📜

𑀚𑀺𑀦𑀯𑀁𑀲𑀤𑀻𑀧𑀁 ¶

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑁧.

𑀫𑀳𑀸𑀤𑀬𑁄 𑀬𑁄 𑀳𑀤𑀬𑁄’𑀤𑀬𑁄’𑀤𑀬𑁄

𑀳𑀺𑀢𑀸𑀬 𑀤𑀼𑀓𑁆𑀔𑀸𑀦𑀼𑀪𑀯𑁂 𑀪𑀯𑁂 𑀪𑀯𑁂,

𑀅𑀓𑀸𑀲𑀺 𑀲𑀫𑁆𑀩𑁄𑀥𑀺𑀧𑀤𑀁 𑀧𑀤𑀁 𑀧𑀤𑀁

𑀢𑀫𑀸𑀪𑀺𑀯𑀦𑁆𑀤𑀸𑀫𑀺 𑀚𑀺𑀦𑀁 𑀚𑀺𑀦𑀁 𑀚𑀺𑀦𑀁; (𑀬𑀫𑀓𑀩𑀦𑁆𑀥𑀦𑀁)

𑁨. ¶

𑀧𑀳𑀸𑀬 𑀬𑀢𑁆𑀣𑀸’𑀪𑀺𑀭𑀢𑀺𑀁 𑀭𑀢𑀺𑀁 𑀭𑀢𑀺𑀁

𑀭𑀫𑀦𑁆𑀢𑀺 𑀥𑀫𑁆𑀫𑁂𑀯 𑀫𑀼𑀦𑀻 𑀫𑀼𑀦𑀻 𑀫𑀼𑀦𑀻,

𑀯𑀺𑀫𑀼𑀢𑁆𑀢𑀺𑀤𑀁 𑀲𑀩𑁆𑀩𑀪𑀯𑀸 𑀪𑀯𑀸’𑀪𑀯𑀸

𑀢𑀫𑀸𑀪𑀺𑀯𑀦𑁆𑀤𑁂 𑀫𑀳𑀺𑀢𑀁 𑀳𑀺𑀢𑀁 𑀳𑀺𑀢𑀁; (𑀬𑀫𑀓𑀩𑀦𑁆𑀥𑀦𑀁)

𑁩. ¶

𑀦𑀺𑀧𑀻𑀢𑀲𑀤𑁆𑀥𑀫𑁆𑀫𑀭𑀲𑀸 𑀭𑀲𑀸’𑀭𑀲𑀸

𑀲𑀼𑀧𑀼𑀜𑁆𑀜𑀔𑁂𑀢𑁆𑀢𑁄’𑀭𑀲𑀢𑀁 𑀲𑀢𑀁 𑀲𑀢𑀁,

𑀕𑀢𑀸 𑀯𑀺𑀥𑀽𑀢𑀸 𑀯𑀺𑀦𑀬𑁂𑀦 𑀬𑁂𑀦 𑀬𑁂

𑀢𑀫𑀸𑀪𑀺𑀯𑀦𑁆𑀤𑁂’𑀲𑀺𑀕𑀡𑀗𑁆𑀕𑀡’𑀗𑁆𑀕𑀡𑀁; (𑀬𑀫𑀓𑀩𑀦𑁆𑀥𑀦𑀁)

𑁪. ¶

𑀚𑀺𑀦𑀸’𑀦𑀢𑀫𑁆𑀪𑁄𑀭𑀼𑀳 𑀳𑀁𑀲𑀭𑀸𑀚𑀺𑀦𑀻

𑀚𑀺𑀦𑁄𑀭𑀲𑀸𑀦𑀁 𑀫𑀼𑀔𑀧𑀜𑁆𑀚𑀭𑀸’𑀮𑀺 𑀦𑀻,

𑀲𑀤𑀢𑁆𑀣𑀲𑀸𑀭𑀁 𑀲𑀭𑀲𑀁 𑀯𑀺𑀲𑀽𑀤 𑀦𑀻

𑀉𑀧𑁂𑀢𑀼 𑀫𑁂 𑀫𑀸𑀦𑀲𑀫𑁂𑀯 𑀯𑀸𑀡𑀺 𑀦𑀻;

𑁫.

𑀓𑀫𑁆𑀫𑀸𑀯𑀲𑁂𑀲𑀸 𑀯𑀺𑀘𑀺𑀢𑁄’𑀧𑀚𑀸𑀢𑁆𑀬𑀸

𑀕𑀦𑁆𑀣𑀸’𑀳𑀺𑀲𑀗𑁆𑀔𑀸𑀭𑀯𑀺𑀩𑀦𑁆𑀥𑀓𑀸 𑀫𑁂,

𑀧𑀡𑀸𑀫 𑀧𑀼𑀜𑁆𑀜𑀸𑀢𑀺𑀲𑀬𑁂𑀦’𑀦𑁂𑀦

𑀫𑀸 𑀧𑀸𑀓𑀤𑀸𑀦𑀸’𑀯𑀲𑀭𑀸 𑀪𑀯𑀦𑁆𑀢𑀼;

𑁬.

𑀲𑀼𑀯𑀡𑁆𑀡𑀯𑀡𑁆𑀡𑀲𑁆𑀲 𑀚𑀺𑀦𑀲𑁆𑀲 𑀯𑀡𑁆𑀡𑀁

𑀯𑀡𑁆𑀡𑁂𑀬𑁆𑀬 𑀓𑀧𑁆𑀧𑀫𑁆𑀧𑀺 𑀓𑀚𑀺𑀢𑁄 𑀲𑀼𑀯𑀡𑁆𑀡𑁄,

𑀓𑀧𑁆𑀧𑀲𑁆𑀲𑀺’𑀯𑁄𑀲𑀸𑀦 𑀫𑀦𑀢𑁆𑀢𑀢𑀸𑀬

𑀦 𑀧𑀸𑀧𑀼𑀡𑁂 𑀩𑀼𑀤𑁆𑀥𑀕𑀼𑀡𑀸𑀦 𑀫𑀦𑁆𑀢𑀁;

𑁭. ¶

𑀦𑀺𑀤𑁆𑀥𑀦𑁆𑀢 𑀘𑀸𑀫𑀻𑀓𑀭 𑀘𑀸𑀭𑀼 𑀭𑀽𑀧𑀁

𑀲𑀭𑀲𑁆𑀲𑀢𑀻 𑀪𑀽𑀲𑀡 𑀪𑀸𑀲𑀦𑀁𑀘,

𑀅𑀦𑀜𑁆𑀜 𑀲𑀸𑀥𑀸𑀭𑀡 𑀜𑀸𑀡𑀫𑀲𑁆𑀲

𑀅𑀯𑀸𑀯𑀺𑀬𑀸’𑀘𑀺𑀦𑁆𑀢𑀺𑀬 𑀫𑀧𑀓𑁆𑀧𑀫𑁂𑀬𑁆𑀬𑀁;

𑁮.

𑀓𑀼𑀳𑀺𑀁 𑀅𑀲𑀸𑀥𑀸𑀭𑀡 𑀭𑀽𑀧 𑀮𑀻𑀮𑀸

𑀓𑀼𑀳𑀺𑀁 𑀅𑀲𑀸𑀥𑀸𑀭𑀡 𑀯𑀸𑀡𑀺 𑀮𑀻𑀮𑀸,

𑀓𑀼𑀳𑀺𑀁 𑀅𑀲𑀸𑀥𑀸𑀭𑀡𑀜𑀸𑀡 𑀮𑀻𑀮𑀸

𑀓𑀼𑀳𑀺𑀁 𑀦𑀼 𑀫𑁂 𑀫𑀦𑁆𑀤𑀫𑀢𑀺𑀲𑁆𑀲 𑀮𑀻𑀮𑀸;

𑁯. ¶

𑀯𑀺𑀪𑀸𑀯𑀺𑀫𑀸𑀦𑀻 𑀧𑀭𑀯𑀫𑁆𑀳𑀺𑀦𑁄 𑀬𑁂

𑀇𑀲𑁆𑀲𑀸’𑀪𑀺𑀫𑀸𑀦𑁂𑀦 𑀯𑀺𑀪𑀜𑁆𑀜𑀫𑀸𑀦𑀸,

𑀕𑀯𑁂𑀲𑀬𑀦𑁆𑀢𑀻’𑀥 𑀧𑀭𑀲𑁆𑀲 𑀭𑀦𑁆𑀥𑀁

𑀢𑁂𑀲𑀁 𑀧𑀲𑀁𑀲𑀸𑀕𑀭𑀳𑀸𑀳𑀺 𑀓𑀺𑀫𑁆𑀫𑁂;

𑁧𑁦.

𑀧𑀲𑀢𑁆𑀣 𑀲𑀢𑁆𑀣𑀸𑀕𑀫 𑀧𑀸𑀭𑀤𑀲𑁆𑀲𑀻

𑀬𑁂 𑀲𑀸𑀥𑀯𑁄 𑀲𑀸𑀥𑀼 𑀕𑀼𑀡𑀧𑁆𑀧𑀲𑀦𑁆𑀢𑀸,

𑀕𑀦𑁆𑀣𑀲𑁆𑀲 𑀦𑀺𑀫𑁆𑀫𑀸𑀡𑀧𑀭𑀺𑀲𑁆𑀲𑀫𑀁 𑀦𑁄

𑀚𑀸𑀦𑀦𑁆𑀢𑀺 𑀢𑁂𑀬𑁂𑀯 𑀇𑀥𑀧𑁆𑀧𑀫𑀸𑀡𑀸;

𑁧𑁧.

𑀆𑀤𑀺𑀘𑁆𑀘𑀯𑀁𑀲𑀧𑁆𑀧𑀪𑀯𑀲𑁆𑀲 𑀢𑀲𑁆𑀲

𑀚𑀺𑀦𑀲𑁆𑀲 𑀲𑀢𑁆𑀣𑀸𑀕𑀫𑀓𑁄𑀯𑀺𑀤𑁂𑀳𑀺,

𑀯𑀼𑀢𑁆𑀢𑁄𑀧𑀺 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀬𑁂𑀲𑀼

𑀕𑀦𑁆𑀣𑁂𑀲𑀼 𑀲𑀗𑁆𑀔𑁂𑀧𑀯𑀲𑁂𑀦 𑀯𑀁𑀲𑁄;

𑁧𑁨.

𑀦 𑀢𑁂𑀳𑀺 𑀲𑀓𑁆𑀓𑀸 𑀲𑀼𑀕𑀢𑀲𑁆𑀲 𑀯𑀁𑀲𑀁

𑀓𑀺𑀜𑁆𑀘𑀸𑀧𑀺 𑀯𑀺𑀜𑁆𑀜𑀸𑀢𑀼 𑀫𑀲𑁂𑀲𑀬𑀺𑀢𑁆𑀯𑀸,

𑀲𑀫𑁆𑀧𑀼𑀡𑁆𑀡𑀯𑀁𑀲𑀲𑁆𑀲 𑀯𑀺𑀪𑀸𑀯𑀦𑀸𑀬

𑀢𑀲𑁆𑀫𑀸 𑀲𑀫𑀼𑀲𑁆𑀲𑀸𑀳𑀺𑀢 𑀫𑀸𑀦𑀲𑁂𑀦;

𑁧𑁩. ¶

𑀅𑀪𑀺𑀧𑁆𑀧𑀲𑀦𑁆𑀦𑁄 𑀭𑀢𑀦𑀢𑁆𑀢𑀬𑀫𑁆𑀳𑀺

𑀧𑀲𑀢𑁆𑀣𑀯𑀁𑀲𑀧𑁆𑀧𑀪𑀯𑁄 𑀧𑀪𑀼𑀦𑀁,

𑀯𑀺𑀪𑀼𑀲𑀡𑁄 𑀯𑀺𑀲𑁆𑀲𑀼𑀢𑀓𑀺𑀢𑁆𑀢𑀺𑀖𑁄𑀲𑁄

𑀬𑁄 𑀪𑀸𑀢𑀺 𑀮𑀗𑁆𑀓𑀸𑀬 𑀫𑀼𑀴𑀸𑀭𑀪𑀸𑀕𑁆𑀬𑁄;

𑁧𑁪.

𑀅𑀫𑀦𑁆𑀤𑀘𑀸𑀕𑀸’𑀪𑀺𑀭𑀢𑀲𑁆𑀲

𑀧𑀼𑀦𑀦𑁆𑀤𑀼 𑀦𑀸𑀫𑀲𑁆𑀲 𑀤𑀬𑀸𑀥𑀦𑀲𑁆𑀲,

𑀩𑀼𑀤𑁆𑀥𑁂 𑀧𑀲𑀸𑀤𑀸𑀢𑀺𑀲𑀬𑀲𑁆𑀲 𑀢𑀲𑁆𑀲

𑀅𑀚𑁆𑀛𑁂𑀲𑀦𑀜𑁆𑀘𑀸𑀧𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸;

𑁧𑁫.

𑀦𑀲𑁆𑀲𑀸𑀬 𑀧𑀼𑀩𑁆𑀩𑀸𑀘𑀭𑀺𑀬𑁄’𑀧𑀤𑁂𑀲𑀁

𑀲𑁄𑀢𑀽𑀦 𑀫𑀢𑁆𑀣𑀸𑀬 𑀫𑀬𑀸 𑀳𑀺𑀢𑀸𑀬,

𑀦𑀺𑀭𑀼𑀢𑁆𑀢𑀺𑀬𑀸 𑀫𑀸𑀕𑀥𑀺𑀓𑀸𑀬 𑀲𑀫𑁆𑀫𑀸

𑀯𑀺𑀥𑀻𑀬𑀢𑁂’𑀤𑀁 𑀚𑀺𑀦𑀯𑀁𑀲𑀤𑀻𑀧𑀁;

𑁧𑁬. ¶

𑀲𑀤𑁆𑀥𑀸𑀲𑀺𑀦𑁂𑀳𑀸𑀦𑀼𑀕𑀢𑀸𑀬 𑀧𑀜𑁆𑀜𑀸-

𑀤𑀲𑀸𑀬 𑀲𑁄𑀢𑀽𑀳𑀺 𑀫𑀦𑁄𑀯𑀺𑀫𑀸𑀦𑁂,

𑀧𑀤𑀻𑀧𑀺𑀢𑁄’𑀬𑀁 𑀚𑀺𑀦𑀯𑀁𑀲𑀤𑀻𑀧-

𑀤𑀻𑀧𑁄𑀳𑀭𑁂𑀧𑀸𑀧𑀢𑀫𑀧𑁆𑀧𑀩𑀦𑁆𑀥𑀁;

𑁧𑁭.

𑀧𑀼𑀭𑀗𑁆𑀕𑀧𑀼𑀡𑁆𑀡𑀸 𑀲𑀺𑀭𑀺𑀚𑀫𑁆𑀩𑀼𑀤𑀻𑀧𑁂

𑀲𑀫𑁆𑀧𑀢𑁆𑀢𑀺𑀪𑀸𑀭𑁂𑀦 𑀤𑀺𑀯𑀸’𑀯𑀢𑀺𑀡𑁆𑀡𑀸,

𑀬𑀸 𑀤𑁂𑀯𑀭𑀸𑀚𑀲𑁆𑀲’𑀫𑀭𑀸𑀯𑀢𑀻’𑀯𑀸-

𑀫𑀭𑀸𑀯𑀢𑀻𑀦𑀸𑀫 𑀧𑀼𑀭𑀻 𑀧𑀼𑀭𑁂’𑀲𑀻;

𑁧𑁮.

𑀯𑀺𑀚𑁆𑀚𑀸𑀥𑀭𑀸𑀦𑀜𑁆𑀘 𑀯𑀺𑀳𑀗𑁆𑀕𑀫𑀸𑀦𑀁

𑀯𑀺𑀩𑀦𑁆𑀥 𑀯𑁂𑀳𑀸𑀲𑀕𑀢𑀺𑀁 𑀩𑀳𑀸𑀲,

𑀬𑀲𑁆𑀫𑀺𑀁 𑀧𑀼𑀭𑀲𑁆𑀫𑀺𑀁 𑀚𑀺𑀢𑀯𑁂𑀭𑀺 𑀘𑀓𑁆𑀓𑀁

𑀧𑀸𑀓𑀸𑀭𑀘𑀓𑁆𑀓𑀁 𑀯𑀺𑀬 𑀘𑀓𑁆𑀓𑀯𑀸𑀴𑀁;

𑁧𑁯. ¶

𑀲𑀜𑁆𑀘𑀼𑀫𑁆𑀩𑀺𑀢𑀫𑁆𑀳𑁄𑀚 𑀭𑀚𑁄 𑀧𑀩𑀦𑁆𑀥-

𑀲𑀼𑀧𑀺𑀜𑁆𑀚𑀭𑀸𑀧𑀸 𑀧𑀭𑀺𑀔𑀸𑀳𑀺𑀭𑀸𑀫𑀸,

𑀧𑀼𑀭𑀺𑀢𑁆𑀣𑀺 𑀧𑀸𑀓𑀸𑀭 𑀦𑀺𑀢𑀫𑁆𑀩𑀪𑀸𑀕𑁂

𑀲𑀫𑀼𑀩𑁆𑀩𑀳𑀻 𑀓𑀜𑁆𑀘𑀦 𑀫𑁂𑀔𑀮𑀸’𑀪𑀁;

𑁨𑁦.

𑀭𑀢𑁆𑀢𑀺𑀦𑁆𑀤𑀺𑀯𑀸 𑀭𑀢𑁆𑀢𑀫𑀡𑀺’𑀦𑁆𑀤𑀦𑀻𑀮-

𑀫𑀡𑀺𑀧𑁆𑀧𑀪𑀸𑀭𑀜𑁆𑀚𑀺𑀢 𑀭𑀸𑀚𑀥𑀸𑀦𑀺,

𑀩𑀩𑀦𑁆𑀥 𑀬𑀸’𑀫𑀦𑁆𑀤𑀲𑀼𑀭𑀺𑀦𑁆𑀤𑀘𑀸𑀧-

𑀲𑀫𑀼𑀚𑁆𑀚𑀮𑀸𑀓𑀸𑀲𑀢𑀮𑀩𑁆𑀩𑀺𑀮𑀸𑀲𑀁;

𑁨𑁧.

𑀬𑀳𑀺𑀁𑀯𑀥𑀽𑀦𑀁 𑀯𑀤𑀦𑀫𑁆𑀩𑀼𑀚𑁂𑀳𑀺

𑀓𑀢𑀸𑀯𑀫𑀸𑀦𑀁 𑀳𑀭𑀺𑀡𑀗𑁆𑀓𑀩𑀺𑀫𑁆𑀩𑀁,

𑀧𑀪𑀸𑀳𑀺 𑀦𑀻𑀮𑁄𑀧𑀮𑀢𑁄𑀭𑀡𑀸𑀢𑀁

𑀲𑁄𑀓𑀸𑀪𑀻𑀪𑀽𑀢𑀁𑀘 𑀯𑀺𑀯𑀡𑁆𑀡𑀫𑀸𑀧;

𑁨𑁨. ¶

𑀲𑀭𑁄𑀭𑀼𑀳’𑀦𑁆𑀢𑀻 𑀫𑀡𑀺𑀫𑀦𑁆𑀤𑀺𑀭𑀸𑀪𑀸-

𑀲𑀜𑁆𑀘𑀼𑀫𑁆𑀩𑀺𑀢𑀁 𑀧𑀼𑀡𑁆𑀡𑀲𑀲𑀗𑁆𑀓𑀩𑀺𑀫𑁆𑀩𑀁;

𑀲𑀗𑁆𑀓𑀸𑀬 𑀭𑀸𑀫𑀸𑀚𑀦𑀢𑀸’𑀪𑀺𑀭𑀸𑀫𑀸

𑀓𑀭𑁂 𑀧𑀲𑀸𑀭𑁂𑀲𑀺 𑀧𑀼𑀭𑀫𑁆𑀳𑀺 𑀬𑀲𑁆𑀫𑀺𑀁;

𑁨𑁩.

𑀬𑀢𑁆𑀣’𑀗𑁆𑀕𑀦𑀸𑀦𑀁 𑀧𑀝𑀺𑀩𑀺𑀫𑁆𑀩𑀺𑀢𑀸𑀦𑀺

𑀆𑀤𑀸𑀲𑀪𑀺𑀢𑁆𑀢𑀻𑀲𑀼 𑀫𑀼𑀔𑀫𑁆𑀩𑀼𑀚𑀸𑀦𑀺,

𑀆𑀲𑀼𑀁 𑀯𑀺𑀖𑀸𑀢𑀸𑀬 𑀫𑀥𑀼𑀩𑁆𑀩𑀢𑀸𑀦𑀁

𑀯𑀺𑀮𑁄𑀘𑀦𑀸𑀮𑀻𑀦 𑀫𑀦𑀼𑀕𑁆𑀕𑀳𑀸𑀬;

𑁨𑁪.

𑀲𑀫𑁆𑀫𑀢𑁆𑀢 𑀫𑀸𑀢𑀗𑁆𑀕 𑀥𑀭𑀸𑀥𑀭𑁂𑀳𑀺

𑀬𑀲𑁆𑀫𑀺𑀁 𑀅𑀪𑀺𑀲𑁆𑀲𑀦𑁆𑀤 𑀫𑀤𑀲𑁆𑀲𑀯𑀦𑁆𑀢𑀺,

𑀢𑀼𑀭𑀗𑁆𑀕 𑀭𑀗𑁆𑀕𑁂𑀳𑀻 𑀢𑀭𑀗𑁆𑀕 𑀫𑀸𑀮𑀸

𑀲𑀫𑀸𑀓𑀼𑀮𑁂𑀯𑀸’𑀲𑀺 𑀯𑀺𑀥𑀽𑀢 𑀥𑀽𑀮𑀻;

𑁨𑁫. ¶

𑀦𑀺𑀓𑁆𑀔𑀺𑀢𑁆𑀢𑀯𑀻𑀡𑀸 𑀫𑀡𑀺𑀦𑀼𑀧𑀼𑀭𑀸𑀦𑀁

𑀯𑀺𑀮𑀸𑀲𑀺𑀦𑀻𑀦𑀁 𑀫𑀼𑀤𑀼𑀧𑀸𑀡𑀺 𑀧𑀸𑀤𑁂,

𑀫𑀢𑁆𑀢𑀸𑀮𑀺𑀫𑀸𑀮𑀸 𑀓𑀮𑀦𑀸𑀤𑀺𑀦𑀻 𑀓𑀺𑀁

𑀦𑀸𑀮𑀗𑁆𑀓𑀭𑀼𑀁 𑀬𑀢𑁆𑀣 𑀓𑀢𑀸𑀯𑀓𑀸𑀲𑀸;

𑁨𑁬.

𑀥𑀯𑀢𑁆𑀣𑀺𑀦𑀻𑀦𑀁 𑀓𑀼𑀘𑀲𑀸𑀭𑀲𑁂𑀳𑀺

𑀦𑁂𑀢𑁆𑀢𑀸𑀮𑀺𑀪𑀸𑀭𑀸’𑀦𑀦𑀦𑀻𑀭𑀚𑁂𑀳𑀺,

𑀬𑀸 𑀳𑀸𑀲𑀯𑀻𑀘𑀻𑀳𑀺 𑀧𑀼𑀭𑀻 𑀭𑀚𑀦𑁆𑀬𑀸

𑀭𑀭𑀸𑀚 𑀲𑀫𑀨𑀼𑀮𑁆𑀮𑀲𑀭𑁄𑀚𑀺𑀦𑀻’𑀯;

𑁨𑁭.

𑀘𑀦𑁆𑀤𑀧𑁆𑀧𑀪𑀸 𑀘𑀼𑀫𑁆𑀩𑀺𑀢 𑀘𑀦𑁆𑀤𑀓𑀦𑁆𑀢

𑀧𑀸𑀲𑀸𑀡𑀥𑀸𑀭𑀸 𑀫𑀡𑀺𑀘𑀦𑁆𑀤𑀺𑀓𑀸𑀲𑀽,

𑀘𑀦𑁆𑀤𑀸𑀦𑀦𑀸𑀦𑀁 𑀬𑀳𑀺 𑀫𑀗𑁆𑀕𑀦𑀸𑀳𑀁

𑀧𑀭𑀺𑀲𑁆𑀲𑀫𑀲𑁆𑀲𑁄’𑀧𑀲𑀫𑀸𑀬’𑀳𑁂𑀲𑀼𑀁;

𑁨𑁮. ¶

𑀬𑀲𑁆𑀫𑀺𑀁 𑀧𑀽𑀭𑁂 𑀉𑀤𑁆𑀥𑀫𑀥𑁄 𑀯𑀺𑀦𑀤𑁆𑀥-

𑀚𑀼𑀢𑀺𑀧𑁆𑀧𑀩𑀦𑁆𑀥𑁄 𑀫𑀡𑀺𑀫𑀦𑁆𑀤𑀺𑀭𑀸𑀦𑀁,

𑀲𑀫𑀼𑀩𑁆𑀩𑀳𑀻 𑀕𑁂𑀭𑀼𑀓 𑀧𑀗𑁆𑀓 𑀤𑀺𑀤𑁆𑀥-

𑀯𑀺𑀢𑀸𑀦 𑀧𑀘𑁆𑀘𑀢𑁆𑀣𑀭𑀡𑀩𑁆𑀩𑀺𑀮𑀸𑀲𑀁

𑁨𑁯.

𑀲𑀼𑀯𑀡𑁆𑀡 𑀫𑀼𑀢𑁆𑀢𑀸 𑀫𑀡𑀺 𑀯𑀁𑀲𑀯𑀡𑁆𑀡𑀸-

𑀧𑀯𑀸𑀴 𑀭𑀽𑀧𑀻 𑀯𑀚𑀺𑀭𑁂𑀳𑀺𑀜𑁆𑀘𑀸’𑀧𑀺,

𑀬𑀸 𑀲𑀢𑁆𑀢𑀥𑀜𑁆𑀜𑁂𑀳𑀺 𑀥𑀦𑁂𑀳𑀺 𑀨𑀻𑀢𑀸

𑀅𑀳𑀽 𑀧𑀼𑀭𑀺 𑀥𑀜𑁆𑀜𑀯𑀢𑀻’𑀯 𑀦𑀸𑀭𑀻; (𑀲𑀺𑀮𑁂𑀲𑀩𑀦𑁆𑀥𑀦𑀁)

𑁩𑁦.

𑀧𑀲𑀸𑀭𑀺𑀢𑀸’𑀦𑁂𑀓𑀤𑀺𑀲𑀸𑀫𑀼𑀔𑁂𑀲𑀼

𑀯𑀺𑀘𑀺𑀢𑁆𑀢𑀯𑀢𑁆𑀣𑀸’𑀪𑀭𑀡𑀸𑀤𑀺𑀧𑀽𑀭𑀸,

𑀬𑀢𑁆𑀣𑀸’𑀧𑀡𑀸 𑀦𑀺𑀚𑁆𑀚𑀺𑀢𑀓𑀧𑁆𑀧𑀭𑀼𑀓𑁆𑀔𑀸

𑀓𑀭𑀺𑀁𑀲𑀼 𑀮𑁄𑀓𑀸𑀪𑀺𑀫𑀢𑀢𑁆𑀣𑀲𑀺𑀤𑁆𑀥𑀺𑀁;

𑁩𑁧. ¶

𑀧𑀭𑀸𑀕𑀭𑀢𑁆𑀢𑀸 𑀫𑀥𑀼𑀧𑀸𑀢𑀺𑀫𑀢𑁆𑀢𑀸

𑀲𑀫𑁆𑀳𑀺𑀦𑁆𑀦𑀯𑁂𑀮𑀸 𑀖𑀦𑀦𑀻𑀮𑀯𑀸𑀮𑀸,

𑀳𑀁𑀲𑀸𑀲𑀬𑀸 𑀧𑀜𑁆𑀘𑀲𑀭𑀸𑀪𑀺𑀭𑀸𑀫𑀸

𑀬𑀲𑁆𑀫𑀺𑀁 𑀢𑀴𑀸𑀓𑀸 𑀯𑀺𑀬 𑀓𑀸𑀫𑀪𑁄𑀕𑀻; (𑀲𑀺𑀮𑁂𑀲𑀩𑀦𑁆𑀥𑀦𑀁)

𑁩𑁨.

𑀧𑀼𑀭𑀦𑁆𑀢𑀭𑀲𑁆𑀫𑀺𑀁 𑀭𑀢𑀦𑀕𑁆𑀖𑀺𑀓𑀸𑀦𑀁

𑀭𑀁𑀲𑀺𑀧𑁆𑀧𑀩𑀦𑁆𑀥𑁂𑀳𑀺 𑀳𑀢𑀦𑁆𑀥𑀓𑀸𑀭𑁂,

𑀓𑀼𑀦𑁆𑀤𑀸𑀭𑀯𑀺𑀦𑁆𑀤𑀩𑁆𑀪𑀼𑀤𑀬𑁂𑀦𑀬𑀲𑁆𑀫𑀺𑀁

𑀭𑀢𑁆𑀢𑀺𑀦𑁆𑀤𑀺𑀯𑀸𑀪𑁂𑀤 𑀫𑀯𑁂𑀤𑀺 𑀮𑁄𑀓𑁄;

𑁩𑁩. ¶

𑀫𑀸𑀢𑀗𑁆𑀕𑀚𑀻𑀫𑀽𑀢𑀖𑀝𑀸𑀬 𑀖𑀡𑁆𑀝𑀸-

𑀝𑀗𑁆𑀓𑀸𑀭𑀕𑀫𑁆𑀪𑀻𑀭𑀭𑀯𑀸𑀬 𑀬𑀲𑁆𑀫𑀺𑀁,

𑀧𑀮𑀫𑁆𑀪𑀻𑀢𑀸 𑀫𑀢𑁆𑀢𑀲𑀺𑀔𑀡𑁆𑀟𑀺𑀫𑀸𑀮𑀸

𑀅𑀓𑀸 𑀯𑀺𑀓𑀸𑀮𑁂𑀧𑀺 𑀅𑀔𑀡𑁆𑀟𑀓𑀻𑀴𑀁;

𑁩𑁪.

𑀧𑀼𑀭𑀫𑁆𑀳𑀺 𑀬𑀲𑁆𑀫𑀺𑀁 𑀘𑀭𑀡𑀫𑁆𑀩𑀼𑀚𑁂𑀳𑀺

𑀯𑀥𑀽𑀚𑀢𑁄 𑀩𑀦𑁆𑀥𑀺𑀢𑀦𑀽𑀧𑀼𑀭𑁂𑀳𑀺,

𑀯𑀺𑀓𑀸𑀲 𑀓𑁄𑀓𑀸𑀲𑀦 𑀲𑀻𑀲 𑀩𑀤𑁆𑀥

𑀫𑀢𑁆𑀢𑀸𑀮𑀺 𑀲𑁂𑀲’𑀫𑁆𑀩𑀼𑀚𑀺𑀦𑀻 𑀅𑀚𑁂𑀲𑀺;

𑁩𑁫.

𑀭𑀲𑀸𑀢𑀮𑀁 𑀦𑀸𑀕𑀨𑀡𑀸𑀯𑀦𑀤𑁆𑀥𑀁

𑀦𑀪𑁄𑀢𑀮𑀁 𑀯𑀺𑀚𑁆𑀚𑀼𑀮𑀢𑀸𑀯𑀦𑀤𑁆𑀥𑀁,

𑀬𑀸 𑀙𑀸𑀤𑀺𑀢𑀸 𑀭𑀽𑀧𑀺𑀬𑀚𑀸𑀢𑀭𑀽𑀧-

𑀥𑀚𑀸𑀯𑀮𑀻𑀳𑀸’𑀚𑀺𑀦𑀺 𑀭𑀸𑀚𑀥𑀸𑀦𑀻;

𑁩𑁬. ¶

𑀦𑀸𑀦𑀢𑁆𑀣𑀲𑀸𑀭𑀁 𑀫𑀺𑀢𑀥𑀸𑀢𑀼𑀯𑀡𑁆𑀡𑀁

𑀙𑀦𑁆𑀤𑀸𑀭𑀳𑀁 𑀧𑀸𑀡𑀕𑀡𑀸’𑀪𑀺𑀭𑀸𑀫𑀁,

𑀓𑀯𑀺𑀧𑁆𑀧𑀲𑀢𑁆𑀣𑀁 𑀲𑀭𑀲𑀁 𑀲𑀺𑀮𑁂𑀲𑀸-

𑀮𑀗𑁆𑀓𑀸𑀭𑀧𑀚𑁆𑀚𑀁’𑀯 𑀧𑀼𑀭𑀁 𑀬𑀫𑀸𑀲𑀺; (𑀲𑀺𑀮𑁂𑀲𑀩𑀦𑁆𑀥𑀦𑀁)

𑁩𑁭.

𑀧𑀼𑀭𑀫𑁆𑀳𑀺 𑀢𑀲𑁆𑀫𑀺𑀁 𑀓𑀭𑀼𑀡𑀸𑀦𑀺𑀥𑀸𑀦𑁄

𑀩𑀼𑀤𑁆𑀥𑀗𑁆𑀓𑀼𑀭𑁄 𑀩𑁆𑀭𑀸𑀳𑁆𑀫𑀡𑀲𑀸𑀭𑀯𑀁𑀲𑁂,

𑀅𑀲𑀗𑁆𑀔𑀓𑀧𑁆𑀧𑀸𑀦 𑀫𑀺𑀢𑁄 𑀘𑀢𑀼𑀦𑁆𑀦𑀁

𑀮𑀓𑁆𑀔𑀸𑀤𑀺𑀓𑀸𑀦𑀁 𑀉𑀤𑀧𑀸𑀤𑀺 𑀧𑀼𑀩𑁆𑀩𑁂;

𑁩𑁮.

𑀪𑁄𑀯𑀸𑀤𑀺𑀯𑀁𑀲𑁂’𑀓𑀤𑀺𑀯𑀸𑀓𑀭𑀲𑁆𑀲

𑀧𑀼𑀜𑁆𑀜𑀸𑀦𑀼𑀪𑀸𑀯𑁄’𑀤𑀬𑀫𑀗𑁆𑀕𑀮𑁂𑀳𑀺,

𑀚𑀸𑀢𑀲𑁆𑀲 𑀔𑁄 𑀲𑀫𑁆𑀧𑀢𑀺 𑀚𑀫𑁆𑀩𑀼𑀤𑀻𑀧𑁄

𑀯𑀺𑀮𑀼𑀫𑁆𑀧𑀬𑀻 𑀫𑀗𑁆𑀕𑀮𑀯𑀸𑀲𑀮𑀻𑀮𑀁;

𑁩𑁯. ¶

𑀚𑀸𑀢𑀓𑁆𑀔𑀡𑁂 𑀢𑀲𑁆𑀲 𑀲𑀭𑀻𑀭𑀚𑁂𑀦

𑀕𑀦𑁆𑀥𑁂𑀦 𑀯𑀡𑁆𑀡𑁂𑀦 𑀲𑀓𑁂 𑀦𑀺𑀓𑁂𑀢𑁂,

𑀳𑀢𑀧𑁆𑀧𑀪𑀸 𑀘𑀦𑁆𑀤𑀦𑀢𑁂𑀮𑀤𑀻𑀧𑀸

𑀲𑀡𑁆𑀞𑀸𑀦𑀫𑀢𑁆𑀢𑁂𑀳𑀺 𑀯𑀺𑀚𑀸𑀦𑀺𑀬𑀸𑀲𑀼𑀁;

𑁪𑁦.

𑀯𑀺𑀫𑀼𑀢𑁆𑀢𑀤𑁄𑀲𑀸𑀳𑀺 𑀲𑀼𑀔𑁂𑀥𑀺𑀢𑀸𑀳𑀺

𑀥𑀸𑀢𑀻𑀳𑀺 𑀓𑀼𑀫𑁆𑀪𑁄𑀭𑀼𑀧𑀬𑁄𑀥𑀭𑀸𑀳𑀺,

𑀪𑀢𑁄 𑀓𑀼𑀫𑀸𑀭𑁄 𑀲𑀼𑀓𑀼𑀫𑀸𑀭𑀓𑀸𑀬𑁄

𑀔𑁂𑀧𑁂𑀲𑀺 𑀲𑁄 𑀓𑀸𑀦𑀺𑀘𑀺 𑀯𑀸𑀲𑀭𑀸𑀦𑀺;

𑁪𑁧.

𑀫𑀳𑀸𑀫𑀳𑁂𑀘𑀸’𑀣 𑀧𑀯𑀢𑁆𑀢𑀫𑀸𑀦𑁂

𑀲𑀯𑁂𑀤 𑀯𑁂𑀤𑀗𑁆𑀕 𑀯𑀺𑀤𑀽 𑀯𑀺𑀤𑀽𑀳𑀺,

𑀓𑀸𑀭𑀸𑀧𑀬𑀼𑀁 𑀢𑁂 𑀧𑀺𑀢𑀭𑁄’𑀭𑀲𑀲𑁆𑀲

𑀦𑀸𑀫𑀁 𑀲𑀼𑀫𑁂𑀥𑁄’𑀢𑀺 𑀧𑀤𑀢𑁆𑀣𑀲𑀸𑀭𑀁;

𑁪𑁨. ¶

𑀉𑀴𑀸𑀭𑀪𑀸𑀕𑁆𑀬𑁂𑀦 𑀲𑀫𑀁 𑀓𑀼𑀫𑀸𑀭𑁂

𑀲𑀁𑀯𑀤𑁆𑀥𑀫𑀸𑀦𑁂 𑀚𑀦𑀦𑀻 𑀦 𑀢𑀺𑀢𑁆𑀢𑀺𑀁,

𑀧𑀸𑀬𑀸𑀲𑀺 𑀦𑀻𑀮𑀸𑀫𑀓𑀮𑀮𑁄𑀘𑀦𑀸𑀮𑀺𑀁

𑀫𑀼𑀔𑀫𑁆𑀩𑀼𑀚𑀁 𑀢𑀲𑁆𑀲’𑀪𑀺𑀘𑀼𑀫𑁆𑀩𑀫𑀸𑀦𑀸;

𑁪𑁩.

𑀲𑀼𑀔𑁂𑀥𑀺𑀢’𑀗𑁆𑀕𑀸𑀯𑀬𑀯𑁄 𑀓𑀼𑀫𑀸𑀭𑁄

𑀯𑀺𑀫𑀸𑀦𑀪𑀼𑀫𑁆𑀬𑀸 𑀫𑀡𑀺𑀦𑀺𑀫𑁆𑀫𑀺𑀢𑀸𑀬,

𑀧𑀭𑁄𑀤𑀺 𑀫𑀸𑀢𑀸𑀧𑀺𑀢𑀭𑁄’𑀪𑀺𑀬𑀸𑀘𑀁

𑀩𑀺𑀫𑁆𑀩𑀁 𑀓𑀦𑀺𑀚𑀁 𑀚𑀸𑀦𑀼𑀬𑀼𑀕𑁂𑀦 𑀕𑀘𑁆𑀙𑀁;

𑁪𑁪.

𑀲𑀼𑀯𑀡𑁆𑀡𑀩𑀺𑀫𑁆𑀩𑁄’𑀧𑀫𑀘𑀸𑀭𑀼𑀭𑀽𑀧𑁄

𑀲𑀫𑀸𑀘𑀭𑀁 𑀥𑀸𑀢𑀺𑀪𑀼𑀚𑀸’𑀯𑀮𑀫𑁆𑀩𑀁,

𑀯𑀺𑀜𑁆𑀜𑀸𑀲𑀧𑀸𑀤’𑀗𑁆𑀕𑀼𑀮𑀺𑀫𑀜𑁆𑀚𑀭𑀻𑀳𑀺

𑀲𑀮𑀻𑀮𑀫𑀸𑀯𑀸𑀲𑀫𑀮𑀗𑁆𑀓𑀭𑀺𑀢𑁆𑀣;

𑁪𑁫. ¶

𑀦𑀺𑀚𑁂𑀦 𑀢𑁂𑀚𑁂𑀦 𑀘 𑀚𑀺𑀯𑀮𑁄𑀓𑀁

𑀬𑀲𑁂𑀦’𑀧𑀼𑀩𑁆𑀩𑀸𑀘𑀭𑀺𑀫𑀁 𑀨𑀼𑀲𑀦𑁆𑀢𑁄,

𑀢𑀺𑀭𑁄𑀓𑀭𑀺𑀢𑁆𑀯𑀸 𑀭𑀯𑀺𑀘𑀦𑁆𑀤𑀲𑁄𑀪𑀁

𑀲𑀁𑀯𑀟𑁆𑀠𑀺 𑀥𑀻𑀭𑁄 𑀉𑀪𑀢𑁄 𑀲𑀼𑀚𑀢𑁄;

𑁪𑁬.

𑀲𑁄 𑀲𑀢𑁆𑀢𑀫𑀸 𑀬𑀸𑀯 𑀧𑀺𑀢𑀸𑀫𑀳𑀲𑁆𑀲

𑀬𑀼𑀕𑀸 𑀲𑀕𑀩𑁆𑀪𑀸𑀲𑀬𑀲𑀼𑀤𑁆𑀥𑀺𑀓𑁄’𑀲𑀺,

𑀦𑀺𑀳𑀻𑀦𑀚𑀘𑁆𑀘𑁄’𑀢𑀺 𑀦 𑀚𑀸𑀢𑀺𑀯𑀸𑀤𑀸

𑀔𑀺𑀢𑁆𑀢𑁄’𑀧𑀓𑀼𑀝𑁆𑀞𑁄 𑀪𑀯𑀺 𑀯𑀺𑀧𑁆𑀧𑀲𑁂𑀝𑁆𑀞𑁄;

𑁪𑁭.

𑀯𑁂𑀤𑀦𑁆𑀢𑀬𑀁 𑀲𑁄 𑀲𑀦𑀺𑀖𑀡𑁆𑀝𑀼 𑀲𑀢𑁆𑀣𑀁

𑀲𑀓𑁂𑀝𑀼𑀪𑀁 𑀲𑀸𑀓𑁆𑀔𑀭𑀪𑁂𑀤 𑀲𑀢𑁆𑀣𑀁,

𑀲𑀸𑀥𑀩𑁆𑀩𑀢𑀩𑁆𑀩𑁂𑀤𑀺’𑀢𑀺𑀳𑀸𑀲 𑀲𑀢𑁆𑀣𑀁

𑀅𑀯𑁂𑀤𑀺 𑀯𑁂𑀤𑀗𑁆𑀕𑀬𑀼𑀢𑀁 𑀧 𑀲𑀢𑁆𑀣𑀁;

𑁪𑁮.

𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄 𑀧𑀯𑀻𑀡𑁄

𑀓𑀮𑀸𑀲𑀼 𑀮𑁄𑀓𑀸𑀬𑀢𑀮𑀓𑁆𑀔𑀡𑁂𑀲𑀼,

𑀧𑀧𑀽𑀭𑀓𑀸𑀭𑀺 𑀧𑀤𑀓𑁄 𑀓𑀯𑀻𑀦𑀁

𑀢𑁂𑀢𑀸’𑀲𑀺 𑀯𑁂𑀬𑁆𑀬𑀸𑀓𑀭𑀡𑁄 𑀕𑀡𑀺𑀲𑁄;

𑁪𑁯. ¶

𑀓𑀦𑁆𑀤𑀧𑁆𑀧𑀤𑀧𑁆𑀧𑀸’𑀦𑀮𑀥𑀼𑀫𑀭𑀸𑀚𑀺-

𑀮𑀻𑀮𑀸𑀯𑀮𑀫𑁆𑀩𑀺 𑀦𑀺𑀚𑀫𑀲𑁆𑀲𑀼𑀭𑀸𑀚𑀺,

𑀦 𑀓𑁂𑀯𑀮𑀁 𑀓𑁄𑀫𑀮𑀕𑀡𑁆𑀟𑀪𑀸𑀕𑀁

𑀫𑀦𑀫𑁆𑀧𑀺 𑀣𑀻𑀦𑀁 𑀫𑀮𑀺𑀦𑀻𑀓𑀭𑀺𑀢𑁆𑀣;

𑁫𑁦.

𑀢𑀦𑁆𑀤𑁂𑀪𑀯𑀡𑁆𑀡𑀸𑀬𑀢𑀦’𑀡𑁆𑀡𑀯𑀫𑁆𑀳𑀺

𑀦𑀭𑀽𑀧𑀢𑀡𑁆𑀳𑀸𑀢𑀭𑀡𑀺 𑀦𑀭𑀸𑀦𑀁,

𑀧𑀸𑀬𑀸𑀲𑀺 𑀘𑀓𑁆𑀔𑀸𑀬𑀢𑀦𑀧𑁆𑀧𑀺𑀬𑀸𑀳𑀺

𑀢𑀻𑀭𑀦𑁆𑀢𑀭𑀁 𑀘𑀺𑀢𑁆𑀢𑀦𑀺𑀬𑀸𑀫𑀓𑀝𑁆𑀞𑀸;

𑁫𑁧.

𑀤𑁆𑀯𑀺𑀚𑁄 𑀲𑀼𑀫𑁂𑀥𑁄 𑀲𑀼𑀯𑀺𑀲𑀼𑀤𑁆𑀥𑀫𑁂𑀥𑁄

𑀫𑀸𑀢𑀸𑀧𑀺𑀢𑀼𑀦𑁆𑀦𑀁 𑀦𑀺𑀥𑀦𑀸𑀯𑀲𑀸𑀦𑁂,

𑀧𑀼𑀜𑁆𑀜𑀸𑀦𑀼𑀪𑀸𑀯𑀧𑁆𑀧𑀪𑀯𑀁 𑀅𑀕𑀸𑀭-

𑀫𑀚𑁆𑀛𑀸𑀯𑀲𑀁 𑀓𑀸𑀫𑀲𑀼𑀔𑀁’𑀦𑀼𑀪𑀼𑀜𑁆𑀚𑀻;

𑁫𑁨. ¶

𑀦𑀺𑀲𑀚𑁆𑀚 𑀧𑀸𑀲𑀸𑀤𑀢𑀮𑁂’𑀓𑀤𑀸 𑀲𑁄

𑀧𑀮𑁆𑀮𑀗𑁆𑀓𑀫𑀸𑀥𑀸𑀬 𑀭𑀳𑁄𑀕𑀢𑁄𑀯,

𑀧𑀼𑀦𑀩𑁆𑀪𑀯𑀼𑀧𑁆𑀧𑀢𑁆𑀢𑀺 𑀲𑀭𑀻𑀭𑀪𑁂𑀤𑁄

𑀤𑀼𑀓𑁆𑀔𑁄’𑀢𑀺 𑀘𑀺𑀦𑁆𑀢𑁂𑀲𑀺 𑀲𑀪𑀸𑀯𑀘𑀺𑀦𑁆𑀢𑀻;

𑁫𑁩.

𑀚𑀸𑀢𑁄 𑀲’𑀳𑀁 𑀚𑀸𑀢𑀺𑀚𑀭𑀸𑀭𑀼𑀚𑀸𑀤𑀺-

𑀥𑀫𑁆𑀫𑁄’𑀫𑁆𑀳𑀺 𑀢𑀲𑁆𑀫𑀸 𑀪𑀯𑀤𑀼𑀓𑁆𑀔𑀲𑀼𑀜𑁆𑀜𑀁,

𑀦𑀺𑀘𑁆𑀘𑀁 𑀅𑀚𑀸𑀢𑀺𑀁 𑀅𑀚𑀭𑀁 𑀅𑀭𑁄𑀕𑀁

𑀕𑀯𑁂𑀲𑀺𑀢𑀼𑀁 𑀯𑀝𑁆𑀝𑀢𑀺 𑀦𑀺𑀩𑁆𑀩𑀼𑀢𑀺’𑀦𑁆𑀢𑀺;

𑁫𑁪.

𑀬𑀣𑀸𑀧𑀺𑀤𑀼𑀓𑁆𑀔𑁂 𑀲𑀢𑀺 𑀘’𑀢𑁆𑀣𑀺𑀲𑀸𑀢𑀁

𑀢𑀤𑀜𑁆𑀜𑀫𑀼𑀡𑁆𑀳𑁂 𑀲𑀢𑀺 𑀲𑀻𑀢𑀫𑀢𑁆𑀣𑀺,

𑀪𑀯𑀫𑁆𑀳𑀺 𑀲𑀦𑁆𑀢𑁂 𑀯𑀺𑀪𑀯𑁄’𑀧𑀺 𑀏𑀯𑀁

𑀦𑀺𑀩𑁆𑀩𑀸𑀡𑀫𑀢𑁆𑀣𑀻 𑀢𑀺𑀯𑀺𑀥𑀕𑁆𑀕𑀺𑀲𑀦𑁆𑀢𑁂;

𑁫𑁫. ¶

𑀲𑀸𑀯𑀚𑁆𑀚𑀥𑀫𑁆𑀫𑁂 𑀇𑀳𑀯𑀺𑀚𑁆𑀚𑀫𑀸𑀦𑁂

𑀲𑀁𑀯𑀺𑀚𑁆𑀚𑀢𑁂 𑀪𑁄 𑀦𑀺𑀭𑀯𑀚𑁆𑀚𑀥𑀫𑁆𑀫𑁄,

𑀅𑀚𑀸𑀢𑀺 𑀳𑁄𑀢𑀺 𑀲𑀢𑀺 𑀚𑀸𑀢𑀺𑀬𑀸’𑀢𑀺

𑀏𑀯𑀁 𑀯𑀺𑀘𑀺𑀦𑁆𑀢𑁂𑀲𑀺 𑀲𑀤𑀢𑁆𑀣𑀯𑀺𑀦𑁆𑀢𑀻;

𑁫𑁬.

𑀤𑀺𑀲𑁆𑀯𑀸 𑀬𑀣𑀸 𑀕𑀼𑀣𑀕𑀢𑁄 𑀢𑀴𑀸𑀓𑀁

𑀦 𑀢𑀲𑁆𑀲 𑀤𑁄𑀲𑁄 𑀦 𑀢𑀫𑁄𑀢𑀭𑁂𑀬𑁆𑀬,

𑀓𑀺𑀮𑁂𑀲𑀥𑁄𑀯𑁂 𑀅𑀫𑀢𑀫𑁆𑀳𑀺 𑀲𑀦𑁆𑀢𑁂

𑀢𑀣𑀸 𑀦 𑀲𑁂𑀯𑁂𑀣 𑀦 𑀢𑀲𑁆𑀲 𑀤𑁄𑀲𑁄;

𑁫𑁭.

𑀧𑀸𑀧𑀸𑀭𑀺𑀭𑀼𑀤𑁆𑀥𑁄 𑀲𑀢𑀺 𑀔𑁂𑀫𑀫𑀕𑁆𑀕𑁂

𑀦 𑀢𑀲𑁆𑀲 𑀤𑁄𑀲𑁄 𑀦 𑀲𑀼𑀔𑀁 𑀯𑀚𑁂𑀬𑁆𑀬,

𑀧𑀸𑀧𑀸𑀭𑀺𑀭𑀼𑀤𑁆𑀥𑁄 𑀲𑀢𑀺 𑀔𑁂𑀫𑀫𑀕𑁆𑀕𑁂

𑀢𑀣𑀸 𑀦𑀕𑀘𑁆𑀙𑁂𑀬𑁆𑀬 𑀦 𑀢𑀲𑁆𑀲 𑀤𑁄𑀲𑁄; (𑀬𑀫𑀓𑀩𑀦𑁆𑀥𑀦𑀁)

𑁫𑁮. ¶

𑀬𑀣𑀸𑀧𑀺 𑀯𑁂𑀚𑁆𑀚𑁂 𑀲𑀢𑀺 𑀖𑁄𑀭𑀭𑁄𑀕𑀻

𑀦 𑀢𑀲𑁆𑀲 𑀤𑁄𑀲𑁄 𑀢 𑀮𑀪𑁂 𑀢𑀺𑀓𑀺𑀘𑁆𑀙𑀁,

𑀭𑀸𑀕𑀸𑀤𑀺𑀭𑁄𑀕𑀻 𑀲𑀢𑀺 𑀩𑀼𑀤𑁆𑀥𑀯𑁂𑀚𑁆𑀚𑁂

𑀥𑀫𑁆𑀫𑁄𑀲𑀥𑀁 𑀦𑁂’𑀘𑁆𑀙𑀢𑀺 𑀓𑀲𑁆𑀲 𑀤𑁄𑀲𑁄;

𑁫𑁯.

𑀬𑁄 𑀓𑀡𑁆𑀞𑀩𑀤𑁆𑀥𑀁 𑀓𑀼𑀡𑀧𑀁 𑀧𑀳𑀸𑀬

𑀬𑀣𑀸𑀲𑀼𑀔𑀁 𑀕𑀘𑁆𑀙𑀢𑀺 𑀲𑁂𑀭𑀺𑀘𑀸𑀭𑀻,

𑀢𑀣𑁂𑀯𑀺’𑀫𑀁 𑀓𑀼𑀘𑁆𑀙𑀺𑀢 𑀧𑀽𑀢𑀺𑀓𑀸𑀬𑀁

𑀬𑀁𑀦𑀽𑀦 𑀕𑀘𑁆𑀙𑁂𑀬𑁆𑀬𑀫𑀳𑀁 𑀚𑀳𑀺𑀢𑁆𑀯𑀸;

𑁬𑁦.

𑀉𑀘𑁆𑀘𑀸𑀭𑀞𑀸𑀦𑀫𑁆𑀳𑀺 𑀚𑀦𑀸’𑀦𑀧𑁂𑀓𑁆𑀔𑀸

𑀓𑀢𑁆𑀯𑀸 𑀓𑀭𑀻𑀲𑀸𑀦𑀺 𑀓𑀬𑀣𑀸 𑀯𑀚𑀦𑁆𑀢𑀺,

𑀢𑀣𑀸 𑀲𑀭𑀻𑀭𑀁 𑀓𑀼𑀡𑀧𑁂𑀳𑀺 𑀧𑀽𑀭𑀁

𑀬𑀁𑀦𑀽𑀦 𑀕𑀘𑁆𑀙𑁂𑀬𑁆𑀬𑀫𑀳𑀁 𑀚𑀳𑀺𑀢𑁆𑀯𑀸;

𑁬𑁧. ¶

𑀦𑀸𑀯𑀁 𑀬𑀣𑀸 𑀚𑀚𑁆𑀚𑀭𑀫𑀸𑀧𑀕𑀸𑀳𑀺𑀁

𑀯𑀚𑁂𑀬𑁆𑀬 𑀦𑁂𑀢𑀸 𑀅𑀢𑀧𑁂𑀓𑁆𑀔𑀓𑁄𑀯,

𑀢𑀣𑀸 𑀦𑀯𑀤𑁆𑀯𑀸𑀭𑀲𑀯𑀁 𑀲𑀭𑀻𑀭𑀁

𑀬𑀁𑀦𑀽𑀦 𑀕𑀘𑁆𑀙𑁂𑀬𑁆𑀬𑀫𑀳𑀁 𑀚𑀳𑀺𑀢𑁆𑀯𑀸;

𑁬𑁨.

𑀘𑁄𑀭𑁂𑀳𑀺 𑀕𑀘𑁆𑀙𑀁 𑀅𑀯𑀳𑀸𑀭𑀪𑀻𑀢𑁆𑀬𑀸

𑀔𑁂𑀫𑀁 𑀲𑀼𑀫𑁂𑀥𑁄 𑀧𑀼𑀭𑀫𑁄𑀢𑀭𑁂𑀬𑁆𑀬,

𑀢𑀣𑀸 𑀲𑀭𑀻𑀭𑀁 𑀓𑀼𑀲𑀮𑀸𑀯𑀳𑀸𑀭𑀁

𑀬𑀁𑀦𑀽𑀦 𑀕𑀘𑁆𑀙𑁂𑀬𑁆𑀬𑀫𑀳𑀁 𑀚𑀳𑀺𑀢𑁆𑀯𑀸;

𑁬𑁩.

𑀦𑁂𑀓𑁆𑀔𑀫𑁆𑀫 𑀲𑀗𑁆𑀓𑀧𑁆𑀧 𑀧𑀭𑁄’𑀧𑀫𑀸𑀳𑀺

𑀅𑀦𑀼𑀲𑁆𑀲𑀭𑀺𑀢𑁆𑀯𑁂’𑀯𑀫𑀼𑀴𑀸𑀭𑀯𑀻𑀭𑁄,

𑀳𑀢𑁄’𑀭𑀧𑀸𑀭𑁂 𑀢𑀺𑀪𑀯𑁂 𑀅𑀲𑀸𑀭𑁂

𑀯𑀺𑀳𑀸𑀲𑀺 𑀉𑀓𑁆𑀓𑀡𑁆𑀞𑀺𑀢𑀫𑀸𑀦𑀲𑁄 𑀲𑁄;

𑁬𑁪. ¶

𑀲𑀼𑀯𑀡𑁆𑀡 𑀫𑀼𑀢𑁆𑀢𑀸 𑀫𑀡𑀺 𑀭𑀽𑀧𑀺𑀬𑀸𑀤𑀺-

𑀥𑀦𑁂𑀳𑀺 𑀥𑀜𑁆𑀜𑁂𑀳𑀺 𑀘 𑀧𑀽𑀭𑀺𑀢𑀸𑀦𑀺,

𑀅𑀯𑀸𑀧𑀼𑀭𑀺𑀢𑁆𑀯𑀸𑀦,𑀣 𑀓𑁄𑀲𑀓𑁄𑀝𑁆𑀞𑀸-

𑀕𑀸𑀭𑀸𑀦𑀺 𑀢𑀁 𑀤𑀲𑁆𑀲𑀬𑀺 𑀭𑀸𑀲𑀺𑀯𑀟𑁆𑀠𑁄;

𑁬𑁫.

𑀧𑀺𑀢𑀸𑀫𑀳𑀸𑀦𑀁 𑀧𑀓𑀧𑀺𑀢𑀸𑀫𑀳𑀸𑀦𑀁

𑀫𑀸𑀢𑀸𑀧𑀺𑀢𑀼𑀦𑁆𑀦𑀁 𑀯𑀺𑀪𑀯𑀸 𑀧𑀦𑁂𑀢𑁆𑀣,

𑀅𑀦𑀧𑁆𑀧𑀓𑀸𑀣𑀸𑀯𑀭𑀚𑀗𑁆𑀕𑀫𑀸𑀢𑁂

𑀲𑀁𑀤𑀺𑀲𑁆𑀲𑀭𑁂 𑀥𑀻𑀭 𑀲𑀼𑀫𑁂𑀥𑀯𑀺𑀧𑁆𑀧;

𑁬𑁬.

𑀲𑁄 𑀲𑀢𑁆𑀢𑀫𑀸 𑀬𑀸𑀯 𑀧𑀯𑁂𑀡𑀺𑀯𑀝𑁆𑀝𑀸

𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀯𑀲𑁆𑀲𑀭𑀸𑀲𑀺𑀁,

𑀥𑀦𑀸𑀕𑀫𑀲𑁆𑀲𑀸𑀧𑀺 𑀥𑀦𑀩𑁆𑀩𑀬𑀲𑁆𑀲

𑀧𑀫𑀸𑀡’𑀫𑀸𑀘𑀻𑀓𑁆𑀔𑀺𑀧𑀫𑀸𑀡𑀤𑀲𑁆𑀲𑀺𑀁;

𑁬𑁭.

𑀓𑀼𑀝𑀼𑀫𑁆𑀩𑀫𑁂𑀢𑀁 𑀧𑀝𑀺𑀧𑀚𑁆𑀚𑀫𑀸𑀦𑁄

𑀓𑀸𑀫𑁂𑀲𑀼 𑀤𑁂𑀯𑁄𑀯𑀺𑀬 𑀇𑀦𑁆𑀤𑁆𑀭𑀺𑀬𑀸𑀦𑀺,

𑀇𑀘𑁆𑀙𑀸𑀦𑀼𑀭𑀽𑀧𑀁 𑀧𑀭𑀺𑀘𑀸𑀭𑀬𑀲𑁆𑀲𑀼

𑀇𑀘𑁆𑀘𑁂𑀯 𑀫𑀸𑀭𑁄𑀘𑀬𑀺 𑀭𑀸𑀲𑀺𑀯𑀟𑁆𑀠𑁄;

𑁬𑁮. ¶

𑀅𑀫𑀼𑀁 𑀫𑀳𑀦𑁆𑀢𑀁 𑀥𑀦𑀥𑀜𑁆𑀜𑀭𑀸𑀲𑀺𑀁

𑀲𑀫𑀸𑀯𑀺𑀦𑀺𑀢𑁆𑀯𑁂’𑀓 𑀓𑀳𑀸𑀧𑀡𑀫𑁆𑀧𑀺,

𑀦𑀸’𑀤𑀸𑀬 𑀫𑀸𑀢𑀸𑀧𑀺𑀢𑀭𑁄𑀧𑁆𑀬’𑀳𑁄 𑀢𑁄

𑀕𑀢𑀸 𑀬𑀣𑀸𑀓𑀫𑁆𑀫 𑀫𑀺𑀢𑁄 𑀧𑀭𑀢𑁆𑀣;

𑁬𑁯.

𑀢𑀩𑁆𑀩𑀢𑁆𑀣𑀼𑀲𑀸𑀭𑀕𑁆𑀕𑀳𑀡𑀸𑀢𑀺𑀲𑀽𑀭𑁄

𑀯𑁄𑀲𑁆𑀲𑀕𑁆𑀕𑀲𑀦𑁆𑀢𑁄 𑀅𑀣 𑀲𑀢𑁆𑀢𑀲𑀸𑀭𑁄,

𑀭𑀜𑁆𑀜𑁄 𑀲𑀫𑀸𑀭𑁄𑀘𑀺𑀬 𑀏𑀢𑀫𑀢𑁆𑀣𑀁

𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 𑀲𑀓𑁂 𑀧𑀼𑀭𑀫𑁆𑀳𑀺;

𑁭𑁦.

𑀲𑀦𑁆𑀢𑀧𑁆𑀧𑀬𑀺 𑀪𑁂𑀭𑀺𑀯𑀺𑀭𑀸𑀯𑀕𑀦𑁆𑀥-

𑀫𑀸𑀖𑀸𑀬 𑀲𑀫𑁆𑀧𑀢𑁆𑀢𑀚𑀸𑀢𑀸’𑀮𑀺𑀚𑀸𑀢𑀁,

𑀪𑁄𑀯𑀸𑀤𑀺 𑀦𑀸𑀦𑀸𑀭𑀢𑀦𑀸𑀤𑀺𑀪𑁄𑀕-

𑀫𑀥𑀽𑀳𑀺 𑀲𑀢𑁆𑀢𑀸𑀳’𑀫𑀦𑀸𑀣𑀦𑀸𑀣𑁄;

𑁭𑁧. ¶

𑀢𑀤𑀕𑁆𑀕 𑀬𑀜𑁆𑀜𑀸𑀮𑀬 𑀯𑀸𑀭𑀺𑀯𑀸𑀳-

𑀥𑀸𑀭𑀸𑀦𑀺𑀧𑀸𑀢𑀤𑁆𑀥𑀦𑀯𑀼𑀝𑁆𑀞𑀺𑀳𑁂𑀢𑀼,

𑀫𑀳𑀸 𑀚𑀦𑀲𑁆𑀲𑀸’𑀥𑀺𑀓𑀯𑀢𑁆𑀣𑀼𑀢𑀡𑁆𑀳𑀸-

𑀢𑀝𑀸𑀦𑀺 𑀪𑀺𑀦𑁆𑀦𑀸𑀦𑀺 𑀫𑀦𑁄𑀤𑀳𑁂𑀲𑀼;

𑁭𑁨.

𑀲𑀼𑀔𑁂𑀥𑀺𑀢𑁄 𑀓𑀸𑀫𑀲𑀼𑀔𑀁 𑀧𑀳𑀸𑀬

𑀖𑀭𑀸’𑀪𑀻𑀦𑀺𑀓𑁆𑀔𑀫𑁆𑀫 𑀢𑀢𑁄 𑀲𑀼𑀫𑁂𑀥𑁄,

𑀅𑀚𑁆𑀛𑁄𑀕𑀳𑁂𑀢𑁆𑀯𑀸 𑀳𑀺𑀫𑀯𑀦𑁆𑀢’𑀫𑀸𑀧

𑀥𑀫𑁆𑀫𑁂𑀲𑀓𑁄 𑀥𑀫𑁆𑀫𑀓𑀧𑀓𑀩𑁆𑀩𑀢’𑀦𑁆𑀢𑀁;

𑁭𑁩.

𑀯𑀺𑀢𑀓𑁆𑀓𑀫𑀜𑁆𑀜𑀸𑀬’𑀣 𑀤𑁂𑀯𑀭𑀜𑁆𑀜𑀸

𑀯𑁆𑀬𑀸𑀧𑀸𑀭𑀺𑀢𑁄 𑀫𑀸𑀧𑀬𑀺 𑀯𑀺𑀲𑁆𑀲𑀓𑀫𑁆𑀫𑁄,

𑀢𑀳𑀺𑀁 𑀯𑀺𑀯𑁂𑀓𑀓𑁆𑀔𑀫𑀓 𑀫𑀲𑁆𑀲𑀫𑀜𑁆𑀘

𑀫𑀦𑁄𑀭𑀫𑀁 𑀘𑀗𑁆𑀓𑀫𑀪𑀼𑀫𑀺𑀪𑀸𑀕𑀁;

𑁭𑁪. ¶

𑀢𑀫𑀲𑁆𑀲𑀫𑀁 𑀧𑀩𑁆𑀩𑀚𑀺𑀢𑁂𑀳𑀺 𑀲𑀼𑀜𑁆𑀜𑀁

𑀉𑀧𑁂𑀘𑁆𑀘 𑀲𑁄𑀜𑁆𑀘𑀸𑀭𑀫𑀯𑀸𑀧𑀼𑀭𑀺𑀢𑁆𑀯𑀸,

𑀜𑀢𑁆𑀯𑀸 𑀢𑀤𑀦𑁆𑀢𑁄𑀮𑀺𑀔𑀺𑀢’𑀓𑁆𑀔𑀭𑀸𑀦𑀺

𑀔𑀸𑀭𑀺𑀁𑀧𑀭𑀺𑀓𑁆𑀔𑀸𑀭𑀪𑀭𑀁𑀅𑀯𑁂𑀓𑁆𑀔𑀺;

𑁭𑁫.

𑀦𑀺𑀯𑀢𑁆𑀣𑀯𑀢𑁆𑀣𑀁𑀦𑀯𑀯𑀤𑁄𑀲𑀼𑀧𑁂𑀢𑀁

𑀯𑀺𑀯𑀚𑁆𑀚𑀺𑀬𑀸𑀯𑀚𑁆𑀚𑀺𑀬𑀯𑀚𑁆𑀚𑀤𑀲𑁆𑀲𑀺,

𑀥𑀸𑀭𑁂𑀲𑀺𑀢𑀁𑀩𑀸𑀭𑀲𑀥𑀸𑀦𑀺𑀲𑀁𑀲-

𑀫𑀦𑁄𑀚𑀧𑀼𑀧𑁆𑀨𑀢𑁆𑀣𑀭𑀯𑀸𑀓𑀘𑀻𑀭𑀁;

𑁭𑁬.

𑀧𑀼𑀦𑁆𑀦𑀸𑀕𑀧𑀼𑀧𑁆𑀨𑀢𑁆𑀣𑀭𑀓𑀸’𑀪𑀺𑀭𑀸𑀫𑀁

𑀅𑀁𑀲𑁂 𑀯𑀺𑀥𑀸𑀬𑀸’𑀚𑀺𑀦𑀘𑀫𑁆𑀫𑀔𑀡𑁆𑀟𑀁,

𑀓𑀢𑁆𑀯𑀸 𑀚𑀝𑀸𑀫𑀡𑁆𑀟𑀮 𑀫𑀺𑀢𑁆𑀢𑀫𑀗𑁆𑀕𑁂

𑀢𑀺𑀯𑀗𑁆𑀓 𑀫𑀸𑀤𑀸𑀬’𑀣 𑀔𑀸𑀭𑀺𑀓𑀸𑀚𑀁;

𑁭𑁭.

𑀪𑀼𑀚𑀗𑁆𑀕𑀪𑁄𑀕𑁄’𑀭𑀼𑀪𑀼𑀚𑁂𑀦 𑀥𑀻𑀭𑁄

𑀆𑀤𑀸𑀬 𑀘𑀸𑀮𑀫𑁆𑀩𑀦𑀤𑀡𑁆𑀟𑀓𑁄𑀝𑀺𑀁,

𑀲𑀫𑀕𑁆𑀕𑀳𑀻 𑀢𑀸𑀧𑀲𑀯𑁂𑀲𑀫𑁂𑀯𑀁

𑀯𑀺𑀭𑀢𑁆𑀢𑀘𑀺𑀢𑁆𑀢𑁄𑀓 𑀯𑀺𑀪𑀯𑁂𑀯 𑀪𑀯𑁂’𑀧𑀺;

𑁭𑁮. ¶

𑀲𑁄 𑀘𑀗𑁆𑀓𑀫𑀻 𑀘𑀗𑁆𑀓𑀫𑀫𑁄𑀢𑀭𑀺𑀢𑁆𑀯𑀸

𑀲𑀺𑀮𑀸𑀢𑀮𑀲𑁆𑀫𑀺𑀜𑁆𑀘 𑀤𑀺𑀯𑀸 𑀦𑀺𑀲𑀚𑁆𑀚𑀺,

𑀲𑀸𑀬𑀁 𑀧𑀯𑀺𑀝𑁆𑀞𑁄 𑀯𑀲𑀺 𑀧𑀡𑁆𑀡𑀲𑀸𑀮𑀁

𑀦𑀺𑀧𑀚𑁆𑀚𑀺 𑀓𑀝𑁆𑀞𑀢𑁆𑀣𑀭𑀲𑁂𑀲𑀫𑀜𑁆𑀘𑁂;

𑁭𑁯.

𑀧𑀘𑀘𑀽𑀲𑀓𑀸𑀮𑀫𑁆𑀳𑀺 𑀧𑀩𑀼𑀚𑁆𑀛𑀺𑀢𑁄 𑀲𑁄

𑀆𑀯𑀚𑁆𑀚𑀬𑀺𑀢𑁆𑀯𑀸’𑀕𑀫𑀦𑀧𑁆𑀧𑀯𑀢𑁆𑀢𑀺𑀁,

𑀯𑀺𑀯𑁂𑀓𑀓𑀸𑀫𑀲𑁆𑀲 𑀫𑀫𑁂’𑀢𑁆𑀣 𑀯𑀸𑀲𑁄

𑀓𑀸𑀫𑀁 𑀖𑀭𑀸𑀯𑀸𑀲𑀲𑀫𑁄 𑀲𑀺𑀬𑀸’𑀢𑀺;

𑁮𑁦.

𑀅𑀤𑀼𑀜𑁆𑀳𑀺 𑀧𑀡𑁆𑀡𑀘𑁆𑀙𑀤𑀦𑀁 𑀓𑀧𑁄𑀢-

𑀧𑀸𑀤𑀸𑀭𑀼𑀡𑀁 𑀩𑁂𑀮𑀼𑀯𑀧𑀓𑁆𑀓𑀯𑀡𑁆𑀡𑀸,

𑀪𑀽𑀫𑀻𑀧𑀺 𑀪𑀺𑀢𑁆𑀢𑀻 𑀭𑀚𑀢𑀸𑀯𑀤𑀸𑀢𑀸

𑀫𑀜𑁆𑀘𑁄’𑀧𑀺 𑀘𑀺𑀢𑁆𑀢𑀢𑁆𑀣𑀭𑀯𑀸𑀭𑀼𑀭𑀽𑀧𑁄;

𑁮𑁧. ¶

𑀲𑀼𑀪𑀸𑀓 𑀫𑀦𑀸𑀧𑀸 𑀫𑀫 𑀧𑀓𑀡𑁆𑀡𑀲𑀸𑀮𑀸

𑀲𑀸𑀤𑀻𑀦𑀯𑀸 𑀤𑀼𑀧𑁆𑀧𑀭𑀺𑀪𑀸𑀭𑀺𑀬𑀸’𑀬𑀁,

𑀧𑀡𑀻𑀢𑀪𑀺𑀓𑁆𑀔𑀸 𑀧𑀭𑀺𑀬𑁂𑀝𑁆𑀞𑀺 𑀫𑀽𑀮-

𑀤𑀼𑀓𑁆𑀔𑀲𑁆𑀲 𑀦𑀢𑁆𑀣𑀺’𑀢𑀺 𑀧𑀫𑀸𑀡 𑀫𑀦𑁆𑀢𑁄;

𑁮𑁨.

𑀅𑀕𑀸𑀭𑀲𑀜𑁆𑀜𑀸𑀬 𑀧𑀝𑀺𑀓𑁆𑀔𑀧𑀺𑀢𑁆𑀯𑀸

𑀢𑀜𑁆𑀘’𑀝𑁆𑀞𑀤𑁄𑀲𑀸 𑀓𑀼𑀮𑀧𑀡𑁆𑀡𑀲𑀸𑀮𑀁,

𑀤𑀲𑀗𑁆𑀕 𑀲𑀸𑀥𑀸𑀭𑀡 𑀭𑀼𑀓𑁆𑀔𑀫𑀽𑀮𑀁

𑀨𑀮𑀸𑀨𑀔𑀮𑀸𑀳𑀸𑀭 𑀫𑀼𑀧𑁂𑀘𑁆𑀘 𑀪𑁄𑀚𑀻;

𑁮𑁩.

𑀲𑀼𑀫𑁂𑀥𑀲𑁄 𑀲𑁄 𑀤𑀺𑀯𑀲𑀸𑀦𑀺 𑀲𑀢𑁆𑀢

𑀫𑀳𑀸𑀧𑀥𑀸𑀦𑀁 𑀧𑀤𑀳𑀁 𑀲𑀼𑀫𑁂𑀥𑁄,

𑀧𑀢𑁆𑀢𑁄 𑀅𑀪𑀺𑀜𑁆𑀜𑀸𑀲𑀼 𑀯𑀲𑀺𑀲𑀼 𑀧𑀸𑀭𑀁

𑀲𑀩𑁆𑀩𑀁𑀓 𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀅𑀯𑀺𑀦𑁆𑀤𑀺;

𑁮𑁪. ¶

𑀢𑀲𑁆𑀫𑀺𑀁𑀔𑀡𑁂 𑀓𑀸𑀦𑀦 𑀤𑁂𑀯𑀢𑀸𑀳𑀺

𑀲𑀸𑀥𑀽’𑀢𑀺 𑀦𑀺𑀕𑁆𑀖𑁄𑀲𑀺𑀢𑀧𑀻𑀢𑀺𑀖𑁄𑀲𑁄,

𑀅𑀩𑁆𑀪𑀼𑀕𑁆𑀕𑀢𑁄 𑀢𑀲𑁆𑀲 𑀬𑀲𑁂𑀦 𑀲𑀤𑁆𑀥𑀺𑀁

𑀯𑀺𑀲𑀼𑀤𑁆𑀥𑀯𑀺𑀚𑁆𑀚𑀸𑀘𑀭𑀡𑀼’𑀩𑁆𑀪𑀯𑁂𑀦;

𑁮𑁫.

𑀯𑀺𑀚𑁆𑀚𑀸𑀥𑀭𑀸 𑀢𑀕𑁆𑀕𑀼𑀡𑀤𑀻𑀧𑀓𑀸𑀦𑀺

𑀫𑀼𑀢𑀺𑀗𑁆𑀕𑀯𑀻𑀡𑀸𑀥𑀦𑀺𑀩𑀦𑁆𑀥𑀯𑀸𑀦𑀺,

𑀕𑀸𑀬𑀺𑀁𑀲𑀼 𑀕𑀻𑀢𑀸𑀦𑀺’𑀯 𑀦𑀘𑁆𑀘𑀫𑀸𑀦𑁄

𑀳𑀺𑀫𑀸𑀘𑀮𑁄 𑀲𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀺;

𑁮𑁬.

𑀫𑀼𑀤𑁆𑀥𑀗𑁆𑀓𑀼𑀭𑀁 𑀪𑀼𑀥𑀭𑀓𑀼𑀝𑀩𑀸𑀳𑀼-

𑀲𑀢𑁂𑀳𑀺 𑀢𑀦𑁆𑀦𑀺𑀚𑁆𑀛𑀭 𑀘𑀸𑀫𑀭𑁂𑀳𑀺,

𑀯𑀺𑀥𑀽𑀬𑀫𑀸𑀦𑁂𑀳𑀺 𑀯𑀺𑀥𑀽𑀢𑀧𑀸𑀧𑀁

𑀓𑀢𑁄𑀧𑀳𑀸𑀭𑁂𑀯 𑀫𑀳𑀸𑀲𑀭𑀸’𑀧𑀻;

𑁮𑁭. ¶

𑀅𑀓𑀸𑀮𑀫𑁂𑀖𑀤𑁆𑀥𑀦𑀺 𑀪𑁂𑀭𑀺𑀭𑀸𑀯-

𑀯𑁆𑀬𑀸𑀧𑀸𑀭𑀺𑀢𑀸 𑀫𑀢𑁆𑀢𑀲𑀺𑀔𑀡𑁆𑀟𑀺𑀲𑀡𑁆𑀟𑀸;

𑀅𑀚𑁆𑀛𑀸𑀯𑀲𑀦𑁆𑀢𑀁 𑀯𑀦𑀲𑀡𑁆𑀟𑀫𑀚𑁆𑀛𑀁

𑀫𑀳𑀺𑀁𑀲𑀼𑀘𑀸’𑀔𑀡𑁆𑀟𑀦𑀢𑀡𑁆𑀟𑀯𑁂𑀦;

𑁮𑁮.

𑀫𑀦𑁆𑀤𑀸’𑀦𑀺𑀮𑀸’𑀫𑀦𑁆𑀤𑀪𑀼𑀚𑀸’𑀯𑀮𑀫𑁆𑀩-

𑀲𑀼𑀦𑀻𑀮𑀲𑀸𑀔𑀸𑀫𑀡𑀺𑀯𑀺𑀚𑀦𑀻𑀳𑀺,

𑀮𑀢𑀗𑁆𑀕𑀦𑀸’𑀮𑀺𑀗𑁆𑀕𑀺𑀢𑀲𑀸𑀮𑀲𑀸𑀫𑀻

𑀲𑀁𑀯𑀺𑀚𑀬𑀼𑀁 𑀯𑀺𑀢𑀤𑀭𑀫𑁆𑀧𑀺 𑀥𑀻𑀭𑀁;

𑁯𑁦. ¶

𑀓𑀧𑀻𑀢𑀦𑀸’𑀲𑁄𑀓 𑀢𑀫𑀸𑀮 𑀦𑀻𑀧𑀸

𑀓𑀧𑀻𑀢𑀦𑀸’𑀲𑁄𑀓 𑀢𑀫𑀸𑀮 𑀦𑀻𑀧𑀸, (𑀲𑀫𑀢𑁆𑀢𑀧𑀸𑀤𑀪𑁆𑀬𑀸𑀲 𑀫𑀳𑀸 𑀬𑀫𑀓𑀁)

𑀓𑀧𑀻𑀢𑀦𑀸’𑀲𑁄𑀓 𑀢𑀫𑀸𑀮 𑀦𑀻𑀧𑀸

𑀓𑀧𑀻𑀢𑀦𑀸’𑀲𑁄𑀓 𑀢𑀫𑀸𑀮 𑀦𑀻𑀧𑀸;

𑁯𑁧.

𑀦 𑀯𑁂𑀮𑀮𑀺𑀢𑀸 𑀓𑀺𑀁 𑀧𑀲𑀯𑀓𑀸’𑀯𑀢𑀁𑀲𑀸

𑀮𑀢𑀸𑀯𑀺𑀢𑀸𑀦𑀸 𑀫𑀥𑀼𑀧𑀸𑀮𑀺𑀲𑀸𑀮𑀻,

𑀮𑀢𑀸𑀯𑀺𑀢𑀸𑀦𑀸 𑀫𑀥𑀼𑀧𑀸’𑀮𑀺𑀲𑀸𑀮𑀻

𑀦 𑀯𑁂𑀮𑁆𑀮𑀺𑀢𑀸 𑀓𑀺𑀁 𑀧𑀓𑀲𑀯𑀸’𑀯𑀢𑀁𑀲𑀸;(𑀲𑀫𑀼𑀕𑁆𑀕𑀪𑁂𑀤 𑀬𑀫𑀓𑀁)

𑁯𑁨. ¶

𑀧𑀼𑀧𑁆𑀨𑀸𑀯𑀮𑀻 𑀓𑀦𑁆𑀤𑀮 𑀧𑀸𑀝𑀮𑀕𑁆𑀕𑀸

𑀓𑀮𑀸𑀧𑀺𑀦𑀻 𑀲𑀸 𑀯𑀦𑀭𑀸𑀚𑀺𑀦𑀻𑀮𑀸,

𑀧𑀼𑀧𑁆𑀨𑀸𑀓𑀼𑀮𑀻 𑀓𑀦𑁆𑀤𑀦 𑀧𑀸𑀝𑀮𑀓𑁆𑀔𑀻

𑀓𑀮𑀸𑀧𑀦𑀻𑀮𑀸 𑀯𑀭 𑀭𑀸𑀚𑀺𑀦𑀻𑀯; (𑀅𑀤𑁆𑀥𑀕𑁄𑀫𑀼𑀢𑁆𑀢𑀺𑀓𑀸 𑀩𑀦𑁆𑀥𑀦𑀁)

𑁯𑁩. ¶

𑀦𑀢𑀸𑀲𑀺𑀭𑁄 𑀫𑀜𑁆𑀚𑀭𑀺𑀓𑀸𑀲𑀼𑀭𑀫𑁆𑀳𑀸

𑀦𑀢𑀸𑀲𑀺𑀭𑁄 𑀧𑀜𑁆𑀚𑀮𑀺𑀓𑀸𑀯 𑀭𑀫𑁆𑀫𑁂,

𑀯𑀦𑁂 𑀦𑀺𑀩𑀤𑁆𑀥𑀁 𑀭𑀫𑀺𑀢𑁄 𑀯𑀺𑀪𑀸𑀲𑀺

𑀯𑀺𑀦𑁂𑀬𑁆𑀬 𑀩𑀦𑁆𑀥𑀽𑀭𑀘𑀻𑀢𑁄 𑀧𑀳𑀸𑀭𑁄; (𑀧𑀸𑀤𑀕𑁄𑀫𑀼𑀢𑁆𑀢𑀺𑀓𑀸 𑀩𑀦𑁆𑀥𑀦𑀁)

𑁯𑁪.

𑀭𑀚𑁄𑀓𑀺𑀭𑀦𑁆𑀢𑀸’𑀯𑀦𑀢𑀸 𑀮𑀢𑀸𑀲𑀼𑀁

𑀮𑀸𑀚𑁄𑀓𑀺𑀭𑀦𑁆𑀢𑀸 𑀯𑀦𑀺𑀢𑀸 𑀦𑀢𑀸𑀯,

𑀤𑁆𑀯𑀺𑀚𑁄𑀅𑀭𑀜𑁆𑀜𑀁 𑀯𑀲𑀺𑀢𑀸 𑀧𑀺𑀢𑀸𑀖𑁄

𑀕𑀚𑁄𑀢𑀭𑀦𑁆𑀢𑁄𑀯 𑀮𑀢𑀸 𑀯𑀺𑀢𑀸𑀦𑀁; (𑀲𑀺𑀮𑁄𑀓𑀕𑁄𑀫𑀼𑀢𑁆𑀢𑀺𑀓𑀸 𑀩𑀦𑁆𑀥𑀦𑀁 𑀆𑀓𑀼𑀮𑀚𑀸𑀮𑀫𑀺𑀢𑀺𑀧𑀺)

𑁯𑁫. ¶

𑀫𑀢𑀗𑁆𑀕𑀚𑀺𑀦𑁆𑀤𑀸 𑀦 𑀫𑀲𑀓𑁆𑀓𑀭𑀺𑀁𑀲𑀼

𑀧𑀸𑀤𑀸𑀦𑀺 𑀦𑀢𑁆𑀯𑀸𑀦 𑀧𑀤𑀺𑀧𑀥𑀸𑀫𑀁,

𑀧𑀜𑁆𑀜𑀸𑀥𑀯𑀁 𑀧𑀻𑀦 𑀢𑀧𑀁 𑀨𑀮𑁂𑀳𑀺

𑀳𑀺𑀫𑀤𑁆𑀤𑀺𑀧𑀸𑀤𑁂 𑀧𑀭𑀺𑀲𑀼𑀢𑁆𑀢𑀫𑀜𑁆𑀳𑀺; (𑀓𑀩𑁆𑀩𑀦𑀸𑀫 𑀕𑀩𑁆𑀪 𑀘𑀓𑁆𑀓𑀁)

𑁯𑁬. ¶

𑀫𑁂𑀢𑁆𑀢𑀸𑀬 𑀙𑀢𑁆𑀢𑀁’𑀯 𑀨𑀡𑀁 𑀨𑀡𑀺𑀦𑁆𑀤𑁄

𑀥𑀸𑀭𑁂𑀲𑀺 𑀲𑀻𑀲𑁂 𑀯𑀲𑀺𑀦𑁄 𑀘𑀘𑀸𑀭,

𑀦𑀣𑀸𑀫𑀯𑀸’𑀓𑀸𑀯’𑀩𑀮𑁂𑀲𑀼 𑀓𑀺𑀜𑁆𑀘𑀺

𑀫𑁂𑀥𑀸𑀬 𑀦𑀦𑁆𑀤𑁄 𑀣𑀺𑀭𑀯𑀸𑀘𑀺 𑀔𑁂𑀫𑁂; (𑀓𑀯𑀺𑀦𑀸𑀫 𑀕𑀩𑁆𑀪 𑀘𑀓𑁆𑀓𑀁)

𑁯𑁭. ¶

𑀦𑁄’𑀲𑀺𑀢𑁂𑀳𑀺’𑀲𑁆𑀲 𑀲𑀦𑁆𑀢𑀸𑀲’𑀦𑀽’𑀦 𑀢𑁄𑀲 𑀯𑀢𑁄 𑀤𑁄,

𑀤𑀸𑀬𑀢𑁄 𑀯𑀲𑀢𑁄 𑀦’𑀦𑀼𑀲𑀦𑁆𑀢𑀸𑀲𑀲𑁆𑀲 𑀳𑀺𑀢𑁂𑀲𑀺𑀦𑁄; (𑀕𑀸𑀣𑀤𑁆𑀥𑀯𑀺𑀲𑀬 𑀧𑀝𑀺𑀮𑁄𑀫 𑀬𑀫𑀓𑀁)

𑁯𑁮.

𑀬𑁄𑀓𑀸’𑀲𑀸’𑀯𑀸𑀲 𑀓𑀸𑀬𑁄 𑀓𑀸𑀫’𑀓𑀸𑀫’𑀫𑀓𑀸𑀫’𑀓𑀸,

𑀲𑀓𑀸𑀬𑀦𑀸’𑀦𑀸𑀬’𑀓𑀸𑀲 𑀯𑀸𑀫 𑀦𑀸 𑀕 𑀕𑀦𑀸’𑀫𑀯𑀸; (𑀲𑀩𑁆𑀩𑀢𑁄 𑀪𑀤𑁆𑀤 𑀩𑀦𑁆𑀥𑀦𑀁)

𑁯𑁯. ¶

𑀤𑀬𑀸𑀬 𑀯𑀲𑀺𑀢𑁄 𑀤𑀸𑀬𑁂 𑀬𑀸𑀧𑀚𑀸𑀲𑀺𑀯 𑀫𑀸𑀲𑀤𑀸,

𑀬𑀚𑀸𑀭𑀳𑀁 𑀭𑀜𑁆𑀚𑀫𑀸𑀦𑁄 𑀯𑀲𑀺𑀳𑀁𑀲𑁄 𑀘𑀺𑀭𑀁𑀯𑀲𑀺; (𑀅𑀤𑁆𑀥𑀩𑁆𑀪𑀫 𑀩𑀦𑁆𑀥𑀦𑀁)

𑁧𑁦𑁦.

𑀫𑀥𑀼𑀫𑀤 𑀫𑀥𑀼𑀓𑀭 𑀯𑀺𑀭𑀼𑀢𑁂 𑀯𑀺𑀭𑀼𑀢𑁂

𑀫𑀮𑀬𑀚 𑀲𑀼𑀭𑀳𑀻𑀢 𑀧𑀯𑀦𑁂 𑀧𑀯𑀦𑁂

𑀳𑀺𑀫𑀯𑀢𑀺 𑀯𑀺𑀓𑀲𑀺𑀢 𑀧𑀤𑀼𑀫𑁂 𑀧𑀤𑀼𑀫𑁂

𑀅𑀥𑀺𑀲𑀼𑀔 𑀫𑀦𑀼𑀪𑀯𑀺 𑀲𑀯𑀲𑀺 𑀲𑀯𑀓𑀲𑀺; (𑀧𑀸𑀤𑀦𑁆𑀢 𑀬𑀫𑀓𑀁)

𑀇𑀢𑀺 𑀫𑁂𑀥𑀸𑀦𑀦𑁆𑀤𑀸𑀪𑀺𑀥𑀸𑀦𑁂𑀦 𑀬𑀢𑀺𑀦𑀸 𑀯𑀺𑀭𑀘𑀺𑀢𑁂 𑀲𑀓𑀮𑀓𑀯𑀺𑀚𑀦 𑀳𑀤𑀬𑀸𑀦𑀦𑁆𑀤𑀤𑀸𑀦𑀦𑀺𑀤𑀸𑀦𑁂 𑀚𑀺𑀦𑀯𑀁𑀲𑀤𑀻𑀧𑁂 𑀤𑀽𑀭𑁂𑀦𑀺𑀤𑀸𑀦𑁂 𑀲𑀼𑀫𑁂𑀥𑀩𑁆𑀭𑀸𑀳𑁆𑀫𑀡𑀸𑀧𑀤𑀸𑀦𑀧𑀭𑀺𑀤𑀻𑀧𑁄.

𑀧𑀞𑀫𑁄 𑀲𑀕𑁆𑀕𑁄.

𑁧. ¶

(𑀫𑀦𑁆𑀤𑀸’𑀓𑁆𑀓𑀦𑁆𑀢𑀸) 𑀫𑀭𑀧𑀼𑀭𑀲𑀺𑀭𑀺𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀸𑀭𑀁

𑀚𑀫𑁆𑀩𑀼𑀤𑁆𑀤𑀻𑀧𑀸’𑀲𑀫 𑀲𑀭𑀲𑀺𑀚𑁂 𑀓𑀡𑁆𑀡𑀺𑀓𑀸 𑀲𑀦𑁆𑀦𑀺𑀓𑀸𑀲𑀁,

𑀭𑀫𑁆𑀫𑀁 𑀭𑀫𑁆𑀫𑀯𑁆𑀳𑀬 𑀧𑀼𑀭𑀯𑀭𑀁 𑀧𑀸𑀭𑀫𑀻𑀧𑀸𑀭𑀤𑀲𑁆𑀲𑀻

𑀩𑀼𑀤𑁆𑀥𑁄 𑀤𑀻𑀧𑀗𑁆𑀓𑀭 𑀤𑀲𑀩𑀮𑁄 𑀲𑀩𑁆𑀩𑀮𑁄𑀓𑁂𑀓𑀤𑀻; ()

𑀢𑀲𑁆𑀫𑀺𑀁 𑀓𑀸𑀮𑁂 𑀯𑀺𑀧𑀼𑀮𑀓𑀭𑀼𑀡𑀸 𑀦𑀸𑀭𑀺𑀲𑀜𑁆𑀘𑁄𑀤𑀺𑀢’𑀢𑁆𑀢𑁄

𑀦𑀸𑀦𑀸 𑀔𑀻𑀡𑀸𑀲𑀯 𑀧𑀭𑀺𑀯𑀼𑀢𑁄 𑀘𑀸𑀭𑀺𑀓𑀁 𑀲𑀜𑁆𑀘𑀭𑀦𑁆𑀢𑁄,

𑀲𑀁𑀯𑀢𑁆𑀢𑁂𑀦𑁆𑀢𑁄 𑀲𑀼𑀦𑀺𑀧𑀼𑀡𑀢𑀬𑀁 𑀥𑀫𑁆𑀫𑀘𑀓𑁆𑀓𑀁 𑀓𑀫𑁂𑀦

𑀧𑀢𑁆𑀯𑀸 𑀢𑀲𑁆𑀫𑀺𑀁 𑀧𑀝𑀺𑀯𑀲𑀢𑀺 𑀲𑁄𑀤𑀲𑁆𑀲𑀦𑀯𑁆𑀳𑁂 𑀯𑀺𑀳𑀸𑀭𑁂; ()

𑁩. ¶

𑀲𑀼𑀢𑁆𑀯𑀸 𑀤𑀺𑀧𑀗𑁆𑀓𑀭 𑀪𑀕𑀯𑀢𑁄 𑀦𑀸𑀕𑀭𑀸 𑀓𑀺𑀢𑁆𑀢𑀺𑀲𑀤𑁆𑀤𑀁

𑀲𑀫𑁆𑀩𑀼𑀤𑁆𑀥𑁄 𑀲𑁄 𑀇𑀢𑀺𑀧𑀺 𑀅𑀭𑀳𑀁 𑀢𑁆𑀬𑀸𑀤𑀺𑀦𑀸’𑀩𑁆𑀪𑀼𑀕𑁆𑀕𑀢𑀁 𑀢𑀁,

𑀕𑀸𑀳𑀸𑀧𑁂𑀢𑁆𑀯𑀸 𑀢𑀼𑀯𑀝𑀢𑀼𑀯𑀝𑀁 𑀯𑀢𑁆𑀣𑀪𑁂𑀲𑀚𑁆𑀚 𑀧𑀸𑀦𑀁

𑀢𑀦𑁆𑀦𑀺𑀢𑁆𑀢𑀸’𑀲𑀼𑀁 𑀧𑀫𑀼𑀤𑀺𑀢𑀫𑀢𑀸 𑀕𑀦𑁆𑀥𑀫𑀓𑀸𑀮𑀸𑀤𑀺𑀳𑀢𑁆𑀣𑀸; ()

𑁪.

𑀧𑀢𑁆𑀯𑀸 𑀤𑀻𑀧𑀗𑁆𑀓𑀭𑀢𑀭𑀺𑀳𑀭𑀺𑀁 𑀕𑀦𑁆𑀥𑀫𑀸𑀮𑀸𑀤𑀺𑀓𑁂𑀳𑀺

𑀧𑀽𑀚𑁂𑀢𑁆𑀯𑀸𑀢’𑀜𑀚𑀮𑀺𑀫𑀼𑀓𑀼𑀮𑀺𑀓𑀸 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸,

𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀯𑀡𑀲𑀼𑀪𑀕𑀁 𑀩𑀼𑀤𑁆𑀥𑀧𑀸𑀫𑁄𑀓𑁆𑀔𑀲𑀗𑁆𑀖𑀁

𑀲𑀁𑀬𑀸𑀘𑀺𑀢𑁆𑀯𑀸 𑀫𑀼𑀤𑀺𑀢𑀳𑀤𑀬𑀸 𑀲𑁆𑀯𑀸𑀢𑁆𑀢𑀬𑀸’𑀧𑀕𑀜𑁆𑀚𑀼𑀁; ()

𑁫. ¶

𑀲𑀚𑁆𑀚𑁂𑀢𑁆𑀯𑀸 𑀢𑁂 𑀤𑀼𑀢𑀺𑀬𑀤𑀺𑀯𑀲𑁂 𑀲𑀚𑁆𑀚𑀦𑀸 𑀤𑀸𑀦𑀲𑀸𑀮𑀁

𑀉𑀲𑁆𑀲𑀸𑀧𑀢𑁆𑀢𑀸 𑀥𑀚𑀓𑀤𑀮𑀺𑀬𑁄 𑀧𑀼𑀡𑁆𑀡𑀓𑀼𑀫𑁆𑀪𑁂 𑀞𑀧𑁂𑀦𑁆𑀦𑀸,

𑀓𑀼𑀩𑁆𑀩𑀦𑁆𑀢𑀸’𑀧𑀺 𑀥𑀯𑀮𑀲𑀼𑀴𑀺𑀦𑀼’𑀓𑁆𑀔𑁂𑀧 𑀮𑀸𑀚𑁄𑀧𑀳𑀸𑀭𑀁

𑀏𑀯𑀁 𑀢𑀲𑁆𑀲𑀸’𑀕𑀫𑀦 𑀫𑀬𑀦𑀁 𑀮𑀗𑁆𑀓𑀭𑁄𑀦𑁆𑀢𑀸 𑀯𑀺𑀳𑀸𑀲𑀼𑀁; ()

𑁬.

𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀅𑀣 𑀳𑀺𑀫𑀯𑀢𑀸 𑀲𑁄 𑀲𑀼𑀫𑁂𑀥𑁄 𑀢𑀧𑀲𑁆𑀲𑀺

𑀕𑀘𑁆𑀙𑀁 𑀢𑁂𑀲𑀁 𑀉𑀧𑀭𑀺 𑀦𑀪𑀲𑀸 𑀯𑀸𑀓𑀘𑀻𑀭𑀁 𑀥𑀼𑀦𑀦𑁆𑀦𑁄,

𑀤𑀺𑀲𑁆𑀯𑀸 𑀧𑀻𑀢𑀺𑀧𑁆𑀧𑀫𑀼𑀤𑀺𑀢𑀚𑀢𑁂 𑀅𑀜𑁆𑀚𑀲𑀁 𑀲𑁄𑀥𑀬𑀦𑁆𑀢𑁂

𑀲𑀜𑁆𑀛𑀸𑀫𑁂𑀖𑁄 𑀭𑀺𑀯 𑀧𑀭𑀺𑀮𑀲𑀁 𑀥𑀢𑀭𑀺𑀢𑁆𑀣𑁂’𑀓𑀫𑀦𑁆𑀢𑀁; ()

𑁭.

𑀲𑀁𑀲𑁄𑀥𑁂𑀦𑁆𑀢𑀸 𑀓𑀮𑀮𑀯𑀺𑀲𑀫𑀝𑁆𑀞𑀸𑀦 𑀲𑀗𑁆𑀓𑀸𑀭𑀥𑀸𑀦𑀁

𑀓𑀲𑁆𑀫𑀸 𑀢𑀼𑀫𑁆𑀳𑁂 𑀧𑀝𑀺𑀧𑀣𑀫𑀺𑀫𑀁’𑀮𑀗𑁆𑀓𑀭𑁄𑀣𑀸’𑀢𑀺 𑀧𑀼𑀘𑁆𑀙𑀺,

𑀪𑀦𑁆𑀢𑁂 𑀤𑀻𑀧𑀗𑁆𑀓𑀭𑀢𑀭𑀳𑀭𑀺’𑀤𑀸𑀦𑀺 𑀦𑀺𑀲𑁆𑀲𑀸𑀬 𑀭𑀫𑁆𑀫𑀁

𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀯𑀺𑀳𑀭𑀢𑀺 𑀫𑀳𑀸𑀥𑀫𑁆𑀫𑀲𑀗𑁆𑀔𑀁 𑀥𑀫𑀦𑁆𑀢𑁄; ()

𑁮. ¶

𑀲𑁄 𑀲𑀫𑁆𑀩𑀼𑀤𑁆𑀥𑁄 𑀧𑀭𑀺𑀯𑀼𑀢𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁄 𑀬𑀢𑁄 𑀦𑁄

𑀕𑀸𑀫𑀓𑁆𑀔𑁂𑀢𑁆𑀢𑀁 𑀧𑀯𑀺𑀲𑀢𑀺 𑀢𑀢𑁄’𑀮𑀗𑁆𑀓𑀭𑁄𑀫𑀸’𑀩𑁆𑀭𑀼𑀯𑀺𑀁𑀲𑀼,

𑀩𑀼𑀤𑁆𑀥𑀽𑀧𑁆𑀧𑀸𑀤𑁄 𑀓𑀺𑀫𑀼𑀢 𑀲𑀼𑀢𑀭𑀁 𑀤𑀼𑀮𑁆𑀮𑀪𑁄 𑀩𑀼𑀤𑁆𑀥𑀲𑀤𑁆𑀤𑁄

𑀇𑀘𑁆𑀘𑁂𑀯𑀁𑀲𑁄 𑀲𑀼𑀫𑀭𑀺𑀬 𑀅𑀮𑀗𑁆𑀓𑀢𑁆𑀢𑀼𑀓𑀸𑀫𑁄’𑀲𑀺 𑀫𑀕𑁆𑀕𑀁; ()

𑁯.

𑀛𑀸𑀦𑀸’𑀪𑀺𑀜𑁆𑀜𑀸 𑀭𑀢𑀢𑀓𑀯𑀘𑀼’𑀚𑁆𑀚𑁄𑀢𑀫𑀸𑀦’𑀢𑁆𑀢𑀪𑀸𑀯𑁄

𑀲𑀤𑁆𑀥𑀸𑀬𑁂’𑀲𑁄 𑀅𑀘𑀮𑀲𑀤𑀺𑀲𑁄 𑀇𑀤𑁆𑀥𑀺𑀫𑀸 𑀢𑀸𑀧𑀲𑁄’𑀢𑀺,

𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀓𑀮𑀮𑀯𑀺𑀲𑀫𑀁 𑀤𑀼𑀕𑁆𑀕𑀫𑀕𑁆𑀕𑀧𑁆𑀧𑀤𑁂𑀲𑀁

𑀲𑀚𑁆𑀚𑁂𑀢𑀼𑀁 𑀢𑁂 𑀲𑀧𑀤𑀺 𑀫𑀼𑀤𑀺𑀢𑀸 𑀲𑀸𑀥𑀯𑁄 𑀢𑀲𑁆𑀲’𑀤𑀁𑀲𑀼; ()

𑁧𑁦. ¶

𑀦𑀸𑀦𑀸𑀧𑀼𑀧𑁆𑀨𑀁 𑀚𑀮𑀚𑀣𑀮𑀚𑀁 𑀑𑀘𑀺𑀦𑀺𑀢𑁆𑀯𑀸 𑀯𑀦𑀫𑁆𑀳𑀸

𑀢𑁂𑀢𑁆𑀯𑀸 𑀤𑁂𑀯𑀸𑀲𑀼𑀭𑀪𑀯𑀦𑀢𑁄 𑀓𑁄𑀯𑀺𑀴𑀸𑀭𑀸𑀤𑀺𑀧𑀼𑀧𑁆𑀨𑁂,

𑀆𑀦𑁂𑀢𑁆𑀯𑀸’𑀳𑀁 𑀪𑀼𑀚𑀕𑀪𑀯𑀢𑀸 𑀨𑀼𑀮𑁆𑀮𑀓𑀡𑁆𑀟𑀼𑀧𑁆𑀧𑀮𑀸𑀦𑀺

𑀙𑁂𑀓𑁄𑀲𑁆𑀫𑀻’𑀢𑀺 𑀯𑀺𑀣𑀭𑀺𑀬 𑀧𑀣𑀁 𑀇𑀤𑁆𑀥𑀺𑀬𑀸 𑀲𑀁𑀯𑀺𑀥𑀸𑀢𑀼𑀁; ()

𑁧𑁧.

𑀓𑀢𑁆𑀯𑁂’𑀯𑀁 𑀫𑁂 𑀳𑀤𑀬𑀫𑀓𑀼𑀴𑀁 𑀢𑁄𑀯𑀺𑀓𑀸𑀲𑁂𑀬𑁆𑀬 𑀢𑀲𑁆𑀫𑀸

𑀯𑁂𑀬𑁆𑀬𑀸𑀯𑀘𑁆𑀘𑀁 𑀯𑀺𑀲𑀤𑀫𑀢𑀺𑀦𑁄 𑀓𑀸𑀬𑀺𑀓𑀁 𑀲𑀁𑀯𑀺𑀥𑀸𑀬,

𑀅𑀚𑁆𑀚𑁂𑀯𑀸’𑀳𑀁 𑀯𑀺𑀧𑀼𑀮𑀓𑀼𑀲𑀮𑀁 𑀲𑀜𑁆𑀘𑀺𑀦𑀺𑀲𑁆𑀲’𑀦𑁆𑀢𑀻 𑀥𑀻𑀭𑁄

𑀲𑀁𑀲𑁄𑀥𑁂𑀢𑀼𑀁 𑀓𑀮𑀮𑀓𑀮𑀼𑀲𑀁 𑀅𑀜𑁆𑀚𑀲𑀁 𑀆𑀭𑀪𑀺𑀢𑁆𑀣; ()

𑁧𑁨.

𑀧𑀲𑁆𑀲𑀦𑁆𑀢𑀸𑀦𑀁 𑀯𑀺𑀫𑀮𑀦𑀬𑀦𑁄’𑀪𑀸𑀲 𑀚𑀺𑀫𑀽𑀢𑀕𑀩𑁆𑀪𑁂

𑀩𑀼𑀤𑁆𑀥𑁄𑀩𑀼𑀤𑁆𑀥𑁄’𑀢𑁆𑀬’𑀪𑀺𑀳𑀺𑀢𑀯𑀘𑁄 𑀯𑀺𑀚𑁆𑀚𑀼𑀭𑀸𑀚𑀻𑀯 𑀘𑀸𑀭𑀻,

𑀢𑀲𑁆𑀫𑀺𑀁 𑀧𑀗𑁆𑀓𑁂 𑀦𑀺𑀚𑀓𑀭𑀢𑀮’𑀫𑁂𑀪𑀸𑀚𑀧𑀘𑁆𑀙𑀺𑀳𑀺 𑀥𑀻𑀫𑀸

𑀧𑀁𑀲𑀼𑀁 𑀤𑀢𑁆𑀯𑀸 𑀭𑀚𑀢𑀥𑀯𑀮𑀁 𑀯𑀸𑀮𑀼𑀓𑀁 𑀯𑁄𑀓𑀺𑀭𑀦𑁆𑀢𑁄; ()

𑁧𑁩. ¶

𑀢𑀲𑁆𑀫𑀺 𑀞𑀸𑀦𑁂 𑀓𑀮𑁆𑀮𑀮𑀼𑀮𑀺𑀢𑁂 𑀲𑀼𑀝𑁆𑀞𑀼 𑀦𑀸’𑀮𑀗𑁆𑀓𑀢𑁂𑀯

𑀲𑀤𑁆𑀥𑀺𑀁 𑀤𑀻𑀧𑀗𑁆𑀓𑀭’𑀦𑀥𑀺𑀯𑀭𑁄’𑀦𑁂𑀓𑀔𑀻𑀡𑀸𑀲𑀯𑁂𑀳𑀺,

𑀧𑀢𑁆𑀢𑁄 𑀩𑁆𑀭𑀳𑁆𑀫𑀸’𑀫𑀭𑀦𑀭𑀨𑀡𑀺𑀲𑀺𑀤𑁆𑀥𑀯𑀺𑀚𑁆𑀚𑀸𑀥𑀭𑀸𑀦𑀁

𑀲𑀁𑀯𑀢𑁆𑀢𑀦𑁆𑀢𑁂 𑀲𑀼𑀯𑀺𑀧𑀼𑀮𑀫𑀳𑁂 𑀧𑀸𑀝𑀺𑀳𑀻𑀭𑁂 𑀉𑀴𑀸𑀭𑁂; ()

𑁧𑁪.

𑀳𑁂𑀫’𑀫𑁆𑀪𑁄𑀚𑁄’𑀧𑀫𑀲𑀼𑀯𑀤𑀦𑀁 𑀫𑀡𑁆𑀟𑀺𑀢𑀁 𑀮𑀓𑁆𑀔𑀡𑁆𑀳𑁄-

𑀲𑀻𑀢𑁆𑀬𑀸’𑀦𑀼𑀩𑁆𑀬𑀜𑁆𑀚𑀦𑀯𑀺𑀮𑀲𑀺𑀢𑀁 𑀓𑁂𑀢𑀼𑀫𑀸𑀮𑀸𑀯𑀺𑀮𑀸𑀲𑀁,

𑀲𑀢𑁆𑀣𑀸𑀭𑀁 𑀢𑀁 𑀤𑀺𑀲𑀺𑀤𑀺𑀲𑀺 𑀧𑀪𑀸𑀦𑀺𑀘𑁆𑀙𑀭𑀦𑁆𑀢’𑀜𑁆𑀚𑀲𑀫𑁆𑀪𑀺

𑀆𑀕𑀘𑁆𑀙𑀦𑁆𑀢𑀁 𑀯𑀺𑀬 𑀫𑀡𑀺𑀢𑀮𑁂 𑀫𑀢𑁆𑀢𑀫𑀸𑀢𑀗𑁆𑀕𑀭𑀸𑀚𑀸; ()

𑁧𑁫. ¶

𑀑𑀮𑁄𑀓𑁂𑀢𑁆𑀯𑀸 𑀯𑀺𑀫𑀮𑀦𑀬𑀦𑀜𑁆𑀘𑀦𑁆𑀤𑀦𑀺𑀮𑀼𑀧𑁆𑀧𑀮𑀸𑀦𑀺

𑀉𑀫𑁆𑀫𑀺𑀮𑁂𑀢𑁆𑀯𑀸 𑀭𑀢𑀦𑀨𑀮𑀓𑀁 𑀅𑀓𑁆𑀓𑀫𑀦𑁆𑀢𑁄𑀯 𑀧𑀺𑀝𑁆𑀞𑀺𑀁,

𑀦𑀸𑀦𑀸𑀔𑀻𑀡𑀸𑀲𑀯𑀧𑀭𑀺𑀘𑀼𑀢𑁄 𑀓𑀤𑁆𑀤𑀫𑀁 𑀦𑀸’𑀓𑁆𑀓𑀫𑀺𑀢𑁆𑀯𑀸

𑀲𑀫𑁆𑀩𑀼𑀤𑁆𑀥𑁄𑀬𑀁 𑀯𑀚𑀢𑀼 𑀇𑀢𑀺 𑀫𑁂 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬; ()

𑁧𑁬.

𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀔𑀭’𑀚𑀺𑀦𑀚𑀝𑀸𑀯𑀸𑀓𑀘𑀻𑀭𑀸𑀦𑀺 𑀓𑁂𑀲𑁂

𑀑𑀫𑀼𑀜𑁆𑀘𑀺𑀢𑁆𑀯𑀸 𑀯𑀺𑀲𑀫𑀓𑀮𑀮𑁂 𑀧𑀢𑁆𑀣𑀭𑀺𑀢𑁆𑀯𑀸’𑀢𑁆𑀢𑀪𑀸𑀯𑀁,

𑀲𑁂𑀢𑀼𑀁 𑀓𑀢𑁆𑀯𑀸 𑀧𑀭𑀫𑀧𑀡𑀺𑀥𑀻 𑀓𑁄𑀫𑀺𑀦𑀻 𑀘𑁄𑀤𑀺𑀢’𑀢𑁆𑀢𑁄

𑀧𑀜𑁆𑀘𑀸’𑀪𑀺𑀜𑁆𑀜𑀸𑀭𑀢𑀦𑀫𑀡𑀺𑀫𑀸 𑀲𑁆𑀯𑀸’𑀘𑀓𑀼𑀚𑁆𑀚𑁄 𑀦𑀺𑀧𑀚𑁆𑀚𑀺; ()

𑁧𑁭.

𑀲𑀼𑀢𑁆𑀯𑀸 𑀕𑀸𑀣𑀸𑀧𑀤𑀫𑁆𑀧𑀺 𑀦 𑀫𑁂 𑀪𑀸𑀭𑀺𑀬𑀁 𑀲𑀁𑀓𑀺𑀮𑁂𑀲𑁂

𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀯𑀭𑀲𑀺𑀯𑀼𑀭𑀁 𑀧𑀢𑁆𑀢𑀼𑀫𑀺𑀘𑁆𑀙𑁂 𑀲𑀘𑀸’𑀳𑀁,

𑀲𑀁𑀯𑀺𑀚𑁆𑀚𑀦𑁆𑀢𑁂 𑀢𑀺𑀪𑀯𑀪𑀯𑀦𑁂 𑀤𑀼𑀓𑁆𑀔𑀺𑀢𑀸’𑀦𑀦𑁆𑀢𑀲𑀢𑁆𑀢𑁂

𑀲𑁄’𑀪𑀁 𑀏𑀓𑁄 𑀓𑀣𑀫𑀥𑀺𑀕𑀫𑁂 𑀥𑀫𑁆𑀫 𑀫𑀜𑁆𑀜𑀸𑀢𑀯𑁂𑀲𑁄;()

𑁧𑁮. ¶

𑀬𑀦𑁆𑀦𑀽𑀦𑀸’𑀳𑀁 𑀧𑀭𑀳𑀺𑀢𑀭𑀢𑁄 𑀲𑀫𑁆𑀫𑀤𑀜𑁆𑀜𑀸𑀬 𑀩𑁄𑀥𑀺𑀁

𑀆𑀭𑁄𑀧𑁂𑀢𑁆𑀯𑀸 𑀦𑀺𑀔𑀺𑀮𑀚𑀦𑀢𑀁’𑀦𑀼𑀢𑁆𑀢𑀭𑀁 𑀥𑀫𑁆𑀫𑀦𑀸𑀯𑀁,

𑀉𑀢𑁆𑀢𑀸𑀭𑁂𑀢𑁆𑀯𑀸 𑀯𑀭𑀲𑀺𑀯𑀧𑀼𑀭𑀁 𑀯𑀝𑁆𑀝𑀤𑀼𑀓𑁆𑀔𑁄𑀤𑀥𑀺𑀫𑁆𑀳𑀸

𑀧𑀘𑁆𑀙𑀸 𑀤𑀻𑀧𑀗𑁆𑀓𑀭𑀫𑀼𑀦𑀺 𑀬𑀣𑀸 𑀦𑀺𑀩𑁆𑀩𑀼𑀢𑀺𑀁 𑀧𑀸𑀧𑀼𑀡𑀺𑀲𑁆𑀲𑀁; ()

𑁧𑁯.

