📜

𑀥𑀸𑀢𑀼𑀯𑀁𑀲𑁄 ¶

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑁧. 𑀢𑀣𑀸𑀕𑀢𑀲𑁆𑀲𑀸𑀕𑀫𑀦𑀓𑀣𑀸

𑀲𑀫𑁆𑀩𑀼𑀤𑁆𑀥𑀫𑀢𑀼𑀮𑀁 𑀲𑀼𑀤𑁆𑀥𑀁 𑀥𑀫𑁆𑀫𑀁 𑀲𑀗𑁆𑀖𑀁 𑀅𑀦𑀼𑀢𑁆𑀢𑀭𑀁,

𑀦𑀫𑀲𑁆𑀲𑀺𑀢𑁆𑀯𑀸 𑀧𑀯𑀓𑁆𑀔𑀸𑀫𑀺 𑀥𑀸𑀢𑀼𑀯𑀁𑀲𑀧𑁆𑀧𑀓𑀸𑀲𑀦𑀁;

𑀢𑀺𑀓𑁆𑀔𑀢𑁆𑀢𑀼𑀫𑀕𑀫𑀸 𑀦𑀸𑀣𑁄 𑀮𑀗𑁆𑀓𑀸𑀤𑀻𑀧𑀁 𑀫𑀦𑁄𑀭𑀫𑀁,

𑀲𑀢𑁆𑀢𑀸𑀦𑀁 𑀳𑀺𑀢𑀫𑀺𑀘𑁆𑀙𑀦𑁆𑀢𑁄 𑀲𑀸𑀲𑀦𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀁.

𑀢𑀢𑁆𑀣 𑀢𑀺𑀓𑁆𑀔𑀢𑁆𑀢𑀼𑀫𑀕𑀫𑀸 𑀦𑀸𑀣𑁄’𑀢𑀺 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑀯𑀝𑁆𑀝𑁂 𑀧𑀭𑀺𑀦𑀸𑀫𑁂𑀢𑁆𑀯𑀸 𑀅𑀧𑁆𑀧𑀢𑀺𑀲𑀭𑀡𑀪𑀸𑀯𑀧𑁆𑀧𑀢𑁆𑀢𑀸𑀦𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀼𑀔𑀦𑀺𑀧𑁆𑀨𑀸𑀤𑀦𑀪𑀸𑀯𑁂𑀦 𑀦𑀸𑀣𑁄 𑀧𑀢𑀺𑀲𑀭𑀡 𑀪𑀽𑀢𑁄 𑀪𑀕𑀯𑀸 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀭𑀢𑀦𑀢𑁆𑀢𑀬𑀫𑀕𑁆𑀕𑀁 𑀆𑀘𑀺𑀓𑁆𑀔𑀦𑁆𑀢𑁄 𑀮𑀗𑁆𑀓𑀸𑀤𑀻𑀧𑀁 𑀢𑀺𑀓𑁆𑀔𑀢𑁆𑀢𑀼𑀁 𑀕𑀢𑁄. 𑀢𑀢𑁆𑀣 𑀧𑀞𑀫𑀕𑀫𑀦𑁂 𑀢𑀸𑀯 𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀧𑀼𑀭𑀢𑁆𑀣𑀻𑀫𑀸𑀪𑀺𑀫𑀼𑀔𑁄 𑀦𑀺𑀲𑀻𑀤𑀺𑀢𑁆𑀯𑀸 𑀲𑀽𑀭𑀺𑀬𑁂 𑀅𑀦𑀢𑁆𑀣𑀫𑀺𑀢𑁂𑀬𑁂𑀯 𑀫𑀸𑀭𑀩𑀮𑀁 𑀯𑀺𑀥𑀫𑁂𑀢𑁆𑀯𑀸, 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀘𑀼𑀢𑀼𑀧𑀧𑀸𑀢𑀜𑀸𑀡𑀁 𑀧𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑀸𑀯𑀲𑀸𑀦𑁂 𑀧𑀘𑁆𑀘𑀬𑀸𑀓𑀸𑀭𑁂 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸 𑀤𑀲𑀩𑀮𑀘𑀢𑀼𑀯𑁂𑀲𑀸𑀭𑀚𑁆𑀚𑀸𑀤𑀺 𑀕𑀼𑀡𑀧𑀢𑀺𑀫𑀡𑁆𑀟𑀺𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑀧𑁆𑀧𑀤𑁂𑀲𑁂 𑀅𑀦𑀼𑀓𑁆𑀓𑀫𑁂𑀦 𑀲𑀢𑁆𑀢𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀦𑀺𑀲𑀺𑀦𑁆𑀦𑁄 𑀥𑀫𑁆𑀫𑀕𑀫𑁆𑀪𑀺𑀭𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁂𑀦 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀁 𑀆𑀧𑀚𑁆𑀚𑀫𑀸𑀦𑁄 𑀤𑀲𑀲𑀳𑀲𑁆𑀲 𑀩𑁆𑀭𑀳𑁆𑀫𑀧𑀭𑀺𑀯𑀸𑀭𑁂𑀦 𑀲𑀳𑀫𑁆𑀧𑀢𑀺𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀆𑀬𑀸𑀘𑀺𑀢𑀥𑀫𑁆𑀫𑀤𑁂𑀲𑀦𑁄 𑀳𑀼𑀢𑁆𑀯𑀸 ¶ 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀑𑀮𑁄𑀓𑁂𑀦𑁆𑀢𑁄 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀪𑀺𑀓𑁆𑀔𑀼𑀦𑀁 𑀩𑀳𑀽𑀧𑀓𑀸𑀭𑀓𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀓𑀸𑀲𑀻𑀦𑀁 𑀧𑀼𑀭𑀁 𑀕𑀦𑁆𑀢𑁆𑀯𑀸 𑀅𑀜𑁆𑀜𑀸𑀓𑁄𑀡𑀟𑀜𑁆𑀜𑀧𑁆𑀧𑀫𑀼𑀔𑁂 𑀅𑀝𑁆𑀞𑀸𑀭𑀲 𑀩𑁆𑀭𑀳𑁆𑀫𑀓𑁄𑀝𑀺𑀬𑁄 𑀅𑀫𑀢𑀁 𑀧𑀸𑀬𑁂𑀦𑁆𑀢𑁄 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑁆𑀯𑀸 𑀧𑀓𑁆𑀔𑀲𑁆𑀲 𑀧𑀜𑁆𑀘𑀫𑀺𑀬𑀁 𑀧𑀜𑁆𑀘𑀯𑀕𑁆𑀕𑀺𑀬𑁂 𑀲𑀩𑁆𑀩𑁂𑀧𑀺 𑀢𑁂 𑀅𑀭𑀳𑀦𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀁 𑀤𑀺𑀯𑀲𑀫𑁂𑀯 𑀬𑀲𑀓𑀼𑀮𑀧𑀼𑀢𑁆𑀢𑀲𑁆𑀲 𑀭𑀢𑁆𑀢𑀺𑀪𑀸𑀕𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀤𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀅𑀭𑀳𑀦𑁆𑀢𑀁 𑀤𑀢𑁆𑀯𑀸 𑀢𑀲𑁆𑀲 𑀲𑀳𑀸𑀬𑀓𑁂 𑀘𑀢𑀼𑀧𑀜𑁆𑀜𑀸𑀲𑀚𑀦𑁂 𑀅𑀭𑀳𑀦𑁆𑀢𑀁 𑀧𑀸𑀧𑁂𑀢𑁆𑀯𑀸 𑀏𑀯𑀁 𑀮𑁄𑀓𑁂 𑀏𑀓𑀲𑀝𑁆𑀞𑀺𑀬𑀸 𑀅𑀭𑀳𑀦𑁆𑀢𑁂𑀲𑀼 𑀚𑀸𑀢𑁂𑀲𑀼 𑀯𑀼𑀢𑁆𑀣𑀯𑀲𑁆𑀲𑁄 𑀧𑀯𑀸𑀭𑁂𑀢𑁆𑀯𑀸, ‘𑀘𑀭𑀣 𑀪𑀺𑀓𑁆𑀔𑀯𑁂 𑀘𑀸𑀭𑀺𑀓’ 𑀦𑁆𑀢𑀺 𑀪𑀺𑀓𑁆𑀔𑀼 𑀤𑀺𑀲𑀸𑀲𑀼 𑀧𑁂𑀲𑁂𑀢𑁆𑀯𑀸 𑀲𑀬𑀁 𑀉𑀭𑀼𑀯𑁂𑀮𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑀧𑁆𑀧𑀸𑀲𑀺𑀓𑀯𑀦𑀲𑀡𑁆𑀟𑁂 𑀪𑀤𑁆𑀤𑀯𑀕𑁆𑀕𑀺𑀬𑁂 𑀓𑀼𑀫𑀸𑀭𑁂 𑀢𑀺𑀁𑀲𑀚𑀦𑁂 𑀯𑀺𑀦𑁂𑀢𑁆𑀯𑀸 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦 𑀧𑀩𑁆𑀩𑀸𑀚𑁂𑀢𑁆𑀯𑀸 𑀉𑀭𑀼𑀯𑁂𑀮𑀁 𑀕𑀦𑁆𑀢𑁆𑀯𑀸 𑀅𑀟𑁆𑀠𑀼𑀟𑁆𑀠𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀲𑀳𑀲𑁆𑀲𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀸𑀤𑀬𑁄 𑀲𑀳𑀲𑁆𑀲𑀚𑀝𑀺𑀮𑀧𑀭𑀺𑀯𑀸𑀭𑁂 𑀢𑁂𑀪𑀸𑀢𑀺𑀓𑀚𑀝𑀺𑀮𑁂 𑀯𑀺𑀦𑁂𑀦𑁆𑀢𑁄 𑀢𑀢𑁆𑀣𑁂𑀯 𑀯𑀺𑀳𑀸𑀲𑀺. 𑀅𑀧𑀭𑀪𑀸𑀕𑁂 𑀅𑀗𑁆𑀕𑀫𑀕𑀥𑀭𑀝𑁆𑀞𑀯𑀸𑀲𑀺𑀦𑁄 𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀫𑀳𑀸𑀬𑀜𑁆𑀜𑀁 𑀉𑀧𑀝𑁆𑀞𑀸𑀧𑁂𑀲𑀼𑀁. 𑀲𑁄 𑀧𑀦 𑀇𑀘𑁆𑀙𑀸𑀘𑀸𑀭𑀸𑀪𑀺𑀪𑀽𑀢𑁄 𑀘𑀺𑀦𑁆𑀢𑁂𑀲𑀺? ‘‘𑀲𑀘𑀸𑀬𑀁 𑀫𑀳𑀸𑀲𑀫𑀡𑁄 𑀇𑀫𑀲𑁆𑀲 𑀲𑀫𑀸𑀕𑀫𑀲𑁆𑀲 𑀫𑀚𑁆𑀛𑁂 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁂𑀬𑁆𑀬 𑀮𑀸𑀪𑀲𑀓𑁆𑀓𑀸𑀭𑁄 𑀫𑁂 𑀧𑀭𑀺𑀳𑀸𑀬𑀺𑀲𑁆𑀲𑀢𑀺’’𑀢𑀺. 𑀢𑀲𑁆𑀲𑁂𑀯𑀁 𑀧𑀯𑀢𑁆𑀢𑀅𑀚𑁆𑀛𑀸𑀲𑀬𑀁 𑀜𑀢𑁆𑀯𑀸 𑀧𑀸𑀢𑁄𑀯 𑀉𑀢𑁆𑀢𑀭𑀓𑀼𑀭𑀼𑀢𑁄 𑀪𑀺𑀓𑁆𑀔𑀁 𑀆𑀳𑀭𑀺𑀢𑁆𑀯𑀸 𑀅𑀦𑁄𑀢𑀢𑁆𑀢𑁂 𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀸𑀬𑀦𑁆𑀳 𑀲𑀫𑀬𑁂 𑀨𑀼𑀲𑁆𑀲𑀧𑀼𑀡𑁆𑀡𑀫𑀻𑀉𑀧𑁄𑀲𑀣𑀤𑀺𑀯𑀲𑁂 𑀮𑀗𑁆𑀓𑀸𑀤𑀻𑀧𑀲𑁆𑀲𑀢𑁆𑀣𑀸𑀬 𑀮𑀗𑁆𑀓𑀸𑀤𑀻𑀧𑀫𑀼𑀧𑀸𑀕𑀫𑀺.

𑀢𑀲𑁆𑀲 𑀧𑀦 𑀤𑀻𑀧𑀲𑁆𑀲 𑀫𑀳𑀸𑀕𑀗𑁆𑀕𑀸𑀬 𑀤𑀓𑁆𑀔𑀺𑀡𑀧𑀲𑁆𑀲𑁂 𑀆𑀬𑀸𑀫𑀢𑁄 𑀢𑀺𑀬𑁄𑀚𑀦𑁂 𑀧𑀼𑀣𑀼𑀮𑀢𑁄 𑀏𑀓𑀬𑁄𑀚𑀦𑀧𑁆𑀧𑀫𑀸𑀡𑁂 𑀫𑀳𑀸𑀦𑀸𑀕𑀯𑀦𑀼𑀬𑁆𑀬𑀸𑀦𑁂 𑀬𑀓𑁆𑀔𑀲𑀫𑀸𑀕𑀫𑀲𑁆𑀲 𑀫𑀚𑁆𑀛𑁂 𑀢𑀲𑁆𑀲 𑀉𑀧𑀭𑀺 𑀫𑀳𑀺𑀬𑀗𑁆𑀕𑀡𑀣𑀽𑀧𑀲𑁆𑀲 𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑁂 𑀆𑀓𑀸𑀲𑁂𑀬𑁂𑀯 𑀞𑀻𑀢𑁄 𑀯𑀼𑀝𑁆𑀞𑀺𑀯𑀸𑀢𑀦𑁆𑀥𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂𑀲𑀁 𑀪𑀬𑀁 𑀉𑀧𑁆𑀧𑀸𑀤𑁂𑀲𑀺. 𑀢𑁂 𑀪𑀬𑁂𑀦 𑀉𑀧𑀤𑁆𑀤𑀼𑀢𑀸 ‘‘𑀓𑀲𑁆𑀲 𑀦𑀼 𑀔𑁄 𑀇𑀫𑀁 𑀓𑀫𑁆𑀫’’𑀦𑁆𑀢𑀺 𑀇𑀢𑁄 𑀘𑀺𑀢𑁄 𑀑𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲𑀁𑀲𑀼 𑀪𑀕𑀯𑀦𑁆𑀢𑀁 𑀆𑀓𑀸𑀲𑁂 𑀦𑀺𑀲𑀺𑀦𑁆𑀦𑀁. 𑀤𑀺𑀲𑁆𑀯𑀸𑀦 𑀪𑀕𑀯𑀦𑁆𑀢𑀁 𑀅𑀪𑀬𑀁 𑀬𑀸𑀯𑀺𑀁𑀲𑀼. 𑀢𑁂𑀲𑀁 𑀪𑀕𑀯𑀸 𑀆𑀳?

‘‘𑀲𑀘𑁂 ¶ 𑀢𑀼𑀫𑁆𑀳𑁂 𑀅𑀪𑀬𑀁 𑀇𑀘𑁆𑀙𑀣 𑀫𑀬𑁆𑀳𑀁 𑀦𑀺𑀲𑀚𑁆𑀚𑀝𑁆𑀞𑀸𑀦𑀲𑁆𑀲 𑀑𑀓𑀸𑀲𑀁 𑀤𑁂𑀣𑀸’’𑀢𑀺. 𑀲𑀩𑁆𑀩𑁂𑀧𑀺 𑀢𑁂 𑀢𑀲𑁆𑀲 𑀦𑀺𑀲𑀚𑁆𑀚𑀝𑁆𑀞𑀸𑀦𑀁 𑀅𑀤𑀁𑀲𑀼. 𑀪𑀕𑀯𑀸 𑀦𑀺𑀲𑀚𑁆𑀚𑀸𑀬 𑀑𑀓𑀸𑀲𑀁 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀪𑀬𑀁 𑀯𑀺𑀦𑁄𑀤𑁂𑀢𑁆𑀯𑀸 𑀢𑁂𑀳𑀺 𑀤𑀺𑀦𑁆𑀦𑁂 𑀪𑀼𑀫𑀺𑀪𑀸𑀕𑁂 𑀘𑀫𑁆𑀫𑀔𑀡𑁆𑀟𑀁 𑀧𑀢𑁆𑀣𑀭𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀦𑀺𑀲𑀺𑀦𑁆𑀦𑁄𑀯 𑀧𑀦 𑀪𑀕𑀯𑀸 𑀘𑀫𑁆𑀫𑀔𑀡𑁆𑀟𑀁 𑀧𑀲𑀸𑀭𑁂𑀲𑀺. 𑀢𑁂 𑀬𑀓𑁆𑀔𑀸 𑀪𑀻𑀢𑀢𑀲𑀺𑀢𑀸 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀅𑀲𑀳𑀫𑀸𑀦𑀸 𑀲𑀫𑀦𑁆𑀢𑀢𑁄 𑀲𑀸𑀕𑀭𑀢𑀻𑀭𑁂 𑀭𑀸𑀲𑀺𑀪𑀽𑀢𑀸 𑀅𑀳𑁂𑀲𑀼𑀁. 𑀲𑀢𑁆𑀣𑀸 𑀕𑀺𑀭𑀺𑀤𑀻𑀧𑀁 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀢𑁂𑀲𑀼 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑁂𑀲𑀼 𑀧𑀼𑀦 𑀬𑀣𑀸𑀝𑁆𑀞𑀸𑀦𑁂𑀯 𑀞𑀧𑁂𑀢𑁆𑀯𑀸 𑀧𑀢𑁆𑀣𑀭𑀺𑀢𑀘𑀫𑁆𑀫𑀔𑀡𑁆𑀟𑀫𑁆𑀧𑀺 𑀲𑀁𑀔𑀺𑀧𑀺. 𑀢𑀲𑁆𑀫𑀺𑀁 𑀔𑀡𑁂 𑀢𑀢𑁄 𑀢𑀢𑁄 𑀤𑁂𑀯𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑁂𑀲𑀁 𑀲𑀫𑀸𑀕𑀫𑁂 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀅𑀦𑁂𑀓𑁂𑀲𑀁 𑀧𑀸𑀡𑀓𑁄𑀝𑀻𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀺𑀢𑀸 𑀅𑀲𑀗𑁆𑀔𑁂𑀬𑁆𑀬𑀸 𑀅𑀳𑁂𑀲𑀼𑀁. 𑀲𑀼𑀫𑀦𑀓𑀽𑀝𑁂 𑀧𑀦 𑀫𑀳𑀸𑀲𑀼𑀫𑀦𑀤𑁂𑀯𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀯𑀸 𑀅𑀢𑁆𑀢𑀦𑁄 𑀧𑀽𑀚𑀦𑀻𑀬𑀁 𑀪𑀕𑀯𑀦𑁆𑀢𑀁 𑀬𑀸𑀘𑀺. 𑀪𑀕𑀯𑀸 𑀢𑁂𑀦 𑀬𑀸𑀘𑀺𑀢𑁄 𑀲𑀻𑀲𑀁 𑀧𑀸𑀡𑀺𑀦𑀸 𑀧𑀭𑀸𑀫𑀲𑀺𑀢𑁆𑀯𑀸 𑀓𑁂𑀲𑀥𑀸𑀢𑀼𑀁𑀕𑀳𑁂𑀢𑁆𑀯𑀸 𑀢𑀲𑁆𑀲 𑀅𑀤𑀸𑀲𑀺. 𑀤𑀢𑁆𑀯𑀸 𑀘 𑀧𑀦 𑀮𑀗𑁆𑀓𑀸𑀤𑀻𑀧𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀭𑀺𑀢𑁆𑀢𑀁 𑀓𑀢𑁆𑀯𑀸 𑀆𑀭𑀓𑁆𑀔𑀁 𑀲𑀁𑀯𑀺𑀥𑀸𑀬 𑀧𑀼𑀦 𑀉𑀭𑀼𑀯𑁂𑀮𑀫𑁂𑀯 𑀆𑀕𑀢𑁄. 𑀲𑁄 𑀧𑀦 𑀓𑁂𑀲𑀥𑀸𑀢𑀼𑀬𑁄 𑀲𑀼𑀯𑀡𑁆𑀡𑀘𑀗𑁆𑀕𑁄𑀝𑀓𑁂𑀦𑀸𑀤𑀸𑀬 𑀲𑀢𑁆𑀣𑀼 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂 𑀦𑀸𑀦𑀸𑀭𑀢𑀦𑁂𑀳𑀺 𑀯𑀺𑀘𑀺𑀢𑁆𑀢𑀁 𑀣𑀽𑀧𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀉𑀧𑀭𑀺 𑀇𑀦𑁆𑀤𑀦𑀻𑀮𑀫𑀡𑀺𑀣𑀽𑀧𑀺𑀓𑀸𑀳𑀺 𑀧𑀺𑀤𑀳𑀺𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀦𑁆𑀢𑁄 𑀯𑀺𑀳𑀸𑀲𑀺. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀧𑀦 𑀪𑀕𑀯𑀢𑀺 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑁄 𑀲𑀭𑀪𑀽 𑀦𑀸𑀫 𑀣𑁂𑀭𑁄 𑀔𑀻𑀡𑀸𑀲𑀯𑁄 𑀘𑀺𑀢𑀓𑀢𑁄 𑀇𑀤𑁆𑀥𑀺𑀬𑀸 𑀢𑀣𑀸𑀕𑀢𑀲𑁆𑀲 𑀕𑀻𑀯𑀝𑁆𑀞𑀺𑀁 𑀆𑀤𑀸𑀬 𑀢𑀲𑁆𑀫𑀺𑀁 𑀇𑀦𑁆𑀤𑀦𑀻𑀮𑀫𑀡𑀺𑀣𑀽𑀧𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀫𑁂𑀖𑀯𑀡𑁆𑀡𑀧𑀸𑀲𑀸𑀡𑁂𑀳𑀺 𑀤𑁆𑀯𑀸𑀤𑀲𑀳𑀢𑁆𑀣𑀁 𑀣𑀽𑀧𑀁 𑀓𑀸𑀭𑀸𑀧𑁂𑀢𑁆𑀯𑀸 𑀕𑀢𑁄. 𑀢𑀢𑁄 𑀤𑁂𑀯𑀸𑀦𑀫𑁆𑀧𑀺𑀬𑀢𑀺𑀲𑁆𑀲𑀭𑀜𑁆𑀜𑁄 𑀪𑀸𑀢𑀸 𑀘𑀽𑀴𑀸𑀪𑀬𑁄 𑀦𑀸𑀫 𑀓𑀼𑀫𑀸𑀭𑁄 𑀢𑀫𑀩𑁆𑀪𑀼𑀢𑀁 𑀘𑁂𑀢𑀺𑀬𑀁 𑀤𑀺𑀲𑁆𑀯𑀸 𑀅𑀪𑀺𑀧𑁆𑀧𑀲𑀦𑁆𑀦𑁄 𑀢𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄 𑀢𑀺𑀁𑀲𑀳𑀢𑁆𑀣𑀁 𑀘𑁂𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀧𑀼𑀦 𑀤𑀼𑀝𑁆𑀞𑀕𑀸𑀫𑀡𑀻 𑀅𑀪𑀬𑀫𑀳𑀸𑀭𑀸𑀚𑀸 𑀢𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀲𑀻𑀢𑀺𑀳𑀢𑁆𑀣𑀁 𑀓𑀜𑁆𑀘𑀼𑀓𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀲𑀺. 𑀫𑀳𑀺𑀬𑀗𑁆𑀕𑀡 ¶ 𑀣𑀽𑀧𑀲𑁆𑀲 𑀧𑀢𑀺𑀝𑁆𑀞𑀸𑀦𑀸𑀥𑀺𑀓𑀸𑀭𑁄 𑀏𑀯𑀁 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑁄?

𑀩𑁄𑀥𑀺𑀁 𑀧𑀢𑁆𑀯𑀸𑀦 𑀲𑀫𑁆𑀩𑀼𑀤𑁆𑀥𑁄 𑀩𑁄𑀥𑀺𑀫𑀽𑀮𑁂 𑀦𑀭𑀸𑀲𑀪𑁄

𑀦𑀺𑀲𑀻𑀤𑀺𑀢𑁆𑀯𑀸𑀦 𑀲𑀢𑁆𑀢𑀸𑀳𑀁 𑀧𑀸𑀝𑀺𑀳𑀻𑀭𑀁 𑀢𑀢𑁄 𑀅𑀓𑀸.

𑀢𑀢𑁄 𑀧𑀼𑀩𑁆𑀩𑀼𑀢𑁆𑀢𑀭𑁂 𑀞𑀢𑁆𑀯𑀸 𑀧𑀮𑁆𑀮𑀗𑁆𑀓𑀸 𑀈𑀲𑀓𑁂 𑀚𑀺𑀦𑁄

𑀅𑀦𑀺𑀫𑀺𑀲𑁂𑀦 𑀦𑁂𑀢𑁆𑀢𑁂𑀦 𑀲𑀢𑁆𑀢𑀸𑀳𑀁 𑀢𑀁 𑀉𑀤𑀺𑀓𑁆𑀔𑀬𑀺.

𑀘𑀗𑁆𑀓𑀫𑀺𑀢𑁆𑀯𑀸𑀦 𑀲𑀢𑁆𑀢𑀸𑀳𑀁 𑀘𑀓𑁆𑀔𑀫𑁂 𑀭𑀢𑀦𑀸𑀫𑀬𑁂

𑀯𑀺𑀘𑀺𑀦𑀺𑀢𑁆𑀯𑀸 𑀚𑀺𑀦𑁄 𑀥𑀫𑁆𑀫𑀁 𑀯𑀭𑀁 𑀲𑁄 𑀭𑀢𑀦𑀸𑀖𑀭𑁂.

𑀅𑀚𑀧𑀸𑀮𑀫𑁆𑀳𑀺 𑀲𑀢𑁆𑀢𑀸𑀳𑀁 𑀅𑀦𑀼𑀪𑁄𑀲𑀺 𑀲𑀫𑀸𑀥𑀺𑀚𑀁

𑀭𑀫𑁆𑀫𑁂 𑀘 𑀫𑀼𑀘𑀮𑀺𑀦𑁆𑀤𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀺𑀲𑀼𑀔𑀫𑀼𑀢𑁆𑀢𑀫𑀁.

𑀭𑀸𑀚𑀸𑀬𑀢𑀦𑀫𑀽𑀮𑀫𑁆𑀳𑀺 𑀲𑀢𑁆𑀢𑀭𑀢𑁆𑀢𑀺𑀦𑁆𑀤𑀺𑀯𑀁 𑀯𑀲𑀻

𑀤𑀦𑁆𑀢𑀧𑁄𑀦𑁄𑀤𑀓𑀁 𑀲𑀓𑁆𑀓𑁄 𑀅𑀤𑀸𑀲𑀺 𑀲𑀢𑁆𑀣𑀼𑀦𑁄 𑀢𑀤𑀸.

𑀘𑀢𑀼𑀳𑀺 𑀮𑁄𑀓𑀧𑀸𑀮𑁂𑀳𑀺 𑀲𑀺𑀮𑀸𑀧𑀢𑁆𑀢𑀁 𑀲𑀫𑀸𑀳𑀝𑀁 𑀘𑀢𑀼𑀓𑁆𑀓𑀫𑁂𑀓𑀓𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀦𑁂𑀦 𑀦𑀸𑀬𑀓𑁄.

𑀯𑀸𑀡𑀺𑀚𑁂𑀳𑀺 𑀢𑀤𑀸 𑀤𑀺𑀦𑁆𑀦𑀁 𑀫𑀦𑁆𑀣𑀜𑁆𑀘 𑀫𑀥𑀼𑀧𑀺𑀡𑁆𑀟𑀺𑀓𑀁

𑀢𑀳𑀺𑀁 𑀧𑀦 𑀕𑀳𑁂𑀢𑁆𑀯𑀸𑀦 𑀪𑀢𑁆𑀢𑀓𑀺𑀘𑁆𑀘𑀁 𑀅𑀓𑀸 𑀚𑀺𑀦𑁄.

𑀕𑀡𑁆𑀳𑀺𑀁𑀲𑀼 𑀲𑀭𑀡𑀁 𑀢𑀲𑁆𑀲 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀸 𑀉𑀪𑁄

𑀲𑀭𑀡𑀁 𑀅𑀕𑀫𑀼𑀁 𑀢𑁂 𑀢𑀁 𑀲𑀢𑁆𑀣𑀼 𑀤𑀺𑀦𑁆𑀦𑀲𑀺𑀭𑁄𑀭𑀼𑀳𑀸.

𑀕𑀦𑁆𑀢𑁆𑀯𑀸𑀦 𑀢𑁂 𑀲𑀓𑀁 𑀭𑀝𑁆𑀞𑀁 𑀣𑀽𑀧𑀁 𑀓𑀢𑁆𑀯𑀸 𑀫𑀦𑁄𑀭𑀫𑀁

𑀦𑀫𑀲𑁆𑀲𑀺𑀁𑀲𑀼 𑀘 𑀧𑀽𑀚𑁂𑀲𑀼𑀁 𑀤𑁆𑀯𑁂𑀪𑀸𑀢𑀺𑀓𑁄𑀧𑀸𑀲𑀓𑀸.

𑀇𑀢𑀺 𑀲𑁄 𑀲𑀢𑁆𑀢𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀺 𑀦𑀸𑀬𑀓𑁄?

𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁄 𑀲𑀢𑁆𑀣𑀸 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀼𑀁.

𑀢𑀢𑁄 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀺

𑀓𑁄𑀡𑁆𑀟𑀜𑁆𑀜𑁄 𑀤𑁂𑀲𑀺𑀢𑁂 𑀥𑀫𑁆𑀫𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀮𑀪𑀺.

𑀩𑁆𑀭𑀳𑁆𑀫𑀸𑀦𑁄’𑀝𑁆𑀞𑀸𑀭𑀲𑀓𑁄𑀝𑀻 𑀤𑁂𑀯𑀢𑀸 𑀘 𑀅𑀲𑀗𑁆𑀔𑀺𑀬𑀸

𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑀸 𑀥𑀫𑁆𑀫𑀘𑀓𑁆𑀓𑁂 𑀧𑀯𑀢𑁆𑀢𑀺𑀢𑁂.

𑀧𑀢𑁆𑀢𑁄 ¶ 𑀧𑀸𑀝𑀺𑀧𑀤𑁂 𑀯𑀧𑁆𑀧𑁄 𑀪𑀤𑁆𑀤𑀺𑀬𑁄 𑀤𑀼𑀢𑀺𑀬𑁂 𑀨𑀮𑀁,

𑀢𑀢𑀺𑀬𑁂 𑀘 𑀫𑀳𑀸𑀦𑀸𑀫𑁄 𑀅𑀲𑁆𑀲𑀚𑀻 𑀘 𑀘𑀢𑀼𑀢𑁆𑀣𑀻𑀬𑀁.

𑀢𑁂 𑀲𑀩𑁆𑀩𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀧𑀜𑁆𑀘’𑀫𑁂 𑀧𑀜𑁆𑀘𑀯𑀕𑁆𑀕𑀺𑀬𑁂,

𑀅𑀦𑀢𑁆𑀢𑀲𑀼𑀢𑁆𑀢𑀁 𑀤𑁂𑀲𑁂𑀢𑁆𑀯𑀸 𑀩𑁄𑀥𑀺𑀬𑀕𑁆𑀕 𑀨𑀮𑁂𑀦 𑀢𑁂.

𑀩𑁄𑀥𑀺𑀁 𑀧𑀸𑀧𑁂𑀢𑁆𑀯𑀸 𑀧𑀜𑁆𑀘𑀸𑀳𑁂 𑀬𑀲𑀢𑁆𑀣𑁂𑀭𑀸𑀤𑀺𑀓𑁂 𑀚𑀦𑁂,

𑀢𑀢𑁄 𑀫𑀕𑁆𑀕𑀦𑁆𑀢𑀭𑁂 𑀢𑀺𑀁𑀲𑀓𑀼𑀫𑀸𑀭𑁂 𑀪𑀤𑁆𑀤𑀯𑀕𑁆𑀕𑀺𑀬𑁂.

𑀉𑀭𑀼𑀯𑁂𑀮𑀁 𑀢𑀢𑁄 𑀕𑀦𑁆𑀢𑁆𑀯𑀸 𑀉𑀭𑀼𑀯𑁂𑀮𑀸𑀬 𑀲𑀜𑁆𑀜𑀺𑀢𑀁,

𑀉𑀭𑀼𑀯𑁂𑀮𑁂𑀦𑀦𑀼𑀜𑁆𑀜𑀸𑀢𑁄 𑀉𑀭𑀼𑀯𑁂𑀮𑀦𑀸𑀕𑀁 𑀤𑀫𑀺.

𑀢𑀁 𑀢𑀁 𑀤𑀫𑀻 𑀚𑀺𑀦𑁄 𑀦𑀸𑀕𑀁 𑀤𑀫𑀦𑁂𑀦 𑀉𑀭𑀸𑀤𑀺𑀕𑀁,

𑀢𑀣𑀸𑀕𑀢𑀁 𑀦𑀺𑀫𑀦𑁆𑀢𑀺𑀁𑀲𑀼 𑀤𑀺𑀲𑁆𑀯𑀸 𑀢𑁂 𑀧𑀸𑀝𑀺𑀳𑀸𑀭𑀺𑀬𑀁.

𑀇𑀥𑁂𑀯 𑀯𑀦𑀲𑀡𑁆𑀟𑀲𑁆𑀫𑀺𑀁 𑀯𑀺𑀳𑀸𑀭𑁂𑀢𑁆𑀯𑀸 𑀫𑀳𑀸𑀫𑀼𑀦𑀻,

𑀉𑀧𑀝𑁆𑀞𑀸𑀳𑀸𑀫𑀲𑁂 𑀲𑀩𑁆𑀩𑁂 𑀦𑀺𑀘𑁆𑀘𑀪𑀢𑁆𑀢𑁂𑀦 𑀢𑀁 𑀫𑀬𑀁.

𑀉𑀭𑀼𑀯𑁂𑀮𑀓𑀲𑁆𑀲𑀧𑀲𑁆𑀲 𑀫𑀳𑀸𑀬𑀜𑁆𑀜𑁂 𑀉𑀧𑀝𑁆𑀞𑀺𑀢𑁂,

𑀢𑀲𑁆𑀲’𑀢𑁆𑀢𑀦𑁄 𑀦𑀸𑀕𑀫𑀦𑁂 𑀇𑀘𑁆𑀙𑀸𑀘𑀸𑀭𑀁 𑀯𑀺𑀚𑀸𑀦𑀺𑀬.

𑀉𑀢𑁆𑀢𑀭𑀓𑀼𑀭𑀼𑀢𑁄 𑀪𑀺𑀓𑁆𑀔𑀁 𑀳𑀭𑀺𑀢𑁆𑀯𑀸 𑀤𑀺𑀧𑀤𑀼𑀢𑁆𑀢𑀫𑁄,

𑀅𑀦𑁄𑀢𑀢𑁆𑀢𑀤𑀳𑁂 𑀪𑀼𑀢𑁆𑀯𑀸 𑀲𑀸𑀬𑀦𑁆𑀳 𑀲𑀫𑀬𑁂 𑀲𑀬𑀁.

𑀩𑁄𑀥𑀺𑀢𑁄 𑀦𑀯𑀫𑁂 𑀫𑀸𑀲𑁂 𑀨𑀼𑀲𑁆𑀲𑀧𑀼𑀡𑁆𑀡𑀫𑀺𑀬𑀁 𑀚𑀺𑀦𑁄,

𑀮𑀗𑁆𑀓𑀸𑀤𑀻𑀧𑀁 𑀯𑀺𑀲𑁄𑀥𑁂𑀢𑀼𑀁 𑀮𑀗𑁆𑀓𑀸𑀤𑀻𑀧𑀫𑀼𑀧𑀸𑀕𑀫𑀺.

𑀬𑀓𑁆𑀔𑁂 𑀤𑀫𑀺𑀢𑁆𑀯𑀸 𑀲𑀫𑁆𑀩𑀼𑀤𑁆𑀥𑁄 𑀥𑀸𑀢𑀼𑀁 𑀤𑀢𑁆𑀯𑀸𑀦 𑀦𑀸𑀬𑀓𑁄,

𑀕𑀦𑁆𑀢𑁆𑀯𑀸𑀦 𑀉𑀭𑀼𑀯𑁂𑀮𑀁 𑀲𑁄 𑀯𑀲𑀻 𑀢𑀢𑁆𑀣 𑀯𑀦𑁂 𑀚𑀺𑀦𑁄.

𑀧𑀞𑀫𑀕𑀫𑀦𑀓𑀣𑀸 𑀲𑀫𑀢𑁆𑀢𑀸.

𑀤𑀼𑀢𑀺𑀬𑀕𑀫𑀦𑁂 𑀧𑀦 𑀩𑁄𑀥𑀺𑀢𑁄 𑀧𑀜𑁆𑀘𑀫𑁂 𑀯𑀲𑁆𑀲𑁂 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀯𑀲𑀦𑁆𑀢𑁄 𑀘𑀽𑀴𑁄𑀤𑀭’𑀫𑀳𑁄𑀤𑀭𑀸𑀦𑀁 𑀫𑀸𑀢𑀼𑀮𑀪𑀸𑀕𑀺𑀦𑁂𑀬𑁆𑀬𑀸𑀦𑀁 𑀦𑀸𑀕𑀸𑀦𑀁 𑀫𑀡𑀺𑀧𑀮𑁆𑀮𑀗𑁆𑀓𑀁 𑀦𑀺𑀲𑁆𑀲𑀸𑀬 𑀲𑀗𑁆𑀕𑀸𑀫𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀤𑀺𑀲𑁆𑀯𑀸 𑀲𑀬𑀁 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀘𑀺𑀢𑁆𑀢𑀫𑀸𑀲𑀲𑁆𑀲 𑀓𑀸𑀴𑀧𑀓𑁆𑀔𑁂 𑀉𑀧𑁄𑀲𑀣𑀤𑀺𑀯𑀲𑁂 ¶ 𑀦𑀸𑀕𑀤𑀻𑀧𑀁 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀲𑀗𑁆𑀕𑀸𑀫𑀫𑀚𑁆𑀛𑁂 𑀆𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀅𑀦𑁆𑀥𑀓𑀸𑀭𑀁 𑀅𑀓𑀸𑀲𑀺. 𑀢𑁂 𑀅𑀦𑁆𑀥𑀓𑀸𑀭𑀸𑀪𑀺𑀪𑀽𑀢𑁂 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀆𑀮𑁄𑀓𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀭𑀡𑀪𑀽𑀢𑀸𑀦𑀁 𑀢𑁂𑀲𑀁 𑀲𑀸𑀫𑀕𑁆𑀕𑀺𑀓𑀭𑀡𑀢𑁆𑀣𑀁 𑀨𑀮𑀪𑀭𑀺𑀢𑀭𑀼𑀓𑁆𑀔𑀁 𑀘𑀸𑀮𑁂𑀦𑁆𑀢𑁄 𑀯𑀺𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑁂 𑀉𑀪𑁄𑀧𑀺 𑀥𑀫𑁆𑀫𑁂 𑀧𑀲𑀻𑀤𑀺𑀢𑁆𑀯𑀸 𑀢𑀫𑁆𑀧𑀺 𑀧𑀮𑁆𑀮𑀗𑁆𑀓𑀁 𑀢𑀣𑀸𑀕𑀢𑀲𑁆𑀲 𑀅𑀤𑀁𑀲𑀼. 𑀪𑀕𑀯𑀸 𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀤𑀺𑀩𑁆𑀩𑀦𑁆𑀦𑀧𑀸𑀦𑁂𑀳𑀺 𑀲𑀦𑁆𑀢𑀧𑁆𑀧𑀺𑀢𑁄 𑀪𑀢𑁆𑀢𑀸𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀅𑀲𑀻𑀢𑀺𑀓𑁄𑀝𑀺𑀬𑁄 𑀦𑀸𑀕𑁂 𑀲𑀭𑀡𑁂𑀲𑀼 𑀘 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀫𑀳𑁄𑀤𑀭𑀲𑁆𑀲 𑀫𑀸𑀢𑀼𑀮𑁄 𑀫𑀡𑀺𑀅𑀓𑁆𑀔𑀺𑀓𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀪𑀕𑀯𑀦𑁆𑀢𑀁 𑀧𑀼𑀦 𑀓𑀮𑁆𑀬𑀸𑀡𑀺𑀤𑁂𑀲𑀫𑀸𑀕𑀫𑀦𑀢𑁆𑀣𑀁. 𑀅𑀬𑀸𑀘𑀺. 𑀪𑀕𑀯𑀸 𑀧𑀦 𑀢𑀼𑀡𑁆𑀳𑀻𑀪𑀸𑀯𑁂𑀦 𑀅𑀥𑀺𑀯𑀸𑀲𑁂𑀢𑁆𑀯𑀸 ‘‘𑀚𑁂𑀢𑀯𑀦𑀫𑁂𑀯 𑀕𑀢𑁄.

𑀏𑀯𑀜𑁆𑀳𑀺 𑀲𑁄 𑀦𑀸𑀕𑀤𑀻𑀧𑀁 𑀉𑀧𑁂𑀢𑁄,

𑀫𑀸𑀭𑀸𑀪𑀺𑀪𑀼 𑀲𑀩𑁆𑀩𑀯𑀺𑀤𑀼 𑀲𑀼𑀫𑁂𑀥𑁄;

𑀤𑀫𑁂𑀢𑁆𑀯 𑀦𑀸𑀕𑁂 𑀓𑀭𑀼𑀡𑀸𑀬𑀼𑀧𑁂𑀢𑁄,

𑀕𑀦𑁆𑀢𑁆𑀯𑀸 𑀯𑀲𑀻 𑀚𑁂𑀢𑀯𑀦𑁂 𑀫𑀼𑀦𑀺𑀦𑁆𑀤𑁄.

𑀤𑀼𑀢𑀺𑀬𑀕𑀫𑀦𑀓𑀣𑀸 𑀲𑀫𑀢𑁆𑀢𑀸.

𑀢𑀢𑀺𑀬𑀕𑀫𑀦𑁂 𑀧𑀦 𑀩𑁄𑀥𑀺𑀢𑁄 𑀅𑀝𑁆𑀞𑀫𑁂 𑀯𑀲𑁆𑀲𑁂 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀯𑀺𑀳𑀭𑀦𑁆𑀢𑁄 𑀪𑀕𑀯𑀸? ‘‘𑀫𑀫 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀧𑀘𑁆𑀙𑀸 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀲𑀸𑀲𑀦𑀁 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀺, 𑀲𑁄 𑀤𑀻𑀧𑁄 𑀩𑀳𑀼 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀉𑀧𑀸𑀲𑀓𑁄𑀧𑀸𑀲𑀺𑀓𑀸𑀤𑀺 𑀅𑀭𑀺𑀬𑀕𑀡𑀲𑁂𑀯𑀺𑀢𑁄 𑀓𑀸𑀲𑀸𑀯𑀧𑀚𑁆𑀚𑁄𑀢𑁄 𑀪𑀯𑀺𑀲𑁆𑀲𑀢𑀺, 𑀫𑀬𑁆𑀳𑀁 𑀘𑀢𑀼𑀦𑁆𑀦𑀁 𑀤𑀸𑀞𑀸𑀥𑀸𑀢𑀼𑀦𑀁 𑀅𑀦𑁆𑀢𑀭𑁂 𑀏𑀓𑀸 𑀤𑀸𑀞𑀸 𑀘 𑀤𑀓𑁆𑀔𑀺𑀡𑀅𑀓𑁆𑀔𑀥𑀸𑀢𑀼 𑀘 𑀦𑀮𑀸𑀝𑀥𑀸𑀢𑀼 𑀘 𑀭𑀸𑀫𑀕𑀸𑀫𑀯𑀸𑀲𑀻𑀳𑀺 𑀮𑀤𑁆𑀥𑁄 𑀏𑀓𑀓𑁄𑀝𑁆𑀞𑀸𑀲𑁄 𑀘 𑀅𑀜𑁆𑀜𑁂 𑀩𑀳𑀼𑀲𑀭𑀻𑀭𑀥𑀸𑀢𑀼 𑀘 𑀓𑁂𑀲𑀥𑀸𑀢𑀼𑀬𑁄 𑀘 𑀢𑀢𑁆𑀣𑁂𑀯 𑀧𑀢𑀺𑀝𑁆𑀞𑀳𑀺𑀲𑁆𑀲𑀦𑁆𑀢𑀺 𑀅𑀦𑁂𑀓𑀸𑀦𑀺 𑀲𑀗𑁆𑀖𑀸𑀭𑀸𑀫𑀲𑀳𑀲𑁆𑀲𑀸𑀦𑀺 𑀘. 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀭𑀢𑀦𑁂 𑀧𑀢𑀺𑀝𑁆𑀞𑀺𑀢𑀲𑀤𑁆𑀥𑁄 𑀫𑀳𑀸𑀚𑀦𑁄 𑀪𑀯𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀮𑀗𑁆𑀓𑀸𑀤𑀻𑀧𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀆𑀕𑀦𑁆𑀢𑀼𑀁 𑀯𑀝𑁆𑀝𑀢𑀻 ‘‘𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺? ‘‘𑀆𑀦𑀦𑁆𑀤 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑀸𑀦𑀁 𑀧𑀜𑁆𑀘𑀲𑀢𑀫𑀳𑀸𑀔𑀻𑀡𑀸𑀲𑀯𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀯𑁂𑀤𑁂𑀲𑀺. 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀕𑀦𑁆𑀢𑀩𑁆𑀩 ‘‘𑀦𑁆𑀢𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀓𑀧𑀺𑀮𑀯𑀢𑁆𑀣𑀼𑀓𑁄𑀴𑀺𑀬 𑀦𑀕𑀭𑀯𑀸𑀲𑀻𑀦𑀁 𑀧𑀜𑁆𑀘𑀲𑀢𑀫𑀳𑀸𑀔𑀻𑀡𑀸𑀲𑀯𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀯𑁂𑀤𑁂𑀲𑀺. 𑀢𑁂 𑀧𑀝𑀺𑀯𑁂𑀤𑀺𑀢𑀸 𑀧𑀜𑁆𑀘𑀲𑀢𑀔𑀻𑀡𑀸𑀲𑀯𑀸 𑀧𑀢𑁆𑀢𑀘𑀻𑀯𑀭𑀥𑀸𑀭𑀸 𑀳𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 ¶ 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀦𑀫𑀲𑁆𑀲𑀫𑀸𑀦𑀸 𑀅𑀝𑁆𑀞𑀁𑀲𑀼. 𑀲𑀢𑁆𑀣𑀼𑀦𑁄 𑀧𑀦 𑀲𑀮𑀮𑀸𑀬 𑀦𑀸𑀫 𑀕𑀦𑁆𑀥𑀓𑀼𑀝𑀺𑀬𑀸 𑀅𑀯𑀺𑀤𑀽𑀭𑁂 𑀭𑀢𑁆𑀢𑀲𑁂𑀢𑀦𑀻𑀮𑀼𑀧𑁆𑀧𑀮𑀓𑀼𑀫𑀼𑀤𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀲𑀢𑀧𑀢𑁆𑀢𑀲𑀳𑀲𑁆𑀲𑀧𑀢𑁆𑀢𑀚𑀮𑀚𑁂𑀳𑀺 𑀲𑁄𑀕𑀦𑁆𑀥𑀺𑀓 𑀦𑀸𑀦𑀸𑀧𑀼𑀧𑁆𑀨𑁂𑀳𑀺 𑀲𑀜𑁆𑀘𑀦𑁆𑀦𑀸,𑀲𑀼𑀪𑀲𑁄𑀧𑀸𑀦𑀸, 𑀧𑀲𑀸𑀤𑀺𑀢𑀲𑀫𑀢𑀺𑀢𑁆𑀢𑀺𑀓𑀓𑀸𑀓𑀧𑁂𑀬𑁆𑀬𑀲𑀼𑀭𑀫𑀡𑀻𑀬𑀲𑀻𑀢𑀮𑀫𑀥𑀼𑀭𑁄𑀤𑀓𑀸 𑀲𑀼𑀨𑀼𑀮𑁆𑀮𑀧𑀼𑀧𑁆𑀨𑀨𑀮𑀥𑀸𑀭𑀺𑀢 𑀦𑀸𑀦𑀸𑀯𑀺𑀥𑀯𑀺𑀘𑀺𑀢𑁆𑀢𑀲𑀸𑀮𑀲𑀮𑀮𑀘𑀫𑁆𑀧𑀓𑀸𑀲𑁄𑀓𑀭𑀼𑀓𑁆𑀔𑀸𑀦𑀸𑀕𑀭𑀼𑀓𑁆𑀔𑀸𑀤𑀻𑀳𑀺 𑀲𑀼𑀲𑀚𑁆𑀚𑀺𑀢𑀪𑀽𑀫𑀺𑀧𑀤𑁂𑀲𑀸 𑀅𑀘𑁆𑀘𑀦𑁆𑀢𑀭𑀫𑀡𑀺𑀬𑀸 𑀧𑁄𑀓𑁆𑀔𑀭𑀡𑀻 𑀅𑀢𑁆𑀣𑀺. 𑀢𑀢𑁆𑀣 𑀅𑀥𑀺𑀯𑀢𑁆𑀣𑁄 𑀫𑀳𑀸𑀦𑀼𑀪𑀸𑀯𑁄 𑀲𑀼𑀫𑀦𑁄𑀦𑀸𑀫 𑀦𑀸𑀕𑀭𑀸𑀚𑀸 𑀲𑁄𑀴𑀲𑀲𑀳𑀲𑁆𑀲𑀫𑀢𑁆𑀢𑀸𑀳𑀺 𑀦𑀸𑀕𑀫𑀸𑀡𑀯𑀺𑀓𑀸𑀳𑀺 𑀧𑀭𑀺𑀯𑀼𑀢𑁄 𑀫𑀳𑀦𑁆𑀢𑀁 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁄 𑀢𑀣𑀸𑀕𑀢𑀲𑁆𑀲 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀅𑀢𑁆𑀢𑀪𑀸𑀯𑀁 𑀑𑀮𑁄𑀓𑁂𑀢𑁆𑀯𑀸 𑀫𑀳𑀦𑁆𑀢𑀁 𑀲𑀼𑀔𑀲𑁄𑀫𑀦𑀲𑁆𑀲𑀁 𑀅𑀦𑀼𑀪𑀯𑀫𑀸𑀦𑁄 𑀅𑀢𑁆𑀢𑀦𑁄 𑀫𑀸𑀢𑀭𑀁 𑀦𑀦𑁆𑀤𑀦𑀸𑀕𑀫𑀸𑀦𑀯𑀺𑀓𑀁 𑀕𑀭𑀼𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀢𑀲𑁆𑀲𑀸 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀼𑀭𑀼𑀫𑀸𑀦𑁄 𑀢𑀲𑁆𑀫𑀺𑀁𑀬𑁂𑀯 𑀧𑁄𑀓𑁆𑀔𑀭𑀡𑀺𑀁 𑀅𑀚𑁆𑀛𑀸𑀯𑀲𑀢𑀺. 𑀲𑀢𑁆𑀣𑀸 𑀧𑀦 𑀅𑀢𑁆𑀢𑀦𑁄 𑀕𑀫𑀦𑀁 𑀲𑀁𑀯𑀺𑀥𑀸𑀦𑀸𑀦𑀦𑁆𑀢𑀭𑁂 𑀲𑀼𑀫𑀦𑀁 𑀦𑀸𑀕𑀭𑀸𑀚𑀸𑀦𑀁 𑀅𑀯𑀺𑀤𑀼𑀭𑁂 𑀞𑀺𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 𑀲𑀧𑀭𑀺𑀯𑀸𑀭𑁄 𑀆𑀕𑀘𑁆𑀙𑀸 𑀳𑀻𑀢𑀺 𑀆𑀳. 𑀲𑁄 𑀲𑀸𑀥𑀼𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂 𑀙𑀓𑁄𑀝𑀺𑀫𑀢𑁆𑀢𑁂 𑀦𑀸𑀕𑁂 𑀕𑀳𑁂𑀢𑁆𑀯𑀸 𑀲𑀼𑀧𑀼𑀧𑁆𑀧𑀻𑀢𑀘𑀫𑁆𑀧𑀓𑀭𑀼𑀓𑁆𑀔𑀁 𑀢𑀣𑀸𑀕𑀢𑀲𑁆𑀲 𑀲𑀽𑀭𑀺𑀬𑀭𑀁𑀲𑀺𑀦𑀺𑀯𑀸𑀭𑀡𑀢𑁆𑀣𑀁 𑀙𑀢𑁆𑀢𑀁 𑀓𑀢𑁆𑀯𑀸 𑀕𑀡𑁆𑀳𑀺. 𑀅𑀣 𑀪𑀕𑀯𑀸 𑀭𑀯𑀺𑀭𑀲𑁆𑀫𑀺𑀧𑀢𑁆𑀣𑀝𑀲𑀼𑀯𑀡𑁆𑀡𑀧𑀩𑁆𑀩𑀢𑁄 𑀯𑀺𑀬 𑀯𑀺𑀭𑁄𑀘𑀫𑀸𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀆𑀓𑀸𑀲𑀁 𑀅𑀩𑁆𑀪𑀽𑀕𑁆𑀕𑀜𑁆𑀙𑀺. 𑀲𑀢𑁆𑀣𑀸𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀻𑀢𑀸 𑀢𑁂 𑀧𑀜𑁆𑀘𑀲𑀢𑀔𑀻𑀡𑀸𑀲𑀯𑀸𑀧𑀺 𑀲𑀓𑀁 𑀲𑀓𑀁 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀆𑀓𑀸𑀲𑀁 𑀉𑀕𑁆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀲𑀢𑁆𑀣𑀸 𑀧𑀜𑁆𑀘𑀲𑀢𑀔𑀻𑀡𑀸𑀲𑀯𑀧𑀭𑀺𑀯𑀼𑀢𑁄 𑀯𑀺𑀲𑀸𑀔𑀧𑀼𑀡𑁆𑀡𑀫𑀼𑀧𑁄𑀲𑀣𑀤𑀺𑀯𑀲𑁂 𑀓𑀮𑁆𑀬𑀸𑀡𑀺𑀬𑀁 𑀕𑀦𑁆𑀢𑁆𑀯𑀸 𑀫𑀳𑀸𑀭𑀳𑁂 𑀫𑀡𑁆𑀟𑀧𑀫𑀚𑁆𑀛𑁂 𑀧𑀜𑁆𑀜𑀢𑁆𑀢𑀯𑀭 𑀩𑀼𑀤𑁆𑀥𑀸𑀲𑀦𑁂 𑀧𑀜𑁆𑀘𑀲𑀢𑀔𑀻𑀡𑀸𑀲𑀯𑀧𑀭𑀺𑀯𑀼𑀢𑁄 𑀳𑀼𑀢𑁆𑀯𑀸 𑀦𑀺𑀲𑀻𑀤𑀺.

𑀅𑀣 𑀫𑀡𑀺𑀅𑀓𑁆𑀔𑀺𑀓𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀩𑀼𑀤𑁆𑀥𑀧𑀫𑀼𑀔𑀁 𑀪𑀺𑀓𑁆𑀔𑀼 𑀲𑀗𑁆𑀖𑀁 𑀅𑀦𑁂𑀓𑁂𑀳𑀺 𑀤𑀺𑀩𑁆𑀩𑁂𑀳𑀺 𑀔𑀚𑁆𑀚𑀪𑁄𑀚𑁆𑀚𑁂𑀳𑀺 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑀢𑁆𑀣𑀸 𑀢𑀲𑁆𑀲 𑀪𑀢𑁆𑀢𑀸𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀲𑀼𑀫𑀦𑀓𑀼𑀝𑁂 𑀧𑀤𑀮𑀜𑁆𑀙𑀦𑀁 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀫𑀺𑀁 𑀧𑀩𑁆𑀩𑀢𑀧𑀸𑀤𑁂 𑀅𑀦𑁂𑀓𑀧𑀸𑀤𑀧𑀸𑀓𑀺𑀡𑁆𑀡𑀪𑀽𑀫𑀺𑀧𑁆𑀧𑀤𑁂𑀲𑁂 𑀦𑀺𑀲𑀺𑀦𑁆𑀦𑁄 𑀤𑀺𑀯𑀸𑀯𑀺𑀳𑀸𑀭𑀁 𑀓𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀤𑀻𑀖𑀯𑀸𑀧𑀺𑀘𑁂𑀢𑀺𑀬𑀝𑁆𑀞𑀸𑀦𑁂 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺. 𑀫𑀳𑀸𑀧𑀣𑀯𑀻 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀲𑀢𑀯𑀸𑀭𑀁 𑀲𑀳𑀲𑁆𑀲𑀯𑀸𑀭𑀁 𑀲𑀗𑁆𑀓𑀫𑁆𑀧𑀺. 𑀢𑀢𑁆𑀣 𑀫𑀳𑀸𑀲𑁂𑀦𑀁 𑀦𑀸𑀫 𑀤𑁂𑀯𑀧𑀼𑀢𑁆𑀢𑀁 𑀆𑀭𑀓𑁆𑀔𑀢𑁆𑀣𑀸𑀬 𑀦𑀺𑀯𑀢𑁆𑀢𑁂𑀢𑁆𑀯𑀸 𑀢𑀢𑁄 ¶ 𑀯𑀼𑀝𑁆𑀞𑀸𑀬 𑀫𑀳𑀸𑀣𑀽𑀧𑀝𑁆𑀞𑀸𑀦𑁂 𑀢𑀣𑁂𑀯 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺. 𑀫𑀳𑀸𑀧𑀣𑀯𑀺 𑀢𑀣𑁂𑀯 𑀓𑀫𑁆𑀧𑀺. 𑀢𑀢𑁆𑀭𑀸𑀧𑀺 𑀯𑀺𑀲𑀸𑀮𑀭𑀽𑀧 𑀤𑁂𑀯𑀧𑀼𑀢𑁆𑀢𑀁 𑀆𑀭𑀓𑁆𑀔𑀁 𑀕𑀡𑁆𑀳𑀦𑀢𑁆𑀣𑀸𑀬 𑀞𑀧𑁂𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀣𑀽𑀧𑀸𑀭𑀸𑀫 𑀘𑁂𑀢𑀺𑀬𑀝𑁆𑀞𑀸𑀦𑁂 𑀢𑀣𑁂𑀯 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺. 𑀫𑀳𑀸𑀧𑀣𑀯𑀻 𑀢𑀣𑁂𑀯 𑀓𑀫𑁆𑀧𑀺. 𑀢𑀢𑁆𑀣 𑀘 𑀧𑀣𑀯𑀺𑀧𑀸𑀮 𑀤𑁂𑀯𑀧𑀼𑀢𑁆𑀢𑀁 𑀆𑀭𑀓𑁆𑀔𑀢𑁆𑀣𑀸𑀬. 𑀦𑀺𑀯𑀢𑁆𑀢𑁂𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀫𑀭𑀺𑀘𑀯𑀝𑁆𑀝𑀺𑀘𑁂𑀢𑀺𑀬𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑀬𑀺. 𑀧𑀣𑀯𑀺 𑀢𑀣𑁂𑀯 𑀓𑀫𑁆𑀧𑀺. 𑀢𑀲𑁆𑀫𑀺𑀁 𑀞𑀸𑀦𑁂 𑀇𑀦𑁆𑀤𑀓𑀤𑁂𑀯𑀧𑀼𑀢𑁆𑀢𑀁 𑀆𑀭𑀓𑁆𑀔𑀁 𑀕𑀡𑁆𑀳𑀦𑀢𑁆𑀣𑀸𑀬 𑀞𑀧𑁂𑀲𑀺. 𑀢𑀢𑁄 𑀯𑀼𑀝𑁆𑀞𑀸𑀬 𑀓𑀸𑀘𑀭𑀕𑀸𑀫𑀘𑁂𑀢𑀺𑀬𑀝𑁆𑀞𑀸𑀦𑁂 𑀢𑀣𑁂𑀯 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺. 𑀧𑀣𑀯𑀺 𑀢𑀣𑁂𑀯 𑀓𑀫𑁆𑀧𑀺. (𑀢𑀲𑁆𑀫𑀺𑀁 𑀞𑀸𑀦𑁂 𑀫𑀳𑀸𑀖𑁄𑀲 𑀤𑁂𑀯𑀧𑀼𑀢𑁆𑀢𑀁 𑀆𑀭𑀓𑁆𑀔𑀁 𑀕𑀡𑁆𑀳𑀦𑀢𑁆𑀣𑀸𑀬 𑀦𑀺𑀬𑁆𑀬𑀸𑀤𑁂𑀲𑀺) 𑀏𑀢𑀲𑁆𑀫𑀺𑀁 𑀫𑀳𑀸𑀘𑁂𑀢𑀺𑀬𑀝𑁆𑀞𑀸𑀦𑁂 𑀫𑀳𑀸𑀖𑁄𑀲𑀁 𑀦𑀸𑀫 𑀤𑁂𑀯𑀧𑀼𑀢𑁆𑀢𑀁 𑀆𑀭𑀓𑁆𑀔𑀁 𑀕𑀳𑀡𑀢𑁆𑀣𑀸𑀬 𑀦𑀺𑀯𑀢𑁆𑀢𑁂𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑀘𑁂𑀢𑀺𑀬𑀝𑁆𑀞𑀸𑀦𑁂 𑀢𑀣𑁂𑀯 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺. 𑀧𑀣𑀯𑀺 𑀢𑀣𑁂𑀯 𑀓𑀫𑁆𑀧𑀺. 𑀢𑀢𑁆𑀣 𑀫𑀡𑀺𑀫𑁂𑀔𑀮𑀁 𑀦𑀸𑀫 𑀤𑁂𑀯𑀥𑀻𑀢𑀭𑀁 𑀆𑀭𑀓𑁆𑀔𑀁 𑀕𑀸𑀳𑀸𑀧𑁂𑀢𑁆𑀯𑀸 𑀢𑀢𑁄 𑀦𑀸𑀕𑀫𑀳𑀸𑀯𑀺𑀳𑀸𑀭𑀘𑁂𑀢𑀺𑀬𑀝𑁆𑀞𑀸𑀦𑁂 𑀢𑀣𑁂𑀯 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺. 𑀧𑀣𑀯𑀺 𑀢𑀣𑁂𑀯 𑀓𑀫𑁆𑀧𑀺. 𑀢𑀲𑁆𑀫𑀺𑀫𑁆𑀧𑀺 𑀫𑀳𑀺𑀦𑁆𑀤𑀁 𑀦𑀸𑀫 𑀤𑁂𑀯𑀧𑀼𑀢𑁆𑀢𑀁 𑀆𑀭𑀓𑁆𑀔𑀁 𑀕𑀳𑀡𑀢𑁆𑀣𑀸𑀬 𑀞𑀧𑁂𑀲𑀺. 𑀢𑀢𑁄 𑀯𑀼𑀝𑁆𑀞𑀸𑀬 𑀫𑀳𑀸𑀕𑀗𑁆𑀕𑀸𑀬 𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁂 𑀲𑁂𑀭𑀼 𑀦𑀸𑀫 𑀤𑀳𑀲𑁆𑀲 𑀅𑀦𑁆𑀢𑁂 𑀯𑀭𑀸𑀳 𑀦𑀸𑀫 𑀲𑁄𑀡𑁆𑀟𑀺𑀫𑀢𑁆𑀣𑀓𑁂 𑀅𑀢𑀺𑀫𑀦𑁄𑀭𑀫𑀁 𑀉𑀤𑀓𑀩𑀼𑀩𑁆𑀩𑀼𑀴𑀓𑁂𑀮𑀸𑀲𑀓𑀽𑀝𑀧𑀝𑀺𑀪𑀸𑀕𑀁 𑀘𑁂𑀢𑀺𑀬𑀁 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀻’𑀢𑀺 𑀧𑀜𑁆𑀘𑀲𑀢𑀔𑀻𑀡𑀸𑀲𑀯𑁂𑀳𑀺 𑀲𑀤𑁆𑀥𑀺𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺. 𑀩𑀳𑀮𑀖𑀦𑀫𑀳𑀸𑀧𑀣𑀯𑀺 𑀧𑀭𑀺𑀩𑁆𑀪𑀫𑀺𑀢𑀓𑀼𑀫𑁆𑀪𑀓𑀸𑀭𑀘𑀓𑁆𑀓𑀁 𑀯𑀺𑀬 𑀧𑀪𑀺𑀦𑁆𑀢𑀫𑀤𑀫𑀳𑀸 𑀳𑀢𑁆𑀣𑀺𑀦𑀸𑀕𑀲𑁆𑀲 𑀓𑀼𑀜𑁆𑀘𑀦𑀸𑀤𑀓𑀭𑀡𑀁 𑀯𑀺𑀬 𑀉𑀘𑁆𑀙𑀼𑀓𑁄𑀝𑁆𑀝𑀦 𑀬𑀦𑁆𑀢-𑀫𑀼𑀔𑀲𑀤𑁆𑀤𑁄 ¶ 𑀯𑀺𑀬 (𑀘) 𑀲𑀢𑀯𑀸𑀭𑀁 𑀲𑀳𑀲𑁆𑀲𑀯𑀸𑀭𑀁 𑀦𑀤𑀫𑀸𑀦𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸 𑀯𑀺𑀬 𑀲𑀓𑀮𑀮𑀗𑁆𑀓𑀸𑀤𑀻𑀧𑀁 𑀉𑀦𑁆𑀦𑀸𑀤𑀁 𑀓𑀼𑀭𑀼𑀫𑀸𑀦𑀸 𑀲𑀁𑀓𑀫𑁆𑀧𑀺. 𑀢𑀢𑁄 𑀯𑀼𑀝𑁆𑀞𑀸𑀬 𑀲𑀼𑀫𑀦𑀦𑀸𑀕𑀭𑀜𑁆𑀜𑁄 𑀳𑀢𑁆𑀣𑁂𑀲𑀼 𑀞𑀺𑀢 𑀘𑀫𑁆𑀧𑀓𑀭𑀼𑀓𑁆𑀔𑀢𑁄 𑀧𑀼𑀧𑁆𑀨𑀸𑀦𑀺 𑀆𑀤𑀸𑀬 𑀢𑀢𑁆𑀣 𑀧𑀽𑀚𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀢𑀁 𑀑𑀮𑁄𑀓𑁂𑀲𑀺. 𑀲𑁄 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀫𑀬𑀸 𑀪𑀦𑁆𑀢𑁂 𑀓𑀺𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀧𑀼𑀘𑁆𑀙𑀺. 𑀇𑀫𑀲𑁆𑀲 𑀞𑀸𑀦𑀲𑁆𑀲 𑀆𑀭𑀓𑁆𑀔𑀁 𑀓𑀭𑁄𑀳𑀻𑀢𑀺 𑀆𑀳. 𑀲𑁄 𑀢𑀁 𑀲𑀼𑀢𑁆𑀯𑀸 𑀪𑀦𑁆𑀢𑁂 𑀢𑀼𑀫𑁆𑀳𑀸𑀓𑀁 𑀕𑀦𑁆𑀥𑀓𑀼𑀝𑀺𑀁 𑀫𑀫 𑀆𑀭𑀓𑁆𑀔𑀁 𑀓𑀭𑁄𑀦𑁆𑀢𑀲𑁆𑀲 𑀭𑀽𑀧𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀁 𑀅𑀲𑀻𑀢𑁆𑀬𑀸𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀯𑀺𑀘𑀺𑀢𑁆𑀢𑀁 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀪𑀽𑀢𑀁 𑀧𑀲𑁆𑀲𑀦𑁆𑀢𑀲𑁆𑀲 𑀫𑀦𑁄𑀲𑀺𑀮𑀸𑀢𑀮𑁂 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀢𑀭𑀼𑀡𑀲𑀻𑀳𑁄 𑀯𑀺𑀬 𑀕𑀚𑁆𑀚𑀦𑁆𑀢𑁄 𑀧𑀸𑀯𑀼𑀲𑁆𑀲𑀓𑀫𑀳𑀸𑀫𑁂𑀖𑁄 𑀯𑀺𑀬 𑀆𑀓𑀸𑀲𑀕𑀗𑁆𑀕𑀁 𑀑𑀢𑀭𑀦𑁆𑀢𑁄 𑀯𑀺𑀬 𑀭𑀢𑀦𑀤𑀸𑀫𑀁 𑀕𑀦𑁆𑀣𑁂𑀦𑁆𑀢𑁄 𑀯𑀺𑀬 𑀘 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀲𑀯𑀦𑀻𑀬𑀲𑀭𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀩𑁆𑀭𑀫𑁆𑀳𑀖𑁄𑀲𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑁄 𑀦𑀸𑀦𑀸𑀦𑀬𑁂𑀳𑀺 𑀯𑀺𑀘𑀺𑀢𑁆𑀢𑀓𑀣𑀁 𑀓𑀣𑀬𑀫𑀸𑀦𑀸𑀦𑀁 𑀲𑀯𑀦𑀸𑀦𑀼𑀭𑀺𑀢𑁆𑀢𑀬𑀪𑀽𑀢𑀁 𑀲𑀁𑀲𑀸𑀭𑀡𑁆𑀡𑀯𑀦𑀺𑀫𑀼𑀕𑁆𑀕𑀸𑀦𑀁 𑀢𑀸𑀭𑀡𑀲𑀫𑀢𑁆𑀣𑀁 𑀫𑀥𑀼𑀭 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑀲𑁆𑀲, 𑀜𑀸𑀡𑀺𑀤𑁆𑀥𑀺𑀬𑀸 𑀓𑁄𑀝𑀺𑀧𑁆𑀧𑀢𑁆𑀢𑁂 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀬𑁄 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑁂 𑀧𑀲𑁆𑀲𑀦𑁆𑀢𑀲𑁆𑀲, 𑀢𑀢𑁆𑀣𑁂𑀯 𑀫𑀬𑁆𑀳𑀁 𑀯𑀲𑀦𑀁 𑀭𑀼𑀘𑁆𑀘𑀢𑀺. 𑀦 𑀲𑀓𑁆𑀓𑁄𑀫𑀺 𑀅𑀜𑁆𑀜𑀢𑁆𑀣 𑀢𑀼𑀫𑁆𑀳𑁂𑀳𑀺 𑀯𑀺𑀦𑀸 𑀯𑀲𑀺𑀢𑀼𑀦𑁆𑀢𑀺 𑀆𑀳. 𑀪𑀕𑀯𑀸 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀦𑀕𑀭𑀸𑀚, 𑀇𑀫𑀁 𑀧𑀤𑁂𑀲𑀁 𑀢𑀬𑀸 𑀘𑀺𑀭𑀁 𑀯𑀲𑀺𑀢𑀝𑁆𑀞𑀸𑀦𑀁. 𑀓𑀓𑀼𑀲𑀦𑁆𑀥𑀲𑁆𑀲 𑀪𑀕𑀯𑀢𑁄 𑀥𑀸𑀢𑀼 𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀧𑀢𑀺𑀝𑁆𑀞𑀺𑀢𑀸, 𑀢𑁆𑀯𑀫𑁂𑀯 𑀢𑀲𑁆𑀫𑀺𑀁 𑀓𑀸𑀮𑁂 𑀯𑀭𑀦𑀺𑀤𑁆𑀤𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀳𑀼𑀢𑁆𑀯𑀸 𑀢𑀲𑁆𑀲𑀸 𑀥𑀸𑀢𑀼𑀬𑀸 𑀆𑀭𑀓𑁆𑀔𑀁 𑀕𑀳𑁂𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀁 𑀓𑀭𑁄𑀦𑁆𑀢𑁄 𑀘𑀺𑀭𑀁 𑀯𑀺𑀳𑀸𑀲𑀺. 𑀧𑀼𑀦 𑀓𑁄𑀡𑀸𑀕𑀫𑀦𑀲𑁆𑀲 𑀪𑀕𑀯𑀢𑁄 𑀥𑀸𑀢𑀼 𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀧𑀢𑀺𑀝𑁆𑀞𑀺𑀢𑀸 𑀢𑁆𑀯𑀫𑁂𑀯 𑀢𑀲𑁆𑀫𑀺𑀁 𑀓𑀸𑀮𑁂 𑀚𑀬𑀲𑁂𑀦𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀢𑀲𑁆𑀲𑀸 𑀥𑀸𑀢𑀼𑀬𑀸 𑀆𑀭𑀓𑁆𑀔𑀁 𑀕𑀳𑁂𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀘𑀺𑀭𑀁 𑀯𑀺𑀳𑀸𑀲𑀺. 𑀧𑀼𑀦 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀥𑀸𑀢𑀼 𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀧𑀢𑀺𑀝𑁆𑀞𑀺𑀢𑀸. 𑀢𑁆𑀯𑀫𑁂𑀯 𑀢𑀲𑁆𑀫𑀺𑀁 𑀓𑀸𑀮𑁂 𑀤𑀻𑀖𑀲𑀸𑀮𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀳𑀼𑀢𑁆𑀯𑀸 𑀢𑀸𑀬 𑀥𑀸𑀢𑀼𑀬𑀸 𑀆𑀭𑀓𑁆𑀔𑀁 𑀕𑀳𑁂𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀁 𑀓𑀭𑁄𑀦𑁆𑀢𑁄 𑀯𑀺𑀳𑀸𑀲𑀺. 𑀫𑀬𑀺 𑀧𑀦 𑀧𑀭𑀺𑀦𑀺𑀩𑁆𑀩𑀼𑀢𑁂 𑀓𑀸𑀓𑀯𑀡𑁆𑀡𑀢𑀺𑀲𑁆𑀲𑀫𑀳𑀸𑀭𑀸𑀚𑀸 𑀫𑀬𑁆𑀳𑀁 𑀦𑀮𑀸𑀝𑀥𑀸𑀢𑀼𑀁 𑀇𑀫𑀲𑁆𑀫𑀺𑀁𑀬𑁂𑀯 ¶ 𑀞𑀸𑀦𑁂 𑀧𑀢𑀺𑀝𑁆𑀞𑀸𑀧𑁂𑀲𑁆𑀲𑀢𑀺, 𑀢𑀲𑁆𑀫𑀸 𑀢𑁆𑀯𑀁 𑀇𑀫𑀲𑁆𑀲 𑀞𑀸𑀦𑀲𑁆𑀲 𑀆𑀭𑀓𑁆𑀔𑀁 𑀓𑀭𑁄𑀳𑀻𑀢𑀺 𑀯𑀢𑁆𑀯𑀸 𑀧𑀜𑁆𑀘𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀜𑁆𑀘𑀲𑀢𑀔𑀻𑀡𑀸𑀲𑀯𑁂𑀳𑀺 𑀲𑀤𑁆𑀥𑀺𑀁 𑀘𑁂𑀢𑀺𑀬𑀝𑁆𑀞𑀸𑀦𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑁆𑀯𑀁 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀻𑀢𑀺 𑀯𑀢𑁆𑀯𑀸 𑀆𑀓𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀚𑁂𑀢𑀯𑀦𑀫𑁂𑀯 𑀕𑀢𑁄.

