢𑁆𑀯𑀸𑀦 𑀲𑁄 𑀫𑀼𑀦𑀺𑀯𑀭𑁄 𑀤𑀲𑀦𑀧𑁆𑀧𑀯𑀢𑁆𑀢𑀺𑀁,

𑀳𑀝𑁆𑀞𑁄 𑀬𑀣𑀸𑀫𑀢𑀭𑀲𑁂𑀦’𑀳𑀺𑀲𑀺𑀢𑁆𑀢𑀕𑀢𑁆𑀢𑁄;

𑀕𑁂𑀳𑁂 𑀲𑀓𑁂 𑀲𑀧𑀤𑀺 𑀧𑀝𑁆𑀝𑀯𑀺𑀢𑀸𑀦𑀓𑁂𑀳𑀺,

𑀯𑀟𑁆𑀠𑁂𑀲𑀺 𑀥𑀸𑀢𑀼𑀫𑀫𑀮𑀁 𑀲𑀫𑀮𑀗𑁆𑀓𑀢𑀫𑁆𑀳𑀺.

𑁩𑁪𑁮. ¶

𑀢𑁂𑀲𑀜𑁆𑀘 𑀚𑀸𑀦𑀺𑀧𑀢𑀺𑀓𑀸𑀦𑀫𑀼𑀪𑀺𑀦𑁆𑀦𑀫𑁂𑀲𑁄,

𑀓𑀢𑁆𑀯𑀸𑀦 𑀲𑀗𑁆𑀕𑀳𑀫𑀼𑀴𑀸𑀭𑀢𑀭𑀁 𑀬𑀣𑀺𑀘𑁆𑀙𑀁;

𑀯𑀼𑀢𑁆𑀢𑀦𑁆𑀢𑀫𑁂𑀢𑀫𑀪𑀺𑀯𑁂𑀤𑀬𑀺𑀢𑀼𑀁 𑀧𑀲𑀢𑁆𑀣𑀁,

𑀮𑀗𑁆𑀓𑀸𑀥𑀺𑀧𑀲𑁆𑀲 𑀲𑀯𑀺𑀥𑀁 𑀧𑀳𑀺𑀡𑀺𑀢𑁆𑀣 𑀪𑀺𑀓𑁆𑀔𑀼𑀁.

𑁩𑁪𑁯.

𑀭𑀸𑀚𑀸 𑀯𑀲𑀦𑁆𑀢𑀲𑀫𑀬𑁂 𑀲𑀳 𑀓𑀸𑀫𑀺𑀦𑀻𑀳𑀺,

𑀉𑀬𑁆𑀬𑀸𑀦𑀓𑁂𑀴𑀺𑀲𑀼𑀔 𑀫𑁂𑀓𑀤𑀺𑀦𑁂’𑀦𑀼𑀪𑁄𑀦𑁆𑀢𑁄;

𑀆𑀕𑀘𑁆𑀙𑀫𑀸𑀦𑀫𑀣 𑀢𑀢𑁆𑀣 𑀲𑀼𑀤𑀼𑀭𑀢𑁄’𑀘,

𑀢𑀁 𑀯𑀺𑀧𑁆𑀧𑀲𑀦𑁆𑀦𑀫𑀼𑀔𑀯𑀡𑁆𑀡𑀫𑀧𑀲𑁆𑀲𑀺 𑀪𑀺𑀓𑁆𑀔𑀼𑀁.

𑁩𑁫𑁦.

𑀲𑁄 𑀲𑀁𑀬𑀫𑀺 𑀲𑀫𑀼𑀧𑀕𑀫𑁆𑀫 𑀦𑀭𑀸𑀥𑀺𑀧𑀁 𑀢𑀁,

𑀯𑀼𑀢𑁆𑀢𑀦𑁆𑀢𑀫𑁂𑀢𑀫𑀪𑀺𑀯𑁂𑀤𑀬𑀺 𑀢𑀼𑀝𑁆𑀞𑀘𑀺𑀢𑁆𑀢𑁄;

𑀲𑀼𑀢𑁆𑀯𑀸𑀦 𑀢𑀁 𑀧𑀭𑀫𑀧𑀻𑀢𑀺𑀪𑀭𑀁 𑀯𑀳𑀦𑁆𑀢𑁄,

𑀲𑀫𑁆𑀧𑀢𑁆𑀢𑀘𑀓𑁆𑀓𑀭𑀢𑀦𑁄’𑀯 𑀅𑀳𑁄𑀲𑀺 𑀭𑀸𑀚𑀸.

𑁩𑁫𑁧. ¶

𑀮𑀗𑁆𑀓𑀺𑀲𑁆𑀲𑀭𑁄 𑀤𑁆𑀯𑀺𑀚𑀯𑀭𑀸 𑀚𑀺𑀦𑀤𑀦𑁆𑀢𑀥𑀸𑀢𑀼,

𑀫𑀸𑀤𑀸𑀬 𑀚𑀸𑀦𑀺𑀧𑀢𑀬𑁄 𑀉𑀪𑀬𑁂 𑀲𑀫𑁂𑀘𑁆𑀘;

𑀏𑀲𑁆𑀲𑀦𑁆𑀢𑀺 𑀮𑀗𑁆𑀓𑀫𑀘𑀺𑀭𑁂𑀦 𑀇𑀢𑀻𑀭𑀺𑀢𑀁 𑀢𑀁,

𑀦𑁂𑀫𑀺𑀢𑁆𑀢𑀺𑀓𑀲𑁆𑀲 𑀯𑀘𑀦𑀜𑁆𑀘 𑀢𑀣𑀁 𑀅𑀫𑀜𑁆𑀜𑀺.

𑁩𑁫𑁨.

𑀭𑀸𑀚𑀸 𑀢𑀢𑁄 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁,

𑀢𑀲𑁆𑀲𑀸𑀦𑀼𑀭𑀸𑀥𑀦𑀕𑀭𑀲𑁆𑀲 𑀧𑀼𑀭𑀼𑀢𑁆𑀢𑀭𑀸𑀬;

𑀆𑀲𑀸𑀬 𑀢𑀁 𑀲𑀧𑀤𑀺 𑀫𑁂𑀖𑀕𑀺𑀭𑀺𑀁 𑀯𑀺𑀳𑀸𑀭𑀁,

𑀲𑀤𑁆𑀥𑁄 𑀅𑀕𑀜𑁆𑀙𑀺 𑀧𑀤𑀲𑀸’𑀯 𑀧𑀲𑀦𑁆𑀦𑀘𑀺𑀢𑁆𑀢𑁄.

𑁩𑁫𑁩.

𑀤𑀺𑀲𑁆𑀯𑀸 𑀢𑀢𑁄 𑀲𑀼𑀕𑀢𑀥𑀸𑀢𑀼𑀫𑀮𑀩𑁆𑀪𑀦𑁂𑀬𑁆𑀬𑀁,

𑀆𑀦𑀦𑁆𑀤𑀚𑀲𑁆𑀲𑀼𑀦𑀺𑀯𑀳𑁂𑀳𑀺 𑀘 𑀢𑀸𑀭𑀳𑀸𑀭𑀁;

𑀲𑀺𑀜𑁆𑀘𑀁 𑀯𑀺𑀥𑀸𑀬 𑀧𑀡𑀺𑀥𑀺𑀁 𑀩𑀳𑀼𑀫𑀸𑀦𑀧𑀼𑀩𑁆𑀩𑀁,

𑀭𑁄𑀫𑀜𑁆𑀘𑀓𑀜𑁆𑀘𑀼𑀓𑀥𑀭𑁄 𑀇𑀢𑀺 𑀘𑀺𑀦𑁆𑀢𑀬𑀺𑀢𑁆𑀣.

𑁩𑁫𑁪. ¶

𑀲𑁄’𑀳𑀁 𑀅𑀦𑁂𑀓𑀭𑀢𑀦𑀼𑀚𑁆𑀚𑀮𑀫𑁄𑀴𑀺𑀥𑀸𑀭𑀺𑀁,

𑀧𑀽𑀚𑁂𑀬𑁆𑀬𑀫𑀚𑁆𑀚 𑀬𑀤𑀺 𑀤𑀼𑀘𑁆𑀘𑀚𑀫𑀼𑀢𑁆𑀢𑀫𑀗𑁆𑀕𑀁;

𑀮𑁄𑀓𑀢𑁆𑀢𑀬𑁂𑀓𑀲𑀭𑀡𑀲𑁆𑀲 𑀢𑀣𑀸𑀕𑀢𑀲𑁆𑀲,

𑀦𑁄 𑀥𑀸𑀢𑀼𑀬𑀸 𑀫𑀳𑀫𑀦𑀼𑀘𑁆𑀙𑀯𑀺𑀓𑀁 𑀓𑀭𑁂𑀬𑁆𑀬𑀁.

𑁩𑁫𑁫.

𑀏𑀢𑀁 𑀧𑀳𑀽𑀢𑀭𑀢𑀦𑀁 𑀲𑀥𑀦𑀁 𑀲𑀪𑁄𑀕𑁆𑀕𑀁,

𑀲𑀫𑁆𑀧𑀽𑀚𑀬𑀁 𑀅𑀧𑀺 𑀥𑀭𑀸𑀯𑀮𑀬𑀁 𑀅𑀲𑁂𑀲𑀁;

𑀧𑀽𑀚𑀁 𑀓𑀭𑁄𑀫𑀺 𑀢𑀤𑀦𑀼𑀘𑁆𑀙𑀯𑀺𑀓𑀁 𑀅𑀳𑀁’𑀢𑀺,

𑀘𑀺𑀦𑁆𑀢𑁂𑀬𑁆𑀬 𑀓𑁄𑀳𑀺 𑀪𑀼𑀯𑀦𑁂𑀲𑀼 𑀅𑀫𑀽𑀴𑁆𑀳𑀢𑀺𑀢𑁆𑀢𑁄.