𑀇𑀘𑁆𑀘𑁂𑀯𑀁 𑀲𑁄 𑀧𑀼𑀫𑀭𑀺𑀬 𑀲𑀫𑁄𑀥𑀸𑀦𑀬𑀺𑀢𑁆𑀯𑀸’𑀝𑁆𑀞𑀥𑀫𑁆𑀫𑁂

𑀲𑀁𑀲𑀸𑀭𑀫𑁆𑀳𑀸’𑀯𑀢𑀭𑀡𑀫𑀳𑀸𑀲𑁂𑀢𑀼𑀭𑀽𑀧𑁄 𑀧𑀚𑀸𑀦𑀁,

𑀫𑀼𑀤𑁆𑀥𑀸𑀩𑀤𑁆𑀥’𑀜𑁆𑀚𑀮𑀺𑀧𑀼𑀝𑀚𑀝𑁄 𑀧𑀗𑁆𑀓𑀧𑀺𑀝𑁆𑀞𑁂 𑀦𑀺𑀧𑀦𑁆𑀦𑁄

𑀲𑀫𑁆𑀩𑁄𑀥𑀢𑁆𑀣𑀁 𑀧𑀡𑀺𑀥𑀺𑀫𑀓𑀭𑀺 𑀢𑀸𑀯 𑀢𑀧𑁆𑀧𑀸𑀤𑀫𑀽𑀮𑁂; ()

𑁨𑁦. ¶

𑀉𑀲𑁆𑀲𑀺𑀲𑀞𑁄 𑀲𑀧𑀤𑀺 𑀪𑀕𑀯𑀸 𑀧𑀜𑁆𑀘𑀯𑀡𑁆𑀡𑀧𑁆𑀧𑀲𑀸𑀤𑀁

𑀉𑀫𑁆𑀫𑀻𑀮𑁂𑀢𑁆𑀯𑀸 𑀦𑀬𑀦𑀬𑀼𑀕𑀮𑀁 𑀨𑀼𑀮𑁆𑀮𑀦𑀻𑀮𑀼𑀧𑁆𑀧𑀮𑀸𑀪𑀁,

𑀤𑀺𑀲𑁆𑀯𑀸 𑀦𑀻𑀮𑁄𑀧𑀮𑀫𑀡𑀺𑀫𑀬𑀁 𑀯𑀸𑀢𑀧𑀸𑀦𑀜𑁆𑀘𑀬𑀁’𑀯

𑀉𑀕𑁆𑀖𑀸𑀝𑁂𑀦𑁆𑀢𑁄 𑀇𑀲𑀺𑀯𑀭𑀫𑁆𑀳𑀸𑀧𑀗𑁆𑀓𑀚𑀁 𑀧𑀗𑁆𑀓𑀧𑀺𑀝𑁆𑀞𑁂; ()

𑁨𑁧.

𑀏𑀢𑀲𑁆𑀲𑀺’𑀚𑀛𑀺𑀲𑁆𑀲𑀢𑀺 𑀇𑀢𑀺 𑀅𑀬𑀁 𑀧𑀢𑁆𑀣𑀦𑀸’𑀦𑀸𑀕𑀢𑀁𑀲-

𑀜𑀸𑀡𑀁 𑀲𑀫𑁆𑀫𑀸 𑀧𑀢𑀺𑀦𑀺𑀬 𑀇𑀢𑁄 𑀓𑀧𑁆𑀧𑀮𑀓𑁆𑀔𑀸𑀥𑀺𑀓𑀸𑀦𑀁,

𑀆𑀯𑀚𑁆𑀚𑁂𑀦𑁆𑀢𑁄 𑀉𑀧𑀭𑀺 𑀘𑀢𑀼𑀭𑀸𑀲𑀗𑁆𑀔𑀺𑀬𑀸𑀦𑀦𑁆𑀢𑁆𑀬’𑀯𑁂𑀤𑀺

𑀧𑀢𑁆𑀯𑀸 𑀩𑁄𑀥𑀺𑀁 𑀅𑀳𑀫𑀺𑀯 𑀲𑀺𑀬𑀸 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄; ()

𑁨𑁨.

𑀢𑀼𑀫𑁆𑀳𑁂 𑀲𑀫𑁆𑀧𑀲𑁆𑀲𑀣 𑀇𑀢𑀺 𑀇𑀫𑀁 𑀢𑀸𑀧𑀲𑀁 𑀲𑀗𑁆𑀖𑀫𑀚𑁆𑀛𑁂

𑀯𑀢𑁆𑀯𑁂’𑀯𑀁 𑀲𑁄 𑀧𑀤𑀫𑀲𑀤𑀺𑀲𑀁 𑀥𑀫𑁆𑀫𑀭𑀸𑀚𑀸 𑀤𑀤𑀦𑁆𑀢𑁄,

𑀲𑀫𑁆𑀳𑀺𑀦𑁆𑀤𑀺𑀢𑁆𑀣𑀸’𑀥𑀭𑀓𑀺𑀲𑀮𑀬𑀸’𑀮𑀢𑁆𑀢𑀓𑀁 𑀦𑀸𑀕𑀢𑀁𑀬-

𑀧𑀜𑁆𑀜𑀸𑀫𑀼𑀤𑁆𑀤𑀸’𑀗𑁆𑀓𑀺𑀢𑀧𑀤𑀲𑀢𑀁 𑀯𑀢𑁆𑀢𑀲𑀦𑁆𑀤𑁂𑀲𑀕𑀩𑁆𑀪𑀁; ()

𑁨𑁩. ¶

𑀯𑀸𑀲𑀝𑁆𑀞𑀸𑀦𑀁 𑀓𑀧𑀺𑀮𑀦𑀕𑀭𑀁 𑀦𑀸𑀫 𑀫𑀸𑀲𑀸𑀫𑀳𑁂𑀲𑀺

𑀫𑀸𑀢𑀸 𑀲𑀼𑀤𑁆𑀥𑁄𑀤𑀦𑀦𑀭𑀧𑀢𑀺 𑀢𑁂 𑀧𑀺𑀢𑀸’𑀤𑀺𑀘𑁆𑀘𑀯𑀁𑀲𑁂,

𑀩𑀺𑀫𑁆𑀩𑀸 𑀩𑀺𑀫𑁆𑀩𑀸 𑀥𑀭𑀯𑀢𑀺 𑀧𑀺𑀬𑀸 𑀳𑁂𑀫 𑀩𑀺𑀫𑁆𑀩𑀸 𑀪𑀺𑀭𑀸𑀫𑀸

𑀢𑀲𑁆𑀫𑀺𑀁𑀓𑀸𑀮𑁂 𑀢𑀦𑀼𑀚𑀭𑀢𑀦𑀁 𑀭𑀸𑀳𑀼𑀮𑁄 𑀳𑁂𑀲𑁆𑀲𑀢𑁂 𑀢𑁂; ()

𑁨𑁪.

𑀳𑁂𑀲𑁆𑀲𑀦𑁆𑀢𑁂 𑀢𑁂 𑀧𑀞𑀫𑀤𑀼𑀢𑀺𑀬𑀲𑁆𑀲𑀸𑀯𑀓𑀸 𑀲𑀸𑀭𑀺𑀧𑀼𑀢𑁆𑀢-

𑀫𑁄𑀕𑁆𑀕𑀮𑁆𑀮𑀸𑀦𑀸 𑀤𑁆𑀯𑀺𑀚𑀓𑀼𑀮𑀪𑀯𑀸 𑀪𑀼𑀭𑀺𑀧𑀜𑁆𑀜𑀺𑀤𑁆𑀥𑀺𑀫𑀦𑁆𑀢𑁄,

𑀆𑀦𑀦𑁆𑀤𑀸𑀔𑁆𑀬𑁄 𑀬𑀢𑀺 𑀧𑀢𑀺 𑀭𑀼𑀧𑀝𑁆𑀞𑀸𑀬𑀓𑁄𑀲𑀸𑀯𑀺𑀓𑀸𑀦𑀁

𑀔𑁂𑀫𑀸𑀣𑁂𑀭𑀺 𑀧𑀭𑀫 𑀬𑀼𑀕𑀮𑀁 𑀉𑀧𑁆𑀧𑀮𑀩𑁆𑀩𑀡𑁆𑀡𑀣𑁂𑀭𑀺; ()

𑁨𑁫. ¶

𑀅𑀲𑁆𑀲𑀢𑁆𑀣𑁄 𑀢𑁂 𑀯𑀺𑀚𑀬𑀯𑀺𑀝𑀧𑀻 𑀢𑁆𑀯𑀜𑁆𑀘 𑀔𑁄 𑀕𑁄𑀢𑀫𑀯𑁆𑀳𑁄

𑀙𑀩𑁆𑀩𑀲𑁆𑀲𑀸𑀦𑀻 𑀧𑀤𑀳𑀺𑀬 𑀖𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀓𑀫𑁆𑀳𑀸,

𑀧𑀸𑀬𑀸𑀲𑀕𑁆𑀕𑀁 𑀧𑀭𑀺𑀯𑀺𑀲𑀺𑀬 𑀪𑁄 𑀢𑁆𑀯𑀁 𑀲𑀼𑀚𑀸𑀢𑀸𑀬 𑀤𑀺𑀦𑁆𑀦𑀁

𑀩𑁄𑀥𑀺𑀁 𑀩𑀼𑀚𑁆𑀛𑀺𑀲𑁆𑀲𑀲𑀺 𑀇𑀢𑀺 𑀥𑀼𑀯𑀁 𑀩𑁄𑀥𑀺𑀫𑀽𑀮𑁂 𑀦𑀺𑀲𑀚𑁆𑀚; ()

𑁨𑁬.

𑀲𑀢𑁆𑀣𑀸 𑀲𑀜𑁆𑀛𑀸𑀖𑀦𑀧𑀝𑀮𑀢𑁄 𑀫𑀼𑀢𑁆𑀢𑀯𑀺𑀚𑁆𑀚𑀼𑀮𑁆𑀮𑀢𑁂,𑀯

𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀦𑀺𑀚𑀪𑀼𑀚𑀮𑀢𑀁 𑀘𑀻𑀯𑀭𑀩𑁆𑀪𑀦𑁆𑀢𑀭𑀫𑁆𑀳𑀸,

𑀧𑀔𑁆𑀬𑀸𑀓𑀸𑀲𑀺 𑀚𑀮𑀥𑀭𑀭𑀯𑀸’𑀓𑀸𑀭𑀕𑀫𑁆𑀪𑀻𑀭𑀖𑁄𑀬𑀁

𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀲𑀼𑀭𑀥𑀦𑀼𑀭𑀺𑀯𑁄’𑀪𑀸𑀲 𑀙𑀩𑁆𑀩𑀡𑁆𑀡𑀭𑀁𑀲𑀺; ()

𑁨𑁭.

𑀅𑀫𑁆𑀳𑁂 𑀤𑀻𑀧𑀗𑁆𑀓𑀭𑀪𑀕𑀯𑀢𑁄 𑀲𑀸𑀲𑀦𑁂 𑀦𑀸’𑀯𑀩𑀼𑀤𑁆𑀥𑀸

𑀮𑀘𑁆𑀙𑀸𑀫𑀸’𑀢𑀺 𑀢𑀯 𑀧𑀭𑀺𑀫𑀼𑀔𑁂’𑀯𑀸’𑀬𑀢𑀺𑀁 𑀫𑁄𑀓𑁆𑀔𑀥𑀫𑁆𑀫𑀁,

𑀢𑀲𑁆𑀫𑀺𑀁 𑀧𑀢𑁆𑀢𑀸’𑀔𑀻𑀮 𑀲𑀼𑀭𑀦𑀭𑀸𑀧𑀢𑁆𑀣𑀬𑀼𑀁 𑀢𑀗𑁆𑀔𑀡𑁂𑀯𑀁

𑀧𑀽𑀚𑁂𑀢𑁆𑀯𑀸’𑀢𑀜𑁆𑀚𑀮𑀺𑀲𑀭𑀲𑀺𑀚𑁂 𑀧𑀸𑀤𑀧𑀻𑀞𑀫𑁆𑀳𑀺 𑀢𑀲𑁆𑀲; ()

𑁨𑁮. ¶

𑀩𑀼𑀤𑁆𑀥𑁄 𑀩𑁆𑀭𑀳𑁆𑀫𑀸𑀫𑀭𑀦𑀭𑀲𑀺𑀭𑁄 𑀘𑀼𑀫𑁆𑀩𑀺𑀢𑀗𑁆𑀖𑀻 𑀲𑀭𑁄𑀚𑁄

𑀲𑀫𑁆𑀧𑀽𑀚𑁂𑀢𑁆𑀯𑀸’𑀝𑁆𑀞𑀳𑀺 𑀚𑀝𑀺𑀮𑀓𑀁 𑀧𑀼𑀧𑁆𑀨𑀫𑀼𑀝𑁆𑀞𑀻𑀳𑀺 𑀢𑀫𑁆𑀳𑀸,

𑀧𑀓𑁆𑀓𑀸𑀫𑀺 𑀲𑁄 𑀓𑀦𑀓𑀲𑀺𑀔𑀭𑀻𑀳𑀸𑀭𑀺 𑀓𑀺𑀜𑁆𑀚𑀓𑁆𑀔𑀪𑀸𑀭𑁂

𑀉𑀩𑁆𑀪𑀽𑀢’𑀫𑁆𑀳𑁄𑀭𑀼𑀳𑀯𑀦𑀲𑀺𑀭𑁂 𑀅𑀧𑁆𑀧𑀬𑀦𑁆𑀢𑁄 𑀧𑀤𑀸𑀦𑀺; ()

𑁨𑁯.

𑀭𑀫𑁆𑀫𑀁 𑀭𑀫𑁆𑀫𑀁 𑀫𑀳𑀻𑀬 𑀚𑀝𑀺𑀮𑀁 𑀧𑀼𑀧𑁆𑀨𑀫𑀼𑀝𑁆𑀞𑀻𑀳𑀺 𑀓𑀢𑁆𑀯𑀸

𑀔𑀻𑀡𑀸 𑀔𑀻𑀡𑀸𑀲𑀯𑀯𑀲𑀺𑀕𑀡𑀸 𑀤𑀓𑁆𑀔𑀺𑀡𑀁 𑀧𑀓𑁆𑀓𑀫𑀺𑀁𑀲𑀼,

𑀤𑁂𑀯𑀸’𑀤𑁂𑀯𑀸 𑀧𑀯𑀼𑀭𑀫𑀓𑀭𑀼𑀁 𑀯𑀦𑁆𑀤𑀦𑀸𑀫𑀸𑀦𑀧𑀽𑀚𑀁

𑀤𑀻𑀧𑀁 𑀤𑀻𑀧𑀗𑁆𑀓𑀭𑀤𑀲𑀩𑀮𑀜𑁆𑀘𑀸’𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀸; ()

𑁩𑁦. ¶

𑀢𑀫𑁆𑀳𑀸 𑀞𑀸𑀦𑀸 𑀕𑀢𑀲𑀢𑀺 𑀚𑀦𑁂 𑀲𑀦𑁆𑀦𑀺𑀲𑀺𑀦𑁆𑀦𑀲𑁆𑀲 𑀢𑀲𑁆𑀲

𑀧𑀮𑁆𑀮𑀗𑁆𑀓𑁂𑀦𑀸’𑀫𑀭𑀦𑀭 𑀧𑀭𑀺𑀘𑁆𑀘𑀦𑁆𑀢 𑀧𑀼𑀧𑁆𑀨𑀸𑀲𑀦𑀫𑁆𑀳𑀺,

𑀚𑀸𑀢𑀺𑀓𑁆𑀔𑁂𑀢𑁆𑀢𑀸 𑀢𑀳𑀺𑀫𑀼𑀧𑀕𑀢𑀸 𑀤𑁂𑀯𑀢𑀸 𑀏𑀢𑀫𑀢𑁆𑀣𑀁

𑀆𑀭𑁄𑀘𑁂𑀲𑀼𑀁 𑀫𑀳𑀺𑀢𑀯𑀭𑀡𑀸 𑀅𑀜𑁆𑀚𑀮𑀺𑀫𑀜𑁆𑀚𑀭𑀻𑀳𑀺𑀁; ()

𑁩𑁧.

𑀧𑀼𑀩𑁆𑀩𑁂 𑀧𑀼𑀧𑁆𑀨𑀸𑀲𑀦𑀼𑀧𑀭𑀺 𑀲𑀫𑀸𑀭𑀽𑀴𑁆𑀳𑀩𑀼𑀤𑁆𑀥𑀗𑁆𑀓𑀼𑀭𑀸𑀦𑀁

𑀅𑀤𑁆𑀥𑀸𑀦𑁂’𑀯𑁂’𑀢𑀭𑀳𑀺 𑀪𑀯𑀢𑁄𑀘𑀸’𑀲𑀦𑀸𑀭𑁄𑀳𑀡𑀫𑁆𑀳𑀺,

𑀏𑀓𑀸𑀮𑁄𑀓𑀸 𑀤𑀲𑀳𑀺 𑀕𑀼𑀡𑀺𑀢𑀸 𑀮𑁄𑀓𑀥𑀸𑀢𑀼 𑀲𑀳𑀲𑁆𑀲𑀻

𑀲𑀁𑀯𑀢𑁆𑀢𑀦𑁆𑀢𑁂 𑀢𑁆𑀯𑀫𑀦𑀯𑀭𑀢𑀁 𑀳𑁂𑀲𑁆𑀲𑀲𑁂 𑀢𑁂𑀦 𑀩𑀼𑀤𑁆𑀥𑁄; ()

𑁩𑁨.

𑀢𑀸𑀲𑀁 𑀯𑀸𑀘𑀁 𑀲𑀯𑀡𑀫𑀥𑀼𑀭𑀁 𑀤𑁂𑀯𑀢𑀸𑀦𑀁 𑀦𑀺𑀲𑀫𑁆𑀫

𑀪𑀺𑀬𑁆𑀬𑁄 𑀘𑀺𑀢𑁆𑀢𑀧𑁆𑀧𑀪𑀯𑀯𑀻𑀭𑀺𑀬𑁄 𑀧𑀻𑀢𑀺𑀯𑀺𑀧𑁆𑀨𑀸𑀭𑀺𑀢𑀢𑁆𑀢𑁄,

𑀧𑀼𑀩𑁆𑀩𑁂 𑀲𑀢𑁆𑀢𑀼𑀢𑁆𑀢𑀫𑀧𑀭𑀺𑀘𑀺𑀢𑀸 𑀩𑁄𑀥𑀺𑀲𑀫𑁆𑀪𑀸𑀭𑀥𑀫𑁆𑀫𑀸

𑀆𑀯𑀚𑁆𑀚𑁂𑀲𑀺 𑀓𑀢𑀺 𑀇𑀢𑀺 𑀲𑀼𑀥𑀻 𑀥𑀫𑁆𑀫𑀥𑀸𑀢𑀼𑀁 𑀲𑀳𑁂𑀢𑀼𑀁; ()

𑁩𑁩. ¶

𑀑𑀓𑀼𑀚𑁆𑀚𑀺𑀢𑁆𑀯𑀸 𑀥𑀭𑀡𑀺𑀞𑀧𑀺𑀢𑁄 𑀧𑀼𑀡𑁆𑀡 𑀓𑀼𑀫𑁆𑀪𑁄 𑀲𑀼𑀫𑁂𑀥

𑀯𑀺𑀲𑁆𑀲𑀦𑁆𑀤𑁂𑀢𑁆𑀯𑀸 𑀲𑀮𑀺𑀮𑀫𑀔𑀺𑀮𑀁 𑀓𑀺𑀦𑁆𑀢𑀼𑀧𑀘𑁆𑀘𑀸𑀳𑀭𑁂𑀣,

𑀏𑀯𑀁 𑀤𑀢𑁆𑀯𑀸 𑀥𑀦𑀲𑀼𑀢𑀓𑀮𑀢𑁆𑀢’𑀗𑁆𑀕𑀧𑀘𑁆𑀘𑀗𑁆𑀕𑀚𑀻𑀯𑁂

𑀦𑀺𑀩𑁆𑀩𑀺𑀦𑁆𑀦𑁄 𑀫𑀸 𑀪𑀯𑀺’𑀢𑀺 𑀧𑀞𑀫𑀁 𑀧𑀸𑀭𑀫𑀺𑀁’𑀥𑀺𑀝𑁆𑀞𑀳𑀺 𑀲𑁄; ()

𑁩𑁪.

𑀦𑀸’𑀧𑁂𑀓𑁆𑀔𑀺𑀢𑁆𑀯𑀸 𑀬𑀣𑀭𑀺𑀯 𑀦𑀺𑀚𑀁 𑀚𑀻𑀯𑀺𑀢𑀁 𑀚𑀻𑀯𑀺𑀢𑀁’𑀯

𑀭𑀓𑁆𑀔𑀦𑁆𑀢𑁄 𑀲𑀜𑁆𑀘𑀭𑀢𑀺 𑀘𑀫𑀭𑀺 𑀘𑀸𑀫𑀭 𑀘𑀦𑁆𑀤𑀺𑀓𑀸𑀪𑀁,

𑀏𑀯𑀁 𑀲𑀻𑀮𑀁 𑀯𑀭𑀲𑀺𑀯𑀧𑀼𑀭𑀤𑁆𑀯𑀸𑀭𑀫𑀸𑀭𑀓𑁆𑀔 𑀥𑀻𑀭

𑀅𑀚𑁆𑀛𑀺𑀝𑁆𑀞𑀸𑀲𑀺 𑀇𑀢𑀺 𑀲𑀤𑀼𑀢𑀺𑀬𑀁 𑀧𑀸𑀭𑀫𑀺𑀁 𑀲𑀼𑀤𑁆𑀥𑀲𑀻𑀮𑁄; ()

𑁩𑁫. ¶

𑀲𑀁𑀯𑀺𑀕𑁆𑀕𑁄 𑀬𑁄 𑀘𑀺𑀭𑀧𑀭𑀺𑀯𑀲𑀁 𑀖𑁄𑀭𑀓𑀸𑀭𑀸𑀖𑀭𑀫𑁆𑀳𑀺

𑀫𑀼𑀢𑁆𑀢𑀻𑀁 𑀢𑀫𑁆𑀳𑀸’𑀕𑀫𑀬𑀢𑀺 𑀬𑀣𑀸 𑀳𑁄𑀳𑀺 𑀦𑁂𑀓𑁆𑀔𑀫𑁆𑀫𑀦𑀺𑀢𑁆𑀢𑁄

𑀦𑀺𑀩𑁆𑀩𑀺𑀦𑁆𑀦𑁄 𑀢𑁆𑀯𑀁 𑀢𑀣𑀭𑀺𑀯 𑀪𑀯𑁂 𑀩𑀦𑁆𑀥𑀦𑀸𑀕𑀸𑀭𑀭𑀽𑀧𑁂

𑀅𑀚𑁆𑀛𑀺𑀝𑁆𑀞𑀸𑀲𑀺 𑀢𑀢𑀺𑀬𑀫𑁆𑀧𑀺 𑀲𑁄 𑀧𑀸𑀭𑀫𑀺𑀦𑁆𑀢𑁆𑀬𑁂’𑀓𑀘𑀸𑀭𑀻; ()

𑁩𑁬.

𑀳𑀻𑀦𑀼𑀓𑁆𑀓𑀝𑁆𑀞𑀁 𑀓𑀼𑀮𑀫𑀦𑀼𑀖𑀭𑀁 𑀪𑀺𑀓𑁆𑀔𑀓𑁄 𑀪𑀺𑀓𑁆𑀔𑀼 𑀪𑀺𑀓𑁆𑀔𑀁

𑀅𑀡𑁆𑀯𑀸𑀳𑀺𑀡𑁆𑀟𑀁 𑀮𑀪𑀢𑀺 𑀦𑀘𑀺𑀭𑀁 𑀲𑀁𑀯𑀭𑀝𑁆𑀞𑁄 𑀬𑀣𑁂’𑀯𑀁,

𑀲𑀫𑁆𑀩𑁄𑀥𑀢𑁆𑀣 𑀪𑀚 𑀧𑀝𑀺𑀩𑀮𑁂 𑀧𑀡𑁆𑀟𑀺𑀢𑁂 𑀧𑀼𑀝𑁆𑀞𑀧𑀜𑁆𑀳𑁄

𑀅𑀚𑁆𑀛𑀺𑀝𑁆𑀞𑀸𑀲𑀺 𑀢𑁆𑀯𑀫𑀺𑀢𑀺 𑀫𑀢𑀺𑀫𑀸 𑀧𑀸𑀭𑀫𑀺𑀁 𑀲𑁄 𑀘𑀢𑀼𑀢𑁆𑀣𑀺𑀁; ()

𑁩𑁭.

𑀦𑀺𑀘𑁆𑀘𑀼𑀲𑁆𑀲𑀸𑀳𑁄 𑀯𑀺𑀘𑀭𑀢𑀺 𑀬𑀣𑀸 𑀓𑁂𑀲𑀭𑀻 𑀲𑁂𑀭𑀺𑀘𑀸𑀭𑀻

𑀏𑀯𑀁 𑀞𑀸𑀦𑁂 𑀕𑀫𑀦𑀲𑀬𑀦𑁂𑀘𑀸’𑀲𑀦𑁂 𑀢𑁆𑀯𑀁 𑀲𑀼𑀫𑁂𑀥,

𑀉𑀲𑁆𑀲𑁄𑀴𑁆𑀳𑀻 𑀢𑁆𑀬𑀸𑀲𑀺𑀣𑀺𑀮𑀯𑀻𑀭𑀺𑀬𑁄 𑀳𑁄𑀢𑀺 𑀲𑀫𑁆𑀩𑁄𑀥𑀦𑀢𑁆𑀣𑀁

𑀅𑀚𑁆𑀛𑀻𑀝𑁆𑀞𑀸𑀲𑀺 𑀣𑀺𑀭𑀯𑀻𑀭𑀺𑀬𑀯𑀸 𑀧𑀜𑁆𑀘𑀫𑀺𑀁 𑀧𑀸𑀭𑀫𑀺𑀁 𑀲𑁄; ()

𑁩𑁮. ¶

𑀇𑀝𑁆𑀞𑀸𑀦𑀺𑀝𑁆𑀞𑀁 𑀧𑀣𑀯𑀺𑀭𑀺𑀯 𑀪𑁄 𑀲𑀩𑁆𑀩𑀫𑀸𑀦𑀸𑀯𑀫𑀸𑀦𑀁

𑀦𑀸𑀧𑀚𑁆𑀚𑀺𑀢𑁆𑀯𑀸 𑀫𑀦𑀲𑀺𑀯𑀺𑀓𑁆𑀢𑀺𑀁 𑀢𑁆𑀯𑀁 𑀲𑀳𑀦𑁆𑀢𑁄 𑀔𑀫𑀦𑁆𑀢𑁄,

𑀲𑀫𑁆𑀩𑁄𑀥𑀢𑁆𑀣𑀁 𑀧𑀭𑀯𑀥𑀔𑀫𑁄 𑀳𑁄𑀳𑀺’𑀢𑀻 𑀔𑀦𑁆𑀢𑀺𑀯𑀸𑀤𑀻

𑀅𑀚𑁆𑀛𑀺𑀝𑁆𑀞𑀸𑀲𑀺 𑀧𑀭𑀳𑀺𑀢𑀭𑀢𑁄 𑀙𑀝𑁆𑀞𑀫𑀺𑀁 𑀧𑀸𑀭𑀫𑀺𑀁 𑀲𑁄; ()

𑁩𑁯.

𑀯𑀻𑀣𑀺𑀁 𑀦𑀸𑀢𑀺𑀓𑁆𑀓𑀫𑀢𑀺 𑀦𑀺𑀬𑀫𑀁 𑀑𑀲𑀥𑀻𑀢𑀸𑀭𑀓𑀸’𑀬𑀁

𑀏𑀯𑀁 𑀲𑀦𑁆𑀢𑀼𑀢𑁆𑀢𑀫 𑀧𑀭𑀺𑀘𑀺𑀢𑀁 𑀲𑀘𑁆𑀘𑀯𑀸𑀘𑀁 𑀲𑀼𑀫𑁂𑀥,

𑀢𑁆𑀯𑀁 𑀫𑀸𑀯𑀺𑀢𑀺𑀓𑁆𑀓𑀫𑀺 𑀓𑀭𑀳𑀘𑀺 𑀩𑁄𑀤𑁆𑀥𑀼𑀓𑀸𑀫𑁄 𑀲𑀼𑀩𑁄𑀥𑀺𑀁

𑀅𑀚𑁆𑀛𑀺𑀝𑁆𑀞𑀸𑀲𑀺’𑀢𑁆𑀬’𑀯𑀺𑀢𑀣𑀓𑀣𑀺 𑀲𑀢𑁆𑀢𑀫𑀺𑀁 𑀧𑀸𑀭𑀫𑀺𑀁 𑀲𑁄; ()

𑁪𑁦. ¶

𑀢𑀫𑁆𑀳𑀸𑀞𑀸𑀦𑀸 𑀩𑀮𑀯𑀧𑀯𑀦𑁂 𑀯𑀸𑀬𑀫𑀸𑀦𑁂’𑀧𑀺 𑀣𑁄𑀓𑀁

𑀓𑀧𑁆𑀧𑀝𑁆𑀞𑀸𑀲𑀺 𑀢𑀘𑀮𑀢𑀺 𑀬𑀣𑀸 𑀧𑀩𑁆𑀩𑀢𑁄 𑀲𑀼𑀧𑁆𑀧𑀢𑀝𑁆𑀞𑁄,

𑀢𑁆𑀯𑀁 𑀢𑀺𑀝𑁆𑀞𑀸𑀳𑀺 𑀢𑀣𑀭𑀺𑀯 𑀅𑀥𑀺𑀝𑁆𑀞𑀸𑀦𑀥𑀫𑁆𑀫𑁂𑀲𑀼 𑀤𑀴𑁆𑀳𑀁

𑀅𑀚𑁆𑀛𑀺𑀝𑁆𑀞𑀸𑀲𑀻’𑀢𑁆𑀬𑀯𑀮𑀲𑀤𑀺𑀲𑁄 𑀘’𑀝𑁆𑀞𑀫𑀺𑀁 𑀧𑀸𑀭𑀫𑀺𑀁 𑀲𑁄; ()

𑁪𑁧.

𑀑𑀢𑀺𑀡𑁆𑀡𑁂𑀲𑀼 𑀉𑀤𑀓𑀭𑀳𑀤𑁄 𑀪𑁄 𑀦𑀺𑀳𑀻𑀦𑀼𑀢𑁆𑀢𑀫𑁂𑀲𑀼

𑀲𑀻𑀢𑀢𑁆𑀢𑀁 𑀲𑀫𑁆𑀨𑀭𑀢𑀺 𑀳𑀺 𑀲𑀫𑀁 𑀯𑀸𑀭𑀺𑀦𑀸 𑀪𑀸𑀯𑀬𑁂𑀦𑀺,

𑀫𑁂𑀢𑁆𑀢𑀸𑀬𑁂𑀯𑀁 𑀢𑀺𑀪𑀯𑀪𑀯𑀦𑁂 𑀲𑀩𑁆𑀩𑀲𑀢𑁆𑀢𑁂𑀲𑀼 𑀢𑀼𑀮𑁆𑀬𑀁

𑀅𑀚𑁆𑀛𑀺𑀝𑁆𑀞𑀸𑀲𑀺 𑀲𑀫𑀼𑀢𑀺 𑀦𑀯𑀫𑀺𑀁 𑀧𑀸𑀭𑀫𑀺𑀁 𑀫𑁂𑀢𑁆𑀢 𑀘𑀺𑀢𑁆𑀢𑁄; ()

𑁪𑁨.

𑀇𑀝𑁆𑀞𑀸𑀦𑀺𑀝𑁆𑀞𑁂 𑀲𑀢𑀺 𑀧𑀝𑀺𑀳𑀢𑁂 𑀯𑀢𑁆𑀣𑀼𑀚𑀸𑀢𑁂 𑀬𑀣𑀸𑀳𑀺

𑀫𑀚𑁆𑀛𑀢𑁆𑀢𑀸’𑀬𑀁 𑀯𑀲𑀼𑀫𑀢𑀺𑀯𑀥𑀽 𑀳𑁄𑀢𑀺 𑀤𑀼𑀓𑁆𑀔𑁂 𑀲𑀼𑀔𑁂𑀓 𑀯𑀸,

𑀏𑀯𑀁 𑀪𑁄 𑀢𑁆𑀯𑀁 𑀪𑀯 𑀲𑀫𑀢𑀼𑀮𑀸𑀲𑀦𑁆𑀢𑀺𑀪𑁄’𑀧𑁂𑀓𑁆𑀔 𑀓𑁄’𑀢𑀺

𑀅𑀚𑁆𑀛𑀺𑀝𑁆𑀞𑀸𑀲𑀺 𑀲𑀯𑀲𑀺 𑀤𑀲𑀫𑀺𑀁 𑀧𑀸𑀭𑀫𑀺𑀁 𑀪𑀼𑀭𑀺𑀫𑁂𑀥𑁄; ()

𑁪𑁩. ¶

𑀆𑀮𑁄𑀮𑁂𑀦𑁆𑀢𑁄 𑀢𑀺𑀤𑀲𑀧𑀫𑀺𑀢𑀁 𑀧𑀸𑀭𑀫𑀺𑀲𑀸𑀕𑀭𑀁 𑀲𑁄

𑀲𑀢𑁆𑀢𑀸𑀥𑀺𑀲𑁄 𑀦𑀺𑀲𑀺𑀢𑀫𑀢𑀺𑀫𑀸 𑀜𑀸𑀡𑀫𑀢𑁆𑀣𑀸’𑀘𑀮𑁂𑀦,

𑀆𑀯𑀚𑁆𑀚𑁂𑀲𑀺 𑀯𑀲𑀼𑀫𑀢𑀯𑀥𑀼 𑀲𑀸𑀥𑀼𑀓𑀸𑀭𑀁’𑀯 𑀤𑁂𑀦𑁆𑀢𑀺

𑀲𑀁𑀓𑀫𑁆𑀧𑀺 𑀲𑀫𑁆𑀧𑀢𑀺 𑀲𑀢𑀺𑀫𑀢𑁄 𑀥𑀫𑁆𑀫𑀢𑁂𑀚𑁂𑀦 𑀢𑁂𑀦; ()

𑁪𑁪.

𑀪𑀻𑀭𑀽𑀘𑁆𑀙𑀫𑁆𑀳𑀻 𑀖𑀡𑀧𑀣𑀯𑀺𑀬𑀸 𑀓𑀫𑁆𑀧𑀫𑀸𑀢𑀸𑀬𑀺’𑀫𑀸𑀬

𑀧𑀢𑁆𑀯𑀸 𑀤𑀻𑀧𑀗𑁆𑀓𑀭𑀪𑀕𑀯𑀢𑁄 𑀭𑀫𑁆𑀫𑀯𑀸𑀲𑀻 𑀲𑀫𑀻𑀧𑀁,

𑀲𑀫𑁆𑀧𑀼𑀘𑁆𑀙𑀺𑀁𑀲𑀼 𑀯𑀲𑀼𑀫𑀢𑀺 𑀪𑀼𑀲𑀁 𑀓𑀫𑁆𑀧𑀺 𑀢𑀁𑀓𑀺𑀲𑁆𑀲𑀳𑁂𑀢𑀼

𑀆𑀯𑀚𑁆𑀚𑁂𑀢𑁆𑀯𑀸 𑀲𑀫𑀼𑀢𑀺 𑀫𑀼𑀦𑀺𑀦𑁄 𑀢𑀫𑁆𑀧𑀯𑀢𑁆𑀢𑀺𑀁 𑀓𑀣𑁂𑀲𑀺; ()

𑁪𑁫.

𑀦𑀺𑀓𑁆𑀓𑀗𑁆𑀔𑀸 𑀢𑁂 𑀧𑀼𑀦𑀧𑀺 𑀦𑀕𑀭𑀸 𑀦𑀸𑀕𑀭𑀸 𑀢𑀁 𑀉𑀧𑁂𑀘𑁆𑀘

𑀲𑀫𑁆𑀧𑀽𑀚𑁂𑀲𑀼𑀁 𑀘𑀭𑀡𑀬𑀼𑀕𑀮𑀁 𑀕𑀦𑁆𑀥𑀫𑀸𑀮𑀸𑀤𑀺𑀓𑁂𑀳𑀺,

𑀓𑀢𑁆𑀯𑀸 𑀢𑁂𑀦’𑀜𑁆𑀚𑀮𑀺𑀲𑀭𑀲𑀺𑀚𑁂 𑀬𑁂𑀦 𑀤𑀻𑀧𑀗𑁆𑀓𑀭𑁂’𑀡𑁄

𑀉𑀝𑁆𑀞𑀸𑀲𑀺 𑀲𑁄 𑀧𑀼𑀭𑀺𑀲𑀢𑀺𑀲𑀳𑁄 𑀲𑀦𑁆𑀦𑀻𑀲𑀺𑀦𑁆𑀦𑀸𑀲𑀦𑀫𑁆𑀳𑀸; ()

𑁪𑁬. ¶

𑀫𑀸 𑀢𑁂 𑀭𑁄𑀕𑁄 𑀪𑀯𑀺 𑀧𑀝𑀺𑀪𑀬𑀁 𑀫𑀸 𑀪𑀯𑀺 𑀙𑀫𑁆𑀪𑀺𑀢𑀢𑁆𑀢𑀁

𑀲𑀗𑁆𑀓𑀧𑁆𑀧𑁄 𑀢𑁂 𑀧𑀭𑀫𑀧𑀡𑀺𑀥𑀺 𑀲𑀺𑀚𑁆𑀛𑀢𑀁 𑀔𑀺𑀧𑁆𑀧𑀫𑁂𑀯,

𑀇𑀢𑁆𑀣𑀜𑁆𑀘𑀸’𑀲𑀺𑀣𑀼𑀢𑀺𑀧𑀤𑀲𑀢𑀁 𑀚𑀸𑀢𑀺𑀔𑁂𑀢𑁆𑀢𑀸 𑀕𑀢𑀸 𑀢𑀁

𑀧𑀼𑀧𑁆𑀨𑀸𑀤𑀻𑀳𑀺 𑀫𑀳𑀻𑀬 𑀚𑀝𑀺𑀮𑀁 𑀦𑀺𑀚𑁆𑀚𑀭𑀸 𑀩𑁆𑀬𑀸𑀳𑀭𑀺𑀁𑀲𑀼; ()

𑁪𑁭.

𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀯𑀦𑀧𑀤𑀯𑀺𑀁 𑀤𑁂𑀯𑀢𑀸𑀦𑀁 𑀫𑀦𑀸𑀦𑀺

𑀩𑁄𑀥𑀸𑀢𑁆𑀯𑁄 𑀳𑀺𑀫𑀯𑀢𑀺 𑀲𑀓𑀁 𑀅𑀲𑁆𑀲𑀫𑀁 𑀢𑀸𑀧𑀲𑁄 𑀲𑁄,

𑀧𑀢𑁆𑀢𑁄 𑀅𑀢𑁆𑀣𑀸𑀘𑀮𑀫𑀼𑀧𑀕𑀫𑀻 𑀢𑀗𑁆𑀔𑀡𑁂 𑀭𑀁𑀲𑀺𑀫𑀸𑀮𑀻

𑀲𑀗𑁆𑀓𑁄𑀘𑁂𑀢𑁆𑀯𑀸 𑀲𑀭𑀲𑀺𑀚𑀯𑀦𑀁 𑀲𑀁𑀳𑀭𑀺𑀢𑁆𑀯𑀸’𑀁𑀲𑀼𑀚𑀸𑀮𑀁; ()

𑁪𑁮. ¶

𑀭𑀫𑁆𑀫𑀁 𑀤𑀻𑀧𑀗𑁆𑀓𑀭𑀪𑀕𑀯𑀢𑁄 𑀭𑀫𑁆𑀫𑀯𑀢𑁆𑀬𑀸’𑀪𑀺𑀥𑀸𑀦𑀁

𑀯𑀸𑀲𑀝𑁆𑀞𑀸𑀦𑀁 𑀚𑀦𑀓𑀚𑀦𑀦𑀻 𑀤𑁆𑀯𑁂 𑀲𑀼𑀤𑁂𑀯𑀲𑁆𑀲𑀼𑀫𑁂𑀥𑀸,

𑀦𑀺𑀘𑁆𑀘𑁄𑀧𑀝𑁆𑀞𑀸𑀬𑀓𑀬𑀢𑀺𑀯𑀭𑁄 𑀲𑀸𑀕𑀢𑁄𑀫𑀗𑁆𑀕𑀮𑁄𑀘

𑀢𑀺𑀲𑁆𑀲𑁄𑀘𑀸’𑀲𑀼𑀁 𑀧𑀞𑀫𑀤𑀼𑀢𑀺𑀬𑀲𑁆𑀲𑀸𑀯𑀓𑀸 𑀣𑁂𑀭𑀦𑀸𑀕𑀸; ()

𑁪𑁯.

𑀦𑀸𑀦𑀸𑀔𑀻𑀡𑀸𑀲𑀯𑀧𑀭𑀺𑀯𑀼𑀢𑁄 𑀘𑀸’𑀲𑀺 𑀦𑀦𑁆𑀤𑀸 𑀲𑀼𑀦𑀦𑁆𑀤𑀸

𑀢𑀲𑁆𑀲𑀸’𑀳𑁂𑀲𑀼𑀁 𑀧𑀞𑀫𑀤𑀼𑀢𑀺𑀬𑀲𑁆𑀲𑀸𑀯𑀺𑀓𑀸 𑀅𑀕𑁆𑀕𑀪𑀽𑀢𑀸,

𑀓𑀸𑀬𑁄’𑀲𑀺𑀢𑀺𑀭𑀢𑀦𑀧𑀫𑀺𑀢𑁄 𑀧𑀺𑀧𑁆𑀨𑀮𑀺𑀦𑀸𑀫𑀩𑁄𑀥𑀺

𑀅𑀝𑁆𑀞𑀸𑀲𑀺 𑀲𑁄 𑀧𑀘𑀼𑀭𑀚𑀦𑀢𑀁 𑀢𑀸𑀭𑀬𑀁 𑀯𑀲𑁆𑀲𑀮𑀓𑁆𑀔𑀁; ()

𑁫𑁦.

𑀲𑀢𑁆𑀣𑀸 𑀤𑀻𑀧𑀗𑁆𑀓𑀭𑀯𑁆𑀳𑁄 𑀲𑀼𑀭𑀦𑀭𑀲𑀭𑀡𑁄𑀤𑀻𑀧𑀤𑀻𑀧𑁄𑀘𑀺𑀭𑀲𑁆𑀲𑀁

𑀤𑀻𑀧𑁂𑀯𑁄 𑀥𑀫𑁆𑀫𑀤𑀻𑀧𑀁 𑀢𑀺𑀪𑀼𑀯𑀦𑀪𑀯𑀦𑁂 𑀯𑀻𑀢’𑀯𑀺𑀚𑁆𑀚𑀦𑁆𑀥𑀓𑀸𑀭𑀁

𑀅𑀕𑁆𑀕𑀺𑀓𑁆𑀔𑀦𑁆𑀥𑁄’𑀯𑀪𑀸𑀲𑀁 𑀯𑀺𑀳𑀭𑀺𑀬 𑀧𑀭𑀺𑀦𑀺𑀩𑁆𑀩𑀸𑀬𑀺 𑀔𑀻𑀡𑀸𑀲𑀯𑀸’𑀧𑀺

𑀔𑀻𑀡𑀲𑁆𑀦𑁂𑀳𑀸𑀧𑀤𑀻𑀧𑀸𑀬𑀣𑀭𑀺𑀯 𑀅𑀭𑀺𑀬𑀸 𑀲𑀸𑀯𑀓𑀸 𑀦𑀺𑀩𑁆𑀩𑀼𑀢𑀸’𑀲𑀼𑀁; ()

𑀇𑀢𑀺 𑀫𑁂𑀥𑀸𑀦𑀦𑁆𑀤𑀸𑀪𑀺𑀥𑀸𑀦𑁂𑀦 𑀬𑀢𑀺𑀦𑀸 𑀯𑀺𑀭𑀘𑀺𑀢𑁂 𑀲𑀓𑀮𑀓𑀯𑀺𑀚𑀦 𑀳𑀤𑀬𑀸𑀦𑀦𑁆𑀤𑀤𑀸𑀦𑀦𑀺𑀤𑀸𑀦𑁂 𑀚𑀺𑀢𑀯𑀁𑀲𑀤𑀻𑀧𑁂 𑀤𑀽𑀭𑁂𑀦𑀺𑀤𑀸𑀦𑁂 𑀲𑀼𑀫𑁂𑀥 𑀢𑀸𑀧𑀲𑀲𑁆𑀲 𑀫𑀽𑀮𑀧𑀡𑀺𑀞𑀸𑀦𑀝𑁆𑀞𑀧𑀦𑀧𑀯𑀢𑁆𑀢𑀺 𑀧𑀭𑀺𑀤𑀻𑀧𑁄 𑀤𑀼𑀢𑀺𑀬𑁄 𑀲𑀕𑁆𑀕𑁄.

𑁧. ¶

𑀮𑁄𑀓𑀁 (’𑀯𑀲𑀦𑁆𑀢𑀢𑀺𑀮𑀓𑁄) 𑀓𑀼𑀫𑀼𑀤𑀸𑀓𑀭𑀁 𑀫𑀸

𑀓𑁄𑀡𑁆𑀟𑀜𑁆𑀜𑀦𑀸𑀫𑀪𑀕𑀯𑀸’𑀣 𑀧𑀩𑁄𑀥𑀬𑀢𑁆𑀢𑁄,

𑀚𑀸𑀢𑁄 𑀢𑀤𑀸 𑀯𑀭𑀫𑀢𑀻 𑀯𑀺𑀚𑀺𑀢𑀸𑀯𑀺 𑀭𑀸𑀚𑀸

𑀲𑀫𑁆𑀧𑀦𑁆𑀦 𑀘𑀓𑁆𑀓𑀭𑀢𑀦𑁄’𑀪𑀯𑀺 𑀘𑀓𑁆𑀓𑀫𑀢𑁆𑀢𑀺; ()

𑁨.

𑀲𑀗𑁆𑀖𑀲𑁆𑀲 𑀩𑀼𑀤𑁆𑀥𑀧𑀫𑀼𑀔𑀲𑁆𑀲 𑀉𑀴𑀸𑀭𑀤𑀸𑀦𑀁

𑀤𑀢𑁆𑀯𑀸 𑀯𑀺𑀥𑀸𑀬 𑀧𑀡𑀺𑀥𑀺𑀁 𑀯𑀭𑀩𑁄𑀥𑀺𑀬𑀸 𑀲𑁄,

𑀭𑀚𑁆𑀚𑀁 𑀧𑀳𑀸𑀬 𑀚𑀺𑀦𑀲𑀸𑀲𑀦𑀫𑁄𑀢𑀭𑀺𑀢𑁆𑀯𑀸

𑀛𑀸𑀦𑀸𑀦𑁆𑀬’𑀮𑀢𑁆𑀣 𑀧𑀝𑀺𑀮𑀗𑁆𑀯𑀭𑀧𑁆𑀧𑀤𑀸𑀦𑁄; ()

𑁩. ¶

𑀢𑀲𑁆𑀲𑀸’𑀲𑀺 𑀭𑀫𑁆𑀫𑀯𑀢𑀺𑀦𑀸𑀫 𑀧𑀼𑀭𑀁 𑀲𑀼𑀦𑀦𑁆𑀤𑁄

𑀭𑀸𑀚𑀸 𑀅𑀳𑁄𑀲𑀺 𑀚𑀦𑀓𑁄 𑀚𑀦𑀦𑀻 𑀲𑀼𑀚𑀸𑀢𑀸,

𑀪𑀤𑁆𑀤𑀲𑁆𑀲𑀼𑀪𑀤𑁆𑀤𑀲𑀫𑀡𑀸 𑀯𑀭𑀲𑀸𑀯𑀓𑀸’𑀲𑀼𑀁

𑀢𑀺𑀲𑁆𑀲𑁄’𑀧𑀢𑀺𑀲𑁆𑀲’𑀲𑀫𑀡𑀺 𑀯𑀭𑀲𑀸𑀯𑀺𑀓𑀸𑀬𑁄; ()

𑁪.

𑀮𑀓𑁆𑀔𑀸𑀬𑀼𑀓𑁄 𑀯𑀺𑀚𑀬𑀩𑁄𑀥𑀺 𑀯𑀺𑀲𑀸𑀮𑀲𑀸𑀮-

𑀓𑀮𑁆𑀬𑀸𑀡𑀺 𑀦𑀸𑀫 𑀢𑀤𑀼𑀧𑀝𑁆𑀞𑀳𑀺 𑀘𑀸’𑀦𑀼𑀭𑀼𑀤𑁆𑀥𑁄,

𑀢𑀲𑁆𑀲𑀸’𑀝𑁆𑀞 𑀲𑀻𑀢𑀺𑀭𑀢𑀦𑀧𑁆𑀧𑀫𑀺𑀢𑀁 𑀲𑀭𑀻𑀭𑀁

𑀆𑀲𑀼𑀁 𑀢𑀬𑁄 𑀅𑀭𑀺𑀬𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸; ()

𑁫.

𑀢𑀲𑁆𑀲𑀸’𑀧𑀭𑁂𑀦 𑀲𑀫𑀬𑁂𑀦𑀺’𑀳’𑀦𑀗𑁆𑀕𑀪𑀗𑁆𑀕𑁄

𑀉𑀧𑁆𑀧𑀚𑁆𑀚𑀺 𑀫𑀗𑁆𑀕𑀮𑀚𑀺𑀦𑁄 𑀚𑀦𑀫𑀗𑁆𑀕𑀮𑀸𑀬,

𑀩𑀼𑀤𑁆𑀥𑀗𑁆𑀓𑀼𑀭𑁄’𑀢𑀺𑀭𑀼𑀘𑀺𑀭𑁄 𑀲𑀼𑀭𑀼𑀘𑀻 𑀲𑀫𑀜𑁆𑀜𑁄

𑀆𑀲𑀺 𑀢𑀤𑀸’𑀯𑀢𑀺𑀲𑀼𑀭𑁄 𑀤𑁆𑀯𑀺𑀚𑀯𑀁𑀲𑀓𑁂𑀢𑀼; ()

𑁬. ¶

𑀤𑀢𑁆𑀯𑀸 𑀲𑀲𑀸𑀯𑀓𑀚𑀺𑀢𑀲𑁆𑀲 𑀤𑀺𑀦𑀸𑀦𑀺 𑀲𑀢𑁆𑀢

𑀧𑀢𑁆𑀣𑁂𑀲𑀺 𑀩𑁄𑀥𑀺𑀫𑀲𑀫𑀁 𑀕𑀯𑀧𑀸𑀦𑀤𑀸𑀦𑀁,

𑀧𑀩𑁆𑀬𑀸𑀓𑀢𑁄 𑀪𑀕𑀯𑀢𑀸 𑀪𑀯𑀦𑀸’𑀳𑀻𑀕𑀦𑁆𑀢𑁆𑀯𑀸

𑀧𑀩𑁆𑀩𑀚𑁆𑀚𑀺𑀢𑁄 𑀲𑀼𑀔𑀫𑀯𑀺𑀦𑁆𑀤𑀺 𑀲𑀫𑀸𑀥𑀺𑀚𑀁 𑀲𑁄; ()

𑁭.

𑀢𑀲𑁆𑀲𑀼’𑀦𑁆𑀢𑀭𑀁 𑀧𑀼𑀭𑀯𑀭𑀁 𑀧𑀺𑀢𑀭𑁄’𑀢𑁆𑀢𑀭’𑀯𑁆𑀳𑀸

𑀆𑀲𑀼𑀁 𑀲𑀼𑀤𑁂𑀯𑀲𑀫𑀡𑁄 𑀯𑀲𑀺 𑀥𑀫𑁆𑀫𑀲𑁂𑀦𑁄,

𑀢𑀲𑁆𑀲𑀸’𑀕𑁆𑀕𑀲𑀸𑀯𑀓𑀬𑀼𑀕𑀁 𑀲𑀓𑀲𑀸𑀯𑀺𑀓𑀸𑀦𑀁

𑀪𑀤𑁆𑀤𑀁𑀬𑀼𑀕𑀁 𑀅𑀪𑀯𑀺 𑀲𑀺𑀯𑀮𑀺𑀘𑀸’𑀧𑁆𑀬’𑀲𑁄𑀓𑀸; ()

𑁮. ¶

𑀢𑀁 𑀧𑀸𑀮𑀺𑀢𑁄 𑀚𑀺𑀦𑀫𑀼𑀧𑀝𑁆𑀞𑀳𑀺 𑀅𑀝𑁆𑀞’𑀲𑀻𑀢𑀺

𑀳𑀢𑁆𑀣𑁄’𑀲𑀺 𑀢𑀲𑁆𑀲 𑀯𑀚𑀺𑀭𑀽𑀧𑀫𑀭𑀽𑀧𑀓𑀸𑀬𑁄,

𑀩𑁄𑀥𑀻’𑀧𑀺 𑀦𑀸𑀕𑀢𑀭𑀼 𑀲𑀸𑀯𑀓𑀲𑀦𑁆𑀢𑀺𑀧𑀸𑀢𑀸

𑀆𑀲𑀼𑀁 𑀢𑀬𑁄 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀫𑀸𑀬𑀼; ()

𑁯.

𑀢𑀲𑁆𑀲𑀸’𑀧𑀭𑁂𑀦 𑀲𑀼𑀫𑀦𑁄 𑀓𑀭𑀼𑀡𑀸𑀦𑀺𑀥𑀸𑀦𑁄

𑀦𑀸𑀣𑁄 𑀫𑀦𑁄𑀚𑀫𑀣𑀦𑁄 𑀉𑀤𑀧𑀸𑀤𑀺 𑀮𑁄𑀓𑁂,

𑀩𑀼𑀤𑁆𑀥𑀗𑁆𑀓𑀼𑀭𑁄’𑀪𑀯𑀺 𑀢𑀤𑀸’𑀢𑀼𑀮𑀦𑀸𑀕𑀭𑀸𑀚𑀸

𑀢𑁂𑀚’𑀕𑁆𑀕𑀺𑀚𑀸𑀮𑀚𑀮𑀺𑀢𑁄 𑀅𑀢𑀼𑀮𑀺𑀤𑁆𑀥𑀺𑀫𑀸 𑀲𑁄; ()

𑁧𑁦.

𑀦𑀸𑀕𑁄’𑀧𑀺 𑀦𑀸𑀕𑀪𑀯𑀦𑀫𑁆𑀳𑀺 𑀲𑀲𑀸𑀯𑀓𑀲𑁆𑀲

𑀩𑀼𑀤𑁆𑀥𑀲𑁆𑀲 𑀤𑀺𑀩𑁆𑀩𑀢𑀼𑀭𑀺𑀬𑁂𑀳𑀺 𑀓𑀢𑀼𑀧𑀳𑀸𑀭𑁄,

𑀤𑀢𑁆𑀯𑀸𑀦 𑀤𑀸𑀦𑀫𑀢𑀼𑀮𑀁 𑀧𑀡𑀺𑀥𑀺𑀁 𑀅𑀓𑀸𑀲𑀺

𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺 𑀢𑀼𑀯𑀦𑁆𑀢𑀺 𑀅𑀳𑀸𑀲𑀺 𑀩𑀼𑀤𑁆𑀥𑁄; ()

𑁧𑁧. ¶

𑀔𑁂𑀫𑀯𑁆𑀳𑀬𑀁 𑀧𑀼𑀭𑀫𑀳𑀽 𑀚𑀦𑀓𑁄 𑀲𑀼𑀤𑀦𑁆𑀢𑁄

𑀭𑀸𑀚𑀸 𑀚𑀦𑁂𑀢𑁆𑀢𑀺 𑀲𑀺𑀭𑀺𑀫𑀸 𑀦𑀺𑀚𑀲𑀸𑀯𑀓𑀸𑀦𑀁;

𑀅𑀕𑁆𑀕𑀸 𑀪𑀯𑀺𑀁𑀲𑀼 𑀲𑀭𑀡𑁄 𑀯𑀲𑀺 𑀪𑀸𑀯𑀺𑀢𑀢𑁆𑀢𑁄

𑀲𑁄𑀡𑀸 𑀢𑀤𑀕𑁆𑀕𑀲𑀫𑀡𑀺’𑀲𑀺 𑀢𑀣𑀼’𑀧𑀲𑁄𑀡𑀸; ()

𑁧𑁨.

𑀢𑀲𑁆𑀲𑀸’𑀲𑀺 𑀦𑀸𑀕𑀢𑀭𑀼 𑀩𑁄𑀥𑀺 𑀉𑀤𑁂𑀦𑀢𑁂𑀭𑁄-

𑀧𑀝𑁆𑀞𑀸𑀬𑀓𑁄 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀫𑀸𑀬𑀼,

𑀉𑀩𑁆𑀩𑁂𑀥𑀢𑁄 𑀦𑀯𑀼𑀢𑀺𑀳𑀢𑁆𑀣𑀫𑀺𑀢𑀁 𑀲𑀭𑀻𑀭𑀁

𑀆𑀲𑀼𑀁 𑀢𑀬𑁄 𑀅𑀭𑀺𑀬𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸; ()

𑁧𑁩.

𑀢𑀲𑁆𑀲𑀸’𑀧𑀭𑁂𑀦 𑀉𑀤𑀧𑀸𑀤𑀺’𑀳 𑀭𑁂𑀯𑀢𑀸𑀔𑁆𑀬𑁄

𑀤𑁂𑀯𑀸𑀤𑀺𑀯𑀦𑁆𑀤𑀺𑀢𑀧𑀤𑁄 𑀪𑀼𑀯𑀺 𑀤𑁂𑀯𑀤𑁂𑀯𑁄,

𑀲𑀢𑁆𑀢𑀼𑀢𑁆𑀢𑀫𑁄 𑀪𑀯𑀺 𑀢𑀤𑀸 𑀅𑀢𑀺𑀤𑁂𑀯𑀦𑀸𑀫𑁄

𑀪𑁄𑀯𑀸𑀤𑀺𑀯𑀁𑀲𑀢𑀺𑀮𑀓𑁄 𑀘𑀢𑀼𑀯𑁂𑀤𑀯𑁂𑀤𑀻; ()

𑁧𑁪. ¶

𑀩𑀤𑁆𑀥𑀜𑁆𑀚𑀮𑀻 𑀲𑀺𑀭𑀲𑀺 𑀥𑀫𑁆𑀫𑀓𑀣𑀁 𑀦𑀺𑀲𑀫𑁆𑀫

𑀕𑀦𑁆𑀢𑁆𑀯𑀸𑀦 𑀢𑀁 𑀲𑀭𑀡𑀫𑀼𑀢𑁆𑀢𑀭𑀫𑀼𑀢𑁆𑀢𑀭𑀺𑀬𑀁;

𑀤𑀢𑁆𑀯𑀸’𑀳𑀺𑀧𑀢𑁆𑀣𑀬𑀺 𑀲𑀼𑀔𑁄𑀥𑀺𑀫𑀣𑁄 𑀫𑀳𑁂𑀲𑀺

𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺 𑀢𑀼𑀯𑀦𑁆𑀢𑀻 𑀯𑀺𑀲𑀸𑀓𑀭𑀺𑀢𑁆𑀣; ()

𑁧𑁫.

𑀢𑀲𑁆𑀲𑀸’𑀲𑀺 𑀥𑀜𑁆𑀜𑀯𑀢𑀺𑀦𑀸𑀫 𑀧𑀼𑀭𑀁 𑀚𑀺𑀦𑀲𑁆𑀲

𑀫𑀸𑀢𑀸 𑀫𑀳𑁂𑀲𑀺 𑀯𑀺𑀧𑀼𑀮𑀸 𑀯𑀺𑀧𑀼𑀮𑁄 𑀧𑀺𑀢𑀸’𑀲𑀺,

𑀲𑀩𑁆𑀭𑀳𑁆𑀫𑀤𑁂𑀯𑀯𑀭𑀼𑀡𑁄 𑀪𑀯𑀺 𑀲𑀗𑁆𑀖𑀫𑀚𑁆𑀛𑁂

𑀪𑀤𑁆𑀤𑀸 𑀘 𑀪𑀤𑁆𑀤𑀬𑀼𑀕𑀮𑀁 𑀤𑀼𑀯𑀺𑀥𑀁 𑀲𑀼𑀪𑀤𑁆𑀤𑀸; ()

𑁧𑁬.

𑀢𑀁 𑀲𑀫𑁆𑀪𑀯𑁄 𑀯𑀲𑀺 𑀉𑀧𑀝𑁆𑀞𑀳𑀺 𑀦𑀸𑀕𑀩𑁄𑀥𑀺

𑀭𑀼𑀓𑁆𑀔𑁄𑀧𑁆𑀬’𑀲𑀺𑀢𑀺𑀭𑀢𑀦𑀁 𑀪𑀯𑀺 𑀅𑀢𑁆𑀢𑀪𑀸𑀯𑁄,

𑀆𑀬𑀼𑀧𑁆𑀧𑀫𑀸𑀡𑀫𑁆𑀧𑀺 𑀲𑀝𑁆𑀞𑀺𑀲𑀳𑀲𑁆𑀲𑀯𑀲𑁆𑀲𑀁

𑀆𑀲𑀼𑀁 𑀢𑀬𑁄 𑀅𑀭𑀺𑀬𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸𑀢;

𑁧𑁭. ¶

𑀢𑀲𑁆𑀲𑀸’𑀧𑀭𑀫𑁆𑀳𑀺 𑀲𑀫𑀬𑁂 𑀚𑀦𑀧𑀸𑀭𑀺𑀚𑀸𑀢𑁄

𑀉𑀧𑁆𑀧𑀚𑁆𑀚𑀺 𑀲𑁄𑀪𑀺𑀢𑀚𑀺𑀦𑁄 𑀚𑀺𑀢𑀧𑀜𑁆𑀘𑀫𑀸𑀭𑁄,

𑀅𑀚𑁆𑀛𑀸𑀬𑀓𑁄 𑀲𑀓𑀮𑀯𑁂𑀤 𑀫𑀼𑀴𑀸𑀭𑀪𑁄𑀕𑀻

𑀩𑀼𑀤𑁆𑀥𑀗𑁆𑀓𑀼𑀭𑁄 𑀪𑀯𑀺 𑀢𑀤𑀸’𑀚𑀺𑀢𑀦𑀸𑀫𑀯𑀧𑁆𑀧𑁄;

𑁧𑁮.

𑀥𑀫𑁆𑀫𑀁 𑀦𑀺𑀲𑀫𑁆𑀫 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀳𑀺𑀢𑁆𑀯𑀸

𑀲𑀗𑁆𑀖𑀲𑁆𑀲 𑀩𑀼𑀤𑁆𑀥𑀧𑀫𑀼𑀔𑀲𑁆𑀲 𑀉𑀴𑀸𑀭𑀤𑀸𑀦𑀁,

𑀤𑀢𑁆𑀯𑀸 𑀧𑀥𑀸𑀦𑀧𑀡𑀺𑀥𑀸𑀦 𑀫𑀓𑀸𑀲𑀺 𑀥𑀻𑀭𑁄

𑀢𑁆𑀯𑀁 𑀮𑀘𑁆𑀙𑀲𑀺’𑀢𑀺 𑀯𑀭𑀩𑁄𑀥𑀺 𑀫𑀳𑀸𑀲𑀺 𑀲𑀢𑁆𑀣𑀸; ()

𑁧𑁯.

𑀭𑀫𑁆𑀫𑀁 𑀲𑀼𑀥𑀫𑁆𑀫𑀫𑀳𑀼 𑀢𑀲𑁆𑀲 𑀧𑀼𑀭𑀁 𑀲𑀼𑀥𑀫𑁆𑀫𑁄

𑀭𑀸𑀚𑀸 𑀅𑀳𑁄𑀲𑀺 𑀚𑀦𑀓𑁄 𑀚𑀦𑀺𑀓𑀸 𑀲𑀼𑀥𑀫𑁆𑀫𑀸

𑀢𑀲𑁆𑀲𑀸’𑀕𑁆𑀕𑀲𑀸𑀯𑀓𑀬𑀼𑀕𑀁 𑀅𑀲𑀫𑁄 𑀲𑀼𑀦𑁂𑀢𑁆𑀢𑁄

𑀢𑀲𑁆𑀲𑀸𑀯𑀺𑀓𑀸’𑀕𑁆𑀕𑀬𑀼𑀕𑀮𑀁 𑀦𑀓𑀼𑀮𑀸 𑀲𑀼𑀚𑀸𑀢𑀸; ()

𑁨𑁦. ¶

𑀦𑀸𑀕𑀲𑁆𑀲 𑀦𑀸𑀕𑀢𑀭𑀼 𑀩𑁄𑀥𑀺 𑀲𑀭𑀻𑀭𑀫𑀝𑁆𑀞-

𑀧𑀡𑁆𑀡𑀸𑀲𑀳𑀢𑁆𑀣𑀧𑀫𑀺𑀢𑀁 𑀢𑀫𑀢𑁄𑀫𑀣𑁂𑀭𑁄,

𑀲𑁄𑀧𑀝𑁆𑀞𑀳𑀻 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀫𑀸𑀬𑀼

𑀆𑀲𑀼𑀁 𑀢𑀬𑁄 𑀅𑀭𑀺𑀬 𑀲𑀸𑀯𑀓 𑀲𑀦𑁆𑀦𑀺𑀧𑀸𑀢𑀸; ()

𑁨𑁧.

𑀉𑀧𑁆𑀧𑀚𑁆𑀚𑀺 𑀢𑀲𑁆𑀲 𑀅𑀧𑀭𑁂𑀦 𑀅𑀦𑁄𑀫𑀤𑀲𑁆𑀲𑀺

𑀩𑀼𑀤𑁆𑀥𑁄 𑀧𑀩𑀼𑀤𑁆𑀥𑀓𑀫𑀮𑀸𑀫𑀮𑀦𑀻𑀮𑀦𑁂𑀢𑁆𑀢𑁄,

𑀩𑀼𑀤𑁆𑀥𑀗𑁆𑀓𑀼𑀭𑁄 𑀚𑀺𑀢𑀲𑀼𑀭𑀸𑀭𑀺 𑀢𑀤𑀸𑀦𑀺 𑀬𑀓𑁆𑀔-

𑀲𑁂𑀦𑀸𑀧𑀢𑀻 𑀪𑀯𑀺 𑀫𑀳𑀺𑀤𑁆𑀥𑀺𑀫𑀳𑀸𑀦𑀼𑀪𑀸𑀯𑁄; ()

𑁨𑁨.

𑀲𑀫𑁆𑀩𑁄𑀥𑀺 𑀫𑀕𑁆𑀕𑀧𑀼𑀭𑀺𑀲𑁄 𑀧𑀡𑀺𑀥𑀸𑀦𑀬𑀁 𑀲𑁄

𑀲𑀗𑁆𑀖𑀲𑁆𑀲 𑀩𑀼𑀤𑁆𑀥𑀧𑀫𑀼𑀔𑀲𑁆𑀲 𑀉𑀴𑀸𑀭𑀤𑀸𑀦𑀁,

𑀧𑀸𑀤𑀸𑀲𑀺 𑀢𑀺𑀲𑀼 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀳𑀺𑀢𑁆𑀯𑀸

𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺 𑀢𑀼𑀯𑀦𑁆𑀢𑀺 𑀚𑀺𑀦𑁄’𑀩𑁆𑀭𑀼𑀯𑀺𑀢𑀁; ()

𑁨𑁩. ¶

𑀞𑀸𑀦𑀜𑁆𑀳𑀺 𑀘𑀦𑁆𑀤𑀯𑀢𑀺𑀦𑀸𑀫 𑀬𑀲𑁄𑀥𑀭𑀸𑀔𑁆𑀬𑀸

𑀫𑀸𑀢𑀸 𑀫𑀳𑁂𑀲𑀺 𑀬𑀲𑀯𑀸 𑀚𑀦𑀓𑁄 𑀚𑀦𑀺𑀦𑁆𑀤𑁄,

𑀢𑀲𑁆𑀲’𑀕𑁆𑀕𑀲𑀸𑀯𑀓𑀬𑀼𑀕𑀁 𑀦𑀺𑀲𑀪𑁄 𑀅𑀢𑁄𑀫𑁄

𑀤𑁆𑀯𑁂 𑀲𑀼𑀦𑁆𑀤𑀭𑀻 𑀘 𑀲𑀼𑀫𑀦𑀸 𑀘𑀭𑀲𑀸𑀯𑀺𑀓𑀸’𑀲𑀼𑀁; ()

𑁨𑁪.

𑀩𑁄𑀥𑀻’𑀧𑀺 𑀢𑀲𑁆𑀲 𑀓𑀓𑀼𑀥𑁄 𑀫𑀼𑀦𑀺𑀤𑁂𑀳𑀫𑀝𑁆𑀞-

𑀧𑀡𑁆𑀡𑀸𑀲𑀳𑀢𑁆𑀣𑀧𑀫𑀺𑀢𑀁 𑀯𑀭𑀼𑀡𑀸𑀪𑀺𑀥𑀸𑀦𑁄,

𑀣𑁂𑀭𑁄 𑀉𑀧𑀝𑁆𑀞𑀳𑀺 𑀘 𑀮𑀓𑁆𑀔𑀧𑀫𑀸𑀡𑀫𑀸𑀬𑀼

𑀆𑀲𑀼𑀁 𑀢𑀬𑁄 𑀅𑀭𑀺𑀬𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸; ()

𑁨𑁫.

𑀢𑀲𑁆𑀲𑀸’𑀧𑀭𑁂𑀦 𑀧𑀤𑀼𑀫𑁄 𑀤𑀺𑀧𑀤𑀸𑀦𑀫𑀺𑀦𑁆𑀤𑁄

𑀚𑀸𑀢𑁄 𑀧𑀩𑀼𑀚𑁆𑀛𑀺𑀢𑀫𑀦𑁄𑀧𑀤𑀼𑀫𑁄 𑀧𑀚𑀸𑀦𑀁,

𑀥𑀻𑀭𑁄 𑀩𑀪𑀽𑀯 𑀯𑀭𑀯𑀸𑀭𑀡𑀓𑀼𑀫𑁆𑀪𑀪𑁂𑀤𑀻

𑀲𑀻𑀳𑁄 𑀢𑀤𑀸 𑀭𑀼𑀘𑀺𑀭𑀓𑁂𑀲𑀭𑀪𑀸𑀭𑀕𑀻𑀯𑁄; ()

𑁨𑁬. ¶

𑀩𑀼𑀤𑁆𑀥𑀁 𑀦𑀺𑀭𑁄𑀥𑀲𑀼𑀔𑀯𑁂𑀤𑀺𑀬𑀦𑀁 𑀯𑀢𑀫𑁆𑀳𑀺

𑀲𑀢𑁆𑀢𑀸𑀳𑀫𑀓𑁆𑀔𑀺𑀧𑀤𑀽𑀫𑁂𑀳𑀺 𑀢𑀫𑀘𑁆𑀘𑀬𑀺𑀢𑁆𑀯𑀸,

𑀘𑀺𑀢𑁆𑀢𑀁 𑀧𑀲𑀸𑀤𑀺𑀬 𑀧𑀼𑀦𑀸’𑀕𑀢𑀲𑀸𑀯𑀓𑁂𑀲𑀼

𑀲𑀻𑀳𑁄 𑀯𑀺𑀪𑀸𑀲𑀺 𑀧𑀝𑀺𑀮𑀤𑁆𑀥𑀯𑀭𑀧𑁆𑀧𑀤𑀸𑀦𑁄; ()

𑁨𑁭.

𑀢𑀲𑁆𑀲𑀸’𑀲𑀺 𑀘𑀫𑁆𑀧𑀓𑀧𑀼𑀭𑀁 𑀧𑀤𑀼𑀫𑀸𑀪𑀺𑀥𑀸𑀦𑁄

𑀭𑀸𑀚𑀸 𑀅𑀳𑁄𑀲𑀺 𑀚𑀦𑀓𑁄 𑀅𑀲𑀫𑀸 𑀚𑀦𑁂𑀢𑁆𑀢𑀻,

𑀲𑀸𑀮𑁄𑀧𑀲𑀸𑀮𑀬𑀢𑀬𑁄 𑀯𑀭𑀲𑀸𑀯𑀓𑀸’𑀲𑀼𑀁

𑀭𑀸𑀫𑀸’𑀧𑀺 𑀢𑀲𑁆𑀲 𑀧𑀭𑀫𑀸𑀲𑀫𑀡𑀺 𑀲𑀼𑀭𑀸𑀫𑀸; ()

𑁨𑁮.

𑀦𑀸𑀫𑁂𑀦𑀼’𑀧𑀝𑁆𑀞𑀳𑀺 𑀯𑀲𑀺 𑀯𑀭𑀼𑀡𑁄 𑀢𑀫𑀝𑁆𑀞-

𑀧𑀡𑁆𑀡𑀸𑀲𑀳𑀢𑁆𑀣𑀫𑀺𑀢 𑀫𑀲𑁆𑀲 𑀲𑀭𑀻𑀭𑀫𑀸’𑀲𑀺,

𑀩𑁄𑀥𑀺’𑀧𑀺 𑀲𑁄𑀡𑀢𑀭𑀼 𑀮𑀓𑁆𑀔𑀧𑀫𑀸𑀡𑀫𑀸𑀬𑀼

𑀆𑀲𑀼𑀁 𑀢𑀬𑁄 𑀅𑀭𑀺𑀬𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸; ()

𑁨𑁯. ¶

𑀢𑀲𑁆𑀲𑀸’𑀧𑀭𑁂𑀦 𑀯𑀭𑀤𑁄 𑀫𑀼𑀦𑀺 𑀦𑀸𑀭𑀤𑀯𑁆𑀳𑁄

𑀧𑀸𑀧𑀦𑁆𑀥𑀓𑀸𑀭𑀦𑀺𑀓𑀭𑀁 𑀪𑀻𑀤𑀼𑀭𑁄’𑀤𑀧𑀸𑀤𑀺,

𑀩𑀼𑀤𑁆𑀥𑀗𑁆𑀓𑀼𑀭𑁄 𑀪𑀯𑀺 𑀢𑀤𑀸’𑀔𑀺𑀮𑀛𑀸𑀢𑀪𑀺𑀜𑁆𑀜𑀸-

𑀮𑀸𑀪𑀻 𑀧𑀯𑀢𑁆𑀢𑀨𑀮𑀪𑁄𑀚𑀺 𑀢𑀧𑁄𑀥𑀦𑀻𑀲𑁄; ()

𑁩𑁦.

𑀓𑀢𑁆𑀯𑀸𑀦𑀼’𑀴𑀸𑀭𑀧𑀡𑀺𑀥𑀸𑀦 𑀫𑀼𑀴𑀸𑀭𑀯𑀺𑀭𑁄

𑀤𑀢𑁆𑀯𑀸 𑀲𑀲𑀸𑀯𑀓𑀚𑀺𑀦𑀲𑁆𑀲 𑀉𑀴𑀸𑀭𑀤𑀸𑀦𑀁,

𑀧𑀽𑀚𑁂𑀲𑀺 𑀢𑀁 𑀲𑀼𑀭𑀪𑀺𑀦𑀸 𑀳𑀭𑀺𑀘𑀦𑁆𑀤𑀦𑁂𑀦

𑀲𑀢𑁆𑀣𑀸𑀧𑀺 𑀲𑀫𑁆𑀧𑀢𑀺 𑀯𑀺𑀬𑀸𑀓𑀭𑀡𑀁 𑀅𑀤𑀸𑀲𑀺; ()

𑁩𑁧.

𑀢𑀲𑁆𑀲𑀸’𑀲𑀺 𑀥𑀜𑁆𑀜𑀯𑀢𑀺𑀦𑀸𑀫 𑀧𑀼𑀭𑀁 𑀲𑀼𑀫𑁂𑀥𑁄

𑀭𑀸𑀚𑀸 𑀅𑀳𑁄𑀲𑀺 𑀚𑀦𑀓𑁄 𑀚𑀦𑀦𑀻 𑀅𑀦𑁄𑀫𑀸,

𑀤𑁆𑀯𑁂 𑀪𑀤𑁆𑀤𑀲𑀸𑀮𑀚𑀺𑀢𑀫𑀺𑀢𑁆𑀢𑀯𑀲𑀺 𑀯𑀲𑀺𑀦-

𑀫𑀕𑁆𑀕𑁄’𑀦𑁆𑀢𑀭𑀸 𑀲𑀫𑀡𑀺 𑀨𑀕𑁆𑀕𑀼𑀡𑀺 𑀪𑀺𑀓𑁆𑀔𑀼𑀦𑀻𑀢𑀁; ()

𑁩𑁨. ¶

𑀯𑀸𑀲𑁂𑀝𑁆𑀞𑀪𑀺𑀓𑁆𑀔𑀼 𑀢𑀤𑀼𑀧𑀝𑁆𑀞𑀳𑀺 𑀭𑀽𑀧𑀓𑀸𑀬𑁄

𑀢𑀲𑁆𑀲𑀸’𑀝𑁆𑀞𑀲𑀺𑀢𑀺𑀭𑀢𑀦𑀁 𑀫𑀳𑀲𑁄𑀡𑀲𑀸𑀔𑀻,

𑀩𑁄𑀥𑀺𑀤𑁆𑀤𑀼𑀫𑁄 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀫𑀸𑀬𑀼

𑀆𑀲𑀼𑀁 𑀢𑀬𑁄 𑀅𑀭𑀺𑀬𑀲𑀸𑀯𑀓𑀲𑀦𑁆𑀢𑀺𑀧𑀸𑀢𑀸; ()

𑁩𑁩.

𑀢𑀲𑁆𑀲𑀸’𑀧𑀭𑁂𑀦 𑀧𑀤𑀼𑀫𑀼𑀢𑁆𑀢𑀭 𑀥𑀫𑁆𑀫𑀭𑀸𑀚𑀸

𑀚𑀸𑀢𑁄 𑀢𑀺𑀮𑁄𑀓𑀧𑀤𑀼𑀫𑁄 𑀧𑀤𑀼𑀫𑀧𑁆𑀧𑀺𑀢𑀗𑁆𑀖𑀻,

𑀅𑀟𑁆𑀠𑁄 𑀉𑀴𑀸𑀭𑀯𑀺𑀪𑀯𑁄 𑀫𑀳𑀭𑀝𑁆𑀞𑀺𑀬𑁄 𑀲𑁄

𑀩𑀼𑀤𑁆𑀥𑀗𑁆𑀓𑀼𑀭𑁄 𑀪𑀯𑀺 𑀢𑀤𑀸 𑀚𑀝𑀺𑀮𑀸𑀪𑀺𑀥𑀸𑀦𑁄;()

𑁩𑁪.

𑀲𑀫𑁆𑀩𑁄𑀥𑀺𑀬𑀸’𑀥𑀺𑀕𑀫 𑀧𑀘𑁆𑀘𑀬𑀧𑀢𑁆𑀣𑀦𑀁 𑀲𑁄

𑀯𑀺𑀭𑁄𑀯𑀺𑀥𑀸𑀬 𑀧𑀤𑀼𑀫𑀼𑀢𑁆𑀢𑀭𑀧𑀸𑀤𑀫𑀽𑀮𑁂,

𑀲𑀗𑁆𑀖𑀲𑁆𑀲 𑀩𑀼𑀤𑁆𑀥𑀧𑀫𑀼𑀔𑀲𑁆𑀲 𑀢𑀺𑀘𑀺𑀯𑀭𑀸𑀦𑀺

𑀧𑀸𑀤𑀸𑀲𑀺 𑀢𑀻𑀲𑀼𑀭𑀢𑀦𑁂𑀲𑀼 𑀅𑀪𑀺𑀧𑁆𑀧𑀲𑀦𑁆𑀦𑁄; ()

𑁩𑁫. ¶

𑀢𑀲𑁆𑀲𑀸’𑀲𑀺 𑀳𑀁𑀲𑀯𑀢𑀺𑀦𑀸𑀫 𑀧𑀼𑀭𑀁 𑀚𑀺𑀦𑀲𑁆𑀲

𑀆𑀦𑀦𑁆𑀤𑀪𑀼𑀧𑀢𑀺 𑀧𑀺𑀢𑀸 𑀚𑀦𑀺𑀓𑀸 𑀲𑀼𑀚𑀸𑀢𑀸,

𑀤𑁆𑀯𑁂 𑀢𑀲𑁆𑀲 𑀤𑁂𑀯𑀮𑀲𑀼𑀚𑀸𑀢𑀯𑀲𑀺 𑀯𑀲𑀺𑀦𑀁

𑀅𑀕𑁆𑀕𑀸 𑀪𑀯𑀺𑀁𑀲𑀼 𑀲𑀫𑀡𑀺𑀲𑁆𑀯𑀸𑀫𑀺𑀢𑀸𑀲𑀫𑀸’𑀕𑁆𑀕𑀸; ()

𑁩𑁬.

𑀮𑀓𑁆𑀔𑀸𑀬𑀼𑀓𑁄 𑀲𑀚𑀬𑀩𑁄𑀥𑀺𑀓 𑀯𑀺𑀲𑀸𑀮𑀲𑀸𑀮

𑀭𑀼𑀓𑁆𑀔𑁄 𑀉𑀧𑀝𑁆𑀞𑀳𑀺 𑀫𑀼𑀦𑀺𑀁 𑀲𑀼𑀫𑀦𑀸𑀪𑀺𑀥𑀸𑀦𑁄,

𑀢𑀲𑁆𑀲’𑀝𑁆𑀞’𑀲𑀺𑀢𑀺𑀭𑀢𑀦𑀧𑁆𑀧𑀫𑀺𑀢𑀁 𑀲𑀭𑀻𑀭𑀁

𑀆𑀲𑀼𑀁 𑀢𑀬𑁄 𑀪𑀕𑀯𑀢𑁄 𑀕𑀡𑀲𑀦𑁆𑀦𑀺𑀧𑀸𑀢𑀸; ()

𑁩𑁭.

𑀢𑀲𑁆𑀲𑀸’𑀧𑀭𑁂𑀦 𑀲𑀫𑀬𑁂𑀦 𑀲𑀼𑀫𑁂𑀥𑀦𑀸𑀫𑁄

𑀮𑁄𑀓𑀫𑁆𑀳𑀺 𑀧𑀸𑀢𑀼𑀪𑀯𑀺 𑀮𑁄𑀓𑀳𑀺𑀢𑀸𑀬 𑀲𑀢𑁆𑀣𑀸,

𑀩𑀼𑀤𑁆𑀥𑀗𑁆𑀓𑀼𑀭𑁄 𑀓𑀺𑀭 𑀢𑀤𑀸𑀦𑁆𑀬𑀼’𑀪𑀢𑁄 𑀲𑀼𑀚𑀸𑀢𑁄

𑀲𑁆𑀯𑀸’𑀲𑀺𑀢𑀺𑀓𑁄𑀝𑀺𑀯𑀺𑀪𑀯𑁄’𑀢𑁆𑀢𑀭 𑀫𑀸𑀡𑀯𑁄’𑀲𑀺; ()

𑁩𑁮. ¶

𑀯𑀺𑀲𑁆𑀲𑀚𑁆𑀚𑀺𑀬𑀸𑀦 𑀯𑀺𑀪𑀯𑀁 𑀢𑀺𑀁𑀲𑀢𑀺𑀓𑁄𑀝𑀺𑀁

𑀤𑀢𑁆𑀯𑀸𑀦 𑀤𑀸𑀦𑀫𑀲𑁆𑀫𑀁 𑀲𑀼𑀕𑀢𑁂 𑀲𑀲𑀗𑁆𑀖𑁂,

𑀧𑀩𑁆𑀩𑀚𑁆𑀚𑀺𑀢𑁄 𑀧𑀭𑀫𑀩𑁄𑀥𑀺 𑀫𑀧𑀢𑁆𑀣𑀬𑀺𑀢𑁆𑀣

𑀩𑁆𑀬𑀸𑀓𑀸𑀲𑀺 𑀲𑁄𑀫𑀼𑀦𑀺 𑀢’𑀫𑀺𑀚𑁆𑀛𑀦𑀪𑀸𑀯’𑀫𑀤𑁆𑀥𑀸; ()

𑁩𑁯.

𑀭𑀫𑁆𑀫𑀁 𑀲𑀼𑀤𑀲𑁆𑀲𑀦𑀫𑀳𑀽 𑀦𑀕𑀭𑀁 𑀲𑀼𑀤𑀦𑁆𑀢𑁄

𑀢𑀲𑁆𑀲𑀸’𑀲𑀺 𑀪𑀽𑀧𑀢𑀺 𑀧𑀺𑀢𑀸 𑀚𑀦𑀦𑀻 𑀲𑀼𑀤𑀢𑁆𑀢𑀸,

𑀲𑀗𑁆𑀖𑁂𑀲𑀼’𑀳𑁄𑀲𑀼 𑀲𑀭𑀡𑁄 𑀯𑀲𑀺 𑀲𑀩𑁆𑀩𑀓𑀸𑀫𑁄

𑀭𑀸𑀫𑀸 𑀬𑀫𑀸𑀦𑀺 𑀧𑀭𑀫𑀸𑀦𑁆𑀬’𑀪𑀯𑀼𑀁𑀓 𑀲𑀼𑀭𑀸𑀫𑀸; ()

𑁪𑁦. ¶

𑀩𑁄𑀥𑀻’𑀧𑀺 𑀦𑀻𑀧𑀢𑀭𑀼 𑀲𑀸𑀕𑀭𑀦𑀸𑀫𑀣𑁂𑀭𑁄

’𑀧𑀝𑁆𑀞𑀸𑀲𑀺 𑀢𑀁 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀫𑀸𑀬𑀼,

𑀢𑀲𑁆𑀲𑀸’𑀠𑀲𑀺𑀢𑀺𑀭𑀢𑀦𑀼’𑀕𑁆𑀕𑀢𑀫𑀸𑀲𑀺 𑀕𑀢𑁆𑀢𑀁

𑀆𑀲𑀼𑀁 𑀢𑀬𑁄 𑀲𑀢𑀺𑀫𑀢𑁄 𑀕𑀡𑀲𑀦𑁆𑀢𑀺𑀧𑀸𑀢𑀸; ()

𑁪𑁧.

𑀢𑀲𑁆𑀲𑀸’𑀧𑀭𑁂𑀦 𑀲𑀫𑀬𑁂𑀦 𑀚𑀦𑀧𑁆𑀧𑀤𑀻𑀧𑁄

𑀚𑀸𑀢𑁄 𑀲𑀼𑀚𑀸𑀢𑀪𑀕𑀯𑀸 𑀚𑀺𑀢𑀧𑀜𑁆𑀘𑀫𑀸𑀭𑁄,

𑀲𑀫𑁆𑀧𑀦𑁆𑀦𑀲𑀢𑁆𑀢𑀭𑀢𑀢𑁄 𑀯𑀭𑀘𑀓𑁆𑀓𑀯𑀢𑁆𑀢𑀺

𑀭𑀸𑀚𑀸 𑀩𑀪𑀽𑀯𑀺’𑀳 𑀫𑀳𑀸𑀧𑀼𑀭𑀺𑀲𑁄 𑀢𑀤𑀸𑀲𑁄; ()

𑁪𑁨.

𑀥𑀫𑁆𑀫𑀸’𑀫𑀢𑁂𑀦 𑀫𑀼𑀤𑀺𑀢𑁄 𑀭𑀢𑀦𑀤𑁆𑀯𑀬𑀲𑁆𑀲

𑀤𑀢𑁆𑀯𑀸 𑀲𑀲𑀢𑁆𑀢𑀭𑀢𑀦𑀁 𑀘𑀢𑀼𑀤𑀻𑀧𑀭𑀚𑁆𑀚𑀁,

𑀧𑀩𑁆𑀩𑀚𑁆𑀚𑀺 𑀩𑁄𑀥𑀺𑀧𑀡𑀺𑀥𑀺𑀁 𑀧𑀡𑀺𑀥𑀸𑀬 𑀥𑀻𑀫𑀸

𑀜𑀢𑁆𑀯𑀸 𑀫𑀳𑀸𑀫𑀼𑀦𑀺 𑀢𑀫𑀺𑀚𑁆𑀛𑀦𑀪𑀸𑀯𑀫𑀸𑀳;

𑁪𑁩. ¶

𑀭𑀫𑁆𑀫𑀁 𑀲𑀼𑀫𑀗𑁆𑀕𑀮𑀫𑀳𑀽 𑀧𑀼𑀭𑀫𑀼𑀕𑁆𑀕𑀢𑀸𑀔𑁆𑀬𑁄

𑀭𑀸𑀚𑀸 𑀧𑀺𑀢𑀸𑀪𑀯𑀺 𑀧𑀪𑀸𑀯𑀢𑀺𑀦𑀸𑀫 𑀫𑀸𑀢𑀸,

𑀅𑀕𑁆𑀕𑀸𑀪𑀯𑀺𑀁𑀲𑀼 𑀘 𑀲𑀼𑀤𑀲𑁆𑀲𑀦𑀤𑁂𑀯𑀣𑁂𑀭𑀸

𑀦𑀸𑀕𑀸 𑀕𑀡𑀲𑁆𑀲𑀤𑀲𑀺 𑀦𑀸𑀕𑀲𑀫𑀸𑀮𑀣𑁂𑀭𑀺; ()

𑁪𑁪.

𑀢𑀁 𑀦𑀸𑀭𑀤𑁄𑀫𑀼𑀦𑀺𑀭𑀼’𑀧𑀝𑁆𑀞𑀳𑀺 𑀘’𑀢𑁆𑀢𑀪𑀸𑀯𑁄

𑀧𑀡𑁆𑀡𑀸𑀲𑀳𑀢𑁆𑀣𑀧𑀫𑀺𑀢𑁄 𑀪𑀯𑀺𑀯𑁂𑀡𑀼𑀩𑁄𑀥𑀺,

𑀢𑀲𑁆𑀲𑀸’𑀪𑀯𑀻 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀫𑀸𑀬𑀼

𑀆𑀲𑀼𑀁 𑀢𑀬𑁄 𑀥𑀻𑀢𑀺𑀫𑀢𑁄 𑀕𑀡𑀲𑀦𑁆𑀦𑀺𑀧𑀸𑀢𑀸; ()

𑁪𑁫.

𑀢𑀲𑁆𑀲𑀸’𑀧𑀭𑁂𑀦𑀺’𑀳 𑀦𑀺𑀭𑀽𑀧𑀫𑀭𑀽𑀧𑀲𑀸𑀭𑁄

𑀚𑀸𑀢𑁄𑀩𑀪𑀽𑀯 𑀧𑀺𑀬𑀤𑀲𑁆𑀲𑀺𑀲𑀫𑀦𑁆𑀢𑀤𑀲𑁆𑀲𑀺,

𑀥𑀻𑀭𑁄 𑀢𑀤𑀦𑁆𑀬’𑀪𑀯𑀺 𑀓𑀲𑁆𑀲𑀧𑀫𑀸𑀡𑀯𑁄 𑀲𑁄

𑀯𑁂𑀤𑁂𑀲𑀼 𑀢𑀻𑀲𑀼 𑀓𑀼𑀲𑀮𑁄 𑀓𑀼𑀲𑀮𑀁 𑀕𑀯𑁂𑀲𑀺; ()

𑁪𑁬. ¶

𑀲𑁄 𑀓𑁄𑀝𑀺𑀮𑀓𑁆𑀔𑀧𑀭𑀺𑀫𑀸𑀡𑀥𑀢𑀩𑁆𑀩𑀬𑁂𑀦

𑀲𑀗𑁆𑀕𑀲𑁆𑀲 𑀩𑀼𑀤𑁆𑀥𑀧𑀫𑀼𑀔𑀲𑁆𑀲 𑀫𑀳𑀸𑀯𑀺𑀳𑀸𑀭𑀁,

𑀓𑀢𑁆𑀯𑀸 𑀧𑀤𑀸𑀲𑀺 𑀅𑀪𑀺𑀧𑀢𑁆𑀣𑀺𑀢𑀩𑀼𑀤𑁆𑀥𑀪𑀸𑀯𑁄

𑀩𑀼𑀤𑁆𑀥𑁄’𑀧𑀺 𑀢𑀧𑁆𑀧𑀡𑀺𑀥𑀺𑀲𑀺𑀤𑁆𑀥𑀺 𑀲𑀺𑀬𑀸’𑀢𑁆𑀬’𑀪𑀸𑀲𑀺; ()

𑁪𑁭.

𑀘𑀦𑁆𑀤𑀸𑀫𑀳𑁂𑀲𑀺 𑀚𑀦𑀦𑀻 𑀚𑀦𑀓𑁄 𑀧𑀼𑀤𑀺𑀦𑁆𑀦𑁄

𑀭𑀸𑀚𑀸 𑀩𑀪𑀽𑀯 𑀧𑀼𑀭𑀫𑀲𑁆𑀲 𑀅𑀦𑁄𑀫𑀦𑀸𑀫𑀁,

𑀆𑀲𑀼𑀁 𑀢𑀤𑀕𑁆𑀕𑀬𑀼𑀕𑀮𑀸𑀦𑀺 𑀲𑀼𑀚𑀸𑀢𑀥𑀫𑁆𑀫-

𑀤𑀺𑀦𑁆𑀦𑀸 𑀕𑀡𑀲𑁆𑀲𑀤𑀲𑀺 𑀧𑀓𑀸𑀮𑀺𑀢𑀲𑀩𑁆𑀩𑀤𑀲𑁆𑀲𑀺; ()

𑁪𑁮.

𑀢𑀁 𑀲𑁄𑀢𑀯𑁆𑀳𑀲𑀫𑀡𑁄 𑀲𑀫𑀼𑀧𑀝𑁆𑀞𑀳𑀺𑀢𑁆𑀣

𑀩𑁄𑀥𑀻 𑀧𑀺𑀬𑀗𑁆𑀕𑀼 𑀪𑀕𑀯𑀸’𑀲𑀺 𑀅𑀲𑀺𑀢𑀺𑀳𑀢𑁆𑀣𑁄,

𑀅𑀝𑁆𑀞𑀸𑀲𑀺𑀓 𑀲𑁄 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀫’𑀲𑁆𑀲

𑀆𑀲𑀼𑀁 𑀢𑀬𑁄 𑀫𑀢𑀺𑀫𑀢𑁄 𑀕𑀡𑀲𑀦𑁆𑀦𑀺𑀧𑀸𑀢𑀸; ()

𑁪𑁯. ¶

𑀢𑀲𑁆𑀲𑀸’𑀧𑀭𑁂𑀦 𑀲𑀫𑀬𑁂𑀦𑀼’𑀤𑀧𑀸𑀤𑀺 𑀮𑁄𑀓𑁂

𑀮𑁄𑀓𑀢𑁆𑀣𑀲𑀸𑀥𑀦𑀭𑀢𑁄 𑀫𑀼𑀦𑀺𑀭’𑀢𑁆𑀣𑀤𑀲𑁆𑀲𑀻,

𑀲𑀢𑁆𑀢𑀼𑀦𑁆𑀢𑀫𑁄’𑀧𑀺 𑀦𑀺𑀭𑀢𑀺𑀓𑁆𑀓𑀫𑀥𑀫𑁆𑀫𑀲𑀺𑀫𑁄

𑀢𑁂𑀚𑀺𑀤𑁆𑀥𑀺𑀫𑀸 𑀇𑀲𑀺 𑀢𑀤𑀸’𑀲𑀺 𑀲𑀼𑀲𑀺𑀫𑀦𑀸𑀫𑁄; ()

𑁫𑁦.

𑀆𑀦𑀻𑀬 𑀤𑀺𑀩𑁆𑀩𑀪𑀯𑀦𑀸 𑀓𑀼𑀲𑀼𑀫𑀸𑀦𑀺 𑀢𑀲𑁆𑀲

𑀫𑀦𑁆𑀤𑀸𑀭𑀯𑀸𑀦𑀺 𑀲𑀼𑀧𑀢𑀺𑀝𑁆𑀞𑀺𑀢𑀧𑀸𑀤𑀧𑀻𑀞𑁂,

𑀲𑀫𑁆𑀧𑀽𑀚𑀺𑀬𑀸𑀦 𑀧𑀡𑀺𑀥𑀸𑀦𑀫𑀓𑀸𑀲𑀺 𑀲𑀢𑁆𑀣𑀸

𑀢𑁆𑀯𑀁 𑀫𑀸𑀤𑀺𑀲𑁄’𑀩𑁆𑀭𑀼𑀯𑀺 𑀪𑀯𑀺𑀲𑁆𑀲𑀲𑀺 𑀘𑀸’𑀬𑀢𑀺𑀦𑁆𑀢𑀺; ()

𑁫𑁧.

𑀢𑀲𑁆𑀲𑀸’𑀲𑀺 𑀲𑁄𑀪𑀺𑀢𑀧𑀼𑀭𑀁 𑀪𑀯𑀺𑀲𑀸𑀕𑀭𑀯𑁆𑀳𑁄

𑀭𑀸𑀚𑀸 𑀧𑀺𑀢𑀸 𑀚𑀦𑀢𑀺𑀤𑁂𑀯𑀺 𑀲𑀼𑀤𑀲𑁆𑀲𑀦𑀸𑀔𑁆𑀬𑀸,

𑀲𑀦𑁆𑀢𑁄𑀧𑀲𑀦𑁆𑀢𑀲𑀫𑀡𑀸 𑀯𑀭𑀲𑀸𑀯𑀓𑀸’𑀲𑀼𑀁

𑀥𑀫𑁆𑀫𑀸 𑀢𑀤𑀕𑁆𑀕𑀲𑀫𑀡𑀺𑀧𑁆𑀬’𑀪𑀯𑀼𑀁 𑀲𑀼𑀥𑀫𑁆𑀫𑀸; ()

𑁫𑁨. ¶

𑀢𑀜𑁆𑀘𑀸’𑀪𑀬𑁄 𑀫𑀼𑀦𑀺𑀭𑀽𑀧𑀝𑁆𑀞𑀳𑀺 𑀲𑁄𑀧𑁆𑀬’𑀲𑀻𑀢𑀺-

𑀳𑀢𑁆𑀣𑀼𑀕𑁆𑀕𑀢𑁄 𑀲𑀢𑀲𑀳𑀲𑁆𑀲𑀧𑀫𑀸𑀡𑀫𑀸𑀬𑀼,

𑀘𑀫𑁆𑀧𑁂𑀬𑁆𑀬𑀲𑀸𑀔𑀺 𑀪𑀯𑀺 𑀩𑁄𑀥𑀺 𑀲𑀼𑀩𑁄𑀥𑀺𑀳𑁂𑀢𑀼

𑀆𑀲𑀼𑀁 𑀢𑀬𑁄 𑀅𑀭𑀺𑀬𑀲𑀯𑀓𑀲𑀦𑁆𑀦𑀺𑀢𑀸; ()

𑁫𑁩.

𑀢𑀲𑁆𑀲𑀸’𑀧𑀭𑁂𑀦 𑀉𑀤𑀧𑀸𑀤𑀺’𑀳 𑀥𑀫𑁆𑀫𑀤𑀲𑁆𑀲𑀻

𑀦𑀺𑀲𑁆𑀲𑀻𑀫𑀥𑀻’𑀦𑀥𑀺𑀯𑀭𑁄 𑀪𑀯𑀧𑀸𑀭𑀤𑀲𑁆𑀲𑀺,

𑀲𑁄 𑀢𑀸𑀯𑀢𑀺𑀁𑀲𑀪𑀯𑀢𑀫𑁆𑀳𑀺 𑀫𑀳𑀸𑀦𑀼𑀪𑀸𑀯𑁄

𑀩𑀼𑀤𑁆𑀥𑀗𑁆𑀓𑀼𑀭𑁄 𑀪𑀯𑀺 𑀢𑀤𑀸 𑀓𑀺𑀭 𑀤𑁂𑀯𑀭𑀸𑀚𑀸;()

𑁫𑁪.

𑀤𑀺𑀩𑁆𑀩𑀸𑀦𑀺 𑀕𑀦𑁆𑀥𑀓𑀼𑀲𑀼𑀫𑀸𑀦𑀺 𑀓𑀣𑀸𑀕𑀢𑀲𑁆𑀲

𑀘𑀓𑁆𑀓𑀗𑁆𑀓𑀺𑀢𑁄𑀭𑀼𑀘𑀭𑀡𑀫𑁆𑀩𑀼𑀭𑀼𑀳𑀸𑀲𑀦𑀫𑁆𑀳𑀺,

𑀧𑀽𑀚𑁂𑀲𑀺 𑀤𑀺𑀩𑁆𑀩𑀢𑀼𑀭𑀺𑀬𑁂𑀳𑀺 𑀘 𑀩𑀼𑀤𑁆𑀥𑀪𑀸𑀯𑀁

𑀲𑁄 𑀧𑀢𑁆𑀣𑀬𑀁 𑀫𑀼𑀦𑀺𑀢𑀫𑀺𑀚𑁆𑀛 𑀦𑀪𑀸𑀯𑀫𑀸𑀳; ()

𑁫𑁫. ¶

𑀞𑀸𑀦𑀺𑀬𑀫𑀸𑀲𑀺 𑀲𑀭𑀡𑀁 𑀲𑀼𑀕𑀢𑀲𑁆𑀲 𑀢𑀲𑁆𑀲

𑀭𑀸𑀚𑀸 𑀧𑀺𑀢𑀸’𑀲𑀺 𑀲𑀭𑀡𑁄 𑀚𑀦𑀦𑀺 𑀲𑀼𑀦𑀦𑁆𑀤𑀸,

𑀅𑀕𑁆𑀕𑀸𑀪𑀯𑀺𑀁𑀲𑀼 𑀧𑀤𑀼𑀫𑁄𑀯𑀲𑀺 𑀨𑀼𑀲𑁆𑀲𑀤𑁂𑀯𑁄

𑀔𑁂𑀫𑀸 𑀘 𑀪𑀺𑀓𑁆𑀔𑀼𑀲𑀫𑀡𑀺𑀲𑁆𑀯’𑀧𑀺 𑀲𑀩𑁆𑀩𑀦𑀸𑀫𑀸; ()

𑁫𑁬.

𑀣𑁂𑀭𑁄 𑀲𑀼𑀦𑁂𑀢𑁆𑀢𑀯𑀺𑀲𑀼𑀢𑁄 𑀢𑀤𑀼𑀧𑀝𑁆𑀞𑀳𑀺 𑀲𑁄

𑀮𑀓𑁆𑀔𑀸𑀬𑀼𑀓𑁄’𑀲𑀺 𑀚𑀬𑀩𑁄𑀥𑀺 𑀜𑁆𑀘 𑀩𑀺𑀫𑁆𑀩𑀺𑀚𑀸𑀮𑁄,

𑀢𑀲𑁆𑀲𑀸’𑀧𑁆𑀬’𑀲𑀺𑀢𑀺𑀭𑀢𑀦𑀧𑁆𑀧𑀫𑀺𑀢𑀁 𑀲𑀭𑀻𑀭𑀁

𑀆𑀲𑀼𑀁 𑀢𑀬𑁄 𑀅𑀭𑀺𑀬𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸; ()

𑁫𑁭.

𑀢𑀲𑁆𑀲𑀸’𑀧𑀭𑁂𑀦 𑀲𑀫𑀬𑁂𑀦𑀺’𑀕 𑀲𑀺𑀤𑁆𑀥𑀩𑁄𑀥𑀺

𑀲𑀺𑀤𑁆𑀥𑀢𑁆𑀣𑀦𑀸𑀫𑀯𑀺𑀤𑀺𑀢𑁄 𑀉𑀤𑀧𑀸𑀤𑀺 𑀲𑀢𑁆𑀣𑀸,

𑀩𑀼𑀤𑁆𑀥𑀗𑁆𑀓𑀼𑀭𑁄 𑀪𑀯𑀺 𑀢𑀤𑀸’𑀔𑀻𑀮𑀗𑀛𑀸𑀦𑀮𑀸𑀪𑀻

𑀪𑁄𑀚𑀺 𑀧𑀯𑀢𑁆𑀢𑀺𑀢𑀨𑀮𑀁 𑀯𑀲𑀺 𑀫𑀗𑁆𑀕𑀮𑀸𑀔𑁆𑀬𑁄; ()

𑁫𑁮. ¶

𑀲𑀫𑁆𑀧𑀦𑁆𑀦𑀕𑀦𑁆𑀥𑀭𑀲𑀺𑀓𑀁 𑀧𑀭𑀺𑀧𑀓𑁆𑀓𑀫𑁂𑀓𑀁

𑀆𑀦𑀻𑀬 𑀲𑁄 𑀯𑀺𑀧𑀓𑀼𑀮𑀚𑀫𑁆𑀩𑀼𑀪𑀮𑀁 𑀯𑀦𑀫𑁆𑀳𑀸,

𑀧𑀸𑀤𑀸𑀲𑀺 𑀢𑀲𑁆𑀲 𑀧𑀡𑀺𑀥𑀻𑀓𑀢𑀩𑀼𑀤𑁆𑀥𑀪𑀸𑀯𑁄

𑀢𑀜𑁆𑀘𑀸𑀦𑀼𑀪𑀼𑀬 𑀪𑀕𑀯𑀸𑀧𑀺 𑀯𑀺𑀬𑀸𑀓𑀭𑀺𑀢𑁆𑀣; ()

𑁫𑁯.

𑀯𑁂𑀳𑀸𑀭𑀫𑀸𑀲𑀺 𑀦𑀕𑀭𑀁 𑀚𑀬𑀲𑁂𑀦𑀦𑀸𑀫𑁄

𑀭𑀸𑀚𑀸 𑀅𑀳𑁄𑀲𑀺 𑀚𑀦𑀓𑁄 𑀚𑀦𑀦𑀻 𑀲𑀼𑀨𑀲𑁆𑀲𑀸

𑀪𑀺𑀓𑁆𑀔𑀽𑀲𑀼 𑀢𑀲𑁆𑀲 𑀯𑀲𑀺 𑀲𑀫𑁆𑀩𑀳𑀼𑀮𑁄 𑀲𑀼𑀫𑀺𑀢𑁆𑀢𑁄

𑀤𑁆𑀯𑁂 𑀲𑀻𑀯𑀮𑀺 𑀜𑁆𑀘 𑀲𑀫𑀡𑀻𑀲𑀼 𑀯𑀭𑀸 𑀲𑀼𑀭𑀸𑀫𑀸; ()

𑁬𑁦.

𑀢𑀁 𑀭𑁂𑀯𑀢𑁄𑀫𑀼𑀦𑀺 𑀫𑀼𑀦𑀺𑀦𑁆𑀤𑀫𑀼𑀝𑁆𑀞𑀳𑀺𑀢𑁆𑀣

𑀩𑁄𑀥𑀻’𑀧𑀺 𑀢𑀲𑁆𑀲 𑀓𑀡𑀺𑀓𑀸𑀭𑀫𑀪𑀻𑀭𑀼𑀳𑁄’𑀲𑀺,

𑀮𑀓𑁆𑀔𑀸𑀬𑀼𑀓𑁄 𑀲’𑀦𑀭𑀲𑀸𑀭𑀣𑀺 𑀲𑀝𑁆𑀞𑀺𑀳𑀢𑁆𑀣𑁄

𑀆𑀲𑀼𑀁 𑀢𑀬𑁄 𑀅𑀭𑀺𑀬𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸; ()

𑁬𑁧. ¶

𑀢𑀲𑁆𑀲𑀸’𑀧𑀭𑁂𑀦𑀺’𑀳 𑀲𑀫𑀼𑀩𑁆𑀪𑀯𑀺 𑀦𑀺𑀲𑁆𑀲𑀦𑀸𑀫𑁄

𑀲𑀢𑁆𑀣𑀸 𑀧𑀲𑀢𑁆𑀣𑀘𑀭𑀡𑁄 𑀘𑀢𑀼𑀭𑁄’𑀖𑀢𑀺𑀡𑁆𑀡𑁄,

𑀩𑀼𑀤𑁆𑀥𑀗𑁆𑀓𑀼𑀭𑁄 𑀪𑀯𑀺 𑀢𑀤𑀸𑀦𑀺 𑀲𑀼𑀚𑀸𑀢𑀭𑀸𑀚𑀸

𑀭𑀸𑀚𑀜𑁆𑀜𑀫𑁄𑀴𑀺𑀫𑀡𑀺𑀮𑀗𑁆𑀓𑀢𑀧𑀸𑀤𑀧𑀻𑀞𑁄; ()

𑁬𑁨.

𑀳𑀺𑀢𑁆𑀯𑀸 𑀲’𑀭𑀚𑁆𑀚𑀫𑀺𑀲𑀺𑀯𑁂𑀬𑀥𑀭𑁄 𑀲𑀼𑀥𑀻𑀭𑁄

𑀤𑀺𑀩𑁆𑀩𑁂𑀳𑀺’𑀦𑁂𑀓𑀓𑀼𑀲𑀼𑀫𑁂𑀳𑀺 𑀚𑀺𑀦𑀁 𑀯𑀚𑀦𑁆𑀢𑀁,

𑀧𑀽𑀚𑁂𑀲𑀺 𑀫𑀼𑀤𑁆𑀥𑀦𑀺 𑀢𑀫𑀸𑀧𑀯𑀺𑀢𑀸𑀦𑀲𑁄𑀪𑀁

𑀲𑀢𑁆𑀣𑀸’𑀧𑀺 𑀢𑀧𑁆𑀧𑀡𑀺𑀥𑀺𑀲𑀺𑀤𑁆𑀥𑀺 𑀲𑀺𑀬𑀸’𑀢𑁆𑀬’𑀪𑀸𑀲𑀺; ()

𑁬𑁩.

𑀔𑁂𑀫𑀁 𑀧𑀼𑀭𑀜𑁆𑀳𑀺 𑀚𑀦𑀓𑁄 𑀚𑀦𑀲𑀦𑁆𑀥𑀦𑀸𑀫𑁄

𑀭𑀸𑀚𑀸 𑀚𑀦𑁂𑀢𑁆𑀢𑀺 𑀧𑀤𑀼𑀫𑀸 𑀦𑀺𑀚𑀲𑀗𑁆𑀖𑀫𑀚𑁆𑀛𑁂,

𑀤𑁆𑀯𑁂 𑀩𑁆𑀭𑀳𑁆𑀫𑀤𑁂𑀯𑀼𑀤𑀬 𑀯𑀺𑀲𑁆𑀲𑀼𑀢𑀣𑁂𑀭𑀦𑀸𑀕𑀸

𑀨𑀼𑀲𑁆𑀲𑀸 𑀘 𑀅𑀕𑁆𑀕𑀬𑀼𑀕𑀮𑀸𑀦𑁆𑀬’𑀪𑀯𑀼𑀁 𑀲𑀼𑀤𑀢𑁆𑀢𑀸; ()

𑁬𑁪. ¶

𑀢𑀁 𑀲𑀫𑁆𑀪𑀯𑁄𑀯𑀲𑀺 𑀯𑀲𑀺𑀦𑁆𑀤𑀫𑀼𑀧𑀝𑁆𑀞𑀳𑀺𑀢𑁆𑀣

𑀢𑀲𑁆𑀲𑀸’𑀲𑀦𑀯𑁆𑀳𑀢𑀭𑀼 𑀩𑁄𑀥𑀺 𑀲’𑀲𑀝𑁆𑀞𑀺𑀢𑀢𑁆𑀣𑁄,

𑀅𑀝𑁆𑀞𑀸𑀲𑀺 𑀯𑀲𑁆𑀲𑀕𑀡𑀦𑀸𑀬 𑀫𑀳𑁂𑀲𑀺 𑀮𑀓𑁆𑀔𑀁

𑀆𑀲𑀼𑀁 𑀢𑀬𑁄 𑀅𑀭𑀺𑀬𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸; ()

𑁬𑁫.