𑀢𑀲𑁆𑀲 𑀧𑀦 𑀦𑀸𑀕𑀭𑀜𑁆𑀜𑁄 𑀫𑀸𑀢𑀸 𑀇𑀦𑁆𑀤𑀫𑀸𑀦𑀯𑀺𑀓𑀸 𑀦𑀸𑀫 𑀆𑀕𑀦𑁆𑀢𑁆𑀯𑀸 𑀢𑀣𑀸𑀕𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸, 𑀪𑀦𑁆𑀢𑁂 𑀫𑀫 𑀧𑀼𑀢𑁆𑀢𑁄 𑀲𑀼𑀫𑀦𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀓𑀼𑀳𑀺𑀦𑁆𑀢𑀺 𑀆𑀳. 𑀢𑀯 𑀧𑀼𑀢𑁆𑀢𑁄 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀫𑀳𑀸𑀯𑀸𑀮𑀼𑀓𑀕𑀗𑁆𑀕𑀸𑀬 𑀤𑀓𑁆𑀔𑀺𑀡𑀪𑀸𑀕𑁂 𑀲𑁂𑀭𑀼 𑀦𑀸𑀫 𑀤𑀳𑀲𑁆𑀲 𑀲𑀫𑀻𑀧𑁂 𑀯𑀭𑀸𑀳 𑀦𑀸𑀫 𑀲𑁄𑀡𑁆𑀟𑀺𑀬𑀁 𑀲𑀫𑀸𑀥𑀺 𑀅𑀧𑁆𑀧𑀺𑀢𑀢𑁆𑀢𑀸 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂 𑀙𑀓𑁄𑀝𑀺𑀫𑀢𑁆𑀢𑁂 𑀦𑀸𑀕𑁂 𑀕𑀳𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀪𑀦𑁆𑀢𑁂 𑀇𑀢𑁄 𑀧𑀝𑁆𑀞𑀸𑀬 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀁 𑀤𑀼𑀮𑁆𑀮𑀪𑀁, 𑀔𑀫𑀣 𑀫𑁂𑀢𑀺 𑀅𑀘𑁆𑀘𑀬𑀁 𑀤𑁂𑀲𑁂𑀢𑁆𑀯𑀸 𑀫𑀳𑀢𑀺𑀁 𑀦𑀸𑀕𑀲𑀫𑁆𑀧𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀲𑀼𑀫𑀦𑀦𑀸𑀕𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀫𑀳𑀢𑀺𑀁 𑀇𑀲𑁆𑀲𑀭𑀺𑀬𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀺 𑀢𑀢𑁆𑀣𑁂𑀯 𑀆𑀭𑀓𑁆𑀔𑀁 𑀕𑀳𑁂𑀢𑁆𑀯𑀸 𑀘𑀺𑀭𑀁 𑀯𑀺𑀳𑀸𑀲𑀺.

𑀫𑀳𑀸𑀧𑀜𑁆𑀜𑁄 𑀫𑀳𑀸𑀲𑀤𑁆𑀥𑁄 𑀫𑀳𑀸𑀯𑀻𑀭𑁄 𑀫𑀳𑀸𑀇𑀲𑀺,

𑀫𑀳𑀸𑀩𑀮𑁂𑀦 𑀲𑀫𑁆𑀧𑀦𑁆𑀦𑁄 𑀫𑀳𑀦𑁆𑀢𑀕𑀼𑀡𑀪𑀼𑀲𑀺𑀢𑁄;

𑀕𑀦𑁆𑀢𑁆𑀯𑀸𑀦 𑀢𑀫𑁆𑀩𑀧𑀡𑁆𑀡𑀺𑀁 𑀲𑁄 𑀲𑀢𑁆𑀢𑀸𑀦𑀼𑀤𑁆𑀤𑀬𑀫𑀸𑀦𑀲𑁄,

𑀕𑀦𑁆𑀢𑁆𑀯𑀸 𑀦𑀸𑀕𑀯𑀭𑀁 𑀤𑀻𑀧𑀁 𑀅𑀕𑀸 𑀚𑁂𑀢𑀯𑀦𑀁 𑀯𑀺𑀤𑀼.

𑀅𑀢𑀺𑀲𑀬𑀫𑀢𑀺𑀲𑀸𑀭𑁄 𑀲𑀸𑀭𑀤𑀸𑀦𑀁 𑀓𑀭𑁄𑀦𑁆𑀢𑁄,

𑀅𑀢𑀺𑀅𑀥𑀺𑀭𑀫𑀡𑀺𑀬𑁄 𑀲𑀩𑁆𑀩𑀮𑁄𑀓𑁂𑀓𑀦𑁂𑀢𑁆𑀢𑁄;

𑀅𑀢𑀺𑀕𑀼𑀡𑀥𑀭𑀡𑀻𑀬𑁄 𑀲𑀩𑁆𑀩𑀲𑀢𑁆𑀢𑁂 𑀢𑀫𑀕𑁆𑀕𑀁,

𑀅𑀢𑀺𑀯𑀺𑀧𑀼𑀮𑀤𑀬𑁄 𑀢𑀸𑀦𑁂𑀢𑀼𑀫𑀸𑀕𑀸 𑀲𑀼𑀤𑀻𑀧𑀁.

𑀢𑀢𑀺𑀬𑀕𑀫𑀦𑀓𑀣𑀸 𑀲𑀫𑀢𑁆𑀢𑀸.

𑀇𑀢𑀺 𑀅𑀭𑀺𑀬𑀚𑀦𑀧𑀲𑀸𑀤𑀦𑀢𑁆𑀣𑀸𑀬 𑀓𑀢𑁂 𑀥𑀸𑀢𑀼𑀯𑀁𑀲𑁂 𑀢𑀣𑀸𑀕𑀢𑀲𑁆𑀲 𑀕𑀫𑀦𑀁 𑀦𑀸𑀫 𑀧𑀞𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀆𑀕𑀦𑁆𑀢𑁆𑀯𑀸 𑀢𑀫𑁆𑀩𑀧𑀡𑁆𑀡𑀺𑀁 𑀲𑁄 𑀲𑀢𑁆𑀢𑀸𑀦𑀼𑀤𑁆𑀤𑀬𑀫𑀸𑀦𑀲𑁄

𑀧𑀼𑀦 𑀕𑀦𑁆𑀢𑁆𑀯𑀸 𑀦𑀸𑀕𑀤𑀻𑀧𑀁 𑀅𑀕𑀸 𑀚𑁂𑀢𑀯𑀦𑀁 𑀯𑀭𑀁

𑀅𑀢𑀺𑀲𑀬𑀫𑀢𑀺𑀲𑀸𑀭𑁄 𑀲𑀸𑀭𑀤𑀸𑀦𑁂𑀓 𑀭𑀢𑁆𑀢𑁄

𑀅𑀢𑀺𑀥𑀺𑀢𑀺𑀭𑀫𑀡𑀺𑀬𑁄 𑀲𑀩𑁆𑀩𑀮𑁄𑀓𑁂𑀓𑀦𑁂𑀢𑁆𑀢𑁄

𑀅𑀢𑀺𑀕𑀼𑀡𑀭𑀫𑀡𑀻𑀬𑀁 𑀲𑀩𑁆𑀩𑀲𑀦𑁆𑀢𑁂𑀓𑀫𑀕𑁆𑀕𑀁

𑀅𑀢𑀺𑀯𑀺𑀧𑀼𑀮𑀤𑀬𑀢𑁆𑀢𑀸 𑀮𑀗𑁆𑀓𑀫𑀸𑀕𑀸 𑀲𑀼𑀤𑀻𑀧𑀁

𑀇𑀢𑀺 𑀲𑀻𑀳𑀴𑀪𑀸𑀲𑀸𑀬 𑀓𑀢𑁂 𑀥𑀸𑀢𑀼𑀯𑀁𑀲𑁂 𑀤𑀺𑀲𑁆𑀲𑀢𑁂.

𑁨. ¶ 𑀧𑀭𑀺𑀦𑀺𑀩𑁆𑀩𑀸𑀦𑀓𑀣𑀸

𑀲𑀢𑁆𑀣𑀸 𑀧𑀦 𑀢𑀢𑁄 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀸𑀦𑀺 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀯𑁂𑀦𑁂𑀬𑁆𑀬𑀚𑀦𑁂 𑀲𑀁𑀲𑀸𑀭𑀢𑁄 𑀘𑀢𑀼𑀅𑀭𑀺𑀬𑀫𑀕𑁆𑀕𑀨𑀮𑀧𑀝𑀺𑀮𑀸𑀪𑀯𑀲𑁂𑀦 𑀉𑀤𑁆𑀥𑀸𑀭𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀯𑁂𑀲𑀸𑀮𑀺𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀘𑀸𑀧𑀸𑀮𑀘𑁂𑀢𑀺𑀬𑀁 𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁄 𑀫𑀸𑀭𑁂𑀦 𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀆𑀭𑀸𑀥𑀺𑀢𑁄 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀆𑀬𑀼𑀲𑀗𑁆𑀔𑀸𑀭𑁂 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀲𑁆𑀲 𑀯𑀺𑀲𑁆𑀲𑀝𑁆𑀞𑀪𑀸𑀯𑀁 𑀆𑀦𑀦𑁆𑀤𑁄𑀬𑁂𑀯 𑀅𑀜𑁆𑀜𑀸𑀲𑀺. 𑀅𑀜𑁆𑀜𑁄 𑀓𑁄𑀘𑀺𑀧𑀺 𑀚𑀸𑀦𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀪𑀺𑀓𑁆𑀔𑀼𑀲𑀗𑁆𑀖𑀫𑁆𑀧𑀺 𑀚𑀸𑀦𑀸𑀧𑁂𑀲𑁆𑀲𑀸𑀫𑀻𑀢𑀺 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀯𑁂 𑀢𑀣𑀸𑀕𑀢𑀲𑁆𑀲 𑀦 𑀘𑀺𑀭𑀲𑁆𑀲𑁂𑀯 𑀢𑀺𑀡𑁆𑀡𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀢𑀼𑀫𑁆𑀳𑁂 𑀲𑀢𑁆𑀢𑀢𑀺𑀁𑀲𑀩𑁄𑀥𑀺 𑀧𑀓𑁆𑀔𑀺𑀬𑀥𑀫𑁆𑀫𑁂𑀲𑀼 𑀲𑀫𑀕𑁆𑀕𑀸 𑀳𑀼𑀢𑁆𑀯𑀸 𑀏𑀓𑀻𑀪𑀸𑀯𑀸 𑀳𑁄𑀣, 𑀢𑀼𑀫𑁆𑀳𑁂 𑀯𑀺𑀯𑀸𑀤𑀁 𑀫𑀸 𑀓𑀭𑁄𑀣. 𑀅𑀧𑁆𑀧𑀫𑀸𑀤𑁂𑀦 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀫𑁆𑀧𑀸𑀤𑁂𑀣𑀸𑀢𑀺 𑀯𑀢𑁆𑀯𑀸 𑀧𑀼𑀦 𑀤𑀺𑀯𑀲𑁂 𑀯𑁂𑀲𑀸𑀮𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀸 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀪𑀡𑁆𑀟𑀕𑀸𑀫𑀁 𑀕𑀢𑁄. 𑀪𑀡𑁆𑀟𑀕𑀸𑀫𑀢𑁄 𑀳𑀢𑁆𑀣𑀺𑀕𑀸𑀫𑀁 𑀳𑀢𑁆𑀣𑀺𑀕𑀸𑀫𑀢𑁄 𑀅𑀫𑁆𑀩𑀕𑀸𑀫𑀁 𑀅𑀫𑁆𑀩𑀕𑀸𑀫𑀢𑁄 𑀚𑀫𑁆𑀩𑀼𑀕𑀸𑀫𑀁 𑀚𑀫𑁆𑀩𑀼𑀕𑀸𑀫𑀢𑁄 𑀦𑀺𑀕𑁆𑀭𑁄𑀥𑀕𑀸𑀫𑀁 𑀦𑀺𑀕𑁆𑀭𑁄𑀥𑀕𑀸𑀫𑀢𑁄 𑀪𑁄𑀕𑀦𑀕𑀭𑀁 𑀪𑁄𑀕𑀦𑀕𑀭𑀢𑁄 𑀧𑀸𑀯𑀸𑀦𑀕𑀭𑀁 𑀧𑀸𑀯𑀸𑀦𑀕𑀭𑀢𑁄 𑀓𑀼𑀲𑀺𑀦𑀸𑀭𑀸𑀦𑀕𑀭𑀁 𑀧𑀢𑁆𑀢𑁄. 𑀢𑀢𑁆𑀣 𑀬𑀫𑀓𑀲𑀸𑀮𑀸𑀦𑀫𑀦𑁆𑀢𑀭𑁂 𑀞𑀻𑀢𑁄 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀢𑁆𑀯𑀸 𑀉𑀦𑁆𑀢𑀭𑀲𑀻𑀲𑀓𑀁 𑀓𑀢𑁆𑀯𑀸 𑀫𑀜𑁆𑀘𑀓𑀁 𑀧𑀜𑁆𑀜𑀸𑀧𑁂𑀳𑀺 𑀓𑀺𑀮𑀦𑁆𑀢𑁄𑀲𑁆𑀫𑀺 𑀆𑀦𑀦𑁆𑀤 𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀺’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑁄 𑀉𑀢𑁆𑀢𑀭𑀲𑀻𑀲𑀓𑀁 𑀓𑀢𑁆𑀯𑀸 𑀫𑀜𑁆𑀘𑀓𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀅𑀢𑁆𑀣𑀭𑀺𑀢𑁆𑀯𑀸 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀸𑀦𑀺 𑀅𑀲𑀬𑀺𑀢𑀩𑀼𑀤𑁆𑀥𑀲𑁂𑀬𑁆𑀬𑀁 𑀲𑀬𑀦𑁆𑀢𑁄 𑀤𑀓𑁆𑀔𑀺𑀡𑀧𑀲𑁆𑀲𑁂𑀦 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀅𑀦𑀼𑀝𑁆𑀞𑀸𑀦𑀲𑀜𑁆𑀜𑀁 𑀫𑀦𑀲𑀺𑀓𑀭𑀺𑀢𑁆𑀯𑀸 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺.

𑀅𑀢𑀻𑀢𑀫𑀤𑁆𑀥𑀸𑀦 𑀪𑀯𑁂 𑀘𑀭𑀦𑁆𑀢𑁄,

𑀅𑀦𑀦𑁆𑀢𑀲𑀢𑁆𑀢𑁂 𑀓𑀭𑀼𑀡𑀸𑀬𑀼𑀧𑁂𑀢𑁄;

𑀓𑀢𑁆𑀯𑀸𑀦 𑀧𑀼𑀜𑁆𑀜𑀸𑀦𑀺 𑀅𑀦𑀧𑁆𑀧𑀓𑀸𑀦𑀺,

𑀧𑀢𑁆𑀢𑁄 𑀲𑀺𑀯𑀁 𑀮𑁄𑀓𑀳𑀺𑀢𑀸𑀬 𑀦𑀸𑀣𑁄.

𑀏𑀯𑀁 ¶ 𑀳𑀺 𑀲𑁄 𑀤𑀲𑀩𑀮𑁄𑀧𑀺 𑀯𑀺𑀳𑀻𑀦𑀣𑀸𑀫𑁄,

𑀬𑀫𑀲𑁆𑀲 𑀲𑀸𑀮𑀸𑀦 𑀦𑀺𑀧𑀚𑁆𑀚𑀺 𑀫𑀚𑁆𑀛𑁂;

𑀓𑀢𑁆𑀯𑀸𑀦 𑀲𑀜𑁆𑀜𑀜𑁆𑀳𑀺 𑀅𑀦𑀼𑀝𑁆𑀞𑀳𑀸𑀦𑀁,

𑀲 𑀇𑀤𑁆𑀥𑀺𑀫𑀸 𑀫𑀸𑀭𑀫𑀼𑀔𑀁 𑀧𑀯𑀺𑀝𑁆𑀞𑁄.

𑀢𑀲𑁆𑀫𑀺𑀁 𑀔𑀡𑁂 𑀲𑀫𑀓𑀲𑀸𑀮𑀸 𑀲𑀼𑀧𑀼𑀧𑁆𑀨𑀺𑀢𑀸 𑀅𑀳𑁂𑀲𑀼𑀁. 𑀦 𑀓𑁂𑀯𑀮𑀁 𑀬𑀫𑀓𑀲𑀸𑀮𑀸𑀬𑁂𑀯 𑀲𑀼𑀧𑀼𑀧𑁆𑀨𑀻𑀢𑀸, 𑀅𑀣 𑀔𑁄 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀘𑀓𑁆𑀓𑀯𑀸𑀴𑁂𑀲𑀼 𑀲𑀸𑀮𑀭𑀼𑀓𑁆𑀔𑀸𑀧𑀺 𑀧𑀼𑀧𑁆𑀨𑀺𑀢𑀸. 𑀦 𑀲𑀸𑀮𑀭𑀼𑀓𑁆𑀔𑀸𑀬𑁂𑀯 𑀲𑀼𑀧𑀼𑀧𑁆𑀨𑀺𑀢𑀸, 𑀅𑀣 𑀔𑁄 𑀬𑀁 𑀓𑀺𑀜𑁆𑀘𑀺 𑀧𑀼𑀧𑁆𑀨𑀼𑀧𑀕𑀨𑀮𑀽𑀧𑀕 𑀭𑀼𑀓𑁆𑀔𑀚𑀸𑀢𑀁 𑀲𑀩𑁆𑀩𑀫𑁆𑀧𑀺 𑀧𑀼𑀧𑁆𑀨𑀜𑁆𑀘 𑀨𑀮𑀜𑁆𑀘 𑀕𑀡𑁆𑀳𑀺. 𑀚𑀮𑁂𑀲𑀼 𑀚𑀮𑀧𑀤𑀼𑀫𑀸𑀦𑀺 𑀣𑀮𑁂𑀲𑀼 𑀣𑀮𑀧𑀤𑀼𑀫𑀸𑀦𑀺 𑀔𑀦𑁆𑀥𑁂𑀲𑀼 𑀔𑀦𑁆𑀥𑀧𑀤𑀼𑀫𑀸𑀦𑀺 𑀲𑀸𑀔𑀸𑀲𑀼 𑀲𑀸𑀔𑀸𑀧𑀤𑀼𑀫𑀸𑀦𑀺 𑀮𑀢𑀸𑀲𑀼 𑀮𑀢𑀸𑀧𑀤𑀼𑀫𑀸𑀦𑀺 𑀆𑀓𑀸𑀲𑁂 𑀑𑀮𑀫𑁆𑀩𑀧𑀤𑀼𑀫𑀸𑀦𑀺 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀳𑀺𑀦𑁆𑀤𑀺𑀢𑁆𑀯𑀸 𑀲𑀢𑀧𑀢𑁆𑀢𑀧𑀤𑀼𑀫𑀸𑀦𑀺 𑀲𑀼𑀧𑀼𑀧𑁆𑀨𑀺𑀢𑀸𑀦𑀺 𑀅𑀳𑁂𑀲𑀼𑀁. 𑀧𑀣𑀯𑀺𑀢𑁄 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑁄 𑀢𑀸𑀯 𑀤𑀲𑀲𑀳𑀲𑁆𑀲𑀺 𑀘𑀓𑁆𑀓𑀯𑀸𑀴𑀸 𑀏𑀓𑀫𑀸𑀮𑀸𑀕𑀼𑀡𑀸 𑀯𑀺𑀬 𑀅𑀳𑁂𑀲𑀼𑀁. 𑀤𑁂𑀯𑀸 𑀆𑀓𑀸𑀲𑀢𑁄 𑀤𑀺𑀩𑁆𑀩𑀫𑀦𑁆𑀤𑀸𑀭𑀯𑀧𑀸𑀭𑀺𑀘𑁆𑀙𑀢𑁆𑀢𑀓𑀓𑁄𑀯𑀺𑀴𑀸𑀭𑀧𑀼𑀧𑁆𑀨𑀸𑀦𑀺 𑀘 𑀘𑀦𑁆𑀤𑀦𑀘𑀼𑀡𑁆𑀡𑀸𑀦𑀺 𑀘 𑀲𑀫𑀸𑀓𑀺𑀭𑀦𑁆𑀢𑀺. 𑀤𑀺𑀩𑁆𑀩𑀢𑀼𑀭𑀺𑀬𑀲𑀗𑁆𑀕𑀺𑀢𑀺𑀬𑁄 𑀘 𑀅𑀦𑁆𑀢𑀮𑀺𑀓𑁆𑀔𑁂 𑀧𑀯𑀢𑁆𑀢𑀦𑁆𑀢𑀺. 𑀅𑀦𑁂𑀓𑀸𑀦𑀺 𑀅𑀘𑁆𑀙𑀭𑀺𑀬𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀏𑀯𑀁 𑀧𑀽𑀚𑀸𑀯𑀺𑀲𑁂𑀲𑁂 𑀧𑀯𑀢𑁆𑀢𑀫𑀸𑀦𑁂 𑀧𑀞𑀫𑀬𑀸𑀫𑁂 𑀲𑀼𑀪𑀤𑁆𑀤𑀧𑀭𑀺𑀩𑁆𑀩𑀸𑀚𑀓𑀁 𑀯𑀺𑀦𑁂𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀤𑀲𑀲𑀳𑀲𑁆𑀲𑀺 𑀮𑁄𑀓𑀥𑀸𑀢𑀼 𑀤𑁂𑀯𑀢𑀸𑀦𑀁 𑀅𑀦𑀼𑀲𑀸𑀲𑀺𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑀸𑀯𑀲𑀸𑀦𑁂 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀤𑀼𑀢𑀺𑀬𑀚𑁆𑀛𑀸𑀦𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀢𑀢𑁄 𑀯𑀼𑀝𑁆𑀞𑀸𑀬 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺. 𑀢𑀢𑁄 𑀯𑀼𑀝𑁆𑀞𑀸𑀬 𑀧𑀞𑀫𑀚𑁆𑀛𑀸𑀦𑀁 𑀤𑀼𑀢𑀺𑀬𑀚𑁆𑀛𑀸𑀦𑀁 𑀢𑀢𑀺𑀬𑀚𑁆𑀛𑀸𑀦𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀜𑁆𑀘 𑀲𑀫𑀸𑀧𑀚𑁆𑀚𑀺. 𑀢𑀢𑁄 𑀯𑀼𑀝𑁆𑀞𑀸𑀬 𑀏𑀢𑁆𑀣𑀦𑁆𑀢𑀭𑀢𑁄 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀫𑀳𑀸𑀫𑁄𑀳𑀢𑀫𑀁 𑀳𑀦𑁆𑀢𑁆𑀯𑀸 𑀲𑀢𑁆𑀢𑀸𑀦𑀁 𑀳𑀤𑀬𑀲𑁆𑀲𑀺𑀢𑀁,

𑀭𑀯𑀻𑀯 𑀚𑁄𑀢𑀫𑀸𑀦𑁄 𑀲𑁄 𑀮𑁄𑀓𑀲𑁆𑀲 𑀅𑀦𑀼𑀓𑀫𑁆𑀧𑀓𑁄;

𑀯𑀲𑁆𑀲𑀸𑀦𑀺 ¶ 𑀧𑀜𑁆𑀘𑀢𑀸𑀮𑀻𑀲𑀁 𑀓𑀢𑁆𑀯𑀸 𑀲𑀢𑁆𑀢𑀳𑀺𑀢𑀁 𑀩𑀳𑀼𑀁,

𑀅𑀥𑀼𑀦𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀯 𑀧𑀭𑀺𑀦𑀺𑀩𑁆𑀩𑀸𑀬𑀺 𑀲𑁄 𑀚𑀺𑀦𑁄.

𑀏𑀯𑀁 𑀧𑀦 𑀪𑀕𑀯𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀯𑀺𑀲𑁆𑀲𑀓𑀫𑁆𑀫𑀤𑁂𑀯𑀧𑀼𑀢𑁆𑀢𑁄 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀧𑁆𑀧𑀫𑀸𑀡𑀁 𑀯𑀭𑀤𑁄𑀡𑀺𑀁 𑀭𑀢𑀦𑁂𑀳𑀺 𑀫𑀸𑀧𑁂𑀢𑁆𑀯𑀸 𑀯𑀺𑀲𑀼𑀤𑁆𑀥𑀓𑀧𑁆𑀧𑀸𑀲𑁂𑀳𑀺 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀁 𑀯𑁂𑀞𑁂𑀢𑁆𑀯𑀸 𑀭𑀢𑀦𑀤𑁄𑀡𑀺𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀦𑁆𑀥𑀢𑁂𑀮𑁂𑀳𑀺 𑀧𑀽𑀭𑁂𑀢𑁆𑀯𑀸 𑀅𑀧𑀭𑀸𑀬 𑀤𑁄𑀡𑀺𑀬𑀸 𑀧𑀺𑀤𑀳𑀺𑀢𑁆𑀯𑀸 𑀲𑀩𑁆𑀩𑀕𑀦𑁆𑀥𑀤𑀸𑀭𑀼𑀘𑀺𑀢𑀓𑀁 𑀓𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀤𑁂𑀯𑀢𑀸𑀬𑁄 𑀮𑁄𑀳𑀺𑀢𑀘𑀦𑁆𑀤𑀦𑀖𑀝𑀺𑀓𑀸𑀬𑁄 𑀆𑀤𑀸𑀬 𑀘𑀺𑀢𑀓𑀸𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀕𑁆𑀕𑀺𑀁 𑀕𑀸𑀳𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀓𑀲𑁆𑀫𑀸? 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀅𑀦𑀸𑀕𑀢𑀢𑁆𑀢𑀸. 𑀲𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀬𑁂𑀪𑀼𑀬𑁆𑀬𑁂𑀦 𑀩𑀳𑀼𑀦𑁆𑀦𑀁 𑀤𑁂𑀯𑀸𑀦𑀁 𑀧𑀺𑀬𑁄 𑀫𑀦𑀸𑀧𑁄. 𑀣𑁂𑀭𑀲𑁆𑀲 𑀳𑀺 𑀤𑀸𑀦𑀁 𑀤𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀸𑀦𑀁 𑀧𑀫𑀸𑀡𑁄 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀤𑁂𑀯𑀢𑀸 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀅𑀢𑁆𑀢𑀦𑁄 𑀓𑀼𑀮𑀽𑀧𑀕𑀢𑁆𑀣𑁂𑀭𑀁 𑀅𑀤𑀺𑀲𑁆𑀯𑀸 𑀅𑀫𑁆𑀳𑀸𑀓𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀓𑀼𑀳𑀺𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂𑀳𑀺 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄𑀢𑀺 𑀜𑀢𑁆𑀯𑀸 𑀬𑀸𑀯 𑀣𑁂𑀭𑁄 𑀇𑀫𑀲𑁆𑀫𑀺𑀁 𑀦 𑀲𑀫𑁆𑀧𑀢𑁆𑀢𑁄 𑀘𑀺𑀢𑀓𑀁 𑀢𑀸𑀯 𑀦 𑀧𑀚𑁆𑀚𑀮𑀢𑀼𑀢𑀺 𑀅𑀥𑀺𑀝𑁆𑀞𑀳𑀺𑀁𑀲𑀼. 𑀢𑀲𑁆𑀫𑀺𑀁 𑀓𑀸𑀮𑁂 𑀣𑁂𑀭𑁄 𑀬𑁂𑀪𑀼𑀬𑁆𑀬𑁂𑀦 𑀢𑁂𑀭𑀲𑀥𑀼𑀢𑀗𑁆𑀕𑀥𑀭𑁂𑀳𑀺 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀆𑀕𑀦𑁆𑀢𑁆𑀯𑀸 𑀘𑀺𑀢𑀓𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀸𑀤𑀧𑀲𑁆𑀲𑁂 𑀞𑀻𑀢𑁄, 𑀪𑀦𑁆𑀢𑁂 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀢𑁆𑀣𑀸𑀬 𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀧𑀤𑀼𑀫𑀼𑀢𑁆𑀢𑀭𑀲𑀢𑁆𑀣𑀼𑀦𑁄 𑀧𑀸𑀤𑀫𑀼𑀮𑁂 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀅𑀯𑀺𑀚𑀳𑀺𑀢𑁆𑀯𑀸 𑀆𑀕𑀢𑁄. 𑀇𑀤𑀸𑀦𑀺 𑀫𑁂 𑀅𑀯𑀲𑀸𑀦𑀤𑀲𑁆𑀲𑀦𑀦𑁆𑀢𑀺 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀯𑀦𑁆𑀤𑀺𑀢𑀼𑀁 𑀅𑀥𑀺𑀝𑁆𑀞𑀸𑀲𑀺.

𑀫𑀳𑀸𑀓𑀲𑁆𑀲𑀧𑀣𑁂𑀭𑁄 𑀲𑁄 𑀪𑀺𑀓𑁆𑀔𑀼𑀲𑀗𑁆𑀖𑀧𑀼𑀭𑀓𑁆𑀔𑀢𑁄;

𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸 𑀧𑀕𑁆𑀕𑀳𑁂𑀢𑁆𑀯𑀸𑀦 𑀅𑀜𑁆𑀚𑀮𑀺𑀁.

𑀧𑀤𑀓𑁆𑀔𑀺𑀡𑀜𑁆𑀘 𑀢𑀺𑀓𑁆𑀔𑀢𑁆𑀢𑀼𑀁 𑀓𑀢𑁆𑀯𑀸 𑀞𑀢𑁆𑀯𑀸 𑀧𑀤𑀦𑁆𑀢𑀺𑀓𑁂;

𑀧𑀢𑀺𑀝𑁆𑀞𑀳𑀦𑁆𑀢𑀼 𑀲𑀻𑀲𑁂 𑀫𑁂 𑀚𑀺𑀦𑀧𑀸𑀤𑁂𑀢𑀺’𑀥𑀺𑀝𑁆𑀞𑀳𑀺.

𑀲𑀳𑀸𑀥𑀺𑀝𑁆𑀞𑀸𑀦𑀁 𑀘𑀺𑀢𑀓𑀸 𑀤𑀼𑀲𑁆𑀲𑀸𑀦𑀺 𑀘 𑀯𑀺𑀪𑀺𑀦𑁆𑀤𑀺𑀬;

𑀦𑀺𑀓𑁆𑀔𑀫𑀺𑀁𑀲𑀼 𑀢𑀤𑀸 𑀧𑀸𑀤𑀸 𑀖𑀦𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸.

𑀉𑀳𑁄 𑀳𑀢𑁆𑀣𑁂𑀳𑀺 𑀧𑀕𑁆𑀕𑀬𑁆𑀳 𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀺𑀭𑁂;

𑀯𑀦𑁆𑀤𑀺𑀢𑁆𑀯𑀸 𑀲𑀢𑁆𑀣𑀼𑀦𑁄 𑀧𑀸𑀤𑁂 𑀔𑀫𑀸𑀧𑁂𑀢𑁆𑀯𑀸 𑀯𑀺𑀲𑀚𑁆𑀚𑀬𑀻.

𑀧𑀼𑀡𑁆𑀡𑀘𑀦𑁆𑀤𑁄 𑀬𑀣𑀸 𑀅𑀩𑁆𑀪𑀁 𑀘𑀺𑀢𑀓𑀁 𑀧𑀸𑀯𑀺𑀲𑀺 𑀢𑀤𑀸;

𑀇𑀤𑀁 𑀅𑀘𑁆𑀙𑁂𑀭𑀓𑀁 𑀤𑀺𑀲𑁆𑀯𑀸 𑀭𑀯𑀁 𑀭𑀯𑀺 𑀫𑀳𑀸𑀚𑀦𑁄.

𑀉𑀝𑁆𑀞𑀳𑀺𑀢𑁆𑀯𑀸𑀦 𑀧𑀸𑀘𑀻𑀦𑀸 𑀯𑀦𑁆𑀤𑁄 𑀅𑀢𑁆𑀣𑀗𑁆𑀕𑀢𑁄 𑀬𑀣𑀸;

𑀧𑀸𑀤𑁂 𑀅𑀦𑁆𑀢𑀭𑀥𑀸𑀬𑀦𑁆𑀢𑁂 𑀅𑀭𑁄𑀤𑀺𑀁𑀲𑀼 𑀫𑀳𑀸𑀚𑀦𑀸.

𑀢𑀤𑀸 𑀫𑀮𑁆𑀮𑀭𑀸𑀚𑀸𑀦𑁄 𑀪𑀕𑀯𑀢𑁄 𑀲𑀭𑀻𑀭𑀓𑀺𑀘𑁆𑀘𑀁 𑀓𑀭𑀺𑀲𑁆𑀲𑀸𑀫𑀸𑀢𑀺 𑀯𑀢𑁆𑀯𑀸 𑀦𑀸𑀦𑀸𑀯𑀢𑁆𑀣𑀸𑀪𑀭𑀡𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀢𑀢𑁄 𑀭𑀸𑀚𑀸𑀦𑁄 𑀫𑀦𑀼𑀲𑁆𑀲𑀸 𑀘 𑀅𑀕𑁆𑀕𑀺𑀁 𑀤𑀸𑀢𑀼𑀁 𑀆𑀭𑀳𑀺𑀁𑀲𑀼. 𑀢𑀤𑀸 𑀲𑀓𑁆𑀓𑁄? 𑀫𑀬𑀺 𑀧𑀦 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀫𑀡𑀺𑀚𑁄𑀢𑀺𑀭𑀲𑀁 𑀧𑀲𑀸𑀭𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀅𑀕𑁆𑀕𑀺𑀦𑀸 𑀫𑀫 𑀲𑀭𑀻𑀭𑀓𑀺𑀘𑁆𑀘𑀁 𑀓𑀭𑀺𑀲𑁆𑀲𑀢𑀺. 𑀫𑀡𑀺𑀅𑀕𑁆𑀕𑀺𑀦𑁄 𑀅𑀯𑀲𑀸𑀦𑁂 𑀫𑀦𑀼𑀲𑁆𑀲𑀸 𑀅𑀕𑁆𑀕𑀺𑀁 𑀓𑀭𑀺𑀲𑁆𑀲𑀦𑁆𑀢𑀺𑀢𑀺. 𑀏𑀯𑀁 𑀩𑀼𑀤𑁆𑀥𑀯𑀘𑀦𑀁 𑀧𑀭𑀺𑀪𑀸𑀯𑁂𑀢𑁆𑀯𑀸 𑀦𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀪𑀕𑀯𑀢𑁄 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀲𑀫𑀦𑁆𑀢𑀢𑁄 𑀉𑀝𑁆𑀞𑀳𑀢𑀼𑀢𑀺 𑀅𑀥𑀺𑀝𑁆𑀞𑀳𑀺.

𑀢𑀲𑁆𑀫𑀺𑀁 𑀔𑀡𑁂 𑀲𑀬𑀫𑁂𑀯 𑀘𑀺𑀢𑀓𑀁 𑀅𑀕𑁆𑀕𑀺 𑀕𑀡𑁆𑀳𑀺. 𑀲𑀭𑀻𑀭𑀁 𑀧𑀦 𑀪𑀕𑀯𑀢𑁄 𑀛𑀸𑀬𑀸𑀫𑀸𑀦𑀁 𑀙𑀯𑀺𑀘𑀫𑁆𑀫𑀫𑀁𑀲𑀦𑀳𑀸𑀭𑀼𑀅𑀝𑁆𑀞𑀺𑀅𑀝𑁆𑀞𑀺𑀫𑀺𑀜𑁆𑀚𑀁 𑀅𑀲𑁂𑀲𑁂𑀢𑁆𑀯𑀸 𑀲𑀼𑀫𑀦𑀫𑀓𑀼𑀴𑀫𑀼𑀢𑁆𑀢𑀸𑀭𑀸𑀲𑀺𑀲𑀤𑀺𑀲𑀫𑁂𑀯 𑀥𑀸𑀢𑀼𑀬𑁄 𑀅𑀯𑀲𑁂𑀲𑀸 𑀅𑀳𑁂𑀲𑀼𑀁.

𑀧𑀭𑀺𑀦𑀺𑀩𑁆𑀩𑀼𑀢𑀓𑀸𑀮𑁂𑀧𑀺 𑀲𑀓𑀮𑀁 𑀓𑀮𑀼𑀦𑀁 𑀅𑀳𑀼;

𑀧𑀭𑀺𑀤𑁂𑀯𑁄 𑀫𑀳𑀸 𑀆𑀲𑀺 𑀫𑀳𑀻 𑀉𑀤𑁆𑀭𑀺𑀬𑀦𑀁 𑀬𑀣𑀸.

𑀤𑁂𑀯𑀢𑀸𑀬𑀸𑀦𑀼𑀪𑀸𑀯𑁂𑀦 𑀲𑀢𑁆𑀣𑀼𑀦𑁄 𑀘𑀺𑀢𑀓𑁄 𑀲𑀬𑀁;

𑀢𑀢𑁄 𑀏𑀓𑀧𑁆𑀧𑀳𑀸𑀭𑁂𑀦 𑀧𑀚𑁆𑀚𑀮𑀺𑀢𑁆𑀣 𑀲𑀫𑀦𑁆𑀢𑀢𑁄.

𑀬𑀜𑁆𑀘 𑀅𑀩𑁆𑀪𑀦𑁆𑀢𑀭𑀁 𑀤𑀼𑀲𑁆𑀲𑀁 𑀬𑀁 𑀤𑀼𑀲𑁆𑀲𑀁 𑀲𑀩𑁆𑀩𑀩𑀸𑀳𑀺𑀭𑀁

𑀤𑀼𑀲𑁆𑀲𑁂 𑀤𑁆𑀯𑁂𑀯 𑀦 𑀛𑀸𑀬𑀺𑀁𑀲𑀼 𑀢𑁂𑀲𑀁 𑀤𑀼𑀲𑁆𑀲𑀸𑀦𑀫𑀦𑁆𑀢𑀭𑁂;

𑀬𑀣𑀸 𑀦𑀺𑀭𑀼𑀤𑁆𑀥𑀢𑁂𑀮𑀲𑁆𑀲 𑀦 𑀫𑀲𑀻 𑀦 𑀘 𑀙𑀸𑀭𑀺𑀓𑀸;

𑀏𑀯𑀫𑀲𑁆𑀲 𑀦 𑀤𑀺𑀲𑁆𑀲𑀢𑀺 𑀩𑀼𑀤𑁆𑀥𑀕𑀢𑁆𑀢𑀲𑁆𑀲 𑀛𑀸𑀬𑀢𑁄.

𑀲𑀼𑀫𑀦𑀫𑀓𑀼𑀴𑀲𑀪𑀸𑀯𑀸 𑀘 𑀥𑁄𑀢𑀫𑀼𑀢𑁆𑀢𑀸𑀪𑀫𑁂𑀯 𑀘;

𑀲𑀼𑀯𑀡𑁆𑀡𑀯𑀡𑁆𑀡𑀲𑀁𑀓𑀸𑀲𑀸 𑀅𑀯𑀲𑀺𑀲𑁆𑀲𑀁𑀲𑀼 𑀥𑀸𑀢𑀼𑀬𑁄.

𑀤𑀸𑀞𑀸 𑀘𑀢𑀲𑁆𑀲𑁄 𑀉𑀡𑁆𑀳𑀻𑀲𑀁 𑀅𑀓𑁆𑀔𑀓𑀸 𑀤𑁆𑀯𑁂 𑀘 𑀲𑀢𑁆𑀢𑀺𑀫𑀸;

𑀦 𑀯𑀺𑀓𑀺𑀡𑁆𑀡𑀸 𑀢𑀢𑁄 𑀲𑁂𑀲𑀸 𑀯𑀺𑀧𑁆𑀧𑀓𑀺𑀡𑁆𑀡𑀸𑀯 𑀥𑀸𑀢𑀼𑀬𑁄.

𑀅𑀳𑁄𑀲𑀺 𑀢𑀦𑀼𑀓𑀸 𑀥𑀸𑀢𑀼 𑀲𑀸𑀲𑀧𑀩𑀻𑀚𑀫𑀢𑁆𑀢𑀺𑀓𑀸;

𑀥𑀸𑀢𑀼𑀬𑁄 𑀫𑀚𑁆𑀛𑀺𑀫𑀸 𑀫𑀚𑁆𑀛𑁂𑀪𑀺𑀦𑁆𑀦𑀢𑀡𑁆𑀟𑀼𑀮𑀫𑀢𑁆𑀢𑀺𑀓𑀸.

𑀥𑀸𑀢𑀼𑀬𑁄 ¶ 𑀫𑀳𑀢𑀺 𑀫𑀚𑁆𑀛𑁂 𑀪𑀺𑀦𑁆𑀦𑀫𑀼𑀕𑁆𑀕𑀧𑁆𑀧𑀫𑀸𑀡𑀺𑀓𑀸;

𑀥𑀸𑀢𑀼𑀯𑀡𑁆𑀡𑀸 𑀢𑀬𑁄 𑀆𑀲𑀼𑀁 𑀩𑀼𑀤𑁆𑀥𑀸𑀥𑀺𑀝𑁆𑀞𑀸𑀦𑀢𑁂𑀚𑀲𑀸.

𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀣𑁂𑀭𑀲𑁆𑀲 𑀲𑀺𑀲𑁆𑀲𑁄 𑀲𑀭𑀪𑀼𑀦𑀸𑀫𑀓𑁄;

𑀆𑀤𑀸𑀬 𑀚𑀺𑀦𑀕𑀻𑀯𑀝𑁆𑀞𑀺𑀁 𑀘𑀺𑀢𑀓𑀸𑀢𑁄𑀯 𑀥𑀸𑀢𑀼 𑀲𑁄.

𑀲𑀤𑁆𑀥𑀺𑀁 𑀲𑀺𑀲𑁆𑀲𑀲𑀳𑀲𑁆𑀲𑁂𑀦 𑀘𑁂𑀢𑀺𑀬𑁂 𑀫𑀳𑀺𑀬𑀗𑁆𑀕𑀡𑁂;

𑀞𑀧𑁂𑀢𑁆𑀯𑀸 𑀘𑁂𑀢𑀺𑀬𑀁 𑀓𑀢𑁆𑀯𑀸 𑀓𑀼𑀲𑀺𑀦𑀸𑀭𑀫𑀕𑀸 𑀫𑀼𑀦𑀺.

𑀙𑀴𑀪𑀺𑀜𑁆𑀜𑁄 𑀯𑀲𑀺𑀧𑁆𑀧𑀢𑁆𑀢𑁄 𑀔𑁂𑀫𑁄 𑀓𑀸𑀭𑀼𑀡𑀺𑀓𑁄 𑀫𑀼𑀦𑀺;

𑀲𑀳𑀲𑀸 𑀘𑀺𑀢𑀓𑀸𑀢𑁄𑀯 𑀯𑀸𑀫𑀤𑀸𑀞𑀁 𑀲𑀫𑀕𑁆𑀕𑀳𑀻.

𑀆𑀓𑀸𑀲𑀢𑁄 𑀧𑀢𑀺𑀢𑁆𑀯𑀸𑀧𑀺 𑀦𑀺𑀓𑁆𑀔𑀫𑀺𑀢𑁆𑀯𑀸𑀧𑀺 𑀲𑀸𑀮𑀢𑁄;

𑀲𑀫𑀦𑁆𑀢𑀢𑁄𑀫𑁆𑀩𑀼𑀫𑀼𑀕𑁆𑀕𑀦𑁆𑀢𑁆𑀯𑀸 𑀦𑀺𑀩𑁆𑀩𑀸𑀧𑁂𑀲𑀼𑀁 𑀚𑀮𑀸𑀦𑀮𑀁.

𑀫𑀮𑁆𑀮𑀭𑀸𑀚𑀕𑀡𑀸 𑀲𑀩𑁆𑀩𑁂 𑀲𑀩𑁆𑀩𑀕𑀦𑁆𑀥𑁄𑀤𑀓𑁂𑀦 𑀢𑀁;

𑀘𑀺𑀢𑀓𑀁 𑀮𑁄𑀓𑀦𑀸𑀣𑀲𑁆𑀲 𑀦𑀺𑀩𑁆𑀩𑀸𑀧𑁂𑀲𑀼𑀁 𑀫𑀳𑁂𑀲𑀺𑀦𑁄.

𑀏𑀯𑀁 𑀧𑀦 𑀲𑀩𑁆𑀩𑀮𑁄𑀓𑁂 𑀓𑀭𑀼𑀡𑀸𑀥𑀺𑀓𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑁂𑀲𑀸𑀔𑀧𑀼𑀡𑁆𑀡𑀫𑀼𑀧𑁄𑀲𑀣𑁂 𑀅𑀗𑁆𑀕𑀸𑀭𑀤𑀺𑀯𑀲𑁂 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀲𑀗𑁆𑀕𑀳𑀓𑀭𑀡𑀢𑁆𑀣𑀸𑀬 𑀬𑀫𑀓𑀲𑀸𑀮𑀸𑀦𑀫𑀦𑁆𑀢𑀭𑁂 𑀘𑀺𑀢𑀓𑀁 𑀲𑀢𑁆𑀢𑀭𑀢𑁆𑀢𑀺𑀦𑁆𑀤𑀺𑀯𑀁 𑀯𑀲𑀻. 𑀢𑀢𑁄 𑀯𑀻𑀲𑀁 𑀳𑀢𑁆𑀣𑀲𑀢𑀺𑀓𑀲𑁆𑀲 𑀉𑀧𑀭𑀺 𑀲𑀢𑁆𑀢𑀭𑀢𑁆𑀢𑀺𑀦𑁆𑀤𑀺𑀯𑀁 𑀯𑀲𑀺. 𑀬𑀸𑀯 𑀅𑀕𑁆𑀕𑀺𑀧𑀭𑀺𑀦𑀺𑀩𑁆𑀩𑀸𑀧𑀦𑀁 𑀲𑀢𑁆𑀢𑀭𑀢𑁆𑀢𑀺𑀦𑁆𑀤𑀺𑀯𑀁 𑀳𑁄𑀢𑀺.

𑀢𑀢𑁄 𑀲𑀢𑁆𑀢𑀤𑀺𑀯𑀲𑀸𑀦𑀺 𑀓𑀼𑀲𑀺𑀦𑀸𑀭𑀸𑀬𑀁 𑀫𑀮𑁆𑀮𑀭𑀸𑀚𑀧𑀼𑀢𑁆𑀢𑁂𑀲𑀼 𑀕𑀦𑁆𑀥𑁄𑀤𑀓𑁂𑀦 𑀘𑀺𑀢𑀓𑀁 𑀦𑀺𑀩𑁆𑀩𑀸𑀧𑀬𑀫𑀸𑀦𑁂𑀲𑀼 𑀲𑀸𑀮𑀭𑀼𑀓𑁆𑀔𑀢𑁄 𑀉𑀤𑀓𑀥𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀺𑀢𑀓𑀁 𑀦𑀺𑀩𑁆𑀩𑀸𑀧𑀬𑀺𑀁𑀲𑀼. 𑀢𑀢𑁄 𑀤𑀲𑀩𑀮𑀲𑁆𑀲 𑀥𑀸𑀢𑀼𑀬𑁄 𑀲𑀼𑀯𑀡𑁆𑀡𑀘𑀗𑁆𑀕𑁄𑀝𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀢𑁆𑀢𑀦𑁄 𑀦𑀕𑀭𑁂 𑀲𑀦𑁆𑀣𑀸𑀕𑀸𑀭𑁂 𑀞𑀧𑁂𑀢𑁆𑀯𑀸 𑀲𑀢𑁆𑀢𑀺𑀧𑀜𑁆𑀚𑀭𑀁 𑀓𑀢𑁆𑀯𑀸 𑀥𑀦𑀼𑀧𑀸𑀓𑀸𑀭𑁂𑀳𑀺 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀫𑀮𑁆𑀮𑀭𑀸𑀚𑀧𑀼𑀢𑁆𑀢𑀸 𑀲𑀓𑁆𑀓𑀸𑀭𑀁 𑀓𑀭𑀺𑀁𑀲𑀼.

𑀢𑀢𑁄 𑀢𑁂 𑀫𑀮𑁆𑀮𑀭𑀸𑀚𑀸𑀦𑁄 𑀭𑀫𑁆𑀫𑀁 𑀤𑁂𑀯𑀲𑀪𑁄𑀧𑀫𑀁;

𑀲𑀩𑁆𑀩𑀣𑀸 𑀫𑀡𑁆𑀟𑀼𑀬𑀺𑀢𑁆𑀯𑀸𑀦 𑀲𑀦𑁆𑀣𑀸𑀕𑀸𑀭𑀁 𑀢𑀢𑁄 𑀧𑀦.

𑀫𑀕𑁆𑀕𑀁 ¶ 𑀅𑀮𑀗𑁆𑀓𑀭𑀺𑀢𑁆𑀯𑀸𑀦 𑀬𑀸𑀯 𑀫𑀓𑀼𑀝𑀘𑁂𑀢𑀺𑀬𑀸;

𑀳𑀢𑁆𑀣𑀻𑀓𑁆𑀔𑀦𑁆𑀥𑁂 𑀞𑀧𑁂𑀢𑁆𑀯𑀸𑀦 𑀳𑁂𑀫𑀤𑁄𑀡𑀺𑀁 𑀲𑀥𑀸𑀢𑀼𑀓𑀁.

𑀕𑀦𑁆𑀥𑀸𑀤𑀻𑀳𑀺𑀧𑀺 𑀧𑀽𑀚𑁂𑀢𑁆𑀯𑀸 𑀓𑀻𑀴𑀦𑁆𑀢𑀸 𑀲𑀸𑀥𑀼𑀓𑀻𑀴𑀺𑀢𑀁;

𑀧𑀯𑁂𑀲𑁂𑀢𑁆𑀯𑀸𑀦 𑀦𑀕𑀭𑀁 𑀲𑀦𑁆𑀣𑀸𑀕𑀸𑀭𑁂 𑀫𑀦𑁄𑀭𑀫𑁂.

𑀤𑀲𑀪𑀽𑀫𑀲𑁆𑀫𑀺𑀁 𑀧𑀮𑁆𑀮𑀗𑁆𑀓𑁂 𑀞𑀧𑁂𑀢𑁆𑀯𑀸 𑀚𑀺𑀦𑀥𑀸𑀢𑀼𑀬𑁄;

𑀉𑀲𑁆𑀲𑀬𑀼𑀁 𑀢𑁂 𑀢𑀤𑀸 𑀙𑀢𑁆𑀢𑁂 𑀲𑀦𑁆𑀣𑀸𑀕𑀸𑀭𑀲𑀫𑀦𑁆𑀢𑀢𑁄.

𑀳𑀢𑁆𑀣𑀻𑀳𑀺 𑀧𑀭𑀺𑀓𑁆𑀔𑀺𑀧𑀸𑀧𑁂𑀲𑀼𑀁 𑀢𑀢𑁄 𑀅𑀲𑁆𑀲𑁂 𑀢𑀢𑁄 𑀭𑀣𑁂,

𑀅𑀜𑁆𑀜𑁄’𑀜𑁆𑀜𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀢𑀢𑁄 𑀬𑁄𑀥𑁂 𑀢𑀢𑁄 𑀥𑀦𑀼;

𑀇𑀢𑀺 𑀧𑀭𑀺𑀓𑁆𑀔𑀺𑀧𑀸𑀧𑁂𑀲𑀼𑀁 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀓𑀫𑀸,

𑀢𑀤𑀸 𑀦𑀘𑁆𑀘𑁂𑀳𑀺 𑀕𑀻𑀢𑁂𑀳𑀺 𑀯𑀸𑀤𑀺𑀢𑁂𑀳𑀺 𑀘 𑀧𑀽𑀚𑀬𑀼𑀁.)

𑀧𑀭𑀺𑀦𑀺𑀩𑁆𑀩𑀸𑀦𑀓𑀣𑀸 𑀲𑀫𑀢𑁆𑀢𑀸.

𑀢𑀢𑁄 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀲𑀼𑀢𑁆𑀯𑀸 𑀅𑀚𑀸𑀢𑀲𑀢𑁆𑀢𑀼 𑀫𑀳𑀸𑀭𑀸𑀚𑀸 𑀓𑁄𑀲𑀺𑀦𑀸𑀭𑀓𑀸𑀦𑀁 𑀫𑀮𑁆𑀮𑀸𑀦𑀁 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀅𑀳𑀫𑁆𑀧𑀺 𑀔𑀢𑁆𑀢𑀺𑀬𑁄 𑀪𑀕𑀯𑀸𑀧𑀺 𑀔𑀢𑁆𑀢𑀺𑀬𑁄 𑀲𑀢𑁆𑀣𑀼𑀦𑁄 𑀲𑀭𑀻𑀭𑀥𑀸𑀢𑀼𑀦𑀁 𑀣𑀽𑀧𑀜𑁆𑀘 𑀫𑀳𑀜𑁆𑀘 𑀓𑀭𑁄𑀫𑀻𑀢𑀺. 𑀢𑁂𑀦𑁂𑀯 𑀉𑀧𑀸𑀬𑁂𑀦 𑀯𑁂𑀲𑀸𑀮𑀺𑀬𑀁 𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑁄 𑀘 𑀓𑀧𑀺𑀮𑀯𑀢𑁆𑀣𑀼𑀫𑁆𑀳𑀺 𑀲𑀓𑁆𑀬𑀭𑀸𑀚𑀸𑀦𑁄 𑀘 𑀅𑀮𑁆𑀮𑀓𑀧𑁆𑀧𑀓𑁂 𑀩𑀼𑀮𑀬𑁄 𑀘 𑀭𑀸𑀫𑀕𑀸𑀫𑀓𑁂 𑀓𑁄𑀴𑀺𑀬𑀸 𑀘 𑀯𑁂𑀞𑀤𑀻𑀧𑀓𑁂 𑀩𑁆𑀭𑀸𑀳𑁆𑀫𑀡𑁄 𑀘 𑀧𑀸𑀯𑀸𑀬𑀁 𑀧𑀸𑀯𑁂𑀬𑁆𑀬𑀓𑀸 𑀘 𑀲𑀸𑀲𑀦𑀁 𑀧𑁂𑀲𑁂𑀢𑁆𑀯𑀸 𑀲𑀩𑁆𑀩𑁂 𑀏𑀓𑀢𑁄 𑀳𑀼𑀢𑁆𑀯𑀸 𑀓𑁄𑀲𑀺𑀦𑀸𑀭𑀓𑁂𑀳𑀺 𑀲𑀤𑁆𑀥𑀺𑀁 𑀯𑀺𑀯𑀸𑀤𑀁 𑀉𑀧𑁆𑀧𑀸𑀤𑁂𑀲𑀼𑀁. 𑀢𑁂𑀲𑀁 𑀧𑀦 𑀆𑀘𑀭𑀺𑀬𑁄 𑀤𑁆𑀭𑁄𑀡𑀩𑁆𑀭𑀸𑀳𑁆𑀫𑀡𑁄 𑀦𑀸𑀫. 𑀲𑁄 𑀢𑁂𑀲𑀁? 𑀫𑀸 𑀪𑁄𑀦𑁆𑀢𑁄 𑀯𑀺𑀕𑁆𑀕𑀳𑀯𑀺𑀯𑀸𑀤𑀁 𑀓𑀭𑁄𑀣, 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀔𑀦𑁆𑀢𑀺𑀯𑀸𑀤𑀻𑀬𑁂𑀯𑀸𑀢𑀺 𑀯𑀢𑁆𑀯𑀸 𑀢𑀸𑀤𑀺𑀲𑀲𑁆𑀲 𑀘 𑀔𑀦𑁆𑀢𑀺𑀫𑁂𑀢𑁆𑀢𑀸𑀦𑀼𑀤𑁆𑀤𑀬𑀲𑀫𑁆𑀧𑀦𑁆𑀦𑀲𑁆𑀲 𑀲𑀭𑀻𑀭𑀪𑀸𑀕𑁂 𑀓𑀮𑀳𑀁 𑀓𑀸𑀢𑀼𑀁 𑀅𑀬𑀼𑀢𑁆𑀢𑀦𑁆𑀢𑀺 𑀆𑀳.

(𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼 𑀘 𑀮𑀺𑀘𑁆𑀙𑀯𑀻 𑀘 𑀦𑀭𑀸𑀥𑀺𑀧𑀸;

𑀲𑀓𑁆𑀬𑀸 𑀘 𑀅𑀮𑁆𑀮𑀓𑀧𑁆𑀧𑀸 𑀘 𑀓𑁄𑀴𑀺𑀬𑀸𑀧𑀺 𑀘 𑀭𑀸𑀫𑀓𑁂.

𑀩𑁆𑀭𑀸𑀳𑁆𑀫𑀡𑁄 𑀯𑁂𑀞𑀤𑀻𑀧𑁄 𑀘 𑀫𑀮𑁆𑀮𑀧𑀸𑀯𑁂𑀬𑁆𑀬𑀓𑀸𑀧𑀺 𑀘;

𑀫𑀮𑁆𑀮𑀸 𑀘 𑀥𑀸𑀢𑀼 𑀅𑀢𑁆𑀣𑀸𑀬 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀸𑀤𑀬𑀼𑀁.

𑀏𑀯𑀁 ¶ 𑀲𑀦𑁆𑀢𑁂 𑀢𑀤𑀸 𑀤𑁄𑀡𑁄 𑀩𑁆𑀭𑀸𑀳𑁆𑀫𑀡𑁄 𑀏𑀢𑀤𑀩𑁆𑀭𑀯𑀻;

𑀲𑀼𑀡𑀦𑁆𑀢𑀼 𑀪𑁄𑀦𑁆𑀢𑁄 𑀫𑁂 𑀯𑀸𑀘𑀁 𑀳𑀺𑀢𑀫𑀢𑁆𑀣𑀼𑀧𑀲𑀁𑀳𑀺𑀢𑀁.

𑀔𑀦𑁆𑀢𑀺𑀯𑀸𑀤𑀻 𑀇𑀲𑀺𑀓𑀸𑀮𑁂 𑀥𑀫𑁆𑀫𑀧𑀸𑀮𑀓𑀼𑀫𑀸𑀭𑀓𑁂;

𑀙𑀤𑁆𑀤𑀦𑁆𑀢𑁂 𑀪𑀼𑀭𑀺𑀤𑀢𑁆𑀢𑁂 𑀘 𑀘𑀫𑁆𑀧𑁂𑀬𑁆𑀬𑁂 𑀲𑀗𑁆𑀔𑀧𑀸𑀮𑀓𑁂.

𑀫𑀳𑀸𑀓𑀧𑀺𑀚𑀸𑀢𑀓𑀸𑀮𑁂 𑀅𑀫𑁆𑀳𑀸𑀓𑀁 𑀮𑁄𑀓𑀦𑀸𑀬𑀓𑁄;

𑀓𑁄𑀧𑀁 𑀅𑀓𑀢𑁆𑀯𑀸 𑀅𑀜𑁆𑀜𑁂𑀲𑀼 𑀔𑀦𑁆𑀢𑀺𑀫𑁂𑀯 𑀅𑀓𑀸 𑀚𑀺𑀦𑁄.

𑀲𑀺𑀝𑁆𑀞𑀸𑀲𑀺𑀝𑁆𑀞𑁂 𑀲𑀼𑀔𑁂 𑀤𑀼𑀓𑁆𑀔𑁂 𑀮𑀸𑀪𑀸𑀮𑀸𑀪𑁂 𑀬𑀲𑀸𑀬𑀲𑁂;

𑀢𑀸𑀤𑀻 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄 𑀔𑀦𑁆𑀢𑀺𑀯𑀸𑀤𑁂𑀲𑀼 𑀓𑀸 𑀓𑀣𑀸.

𑀏𑀯𑀁 𑀪𑀯𑀢𑀁 𑀯𑀺𑀯𑀸𑀤𑁂 𑀲𑀫𑁆𑀧𑀳𑀸𑀭𑁄 𑀦 𑀲𑀸𑀥𑀼𑀓𑁄;

𑀲𑀩𑁆𑀩𑁂𑀯 𑀲𑀳𑀺𑀢𑀸 𑀳𑁄𑀣 𑀲𑀫𑀕𑁆𑀕𑀸 𑀫𑁄𑀤𑀫𑀸𑀦𑀓𑀸.

𑀢𑀣𑀸𑀕𑀢𑀲𑁆𑀲 𑀲𑀸𑀭𑀻𑀭𑀁 𑀅𑀝𑁆𑀞𑀪𑀸𑀕𑀁 𑀓𑀭𑁄𑀫𑀲𑁂;

𑀣𑀽𑀧𑀸 𑀯𑀺𑀢𑁆𑀣𑀸𑀭𑀺𑀢𑀸 𑀳𑁄𑀦𑁆𑀢𑀼 𑀧𑀲𑀦𑁆𑀦𑀸 𑀳𑀺 𑀩𑀳𑀼𑀚𑁆𑀚𑀦𑀸.

𑀢𑁂𑀦 𑀳𑀺 𑀯𑀺𑀪𑀚𑁂𑀳𑀺 𑀢𑁆𑀯𑀁 𑀅𑀝𑁆𑀞𑀪𑀸𑀕𑀦𑁆𑀢𑀼 𑀩𑁆𑀭𑀸𑀳𑁆𑀫𑀡;

𑀣𑀽𑀧𑀸 𑀯𑀺𑀢𑁆𑀣𑀸𑀭𑀺𑀢𑀸 𑀳𑁄𑀦𑁆𑀢𑀼 𑀧𑀲𑀦𑁆𑀦𑀸 𑀳𑀺 𑀩𑀳𑀼𑀚𑁆𑀚𑀦𑀸.

𑀏𑀯𑀁 𑀯𑀼𑀢𑁆𑀢𑁂 𑀢𑀤𑀸 𑀤𑁄𑀡𑁄 𑀩𑁆𑀭𑀸𑀳𑁆𑀫𑀡𑁄 𑀕𑀡𑀚𑁂𑀝𑁆𑀞𑀓𑁄;

𑀲𑀼𑀯𑀡𑁆𑀡𑀁 𑀦𑀸𑀴𑀺𑀁 𑀓𑀢𑁆𑀯𑀸𑀦 𑀲𑀫𑀁 𑀪𑀸𑀚𑁂𑀲𑀺 𑀭𑀸𑀚𑀼𑀦𑀁.

𑀲𑁄𑀴𑀲𑀦𑀸𑀴𑀺𑀬𑁄 𑀆𑀲𑀼𑀁 𑀲𑀩𑁆𑀩𑀸 𑀢𑀸 𑀲𑁂𑀲𑀥𑀸𑀢𑀼𑀬𑁄;

𑀏𑀓𑁂𑀓𑀧𑀼𑀭𑀯𑀸𑀲𑀻𑀦𑀁 𑀤𑁆𑀯𑁂 𑀤𑁆𑀯𑁂 𑀤𑁄𑀡𑁄 𑀅𑀤𑀸 𑀢𑀤𑀸.

𑀥𑀸𑀢𑀼𑀬𑁄 𑀘 𑀕𑀳𑁂𑀢𑁆𑀯𑀸𑀦 𑀳𑀝𑁆𑀞𑀢𑀼𑀝𑁆𑀞𑀸 𑀦𑀭𑀸𑀥𑀺𑀧𑀸;

𑀕𑀦𑁆𑀢𑁆𑀯𑀸 𑀲𑀓𑁂 𑀲𑀓𑁂 𑀭𑀝𑁆𑀞𑁂 𑀘𑁂𑀢𑀺𑀬𑀸𑀦𑀺 𑀅𑀓𑀸𑀭𑀬𑀼𑀁.

𑀤𑁄𑀡𑁄 𑀢𑀼𑀫𑁆𑀩𑀁 𑀕𑀳𑁂𑀢𑁆𑀯𑀸𑀦 𑀓𑀸𑀭𑁂𑀲𑀺 𑀢𑀼𑀫𑁆𑀩𑀘𑁂𑀢𑀺𑀬𑀁;

𑀅𑀗𑁆𑀕𑀸𑀭𑀣𑀽𑀧𑀁 𑀓𑀸𑀭𑁂𑀲𑀼𑀁 𑀫𑁄𑀭𑀺𑀬𑀸 𑀳𑀝𑁆𑀞𑀫𑀸𑀦𑀲𑀸.

𑀏𑀓𑀸 𑀤𑀸𑀞𑀸 𑀢𑀺𑀤𑀲𑀧𑀼𑀭𑁂 𑀏𑀓𑀸 𑀦𑀸𑀕𑀧𑀼𑀭𑁂 𑀅𑀳𑀼;

𑀏𑀓𑀸 𑀕𑀦𑁆𑀥𑀸𑀭𑀯𑀺𑀲𑀬𑁂 𑀏𑀓𑀸 𑀓𑀸𑀮𑀺𑀗𑁆𑀕𑀭𑀸𑀚𑀺𑀦𑁄.)

𑀢𑀢𑁆𑀣 ¶ 𑀤𑁄𑀡𑁄𑀢𑀺? 𑀢𑀤𑀸 𑀕𑀡𑀸𑀘𑀭𑀺𑀬𑁄. 𑀲𑁄 𑀥𑀸𑀢𑀼𑀬𑁄 𑀯𑀺𑀪𑀚𑀦𑁆𑀢𑁄 𑀏𑀓𑀁 𑀤𑀓𑁆𑀔𑀺𑀡𑀤𑀸𑀞𑀸𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀯𑁂𑀞𑀦𑁆𑀢𑀭𑁂 𑀞𑀧𑁂𑀲𑀺. 𑀢𑀤𑀸 𑀲𑀓𑁆𑀓𑁄 𑀅𑀚𑁆𑀚 𑀤𑀓𑁆𑀔𑀺𑀡𑀤𑀸𑀞𑀸𑀥𑀸𑀢𑀼𑀁 𑀓𑁄 𑀮𑀪𑀢𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀯𑁂𑀞𑀦𑁆𑀢𑀭𑁂 𑀧𑀲𑁆𑀲𑀺. 𑀲𑁄 𑀭𑀢𑀦𑀘𑀗𑁆𑀕𑁄𑀝𑀓𑀁 𑀕𑀳𑁂𑀢𑁆𑀯𑀸 𑀅𑀤𑀺𑀲𑁆𑀲𑀫𑀸𑀦𑀓𑀸𑀬𑁂𑀦 𑀕𑀦𑁆𑀢𑁆𑀯𑀸 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀘𑀽𑀴𑀸𑀫𑀡𑀺𑀘𑁂𑀢𑀺𑀬 𑀏𑀓𑀬𑁄𑀚𑀦𑀼𑀩𑁆𑀩𑁂𑀥𑀁𑀬𑁂𑀯 𑀫𑀳𑀦𑁆𑀢𑀁 𑀣𑀽𑀧𑀁 𑀓𑀢𑁆𑀯𑀸 𑀞𑀧𑁂𑀲𑀺. 𑀏𑀓𑀁 𑀤𑀓𑁆𑀔𑀺𑀡𑀤𑀞𑀸𑀥𑀸𑀢𑀼𑀁 𑀧𑀸𑀤𑀕𑁆𑀕𑀦𑁆𑀢𑀭𑁂 𑀅𑀓𑁆𑀓𑀫𑀺𑀢𑁆𑀯𑀸 𑀕𑀡𑁆𑀳𑀺. 𑀏𑀢𑁆𑀢𑀸𑀯𑀢𑀸 𑀢𑀸𑀯𑀢𑀺𑀁𑀲𑀪𑀯𑀦𑀤𑀦𑁆𑀢𑀥𑀸𑀢𑀼𑀓𑀣𑀸 𑀧𑀭𑀺𑀧𑀼𑀡𑁆𑀡𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀤𑀸 𑀚𑀬𑀲𑁂𑀦𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀲𑀼𑀢𑁆𑀯𑀸 𑀅𑀚𑁆𑀚 𑀧𑀘𑁆𑀙𑀺𑀫𑀤𑀲𑁆𑀲𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺 𑀫𑀳𑀦𑁆𑀢𑀁 𑀦𑀸𑀕𑀭𑀸𑀚𑀲𑀫𑁆𑀧𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀓𑀼𑀲𑀺𑀦𑀸𑀭𑀁 𑀕𑀦𑁆𑀢𑁆𑀯𑀸 𑀫𑀳𑀸𑀧𑀽𑀚𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀢𑁆𑀯𑀸 𑀧𑀸𑀤𑀕𑁆𑀕𑀦𑁆𑀢𑀭𑁂 𑀞𑀺𑀢𑀁 𑀥𑀸𑀢𑀼𑀁 𑀤𑀺𑀲𑁆𑀯𑀸 𑀦𑀸𑀕𑁂𑀤𑁆𑀥𑀺𑀩𑀮𑁂𑀦 𑀕𑀳𑁂𑀢𑁆𑀯𑀸 𑀦𑀸𑀕𑀪𑀯𑀦𑀁 𑀦𑁂𑀢𑁆𑀯𑀸 𑀦𑀸𑀕𑀧𑀼𑀭𑀲𑁆𑀲 𑀫𑀚𑁆𑀛𑁂 𑀭𑀢𑀦𑀔𑀘𑀺𑀢𑁂 𑀘𑁂𑀢𑀺𑀬𑁂 𑀞𑀧𑁂𑀲𑀺. 𑀢𑀁 𑀢𑀫𑁆𑀩𑀧𑀡𑁆𑀡𑀺𑀬𑀁 𑀓𑀸𑀓𑀯𑀡𑁆𑀡𑀢𑀺𑀲𑁆𑀲𑀭𑀸𑀚𑀓𑀸𑀮𑁂 𑀫𑀳𑀸𑀤𑁂𑀯𑀢𑁆𑀣𑁂𑀭𑀲𑁆𑀲 𑀲𑀺𑀲𑁆𑀲𑁄 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀦𑀸𑀫 𑀦𑀸𑀕𑀪𑀯𑀦𑀁 𑀕𑀦𑁆𑀢𑁆𑀯𑀸 𑀤𑀓𑁆𑀔𑀺𑀡𑀤𑀸𑀞𑀁 𑀕𑀳𑁂𑀢𑁆𑀯𑀸 𑀢𑀫𑁆𑀩𑀧𑀡𑁆𑀡𑀺𑀬𑀁 𑀲𑁂𑀭𑀼𑀦𑀕𑀭𑀁 𑀳𑀭𑀺𑀢𑁆𑀯𑀸 𑀕𑀺𑀭𑀺𑀅𑀪𑀬𑀲𑁆𑀲 𑀲𑁂𑀭𑀼𑀦𑀕𑀭𑀧𑀩𑁆𑀩𑀢𑀦𑁆𑀢𑀭𑁂 𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀞𑀧𑁂𑀲𑀺.

𑀏𑀢𑁆𑀢𑀸𑀯𑀢𑀸 𑀦𑀸𑀕𑀪𑀯𑀦𑀤𑀦𑁆𑀢𑀥𑀸𑀢𑀼𑀓𑀣𑀸 𑀧𑀭𑀺𑀧𑀼𑀡𑁆𑀡𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀭𑀸𑀬𑀁 𑀕𑀦𑁆𑀥𑀸𑀭𑀯𑀸𑀲𑀺𑀦𑁄𑀢𑀺? 𑀏𑀓𑀸 𑀯𑀸𑀫𑀤𑀸𑀞𑀸 𑀤𑁄𑀡𑁄 𑀦𑀸𑀫 𑀆𑀘𑀭𑀺𑀬𑁄 𑀦𑀺𑀯𑀢𑁆𑀣 𑀯𑀢𑁆𑀣𑀦𑁆𑀢𑀭𑁂 𑀞𑀧𑁂𑀢𑁆𑀯𑀸 𑀕𑀡𑁆𑀳𑀺. 𑀢𑀤𑀸 𑀏𑀓𑁄 𑀕𑀦𑁆𑀥𑀸𑀭𑀯𑀸𑀲𑀻 𑀧𑀼𑀩𑁆𑀩𑁂 𑀮𑀤𑁆𑀥𑀩𑁆𑀬𑀸𑀓𑀭𑀡𑁄 𑀓𑀢𑀸𑀪𑀺𑀦𑀻𑀳𑀸𑀭𑁄 𑀯𑀢𑁆𑀣𑀦𑁆𑀢𑀭𑁂 𑀞𑀢𑀧𑀺𑀤𑀦𑁆𑀢𑀥𑀸𑀢𑀼𑀁 𑀤𑀺𑀲𑁆𑀯𑀸 𑀓𑀼𑀲𑀮𑀘𑀺𑀢𑁆𑀢𑁂𑀦 𑀢𑀢𑁄 𑀤𑀦𑁆𑀢𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀕𑀦𑁆𑀥𑀸𑀭𑀯𑀸𑀲𑀺𑀓𑁂𑀳𑀺 𑀲𑀤𑁆𑀥𑀺𑀁 𑀅𑀢𑁆𑀢𑀦𑁄 𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀘𑁂𑀢𑀺𑀬𑀯𑀦𑁂 𑀞𑀧𑁂𑀲𑀺.