𑁩𑁫𑁬.

𑀮𑀗𑁆𑀓𑀸𑀥𑀺𑀧𑀘𑁆𑀘𑀫𑀺𑀤𑀫𑀧𑁆𑀧𑀢𑀭𑀁 𑀫𑀫𑀸𑀲𑀺,

𑀩𑀼𑀤𑁆𑀥𑁄 𑀕𑀼𑀡𑁂𑀳𑀺 𑀯𑀺𑀯𑀺𑀥𑁂𑀳𑀺 𑀧𑀫𑀸𑀡 𑀲𑀼𑀜𑁆𑀜𑁄;

𑀲𑁄’𑀳𑀁 𑀧𑀭𑀺𑀢𑁆𑀢𑀯𑀺𑀪𑀯𑁄 𑀢𑀺𑀪𑀯𑁂𑀓𑀦𑀸𑀣𑀁,

𑀢𑀁 𑀢𑀸𑀤𑀺𑀲𑀁 𑀤𑀲𑀩𑀮𑀁 𑀓𑀣𑀫𑀘𑁆𑀘𑀬𑀺𑀲𑁆𑀲𑀁.

𑁩𑁫𑁭. ¶

𑀇𑀢𑁆𑀣𑀁 𑀧𑀼𑀦𑀧𑁆𑀧𑀼𑀦 𑀢𑀤𑁂𑀯 𑀯𑀺𑀘𑀺𑀦𑁆𑀢𑀬𑀦𑁆𑀢𑁄,

𑀆𑀧𑀚𑁆𑀚𑀺 𑀲𑁄 𑀥𑀺𑀢𑀺𑀬𑀼𑀢𑁄’𑀧𑀺 𑀯𑀺𑀲𑀜𑁆𑀜𑀺𑀪𑀸𑀯𑀁;

𑀲𑀁𑀯𑀻𑀚𑀺𑀢𑁄 𑀲𑀧𑀤𑀺 𑀘𑀸𑀫𑀭𑀫𑀸𑀭𑀼𑀢𑁂𑀦,

𑀔𑀺𑀦𑁆𑀦𑁂𑀦 𑀲𑁂𑀯𑀓𑀚𑀦𑁂𑀦 𑀅𑀮𑀢𑁆𑀣 𑀲𑀜𑁆𑀜𑀁.

𑁩𑁫𑁮.

𑀣𑁄𑀓𑀫𑁆𑀧𑀺 𑀩𑀻𑀚𑀫𑀣 𑀯𑀸 𑀅𑀪𑀺𑀭𑁄𑀧𑀬𑀦𑁆𑀢𑀸,

𑀫𑁂𑀥𑀸𑀯𑀺𑀦𑁄 𑀫𑀳𑀢𑀺𑀬𑀸’𑀧𑀺 𑀫𑀲𑀼𑀦𑁆𑀥𑀭𑀸𑀬;

𑀓𑀸𑀮𑁂𑀦 𑀧𑀢𑁆𑀢 𑀢𑀯 𑀧𑀼𑀧𑁆𑀨𑀨𑀮𑀤𑀺𑀓𑀸𑀦𑀺,

𑀯𑀺𑀦𑁆𑀤𑀦𑁆𑀢𑀺 𑀧𑀢𑁆𑀣𑀺𑀢𑀨𑀮𑀸𑀦𑀺 𑀅𑀦𑀧𑁆𑀧𑀓𑀸𑀦𑀺.

𑁩𑁫𑁯.

𑀏𑀯𑀁 𑀕𑀼𑀡𑁂𑀳𑀺 𑀯𑀺𑀯𑀺𑀥𑁂𑀳𑀺’𑀧𑀺 𑀅𑀧𑁆𑀧𑀫𑁂𑀬𑁆𑀬,

𑀥𑀫𑁆𑀫𑀺𑀲𑁆𑀲𑀭𑀫𑁆𑀳𑀺 𑀫𑀳𑀫𑀧𑁆𑀧𑀢𑀭𑀫𑁆𑀧𑀺 𑀓𑀢𑁆𑀯𑀸;

𑀓𑀸𑀮𑀘𑁆𑀘𑀬𑁂𑀦 𑀧𑀭𑀺𑀡𑀸𑀫 𑀯𑀺𑀲𑁂𑀲𑀭𑀫𑁆𑀫𑀁,

𑀲𑀕𑁆𑀕𑀸𑀧𑀯𑀕𑁆𑀕𑀲𑀼𑀔𑀫𑀧𑁆𑀧𑀝𑀺𑀫𑀁 𑀮𑀪𑀺𑀲𑁆𑀲𑀁.

𑁩𑁬𑁦. ¶

𑀇𑀢𑁆𑀣𑀁 𑀯𑀺𑀘𑀺𑀦𑁆𑀢𑀺𑀬 𑀧𑀫𑁄𑀤𑀪𑀭𑀸𑀢𑀺𑀭𑁂𑀓,

𑀲𑀫𑁆𑀧𑀼𑀡𑁆𑀡𑀘𑀦𑁆𑀤𑀺𑀫𑀲𑀭𑀺𑀓𑁆𑀔𑀫𑀼𑀔𑁄 𑀦𑀭𑀺𑀦𑁆𑀤𑁄;

𑀲𑀩𑁆𑀩𑀜𑁆𑀜𑀼𑀦𑁄 𑀤𑀲𑀦𑀥𑀸𑀢𑀼𑀯𑀭𑀲𑁆𑀲 𑀢𑀲𑁆𑀲,

𑀧𑀽𑀚𑁂𑀲𑀺 𑀲𑀩𑁆𑀩𑀫𑀧𑀺 𑀲𑀻𑀳𑀴𑀤𑀻𑀧𑀫𑁂𑀢𑀁.

𑁩𑁬𑁧.

𑀪𑀺𑀓𑁆𑀔𑀽’𑀧𑀺 𑀢𑁂𑀧𑀺𑀝𑀓 𑀚𑀸𑀢𑀓𑀪𑀸𑀡𑀓𑀸𑀤𑀺,

𑀢𑀓𑁆𑀓𑀕𑀫𑀸𑀤𑀺 𑀓𑀼𑀲𑀮𑀸 𑀅𑀧𑀺 𑀩𑀼𑀤𑁆𑀥𑀺𑀫𑀦𑁆𑀢𑁄;

𑀯𑀢𑁆𑀣𑀼𑀢𑁆𑀢𑀬𑁂𑀓𑀲𑀭𑀡𑀸 𑀅𑀧𑀺 𑀧𑁄𑀭𑀯𑀕𑁆𑀕𑀸,

𑀓𑁄𑀢𑀼𑀳𑀮𑀸 𑀲𑀧𑀤𑀺 𑀲𑀦𑁆𑀦𑀺𑀧𑀢𑀺𑀁𑀲𑀼 𑀢𑀢𑁆𑀣.

𑁩𑁬𑁨.

𑀭𑀸𑀚𑀸 𑀢𑀢𑁄 𑀫𑀳𑀢𑀺𑀬 𑀧𑀭𑀺𑀲𑀸𑀬 𑀫𑀚𑁆𑀛𑁂,

𑀇𑀘𑁆𑀘𑀩𑁆𑀭𑀼𑀯𑀻 𑀫𑀼𑀦𑀺𑀯𑀭𑁄 𑀳𑀺 𑀲𑀼𑀲𑀼𑀓𑁆𑀓𑀤𑀸𑀞𑁄;

𑀤𑀸𑀞𑀸 𑀚𑀺𑀦𑀲𑁆𑀲 𑀬𑀤𑀺 𑀑𑀲𑀥𑀺𑀢𑀸𑀭𑀓𑀸’𑀯,

𑀲𑁂𑀢𑀸 𑀪𑀯𑁂𑀬𑁆𑀬 𑀓𑀺𑀫𑀬𑀁 𑀫𑀮𑀺𑀦𑀸𑀯𑀪𑀸𑀲𑀸.

𑁩𑁬𑁩. ¶

𑀢𑀲𑁆𑀫𑀺𑀁 𑀔𑀡𑁂 𑀤𑀲𑀦𑀥𑀸𑀢𑀼 𑀫𑀼𑀦𑀺𑀲𑁆𑀲𑀭𑀲𑁆𑀲,

𑀧𑀓𑁆𑀔𑁂 𑀧𑀲𑀸𑀭𑀺𑀬 𑀤𑀼𑀯𑁂 𑀯𑀺𑀬 𑀭𑀸𑀚𑀳𑀁𑀲𑀻;

𑀯𑀺𑀢𑁆𑀣𑀸𑀭𑀺𑀢𑀁’𑀲𑀼𑀦𑀺 𑀯𑀳𑀸 𑀕𑀕𑀦𑀗𑁆𑀕𑀦𑀫𑁆𑀳𑀺,

𑀆𑀯𑀝𑁆𑀝𑀢𑁄 𑀙𑀯𑀺 𑀚𑀯𑁂𑀦 𑀫𑀼𑀳𑀼𑀢𑁆𑀢𑀫𑀢𑁆𑀢𑀁.

𑁩𑁬𑁪.