𑀢𑀲𑁆𑀲𑀸’𑀧𑀭𑁂𑀦 𑀪𑀯𑀲𑀸𑀕𑀭𑀧𑀸𑀤𑀲𑁆𑀲𑀺

𑀨𑀼𑀲𑁆𑀲𑁄 𑀫𑀳𑀸𑀫𑀼𑀦𑀺𑀭𑀺’𑀳𑀓𑀩𑁆𑀪𑀼𑀤𑀧𑀸𑀤𑀺 𑀮𑁄𑀓𑁂,

𑀥𑀻𑀭𑁄 𑀢𑀤𑀸𑀦𑀺 𑀯𑀺𑀚𑀺𑀢𑀸𑀯𑀺 𑀚𑀺𑀢𑀸𑀭𑀺𑀯𑀕𑁆𑀕𑁄

𑀭𑀸𑀚𑀸 𑀩𑀪𑀽𑀯 𑀲𑀼𑀭𑀭𑀸𑀚𑀦𑀺𑀪𑁄’𑀭𑀼𑀢𑁂𑀚𑁄; ()

𑁬𑁬.

𑀲𑀫𑁆𑀩𑁄𑀥𑀺 𑀫𑀕𑁆𑀕𑀧𑀼𑀭𑀺𑀲𑁄 𑀧𑀡𑀻𑀥𑀸𑀬 𑀨𑀻𑀢𑀁

𑀭𑀚𑁆𑀚𑀁 𑀯𑀺𑀯𑀚𑁆𑀚𑀺𑀬 𑀲’𑀧𑀩𑁆𑀩𑀚𑀺𑀢𑁄 𑀚𑀦𑀲𑁆𑀲,

𑀅𑀜𑁆𑀜𑀸𑀬 𑀢𑀻𑀡𑀺𑀧𑀺𑀝𑀓𑀸𑀦𑀺 𑀓𑀣𑁂𑀲𑀺 𑀥𑀫𑁆𑀫𑀁

𑀯𑁆𑀬𑀸𑀓𑀸𑀲𑀺 𑀨𑀼𑀲𑁆𑀲𑀪𑀕𑀯𑀸’𑀧𑀺’𑀯 𑀧𑀼𑀩𑁆𑀩𑀩𑀼𑀤𑁆𑀥𑀸; ()

𑁬𑁭. ¶

𑀢𑀲𑁆𑀲𑀸’𑀲𑀺 𑀓𑀸𑀲𑀺𑀦𑀕𑀭𑀁 𑀚𑀬𑀲𑁂𑀦𑀦𑀸𑀫𑁄

𑀭𑀸𑀚𑀸 𑀧𑀺𑀢𑀸’𑀲𑀺 𑀚𑀦𑀢𑀺 𑀲𑀺𑀭𑀺𑀫𑀸 𑀫𑀳𑁂𑀲𑀺,

𑀲𑀗𑁆𑀖𑁂𑀲𑀼’𑀪𑁄𑀲𑀼’𑀧𑀺 𑀲𑀼𑀭𑀓𑁆𑀔𑀺𑀢𑀥𑀫𑁆𑀫𑀲𑁂𑀢𑀸

𑀘𑀸𑀮𑀸 𑀢𑀤𑀕𑁆𑀕𑀬𑀼𑀕𑀮𑀸𑀦𑀺 𑀢𑀣𑀽’𑀧𑀜𑁆𑀘𑀸𑀮𑀸; ()

𑁬𑁮.

𑀩𑁄𑀥𑀺𑀤𑁆𑀤𑀼𑀫𑀸’𑀫𑀮𑀓𑀲𑀸𑀔𑀺 𑀲𑀭𑀻𑀭𑀫𑀝𑁆𑀞-

𑀧𑀡𑁆𑀡𑀸𑀲𑀳𑀢𑁆𑀣𑀧𑀫𑀺𑀢𑀁 𑀲𑀪𑀺𑀬𑀸𑀪𑀺𑀥𑀸𑀦𑁄,

𑀲𑁄𑀧𑀝𑁆𑀞𑀳𑀻 𑀦𑀯𑀼𑀢𑀺𑀯𑀲𑁆𑀲𑀲𑀳𑀲𑁆𑀲𑀫𑀸𑀬𑀼

𑀆𑀲𑀼𑀁 𑀢𑀬𑁄 𑀪𑀓𑀯𑀢𑁄 𑀕𑀡𑀲𑀦𑁆𑀦𑀺𑀧𑀸𑀢𑀸; ()

𑁬𑁯.

𑀢𑀲𑁆𑀲𑀸’𑀧𑀭𑁂𑀦 𑀲𑀦𑀭𑀸𑀫𑀭𑀲𑀢𑁆𑀢𑀲𑀸𑀭𑁄

𑀲𑀢𑁆𑀣𑀸 𑀯𑀺𑀧𑀲𑁆𑀲𑀺’𑀳 𑀲𑀫𑀼𑀩𑁆𑀪𑀯𑀺 𑀲𑀩𑁆𑀩𑀤𑀲𑁆𑀲𑀻,

𑀓𑀫𑁆𑀫𑁂𑀦 𑀓𑁂𑀦𑀘𑀺 𑀫𑀳𑀺𑀤𑁆𑀥𑀺𑀫𑀳𑀸𑀦𑀼𑀪𑀸𑀯𑁄

𑀩𑀼𑀤𑁆𑀥𑀗𑁆𑀓𑀼𑀭𑁄’𑀪𑀯𑀺 𑀢𑀤𑀸’𑀢𑀼𑀮𑀦𑀸𑀕𑀭𑀸𑀚𑀸; ()

𑁭𑁦. ¶

𑀅𑀗𑁆𑀕𑀻𑀭𑀲𑀲𑁆𑀲 𑀖𑀦𑀓𑀜𑁆𑀘𑀦𑀳𑀤𑁆𑀤𑀧𑀻𑀞𑀁

𑀧𑀸𑀤𑀸𑀲𑀺 𑀢𑀲𑁆𑀲 𑀔𑀯𑀺𑀢𑀁 𑀭𑀢𑀦𑁂𑀳𑀺 𑀦𑀸𑀦𑀸,

𑀲𑁄 𑀩𑀼𑀤𑁆𑀥𑀪𑀸𑀯𑀫𑀳𑀺𑀧𑀢𑁆𑀣𑀺𑀬 𑀩𑁄𑀥𑀺𑀲𑀢𑁆𑀢𑁄

𑀯𑁆𑀬𑀸𑀓𑀸𑀲𑀺 𑀢𑀢𑁆𑀣𑀲𑀼𑀦𑀺𑀲𑀚𑁆𑀚 𑀚𑀺𑀦𑁄 𑀯𑀺𑀧𑀲𑁆𑀲𑀺; ()

𑁭𑁧.

𑀢𑀲𑁆𑀲𑀸’𑀲𑀺 𑀩𑀦𑁆𑀥𑀼𑀫𑀢𑀺𑀦𑀸𑀫𑀧𑀼𑀭𑀁 𑀢𑀤𑁂𑀯-

𑀦𑀸𑀫𑁄 𑀧𑀺𑀢𑀸 𑀚𑀦𑀦𑀺 𑀩𑀦𑁆𑀥𑀼𑀫𑀢𑀻 𑀫𑀳𑁂𑀲𑀺,

𑀤𑁆𑀯𑁂 𑀔𑀡𑁆𑀟𑀢𑀺𑀲𑁆𑀲𑀯𑀲𑀺𑀦𑁄 𑀯𑀭𑀲𑀸𑀯𑀓𑀸’𑀲𑀼𑀁

𑀘𑀦𑁆𑀤𑀸 𑀘 𑀪𑀤𑁆𑀤𑀬𑀼𑀕𑀮𑀁 𑀪𑀯𑀺 𑀘𑀦𑁆𑀤𑀫𑀺𑀢𑁆𑀢𑀸; ()

𑁭𑁨.

𑀤𑁂𑀳𑀁 𑀅𑀲𑀺𑀢𑀺𑀭𑀢𑀢𑀁 𑀢𑀫𑀲𑁄𑀓𑀣𑁂𑀭𑁄-

𑀧𑀝𑁆𑀞𑀸𑀲𑀺 𑀩𑁄𑀥𑀺𑀯𑀺𑀝𑀧𑀻 𑀪𑀯𑀺 𑀓𑀡𑁆𑀳𑀯𑀡𑁆𑀝𑀸,

𑀯𑀸𑀲𑀁𑀅𑀓𑀸 𑀫𑀼𑀦𑀺𑀭’𑀲𑀻𑀢𑀺𑀲𑀳𑀲𑁆𑀲𑀯𑀲𑁆𑀲𑀁

𑀆𑀲𑀼𑀁 𑀢𑀬𑁄 𑀅𑀭𑀺𑀬𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸; ()

𑁭𑁩. ¶

𑀢𑀲𑁆𑀲𑀸’𑀧𑀭𑁂𑀦 𑀅𑀥𑀺𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑁄

𑀲𑀢𑁆𑀣𑀸 𑀲𑀫𑀼𑀩𑁆𑀪𑀯𑀻 𑀲𑀺𑀔𑀻 𑀚𑀦𑀓𑀧𑁆𑀧𑀲𑀸𑀔𑀻,

𑀥𑀻𑀭𑁄 𑀢𑀤𑀸’𑀪𑀯𑀺 𑀅𑀭𑀺𑀦𑁆𑀤𑀫𑀦𑀸𑀫𑀭𑀸𑀚𑀸

𑀲𑀤𑁆𑀥𑁄 𑀧𑀳𑀽𑀢𑀭𑀢𑀢𑁄 𑀭𑀢𑀦𑀢𑁆𑀢𑀬𑀫𑁆𑀳𑀺; ()

𑁭𑁪.

𑀪𑀺𑀓𑁆𑀔𑀜𑁆𑀘 𑀲𑀢𑁆𑀢𑀭𑀢𑀦𑀸𑀪𑀭𑀡𑀸𑀪𑀺𑀭𑀸𑀫𑀁

𑀜𑀢𑁆𑀯𑀸𑀦 𑀳𑀢𑁆𑀣𑀺𑀭𑀢𑀦𑀁 𑀲𑀼𑀕𑀢𑁂 𑀲𑀲𑀗𑁆𑀖𑁂,

𑀲𑁄 𑀩𑀼𑀤𑁆𑀥𑀪𑀸𑀯𑀫𑀳𑀺𑀧𑀢𑁆𑀣𑀬𑀺 𑀲𑀢𑁆𑀢𑀲𑀸𑀭𑁄

𑀯𑁆𑀬𑀸𑀓𑀸𑀲𑀺 𑀮𑀘𑁆𑀙𑀲𑀺 𑀲𑀼𑀔𑁄𑀥𑀺𑀧𑀤𑀦𑁆𑀢𑀺 𑀲𑀢𑁆𑀣𑀸; ()

𑁭𑁫.

𑀩𑀼𑀤𑁆𑀥𑀲𑁆𑀲 𑀘𑀸𑀭𑀺𑀡𑀯𑀢𑀻 𑀦𑀕𑀭𑀁 𑀅𑀳𑁄𑀲𑀺

𑀫𑀸𑀢𑀸 𑀧𑀪𑀸𑀯𑀢𑀺 𑀧𑀺𑀢𑀸 𑀅𑀭𑀼𑀡𑀯𑁆𑀳 𑀭𑀸𑀚𑀸,

𑀲𑀗𑁆𑀖𑁂𑀲𑀼’𑀪𑁄𑀲𑀼 𑀅𑀪𑀺𑀪𑀼𑀯𑀲𑀺 𑀲𑀫𑁆𑀪𑀯𑁄 𑀘

𑀅𑀕𑁆𑀕𑀸𑀪𑀯𑀺𑀁𑀲𑀼 𑀫𑀔𑀺𑀮𑀸𑀧𑀤𑀼𑀫𑀸𑀪𑀺𑀥𑀸𑀦𑀸; ()

𑁭𑁬. ¶

𑀔𑁂𑀫𑀗𑁆𑀓𑀭𑁄 𑀚𑀺𑀦𑀫𑀼𑀧𑀝𑁆𑀞𑀳𑀺 𑀲𑀢𑁆𑀢𑀢𑀺𑀁𑀲-

𑀳𑀢𑁆𑀣𑀼𑀘𑁆𑀙𑀺𑀢𑁄 𑀯𑀺𑀚𑀬𑀩𑁄𑀥𑀺 𑀘 𑀧𑀼𑀡𑁆𑀟𑀭𑀺𑀓𑁄,

𑀲𑁄 𑀲𑀢𑁆𑀢𑀢𑀺𑀁𑀲𑀢𑀺𑀲𑀳𑀲𑁆𑀲 𑀫𑀺𑀢𑀸𑀬𑀼𑀓𑁄’𑀲𑀺

𑀆𑀲𑀼𑀁 𑀢𑀬𑁄 𑀢𑀤𑀺𑀬𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀸; ()

𑁭𑁭.

𑀢𑀲𑁆𑀲𑀸’𑀧𑀭𑁂𑀦𑀺’𑀳 𑀲𑀫𑀼𑀩𑁆𑀪𑀯𑀺 𑀓𑁂𑀢𑀼𑀫𑀸𑀮𑀸-

𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀮𑀲𑀁 𑀫𑀼𑀦𑀺𑀯𑁂𑀲𑁆𑀲𑀪𑀽’𑀢𑀺,

𑀩𑀼𑀤𑁆𑀥𑀗𑁆𑀓𑀼𑀭𑁄 𑀓𑀺𑀭 𑀢𑀤𑀸𑀦𑀺 𑀲𑀼𑀤𑀲𑁆𑀲𑀦𑀯𑁆𑀳-

𑀭𑀸𑀚𑀸 𑀩𑀪𑀽𑀯 𑀧𑀭𑀭𑀸𑀚𑀕𑀚𑀺𑀦𑁆𑀤𑀲𑀻𑀳𑁄; ()

𑁭𑁮.

𑀲𑀗𑁆𑀖𑀲𑁆𑀲 𑀩𑀼𑀤𑁆𑀥𑀧𑀫𑀼𑀔𑀲𑁆𑀲 𑀲𑀘𑀻𑀯𑀭𑀁 𑀲𑁄

𑀤𑀢𑁆𑀯𑀸𑀦 𑀤𑀸𑀦𑀫𑀢𑀼𑀮𑀁 𑀚𑀺𑀦𑀲𑀸𑀲𑀦𑀫𑁆𑀳𑀺,

𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀫𑀪𑀺𑀧𑀢𑁆𑀣𑀺𑀬 𑀧𑀩𑁆𑀩𑀚𑀺𑀢𑁆𑀣

𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺 𑀥𑀼𑀯𑀦𑁆𑀢𑀺 𑀢𑀫𑀸𑀳𑀲𑀢𑁆𑀣𑀸; ()

𑁭𑁯. ¶

𑀢𑀲𑁆𑀲𑀸’𑀧𑁆𑀬’𑀦𑁄𑀧𑀫𑀧𑀼𑀭𑀁 𑀪𑀯𑀺 𑀲𑀼𑀧𑁆𑀧𑀢𑀻𑀢𑁄

𑀭𑀸𑀚𑀸 𑀧𑀺𑀢𑀸 𑀬𑀲𑀯𑀢𑀻 𑀚𑀦𑀺𑀓𑀸 𑀫𑀳𑁂𑀲𑀻,

𑀲𑁄𑀡𑀼𑀢𑁆𑀢𑀭𑀸 𑀘 𑀦𑀺𑀚𑀲𑀸𑀯𑀓𑀲𑀸𑀯𑀺𑀓𑀸𑀦𑀁

𑀤𑀸𑀫𑀸 𑀫𑀢𑀺𑀤𑁆𑀥𑀺𑀧𑀭𑀫𑀸 𑀧𑀭𑀫𑀸 𑀲𑀫𑀸𑀮𑀸; ()

𑁮𑁦.

𑀩𑁄𑀥𑀻’𑀧𑀺 𑀢𑀲𑁆𑀲 𑀪𑀯𑀺 𑀲𑀸𑀮𑀫𑀳𑀻𑀭𑀽𑀳𑁄’𑀧-

𑀲𑀫𑁆𑀧𑀦𑁆𑀦𑀪𑀺𑀓𑁆𑀔𑀼 𑀢𑀤𑀼𑀧𑀝𑁆𑀞𑀳𑀺 𑀲𑀝𑁆𑀞𑀺𑀳𑀢𑁆𑀣𑁄,

𑀲𑀢𑁆𑀣𑀸 𑀯𑀺𑀳𑀸𑀲𑀺 𑀲𑀫𑀲𑀝𑁆𑀞𑀺𑀲𑀳𑀲𑁆𑀲𑀯𑀲𑁆𑀲𑀁

𑀆𑀲𑀼𑀁 𑀢𑀬𑁄 𑀢𑀤𑀺𑀬𑀲𑀸𑀯𑀓𑀲𑀢𑁆𑀢𑀺𑀧𑀸𑀢𑀸; ()

𑁮𑁧.

𑀢𑀲𑁆𑀲𑀸’𑀧𑀭𑁂𑀦𑀺’𑀓𑀳 𑀲𑀫𑀼𑀩𑁆𑀪𑀯𑀺 𑀲𑀘𑁆𑀘𑀲𑀦𑁆𑀤𑁄

𑀯𑁂𑀦𑁂𑀬𑁆𑀬𑀩𑀦𑁆𑀥𑀼 𑀪𑀕𑀯𑀸 𑀓𑀓𑀼𑀲𑀦𑁆𑀥𑀦𑀸𑀫𑁄,

𑀩𑀼𑀤𑁆𑀥𑀗𑁆𑀓𑀼𑀭𑁄 𑀪𑀼𑀯𑀺 𑀢𑀤𑀸’𑀪𑀯𑀺 𑀔𑁂𑀫𑀭𑀸𑀚𑀸

𑀤𑀸𑀦𑀧𑁆𑀧𑀩𑀦𑁆𑀥𑀚𑀮𑀲𑁂𑀓𑀲𑀼𑀥𑁄𑀢𑀳𑀢𑁆𑀣𑁄; ()

𑁮𑁨. ¶

𑀲𑁄 𑀧𑀢𑁆𑀢𑀘𑀻𑀯𑀭𑀧𑀪𑀽𑀢𑀺𑀓𑀫𑀦𑁆𑀦𑀧𑀸𑀦𑀁

𑀤𑀢𑁆𑀯𑀸 𑀲𑀲𑀸𑀯𑀓𑀚𑀺𑀦𑀲𑁆𑀲 𑀖𑀭𑀸’𑀪𑀺𑀕𑀦𑁆𑀢𑁆𑀯𑀸,

𑀧𑀩𑁆𑀩𑀚𑁆𑀚𑀺 𑀩𑁄𑀥𑀺𑀧𑀡𑀺𑀥𑀺𑀁 𑀧𑀡𑀺𑀥𑀸𑀬 𑀭𑀸𑀚𑀸

𑀲𑀢𑁆𑀣𑀸𑀲𑀬𑀸’𑀢𑁆𑀬’𑀯𑀘 𑀢𑀧𑁆𑀧𑀡𑀺𑀥𑀸𑀦𑀲𑀺𑀤𑁆𑀥𑀺; ()

𑁮𑁩.

𑀔𑁂𑀫𑀯𑀳𑀬𑀁 𑀦𑀕𑀭𑀫𑀲𑁆𑀲 𑀧𑀺𑀢𑀸’𑀕𑁆𑀕𑀺𑀤𑀢𑁆𑀢𑁄

𑀯𑀺𑀧𑁆𑀧𑁄 𑀯𑀺𑀪𑀸𑀯𑀺 𑀅𑀪𑀯𑀺 𑀚𑀦𑀺𑀓𑀸 𑀯𑀺𑀲𑀸𑀔𑀸,

𑀲𑀜𑁆𑀚𑀺𑀯𑀣𑁂𑀭𑀤𑀼𑀢𑀺𑀬𑁄 𑀯𑀺𑀥𑀼𑀭𑁄 𑀘 𑀣𑁂𑀭𑁄

𑀲𑀸𑀫𑀸 𑀢𑀤𑀕𑁆𑀕𑀬𑀼𑀕𑀮𑀁 𑀪𑀯𑀺 𑀘𑀫𑁆𑀧𑀓𑀸𑀔𑁆𑀬𑀸; ()

𑁮𑁪. ¶

𑀢𑀁 𑀩𑀼𑀤𑁆𑀥𑀺𑀚𑁄 𑀚𑀺𑀦𑀫𑀼𑀧𑀝𑁆𑀞𑀳𑀺 𑀢𑀲𑁆𑀲 𑀕𑀢𑁆𑀢𑀁

𑀢𑀸𑀴𑀺𑀲𑀳𑀢𑁆𑀣𑀫𑀺𑀢𑀫𑀸𑀲𑀺 𑀲𑀺𑀭𑀺𑀲𑀩𑁄𑀥𑀺,

𑀢𑀸𑀴𑀺𑀲𑀳𑀸𑀬𑀦𑀲𑀳𑀲𑁆𑀲𑀧𑀫𑀸𑀡𑀫𑀸𑀬𑀼

𑀏𑀓𑁄’𑀯 𑀢𑀲𑁆𑀲 𑀪𑀯𑀺 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁄; ()

𑁮𑁫.

𑀢𑀲𑁆𑀲𑀸’𑀧𑀭𑀫𑁆𑀳𑀺 𑀲𑀫𑀬𑁂 𑀓𑀭𑀼𑀡𑀸𑀦𑀺𑀥𑀸𑀦𑁄

𑀮𑁄𑀓𑀸𑀪𑀺𑀪𑀽 𑀓𑀦𑀓𑀪𑀼𑀥𑀭𑀳𑀸𑀭𑀺𑀭𑀽𑀧𑁄,

𑀉𑀧𑁆𑀧𑀚𑁆𑀚𑀺 𑀓𑁄𑀡𑀕𑀫𑀦𑁄𑀫𑀼𑀦𑀺 𑀧𑀩𑁆𑀩𑀢𑀸𑀔𑁆𑀬𑁄

𑀪𑀼𑀫𑀺𑀲𑁆𑀲𑀭𑁄 𑀪𑀯𑀺 𑀫𑀳𑀸𑀧𑀼𑀭𑀺𑀲𑁄 𑀢𑀤𑀸𑀦𑀺; ()

𑁮𑁬.

𑀲𑀗𑁆𑀖𑀲𑁆𑀲 𑀩𑀼𑀤𑁆𑀥𑀧𑀫𑀼𑀔𑀲𑁆𑀲 𑀉𑀴𑀸𑀭𑀤𑀸𑀦𑀁

𑀤𑀢𑁆𑀯𑀸 𑀫𑀳𑀕𑁆𑀖𑀯𑀭𑀘𑀺𑀯𑀭𑀲𑀸𑀝𑀓𑁂 𑀘,

𑀲𑁄 𑀧𑀓𑀩𑁆𑀩𑀚𑀺𑀢𑁆𑀣 𑀅𑀪𑀺𑀧𑀢𑁆𑀣𑀺𑀢 𑀩𑀼𑀤𑁆𑀥𑀪𑀸𑀯𑁄

𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀲𑀺 𑀢𑀼𑀯𑀦𑁆𑀢𑀺 𑀢𑀫𑀸𑀳𑀲𑀢𑁆𑀣𑀸; ()

𑁮𑁭. ¶

𑀦𑀸𑀫𑁂𑀦 𑀲𑁄𑀪𑀯𑀢𑀺 𑀢𑀫𑁆𑀧𑀼𑀭𑀫𑀼𑀢𑁆𑀢𑀭𑀸𑀔𑁆𑀬𑀸

𑀫𑀸𑀢𑀸 𑀧𑀺𑀢𑀸’𑀯𑀦𑀺𑀲𑀼𑀭𑁄 𑀪𑀯𑀺 𑀬𑀜𑁆𑀜𑀤𑀢𑁆𑀢𑁄,

𑀳𑀻𑀬𑁄𑀲𑁄𑀢𑁆𑀢𑀭𑀯𑀲𑀻 𑀲𑀫𑀡𑀺 𑀲𑀫𑀼𑀤𑁆𑀤𑀸

𑀢𑀲𑁆𑀲𑁄’𑀢𑁆𑀢𑀭𑀸 𑀘 𑀧𑀭𑀫𑀸 𑀧𑀭𑀺𑀲𑀸𑀲𑀼’𑀪𑁄𑀲𑀼; ()

𑁮𑁮.

𑀢𑀁 𑀲𑁄𑀢𑁆𑀣𑀺𑀚𑁄 𑀚𑀺𑀦𑀫𑀼𑀧𑀝𑁆𑀞𑀳𑀺 𑀢𑀺𑀁𑀲𑀳𑀢𑁆𑀣𑁄

𑀅𑀗𑁆𑀕𑀻𑀭𑀲𑁄 𑀪𑀯𑀺 𑀉𑀤𑀼𑀫𑁆𑀩𑀭𑀲𑀸𑀔𑀺 𑀩𑁄𑀥𑀺,

𑀲𑁄 𑀢𑀺𑀁𑀲𑀳𑀸𑀬𑀦𑀲𑀳𑀲𑁆𑀲𑀫𑀺𑀢𑀸𑀬𑀼𑀓𑁄’𑀲𑀺

𑀏𑀓𑁄’𑀯 𑀢𑀲𑁆𑀲 𑀪𑀯𑀺 𑀲𑀸𑀯𑀓𑀲𑀦𑁆𑀢𑀺𑀧𑀸𑀢𑁄; ()

𑁮𑁯.

𑀢𑀲𑁆𑀲𑀸’𑀧𑀭𑁂𑀦𑀺’𑀳 𑀫𑀳𑀸𑀫𑀼𑀦𑀺 𑀓𑀲𑁆𑀲𑀧𑀸𑀔𑁆𑀬𑁄

𑀮𑁄𑀓𑀫𑁆𑀳𑀺 𑀧𑀸𑀢𑀼𑀪𑀯𑀺 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄,

𑀩𑀼𑀤𑁆𑀥𑀗𑁆𑀓𑀼𑀭𑁄 𑀪𑀼𑀯𑀺 𑀢𑀤𑀸’𑀪𑀯𑀺 𑀚𑁄𑀢𑀺𑀧𑀸𑀮𑁄

𑀯𑁂𑀤𑁂𑀲𑀼 𑀢𑀻𑀲𑀼 𑀲𑀓𑀮𑀸𑀲𑀼 𑀓𑀮𑀸𑀲𑀼 𑀙𑁂𑀓𑁄; ()

𑁯𑁦. ¶

𑀓𑀮𑁆𑀬𑀸𑀡𑀫𑀺𑀢𑁆𑀢𑀤𑀼𑀢𑀺𑀬𑁄 𑀲𑀼𑀕𑀢𑀁 𑀉𑀧𑁂𑀘𑁆𑀘

𑀲𑀼𑀢𑁆𑀯𑀸𑀦 𑀥𑀫𑁆𑀫𑀫𑀣𑀲𑀸𑀲𑀦 𑀫𑁄𑀢𑀭𑀺𑀢𑁆𑀯𑀸,

𑀲𑀩𑁆𑀩𑀜𑁆𑀜𑀼𑀪𑀸𑀯𑀫𑁆𑀳𑀺𑀧𑀢𑁆𑀣𑀬𑀺 𑀫𑀸𑀡𑀯𑁄 𑀲𑁄

𑀯𑁆𑀬𑀸𑀓𑀸𑀲𑀺 𑀓𑀲𑁆𑀲𑀧𑀫𑀼𑀦𑀻’𑀧𑀺 𑀫𑀼𑀦𑀻’𑀘 𑀧𑀼𑀩𑁆𑀩𑀸; ()

𑁯𑁧.

𑀩𑀸𑀭𑀸𑀡𑀲𑀺 𑀦𑀕𑀭𑀫𑀸𑀲𑀺 𑀧𑀺𑀢𑀸 𑀘 𑀫𑀸𑀢𑀸

𑀤𑁆𑀯𑁂 𑀩𑁆𑀭𑀳𑁆𑀫𑀤𑀢𑁆𑀢𑀥𑀦𑀯𑀢𑁆𑀬’𑀪𑀺𑀥𑀸𑀦𑀯𑀦𑁆𑀢𑁄,

𑀪𑀺𑀓𑁆𑀔𑀼𑀲𑀼 𑀢𑀲𑁆𑀲 𑀲𑀫𑀡𑀺𑀲𑁆𑀯’𑀧𑀺 𑀢𑀺𑀲𑁆𑀲𑀪𑀸𑀭-

𑀤𑁆𑀯𑀸𑀚𑀸 𑀘 𑀪𑀤𑁆𑀤𑀬𑀼𑀕𑀮𑀸𑀢𑁆𑀬’𑀦𑀼𑀮𑁄𑀭𑀼𑀯𑁂𑀮𑀸; ()

𑁯𑁨.

𑀢𑀁 𑀲𑀩𑁆𑀩𑀫𑀺𑀢𑁆𑀢𑀲𑀫𑀡𑁄 𑀲𑀫𑀼𑀧𑀝𑁆𑀞𑀳𑀺𑀢𑁆𑀣

𑀦𑀺𑀕𑁆𑀭𑁄𑀥𑀲𑀸𑀔𑀻 𑀚𑀬𑀩𑁄𑀥𑀺 𑀲’𑀯𑀻𑀲𑀳𑀢𑁆𑀣𑁄,

𑀢𑀲𑁆𑀲𑀸’𑀲𑀺 𑀯𑀺𑀲𑀢𑀺𑀲𑀳𑀲𑁆𑀲 𑀧𑀫𑀸𑀡𑀫𑀸𑀬𑀼

𑀏𑀓𑁄’𑀯’𑀳𑀽 𑀅𑀭𑀺𑀬𑀲𑀸𑀯𑀓𑀲𑀦𑁆𑀦𑀻𑀧𑀸𑀢𑁄; ()

𑀇𑀢𑀺 𑀫𑁂𑀥𑀸𑀦𑀦𑁆𑀤𑀸𑀪𑀺𑀥𑀸𑀦𑁂𑀦 𑀬𑀢𑀺𑀢𑀸 𑀯𑀺𑀭𑀘𑀺𑀢𑁂 𑀲𑀓𑀮𑀓𑀯𑀺𑀚𑀦 𑀳𑀤𑀬𑀸𑀦𑀦𑁆𑀤 𑀤𑀸𑀦𑀦𑀺𑀤𑀸𑀦𑁂 𑀚𑀺𑀦𑀯𑀁𑀲𑀤𑀻𑀧𑁂 𑀤𑀽𑀭𑁂𑀦𑀺𑀤𑀸𑀦𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑁂𑀲𑀧𑀡𑀺𑀥𑀸𑀢𑀝𑁆𑀞𑀧𑀦 𑀧𑀯𑀢𑁆𑀢𑀺 𑀧𑀭𑀺𑀤𑀻𑀧𑁄 𑀢𑀢𑀺𑀬𑁄 𑀲𑀕𑁆𑀕𑁄.

𑁧. ¶

𑀤𑀻𑀧𑀗𑁆𑀓𑀭𑀸𑀤𑀺𑀘𑀢𑀼𑀯𑀻𑀲𑀢𑀺 𑀩𑀼𑀤𑁆𑀥𑀧𑀸𑀤-

𑀫𑀽𑀮𑁂𑀲𑀼 𑀮𑀗𑀧𑀡𑀺𑀥𑀸𑀦 𑀫𑀳𑀸𑀦𑀺𑀥𑀸𑀦𑁄,

𑀮𑀓𑁆𑀔𑀸𑀥𑀺𑀓𑀁 𑀘𑀢𑀼𑀭𑀲𑀗𑁆𑀔𑀺𑀬𑀓𑀧𑁆𑀧𑀲𑀗𑁆𑀔𑀁

𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀫𑀪𑀺𑀲𑀗𑁆𑀔𑀭𑀺 𑀩𑁄𑀥𑀺𑀲𑀢𑁆𑀢𑁄; ()

𑁨.

𑀏𑀢𑁆𑀣𑀦𑁆𑀢𑀭𑁂 𑀯𑀺𑀯𑀺𑀥𑀩𑀸𑀳𑀺𑀭𑀯𑀢𑁆𑀣𑀼𑀚𑀸𑀢𑀁

𑀲𑀺𑀲’𑀓𑁆𑀔𑀺𑀫𑀁𑀲𑀭𑀼𑀥𑀺𑀭𑀸𑀦𑀺 𑀘 𑀧𑀼𑀢𑁆𑀢𑀤𑀸𑀭𑁂,

𑀲𑁄 𑀚𑀺𑀯𑀺𑀢𑀫𑁆𑀧𑀺 𑀓𑀧𑀡𑀟𑀺𑀓𑀬𑀸𑀘𑀓𑀸𑀦𑀁

𑀯𑀻𑀭𑁄 𑀧𑀭𑀺𑀘𑁆𑀘𑀚𑀺 𑀧𑀚𑀸𑀬 𑀳𑀺𑀢𑀢𑁆𑀣𑀫𑁂𑀯; ()

𑁩. ¶

𑀤𑀸𑀦𑀸𑀥𑀺𑀫𑀼𑀢𑁆𑀢𑀺𑀧𑀭𑀺𑀬𑁂𑀲𑀦 𑀯𑀺𑀧𑁆𑀧𑀯𑁂𑀲𑁄

𑀧𑀢𑁆𑀯𑀸 𑀢𑀧𑁄𑀯𑀦𑀫𑀓𑀺𑀢𑁆𑀢𑀺 𑀢𑀧𑁄𑀥𑀦𑀲𑁆𑀲,

𑀢𑀺𑀳𑀁 𑀅𑀮𑀢𑁆𑀣 𑀲𑀓𑀝𑀸𑀳𑀫𑀮𑁄𑀡𑀟𑀸𑀓𑀁

𑀬𑀲𑁆𑀲𑀸’𑀪𑀺𑀪𑀽𑀢𑀚𑀞𑀭𑀲𑁆𑀲 𑀚𑀺𑀖𑀘𑁆𑀙𑀺𑀢𑀢𑁆𑀢𑀸; () (𑀅𑀓𑀺𑀢𑁆𑀢𑀺𑀘𑀭𑀺𑀬𑀁)

𑁪.

𑀓𑀦𑁆𑀢𑀸𑀭𑀫𑀕𑁆𑀕 𑀧𑀝𑀺𑀧𑀦𑁆𑀦 𑀫𑀦𑀸𑀢𑀧𑀢𑁆𑀢𑀁

𑀧𑀘𑁆𑀘𑁂𑀓 𑀩𑀼𑀤𑁆𑀥𑀫𑀳𑀺𑀧𑀲𑁆𑀲𑀺𑀬 𑀲𑀗𑀓𑁆𑀔𑀯𑀺𑀧𑁆𑀧𑁄,

𑀨𑀼𑀝𑁆𑀞𑀁 𑀲𑀓𑀺𑀘𑁆𑀘𑀧𑀲𑀼𑀢𑁄 𑀲𑀽𑀭𑀺𑀬𑀸𑀢𑀧𑁂𑀦

𑀬𑁄 𑀙𑀢𑁆𑀢𑀼𑀧𑀸𑀳𑀡𑀫𑀤𑀸𑀲𑀺 𑀲𑀼𑀥𑁄𑀢𑀧𑀸𑀡𑀺; () (𑀲𑀗𑁆𑀔𑀘𑀭𑀺𑀬𑀁)

𑁫.

𑀤𑀼𑀩𑁆𑀪𑀺𑀓𑁆𑀔𑀧𑀻𑀴𑀦𑀪𑀬𑁂𑀦 𑀓𑀮𑀺𑀗𑁆𑀕𑀭𑀝𑁆𑀞𑀸

𑀲𑀁𑀬𑀸𑀘𑀢𑀁 𑀬𑀤𑀼𑀧𑀕𑀫𑁆𑀫 𑀥𑀦𑀜𑁆𑀚𑀬𑀯𑁆𑀳𑁄,

𑀲𑁄𑀡𑁆𑀟𑀸𑀬 𑀕𑀬𑁆𑀳 𑀦𑀺𑀚𑀫𑀜𑁆𑀚𑀦 𑀦𑀸𑀕𑀭𑀸𑀚𑀁

𑀬𑁄 𑀤𑀓𑁆𑀔𑀺𑀡𑁄𑀤𑀓 𑀦𑀺𑀲𑁂𑀓𑀫𑀓𑀸𑀲𑀺 𑀭𑀸𑀚𑀸; () (𑀓𑀼𑀭𑀼𑀥𑀫𑁆𑀫𑀘𑀭𑀺𑀬𑀁)

𑁬. ¶

𑀳𑀼𑀢𑁆𑀯𑀸𑀦 𑀬𑁄 𑀫𑀳𑀲𑀼𑀤𑀲𑁆𑀲𑀦 𑀘𑀓𑁆𑀓𑀯𑀢𑁆𑀢𑀻

𑀭𑀸𑀚𑀸 𑀓𑀼𑀲𑀸𑀯𑀢𑀺𑀧𑀼𑀭𑀫𑁆𑀳𑀺 𑀤𑀺𑀯𑀸 𑀘 𑀭𑀢𑁆𑀢𑁄,

𑀯𑀢𑁆𑀣𑀢𑁆𑀢𑀧𑀸𑀦𑀫𑀼𑀧𑀢𑁂𑀲𑀺 𑀘𑀭𑀸𑀧𑀬𑀺𑀢𑁆𑀯𑀸

𑀪𑁂𑀭𑀺𑀁𑀓 𑀅𑀲𑁂𑀲𑀓𑀧𑀡𑁆𑀟𑀺𑀓𑀬𑀸𑀘𑀓𑀸𑀦𑀁; () (𑀫𑀳𑀸𑀲𑀼𑀤𑀲𑁆𑀲𑀦𑀘𑀭𑀺𑀬𑀁)

𑁭.

𑀬𑁄 𑀲𑀢𑁆𑀢𑀪𑀼𑀫𑀺𑀪𑀼𑀚𑀲𑀸𑀲𑀺 𑀧𑀼𑀭𑁄𑀳𑀺𑀢𑁄’𑀧𑀺

𑀭𑀸𑀚𑀽𑀳𑀺 𑀮𑀤𑁆𑀥𑀫𑀔𑀺𑀮𑀁 𑀥𑀦𑀥𑀜𑁆𑀜𑀭𑀸𑀲𑀺𑀁,

𑀲𑀫𑁆𑀧𑀢𑁆𑀢𑀬𑀸𑀘𑀓𑀚𑀦𑀲𑁆𑀲 𑀧𑀭𑀺𑀘𑁆𑀙𑀚𑀺𑀢𑁆𑀯𑀸

𑀧𑀼𑀜𑁆𑀜𑀧𑁆𑀧𑀩𑀦𑁆𑀥𑀫𑀪𑀺𑀲𑀜𑁆𑀘𑀺𑀦𑀺 𑀩𑁄𑀥𑀺𑀳𑁂𑀢𑀼; () (𑀫𑀳𑀸𑀕𑁄𑀯𑀺𑀦𑁆𑀤𑀘𑀭𑀺𑀬𑀁)

𑁮.

𑀥𑀫𑁆𑀫𑀸𑀦𑀼𑀲𑀸𑀲𑀺 𑀦𑀺𑀫𑀺𑀦𑀸𑀫 𑀫𑀳𑀻𑀪𑀼𑀚𑁄’𑀧𑀺

𑀲𑀸𑀮𑀁 𑀯𑀺𑀥𑀸𑀬 𑀫𑀺𑀣𑀺𑀮𑀸𑀬 𑀘𑀢𑀼𑀫𑁆𑀫𑀼𑀔𑀁 𑀬𑁄,

𑀅𑀘𑁆𑀙𑀺𑀦𑁆𑀦𑀫𑀢𑁆𑀣𑀺𑀚𑀦𑀧𑀓𑁆𑀔𑀺𑀘𑀢𑀼𑀧𑁆𑀧𑀤𑀸𑀦𑀁

𑀤𑀸𑀦𑀁 𑀧𑀯𑀢𑁆𑀢𑀬𑀻 𑀧𑀼𑀭𑀸 𑀤𑀤𑀢𑀁 𑀯𑀭𑀺𑀝𑁆𑀞𑁄; () (𑀦𑀺𑀫𑀺𑀭𑀸𑀚𑀘𑀭𑀺𑀬𑀁)

𑁯. ¶

𑀬𑁄 𑀏𑀓𑀭𑀸𑀚𑀲𑀼𑀢𑀘𑀦𑁆𑀤𑀓𑀼𑀫𑀸𑀭𑀪𑀽𑀢𑁄

𑀫𑀼𑀤𑁆𑀥𑀸𑀪𑀺𑀲𑁂𑀓 𑀓𑀭𑀡𑀸𑀬 𑀚𑀦𑁂𑀳𑀺 𑀕𑀘𑁆𑀙𑀁,

𑀲𑀁𑀯𑁂𑀚𑀺𑀢𑁄 𑀲𑀯𑀺𑀪𑀯𑁂 𑀢𑀺𑀪𑀯𑁂’𑀧𑀺 𑀬𑀜𑁆𑀜𑀸-

𑀯𑀸𑀝𑀁 𑀯𑀺𑀥𑀸𑀬’𑀪𑀺𑀧𑀯𑀢𑁆𑀢𑀬𑀺 𑀤𑀸𑀦𑀯𑀝𑁆𑀝𑀁; () (𑀘𑀦𑁆𑀤𑀓𑀼𑀫𑀸𑀭𑀘𑀭𑀺𑀬𑀁)

𑁧𑁦.

𑀬𑁄 𑀯𑀢𑁆𑀣𑀼𑀲𑀸𑀭𑀕𑀳𑀡𑁂𑀦 𑀅𑀢𑀺𑀢𑁆𑀢𑀭𑀽𑀧𑁄

𑀪𑀼𑀫𑀺𑀲𑁆𑀲𑀭𑁄’𑀧𑀺 𑀲𑀺𑀯𑀺𑀦𑀸𑀫 𑀲𑀼𑀭𑀸𑀥𑀺𑀧𑀲𑁆𑀲,

𑀚𑀘𑁆𑀘𑀦𑁆𑀥𑀯𑁂𑀲𑀕𑀳𑀺𑀢𑀲𑁆𑀲 𑀯𑀺𑀮𑁄𑀘𑀦𑀸𑀦𑀺

𑀉𑀧𑁆𑀧𑀸𑀝𑀬𑀺𑀢𑁆𑀯 𑀧𑀤𑀤𑀁 𑀮𑀪𑀺 𑀤𑀺𑀩𑁆𑀩𑀘𑀓𑁆𑀔𑀽; () (𑀲𑀺𑀯𑀺𑀭𑀸𑀚𑀘𑀭𑀺𑀬𑀁;)

𑁧𑁧.

𑀤𑀸𑀦𑀸𑀥𑀺𑀫𑀼𑀢𑁆𑀢𑀺𑀧𑀭𑀫𑁄 𑀲𑀲𑀧𑀡𑁆𑀟𑀺𑀢𑁄 𑀬𑁄

𑀫𑀺𑀢𑁆𑀢𑁂𑀦𑀼 𑀲𑀸𑀲𑀺𑀬 𑀅𑀥𑀺𑀝𑁆𑀞𑀺𑀢𑀼𑀧𑁄𑀲𑀣𑀗𑁆𑀕𑁄,

𑀅𑀗𑁆𑀕𑀸𑀭𑀫𑀼𑀤𑁆𑀥𑀦𑀺 𑀧𑀧𑀸𑀢 𑀲𑀚𑀻𑀯𑀺𑀢𑀸𑀲𑀁

𑀳𑀺𑀢𑁆𑀯𑀸 𑀤𑁆𑀯𑀺𑀚𑀲𑁆𑀲 𑀢𑀦𑀼𑀫𑀁𑀲𑀧𑀤𑀸𑀢𑀼𑀓𑀸𑀫𑁄; () (𑀲𑀲𑀧𑀡𑁆𑀟𑀺𑀢𑀘𑀭𑀺𑀬𑀁; 𑀇𑀢𑀺𑀤𑀸𑀦𑀧𑀸𑀭𑀫𑀻𑀁)

𑁧𑁨. ¶

𑀬𑁄 𑀫𑀸𑀢𑀼𑀧𑁄𑀲𑀓𑀓𑀭𑀺 𑀪𑀺𑀲𑀫𑀼𑀤𑁆𑀥𑀭𑀢𑁆𑀢𑁄

𑀅𑀦𑁆𑀥𑀸𑀬 𑀳𑀢𑁆𑀣𑀺𑀤𑀫𑀓𑁂𑀦 𑀓𑀭𑁂𑀡𑀼𑀓𑀸𑀬,

𑀲𑁄𑀡𑁆𑀟𑀸𑀬 𑀲𑀼𑀝𑁆𑀞𑀼𑀕𑀳𑀺𑀢𑁄’𑀧𑁆𑀬’𑀯𑀺𑀓𑀡𑁆𑀟𑀺𑀢𑀲𑁆𑀲

𑀲𑀻𑀮𑀲𑁆𑀲 𑀔𑀡𑁆𑀟𑀦𑀪𑀬𑀸 𑀦𑀚𑀦𑁂𑀲𑀺 𑀓𑁄𑀧𑀁; () (𑀫𑀸𑀢𑀼𑀧𑁄𑀲𑀓𑀘𑀭𑀺𑀬𑀁)

𑁧𑁩.

𑀬𑁄 𑀪𑀼𑀭𑀺𑀤𑀢𑁆𑀢𑀪𑀼𑀚𑀕𑁄’𑀧𑀭𑀺𑀯𑀫𑁆𑀫𑀺𑀓𑀝𑁆𑀞𑁄,

𑀲𑀻𑀮𑀩𑁆𑀩𑀢𑀁 𑀯𑀺𑀲𑀥𑀭𑁄 𑀲𑀫𑀥𑀺𑀝𑁆𑀞𑀳𑀺𑀢𑁆𑀯𑀸,

𑀧𑁂𑀴𑀸𑀬 𑀔𑀺𑀢𑁆𑀢𑀪𑀼𑀚𑀕𑁂 𑀅𑀳𑀺𑀕𑀼𑀡𑁆𑀞𑀺𑀓𑀫𑁆𑀳𑀺

𑀲𑀻𑀮𑀲𑁆𑀲 𑀓𑀼𑀧𑁆𑀧𑀦𑀪𑀬𑁂𑀦 𑀚𑀳𑀸𑀲𑀺 𑀓𑁄𑀧𑀁; () (𑀪𑀼𑀭𑀺𑀤𑀢𑁆𑀢𑀘𑀭𑀺𑀬𑀁;)

𑁧𑁪.

𑀲𑀻𑀮𑀩𑁆𑀩𑀢𑀸𑀤𑀺𑀯𑀺𑀪𑀯𑁄 𑀚𑀮𑀺𑀢𑀺𑀤𑁆𑀥𑀺𑀫𑀸 𑀬𑁄

𑀘𑀫𑁆𑀧𑁂𑀬𑁆𑀬𑀦𑀸𑀫𑀪𑀼𑀚𑀕𑁄 𑀅𑀳𑀺𑀕𑀼𑀡𑁆𑀞𑀺𑀓𑀫𑁆𑀳𑀺,

𑀇𑀘𑁆𑀙𑀸𑀦𑀼𑀭𑀽𑀧𑀯𑀺𑀘𑀭𑁄 𑀘𑀫𑀭𑀻’𑀯 𑀯𑀸𑀮𑀁

𑀲𑀻𑀮𑀁 𑀚𑀼𑀕𑁄𑀧 𑀦𑀧𑀺 𑀢𑀩𑁆𑀩𑀥𑀓𑁂 𑀘𑀼𑀓𑁄𑀧; () (𑀘𑀫𑁆𑀧𑁂𑀬𑁆𑀬𑀘𑀭𑀺𑀬𑀁;)

𑁧𑁫. ¶

𑀬𑁄 𑀘𑀽𑀮𑀩𑁄𑀥𑀺𑀯𑀺𑀲𑀼𑀢𑁄 𑀲𑀫𑀤𑀺𑀝𑁆𑀞𑀳𑀢𑁆𑀯𑀸

𑀲𑀻𑀮𑀩𑁆𑀩𑀢𑀁 𑀯𑀦𑀫𑀼𑀧𑁂𑀘𑁆𑀘 𑀯𑀲𑀁 𑀧𑀺𑀬𑀸𑀬,

𑀢𑀸𑀬𑀁 𑀧𑀲𑀬𑁆𑀳 𑀕𑀳𑀺𑀢𑀸𑀬’𑀧𑀺 𑀓𑀸𑀲𑀺𑀭𑀜𑁆𑀜𑀸

𑀲𑀻𑀮𑀩𑁆𑀩𑀺𑀲𑁄𑀥𑀦𑀧𑀭𑁄 𑀧𑀚𑀳𑀺𑀢𑁆𑀣 𑀭𑁄𑀲𑀁; () (𑀘𑀽𑀮𑀩𑁄𑀥𑀺𑀘𑀭𑀺𑀬𑀁)

𑁧𑁬.

𑀬𑁄 𑀪𑀺𑀁𑀲𑀭𑀽𑀧𑀺 𑀫𑀳𑀺𑀲𑁄’𑀧𑀺 𑀯𑀮𑀺𑀫𑀼𑀔𑀲𑁆𑀲

𑀆𑀕𑀼𑀁 𑀢𑀺𑀢𑀺𑀓𑁆𑀔𑀫𑀔𑀻𑀮𑀁 𑀧𑀭𑀺𑀲𑀼𑀤𑁆𑀥𑀲𑀺𑀮𑁄,

𑀭𑀼𑀓𑁆𑀔𑀝𑁆𑀞𑀬𑀓𑁆𑀔𑀯𑀘𑀦𑀸𑀦𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸

𑀢𑀁 𑀲𑀻𑀮𑀪𑀗𑁆𑀕𑀪𑀬𑀢𑁄 𑀪𑀬𑀢𑁄 𑀫𑀼𑀫𑁄𑀘; ()

𑁧𑁭.

𑀬𑁄 𑀯𑀼𑀬𑁆𑀳𑀫𑀸𑀦𑀫𑀧𑀦𑀻𑀬 𑀦𑀤𑀻𑀧𑀯𑀸𑀳𑀸

𑀫𑀺𑀢𑁆𑀢𑀤𑁆𑀤𑀼𑀳𑀺𑀁 𑀧𑀼𑀢𑀲𑀚𑀻𑀯𑀺𑀢𑀤𑀸𑀦𑀳𑁂𑀢𑀼,

𑀭𑀜𑁆𑀜𑀸 𑀫𑀼𑀫𑁄𑀘 𑀯𑀥𑀺𑀬𑀁 𑀅𑀯𑀺𑀓𑁄𑀧𑀦𑁂𑀦

𑀲𑀻𑀮𑀲𑁆𑀲 𑀭𑀽𑀭𑀼𑀳𑀭𑀺𑀡𑁄’𑀧𑀺 𑀳𑀭𑀺𑀲𑁆𑀲𑀯𑀡𑁆𑀡𑁄, () (𑀭𑀽𑀭𑀼𑀫𑀺𑀕𑀭𑀸𑀚𑀘𑀭𑀺𑀬𑀁;)

𑁧𑁮. ¶

𑀬𑁄 𑀤𑀦𑁆𑀢𑀓𑀝𑁆𑀞𑀲𑀓𑀮𑁂𑀳𑀺 𑀚𑀝𑀸𑀓𑀼𑀮𑁂𑀳𑀺

𑀓𑀼𑀤𑁆𑀥𑁂𑀦 𑀓𑀼𑀝𑀚𑀝𑀺𑀮𑁂𑀦 𑀓𑀢𑀸𑀳𑀺𑀲𑀸𑀧𑁄,

𑀫𑀸𑀢𑀗𑁆𑀕𑀦𑀸𑀫𑀫𑀼𑀦𑀺 𑀲𑀻𑀮𑀥𑀦𑀁 𑀚𑀼𑀕𑁄𑀧

𑀲𑀫𑁆𑀧𑀸𑀢𑀲𑀸𑀧𑀭𑀺𑀧𑀼𑀫𑀺𑀤𑁆𑀥𑀺𑀩𑀮𑁂𑀦 𑀭𑀓𑁆𑀔𑀁; () (𑀫𑀸𑀢𑀗𑁆𑀕𑀘𑀭𑀺𑀬𑀁;)

𑁧𑁯.

𑀫𑀕𑁆𑀕𑀸𑀯𑀢𑀺𑀡𑁆𑀡𑀫𑀥𑀫𑀁 𑀓𑀮𑁆𑀳𑀸𑀪𑀻𑀮𑀸𑀲𑀸-

𑀲𑀗𑁆𑀖𑀝𑁆𑀝𑀺𑀢𑁄𑀪𑀬𑀭𑀣𑀗𑁆𑀕𑀫𑀥𑀫𑁆𑀫𑀬𑀓𑁆𑀔𑀁,

𑀓𑁄𑀧𑀕𑁆𑀕𑀺𑀦𑀸 𑀦𑀧𑀭𑀺𑀛𑀸𑀧𑀬𑀫𑀺𑀤𑁆𑀥𑀺𑀫𑀸 𑀬𑁄

𑀲𑀻𑀮𑀁 𑀭𑀭𑀓𑁆𑀔 𑀔𑀮𑀼 𑀥𑀫𑁆𑀫𑀺𑀓𑀬𑀓𑁆𑀔𑀭𑀸𑀚𑀸; () (𑀥𑀫𑁆𑀫𑀸𑀥𑀫𑁆𑀫 𑀤𑁂𑀯𑀧𑀼𑀢𑁆𑀢𑀘𑀭𑀺𑀬𑀁;)

𑁨𑁦.

𑀬𑁄 𑀧𑁄𑀭𑀺𑀲𑀸𑀤𑀯𑀲𑀕𑀲𑁆𑀲 𑀚𑀬𑀤𑁆𑀤𑀺𑀲𑀲𑁆𑀲

𑀭𑀜𑁆𑀜𑁄 𑀧𑀝𑀺𑀜𑁆𑀜𑀫𑀥𑀺𑀓𑀺𑀘𑁆𑀘 𑀯𑀺𑀚𑀺𑀯𑀺𑀢𑀸𑀲𑁄,

𑀔𑀻𑀢𑁆𑀢𑀸𑀬𑀼𑀥𑁄 𑀢𑀤𑀼𑀧𑀕𑀫𑁆𑀫 𑀅𑀮𑀻𑀦𑀲𑀢𑁆𑀢𑁄

𑀬𑀓𑁆𑀔𑀁 𑀤𑀫𑁂𑀲𑀺 𑀦𑀦𑀼 𑀲𑀻𑀮𑀯𑀢𑀁 𑀦𑀺𑀤𑀸𑀦𑀸; () (𑀅𑀮𑀻𑀦𑀲𑀢𑁆𑀢𑀘𑀭𑀺𑀬𑀁;)

𑁨𑁧. ¶

𑀬𑁄 𑀲𑀗𑁆𑀔𑀧𑀸𑀮𑀪𑀼𑀚𑀕𑁄 𑀦𑀺𑀚𑀪𑁄𑀕𑀧𑀽𑀭-

𑀯𑁆𑀬𑀸𑀪𑀗𑁆𑀕𑀺𑀪𑀸𑀭𑀢𑀭𑀯𑀸𑀳𑀺𑀢𑀺 𑀪𑁄𑀚𑀧𑀼𑀢𑁆𑀢𑁂,

𑀓𑀸𑀭𑀼𑀜𑁆𑀜𑀫𑀸𑀧 𑀅𑀪𑀺𑀕𑀦𑁆𑀢𑀼𑀫𑀧𑀸𑀤𑀢𑀸𑀬

𑀲𑀻𑀮𑀲𑁆𑀲 𑀪𑀗𑁆𑀕𑀪𑀬𑀢𑁄’𑀧𑀺 𑀳𑀼𑀢𑀸𑀲𑀢𑁂𑀚𑁄; () (𑀲𑀗𑁆𑀔𑀧𑀸𑀮𑀘𑀭𑀺𑀬𑀁; 𑀇𑀢𑀺 𑀲𑀻𑀮𑀧𑀸𑀭𑀫𑀺𑀁;)

𑁨𑁨.

𑀲𑀗𑁆𑀔𑀸𑀭𑀥𑀫𑁆𑀫𑀔𑀡𑀪𑀗𑁆𑀕𑀲𑀪𑀸𑀯𑀤𑀲𑁆𑀲𑀺

𑀉𑀲𑁆𑀲𑀸𑀯𑀩𑀺𑀦𑁆𑀤𑀼𑀯𑀺𑀮𑀬𑀁’𑀯 𑀬𑀼𑀥𑀜𑁆𑀚𑀬𑁄 𑀬𑁄,

𑀭𑀸𑀚𑀸 𑀚𑀦𑀲𑁆𑀲 𑀭𑀼𑀤𑀢𑁄 𑀧𑀯𑀺𑀳𑀸𑀬 𑀭𑀚𑁆𑀚𑀁

𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀫𑀧𑀼𑀭𑀬𑀺 𑀧𑀩𑁆𑀩𑀚𑀺𑀢𑁆𑀯𑀸; () (𑀬𑀼𑀥𑀜𑁆𑀚𑀬 𑀘𑀭𑀺𑀬𑀁;)

𑁨𑁩.

𑀬𑁄 𑀲𑁄𑀫𑀦𑀲𑁆𑀲𑀯𑀺𑀲𑀼𑀢𑁄 𑀓𑀼𑀭𑀼𑀭𑀸𑀚𑀧𑀼𑀢𑁆𑀢𑁄

𑀤𑀼𑀲𑁆𑀲𑀻𑀮𑀓𑀼𑀝𑀚𑀝𑀺𑀮𑀩𑁆𑀩𑀘𑀦𑀁 𑀧𑀝𑀺𑀘𑁆𑀘,

𑀭𑀜𑁆𑀜𑀸 𑀦𑀺𑀬𑁄𑀚𑀺𑀢𑀯𑀥𑁄 𑀯𑀥𑀓𑀸𑀯𑀓𑀸𑀲𑀁

𑀮𑀤𑁆𑀥𑀸𑀦𑀼𑀲𑀸𑀲𑀺𑀬’𑀪𑀺𑀦𑀺𑀓𑁆𑀔𑀫𑀺 𑀘𑀢𑁆𑀢𑀭𑀚𑁆𑀚𑁄; () (𑀲𑁄𑀫𑀦𑀲𑁆𑀲 𑀘𑀭𑀺𑀬𑀁;)

𑁨𑁪. ¶

𑀬𑁄 𑀓𑀸𑀲𑀺𑀭𑀸𑀚𑀢𑀦𑀼𑀚𑁄’𑀧𑀺 𑀅𑀬𑁄𑀖𑀭𑀸𑀔𑁆𑀬𑁄

𑀈𑀳𑀁 𑀪𑀢𑁄 𑀘𑀺𑀭𑀫𑀬𑁄𑀖𑀭𑀯𑀸𑀲𑀳𑀻𑀭𑀽,

𑀭𑀚𑁆𑀚𑀁 𑀧𑀳𑀸𑀬 𑀧𑀭𑀫𑀁 𑀧𑀺𑀢𑀭𑀸 𑀧𑀤𑀢𑁆𑀢𑀁

𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀧𑀭𑁄 𑀯𑀦𑀫𑁄𑀢𑀭𑀺𑀢𑁆𑀣; () (𑀅𑀬𑁄𑀖𑀭𑀘𑀭𑀺𑀬𑀁;)

𑁨𑁫.

𑀬𑁄 𑀧𑀜𑁆𑀘𑀓𑀸𑀫𑀕𑀼𑀡𑀤𑀻𑀧𑀦𑀢𑁄’𑀧𑀤𑀺𑀝𑁆𑀞-

𑀲𑀫𑁆𑀪𑀢𑁆𑀢𑀫𑀺𑀢𑁆𑀢𑀯𑀘𑀦𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸,

𑀦𑀺𑀤𑁆𑀥𑀦𑁆𑀢𑀓𑀜𑁆𑀘𑀦𑀦𑀺𑀪𑀘𑁆𑀙𑀯𑀺 𑀓𑀜𑁆𑀘𑀦𑀸𑀔𑁆𑀬𑁄

𑀧𑀢𑁆𑀯𑀸 𑀢𑀧𑁄𑀯𑀦𑀫𑀧𑀩𑁆𑀩𑀚𑀺 𑀩𑀦𑁆𑀥𑀯𑁂𑀳𑀺; () (𑀪𑀺𑀲𑀘𑀭𑀺𑀬𑀁;)

𑁨𑁬. ¶

𑀧𑀓𑁆𑀔𑀺𑀢𑁆𑀢𑀤𑀤𑁆𑀤𑀼𑀮𑀦𑀳𑀸𑀭𑀼𑀭𑀺𑀯𑀸’𑀦𑀮𑀫𑁆𑀳𑀺

𑀲𑀗𑁆𑀔𑀸𑀭𑀥𑀫𑁆𑀫𑀯𑀺𑀲𑀬𑁂 𑀧𑀝𑀺𑀯𑀝𑁆𑀝𑀺𑀢𑀢𑁆𑀢𑁄,

𑀬𑁄 𑀲𑁄𑀡𑀪𑀼𑀲𑀼𑀭𑀲𑀼𑀥𑀻 𑀯𑀺𑀪𑀯𑀁 𑀧𑀳𑀸𑀬

𑀧𑀩𑁆𑀩𑀚𑁆𑀚𑀺𑀢𑀼𑀁 𑀲𑀧𑀭𑀺𑀲𑁄 𑀧𑀯𑀦𑀁 𑀚𑀕𑀸𑀫; () (𑀲𑁄𑀡𑀧𑀡𑁆𑀟𑀺𑀢𑀘𑀭𑀺𑀬𑀁; 𑀇𑀢𑀺 𑀦𑁂𑀓𑁆𑀔𑀫𑁆𑀫 𑀧𑀸𑀭𑀫𑀺;)

𑁨𑁭.

𑀬𑁄 𑀲𑁂𑀡𑀓𑁄 𑀲𑀼𑀥𑀺 𑀧𑀲𑀺𑀩𑁆𑀩𑀓𑀕𑀩𑁆𑀪𑀲𑀸𑀬𑀺𑀁

𑀯𑀺𑀧𑁆𑀧𑀲𑁆𑀲𑀺 𑀫𑁄𑀳𑀓𑀮𑀼𑀲𑀺𑀓𑀢𑀫𑀸𑀦𑀲𑀲𑁆𑀲,

𑀲𑀧𑁆𑀧𑀁 𑀲𑀼𑀖𑁄𑀭𑀫𑀼𑀧𑀤𑀲𑁆𑀲𑀺𑀬 𑀤𑀻𑀖𑀤𑀲𑁆𑀲𑀻

𑀧𑀜𑁆𑀜𑀸𑀲𑀼𑀧𑀸𑀭𑀫𑀺𑀫𑀧𑀽𑀭𑀬𑀺 𑀪𑀼𑀭𑀺𑀫𑁂𑀥𑁄; () (𑀲𑁂𑀡𑀓𑀧𑀡𑁆𑀟𑀺𑀢 𑀘𑀭𑀺𑀬𑀁;)

𑁨𑁮.

𑀬𑁄 𑀬𑀁 𑀫𑀳𑁄𑀲𑀥𑀲𑀫𑀸𑀔𑁆𑀬𑀲𑀼𑀥𑀻 𑀲𑀼𑀥𑀻𑀲𑁄

𑀉𑀫𑁆𑀫𑀕𑁆𑀕𑀲𑀁𑀯𑀼𑀢𑀦𑀺𑀲𑀕𑁆𑀕𑀯𑀢𑀺𑀲𑀫𑁄’𑀧𑀺,

𑀉𑀫𑁆𑀫𑀕𑁆𑀕𑀢𑁄’𑀯 𑀲𑀩𑀮𑀁 𑀫𑀺𑀣𑀺𑀮𑀸𑀥𑀺𑀦𑀸𑀣𑀁

𑀧𑀜𑁆𑀜𑀸𑀧𑀚𑀸𑀧𑀢𑀺𑀧𑀢𑀺 𑀭𑀺𑀧𑀼𑀢𑁄 𑀫𑀼𑀫𑁄𑀘; () (𑀫𑀳𑁄𑀲𑀥𑀘𑀭𑀺𑀬𑀁 𑀇𑀢𑀺 𑀧𑀜𑁆𑀜𑀸 𑀧𑀸𑀭𑀫𑀻;)

𑁨𑁯. ¶

𑀯𑀸𑀮𑁂𑀦𑀼’𑀴𑀸𑀭𑀯𑀻𑀭𑀺𑀬𑁄 𑀯𑀻𑀭𑀺𑀬𑁂𑀦 𑀖𑁄𑀭𑀁

𑀲𑀁𑀲𑀸𑀭𑀤𑀼𑀓𑁆𑀔𑀫𑀺𑀯 𑀬𑁄 𑀓𑀺𑀲𑀓𑀸𑀮𑀓𑁄’𑀧𑀺,

𑀕𑀫𑁆𑀪𑀻𑀭𑀲𑀸𑀕𑀭𑀚𑀮𑀁 𑀲𑀧𑀚𑀸𑀦𑀼𑀓𑀫𑁆𑀧𑀻

𑀉𑀲𑁆𑀲𑀺𑀜𑁆𑀘𑀺𑀢𑀼𑀁 𑀲𑀢𑀢𑀫𑀸𑀭𑀳𑀺 𑀲𑀢𑁆𑀢𑀲𑀸𑀭𑁄; () (𑀓𑀸𑀮𑀓 𑀘𑀭𑀺𑀬𑀁)

𑁩𑁦.

𑀭𑀸𑀚𑀸𑀫𑀳𑀸𑀤𑀺𑀚𑀦𑀓𑁄 𑀚𑀦𑀓𑀼𑀦𑁆𑀤𑀘𑀦𑁆𑀤𑁄

𑀕𑀫𑁆𑀪𑀻𑀭𑀪𑀼𑀭𑀺𑀲𑀮𑀺𑀮𑀁 𑀲𑀮𑀺𑀮𑀸𑀓𑀭𑀁 𑀬𑁄,

𑀲𑀽𑀭𑁄’𑀭𑀼𑀩𑀸𑀳𑀼𑀯𑀻𑀭𑀺𑀬𑁄 𑀯𑀻𑀭𑀺𑀬𑀁 𑀢𑀢𑀸𑀭

𑀲𑀁𑀲𑀸𑀭𑀲𑀺𑀦𑁆𑀥𑀼𑀢𑀭𑀡𑁂 𑀢𑀭𑀡𑀻𑀲𑀭𑀽𑀧𑁄; () (𑀫𑀳𑀸𑀚𑀦𑀓𑀘𑀭𑀺𑀬𑀁; 𑀇𑀢𑀺 𑀯𑀻𑀭𑀺𑀬𑀧𑀸𑀭𑀫𑀺;)

𑁩𑁧.

𑀬𑁄 𑀔𑀦𑁆𑀢𑀺𑀢𑀺𑀦𑁆𑀢𑀳𑀤𑀬𑁄 𑀬𑀢𑀺𑀔𑀦𑁆𑀢𑀺𑀯𑀸𑀤𑀻

𑀙𑁂𑀤𑀸𑀧𑀺𑀢𑁂’𑀧𑀺 𑀲𑀓𑀮𑀁 𑀲𑀓𑀮𑀢𑁆𑀢𑀪𑀸𑀯𑁂,

𑀲𑀫𑀧𑀽𑀢𑀔𑀦𑁆𑀢𑀺𑀚𑀮𑀫𑁂𑀯𑀪𑀽𑀲𑀁 𑀲𑀺𑀲𑁂𑀘

𑀯𑁆𑀬𑀸𑀧𑀸𑀤𑀧𑀸𑀯𑀓𑀧𑀤𑀺𑀢𑁆𑀢𑀓𑀮𑀸𑀩𑀼𑀭𑀸𑀚𑁂; () (𑀔𑀦𑁆𑀢𑀺𑀯𑀸𑀤𑀻 𑀘𑀭𑀺𑀬𑀁)

𑁩𑁨. ¶

𑀬𑁄 𑀥𑀫𑁆𑀫𑀧𑀸𑀮𑀦𑀧𑀭𑁄 𑀲𑀼𑀲𑀼 𑀥𑀫𑁆𑀫𑀧𑀸𑀮𑁄

𑀓𑀸𑀭𑀸𑀧𑀺𑀢𑁂’𑀧𑀺 𑀯𑀥𑀓𑁂𑀳’𑀲𑀺𑀫𑀸𑀮𑀓𑀫𑁆𑀫𑀁,

𑀆𑀲𑀦𑁆𑀦𑀢𑀸𑀧𑀦𑀺𑀭𑀬𑀫𑁆𑀳𑀺 𑀧𑀢𑀸𑀧𑀭𑀸𑀚𑁂

𑀔𑀦𑁆𑀢𑀺𑀁 𑀧𑀯𑀢𑁆𑀢𑀬𑀺 𑀫𑀦𑀧𑁆𑀧𑀺𑀢𑀔𑀦𑁆𑀢𑀺𑀫𑁂𑀢𑁆𑀢𑁄; () (𑀥𑀫𑁆𑀫𑀧𑀸𑀮 𑀘𑀭𑀺𑀬𑀁; 𑀇𑀢𑀺 𑀔𑀦𑁆𑀢𑀺𑀧𑀸𑀭𑀫𑀻;)

𑁩𑁩.

𑀬𑁄 𑀅𑀦𑁆𑀢𑀭𑀻𑀧𑀕𑀪𑀬𑀁𑀓𑀭𑀲𑀼𑀁𑀲𑀼𑀫𑀸𑀭-

𑀫𑀼𑀤𑁆𑀥𑀸𑀲𑀫𑀧𑁆𑀧𑀺𑀢𑀧𑀤𑁄 𑀓𑀧𑀺𑀭𑀸𑀚𑀪𑀽𑀢𑁄,

𑀤𑀺𑀦𑁆𑀦𑀁 𑀧𑀝𑀺𑀜𑁆𑀜𑀫𑀦𑀼𑀓𑀼𑀩𑁆𑀩𑀫𑀦𑀜𑁆𑀜𑀮𑀩𑁆𑀪𑀁

𑀦𑀚𑁆𑀚𑀸 𑀧𑀧𑀸𑀢 𑀧𑀭𑀢𑀻𑀭𑀫𑀲𑀘𑁆𑀘𑀪𑀻𑀭𑀽; () (𑀓𑀧𑀺𑀭𑀸𑀚 𑀘𑀭𑀺𑀬𑀁)

𑁩𑁪. ¶

𑀬𑁄 𑀲𑀘𑁆𑀘𑀧𑀸𑀭𑀫𑀺𑀧𑀭𑁄 𑀯𑀲𑀺 𑀧𑀘𑁆𑀘𑀦𑀸𑀫𑁄

𑀲𑀘𑁆𑀘𑁂𑀦 𑀲𑀘𑁆𑀘𑀫𑀳𑀻𑀲𑀦𑁆𑀥𑀺𑀬 𑀲𑀘𑁆𑀘𑀤𑀲𑁆𑀲𑀻,

𑀧𑁄𑀭𑀺𑀁 𑀲𑀫𑀕𑁆𑀕𑀓𑀭𑀡𑀺𑀁 𑀲𑀺𑀭𑀺𑀚𑀫𑁆𑀩𑀼𑀤𑀻𑀧𑁂

𑀲𑀫𑁆𑀧𑀸𑀮𑀬𑀁 𑀲𑀓𑀮𑀮𑁄𑀓𑀫𑀯𑁄𑀘 𑀯𑀸𑀘𑀁; () (𑀲𑀘𑁆𑀘𑀲𑀯𑁆𑀪𑀬 𑀘𑀭𑀺𑀬𑀁;)

𑁩𑁫.

𑀬𑁄 𑀯𑀝𑁆𑀝𑀧𑁄𑀢𑀓𑀤𑀺𑀚𑁄 𑀅𑀯𑀺𑀭𑀽𑀴𑁆𑀳𑀧𑀓𑁆𑀔-

𑀧𑀸𑀤𑁄’𑀢𑀺𑀔𑀼𑀤𑁆𑀤𑀓𑀓𑀼𑀮𑀸𑀯𑀓𑀕𑀩𑁆𑀪𑀲𑀸𑀬𑀻,

𑀲𑀘𑁆𑀘𑁂𑀦 𑀲𑁄𑀴𑀲𑀓𑀭𑀺𑀲𑀫𑀺𑀢𑀧𑁆𑀧𑀤𑁂𑀲𑁂

𑀤𑀸𑀯𑀕𑁆𑀕𑀺𑀦𑀺𑀩𑁆𑀩𑀼𑀢𑀺𑀫𑀓𑀸 𑀣𑀺𑀭𑀫𑀸𑀬𑀼𑀕𑀦𑁆𑀢𑀁; () (𑀯𑀝𑁆𑀝𑀧𑁄𑀢𑀓 𑀘𑀭𑀺𑀬𑀁;)

𑁩𑁬.

𑀬𑁄 𑀕𑀺𑀚𑁆𑀛𑀓𑀸𑀓𑀩𑀓𑀩𑀸𑀡𑀓𑀪𑀓𑁆𑀔𑀪𑀼𑀢-

𑀩𑀦𑁆𑀥𑀼 𑀦𑀺𑀤𑀸𑀖𑀭𑀯𑀺𑀢𑀸𑀧𑀧𑀭𑀺𑀓𑁆𑀔𑀬𑀸’𑀧𑁂,

𑀭𑀺𑀢𑁆𑀢𑁂 𑀲𑀭𑀫𑁆𑀳𑀺 𑀧𑀭𑀺𑀫𑁄𑀘𑀬𑀺 𑀫𑀘𑁆𑀙𑀭𑀸𑀚𑀸

𑀲𑀘𑁆𑀘𑁂𑀦’𑀓𑀸𑀮𑀚𑀮𑀤𑀸𑀕𑀫𑀧𑀘𑁆𑀘𑀬𑁂𑀦; () (𑀫𑀘𑁆𑀙𑀭𑀸𑀚 𑀘𑀭𑀺𑀬𑀁;)

𑁩𑁭. ¶

𑀤𑀼𑀝𑁆𑀞𑀸𑀳𑀺𑀤𑀝𑁆𑀞𑀯𑀺𑀲𑀯𑁂𑀕𑀯𑀺𑀫𑀼𑀘𑁆𑀙𑀺𑀢𑀁 𑀬𑁄

𑀫𑀡𑁆𑀟𑀩𑁆𑀩𑀢𑀸𑀧𑀲𑀯𑀭𑁄’𑀭𑀲𑀬𑀜𑁆𑀜𑀤𑀢𑁆𑀢𑀁,

𑀓𑀢𑁆𑀯𑀸𑀦 𑀲𑀘𑁆𑀘𑀓𑀺𑀭𑀺𑀬𑀁 𑀓𑀭𑀼𑀡𑀸𑀬 𑀓𑀡𑁆𑀳-

𑀤𑀻𑀧𑀸𑀬𑀦𑁄 𑀫𑀼𑀦𑀺 𑀫𑀼𑀫𑁄𑀘 𑀢𑀫𑀸𑀧𑀤𑀫𑁆𑀳𑀸; () (𑀓𑀡𑁆𑀳𑀸𑀤𑀻𑀧𑀸𑀬𑀦 𑀘𑀭𑀺𑀬𑀁;)

𑁩𑁮.

𑀬𑁄 𑀧𑁄𑀭𑀺𑀲𑀸𑀤𑀯𑀲𑀕𑁄 𑀲𑀼𑀢𑀲𑁄𑀫𑀭𑀸𑀚𑀸

𑀭𑀚𑁆𑀚𑁂 𑀢𑀺𑀬𑁄𑀚𑀦𑀲𑀢𑁂 𑀲𑀓𑀚𑀻𑀯𑀺𑀢𑁂’𑀧𑀺,

𑀲𑀘𑁆𑀘𑀁 𑀭𑀭𑀓𑁆𑀔 𑀦𑀦𑀼 𑀲𑀘𑁆𑀘𑀧𑀭𑁄 𑀦𑀺𑀭𑀸𑀲𑁄

𑀤𑀺𑀦𑁆𑀦𑀁 𑀧𑀝𑀺𑀲𑁆𑀲𑀯𑀫𑀼𑀪𑀺𑀦𑁆𑀦𑀫𑀧𑀸𑀦𑀼𑀓𑀼𑀩𑁆𑀩𑀁; () (𑀲𑀼𑀢𑀲𑁄𑀫𑀘𑀭𑀺𑀬𑀁; 𑀇𑀢𑀺 𑀲𑀘𑁆𑀘𑀧𑀸𑀭𑀫𑀻;)

𑁩𑁯.

𑀦𑀺𑀩𑁆𑀩𑀺𑀦𑁆𑀦𑀭𑀚𑁆𑀚𑀯𑀺𑀪𑀯𑁄 𑀪𑀯𑀪𑀻𑀭𑀽𑀢𑀸𑀬

𑀬𑁄 𑀫𑀽𑀕𑀧𑀓𑁆𑀔𑀩𑀥𑀺𑀭𑀸𑀓𑀢𑀺 𑀫𑀽𑀕𑀧𑀓𑁆𑀔𑁄,

𑀦𑀻𑀢𑁂 𑀦𑀺𑀔𑀸𑀢𑀼𑀫𑀧𑀓𑀺 𑀲𑀻𑀯𑀣𑀺𑀓𑀸𑀯𑀓𑀸𑀲𑁂

𑀤𑀴𑁆𑀳𑀁 𑀅𑀥𑀺𑀝𑁆𑀞𑀺𑀢𑀯𑀢𑀁 𑀯𑀢 𑀦𑁄𑀚𑀳𑀸𑀲𑀺; () (𑀢𑁂𑀫𑀺𑀬𑀘𑀭𑀺𑀬𑀁; 𑀇𑀢𑀺 𑀅𑀥𑀺𑀝𑁆𑀞𑀸𑀦 𑀧𑀸𑀭𑀫𑀻;)

𑁪𑁦. ¶

𑀫𑁂𑀢𑁆𑀢𑀯𑀺𑀳𑀸𑀭𑀧𑀭𑀫𑁄 𑀧𑀺𑀢𑀼𑀭𑀦𑁆𑀥𑀬𑀝𑁆𑀞𑀺

𑀬𑁄 𑀲𑁄𑀫𑀲𑁄𑀫𑁆𑀫𑀬𑀤𑀬𑁄’𑀧𑀺 𑀲𑀼𑀯𑀡𑁆𑀡𑀲𑀸𑀫𑁄,

𑀯𑀸𑀴𑁂𑀳𑀺 𑀲𑀫𑁆𑀧𑀭𑀺𑀯𑀼𑀢𑁄 𑀧𑀯𑀦𑁂 𑀯𑀺𑀳𑀸𑀭𑀺

𑀫𑁂𑀢𑁆𑀢𑀸𑀔𑁆𑀬𑀧𑀸𑀭𑀫𑀺𑀫𑀧𑀽𑀭𑀬𑀺 𑀧𑀸𑀧𑀪𑀻𑀭𑀽; () (𑀲𑀼𑀯𑀡𑁆𑀡𑀲𑀸𑀫𑀘𑀭𑀺𑀬𑀁;)

𑁪𑁧.

𑀬𑁄 𑀏𑀓𑀭𑀸𑀚𑀯𑀺𑀲𑀼𑀢𑁄 𑀪𑀼𑀯𑀺 𑀓𑀸𑀲𑀺𑀭𑀸𑀚𑀸

𑀫𑁂𑀢𑁆𑀢𑀸𑀓𑀮𑀢𑁆𑀢𑀤𑀼𑀢𑀺𑀬𑁄 𑀲𑀓𑀚𑀻𑀯𑀺𑀢𑁂’𑀧𑀺,

𑀅𑀯𑀙𑀺𑀦𑁆𑀦𑀭𑀚𑁆𑀚𑀯𑀺𑀪𑀸𑀯𑁂 𑀧𑀝𑀺𑀧𑀓𑁆𑀔𑀭𑀸𑀚𑁂

𑀫𑁂𑀢𑁆𑀢𑀸𑀬 𑀲𑀫𑁆𑀨𑀭𑀺 𑀲𑀫𑀁 𑀧𑀭𑀺𑀪𑀸𑀯𑀺𑀢𑀸𑀬; () (𑀏𑀓𑀭𑀸𑀚𑀘𑀭𑀺𑀬𑀁; 𑀇𑀢𑀺 𑀫𑁂𑀢𑁆𑀢𑀸 𑀧𑀸𑀭𑀫𑀻;)

𑁪𑁨. ¶

𑀬𑀸 𑀮𑁄𑀫𑁂𑀳𑀁𑀲𑀯𑀺𑀲𑀼𑀢𑁄’𑀧𑀺 𑀢𑀼𑀮𑀸𑀲𑀭𑀺𑀓𑁆𑀔𑁄

𑀫𑀸𑀦𑀸𑀯𑀫𑀸𑀦𑀦𑀓𑀭𑁂𑀲𑀼 𑀲𑀼𑀔𑁂 𑀘 𑀤𑀼𑀓𑁆𑀔,

𑀯𑀸𑀲𑀁 𑀘𑀯𑀝𑁆𑀞𑀺𑀧𑀭𑀺𑀓𑀺𑀡𑁆𑀡𑀲𑀼𑀲𑀸𑀦𑀫𑀚𑁆𑀛𑁂

𑀯𑁂𑀭𑀁 𑀅𑀯𑁂𑀭𑀫𑀦𑀼𑀧𑁂𑀘𑁆𑀘 𑀭𑀭𑀓𑁆𑀔𑀼’𑀧𑁂𑀓𑁆𑀔𑀁; () (𑀮𑁄𑀫𑀳𑀁𑀲𑀘𑀭𑀺𑀬𑀁; 𑀇𑀢𑀺 𑀉𑀧𑁂𑀓𑁆𑀔𑀸𑀓 𑀧𑀓𑀸𑀭𑀫𑀺𑀁)

𑁪𑁩.

𑀲𑁄 𑀩𑁄𑀥𑀺𑀬𑀸’𑀪𑀺𑀦𑀺𑀬𑀢𑁄 𑀧𑀭𑀺𑀧𑀓𑁆𑀓𑀜𑀸𑀡𑁄

𑀩𑀼𑀤𑁆𑀥𑀗𑁆𑀓𑀼𑀭𑁄’𑀧𑀘𑀺𑀢𑀧𑀸𑀭𑀫𑀺𑀢𑀸𑀩𑀮𑁂𑀦,

𑀦𑀺𑀚𑁆𑀛𑀸𑀫𑀢𑀡𑁆𑀳’𑀲𑀺𑀢𑀓𑀜𑁆𑀚𑀓𑁆𑀔𑀼𑀧𑁆𑀧𑀺𑀧𑀸𑀲-

𑀮𑁄𑀓𑀦𑁆𑀢𑀭𑁄𑀭𑀼𑀦𑀺𑀭𑀬𑁂𑀲𑀼 𑀦 𑀚𑀸𑀢𑀼 𑀚𑀸𑀢𑁄; ()

𑁪𑁪.

𑀦𑀸𑀮𑀢𑁆𑀣 𑀧𑀡𑁆𑀟𑀓𑀦𑀧𑀼𑀁𑀲𑀓𑀫𑀽𑀕𑀧𑀓𑁆𑀔-

𑀙𑀘𑁆𑀘𑀦𑁆𑀥𑀚𑀸𑀢𑀺𑀩𑀥𑀺𑀭𑀺𑀢𑁆𑀣𑀺𑀚𑀴𑀢𑁆𑀢𑀪𑀸𑀯𑀁,

𑀲𑁄 𑀫𑀓𑁆𑀔𑀺𑀓𑀸𑀫𑀓𑀲𑀓𑀼𑀢𑁆𑀣𑀓𑀺𑀧𑀺𑀮𑁆𑀮𑀺𑀓𑀸𑀤𑀺-

𑀚𑀸𑀢𑁆𑀬𑀸 𑀦𑀧𑀸𑀢𑀼𑀪𑀯𑀺 𑀓𑀻𑀝𑀧𑀝𑀗𑁆𑀕𑀚𑀸𑀢𑁆𑀬𑀸; ()

𑁪𑁫. ¶

𑀦𑀸𑀮𑀢𑁆𑀣 𑀕𑀦𑁆𑀥𑀕𑀚𑀢𑁄 𑀧𑀼𑀣𑀼𑀮𑀢𑁆𑀢 𑀪𑀸𑀯𑀁

𑀦𑀸𑀮𑀢𑁆𑀣 𑀯𑀝𑁆𑀝𑀲𑀼𑀲𑀼𑀓𑀸 𑀲𑀼𑀔𑀼𑀫𑀦𑁆𑀢 𑀪𑀸𑀯𑀁,

𑀦𑀸𑀮𑀢𑁆𑀣 𑀉𑀫𑁆𑀤𑀦𑀫𑀫𑁆𑀫𑀦𑀓𑀢𑁆𑀢 𑀪𑀸𑀯𑀁

𑀦𑀸𑀮𑀢𑁆𑀣 𑀏𑀯𑀫𑀢𑀺𑀳𑀻𑀦𑀢𑀭𑀢𑁆𑀢 𑀪𑀸𑀯𑀁;

𑁪𑁬.

𑀦𑀸𑀳𑁄𑀲𑀺 𑀫𑀸𑀢𑀼𑀯𑀥𑀓𑁄 𑀧𑀺𑀢𑀼𑀖𑀸𑀢𑀓𑁄 𑀯𑀸

𑀦𑀸𑀳𑁄𑀲𑀺 𑀲𑀗𑁆𑀖𑀪𑀺𑀤𑀼𑀭𑁄 𑀅𑀭𑀳𑀦𑁆𑀢𑀖𑀸𑀢𑁄,

𑀦𑀸𑀳𑁄𑀲𑀺 𑀤𑀼𑀝𑁆𑀞𑀳𑀤𑀬𑁂𑀦 𑀢𑀣𑀸𑀕𑀢𑀲𑁆𑀲

𑀦𑀸𑀳𑁄𑀲𑀺 𑀲𑀁𑀚𑀦𑀦𑀓𑁄 𑀭𑀼𑀥𑀺𑀭𑀲𑁆𑀲 𑀓𑀸𑀬𑁂; ()

𑁪𑁭.

𑀓𑀫𑁆𑀫𑀁 𑀨𑀔𑀮𑀁 𑀢𑀤𑀼𑀪𑀬𑀁 𑀧𑀝𑀺𑀩𑀸𑀳𑀺𑀦𑁄 𑀬𑁂

𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀕𑀢𑀺𑀓𑀸 𑀯𑀺𑀳𑀭𑀺𑀁𑀲𑀼 𑀢𑁂𑀲𑀁,

𑀮𑀤𑁆𑀥𑀺𑀁 𑀓𑀤𑀸𑀘𑀺 𑀦𑀧𑀭𑀸𑀫𑀲𑀺 𑀲𑀤𑁆𑀤𑀳𑀸𑀦𑁄

𑀓𑀫𑁆𑀫𑀁 𑀨𑀮𑀁 𑀦𑀺𑀬𑀢𑀩𑁄𑀥𑀺𑀧𑀭𑀸𑀬𑀡𑁄 𑀲𑁄; ()

𑁪𑁮. ¶

𑀬𑀲𑁆𑀫𑀺𑀁 𑀪𑀯𑁂 𑀪𑀯𑀢𑀺 𑀦𑀸𑀫𑀘𑀢𑀼𑀓𑁆𑀓𑀫𑀢𑁆𑀢𑀁

𑀢𑀢𑁆𑀭𑀸’𑀧𑀺 𑀧𑀼𑀜𑁆𑀜𑀓𑀭𑀡𑀢𑁆𑀣 𑀫𑀲𑀜𑁆𑀜𑀲𑀢𑁆𑀢𑁂,

𑀅𑀝𑁆𑀞𑀸𑀦𑀢𑁄 𑀦𑀧𑀝𑀺𑀲𑀦𑁆𑀥𑀺𑀫𑀕𑀡𑁆𑀳𑀺 𑀲𑀼𑀤𑁆𑀥𑀸-

𑀯𑀸𑀲𑁂𑀲𑀼 𑀧𑀜𑁆𑀘𑀲𑀼 𑀓𑀤𑀸𑀘𑀺 𑀧𑀧𑀜𑁆𑀘𑀪𑀻𑀭𑀽; ()

𑁪𑁯.

𑀩𑀼𑀤𑁆𑀥𑀗𑁆𑀓𑀼𑀭𑁄 𑀦𑀺𑀬𑀢𑀩𑁄𑀥𑀺𑀧𑀤𑁄 𑀓𑀤𑀸𑀘𑀺

𑀤𑀻𑀖𑀸𑀬𑀼𑀓𑁂𑀲𑀼’𑀧𑀺𑀪𑀯𑁂𑀲𑀼 𑀲𑀼𑀔𑀸𑀦𑀧𑁂𑀔𑁄,

𑀓𑀢𑁆𑀯𑀸’𑀥𑀺𑀫𑀼𑀢𑁆𑀢𑀺𑀯𑀘𑀦𑀁 𑀇𑀥 𑀚𑀻𑀯𑀮𑁄𑀓𑁂

𑀦𑀺𑀩𑁆𑀩𑀢𑁆𑀢𑀺 𑀲𑁄 𑀢𑀺𑀤𑀲𑀧𑀸𑀭𑀫𑀺𑀧𑀽𑀭𑀡𑀢𑁆𑀣𑀁; ()

𑁫𑁦.

𑀇𑀘𑁆𑀘𑁂𑀯𑀁 𑀲𑁄 𑀧𑀼𑀭𑀺𑀲𑀦𑀺𑀲𑀪𑁄 𑀤𑀼𑀧𑁆𑀧𑀯𑁂𑀲𑀲𑁆𑀲 𑀩𑁄𑀥𑀺-

𑀧𑀸𑀲𑀸𑀤𑀲𑁆𑀲𑀸’𑀯𑀢𑀭𑀡𑀲𑀫𑀢𑁆𑀢𑀺𑀁𑀲𑀢𑀺𑀲𑁆𑀲𑁂𑀡𑀺𑀭𑀽𑀧𑀁,

𑀦𑀺𑀧𑁆𑀨𑀸𑀤𑁂𑀦𑁆𑀢𑁄 𑀧𑀭𑀳𑀺𑀢𑀭𑀢𑁄 𑀧𑀸𑀭𑀫𑀻𑀥𑀫𑁆𑀫𑀚𑀸𑀢𑀁

𑀲𑀁𑀲𑀸𑀭𑁂 𑀲𑀁𑀲𑀭𑀺 𑀘𑀺𑀭𑀢𑀭𑀁 𑀖𑁄𑀭𑀤𑀼𑀓𑁆𑀔𑀁 𑀢𑀺𑀢𑀺𑀓𑁆𑀔𑀁; ()

𑀇𑀢𑀺 𑀫𑁂𑀥𑀸𑀦𑀦𑁆𑀤𑀸𑀪𑀺𑀥𑀸𑀦𑁂𑀦 𑀬𑀢𑀺𑀦𑀸 𑀯𑀺𑀭𑀘𑀺𑀢𑁂 𑀲𑀓𑀮𑀓𑀯𑀺𑀚𑀦 𑀳𑀤𑀬𑀸𑀦𑀦𑁆𑀤 𑀤𑀸𑀦𑀦𑀺𑀤𑀸𑀦𑁂 𑀚𑀺𑀦𑀯𑀁𑀲𑀤𑀻𑀧𑁂 𑀤𑀼𑀭𑁂𑀦𑀺𑀤𑀸𑀦𑁂 𑀧𑀸𑀭𑀫𑀺𑀥𑀫𑁆𑀫𑀸𑀪𑀺𑀲𑀗𑁆𑀔𑀭𑀡 𑀧𑀯𑀢𑁆𑀢𑀺 𑀧𑀭𑀺𑀤𑀻𑀧𑁄 𑀘𑀢𑀼𑀢𑁆𑀣𑁄 𑀲𑀕𑁆𑀕𑁄.

𑁧. ¶

𑀅𑀢𑁆𑀣𑀯𑀢𑁆𑀢𑀧𑀤𑀁 𑀦𑀸𑀦𑀸𑀯𑀡𑁆𑀡𑀫𑀡𑁆𑀡𑀯𑀚𑀸𑀦𑁆𑀯𑀺𑀢𑀁,

𑀧𑀢𑁆𑀣𑁆𑀬𑀸𑀯𑀢𑁆𑀢𑀫𑀺𑀯𑀸𑀳𑁄𑀲𑀺 𑀚𑁂𑀢𑀼𑀢𑁆𑀢𑀭𑀧𑀼𑀭𑀁 𑀧𑀼𑀭𑁂; () (𑀲𑀺𑀮𑁂𑀲 𑀩𑀦𑁆𑀥𑀦𑀁;)

𑁨.

𑀧𑀭𑀺𑀔𑀸𑀫𑁂𑀔𑀮𑀸𑀤𑀸𑀫 𑀩𑀤𑁆𑀥𑀧𑀸𑀓𑀸𑀭𑀲𑁄𑀡𑀺𑀦𑀻,

𑀭𑀭𑀸𑀚 𑀭𑀸𑀚𑀥𑀸𑀦𑀻 𑀲𑀸 𑀯𑀥𑀽𑀯 𑀧𑀢𑀺𑀫𑀡𑁆𑀟𑀺𑀢𑀸; ()

𑁩. ¶

𑀫𑀡𑀺𑀲𑀺𑀗𑁆𑀕𑀁𑀲𑀼𑀫𑀸𑀮𑀸𑀪𑀺 𑀩𑀸𑀮𑀁𑀲𑀼𑀫𑀸𑀮𑀺𑀯𑀺𑀩𑁆𑀪𑀫𑀁,

𑀲𑀲𑀗𑁆𑀓𑀫𑀡𑁆𑀟𑀮𑀁 𑀢𑀲𑁆𑀫𑀺𑀁 𑀧𑀮𑀫𑁆𑀳𑁂𑀲𑀸’𑀪𑀻𑀲𑀸𑀭𑀺𑀓𑀸; ()

𑁪.

𑀇𑀦𑁆𑀤𑀺𑀭𑀸𑀫𑀦𑁆𑀤𑀺𑀭𑀸’𑀫𑀦𑁆𑀤𑀫𑀡𑀺𑀫𑀦𑁆𑀤𑀺𑀭𑀲𑀸𑀮𑀺𑀦𑀻,

𑀳𑁂𑀫𑀤𑁆𑀥𑀚𑀸𑀯𑀮𑀺 𑀢𑀲𑁆𑀫𑀺𑀁 𑀓𑀺𑀴𑀸𑀧𑀬𑀺 𑀓𑀮𑀸𑀧𑀺𑀦𑁄; ()

𑁫.

𑀭𑀭𑀸𑀚 𑀦𑀸𑀕𑀭𑀸𑀚𑀸𑀦𑀁 𑀓𑀧𑁆𑀧𑀺𑀢𑀸𑀪𑀭𑀡𑁂𑀳𑀺 𑀘,

𑀤𑀸𑀞𑀸𑀳𑀺 𑀤𑀸𑀦𑀥𑀸𑀭𑀸𑀳𑀺 𑀫𑁂𑀖𑀯𑀘𑁆𑀙𑀦𑁆𑀢𑀸’𑀯 𑀲𑀸 𑀧𑀼𑀭𑀻; ()

𑁬.

𑀢𑀼𑀭𑀗𑁆𑀕𑀦𑀺𑀓𑀭𑁄𑀡𑁆𑀟𑀼𑀢𑀥𑀼𑀮𑀺𑀥𑀽𑀲𑀭𑀺𑀢𑀫𑁆𑀩𑀭𑀁,

𑀦𑀺𑀯𑀸𑀭𑀺𑀢𑀸𑀢𑀧𑀁𑀭𑀗𑁆𑀕𑀯𑀺𑀢𑀸𑀦𑀲𑁆𑀲𑀺𑀭𑀺𑀫𑀸𑀳𑀭𑀺; ()

𑁭. ¶

𑀦𑀻𑀮𑀲𑁂𑀯𑀸𑀮𑀥𑀫𑁆𑀫𑀺𑀮𑁆𑀮𑀸 𑀲𑀫𑁆𑀨𑀼𑀮𑁆𑀮𑀓𑀫𑀮𑀸’𑀦𑀦𑀸,

𑀢𑀳𑀺𑀫𑀼𑀧𑁆𑀧𑀮𑀮𑁄𑀮’𑀓𑁆𑀔𑀻 𑀳𑀁𑀲𑀧𑀻𑀦𑀧𑀬𑁄𑀥𑀭𑀸; ()

𑁮.

𑀓𑀺𑀜𑁆𑀚𑀓𑁆𑀔𑀭𑀸𑀚𑀺𑀭𑀲𑀸𑀦𑀸𑀭𑀼𑀤𑁆𑀥𑀭𑁄𑀥𑀦𑀺𑀢𑀫𑁆𑀩𑀺𑀦𑀻,

𑀪𑀺𑀗𑁆𑀕𑀸𑀮𑀺𑀫𑀡𑀺𑀫𑀜𑁆𑀚𑀺𑀭𑀸 𑀦𑀸𑀭𑀻’𑀯𑀸’𑀲𑀼𑀁 𑀲𑀭𑁄𑀚𑀺𑀦𑀻; () (𑀲𑀺𑀮𑁂𑀲 𑀩𑀦𑁆𑀥𑀦𑀁;)

𑁯.

𑀓𑁂𑀯𑀓𑀮𑀁 𑀓𑀧𑁆𑀧𑀭𑀼𑀓𑁆𑀔𑁂𑀳𑀺 𑀯𑀺𑀦𑀸 𑀲𑀸 𑀭𑀸𑀚𑀥𑀸𑀦𑁆𑀬’𑀳𑀼,

𑀯𑀺𑀲𑀸𑀡𑀸𑀭𑀸𑀚𑀥𑀸𑀦𑀻’𑀯 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀸𑀮𑀺𑀦𑀻; ()

𑁧𑁦.

𑀓𑀤𑀸𑀘𑀺 𑀧𑀼𑀭𑀺𑀲𑀸𑀚𑀜𑁆𑀜𑁄 𑀭𑀸𑀚𑀸’𑀳𑁄𑀲𑀺 𑀧𑀼𑀭𑁂 𑀢𑀳𑀺𑀁,

𑀯𑁂𑀲𑁆𑀲𑀦𑁆𑀢𑀭𑁄’𑀢𑀺𑀦𑀸𑀫𑁂𑀦 𑀯𑀺𑀲𑁆𑀲𑀼𑀢𑁄 𑀪𑀼𑀯𑀦𑀢𑁆𑀢𑀬𑁂; ()

𑁧𑁧. ¶

𑀓𑀼𑀫𑀸𑀭𑁄’𑀯 𑀲𑀫𑀸𑀦𑁄 𑀲𑁄 𑀤𑀸𑀦𑀓𑀻𑀴𑀸𑀧𑀭𑀸𑀬𑀡𑁄,

𑀓𑀸𑀬𑀽𑀧𑀕𑀸𑀦𑀺 𑀥𑀸𑀢𑀻𑀦𑀁 𑀭𑀢𑀦𑀸𑀪𑀭𑀡𑀸𑀦𑀺’𑀧𑀺; ()

𑁧𑁨.

𑀔𑀡𑁆𑀟𑀸𑀔𑀡𑁆𑀟𑀁 𑀓𑀭𑀺𑀢𑁆𑀯𑀸𑀦 𑀦𑀯𑀓𑁆𑀔𑀦𑁆𑀢𑀼𑀁 𑀓𑀧𑀭𑀺𑀘𑁆𑀘𑀚𑀺,

𑀏𑀯𑀁 𑀩𑀸𑀳𑀺𑀭𑀯𑀢𑁆𑀣𑀽𑀦𑀺𑀤𑀤𑀦𑁆𑀢𑁄 𑀅𑀝𑁆𑀞𑀯𑀲𑁆𑀲𑀺𑀓𑁄; ()

𑁧𑁩.

𑀧𑀸𑀲𑀸𑀤𑀫𑀪𑀺𑀭𑀻𑀳𑀺𑀢𑁆𑀯𑀸 𑀲𑁄𑀦𑀺𑀲𑀚𑁆𑀚𑀸’𑀪𑀺𑀬𑀸𑀘𑀦𑀁,

𑀤𑀲𑁆𑀲𑀸𑀫𑀻’𑀢𑀺 𑀯𑀺𑀘𑀺𑀦𑁆𑀢𑁂𑀲𑀺 𑀲𑀺𑀲𑀓𑁆𑀔𑀺𑀫𑀁𑀲𑀮𑁄𑀳𑀺𑀢𑀁; ()

𑁧𑁪.

𑀲𑀼𑀔𑁂𑀥𑀺𑀢𑁄 𑀫𑀳𑀸𑀲𑀢𑁆𑀢𑁄 𑀲𑀼𑀓𑁆𑀓𑀧𑀓𑁆𑀔𑁂’𑀯 𑀘𑀦𑁆𑀤𑀺𑀫𑀸,

𑀧𑀸𑀮𑁂𑀲𑀺 𑀤𑀲𑀥𑀫𑁆𑀫𑁂𑀦 𑀧𑀢𑁆𑀯𑀸 𑀭𑀚𑁆𑀚𑀲𑀺𑀭𑀺𑀁 𑀧𑀚𑀁; ()

𑁧𑁫.

𑀦𑀺𑀲𑀚𑁆𑀚𑁄 𑀧𑀭𑀺𑀧𑀸𑀲𑀸𑀤𑁂 𑀲𑁄 𑀭𑀸𑀚𑀸 𑀏𑀓𑀤𑀸 𑀭𑀳𑁄,

𑀓𑀸𑀫𑀸𑀦𑀁 𑀲𑀗𑁆𑀓𑀺𑀮𑁂𑀲𑀜𑁆𑀘 𑀯𑁄𑀓𑀸𑀭𑀸𑀤𑀻𑀦𑀯𑀁 𑀲𑀭𑀺; ()

𑁧𑁬. ¶

𑀧𑀩𑁆𑀩𑀚𑁆𑀚𑀸𑀳𑀺𑀭𑀢𑁄 𑀭𑀸𑀚𑀸 𑀦𑀺𑀩𑁆𑀩𑀺𑀦𑁆𑀢𑁄 𑀯𑀺𑀪𑀯𑁂𑀪𑀯𑁂,

𑀲𑀫𑁆𑀧𑀢𑁆𑀢𑀺𑀲𑀸𑀭𑀫𑀸𑀤𑀸𑀬 𑀳𑀺𑀢𑁆𑀯𑀸 𑀭𑀚𑁆𑀚𑀲𑀺𑀭𑀺𑀁 𑀯𑀭𑀁; ()

𑁧𑁭.

𑀫𑀢𑁆𑀢𑀫𑀸𑀢𑀗𑁆𑀕𑀭𑀸𑀚𑀸’𑀯 𑀅𑀕𑁆𑀕𑀺𑀧𑀚𑁆𑀚𑀮𑀓𑀸𑀦𑀦𑀸,

𑀭𑀼𑀤𑀢𑁄 𑀜𑀸𑀢𑀺𑀲𑀗𑁆𑀖𑀲𑁆𑀲 𑀅𑀕𑀸𑀭𑀲𑁆𑀫𑀸’𑀪𑀺 𑀦𑀺𑀓𑁆𑀔𑀫𑀻; ()

𑁧𑁮.

𑀘𑀫𑁆𑀧𑀓𑀸𑀲𑁄𑀓𑀯𑀓𑀼𑀮𑀢𑀭𑀼𑀲𑀡𑁆𑀟𑀲𑀼𑀫𑀡𑁆𑀟𑀺𑀢𑀁,

𑀲𑀺𑀔𑀡𑁆𑀟𑀺𑀫𑀡𑁆𑀟𑀮𑀸𑀔𑀡𑁆𑀟𑀓𑀻𑀴𑀁 𑀓𑁄𑀓𑀺𑀮𑀓𑀽𑀚𑀦𑀁; ()

𑁧𑁯.

𑀅𑀦𑁂𑀓𑀫𑀺𑀕𑀧𑀓𑁆𑀔𑀻𑀦𑀫𑀸𑀲𑀬𑀁 𑀲𑀮𑀺𑀮𑀸𑀲𑀬𑀁,

𑀯𑀻𑀓𑀸𑀲𑀓𑀼𑀲𑀼𑀫𑀸𑀫𑁄𑀤𑀧𑁆𑀧𑀯𑀸𑀲𑀺𑀢𑀲𑀫𑀻𑀭𑀡𑀁; ()

𑁨𑁦.

𑀫𑀥𑀼𑀫𑀢𑁆𑀢𑀸’𑀮𑀺𑀗𑁆𑀥𑀗𑁆𑀓𑀸𑀭𑀦𑀺𑀩𑁆𑀪𑀭’𑀫𑁆𑀩𑀼𑀭𑀼𑀳𑀸𑀓𑀭𑀁,

𑀲𑀫𑁆𑀧𑀸𑀢𑀦𑀺𑀚𑁆𑀛𑀭𑀸’𑀭𑀸𑀯𑀕𑀫𑁆𑀪𑀻𑀭𑀪𑀼𑀭𑀺𑀪𑀽𑀥𑀭𑀁; ()

𑁨𑁧. ¶

𑀧𑀯𑀯𑁂𑀓𑀓𑁆𑀔𑀫𑀁 𑀯𑀗𑁆𑀓𑀧𑀩𑁆𑀪𑀸𑀭𑀁 𑀕𑀺𑀭𑀺𑀕𑀩𑁆𑀪𑀭𑀁,

𑀤𑀼𑀧𑁆𑀧𑀯𑁂𑀲𑀧𑀓𑀣𑀁 𑀯𑀗𑁆𑀓𑀕𑀺𑀭𑀺𑀦𑀸𑀫𑀢𑀧𑁄𑀯𑀦𑀁; ()

𑁨𑁨.

𑀧𑀢𑁆𑀯𑀸 𑀮𑀤𑁆𑀥𑁂’𑀲𑀺𑀧𑀩𑁆𑀩𑀚𑁆𑀚𑀸 𑀓𑀯𑀺𑀮𑀸𑀲𑁄 𑀲𑁄 𑀫𑀳𑀻𑀪𑀼𑀚𑁄,

𑀘𑀭𑀦𑁆𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀭𑀲𑁆𑀲𑀁 𑀯𑀻𑀢𑀺𑀦𑀸𑀫𑀬𑀺; ()

𑁨𑁩.

𑀢𑀲𑁆𑀲𑀭𑀜𑁆𑀜𑁄 𑀫𑀳𑁂𑀲𑀺𑀧𑀺 𑀫𑀤𑁆𑀤𑀻𑀦𑀸𑀫 𑀲𑀼𑀔𑁂𑀥𑀺𑀢𑀸,

𑀧𑀼𑀢𑁆𑀢𑀥𑀻𑀢𑀽𑀪𑀺𑀲𑀤𑁆𑀥𑀺𑀁 𑀢𑀁 𑀢𑀧𑁄𑀯𑀦𑀫𑀼𑀧𑀸𑀯𑀺𑀲𑀺; ()

𑁨𑁪.

𑀫𑀳𑀺𑀘𑁆𑀙𑁄 𑀧𑀽𑀚𑀓𑁄𑀯𑀺𑀧𑁆𑀧𑁄 𑀢𑀤𑀸 𑀩𑀻𑀕𑀘𑁆𑀙𑀤𑀲𑁆𑀲𑀦𑁄,

𑀬𑁂𑀦 𑀯𑁂𑀲𑁆𑀲𑀦𑁆𑀢𑀭𑁄𑀲𑀢𑁆𑀢𑀲𑀸𑀭𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; ()

𑁨𑁫. ¶

𑀅𑀢𑁆𑀣𑁄 𑀓𑀫𑁆𑀫𑀓𑀭𑁂𑀳𑀻’𑀢𑀺 𑀚𑀭𑀸𑀚𑀚𑁆𑀚𑀭𑀺𑀢𑀲𑁆𑀲 𑀫𑁂,

𑀧𑀼𑀢𑁆𑀢𑀜𑁆𑀘𑀥𑀻𑀢𑀭𑀁 𑀬𑀸𑀘𑀻 𑀥𑀻𑀭𑀁 𑀧𑀢𑁆𑀯𑀸 𑀤𑀬𑀸𑀧𑀭𑀁; ()

𑁨𑁬.

𑀉𑀪𑁄 𑀓𑀡𑁆𑀳𑀸𑀚𑀺𑀦𑀁 𑀚𑀸𑀮𑀺𑀁 𑀲𑀲𑁂𑀦𑀳𑀪𑀸𑀭𑀪𑀸𑀚𑀦𑀁,

𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀓𑀸𑀫𑁄 𑀲𑁄 𑀢𑀡𑁆𑀳𑀸𑀤𑀸𑀲𑀩𑁆𑀬𑀫𑀼𑀢𑁆𑀢𑀺𑀬𑀸; ()

𑁨𑁭.

𑀤𑀓𑁆𑀔𑀺𑀡𑁄𑀤𑀓𑀲𑀫𑁆𑀧𑀼𑀢𑀚𑀽𑀚𑀓’𑀜𑁆𑀚𑀮𑀺𑀪𑀸𑀚𑀦𑁂,

𑀲𑀫𑀧𑁆𑀧𑀬𑀺𑀢𑁆𑀣 𑀩𑀦𑁆𑀥𑀺𑀢𑁆𑀯𑀸 𑀅𑀕𑀫𑀸’𑀤𑀸𑀬 𑀦𑀺𑀤𑁆𑀤𑀬𑁄; ()

𑁨𑁮.

𑀤𑀸𑀦𑀸𑀥𑀺𑀫𑀼𑀢𑁆𑀢𑀻𑀯𑀻𑀫𑀁𑀲𑀻 𑀯𑀺𑀧𑁆𑀧𑀸𑀓𑀧𑁆𑀧𑁂𑀦𑀼’𑀧𑀸𑀕𑀢𑁄,

𑀲𑀁𑀬𑀸𑀘𑀺 𑀤𑁂𑀯𑀭𑀸𑀚𑀸’𑀣 𑀫𑀤𑁆𑀤𑀺𑀤𑁂𑀯𑀺𑀁 𑀧𑀢𑀺𑀩𑁆𑀩𑀢𑀁; ()

𑁨𑁯.

𑀤𑀓𑁆𑀔𑀺𑀡𑁄𑀤𑀓𑀦𑀺𑀤𑁆𑀥𑁄𑀢𑀳𑀢𑁆𑀣𑁄 𑀲𑁄 𑀤𑀓𑁆𑀔𑀺𑀡𑁄𑀤𑀓𑀁,

𑀓𑀢𑁆𑀯𑀸 𑀤𑁂𑀯𑁂𑀲𑀯𑀺𑀧𑁆𑀧𑀲𑁆𑀲 𑀤𑁂𑀯𑀺𑀁 𑀤𑁂𑀯𑁄 𑀧𑀭𑀺𑀘𑁆𑀘𑀚𑀺; ()

𑁩𑁦. ¶

𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀓𑀫𑁆𑀧𑀺𑀢𑁆𑀣 𑀢𑀲𑁆𑀲 𑀧𑀸𑀭𑀫𑀺𑀢𑁂𑀚𑀲𑀸,

𑀲𑀸𑀥𑀼𑀲𑀸𑀥𑀽𑀢𑀺 𑀧𑀢𑁆𑀢𑀸𑀦𑀼𑀫𑁄𑀤𑀦𑁆𑀢𑀻’𑀯 𑀫𑀳𑀻𑀯𑀥𑀽; ()

𑁩𑁧.

𑀇𑀘𑁆𑀘𑁂𑀯𑀁 𑀧𑀼𑀭𑀺𑀲𑀸𑀭𑀜𑁆𑀜𑁄 𑀧𑀭𑀺𑀧𑀸𑀘𑀺𑀦𑀧𑀸𑀭𑀫𑀻,

𑀫𑀡𑀺𑀭𑀁𑀲𑀺𑀲𑁆𑀫𑀼𑀚𑁆𑀚𑁄𑀢 𑀧𑀸𑀲𑀸𑀤𑀲𑀢𑀮𑀗𑁆𑀓𑀢𑁂; ()

𑁩𑁨.

𑀫𑀦𑁆𑀤𑀫𑀦𑁆𑀤𑀸𑀦𑀺𑀮𑁄𑀡𑁆𑀟𑀽𑀢 𑀧𑀜𑁆𑀘𑀯𑀡𑁆𑀡𑀤𑁆𑀥𑀚𑀸𑀮𑀻𑀦𑀁,

𑀫𑀡𑀺𑀓𑀺𑀁𑀓𑀺𑀡𑀺𑀚𑀸𑀮𑀸𑀦𑀼𑀭𑀸𑀯𑀲𑁄𑀢𑀭𑀲𑀸𑀬𑀦𑁂; ()

𑁩𑁩.

𑀤𑀺𑀩𑁆𑀩𑁂𑀳𑀺 𑀦𑀘𑁆𑀘𑀕𑀻𑀢𑁂𑀳𑀺 𑀯𑀸𑀤𑀺𑀢𑁂𑀳𑀺 𑀫𑀦𑁄𑀭𑀫𑁂,

𑀓𑀦𑁆𑀤𑀧𑁆𑀧𑀫𑀡𑁆𑀟𑀧𑀸𑀓𑀸𑀭 𑀭𑀗𑁆𑀕𑀫𑀡𑁆𑀟𑀧𑀫𑀡𑁆𑀟𑀺𑀢𑁂; ()

𑁩𑁪.