𑀏𑀢𑁆𑀢𑀸𑀯𑀢𑀸 𑀯𑀸𑀫𑀤𑀦𑁆𑀢𑀥𑀸𑀢𑀼𑀓𑀣𑀸 𑀧𑀭𑀺𑀧𑀼𑀡𑁆𑀡𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 𑀅𑀥𑁄 𑀯𑀸𑀫𑀤𑀦𑁆𑀢𑀥𑀸𑀢𑀼𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀺𑀲𑁆𑀲𑁄 𑀔𑁂𑀫𑁄 𑀦𑀸𑀫 𑀫𑀼𑀦𑀺 𑀚𑀸𑀮𑀘𑀺𑀢𑀓𑀢𑁄𑀯 𑀉𑀧𑁆𑀧𑀢𑀺𑀢𑁆𑀯𑀸 𑀯𑀸𑀫𑀤𑀸𑀞𑀁 𑀕𑀳𑁂𑀢𑁆𑀯𑀸 𑀓𑀸𑀮𑀺𑀗𑁆𑀕𑀧𑀼𑀭𑀁 𑀦𑁂𑀢𑁆𑀯𑀸 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀭𑀜𑁆𑀜𑁄 𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 ¶ 𑀤𑀦𑁆𑀢𑀥𑀸𑀢𑀼𑀁 𑀤𑀲𑁆𑀲𑁂𑀢𑁆𑀯𑀸? 𑀫𑀳𑀸𑀭𑀸𑀚 𑀯𑀸𑀫𑀤𑀦𑁆𑀢𑀥𑀸𑀢𑀼𑀁 𑀪𑀕𑀯𑀸 𑀢𑀫𑁂𑀯 𑀇𑀫𑀲𑁆𑀫𑀺𑀁 𑀚𑀫𑁆𑀩𑀼𑀤𑀻𑀧𑁂 𑀬𑀸𑀯 𑀕𑀼𑀳𑀲𑀻𑀯𑀧𑀭𑀫𑁆𑀧𑀭𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀢𑁆𑀣𑀁 𑀓𑀭𑀺𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑁂 𑀕𑀼𑀳𑀲𑀻𑀯𑀭𑀜𑁆𑀜𑁄 𑀧𑀸𑀳𑁂𑀲𑁆𑀲𑀢𑀻𑀢𑀺 (𑀦𑀻𑀬𑀸𑀤𑁂𑀢𑀼𑀁) 𑀆𑀳𑀸𑀢𑀺 𑀦𑀻𑀬𑁆𑀬𑀸𑀤𑁂𑀲𑀺.

𑀅𑀧𑀭𑀪𑀸𑀕𑁂 𑀳𑁂𑀫𑀫𑀸𑀮𑀸 𑀭𑀸𑀚𑀓𑀜𑁆𑀜𑀸 𑀤𑀦𑁆𑀢𑀓𑀼𑀫𑀸𑀭𑁂𑀦 𑀲𑀤𑁆𑀥𑀺𑀁 𑀩𑁆𑀭𑀸𑀳𑁆𑀫𑀡𑀯𑁂𑀲𑀁 𑀕𑀳𑁂𑀢𑁆𑀯𑀸 𑀤𑀦𑁆𑀢𑀥𑀸𑀢𑀼𑀁 𑀆𑀤𑀸𑀬 𑀧𑀮𑀸𑀬𑀺𑀢𑁆𑀯𑀸 𑀯𑀸𑀡𑀺𑀚𑁂 𑀆𑀭𑁄𑀘𑁂𑀢𑁆𑀯𑀸 𑀦𑀸𑀯𑀸 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀘𑁂𑀯 𑀦𑀸𑀕𑀲𑀼𑀧𑀡𑁆𑀡𑁂𑀳𑀺 𑀫𑀳𑀦𑁆𑀢𑀁 𑀧𑀽𑀚𑀁 𑀓𑀸𑀭𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦𑀸𑀕𑀦𑁆𑀢𑁆𑀯𑀸 𑀚𑀫𑁆𑀩𑀼𑀓𑁄𑀴𑀧𑀝𑁆𑀝𑀦𑀁 𑀧𑀢𑁆𑀯𑀸 𑀤𑀺𑀚𑀯𑀭𑀲𑁆𑀲 𑀆𑀘𑀺𑀓𑁆𑀔𑀺𑀢𑀫𑀕𑁆𑀕𑁂𑀦 𑀅𑀦𑀼𑀭𑀸𑀥𑀧𑀼𑀭𑀁 𑀧𑀢𑁆𑀯𑀸 𑀓𑀺𑀢𑁆𑀢𑀺𑀲𑁆𑀲𑀺𑀭𑀺𑀫𑁂𑀖𑀲𑁆𑀲 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀺𑀢𑁆𑀯𑀸 𑀦𑀯𑀯𑀲𑁆𑀲𑀆𑀬𑀼𑀲𑀫𑀸𑀦𑁄 𑀢𑀻𑀲𑀼 𑀲𑀭𑀡𑁂𑀲𑀼 𑀧𑀲𑀦𑁆𑀦𑀪𑀸𑀯𑀁 𑀲𑀼𑀢𑁆𑀯𑀸 𑀫𑁂𑀖𑀕𑀺𑀭𑀺 𑀫𑀳𑀸𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀤𑀦𑁆𑀢𑀥𑀸𑀢𑀼𑀁 𑀚𑀫𑁆𑀩𑀼𑀤𑀻𑀧𑀢𑁄 𑀕𑀳𑁂𑀢𑁆𑀯𑀸 𑀆𑀕𑀢𑀪𑀸𑀯𑀁 𑀆𑀭𑁄𑀘𑁂𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀤𑀺𑀲𑁆𑀯𑀸 𑀘 𑀧𑀦 𑀧𑀻𑀢𑀺𑀬𑀸 𑀨𑀼𑀝𑁄 𑀉𑀪𑀺𑀦𑁆𑀦𑀫𑁆𑀧𑀺 𑀲𑀗𑁆𑀕𑀳𑀁 𑀓𑀢𑁆𑀯𑀸 𑀫𑀳𑀸𑀯𑀺𑀳𑀸𑀭𑀁 𑀅𑀮𑀗𑁆𑀓𑀸𑀭𑁂𑀢𑁆𑀯𑀸 𑀚𑀺𑀦𑀤𑀦𑁆𑀢𑀥𑀸𑀢𑀼𑀁 𑀞𑀧𑁂𑀢𑁆𑀯𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀧𑁂𑀲𑁂𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀭𑀜𑁆𑀜𑁄 𑀆𑀭𑁄𑀘𑀸𑀧𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀧𑀻𑀢𑀺𑀧𑀸𑀫𑁄𑀚𑁆𑀚𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀲𑀺𑀭𑀺𑀲𑀫𑁆𑀧𑀢𑁆𑀢𑁄 𑀤𑀴𑀺𑀤𑁆𑀤𑁄 𑀯𑀺𑀬 𑀢𑀲𑁆𑀲 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀯𑀻𑀫𑀁𑀲𑀺𑀢𑁆𑀯𑀸 𑀦𑀺𑀓𑁆𑀓𑀗𑁆𑀔𑁄 𑀳𑀼𑀢𑁆𑀯𑀸 𑀲𑀓𑀮𑀮𑀗𑁆𑀓𑀸𑀤𑀻𑀧𑁂𑀦 𑀧𑀽𑀚𑁂𑀲𑀺. 𑀏𑀢𑁂𑀦 𑀦𑀬𑁂𑀦 𑀧𑀽𑀚𑀁 𑀓𑀢𑁆𑀯𑀸 𑀏𑀓𑀤𑀺𑀯𑀲𑁂𑀦𑁂𑀯 𑀦𑀯𑀮𑀓𑁆𑀔𑀁 𑀧𑀽𑀚𑁂𑀲𑀺.

𑀲𑀻𑀳𑀴𑀺𑀦𑁆𑀤𑁄 𑀉𑀪𑀺𑀦𑁆𑀦𑀫𑁆𑀧𑀺 𑀩𑀳𑀽𑀦𑀺 𑀭𑀢𑀦𑀸𑀦𑀺 𑀘;

𑀕𑀸𑀫𑁂 𑀘 𑀇𑀲𑁆𑀲𑀭𑁂 𑀘𑁂𑀯 𑀤𑀢𑁆𑀯𑀸𑀦 𑀲𑀗𑁆𑀕𑀳𑀁 𑀅𑀓𑀸.

𑀏𑀢𑁆𑀢𑀸𑀯𑀢𑀸 𑀅𑀥𑁄𑀤𑀸𑀞𑀸𑀥𑀸𑀢𑀼𑀓𑀣𑀸 𑀧𑀭𑀺𑀧𑀼𑀡𑁆𑀡𑀸 𑀯𑁂𑀤𑀺𑀢𑀩𑁆𑀩𑀸.

𑀘𑀢𑁆𑀢𑀸𑀮𑀻𑀲 𑀲𑀫𑀸 𑀤𑀦𑁆𑀢𑀸 𑀓𑁂𑀲𑀸 𑀮𑁄𑀫𑀸 𑀘 𑀲𑀩𑁆𑀩𑀲𑁄 𑀤𑁂𑀯𑀸 𑀳𑀭𑀺𑀁𑀲𑀼 𑀏𑀓𑁂𑀓𑀁 𑀘𑀓𑁆𑀓𑀯𑀸𑀴𑀧𑀭𑀫𑁆𑀧𑀭𑀸.

𑀢𑀢𑁆𑀭 𑀯𑀘𑀦𑁂, 𑀘𑀢𑁆𑀢𑀸𑀮𑀻𑀲 𑀲𑀫𑀸 𑀤𑀦𑁆𑀢𑀸𑀢𑀺? 𑀲𑁂𑀲𑀤𑀦𑁆𑀢𑀸 𑀘 𑀓𑁂𑀲𑀸 𑀘 𑀮𑁄𑀫𑀸 𑀘 𑀦𑀔𑀸 𑀘 𑀲𑀩𑁆𑀩𑀲𑁄𑀧𑀺 𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢-𑀓𑀸𑀮𑁂 ¶ 𑀫𑀸 𑀟𑀬𑁆𑀳𑀦𑁆𑀢𑀼 𑀮𑀼𑀜𑁆𑀘𑀺𑀢𑁆𑀯𑀸 𑀆𑀓𑀸𑀲𑁂 𑀧𑀢𑀺𑀝𑁆𑀞𑀦𑁆𑀢𑀼 𑀏𑀓𑁂𑀓𑀘𑀓𑁆𑀓𑀯𑀸𑀴𑀜𑁆𑀘 𑀏𑀓𑁂𑀓𑀓𑁂𑀲𑀮𑁄𑀫𑀦𑀔𑀤𑀦𑁆𑀢𑀥𑀸𑀢𑀼𑀧𑀭𑀫𑁆𑀧𑀭𑀸 𑀦𑁂𑀢𑁆𑀯𑀸 𑀘𑁂𑀢𑀺𑀬𑀁 𑀓𑀸𑀭𑁂𑀢𑁆𑀯𑀸𑀦 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀢𑁆𑀣𑀁 𑀓𑀭𑁄𑀢𑀼𑀢𑀺 𑀅𑀥𑀺𑀝𑁆𑀞𑀳𑀺. 𑀢𑀲𑁆𑀫𑀸 𑀧𑀭𑀺𑀦𑀺𑀩𑁆𑀩𑀼𑀢𑀓𑀸𑀮𑀢𑁄 𑀬𑀸𑀯 𑀲𑀭𑀻𑀭𑀁 𑀦 𑀟𑀬𑁆𑀳𑀢𑀺 𑀢𑀸𑀯 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀮𑁄𑀫𑀥𑀸𑀢𑀼 𑀦 𑀧𑀚𑀳𑀢𑀺. 𑀤𑁄𑀡𑀩𑁆𑀭𑀸𑀳𑁆𑀫𑀡𑁄𑀧𑀺 𑀥𑀸𑀢𑀼𑀯𑀺𑀪𑀚𑀦𑀸𑀯𑀲𑀸𑀦𑁂 𑀯𑁂𑀞𑀦𑁆𑀢𑀭𑁂 𑀘 𑀦𑀺𑀯𑀸𑀲𑀦𑀦𑁆𑀢𑀭𑁂 𑀘 𑀧𑀸𑀤𑀕𑁆𑀕𑀦𑁆𑀢𑀭𑁂 𑀘 𑀥𑀸𑀢𑀼𑀦𑀁 𑀯𑀺𑀦𑀝𑁆𑀞𑀪𑀸𑀯𑀁 𑀜𑀢𑁆𑀯𑀸 𑀧𑀣𑀯𑀺𑀬𑀁 𑀉𑀢𑁆𑀢𑀸𑀦𑀓𑁄𑀬𑁂𑀯𑀚𑀸𑀢𑁄. 𑀢𑀤𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀤𑀺𑀲𑁆𑀯𑀸 𑀅𑀬𑀁 𑀤𑁂𑀡𑀸𑀘𑀭𑀺𑀬𑁄 𑀥𑀸𑀢𑀼 𑀅𑀢𑁆𑀣𑀸𑀬 𑀅𑀦𑀼𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀯𑀺𑀦𑀸𑀲𑀁 𑀧𑀸𑀧𑀼𑀡𑁂𑀬𑁆𑀬 𑀅𑀳𑀁 𑀯𑀻𑀡𑀸𑀘𑀭𑀺𑀬𑀯𑁂𑀲𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑁄𑀓𑀁 𑀯𑀺𑀦𑁄𑀤𑁂𑀲𑁆𑀲𑀸𑀫𑀻𑀢𑀺 𑀲𑀓𑁆𑀓𑀭𑀽𑀧𑀁 𑀚𑀳𑀺𑀢𑁆𑀯𑀸 𑀯𑀻𑀡𑀸𑀘𑀭𑀺𑀬𑀯𑁂𑀲𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀤𑀺𑀩𑁆𑀩𑀕𑀻𑀢𑀁 𑀕𑀸𑀬𑀺𑀢𑁆𑀯𑀸 𑀯𑀻𑀡𑀁 𑀯𑀸𑀤𑁂𑀦𑁆𑀢𑁄 𑀦𑀸𑀦𑀧𑁆𑀧𑀓𑀸𑀭𑀁 𑀉𑀤𑀸𑀦𑁂𑀲𑀺. 𑀬𑀁 𑀥𑀫𑁆𑀫𑀫𑁂𑀢𑀁 𑀧𑀼𑀭𑀺𑀲𑀲𑁆𑀲 𑀯𑀸𑀤𑀁 𑀙𑀺𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀯𑀢𑁆𑀯𑀸 𑀓𑀣𑀸𑀬 𑀲𑁄𑀢𑀼𑀦𑀁 𑀮𑁄𑀪𑀁 𑀧𑀭𑀲𑁆𑀲 𑀅𑀢𑁆𑀣𑀁 𑀯𑀺𑀦𑀸𑀲𑁂𑀢𑁆𑀯𑀸 𑀅𑀢𑀺𑀮𑁄𑀪𑁂𑀦 𑀧𑀼𑀭𑀺𑀲𑁄 𑀧𑀸𑀧𑀓𑁄 𑀳𑁄𑀢𑀻𑀢𑀺. 𑀳𑀁𑀲𑀭𑀸𑀚𑀚𑀸𑀢𑀓𑀁 𑀤𑀻𑀧𑁂𑀢𑁆𑀯𑀸 𑀬𑀁 𑀮𑀤𑁆𑀥𑀁 𑀢𑀁 𑀲𑀼𑀮𑀤𑁆𑀥𑀦𑁆𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀤𑁄𑀡𑁄 𑀅𑀬𑀁 𑀯𑀻𑀡𑀸𑀘𑀭𑀺𑀬𑁄 𑀫𑀬𑁆𑀳𑀁 𑀣𑁂𑀦𑀪𑀸𑀯𑀁 𑀅𑀜𑁆𑀜𑀸𑀲𑀻𑀢𑀺 𑀲𑁄𑀓𑀁 𑀯𑀺𑀦𑁄𑀤𑁂𑀢𑁆𑀯𑀸 𑀉𑀝𑁆𑀞𑀸𑀬 𑀆𑀯𑀚𑁆𑀚𑀫𑀸𑀦𑁄 𑀢𑀼𑀫𑁆𑀩𑀁 𑀤𑀺𑀲𑁆𑀯𑀸 𑀬𑁂𑀦 𑀪𑀕𑀯𑀢𑁄 𑀲𑀭𑀻𑀭𑀥𑀸𑀢𑀼𑀬𑁄 𑀫𑀺𑀢𑀸 𑀲𑁄𑀧𑀺 𑀥𑀸𑀢𑀼𑀕𑀢𑀺𑀓𑁄𑀯. 𑀇𑀤𑀁 𑀣𑀽𑀧𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀼𑀫𑁆𑀩𑀁 𑀕𑀳𑁂𑀢𑁆𑀯𑀸𑀦 𑀘𑁂𑀢𑀺𑀬𑁂 𑀞𑀧𑁂𑀲𑀺. 𑀫𑁄𑀭𑀺𑀬𑀸 𑀅𑀗𑁆𑀕𑀸𑀭𑀁 𑀕𑀳𑁂𑀢𑁆𑀯𑀸 𑀅𑀗𑁆𑀕𑀸𑀭𑀘𑁂𑀢𑀺𑀬𑀁 𑀦𑀸𑀫 𑀓𑀸𑀭𑁂𑀲𑀼𑀁.

(𑀦𑀕𑀭𑁂 𑀓𑀧𑀺𑀮𑀯𑀢𑁆𑀣𑀼𑀫𑁆𑀳𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀩𑀳𑀼𑀚𑁆𑀚𑀦𑁄;

𑀢𑀢𑁆𑀣 𑀲𑀸𑀭𑀻𑀭𑀺𑀓𑀁 𑀣𑀽𑀧𑀁 𑀅𑀓𑀸𑀲𑀺 𑀭𑀢𑀦𑀸𑀫𑀬𑀁.

𑀦𑀕𑀭𑁂 ¶ 𑀅𑀮𑁆𑀮𑀓𑁂 𑀭𑀫𑁆𑀫𑁂 𑀩𑀼𑀤𑁆𑀥𑀥𑀸𑀢𑀼 𑀧𑀢𑀺𑀝𑁆𑀞𑀺𑀬;

𑀲𑀺𑀮𑀸𑀬 𑀫𑀼𑀕𑁆𑀕𑀯𑀡𑁆𑀡𑀸𑀬 𑀣𑀽𑀧𑀁 𑀲𑀥𑀸𑀢𑀼𑀓𑀁 𑀅𑀓𑀸.

𑀚𑀦𑁄 𑀧𑀸𑀯𑁂𑀬𑁆𑀬𑀭𑀝𑁆𑀞𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀬 𑀲𑀸𑀭𑀻𑀭𑀺𑀓𑀁;

𑀲𑀺𑀮𑀸𑀬 𑀫𑀡𑀺𑀯𑀡𑁆𑀡𑀸𑀬 𑀧𑀸𑀯𑁂𑀬𑁆𑀬𑀁 𑀘𑁂𑀢𑀺𑀬𑀁 𑀅𑀓𑀸.

𑀘𑀻𑀯𑀭𑀁 𑀧𑀢𑁆𑀢𑀤𑀡𑁆𑀟𑀜𑁆𑀘 𑀫𑀥𑀼𑀭𑀸𑀬𑀁 𑀅𑀧𑀽𑀚𑀬𑀼𑀁;

𑀦𑀺𑀯𑀸𑀲𑀦𑀁 𑀓𑀼𑀲𑀖𑀭𑁂 𑀧𑀽𑀚𑀬𑀺𑀁𑀲𑀼 𑀫𑀳𑀸𑀚𑀦𑀸.

𑀧𑀘𑁆𑀘𑀢𑁆𑀣𑀭𑀡𑀁 𑀓𑀧𑀺𑀮𑁂 𑀉𑀡𑁆𑀡𑀮𑁄𑀫𑀜𑁆𑀘 𑀓𑁄𑀲𑀮𑁂;

𑀧𑀽𑀚𑁂𑀲𑀼𑀁 𑀧𑀸𑀝𑀮𑀺𑀧𑀼𑀢𑁆𑀢𑁂 𑀓𑀭𑀓𑀁 𑀓𑀸𑀬𑀩𑀦𑁆𑀥𑀦𑀁.

𑀦𑀺𑀲𑀻𑀤𑀦𑀁 𑀅𑀯𑀦𑁆𑀢𑀺𑀲𑀼 𑀘𑀫𑁆𑀧𑀸𑀬𑀁’𑀤𑀓𑀲𑀸𑀝𑀓𑀁;

𑀤𑁂𑀯𑀭𑀝𑁆𑀞𑁂 𑀅𑀢𑁆𑀣𑀭𑀡𑀁 𑀯𑀺𑀤𑁂𑀳𑁂 𑀧𑀭𑀺𑀲𑁆𑀲𑀸𑀯𑀦𑀁.

𑀯𑀸𑀲𑀺-𑀲𑀽𑀘𑀺𑀖𑀭𑀜𑁆𑀘𑀸𑀧𑀺 𑀇𑀦𑁆𑀤𑀧𑀢𑁆𑀣𑁂 𑀅𑀧𑀽𑀚𑀬𑀼𑀁;

𑀧𑀸𑀲𑀸𑀡𑀓𑁂 𑀧𑀤𑀁 𑀲𑁂𑀝𑁆𑀞𑀁 𑀪𑀡𑁆𑀟𑀲𑁂𑀲𑀁 𑀧𑀭𑀦𑁆𑀢𑀓𑁂.

𑀫𑀳𑀺𑀁𑀲𑀼 𑀫𑀦𑀼𑀚𑀸 𑀥𑀸𑀢𑀼𑀁 𑀅𑀝𑁆𑀞𑀤𑁄𑀡𑀫𑀺𑀢𑀁 𑀢𑀤𑀸;

𑀥𑀸𑀢𑀼 𑀯𑀺𑀢𑁆𑀣𑀸𑀭𑀺𑀢𑀸 𑀆𑀲𑀺 𑀮𑁄𑀓𑀦𑀸𑀣𑀲𑁆𑀲 𑀲𑀢𑁆𑀣𑀼𑀦𑁄).

𑀢𑁂 𑀧𑀦 𑀭𑀸𑀚𑀸𑀦𑁄 𑀳𑀺 𑀅𑀢𑁆𑀢𑀦𑁄𑀮𑀤𑁆𑀥𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀲𑀓𑀲𑀓𑀦𑀕𑀭𑀁 𑀕𑀦𑁆𑀢𑁆𑀯𑀸 𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑀁 𑀧𑀽𑀚𑀸𑀯𑀺𑀥𑀸𑀦𑀁 𑀓𑀭𑀺𑀁𑀲𑀼. 𑀘𑀓𑁆𑀔𑀼𑀫𑀦𑁆𑀢𑀲𑁆𑀲 𑀪𑀕𑀯𑀢𑁄 𑀲𑀭𑀻𑀭𑀥𑀸𑀢𑀼 𑀅𑀝𑁆𑀞𑀤𑁄𑀡𑀫𑀢𑁆𑀢𑀁 𑀲𑀼𑀯𑀡𑁆𑀡𑀦𑀸𑀴𑀺𑀬𑀸 𑀏𑀓𑀲𑀢𑀅𑀝𑁆𑀞𑀯𑀻𑀲𑀢𑀺𑀦𑀸𑀴𑀺𑀓𑀸 𑀅𑀳𑁄𑀲𑀺? 𑀲𑀢𑁆𑀣𑀸 𑀧𑀦 𑀉𑀢𑁆𑀢𑀭𑀸𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑁂𑀦 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀯𑀺𑀲𑀸𑀔𑀦𑀓𑁆𑀔𑀢𑁆𑀢𑁂𑀦 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀉𑀢𑁆𑀢𑀭𑀸𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑁂𑀦 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺. 𑀯𑀺𑀲𑀸𑀔𑀦𑀓𑁆𑀔𑀢𑁆𑀢𑁂𑀦 𑀩𑀼𑀤𑁆𑀥𑁄 𑀅𑀳𑁄𑀲𑀺. 𑀉𑀢𑁆𑀢𑀭𑀸𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑁂𑀦 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺. 𑀢𑁂𑀦𑁂𑀯 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀅𑀓𑀸𑀲𑀺. 𑀅𑀲𑁆𑀲𑀬𑀼𑀚𑀦𑀓𑁆𑀔𑀢𑁆𑀢𑁂𑀦 𑀤𑁂𑀯𑁄𑀭𑁄𑀳𑀡𑀁 𑀅𑀓𑀸𑀲𑀺. 𑀯𑀺𑀲𑀸𑀔𑀦𑀓𑁆𑀔𑀢𑁆𑀢𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀸 𑀘 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀘 𑀤𑁆𑀯𑁂 𑀫𑀳𑀸𑀣𑁂𑀭𑀸 𑀪𑀕𑀯𑀢𑁄 𑀲𑀭𑀻𑀭𑀥𑀸𑀢𑀼𑀬𑁄 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀅𑀤𑀁𑀲𑀼.

𑀢𑁂𑀲𑀁 ¶ 𑀭𑀸𑀚𑀼𑀦𑀁 𑀪𑀕𑀯𑀢𑁄 𑀲𑀭𑀻𑀭𑀥𑀸𑀢𑀼𑀁 𑀮𑀪𑀺𑀢𑁆𑀯𑀸 𑀲𑀢𑁆𑀢𑀤𑀺𑀯𑀲𑀲𑀢𑁆𑀢𑀫𑀸𑀲𑀸𑀥𑀺𑀓𑀸𑀦𑀺 𑀲𑀢𑁆𑀢𑀯𑀲𑁆𑀲𑀸𑀦𑀺 𑀫𑀳𑀸𑀭𑀳𑀁 𑀧𑀽𑀚𑀁 𑀓𑀢𑁆𑀯𑀸 𑀕𑀢𑀓𑀸𑀮𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑀦𑀼𑀲𑁆𑀲𑀸? 𑀲𑀫𑀡𑁄 𑀕𑁄𑀢𑀫𑁄 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀢𑀲𑁆𑀲 𑀥𑀸𑀢𑀼 𑀅𑀢𑁆𑀣𑀸𑀬 𑀅𑀫𑁆𑀳𑀸𑀓𑀁 𑀚𑀻𑀯𑀺𑀢𑀓𑀧𑁆𑀧𑀦𑀁 𑀦𑀸𑀲𑁂𑀢𑁆𑀯𑀸 𑀧𑀽𑀚𑀁 𑀓𑀭𑁄𑀢𑀻’𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀧𑀤𑀼𑀲𑁆𑀲𑀦𑁆𑀢𑀺. 𑀲𑀓𑁆𑀓𑁄 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀆𑀭𑁄𑀘𑁂𑀲𑀺;’𑀪𑀦𑁆𑀢𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀦𑀼𑀲𑁆𑀲𑀸 𑀪𑀕𑀯𑀢𑀺 𑀧𑀤𑀼𑀝𑁆𑀞𑀘𑀺𑀢𑁆𑀢𑁂𑀦 𑀇𑀢𑁄 𑀘𑀼𑀢𑀸 𑀅𑀯𑀻𑀘𑀺𑀦𑀺𑀭𑀬𑀁 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀩𑀳𑀼𑀢𑀭𑀸 𑀅𑀦𑀸𑀕𑀢𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀸𑀢𑀼𑀧𑀺𑀢𑀼𑀖𑀸𑀢𑀓𑀸 𑀭𑀸𑀚𑀸𑀦𑁄 𑀪𑀯𑀺𑀲𑁆𑀲𑀦𑁆𑀢𑀺. 𑀅𑀚𑁆𑀚𑁂𑀯 𑀥𑀸𑀢𑀼𑀬𑁄 𑀦𑀺𑀤𑀳𑀺𑀢𑀼𑀁 𑀯𑀝𑁆𑀝𑀢𑀻’𑀢𑀺 𑀣𑁂𑀭𑁄 𑀯𑀺𑀘𑀸𑀭𑁂𑀢𑁆𑀯𑀸 𑀅𑀤𑁆𑀤𑀲.

𑀅𑀦𑀦𑁆𑀢𑀫𑀢𑁆𑀣𑀁 𑀥𑀭𑀫𑀸𑀦𑀓𑀸𑀮𑁂 𑀓𑀢𑁆𑀯𑀸𑀦 𑀲𑀢𑁆𑀢𑀸𑀦𑀫𑀮𑀻𑀦𑀘𑀺𑀢𑁆𑀢𑁄 𑀲𑁂𑀲𑀸𑀦𑀫𑀢𑁆𑀣𑀸𑀬 𑀲𑀭𑀻𑀭𑀥𑀸𑀢𑀼𑀁 𑀞𑀧𑁂𑀢𑁆𑀯 𑀲𑁄 𑀫𑀘𑁆𑀘𑀼𑀫𑀼𑀔𑀁 𑀉𑀧𑁂𑀢𑁄. (𑀓𑀢𑁆𑀯𑀸 𑀬𑁄 𑀩𑁄𑀥𑀺𑀜𑀸𑀡𑀁 𑀯𑀺𑀯𑀺𑀥𑀩𑀮𑀯𑀭𑀁 𑀩𑀼𑀚𑁆𑀛𑀺𑀢𑀼𑀁 𑀧𑀸𑀭𑀫𑀻𑀬𑁄 𑀯𑀢𑁆𑀯𑀸 𑀲𑀗𑁆𑀔𑁂𑀬𑁆𑀬𑀧𑀼𑀡𑁆𑀡𑁂 𑀅𑀧𑀭𑀺𑀫𑀺𑀢𑀪𑀯𑁂 𑀉𑀢𑁆𑀢𑀭𑀺𑀢𑁆𑀯𑀸 𑀲𑀼𑀫𑀼𑀢𑁆𑀢𑀁. 𑀆𑀭𑁄𑀳𑀺𑀢𑁆𑀯𑀸𑀦 𑀲𑀻𑀖𑀁 𑀅𑀭𑀺𑀬𑀲𑀺𑀯𑀧𑀤𑀁 𑀅𑀘𑁆𑀘𑀼𑀢𑀁 𑀲𑀻𑀢𑀺𑀪𑀸𑀯𑀁 𑀧𑀢𑁆𑀢𑁄 𑀲𑁄 𑀚𑀸𑀢𑀺𑀧𑀸𑀭𑀁 𑀦𑀺𑀔𑀺𑀮𑀧𑀤𑀳𑀦𑀁 𑀤𑀼𑀓𑁆𑀓𑀭𑀁 𑀓𑀸𑀭𑀬𑀺𑀢𑁆𑀯𑀸.

𑀥𑀸𑀢𑁆𑀯𑀦𑁆𑀢𑀭𑀸𑀬𑀁 𑀤𑀺𑀲𑁆𑀯𑀸𑀦 𑀣𑁂𑀭𑁄 𑀓𑀲𑁆𑀲𑀧𑀲𑀯𑁆𑀳𑀬𑁄;

𑀦𑀺𑀥𑀸𑀦𑀁 𑀲𑀩𑁆𑀩𑀥𑀸𑀢𑀼𑀦𑀁 𑀓𑀭𑁄𑀳𑀻𑀢𑁆𑀬𑀸𑀳 𑀪𑀽𑀧𑀢𑀺𑀁.

𑀲𑀸𑀥𑀽𑀢𑀺 𑀲𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀫𑀸𑀕𑀥𑁄 𑀢𑀼𑀝𑁆𑀞𑀫𑀸𑀦𑀲𑁄;

𑀥𑀸𑀢𑀼𑀦𑀺𑀥𑀸𑀦𑀁 𑀓𑀸𑀭𑁂𑀲𑀺 𑀲𑀩𑁆𑀩𑀢𑁆𑀣 𑀯𑀢𑁆𑀢𑀺𑀢𑀸𑀤𑀺𑀬.

𑀓𑀸𑀭𑀸𑀧𑁂𑀢𑁆𑀯𑀸𑀦 𑀲𑁄 𑀭𑀸𑀚𑀸 𑀓𑀲𑁆𑀲𑀧𑀲𑁆𑀲 𑀦𑀺𑀯𑁂𑀤𑀬𑀻;

𑀥𑀸𑀢𑀼𑀬𑁄 𑀆𑀳𑀭𑀻 𑀣𑁂𑀭𑁄 𑀇𑀤𑀁 𑀓𑀸𑀭𑀡𑀫𑀤𑁆𑀤𑀲.

𑀪𑀼𑀚𑀗𑁆𑀕𑀸 ¶ 𑀧𑀭𑀺𑀕𑀡𑁆𑀳𑀺𑀁𑀲𑀼 𑀭𑀸𑀫𑀕𑀸𑀫𑀫𑁆𑀳𑀺 𑀥𑀸𑀢𑀼𑀬𑁄;

𑀘𑁂𑀢𑀺𑀬𑁂 𑀥𑀸𑀭𑀬𑀺𑀲𑁆𑀲𑀦𑁆𑀢𑀺 𑀮𑀗𑁆𑀓𑀸𑀤𑀻𑀧𑁂 𑀅𑀦𑀸𑀕𑀢𑁂.

𑀢𑀸 𑀥𑀸𑀢𑀼𑀬𑁄 𑀞𑀧𑁂𑀢𑁆𑀯𑀸𑀦 𑀣𑁂𑀭𑁄 𑀓𑀲𑁆𑀲𑀧𑀲𑀯𑁆𑀳𑀬𑁄;

𑀭𑀜𑁆𑀜𑁄 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀅𑀤𑀸𑀲𑀺 𑀥𑀸𑀢𑀼𑀬𑁄 𑀢𑀤𑀸.

𑀕𑁂𑀳𑁂 𑀘𑀽𑀧𑀓𑀭𑀡𑀸𑀦𑀺 𑀘𑀢𑀼𑀲𑀝𑁆𑀞𑀺𑀲𑀢𑀸𑀦𑀺 𑀲𑁄;

𑀅𑀩𑁆𑀪𑀦𑁆𑀢𑀭𑁂 𑀞𑀧𑁂𑀲𑀺 𑀭𑀸𑀚𑀸 𑀲𑀩𑁆𑀩𑀸 𑀢𑀸 𑀩𑀼𑀤𑁆𑀥𑀥𑀸𑀢𑀼𑀬𑁄.

𑀓𑀭𑀡𑁆𑀟𑀸𑀲𑀻𑀢𑀺 𑀲𑀁𑀓𑀺𑀡𑁆𑀡𑀁 𑀘𑁂𑀢𑀺𑀬𑀸𑀲𑀻𑀢𑀺𑀮𑀗𑁆𑀓𑀢𑀁;

𑀕𑁂𑀳𑁂 𑀩𑀳𑀼𑀲𑀫𑀸𑀓𑀺𑀡𑁆𑀡𑀁 𑀣𑀽𑀧𑀸𑀭𑀸𑀫𑀧𑁆𑀧𑀫𑀸𑀡𑀓𑀁.

𑀓𑀸𑀭𑁂𑀢𑁆𑀯𑀸 𑀲𑀩𑁆𑀩𑀓𑀭𑀡𑀁 𑀯𑀸𑀮𑀺𑀓𑀁 𑀑𑀓𑀺𑀭𑀻 𑀢𑀳𑀺𑀁;

𑀦𑀸𑀦𑀸𑀧𑀼𑀧𑁆𑀨𑀲𑀳𑀲𑁆𑀲𑀸𑀦𑀺 𑀦𑀸𑀦𑀸 𑀕𑀦𑁆𑀥𑀁 𑀲𑀫𑀸𑀓𑀺𑀭𑀺.

𑀅𑀲𑀻𑀢𑀺𑀣𑁂𑀭𑀭𑀽𑀧𑀸𑀦𑀺 𑀅𑀝𑁆𑀞𑀘𑀓𑁆𑀓𑀲𑀢𑀸𑀦𑀺 𑀘;

𑀲𑀼𑀤𑁆𑀥𑁄𑀥𑀦𑀲𑁆𑀲 𑀭𑀽𑀧𑀫𑁆𑀧𑀺 𑀫𑀸𑀬𑀸𑀧𑀚𑀸𑀧𑀢𑀸𑀤𑀺𑀦𑀁.

𑀲𑀩𑁆𑀩𑀸𑀦𑀺 𑀢𑀸𑀦𑀺 𑀭𑀽𑀧𑀸𑀦𑀺 𑀲𑀼𑀯𑀡𑁆𑀡𑀲𑁆𑀲𑁂𑀯 𑀓𑀸𑀭𑀬𑀺;

𑀧𑀜𑁆𑀘 𑀙𑀢𑁆𑀢𑀥𑀚𑀲𑀢𑁂 𑀉𑀲𑁆𑀲𑀸𑀧𑁂𑀲𑀺 𑀫𑀳𑀻𑀧𑀢𑀻.

𑀚𑀸𑀢𑀭𑀽𑀧𑀫𑀬𑁂 𑀓𑀼𑀫𑁆𑀪𑁂 𑀓𑀼𑀫𑁆𑀪𑁂 𑀘 𑀭𑀢𑀦𑀸𑀫𑀬𑁂;

𑀧𑀜𑁆𑀘 𑀧𑀜𑁆𑀘 𑀲𑀢𑁂𑀬𑁂𑀯 𑀞𑀧𑀸𑀧𑁂𑀲𑀺 𑀲𑀫𑀦𑁆𑀢𑀢𑁄.

𑀲𑁄𑀯𑀡𑁆𑀡𑀦𑀺𑀓𑁆𑀔𑀫𑀬𑁂𑀦 𑀘 𑀓𑀧𑀸𑀮𑁂 𑀭𑀚𑀢𑀸𑀫𑀬𑁂;

𑀧𑀼𑀭𑁂𑀲𑀺 𑀕𑀦𑁆𑀥𑀢𑁂𑀮𑀲𑁆𑀲 𑀚𑀸𑀮𑀸𑀧𑁂𑀢𑁆𑀯𑀸 𑀧𑀤𑀻𑀧𑀓𑁂.

𑀧𑀜𑁆𑀘 𑀧𑀜𑁆𑀘 𑀲𑀢𑁂𑀬𑁂𑀯 𑀞𑀧𑀸𑀧𑁂𑀲𑀺 𑀤𑀺𑀲𑀫𑁆𑀧𑀢𑀺;

𑀇𑀫𑁂 𑀢𑀣𑁂𑀯 𑀢𑀺𑀝𑁆𑀞𑀦𑁆𑀢 𑀅𑀥𑀺𑀝𑁆𑀞𑀸𑀲𑀺 𑀫𑀳𑀸𑀫𑀼𑀦𑀺.

𑀯𑀺𑀢𑁆𑀣𑀸𑀭𑀺𑀢𑀸 𑀥𑀫𑁆𑀫𑀸𑀲𑁄𑀓𑁄 𑀪𑀯𑀺𑀲𑁆𑀲𑀢𑀺 𑀅𑀦𑀸𑀕𑀢𑁂;

𑀅𑀓𑁆𑀔𑀭𑁂 𑀲𑁄𑀡𑁆𑀡𑀧𑀢𑁆𑀢𑀫𑁆𑀳𑀺 𑀙𑀺𑀦𑁆𑀤𑀸𑀧𑁂𑀲𑀺 𑀫𑀳𑀸𑀫𑀢𑀻.

𑀧𑀓𑀧𑁆𑀧𑀺𑀢𑁆𑀯𑀸 𑀯𑀺𑀲𑀼𑀓𑀫𑁆𑀫𑀁 𑀥𑀸𑀢𑀼𑀕𑀩𑁆𑀪𑀲𑀫𑀦𑁆𑀢𑀢𑁄;

𑀯𑀸𑀢𑀯𑁂𑀕𑁂𑀦 𑀬𑀸𑀬𑀦𑁆𑀢𑀁 𑀬𑀦𑁆𑀢𑀭𑀽𑀧𑀫𑀓𑀸𑀭𑀬𑀻.

𑀓𑀢𑁆𑀯𑀸 𑀲𑀺𑀮𑀸𑀧𑀭𑀺𑀓𑁆𑀔𑁂𑀧𑀁 𑀧𑀺𑀤𑀳𑀺𑀢𑁆𑀯𑀸 𑀲𑀺𑀮𑀸𑀳𑀺 𑀢𑀁;

𑀢𑀲𑁆𑀲𑀽𑀧𑀭𑀺 𑀓𑀭𑀻 𑀣𑀽𑀧𑀁 𑀲𑀫𑀁 𑀧𑀸𑀲𑀸𑀡𑀣𑀽𑀧𑀺𑀬𑀁.)

𑀥𑀸𑀢𑀼𑀦𑀺𑀥𑀸𑀦𑀓𑀣𑀸 𑀲𑀫𑀢𑁆𑀢𑀸.

𑀇𑀢𑀺 𑀅𑀭𑀺𑀬𑀚𑀦𑀧𑁆𑀧𑀲𑀸𑀤𑀦𑀢𑁆𑀣𑀸𑀬 𑀓𑀢𑁂 𑀥𑀸𑀢𑀼𑀯𑀁𑀲𑁂 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀸𑀥𑀺𑀓𑀸𑀭𑁄 𑀦𑀸𑀫 𑀤𑀼𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.

𑁩. ¶ 𑀥𑀸𑀢𑀼𑀧𑀭𑀫𑁆𑀧𑀭𑀸𑀓𑀣𑀸

𑀥𑀸𑀢𑀼𑀲𑀼 𑀧𑀦 𑀯𑀺𑀪𑀚𑀺𑀢𑁆𑀯𑀸 𑀤𑀻𑀬𑀫𑀸𑀦𑁂𑀲𑀼 𑀲𑀢𑁆𑀣𑀼𑀦𑁄 𑀦𑀮𑀸𑀝𑀥𑀸𑀢𑀼 𑀓𑁄𑀲𑀺𑀦𑀸𑀭𑀓𑀸𑀦𑀁 𑀫𑀮𑁆𑀮𑀸𑀦𑀁 𑀮𑀤𑁆𑀥𑀓𑁄𑀝𑁆𑀞𑀸𑀲𑁂𑀬𑁂𑀯 𑀅𑀳𑁄𑀲𑀺. 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀢𑁆𑀣𑀼𑀦𑁄 𑀦𑀮𑀸𑀝𑀥𑀸𑀢𑀼 𑀢𑀼𑀫𑁆𑀳𑀸𑀓𑀁 𑀓𑁄𑀝𑁆𑀞𑀸𑀲𑁂 𑀅𑀳𑁄𑀲𑀺, 𑀢𑀁 𑀕𑀳𑁂𑀢𑀼𑀁 𑀆𑀕𑀢𑁄, 𑀪𑀕𑀯𑀸 𑀳𑀺 𑀥𑀭𑀫𑀸𑀦𑁂𑀬𑁂𑀯 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀲𑁆𑀲 𑀅𑀦𑀼𑀚𑀸𑀦𑀺, ‘𑀢𑀲𑁆𑀫𑀸 𑀢𑀁 𑀅𑀫𑁆𑀳𑀸𑀓𑀁 𑀤𑁂𑀣𑀸’𑀢𑀺. 𑀢𑀁 𑀲𑀼𑀢𑁆𑀯𑀸 𑀫𑀮𑁆𑀮𑀭𑀸𑀚𑀸𑀦𑁄?’𑀏𑀯𑀁 𑀧𑀢𑀺𑀕𑀡𑁆𑀳𑀣 𑀪𑀦𑁆𑀢𑁂 𑀥𑀸𑀢𑀼’𑀢𑀺 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀅𑀤𑀁𑀲𑀼. 𑀲𑁄 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀫𑀳𑀸𑀦𑀦𑁆𑀤𑀢𑁆𑀣𑁂𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀦𑀮𑀸𑀝𑀥𑀸𑀢𑀼𑀁 𑀣𑁂𑀭𑀲𑁆𑀲 𑀦𑀺𑀬𑁆𑀬𑀸𑀤𑁂𑀢𑁆𑀯𑀸’ 𑀇𑀫𑀁 𑀥𑀸𑀢𑀼𑀁 𑀢𑀫𑁆𑀩𑀧𑀡𑁆𑀡𑀺 𑀤𑀻𑀧𑁂 𑀫𑀳𑀸𑀯𑀸𑀮𑀼𑀓𑀕𑀗𑁆𑀕𑀸𑀬 𑀤𑀓𑁆𑀔𑀺𑀡𑀪𑀸𑀕𑁂 𑀲𑁂𑀭𑀼𑀦𑀸𑀫 𑀤𑀳𑀲𑁆𑀲 𑀅𑀦𑁆𑀢𑁂 𑀯𑀭𑀸𑀳 𑀦𑀸𑀫 𑀲𑁄𑀡𑁆𑀟𑀺𑀫𑀢𑁆𑀣𑀓𑁂 𑀓𑀸𑀓𑀯𑀡𑁆𑀡𑀢𑀺𑀲𑁆𑀲𑁄 𑀦𑀸𑀫 𑀭𑀸𑀚𑀸 𑀧𑀢𑀺𑀝𑁆𑀞𑀸𑀧𑁂𑀲𑁆𑀲𑀢𑀺, 𑀘𑁂𑀢𑀺𑀬𑀁 𑀲𑀗𑁆𑀖𑀸𑀭𑀸𑀫𑀁 𑀓𑀸𑀭𑀸𑀧𑁂𑀲𑁆𑀲𑀢𑀺, 𑀢𑁆𑀯𑀁 𑀇𑀫𑀁 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀯𑁂𑀲𑀸𑀮𑀺𑀬𑀁 𑀉𑀧𑀦𑀺𑀲𑁆𑀲𑀸𑀬 𑀫𑀳𑀸𑀯𑀦𑀯𑀺𑀳𑀸𑀭𑁂 𑀓𑀼𑀝𑀸𑀕𑀸𑀭𑀲𑀸𑀮𑀸𑀬𑀁 𑀲𑀢𑁆𑀣𑀼𑀦𑁄 𑀯𑀲𑀺𑀢𑀕𑀦𑁆𑀥𑀓𑀼𑀝𑀺𑀬𑀁 𑀞𑀧𑁂𑀢𑁆𑀯𑀸 𑀥𑀸𑀢𑀼𑀧𑀽𑀚𑀁 𑀓𑀢𑁆𑀯𑀸 𑀆𑀬𑀼𑀲𑀗𑁆𑀔𑀸𑀭𑁂 𑀑𑀲𑁆𑀲𑀝𑁆𑀞𑁂 𑀧𑀭𑀺𑀦𑀺𑀩𑁆𑀩𑀸𑀧𑀬𑀫𑀸𑀦𑁂 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀘𑀦𑁆𑀤𑀕𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀥𑀸𑀢𑀼𑀯𑀁𑀲𑀁 𑀓𑀣𑁂𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀻’𑀢𑀺 𑀯𑀢𑁆𑀯𑀸 𑀥𑀸𑀢𑀼𑀁 𑀣𑁂𑀭𑀲𑁆𑀲 𑀤𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀲𑀸𑀯𑀓𑁄 𑀲𑀢𑁆𑀣𑀼𑀓𑀧𑁆𑀧𑁄 𑀲𑁄 𑀧𑀪𑀻𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁄;

𑀕𑀳𑁂𑀢𑁆𑀯𑀸 𑀫𑀸𑀦𑀬𑀻 𑀥𑀸𑀢𑀼𑀁 𑀫𑀳𑀸𑀦𑀦𑁆𑀤𑁄 𑀫𑀳𑀸𑀯𑀦𑁂.

𑀢𑀲𑁆𑀲 𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀘𑀦𑁆𑀤𑀕𑀼𑀢𑁆𑀢𑀢𑁆𑀣𑁂𑀭𑁄 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑀁 𑀉𑀕𑁆𑀕𑀦𑁆𑀢𑁆𑀯𑀸 𑀲𑀸𑀯𑀢𑁆𑀣𑀻𑀬𑀁 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀤𑀲𑀩𑀮𑁂𑀦 𑀯𑀲𑀺𑀢𑀕𑀦𑁆𑀥𑀓𑀼𑀝𑀺𑀬𑀁 𑀞𑀧𑁂𑀢𑁆𑀯𑀸 𑀥𑀸𑀢𑀼𑀧𑀽𑀚𑀁 𑀓𑀢𑁆𑀯𑀸 𑀘𑀺𑀭𑀁 𑀯𑀺𑀳𑀸𑀲𑀺. 𑀲𑁄𑀧𑀺 𑀆𑀬𑀼𑀲𑀗𑁆𑀔𑀸𑀭𑁂 𑀑𑀲𑁆𑀲𑀝𑁆𑀞𑁂 𑀧𑀭𑀺𑀦𑀺𑀩𑁆𑀩𑀸𑀧𑀬𑀫𑀸𑀦𑁂 𑀅𑀢𑁆𑀢𑀦𑁄. 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀪𑀤𑁆𑀤𑀲𑁂𑀦𑀢𑁆𑀣𑁂𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀥𑀸𑀢𑀼𑀁 𑀣𑁂𑀭𑀲𑁆𑀲 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀥𑀸𑀢𑀼𑀯𑀁𑀲𑀁 𑀓𑀣𑁂𑀢𑁆𑀯𑀸 𑀅𑀦𑀼𑀲𑀸𑀲𑀺𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀘𑀦𑁆𑀤𑀕𑀼𑀢𑁆𑀢𑁄 𑀫𑀳𑀸𑀧𑀜𑁆𑀜𑁄 𑀙𑀴𑀪𑀺𑀜𑁆𑀜𑁄 𑀯𑀺𑀲𑀸𑀭𑀤𑁄;

𑀭𑀫𑁆𑀫𑁂 𑀚𑁂𑀢𑀯𑀦𑁂 𑀥𑀸𑀢𑀼𑀁 𑀞𑀧𑁂𑀢𑁆𑀯𑀸 𑀯𑀦𑁆𑀤𑀦𑀁 𑀅𑀓𑀸.

𑀢𑀲𑁆𑀲 ¶ 𑀲𑀺𑀲𑁆𑀲𑁄 𑀪𑀤𑁆𑀤𑀲𑁂𑀦𑀢𑁆𑀣𑁂𑀭𑁄 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂 𑀇𑀲𑀺𑀧𑀢𑀦𑁂 𑀫𑀳𑀸 𑀯𑀺𑀳𑀸𑀭𑁂 𑀲𑀢𑁆𑀣𑀼𑀦𑁄 𑀯𑀲𑀺𑀢𑀕𑀦𑁆𑀥𑀓𑀼𑀝𑀺𑀬𑀁 𑀞𑀧𑁂𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀘𑀺𑀭𑀁 𑀯𑀺𑀳𑀸𑀲𑀺. 𑀲𑁄 𑀧𑀭𑀺𑀦𑀺𑀩𑁆𑀩𑀸𑀧𑀬𑀫𑀸𑀦𑁄 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀚𑀬𑀲𑁂𑀦𑀢𑁆𑀣𑁂𑀭𑀲𑁆𑀲 𑀥𑀸𑀢𑀼𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀥𑀸𑀢𑀼𑀯𑀁𑀲𑀁 𑀓𑀣𑁂𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀪𑀤𑁆𑀤𑀲𑁂𑀦𑁄 𑀫𑀳𑀸𑀣𑁂𑀭𑁄 𑀓𑀢𑀓𑀺𑀘𑁆𑀘𑁄 𑀫𑀳𑀸𑀇𑀲𑀺;

𑀥𑀸𑀢𑀼𑀁 𑀞𑀧𑁂𑀢𑁆𑀯𑀸 𑀇𑀲𑀺𑀧𑀢𑀦𑁂 𑀯𑀦𑁆𑀤𑀺𑀢𑁆𑀯𑀸 𑀦𑀺𑀩𑁆𑀩𑀼𑀢𑀺𑀁 𑀕𑀢𑁄.

𑀲𑁄 𑀧𑀦 𑀚𑀬𑀲𑁂𑀦𑀢𑁆𑀣𑁂𑀭𑁄 𑀢𑀁 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀯𑁂𑀮𑀼𑀯𑀦𑀫𑀳𑀸𑀯𑀺𑀳𑀸𑀭𑁂 𑀲𑀢𑁆𑀣𑀼𑀦𑁄 𑀯𑀲𑀺𑀢𑀕𑀦𑁆𑀥𑀓𑀼𑀝𑀺𑀬𑀁 𑀞𑀧𑁂𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀧𑀬𑀫𑀸𑀦𑁄 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀫𑀳𑀸𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲 𑀥𑀸𑀢𑀼𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀥𑀸𑀢𑀼𑀯𑀁𑀲𑀁 𑀓𑀣𑁂𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀕𑀳𑁂𑀢𑁆𑀯𑀸𑀦 𑀥𑀸𑀢𑀼𑀯𑀭𑀁 𑀚𑀬𑀲𑁂𑀦𑁄 𑀫𑀳𑀸𑀫𑀼𑀦𑀺;

𑀦𑀺𑀥𑀸𑀬 𑀯𑁂𑀮𑀼𑀯𑀦𑁂 𑀭𑀫𑁆𑀫𑁂 𑀅𑀓𑀸 𑀧𑀽𑀚𑀁 𑀫𑀦𑁄𑀭𑀫𑀁.

𑀲𑁄 𑀧𑀦𑀸𑀬𑀲𑁆𑀫𑀸 𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑁄 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂𑀦 𑀆𑀕𑀦𑁆𑀢𑁆𑀯𑀸 𑀓𑁄𑀲𑀫𑁆𑀩𑀺𑀁 𑀉𑀧𑀦𑀺𑀲𑁆𑀲𑀸𑀬 𑀖𑁄𑀲𑀺𑀢 𑀲𑁂𑀝𑁆𑀞𑀺𑀦𑀸 𑀓𑀸𑀭𑀸𑀧𑀺𑀢𑁂 𑀖𑁄𑀲𑀺𑀢𑀸𑀭𑀸𑀫𑁂 𑀪𑀕𑀯𑀢𑁄 𑀯𑀲𑀺𑀢𑀕𑀦𑁆𑀥𑀓𑀼𑀝𑀺𑀬𑀁 𑀞𑀧𑁂𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀁 𑀓𑀢𑁆𑀯𑀸 𑀘𑀺𑀭𑀁 𑀯𑀺𑀳𑀸𑀲𑀺. 𑀲𑁄’𑀧𑀺 𑀧𑀭𑀺𑀦𑀺𑀩𑁆𑀩𑀸𑀧𑀬𑀫𑀸𑀦𑁄 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀫𑀳𑀸𑀤𑁂𑀯𑀢𑁆𑀣𑁂𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀥𑀸𑀢𑀼𑀯𑀁𑀲𑀁 𑀓𑀣𑁂𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀻’𑀢𑀺 𑀯𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀲𑀗𑁆𑀖𑀭𑀓𑁆𑀔𑀺𑀢𑀯𑁆𑀳𑀬𑁄 𑀣𑁂𑀭𑁄 𑀘𑀦𑁆𑀤𑁄 𑀯𑀺𑀬 𑀲𑀼𑀧𑀸𑀓𑀝𑁄;

𑀞𑀧𑁂𑀢𑁆𑀯𑀸 𑀖𑁄𑀲𑀺𑀢𑀸𑀭𑀸𑀫𑁂 𑀅𑀓𑀸 𑀧𑀽𑀚𑀁 𑀫𑀦𑁄𑀭𑀫𑀁.

𑀢𑀲𑁆𑀲 𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀫𑀳𑀸𑀤𑁂𑀯𑀢𑁆𑀣𑁂𑀭𑁄 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀤𑁂𑀯𑀸𑀦𑀫𑁆𑀧𑀺𑀬𑀢𑀺𑀲𑁆𑀲𑀲𑁆𑀲 𑀫𑀳𑀸𑀭𑀜𑁆𑀜𑁄 𑀪𑀸𑀢𑀼 𑀫𑀳𑀸𑀦𑀸𑀕𑀲𑁆𑀲 𑀉𑀧𑀭𑀸𑀚𑀲𑁆𑀲 𑀫𑀳𑀸𑀕𑀸𑀫𑁂 𑀲𑁂𑀢𑀘𑁆𑀙𑀢𑁆𑀢𑀁 𑀉𑀲𑁆𑀲𑀸𑀧𑀺𑀢𑀓𑀸𑀮𑁂 𑀳𑀢𑁆𑀣𑁄𑀝𑁆𑀞 𑀦𑀸𑀫𑀚𑀦𑀧𑀤𑁂 𑀓𑀼𑀓𑁆𑀓𑀼𑀝𑀧𑀩𑁆𑀩𑀢𑀦𑁆𑀢𑀭𑁂 𑀫𑀳𑀸𑀲𑀸𑀮𑀭𑀼𑀓𑁆𑀔𑀫𑀽𑀮𑁂 𑀆𑀓𑀸𑀲𑀢𑁄 𑀑𑀢𑀭𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀳𑀸𑀓𑀸𑀴𑁄 𑀦𑀸𑀫 𑀉𑀧𑀸𑀲𑀓𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀤𑀸𑀭𑁂𑀳𑀺 𑀲𑀤𑁆𑀥𑀺𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀥𑀚𑀧𑀢𑀸𑀓𑀸𑀤𑀻𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀫𑀳𑀦𑁆𑀢𑁂𑀳𑀺 𑀧𑀽𑀚𑀸𑀯𑀺𑀥𑀸𑀦𑁂𑀳𑀺 𑀥𑀸𑀢𑀼𑀁 𑀧𑀭𑀺𑀳𑀭𑀺𑀢𑁆𑀯𑀸 𑀘𑀺𑀭𑀁 𑀯𑀲𑀺. 𑀫𑀸𑀲𑀲𑁆𑀲 𑀅𑀝𑁆𑀞-𑀉𑀧𑁄𑀲𑀣𑀤𑀺𑀯𑀲𑁂 ¶ 𑀥𑀸𑀢𑀼𑀢𑁄 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀉𑀕𑁆𑀕𑀘𑁆𑀙𑀺𑀁𑀲𑀼. 𑀢𑀲𑁆𑀫𑀺𑀁 𑀲𑀫𑀬𑁂 𑀲𑁄 𑀧𑀤𑁂𑀲𑁄 𑀩𑀼𑀤𑁆𑀥𑀲𑁆𑀲 𑀥𑀭𑀫𑀸𑀦𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀚𑀦𑀧𑀤𑀯𑀸𑀲𑀻 𑀫𑀦𑀼𑀲𑁆𑀲𑀸𑀧𑀺 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀲𑀻𑀮𑀸𑀦𑀺 𑀕𑀡𑁆𑀳𑀦𑁆𑀢𑀺, 𑀉𑀧𑁄𑀲𑀣𑀯𑀸𑀲𑀁 𑀯𑀲𑀦𑁆𑀢𑀺, 𑀤𑀸𑀦𑀁 𑀤𑁂𑀦𑁆𑀢𑀺, 𑀘𑁂𑀢𑀺𑀬𑀲𑁆𑀲 𑀫𑀳𑀦𑁆𑀢𑀁 𑀧𑀽𑀚𑀁 𑀓𑀭𑁄𑀦𑁆𑀢𑀻. 𑀢𑀢𑁄 𑀅𑀧𑀭𑀪𑀸𑀕𑁂 𑀉𑀧𑀭𑀸𑀚𑀸 𑀫𑀳𑀸𑀕𑀸𑀫𑁂 𑀯𑀺𑀳𑀭𑀦𑁆𑀢𑁄 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺? 𑀬𑁄 𑀅𑀫𑁆𑀳𑀸𑀓𑀁 𑀤𑀲𑀩𑀮𑀲𑁆𑀲 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀇𑀥𑀸𑀕𑀢𑁄, 𑀢𑀲𑁆𑀲 𑀫𑀳𑀦𑁆𑀢𑀁 𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑀸𑀫𑀻𑀢𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀓𑀼𑀝𑀼𑀫𑁆𑀩𑀺𑀓𑁄 𑀫𑀳𑀸𑀓𑀸𑀴𑁄 𑀉𑀧𑀭𑀸𑀚𑀁 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺 𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑁂 𑀞𑀢𑁆𑀯𑀸 𑀲𑀸𑀲𑀦𑀁 𑀧𑀳𑀺𑀡𑀺. 𑀉𑀧𑀭𑀸𑀚𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀲𑁄 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑁄 𑀢𑀁 𑀧𑀡𑁆𑀡𑀸𑀓𑀸𑀭𑀁 𑀭𑀸𑀚𑀧𑀼𑀭𑀺𑀲𑀸𑀦𑀁 𑀧𑀝𑀺𑀘𑁆𑀙𑀸𑀧𑁂𑀲𑀺. 𑀉𑀧𑀭𑀸𑀚𑀸? 𑀫𑀸𑀢𑀼𑀮 𑀫𑀳𑀸𑀓𑀸𑀴, 𑀢𑀼𑀫𑁆𑀳𑀸𑀓𑀁 𑀚𑀦𑀧𑀤𑁂 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼𑀦𑁄 𑀥𑀸𑀢𑀼 𑀅𑀢𑁆𑀣𑀻’𑀢𑀺 𑀆𑀳. 𑀫𑀳𑀸𑀓𑀸𑀴𑁄 𑀉𑀧 𑀭𑀸𑀚𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀅𑀢𑁆𑀣𑀺 𑀤𑁂𑀯, 𑀫𑀬𑁆𑀳𑀁 𑀓𑀼𑀮𑀼𑀧𑀕𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀆𑀤𑀸𑀲𑀫𑀡𑁆𑀟𑀮𑀧𑁆𑀧𑀫𑀸𑀡𑀁 𑀲𑀢𑁆𑀣𑀼𑀦𑁄 𑀦𑀮𑀸𑀝𑀥𑀸𑀢𑀼 𑀙𑀩𑁆𑀩𑀡𑁆𑀡𑀭𑀁𑀲𑀻𑀳𑀺 𑀆𑀓𑀸𑀲𑀧𑁆𑀧𑀤𑁂𑀲𑁂 𑀲𑀽𑀭𑀺𑀬𑀲𑀳𑀲𑁆𑀲𑀘𑀦𑁆𑀤𑀲𑀳𑀲𑁆𑀲𑀸𑀦𑀁 𑀉𑀝𑁆𑀞𑀺𑀢𑀓𑀸𑀮𑁄 𑀯𑀺𑀬 𑀑𑀪𑀸𑀲𑁂𑀢𑀺. 𑀲𑁄 𑀚𑀦𑀧𑀤𑁄 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀦𑁆𑀦𑀓𑀸𑀮𑁄 𑀯𑀺𑀬 𑀅𑀳𑁄𑀲𑀻𑀢𑀺 𑀆𑀳. 𑀢𑀲𑁆𑀲 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀓𑀣𑀁 𑀲𑀼𑀡𑀦𑁆𑀢𑀲𑁆𑀲𑀏𑀯 𑀭𑀜𑁆𑀜𑁄 𑀲𑀓𑀮𑀲𑀭𑀻𑀭𑀁 𑀧𑀜𑁆𑀘𑀯𑀡𑁆𑀡𑀸𑀬 𑀧𑀻𑀢𑀺𑀬𑀸 𑀧𑀭𑀺𑀧𑀼𑀡𑁆𑀡𑀁 𑀅𑀳𑁄𑀲𑀺. 𑀅𑀢𑀺𑀯𑀺𑀬 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀭𑀸𑀚𑀸 𑀫𑀬𑁆𑀳𑀁 𑀫𑀸𑀢𑀼𑀮𑀲𑁆𑀲 𑀫𑀳𑀸𑀓𑀸𑀴𑀲𑁆𑀲 𑀲𑀢𑀲𑀳𑀲𑁆𑀲𑀁 𑀓𑀳𑀸𑀧𑀡𑀸𑀦𑀺 𑀘 𑀘𑀢𑀼𑀲𑀺𑀦𑁆𑀥𑀯𑀬𑀼𑀢𑁆𑀢𑀭𑀣𑀜𑁆𑀘 𑀲𑀼𑀯𑀡𑁆𑀡𑀸𑀮𑀗𑁆𑀓𑀸𑀭𑁂𑀳𑀺 𑀲𑀼𑀲𑀚𑁆𑀚𑀺𑀢𑀁 𑀏𑀓𑀁 𑀅𑀲𑁆𑀲𑀜𑁆𑀘 𑀉𑀤𑀓𑀨𑀸𑀲𑀼𑀓𑀝𑁆𑀞𑀸𑀦𑀓𑁂 𑀔𑁂𑀢𑁆𑀢𑀜𑁆𑀘 𑀧𑀜𑁆𑀘𑀤𑀸𑀲𑀻𑀲𑀢𑀜𑁆𑀘 𑀤𑁂𑀣𑀸’𑀢𑀺 𑀯𑀢𑁆𑀯𑀸 𑀅𑀜𑁆𑀜𑀜𑁆𑀘 𑀧𑀲𑀸𑀤𑀁 𑀤𑀸𑀧𑁂𑀲𑀺. 𑀲𑁄 𑀉𑀧𑀭𑀸𑀚𑀸 𑀏𑀢𑁆𑀢𑀓𑀁 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀤𑀸𑀧𑁂𑀢𑁆𑀯𑀸 𑀢𑀁 𑀤𑀺𑀯𑀲𑀫𑁂𑀯 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀳𑀢𑁆𑀣𑀲𑁆𑀲𑀭𑀣𑀬𑀸𑀦𑀸𑀦𑀺 𑀕𑀳𑁂𑀢𑁆𑀯𑀸 𑀓𑀼𑀝𑀼𑀫𑁆𑀩𑀺𑀓𑀁 𑀫𑀕𑁆𑀕𑀤𑁂𑀲𑀓𑀁 𑀓𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀳𑀢𑁆𑀣𑁄𑀝𑁆𑀞𑀚𑀦𑀧𑀤𑀁 𑀧𑀢𑁆𑀯𑀸 𑀭𑀫𑀡𑀻𑀬𑁂 𑀪𑀽𑀫𑀺𑀧𑁆𑀧𑀤𑁂𑀲𑁂 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀓𑀼𑀝𑀼𑀫𑁆𑀩𑀺𑀓𑀁 𑀕𑀳𑁂𑀢𑁆𑀯𑀸 𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀲𑁂𑀲𑀸 𑀅𑀫𑀘𑁆𑀘𑀸 𑀓𑀼𑀝𑀼𑀫𑁆𑀩𑀺𑀓𑁄 𑀘 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 ¶ 𑀅𑀝𑁆𑀞𑀁𑀲𑀼. 𑀉𑀧𑀭𑀸𑀚𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀲𑀸𑀭𑀸𑀡𑀻𑀬𑀁 𑀓𑀣𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀧𑀝𑀺𑀲𑀦𑁆𑀣𑀸𑀭𑀫𑀓𑀸𑀲𑀺. 𑀫𑀳𑀸𑀤𑁂𑀯𑀢𑁆𑀣𑁂𑀭𑁄𑀧𑀺 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀓𑀢𑁆𑀯𑀸 𑀓𑀺𑀲𑁆𑀲 𑀢𑁆𑀯𑀁 𑀫𑀳𑀸𑀭𑀸𑀚 𑀇𑀥𑀸𑀕𑀢𑁄𑀲𑀺 𑀆𑀕𑀢𑀓𑀸𑀭𑀡𑀁 𑀫𑁂 𑀆𑀭𑁄𑀘𑁂𑀳𑀻’𑀢𑀺 𑀆𑀳. 𑀪𑀦𑁆𑀢𑁂 𑀢𑀼𑀫𑁆𑀳𑀸𑀓𑀁. 𑀲𑀦𑁆𑀢𑀺𑀓𑁂 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀦𑀮𑀸𑀝𑀥𑀸𑀢𑀼 𑀅𑀢𑁆𑀣𑀻 𑀓𑀺𑀭. 𑀢𑀁 𑀯𑀦𑁆𑀤𑀺𑀲𑁆𑀲𑀸𑀫𑀺’𑀢𑀺 𑀆𑀕𑀢𑁄𑀫𑁆𑀳𑀻’𑀢𑀺 𑀆𑀳. 𑀣𑁂𑀭𑁄? 𑀪𑀤𑁆𑀤𑀓𑀁 𑀫𑀳𑀸 𑀭𑀸𑀚 𑀢𑀬𑀸 𑀓𑀢𑀦𑁆𑀢𑀺 𑀯𑀢𑁆𑀯𑀸 𑀥𑀸𑀢𑀼𑀖𑀭𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀫𑀳𑀸𑀭𑀸𑀚 𑀩𑀼𑀤𑁆𑀥𑀲𑁆𑀲 𑀦𑀮𑀸𑀝𑀥𑀸𑀢𑀼 𑀅𑀢𑀺𑀤𑀼𑀮𑁆𑀮𑀪𑀸’𑀢𑀺 𑀆𑀳. 𑀭𑀸𑀚𑀸 𑀲𑁄𑀴𑀲𑁂𑀳𑀺 𑀕𑀦𑁆𑀥𑁄𑀤𑀓𑁂𑀳𑀺 𑀦𑀳𑀸𑀬𑀺𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀢𑀺𑀫𑀡𑁆𑀟𑀺𑀢𑁄 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀦𑀫𑀲𑁆𑀲𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀩𑀼𑀤𑁆𑀥𑀸𑀭𑀫𑁆𑀫𑀡𑀸𑀬 𑀧𑀻𑀢𑀺𑀬𑀸 𑀲𑀓𑀮𑀲𑀭𑀻𑀭𑀁 𑀨𑀼𑀝𑀁 𑀅𑀳𑁄𑀲𑀺.

(𑀭𑀸𑀚𑀸 𑀧𑀻𑀢𑀺𑀯𑁂𑀕𑁂𑀦 𑀇𑀫𑀸 𑀕𑀸𑀣𑀸 𑀆𑀳;

𑀦𑀫𑀸𑀫𑀺 𑀯𑀻𑀭 𑀧𑀸𑀤𑁂 𑀢𑁂 𑀘𑀓𑁆𑀓𑀗𑁆𑀓𑀺𑀢 𑀢𑀮𑁂 𑀲𑀼𑀪𑁂;

𑀯𑀦𑁆𑀤𑀺𑀢𑁂 𑀦𑀭𑀤𑁂𑀯𑁂𑀳𑀺 𑀅𑀫𑀢𑀁 𑀤𑁂𑀳𑀺 𑀯𑀦𑁆𑀤𑀺𑀢𑁂.

𑀮𑁄𑀓𑀦𑀸𑀣 𑀢𑀼𑀯𑀁 𑀏𑀓𑁄 𑀲𑀭𑀡𑀁 𑀲𑀩𑁆𑀩𑀧𑀸𑀡𑀺𑀦𑀁;

𑀮𑁄𑀓𑁂 𑀢𑀬𑀸 𑀲𑀫𑁄 𑀦𑀢𑁆𑀣𑀺 𑀢𑀸𑀭𑁂𑀳𑀺 𑀚𑀦𑀢𑀁 𑀩𑀳𑀼𑀁.

𑀫𑀳𑀡𑁆𑀡𑀯𑁂 𑀫𑀬𑀁 𑀪𑀦𑁆𑀢𑁂 𑀦𑀺𑀫𑀼𑀕𑁆𑀕𑀸 𑀤𑀻𑀖𑀲𑀫𑁆𑀪𑀯𑁂;

𑀅𑀧𑁆𑀧𑀢𑀺𑀲𑁆𑀲𑀸 𑀅𑀧𑁆𑀧𑀢𑀺𑀝𑁆𑀞𑀸 𑀲𑀁𑀲𑀭𑀸𑀫 𑀘𑀺𑀭𑀁 𑀢𑀳𑀺𑀁.

𑀏𑀢𑀭𑀳𑀺 𑀢𑀼𑀫𑁆𑀳𑁂 𑀆𑀧𑀚𑁆𑀚 𑀧𑀢𑀺𑀝𑁆𑀞𑀁 𑀅𑀥𑀺𑀕𑀘𑁆𑀙𑀭𑁂;

𑀢𑀼𑀫𑁆𑀳𑀸𑀓𑀁 𑀯𑀦𑁆𑀤𑀦𑀁 𑀓𑀢𑁆𑀯𑀸 𑀉𑀢𑁆𑀢𑀺𑀡𑁆𑀡𑀫𑁆𑀳 𑀪𑀯𑀡𑁆𑀡𑀯𑀸’𑀢𑀺.)