𑀧𑀘𑁆𑀘𑀕𑁆𑀖𑀫𑀢𑁆𑀣𑀭𑀡𑀓𑀁 𑀲𑀺𑀢𑀫𑀢𑁆𑀣𑀭𑀺𑀢𑁆𑀯𑀸,

𑀪𑀤𑁆𑀤𑀸𑀲𑀦𑀫𑁆𑀳𑀺 𑀯𑀺𑀦𑀺𑀥𑀸𑀬 𑀫𑀼𑀦𑀺𑀦𑁆𑀤𑀥𑀸𑀢𑀼𑀁;

𑀢𑀁 𑀚𑀸𑀢𑀺𑀧𑀼𑀧𑁆𑀨𑀦𑀺𑀓𑀭𑁂𑀦 𑀣𑀓𑁂𑀲𑀺 𑀭𑀸𑀚𑀸,

𑀯𑀲𑁆𑀲𑀘𑁆𑀘𑀬𑀫𑁆𑀩𑀼𑀥𑀭𑀓𑀽𑀝𑀲𑀫𑀧𑁆𑀧𑀪𑁂𑀦.

𑁩𑁬𑁫.

𑀉𑀕𑁆𑀕𑀫𑁆𑀫 𑀔𑀺𑀧𑁆𑀧𑀫𑀣 𑀥𑀸𑀢𑀼 𑀫𑀼𑀦𑀺𑀲𑁆𑀲𑀭𑀲𑁆𑀲,

𑀲𑀸 𑀧𑀼𑀧𑁆𑀨𑀭𑀸𑀲𑀺𑀲𑀺𑀔𑀭𑀫𑁆𑀳𑀺 𑀧𑀢𑀺𑀝𑁆𑀞𑀳𑀺𑀢𑁆𑀯𑀸;

𑀭𑀁𑀲𑀻𑀳𑀺 𑀤𑀼𑀤𑁆𑀥𑀥𑀯𑀮𑁂𑀳𑀺 𑀯𑀺𑀭𑁄𑀘𑀫𑀸𑀦𑀸,

𑀲𑀫𑁆𑀧𑀲𑁆𑀲𑀢𑀁 𑀅𑀦𑀺𑀫𑀺𑀲𑁂 𑀦𑀬𑀦𑁂 𑀅𑀓𑀸𑀲𑀺.

𑁩𑁬𑁬. ¶

𑀢𑀁 𑀥𑀸𑀢𑀼𑀫𑀸𑀲𑀦𑀕𑀢𑀫𑁆𑀳𑀺 𑀧𑀢𑀺𑀝𑁆𑀞𑀧𑁂𑀢𑁆𑀯𑀸,

𑀔𑀻𑀭𑁄𑀤𑀏𑀡𑁂𑀧𑀝𑀮𑀧𑁆𑀧𑀝𑀺𑀫𑁂 𑀤𑀼𑀓𑀼𑀴𑁂;

𑀙𑀸𑀤𑁂𑀲𑀺 𑀲𑀸𑀝𑀓𑀲𑀢𑁂𑀳𑀺 𑀫𑀳𑀸𑀭𑀳𑁂𑀳𑀺,

𑀪𑀺𑀬𑁆𑀬𑁄’𑀧𑀺 𑀲𑁄 𑀉𑀧𑀧𑀭𑀺𑀓𑁆𑀔𑀺𑀢𑀼𑀓𑀸𑀫𑀢𑀸𑀬.

𑁩𑁬𑁭.

𑀅𑀩𑁆𑀪𑀼𑀕𑁆𑀕𑀢𑀸 𑀲𑀧𑀤𑀺 𑀯𑀢𑁆𑀣𑀲𑀢𑀸𑀦𑀺 𑀪𑁂𑀢𑁆𑀯𑀸,

𑀲𑁂𑀢𑀫𑁆𑀩𑀼𑀤𑁄𑀤𑀭𑀯𑀺𑀦𑀺𑀕𑁆𑀕𑀢𑀘𑀦𑁆𑀤𑀺𑀫𑀸’𑀯;

𑀞𑀢𑁆𑀯𑀸𑀦 𑀲𑀸 𑀉𑀧𑀭𑀺 𑀢𑁂𑀲𑀫𑀪𑀸𑀲𑀬𑀺𑀢𑁆𑀣,

𑀭𑀁𑀲𑀻𑀳𑀺 𑀓𑀼𑀦𑁆𑀤𑀯𑀺𑀲𑀤𑁂𑀳𑀺 𑀤𑀺𑀲𑀸 𑀲𑀫𑀦𑁆𑀢𑀸

𑁩𑁬𑁮.

𑀢𑀲𑁆𑀫𑀺𑀁 𑀔𑀡𑁂 𑀯𑀲𑀼𑀫𑀢𑀻 𑀲𑀳 𑀪𑀽𑀥𑀭𑁂𑀳𑀺,

𑀕𑀚𑁆𑀚𑀺𑀢𑁆𑀣 𑀲𑀸𑀥𑀼𑀯𑀘𑀦𑀁’𑀯 𑀲𑀫𑀼𑀕𑁆𑀕𑀺𑀭𑀦𑁆𑀢𑀻;

𑀢𑀁 𑀅𑀩𑁆𑀪𑀽𑀢𑀁 𑀯𑀺𑀬 𑀲𑀫𑁂𑀓𑁆𑀔𑀺𑀢𑀼𑀫𑀫𑁆𑀩𑀼𑀭𑀸𑀲𑀺,

𑀲𑁄 𑀦𑀺𑀘𑁆𑀘𑀮𑁄 𑀅𑀪𑀯𑀺 𑀲𑀦𑁆𑀢𑀢𑀭𑀗𑁆𑀕𑀩𑀸𑀳𑀼.

𑁩𑁬𑁯. ¶

𑀫𑀢𑁆𑀢𑁂𑀪𑀓𑀫𑁆𑀧𑀺𑀢𑀲𑀼𑀧𑀼𑀧𑀨𑀺𑀢𑀲𑀸𑀮𑀢𑁄’𑀯,

𑀪𑀲𑁆𑀲𑀺𑀁𑀲𑀼 𑀤𑀺𑀩𑁆𑀩𑀓𑀼𑀲𑀼𑀫𑀸𑀦𑀺’𑀧𑀺 𑀅𑀦𑁆𑀢𑀴𑀺𑀓𑁆𑀔𑀸;

𑀦𑀘𑁆𑀘𑁂𑀲𑀼 𑀘𑀸𑀢𑀼𑀭𑀺𑀬𑀬𑀫𑀘𑁆𑀙𑀭𑀺𑀬𑀁 𑀚𑀦𑀲𑁆𑀲,

𑀲𑀦𑁆𑀤𑀲𑁆𑀲𑀬𑀺𑀁𑀲𑀼 𑀕𑀕𑀦𑁂 𑀲𑀼𑀭𑀲𑀼𑀦𑁆𑀤𑀭𑀻’𑀧𑀺.

𑁩𑁭𑁦.

𑀆𑀦𑀦𑁆𑀤𑀲𑀜𑁆𑀚𑀦𑀺𑀢𑀢𑀸𑀭𑀭𑀯𑀸𑀪𑀺𑀭𑀸𑀫𑀁,

𑀕𑀸𑀬𑀺𑀁𑀲𑀼 𑀕𑀻𑀢𑀫𑀫𑀢𑀸𑀲𑀦𑀕𑀸𑀬𑀓𑀸’𑀧𑀺;

𑀫𑀼𑀜𑁆𑀘𑀺𑀁𑀲𑀼 𑀤𑀺𑀩𑁆𑀩𑀢𑀼𑀭𑀺𑀬𑀸𑀦𑀺’𑀧𑀺 𑀯𑀸𑀤𑀺𑀢𑀸𑀦𑀺,

𑀕𑀫𑁆𑀪𑀻𑀭𑀫𑀼𑀘𑁆𑀘𑀫𑀥𑀼𑀭𑀁 𑀤𑁆𑀯𑀺𑀕𑀼𑀡𑀁 𑀦𑀺𑀦𑀸𑀤𑀁.

𑁩𑁭𑁧.

𑀲𑀁𑀲𑀺𑀩𑁆𑀩𑀺𑀢𑀁 𑀭𑀚𑀢𑀭𑀚𑁆𑀚𑀼𑀲𑀢𑀸𑀦𑀼𑀓𑀸𑀭𑀻,

𑀥𑀸𑀭𑀸𑀲𑀢𑁂𑀳𑀺 𑀯𑀲𑀼𑀥𑀫𑁆𑀩𑀭𑀫𑀫𑁆𑀩𑀼𑀤𑁂𑀦;

𑀲𑀩𑁆𑀩𑀸 𑀤𑀺𑀲𑀸 𑀚𑀮𑀤𑀓𑀼𑀝𑀫𑀳𑀕𑀖𑀺𑀬𑁂𑀲𑀼,

𑀤𑀺𑀢𑁆𑀢𑀸𑀘𑀺𑀭𑀚𑁆𑀚𑀼𑀢𑀺𑀧𑀤𑀻𑀧𑀲𑀢𑀸𑀯𑀪𑀸𑀲𑀸.

𑁩𑁭𑁨. ¶

𑀆𑀥𑀼𑀬𑀫𑀸𑀦 𑀫𑀮𑀬𑀸𑀯𑀮 𑀓𑀸𑀦𑀦𑀦𑁆𑀢𑁄,

𑀲𑀫𑀣𑀼𑀮𑁆𑀮 𑀧𑀼𑀧𑁆𑀨𑀚 𑀧𑀭𑀸𑀕𑀳𑀭𑀸𑀪𑀺𑀳𑀸𑀭𑀺;

𑀲𑁂𑀤𑁄𑀤 𑀩𑀺𑀦𑁆𑀤𑀼𑀕𑀡 𑀲𑀁𑀳𑀭𑀡𑀧𑁆𑀧𑀯𑀻𑀡𑁄,

𑀫𑀦𑁆𑀤𑀁 𑀅𑀯𑀸𑀲𑀺 𑀲𑀺𑀲𑀺𑀭𑁄 𑀅𑀧𑀺 𑀕𑀦𑁆𑀥𑀯𑀸𑀳𑁄.