𑀤𑀺𑀩𑁆𑀩𑀦𑁆𑀢𑀤𑀺𑀩𑁆𑀩𑀭𑀸𑀚𑀽𑀦𑀁 𑀇𑀦𑁆𑀤𑀘𑀸𑀧𑀲𑀢𑁂𑀳𑀺’𑀯,

𑀘𑀽𑀴𑀸𑀫𑀡𑀻𑀫𑀭𑀻𑀘𑀺𑀳𑀻 𑀲𑀫𑁆𑀩𑀸𑀥𑀻𑀓𑀴𑀺𑀢’𑀫𑁆𑀩𑀭𑁂; ()

𑁩𑁫. ¶

𑀅𑀘𑁆𑀙𑀭𑀸𑀳𑀺 𑀓𑀼𑀘𑀜𑁆𑀘𑀦𑁆𑀤𑀦𑀫𑀺𑀢𑀗𑁆𑀕𑀻𑀳𑀺 𑀤𑀽𑀭𑀢𑁄,

𑀯𑀺𑀥𑀽𑀢𑀘𑀦𑁆𑀤𑀺𑀓𑀸𑀭𑀸𑀚𑀺 𑀘𑀸𑀭𑀼𑀘𑀸𑀫𑀭 𑀫𑀸𑀭𑀼𑀢𑁂; ()

𑁩𑁬.

𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑀧𑁄𑀲𑁄’𑀯 𑀢𑀼𑀲𑀺𑀢𑁂 𑀢𑀺𑀤𑀲𑀸𑀮𑀬𑁂,

𑀢𑀢𑁄 𑀘𑀯𑀺𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺 𑀳𑀼𑀢𑁆𑀯𑀸 𑀲𑀦𑁆𑀢𑀼𑀲𑀺𑀢’𑀯𑁆𑀳𑀬𑁄; ()

𑁩𑁭.

𑀤𑀺𑀩𑁆𑀩𑁂𑀲𑀼 𑀧𑀜𑁆𑀘𑀓𑀸𑀫𑁂𑀲𑀼 𑀯𑀲𑀦𑁆𑀢𑁄 𑀢𑀼𑀲𑀺𑀢𑀸𑀮𑀬𑁂,

𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀮𑁄𑀓𑁂𑀓𑀮𑁄𑀘𑀦𑁄 𑀧𑀭𑀺𑀘𑀸𑀭𑀬𑀺; ()

𑁩𑁮.

𑀢𑀤𑀸 𑀤𑀲𑀲𑀳𑀲𑁆𑀲𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀤𑁂𑀯𑀢𑀸,

𑀏𑀓𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀸 𑀲𑀼𑀢𑁆𑀯𑀸 𑀩𑀼𑀤𑁆𑀥𑀳𑀴𑀸𑀳𑀴𑀁; ()

𑁩𑁯.

𑀢𑁂𑀦𑁄’𑀧𑀲𑀗𑁆𑀓𑀫𑀺𑀢𑁆𑀯𑀸𑀦 𑀬𑁂𑀦𑀸’𑀲𑀺 𑀧𑀼𑀭𑀺𑀲𑀼𑀢𑁆𑀢𑀫𑁄,

𑀓𑀢𑁆𑀯𑀸 𑀢𑀩𑁆𑀩𑀤𑀦𑀫𑁆𑀪𑁄𑀚𑀁 𑀦𑀬𑀦𑀸𑀮𑀺𑀓𑀼𑀮𑀸𑀮𑀬𑀁; ()

𑁪𑁦. ¶

𑀘𑀽𑀴𑀸𑀫𑀡𑀺𑀫𑀬𑀼𑀔𑀫𑁆𑀩𑀼𑀢𑀺𑀤𑁆𑀥𑁄𑀢𑀘𑀭𑀡𑀸𑀲𑀦𑁂,

𑀩𑀤𑁆𑀥𑀜𑁆𑀚𑀮𑀺𑀧𑀼𑀝𑀫𑁆𑀪𑁄𑀚𑀫𑀓𑀼𑀮𑀸𑀢𑀺 𑀲𑀫𑀧𑁆𑀧𑀬𑀼𑀁; ()

𑁪𑁧.

𑀘𑀓𑁆𑀓𑀯𑀢𑁆𑀢𑀺𑀧𑀤𑀁 𑀲𑀓𑁆𑀓𑀫𑀸𑀭𑀩𑁆𑀭𑀳𑁆𑀫𑀧𑀤𑀢𑀬𑀸,

𑀦𑀔𑁄 𑀫𑀸𑀭𑀺𑀲 𑀧𑀢𑁆𑀣𑁂𑀢𑁆𑀯𑀸 𑀧𑀸𑀭𑀫𑀻 𑀧𑀭𑀺𑀧𑀸𑀘𑀺𑀢𑀸; ()

𑁪𑁨.

𑀯𑁂𑀦𑁂𑀬𑁆𑀬𑀩𑀦𑁆𑀥𑀼𑀪𑀼𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀫𑀺𑀘𑁆𑀙𑀢𑀸,

𑀢𑀬𑀸 𑀫𑀸𑀭𑀺𑀲 𑀓𑀺𑀘𑁆𑀙𑁂𑀦 𑀧𑀽𑀭𑀺𑀢𑀸 𑀤𑀲𑀧𑀸𑀭𑀫𑀻; ()

𑁪𑁩.

𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀳𑀺𑀢𑀸𑀬 𑀫𑀸𑀢𑀼𑀓𑀼𑀘𑁆𑀙𑀺𑀬𑀁,

𑀉𑀧𑁆𑀧𑀚𑁆𑀚𑀢𑀽𑀢𑀺 𑀬𑀸𑀘𑀺𑀁𑀲𑀼 𑀢𑀁𑀥𑀻𑀭𑀁 𑀓𑀭𑀼𑀡𑀸𑀧𑀭𑀁; ()

𑁪𑁪.

𑀲𑀢𑀯𑀲𑁆𑀲𑀸𑀬𑀼𑀳𑁂𑀝𑁆𑀞𑀸𑀧𑀺 𑀉𑀤𑁆𑀥𑀁 𑀲𑀳𑀲𑀳𑀲𑁆𑀲𑀢𑁄,

𑀬𑀲𑁆𑀫𑀸 𑀅𑀓𑀸𑀮𑁄 𑀩𑀼𑀤𑁆𑀥𑀸𑀦𑀁 𑀢𑀲𑁆𑀫𑀸 𑀓𑀸𑀮𑀁 𑀯𑀺𑀧𑀲𑁆𑀲𑀺 𑀲𑁄; ()

𑁪𑁫. ¶

𑀬𑀲𑁆𑀫𑀸 𑀅𑀜𑁆𑀜𑁂𑀲𑀼 𑀤𑀻𑀧𑁂𑀲𑀼 𑀲𑀫𑁆𑀩𑀼𑀤𑁆𑀥𑀸 𑀦𑁄𑀧𑀧𑀚𑁆𑀚𑀭𑁂,

𑀚𑀸𑀬𑀦𑁆𑀢𑀺 𑀚𑀫𑁆𑀩𑀼𑀤𑀻𑀧𑀲𑁆𑀫𑀺𑀁 𑀢𑀲𑁆𑀫𑀸 𑀤𑀻𑀧𑀁 𑀯𑀺𑀧𑀲𑁆𑀲𑀺 𑀲𑁄; ()

𑁪𑁬.

𑀬𑀲𑁆𑀫𑀸 𑀫𑀺𑀮𑀓𑁆𑀔𑀤𑁂𑀲𑁂𑀲𑀼 𑀦𑀽𑀧𑁆𑀧𑀚𑁆𑀚𑀦𑁆𑀢𑀺 𑀢𑀣𑀸𑀕𑀢𑀸,

𑀚𑀸𑀬𑀭𑁂 𑀫𑀚𑁆𑀛𑀺𑀫𑁂 𑀤𑁂𑀲𑁂 𑀢𑀲𑁆𑀫𑀸𑀤𑁂𑀲𑀁 𑀯𑀺𑀧𑀲𑁆𑀲𑀺 𑀲𑁄; ()

𑁪𑁭.

𑀬𑀲𑁆𑀫𑀸 𑀦𑀚𑀸𑀬𑀭𑁂 𑀯𑁂𑀲𑁆𑀲𑀲𑀼𑀤𑁆𑀤𑀢𑁆𑀯𑀬𑁂𑀲𑀼 𑀚𑀸𑀬𑀭𑁂,

𑀔𑀦𑁆𑀢𑀺𑀬𑁂 𑀩𑁆𑀭𑀸𑀳𑁆𑀫𑀡𑁂 𑀩𑀼𑀤𑁆𑀥𑀸 𑀓𑀼𑀮𑀁 𑀢𑀲𑁆𑀫𑀸 𑀯𑀺𑀧𑀲𑁆𑀲𑀺 𑀲𑁄; ()

𑁪𑁮.

𑀬𑀲𑁆𑀫𑀸 𑀅𑀦𑀜𑁆𑀜𑀯𑀺𑀲𑀬𑀸 𑀓𑀼𑀘𑁆𑀙𑀺 𑀲𑀫𑁆𑀩𑀼𑀤𑁆𑀥𑀫𑀸𑀢𑀼𑀬𑀸,

𑀢𑀲𑁆𑀫𑀸 𑀆𑀬𑀼𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀧𑀲𑁆𑀲𑀺 𑀫𑀸𑀢𑀭𑀁; ()

𑁪𑁯.

𑀮𑁄𑀓𑁂𑀓𑀮𑁄𑀘𑀦𑁄 𑀏𑀯𑀁 𑀓𑀢𑁆𑀯𑀸 𑀧𑀜𑁆𑀘𑀸𑀯𑀮𑁄𑀓𑀦𑀁,

𑀢𑀸𑀲𑀁 𑀧𑀝𑀺𑀜𑁆𑀜𑀁 𑀧𑀸𑀤𑀸𑀲𑀺 𑀓𑀭𑀼𑀡𑀸𑀧𑀼𑀡𑁆𑀡𑀫𑀸𑀦𑀲𑁄; ()

𑁫𑁦. ¶

𑀢𑀧𑁆𑀧𑀸𑀤𑀢𑀸𑀫𑀭𑀲𑀘𑀼𑀫𑁆𑀩𑀺𑀢 𑀫𑁄𑀴𑀺𑀫𑀸𑀮𑀸

𑀲𑀫𑁆𑀧𑀢𑁆𑀢𑀤𑁂𑀯𑀧𑀭𑀺𑀲𑀸’𑀦𑁆𑀢𑀭𑀥𑀸𑀬𑀺 𑀢𑀸𑀯,

𑀑𑀕𑀬𑁆𑀳 𑀦𑀦𑁆𑀤𑀦𑀯𑀦𑀁 𑀢𑀼𑀲𑀺𑀢𑀸𑀥𑀺𑀭𑀸𑀚𑀸

𑀢𑀫𑁆𑀳𑀸 𑀘𑀯𑀻 𑀫𑀢𑀺𑀤𑀬𑀸𑀤𑀬𑀺𑀦𑀸𑀲𑀪𑀸𑀬𑁄; ()

𑀇𑀢𑀺 𑀫𑁂𑀥𑀸𑀦𑀦𑁆𑀤𑀸𑀪𑀺𑀥𑀸𑀦𑁂𑀦𑀬𑀢𑀺𑀦𑀸 𑀯𑀺𑀭𑀘𑀺𑀢𑁂 𑀲𑀓𑀮𑀓𑀯𑀺𑀚𑀦 𑀳𑀤𑀬𑀸𑀦𑀦𑁆𑀤𑀤𑀸𑀦𑀢𑀺𑀤𑀸𑀦𑁂 𑀚𑀺𑀦𑀯𑀁𑀲𑀤𑀻𑀧𑁂 𑀤𑀼𑀭𑁂𑀦𑀺𑀤𑀸𑀦𑁂 𑀯𑁂𑀲𑁆𑀲𑀦𑁆𑀢𑀭𑀘𑀭𑀺𑀬𑀧𑁆𑀧𑀪𑀼𑀢𑀺𑀤𑁂𑀯𑀸𑀭𑀸𑀥𑀦𑀸 𑀧𑀯𑀢𑁆𑀢𑀺 𑀧𑀭𑀺𑀤𑀻𑀧𑁄 𑀧𑀜𑁆𑀘𑀫𑁄 𑀲𑀕𑁆𑀕𑁄.

𑀚𑀺𑀦𑀯𑀁𑀲𑀤𑀻𑀧𑁂 𑀤𑀽𑀭𑁂𑀦𑀺𑀤𑀸𑀦 𑀪𑀸𑀕𑁄 𑀧𑀞𑀫𑁄.

𑁧. ¶

𑀬𑀸 𑀲𑀢𑁆𑀢𑀲𑀸𑀭𑀧𑀪𑀯𑀸 𑀲𑀺𑀭𑀺𑀚𑀫𑁆𑀩𑀼𑀤𑀻𑀧𑁂

𑀨𑀻𑀢𑀸’𑀫𑀭𑀸𑀯𑀢𑀺𑀧𑀼𑀭𑀻’𑀯 𑀧𑀼𑀭𑀻𑀯𑀢𑀁𑀲𑀸,

𑀆𑀤𑀺𑀘𑁆𑀘𑀯𑀁𑀲𑀺𑀓𑀦𑀭𑀺𑀦𑁆𑀤𑀧𑀯𑁂𑀡𑀺 𑀪𑀽𑀫𑀺

𑀮𑀓𑁆𑀔𑁆𑀬𑀸𑀮𑀬𑀸 𑀓𑀧𑀺𑀮𑀯𑀢𑁆𑀣𑀼𑀧𑀼𑀭𑀻 𑀧𑀼𑀭𑁂’𑀲𑀺; ()

𑁨.

𑀯𑀡𑁆𑀡𑁂𑀳𑀺 𑀓𑀡𑁆𑀡𑀲𑀼𑀔𑀲𑀤𑁆𑀤𑀭𑀲𑁂𑀳𑀺 𑀚𑀸𑀢-

𑀭𑀽𑀧𑁂𑀳𑀺 𑀅𑀢𑁆𑀣𑀯𑀺𑀲𑀭𑁂𑀳𑀺 𑀬𑀢𑀻𑀳𑀺 𑀬𑀼𑀢𑁆𑀢𑀸,

𑀬𑀸 𑀭𑀸𑀚𑀥𑀸𑀦𑀺 𑀧𑀼𑀣𑀼𑀧𑀸𑀡𑀕𑀡𑀧𑁆𑀧𑀤𑁂𑀳𑀺

𑀆𑀲𑀻 (𑀯𑀲𑀦𑁆𑀢𑀢𑀺𑀮𑀓𑀸) 𑀭𑀘𑀦𑀸 𑀬𑀣𑁂𑀯; () (𑀲𑀺𑀮𑁂𑀲 𑀩𑀦𑁆𑀥𑀦𑀁;)

𑁩. ¶

𑀧𑀸𑀘𑀻𑀤𑀺𑀲𑀸𑀪𑀼𑀚𑀮𑀢𑀸𑀬 𑀫𑀳𑀻𑀬𑀼𑀯𑀢𑁆𑀬𑀸

𑀲𑀦𑁆𑀦𑀤𑁆𑀥𑀲𑀗𑁆𑀔𑀯𑀮𑀬𑀲𑁆𑀲𑀺𑀭𑀺𑀫𑀸𑀯𑀳𑀦𑁆𑀢𑀁,

𑀬𑀲𑁆𑀲𑀸 𑀲𑀼𑀥𑀸𑀲𑀼𑀧𑀭𑀺𑀓𑀫𑁆𑀫𑀓𑀢𑀁 𑀭𑀭𑀸𑀚

𑀧𑀸𑀓𑀸𑀭𑀘𑀓𑁆𑀓𑀫𑀘𑀮𑀁 𑀫𑀓𑀼𑀝𑀸𑀦𑀼𑀓𑀸𑀭𑀁; ()

𑁪.

𑀬𑀲𑁆𑀲𑀸 𑀭𑀭𑀸𑀚 𑀧𑀭𑀺𑀔𑀸 𑀦𑀕𑀭𑀺𑀦𑁆𑀤𑀺𑀭𑀸𑀬

𑀓𑀺𑀜𑁆𑀚𑀓𑁆𑀔𑀺𑀜𑁆𑀚𑀭𑀺𑀢𑀢𑀻𑀭𑀤𑀲𑀸𑀪𑀺𑀭𑀸𑀫𑀸,

𑀲𑀁𑀲𑀺𑀩𑁆𑀩𑀺𑀢𑀸𑀮𑀺𑀯𑀺𑀢𑁆𑀢𑀻𑀫𑀡𑀺𑀢𑀦𑁆𑀢𑀼𑀧𑀦𑁆𑀢𑀻

𑀧𑀸𑀓𑀸𑀭𑀲𑁄𑀡𑀺𑀪𑀭𑀢𑁄 𑀕𑀮𑀺𑀢𑀫𑁆𑀩𑀭𑀁’𑀯; ()

𑁫.

𑀓𑀦𑁆𑀤𑀧𑁆𑀧𑀤𑀧𑁆𑀧𑀫𑀤𑀺𑀭𑀸𑀫𑀤𑀫𑀢𑁆𑀢𑀥𑀼𑀢𑁆𑀢𑀸

𑀫𑀦𑁆𑀤𑀸𑀦𑀺𑀮𑁂𑀭𑀺𑀢𑀲𑀼𑀦𑀻𑀮𑀮𑀢𑀸𑀯𑀺𑀢𑀸𑀦𑀁,

𑀬𑀲𑁆𑀫𑀺𑀁 𑀯𑀺𑀮𑁄𑀮𑀦𑀬𑀦𑀜𑁆𑀚𑀮𑀺𑀧𑀺𑀬𑀫𑀸𑀦𑀁

𑀆𑀧𑀸𑀦𑀪𑀼𑀫𑀺𑀦𑀺𑀪𑀫𑁄𑀧𑀯𑀦𑀁𑀪𑀚𑀺𑀁𑀲𑀼; ()

𑁬. ¶

𑀫𑀢𑁆𑀢𑀗𑁆𑀕𑀦𑀸𑀬 𑀦𑀯𑀬𑁄𑀩𑁆𑀩𑀦𑀕𑀩𑁆𑀩𑀺𑀢𑀸𑀬

𑀭𑀗𑁆𑀕𑀸𑀮𑀬𑀕𑁆𑀕𑀫𑀡𑀺𑀤𑀧𑁆𑀧𑀡𑀩𑀺𑀫𑁆𑀩𑀺𑀢𑁂𑀳𑀺,

𑀬𑀸 𑀭𑀸𑀚𑀥𑀸𑀦𑀺 𑀖𑀦𑀧𑀻𑀦𑀧𑀬𑁄𑀥𑀭𑁂𑀳𑀺

𑀲𑁄𑀫𑁆𑀫𑀸𑀦𑀦𑁂𑀳𑀺 𑀪𑀚𑀺 𑀫𑀸𑀦𑀲𑀯𑀸𑀧𑀺𑀲𑁄𑀪𑀁; ()

𑁭.

𑀲𑀗𑁆𑀓𑀧𑁆𑀧𑀺𑀢𑀸𑀪𑀭𑀡𑀭𑀁𑀲𑀺 𑀲𑀢𑁂𑀭𑀢𑀸𑀮𑀻

𑀤𑀸𑀞𑀸𑀩𑀮𑀸𑀓𑀯𑀺𑀲𑀭𑀸 𑀫𑀤𑀯𑀼𑀝𑁆𑀞𑀺𑀥𑀸𑀭𑀸,

𑀬𑀲𑁆𑀫𑀺𑀁 𑀧𑀼𑀭𑁂 𑀖𑀭𑀫𑀬𑀽𑀭𑀓𑀼𑀮𑀁 𑀅𑀓𑀸𑀮𑁂

𑀓𑀻𑀴𑀸𑀧𑀬𑀺𑀁𑀲𑀼 𑀯𑀭𑀯𑀸𑀭𑀡𑀯𑀸𑀭𑀺𑀯𑀸𑀳𑀸; ()

𑁮.

𑀧𑀸𑀓𑀸𑀭𑀘𑀓𑁆𑀓𑀩𑀳𑀺𑀦𑀺𑀕𑁆𑀕𑀢 𑀫𑀼𑀕𑁆𑀕𑀭𑀸𑀕𑀁

𑀬𑀲𑁆𑀫𑀺𑀁 𑀢𑀼𑀭𑀗𑁆𑀕𑀦𑀺𑀓𑀭𑀼𑀤𑁆𑀥𑀝𑀥𑀽𑀮𑀺𑀚𑀸𑀮𑀁,

𑀭𑀘𑁆𑀙𑀸𑀯𑀢𑀸𑀭𑀚𑀦𑀢𑀸𑀬 𑀔𑀡𑀁 𑀚𑀦𑁂𑀲𑀺

𑀪𑀻𑀢𑀺𑀁 𑀧𑀤𑀺𑀢𑁆𑀢𑀧𑀮𑀬𑀸𑀦𑀮𑀚𑀸𑀮𑀲𑁄𑀪𑀁; ()

𑁯. ¶

𑀬𑀲𑁆𑀫𑀺𑀁 𑀯𑀺𑀫𑀸𑀦𑀫𑀡𑀺𑀲𑀺𑀗𑁆𑀕𑀚𑀼𑀢𑀺𑀧𑁆𑀧𑀩𑀦𑁆𑀥-

𑀲𑀜𑁆𑀘𑀼𑀫𑁆𑀩𑀺𑀢𑀁 𑀚𑀺𑀢𑀭𑀯𑀺𑀁 𑀳𑀭𑀺𑀡𑁆𑀟𑀓𑀩𑀺𑀫𑁆𑀩𑀁,

𑀦𑀸𑀭𑀻𑀚𑀦𑀸𑀦𑀦𑀲𑀭𑁄𑀚𑀓𑀢𑀸𑀯𑀫𑀸𑀦𑀁

𑀓𑁄𑀥𑀸𑀪𑀺𑀪𑀼𑀢𑀫𑀺𑀯 𑀯𑀡𑁆𑀡𑀯𑀺𑀓𑀸𑀭𑀫𑀸𑀧; ()

𑁧𑁦.

𑀬𑀢𑁆𑀣𑀺𑀲𑁆𑀲𑀭𑁂𑀳𑀺 𑀲𑀫𑀥𑀺𑀕𑁆𑀕𑀳𑀺𑀢𑀸𑀦𑀺 𑀢𑀼𑀗𑁆𑀕-

𑀓𑁂𑀮𑀸𑀲𑀓𑀼𑀝𑀥𑀯𑀮𑀸𑀢𑀺 𑀫𑀦𑁄𑀳𑀭𑀸𑀢𑀺,

𑀦𑀺𑀘𑁆𑀘𑀁 𑀲𑀼𑀥𑀸𑀲𑀼𑀧𑀭𑀺𑀓𑀫𑁆𑀫𑀓𑀢𑀸𑀦𑀺 𑀘𑀸’𑀲𑀼𑀁

𑀮𑀓𑁆𑀔𑀻𑀦𑀺𑀓𑁂𑀢𑀦𑀦𑀺𑀪𑀸𑀦𑀺 𑀦𑀺𑀓𑁂𑀢𑀦𑀸𑀦𑀺; ()

𑁧𑁧.

𑀬𑀢𑁆𑀣𑀺𑀦𑁆𑀤𑀦𑀺𑀮𑀫𑀡𑀺𑀫𑀸𑀧𑀺𑀢𑀫𑀡𑁆𑀟𑀧𑀕𑁆𑀕𑁂

𑀳𑁂𑀫𑀤𑁆𑀥𑀚𑀸𑀯𑀮𑀺𑀧𑀭𑀺𑀩𑁆𑀪𑀫𑀡𑀁𑀓 𑀧𑀼𑀭𑀫𑁆𑀳𑀺,

𑀚𑀻𑀫𑀽𑀢𑀓𑀽𑀝𑀧𑀫𑀼𑀔𑁂 𑀲𑀢𑀯𑀺𑀚𑁆𑀚𑀼𑀫𑀸𑀮𑀸-

𑀮𑀻𑀮𑀸𑀯𑀳𑀁 𑀯𑀺𑀭𑀳𑀺𑀦𑀻𑀦𑀫𑀖𑀁 𑀚𑀦𑁂𑀲𑀺; ()

𑁧𑁨. ¶

𑀲𑀜𑁆𑀛𑀸𑀦𑀼𑀭𑀸𑀕𑀫𑀡𑀺𑀢𑁄𑀭𑀡𑀤𑀻𑀥𑀺𑀢𑀻𑀳𑀺

𑀪𑀺𑀦𑁆𑀦𑀦𑁆𑀥𑀓𑀸𑀭𑀦𑀺𑀓𑀭𑀸’𑀔𑀺𑀮𑀦𑀸𑀕𑀭𑀸𑀦𑀁,

𑀬𑀸 𑀭𑀸𑀚𑀥𑀸𑀦𑀺 𑀚𑀦𑀬𑀦𑁆𑀢𑀺𑀧𑀺 𑀢𑀼𑀗𑁆𑀕𑀢𑀼𑀝𑁆𑀞𑀺𑀁

𑀧𑀻𑀢𑁆𑀬𑀸 𑀦𑀯𑀸𑀲𑀺 𑀭𑀚𑀦𑀻𑀲𑁆𑀫 𑀪𑀺𑀲𑀸𑀭𑀺𑀓𑀸𑀦𑀁; ()

𑁧𑁩.

𑀲𑁂𑀯𑀸𑀮𑀓𑁂𑀲𑀭𑀲𑀫𑀸𑀓𑀼𑀮𑀢𑀻𑀭𑀪𑀸𑀕𑀸

𑀲𑀫𑁆𑀨𑀼𑀮𑁆𑀮𑀭𑀢𑁆𑀢𑀧𑀤𑀼𑀫𑀼𑀧𑁆𑀧𑀮𑀓𑀮𑁆𑀮𑀳𑀸𑀭𑀸,

𑀳𑀁𑀲𑀸𑀮𑀺𑀲𑀸𑀭𑀲𑀲𑀫𑁄𑀲𑀭𑀡𑀸𑀪𑀺𑀭𑀸𑀫𑀸

𑀬𑀲𑁆𑀫𑀺𑀁 𑀲𑀼𑀦𑀺𑀫𑁆𑀫𑀮𑀚𑀮𑀸 𑀓𑀫𑀮𑀸𑀓𑀭𑀸𑀲𑀼𑀁; ()

𑁧𑁪.

𑀬𑀲𑁆𑀫𑀺𑀁𑀧𑀼𑀭𑁂 𑀓𑀼𑀮𑀯𑀥𑀽𑀯𑀤𑀦𑀫𑁆𑀩𑀼𑀚𑀸𑀦𑀁

𑀮𑀤𑁆𑀥𑀼𑀁 𑀦𑀺𑀭𑀽𑀧𑀫𑀲𑀺𑀭𑀺𑀁 𑀪𑀼𑀲𑀫𑀼𑀲𑁆𑀲𑀳𑀦𑁆𑀢𑀸,

𑀬𑀸𑀯𑀚𑁆𑀚 𑀲𑁂𑀢𑀲𑀭𑀲𑀺𑀭𑀼𑀳𑀲𑀻𑀢𑀭𑀁𑀲𑀻

𑀅𑀜𑁆𑀜𑁄𑀜𑁆𑀜𑀩𑀤𑁆𑀥𑀧𑀝𑀺𑀖𑀸’𑀯 𑀯𑀚𑀦𑁆𑀢𑀺 𑀦𑀸𑀲𑀁; ()

𑁧𑁫. ¶

𑀬𑀲𑁆𑀫𑀺𑀁 𑀲𑀼𑀯𑀡𑁆𑀡𑀫𑀓𑀡𑀺𑀭𑀽𑀧𑀺𑀬𑀯𑀁𑀲𑀯𑀡𑁆𑀡-

𑀫𑀼𑀢𑁆𑀢𑀸𑀧𑀯𑀸𑀴𑀘𑀚𑀺𑀭𑁂𑀳𑀺 𑀫𑀳𑀸𑀭𑀳𑁂𑀳𑀺,

𑀦𑀸𑀦𑀸𑀧𑀡𑀸 𑀲𑀼𑀔𑀼𑀫𑀓𑀸𑀲𑀺𑀓𑀲𑀸𑀡𑀳𑀗𑁆𑀕-

𑀓𑁄𑀲𑁂𑀬𑁆𑀬𑀔𑁄𑀫𑀯𑀲𑀦𑁂𑀳𑀺’𑀪𑀯𑀼𑀁 𑀧𑀧𑀼𑀡𑁆𑀡𑀸; ()

𑁧𑁬.

𑀘𑀓𑁆𑀓𑀸𑀲𑀺𑀲𑀢𑁆𑀢𑀺𑀥𑀦𑀼𑀓𑀼𑀦𑁆𑀢𑀕𑀤𑀸𑀤𑀺𑀪𑀢𑁆𑀣𑀸

𑀲𑀦𑁆𑀦𑀤𑁆𑀥𑀳𑁂𑀫𑀓𑀯𑀘𑀸 𑀯𑀺𑀚𑀺𑀢𑀸𑀭𑀺𑀯𑀕𑁆𑀕𑀸,

𑀲𑀗𑁆𑀕𑀸𑀫𑀲𑀸𑀕𑀭𑀲𑀫𑀼𑀢𑁆𑀢𑀭𑀡𑀸𑀢𑀺𑀲𑀼𑀭𑀸

𑀬𑁄𑀥𑀸 𑀬𑀳𑀺𑀁 𑀧𑀼𑀭𑀯𑀭𑁂 𑀅𑀓𑀭𑀺𑀁𑀲𑀼 𑀭𑀓𑁆𑀔𑀁; ()

𑁧𑁭.

𑀨𑀽𑀝𑁆𑀞𑀸 𑀓 𑀯𑀸𑀝𑀦𑀺𑀓𑀝𑁂 𑀫𑀡𑀺𑀫𑀦𑁆𑀤𑀺𑀭𑀸𑀦𑀁

𑀓𑀧𑁆𑀧𑀸𑀲𑀧𑀝𑁆𑀝𑀥𑀯𑀮𑀸 𑀲𑀭𑀤𑀩𑁆𑀪𑀭𑀸𑀚𑀻,

𑀬𑀲𑁆𑀫𑀺𑀁 𑀔𑀡𑀁 𑀚𑀯𑀦𑀺𑀓𑀸𑀲𑀺𑀭𑀺𑀫𑀸𑀤𑀥𑀸𑀦𑀸

𑀣𑀻𑀦𑀁 𑀚𑀼𑀕𑁄𑀧 𑀫𑀥𑀼𑀧𑁂𑀳𑀺 𑀫𑀼𑀔𑀫𑁆𑀩𑀼𑀚𑀸𑀦𑀺; ()

𑁧𑁮. ¶

𑀦𑀺𑀩𑁆𑀩𑀺𑀤𑁆𑀥𑀯𑀻𑀣𑀺𑀯𑀺𑀲𑀭𑁂𑀳𑀺 𑀲𑀼𑀲𑀚𑁆𑀚𑀺𑀢𑁂𑀳𑀺

𑀦𑀺𑀘𑁆𑀘𑀼𑀲𑁆𑀲𑀯𑀸𑀬 𑀧𑀼𑀭𑀫𑀼𑀲𑁆𑀲𑀺𑀢𑀢𑁄𑀭𑀲𑁂𑀳𑀺,

𑀪𑁄𑀕𑀺𑀦𑁆𑀤𑀪𑁄𑀕𑀦𑀺𑀓𑀭𑁂𑀳𑀺 𑀭𑀲𑀸𑀢𑀮𑀁’𑀯

𑀬𑀁 𑀲𑀫𑁆𑀧𑀲𑀸𑀭𑀺𑀢𑀨𑀡𑁂𑀳𑀺 𑀩𑀪𑀼𑀯 𑀭𑀫𑁆𑀫𑀁; ()

𑁧𑁯.

𑀬𑀲𑁆𑀫𑀺𑀁𑀧𑀼𑀭𑁂 𑀯𑀺𑀯𑀝𑀫𑀦𑁆𑀤𑀺𑀭𑀚𑀸𑀮𑀓𑀸𑀦𑀁

𑀉𑀤𑁆𑀥𑀽𑀢𑀥𑀼𑀮𑀺𑀫𑀮𑀺𑀦𑀻𑀓𑀴𑀺𑀢𑀸𑀮𑀓𑀸𑀦𑀁,

𑀦𑀸𑀭𑀺𑀦𑀫𑀺𑀦𑁆𑀤𑀼𑀭𑀼𑀘𑀻𑀭𑀸𑀦𑀦 𑀤𑀧𑁆𑀧𑀡𑁂𑀲𑀼

𑀮𑁄𑀓𑀲𑁆𑀲 𑀮𑁄𑀘𑀦𑀫𑀡𑀺 𑀧𑀝𑀺𑀩𑀺𑀫𑁆𑀩𑀺𑀢𑀸’𑀲𑀼𑀁; ()

𑁨𑁦.

𑀕𑀫𑁆𑀪𑀻𑀭𑀲𑀗𑁆𑀔𑀧𑀝𑀪𑀤𑁆𑀥𑀦𑀺𑀪𑀽𑀭𑀺𑀖𑁄𑀲𑀁

𑀓𑁂𑀮𑀸𑀲𑀓𑀽𑀝𑀥𑀯𑀮𑀸𑀮𑀬𑀨𑁂𑀡𑀧𑀺𑀡𑁆𑀟𑀁,

𑀬𑀁 𑀧𑀼𑀡𑁆𑀡𑀲𑀢𑁆𑀢𑀭𑀢𑀦𑀁 𑀧𑀼𑀭𑀔𑀻𑀭𑀲𑀺𑀦𑁆𑀥𑀼𑀁

𑀮𑀓𑁆𑀔𑀻 𑀅𑀮𑀗𑁆𑀓𑀭𑀺 𑀢𑀼𑀭𑀗𑁆𑀕𑀢𑀭𑀗𑁆𑀕𑀯𑁂𑀕𑀁; ()

𑁨𑁧. ¶

𑀭𑁂𑀡𑀼𑀧𑁆𑀧𑀩𑀦𑁆𑀥𑀫𑀮𑀺𑀦𑀁 𑀓𑀯𑀦𑀭𑀸𑀚𑀺𑀦𑀻𑀮𑀁

𑀫𑀥𑀯𑀸𑀢𑀺𑀫𑀢𑁆𑀢𑀫𑀥𑀼𑀧𑀁 𑀧𑀤𑀼𑀫𑀸𑀪𑀺𑀭𑀸𑀫𑀁,

𑀬𑀁 𑀭𑀸𑀚𑀳𑀁𑀲𑀪𑀚𑀺𑀢𑀁 𑀅𑀯𑀢𑀺𑀡𑁆𑀡𑀮𑁄𑀓𑀁

𑀆𑀲𑀺 𑀧𑀼𑀭𑀁 𑀯𑀺𑀓𑀘𑀓𑀜𑁆𑀚𑀯𑀦𑀁 𑀬𑀣𑁂𑀯; () (𑀲𑀺𑀮𑁂𑀲𑀩𑀦𑁆𑀥𑀦𑀁;)

𑁨𑁨.

𑀬𑀲𑁆𑀫𑀺𑀁𑀧𑀼𑀭𑀫𑁆𑀳𑀺 𑀭𑀢𑀦𑀼𑀚𑁆𑀚𑀮𑀦𑀻𑀮𑀓𑀡𑁆𑀞𑀸

𑀭𑀸𑀕𑀸𑀯𑀫𑀤𑁆𑀤𑀺𑀢𑀥𑀭𑀸’𑀯𑀺𑀯𑀝𑀤𑁆𑀯𑀺𑀚𑀸𑀮𑀺,

𑀆𑀲𑀼𑀁𑀧𑀬𑁄𑀥𑀭𑀪𑀭𑀸’𑀯𑀺𑀭𑀴𑀧𑁆𑀧𑀤𑁂𑀲𑀸

𑀲𑀫𑁆𑀧𑀢𑁆𑀢𑀯𑀼𑀝𑁆𑀞𑀺𑀤𑀺𑀯𑀲𑀸𑀯𑀺𑀬𑀫𑀸𑀢𑀼𑀕𑀸𑀫𑀸; () (𑀲𑀺𑀮𑁂𑀲𑀩𑀦𑁆𑀥𑀦𑀁;)

𑁨𑁩. ¶

𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺 𑀧𑀭𑀸𑀬𑀡𑀲𑁆𑀲

𑀲𑀁𑀲𑀸𑀭𑀪𑀻𑀭𑀼𑀓𑀚𑀦𑀲𑁆𑀲 𑀢𑀧𑁄𑀯𑀦𑀸𑀪𑀸,

𑀬𑀸 𑀭𑀸𑀚𑀥𑀸𑀦𑀺 𑀧𑀘𑀼𑀭𑀦𑁆𑀥𑀧𑀼𑀣𑀼𑀚𑁆𑀚𑀦𑀸𑀦𑀁

𑀆𑀧𑀸𑀦𑀪𑀼𑀫𑀺𑀯 𑀩𑀪𑀽𑀯𑀼’𑀪𑀬𑀧𑁆𑀧𑀓𑀸𑀭𑀸; ()

𑁨𑁪.

𑀩𑀼𑀤𑁆𑀥𑀗𑁆𑀓𑀼𑀭𑀲𑁆𑀲 𑀭𑀯𑀺𑀯𑀁𑀲𑀧𑀪𑀗𑁆𑀓𑀭𑀲𑁆𑀲

𑀲𑀫𑁆𑀫𑀸 𑀲𑀼𑀔𑀸𑀦𑀼𑀪𑀸𑀯𑀦𑀸𑀬 𑀲𑀼𑀪𑀼𑀫𑀺𑀪𑀼𑀢𑀸,

𑀪𑁄 𑀬𑀸𑀤𑀺𑀲𑀺 𑀓𑀧𑀺𑀮𑀯𑀢𑁆𑀣𑀼𑀧𑀼𑀭𑀺 𑀧𑀼𑀭𑁂’𑀲𑀺

𑀥𑀫𑁆𑀫𑀲𑁆𑀲𑀪𑀸𑀯𑀫𑀥𑀼𑀦𑀸 𑀧𑀭𑀺𑀤𑀻𑀧𑀬𑁂 𑀲𑀸; ()

𑁨𑁫.

𑀢𑀲𑁆𑀫𑀺𑀁 𑀩𑀪𑀽𑀯 𑀦𑀕𑀭𑁂 𑀦𑀕𑀭𑀸𑀥𑀺𑀭𑀸𑀚𑁂

𑀭𑀸𑀚𑀸 𑀲𑀼𑀦𑀻𑀢𑀺𑀘𑀢𑀼𑀭𑁄 𑀘𑀢𑀼𑀲𑀗𑁆𑀕𑀳𑁂𑀳𑀺,

𑀥𑀫𑁆𑀫𑁂𑀦 𑀲𑀩𑁆𑀩𑀚𑀦𑀭𑀜𑁆𑀚𑀦𑀓𑁄 𑀓𑀤𑀸𑀘𑀺

𑀲𑀼𑀤𑁆𑀥𑁄𑀤𑀦𑀯𑁆𑀳𑀯𑀺𑀲𑀼𑀢𑁄 𑀭𑀯𑀺𑀯𑀁𑀲𑀓𑁂𑀢𑀼; ()

𑁨𑁬. ¶

𑀤𑀺𑀲𑁆𑀯𑀸’𑀯𑀢𑀸𑀭𑀓𑀮𑀼𑀲𑀺𑀓𑀢𑀫𑀢𑁆𑀢𑀪𑀸𑀯𑀁

𑀉𑀓𑁆𑀓𑀡𑁆𑀞𑀺𑀢𑁂’𑀯 𑀓𑀫𑀮𑀸 𑀓𑀫𑀮𑀸𑀧𑀢𑀺𑀲𑁆𑀲,

𑀪𑀽𑀧𑀸𑀮𑀺𑀧𑀸𑀮𑀺𑀪𑀚𑀺𑀢𑀁 𑀘𑀭𑀡𑀸𑀭𑀯𑀺𑀦𑁆𑀤𑀁

𑀲𑀁𑀲𑁂𑀯𑀺 𑀬𑀲𑁆𑀲 𑀭𑀯𑀺𑀯𑀁𑀲𑀥𑀚𑀲𑁆𑀲 𑀭𑀜𑁆𑀜𑁄; ()

𑁨𑁭.

𑀬𑀲𑁆𑀲𑀸’𑀯𑀦𑀻𑀲𑀓𑀯𑀺𑀦𑁄 𑀓𑀯𑀺𑀓𑀡𑁆𑀞𑀪𑀼𑀲𑀸

𑀯𑀸𑀡𑀺𑀯𑀥𑀽 𑀫𑀥𑀼𑀭𑀓𑁄𑀫𑀓𑀮𑀓𑀢𑁆𑀢𑀯𑀸𑀡𑀻,

𑀧𑀢𑁆𑀯𑀸 𑀘𑀢𑀼𑀫𑁆𑀫𑀼𑀔𑀫𑀼𑀔𑀫𑁆𑀩𑀼𑀚𑀓𑀸𑀦𑀦𑀫𑁆𑀳𑀸

𑀳𑀁𑀲𑀻𑀯 𑀫𑀸𑀦𑀲𑀢𑀴𑀸𑀓𑀫𑀮𑀗𑁆𑀓𑀭𑀺𑀢𑁆𑀣; ()

𑁨𑁮.

𑀲𑀩𑁆𑀩𑀸𑀭𑀺𑀤𑀧𑁆𑀧𑀫𑀣𑀦𑁄𑀧𑀭𑀺 𑀏𑀓𑀥𑀢𑁆𑀯𑀸

𑀅𑀚𑁆𑀛𑀢𑁆𑀢𑀺𑀓𑀸𑀭𑀺𑀧𑀭𑀸𑀚𑀺𑀬𑀫𑀧𑁆𑀧𑀲𑀬𑁆𑀳𑀁,

𑀲𑀁𑀲𑀼𑀤𑁆𑀥𑀘𑀺𑀢𑁆𑀢𑀦𑀺𑀓𑀲𑁂 𑀦𑀺𑀲𑀺𑀢𑁂𑀦 𑀢𑀸𑀯

𑀧𑀜𑁆𑀜𑀸𑀬𑀼𑀥𑁂𑀦 𑀅𑀯𑀥𑀺𑀢𑁆𑀣 𑀫𑀳𑀻𑀪𑀼𑀚𑁄 𑀬𑁄; ()

𑁨𑁯. ¶

𑀬𑀲𑁆𑀫𑀸 𑀫𑀳𑀻𑀧𑀢𑀺𑀫𑀳𑀻𑀥𑀭𑀢𑁄 𑀉𑀧𑁂𑀓𑁆𑀔𑀸-

𑀯𑁂𑀴𑀸𑀢𑀮𑀸𑀯𑀥𑀺 𑀤𑀬𑀸𑀲𑀮𑀺𑀮𑁂𑀦 𑀧𑀼𑀡𑁆𑀡𑀸,

𑀫𑁂𑀢𑁆𑀢𑀸𑀲𑀯𑀦𑁆𑀢𑀺 𑀧𑀪𑀯𑀸 𑀫𑀼𑀤𑀺𑀢𑀼𑀫𑀺𑀫𑀸𑀮𑀸

𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀣 𑀪𑀼𑀯𑀦𑀢𑁆𑀢𑀬𑀕𑀁𑀚𑀦𑁄𑀖𑀁; ()

𑁩𑁦.

𑀲𑀫𑁆𑀧𑀦𑁆𑀦𑀤𑀸𑀦𑀲𑀤𑀦𑀫𑁆𑀩𑀼𑀥𑀭𑁂𑀳𑀺 𑀬𑀲𑁆𑀲

𑀤𑀸𑀦𑀸𑀥𑀺𑀫𑀼𑀢𑁆𑀢𑀺𑀧𑀭𑀫𑀲𑁆𑀲 𑀫𑀦𑁄𑀤𑀳𑁂𑀲𑀼,

𑀢𑀡𑁆𑀳𑀸𑀢𑀝𑀸𑀦𑀺 𑀓𑀧𑀡𑀤𑁆𑀥𑀺𑀓𑀬𑀸𑀘𑀓𑀸𑀦𑀁

𑀳𑀺𑀦𑁆𑀦𑀸𑀦𑀺 𑀲𑀢𑁆𑀢𑀭𑀢𑀦𑀫𑁆𑀩𑀼𑀦𑀺𑀧𑀸𑀢𑀦𑁂𑀦; ()

𑁩𑁧.

𑀬𑀲𑁆𑀲𑀺𑀦𑁆𑀤𑀦𑀻𑀮𑀦𑀬𑀦𑀁 𑀭𑀚𑀢𑀸𑀯𑀤𑀸𑀢-

𑀤𑀦𑁆𑀢𑀁 𑀲𑀼𑀯𑀡𑁆𑀡𑀯𑀤𑀦𑀜𑁆𑀘 𑀧𑀯𑀸𑀴𑀲𑀻𑀲𑀁,

𑀫𑀼𑀢𑁆𑀢𑀸𑀫𑀬𑀗𑁆𑀕𑀯𑀬𑀯𑀁 𑀭𑀢𑀦𑁂𑀳𑀺 𑀦𑀸𑀦𑀸

𑀤𑁂𑀳𑀁 𑀲𑀼𑀫𑀸𑀧𑀺𑀢𑀫𑀺𑀯𑀸𑀲𑀺 𑀧𑀺𑀢𑀸𑀫𑀳𑁂𑀦; () (𑀲𑀻𑀮𑁂𑀲𑀩𑀦𑁆𑀥𑀦𑀁)

𑁩𑁨. ¶

𑀬𑀲𑁆𑀲𑀸𑀢𑀺𑀧𑀡𑁆𑀟𑀭𑀬𑀲𑁄𑀯𑀺𑀲𑀭𑁄’𑀲𑀥𑀻𑀲𑁄

𑀲𑀗𑁂𑀓𑁆𑀓𑀸𑀘𑀺𑀢𑀸𑀦𑀦𑀲𑀭𑁄’𑀭𑀺𑀦𑀭𑀸𑀥𑀺𑀧𑀸𑀦𑀁,

𑀲𑁄𑀓𑀦𑁆𑀥𑀓𑀸𑀭𑀪𑀺𑀤𑀼𑀭𑁄 𑀭𑀺𑀧𑀼𑀭𑀸𑀚𑀺𑀦𑀻𑀦𑀁

𑀆𑀲𑀸𑀕𑀭𑀦𑁆𑀢𑀧𑀣𑀯𑀺𑀁 𑀧𑀭𑀺𑀥𑀺𑀓𑀭𑀺𑀢𑁆𑀣; ()

𑁩𑁩.

𑀭𑀸𑀚𑀜𑁆𑀜𑀙𑀧𑁆𑀧𑀤𑀓𑀼𑀮𑀁 𑀲𑀓𑀮𑀁 𑀧𑀤𑁂𑀲-

𑀭𑀚𑁆𑀚𑀸𑀥𑀺𑀧𑀘𑁆𑀘𑀫𑀓𑀭𑀦𑁆𑀤𑀭𑀲𑀸𑀪𑀺𑀮𑀸𑀲𑀁,

𑀬𑀲𑁆𑀲𑀢𑁆𑀢𑀪𑀸𑀯𑀓𑀫𑀮𑀸𑀓𑀭𑀨𑀼𑀮𑁆𑀮𑀺𑀢𑀸𑀦𑀺

𑀲𑀁𑀲𑁂𑀯𑀺 𑀘𑀸𑀭𑀼𑀘𑀭𑀡𑀫𑁆𑀩𑀽𑀭𑀼𑀳𑀸𑀦𑀺 𑀪𑀢𑁆𑀬𑀸; ()

𑁩𑁪. ¶

𑀲𑁂𑀢𑀸𑀢𑀧𑀢𑁆𑀢𑀫𑀺𑀯 𑀯𑀺𑀲𑁆𑀲𑀼𑀢𑀓𑀺𑀢𑁆𑀢𑀺𑀧𑀼𑀜𑁆𑀚𑀁

𑀓𑀢𑁆𑀯𑀸’𑀲𑀺𑀧𑀢𑁆𑀢𑀫𑀺𑀯 𑀧𑀸𑀯𑀓𑀪𑀻𑀫𑀢𑁂𑀚𑀁,

𑀬𑀲𑁆𑀫𑀺𑀁 𑀲𑀭𑀚𑁆𑀚𑀫𑀦𑀼𑀲𑀸𑀲𑀢𑀺 𑀲𑁂𑀲𑀪𑀽𑀧𑀸

𑀙𑀢𑁆𑀢𑀸𑀲𑀺𑀪𑀽𑀲𑀺𑀢𑀓𑀭𑀸 𑀲𑀓𑀓𑀺𑀗𑁆𑀓𑀭𑀸’𑀯; ()

𑁩𑁫.

𑀤𑁆𑀯𑀸𑀭𑀸𑀦𑀺’𑀦𑁂𑀓𑀓𑀧𑀡𑁆𑀟𑀺𑀓𑀬𑀸𑀘𑀓𑀸𑀦𑀁

𑀉𑀕𑁆𑀖𑀸𑀝𑀺𑀢𑁄𑀧𑁆𑀬’𑀯𑀺𑀭𑀢𑀁 𑀭𑀢𑀦𑀸𑀮𑀬𑁂𑀲𑀼,

𑀲𑀤𑁆𑀥𑀸𑀤𑀺𑀲𑀢𑁆𑀢𑀥𑀦𑀭𑀓𑁆𑀔𑀡𑀢𑀧𑁆𑀧𑀭𑁄 𑀲𑀁

𑀤𑁆𑀯𑀸𑀭𑀢𑁆𑀢𑀬𑀁 𑀧𑀺𑀤𑀳𑀺 𑀬𑁄 𑀓𑀧𑀺𑀮𑀸𑀥𑀺𑀦𑀸𑀣𑁄; ()

𑁩𑁬.

𑀬𑀲𑁆𑀲𑀼𑀲𑁆𑀲𑀺𑀢𑀤𑁆𑀥𑀦𑀼𑀏𑀡𑁄 𑀧𑀩𑀮𑀸𑀭𑀺𑀯𑀕𑁆𑀕𑀁

𑀯𑀺𑀲𑁆𑀲𑀝𑁆𑀞𑀸𑀩𑀸𑀡𑀯𑀺𑀲𑀭𑀩𑁆𑀩𑀺𑀲𑀫𑀼𑀩𑁆𑀩𑀳𑀦𑁆𑀢𑁄,

𑀪𑀲𑁆𑀫𑀺𑀓𑀭𑀺 𑀓𑀭𑀺𑀓𑀭𑀸𑀬𑀢𑀧𑀻𑀦𑀩𑀸𑀳𑀼-

𑀲𑀧𑁆𑀧𑁄 𑀲𑀼𑀨𑁄𑀞𑀺𑀢𑀚𑀺𑀬𑀸𑀧𑀭𑀺𑀨𑀦𑁆𑀤𑀚𑀺𑀯𑁆𑀳𑁄; ()

𑁩𑁭. ¶

𑀮𑀓𑁆𑀔𑀻𑀦𑀺𑀥𑀸𑀦𑀦𑀕𑀭𑀡𑁆𑀡𑀯𑀧𑀸𑀢𑀼𑀪𑀽𑀢𑁄

𑀫𑀦𑁆𑀢𑀺𑀦𑁆𑀤𑀓𑀽𑀝𑀲𑀺𑀔𑀭𑀻𑀯𑀮𑀬𑀸𑀯𑀼𑀢𑁄 𑀬𑁄,

𑀯𑀸𑀮𑀕𑁆𑀕𑀫𑀢𑁆𑀢𑀫𑁆𑀧𑀺 𑀭𑀸𑀚𑀲𑀺𑀡𑁂𑀭𑀼𑀭𑀸𑀚𑀸

𑀓𑁄𑀥𑀸𑀦𑀺𑀮𑁂𑀦 𑀭𑀺𑀧𑀼𑀭𑀜𑁆𑀜𑀫𑀓𑀫𑁆𑀧𑀺𑀬𑁄’𑀲𑀺; ()

𑁩𑁮.

𑀪𑀲𑁆𑀫𑀺𑀓𑀢𑀸𑀔𑀻𑀮𑀯𑀺𑀧𑀓𑁆𑀔𑀦𑀭𑀺𑀦𑁆𑀤𑀓𑀝𑁆𑀞𑁄

𑀓𑁄𑀥𑀸𑀦𑀮𑁄 𑀲𑀭𑀲𑀫𑀻𑀭𑀡𑀪𑀸𑀯𑀺𑀢𑁄𑀧𑀺,

𑀦𑀺𑀩𑁆𑀩𑀸𑀬𑀺 𑀧𑀕𑁆𑀖𑀭𑀺𑀢𑀩𑀧𑁆𑀧𑀚𑀮𑁂𑀳𑀺 𑀬𑀲𑁆𑀲

𑀮𑁄𑀮𑀩𑁆𑀩𑀺𑀮𑁄𑀘𑀦𑀖𑀝𑁂𑀳𑀺 𑀯𑀺𑀧𑀓𑁆𑀔𑀣𑀻𑀦𑀁; ()

𑁩𑁯.

𑀲𑀦𑁆𑀦𑀻𑀢𑀺𑀫𑀕𑁆𑀕𑀚𑀮𑀺𑀢𑀼𑀕𑁆𑀕𑀫𑀢𑀺𑀧𑁆𑀧𑀤𑀻𑀧𑁄

𑀓𑀺𑀢𑁆𑀢𑀺𑀧𑁆𑀧𑀩𑀦𑁆𑀥𑀥𑀯𑀮𑀻𑀓𑀢𑀚𑀺𑀯𑀮𑁄𑀓𑁄,

𑀭𑀸𑀚𑀺𑀦𑁆𑀤𑀫𑁄𑀴𑀺𑀫𑀡𑀺𑀮𑀗𑁆𑀓𑀢𑀧𑀸𑀤𑀧𑀻𑀞𑁄

𑀥𑀫𑁆𑀫𑁂𑀦 𑀭𑀚𑁆𑀚𑀫𑀦𑀼𑀲𑀸𑀲𑀺 𑀘𑀺𑀭𑀁 𑀲𑀭𑀸𑀚𑀸; ()

𑁪𑁦. ¶

𑀢𑀲𑁆𑀲𑀢𑀺𑀧𑀻𑀯𑀭𑀧𑀬𑁄𑀥𑀭𑀪𑀤𑁆𑀤𑀓𑀼𑀫𑁆𑀪-

𑀤𑁆𑀯𑀦𑁆𑀤𑀸𑀢𑀺𑀪𑀸𑀭𑀯𑀺𑀭𑀴𑀻𑀓𑀢𑀫𑀚𑁆𑀛𑀪𑀸𑀕𑀸,

𑀦𑀺𑀤𑁆𑀤𑁄𑀲𑀩𑀸𑀮𑀭𑀯𑀺𑀫𑀡𑁆𑀟𑀮𑀘𑀸𑀭𑀼𑀕𑀡𑁆𑀟𑀸

𑀤𑀺𑀩𑁆𑀩𑀘𑁆𑀙𑀭𑀸𑀚𑀺𑀢𑀯𑀺𑀭𑀸𑀚𑀺𑀢𑀭𑀽𑀧𑀲𑁄𑀪𑀸; ()

𑁪𑁧.

𑀲𑀫𑁆𑀨𑀼𑀮𑁆𑀮𑀦𑀻𑀮𑀓𑀫𑀮𑀸𑀫𑀮𑀦𑀻𑀮𑀦𑁂𑀢𑁆𑀢𑀸

𑀑𑀮𑀫𑁆𑀩𑀫𑀸𑀦𑀫𑀡𑀺𑀓𑀼𑀡𑁆𑀟𑀮𑀮𑀫𑁆𑀩𑀓𑀡𑁆𑀡𑀸,

𑀫𑀼𑀢𑁆𑀢𑀸𑀯𑀮𑀺𑀯𑀤𑀲𑀦𑀸𑀯𑀮𑀺 𑀳𑀁𑀲𑀥𑁂𑀦𑀼-

𑀳𑁂𑀮𑀸𑀧𑀳𑀸𑀲𑀕𑀫𑀦𑀸 𑀫𑀼𑀤𑀼𑀘𑀸𑀭𑀼𑀯𑀸𑀡𑀻; ()

𑁪𑁨.

𑀩𑀺𑀫𑁆𑀩𑀸𑀥𑀭𑀸 𑀚𑀮𑀥𑀭𑀸𑀬𑀢𑀓𑁂𑀲𑀧𑀸𑀲𑀸

𑀲𑁄𑀯𑀡𑁆𑀡𑀤𑀧𑁆𑀧𑀡𑀦𑀺𑀪𑀸𑀦𑀦𑀘𑀦𑁆𑀤𑀩𑀺𑀫𑁆𑀩𑀸,

𑀲𑀦𑁆𑀦𑀻𑀭𑀧𑀼𑀧𑁆𑀨𑀫𑀓𑀼𑀴𑁄𑀧𑀫𑀘𑀸𑀭𑀼𑀚𑀗𑁆𑀖𑀸

𑀓𑀦𑁆𑀤𑀧𑁆𑀧 𑀫𑀗𑁆𑀕𑀮𑀲𑀺𑀮𑀸𑀢𑀮𑀲𑁄𑀡𑀺𑀪𑀸𑀕𑀸; ()

𑁪𑁩. ¶

𑀦𑀸𑀪𑀸𑀮𑀯𑀸𑀴𑀭𑀼𑀳𑀦𑀻𑀮𑀢𑀫𑀸𑀮𑀯𑀮𑁆𑀮𑀻-

𑀮𑀻𑀮𑀸𑀯𑀺𑀦𑀤𑁆𑀥𑀦𑀯𑀓𑁄𑀫𑀮𑀭𑁄𑀫𑀭𑀸𑀚𑀻,

𑀮𑀸𑀯𑀡𑁆𑀡𑀯𑀸𑀭𑀺𑀥𑀺𑀢𑀭𑀗𑁆𑀕𑀪𑀼𑀚𑀸’𑀪𑀺𑀦𑀻𑀮-

𑀲𑀼𑀩𑁆𑀪𑀼𑀮𑀢𑀸𑀫𑀓𑀭𑀓𑁂𑀢𑀦𑀘𑀸𑀧𑀭𑀽𑀧𑀸; ()

𑁪𑁪.

𑀪𑀼𑀧𑀸𑀮𑀯𑀁𑀲𑀓𑀫𑀮𑀸𑀓𑀭𑀭𑀸𑀚𑀪𑀁𑀲𑀺

𑀫𑀸𑀬𑀸𑀯𑀥𑀼 𑀇𑀯 𑀲𑀼𑀚𑀫𑁆𑀧𑀢𑀺𑀦𑁄 𑀲𑀼𑀚𑀸𑀢𑀸,

𑀘𑀦𑁆𑀤𑀲𑁆𑀲𑀓𑁄𑀫𑀼𑀤𑀺’𑀯 𑀯𑀺𑀚𑁆𑀚𑀼𑀭𑀺𑀯’𑀫𑁆𑀩𑀼𑀤𑀲𑁆𑀲

𑀭𑀜𑁆𑀜𑁄’𑀢𑀺𑀘𑀸𑀭𑀼𑀘𑀭𑀺𑀢𑀸𑀲𑀺 𑀧𑀺𑀬𑀸 𑀫𑀳𑁂𑀲𑀺; ()

𑁪𑁫. ¶

𑀢𑀲𑁆𑀫𑀺𑀁 𑀦𑀕𑁄𑀧𑀫𑀖𑀭𑁂 𑀦𑀕𑀭𑁂 𑀢𑀤𑀸𑀲𑀺

𑀆𑀲𑀸𑀴𑁆𑀳𑀺𑀫𑀗𑁆𑀕𑀮𑀫𑀳𑁄 𑀤𑀺𑀯𑀲𑀸𑀦𑀺𑀲𑀢𑁆𑀢,

𑀫𑀺𑀮𑀸𑀲𑀼𑀕𑀦𑁆𑀥𑀧𑀭𑀫𑀁 𑀯𑀺𑀕𑀢𑀸𑀲𑀯𑀁 𑀢𑀁

𑀦𑀓𑁆𑀔𑀢𑁆𑀢𑀓𑀻𑀴𑀫𑀓𑀭𑀺𑀢𑁆𑀣 𑀫𑀳𑁂𑀲𑀺 𑀫𑀸𑀬𑀸; ()

𑁪𑁬.

𑀯𑀼𑀝𑁆𑀞𑀸𑀬 𑀲𑀢𑁆𑀢𑀫𑀤𑀺𑀦𑀸𑀕𑀢𑀧𑀼𑀡𑁆𑀡𑀫𑀸𑀬

𑀧𑀸𑀢𑁄 𑀲𑀼𑀕𑀦𑁆𑀥𑀧𑀭𑀺𑀯𑀸𑀲𑀺𑀢𑀯𑀸𑀭𑀺𑀦𑀸 𑀲𑀸,

𑀓𑀢𑁆𑀯𑀸 𑀲𑀺𑀦𑀸𑀦𑀫𑀢𑀼𑀮𑀁 𑀓𑀧𑀡𑁆𑀟𑀺𑀓𑀸𑀦𑀁

𑀤𑀸𑀦𑀁 𑀅𑀤𑀸𑀲𑀺 𑀘𑀢𑀼𑀮𑀓𑁆𑀔𑀥𑀦𑀩𑁆𑀩𑀬𑁂𑀦; ()

𑁪𑁭.

𑀯𑀢𑁆𑀣𑀸𑀳𑀢𑁂𑀳𑀺 𑀲𑀼𑀦𑀺𑀯𑀢𑁆𑀣𑀲𑀼𑀧𑀸𑀭𑀼𑀢𑀸 𑀲𑀸

𑀪𑀼𑀢𑁆𑀯𑀸’𑀕𑁆𑀕𑀪𑁄𑀚𑀦𑀫𑀥𑀺𑀝𑁆𑀞𑀺𑀢𑀼𑀧𑁄𑀲𑀣’𑀗𑁆𑀕𑀸,

𑀦𑀺𑀤𑁆𑀤𑀸𑀢𑀼𑀭𑀸 𑀲𑀼𑀧𑀺𑀦𑀫𑁄𑀯𑀭𑀓𑀁 𑀧𑀯𑀺𑀲𑁆𑀲

𑀓𑀮𑁆𑀬𑀸𑀡𑀫𑀤𑁆𑀤𑀲 𑀲𑀺𑀭𑀻𑀲𑀬𑀦𑁂 𑀦𑀺𑀧𑀦𑁆𑀦𑀸; ()

𑁪𑁮. ¶

𑀦𑁂𑀢𑁆𑀯𑀸 𑀦𑀺𑀧𑀦𑁆𑀦𑀲𑀬𑀦𑀁 𑀳𑀺𑀫𑀯𑀦𑁆𑀢𑀧𑀲𑁆𑀲𑁂

𑀳𑁂𑀝𑁆𑀞𑀸 𑀯𑀺𑀲𑀸𑀮𑀢𑀭𑀲𑀸𑀴𑀫𑀳𑀻𑀭𑀼𑀳𑀲𑁆𑀲,

𑀦𑀁 𑀲𑀝𑁆𑀞𑀺𑀬𑁄𑀚𑀦𑀓𑀘𑀸𑀭𑀼𑀫𑀦𑁄𑀲𑀺𑀮𑀸𑀬𑀁

𑀆𑀭𑁄𑀧𑀬𑀺𑀁𑀲𑀼 𑀘𑀢𑀼𑀭𑁄 𑀓𑀺𑀭 𑀤𑁂𑀯𑀭𑀸𑀚𑀸; ()

𑁪𑁯.

𑀦𑁂𑀢𑁆𑀯𑀸 𑀫𑀦𑀼𑀲𑁆𑀲𑀫𑀮𑀲𑀁𑀳𑀭𑀡𑀸𑀬 𑀢𑀫𑁆𑀳𑀸’

𑀦𑁄𑀢𑀢𑁆𑀢𑀦𑀸𑀫𑀭𑀳𑀤𑀁 𑀲𑀼𑀦𑀳𑀸𑀧𑀬𑀺𑀢𑁆𑀯𑀸,

𑀤𑁂𑀯𑀺𑀢𑁆𑀣𑀺𑀬𑁄 𑀲𑀧𑀤𑀺 𑀤𑀺𑀩𑁆𑀩𑀫𑀬𑁂𑀳𑀺 𑀦𑁂𑀲𑀁

𑀯𑀢𑁆𑀣𑁂𑀳𑀺 𑀕𑀦𑁆𑀥𑀓𑀼𑀲𑀼𑀫𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸; ()

𑁫𑁦.

𑀢𑀢𑁆𑀣𑀼𑀩𑁆𑀪𑀯𑁄 𑀮𑀲𑀢𑀺 𑀭𑀽𑀧𑀺𑀬𑀧𑀓𑀩𑁆𑀩𑀢𑁄 𑀬𑁄

𑀢𑀲𑁆𑀲𑁄𑀤𑀭𑁂’𑀢𑀺𑀭𑀼𑀘𑀺𑀭𑁂 𑀓𑀦𑀓𑀩𑁆𑀩𑀺𑀫𑀸𑀦𑁂,

𑀧𑀸𑀘𑀻𑀦𑀲𑀻𑀲𑀯𑀢𑀺 𑀤𑀺𑀩𑁆𑀩𑀫𑀬𑀫𑁆𑀳𑀺 𑀲𑀫𑁆𑀫𑀸

𑀧𑀜𑁆𑀜𑀸𑀧𑀺𑀢𑀕𑁆𑀕𑀲𑀬𑀦𑀫𑁆𑀳𑀺 𑀲𑀬𑀸𑀧𑀬𑀺𑀁𑀲𑀼; ()

𑁫𑁧.

𑀑𑀭𑀼𑀬𑁆𑀳 𑀲𑁂𑀢𑀯𑀭𑀯𑀸𑀭𑀡𑀭𑀸𑀚𑀯𑁂𑀲𑁄

𑀩𑀼𑀤𑁆𑀥𑀗𑁆𑀓𑀼𑀭𑁄 𑀭𑀼𑀘𑀺𑀭𑀓𑀜𑁆𑀘𑀦𑀧𑀩𑁆𑀩𑀢𑀫𑁆𑀳𑀸,

𑀆𑀭𑀼𑀬𑁆𑀳 𑀲𑀚𑁆𑀛𑀼𑀥𑀭𑀡𑀺𑀥𑀭𑀫𑀼𑀢𑁆𑀢𑀭𑀸𑀬

𑀲𑁄𑀡𑁆𑀟𑀸𑀬 𑀲𑁂𑀢𑀲𑀭𑀲𑀺𑀭𑀼𑀳𑀫𑀼𑀩𑁆𑀩𑀳𑀦𑁆𑀢𑁄; ()

𑁫𑁨. ¶

𑀧𑀢𑁆𑀯𑀸 𑀯𑀺𑀫𑀸𑀦𑀯𑀣𑀓𑀼𑀜𑁆𑀘𑀦𑀤𑀁 𑀦𑀤𑀺𑀢𑁆𑀯𑀸

𑀓𑀢𑁆𑀯𑀸 𑀧𑀤𑀓𑁆𑀔𑀺𑀡𑀫𑀮𑀗𑁆𑀓𑀢𑀫𑀸𑀢𑀼𑀲𑁂𑀬𑁆𑀬𑀁,

𑀪𑁂𑀢𑁆𑀯𑀸𑀦 𑀢𑀸𑀬𑀧𑀦 𑀤𑀓𑁆𑀔𑀺𑀡𑀧𑀲𑁆𑀲𑀫𑀦𑁆𑀢𑁄

𑀓𑀼𑀘𑁆𑀙𑀺𑀁 𑀧𑀯𑀺𑀝𑁆𑀞𑀲𑀤𑀺𑀲𑁄 𑀲𑀼𑀧𑀺𑀦𑁂𑀦 𑀤𑀺𑀝𑁆𑀞𑁄; ()

𑁫𑁩.

𑀫𑀸𑀬𑀸𑀬 𑀭𑀸𑀚𑀯𑀥𑀼𑀬𑀸 𑀭𑀼𑀘𑀺𑀭𑀸𑀦𑀦𑀸𑀬

𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀺𑀬𑀫𑀼𑀢𑁆𑀢𑀭’𑀲𑀸𑀴𑁆𑀳𑀪𑁂𑀦,

𑀩𑀼𑀤𑁆𑀥𑀗𑁆𑀓𑀼𑀭𑀲𑁆𑀲 𑀧𑀞𑀫𑁂𑀦 𑀫𑀳𑀸𑀯𑀺𑀧𑀸𑀓-

𑀘𑀺𑀢𑁆𑀢𑁂𑀦 𑀲𑀫𑁆𑀧𑀢𑀺 𑀅𑀳𑀽 𑀧𑀝𑀺𑀲𑀦𑁆𑀥𑀺𑀕𑀩𑁆𑀪𑁂; ()

𑁫𑁪.

𑀩𑀼𑀤𑁆𑀥𑀗𑁆𑀓𑀼𑀭𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑀢𑀲𑁆𑀲 𑀕𑀩𑁆𑀪𑁂

𑀫𑀸𑀬𑀸𑀬 𑀘𑀸𑀭𑀼𑀘𑀭𑀺𑀢𑀸𑀬 𑀘 𑀔𑀕𑁆𑀕𑀳𑀢𑁆𑀣𑀸,

𑀦𑀺𑀲𑁆𑀲𑁂𑀲𑀼𑀧𑀤𑁆𑀤𑀯𑀦𑀺𑀭𑀸𑀓𑀭𑀡𑀸𑀬 𑀭𑀓𑁆𑀔𑀁

𑀕𑀡𑁆𑀳𑀺𑀁𑀲𑀼 𑀢𑀸𑀯 𑀘𑀢𑀼𑀭𑁄 𑀲𑀼𑀭𑀭𑀸𑀚𑀧𑀼𑀢𑁆𑀢𑀸; ()

𑁫𑁫. ¶

𑀫𑀸𑀬𑀸𑀬 𑀪𑀢𑁆𑀢𑀼𑀧𑀭𑀫𑀸𑀬 𑀢𑀢𑁄𑀧𑁆𑀧𑀪𑀼𑀢𑀺

𑀦𑀽𑀧𑁆𑀧𑀚𑁆𑀚𑀺 𑀓𑀺𑀜𑁆𑀘𑀺 𑀧𑀼𑀭𑀺𑀲𑁂𑀲𑀼 𑀲𑀭𑀸𑀕𑀘𑀺𑀢𑁆𑀢𑀁,

𑀲𑀸 𑀧𑀜𑁆𑀘𑀓𑀸𑀫𑀲𑀼𑀔𑀺𑀦𑀻 𑀅𑀓𑀺𑀮𑀦𑁆𑀢𑀓𑀸𑀬𑀸

𑀮𑀸𑀪𑁂𑀦𑀼𑀴𑀸𑀭𑀬𑀲𑀲𑀸𑀧𑁆𑀬𑀪𑀺𑀯𑀟𑁆𑀠𑀺𑀢𑀸𑀲𑀺; ()

𑁫𑁬.

𑀧𑀜𑁆𑀜𑀸𑀬𑀺 𑀥𑁄𑀢𑀭𑀢𑀦𑁂 𑀚𑀦𑀺𑀓𑀸𑀬 𑀅𑀦𑁆𑀢𑁄

𑀓𑀼𑀘𑁆𑀙𑀺𑀁 𑀕𑀢𑁄 𑀬𑀣𑀭𑀺𑀯𑀸𑀯𑀼𑀢𑀧𑀡𑁆𑀟𑀼𑀲𑀼𑀢𑁆𑀢𑀁,

𑀢𑀁 𑀓𑀼𑀘𑁆𑀙𑀺𑀦𑀸 𑀧𑀭𑀺𑀳𑀭𑀻 𑀤𑀲𑀫𑀸𑀲𑀫𑀢𑁆𑀢𑀁

𑀧𑀢𑁆𑀢𑁂𑀦 𑀢𑁂𑀮𑀫𑀺𑀯 𑀭𑀸𑀚𑀺𑀦𑀺 𑀅𑀧𑁆𑀧𑀫𑀢𑁆𑀢𑀸; ()

𑁫𑁭.

𑀧𑀸𑀢𑁄’𑀯 𑀧𑀸𑀝𑀺𑀧𑀤𑀕𑁂 𑀤𑀺𑀯𑀲𑁂 𑀧𑀩𑀼𑀤𑁆𑀥𑀸

𑀭𑀜𑁆𑀜𑁄 𑀓𑀣𑁂𑀲𑀺 𑀲𑀼𑀧𑀺𑀦𑀁 𑀅𑀣 𑀲𑁄 𑀦𑀭𑀺𑀦𑁆𑀤𑁄,

𑀯𑁂𑀤𑀗𑁆𑀕𑀯𑁂𑀤𑀘𑀢𑀼𑀭𑁂 𑀘𑀢𑀼𑀲𑀝𑁆𑀞𑀫𑀢𑁆𑀢𑁂

𑀧𑀓𑁆𑀓𑁄𑀲𑀬𑀻 𑀤𑁆𑀯𑀺𑀚𑀯𑀭𑁂 𑀤𑁆𑀯𑀺𑀚𑀯𑀁𑀲𑀓𑁂𑀢𑀽; ()

𑁫𑁮. ¶

𑀮𑀸𑀚𑀼𑀢𑁆𑀢𑀭𑀸𑀬 𑀧𑀭𑀺𑀪𑀡𑁆𑀟𑀓𑀢𑀸𑀬 𑀪𑀼𑀫𑁆𑀬𑀸

𑀧𑀜𑁆𑀜𑀸𑀧𑀺𑀢𑁂𑀲𑀼 𑀲𑀼𑀔𑀼𑀫𑀢𑁆𑀣𑀭𑀡𑀢𑁆𑀣𑀢𑁂𑀲𑀼,

𑀪𑀤𑁆𑀤𑀸𑀲𑀦𑁂𑀲𑀼 𑀪𑀯𑀦𑀫𑁆𑀳𑀺𑀦𑀺𑀲𑀺𑀦𑁆𑀦𑀓𑀸𑀦𑀁

𑀦𑁂𑀫𑀺𑀢𑁆𑀢𑀺𑀓𑀸𑀦𑀫𑀯𑀦𑀻𑀧𑀢𑀺 𑀪𑀼𑀲𑀼𑀭𑀸𑀦𑀁; ()

𑁫𑁯.

𑀧𑀓𑁆𑀔𑀺𑀢𑁆𑀢𑀲𑀧𑁆𑀧𑀺𑀫𑀥𑀼𑀲𑀓𑁆𑀔𑀺𑀭𑀔𑀻𑀭𑀫𑀺𑀲𑁆𑀲-

𑀧𑀸𑀬𑀸𑀲𑀧𑀼𑀡𑁆𑀡𑀳𑀭𑀺𑀭𑀽𑀧𑀺𑀬𑀪𑀸𑀚𑀦𑁂𑀳𑀺,

𑀯𑀢𑁆𑀣𑀸𑀳𑀢𑀸𑀦𑀺 𑀥𑀦𑀥𑀜𑁆𑀜𑀘𑀬𑀜𑁆𑀘 𑀥𑁂𑀦𑀽

𑀤𑀢𑁆𑀯𑀸𑀦 𑀤𑀺𑀝𑁆𑀞𑀲𑀼𑀧𑀺𑀦𑀲𑁆𑀲 𑀨𑀔𑀮𑀁 𑀅𑀧𑀼𑀘𑁆𑀙𑀺; ()

𑁬𑁦.

𑀫𑀸𑀘𑀺𑀦𑁆𑀢𑀬𑀺𑀢𑁆𑀣 𑀢𑀯 𑀭𑀸𑀚𑀺𑀦𑀺𑀬𑀸 𑀚𑀦𑀺𑀦𑁆𑀤

𑀓𑀼𑀘𑁆𑀙𑀺𑀫𑁆𑀳𑀺 𑀢𑀫𑁆𑀧𑀢𑀺 𑀧𑀢𑀺𑀝𑁆𑀞𑀳𑀺 𑀧𑀼𑀢𑁆𑀢𑀕𑀩𑁆𑀪𑁄,

𑀅𑀚𑁆𑀛𑀸𑀯𑀲𑀺𑀲𑁆𑀲𑀢𑀺 𑀲𑀜𑁆𑀘𑁂𑀧𑀦 𑀘𑀓𑁆𑀓𑀯𑀢𑁆𑀢𑀺

𑀭𑀸𑀚𑀸 𑀪𑀯𑀺𑀲𑁆𑀲𑀢𑀺 𑀅𑀕𑀸𑀭𑀫𑀲𑀁𑀲𑀬𑀁 𑀲𑁄; ()

𑁬𑁧. ¶

𑀳𑀺𑀢𑁆𑀯𑀸 𑀲𑀲𑀢𑁆𑀢𑀭𑀢𑀦𑀁 𑀘𑀢𑀼𑀤𑀻𑀧𑀭𑀚𑁆𑀚𑀁

𑀲𑁄 𑀧𑀩𑁆𑀩𑀚𑀺𑀲𑁆𑀲𑀢𑀺 𑀲𑀘𑁂 𑀪𑀯𑀦𑀸’𑀪𑀺𑀕𑀦𑁆𑀢𑁆𑀯𑀸,

𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺 𑀥𑀼𑀯𑀁 𑀘𑀢𑀼𑀲𑀘𑁆𑀘𑀩𑀼𑀤𑁆𑀥𑁄

𑀇𑀘𑁆𑀘𑀩𑁆𑀭𑀼𑀯𑀺𑀁𑀲𑀼 𑀲𑀼𑀧𑀺𑀦𑀢𑁆𑀣𑀯𑀺𑀤𑀽 𑀯𑀺𑀤𑀽 𑀢𑁂; ()

𑁬𑁨.

𑀲𑀸 𑀕𑀩𑁆𑀪𑀪𑀸𑀭𑀯𑀞𑀭𑀺𑀓𑀢𑀫𑀚𑁆𑀛𑀪𑀸𑀕𑀸

𑀕𑀦𑁆𑀢𑀼𑀁 𑀲𑀓𑀁 𑀓𑀼𑀮𑀖𑀭𑀁 𑀓𑀼𑀮𑀓𑀜𑁆𑀚𑀳𑀁𑀲𑀺,

𑀇𑀘𑁆𑀙𑀸𑀫𑀳𑀦𑁆𑀢𑀺 𑀧𑀝𑀺𑀯𑁂𑀤𑀬𑀺 𑀤𑁂𑀯𑀺 𑀭𑀜𑁆𑀜𑁄

𑀲𑁄 𑀲𑀫𑁆𑀧𑀝𑀺𑀘𑁆𑀙𑀺 𑀯𑀘𑀦𑀁 𑀓𑀭𑀯𑀻𑀓𑀯𑀸𑀡𑁆𑀬𑀸; ()

𑁬𑁩.

𑀢𑀫𑁆𑀳𑀸 𑀫𑀳𑀸𑀦𑀕𑀭𑀢𑁄 𑀦𑀕𑀭𑀗𑁆𑀕𑀧𑀼𑀡𑁆𑀡𑀁

𑀲𑁄 𑀬𑀸𑀯 𑀤𑁂𑀯𑀤𑀳𑀦𑀸𑀫𑀺𑀓𑀭𑀸𑀚𑀥𑀸𑀦𑀻,

𑀫𑀼𑀢𑁆𑀢𑀸’𑀯𑀤𑀸𑀢𑀧𑀼𑀴𑀺𑀦𑀢𑁆𑀣𑀭𑀡𑁂𑀳𑀺 𑀭𑀸𑀚𑀸

𑀮𑀸𑀚𑁄𑀧𑀳𑀸𑀭𑀯𑀺𑀥𑀺𑀦𑀸 𑀓𑀫𑀮𑀼𑀧𑁆𑀧𑀮𑁂𑀳𑀺; ()

𑁬𑁪. ¶

𑀲𑀦𑁆𑀢𑀻𑀭𑀧𑀼𑀧𑁆𑀨𑀓𑀮𑀲𑁂𑀳𑀺 𑀲𑀫𑀧𑁆𑀧𑀺𑀢𑁂𑀳𑀺

𑀫𑀦𑁆𑀤𑀸𑀢𑀺𑀮𑁂𑀭𑀺𑀢𑀧𑀝𑀸𑀓 𑀥𑀚𑀸𑀯𑀮𑀻𑀳𑀺,

𑀓𑀸𑀭𑀸𑀧𑀬𑀻 𑀓𑀦𑀓𑀭𑀽𑀧𑀺𑀬𑀢𑁄𑀭𑀡𑁂𑀳𑀺

𑀅𑀤𑁆𑀥𑀸𑀦𑀫𑀕𑁆𑀕𑀲𑀫𑀮𑀗𑁆𑀓𑀭𑀡𑀁’𑀢𑀔𑀺𑀧𑁆𑀧𑀁; ()

𑁬𑁫.

𑀯𑀦𑁆𑀤𑀻’𑀪𑀺𑀕𑀻𑀢𑀣𑀼𑀢𑀺𑀫𑀗𑁆𑀕𑀮𑀕𑀻𑀢𑀺𑀓𑀸𑀳𑀺

𑀧𑀜𑁆𑀘𑀗𑁆𑀕𑀺𑀓𑁂𑀳𑀺 𑀢𑀼𑀭𑀺𑀬𑁂𑀳𑀺 𑀓𑀢𑀼𑀧𑀳𑀸𑀭𑀁,

𑀢𑀲𑁆𑀫𑀺𑀁 𑀲𑀼𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑀫𑀜𑁆𑀚𑀲𑀫𑁆𑀳𑀺

𑀤𑀺𑀩𑁆𑀩𑀯𑁆𑀘𑀭𑀸𑀲𑀺𑀭𑀺𑀯𑀺𑀟𑀫𑁆𑀩𑀦𑀭𑀽𑀧𑀲𑁄𑀪𑀁; ()

𑁬𑁬.

𑀤𑁂𑀯𑀺𑀁 𑀲𑀼𑀯𑀡𑁆𑀡𑀲𑀺𑀯𑀺𑀓𑀸𑀬 𑀲𑀼𑀲𑀚𑁆𑀚𑀺𑀢𑀸𑀬

𑀆𑀭𑁄𑀧𑀬𑀺𑀢𑁆𑀯 𑀔𑀘𑀺𑀢𑀸𑀬 𑀫𑀡𑀻𑀳𑀺 𑀦𑀸𑀦𑀸,

𑀧𑁂𑀲𑁂𑀲𑀺 𑀪𑀼𑀧𑀢𑀺 𑀧𑀼𑀭𑀓𑁆𑀔𑀢𑀜𑀸𑀢𑀺𑀲𑀗𑁆𑀖𑀁

𑀲𑀤𑁆𑀥𑀺𑀁 𑀲𑀳𑀲𑁆𑀲𑀲𑀘𑀺𑀯𑁂𑀳𑀺 𑀲𑀼𑀔𑁂𑀥𑀺𑀢𑀁 𑀲𑁄; ()

𑁬𑁭. ¶

𑀲𑀫𑁆𑀣𑀼𑀮𑁆𑀮𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀯𑀢𑁆𑀢𑀪𑀸𑀭-

𑀭𑀼𑀓𑁆𑀔𑀸𑀓𑀼𑀮𑀁 𑀖𑀦𑀲𑀼𑀦𑀻𑀮𑀮𑀢𑀸𑀯𑀺𑀢𑀸𑀦𑀁,

𑀳𑀺𑀦𑁆𑀢𑀸𑀮𑀢𑀸𑀮𑀦𑀴𑀓𑀻𑀘𑀓𑀦𑀸𑀴𑀺𑀓𑁂𑀭-

𑀲𑀦𑁆𑀦𑀻𑀭𑀧𑀽𑀕𑀢𑀺𑀡𑀧𑀸𑀤𑀧𑀧𑀦𑁆𑀢𑀺𑀲𑀸𑀮𑀺𑀁; ()

𑁬𑁮.

𑀲𑁂𑀯𑀸𑀮𑀦𑀻𑀮𑀲𑀮𑀺𑀮𑀸𑀦𑀺𑀮𑀲𑀻𑀢𑀮𑁂𑀳𑀺

𑀑𑀢𑀺𑀡𑁆𑀡𑀓𑀳𑀁𑀲𑀯𑀺𑀲𑀭𑁂𑀳𑀺 𑀲𑀫𑀼𑀮𑁆𑀮𑀲𑀢𑁆𑀢𑀁,

𑀛𑀗𑁆𑀓𑀸𑀭𑀭𑀸𑀯𑀫𑀼𑀔𑀭𑀸𑀮𑀺𑀓𑀼𑀮𑀸𑀓𑀭𑀸𑀮-

𑀓𑀺𑀜𑁆𑀚𑀓𑁆𑀔𑀚𑀸𑀮𑀪𑀭𑀺𑀢𑀫𑁆𑀩𑀼𑀭𑀼𑀳𑀸𑀓𑀭𑁂𑀳𑀺; ()

𑁬𑁯.

𑀧𑀼𑀧𑁆𑀨𑀸𑀪𑀺𑀕𑀦𑁆𑀥𑀲𑀼𑀭𑀪𑀻𑀓𑀢𑀕𑀦𑁆𑀥𑀯𑀸𑀳𑀁

𑀅𑀤𑁆𑀤𑀓𑁆𑀔𑀺𑀲𑀩𑁆𑀩𑀚𑀦𑀮𑁄𑀘𑀦𑀧𑀻𑀬𑀫𑀸𑀦𑀁,

𑀦𑀺𑀦𑁆𑀤𑀦𑁆𑀢𑀦𑀦𑁆𑀤𑀦𑀯𑀦𑀁 𑀯𑀦𑀚𑀸𑀬𑀢𑀓𑁆𑀔𑀻

𑀲𑀸 𑀮𑀼𑀫𑁆𑀩𑀺𑀦𑀻𑀯𑀦𑀫𑀦𑀗𑁆𑀕𑀯𑀺𑀫𑀸𑀦𑀪𑀽𑀢𑀺𑀁; ()

𑁭𑁦. ¶

𑀲𑀸 𑀭𑀸𑀚𑀺𑀦𑀻 𑀦𑀯𑀤𑀮𑀗𑁆𑀕𑀼𑀮𑀺𑀧𑀦𑁆𑀢𑀻𑀘𑀸𑀭𑀼-

𑀲𑀸𑀔𑀸𑀪𑀼𑀚𑁄𑀧𑀳𑀺𑀢𑀫𑀜𑁆𑀚𑀭𑀺𑀘𑀸𑀫𑀭𑁂𑀳𑀺,

𑀲𑀦𑁆𑀦𑀤𑁆𑀥𑀓𑁄𑀫𑀮𑀮𑀢𑀸𑀯𑀦𑀺𑀢𑀸𑀦𑀫𑀕𑁆𑀕𑁂

𑀅𑀢𑁆𑀢𑀼𑀧𑀳𑀸𑀭𑀓𑀭𑀡𑀸𑀬 𑀓𑀢𑀸𑀯𑀓𑀸𑀲𑀸; ()

𑁭𑁧.

𑀲𑁂𑀦𑀸𑀬 𑀘𑀸𑀭𑀼𑀘𑀭𑀡𑀫𑁆𑀩𑀼𑀭𑀼𑀳𑁄𑀤𑁆𑀥𑀝𑁂𑀳𑀺

𑀭𑁂𑀡𑀽𑀳𑀺 𑀥𑀽𑀲𑀭𑀺𑀢𑀫𑀕𑁆𑀕𑀫𑀦𑀓𑁆𑀓𑀫𑀦𑁆𑀢𑀺,

𑀲𑀤𑁆𑀥𑀺𑀁 𑀲𑀓𑀸𑀬 𑀧𑀭𑀺𑀲𑀸𑀬 𑀢𑀢𑁄𑀢𑀭𑀺𑀢𑁆𑀯𑀸

𑀢𑀁 𑀮𑀼𑀫𑁆𑀩𑀺𑀦𑀻𑀯𑀦𑀫𑀼𑀧𑀸𑀯𑀺𑀲𑀺 𑀭𑀸𑀫𑀡𑁂𑀬𑁆𑀬𑀁;()

𑁭𑁨.

𑀢𑀁 𑀭𑀸𑀚𑀺𑀦𑀺𑀁 𑀯𑀦𑀯𑀥𑀼 𑀚𑀺𑀢𑀳𑀁𑀲𑀕𑀸𑀫𑀺𑀁

𑀆𑀫𑁄𑀤𑀫𑀦𑁆𑀤𑀫𑀮𑀬𑀸𑀦𑀺𑀮𑀳𑀢𑁆𑀣𑀕𑁂𑀳𑀺,

𑀲𑀫𑁆𑀪𑀸𑀯𑀬𑀺𑀢𑁆𑀣 𑀫𑀼𑀔𑀭𑀸𑀮𑀺𑀓𑀼𑀮𑀸𑀪𑀺𑀓𑀺𑀡𑁆𑀡-

𑀭𑁂𑀡𑀼𑀧𑁆𑀧𑀩𑀦𑁆𑀥𑀳𑀭𑀺𑀲𑀗𑁆𑀔𑀲𑀢𑁂𑀳𑀺 𑀫𑀕𑁆𑀕𑁂; ()

𑁭𑁩. ¶

𑀕𑀘𑁆𑀙𑀦𑁆𑀢𑀺𑀬𑀸 𑀘𑀭𑀡𑀦𑀽𑀧𑀼𑀭𑀦𑀸𑀤𑀧𑀸𑀲-

𑀩𑀤𑁆𑀥𑀸𑀦𑀫𑀼𑀦𑁆𑀦𑀢𑀲𑀺𑀭𑁄𑀫𑀺𑀕𑀧𑁄𑀢𑀓𑀸𑀦𑀁,

𑀉𑀫𑁆𑀫𑀻𑀮𑀺𑀢𑀸𑀬𑀢𑀯𑀺𑀮𑁄𑀘𑀦𑀧𑀦𑁆𑀢𑀺𑀧𑀓𑁆𑀔𑁂

𑀤𑀲𑁆𑀲𑁂𑀲𑀺 𑀦𑀻𑀮𑀦𑀮𑀺𑀦𑀻𑀯𑀦𑀭𑀸𑀚𑀺𑀲𑁄𑀪𑀁; ()

𑁭𑁪.

𑀉𑀤𑁆𑀥𑀁 𑀲𑀫𑀕𑁆𑀕𑀲𑀺𑀔𑀭𑁂𑀳𑀺 𑀓𑀢𑀸𑀯𑀓𑀸𑀲-

𑀫𑀕𑁆𑀕𑀦𑁆𑀢𑀭𑁂𑀳𑀺 𑀓𑀮𑀺𑀓𑀸𑀓𑀼𑀲𑀼𑀫𑀸𑀓𑀼𑀮𑁂𑀳𑀺,

𑀦𑀸𑀦𑀸𑀮𑀢𑀸𑀓𑀼𑀮𑀫𑀳𑀺𑀭𑀼𑀳𑀢𑁄𑀭𑀡𑁂𑀳𑀺

𑀉𑀬𑁆𑀬𑀸𑀦𑀪𑀼𑀫𑀺 𑀉𑀧𑀳𑀸𑀭𑀭𑀢𑁂’𑀯 𑀪𑀼𑀬; ()

𑁭𑁫.

𑀉𑀓𑁆𑀔𑀺𑀢𑁆𑀢𑀧𑀺𑀜𑁆𑀙𑀪𑀭𑀫𑀦𑁆𑀢𑀲𑀺𑀔𑀡𑁆𑀟𑀺𑀫𑀸𑀮𑀸-

𑀓𑀻𑀴𑀸𑀳𑀺 𑀓𑁄𑀓𑀺𑀮𑀓𑀼𑀮𑀗𑀦𑀺𑀓𑀸𑀳𑀴𑁂𑀳𑀺,

𑀉𑀬𑁆𑀬𑀸𑀦𑀪𑀼𑀫𑀺 𑀫𑀓𑀭𑀗𑀚𑀭𑀗𑁆𑀕𑀪𑀼𑀫𑀺-

𑀮𑀻𑀮𑀁 𑀪𑀚𑀺𑀢𑁆𑀣 𑀪𑀫𑀭𑀤𑁆𑀥𑀦𑀺𑀯𑀮𑁆𑀮𑀓𑀻𑀳𑀺; ()

𑁭𑁬. ¶

𑀦𑀺𑀘𑁆𑀘𑀁 𑀯𑀲𑀦𑁆𑀢𑀲𑀫𑀬𑀲𑁆𑀲𑀺𑀭𑀺𑀫𑀼𑀩𑁆𑀩𑀳𑀦𑁆𑀢𑀁

𑀢𑀁𑀔𑁄𑀯𑀦𑀁 𑀯𑀦𑀯𑀥𑀽𑀳𑀤𑀬𑀸𑀦𑀼𑀢𑀸𑀧𑀻,

𑀧𑀢𑁆𑀢𑁄 𑀦𑀺𑀤𑀸𑀖𑀲𑀫𑀬𑁄𑀧𑀺 𑀚𑀦𑁂𑀲𑀺 𑀢𑀼𑀝𑁆𑀞𑀺𑀁

𑀢𑀲𑁆𑀲𑀸 𑀲𑀺𑀭𑀺𑀲𑀓𑀼𑀲𑀼𑀫𑀸𑀮𑀺𑀓𑀼𑀮𑀸𑀯𑀢𑀁𑀲𑁄; ()

𑁭𑁭.

𑀢𑀲𑁆𑀫𑀺𑀁 𑀦𑀺𑀤𑀸𑀖𑀲𑀽𑀭𑀺𑀬𑀸𑀢𑀧𑀢𑀸𑀧𑀺𑀢𑀸𑀫𑁆𑀪𑀁

𑀭𑀺𑀢𑁆𑀢𑀸𑀮𑀯𑀸𑀴𑀫𑀺𑀯𑀓𑀸𑀮𑀫𑀓𑀸𑀮𑀫𑁂𑀖𑁄,

𑀘𑀺𑀦𑁆𑀢𑀸𑀢𑀼𑀭𑀁 𑀳𑀤𑀬𑀫𑀢𑁆𑀢𑀲𑀔𑀻𑀚𑀦𑁄𑀧𑀺

𑀧𑀻𑀡𑁂𑀲𑀺 𑀕𑀩𑁆𑀪𑀧𑀭𑀺𑀧𑀸𑀓𑀪𑀭𑀁 𑀯𑀸𑀳𑀦𑁆𑀢𑁆𑀬𑀸; ()

𑁭𑁮.

𑀓𑀝𑁆𑀞𑀸𑀯𑀲𑀺𑀝𑁆𑀞𑀢𑀭𑀯𑁄 𑀧𑀭𑀺𑀳𑀻𑀦𑀧𑀢𑁆𑀢𑀸

𑀢𑀲𑁆𑀲𑀸𑀥𑀭𑀓𑁆𑀔𑀺𑀤𑀲𑀦𑀚𑁆𑀚𑀼𑀢𑀺𑀲𑀗𑁆𑀕𑀫𑁂𑀦,

𑀆𑀲𑀼𑀁 𑀦𑀯𑀗𑁆𑀓𑀼𑀭𑀧𑀮𑀸𑀲𑀯𑀺𑀓𑀸𑀲𑀧𑀼𑀧𑁆𑀨-

𑀲𑀁𑀯𑁂𑀮𑁆𑀮𑀺𑀢𑀸’𑀯 𑀭𑀫𑀡𑀻𑀬𑀯𑀦𑀧𑁆𑀧 𑀤𑁂𑀲𑁂; ()

𑁭𑁯. ¶

𑀕𑀺𑀫𑁆𑀳𑀸𑀪𑀻𑀢𑀸𑀧𑀧𑀭𑀺𑀧𑀻𑀴𑀺𑀢𑀗𑁆𑀥𑀮𑁆𑀮𑀺𑀓𑀸𑀦𑀁

𑀕𑀫𑁆𑀪𑀻𑀭𑀭𑀸𑀯𑀫𑀼𑀔𑀭𑀻𑀓𑀢𑀤𑀸𑀬𑀭𑀸𑀚𑀺,

𑀤𑀼𑀓𑁆𑀔𑀸𑀢𑀼𑀭𑀩𑁆𑀩𑀺𑀭𑀳𑀺𑀦𑀻𑀧𑀫𑀤𑀸𑀚𑀦𑀲𑁆𑀲

𑀆𑀲𑀺 𑀯𑀺𑀮𑀸𑀧𑀩𑀥𑀺𑀭𑀻𑀓𑀴𑀺𑀢𑁂’𑀯 𑀲𑀸𑀴𑀸; ()

𑁮𑁦.

𑀢𑀲𑁆𑀫𑀺𑀁 𑀯𑀺𑀓𑀸𑀲𑀓𑀮𑀺𑀓𑀸𑀯𑀮𑀺𑀳𑀸𑀭𑀺𑀳𑀸𑀭𑀸

𑀓𑀺𑀜𑁆𑀘𑀸𑀧𑀺 𑀧𑀓𑁆𑀓𑀨𑀔𑀮𑀯𑀮𑁆𑀮𑀭𑀺𑀓𑀡𑁆𑀞𑀪𑀼𑀲𑀸,

𑀦𑀸𑀲𑀓𑁆𑀔𑀺 𑀧𑀽𑀕𑀢𑀭𑀼𑀧𑀦𑁆𑀢𑀺 𑀲𑀼𑀫𑀡𑁆𑀟𑀺𑀢𑀸𑀬

𑀫𑀸𑀬𑀸𑀬 𑀢𑀸𑀬 𑀲𑀺𑀭𑀺𑀫𑀸𑀪𑀭𑀺𑀢𑀼𑀁 𑀖𑀝𑀦𑁆𑀢𑀻; ()

𑁮𑁧.

𑀉𑀬𑁆𑀬𑀸𑀦𑀫𑀼𑀩𑁆𑀪𑀫𑀺𑀢𑀫𑀢𑁆𑀢𑀫𑀥𑀼𑀩𑁆𑀩𑀢𑁂𑀳𑀺

𑀘𑀫𑁆𑀧𑁂𑀬𑁆𑀬𑀧𑀼𑀧𑁆𑀨𑀫𑀓𑀼𑀮𑁂𑀳𑀺 𑀲𑀫𑀸𑀓𑀼𑀮𑀁𑀢𑀁,

𑀉𑀤𑁆𑀥𑀼𑀢𑀥𑀼𑀫𑀧𑀝𑀮𑁂𑀳𑀺 𑀫𑀦𑁄𑀪𑀯𑀲𑁆𑀲

𑀤𑀻𑀧𑁂𑀳𑀺 𑀯𑀸𑀲𑀪𑀯𑀓𑀦𑀁’𑀯 𑀮𑀲𑀦𑁆𑀢𑀫𑀸𑀲𑀺; ()

𑁮𑁨. ¶

𑀕𑀩𑁆𑀪𑀽𑀧𑀕𑀁 𑀪𑀫𑀭𑀓𑁂𑀲𑀓𑀮𑀸𑀧𑀪𑀸𑀭𑀸

𑀩𑀼𑀤𑁆𑀥𑀗𑁆𑀓𑀼𑀭𑀁 𑀧𑀭𑀺𑀡𑀢𑀗𑁆𑀓𑀼𑀭𑀮𑁄𑀫𑀳𑀁𑀲𑀸,

𑀯𑀦𑁆𑀤𑀦𑁆𑀢𑀺𑀬𑁄 𑀯𑀺𑀬 𑀢𑀳𑀺𑀁 𑀣𑀩𑀓𑀜𑁆𑀚𑀮𑀻𑀳𑀺

𑀫𑀦𑁆𑀤𑀸𑀦𑀺𑀮𑁂𑀭𑀺𑀢𑀮𑀢𑀸𑀯𑀦𑀺𑀢𑀸 𑀓𑀦𑀢𑀸’𑀲𑀼𑀁; ()

𑁮𑁩.

𑀕𑀩𑁆𑀪𑀽𑀧𑀕𑀲𑁆𑀲 𑀧𑀭𑀺𑀧𑀓𑁆𑀓𑀨𑀮𑁂𑀳𑀺 𑀦𑀸𑀦𑀸

𑀧𑀼𑀜𑁆𑀜𑀸𑀦𑀼𑀪𑀸𑀯𑀧𑀪𑀯𑁄𑀢𑀼𑀲𑀫𑀼𑀩𑁆𑀪𑀯𑁂𑀳𑀺,

𑀫𑀸𑀬𑀸𑀬 𑀕𑀩𑁆𑀪𑀩𑀮𑀺𑀓𑀫𑁆𑀫𑀦𑀺 𑀢𑀧𑁆𑀧𑀭𑁂’𑀯

𑀉𑀬𑁆𑀬𑀸𑀦𑀪𑀼𑀫𑀺 𑀚𑀦𑀢𑀁 𑀪𑀯𑀺 𑀢𑀧𑁆𑀧𑀬𑀦𑁆𑀢𑀺; ()

𑁮𑁪.

𑀕𑀩𑁆𑀪𑀽𑀧𑀕𑀲𑁆𑀲 𑀳𑀺 𑀫𑀳𑀸𑀧𑀼𑀭𑀺𑀲𑀲𑁆𑀲 𑀕𑀩𑁆𑀪-

𑀯𑀼𑀝𑁆𑀞𑀸𑀦𑀫𑀗𑁆𑀕𑀮𑀫𑀳𑀼𑀲𑁆𑀲𑀯𑀯𑀸𑀲𑀭𑀫𑁆𑀳𑀺,

𑀉𑀬𑁆𑀬𑀸𑀦𑀪𑀼𑀫𑀺 𑀲𑀓𑀮𑁄𑀢𑀼𑀲𑀫𑀼𑀩𑁆𑀪𑀯𑁂𑀳𑀺

𑀆𑀲𑀺 𑀯𑀺𑀓𑀸𑀲𑀓𑀼𑀲𑀼𑀫𑁂𑀳𑀺 𑀲𑀫𑀸𑀪𑀺𑀓𑀺𑀡𑁆𑀡𑀸; ()

𑁮𑁫. ¶

𑀲𑀸𑀮𑀼𑀫𑁆𑀩𑀺𑀦𑀻𑀯𑀦𑀲𑀺𑀭𑀺𑀁 𑀓𑀮𑀳𑀁𑀲𑀖𑁄𑀲𑀁

𑀲𑀫𑀨𑀼𑀮𑁆𑀮𑀧𑀼𑀧𑁆𑀨𑀲𑀼𑀭𑀪𑀺𑀁𑀨𑀮𑀲𑀫𑁆𑀪𑀯𑁄𑀚𑀁,

𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑁂𑀳𑀺 𑀕𑀺𑀭𑀺𑀦𑀺𑀚𑁆𑀛𑀭𑀲𑀺𑀢𑀯𑀸𑀢𑀁

𑀧𑀘𑁆𑀘𑀓𑁆𑀔𑀧𑀜𑁆𑀘𑀯𑀺𑀥𑀓𑀸𑀫𑀭𑀲𑀁𑀅𑀯𑀺𑀦𑁆𑀤𑀺; ()

𑁮𑁬.

𑀦𑀺𑀬𑁆𑀬𑀸𑀲𑀲𑀸𑀭𑀲𑀼𑀭𑀳𑀺𑀁𑀨𑀔𑀮𑀧𑀮𑁆𑀮𑀯𑁂𑀳𑀺

𑀛𑀁𑀓𑀸𑀭𑀺𑀢𑀸𑀮𑀺𑀓𑀼𑀮𑀓𑀼𑀚𑀺𑀢𑀓𑁄𑀓𑀺𑀮𑁂𑀳𑀺,

𑀲𑀫𑁆𑀨𑀼𑀮𑁆𑀮𑀧𑀼𑀧𑁆𑀨𑀦𑀺𑀓𑀭𑁂𑀳𑀺 𑀲𑀫𑀸𑀪𑀺𑀓𑀺𑀡𑁆𑀡

𑀫𑀤𑁆𑀤𑀓𑁆𑀔𑀺𑀲𑀸𑀬𑀼𑀯𑀢𑀺𑀫𑀗𑁆𑀕𑀮𑀲𑀸𑀴𑀲𑀸𑀮𑀁; ()

𑁮𑁭.

𑀲𑀫𑁆𑀨𑀼𑀮𑁆𑀮𑀲𑀸𑀴𑀓𑀮𑀺𑀓𑀁𑀢𑀬𑀢𑀸𑀮𑀺𑀫𑀸𑀮𑀸

𑀲𑀜𑁆𑀘𑀼𑀫𑁆𑀩𑀺𑀢𑀁𑀓𑀼𑀯𑀮𑀬𑀸𑀫𑀮𑀮𑁄𑀘𑀦𑀸𑀬,

𑀲𑀸𑀔𑀁𑀲𑀼𑀓𑁄𑀫𑀮𑀓𑀭𑀗𑁆𑀕𑀼𑀮𑀺𑀧𑀮𑁆𑀮𑀯𑁂𑀳𑀺

𑀫𑀸𑀬𑀸𑀫𑀳𑁂𑀲𑀺𑀲𑀫𑀮𑀗𑁆𑀓𑀭𑀺 𑀯𑀺𑀢𑀫𑀸𑀬𑀸; ()

𑁮𑁮. ¶

𑀪𑀸𑀭𑁄𑀦𑀢𑀸’𑀯 𑀭𑀼𑀘𑀺𑀭𑀗𑁆𑀕𑀼𑀮𑀺𑀧𑀮𑁆𑀮𑀯𑀸𑀦𑀁

𑀛𑀗𑁆𑀓𑀸𑀭𑀭𑀸𑀯𑀫𑀼𑀔𑀭𑀸𑀮𑀺𑀓𑀼𑀮𑀸𑀪𑀺𑀭𑀸𑀫𑀸,

𑀲𑀸𑀔𑀸 𑀯𑀺𑀓𑀸𑀲𑀓𑀼𑀲𑀼𑀫𑁂𑀳𑀺𑀲𑀫𑀸𑀓𑀼𑀮𑀸 𑀲𑀸

𑀑𑀮𑀫𑁆𑀩𑀬𑀝𑁆𑀞𑀺 𑀪𑀯𑀺 𑀕𑀩𑁆𑀪𑀪𑀭𑀸𑀢𑀼𑀭𑀸𑀬; ()

𑁮𑁯.

𑀢𑀲𑁆𑀲𑀸 𑀘𑀮𑀺𑀢𑁆𑀣 𑀧𑀯𑀦𑁄 𑀘𑀮𑀮𑁄𑀘𑀦𑀸𑀬

𑀓𑀫𑁆𑀫𑀼𑀩𑁆𑀪𑀯𑁄 𑀯𑀭𑀢𑀺𑀭𑁄𑀓𑀭𑀡𑁂𑀳𑀺 𑀢𑀸𑀯,

𑀤𑁂𑀯𑀺𑀁 𑀦𑀺𑀭𑀽𑀧𑀫𑀲𑀺𑀭𑀺𑀁 𑀲𑀼𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸

𑀢𑀫𑁆𑀳𑀸 𑀧𑀝𑀺𑀓𑁆𑀓𑀫𑀺 𑀚𑀦𑁄 𑀓𑀴𑀺𑀢𑀸𑀯𑀓𑀸𑀲𑁄; ()

𑁯𑁦.

𑀩𑁆𑀭𑀳𑁆𑀫𑀸𑀫𑀭𑀸𑀲𑀼𑀭𑀦𑀭𑁄𑀭𑀕𑀧𑀽𑀚𑀦𑀻𑀬𑀁

𑀩𑀢𑁆𑀢𑀺𑀁𑀲𑀮𑀓𑁆𑀔𑀡𑀲𑀫𑀼𑀚𑁆𑀚𑀮𑀭𑀽𑀧 𑀲𑀸𑀭𑀁

𑀦𑀺𑀤𑁆𑀥𑁄𑀢𑀚𑀸𑀢𑀺𑀫𑀡𑀺𑀲𑀦𑁆𑀦𑀺𑀪𑀲𑀼𑀤𑁆𑀥𑀕𑀢𑁆𑀢𑀁

𑀲𑀢𑁆𑀢𑀼𑀢𑁆𑀢𑀫𑀁 𑀲𑀧𑀤𑀺 𑀤𑁂𑀯𑀺 𑀞𑀺𑀢𑀸 𑀯𑀺𑀚𑀸𑀬𑀺; ()

𑁯𑁧. ¶

𑀤𑀼𑀕𑁆𑀕𑀦𑁆𑀥𑀫𑀼𑀢𑁆𑀢𑀫𑀮𑀲𑁄𑀡𑀺𑀢𑀫𑀓𑁆𑀔𑀺𑀢𑀗𑁆𑀕𑀸

𑀚𑀸𑀬𑀦𑁆𑀢𑁆𑀬’𑀲𑁂𑀲𑀫𑀦𑀼𑀚𑀸 𑀫𑀦𑀼𑀚𑁂𑀲𑀼𑀦𑁂’𑀯𑀁,

𑀘𑀗𑁆𑀕𑁄𑀝𑀓𑀫𑁆𑀳𑀺 𑀚𑀺𑀦𑀥𑀸𑀢𑀼𑀭𑀺𑀯𑀸𑀥𑀺𑀯𑀸𑀲𑁄

𑀣𑀽𑀧𑀫𑁆𑀳𑀺 𑀲𑁄𑀡𑁆𑀡𑀧𑀝𑀺𑀫𑀸𑀭𑀺𑀯 𑀫𑀸𑀢𑀼𑀕𑀩𑁆𑀪𑀁; ()

𑁯𑁨.

𑀦𑀺𑀲𑁆𑀲𑁂𑀡𑀺𑀢𑁄𑀯 𑀧𑀼𑀭𑀺𑀲𑁄 𑀭𑀢𑀦𑀸𑀲𑀦𑀫𑁆𑀳𑀸

𑀣𑁂𑀭𑁄𑀯 𑀥𑀫𑁆𑀫𑀓𑀣𑀺𑀓𑁄 𑀞𑀺𑀢𑀓𑁄’𑀢𑀭𑀦𑁆𑀢𑁄,

𑀲𑀫𑁆𑀫𑀸 𑀧𑀲𑀸𑀭𑀺𑀬 𑀉𑀪𑁄 𑀫𑀼𑀤𑀼𑀧𑀸𑀡𑀺𑀧𑀸𑀤𑁂

𑀲𑁄 𑀦𑀺𑀓𑁆𑀔𑀫𑀺𑀢𑁆𑀣 𑀓𑀼𑀡𑀧𑁂𑀳𑀺 𑀅𑀫𑀓𑁆𑀔𑀺𑀢𑀗𑁆𑀕𑁄; ()

𑁯𑁩. ¶

𑀢𑀢𑁆𑀭𑁄𑀧𑀕𑀫𑁆𑀫 𑀘𑀢𑀼𑀭𑁄 𑀘𑀢𑀼𑀭𑀸𑀦𑀦𑀸 𑀢𑀁

𑀚𑀸𑀮𑁂𑀦 𑀓𑀜𑁆𑀘𑀦𑀫𑀬𑁂𑀦 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀸,

𑀆𑀤𑀸𑀬 𑀫𑀸𑀢𑀼𑀧𑀼𑀭𑀢𑁄 𑀢𑀦𑀬𑀁 𑀞𑀧𑁂𑀢𑁆𑀯𑀸

𑀘𑀦𑁆𑀤𑀸𑀦𑀦𑁂 𑀪𑀯𑀢𑀼 𑀦𑀦𑁆𑀤𑀫𑀦𑀸’𑀢𑁆𑀬’𑀯𑁄𑀘𑀼𑀁; ()

𑁯𑁪.

𑀆𑀤𑀺𑀘𑁆𑀘𑀯𑀁𑀲𑀓𑀫𑀮𑀸𑀓𑀭𑀪𑀸𑀓𑀭𑀲𑁆𑀲

𑀩𑀼𑀤𑁆𑀥𑀗𑁆𑀓𑀼𑀭𑀲𑁆𑀲 𑀲𑀼𑀪𑀲𑀻𑀢𑀮𑀯𑀸𑀭𑀺𑀥𑀸𑀭𑀸,

𑀦𑀺𑀓𑁆𑀔𑀫𑁆𑀫 𑀢𑀸𑀯 𑀦𑀪𑀲𑀸 𑀦𑀺𑀚𑀫𑀸𑀢𑀼𑀬𑀸 𑀘

𑀕𑀸𑀳𑀸𑀧𑀬𑀼𑀁 𑀉𑀢𑀼𑀫𑀼𑀪𑁄𑀲𑀼 𑀓𑀮𑁂𑀩𑀭𑁂𑀲𑀼; ()

𑁯𑁫.