𑀢𑀲𑁆𑀫𑀺𑀁 𑀔𑀡𑁂 𑀥𑀸𑀢𑀼𑀢𑁄 𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀺𑀁𑀲𑀼. 𑀲𑀓𑀮 𑀮𑀗𑁆𑀓𑀸𑀤𑀻𑀧𑀁 𑀲𑀼𑀯𑀡𑁆𑀡𑀭𑀲𑀥𑀸𑀭𑀸𑀳𑀺 𑀲𑀜𑁆𑀙𑀦𑁆𑀦𑀁 𑀯𑀺𑀬 𑀅𑀳𑁄𑀲𑀺. 𑀫𑀳𑀦𑁆𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀺. 𑀭𑀸𑀚𑀸 𑀫𑀳𑀦𑁆𑀢𑀁 𑀲𑁄𑀫𑀦𑀲𑁆𑀲𑀁 𑀧𑀢𑁆𑀢𑁄 𑀳𑀼𑀢𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑁄 𑀅𑀳𑁄𑀲𑀺. 𑀲𑁄 𑀥𑀸𑀢𑀼𑀖𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀅𑀮𑀗𑁆𑀓𑀢𑀫𑀡𑁆𑀟𑀧𑁂 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 (𑀦𑀺𑀲𑀚𑁆𑀚𑀸𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸 𑀲𑁂𑀬𑁆𑀬𑀣𑀺𑀤𑀁? 𑀅𑀢𑀺𑀤𑀼𑀭𑀘𑁆𑀘𑀸𑀲𑀦𑁆𑀢-𑀉𑀧𑀭𑀺𑀯𑀸𑀢-𑀉𑀦𑁆𑀦𑀢𑀧𑁆𑀧𑀤𑁂𑀲-𑀅𑀢𑀺𑀲𑀫𑁆𑀫𑀼𑀔-𑀅𑀢𑀺𑀧𑀘𑀙𑀸’𑀢𑀺. ¶ 𑀅𑀢𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄 𑀲𑀘𑁂 𑀓𑀣𑁂𑀢𑀼𑀓𑀸𑀫𑁄 𑀉𑀘𑁆𑀘𑀸𑀲𑀤𑁆𑀤𑁂𑀦 𑀓𑀣𑁂𑀢𑀩𑁆𑀩𑀁 𑀳𑁄𑀢𑀺. 𑀅𑀘𑁆𑀘𑀸𑀲𑀦𑁆𑀦𑁂 𑀦𑀺𑀲𑀺𑀦𑁆𑀦𑁄 𑀲𑀗𑁆𑀓𑀭𑀁 𑀓𑀭𑁄𑀢𑀺. 𑀉𑀧𑀭𑀺𑀯𑀸𑀢𑁂 𑀦𑀺𑀲𑀺𑀦𑁆𑀦𑁄 𑀲𑀭𑀻𑀭𑀕𑀦𑁆𑀥𑁄 𑀯𑀸𑀬𑀢𑀺. 𑀉𑀦𑁆𑀦𑀢𑀧𑁆𑀧𑀤𑁂𑀲𑁂 𑀦𑀺𑀲𑀺𑀦𑁆𑀦𑁄 𑀅𑀕𑀸𑀭𑀯𑀁 𑀓𑀭𑁄𑀢𑀺. 𑀅𑀢𑀺𑀲𑀫𑁆𑀫𑀼𑀔𑁂 𑀦𑀺𑀲𑀺𑀦𑁆𑀦𑁄 𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀁 𑀧𑀳𑀭𑀺𑀢𑁆𑀯𑀸 𑀤𑀝𑁆𑀞𑀩𑁆𑀩𑀁 𑀳𑁄𑀢𑀺. 𑀅𑀢𑀺𑀧𑀘𑁆𑀙𑀸 𑀦𑀺𑀲𑀺𑀦𑁆𑀦𑁄 𑀕𑀻𑀯𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀤𑀝𑁆𑀞𑀩𑁆𑀩𑀁 𑀳𑁄𑀢𑀺. 𑀇𑀢𑀺 𑀦𑀺𑀲𑀚𑁆𑀚𑀸𑀤𑁄𑀲𑀁 𑀯𑀚𑁆𑀚𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄). 𑀏𑀯𑀫𑀸𑀳. 𑀪𑀦𑁆𑀢𑁂 𑀇𑀫𑀁 𑀥𑀸𑀢𑀼𑀁 𑀫𑀬𑁆𑀳𑀁 𑀤𑁂𑀣. 𑀫𑀳𑀦𑁆𑀢𑀁 𑀧𑀽𑀚𑀸𑀲𑀓𑁆𑀓𑀭𑀁 𑀓𑀢𑁆𑀯𑀸 𑀧𑀭𑀺𑀳𑀭𑀸𑀫𑀻𑀢𑀺. 𑀪𑀤𑁆𑀤𑀓𑀁 𑀫𑀳𑀸𑀭𑀸𑀚 𑀇𑀫𑀸𑀬 𑀥𑀸𑀢𑀼𑀬𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀥𑀭𑀫𑀸𑀦𑁄𑀬𑁂𑀯 𑀯𑁆𑀬𑀸𑀓𑀭𑀡𑀁 𑀅𑀓𑀸𑀲𑀺. 𑀢𑀼𑀫𑁆𑀳𑀸𑀓𑀁 𑀯𑀁𑀲𑁂 𑀚𑀸𑀢𑁄 𑀓𑀸𑀓𑀯𑀡𑁆𑀡𑀢𑀺𑀲𑁆𑀲𑁄 𑀦𑀸𑀫 𑀭𑀸𑀚𑀸 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀫𑀳𑀸𑀯𑀸𑀮𑀼𑀓𑀕𑀗𑁆𑀕𑀸𑀬 𑀤𑀓𑁆𑀔𑀺𑀡𑀢𑀻𑀭𑁂 𑀲𑁂𑀭𑀼 𑀦𑀸𑀫 𑀤𑀳𑀲𑁆𑀲 𑀅𑀦𑁆𑀢𑁂 𑀯𑀭𑀸𑀳 𑀦𑀸𑀫 𑀲𑁄𑀡𑁆𑀟𑀺𑀬𑀸 𑀫𑀢𑁆𑀣𑀓𑁂 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀫𑀳𑀦𑁆𑀢𑀁 𑀣𑀽𑀧𑀁 𑀓𑀭𑀺𑀲𑁆𑀲𑀢𑀻’𑀢𑀺 𑀯𑀢𑁆𑀯𑀸 𑀲𑀢𑁆𑀣𑀸 𑀢𑀢𑁆𑀣 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀜𑁆𑀘𑀲𑀢𑀔𑀻𑀡𑀸𑀲𑀯𑁂𑀳𑀺 𑀲𑀤𑁆𑀥𑀺𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀕𑀢𑁄. 𑀢𑀲𑁆𑀫𑀸 𑀕𑀡𑁆𑀳𑀣 𑀫𑀳𑀸𑀭𑀸𑀚𑀸’𑀢𑀺 𑀯𑀢𑁆𑀯𑀸 𑀥𑀸𑀢𑀼𑀁 𑀅𑀤𑀸𑀲𑀺.

𑀭𑀸𑀚𑀸 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀘𑀢𑀼𑀭𑀲𑁆𑀲𑀧𑀮𑁆𑀮𑀗𑁆𑀓𑁂 𑀥𑀸𑀢𑀼𑀓𑀭𑀡𑁆𑀟𑀓𑀁 𑀦𑀺𑀤𑀳𑀺𑀢𑁆𑀯𑀸 𑀓𑀭𑀡𑁆𑀟𑀓𑁂 𑀥𑀸𑀢𑀼𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀁 𑀓𑀼𑀫𑀼𑀤𑀧𑀢𑁆𑀢𑀲𑀦𑁆𑀦𑀺𑀳𑀫𑀗𑁆𑀕𑀮𑀲𑀺𑀦𑁆𑀥𑀯𑀬𑀼𑀢𑁆𑀢𑀭𑀣𑁂 𑀞𑀧𑁂𑀢𑁆𑀯𑀸 𑀲𑀫𑀦𑁆𑀢𑀸 𑀆𑀭𑀓𑁆𑀔𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 (𑀭𑀸𑀚𑀸 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸) 𑀧𑀜𑁆𑀘𑀗𑁆𑀕𑀢𑀼𑀭𑀺𑀬𑁂 𑀧𑀕𑁆𑀕𑀡𑁆𑀳𑀸𑀧𑀬𑀫𑀸𑀦𑁄 𑀧𑀘𑁆𑀙𑀸 𑀆𑀕𑀘𑁆𑀙𑀢𑀼’𑀢𑀺 𑀫𑀳𑀸𑀚𑀦𑀲𑁆𑀲 𑀲𑀸𑀲𑀦𑀁 𑀯𑀢𑁆𑀯𑀸 𑀫𑀳𑀸𑀤𑁂𑀯𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸? 𑀢𑀼𑀫𑁆𑀳𑁂 𑀪𑀦𑁆𑀢𑁂, 𑀥𑀸𑀢𑀼𑀬𑀸 𑀉𑀧𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑁄 𑀆𑀕𑀘𑁆𑀙𑀣𑀸’𑀢𑀺 𑀆𑀳. 𑀣𑁂𑀭𑁄 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸;’𑀫𑀳𑀸𑀭𑀸𑀚 𑀅𑀬𑀁 𑀥𑀸𑀢𑀼 𑀧𑀭𑀫𑁆𑀧𑀭𑀸 𑀆𑀕𑀢𑀸. 𑀅𑀳𑀁 𑀪𑀕𑀯𑀢𑁄 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀆𑀦𑀦𑁆𑀤𑀢𑁆𑀣𑁂𑀭𑁄 𑀯𑀺𑀬 𑀇𑀫𑀁 𑀥𑀸𑀢𑀼𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀧𑀘𑁆𑀘𑀬𑀤𑀸𑀬𑀓𑀁 𑀓𑀼𑀝𑀼𑀫𑁆𑀩𑀺𑀓𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀥𑀸𑀢𑀼𑀁 𑀉𑀧𑀝𑁆𑀞𑀳𑀺𑀬𑀫𑀸𑀦𑁄 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀕𑀘𑁆𑀙𑀢𑀺. 𑀭𑀸𑀚𑀸 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀫𑀳𑀸𑀕𑀸𑀫𑀁 𑀧𑀢𑁆𑀢𑁄 𑀫𑀳𑀸𑀲𑁂𑀦𑀕𑀼𑀢𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀦𑀕𑀭𑀁 𑀅𑀮𑀗𑁆𑀓𑀭𑀸𑀧𑁂𑀳𑀻’𑀢𑀺 𑀆𑀳. 𑀲𑁄 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀅𑀝𑁆𑀞𑀸𑀭𑀲 𑀯𑀻𑀣𑀺𑀬𑁄 𑀲𑀫𑁆𑀫𑀚𑁆𑀚𑀦𑁆𑀢𑀼, 𑀧𑀼𑀡𑁆𑀡𑀖𑀝𑁂 𑀞𑀧𑁂𑀦𑁆𑀢𑀼, 𑀥𑀚𑀧𑀢𑀸𑀓𑀸𑀤𑀬𑁄 𑀉𑀲𑁆𑀲𑀸𑀧𑁂𑀦𑁆𑀢𑀼, 𑀢𑁄𑀭𑀡𑀸𑀦𑀺 𑀉𑀲𑁆𑀲𑀸𑀧𑁂𑀦𑁆𑀢𑀼, 𑀧𑀜𑁆𑀘𑀯𑀡𑁆𑀡𑀸𑀦𑀺 𑀧𑀼𑀧𑁆𑀨𑀸𑀦𑀺 ¶ 𑀑𑀓𑀺𑀭𑀦𑁆𑀢𑀼, 𑀲𑀓𑀮𑀦𑀕𑀭𑀁 𑀅𑀮𑀗𑁆𑀓𑀭𑁄𑀦𑁆𑀢𑀼, 𑀕𑀦𑁆𑀥𑀫𑀸𑀮𑀸𑀤𑀬𑁄 𑀕𑀳𑁂𑀢𑁆𑀯𑀸 𑀲𑀼𑀤𑁆𑀥𑀼𑀢𑁆𑀢𑀭𑀸𑀲𑀗𑁆𑀕𑀸 𑀳𑀼𑀢𑁆𑀯𑀸 𑀲𑀓𑀮𑀦𑀸𑀕𑀭𑀸 𑀧𑀝𑀺𑀧𑀣𑀁 𑀆𑀕𑀘𑁆𑀙𑀦𑁆𑀢𑀼𑀢𑀺 𑀆𑀡𑀸𑀧𑁂𑀲𑀺. 𑀢𑀢𑁄 𑀫𑀳𑀸𑀚𑀦𑁄 𑀲𑀩𑁆𑀩𑀢𑀼𑀭𑀺𑀬𑀸𑀦𑀺 𑀖𑁄𑀲𑀸𑀧𑀬𑀫𑀸𑀦𑁄 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑁄 𑀧𑀝𑀺𑀧𑀣𑀁 𑀦𑀺𑀓𑁆𑀔𑀦𑁆𑀢𑁄. 𑀤𑁂𑀯𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀸𑀲𑀓𑁄𑀧𑀸𑀲𑀺𑀓𑀸 𑀅𑀧𑁆𑀧𑀫𑀸𑀡𑀸 𑀅𑀳𑁂𑀲𑀼𑀁. (𑀕𑀦𑁆𑀥𑀫𑀸𑀮𑀸𑀤𑀺 𑀧𑀼𑀡𑁆𑀡𑀖𑀝𑀲𑀫𑀼𑀲𑁆𑀲𑀺𑀢𑀥𑀚𑀸𑀓𑀺𑀡𑁆𑀡𑀸) 𑀧𑀭𑀺𑀲𑀸 𑀯𑁂𑀮𑀼𑀓𑁆𑀔𑁂𑀧𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑀬𑀺𑀁𑀲𑀼. 𑀲𑀼𑀕𑀦𑁆𑀥𑀯𑀸𑀢𑀸𑀪𑀺𑀖𑀸𑀢𑀲𑀫𑀼𑀤𑁆𑀤𑀖𑁄𑀲𑁄 𑀯𑀺𑀬 𑀲𑀓𑀮𑀦𑀕𑀭𑀁 𑀏𑀓𑀦𑀺𑀦𑁆𑀦𑀸𑀤𑀚𑀸𑀢𑀁. 𑀲𑁄 𑀭𑀸𑀚𑀸 𑀦𑀕𑀭𑁂 𑀩𑀦𑁆𑀥𑀦𑀸𑀕𑀸𑀭𑁂 𑀲𑀩𑁆𑀩𑀲𑀢𑁆𑀢𑁂 𑀩𑀦𑁆𑀥𑀦𑀸 𑀫𑀼𑀜𑁆𑀘𑀦𑁆𑀢𑀼, 𑀥𑀫𑁆𑀫𑁂𑀦 𑀲𑀫𑁂𑀦 𑀅𑀦𑀼𑀲𑀸𑀲𑀦𑁆𑀢𑀼𑀢𑀺 𑀯𑀢𑁆𑀯𑀸 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀦𑀕𑀭𑀁 𑀧𑀯𑁂𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀭𑀸𑀚𑀦𑀺𑀯𑁂𑀲𑀦𑀁 𑀆𑀕𑀦𑁆𑀢𑁆𑀯𑀸 𑀦𑀸𑀝𑀓𑀻𑀦𑀁 𑀲𑀜𑁆𑀜𑀫𑀤𑀸𑀲𑀺 𑀥𑀸𑀢𑀼𑀁 𑀯𑀦𑁆𑀤𑀦𑁆𑀢𑀼𑀢𑀺. 𑀦𑀸𑀝𑀓𑀻 𑀦𑀸𑀦𑀸𑀪𑀭𑀡𑁂𑀳𑀺 𑀧𑀢𑀺𑀫𑀡𑁆𑀟𑀺𑀢𑀸 𑀭𑀸𑀚𑀕𑁂𑀳𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀥𑀸𑀢𑀼𑀁 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑀸𑀦𑀺 𑀢𑀼𑀭𑀺𑀬𑀪𑀡𑁆𑀟𑀸𑀦𑀺 𑀲𑀸𑀥𑀼𑀓𑀁 𑀧𑀕𑁆𑀕𑀡𑁆𑀳𑀺𑀢𑁆𑀯𑀸 𑀫𑀳𑀦𑁆𑀢𑀁 𑀧𑀽𑀚𑀫𑀓𑀁𑀲𑀼.

𑀢𑀢𑁄 𑀯𑀟𑁆𑀠𑀓𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀭𑀸𑀚𑀦𑀺𑀯𑁂𑀲𑀦𑀢𑁄 𑀦𑀸𑀢𑀺𑀤𑀽𑀭𑁂 𑀦𑀸𑀘𑁆𑀘𑀸𑀲𑀦𑁆𑀢𑁂 𑀲𑀼𑀪𑀼𑀫𑀺𑀢𑀮𑁂 𑀥𑀸𑀢𑀼𑀖𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑀸𑀤𑀺𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀥𑀸𑀢𑀼𑀖𑀭𑁂 𑀯𑀺𑀘𑀺𑀢𑁆𑀢𑀫𑀡𑁆𑀟𑀧𑀁 𑀓𑀸𑀭𑀸𑀧𑁂𑀢𑁆𑀯𑀸𑀦 𑀲𑀢𑁆𑀢𑀭𑀢𑀦𑀫𑀬𑀁 𑀥𑀸𑀢𑀼𑀓𑀭𑀡𑁆𑀟𑀓𑀁 𑀓𑀸𑀭𑀸𑀧𑁂𑀢𑁆𑀯𑀸 𑀥𑀸𑀢𑀼𑀓𑀭𑀡𑁆𑀟𑀓𑁂 𑀥𑀸𑀢𑀼𑀁 𑀞𑀧𑁂𑀢𑁆𑀯𑀸 𑀭𑀢𑀦𑀧𑀮𑁆𑀮𑀗𑁆𑀓 𑀫𑀢𑁆𑀣𑀓𑁂 𑀥𑀸𑀢𑀼𑀁 𑀞𑀧𑁂𑀢𑁆𑀯𑀸 𑀉𑀧𑀭𑀺 𑀯𑀺𑀘𑀺𑀢𑁆𑀢𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀫𑀳𑀦𑁆𑀢𑀁 𑀥𑀸𑀢𑀼𑀧𑀽𑀚𑀁 𑀅𑀓𑀸𑀲𑀺. 𑀫𑀳𑀸𑀚𑀦𑀸 𑀕𑀦𑁆𑀥𑀫𑀸𑀮𑀁 𑀕𑀳𑁂𑀢𑁆𑀯𑀸 𑀫𑀸𑀲𑀲𑁆𑀲 𑀅𑀝𑁆𑀞𑀽𑀧𑁄𑀲𑀣𑀤𑀺𑀯𑀲𑁂 𑀥𑀸𑀢𑀼𑀬𑀸 𑀫𑀳𑀦𑁆𑀢𑀁 𑀧𑀽𑀚𑀁 𑀅𑀓𑀁𑀲𑀼. 𑀥𑀸𑀢𑀼𑀢𑁄 𑀭𑀁𑀲𑀺𑀬𑁄 𑀲𑀫𑀼𑀕𑁆𑀕𑀘𑁆𑀙𑀦𑁆𑀢𑀺. 𑀫𑀳𑀸𑀚𑀦𑀸 𑀯𑀺𑀫𑁆𑀪𑀬𑀚𑀸𑀢𑀸 𑀲𑀸𑀥𑀼𑀓𑀸𑀭𑀁 𑀓𑀭𑁄𑀦𑁆𑀢𑀺. 𑀲𑁄𑀫𑀦𑀲𑁆𑀲𑀪𑀽𑀢𑀸 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀩𑀼𑀤𑁆𑀥𑀸𑀭𑀫𑁆𑀫𑀡 𑀧𑀻𑀢𑀺𑀁 𑀕𑀳𑁂𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀥𑀸𑀢𑀼𑀬𑀸 𑀫𑀳𑀦𑁆𑀢𑀁 𑀧𑀽𑀚𑀁 𑀓𑀭𑁄𑀦𑁆𑀢𑀸 𑀯𑀻𑀢𑀺𑀦𑀸𑀫𑁂𑀦𑁆𑀢𑀺. 𑀧𑀜𑁆𑀘𑀲𑀻𑀮𑀸𑀦𑀺 𑀭𑀓𑁆𑀔𑀦𑁆𑀢𑀺, 𑀩𑀼𑀤𑁆𑀥𑀫𑀸𑀫𑀓𑀸 𑀥𑀫𑁆𑀫𑀫𑀸𑀫𑀓𑀸 𑀲𑀗𑁆𑀖𑀫𑀸𑀫𑀓𑀸 𑀳𑀼𑀢𑁆𑀯𑀸 𑀲𑀭𑀡𑀸𑀦𑀺 𑀕𑀘𑁆𑀙𑀦𑁆𑀢𑀺. 𑀭𑀸𑀚𑀸 𑀫𑀳𑀸𑀚𑀦𑀲𑁆𑀲 𑀑𑀯𑀤𑀢𑀺. ‘‘𑀫𑁂𑀢𑁆𑀢𑀁 𑀪𑀸𑀯𑁂𑀣, 𑀓𑀭𑀼𑀡𑀁 𑀫𑀼𑀤𑀺𑀢𑀁 𑀉𑀧𑁂𑀓𑁆𑀔𑀁 𑀪𑀸𑀯𑁂𑀣, 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀦𑀓𑀫𑁆𑀫𑀁 𑀓𑀭𑁄𑀣𑀸‘‘𑀢𑀺. 𑀑𑀯𑀤𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀧𑀺 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀕𑀗𑁆𑀕𑀸𑀬 𑀫𑀳𑁄-𑀖𑀧𑁆𑀧𑀯𑀢𑁆𑀢𑀦𑀓𑀸𑀮𑁄 ¶ 𑀯𑀺𑀬 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀲𑀺. 𑀫𑀸𑀢𑀸𑀧𑀺𑀢𑀼𑀝𑁆𑀞𑀸𑀦𑁂 𑀞𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀗𑁆𑀕𑀡𑁆𑀳𑀺. 𑀫𑀳𑀸𑀚𑀦𑀸 𑀢𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀢𑀲𑁆𑀫𑀺𑀁 𑀓𑀸𑀮𑁂 𑀫𑀢𑀸 𑀲𑀕𑁆𑀕𑀁 𑀕𑀢𑀸.

𑀓𑀮𑁆𑀬𑀸𑀡𑀯𑀕𑁆𑀕𑀫𑁆𑀳𑀺 𑀧𑀢𑀺𑀝𑁆𑀞𑀺𑀢𑀸 𑀚𑀦𑀸,

𑀤𑀸𑀦𑀸𑀤𑀺 𑀧𑀼𑀜𑁆𑀜𑀸𑀦𑀺 𑀓𑀭𑀺𑀢𑁆𑀯 𑀲𑀩𑁆𑀩𑀤𑀸;

𑀘𑀼𑀢𑀸 𑀘𑀼𑀢𑀸 𑀲𑀩𑁆𑀩𑀚𑀦𑀸 𑀲𑀼𑀫𑀸𑀦𑀲𑀸,

𑀕𑀢𑀸 𑀅𑀲𑁂𑀲𑀁 𑀲𑀼𑀕𑀢𑀺𑀁 𑀲𑀼𑀪𑁂 𑀭𑀢𑀸.

𑀭𑀸𑀚𑀸 𑀥𑀸𑀢𑀼𑀬𑀸 𑀫𑀳𑀦𑁆𑀢𑀁 𑀧𑀽𑀚𑀁 𑀓𑀭𑁄𑀦𑁆𑀢𑁄 𑀫𑀳𑀕𑀸𑀫𑁂 𑀯𑀺𑀳𑀸𑀲𑀺. 𑀢𑁂𑀦 𑀧𑀢𑀺𑀝𑁆𑀞𑀸𑀧𑀺𑀢𑀯𑀺𑀳𑀸𑀭𑀸 𑀓𑀣𑁂𑀢𑀩𑁆𑀩𑀸? 𑀓𑀣𑀁? 𑀮𑁂𑀦𑀯𑀺𑀳𑀸𑀭𑀁 𑀘𑀦𑁆𑀤𑀕𑀺𑀭𑀺𑀯𑀺𑀳𑀸𑀭𑀁 𑀓𑁄𑀝𑀺𑀧𑀩𑁆𑀩𑀢𑀯𑀺𑀳𑀸𑀭𑀁 𑀦𑀕𑀭𑀗𑁆𑀕𑀡𑀯𑀺𑀳𑀸𑀭𑀁 𑀲𑁂𑀮𑀓𑀸 𑀯𑀺𑀳𑀸𑀭𑀁 𑀢𑀮𑀸𑀓𑀸𑀯𑀺𑀳𑀸𑀭𑀦𑁆𑀢𑀺 𑀏𑀯𑀫𑀸𑀤𑀬𑁄 𑀯𑀺𑀳𑀸𑀭𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀺𑀧𑀺𑀝𑀓𑀫𑀳𑀸𑀅𑀭𑀺𑀝𑁆𑀞𑀢𑁆𑀣𑁂𑀭𑀲𑁆𑀲 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸 𑀫𑀳𑀸𑀯𑀺𑀳𑀸𑀭𑁂 𑀦𑀺𑀬𑁆𑀬𑀸𑀤𑁂𑀲𑀺. 𑀏𑀯𑀁 𑀲𑁄 𑀭𑀸𑀚𑀸 𑀬𑀸𑀯𑀚𑀻𑀯𑀁 𑀥𑀸𑀢𑀼𑀁 𑀧𑀭𑀺𑀳𑀭𑀺𑀢𑁆𑀯𑀸 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀬𑀝𑀸𑀮𑀢𑀺𑀲𑁆𑀲 𑀓𑀼𑀫𑀸𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸; 𑀢𑀸𑀢 𑀢𑀺𑀲𑁆𑀲, 𑀅𑀫𑁆𑀳𑁂𑀳𑀺 𑀧𑀭𑀺𑀳𑀭𑀺𑀢 𑀦𑀮𑀸𑀝𑀥𑀸𑀢𑀼 𑀧𑀽𑀚𑁂𑀳𑀻’𑀢𑀺 𑀥𑀸𑀢𑀼𑀯𑀁𑀲𑀁 𑀓𑀣𑁂𑀢𑁆𑀯𑀸 𑀧𑀼𑀢𑁆𑀢𑀁 𑀅𑀦𑀼𑀲𑀸𑀲𑀺𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀲𑀕𑁆𑀕𑀧𑀼𑀭𑀁 𑀕𑀢𑁄.

𑀭𑀸𑀚𑀸 𑀫𑀳𑀸𑀦𑀸𑀕𑀯𑀭𑁄 𑀬𑀲𑀲𑁆𑀲𑀺,

𑀓𑀢𑁆𑀯𑀸𑀧𑀺 𑀭𑀚𑁆𑀚𑀁 𑀫𑀢𑀺𑀫𑀸 𑀲𑀼𑀲𑀤𑁆𑀥𑁄;

𑀫𑀸𑀦𑁂𑀢𑁆𑀯 𑀲𑀗𑁆𑀖𑀁 𑀘𑀢𑀼𑀧𑀘𑁆𑀘𑀬𑁂𑀳𑀺,

𑀅𑀕𑀸 𑀅𑀲𑁄𑀓𑁄 𑀯𑀭𑀤𑁂𑀯𑀮𑁄𑀓𑀁;

𑀢𑀲𑁆𑀲 𑀧𑀼𑀢𑁆𑀢𑁄 𑀬𑀝𑀸𑀮𑀢𑀺𑀲𑁆𑀲𑀓𑀼𑀫𑀸𑀭𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀧𑀺𑀢𑀭𑀸 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀥𑀸𑀢𑀼𑀬𑀸 𑀫𑀳𑀦𑁆𑀢𑀁 𑀧𑀽𑀚𑀁 𑀓𑀸𑀭𑁂𑀲𑀺. 𑀲𑁄’𑀧𑀺 𑀤𑀺𑀯𑀲𑀲𑁆𑀲 𑀢𑀬𑁄 𑀯𑀸𑀭𑁂 𑀥𑀸𑀢𑀼𑀧𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑁄 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀘𑀺𑀭𑀁 𑀯𑀺𑀳𑀸𑀲𑀺. 𑀇𑀫𑀺𑀦𑀸’𑀧𑀺 𑀧𑀢𑀺𑀝𑁆𑀞𑀸𑀧𑀺𑀢𑀯𑀺𑀳𑀸𑀭𑀸 𑀓𑀣𑁂𑀢𑀩𑁆𑀩𑀸; 𑀥𑀫𑁆𑀫𑀲𑀸𑀮𑀯𑀺𑀳𑀸𑀭𑀁 𑀫𑀳𑀸𑀥𑀫𑁆𑀫𑀲𑀸𑀮𑀯𑀺𑀳𑀸𑀭𑀁 𑀲𑁂𑀮𑀸𑀪𑀬𑀯𑀺𑀳𑀸𑀭𑀦𑁆𑀢𑀺 𑀏𑀯𑀫𑀸𑀤𑀬𑁄 ¶ 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸-𑀢𑀺𑀧𑀺𑀝𑀓𑀫𑀳𑀸𑀅𑀭𑀺𑀝𑁆𑀞𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀢𑀺𑀧𑀺𑀝𑀓𑀫𑀳𑀸𑀅𑀪𑀬𑀢𑁆𑀣𑁂𑀭𑁄 𑀉𑀧𑀭𑀸𑀚𑀲𑁆𑀲 𑀫𑀳𑀸𑀦𑀸𑀕𑀲𑁆𑀲 𑀅𑀬𑁆𑀬𑀓𑁄. 𑀢𑀲𑁆𑀲 𑀣𑁂𑀭𑀲𑁆𑀲 𑀤𑀓𑁆𑀔𑀺𑀡𑁄𑀤𑀓𑀁 𑀅𑀤𑀸𑀲𑀺. 𑀲𑁄’𑀧𑀺 𑀭𑀸𑀚𑀸 𑀬𑀸𑀯𑀚𑀻𑀯𑀁 𑀥𑀸𑀢𑀼𑀁 𑀧𑀭𑀺𑀳𑀭𑀺𑀢𑁆𑀯𑀸 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀕𑁄𑀞𑀸𑀪𑀬𑀓𑀼𑀫𑀸𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸’𑀥𑀸𑀢𑀼𑀬𑀸 𑀫𑀳𑀦𑁆𑀢𑀁 𑀧𑀽𑀚𑀁 𑀓𑀭𑁄𑀦𑁆𑀢𑁄 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀻’𑀢𑀺 𑀯𑀢𑁆𑀯𑀸 𑀥𑀸𑀢𑀼𑀯𑀁𑀲𑀁 𑀓𑀣𑁂𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺.

𑀬𑀝𑁆𑀞𑀸𑀮𑀓𑁄 𑀦𑀸𑀫 𑀫𑀳𑀸𑀫𑀳𑀻𑀧𑀢𑀺,

𑀫𑀳𑀸𑀚𑀦𑀲𑁆𑀲𑀢𑁆𑀣𑀓𑀭𑁄 𑀕𑀼𑀡𑀸𑀮𑀬𑁄;

𑀲𑁄 𑀥𑀸𑀢𑀼𑀧𑀽𑀚𑀁 𑀯𑀺𑀧𑀼𑀮𑀁 𑀅𑀦𑁂𑀓𑀥𑀸,

𑀓𑀢𑁆𑀯𑀸 𑀕𑀢𑁄 𑀤𑁂𑀯𑀧𑀼𑀭𑀁 𑀅𑀦𑀺𑀦𑁆𑀤𑀺𑀢𑁄.

𑀢𑀲𑁆𑀲 𑀧𑀼𑀢𑁆𑀢𑁄 𑀕𑁄𑀞𑀸𑀪𑀬𑀓𑀼𑀫𑀸𑀭𑁄 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀧𑀺𑀢𑀭𑀸 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀥𑀸𑀢𑀼𑀬𑀸 𑀫𑀳𑀦𑁆𑀢𑀁 𑀧𑀽𑀚𑀁 𑀓𑀢𑁆𑀯𑀸 𑀕𑁄𑀞𑀸𑀪𑀬 𑀫𑀳𑀸𑀭𑀸𑀚𑀸 𑀳𑀼𑀢𑁆𑀯𑀸 𑀭𑀚𑁆𑀚𑀁 𑀓𑀭𑁄𑀦𑁆𑀢𑁄 𑀓𑀸𑀘𑀭𑀕𑀸𑀫𑁂 𑀤𑀲𑀪𑀸𑀢𑀺𑀓𑁂 𑀭𑀸𑀚𑀸𑀦𑁄 𑀖𑀸𑀢𑁂𑀢𑁆𑀯𑀸 𑀤𑀡𑁆𑀟𑀓𑀫𑁆𑀫𑀢𑁆𑀣𑀸𑀬 𑀕𑁄𑀞𑀸𑀪𑀬𑀫𑀳𑀸𑀣𑁂𑀭𑀲𑁆𑀲 𑀳𑀢𑁆𑀣𑁄𑀝𑁆𑀞𑀚𑀦𑀧𑀤𑁂 𑀯𑀲𑀦𑁆𑀢𑀲𑁆𑀲 𑀫𑀢𑁆𑀢𑀺𑀓𑀮𑁂𑀦𑀯𑀺𑀳𑀸𑀭𑀁 𑀔𑀻𑀭𑀲𑀸𑀮 𑀯𑀺𑀳𑀸𑀭𑀁 𑀦𑀸𑀕𑀫𑀳𑀸𑀯𑀺𑀳𑀸𑀭𑀁 𑀓𑀼𑀫𑁆𑀪𑀲𑁂𑀮𑀯𑀺𑀳𑀸𑀭𑀁 𑀘𑁂𑀢𑀺𑀬𑀧𑀩𑁆𑀩𑀢𑀯𑀺𑀳𑀸𑀭𑀁 𑀲𑀸𑀦𑀼𑀧𑀩𑁆𑀩𑀢𑀯𑀺𑀳𑀸𑀭𑀁 𑀓𑀡𑀺𑀓𑀸𑀭 𑀲𑁂𑀮𑀯𑀺𑀳𑀸𑀭𑀁 𑀅𑀫𑁆𑀩𑀲𑁂𑀮 𑀯𑀺𑀳𑀸𑀭𑀁 𑀢𑀺𑀦𑁆𑀤𑀼𑀓𑀮𑁂𑀦 𑀯𑀺𑀳𑀸𑀭𑀁 𑀓𑀭𑀡𑁆𑀟𑀓𑀯𑀺𑀳𑀸𑀭𑀁 𑀕𑁄𑀥𑀲𑀸𑀮𑀯𑀺𑀳𑀸𑀭𑀁 𑀯𑀸𑀮𑀼𑀓𑀢𑀺𑀢𑁆𑀣𑀯𑀺𑀳𑀸𑀭𑀦𑁆𑀢𑀺 𑀏𑀯𑀫𑀸𑀤𑀬𑁄 𑀕𑀗𑁆𑀕𑀸𑀬 𑀧𑀭𑀢𑀻𑀭𑁂 𑀧𑀜𑁆𑀘𑀲𑀢𑀯𑀺𑀳𑀸𑀭𑁂 𑀑𑀭𑀺𑀫𑀢𑀻𑀭𑁂 𑀧𑀜𑁆𑀘𑀲𑀢𑀯𑀺𑀳𑀸𑀭𑁂 𑀘𑀸’𑀢𑀺 𑀯𑀺𑀳𑀸𑀭𑀲𑀳𑀲𑁆𑀲𑀁 𑀓𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀤𑀺𑀲𑀦𑀸𑀫𑀲𑁆𑀲 𑀕𑁄𑀞𑀸𑀪𑀬𑀢𑁆𑀣𑁂𑀭𑀲𑁆𑀲 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀬𑀸𑀯𑀚𑀻𑀯𑀁 𑀥𑀸𑀢𑀼𑀧𑀽𑀚𑀁 𑀓𑀢𑁆𑀯𑀸 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀓𑀸𑀓𑀯𑀡𑁆𑀡𑀢𑀺𑀲𑁆𑀲 𑀓𑀼𑀫𑀸𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀮𑀺𑀗𑁆𑀕𑀺𑀢𑁆𑀯𑀸;’𑀢𑀸𑀢 𑀢𑀺𑀲𑁆𑀲, 𑀅𑀬𑀁 𑀦𑀮𑀸𑀝𑀥𑀸𑀢𑀼 𑀅𑀫𑁆𑀳𑀸𑀓𑀁 𑀧𑀭𑀫𑁆𑀧𑀭𑀸𑀬 𑀆𑀕𑀢𑀸. 𑀢𑁆𑀯𑀁 𑀓𑀺𑀭 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀫𑀳𑀸𑀕𑀗𑁆𑀕𑀸𑀬 𑀧𑀲𑁆𑀲𑁂 𑀲𑁂𑀭𑀼 𑀦𑀸𑀫 𑀤𑀳𑀲𑁆𑀲 𑀅𑀦𑁆𑀢𑁂 𑀯𑀭𑀸𑀳 𑀦𑀸𑀫 𑀲𑁄𑀡𑁆𑀟𑀺𑀬𑀸 𑀫𑀢𑁆𑀣𑀓𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀗𑁆𑀖𑀸𑀭𑀸𑀫𑀁 𑀓𑀸𑀭𑀸𑀧𑁂𑀲𑁆𑀲𑀲𑀻’𑀢𑀺 𑀲𑀢𑁆𑀣𑀸 𑀚𑀻𑀯𑀫𑀸𑀦𑁄 𑀯𑁆𑀬𑀸𑀓𑀭𑀡𑀫𑀓𑀸𑀲𑀺. 𑀢𑀲𑁆𑀫𑀸 𑀢𑁆𑀯𑀁 𑀇𑀫𑀁 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀫𑀫𑀘𑁆𑀘𑀬𑁂𑀦 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀢𑀺𑀝𑁆𑀞𑀸𑀧𑁂𑀳𑀻’𑀢𑀺 𑀧𑀼𑀢𑁆𑀢𑀁 𑀅𑀦𑀼𑀲𑀸𑀲𑀺𑀢𑁆𑀯𑀸 𑀓𑀸𑀮𑀓𑀺𑀭𑀺𑀬𑀁 𑀓𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺.

𑀕𑁄𑀞𑀸𑀪𑀬𑁄 ¶ 𑀦𑀸𑀫 𑀫𑀳𑀻𑀧𑀢𑀺𑀲𑁆𑀲𑀭𑁄,

𑀫𑀳𑀸𑀚𑀦𑁂 𑀢𑁄𑀲𑀬𑀺 𑀅𑀧𑁆𑀧𑀫𑀢𑁆𑀢𑁄;

𑀲𑁄 𑀥𑀸𑀢𑀼𑀧𑀽𑀚𑀁 𑀯𑀺𑀧𑀼𑀮𑀁 𑀓𑀭𑀺𑀢𑁆𑀯𑀸,

𑀅𑀕𑀸 𑀅𑀲𑁄𑀓𑁄 𑀯𑀭𑀤𑁂𑀯𑀮𑁄𑀓𑀁.

𑀫𑀳𑀸𑀦𑀦𑁆𑀤𑁄 𑀫𑀳𑀸𑀧𑀜𑁆𑀜𑁄 𑀘𑀦𑁆𑀤𑀕𑀼𑀢𑁆𑀢𑁄 𑀩𑀳𑀼𑀲𑁆𑀲𑀼𑀢𑁄;

𑀪𑀤𑁆𑀤𑀲𑁂𑀦𑁄 𑀫𑀳𑀸𑀣𑁂𑀭𑁄 𑀪𑀤𑁆𑀤𑀥𑀫𑁆𑀫𑁂 𑀯𑀺𑀲𑀸𑀭𑀤𑁄.

𑀚𑀬𑀲𑁂𑀦𑁄 𑀘 𑀲𑁄 𑀯𑀻𑀭𑁄 𑀣𑁂𑀭𑁄 𑀲𑁄 𑀲𑀗𑁆𑀖𑀭𑀓𑁆𑀔𑀺𑀢𑁄;

𑀤𑁂𑀯𑀢𑁆𑀣𑁂𑀭𑁄 𑀘 𑀫𑁂𑀥𑀸𑀯𑀻 𑀭𑀓𑁆𑀔𑀓𑀸 𑀥𑀸𑀢𑀼 𑀪𑀤𑁆𑀤𑀓𑀸.

𑀉𑀧𑀭𑀸𑀚𑀸 𑀫𑀳𑀸𑀦𑀸𑀕𑁄 𑀬𑀝𑁆𑀞𑀸𑀮𑀓𑁄 𑀫𑀳𑀸𑀩𑀮𑁄;

𑀕𑁄𑀞𑀸𑀪𑀬𑁄 𑀫𑀳𑀸𑀧𑀼𑀜𑁆𑀜𑁄 𑀓𑀸𑀓𑀯𑀡𑁆𑀡𑁄 𑀘 𑀯𑀻𑀭𑀺𑀬𑀯𑀸.

𑀏𑀢𑁂 𑀣𑁂𑀭𑀸 𑀘 𑀭𑀸𑀚𑀸𑀦𑁄 𑀧𑀼𑀜𑁆𑀜𑀯𑀦𑁆𑀢𑁄 𑀲𑀼𑀫𑀸𑀦𑀲𑀸;

𑀥𑀸𑀢𑀼 𑀧𑀭𑀫𑁆𑀧𑀭𑀸𑀦𑀻𑀢𑀸 𑀥𑀸𑀢𑀸 𑀥𑀸𑀢𑀼𑀲𑀼𑀓𑁄𑀯𑀺𑀤𑀸.

𑀓𑀲𑁆𑀲𑀧𑀸𑀤𑀻𑀦𑀣𑁂𑀭𑀸𑀦𑀁 𑀧𑀭𑀫𑁆𑀧𑀭𑀸𑀬𑀫𑀸𑀕𑀢𑀸;

𑀫𑀳𑀸𑀦𑀸𑀕𑀸𑀤𑀺 𑀳𑀢𑁆𑀣𑀢𑁄 𑀬𑀸𑀯 𑀢𑀺𑀲𑁆𑀲𑀫𑀼𑀧𑀸𑀕𑀢𑀸.

𑀇𑀢𑀺 𑀅𑀭𑀺𑀬𑀚𑀦𑀧𑁆𑀧𑀲𑀸𑀤𑀦𑀢𑁆𑀣𑀸𑀬 𑀓𑀢𑁂 𑀥𑀸𑀢𑀼𑀯𑀁𑀲𑁂

𑀥𑀸𑀢𑀼𑀧𑀭𑀫𑁆𑀧𑀭𑀸 𑀓𑀣𑀸 𑀦𑀸𑀫

𑀢𑀢𑀺𑀬𑁄 𑀧𑀭𑀺𑀘𑁆𑀙𑁂𑀤𑁄.

𑁪. ¶ 𑀧𑀓𑀺𑀡𑁆𑀡𑀓𑀓𑀣𑀸

𑀢𑀢𑁆𑀭 𑀞𑀢𑁆𑀯𑀸 𑀭𑀜𑁂𑀜𑁄 𑀉𑀧𑁆𑀧𑀢𑁆𑀢𑀺 𑀓𑀣𑁂𑀢𑀩𑁆𑀩𑀸. (𑀲𑁄 𑀧𑀦) 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼𑀦𑁄 𑀩𑁄𑀥𑀺𑀧𑁆𑀧𑀢𑁆𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀫𑀳𑀸𑀫𑀮𑀬 𑀭𑀝𑁆𑀞𑁂 𑀯𑀦𑀘𑀭𑀓𑀁 𑀧𑀝𑀺𑀘𑁆𑀘 𑀢𑀲𑁆𑀲 𑀪𑀭𑀺𑀬𑀸𑀬 𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀦𑀯𑀟𑁆𑀠𑀫𑀸𑀲𑀸𑀯𑀲𑀸𑀦𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀫𑁂𑀦 𑀯𑀟𑁆𑀠𑀦𑁆𑀢𑁄 𑀯𑀺𑀜𑁆𑀜𑀼𑀪𑀸𑀯𑀁 𑀧𑀸𑀧𑀼𑀡𑀺. 𑀢𑀲𑁆𑀲 𑀧𑀺𑀢𑀸 𑀏𑀓𑀁 𑀤𑀸𑀭𑀺𑀓𑀁 𑀆𑀦𑁂𑀢𑁆𑀯𑀸 𑀧𑀼𑀢𑁆𑀢𑀲𑁆𑀲 𑀕𑁂𑀳𑁂 𑀅𑀓𑀸𑀲𑀺. 𑀅𑀧𑀭𑀪𑀸𑀕𑁂 𑀢𑀲𑁆𑀲 𑀧𑀺𑀢𑀸 𑀓𑀸𑀮𑀫𑀓𑀸𑀲𑀺. 𑀓𑀼𑀫𑀸𑀭𑁄’𑀘𑀭𑀓𑁄’𑀢𑀺 𑀧𑀜𑁆𑀜𑀸𑀬𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀉𑀧𑀝𑁆𑀞𑀳𑀺. 𑀘𑀭𑀓𑁄 𑀅𑀢𑁆𑀢𑀦𑁄 𑀦𑀺𑀯𑀸𑀲𑀯𑀢𑁆𑀣𑀼𑀲𑁆𑀫𑀺𑀁 𑀓𑀤𑀮𑀺𑀧𑀦𑀲𑀸𑀤𑀻𑀦𑀺 𑀭𑁄𑀧𑁂𑀢𑁆𑀯𑀸 𑀨𑀮𑀸𑀭𑀸𑀫𑀁 𑀅𑀓𑀸𑀲𑀺. 𑀢𑀢𑁄 𑀅𑀧𑀭𑀪𑀸𑀕𑁂 𑀢𑁂𑀦 𑀭𑁄𑀧𑀺𑀢𑀧𑀦𑀲𑀭𑀼𑀓𑁆𑀔𑁄 𑀫𑀳𑀦𑁆𑀢𑀁 𑀘𑀸𑀝𑀺𑀧𑁆𑀧𑀫𑀸𑀡𑀁 𑀧𑀦𑀲𑀨𑀮𑀁 𑀕𑀡𑁆𑀳𑀺. 𑀘𑀭𑀓𑁄 𑀅𑀢𑁆𑀢𑀦𑁄 𑀯𑀢𑁆𑀣𑀼𑀁 𑀕𑀦𑁆𑀢𑁆𑀯𑀸 𑀲𑀸𑀔𑀸𑀬 𑀲𑀼𑀧𑀓𑁆𑀓𑀁 𑀧𑀦𑀲𑀨𑀮𑀁 𑀧𑀲𑁆𑀲𑀺𑀢𑁆𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀕𑁂𑀳𑀁 𑀆𑀳𑀭𑀺𑀢𑁆𑀯𑀸 𑀅𑀧𑀲𑁆𑀲𑀸𑀬𑀁 𑀮𑀼𑀜𑁆𑀘𑀺𑀢𑁆𑀯𑀸 𑀉𑀧𑀥𑀸𑀭𑁂𑀲𑀺. 𑀢𑀢𑁄 𑀲𑀫𑀦𑁆𑀢𑀸 𑀘𑀢𑀼𑀫𑀥𑀼𑀭𑀁 𑀯𑀺𑀬 𑀬𑀽𑀲𑀁 𑀑𑀢𑀭𑀺𑀢𑁆𑀯𑀸 𑀅𑀧𑀲𑁆𑀲𑀬𑀁 𑀅𑀧𑀦𑀻𑀢 𑀆𑀯𑀸𑀝𑀁 𑀧𑀽𑀭𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀢𑁄 𑀘𑀭𑀓𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺. 𑀇𑀫𑀁 𑀧𑀦𑀲𑀨𑀮𑀁 𑀅𑀫𑁆𑀳𑀸𑀓𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀦 𑀯𑀺𑀦𑀸 𑀅𑀜𑁆𑀜𑁂𑀲𑀁 𑀦𑀸𑀦𑀼𑀘𑁆𑀙𑀯𑀺𑀓𑀦𑁆𑀢𑀺. 𑀧𑀝𑀺𑀲𑀸𑀫𑁂𑀢𑁆𑀯𑀸 𑀞𑀧𑁂𑀲𑀺.

𑀧𑀼𑀦𑀤𑀺𑀯𑀲𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀮𑁂𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀲𑀼𑀭𑀢𑁆𑀢𑀧𑀮𑁆𑀮𑀯𑀲𑀤𑀺𑀲𑀁 𑀅𑀦𑁆𑀢𑀭𑀯𑀸𑀲𑀓𑀁 𑀧𑀭𑀺𑀫𑀡𑁆𑀟𑀮𑀁 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀩𑀳𑀮𑀧𑀯𑀭𑀫𑀳𑀸𑀧𑀁𑀲𑀼𑀓𑀽𑀮𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀻𑀮𑀪𑀫𑀭𑀯𑀡𑁆𑀡𑀁 𑀧𑀢𑁆𑀢𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂𑀦 𑀆𑀕𑀦𑁆𑀢𑁆𑀯𑀸 𑀢𑀲𑁆𑀲 𑀓𑀼𑀝𑀺𑀤𑁆𑀯𑀸𑀭𑁂 𑀧𑀸𑀓𑀝𑁄 𑀅𑀳𑁄𑀲𑀺. 𑀘𑀭𑀓𑁄 𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀕𑁂𑀳𑀁 𑀧𑀯𑁂𑀲𑁂𑀢𑁆𑀯𑀸 𑀧𑀻𑀞𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀞𑀧𑀺𑀢𑀝𑁆𑀞𑀸𑀦𑀢𑁄 𑀧𑀦𑀲𑀨𑀮𑀁 𑀕𑀳𑁂𑀢𑁆𑀯𑀸 𑀬𑀽𑀲𑀁 𑀧𑀢𑁆𑀢𑁂 𑀧𑀽𑀭𑁂𑀢𑁆𑀯𑀸 𑀧𑀝𑀺𑀕𑁆𑀕𑀳𑀸𑀧𑁂𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 ¶ 𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀆𑀓𑀸𑀲𑀢𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀅𑀣𑁂𑀓𑀤𑀺𑀯𑀲𑀁 𑀘𑀭𑀓𑁄 𑀧𑀭𑀤𑁂𑀲𑀸 𑀕𑀘𑁆𑀙𑀦𑁆𑀢𑁄 𑀪𑀭𑀺𑀬𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸;’ 𑀅𑀫𑁆𑀫, 𑀅𑀬𑁆𑀬𑀲𑁆𑀲 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀤𑀸𑀦𑀁 𑀤𑁂𑀳𑀻’𑀢𑀺 𑀲𑀩𑁆𑀩𑀽𑀧𑀓𑀭𑀡𑀁 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀧𑀭𑀤𑁂𑀲𑀁 𑀕𑀢𑁄. 𑀧𑀼𑀦𑀤𑀺𑀯𑀲𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀮𑁂𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀫𑀸𑀤𑀸𑀬 𑀆𑀓𑀸𑀲𑀢𑁄 𑀆𑀕𑀦𑁆𑀢𑁆𑀯𑀸 𑀓𑀼𑀝𑀺𑀤𑁆𑀯𑀸𑀭𑁂 𑀑𑀢𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀘𑀭𑀓𑀲𑁆𑀲 𑀪𑀭𑀺𑀬𑀸 𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀕𑁂𑀳𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑀢𑁆𑀢𑀁 𑀅𑀤𑀸𑀲𑀺.

𑀢𑁂𑀦 𑀪𑀢𑁆𑀢𑀓𑀺𑀘𑁆𑀘𑁂 𑀧𑀭𑀺𑀦𑀺𑀝𑁆𑀞𑀺𑀢𑁂 𑀲𑀸 𑀢𑀭𑀼𑀡𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀧𑀲𑁆𑀲𑀺𑀢𑁆𑀯𑀸 𑀓𑀺𑀮𑁂𑀲𑀧𑀝𑀺𑀲𑀁𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀁 𑀓𑀣𑁂𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀲𑁆𑀲𑀸 𑀓𑀣𑀁 𑀲𑀼𑀢𑁆𑀯𑀸 𑀚𑀺𑀕𑀼𑀘𑁆𑀙𑀫𑀸𑀦𑁄 𑀉𑀧𑁆𑀧𑀢𑀺𑀢𑁆𑀯𑀸 𑀆𑀓𑀸𑀲𑀢𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀢𑁄. 𑀲𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀕𑀢𑀓𑀸𑀮𑁂 𑀅𑀢𑁆𑀢𑀦𑁄 𑀲𑀭𑀻𑀭𑀁 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀪𑀡𑁆𑀟𑀦𑀓𑀸 𑀯𑀺𑀬 𑀦𑀺𑀢𑁆𑀣𑀼𑀦𑀫𑀸𑀦𑀸 𑀫𑀜𑁆𑀘𑁂 𑀦𑀺𑀧𑀚𑁆𑀚𑀺. 𑀘𑀭𑀓𑁄 𑀧𑀭𑀤𑁂𑀲𑀢𑁄 𑀆𑀕𑀦𑁆𑀢𑁆𑀯𑀸 𑀪𑀭𑀺𑀬𑀁 𑀦𑀺𑀧𑀚𑁆𑀚𑀫𑀸𑀦𑀁 𑀏𑀯𑀫𑀸𑀳?’𑀪𑀤𑁆𑀤𑁂, 𑀓𑀺𑀁 𑀅𑀬𑁆𑀬𑀲𑁆𑀲 𑀪𑀺𑀓𑁆𑀔𑀁 𑀅𑀤𑀸𑀲𑀻’𑀢𑀺. 𑀲𑀸 𑀦𑀺𑀢𑁆𑀣𑀼𑀦𑀫𑀸𑀦𑀸 𑀆𑀳? 𑀫𑀸 𑀧𑀼𑀘𑁆𑀙 𑀢𑀯 𑀅𑀬𑁆𑀬𑀲𑁆𑀲 𑀓𑀫𑁆𑀫𑀦𑁆𑀢𑀺. 𑀓𑀣𑁂𑀳𑀺 𑀪𑀤𑁆𑀤𑁂, 𑀓𑀺𑀁 𑀢𑁂𑀦 𑀓𑀫𑁆𑀫𑀁 𑀓𑀢𑀦𑁆𑀢𑀺. 𑀲𑁄 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀓𑀺𑀮𑁂𑀲𑀯𑀲𑁆𑀦𑁂 𑀑𑀓𑀸𑀲𑀁 𑀓𑀸𑀭𑀸𑀧𑁂𑀢𑀼𑀁 𑀯𑀸𑀬𑀫𑀺𑀢𑁆𑀯𑀸 𑀫𑀬𑀸 𑀅𑀬𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑁂 𑀫𑀫 𑀓𑁂𑀲𑁂 𑀕𑀳𑁂𑀢𑁆𑀯𑀸 𑀳𑀢𑁆𑀣𑀧𑀸𑀤𑁂𑀳𑀺 𑀆𑀓𑁄𑀝𑁂𑀢𑁆𑀯𑀸 𑀲𑀭𑀻𑀭𑀁 𑀦𑀔𑁂𑀦 𑀑𑀢𑁆𑀣𑀭𑀺𑀢𑁆𑀯𑀸 𑀲𑀻𑀲𑁂 𑀧𑀳𑀭𑀺𑀢𑁆𑀯𑀸 𑀕𑀢𑁄’𑀢𑀺 𑀯𑀼𑀢𑁆𑀢𑁂 𑀘𑀭𑀓𑁄 𑀢𑀁 𑀲𑀼𑀢𑁆𑀯𑀸 𑀅𑀲𑀳𑀦𑁆𑀢𑁄 (𑀏𑀲𑁄 𑀫𑀬𑀸) 𑀏𑀯𑀭𑀽𑀧𑀲𑁆𑀲 𑀅𑀲𑁆𑀲𑀫𑀡𑀓𑀫𑁆𑀫𑀲𑁆𑀲 𑀧𑁄𑀲𑀺𑀢𑁄’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸 𑀲𑁄𑀓𑀁 𑀯𑀺𑀦𑁄𑀤𑁂𑀢𑁆𑀯𑀸 𑀥𑀦𑀼𑀁 𑀆𑀤𑀸𑀬 𑀢𑀺𑀓𑁆𑀔𑀲𑀭𑀁 𑀕𑀳𑁂𑀢𑁆𑀯𑀸 𑀏𑀢𑀁 𑀫𑀸𑀭𑁂𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀻’𑀢𑀺 𑀯𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀁 𑀅𑀕𑀫𑀸𑀲𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀦𑀳𑀸𑀦𑀢𑁆𑀣𑀸𑀬 𑀕𑀢𑁄. 𑀕𑀦𑁆𑀢𑁆𑀯𑀸 𑀘 𑀧𑀦 𑀓𑀸𑀬𑀩𑀦𑁆𑀥𑀦𑀁 𑀆𑀓𑀸𑀲𑁂 𑀘𑀻𑀯𑀭𑀯𑀁𑀲𑀁 𑀯𑀺𑀬 𑀓𑀢𑁆𑀯𑀸 𑀦𑀺𑀯𑀸𑀲𑀦𑀧𑀸𑀧𑀼𑀭𑀡𑀁 𑀢𑀲𑁆𑀫𑀺𑀁 𑀞𑀧𑁂𑀢𑁆𑀯𑀸 𑀚𑀮𑀲𑀸𑀝𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀉𑀤𑀓𑀫𑀢𑁆𑀣𑀓𑀸 𑀆𑀓𑀸𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 𑀦𑀳𑀸𑀬𑀺𑀢𑀼𑀁 𑀆𑀭𑀪𑀺. 𑀘𑀭𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀕𑀭𑀼𑀕𑀸𑀭𑀯𑀓𑀸𑀭𑀡𑀁 𑀧𑀲𑁆𑀲𑀦𑁆𑀢𑁄 𑀕𑀼𑀫𑁆𑀩𑀦𑁆𑀢𑀭𑁂 𑀦𑀺𑀮𑀻𑀦𑁄 ¶ 𑀅𑀝𑁆𑀞𑀸𑀲𑀺. 𑀞𑀢𑁆𑀯𑀸 𑀘 𑀧𑀦 𑀏𑀯𑀭𑀽𑀧𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺? 𑀅𑀬𑀜𑁆𑀘 𑀏𑀯𑀭𑀽𑀧𑀁 𑀦 𑀓𑀭𑁄𑀢𑀺, 𑀅𑀤𑁆𑀥𑀸 𑀏𑀲𑀸 𑀫𑀼𑀲𑀸𑀯𑀸𑀤𑀸’𑀢𑀺. 𑀅𑀳𑀁 𑀏𑀢𑀺𑀲𑁆𑀲𑀸 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀏𑀯𑀭𑀽𑀧𑀲𑁆𑀲 𑀲𑀫𑀡𑀲𑁆𑀲 𑀅𑀓𑀸𑀭𑀡𑁂 𑀅𑀧𑀭𑀸𑀥𑀁 𑀓𑀢𑀁. 𑀏𑀲𑁄 𑀢𑀸𑀤𑀺𑀲𑀁 𑀦 𑀓𑀭𑁄𑀢𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀦𑀳𑀢𑁆𑀯𑀸 𑀞𑀻𑀢𑀓𑀸𑀮𑁂 𑀕𑀦𑁆𑀢𑁆𑀯𑀸 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸?’𑀫𑀬𑁆𑀳𑀁 𑀔𑀫𑀣 𑀅𑀬𑁆𑀬𑀸’𑀢𑀺 𑀆𑀳. 𑀧𑀘𑁆𑀘𑁂𑀓 𑀩𑀼𑀤𑁆𑀥𑁄? 𑀓𑀺𑀁 𑀓𑀣𑁂𑀲𑀺 𑀉𑀧𑀸𑀲𑀓𑀸’𑀢𑀺. 𑀲𑁄 𑀅𑀢𑁆𑀢𑀦𑁄 𑀫𑀸𑀢𑀼𑀕𑀸𑀫𑀲𑁆𑀲 𑀓𑀣𑀺𑀢𑀁 𑀆𑀘𑀺𑀓𑁆𑀔𑀺. 𑀏𑀯𑀜𑁆𑀳𑀺 𑀲𑀢𑀺 𑀉𑀧𑀸𑀲𑀓 𑀢𑀼𑀫𑁆𑀳𑀸𑀓𑀁 𑀆𑀕𑀢𑀓𑀫𑁆𑀫𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’𑀢𑀺 𑀆𑀳. 𑀫𑀸 𑀏𑀯𑀁 𑀓𑀣𑁂𑀣 𑀲𑀸𑀫𑀺, 𑀅𑀳𑀁 𑀅𑀜𑁆𑀜𑀸𑀡𑀪𑀸𑀯𑁂𑀦 𑀢𑀲𑁆𑀲𑀸 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀅𑀓𑀸𑀭𑀡𑁂 𑀤𑀼𑀩𑁆𑀪𑀺𑀢𑀼𑀁 𑀆𑀕𑀢𑁄𑀫𑁆𑀳𑀺’𑀢𑀺 𑀲𑀩𑁆𑀩𑀁 𑀅𑀢𑁆𑀢𑀦𑀸 𑀘𑀺𑀦𑁆𑀢𑀺𑀢𑀁 𑀆𑀘𑀺𑀓𑁆𑀔𑀺.

𑀧𑀘𑁆𑀘𑁂𑀓𑀩𑀼𑀤𑁆𑀥𑁄? 𑀆𑀫 𑀉𑀧𑀸𑀲𑀓, 𑀲𑀸 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀅𑀲𑀤𑁆𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀁 𑀓𑀣𑁂𑀲𑀻’𑀢𑀺 𑀆𑀳. 𑀲𑁄 𑀢𑀲𑁆𑀲𑀸 𑀓𑀼𑀚𑁆𑀛𑀺𑀢𑁆𑀯𑀸 𑀅𑀳𑀁 𑀏𑀢𑀁 𑀦𑀺𑀲𑁆𑀲𑀸𑀬 𑀇𑀫𑀲𑁆𑀲 𑀅𑀧𑀭𑀚𑁆𑀛𑀸𑀫𑀺. 𑀕𑀦𑁆𑀢𑁆𑀯𑀸 𑀢𑀁 𑀫𑀸𑀭𑁂𑀲𑁆𑀲𑀸𑀫𑀻’𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀢𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀫𑀸𑀢𑀼𑀕𑀸𑀫𑀁 𑀫𑀸 𑀫𑀸𑀭𑁂𑀳𑀻’𑀢𑀺 𑀅𑀦𑁂𑀓𑀯𑀺𑀥𑀸𑀦𑀺 𑀓𑀸𑀭𑀡𑀸𑀦𑀺 𑀓𑀣𑁂𑀢𑁆𑀯𑀸 𑀧𑀜𑁆𑀘𑀲𑀻𑀮𑁂 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳?

𑀬𑁄 𑀅𑀧𑁆𑀧𑀤𑀼𑀝𑁆𑀞𑀲𑁆𑀲 𑀦𑀭𑀲𑁆𑀲 𑀤𑀼𑀲𑁆𑀲𑀢𑀺,

𑀲𑀼𑀤𑁆𑀥𑀲𑁆𑀲 𑀧𑁄𑀲𑀲𑁆𑀲 𑀅𑀦𑀗𑁆𑀕𑀡𑀲𑁆𑀲;

𑀢𑀫𑁂𑀯 𑀩𑀸𑀮𑀁 𑀧𑀘𑁆𑀘𑁂𑀢𑀺 𑀧𑀸𑀧𑀁,

𑀲𑀼𑀔𑀼𑀫𑁄 𑀭𑀚𑁄 𑀧𑀝𑀺𑀯𑀸𑀢𑀁𑀯 𑀔𑀺𑀢𑁆𑀢𑁄’𑀢𑀺;

𑀘𑀭𑀓𑁄 𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀢𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀢𑀸𑀬 𑀲𑀤𑁆𑀥𑀺𑀁 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯𑀚𑀻𑀯𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀤𑀬𑁄 𑀧𑀭𑀺𑀓𑁆𑀔𑀸𑀭𑁂 𑀘 𑀤𑀢𑁆𑀯𑀸 𑀧𑀝𑀺𑀚𑀕𑁆𑀕𑀺. 𑀲𑁄 𑀢𑀲𑁆𑀫𑀺𑀁𑀬𑁂𑀯 𑀮𑁂𑀦𑁂 𑀯𑀲𑀦𑁆𑀢𑁄 𑀅𑀧𑀭𑀪𑀸𑀕𑁂 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀲𑀬𑀫𑁆𑀪𑀼𑀜𑀸𑀡𑁂𑀦 ¶ 𑀯𑀺𑀕𑀬𑁆𑀳 𑀥𑀫𑁆𑀫𑀁,

𑀤𑀼𑀓𑁆𑀔𑀁 𑀅𑀦𑀦𑁆𑀢𑀁 𑀲𑀓𑀮𑀁 𑀧𑀳𑀸𑀬;

𑀲𑀫𑀸𑀥𑀺𑀛𑀸𑀦𑀸𑀪𑀺𑀭𑀢𑁄 𑀬𑀲𑀲𑁆𑀲𑀺,

𑀕𑀢𑁄 𑀯𑀺𑀦𑀸𑀲𑀁 𑀧𑀯𑀭𑁄 𑀬𑀲𑀲𑁆𑀲𑀺.

𑀅𑀣 𑀧𑀘𑁆𑀙𑀸 𑀘𑀭𑀓𑁄 𑀓𑀸𑀮𑀁 𑀓𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁆𑀣 𑀘𑀺𑀭𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀤𑀻𑀧𑁂 𑀫𑀮𑀬 𑀭𑀝𑁆𑀞𑁂 𑀅𑀫𑀭𑀼𑀧𑁆𑀧𑀮 𑀮𑁂𑀦𑀲𑁆𑀲 𑀆𑀲𑀦𑁆𑀦𑀝𑁆𑀞𑀸𑀦𑁂 𑀉𑀧𑀘𑀭𑀓𑀲𑁆𑀲 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀦𑀯𑀫𑀸𑀲𑀟𑁆𑀠𑀧𑀭𑀺𑀬𑁄𑀲𑀸𑀦𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀢𑀲𑁆𑀲 𑀦𑀸𑀫𑀕𑀳𑀡𑀤𑀺𑀯𑀲𑁂 𑀜𑀸𑀢𑀓𑀸 𑀅𑀫𑀭𑀼𑀧𑁆𑀧𑀮 𑀓𑀼𑀫𑀸𑀭𑁄𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀧𑀦 𑀅𑀧𑀭𑀪𑀸𑀕𑁂 𑀯𑀟𑁆𑀠𑁂𑀦𑁆𑀢𑁄 𑀤𑀸𑀭𑀓𑁂𑀳𑀺 𑀲𑀤𑁆𑀥𑀺𑀁 𑀓𑀻𑀴𑀦𑁆𑀢𑁄 𑀧𑀢𑁆𑀢𑀧𑀼𑀝𑁂𑀦 𑀯𑀸𑀮𑀼𑀓𑀪𑀢𑁆𑀢𑀁 𑀧𑀘𑀺𑀢𑁆𑀯𑀸, 𑀤𑀸𑀭𑀓𑀸 𑀇𑀫𑁂 𑀲𑀫𑀡𑀸𑀢𑀺 𑀯𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀤𑀸𑀦𑀁 𑀤𑀲𑁆𑀲𑀸𑀫𑀻’𑀢𑀺 𑀯𑀢𑁆𑀯𑀸 𑀓𑀻𑀴𑀸𑀤𑀸𑀦𑀁 𑀤𑁂𑀢𑀺. 𑀏𑀓𑀤𑀺𑀯𑀲𑀁 𑀅𑀫𑀭𑀼𑀧𑁆𑀧𑀮 𑀓𑀼𑀫𑀸𑀭𑁄 𑀯𑀸𑀮𑀼𑀓𑀣𑀼𑀧𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑀸𑀲𑀦𑀯𑀢𑁆𑀣𑀤𑀼𑀲𑁆𑀲𑀁 𑀕𑀳𑁂𑀢𑁆𑀯𑀸 𑀔𑀼𑀤𑁆𑀤𑀓𑀤𑀡𑁆𑀟𑀓𑁂 𑀩𑀦𑁆𑀥𑀺𑀢𑁆𑀯𑀸 𑀧𑀝𑀸𑀓𑀁 𑀓𑀢𑁆𑀯𑀸 𑀧𑀽𑀚𑀦𑀢𑁆𑀣𑀸𑀬 𑀞𑀧𑁂𑀲𑀺. 𑀅𑀫𑀭𑀼𑀧𑁆𑀧𑀮 𑀮𑁂𑀦𑀯𑀸𑀲𑀻 𑀫𑀮𑀺𑀬 𑀤𑁂𑀯𑀢𑁆𑀣𑁂𑀭𑀁 𑀦𑀺𑀲𑁆𑀲𑀸𑀬 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀇𑀫𑀲𑁆𑀫𑀺𑀁𑀬𑁂𑀯 𑀤𑀻𑀧𑁂 𑀫𑀳𑀸𑀕𑀸𑀫𑁂 𑀕𑁄𑀞𑀸𑀪𑀬𑀫𑀳𑀸𑀭𑀸𑀚𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀲𑁄 𑀦𑀯𑀫𑀸𑀲𑀟𑁆𑀠𑀧𑀭𑀺𑀬𑁄𑀲𑀸𑀦𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺. 𑀢𑀲𑁆𑀲 𑀦𑀸𑀫𑀕𑀳𑀡 𑀤𑀺𑀯𑀲𑁂’𑀓𑀸𑀓𑀯𑀡𑁆𑀡𑀢𑀺𑀲𑁆𑀲𑁄’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑁄 𑀅𑀦𑀼𑀧𑀼𑀩𑁆𑀩𑁂𑀦 𑀯𑀟𑁆𑀠𑀺𑀢𑁆𑀯𑀸 𑀧𑀺𑀢𑀼 𑀅𑀘𑁆𑀘𑀬𑁂𑀦 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀓𑀸𑀓𑀯𑀡𑁆𑀡𑀢𑀺𑀲𑁆𑀲𑀫𑀳𑀸𑀭𑀸𑀚𑀸 𑀅𑀳𑁄𑀲𑀺. 𑀢𑀲𑁆𑀲 𑀙𑀢𑁆𑀢𑁂 𑀉𑀲𑁆𑀲𑀸𑀧𑀺𑀢𑁂𑀬𑁂𑀯 𑀲𑀓𑀮𑀭𑀝𑁆𑀞𑀁 𑀲𑀼𑀪𑀺𑀓𑁆𑀔𑀁 𑀅𑀳𑁄𑀲𑀺. 𑀧𑀜𑁆𑀘 𑀯𑀸 𑀤𑁆𑀯𑀸𑀤𑀲 𑀯𑀸 𑀤𑀺𑀯𑀲𑁂 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀤𑁂𑀯𑁄 𑀲𑀫𑁆𑀫𑀸 𑀯𑀲𑁆𑀲𑀢𑀺. 𑀯𑁂𑀲𑁆𑀲𑀦𑁆𑀢𑀭𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑀸𑀦𑀕𑁆𑀕𑁂 𑀬𑀸𑀘𑀓𑀸𑀦𑀁 𑀳𑀢𑁆𑀣𑁂 𑀪𑀺𑀓𑁆𑀔𑀸𑀪𑀸𑀚𑀦𑀁 𑀯𑀺𑀬 𑀢𑀲𑁆𑀫𑀺𑀁 𑀓𑀸𑀮𑁂 𑀯𑀸𑀧𑀻𑀧𑁄𑀓𑁆𑀔𑀭𑀡𑀻-𑀦𑀤𑀻-𑀓𑀦𑁆𑀤𑀭-𑀲𑁄𑀩𑁆𑀪-𑀚𑀸𑀢𑀲𑀭𑀸𑀤𑀬𑁄 𑀯𑀲𑁆𑀲𑁄𑀤𑀓𑁂𑀦 𑀧𑀽𑀭𑀺𑀢𑀸 𑀅𑀳𑁂𑀲𑀼𑀁. 𑀧𑀜𑁆𑀘𑀯𑀺𑀥𑀧𑀤𑀼𑀫𑀲𑀜𑁆𑀙𑀦𑁆𑀦𑀸 𑀅𑀦𑁂𑀓𑀤𑀺𑀚𑀲𑀫𑀸𑀓𑀺𑀡𑁆𑀡𑀸 𑀦𑀸𑀦𑀸𑀭𑀼𑀓𑁆𑀔𑁂𑀳𑀺 𑀯𑀺𑀭𑁄𑀘𑀺𑀢𑀸 𑀅𑀳𑁂𑀲𑀼𑀁. 𑀦𑀸𑀦𑀸 𑀲𑀲𑁆𑀲𑀸𑀦𑀺 𑀲𑀫𑁆𑀧𑀚𑁆𑀚𑀺𑀁𑀲𑀼, 𑀉𑀢𑁆𑀢𑀭𑀓𑀼𑀭𑀼 𑀆𑀮𑀓𑀫𑀦𑁆𑀤𑀸 𑀭𑀸𑀚𑀥𑀸𑀦𑀺𑀲𑀤𑀺𑀲𑀁𑀯 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺 𑀭𑀢𑀦𑀝𑁆𑀞𑀸𑀦𑀁.

𑀲𑁄 ¶ 𑀭𑀸𑀚𑀸 𑀲𑀤𑁆𑀥𑀸𑀬 𑀲𑀫𑁆𑀧𑀦𑁆𑀦𑁄 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀅𑀦𑀽𑀦𑀁 𑀓𑀢𑁆𑀯𑀸 𑀤𑀸𑀧𑁂𑀲𑀺. 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀢𑀺𑀧𑀺𑀝𑀓𑀥𑀭𑀸𑀦𑀁 𑀘𑀦𑁆𑀤𑀦𑀤𑁄𑀡𑀺𑀬𑀸 𑀲𑀢𑀧𑀸𑀓𑀢𑁂𑀮𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸 𑀬𑀸𑀯𑀧𑀺𑀝𑁆𑀞𑀺𑀧𑀸𑀤𑀁 𑀢𑀸𑀯 𑀑𑀲𑀻𑀤𑀸𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀦𑀁 𑀮𑀝𑁆𑀞𑀺𑀫 𑀥𑀼𑀤𑀦𑁆𑀢𑀓𑀝𑁆𑀞𑀁 𑀘𑀢𑀼𑀫𑀥𑀼𑀭𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀸𑀧𑁂𑀲𑀺. 𑀉𑀘𑁆𑀙𑀼𑀓𑀡𑁆𑀟-𑀲𑀓𑁆𑀔𑀭𑀸-𑀦𑀸𑀮𑀺𑀓𑁂𑀭-𑀨𑀮𑀫𑀽𑀮𑀔𑀦𑁆𑀥𑀔𑀸𑀤𑀦𑀜𑁆𑀘 𑀦𑀸𑀦𑀸𑀯𑀺𑀥𑀫𑀘𑁆𑀙𑀭𑀲𑁂𑀳𑀺 𑀲𑀼𑀕𑀦𑁆𑀥𑀲𑀸𑀮𑀺𑀢𑀡𑁆𑀟𑀼𑀮𑁂𑀦 𑀲𑀸𑀥𑀺𑀢𑀬𑀸𑀕𑀼𑀪𑀢𑁆𑀢𑀜𑁆𑀘 𑀧𑀸𑀢𑁄𑀯 𑀅𑀤𑀸𑀲𑀺. 𑀅𑀦𑁆𑀢𑀭𑀸𑀪𑀢𑁆𑀢𑁂 𑀅𑀝𑁆𑀞𑀸𑀭𑀲𑀯𑀺𑀥-𑀅𑀦𑁆𑀢𑀭𑀔𑀚𑁆𑀚𑀓𑀜𑁆𑀘 𑀉𑀘𑁆𑀙𑀼𑀓𑀤𑀮𑀺𑀧𑀦𑀲𑀨𑀮𑀸𑀤𑀬𑁄 𑀘 𑀦𑀸𑀦𑀸𑀯𑀺𑀥𑁄𑀢𑁆𑀢𑀭𑀺𑀪𑀗𑁆𑀕𑁂𑀦 𑀲𑀤𑁆𑀥𑀺𑀁 𑀲𑀼𑀕𑀦𑁆𑀥𑀲𑀸𑀮𑀺𑀢𑀡𑁆𑀟𑀼𑀮𑀪𑀢𑁆𑀢𑀁 𑀦𑀸𑀦𑀕𑁆𑀕𑀭𑀲𑀁 𑀤𑀸𑀧𑁂𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀅𑀝𑁆𑀞𑀯𑀺𑀥𑀓𑀧𑁆𑀧𑀻𑀬𑀧𑀸𑀦𑀓𑁂 𑀘 𑀤𑀸𑀧𑁂𑀲𑀺. 𑀅𑀜𑁆𑀜𑁂 𑀲𑀫𑀡𑀧𑀭𑀺𑀓𑁆𑀔𑀸𑀭𑁂 𑀘 𑀤𑀸𑀧𑁂𑀲𑀺. 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦𑁂𑀯 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀢𑀺𑀧𑀺𑀝𑀓𑀥𑀭𑀪𑀺𑀓𑁆𑀔𑀽𑀦𑀜𑁆𑀘 𑀦𑀺𑀭𑀦𑁆𑀢𑀭𑀁 𑀫𑀳𑀸 𑀤𑀸𑀦𑀁 𑀤𑀢𑁆𑀯𑀸 𑀯𑀲𑀢𑀺.