𑁩𑁭𑁩.

𑀭𑀸𑀚𑀸 𑀢𑀫𑀩𑁆𑀪𑀼𑀢𑀫𑀯𑁂𑀓𑁆𑀔𑀺𑀬 𑀧𑀸𑀝𑀺𑀳𑀻𑀭𑀁,

𑀮𑁄𑀓𑀼𑀲𑁆𑀲𑀯𑀁 𑀩𑀳𑀼𑀢𑀭𑀜𑁆𑀘 𑀅𑀤𑀺𑀝𑁆𑀞𑀧𑀼𑀩𑁆𑀩𑀁;

𑀘𑀺𑀧𑁆𑀨𑀸𑀭𑀺𑀢𑀓𑁆𑀔𑀺𑀬𑀼𑀕𑀮𑁄 𑀧𑀭𑀫𑀧𑁆𑀧𑀫𑁄𑀤𑀸,

𑀧𑀽𑀚𑀁 𑀓𑀭𑀺𑀢𑁆𑀣 𑀫𑀳𑀢𑀺𑀁 𑀭𑀢𑀦𑀸𑀤𑀺𑀓𑁂𑀳𑀺.

𑁩𑁭𑁪.

𑀲𑁄 𑀥𑀸𑀢𑀼𑀫𑀢𑁆𑀢𑀲𑀺𑀭𑀲𑀸’𑀣 𑀲𑀫𑀼𑀩𑁆𑀩𑀳𑀦𑁆𑀢𑁄,

𑀞𑀢𑁆𑀯𑀸 𑀲𑀫𑀼𑀲𑁆𑀲𑀺𑀢 𑀲𑀺𑀢𑀸𑀢𑀧𑀯𑀸𑀭𑀡𑀫𑁆𑀳𑀺;

𑀘𑀺𑀢𑁆𑀢𑀢𑁆𑀣𑀭𑁂 𑀭𑀣𑀯𑀭𑁂 𑀲𑀺𑀢𑀯𑀸𑀚𑀺𑀬𑀼𑀢𑁆𑀢𑁂,

𑀮𑀓𑁆𑀔𑀺𑀦𑀺𑀥𑀸𑀦𑀦𑀼𑀭𑀸𑀥𑀧𑀼𑀭𑀁 𑀧𑀯𑁂𑀓𑁆𑀔𑀺.

𑁩𑁭𑁫. ¶

𑀤𑁂𑀯𑀺𑀦𑁆𑀤 𑀫𑀦𑁆𑀤𑀺𑀭 𑀲𑀫𑁂 𑀲𑀫𑀮𑀗𑁆𑀓𑀢𑀫𑁆𑀳𑀺,

𑀭𑀸𑀚𑀸 𑀲𑀓𑀫𑁆𑀳𑀺 𑀪𑀯𑀦𑁂 𑀅𑀢𑀼𑀮𑀸𑀦𑀼𑀪𑀸𑀯𑁄;

𑀲𑀻𑀳𑀸𑀲𑀦𑁂 𑀧𑀝𑀺𑀓 𑀓𑁄𑀚𑀯 𑀲𑀦𑁆𑀣𑀢𑀫𑁆𑀳𑀺,

𑀥𑀸𑀢𑀼𑀁 𑀞𑀧𑁂𑀲𑀺 𑀫𑀼𑀦𑀺𑀦𑁄 𑀲𑀲𑀺𑀢𑀸𑀢𑀧𑀢𑁆𑀢𑁂.

𑁩𑁭𑁬.

𑀅𑀦𑁆𑀢𑁄’𑀯 𑀪𑀼𑀫𑀺𑀧𑀢𑀺 𑀥𑀸𑀢𑀼𑀖𑀭𑀁 𑀫𑀳𑀕𑁆𑀖𑀁,

𑀓𑀢𑁆𑀯𑀸𑀦 𑀢𑀢𑁆𑀣 𑀯𑀺𑀦𑀺𑀥𑀸𑀬 𑀫𑀼𑀦𑀺𑀦𑁆𑀤𑀥𑀸𑀢𑀼𑀁;

𑀲𑀫𑁆𑀧𑀽𑀚𑀬𑀺𑀢𑁆𑀣 𑀯𑀺𑀯𑀺𑀥𑁂𑀳𑀺 𑀉𑀧𑀸𑀬𑀦𑁂𑀳𑀺,

𑀭𑀢𑁆𑀢𑀻𑀦𑁆𑀤𑀺𑀯𑀁 𑀢𑀺𑀤𑀺𑀯𑀫𑁄𑀓𑁆𑀔 𑀲𑀼𑀔𑀸𑀪𑀺𑀓𑀗𑁆𑀔𑀻.

𑁩𑁭𑁭.

𑀢𑁂𑀲𑀜𑁆𑀘 𑀚𑀸𑀦𑀺𑀧𑀢𑀺𑀓𑀸𑀦𑀫𑀼𑀪𑀺𑀦𑁆𑀦𑀫𑁂𑀯,

𑀢𑀼𑀝𑁆𑀞𑁄 𑀩𑀳𑀽𑀦𑀺 𑀭𑀢𑀦𑀸𑀪𑀭𑀡𑀸𑀤𑀺𑀓𑀸𑀦𑀺;

𑀕𑀸𑀫𑁂𑀘 𑀇𑀲𑁆𑀲𑀭𑀓𑀼𑀮𑁂𑀓 𑀦𑀻𑀯𑀸𑀲𑀪𑀼𑀢𑁂,

𑀤𑀢𑁆𑀯𑀸𑀦 𑀲𑀗𑁆𑀕𑀳𑀫𑀓𑀸𑀲𑀺 𑀢𑀺𑀲𑀻𑀳𑀴𑀺𑀦𑁆𑀤𑁄.

𑁩𑁭𑁮. ¶

𑀲𑀗𑁆𑀕𑀫𑁆𑀫 𑀚𑀸𑀦𑀧𑀤 𑀦𑁂𑀕𑀫 𑀦𑀸𑀕𑀭𑀸𑀤𑀻,

𑀉𑀓𑁆𑀓𑀡𑁆𑀞𑀺𑀢𑀸 𑀲𑀼𑀕𑀢𑀥𑀸𑀢𑀼𑀫𑀧𑀲𑁆𑀲𑀫𑀸𑀦𑀸;

𑀮𑁄𑀓𑀼𑀢𑁆𑀢𑀫𑀲𑁆𑀲 𑀘𑀭𑀺𑀢𑀸𑀦𑀺 𑀅𑀪𑀺𑀢𑁆𑀣𑀯𑀦𑁆𑀢𑀸,

𑀉𑀕𑁆𑀖𑁄𑀲𑀬𑀺𑀁𑀲𑀼 𑀥𑀭𑀡𑀻𑀧𑀢𑀺𑀲𑀦𑁆𑀦𑀺𑀥𑀸𑀦𑀺;

𑀥𑀫𑁆𑀫𑀺𑀲𑁆𑀲𑀭𑁄 𑀲𑀓𑀮𑀮𑁄𑀓𑀳𑀺𑀢𑀸𑀬 𑀮𑁄𑀓𑁂,

𑀚𑀸𑀬𑀺𑀢𑁆𑀣 𑀲𑀩𑁆𑀩𑀚𑀦𑀢𑀸𑀳𑀺𑀢𑀫𑀸𑀘𑀭𑀺𑀢𑁆𑀣;

𑀯𑀺𑀢𑁆𑀣𑀸𑀭𑀺𑀢𑀸 𑀩𑀳𑀼𑀚𑀦𑀲𑁆𑀲 𑀳𑀺𑀢𑀸𑀬 𑀥𑀸𑀢𑀼,

𑀇𑀘𑁆𑀙𑀸𑀫 𑀥𑀸𑀢𑀼𑀫𑀪𑀺𑀧𑀽𑀚𑀬𑀺𑀢𑀼𑀁 𑀫𑀬𑀫𑁆𑀧𑀺.

𑁩𑁮𑁦.

𑀲𑁄 𑀲𑀦𑁆𑀦𑀺𑀧𑀸𑀢𑀺𑀬 𑀫𑀳𑀻𑀧𑀢𑀺 𑀪𑀺𑀓𑁆𑀔𑀼𑀲𑀗𑁆𑀖,

𑀫𑀸𑀭𑀸𑀫𑀯𑀸𑀲𑀺𑀫𑀦𑀼𑀭𑀸𑀥𑀧𑀼𑀭𑁄𑀧𑀓𑀡𑁆𑀞𑁂;

𑀅𑀚𑁆𑀛𑀸𑀲𑀬𑀁 𑀢𑀫𑀪𑀺𑀯𑁂𑀤𑀬𑀺 𑀲𑀢𑁆𑀣𑀼𑀥𑀸𑀢𑀼,

𑀧𑀽𑀚𑀸𑀬 𑀲𑀦𑁆𑀦𑀺𑀧𑀢𑀺𑀢𑀲𑁆𑀲 𑀫𑀳𑀸𑀚𑀦𑀲𑁆𑀲.