𑀢𑁂𑀲𑀁 𑀓𑀭𑁂𑀳𑀺 𑀘𑀢𑀼𑀭𑁄 𑀲𑀼𑀭𑀭𑀸𑀚𑀧𑀼𑀢𑁆𑀢𑀸

𑀕𑀡𑁆𑀳𑀺𑀁𑀲𑀼 𑀲𑀡𑁆𑀳𑀲𑀼𑀔𑀼𑀫𑀸𑀬’𑀚𑀺𑀡𑀧𑁆𑀧𑀯𑁂𑀡𑁆𑀬𑀸,

𑀢𑁂𑀲𑀜𑁆𑀳𑀺 𑀧𑀸𑀡𑀺𑀢𑀮𑀢𑁄 𑀧𑀡𑀺𑀧𑀸𑀢𑀧𑀼𑀩𑁆𑀩𑀁

𑀕𑀡𑁆𑀳𑀺𑀁𑀲𑀼 𑀢𑀁 𑀤𑀼𑀓𑀼𑀮𑀘𑀼𑀫𑁆𑀩𑀝𑀓𑁂𑀦’𑀫𑀘𑁆𑀘𑀸; ()

𑁯𑁬. ¶

𑀢𑁂𑀲𑀁 𑀓𑀭𑁂𑀳𑀺 𑀧𑀣𑀯𑀺𑀢𑀮𑀫𑁄𑀢𑀭𑀺𑀢𑁆𑀯𑀸

𑀞𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀤𑀺𑀲𑀁 𑀅𑀲𑀫𑁄 𑀯𑀺𑀧𑀲𑁆𑀲𑀺,

𑀉𑀤𑁆𑀥𑀁 𑀅𑀥𑁄 𑀘𑀢𑀼𑀤𑀺𑀲𑀸𑀦𑀼𑀤𑀺𑀲𑀸 𑀘 𑀏𑀯𑀁

𑀏𑀓𑀗𑁆𑀕𑀦𑀁 𑀪𑀯𑀺𑀢𑀤𑀸’𑀔𑀺𑀮𑀮𑁄𑀓𑀥𑀸𑀢𑀼; ()

𑁯𑁭.

𑀢𑀼𑀫𑁆𑀳𑁂𑀳𑀺 𑀉𑀢𑁆𑀢𑀭𑀺𑀢𑀭𑁄 𑀪𑀼𑀯𑀲𑁂 𑀢𑀻𑀲𑀼

𑀦𑀢𑁆𑀣𑀻𑀢𑀺 𑀫𑀢𑁆𑀣𑀓𑀚𑀝𑀸𑀫𑀓𑀼𑀝𑀧𑁆𑀧𑀺𑀢𑁂𑀳𑀺,

𑀓𑀢𑁆𑀯𑀸𑀦𑀺𑀚𑀜𑁆𑀚𑀮𑀺𑀧𑀼𑀝𑁂𑀳𑀺 𑀦𑀺𑀧𑀘𑁆𑀘𑀓𑀸𑀭𑀁

𑀩𑁆𑀭𑀳𑁆𑀫𑀸𑀫𑀭𑀸𑀲𑀼𑀭𑀦𑀭𑀸 𑀢𑀫𑀪𑀺𑀢𑁆𑀣𑀯𑀺𑀁𑀲𑀼; ()

𑁯𑁮.

𑀲𑁄𑀘’𑀢𑁆𑀢𑀦𑀸 𑀲𑀫𑀫𑀤𑀺𑀲𑁆𑀯 𑀤𑀺𑀲𑀸𑀲𑀼 𑀢𑀸𑀲𑀽

𑀢𑀧𑁆𑀧𑀸𑀤𑀯𑀻𑀢𑀺𑀳𑀭𑀡𑁂𑀦 𑀧𑀤𑀸𑀦𑀺𑀲𑀢𑁆𑀢,

𑀕𑀦𑁆𑀢𑁆𑀯𑀸𑀦 𑀉𑀢𑁆𑀢𑀭𑀤𑀺𑀲𑀸’𑀪𑀺𑀫𑀼𑀔𑁄 𑀅𑀯𑀦𑁆𑀬𑀸

𑀅𑀩𑁆𑀪𑀼𑀕𑁆𑀕𑀢𑀫𑁆𑀩𑀼𑀭𑀼𑀳𑀫𑀼𑀤𑁆𑀥𑀦𑀺 𑀢𑀺𑀝𑁆𑀞𑀫𑀸𑀦𑁄; ()

𑁯𑁯. ¶

𑀅𑀕𑁆𑀕𑁄’𑀳𑀫𑀲𑁆𑀫𑀺 𑀅𑀳𑀫𑀲𑁆𑀫𑀺 𑀚𑀦𑀲𑁆𑀲 𑀚𑁂𑀝𑁆𑀞𑁄

𑀲𑁂𑀝𑁆𑀞𑁄’𑀳𑀫𑀲𑁆𑀫𑀺 𑀅𑀬𑀫𑀦𑁆𑀢𑀺𑀫’𑀚𑀸𑀢𑀺 𑀫𑀬𑁆𑀳𑀁,

𑀥𑀻𑀭𑁄 𑀫𑀫𑁂𑀢𑀭𑀳𑀺 𑀦𑀢𑁆𑀣𑀺 𑀧𑀼𑀦𑀩𑁆𑀪𑀯𑁄’𑀢𑀺

𑀦𑀺𑀘𑁆𑀙𑀸𑀭𑀺𑀢𑀸𑀲𑀪𑀺𑀯𑀘𑁄 𑀦𑀤𑀺 𑀲𑀻𑀳𑀓𑀦𑀸𑀤𑀁; ()

𑁧𑁦𑁦.

𑀯𑁂𑀲𑀸𑀔𑁂𑀫𑀸𑀲𑁂 𑀲𑀼𑀳𑀓𑀼𑀚𑀤𑀺𑀦𑁂 𑀧𑀼𑀡𑁆𑀡𑀫𑀸𑀬𑀁 𑀯𑀺𑀲𑀸𑀔𑁂

𑀦𑀓𑁆𑀔𑀢𑁆𑀢𑁂𑀬𑁄𑀕𑁂 𑀲𑀼𑀭𑀕𑀼𑀭𑀼𑀕𑀢𑁂 𑀲𑁄 𑀓𑀼𑀴𑀻𑀭𑀯𑁆𑀳𑀭𑀸𑀲𑀺𑀁,

𑀲𑀜𑁆𑀚𑀸𑀢𑁄 𑀦𑀸𑀣𑁄 𑀧𑀭𑀫𑀓𑀭𑀼𑀡𑀸𑀪𑀸𑀯𑀦𑀸𑀪𑀸𑀯𑀢𑀢𑁆𑀢𑁄

𑀫𑀸𑀬𑀸𑀓𑀼𑀘𑁆𑀙𑀺𑀫𑁆𑀳𑀸 𑀓𑀼𑀲𑀼𑀫𑀺𑀢𑀮𑀢𑀸𑀯𑁂𑀮𑀮𑀺𑀢𑀼𑀬𑁆𑀬𑀸𑀦𑀪𑀼𑀫𑁆𑀬𑀸; ()

𑀇𑀢𑀺 𑀫𑁂𑀥𑀸𑀦𑀦𑁆𑀤𑀸𑀪𑀺𑀥𑀸𑀦𑁂𑀦 𑀬𑀢𑀺𑀦𑀸 𑀯𑀺𑀭𑀘𑀺𑀢𑁂 𑀲𑀓𑀮 𑀓𑀯𑀺𑀚𑀦 𑀳𑀤𑀬𑀸𑀦𑀦𑁆𑀤𑀤𑀸𑀦𑀦𑀺𑀤𑀸𑀦𑁂 𑀚𑀺𑀦𑀯𑀁𑀲𑀤𑀻𑀧𑁂 𑀅𑀯𑀺𑀤𑀼𑀭𑁂𑀦𑀺𑀤𑀸𑀦𑁂 𑀧𑀘𑁆𑀙𑀺𑀫𑀪𑀯𑀺𑀓 𑀫𑀳𑀸𑀩𑁄𑀥𑀺 𑀲𑀢𑁆𑀢𑀼𑀧𑁆𑀧𑀢𑁆𑀢𑀺 𑀧𑀯𑀢𑁆𑀢𑀺𑀧𑀭𑀺𑀤𑀻𑀧𑁄 𑀙𑀝𑁆𑀞𑁄𑀲𑀕𑁆𑀕𑁄.

𑁧. ¶

𑀅𑀣𑀭𑀫𑁆𑀫𑀢𑀭𑀸’𑀲𑀺 𑀚𑀸𑀢𑀺𑀔𑁂𑀢𑁆𑀢-

𑀧𑀭𑀺𑀬𑀸𑀧𑀢𑁆𑀢’𑀯𑀓𑀸𑀲𑀮𑁄𑀓𑀥𑀸𑀢𑀼,

𑀓𑀫𑀮𑀼𑀧𑁆𑀧𑀮 (𑀫𑀸𑀮𑀪𑀸𑀭𑀺𑀦𑀻) 𑀳𑀺

𑀢𑀤𑀼𑀧𑀝𑁆𑀞𑀸𑀦𑀕𑀢𑀸𑀳𑀺 𑀤𑁂𑀯𑀢𑀸𑀳𑀺; ()

𑁨.

𑀓𑀫𑀮𑀸𑀲𑀦𑀤𑁂𑀯𑀤𑀸𑀦𑀯𑀸𑀦𑀁

𑀪𑀼𑀯𑀦𑁂’𑀓𑀢𑁆𑀣 𑀲𑀫𑀸𑀕𑀫𑁄 𑀢𑀤𑀸’𑀲𑀺,

𑀚𑀺𑀦𑀘𑀓𑁆𑀓𑀧𑀝𑀺𑀕𑁆𑀕𑀳𑀲𑁆𑀲 𑀞𑀸𑀦𑀁

𑀅𑀯𑀺𑀯𑀸𑀤𑁂𑀦 𑀲𑀤𑁂𑀯𑀫𑀸𑀦𑀼𑀲𑀸𑀦𑀁; ()

𑁩.

𑀧𑀝𑀺𑀮𑀸𑀪𑀦𑀺𑀫𑀺𑀢𑁆𑀢𑀫𑀸𑀤𑀺𑀲𑀦𑁆𑀢𑀻

𑀯𑀢 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑀫𑁆𑀧𑀤𑀸𑀬,

𑀤𑀲𑀲𑀗𑁆𑀔𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼

𑀅𑀪𑀺𑀓𑀫𑁆𑀧𑀻 𑀧𑀳𑀝𑁂’𑀯 𑀓𑀁𑀲𑀧𑀸𑀢𑀻; ()

𑁪. ¶

𑀚𑀦𑀦𑀼𑀲𑁆𑀲𑀯𑀯𑀸𑀲𑀭𑀫𑁆𑀳𑀺 𑀢𑀲𑁆𑀫𑀺𑀁

𑀦𑀺𑀚𑀤𑁂𑀳𑀚𑁆𑀚𑀼𑀢𑀺𑀧𑀺𑀜𑁆𑀚𑀭𑁄’𑀤𑀧𑀸𑀤𑀺,

𑀤𑀲𑀲𑀗𑁆𑀔𑀲𑀳𑀲𑁆𑀲𑀘𑀓𑁆𑀓𑀯𑀸𑀴-

𑀓𑀼𑀳𑀭𑀸𑀮𑁄𑀓𑀓𑀭𑁄 𑀫𑀳𑀸𑀯𑀪𑀸𑀲𑁄; ()

𑁫.

𑀅𑀧𑀢𑀸𑀴𑀺𑀢𑀘𑀫𑁆𑀫𑀦𑀤𑁆𑀥𑀪𑁂𑀭𑀻-

𑀯𑀺𑀓𑀢𑀻𑀦𑀁 𑀲𑀬𑀫𑁂𑀯 𑀯𑀚𑁆𑀚𑀦𑀫𑁆𑀧𑀺,

𑀢𑀤𑀦𑀼𑀢𑁆𑀢𑀭𑀥𑀫𑁆𑀫𑀤𑁂𑀲𑀦𑀸𑀬

𑀪𑀯𑀺 𑀞𑀸𑀦𑀁 𑀅𑀦𑀼𑀲𑀸𑀯𑀡𑀲𑁆𑀲 𑀮𑁄𑀓𑁂; ()

𑁬.

𑀖𑀡𑀓𑀸𑀳𑀴𑀯𑀁𑀲𑀲𑀗𑁆𑀔𑀯𑀻𑀡𑀸-

𑀪𑀭𑀡𑀸𑀦𑀁 𑀲𑀬𑀫𑁂𑀯 𑀯𑀚𑁆𑀚𑀦𑀫𑁆𑀧𑀻,

𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀪𑀸𑀯𑀦𑀸𑀦𑀁

𑀧𑀝𑀺𑀮𑀸𑀪𑀸𑀬 𑀦𑀺𑀩𑀦𑁆𑀥𑀦𑀁 𑀩𑀪𑀽𑀯; ()

𑁭. ¶

𑀧𑀭𑀺𑀫𑀼𑀢𑁆𑀢𑀺𑀯𑀭𑀢𑁆𑀢𑀧𑀸𑀲𑀓𑀸𑀭𑀸-

𑀖𑀭,𑀬𑁄𑀲𑀗𑁆𑀔𑀮𑀺𑀓𑀸𑀤𑀺𑀩𑀦𑁆𑀥𑀦𑁂𑀳𑀺,

𑀫𑀺𑀕𑀧𑀓𑁆𑀔𑀺𑀦𑀭𑀸𑀦𑀫𑀲𑁆𑀫𑀺𑀫𑀸𑀦-

𑀯𑀺𑀕𑀫𑀲𑁆𑀲𑀸’𑀲𑀺 𑀦𑀺𑀤𑀸𑀦𑀫𑀸𑀤𑀺𑀪𑀼𑀢𑀁; ()

𑁮.

𑀪𑀼𑀯𑀦𑁂𑀲𑀼 𑀫𑀳𑀸𑀚𑀦𑀲𑁆𑀲 𑀭𑁄𑀕𑀸-

𑀧𑀕𑀫𑁂𑀦𑀸’𑀤𑀺𑀲𑀦𑀁 𑀅𑀳𑁄𑀲𑀼𑀔𑀦𑁆𑀢𑀺,

𑀘𑀢𑀼𑀭𑀸𑀭𑀺𑀬𑀲𑀘𑁆𑀘𑀤𑀲𑁆𑀲𑀦𑁂𑀦

𑀪𑀯𑀺 𑀞𑀸𑀦𑀁 𑀘𑀢𑀼𑀲𑀘𑁆𑀘𑀤𑁂𑀲𑀦𑀸𑀬; ()

𑁯.

𑀯𑀺𑀯𑀺𑀥𑀩𑁆𑀪𑀼𑀢𑀭𑀽𑀧𑀕𑁄𑀘𑀭𑀸𑀦𑀁

𑀪𑀼𑀯𑀺 𑀚𑀘𑁆𑀘𑀦𑁆𑀥𑀚𑀦𑀲𑁆𑀲𑀮𑁄𑀘𑀦𑀸𑀦𑀁,

𑀧𑀪𑀯𑁄 𑀧𑀪𑀯𑁄’𑀲𑀺 𑀤𑀺𑀩𑁆𑀩𑀘𑀓𑁆𑀔𑀼

𑀧𑀝𑀺𑀮𑀸𑀪𑀸𑀬 𑀢𑀺𑀮𑁄𑀓𑀮𑁄𑀘𑀦𑀲𑁆𑀲; ()

𑁧𑁦. ¶

𑀣𑀼𑀢𑀕𑀻𑀢𑀺𑀲𑀼𑀥𑀸𑀭𑀲𑀲𑁆𑀲 𑀧𑀸𑀦𑀁

𑀩𑀥𑀺𑀭𑀸𑀦𑀁 𑀲𑀯𑀡𑀜𑁆𑀚𑀮𑀻𑀧𑀼𑀝𑁂𑀳𑀺,

𑀅𑀢𑀺𑀫𑀸𑀦𑀼𑀲𑀤𑀺𑀩𑁆𑀩𑀲𑁄𑀢𑀥𑀸𑀢𑀼-

𑀧𑀝𑀺𑀯𑁂𑀥𑀸𑀬 𑀦𑀺𑀤𑀸𑀦𑀫𑀸𑀲𑀺 𑀢𑀲𑁆𑀲; ()

𑁧𑁧.

𑀪𑀼𑀯𑀺 𑀚𑀸𑀢𑀺𑀚𑀴𑀸𑀤𑀺𑀧𑀼𑀕𑁆𑀕𑀮𑀸𑀦𑀁

𑀢𑀤𑀳𑁂’𑀦𑀼𑀲𑁆𑀲𑀢𑀺𑀬𑀸 𑀲𑀼𑀧𑀸𑀢𑀼𑀪𑀸𑀯𑁄,

𑀪𑀯𑀺 𑀧𑀼𑀩𑁆𑀩𑀫𑀼𑀧𑀝𑁆𑀞𑀺𑀢𑀲𑁆𑀲𑀢𑀺𑀲𑁆𑀲

𑀲𑀢𑀺𑀧𑀝𑁆𑀞𑀸𑀦𑀦𑀺𑀩𑁄𑀥𑀦𑀸𑀬 𑀞𑀸𑀦𑀁; ()

𑁧𑁨.

𑀯𑀺𑀲𑀺𑀔𑀸𑀘𑀭𑀡𑀁 𑀲𑀭𑁄𑀚𑀘𑀸𑀭𑀼-

𑀧𑀤𑀯𑀺𑀜𑁆𑀜𑀸𑀲𑀯𑀲𑁂𑀦 𑀧𑀗𑁆𑀕𑀼𑀮𑀸𑀦𑀁,

𑀧𑀼𑀭𑀺𑀫𑀁 𑀘𑀢𑀼𑀭𑀺𑀤𑁆𑀥𑀺𑀧𑀸𑀤𑀯𑁂𑀕-

𑀧𑀝𑀺𑀮𑀸𑀪𑀸𑀬 𑀦𑀺𑀫𑀺𑀢𑁆𑀢𑀫𑀸𑀲𑀺 𑀮𑁄𑀓𑁂; ()

𑁧𑁩.

𑀫𑀥𑀼𑀭𑁂𑀦 𑀲𑀭𑁂𑀦 𑀚𑀸𑀢𑀺𑀫𑀽𑀕𑀸

𑀣𑀼𑀢𑀺𑀕𑀻𑀢𑀸𑀦𑁆𑀬’𑀯𑀤𑀺𑀁𑀲𑀼 𑀯𑀦𑁆𑀤𑀺𑀦𑁄’𑀯,

𑀪𑀼𑀯𑀺 𑀔𑀼𑀚𑁆𑀚𑀚𑀦𑁄’𑀚𑀼𑀕𑀢𑁆𑀢𑀮𑀸𑀪𑁄

𑀓𑀼𑀝𑀺𑀮𑀢𑁆𑀢𑀸’𑀧𑀕𑀫𑀸𑀬 𑀞𑀸𑀦𑀫𑀸𑀲𑀺; ()

𑁧𑁪. ¶

𑀲𑀭𑀡𑀁 𑀧𑀼𑀭𑀺𑀲𑀸𑀲𑀪𑁄 𑀲𑀺𑀬𑀸𑀦𑁄

𑀪𑀯𑀢𑁄 𑀤𑀼𑀕𑁆𑀕𑀢𑀺𑀢𑁄 𑀯𑀺𑀫𑀼𑀢𑁆𑀢𑀺𑀬𑀸’𑀢𑀺,

𑀓𑀭𑀺𑀦𑁄’𑀧𑀺 𑀓𑀭𑀺𑀁𑀲𑀼 𑀓𑀼𑀜𑁆𑀘𑀦𑀸𑀤𑀁

𑀢𑀼𑀭𑀕𑀸 𑀳𑁂𑀲𑀫𑀓𑀁𑀲𑀼 𑀧𑀻𑀢𑀺𑀬𑁂’𑀯; ()

𑁧𑁫.

𑀯𑀺𑀲𑀤𑀸 𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀲𑁆𑀲𑁄

𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀢𑀺 𑀘𑀸’𑀬𑀢𑀺𑀁 𑀲𑀘𑀸’𑀬𑀁,

𑀲𑀓𑀧𑀝𑁆𑀝𑀦𑀫𑁂𑀯 𑀢𑀦𑁆𑀦𑀺𑀤𑀸𑀦𑀸

𑀢𑀭𑀡𑀻 𑀲𑀻𑀖𑀫𑀼𑀧𑀸𑀕𑀫𑀼𑀁 𑀯𑀺𑀤𑁂𑀲𑀸; ()

𑁧𑁬.

𑀲𑀬𑀫𑁂𑀯 𑀯𑀺𑀭𑁄𑀘𑀦𑀁 𑀢𑀤𑀸𑀦𑀺

𑀭𑀢𑀦𑀸𑀦𑀁 𑀪𑀼𑀯𑀦𑀸𑀓𑀭𑀼𑀩𑁆𑀪𑀯𑀸𑀦𑀁,

𑀭𑀯𑀺𑀯𑀁𑀲𑀭𑀯𑀺𑀲𑁆𑀲 𑀥𑀫𑁆𑀫𑀭𑀁𑀲𑀻

𑀯𑀺𑀲𑀭𑀲𑁆𑀲𑀼’𑀚𑁆𑀚𑀮𑀦𑀸𑀬 𑀞𑀸𑀦𑀫𑀸𑀲𑀻; ()

𑁧𑁭. ¶

𑀢𑀼𑀭𑀺𑀬𑀸𑀦𑀺 𑀲𑀓𑀁𑀲𑀓𑀁 𑀦𑀺𑀦𑀸𑀤𑀁

𑀅𑀓𑀭𑀼𑀁 𑀢𑀕𑁆𑀕𑀼𑀡𑀤𑀻𑀧𑀓𑀸𑀦𑀺𑀯𑀸’𑀢𑁆𑀭,

𑀯𑀺𑀯𑀝𑀸 𑀯𑀺𑀤𑀺𑀲𑀸𑀤𑀺𑀲𑀸 𑀲𑀓𑀺𑀢𑁆𑀢𑀺-

𑀯𑀺𑀲𑀭𑁄𑀓𑀸𑀲𑀓𑀢𑁂’𑀯’𑀳𑀺𑀧𑁆𑀧𑀲𑀢𑁆𑀢𑀸; ()

𑁧𑁮.

𑀲𑀓𑀮𑀲𑁆𑀲 𑀓𑀺𑀮𑁂𑀲𑀧𑀸𑀯𑀓𑀲𑁆𑀲

𑀧𑀭𑀺𑀦𑀺𑀩𑁆𑀩𑀸𑀦𑀲𑀪𑀸𑀯𑀤𑀻𑀧𑀦𑁂𑀦,

𑀦𑀺𑀭𑀬𑁂𑀲𑀼 𑀳𑀼𑀢𑀸𑀲𑀚𑀸𑀮𑀫𑀸𑀮𑀸

𑀢𑀤𑀳𑁂 𑀦𑀺𑀩𑁆𑀩𑀼𑀢𑀺𑀫𑀸𑀧 𑀚𑀸𑀢𑀺𑀔𑁂𑀢𑁆𑀢𑁂; ()

𑁧𑁯.

𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑀲𑁆𑀲 𑀢𑀲𑁆𑀲

𑀘𑀢𑀼𑀯𑁂𑀲𑀸𑀭𑀤𑀜𑀸𑀡𑀮𑀸𑀪𑀳𑁂𑀢𑀼,

𑀪𑀼𑀯𑀦𑁂𑀲𑀼 𑀢𑀤𑀸𑀫𑀳𑀸𑀦𑀤𑀻𑀦𑀁

𑀅𑀦𑀪𑀺𑀲𑁆𑀲𑀦𑁆𑀤𑀦𑀫𑀸𑀲𑀺 𑀓𑀼𑀦𑁆𑀦𑀤𑀻𑀦𑀁; ()

𑁨𑁦.

𑀉𑀤𑀧𑀸𑀤𑀺 𑀧𑀪𑀸 𑀦𑀺𑀭𑀸𑀓𑀭𑀺𑀢𑁆𑀯𑀸-

𑀩𑀺𑀮𑀮𑁄𑀓𑀦𑁆𑀢𑀭𑀺𑀬𑁂𑀲𑀼 𑀅𑀦𑁆𑀥𑀓𑀸𑀭𑀁,

𑀳𑀢𑀫𑁄𑀳𑀢𑀫’𑀕𑁆𑀕 𑀫𑀕𑁆𑀕𑀜𑀸𑀡-

𑀚𑁆𑀚𑀼𑀢𑀺𑀮𑀸𑀪𑀸𑀬 𑀦𑀺𑀩𑀦𑁆𑀥𑀦𑀁 𑀢𑀫𑀸𑀲𑀺; ()

𑁨𑁧. ¶

𑀲𑀼𑀯𑀺𑀫𑀼𑀢𑁆𑀢𑀺𑀭𑀲𑁄 𑀲𑀺𑀬𑀸’𑀯 𑀢𑀲𑁆𑀲

𑀘𑀢𑀼𑀭𑀸𑀲𑀺𑀢𑀲𑀳𑀲𑁆𑀲𑀥𑀫𑁆𑀫𑀔𑀦𑁆𑀥𑁄,

𑀫𑀥𑀼𑀭𑀁 𑀘𑀢𑀼𑀭𑁄𑀤𑀥𑀻𑀦𑀫𑀸𑀲𑀺

𑀲𑀮𑀺𑀮𑀁 𑀲𑀦𑁆𑀢𑀢𑀭𑀁 𑀢𑀭𑀗𑁆𑀕𑀭𑀺𑀢𑁆𑀢𑀁; ()

𑁨𑁨.

𑀯𑀺𑀤𑀺𑀲𑀸𑀲𑀼 𑀘𑀢𑀼𑀤𑁆𑀤𑀺𑀲𑀸𑀲𑀼 𑀘𑀡𑁆𑀟-

𑀧𑀯𑀦𑀲𑁆𑀲𑀸’𑀧𑀺 𑀅𑀯𑀸𑀬𑀦𑀁 𑀢𑀤𑀸𑀦𑀺,

𑀪𑀯𑀺 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀫𑀢𑁆𑀢𑀦𑁄’𑀧𑀺

𑀪𑀝𑀤𑀺𑀝𑁆𑀞𑁆𑀬𑀸𑀪𑀯𑀤𑀝𑁆𑀞𑀺𑀪𑁂𑀤𑀦𑀸𑀬; ()

𑁨𑁩.

𑀦𑀯𑀧𑀮𑁆𑀮𑀯𑀧𑀢𑁆𑀢𑀲𑁂𑀔𑀭𑀸𑀦𑀁

𑀯𑀺𑀝𑀧𑀻𑀦𑀁 𑀓𑀼𑀲𑀼𑀫𑀸𑀳𑀺𑀓𑀺𑀡𑁆𑀡𑀪𑀸𑀯𑁄,

𑀪𑀯𑀺 𑀧𑀼𑀩𑁆𑀩𑀦𑀺𑀩𑀦𑁆𑀥𑀦𑀁 𑀯𑀺𑀫𑀼𑀢𑁆𑀢𑀺

𑀓𑀼𑀲𑀼𑀫𑁂𑀳𑀸’𑀢𑀼𑀫𑀤𑁂𑀳𑀪𑀽𑀲𑀡𑀸𑀬; ()

𑁨𑁪. ¶

𑀓𑀼𑀫𑀼𑀤𑀸𑀓𑀭𑀩𑁄𑀥𑀓𑀲𑁆𑀲 𑀘𑀦𑁆𑀤-

𑀓𑀺𑀭𑀡𑀲𑁆𑀲𑀸’𑀢𑀺𑀯𑀺𑀭𑁄𑀘𑀦𑀁 𑀢𑀤𑀸𑀲𑀺,

𑀲𑀢𑀺𑀩𑀼𑀤𑁆𑀥𑀲𑀼𑀥𑀸𑀓𑀭𑁄’𑀤𑀬𑀫𑁆𑀳𑀺

𑀚𑀦𑀲𑀦𑁆𑀤𑁄𑀳𑀫𑀦𑁄𑀧𑀲𑀸𑀤𑀳𑁂𑀢𑀼; ()

𑁨𑁫.

𑀯𑀺𑀫𑀮𑀢𑁆𑀢𑀫𑀦𑀼𑀡𑁆𑀳𑀢𑀸 𑀦𑀺𑀤𑀸𑀖-

𑀲𑀽𑀭𑀺𑀬𑀲𑁆𑀲𑀽’𑀧𑀲𑀫𑁄 𑀦𑀺𑀫𑀺𑀢𑁆𑀢𑀫𑀕𑁆𑀕𑀁,

𑀪𑀯𑀺 𑀘𑁂𑀢𑀲𑀺𑀓𑀲𑁆𑀲 𑀓𑀸𑀬𑀺𑀓𑀲𑁆𑀲

𑀧𑀝𑀺𑀮𑀸𑀪𑀸𑀬 𑀲𑀼𑀔𑀲𑁆𑀲 𑀢𑀫𑁆𑀳𑀺𑀚𑀸𑀢𑁂; ()

𑁨𑁬.

𑀕𑀕𑀦𑀸’𑀕𑀦𑀕𑀸𑀤𑀺𑀢𑁄’𑀢𑀭𑀺𑀢𑁆𑀯𑀸

𑀧𑀣𑀯𑀺𑀲𑀗𑁆𑀓𑀫𑀡𑀁 𑀢𑀤𑀸 𑀔𑀕𑀸𑀦𑀁,

𑀲𑀭𑀡𑀸𑀕𑀫𑀦𑀲𑁆𑀲 𑀞𑀸𑀦𑀫𑀸𑀲𑀺

𑀚𑀺𑀦𑀥𑀫𑁆𑀫𑀁 𑀲𑀼𑀦𑀺𑀲𑀫𑁆𑀫 𑀲𑀚𑁆𑀚𑀦𑀸𑀦𑀁; ()

𑁨𑁭.

𑀦𑀪𑀲𑀸’𑀪𑀺𑀧𑀯𑀲𑁆𑀲𑀦𑀁 𑀢𑀤𑀸𑀦𑀺

𑀘𑀢𑀼𑀤𑀻𑀧𑁂𑀲𑀼 𑀅𑀓𑀸𑀮𑀯𑀸𑀭𑀺𑀤𑀸𑀦𑀁,

𑀧𑀭𑀺𑀲𑀸𑀲𑀼 𑀅𑀔𑀡𑁆𑀟𑀥𑀫𑁆𑀫𑀯𑀼𑀝𑁆𑀞𑀺-

𑀧𑀢𑀦𑀲𑁆𑀲𑀸’𑀲𑀺 𑀦𑀺𑀩𑀦𑁆𑀥𑀦𑀁 𑀚𑀺𑀦𑀫𑁆𑀳𑀸; ()

𑁨𑁮. ¶

𑀙𑀡𑀫𑀗𑁆𑀕𑀮𑀓𑀻𑀴𑀡𑀁 𑀢𑀤𑀸𑀦𑀺

𑀢𑀺𑀤𑀲𑀸𑀦𑀫𑁆𑀧𑀺 𑀲𑀓𑁂𑀲𑀓𑁂 𑀯𑀺𑀫𑀸𑀦𑁂,

𑀉𑀧𑀕𑀫𑁆𑀫 𑀢𑀳𑀺𑀁𑀢𑀳𑀺𑀁 𑀉𑀤𑀸𑀦

𑀲𑀫𑀼𑀤𑀸𑀦𑀲𑁆𑀲𑀦𑀺𑀤𑀸𑀦𑀫𑀸’𑀲𑀺 𑀩𑁄𑀥𑀺𑀁; ()

𑁨𑁯.

𑀯𑀺𑀯𑀝𑀸 𑀲𑀬𑀫𑁂𑀯 𑀫𑀦𑁆𑀤𑀺𑀭𑀸𑀦𑀁

𑀧𑀺𑀳𑀺𑀢𑀜𑁆𑀘𑀸𑀭𑀓𑀯𑀸𑀝𑀯𑀸𑀢𑀧𑀸𑀦𑀸,

𑀪𑀯𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀫𑀕𑁆𑀕-

𑀧𑀝𑀺𑀮𑀸𑀪𑀸𑀬 𑀦𑀺𑀫𑀺𑀢𑁆𑀢𑀫𑀸𑀳𑀭𑀺𑀁𑀲𑀼; ()

𑁩𑁦.

𑀢𑀤𑀳𑁂 𑀫𑀥𑀼𑀭𑀸𑀫𑀺𑀲𑀲𑁆𑀲 𑀧𑁂𑀢𑁆𑀢𑀻-

𑀯𑀺𑀲𑀬𑁂𑀲𑁆𑀯𑀸𑀳𑀭𑀡𑀁 𑀔𑀼𑀤𑀸𑀢𑀼𑀭𑀸𑀦𑀁,

𑀪𑀯𑀺 𑀓𑀸𑀬𑀕𑀢𑀸𑀲𑀢𑀸𑀫𑀢𑀲𑁆𑀲

𑀧𑀝𑀺𑀮𑀸𑀪𑀸𑀬 𑀦𑀺𑀫𑀺𑀢𑁆𑀢𑀫𑀢𑁆𑀢𑀦𑁄’𑀧𑀺; ()

𑁩𑁧. ¶

𑀤𑀺𑀯𑀲𑁂 𑀚𑀦𑀦𑀼𑀲𑁆𑀲𑀯𑁂 𑀧𑀺𑀧𑀸𑀲𑀸-

𑀯𑀺𑀕𑀫𑁄 𑀤𑀻𑀦𑀚𑀦𑀲𑁆𑀲 𑀧𑁂𑀢𑀮𑁄𑀓𑁂,

𑀲𑀼𑀔𑀺𑀢𑀢𑁆𑀢𑀲𑁆𑀲 𑀉𑀧𑁂𑀘𑁆𑀘𑀩𑀼𑀤𑁆𑀥𑀪𑀸𑀯𑀁; ()

𑁩𑁨.

𑀧𑀝𑀺𑀧𑀓𑁆𑀔𑀚𑀦𑀲𑁆𑀲 𑀫𑁂𑀢𑁆𑀢𑀺𑀮𑀸𑀪𑁄

𑀢𑀤𑀳𑁂 𑀯𑀸𑀬𑀲𑀯𑀸𑀬𑀲𑀸𑀭𑀺𑀦𑀫𑁆𑀧𑀺,

𑀪𑀯𑀺𑀞𑀸𑀦𑀫𑀦𑀦𑁆𑀢𑀲𑀢𑁆𑀢𑀮𑁄𑀓-

𑀯𑀺𑀲𑀬𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀸𑀬; ()

𑁩𑁩.

𑀲𑀢𑀺𑀫𑀕𑁆𑀕𑀨𑀮𑀼𑀩𑁆𑀪𑀯𑁂 𑀬𑀣𑁂𑀯

𑀪𑀯𑀪𑀻𑀢𑁆𑀬𑀸𑀧𑀕𑀫𑁄 𑀢𑀣𑀸𑀕𑀢𑀸𑀦𑀁,

𑀲𑀢𑀺 𑀚𑀸𑀢𑀫𑀳𑀸𑀫𑀳𑁂 𑀪𑀬𑀁 𑀯𑀸

𑀦𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀫𑀸𑀲𑀺 𑀢𑀸𑀲𑁄; ()

𑁩𑁪.

𑀧𑀺𑀬𑀪𑀸𑀯𑀼𑀧𑀲𑀗𑁆𑀓𑀫𑁄 𑀧𑀚𑀸𑀦𑀁

𑀳𑀤𑀬𑀸𑀦𑀦𑁆𑀤𑀓𑀭𑀸𑀬 𑀔𑁄 𑀕𑀺𑀭𑀸𑀬,

𑀚𑀺𑀦𑀥𑀫𑁆𑀫𑀓𑀣𑀸𑀬 𑀲𑀸𑀯𑀓𑀸𑀦𑀁

𑀯𑀺𑀬 𑀲𑀸𑀫𑀕𑁆𑀕𑀺𑀭𑀲𑀲𑁆𑀲 𑀧𑀸𑀢𑀼𑀪𑀸𑀯𑁄; ()

𑁩𑁫. ¶

𑀲𑀺𑀢𑀓𑀺𑀢𑁆𑀢𑀺𑀮𑀢𑀸𑀬 𑀭𑁄𑀧𑀺𑀢𑀸𑀬

𑀪𑀯𑀢𑁄’𑀲𑁆𑀫𑀺𑀁 𑀪𑀼𑀯𑀦𑀸𑀮𑀯𑀸𑀴𑀕𑀩𑁆𑀪𑁂,

𑀯𑀺𑀬 𑀦𑀺𑀫𑁆𑀫𑀺𑀢𑀬𑀦𑁆𑀢𑀯𑀸𑀭𑀺𑀥𑀸𑀭𑀸

𑀚𑀮𑀥𑀸𑀭𑀸 𑀥𑀭𑀡𑀻𑀢𑀮𑀼𑀝𑁆𑀞𑀳𑀺𑀁𑀲𑀼; ()

𑁩𑁬.

𑀪𑀫𑀭𑀸𑀯𑀮𑀺𑀪𑀸𑀭𑀧𑀜𑁆𑀘𑀯𑀡𑁆𑀡-

𑀓𑀫𑀮𑀘𑁆𑀙𑀦𑁆𑀦𑀫𑀳𑀻𑀢𑀮𑀁 𑀭𑀭𑀸𑀚,

𑀚𑀮𑀚𑀁 𑀣𑀮𑀚𑀁 𑀧𑀭𑀸𑀕𑀳𑀸𑀭𑀁

𑀪𑀼𑀯𑀺 𑀲𑀩𑁆𑀩𑀢𑁆𑀣 𑀅𑀧𑀼𑀧𑁆𑀨𑀺 𑀧𑀼𑀧𑁆𑀨𑀚𑀸𑀢𑀁, ()

𑁩𑁭.

𑀯𑀺𑀝𑀧𑀻𑀲𑀼 𑀮𑀢𑀸𑀲𑀼 𑀔𑀦𑁆𑀥𑀲𑀸𑀔𑀸-

𑀲𑀢𑀧𑀢𑁆𑀢𑀸𑀦𑀺 𑀢𑀤𑀸 𑀲𑀼𑀧𑀼𑀧𑁆𑀨𑀺𑀢𑀸𑀦𑀺,

𑀦𑀭𑀯𑀻𑀭’𑀪𑀺𑀭𑀽𑀧𑀤𑀲𑁆𑀲𑀦𑀸𑀬

𑀪𑀽𑀲𑀫𑀼𑀫𑁆𑀫𑀻𑀮𑀺𑀢𑀮𑁄𑀘𑀦𑀸𑀦𑀺’𑀯𑀸𑀲𑀼𑀁; ()

𑁩𑁮. ¶

𑀉𑀧𑀭𑀽𑀧𑀭𑀺 𑀲𑀢𑁆𑀢𑀲𑀢𑁆𑀢 𑀳𑀼𑀢𑁆𑀯𑀸

𑀲𑀢𑀧𑀢𑁆𑀢𑀸𑀦𑀺 𑀲𑀻𑀮𑀸𑀢𑀮𑀼𑀩𑁆𑀪𑀯𑀸𑀦𑀺,

𑀢𑀯 𑀅𑀩𑁆𑀪𑀼𑀤𑀬𑁄 𑀲𑀼𑀤𑀼𑀮𑁆𑀮𑀪𑁄𑀢𑀺

𑀓𑀣𑀬𑀦𑁆𑀢𑀺𑀯𑀺’𑀳 𑀓𑀧𑀸𑀢𑀼𑀪𑀸𑀯𑀢𑁄 𑀦𑁄; ()

𑁩𑁯.

𑀦𑀺𑀚𑀧𑀸𑀭𑀫𑀺𑀢𑀸𑀮𑀢𑀸𑀬 𑀓𑀢𑁆𑀢𑀺-

𑀮𑀢𑀬𑀸’𑀮𑀗𑁆𑀓𑀢𑀧𑀼𑀧𑁆𑀨𑀳𑀸𑀲𑀭𑀽𑀧𑀸,

𑀲𑀫𑀮𑀗𑁆𑀓𑀭𑀺 𑀬𑀸𑀯𑀢𑀸 𑀪𑀯𑀕𑁆𑀕𑀁

𑀥𑀚𑀫𑀸𑀮𑀸 𑀚𑀦𑀦𑀼𑀲𑁆𑀲𑀯𑁂 𑀢𑀺𑀮𑁄𑀓𑀁; ()

𑁪𑁦.

𑀅𑀯𑀓𑀼𑀚𑁆𑀚𑀲𑀭𑁄𑀭𑀼𑀳𑀸𑀪𑀺𑀭𑀸𑀫𑀁

𑀦𑀪𑀯𑀫𑁆𑀪𑁄𑀚𑀯𑀦𑀲𑁆𑀲𑀺𑀭𑀺𑀁 𑀩𑀩𑀦𑁆𑀥,

𑀪𑀼𑀯𑀺 𑀧𑁄𑀓𑁆𑀔𑀭𑀯𑀲𑁆𑀲𑀫𑀻𑀤𑀺𑀲𑀦𑁆𑀢𑀺

𑀯𑀤𑀫𑀸𑀦𑀁𑀯 𑀧𑀯𑀲𑁆𑀲𑀺 𑀥𑀫𑁆𑀫𑀯𑀲𑁆𑀲𑀁; ()

𑁪𑁧.

𑀭𑀫𑀡𑀻 𑀭𑀫𑀡𑀻𑀬𑀭𑀽𑀧𑀲𑁄𑀪𑀸

𑀅𑀘𑀭𑀼𑀁 𑀥𑀫𑁆𑀫𑀫𑀦𑀗𑁆𑀕𑀭𑀗𑁆𑀕𑀪𑀽𑀫𑀺,

𑀫𑀥𑀼𑀧𑀸 𑀫𑀥𑀼𑀧𑀸𑀦𑀫𑀦𑁆𑀤𑀺𑀭𑀸𑀦𑀺

𑀢𑀤𑀳𑁂 𑀦𑀸𑀯𑀲𑀭𑀺𑀁𑀲𑀼 𑀥𑀫𑁆𑀫𑀓𑀸𑀫𑀸; () (𑀅𑀩𑁆𑀬𑀧𑁂𑀢 𑀧𑀞𑀫𑀤𑀼𑀢𑀺𑀬 𑀧𑀸𑀤𑀸𑀤𑀺𑀬𑀫𑁂𑀓𑀁)

𑁪𑁨. ¶

𑀓𑀫𑀮𑀸 𑀓𑀫𑀮𑀸𑀮𑀬𑀸 𑀯𑀺𑀯𑁂𑀲

𑀪𑀼𑀯𑀦𑀁 𑀪𑀽𑀭𑀺𑀦𑀯𑀸𑀯𑀢𑀸𑀭𑀳𑀸𑀭𑀻,

𑀥𑀭𑀡𑀻 𑀥𑀭𑀡𑀻𑀥𑀭𑀸𑀯𑀢𑀁𑀲𑀸

𑀉𑀧𑀳𑀸𑀭𑀸𑀢𑀺𑀪𑀭𑀸𑀢𑀼𑀭𑁂𑀯 𑀓𑀫𑁆𑀧𑀺; () (𑀅𑀩𑁆𑀬𑀧𑁂𑀢 𑀧𑀞𑀫𑀤𑀼𑀢𑀺𑀬 𑀧𑀸𑀤𑀸𑀤𑀺𑀬𑀫𑀓𑀁)

𑁪𑁩.

𑀭𑀼𑀘𑀺𑀭𑀁 𑀭𑀼𑀘𑀺𑀭𑀗𑁆𑀕𑀦𑀸 𑀢𑀤𑀸𑀦𑀺

𑀅𑀓𑀭𑀼𑀁 𑀓𑀻𑀴𑀫𑀦𑁂𑀓𑀘𑀦𑁆𑀤𑀺𑀓𑀸𑀲𑀼,

𑀲𑀼𑀯𑀻𑀭𑀁 𑀲𑀼𑀘𑀺𑀭𑀁𑀲𑀺𑀓𑀺𑀡𑁆𑀡𑀢𑀸𑀭𑀸-

𑀦𑀺𑀓𑀭𑁄’𑀪𑀸𑀲𑀢𑀭𑁄’𑀲𑀺 𑀪𑀸𑀓𑀭𑁄’𑀯; () (𑀅𑀩𑁆𑀬𑀧𑁂𑀢 𑀧𑀞𑀫𑀤𑀼𑀢𑀺𑀬 𑀧𑀸𑀤𑀸𑀤𑀺𑀬𑀫𑀓𑀁)

𑁪𑁪.

𑀧𑀯𑀦𑁄’𑀧𑀯𑀦𑁄’𑀧𑀯𑀸𑀬𑀫𑀸𑀦𑁄

𑀧𑀯𑀺𑀦𑁄𑀤𑁂𑀲𑀺 𑀧𑀭𑀺𑀲𑁆𑀲𑀫𑀁 𑀚𑀦𑀲𑁆𑀲,

𑀯𑀦𑀤𑀸 𑀯𑀦𑀤𑀸𑀳𑀯𑀼𑀧𑀲𑀦𑁆𑀢𑀺𑀁

𑀅𑀓𑀭𑀼𑀁 𑀲𑀩𑁆𑀩𑀥𑀺 𑀲𑀲𑁆𑀲𑀲𑀫𑁆𑀧𑀤𑀜𑁆𑀘; () (𑀅𑀩𑁆𑀬𑀧𑁂𑀢 𑀧𑀞𑀫𑀤𑀼𑀢𑀺𑀬 𑀧𑀸𑀤𑀸𑀤𑀺𑀬𑀫𑀓𑀁)

𑁪𑁫. ¶

𑀯𑀺𑀲𑀤𑀸 𑀯𑀺𑀲𑀤𑀸 𑀲𑀓𑀺𑀢𑁆𑀢𑀺𑀭𑀸𑀫𑀸

𑀫𑀼𑀔𑀭𑀗𑁆𑀕𑀸𑀮𑀬 𑀫𑀸𑀧𑀓𑁄𑀯𑀺𑀤𑀸𑀦𑀁,

𑀲𑀼𑀚𑀦𑀸’𑀲𑀼𑀚𑀦𑀸 𑀪𑀚𑀺𑀁𑀲𑀼 𑀢𑀲𑁆𑀲

𑀘𑀭𑀡𑀸𑀦𑁆𑀬𑀗𑁆𑀓𑀺𑀢𑀘𑀓𑁆𑀓𑀮𑀓𑁆𑀔𑀡𑀸𑀦𑀺; () (𑀅𑀩𑁆𑀬𑀧𑁂𑀢 𑀧𑀞𑀫𑀤𑀼𑀢𑀺𑀬 𑀧𑀸𑀤𑀸𑀤𑀺𑀬𑀫𑀓𑀁)

𑁪𑁬.

𑀯𑀲𑀼𑀥𑀁 𑀯𑀲𑀼𑀥𑀫𑁆𑀧𑀢𑀻 𑀲𑀫𑀕𑁆𑀕𑀸

𑀤𑀲𑀥𑀫𑁆𑀫𑁂𑀦’𑀦𑀼𑀲𑀸𑀲𑀬𑀼𑀁 𑀢𑀤𑀸𑀦𑀺,

𑀳𑀤𑀬𑀁 𑀬𑀤𑀬𑀗𑁆𑀕𑀫𑀸𑀬 𑀯𑀸𑀡𑁆𑀬𑀸

𑀅𑀲𑀢𑀁 𑀫𑀺𑀢𑁆𑀢𑀤𑀼𑀳𑀻 𑀯𑀺𑀥𑀸𑀦𑀬𑀺𑀁𑀲𑀼; () (𑀅𑀩𑁆𑀬𑀧𑁂𑀢 𑀧𑀞𑀫𑀤𑀼𑀢𑀺𑀬 𑀧𑀸𑀤𑀸𑀤𑀺𑀬𑀫𑀓𑀁)

𑁪𑁭.

𑀢𑀺𑀫𑀤𑀸’𑀢𑀺𑀫𑀤𑀸 𑀕𑀚𑀸𑀥𑀺𑀧𑀸𑀧𑀺

𑀫𑀺𑀕𑀭𑀸𑀚𑀽𑀳𑀺 𑀢𑀤𑀸 𑀲𑀫𑀸𑀘𑀭𑀺𑀁𑀲𑀼,

𑀧𑀩𑀮𑀸’𑀧𑀩𑀮𑀸 𑀫𑀺𑀕𑀸 𑀢𑀤𑀜𑁆𑀜𑁂

𑀧𑀝𑀺𑀲𑀢𑁆𑀣𑀸𑀭𑀫𑀓𑀁𑀲𑀼 𑀅𑀜𑁆𑀜𑀫𑀜𑁆𑀜𑀁; () (𑀅𑀩𑁆𑀬𑀧𑁂𑀢 𑀧𑀞𑀫𑀤𑀼𑀢𑀺𑀬 𑀧𑀸𑀤𑀸𑀤𑀺𑀬𑀫𑀓𑀁)

𑁪𑁮. ¶

𑀪𑀼𑀯𑀦𑁂 𑀪𑀼𑀯𑀦𑁂𑀓𑀮𑁄𑀘𑀦𑀲𑁆𑀲

𑀚𑀦𑀦𑀲𑁆𑀫𑀺𑀁 𑀤𑀺𑀯𑀲𑁂 𑀲𑀫𑀼𑀚𑁆𑀚𑀮𑀸𑀦𑀻,

𑀦𑀺𑀳𑀦𑀺𑀢𑀸’𑀦𑀺𑀳𑀺𑀢𑀸𑀬𑀼𑀥𑀸𑀢𑀺 𑀪𑀺𑀢𑀺𑀁

𑀚𑀦𑀬𑀼𑀁 𑀧𑀸𑀧𑀺𑀫𑀢𑁄𑀯 𑀦𑁂𑀢𑀭𑁂𑀲𑀁; () (𑀅𑀩𑁆𑀬𑀧𑁂𑀢 𑀧𑀞𑀫𑀤𑀼𑀢𑀺𑀬 𑀧𑀸𑀤𑀸𑀤𑀺𑀬𑀫𑀓𑀁)

𑁪𑁯.

𑀧𑀭𑀺𑀯𑀸𑀤𑀺𑀢𑀤𑀺𑀩𑁆𑀩𑀪𑁂𑀭𑀺𑀯𑀻𑀡𑀸-

𑀢𑀼𑀭𑀺𑀬𑀁 𑀤𑀲𑁆𑀲𑀺𑀢𑀤𑀺𑀩𑁆𑀩𑀦𑀘𑁆𑀘𑀪𑁂𑀤𑀁,

𑀕𑀕𑀦𑀁 𑀲𑀼𑀭𑀭𑀗𑁆𑀕𑀫𑀡𑁆𑀟𑀮𑀸𑀪𑀁

𑀢𑀺𑀤𑀲𑀸𑀦𑀁 𑀉𑀧𑀳𑀸𑀭𑀲𑀸𑀭𑀫𑀸𑀲𑀺; ()

𑁫𑁦. ¶

𑀲𑁄𑀯𑀡𑁆𑀡𑀯𑀡𑁆𑀡𑀯𑀥𑀼𑀬𑀸 𑀕𑀭𑀼𑀕𑀩𑁆𑀪𑀕𑀲𑁆𑀫𑀺𑀁

𑀢𑀁𑀦𑀦𑁆𑀤𑀦𑀩𑁆𑀩𑀦𑀲𑀫𑀸𑀦𑀯𑀦𑀗𑁆𑀕𑀢𑀲𑁆𑀫𑀺𑀁,

𑀪𑀼𑀢𑀩𑁆𑀪𑀼𑀢𑀦𑁆𑀯𑀺𑀢𑀫𑀳𑁂 𑀦𑀬𑀦𑀜𑁆𑀚𑀦𑀲𑁆𑀫𑀺𑀁

𑀚𑀸𑀢𑀫𑁆𑀳𑀺 𑀢𑀫𑁆𑀳𑀺 𑀢𑀦𑀼𑀚𑁂 𑀪𑀯𑀺 𑀪𑀤𑁆𑀤𑀪𑀢𑁆𑀢𑀺; () (𑀫𑀸𑀮𑀸𑀩𑀦𑁆𑀥𑀦𑀁)

𑀇𑀢𑀺 𑀫𑁂𑀥𑀸𑀦𑀦𑁆𑀤𑀸𑀪𑀺𑀥𑀸𑀦𑁂𑀦 𑀬𑀢𑀺𑀦𑀸 𑀯𑀺𑀭𑀘𑀺𑀢𑁂 𑀲𑀓𑀮𑀓𑀯𑀺𑀚𑀦 𑀳𑀤𑀬𑀸𑀦𑀦𑁆𑀤𑀦𑀦𑀺𑀤𑀸𑀦𑁂 𑀚𑀺𑀦𑀯𑀁𑀲𑀤𑀻𑀧𑁂 𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑁂 𑀯𑀺𑀯𑀺𑀥𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀧𑀸𑀢𑀼𑀪𑀸𑀯𑀧𑁆𑀧𑀯𑀢𑁆𑀢𑀺 𑀧𑀭𑀺𑀤𑀺𑀧𑁄. 𑀲𑀢𑁆𑀢𑀫𑁄𑀲𑀕𑁆𑀕𑁄.

𑁧. ¶

𑀯𑀺𑀲𑀼𑀤𑁆𑀥 (𑀯𑀁𑀲𑀝𑁆𑀞) 𑀫𑀲𑁂𑀲𑀩𑀦𑁆𑀥𑀯𑁄

𑀓𑀼𑀫𑀸𑀭𑀫𑀸𑀤𑀸𑀬 𑀢𑀺𑀮𑁄𑀓𑀮𑁄𑀘𑀦𑀁,

𑀅𑀕𑀁𑀲𑀼 𑀢𑀫𑁆𑀳𑀸 𑀓𑀧𑀺𑀮𑀯𑁆𑀳𑀬𑀁𑀧𑀼𑀭𑀁

𑀧𑀼𑀭𑀻𑀯𑀢𑀁𑀲𑀁 𑀲𑀫𑀮𑀗𑁆𑀓𑀢𑀜𑁆𑀚𑀲𑀁; ()

𑁨.

𑀢𑀤𑀸 𑀅𑀪𑀺𑀜𑁆𑀜𑀸𑀲𑀼 𑀯𑀲𑀺𑀲𑀼 𑀧𑀸𑀭𑀕𑁄

𑀲𑀫𑀸𑀥𑀺𑀯𑀺𑀓𑁆𑀔𑀫𑁆𑀪𑀺𑀢𑀲𑀩𑁆𑀩𑀓𑀺𑀩𑁆𑀩𑀺𑀲𑁄,

𑀯𑀺𑀳𑀸𑀲𑀺 𑀲𑀼𑀤𑁆𑀥𑁄𑀤𑀦𑀪𑀼𑀫𑀺𑀪𑀢𑁆𑀢𑀼𑀦𑁄

𑀓𑀼𑀮𑀽𑀧𑀕𑁄 𑀤𑁂𑀯𑀮𑀦𑀸𑀫𑀢𑀸𑀧𑀲𑁄; ()

𑁩. ¶

𑀢𑀧𑁄𑀥𑀦𑁄 𑀲𑁄 𑀧𑀯𑀺𑀯𑁂𑀓𑀓𑀸𑀫𑀯𑀸

𑀤𑀺𑀯𑀸𑀯𑀺𑀳𑀸𑀭𑀢𑁆𑀣𑀫𑀼𑀧𑀸𑀕𑀢𑁄 𑀤𑀺𑀯𑀁,

𑀢𑀫𑀢𑁆𑀣𑀫𑀜𑁆𑀜𑀸𑀢𑀼𑀫𑀧𑀼𑀘𑁆𑀙𑀺 𑀤𑁂𑀯𑀢𑀸-

𑀧𑀯𑀢𑁆𑀢𑀺𑀢𑀁 𑀧𑀲𑁆𑀲𑀺𑀬𑀫𑀗𑁆𑀕𑀮𑀼𑀲𑁆𑀲𑀯𑀁; ()

𑁪.

𑀢𑀯𑁂𑀯𑀼𑀧𑀝𑁆𑀞𑀸𑀬𑀓𑀪𑀼𑀫𑀺𑀪𑀢𑁆𑀢𑀼𑀦𑁄

𑀯𑀭𑁄𑀭𑀲𑁄 𑀫𑀸𑀭𑀺𑀬 𑀫𑀸𑀭𑀯𑀸𑀳𑀺𑀦𑀺𑀁,

𑀧𑀭𑀸𑀚𑀬𑀁 𑀮𑀘𑁆𑀙𑀢𑀺 𑀩𑁄𑀥𑀺𑀫𑀸𑀬𑀢𑀺𑀁

𑀫𑀳𑀼𑀲𑁆𑀲𑀯𑁄 𑀢𑀫𑁆𑀧𑀢𑀺 𑀯𑀢𑁆𑀢𑀢𑁂, 𑀩𑁆𑀭𑀯𑀼𑀁; ()

𑁫.

𑀇𑀫𑀸𑀬 𑀯𑀼𑀢𑁆𑀢𑀦𑁆𑀢𑀓𑀣𑀸𑀬 𑀘𑁄𑀤𑀺𑀢𑁄

𑀢𑀧𑁄𑀥𑀦𑁄 𑀇𑀤𑁆𑀥𑀺𑀩𑀮𑁂𑀦 𑀇𑀤𑁆𑀥𑀺𑀫𑀸,

𑀲𑀼𑀭𑀸𑀮𑀬𑁂 𑀅𑀦𑁆𑀢𑀭𑀥𑀸𑀦’𑀦𑀦𑁆𑀢𑀭𑀁

𑀦𑀺𑀓𑁂𑀢𑀦𑁂 𑀧𑀸𑀢𑀼𑀭𑀳𑁄𑀲𑀺 𑀭𑀸𑀚𑀺𑀦𑁄; ()

𑁬. ¶

𑀓𑀼𑀫𑀸𑀭𑀦𑀺𑀚𑁆𑀛𑀸𑀦𑀫𑀦𑁄𑀭𑀣𑁄𑀓 𑀯𑀲𑀺

𑀢𑀳𑀺𑀁 𑀲𑀼𑀧𑀜𑁆𑀜𑀢𑁆𑀢𑀫𑀳𑀸𑀭𑀳𑀓𑀸𑀲𑀦𑁂,

𑀦𑀺𑀲𑀚𑁆𑀚 𑀲𑀼𑀤𑁆𑀥𑁄𑀤𑀦𑀭𑀸𑀚𑀺𑀦𑁄’𑀩𑁆𑀭𑀼𑀯𑀺

𑀢𑀯𑀢𑁆𑀭𑀚𑀁 𑀤𑀝𑁆𑀞𑀼𑀫𑀺𑀥𑀸𑀕𑀢𑁄𑀢𑁆𑀬’𑀳𑀁; ()

𑁭.

𑀦𑀭𑀺𑀦𑁆𑀤𑀘𑀽𑀴𑀸𑀫𑀡𑀺𑀘𑀼𑀫𑁆𑀩𑀺𑀢𑀸𑀦𑁆𑀬’𑀣

𑀧𑀤𑀸𑀦𑀺 𑀯𑀦𑁆𑀤𑀸𑀧𑀬𑀺𑀢𑀼 𑀢𑀧𑀲𑁆𑀲𑀺𑀦𑁄,

𑀯𑀺𑀪𑀼𑀲𑀡𑀸𑀮𑀗𑁆𑀓𑀢𑀫𑀢𑁆𑀢𑀲𑀫𑁆𑀪𑀯𑀁

𑀦𑀭𑀸𑀥𑀺𑀧𑁄 𑀭𑀸𑀚𑀓𑀼𑀫𑀸𑀭𑀫𑀸𑀳𑀭𑀺; ()

𑁮.

𑀢𑀤𑀢𑁆𑀢𑀪𑀸𑀯𑁂𑀦’𑀳𑀺𑀯𑀸𑀤𑀦𑀸𑀭𑀳-

𑀲𑁆𑀲’𑀪𑀸𑀯𑀢𑁄 𑀢𑀲𑁆𑀲 𑀭𑀭𑀸𑀚 𑀲𑀽𑀦𑀼𑀦𑁄,

𑀧𑀯𑀝𑁆𑀝𑀬𑀺𑀢𑁆𑀯𑀸 𑀚𑀝𑀺𑀮𑀲𑁆𑀲 𑀲𑀫𑁆𑀧𑀢𑀺

𑀚𑀝𑀸𑀲𑀼 𑀘𑀓𑁆𑀓𑀗𑁆𑀓𑀺𑀢𑀧𑀸𑀤𑀧𑀗𑁆𑀓𑀚𑀁; ()

𑁯.

𑀓𑀼𑀫𑀸𑀭𑀫𑀸𑀤𑀸𑀬 𑀲𑀫𑀧𑁆𑀧𑀺𑀢𑀜𑁆𑀚𑀮𑀺𑀁

𑀯𑀺𑀥𑀸𑀬 𑀧𑀸𑀤𑁂𑀲𑁆𑀯𑀦𑀺𑀲𑀫𑁆𑀫𑀓𑀸𑀭𑀺𑀦𑁄,

𑀲𑀘𑁂 𑀞𑀧𑁂𑀬𑁆𑀬𑀼𑀁 𑀚𑀝𑀺𑀮𑀲𑁆𑀲 𑀲𑀢𑁆𑀢𑀥𑀸

𑀨𑀮𑁂𑀬𑁆𑀬 𑀫𑀼𑀤𑁆𑀥𑀸 𑀚𑀝𑀺𑀢𑁄𑀚𑀝𑀸𑀬’𑀧𑀺; ()

𑁧𑁦.

𑀲𑀓𑀸𑀲𑀦𑀼𑀝𑁆𑀞𑀸𑀬 𑀅𑀣𑁂’𑀲𑀺𑀪𑀽𑀫𑀺𑀬𑀸

𑀦𑀺𑀳𑀘𑁆𑀘 𑀲𑁄 𑀤𑀓𑁆𑀔𑀺𑀡𑀚𑀸𑀦𑀼𑀫𑀡𑁆𑀟𑀮𑀁,

𑀅𑀓𑀸 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀕𑀸𑀭𑀯𑀁

𑀲𑀺𑀭𑁄𑀯𑀺𑀭𑀽𑀴𑁆𑀳𑀜𑁆𑀚𑀮𑀺 𑀧𑀼𑀧𑁆𑀨𑀫𑀜𑁆𑀚𑀭𑀻; ()

𑁧𑁧.

𑀉𑀤𑀺𑀓𑁆𑀔𑀫𑀸𑀦𑁄 𑀯𑀲𑀺𑀦𑀸 𑀲𑀫𑀧𑁆𑀧𑀺𑀢𑀁

𑀢𑀫𑀜𑁆𑀚𑀮𑀺𑀁 𑀪𑀢𑁆𑀢𑀺𑀪𑀭𑁂𑀦 𑀪𑀽𑀧𑀢𑀺,

𑀅𑀣𑁄’𑀦𑀫𑁂𑀢𑁆𑀯𑀸 𑀢𑀦𑀼𑀫𑀻𑀲𑀓𑀁 𑀲𑀓𑀁

𑀧𑀯𑀦𑁆𑀤𑀺 𑀧𑀸𑀤𑀫𑁆𑀩𑀼𑀭𑀼𑀳𑀸𑀦𑀺 𑀲𑀼𑀦𑀼𑀦𑁄; ()

𑁧𑁨.

𑀲𑀺𑀬𑀸’𑀯 𑀩𑀼𑀤𑁆𑀥𑁄 𑀧𑀼𑀭𑀺𑀲𑀸𑀲𑀪𑁄 𑀅𑀬𑀁

𑀦𑀤𑀲𑁆𑀲𑀦𑀁 𑀢𑀲𑁆𑀲 𑀲𑀺𑀬𑀸 𑀫𑀫𑀦𑁆𑀢𑀻 𑀲𑁄,

𑀦𑀺𑀭𑀽𑀧𑀫𑀁 𑀭𑀽𑀧𑀲𑀺𑀭𑀺𑀁 𑀲𑀫𑁂𑀓𑁆𑀔𑀺𑀬

𑀧𑀬𑀸𑀲𑀺 𑀦𑀺𑀝𑁆𑀞𑀁 𑀉𑀧𑀥𑀸𑀭𑀬𑀁 𑀯𑀲𑀺; ()

𑁧𑁩. ¶

𑀯𑀯𑀢𑁆𑀣𑀬𑀺𑀢𑁆𑀯𑁂𑀯𑀫𑀼𑀴𑀸𑀭𑀩𑀼𑀤𑁆𑀥𑀺𑀫𑀸

𑀯𑀺𑀢𑀺𑀡𑁆𑀡𑀓𑀗𑁆𑀔𑁄 𑀳𑀲𑀫𑀻𑀲𑀓𑀁 𑀭𑀼𑀤𑀁,

𑀦𑀭𑀺𑀦𑁆𑀤𑀫𑁄𑀭𑁄𑀥𑀧𑀼𑀭𑀓𑁆𑀔𑀢𑀁 𑀯𑀲𑀻

𑀢𑀤𑀯𑀲𑀻𑀤𑀸𑀧𑀬𑀺 𑀲𑀁𑀲𑀬𑀡𑁆𑀡𑀯𑁂; ()

𑁧𑁪.

𑀢𑀫𑀸𑀳𑀭𑀺𑀢𑁆𑀯𑀸𑀦 𑀧𑀓𑀯𑀢𑁆𑀢𑀺𑀫𑀩𑁆𑀪𑀼𑀢𑀁

𑀧𑀼𑀭𑀓𑁆𑀔𑀢𑁄’𑀭𑁄𑀥𑀚𑀦𑀲𑁆𑀲 𑀭𑀸𑀚𑀺𑀦𑁄,

𑀬𑀢𑀺𑀲𑁆𑀲𑀭𑁄 𑀲𑀁𑀲𑀬𑀲𑀮𑁆𑀮𑀫𑀼𑀤𑁆𑀥𑀭𑀁

𑀲𑀩𑀦𑁆𑀥𑀯𑁂’𑀦𑀼𑀲𑁆𑀲𑀭𑀺 𑀓𑀸𑀮𑀤𑁂𑀯𑀮𑁄;()

𑁧𑁫.

𑀲𑀓𑁂𑀓𑀼𑀮𑁂 𑀦𑀸𑀴𑀓𑀦𑀸𑀫𑀤𑀸𑀭𑀓𑁄

𑀲𑀬𑀫𑁆𑀪𑀼𑀦𑁄 𑀮𑀘𑁆𑀙𑀢𑀺 𑀤𑀲𑁆𑀲𑀦𑀁 𑀇𑀢𑀺,

𑀢𑀫𑀢𑁆𑀣𑀫𑀜𑁆𑀜𑀸 𑀲𑀫𑀼𑀧𑁂𑀘𑁆𑀘 𑀢𑀁𑀓𑀼𑀮𑀁

𑀢𑁆𑀯𑀫𑀸𑀳 𑀧𑀩𑁆𑀩𑀚𑁆𑀚𑀺𑀢𑀺 𑀪𑀸𑀕𑀺𑀦𑁂𑀬𑁆𑀬𑀓𑀁; ()

𑁧𑁬. ¶

𑀦𑀺𑀭𑀸𑀫𑀬𑀁 𑀧𑀜𑁆𑀘𑀫𑀯𑀸𑀲𑀭𑀫𑁆𑀳𑀺 𑀲𑁄

𑀯𑀭𑁄𑀭𑀲𑀁 𑀯𑀸𑀲𑀺𑀢𑀕𑀦𑁆𑀥𑀯𑀸𑀭𑀺𑀦𑀸,

𑀧𑀯𑀢𑁆𑀢𑀫𑀸𑀦𑁂 𑀪𑀯𑀦𑁂 𑀫𑀳𑀸𑀫𑀳𑁂

𑀦𑀳𑀸𑀧𑀬𑀺 𑀪𑀽𑀧𑀢𑀺 𑀩𑀦𑁆𑀥𑀼𑀫𑀚𑁆𑀛𑀕𑁄; ()

𑁧𑁭.

𑀧𑀲𑀢𑁆𑀣𑀫𑀦𑁆𑀯𑀢𑁆𑀣𑀪𑀺𑀥𑀸𑀦 𑀫𑀢𑁆𑀢𑀦𑁄

𑀓𑀼𑀫𑀸𑀭𑀫𑀸𑀭𑁄𑀧𑀬𑀺𑀢𑀼𑀁 𑀧𑀭𑁄𑀲𑀢𑀁,

𑀲𑀯𑁂𑀤𑀯𑁂𑀤𑀗𑁆𑀕𑀧𑀪𑁂𑀤𑀓𑁄𑀯𑀺𑀤𑁂

𑀤𑁆𑀯𑀺𑀚𑁂 𑀦𑀺𑀫𑀦𑁆𑀢𑀸𑀧𑀬𑀺 𑀲𑁄 𑀦𑀭𑀸𑀥𑀺𑀧𑁄; ()

𑁧𑁮.

𑀲𑀼𑀭𑀺𑀦𑁆𑀤𑀭𑀽𑀧𑁄 𑀲𑀼𑀭𑀫𑀦𑁆𑀤𑀺𑀭𑁄𑀧𑀫𑀁

𑀢𑀫𑀺𑀦𑁆𑀤𑀺𑀭𑀸𑀥𑀸𑀭𑀦𑀭𑀺𑀦𑁆𑀤𑀫𑀦𑁆𑀤𑀺𑀭𑀁,

𑀚𑀦𑀺𑀦𑁆𑀤𑀲𑀻𑀳𑁄’𑀧𑀕𑀢𑀸’𑀯𑀦𑀻𑀲𑀼𑀭𑁂

𑀅𑀫𑀦𑁆𑀤𑀧𑀽𑀚𑀸𑀯𑀺𑀥𑀺𑀦𑀸’𑀪𑀺𑀭𑀸𑀥𑀬𑀺; ()

𑁧𑁯.

𑀅𑀦𑁂𑀦𑀲𑀺𑀤𑁆𑀥𑀸 𑀲𑀫𑀢𑀺𑀁𑀲𑀧𑀸𑀭𑀫𑀻-

𑀲𑀤𑀢𑁆𑀣𑀲𑀫𑁆𑀧𑀢𑁆𑀢𑀺𑀧𑀭𑀢𑁆𑀣𑀓𑀸𑀭𑀺𑀦𑀸,

𑀢𑀣𑀸’𑀢𑁆𑀣 𑀲𑀗𑁆𑀔𑀸𑀢𑀥𑀦𑀁 𑀦𑀺𑀥𑀸𑀦𑀕𑀁

𑀇𑀫𑀫𑁆𑀳𑀺 𑀲𑀺𑀤𑁆𑀥𑀁 𑀲𑀳𑀚𑀸𑀢𑀺𑀬𑀸 𑀬𑀢𑁄; (𑁫)

𑁨𑁦. ¶

𑀤𑁆𑀯𑀺𑀚𑁂𑀳𑀺 𑀢𑀦𑁆𑀢𑀺𑀩𑁆𑀩𑀘𑀦𑀤𑁆𑀯𑀬𑀸𑀭𑀳𑀁

𑀲𑀫𑀸𑀲𑀲𑀁𑀔𑀺𑀢𑁆𑀢𑀧𑀤𑀢𑁆𑀣𑀲𑀁𑀳𑀺𑀢𑀁,

𑀲𑀼𑀢𑀲𑁆𑀲 𑀲𑀺𑀤𑁆𑀥𑀢𑁆𑀣’𑀪𑀺𑀥𑀸𑀦𑀫𑀢𑁆𑀢𑀦𑁄

𑀢𑀢𑁄’𑀪𑀺𑀯𑁄𑀳𑀸𑀭𑀲𑀼𑀔𑀸𑀬 𑀓𑀸𑀭𑀬𑀺; ()

𑁨𑁧.

𑀲𑀼𑀬𑀸𑀫𑀭𑀸𑀫𑀤𑁆𑀥𑀚𑀫𑀦𑁆𑀢𑀺𑀮𑀓𑁆𑀔𑀡-

𑀲𑀼𑀪𑁄𑀚𑀓𑁄𑀡𑁆𑀟𑀜𑁆𑀜𑀲𑀼𑀤𑀢𑁆𑀢𑀲𑀜𑁆𑀜𑀺𑀦𑁄,

𑀇𑀫𑁂 𑀤𑁆𑀯𑀺𑀚𑀸 𑀭𑀸𑀚𑀲𑀼𑀧𑀽𑀚𑀺𑀢𑀸 𑀢𑀤𑀸

𑀯𑀺𑀘𑀓𑁆𑀔𑀡𑀸𑀮𑀓𑁆𑀔𑀡𑀧𑀸𑀞𑀓𑀸’𑀪𑀯𑀁; ()

𑁨𑁨.

𑀲𑀼𑀪𑀸𑀲𑀼𑀪𑀁 𑀧𑀲𑁆𑀲𑀺𑀬 𑀤𑁂𑀳𑀮𑀓𑁆𑀔𑀡𑀁

𑀯𑀺𑀪𑀸𑀯𑀬𑀯𑁆𑀳𑁄 𑀇𑀢𑀺 𑀢𑁂𑀲𑀫𑀩𑁆𑀭𑀼𑀯𑀺,

𑀲𑀫𑀼𑀓𑁆𑀔𑀺𑀧𑀺𑀢𑁆𑀯𑀸’𑀗𑁆𑀕𑀼𑀮𑀺𑀧𑀮𑁆𑀮𑀯𑀤𑁆𑀯𑀬𑀁

𑀚𑀦𑀸𑀥𑀺𑀧𑀁 𑀲𑀢𑁆𑀢𑀚𑀦𑀸’𑀩𑁆𑀭𑀯𑀼𑀁 𑀤𑁆𑀯𑀺𑀥𑀸; ()

𑁨𑁩. ¶

𑀲𑀘𑁂 𑀫𑀳𑀸𑀭𑀸𑀚 𑀅𑀕𑀸𑀭𑀫𑀸𑀯𑀲𑁂

𑀯𑀭𑁄𑀭𑀲𑁄 𑀢𑁂 𑀧𑀭𑀺𑀘𑀸𑀭𑀺𑀢𑀺𑀦𑁆𑀤𑁆𑀭𑀺𑀬𑁄,

𑀲𑀫𑀗𑁆𑀕𑀺𑀪𑀼𑀢𑁄 𑀭𑀢𑀦𑁂𑀳𑀺 𑀲𑀢𑁆𑀢𑀳𑀺

𑀪𑀯𑁂𑀬𑁆𑀬 𑀭𑀸𑀚𑀸 𑀯𑀢𑀘𑀓𑁆𑀓𑀯𑀢𑁆𑀬’𑀬𑀁; ()

𑁨𑁪.

𑀫𑀳𑀸𑀤𑀬𑁄’𑀬𑀁 𑀓𑀭𑀼𑀡𑀸𑀬 𑀘𑁄𑀤𑀺𑀢𑁄

𑀖𑀭𑀸’𑀪𑀺𑀕𑀦𑁆𑀢𑁆𑀯𑀸 𑀬𑀤𑀺 𑀧𑀩𑁆𑀩𑀚𑀺𑀲𑁆𑀲𑀢𑀺,

𑀪𑀯𑁂𑀬𑁆𑀬 𑀩𑀼𑀤𑁆𑀥𑁄’𑀔𑀺𑀮𑀜𑁂𑀬𑁆𑀬𑀫𑀡𑁆𑀟𑀮𑀁

𑀲𑀬𑀁 𑀅𑀪𑀺𑀜𑁆𑀜𑀸𑀬 𑀦𑀳𑁂’𑀢𑁆𑀣𑀲𑀁𑀲𑀬𑁄; ()

𑁨𑁫.

𑀓𑀡𑀺𑀝𑁆𑀞𑀪𑀽𑀢𑁄 𑀯𑀬𑀲𑀸 𑀢𑀤𑀦𑁆𑀢𑀭𑁂

𑀧𑀲𑀢𑁆𑀣𑀲𑀢𑁆𑀣𑀸’𑀯𑀕𑀫𑁂𑀦 𑀚𑁂𑀝𑁆𑀞𑀓𑁄,

𑀲𑀫𑀼𑀓𑁆𑀔𑀺𑀧𑀺𑀢𑁆𑀯𑀸’𑀗𑁆𑀕𑀼𑀮𑀺𑀫𑁂𑀓𑀫𑀩𑁆𑀭𑀼𑀯𑀺

𑀇𑀢𑀻𑀳 𑀓𑁄𑀡𑁆𑀟𑀜𑁆𑀜𑀲𑀫𑀜𑁆𑀜𑀪𑀼𑀲𑀼𑀭𑁄; ()

𑁨𑁬. ¶

𑀇𑀫𑀲𑁆𑀲 𑀯𑁂𑀦𑁂𑀬𑁆𑀬𑀚𑀦𑀸𑀓𑀢𑀜𑁆𑀚𑀮𑀻

𑀲𑀫𑀁 𑀨𑀼𑀲𑀦𑁆𑀢𑀸𑀦𑀺 𑀯𑀲𑀼𑀦𑁆𑀥𑀭𑀸𑀢𑀮𑀁,

𑀲𑀼𑀪𑀸𑀦𑀺 𑀪𑁄𑀧𑀸𑀤𑀢𑀮𑀸𑀢𑀺 𑀲𑀩𑁆𑀩𑀤𑀸

𑀪𑀚𑀦𑁆𑀢𑀺 𑀪𑀢𑁆𑀬𑀸 𑀓𑀫𑀮𑀸𑀦𑀺𑀯𑀸𑀮𑀺𑀦𑁄; ()

𑁨𑁭.

𑀇𑀫𑀲𑁆𑀲 𑀔𑁂𑀫𑀦𑁆𑀢𑀫𑀲𑁂𑀲𑀧𑀸𑀡𑀺𑀦𑁄

𑀢𑀺𑀧𑀝𑁆𑀝𑀓𑀦𑁆𑀢𑀸𑀭𑀧𑀣𑀸𑀯𑀢𑀸𑀭𑀡𑁂,

𑀲𑀼𑀲𑀚𑁆𑀚𑀺𑀢𑀁 𑀘𑀓𑁆𑀓𑀬𑀼𑀕𑀁𑀯 𑀧𑀸𑀭𑀫𑀻

𑀭𑀣𑀫𑁆𑀳𑀺 𑀧𑀸𑀤𑀗𑁆𑀓𑀺𑀢𑀘𑀓𑁆𑀓𑀮𑀓𑁆𑀔𑀡𑀁; ()

𑁨𑁮.

𑀇𑀫𑀲𑁆𑀲 𑀪𑁄 𑀓𑀫𑁆𑀩𑀮𑀪𑁂𑀡𑁆𑀟𑀼𑀓𑁄𑀧𑀫𑀁

𑀲𑀼𑀫𑀝𑁆𑀝𑀯𑀝𑁆𑀝𑀸𑀬𑀢𑀧𑀡𑁆𑀳𑀺𑀫𑀡𑁆𑀟𑀮𑀁,

𑀲𑀤𑀸 𑀧𑀤𑀫𑁆𑀪𑁄𑀚𑀦𑀺𑀯𑀸𑀲𑀮𑀓𑁆𑀔𑀺𑀬𑀸

𑀢𑀦𑁄𑀢𑀺 𑀧𑀻𑀦𑀢𑁆𑀣𑀦𑀧𑀺𑀡𑁆𑀟𑀯𑀺𑀩𑁆𑀪𑀫𑀁; ()

𑁨𑁯. ¶

𑀇𑀫𑀲𑁆𑀲 𑀤𑀻𑀖𑀗𑁆𑀕𑀼𑀮𑀺𑀧𑀦𑁆𑀢𑀺 𑀯𑀝𑁆𑀝𑀺𑀢-

𑀫𑀦𑁄𑀲𑀺𑀮𑀸𑀮𑀢𑁆𑀢𑀓𑀯𑀢𑁆𑀢𑀺𑀓𑁄𑀧𑀫𑀸,

𑀯𑀺𑀪𑀸𑀢𑀺 𑀪𑁄 𑀩𑀸𑀳𑀼𑀮𑀢𑀸𑀬 𑀧𑀸𑀭𑀫𑀻-

𑀮𑀢𑀸𑀬 𑀯𑀸 𑀦𑀽𑀢𑀦𑀧𑀢𑁆𑀢𑀧𑀦𑁆𑀢𑀺𑀯; ()

𑁩𑁦.

𑀇𑀫𑀲𑁆𑀲 𑀧𑀸𑀭𑁂𑀯𑀝𑀧𑀸𑀤 𑀧𑀸𑀝𑀮𑀸

𑀲𑀧𑀸𑀡𑀺𑀧𑀸𑀤𑀸 𑀢𑀴𑀼𑀡𑀸𑀢𑀺𑀓𑁄𑀫𑀮𑀸,

𑀉𑀴𑀸𑀭𑀧𑀽𑀚𑀸𑀯𑀺𑀥𑀺𑀲𑀫𑁆𑀧𑀝𑀺𑀘𑁆𑀙𑀦𑁂

𑀧𑀯𑀸𑀴𑀧𑀸𑀢𑀺’𑀯 𑀲𑀫𑀼𑀮𑁆𑀮𑀲𑀦𑁆𑀢𑀺 𑀪𑁄; ()

𑁩𑁧.

𑀇𑀫𑀲𑁆𑀲𑀭𑀽𑀧𑀲𑁆𑀲𑀺𑀭𑀺𑀫𑀦𑁆𑀤𑀺𑀭𑁄𑀤𑀭𑁂

𑀲𑀫𑀧𑁆𑀧𑀫𑀸𑀡𑀸𑀪𑀺𑀦𑀯𑀗𑁆𑀕𑀼𑀮𑀻𑀳𑀺 𑀪𑁄,

𑀧𑀤𑀺𑀲𑁆𑀲𑀭𑁂 𑀚𑀸𑀮𑀓𑀯𑀸𑀝𑀲𑀦𑁆𑀢𑀺𑀪𑀸

𑀲𑀧𑀸𑀡𑀺𑀧𑀸𑀤𑀸 𑀢𑀢𑀚𑀸𑀮𑀮𑀓𑁆𑀔𑀡𑀸 ()

𑁩𑁨. ¶

𑀇𑀫𑀲𑁆𑀲 𑀉𑀲𑁆𑀲𑀗𑁆𑀔𑀧𑀤𑀲𑁆𑀲 𑀕𑁄𑀧𑁆𑀨𑀓𑀸

𑀧𑀤𑀫𑁆𑀩𑀼𑀚𑀸𑀦𑀁 𑀘𑀢𑀼𑀭𑀗𑁆𑀕𑀼𑀮𑁄𑀧𑀭𑀺,

𑀧𑀢𑀺𑀝𑁆𑀞𑀺𑀢𑀸 𑀧𑀼𑀡𑁆𑀡𑀖𑀝𑁂𑀲𑀼𑀓𑀦𑁆𑀥𑀭𑀸-

𑀯𑀺𑀮𑀸𑀲𑀫𑀸𑀮𑀺𑀗𑁆𑀕𑀺𑀬 𑀭𑀸𑀚𑀪𑀸𑀲𑀭𑁂; ()

𑁩𑁩.

𑀇𑀫𑀲𑁆𑀲 𑀤𑁂𑀳𑀚𑁆𑀚𑀼𑀢𑀺𑀯𑀸𑀭𑀺𑀧𑀽𑀭𑀺𑀢-

𑀲𑀭𑀻𑀭𑀓𑁂𑀤𑀸𑀭𑀪𑀯𑀸 𑀨𑀮𑀢𑁆𑀣𑀺𑀦𑁄,

𑀲𑀼𑀭𑀢𑁆𑀢𑀲𑀸𑀮𑁆𑀬𑁄𑀤𑀭𑀲𑀦𑁆𑀦𑀺𑀪𑀸 𑀲𑀼𑀪𑀸

𑀤𑀼𑀯𑁂𑀡𑀺𑀚𑀗𑁆𑀖𑀸 𑀅𑀪𑀺𑀧𑀻𑀡𑀬𑀦𑁆𑀢𑀻 𑀪𑁄; ()

𑁩𑁪.

𑀇𑀫𑀲𑁆𑀲 𑀪𑁄 𑀚𑀸𑀦𑀼𑀬𑀼𑀕𑀁 𑀧𑀭𑀸𑀫𑀲𑀁

𑀅𑀦𑁄𑀦𑀫𑀦𑁆𑀢𑁄 𑀞𑀺𑀢𑀓𑁄 𑀫𑀳𑀸𑀪𑀼𑀚𑁄,

𑀲𑀳𑀢𑁆𑀢𑀦𑀸 𑀲𑀫𑁆𑀪𑀯𑀩𑁄𑀥𑀺𑀲𑀸𑀔𑀺𑀦𑁄

𑀯𑀺𑀲𑀸𑀮𑀲𑀸𑀔𑀸𑀬 𑀯𑀺𑀮𑀸𑀲𑀫𑀸𑀤𑀺𑀲𑁂; ()

𑁩𑁫.

𑀇𑀫𑀲𑁆𑀲 𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑀓𑁄

𑀅𑀪𑀺𑀦𑁆𑀦𑀓𑁄𑀓𑀸𑀲𑀓𑀓𑁄𑀲𑀓𑁄𑀲𑀕𑁄,

𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀤𑀺𑀦𑀸’𑀬𑀢𑀺𑀁

𑀅𑀦𑀗𑁆𑀕𑀲𑀗𑁆𑀕𑀸𑀫𑀧𑀭𑀫𑁆𑀫𑀼𑀔𑁄 𑀲𑀺𑀬𑀸; ()

𑁩𑁬. ¶

𑀇𑀫𑀲𑁆𑀲 𑀪𑁄 𑀕𑁄𑀢𑀫𑀕𑁄𑀢𑁆𑀢𑀓𑁂𑀢𑀼𑀦𑁄

𑀓𑀮𑁂𑀯𑀭𑁂 𑀓𑀜𑁆𑀘𑀦𑀲𑀢𑁆𑀢𑀺𑀪𑀢𑁆𑀢𑀘𑁄,

𑀲𑀼𑀯𑀡𑁆𑀡𑀯𑀡𑁆𑀡𑁄 𑀚𑀺𑀦𑀘𑀻𑀯𑀭𑀲𑁆𑀲𑀧𑀺

𑀢𑀦𑁄𑀢𑀺 𑀲𑁄𑀪𑀁 𑀖𑀦𑀩𑀼𑀤𑁆𑀥𑀭𑀁𑀲𑀺𑀦𑁄; ()

𑁩𑁭.

𑀇𑀫𑀲𑁆𑀲 𑀚𑀫𑁆𑀩𑁄𑀦𑀤𑀻𑀧𑀺𑀜𑁆𑀚𑀭𑀸𑀬 𑀪𑁄

𑀲𑀺𑀭𑀺𑀲𑀧𑀼𑀧𑁆𑀨𑀲𑁆𑀲𑀼𑀓𑀼𑀫𑀸𑀭𑀘𑀸𑀭𑀺𑀬𑀸

𑀭𑀚𑁄𑀦𑀼𑀫𑀢𑁆𑀢𑀁 𑀙𑀯𑀺𑀬𑀸 𑀦𑀮𑀺𑀫𑁆𑀧𑀢𑁂

𑀲𑀭𑁄𑀚𑀧𑀢𑁆𑀢𑁂𑀭𑀺𑀯 𑀯𑀸𑀭𑀺𑀩𑀺𑀦𑁆𑀤𑀯𑁄; ()

𑁩𑁮.

𑀇𑀫𑀲𑁆𑀲 𑀮𑁄𑀫𑀸𑀦𑀺 𑀓𑀮𑁂𑀯𑀭𑁂 𑀯𑀭𑁂

𑀯𑀺𑀲𑀼𑀁 𑀯𑀺𑀲𑀼𑀁 𑀓𑀽𑀧𑀕𑀢𑀸𑀦𑀺 𑀲𑀽𑀦𑀼𑀦𑁄,

𑀯𑀺𑀮𑀼𑀫𑁆𑀧𑀭𑁂 𑀭𑀽𑀧𑀯𑀺𑀮𑀸𑀲𑀮𑀓𑁆𑀔𑀺𑀬𑀸

𑀫𑀦𑁄𑀭𑀫𑀁 𑀪𑁄 𑀓𑀫𑀡𑀺𑀓𑀜𑁆𑀘𑀼𑀓𑀲𑁆𑀲𑀺𑀭𑀺𑀁; ()

𑁩𑁯. ¶

𑀇𑀫𑀲𑁆𑀲 𑀉𑀤𑁆𑀥𑀕𑁆𑀕𑀫𑀼𑀔𑀁 𑀫𑀼𑀔𑀲𑁆𑀲𑀺𑀭𑀺𑀁

𑀧𑀤𑀓𑁆𑀔𑀺𑀡𑀸𑀯𑀢𑁆𑀢 𑀫𑀧𑁂𑀓𑁆𑀔𑀺𑀦𑁄 𑀬𑀣𑀸,

𑀢𑀺𑀭𑁄𑀓𑀭𑁂 𑀭𑁄𑀫𑀯𑀺𑀢𑀸𑀦 𑀫𑀺𑀦𑁆𑀤𑀺𑀭𑀸-

𑀦𑀺𑀓𑁂𑀢𑀦𑀺𑀦𑁆𑀤𑀻𑀯𑀭𑀓𑀸𑀦𑀦𑀲𑁆𑀲𑀺𑀭𑀺𑀁; ()

𑁪𑁦.

𑀇𑀫𑀲𑁆𑀲 𑀪𑁄𑀭𑀸𑀚 𑀲𑀭𑁄𑀚𑀬𑁄𑀦𑀺𑀦𑁄

𑀬𑀣𑁄𑀚𑀼𑀕𑀢𑁆𑀢𑀁 𑀉𑀚𑀼𑀕𑀢𑁆𑀢𑀫𑀸𑀬𑀢𑀺𑀁,

𑀅𑀦𑀜𑁆𑀜𑀲𑀸𑀫𑀜𑁆𑀜𑀕𑀼𑀡𑀸𑀯𑀓𑀸𑀲𑀢𑁄

𑀧𑀚𑀸𑀪𑀺𑀧𑀽𑀚𑀸𑀯𑀺𑀥𑀺𑀪𑀸𑀚𑀦𑀁 𑀲𑀺𑀬𑀸; ()

𑁪𑁧.

𑀇𑀫𑀲𑁆𑀲 𑀲𑀢𑁆𑀢𑀼𑀲𑁆𑀲𑀤𑀮𑀓𑁆𑀔𑀡𑀁 𑀲𑀼𑀪𑀁

𑀲𑀫𑀁𑀲𑀫𑀤𑁆𑀤𑀺𑀝𑁆𑀞𑀲𑀺𑀭𑀸𑀯𑀮𑀺𑀁 𑀲𑀤𑀸,

𑀤𑀥𑀸𑀢𑀺 𑀪𑁄 𑀧𑀸𑀭𑀫𑀺𑀥𑀫𑁆𑀫𑀲𑀺𑀧𑀓𑁆𑀧𑀺𑀦𑁄

𑀲𑀼𑀥𑀦𑁆𑀢𑀘𑀸𑀫𑀻𑀓𑀭𑀧𑀺𑀡𑁆𑀟𑀯𑀺𑀩𑁆𑀪𑀫𑀁; ()

𑁪𑁨. ¶

𑀇𑀫𑀲𑁆𑀲 𑀧𑀼𑀡𑁆𑀡𑁄𑀪𑀬𑀓𑀸𑀬𑀪𑀸𑀕𑀺𑀫𑀁

𑀫𑀺𑀕𑀺𑀦𑁆𑀤𑀧𑀼𑀩𑁆𑀩𑀤𑁆𑀥𑀲𑀭𑀻𑀭𑀮𑀓𑁆𑀔𑀡𑀁,

𑀓𑀼𑀤𑀺𑀝𑁆𑀞𑀺𑀯𑀸𑀤𑀻𑀪𑀲𑀺𑀭𑁄𑀯𑀺𑀤𑀸𑀭𑀡𑁂

𑀦𑀭𑀺𑀦𑁆𑀤𑀲𑀸𑀫𑀢𑁆𑀣𑀺𑀬𑀫𑀼𑀩𑁆𑀩𑀳𑁂 𑀦𑀓𑀺𑀁; ()

𑁪𑁩.

𑀇𑀫𑀲𑁆𑀲𑀼’𑀧𑁂𑀢𑁄 𑀖𑀦𑀫𑀁𑀲𑀯𑀝𑁆𑀝𑀺𑀬𑀸

𑀘𑀺𑀢𑀦𑁆𑀢𑀭𑀁𑀲𑁄 𑀫𑀼𑀤𑀼𑀘𑀸𑀭𑀼𑀧𑀺𑀝𑁆𑀞𑀺𑀬𑀁,

𑀪𑀯𑀡𑁆𑀡𑀯𑀸 𑀓𑀜𑁆𑀘𑀦𑀧𑀘𑁆𑀘𑀭𑀺𑀲𑀺𑀭𑀁

𑀢𑀦𑁄𑀢𑀺 𑀲𑀢𑁆𑀢𑀼𑀢𑁆𑀢𑀭𑀡𑁂 𑀦𑀭𑀸𑀥𑀺𑀧; ()

𑁪𑁪.

𑀇𑀫𑀲𑁆𑀲 𑀦𑀺𑀕𑁆𑀭𑁄𑀥𑀫𑀳𑀻𑀭𑀼𑀳𑀲𑁆𑀲𑀺𑀯

𑀲𑀫𑀧𑁆𑀧𑀫𑀸𑀡𑁄 𑀧𑀭𑀺𑀫𑀡𑁆𑀟𑀮𑁄𑀧𑁆𑀬’𑀬𑀁,

𑀓𑀤𑀸𑀘𑀺 𑀤𑀼𑀓𑁆𑀔𑀸𑀢𑀧𑀔𑀺𑀦𑁆𑀦𑀤𑁂𑀳𑀺𑀦𑀁

𑀧𑀭𑀺𑀲𑁆𑀲𑀫𑀁 𑀪𑁄 𑀧𑀚𑀳𑁂 𑀪𑀯𑀜𑁆𑀚𑀲𑁂; ()

𑁪𑁫. ¶

𑀇𑀫𑀲𑁆𑀲 𑀭𑀸𑀚𑀺𑀢𑁆𑀢𑀬𑀭𑀜𑁆𑀚𑀺𑀢𑁄’𑀢𑁆𑀢𑀭𑀺𑀁

𑀓𑀭𑀻𑀬𑀫𑀸𑀦𑀼’𑀢𑁆𑀢𑀫𑀥𑀫𑁆𑀫𑀦𑀺𑀲𑁆𑀲𑀦𑁄,

𑀲𑀼𑀫𑀝𑁆𑀝𑀯𑀝𑁆𑀝𑁄 𑀲𑀫𑀯𑀢𑁆𑀢𑀔𑀦𑁆𑀥𑀓𑁄

𑀫𑀼𑀢𑀺𑀗𑁆𑀕𑀔𑀦𑁆𑀥𑁄𑀭𑀺𑀯 𑀭𑀸𑀚 𑀭𑀸𑀚𑀢𑁂; () (𑀲𑀺𑀮𑁂𑀲 𑀩𑀦𑁆𑀥𑀦𑀁)

𑁪𑁬.

𑀇𑀫𑀲𑁆𑀲 𑀪𑁄 𑀲𑀢𑁆𑀢𑀲𑀳𑀲𑁆𑀲𑀲𑀫𑁆𑀫𑀺𑀢𑀸

𑀬𑀣𑀸’𑀫𑀢𑀚𑁆𑀛𑁄𑀳𑀭𑀡𑀸𑀪𑀺𑀮𑀸𑀲𑀺𑀦𑁄,

𑀭𑀲𑀕𑁆𑀕𑀲𑀸 𑀲𑀦𑁆𑀢𑀺 𑀭𑀲𑀸𑀤𑀦𑀼𑀫𑁆𑀫𑀼𑀔𑀸

𑀭𑀲𑀕𑁆𑀕𑀲𑀕𑁆𑀕𑀻’𑀢𑁆𑀬’𑀪𑀺𑀥𑀻𑀬𑀢𑁂 𑀢𑀢𑁄; ()

𑁪𑁭.

𑀇𑀫𑀲𑁆𑀲’𑀦𑀼𑀩𑁆𑀬𑀜𑁆𑀚𑀦𑀢𑀸𑀭𑀓𑀸𑀓𑀼𑀮𑁂

𑀅𑀦𑀦𑁆𑀢𑀭𑀽𑀧𑀸𑀬𑀢𑀦𑀫𑁆𑀩𑀭𑁄 𑀤𑀭𑁂,

𑀯𑀺𑀭𑁄𑀘𑀢𑁂𑀩𑀸𑀭𑀲𑀫𑀻𑀲𑀲𑀺𑀭𑀺𑀯

𑀦𑀭𑀺𑀦𑁆𑀤𑀲𑀻𑀳𑀲𑁆𑀲𑀳𑀦𑀽𑀧𑀫𑀸𑀳𑀦𑀽; ()

𑁪𑁮. ¶

𑀇𑀫𑀲𑁆𑀲 𑀢𑀸𑀴𑀺𑀲𑀢𑀺𑀤𑀦𑁆𑀢𑀧𑀦𑁆𑀢𑀺 𑀪𑁄

𑀧𑀳𑀽𑀢𑀚𑀺𑀯𑁆𑀳𑀸𑀭𑀣𑀺𑀓𑀁 𑀘𑀭𑀦𑁆𑀢𑀺𑀬𑀸,

𑀫𑀦𑀼𑀜𑁆𑀜𑀯𑀸𑀡𑀺𑀯𑀦𑀺𑀢𑀸𑀬 𑀢𑀢𑁆𑀯𑀢𑁂

𑀧𑀲𑀢𑁆𑀣𑀫𑀼𑀢𑁆𑀢𑀸𑀯𑀮𑀺𑀮𑀻𑀮𑀫𑀸𑀬𑀢𑀺𑀁; ()

𑁪𑁯.

𑀇𑀫𑀲𑁆𑀲 𑀚𑀯𑁆𑀳𑀸𑀯𑀭𑀓𑀡𑁆𑀡𑀺𑀓𑀸𑀯𑀳𑁂

𑀫𑀼𑀔𑀫𑁆𑀩𑀼𑀚𑁂 𑀲𑀘𑁆𑀘𑀲𑀼𑀕𑀦𑁆𑀥𑀯𑀸𑀲𑀺𑀢𑁂,

𑀲𑀫𑀧𑁆𑀧𑀫𑀸𑀡𑀸 𑀤𑀲𑀦𑀸𑀯𑀮𑀻 𑀲𑀼𑀪𑀸

𑀯𑀺𑀪𑀸𑀢𑀺 𑀓𑀺𑀜𑁆𑀚𑀓𑁆𑀔𑀢𑀢𑀻𑀯 𑀪𑀽𑀧𑀢𑀻; ()

𑁫𑁦.

𑀇𑀫𑀲𑁆𑀲 𑀪𑁄 𑀔𑀡𑁆𑀟𑀺𑀢𑀲𑀗𑁆𑀔𑀧𑀡𑁆𑀟𑀭𑀸

𑀤𑁆𑀯𑀺𑀚𑀸𑀯𑀮𑀻 𑀦𑀺𑀩𑁆𑀩𑀺𑀯𑀭𑀦𑁆𑀢𑀭𑀸𑀬𑀢𑀺𑀁,

𑀲𑀫𑀼𑀩𑁆𑀪𑀯𑀸𑀬𑀼𑀢𑁆𑀢𑀺𑀮𑀢𑀸𑀬 𑀢𑀸𑀬𑀢𑀺

𑀫𑀼𑀔𑀸𑀮𑀯𑀸𑀴𑁂 𑀫𑀼𑀓𑀼𑀮𑀸𑀯𑀮𑀺𑀲𑁆𑀲𑀺𑀭𑀺𑀁; ()

𑁫𑁧. ¶

𑀇𑀫𑀲𑁆𑀲 𑀧𑀻𑀡𑀸𑀦𑀦𑀘𑀦𑁆𑀤𑀘𑀦𑁆𑀤𑀺𑀓𑀸

𑀲𑀼𑀲𑀼𑀓𑁆𑀓𑀤𑀸𑀞𑀸𑀯𑀮𑀺 𑀲𑀘𑁆𑀘𑀯𑀸𑀤𑀺𑀦𑁄,

𑀧𑀤𑀺𑀲𑁆𑀲𑀢𑁂 𑀥𑀫𑁆𑀫𑀢𑀴𑀸𑀓𑀓𑀻𑀴𑀦𑁂

𑀓𑀢𑀸𑀪𑀺𑀮𑀸𑀲𑀸𑀭𑀺𑀯𑀳𑀁𑀲𑀫𑀸𑀮𑀺𑀦𑀻; ()

𑁫𑁨.

𑀇𑀫𑀲𑁆𑀲 𑀘𑀸𑀦𑀼𑀢𑁆𑀢𑀭𑀥𑀫𑁆𑀫𑀤𑁂𑀲𑀦𑀸-

𑀢𑀭𑀡𑁆𑀬𑀫𑀸𑀮𑁄𑀮𑀮𑀓𑀸𑀭𑀭𑀽𑀧𑀺𑀦𑀻,

𑀧𑀳𑀽𑀢𑀚𑀺𑀯𑁆𑀳𑀸 𑀪𑀯𑀲𑀸𑀕𑀭𑀸’𑀬𑀢𑀺𑀁

𑀦𑀭𑀺𑀦𑁆𑀤 𑀧𑀸𑀭𑀁 𑀚𑀦𑀢𑀸’𑀯𑀢𑀸𑀭𑀬𑁂; ()

𑁫𑁩.

𑀇𑀫𑀲𑁆𑀲 𑀪𑁄 𑀩𑁆𑀭𑀳𑁆𑀫𑀲𑀭𑁄𑀧𑀫𑁄 𑀲𑀤𑀸

𑀲𑀳𑀲𑁆𑀲𑀥𑀸’𑀬𑀁 𑀓𑀭𑀯𑀻𑀓𑀭𑀸𑀯𑀢𑁄,

𑀫𑀦𑁄𑀳𑀭𑀝𑁆𑀞𑀗𑁆𑀕𑀲𑀫𑀗𑁆𑀕𑀺𑀲𑀼𑀲𑁆𑀲𑀭𑁄

𑀲𑀲𑁄𑀢𑀓𑀸𑀦𑀁 𑀫𑀡𑀺𑀓𑀼𑀡𑁆𑀟𑀮𑀸𑀬𑀢𑁂; ()

𑁫𑁪. ¶

𑀇𑀫𑀲𑁆𑀲 𑀦𑀻𑀮𑀁 𑀦𑀬𑀦𑀼𑀧𑁆𑀧𑀮𑀜𑁆𑀘𑀬𑀁

𑀦𑀺𑀭𑀽𑀧𑀫𑁂 𑀭𑀽𑀧𑀯𑀺𑀮𑀸𑀲𑀫𑀦𑁆𑀤𑀺𑀭𑁂,

𑀦𑀺𑀭𑁄𑀧𑀺𑀢𑀁 𑀪𑁄 𑀫𑀡𑀺𑀲𑀻𑀳𑀧𑀜𑁆𑀚𑀭-

𑀤𑁆𑀯𑀬𑀁𑀯 𑀪𑀸𑀲𑁂 𑀓𑀼𑀲𑀮𑁂𑀦 𑀓𑁂𑀦𑀘𑀺; ()

𑁫𑁫.

𑀇𑀫𑀲𑁆𑀲 𑀧𑀸𑀞𑀻𑀦𑀬𑀼𑀕𑀁’𑀯 𑀤𑀺𑀲𑁆𑀲𑀢𑁂

𑀯𑀺𑀲𑀺𑀝𑁆𑀞𑀭𑀽𑀧𑀸𑀬𑀢𑀦𑀸𑀧𑀕𑀸𑀲𑀬𑀁,

𑀲𑀼𑀪𑀁 𑀕𑀯𑀘𑁆𑀙𑀸𑀧𑀯𑀺𑀮𑁄𑀘𑀦𑁄𑀧𑀫𑀁

𑀫𑀡𑀺𑀧𑁆𑀧𑀪𑀁 𑀕𑁄𑀧𑀔𑀼𑀫𑀤𑁆𑀯𑀬𑀁 𑀲𑀤𑀸; ()

𑁫𑁬.

𑀇𑀫𑀲𑁆𑀲𑀸 𑀉𑀡𑁆𑀡𑀸 𑀪𑀫𑀼𑀓𑀦𑁆𑀢𑀭𑀼𑀩𑁆𑀪𑀯𑀸

𑀴𑀸𑀝𑀫𑀚𑁆𑀛𑁄𑀧𑀕𑀢𑀸 𑀯𑀺𑀭𑁄𑀘𑀢𑀺,

𑀬𑀤𑀢𑁆𑀣𑀺 𑀲𑀜𑀛𑀸𑀖𑀦𑀭𑀸𑀚𑀺𑀫𑀚𑁆𑀛𑀕𑀁

𑀲𑀲𑀗𑁆𑀓𑀳𑀻𑀦𑀁 𑀲𑀲𑀺𑀫𑀡𑁆𑀟𑀮𑀁 𑀢𑀣𑀸 ()

𑁫𑁭. ¶

𑀇𑀫𑀲𑁆𑀲 𑀉𑀡𑁆𑀳𑀻𑀲𑀓𑀲𑀻𑀲𑀮𑀓𑁆𑀔𑀡𑀁

𑀲𑀥𑀫𑁆𑀫𑀭𑀚𑁆𑀚𑀺𑀲𑁆𑀲𑀭𑀺𑀬𑀁 𑀅𑀦𑀸𑀕𑀢𑁂,

𑀓𑀭𑀺𑀬𑀫𑀸𑀦𑀲𑁆𑀲 𑀳𑀺 𑀘𑀓𑁆𑀓𑀯𑀢𑁆𑀢𑀺𑀦𑁄

𑀤𑀥𑀸𑀢𑀺 𑀉𑀡𑁆𑀳𑀻𑀲𑀓𑀲𑀺𑀲𑀯𑀺𑀩𑁆𑀪𑀫𑀁; ()

𑁫𑁮.

𑀇𑀫𑀲𑁆𑀲 𑀪𑀼𑀫𑀺𑀲𑁆𑀲𑀭 𑀲𑀼𑀧𑀓𑁆𑀧𑀢𑀺𑀝𑁆𑀞𑀺𑀢-

𑀧𑀤𑀗𑁆𑀓𑀺𑀢𑁂 𑀘𑀓𑁆𑀓𑀬𑀼𑀕𑀫𑁆𑀳𑀺 𑀤𑀺𑀲𑁆𑀲𑀭𑁂,

𑀅𑀭𑀸𑀲𑀳𑀲𑁆𑀲𑀸𑀦𑀺 𑀘 𑀦𑁂𑀫𑀺𑀦𑀸𑀪𑀺𑀬𑁄

𑀢𑀺𑀯𑀝𑁆𑀝𑀭𑁂𑀔𑀸 𑀲𑀺𑀭𑀺𑀯𑀘𑁆𑀙𑀓𑀸𑀤𑀬𑁄; ()

𑁫𑁯.

𑀇𑀫𑁂𑀳𑀺 𑀩𑀢𑁆𑀢𑀺𑀁𑀲𑀢𑀺𑀮𑀓𑁆𑀔𑀡𑁂𑀳𑀺 𑀪𑁄

𑀅𑀲𑀻𑀢𑁆𑀬𑀦𑀼𑀩𑁆𑀬𑀜𑁆𑀚𑀦𑀮𑀓𑁆𑀔𑀡𑁂𑀳𑀺’𑀧𑀺,

𑀲𑀫𑀼𑀚𑁆𑀚𑀮𑀦𑁆𑀢𑁄 𑀧𑀼𑀭𑀺𑀲𑀸𑀲𑀪𑁄𑀢𑁆𑀬𑀬𑀁

𑀪𑀯𑁂𑀬𑁆𑀬 𑀩𑀼𑀤𑁆𑀥𑁄 𑀪𑀯𑀩𑀦𑁆𑀥𑀦𑀘𑁆𑀙𑀺𑀤𑁄; ()

𑁬𑁦. ¶

𑀲𑀲𑁄𑀢𑀫𑀸𑀧𑀸𑀣𑀕𑀢𑀸𑀬 𑀢𑀸𑀯𑀤𑁂

𑀤𑁆𑀯𑀺𑀚𑀲𑁆𑀲 𑀯𑀺𑀢𑁆𑀣𑀸𑀭𑀓𑀣𑀸𑀬 𑀘𑁄𑀤𑀺𑀢𑁄,

𑀅𑀧𑀼𑀘𑁆𑀙𑀺 𑀭𑀸𑀚𑀸 𑀓𑀺𑀫𑀬𑀁 𑀲𑀫𑁂𑀓𑁆𑀔𑀺𑀬

𑀅𑀦𑀸𑀕𑀢𑁂 𑀩𑁆𑀭𑀸𑀳𑁆𑀫𑀡 𑀧𑀩𑁆𑀩𑀚𑀺𑀲𑁆𑀲𑀢𑀺; ()

𑁬𑁧.

𑀓𑀤𑀸𑀘𑀺 𑀉𑀬𑁆𑀬𑀸𑀦𑀕𑀢𑁄 𑀫𑀳𑀸𑀧𑀣𑁂

𑀚𑀭𑀸𑀭𑀼𑀚𑀸𑀫𑀘𑁆𑀘𑀼𑀯𑀺𑀭𑀽𑀧𑀤𑀲𑁆𑀲𑀦𑀁,

𑀯𑀺𑀥𑀸𑀬 𑀦𑀺𑀩𑁆𑀩𑀺𑀦𑁆𑀢𑀫𑀦𑁄 𑀪𑀯𑀢𑁆𑀢𑀬𑁂

𑀢𑀧𑁄𑀥𑀦𑀁 𑀧𑀲𑁆𑀲𑀺𑀬 𑀧𑀩𑁆𑀩𑀚𑀺𑀲𑁆𑀲𑀢𑀺; ()

𑁬𑁨.

𑀇𑀢𑀺𑀳 𑀯𑀢𑁆𑀯𑀸𑀦 𑀲𑀓𑀁𑀲𑀓𑀁 𑀖𑀭𑀁

𑀢𑀢𑁄’𑀧𑀕𑀦𑁆𑀢𑁆𑀯𑀸’𑀤𑁆𑀥𑀦𑀺𑀫𑀺𑀢𑁆𑀢𑀧𑀸𑀞𑀓𑀸,

𑀫𑀳𑀮𑁆𑀮𑀓𑀸’𑀤𑀸𑀦𑀺 𑀫𑀬𑀦𑁆𑀢𑀺 𑀲𑀼𑀦𑀯𑁄

𑀢𑀫𑀸𑀦𑀼𑀧𑀩𑁆𑀩𑀚𑁆𑀚𑀺𑀢𑀼𑀫𑁄𑀯𑀤𑀺𑀁𑀲𑀼 𑀢𑁂; ()

𑁬𑁩. ¶

𑀤𑁆𑀯𑀺𑀚𑁂𑀲𑀼 𑀯𑀼𑀤𑁆𑀥𑁂𑀲𑀼 𑀫𑀢𑁂𑀲𑀼 𑀲𑀢𑁆𑀢𑀲𑀼

𑀅𑀬𑀁𑀳𑀺 𑀓𑁄𑀡𑁆𑀟𑀜𑁆𑀜𑀲𑀫𑀯𑁆𑀳𑀬𑁄 𑀲𑀼𑀥𑀻,

𑀫𑀳𑀸𑀧𑀥𑀸𑀦𑀁 𑀧𑀼𑀭𑀺𑀲𑀸𑀲𑀪𑁄’𑀥𑀼𑀦𑀸

𑀓𑀭𑁄𑀢𑀺 𑀲𑀼𑀢𑁆𑀯𑀸 𑀓𑀭𑀼𑀡𑀸𑀬 𑀘𑁄𑀤𑀺𑀢𑁄; ()

𑁬𑁪.

𑀲𑀫𑀸𑀦𑀮𑀤𑁆𑀥𑀺𑀳𑀺 𑀓𑀼𑀮𑁂𑀲𑀼 𑀢𑁂𑀲𑀼 𑀳𑀺

𑀘𑀢𑀼𑀳𑀺 𑀯𑀺𑀧𑁆𑀧𑁂𑀳𑀺 𑀲𑀳’𑀦𑁆𑀢𑀧𑀜𑁆𑀘𑀫𑁄,

𑀅𑀣𑁄’𑀭𑀼𑀯𑁂𑀮𑀁 𑀉𑀧𑀕𑀫𑁆𑀫 𑀧𑀩𑁆𑀩𑀚𑀺

𑀪𑀯𑀺𑀁𑀲𑀼 𑀢𑁂𑀧𑀜𑁆𑀘𑀺’𑀥 𑀧𑀜𑁆𑀘𑀯𑀕𑁆𑀕𑀺𑀬𑀸; ()

𑁬𑁫.

𑀓𑀤𑀸𑀘𑀺 𑀮𑀤𑁆𑀥𑀸 𑀧𑀭𑀺𑀬𑀦𑁆𑀢𑀲𑀸𑀕𑀭𑀁

𑀇𑀫𑀁 𑀘𑀢𑀼𑀤𑁆𑀤𑀻𑀧𑀺𑀓𑀭𑀚𑁆𑀚𑀫𑀢𑁆𑀭𑀚𑀁,

𑀚𑀺𑀢𑀸𑀭𑀺𑀯𑀕𑁆𑀕𑀁 𑀯𑀺𑀘𑀭𑀦𑁆𑀢𑀫𑀫𑁆𑀩𑀭𑁂

𑀓𑀭𑁄𑀫𑀺 𑀧𑀘𑁆𑀘𑀓𑁆𑀔𑀫𑀳𑀦𑁆𑀢𑀺 𑀘𑀺𑀦𑁆𑀢𑀺𑀬; ()

𑁬𑁬.