𑀅𑀣𑀸𑀧𑀭𑁂𑀦 𑀲𑀫𑀬𑁂𑀦 𑀓𑀮𑁆𑀬𑀸𑀡𑀺𑀬𑀁 𑀲𑀺𑀯𑁄 𑀦𑀸𑀫 𑀫𑀳𑀸𑀭𑀸𑀚𑀸 𑀅𑀢𑁆𑀢𑀦𑁄 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀅𑀪𑀬𑀓𑀼𑀫𑀸𑀭𑀲𑁆𑀲 𑀓𑀸𑀓𑀯𑀡𑁆𑀡𑀢𑀺𑀲𑁆𑀲 𑀭𑀜𑁆𑀜𑁄 𑀪𑀕𑀺𑀦𑀺𑀬𑀸 𑀲𑁄𑀫𑀤𑁂𑀯𑀺𑀬𑀸 𑀦𑀸𑀫 𑀭𑀸𑀚𑀧𑀼𑀢𑁆𑀢𑀺𑀬𑀸 𑀆𑀯𑀸𑀳𑀫𑀗𑁆𑀕𑀮𑀁 𑀓𑀢𑁆𑀯𑀸 𑀆𑀦𑁂𑀢𑁆𑀯𑀸 𑀧𑀸𑀤𑀧𑀭𑀺𑀘𑀸𑀭𑀺𑀓𑀁 𑀤𑀸𑀧𑁂𑀲𑀺. 𑀤𑀢𑁆𑀯𑀸 𑀘 𑀧𑀦 𑀅𑀪𑀬 𑀓𑀼𑀫𑀸𑀭𑀁 𑀕𑀺𑀭𑀺𑀦𑀕𑀭𑀫𑁆𑀳𑀺 𑀦𑀺𑀲𑀻𑀤𑀸𑀧𑁂𑀲𑀻. 𑀲𑁄 𑀕𑀺𑀭𑀺𑀦𑀕𑀭𑁂 𑀭𑀚𑁆𑀚𑀁 𑀓𑀸𑀭𑀸𑀧𑁂𑀢𑁆𑀯𑀸 𑀕𑀺𑀭𑀺𑀅𑀪𑀬𑁄 𑀦𑀸𑀫 𑀭𑀸𑀚𑀸 𑀳𑀼𑀢𑁆𑀯𑀸 𑀫𑀳𑀦𑁆𑀢𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁄 𑀯𑀺𑀳𑀸𑀲𑀺. 𑀢𑀢𑁄 𑀅𑀧𑀭𑀪𑀸𑀕𑁂 𑀓𑀸𑀓𑀯𑀡𑁆𑀡𑀢𑀺𑀲𑁆𑀲 𑀫𑀳𑀸𑀭𑀸𑀚𑀸 𑀫𑀳𑀸𑀕𑀸𑀫𑁂 𑀯𑀺𑀳𑀭𑀦𑁆𑀢𑁄 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀕𑀢𑁆𑀢𑁂 𑀫𑀗𑁆𑀓𑀼𑀦𑀸 𑀤𑀝𑁆𑀞𑀝𑁆𑀞𑀸𑀦𑁂 𑀕𑀡𑁆𑀟𑀁 𑀉𑀝𑁆𑀞𑀺𑀢𑀁 𑀤𑀺𑀲𑁆𑀯𑀸 𑀓𑀺𑀫𑁂𑀢𑀁 𑀅𑀬𑁆𑀬𑀸’𑀢𑀺 𑀧𑀼𑀘𑁆𑀙𑀺. 𑀫𑀗𑁆𑀓𑀼𑀦𑀸 𑀤𑀝𑁆𑀞𑀝𑁆𑀞𑀸𑀦𑀁 𑀫𑀳𑀸𑀭𑀸𑀚𑀸𑀢𑀺. 𑀢𑀁 𑀲𑀼𑀢𑁆𑀯𑀸 𑀲𑀁𑀯𑁂𑀕𑀧𑁆𑀧𑀢𑁆𑀢𑁄, 𑀪𑀦𑁆𑀢𑁂 𑀫𑀗𑁆𑀓𑀼𑀦𑀸 𑀓𑀺𑀲𑁆𑀫𑀺𑀁 𑀦 𑀪𑀯𑀦𑁆𑀢𑀺’𑀢𑀺 𑀧𑀼𑀘𑁆𑀙𑀺. 𑀧𑀝𑁆𑀝𑀲𑀸𑀝𑀓𑁂 𑀦 𑀪𑀯𑀦𑁆𑀢𑀺’𑀢𑀺. 𑀇𑀫𑁂 𑀧𑀦 𑀪𑀤𑁆𑀤𑀦𑁆𑀢𑀸 𑀧𑀝𑁆𑀝𑀲𑀸𑀝𑀓𑁂 𑀓𑀼𑀢𑁄 𑀮𑀪𑀦𑁆𑀢𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑀢𑁄. 𑀢𑀁 𑀤𑀺𑀯𑀲𑀫𑁂𑀯 𑀧𑀸𑀦𑀻𑀬𑀫𑀸𑀴𑀓𑁂 𑀦𑀺𑀲𑀺𑀦𑁆𑀦𑁄 𑀢𑀺𑀧𑀺𑀝𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀦𑀸𑀫 𑀭𑀜𑁆𑀜𑁄 𑀩𑀼𑀤𑁆𑀥𑀲𑀻𑀳𑀦𑀸𑀤𑀲𑀼𑀢𑁆𑀢𑀁 𑀦𑀸𑀫 𑀓𑀣𑁂𑀲𑀺. 𑀲𑁄 𑀣𑁂𑀭𑁂 𑀧𑀲𑀦𑁆𑀦𑁄; 𑀉𑀢𑁆𑀢𑀭𑀸𑀲𑀗𑁆𑀕𑁂 𑀤𑀻𑀬𑀫𑀸𑀦𑁂’𑀏𑀓𑀲𑀸𑀝𑀓𑁄 𑀪𑀯𑀺𑀲𑁆𑀲𑀸𑀫𑀺’ 𑀢𑀲𑁆𑀫𑀸 𑀇𑀫𑀫𑁂𑀯 𑀤𑀸𑀢𑀼𑀁 𑀦 𑀲𑀓𑁆𑀓𑀸, 𑀓𑀣𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀓𑀣𑀬𑀫𑀸𑀦𑁄 𑀢𑀢𑁆𑀣 𑀫𑀸𑀴𑀓𑁂𑀬𑁂𑀯 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀏𑀓𑁄 𑀓𑀸𑀓𑁄 𑀅𑀫𑁆𑀩𑀲𑀸𑀔𑀦𑁆𑀢𑀭𑁂 𑀦𑀺𑀲𑀻𑀤𑀺𑀢𑁆𑀯𑀸

𑀲𑀤𑁆𑀤𑀁 ¶ 𑀓𑀭𑁄𑀦𑁆𑀢𑁄 𑀏𑀯𑀫𑀸𑀘𑀺𑀓𑁆𑀔𑀺. 𑀅𑀬𑁆𑀬 𑀓𑀸𑀓𑀯𑀡𑁆𑀡𑀢𑀺𑀲𑁆𑀲𑀫𑀳𑀸𑀭𑀸𑀚, 𑀢𑀼𑀫𑁆𑀳𑀸𑀓𑀁 𑀓𑀗𑁆𑀔𑀸 𑀦𑀸𑀫 𑀦𑀢𑁆𑀣𑀻, 𑀧𑀲𑀸𑀤𑀓𑁆𑀔𑀡𑁂 𑀥𑀫𑁆𑀫𑀓𑀣𑀺𑀓𑀲𑁆𑀲 𑀉𑀢𑁆𑀢𑀭𑀸𑀲𑀗𑁆𑀕𑀁 𑀤𑁂𑀳𑀻’𑀢𑀺 𑀆𑀳.

(𑀓𑀸𑀓𑁄 𑀲𑁄 𑀓𑀸𑀓𑀯𑀡𑁆𑀡𑀲𑁆𑀲 𑀯𑀤𑁂𑀢𑀺 𑀯𑀘𑀦𑀓𑁆𑀔𑀫𑁄,

𑀧𑀲𑀸𑀤𑀚𑀸𑀢𑁄 𑀣𑁂𑀭𑀲𑁆𑀲 𑀢𑀼𑀯𑀁 𑀲𑀤𑁆𑀥𑀫𑁆𑀫𑀤𑁂𑀲𑀦𑁂;

𑀤𑀤𑀸𑀳𑀺 𑀉𑀢𑁆𑀢𑀭𑀸𑀲𑀗𑁆𑀕𑀁 𑀫𑀳𑀸𑀣𑁂𑀭𑀲𑁆𑀲 𑀪𑀽𑀫𑀺𑀧𑀸’𑀢𑀺.)

𑀫𑀳𑀸𑀭𑀸𑀚, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀧𑀜𑁆𑀘𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄. 𑀯𑀺𑀳𑀸𑀭𑀤𑁂𑀯𑀺 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀇𑀤𑀫𑁂𑀓𑀁 𑀲𑀸𑀲𑀦𑀁. 𑀏𑀓𑀸 𑀓𑀭𑁂𑀡𑀼𑀓𑀸 𑀲𑀼𑀯𑀻𑀭𑀳𑀢𑁆𑀣𑀺𑀧𑁄𑀢𑀓𑀁 𑀢𑀺𑀢𑁆𑀣𑀲𑀭𑁂 𑀯𑀺𑀚𑀸𑀬𑀻. 𑀇𑀤𑀁 𑀤𑀼𑀢𑀺𑀬𑀁 𑀲𑀸𑀲𑀦𑀁. 𑀕𑁄𑀞𑀲𑀫𑀼𑀤𑁆𑀤𑀫𑀚𑁆𑀛𑁂𑀦 𑀲𑀢𑁆𑀢𑀫𑀢𑁆𑀢𑀸 𑀦𑀸𑀯𑀸 𑀧𑀝𑁆𑀝𑀦𑁂 𑀧𑀘𑁆𑀘𑀼𑀝𑁆𑀞𑀺𑀢𑀸, 𑀇𑀤𑀁 𑀢𑀢𑀺𑀬𑀁 𑀲𑀸𑀲𑀦𑀁 𑀉𑀢𑁆𑀢𑀭 𑀯𑀟𑁆𑀠𑀫𑀸𑀦𑀧𑀩𑁆𑀩𑀢𑀧𑀸𑀤𑁂 𑀤𑁆𑀯𑀺𑀓𑀭𑀻𑀲𑀧𑁆𑀧𑀫𑀸𑀡𑁂 𑀔𑁂𑀢𑁆𑀢𑁂 𑀢𑀭𑀼𑀡𑀢𑀸𑀮𑀓𑁆𑀔𑀦𑁆𑀥𑀧𑁆𑀧𑀫𑀸𑀡𑀸 𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑀸 𑀉𑀕𑁆𑀕𑀘𑁆𑀙𑀺𑀁𑀲𑀼, 𑀇𑀤𑀁 𑀘𑀢𑀼𑀢𑁆𑀣𑀁 𑀲𑀸𑀲𑀦𑀁. 𑀕𑀺𑀭𑀺𑀧𑀩𑁆𑀩𑀢𑀧𑀸𑀤𑁂 𑀓𑁄𑀝 𑀭𑀝𑁆𑀞𑀓 𑀯𑀺𑀳𑀸𑀭𑁂 𑀓𑁄𑀝𑀭𑀝𑁆𑀞𑀓𑁄 𑀦𑀸𑀫 𑀣𑁂𑀭𑁄 𑀫𑀕𑁆𑀕𑁄𑀧𑀲𑀫𑀁 𑀯𑀢𑁆𑀯𑀸 𑀕𑀺𑀭𑀺𑀧𑀩𑁆𑀩𑀢𑀫𑀢𑁆𑀣𑀓𑁂 𑀲𑀢𑁆𑀢𑀢𑀸𑀮𑀧𑁆𑀧𑀫𑀸𑀡𑀁 𑀉𑀕𑁆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀧𑀭𑀺𑀦𑀺𑀩𑁆𑀩𑀸𑀬𑀺, 𑀇𑀤𑀁 𑀧𑀜𑁆𑀘𑀫𑀁 𑀲𑀸𑀲𑀦𑀁.

(𑀧𑀼𑀢𑁆𑀢𑁄 𑀳𑀢𑁆𑀣𑀻 𑀘 𑀦𑀸𑀯𑀸 𑀘 𑀘𑀢𑀼𑀢𑁆𑀣𑀁 𑀳𑁂𑀫𑀔𑀦𑁆𑀥𑀓𑀁;

𑀣𑁂𑀭𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀜𑁆𑀘𑀫𑀁 𑀲𑀸𑀲𑀦𑀁 𑀇𑀤𑀁.

𑀇𑀫𑀁 𑀕𑀳𑁂𑀢𑁆𑀯𑀸𑀦 𑀅𑀳𑀁 𑀆𑀕𑀢𑁄 𑀢𑀯 𑀲𑀦𑁆𑀢𑀺𑀓𑀁;

𑀲𑀸𑀲𑀦𑀁 𑀈𑀤𑀺𑀲𑀁 𑀲𑀼𑀢𑁆𑀯𑀸 𑀧𑀼𑀜𑁆𑀜𑀓𑀫𑁆𑀫𑁂 𑀭𑀢𑁄 𑀪𑀯.

𑀯𑀢𑁆𑀣𑀁 𑀲𑀳𑀲𑀸 𑀤𑀸𑀧𑁂𑀳𑀺 𑀓𑀢𑁄 𑀲𑀩𑁆𑀩𑀲𑀫𑀸𑀕𑀫𑁄;

𑀇𑀤𑀁 𑀦𑀺𑀘𑁆𑀘𑀁 𑀚𑀸𑀦𑀦𑁆𑀢𑁄 𑀓𑀺𑀁 𑀮𑀕𑁆𑀕𑁄 𑀉𑀢𑁆𑀢𑀭𑀸𑀲𑀗𑁆𑀕𑁂’𑀢𑀺.)

𑀭𑀸𑀚𑀸 𑀓𑀸𑀓𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀳𑀲𑀺. 𑀣𑁂𑀭𑁄? 𑀓𑀲𑁆𑀫𑀸 𑀫𑀳𑀸𑀭𑀸𑀚 𑀳𑀲𑀻’𑀢𑀺 𑀧𑀼𑀘𑁆𑀙𑀺. 𑀪𑀦𑁆𑀢𑁂, 𑀏𑀢𑀲𑁆𑀫𑀺𑀁 𑀅𑀫𑁆𑀩𑀲𑀸𑀔𑀦𑁆𑀢𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀤𑁆𑀤𑀁 𑀓𑀭𑁄𑀦𑁆𑀢𑀲𑁆𑀲 𑀓𑀸𑀓𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀳𑀲𑀺𑀦𑁆𑀢𑀺 𑀲𑀩𑁆𑀩𑀁 𑀆𑀭𑁄𑀘𑁂𑀲𑀺. 𑀣𑁂𑀭𑁄’𑀧𑀺 𑀭𑀜𑁆𑀜𑀸 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀓𑀢𑀓𑀫𑁆𑀫𑀁 ¶ 𑀧𑀲𑁆𑀲𑀺𑀢𑁆𑀯𑀸 𑀳𑀲𑀺. 𑀭𑀸𑀚𑀸 𑀓𑀲𑁆𑀫𑀸 𑀅𑀬𑁆𑀬𑁄 𑀳𑀲𑀻’𑀢𑀺 𑀧𑀼𑀘𑁆𑀙𑀺. 𑀫𑀳𑀸𑀭𑀸𑀚, 𑀢𑀼𑀫𑁆𑀳𑀸𑀓𑀁 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀫𑀮𑀬𑀭𑀝𑁆𑀞𑁂 𑀅𑀫𑀭𑀼𑀧𑁆𑀧𑀮 𑀦𑀸𑀫 𑀓𑀸𑀮𑁂 𑀓𑀢𑀓𑀫𑁆𑀫𑀁 𑀧𑀲𑁆𑀲𑀺𑀢𑁆𑀯𑀸 𑀳𑀲𑀺𑀢𑁆𑀢𑀺. 𑀢𑁂𑀦 𑀧𑀼𑀝𑁆𑀞𑁄 𑀓𑀢𑀓𑀼𑀲𑀮𑀓𑀫𑁆𑀫𑀁 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀦 𑀢𑀲𑁆𑀲 𑀆𑀘𑀺𑀓𑁆𑀔𑀺. 𑀭𑀸𑀚𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀅𑀢𑁆𑀢𑀦𑁄 𑀉𑀢𑁆𑀢𑀭𑀸𑀲𑀗𑁆𑀕𑀁 𑀤𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀕𑁂𑀳𑀁 𑀕𑀢𑁄. 𑀓𑁄𑀝𑀭𑀝𑁆𑀞𑀓𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀲𑀭𑀻𑀭𑀚𑁆𑀛𑀸𑀧𑀦𑀁 𑀓𑀸𑀭𑀸𑀧𑁂𑀢𑁆𑀯𑀸 𑀥𑀸𑀢𑀼𑀁 𑀆𑀤𑀸𑀬 𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑀁 𑀧𑀽𑀚𑀁 𑀓𑀢𑁆𑀯𑀸 𑀫𑀳𑀸𑀕𑀸𑀫𑀁 𑀕𑀢𑁄. 𑀲𑀼𑀯𑀡𑁆𑀡𑀁 𑀆𑀳𑀭𑀸𑀧𑁂𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀞𑀧𑀸𑀧𑁂𑀲𑀺. 𑀕𑁄𑀞𑀲𑀫𑀼𑀤𑁆𑀤𑀓𑀼𑀘𑁆𑀙𑀺𑀬𑀁 𑀧𑀢𑁆𑀢 𑀦𑀸𑀯𑀸𑀢𑁄 𑀯𑀢𑁆𑀣𑀸𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘𑀻𑀯𑀭𑀢𑁆𑀣𑀸𑀬 𑀤𑀸𑀧𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑁆𑀯𑀸 𑀫𑀳𑀸𑀕𑀸𑀫𑀲𑀫𑀻𑀧𑁂 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀯𑀺𑀳𑀭𑀦𑁆𑀢𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀤𑀼𑀝𑁆𑀞𑀕𑀸𑀫𑀡𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸; 𑀢𑀸𑀢, 𑀢𑁆𑀯𑀁 𑀕𑀦𑁆𑀢𑁆𑀯𑀸 𑀕𑀺𑀭𑀺𑀫𑁆𑀳𑀺 𑀦𑀕𑀭𑁂 𑀦𑀺𑀲𑀻𑀤𑀸’𑀢𑀺 𑀯𑀢𑁆𑀯𑀸 𑀅𑀫𑀘𑁆𑀘𑀜𑁆𑀘𑀲𑁆𑀲 𑀧𑀺𑀢𑀼𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀕𑀺𑀭𑀺𑀦𑀕𑀭𑀁 𑀧𑀸𑀳𑁂𑀲𑀺. 𑀢𑀁 𑀤𑀺𑀲𑁆𑀯𑀸 𑀕𑀺𑀭𑀺𑀅𑀪𑀬 𑀓𑀼𑀫𑀸𑀭𑁄 𑀓𑀼𑀫𑀸𑀭𑁂𑀦 𑀲𑀤𑁆𑀥𑀺𑀁 𑀆𑀕𑀢𑀩𑀴𑀲𑁆𑀲 𑀯𑀢𑁆𑀣𑀸𑀳𑀸𑀭𑀸𑀤𑀻𑀦𑀺 𑀤𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑀁 𑀲𑀫𑁆𑀫𑀸𑀦𑀁 𑀅𑀓𑀸𑀲𑀺. 𑀭𑀸𑀚𑀓𑀼𑀫𑀸𑀭𑁄 𑀕𑀺𑀭𑀺𑀧𑀩𑁆𑀩𑀢𑀧𑀸𑀤𑁂 𑀯𑀺𑀳𑀸𑀲𑀺.

𑀢𑀢𑁄 𑀅𑀧𑀭𑀪𑀸𑀕𑁂 𑀚𑀸𑀢𑀺𑀁 𑀦𑀺𑀲𑁆𑀲𑀸𑀬 𑀔𑀢𑁆𑀢𑀺𑀬𑀸𑀦𑀁 𑀯𑀺𑀯𑀸𑀤𑁄 𑀅𑀳𑁄𑀲𑀺. 𑀲𑁄 𑀅𑀪𑀬𑀭𑀸𑀚𑀸 𑀓𑀺𑀁 𑀫𑁂𑀯𑀺𑀯𑀸𑀤𑁂𑀦𑀸’𑀢𑀺 𑀅𑀢𑁆𑀢𑀦𑁄 𑀪𑀭𑀺𑀬𑀸𑀬 𑀲𑁄𑀫𑀤𑁂𑀯𑀺𑀬𑀸 𑀲𑀤𑁆𑀥𑀺𑀁 𑀩𑀮𑀯𑀸𑀳𑀦𑀁 𑀕𑀳𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀕𑀘𑁆𑀙𑀦𑁆𑀢𑁄 𑀲𑁂𑀭𑀼𑀦𑀕𑀭𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀁 𑀅𑀢𑁆𑀢𑀲𑀳𑀸𑀬𑀁 𑀲𑀺𑀯𑀭𑀸𑀚𑀁 𑀲𑀦𑁆𑀥𑀸𑀬 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀜𑁆𑀚𑀺. 𑀲𑁄’𑀧𑀺 𑀲𑀺𑀯𑀭𑀸𑀚𑀸 𑀕𑀺𑀭𑀺𑀅𑀪𑀬𑀭𑀜𑁆𑀜𑀸 𑀲𑀤𑁆𑀥𑀺𑀁 𑀆𑀕𑀢𑀩𑀴𑀲𑁆𑀲 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀓𑀸𑀭𑁂𑀢𑁆𑀯𑀸 𑀅𑀳𑀢𑀯𑀢𑁆𑀣𑀢𑀺𑀮𑀢𑀡𑁆𑀟𑀼𑀮𑀸𑀤𑀻𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀤𑀸𑀧𑁂𑀲𑀺. 𑀓𑀢𑀺𑀧𑀸𑀳𑀘𑁆𑀘𑀬𑁂; 𑀲𑀫𑁆𑀫, 𑀓𑀲𑁆𑀫𑀸 𑀆𑀕𑀢𑁄𑀲𑀺’𑀢𑀺 𑀧𑀼𑀘𑁆𑀙𑀺. 𑀲𑁄 𑀆𑀕𑀢𑀓𑀸𑀭𑀡𑀁 𑀲𑀩𑁆𑀩𑀫𑀲𑁆𑀲 𑀆𑀘𑀺𑀓𑁆𑀔𑀺. 𑀪𑀤𑁆𑀤𑀓𑀁 𑀲𑀫𑁆𑀫, 𑀢𑁂 𑀓𑀢𑀁 𑀆𑀕𑀦𑁆𑀢𑀩𑁆𑀩𑀫𑁂𑀯 𑀆𑀕𑀢𑁄. 𑀅𑀳𑀁 𑀢𑁂 𑀓𑀢𑁆𑀢𑀩𑁆𑀩𑀁 𑀚𑀸𑀦𑀺𑀲𑁆𑀲𑀸𑀫𑀺. 𑀢𑁆𑀯𑀁 𑀫𑀸 𑀘𑀺𑀦𑁆𑀢𑀬𑀻’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀯𑀲𑀦𑀢𑁆𑀣𑀸𑀬 𑀦𑀕𑀭𑀪𑀽𑀫𑀺𑀁 𑀕𑀯𑁂𑀲𑀦𑁆𑀢𑁄 𑀲𑀭𑀓𑁄𑀝𑀺𑀬𑀁 𑀅𑀢𑀺𑀭𑀫𑀡𑀻𑀬𑀪𑀽𑀫𑀺𑀁 𑀧𑀲𑁆𑀲𑀺𑀢𑁆𑀯𑀸 𑀢𑀲𑁆𑀫𑀺𑀁 𑀪𑀽𑀫𑀺𑀪𑀸𑀕𑁂 𑀲𑁄 𑀦𑀕𑀭𑀁 𑀫𑀸𑀧𑁂𑀢𑁆𑀯𑀸 𑀤𑁂𑀯𑀺𑀬𑀸 𑀏𑀓𑀲𑀤𑀺𑀲𑀦𑀸𑀫𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀲𑁄𑀫𑀦𑀕𑀭𑀦𑁆𑀢𑀺 𑀦𑀸𑀫𑀁 𑀅𑀓𑀸𑀲𑀺. 𑀢𑀁 𑀦𑀕𑀭𑀁 𑀲𑀼𑀲𑀫𑀺𑀤𑁆𑀥𑀁 𑀲𑀫𑁆𑀧𑀦𑁆𑀦𑀥𑀦𑀥𑀜𑁆𑀜𑀸𑀤𑀻𑀳𑀺 𑀉𑀧𑀓𑀭𑀡𑁂𑀳𑀺 𑀤𑁆𑀯𑀸𑀭𑀝𑁆𑀝𑀸𑀮𑀓𑀕𑁄𑀧𑀼𑀭𑀧𑀭𑀺𑀔𑀸𑀧𑁄𑀓𑁆𑀔𑀭-𑀡𑀺𑀬𑀸𑀤𑀻𑀳𑀺 ¶ 𑀲𑀳𑀺𑀢𑀁 𑀳𑀢𑁆𑀣𑀺𑀅𑀲𑁆𑀲𑀭𑀣𑀧𑀢𑁆𑀢𑀺𑀆𑀤𑀻𑀳𑀺 𑀲𑀫𑀸𑀓𑀼𑀮𑀁 𑀲𑀗𑁆𑀔𑀧𑀡𑀯𑀪𑁂𑀭𑀺𑀲𑀤𑁆𑀤𑀸𑀤𑀻𑀳𑀺 𑀲𑀫𑀸𑀓𑀺𑀡𑁆𑀡𑀁 𑀦𑀕𑀭𑀁 𑀅𑀳𑁄𑀲𑀺. 𑀲𑁄 𑀅𑀪𑀬𑁄 𑀘𑀺𑀭𑀁 𑀲𑁄𑀫𑀦𑀕𑀭𑁂 𑀫𑀳𑀦𑁆𑀢𑀁 𑀇𑀲𑁆𑀲𑀭𑀺𑀬𑀁 𑀅𑀦𑀼𑀪𑀯𑀦𑁆𑀢𑁄 𑀯𑀺𑀳𑀸𑀲𑀺.

𑀅𑀣𑀸𑀧𑀭𑀲𑁆𑀫𑀺𑀁 𑀓𑀸𑀮𑁂 𑀲𑁄𑀫𑀤𑁂𑀯𑀻 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀓𑀣𑁂𑀲𑀺; 𑀅𑀬𑁆𑀬 𑀅𑀫𑁆𑀳𑀸𑀓𑀁 𑀧𑀝𑀺𑀲𑀭𑀡𑀁 𑀘𑁂𑀢𑀺𑀬𑀜𑁆𑀘 𑀯𑀺𑀳𑀸𑀭𑀜𑁆𑀘 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’𑀢𑀺. 𑀪𑀤𑁆𑀤𑀓𑀁 𑀢𑁂 𑀓𑀣𑀺𑀢𑀦𑁆𑀢𑀺 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀯𑀺𑀳𑀸𑀭𑀪𑀽𑀫𑀺𑀁 𑀕𑀯𑁂𑀲𑀦𑁆𑀢𑁄 𑀦𑀕𑀭𑀢𑁄 𑀦𑀸𑀢𑀺𑀤𑀼𑀭𑁂 𑀦𑀸𑀘𑁆𑀘𑀸𑀲𑀦𑁆𑀦𑁂 𑀫𑀳𑀦𑁆𑀢𑀁 𑀲𑀸𑀮𑀯𑀦𑀁 𑀅𑀢𑁆𑀣𑀺. 𑀢𑀁 𑀧𑀲𑁆𑀲𑀺𑀢𑀼𑀁 𑀕𑀢𑁄. 𑀢𑀤𑀸 𑀢𑀲𑁆𑀫𑀺𑀁 𑀲𑀸𑀮𑀯𑀦𑁂 𑀫𑀳𑀸𑀅𑀭𑀺𑀝𑁆𑀞𑀢𑁆𑀣𑁂𑀭𑀲𑁆𑀲 𑀯𑀁𑀲𑁂 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀦𑀸𑀫 𑀏𑀓𑁄 𑀣𑁂𑀭𑁄 𑀅𑀢𑁆𑀣𑀺. 𑀲𑁄 𑀲𑀝𑁆𑀞𑀺𑀫𑀢𑁆𑀢𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀯𑀺𑀳𑀭𑀢𑀺. 𑀢𑀁 𑀤𑀺𑀲𑁆𑀯𑀸 𑀇𑀭𑀺𑀬𑀸𑀧𑀣𑁂 𑀧𑀲𑀦𑁆𑀦𑁄 𑀣𑁂𑀭𑀁 𑀏𑀯𑀫𑀸𑀳; ‘𑀅𑀬𑁆𑀬 𑀢𑀼𑀫𑁆𑀳𑀸𑀓𑀁 𑀇𑀫𑀲𑁆𑀫𑀺𑀁 𑀲𑀸𑀮𑀯𑀦𑁂 𑀯𑀺𑀳𑀸𑀭𑀁 𑀓𑀭𑀺𑀲𑁆𑀲𑀸𑀫𑀺’𑀢𑀺. 𑀣𑁂𑀭𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀼𑀡𑁆𑀳𑀻𑀳𑀸𑀯𑁂𑀦 𑀅𑀥𑀺𑀯𑀸𑀲𑁂𑀲𑀺. 𑀭𑀸𑀚𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀕𑀭𑀫𑁂𑀯 𑀕𑀦𑁆𑀢𑁆𑀯𑀸 𑀲𑁄𑀫𑀤𑁂𑀯𑀺𑀁 𑀆𑀫𑀦𑁆𑀢𑁂𑀢𑁆𑀯𑀸; 𑀪𑀤𑁆𑀤𑁂𑀲𑁄𑀫𑀤𑁂𑀯𑀺, 𑀅𑀫𑁆𑀳𑀸𑀓𑀁 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀢𑁆𑀢𑁄. 𑀯𑀺𑀳𑀸𑀭𑀓𑀭𑀡𑀢𑁆𑀣𑀸𑀬 𑀫𑀦𑀸𑀧𑁄 𑀪𑀽𑀫𑀺𑀪𑀸𑀕𑁄 𑀮𑀤𑁆𑀥𑁄. 𑀢𑀢𑁆𑀣 𑀘 𑀫𑀳𑀺𑀦𑁆𑀤𑁄 𑀦𑀸𑀫 𑀣𑁂𑀭𑁄 𑀲𑀫𑀡𑀸𑀦𑀁 𑀲𑀝𑁆𑀞𑀺𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀯𑀺𑀳𑀭𑀢𑀺. 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀯𑀺𑀳𑀭𑀡𑀢𑁆𑀣𑀸𑀬 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄. 𑀢𑀢𑁆𑀣 𑀯𑀺𑀳𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀆𑀳. 𑀲𑀸 𑀢𑀁 𑀲𑀼𑀢𑁆𑀯𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸 𑀲𑀸𑀥𑀽’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀧𑀼𑀦𑀤𑀺𑀯𑀲𑁂 𑀤𑁂𑀯𑀺𑀬𑀸 𑀲𑀤𑁆𑀥𑀺𑀁 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀣𑁂𑀭𑁄 𑀢𑁂𑀲𑀁 𑀫𑀳𑀸𑀲𑀫𑀬𑀲𑀼𑀢𑁆𑀢𑀁 𑀓𑀣𑁂𑀲𑀺. 𑀢𑁂 𑀉𑀪𑁄’𑀧𑀺 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑀸 𑀅𑀳𑁂𑀲𑀼𑀁. 𑀅𑀣 𑀭𑀸𑀚𑀸 𑀅𑀬𑁆𑀬 𑀥𑀸𑀢𑀼𑀁 𑀓𑀼𑀢𑁄 𑀮𑀪𑀺𑀲𑁆𑀲𑀸𑀫𑀸’𑀢𑀺 𑀣𑁂𑀭𑀁 𑀧𑀼𑀘𑁆𑀙𑀺. 𑀫𑀸 𑀘𑀺𑀦𑁆𑀢𑀬𑀺 𑀫𑀳𑀸𑀭𑀸𑀚, 𑀥𑀸𑀢𑀼𑀁 𑀅𑀫𑁆𑀳𑁂 𑀚𑀸𑀦𑀺𑀲𑁆𑀲𑀸𑀫𑀸’𑀢𑀺 𑀆𑀘𑀺𑀓𑁆𑀔𑀺.

𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀯𑀺𑀳𑀸𑀭𑀪𑀼𑀫𑀺𑀁 𑀲𑁄𑀥𑀸𑀧𑁂𑀢𑁆𑀯𑀸 𑀔𑀸𑀡𑀼𑀓𑀡𑁆𑀝𑀓𑀸𑀤𑀬𑁄 𑀦𑀻𑀳𑀭𑀺𑀢𑁆𑀯𑀸 𑀪𑁂𑀭𑀺𑀢𑀮𑀫𑀺𑀯 𑀭𑀫𑀡𑀻𑀬𑀁 𑀲𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀇𑀝𑁆𑀞𑀓𑀯𑀟𑁆𑀠𑀓𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀇𑀝𑁆𑀞𑀘𑀺𑀢𑀁 𑀓𑀸𑀭𑀸𑀧𑁂𑀢𑁆𑀯𑀸 𑀘𑁂𑀢𑀺𑀬𑀓𑀫𑁆𑀫𑀁 𑀧𑀝𑁆𑀞𑀧𑁂𑀲𑀺. 𑀯𑀟𑁆𑀠𑀓𑀻 𑀘𑁂𑀢𑀺𑀬𑀁 𑀘𑀺𑀦𑀦𑁆𑀢𑁄 𑀓𑀢𑀺𑀧𑀸𑀳𑁂𑀦 𑀧𑀼𑀧𑁆𑀨𑀸𑀥𑀸𑀦𑀢𑁆𑀢𑀬𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀥𑀸𑀢𑀼𑀕𑀩𑁆𑀪𑁂 𑀲𑀩𑁆𑀩𑀁 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀭𑀜𑁆𑀜𑁄 𑀧𑀝𑀺𑀯𑁂𑀤𑁂𑀲𑀺. 𑀭𑀸𑀚𑀸, 𑀆𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀆𑀭𑁄𑀘𑁂𑀲𑀺. 𑀦𑀺𑀝𑁆𑀞𑀸𑀧𑀺𑀢𑁄 𑀅𑀬𑁆𑀬 𑀥𑀸𑀢𑀼 𑀕𑀩𑁆𑀪𑁄’𑀢𑀺. 𑀣𑁂𑀭𑁄 𑀭𑀜𑁆𑀜𑁄 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑀸 𑀧𑀭𑀺𑀳𑀭𑀺𑀢𑀁 ¶ 𑀢𑀣𑀸𑀕𑀢𑀲𑁆𑀲 𑀤𑀓𑁆𑀔𑀺𑀡𑀤𑀸𑀞𑀸𑀥𑀸𑀢𑀼𑀁 𑀢𑀲𑁆𑀲 𑀅𑀤𑀸𑀲𑀺. 𑀭𑀸𑀚𑀸 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀲𑀼𑀦𑀓𑁆𑀔𑀢𑁆𑀢𑁂𑀦 𑀲𑀼𑀫𑀼𑀳𑀼𑀢𑁆𑀢𑁂𑀦 𑀫𑀳𑀢𑀸 𑀧𑀭𑀺𑀯𑀸𑀭𑁂𑀦 𑀥𑀸𑀢𑀼𑀕𑀩𑁆𑀪𑁂 𑀦𑀺𑀤𑀳𑀺𑀢𑁆𑀯𑀸 𑀅𑀢𑀺𑀫𑀦𑁄𑀭𑀫𑀁 𑀉𑀤𑀓𑀩𑀼𑀩𑁆𑀩𑀼𑀴𑀓𑁂𑀮𑀸𑀲𑀓𑀼𑀝𑀧𑀝𑀺𑀪𑀸𑀕𑀁 𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀲𑀺.

𑀲𑀤𑁆𑀥𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁄 𑀮𑁄𑀓𑀲𑀸𑀲𑀦𑀭𑀓𑁆𑀔𑀓𑁄;

𑀲𑀘𑁂𑀢𑀺𑀬𑀁 𑀫𑀳𑀸𑀭𑀸𑀚𑀸 𑀓𑀸𑀭𑀸𑀧𑁂𑀲𑀺 𑀯𑀺𑀳𑀸𑀭𑀓𑀁.

𑀢𑀢𑁄 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀪𑀺𑀓𑁆𑀔𑀼𑀦𑀁 𑀅𑀢𑁆𑀣𑀸𑀬 𑀲𑀝𑁆𑀞𑀺𑀫𑀢𑁆𑀢𑀸𑀦𑀺 𑀧𑀭𑀺𑀯𑁂𑀡𑀸𑀦𑀺 𑀓𑀸𑀭𑀸𑀧𑁂𑀢𑁆𑀯𑀸 𑀤𑁆𑀯𑀸𑀭𑀝𑁆𑀝𑀸𑀮𑀓𑀧𑀸𑀓𑀸𑀭𑁂𑀳𑀺 𑀲𑁄𑀪𑀺𑀢𑀁 𑀯𑀺𑀳𑀸𑀭𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀤𑁂𑀯𑀺𑀬𑀸 𑀏𑀓𑀦𑀸𑀫𑀁 𑀓𑀢𑁆𑀯𑀸 𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲 𑀤𑀓𑁆𑀔𑀺𑀡𑁄𑀤𑀓𑀁 𑀤𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀥𑀽𑀧𑀥𑀚𑁂𑀳𑀺 𑀧𑀽𑀚𑀁 𑀓𑀭𑁄𑀦𑁆𑀢𑁄 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀥𑀸𑀢𑀼𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀼𑀭𑀼𑀫𑀸𑀦𑁄 𑀕𑀺𑀭𑀺𑀅𑀪𑀬𑀭𑀸𑀚𑀸 𑀫𑀳𑀦𑁆𑀢𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁄 𑀲𑁄𑀫𑀦𑀕𑀭𑀁 𑀧𑀝𑀺𑀯𑀲𑀢𑀺.

(𑀦𑀕𑀭𑁂 𑀲𑁄𑀫𑀦𑀸𑀫𑀫𑁆𑀳𑀺 𑀭𑀫𑀡𑀻𑀬𑁂 𑀫𑀦𑁄𑀭𑀫𑁂;

𑀤𑁂𑀯𑀺𑀬𑀸 𑀲𑀳 𑀫𑁄𑀤𑀦𑁆𑀢𑁄 𑀭𑀚𑁆𑀚𑀁 𑀓𑀸𑀭𑁂𑀲𑀺 𑀦𑀸𑀬𑀓𑁄.)

𑀢𑀢𑁄 𑀯𑀺𑀳𑀸𑀭𑀤𑁂𑀯𑀺𑀬𑀸 𑀪𑀸𑀢𑀸 𑀘𑀼𑀮𑁆𑀮𑀧𑀺𑀡𑁆𑀟𑀧𑀸𑀢𑀺𑀬𑀢𑀺𑀲𑁆𑀲𑀢𑁆𑀣𑁂𑀭𑁄 𑀦𑀸𑀫 𑀏𑀓𑀤𑀺𑀯𑀲𑀁 𑀓𑀸𑀓𑀯𑀡𑁆𑀡𑀢𑀺𑀲𑁆𑀲𑀫𑀳𑀸𑀭𑀜𑁆𑀜𑁄 𑀆𑀬𑀼𑀲𑀗𑁆𑀔𑀸𑀭𑀫𑁄𑀮𑁄𑀓𑁂𑀦𑁆𑀢𑁄 𑀦 𑀘𑀺𑀭𑀧𑁆𑀧𑀯𑀢𑁆𑀢𑀦𑀪𑀸𑀯𑀁 𑀜𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀲𑀺. 𑀫𑀳𑀸𑀭𑀸𑀚 𑀢𑀼𑀫𑁆𑀳𑀸𑀓𑀁 𑀦𑀮𑀸𑀝𑀥𑀸𑀢𑀼𑀬𑀸 𑀲𑀢𑁆𑀣𑀸𑀭𑀸 𑀩𑁆𑀬𑀸𑀓𑀭𑀡𑀁 𑀤𑀺𑀦𑁆𑀦𑀁;’𑀫𑀳𑀸𑀯𑀸𑀮𑀼𑀓𑀕𑀗𑁆𑀕𑀸𑀬 𑀤𑀓𑁆𑀔𑀺𑀡𑀪𑀸𑀕𑁂 𑀲𑁂𑀭𑀼 𑀦𑀸𑀫 𑀤𑀳𑀲𑁆𑀲 𑀅𑀦𑁆𑀢𑁂 𑀯𑀭𑀸𑀳 𑀦𑀸𑀫 𑀲𑁄𑀡𑁆𑀟𑀺𑀬𑀸 𑀫𑀢𑁆𑀣𑀓𑁂 𑀅𑀦𑀸𑀕𑀢𑁂 𑀓𑀸𑀓𑀯𑀡𑁆𑀡𑀢𑀺𑀲𑁆𑀲𑁄 𑀦𑀸𑀫 𑀫𑀳𑀸𑀭𑀸𑀚𑀸 𑀫𑀬𑁆𑀳𑀁 𑀦𑀮𑀸𑀝𑀥𑀸𑀢𑀼𑀁 𑀧𑀢𑀺𑀝𑁆𑀞𑀧𑁂𑀲𑁆𑀲𑀢𑀻’𑀢𑀺 𑀯𑀢𑁆𑀯𑀸 𑀢𑀁 𑀲𑀦𑁆𑀥𑀸𑀬 𑀪𑀕𑀯𑀸 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀕𑀢𑁄. 𑀢𑀲𑁆𑀲 𑀯𑀘𑀦𑀁 𑀫𑀦𑀲𑀺𑀓𑀭𑁄𑀳𑀻’𑀢𑀺 𑀆𑀳. 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀅𑀫𑁆𑀳𑀸𑀓𑀁 𑀓𑀼𑀲𑀮𑀲𑀫𑁆𑀧𑀢𑁆𑀢𑀺𑀁 𑀅𑀯𑀺𑀦𑀸𑀲𑁂𑀢𑁆𑀯𑀸 𑀅𑀬𑁆𑀬𑀲𑁆𑀲 𑀯𑀘𑀦𑀫𑀼𑀤𑁆𑀤𑀺𑀲𑁆𑀲 𑀘𑁂𑀢𑀺𑀬𑀁 𑀓𑀸𑀭𑀸𑀧𑀦𑀢𑁆𑀣𑀸𑀬 𑀕𑀦𑁆𑀢𑀩𑁆𑀩𑀦𑁆𑀢𑀺 𑀫𑀦𑁆𑀢𑁆𑀯𑀸 𑀪𑀤𑁆𑀤𑀓𑀁 𑀅𑀬𑁆𑀬𑀸’𑀢𑀺 𑀣𑁂𑀭𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀤𑀼𑀝𑁆𑀞𑀕𑀸𑀫𑀡𑀺𑀁 𑀕𑀺𑀭𑀺𑀦𑀕𑀭𑀢𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀫𑀳𑀸𑀕𑀸𑀫𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺; 𑀅𑀳𑀁 𑀫𑀳𑀸𑀯𑀸𑀮𑀼𑀓𑀸𑀬 𑀕𑀗𑁆𑀕𑀸𑀬 𑀲𑀫𑀻𑀧𑁂 𑀲𑁂𑀭𑀼 𑀦𑀸𑀫 ¶ 𑀤𑀳𑀲𑁆𑀲 𑀅𑀦𑁆𑀢𑁂 𑀯𑀭𑀸𑀳 𑀦𑀸𑀫 𑀲𑁄𑀡𑁆𑀟𑀺𑀬𑀸 𑀫𑀢𑁆𑀣𑀓𑁂 𑀘𑁂𑀢𑀺𑀬𑀁 𑀓𑀸𑀭𑀸𑀧𑀦𑀢𑁆𑀣𑀸𑀬 𑀕𑀫𑀺𑀲𑁆𑀲𑀸𑀫𑀺, 𑀲𑀩𑁆𑀩𑀲𑁂𑀦𑀺𑀬𑁄 𑀘 𑀫𑀳𑀸 𑀚𑀦𑁄 𑀘 𑀫𑀬𑀸 𑀲𑀤𑁆𑀥𑀺𑀁 𑀆𑀕𑀘𑁆𑀙𑀦𑁆𑀢𑀼’𑀢𑀺 𑀯𑀢𑁆𑀯𑀸 𑀭𑀸𑀚𑀸 𑀘𑀼𑀮𑀧𑀺𑀡𑁆𑀟𑀧𑀸𑀢𑀺𑀬𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑁂 𑀲𑀸𑀕𑀮𑀢𑁆𑀣𑁂𑀭𑀲𑁆𑀲 𑀘 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀪𑀦𑁆𑀢𑁂 𑀢𑀼𑀫𑁆𑀳𑀸𑀓𑀁 𑀧𑀭𑀺𑀯𑀸𑀭𑁂 𑀧𑀜𑁆𑀘𑀲𑀢𑀫𑀢𑁆𑀢𑁂 𑀪𑀺𑀓𑁆𑀔𑀼 𑀕𑀳𑁂𑀢𑁆𑀯𑀸 𑀥𑀸𑀢𑀼𑀁 𑀉𑀧𑀝𑁆𑀞𑀳𑀦𑁆𑀢𑀸 𑀫𑀬𑀸 𑀲𑀤𑁆𑀥𑀺𑀁𑀬𑁂𑀯 𑀆𑀕𑀘𑁆𑀙𑀣𑀸’𑀢𑀺 𑀯𑀢𑁆𑀯𑀸 𑀪𑀤𑁆𑀤𑀫𑀸𑀲𑁂 𑀪𑀤𑁆𑀤𑀤𑀺𑀯𑀲𑁂 𑀲𑀼𑀦𑀓𑁆𑀔𑀢𑁆𑀢𑁂 𑀲𑀼𑀫𑀼𑀳𑀼𑀢𑁆𑀢𑁂 𑀩𑀦𑁆𑀥𑀸𑀯𑀸𑀭𑀁 𑀲𑀚𑁆𑀚𑁂𑀢𑁆𑀯𑀸 𑀥𑀸𑀢𑀼𑀖𑀭𑀢𑁄 𑀥𑀸𑀢𑀼𑀓𑀭𑀡𑁆𑀟𑀓𑀁 𑀦𑀻𑀳𑀭𑀺𑀢𑁆𑀯𑀸 𑀲𑀼𑀲𑀚𑁆𑀚𑀺𑀢𑀭𑀣𑁂 𑀞𑀧𑁂𑀢𑁆𑀯𑀸 𑀉𑀧𑀭𑀺 𑀲𑁂𑀢𑀘𑁆𑀙𑀢𑁆𑀢𑀜𑁆𑀘 𑀓𑀢𑁆𑀯𑀸 𑀧𑀼𑀭𑀢𑁄 𑀧𑀼𑀭𑀢𑁄 𑀭𑀢𑀦𑀫𑀡𑀟𑀧𑁂 𑀓𑀸𑀭𑀸𑀧𑁂𑀢𑁆𑀯𑀸 𑀧𑀼𑀭𑁂𑀢𑀭𑀫𑀓𑀸𑀲𑀺.

𑀢𑀢𑁄 𑀭𑀸𑀚𑀸 𑀧𑀼𑀢𑁆𑀢𑀁 𑀤𑀼𑀝𑁆𑀞𑀕𑀸𑀫𑀡𑀺𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀅𑀦𑀼𑀲𑀸𑀲𑀺𑀢𑁆𑀯𑀸 𑀧𑀼𑀢𑁆𑀢𑀁 𑀲𑀤𑁆𑀥𑀸𑀢𑀺𑀲𑁆𑀲𑀓𑀼𑀫𑀸𑀭𑀜𑁆𑀘 𑀯𑀺𑀳𑀸𑀭𑀤𑁂𑀯𑀺𑀜𑁆𑀘 𑀕𑀳𑁂𑀢𑁆𑀯𑀸 𑀲𑀻𑀖𑀁 𑀦𑀺𑀓𑁆𑀔𑀫𑀺. 𑀘𑀽𑀴𑀧𑀺𑀡𑁆𑀟𑀧𑀸𑀢𑀺𑀬𑀢𑀺𑀲𑁆𑀲𑀢𑁆𑀣𑁂𑀭𑁄 𑀘 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂 𑀧𑀜𑁆𑀘𑀲𑀢𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀥𑀸𑀢𑀼𑀁 𑀉𑀧𑀝𑁆𑀞𑀳𑀦𑁆𑀢𑁄 𑀧𑀘𑁆𑀙𑀢𑁄 𑀆𑀕𑀜𑁆𑀙𑀺. 𑀲𑀩𑁆𑀩𑀲𑁂𑀦𑀺𑀬𑁄 𑀘 𑀭𑀸𑀚𑀸 𑀘 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀪𑀺𑀓𑁆𑀔𑀼 𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀤𑀻𑀖𑀯𑀸𑀧𑀺𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀲𑁆𑀫𑀺𑀁 𑀲𑀤𑁆𑀥𑀸𑀢𑀺𑀲𑁆𑀲𑀓𑀼𑀫𑀸𑀭𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀆𑀕𑀦𑁆𑀢𑁆𑀯𑀸 𑀲𑀼𑀫𑀦𑀫𑀸𑀮𑀸𑀧𑀺𑀝𑁆𑀞𑀺𑀬𑀁 𑀔𑀦𑁆𑀥𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀓𑀲𑁆𑀫𑀸 𑀧𑀦 𑀢𑀁 𑀞𑀸𑀦𑀁 𑀏𑀯𑀁 𑀦𑀸𑀫𑀓𑀁 𑀚𑀸𑀢𑀦𑁆𑀢𑀺. 𑀲𑀼𑀫𑀦𑀦𑀸𑀕𑀭𑀸𑀚𑀸 𑀲𑀢𑁆𑀢𑀤𑀺𑀯𑀲𑀸𑀦𑀺 𑀦𑀸𑀕𑀲𑀫𑁆𑀧𑀢𑁆𑀢𑀺𑀁 𑀅𑀪𑀺𑀭𑀫𑀫𑀸𑀦𑁄 (𑀦𑀮𑀸𑀝𑀥𑀸𑀢𑀼𑀁 𑀯𑀺𑀲𑁆𑀲𑀭𑀺.) 𑀲𑀢𑁆𑀢𑀸𑀳𑀘𑁆𑀘𑀬𑁂𑀦 𑀦𑀮𑀸𑀝𑀥𑀸𑀢𑀼𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀧𑀘𑁆𑀙𑀸 𑀆𑀯𑀚𑁆𑀚𑀫𑀸𑀦𑁄 𑀭𑀜𑁆𑀜𑁄 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀆𑀕𑀢𑀪𑀸𑀯𑀁 𑀜𑀢𑁆𑀯𑀸 𑀫𑀳𑀦𑁆𑀢𑀁 𑀲𑁄𑀫𑀦𑀲𑁆𑀲𑀁 𑀧𑀢𑁆𑀢𑁄 𑀫𑀳𑀦𑁆𑀢𑀚𑁆𑀛𑀸𑀲𑀬𑁄 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂 𑀙𑀓𑁄𑀝𑀺𑀫𑀢𑁆𑀢𑁂 𑀦𑀸𑀕𑁂 𑀕𑀳𑁂𑀢𑁆𑀯𑀸 𑀥𑀸𑀢𑀼𑀧𑀝𑀺𑀧𑀣𑀁 𑀕𑀦𑁆𑀢𑁆𑀯𑀸 𑀥𑀸𑀢𑀼𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑁂𑀯 𑀧𑀣𑀯𑀺𑀬𑀁 𑀦𑀸𑀪𑀺𑀧𑁆𑀧𑀫𑀸𑀡𑀢𑁄 𑀲𑀼𑀫𑀦𑀫𑀸𑀮𑀸𑀯𑀲𑁆𑀲𑀁 𑀯𑀲𑁆𑀲𑁂𑀲𑀺. 𑀢𑀲𑁆𑀫𑀸 𑀢𑀁 𑀞𑀸𑀦𑀁 𑀲𑀼𑀫𑀦𑀫𑀸𑀮𑀸𑀧𑀺𑀝𑁆𑀞𑀺𑀢𑀺 𑀚𑀸𑀢𑀁. 𑀧𑀼𑀦𑀤𑀺𑀯𑀲𑁂 𑀭𑀸𑀚𑀸 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀯𑀭𑀸𑀳 ¶ 𑀦𑀸𑀫 𑀲𑁄𑀡𑁆𑀟𑀺𑀁 𑀧𑀸𑀧𑀼𑀡𑀺. 𑀲𑀫𑁆𑀧𑀢𑁆𑀢𑀸𑀬 𑀥𑀸𑀢𑀼𑀬𑀸 𑀢𑀲𑁆𑀫𑀺𑀁 𑀞𑀸𑀦𑁂 𑀲𑀼𑀫𑀦𑀦𑀸𑀕𑀭𑀸𑀚𑀸 𑀭𑀣𑀘𑀓𑁆𑀓𑁂 𑀬𑀸𑀯 𑀦𑀸𑀪𑀺𑀁 𑀢𑀸𑀯 𑀑𑀲𑀻𑀤𑀸𑀧𑁂𑀢𑁆𑀯𑀸 𑀅𑀧𑀭𑀺𑀯𑀢𑁆𑀢𑀦𑀁 𑀅𑀓𑀸𑀲𑀺. 𑀢𑀁 𑀤𑀺𑀲𑁆𑀯𑀸 𑀭𑀸𑀚𑀸 𑀲𑀁𑀯𑁂𑀕𑀧𑁆𑀧𑀢𑁆𑀢𑁄 𑀣𑁂𑀭𑀁 𑀧𑀼𑀘𑁆𑀙𑀺. 𑀫𑀸 𑀪𑀸𑀬𑀺 𑀫𑀳𑀸𑀭𑀸𑀚, 𑀥𑀸𑀢𑀼 𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑀁 𑀆𑀕𑀢𑁄. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀻’𑀢𑀺 𑀆𑀳.

𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀥𑀸𑀢𑀼𑀧𑀢𑀺𑀝𑁆𑀞𑀸𑀦 𑀪𑀽𑀫𑀺𑀪𑀸𑀕𑀁 𑀪𑀯𑀺𑀲𑁆𑀲𑀢𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀢𑁆𑀣𑁂𑀯 𑀲𑁂𑀦𑀁𑀦𑀺𑀯𑁂𑀲𑁂𑀢𑁆𑀯𑀸 𑀇𑀤𑀁 𑀞𑀸𑀦𑀁 𑀲𑀫𑀦𑁆𑀢𑀢𑁄 𑀲𑀓𑀡𑁆𑀝𑀓𑀁 𑀯𑀦𑀁 𑀦𑀻𑀳𑀭𑀸𑀧𑁂𑀢𑁆𑀯𑀸 𑀪𑀽𑀫𑀺𑀪𑀸𑀕𑀁 𑀅𑀢𑀺𑀭𑀫𑀡𑀻𑀬𑀁 𑀪𑁂𑀭𑀺𑀢𑀮𑀫𑀺𑀯 𑀲𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑁂𑀦𑀺𑀬𑀧𑀸𑀫𑁄𑀓𑁆𑀔𑀁 𑀆𑀫𑀦𑁆𑀢𑁂𑀢𑁆𑀯𑀸 𑀢𑀼𑀫𑁆𑀳𑁂 𑀥𑀸𑀢𑀼𑀁 𑀞𑀧𑀦𑀢𑁆𑀣𑀸𑀬 𑀧𑀞𑀫𑀁 𑀥𑀸𑀢𑀼𑀖𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀥𑀸𑀢𑀼 𑀕𑀩𑁆𑀪𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀦𑀺𑀯𑁂𑀤𑁂𑀲𑀺. 𑀭𑀸𑀚𑀸 𑀅𑀦𑁆𑀢𑁄 𑀥𑀸𑀢𑀼𑀖𑀭𑁂 𑀢𑀲𑁆𑀫𑀺𑀁 𑀥𑀸𑀢𑀼𑀕𑀩𑁆𑀪𑁂 𑀥𑀸𑀢𑀼𑀓𑀭𑀡𑁆𑀟𑀓𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀩𑀳𑀺 𑀆𑀭𑀓𑁆𑀔𑀁 𑀲𑀁𑀯𑀺𑀥𑀸𑀬 𑀢𑀢𑁆𑀣 𑀫𑀳𑀦𑁆𑀢𑀁 𑀧𑀽𑀚𑀸𑀯𑀺𑀥𑀸𑀦𑀁 𑀓𑀸𑀭𑀸𑀧𑁂𑀢𑁆𑀯𑀸 𑀥𑀸𑀢𑀼𑀖𑀭𑀁 𑀘𑀢𑀼𑀚𑀸𑀢𑀺𑀬𑀕𑀦𑁆𑀥𑁂𑀦 𑀯𑀺𑀮𑀺𑀫𑁆𑀧𑀸𑀧𑁂𑀲𑀺. 𑀢𑀤𑀼𑀧𑀸𑀤𑀸𑀬 𑀢𑀁 𑀕𑁂𑀳𑀁 𑀕𑀦𑁆𑀥𑀫𑀽𑀮𑀁 𑀦𑀸𑀫 𑀚𑀸𑀢𑀁. 𑀢𑀲𑁆𑀫𑀺𑀁 𑀞𑀸𑀦𑁂 𑀩𑀳𑀽 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑀢𑁆𑀣 𑀫𑀳𑀺𑀦𑁆𑀤𑁄 𑀦𑀸𑀫 𑀣𑁂𑀭𑁄 𑀆𑀕𑀦𑁆𑀢𑀼𑀓 𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀅𑀓𑀸𑀲𑀺. 𑀧𑀼𑀦𑀤𑀺𑀯𑀲𑁂 𑀭𑀸𑀚𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀼𑀔𑁂𑀦 𑀯𑀲𑀺𑀢𑁆𑀣 𑀅𑀬𑁆𑀬𑀸’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀲𑀩𑁆𑀩𑁂 𑀪𑀺𑀓𑁆𑀔𑀼 𑀦𑀺𑀫𑀦𑁆𑀢𑁂𑀢𑁆𑀯𑀸 𑀭𑀸𑀚𑀕𑁂𑀳𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀪𑀢𑁆𑀢𑀁 𑀲𑀓𑁆𑀓𑀘𑁆𑀘𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀪𑀢𑁆𑀢𑀁 𑀅𑀦𑀼𑀫𑁄𑀤𑀦𑀁 𑀲𑀼𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑀸𑀮𑁂 𑀣𑁂𑀭𑁄 𑀑𑀯𑀤𑀦𑁆𑀢𑁄 𑀫𑀳𑀸𑀭𑀸𑀚, 𑀧𑀫𑀸𑀤𑁂𑀦 𑀯𑀲𑀺𑀢𑀼𑀁 𑀦 𑀯𑀝𑁆𑀝𑀢𑀺 𑀚𑀻𑀯𑀺𑀢𑀁 𑀦𑀸𑀫 𑀦 𑀘𑀺𑀭𑀝𑁆𑀞𑀺𑀢𑀺𑀓𑀁, 𑀥𑀸𑀢𑀼𑀧𑀢𑀺𑀝𑁆𑀞𑀸𑀧𑀦𑀁 𑀧𑀧𑀜𑁆𑀘𑀁 𑀅𑀓𑀢𑁆𑀯𑀸 𑀓𑀸𑀭𑁂𑀳𑀻’𑀢𑀺 𑀯𑀢𑁆𑀯𑀸 𑀕𑀸𑀣𑀫𑀸𑀳?

𑀬𑀲𑁆𑀫𑀸 𑀳𑀺 𑀚𑀻𑀯𑀺𑀢𑀁 𑀦𑀸𑀫 𑀅𑀧𑁆𑀧𑀁 𑀩𑀼𑀩𑁆𑀩𑀼𑀮𑀓𑀼𑀧𑀫𑀁;

𑀢𑀲𑁆𑀫𑀸 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄 𑀓𑀭𑁂𑀬𑁆𑀬 𑀓𑀼𑀲𑀮𑀁 𑀲𑀤𑀸’𑀢𑀺.

𑀇𑀫𑀺𑀦𑀸 ¶ 𑀦𑀬𑁂𑀦 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀘𑀽𑀴𑀧𑀺𑀡𑁆𑀟𑀧𑀸𑀢𑀺𑀬𑀢𑀺𑀲𑁆𑀲 𑀢𑁆𑀣𑁂𑀭𑁄 𑀘 𑀲𑀸𑀕𑀮𑀢𑁆𑀣𑁂𑀭𑁄 𑀘 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀘𑀸’𑀢𑀺 𑀢𑀬𑁄 𑀣𑁂𑀭𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀥𑀸𑀢𑀼 𑀧𑀭𑀺𑀳𑀭𑀡𑀢𑁆𑀣𑀸𑀬 𑀆𑀕𑀘𑁆𑀙𑀺𑀁𑀲𑀼.

𑀯𑀺𑀧𑀼𑀮𑀬𑀲𑁄 𑀧𑀭𑀳𑀺𑀢𑀸𑀯𑀳𑀦𑁆𑀢𑁄,

𑀲𑀼𑀚𑀦𑀳𑀺𑀢𑁄 𑀥𑀺𑀢𑀺𑀫𑀸 𑀅𑀯𑀻𑀢𑀲𑀤𑁆𑀥𑁄;

𑀲𑀼𑀧𑀭𑀺𑀯𑀼𑀢𑁄 𑀫𑀳𑀢𑀺𑀬𑀸 𑀳𑀺 𑀧𑀭𑀺𑀲𑀸,

𑀭𑀸𑀚𑀲𑁂𑀝𑁆𑀞𑁄 𑀧𑀯𑀭𑀣𑀽𑀧𑀫𑀸𑀭𑀪𑀻’𑀢𑀺.

𑀇𑀢𑀺 𑀅𑀭𑀺𑀬𑀚𑀦𑀧𑁆𑀧𑀲𑀸𑀤𑀦𑀢𑁆𑀣𑀸𑀬 𑀓𑀢𑁂 𑀥𑀸𑀢𑀼𑀯𑀁𑀲𑁂

𑀧𑀓𑀺𑀡𑁆𑀡𑀓𑁄 𑀦𑀸𑀫

𑀘𑀢𑀼𑀢𑁆𑀣𑁄 𑀧𑀭𑀺𑀘𑁆𑀙𑁂𑀤𑁄.

𑁫. ¶ 𑀥𑀸𑀢𑀼𑀦𑀺𑀥𑀸𑀦𑀸𑀥𑀺𑀓𑀸𑀭𑁄

𑀢𑀢𑁄 𑀯𑀺𑀫𑀁𑀲𑁂𑀢𑁆𑀯𑀸 𑀪𑀼𑀫𑀺𑀪𑀸𑀕𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’𑀢𑀺 𑀪𑀽𑀫𑀺 𑀪𑀸𑀕𑀁 𑀯𑀻𑀫𑀁𑀲𑁂𑀦𑁆𑀢𑁄 𑀫𑀗𑁆𑀕𑀮𑀲𑀫𑁆𑀫𑀢𑁂 𑀅𑀝𑁆𑀞 𑀕𑁄𑀡𑁂 𑀆𑀳𑀭𑀸𑀧𑁂𑀢𑁆𑀯𑀸 𑀕𑀦𑁆𑀥𑁄𑀤𑀓𑁂𑀦 𑀦𑀳𑀸𑀧𑁂𑀢𑁆𑀯𑀸 𑀲𑀺𑀗𑁆𑀕𑁂𑀲𑀼 𑀲𑀼𑀯𑀡𑁆𑀡𑀓𑀜𑁆𑀘𑀼𑀓𑀁 𑀧𑀢𑀺𑀫𑀼𑀜𑁆𑀘𑀸𑀧𑁂𑀢𑁆𑀯𑀸 𑀕𑀦𑁆𑀥𑀧𑀜𑁆𑀘𑀗𑁆𑀕𑀼𑀮𑀺𑀓𑀁 𑀤𑀸𑀧𑁂𑀢𑁆𑀯𑀸 𑀕𑀻𑀯𑀸𑀬 𑀫𑀸𑀮𑀸𑀤𑀸𑀫𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀅𑀬𑁄𑀤𑀸𑀫𑁂𑀦 𑀩𑀦𑁆𑀥𑀸𑀧𑁂𑀢𑁆𑀯𑀸 𑀏𑀯𑀁 𑀘𑀺𑀦𑁆𑀢𑁂𑀲𑀺? 𑀬𑀤𑀺 𑀧𑀦 𑀪𑀕𑀯𑀢𑁄 𑀦𑀮𑀸𑀝𑀥𑀸𑀢𑀼 𑀬𑀲𑁆𑀫𑀺𑀁 𑀞𑀸𑀦𑁂 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀮𑁄𑀓𑀢𑁆𑀣𑀘𑀭𑀺𑀬𑀁 𑀓𑀭𑁄𑀦𑁆𑀢𑀻 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑀸𑀲𑀦𑀁 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀺 𑀢𑀲𑁆𑀫𑀺𑀁 𑀞𑀸𑀦𑁂 𑀕𑁄𑀡𑀸 𑀲𑀬𑀫𑁂𑀯 𑀅𑀬𑁄𑀤𑀸𑀫𑀢𑁄 𑀫𑀼𑀜𑁆𑀘𑀺𑀢𑁆𑀯𑀸 𑀣𑀼𑀧𑀝𑁆𑀞𑀸𑀦𑀁 𑀲𑀫𑀦𑁆𑀢𑀢𑁄 𑀯𑀺𑀘𑀭𑀺𑀢𑁆𑀯𑀸 𑀘𑀢𑀼𑀲𑀼 𑀤𑀺𑀲𑀸𑀲𑀼 𑀲𑀬𑀦𑁆𑀢𑀼𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀼𑀭𑀺𑀲𑁂 𑀆𑀡𑀸𑀧𑁂𑀲𑀺. 𑀢𑁂 𑀢𑀣𑁂𑀯 𑀅𑀓𑀁𑀲𑀼. 𑀢𑀢𑁄 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀭𑀸𑀚𑀸𑀕𑁄𑀡𑁂 𑀕𑀸𑀳𑀸𑀧𑀦𑀢𑁆𑀣𑀸𑀬 𑀆𑀬𑀼𑀢𑁆𑀢𑀓𑁂 𑀆𑀡𑀸𑀧𑁂𑀲𑀺. 𑀢𑁂 𑀫𑀦𑀼𑀲𑁆𑀲𑀸 𑀕𑀦𑁆𑀢𑁆𑀯𑀸 𑀕𑁄𑀡𑁂 𑀅𑀧𑀲𑁆𑀲𑀺𑀢𑁆𑀯𑀸 𑀦 𑀧𑀲𑁆𑀲𑀸𑀫 𑀤𑁂𑀯𑀸’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀕𑀘𑁆𑀙 𑀪𑀡𑁂, 𑀕𑁄𑀡𑀸𑀦𑀁 𑀕𑀢𑀝𑁆𑀞𑀸𑀦𑀁 𑀑𑀮𑁄𑀓𑁂𑀣𑀸’𑀢𑀺 𑀆𑀳. 𑀢𑁂 𑀕𑀯𑁂𑀲𑀫𑀸𑀦𑀸 𑀩𑀦𑁆𑀥𑀦𑀝𑁆𑀞𑀸𑀦𑁂 𑀅𑀤𑀺𑀲𑁆𑀯𑀸 𑀧𑀤𑀸𑀦𑀼𑀧𑀤𑀁 𑀕𑀦𑁆𑀢𑁆𑀯𑀸 𑀣𑀽𑀧𑀓𑀭𑀡𑀝𑁆𑀞𑀸𑀦𑀁 𑀲𑀫𑀦𑁆𑀢𑀸 𑀯𑀺𑀘𑀭𑀺𑀢𑁆𑀯𑀸 𑀘𑀢𑀼𑀲𑀼 𑀤𑀺𑀲𑀸𑀲𑀼 𑀲𑀬𑀺𑀢𑀕𑁄𑀡𑁂 𑀤𑀺𑀲𑁆𑀯𑀸 𑀲𑀬𑀺𑀢𑀝𑁆𑀞𑀸𑀦𑀢𑁄 𑀦𑀗𑁆𑀕𑀼𑀝𑁆𑀞𑀸𑀤𑀻𑀦𑀺 𑀫𑀤𑁆𑀤𑀦𑁆𑀢𑀸𑀧𑀺 𑀉𑀝𑁆𑀞𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁; 𑀤𑁂𑀯, 𑀕𑁄𑀡𑀸 𑀦 𑀉𑀝𑁆𑀞𑀳𑀦𑁆𑀢𑀺, 𑀏𑀓𑀁 𑀞𑀸𑀦𑀁 𑀲𑀫𑀦𑁆𑀢𑀸 𑀯𑀺𑀘𑀭𑀺𑀢𑁆𑀯𑀸 𑀘𑀢𑀼𑀲𑀼 𑀤𑀺𑀲𑀸𑀲𑀼 𑀲𑀬𑀺𑀢𑀸’𑀢𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀲𑁂𑀦𑀗𑁆𑀕𑀧𑀭𑀺𑀯𑀼𑀢𑁄 𑀲𑀬𑀫𑁂𑀯 𑀕𑀦𑁆𑀢𑁆𑀯𑀸’𑀧𑀺 𑀕𑁄𑀡𑁂 𑀉𑀝𑁆𑀞𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀭𑀸𑀚𑀸 𑀏𑀯𑀁 𑀅𑀥𑀺𑀝𑁆𑀞𑀸𑀲𑀺; 𑀬𑀤𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀥𑀸𑀢𑀼 𑀧𑀢𑀺𑀝𑁆𑀞𑀸𑀧𑁂𑀢𑀩𑁆𑀩𑀸 𑀪𑀯𑁂𑀬𑁆𑀬 𑀕𑁄𑀡𑀸 𑀉𑀝𑁆𑀞𑀳𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀼’𑀢𑀺. 𑀕𑁄𑀡𑀸 𑀘𑀺𑀢𑁆𑀢𑀓𑁆𑀔𑀡𑁂𑀬𑁂𑀯 𑀉𑀝𑁆𑀞𑀳𑀺𑀢𑁆𑀯𑀸 𑀧𑀮𑀸𑀬𑀺𑀁𑀲𑀼. 𑀭𑀸𑀚𑀸 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀫𑀦𑁄 𑀳𑀼𑀢𑁆𑀯𑀸 𑀧𑀼𑀦𑁂𑀓𑀤𑀺𑀯𑀲𑀁 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀅𑀲𑁆𑀲𑁂 ¶ 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀅𑀬𑁄𑀤𑀸𑀫𑁂𑀦 𑀩𑀦𑁆𑀥𑀸𑀧𑁂𑀢𑁆𑀯𑀸 𑀞𑀧𑁂𑀲𑀺. 𑀅𑀲𑁆𑀲𑀸𑀧𑀺 𑀢𑁂 𑀕𑁄𑀡𑀸 𑀯𑀺𑀬 𑀕𑀦𑁆𑀢𑁆𑀯𑀸 𑀦𑀺𑀧𑀚𑁆𑀚𑀺𑀁𑀲𑀼. 𑀭𑀸𑀚𑀸 𑀕𑀦𑁆𑀢𑁆𑀯𑀸 𑀢𑀣𑁂𑀯 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀅𑀲𑁆𑀲𑁂 𑀉𑀝𑁆𑀞𑀸𑀧𑁂𑀲𑀺. 𑀧𑀼𑀦𑁂𑀓𑀤𑀺𑀯𑀲𑀁 𑀳𑀢𑁆𑀣𑀻𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀢𑀣𑁂𑀯 𑀅𑀥𑀺𑀝𑁆𑀞𑀸𑀲𑀺. 𑀲𑁄𑀧𑀺 𑀩𑀦𑁆𑀥𑀤𑀸𑀫𑁂 𑀙𑀺𑀦𑁆𑀤𑀺𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀕𑀦𑁆𑀢𑁆𑀯𑀸 𑀘𑁂𑀢𑀺𑀬𑀓𑀭𑀡𑀝𑁆𑀞𑀸𑀦𑁂 𑀦𑀺𑀧𑀚𑁆𑀚𑀺. 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀭𑀸𑀚𑀸 𑀳𑀢𑁆𑀣𑀻𑀕𑁄𑀧𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀳𑀢𑁆𑀣𑀺𑀁 𑀆𑀦𑁂𑀣𑀸’𑀢𑀺 𑀆𑀳. 𑀳𑀢𑁆𑀣𑀺𑀕𑁄𑀧𑀓𑀸 𑀳𑀢𑁆𑀣𑀺𑀁 𑀩𑀦𑁆𑀥𑀦𑀝𑁆𑀞𑀸𑀦𑁂 𑀅𑀤𑀺𑀲𑁆𑀯𑀸, 𑀳𑀢𑁆𑀣𑀺𑀁 𑀩𑀦𑁆𑀥𑀦𑀝𑁆𑀞𑀸𑀦𑁂 𑀦 𑀧𑀲𑁆𑀲𑀸𑀫 𑀤𑁂𑀯𑀸’𑀢𑀺 𑀆𑀳𑀁𑀲𑀼. 𑀢𑁂𑀦𑀳𑀺 𑀪𑀡𑁂, 𑀲𑀻𑀖𑀁 𑀉𑀧𑀥𑀸𑀭𑁂𑀣𑀸’𑀢𑀺 𑀯𑀼𑀢𑁆𑀢𑁂 𑀳𑀢𑁆𑀣𑀺𑀕𑁄𑀧𑀓𑀸 𑀧𑀤𑀸𑀦𑀼𑀧𑀤𑀁 𑀕𑀯𑁂𑀲𑀫𑀸𑀦𑀸 𑀘𑁂𑀢𑀺𑀬𑀝𑁆𑀞𑀸𑀦𑁂 𑀦𑀺𑀧𑀦𑁆𑀦𑀁 𑀳𑀢𑁆𑀣𑀺𑀁 𑀤𑀺𑀲𑁆𑀯𑀸 𑀆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀳𑀢𑁆𑀣𑀺𑀁 𑀧𑀼𑀭𑁂 𑀓𑀢𑁆𑀯𑀸 𑀆𑀕𑀘𑁆𑀙𑀺.