𑁩𑁮𑁧. ¶

𑀣𑁂𑀭𑁄 𑀢𑀳𑀺𑀁 𑀫𑀳𑀢𑀺 𑀪𑀺𑀓𑁆𑀔𑀼𑀕𑀡𑁂 𑀧𑀦𑁂𑀓𑁄,

𑀫𑁂𑀥𑀸𑀩𑀮𑁂𑀦 𑀅𑀲𑀫𑁄 𑀓𑀭𑀼𑀡𑀸𑀥𑀺𑀯𑀸𑀲𑁄;

𑀏𑀯𑀁 𑀢𑀺𑀲𑀻𑀳𑀴𑀧𑀢𑀺𑀲𑁆𑀲 𑀫𑀳𑀸𑀫𑀢𑀺𑀲𑁆𑀲,

𑀮𑁄𑀓𑀢𑁆𑀣𑀘𑀸𑀭𑀘𑀢𑀼𑀭𑀲𑁆𑀲 𑀦𑀺𑀯𑁂𑀤𑀬𑀺𑀢𑁆𑀣.

𑁩𑁮𑁨.

𑀬𑁄 𑀆𑀘𑀭𑁂𑀬𑁆𑀬 𑀅𑀦𑀼𑀚𑀻𑀯𑀺𑀚𑀦𑀲𑁆𑀲 𑀅𑀢𑁆𑀣𑀁,

𑀏𑀲𑁄 𑀪𑀯𑁂’𑀦𑀼𑀘𑀭𑀺𑀢𑁄 𑀫𑀳𑀢𑀁 𑀲𑀪𑀸𑀯𑁄;

𑀥𑀸𑀢𑀼𑀁 𑀯𑀲𑀦𑁆𑀢𑀲𑀫𑀬𑁂 𑀩𑀳𑀺 𑀦𑀻𑀳𑀭𑀺𑀢𑁆𑀯𑀸,

𑀤𑀲𑁆𑀲𑁂𑀳𑀺 𑀧𑀼𑀜𑁆𑀜𑀫𑀪𑀺𑀧𑀢𑁆𑀣𑀬𑀢𑀁 𑀚𑀦𑀸𑀦𑀁.

𑁩𑁮𑁩.

𑀲𑀼𑀢𑁆𑀯𑀸𑀦 𑀲𑀁𑀬𑀫𑀺𑀯𑀭𑀲𑁆𑀲 𑀲𑀼𑀪𑀸𑀲𑀺𑀢𑀸𑀦𑀺,

𑀧𑀼𑀘𑁆𑀙𑀺𑀢𑁆𑀣 𑀲𑁄 𑀦𑀭𑀯𑀭𑁄 𑀧𑀼𑀦 𑀪𑀺𑀓𑁆𑀔𑀼𑀲𑀗𑁆𑀖𑀁;

𑀥𑀸𑀢𑀼𑀁 𑀦𑀫𑀲𑁆𑀲𑀺𑀢𑀼𑀫𑀦𑁂𑀦 𑀫𑀳𑀸𑀚𑀦𑁂𑀦,

𑀞𑀸𑀦𑀁 𑀓𑀺𑀫𑁂𑀢𑁆𑀣 𑀭𑀫𑀡𑀻𑀬𑀢𑀭𑀁 𑀲𑀺𑀬𑀸’𑀢𑀺.

𑁩𑁮𑁪. ¶

𑀲𑀩𑁆𑀩𑁂’𑀧𑀺 𑀢𑁂 𑀅𑀣 𑀦𑀺𑀓𑀸𑀬 𑀦𑀺𑀯𑀸𑀲𑀺 𑀪𑀺𑀓𑁆𑀔𑀽,

𑀞𑀸𑀦𑀁 𑀲𑀓𑀁 𑀲𑀓𑀫 𑀯𑀡𑁆𑀡𑀬𑀼𑀫𑀸𑀤𑀭𑁂𑀦;

𑀅𑀜𑁆𑀜𑁄𑀜𑁆𑀜𑀪𑀺𑀦𑁆𑀦𑀯𑀘𑀦𑁂𑀲𑀼 𑀘 𑀢𑁂𑀲𑀼 𑀭𑀸𑀚𑀸,

𑀦𑁂𑀯𑀸𑀪𑀺𑀦𑀦𑁆𑀤𑀺 𑀦 𑀧𑀝𑀺𑀓𑁆𑀔𑀺𑀧𑀺 𑀓𑀺𑀜𑁆𑀘𑀺𑀯𑀸𑀓𑁆𑀬𑀁.

𑁩𑁮𑁫.

𑀫𑀚𑁆𑀛𑀢𑁆𑀢𑀢𑀸𑀦𑀼𑀕𑀢𑀫𑀸𑀦𑀲𑀢𑀸𑀬 𑀓𑀺𑀦𑁆𑀢𑀼,

𑀭𑀸𑀚𑀸 𑀅𑀯𑁄 𑀘 𑀧𑀼𑀦 𑀪𑀺𑀓𑁆𑀔𑀼𑀕𑀡𑀲𑁆𑀲 𑀫𑀚𑁆𑀛𑁂;

𑀅𑀢𑁆𑀢𑀸𑀦𑀼𑀭𑀽𑀧𑀫𑀬𑀫𑁂𑀯 𑀫𑀼𑀦𑀺𑀦𑁆𑀤𑀥𑀸𑀢𑀼,

𑀞𑀸𑀦𑀁 𑀔𑀡𑁂𑀦 𑀲𑀬𑀫𑁂𑀯 𑀕𑀫𑀺𑀲𑁆𑀲𑀢𑀻𑀢𑀺.

𑁩𑁮𑁬.

𑀭𑀸𑀚𑀸 𑀢𑀢𑁄 𑀪𑀯𑀦𑀫𑁂𑀯 𑀲𑀓𑀁 𑀉𑀧𑁂𑀘𑁆𑀘,

𑀥𑀸𑀢𑀼𑀧𑁆𑀧𑀡𑀸𑀫𑀫𑀪𑀺𑀧𑀢𑁆𑀣𑀬𑀢𑀁 𑀚𑀦𑀸𑀦𑀁;

𑀔𑀺𑀧𑁆𑀧𑀁𑀫𑀼𑀔𑀫𑁆𑀩𑀼𑀚𑀯𑀦𑀸𑀦𑀻 𑀯𑀺𑀓𑀸𑀲𑀬𑀦𑁆𑀢𑁄,

𑀲𑀚𑁆𑀚𑁂𑀢𑀼𑀫𑀸𑀳 𑀦𑀕𑀭𑀜𑁆𑀘 𑀯𑀺𑀳𑀸𑀭𑀫𑀕𑁆𑀕𑀁.

𑁩𑁮𑁭.

𑀲𑀫𑁆𑀫𑀚𑁆𑀚𑀺𑀢𑀸 𑀲𑀮𑀺𑀮 𑀲𑁂𑀯𑀦 𑀲𑀦𑁆𑀢𑀥𑀽𑀮𑀻,

𑀭𑀘𑁆𑀙𑀸 𑀢𑀤𑀸’𑀲𑀺 𑀧𑀼𑀮𑀺𑀦𑀢𑁆𑀣𑀭𑀡𑀸𑀪𑀺𑀭𑀸𑀫𑀸;

𑀉𑀲𑁆𑀲𑀸𑀧𑀺𑀢𑀸𑀦𑀺 𑀓𑀡𑀓𑀸𑀤𑀺𑀯𑀺𑀘𑀺𑀢𑁆𑀢𑀺𑀢𑀸𑀦𑀺,

𑀯𑁆𑀬𑀕𑁆𑀖𑀸𑀤𑀺 𑀭𑀽𑀧𑀔𑀘𑀺𑀢𑀸𑀦𑀺 𑀘 𑀢𑁄𑀭𑀡𑀸𑀦𑀺.

𑁩𑁮𑁮. ¶

𑀙𑀸𑀬𑀸 𑀦𑀺𑀯𑀸𑀭𑀺𑀢 𑀯𑀺𑀭𑁄𑀘𑀦 𑀭𑀁𑀲𑀺𑀢𑀸𑀧𑀸,

𑀦𑀘𑁆𑀘𑀁’𑀯 𑀤𑀲𑁆𑀲𑀬𑀢𑀺 𑀯𑀸𑀢𑀥𑀽𑀢𑀸 𑀥𑀚𑀸𑀮𑀺;

𑀯𑀻𑀣𑀺 𑀯𑀲𑀦𑁆𑀢𑀯𑀦𑀭𑀸𑀚𑀺 𑀲𑀫𑀸𑀦𑀯𑀡𑁆𑀡𑀸,

𑀚𑀸𑀢𑀸 𑀲𑀼𑀚𑀸𑀢𑀓𑀤𑀮𑀻𑀢𑀭𑀼𑀫𑀸𑀮𑀺𑀓𑀸𑀳𑀺.

𑁩𑁮𑁯.

𑀲𑀁𑀲𑀽𑀘𑀬𑀦𑁆𑀢𑀺 𑀘 𑀲𑀢𑀁 𑀦𑀯𑀧𑀼𑀡𑁆𑀡𑀓𑀼𑀫𑁆𑀪𑀸,

𑀲𑀕𑁆𑀕𑀸𑀧𑀯𑀕𑁆𑀕𑀲𑀼𑀔𑀫𑀺𑀘𑁆𑀙𑀺𑀢𑀫𑀺𑀚𑁆𑀛𑀢𑀻𑀢𑀺;

𑀓𑀧𑁆𑀧𑀼𑀭𑀲𑀸𑀭𑀢𑀕𑀭𑀸𑀕𑀭𑀼𑀲𑀫𑁆𑀪𑀯𑁂𑀳𑀺,

𑀥𑀽𑀧𑁂𑀳𑀺 𑀤𑀼𑀤𑁆𑀤𑀺𑀦𑀫𑀣𑁄 𑀲𑀼𑀤𑀺𑀦𑀁 𑀅𑀳𑁄𑀲𑀺.