𑀦𑀺𑀫𑀺𑀢𑁆𑀢𑀭𑀽𑀧𑀓𑁆𑀔𑀺𑀧𑀣𑀧𑁆𑀧𑀯𑁂𑀲𑀦𑀁

𑀦𑀺𑀯𑀸𑀭𑀡𑀢𑁆𑀣𑀁 𑀢𑀦𑀺𑀚𑀭𑀸𑀚𑀲𑀽𑀦𑀼𑀦𑀸,

𑀦𑀭𑀸𑀥𑀺𑀧𑁄 𑀲𑁄 𑀧𑀼𑀭𑀺𑀲𑁂𑀳𑀺 𑀲𑀩𑁆𑀩𑀣𑀸

𑀤𑀺𑀲𑀸𑀲𑀼 𑀭𑀓𑁆𑀔𑀸𑀯𑀭𑀡𑀁 𑀅𑀓𑀸𑀭𑀬𑀺; ()

𑁬𑁭. ¶

𑀅𑀬𑀁 𑀓𑀼𑀫𑀸𑀭𑁄 𑀬𑀤𑀺 𑀘𑀓𑁆𑀓𑀯𑀢𑁆𑀢𑀺𑀯𑀸

𑀪𑀯𑁂𑀬𑁆𑀬 𑀲𑀫𑁆𑀩𑁄𑀥𑀺𑀧𑀤𑀁 𑀮𑀪𑁂𑀬𑁆𑀬𑀯𑀸,

𑀲𑀓𑁂𑀓𑀼𑀮𑁂 𑀔𑀢𑁆𑀢𑀺𑀬𑀩𑀦𑁆𑀥𑀯𑁂𑀳𑀺 𑀲𑁄

𑀧𑀼𑀭𑀓𑁆𑀔𑀢𑁄𑀬𑁂𑀯 𑀘𑀭𑀺𑀲𑁆𑀲𑀢𑀁 𑀇𑀢𑀺; ()

𑁬𑁮.

𑀓𑀼𑀫𑀸𑀭𑀦𑀸𑀫𑀝𑁆𑀞𑀧𑀦𑀫𑁆𑀳𑀺 𑀯𑀸𑀲𑀭𑁂

𑀲𑀳𑀲𑁆𑀲𑀫𑀢𑁆𑀢𑁂𑀲𑀼 𑀓𑀼𑀮𑁂𑀲𑁆𑀯’𑀲𑀺𑀢𑀺𑀬𑀸,

𑀅𑀤𑀸𑀲𑀺 𑀧𑀘𑁆𑀘𑁂𑀓𑀚𑀦𑁄 𑀧𑀝𑀺𑀲𑁆𑀲𑀯𑀁

𑀧𑀤𑀸𑀢𑀼𑀓𑀸𑀫𑁄𑀯 𑀯𑀺𑀲𑀼𑀁𑀯𑀺𑀲𑀼𑀁 𑀲𑀼𑀢𑁂; ()

𑁬𑁯.

𑀅𑀲𑁂𑀲𑀤𑁄𑀲𑀸𑀧𑀕𑀢𑀸 𑀲𑀼𑀔𑁂𑀥𑀺 𑀢𑀸

𑀲𑀼𑀯𑀡𑁆𑀡𑀓𑀼𑀫𑁆𑀪𑁄𑀭𑀼𑀧𑀬𑁄𑀥𑀭𑁄 𑀦 𑀢𑀸,

𑀅𑀦𑁂𑀓𑀥𑀸𑀢𑀻 𑀯𑀭𑀯𑀡𑁆𑀡𑀕𑀩𑁆𑀩𑀺 𑀢𑀸

𑀲𑀧𑀘𑁆𑀘𑀼𑀧𑀝𑁆𑀞𑀸𑀧𑀬𑀺 𑀢𑀗𑁆𑀔𑀡𑁂𑀧𑀺 𑀢𑀸; ()

𑁭𑁦. ¶

𑀢𑀴𑀸𑀓𑀢𑀻𑀭𑀫𑁆𑀳𑀺 𑀢𑀭𑀗𑁆𑀕𑀪𑀸𑀲𑀼𑀭𑁂

𑀬𑀣𑁂𑀯 𑀳𑀁𑀲𑁆𑀬𑀸 𑀓𑀮𑀳𑀁𑀲𑀧𑁄𑀢𑀓𑀁,

𑀫𑀳𑁂𑀲𑀺𑀬𑀸’𑀗𑁆𑀓𑁂 𑀲𑀬𑀦𑁂 𑀲𑀺𑀢𑀢𑁆𑀣𑀭𑁂

𑀲𑀼𑀯𑀸𑀲𑀭𑁂 𑀪𑀼𑀧𑀢𑀺 𑀧𑀼𑀢𑁆𑀢𑀫𑀤𑁆𑀤𑀲; ()

𑁭𑁧.

𑀅𑀤𑀺𑀝𑁆𑀞𑀧𑀼𑀢𑁆𑀢𑀸𑀦𑀦𑀧𑀗𑁆𑀓𑀚𑀸 𑀘𑀺𑀭𑀁

𑀮𑀳𑀼𑀁 𑀧𑀭𑀺𑀓𑁆𑀔𑀻𑀡𑀯𑀬𑁄𑀕𑀼𑀡𑀸 𑀇𑀢𑁄,

𑀘𑀼𑀢𑀸’𑀯 𑀫𑀸𑀬𑀸𑀚𑀦𑀦𑀺 𑀦𑀺𑀭𑀸𑀫𑀬𑀸

𑀉𑀧𑀸𑀯𑀺𑀲𑀺 𑀲𑀢𑁆𑀢𑀫𑀯𑀸𑀲𑀭𑁂 𑀤𑀺𑀯𑀁; ()

𑁭𑁨.

𑀫𑀳𑁂𑀲𑀺𑀫𑀸𑀬𑀸𑀪𑀕𑀺𑀦𑀻 𑀢𑀤𑀸 𑀫𑀳𑀸-

𑀧𑀚𑀸𑀧𑀢𑀺𑀕𑁄𑀢𑀫𑀺𑀦𑀸𑀫𑀭𑀸𑀚𑀺𑀦𑀻,

𑀦𑀺𑀚𑀁 𑀓𑀼𑀫𑀸𑀭𑀁 𑀪𑀭𑀡𑀸𑀬 𑀥𑀸𑀢𑀺𑀦𑀁

𑀯𑀺𑀥𑀸𑀬 𑀪𑀸𑀭𑀁 𑀧𑀝𑀺𑀚𑀕𑁆𑀕𑀺 𑀢𑀁 𑀲𑀬𑀁; ()

𑁭𑁩. ¶

𑀢𑀤𑀸’𑀪𑀯𑀼𑀁 𑀤𑀻𑀧𑀲𑀺𑀔𑀸 𑀚𑀕𑀦𑁆𑀢𑀬𑁂

𑀓𑀮𑁂𑀩𑀭𑁄’𑀪𑀸𑀲𑀮𑀯𑁂𑀦 𑀲𑀼𑀦𑀼𑀦𑁄,

𑀯𑀺𑀦𑀝𑁆𑀞𑀢𑁂𑀚𑀸𑀭𑀺𑀯 𑀭𑀗𑁆𑀕𑀤𑀻𑀧𑀺𑀓𑀸

𑀯𑀺𑀫𑀸𑀦𑀤𑀺𑀧𑁂𑀲𑀼 𑀓𑀣𑀸𑀯𑀓𑀸’𑀢𑁆𑀢𑀦𑁄; ()

𑁭𑁪.

𑀯𑀺𑀘𑀺𑀢𑁆𑀢𑀪𑀼𑀫𑁆𑀫𑀢𑁆𑀣𑀭𑀡𑁂 𑀅𑀪𑀺𑀓𑁆𑀔𑀡𑀁

𑀲𑀚𑀦𑁆𑀦𑀼𑀓𑁂𑀳𑀸’𑀘𑀭𑀺 𑀫𑀦𑁆𑀤𑀺𑀭𑁄𑀤𑀭𑁂,

𑀫𑀳𑀸𑀯𑀦𑀲𑁆𑀫𑀺𑀁 𑀫𑀡𑀺𑀯𑀸𑀮𑀼𑀓𑀸𑀢𑀮𑁂

𑀯𑀺𑀚𑀫𑁆𑀪𑀫𑀸𑀦𑁄𑀭𑀺𑀯 𑀲𑀺𑀳𑀧𑁄𑀢𑀓𑁄; ()

𑁭𑁫.

𑀲𑀼𑀢𑀲𑁆𑀲 𑀓𑀻𑀴𑀸𑀧𑀲𑀼𑀢𑀲𑁆𑀲 𑀫𑀦𑁆𑀤𑀺 𑀭𑁂

𑀪𑀫𑀦𑁆𑀢𑀩𑀺𑀫𑁆𑀩𑀁 𑀫𑀡𑀺𑀤𑀧𑁆𑀧𑀡𑁄𑀤 𑀭𑁂

𑀦𑀺𑀩𑀤𑁆𑀥𑀫𑀤𑁆𑀤𑀓𑁆𑀔𑀺 𑀘𑀭𑀦𑁆𑀢𑀫𑀫𑁆𑀩 𑀭𑁂

𑀬𑀣𑁂𑀯 𑀘𑀓𑁆𑀓𑀁 𑀭𑀢𑀦𑀁 𑀫𑀳𑀻𑀪𑀼 𑀚𑁄; ()

𑁭𑁬. ¶

𑀢𑀤𑀗𑁆𑀖𑀺𑀯𑀺𑀜𑁆𑀜𑀸𑀲𑀯𑀲𑁂𑀦 𑀪𑀼𑀫𑀺𑀬𑀸

𑀯𑀚𑀦𑁆𑀢𑀫𑀗𑁆𑀓𑁄’𑀧𑀦𑀺𑀥𑀸𑀬 𑀪𑀼𑀫𑀺𑀧𑁄,

𑀢𑀤𑀸’𑀪𑀺𑀦𑀺𑀘𑁆𑀙𑀸𑀭𑀺𑀢 𑀫𑀸𑀲𑀪𑀺𑀁 𑀕𑀺𑀭𑀁

𑀇𑀤𑀸𑀦𑀺 𑀫𑀁 𑀲𑀸𑀯𑀬 𑀧𑀼𑀢𑁆𑀢𑀫𑀩𑁆𑀭𑀼𑀯𑀺; ()

𑁭𑁭.

𑀦𑀺𑀩𑀤𑁆𑀥𑀫𑀦𑁆𑀢𑁄𑀫𑀡𑀺𑀯𑁂𑀤𑀺𑀓𑀸𑀢𑀮𑁂

𑀫𑀼𑀔𑁂𑀦𑁆𑀤𑀼𑀩𑀺𑀫𑁆𑀩𑀼𑀤𑁆𑀥𑀭𑀡𑁂 𑀧𑀬𑁄𑀚𑀬𑀁,

𑀲𑀬𑀁 𑀧𑀮𑀫𑁆𑀪𑁂𑀲𑀺 𑀅𑀫𑀘𑁆𑀘𑀲𑀽𑀦𑀯𑁄

𑀯𑀬𑁂𑀦 𑀫𑀦𑁆𑀤𑁄’𑀧𑀺 𑀅𑀫𑀦𑁆𑀤𑀩𑀼𑀤𑁆𑀥𑀺𑀫𑀸; ()

𑁭𑁮.

𑀉𑀴𑀸𑀭𑀲𑁄𑀓𑀁 𑀧𑀺𑀢𑀼𑀘𑀺𑀢𑁆𑀢𑀲𑀫𑁆𑀪𑀯𑀁

𑀢𑀺𑀮𑁄𑀓𑀤𑀻𑀧𑁄 𑀦𑀺𑀚𑀧𑀼𑀜𑁆𑀜𑀢𑁂𑀚𑀲𑀸,

𑀢𑀫𑁄𑀧𑀩𑀦𑁆𑀥𑀁 𑀪𑀼𑀯𑀦𑁄’𑀤𑀭𑀼𑀩𑁆𑀪𑀯𑀁

𑀦𑀺𑀭𑀸𑀓𑀭𑀺 𑀩𑀸𑀮𑀭𑀯𑀻’𑀯 𑀭𑀁𑀲𑀺𑀦𑀸; ()

𑁭𑁯.

𑀯𑀺𑀓𑀺𑀡𑁆𑀡𑀮𑀸𑀚𑀸𑀓𑀼𑀲𑀼𑀫𑀸𑀓𑀼𑀮𑀜𑁆𑀚𑀲𑁂

𑀯𑀺𑀢𑀸𑀦𑀭𑀗𑁆𑀕𑀤𑁆𑀥𑀚𑀦𑀺𑀩𑁆𑀪𑀭𑀫𑁆𑀩𑀭𑁂,

𑀧𑀼𑀭𑁂 𑀢𑀳𑀺𑀁 𑀫𑀗𑁆𑀕𑀮𑀓𑀺𑀘𑁆𑀘𑀲𑀫𑁆𑀫𑀢𑀁

𑀓𑀤𑀸𑀘𑀺 𑀭𑀜𑁆𑀜𑁄 𑀪𑀯𑀺 𑀯𑀧𑁆𑀧𑀫𑀗𑁆𑀕𑀮𑀁; ()

𑁮𑁦. ¶

𑀲𑀼𑀕𑀦𑁆𑀥𑀫𑀸𑀮𑀸𑀪𑀭𑀡𑀸𑀤𑀺𑀫𑀡𑁆𑀟𑀺𑀢-

𑀧𑀲𑀸𑀥𑀺𑀢𑀸 𑀓𑀸𑀧𑀺𑀮𑀯𑀢𑁆𑀣𑀯𑀸 𑀦𑀭𑀸,

𑀲𑀓𑀺𑀗𑁆𑀓𑀭𑀸 𑀓𑀫𑁆𑀫𑀓𑀭𑀸’𑀧𑀺 𑀓𑀧𑁆𑀧𑀺𑀢𑀸

𑀢𑀢𑁄 𑀢𑀢𑁄 𑀲𑀢𑁆𑀢𑀺𑀧𑀢𑀺𑀁𑀲𑀼 𑀢𑀁 𑀓𑀼𑀮𑀁; ()

𑁮𑁧.

𑀫𑀳𑀘𑁆𑀘𑀲𑁂𑀦𑀸𑀬𑀧𑀼𑀭𑀓𑁆𑀔𑀢𑁄𑀳𑀺𑀲𑁄

𑀉𑀴𑀸𑀭𑀭𑀸𑀚𑀺𑀤𑁆𑀥𑀺𑀲𑀫𑀼𑀚𑁆𑀚𑀮𑀁𑀢𑀢𑁄

𑀧𑀬𑀸𑀲𑀺𑀓𑀫𑁆𑀫𑀦𑁆𑀢𑀧𑀤𑁂𑀲𑀫𑀢𑁆𑀭𑀚𑀁

𑀓𑀼𑀫𑀸𑀭𑀫𑀸𑀤𑀸𑀬𑀧𑀼𑀭𑀺𑀦𑁆𑀤𑀤𑁄𑀧𑀫𑁄; ()

𑁮𑁨.

𑀙𑀡𑀫𑁆𑀳𑀺 𑀢𑀲𑁆𑀫𑀺𑀁 𑀫𑀦𑀼𑀯𑀁𑀲𑀓𑁂𑀢𑀼𑀦𑁄

𑀫𑀦𑁄𑀭𑀫𑀁 𑀫𑀗𑁆𑀕𑀮𑀦𑀗𑁆𑀕𑀮𑀸𑀤𑀺𑀓𑀁,

𑀲𑀼𑀯𑀡𑁆𑀡𑀧𑀝𑁆𑀝𑁂𑀳𑀺 𑀧𑀭𑀺𑀓𑁆𑀔𑀝𑀁𑀓 𑀫𑀳𑀸-

𑀚𑀦𑀲𑁆𑀲’𑀧𑀻 𑀭𑀽𑀧𑀺𑀬𑀧𑀝𑁆𑀝𑀙𑀸𑀤𑀺𑀢𑀁; ()

𑁮𑁩. ¶

𑀯𑀺𑀲𑀸𑀮𑀲𑀸𑀔𑀸𑀓𑀼𑀮𑀚𑀫𑁆𑀩𑀼𑀲𑀸𑀔𑀺𑀦𑁄

𑀯𑀺𑀥𑀸𑀬 𑀳𑁂𑀝𑁆𑀞𑀸 𑀲𑀬𑀦𑁂 𑀫𑀳𑀸𑀭𑀳𑁂,

𑀦𑀺𑀚𑀁 𑀓𑀼𑀫𑀸𑀭𑀁 𑀲𑀚𑀦𑁄 𑀚𑀦𑀸𑀥𑀺𑀧𑁄

𑀲𑀫𑀸𑀭𑀳𑀻 𑀲𑀫𑁆𑀧𑀢𑀺 𑀯𑀧𑁆𑀧𑀫𑀗𑁆𑀕𑀮𑀁; ()

𑁮𑁪.

𑀓𑀼𑀫𑀸𑀭𑀭𑀓𑁆𑀔𑀸𑀯𑀭𑀡𑀸𑀬𑀼’𑀧𑀝𑁆𑀞𑀺𑀢𑀸

𑀢𑀫𑀼𑀲𑁆𑀲𑀯𑀁 𑀥𑀸𑀢𑀺𑀚𑀦𑀸 𑀯𑀺𑀧𑀲𑁆𑀲𑀺𑀢𑀼𑀁,

𑀅𑀧𑀓𑁆𑀓𑀫𑀺𑀢𑁆𑀯𑀸 𑀩𑀳𑀺 𑀲𑀸𑀡𑀺𑀢𑁄 𑀔𑀡𑀁

𑀧𑀫𑀢𑁆𑀢𑀭𑀽𑀧𑀸 𑀯𑀺𑀘𑀭𑀺𑀁𑀲𑁆𑀯𑀺’𑀢𑁄𑀘𑀺𑀢𑁄; ()

𑁮𑁫.

𑀧𑀭𑀺𑀕𑁆𑀕𑀳𑁂𑀢𑁆𑀯𑀸’𑀦𑀫𑀧𑀸𑀦 𑀫𑀸𑀲𑀦𑁂

𑀦𑀺𑀲𑀚𑁆𑀚 𑀧𑀮𑁆𑀮𑀗𑁆𑀓 𑀫𑀮𑀢𑁆𑀣 𑀩𑀦𑁆𑀥𑀺𑀬,

𑀚𑀺𑀦𑀗𑁆𑀓𑀼𑀭𑁄 𑀦𑀻𑀯𑀭𑀡𑁂𑀳𑀺 𑀦𑀺𑀲𑁆𑀲𑀝𑀁

𑀯𑀺𑀯𑁂𑀓𑀚𑀁 𑀛𑀸𑀦𑀫𑀕𑀸𑀥𑀩𑀼𑀤𑁆𑀥𑀺𑀫𑀸; ()

𑁮𑁬. ¶

𑀯𑀺𑀧𑀲𑁆𑀲 𑀧𑀼𑀢𑁆𑀢𑀲𑁆𑀲𑀼’𑀧𑀯𑁂𑀲𑀦𑀁 𑀢𑀳𑀺𑀁

𑀤𑀼𑀫𑀲𑁆𑀲 𑀙𑀸𑀬𑀸𑀬 𑀦𑀺𑀯𑀢𑁆𑀢𑀢𑀁 𑀢𑀣𑀸,

𑀧𑀯𑀦𑁆𑀤𑀺 𑀭𑀸𑀚𑀸 𑀧𑀝𑀺𑀳𑀸𑀭𑀺𑀓𑀸𑀓𑀣𑀸-

𑀧𑀘𑁄𑀤𑀺𑀢𑁄𑀧𑀼𑀢𑁆𑀢𑀫𑀼𑀧𑁂𑀘𑁆𑀘 𑀢𑀗𑁆𑀔𑀡𑁂; ()

𑁮𑁭.

𑀓𑀮𑀸𑀲𑀼 𑀯𑀼𑀚𑁆𑀚𑀸𑀲𑀼 𑀘 𑀧𑀼𑀢𑁆𑀢𑀫𑀢𑁆𑀢𑀦𑁄

𑀯𑀺𑀦𑁂𑀢𑀼𑀓𑀸𑀫𑁄 𑀯𑀺𑀦𑀬𑀓𑁆𑀔𑀫𑀁 𑀧𑀺𑀢𑀸;

𑀧𑀲𑀢𑁆𑀣𑀲𑀢𑁆𑀣𑀦𑁆𑀢𑀭𑀧𑀸𑀭𑀤𑀲𑁆𑀲𑀺𑀦𑀁

𑀓𑀤𑀸𑀘𑀺 𑀯𑀺𑀧𑁆𑀧𑀸𑀘𑀭𑀺𑀬𑀁 𑀓𑀺𑀭𑀸’𑀦𑀬𑀺; ()

𑁮𑁮.

𑀲𑀫𑀧𑁆𑀧𑀺𑀢𑀁 𑀢𑀁 𑀕𑀼𑀭𑀼𑀦𑁄 𑀓𑀭𑀫𑁆𑀩𑀼𑀚𑁂

𑀲𑀤𑁂𑀯𑀮𑁄𑀓𑀲𑁆𑀲 𑀕𑀼𑀭𑀼𑀁 𑀲𑀕𑀸𑀭𑀯𑀁,

𑀫𑀳𑀻𑀲𑀼𑀭𑁄 𑀲𑁄 𑀚𑀮𑀩𑀺𑀦𑁆𑀤𑀼𑀦𑀸 𑀬𑀣𑀸

𑀲𑀼𑀤𑀼𑀢𑁆𑀢𑀭𑀸𑀕𑀸𑀥𑀫𑀳𑁄𑀤𑀥𑀻𑀭𑀲𑀁; ()

𑁮𑁯. ¶

𑀲𑀯𑀡𑁆𑀡𑀪𑁂𑀤𑀁 𑀲𑀦𑀺𑀖𑀡𑁆𑀝𑀼𑀓𑁂𑀝𑀼𑀪𑀁

𑀅𑀣𑀩𑁆𑀩𑀩𑁂𑀤𑁂𑀦𑀺’𑀦𑀺𑀳𑀸𑀲𑀧𑀜𑁆𑀘𑀫𑀁,

𑀢𑀺𑀯𑁂𑀤𑀫𑀼𑀤𑁆𑀤𑁂𑀲𑀧𑀤𑁂𑀦 𑀤𑀼𑀤𑁆𑀤𑀲𑀁

𑀢𑀣𑀸 𑀓𑀮𑀸𑀲𑀺𑀧𑁆𑀧𑀢𑀁 𑀦𑀺𑀩𑁄𑀥𑀬𑀻; ()

𑁯𑁦.

𑀅𑀦𑀜𑁆𑀜𑀲𑀸𑀥𑀸𑀭𑀡𑀧𑀼𑀜𑁆𑀜𑀯𑀸𑀲𑀦𑀸-

𑀯𑀺𑀥𑀽𑀢𑀲𑀫𑁆𑀫𑁄𑀳𑀯𑀺𑀲𑀼𑀤𑁆𑀥𑀩𑀼𑀤𑁆𑀥𑀺𑀦𑁄,

𑀲𑀫𑀢𑁆𑀢𑀯𑀺𑀚𑁆𑀚𑀸 𑀲𑀓𑀮𑀸𑀓𑀮𑀸 𑀥𑀺𑀬𑀸

𑀓𑀮𑀫𑁆𑀧𑀺 𑀦𑀸𑀮𑀁 𑀩𑀳𑀼𑀪𑀸𑀲𑀦𑁂𑀦 𑀓𑀺𑀁; ()

𑁯𑁧.

𑀦 𑀓𑁂𑀯𑀮𑀁 𑀢𑀲𑁆𑀲 𑀓𑀮𑁂𑀩𑀭𑀁 𑀩𑀳𑀺

𑀯𑀺𑀪𑀸𑀢𑀺 𑀩𑀢𑁆𑀢𑀺𑀁𑀲𑀢𑀺𑀮𑀓𑁆𑀔𑀡𑁂𑀳𑀺 𑀪𑁄,

𑀪𑀼𑀲𑀁 𑀢𑀤𑀩𑁆𑀪𑀦𑁆𑀢𑀭𑀯𑀢𑁆𑀣𑀼 𑀤𑀺𑀧𑁆𑀧𑀢𑁂

𑀲𑀼𑀩𑀼𑀤𑁆𑀥𑀲𑀢𑁆𑀣𑀦𑁆𑀢𑀭𑀮𑀓𑁆𑀔𑀡𑁂𑀳𑀻’𑀧𑀺; ()

𑁯𑁨. ¶

𑀢𑀺𑀮𑁄𑀘𑀦𑀲𑁆𑀲𑀸’𑀧𑀺 𑀢𑀺𑀮𑁄𑀓𑀘𑀓𑁆𑀔𑀼𑀦𑁄

𑀅𑀬𑀁 𑀯𑀺𑀲𑁂𑀲𑁄 𑀦𑀬𑀦𑁂𑀳𑀺 𑀤𑀺𑀲𑁆𑀲𑀢𑁂,

𑀮𑀮𑀸𑀝𑀦𑁂𑀢𑁆𑀢𑁄 𑀧𑀼𑀭𑀺𑀫𑁄 𑀦𑀲𑁄𑀪𑀢𑀺

𑀧𑀭𑁄’𑀯 𑀅𑀩𑁆𑀪𑀢𑁆𑀢𑀭𑀜𑀸𑀡𑀮𑁄𑀘𑀦𑁄; ()

𑁯𑁩.

𑀅𑀦𑀼𑀩𑁆𑀩𑀚𑀦𑁆𑀢𑁄 𑀦𑀯𑀬𑁄𑀩𑁆𑀩𑀦𑀲𑁆𑀲𑀺𑀭𑀺𑀁

𑀬𑀲𑁄𑀧𑀩𑀦𑁆𑀥𑁂𑀦 𑀲𑀓𑁂 𑀦𑀺𑀓𑁂𑀢𑀦𑁂,

𑀧𑀯𑀟𑁆𑀠𑀺 𑀥𑀻𑀭𑁄 𑀲𑀓𑀮𑀁 𑀓𑀮𑀸𑀦𑁆𑀢𑀭𑀁

𑀓𑀮𑀸𑀦𑀺𑀥𑀻 𑀭𑀁𑀲𑀺𑀘𑀬𑁂𑀦𑀺’𑀯’𑀫𑁆𑀩𑀭𑁂; ()

𑁯𑁪.

𑀉𑀧𑀟𑁆𑀠𑀕𑀡𑁆𑀟𑀸𑀳𑀺𑀢𑀤𑀸𑀞𑀺𑀓𑀸𑀬 𑀲𑁄

𑀬𑀲𑁄𑀥𑀦𑁄 𑀲𑁄𑀴𑀲𑀯𑀲𑁆𑀲𑀺𑀓𑁄 𑀬𑀤𑀸,

𑀓𑀧𑁄𑀮𑀨𑀼𑀝𑁆𑀞𑀜𑁆𑀚𑀦𑀤𑀸𑀦𑀭𑀸𑀚𑀺𑀬𑀸

𑀓𑀭𑀺 𑀬𑀣𑀸 𑀩𑀸𑀮𑀤𑀲𑀁 𑀯𑁆𑀬𑀢𑀺𑀓𑁆𑀓𑀫𑀺 ()

𑁯𑁫. ¶

𑀢𑀤𑀸 𑀦𑀭𑀺𑀦𑁆𑀤𑁄 𑀲𑀼𑀭𑀫𑀦𑁆𑀤𑀺𑀭𑁄’𑀧𑀫𑀁

𑀉𑀢𑀼𑀢𑁆𑀢𑀬𑀸𑀦𑀼𑀘𑁆𑀙𑀯𑀺𑀓𑀁 𑀫𑀦𑁄𑀭𑀫𑀁,

𑀧𑀬𑁄𑀚𑀬𑀺𑀢𑁆𑀯𑀸𑀦 𑀧𑀯𑀺𑀡𑀲𑀺𑀧𑁆𑀧𑀺𑀓𑁂

𑀲𑀼𑀢𑀸𑀬 𑀓𑀸𑀭𑀸𑀧𑀬𑀺 𑀫𑀦𑁆𑀤𑀺𑀭𑀢𑁆𑀢𑀬𑀁; ()

𑁯𑁬.

𑀦𑀺𑀲𑀺𑀢𑀲𑀫𑁆𑀩𑀸𑀥𑀢𑀮𑀁 𑀦𑀺𑀯𑀸𑀭𑀺𑀢-

𑀲𑀭𑁄𑀦𑀺𑀮𑀁 𑀨𑀲𑁆𑀲𑀺𑀢𑀲𑀺𑀳𑀧𑀜𑁆𑀚𑀭𑀁,

𑀫𑀳𑀺𑀯𑀢𑀁𑀲𑀁 𑀦𑀯𑀪𑀼𑀫𑀺𑀓𑀁 𑀖𑀭𑀁

𑀩𑀪𑀼𑀯 𑀭𑀫𑁆𑀫𑀁 𑀪𑀼𑀯𑀺 𑀭𑀫𑁆𑀫𑀦𑀸𑀫𑀺𑀓𑀁; ()

𑁯𑁭.

𑀲𑀲𑀺𑀓𑀭’𑀫𑁆𑀪𑁄𑀥𑀭𑀭𑀸𑀯𑀦𑀺𑀩𑁆𑀪𑀭-

𑀯𑀺𑀢𑀸𑀦 𑀫𑀼𑀕𑁆𑀖𑀸𑀝𑀓𑀯𑀸𑀝𑀩𑀦𑁆𑀥𑀦𑀁,

𑀲𑀼𑀭𑀫𑁆𑀫𑀦𑀸𑀫𑀁 𑀳𑀢𑀖𑀫𑁆𑀫𑀫𑀺𑀦𑁆𑀤𑀺𑀭𑀸-

𑀦𑀺𑀯𑀸𑀲𑀭𑀫𑁆𑀫𑀁 𑀪𑀯𑀺 𑀧𑀜𑁆𑀘𑀪𑀽𑀫𑀺𑀓𑀁; ()

𑁯𑁮.

𑀅𑀳𑀺𑀡𑁆𑀳𑀲𑀺𑀢𑀼𑀡𑁆𑀪𑀕𑀼𑀡𑁂𑀳𑀺 𑀧𑀸𑀯𑀼𑀲𑁂

𑀲𑀼𑀔𑀸𑀦𑀼𑀮𑁄𑀫𑀁 𑀲𑀫𑀲𑀢𑁆𑀢𑀪𑀼𑀫𑀺𑀓𑀁,

𑀲𑀼𑀨𑀲𑁆𑀲𑀺𑀢𑀸’𑀨𑀲𑁆𑀲𑀺𑀢𑀲𑀺𑀳𑀧𑀜𑁆𑀚𑀭𑀁

𑀲𑀼𑀪𑀁 𑀲𑀼𑀪𑀁 𑀦𑀸𑀫 𑀦𑀺𑀓𑁂𑀢𑀦𑀁 𑀪𑀯𑀺; ()

𑁯𑁯. ¶

𑀯𑀬𑁄𑀦𑀼𑀧𑀢𑁆𑀢𑀲𑁆𑀲 𑀦𑀭𑀺𑀦𑁆𑀤𑀲𑀼𑀦𑀼𑀦𑁄

𑀉𑀴𑀸𑀭𑀭𑀸𑀚𑀺𑀤𑁆𑀥𑀺𑀯𑀺𑀮𑀸𑀲𑀤𑀲𑁆𑀲𑀦𑁂,

𑀓𑀢𑀸’𑀪𑀺𑀮𑀸𑀲𑁄 𑀚𑀦𑀓𑁄 𑀚𑀦𑀸𑀥𑀺𑀧𑁄

𑀧𑀤𑀸𑀢𑀼𑀓𑀸𑀫𑁄 𑀦𑀺𑀚𑀭𑀚𑁆𑀚𑀲𑀫𑁆𑀧𑀤𑀁; ()

𑁧𑁦𑁦.

𑀯𑀲𑀦𑁆𑀢𑀺 𑀘𑁂 𑀬𑁄𑀩𑁆𑀩𑀦𑀳𑀸𑀭𑀺𑀤𑀸𑀭𑀺𑀓𑀸

𑀦𑀭𑀺𑀦𑁆𑀤𑀲𑀦𑁆𑀤𑁂𑀲𑀳𑀭𑁂𑀳𑀺 𑀧𑁂𑀲𑀬𑀺

𑀲 𑀲𑀸𑀓𑀺𑀬𑀸𑀦𑀁 𑀲𑀘𑀺𑀯𑁂𑀳𑀺 𑀲𑀸𑀲𑀦𑁂; ()

𑁧𑁦𑁧.

𑀦𑀺𑀯𑁂𑀤𑀬𑀼𑀁 𑀬𑁄𑀩𑁆𑀩𑀦𑀕𑀩𑁆𑀩𑀺𑀢𑀲𑁆𑀲 𑀢𑁂

𑀦𑀓𑀺𑀜𑁆𑀘𑀺𑀲𑀺𑀓𑀧𑁆𑀧𑀸𑀬𑀢𑀦’𑀦𑁆𑀢𑀤𑀲𑁆𑀲𑀺𑀦𑁄,

𑀲𑀼𑀢𑀲𑁆𑀲 𑀤𑀸𑀭𑀸𑀪𑀭𑀡𑀸𑀬 𑀥𑀻𑀢𑀭𑁄

𑀓𑀣𑀦𑁆𑀦𑀼 𑀤𑀲𑁆𑀲𑀸𑀫 𑀫𑀬𑀦𑁆𑀢𑀺 𑀔𑀢𑁆𑀢𑀺𑀬𑀸; ()

𑁧𑁦𑁨. ¶

𑀲𑀼𑀢𑁂𑀦 𑀢𑀁 𑀭𑀸𑀚𑀲𑀼𑀢𑁂𑀦 𑀘𑁄𑀤𑀺𑀢𑁄

𑀧𑀺𑀢𑀸 𑀘𑀭𑀸𑀧𑁂𑀲𑀺 𑀧𑀼𑀭𑀫𑁆𑀳𑀺 𑀪𑁂𑀭𑀺𑀬𑁄,

𑀫𑀫’𑀢𑁆𑀭𑀚𑁄 𑀓𑀸𑀳𑀢𑀺 𑀲𑀺𑀧𑁆𑀧𑀤𑀻𑀧𑀦𑀁

𑀇𑀢𑁄𑀧𑀭𑀁 𑀲𑀢𑁆𑀢𑀫𑀯𑀸𑀲𑀭𑁂 𑀇𑀢𑀺; ()

𑁧𑁦𑁩.

𑀯𑀭𑁄 𑀓𑀼𑀫𑀸𑀭𑁄 𑀳𑀺 𑀓𑀼𑀫𑀸𑀭𑀯𑀺𑀓𑁆𑀓𑀫𑁄

𑀓𑀮𑀸𑀧𑀲𑀦𑁆𑀦𑀤𑁆𑀥 𑀓𑀮𑁂𑀩𑀭𑁄 𑀢𑀤𑀸,

𑀯𑀺𑀧𑀲𑁆𑀲𑀢𑀁 𑀩𑀦𑁆𑀥𑀼𑀚𑀦𑀸𑀦𑀫𑁄𑀲𑀭𑀺

𑀅𑀦𑀧𑁆𑀧𑀤𑀧𑁆𑀧𑁄 𑀭𑀡𑀓𑁂𑀴𑀺𑀫𑀡𑁆𑀟𑀮𑀁; ()

𑁧𑁦𑁪.

𑀥𑀦𑀼𑀤𑁆𑀥𑀭𑁄 𑀲𑁄 𑀧𑀞𑀫𑀁 𑀲𑀓𑁂 𑀪𑀼𑀚𑁂

𑀲𑀳𑀲𑁆𑀲𑀣𑀸𑀫𑀁 𑀲𑀲𑀭𑀁 𑀲𑀭𑀸𑀲𑀦𑀁,

𑀯𑀺𑀥𑀸𑀬 𑀧𑁄𑀞𑁂𑀲𑀺 𑀚𑀺𑀬𑀁 𑀯𑀲𑀼𑀦𑁆𑀥𑀭𑀸-

𑀯𑀺𑀤𑀸𑀭𑀡𑀸𑀓𑀸𑀭𑀫𑀳𑀸𑀭𑀯𑀁 𑀭𑀯𑀺; ()

𑁧𑁦𑁫. ¶

𑀘𑀢𑀼𑀤𑁆𑀤𑀺𑀲𑀸’𑀥𑀭𑀥𑀦𑀼𑀤𑁆𑀥𑀭𑀸 𑀫𑀫𑀁

𑀓𑀭𑁄𑀦𑁆𑀢𑀼 𑀮𑀓𑁆𑀔𑀁 𑀦𑀺𑀚𑀔𑀸𑀡𑀧𑀢𑁆𑀢𑀺𑀬𑀸,

𑀇𑀢𑀻𑀳 𑀯𑀢𑁆𑀯𑀸 𑀲𑀭𑀯𑀸𑀭𑀡𑁂𑀦 𑀲𑁄

𑀅𑀪𑀼𑀢𑀧𑀼𑀩𑁆𑀩𑀁 𑀲𑀭𑀲𑀺𑀧𑁆𑀧𑀫𑀸𑀳𑀭𑀺; ()

𑁧𑁦𑁬.

𑀘𑀢𑀼𑀤𑁆𑀤𑀺𑀲𑀸𑀬𑀁 𑀘𑀢𑀼𑀭𑁄 𑀥𑀦𑀼𑀤𑁆𑀥𑀭𑁂

𑀫𑀫𑁂’𑀓𑀩𑀸𑀡𑁂𑀦 𑀳𑀡𑀸𑀫’𑀳𑀁 𑀇𑀢𑀺,

𑀅𑀓𑀸𑀲𑀺 𑀢𑀤𑀤𑀻𑀧𑀬𑀫𑀜𑁆𑀜𑀣𑀸’𑀩𑁆𑀪𑀼𑀢𑀁

𑀲 𑀘𑀓𑁆𑀓𑀯𑁂𑀥𑀯𑁆𑀳𑀬𑀲𑀺𑀧𑁆𑀧𑀤𑀻𑀧𑀦𑀁; ()

𑁧𑁦𑁭.

𑀲𑀭𑁂𑀳𑀺 𑀯𑁂𑀡𑁆𑀬𑀸’𑀬𑀢𑀬𑀝𑁆𑀞𑀺𑀭𑀚𑁆𑀚𑀼𑀓𑀁

𑀲𑀭𑁂𑀳𑀺 𑀘𑀸’𑀭𑁄𑀳𑀡𑀫𑀡𑁆𑀟𑀧𑀸𑀮𑀬𑀁,

𑀲𑀭𑁂𑀳𑀺 𑀧𑀸𑀓𑀸𑀭𑀢𑀴𑀸𑀓𑀧𑀗𑁆𑀓𑀚𑀁

𑀲𑀭𑁂𑀳𑀺 𑀯𑀲𑁆𑀲𑀁 𑀇𑀢𑀺𑀲𑀺𑀧𑁆𑀧𑀫𑀸𑀳𑀭𑀺; ()

𑁧𑁦𑁮. ¶

𑀫𑀳𑀸𑀲𑀢𑁆𑀢𑁄 𑀮𑁄𑀓𑀧𑁆𑀧𑀪𑀯𑀫𑀲𑀫𑀁 𑀲𑀺𑀧𑁆𑀧𑀚𑀸𑀢𑀁 𑀚𑀦𑀸𑀦𑀁

𑀢𑀤𑀸 𑀲𑀁𑀤𑀲𑁆𑀲𑁂𑀲𑀺 𑀫𑀼𑀤𑀺𑀢𑀳𑀤𑀬𑀸 𑀲𑀸𑀓𑀺𑀬𑀸 𑀤𑀸𑀭𑀺𑀓𑀸𑀬𑁄,

𑀉𑀧𑀝𑁆𑀞𑀸𑀧𑁂𑀲𑀼𑀁 𑀢𑀸 𑀲𑀼𑀭𑀢𑀺𑀭𑀢𑀺𑀲𑀗𑁆𑀕𑀸𑀫𑀘𑀢𑀼𑀭𑀸

𑀲𑀳𑀲𑁆𑀲𑀸𑀦𑀁 𑀢𑀸𑀴𑀺𑀲𑀢𑀺𑀧𑀭𑀺𑀫𑀺𑀢𑀸 𑀦𑀸𑀝𑀺𑀓𑀸’𑀲𑀼𑀁 𑀖𑀭𑁂𑀲𑀽; ()

𑀇𑀢𑀺 𑀫𑁂𑀥𑀸𑀦𑀦𑁆𑀤𑀸𑀪𑀺𑀥𑀸𑀦𑁂𑀦 𑀬𑀢𑀺𑀦𑀸 𑀯𑀺𑀭𑀘𑀺𑀢𑁂 𑀲𑀓𑀮𑀓𑀯𑀺𑀚𑀦 𑀳𑀤𑀬𑀸𑀦𑀦𑁆𑀤 𑀤𑀸𑀦𑀦𑀺𑀤𑀸𑀦𑁂 𑀚𑀺𑀦𑀯𑀁𑀲𑀤𑀻𑀧𑁂 𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑁂 𑀮𑀓𑁆𑀔𑀡𑀧𑀝𑀺𑀕𑁆𑀕𑀳𑀡 𑀓𑀼𑀫𑀸𑀭𑀲𑀫𑁆𑀪𑀭𑀡𑀸𑀤𑀺 𑀧𑀯𑀢𑁆𑀢𑀺 𑀧𑀭𑀺𑀤𑀺𑀧𑁄 𑀅𑀝𑁆𑀞𑀫𑁄 𑀲𑀕𑁆𑀕𑁄.

𑁧. ¶

𑀇𑀢𑀺 𑀯𑀺𑀳𑀺𑀢𑁂 𑀲𑀢𑀺 𑀲𑀺𑀧𑁆𑀧𑀤𑀻𑀧𑀦𑀲𑁆𑀫𑀺𑀁

𑀢𑀤𑀪𑀺𑀫𑀼𑀔𑁂’𑀢𑀭𑀔𑀢𑁆𑀢𑀺𑀬𑀸’𑀢𑀺𑀲𑀽𑀭𑀸,

𑀅𑀧𑀕𑀢𑀫𑀸𑀦𑀫𑀤𑀸𑀪𑀯𑀺𑀁𑀲𑀼𑀫𑀜𑁆𑀜𑁄

(𑀢𑀭𑀼𑀡𑀫𑀺𑀕𑀺𑀦𑁆𑀤𑀫𑀼𑀔𑁂)𑀯 𑀫𑀢𑁆𑀢𑀤𑀦𑁆𑀢𑀺; ()

𑁨.

𑀯𑀺𑀚𑀝𑀺𑀢 𑀲𑀁𑀲𑀬𑀩𑀦𑁆𑀥𑀦𑁄 𑀧𑀤𑀸𑀢𑀼𑀁

𑀲𑀼𑀫𑀭𑀺𑀬 𑀤𑁂𑀯𑀤𑀳𑀫𑁆𑀳𑀺 𑀲𑀼𑀧𑀓𑁆𑀧𑀩𑀼𑀤𑁆𑀥𑁄,

𑀦𑀭𑀧𑀯𑀭𑁄 𑀦𑀺𑀚𑀥𑀻𑀢𑀭𑀁 𑀓𑀼𑀫𑀸𑀭𑀺𑀁

𑀲𑀼𑀯𑀺𑀫𑀮 𑀓𑁄𑀮𑀺𑀬𑀯𑀁𑀲𑀓𑀜𑁆𑀚𑀳𑀁𑀲𑀺𑀁; ()

𑁩.

𑀢𑀳𑀺𑀫𑀣𑀫𑀦𑁆𑀢𑀺𑀯𑀭𑁂𑀳𑀺 𑀫𑀦𑁆𑀢𑀬𑀺𑀢𑁆𑀯𑀸

𑀦𑀺𑀔𑀺𑀮𑀧𑀯𑀢𑁆𑀢𑀺𑀦𑀺𑀯𑁂𑀤𑀦𑀸𑀬 𑀤𑀽𑀢𑁂,

𑀧𑀳𑀺𑀡𑀺 𑀓𑀯𑀺𑀯𑀸𑀳𑀫𑀳𑁂 𑀯𑀺𑀥𑀺𑀬𑀢𑀦𑁆𑀢𑀺

𑀢𑀯 𑀢𑀦𑀼𑀚𑁂𑀦 𑀫𑀫𑀜𑁆𑀳𑀺 𑀥𑀻𑀢𑀼𑀓𑀜𑁆𑀜𑀸; ()

𑁪. ¶

𑀯𑀮𑀬𑀺𑀢𑀢𑀸𑀭𑀫𑀼𑀧𑀝𑁆𑀞𑀺𑀢𑁄’𑀤𑀬𑀁 𑀢𑁂

𑀳𑀺𑀫𑀓𑀭𑀩𑀺𑀫𑁆𑀩𑀫𑀺𑀯𑁄’𑀧𑀯𑀺𑀝𑁆𑀞𑀧𑀻𑀞𑀁,

𑀧𑀭𑀺𑀯𑀼𑀢𑀫𑀦𑁆𑀢𑀺𑀕𑀡𑀁 𑀧𑀡𑀫𑁆𑀫 𑀭𑀸𑀚𑀁

𑀓𑀧𑀺𑀮𑀧𑀼𑀭𑁄𑀧𑀕𑀢𑀸 𑀢𑀫𑀢𑁆𑀣𑀫𑀸𑀳𑀼;

𑁫.

𑀅𑀣 𑀧𑀝𑀺𑀮𑀤𑁆𑀥𑀧𑀝𑀺𑀲𑁆𑀲𑀯𑁂𑀦𑀼’𑀤𑀕𑁆𑀕𑀸

𑀧𑀤𑀬𑀼𑀕𑀫𑀜𑁆𑀚𑀮𑀺𑀧𑀼𑀧𑁆𑀨𑀫𑀜𑁆𑀚𑀭𑀻𑀳𑀺,

𑀲𑀼𑀫𑀳𑀺𑀬 𑀢𑀁 𑀧𑀝𑀺𑀯𑁂𑀤𑀬𑀺𑀁𑀲𑀼 𑀭𑀜𑁆𑀜𑁄

𑀲𑀓𑀯𑀺𑀲𑀬𑀁 𑀲𑀫𑀼𑀧𑁂𑀘𑁆𑀘 𑀭𑀸𑀚𑀤𑀽𑀢𑀸; ()

𑁬.

𑀉𑀪𑀬𑀓𑀼𑀮𑀫𑁆𑀳𑀺 𑀫𑀳𑀻𑀪𑀼𑀚𑀸’𑀜𑁆𑀜𑀫𑀜𑁆𑀜𑀁

𑀧𑀼𑀦𑀭𑀧𑀺 𑀫𑀦𑁆𑀢𑀺𑀯𑀭𑁂𑀳𑀺 𑀫𑀦𑁆𑀢𑀬𑀺𑀢𑁆𑀯𑀸,

𑀯𑀺𑀲𑀤𑀫𑀢𑀻𑀳𑀺 𑀦𑀺𑀫𑀺𑀢𑁆𑀢𑀧𑀸𑀞𑀓𑁂𑀳𑀺

𑀦𑀺𑀬𑀫𑀺𑀢𑀫𑀗𑁆𑀕𑀮𑀯𑀸𑀲𑀭𑀫𑁆𑀳𑀺𑀢𑀫𑁆𑀳𑀸; ()

𑁭.

𑀓𑀦𑀓𑀯𑀺𑀢𑀸𑀦𑀯𑀺𑀦𑀤𑁆𑀥𑀳𑀸𑀭𑀺𑀳𑀸𑀭𑀁

𑀓𑀼𑀲𑀼𑀫𑀲𑀫𑀸𑀓𑀼𑀮𑀳𑁂𑀫𑀧𑀼𑀡𑁆𑀡𑀓𑀼𑀫𑁆𑀪𑀁,

𑀢𑀺𑀤𑀺𑀯𑀯𑀺𑀫𑀸𑀦𑀲𑀫𑀸𑀦𑀫𑀼𑀮𑁆𑀮𑀲𑀦𑁆𑀦-

𑀭𑀢𑀦𑀯𑀺𑀘𑀺𑀢𑁆𑀢𑀯𑀺𑀯𑀸𑀳𑀫𑀡𑁆𑀟𑀧𑀕𑁆𑀕𑀁; ()

𑁮. ¶

𑀕𑀳𑀺𑀢𑀯𑀺𑀢𑀸𑀦𑀲𑀺𑀢𑀸𑀢𑀧𑀢𑁆𑀢𑀓𑁂𑀢𑀼-

𑀤𑁆𑀥𑀚𑀫𑀡𑀺𑀯𑀺𑀚𑀦𑀺𑀘𑀭𑀼𑀘𑀸𑀫𑀭𑁂𑀳𑀺,

𑀧𑀘𑀼𑀭𑀚𑀦𑁂𑀳𑀺 𑀓𑀢𑀼𑀧𑀳𑀸𑀭𑀫𑀕𑁆𑀕𑁂

𑀲𑀼𑀧𑀭𑀺𑀯𑀼𑀢𑀁 𑀘𑀢𑀼𑀗𑁆𑀕𑀺𑀭𑀦𑀺𑀥𑀚𑀺𑀦𑁆𑀬𑀸; (𑁬)

𑁯.

𑀯𑀺𑀯𑀺𑀥𑀯𑀺𑀪𑀽𑀲𑀡𑀪𑀼𑀲𑀺𑀢𑀢𑁆𑀢𑀪𑀸𑀯𑀁

𑀅𑀪𑀺𑀦𑀯𑀧𑀻𑀦𑀧𑀬𑁄𑀥𑀭𑀸𑀪𑀺𑀭𑀸𑀫𑀁,

𑀳𑀭𑀺𑀲𑀺𑀯𑀺𑀓𑀸𑀬 𑀬𑀲𑁄𑀥𑀭𑀁 𑀓𑀼𑀫𑀸𑀭𑀺𑀁

𑀫𑀡𑀺𑀔𑀘𑀺𑀢𑀸𑀬 𑀯𑀺𑀥𑀸𑀬 𑀘𑀸’𑀦𑀬𑀺𑀁𑀲𑀼; ()

𑁧𑁦.

𑀯𑀮𑀬𑀺𑀢𑀫𑀸𑀮𑀢𑀺𑀤𑀸𑀫𑀳𑁂𑀫𑀫𑀸𑀮𑀸

𑀧𑀭𑀺𑀫𑀮𑀪𑀸𑀯𑀺𑀢𑀓𑀼𑀦𑁆𑀢𑀮𑀧𑁆𑀧𑀯𑁂𑀡𑀺,

𑀯𑀺𑀭𑀴𑀩𑀓𑀸𑀯𑀮𑀺𑀫𑀧𑁆𑀧𑀯𑀺𑀚𑁆𑀚𑀼𑀭𑀸𑀚𑀺𑀁

𑀚𑀮𑀥𑀭𑀫𑀸𑀮𑀫𑀚𑁂𑀲𑀺 𑀓𑁄𑀫𑀮𑀸𑀬 ()

𑁧𑁧. ¶

𑀦𑀺𑀭𑀯𑀥𑀺𑀭𑀽𑀧𑀦𑀪𑁄𑀢𑀮𑀫𑁆𑀳𑀺 𑀢𑀲𑁆𑀲𑀸

𑀚𑀦𑀫𑀦𑀓𑀼𑀦𑁆𑀤𑀯𑀺𑀓𑀸𑀲𑀦𑀁 𑀩𑀪𑀸𑀲,

𑀓𑀼𑀝𑀺𑀮𑀢𑀭𑀸𑀮𑀓𑀓𑀸𑀮𑀫𑁂𑀖𑀭𑀸𑀚𑀺-

𑀚𑀝𑀺𑀢𑀮𑀮𑀸𑀝𑀢𑀮𑀤𑁆𑀥𑀘𑀦𑁆𑀤𑀩𑀺𑀫𑁆𑀩𑀁; ()

𑁧𑁨.

𑀫𑀺𑀕𑀫𑀤𑀓𑀼𑀗𑁆𑀓𑀼𑀫𑀕𑀦𑁆𑀥𑀧𑀗𑁆𑀓𑀮𑀺𑀢𑁆𑀢𑁄

𑀓𑀼𑀮𑀯𑀥𑀼𑀬𑀸 𑀢𑀺𑀮𑀓𑁄 𑀮𑀮𑀸𑀝𑀫𑀚𑁆𑀛𑁂,

𑀫𑀓𑀭𑀥𑀚𑁂𑀦 𑀦𑀺𑀭𑁄𑀧𑀺𑀢𑁄𑀭𑀺’𑀯𑀸’𑀲𑀺

𑀢𑀺𑀪𑀼𑀯𑀦𑀪𑀼𑀢𑀚𑀬𑀸𑀬 𑀧𑀼𑀧𑁆𑀨𑀓𑁂𑀢𑀼; ()

𑁧𑁩.

𑀚𑀦𑀦𑀬𑀦𑀜𑁆𑀚𑀦𑀭𑀽𑀧𑀲𑀫𑁆𑀧𑀤𑀸𑀬

𑀓𑀼𑀮𑀫𑀧𑀤𑀸𑀬 𑀭𑀭𑀸𑀚 𑀦𑀺𑀫𑁆𑀫𑀤𑀸𑀬,

𑀧𑀭𑀫𑀲𑀺𑀭𑀺𑀁 𑀲𑀭𑀼𑀲𑀻𑀭𑀼𑀳𑀸𑀪𑀺𑀭𑀸𑀫𑀁

𑀯𑀤𑀦𑀫𑀦𑀗𑁆𑀕𑀲𑀼𑀯𑀡𑁆𑀡𑀤𑀧𑁆𑀧𑀡𑀸𑀪𑀁; ()

𑁧𑁪. ¶

𑀫𑀡𑀺𑀕𑀡𑀫𑀡𑁆𑀟𑀺𑀢𑀓𑀼𑀡𑁆𑀟𑀮𑁂𑀳𑀺 𑀢𑀲𑁆𑀲𑀸

𑀲𑀯𑀡𑁆𑀬𑀼𑀕𑀁 𑀖𑀝𑀺𑀢𑀸𑀯𑀕𑀡𑁆𑀟𑀪𑀸𑀕𑀁,

𑀫𑀦𑀲𑀺𑀚𑀲𑀸𑀓𑀼𑀡𑀺𑀓𑁂𑀦 𑀔𑀺𑀢𑁆𑀢𑀧𑀸𑀲-

𑀬𑀼𑀕𑀮𑀫𑀺𑀯𑀓𑁆𑀔𑀺𑀯𑀺𑀪𑀗𑁆𑀕𑀫𑀸𑀦𑀫𑀸𑀲𑀺; ()

𑁧𑁫.

𑀲𑀼𑀯𑀺𑀫𑀮𑀓𑀦𑁆𑀢𑀺𑀧𑀩𑀦𑁆𑀥𑀲𑀦𑁆𑀤𑀦𑀢𑁆𑀣𑀁

𑀦𑀬𑀦𑀦𑀤𑀻𑀦𑀫𑀼𑀪𑀺𑀦𑁆𑀦𑀫𑀦𑁆𑀢𑀭𑀸𑀴𑁂,

𑀓𑀦𑀓𑀧𑀡𑀸𑀴𑀺𑀲𑀫𑀧𑁆𑀧𑀺𑀢𑁂’𑀯 𑀢𑀸𑀬

𑀯𑀭𑀯𑀤𑀦𑀸𑀬 𑀭𑀭𑀸𑀚 𑀢𑀼𑀗𑁆𑀕𑀦𑀸𑀲𑀸; ()

𑁧𑁬.

𑀦𑀺𑀭𑀼𑀧𑀫𑀭𑀽𑀧𑀯𑀺𑀮𑀸𑀲𑀫𑀦𑁆𑀤𑀺𑀭𑀲𑁆𑀫𑀺𑀁

𑀲𑀚𑀯𑀦𑀺𑀓𑀸𑀦𑀺’𑀯 𑀲𑀻𑀳𑀧𑀜𑁆𑀚𑀭𑀸𑀦𑀺,

𑀭𑀼𑀘𑀺𑀭𑀯𑀺𑀮𑀸𑀲𑀺𑀦𑀺𑀬𑀸 𑀮𑀲𑀺𑀁𑀲𑀼 𑀧𑀫𑁆𑀪𑀸-

𑀯𑀮𑀺𑀲𑀳𑀺𑀢𑀸𑀦𑀺 𑀲𑀼𑀦𑀻𑀮𑀮𑁄𑀘𑀦𑀸𑀦𑀺; ()

𑁧𑁭. ¶

𑀓𑀦𑀓𑀓𑀧𑀸𑀮𑀦𑀺𑀪𑀁 𑀫𑀦𑁄𑀪𑀯𑀲𑁆𑀲

𑀯𑀺𑀫𑀮𑀓𑀧𑁄𑀮𑀬𑀼𑀕𑀁 𑀲𑀺𑀦𑀺𑀤𑁆𑀥𑀓𑀦𑁆𑀦𑀺𑀁,

𑀦𑀯𑀲𑀲𑀺𑀫𑀡𑁆𑀟𑀮𑀧𑀼𑀡𑁆𑀟𑀭𑀻𑀓𑀲𑀡𑁆𑀟-

𑀲𑀲𑀺𑀭𑀺𑀫𑀯𑀭𑀼𑀦𑁆𑀥𑀺𑀫𑀦𑁄𑀳𑀭𑀸𑀥𑀭𑀸𑀬; (𑁬)

𑁧𑁮.

𑀲𑀼𑀘𑀭𑀺𑀢𑀧𑀸𑀭𑀫𑀺𑀢𑀸𑀮𑀢𑀸𑀬 𑀢𑀸𑀬

𑀧𑀭𑀺𑀡𑀢𑀭𑀸𑀕𑀮𑀢𑀸𑀬 𑀪𑀽𑀮𑀢𑀸𑀬,

𑀅𑀥𑀭𑀬𑀼𑀕𑀁 𑀢𑀭𑀼𑀡𑀗𑁆𑀓𑀼𑀭𑀤𑁆𑀯𑀬𑀁 𑀯𑀸

𑀓𑀺𑀫𑀺𑀢𑀺 𑀯𑀺𑀢𑀓𑁆𑀓𑀳𑀢𑁄’𑀬𑀫𑀸𑀲𑀺 𑀮𑁄𑀓𑁄; ()

𑁧𑁯.

𑀓𑀼𑀮𑀯𑀥𑀼𑀬𑀸 𑀯𑀤𑀦𑀸’𑀮𑀯𑀸𑀴𑀕𑀩𑁆𑀪𑁂

𑀦𑀯𑀓𑀮𑀺𑀓𑀸𑀯𑀮𑀺𑀨𑀼𑀮𑁆𑀮𑀺𑀢𑁂’𑀯𑀓𑀺𑀜𑁆𑀘𑀺,

𑀲𑀼𑀫𑀥𑀼𑀭𑀯𑀸𑀡𑀺𑀮𑀢𑀸𑀬 𑀫𑀦𑁆𑀤𑀳𑀸𑀲-

𑀚𑁆𑀚𑀼𑀢𑀺𑀥𑀯𑀮𑀺 𑀤𑀲𑀦𑀯𑀮𑀺 𑀭𑀭𑀸𑀚; ()

𑁨𑁦. ¶

𑀓𑀼𑀯𑀮𑀬𑀦𑀻𑀮𑀯𑀺𑀮𑁄𑀮𑀮𑁄𑀘𑀦𑀸𑀬

𑀫𑀼𑀔𑀓𑀫𑀮𑀸’𑀮𑀺𑀓𑀼𑀮𑀸𑀦𑀼𑀓𑀸𑀭𑀺𑀦𑀻𑀪𑀼,

𑀦𑀬𑀦𑀫𑀬𑀽𑀔𑀕𑀼𑀡𑁂𑀳’𑀧𑀸𑀗𑁆𑀕𑀪𑀗𑁆𑀕-

𑀦𑀺𑀲𑀺𑀢𑁆𑀲𑀭𑁂𑀳𑀺 𑀅𑀦𑀗𑁆𑀕𑀘𑀸𑀧𑀭𑀽𑀧𑀸; ()

𑁨𑁧.

𑀓𑀮𑀭𑀯𑀫𑀜𑁆𑀚𑀼𑀕𑀺𑀭𑀸 𑀢𑀺𑀯𑀝𑁆𑀝𑀭𑀸𑀚𑀺

𑀖𑀦𑀓𑀼𑀘𑀪𑀤𑁆𑀤𑀖𑀝𑀸𑀬 𑀓𑀫𑁆𑀩𑀼𑀕𑀻𑀯𑀸,

𑀫𑀥𑀼𑀭𑀕𑀪𑀻𑀭𑀯𑀺𑀭𑀸𑀯 𑀭𑀗𑁆𑀕𑀮𑁂𑀔𑀁

𑀅𑀚𑀺𑀦𑀺 𑀲𑀼𑀯𑀡𑁆𑀡𑀫𑀼𑀢𑀺𑀗𑁆𑀕𑀪𑁂𑀭𑀺𑀲𑀗𑁆𑀔𑀁; ()

𑁨𑁨.

𑀅𑀪𑀺𑀦𑀯𑀧𑀺𑀦𑀧𑀬𑁄𑀥𑀭𑁄’𑀧𑀥𑀸𑀦𑀁

𑀲𑀼𑀔𑀼𑀫𑀢𑀭𑀘𑁆𑀙𑀯𑀺𑀓𑁄𑀚𑀯𑀸𑀪𑀺𑀭𑀸𑀫𑀁,

𑀉𑀭𑀲𑀬𑀦𑀁 𑀲𑀫𑀮𑀗𑁆𑀓𑀢𑀁 𑀯𑀺𑀬𑀸’𑀲𑀺

𑀦𑀺𑀚𑀧𑀢𑀺𑀲𑀗𑁆𑀕𑀫𑀫𑀗𑁆𑀕𑀮𑀸𑀬 𑀢𑀸𑀬; ()

𑁨𑁩. ¶

𑀓𑀼𑀘𑀓𑀦𑀓𑀸’𑀘𑀮𑀲𑀫𑁆𑀪𑀯𑀸𑀬 𑀦𑀸𑀪𑀺-

𑀓𑀼𑀳𑀭𑀢𑀝𑀸𑀪𑀺𑀫𑀼𑀔𑀸𑀬 𑀓𑀦𑁆𑀢𑀺𑀦𑀚𑁆𑀚𑀸,

𑀙𑀞𑀸𑀭𑀯𑀮𑀺𑀢𑁆𑀢𑀬𑀫𑀺𑀦𑁆𑀤𑀺𑀭𑁄𑀧𑀫𑀸𑀬

𑀅𑀯𑀳𑀭𑀺 𑀢𑀼𑀗𑁆𑀕𑀢𑀭𑀗𑁆𑀕𑀧𑀦𑁆𑀢𑀺𑀓𑀦𑁆𑀢𑀺𑀁; ()

𑁨𑁪.

𑀫𑀡𑀺𑀭𑀲𑀦𑀸𑀕𑀼𑀡𑀫𑀦𑁆𑀣𑀭𑀸𑀬 𑀢𑀲𑁆𑀲𑀸

𑀖𑀦𑀓𑀼𑀘𑀪𑀸𑀭𑀓𑀺𑀲𑁄 𑀓𑀺𑀲𑁄𑀤𑀭𑀸𑀬,

𑀳𑀭𑀺𑀲𑀺𑀭𑀺𑀯𑀘𑁆𑀙𑀲𑀼𑀳𑀚𑁆𑀚𑀫𑀚𑁆𑀛𑀪𑀸𑀕𑁄

𑀫𑀤𑀥𑀦𑀼𑀫𑀼𑀝𑁆𑀞𑀺𑀯𑀺𑀮𑀸𑀲𑀫𑀸𑀳𑀭𑀺𑀢𑁆𑀣; ()

𑁨𑁫.

𑀲𑀭𑀲𑀺𑀚𑀢𑀦𑁆𑀢𑀼𑀧𑀯𑁂𑀲𑀦𑀸𑀯𑀓𑀸𑀲

𑀫𑀯𑀳𑀭𑀺 𑀧𑀻𑀦𑀧𑀬𑁄𑀥𑀭𑀦𑁆𑀢𑀭𑀸𑀴𑀁,

𑀦𑀺𑀚𑀕𑀴𑀪𑀸𑀲𑀼𑀭𑀳𑀸𑀭𑀦𑀺𑀚𑁆𑀛𑀭𑁂𑀳𑀺

𑀓𑀦𑀓𑀤𑀭𑀺𑀫𑀼𑀔𑀯𑀺𑀩𑁆𑀪𑀫𑀁 𑀬𑀼𑀯𑀢𑁆𑀬𑀸; ()

𑁨𑁬. ¶

𑀅𑀯𑀺𑀓𑀮𑀭𑀽𑀧𑀯𑀺𑀮𑀸𑀲𑀲𑀺𑀦𑁆𑀥𑀼𑀯𑁂𑀮𑀸

𑀯𑀺𑀭𑀮𑀯𑀺𑀮𑀕𑁆𑀕𑀺𑀦𑀺𑀬𑀸𑀓 𑀯𑀺𑀲𑀸𑀮𑀲𑁄𑀡𑀺,

𑀧𑀭𑀺𑀳𑀭𑀺 𑀭𑀸𑀚𑀓𑀼𑀫𑀸𑀭𑀺𑀓𑀸𑀬 𑀢𑀸𑀬

𑀓𑀼𑀲𑀼𑀫𑀲𑀭𑀸𑀪𑀯𑀪𑀼𑀫𑀺𑀪𑀸𑀕𑀲𑁄𑀪𑀁; ()

𑁨𑁭.

𑀓𑀼𑀮𑀯𑀥𑀼𑀬𑀸 𑀓𑀫𑀮𑀸𑀫𑀮𑀸𑀦𑀦𑀸𑀬

𑀓𑀼𑀯𑀮𑀬𑀓𑁄𑀫𑀮𑀦𑀺𑀮𑀭𑁄𑀫𑀭𑀸𑀚𑀺,

𑀪𑀼𑀲𑀫𑀪𑀺𑀘𑀼𑀫𑁆𑀩𑀺 𑀕𑀪𑀺𑀭𑀦𑀸𑀪𑀺𑀕𑀩𑁆𑀪𑀁;

𑀓𑀫𑀮𑀯𑀺𑀯𑀸𑀬𑀢𑀫𑀢𑁆𑀢𑀪𑀺𑀗𑁆𑀕𑀭𑀸𑀚𑀺 ()

𑁨𑁮.

𑀭𑀼𑀘𑀺𑀭𑀢𑀭𑁄𑀭𑀼𑀬𑀼𑀕𑀁 𑀲𑀼𑀯𑀡𑁆𑀡 𑀭𑀫𑁆𑀪𑀸-

𑀓𑀭𑀺𑀓𑀭𑀧𑀻𑀯𑀭𑀫𑀺𑀦𑁆𑀤𑀺𑀭𑁄𑀧𑀫𑀸𑀬,

𑀪𑀚𑀺 𑀫𑀓𑀭𑀤𑁆𑀥𑀚𑀭𑀗𑁆𑀕𑀫𑀦𑁆𑀤𑀺𑀭𑀲𑁆𑀫𑀺𑀁

𑀳𑀭𑀺𑀫𑀬𑀣𑀫𑁆𑀪𑀬𑀼𑀕𑀲𑁆𑀲𑀺𑀭𑀺𑀁 𑀭𑀫𑀸𑀬; ()

𑁨𑁯. ¶

𑀫𑀤𑀭𑀬𑀭𑀽𑀧𑀭𑀲𑀤𑁆𑀯𑀬𑀁 𑀢𑀼𑀮𑀸𑀬

𑀲𑀼𑀧𑀭𑀺𑀫𑀺𑀢𑀸𑀬 𑀘𑀢𑀼𑀫𑁆𑀫𑀼𑀔𑁂𑀦 𑀢𑀼𑀮𑁆𑀬𑀁,

𑀦𑀺𑀚𑀫𑀺𑀳𑀚𑀸𑀦𑀼𑀬𑀼𑀕𑀁 𑀧𑀯𑀸𑀴𑀧𑀸𑀢𑀺-

𑀬𑀼𑀕𑀮𑀯𑀺𑀯𑀸𑀲𑀺 𑀅𑀯𑀫𑁆𑀫𑀼𑀔𑁄𑀧𑀦𑀻𑀢𑀁; ()

𑁩𑁦.

𑀯𑀺𑀲𑀬𑀯𑀺𑀢𑀓𑁆𑀓𑀢𑀫𑀸𑀓𑀼𑀮𑀁 𑀬𑀼𑀯𑀢𑁆𑀬𑀸

𑀫𑀤𑀦𑀼𑀧𑀲𑀗𑁆𑀓𑀫𑀡𑁂 𑀫𑀦𑁄𑀯𑀺𑀫𑀸𑀦𑀁,

𑀚𑀺𑀢𑀫𑀤𑀫𑀢𑁆𑀢𑀫𑀬𑀽𑀭𑀓𑀡𑁆𑀞𑀪𑀽𑀢𑀺

𑀚𑀮𑀺𑀢𑀧𑀤𑀻𑀧𑀲𑀺𑀔𑁂’𑀯 𑀘𑀸𑀭𑀼𑀚𑀗𑁆𑀖𑀸; ()

𑁩𑁧.

𑀫𑀡𑀺𑀫𑀬𑀦𑀽𑀧𑀼𑀭𑀪𑀸𑀲𑀼𑀭𑁂𑀳𑀺 𑀢𑀲𑁆𑀲𑀸

𑀘𑀭𑀡𑀢𑀮𑁂𑀳𑀺 𑀧𑀭𑀸𑀚𑀺𑀢𑀸𑀦𑀺 𑀣𑀻𑀦𑀁,

𑀫𑀼𑀔𑀧𑀤𑀼𑀫𑀸𑀦𑀺𑀯 𑀲𑀗𑁆𑀓𑀼𑀘𑀦𑁆𑀢𑀺 𑀫𑀜𑁆𑀜𑁂

𑀪𑀫𑀭𑀪𑀭𑀫𑁆𑀩𑀼𑀭𑀼𑀳𑀸𑀦𑀺 𑀓𑀜𑁆𑀚𑀦𑀻𑀦𑀁; ()

𑁩𑁨.

𑀓𑀭𑀘𑀭𑀡𑀗𑁆𑀕𑀼𑀮𑀺𑀧𑀮𑁆𑀮’𑀯𑀕𑁆𑀕𑀲𑀸𑀮𑀻-

𑀚𑀮𑀮𑀯𑀧𑀦𑁆𑀢𑀺𑀦𑀺𑀪𑀸’𑀢𑀺𑀓𑁄𑀫𑀮𑀸𑀬,

𑀅𑀪𑀺𑀦𑀯𑀢𑀫𑁆𑀩𑀦𑀔𑀸𑀯𑀮𑀻 𑀩𑀪𑀽𑀯

𑀫𑀓𑀭𑀥𑀚𑀲𑁆𑀲 𑀓𑀢𑁂’𑀯 𑀧𑀼𑀧𑁆𑀨𑀧𑀽𑀚𑀸; ()

𑁩𑁩. ¶

𑀲𑀧𑀭𑀺𑀚𑀦𑁄 𑀯𑀦𑀺𑀢𑀸𑀬 𑀢𑀸𑀬 𑀲𑀤𑁆𑀥𑀺𑀁

𑀫𑀡𑀺𑀕𑀡𑀫𑀡𑁆𑀟𑀺𑀢𑀫𑀡𑁆𑀟𑀧𑀧𑁆𑀧𑀤𑁂𑀲𑁂,

𑀤𑀺𑀦𑀓𑀭𑀯𑀁𑀲𑀥𑀚𑀲𑁆𑀲 𑀭𑀸𑀚𑀧𑀼𑀢𑁆𑀢-

𑀲𑁆𑀲𑀼𑀧𑀕𑀫𑀦𑀁 𑀅𑀧𑀮𑁄𑀓𑀬𑀁 𑀦𑀺𑀲𑀻𑀤𑀺; ()

𑁩𑁪.

𑀧𑀭𑀺𑀯𑀼𑀢𑀩𑀦𑁆𑀥𑀼𑀚𑀦𑁂𑀳𑀺 𑀭𑀸𑀚𑀧𑀼𑀢𑁆𑀢𑁄

𑀬𑀣𑀭𑀺𑀯 𑀤𑁂𑀯𑀕𑀡𑁂𑀳𑀺 𑀤𑁂𑀯𑀭𑀸𑀚𑀸,

𑀲𑀧𑀤𑀺 𑀢𑀼𑀭𑀗𑁆𑀕𑀭𑀣𑀁 𑀲𑀫𑀸𑀳𑀺𑀭𑀽𑀴𑁆𑀳𑁄

𑀢𑀤𑀪𑀺𑀫𑀼𑀔𑁄 𑀬𑀲𑀲𑀸 𑀚𑀮𑀁 𑀧𑀬𑀸𑀲𑀺; ()

𑁩𑁫.

𑀢𑀳𑀺𑀫𑀼𑀧𑀕𑀫𑁆𑀫 𑀞𑀺𑀢𑀲𑁆𑀲 𑀫𑀡𑁆𑀟𑀧𑀲𑁆𑀫𑀺𑀁

𑀧𑀭𑀺𑀤𑀳𑀺𑀢𑀼’𑀢𑁆𑀢𑀭𑀲𑀸𑀝𑀓𑁂𑀦 𑀢𑀲𑁆𑀲,

𑀳𑀭𑀺𑀫𑀡𑀺𑀫𑀡𑁆𑀟𑀦𑀫𑀡𑁆𑀟𑀺𑀢’𑀢𑁆𑀢𑀪𑀸𑀯𑁄

𑀳𑀺𑀫𑀧𑀝𑀮𑁂𑀦 𑀳𑀺𑀫𑀸𑀘𑀮𑁄 𑀭𑀺𑀯𑀸𑀲𑀺; ()

𑁩𑁬. ¶

𑀫𑀡𑀺𑀫𑀓𑀼𑀝𑁂𑀦 𑀦𑀺𑀯𑀢𑁆𑀣𑀓𑀸𑀲𑀺𑀓𑁂𑀦

𑀦𑀭𑀧𑀢𑀺𑀲𑀼𑀦𑀼 𑀲𑀼𑀫𑀡𑁆𑀟𑀺𑀢𑁄 𑀭𑀭𑀸𑀚,

𑀲𑀼𑀭𑀪𑀯𑀦𑁂𑀦 𑀘 𑀔𑀻𑀭𑀲𑀸𑀕𑀭𑁂𑀦

𑀓𑀦𑀓𑀲𑀺𑀡𑁂𑀭𑀼𑀕𑀺𑀭𑀻’𑀯 𑀦𑀺𑀘𑁆𑀘𑀮𑀝𑁆𑀞𑁄; ()

𑁩𑁭.

𑀦𑀪𑀲𑀺 𑀲𑀫𑀸𑀓𑀼𑀮𑀢𑀸𑀭𑀓𑀸𑀯𑀮𑀻’𑀯

𑀉𑀭𑀲𑀺 𑀯𑀺𑀭𑀸𑀚𑀺𑀢𑀢𑀸𑀭𑀳𑀸𑀭𑀧𑀦𑁆𑀢𑀻,

𑀦𑀭𑀧𑀯𑀭𑁄 𑀧𑀺𑀯𑀺 𑀢𑀸𑀬 𑀭𑀽𑀧𑀲𑀸𑀭𑀁

𑀅𑀫𑀢𑀫𑀺𑀯𑀸’𑀬𑀢𑀮𑁄𑀘𑀦’𑀜𑁆𑀚𑀮𑀻𑀳𑀺; ()

𑁩𑁮.

𑀢𑀤𑀳𑀦𑀺 𑀭𑀸𑀚𑀓𑀼𑀫𑀸𑀭𑀧𑀼𑀩𑁆𑀩𑀲𑁂𑀮-

𑀧𑁆𑀧𑀪𑀯𑀯𑀭𑀸𑀦𑀦𑀘𑀦𑁆𑀤𑀫𑀡𑁆𑀟𑀮𑁂𑀦,

𑀫𑀼𑀓𑀼𑀴𑀺𑀢𑀮𑁄𑀘𑀦𑀦𑀻𑀮𑀦𑀻𑀭𑀚𑀸𑀬

𑀅𑀪𑀯𑀺𑀫𑀦𑁄𑀓𑀼𑀫𑀼𑀤𑀸𑀓𑀭𑀧𑁆𑀧𑀩𑁄𑀥𑁄; ()

𑁩𑁯. ¶

𑀬𑀼𑀯𑀢𑀬𑀼𑀯𑀸𑀦𑀫𑀧𑁂𑀓𑁆𑀔𑀢𑀁 𑀚𑀦𑀸𑀦𑀁

𑀅𑀦𑀺𑀫𑀺𑀲𑀮𑁄𑀘𑀦𑀦𑀻𑀮𑀓𑀦𑁆𑀢𑀺𑀕𑀗𑁆𑀕𑀸,

𑀭𑀼𑀘𑀺𑀭𑀯𑀥𑀽𑀳𑀺 𑀯𑀺𑀥𑀽𑀢𑀘𑀸𑀫𑀭𑁂𑀳𑀺

𑀅𑀦𑀺𑀮𑀯𑀺𑀮𑁄𑀮𑀢𑀭𑀗𑁆𑀕𑀲𑀸𑀮𑀺𑀦𑀻𑀯; ()

𑁪𑁦.

𑀕𑀕𑀦𑀢𑀮𑁄𑀧𑀭𑀺 𑀢𑀸𑀭𑀓𑀸𑀓𑀼𑀮𑀫𑁆𑀳𑀺

𑀬𑀼𑀯𑀬𑀼𑀯𑀢𑀻𑀦𑀯𑀘𑀦𑁆𑀤𑀘𑀦𑁆𑀤𑀺𑀓𑁂𑀯,

𑀦𑀺𑀘𑀺𑀢𑀲𑀼𑀯𑀡𑁆𑀡𑀓𑀳𑀸𑀧𑀡𑁂 𑀯𑀭𑁂𑀚𑀼𑀁

𑀅𑀣𑀫𑀡𑀺𑀫𑀡𑁆𑀟𑀧𑀯𑁂𑀤𑀺𑀓𑀸𑀢𑀮𑀫𑁆𑀳𑀺; ()

𑁪𑁧.

𑀲𑀓𑀮𑀓𑀮𑀸𑀓𑀼𑀲𑀮𑁄’𑀧𑀕𑀫𑁆𑀫𑀯𑀺𑀧𑁆𑀧𑀸-

𑀘𑀭𑀺𑀬𑀕𑀡𑁄 𑀚𑀬𑀫𑀗𑁆𑀕𑀮𑀸𑀬 𑀢𑁂𑀲𑀁,

𑀲𑀼𑀧𑀭𑀺𑀲𑀫𑀸𑀧𑀬𑀺 𑀲𑀩𑁆𑀩𑀧𑀼𑀩𑁆𑀩𑀓𑀺𑀘𑁆𑀘𑀁

𑀲𑀧𑀤𑀺 𑀧𑀯𑀲𑁆𑀲𑀺 𑀅𑀔𑀡𑁆𑀟𑀮𑀸𑀯𑀼𑀚𑀝𑁆𑀞𑀺; ()

𑁪𑁨. ¶

𑀓𑀭𑀢𑀮𑀢𑀸𑀫𑀭𑀲𑁂𑀲𑀼 𑀓𑀼𑀡𑁆𑀟𑀺𑀓𑀸𑀬

𑀫𑀡𑀺𑀔𑀯𑀺𑀢𑀸𑀬 𑀧𑀼𑀭𑁄𑀳𑀺𑀢𑁄 𑀉𑀪𑀺𑀦𑁆𑀦𑀁,

𑀲𑀼𑀪𑀫𑀪𑀺𑀲𑁂𑀓𑀚𑀮𑀁 𑀦𑀺𑀧𑀸𑀢𑀬𑀁 𑀢𑁂

𑀧𑀼𑀦𑀳𑀺𑀧𑀬𑁄𑀚𑀬𑀺 𑀧𑀸𑀡𑀺𑀧𑀻𑀴𑀡𑀲𑁆𑀫𑀺𑀁; ()

𑁪𑁩.

𑀲𑀼𑀭𑀥𑀦𑀼𑀯𑀺𑀚𑁆𑀚𑀼𑀮𑀢𑁂’𑀯 𑀯𑀸𑀭𑀺𑀯𑀸𑀳𑀁

𑀭𑀣𑀫𑀪𑀺𑀭𑀼𑀬𑁆𑀳 𑀕𑀳𑀻𑀭𑀫𑀦𑁆𑀤𑀖𑁄𑀲𑀁,

𑀧𑀭𑀺𑀯𑀼𑀢𑀔𑀢𑁆𑀢𑀺𑀬𑀩𑀦𑁆𑀥𑀯𑁂𑀳𑀺 𑀢𑀫𑁆𑀳𑀸

𑀓𑀧𑀺𑀮𑀧𑀼𑀭𑀸’𑀪𑀺𑀫𑀼𑀔𑀸𑀪𑀯𑀼𑀁 𑀉𑀪𑁄𑀢 𑀢𑁂; ()

𑁪𑁪.

𑀅𑀣 𑀲𑀫𑀮𑀗𑁆𑀓𑀢𑀯𑀻𑀣𑀺𑀫𑀚𑁆𑀛𑀺𑀕𑀸𑀦𑀁

𑀯𑀺𑀯𑀝𑀦𑀺𑀓𑁂𑀢𑀦𑀲𑀻𑀳𑀧𑀜𑁆𑀚𑀭𑀝𑁆𑀞𑀸,

𑀅𑀦𑀺𑀫𑀺𑀲𑀮𑁄𑀘𑀦𑀧𑀗𑁆𑀓𑀚𑁄𑀧𑀳𑀸𑀭𑀁

𑀪𑀽𑀲𑀫𑀓𑀭𑀼𑀁 𑀓𑀧𑀺𑀮𑀗𑁆𑀕𑀦𑀸 𑀧𑀲𑀦𑁆𑀦𑀸; ()

𑁪𑁫. ¶

𑀕𑀫𑀦𑀯𑀺𑀮𑀸𑀲𑀫𑀼𑀤𑀺𑀓𑁆𑀔𑀢𑀁 𑀚𑀦𑀸𑀦𑀁

𑀭𑀼𑀘𑀺𑀭𑀲𑀺𑀭𑁄𑀧𑀳𑀺𑀢’𑀜𑁆𑀚𑀮𑀻𑀳𑀺 𑀪𑀢𑁆𑀢𑁆𑀬𑀸,

𑀫𑀡𑀺𑀓𑀮𑀲𑀧𑁆𑀧𑀺𑀢𑀧𑀼𑀧𑁆𑀨𑀫𑀜𑁆𑀚𑀭𑀻𑀳𑀺

𑀭𑀘𑀺𑀢𑀫𑀺𑀯𑁄𑀪𑀬𑀯𑀻𑀣𑀺𑀧𑀲𑁆𑀲𑀫𑀸𑀲𑀺; ()

𑁪𑁬.

𑀢𑀺𑀔𑀺𑀡𑀯𑀺𑀮𑁄𑀘𑀦𑀩𑀸𑀡𑀮𑀓𑁆𑀔𑀪𑀸𑀯𑀁

𑀦𑀺𑀭𑀼𑀧𑀫𑀭𑀽𑀧𑀺𑀦𑀺 𑀓𑀸𑀫𑀺𑀦𑀻𑀳𑀺 𑀦𑀻𑀢𑁂,

𑀧𑀢𑀺𑀢’𑀦𑀼𑀭𑀸𑀕𑀲𑀭𑁂𑀳𑀺𑀬𑁂𑀯 𑀢𑀸𑀲𑀁

𑀳𑀤𑀬𑀯𑀺𑀤𑀸𑀭𑀡𑀫𑀸𑀲𑀺 𑀢𑀧𑁆𑀨𑀮𑀁’𑀯; ()

𑁪𑁭.

𑀓𑀣𑀫𑀧𑀺 𑀓𑀸𑀧𑀺𑀮𑀯𑀢𑁆𑀣𑀯𑀸 𑀅𑀳𑁂𑀲𑀼𑀁

𑀢𑀤𑀳𑀦𑀺 𑀦𑀺𑀘𑁆𑀘𑀮𑀮𑁄𑀘𑀦𑀼𑀧𑁆𑀧𑀮𑁂𑀳𑀺,

𑀓𑀧𑀺𑀮𑀧𑀼𑀭𑀁 𑀢𑀺𑀤𑀲𑀸𑀮𑀬𑀸𑀯𑀢𑀺𑀡𑁆𑀡𑀸

𑀢𑀺𑀤𑀲𑀕𑀡𑀸’𑀯 𑀯𑀺𑀧𑀲𑁆𑀲𑀦𑀸𑀬𑀼’𑀪𑀺𑀦𑁆𑀦𑀁; ()

𑁪𑁮. ¶

𑀢𑀺𑀤𑀺𑀯𑀧𑀼𑀭𑀸 𑀦𑀺𑀚𑀯𑁂𑀚𑀬𑀦𑁆𑀢𑀦𑀸𑀫-

𑀲𑀼𑀭𑀪𑀯𑀦𑀁’𑀯 𑀲𑀼𑀚𑀫𑁆𑀧𑀢𑀻 𑀲𑀼𑀚𑀸𑀢𑀸,

𑀓𑀧𑀺𑀮𑀧𑀼𑀭𑀸 𑀧𑀼𑀦𑀭𑀸𑀕𑀫𑀺𑀁𑀲𑀼 𑀢𑀫𑁆𑀳𑀸

𑀧𑀢𑀺𑀧𑀢𑀺𑀦𑀻 𑀦𑀺𑀚𑀭𑀸𑀚𑀫𑀦𑁆𑀤𑀺𑀭𑀁 𑀤𑁆𑀯𑁂; ()

𑁪𑁯.

𑀥𑀭𑀡𑀺𑀧𑀢𑀺𑀲𑀼𑀢𑁄 𑀧𑀢𑁆𑀢𑀭𑀚𑁆𑀚𑀸𑀪𑀺𑀲𑁂𑀓𑁄

𑀓𑀧𑀺𑀮𑀧𑀼𑀭𑀯𑀭𑁂 𑀢𑁂𑀲𑀼 𑀢𑀺𑀲𑁆𑀯𑀸𑀮𑀬𑁂𑀲𑀼,

𑀅𑀧𑀭𑀺𑀫𑀺𑀢𑀲𑀼𑀔𑀁 𑀢𑀸𑀬 𑀩𑀺𑀫𑁆𑀩𑀸𑀬 𑀲𑀤𑁆𑀥𑀺𑀁

𑀲𑀼𑀘𑀺𑀭𑀫𑀦𑀼𑀪𑀯𑀺 𑀘𑀦𑁆𑀤𑀩𑀺𑀫𑁆𑀩𑀸𑀦𑀦𑀸𑀬; ()

𑁫𑁦.

𑀯𑀺𑀓𑀘𑀓𑀫𑀮 (𑀦𑀦𑁆𑀤𑀻𑀫𑀼𑀔𑀺) 𑀫𑀜𑁆𑀚𑀼𑀪𑀸𑀡𑀻

𑀢𑀺𑀯𑀺𑀥𑀯𑀬𑀲𑀺 𑀤𑀺𑀩𑁆𑀩𑀘𑁆𑀙𑀭𑀸𑀭𑀽𑀧𑀲𑁄𑀪𑀸,

𑀅𑀕𑀫𑀺 𑀔𑀬𑀯𑀬𑀁 𑀲𑀸’𑀧𑀺 𑀩𑀺𑀫𑁆𑀩𑀸𑀫𑀳𑁂𑀲𑀺

𑀲𑀭𑀣 𑀲𑀭𑀣 𑀲𑀗𑁆𑀔𑀸𑀭𑀥𑀫𑁆𑀫𑀲𑁆𑀲𑀪𑀸𑀯𑀁; ()

𑀇𑀢𑀺 𑀫𑁆𑀩𑁂𑀥𑀸𑀦𑀦𑁆𑀤𑀸𑀪𑀺𑀥𑀸𑀦𑁂𑀦 𑀬𑀢𑀺𑀦𑀸 𑀯𑀺𑀭𑀘𑀺𑀢𑁂 𑀲𑀓𑀮𑀓𑀯𑀺𑀚𑀦 𑀳𑀤𑀬𑀸𑀦𑀦𑁆𑀤𑀤𑀸𑀦𑀦𑀺𑀤𑀸𑀦𑁂 𑀚𑀺𑀦𑀯𑀁𑀲𑀤𑀻𑀧𑁂 𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑁂 𑀧𑀸𑀡𑀺𑀕𑁆𑀕𑀳𑀫𑀗𑁆𑀕𑀮𑀼𑀲𑁆𑀲𑀯𑀧𑀯𑀢𑁆𑀢𑀺𑀧𑀭𑀺𑀤𑀻𑀧𑁄. 𑀦𑀯𑀫𑁄 𑀲𑀕𑁆𑀕𑁄.

𑁧. ¶

𑀕𑀼𑀡𑀫𑀡𑀺𑀫𑀡𑀺𑀫𑀸 𑀲𑁄 𑀤𑁂𑀯𑀭𑀸𑀚𑀸’𑀯 𑀭𑀸𑀚𑀸

𑀲𑀼𑀔𑀫𑀦𑀼𑀪𑀯𑀫𑀸𑀦𑁄 𑀯𑀸𑀚𑀺𑀬𑀸𑀦𑁂𑀦 𑀬𑁂𑀦,

𑀪𑀫𑀭𑀪𑀭𑀺𑀢𑀫𑀸𑀮𑀸 𑀫𑀗𑁆𑀕𑀮𑀼𑀬𑁆𑀬𑀸𑀦𑀪𑀽𑀫𑀺

𑀢𑀤𑀯𑀲𑀭𑀺 𑀓𑀤𑀸𑀘𑀺 𑀲𑀸𑀮𑀺𑀦𑀻 (𑀫𑀸𑀮𑀺𑀦𑀻) 𑀳𑀺; ()

𑁨.

𑀉𑀧𑀕𑀢𑀲𑀫𑀬𑁄’𑀢𑀺 𑀩𑀼𑀚𑁆𑀛𑀦𑀢𑁆𑀣𑀸𑀬 𑀩𑁄𑀥𑀺𑀁

𑀲𑀼𑀫𑀭𑀺𑀬 𑀲𑀼𑀭𑀧𑀼𑀢𑁆𑀢𑀸 𑀩𑁄𑀥𑀺𑀲𑀢𑁆𑀢𑁂 𑀯𑀚𑀦𑁆𑀢𑁂,

𑀪𑀯𑀯𑀺𑀭𑀢𑀺𑀲𑀫𑀢𑁆𑀣𑀁 𑀤𑀲𑁆𑀲𑀬𑀼𑀁 𑀫𑀸𑀧𑀬𑀺𑀢𑁆𑀯𑀸

𑀚𑀭𑀲𑀓𑀝𑀲𑀭𑀽𑀧𑀁 𑀚𑀺𑀡𑁆𑀡𑀭𑀽𑀧𑀁𑀓 𑀯𑀺𑀭𑀽𑀧𑀁; ()

𑁩. ¶

𑀓𑀺𑀫𑀺𑀤𑀫𑀺𑀢𑀺𑀳𑀧𑀼𑀝𑁆𑀞𑁄 𑀚𑀺𑀡𑁆𑀡𑀭𑀽𑀧𑀁 𑀯𑀺𑀧𑀲𑁆𑀲

𑀯𑀺𑀫𑀢𑀺𑀧𑀭𑀯𑀲𑁄 𑀲𑁄 𑀲𑀸𑀭𑀣𑀺𑀁 𑀭𑀽𑀧𑀲𑀸𑀭𑁄,

𑀦𑀺𑀚𑀳𑀤𑀬𑀦𑀺𑀥𑀸𑀦𑁂 𑀤𑁂𑀯𑀢𑀸𑀘𑁄𑀤𑀺𑀢𑀲𑁆𑀲

𑀦𑀺𑀤𑀳𑀺 𑀥𑀦𑀫𑀺𑀯𑀕𑁆𑀖𑀁 𑀢𑀲𑁆𑀲𑀥𑀫𑁆𑀫𑁄𑀧𑀤𑁂𑀲𑀁; ()

𑁪.

𑀳𑀭𑀺𑀢𑀦𑀴𑀓𑀮𑀸𑀧𑀁 𑀫𑀗𑁆𑀕𑀮𑀼𑀬𑁆𑀬𑀸𑀦𑀫𑀕𑁆𑀕𑁂

𑀬𑀣𑀭𑀺𑀯’𑀳𑀺𑀫𑀼𑀔𑀝𑁆𑀞𑀸 𑀓𑀼𑀜𑁆𑀚𑀭𑀺 𑀪𑀜𑁆𑀚𑀫𑀸𑀦𑀸,

𑀢𑀣𑀭𑀺𑀯’𑀪𑀺𑀪𑀯𑀦𑁆𑀢𑀻 𑀲𑀩𑁆𑀩𑀬𑁄𑀩𑁆𑀩𑀜𑁆𑀜𑀤𑀧𑁆𑀧𑀁

𑀔𑀭𑀢𑀭𑀚𑀭𑀢𑀸 𑀲𑀸 𑀅𑀢𑁆𑀢𑀧𑀘𑁆𑀘𑀓𑁆𑀔𑀪𑀽𑀢𑀸; ()

𑁫.

𑀫𑀼𑀔𑀓𑀼𑀓𑀯𑀮𑀬𑀕𑀩𑁆𑀪𑀸 𑀪𑀝𑁆𑀞𑀓𑀺𑀜𑁆𑀚𑀓𑁆𑀔𑀲𑁄𑀪𑀸

𑀪𑀯𑀺 𑀓𑀞𑀺𑀦𑀚𑀭𑀸𑀭𑀺𑀔𑀡𑁆𑀟𑀤𑀦𑁆𑀢𑀝𑁆𑀞𑀺𑀧𑀦𑁆𑀢𑀺,

𑀓𑀼𑀝𑀺𑀮𑀧𑀮𑀺𑀢𑀚𑀸𑀢𑀁 𑀢𑀜𑁆𑀚𑀭𑀸𑀬𑀸’𑀪𑀺𑀲𑁂𑀓𑁂

𑀲𑀺𑀭𑀲𑀺 𑀭𑀘𑀺𑀢𑀲𑁂𑀢𑀘𑁆𑀙𑀢𑁆𑀢𑀲𑁄𑀪𑀁 𑀩𑀩𑀦𑁆𑀥; ()

𑁬. ¶

𑀅𑀯𑀺𑀭𑀴𑀯𑀮𑀺𑀬𑁄 𑀢𑀸 𑀚𑀺𑀡𑁆𑀡𑀭𑀽𑀧𑀲𑁆𑀲 𑀘𑀫𑁆𑀫𑁂

𑀧𑀪𑀯𑀩𑀮𑀯𑀢𑁂𑀚𑁄𑀥𑀸𑀢𑀼𑀯𑁂𑀕𑀼𑀝𑁆𑀞𑀺𑀢𑀸’𑀲𑀼𑀁,

𑀢𑀭𑀮𑀲𑀮𑀺𑀮𑀧𑀺𑀝𑁆𑀞𑁂 𑀲𑁂𑀬𑁆𑀬𑀣𑀸𑀧𑁄’𑀤𑀥𑀺𑀲𑁆𑀲

𑀢𑀭𑀮𑀲𑀮𑀺𑀮𑀧𑀺𑀝𑁆𑀞𑁂 𑀲𑁂𑀬𑁆𑀬𑀣𑀸𑀧𑁄’𑀤𑀥𑀺𑀲𑁆𑀲

𑀧𑀮𑀬𑀧𑀯𑀦𑀯𑁂𑀕𑀼’𑀢𑁆𑀢𑀼𑀗𑁆𑀕𑀓𑀮𑁆𑀮𑁄𑀮𑀫𑀸𑀮𑀸 ()

𑁭.

𑀞𑀺𑀢𑀫𑀼𑀧𑀯𑀦𑀧𑀦𑁆𑀣𑁂 𑀯𑀗𑁆𑀓𑀕𑁄𑀧𑀸𑀡𑀲𑀺’𑀯

𑀅𑀦𑀼𑀚𑀼𑀓𑀫𑀼𑀚𑀼𑀪𑀼𑀢𑀁 𑀤𑀡𑁆𑀟𑀫𑁄𑀮𑀼𑀩𑁆𑀪 𑀪𑀼𑀫𑁆𑀬𑀸,

𑀦𑀺𑀚𑀢𑀭𑀼𑀡𑀯𑀺𑀮𑀸𑀲𑀁 𑀮𑀓𑁆𑀔𑀫𑀸𑀧𑀸𑀤𑀬𑀦𑁆𑀢𑀁

𑀥𑀦𑀼𑀫𑀺𑀯 𑀲𑀕𑀼𑀡𑀁 𑀢𑀁 𑀭𑀽𑀧𑀫𑀤𑁆𑀤𑀓𑁆𑀔𑀺 𑀥𑀻𑀭𑁄; ()

𑁮. ¶

𑀚𑀺𑀦𑀺𑀅𑀚𑀕𑀭𑀪𑁄𑀕𑁂 𑀚𑀺𑀡𑁆𑀡𑀦𑀺𑀫𑁆𑀫𑁄𑀓𑀪𑀸𑀭𑀁

𑀢𑀺𑀮𑀓𑀯𑀺𑀩𑀢𑀘𑀫𑁆𑀫𑀁 𑀢𑀦𑁆𑀢𑀺𑀭𑁄𑀚𑀢𑁆𑀢𑀪𑀸𑀯𑁂,

𑀅𑀧𑀕𑀢𑀖𑀦𑀫𑀁𑀲𑁄 𑀨𑀸𑀲𑀼𑀓𑀝𑁆𑀞𑀺𑀧𑁆𑀧𑀦𑁆𑀥𑁄

𑀅𑀚𑀺𑀦𑀺𑀢𑀺𑀭𑀯𑀮𑁂𑀧𑀁 𑀓𑀼𑀟𑁆𑀟𑀤𑀸𑀭𑀼𑀧𑁆𑀧𑀩𑀦𑁆𑀥𑀁; ()

𑁯.

𑀯𑀺𑀕𑀢𑀩𑀮𑀫𑀤𑀸𑀤𑀺𑀁 𑀯𑀺𑀲𑁆𑀲𑀯𑀦𑁆𑀢𑀁 𑀲𑀭𑀻𑀭𑁂

𑀦𑀯𑁆𑀳𑀺 𑀯𑀡𑀫𑀼𑀔𑁂𑀳𑀺 𑀕𑀼𑀣𑀫𑀼𑀢𑁆𑀢𑀸𑀤𑁆𑀬’𑀲𑀽𑀯𑀺𑀁,

𑀯𑀮𑀺𑀯𑀺𑀲𑀫𑀓𑀧𑁄𑀮𑀁 𑀓𑀫𑁆𑀧𑀫𑀸𑀦𑀼𑀢𑁆𑀢𑀫𑀗𑁆𑀕𑀁

𑀲𑀼𑀯𑀺𑀲𑀤𑀫𑀢𑀺𑀦𑁄 𑀢𑀁 𑀧𑀲𑁆𑀲𑀢𑁄 𑀚𑀺𑀡𑁆𑀡𑀭𑀽𑀧𑀁; ()

𑁧𑁦.

𑀪𑀼𑀯𑀦𑀫𑀦𑀯𑀲𑁂𑀲𑀁 𑀢𑀲𑁆𑀲𑀼’𑀧𑀝𑁆𑀞𑀸𑀲𑀺 𑀲𑀫𑁆𑀧-

𑀚𑁆𑀚𑀮𑀺𑀢𑀫𑀣 𑀚𑀭𑀸𑀬𑀸’𑀤𑀺𑀢𑁆𑀢𑀕𑁂𑀳𑀢𑁆𑀢𑀬𑀁’𑀯,

𑀅𑀳𑀫𑀧𑀓𑀺 𑀅𑀦𑀢𑀻𑀢𑁄 𑀥𑀫𑁆𑀫𑀫𑁂𑀢𑀦𑁆𑀢𑀺 𑀯𑀢𑁆𑀯𑀸

𑀪𑀯𑀦𑀯𑀦𑀫𑀕𑀜𑁆𑀙𑀺 𑀚𑀸𑀢𑀺𑀬𑀼’𑀓𑁆𑀓𑀡𑁆𑀞𑀺𑀢𑀢𑁆𑀢𑁄; ()

𑁧𑁧. ¶

𑀧𑀼𑀦𑀭𑀼𑀧𑀯𑀦𑀫𑀕𑁆𑀕𑀁 𑀑𑀕𑀳𑀦𑁆𑀢𑀲𑁆𑀲 𑀭𑀜𑁆𑀜𑁄

𑀲𑀼𑀔𑀫𑀦𑀼𑀪𑀯𑀦𑀢𑁆𑀣𑀁 𑀤𑁂𑀯𑀢𑀸𑀫𑀸𑀧𑀬𑀺𑀢𑁆𑀯𑀸,

𑀧𑀭𑀧𑀭𑀺𑀳𑀭𑀦𑀻𑀬𑀁 𑀖𑁄𑀭𑀭𑁄𑀕𑀸𑀯𑀢𑀺𑀡𑁆𑀡𑀁

𑀅𑀧𑀭𑀫𑀧𑀺 𑀯𑀺𑀭𑀽𑀧𑀁 𑀤𑀲𑁆𑀲𑀬𑀼𑀁 𑀯𑁆𑀬𑀸𑀥𑀺𑀭𑀽𑀧𑀁; ()

𑁧𑁨.

𑀯𑀺𑀲𑀤𑀫𑀢𑀺 𑀯𑀺𑀫𑀢𑁆𑀬𑀸 𑀲𑀓𑁆𑀬𑀯𑀁𑀲𑁂𑀓𑀓𑁂𑀢𑀼

𑀓𑀺𑀫𑀺𑀫𑀺𑀯𑀧𑀮𑀺𑀧𑀦𑁆𑀦𑀁 𑀯𑀘𑁆𑀘𑀧𑀲𑁆𑀲𑀸𑀯𑀧𑀗𑁆𑀓𑁂,

𑀧𑀪𑀯𑀩𑀮𑀯𑀤𑀼𑀓𑁆𑀔𑀁 𑀢𑀁 𑀧𑀭𑀸𑀥𑀻𑀦𑀯𑀼𑀢𑁆𑀢𑀺𑀁

𑀓𑀺𑀫𑀺𑀤𑀫𑀺𑀢𑀺 𑀧𑀤𑀺𑀲𑁆𑀯𑀸 𑀧𑀸𑀚𑀺𑀢𑀸𑀭𑀁 𑀅𑀧𑀼𑀘𑁆𑀙𑀺; ()

𑁧𑁩.

𑀯𑀭𑀫𑀢𑀺 𑀯𑀭𑀥𑀫𑁆𑀫𑀁 𑀢𑁂𑀦 𑀲𑀽𑀢𑁂𑀦 𑀯𑀼𑀢𑁆𑀢𑀁

𑀅𑀫𑀢𑀫𑀺𑀯 𑀧𑀺𑀩𑀦𑁆𑀢𑁄 𑀲𑁄𑀢𑀥𑀸𑀢𑁆𑀯𑀜𑁆𑀚𑀮𑀻𑀳𑀺,

𑀅𑀕𑀫𑀧𑀺 𑀅𑀦𑀢𑀺𑀢𑁄 𑀩𑁆𑀬𑀸𑀥𑀺𑀥𑀫𑁆𑀫𑀦𑁆𑀢𑀺 𑀢𑀫𑁆𑀳𑀸

𑀦𑀺𑀚𑀪𑀯𑀦𑀯𑀦𑀁 𑀲𑁄𑀧𑀸’𑀕 𑀲𑀁𑀯𑀺𑀕𑁆𑀕𑀭𑀽𑀧𑁄; ()

𑁧𑁪. ¶

𑀢𑀤𑀼𑀧𑀯𑀦𑀯𑀺𑀫𑀸𑀦𑀁 𑀯𑀸𑀚𑀺𑀬𑀸𑀦𑁂𑀦 𑀦𑀸𑀣𑁂

𑀯𑀚𑀢𑀺 𑀲𑀢𑀺 𑀓𑀤𑀸𑀘𑀺 𑀫𑀸𑀧𑀬𑀼𑀁 𑀤𑁂𑀯𑀢𑀸𑀬𑁄,

𑀲𑀼𑀡𑀔𑀓𑀼𑀮𑀮𑀕𑀺𑀚𑁆𑀛𑀸𑀤𑀻𑀳𑀻𑀯𑀸 𑀔𑀚𑁆𑀚𑀫𑀸𑀦𑀁

𑀦𑀭𑀓𑀼𑀡𑀧𑀲𑀭𑀻𑀭𑀁 𑀉𑀤𑁆𑀥𑀼𑀫𑀸𑀢𑀁 𑀧𑀞𑀫𑁆𑀳𑀺; ()

𑁧𑁫.

𑀧𑀪𑀯𑀓𑀺𑀫𑀺𑀓𑀼𑀮𑀸𑀦𑀁 𑀘𑀸𑀮𑀬𑀁 𑀦𑀻𑀮𑀯𑀡𑁆𑀡𑀁

𑀯𑀡𑀯𑀺𑀯𑀭𑀫𑀼𑀔𑁂𑀳𑀺 𑀮𑁄𑀳𑀺𑀢𑀁 𑀧𑀕𑁆𑀖𑀭𑀦𑁆𑀢𑀁,

𑀲𑀓𑀼𑀡𑀕𑀡𑁆𑀯𑀺𑀢𑀘𑁆𑀙𑀺𑀁 𑀫𑀓𑁆𑀔𑀺𑀓𑀸𑀫𑀓𑁆𑀔𑀺𑀢𑀗𑁆𑀕𑀁

𑀲𑀼𑀫𑀢𑀺 𑀫𑀢𑀲𑀭𑀻𑀭𑀁 𑀅𑀤𑁆𑀤𑀲𑀸 𑀲𑀸𑀭𑀳𑀻𑀦𑀁; ()

𑁧𑁬.

𑀅𑀪𑀺𑀕𑀫𑀺 𑀕𑀫𑀬𑀦𑁆𑀢𑁄 𑀪𑀸𑀭𑀢𑀺𑀁 𑀲𑀸𑀭𑀣𑀺𑀲𑁆𑀲

𑀦𑀺𑀚𑀲𑀯𑀡𑀬𑀼𑀕𑀲𑁆𑀫𑀺𑀁 𑀳𑁂𑀫𑀢𑀸𑀟𑀗𑁆𑀓𑀲𑁄𑀪𑀁,

𑀅𑀳𑀫𑁆𑀧𑀺 𑀫𑀭𑀡𑀁 𑀪𑁄 𑀦𑀸𑀢𑀺𑀯𑀢𑁆𑀢𑁄𑀢𑀺 𑀯𑀢𑁆𑀯𑀸

𑀯𑀦𑀫𑀺𑀯 𑀫𑀺𑀕𑀭𑀸𑀚𑀸 𑀲𑀓𑁆𑀬𑀭𑀸𑀚𑀸 𑀯𑀺𑀫𑀸𑀦𑀁; ()

𑁧𑁭. ¶

𑀧𑀼𑀦𑀧𑀺 𑀲𑀧𑀭𑀺𑀲𑁄 𑀲𑁄 𑀬𑀸𑀦𑀫𑀸𑀭𑀼𑀬𑁆𑀳 𑀪𑀤𑁆𑀭𑀁

𑀓𑀢𑀺𑀧𑀬𑀤𑀺𑀯𑀲𑀸𑀦𑀁 𑀅𑀘𑁆𑀘𑀬𑁂𑀦𑀸’𑀥𑀺𑀭𑀸𑀚𑀸,

𑀓𑀧𑀺𑀮𑀧𑀼𑀭𑀯𑀭𑀫𑁆𑀳𑀸’𑀦𑀗𑁆𑀕𑀭𑀗𑁆𑀕𑀸𑀮𑀬𑀸𑀪𑀁

𑀢𑀤𑀼𑀧𑀯𑀦𑀫𑀕𑀜𑁆𑀙𑀺 𑀧𑀜𑁆𑀘𑀩𑀸𑀡𑀸𑀪𑀺𑀭𑀽𑀧𑁄; ()

𑁧𑁮.

𑀕𑀼𑀡𑀫𑀡𑀺 𑀫𑀡𑀺𑀯𑀡𑁆𑀡𑀁 𑀧𑀢𑁆𑀢𑀫𑀸𑀤𑀸𑀬 𑀧𑀢𑁆𑀣𑁂

𑀧𑀦𑀲𑀲𑀭𑀲𑀭𑀸𑀕𑀁 𑀯𑀻𑀯𑀭𑀁𑀧𑀸𑀭𑀼𑀧𑀺𑀢𑁆𑀯𑀸,

𑀞𑀺𑀢𑀫𑀯𑀺𑀓𑀮𑀘𑀓𑁆𑀔𑀼𑀁 𑀦𑀺𑀫𑁆𑀫𑀺𑀢𑀁 𑀤𑁂𑀯𑀢𑀸𑀳𑀺

𑀲𑀼𑀫𑀢𑀺 𑀲𑀫𑀡𑀭𑀽𑀧𑀁 𑀩𑀼𑀤𑁆𑀥𑀭𑀽𑀧𑀁’𑀯 𑀧𑀲𑁆𑀲𑀺; ()

𑁧𑁯.

𑀢𑀤𑀳𑀦𑀺 𑀯𑀺𑀩𑀼𑀥𑀸’𑀥𑀺𑀝𑁆𑀞𑀸𑀦𑀢𑁄 𑀪𑀸𑀯𑀦𑀻𑀬𑁄

𑀬𑀢𑀺𑀧𑀢𑀺𑀭𑀺𑀯 𑀲𑀽𑀢𑁄 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀺,

𑀲𑀫𑀡𑀕𑀼𑀡𑀫𑀦𑁂𑀓𑀸𑀤𑀻𑀦𑀯𑀁 𑀧𑀜𑁆𑀘𑀓𑀸𑀫𑁂

𑀢𑀫𑀯𑀤𑀺 𑀕𑀫𑀦𑀲𑁆𑀫𑀺𑀁 𑀆𑀦𑀺𑀲𑀁𑀲𑀜𑁆𑀘 𑀕𑁂𑀳𑀸; ()

𑁨𑁦. ¶

𑀓𑀼𑀳𑀦𑀮𑀧𑀦𑀫𑀺𑀘𑁆𑀙𑀸𑀚𑀻𑀯𑀫𑁄𑀳𑀸𑀬 𑀓𑀼𑀘𑁆𑀙𑀺-

𑀧𑀭𑀳𑀭𑀡𑀲𑀫𑀢𑁆𑀣𑀁 𑀫𑀢𑁆𑀢𑀺𑀓𑀸𑀧𑀢𑁆𑀢𑀫𑀲𑁆𑀲,

𑀓𑀭 𑀓𑀫𑀓𑀮𑀕𑀢𑀁 𑀲𑁄 𑀧𑀸𑀭𑀫𑀻𑀘𑁄𑀤𑀺𑀢𑀢𑁆𑀢𑁄

𑀯𑀺𑀲𑀤𑀫𑀢𑀺 𑀧𑀤𑀺𑀲𑁆𑀯𑀸 𑀲𑀫𑁆𑀧𑀲𑀸𑀤𑀁 𑀚𑀦𑁂𑀲𑀺; ()

𑁨𑁧.

𑀯𑀺𑀓𑀲𑀺𑀢𑀓𑀮𑀺𑀓𑀸𑀮𑀗𑁆𑀓𑀸𑀭𑀫𑀼𑀤𑁆𑀤𑀸𑀮𑀲𑀸𑀮-

𑀫𑀺𑀯 𑀲𑀫𑀡𑀯𑀺𑀮𑀸𑀲𑀁 𑀘𑀻𑀯𑀭𑁄𑀪𑀸𑀲𑀫𑀕𑁆𑀕𑁂,

𑀦𑀬𑀦𑀫𑀥𑀼𑀓𑀭𑀸𑀦𑀁 𑀪𑀸𑀭𑀫𑀸𑀥𑀸𑀬 𑀥𑀻𑀭𑁄

𑀦𑀺𑀚𑀫𑀦𑀲𑀺 𑀚𑀦𑁂𑀲𑀺 𑀘𑀻𑀯𑀭𑁂 𑀲𑀫𑁆𑀧𑀲𑀸𑀤𑀁; ()

𑁨𑁨.