𑀏𑀯𑀁 𑀢𑀻𑀳𑀺 𑀯𑀺𑀫𑀁𑀲𑀦𑀸𑀳𑀺 𑀯𑀻𑀫𑀁𑀲𑁂𑀢𑁆𑀯𑀸 𑀪𑀼𑀫𑀺𑀕𑀳𑀺𑀢𑀪𑀸𑀯𑀁 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀉𑀧𑀝𑁆𑀞𑀳𑀫𑀸𑀦𑁄 𑀆𑀭𑁄𑀘𑁂𑀲𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀲𑁂𑀭𑀼𑀦𑀕𑀭𑁂 𑀲𑀺𑀯𑀭𑀸𑀚𑀸 𑀩𑀳𑀽 𑀧𑀡𑁆𑀡𑀸𑀓𑀸𑀭𑁂 𑀕𑀸𑀳𑀸𑀧𑁂𑀢𑁆𑀯𑀸 𑀭𑀸𑀚𑀸𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀺’𑀢𑀺 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀭𑀸𑀚𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑀸𑀮𑁂 𑀮𑁄𑀡𑀦𑀕𑀭𑁂 𑀫𑀳𑀸𑀦𑀸𑀕𑀭𑀸𑀚𑀸’𑀧𑀺 𑀩𑀳𑀼𑀧𑀡𑁆𑀡𑀸𑀓𑀸𑀭𑀁 𑀕𑀸𑀳𑀸𑀧𑁂𑀢𑁆𑀯𑀸 𑀭𑀸𑀚𑀸𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀺’𑀢𑀺 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀅𑀓𑀸𑀲𑀺; 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀤𑀲𑀩𑀮𑀥𑀸𑀢𑀼𑀁 𑀧𑀢𑀺𑀝𑁆𑀞𑀸𑀧𑁂𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀫𑀫 𑀲𑀳𑀸𑀬𑀸 𑀳𑁄𑀣𑀸’𑀢𑀺 𑀢𑁂 𑀕𑀳𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀥𑀸𑀢𑀼𑀁 𑀯𑀦𑁆𑀤𑀣𑀸’𑀢𑀺 𑀯𑀦𑁆𑀤𑀸𑀧𑁂𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀥𑀸𑀢𑀼𑀢𑁄 𑀙𑀩𑁆𑀩𑀡𑁆𑀡𑀭𑀁𑀲𑀺𑀬𑁄 𑀉𑀕𑁆𑀕𑀘𑁆𑀙𑀺𑀁𑀲𑀼. 𑀤𑁂𑀯𑀸 𑀲𑀸𑀥𑀼𑀓𑀸𑀭𑀁 𑀓𑀭𑁄𑀦𑁆𑀢𑀸 𑀆𑀓𑀸𑀲𑀢𑁄 𑀫𑀸𑀮𑀸𑀬𑁄 𑀔𑀺𑀧𑀺𑀁𑀲𑀼. 𑀭𑀸𑀚𑀸𑀦𑁄 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸 𑀅𑀫𑁆𑀳𑀸𑀓𑀁 𑀮𑀗𑁆𑀓𑀸𑀬𑀁 𑀤𑀲𑀩𑀮𑀲𑁆𑀲 𑀦𑀮𑀸𑀝𑀥𑀸𑀢𑀼 𑀅𑀫𑁆𑀳𑀸𑀓𑀁 𑀭𑀝𑁆𑀞𑁂 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀺. 𑀏𑀲𑀸 𑀥𑀸𑀢𑀼 𑀫𑀳𑀸 𑀚𑀦𑀲𑁆𑀲 𑀲𑀢𑁆𑀣𑀼𑀓𑀺𑀘𑁆𑀘𑀁 𑀲𑀸𑀥𑁂𑀬𑁆𑀬𑀸𑀢𑀺 𑀯𑀦𑁆𑀤𑀺𑀢𑁆𑀯𑀸 𑀕𑀢𑀸. 𑀭𑀸𑀚𑀸 𑀢𑁂𑀲𑀁 𑀕𑀢𑀓𑀸𑀮𑁂 𑀕𑀺𑀭𑀺𑀅𑀪𑀬𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀢𑀸𑀢, 𑀇𑀝𑁆𑀞𑀓𑀁 𑀚𑀦𑀲𑁆𑀲 𑀧𑀻𑀴𑀦𑀁 𑀅𑀓𑀢𑁆𑀯𑀸 𑀓𑀸𑀭𑀸𑀧𑁂𑀫𑀸’𑀢𑀻 𑀆𑀳. 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣 𑀤𑁂𑀯, 𑀅𑀳𑀁 ¶ 𑀇𑀝𑁆𑀞𑀓𑀁 𑀓𑀸𑀭𑀸𑀧𑁂𑀲𑁆𑀲𑀸𑀫𑀻𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀧𑀧𑀜𑁆𑀘𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀆𑀳. 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀲𑀼𑀯𑀡𑁆𑀡𑀭𑀚𑀢𑀸𑀦𑀺 𑀫𑀦𑁆𑀤𑀸𑀦𑀺 𑀓𑀼𑀢𑁄 𑀮𑀪𑀺𑀲𑁆𑀲𑀸𑀫𑀸’𑀢𑀺 𑀯𑀼𑀢𑁆𑀢𑁂 𑀕𑀺𑀭𑀺𑀅𑀪𑀬𑁄 𑀏𑀯𑀫𑀸𑀳; 𑀤𑁂𑀯, 𑀲𑀢𑁆𑀣𑀸 𑀫𑀳𑀸𑀧𑀼𑀜𑁆𑀜𑁄 𑀫𑀳𑀦𑁆𑀢𑀁 𑀧𑀽𑀚𑀸𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀮𑀪𑀺𑀲𑁆𑀲𑀢𑀺. 𑀢𑁆𑀯𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 𑀘𑁂𑀢𑀺𑀬𑀓𑀫𑁆𑀫𑀁 𑀧𑀝𑁆𑀞𑀧𑁂𑀳𑀻’𑀢𑀺 𑀆𑀳.

𑀲𑁄 𑀢𑀲𑁆𑀲 𑀢𑀁 𑀅𑀘𑀺𑀦𑁆𑀢𑀦𑀻𑀬𑀁 𑀓𑀣𑀁 𑀲𑀼𑀢𑁆𑀯𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀥𑀸𑀢𑀼𑀁 𑀯𑀦𑁆𑀤𑀺𑀢𑁆𑀯𑀸 𑀦𑀕𑀭𑀁 𑀕𑀦𑁆𑀢𑁆𑀯𑀸 𑀪𑀼𑀢𑁆𑀢𑀲𑀸𑀬𑀫𑀸𑀲𑁄 𑀲𑀬𑀦𑁂 𑀦𑀺𑀧𑀦𑁆𑀦𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀧𑀩𑀼𑀚𑁆𑀛𑀺𑀢𑁆𑀯𑀸 𑀇𑀝𑁆𑀞𑀓𑀁 𑀘𑀺𑀦𑁆𑀢𑀬𑀫𑀸𑀦𑀲𑁆𑀲 𑀤𑁄𑀫𑀦𑀲𑁆𑀲𑀁 𑀅𑀳𑁄𑀲𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀯𑀺𑀲𑁆𑀲𑀓𑀫𑁆𑀫𑀁 𑀤𑁂𑀯𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀢𑁆𑀯𑀸; 𑀢𑀸𑀢, 𑀯𑀺𑀲𑁆𑀲𑀓𑀫𑁆𑀫, 𑀓𑀸𑀓𑀯𑀡𑁆𑀡𑀢𑀺𑀲𑁆𑀲𑀫𑀳𑀸𑀭𑀸𑀚𑀸 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼𑀦𑁄 𑀦𑀮𑀸𑀝 𑀥𑀸𑀢𑀼𑀁 𑀦𑀺𑀤𑀳𑀺𑀢𑁆𑀯𑀸 𑀫𑀳𑀦𑁆𑀢𑀁 𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀢𑀼𑀓𑀸𑀫𑁄 𑀇𑀝𑁆𑀞𑀓𑀁 𑀘𑀺𑀦𑁆𑀢𑀬𑀺. 𑀢𑁆𑀯𑀁 𑀕𑀦𑁆𑀢𑁆𑀯𑀸 𑀨𑀸𑀲𑀼𑀓𑀝𑁆𑀞𑀸𑀦𑁂 𑀇𑀝𑁆𑀞𑀓𑀁 𑀫𑀸𑀧𑁂𑀳𑀻𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀯𑀺𑀲𑁆𑀲𑀓𑀫𑁆𑀫𑀤𑁂𑀯𑀧𑀼𑀢𑁆𑀢𑁄 𑀤𑀼𑀕𑁆𑀕𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀔𑁂𑀢𑁆𑀢𑁂 𑀇𑀝𑁆𑀞𑀓𑀁 𑀫𑀸𑀧𑁂𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀕𑀢𑁄. 𑀢𑀲𑁆𑀫𑀺𑀁 𑀔𑀡𑁂 𑀔𑁂𑀢𑁆𑀢𑀲𑀸𑀫𑀺𑀓𑁄 𑀤𑀼𑀕𑁆𑀕𑀢𑀩𑁆𑀭𑀸𑀳𑁆𑀫𑀡𑁄 𑀧𑀸𑀢𑁄𑀯 𑀅𑀢𑁆𑀢𑀦𑁄 𑀔𑁂𑀢𑁆𑀢𑀁 𑀑𑀮𑁄𑀓𑀦𑀢𑁆𑀣𑀸𑀬 𑀕𑀢𑁄 𑀇𑀢𑁄𑀯𑀺𑀢𑁄 𑀑𑀮𑁄𑀓𑁂𑀦𑁆𑀢𑁄 𑀇𑀝𑁆𑀞𑀓𑀭𑀸𑀲𑀺𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺; 𑀳𑀻𑀬𑁄 𑀭𑀸𑀚𑀸 𑀇𑀝𑁆𑀞𑀓𑀁 𑀓𑀣𑀁 𑀮𑀪𑀺𑀲𑁆𑀲𑀸𑀫𑀻𑀢𑀺 𑀓𑀣𑁂𑀲𑀺. 𑀫𑀳𑀦𑁆𑀢𑀁 𑀯𑀢 𑀧𑀡𑁆𑀡𑀸𑀓𑀸𑀭𑀁 𑀫𑀬𑀸 𑀮𑀤𑁆𑀥𑀦𑁆𑀢𑀺 𑀢𑀼𑀝𑁆𑀞𑁄 𑀤𑁂𑀯𑁆ै𑀝𑁆𑀞𑀓𑀸𑀦𑀺 𑀓𑀸𑀚𑁂𑀦 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑀦𑀢𑁆𑀣𑀸𑀬 𑀕𑀦𑁆𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑁂 𑀞𑀢𑁆𑀯𑀸 𑀲𑀸𑀲𑀦𑀁 𑀧𑀳𑀺𑀡𑀺. 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀓𑀲𑁆𑀫𑀸 𑀧𑀸𑀢𑁄’𑀯 𑀆𑀕𑀢𑁄𑀲𑀻’𑀢𑀺 𑀧𑀼𑀘𑁆𑀙𑀺. 𑀤𑁂𑀯 𑀫𑀬𑁆𑀳𑀁 𑀔𑁂𑀢𑁆𑀢𑁂 𑀇𑀝𑁆𑀞𑀓𑀭𑀸𑀲𑀺𑀁 𑀤𑀺𑀲𑁆𑀯𑀸 𑀧𑀸𑀢𑁄’𑀯 𑀇𑀝𑁆𑀞𑀓𑀸𑀦𑀺 𑀕𑀳𑁂𑀢𑁆𑀯𑀸 𑀆𑀕𑀢𑁄𑀫𑁆𑀳𑀻’𑀢𑀺. 𑀈𑀤𑀺𑀲𑀸𑀦𑀺 𑀇𑀝𑁆𑀞𑀓𑀸𑀦𑀺 𑀘𑁂𑀢𑀺𑀬𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀸𑀦𑀻𑀢𑀺 𑀤𑀲𑁆𑀲𑁂𑀲𑀺. 𑀭𑀸𑀚𑀸 𑀧𑀲𑁆𑀲𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀩𑀳𑀼𑀁 𑀥𑀦𑀁 𑀤𑀸𑀧𑁂𑀲𑀺.

𑀢𑀲𑁆𑀫𑀺𑀁 ¶ 𑀔𑀡𑁂 𑀅𑀜𑁆𑀜𑀁 𑀲𑀸𑀲𑀦𑀁 𑀆𑀳𑀭𑀺. 𑀫𑀤𑀦𑀧𑀝𑁆𑀝𑀦𑀤𑁆𑀯𑀸𑀭𑀢𑁄 𑀘𑀢𑀲𑁆𑀲𑁄 𑀭𑀚𑀢𑀦𑀸𑀯𑀸 𑀲𑀼𑀯𑀡𑁆𑀡𑀪𑀼𑀫𑀺𑀢𑁄 𑀘𑀢𑀲𑁆𑀲𑁄 𑀲𑀼𑀯𑀡𑁆𑀡𑀦𑀸𑀯𑀸 𑀉𑀓𑁆𑀓𑀫𑀺𑀁𑀲𑀽𑀢𑀺 𑀧𑀝𑁆𑀝𑀦𑀫𑀼𑀔𑀤𑁆𑀯𑀸𑀭𑁂 𑀯𑀺𑀳𑀭𑀦𑁆𑀢𑁄 𑀆𑀭𑀓𑁆𑀔𑀓 𑀚𑁂𑀝𑁆𑀞𑀓𑁄 𑀥𑀫𑁆𑀫𑀧𑀸𑀮𑁄 𑀦𑀸𑀫 𑀆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀢𑀼𑀝𑁆𑀞𑁄 𑀲𑀼𑀯𑀡𑁆𑀡𑀭𑀚𑀢𑁂 𑀆𑀳𑀭𑀸𑀧𑁂𑀲𑀺.

(𑀇𑀝𑁆𑀞𑀓𑀁 𑀭𑀚𑀢𑀜𑁆𑀘𑁂𑀯 𑀲𑀼𑀯𑀡𑁆𑀡𑀜𑁆𑀘 𑀫𑀳𑀸𑀭𑀳𑀁;

𑀆𑀳𑀭𑀺𑀢𑁆𑀯𑀸𑀦 𑀢𑀁 𑀲𑀩𑁆𑀩𑀁 𑀓𑀫𑁆𑀫𑀁 𑀆𑀭𑀪𑀺 𑀘𑁂𑀢𑀺𑀬𑁂.

𑀲𑀢𑁆𑀣𑀼 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀭𑀜𑁆𑀜𑁄 𑀧𑀼𑀜𑁆𑀜𑀩𑀮𑁂𑀦 𑀘;

𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀺𑀢𑀁 𑀲𑀩𑁆𑀩𑀁 𑀔𑀡𑁂𑀦𑁂𑀯 𑀲𑀫𑀺𑀚𑁆𑀛𑀢𑀺.)

𑀢𑀢𑁄 𑀭𑀸𑀚𑀸 𑀘𑀽𑀴𑀧𑀺𑀡𑁆𑀟𑀧𑀸𑀢𑀺𑀬𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸? 𑀅𑀬𑁆𑀬 𑀇𑀝𑁆𑀞𑀓𑀪𑀼𑀫𑀺𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 𑀆𑀳. 𑀣𑁂𑀭𑁄 𑀲𑀼𑀢𑁆𑀯𑀸 𑀢𑀼𑀝𑁆𑀞𑁄 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂𑀳𑀺 𑀧𑀜𑁆𑀘𑀲𑀢𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀇𑀝𑁆𑀞𑀓 𑀪𑀽𑀫𑀺𑀁 𑀕𑀢𑁄. 𑀢𑀢𑁄 𑀫𑀳𑀸𑀲𑀸𑀕𑀮𑀢𑁆𑀣𑁂𑀭𑁄 𑀘 𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀘 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂𑀳𑀺 𑀪𑀺𑀓𑁆𑀔𑀼𑀳𑀺 𑀲𑀤𑁆𑀥𑀺𑀁 𑀇𑀝𑁆𑀞𑀓𑀪𑀼𑀫𑀺𑀁 𑀕𑀢𑀸. 𑀲𑀺𑀯 𑀦𑀕𑀭𑁂 𑀭𑀸𑀚𑀸𑀧𑀺 𑀇𑀝𑁆𑀞𑀓𑀪𑀼𑀫𑀺𑀁 𑀕𑀢𑁄. 𑀮𑁄𑀡𑀦𑀕𑀭𑁂 𑀦𑀸𑀕𑀭𑀸𑀚𑀸𑀧𑀺 𑀇𑀝𑁆𑀞𑀓𑀪𑀼𑀫𑀺𑀁 𑀕𑀢𑁄. 𑀲𑁄𑀫𑀦𑀕𑀭𑁂 𑀕𑀺𑀭𑀺𑀅𑀪𑀬𑀭𑀸𑀚𑀸𑀧𑀺 𑀅𑀢𑁆𑀢𑀦𑁄 𑀲𑁂𑀦𑀗𑁆𑀕𑁂𑀳𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀇𑀝𑁆𑀞𑀓𑀪𑀼𑀫𑀺𑀁 𑀕𑀢𑁄. 𑀢𑁂𑀲𑀁 𑀲𑀫𑀡 𑀩𑁆𑀭𑀸𑀳𑁆𑀫𑀡𑀸𑀦𑀁 𑀭𑀸𑀚𑀩𑀴𑀸𑀦𑀜𑁆𑀘 𑀲𑀫𑁆𑀧𑀺𑀡𑁆𑀟𑀺𑀢𑀢𑁆𑀢𑀸 𑀲𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀩𑀮𑀯𑀸𑀳𑀦𑁄 𑀦𑀸𑀫 𑀚𑀸𑀢𑁄. 𑀢𑁂 𑀲𑀩𑁆𑀩𑁂 𑀇𑀝𑁆𑀞𑀓𑀪𑀼𑀫𑀺𑀁 𑀲𑀫𑁄𑀲𑀭𑀺𑀁𑀲𑀼. 𑀣𑁂𑀭𑁄 𑀇𑀝𑁆𑀞𑀓𑀭𑀸𑀲𑀺𑀁 𑀑𑀮𑁄𑀓𑁂𑀢𑁆𑀯𑀸 𑀭𑀸𑀚𑀸𑀦𑀁 𑀏𑀯𑀫𑀸𑀳? 𑀫𑀳𑀸𑀭𑀸𑀚, 𑀅𑀬𑀁 𑀇𑀝𑁆𑀞𑀓𑀭𑀸𑀲𑀺 𑀘𑁂𑀢𑀺𑀬𑁂 𑀲𑀩𑁆𑀩𑀓𑀫𑁆𑀫𑀢𑁆𑀣𑀸𑀬 𑀧𑀳𑁄𑀢𑀻’𑀢𑀺. 𑀭𑀸𑀚𑀸 𑀅𑀢𑁆𑀢𑀫𑀦𑁄 𑀲𑁂𑀦𑀗𑁆𑀕𑀧𑀭𑀺𑀯𑀼𑀢𑁄 𑀲𑀬𑀫𑁂𑀯 𑀧𑀞𑀫𑀁 𑀇𑀝𑁆𑀞𑀓𑀁 𑀕𑀡𑁆𑀳𑀺. 𑀢𑀁 𑀤𑀺𑀲𑁆𑀯𑀸 𑀲𑁂𑀲𑀭𑀸𑀚𑀸𑀦𑁄 𑀘 𑀅𑀫𑀘𑁆𑀘𑀸𑀤𑀬𑁄 𑀘 𑀧𑀭𑀺𑀲𑀸 𑀘 𑀲𑀩𑁆𑀩𑁂 𑀪𑀺𑀓𑁆𑀔𑀼 𑀘 𑀇𑀝𑁆𑀞𑀓𑀸𑀦𑀺 𑀕𑀡𑁆𑀳𑀺𑀁𑀲𑀼 𑀢𑀲𑁆𑀫𑀺𑀁 𑀓𑀸𑀮𑁂 𑀪𑀸𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀫𑀦𑀁 𑀧𑀧𑀜𑁆𑀘𑀁 𑀪𑀯𑀺𑀲𑁆𑀲𑀢𑀻’𑀢𑀺 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺. 𑀣𑁂𑀭𑁄 𑀢𑀲𑁆𑀲 𑀘𑀺𑀢𑁆𑀢𑀁 𑀚𑀸𑀦𑀺𑀢𑁆𑀯𑀸 𑀏𑀯𑀫𑀸𑀳? 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣 𑀫𑀳𑀸𑀭𑀸𑀚, 𑀇𑀝𑁆𑀞𑀓𑀸𑀦𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙. 𑀧𑀘𑁆𑀙𑀸 𑀤𑁂𑀯𑀦𑀸𑀕𑀸𑀤𑀬𑁄 𑀇𑀝𑁆𑀞𑀓𑀪𑀼𑀫𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀘𑁂𑀢𑀺𑀬𑀝𑁆𑀞𑀸𑀦𑀁 𑀦𑀺𑀭𑀦𑁆𑀢𑀭𑀸 𑀞𑀺𑀢𑀸 𑀆𑀳𑀭𑀺𑀲𑁆𑀲𑀦𑁆𑀢𑀻’𑀢𑀺. 𑀢𑁂 𑀆𑀳𑀭𑀺𑀢𑁆𑀯𑀸 𑀘𑁂𑀢𑀺𑀬𑀝𑁆𑀞𑀸𑀦𑁂 𑀭𑀸𑀲𑀺𑀁 𑀓𑀭𑁄𑀦𑁆𑀢𑀺. 𑀢𑁂𑀦𑁂𑀯 ¶ 𑀦𑀻𑀬𑀸𑀫𑁂𑀦 𑀬𑀸𑀯 𑀘𑁂𑀢𑀺𑀬𑀲𑁆𑀲 𑀦𑀺𑀝𑁆𑀞𑀗𑁆𑀕𑀫𑀸 𑀢𑀸𑀯 𑀤𑁂𑀯𑀦𑀸𑀕𑀲𑀼𑀧𑀡𑁆𑀡𑀸𑀤𑀬𑁄 𑀦𑀺𑀭𑀦𑁆𑀢𑀭𑀁 𑀞𑀢𑁆𑀯𑀸 𑀇𑀝𑁆𑀞𑀓𑀸𑀦𑀺 𑀆𑀳𑀭𑀺𑀢𑁆𑀯𑀸 𑀘𑁂𑀢𑀺𑀬𑀓𑀭𑀡𑀝𑁆𑀞𑀸𑀦𑁂𑀯 𑀘𑀢𑀼𑀲𑀼 𑀤𑀺𑀲𑀸𑀲𑀼 𑀭𑀸𑀲𑀺𑀁 𑀅𑀓𑀁𑀲𑀼.

𑀢𑀢𑁄 𑀭𑀸𑀚𑀸 𑀲𑀩𑁆𑀩𑁂 𑀇𑀝𑁆𑀞𑀓𑀯𑀟𑁆𑀠𑀓𑀻 𑀭𑀸𑀲𑀺𑀁 𑀓𑀸𑀭𑀸𑀧𑁂𑀢𑁆𑀯𑀸 𑀢𑁂𑀲𑀁 𑀯𑀟𑁆𑀠𑀓𑀻𑀦𑀁 𑀅𑀦𑁆𑀢𑀭𑁂 𑀚𑀬𑀲𑁂𑀦𑀁 𑀦𑀸𑀫 𑀇𑀝𑁆𑀞𑀓𑀯𑀟𑁆𑀠𑀓𑀺𑀁 𑀧𑀭𑀺𑀕𑀡𑁆𑀳𑀺𑀢𑁆𑀯𑀸 𑀢𑀲𑁆𑀲 𑀧𑀦 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀸𑀦𑀺 𑀤𑁆𑀯𑁂 𑀲𑀸𑀝𑀓𑀸𑀦𑀺 𑀓𑀳𑀸𑀧𑀡𑀲𑀢𑀲𑀳𑀲𑁆𑀲𑀸𑀦𑀺 𑀘 𑀲𑀼𑀯𑀡𑁆𑀡𑀓𑀼𑀡𑁆𑀟𑀮𑀸𑀤𑀬𑁄 𑀆𑀪𑀭𑀡𑀸𑀦𑀺 𑀘 𑀤𑀸𑀧𑁂𑀲𑀺. 𑀢𑀲𑁆𑀲 𑀧𑀭𑀺𑀯𑀸𑀭𑀸𑀦𑀁 𑀯𑀟𑁆𑀠𑀓𑀻𑀦𑀁 𑀅𑀳𑀢𑀯𑀢𑁆𑀣𑀸𑀤𑀻𑀦𑀺 𑀲𑀩𑁆𑀩𑀼𑀧𑀓𑀭𑀡𑀸𑀦𑀺 𑀤𑀸𑀧𑁂𑀲𑀺. 𑀅𑀦𑁂𑀓𑀯𑀺𑀥𑀁 𑀫𑀳𑀦𑁆𑀢𑀁 𑀲𑀫𑁆𑀫𑀸𑀦𑀁 𑀓𑀸𑀭𑁂𑀢𑁆𑀯𑀸 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀦𑁆𑀢𑁄; 𑀅𑀬𑁆𑀬 𑀅𑀚𑁆𑀚 𑀯𑀺𑀲𑀸𑀔𑀧𑀼𑀡𑁆𑀡𑀫𑀻 𑀉𑀧𑁄𑀲𑀣𑀤𑀺𑀯𑀲𑁄, 𑀢𑀲𑁆𑀫𑀸 𑀦𑀮𑀸𑀝𑀥𑀸𑀢𑀼𑀬𑀸 𑀫𑀗𑁆𑀕𑀮𑀁 𑀓𑀭𑀺𑀢𑁆𑀯𑀸 𑀘𑁂𑀢𑀺𑀬𑀝𑁆𑀞𑀸𑀦𑁂 𑀇𑀝𑁆𑀞𑀓𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁 𑀯𑀝𑁆𑀝𑀢𑀻’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀣𑁂𑀭𑁄; 𑀪𑀤𑁆𑀤𑀓𑀁 𑀫𑀳𑀸𑀭𑀸𑀚, 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀚𑀸𑀢𑀤𑀺𑀯𑀲𑁄’𑀢𑀺 𑀯𑀢𑁆𑀯𑀸 𑀘𑁂𑀢𑀺𑀬𑀓𑀫𑁆𑀫𑀓𑀭𑀡𑀢𑁆𑀣𑀸𑀬 𑀧𑀜𑁆𑀘 𑀚𑀦𑁂 𑀕𑀡𑁆𑀳𑀺. 𑀢𑁂𑀲𑀼 𑀏𑀓𑁄 𑀯𑀭𑀤𑁂𑀯𑁄 𑀦𑀸𑀫, 𑀏𑀓𑁄 𑀲𑀗𑁆𑀔𑁄 𑀦𑀸𑀫, 𑀏𑀓𑁄 𑀯𑀺𑀚𑁆𑀚𑁄 𑀦𑀸𑀫, 𑀏𑀓𑁄 𑀧𑀼𑀲𑁆𑀲𑀤𑁂𑀯𑁄 𑀦𑀸𑀫, 𑀏𑀓𑁄 𑀫𑀳𑀸𑀤𑁂𑀯𑁄 𑀦𑀸𑀫. 𑀇𑀫𑁂𑀲𑀁 𑀯𑀟𑁆𑀠𑀓𑀻𑀦𑀁 𑀫𑀗𑁆𑀕𑀮𑀁 𑀓𑀸𑀭𑀸𑀧𑁂𑀢𑁆𑀯𑀸 𑀙𑀡𑀯𑁂𑀲𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀭𑀸𑀚𑀸 𑀲𑀬𑀫𑁆𑀧𑀺 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀦 𑀧𑀢𑀺𑀫𑀡𑁆𑀟𑀺𑀢𑁄 𑀫𑀗𑁆𑀕𑀮𑀯𑀺𑀥𑀸𑀦𑀁 𑀓𑀸𑀭𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀘𑀢𑀼𑀲𑀼 𑀞𑀸𑀦𑁂𑀲𑀼 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀯𑀺𑀚𑀫𑁆𑀳𑁂𑀢𑁆𑀯𑀸 𑀲𑀼𑀯𑀡𑁆𑀡𑀖𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀲𑀼𑀯𑀡𑁆𑀡𑀔𑀘𑀺𑀢𑀁 𑀫𑀡𑀺𑀫𑀼𑀢𑁆𑀢𑀸𑀭𑀢𑀦𑀫𑀬𑀁 𑀧𑀭𑀺𑀩𑁆𑀪𑀫𑀦𑀤𑀡𑁆𑀟𑀁 𑀚𑀻𑀯𑀫𑀸𑀦𑀓𑀫𑀸𑀢𑀸𑀧𑀺𑀢𑀭𑁂𑀦 𑀉𑀪𑀢𑁄𑀲𑀼𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑁂𑀦 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑁂𑀦 𑀅𑀫𑀘𑁆𑀘𑀧𑀼𑀢𑁆𑀢𑁂𑀦 𑀕𑀸𑀳𑀸𑀧𑁂𑀢𑁆𑀯𑀸 𑀫𑀳𑀦𑁆𑀢𑀁 𑀘𑁂𑀢𑀺𑀬𑀁 𑀢𑀢𑁆𑀣 𑀓𑀭𑁄𑀦𑁆𑀢𑁄 𑀲𑀬𑀫𑁆𑀧𑀺 𑀧𑀭𑀺𑀩𑁆𑀪𑀫𑀦𑀤𑀡𑁆𑀟𑀁 𑀕𑀳𑁂𑀢𑁆𑀯𑀸 𑀧𑀭𑀺𑀓𑀫𑁆𑀫𑀓𑀢𑀪𑀼𑀫𑀺𑀬𑀁 𑀧𑀭𑀺𑀩𑁆𑀪𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀢𑀢𑁄 𑀫𑀳𑀸𑀯𑀟𑁆𑀠𑀓𑀻 𑀲𑀼𑀦𑀓𑁆𑀔𑀢𑁆𑀢𑁂𑀦 𑀲𑀼𑀫𑀼𑀳𑀼𑀢𑁆𑀢𑁂𑀦 𑀘𑁂𑀢𑀺𑀬𑀝𑁆𑀞𑀸𑀦𑁂 𑀇𑀝𑁆𑀞𑀓𑀁 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀢𑀲𑁆𑀫𑀺𑀁 ¶ 𑀔𑀡𑁂 𑀘𑀢𑀼𑀦𑀳𑀼𑀢𑀸𑀥𑀺𑀓 𑀤𑁆𑀯𑀺𑀬𑁄𑀚𑀦 𑀲𑀢𑀲𑀳𑀲𑁆𑀲𑀩𑀳𑀼𑀮𑀸 𑀅𑀬𑀁 𑀫𑀳𑀸𑀧𑀣𑀯𑀻 𑀲𑀸𑀥𑀼𑀓𑀸𑀭𑀁 𑀧𑀯𑀢𑁆𑀢𑁂𑀦𑁆𑀢𑀻 𑀯𑀺𑀬 𑀫𑀳𑀸𑀦𑀸𑀤𑀁 𑀧𑀯𑀢𑁆𑀢𑁂𑀲𑀺. 𑀤𑁂𑀯𑀫𑀦𑀼𑀲𑁆𑀲𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀳𑁄𑀦𑀓-𑀫𑀢𑁆𑀢𑀺𑀓𑀁 𑀦𑀺𑀲𑀤𑁂𑀦 𑀧𑀺𑀁𑀲𑀺𑀢𑁆𑀯𑀸 𑀲𑀼𑀧𑁆𑀧𑁂𑀳𑀺 𑀧𑀧𑁆𑀨𑁄𑀞𑁂𑀢𑁆𑀯𑀸 𑀤𑁂𑀦𑁆𑀢𑀺. 𑀏𑀯𑀁 𑀓𑀭𑁄𑀦𑁆𑀢𑁄 𑀓𑀢𑀺𑀧𑀬𑁂𑀦𑁂𑀯 𑀤𑀺𑀯𑀲𑁂𑀦 𑀧𑀼𑀧𑁆𑀨𑀸𑀥𑀸𑀦𑀢𑁆𑀢𑀬𑀁 𑀘𑀺𑀦𑀺𑀢𑁆𑀯𑀸 𑀫𑀳𑀸𑀪𑀺𑀓𑁆𑀔𑀼 𑀲𑀗𑁆𑀖𑀲𑁆𑀲 𑀦𑀺𑀯𑁂𑀤𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀲𑀗𑁆𑀖𑁄 𑀘𑀼𑀦𑁆𑀤𑀼𑀢𑁆𑀢𑀭𑀦𑀸𑀫𑀓𑁂 𑀤𑁆𑀯𑁂 𑀲𑀸𑀫𑀡𑁂𑀭𑁂 𑀆𑀡𑀸𑀧𑁂𑀲𑀺? 𑀢𑀼𑀫𑁆𑀳𑁂 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀫𑁂𑀤𑀯𑀡𑁆𑀡𑀧𑀸𑀲𑀸𑀡𑁂 𑀆𑀳𑀭𑀣𑀸’𑀢𑀺. 𑀢𑁂 𑀧𑀦 𑀲𑀸𑀫𑀡𑁂𑀭𑀸 𑀚𑀸𑀢𑀺𑀬𑀸 𑀲𑁄𑀴𑀲𑀯𑀲𑁆𑀲𑀺𑀓𑀸 𑀙𑀴𑀪𑀺𑀜𑁆𑀜𑀸𑀧𑁆𑀧𑀪𑁂𑀤𑁂𑀦 𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑀸. 𑀫𑀳𑀸𑀔𑀻𑀡𑀸𑀲𑀯𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀦𑁆𑀢𑀺𑀓𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀆𑀓𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀳𑀺𑀫𑀯𑀦𑁆𑀢𑀢𑁄 𑀅𑀢𑁆𑀢𑀦𑁄 𑀇𑀤𑁆𑀥𑀺𑀩𑀮𑁂𑀦 𑀫𑁂𑀤𑀯𑀡𑁆𑀡𑀧𑀸𑀲𑀸𑀡𑁂 𑀆𑀳𑀭𑀺𑀁𑀲𑀼. 𑀏𑀢𑁂𑀲𑀼 𑀏𑀓𑀁 𑀧𑀸𑀲𑀸𑀡𑀁 𑀥𑀸𑀢𑀼𑀕𑀩𑁆𑀪𑀲𑁆𑀲 𑀪𑀼𑀫𑀺𑀬𑀁 𑀧𑀢𑁆𑀣𑀭𑀺𑀢𑁆𑀯𑀸 𑀘𑀢𑀼𑀲𑀼 𑀧𑀲𑁆𑀲𑁂𑀲𑀼 𑀘𑀢𑁆𑀢𑀸𑀭𑁄 𑀧𑀸𑀲𑀸𑀡𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀧𑀭𑀁 𑀥𑀸𑀢𑀼𑀕𑀩𑁆𑀪𑀁 𑀧𑀺𑀤𑀳𑀺𑀢𑀼𑀁 𑀅𑀤𑀲𑁆𑀲𑀦𑀁 𑀓𑀢𑁆𑀯𑀸 𑀞𑀧𑀬𑀺𑀁𑀲𑀼.

𑀢𑀤𑀸 𑀭𑀸𑀚𑀸 𑀥𑀸𑀢𑀼𑀕𑀩𑁆𑀪𑁂 𑀓𑀫𑁆𑀫𑀁 𑀦𑀺𑀝𑁆𑀞𑀧𑁂𑀦𑁆𑀢𑁄 𑀦𑀯 𑀓𑁄𑀝𑀺𑀧𑁆𑀧𑀫𑀸𑀡𑀁 𑀲𑀼𑀯𑀡𑁆𑀡𑀁 𑀆𑀳𑀭𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀓𑀸𑀭𑀸𑀦𑀁 𑀤𑀢𑁆𑀯𑀸 𑀥𑀸𑀢𑀼𑀕𑀩𑁆𑀪𑀲𑁆𑀲 𑀇𑀝𑁆𑀞𑀓𑀸𑀦𑀺 𑀓𑀭𑁄𑀣𑀸’𑀢𑀺 𑀆𑀡𑀸𑀧𑁂𑀲𑀺. 𑀢𑁂 𑀲𑀼𑀯𑀡𑁆𑀡𑀓𑀸𑀭𑀸 𑀤𑀻𑀖𑀢𑁄 𑀭𑀢𑀦𑀧𑁆𑀧𑀫𑀸𑀡𑀁 𑀧𑀼𑀣𑀼𑀮𑀢𑁄 𑀯𑀺𑀤𑀢𑁆𑀣𑀻𑀧𑁆𑀧𑀫𑀸𑀡𑀁 𑀩𑀳𑀮𑀢𑁄 𑀘𑀢𑀼𑀭𑀗𑁆𑀕𑀼𑀮𑀧𑁆𑀧𑀫𑀸𑀡𑀁 𑀇𑀝𑁆𑀞𑀓𑀁 𑀓𑀢𑁆𑀯𑀸 𑀥𑀸𑀢𑀼𑀕𑀩𑁆𑀪𑀁 𑀘𑀺𑀦𑀺𑀁𑀲𑀼. 𑀢𑀁 𑀧𑀦 𑀥𑀸𑀢𑀼𑀕𑀩𑁆𑀪𑀁 𑀉𑀘𑁆𑀘𑀢𑁄 𑀲𑁄𑀴𑀲𑀳𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄𑀧𑀺 𑀇𑀢𑁄𑀘𑀺𑀢𑁄 𑀤𑀲𑀤𑀲𑀭𑀢𑀦𑀁 𑀓𑀢𑁆𑀯𑀸 𑀲𑀼𑀯𑀡𑁆𑀡𑀺𑀝𑁆𑀞𑀓𑁂𑀳𑁂𑀯 𑀦𑀺𑀝𑁆𑀞𑀧𑁂𑀢𑁆𑀯𑀸 𑀥𑀸𑀢𑀼𑀕𑀩𑁆𑀪𑀲𑁆𑀲 𑀫𑀚𑁆𑀛𑁂 𑀲𑀢𑁆𑀢𑀭𑀢𑀦𑀫𑀬𑀁 𑀲𑀺𑀦𑁂𑀭𑀼𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑀺𑀦𑁂𑀭𑀼𑀲𑁆𑀲 𑀉𑀧𑀭𑀺 𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑁂𑀦 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀲𑀢𑁆𑀢𑀭𑀢𑀦𑁂𑀦 𑀧𑀸𑀭𑀺𑀘𑁆𑀙𑀢𑁆𑀢𑀓𑀭𑀼𑀓𑁆𑀔𑀁 𑀭𑀚𑀢𑀫𑀬𑀁 𑀲𑁂𑀢𑀘𑁆𑀙𑀢𑁆𑀢𑀁 𑀩𑁆𑀭𑀳𑁆𑀫𑀼𑀦𑀸 𑀕𑀸𑀳𑀸𑀧𑁂𑀢𑁆𑀯𑀸 𑀲𑀢𑁆𑀣𑀼𑀦𑁄 𑀧𑀝𑀺𑀫𑀸𑀬 𑀉𑀧𑀭𑀺 𑀥𑀸𑀭𑀺𑀬𑀫𑀸𑀦𑀁 𑀓𑀸𑀭𑁂𑀲𑀺. 𑀲𑀺𑀦𑁂𑀭𑀼𑀧𑀸𑀤𑀫𑀽𑀮𑁂 𑀕𑀦𑁆𑀥𑀓𑀮𑀮𑀧𑀽𑀭𑀺𑀢 𑀦𑀻𑀮𑀼𑀧𑁆𑀧𑀮𑀯𑀺𑀪𑀼𑀲𑀺𑀢𑀲𑀼𑀯𑀡𑁆𑀡𑀫𑀬𑀅𑀝𑁆𑀞𑀼𑀢𑁆𑀢𑀭𑀲𑀢𑀖𑀝𑀧𑀦𑁆𑀢𑀺𑀬𑁄 𑀞𑀧𑀸𑀧𑁂𑀲𑀺. 𑀢𑀤𑀦𑀦𑁆𑀢𑀭𑀁 𑀕𑀦𑁆𑀥𑀓𑀮𑀮𑀧𑀽𑀭𑀺𑀢𑀭𑀢𑁆𑀦𑀧𑀤𑀼𑀫𑀯𑀺𑀪𑀼𑀲𑀺𑀢𑀭𑀚𑀢𑀫𑀬𑀅𑀝𑁆𑀞𑀼𑀢𑁆𑀢𑀭- ¶ 𑀲𑀢𑀖𑀝𑀧𑀦𑁆𑀢𑀺𑀬𑁄 𑀞𑀧𑀸𑀧𑁂𑀲𑀺. 𑀢𑀤𑀦𑀦𑁆𑀢𑀭𑀁 𑀕𑀦𑁆𑀥𑀓𑀮𑀮𑀧𑀽𑀭𑀺𑀢 𑀲𑁂𑀢𑀼𑀧𑁆𑀧𑀮𑀫𑀸𑀮𑀸𑀯𑀺𑀪𑀼𑀲𑀺𑀢𑀫𑀡𑀺𑀫𑀬𑀅𑀝𑁆𑀞𑀼𑀢𑁆𑀢𑀭𑀲𑀢𑀖𑀝𑀧𑀢𑁆𑀢𑀺𑀬𑁄 𑀞𑀧𑀸𑀧𑁂𑀲𑀺. 𑀢𑀤𑀦𑀦𑁆𑀢𑀭𑀁 𑀕𑀦𑁆𑀥𑀓𑀮𑀮𑀧𑀽𑀭𑀺𑀢𑀲𑁂𑀢𑀼𑀧𑁆𑀧𑀮𑀯𑀺𑀪𑀼𑀲𑀺𑀢-𑀫𑀲𑀸𑀭𑀕𑀮𑁆𑀮𑀫𑀬 𑀅𑀝𑁆𑀞𑀼𑀢𑁆𑀢𑀭𑀲𑀢𑀖𑀝𑀧𑀦𑁆𑀢𑀺𑀬𑁄 𑀞𑀧𑀸𑀧𑁂𑀲𑀺. 𑀢𑀤𑀦𑀦𑁆𑀢𑀭𑀁 𑀕𑀦𑁆𑀥𑀓𑀮𑀮𑀧𑀽𑀭𑀺𑀢𑀘𑀫𑁆𑀧𑀓𑀧𑀼𑀧𑁆𑀨𑀯𑀺𑀪𑀼𑀲𑀺𑀢𑀮𑁄𑀳𑀺𑀢𑀗𑁆𑀓𑀫𑀬𑀅𑀝𑁆𑀞𑀼𑀢𑁆𑀢𑀭𑀲𑀢 𑀖𑀝𑀧𑀢𑁆𑀢𑀺𑀬𑁄 𑀞𑀧𑀸𑀧𑁂𑀲𑀺. 𑀢𑀤𑀦𑀦𑁆𑀢𑀭𑀁 𑀕𑀦𑁆𑀥𑀓𑀮𑀮𑀧𑀽𑀭𑀺𑀢𑀧𑀜𑁆𑀘𑀼𑀧𑁆𑀧𑀮𑀯𑀺𑀪𑀼𑀲𑀺𑀢𑀫𑀢𑁆𑀢𑀺𑀓𑀸𑀫𑀬𑀅𑀝𑁆𑀞𑀼𑀢𑁆𑀢𑀭𑀲𑀢𑀖𑀝𑀧𑀦𑁆𑀢𑀺𑀬𑁄 𑀞𑀧𑀸𑀧𑁂𑀲𑀺. 𑀢𑀸𑀲𑀁 𑀖𑀝𑀧𑀦𑁆𑀢𑀻𑀦𑀁 𑀅𑀦𑁆𑀢𑀭𑁂 𑀕𑀦𑁆𑀥𑀓𑀮𑀮𑀧𑀽𑀭𑀺𑀢𑀲𑀢𑁆𑀢𑀭𑀢𑀦𑀫𑀬𑀲𑀭𑀸𑀯𑀓𑁂 𑀞𑀧𑀸𑀧𑁂𑀲𑀺. 𑀓𑀜𑁆𑀘𑀦𑀫𑀬-𑀲𑀢𑁆𑀢𑀭𑀢𑀦𑀫𑀬-𑀯𑀺𑀘𑀺𑀢𑁆𑀢𑀫𑀸𑀮𑀸𑀮𑀢𑀸𑀧𑀼𑀡𑁆𑀡𑀖𑀝𑀲𑀺𑀭𑀺𑀯𑀘𑁆𑀙𑀦𑀦𑁆𑀤𑀺𑀬𑀸𑀯𑀝𑁆𑀝𑀪𑀤𑁆𑀤𑀧𑀻𑀞𑀸𑀤𑀬𑁄 𑀘 𑀳𑀢𑁆𑀣𑀺𑀅𑀲𑁆𑀲𑀲𑀻𑀳𑀯𑁆𑀬𑀕𑁆𑀖𑁄𑀲𑀪𑀧𑀦𑁆𑀢𑀺𑀆𑀤𑀬𑁄 𑀘 𑀓𑀸𑀭𑁂𑀲𑀺. 𑀤𑁂𑀯𑁄𑀭𑁄𑀳𑀡𑀁 𑀬𑀫𑀓𑀧𑀸𑀝𑀺𑀳𑀻𑀭𑀸𑀤𑀬𑁄 𑀥𑀦𑀧𑀸𑀮-𑀅𑀗𑁆𑀕𑀼𑀮𑀺𑀫𑀸𑀮-𑀆𑀴𑀯𑀓𑀤𑀫𑀦𑀸𑀤𑀬𑁄, 𑀲𑀸𑀭𑀺𑀧𑀼𑀢𑁆𑀢-𑀫𑁄𑀕𑁆𑀕𑀮𑁆𑀮𑀸𑀦-𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀸𑀤𑀬𑁄, 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀭𑀽𑀧𑀸𑀤𑀻𑀦𑀺 𑀘 𑀓𑀸𑀭𑀸𑀧𑁂𑀲𑀺. 𑀲𑀺𑀦𑁂𑀭𑀼𑀲𑁆𑀲 𑀫𑀚𑁆𑀛𑀺𑀫𑀪𑀸𑀕𑁂 𑀢𑀸𑀭𑀸𑀕𑀡𑀧𑀭𑀺𑀯𑀸𑀭𑀺𑀢𑀁 𑀭𑀚𑀢𑀫𑀬𑀁 𑀘𑀦𑁆𑀤𑀫𑀡𑁆𑀟𑀮𑀜𑁆𑀘 𑀓𑀸𑀭𑀸𑀧𑁂𑀲𑀺. 𑀭𑀁𑀲𑀺𑀚𑀸𑀮𑀯𑀺𑀪𑀼𑀲𑀺𑀢𑀁 𑀓𑀦𑀓𑀫𑀬𑀁 𑀲𑀽𑀭𑀺𑀬𑀫𑀡𑁆𑀟𑀮𑀜𑁆𑀘 𑀓𑀸𑀭𑀸𑀧𑁂𑀲𑀺.

𑀢𑀢𑁄 𑀲𑀺𑀦𑁂𑀭𑀼𑀲𑁆𑀲 𑀫𑀢𑁆𑀣𑀓𑁂 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀼𑀮𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑁂 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼𑀦𑁄 𑀧𑀝𑀺𑀫𑀁 𑀖𑀦𑀓𑁄𑀝𑁆𑀝𑀺𑀫 𑀭𑀢𑁆𑀢𑀲𑀼𑀯𑀡𑁆𑀡𑀫𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀫𑀸𑀢𑀼𑀤𑁂𑀯𑀧𑀸𑀫𑁄𑀓𑁆𑀔 𑀤𑀲𑀲𑀳𑀲𑁆𑀲 𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀦𑀁 𑀲𑀢𑁆𑀢𑀧𑁆𑀧𑀓𑀭𑀡𑀁 𑀅𑀪𑀺𑀥𑀫𑁆𑀫𑀁 𑀤𑁂𑀲𑀦𑀸𑀓𑀸𑀭𑁂𑀦 𑀦𑀺𑀲𑀻𑀤𑀸𑀧𑁂𑀲𑀺. 𑀢𑀲𑁆𑀲 𑀯𑀻𑀲𑀢𑀺𑀦𑀔𑀸 𑀅𑀓𑁆𑀔𑀺𑀢𑀮𑀸𑀦𑀁 𑀲𑁂𑀢𑀝𑁆𑀞𑀸𑀦𑀸𑀦𑀺 𑀚𑀸𑀢𑀺𑀨𑀮𑀺𑀓𑀫𑀬𑀸𑀦𑀺. 𑀅𑀗𑁆𑀕𑀼𑀮𑀺𑀬𑁄 𑀲𑀼𑀯𑀡𑁆𑀡𑀫𑀬𑀸 𑀳𑀢𑁆𑀣𑀧𑀸𑀤𑀢𑀮𑀸𑀦𑀺 𑀘 𑀤𑀦𑁆𑀢𑀸𑀯𑀭𑀡𑀸𑀦𑀺 𑀘 𑀅𑀓𑁆𑀔𑀻𑀦𑀁 𑀭𑀢𑁆𑀢𑀝𑁆𑀞𑀸𑀦𑀸𑀦𑀺 𑀘 𑀚𑀸𑀢𑀺𑀧𑀯𑀸𑀴𑀫𑀬𑀸𑀦𑀺, 𑀓𑁂𑀲𑀫𑀲𑁆𑀲𑀼𑀪𑀫𑀼𑀓𑀝𑁆𑀞𑀸𑀦𑀸𑀦𑀺 𑀇𑀦𑁆𑀤𑀦𑀻𑀮𑀫𑀬𑀸𑀦𑀺, 𑀲𑀫𑀘𑀢𑁆𑀢𑀸𑀮𑀻𑀲 𑀤𑀦𑁆𑀢𑀸 𑀯𑀚𑀺𑀭𑀫𑀬𑀸 𑀅𑀳𑁂𑀲𑀼𑀁. 𑀉𑀡𑁆𑀡𑀮𑁄𑀫𑀁 𑀧𑀦 𑀲𑀼𑀯𑀡𑁆𑀡 𑀪𑀺𑀢𑁆𑀢𑀺𑀬𑀁 𑀞𑀧𑀺𑀢𑀭𑀚𑀢𑀩𑀼𑀩𑁆𑀩𑀼𑀴𑀯𑀺𑀮𑀸𑀲𑀁 𑀭𑀚𑀢𑀫𑀬𑀁 𑀅𑀳𑁄𑀲𑀺. 𑀪𑀕𑀯𑀢𑁄 𑀅𑀦𑀯𑀮𑁄𑀓𑀺𑀢 𑀫𑀼𑀤𑁆𑀥𑀦𑀺 𑀫𑀢𑁆𑀣𑀓𑁂 𑀲𑀢𑁆𑀢𑀭𑀢𑀦𑀫𑀬𑀁 𑀯𑀺𑀘𑀺𑀢𑁆𑀢𑀓𑀺𑀁𑀓𑀺𑀡𑀺𑀚𑀸𑀮𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀲𑀺. 𑀫𑀡𑁆𑀟𑀧𑀲𑁆𑀲 𑀅𑀦𑁆𑀢𑁄 𑀦𑀯𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑀁 𑀫𑀼𑀢𑁆𑀢𑀸𑀓𑀮𑀸𑀧𑀫𑁄𑀮𑀫𑁆𑀩𑀓𑀁 𑀫𑀦𑁄𑀭𑀫𑀁 𑀘𑁂𑀮𑀯𑀺𑀢𑀸𑀦𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀫𑀡𑁆𑀟𑀧𑀓𑁄𑀝𑀺𑀬𑀁 𑀫𑀼𑀢𑁆𑀢𑀸𑀚𑀸𑀮𑀁 𑀢𑀤𑀦𑀦𑁆𑀢𑀭𑀁 𑀲𑀢𑁆𑀢 𑀭𑀢𑀦𑀯𑀺𑀘𑀺𑀢𑁆𑀢𑀁 𑀓𑀺𑀁𑀓𑀺𑀡𑀺𑀚𑀸𑀮𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀲𑀺.

𑀅𑀫𑁆𑀳𑀸𑀓𑀁 ¶ 𑀪𑀕𑀯𑀢𑁄 𑀫𑀸𑀢𑀼𑀤𑁂𑀯𑀧𑀼𑀢𑁆𑀢𑀫𑁆𑀧𑀺 𑀲𑀢𑁆𑀢𑀭𑀢𑀦𑁂𑀦 𑀓𑀸𑀭𑀸𑀧𑁂𑀲𑀺. 𑀢𑀣𑀸 𑀏𑀭𑀸𑀯𑀡𑀯𑀺𑀲𑁆𑀲𑀓𑀫𑁆𑀫𑀤𑁂𑀯𑀧𑀼𑀢𑁆𑀢𑀸𑀤𑀬𑁄 𑀘 𑀲𑀧𑀭𑀺𑀯𑀸𑀭𑁄 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀘 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀘 𑀧𑀜𑁆𑀘𑀲𑀺𑀔𑀤𑁂𑀯𑀧𑀼𑀢𑁆𑀢𑀸𑀤𑀬𑁄 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑀸 𑀘 𑀲𑀳𑀫𑁆𑀧𑀢𑀺 𑀫𑀳𑀸 𑀩𑁆𑀭𑀳𑁆𑀫𑀸𑀤𑀬𑁄 𑀫𑀳𑀸𑀩𑁆𑀭𑀳𑁆𑀫𑀦𑁄 𑀘 𑀓𑀸𑀭𑀸𑀧𑁂𑀲𑀺. 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑀁 𑀓𑀭𑁄𑀦𑁆𑀢𑁄 𑀲𑀁𑀚𑀬𑀫𑀳𑀸𑀭𑀸𑀚𑀸 𑀨𑀼𑀲𑀢𑀻𑀤𑁂𑀯𑀻 𑀆𑀤𑀬𑁄 𑀘 𑀫𑀤𑁆𑀤𑀻𑀤𑁂𑀯𑀻 𑀤𑁆𑀯𑁂 𑀤𑀸𑀭𑀓𑁂 𑀘 𑀚𑀽𑀚𑀓𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀘 𑀓𑀸𑀭𑀸𑀧𑁂𑀲𑀺. 𑀯𑀺𑀥𑀼𑀭-𑀲𑁄𑀡𑀤𑀢𑁆𑀢 𑀫𑀳𑀸𑀦𑀸𑀭𑀤𑀓𑀲𑁆𑀲𑀧-𑀲𑀼𑀢𑀲𑁄𑀫-𑀲𑀼𑀧𑁆𑀧𑀸𑀭𑀓-𑀲𑀗𑁆𑀔𑀧𑀸𑀮𑀚𑀸𑀢𑀓𑀸𑀤𑀻𑀦𑀺 𑀘, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦-𑀫𑀳𑀸𑀲𑀫𑀬𑀲𑀼𑀢𑁆𑀢𑀸𑀤𑀺 𑀤𑁂𑀲𑀦𑀸𑀓𑀸𑀭𑁄 𑀘, 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀫𑀳𑀸𑀫𑀸𑀬𑀸 𑀫𑀳𑀸𑀧𑀚𑀸𑀧𑀢𑀻 𑀕𑁄𑀢𑀫𑀻 𑀪𑀤𑁆𑀤𑀓𑀘𑁆𑀘𑀸𑀦𑀸 𑀭𑀸𑀳𑀼𑀮𑀫𑀸𑀢𑀸𑀤𑁂𑀯𑀻 𑀘 𑀭𑀸𑀳𑀼𑀮𑀓𑀼𑀫𑀸𑀭𑁄 𑀘 𑀙𑀦𑁆𑀦𑀜𑁆𑀘 𑀓𑀦𑁆𑀣𑀓𑀜𑁆𑀘 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀫𑀳𑀸𑀩𑁄𑀥𑀺𑀫𑀡𑁆𑀟𑀮𑀁 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸 𑀓𑁄𑀲𑀮𑀫𑀳𑀸𑀭𑀸𑀚𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑀫𑀳𑀸𑀲𑁂𑀝𑁆𑀞𑀺 𑀘𑀽𑀴𑀅𑀦𑀸𑀣𑀧𑀺𑀡𑁆𑀟𑀺𑀓-𑀯𑀺𑀲𑀸𑀔𑀸 𑀲𑀼𑀧𑁆𑀧𑀯𑀸𑀲𑀸 𑀘 𑀧𑀘𑁆𑀙𑀸 𑀘𑀽𑀴𑀧𑀺𑀡𑁆𑀟𑀧𑀸𑀢𑀺𑀬 𑀢𑀺𑀲𑁆𑀲𑀢𑁆𑀣𑁂𑀭𑀜𑁆𑀘 𑀅𑀢𑁆𑀢𑀸𑀦𑀜𑁆𑀘 𑀓𑀸𑀭𑀸𑀧𑁂𑀢𑁆𑀯𑀸 𑀢𑁂 𑀲𑀩𑁆𑀩𑁂 𑀥𑀸𑀢𑀼 𑀕𑀩𑁆𑀪𑁂 𑀧𑀢𑀺𑀝𑁆𑀞𑀸𑀧𑁂𑀲𑀺.

𑀥𑀸𑀢𑀼𑀕𑀩𑁆𑀪𑀯𑀡𑁆𑀡𑀡𑀸 𑀲𑀫𑀢𑁆𑀢𑀸.

𑀏𑀯𑀁 𑀥𑀸𑀢𑀼𑀕𑀩𑁆𑀪𑁂 𑀧𑀽𑀚𑀸𑀯𑀺𑀥𑀸𑀦𑀁 𑀲𑀼𑀯𑀺𑀪𑀢𑁆𑀢𑀁 𑀲𑀼𑀫𑀦𑁄𑀭𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀓𑀣𑁂𑀲𑀺? 𑀪𑀦𑁆𑀢𑁂 𑀥𑀸𑀢𑀼𑀕𑀩𑁆𑀪𑁂 𑀫𑀬𑀸 𑀓𑀢𑁆𑀢𑀩𑁆𑀩𑀁 𑀦𑀺𑀝𑁆𑀞𑀸𑀧𑀺𑀢𑀁. 𑀲𑁆𑀯𑁂 𑀭𑁄𑀳𑀺𑀡𑀻𑀦𑀓𑁆𑀔𑀢𑁆𑀢𑁂𑀦 𑀥𑀸𑀢𑀼 𑀦𑀺𑀥𑀸𑀦𑀁 𑀓𑀭𑀺𑀲𑁆𑀲𑀸𑀫𑀻. 𑀅𑀬𑁆𑀬𑀸 𑀧𑀦 𑀓𑁂𑀲𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀼𑀢𑀺. 𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀪𑀸𑀭𑀫𑀓𑀸𑀲𑀺. 𑀣𑁂𑀭𑁄 𑀢𑀁 𑀲𑀼𑀢𑁆𑀯𑀸 𑀪𑀤𑁆𑀤𑀓𑀁 𑀫𑀳𑀸𑀭𑀸𑀚, 𑀓𑁂𑀲𑀥𑀸𑀢𑀼𑀬𑁄 𑀯𑀺𑀘𑀺𑀦𑀺𑀢𑁆𑀯𑀸 𑀆𑀳𑀭𑀸𑀧𑁂𑀲𑁆𑀲𑀸𑀫𑀸𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀲𑀺𑀯𑀢𑁆𑀣𑁂𑀭𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀯𑀼𑀲𑁄 𑀪𑀽𑀫𑀺𑀦𑁆𑀥𑀭𑀦𑀸𑀕𑀯𑀺𑀫𑀸𑀦𑁂 𑀚𑀬𑀲𑁂𑀦𑁄 𑀦𑀸𑀫 𑀦𑀸𑀕𑀭𑀸𑀚𑀸 𑀯𑀲𑀢𑀺. 𑀢𑀲𑁆𑀲 𑀲𑀦𑁆𑀢𑀺𑀓𑁂 (𑀓𑁂𑀲𑀥𑀸𑀢𑀼𑀬𑁄 𑀲𑀦𑁆𑀢𑀺.) 𑀢𑀧𑀼𑀲𑁆𑀲 𑀪𑀮𑁆𑀮𑀺𑀓𑀸𑀦𑀁 𑀤𑁆𑀯𑁂𑀪𑀸𑀢𑀺𑀓𑀯𑀸𑀡𑀺𑀚𑀸𑀦𑀁 𑀧𑀭𑀺𑀘𑀭𑀡𑀓𑀸𑀮𑁂 𑀢𑁂𑀲𑀁 𑀧𑀫𑀸𑀤𑀁 𑀜𑀢𑁆𑀯𑀸 𑀦𑀸𑀕𑀭𑀸𑀚𑀸 𑀤𑁆𑀯𑁂 𑀓𑁂𑀲𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀦𑀸𑀕𑀪𑀯𑀦𑁂 𑀞𑀧𑁂𑀲𑀺. 𑀢𑁆𑀯𑀁 𑀢𑀸 𑀥𑀸𑀢𑀼𑀬𑁄 𑀆𑀳𑀭𑀺𑀢𑁆𑀯𑀸 𑀭𑀜𑁆𑀜𑁄 𑀤𑁂𑀳𑀻𑀢𑀺 𑀆𑀡𑀸𑀧𑁂𑀲𑀺. 𑀣𑁂𑀭𑁄 𑀢𑀁 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀕𑀢𑁄.

𑀢𑀢𑁄 𑀭𑀸𑀚𑀸 𑀅𑀢𑁆𑀢𑀦𑁄 𑀪𑀕𑀺𑀦𑀺𑀬𑀸 𑀲𑁄𑀫𑀤𑁂𑀯𑀺𑀬𑀸 𑀘 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀕𑀺𑀭𑀺𑀅𑀪𑀬𑀭𑀜𑁆𑀜𑁄 𑀘 𑀲𑀸𑀲𑀦𑀁 𑀧𑁂𑀲𑁂𑀲𑀺? 𑀲𑁆𑀯𑁂 𑀥𑀸𑀢𑀼𑀦𑀺𑀥𑀸𑀦𑀁𑀓𑀭𑀺𑀲𑁆𑀲𑀸𑀫. 𑀢𑀼𑀫𑁆𑀳𑁂 𑀲𑁂𑀦𑀗𑁆𑀕𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀣𑀸’𑀢𑀺. 𑀮𑁄𑀡𑀦𑀕𑀭𑁂 ¶ 𑀫𑀳𑀸𑀦𑀸𑀕𑀭𑀜𑁆𑀜𑁄 𑀘 𑀲𑁂𑀭𑀼 𑀦𑀕𑀭𑁂 𑀲𑀺𑀯𑀭𑀜𑁆𑀜𑁄 𑀘 𑀢𑀣𑁂𑀯 𑀲𑀸𑀲𑀦𑀁 𑀧𑁂𑀲𑁂𑀢𑁆𑀯𑀸 𑀲𑀬𑀫𑁆𑀧𑀺 𑀅𑀢𑁆𑀢𑀦𑁄 𑀯𑀺𑀚𑀺𑀢𑁂 𑀬𑁂𑀦 𑀫𑀬𑁆𑀳𑀁 𑀳𑀢𑁆𑀣𑀢𑁄 𑀅𑀦𑁆𑀢𑀫𑀲𑁄 𑀏𑀓𑀓𑀭𑀻𑀲𑀫𑀢𑁆𑀢𑀫𑁆𑀧𑀺 𑀮𑀤𑁆𑀥𑀁 𑀢𑀤𑀼𑀧𑀸𑀤𑀸𑀬 𑀲𑀩𑁆𑀩𑁂𑀧𑀺 𑀢𑀼𑀫𑁆𑀳𑁂 𑀲𑀤𑁆𑀥𑀺𑀁 𑀧𑀭𑀺𑀯𑀸𑀭𑁂𑀦 𑀆𑀕𑀘𑁆𑀙𑀣𑀸’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑀸 𑀫𑀳𑀸𑀚𑀦𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀪𑀯𑀸𑀦𑀼𑀭𑀽𑀧𑁂𑀦 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀅𑀕𑀫𑀺𑀁𑀲𑀼. 𑀭𑀸𑀚𑀸 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀲𑀩𑁆𑀩𑁂 𑀲𑁂𑀦𑀺𑀬𑁄 𑀕𑀦𑁆𑀥𑀫𑀸𑀮𑀸𑀥𑀽𑀧𑀥𑀚𑀸𑀤𑀬𑁄 𑀕𑀳𑁂𑀢𑁆𑀯𑀸 𑀥𑀸𑀢𑀼𑀦𑀺𑀥𑀸𑀦𑀁 𑀆𑀕𑀘𑁆𑀙𑀦𑁆𑀢𑀼𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀢𑀺𑀯𑀻𑀯𑀭𑀢𑁆𑀣𑀸𑀬 𑀫𑀳𑀕𑁆𑀖𑀯𑀢𑁆𑀣𑀸𑀤𑀻𑀦𑀺 𑀤𑀢𑁆𑀯𑀸 𑀲𑀬𑀫𑁆𑀧𑀺 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀢𑀺𑀫𑀡𑁆𑀟𑀺𑀢𑁄 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀉𑀧𑁄𑀲𑀣𑀁 𑀅𑀥𑀺𑀝𑁆𑀞𑀸𑀬 𑀫𑀡𑀺𑀓𑀼𑀡𑁆𑀟𑀮𑀫𑁂𑀔𑀮𑀸𑀦𑀽𑀧𑀼𑀭 𑀯𑀮𑀬𑀸𑀤𑀺𑀯𑀺𑀘𑀺𑀢𑁆𑀢𑀲𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀸𑀳𑀺 𑀓𑁄𑀲𑁂𑀬𑁆𑀬𑀸𑀤𑀺𑀲𑀼𑀔𑀼𑀫𑀦𑀸𑀦𑀸𑀯𑀺𑀥𑀯𑀺𑀘𑀺𑀢𑁆𑀢𑀯𑀢𑁆𑀣𑀦𑀺𑀯𑀢𑁆𑀣𑀸𑀳𑀺 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀢𑀼𑀭𑀺𑀬𑀪𑀡𑁆𑀟𑀕𑀳𑀺𑀢 𑀳𑀢𑁆𑀣𑀸𑀳𑀺 𑀤𑁂𑀯𑀘𑁆𑀙𑀭𑀸𑀧𑀝𑀺𑀪𑀸𑀕𑀦𑀸𑀝𑀓𑀺𑀢𑁆𑀣𑀻𑀳𑀺 𑀧𑀭𑀺𑀯𑀸𑀭𑀺𑀢𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑀺 𑀲𑀤𑁆𑀥𑀺𑀁 𑀘𑁂𑀢𑀺𑀬𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺.

𑀢𑀢𑁄 𑀲𑁄𑀫𑀦𑀕𑀭𑁂 𑀕𑀺𑀭𑀺𑀅𑀪𑀬𑀭𑀸𑀚𑀸’𑀧𑀺 𑀲𑀩𑁆𑀩𑁂 𑀦𑀸𑀕𑀭𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀪𑀯𑀸𑀦𑀼𑀭𑀽𑀧𑁂𑀦 𑀥𑀸𑀢𑀼𑀦𑀺𑀥𑀸𑀦𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀼𑀢𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀲𑀬𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀢𑀺𑀫𑀡𑁆𑀟𑀺𑀢𑁄 𑀲𑀼𑀲𑀚𑁆𑀚𑀺𑀢𑀅𑀫𑀘𑁆𑀘𑀕𑀡𑀧𑀭𑀺𑀯𑀸𑀭𑀺𑀢𑁄 𑀦𑀺𑀓𑁆𑀔𑀫𑀺. 𑀲𑁄𑀫 𑀤𑁂𑀯𑀻𑀧𑀺 𑀲𑀻𑀲𑀁 𑀦𑀳𑀸𑀢𑁆𑀯𑀸 𑀅𑀳𑀢𑀯𑀢𑁆𑀣𑀦𑀺𑀯𑀢𑁆𑀣𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀢𑀺𑀫𑀡𑁆𑀟𑀺𑀢𑀸 𑀤𑁂𑀯𑀘𑁆𑀙𑀭𑀸 𑀯𑀺𑀬 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑀸 𑀧𑀜𑁆𑀘𑀲𑀢𑀓𑀼𑀫𑀸𑀭𑀺𑀬𑁄 𑀦𑀻𑀮𑀯𑀢𑁆𑀣𑁂𑀳𑀺 𑀧𑀭𑀺𑀤𑀳𑀸𑀧𑁂𑀢𑁆𑀯𑀸 𑀢𑀣𑁂𑀯 𑀅𑀮𑀗𑁆𑀓𑀸𑀭𑁂𑀢𑁆𑀯𑀸 𑀧𑀼𑀡𑁆𑀡𑀖𑀝𑁂 𑀕𑀸𑀳𑀸𑀧𑁂𑀢𑁆𑀯𑀸 𑀢𑀸𑀲𑀁 𑀅𑀦𑀦𑁆𑀢𑀭𑀸 𑀧𑀜𑁆𑀘𑀲𑀢𑀓𑀼𑀫𑀸𑀭𑀺𑀬𑁄 𑀧𑀻𑀢𑀯𑀢𑁆𑀣𑁂𑀳𑀺 𑀧𑀭𑀺𑀤𑀳𑀸𑀧𑁂𑀢𑁆𑀯𑀸 𑀢𑀣𑁂𑀯 𑀅𑀮𑀗𑁆𑀓𑀸𑀭𑁂𑀢𑁆𑀯𑀸 𑀧𑀽𑀚𑀸𑀪𑀡𑁆𑀟𑀸𑀦𑀺 𑀕𑀸𑀳𑀸𑀧𑁂𑀢𑁆𑀯𑀸, 𑀢𑀸𑀲𑀁 𑀅𑀦𑀦𑁆𑀢𑀭𑀸 𑀧𑀜𑁆𑀘𑀲𑀢 𑀓𑀼𑀫𑀸𑀭𑀺𑀬𑁄 𑀭𑀢𑁆𑀢𑀯𑀢𑁆𑀣𑁂𑀳𑀺 𑀧𑀭𑀺𑀤𑀳𑀸𑀧𑁂𑀢𑁆𑀯𑀸 𑀢𑀣𑁂𑀯. 𑀅𑀮𑀗𑁆𑀓𑀸𑀭𑁂𑀢𑁆𑀯𑀸 𑀯𑀺𑀘𑀺𑀢𑁆𑀭𑀧𑀼𑀧𑁆𑀨𑀧𑀽𑀭𑀺𑀢𑀫𑀜𑁆𑀚𑀼𑀲𑀸𑀬𑁄 𑀕𑀸𑀳𑀸𑀧𑁂𑀢𑁆𑀯𑀸 𑀢𑀸𑀲𑀁 𑀅𑀦𑀦𑁆𑀢𑀭𑀸 𑀧𑀜𑁆𑀘𑀲𑀢𑀓𑀼𑀫𑀸𑀭𑀺𑀬𑁄 𑀲𑁂𑀢𑀯𑀢𑁆𑀣𑁂𑀳𑀺 𑀧𑀭𑀺𑀤𑀳𑀸𑀧𑁂𑀢𑁆𑀯𑀸 𑀢𑀣𑁂𑀯 𑀅𑀮𑀗𑁆𑀓𑀸𑀭𑁂𑀢𑁆𑀯𑀸 𑀥𑀽𑀫 𑀓𑀝𑀘𑁆𑀙𑀼𑀓𑁂 𑀕𑀸𑀳𑀸𑀧𑁂𑀢𑁆𑀯𑀸 𑀏𑀯𑀁 𑀧𑀽𑀚𑀸𑀯𑀺𑀥𑀸𑀦𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀧𑀭𑀺𑀯𑀸𑀭𑁂𑀦 ¶ 𑀘𑁂𑀢𑀺𑀗𑁆𑀕𑀡𑀁 𑀕𑀦𑁆𑀢𑁆𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀲𑀸𑀫𑀺𑀦𑀸 𑀕𑀺𑀭𑀺𑀅𑀪𑀬𑀭𑀸𑀚𑁂𑀦 𑀲𑀤𑁆𑀥𑀺𑀁 𑀏𑀓𑀧𑀲𑁆𑀲𑁂 𑀞𑀻𑀢𑀸.

𑀮𑁄𑀡𑀦𑀕𑀭𑁂 𑀫𑀳𑀸𑀦𑀸𑀕𑀭𑀸𑀚𑀸’𑀧𑀺 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀧𑀢𑀺𑀫𑀡𑁆𑀟𑀺𑀢𑁄 𑀲𑀩𑁆𑀩𑀸𑀪𑀭𑀡𑁂𑀳𑀺 𑀲𑀼𑀲𑀚𑁆𑀚𑀻𑀢𑀅𑀫𑀘𑁆𑀘𑀫𑀡𑁆𑀟𑀮𑀧𑀭𑀺𑀯𑀼𑀢𑁄 𑀦𑀘𑁆𑀘𑀕𑀻𑀢𑀢𑀼𑀭𑀻𑀬𑀸𑀦𑀺 𑀧𑀕𑁆𑀕𑀡𑁆𑀳𑀸𑀧𑀬𑀫𑀸𑀦𑁄 𑀕𑀦𑁆𑀥𑀫𑀸𑀮𑀸 𑀥𑀽𑀫𑀓𑀝𑀘𑁆𑀙𑀼 𑀕𑀸𑀳𑀸𑀧𑁂𑀢𑁆𑀯𑀸 𑀘𑁂𑀢𑀺𑀬𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺.