𑁩𑁯𑁦.

𑀑𑀮𑀫𑁆𑀩𑀫𑀸𑀦𑀲𑀺𑀢𑀫𑀼𑀢𑁆𑀢𑀓𑀚𑀸𑀮𑀓𑀸𑀦𑀺,

𑀲𑀚𑁆𑀚𑀸𑀧𑀺𑀢𑀸𑀦𑀺 𑀯𑀺𑀯𑀺𑀥𑀸𑀦𑀺 𑀘 𑀫𑀡𑁆𑀟𑀧𑀸𑀦𑀺;

𑀲𑀫𑁆𑀧𑀸𑀤𑀺𑀢𑀸𑀦𑀺 𑀘 𑀢𑀳𑀺𑀁 𑀓𑀼𑀲𑀼𑀫𑀕𑀖𑀺𑀓𑀸𑀦𑀺,

𑀆𑀫𑁄𑀤 𑀮𑀼𑀤𑁆𑀥 𑀫𑀥𑀼𑀧𑀸𑀯𑀮𑀺 𑀓𑀼𑀚𑀺𑀢𑀸𑀦𑀺.

𑁩𑁯𑁧. ¶

𑀕𑀘𑁆𑀙𑀺𑀁𑀲𑀼 𑀓𑁂𑀘𑀺 𑀕𑀳𑀺𑀢𑀼𑀲𑁆𑀲𑀯 𑀯𑁂𑀲𑀲𑁄𑀪𑀸,

𑀏𑀓𑁂 𑀲𑀫𑀼𑀕𑁆𑀕𑀧𑀭𑀺𑀧𑀼𑀭𑀺𑀢𑀧𑀼𑀧𑁆𑀨𑀳𑀢𑁆𑀣𑀸;

𑀅𑀜𑁆𑀜𑁂 𑀚𑀦𑀸 𑀲𑀼𑀭𑀪𑀺𑀘𑀼𑀡𑁆𑀡𑀪𑀭𑀁 𑀯𑀳𑀦𑁆𑀢𑀸,

𑀢𑀢𑁆𑀣𑁂𑀢𑀭𑁂 𑀥𑀢𑀯𑀺𑀘𑀺𑀢𑁆𑀢𑀫𑀳𑀸𑀢𑀧𑀢𑁆𑀢𑀸.

𑁩𑁯𑁨.

𑀮𑀗𑁆𑀓𑀺𑀲𑁆𑀲𑀭𑁄’𑀣 𑀲𑀲𑀺𑀧𑀡𑁆𑀟𑀭𑀯𑀸𑀚𑀺𑀬𑀼𑀢𑁆𑀢𑁂,

𑀉𑀚𑁆𑀚𑁄𑀢𑀺𑀢𑁂 𑀭𑀣𑀯𑀭𑁂 𑀭𑀢𑀦𑀧𑁆𑀧𑀪𑀸𑀳𑀺;

𑀥𑀸𑀢𑀼𑀁 𑀢𑀺𑀮𑁄𑀓𑀢𑀺𑀮𑀓𑀲𑁆𑀲 𑀧𑀢𑀺𑀝𑁆𑀞𑀧𑁂𑀢𑁆𑀯𑀸,

𑀏𑀢𑀁 𑀅𑀯𑁄𑀘 𑀯𑀘𑀦𑀁 𑀧𑀡𑀺𑀧𑀸𑀢𑀧𑀼𑀩𑁆𑀩𑀁.

𑁩𑁯𑁩.

𑀲𑀫𑁆𑀩𑁄𑀥𑀺𑀬𑀸 𑀇𑀯 𑀫𑀼𑀦𑀺𑀲𑁆𑀲𑀭 𑀩𑁄𑀥𑀺𑀫𑀡𑁆𑀟𑀁,

𑀕𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀺𑀯 𑀢𑀺𑀢𑁆𑀣𑀺𑀬𑀫𑀤𑁆𑀤𑀦𑀸𑀬;

𑀥𑀫𑁆𑀫𑀜𑁆𑀘 𑀲𑀁𑀯𑀺𑀪𑀚𑀺𑀢𑀼𑀁 𑀫𑀺𑀕𑀤𑀸𑀬𑀫𑀚𑁆𑀚,

𑀧𑀽𑀚𑀸𑀦𑀼𑀭𑀽𑀧𑀫𑀼𑀧𑀕𑀘𑁆𑀙 𑀲𑀬𑀁 𑀧𑀤𑁂𑀲𑀁.

𑁩𑁯𑁪. ¶

𑀭𑀸𑀚𑀸 𑀢𑀢𑁄 𑀲𑀫𑀼𑀘𑀺𑀢𑀸𑀘𑀭𑀡𑁂𑀲𑀼 𑀤𑀓𑁆𑀔𑁄,

𑀯𑀺𑀲𑁆𑀲𑀚𑁆𑀚𑀺 𑀨𑀼𑀲𑁆𑀲𑀭𑀣𑀫𑀝𑁆𑀞𑀺𑀢𑀲𑀸𑀭𑀣𑀺𑀁 𑀢𑀁;

𑀧𑀘𑁆𑀙𑀸 𑀲𑀬𑀁 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁,

𑀧𑀽𑀚𑀸𑀯𑀺𑀲𑁂𑀲𑀫𑀲𑀫𑀁 𑀅𑀕𑀫𑀸 𑀓𑀭𑁄𑀦𑁆𑀢𑁄.

𑁩𑁯𑁫.

𑀉𑀓𑁆𑀓𑀼𑀝𑁆𑀞𑀺𑀦𑀸𑀤𑀯𑀺𑀲𑀭𑁂𑀦 𑀫𑀳𑀸𑀚𑀦𑀲𑁆𑀲,

𑀳𑁂𑀲𑀸𑀭𑀯𑁂𑀦 𑀯𑀺𑀲𑀝𑁂𑀦 𑀢𑀼𑀭𑀗𑁆𑀕𑀫𑀸𑀦𑀁;

𑀪𑁂𑀭𑀻𑀭𑀯𑁂𑀦 𑀫𑀳𑀢𑀸 𑀓𑀭𑀺 𑀕𑀚𑁆𑀚𑀺𑀢𑁂𑀦,

𑀉𑀤𑁆𑀤𑀸𑀫𑀲𑀸𑀕𑀭 𑀲𑀫𑀁 𑀦𑀕𑀭𑀁 𑀅𑀳𑁄𑀲𑀺.

𑁩𑁯𑁬.

𑀆𑀫𑁄𑀤𑀺𑀢𑀸 𑀉𑀪𑀬𑀯𑀻𑀣𑀺𑀕𑀢𑀸 𑀓𑀼𑀮𑀺𑀢𑁆𑀣𑀺,

𑀯𑀸𑀢𑀸𑀬𑀦𑁂𑀳𑀺 𑀓𑀦𑀓𑀸𑀪𑀭𑀡𑁂 𑀔𑀺𑀧𑀺𑀁𑀲𑀼;

𑀲𑀩𑁆𑀩𑀢𑁆𑀣𑀓𑀁 𑀓𑀼𑀲𑀼𑀫𑀯𑀲𑁆𑀲𑀫𑀯𑀲𑁆𑀲𑀬𑀺𑀁𑀲𑀼,

𑀘𑁂𑀮𑀸𑀦𑀺𑀘𑁂𑀯 𑀪𑀫𑀬𑀺𑀁𑀲𑀼𑀦𑀺𑀚𑀼𑀢𑁆𑀢𑀫𑀗𑁆𑀕𑁂.

𑁩𑁯𑁭. ¶

𑀧𑀸𑀘𑀻𑀦𑀕𑁄𑀧𑀼𑀭𑀲𑀫𑀻𑀧𑀫𑀼𑀧𑀸𑀕𑀢𑀫𑁆𑀳𑀺,

𑀢𑀲𑁆𑀫𑀺𑀁 𑀭𑀣𑁂 𑀚𑀮𑀥𑀺𑀧𑀺𑀝𑁆𑀞𑀺𑀕𑀢𑁂’𑀯 𑀧𑁄𑀢𑁂;

𑀢𑀼𑀝𑁆𑀞𑀸 𑀢𑀳𑀺𑀁 𑀬𑀢𑀺𑀕𑀡𑀸 𑀫𑀦𑀼𑀚𑀸 𑀘 𑀲𑀩𑁆𑀩𑁂,

𑀲𑀫𑁆𑀧𑀼𑀚𑀬𑀺𑀁𑀲𑀼 𑀯𑀺𑀯𑀺𑀥𑁂𑀳𑀺 𑀉𑀧𑀸𑀬𑀦𑁂𑀳𑀺.

𑁩𑁯𑁮.

𑀓𑀢𑁆𑀯𑀸 𑀧𑀤𑀓𑁆𑀔𑀺𑀡𑀫𑀣𑁄 𑀧𑀼𑀭𑀫𑀼𑀢𑁆𑀢𑀭𑁂𑀦,

𑀤𑁆𑀯𑀸𑀭𑁂𑀦 𑀲𑁄 𑀭𑀣𑀯𑀭𑁄 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸;

𑀞𑀸𑀦𑁂 𑀫𑀳𑀺𑀦𑁆𑀤𑀫𑀺𑀦𑀼𑀥𑀫𑁆𑀫𑀓𑀣𑀸𑀧𑀯𑀺𑀢𑁆𑀢𑁂,

𑀅𑀝𑁆𑀞𑀸𑀲𑀺 𑀢𑀺𑀢𑁆𑀣𑀕𑀫𑀺𑀢𑀸 𑀇𑀯 𑀪𑀡𑁆𑀟𑀦𑀸𑀯𑀸.