𑀔𑀡𑀺𑀓𑀫𑀭𑀡𑀤𑀼𑀓𑁆𑀔𑀸𑀯𑀝𑁆𑀝𑀫𑀸𑀩𑀸𑀥𑀭𑀸𑀲𑀺-

𑀫𑀓𑀭𑀦𑀺𑀓𑀭𑀪𑀺𑀫𑀁 𑀢𑀁 𑀚𑀭𑀸𑀯𑀻𑀘𑀺𑀯𑁂𑀕𑀁,

𑀪𑀯𑀚𑀮𑀥𑀺𑀫𑀕𑀸𑀥𑀁 𑀚𑀸𑀢𑀺𑀯𑁂𑀮𑀸𑀯𑀥𑀺𑀁 𑀲𑁄

𑀅𑀬𑀫𑀺𑀯 𑀧𑀝𑀺𑀧𑀦𑁆𑀦𑀸 𑀦𑀺𑀢𑁆𑀢𑀭𑁂𑀬𑁆𑀬𑀼𑀦𑁆𑀢𑁆𑀬’𑀯𑁂𑀤𑀺; ()

𑁨𑁩. ¶

𑀲𑀫𑀡𑀯𑀤𑀦𑀧𑀻𑀦𑀘𑁆𑀘𑀦𑁆𑀤𑀩𑀺𑀫𑁆𑀩𑁄𑀤𑀬𑁂𑀦

𑀯𑀺𑀓𑀲𑀺𑀢𑀫𑀦𑀓𑀼𑀦𑁆𑀤𑁄 𑀦𑀦𑁆𑀤𑀦𑀼𑀬𑁆𑀬𑀸𑀦𑀲𑁄𑀪𑀁,

𑀉𑀧𑀯𑀦𑀫𑀪𑀻𑀕𑀦𑁆𑀢𑀼𑀁 𑀲𑀦𑁆𑀤𑀦𑀁 𑀘𑀸𑀭𑀬𑁂’𑀢𑀺

𑀢𑀤𑀳𑀦𑀺 𑀫𑀦𑀼𑀚𑀺𑀦𑁆𑀤𑁄 𑀲𑀦𑁆𑀤𑀦𑀸𑀘𑀸𑀭𑀺𑀫𑀸𑀳; ()

𑁨𑁪.

𑀯𑀮𑀬𑀺𑀢𑀦𑀴𑀢𑀸𑀴𑀻𑀢𑀸𑀮𑀳𑀺𑀦𑁆𑀢𑀸𑀮𑀧𑀦𑁆𑀢𑀺𑀁

𑀫𑀮𑀬𑀚𑀢𑀭𑀼𑀚𑀸𑀬𑀸𑀲𑀻𑀢𑀮𑀁 𑀦𑀺𑀫𑁆𑀫𑀮𑀸𑀧𑀁,

𑀉𑀧𑀯𑀦𑀫𑀯𑀢𑀺𑀡𑁆𑀡𑁄 𑀦𑀦𑁆𑀤𑀦𑀁 𑀯𑀸𑀲𑀯𑁄’𑀯

𑀅𑀓𑀭𑀺 𑀤𑀺𑀯𑀲𑀪𑀸𑀕𑀁 𑀲𑀸𑀥𑀼𑀓𑀻𑀴𑀁 𑀲𑀭𑀸𑀚𑀸; ()

𑁨𑁫.

𑀤𑀲𑀲𑀢𑀓𑀺𑀭𑀡𑀲𑁆𑀫𑀺𑀁 𑀬𑀲𑁆𑀲 𑀓𑀺𑀢𑁆𑀢𑀺𑀧𑁆𑀧𑀩𑀦𑁆𑀥-

𑀲𑀭𑀤𑀚𑀮𑀤𑀭𑀸𑀚𑀺𑀙𑀸𑀤𑀺𑀢𑀲𑁆𑀫𑀺𑀁 𑀦𑀪𑀲𑁆𑀫𑀺𑀁,

𑀉𑀧𑀭𑀺𑀲𑀺𑀭𑀲𑀺 𑀲𑁂𑀢𑀘𑁆𑀙𑀢𑁆𑀢𑀲𑁄𑀪𑀁 𑀪𑀚𑀦𑁆𑀢𑁂

𑀢𑀤𑀺𑀬𑀘𑀭𑀡𑀮𑀓𑁆𑀔𑁆𑀬𑀸’𑀮𑀗𑁆𑀓𑀭𑀺 𑀯𑀸𑀧𑀺𑀢𑀻𑀭𑀁; ()

𑁨𑁬. ¶

𑀲𑀭𑀲𑀺𑀚𑀯𑀤𑀦𑁂𑀳𑀺 𑀳𑀁𑀲𑀧𑀻𑀦𑀢𑁆𑀣𑀦𑁂𑀳𑀺

𑀓𑀼𑀯𑀮𑀬𑀦𑀬𑀦𑁂𑀳𑀻 𑀦𑀻𑀮𑀺𑀓𑀸𑀓𑀼𑀦𑁆𑀢𑀮𑁂𑀳𑀺,

𑀫𑀥𑀼𑀫𑀤𑀫𑀼𑀤𑀺𑀢𑀸𑀮𑀻𑀦𑀽𑀧𑀼𑀭𑁂𑀪𑀸’𑀯𑀭𑁄𑀥-

𑀚𑀦𑀫𑀺𑀯 𑀭𑀫𑀡𑀻𑀬𑀁 𑀑𑀢𑀭𑀺 𑀲𑁄 𑀢𑀴𑀸𑀓𑀁; () (𑀲𑀺𑀮𑁂𑀲𑀩𑀦𑁆𑀥𑀦𑀁)

𑁨𑁭.

𑀯𑀭𑀬𑀼𑀯𑀢𑀺𑀚𑀦𑀸𑀦𑀁 𑀓𑀼𑀫𑁆𑀪𑀕𑀫𑁆𑀪𑀻𑀭𑀦𑀸𑀪𑀺-

𑀯𑀺𑀯𑀭𑀕𑀳𑀺𑀢𑀯𑀸𑀭𑀺 𑀯𑀸𑀧𑀺 𑀲𑀸 𑀭𑀺𑀢𑁆𑀢𑀭𑀽𑀧𑀸,

𑀖𑀦𑀣𑀦𑀚𑀖𑀦𑀸𑀦𑀁 𑀲𑀗𑁆𑀕𑀫𑁂𑀦𑁂’𑀢𑀭𑀸𑀲𑀁

𑀧𑀼𑀦𑀭𑀪𑀯𑀺 𑀓𑀧𑀧𑀼𑀡𑁆𑀡𑀸 𑀧𑀻𑀢𑀺𑀯𑀺𑀧𑁆𑀨𑀸𑀭𑀺𑀦𑀻𑀯; ()

𑁨𑁮.

𑀅𑀪𑀺𑀦𑀯𑀭𑀫𑀡𑀺𑀦𑀁 𑀚𑀸𑀢𑀼𑀮𑀚𑁆𑀚𑀸𑀢𑀼𑀭𑀸𑀦𑀁

𑀯𑀺𑀫𑀼𑀔𑀦𑀬𑀦𑀫𑀻𑀦𑁂 𑀫𑀻𑀦𑀓𑁂𑀢𑀼𑀧𑀫𑁂𑀦,

𑀉𑀧𑀯𑀥𑀺𑀢𑀼𑀫𑀻𑀯𑀕𑁆𑀕𑁂 𑀔𑀺𑀢𑁆𑀢𑀚𑀸𑀮𑀩𑁆𑀩𑀺𑀮𑀸𑀲𑀁

𑀔𑀡𑀫𑀯𑀳𑀭𑀺 𑀭𑀜𑁆𑀜𑀸 𑀯𑀺𑀤𑁆𑀥𑀳𑀢𑁆𑀣𑀫𑁆𑀩𑀼𑀥𑀸𑀭𑀸; ()

𑁨𑁯. ¶

𑀦𑀯𑀚𑀮𑀓𑀡𑀺𑀓𑀸𑀮𑀗𑁆𑀓𑀸𑀭𑀯𑀢𑁆𑀢𑀸𑀭𑀯𑀺𑀦𑁆𑀤𑀸

𑀖𑀦𑀓𑀼𑀘𑀓𑀮𑀳𑀁𑀲𑀸 𑀓𑁂𑀲𑀲𑁂𑀯𑀸𑀮𑀦𑀻𑀮𑀸,

𑀧𑀢𑀺𑀫𑀣𑀺𑀢𑀢𑀭𑀗𑁆𑀕𑀸𑀓𑀺𑀡𑁆𑀡𑀲𑀼𑀲𑁆𑀲𑁄𑀡𑀺𑀯𑁂𑀮𑀸

𑀲𑀭𑀲𑀺 𑀲𑀭𑀲𑀺’𑀯𑀸’𑀲𑀺 𑀢𑀢𑁆𑀭 𑀓𑀻𑀴𑀸𑀢𑀼𑀭𑁂’𑀓𑀸; ()

𑁩𑁦.

𑀲𑀲𑀺𑀭𑀽𑀘𑀺𑀭𑀫𑀼𑀔𑀻𑀦𑀁 𑀔𑁄𑀫𑀯𑀢𑁆𑀣𑀦𑁆𑀢𑀭𑀻𑀬𑁂

𑀲𑀦𑀺𑀓𑀫𑀧𑀦𑀬𑀦𑁆𑀢𑁂 𑀯𑀺𑀘𑀻𑀳𑀢𑁆𑀣𑁂𑀳𑀺 𑀭𑀜𑁆𑀜𑀸,

𑀭𑀘𑀺𑀢𑀦𑀬𑀦𑀓𑀦𑁆𑀢𑀻 𑀩𑁆𑀬𑀦𑁆𑀢 𑀕𑀫𑁆𑀪𑀻𑀭𑀦𑀸𑀪𑀻-

𑀲𑀭𑀲𑀺𑀚𑀧𑀭𑀺𑀬𑀦𑁆𑀢𑀸 𑀦𑀸𑀴𑀧𑀦𑁆𑀢𑀻𑀭𑀺’𑀯𑀸’𑀲𑀺; ()

𑁨𑁯. ¶

𑀦𑀯𑀚𑀮𑀓𑀡𑀺𑀓𑀸𑀮𑀗𑁆𑀓𑀸𑀭𑀯𑀢𑁆𑀢𑀸𑀭𑀯𑀺𑀦𑁆𑀤𑀸

𑀖𑀦𑀓𑀼𑀘𑀓𑀮𑀳𑀁𑀲𑀸 𑀓𑁂𑀲𑀲𑁂𑀯𑀸𑀮𑀦𑀻𑀮𑀸,

𑀧𑀢𑀺𑀫𑀣𑀺𑀢𑀢𑀭𑀗𑁆𑀕𑀸𑀓𑀺𑀡𑁆𑀡𑀲𑀼𑀲𑁆𑀲𑁄𑀡𑀺𑀯𑁂𑀮𑀸

𑀲𑀭𑀲𑀺 𑀲𑀭𑀲𑀺’𑀯𑀸’𑀲𑀺 𑀢𑀢𑁆𑀭 𑀓𑀻𑀴𑀸𑀢𑀼𑀭𑁂’𑀓𑀸; ()

𑁩𑁦.

𑀲𑀲𑀺𑀭𑀼𑀘𑀺𑀭𑀫𑀼𑀔𑀻𑀦𑀁 𑀔𑁄𑀫𑀯𑀢𑁆𑀣𑀦𑁆𑀢𑀭𑀻𑀬𑁂

𑀲𑀦𑀺𑀓𑀫𑀧𑀦𑀬𑀦𑁆𑀢𑁂 𑀯𑀺𑀯𑀺𑀪𑀡𑁆𑀣𑁂𑀳𑀺 𑀭𑀜𑁆𑀜𑀸,

𑀭𑀘𑀺𑀢𑀦𑀬𑀦𑀓𑀦𑁆𑀢𑀻 𑀩𑁆𑀬𑀦𑁆𑀢 𑀕𑀫𑁆𑀳𑀻𑀭𑀦𑀸𑀳𑀻

𑀲𑀭𑀲𑀺𑀚𑀧𑀭𑀺𑀬𑀦𑁆𑀢𑀸 𑀦𑀸𑀴𑀧𑀦𑁆𑀢𑀺𑀭𑀺’𑀯𑀸’𑀲𑀺; ()

𑁩𑁧. ¶

𑀧𑀼𑀦𑀭𑀧𑀺 𑀓𑀼𑀘𑀓𑀼𑀫𑁆𑀪𑀜𑁆𑀘𑀦𑁆𑀤𑀳𑀸𑀭𑁂𑀦𑀺𑀯𑀸’𑀧𑁂

𑀦𑀺𑀚𑀕𑀴𑀧𑀭𑀺𑀫𑀸𑀡𑁂 𑀲𑀦𑁆𑀦𑀺𑀫𑀼𑀕𑁆𑀕𑀗𑁆𑀕𑀦𑀸𑀦𑀁,

𑀫𑀮𑀺𑀦𑀓𑀫𑀮𑀺𑀦𑀻 𑀲𑀸 𑀮𑁄𑀘𑀦𑁂𑀳𑀸’𑀦𑀦𑁂𑀳𑀺

𑀅𑀪𑀯𑀺 𑀪𑀫𑀭𑀪𑀸𑀭’𑀫𑁆𑀪𑁄𑀚𑀲𑀡𑁆𑀟𑀸’𑀓𑀼𑀮𑁂’𑀘; ()

𑁩𑁨.

𑀫𑀥𑀼𑀫𑀤𑀫𑀥𑀼𑀧𑁂𑀳𑀺 𑀕𑀻𑀬𑀫𑀸𑀦𑁂𑀳𑀺 𑀯𑀺𑀘𑀺-

𑀪𑀼𑀚𑀲𑀢𑀧𑀳𑀝𑀸𑀳𑀺 𑀲𑁄𑀡𑀺𑀪𑁂𑀭𑀻𑀳𑀺 𑀣𑀺𑀦𑀁,

𑀮𑀮𑀺𑀢𑀓𑀫𑀮𑀲𑀻𑀲𑁂 𑀦𑀘𑁆𑀘𑀫𑀸𑀦𑀺𑀦𑁆𑀤𑀺𑀭𑀸𑀬

𑀅𑀚𑀺𑀦𑀺 𑀚𑀮𑀚𑀺𑀦𑀻 𑀲𑀸 𑀤𑀺𑀩𑁆𑀩𑀲𑀗𑁆𑀕𑀻𑀢𑀲𑀸𑀮𑀁; ()

𑁩𑁩.

𑀢𑀼𑀳𑀺𑀦𑀓𑀭𑀫𑀼𑀔𑀻𑀦𑀁 𑀢𑀦𑁆𑀢𑀴𑀸𑀓’𑀦𑁆𑀢𑀮𑀺𑀓𑁆𑀔𑁂

𑀲𑀼𑀮𑀮𑀺𑀢𑀪𑀼𑀚𑀯𑀮𑁆𑀮𑀻 𑀯𑀺𑀚𑁆𑀚𑀼𑀮𑁂𑀔𑀸𑀪𑀺𑀭𑀸𑀫𑀸,

𑀓𑀼𑀯𑀮𑀬𑀯𑀦𑀭𑀸𑀚𑀺 𑀦𑀻𑀮𑀚𑀻𑀫𑀼𑀢𑀭𑀸𑀚𑀺

𑀧𑀢𑀺𑀦𑀬𑀦𑀫𑀬𑀽𑀭𑁂 𑀓𑀻𑀴𑀬𑀦𑁆𑀢𑀻 𑀭𑀭𑀸𑀚; ()

𑁩𑁪. ¶

𑀨𑀼𑀝𑀓𑀼𑀯𑀮𑀬𑀳𑀢𑁆𑀣𑀁 𑀭𑀸𑀚𑀪𑀁𑀲𑁂𑀳𑀺 𑀔𑀺𑀢𑁆𑀢𑀁

𑀯𑀺𑀯𑀺𑀥𑀫𑀥𑀼𑀧𑀪𑀼𑀢𑁆𑀢𑀁 𑀥𑀫𑁆𑀫𑀯𑁂𑀮𑀸𑀢𑀺𑀯𑀢𑁆𑀢𑀁,

𑀬𑀣𑀭𑀺𑀯 𑀕𑀡𑀺𑀓𑀁 𑀢𑀁 𑀓𑀜𑁆𑀚𑀦𑀺𑀁 𑀲𑁄 𑀚𑀦𑀺𑀦𑁆𑀤𑁄

𑀢𑀤𑀳𑀦𑀺 𑀧𑀭𑀺𑀪𑀼𑀢𑁆𑀯𑀸’𑀫𑀦𑁆𑀤𑀫𑀸𑀦𑀦𑁆𑀯𑁆𑀤𑀫𑀸𑀧; () (𑀲𑀺𑀮𑁂𑀲𑀩𑀦𑁆𑀥𑀦𑀁)

𑁩𑁫.

𑀘𑀭𑀡’𑀦𑀼𑀯𑀚𑀫𑀸𑀦𑀩𑁆𑀩𑀻𑀘𑀺𑀲𑀗𑁆𑀔𑁄𑀪𑀢𑀻𑀭𑀁

𑀚𑀳𑀢𑀺 𑀲𑀢𑀺 𑀢𑀴𑀸𑀓𑀁 𑀲𑀸𑀯𑀭𑁄𑀥𑁂 𑀦𑀭𑀺𑀦𑁆𑀤𑁂,

𑀲𑀭𑀲𑀺𑀯𑀺𑀭𑀳𑀺𑀦𑀻𑀲𑀁𑀭𑀼𑀤𑁆𑀥𑀦𑀺𑀲𑁆𑀲𑀸𑀲𑀭𑀽𑀧𑁄

𑀫𑀼𑀤𑀼𑀲𑀼𑀭𑀪𑀺𑀲𑀫𑀻𑀭𑁄 𑀫𑀦𑁆𑀤𑀫𑀦𑁆𑀤𑀁 𑀧𑀯𑀸𑀬𑀺; ()

𑁩𑁬. ¶

𑀧𑀭𑀺𑀪𑀯𑀺 𑀭𑀯𑀺𑀩𑀺𑀫𑁆𑀩𑀁 𑀢𑀗𑁆𑀔𑀡𑀢𑁆𑀣𑀸𑀘𑀮𑀝𑁆𑀞𑀁

𑀢𑀳𑀺𑀫𑀼𑀧𑀮𑀢𑀮𑀝𑁆𑀞𑁄 𑀪𑀸𑀦𑀼𑀯𑀁𑀲𑁂𑀓𑀪𑀸𑀦𑀼,

𑀅𑀣 𑀲𑀭𑀲𑀺𑀯𑀥𑀽𑀦𑀁 𑀓𑀺𑀜𑁆𑀘𑀺𑀲𑀗𑁆𑀓𑁄𑀯𑀺𑀢𑀸𑀦𑀺

𑀲𑀭𑀲𑀺𑀚𑀯𑀤𑀦𑀸𑀢𑀺 𑀲𑁄𑀓𑀤𑀻𑀦𑀸𑀦𑀺𑀯𑀸’𑀲𑀼𑀁; ()

𑁩𑁭.

𑀅𑀲𑀺𑀢𑀦𑀪𑀲𑀺 𑀲𑀜𑁆𑀛𑀸𑀫𑁂𑀖𑀫𑀸𑀮𑀸𑀯𑀺𑀮𑀸𑀲𑀁

𑀅𑀪𑀺𑀪𑀯𑀺𑀬 𑀦𑀺𑀲𑀺𑀦𑁆𑀦𑁂 𑀢𑀢𑁆𑀭 𑀲𑀓𑁆𑀬𑀸𑀥𑀺𑀦𑀸𑀣𑁂,

𑀢𑀼𑀯𑀝𑀫𑀼𑀧𑀕𑀢𑀸 𑀢𑀁 𑀓𑀧𑁆𑀧𑀓𑀸’𑀦𑁂𑀓𑀯𑀢𑁆𑀣𑀸-

𑀪𑀭𑀡𑀯𑀺𑀓𑀢𑀺𑀳𑀢𑁆𑀣𑀸 𑀪𑀽𑀧𑀢𑀺𑀁 𑀪𑀽𑀲𑀡𑀢𑁆𑀣𑀁; ()

𑁩𑁮.

𑀭𑀯𑀺𑀓𑀼𑀮𑀭𑀯𑀺𑀦𑁄 𑀔𑁄 𑀥𑀫𑁆𑀫𑀢𑁂𑀚𑀸𑀪𑀺𑀪𑀽𑀢𑁄

𑀲𑀼𑀭𑀧𑀢𑀺 𑀲𑀼𑀭𑀧𑀼𑀢𑁆𑀢𑀁 𑀯𑀺𑀲𑁆𑀲𑀓𑀫𑁆𑀫𑀸𑀪𑀺𑀥𑀸𑀦𑀁,

𑀲𑀧𑀤𑀺 𑀧𑀳𑀺𑀡𑀺 𑀲𑀫𑁆𑀫𑀸 𑀤𑀺𑀩𑁆𑀩𑀯𑀢𑁆𑀣𑀸𑀤𑀺𑀦𑀸 𑀪𑁄

𑀢𑀺𑀪𑀼𑀯𑀦𑀲𑀭𑀡𑀁 𑀢𑀁 𑀪𑀽𑀲𑀬𑀲𑁆𑀲𑀽’𑀢𑀺 𑀯𑀢𑁆𑀯𑀸; ()

𑁩𑁯. ¶

𑀕𑀳𑀺𑀢𑀫𑀦𑀼𑀚𑀯𑁂𑀲𑁄 𑀲𑁄’𑀧𑀲𑀗𑁆𑀓𑀫𑁆𑀫 𑀲𑀻𑀲𑁂

𑀲𑀼𑀔𑀼𑀫𑀧𑀝𑀲𑀢𑁂𑀳𑀻 𑀯𑁂𑀞𑀦𑀜𑁆𑀘𑀸’𑀧𑀺 𑀤𑀢𑁆𑀯𑀸,

𑀫𑀡𑀺𑀓𑀦𑀓𑀫𑀬𑁂𑀳𑀺 𑀪𑀽𑀲𑀬𑀺 𑀪𑀽𑀲𑀡𑁂𑀳𑀺

𑀢𑀤𑀳𑀦𑀺 𑀪𑀯𑀺 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸’𑀯 𑀭𑀸𑀚𑀸; ()

𑁪𑁦.

𑀢𑀺𑀫𑀺𑀭𑀳𑀫𑀭𑀪𑀸𑀭’𑀓𑁆𑀓𑀦𑁆𑀢𑀧𑀸𑀘𑀻𑀦𑀧𑀲𑁆𑀲𑀁

𑀫𑀼𑀓𑀼𑀮𑀺𑀢𑀲𑀢𑀲𑀜𑁆𑀛𑀸𑀫𑁂𑀖𑀧𑀢𑁆𑀢𑀸𑀯𑀮𑀻𑀦𑀁,

𑀕𑀕𑀦𑀢𑀮𑀢𑀴𑀸𑀓𑀸𑀥𑀸𑀭𑀫𑀦𑁆𑀤𑀸𑀭𑀦𑀸𑀴𑀁

𑀓𑀫𑀮𑀫𑀓𑀼𑀮𑀲𑁄𑀪𑀁 𑀪𑀸𑀦𑀼𑀩𑀺𑀫𑁆𑀩𑀁 𑀩𑀩𑀦𑁆𑀥; ()

𑁪𑁧.

𑀧𑀳𑀺𑀡𑀺 𑀧𑀺𑀢𑀼𑀦𑀭𑀺𑀦𑁆𑀤𑁄 𑀲𑀸𑀲𑀦𑀁 𑀢𑀸𑀯 𑀢𑀲𑁆𑀲

𑀦𑀺𑀚𑀢𑀦𑀼𑀚𑀓𑀼𑀫𑀸𑀭𑀼’𑀧𑁆𑀧𑀢𑁆𑀢𑀺𑀫𑀸𑀭𑁄𑀘𑀬𑀺𑀢𑁆𑀯𑀸,

𑀧𑀫𑀼𑀤𑀺𑀢𑀪𑀤𑀬𑁄 𑀲𑁄 𑀮𑁂𑀔𑀡𑀸𑀮𑁄𑀓𑀦𑁂𑀦

𑀅𑀯𑀤𑀺𑀢𑀺 𑀫𑀫 𑀚𑀸𑀢𑀁 𑀩𑀦𑁆𑀥𑀦𑀁 𑀭𑀸𑀳𑀼𑀚𑀸𑀢𑁄; ()

𑁪𑁨. ¶

𑀢𑀤𑀳𑀦𑀺𑀧𑀺𑀢𑀼𑀭𑀜𑁆𑀜𑀸 𑀯𑀼𑀢𑁆𑀢𑀯𑀸𑀓𑁆𑀬𑀸𑀦𑀼𑀭𑀽𑀧𑀁

𑀢𑀳𑀺𑀫𑀔𑀺𑀮𑀧𑀤𑀢𑁆𑀣𑀁 𑀲𑀤𑁆𑀤𑀲𑀢𑁆𑀣𑀓𑁆𑀓𑀫𑁂𑀦,

𑀓𑀭𑀳𑀘𑀻 𑀫𑀦𑀼𑀚𑀺𑀦𑁆𑀤𑁄 𑀅𑀬𑁆𑀬𑀓𑁄 𑀲𑀗𑁆𑀕𑀳𑁂𑀢𑁆𑀯𑀸

𑀅𑀯𑀤𑀺𑀢𑀺 𑀫𑀫𑀢𑀢𑁆𑀢𑀸 𑀭𑀸𑀳𑀼𑀮𑁄𑀦𑀸𑀫𑀳𑁄𑀢𑀁; ()

𑁪𑁩.

𑀯𑀦𑀲𑀼𑀭𑀯𑀦𑀺𑀢𑀸𑀦𑀁 𑀮𑁄𑀘𑀦𑀺𑀦𑁆𑀤𑀻𑀯𑀭𑁂𑀳𑀺

𑀫𑀳𑀺𑀢𑀲𑀺𑀭𑀺𑀲𑀭𑀺𑀭𑁄 𑀪𑀤𑁆𑀭𑀫𑀸𑀭𑀼𑀬𑁆𑀳 𑀬𑀸𑀦𑀁,

𑀲𑀪𑀯𑀦𑀫𑀪𑀺𑀕𑀦𑁆𑀢𑀼𑀁 𑀑𑀲𑀭𑀺 𑀦𑀸𑀕𑀭𑀸𑀦𑀁

𑀲𑀼𑀯𑀺𑀫𑀮𑀦𑀬𑀦𑀸𑀮𑀻𑀢𑁄𑀭𑀡𑀸𑀓𑀺𑀡𑁆𑀡𑀯𑀻𑀣𑀺𑀁; ()

𑁪𑁪.

𑀯𑀺𑀯𑀝𑀫𑀡𑀺𑀓𑀯𑀸𑀝𑁄’𑀧𑀦𑁆𑀢𑀺𑀓𑀝𑁆𑀞𑀸 𑀯𑀺𑀫𑀸𑀦𑁂

𑀚𑀺𑀢𑀲𑀼𑀭𑀯𑀦𑀺𑀢𑀸’𑀲𑀺 𑀬𑀸 𑀧𑀺𑀢𑀼𑀘𑁆𑀙𑀸𑀬 𑀥𑀻𑀢𑀸,

𑀦𑀬𑀦𑀓𑀭𑀧𑀼𑀝𑁂𑀳𑀺 𑀭𑀽𑀧𑀲𑀸𑀭𑀁 𑀦𑀺𑀧𑀻𑀬

𑀲𑀫𑀺𑀢𑀭𑀢𑀺𑀧𑀺𑀧𑀸𑀲𑀸 𑀲𑀸 𑀓𑀺𑀲𑀸𑀕𑁄𑀢𑀫𑀻 𑀣𑀻; ()

𑁪𑁫. ¶

𑀚𑀺𑀢𑀫𑀦𑀲𑀺𑀚𑀭𑀽𑀧𑀁 𑀈𑀤𑀺𑀲𑀁 𑀬𑁂𑀲𑀫𑀢𑁆𑀣𑀺

𑀢𑀦𑀼𑀚𑀭𑀢𑀦𑀫𑀤𑁆𑀥𑀸 𑀦𑀺𑀩𑁆𑀩𑀼𑀢𑀸 𑀲𑀸’𑀧𑀺 𑀫𑀸𑀢𑀸,

𑀧𑀺𑀢𑀼𑀚𑀕𑀢𑀺𑀧𑀢𑀻 𑀲𑁄 𑀦𑀺𑀩𑁆𑀩𑀼𑀢𑁄 𑀲𑀻𑀢𑀺𑀪𑀽𑀢𑁄

𑀦𑀺𑀚𑀧𑀺𑀬𑀪𑀭𑀺𑀬𑀸’𑀧𑀺 𑀦𑀺𑀩𑁆𑀩𑀼𑀢𑀸’𑀢𑁆𑀬𑁂’𑀯𑀫𑀸𑀳; ()

𑁪𑁬.

𑀳𑀤𑀬𑀕𑀢𑀓𑀺𑀮𑁂𑀲𑁂 𑀦𑀺𑀩𑁆𑀩𑀼𑀢𑁂 𑀯𑀽𑀧𑀲𑀦𑁆𑀢𑁂

𑀬𑀢𑀺𑀧𑀢𑀺𑀭𑀺𑀯 𑀤𑀺𑀝𑁆𑀞𑁄 𑀦𑀺𑀩𑁆𑀩𑀼𑀢𑁄 𑀲𑁄’𑀳𑀫𑀲𑁆𑀫𑀺,

𑀇𑀢𑀺 𑀯𑀭𑀫𑀢𑀺 𑀲𑀼𑀢𑁆𑀯𑀸 𑀢𑀸𑀬 𑀕𑀸𑀣𑀁 𑀲𑀼𑀕𑀻𑀢𑀁

𑀯𑀺𑀯𑀺𑀥𑀦𑀬𑀯𑀺𑀪𑀢𑁆𑀢𑀁 𑀢𑀧𑁆𑀧𑀤𑀢𑁆𑀣𑀁 𑀅𑀯𑁂𑀤𑀺; ()

𑁪𑁭.

𑀅𑀳𑀫𑀺𑀢𑀺𑀧𑀤𑀫𑀲𑁆𑀲𑀸 𑀦𑀺𑀩𑁆𑀩𑀼𑀢𑀺𑀁 𑀲𑀸𑀯𑀺𑀢𑁄’𑀲𑁆𑀫𑀺

𑀲𑀼𑀫𑀭𑀺𑀬 𑀕𑀭𑀼𑀪𑀢𑁆𑀬𑀸 𑀢𑀸𑀬 𑀮𑀓𑁆𑀔𑀕𑁆𑀖𑀫𑀕𑁆𑀕𑀁,

𑀥𑀯𑀮𑀓𑀺𑀭𑀡𑀪𑀸𑀭𑀁 𑀪𑀸𑀲𑀼𑀭𑀁 𑀳𑀸𑀭𑀺𑀳𑀸𑀭𑀁

𑀧𑀳𑀺𑀡𑀺𑀬 𑀪𑀯𑀦𑀁 𑀲𑁄 𑀧𑀸𑀯𑀺𑀲𑀺 𑀲𑀸𑀯𑀭𑁄𑀥𑁄; ()

𑁪𑁮. ¶

𑀫𑀬𑀫𑀺𑀯 𑀯𑀭𑀩𑁄𑀥𑀺𑀁 𑀩𑀼𑀚𑁆𑀛𑀫𑀸𑀦𑀲𑁆𑀲 𑀚𑀸𑀢𑀼

𑀫𑀦𑀲𑀺 𑀯𑀼𑀧𑀲𑀫𑁂’𑀢𑀺 𑀢𑀼𑀬𑁆𑀳𑀫𑁂𑀓𑀸𑀤𑀲𑀕𑁆𑀕𑀺,

𑀉𑀧𑀕𑀫𑀼𑀫𑀼𑀧𑀲𑀦𑁆𑀢𑀺𑀁 𑀯𑁆𑀬𑀸𑀓𑀭𑁄𑀦𑁆𑀢𑀻’𑀯 𑀢𑀸𑀯

𑀅𑀧𑀭𑀤𑀺𑀲𑀺 𑀯𑀺𑀦𑀤𑁆𑀥𑀸’𑀦𑁂𑀓𑀲𑀜𑁆𑀛𑀸𑀖𑀦𑀸𑀮𑀻; ()

𑁪𑁯.

𑀅𑀢𑀼𑀮𑀥𑀯𑀚𑀙𑀢𑁆𑀢𑀁 𑀥𑁄𑀢𑀫𑀼𑀢𑁆𑀢𑀸𑀯𑀮𑀻𑀳𑀺

𑀯𑀮𑀬𑀺𑀢𑀫𑀺𑀯 𑀭𑀜𑁆𑀜𑁄 𑀢𑀲𑁆𑀲 𑀲𑀺𑀳𑀸𑀲𑀦𑀲𑁆𑀫𑀺𑀁,

𑀉𑀤𑀬𑀲𑀺𑀔𑀭𑀺𑀲𑀻𑀲𑁂 𑀢𑀸𑀯𑀢𑀸𑀭𑀸𑀯𑀮𑀻𑀳𑀺

𑀧𑀭𑀺𑀯𑀼𑀢𑀫𑀢𑀺𑀲𑁄𑀪𑀁 𑀘𑀦𑁆𑀤𑀩𑀺𑀫𑁆𑀩𑀁 𑀩𑀳𑀸𑀲; ()

𑁫𑁦.

𑀖𑀦𑀢𑀭𑀢𑀺𑀫𑀺𑀭𑁂𑀳𑀸’𑀯𑀢𑁆𑀣𑀭𑀢𑁆𑀢𑁂𑀳𑀺 𑀮𑁄𑀓𑁂

𑀫𑀲𑀺𑀫𑀮𑀺𑀦𑀯𑀺𑀮𑀸𑀲𑀁 𑀢𑀗𑁆𑀔𑀡𑁂 𑀤𑀲𑁆𑀲𑀬𑀦𑁆𑀢𑀺,

𑀭𑀚𑀦𑀺𑀓𑀭𑀓𑀭𑁂𑀳𑀺 𑀯𑀺𑀧𑁆𑀨𑀼𑀭𑀢𑁆𑀢𑁂𑀳𑀺 𑀨𑀻𑀢𑀸

𑀓𑀢𑀦𑀯𑀧𑀭𑀺𑀓𑀫𑁆𑀫𑁂’𑀯𑀸’𑀲𑀺 𑀲𑀸 𑀭𑀸𑀚𑀥𑀸𑀦𑀺; ()

𑁫𑁧. ¶

𑀳𑀺𑀫𑀓𑀭𑀓𑀭𑀪𑀸𑀭𑀓𑁆𑀓𑀢𑁆𑀢𑀭𑀢𑁆𑀢𑀦𑁆𑀥𑀓𑀸𑀭-

𑀕𑀮𑀺𑀢𑀢𑀺𑀫𑀺𑀭𑀮𑁂𑀔𑀸𑀓𑀸𑀭𑀫𑀸𑀯𑀻 𑀓𑀭𑁄𑀦𑁆𑀢𑀺,

𑀨𑀼𑀝𑀓𑀼𑀫𑀼𑀤 𑀯𑀦𑁂𑀲𑀼 𑀘𑀸𑀲𑀺𑀓𑀼𑀦𑁆𑀤𑀸𑀝𑀯𑀻𑀲𑀼

𑀲𑀼𑀫𑀥𑀼𑀭 𑀫𑀥𑀼𑀫𑀢𑁆𑀢𑀸 𑀪𑀺𑀗𑁆𑀕𑀫𑀸𑀮𑀸 𑀧𑀫𑀢𑁆𑀢𑀸; ()

𑁫𑁨.

𑀚𑀺𑀢𑀲𑀼𑀭𑀧𑀢𑀺𑀯𑁂𑀲𑁄 𑀥𑀫𑁆𑀫𑀘𑀺𑀦𑁆𑀢𑀸𑀧𑀭𑁄 𑀲𑁄

𑀚𑀮𑀺𑀢 𑀫𑀡𑀺𑀧𑀤𑀻𑀧𑀸𑀮𑁄𑀓𑀪𑀺𑀦𑁆𑀦𑀦𑁆𑀥𑀓𑀸𑀭𑁂,

𑀦𑀺𑀚𑀲𑀺𑀭𑀺𑀪𑀯𑀦𑀲𑁆𑀫𑀺𑀁 𑀳𑁂𑀫𑀲𑀻𑀳𑀸𑀲𑀦𑀲𑁆𑀫𑀺𑀁

𑀦𑀘𑀺𑀭 𑀫𑀪𑀺𑀦𑀺𑀲𑀚𑁆𑀚𑀻 𑀧𑀜𑁆𑀘𑀓𑀸𑀫𑁂 𑀯𑀺𑀭𑀢𑁆𑀢𑁄; ()

𑁫𑁩.

𑀲𑀧𑀤𑀺 𑀢𑀼𑀭𑀺𑀬𑀳𑀢𑁆𑀣𑀸 𑀦𑀻𑀮𑀚𑀺𑀫𑀼𑀢𑀓𑁂𑀲𑀸

𑀓𑀼𑀯𑀮𑀬𑀤𑀮𑀦𑁂𑀢𑁆𑀢𑀸 𑀘𑀦𑁆𑀤𑀮𑁂𑀔𑀸𑀮𑀮𑀸𑀝𑀸,

𑀯𑀺𑀓𑀘𑀓𑀫𑀮𑀯𑀢𑁆𑀢𑀸 𑀫𑁂𑀔𑀮𑀸𑀪𑀸𑀭𑀲𑁄𑀡𑀻

𑀓𑀼𑀘𑀳𑀭𑀯𑀺𑀭𑀴𑀗𑁆𑀕𑀻 𑀘𑀸𑀭𑀼𑀯𑀸𑀫𑁄𑀭𑀼𑀚𑀗𑁆𑀖𑀸; ()

𑁫𑁪. ¶

𑀓𑀼𑀫𑀼𑀤𑀫𑀼𑀤𑀓𑀧𑁄𑀮𑀸 𑀓𑀼𑀡𑁆𑀟𑀮𑁄𑀮𑀫𑁆𑀩𑀓𑀡𑁆𑀡𑀸

𑀅𑀯𑀺𑀯𑀭𑀤𑀲𑀦𑀸𑀮𑀺𑀫𑀸𑀮𑀢𑀻𑀤𑀸𑀫𑀮𑀺𑀮𑀸,

𑀓𑀦𑀓𑀭𑀢𑀦𑀫𑀸𑀮𑀸𑀪𑀸𑀭𑀕𑀻𑀯𑀸, 𑀪𑀺𑀭𑀸𑀫𑀸,

𑀅𑀪𑀺𑀦𑀯𑀯𑀦𑀺𑀢𑀸𑀬𑁄 𑀦𑀘𑁆𑀘𑀕𑀻𑀢𑁂𑀲𑀼 𑀙𑁂𑀓𑀸; ()

𑁫𑁫.

𑀭𑀳𑀤𑀫𑀺𑀯𑀧𑀲𑀦𑁆𑀦𑀁 𑀦𑀺𑀘𑁆𑀘𑀮𑀸𑀲𑀺𑀦𑀫𑀺𑀦𑀁

𑀲𑀼𑀫𑀢𑀺𑀫𑀼𑀧𑀦𑀺𑀲𑀺𑀦𑁆𑀦𑀁 𑀲𑀁𑀯𑀼𑀢𑀤𑁆𑀯𑀸𑀭𑀼𑀧𑁂𑀢𑀁,

𑀢𑀫𑀪𑀺𑀭𑀢𑀺𑀦𑀺𑀭𑀸𑀲𑀁 𑀩𑀼𑀤𑁆𑀥𑀪𑀸𑀯𑀸𑀪𑀺𑀮𑀸𑀲𑀁

𑀅𑀪𑀺𑀭𑀫𑀬𑀺𑀢𑀼𑀓𑀸𑀫𑀸 𑀑𑀢𑀭𑀼𑀁 𑀭𑀗𑁆𑀕𑀪𑀽𑀫𑀺𑀁; ()

𑁫𑁬. ¶

𑀫𑀡𑀺𑀫𑀬𑀯𑀲𑀼𑀫𑀢𑁆𑀬𑀸 𑀧𑀸𑀤𑀲𑀗𑁆𑀖𑀝𑁆𑀝𑀦𑁂𑀦

𑀓𑀦𑀓𑀯𑀓𑀮𑀬𑀖𑁄𑀲𑀁 𑀓𑀸𑀘𑀺 𑀦𑀺𑀘𑁆𑀙𑀸𑀭𑀬𑀦𑁆𑀢𑀻,

𑀘𑀮𑀓𑀺𑀲𑀮𑀬𑀮𑀻𑀮𑀸 𑀅𑀗𑁆𑀕𑀼𑀮𑀺 𑀘𑀸𑀮𑀬𑀦𑁆𑀢𑀺

𑀅𑀦𑀼𑀮𑀬𑀫𑀪𑀺𑀦𑀘𑁆𑀘𑀼𑀁 𑀳𑁂𑀫𑀯𑀮𑁆𑀮𑀻𑀯𑀺𑀮𑀸𑀲𑀸; ()

𑁫𑁭.

𑀦𑀭𑀧𑀢𑀺𑀫𑀼𑀔𑀩𑀺𑀫𑁆𑀩𑀁𑀓 𑀮𑀓𑁆𑀔𑀫𑀸𑀧𑀸𑀤𑀬𑀦𑁆𑀢𑀻

𑀦𑀬𑀦𑀔𑀭𑀲𑀭𑀸𑀦𑀁 𑀭𑀗𑁆𑀕𑀲𑀗𑁆𑀕𑀸𑀫𑀪𑀽𑀫𑁆𑀬𑀸,

𑀚𑀺𑀢𑀓𑀮𑀭𑀯𑀯𑀸𑀡𑀻 𑀓𑀸𑀘𑀺 𑀭𑀸𑀫𑀸 𑀪𑀺𑀭𑀸𑀫𑀸

𑀲𑀯𑀡𑀲𑀼𑀪𑀕𑀕𑀻𑀢𑀁 𑀕𑀸𑀬𑀫𑀸𑀦𑀸 𑀯𑀺𑀪𑀸𑀲𑀼𑀁; ()

𑁫𑁮.

𑀚𑀺𑀢𑀲𑀼𑀭𑀮𑀮𑀦𑀸𑀬𑁄𑀓𑀸𑀯𑀺 𑀧𑀜𑁆𑀘𑀗𑁆𑀕𑀺𑀓𑀸𑀦𑀺

𑀢𑀤𑀳𑀦𑀺 𑀢𑀼𑀭𑀺𑀬𑀸𑀦𑀺 𑀯𑀸𑀤𑀬𑀼𑀁 𑀮𑁄𑀮𑀧𑀸𑀗𑁆𑀕𑀸,

𑀲𑀯𑀡𑀫𑀥𑀼𑀭𑀯𑀻𑀡𑀸 𑀪𑁂𑀭𑀺𑀦𑀸𑀤𑁂𑀳𑀺 𑀢𑀸𑀲𑀁

𑀕𑀕𑀦𑀢𑀮 𑀫𑀺𑀯𑀸,𑀲𑀺 𑀧𑀸𑀯𑀼𑀲𑁂 𑀭𑀗𑁆𑀕𑀪𑀽𑀫𑀺; ()

𑁫𑁯. ¶

𑀯𑀭𑀫𑀢𑀺 𑀭𑀫𑀡𑀻𑀦𑀁 𑀢𑀁 𑀫𑀳𑀸𑀪𑀽𑀢𑀭𑀽𑀧-

𑀧𑁆𑀧𑀪𑀯𑀫𑀺𑀯𑀯𑀺𑀓𑀸𑀭𑀁 𑀦𑀘𑁆𑀘𑀫𑀤𑁆𑀤𑀓𑁆𑀔𑀺 𑀢𑀸𑀲𑀁,

𑀯𑀺𑀲𑀫𑀪𑀯𑀓𑀼𑀝𑀻𑀭𑁂 𑀭𑀸𑀚𑀭𑁄𑀕𑀸𑀢𑀼𑀭𑀸𑀦𑀁

𑀅𑀲𑀼𑀦𑀺𑀢𑀼𑀭𑀺𑀬𑀭𑀸𑀯𑀁 𑀕𑀻𑀢𑀫𑀝𑁆𑀝𑀲𑁆𑀲𑀭𑀁,𑀯; ()

𑁬𑁦.

𑀪𑀼𑀲𑀫𑀦𑀳𑀺𑀭𑀢𑁄 𑀲𑁄 𑀦𑀘𑁆𑀘𑀕𑀻𑀢𑁂𑀲𑀼 𑀢𑀸𑀲𑀁

𑀲𑀺𑀭𑀺𑀲𑀬𑀦𑀯𑀭𑀲𑁆𑀫𑀺𑀁 𑀲𑀻𑀳𑀲𑁂𑀬𑁆𑀬𑀁 𑀅𑀓𑀸𑀲𑀺,

𑀇𑀢𑀺𑀕𑀳𑀺𑀢𑀯𑀺𑀳𑁂𑀲𑀸 𑀮𑀤𑁆𑀥𑀦𑀺𑀤𑁆𑀤𑀸𑀯𑀓𑀸𑀲𑀸

𑀲𑀧𑀤𑀺 𑀫𑀤𑀦𑀧𑀸𑀲𑀸 𑀢𑀸 𑀦𑀺𑀧𑀚𑁆𑀚𑀺𑀁𑀲𑀼𑀦𑀸𑀭𑀻; ()

𑁬𑁧.

𑀲𑀳𑀓𑀼𑀫𑀼𑀤𑀺𑀦𑀺𑀬𑀸 𑀲𑁄 𑀲𑀼𑀢𑁆𑀢𑀫𑀢𑁆𑀢𑀧𑁆𑀧𑀩𑀼𑀤𑁆𑀥𑁄

𑀦𑀺𑀚𑀲𑀺𑀭𑀺𑀲𑀬𑀦𑀲𑁆𑀫𑀺𑀁 𑀲𑀦𑁆𑀦𑀺𑀲𑀺𑀦𑁆𑀦𑁄 𑀭𑀚𑀦𑁆𑀬𑀸,

𑀕𑀳𑀺𑀢𑀢𑀼𑀭𑀺𑀬𑀪𑀡𑁆𑀟𑁂 𑀢𑀢𑁆𑀣𑀢𑀢𑁆𑀣𑁄, 𑀢𑁆𑀣𑀭𑀺𑀢𑁆𑀯𑀸

𑀬𑀼𑀯𑀢𑀺𑀚𑀦𑀫𑀧𑀲𑁆𑀲𑀺 𑀤𑀴𑁆𑀳𑀦𑀺𑀤𑁆𑀤𑀸𑀪𑀺𑀪𑀽𑀢𑀁; ()

𑁬𑁨. ¶

𑀅𑀦𑀺𑀮𑀘𑀮𑀓𑀧𑁄 𑀮𑀸 𑀓𑀸𑀘𑀺 𑀮𑀸𑀮𑀁 𑀕𑀺𑀮𑀦𑁆𑀢𑁂

𑀕𑀮𑀺𑀢𑀩𑀳𑀴𑀔𑁂 𑀴𑀸 𑀓𑀸𑀘𑀺 𑀔𑀸𑀤𑀦𑁆𑀢𑀺 𑀤𑀦𑁆𑀢𑁂,

𑀪𑀕𑀫𑀧𑀕𑀢𑀘𑁄 𑀴𑀸 𑀓𑀸𑀘𑀺 𑀲𑀁𑀤𑀲𑁆𑀲𑀬 𑀦𑁆𑀦𑁂

𑀔𑀮𑀺𑀢𑀯𑀘𑀦𑀫𑀸 𑀮𑀸 𑀓𑀸𑀘𑀺 𑀬𑀁𑀬𑀁 𑀮𑀧𑀦𑁆𑀢𑁂; ()

𑁬𑁩.

𑀔𑀺𑀧𑀺𑀢𑀫𑀧𑀺 𑀓𑀭𑁄𑀦𑁆𑀢𑀻 𑀓𑀸𑀘𑀺 𑀓𑀸𑀲𑀦𑁆𑀢𑀺𑀓𑀸𑀘𑀺

𑀇𑀢𑀺 𑀧𑀘𑀼𑀭𑀯𑀺𑀓𑀸𑀭𑀁 𑀦𑀺𑀲𑁆𑀲𑀺𑀭𑀺𑀓𑀁 𑀅𑀲𑀸𑀭𑀁,

𑀪𑀯𑀦𑀫𑀦𑀯𑀲𑁂𑀲𑀁 𑀢𑀲𑁆𑀲𑀼, 𑀧𑀝𑁆𑀞𑀸𑀲𑀺 𑀤𑀴𑁆𑀳𑀁

𑀦𑀭𑀓𑀼𑀡𑀧𑀯𑀺𑀓𑀺𑀡𑁆𑀡𑀁 𑀆𑀫𑀓𑀸𑀴𑀸𑀳𑀡𑀁𑀯; ()

𑁬𑁪.

𑀢𑀤𑀳𑀦𑀺 𑀢𑀺𑀪𑀯𑀁 𑀘𑀸,𑀤𑀺𑀢𑁆𑀢𑀕𑁂𑀳𑀢𑁆𑀢𑀬𑀁,𑀯

𑀲𑀼𑀫𑀭𑀺𑀬 𑀯𑀢𑀪𑁄, 𑀧𑀲𑁆𑀲𑀝𑁆𑀞𑀫𑁄𑀧𑀤𑁆𑀤𑀼𑀢𑀁 𑀪𑁄,

𑀇𑀢𑀺 𑀧𑀭𑀫𑀫𑀼𑀤𑀸𑀦𑀁 𑀓𑀯𑀢𑁆𑀢𑀬𑀁 𑀢𑀩𑁆𑀩𑀺𑀫𑀼𑀢𑁆𑀬𑀸

𑀫𑀦𑀲𑀺 𑀧𑀼𑀭𑀺𑀲𑀲𑀽𑀭𑁄 𑀲𑀽𑀭𑀪𑀸𑀯𑀁 𑀚𑀦𑁂𑀲𑀺; ()

𑁬𑁫. ¶

𑀲𑀼𑀭𑀢𑀘𑀢𑀼𑀭𑀭𑀸𑀫𑀸𑀭𑀓𑁆𑀔𑀲𑀺𑀯𑀸𑀲𑀪𑀽𑀢𑁂

𑀲𑀺𑀭𑀺𑀪𑀯𑀦𑀯𑀦𑀲𑁆𑀫𑀺𑀁 𑀫𑁄𑀳𑀬𑀦𑁆𑀢𑀫𑁆𑀳𑀺 𑀩𑀸𑀮𑁂,

𑀅𑀮𑀫𑀺𑀢𑀺 𑀫𑀫 𑀯𑀸𑀲𑁄 𑀳𑀦𑁆𑀤 𑀦𑀺𑀓𑁆𑀔𑀫𑁆𑀫 𑀢𑀫𑁆𑀳𑀸

𑀢𑀺𑀪𑀯𑀪𑀬𑀯𑀺𑀫𑀼𑀢𑁆𑀢𑀺𑀁 𑀏𑀲𑀬𑀺𑀲𑁆𑀲𑀸𑀫𑀳𑀁,𑀢𑀺; ()

𑁬𑁬.

𑀉𑀧𑀓𑀫𑀺𑀬 𑀯𑀺𑀫𑀸𑀦𑀤𑁆𑀯𑀸𑀭𑀫𑀼𑀫𑁆𑀫𑀸𑀭𑀼𑀧𑀦𑁆𑀢𑁂

𑀲𑀬𑀦𑀼𑀧𑀭𑀺 𑀦𑀺𑀧𑀦𑁆𑀦𑀁 𑀙𑀦𑁆𑀦𑀫𑀼𑀝𑁆𑀞𑀸𑀧𑀬𑀺𑀢𑁆𑀯𑀸,

𑀢𑀫𑀯𑀤𑀺 𑀅𑀪𑀺𑀕𑀦𑁆𑀢𑀼𑀁 𑀓𑀧𑁆𑀧𑀬𑀺𑀢𑁆𑀯𑀁, 𑀦𑀬𑁂𑀢𑀺

𑀧𑀩𑀮𑀚𑀯𑀩𑀮𑀕𑁆𑀕𑀁 𑀯𑀸𑀚𑀺𑀭𑀸𑀚𑀁 𑀲𑀭𑀸𑀚𑀸, ()

𑁬𑁭.

𑀕𑀢𑀲𑀢𑀺 𑀳𑀬𑀲𑀸𑀴𑀁 𑀢𑀗𑁆𑀔𑀡𑁂 𑀙𑀦𑁆𑀦𑀫𑀘𑁆𑀘𑁂

𑀲𑀓𑀧𑀢𑀺𑀕𑀫𑀦𑀢𑁆𑀣𑀁 𑀏𑀲𑀫𑀁 𑀓𑀧𑁆𑀧𑀦𑀢𑁆𑀣𑁄,

𑀅𑀕𑀫𑀺𑀢𑀺 𑀲𑀳𑀚𑀸𑀢𑁄 𑀓𑀢𑁆𑀣𑀓𑁄 𑀯𑀸𑀚𑀺𑀭𑀸𑀚𑀸

𑀅𑀓𑀭𑀺 𑀯𑀺𑀧𑀼𑀮𑀳𑁂𑀲𑀸𑀭𑀸𑀯𑀫𑀸𑀦𑀦𑁆𑀤𑀪𑀸𑀭𑁄; ()

𑁬𑁮. ¶

𑀧𑀯𑀺𑀲𑀺𑀬 𑀲𑀺𑀭𑀺𑀕𑀩𑁆𑀪𑀁 𑀢𑁂𑀮𑀤𑀻𑀧𑀼𑀚𑁆𑀚𑀮𑀦𑁆𑀢𑀁

𑀭𑀢𑀦𑀔𑀘𑀺𑀢𑀫𑀜𑁆𑀘𑁂 𑀕𑀦𑁆𑀥𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑁂,

𑀥𑀭𑀡𑀺𑀧𑀢𑀺𑀦𑀺𑀧𑀦𑁆𑀦𑀁 𑀳𑁂𑀫𑀩𑀺𑀫𑁆𑀩𑁄𑀧𑀫𑀸𑀦𑀁

𑀦𑀺𑀚𑀢𑀦𑀼𑀚𑀓𑀼𑀫𑀸𑀭𑀁 𑀧𑀲𑁆𑀲𑀺𑀩𑀺𑀫𑁆𑀩𑀸𑀬𑀲𑀤𑁆𑀥𑀺𑀁; ()

𑁬𑁯.

𑀬𑀤𑀺 𑀅𑀳𑀫𑀧𑀦𑁂𑀢𑁆𑀯𑀸 𑀤𑁂𑀯𑀺𑀬𑀸 𑀳𑀢𑁆𑀣𑀧𑀸𑀲𑀁

𑀫𑀫 𑀢𑀦𑀼𑀚𑀓𑀼𑀫𑀸𑀭𑀁 𑀅𑀗𑁆𑀓𑀫𑀸𑀭𑁄𑀧𑀬𑀸𑀫𑀺,

𑀯𑀤𑀦𑀚𑀺𑀢𑀲𑀭𑁄𑀚𑀸 𑀭𑀸𑀚𑀺𑀦𑀻 𑀯𑀼𑀝𑁆𑀞𑀳𑀺𑀢𑁆𑀯𑀸

𑀯𑀦𑀫𑀳𑀻𑀕𑀫𑀦𑀁 𑀫𑁂 𑀯𑀸𑀭𑀬𑁂 𑀤𑀼𑀦𑁆𑀦𑀺𑀯𑀸𑀭𑀁; ()

𑁭𑁦.

𑀢𑀦𑀼𑀚𑀫𑀼𑀔𑀲𑀭𑁄𑀚𑀁 𑀩𑀼𑀤𑁆𑀥𑀪𑀽𑀢𑁄 𑀲𑀫𑀸𑀦𑁄

𑀦𑀬𑀦𑀫𑀥𑀼𑀓𑀭𑀸𑀦𑀁 𑀚𑀸𑀢𑀼 𑀓𑀸𑀳𑀸𑀫𑀺𑀪𑀸𑀭𑀁,

𑀲𑀼𑀫𑀭𑀺𑀬 𑀘𑀭𑀡𑀁 𑀲𑁄 𑀉𑀤𑁆𑀥𑀭𑀦𑁆𑀢𑁄,𑀯 𑀫𑁂𑀭𑀼𑀁

𑀅𑀯𑀢𑀭𑀺 𑀪𑀯𑀦𑀫𑁆𑀳𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀯𑀻𑀭𑁄; ()

𑁭𑁧. ¶

𑀓𑀼𑀯𑀮𑀬𑀤𑀮𑀦𑁂𑀢𑁆𑀢𑀜𑁆𑀘𑀦𑁆𑀤𑀫𑀫𑁆𑀳𑁄𑀚𑀯𑀢𑁆𑀢𑀁

𑀫𑀤𑀦𑀭𑀣𑀭𑀣𑀗𑁆𑀕𑀸𑀓𑀸𑀭𑀲𑀼𑀲𑁆𑀲𑁄𑀡𑀺𑀪𑀸𑀭𑀁,

𑀓𑀣𑀫𑀯𑀢𑀭𑀺 𑀩𑀺𑀫𑁆𑀩𑀸𑀦𑀸𑀫𑀤𑁂𑀯𑀺𑀁 𑀧𑀳𑀸𑀬

𑀦𑀭𑀧𑀢𑀺 𑀪𑀯𑀦𑀫𑁆𑀳𑀸 𑀳𑁂𑀫𑀩𑀺𑀫𑁆𑀩𑀸𑀪𑀺𑀭𑀸𑀫𑀁; ()

𑁭𑁨.

𑀫𑀭𑀓𑀢𑀧𑀝𑀺𑀫𑀸𑀪𑀁 𑀲𑀫𑁆𑀪𑀯𑀁 𑀲𑀓𑁆𑀬𑀯𑀁𑀲𑁂

𑀲𑀫𑀼𑀧𑀘𑀺𑀢𑀲𑀼𑀧𑀼𑀜𑁆𑀜𑀁 𑀮𑀓𑁆𑀔𑀡𑀸𑀓𑀺𑀡𑁆𑀡𑀕𑀢𑁆𑀢𑀁,

𑀧𑀚𑀳𑀺𑀬 𑀲𑀼𑀓𑀼𑀫𑀸𑀭𑀁 𑀭𑀸𑀳𑀼𑀮𑀸𑀔𑁆𑀬𑀁 𑀓𑀼𑀫𑀸𑀭𑀁

𑀓𑀣𑀫𑀯𑀢𑀭𑀺 𑀧𑀸𑀤𑀫𑀦𑁆𑀤𑀫𑀼𑀓𑁆𑀔𑀺𑀧𑁆𑀧 𑀥𑀻𑀭𑁄; ()

𑁭𑁩.

𑀭𑀺𑀧𑀼𑀕𑀚𑀫𑀺𑀕𑀭𑀸𑀚𑀁 𑀚𑀫𑁆𑀩𑀼𑀤𑀻𑀧𑀕𑁆𑀕𑀭𑀸𑀚𑀁

𑀢𑀤𑀳𑀦𑀺 𑀧𑀺𑀢𑀼𑀭𑀸𑀚𑀁 𑀧𑀼𑀢𑁆𑀢𑀲𑁄𑀓𑀡𑁆𑀡𑀯𑀫𑁆𑀳𑀺,

𑀓𑀣𑀫𑀫𑀺𑀢𑀤𑀬𑁄 𑀲𑁄 𑀦𑀺𑀤𑁆𑀤𑀬𑁄 𑀧𑀓𑁆𑀔𑀺𑀧𑀺𑀢𑁆𑀯𑀸

𑀅𑀯𑀢𑀭𑀺 𑀪𑀯𑀦𑀫𑁆𑀳𑀸𑀓 𑀉𑀤𑁆𑀥𑀭𑀺𑀢𑁆𑀯𑀸𑀦 𑀧𑀸𑀤𑁂; ()

𑁭𑁪. ¶

𑀲𑀓𑀮𑀧𑀣𑀯𑀺𑀘𑀓𑁆𑀓𑀁 𑀘𑀓𑁆𑀓𑀯𑀸𑀴𑀸𑀯𑀥𑀺𑀁 𑀲𑁄

𑀅𑀪𑀺𑀯𑀺𑀚𑀺𑀬 𑀅𑀲𑀢𑁆𑀣𑁄 𑀲𑀢𑁆𑀢𑀫𑁂 𑀯𑀸𑀲𑀭𑀫𑁆𑀳𑀺,

𑀦𑀭𑀳𑀭𑀺 𑀓𑀢𑀧𑀼𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺 𑀅𑀳𑀼𑀢𑁆𑀯𑀸

𑀓𑀣𑀫𑀯𑀢𑀭𑀺 𑀢𑀫𑁆𑀳𑀸 𑀉𑀓𑁆𑀔𑀺𑀧𑀺𑀢𑁆𑀯𑀸𑀦 𑀧𑀸𑀤𑁂; ()

𑁭𑁫.

𑀅𑀯𑀢𑀭𑀺𑀬 𑀯𑀺𑀫𑀸𑀦𑀸 𑀅𑀚𑁆𑀚 𑀫𑀁 𑀢𑀸𑀭𑀬𑀢𑁆𑀯𑀁

𑀢𑁆𑀯𑀫𑀧𑀺𑀢𑀺𑀪𑀯𑀢𑁄)𑀳𑀁 𑀉𑀢𑁆𑀢𑀭𑁂𑀬𑁆𑀬’𑀦𑁆𑀢𑀺 𑀯𑀢𑁆𑀯𑀸,

𑀢𑀫𑀪𑀺𑀭𑀼𑀳𑀺 𑀚𑀦𑀺𑀦𑁆𑀤𑁄 𑀯𑀸𑀚𑀺𑀭𑀸𑀚𑀺𑀦𑁆𑀤’𑀫𑀝𑁆𑀞𑀸-

𑀭𑀲𑀭𑀢𑀦𑀧𑀫𑀸𑀡𑀁 𑀥𑁄𑀢𑀲𑀗𑁆𑀔𑀸𑀯𑀤𑀸𑀢𑀁; ()

𑁭𑁬.

𑀧𑀯𑀦𑀢𑀼𑀭𑀺𑀢𑀯𑁂𑀕𑁄 𑀓𑀦𑁆𑀣𑀓𑁄 𑀯𑀸𑀚𑀺𑀭𑀸𑀚𑀸

𑀬𑀤𑀳𑀦𑀺 𑀧𑀤𑀲𑀤𑁆𑀤𑀁 𑀘𑀸’𑀧𑀺 𑀳𑁂𑀲𑀁 𑀓𑀭𑁂𑀬𑁆𑀬,

𑀦𑀦𑀼 𑀲𑀓𑀮𑀧𑀼𑀭𑀁 𑀲𑁄 𑀬𑀸𑀢𑀺 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸

𑀢𑀤𑀳𑀦𑀺 𑀓𑀢𑀲𑀤𑁆𑀤𑀁 𑀯𑀸𑀭𑀬𑀼𑀁 𑀤𑁂𑀯𑀢𑀸𑀬𑁄; ()

𑁭𑁭. ¶

𑀓𑀭𑀓𑀫𑀮𑀢𑀮𑁂𑀲𑀼 𑀤𑁂𑀯𑀢𑀸𑀦𑀺𑀫𑁆𑀫𑀺𑀢𑁂𑀲𑀼

𑀧𑀦𑀺𑀳𑀺𑀢𑀧𑀤𑀯𑀸𑀭𑀁 𑀅𑀲𑁆𑀲 𑀫𑀸𑀭𑀼𑀬𑁆𑀳 𑀥𑀻𑀭𑁄,

𑀮𑀳𑀼𑀫𑀼𑀧𑀕𑀫𑀺 𑀙𑀦𑁆𑀦𑀁 𑀯𑀸𑀮𑀥𑀺𑀁 𑀕𑀸𑀳𑀬𑀺𑀢𑁆𑀯𑀸

𑀣𑀺𑀭𑀧𑀺𑀳𑀺𑀢𑀓𑀯𑀸𑀝𑀤𑁆𑀯𑀸𑀭𑀧𑀸𑀓𑀸𑀭𑀼𑀧𑀦𑁆𑀢𑀁; ()

𑁭𑁮.

𑀬𑀤𑀺 𑀧𑀺𑀳𑀺𑀢𑀓𑀯𑀸𑀝𑀼𑀕𑁆𑀖𑀸𑀝𑀦𑀁 𑀦𑀸’𑀪𑀯𑀺𑀲𑁆𑀲𑀸

𑀳𑀬𑀯𑀭𑀫𑀧𑀺 𑀙𑀦𑁆𑀦𑀸𑀫𑀘𑁆𑀘𑀫𑀸𑀤𑀸𑀬 𑀲𑁄𑀳𑀁,

𑀅𑀲𑀭𑀺 𑀧𑀼𑀭𑀺𑀲𑀲𑀺𑀳𑁄 𑀉𑀧𑁆𑀧𑀢𑁂𑀬𑁆𑀬𑀦𑁆𑀢𑀺 𑀅𑀝𑁆𑀞𑀸-

𑀭𑀲𑀭𑀢𑀢𑀧𑀫𑀸𑀡𑀼’𑀢𑁆𑀢𑀼𑀗𑁆𑀕𑀧𑀸𑀓𑀸𑀭𑀘𑀓𑁆𑀓𑀁; ()

𑁭𑁯.

𑀢𑀣𑀭𑀺𑀯 𑀳𑀬𑀭𑀸𑀚𑀸 𑀙𑀦𑁆𑀦𑀦𑀸𑀫𑁄 𑀘 𑀫𑀦𑁆𑀢𑀻

𑀯𑀻𑀭𑀺𑀬𑀩𑀮𑀲𑀫𑀗𑁆𑀕𑀻 𑀘𑀻𑀦𑁆𑀢𑀬𑀼𑀁 𑀢𑀸𑀯𑀤𑁂𑀯,

𑀯𑀺𑀯𑀭𑀺 𑀢𑀤𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀘𑁄𑀤𑀺𑀢𑀢𑁆𑀢𑀸

𑀧𑀼𑀭𑀺𑀲𑀤𑀲𑀲𑀢𑁂𑀦𑀼’𑀕𑁆𑀖𑀸𑀝𑀺𑀬𑀁 𑀤𑁆𑀯𑀸𑀭𑀩𑀸𑀳𑀁; ()

𑁮𑁦. ¶

𑀫𑀫 𑀯𑀺𑀲𑀬𑀫𑀲𑁂𑀲𑀁 𑀏𑀲𑀲𑀺𑀤𑁆𑀥𑀢𑁆𑀣𑀦𑀸𑀫𑁄

𑀅𑀪𑀺𑀪𑀯𑀺𑀬 𑀲𑀼𑀩𑁄𑀥𑀺𑀁 𑀚𑀸𑀢𑀼 𑀩𑀼𑀚𑁆𑀛𑀺𑀲𑁆𑀲𑀢𑀻𑀢𑀺,

𑀅𑀣 𑀲𑀼𑀫𑀭𑀺𑀬 𑀫𑀸𑀭𑁄 𑀧𑀸𑀧𑀺𑀫𑀸’𑀢𑀻𑀯𑀓𑀼𑀤𑁆𑀥𑁄

𑀧𑀝𑀺𑀧𑀣𑀫𑀼𑀧𑀕𑀜𑁆𑀙𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀫𑀸𑀦𑀸; ()

𑁮𑁧.

𑀢𑀼𑀭𑀺𑀢𑀫𑀳𑀺𑀯𑀚𑀦𑁆𑀢𑁂 𑀫𑀸𑀭𑀯𑁂𑀭𑀺𑀫𑁆𑀳𑀺 𑀫𑀸𑀭𑁄

𑀅𑀲𑀺𑀢𑀦𑀪𑀲𑀺 𑀞𑀢𑁆𑀯𑀸 𑀇𑀢𑁆𑀣𑀫𑀸𑀭𑁄𑀘𑀬𑀺𑀢𑁆𑀣,

𑀯𑀭𑀧𑀼𑀭𑀺𑀲 𑀇𑀢𑁄 𑀔𑁄 𑀲𑀢𑁆𑀢𑀫𑁂 𑀯𑀸𑀲𑀭𑀫𑁆𑀳𑀺

𑀢𑁆𑀯𑀫𑀳𑀺𑀯𑀺𑀚𑀺𑀬 𑀮𑁄𑀓𑀁 𑀳𑁂𑀲𑁆𑀲𑀲𑁂 𑀘𑀓𑁆𑀓𑀯𑀢𑁆𑀢𑀻; ()

𑁮𑁨.

𑀲𑀼𑀔𑀫𑀦𑀼𑀪𑀯𑀫𑀸𑀦𑁄 𑀘𑀓𑁆𑀓𑀯𑀢𑁆𑀢𑀻 𑀪𑀯𑀺𑀢𑁆𑀯𑀸

𑀖𑀭𑀫𑀥𑀺𑀯𑀲 𑀘𑀓𑁆𑀓𑀁 𑀯𑀢𑁆𑀢𑀬𑀁 𑀬𑀸𑀯𑀚𑀻𑀯𑀁,

𑀅𑀫𑀺𑀢𑀫𑀢𑀺 𑀢𑀼𑀯𑀁 𑀫𑀸 𑀦𑀺𑀓𑁆𑀔𑀫𑀲𑁆𑀲𑀽’𑀢𑀺 𑀫𑀸𑀭𑁄

𑀅𑀪𑀺𑀕𑀫𑀦𑀦𑀺𑀲𑁂𑀥𑀁 𑀓𑀸𑀢𑀼𑀫𑀺𑀘𑁆𑀘𑀸𑀦𑀼𑀲𑀸𑀲𑀺; ()

𑁮𑁩. ¶

𑀦𑀫𑀼𑀯𑀺𑀮𑀧𑀺𑀢𑀯𑀸𑀘𑀁 𑀲𑁄𑀢𑀥𑀸𑀢𑁆𑀯𑀜𑁆𑀚𑀮𑀻𑀳𑀺

𑀲𑀯𑀺𑀲𑀫𑀺𑀯 𑀧𑀺𑀩𑀦𑁆𑀢𑁄 𑀢𑀁 𑀢𑀼𑀯𑀁 𑀓𑁄’𑀲𑀺 𑀧𑀼𑀘𑁆𑀙𑀺,

𑀧𑀯𑀦𑀧𑀣𑀞𑀺𑀢𑁄’𑀳𑀁 𑀇𑀲𑁆𑀲𑀭𑁄 𑀤𑁂𑀯𑀢𑀸𑀦𑀁

𑀦𑀭𑀯𑀭 𑀯𑀲𑀯𑀢𑁆𑀢𑀻 𑀧𑀸𑀧𑀺𑀫𑀸’𑀢𑁆𑀬𑁂’𑀯 𑀫𑀸𑀳; ()

𑁮𑁪.

𑀲𑀼𑀭𑀦𑀭𑀲𑀭𑀡𑁄 𑀲𑁄 𑀦𑀺𑀩𑁆𑀪𑀬𑁄 𑀤𑀺𑀩𑁆𑀩𑀘𑀤𑁆𑀤-

𑀭𑀢𑀦𑀚𑀦𑀦𑀫𑀤𑁆𑀥𑀸 𑀫𑀸𑀭𑀚𑀸𑀦𑀸𑀫𑀳’𑀦𑁆𑀢𑀺,

𑀧𑀝𑀺𑀯𑀘𑀦𑀫𑀤𑀸𑀲𑀺 𑀫𑀸𑀤𑀺𑀲𑁄 𑀤𑀼𑀧𑁆𑀧𑀲𑀬𑁆𑀳𑁄

𑀪𑀯𑀢𑀺 𑀤𑀲𑀲𑀳𑀲𑁆𑀲𑁂𑀳𑀸’𑀧𑀺 𑀢𑀼𑀫𑁆𑀳𑀸𑀤𑀺𑀲𑁂𑀳𑀺; ()

𑁮𑁫.

𑀬𑀤𑀺 𑀫𑀦𑀲𑀺 𑀲𑀺𑀬𑀸 𑀢𑁂 𑀓𑀸𑀫𑀤𑁄𑀲𑀩𑁆𑀩𑀺𑀳𑀺𑀁𑀲𑀸-

𑀧𑀪𑀼𑀢𑀺𑀧𑀭𑀺𑀯𑀺𑀢𑀓𑁆𑀓𑁄 𑀢𑀸𑀯𑀚𑀸𑀦𑀸𑀫’𑀳𑀦𑁆𑀢𑀺,

𑀧𑀝𑀺𑀖𑀧𑀭𑀯𑀲𑁄 𑀲𑁄 𑀓𑀺𑀜𑁆𑀘𑀺𑀑𑀢𑀸𑀭𑀧𑁂𑀔𑁄

𑀅𑀦𑀼𑀧𑀤𑀫𑀦𑀼𑀩𑀦𑁆𑀥𑀺 𑀢𑀲𑁆𑀲 𑀙𑀸𑀬𑀸𑀬𑀣𑁂𑀯; ()

𑁮𑁬. ¶

𑀧𑀼𑀦𑀭𑀪𑀺𑀯𑀚𑀢𑁄𑀯𑀸’𑀲𑀸𑀴𑁆𑀳𑀺𑀬𑀸 𑀧𑀼𑀡𑁆𑀡𑀫𑀸𑀬

𑀓𑀧𑀺𑀮𑀧𑀼𑀭𑀯𑀺𑀪𑀽𑀢𑀺𑀁 𑀤𑀝𑁆𑀞𑀼𑀓𑀸𑀫𑀫𑁆𑀳𑀺 𑀚𑀸𑀢𑁂,

𑀯𑀲𑀼𑀫𑀢𑀺 𑀧𑀭𑀺𑀯𑀢𑁆𑀢𑀻 𑀤𑀲𑁆𑀲𑀬𑀺 𑀅𑀲𑁆𑀲𑀭𑀜𑁆𑀜𑁄

𑀧𑀼𑀭𑀯𑀭𑀪𑀺𑀫𑀼𑀔𑀝𑁆𑀞𑁄 𑀘𑁂𑀢𑀺𑀬𑀝𑁆𑀞𑀸𑀦𑀪𑀼𑀫𑀺𑀁; ()

𑁮𑁭.

𑀲𑀧𑀤𑀺 𑀤𑀲𑀲𑀳𑀲𑁆𑀲𑀺𑀘𑀓𑁆𑀓𑀯𑀸𑀴𑁂𑀲𑀼 𑀤𑁂𑀯𑀸

𑀢𑀺𑀪𑀼𑀯𑀦𑀲𑀭𑀡𑀲𑁆𑀲𑀸’𑀭𑀓𑁆𑀔𑀡𑁂 𑀯𑁆𑀬𑀸𑀯𑀝𑀸𑀲𑀼𑀁,

𑀫𑀡𑀺𑀓𑀦𑀓𑀫𑀬𑁂𑀳𑀺 𑀤𑀡𑁆𑀟𑀤𑀻𑀧𑀸𑀤𑀺𑀓𑁂𑀳𑀺

𑀅𑀦𑀺𑀫𑀺𑀲𑀢𑀦𑀬𑁂’𑀓𑁂 𑀫𑀕𑁆𑀕𑀫𑀸𑀮𑁄𑀓𑀬𑀺𑀁𑀲𑀼; ()

𑁮𑁮.

𑀲𑀼𑀭𑀪𑀺𑀓𑀼𑀲𑀼𑀫𑀤𑀸𑀫𑁄𑀮𑀫𑁆𑀩𑀫𑀸𑀦𑀩𑁆𑀩𑀺𑀢𑀸𑀦-

𑀓𑀦𑀓𑀓𑀮𑀲𑀲𑁂𑀢𑀘𑁆𑀙𑀢𑁆𑀢𑀓𑁂𑀢𑀼𑀤𑁆𑀥𑀚𑁂𑀳𑀺,

𑀢𑀤𑀳𑀺𑀕𑀫𑀦𑀫𑀕𑁆𑀕𑀁 𑀤𑁂𑀯𑀢𑀸’𑀮𑀗𑁆𑀓𑀭𑀺𑀁𑀲𑀼

𑀪𑀼𑀯𑀦𑀓𑀼𑀳𑀭𑀫𑀸𑀲𑀺 𑀧𑀼𑀧𑁆𑀨𑀧𑀽𑀚𑀸𑀪𑀺𑀭𑀸𑀫𑀁; ()

𑁮𑁯. ¶

𑀕𑀕𑀦𑀫𑀲𑀦𑀺𑀖𑁄𑀲𑀘𑁆𑀙𑀦𑁆𑀢𑀫𑁂𑀯𑀝𑁆𑀞𑀲𑀝𑁆𑀞𑀺-

𑀢𑀼𑀭𑀺𑀬𑀲𑀢𑀲𑀳𑀲𑁆𑀲𑀸𑀭𑀯𑀯𑀺𑀧𑁆𑀨𑀸𑀭𑀫𑀸𑀲𑀺,

𑀫𑀳𑀺𑀢𑀲𑀼𑀭𑀪𑀺𑀧𑀼𑀧𑁆𑀨𑀸𑀓𑀺𑀡𑁆𑀡𑀫𑀕𑁆𑀕𑀸𑀯𑀢𑀺𑀡𑁆𑀡𑁄

𑀅𑀢𑀼𑀭𑀺𑀢𑀫𑀪𑀺𑀕𑀦𑁆𑀢𑁆𑀯𑀸 𑀬𑁄𑀚𑀦𑀦𑁆𑀢𑀺𑀁𑀲𑀫𑀢𑁆𑀢𑀁; ()

𑁯𑁦.

𑀯𑀺𑀫𑀮𑀲𑀮𑀺𑀮𑀧𑀼𑀡𑁆𑀡𑀁 𑀨𑁂𑀡𑀫𑀸𑀮𑀸𑀪𑀺𑀓𑀺𑀡𑁆𑀡𑀁

𑀯𑀺𑀓𑀘𑀓𑀫𑀮𑀭𑀸𑀚𑀺𑀁 𑀢𑀼𑀗𑁆𑀕𑀓𑀮𑁆𑀮𑁄𑀮𑀭𑀸𑀚𑀺𑀁,

𑀲𑀲𑀺𑀭𑀢𑀭𑀲𑀫𑀻𑀭𑀁 𑀯𑀸𑀴𑀼𑀓𑀸𑀓𑀺𑀡𑁆𑀡𑀢𑀺𑀭𑀁

𑀲𑀫𑀼𑀧𑀕𑀫𑀺 𑀅𑀦𑁄𑀫𑀸𑀦𑀸𑀫𑀕𑀗𑁆𑀕𑀁 𑀲𑀯𑀻𑀭𑁄; ()

𑁯𑁧.

𑀅𑀲𑀺𑀢𑀫𑀡𑀺𑀢𑀮𑀸𑀪𑀸 𑀙𑀦𑁆𑀦 𑀓𑀸 𑀦𑀸𑀫𑀺𑀓𑀸’𑀬𑀁

𑀇𑀢𑀺 𑀯𑀭𑀫𑀢𑀺 𑀧𑀼𑀘𑁆𑀙𑀺 𑀲𑁄 𑀅𑀦𑁄𑀫𑀸𑀦𑀤𑀻𑀢𑀺,

𑀢𑀫𑀯𑀤𑀺 𑀬𑀤𑀺 𑀢𑀻𑀭𑁂 𑀏𑀢𑁆𑀣’𑀳𑀁 𑀧𑀩𑁆𑀩𑀚𑁂𑀬𑁆𑀬𑀁

𑀅𑀢𑀺𑀯𑀺𑀬 𑀲𑀨𑀔𑀮𑀸 𑀫𑁂 𑀲𑀸 𑀅𑀦𑁄𑀫𑀸𑀲𑀺𑀬𑀸’𑀢𑀺; ()

𑁯𑁨. ¶

𑀭𑀯𑀺𑀓𑀼𑀮𑀢𑀺𑀮𑀓𑁄 𑀲𑁄 𑀧𑀡𑁆𑀳𑀺𑀬𑀸 𑀯𑀸𑀚𑀺𑀭𑀸𑀚𑀁

𑀲𑀚𑀯𑀫𑀤𑀤𑀺 𑀲𑀜𑁆𑀜𑀁 𑀢𑀸𑀬 𑀅𑀝𑁆𑀞𑁄𑀲𑀪𑀸𑀬,

𑀲𑀼𑀯𑀺𑀫𑀮𑀲𑀮𑀺𑀮𑀸𑀬𑀸’𑀦𑁄𑀫𑀕𑀗𑁆𑀕𑀸𑀬 𑀢𑀻𑀭𑁂

𑀢𑀭𑀡𑀺𑀭𑀺𑀯 𑀞𑀺𑀢𑁄’𑀲𑀺 𑀉𑀧𑁆𑀧𑀢𑀺𑀢𑁆𑀯𑀸 𑀢𑀼𑀭𑀗𑁆𑀕𑁄; ()

𑁯𑁩.

𑀲𑀺𑀢𑀧𑀼𑀮𑀺𑀦𑀢𑀮𑀝𑁆𑀞𑁄 𑀢𑀺𑀡𑁆𑀳𑀥𑀸𑀭𑀸’𑀲𑀺𑀳𑀢𑁆𑀣𑁄

𑀯𑀺𑀲𑀤𑀫𑀢𑀺 𑀲𑀫𑁄𑀴𑀺𑀁 𑀘𑀽𑀴𑀫𑀸𑀤𑀸𑀬 𑀤𑀴𑁆𑀳𑀁,

𑀅𑀮𑀼𑀦𑀺 𑀲𑀺𑀭𑀲𑀺 𑀲𑁂𑀲𑀸 𑀤𑁆𑀯𑀗𑁆𑀕𑀼𑀮𑀸 𑀦𑀻𑀮𑀓𑁂𑀲𑀸

𑀦 𑀢𑀤𑀼𑀧𑀭𑀺 𑀧𑀭𑀽𑀴𑁆𑀳𑀸 𑀤𑀓𑁆𑀔𑀺𑀡𑀸𑀯𑀢𑁆𑀢𑀬𑀺𑀁𑀲𑀼; ()

𑁯𑁪.

𑀅𑀪𑀯𑀺 𑀢𑀤𑀦𑀼𑀭𑀽𑀧𑀁 𑀤𑀸𑀞𑀺𑀓𑀸 𑀫𑀲𑁆𑀲𑀼𑀘𑀸’𑀧𑀺

𑀅𑀬𑀫𑀼𑀧𑀭𑀺 𑀲𑀘𑀸’𑀳𑀁 𑀞𑀸𑀢𑀼 𑀩𑀼𑀤𑁆𑀥𑁄 𑀪𑀯𑁂𑀬𑁆𑀬𑀁,

𑀦𑀪𑀲𑀺 𑀔𑀺𑀧𑀺 𑀲𑀺𑀔𑀁 𑀢𑀁 𑀇𑀘𑁆𑀘𑀥𑀺𑀝𑁆𑀞𑀸𑀬 𑀥𑀻𑀭𑁄

𑀧𑀭𑀺𑀪𑀯𑀺𑀬 𑀞𑀺𑀢𑀸 𑀲𑀸 𑀫𑁂𑀖𑀫𑀸𑀮𑀸𑀯𑀺𑀮𑀸𑀲𑀁; ()

𑁯𑁫. ¶

𑀲𑀧𑀤𑀺 𑀲𑀼𑀭𑀧𑀼𑀭𑀫𑁆𑀳𑀸 𑀤𑁂𑀯𑀭𑀸𑀚𑀸𑀪𑀺’𑀕𑀦𑁆𑀢𑁆𑀯𑀸

𑀢𑀫𑀪𑀺𑀳𑀭𑀺𑀬 𑀘𑀽𑀴𑀁 𑀘𑀸𑀭𑀺𑀘𑀗𑁆𑀕𑁄𑀝𑀓𑁂𑀦,

𑀭𑀢𑀦𑀫𑀬𑀫𑀼𑀴𑀸𑀭𑀁 𑀘𑁂𑀢𑀺𑀬𑀁 𑀫𑀸𑀧𑀬𑀺𑀢𑁆𑀣

𑀲𑀼𑀭𑀕𑀡𑀫𑀳𑀦𑀻𑀬𑀁 𑀢𑀢𑁆𑀭 𑀘𑀽𑀴𑀸𑀫𑀡𑀺𑀦𑁆𑀢𑀺; ()

𑁯𑁬.

𑀯𑀺𑀥𑀺𑀭𑀪𑀯𑀺 𑀲𑀳𑀸𑀬𑁄 𑀬𑁄 𑀖𑀝𑀺𑀓𑀸𑀭𑀦𑀸𑀫𑁄

𑀅𑀤𑀤𑀺 𑀲𑀫𑀡𑀓𑀧𑁆𑀧𑀁𑀓 𑀲𑁄 𑀓𑀧𑀭𑀺𑀓𑁆𑀔𑀸𑀭𑀫𑀲𑁆𑀲,

𑀕𑀳𑀺𑀢𑀲𑀫𑀡𑀯𑁂𑀲𑁄 𑀧𑀼𑀩𑁆𑀩𑀩𑀼𑀤𑁆𑀥𑀸’𑀯 𑀦𑀸𑀣𑁄

𑀦𑀪𑀲𑀺 𑀔𑀺𑀧𑀺 𑀦𑀺𑀯𑀢𑁆𑀣𑀁 𑀲𑀸𑀝𑀓𑀁 𑀲𑀁𑀳𑀭𑀺𑀢𑁆𑀯𑀸; ()

𑁯𑁭.

𑀢𑀫𑀪𑀺𑀳𑀭𑀺𑀬 𑀤𑀼𑀲𑁆𑀲𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀫𑀼𑀕𑁆𑀕𑁂

𑀭𑀢𑀦𑀫𑀬𑀫𑀢𑀼𑀮𑁆𑀬𑀁 𑀬𑁄𑀚𑀦𑀤𑁆𑀯𑀸𑀤𑀲𑀼𑀘𑁆𑀘𑀁,

𑀅𑀓𑀭𑀺 𑀧𑀭𑀳𑀺𑀢𑀢𑁆𑀣𑀁 𑀩𑁆𑀭𑀳𑁆𑀫𑀮𑁄𑀓𑁂𑀓 𑀯𑀺𑀥𑀸𑀢𑀸

𑀫𑀓𑀼𑀝𑀫𑀡𑀺𑀫𑀭𑀺𑀘𑀻𑀘𑀼𑀫𑁆𑀩𑀺𑀬𑀁 𑀘𑁂𑀢𑀺𑀬𑀁𑀲𑁄; ()

𑁯𑁮. ¶

𑀧𑀺𑀢𑀼𑀦𑀭𑀧𑀢𑀺𑀦𑁄 𑀢𑁆𑀯𑀁 𑀪𑀼𑀲𑀡𑀸𑀤𑀻𑀦𑀺 𑀤𑀢𑁆𑀯𑀸

𑀇𑀢𑀺 𑀫𑀫 𑀯𑀘𑀦𑁂𑀦𑀸’𑀭𑁄𑀕𑁆𑀬𑀫𑀸𑀭𑁄𑀘𑀬𑀲𑁆𑀲𑀼,

𑀲𑀘𑀺𑀯𑀫𑀦𑀼𑀧𑀮𑀩𑁆𑀪𑀸’ 𑀤𑀸𑀦𑀺 𑀧𑀩𑁆𑀩𑀚𑁆𑀚𑀺𑀢𑀼𑀁 𑀢𑁂

𑀧𑀳𑀺𑀡𑀺 𑀳𑀬𑀲𑀳𑀸𑀬𑀁 𑀑𑀯𑀤𑀺𑀢𑁆𑀯𑀸𑀦 𑀙𑀦𑁆𑀦𑀁; ()

𑁯𑁯.

𑀧𑀝𑀺𑀧𑀣𑀫𑀯𑀢𑀺𑀡𑁆𑀡𑁄 𑀕𑀦𑁆𑀢𑀼𑀓𑀸𑀫𑁄 𑀲𑀭𑀝𑁆𑀞𑀁

𑀥𑀭𑀡𑀺𑀧𑀢𑀺𑀯𑀺𑀬𑁄𑀕𑀸 𑀲𑁄𑀓𑀦𑀺𑀩𑁆𑀩𑀺𑀤𑁆𑀥𑀕𑀢𑁆𑀢𑁄,

𑀢𑀼𑀭𑀕𑀧𑀢𑀺 𑀘𑀯𑀺𑀢𑁆𑀯𑀸 𑀓𑀦𑁆𑀣𑀓𑁄 𑀤𑁂𑀯𑀧𑀼𑀢𑁆𑀢𑁄

𑀪𑀯𑀺 𑀓𑀦𑀓𑀯𑀺𑀫𑀸𑀦𑁂 𑀢𑀗𑁆𑀔𑀡𑁂𑀢𑀸𑀯𑀢𑀺𑀁𑀲𑁂; ()

𑁧𑁦𑁦.

𑀲𑀓𑀮𑀯𑀦𑀲𑀼𑀭𑀸𑀦𑀁 𑀅𑀜𑁆𑀚𑀮𑀺𑀫𑀜𑁆𑀚𑀭𑀺𑀳𑀺

𑀫𑀳𑀺𑀢𑀜𑁆𑀘𑀭𑀡𑀧𑀻𑀞𑁄 𑀬𑁂𑀦 𑀧𑀩𑁆𑀩𑀚𑁆𑀚𑀺𑀢𑁄 𑀲𑁄,

𑀢𑀤𑀯𑀲𑀭𑀺𑀅𑀦𑁄𑀫𑀸𑀦𑀸𑀫𑀦𑀚𑁆𑀚𑀸 𑀲𑀫𑀻𑀧𑁂

𑀯𑀦𑀫𑀦𑀼𑀧𑀺𑀬𑀦𑀸𑀫𑀁 𑀅𑀫𑁆𑀩𑀭𑀼𑀓𑁆𑀔𑀸𑀪𑀺𑀭𑀸𑀫𑀁; ()

𑁧𑁦𑁧. ¶

𑀲𑁄 𑀦𑀺𑀓𑁆𑀔𑀫𑁆𑀫 𑀅𑀪𑀺𑀦𑁆𑀦𑀔𑀢𑁆𑀢𑀺𑀬𑀓𑀼𑀮𑀸 𑀦𑁂𑀓𑁆𑀔𑀫𑁆𑀫 𑀥𑀫𑁆𑀫𑀸𑀮𑀬𑁄

𑀪𑁄𑀕𑀓𑁆𑀔𑀦𑁆𑀥𑀫𑀼𑀴𑀸𑀭𑀘𑀓𑁆𑀓𑀭𑀢𑀦𑀁 𑀉𑀘𑁆𑀘𑀸𑀭𑀪𑀸𑀭𑀁 𑀯𑀺𑀬,

𑀑𑀳𑀸𑀬𑀸’𑀦𑀼𑀧𑀺𑀬𑀫𑁆𑀩𑀦𑀸𑀫𑀯𑀺𑀧𑀺𑀦𑁂 𑀲𑀢𑁆𑀢𑀸𑀳𑀫𑀚𑁆𑀛𑀸𑀯𑀲𑀁

𑀧𑀩𑁆𑀩𑀚𑁆𑀚𑀸𑀧𑀝𑀺𑀮𑀸𑀪𑀲𑀫𑁆𑀪𑀯𑀲𑀼𑀔𑀁 𑀯𑁂𑀤𑁂𑀲𑀺 𑀩𑀼𑀤𑁆𑀥𑀗𑁆𑀓𑀼𑀭𑁄; ()

𑀇𑀢𑀺 𑀫𑁂𑀥𑀸𑀦𑀦𑁆𑀤𑀸𑀪𑀺𑀥𑀸𑀦𑁂𑀦 𑀬𑀢𑀺𑀦𑀸 𑀯𑀺𑀭𑀘𑀺𑀢𑁂 𑀲𑀓𑀮 𑀓𑀯𑀺𑀚𑀦 𑀳𑀤𑀬𑀸𑀦𑀦𑁆𑀤 𑀤𑀸𑀦𑀦𑀺𑀤𑀸𑀦𑁂 𑀚𑀺𑀦𑀯𑀁𑀲𑀤𑀻𑀧𑁂 𑀅𑀯𑀺𑀤𑀽𑀭𑁂 𑀦𑀺𑀤𑀸𑀦𑁂 𑀫𑀳𑀸𑀪𑀺𑀦𑀺𑀓𑁆𑀔𑀫𑀦 𑀧𑀯𑀢𑁆𑀢𑀺𑀧𑀭𑀺𑀤𑀻𑀧𑁄 𑀤𑀲𑀫𑁄 𑀲𑀕𑁆𑀕𑁄.

𑁧. ¶

𑀫𑀦𑁆𑀤𑀸𑀦𑀺𑀮𑁂𑀭𑀺𑀢𑀢𑀭𑀼𑀲𑀡𑁆𑀟𑀫𑀡𑁆𑀟𑀺𑀢𑁂

𑀢𑀲𑁆𑀫𑀺𑀁 𑀢𑀧𑁄𑀯𑀦𑀕𑀳𑀡𑁂 𑀢𑀧𑁄𑀥𑀦𑁄,

𑀪𑀼𑀢𑁆𑀯𑀸 (𑀧𑀪𑀸𑀯𑀢𑀺) 𑀯𑀦𑀤𑁂𑀯𑀢𑀸 𑀬𑀣𑀸

𑀤𑀺𑀩𑁆𑀩𑀁 𑀲𑀼𑀔𑀁 𑀲𑀼𑀔𑀫𑀦𑀕𑀸𑀭𑀺𑀬𑀁 𑀢𑀢𑁄; ()

𑁨.

𑀬𑁄 𑀲𑁂𑀦𑀺𑀬𑁄 𑀦𑀭𑀧𑀢𑀺 𑀫𑀸𑀕𑀥𑁄 𑀢𑀤𑀸

𑀬𑀲𑁆𑀫𑀺𑀁 𑀧𑀼𑀭𑁂 𑀯𑀲𑀢𑀺 𑀧𑀼𑀭𑀗𑁆𑀕𑀪𑀸𑀲𑀼𑀭𑁂,

𑀭𑀸𑀚𑀕𑁆𑀕𑀳𑀁 𑀢𑀫𑀳𑀺𑀧𑀯𑁂𑀲𑀦𑀢𑁆𑀣𑀺𑀓𑁄

𑀅𑀤𑁆𑀥𑀸𑀦𑀫𑁄𑀲𑀭𑀺 𑀲𑀫𑀢𑀺𑀁𑀲𑀬𑁄𑀚𑀦𑀁; ()

𑁩.

𑀘𑀓𑁆𑀓𑀗𑁆𑀓𑀺𑀢𑀲𑁆𑀲𑀺𑀭𑀺𑀘𑀸𑀭𑀡𑁄 𑀲𑀼𑀲𑀜𑁆𑀜𑀫𑁄

𑀤𑀻𑀖𑀜𑁆𑀚𑀲𑀁 𑀯𑀲𑀺 𑀢𑀤𑀳𑁂𑀦 𑀔𑁂𑀧𑀬𑀁,

𑀭𑀸𑀚𑀕𑁆𑀕𑀳𑀁 𑀓𑀧𑀼𑀭𑀯𑀭𑀫𑀺𑀦𑁆𑀤𑀺𑀭𑀸𑀮𑀬𑀁

𑀲𑀫𑁆𑀧𑀸𑀯𑀺𑀲𑀺 𑀚𑀺𑀢𑀕𑀚𑀭𑀸𑀚𑀕𑀸𑀫𑀺 𑀲𑁄; ()

𑁪. ¶

𑀇𑀦𑁆𑀤𑀸𑀲𑀼𑀥𑀸𑀯𑀮𑀺𑀯𑀮𑀬𑀺𑀓𑀢𑁄 𑀫𑀳𑀸-

𑀫𑀕𑁆𑀕𑀫𑁆𑀳𑀺 𑀚𑀗𑁆𑀕𑀫𑁆𑀫𑀡𑀺𑀧𑀩𑁆𑀩𑀢𑁄𑀭𑀺𑀯,

𑀔𑀢𑁆𑀢𑀺𑀁𑀲𑀮𑀓𑁆𑀔𑀡𑀲𑀫𑀮𑀗𑁆𑀓𑀢𑁄 𑀫𑀳𑀸-

𑀯𑀻𑀭𑁄 𑀢𑀧𑁄𑀦𑀺𑀥𑀺 𑀬𑀼𑀕𑀫𑀢𑁆𑀢𑀤𑀲𑁆𑀲𑀦𑁄; ()

𑁫.

𑀩𑁄𑀥𑀸𑀧𑀬𑀁 𑀩𑀼𑀥𑀚𑀦𑀫𑀸𑀦𑀲𑀫𑁆𑀩𑀼𑀚𑁂

𑀅𑀯𑁆𑀳𑀸𑀧𑀬𑀁 𑀧𑀣𑀺𑀓𑀚𑀦’𑀓𑁆𑀔𑀺𑀧𑀓𑁆𑀔𑀺𑀦𑁄,

𑀯𑀺𑀫𑁆𑀳𑀸𑀧𑀬𑀁 𑀦𑀺𑀚𑀲𑀺𑀭𑀺𑀬𑀸 𑀲𑀤𑁂𑀯𑀓𑁂

𑀢𑀲𑁆𑀫𑀺𑀁 𑀧𑀼𑀭𑁂 𑀘𑀭𑀺 𑀲𑀧𑀤𑀸𑀦𑀘𑀸𑀭𑀺𑀓𑀁; ()

𑁬.

𑀧𑀺𑀡𑁆𑀟𑀸𑀬 𑀕𑀘𑁆𑀙𑀢𑀺𑀲𑀢𑀺 𑀭𑀽𑀧𑀤𑀲𑁆𑀲𑀦-

𑀧𑀩𑁆𑀬𑀸𑀯𑀝𑀸’𑀔𑀺𑀮𑀚𑀦𑀢𑀸𑀬 𑀕𑁄𑀢𑀫𑁂,

𑀲𑀗𑁆𑀖𑁄𑀪𑀺𑀢𑀸’𑀲𑀼𑀭𑀫𑀺𑀲𑀭𑁂𑀳𑀺 𑀲𑀸 𑀧𑀼𑀭𑀺

𑀧𑀢𑁆𑀢𑁂 𑀬𑀣𑁂𑀯’𑀲𑀼𑀭𑀧𑀼𑀭𑀺 𑀧𑀼𑀭𑀺𑀦𑁆𑀤𑀤𑁂; ()

𑁭. ¶

𑀔𑀢𑁆𑀢𑀺𑀁𑀲𑀮𑀓𑁆𑀔𑀡𑀲𑀼𑀭𑀘𑀸𑀧𑀪𑀸𑀲𑀼𑀭𑁂

𑀭𑀽𑀧𑀫𑁆𑀩𑀭𑁂 𑀯𑀭𑀧𑀼𑀭𑀺𑀲𑀲𑁆𑀲 𑀕𑀘𑁆𑀙𑀢𑁄,

𑀮𑁄𑀓𑀲𑁆𑀲 𑀮𑁄𑀘𑀦𑀲𑀓𑀼𑀡𑀸𑀯𑀮𑀺𑀢𑀤𑀸

𑀅𑀦𑁆𑀢𑀁 𑀦𑀧𑀸𑀧𑀼𑀡𑀺 𑀧𑀭𑀺𑀲𑀗𑁆𑀓𑀫𑀦𑁆𑀢𑀻𑀧𑀺; ()

𑁮.

𑀫𑀜𑁆𑀚𑀻𑀭𑀧𑀺𑀜𑁆𑀚𑀭𑀓𑀭 𑀓𑀦𑁆𑀥𑀭𑀸𑀫𑀡𑀺-

𑀓𑁂𑀬𑀽𑀭𑀪𑀸𑀲𑀼𑀭𑀘𑀭𑀡𑀸 𑀲𑀺𑀭𑀺𑀫𑀢𑁄,

𑀲𑀻𑀫𑀦𑁆𑀢𑀺𑀦𑀻 𑀧𑀭𑀫𑀲𑀺𑀭𑀺𑀁 𑀯𑀺𑀧𑀲𑁆𑀲𑀺𑀢𑀼𑀁

𑀥𑀸𑀯𑀺𑀁𑀲𑀼 𑀦𑀺𑀚𑁆𑀚𑀺𑀢𑀓𑀮𑀳𑀁𑀲𑀓𑀸𑀫𑀺𑀦𑀻; ()

𑁯.

𑀦𑀸𑀭𑀺𑀚𑀦𑀸 𑀫𑀳𑀺𑀢𑀼𑀫𑀺𑀯𑀸’𑀪𑀺𑀕𑀘𑁆𑀙𑀢𑁄

𑀭𑀽𑀧𑀺𑀦𑁆𑀤𑀺𑀭𑀸𑀬’ 𑀦𑀺𑀫𑀺𑀲𑀮𑁄𑀘𑀦𑀼𑀧𑁆𑀧𑀮𑁂,

𑀥𑀫𑁆𑀫𑀺𑀮𑁆𑀮𑀯𑁂𑀮𑁆𑀮𑀺𑀢𑀪𑀼𑀚𑀘𑀫𑁆𑀧𑀓𑀸𑀯𑀮𑀻

𑀥𑀸𑀯𑀺𑀁𑀲𑀼 𑀧𑀻𑀯𑀭𑀓𑀼𑀘𑀳𑀸𑀭𑀧𑀻𑀴𑀺𑀢𑀸; ()

𑁧𑁦. ¶

𑀦𑀺𑀲𑁆𑀲𑀸𑀲𑀺𑀦𑀻 𑀲𑀫𑀚𑀮𑀩𑀺𑀦𑁆𑀤𑀼𑀘𑀼𑀫𑁆𑀩𑀺𑀢-

𑀯𑀢𑁆𑀢𑀫𑁆𑀩𑀼𑀚𑀸 𑀲𑀺𑀣𑀺𑀮𑀺𑀢𑀓𑀸𑀲𑀺𑀓𑀫𑁆𑀩𑀭𑀸,

𑀓𑀸𑀘𑀺𑀢𑁆𑀣𑀺𑀬𑁄 𑀲𑀫𑀡𑀫𑀼𑀤𑀺𑀓𑁆𑀔𑀺𑀢𑀼𑀁 𑀧𑀣𑁂

𑀥𑀸𑀯𑀦𑁆𑀢𑀺𑀬𑁄 𑀓𑀺𑀫𑀼𑀧𑀢𑀺𑀲𑀗𑁆𑀓𑀺𑀬𑀸’𑀪𑀯𑀼𑀁; ()

𑁧𑁧.

𑀉𑀕𑁆𑀖𑀸𑀝𑀺𑀢𑀸’𑀲𑀺𑀢𑀫𑀡𑀺𑀲𑀺𑀳𑀧𑀜𑁆𑀚𑀭𑀸

𑀭𑀸𑀫𑀸𑀧𑀲𑀸𑀭𑀺𑀢𑀯𑀤𑀦𑀫𑁆𑀩𑀼𑀚𑀸𑀓 𑀯𑀲𑀺𑀁,

𑀤𑀝𑁆𑀞𑀼𑀁 𑀧𑀪𑀼𑀚𑀦𑀪𑀯𑀦𑁂𑀲𑀼 𑀢𑀗𑁆𑀔𑀡𑁂

𑀫𑀦𑁆𑀤𑀸𑀓𑀺𑀦𑀺𑀲𑀭𑀲𑀺𑀯𑀺𑀮𑀸𑀲𑀫𑀸𑀳𑀭𑀼𑀁; ()

𑁧𑁨.

𑀉𑀘𑁆𑀙𑀗𑁆𑀕𑀢𑁄𑀧𑀢𑀺𑀢𑀲𑀼𑀢𑀸’𑀪𑀺𑀭𑀽𑀧𑀺𑀦𑁄

𑀭𑀽𑀧𑀧𑁆𑀧𑀮𑀫𑁆𑀳𑀺𑀢𑀳𑀤𑀬𑀸𑀓 𑀧𑀽𑀭𑀻𑀯𑀥𑀽,

𑀧𑀲𑁆𑀲𑀦𑁆𑀢𑀺𑀬𑁄 𑀧𑀣𑀺𑀓𑀚𑀦𑀲𑁆𑀲𑀳𑀢𑁆𑀣𑀕𑁂

𑀦𑀸𑀓𑀁𑀲𑀼 𑀓𑀺𑀁 𑀅𑀥𑀺𑀓𑀭𑀡𑀸’𑀥𑀺𑀭𑁄𑀧𑀡𑀁; ()

𑁧𑁩. ¶

𑀏𑀓𑁂 𑀚𑀦𑀸 𑀬𑀢𑀺𑀧𑀢𑀺𑀭𑀽𑀧𑀤𑀲𑁆𑀲𑀦-

𑀓𑁄𑀢𑀼𑀳𑀴𑀸 𑀲𑀓𑀧𑀝𑀺𑀪𑀸𑀦𑀫𑀩𑁆𑀭𑀯𑀼𑀁,

𑀲𑀻𑀫𑀦𑁆𑀢𑀺𑀦𑀻 𑀫𑀦𑀓𑀼𑀫𑀼𑀤𑀸𑀦𑀺 𑀩𑁄𑀥𑀬𑀁

𑀧𑀢𑁆𑀢𑁄’𑀢𑁆𑀬’𑀬𑀁 𑀧𑀓𑀢𑀺𑀦𑀺𑀲𑀸𑀧𑀢𑀻𑀦𑀼𑀔𑁄; ()

𑁧𑁪.

𑀲𑀼𑀢𑁆𑀯𑀸𑀦 𑀢𑀁 𑀲𑀓𑀮𑀓𑀮𑀸𑀦𑁆𑀢𑀭𑁄𑀧𑀕𑀁

𑀩𑀺𑀫𑁆𑀩𑀁 𑀢𑀤𑀗𑁆𑀓𑀺𑀢𑀳𑀭𑀺𑀡𑀗𑁆𑀓𑀫𑀫𑁆𑀩𑀭𑁂,

𑀢𑀼𑀫𑁆𑀳𑁂 𑀦𑀧𑀲𑁆𑀲𑀣 𑀳𑀺𑀫𑀭𑀁𑀲𑀺𑀦𑁄 𑀇𑀢𑀺

𑀕𑀩𑁆𑀩𑀸𑀪𑀺𑀚𑀧𑁆𑀧𑀺𑀢𑀯𑀘𑀦𑀸’𑀧𑀭𑁂𑀚𑀦𑀸; ()

𑁧𑁫.

𑀅𑀘𑁆𑀙𑁂𑀭𑀧𑀗𑁆𑀓𑀚𑀯𑀺𑀲𑀭𑀸𑀦𑀺 𑀘𑀺𑀦𑁆𑀢𑀺𑀬

𑀲𑀜𑁆𑀘𑀼𑀫𑁆𑀩𑀺𑀢𑀼𑀁 𑀧𑀼𑀭𑀮𑀮𑀦𑀸𑀦𑀦’𑀫𑁆𑀩𑀼𑀚𑁂;

𑀯𑁂𑀭𑁄𑀘𑀦𑁄 𑀇𑀥𑀼𑀧𑀕𑀫𑀸 𑀯𑀺𑀭𑀽𑀧𑀺𑀫𑀸

𑀇𑀘𑁆𑀘𑀩𑁆𑀭𑀯𑀼𑀁 𑀧𑀼𑀦𑀭𑀦𑀺𑀲𑀫𑁆𑀫𑀓𑀸𑀭𑀺𑀦𑁄; ()

𑁧𑁬.

𑀲𑀼𑀢𑁆𑀯𑀸𑀦 𑀢𑀁 𑀕𑀕𑀦𑀢𑀮𑀗𑁆𑀕𑀦𑁂’𑀥𑀼𑀦𑀸

𑀯𑁂𑀭𑁄𑀘𑀦𑀲𑁆𑀲’𑀪𑀺𑀘𑀭𑀢𑁄 𑀦𑀧𑀲𑁆𑀲𑀣,

𑀘𑀡𑁆𑀟𑀸𑀢𑀧𑀁 𑀣𑀺𑀭𑀧𑀭𑀺𑀯𑁂𑀲𑀫𑀫𑁆𑀩𑀼𑀚-

𑀧𑀸𑀡𑀺𑀦𑁆𑀢𑀺 𑀕𑀚𑁆𑀚𑀺𑀢𑀯𑀘𑀦𑀸’𑀧𑀭𑁂𑀚𑀦𑀸; ()

𑁧𑁭. ¶

𑀉𑀢𑁆𑀢𑀼𑀗𑁆𑀕𑀫𑀦𑁆𑀤𑀺𑀭𑀫𑀡𑀺𑀘𑀦𑁆𑀤𑀺𑀓𑀸𑀢𑀮𑁂

𑀤𑀺𑀩𑁆𑀩𑀘𑁆𑀙𑀭𑀸𑀦𑀺𑀪𑀭𑀫𑀡𑀺𑀳𑀺 𑀯𑀜𑁆𑀘𑀺𑀢𑁄,

𑀏𑀬𑀸’𑀫𑀭𑀸𑀯𑀢𑀺𑀦𑀕𑀭𑀺𑀢𑀺 𑀘𑀺𑀦𑁆𑀢𑀺𑀬

𑀲𑀓𑁆𑀓𑁄 𑀘𑀭𑁂 𑀦𑀦𑀼 𑀲𑀓𑀯𑀸𑀤𑀫𑀧𑀓𑁆𑀧𑀬𑀼𑀁; ()

𑁧𑁮.

𑀲𑀓𑁆𑀓𑀲𑁆𑀲 𑀤𑀸𑀦𑀯𑀯𑀺𑀚𑀬𑀸’𑀪𑀺𑀮𑀸𑀲𑀺𑀦𑁄

𑀧𑀸𑀡𑀺𑀫𑁆𑀳𑀺 𑀤𑀺𑀲𑁆𑀲𑀢𑀺 𑀯𑀚𑀺𑀭𑀸𑀬𑀼𑀥𑀁 𑀔𑀭𑀁,

𑀲𑀁𑀯𑀺𑀚𑁆𑀚𑀭𑁂 𑀤𑀲𑀲𑀢𑀮𑁄𑀘𑀦𑀸𑀦𑀺’𑀧𑀺

𑀦𑁄𑀢𑀸𑀤𑀺𑀲𑁄 𑀅𑀬𑀫𑀺𑀢𑀺 𑀢𑀩𑁆𑀩𑀺𑀧𑀓𑁆𑀔𑀺𑀦𑁄; ()

𑁧𑁯.

𑀬𑀸 𑀲𑀸𑀮𑀯𑀢𑁆𑀬’𑀥𑀺𑀯𑀘𑀦𑀸’𑀪𑀺𑀭𑀽𑀧𑀺𑀦𑀻

𑀲𑀜𑁆𑀘𑁄𑀤𑀺𑀢𑁄 𑀚𑀺𑀢𑀕𑀺𑀭𑀺𑀚𑀸𑀬 𑀢𑀸𑀬 𑀳𑁄,

𑀓𑁂𑀮𑀸𑀲𑀧𑀩𑁆𑀩𑀢𑀦𑀺𑀪𑀧𑀡𑁆𑀟𑀯𑀸𑀘𑀮-

𑀜𑀢𑁆𑀢𑀁 𑀯𑀚𑀁 𑀅𑀬𑀫𑀺𑀢𑀺𑀇𑀲𑁆𑀲𑀭𑁄’𑀩𑁆𑀭𑀯𑀼𑀁; ()

𑁨𑁦. ¶

𑀢𑀼𑀫𑁆𑀳𑁂 𑀦𑀧𑀲𑁆𑀲𑀣 𑀧𑀭𑀫𑀺𑀲𑁆𑀲𑀭𑀲𑁆𑀲 𑀓𑀺𑀁

𑀦𑀕𑁆𑀕𑀢𑁆𑀢𑀦𑀁 𑀧𑀲𑀼𑀲𑀬𑀦𑁄’𑀧𑀯𑁂𑀲𑀦𑀁,

𑀧𑀸𑀡𑀺𑀁 𑀓𑀧𑀸𑀮𑀓𑀫𑀥𑀺𑀓𑀓𑁆𑀔𑀺𑀫𑀡𑁆𑀟𑀮𑀁

𑀇𑀢𑁆𑀣𑀁 𑀧𑀯𑁂𑀤𑀺𑀢𑀯𑀘𑀦𑀸’𑀧𑀭𑁂𑀚𑀦𑀸; ()

𑁨𑁧.

𑀏𑀲𑀸’𑀯𑀮𑀫𑁆𑀩𑀺𑀢𑀧𑀼𑀭𑀔𑀻𑀭𑀦𑀻𑀭𑀥𑀺𑀁

𑀮𑀓𑁆𑀔𑀺𑀁 𑀲𑀫𑁂𑀓𑁆𑀔𑀺𑀬 𑀦𑀺𑀚𑀮𑀓𑁆𑀔𑀺𑀲𑀁𑀲𑀬𑁄,

𑀧𑀻𑀢𑀫𑁆𑀩𑀭𑀁 𑀧𑀭𑀺𑀤𑀳𑀺𑀬’𑀜𑁆𑀚𑀲𑁂 𑀘𑀭𑀁

𑀦𑀸𑀭𑀸𑀬𑀦𑁄 𑀇𑀢𑀺 𑀫𑀢𑀺𑀫𑀧𑁆𑀧𑀬𑀼𑀁 𑀲𑀓𑀁; ()

𑁨𑁨.