𑀲𑁂𑀭𑀼𑀦𑀕𑀭𑁂 𑀲𑀺𑀯𑀭𑀸𑀚𑀸’𑀧𑀺 𑀅𑀢𑁆𑀢𑀸𑀦𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀧𑀽𑀚𑀸𑀯𑀺𑀥𑀸𑀦𑀁 𑀕𑀸𑀳𑀸𑀧𑁂𑀢𑁆𑀯𑀸 𑀘𑁂𑀢𑀺𑀬𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀭𑀸𑀚𑀧𑀭𑀺𑀲𑀸 𑀅𑀢𑁆𑀢𑀦𑁄 𑀯𑀺𑀪𑀯𑀸𑀦𑀼𑀭𑀽𑀧𑁂𑀦 𑀯𑀢𑁆𑀣𑀸𑀮𑀗𑁆𑀓𑀸𑀭𑁂𑀳𑀺 𑀘𑀦𑁆𑀤𑀦 𑀫𑀸𑀮𑀸𑀤𑀻𑀳𑀺 𑀘 𑀲𑁄𑀪𑀫𑀸𑀦𑀸 𑀦𑀮𑀸𑀝𑁂 𑀫𑀼𑀢𑁆𑀢𑀸𑀓𑀮𑀸𑀧𑀫𑁄𑀮𑀫𑁆𑀩𑀓 𑀯𑀺𑀘𑀺𑀢𑁆𑀢𑀲𑀼𑀯𑀡𑁆𑀡𑀧𑀝𑁆𑀝𑀸𑀦𑀺 𑀩𑀦𑁆𑀥𑀺𑀢𑁆𑀯𑀸 𑀳𑀢𑁆𑀣𑀸𑀪𑀭𑀡𑀸𑀤𑀺 𑀅𑀦𑁂𑀓𑀸𑀪𑀭𑀡𑁂𑀳𑀺 𑀤𑀺𑀩𑁆𑀩𑀧𑀭𑀺𑀲𑀸 𑀯𑀺𑀬 𑀲𑀼𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑀸 𑀯𑁂𑀲𑀸𑀦𑀼𑀭𑀽𑀧𑀸𑀦𑀺 𑀯𑀺𑀯𑀺𑀥𑀸𑀯𑀼𑀥𑀸𑀦𑀺 𑀕𑀳𑁂𑀢𑁆𑀯𑀸 𑀏𑀓𑀧𑀲𑁆𑀲𑁂 𑀞𑀻𑀢𑀸. 𑀲𑀻𑀳𑀯𑁆𑀬𑀕𑁆𑀖𑀤𑀻𑀧𑀺𑀘𑀫𑁆𑀫𑁂𑀳𑀺 𑀧𑀲𑀸𑀥𑀺𑀢𑀲𑀼𑀯𑀡𑁆𑀡𑀸𑀮𑀗𑁆𑀓𑀸𑀭𑀲𑀼𑀯𑀡𑁆𑀡𑀥𑀚𑀳𑁂𑀫𑀚𑀸𑀮𑀲𑀜𑁆𑀙𑀦𑁆𑀦𑁂 𑀭𑀣 𑀯𑀭𑁂 𑀘 𑀲𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀼𑀲𑀺𑀢𑀸 𑀭𑀣𑀺𑀓𑀸 𑀆𑀭𑀼𑀬𑁆𑀳 𑀏𑀓𑀧𑀲𑁆𑀲𑁂 𑀞𑀻𑀢𑀸. 𑀩𑁆𑀭𑀸𑀳𑁆𑀫𑀡𑀧𑀼𑀢𑁆𑀢𑀸𑀤𑀬𑁄 𑀫𑀡𑁆𑀟𑀺𑀢𑀘𑀫𑁆𑀫𑁂 𑀧𑀸𑀭𑀼𑀧𑀺𑀢𑁆𑀯𑀸 𑀉𑀧𑀲𑁄𑀪𑀬𑀫𑀸𑀦𑀸 𑀏𑀓𑀧𑀲𑁆𑀲𑁂 𑀞𑀻𑀢𑀸. 𑀩𑀳𑀼 𑀅𑀫𑀘𑁆𑀘𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑁂𑀲𑀸𑀦𑀼𑀭𑀽𑀧𑁂𑀦 𑀫𑀳𑀕𑁆𑀖𑀯𑀢𑁆𑀣𑀸𑀪𑀭𑀡𑀯𑀺𑀪𑀽𑀲𑀺𑀢𑀸 𑀲𑀧𑀭𑀺𑀯𑀸𑀭𑀸 𑀏𑀓𑀧𑀲𑁆𑀲𑁂 𑀞𑀻𑀢𑀸. 𑀕𑀦𑁆𑀥𑁄𑀤𑀓 𑀧𑀽𑀭𑀺𑀢 𑀤𑀓𑁆𑀔𑀺𑀡𑀸𑀯𑀢𑁆𑀢 𑀲𑀗𑁆𑀔𑀁 𑀕𑀳𑁂𑀢𑁆𑀯𑀸 𑀉𑀧𑀯𑀻𑀢𑀲𑀼𑀢𑁆𑀢𑀁 𑀏𑀓𑀁𑀲𑀁 𑀓𑀭𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀯𑁂𑀞𑀦𑀁 𑀯𑁂𑀞𑁂𑀢𑁆𑀯𑀸 𑀧𑀼𑀭𑁄𑀳𑀺𑀢𑀩𑁆𑀭𑀸𑀳𑁆𑀫𑀡𑀸 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀧𑀽𑀚𑀸𑀯𑀺𑀥𑀸𑀦𑀁 𑀕𑀸𑀳𑀸𑀧𑁂𑀢𑁆𑀯𑀸 𑀘𑁂𑀢𑀺𑀬𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀁 𑀯𑀦𑁆𑀤𑀺𑀢𑁆𑀯𑀸 𑀚𑀬𑀖𑁄𑀲𑀁 𑀲𑀸𑀯𑁂𑀦𑁆𑀢𑀸 𑀏𑀯𑀫𑀸𑀳𑀁𑀲𑀼?

𑀔𑁂𑀫𑀁 𑀲𑀼𑀪𑀺𑀓𑁆𑀔𑀁 𑀪𑀯𑀢𑀼 𑀦𑀺𑀘𑁆𑀘𑀁 𑀚𑀦𑀧𑀤𑀁 𑀲𑀺𑀯𑀁;

𑀲𑀲𑁆𑀲𑀸𑀦𑀺 𑀲𑀫𑀼𑀧𑁆𑀧𑀚𑁆𑀚𑀦𑁆𑀢𑀼 𑀭𑀜𑁆𑀜𑁄 𑀏𑀯𑀁 𑀚𑀬𑀸 𑀲𑀺𑀬𑀼𑀁.

𑀅𑀯𑀲𑁂𑀲𑀸 𑀫𑀳𑀸𑀚𑀦𑀸 𑀏𑀯𑀫𑀸𑀳𑀁𑀲𑀼? 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 ¶ 𑀳𑀺 𑀫𑀳𑀺𑀁 𑀲𑀸𑀕𑀭𑀓𑀼𑀡𑁆𑀟𑀮𑀁 𑀯𑀲𑀼𑀦𑁆𑀥𑀭𑀁 𑀆𑀯𑀲𑀢𑀼 𑀅𑀫𑀘𑁆𑀘𑀧𑀭𑀺𑀯𑀸𑀭𑀺𑀢𑁄. 𑀏𑀯𑀁 𑀯𑀢𑁆𑀯𑀸? 𑀅𑀫𑁆𑀳𑀸𑀓𑀁 𑀅𑀬𑁆𑀬𑁄 𑀓𑀸𑀓𑀯𑀡𑁆𑀡𑀢𑀺𑀲𑁆𑀲𑁄 𑀫𑀳𑀸 𑀭𑀸𑀚𑀸 𑀲𑀤𑁂𑀯𑀓𑁂 𑀮𑁄𑀓𑁂 𑀏𑀓𑀧𑀼𑀕𑁆𑀕𑀮𑀲𑁆𑀲 𑀮𑁄𑀓𑀦𑀸𑀣𑀲𑁆𑀲𑀦𑀮𑀸𑀝𑀥𑀸𑀢𑀼𑀁 𑀧𑀢𑀺𑀝𑁆𑀞𑀸𑀧𑁂𑀢𑀻’𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀪𑀯𑀸𑀦𑀼𑀭𑀽𑀧𑁂𑀦 𑀲𑀼𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑀸. 𑀔𑀼𑀚𑁆𑀚𑀯𑀸𑀫𑀦𑀓𑀸𑀤𑀬𑁄’𑀧𑀺 𑀲𑀩𑁆𑀩𑁂 𑀚𑀦𑀸 𑀧𑀽𑀚𑀸𑀪𑀡𑁆𑀟𑀸𑀦𑀺 𑀕𑀳𑁂𑀢𑁆𑀯𑀸 𑀲𑀸𑀥𑀼𑀓𑀸𑀭𑀁 𑀤𑀤𑀫𑀸𑀦𑀸 𑀅𑀝𑁆𑀞𑀁𑀲𑀼. 𑀇𑀫𑀲𑁆𑀫𑀺𑀁 𑀘𑁂𑀢𑀺𑀬𑀝𑁆𑀞𑀸𑀦𑁂 𑀭𑀸𑀲𑀻𑀪𑀽𑀢𑀸 𑀧𑀭𑀺𑀲𑀸 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸? 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸 𑀦𑁂𑀕𑀫𑀸 𑀘 𑀲𑀫𑀸𑀕𑀢𑀸 𑀧𑀼𑀧𑁆𑀨𑀸𑀤𑀺𑀕𑀳𑀺𑀢𑀸 𑀲𑀩𑁆𑀩𑁂 𑀅𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀸.

𑀕𑀡𑀦𑀸 𑀯𑀻𑀢𑀺𑀯𑀢𑁆𑀢𑀸 𑀢𑁂 𑀅𑀦𑁂𑀓𑁂 𑀘 𑀫𑀳𑀸𑀚𑀦𑀸;

𑀲𑀫𑀼𑀤𑁆𑀤𑁄 𑀧𑀢𑁆𑀣𑀭𑀦𑁆𑀢𑁄𑀯 𑀔𑀢𑁆𑀢𑀺𑀬𑀸 𑀲𑀫𑀼𑀧𑀸𑀕𑀢𑀸.

𑀅𑀮𑀗𑁆𑀓𑀢𑁄 𑀫𑀳𑀸𑀭𑀸𑀚𑀸 𑀲𑀭𑀸𑀚𑀧𑀭𑀺𑀯𑀸𑀭𑀺𑀢𑁄;

𑀤𑁂𑀯𑀭𑀸𑀚𑀸 𑀬𑀣𑀸 𑀲𑀓𑁆𑀓𑁄 𑀅𑀝𑁆𑀞𑀸𑀲𑀺 𑀘𑁂𑀢𑀺𑀬𑀗𑁆𑀕𑀡𑁂.

𑀲𑀸𑀥𑀼𑀯𑀸𑀤𑁂𑀦 𑀲𑀢𑁆𑀢𑀸𑀦𑀁 𑀧𑀜𑁆𑀘𑀗𑁆𑀕𑀢𑀼𑀭𑀺𑀬𑁂𑀳𑀺 𑀘;

𑀳𑀢𑁆𑀣𑀲𑁆𑀲𑀭𑀣𑀲𑀤𑁆𑀤𑁂𑀦 𑀲𑀫𑀸𑀓𑀺𑀡𑁆𑀡𑀁 𑀫𑀳𑀻𑀢𑀮𑀁.

𑀢𑀢𑁄 𑀘𑀽𑀴𑀧𑀺𑀡𑁆𑀟𑀧𑀸𑀢𑀺𑀬𑀢𑀺𑀲𑁆𑀲𑀢𑁆𑀣𑁂𑀭𑁄 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀻𑀓𑁂 𑀧𑀜𑁆𑀘𑀲𑀢 𑀔𑀻𑀡𑀸𑀲𑀯𑁂 𑀧𑀭𑀺𑀯𑀸𑀭𑁂𑀢𑁆𑀯𑀸 𑀘𑁂𑀢𑀺𑀬𑀝𑁆𑀞𑀸𑀦𑀫𑁂𑀯 𑀆𑀕𑀢𑁄. 𑀫𑀳𑀸𑀲𑀸𑀕𑀮𑀢𑁆𑀣𑁂𑀭𑁄’𑀧𑀺 𑀧𑀜𑁆𑀘𑀲𑀢 𑀔𑀻𑀡𑀸𑀲𑀯𑁂 𑀧𑀭𑀺𑀯𑀸𑀭𑁂𑀢𑁆𑀯𑀸 𑀘𑁂𑀢𑀺𑀬𑀝𑁆𑀞𑀸𑀦𑀫𑁂𑀯 𑀆𑀕𑀢𑁄. 𑀫𑀳𑀺𑀦𑁆𑀤𑀢𑁆𑀣𑁂𑀭𑁄’𑀧𑀺 𑀅𑀢𑁆𑀢𑀦𑁄 𑀲𑀸𑀯𑀓𑁂 𑀲𑀝𑁆𑀞𑀺𑀫𑀢𑁆𑀢𑁂 𑀔𑀺𑀡𑀸𑀲𑀯𑁂 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀝𑁆𑀞𑀸𑀦𑀫𑁂𑀯 𑀆𑀕𑀢𑁄. 𑀇𑀢𑀺 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦𑁂𑀯 𑀏𑀓𑁄 𑀤𑁆𑀯𑁂 𑀢𑀬𑁄 𑀘𑀢𑁆𑀢𑀸𑀭𑁄 𑀧𑀜𑁆𑀘 𑀔𑀻𑀡𑀸𑀲𑀯𑀸 𑀆𑀕𑀘𑁆𑀙𑀦𑁆𑀢𑀸 𑀲𑀢𑁆𑀢 𑀲𑀳𑀲𑁆𑀲𑀫𑀢𑁆𑀢𑀸 𑀅𑀳𑁂𑀲𑀼𑀁. 𑀢𑀢𑁄 𑀘𑀽𑀴𑀧𑀺𑀡𑁆𑀟𑀧𑀸𑀢𑀺𑀬𑀢𑀺𑀲𑁆𑀲𑀢𑁆𑀣𑁂𑀭𑁄 𑀏𑀢𑁆𑀢𑀓𑁂 𑀪𑀺𑀓𑁆𑀔𑀽 𑀧𑀭𑀺𑀯𑀸𑀭𑁂𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑁂 𑀦𑀺𑀲𑀻𑀤𑀻. 𑀢𑀢𑁄 𑀭𑀸𑀚𑀸 𑀆𑀕𑀦𑁆𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀓𑀣𑁂𑀲𑀺? ¶ 𑀓𑁂𑀲𑀥𑀸𑀢𑀼 𑀓𑀼𑀢𑁄 𑀮𑀪𑀺𑀲𑁆𑀲𑀸𑀫 𑀅𑀬𑁆𑀬𑀸’𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀢𑀺𑀲𑁆𑀲𑀢𑁆𑀣𑁂𑀭𑁄 𑀅𑀢𑁆𑀢𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀲𑀺𑀯𑀢𑁆𑀣𑁂𑀭𑀁 𑀑𑀮𑁄𑀓𑁂𑀲𑀺. 𑀲𑁄 𑀑𑀮𑁄𑀓𑀺𑀢𑀓𑁆𑀔𑀡𑁂𑀬𑁂𑀯 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀢𑁄 𑀉𑀝𑁆𑀞𑀸𑀬 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀁 𑀯𑀦𑁆𑀤𑀺𑀢𑁆𑀯𑀸 𑀙𑀴𑀪𑀺𑀜𑁆𑀜𑁄 𑀫𑀳𑀸𑀔𑀻𑀡𑀸𑀲𑀯𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀪𑀼𑀫𑀺𑀦𑁆𑀥𑀭𑀦𑀸𑀕𑀯𑀺𑀫𑀸𑀦𑁂 𑀧𑀸𑀢𑀼𑀭𑀳𑁄𑀲𑀺.

(𑀲𑀼𑀢𑁆𑀯𑀸𑀲𑁆𑀲 𑀲𑀺𑀯𑀣𑁂𑀭𑁄 𑀘 𑀯𑀲𑀺𑀧𑁆𑀧𑀢𑁆𑀢𑁄 𑀯𑀺𑀲𑀸𑀭𑀤𑁄;

𑀧𑀸𑀓𑀝𑁄 𑀅𑀪𑀯𑀺 𑀦𑀸𑀕𑀦𑀕𑀭𑀁 𑀧𑀼𑀭𑀢𑁄 𑀔𑀡𑁂.)

𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀚𑀬𑀲𑁂𑀦𑁄 𑀦𑀸𑀕𑀭𑀸𑀚𑀸 𑀅𑀢𑁆𑀢𑀦𑁄 𑀪𑀸𑀕𑀺𑀦𑁂𑀬𑁆𑀬𑀁 𑀤𑁆𑀯𑀺𑀓𑁄𑀝𑀺𑀫𑀢𑁆𑀢𑁂 𑀦𑀸𑀕𑁂 𑀧𑀭𑀺𑀯𑀸𑀭𑁂𑀢𑁆𑀯𑀸 𑀫𑀳𑀸 𑀬𑀲𑀁 𑀅𑀦𑀼𑀪𑀯𑀫𑀸𑀦𑀁 𑀦𑀺𑀲𑀺𑀦𑁆𑀦𑀁 𑀇𑀗𑁆𑀕𑀺𑀢𑀲𑀜𑁆𑀜𑀁 𑀤𑀢𑁆𑀯𑀸 𑀣𑁂𑀭𑀁 𑀤𑀼𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺? 𑀇𑀫𑀲𑁆𑀫𑀺𑀁 𑀦𑀸𑀕𑀪𑀯𑀦𑁂 𑀲𑀫𑀡𑁂𑀳𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀦𑀢𑁆𑀣𑀻. 𑀦𑀺𑀲𑁆𑀲𑀁𑀲𑀬𑀁 𑀓𑁂𑀲𑀥𑀸𑀢𑀼𑀁 𑀦𑀺𑀲𑁆𑀲𑀸𑀬 𑀆𑀕𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑀉𑀝𑁆𑀞𑀸𑀬 𑀥𑀸𑀢𑀼𑀖𑀭𑀁 𑀧𑀯𑀺𑀲𑀺𑀢𑁆𑀯𑀸 𑀥𑀸𑀢𑀼𑀓𑀭𑀡𑁆𑀟𑀓𑀁 𑀕𑀺𑀮𑀺𑀢𑁆𑀯𑀸 𑀓𑀺𑀜𑁆𑀘𑀺 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀣𑁂𑀭𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀦𑀸𑀕𑀭𑀸𑀚𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑁄 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀓𑀣𑁂𑀲𑀺. 𑀓𑀲𑁆𑀫𑀸 𑀅𑀬𑁆𑀬𑁄 𑀆𑀕𑀢𑁄’𑀢𑀺 𑀯𑀼𑀢𑁆𑀢𑁂 𑀏𑀯𑀫𑀸𑀳? 𑀢𑀺𑀮𑁄𑀓𑀦𑀸𑀣𑀲𑁆𑀲 𑀅𑀫𑁆𑀳𑀸𑀓𑀁 𑀲𑀫𑁆𑀩𑀼𑀤𑁆𑀥𑀲𑁆𑀲 𑀓𑁂𑀲𑀥𑀸𑀢𑀽𑀦𑀁 𑀅𑀢𑁆𑀣𑀸𑀬 𑀆𑀕𑀢𑁄, 𑀢𑀼𑀬𑁆𑀳𑀁 𑀲𑀦𑁆𑀢𑀺𑀓𑁂 𑀞𑀧𑀺𑀢𑀓𑁂𑀲𑀥𑀸𑀢𑀼𑀬𑁄 𑀧𑀧𑀜𑁆𑀘𑀁 𑀅𑀓𑀢𑁆𑀯𑀸 𑀫𑀬𑁆𑀳𑀁 𑀤𑁂𑀳𑀺, 𑀢𑁂𑀬𑁂𑀯 𑀲𑀦𑁆𑀥𑀸𑀬 𑀉𑀧𑀚𑁆𑀛𑀸𑀬𑁂𑀦 𑀧𑁂𑀲𑀺𑀢𑁄𑀫𑁆𑀳𑀻’𑀢𑀺 𑀯𑀼𑀢𑁆𑀢𑁂 𑀅𑀫𑁆𑀳𑀸𑀓𑀁 𑀲𑀫𑁆𑀫𑀸 𑀲𑀫𑁆𑀩𑀼𑀤𑁆𑀥𑀲𑁆𑀲 𑀓𑁂𑀲𑀥𑀸𑀢𑀼𑀬𑁄 𑀫𑀫 𑀲𑀦𑁆𑀢𑀺𑀓𑁂 𑀦𑀢𑁆𑀣𑀻’𑀢𑀺 𑀆𑀳. 𑀣𑁂𑀭𑁄 𑀥𑀸𑀢𑀼𑀓𑀭𑀡𑁆𑀟𑀓𑀁 𑀕𑀺𑀮𑀺𑀢𑀪𑀸𑀯𑀁 𑀜𑀢𑁆𑀯𑀸 𑀕𑀡𑁆𑀳𑀸𑀫𑀺 𑀫𑀳𑀸𑀭𑀸𑀚𑀸 𑀓𑁂𑀲𑀥𑀸𑀢𑀼𑀬𑁄’𑀢𑀺 𑀯𑀼𑀢𑁆𑀢𑁂 𑀆𑀫 𑀧𑀲𑁆𑀲𑀦𑁆𑀢𑁄 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸𑀳𑀻𑀢𑀺 𑀆𑀳. 𑀏𑀯𑀁 𑀢𑀬𑁄 𑀯𑀸𑀭𑁂 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀢𑀣𑁂𑀯 𑀞𑀻𑀢𑁄?

𑀇𑀤𑁆𑀥𑀺𑀬𑀸 𑀫𑀸𑀧𑀬𑀺𑀢𑁆𑀯𑀸𑀦 𑀢𑀢𑁄 𑀲𑁄 𑀲𑀼𑀔𑀼𑀫𑀁 𑀓𑀭𑀁,

𑀧𑀯𑁂𑀲𑁂𑀢𑁆𑀯𑀸 𑀫𑀼𑀔𑁂 𑀢𑀲𑁆𑀲 𑀕𑀡𑁆𑀳𑀻 𑀥𑀸𑀢𑀼𑀓𑀭𑀡𑁆𑀟𑀓𑀁;

𑀦𑀸𑀕𑀸𑀮𑀬𑀸𑀪𑀺𑀦𑀺𑀓𑁆𑀔𑀫𑀺 𑀢𑀺𑀝𑁆𑀞 𑀦𑀸𑀕𑀸’𑀢𑀺 𑀪𑀸𑀲𑀺𑀬.

𑀢𑀲𑁆𑀫𑀺𑀁 ¶ 𑀔𑀡𑁂 𑀚𑀬𑀲𑁂𑀦𑁄 𑀦𑀸𑀕𑀭𑀸𑀚𑀸 𑀲𑀫𑀡𑀁 𑀯𑀜𑁆𑀘𑁂𑀢𑁆𑀯𑀸 𑀧𑁂𑀲𑀺𑀢𑁄𑀫𑁆𑀳𑀻’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀕𑀢𑀓𑀸𑀮𑁂 𑀥𑀸𑀢𑀼𑀓𑀭𑀡𑁆𑀟𑀓𑀁 𑀑𑀮𑁄𑀓𑁂𑀢𑁆𑀯𑀸 𑀥𑀸𑀢𑀼 𑀅𑀧𑀲𑁆𑀲𑀺𑀢𑁆𑀯𑀸 𑀲𑀫𑀡𑁂𑀦 𑀦𑀸𑀲𑀺𑀢𑁄𑀫𑁆𑀳𑀻’𑀢𑀺 𑀤𑁆𑀯𑁂 𑀳𑀢𑁆𑀣𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀓𑀮𑀦𑀸𑀕𑀪𑀯𑀦𑀁 𑀏𑀓 𑀓𑁄𑀮𑀸𑀳𑀮𑀁 𑀓𑀢𑁆𑀯𑀸 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 𑀧𑀭𑀺𑀤𑁂𑀯𑀦𑁆𑀢𑁄? 𑀅𑀫𑁆𑀳𑀸𑀓𑀁 𑀘𑀓𑁆𑀔𑀼𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀕𑀢𑁄 𑀯𑀺𑀬 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀧𑀢𑀺𑀝𑁆𑀞𑀸𑀦𑀪𑀽𑀢𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀓𑁂𑀲𑀥𑀸𑀢𑀼𑀬𑁄 𑀅𑀧𑀸𑀬𑀤𑀼𑀓𑁆𑀔𑀢𑁄 𑀅𑀫𑀼𑀜𑁆𑀘𑀦𑁆𑀢𑀸𑀦𑀁 𑀅𑀫𑁆𑀳𑀸𑀓𑀁 𑀅𑀪𑀺𑀪𑀯𑀺𑀢𑁆𑀯𑀸 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀕𑀢𑀲𑀫𑀡𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀸’𑀢𑀺 𑀤𑁆𑀯𑁂𑀓𑁄𑀝𑀺𑀫𑀢𑁆𑀢𑁂 𑀦𑀸𑀕𑁂 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀪𑀸𑀕𑀺𑀦𑁂𑀬𑁆𑀬𑁂𑀦 𑀲𑀤𑁆𑀥𑀺𑀁 𑀢𑀲𑁆𑀲 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀆𑀓𑀸𑀲𑀁 𑀉𑀕𑁆𑀕𑀘𑁆𑀙𑀺𑀁 (𑀲𑀼). 𑀢𑀲𑁆𑀫𑀺𑀁 𑀔𑀡𑁂 𑀧𑀦 𑀲𑀺𑀯𑀢𑁆𑀣𑁂𑀭𑁄 𑀅𑀓𑀸𑀲𑀢𑁄 𑀑𑀢𑀭𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀸𑀯𑀺𑀲𑀺. 𑀧𑀼𑀦 𑀢𑁂𑀧𑀺 𑀧𑀣𑀯𑀺𑀬𑀁 𑀧𑀯𑀺𑀲𑀺𑀁𑀲𑀼. 𑀏𑀯𑀁 𑀣𑁂𑀭𑁄 𑀢𑁂𑀳𑀺 𑀲𑀤𑁆𑀥𑀺𑀁 𑀉𑀫𑁆𑀫𑀼𑀚𑁆𑀚 𑀦𑀺𑀫𑀼𑀚𑁆𑀚𑀁 𑀓𑀭𑁄𑀦𑁆𑀢𑁄 𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑁆𑀯𑀸 𑀲𑁂𑀭𑀼𑀦𑀕𑀭𑀲𑁆𑀲 𑀦𑀸𑀢𑀺𑀤𑀽𑀭𑁂 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀉𑀕𑁆𑀕𑀜𑁆𑀚𑀺. 𑀢𑀢𑁆𑀣𑁂𑀯 𑀢𑁂 𑀲𑀁𑀯𑁂𑀚𑁂𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑁂 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀼𑀭𑀢𑁄 𑀧𑀸𑀓𑀝𑁄 𑀅𑀳𑁄𑀲𑀺. 𑀦𑀸𑀕𑀸 𑀢𑀁 𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀫𑀳𑀦𑁆𑀢𑁂𑀦 𑀲𑀤𑁆𑀤𑁂𑀦 𑀭𑀯𑀁 𑀧𑀢𑀺𑀭𑀯𑀁 𑀤𑀢𑁆𑀯𑀸. 𑀇𑀢𑁄 𑀧𑀝𑁆𑀞𑀸𑀬 𑀦𑀝𑁆𑀞𑀫𑁆𑀳𑀸’𑀢𑀺 𑀢𑀲𑁆𑀫𑀺𑀁 𑀧𑀺𑀝𑁆𑀞𑀺 𑀧𑀸𑀲𑀸𑀡𑁂 𑀲𑀩𑁆𑀩𑁂 𑀲𑀫𑀸𑀕𑀫𑀁 𑀓𑀢𑁆𑀯𑀸 𑀫𑀳𑀸𑀲𑀤𑁆𑀤𑁂𑀦 𑀧𑀭𑀺𑀤𑁂𑀯𑀺𑀁𑀲𑀼? 𑀦𑀝𑁆𑀞𑀫𑁆𑀪𑀸 𑀯𑀢 𑀪𑁄’𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑁄 𑀦𑀸𑀕𑀸𑀦𑀁 𑀭𑀯𑀁 𑀧𑀢𑀺𑀭𑀯𑀁 𑀤𑀢𑁆𑀯𑀸 𑀧𑀭𑀺𑀤𑁂𑀯𑀺𑀢𑀳𑀸𑀯𑁂𑀦 𑀦𑀸𑀕𑀕𑀮𑁆𑀮𑀁 𑀦𑀸𑀫 𑀅𑀳𑁄𑀲𑀺.

𑀦𑀸𑀕𑁄 𑀣𑁂𑀭𑀲𑁆𑀲 𑀧𑀺𑀝𑁆𑀞𑀺𑀢𑁄𑀬𑁂𑀯 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑀁 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀏𑀯𑀫𑀸𑀳? 𑀤𑁂𑀯, 𑀏𑀲𑁄 𑀪𑀺𑀓𑁆𑀔𑀼 𑀫𑀬𑀸 𑀅𑀤𑀺𑀦𑁆𑀦𑀥𑀸𑀢𑀼 𑀕𑀳𑁂𑀢𑁆𑀯𑀸 𑀆𑀕𑀢𑁄’𑀢𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸? 𑀲𑀘𑁆𑀘𑀁 𑀓𑀺𑀭 𑀅𑀬𑁆𑀬 𑀦𑀸𑀕𑀲𑁆𑀲 𑀯𑀘𑀦𑀦𑁆𑀢𑀺 𑀯𑀼𑀢𑁆𑀢𑁂 𑀦𑀳𑁂𑀯 𑀫𑀳𑀸𑀭𑀸𑀚, 𑀇𑀫𑀺𑀦𑀸 𑀤𑀺𑀦𑁆𑀦𑀁 𑀏𑀯 𑀥𑀸𑀢𑀼𑀁 𑀅𑀕𑁆𑀕𑀳𑁂𑀲𑀺𑀦𑁆𑀢𑀺 𑀯𑀼𑀢𑁆𑀢𑁂? 𑀦𑀸𑀕𑁄 𑀢𑀯 𑀲𑀓𑁆𑀔𑀺𑀁 𑀤𑁂𑀳𑀻𑀢𑀺 𑀆𑀳. 𑀣𑁂𑀭𑁄 𑀢𑀲𑁆𑀲 𑀪𑀸𑀕𑀺𑀦𑁆𑀬𑁂𑀁 𑀲𑀫𑀡𑀼𑀧𑁆𑀧𑀮 𑀦𑀸𑀕𑀭𑀸𑀚𑀸𑀦𑀁 𑀲𑀓𑁆𑀔𑀺𑀁 𑀅𑀓𑀸𑀲𑀺. 𑀭𑀸𑀚𑀸 𑀢𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀲𑀩𑁆𑀩𑀯𑀘𑀦𑀁 𑀲𑀼𑀢𑁆𑀯𑀸 𑀲𑀤𑁆𑀤𑀳𑀺. 𑀢𑀲𑁆𑀫𑀺𑀁 𑀓𑀸𑀮𑁂 𑀤𑀼𑀓𑁆𑀔𑀸𑀪𑀺𑀪𑀽𑀢𑁄 𑀦𑀸𑀕𑀭𑀸𑀚𑀸 𑀕𑀦𑁆𑀢𑁆𑀯𑀸 𑀩𑀳𑀺 𑀞𑀻𑀢𑁄. 𑀢𑀢𑁄 𑀧𑀝𑁆𑀞𑀸𑀬 𑀲𑁄 𑀦𑀸𑀕𑀭𑀸𑀚𑀸 ¶ 𑀩𑀳𑀺 𑀳𑀼𑀢𑁆𑀯𑀸 𑀦𑀺𑀲𑀺𑀦𑁆𑀦𑀢𑁆𑀢𑀸 𑀩𑀳𑀺𑀦𑀸𑀕𑀭𑀸𑀚𑀸 𑀦𑀸𑀫 𑀅𑀳𑁄𑀲𑀺. 𑀢𑀲𑁆𑀲 𑀧𑀦 𑀪𑀸𑀕𑀺𑀦𑁂𑀬𑁆𑀬𑀁 𑀅𑀦𑁆𑀢𑁄 𑀘𑁂𑀢𑀺𑀬𑀗𑁆𑀕𑀡𑁂 𑀦𑀺𑀲𑀻𑀤𑀸𑀧𑁂𑀲𑀺. 𑀇𑀫𑀲𑁆𑀲 𑀧𑀦 𑀘𑁂𑀢𑀺𑀬𑀲𑁆𑀲 𑀆𑀭𑀓𑁆𑀔𑀁 𑀕𑀳𑀺𑀢𑀦𑀸𑀕𑀸 𑀓𑀣𑁂𑀢𑀩𑁆𑀩𑀸. 𑀲𑀼𑀫𑀦𑀦𑀸𑀕𑀭𑀜𑁆𑀜𑁄 𑀧𑀭𑀺𑀯𑀸𑀭𑀸 𑀙𑀓𑁄𑀝𑀺𑀫𑀢𑁆𑀢𑀸 𑀦𑀸𑀕𑀸, 𑀚𑀬𑀲𑁂𑀦𑀲𑁆𑀲 𑀧𑀭𑀺𑀯𑀸𑀭𑀸 𑀓𑁄𑀝𑀺𑀲𑀢𑀫𑀢𑁆𑀢𑀸 𑀦𑀸𑀕𑀸, 𑀲𑀫𑀡𑀼𑀧𑁆𑀧𑀮𑀦𑀸𑀕𑀭𑀜𑁆𑀜𑁄 𑀧𑀭𑀺𑀯𑀸𑀭𑀸 𑀤𑁆𑀯𑀺𑀓𑁄𑀝𑀺𑀫𑀢𑁆𑀢𑀸 𑀦𑀸𑀕𑀸 𑀅𑀳𑁂𑀲𑀼𑀁. 𑀲𑀩𑁆𑀩𑁂 𑀥𑀸𑀢𑀼𑀬𑀸 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁𑀲𑀼. 𑀭𑀸𑀚𑀸 𑀣𑁂𑀭𑀲𑁆𑀲 𑀳𑀢𑁆𑀣𑀢𑁄 𑀓𑁂𑀲𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀭𑀢𑀦𑀘𑀗𑁂𑀕𑀸𑀝𑀓𑁂 𑀞𑀧𑁂𑀢𑁆𑀯𑀸 𑀫𑀳𑀺𑀦𑁆𑀤𑀲𑁆𑀲 𑀦𑀸𑀫 𑀅𑀫𑀘𑁆𑀘𑀲𑁆𑀲 𑀅𑀤𑀸𑀲𑀺. 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀢𑀺𑀧𑀺𑀝𑀓𑀫𑀳𑀸𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑀸 𑀘𑀢𑁆𑀢𑀸𑀭𑁄 𑀲𑀸𑀫𑀡𑁂𑀭𑀸 𑀅𑀳𑁂𑀲𑀼𑀁. 𑀢𑁂𑀲𑀼 𑀏𑀓𑁄 𑀫𑀮𑀬 𑀭𑀸𑀚𑀧𑀼𑀢𑁆𑀢𑁄 𑀲𑀼𑀫𑀦𑀲𑀸𑀫𑀡𑁂𑀭𑁄 𑀦𑀸𑀫, 𑀏𑀓𑁄 𑀲𑁂𑀭𑀼𑀦𑀕𑀭𑁂 𑀲𑀺𑀯𑀭𑀸𑀚𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀧𑀼𑀢𑁆𑀢𑁄 𑀉𑀢𑁆𑀢𑀭 𑀲𑀸𑀫𑀡𑁂𑀭𑁄 𑀦𑀸𑀫. 𑀏𑀓𑁄 𑀫𑀳𑀸𑀕𑀸𑀫𑁂 𑀫𑀸𑀮𑀸𑀓𑀸𑀭𑀧𑀼𑀢𑁆𑀢𑁄 𑀘𑀼𑀦𑁆𑀤 𑀲𑀸𑀫𑀡𑁂𑀭𑁄 𑀦𑀸𑀫 𑀏𑀓𑁄 𑀫𑀳𑀸𑀕𑀸𑀫𑁂 𑀏𑀓𑀲𑁆𑀲 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀧𑀼𑀢𑁆𑀢𑁄 𑀫𑀳𑀸𑀓𑀲𑁆𑀲𑀧𑀲𑀸𑀫𑀡𑁂𑀭𑁄 𑀦𑀸𑀫, 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀸𑀫𑀡𑁂𑀭𑀸 𑀅𑀚𑁆𑀚 𑀓𑀸𑀓𑀯𑀡𑁆𑀡𑀢𑀺𑀲𑁆𑀲𑀫𑀳𑀸𑀭𑀸𑀚𑀸 𑀫𑀳𑀸𑀘𑁂𑀢𑀺𑀬𑁂 𑀥𑀸𑀢𑀼 𑀦𑀺𑀥𑀸𑀦𑀁 𑀓𑀭𑀺𑀲𑁆𑀲𑀢𑀺, 𑀫𑀬𑀁 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀲𑀼𑀓𑀼𑀲𑀼𑀫𑀸𑀦𑀺 𑀆𑀳𑀭𑀺𑀲𑁆𑀲𑀸𑀫𑀸𑀢𑀺 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀆𑀓𑀸𑀲𑀢𑁄 𑀳𑀺𑀫𑀯𑀦𑁆𑀢𑀁 𑀕𑀦𑁆𑀢𑁆𑀯𑀸 𑀘𑀫𑁆𑀧𑀓𑀦𑀸𑀕𑀲𑀮𑀮𑀸𑀤𑀬𑁄 𑀧𑀽𑀚𑀦𑀻𑀬𑀫𑀸𑀮𑀁 𑀕𑀳𑁂𑀢𑁆𑀯𑀸 𑀢𑀸𑀯𑀢𑀺𑀁𑀲𑀤𑁂𑀯 𑀮𑁄𑀓𑀁 𑀕𑀢𑀸.

𑀢𑀲𑁆𑀫𑀺𑀁 𑀓𑀸𑀮𑁂 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀲𑀩𑁆𑀩𑀸𑀪𑀭𑀡𑀧𑀢𑀺𑀫𑀡𑁆𑀟𑀺𑀢𑁄 𑀤𑁆𑀯𑀺𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑀢𑀸𑀬𑁄 𑀕𑀳𑁂𑀢𑁆𑀯𑀸 𑀏𑀭𑀸𑀯𑀡𑀳𑀢𑁆𑀣𑀻𑀓𑁆𑀔𑀦𑁆𑀥𑀫𑀸𑀭𑀼𑀬𑁆𑀳 𑀅𑀟𑁆𑀠𑀢𑁂𑀬𑁆𑀬𑀓𑁄𑀝𑀺𑀤𑁂𑀯𑀘𑁆𑀙𑀭𑀸𑀧𑀭𑀺𑀯𑀸𑀭𑀺𑀢𑁄 𑀲𑀼𑀤𑀲𑁆𑀲𑀦𑀫𑀳𑀸 𑀯𑀻𑀣𑀺𑀬𑀁 𑀯𑀺𑀘𑀭𑀦𑁆𑀢𑁄 𑀲𑀯𑀗𑁆𑀕𑁄𑀝𑀓𑁂 𑀢𑁂 𑀘𑀢𑁆𑀢𑀸𑀭𑁄 𑀲𑀸𑀫𑀡𑁂𑀭𑁂 𑀤𑀼𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀳𑀢𑁆𑀣𑀻𑀓𑁆𑀔𑀦𑁆𑀥𑀢𑁄 𑀑𑀭𑀼𑀬𑁆𑀳 𑀧𑀜𑁆𑀘 𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀢𑁂𑀲𑀁 𑀳𑀢𑁆𑀣𑁂 𑀫𑀸𑀮𑀸𑀘𑀗𑁆𑀕𑁄𑀝𑀓𑁂 𑀤𑀺𑀲𑁆𑀯𑀸? 𑀓𑀺𑀁 𑀅𑀬𑁆𑀬𑀸 𑀢𑀼𑀫𑁆𑀳𑀸𑀓𑀁 𑀳𑀢𑁆𑀣𑁂’𑀢𑀺 𑀧𑀼𑀘𑁆𑀙𑀺. 𑀢𑀁 𑀲𑀼𑀢𑁆𑀯𑀸 𑀲𑀸𑀫𑀡𑁂𑀭𑀸 𑀫𑀳𑀸𑀭𑀸𑀚, 𑀓𑀺𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺. 𑀮𑀗𑁆𑀓𑀸𑀬𑀁 𑀓𑀸𑀓𑀯𑀡𑁆𑀡𑀢𑀺𑀲𑁆𑀲 𑀫𑀳𑀸𑀭𑀸𑀚𑀸 𑀤𑀲𑀩𑀮𑀲𑁆𑀲 𑀦𑀮𑀸𑀝𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀫𑀳𑀸𑀯𑀸𑀮𑀼𑀓𑀕𑀗𑀕𑀸𑀬 𑀤𑀓𑁆𑀔𑀺𑀡𑀧𑀲𑁆𑀲𑁂 𑀲𑁂𑀭𑀼 𑀦𑀸𑀫 𑀤𑀳𑀲𑁆𑀲 𑀅𑀦𑁆𑀢𑁂 𑀯𑀭𑀸𑀳 𑀦𑀸𑀫 𑀲𑁄𑀡𑁆𑀟𑀺𑀫𑀢𑁆𑀣𑀓𑁂 𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀢𑀼𑀁 𑀢𑀼𑀫𑁆𑀳𑀸𑀓𑀁 𑀦𑀺𑀬𑁄𑀕𑁂𑀦 𑀯𑀺𑀲𑁆𑀲𑀓𑀫𑁆𑀫𑀤𑁂𑀯𑀧𑀼𑀢𑁆𑀢𑁂𑀦 𑀦𑀺𑀫𑁆𑀫𑀺𑀢𑁆ै𑀝𑁆𑀞𑀓𑀸𑀦𑀺 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀚𑁆𑀚 𑀥𑀸𑀢𑀼𑀦𑀺𑀥𑀸𑀦𑀁 𑀓𑀭𑁄𑀢𑀺. 𑀢𑀢𑁆𑀣 𑀧𑀽𑀚𑀦𑀢𑁆𑀣𑀸𑀬 𑀳𑀺𑀫𑀯𑀦𑁆𑀢𑀢𑁄 𑀆𑀦𑀻𑀢𑀧𑀼𑀧𑁆𑀨𑀫𑀺𑀤𑀦𑁆𑀢𑀺 𑀯𑀢𑁆𑀯𑀸 𑀇𑀢𑁄𑀧𑀺 𑀓𑀼𑀲𑀼𑀫𑀁 𑀕𑀳𑁂𑀢𑀼𑀁 𑀆𑀕𑀢𑀫𑁆𑀳𑀸’𑀢𑀺 𑀯𑀤𑀺𑀁𑀲𑀼. 𑀲𑀓𑁆𑀓𑁄 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸?

𑀅𑀬𑁆𑀬 ¶ 𑀢𑀼𑀫𑁆𑀳𑀸𑀓𑀁 𑀳𑀢𑁆𑀣𑁂 𑀧𑀼𑀧𑁆𑀨𑀸𑀦𑀺 𑀘𑀽𑀴𑀸𑀫𑀡𑀺𑀘𑁂𑀢𑀺𑀬𑁂 𑀧𑀼𑀚𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀉𑀬𑁆𑀬𑀸𑀦𑀢𑁄 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀣𑀸𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀧𑀼𑀧𑁆𑀨𑁂𑀳𑀺 𑀘𑀽𑀴𑀸𑀫𑀡𑀺𑀘𑁂𑀢𑀺𑀬𑀁 𑀧𑀽𑀚𑁂𑀲𑀺. 𑀢𑀢𑁄 𑀧𑀧𑀜𑁆𑀘𑀁 𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀲𑀓𑁆𑀓𑀲𑁆𑀲 𑀦𑀺𑀯𑁂𑀤𑁂𑀲𑀼𑀁. 𑀢𑀁 𑀲𑀼𑀢𑁆𑀯𑀸 𑀲𑀓𑁆𑀓𑁄 𑀲𑀸𑀫𑀡𑁂𑀭𑀸𑀦𑀁 𑀧𑀜𑁆𑀘𑀫𑀳𑀸𑀉𑀬𑁆𑀬𑀸𑀦𑀢𑁄 𑀧𑀸𑀭𑀺𑀘𑁆𑀙𑀢𑁆𑀢-𑀓𑁄𑀯𑀺𑀴𑀸𑀭𑀸𑀤𑀻𑀦𑀺 𑀧𑀼𑀧𑁆𑀨𑀸𑀦𑀺 𑀘 𑀘𑀦𑁆𑀤𑀦𑀘𑀼𑀡𑁆𑀡𑀜𑁆𑀘 𑀕𑀳𑁂𑀢𑁆𑀯𑀸 𑀤𑀸𑀧𑁂𑀲𑀺. 𑀲𑀸𑀫𑀡𑁂𑀭𑀸 𑀧𑀼𑀧𑁆𑀨𑀸𑀦𑀺 𑀕𑀳𑁂𑀢𑁆𑀯𑀸 𑀤𑁂𑀯𑀮𑁄𑀓𑀢𑁄 𑀑𑀢𑀭𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀲𑀼𑀯𑀡𑁆𑀡𑀫𑀡𑀺𑀧𑀩𑁆𑀩𑀢𑁂 𑀲𑀦𑁆𑀢𑀘𑁆𑀙𑀸𑀬𑀸𑀬 𑀦𑀲𑀻𑀤𑀺𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀁 𑀓𑀢𑁆𑀯𑀸 𑀦𑀓𑁆𑀔𑀢𑁆𑀢𑀯𑁂𑀮𑀸𑀬 𑀲𑀫𑁆𑀧𑀢𑁆𑀢𑀸𑀬 𑀫𑀡𑀻 𑀕𑀯𑁂𑀲𑀫𑀸𑀦𑀸 𑀘𑀢𑁆𑀢𑀸𑀭𑁄 𑀫𑀡𑀬𑁄 𑀅𑀤𑁆𑀤𑀲𑀁𑀲𑀼. 𑀢𑁂𑀲𑀁 𑀏𑀓𑁄 𑀇𑀦𑁆𑀤𑀦𑀻𑀮𑀫𑀡𑀻, 𑀏𑀓𑁄 𑀧𑀳𑀲𑁆𑀲𑀭𑀚𑁄𑀢𑀺𑀭𑀗𑁆𑀕 𑀫𑀡𑀻, 𑀏𑀓𑁄 𑀯𑁂𑀮𑀼𑀭𑀺𑀬𑀫𑀡𑀺, 𑀏𑀓𑁄 𑀫𑀲𑀸𑀭𑀕𑀮𑁆𑀮𑀫𑀡𑀺, 𑀘𑀢𑁆𑀢𑀸𑀭𑁄 𑀫𑀡𑀬𑁄 𑀘 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀘 𑀕𑀳𑁂𑀢𑁆𑀯𑀸 𑀣𑁂𑀭𑀸𑀦𑀁 𑀤𑀲𑁆𑀲𑁂𑀲𑀼𑀁. 𑀣𑁂𑀭𑁄? 𑀫𑀳𑀸𑀭𑀸𑀚, 𑀇𑀫𑁂 𑀲𑀸𑀫𑀡𑁂𑀭𑀸 𑀧𑀸𑀭𑀺𑀘𑁆𑀙𑀢𑁆𑀢𑀓𑀓𑁄𑀯𑀺𑀴𑀸𑀭𑀸𑀤𑀻𑀦𑀺 𑀧𑀼𑀧𑁆𑀨𑀸𑀦𑀺 𑀘 𑀘𑀦𑁆𑀤𑀦𑀘𑀼𑀡𑁆𑀡𑀜𑁆𑀘 𑀘𑀢𑁆𑀢𑀸𑀭𑁄 𑀫𑀡𑀬𑁄 𑀘 𑀕𑀳𑁂𑀢𑁆𑀯𑀸 𑀆𑀕𑀢𑀸’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁.

𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀲𑀸𑀫𑀡𑁂𑀭𑁂 𑀧𑀜𑁆𑀘 𑀧𑀢𑀺𑀝𑁆𑀞𑀻𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀢𑁂𑀲𑀫𑀸𑀳𑀢𑀫𑀡𑀬𑁄 𑀕𑀳𑁂𑀢𑁆𑀯𑀸 𑀫𑀳𑀸𑀦𑀦𑁆𑀤 𑀦𑀸𑀫 𑀅𑀫𑀘𑁆𑀘𑀲𑁆𑀲 𑀤𑀢𑁆𑀯𑀸 𑀣𑁂𑀭𑁂𑀳𑀻 𑀲𑀤𑁆𑀥𑀺𑀁 𑀫𑀳𑀦𑁆𑀢𑁂𑀦 𑀧𑀭𑀺𑀯𑀸𑀭𑁂𑀦 𑀘𑁂𑀢𑀺𑀬𑀗𑁆𑀕𑀡𑀁 𑀕𑀦𑁆𑀢𑁆𑀯𑀸 𑀫𑀡𑀺𑀓𑀭𑀡𑁆𑀟𑀓𑁂𑀦 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀻𑀲𑁂 𑀥𑀸𑀢𑀼𑀁 𑀞𑀧𑁂𑀢𑁆𑀯𑀸 𑀉𑀧𑀭𑀺 𑀲𑁂𑀢𑀘𑁆𑀙𑀢𑁆𑀢𑀁 𑀓𑀸𑀭𑀸𑀧𑁂𑀢𑁆𑀯𑀸 𑀘𑁂𑀢𑀺𑀬𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀸𑀘𑀻𑀦𑀤𑁆𑀯𑀸𑀭𑁂 𑀞𑀻𑀢𑁄? 𑀅𑀬𑀁 𑀤𑀲𑀩𑀮𑀲𑁆𑀲 𑀦𑀮𑀸𑀝𑀥𑀸𑀢𑀼 𑀅𑀫𑁆𑀳𑁂𑀳𑀺 𑀓𑀸𑀭𑀸𑀧𑀺𑀢𑀸𑀬 𑀩𑀼𑀤𑁆𑀥𑀧𑀝𑀺𑀫𑀸𑀬 𑀦𑀮𑀸𑀝𑁂 𑀉𑀡𑁆𑀡𑀮𑁄𑀫𑀸𑀓𑀸𑀭𑀁 𑀳𑀼𑀢𑁆𑀯𑀸 𑀧𑀢𑀺𑀝𑁆𑀞𑀳𑀢𑀽𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀢𑀲𑁆𑀲 𑀘𑀺𑀦𑁆𑀢𑀺𑀢𑀓𑁆𑀔𑀡𑁂𑀬𑁂𑀯 𑀥𑀸𑀢𑀼 𑀓𑀭𑀡𑁆𑀟𑀢𑁄 𑀦𑀪𑀫𑀼𑀕𑁆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀲𑀢𑁆𑀢𑀢𑀸𑀮𑀧𑁆𑀧𑀫𑀸𑀡𑁂 𑀞𑀢𑁆𑀯𑀸 𑀙𑀩𑁆𑀩𑀡𑁆𑀡 𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀸 𑀭𑀁𑀲𑀺𑀬𑁄 𑀓𑀼𑀝𑁂𑀦 𑀆𑀲𑀺𑀜𑁆𑀘𑀫𑀸𑀦𑀯𑀺𑀮𑀻𑀦 𑀲𑀼𑀯𑀡𑁆𑀡𑀁 𑀯𑀺𑀬 𑀅𑀦𑁆𑀢𑀮𑀺𑀓𑁆𑀔𑀢𑁄 𑀦𑀺𑀓𑁆𑀔𑀦𑁆𑀢𑀲𑀼𑀯𑀡𑁆𑀡𑀭𑀲𑀥𑀸𑀭𑀸 𑀯𑀺𑀬 𑀲𑀓𑀮𑀮𑀗𑁆𑀓𑀸𑀤𑀻𑀧𑀁 ¶ 𑀭𑀁𑀲𑀺𑀚𑀸𑀮𑁂𑀳𑀺 𑀏𑀓𑁄𑀪𑀸𑀲𑀁 𑀓𑀢𑁆𑀯𑀸 𑀕𑀡𑁆𑀳𑀺𑀁𑀲𑀼. 𑀢𑀲𑁆𑀫𑀺𑀁 𑀓𑀸𑀮𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀲𑀤𑀺𑀲𑀁 𑀧𑀸𑀝𑀺𑀳𑀸𑀭𑀺𑀬𑀁 𑀅𑀳𑁄𑀲𑀺. 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀪𑀕𑀯𑀢𑁄 𑀅𑀤𑀺𑀝𑁆𑀞𑀧𑀼𑀩𑁆𑀩𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀫𑀳𑀸𑀚𑀦𑀸 𑀢𑀣𑀸𑀕𑀢𑀲𑁆𑀲 𑀭𑀽𑀧𑀓𑀸𑀬𑀁 𑀧𑀘𑁆𑀘𑀓𑁆𑀔𑀪𑀼𑀢𑀸 𑀯𑀺𑀬 𑀅𑀳𑁂𑀲𑀼𑀁.

𑀅𑀤𑀺𑀝𑁆𑀞𑀧𑀼𑀩𑁆𑀩𑀁 𑀲𑀢𑁆𑀣𑀼𑀲𑁆𑀲 𑀧𑀸𑀝𑀺𑀳𑀻𑀭𑀁 𑀫𑀳𑀸𑀚𑀦𑀸;

𑀤𑀺𑀲𑁆𑀯𑀸 𑀧𑀻𑀢𑀺𑀧𑀭𑀸 𑀚𑀸𑀢𑀸 𑀧𑀲𑀸𑀤𑀫𑀚𑁆𑀛𑀕𑀼𑀁 𑀚𑀺𑀦𑁂.

𑀧𑀽𑀚𑁂𑀲𑀼𑀁 𑀕𑀦𑁆𑀥𑀫𑀸𑀮𑀜𑁆𑀘 𑀅𑀮𑀗𑁆𑀓𑀸𑀭𑀁 𑀲𑀓𑀁 𑀲𑀓𑀁;

𑀲𑀩𑁆𑀩𑁂 𑀯𑀦𑁆𑀤𑀺𑀁𑀲𑀼 𑀲𑀺𑀭𑀲𑀸-𑀘𑁂𑀢𑀺𑀬𑀁 𑀈𑀤𑀺𑀲𑀁 𑀯𑀭𑀁.

𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀏𑀓𑁄 𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀚𑀺𑀦𑀁 𑀣𑁄𑀫𑁂𑀦𑁆𑀢𑁄 𑀏𑀯𑀫𑀸𑀳?

𑀦𑀺𑀩𑁆𑀩𑀼𑀢𑀲𑁆𑀲𑀸𑀧𑀺 𑀩𑀼𑀤𑁆𑀥𑀲𑁆𑀲 𑀬𑀲𑁄 𑀪𑀯𑀢𑀺 𑀈𑀤𑀺𑀲𑁄;

𑀞𑀻𑀢𑀲𑁆𑀲 𑀮𑁄𑀓𑀦𑀸𑀣𑀲𑁆𑀲 𑀓𑀻𑀤𑀺𑀲𑀸 𑀆𑀲𑀺 𑀲𑀫𑁆𑀧𑀤𑀸.

𑀅𑀦𑀼𑀪𑀸𑀯𑀫𑀺𑀤𑀁 𑀲𑀩𑁆𑀩𑀁 𑀧𑀼𑀜𑁆𑀜𑁂𑀦𑁂𑀯 𑀫𑀳𑁂𑀲𑀺𑀦𑁄;

𑀓𑀭𑁂𑀬𑁆𑀬 𑀜𑀢𑁆𑀯𑀸 𑀧𑀼𑀜𑁆𑀜𑀁 𑀢𑀁 𑀧𑀢𑁆𑀣𑁂𑀦𑁆𑀢𑁄 𑀩𑁄𑀥𑀺𑀫𑀼𑀢𑁆𑀢𑀫𑀁.

𑀢𑀲𑁆𑀫𑀺𑀁 𑀓𑀸𑀮𑁂 𑀦𑀸𑀦𑀸𑀭𑀢𑀦𑀯𑀺𑀘𑀺𑀢𑁆𑀢𑀁 𑀅𑀦𑁂𑀓𑀸𑀮𑀗𑁆𑀓𑀸𑀭𑀧𑀢𑀺𑀫𑀡𑁆𑀟𑀺𑀢𑀁 𑀫𑀳𑀸𑀭𑀳𑀁 𑀲𑀫𑀼𑀲𑁆𑀲𑀺𑀢𑀥𑀚𑀧𑀢𑀸𑀓𑀁 𑀦𑀸𑀦𑀸𑀯𑀺𑀥𑀓𑀼𑀲𑀼𑀫𑀲𑀫𑀸𑀓𑀺𑀡𑁆𑀡𑀁 𑀅𑀦𑁂𑀓𑀧𑀽𑀚𑀸𑀯𑀺𑀥𑀸𑀦𑀁 𑀕𑀳𑁂𑀢𑁆𑀯𑀸 𑀫𑀦𑀼𑀲𑁆𑀲𑀸 𑀙𑀡𑀯𑁂𑀲𑀁 𑀕𑀡𑁆𑀳𑀺𑀁𑀲𑀼. 𑀅𑀦𑁂𑀓𑀯𑀺𑀥𑀢𑀼𑀭𑀺𑀬𑀲𑀗𑁆𑀖𑀼𑀝𑁆𑀝𑀁 𑀅𑀳𑁄𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀤𑁂𑀯𑀢𑀸𑀬𑁄 𑀧𑀼𑀧𑁆𑀨𑀯𑀲𑁆𑀲𑀁 𑀯𑀲𑁆𑀲𑀸𑀧𑁂𑀦𑁆𑀢𑀺. 𑀫𑀳𑀸𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑀸 𑀦𑀸𑀕𑀸 𑀧𑀽𑀚𑀁 𑀓𑀭𑁄𑀦𑁆𑀢𑀺. 𑀏𑀯𑀁 𑀲𑀩𑁆𑀩𑁂 𑀤𑁂𑀯𑀸 𑀦𑀸𑀕𑀸 𑀫𑀦𑀼𑀲𑁆𑀲𑀸 𑀲𑀸𑀥𑀼𑀓𑀸𑀭𑀁 𑀤𑁂𑀦𑁆𑀢𑀺, 𑀅𑀧𑁆𑀨𑁄𑀝𑁂𑀦𑁆𑀢𑀺, 𑀯𑁂𑀮𑀼𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑀺, 𑀳𑀢𑁆𑀣𑀻𑀦𑁄 𑀓𑀼𑀜𑁆𑀘𑀦𑀸𑀤𑀁 𑀦𑀤𑀦𑁆𑀢𑀺. 𑀅𑀲𑁆𑀲𑀸 𑀢𑀼𑀝𑁆𑀞𑀺𑀭𑀯𑀁 𑀭𑀯𑀦𑁆𑀢𑀺, 𑀩𑀳𑀮𑀖𑀦 𑀫𑀳𑀸𑀧𑀣𑀯𑀻 𑀬𑀸𑀯 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀫𑁆𑀧𑀺. 𑀤𑀺𑀲𑀸𑀲𑀼 𑀯𑀺𑀚𑁆𑀚𑀼𑀮𑁆𑀮𑀢𑀸 𑀦𑀺𑀘𑁆𑀙𑀭𑀺𑀁𑀲𑀼. 𑀲𑀓𑀮𑀮𑀗𑁆𑀓𑀸𑀤𑀻𑀧𑁂 𑀲𑀼𑀫𑀦𑀓𑀽𑀝𑀸𑀤𑀬𑁄 𑀫𑀳𑀸𑀦𑀕𑀸 𑀓𑀼𑀲𑀼𑀫𑀕𑀡𑀲𑀫𑀸𑀓𑀺𑀡𑁆𑀡𑀸 𑀅𑀳𑁂𑀲𑀼𑀁. 𑀲𑀩𑁆𑀩𑁂 𑀚𑀮𑀸𑀲𑀬𑀸 𑀧𑀜𑁆𑀘𑀯𑀺𑀥 𑀧𑀤𑀼𑀫𑀲𑀜𑁆𑀙𑀦𑁆𑀢𑀸, 𑀤𑁂𑀯𑀢𑀸𑀦𑀫𑀦𑁆𑀢𑀭𑁂 𑀫𑀦𑀼𑀲𑁆𑀲𑀸, 𑀫𑀦𑀼𑀲𑁆𑀲𑀸𑀦𑀁 𑀅𑀦𑁆𑀢𑀭𑁂 𑀬𑀓𑁆𑀔𑀦𑀸𑀕𑀲𑀼𑀧𑀡𑁆𑀡𑀸𑀤𑀬𑁄 𑀘 𑀅𑀳𑁂𑀲𑀼𑀁. 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀉𑀧𑀸𑀲𑀓 𑀉𑀧𑀸𑀲𑀺𑀓𑀸 𑀅𑀧𑀭𑀺𑀫𑀸𑀡𑀸 𑀅𑀳𑁂𑀲𑀼𑀁. 𑀫𑀳𑀦𑁆𑀢𑁂𑀦 𑀲𑀸𑀥𑀼𑀓𑀸𑀭𑁂𑀦 𑀫𑀳𑀸 𑀦𑀺𑀕𑁆𑀖𑁄𑀲𑁂𑀦 𑀲𑀓𑀮𑀮𑀗𑁆𑀓𑀸𑀤𑀻𑀧𑁂 𑀢𑀺𑀩𑁆𑀩𑀯𑀸𑀢𑀸𑀪𑀺𑀳𑀢𑀲𑀫𑀼𑀤𑁆𑀤𑁄 𑀯𑀺𑀬 𑀏𑀓𑀦𑀺𑀦𑁆𑀦𑀸𑀤𑀁 ¶ 𑀏𑀓𑀦𑀺𑀕𑁆𑀖𑁄𑀲𑀁 𑀅𑀳𑁄𑀲𑀺. 𑀇𑀫𑀺𑀦𑀸 𑀧𑀽𑀚𑀸𑀯𑀺𑀥𑀸𑀦𑁂𑀦 𑀧𑀲𑀸𑀤𑀓𑀪𑀽𑀢𑀫𑀳𑀸𑀚𑀦𑀓𑀸𑀬𑀫𑀚𑁆𑀛𑁂 𑀥𑀸𑀢𑀼 𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑁆𑀯𑀸 𑀆𑀓𑀸𑀲𑀢𑁄 𑀑𑀢𑀭𑀺𑀢𑁆𑀯𑀸 𑀩𑀼𑀤𑁆𑀥𑀧𑀝𑀺𑀫𑀸𑀬 𑀦𑀮𑀸𑀝𑁂 𑀧𑀼𑀡𑁆𑀡𑀘𑀦𑁆𑀤𑀲𑀲𑁆𑀲𑀺𑀭𑀻𑀓𑀁 𑀅𑀪𑀺𑀪𑀯𑀦𑁆𑀢𑀫𑀺𑀯 𑀯𑀺𑀭𑁄𑀘𑀫𑀸𑀦𑀸 𑀧𑀢𑀺𑀝𑁆𑀞𑀸𑀲𑀺.

𑀭𑀸𑀚𑀸 𑀫𑀳𑀸𑀦𑀦𑁆𑀤𑀦𑀸𑀫𑀓𑀲𑁆𑀲 𑀅𑀫𑀘𑁆𑀘𑀲𑁆𑀲 𑀳𑀢𑁆𑀣𑀢𑁄 𑀓𑁂𑀲𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀤𑁂𑀯𑀺𑀬𑀸 𑀤𑀢𑁆𑀯𑀸 𑀢𑁆𑀯𑀁 𑀇𑀫𑀸 𑀓𑁂𑀲𑀥𑀸𑀢𑀼𑀬𑁄 𑀤𑀲𑀩𑀮𑀲𑁆𑀲 𑀅𑀦𑀯𑀮𑁄𑀓𑀺𑀢 𑀫𑀢𑁆𑀣𑀓𑁂 𑀧𑀢𑀺𑀝𑁆𑀞𑀸𑀧𑁂𑀳𑀻’𑀢𑀺 𑀆𑀳. 𑀲𑀸 𑀓𑁂𑀲𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀢𑀢𑁆𑀣𑁂𑀯 𑀧𑀢𑀺𑀝𑁆𑀞𑀳𑀦𑁆𑀢𑀼’𑀢𑀺 𑀅𑀥𑀺𑀝𑁆𑀞𑀸𑀦𑀁 𑀅𑀓𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀓𑁂𑀲𑀥𑀸𑀢𑀼𑀬𑁄 𑀓𑀭𑀡𑁆𑀟𑀢𑁄 𑀦𑀪𑀁 𑀉𑀕𑁆𑀕𑀦𑁆𑀢𑁆𑀯𑀸 𑀫𑀬𑀽𑀭𑀕𑀻𑀯𑀲𑀁𑀓𑀸𑀲𑀦𑀻𑀮𑀭𑀁𑀲𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀻 𑀆𑀓𑀸𑀲𑀢𑁄 𑀑𑀢𑀭𑀺𑀢𑁆𑀯𑀸 𑀩𑀼𑀤𑁆𑀥𑀧𑀝𑀺𑀫𑀸𑀬 𑀉𑀢𑁆𑀢𑀫𑀗𑁆𑀕𑁂 𑀲𑀺𑀭𑀲𑁆𑀫𑀺𑀁 𑀧𑀢𑀺𑀝𑁆𑀞𑀳𑀺𑀁𑀲𑀼.

𑀢𑀢𑁄 𑀭𑀸𑀚𑀸 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀥𑀸𑀢𑀼𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀤𑀺𑀩𑁆𑀩𑀘𑀦𑁆𑀤𑀦𑀘𑀼𑀡𑁆𑀡𑀲𑀫𑀸𑀓𑀺𑀡𑁆𑀡𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑀓𑁄𑀯𑀺𑀴𑀸𑀭𑀸𑀤𑀺 𑀲𑀼𑀕𑀦𑁆𑀥𑀧𑀼𑀧𑁆𑀨𑀲𑀦𑁆𑀣𑀭𑀁 𑀯𑀺𑀬𑀽𑀳𑀺𑀢𑁆𑀯𑀸 𑀧𑀪𑀸𑀲𑀫𑀼𑀤𑀬𑀲𑀫𑀸𑀓𑀺𑀡𑁆𑀡𑁂 𑀘𑀢𑁆𑀢𑀸𑀭𑁄 𑀫𑀡𑀺 𑀧𑀸𑀲𑀸𑀡𑁂 𑀞𑀧𑁂𑀲𑀺. 𑀢𑁂𑀲𑀁 𑀆𑀮𑁄𑀓𑀸𑀪𑀺𑀪𑀽𑀢𑁄 𑀥𑀸𑀢𑀼𑀕𑀩𑁆𑀪𑁄 𑀅𑀢𑀺𑀯𑀺𑀬 𑀯𑀺𑀭𑁄𑀘𑀺𑀢𑁆𑀣. 𑀲𑀩𑁆𑀩𑀦𑀸𑀝𑀓𑀺𑀢𑁆𑀣𑀻𑀬𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀆𑀪𑀭𑀡𑀸𑀦𑀺 𑀑𑀫𑀼𑀜𑁆𑀘𑀺𑀢𑁆𑀯𑀸 𑀥𑀸𑀢𑀼𑀕𑀩𑁆𑀪𑁂𑀬𑁂𑀯 𑀧𑀽𑀚𑁂𑀲𑀼𑀁. 𑀢𑀢𑁄 𑀭𑀸𑀚𑀸 𑀥𑀸𑀢𑀼𑀦𑀺𑀥𑀸𑀦𑀁 𑀓𑀢𑁆𑀯𑀸 𑀩𑀼𑀤𑁆𑀥𑀭𑀽𑀧𑀲𑁆𑀲 𑀧𑀸𑀤𑀢𑀮𑁂 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀦𑀺𑀧𑀦𑁆𑀦𑁄 𑀏𑀯𑀁 𑀧𑀭𑀺𑀤𑁂𑀯𑀺; 𑀫𑀬𑁆𑀳𑀁 𑀧𑀺𑀢𑀼𑀧𑀺𑀢𑀸𑀫𑀳𑀧𑀭𑀫𑁆𑀧𑀭𑀸𑀕𑀢𑀸𑀥𑀸𑀢𑀼 𑀅𑀚𑁆𑀚 𑀆𑀤𑀺𑀁 𑀓𑀢𑁆𑀯𑀸 𑀇𑀢𑁄 𑀧𑀝𑁆𑀞𑀸𑀬 𑀯𑀺𑀬𑁄𑀕𑀸 𑀚𑀸𑀢𑀸 𑀅𑀳𑀁 𑀤𑀸𑀦𑀺 𑀢𑀼𑀫𑁆𑀳𑀸𑀓𑀁 𑀅𑀢𑀺𑀘𑀺𑀭𑀁 (𑀞𑀻𑀢𑀸) 𑀭𑀫𑀡𑀻𑀬𑀸 𑀭𑁄𑀳𑀡𑀚𑀦𑀧𑀤𑀸 𑀆𑀳𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀢𑀺𑀝𑁆𑀞𑀸𑀧𑁂𑀲𑀺𑀦𑁆𑀢𑀺 𑀯𑀢𑁆𑀯𑀸 𑀲𑀺𑀦𑁂𑀭𑀼 𑀫𑀼𑀤𑁆𑀥𑀦𑀺 ¶ 𑀲𑀫𑀼𑀚𑁆𑀚𑀮𑀫𑀳𑀸𑀧𑀤𑀻𑀧𑁄 𑀯𑀺𑀬 𑀢𑀼𑀫𑁆𑀳𑁂 𑀇𑀥𑁂𑀯 𑀞𑀻𑀢𑀸. 𑀇𑀤𑀸𑀦𑀺 𑀦 𑀕𑀫𑀺𑀲𑁆𑀲𑀸𑀫 𑀫𑀬𑀁 𑀔𑀫𑀣 𑀪𑀕𑀯𑀸’𑀢𑀺 𑀧𑀭𑀺𑀤𑁂𑀯𑀫𑀸𑀦𑁄 𑀥𑀸𑀢𑀼 𑀕𑀩𑁆𑀪𑁂𑀬𑁂𑀯 𑀧𑀢𑀺𑀢𑁆𑀯𑀸 𑀆𑀳?

𑀅𑀳𑁄 𑀯𑀺𑀬𑁄𑀕𑀁 𑀤𑀼𑀓𑁆𑀔𑀁 𑀫𑁂 𑀏𑀢𑀸 𑀩𑀸𑀥𑁂𑀦𑁆𑀢𑀺 𑀥𑀸𑀢𑀼𑀬𑁄;

𑀯𑀢𑁆𑀯𑀸 𑀲𑁄 𑀧𑀭𑀺𑀤𑁂𑀯𑀦𑁆𑀢𑁄 𑀥𑀸𑀢𑀼𑀕𑀩𑁆𑀪𑁂 𑀲𑀬𑀻 𑀢𑀤𑀸.

𑀫𑀭𑀺𑀲𑁆𑀲𑀸𑀫𑀺 𑀦𑁄 𑀕𑀫𑀺𑀲𑁆𑀲𑀁 𑀅𑀬𑁆𑀬𑀁 𑀳𑀺𑀢𑁆𑀯𑀸 𑀇𑀥𑁂𑀯’𑀳𑀁;

𑀤𑀼𑀮𑁆𑀮𑀪𑀁 𑀤𑀲𑁆𑀲𑀦𑀁 𑀢𑀲𑁆𑀲 𑀲𑀁𑀲𑀸𑀭𑁂 𑀘𑀭𑀢𑁄 𑀫𑀫𑀸’𑀢𑀺.

𑀯𑀢𑁆𑀯𑀸 𑀧𑀭𑀺𑀤𑁂𑀯𑀦𑁆𑀢𑁄 𑀦𑀺𑀧𑀚𑁆𑀚𑀺. 𑀢𑀲𑁆𑀲 𑀧𑀦 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀦𑁆𑀢𑀭𑁂 𑀲𑀳𑀤𑁂𑀯𑁄 𑀦𑀸𑀫 𑀣𑁂𑀭𑁄 𑀭𑀸𑀚𑀸𑀦𑀁 𑀥𑀸𑀢𑀼𑀕𑀩𑁆𑀪𑁂 𑀭𑁄𑀤𑀫𑀸𑀦𑀁 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 𑀓𑀺𑀫𑀚𑁆𑀛𑀸𑀲𑀬𑁄 𑀏𑀢𑀲𑁆𑀲𑀸’𑀢𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀲𑀫𑀦𑁆𑀢𑀸𑀳𑀭𑀺𑀢𑁆𑀯𑀸 𑀇𑀥 𑀦𑀺𑀧𑀦𑁆𑀦𑁄 𑀫𑀭𑀺𑀲𑁆𑀲𑀸𑀫𑀻’𑀢𑀺 𑀦𑀺𑀧𑀦𑁆𑀦𑀪𑀸𑀯𑀁 𑀚𑀸𑀦𑀺𑀢𑁆𑀯𑀸 𑀇𑀤𑁆𑀥𑀺𑀬𑀸 𑀲𑀁𑀲𑀭𑀁 𑀧𑀺𑀬𑀭𑀽𑀧𑀁 𑀫𑀸𑀧𑁂𑀢𑁆𑀯𑀸 𑀥𑀸𑀢𑀼𑀕𑀩𑁆𑀪𑀢𑁄 𑀢𑀁 𑀩𑀳𑀺 𑀅𑀓𑀸𑀲𑀺.

(𑀇𑀤𑁆𑀥𑀺𑀬𑀸 𑀲𑁄 𑀯𑀲𑀺𑀧𑀢𑁆𑀢𑁄 𑀙𑀴𑀪𑀺𑀜𑁆𑀜𑁄 𑀯𑀺𑀲𑀸𑀭𑀤𑁄;

𑀢𑀁 𑀔𑀡𑀜𑁆𑀜𑁂𑀯 𑀲𑀧𑁆𑀧𑀜𑁆𑀜𑁄 𑀭𑀸𑀚𑀸𑀦𑀁 𑀢𑀁 𑀩𑀳𑀺𑀁 𑀅𑀓𑀸.)