𑁩𑁯𑁯.

𑀞𑀸𑀦𑁂 𑀢𑀳𑀺𑀁 𑀤𑀲𑀦𑀥𑀸𑀢𑀼𑀯𑀭𑀁 𑀚𑀺𑀦𑀲𑁆𑀲,

𑀮𑀗𑁆𑀓𑀺𑀲𑁆𑀲𑀭𑁄 𑀭𑀢𑀦𑀯𑀺𑀢𑁆𑀢𑀓𑀭𑀡𑁆𑀟𑀕𑀩𑁆𑀪𑀸;

𑀲𑀜𑁆𑀛𑀸𑀖𑀦𑀸 𑀇𑀯 𑀯𑀺𑀥𑀼𑀁 𑀩𑀳𑀺𑀦𑀻𑀳𑀭𑀺𑀢𑁆𑀯𑀸,

𑀤𑀲𑁆𑀲𑁂𑀲𑀺 𑀚𑀸𑀦𑀧𑀤 𑀦𑁂𑀕𑀫 𑀦𑀸𑀕𑀭𑀸𑀦𑀁.

𑁪𑁦𑁦. ¶

𑀢𑀲𑁆𑀫𑀺𑀁 𑀚𑀦𑁂 𑀲𑀧𑀤𑀺 𑀆𑀪𑀭𑀡𑀸𑀤𑀺𑀯𑀲𑁆𑀲,

𑀫𑀘𑁆𑀘𑀦𑁆𑀢𑀧𑀻𑀢𑀺𑀪𑀭𑀺𑀢𑁂 𑀅𑀪𑀺𑀯𑀲𑁆𑀲𑀬𑀦𑁆𑀢𑁂;

𑀲𑀸𑀦𑀦𑁆𑀤𑀺𑀯𑀦𑁆𑀤𑀺𑀚𑀦𑀫𑀗𑁆𑀕𑀮𑀕𑀻𑀢𑀓𑁂𑀳𑀺,

𑀲𑀫𑁆𑀧𑀸𑀤𑀺𑀢𑁂𑀲𑀼 𑀫𑀼𑀔𑀭𑁂𑀲𑀼 𑀤𑀺𑀲𑀸𑀫𑀼𑀔𑁂𑀲𑀼.

𑁪𑁦𑁧.

𑀳𑀢𑁆𑀣𑀸𑀭𑀯𑀺𑀦𑁆𑀤𑀦𑀺𑀯𑀳𑁂𑀲𑀼 𑀫𑀳𑀸𑀚𑀦𑀲𑁆𑀲,

𑀘𑀦𑁆𑀤𑁄𑀤𑀬𑁂’𑀘 𑀫𑀼𑀓𑀼𑀮𑀢𑁆𑀢𑀦𑀫𑀸𑀕𑀢𑁂𑀲𑀼;

𑀩𑁆𑀭𑀳𑁆𑀫𑀸𑀫𑀭𑀸𑀤𑀺𑀚𑀦𑀺𑀢𑀸𑀫𑀺𑀢 𑀲𑀸𑀥𑀼𑀯𑀸𑀤𑁂,

𑀢𑀸𑀭𑀸𑀧𑀣𑀫𑁆𑀳𑀺 𑀪𑀼𑀯𑀦𑁄𑀤𑀭 𑀫𑁄𑀢𑁆𑀣𑀭𑀦𑁆𑀢𑁂.

𑁪𑁦𑁨.

𑀲𑀸𑀤𑀦𑁆𑀢𑀥𑀸𑀢𑀼 𑀲𑀲𑀺𑀔𑀡𑁆𑀟 𑀲𑀫𑀸𑀦𑀯𑀡𑁆𑀡𑀸,

𑀭𑀁𑀲𑀻𑀳𑀺 𑀓𑀼𑀦𑁆𑀤 𑀦𑀯𑀘𑀦𑁆𑀤𑀦 𑀧𑀡𑁆𑀟𑀭𑁂𑀳𑀺;

𑀧𑀸𑀲𑀸𑀤 𑀕𑁄𑀧𑀼𑀭 𑀲𑀺𑀮𑀼𑀘𑁆𑀘𑀬 𑀧𑀸𑀤𑀧𑀸𑀤𑀺𑀁,

𑀦𑀺𑀤𑁆𑀥𑁄𑀢 𑀭𑀽𑀧𑀺𑀬𑀫𑀬𑀁’𑀯 𑀅𑀓𑀸 𑀔𑀡𑁂𑀦.

𑁪𑁦𑁩.

𑀢𑀁 𑀧𑀸𑀝𑀺𑀳𑀸𑀭𑀺𑀬 𑀫𑀘𑀺𑀦𑁆𑀢𑀺𑀬 𑀫𑀘𑁆𑀘𑀼𑀴𑀸𑀭𑀁,

𑀤𑀺𑀲𑁆𑀯𑀸𑀦 𑀓𑁂 𑀢𑀳𑀻𑀫𑀳𑁂𑀲𑀼 𑀫𑀳𑀝𑁆𑀞𑀮𑁄𑀫𑀸;

𑀓𑁂𑀯𑀸’𑀦𑀬𑀼𑀁 𑀲𑀓𑀲𑀓𑀸𑀪𑀭𑀡𑀸𑀦𑀺 𑀕𑁂𑀳𑀁,

𑀓𑁂𑀯𑀸 𑀦 𑀅𑀢𑁆𑀢𑀧𑀝𑀺𑀮𑀸𑀪𑀫𑀯𑀡𑁆𑀡𑀬𑀺𑀁𑀲𑀼.

𑁪𑁦𑁪. ¶

𑀓𑁂 𑀦𑁄𑀚𑀳𑀺𑀁𑀲𑀼 𑀲𑀓𑀤𑀺𑀝𑁆𑀞𑀺𑀫𑀮𑀸𑀦𑀼𑀩𑀤𑁆𑀥𑀁,

𑀓𑁂 𑀯𑀸 𑀦 𑀩𑀼𑀤𑁆𑀥𑀫𑀳𑀺𑀫𑀁 𑀅𑀪𑀺𑀧𑀢𑁆𑀣𑀬𑀺𑀁𑀲𑀼;

𑀓𑁂 𑀦𑀸𑀫 𑀫𑀘𑁆𑀙𑀭𑀺𑀬𑀧𑀸𑀲𑀯𑀲𑀸 𑀅𑀳𑁂𑀲𑀼𑀁,

𑀯𑀢𑁆𑀣𑀼𑀢𑁆𑀢𑀬𑀜𑁆𑀘 𑀲𑀭𑀡𑀁 𑀦𑀕𑀫𑀺𑀁𑀲𑀼 𑀓𑁂𑀯𑀸.

𑁪𑁦𑁫.

𑀮𑀗𑁆𑀓𑀺𑀲𑁆𑀲𑀭𑁄’𑀧𑀺 𑀦𑀯𑀮𑀓𑁆𑀔 𑀧𑀭𑀺𑀩𑁆𑀩𑀬𑁂𑀦,

𑀲𑀩𑁆𑀩𑀜𑁆𑀜𑀼𑀥𑀸𑀢𑀼𑀫𑀢𑀼𑀮𑀁 𑀅𑀪𑀺𑀧𑀽𑀚𑀬𑀺𑀢𑁆𑀯𑀸;

𑀢𑀁 𑀤𑀦𑁆𑀢𑀥𑀸𑀢𑀼𑀪𑀯𑀦𑀁 𑀧𑀼𑀦 𑀯𑀟𑁆𑀠𑀬𑀺𑀢𑁆𑀯𑀸,

𑀅𑀦𑁆𑀢𑁂𑀧𑀼𑀭𑀫𑁆𑀳𑀺 𑀧𑀝𑀺𑀯𑀸𑀲𑀭𑀫𑀘𑁆𑀘𑀬𑀺𑀢𑁆𑀣.

𑁪𑁦𑁬.

𑀥𑀸𑀢𑀼𑀁 𑀯𑀺𑀳𑀸𑀭𑀫𑀳𑀬𑀼𑀢𑁆𑀢𑀭𑀫𑁂𑀯 𑀦𑁂𑀢𑁆𑀯𑀸,

𑀧𑀽𑀚𑀁 𑀯𑀺𑀥𑀸𑀢𑀼𑀫𑀦𑀼𑀯𑀘𑁆𑀙𑀭𑀫𑁂𑀯𑀭𑀽𑀧𑀁;

𑀭𑀸𑀚𑀸’𑀣 𑀓𑀺𑀢𑁆𑀢𑀺𑀲𑀺𑀭𑀺𑀫𑁂𑀖𑀲𑀫𑀯𑁆𑀳𑀬𑁄 𑀲𑁄,

𑀯𑀸𑀭𑀺𑀢𑁆𑀢𑀮𑁂𑀔 𑀫𑀪𑀺𑀮𑁂𑀔𑀬𑀺 𑀲𑀘𑁆𑀘𑀲𑀦𑁆𑀥𑁄.