𑀢𑀢𑁄 𑀧𑀞𑀫𑀸𑀦𑀻𑀢𑀚𑁄𑀢𑀺𑀭𑀗𑁆𑀕 𑀧𑀸𑀲𑀸𑀡𑀁 𑀥𑀸𑀢𑀼𑀕𑀩𑁆𑀪𑀲𑁆𑀲 𑀉𑀧𑀭𑀺 𑀯𑀺𑀢𑀸𑀦𑀁 𑀯𑀺𑀬 𑀞𑀧𑁂𑀢𑁆𑀯𑀸 𑀅𑀭𑀳𑀦𑁆𑀢𑀸? 𑀥𑀸𑀢𑀼𑀕𑀩𑁆𑀪𑁄 𑀲𑀫𑀦𑁆𑀢𑀢𑁄 𑀘𑀢𑀼𑀭𑀲𑁆𑀲𑀫𑀜𑁆𑀘𑀁 𑀯𑀺𑀬 𑀏𑀓𑀖𑀦𑁄 𑀳𑁄𑀢𑀼. 𑀥𑀸𑀢𑀼 𑀕𑀩𑁆𑀪𑁂 𑀕𑀦𑁆𑀥𑀸 𑀫𑀸 𑀲𑀼𑀲𑁆𑀲𑀦𑁆𑀢𑀼, 𑀧𑀼𑀧𑁆𑀨𑀸𑀦𑀺 𑀫𑀸 𑀫𑀺𑀮𑀸𑀬𑀦𑁆𑀢𑀼, 𑀭𑀢𑀦𑀸𑀦𑀺 𑀫𑀸 𑀯𑀺𑀯𑀡𑁆𑀡𑀸 𑀳𑁄𑀦𑁆𑀢𑀼, 𑀧𑀽𑀚𑀦𑀻𑀬𑀪𑀡𑁆𑀟𑀸𑀦𑀺 𑀫𑀸 𑀦𑀲𑁆𑀲𑀦𑁆𑀢𑀼, 𑀧𑀘𑁆𑀘𑀢𑁆𑀣𑀺𑀓𑀧𑀘𑁆𑀘𑀸𑀫𑀺𑀢𑁆𑀢𑀸𑀦𑀁 𑀑𑀓𑀸𑀲𑁄 𑀯𑀸 𑀯𑀺𑀯𑀭𑁄 𑀯𑀸 𑀫𑀸 𑀳𑁄𑀢𑀼’𑀢𑀺 𑀅𑀥𑀺𑀝𑁆𑀞𑀳𑀺𑀁𑀲𑀼. 𑀢𑀢𑁄 𑀭𑀸𑀚𑀸 𑀥𑀸𑀢𑀼𑀬𑁄 𑀫𑀳𑀦𑁆𑀢𑀁 𑀧𑀽𑀚𑀁 𑀓𑀢𑁆𑀯𑀸 𑀫𑀗𑁆𑀕𑀮𑀘𑁂𑀢𑀺𑀬𑁂 𑀘𑀢𑀼𑀭𑀲𑁆𑀲𑀓𑁄𑀝𑁆𑀞𑀓𑀁 𑀅𑀢𑀺𑀫𑀦𑁄𑀭𑀫𑀁 𑀙𑀢𑁆𑀢𑀓𑀫𑁆𑀫𑀜𑁆𑀘 𑀓𑁂𑀮𑀸𑀲𑀓𑀽𑀝𑀁 𑀯𑀺𑀬 𑀲𑀼𑀥𑀸𑀓𑀫𑁆𑀫𑀜𑁆𑀘 𑀯𑀸𑀮𑀼𑀓𑀧𑀸𑀤𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀜𑁆𑀘 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀲𑁄 𑀧𑀦 𑀲𑁂𑀢 𑀦𑀺𑀫𑁆𑀫𑀮𑀘𑀦𑁆𑀤𑀭𑀁𑀲𑀺 𑀯𑀺𑀬 𑀉𑀤𑀓𑀩𑀼𑀩𑁆𑀩𑀼𑀴𑀓𑁂𑀮𑀸𑀲𑀓𑀽𑀝𑀧𑀝𑀺𑀪𑀸𑀕𑁄 𑀙𑀢𑁆𑀢𑀥𑀭𑁄 ¶ 𑀅𑀘𑀮𑀧𑁆𑀧𑀢𑀺𑀝𑁆𑀞𑀺𑀢𑁄 𑀲𑀼𑀚𑀦𑀧𑁆𑀧𑀲𑀸𑀤𑀓𑁄 𑀅𑀜𑁆𑀜𑀢𑀺𑀢𑁆𑀣𑀻𑀬 𑀫𑀤𑁆𑀤𑀦𑀓𑀭𑁄 𑀫𑀗𑁆𑀕𑀮𑀣𑀽𑀧𑁄 𑀯𑀺𑀭𑁄𑀘𑀺𑀢𑁆𑀣.

𑀯𑀺𑀮𑀸𑀲𑀫𑀸𑀦𑁄 𑀅𑀝𑁆𑀞𑀸𑀲𑀺 𑀢𑁄𑀲𑀬𑀦𑁆𑀢𑁄 𑀫𑀳𑀸𑀚𑀦𑁂;

𑀫𑀗𑁆𑀕𑀮𑀓𑁂𑀮𑀸𑀲𑀣𑀽𑀧𑁄 𑀅𑀘𑀮𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄.

𑀲𑀼𑀚𑀦𑀧𑁆𑀧𑀲𑀸𑀤𑀦𑀓𑀭𑁄 𑀢𑀺𑀢𑁆𑀣𑀺𑀬𑀤𑀺𑀝𑁆𑀞𑀺𑀫𑀤𑁆𑀤𑀦𑁄;

𑀪𑀯𑀺 𑀲𑀤𑁆𑀥𑀸𑀓𑀭𑁄 𑀲𑁂𑀝𑁆𑀞𑁄 𑀲𑀩𑁆𑀩𑀚𑀦𑀧𑀲𑀸𑀤𑀓𑁄.

𑀘𑁂𑀢𑀺𑀬𑁄 𑀧𑀯𑀭𑁄 𑀮𑁄𑀓𑁂 𑀫𑀳𑀸𑀚𑀦𑀦𑀺𑀲𑁂𑀯𑀺𑀢𑁄;

𑀥𑀚𑀧𑀼𑀧𑁆𑀨𑀲𑀫𑀸𑀓𑀺𑀡𑁆𑀡𑁄 𑀲𑀤𑀸 𑀧𑀽𑀚𑀸𑀭𑀳𑁄 𑀪𑀯𑀺.

𑀩𑀳𑀽 𑀚𑀦𑀸 𑀲𑀫𑀸𑀕𑀫𑁆𑀫 𑀦𑀸𑀦𑀸 𑀤𑁂𑀲𑀸 𑀲𑀫𑀸𑀕𑀢𑀸;

𑀧𑀽𑀚𑁂𑀲𑀼𑀁 𑀢𑀁 𑀫𑀳𑀸𑀣𑀽𑀧𑀁 𑀲𑀩𑁆𑀩𑀤𑀸𑀧𑀺 𑀅𑀢𑀦𑁆𑀤𑀺𑀢𑀸.

𑀈𑀤𑀺𑀲𑁄 𑀧𑀢𑀺𑀭𑀽𑀧𑀯𑀸𑀲𑁄 𑀲𑁄 𑀤𑁂𑀲𑁄 𑀤𑀼𑀮𑁆𑀮𑀪𑁄 𑀪𑀯𑁂;

𑀅𑀧𑁆𑀧𑀫𑀢𑁆𑀢𑀸 𑀲𑀤𑀸 𑀲𑀦𑁆𑀢𑀸 𑀯𑀺𑀦𑀸𑀣 𑀓𑀼𑀲𑀮𑀁 𑀩𑀳𑀼𑀦𑁆𑀢𑀺.

𑀭𑀸𑀚𑀸 𑀓𑀧𑁆𑀧𑀸𑀲𑀺𑀓𑀲𑀼𑀔𑀼𑀫𑀯𑀢𑁆𑀣𑁂𑀦 𑀫𑀳𑀸𑀭𑀳𑀁 𑀘𑁂𑀢𑀺𑀬𑀁 𑀯𑁂𑀞𑁂𑀢𑁆𑀯𑀸, 𑀲𑀺𑀭𑀺𑀯𑀟𑁆𑀠𑀦𑀁 𑀦𑀸𑀫 𑀫𑀳𑀸𑀩𑁄𑀥𑀺𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀢𑀢𑁆𑀣 𑀩𑁄𑀥𑀺𑀖𑀭𑀜𑁆𑀘 𑀓𑀸𑀭𑀸𑀧𑁂𑀢𑁆𑀯𑀸 𑀢𑀺𑀪𑀽𑀫𑀓𑀁 𑀉𑀧𑁄𑀲𑀣𑀸𑀕𑀸𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀭𑀢𑁆𑀢𑀺𑀝𑁆𑀞𑀸𑀦 𑀤𑀺𑀯𑀸𑀝𑁆𑀞𑀸𑀦𑀸𑀤𑀻𑀦𑀺 𑀓𑀢𑁆𑀯𑀸 𑀲𑀩𑁆𑀩𑀁 𑀯𑀺𑀳𑀸𑀭𑁂 𑀓𑀢𑁆𑀢𑀩𑁆𑀩𑀁 𑀓𑀸𑀭𑁂𑀲𑀺. 𑀏𑀢𑁆𑀢𑀓𑀁 𑀓𑀸𑀭𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀁 𑀤𑀓𑁆𑀔𑀺𑀡𑁄𑀤𑀓𑀁 𑀤𑀲𑁆𑀲𑀸𑀫𑀻’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀲𑀻𑀢𑀺𑀲𑀳𑀲𑁆𑀲𑀫𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀢𑁆𑀢𑀤𑀺𑀯𑀲𑀸𑀦𑀺 𑀦𑀸𑀦𑀸𑀯𑀺𑀥 𑀲𑀽𑀧𑀯𑁆𑀬𑀜𑁆𑀚𑀦𑁂𑀳𑀺 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀳𑀸𑀪𑀺𑀓𑁆𑀔𑀼 𑀲𑀗𑁆𑀖𑀲𑁆𑀲 𑀢𑀺𑀘𑀻𑀯𑀭𑀢𑁆𑀣𑀸𑀬 𑀯𑀢𑁆𑀣𑀸𑀦𑀺 𑀤𑀸𑀧𑁂𑀢𑁆𑀯𑀸 𑀧𑀸𑀢𑁄𑀯 𑀧𑀸𑀢𑀭𑀸𑀲𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀻𑀢𑁄 𑀏𑀯𑀫𑀸𑀳? 𑀅𑀬𑁆𑀬𑀸, 𑀘𑀸𑀢𑀼𑀤𑁆𑀤𑀲𑀺𑀓𑁂 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀓𑁆𑀔𑀺𑀡𑀁 𑀤𑀸𑀢𑀼𑀫𑀺𑀘𑁆𑀙𑀸𑀫𑀻’𑀢𑀺. 𑀲𑁄 𑀧𑀦𑀸𑀬𑀲𑁆𑀫𑀸 𑀏𑀯𑀫𑀸𑀳; 𑀉𑀧𑀓𑀝𑁆𑀞 𑀧𑀼𑀡𑁆𑀡𑀫𑀸𑀬𑀁 𑀉𑀧𑁄𑀲𑀣𑀤𑀺𑀯𑀲𑁂 𑀅𑀲𑁆𑀲𑀬𑀼𑀚𑀦𑀓𑁆𑀔𑀢𑁆𑀢𑁂𑀦 𑀤𑀓𑁆𑀔𑀺𑀡𑀁 𑀥𑀸𑀢𑀼𑀁 𑀪𑀤𑁆𑀤𑀓𑀦𑁆𑀢𑀺. 𑀲𑁄 𑀣𑁂𑀭𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀲𑁄𑀫𑀦𑀕𑀭𑁂 𑀅𑀢𑁆𑀢𑀦𑁄 𑀪𑀕𑀺𑀦𑀺𑀁 𑀤𑁂𑀯𑀺𑀁 𑀓𑀣𑁂𑀲𑀺? 𑀪𑀕𑀺𑀦𑀺, 𑀤𑀲𑀩𑀮𑀲𑁆𑀲 𑀦𑀮𑀸𑀝𑀥𑀸𑀢𑀼𑀁 𑀦𑀺𑀤𑀳𑀺𑀢𑁆𑀯𑀸 𑀫𑀗𑁆𑀕𑀮𑀫𑀳𑀸𑀘𑁂𑀢𑀺𑀬𑀸𑀦𑀼𑀭𑀽𑀧𑀁 ¶ 𑀧𑀸𑀲𑀸𑀤𑀁 𑀅𑀮𑀗𑁆𑀓𑀢𑀤𑁆𑀯𑀸𑀭𑀝𑁆𑀝𑀸𑀮𑀓𑀢𑁄𑀭𑀡𑀁 𑀲𑁂𑀢 𑀯𑀢𑁆𑀣 𑀅𑀦𑁂𑀓𑀥𑀚𑀲𑀫𑀸𑀓𑀺𑀡𑁆𑀡𑀁 𑀯𑀺𑀳𑀸𑀭𑀜𑁆𑀘 𑀓𑀸𑀭𑀸𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑀁 𑀤𑀲𑁆𑀲𑀸𑀫𑀻’𑀢𑀺 𑀅𑀬𑁆𑀬𑀲𑁆𑀲 𑀓𑀣𑁂𑀲𑀺𑀁. 𑀲𑁄 𑀧𑀦𑀸𑀬𑀲𑁆𑀫𑀸; 𑀉𑀧𑀓𑀝𑁆𑀞 𑀧𑀼𑀡𑁆𑀡𑀫𑀸𑀬 𑀉𑀧𑁄𑀲𑀣𑀤𑀺𑀯𑀲𑁂 𑀤𑀸𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀆𑀳𑀸’𑀢𑀺. 𑀤𑁂𑀯, 𑀓𑀺𑀁 𑀓𑀣𑁂𑀲𑀺, 𑀅𑀬𑁆𑀬𑀲𑁆𑀲 𑀓𑀣𑀻𑀢𑀦𑀺𑀬𑀸𑀫𑁂𑀦𑁂𑀯 𑀉𑀧𑀓𑀝𑁆𑀞 𑀧𑀼𑀡𑁆𑀡𑀫𑀸𑀬 𑀉𑀧𑁄𑀲𑀣𑀤𑀺𑀯𑀲𑁂 𑀤𑀓𑁆𑀔𑀺𑀡𑀁 𑀤𑁂𑀳𑀻’𑀢𑀺 𑀆𑀳. 𑀲𑁄 𑀢𑀲𑁆𑀲𑀸 𑀓𑀣𑀁 𑀲𑀼𑀢𑁆𑀯𑀸 𑀲𑁄𑀫𑀦𑀲𑁆𑀲𑀧𑀢𑁆𑀢𑁄 𑀲𑀸𑀥𑀼 𑀪𑀤𑁆𑀤𑁂’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑁄𑀫𑀦𑀕𑀭𑁂 𑀯𑀺𑀳𑀭𑀦𑁆𑀢𑁄, 𑀉𑀧𑀓𑀝𑁆𑀞 𑀧𑀼𑀡𑁆𑀡𑀫𑀸𑀬 𑀉𑀧𑁄𑀲𑀣𑁂 𑀲𑀫𑁆𑀧𑀢𑁆𑀢𑁂𑀬𑁂𑀯 𑀅𑀚𑁆𑀚𑀼𑀧𑁄𑀲𑀣𑁄’𑀢𑀺 𑀜𑀢𑁆𑀯𑀸 𑀕𑀺𑀭𑀺𑀅𑀪𑀬𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, 𑀢𑀸𑀢 𑀲𑁆𑀯𑁂 𑀤𑀓𑁆𑀔𑀺𑀡𑀁 𑀤𑀸𑀢𑀩𑁆𑀩𑀁 𑀢𑁆𑀯𑀁 𑀲𑁂𑀦𑀗𑁆𑀕𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑁆𑀯𑁂 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀏𑀳𑀻’𑀢𑀺 𑀯𑀢𑁆𑀯𑀸 𑀲𑁂𑀭𑀼𑀦𑀕𑀭𑁂 𑀲𑀺𑀯𑀭𑀜𑁆𑀜𑁄 𑀮𑁄𑀡𑀦𑀕𑀭𑁂 𑀫𑀳𑀸𑀦𑀸𑀕𑀭𑀜𑁆𑀜𑁄 𑀧𑀡𑁆𑀡𑀁 𑀧𑀳𑀺𑀡𑀻. 𑀲𑁆𑀯𑁂 𑀢𑀼𑀫𑁆𑀳𑀸𑀓𑀁 𑀳𑀢𑁆𑀣𑀺𑀅𑀲𑁆𑀲𑀭𑀣𑀧𑀢𑁆𑀢𑀸𑀤𑀻𑀦𑀺 𑀲𑀼𑀯𑀡𑁆𑀡𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑁆𑀯𑁂 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀙𑀡 𑀯𑁂𑀲𑀁 𑀕𑀸𑀳𑀸𑀧𑁂𑀢𑁆𑀯𑀸 𑀅𑀬𑁆𑀬𑀲𑁆𑀲 𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀤𑀓𑁆𑀔𑀺𑀡𑀁 𑀤𑀻𑀬𑀫𑀸𑀦𑀁 𑀲𑀫𑁄𑀲𑀭𑀦𑁆𑀢𑀼𑀢𑀺. 𑀢𑁂 𑀧𑀦 𑀭𑀸𑀚𑀸𑀦𑁄 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀪𑀯𑀸𑀦𑀼𑀭𑀽𑀧𑁂𑀦 𑀳𑀢𑁆𑀣𑀺𑀅𑀲𑁆𑀲𑀭𑀣𑀧𑀢𑁆𑀢𑀸𑀤𑀻𑀦𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀕𑀦𑁆𑀥𑀧𑀜𑁆𑀘𑀗𑁆𑀕𑀼𑀮𑀺𑀓𑀁 𑀤𑀢𑁆𑀯𑀸 𑀲𑀼𑀯𑀡𑁆𑀡𑀫𑀸𑀮𑀸𑀤𑀻𑀦𑀺 𑀧𑀺𑀮𑀦𑁆𑀥𑀸𑀧𑁂𑀢𑁆𑀯𑀸 𑀫𑀳𑀸 𑀕𑁄𑀡𑁂𑀧𑀺 𑀢𑀣𑁂𑀯 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀺𑀗𑁆𑀕𑁂𑀲𑀼 𑀲𑀼𑀯𑀡𑁆𑀡𑀓𑀜𑁆𑀘𑀼𑀓𑀁 (𑀧𑀝𑀺) 𑀫𑀼𑀜𑁆𑀘𑀸𑀧𑁂𑀢𑁆𑀯𑀸 𑀅𑀫𑀘𑁆𑀘𑀕𑀳𑀧𑀢𑀺-𑀩𑁆𑀭𑀸𑀳𑁆𑀫𑀡𑀧𑀼𑀢𑁆𑀢-𑀅𑀚𑀕𑁄𑀧𑀓-𑀔𑀼𑀚𑁆𑀚𑀯𑀸𑀫𑀦𑀓-𑀲𑁂𑀦𑀸𑀧𑀢𑀺𑀆𑀤𑀬𑁄 𑀘 𑀯𑀺𑀘𑀺𑀢𑁆𑀢𑀯𑀢𑁆𑀣𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀦𑀸𑀦𑀸𑀯𑀺𑀥𑀯𑀺𑀮𑁂𑀧𑀦𑀸𑀦𑀺 𑀯𑀺𑀮𑀺𑀫𑁆𑀧𑁂𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑀬𑀺𑀁𑀲𑀼. 𑀭𑀸𑀚𑀸𑀧𑀺 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀧𑀭𑀺𑀯𑀼𑀢𑁄 𑀅𑀮𑀗𑁆𑀓𑀢𑀳𑀢𑁆𑀣𑀺𑀓𑁆𑀔𑀦𑁆𑀥𑀁 𑀆𑀭𑀼𑀳𑀺. 𑀲𑁂𑀲𑀭𑀸𑀚𑀸𑀦𑁄 𑀘 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑁂𑀦𑀗𑁆𑀕𑁂𑀳𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀦𑀺𑀲𑀻𑀤𑀺𑀢𑁆𑀯𑀸 𑀭𑀸𑀚𑀸𑀦𑀁 𑀫𑀚𑁆𑀛𑁂 𑀓𑀢𑁆𑀯𑀸 𑀯𑀸𑀫𑀤𑀓𑁆𑀔𑀺𑀡𑀧𑀲𑁆𑀲𑀢𑁄 𑀦𑀫𑀲𑁆𑀲𑀫𑀸𑀦𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀢𑀲𑁆𑀲 𑀧𑀦 𑀕𑀫𑀦𑀁 𑀅𑀚𑀸𑀢𑀲𑀢𑁆𑀢𑀼𑀦𑁄 𑀢𑀣𑀸𑀕𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀸𑀬 𑀚𑀻𑀯𑀓𑀫𑁆𑀩𑀯𑀦𑀕𑀫𑀦𑀁 𑀯𑀺𑀬 𑀢𑀺𑀁𑀲𑀬𑁄𑀚𑀦𑀧𑁆𑀧𑀫𑀸𑀡𑀁 𑀏𑀭𑀸𑀯𑀡𑀳𑀢𑁆𑀣𑀺𑀓𑁆𑀔𑀦𑁆𑀥𑀁 𑀆𑀭𑀼𑀳𑀺𑀢𑁆𑀯𑀸 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑁂𑀳𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀦𑀦𑁆𑀤𑀦𑀯𑀦𑀕𑀫𑀦𑀓𑀸𑀮𑁄 𑀯𑀺𑀬 𑀘 𑀅𑀳𑁄𑀲𑀺. 𑀲𑁄 𑀯𑀟𑁆𑀠𑀫𑀸𑀲𑀓𑀘𑁆𑀙𑀸𑀬𑀸𑀬 ¶ 𑀲𑀫𑁆𑀧𑀢𑁆𑀢𑀸𑀬 𑀲𑁄𑀫𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑁂𑀭𑀼𑀤𑀳𑀲𑁆𑀲 𑀅𑀦𑁆𑀢𑁂 𑀦𑀸𑀦𑀸𑀯𑀺𑀥 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀦𑀸𑀝𑀓𑀺𑀢𑁆𑀣𑀻𑀦𑀁 𑀧𑀜𑁆𑀘𑀗𑁆𑀕𑀺𑀓𑀢𑀼𑀭𑀺𑀬𑀁 𑀧𑀕𑁆𑀕𑀡𑁆𑀳𑀸𑀧𑀬𑀫𑀸𑀦𑁄 𑀅𑀝𑁆𑀞𑀸𑀲𑀺.

𑀫𑀳𑀸𑀧𑀣𑀯𑀻 𑀪𑀺𑀚𑁆𑀚𑀫𑀸𑀦𑀸 𑀯𑀺𑀬 𑀧𑀩𑁆𑀩𑀢𑀸 𑀧𑀭𑀺𑀯𑀢𑁆𑀢𑀫𑀸𑀦𑀸 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑁄 (𑀣𑀮𑀁) 𑀅𑀯𑀢𑁆𑀣𑀭𑀺𑀢𑁆𑀯𑀸 𑀪𑀺𑀚𑁆𑀚𑀫𑀸𑀦𑀓𑀸𑀮𑁄 𑀯𑀺𑀬 𑀘 𑀅𑀳𑁄𑀲𑀺. 𑀩𑁆𑀭𑀸𑀳𑁆𑀫𑀡𑀸 𑀚𑀬𑀫𑀼𑀔𑀫𑀗𑁆𑀕𑀮𑀺𑀓𑀸 𑀲𑁄𑀢𑁆𑀣𑀺 𑀯𑀘𑀦𑀁 𑀯𑀤𑀺𑀁𑀲𑀼. 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀢𑀺𑀫𑀡𑁆𑀟𑀺𑀢𑀸 𑀦𑀸𑀝𑀓𑀺𑀢𑁆𑀣𑀺𑀬𑁄 𑀧𑀜𑁆𑀘𑀗𑁆𑀕𑀺𑀓𑀢𑀼𑀭𑀺𑀬𑀁 𑀧𑀯𑀢𑁆𑀢𑀬𑀺𑀁𑀲𑀼. 𑀫𑀳𑀸𑀚𑀦𑁄 𑀯𑁂𑀮𑀼𑀓𑁆𑀔𑁂𑀧𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑁂𑀲𑀺. 𑀢𑀢𑁄 𑀭𑀸𑀚𑀸 𑀩𑀳𑀽 𑀕𑀦𑁆𑀥𑀤𑀻𑀧𑀥𑀽𑀧𑀸𑀤𑀬𑁄 𑀕𑀸𑀳𑀸𑀧𑁂𑀢𑁆𑀯𑀸 𑀉𑀝𑁆𑀞𑀸𑀬 𑀲𑁂𑀦𑀸𑀬 𑀧𑀭𑀺𑀯𑀼𑀢𑁄 𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀆𑀳? 𑀅𑀬𑁆𑀬 𑀭𑀸𑀚𑀸𑀦𑁄 𑀘 𑀲𑀫𑁆𑀧𑀺𑀡𑁆𑀟𑀺𑀢𑁆𑀯𑀸 𑀤𑀓𑁆𑀔𑀺𑀡𑁄𑀤𑀓𑀲𑁆𑀲 𑀤𑀻𑀬𑀫𑀸𑀦𑀲𑁆𑀲 𑀓𑀸𑀮𑁄’𑀢𑀺. 𑀣𑁂𑀭𑁄 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀪𑀤𑁆𑀤𑀓𑀁 𑀫𑀳𑀸𑀭𑀸𑀚𑀸’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀢𑀲𑁆𑀫𑀺𑀁 𑀤𑀓𑁆𑀔𑀺𑀡𑁄𑀤𑀓𑀲𑁆𑀲 𑀤𑀸𑀦𑀤𑀺𑀯𑀲𑁂 𑀦𑀸𑀦𑀸𑀯𑀺𑀥𑀯𑀺𑀘𑀺𑀢𑁆𑀢𑀫𑀡𑀺𑀤𑀡𑁆𑀟𑀓𑁂𑀲𑀼 𑀦𑀸𑀦𑀸𑀯𑀺𑀥 𑀥𑀚𑀧𑀢𑀸𑀓𑀸𑀤𑀻𑀦𑀺 𑀩𑀦𑁆𑀥𑀸𑀧𑁂𑀢𑁆𑀯𑀸 𑀲𑀫𑀼𑀲𑁆𑀲𑀺𑀢𑀸𑀦𑀺 𑀅𑀳𑁂𑀲𑀼𑀁. 𑀧𑀼𑀭𑀺𑀫𑀸𑀤𑀻 𑀤𑀺𑀲𑀸𑀲𑀼 𑀫𑀦𑀼𑀜𑁆𑀜𑀯𑀸𑀢𑀸 𑀯𑀸𑀬𑀺𑀁𑀲𑀼. 𑀢𑀣𑀸 𑀫𑀳𑀸𑀭𑀁𑀲𑀺𑀚𑀸𑀮𑀲𑀫𑀼𑀚𑁆𑀚𑀮𑀺𑀢𑁄 𑀲𑀳𑀲𑁆𑀲𑀭𑀁𑀲𑀺𑀪𑀸𑀓𑀭𑁄 𑀅𑀢𑁆𑀣𑀗𑁆𑀕𑀢𑁄 𑀅𑀳𑁄𑀲𑀺. 𑀯𑀺𑀧𑁆𑀨𑀼𑀭𑀺𑀢𑀓𑀺𑀭𑀡𑀭𑀚𑀥𑀽𑀫𑀭𑀸𑀳𑀼𑀅𑀩𑁆𑀪𑀸𑀤𑀻𑀳𑀺 𑀉𑀧𑀭𑁄𑀥𑁂𑀳𑀺 𑀯𑀺𑀭𑀳𑀺𑀢𑁄 𑀢𑀸𑀭𑀸𑀕𑀡𑀧𑀭𑀺𑀯𑀼𑀢𑁄 𑀧𑀼𑀡𑁆𑀡𑀘𑀦𑁆𑀤𑁄 𑀲𑀫𑀼𑀚𑁆𑀚𑀮𑀭𑀚𑀢𑀫𑀬𑀁 𑀆𑀤𑀸𑀲𑀫𑀡𑁆𑀟𑀮𑀁 𑀯𑀺𑀬 𑀧𑀸𑀘𑀻𑀦𑀤𑀺𑀲𑀢𑁄 𑀲𑀫𑀼𑀕𑁆𑀕𑀢𑁄. 𑀢𑀲𑁆𑀫𑀺𑀁 𑀔𑀡𑁂 𑀤𑀡𑁆𑀟𑀤𑀻𑀧𑀺𑀓𑀸𑀤𑀬𑁄 𑀲𑀫𑀼𑀚𑁆𑀚𑀮𑀸𑀧𑁂𑀲𑀼𑀁. 𑀫𑀳𑀸𑀫𑀗𑁆𑀕𑀮𑀘𑁂𑀢𑀺𑀬𑀁 𑀧𑀦 𑀚𑀸𑀢𑀺𑀲𑀼𑀫𑀦𑀫𑀸𑀮𑀸𑀤𑀸𑀫𑁂𑀦 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀫𑀸𑀮𑀸𑀕𑀼𑀡𑀁 𑀯𑀺𑀬 𑀅𑀮𑀗𑁆𑀓𑀭𑀺. 𑀬𑀣𑀸 𑀢𑀸𑀭𑀸𑀕𑀡𑀧𑀭𑀺𑀯𑀼𑀢𑁄 𑀧𑀼𑀡𑁆𑀡𑀘𑀦𑁆𑀤𑁄 𑀢𑀣𑀸 𑀧𑀤𑀻𑀧𑀫𑀸𑀮𑀸𑀮𑀗𑁆𑀓𑀢𑁄 𑀫𑀳𑀸𑀘𑁂𑀢𑀺𑀬𑁄 𑀅𑀢𑀺𑀯𑀺𑀬 𑀯𑀺𑀭𑁄𑀘𑀢𑀺. 𑀲𑀓𑀮 𑀮𑀗𑁆𑀓𑀸𑀤𑀻𑀧𑁂 𑀧𑀦 𑀲𑀩𑁆𑀩𑁂 𑀭𑀼𑀓𑁆𑀔𑀸𑀧𑀺 𑀯𑀺𑀘𑀺𑀢𑁆𑀢𑀥𑀚𑁂𑀦 𑀅𑀮𑀗𑁆𑀓𑀢𑀸 𑀯𑀺𑀬 𑀅𑀓𑀸𑀮𑀨𑀮𑀧𑀮𑁆𑀮𑀯𑁂𑀳𑀺 𑀯𑀺𑀘𑀺𑀢𑁆𑀢𑀸 𑀅𑀳𑁂𑀲𑀼𑀁. 𑀫𑀳𑀸𑀲𑀫𑀼𑀤𑁆𑀤𑀮𑁄𑀡𑀲𑀸𑀕𑀭𑀸𑀤𑀬𑁄’𑀧𑀺 𑀧𑀜𑁆𑀘𑀯𑀺𑀥𑀧𑀤𑀼𑀫𑀲𑀜𑁆𑀙𑀦𑁆𑀦𑀸 𑀅𑀳𑁂𑀲𑀼𑀁.

𑀯𑀺𑀘𑀺𑀢𑁆𑀭𑀯𑀢𑁆𑀣𑀸𑀪𑀭𑀡𑁂𑀳𑀺 𑀲𑀩𑁆𑀩𑁂,

𑀅𑀮𑀗𑁆𑀓𑀢𑀸 𑀤𑁂𑀯𑀲𑀫𑀸𑀦𑀯𑀡𑁆𑀡𑀸;

𑀅𑀦𑁂𑀓𑀲𑀗𑁆𑀔𑁆𑀬𑀸 𑀲𑀼𑀫𑀦𑀸 𑀧𑀢𑀻𑀢𑀸,

𑀚𑀦𑀸 𑀲𑀫𑀦𑁆𑀢𑀸 𑀧𑀭𑀺𑀯𑀸𑀭𑀬𑀺𑀁𑀲𑀼.

𑀲𑀩𑁆𑀩𑁂𑀯 ¶ 𑀉𑀚𑁆𑀚𑀮𑀸𑀧𑁂𑀲𑀼𑀁 𑀤𑀡𑁆𑀟𑀤𑀻𑀧𑀁 𑀫𑀦𑁄𑀭𑀫𑀁;

𑀲𑀓𑀮𑀫𑁆𑀧𑀺 𑀇𑀤𑀁 𑀤𑀻𑀧𑀁 𑀆𑀲𑀺 𑀑𑀪𑀸𑀲𑀺𑀢𑀁 𑀢𑀤𑀸.

𑀢𑀸𑀭𑀸𑀕𑀡𑀲𑀫𑀸𑀓𑀺𑀡𑁆𑀡𑁄 𑀧𑀼𑀡𑁆𑀡𑀘𑀦𑁆𑀤𑁄𑀯 𑀚𑁄𑀢𑀬𑀻;

𑀲𑀸𑀭𑀤𑁂 𑀦𑀪𑀫𑀚𑁆𑀛𑀫𑁆𑀳𑀺 𑀞𑀺𑀢𑁄 𑀭𑀼𑀘𑀺𑀭𑀭𑀁𑀲𑀺𑀬𑀸.

𑀢𑀣𑀸 𑀅𑀬𑀁 𑀣𑀽𑀧𑀯𑀭𑁄 𑀲𑀼𑀧𑁆𑀧𑀪𑀸𑀲𑁄 𑀅𑀮𑀗𑁆𑀓𑀢𑁄;

𑀫𑀸𑀮𑀸𑀧𑀤𑀻𑀧𑀫𑀚𑁆𑀛𑀫𑁆𑀳𑀺 𑀪𑀸𑀢𑀺 𑀪𑀼𑀢𑀺𑀮𑀓𑀼𑀢𑁆𑀢𑀫𑁄.

𑀲𑀩𑁆𑀩𑁂’𑀧𑀺 𑀧𑀸𑀤𑀧𑀸 𑀅𑀲𑁆𑀲 𑀮𑀗𑁆𑀓𑀸𑀤𑀻𑀧𑀲𑁆𑀲 𑀲𑀩𑁆𑀩𑀲𑁄;

𑀥𑀚𑁂𑀳𑀺’𑀯 𑀲𑀫𑀸𑀓𑀺𑀡𑁆𑀡𑀸 𑀆𑀲𑀼𑀁 𑀧𑀼𑀧𑁆𑀨𑀨𑀮𑀦𑁆𑀤𑀤𑀸.

𑀲𑀘𑁂𑀢𑀦𑀸 𑀬𑀣𑀸 𑀲𑀩𑁆𑀩𑁂 𑀅𑀓𑀸 𑀧𑀽𑀚𑀁 𑀅𑀓𑀸 𑀢𑀤𑀸;

𑀢𑀣𑀸 𑀅𑀘𑁂𑀢𑀦𑀸 𑀲𑀩𑁆𑀩𑁂 𑀅𑀓𑀸 𑀧𑀽𑀚𑀁 𑀅𑀦𑀧𑁆𑀧𑀓𑀁.

𑀬𑁂𑀪𑀼𑀬𑁆𑀬𑁂𑀦 𑀪𑀼𑀫𑀝𑁆𑀞𑁂 𑀤𑁂𑀯𑁂 𑀉𑀧𑀸𑀤𑀸𑀬 𑀬𑀸𑀯 𑀅𑀓𑀡𑀺𑀝𑁆𑀞𑀓𑀸 𑀤𑁂𑀯𑀸 𑀩𑁆𑀭𑀳𑁆𑀫𑀸 𑀤𑀺𑀩𑁆𑀩𑀫𑀸𑀮𑀸𑀧𑀸𑀭𑀺𑀘𑁆𑀙𑀢𑁆𑀢𑀓𑀓𑁄𑀯𑀺𑀴𑀸𑀭𑀘𑀦𑁆𑀤𑀦𑀘𑀼𑀡𑁆𑀡𑀁 𑀕𑀳𑁂𑀢𑁆𑀯𑀸 𑀆𑀕𑀢𑀸𑀤𑁂𑀯𑀸𑀢𑀺 𑀯𑀸 𑀫𑀦𑀼𑀲𑁆𑀲𑀸𑀢𑀺 𑀯𑀸 𑀚𑀸𑀦𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀺. 𑀉𑀓𑁆𑀓𑀝𑁆𑀞𑀫𑀳𑀸𑀲𑀫𑀸𑀕𑀫𑁄 𑀅𑀳𑁄𑀲𑀺. 𑀢𑀲𑁆𑀫𑀺𑀫𑁆𑀧𑀺 𑀤𑀺𑀯𑀲𑁂 𑀫𑀳𑀸𑀧𑀣𑀯𑀺 𑀆𑀓𑀸𑀲𑀬𑀼𑀕𑀦𑁆𑀥𑀭𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀼𑀢𑁆𑀢𑀫𑀸𑀤𑀬𑁄 𑀓𑀫𑁆𑀧𑀺𑀁𑀲𑀼. 𑀢𑀁 𑀤𑀺𑀲𑁆𑀯𑀸 𑀭𑀸𑀚𑀸 𑀅𑀢𑀺𑀯𑀺𑀬 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀣𑁂𑀭𑁂 𑀘 𑀅𑀯𑀲𑁂𑀲 𑀫𑀳𑀸𑀫𑀢𑁆𑀢𑀸𑀤𑀬𑁄 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀦𑀸𑀝𑀓𑀸𑀤𑀬𑁄 𑀘 𑀕𑀳𑁂𑀢𑁆𑀯𑀸, 𑀇𑀤𑀸𑀦𑁂𑀯𑀸𑀳𑀁 𑀯𑀺𑀳𑀸𑀭𑀤𑀓𑁆𑀔𑀺𑀡𑀁 𑀤𑀲𑁆𑀲𑀸𑀫𑀺’𑀢𑀺 𑀘𑁂𑀢𑀺𑀬𑀗𑁆𑀕𑀡𑀁 𑀅𑀕𑀫𑀸𑀲𑀺. 𑀣𑁂𑀭𑁄𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑀁 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑁂 𑀅𑀮𑀗𑁆𑀓𑀢𑀫𑀡𑁆𑀟𑀧𑁂 𑀦𑀺𑀲𑀻𑀤𑀺. 𑀭𑀸𑀚𑀸 𑀯𑀸𑀲𑀺𑀢𑀕𑀦𑁆𑀥𑁄𑀤𑀓𑀲𑀼𑀯𑀡𑁆𑀡𑀪𑀺𑀗𑁆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀉𑀤𑀓𑀁 𑀣𑁂𑀭𑀲𑁆𑀲 𑀳𑀢𑁆𑀣𑁂 𑀆𑀲𑀺𑀜𑁆𑀘𑀺𑀢𑁆𑀯𑀸 𑀤𑀓𑁆𑀔𑀺𑀡𑀁 𑀅𑀤𑀸𑀲𑀺. 𑀤𑀢𑁆𑀯𑀸 𑀘 𑀧𑀦 𑀏𑀯𑀫𑀸𑀳; 𑀅𑀬𑁆𑀬𑀸 𑀏𑀲𑀸 𑀥𑀸𑀢𑀼 𑀫𑀬𑁆𑀳𑀁 𑀧𑀺𑀢𑀸𑀫𑀳𑀯𑀁𑀲𑁂𑀦 𑀆𑀕𑀢𑀸. 𑀇𑀤𑀸𑀦𑀺 𑀅𑀫𑁆𑀳𑀸𑀓𑀁 𑀅𑀢𑀺𑀭𑀼𑀘𑀺𑀭𑀭𑀫𑀡𑀺𑀬𑀸 𑀭𑁄𑀳𑀡𑀚𑀦𑀧𑀤𑀸 𑀆𑀳𑀭𑀺𑀢𑁆𑀯𑀸 𑀲𑀼𑀯𑀡𑁆𑀡𑁂𑀦 𑀥𑀸𑀢𑀼𑀕𑀩𑁆𑀪𑀁, 𑀲𑀢𑁆𑀢𑀭𑀢𑀦𑁂𑀦 𑀥𑀸𑀢𑀼𑀫𑀡𑁆𑀟𑀧𑀁 𑀓𑀸𑀭𑀸𑀧𑁂𑀢𑁆𑀯𑀸 𑀢𑀲𑁆𑀫𑀺𑀁 𑀲𑀼𑀯𑀡𑁆𑀡𑀫𑀬𑀁 𑀩𑀼𑀤𑁆𑀥𑀧𑀝𑀺𑀫𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀤𑀲𑀩𑀮𑀲𑁆𑀲 𑀦𑀮𑀸𑀝𑀥𑀸𑀢𑀼𑀁 ¶ 𑀦𑀺𑀤𑀳𑀺𑀢𑁆𑀯𑀸 𑀅𑀬𑁆𑀬𑀲𑁆𑀲 𑀘𑀻𑀯𑀭𑀸𑀤𑀻𑀦𑀫𑀢𑁆𑀣𑀸𑀬 𑀇𑀤𑀸𑀦𑀺 𑀲𑁄𑀴𑀲𑀕𑀸𑀫𑀯𑀭𑀸𑀦𑀺 𑀤𑀲𑁆𑀲𑀸𑀫𑀺’𑀢𑀺 𑀕𑀸𑀫𑀯𑀭𑀸𑀦𑀺 𑀤𑀢𑁆𑀯𑀸 𑀲𑀫𑀦𑁆𑀢𑀢𑁄 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑁂 𑀲𑁂𑀭𑀼𑀤𑀳𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀆𑀭𑀸𑀫𑀺𑀓𑀁 𑀓𑀢𑁆𑀯𑀸 𑀆𑀳? 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀫𑀬𑀸 𑀤𑀺𑀦𑁆𑀦𑀲𑁄𑀴𑀲𑀕𑀸𑀫𑀁 𑀅𑀚𑁆𑀚𑁂𑀯 𑀕𑀦𑁆𑀢𑀩𑁆𑀩𑀁. 𑀕𑀦𑁆𑀢𑁆𑀯𑀸 𑀘 𑀧𑀦 𑀅𑀚𑁆𑀚𑁂𑀯 𑀧𑀭𑀺𑀕𑁆𑀕𑀳𑀁 𑀓𑀭𑁄𑀣𑀸𑀢𑀺 𑀯𑀢𑁆𑀯𑀸 𑀢𑀢𑁆𑀣𑁂𑀯 𑀯𑀸𑀲𑀼𑀧𑀕𑀢𑁄 𑀧𑀼𑀦 𑀤𑀺𑀯𑀲𑁂 𑀲𑀫𑀸𑀕𑀦𑁆𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀢𑀻𑀘𑀻𑀯𑀭𑀧𑁆𑀧𑀳𑁄𑀦𑀓𑀲𑀸𑀝𑀓𑀁 𑀧𑀡𑀻𑀢𑀁 𑀪𑁄𑀚𑀦𑀁 𑀤𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀢𑁄, 𑀅𑀬𑁆𑀬 𑀯𑀺𑀳𑀸𑀭𑁂 𑀓𑀢𑁆𑀢𑀩𑁆𑀩𑀁 𑀅𑀧𑀭𑀺𑀳𑀸𑀧𑁂𑀢𑁆𑀯𑀸 𑀫𑀬𑀸 𑀓𑀢𑀁, 𑀕𑁂𑀳𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 (𑀦𑀺𑀯𑁂𑀤𑁂𑀲𑀺). 𑀣𑁂𑀭𑁄 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀲𑀸𑀥𑀼 𑀫𑀳𑀸𑀭𑀸𑀚𑀸𑀢𑀺 𑀲𑀫𑁆𑀧𑀝𑀺𑀘𑁆𑀙𑀺.

𑀲𑁄 𑀧𑀦 𑀘𑁂𑀢𑀺𑀬𑀲𑁆𑀲 𑀧𑀽𑀚𑀦𑀢𑁆𑀣𑀸𑀬 𑀧𑀼𑀧𑁆𑀨𑀸𑀭𑀸𑀫𑀁 𑀓𑀸𑀭𑀸𑀧𑁂𑀢𑁆𑀯𑀸 𑀫𑀸𑀮𑀸𑀓𑀸𑀭𑀸𑀦𑀁 𑀧𑀭𑀺𑀩𑁆𑀩𑀬𑀁 𑀤𑀸𑀧𑁂𑀲𑀺. 𑀢𑀣𑀸 𑀪𑁂𑀭𑀺𑀯𑀸𑀤𑀓𑀦𑀸𑀝𑀓𑀸𑀦𑀫𑁆𑀧𑀺 𑀯𑀺𑀳𑀸𑀭𑀲𑀻𑀫𑀦𑁆𑀢𑁂 𑀲𑀼𑀯𑀡𑁆𑀡𑀦𑀗𑁆𑀕𑀮𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀆𑀭𑀸𑀫𑀺𑀓𑀸𑀦𑀫𑁆𑀧𑀺 𑀕𑀸𑀫𑀁 𑀓𑀸𑀭𑀸𑀧𑁂𑀲𑀺. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑀢𑁆𑀣𑀸𑀬 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀧𑀜𑁆𑀘𑀲𑀢𑀅𑀫𑀘𑁆𑀘𑀥𑀻𑀢𑀭𑁄 𑀢𑀢𑁆𑀢𑀓𑁂 𑀅𑀫𑀘𑁆𑀘𑀧𑀼𑀢𑁆𑀢𑁂 𑀤𑀸𑀲𑀤𑀸𑀲𑀺𑀬𑁄 𑀘 𑀤𑀢𑁆𑀯𑀸 𑀧𑀭𑀺𑀩𑁆𑀩𑀬𑀢𑁆𑀣𑀸𑀬 𑀢𑁂𑀲𑀁 𑀢𑁂𑀲𑀁 𑀧𑀜𑁆𑀘𑀲𑀢𑀲𑀳𑀲𑁆𑀲𑀓𑀳𑀸𑀧𑀡𑁂 𑀘 𑀤𑀸𑀧𑁂𑀲𑀺. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀥𑀸𑀢𑀼𑀧𑀼𑀚𑀦𑀢𑁆𑀣𑀸𑀬 𑀲𑁄𑀴𑀲𑀲𑀳𑀲𑁆𑀲𑀁 𑀓𑀳𑀸𑀧𑀡𑀁 𑀤𑀸𑀧𑁂𑀲𑀺.

𑀢𑀢𑁄 𑀕𑀺𑀭𑀺𑀅𑀪𑀬𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, 𑀢𑀸𑀢 𑀢𑀼𑀫𑁆𑀳𑁂 𑀇𑀥𑁂𑀯 𑀦𑀺𑀘𑁆𑀘𑀁 𑀯𑀲𑀣. 𑀅𑀫𑁆𑀳𑀸𑀓𑀁 𑀯𑀺𑀳𑀸𑀭𑁂 𑀘 𑀆𑀭𑀸𑀫𑀺𑀓𑁂𑀲𑀼 𑀘 𑀅𑀬𑁆𑀬𑁂𑀲𑀼 𑀘 𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀻𑀢𑀺 𑀑𑀯𑀤𑀺𑀢𑁆𑀯𑀸 𑀲𑀩𑁆𑀩𑀁 𑀢𑀲𑁆𑀲 𑀦𑀺𑀬𑁆𑀬𑀸𑀤𑁂𑀲𑀺. 𑀣𑁂𑀭𑁄 𑀢𑀲𑁆𑀲 𑀏𑀯𑀫𑀸𑀳? 𑀫𑀳𑀸𑀭𑀸𑀚 𑀲𑀫𑀦𑁆𑀢𑀢𑁄 𑀫𑀳𑀸𑀲𑀻𑀫𑀁 𑀩𑀦𑁆𑀥𑀺𑀢𑀩𑁆𑀩𑀦𑁆𑀢𑀺. 𑀩𑀦𑁆𑀥𑀣 𑀪𑀦𑁆𑀢𑁂𑀢𑀺 𑀯𑀼𑀢𑁆𑀢𑁂? 𑀫𑀳𑀸𑀭𑀸𑀚 𑀅𑀓𑀺𑀢𑁆𑀢𑀺𑀢𑁂𑀦 𑀦𑀺𑀫𑀺𑀢𑁆𑀢𑁂𑀦 𑀲𑀻𑀫𑀁 𑀩𑀦𑁆𑀥𑀺𑀢𑀼𑀁 𑀦𑀲𑀓𑁆𑀓𑀸, 𑀯𑀺𑀳𑀸𑀭𑀲𑁆𑀲 𑀧𑀸𑀘𑀻𑀦 𑀧𑀘𑁆𑀙𑀺𑀫𑀼𑀢𑁆𑀢𑀭𑀤𑀓𑁆𑀔𑀺𑀡𑀢𑁄 𑀫𑀳𑀸𑀲𑀻𑀫𑀁 𑀩𑀦𑁆𑀥𑀦𑀸𑀬 𑀦𑀺𑀫𑀺𑀢𑁆𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀤𑁂𑀳𑀺, 𑀫𑀬𑀁 𑀲𑀻𑀫𑀁 𑀩𑀦𑁆𑀥𑀺𑀲𑁆𑀲𑀸𑀫𑀸𑀢𑀺 𑀆𑀳. 𑀭𑀸𑀚𑀸 𑀢𑀼𑀝𑁆𑀞𑁄 𑀲𑀢𑁆𑀢 𑀅𑀫𑀘𑁆𑀘𑁂 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀻𑀫𑀸𑀦𑀺𑀫𑀺𑀢𑁆𑀢𑀁 𑀓𑀺𑀢𑁆𑀢𑁂𑀢𑁆𑀯𑀸 𑀆𑀕𑀫𑀦𑀢𑁆𑀣𑀁 ¶ 𑀧𑁂𑀲𑁂𑀲𑀺. 𑀢𑁂 𑀧𑀦 𑀲𑀢𑁆𑀢 𑀅𑀫𑀘𑁆𑀘𑀸 𑀘𑀢𑀼𑀲𑀼 𑀤𑀺𑀲𑀸𑀲𑀼 𑀦𑀺𑀫𑀺𑀢𑁆𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀡𑁆𑀡𑁂 𑀮𑀺𑀔𑀺𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀭𑀜𑁆𑀜𑁄 𑀅𑀤𑀁𑀲𑀼. 𑀭𑀸𑀚𑀸 𑀏𑀓𑁂𑀓𑀁 𑀲𑀢𑀓𑀳𑀸𑀧𑀡𑀁 𑀤𑀢𑁆𑀯𑀸 𑀘𑀢𑀼𑀲𑀼 𑀤𑀺𑀲𑀸𑀲𑀼 𑀆𑀭𑀓𑁆𑀔𑀁 𑀤𑀸𑀧𑁂𑀢𑁆𑀯𑀸 𑀲𑀻𑀫𑀁 𑀩𑀦𑁆𑀥𑀦𑁆𑀢𑀽𑀢𑀺 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀯𑁂𑀤𑁂𑀲𑀺. 𑀅𑀣 𑀣𑁂𑀭𑁄 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀘𑁂𑀢𑀺𑀬𑀗𑁆𑀕𑀡𑁂 𑀦𑀺𑀲𑀻𑀤𑀺𑀢𑁆𑀯𑀸 𑀯𑀧𑁆𑀧𑀫𑀸𑀲𑀓𑀸𑀴𑀧𑀓𑁆𑀔𑀤𑁆𑀯𑀸𑀤𑀲𑀤𑀺𑀯𑀲𑁂 𑀲𑀻𑀫𑀁 𑀩𑀦𑁆𑀥𑀺𑀢𑁆𑀯𑀸 𑀦𑀺𑀝𑁆𑀞𑀧𑁂𑀲𑀺.

𑀢𑀢𑁆𑀣 𑀲𑀻𑀫𑀸𑀦𑀺𑀫𑀺𑀢𑁆𑀢𑀁 𑀏𑀯𑀁 𑀚𑀸𑀦𑀺𑀢𑀩𑁆𑀩𑀁; 𑀧𑀼𑀭𑀺𑀫𑀸𑀬 𑀤𑀺𑀲𑀸𑀬 𑀲𑀺𑀕𑀸𑀮 𑀧𑀸𑀲𑀸𑀡𑀁 𑀕𑀢𑁄. 𑀢𑀢𑁄 𑀫𑀘𑁆𑀙𑀲𑁂𑀮𑀕𑀸𑀫𑀲𑁆𑀲 𑀯𑀸𑀫 𑀧𑀲𑁆𑀲𑁂𑀦 𑀓𑁄𑀝𑀲𑀻𑀫𑀸 𑀦𑀸𑀫 𑀕𑀸𑀫𑀓𑁆𑀔𑁂𑀢𑁆𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀕𑀡𑀤𑁆𑀯𑀸𑀭𑀕𑀸𑀫𑀁 𑀕𑀢𑁄. 𑀘𑀺𑀢𑁆𑀢𑀯𑀸𑀧𑀺𑀬𑀸 𑀉𑀢𑁆𑀢𑀭𑀯𑀸𑀦 𑀓𑁄𑀝𑀺𑀢𑁄 𑀯𑀭𑀕𑀸𑀫𑀓𑁆𑀔𑁂𑀢𑁆𑀢𑁂 𑀧𑀺𑀝𑁆𑀞𑀺𑀧𑀸𑀲𑀸𑀡𑀁 𑀕𑀢𑁄. 𑀢𑀢𑁄 𑀲𑀸𑀮𑀺𑀓𑀁 𑀦𑀸𑀫 𑀫𑀥𑀼𑀓𑀭𑀼𑀓𑁆𑀔𑁂 𑀞𑀻𑀢𑀧𑀸𑀲𑀸𑀡𑀣𑀽𑀧𑀲𑁆𑀲 𑀕𑀢𑁄. 𑀢𑀢𑁄 𑀯𑀼𑀢𑁆𑀢𑀺𑀓 𑀦𑀸𑀫 𑀯𑀸𑀧𑀺𑀬𑀸 𑀤𑀓𑁆𑀔𑀺𑀡𑀯𑀸𑀦 𑀓𑁄𑀝𑀺𑀢𑁄 𑀓𑀡𑀺𑀓𑀸𑀭 𑀲𑁂𑀮𑀲𑁆𑀲 𑀕𑀢𑁄. 𑀢𑀢𑁄 𑀙𑀦𑁆𑀦𑀚𑁆𑀛𑀸𑀧𑀺𑀢𑀲𑁂𑀮𑀲𑁆𑀲 𑀕𑀢𑁄. 𑀢𑀢𑁄 𑀓𑀼𑀓𑁆𑀓𑀼𑀝𑀲𑀺𑀯 𑀦𑀸𑀫 𑀉𑀧𑀸𑀲𑀓𑀲𑁆𑀲 𑀫𑀥𑀼𑀓𑀭𑀼𑀓𑁆𑀔𑁂 𑀞𑀻𑀢𑀁 𑀣𑀽𑀧𑀁 𑀕𑀢𑁄. 𑀢𑀢𑁄 𑀲𑁄𑀡𑁆𑀟𑀁 𑀦𑀸𑀫 𑀲𑁂𑀮𑀁 𑀕𑀢𑁄. 𑀢𑀢𑁄 𑀲𑀩𑀭𑀁 𑀦𑀸𑀫 𑀧𑀸𑀲𑀸𑀡𑀁 𑀕𑀢𑁄. 𑀢𑀢𑁄 𑀏𑀮𑀸𑀮𑀢𑀺𑀢𑁆𑀣𑀲𑁆𑀲 𑀕𑀢𑁄. 𑀢𑀢𑁄 𑀲𑁄𑀩𑁆𑀪 𑀫𑀚𑁆𑀛𑀺𑀫𑁂𑀦 𑀕𑀦𑁆𑀢𑁆𑀯𑀸 𑀅𑀲𑁆𑀲𑀩𑀦𑁆𑀥𑀦𑀁 𑀦𑀸𑀫 𑀞𑀸𑀦𑀁 𑀕𑀢𑁄. 𑀢𑀢𑁄 𑀧𑀸𑀲𑀸𑀡𑀲𑁆𑀲 𑀫𑀢𑁆𑀣𑀓𑁂 𑀉𑀤𑀓 𑀓𑀸𑀓𑀁 𑀦𑀸𑀫 𑀦𑀺𑀕𑁆𑀭𑁄𑀥𑀁 𑀕𑀢𑁄. 𑀲𑁄 𑀭𑀼𑀓𑁆𑀔𑁄 𑀉𑀤𑀓 𑀓𑀸𑀓𑀸𑀦𑀁 𑀯𑀼𑀲𑀺𑀢 𑀪𑀸𑀯𑁂𑀦 𑀏𑀯𑀁 𑀦𑀸𑀫 𑀚𑀸𑀢𑁄. 𑀢𑀢𑁄 𑀢𑀫𑁆𑀩𑀢𑀺𑀢𑁆𑀣𑀁 𑀦𑀸𑀫 𑀕𑀦𑁆𑀢𑀸 𑀫𑀳𑀸𑀘𑀸𑀭𑀺𑀓𑀲𑁆𑀲𑀦𑀸𑀫 𑀣𑀽𑀧𑀫𑀕𑁆𑀕𑀲𑁆𑀲 𑀕𑀢𑁄. ¶ 𑀢𑀢𑁄 𑀅𑀲𑁆𑀲𑀫𑀡𑁆𑀟𑀮𑀧𑀺𑀝𑁆𑀞𑀺𑀁 𑀕𑀢𑁄. 𑀢𑀢𑁄 𑀫𑀳𑀸 𑀓𑀤𑀫𑁆𑀩 𑀧𑀲𑁆𑀲𑁂 𑀞𑀻𑀢𑀁 𑀧𑀸𑀲𑀸𑀡𑀣𑀽𑀧𑀁 𑀕𑀢𑁄. 𑀢𑀢𑁄 𑀫𑀳𑀸 𑀭𑀸𑀚𑀼𑀯𑀸𑀧𑀺𑀬𑀸 𑀉𑀢𑁆𑀢𑀭𑀓𑁄𑀝𑀺𑀬𑀸 𑀞𑀻𑀢𑀁 𑀫𑀳𑀸𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀁 𑀕𑀢𑁄. 𑀢𑀢𑁄 𑀫𑀳𑀸𑀯𑀦𑀧𑀺𑀝𑁆𑀞𑀺𑀁 𑀕𑀢𑁄. 𑀢𑀢𑁄 𑀮𑁄𑀡𑀲𑀸𑀕𑀭𑀲𑁆𑀲 𑀅𑀦𑁆𑀢𑁂 𑀭𑀚𑀢𑀲𑁂𑀮𑀁 𑀕𑀢𑁄. 𑀧𑀼𑀦 𑀆𑀯𑀢𑁆𑀢𑀺𑀢𑁆𑀯𑀸 𑀲𑀺𑀕𑀸𑀮 𑀧𑀸𑀲𑀸𑀡𑁂𑀬𑁂𑀯 𑀞𑀻𑀢𑁄. 𑀇𑀫𑀁 𑀏𑀢𑁆𑀢𑀓𑀁 𑀧𑀤𑁂𑀲𑀁 𑀲𑀫𑀦𑁆𑀢𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀸𑀧𑁂𑀢𑁆𑀯𑀸 𑀭𑀸𑀚𑀸 𑀅𑀤𑀸𑀲𑀺. 𑀯𑀺𑀳𑀸𑀭𑀲𑁆𑀲 𑀩𑀳𑀽 𑀆𑀭𑀸𑀫𑀺𑀓𑁂 𑀘 (𑀢𑁂𑀲𑀁) 𑀯𑀺𑀯𑀺𑀥𑀸𑀦𑀺 𑀉𑀧𑀓𑀭𑀡𑀸𑀦𑀺 (𑀘) 𑀤𑀸𑀧𑁂𑀢𑁆𑀯𑀸 𑀲𑀩𑁆𑀩𑁂 𑀧𑀸𑀓𑀸𑀭𑀢𑁄𑀭𑀡𑀸𑀤𑀬𑁄 𑀓𑀸𑀭𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀭𑁄𑀳𑀡𑀫𑁂𑀯 𑀕𑀢𑁄.

𑀭𑀸𑀚𑀸 𑀧𑀲𑀦𑁆𑀦𑀳𑀤𑀬𑁄 𑀫𑀳𑀸𑀧𑀼𑀜𑁆𑀜𑁄 𑀫𑀳𑀸𑀩𑀮𑁄;

𑀓𑀸𑀭𑁂𑀢𑁆𑀯𑀸 𑀉𑀢𑁆𑀢𑀫𑀁 𑀣𑀽𑀧𑀁 𑀓𑀜𑁆𑀘𑀦𑀕𑁆𑀖𑀻𑀓 𑀲𑁄𑀪𑀺𑀢𑀁.

𑀩𑀦𑁆𑀥𑀸𑀧𑁂𑀢𑁆𑀯𑀸 𑀢𑀢𑁄 𑀲𑀻𑀫𑀁 𑀯𑀝𑁆𑀝𑀕𑀸𑀫𑀜𑁆𑀘 𑀲𑁄𑀴𑀲;

𑀤𑀢𑁆𑀯𑀸 𑀆𑀭𑀸𑀫𑀺𑀓𑀸𑀦𑀜𑁆𑀘 𑀲𑀩𑁆𑀩𑀼𑀧𑀓𑀭𑀡𑀸𑀦𑀺 𑀘.

𑀢𑀢𑁄 𑀲𑁄 𑀭𑁄𑀳𑀡𑀁 𑀕𑀦𑁆𑀢𑁆𑀯𑀸 𑀫𑀳𑀸𑀲𑁂𑀦𑀸𑀧𑀼𑀭𑀓𑁆𑀔𑀢𑁄;

𑀯𑀺𑀳𑀸𑀭𑀤𑁂𑀯𑀺𑀬𑀸 𑀲𑀤𑁆𑀥𑀺𑀁 𑀫𑁄𑀤𑀫𑀸𑀦𑁄 𑀯𑀲𑀻 𑀢𑀳𑀺𑀁.

𑀣𑁂𑀭𑁄 𑀧𑀦 𑀢𑀢𑁆𑀣𑁂𑀯 𑀯𑀺𑀳𑀭𑀦𑁆𑀢𑁄 𑀬𑁄 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀦𑁆𑀢𑁄 𑀢𑀣𑀸𑀕𑀢𑀲𑁆𑀲 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀼𑀢𑁆𑀣𑁄 𑀯𑀺𑀬 𑀪𑀯𑀺𑀲𑁆𑀲𑀢𑀻𑀢𑀺 𑀔𑁆𑀬𑀸𑀓𑀭𑀺𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀲𑀻𑀮𑀸𑀘𑀸𑀭𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀺𑀧𑀝𑀺𑀮𑀤𑁆𑀥𑀚𑀴𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑁂𑀳𑀺 𑀔𑀻𑀡𑀸𑀲𑀯𑁂𑀳𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀲𑀩𑁆𑀩 𑀩𑀼𑀤𑁆𑀥𑀕𑀼𑀡𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀘𑀺𑀭𑀁 𑀯𑀲𑀺𑀢𑁆𑀯𑀸 𑀢𑀢𑁆𑀣𑁂𑀯 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀅𑀦𑁂𑀓𑀕𑀼𑀡𑀲𑀫𑁆𑀧𑀦𑁆𑀦𑁄 ¶ 𑀢𑀺𑀲𑁆𑀲𑀢𑁆𑀣𑁂𑀭𑁄 𑀩𑀳𑀼𑀲𑁆𑀲𑀼𑀢𑁄;

𑀚𑀦𑀸𑀦𑀁 𑀲𑀗𑁆𑀕𑀳𑀁𑀓𑀢𑁆𑀯𑀸 𑀦𑀺𑀩𑁆𑀩𑀼𑀢𑁄 𑀲𑁄 𑀅𑀦𑀸𑀲𑀯𑁄.

𑀣𑁂𑀭𑀸𑀧𑀺 𑀢𑁂 𑀲𑀻𑀮𑀲𑀫𑀸𑀥𑀺𑀬𑀼𑀢𑁆𑀢𑀸,

𑀩𑀳𑀼𑀲𑁆𑀲𑀼𑀢𑀸 𑀲𑀸𑀥𑀼𑀕𑀼𑀡𑀸𑀪𑀺𑀭𑀸𑀫𑀸;

𑀧𑀜𑁆𑀜𑀸𑀧𑀪𑀸𑀯𑀸𑀬𑀼𑀧𑁆𑀧𑀦𑁆𑀦𑀘𑀺𑀢𑁆𑀢𑀸,

𑀕𑀼𑀡𑀸𑀓𑀭𑀸 𑀢𑀸𑀦𑀬𑀼𑀢𑀸 𑀚𑀦𑀸𑀦𑀁.

𑀧𑀳𑀻𑀦𑀪𑀯𑀲𑀁𑀲𑀸𑀭𑀸 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑀸;

𑀦𑀸𑀫𑀭𑀽𑀧𑀁 𑀲𑀫𑀸𑀲𑀦𑁆𑀢𑁄 𑀧𑁂𑀲𑀮𑀸 𑀙𑀺𑀦𑁆𑀦𑀩𑀦𑁆𑀥𑀦𑀸.

𑀲𑀢𑁆𑀢𑀸𑀦𑀁 𑀉𑀢𑁆𑀢𑀫𑀁 𑀲𑀦𑁆𑀢𑀺𑀁 𑀓𑀢𑁆𑀯𑀸 𑀘 𑀚𑀦𑀲𑀗𑁆𑀕𑀳𑀁;

𑀦𑀺𑀩𑁆𑀩𑀼𑀢𑀸 𑀢𑁂 𑀫𑀳𑀸𑀧𑀜𑁆𑀜𑀸 𑀧𑀤𑀻𑀧𑁄𑀘 𑀲𑀼𑀫𑀸𑀦𑀲𑀸.

𑀇𑀢𑀺 𑀅𑀭𑀺𑀬𑀚𑀦𑀧𑁆𑀧𑀲𑀸𑀤𑀦𑀢𑁆𑀣𑀸𑀬 𑀓𑀢𑁂 𑀥𑀸𑀢𑀼𑀯𑀁𑀲𑁂

𑀥𑀸𑀢𑀼𑀦𑀺𑀥𑀸𑀦𑀸𑀥𑀺𑀓𑀸𑀭𑁄 𑀦𑀸𑀫

𑀧𑀜𑁆𑀘𑀫𑁄 𑀧𑀭𑀺𑀘𑁆𑀙𑁂𑀤𑁄.

𑀇𑀫𑀺𑀦𑀸 ¶ 𑀓𑀸𑀭𑀸𑀧𑀺𑀢𑀯𑀺𑀳𑀸𑀭𑀸 𑀓𑀣𑁂𑀢𑀩𑁆𑀩𑀸; 𑀯𑀺𑀳𑀸𑀭𑀤𑁂𑀯𑀻𑀫𑀳𑀸𑀯𑀺𑀳𑀸𑀭𑀁, 𑀙𑀸𑀢𑀧𑀩𑁆𑀩𑀢 𑀯𑀺𑀳𑀸𑀭𑀁, 𑀲𑀫𑀼𑀤𑁆𑀤𑀯𑀺𑀳𑀸𑀭𑀁, 𑀘𑀺𑀢𑁆𑀢𑀮𑀧𑀩𑁆𑀩𑀢𑀯𑀺𑀳𑀸𑀭𑀁, 𑀪𑀤𑁆𑀤𑀧𑀸𑀲𑀸𑀡𑀤𑁆𑀯𑀸𑀭𑀯𑀺𑀳𑀸𑀭𑀁, 𑀅𑀘𑁆𑀙𑀕𑀮𑁆𑀮 𑀯𑀺𑀳𑀸𑀭𑀁, 𑀓𑁄𑀴𑀫𑁆𑀩𑀢𑀺𑀲𑁆𑀲𑀧𑀩𑁆𑀩𑀢𑀯𑀺𑀳𑀸𑀭𑀁, 𑀕𑀡𑀯𑀺𑀳𑀸𑀭𑀁, 𑀓𑀸𑀮𑀓𑀯𑀺𑀳𑀸𑀭𑀁, 𑀤𑀼𑀓𑁆𑀔𑀧𑀸𑀮𑀓 𑀯𑀺𑀳𑀸𑀭𑀁, 𑀉𑀘𑁆𑀘𑀗𑁆𑀕𑀡𑀯𑀺𑀳𑀸𑀭𑀁, 𑀓𑁄𑀝𑀺𑀢𑀺𑀲𑁆𑀲𑀯𑀺𑀳𑀸𑀭𑀁, 𑀢𑀲𑁆𑀲 𑀧𑀦 𑀏𑀓𑀦𑀸𑀫𑀁 𑀓𑀢𑁆𑀯𑀸 𑀓𑀸𑀭𑀸𑀧𑀺𑀢𑁂 𑀫𑀳𑀸𑀕𑀸𑀫𑁂 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑀸𑀤𑀺𑀁 𑀓𑀢𑁆𑀯𑀸 𑀏𑀓𑀲𑀢𑀅𑀝𑁆𑀞𑀯𑀻𑀲𑀯𑀺𑀳𑀸𑀭𑀸𑀦𑀺 𑀓𑀢𑀸𑀦𑀺 𑀅𑀳𑁂𑀲𑀼𑀁.

𑀅𑀝𑁆𑀞𑀯𑀻𑀲𑀏𑀓𑀲𑀢𑀯𑀺𑀳𑀸𑀭𑀜𑁆𑀘 𑀫𑀳𑀸𑀭𑀳𑀁;

𑀯𑀺𑀳𑀸𑀭𑀤𑁂𑀯𑀺𑀬𑀸 𑀲𑀤𑁆𑀥𑀺𑀁 𑀓𑀸𑀭𑀸𑀧𑁂𑀲𑀺 𑀫𑀳𑀸𑀬𑀲𑁄.

𑀢𑀢𑁄 𑀧𑀝𑁆𑀞𑀸𑀬 𑀭𑀸𑀚𑀸 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺.

𑀓𑀢𑁆𑀯𑀸𑀦𑀺 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀅𑀦𑁂𑀓𑀸𑀦𑀺 𑀫𑀳𑀸𑀬𑀲𑁄;

𑀅𑀢𑁆𑀣𑀁 𑀚𑀦𑀲𑁆𑀲 𑀓𑀢𑁆𑀯𑀸𑀦 𑀕𑀦𑁆𑀢𑁆𑀯𑀸𑀦 𑀢𑀼𑀲𑀺𑀢𑀁 𑀧𑀼𑀭𑀁.

𑀲𑁄 𑀢𑀢𑁆𑀣 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀘𑀻𑀭𑀁 𑀪𑀼𑀜𑁆𑀚𑀺𑀬 𑀦𑀦𑁆𑀤𑀺𑀢𑁄;

𑀫𑀳𑀸𑀯𑀻𑀪𑀯𑀲𑀫𑁆𑀧𑀦𑁆𑀦𑁄 𑀤𑁂𑀯𑀢𑀸𑀦𑀁 𑀧𑀼𑀭𑀓𑁆𑀔𑀢𑁄.

𑀢𑀫𑁆𑀧𑀺 𑀲𑀫𑁆𑀧𑀢𑁆𑀢𑀺𑀫𑁄𑀳𑀸𑀬 𑀚𑀻𑀯𑀯𑀮𑁄𑀓𑁂 𑀫𑀦𑁄𑀭𑀫𑁂;

𑀮𑁄𑀓𑀼𑀢𑁆𑀢𑀭𑀁 𑀲𑀺𑀯𑀁 𑀔𑁂𑀫𑀁 𑀇𑀘𑁆𑀙𑀦𑁆𑀢𑁄 𑀆𑀕𑀫𑀺𑀲𑁆𑀲𑀢𑀺.

𑀲𑁄 𑀢𑀢𑁄 𑀘𑀼𑀢𑁄 𑀚𑀫𑁆𑀩𑀼𑀤𑀻𑀧𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑁂𑀢𑁆𑀢𑁂𑀬𑁆𑀬 𑀪𑀕𑀯𑀢𑁄 𑀧𑀺𑀢𑀸 𑀲𑀼𑀩𑁆𑀭𑀳𑁆𑀫𑀸 𑀦𑀸𑀫 𑀪𑀯𑀺𑀲𑁆𑀲𑀢𑀺. 𑀯𑀺𑀳𑀸𑀭𑀤𑁂𑀯𑀻 𑀢𑀲𑁆𑀲𑁂𑀯 𑀫𑀸𑀢𑀸 𑀩𑁆𑀭𑀳𑁆𑀫𑀯𑀢𑀻 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻 𑀪𑀯𑀺𑀲𑁆𑀲𑀢𑀺. 𑀅𑀪𑀬𑀕𑀸𑀫𑀡𑀻𑀓𑀼𑀫𑀸𑀭𑁄 𑀢𑀲𑁆𑀲𑁂𑀯 𑀫𑁂𑀢𑁆𑀢𑁂𑀬𑁆𑀬𑀲𑁆𑀲 𑀪𑀕𑀯𑀢𑁄 𑀧𑀞𑀫𑀕𑁆𑀕𑀲𑀸𑀯𑀓𑁄 𑀪𑀯𑀺𑀲𑁆𑀲𑀢𑀺. 𑀓𑀦𑀺𑀝𑁆𑀞𑁄 𑀲𑀤𑁆𑀥𑀸𑀢𑀺𑀲𑁆𑀲𑁄 𑀤𑀼𑀢𑀺𑀬𑀕𑁆𑀕𑀲𑀸𑀯𑀓𑁄 𑀪𑀯𑀺𑀲𑁆𑀲𑀢𑀺.

𑀏𑀢𑁆𑀢𑀸𑀯𑀢𑀸 𑀦𑀮𑀸𑀝𑀥𑀸𑀢𑀼 𑀲𑀁𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀥𑀸𑀢𑀼𑀯𑀁𑀲𑁄 𑀲𑀫𑀢𑁆𑀢𑁄.

𑀅𑀦𑁂𑀦 ¶ 𑀧𑀼𑀜𑁆𑀜𑀓𑀫𑁆𑀫𑁂𑀦 𑀲𑀁𑀲𑀭𑀦𑁆𑀢𑁄 𑀪𑀯𑀸𑀪𑀯𑁂;

𑀲𑀩𑁆𑀩𑀢𑁆𑀣 𑀧𑀡𑁆𑀟𑀺𑀢𑁄 𑀳𑁄𑀫𑀻 𑀲𑀸𑀭𑀺𑀧𑀼𑀢𑁆𑀢𑁄𑀯 𑀧𑀜𑁆𑀜𑀯𑀸.

𑀅𑀭𑀺𑀫𑁂𑀤𑀲𑁆𑀲 𑀩𑀼𑀤𑁆𑀥𑀲𑁆𑀲 𑀧𑀩𑁆𑀩𑀚𑀺𑀢𑁆𑀯𑀸𑀦 𑀲𑀸𑀲𑀦𑁂;

𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀺𑀢𑁆𑀯𑀸𑀦 𑀫𑀼𑀜𑁆𑀘𑁂𑀫𑀺 𑀪𑀯𑀩𑀦𑁆𑀥𑀦𑀸.

𑀅𑀦𑁂𑀦 𑀫𑁂 𑀲𑀩𑁆𑀩𑀪𑀯𑀸𑀪𑀯𑁂’𑀳𑀁,

𑀪𑀯𑁂𑀬𑁆𑀬𑀫𑁂𑀓𑀦𑁆𑀢𑀧𑀭𑀸𑀦𑀼𑀓𑀫𑁆𑀧𑀻;

𑀓𑀼𑀮𑀻 𑀩𑀮𑀻 𑀘𑁂𑀯 𑀲𑀢𑀻 𑀫𑀢𑀻 𑀘,

𑀓𑀯𑀻𑀳𑀺𑀲𑀦𑁆𑀢𑁂𑀳𑀺 𑀲𑀤𑀸 𑀲𑀫𑀗𑁆𑀕𑀻.

𑀧𑀜𑁆𑀜𑀸𑀯𑀦𑁆𑀢𑀸𑀦𑀁 𑀅𑀕𑁆𑀕𑁄 𑀪𑀯𑀢𑀼.