𑁪𑁦𑁭. ¶

𑀯𑀸𑀭𑀺𑀢𑁆𑀢𑀫𑁂𑀢𑀫𑀺𑀢𑀭𑁂’𑀧𑀺 𑀧𑀯𑀢𑁆𑀢𑀬𑀦𑁆𑀢𑀸,

𑀢𑁂 𑀩𑀼𑀤𑁆𑀥𑀤𑀸𑀲𑀧𑀫𑀼𑀔𑀸 𑀯𑀲𑀼𑀥𑀸𑀥𑀺𑀦𑀸𑀣𑀸;

𑀲𑀤𑁆𑀥𑀸𑀤𑀬𑀸𑀥𑀺𑀓𑀕𑀼𑀡𑀸𑀪𑀭𑀡𑀸𑀪𑀺𑀭𑀸𑀫𑀸,

𑀢𑀁 𑀲𑀓𑁆𑀓𑀭𑀺𑀁𑀲𑀼 𑀩𑀳𑀼𑀥𑀸 𑀚𑀺𑀦𑀤𑀦𑁆𑀢𑀥𑀸𑀢𑀼𑀁.

𑁪𑁦𑁮.

𑀲𑀢𑁆𑀣𑀸𑀭𑀸 𑀲𑀫𑁆𑀪𑀢𑀢𑁆𑀣𑀁 𑀧𑀼𑀭𑀺𑀫𑀢𑀭𑀪𑀯𑁂 𑀲𑀫𑁆𑀧𑀚𑀸𑀦𑀁 𑀧𑀚𑀸𑀦𑀁,

𑀲𑀫𑁆𑀩𑁄𑀥𑀺𑀁 𑀢𑀲𑁆𑀲 𑀲𑀩𑁆𑀩𑀸𑀲𑀯𑀯𑀺𑀕𑀫𑀓𑀭𑀺𑀁 𑀲𑀤𑁆𑀤𑀳𑀦𑁆𑀢𑁄’𑀤𑀳𑀦𑁆𑀢𑁄;

𑀲𑁄𑀢𑀁 𑀢𑀲𑁆𑀲’𑀕𑁆𑀕𑀥𑀫𑁆𑀫𑁂 𑀦𑀺𑀧𑀼𑀡𑀫𑀢𑀺 𑀲𑀢𑀁 𑀲𑀗𑁆𑀕𑀫𑁂𑀲𑀗𑁆𑀕𑀫𑁂𑀲𑀁,

𑀦𑀺𑀩𑁆𑀩𑀸𑀡𑀁 𑀲𑀦𑁆𑀢𑀫𑀺𑀘𑁆𑀙𑁂 𑀢𑀺𑀪𑀯𑀪𑀬𑀧𑀭𑀺𑀘𑁆𑀘𑀸𑀕𑀳𑁂𑀢𑀼𑀁 𑀕𑀳𑁂𑀢𑀼𑀁.

𑀧𑀜𑁆𑀘𑀫𑁄 𑀧𑀭𑀺𑀘𑁆𑀙𑁂𑀤𑁄.

𑁪𑁦𑁯. ¶

𑀬𑁄 𑀘𑀦𑁆𑀤𑀕𑁄𑀫𑀺 𑀭𑀘𑀺𑀢𑁂𑀯𑀭𑀲𑀤𑁆𑀤𑀲𑀢𑁆𑀣𑁂,

𑀝𑀻𑀓𑀁 𑀧𑀲𑀢𑁆𑀣𑀫𑀓𑀭𑀺𑀢𑁆𑀣 𑀘 𑀧𑀜𑁆𑀘𑀺𑀓𑀸𑀬;

𑀩𑀼𑀤𑁆𑀥𑀧𑁆𑀧𑀪𑀸𑀯𑀚𑀦 𑀦𑀺𑀁𑀘 𑀅𑀓𑀸 𑀲𑀫𑀦𑁆𑀢,

𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀝𑀻𑀓𑀁.

𑁪𑁧𑁦.

𑀅𑀗𑁆𑀕𑀼𑀢𑁆𑀢𑀭𑀸𑀕𑀫𑀯𑀭𑀝𑁆𑀞𑀓𑀣𑀸𑀬 𑀝𑀻𑀓𑀁,

𑀲𑀫𑁆𑀫𑁄𑀪𑀯𑀺𑀩𑁆𑀪𑀫 𑀯𑀺𑀖𑀸𑀢𑀓𑀭𑀺𑀁 𑀅𑀓𑀸𑀲𑀺;

𑀅𑀢𑁆𑀣𑀸𑀬 𑀲𑀁𑀬𑀫𑀺𑀕𑀡𑀲𑁆𑀲 𑀧𑀥𑀸𑀦𑀺𑀓𑀲𑁆𑀲,

𑀕𑀦𑁆𑀣𑀁 𑀅𑀓𑀸 𑀯𑀺𑀦𑀬𑀲𑀗𑁆𑀕𑀳𑀦𑀸𑀫𑀥𑁂𑀬𑁆𑀬𑀁.

𑁪𑁧𑁧.

𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑀧𑀝𑀺𑀧𑀢𑁆𑀢𑀺 𑀧𑀭𑀸𑀬𑀡𑀲𑁆𑀲,

𑀲𑀮𑁆𑀮𑁂𑀔 𑀯𑀼𑀢𑁆𑀢𑀺 𑀦𑀺𑀭𑀢𑀲𑁆𑀲 𑀲𑀫𑀸𑀳𑀺𑀢𑀲𑁆𑀲;

𑀅𑀧𑁆𑀧𑀺𑀘𑁆𑀙𑀢𑀸𑀤𑀺 𑀕𑀼𑀡𑀬𑁄𑀕 𑀯𑀺𑀪𑀼𑀲𑀦𑀲𑁆𑀲,

𑀲𑀫𑁆𑀩𑀼𑀤𑁆𑀥𑀲𑀸𑀲𑀦𑀫𑀳𑁄𑀤𑀬𑀓𑀸𑀭𑀡𑀲𑁆𑀲.

𑁪𑁧𑁨. ¶

𑀲𑀩𑁆𑀩𑁂𑀲𑀼𑀆𑀘𑀭𑀺𑀬𑀢𑀁 𑀧𑀭𑀫𑀁 𑀕𑀢𑀲𑁆𑀲,

𑀲𑀢𑁆𑀣𑁂𑀲𑀼 𑀲𑀩𑁆𑀩𑀲𑀫𑀬𑀦𑁆𑀢𑀭 𑀓𑁄𑀯𑀺𑀤𑀲𑁆𑀲;

𑀲𑀺𑀲𑁆𑀲𑁂𑀦𑀲𑀸𑀭𑀺𑀢𑀦𑀼𑀚𑀲𑁆𑀲 𑀫𑀳𑀸𑀤𑀺𑀲𑀸𑀫𑀺.

𑁪𑁧𑁩.

𑀲𑀼𑀤𑁆𑀥𑀦𑁆𑀯𑀬𑁂𑀦 𑀓𑀭𑀼𑀡𑀸𑀤𑀺𑀕𑀼𑀡𑁄𑀤𑀬𑁂𑀦,

𑀢𑀓𑁆𑀓𑀸𑀕𑀫𑀸𑀤𑀺 𑀓𑀼𑀲𑀮𑁂𑀦 𑀯𑀺𑀲𑀸𑀭𑀤𑁂𑀦;

𑀲𑀩𑁆𑀩𑀢𑁆𑀣 𑀧𑀢𑁆𑀣𑀝 𑀲𑀼𑀥𑀸𑀓𑀭𑀭𑀁𑀲𑀺𑀚𑀸𑀮,

𑀲𑀗𑁆𑀓𑀸𑀲𑀓𑀺𑀢𑁆𑀢𑀺𑀯𑀺𑀲𑀭𑁂𑀦 𑀧𑀭𑀺𑀓𑁆𑀔𑀓𑁂𑀦.

𑁪𑁧𑁪. ¶

𑀲𑀤𑁆𑀥𑀸𑀥𑀦𑁂𑀦 𑀲𑀔𑀺𑀮𑁂𑀦 𑀘 𑀥𑀫𑁆𑀫𑀓𑀺𑀢𑁆𑀢𑀺,

𑀦𑀸𑀫𑁂𑀦 𑀭𑀸𑀚𑀕𑀭𑀼𑀦𑀸 𑀘𑀭𑀺𑀬𑁂𑀦 𑀏𑀲𑁄;

𑀲𑁄𑀢𑀼𑀧𑁆𑀧𑀲𑀸𑀤𑀚𑀦𑀦𑁄 𑀚𑀺𑀦𑀤𑀦𑁆𑀢𑀥𑀸𑀢𑀼,

𑀯𑀁𑀲𑁄 𑀓𑀢𑁄 𑀦𑀺𑀔𑀺𑀮𑀤𑀲𑁆𑀲𑀺𑀧𑀪𑀸𑀯𑀤𑀻𑀧𑁄.

𑁪𑁧𑁫.

𑀥𑀫𑁆𑀫𑁄 𑀧𑀯𑀢𑁆𑀢𑀢𑀼 𑀘𑀺𑀭𑀸𑀬 𑀫𑀼𑀦𑀺𑀲𑁆𑀲𑀭𑀲𑁆𑀲,

𑀥𑀫𑁆𑀫𑁂 𑀞𑀺𑀢𑀸 𑀯𑀲𑀼𑀫𑀢𑀻𑀧𑀢𑀬𑁄 𑀪𑀯𑀦𑁆𑀢𑀼;

𑀓𑀸𑀮𑁂 𑀧𑀯𑀲𑁆𑀲𑀢𑀼 𑀖𑀦𑁄 𑀦𑀺𑀔𑀺𑀮𑀸 𑀧𑀚𑀸’𑀧𑀺,

𑀅𑀜𑁆𑀜𑁄𑀜𑁆𑀜𑀫𑁂𑀢𑁆𑀢𑀺𑀧𑀝𑀺𑀮𑀸𑀪𑀲𑀼𑀔𑀁 𑀮𑀪𑀦𑁆𑀢𑀼.