𑀦𑀸𑀭𑀸𑀬𑀦𑁄 𑀓𑀼𑀯𑀮𑀬𑀦𑀻𑀮𑀯𑀺𑀕𑁆𑀕𑀳𑁄

𑀓𑁄𑀧𑀦𑁆𑀢𑀭𑁄’𑀭𑀕𑀲𑀬𑀦𑀺𑀦𑁆𑀤𑀺𑀭𑀸𑀥𑀦𑁄,

𑀘𑀓𑁆𑀓𑀸𑀬𑀼𑀥𑁄’𑀮𑁆𑀮𑀲𑀺𑀢𑀓𑀭𑁄’𑀢𑀺𑀯𑀸𑀫𑀦𑁄

𑀢𑀩𑁆𑀩𑀸𑀤𑀫𑀤𑁆𑀤𑀦𑀘𑀢𑀼𑀭𑁂’𑀢𑀭𑁂 𑀚𑀦𑀸; ()

𑁨𑁩. ¶

𑀯𑁂𑀤𑀢𑁆𑀢𑀬𑀁 𑀯𑀺𑀩𑀼𑀥𑀚𑀦𑀸𑀦𑀫𑀸𑀦𑀦𑁂

𑀲𑁆𑀯’𑀚𑁆𑀛𑀸𑀬𑀢𑀁 𑀯𑀲𑀢𑀺𑀦𑀼𑀔𑁄 𑀲𑀭𑀲𑁆𑀲𑀢𑀻,

𑀲𑀜𑁆𑀚𑀸𑀢𑀲𑀁𑀲𑀬 𑀚𑀝𑀺𑀢𑁄 𑀧𑀺𑀢𑀸𑀫𑀳𑁄

𑀢𑀲𑁆𑀲𑀸𑀕𑀯𑁂𑀲𑀦𑀧𑀲𑀼𑀢𑁄’𑀢𑁆𑀬𑀼’𑀤𑀻𑀭𑀬𑀼𑀁; ()

𑁨𑁪.

𑀲𑀼𑀢𑁆𑀯𑀸𑀦 𑀢𑀁 𑀲𑀭𑀲𑀺𑀚𑀬𑁄𑀦𑀺𑀦𑁄 𑀲𑀤𑀸

𑀧𑀸𑀡𑀺𑀫𑁆𑀳𑀺 𑀯𑀺𑀚𑁆𑀚𑀢𑀺 𑀯𑀭𑀫𑀢𑁆𑀢𑀧𑁄𑀢𑁆𑀣𑀓𑀁,

𑀘𑀢𑁆𑀢𑀸𑀭𑀺𑀘𑀸𑀦𑀦𑀧𑀤𑀼𑀫𑀸𑀦𑀺 𑀤𑀺𑀲𑁆𑀲𑀭𑁂

𑀕𑀘𑁆𑀙𑀁 𑀅𑀬𑀁𑀧𑀦 𑀧𑀼𑀭𑀺𑀲𑁄 𑀦𑀢𑀸𑀤𑀺𑀲𑁄; ()

𑁨𑁫.

𑀲𑀼𑀤𑁆𑀥𑁄𑀤𑀦𑀯𑁆𑀳𑀬𑀯𑀲𑀼𑀥𑀸𑀥𑀺𑀧’𑀢𑁆𑀭𑀚𑁄

𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺 𑀇𑀢𑀺 𑀯𑁂𑀤𑀓𑁄𑀯𑀺𑀤𑀸,

𑀓𑁄𑀡𑁆𑀟𑀜𑁆𑀜𑀪𑀼𑀲𑀼𑀭𑀧𑀫𑀼𑀔𑀸 𑀤𑁆𑀯𑀺𑀚𑀸 𑀢𑀤𑀸

𑀧𑀩𑁆𑀬𑀸𑀓𑀭𑀼𑀁 𑀢𑀦𑀼 𑀩𑀳𑀼𑀪𑀸𑀲𑀡𑁂𑀦 𑀓𑀺𑀁; ()

𑁨𑁬. ¶

𑀉𑀓𑁆𑀓𑀡𑁆𑀞𑀺𑀢𑁄 𑀲𑀓𑀪𑀯𑀦𑀸 𑀫𑀳𑀸𑀫𑀢𑀻

𑀦𑀺𑀓𑁆𑀔𑀫𑁆𑀫 𑀲𑀢𑁆𑀢𑀫𑀤𑀺𑀯𑀲𑁄𑀢𑀺 𑀯𑀺𑀲𑁆𑀲𑀼𑀢𑁄,

𑀆𑀧𑀸𑀣𑀕𑀁 𑀦𑀺𑀚𑀲𑀯𑀡𑀜𑁆𑀚𑀮𑀺𑀳𑀺 𑀪𑁄

𑀢𑀁 𑀩𑁆𑀬𑀧𑁆𑀧𑀣𑀁 𑀦𑀧𑀺𑀯𑀣 𑀓𑀺𑀁 𑀬𑀣𑀸𑀫𑀢𑀁; ()

𑁨𑁭.

𑀯𑁂𑀤𑀸𑀕𑀢𑀁 𑀯𑀭𑀧𑀼𑀭𑀺𑀲𑀗𑁆𑀕𑀮𑀓𑁆𑀔𑀡𑀁

𑀤𑁂𑀳𑀫𑁆𑀳𑀺 𑀯𑀺𑀚𑁆𑀚𑀢𑀺 𑀲𑀫𑀡𑀲𑁆𑀲 𑀕𑀘𑁆𑀙𑀢𑁄,

𑀅𑀦𑁆𑀥𑀸’𑀯 𑀪𑁄 𑀅𑀧𑀕𑀢𑀭𑀽𑀧𑀤𑀲𑁆𑀲𑀦𑀸

𑀢𑀼𑀫𑁆𑀳𑁂’𑀧𑀺 𑀓𑀺𑀁 𑀢𑀮𑀳𑀣 𑀭𑀽𑀧𑀤𑀲𑁆𑀲𑀦𑀁; ()

𑁨𑁮.

𑀦𑀺𑀓𑁆𑀔𑀫𑁆𑀫 𑀙𑀟𑁆𑀟𑀺𑀢𑀯𑀺𑀪𑀯𑁄 𑀫𑀳𑀸𑀓𑀼𑀮𑀸

𑀲𑀼𑀤𑁆𑀥𑀸𑀲𑀬𑁄 𑀲𑀼𑀕𑀳𑀺𑀬 𑀧𑀢𑁆𑀢𑀘𑀻𑀯𑀭𑀁,

𑀧𑀩𑁆𑀩𑀚𑁆𑀚𑀺𑀬𑀸’𑀦𑀳𑀺𑀭𑀫𑀺𑀢𑁄 𑀪𑀯𑀢𑁆𑀢𑀬𑁂

𑀅𑀢𑁆𑀣𑀸𑀘𑀭𑀁 𑀅𑀦𑀼𑀖𑀭𑀫𑀜𑁆𑀚𑀲𑁂’𑀥𑀼𑀦𑀸; ()

𑁨𑁯. ¶

𑀲𑀼𑀤𑁆𑀥𑁄𑀤𑀦𑀸𑀯𑀦𑀺𑀧𑀢𑀺𑀦𑁄 𑀯𑀭𑁄𑀭𑀲𑁄

𑀏𑀲𑁄 𑀲𑀫𑀼𑀚𑁆𑀚𑀮𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑁄,

𑀯𑁆𑀬𑀸𑀧𑀸𑀭𑀺𑀢𑁄 𑀓𑀼𑀲𑀮𑀩𑀮𑁂𑀦 𑀩𑁄𑀥𑀺𑀬𑀸

𑀳𑁄𑀢𑁂’𑀯 𑀕𑁄𑀢𑀫𑀲𑀫𑀡𑁄 𑀦𑀲𑀁𑀲𑀬𑁄; ()

𑁩𑁦.

𑀤𑀺𑀲𑁆𑀯𑀸 𑀢𑀧𑁄𑀥𑀦𑀫𑀳𑀺𑀬𑀦𑁆𑀢𑀫𑀜𑁆𑀚𑀲𑁂

𑀬𑁂 𑀫𑀸𑀦𑀯𑀸 𑀲𑀓𑀲𑀓𑀯𑀸𑀤𑀫𑀧𑁆𑀧𑀬𑀼𑀁,

𑀢𑀩𑁆𑀩𑀸𑀤𑀩𑀦𑁆𑀥𑀦𑀯𑀺𑀦𑀺𑀯𑁂𑀞𑀦𑀸 𑀧𑀭𑀁

𑀇𑀘𑁆𑀘𑀸𑀳𑀼 𑀧𑀡𑁆𑀟𑀺𑀢𑀧𑀼𑀭𑀺𑀲𑀸 𑀬𑀣𑀸𑀯𑀢𑁄; ()

𑁩𑁧.

𑀤𑀼𑀢𑀸 𑀢𑀤𑀸 𑀲𑀼𑀭𑀲𑀺 𑀲𑀫𑀧𑁆𑀧𑀺𑀢𑀜𑁆𑀚𑀮𑀻

𑀭𑀜𑁆𑀜𑁄 𑀢𑀫𑀘𑁆𑀙𑀭𑀺𑀬𑀧𑀯𑀢𑁆𑀢𑀺𑀫𑀸𑀳𑀭𑀼𑀁,

𑀅𑀤𑁆𑀤𑀓𑁆𑀔𑀺 𑀪𑀼𑀧𑀢𑀺 𑀘𑀭𑀫𑀸𑀦𑀫𑀜𑁆𑀚𑀲𑁂

𑀧𑀺𑀡𑁆𑀟𑀸𑀬’𑀣𑀩𑁆𑀩𑀺𑀯𑀭𑀺𑀬 𑀲𑀺𑀳𑀧𑀜𑁆𑀚𑀭𑀁; ()

𑁩𑁨.

𑀦𑀸 𑀕𑁄 𑀲𑀺𑀬𑀸 𑀧𑀞𑀫𑀺𑀦𑀺𑀫𑀼𑀚𑁆𑀚𑀦𑀁 𑀓 𑀭𑁂

𑀬𑀓𑁆𑀔𑁄 𑀲𑀺𑀬𑀸 𑀲𑀳𑀬𑀫𑀤𑀲𑁆𑀲𑀦𑀁 𑀓 𑀭𑁂,

𑀤𑁂 𑀯𑁄 𑀲𑀺𑀬𑀸 𑀕𑀕𑀦𑀢𑀮𑀗𑁆𑀕𑀡𑀜𑁆𑀘 𑀭𑁂

𑀧𑁄𑀲𑁄 𑀲𑀺𑀬𑀸 𑀬𑀤𑀺 𑀧𑀝𑀺𑀮𑀤𑁆𑀥𑀫𑀸𑀳 𑀭𑁂; ()

𑁩𑁩. ¶

𑀤𑀽𑀢𑁂𑀦𑀼’𑀲𑀸𑀲𑀺𑀬 𑀫𑀕𑀥𑀸𑀥𑀺𑀧𑁄 𑀇𑀢𑀺

𑀯𑀻𑀫𑀁𑀲𑀺𑀢𑀼𑀁 𑀧𑀓𑀢𑀺𑀫𑀦𑀗𑁆𑀕𑀳𑀗𑁆𑀕𑀺𑀦𑁄,

𑀧𑀸𑀳𑁂𑀲𑀺 𑀢𑁂 𑀧𑀤𑀫𑀦𑀼𑀕𑀫𑁆𑀫𑀼’𑀧𑀸𑀕𑀫𑀼𑀁

𑀲𑀤𑁆𑀥𑀺𑀁 𑀫𑀳𑀸𑀲𑀫𑀡𑀯𑀭𑁂𑀦 𑀧𑀡𑁆𑀟𑀯𑀁; ()

𑁩𑁪.

𑀯𑀺𑀓𑁆𑀔𑀸𑀮𑀬𑀁 𑀫𑀼𑀔𑀓𑀫𑀮𑀁 𑀓𑀼𑀮𑁂 𑀓𑀼𑀮𑁂

𑀪𑀺𑀓𑁆𑀔𑀸𑀝𑀦𑁂𑀦’ 𑀪𑀺𑀳𑀝𑀫𑀺𑀲𑁆𑀲𑀪𑁄𑀚𑀦𑀁,

𑀮𑀤𑁆𑀥𑀸 𑀚𑀺𑀕𑀼𑀘𑁆𑀙𑀺𑀬 𑀯𑀲𑀺 𑀧𑀡𑁆𑀟𑀯𑀸𑀘𑀮-

𑀘𑁆𑀙𑀸𑀬𑀸𑀬 𑀫𑀸𑀭𑀪𑀺 𑀲𑀼𑀦𑀺𑀲𑀚𑁆𑀚 𑀪𑀼𑀜𑁆𑀚𑀺𑀢𑀼𑀁; ()

𑁩𑁫.

𑀪𑀢𑁆𑀢𑀫𑁆𑀳𑀻 𑀓𑀼𑀓𑁆𑀓𑀼𑀭𑀯𑀫𑀣𑀽𑀧𑀫𑁂 𑀫𑀼𑀳𑀼𑀁

𑀅𑀦𑁆𑀢𑁄𑀤𑀭𑀁 𑀧𑀯𑀺𑀲𑀢𑀺 𑀥𑀻𑀫𑀢𑁄 𑀲𑀢𑀺,

𑀅𑀦𑁆𑀢𑀸𑀦𑀺 𑀩𑀸𑀳𑀺𑀭𑀓𑀭𑀡𑀸𑀦𑀺’𑀯𑀸’𑀪𑀯𑀼𑀁

𑀢𑀁𑀔𑁄 𑀲𑀳𑀻 𑀯𑀲𑀺𑀲𑀦𑀺𑀲𑀫𑁆𑀧𑀚𑀜𑁆𑀜𑀯𑀸; ()

𑁩𑁬. ¶

𑀧𑀩𑁆𑀩𑀚𑁆𑀚𑀺𑀢𑀁 𑀲𑀼𑀕𑀳𑀺𑀢𑀧𑀢𑁆𑀢𑀘𑀻𑀯𑀭𑀁

𑀤𑀺𑀲𑁆𑀯𑀸 𑀭𑀢𑀺𑀁 𑀧𑀚𑀳𑀺𑀬 𑀭𑀸𑀚𑀪𑁄𑀚𑀦𑁂,

𑀲𑀺𑀤𑁆𑀥𑀢𑁆𑀣 𑀦𑁄 𑀢𑁆𑀯𑀫𑀪𑀺𑀕𑀫𑀺𑀢𑁆𑀣 𑀅𑀢𑁆𑀢𑀦𑀸

𑀅𑀢𑁆𑀢𑀸𑀦𑀫𑁄𑀯𑀤𑀺𑀬 𑀧𑀪𑀼𑀜𑁆𑀚𑀺 𑀪𑁄𑀚𑀦𑀁; ()

𑁩𑁭.

𑀤𑀽𑀢𑁂𑀳𑀺 𑀘𑁄𑀤𑀺𑀢𑀳𑀤𑀬𑁄 𑀤𑀬𑀸𑀥𑀦𑁄

𑀲𑁄 𑀫𑀸𑀕𑀥𑁄 𑀦𑀭𑀧𑀢𑀺 𑀢𑁂𑀦 𑀧𑀸𑀯𑀺𑀲𑀺,

𑀬𑁂𑀦𑀸’𑀲𑀺 𑀧𑀡𑁆𑀟𑀯𑀕𑀺𑀭𑀺 𑀪𑀤𑁆𑀭𑀯𑀸𑀳𑀦𑀁

𑀆𑀭𑀼𑀬𑁆𑀳 𑀤𑀲𑁆𑀲𑀦𑀭𑀲𑀖𑁂𑀥𑀮𑁄𑀘𑀦𑁄; ()

𑁩𑁮.

𑀅𑀜𑁆𑀜𑀸𑀬 𑀲𑀸𑀓𑀺𑀬𑀓𑀼𑀮𑀲𑀫𑁆𑀪𑀯𑀁 𑀯𑀲𑀺𑀁

𑀭𑀸𑀚𑀸 𑀧𑀲𑀺𑀤𑀺𑀬 𑀅𑀭𑀺𑀬𑁂’𑀭𑀺𑀬𑀸𑀧𑀣𑁂,

𑀫𑀸 𑀓𑀸𑀳𑀲𑁂 𑀲𑀔 𑀇𑀢𑀺 𑀤𑀼𑀓𑁆𑀓𑀭𑀁 𑀔𑀭𑀁

𑀭𑀚𑁆𑀚𑁂𑀦 𑀢𑀁𑀦𑀭𑀧𑀯𑀭𑀁 𑀧𑀯𑀸𑀭𑀬𑀺; ()

𑁩𑁯. ¶

𑀭𑀚𑁆𑀚𑁂𑀦 𑀓𑀺𑀁 𑀢𑀯 𑀘𑀢𑀼𑀭𑀡𑁆𑀡𑀯𑀸𑀯𑀥𑀺𑀁

𑀭𑀚𑁆𑀚𑀁 𑀦𑀺𑀚𑀁 𑀧𑀚𑀳𑀺𑀬 𑀆𑀕𑀢𑀲𑁆𑀲 𑀫𑁂,

𑀩𑁄𑀥𑀺𑀁 𑀧𑀩𑀼𑀚𑁆𑀛𑀺𑀬 𑀧𑀞𑀫𑀁 𑀢𑀣𑀸𑀲𑀢𑀺

𑀆𑀕𑀘𑁆𑀙𑀢𑀁 𑀫𑀫 𑀯𑀺𑀚𑀺𑀢𑀦𑁆𑀢𑁆𑀬’𑀯𑁄𑀘 𑀦𑀁; ()

𑁪𑁦.

𑀤𑀢𑁆𑀯𑀸 𑀧𑀝𑀺𑀲𑁆𑀲𑀯𑀫𑀣 𑀪𑀼𑀫𑀺𑀪𑀢𑁆𑀢𑀼𑀦𑁄

𑀮𑁄𑀓𑀲𑁆𑀲 𑀮𑁄𑀘𑀦𑀫𑀡𑀺𑀢𑁄𑀭𑀡𑀸𑀓𑀼𑀮𑁂,

𑀤𑀻𑀖𑀜𑁆𑀚𑀲𑁂 𑀯𑀲𑀺 𑀞𑀧𑀺𑀢𑀗𑁆𑀖𑀺𑀧𑀗𑁆𑀓𑀚𑁄

𑀆𑀴𑀸𑀭𑀸𑀓𑀁 𑀇𑀲𑀺𑀧𑀯𑀭𑀁 𑀉𑀧𑀸𑀯𑀺𑀲𑀺; ()

𑁪𑁧.

𑀧𑀢𑁆𑀯𑀸𑀦 𑀓𑀺𑀁 𑀓𑀼𑀲𑀮𑀕𑀯𑁂𑀲𑀺 𑀲𑁄 𑀯𑀲𑀺

𑀆𑀴𑀸𑀭𑀓𑀁 𑀯𑀺𑀭𑀚𑀫𑀼𑀴𑀸𑀭𑀛𑀸𑀬𑀺𑀦𑀁,

𑀇𑀘𑁆𑀙𑀸𑀫𑀳𑀦𑁆𑀢𑀺’𑀲𑀺 𑀢𑀯 𑀲𑀦𑁆𑀢𑀺𑀓𑁂’𑀥𑀼𑀦𑀸

𑀥𑀫𑁆𑀫𑀁 𑀲𑀫𑀸𑀘𑀭𑀺𑀢𑀼𑀫𑀺𑀥𑀸𑀕𑀢𑁄 𑀩𑁆𑀭𑀼𑀯𑀺; ()

𑁪𑁨. ¶

𑀲𑀼𑀢𑁆𑀯𑀸𑀦 𑀢𑀁 𑀢𑀢𑀺𑀬𑀫𑀭𑀽𑀧𑀺𑀓𑀁 𑀯𑀲𑀺

𑀛𑀸𑀦𑀁 𑀯𑀺𑀬𑀸𑀓𑀭𑀺 𑀧𑀝𑀺𑀮𑀤𑁆𑀥𑀫𑀢𑁆𑀢𑀦𑀸,

𑀔𑀺𑀧𑁆𑀧𑀁 𑀢𑀧𑁄𑀦𑀺𑀥𑀺𑀧𑀕𑀼𑀡𑀁 𑀅𑀓𑀸𑀲𑀺 𑀢𑀁

𑀥𑀫𑁆𑀫𑀁 𑀲𑀓𑀸𑀘𑀭𑀺𑀬𑀦𑀬𑀸’𑀯𑀮𑀫𑁆𑀩𑀺𑀬; ()

𑁪𑁩.

𑀦𑀸’𑀬𑀁 𑀯𑀲𑀺 𑀢𑀦𑀼𑀢𑀭𑀲𑀤𑁆𑀥𑀬𑀸 𑀫𑀫𑀁

𑀥𑀫𑁆𑀫𑀁 𑀲𑀬𑀁 𑀲𑀫𑀥𑀺𑀕𑀢𑀁 𑀯𑀺𑀬𑀸𑀓𑀭𑁂,

𑀕𑁄𑀲𑀸𑀫𑀺𑀓𑁄 𑀬𑀣𑀭𑀺𑀯 𑀧𑀜𑁆𑀘𑀕𑁄𑀭𑀲𑀁

𑀅𑀤𑁆𑀥𑀸𑀨𑀮𑀁 𑀅𑀦𑀼𑀪𑀯𑀢𑀻𑀢𑀺 𑀢𑀺𑀦𑁆𑀢𑀺𑀬; ()

𑁪𑁪.

𑀓𑀸𑀮𑀸𑀫 𑀤𑁆𑀯𑁂 𑀅𑀥𑀺𑀕𑀢𑀛𑀸𑀦𑀲𑀫𑁆𑀪𑀯𑀁

𑀢𑁆𑀯𑀁 𑀬𑀸𑀯𑀢𑀸𑀲𑀼𑀔 𑀫𑀦𑀼𑀪𑁄𑀲𑀺 𑀫𑀁 𑀯𑀤,

𑀧𑀼𑀝𑁆𑀞𑀲𑁆𑀲 𑀢𑀲𑁆𑀲𑀺’𑀢𑀺 𑀦𑀘𑀓𑀺𑀜𑁆𑀘𑀺 𑀪𑀸𑀯𑀺𑀬𑀁

𑀆𑀓𑀺𑀜𑁆𑀘𑀦𑀁 𑀅𑀯𑀘 𑀅𑀓𑀺𑀜𑁆𑀘𑀦𑀸𑀮𑀬𑁄; ()

𑁪𑁫. ¶

𑀲𑀁𑀯𑀺𑀚𑁆𑀚𑀭𑁂 𑀫𑀫𑀧𑀓𑀺 𑀇𑀫𑀲𑁆𑀲𑀺’𑀯𑁂’𑀲𑀺𑀦𑁄

𑀲𑀤𑁆𑀥𑀸𑀲𑀢𑀻𑀯𑀻𑀭𑀺𑀬𑀲𑀫𑀸𑀥𑀺𑀩𑀼𑀤𑁆𑀥𑀺𑀬𑁄,

𑀏𑀯𑀁 𑀯𑀺𑀢𑀓𑁆𑀓𑀺𑀬 𑀦𑀘𑀺𑀭𑀁 𑀓𑀢𑀼𑀲𑁆𑀲𑀳𑁄

𑀛𑀸𑀦𑀁 𑀮𑀪𑀻 𑀢𑀢𑀻𑀬𑀫𑀭𑀽𑀧𑀺𑀓𑀁 𑀯𑀲𑀻;

𑁪𑁬.

𑀬𑀁 𑀔𑁄 𑀢𑀼𑀯𑀁 𑀯𑀺𑀳𑀭𑀲𑀺 𑀛𑀸𑀢𑀫𑀧𑀓𑁆𑀧𑀺𑀢𑁄

𑀲𑀫𑁆𑀧𑀚𑁆𑀚 𑀲𑀫𑁆𑀧𑀢𑀺 𑀯𑀺𑀳𑀭𑀸𑀫𑀳𑀦𑁆𑀢𑀺 𑀢𑀁,

𑀆𑀴𑀸𑀭𑀺’𑀲𑀺 𑀯𑀭𑀧𑀼𑀭𑀺𑀲𑁂𑀦 𑀲𑀸𑀯𑀺𑀢𑁄

𑀮𑀸𑀪𑀸’𑀯𑀼𑀲𑁄𑀢𑁆𑀬𑀯𑀘 𑀲𑀼𑀮𑀤𑁆𑀥𑀫𑀸𑀯𑀼𑀲𑁄;

𑁪𑁭.

𑀚𑀸𑀦𑀸𑀫𑀺 𑀧𑀸𑀯𑀘𑀦𑀫𑀳𑀁 𑀬𑀣𑀸 𑀢𑀼𑀯𑀁

𑀚𑀸𑀦𑀸𑀲𑀺 𑀧𑀸𑀯𑀘𑀦𑀫𑀳𑀁 𑀬𑀣𑀸 𑀢𑀼𑀯𑀁,

𑀢𑁆𑀯𑀁 𑀢𑀸𑀤𑀺𑀲𑁄 𑀅𑀳𑀫𑀧𑀺 𑀬𑀸𑀤𑀺𑀲𑁄 𑀪𑀯𑁂

𑀢𑁆𑀯𑀁 𑀬𑀸𑀤𑀺𑀲𑁄 𑀅𑀳𑀫𑀧𑀓𑀺 𑀢𑀸𑀤𑀺𑀲𑁄 𑀪𑀯𑁂;

𑁪𑁮. ¶

𑀏𑀳𑀸’𑀯𑀼𑀲𑁄 𑀲𑀫𑀡 𑀫𑀬𑀁 𑀉𑀪𑁄 𑀚𑀦𑀸

𑀓𑀸𑀳𑀸𑀫𑀺’𑀢𑁄 𑀧𑀭𑀺𑀳𑀭𑀡𑀁 𑀕𑀡𑀲𑁆𑀲𑀺’𑀤𑀁,

𑀯𑀢𑁆𑀯𑀸𑀦 𑀆𑀘𑀭𑀺𑀬𑀲𑀫𑀸𑀦𑀓𑁄 𑀲𑀓𑀁

𑀲𑀺𑀲𑁆𑀲𑀁 𑀅𑀓𑀸 𑀢𑀫𑀲𑀫𑀫𑀢𑁆𑀢𑀦𑀸 𑀲𑀫𑀁; ()

𑁪𑁯.

𑀥𑀫𑁆𑀫𑁄𑀧𑁆𑀬’𑀬𑀁 𑀦𑀪𑀯𑀢𑀺 𑀦𑀺𑀩𑁆𑀩𑀺𑀤𑀸𑀬 𑀯𑀸

𑀩𑁄𑀥𑀸𑀬𑀯𑀸 𑀦𑀯𑀼𑀧𑀲𑀫𑀸𑀬 𑀓𑁂𑀯𑀮𑀁,

𑀆𑀭𑀼𑀧𑁆𑀧𑀪𑀼𑀫𑀺𑀬𑀫𑀼𑀧𑀧𑀢𑁆𑀢𑀺𑀬𑀸 𑀲𑀺𑀬𑀸

𑀇𑀘𑁆𑀘𑀸𑀦𑀮𑀗𑁆𑀓𑀭𑀺𑀬 𑀢𑀢𑁄 𑀅𑀧𑀓𑁆𑀓𑀫𑀺; ()

𑁫𑁦.

𑀓𑀸𑀮𑀫𑀢𑁄 𑀉𑀧𑀭𑀺𑀯𑀺𑀲𑁂𑀲𑀫𑀼𑀤𑁆𑀤𑀓𑁄

𑀚𑀜𑁆𑀜𑀸’𑀢𑁆𑀬’𑀬𑀁 𑀲𑀼𑀫𑀭𑀺𑀬 𑀭𑀸𑀫𑀧𑀼𑀢𑁆𑀢𑀓𑁄,

𑀧𑀢𑁆𑀯𑀸’𑀲𑁆𑀲𑀫𑀁 𑀲𑀫𑀥𑀺𑀕𑀢𑀁 𑀢𑁆𑀯𑀬𑀸’𑀧’𑀳𑀁

𑀥𑀫𑁆𑀫𑀁 𑀲𑀫𑀸𑀘𑀭𑀺𑀢𑀼𑀫𑀺𑀥𑀸𑀕𑀢𑁄’𑀩𑁆𑀭𑀼𑀯𑀺; ()

𑁫𑁧. ¶

𑀜𑀢𑁆𑀯𑀸 𑀲𑀓𑀸𑀘𑀭𑀺𑀬𑀫𑀢𑀜𑁆𑀳𑀺 𑀩𑀼𑀤𑁆𑀥𑀺𑀫𑀸

𑀥𑀫𑁆𑀫𑀜𑁆𑀘𑀭𑁂 𑀫𑀫 𑀲𑀫𑀬𑁄 𑀘 𑀢𑀸𑀤𑀺𑀲𑁄,

𑀯𑀢𑁆𑀯𑁂’𑀯𑀫𑀼𑀤𑁆𑀤𑀓𑀯𑀲𑀺 𑀔𑀺𑀧𑁆𑀧𑀫𑀢𑁆𑀢𑀦𑁄

𑀲𑀺𑀓𑁆𑀔𑁂𑀲𑀺 𑀧𑀸𑀯𑀘𑀦𑀧𑀣𑁂 𑀢𑀧𑁄𑀥𑀦𑀁; ()

𑁫𑁨.

𑀲𑀤𑁆𑀥𑀸𑀬 𑀫𑀁 𑀲𑀓𑀲𑀫𑀬𑀸’𑀦𑀼𑀲𑀸𑀲𑀓𑁄

𑀅𑀤𑁆𑀥𑀸 𑀲𑀫𑀸𑀥𑀺𑀚𑀨𑀮𑀫𑀸𑀳𑀭𑁂’𑀢𑁆𑀬’𑀬𑀁,

𑀘𑀺𑀦𑁆𑀢𑀸𑀧𑀭𑁄 𑀯𑀭𑀧𑀼𑀭𑀺𑀲𑁄 𑀅𑀭𑀽𑀧𑀺𑀓𑀁

𑀛𑀸𑀦𑀁 𑀯𑀮𑀜𑁆𑀚𑀲𑀺 𑀓𑀢𑀫𑀦𑁆𑀢𑁆𑀬’𑀧𑀼𑀘𑁆𑀙𑀺 𑀦𑀁; ()

𑁫𑁩.

𑀲𑀼𑀢𑁆𑀯𑀸 𑀢𑀫𑀼𑀤𑁆𑀤𑀓𑀯𑀲𑀺 𑀲𑀦𑁆𑀢𑀫𑀸𑀦𑀲𑁄

𑀲𑀦𑁆𑀢𑀁𑀳𑀺’𑀤𑀁 𑀧𑀭𑀫𑀫𑀺𑀤𑀦𑁆𑀢𑀺 𑀪𑀸𑀯𑀺𑀬𑀁,

𑀲𑀸𑀫𑀁 𑀯𑀮𑀜𑁆𑀚𑀦𑀓𑀫𑀭𑀽𑀧𑀪𑀼𑀫𑀺𑀓𑀁

𑀛𑀸𑀦𑀁 𑀘𑀢𑀼𑀢𑁆𑀣𑀓𑀫𑀯𑀺𑀓𑀫𑁆𑀧𑀫𑀸𑀳𑀭𑀻; ()

𑁫𑁪. ¶

𑀲𑀁𑀯𑀺𑀚𑁆𑀚𑀭𑁂 𑀫𑀫𑀧𑀺 𑀫𑀦𑁄𑀦𑀺𑀓𑁂𑀢𑀦𑁂

𑀲𑀤𑁆𑀥𑀸𑀤𑀺𑀲𑀕𑁆𑀕𑀼𑀡𑀭𑀢𑀦𑀸𑀦𑀺’𑀫𑀲𑁆𑀲𑀺’𑀯,

𑀏𑀯𑀁𑀲𑀭𑀁 𑀦𑀘𑀺𑀭𑀫𑀭𑀽𑀧𑀺𑀓𑀁 𑀯𑀲𑀺

𑀛𑀸𑀦𑀁 𑀮𑀪𑀻 𑀯𑀻𑀭𑀺𑀬𑀩𑀮𑁂𑀦𑀯𑀸’𑀦𑁆𑀢𑀫𑀁; ()

𑁫𑁫.

𑀮𑀤𑁆𑀥𑀁 𑀢𑀬𑀸 𑀬𑀫𑀥𑀺𑀕𑀢𑀦𑁆𑀢𑀺 𑀢𑀫𑁆𑀫𑀬𑀸

𑀆𑀭𑁄𑀘𑀺𑀢𑁂 𑀲𑀫𑀡 𑀯𑀭𑁂’𑀲𑀺𑀧𑀼𑀗𑁆𑀕𑀯𑁄,

𑀅𑀫𑁆𑀳𑁂 𑀕𑀡𑀁 𑀲𑀼𑀧𑀭𑀺𑀳𑀭𑀸𑀫𑀼’𑀪𑁄’𑀢𑀺𑀫𑀁

𑀯𑀢𑁆𑀯𑀸 𑀢𑀫𑀸𑀘𑀭𑀺𑀬𑀥𑀼𑀭𑁂𑀦 𑀫𑀸𑀦𑀬𑀺; ()

𑁫𑁬.

𑀦𑀸’𑀬𑀁 𑀧𑀣𑁄 𑀪𑀯𑀧𑀭𑀺𑀫𑀼𑀢𑁆𑀢𑀺𑀬𑀸 𑀲𑀺𑀬𑀸

𑀅𑀤𑁆𑀥𑀸𑀪𑀯𑁂 𑀫𑀫𑀧𑀓𑀺 𑀪𑀯𑀕𑁆𑀕𑀧𑀢𑁆𑀢𑀺𑀬𑀸,

𑀏𑀯𑀁 𑀯𑀯𑀢𑁆𑀣𑀺𑀢𑀳𑀤𑀬𑁄 𑀫𑀳𑀸𑀤𑀬𑁄

𑀦𑀺𑀩𑁆𑀩𑀺𑀚𑁆𑀚𑀲𑁄 𑀢𑀤𑀧𑀕𑀢𑁄’𑀦𑀮𑀁𑀇𑀢𑀺; ()

𑁫𑁭. ¶

𑀫𑁄𑀓𑁆𑀔𑁂𑀲𑀓𑁄 𑀚𑀺𑀢𑀯𑀭𑀯𑀸𑀭𑀡𑀓𑁆𑀓𑀫𑁄

𑀏𑀓𑁄𑀘𑀭𑀁 𑀯𑀲𑀺 𑀫𑀕𑀥𑁂𑀲𑀼 𑀘𑀸𑀭𑀺𑀓𑀁,

𑀲𑁂𑀦𑀸𑀦𑀺𑀯𑀺𑀲𑁆𑀲𑀼𑀦𑁆𑀦𑀺𑀕𑀫𑁄 𑀬𑀳𑀺𑀁𑀲𑀺𑀬𑀸

𑀢𑀁 𑀢𑀸𑀧𑀲𑀸𑀮𑀬𑀫𑀼𑀭𑀼𑀯𑁂𑀮𑀫𑁄𑀲𑀭𑀺; ()

𑁫𑁮.

𑀅𑀤𑁆𑀤𑀓𑁆𑀔𑀺 𑀲𑁄 𑀳𑀭𑀺𑀡𑀯𑀺𑀳𑀗𑁆𑀕𑀫𑀸𑀓𑀼𑀮𑀁

𑀫𑀦𑁆𑀤𑀸𑀦𑀺𑀮𑁂𑀭𑀺𑀢𑀢𑀭𑀼𑀲𑀡𑁆𑀟𑀫𑀡𑁆𑀟𑀺𑀢𑀁,

𑀦𑁂𑀭𑀜𑁆𑀚𑀭𑀸𑀲𑀮𑀺𑀮𑀧𑀯𑀸𑀳𑀲𑀺𑀢𑀮𑀁

𑀧𑀸𑀲𑀸𑀤𑀺𑀓𑀁 𑀧𑀭𑀫𑀢𑀧𑁄𑀯𑀦𑀁 𑀢𑀳𑀺𑀁; ()

𑁫𑁯.

𑀅𑀦𑁆𑀢𑁄𑀚𑀝𑀁 𑀚𑀝𑀺𑀮𑀚𑀝𑀸’𑀮𑀺𑀯𑀼𑀫𑁆𑀩𑀺𑀢-

𑀧𑀸𑀤𑀫𑁆𑀩𑀼𑀚𑁄 𑀯𑀺𑀚𑀝𑀬𑀺𑀢𑀼𑀁 𑀖𑀝𑀁 𑀯𑀲𑀻,

𑀅𑀢𑁆𑀢𑀸𑀳𑀺𑀢𑀸𑀧𑀦𑀧𑀝𑀺𑀧𑀢𑁆𑀢𑀺𑀬𑀸 𑀢𑀳𑀺𑀁

𑀯𑀺𑀚𑁆𑀚𑀸𑀥𑀭𑁂 𑀚𑀝𑀺𑀮𑀯𑀭𑁂 𑀧𑀲𑀸𑀤𑀬𑀻; ()

𑁬𑁦. ¶ 𑀲𑀜𑁆𑀘𑀸𑀭𑀺𑀢𑁄 𑀚𑀦𑀧𑀤𑀘𑀸𑀭𑀺𑀓𑀁 𑀢𑀤𑀸

𑀧𑀢𑁆𑀯𑀸 𑀢𑀧𑁄𑀯𑀦𑀫𑀣 𑀧𑀜𑁆𑀘𑀯𑀕𑁆𑀕𑀺𑀬𑀸,

𑀪𑀺𑀓𑁆𑀔𑀼 𑀫𑀳𑀸𑀧𑀼𑀭𑀺𑀲𑀫𑀼𑀧𑀝𑁆𑀞𑀳𑀺𑀁𑀲𑀼 𑀢𑀁

𑀆𑀭𑀤𑁆𑀥𑀤𑀼𑀓𑁆𑀓𑀭𑀓𑀺𑀭𑀺𑀬𑀁 𑀬𑀣𑀸𑀩𑀮𑀁. ()

𑁬𑁧. 𑀥𑀻𑀭𑁄’𑀢𑀺𑀤𑀼𑀓𑁆𑀓𑀭𑀧𑀝𑀺𑀧𑀢𑁆𑀢𑀺𑀧𑀽𑀭𑀓𑁄

𑀤𑀦𑁆𑀢𑀸𑀦𑀺 𑀯𑀻𑀲𑀢𑀺𑀤𑀲𑀦𑁂𑀳𑀺 𑀯𑀻𑀲𑀢𑀺,

𑀢𑀸𑀮𑀼𑀁 𑀦𑀺𑀭𑀼𑀫𑁆𑀳𑀺𑀬 𑀭𑀲𑀦𑀸𑀬 𑀘𑁂𑀢𑀲𑀸

𑀘𑀺𑀢𑁆𑀢𑀁 𑀦𑀺𑀧𑀻𑀴𑀬𑀺 𑀧𑀭𑀺𑀢𑀸𑀧𑀬𑀺 𑀢𑀳𑀺𑀁. ()

𑁬𑁨. 𑀧𑀕𑁆𑀕𑀬𑁆𑀳 𑀫𑀼𑀤𑁆𑀥𑀦𑀺 𑀩𑀮𑀯𑀸’𑀢𑀺𑀤𑀼𑀩𑁆𑀩𑀮𑀁

𑀦𑀺𑀧𑁆𑀨𑀻𑀴𑀬𑁂 𑀬𑀣𑀭𑀺𑀯 𑀥𑀻𑀫𑀢𑁄 𑀢𑀣𑀸,

𑀅𑀢𑁆𑀢𑀸𑀳𑀺𑀢𑀸𑀧𑀦𑀧𑀲𑀼𑀢𑀲𑁆𑀲 𑀧𑀕𑁆𑀖𑀭𑀼𑀁

𑀓𑀘𑁆𑀙𑀸𑀤𑀺𑀦𑀸’𑀥𑀻𑀓𑀢𑀭𑀲𑁂𑀤𑀩𑀺𑀦𑁆𑀤𑀯𑁄; ()

𑁬𑁩. ¶ 𑀫𑀕𑁆𑀕𑁄𑀪𑀯𑀢𑁆𑀬’𑀬𑀫𑀺𑀢𑀺 𑀩𑁄𑀥𑀺𑀲𑀺𑀤𑁆𑀥𑀺𑀬𑀸

𑀅𑀧𑁆𑀧𑀸𑀡𑀓𑀁 𑀧𑀝𑀺𑀧𑀤 𑀫𑀸𑀘𑀭𑀁 𑀘𑀺𑀭𑀁,

𑀯𑀸𑀲𑀁 𑀅𑀓𑀸 𑀯𑀲𑀺 𑀫𑀼𑀔𑀢𑁄 𑀘 𑀦𑀸𑀲𑀢𑁄

𑀅𑀲𑁆𑀲𑀸𑀲𑀫𑀧𑁆𑀧𑀝𑀺𑀧𑀝𑀺𑀫𑁄’𑀧𑀭𑀼𑀦𑁆𑀥𑀺𑀬; ()

𑁬𑁪.

𑀭𑀼𑀤𑁆𑀥𑁂𑀲𑀼 𑀢𑁂𑀲𑁆𑀯’ 𑀧𑀺𑀳𑀺𑀢𑀲𑁄𑀢𑀭𑀦𑁆𑀥𑀢𑁄

𑀯𑀸𑀢𑁄’𑀪𑀺𑀦𑀺𑀓𑁆𑀔𑀫𑀺 𑀅𑀥𑀺𑀫𑀢𑁆𑀢𑀦𑀺𑀲𑁆𑀲𑀦𑁄,

𑀓𑀫𑁆𑀫𑀸𑀭𑀕𑀕𑁆𑀕𑀭𑀺𑀫𑀼𑀔𑀢𑁄 𑀭𑀯𑁄 𑀪𑀼𑀲𑀁

𑀦𑀺𑀕𑁆𑀕𑀘𑁆𑀙𑀢𑁂 𑀅𑀪𑀺𑀥𑀫𑀦𑁂𑀦 𑀲𑁂𑀬𑁆𑀬𑀣𑀸; ()

𑁬𑁫.

𑀬𑀸𑀯𑁂𑀤𑀦𑀸 𑀔𑀭𑀲𑀺𑀔𑀭𑁂𑀦 𑀚𑀸𑀬𑀭𑁂

𑀲𑀻𑀲𑀲𑁆𑀲 𑀯𑀺𑀚𑁆𑀛𑀦𑀲𑀫𑀬𑁂 𑀲𑀼𑀔𑀢𑁆𑀣𑀺𑀦𑁄,

𑀏𑀯𑀁 𑀢𑀤𑀸 𑀓𑀞𑀺𑀦𑀲𑀺𑀭𑁄𑀭𑀼𑀚𑀸’𑀪𑀯𑀼𑀁

𑀭𑀼𑀤𑁆𑀥𑀸𑀦𑀺𑀮𑀲𑁆𑀲 𑀳𑀺 𑀫𑀼𑀔𑀓𑀡𑁆𑀡𑀦𑀸𑀲𑀢𑁄; ()

𑁬𑁬. ¶

𑀯𑀸𑀢𑀸𑀪𑀺𑀖𑀸𑀢𑀦𑀲𑀫𑀬𑁂 𑀲𑀼𑀥𑀺𑀫𑀢𑁄

𑀲𑀻𑀲𑁂’𑀪𑀯𑀼𑀁 𑀧𑀼𑀦𑀭𑀧𑀺𑀲𑀺𑀲𑀯𑁂𑀤𑀦𑀸,

𑀤𑀴𑁆𑀳𑁂𑀦 𑀬𑁄 𑀲𑀺𑀭𑀲𑀺 𑀯𑀭𑀢𑁆𑀢𑀓𑁂𑀦 𑀬𑀁

𑀤𑀴𑁆𑀳𑀁 𑀤𑀤𑁂 𑀬𑀣𑀭𑀺𑀯 𑀲𑀺𑀲𑀯𑁂𑀞𑀦𑀁; ()

𑁬𑁭.

𑀲𑀫𑁆𑀫𑀸 𑀦𑀺𑀭𑀼𑀫𑁆𑀳𑀺𑀢𑀫𑀼𑀔𑀓𑀡𑁆𑀡𑀦𑀸𑀲𑀢𑁄

𑀥𑀻𑀭𑁄 𑀲𑀫𑀻𑀭𑀡𑀫𑀼𑀧𑀭𑀼𑀦𑁆𑀥𑀺𑀘𑀼’𑀢𑁆𑀢𑀭𑀺𑀁,

𑀕𑀩𑁆𑀪𑀦𑁆𑀢𑀭𑀁 𑀔𑀭𑀢𑀭𑀯𑁂𑀤𑀦𑀸’𑀢𑀼𑀭𑀁

𑀯𑀸𑀢𑀸’𑀪𑀺𑀫𑀦𑁆𑀣𑀺𑀬 𑀧𑀭𑀺𑀓𑀦𑁆𑀢𑀬𑀼𑀁 𑀢𑀢𑁄; ()

𑁬𑁮.

𑀕𑁄𑀖𑀸𑀢𑀓𑁄 𑀘𑀢𑀼𑀭𑀢𑀭𑁄 𑀯𑀺𑀓𑀢𑁆𑀢𑀬𑁂

𑀓𑀼𑀘𑁆𑀙𑀺𑀁 𑀕𑀯𑀁 𑀢𑀺𑀔𑀺𑀡𑀯𑀺𑀓𑀦𑁆𑀢𑀦𑁂𑀦 𑀘𑁂,

𑀭𑀼𑀤𑁆𑀥𑀸𑀢𑀺𑀮𑁂𑀳’𑀦𑀭𑀺𑀬𑀫𑀕𑁆𑀕𑀕𑀸𑀫𑀺𑀦𑁄

𑀚𑀸𑀢𑀸 𑀢𑀣𑀸 𑀔𑀭𑀢𑀭 𑀓𑀼𑀘𑁆𑀙𑀺𑀯𑁂𑀤𑀦𑀸; ()

𑁬𑁯. ¶

𑀅𑀧𑁆𑀧𑀸𑀦𑀓𑀁 𑀧𑀼𑀦𑀭𑀧𑀺 𑀛𑀸𑀦𑀫𑀸𑀘𑀭𑀁

𑀯𑀻𑀭𑁄 𑀲𑀫𑀻𑀭𑀡 𑀫𑀼𑀧𑀭𑀼𑀦𑁆𑀥𑀺 𑀲𑀩𑁆𑀩𑀣𑀸,

𑀘𑀻𑀦𑁆𑀢𑀼𑀩𑁆𑀪𑀯𑀁 𑀲𑀓𑀫𑀼𑀔𑀓𑀡𑁆𑀡𑀦𑀸𑀲𑀕𑀁

𑀢𑁂𑀦𑀸’𑀲𑀺 𑀓𑀸𑀬𑀺𑀓𑀤𑀭𑀣𑁄 𑀥𑀺𑀢𑀻𑀫𑀢𑁄; ()

𑁭𑁦.

𑀤𑀴𑁆𑀳𑀁 𑀉𑀪𑁄 𑀘𑀭𑀧𑀼𑀭𑀺𑀲𑀸 𑀫𑀳𑀩𑁆𑀩𑀮𑀸

𑀩𑀸𑀳𑀸𑀲𑀼 𑀕𑀡𑁆𑀳𑀺𑀬 𑀧𑀼𑀭𑀺𑀲𑀁’𑀢𑀺𑀤𑀼𑀩𑁆𑀩𑀮𑀁,

𑀅𑀗𑁆𑀕𑀸𑀭𑀓𑀸𑀲𑀼𑀬𑀫𑀳𑀺𑀢𑀸𑀧𑀬𑀦𑁆𑀢𑀺𑀘𑁂

𑀲𑁄 𑀢𑀸𑀤𑀺𑀲𑀺𑀁 𑀅𑀦𑀼𑀪𑀯𑀺 𑀤𑀼𑀓𑁆𑀔𑀯𑁂𑀤𑀦𑀁; ()

𑁭𑁧.

𑀔𑀺𑀢𑁆𑀢𑀁 𑀓𑀮𑀺𑀗𑁆𑀕𑀭𑀫𑀺𑀯𑀓𑀸𑀯𑀺𑀤𑁂𑀯𑀢𑀸

𑀭𑀼𑀤𑁆𑀥𑀸𑀦𑀺𑀮𑀼𑀩𑁆𑀪𑀯𑀔𑀭𑀯𑁂𑀤𑀦𑀸𑀢𑀼𑀭𑀁,

𑀯𑀻𑀭𑀁 𑀯𑀺𑀮𑁄𑀓𑀺𑀬 𑀧𑀢𑀺𑀢𑀁 𑀢𑀧𑁄𑀯𑀦𑁂

𑀧𑀩𑁆𑀬𑀸𑀓𑀭𑀼𑀁𑀓 𑀯𑀭𑀧𑀼𑀭𑀺𑀲𑁄 𑀫𑀢𑁄 𑀇𑀢𑀺; ()

𑁭𑁨. ¶

𑀓𑀸𑀮𑀁𑀓𑀭𑁄𑀢𑁆𑀬’𑀬𑀫𑀺𑀢𑀺 𑀓𑀸𑀘𑀺 𑀤𑁂𑀯𑀢𑀸

𑀦𑁄𑀘𑀸𑀳𑀼𑀓𑀺𑀁 𑀢𑀤𑀺𑀢𑀭 𑀤𑁂𑀯𑀢𑀸 𑀯𑀢𑀁,

𑀅𑀲𑁆𑀲𑁂’𑀯 𑀕𑁄𑀢𑀫𑀲𑀫𑀡𑀲𑁆𑀲 𑀫𑀸𑀭𑀺𑀲𑀸

𑀆𑀭𑁄𑀘𑀬𑀼𑀁 𑀯𑀺𑀳𑀭𑀡𑀫𑀻𑀤𑀺𑀲𑀁𑀇𑀢𑀺; ()

𑁭𑁩.

𑀬𑀁𑀦𑀽𑀦’𑀳𑀁 𑀧𑀝𑀺𑀧𑀤𑀳𑁂𑀬𑁆𑀬𑀫𑀸𑀬𑀢𑀺𑀁

𑀆𑀳𑀸𑀭𑀬𑀸𑀧𑀦𑀳𑀭𑀡𑀸𑀬 𑀲𑀩𑁆𑀩𑀲𑁄,

𑀏𑀯𑀁 𑀲𑀘𑀺𑀦𑁆𑀢𑀬𑀺 𑀓𑀭𑀼𑀡𑀸𑀬 𑀘𑁄𑀤𑀺𑀢𑀸

𑀢𑀸 𑀤𑁂𑀯𑀢𑀸 𑀢𑀼𑀯𑀝𑀼𑀫𑀼𑀧𑁂𑀘𑁆𑀘 𑀕𑁄𑀢𑀫𑀁; ()

𑁭𑁪.

𑀆𑀭𑁄𑀘𑀬𑀼𑀁 𑀬𑀤𑀺𑀧𑀦 𑀦𑀺𑀘𑁆𑀘𑀪𑁄𑀚𑀦𑁄-

𑀧𑀘𑁆𑀙𑁂𑀤𑀦𑀁 𑀲𑀫𑀡𑀢𑀼𑀯𑀁 𑀓𑀭𑀺𑀲𑁆𑀲𑀲𑀺,

𑀓𑀸𑀳𑀸𑀫 𑀢𑁂 𑀫𑀬𑀫𑀺𑀢𑀺𑀮𑁄𑀫𑀓𑀼𑀧𑀢𑁄

𑀤𑀺𑀩𑁆𑀩𑁄𑀚𑀫𑁄𑀓𑀺𑀭𑀺𑀬 𑀲𑀭𑀺𑀭𑀢𑀧𑁆𑀧𑀡𑀁; ()

𑁭𑁫.

𑀖𑀸𑀲𑀲𑁆𑀲𑀙𑁂𑀤𑀦𑀯𑀻𑀭𑀺𑀬𑀁 𑀓𑀭𑁄𑀫𑀺 𑀘𑁂

𑀬𑀸𑀧𑁂𑀦𑁆𑀢𑀺 𑀢𑀸 𑀫𑀥𑀼𑀭 𑀲𑀼𑀥𑀸𑀭𑀲𑁂𑀦 𑀫𑀁,

𑀢𑁂𑀦𑀸’𑀪𑀺𑀬𑀸𑀧𑀦𑀯𑀺𑀥𑀺𑀫𑀺𑀘𑁆𑀙𑀢𑁄 𑀲𑀢𑁄

𑀢𑀁𑀔𑁄𑀢𑀧𑀁 𑀦𑀪𑀯𑀢𑀺 𑀓𑀺𑀁 𑀫𑀼𑀲𑀸 𑀫𑀫𑀁; ()

𑁭𑁬. ¶

𑀦𑀸𑀮𑀦𑁆𑀢𑀺 𑀲𑁄 𑀓𑀼𑀳𑀦𑀯𑀲𑁂𑀦 𑀤𑁂𑀯𑀢𑀸-

𑀯𑀺𑀫𑁆𑀳𑀸𑀧𑀦𑁂𑀢𑀺’𑀳 𑀦𑀺𑀚𑀤𑁂𑀳𑀢𑀧𑁆𑀧𑀡𑀁,

𑀏𑀯𑀁 𑀅𑀦𑀼𑀲𑁆𑀲𑀭𑀺𑀬’𑀦𑀼𑀯𑀸𑀲𑀭𑀁 𑀯𑀲𑀻

𑀆𑀳𑀸𑀭𑀫𑀸𑀳𑀭𑀺 𑀯𑀺𑀭𑀲𑀁 𑀧𑀭𑀺𑀢𑁆𑀢𑀓𑀁; ()

𑁭𑁭.

𑀲𑁆𑀯𑀸𑀘𑁂𑀮𑀓𑁄 𑀯𑀺𑀘𑀭𑀺𑀓𑀭𑀸𑀧𑀮𑁂𑀔𑀡𑁄

𑀆𑀘𑀸𑀭𑀫𑀼𑀢𑁆𑀢𑁆𑀬’𑀪𑀯𑀺 𑀦𑀘𑁂𑀳𑀺𑀢𑀺𑀝𑁆𑀞𑀺𑀓𑁄,

𑀉𑀤𑁆𑀤𑀺𑀲𑁆𑀲𑀓𑀁 𑀅𑀪𑀺𑀳𑀝𑀓𑀁 𑀦𑀺𑀫𑀦𑁆𑀢𑀦𑀁

𑀦𑀸𑀲𑀸𑀤𑀬𑀺 𑀧𑀺𑀝𑀓𑀓𑀮𑁄𑀧𑀺𑀓𑀼𑀫𑁆𑀪𑀺𑀓𑀁; ()

𑁭𑁮. ¶

𑀲𑁄 𑀤𑀡𑁆𑀟𑀫𑀼𑀕𑁆𑀕𑀭𑀫𑀼𑀲𑀮𑁂’𑀴𑀓𑀦𑁆𑀢𑀭𑀁

𑀧𑀸𑀬𑀦𑁆𑀢𑀺𑀕𑀩𑁆𑀪𑀺𑀦𑀺𑀧𑀦𑀺𑀢𑀻𑀳𑀺 𑀘𑀸’𑀳𑀝𑀁,

𑀲𑀸𑀫𑀓𑁆𑀔𑀺𑀓𑀸𑀯𑀺𑀲𑀬 𑀫𑀼𑀳𑀺𑀦𑁆𑀦𑀫𑁂𑀓𑀺𑀓𑀁

𑀲𑀗𑁆𑀓𑀺𑀢𑁆𑀢𑀺𑀦𑁄𑀤𑀦𑀫𑀧𑀺 𑀦𑀸𑀪𑀺𑀲𑀸𑀤𑀬𑀻; ()

𑁭𑁯.

𑀲𑁄𑀯𑀻𑀭𑀓𑀁 𑀦𑀧𑀺𑀯𑀺 𑀲𑀼𑀭𑀁 𑀦𑀫𑁂𑀭𑀬𑀁

𑀲𑀼𑀓𑁆𑀔𑀸𑀫𑀓𑀁 𑀬𑀤𑀧𑀺 𑀢𑀺𑀓𑁄𑀯𑀺𑀲𑀼𑀤𑁆𑀥𑀺𑀓𑀁,

𑀲𑁄 𑀫𑀘𑁆𑀙𑀫𑀁𑀲𑀓𑀯𑀺𑀓𑀢𑀺𑀁 𑀧𑀝𑀺𑀓𑁆𑀔𑀺𑀧𑀺

𑀅𑀧𑁆𑀧𑁂𑀓𑀤𑀸 𑀢𑀧𑀲𑀺 𑀦𑀺𑀭𑀸𑀫𑀕𑀦𑁆𑀥𑀺𑀓𑁄; ()

𑁮𑁦. ¶

𑀲𑁄 𑀲𑀢𑁆𑀢𑀢𑁄𑀧𑁆𑀧𑀪𑀼𑀢𑀺 𑀓𑀫𑁂𑀦 𑀳𑀸𑀧𑀬𑀁

𑀬𑀸𑀯𑁂𑀓𑀫𑀸𑀳𑀭𑀺 𑀓𑀩𑀮𑀁 𑀩𑀮𑀢𑁆𑀣𑀺𑀓𑁄,

𑀲𑁄 𑀲𑀢𑁆𑀢𑀢𑁄𑀧𑁆𑀧𑀪𑀼𑀢𑀺 𑀓𑀫𑁂𑀦 𑀳𑀸𑀧𑀬𑀁

𑀏𑀓𑀁 𑀓𑀼𑀮𑀁 𑀉𑀧𑀕𑀫𑀺 𑀬𑀸𑀯 𑀪𑀺𑀓𑁆𑀔𑀺𑀢𑀼𑀁; () (𑀬𑀫𑀓𑀩𑀦𑁆𑀥𑀦𑀁)

𑁮𑁧.

𑀏𑀓𑀸𑀬 𑀤𑀻𑀳𑀺𑀧𑀺 𑀢𑀺𑀘𑀢𑀽𑀳𑀺 𑀧𑀜𑁆𑀘𑀳𑀺

𑀤𑀺𑀦𑁆𑀦𑀁 𑀧𑀝𑀺𑀕𑁆𑀕𑀳𑀺 𑀙𑀳𑀺 𑀤𑀢𑁆𑀢𑀺𑀲𑀢𑁆𑀢𑀳𑀺,

𑀏𑀓𑀸𑀳𑀺𑀓𑀧𑁆𑀧𑀪𑀼𑀢𑀺𑀓𑀫𑀤𑁆𑀥𑀫𑀸𑀲𑀺𑀓𑀁

𑀫𑀽𑀮𑀁 𑀲𑀬𑀁 𑀧𑀢𑀺𑀢𑀨𑀮𑀁 𑀧𑀪𑀼𑀜𑁆𑀚𑀺 𑀲𑁄; ()

𑁮𑁨.

𑀲𑀸𑀫𑀸𑀓𑀢𑀡𑁆𑀟𑀼𑀮𑀫𑀣𑀲𑀸𑀓𑀫𑀤𑁆𑀤𑀓𑀁

𑀦𑀻𑀯𑀸𑀭𑀓𑀼𑀡𑁆𑀟𑀓𑀳𑀝𑀤𑀤𑁆𑀤𑀼𑀮𑀸𑀤𑀺𑀓𑀁,

𑀧𑀺𑀜𑁆𑀜𑀸𑀓𑀕𑁄𑀫𑀬𑀢𑀺𑀡 𑀛𑀸𑀫𑀓𑁄𑀤𑀦𑀁

𑀯𑀻𑀭𑁄 𑀫𑀳𑀸𑀯𑀺𑀓𑀝𑀫𑀧𑀸𑀦𑀼𑀪𑀼𑀜𑁆𑀚𑀺 𑀲𑁄; ()

𑁮𑁩. ¶

𑀣𑁄𑀓𑀁 𑀧𑀺𑀯𑀺 𑀧𑀓𑀲𑀢𑀫𑀺𑀢𑀁 𑀳𑀭𑁂𑀡𑀼𑀓-

𑀬𑀽𑀲𑀁 𑀢𑀣𑀸 𑀘𑀦𑀓 𑀓𑀼𑀮𑀢𑁆𑀣𑀫𑀼𑀕𑁆𑀕𑀚𑀁,

𑀲𑁄 𑀅𑀧𑁆𑀧𑀪𑁄𑀚𑀦𑀧𑀭𑀫𑁄 𑀲𑀚𑀻𑀯𑀺𑀢𑀁

𑀏𑀓𑁂𑀦 𑀬𑀸𑀧𑀬𑀺 𑀢𑀺𑀮𑀢𑀡𑁆𑀟𑀼𑀮𑁂𑀦’𑀧𑀺; ()

𑁮𑁪.

𑀲𑀸𑀡𑀫𑁆𑀫𑀲𑀸𑀡?𑀚𑀺𑀦’𑀚𑀺𑀦𑀓𑁆𑀔𑀺𑀧𑀘𑁆𑀙𑀯-

𑀤𑀼𑀲𑁆𑀲𑀁 𑀢𑀺𑀭𑀻𑀝𑀓𑀓𑀼𑀲𑀯𑀸𑀓𑀘𑀻𑀭𑀓𑀁,

𑀲𑁄 𑀓𑁂𑀲𑀓𑀫𑁆𑀩𑀮𑀫𑀧𑀺𑀯𑀸𑀴𑀓𑀫𑁆𑀩𑀮

𑀫𑁄𑀴𑀼𑀓𑀧𑀓𑁆𑀔𑀺𑀓𑀨𑀮𑀓𑀸𑀦𑁆𑀬’𑀥𑀸𑀭𑀬𑀺; ()

𑁮𑁫. ¶

𑀤𑀼𑀩𑁆𑀩𑀡𑁆𑀡𑀦𑀢𑁆𑀢𑀓𑀫𑀬𑀫𑀕𑁆𑀕𑀧𑀼𑀕𑁆𑀕𑀮𑁄

𑀅𑀧𑁆𑀧𑁂𑀓𑀤𑀸 𑀧𑀭𑀺𑀤𑀳𑀺 𑀧𑀁𑀲𑀼𑀓𑀽𑀮𑀓𑀁,

𑀅𑀢𑁆𑀢𑀦𑁆𑀢𑀧𑁄𑀯𑀭𑀡 𑀧𑀭𑀸𑀬𑀡𑁄 𑀪𑀯𑀺

𑀲𑁄 𑀫𑀲𑁆𑀲𑀼𑀓𑀼𑀦𑁆𑀢𑀮𑀢𑀦𑀼𑀮𑁄𑀫𑀮𑁄𑀘𑀓𑁄; ()

𑁮𑁬.

𑀉𑀩𑁆𑀪𑀝𑁆𑀞𑀓𑁄’𑀪𑀯𑀺 𑀧𑀭𑀺𑀯𑀚𑁆𑀚𑀺𑀢𑀸𑀲𑀦𑁄

𑀉𑀓𑁆𑀓𑀝𑁆𑀞𑀫𑀼𑀓𑁆𑀓𑀼𑀝𑀺𑀓𑀯𑀢𑀁 𑀅𑀥𑀺𑀝𑁆𑀞𑀳𑀻,

𑀉𑀤𑁆𑀥𑀕𑁆𑀕𑀓𑀡𑁆𑀝𑀓𑀯𑀻𑀲𑀫𑁂 𑀅𑀧𑀲𑁆𑀲𑀬𑁂

𑀲𑁂𑀬𑁆𑀬𑀁 𑀅𑀓𑀸 𑀢𑀤𑀼𑀧𑀭𑀺𑀞𑀸𑀦𑀘𑀗𑁆𑀓𑀫𑀁; ()

𑁮𑁭.

𑀲𑁄 𑀲𑀸𑀬𑀢𑀢𑀺𑀬𑀓𑀫𑀼𑀤𑀓𑀸𑀯𑀭𑁄𑀳𑀡-

𑀬𑀼𑀢𑁆𑀢𑁄 𑀧𑀯𑀸𑀳𑀬𑀺𑀢𑀼𑀫𑀖𑀁 𑀲𑀫𑀼𑀲𑁆𑀲 𑀳𑀻,

𑀆𑀢𑀸𑀧𑀬𑀁 𑀇𑀢𑀺 𑀧𑀭𑀺𑀢𑀸𑀧𑀬𑀁 𑀲𑀓𑀁

𑀤𑁂𑀳𑀁 𑀘𑀺𑀭𑀁 𑀧𑀭𑀺𑀳𑀭𑀺 𑀧𑀸𑀧𑀪𑀻𑀭𑀼𑀓𑁄; ()

𑁮𑁮. ¶

𑀬𑁄 𑀦𑁂𑀓𑀳𑀸𑀬𑀦𑀕𑀡𑀺𑀓𑁄’𑀢𑁆𑀣𑀺’𑀢𑀺𑀦𑁆𑀤𑀼𑀓-

𑀭𑀼𑀓𑁆𑀔𑀲𑁆𑀲 𑀔𑁄 𑀧𑀧𑀝𑀺𑀓𑀚𑀸𑀢𑀔𑀸𑀡𑀼𑀓𑁄,

𑀏𑀯𑀁 𑀢𑀣𑀸 𑀧𑀧𑀝𑀺𑀓𑀚𑀸𑀢𑀫𑀢𑁆𑀢𑀦𑁄

𑀕𑀢𑁆𑀢𑀜𑁆𑀘 𑀲𑀦𑁆𑀦𑀺𑀯𑀺𑀢𑀭𑀚𑁄𑀫𑀮𑀁 𑀪𑀯𑀺; ()

𑁮𑁯.

𑀲𑁄𑀯𑀸 𑀧𑀭𑁄 𑀦𑀢𑀼 𑀧𑀭𑀺𑀯𑀚𑁆𑀚𑀬𑀻 𑀭𑀚𑁄-

𑀚𑀮𑁆𑀮𑀸𑀦𑀺 𑀓𑀚𑁆𑀚𑀮𑀫𑀮𑀺𑀦𑀸𑀦𑀺 𑀧𑀸𑀡𑀺𑀦𑀸,

𑀤𑁂𑀳𑀁 𑀲𑀼𑀪𑁄𑀚𑀦𑀚𑀳𑀦𑁂𑀦 𑀚𑀚𑁆𑀚𑀭𑀁

𑀢𑁂𑀮𑀁 𑀯𑀺𑀮𑁂𑀧𑀺𑀬 𑀭𑀚𑀲𑀸’𑀪𑀺𑀣𑀽𑀮𑀬𑀻; ()

𑁯𑁦.

𑀲𑁄 𑀤𑁆𑀯𑁂’𑀓𑀧𑀲𑁆𑀲𑀬𑀺𑀓𑀯𑀢𑀁 𑀧𑀧𑀽𑀭𑀬𑀻

𑀆𑀧𑀸𑀦𑀓𑁄’ 𑀪𑀯𑀺 𑀨𑀮𑀓𑁂’𑀧𑀺 𑀣𑀡𑁆𑀟𑀺𑀮𑁂,

𑀲𑁂𑀬𑁆𑀬𑀁 𑀅𑀓𑀸𑀓 𑀯𑀺𑀳𑀭𑀺 𑀯𑀺𑀯𑁂𑀓𑀓𑀸𑀫𑀯𑀸

𑀅𑀚𑁆𑀛𑁄𑀕𑀳𑀁 𑀅𑀤𑀼𑀢𑀺𑀬𑀓𑁄 𑀫𑀳𑀸𑀯𑀦𑀁; ()

𑁯𑁧. ¶

𑀧𑀸𑀡𑁂 𑀇𑀫𑁂 𑀯𑀺𑀲𑀫𑀕𑀢𑁂’𑀢𑀺𑀔𑀼𑀤𑁆𑀤𑀓𑁂

𑀦𑀸’𑀳𑀁 𑀯𑀥𑀺𑀲𑁆𑀲𑀫𑀺𑀢𑀺 𑀧𑀝𑀺𑀘𑁆𑀘’𑀦𑀼𑀤𑁆𑀤𑀬𑀁,

𑀉𑀲𑁆𑀲𑀸𑀯𑀫𑀤𑁆𑀤𑀦𑀳𑀺𑀭𑀪𑀻𑀭𑀼𑀢𑀸𑀬 𑀲𑁄

𑀦𑀸𑀣𑁄 𑀅𑀪𑀺𑀓𑁆𑀓𑀫𑀺 𑀘 𑀲𑀢𑁄 𑀧𑀝𑀺𑀓𑁆𑀓𑀫𑀺; ()

𑁯𑁨.

𑀦𑀺𑀦𑁆𑀦𑀢𑁆𑀣𑀮𑀸 𑀯𑀦𑀕𑀳𑀦𑀸 𑀯𑀦𑀸𑀲𑀬𑁄

𑀦𑀺𑀦𑁆𑀦𑀢𑁆𑀣𑀮𑀁 𑀯𑀦𑀕𑀳𑀦𑀁 𑀫𑀺𑀕𑁄 𑀬𑀣𑀸,

𑀳𑀻𑀢𑁄 𑀯𑀺𑀧𑀲𑁆𑀲𑀺𑀬 𑀯𑀺𑀧𑀺𑀦𑁄𑀧𑀕𑁂 𑀚𑀦𑁂

𑀢𑀸𑀲𑀸𑀪𑀺𑀪𑀽 𑀧𑀧𑀦𑀢𑀺 𑀏𑀯𑀫𑁂𑀯𑀔𑁄; ()

𑁯𑁩.

𑀤𑀺𑀲𑁆𑀯𑀸𑀦 𑀮𑀼𑀤𑁆𑀤𑀓𑀯𑀦𑀓𑀫𑁆𑀫𑀺𑀓𑀸𑀤𑀬𑁄

𑀕𑁄𑀧𑀸𑀮𑀓𑁂 𑀢𑀺𑀡𑀦𑀴𑀓𑀝𑁆𑀞𑀳𑀸𑀭𑀓𑁂,

𑀫𑀸𑀘𑀤𑁆𑀤𑀲𑀁 𑀅𑀳𑀫𑀧𑀺 𑀢𑁂𑀢𑁆𑀬’𑀬𑀁𑀚𑀦𑁄

𑀫𑀸 𑀫𑀁 𑀯𑀺𑀧𑀲𑁆𑀲𑀢𑀼 𑀲𑀫𑀥𑀺𑀝𑁆𑀞𑀳𑀁 𑀯𑀢𑀁; ()

𑁯𑁪.

𑀏𑀓𑁄𑀯𑀲𑀗𑁆𑀕𑀡𑀺𑀓𑀯𑀺𑀳𑀸𑀭𑀪𑀻𑀢𑀺𑀬𑀸

𑀦𑀺𑀦𑁆𑀦𑀢𑁆𑀣𑀮𑀸 𑀯𑀦𑀕𑀳𑀦𑀸 𑀢𑀧𑁄𑀦𑀺𑀥𑀻,

𑀦𑀺𑀦𑁆𑀦𑀢𑁆𑀣𑀮𑀁 𑀯𑀦𑀕𑀳𑀦𑀁 𑀧𑀧𑀸𑀢 𑀲𑁄

𑀢𑀲𑁆𑀲𑀸𑀲𑀺 𑀢𑀸𑀤𑀺𑀲𑀺 𑀧𑀯𑀺𑀯𑀺𑀢𑁆𑀢𑀢𑀸 𑀢𑀤𑀸; ()

𑁯𑁫. ¶

𑀬𑀲𑁆𑀫𑀺𑀁𑀯𑀦𑁂 𑀘𑀭𑀢𑀫𑀯𑀻𑀢𑀭𑀸𑀕𑀻𑀦𑀁

𑀭𑁄𑀫𑀼𑀕𑁆𑀕𑀫𑁄 𑀘𑀭𑀡𑀢𑀮𑀸𑀦𑀺 𑀓𑀫𑁆𑀧𑀭𑁂,

𑀤𑀺𑀲𑁆𑀯𑀸𑀦 𑀪𑀺𑀁𑀲𑀡𑀓𑀯𑀦𑀁 𑀢𑀣𑀸𑀯𑀺𑀥𑀁

𑀅𑀚𑁆𑀛𑁄𑀕𑀳𑀁 𑀯𑀲𑀺 𑀧𑀯𑀺𑀯𑁂𑀓𑀓𑀸𑀫𑀯𑀸; ()

𑁯𑁬.

𑀉𑀲𑁆𑀲𑀸𑀯𑀧𑀸𑀢𑀢𑀲𑀫𑀬𑁂’𑀦𑁆𑀢𑀭𑀝𑁆𑀞𑀓𑁂

𑀳𑁂𑀫𑀦𑁆𑀢𑀺𑀓𑁂 𑀲𑀺𑀲𑀺𑀭𑀢𑀭𑀸𑀬 𑀭𑀢𑁆𑀢𑀺𑀬𑀸,

𑀅𑀩𑁆𑀪𑀸𑀯𑀓𑀸𑀲𑀺𑀓 𑀫𑀪𑀺𑀧𑀽𑀭𑀬𑀺 𑀯𑀢𑀁

𑀓𑀺𑀘𑁆𑀙𑀁 𑀯𑀲𑀺 𑀯𑀲𑀺 𑀯𑀦𑀲𑀡𑁆𑀟𑀕𑁄 𑀤𑀺𑀯𑀸; ()

𑁯𑁭.

𑀕𑀺𑀫𑁆𑀳𑁄𑀢𑀼 𑀧𑀘𑁆𑀙𑀺𑀫𑀤𑀺𑀯𑀲𑀦𑁆𑀢𑀭𑁂 𑀤𑀺𑀯𑀸

𑀅𑀩𑁆𑀪𑀸𑀯𑀓𑀸𑀲𑀺𑀓𑀥𑀼𑀢𑀥𑀫𑁆𑀫𑀧𑀽𑀭𑀓𑁄,

𑀭𑀢𑁆𑀢𑀺𑀁 𑀯𑀦𑁂 𑀯𑀺𑀳𑀭𑀺 𑀚𑀯𑀝𑁆𑀞𑀺𑀓𑀸𑀦𑁆𑀬𑀼’𑀧

𑀦𑀺𑀲𑁆𑀲𑀸𑀬 𑀲𑁄 𑀅𑀲𑀬𑀺 𑀲𑀼𑀲𑀸𑀦𑀪𑀽𑀫𑀺𑀬𑀁; ()

𑁯𑁮. ¶

𑀩𑀼𑀤𑁆𑀥𑀗𑁆𑀓𑀼𑀭𑀁 𑀉𑀧𑀕𑀫𑀺𑀬𑁄’𑀞𑀼𑀪𑀦𑁆𑀢𑀺’𑀧𑀺

𑀑𑀫𑀼𑀢𑁆𑀢𑀬𑀦𑁆𑀢𑀺𑀧𑀺 𑀭𑀚𑀲𑁄’𑀓𑀺𑀭𑀦𑁆𑀢𑀺’𑀧𑀺,

𑀕𑁄𑀫𑀡𑁆𑀟𑀮𑀸 𑀲𑀯𑀡𑀔𑀺𑀮𑁂𑀲𑀼 𑀤𑀡𑁆𑀟𑀓𑀁

𑀤𑀢𑁆𑀯𑀸 𑀯𑀤𑀸𑀧𑀬𑀺𑀢𑀼𑀫𑀼𑀧𑀓𑁆𑀓𑀫𑀦𑁆𑀢𑀺’𑀧𑀺; ()

𑁯𑁯.

𑀲𑁄𑀯𑀸𑀥𑀺𑀯𑀸𑀲𑀬𑀺 𑀲𑀢𑀺𑀫𑀸 𑀉𑀧𑁂𑀓𑁆𑀔𑀓𑁄

𑀢𑀁𑀯𑁂𑀤𑀦𑀁 𑀓𑀝𑀼𑀓𑀓 𑀫𑀦𑀜𑁆𑀜𑀯𑁂𑀤𑀺𑀬𑀁,

𑀤𑀼𑀓𑁆𑀔𑁂 𑀲𑀼𑀔𑁂 𑀲𑀼𑀫𑀢𑀺 𑀢𑀼𑀮𑀸𑀲𑀭𑀺𑀓𑁆𑀔𑀓𑁄

𑀩𑀸𑀮𑁂𑀲𑀼 𑀢𑁂𑀲𑁆𑀯’𑀧𑀺 𑀦𑀯𑀺𑀓𑁄𑀧𑀬𑀺𑀫𑀦𑀁; ()

𑁧𑁦𑁦.

𑀆𑀳𑀸𑀭𑀢𑀧𑁆𑀧𑀡𑀯𑀺𑀥𑀺𑀦𑀸 𑀯𑀺𑀲𑀼𑀤𑁆𑀥𑀺’𑀢𑀺

𑀏𑀓𑁂 𑀯𑀤𑀦𑁆𑀢𑀺’𑀳 𑀲𑀫𑀡𑀸𑀜𑁆𑀜𑀢𑀺𑀢𑁆𑀣𑀺𑀬𑀸,

𑀓𑁄𑀮𑀸𑀤𑀺𑀪𑁄𑀚𑀦𑀯𑀺𑀓𑀢𑀺𑀁 𑀢𑀣𑀸𑀯𑀺𑀥𑀁

𑀅𑀧𑁆𑀧𑀺𑀘𑁆𑀙𑀢𑀸𑀬’𑀦𑀼𑀪𑀯𑀺 𑀲𑀼𑀤𑁆𑀥𑀺𑀓𑀸𑀫𑀯𑀸; ()

𑁧𑁦𑁧. ¶

𑀅𑀧𑁆𑀧𑁄𑀚𑀪𑁄𑀚𑀦𑀯𑀺𑀓𑀢𑀺𑀁 𑀧𑀪𑀼𑀜𑁆𑀚𑀢𑁄

𑀔𑀢𑁆𑀢𑀺𑀁𑀲𑀮𑀓𑁆𑀔𑀡𑀲𑀺𑀭𑀺𑀬𑀸 𑀲𑀫𑀼𑀚𑁆𑀚𑀮𑀁,

𑀓𑀸𑀬𑁄 𑀲𑀼𑀭𑀤𑁆𑀤𑀼𑀫𑀭𑀼𑀘𑀺𑀭𑁄’𑀥𑀺𑀫𑀢𑁆𑀢𑀓-

𑀲𑀻𑀫𑀸𑀦𑀫𑀝𑁆𑀞𑀺𑀓𑀢𑀘 𑀫𑀸𑀧𑀥𑀻𑀫𑀢𑁄; ()

𑀧𑀩𑁆𑀩𑀸𑀦𑀺𑀯𑀸 𑀅𑀲𑀺𑀢𑀮𑀦𑀸𑀲𑁆𑀯’𑀲𑀺𑀢𑀺𑀓-

𑀯𑀮𑁆𑀮𑀺𑀲𑀼 𑀉𑀦𑁆𑀦𑀢’𑀯𑀦𑀢𑀸𑀦𑀺 𑀲𑁂𑀬𑁆𑀬𑀣𑀸,

𑀆𑀲𑀼𑀁 𑀢𑀣𑀸 𑀓𑀭𑀘𑀭𑀡𑀸𑀤𑀺𑀓𑀸𑀦𑀺’𑀧𑀺

𑀢𑀲𑁆𑀲𑀼’𑀦𑁆𑀦𑀢𑁄𑀦𑀢’𑀯𑀬𑀯𑀸𑀢𑀺 𑀯𑀺𑀕𑁆𑀕𑀳𑁂; ()

𑁧𑁦𑁩.

𑀫𑁄𑀓𑁆𑀔𑁂𑀲𑀺𑀦𑁄 𑀓𑀭𑀪𑀧𑀤𑀁𑀯 𑀦𑀺𑀲𑁆𑀲𑀺𑀭𑀺𑀁

𑀦𑀺𑀫𑁆𑀫𑀁𑀲 𑀫𑀸𑀦𑀺𑀲𑀤 𑀫𑀳𑀽 𑀲𑀺𑀭𑀺𑀫𑀢𑁄;

𑀢𑀲𑁆𑀲𑀼’𑀦𑁆𑀢𑀢𑀸𑀯𑀦𑀢𑀓𑀧𑀺𑀝𑁆𑀞𑀺𑀓𑀡𑁆𑀝𑀓𑁄

𑀆𑀲𑀺 𑀬𑀣𑀸𑀯𑀮𑀬𑀺𑀢𑀯𑀝𑁆𑀝𑀦𑀸𑀯𑀮𑀺; ()

𑁧𑁦𑁪. ¶

𑀕𑁄𑀧𑀸𑀡𑀲𑀺 𑀲𑀺𑀣𑀺𑀮𑀺𑀢𑀩𑀦𑁆𑀥𑀦𑀸 𑀚𑀭-

𑀲𑀸𑀴𑀸𑀬 𑀳𑁂𑀝𑁆𑀞𑀼𑀧𑀭𑀺𑀞𑀺𑀢𑁂’𑀯 𑀥𑀻𑀫𑀢𑁄,

𑀦𑀺𑀫𑁆𑀫𑀁𑀲𑀮𑁄𑀳𑀺𑀢𑀓𑀓𑀮𑁂𑀩𑀭𑁂 𑀧𑁆𑀬’𑀯-

𑀪𑀕𑁆𑀕𑀸 𑀪𑀯𑀼𑀁 𑀧𑀯𑀺𑀲𑀫𑀨𑀸𑀲𑀼𑀓𑀸𑀯𑀮𑀻; ()

𑁧𑁦𑁫.

𑀅𑀧𑁆𑀧𑀁 𑀓𑀼𑀪𑁄𑀚𑀦𑀯𑀺𑀓𑀢𑀺𑀁 𑀧𑀪𑀼𑀜𑁆𑀚𑀦𑁄

𑀢𑀲𑁆𑀲’𑀓𑁆𑀔𑀺𑀓𑀽𑀧𑀕𑀬𑀼𑀕𑀮𑀓𑁆𑀔𑀺𑀢𑀸𑀭𑀓𑀸,

𑀑𑀓𑁆𑀓𑀸𑀬𑀺𑀓𑀸 𑀅𑀪𑀯𑀼 𑀫𑀕𑀸𑀥𑀕𑀸 𑀢𑀤𑀸

𑀕𑀫𑁆𑀪𑀻𑀭𑀓𑀼𑀧𑀕𑀤𑀓𑀢𑀸𑀭𑀓𑀸𑀓 𑀯𑀺𑀬; ()

𑁧𑁦𑁬.

𑀯𑀸𑀢𑀸𑀢𑀧𑁂𑀦’ 𑀪𑀺𑀨𑀼𑀲𑀺𑀢𑁄 𑀬𑀣𑀸’𑀫𑀓-

𑀘𑁆𑀙𑀺𑀦𑁆𑀦𑁄’𑀪𑀺𑀲𑀫𑁆𑀨𑀼𑀝𑀦𑀺 𑀅𑀮𑀸𑀩𑀼 𑀢𑀺𑀢𑁆𑀢𑀓𑁄,

𑀲𑀻𑀲𑀘𑁆𑀙𑀯𑀻 𑀲𑀼𑀔𑀼𑀫𑀙𑀯𑀺𑀲𑁆𑀲 𑀪𑁄𑀚𑀦𑁄-

𑀧𑀘𑁆𑀙𑁂𑀤𑀦𑁂𑀦’𑀪𑀺𑀨𑀼𑀝𑀺𑀢𑀸 𑀞𑀺𑀢𑀁 𑀢𑀣𑀸; ()

𑁧𑁦𑁭. ¶

𑀢𑀲𑁆𑀲𑁄𑀤𑀭𑀘𑁆𑀙𑀯𑀺 𑀧𑀦 𑀧𑀺𑀝𑁆𑀞𑀺𑀓𑀡𑁆𑀝𑀓𑀁

𑀅𑀮𑁆𑀮𑀺𑀬𑀺 𑀲𑁄 𑀫𑀼𑀦𑀺 𑀫𑀮𑀫𑀼𑀢𑁆𑀢𑀫𑁄𑀘𑀓𑁄,

𑀑𑀓𑀼𑀚𑁆𑀚𑀺𑀢𑁄 𑀧𑀭𑀺𑀧𑀢𑀺 𑀧𑀽𑀢𑀺𑀫𑀽𑀮𑀓-

𑀮𑁄𑀫𑀸𑀦𑀺 𑀢𑀩𑁆𑀩𑀧𑀼𑀕𑀮𑀺𑀢𑀸𑀦𑀺 𑀪𑀽𑀫𑀺𑀬𑀁; ()

𑁧𑁦𑁮.

𑀲𑁄 𑀧𑀺𑀝𑁆𑀞𑀺𑀓𑀡𑁆𑀝𑀓𑀫𑀯𑀲𑀗𑁆𑀕𑀧𑀸𑀡𑀺𑀦𑀸

𑀓𑀼𑀘𑁆𑀙𑀺𑀘𑁆𑀙𑀯𑀺𑀁 𑀨𑀼𑀲𑀺𑀢𑀼𑀫𑀺𑀢𑁄 𑀧𑀭𑀸𑀫𑀲𑀺,

𑀲𑁄 𑀧𑀺𑀝𑁆𑀞𑀺𑀓𑀡𑁆𑀝𑀓𑀫𑀯𑀲𑀗𑁆𑀕𑀧𑀸𑀡𑀺𑀦𑀸

𑀓𑀼𑀘𑁆𑀙𑀺𑀘𑁆𑀙𑀯𑀺𑀁 𑀨𑀼𑀲𑀺𑀢𑀼𑀫𑀺𑀢𑁄 𑀧𑀭𑀸𑀫𑀲𑀺; () (𑀬𑀫𑀓𑀩𑀦𑁆𑀥𑀦𑀁)

𑁧𑁦𑁯.

𑀓𑀸𑀮𑁄𑀦𑀼𑀔𑁄 𑀯𑀭𑀧𑀼𑀭𑀺𑀲𑁄’𑀢𑀺 𑀦𑁄 𑀢𑀣𑀸

𑀲𑀸𑀫𑁄𑀦𑀼𑀔𑁄 𑀦𑀧𑀺 𑀦𑀦𑀼𑀫𑀗𑁆𑀕𑀼𑀭𑀘𑁆𑀙𑀯𑀺,

𑀆𑀲𑀼𑀁 𑀢𑀤𑀸 𑀓𑀯𑀺𑀫𑀢𑀺𑀓𑀣𑀸𑀧𑀭𑀸 𑀦𑀭𑀸

𑀤𑀺𑀲𑁆𑀯𑀸 𑀫𑀮𑀕𑁆𑀕𑀳𑀺𑀢𑀫𑀲𑁄𑀪𑀦𑀘𑁆𑀙𑀯𑀺𑀁; ()

𑁧𑁧𑁦. ¶

𑀬𑁂 𑀲𑀦𑁆𑀢𑀻 𑀲𑀫𑁆𑀧𑀢𑀻 𑀲𑀫𑀡𑀸’𑀪𑀯𑀼𑀁 𑀧𑀼𑀭𑁂

𑀅𑀢𑁆𑀢𑀦𑁆𑀢𑀧𑀸 𑀢𑀧𑀲𑀺 𑀅𑀦𑀸𑀕𑀢𑁂 𑀲𑀺𑀬𑀼𑀁,

𑀢𑁂 𑀯𑁂𑀤𑀦𑀁 𑀓𑀝𑀼𑀓𑀫𑀺𑀢𑁄𑀥𑀺𑀓𑀁 𑀓𑀺𑀫𑀼

𑀯𑁂𑀤𑁂𑀦𑁆𑀢𑀺 𑀯𑁂𑀤𑀬𑀼 𑀫𑀪𑀺𑀯𑁂𑀤𑀬𑀺𑀲𑁆𑀲𑀭𑁂; ()

𑁧𑁧𑁧.

𑀈𑀳𑀸𑀬 𑀤𑀼𑀓𑁆𑀓𑀭𑀓𑀺𑀭𑀺𑀬𑀸𑀬𑀺’𑀫𑀸𑀬’𑀧𑀺

𑀦𑁂𑀯’𑀚𑁆𑀛𑀕𑀸 𑀬𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀁,

𑀅𑀢𑁆𑀢𑀽𑀧𑀢𑀸𑀧𑀦𑀓𑀲𑀺𑀭𑀲𑁆𑀲 𑀓𑁂𑀯𑀮𑀁

𑀪𑀸𑀕𑀻 𑀪𑀯𑀺 𑀅𑀦𑀭𑀺𑀬𑀫𑀕𑁆𑀕𑀕𑀸𑀫𑀺𑀲𑁄; ()

𑁧𑁧𑁨.

𑀲𑀁𑀲𑀸𑀭𑁂 𑀲𑀸𑀢𑀺𑀲𑀸𑀭𑁂 𑀩𑀭𑀢𑀭𑀤𑀭𑀣𑁂 𑀲𑀁𑀲𑀭𑀁 𑀲𑀘𑁆𑀘𑀲𑀦𑁆𑀥𑁄

𑀔𑁂𑀤𑁂𑀯𑁂𑀤𑁂𑀲𑀺 𑀤𑁂𑀯𑀸𑀲𑀺𑀭𑀦𑀭𑀲𑀭𑀡𑁄𑀏𑀲𑀬𑀁𑀲𑀢𑁆𑀢𑀲𑀦𑁆𑀢𑀺𑀁,

𑀥𑀻𑀭𑁄𑀯𑀻𑀭𑁄𑀯𑀭𑁄𑀬𑁄𑀧𑀪𑀯𑀪𑀯𑀪𑀬𑁄𑀧𑀸𑀧𑀢𑀸𑀧𑀩𑁆𑀩𑀺𑀧𑀢𑁆𑀢𑁄

𑀆𑀬𑁄𑀕𑀁 𑀬𑁄𑀕𑀺𑀬𑁄𑀕𑀻 𑀧𑀭𑀺𑀳𑀭𑀺 𑀳𑀺𑀭𑀺𑀫𑀸𑀏𑀯𑀫𑁂𑀯𑀘𑁆𑀙𑀯𑀲𑁆𑀲𑀁; () (𑀫𑀼𑀢𑁆𑀢𑀸𑀳𑀸𑀭 𑀩𑀦𑁆𑀥𑀦𑀁)

𑀇𑀢𑀺 𑀫𑁂𑀥𑀸𑀦𑀦𑁆𑀤𑀸𑀪𑀺𑀥𑀸𑀦𑁂𑀦 𑀬𑀢𑀺𑀦𑀸 𑀯𑀺𑀭𑀘𑀺𑀢𑁂 𑀲𑀓𑀮 𑀓𑀯𑀺𑀚𑀦 𑀳𑀓𑀬𑀸𑀦𑀦𑁆𑀤𑀤𑀸𑀦𑀦𑀺𑀤𑀸𑀦𑁂 𑀚𑀺𑀦𑀯𑀁𑀲𑀤𑀻𑀧𑁂 𑀅𑀯𑀺𑀤𑀼𑀭𑁂𑀦𑀺𑀤𑀸𑀦𑁂 𑀫𑀳𑀸𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀳𑀸 𑀧𑀥𑀸𑀦𑀸𑀦𑀼𑀬𑁄𑀕𑀧𑁆𑀧𑀯𑀢𑁆𑀢𑀺𑀧𑀭𑀺𑀤𑀻𑀧𑁄 𑀏𑀓𑀸𑀤𑀲𑀫𑁄𑀲𑀕𑁆𑀕𑁄.

𑁧. ¶

𑀓𑀸𑀫𑀁 𑀓𑀸𑀫𑀲𑀼𑀔𑀮𑁆𑀮𑀺𑀓𑀸’𑀦𑀼𑀬𑁄𑀕𑁄

𑀳𑀻𑀦𑁄’𑀦𑀢𑁆𑀣𑀓𑀭𑁄’𑀢𑁆𑀬’𑀦𑁂(’𑀓𑀭𑀽𑀧𑀁),

𑀘𑀺𑀦𑁆𑀢𑁂𑀢𑁆𑀯𑀸𑀦 𑀢𑀧𑁄𑀯𑀦𑀁 𑀯𑀺𑀫𑀸𑀦𑀸

𑀢𑁆𑀯𑀁 𑀲𑀺𑀤𑁆𑀥𑀢𑁆𑀣𑀼’𑀧𑀕𑀫𑁆𑀫 𑀓𑀸𑀳𑀲𑁂 𑀓𑀺𑀁; ()

𑁨. ¶

𑀓𑁄𑀦𑀸𑀫’𑀦𑁆𑀢𑀼’𑀧𑀢𑀸𑀧𑀦𑀸’𑀦𑀼𑀬𑀼𑀢𑁆𑀢𑁄

𑀧𑀢𑁆𑀢𑁄 𑀳𑁄𑀢𑀺 𑀲𑀼𑀔𑀧𑁆𑀧𑀤𑀁 𑀓𑀤𑀸𑀘𑀺,

𑀢𑀲𑁆𑀫𑀸 𑀅𑀢𑁆𑀢𑀼’𑀧𑀢𑀸𑀧𑀦𑀸’𑀦𑀼𑀬𑁄𑀕𑁄

𑀳𑀻𑀦𑁄’𑀦𑀢𑁆𑀣𑀓𑀭𑁄’𑀢𑀺 𑀘𑀺𑀦𑁆𑀢𑀬𑀲𑁆𑀲𑀼; ()

𑁩.

𑀅𑀢𑁆𑀢𑀸𑀦𑀁 𑀲𑀬𑀫𑁂𑀯𑀫𑁄𑀯𑀤𑀺𑀢𑁆𑀯𑀸

𑀧𑀺𑀡𑁆𑀟𑀸𑀬𑀸’𑀦𑀼𑀖𑀭𑀁 𑀘𑀭𑀺𑀢𑁆𑀯 𑀮𑀤𑁆𑀥𑀁,

𑀪𑀢𑁆𑀢𑀁 𑀪𑀼𑀢𑁆𑀢𑀯𑀢𑁄 𑀲𑀓𑀫𑁆𑀳𑀺 𑀓𑀸𑀬𑁂

𑀆𑀲𑀼𑀁 𑀧𑀸𑀓𑀢𑀺𑀓𑀸𑀦𑀺 𑀮𑀓𑁆𑀔𑀡𑀸𑀦𑀺, ()

𑁪.

𑀳𑀻𑀦𑀦𑁆𑀢𑀤𑁆𑀯𑀬𑀯𑀚𑁆𑀚𑀦𑁂𑀦 𑀚𑀸𑀢𑀼

𑀜𑀸𑀡𑀼𑀓𑁆𑀓𑀁𑀲𑀕𑀢𑀫𑁆𑀳𑀺 𑀢𑀫𑁆𑀳𑀺 𑀯𑀻𑀭𑁂,

𑀩𑁄𑀥𑀸𑀬𑀽’𑀧𑀲𑀫𑀸𑀬 𑀦𑀺𑀩𑁆𑀩𑀺𑀤𑀸𑀬

𑀉𑀓𑁆𑀓𑀝𑁆𑀞𑀁 𑀧𑀝𑀺𑀧𑀢𑁆𑀢𑀺𑀫𑀸𑀘𑀭𑀦𑁆𑀢𑁂; ()

𑁫. ¶

𑀙𑀩𑁆𑀩𑀲𑁆𑀲𑀸𑀦𑁆𑀬’𑀦𑀺𑀤𑀼𑀓𑁆𑀓𑀭𑀁 𑀓𑀭𑀺𑀢𑁆𑀯𑀸

𑀩𑁄𑀥𑀺𑀁 𑀦𑀸𑀚𑁆𑀛𑀕𑀢𑁄 𑀲𑀼𑀪𑁄𑀚𑀦𑀸𑀦𑀺,

𑀪𑀼𑀜𑁆𑀚𑀦𑁆𑀢𑁄 𑀓𑀺𑀫𑀼 𑀓𑀼𑀩𑁆𑀩𑀢𑁂’ 𑀧𑀥𑀸𑀦𑀸

𑀯𑀺𑀩𑁆𑀪𑀦𑁆𑀢𑁄 𑀇𑀢𑀺 𑀧𑀜𑁆𑀘𑀯𑀕𑁆𑀕𑀺𑀬𑀸𑀬𑀁; ()

𑁬.

𑀫𑀤𑀤𑀺𑀢𑁆𑀯𑀸 𑀲𑀺𑀓𑀢𑀁 𑀲𑀺𑀦𑁂𑀳𑀮𑀤𑁆𑀥𑀸

𑀓𑁂𑀯𑀸’𑀲𑀼𑀁 𑀲𑀫𑀡𑀁 𑀳𑀺’𑀫𑀁 𑀉𑀧𑁂𑀘𑁆𑀘,

𑀓𑁄 𑀫𑀽𑀴𑁆𑀳𑁄’𑀥𑀺𑀕𑀫𑀸𑀥𑀺𑀕𑀦𑁆𑀢𑀼𑀫𑀺𑀘𑁆𑀙𑁂

𑀘𑀺𑀦𑁆𑀢𑁂𑀢𑁆𑀯𑀸 𑀫𑀺𑀕𑀤𑀸𑀬𑀫𑁄𑀢𑀭𑀺𑀁𑀲𑀼; ()

𑁭.

𑀲𑁂𑀦𑀸𑀦𑀻𑀦𑀺𑀕𑀫𑁂 𑀢𑀤𑀸𑀦𑀺 𑀲𑁂𑀝𑁆𑀞𑀺-

𑀥𑀻𑀢𑀸 𑀲𑀸𑀫𑀺𑀓𑀼𑀮𑀁 𑀅𑀮𑀗𑁆𑀓𑀢𑀸’𑀲𑀺,

𑀪𑀸𑀭𑁂𑀦𑀸’𑀯𑀦𑀢𑀗𑁆𑀕𑀺𑀦𑀻 𑀓𑀼𑀘𑀸𑀦𑀁

𑀳𑀁𑀲𑀺𑀯𑀸’𑀮𑀲𑀕𑀸𑀫𑀺𑀦𑀻 𑀲𑀼𑀚𑀸𑀢𑀸; ()

𑁮. ¶

𑀚𑀸𑀢𑁂 𑀧𑀢𑁆𑀣𑀺𑀢𑀧𑀢𑁆𑀣𑀦𑀸𑀲𑀫𑀺𑀤𑁆𑀥𑁂

𑀭𑀼𑀓𑁆𑀔𑀸’𑀥𑀺𑀕𑁆𑀕𑀳𑀺𑀢𑀸𑀬 𑀤𑁂𑀯𑀢𑀸𑀬,

𑀓𑀸𑀢𑀼𑀁 𑀲𑀸𑀩𑀮𑀺𑀓𑀫𑁆𑀫𑀓 𑀫𑀸𑀦𑀬𑀺𑀢𑁆𑀯𑀸

𑀥𑁂𑀦𑀽 𑀮𑀝𑁆𑀞𑀺𑀯𑀦𑁄𑀧𑀕𑀸 𑀲𑀳𑀲𑁆𑀲𑀁; ()

𑁯.

𑀢𑀸𑀲𑀁 𑀧𑀜𑁆𑀘𑀲𑀢𑀸𑀦𑀺 𑀤𑀼𑀤𑁆𑀥𑀔𑀻𑀭𑀁

𑀧𑀸𑀬𑁂𑀢𑁆𑀯𑀸 𑀓𑀢𑀧𑀼𑀦 𑀬𑀸𑀯𑀢𑀸’𑀠𑀥𑁂𑀦𑀽,

𑀔𑀻𑀭𑀸𑀦𑀁 𑀧𑀭𑀺𑀯𑀢𑁆𑀢𑀦𑀁 𑀯𑀺𑀥𑀸𑀬

𑀧𑀘𑁆𑀘𑀽𑀲𑀫𑁆𑀳𑀺 𑀤𑀼𑀤𑁄𑀳 𑀢𑀸’𑀠𑀥𑁂𑀦𑀽; ()

𑁧𑁦.

𑀫𑀺𑀲𑁆𑀲𑁂𑀢𑁆𑀯𑀸 𑀲𑀬𑀫𑁂𑀯𑀯 𑀤𑀼𑀤𑁆𑀥𑀔𑀻𑀭𑀁

𑀧𑀸𑀬𑀸𑀲𑀁 𑀧𑀘𑀺𑀢𑀼𑀁 𑀲𑀫𑀸𑀭𑀪𑀺𑀢𑁆𑀣,

𑀤𑁂𑀯𑀸 𑀢𑀢𑁆𑀣 𑀲𑀼𑀥𑀸𑀭𑀲𑀁 𑀔𑀺𑀧𑀺𑀢𑁆𑀯𑀸

𑀆𑀭𑀓𑁆𑀔𑀸𑀤𑀺𑀫𑀓𑀁𑀲𑀼 𑀉𑀤𑁆𑀥𑀦𑀲𑁆𑀫𑀺𑀁; ()

𑁧𑁧.

𑀢𑀲𑁆𑀲𑀸’𑀲𑀺 𑀳𑀺𑀫𑀸𑀯𑀸𑀘𑀮𑁄’𑀧𑀥𑀸𑀦𑀁

𑀧𑀮𑁆𑀮𑀗𑁆𑀓𑁄 𑀧𑀣𑀯𑀺𑀢𑀮𑀁 𑀅𑀳𑀽 𑀘𑁂,

𑀳𑀢𑁆𑀣𑀸 𑀧𑀘𑁆𑀙𑀺𑀫𑀧𑀼𑀩𑁆𑀩𑀲𑀸𑀕𑀭𑁂𑀲𑀼

𑀧𑀸𑀤𑀸 𑀤𑀓𑁆𑀔𑀺𑀡𑀲𑀸𑀕𑀭𑁂 𑀪𑀯𑀺𑀁𑀲𑀽; ()

𑁧𑁨. ¶

𑀉𑀕𑁆𑀕𑀦𑁆𑀢𑁆𑀯𑀸 𑀢𑀺𑀡𑀚𑀸𑀢𑀺 𑀦𑀸𑀳𑀺𑀭𑀦𑁆𑀥𑀸

𑀢𑀲𑁆𑀲𑀸’𑀳𑀘𑁆𑀘 𑀞𑀺𑀢𑀸 𑀦𑀪𑀁 𑀅𑀲𑁂𑀲𑀁,

𑀙𑀸𑀤𑁂𑀲𑀼𑀁 𑀘𑀭𑀡𑀼𑀝𑁆𑀞𑀺𑀢𑀸’𑀲𑁆𑀲 𑀓𑀡𑁆𑀳-

𑀲𑀻𑀲𑀸’𑀚𑀸𑀦𑀼𑀬𑀼𑀕𑀸’𑀧𑁆𑀬’𑀓𑀡𑁆𑀳𑀓𑀻𑀝𑀸; ()

𑁧𑁩.

𑀘𑀢𑁆𑀢𑀸𑀭𑁄 𑀲𑀓𑀼𑀡𑀸 𑀘𑀢𑀼𑀤𑁆𑀤𑀺𑀲𑀸𑀳𑀺

𑀧𑀢𑁆𑀯𑀸 𑀢𑀧𑁆𑀧𑀤𑀧𑀜𑁆𑀚𑀭𑀁 𑀯𑀺𑀯𑀡𑁆𑀡𑀸,

𑀲𑁂𑀢𑀸’𑀲𑀼𑀁 𑀧𑀼𑀣𑀼𑀫𑀻𑀴𑁆𑀳𑀧𑀩𑁆𑀩𑀢𑀲𑁆𑀲

𑀲𑀻𑀲𑁂 𑀘𑀗𑁆𑀓𑀫𑀺 𑀲𑁄 𑀅𑀮𑀺𑀫𑁆𑀧𑀫𑀸𑀦𑁄; ()

𑁧𑁪.

𑀇𑀘𑁆𑀘𑁂𑀯𑀁 𑀲𑀼𑀫𑀢𑀺’𑀝𑁆𑀞𑀧𑀸𑀓𑀤𑀸𑀦𑀺

𑀧𑀲𑁆𑀲𑀺𑀢𑁆𑀯𑀸 𑀲𑀼𑀧𑀺𑀦𑀸𑀦𑀺 𑀧𑀜𑁆𑀘 𑀦𑀺𑀝𑁆𑀞𑀁,

𑀧𑀢𑁆𑀢𑁄 𑀅𑀚𑁆𑀚 𑀪𑀯𑀸𑀫𑀳𑀦𑁆𑀢𑀺 𑀩𑀼𑀤𑁆𑀥𑁄

𑀦𑀺𑀕𑁆𑀭𑁄𑀥𑀁 𑀲𑀫𑀼𑀧𑁂𑀘𑁆𑀘 𑀲𑀦𑁆𑀦𑀺𑀲𑀻𑀤𑀺; ()

𑁧𑁫. ¶

𑀲𑁄𑀥𑁂𑀢𑀁 𑀲𑀳𑀺𑀢𑀸 𑀢𑀼 𑀧𑀼𑀡𑁆𑀡𑀤𑀸𑀲𑀻

𑀧𑀘𑁆𑀘𑀽𑀲𑁂 𑀯𑀝𑀫𑀽𑀮𑀧𑀼𑀩𑁆𑀩𑀲𑁂𑀮𑁂,

𑀢𑀁 𑀮𑁄𑀓𑁂𑀓𑀭𑀯𑀺𑀁 𑀯𑀺𑀭𑀸𑀚𑀫𑀸𑀦𑀁

𑀤𑀺𑀲𑁆𑀯𑀸’𑀯𑁄𑀘 𑀲𑀼𑀚𑀸𑀢𑀫𑁂𑀢𑀫𑀢𑁆𑀣𑀁; ()

𑁧𑁬.

𑀮𑀓𑁆𑀔𑀕𑁆𑀖𑀁 𑀳𑀭𑀺𑀧𑀸𑀢𑀺𑀫𑀸𑀳𑀭𑀺𑀢𑁆𑀯𑀸

𑀲𑀸 𑀆𑀯𑀚𑁆𑀚𑀬𑀺 𑀧𑀓𑁆𑀓𑀪𑀸𑀚𑀦𑀁 𑀲𑁄,

𑀧𑀸𑀬𑀸𑀲𑁄 𑀯𑀺𑀦𑀺𑀯𑀝𑁆𑀝𑀺𑀢𑁄 𑀞𑀺𑀢𑁄’𑀲𑀺

𑀢𑀸𑀬𑀁 𑀧𑁄𑀓𑁆𑀔𑀭𑀧𑀢𑁆𑀢𑀢𑁄𑀯’𑀢𑁄𑀬𑀁; ()

𑁧𑁭.

𑀲𑀸 𑀅𑀜𑁆𑀜𑀸𑀬 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀢𑀁

𑀙𑀸𑀤𑁂𑀢𑁆𑀯𑀸 𑀫𑀼𑀤𑀺𑀢𑀸 𑀧𑀲𑀦𑁆𑀢𑀘𑀺𑀢𑁆𑀢𑀸

𑀕𑀦𑁆𑀢𑁆𑀯𑀸 𑀫𑀡𑁆𑀟𑀦 𑀫𑀡𑁆𑀟𑀺𑀢𑀸 𑀲𑀲𑀻𑀲𑁂

𑀓𑀢𑁆𑀯𑀸 𑀧𑀽𑀚𑀬𑀺 𑀪𑁄𑀚𑀦𑀁 𑀲𑀼𑀚𑀸𑀢𑀸; ()

𑁧𑁮.

𑀓𑀸𑀮𑀁 𑀏𑀢𑁆𑀢𑀓𑀫𑁂𑀯𑀩𑁄𑀥𑀺𑀲𑀢𑁆𑀢𑀁

𑀦𑀸𑀢𑀺𑀓𑁆𑀓𑀫𑁆𑀫 𑀯𑀺𑀥𑀸𑀢𑀼𑀤𑀺𑀦𑁆𑀦𑀧𑀢𑁆𑀢𑁄,

𑀲𑀫𑁆𑀧𑀢𑁆𑀢𑁄’𑀲𑀺 𑀅𑀤𑀲𑁆𑀲𑀦𑀁 𑀢𑀢𑁄 𑀢𑀁

𑀧𑀸𑀢𑀺𑀁 𑀲𑁄𑀡𑁆𑀡𑀫𑀬𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸; ()

𑁧𑁯. ¶

𑀳𑀁𑀲𑀸𑀮𑀺𑀫𑀮𑀺𑀦𑀻𑀓𑀢𑀸𑀭𑀯𑀺𑀦𑁆𑀤-

𑀭𑁂𑀡𑀼𑀘𑁆𑀙𑀦𑁆𑀦𑀲𑀼𑀦𑀻𑀮𑀦𑀻𑀭𑀧𑀼𑀭𑀸,

𑀬𑀸 𑀦𑁂𑀭𑀜𑁆𑀚𑀭𑀯𑀺𑀲𑁆𑀲𑀼𑀢𑀸’𑀲𑀺 𑀢𑀸𑀬

𑀦𑀚𑁆𑀚𑀸𑀢𑀻𑀭𑀫𑀕𑀜𑁆𑀚𑀺 𑀲𑀢𑁆𑀢𑀲𑀸𑀭𑁄; ()

𑁨𑁦.

𑀧𑀸𑀬𑀸𑀲𑀸𑀫𑀺𑀲𑀧𑀼𑀡𑁆𑀡𑀲𑁄𑀡𑁆𑀡𑀧𑀸𑀢𑀺𑀁

𑀓𑀸𑀲𑀸𑀯𑀸𑀦𑀺 𑀚𑀺𑀦𑀗𑁆𑀓𑀼𑀭𑁄 𑀞𑀧𑁂𑀢𑁆𑀯𑀸,

𑀢𑀻𑀭𑁂 𑀢𑀸𑀬 𑀲𑀯𑀦𑁆𑀢𑀺𑀬𑀸 𑀦𑀳𑀸𑀢𑀼𑀁

𑀢𑀺𑀢𑁆𑀣𑀁 𑀕𑀦𑁆𑀥𑀕𑀚𑁄𑀭𑀺𑀯𑁄’𑀢𑀭𑀺𑀢𑁆𑀣; ()

𑁨𑁧.

𑀭𑁄𑀮𑀫𑁆𑀩𑀸𑀓𑀼𑀮𑀦𑀻𑀮𑀦𑀻𑀭𑀚𑁂𑀳𑀺

𑀲𑁂𑀯𑀸𑀮𑁂𑀳𑀺 𑀦𑀤𑀻𑀚𑀮𑀁 𑀲𑀼𑀦𑀺𑀮𑀁,

𑀦𑀺𑀓𑁆𑀔𑀦𑁆𑀢𑀚𑁆𑀚𑀼𑀢𑀺𑀲𑀜𑁆𑀘𑀬𑁂𑀳𑀺 𑀤𑁂𑀳𑀸

𑀑𑀢𑀺𑀡𑁆𑀡𑀲𑁆𑀲 𑀚𑀕𑀸𑀫 𑀧𑀺𑀜𑁆𑀚𑀭𑀢𑁆𑀢𑀁; ()

𑁨𑁨. ¶

𑀕𑀗𑁆𑀕𑀸𑀓𑀸𑀫𑀺𑀦𑀺 𑀓𑀜𑁆𑀚𑀭𑁂𑀡𑀼𑀕𑀦𑁆𑀥-

𑀘𑀼𑀡𑁆𑀡𑀁 𑀢𑀼𑀗𑁆𑀕𑀢𑀭𑀗𑁆𑀕𑀩𑀸𑀳𑀼𑀦𑀸 𑀢𑀁,

𑀪𑀢𑁆𑀢𑀸𑀭𑀁 𑀲𑀮𑀺𑀮𑁂𑀦 𑀲𑀻𑀢𑀮𑁂𑀦

𑀫𑀓𑁆𑀔𑁂𑀢𑁆𑀯𑀸𑀲𑀼𑀦𑀳𑀸𑀧𑀬𑀦𑁆𑀢𑀻’𑀯𑀸’𑀲𑀺; ()

𑁨𑁩.

𑀢𑀼𑀮𑁆𑀬𑀁 𑀢𑀩𑁆𑀩𑀤𑀦𑀫𑁆𑀩𑀼𑀚𑁂𑀦 𑀮𑀤𑁆𑀥𑀼𑀁

𑀆𑀬𑀦𑁆𑀢𑀁 𑀭𑀯𑀺𑀭𑀁𑀲𑀺𑀲𑀗𑁆𑀕𑀫𑁂𑀦,

𑀳𑀁𑀲𑀲𑁆𑀲𑁂𑀡𑀺 𑀲𑀭𑁄𑀚𑀓𑁄𑀲𑀭𑀸𑀲𑀺𑀁

𑀲𑀁𑀤𑀽𑀲𑁂𑀲𑀺 𑀆𑀯𑀸𑀭𑀺𑀬𑁄 𑀳𑀺 𑀧𑀸𑀓𑁄; ()

𑁨𑁪.

𑀢𑀻𑀭𑁂 𑀲𑀸𑀭𑀲𑀘𑀓𑁆𑀓𑀯𑀸𑀓𑀧𑀓𑁆𑀔𑀻

𑀲𑁄𑀲𑀸𑀬’𑀲𑁆𑀲𑀯𑀺𑀲𑀸𑀭𑀺𑀢𑀁’𑀲𑀧𑀓𑁆𑀔𑀸,

𑀕𑀫𑁆𑀪𑀻𑀭𑀫𑁆𑀪𑀲𑀺 𑀫𑀢𑁆𑀢𑀫𑀸𑀳𑀭𑀺𑀁𑀲𑀼

𑀫𑀜𑁆𑀜𑁂 𑀦𑀺𑀓𑁆𑀓𑀭𑀼𑀡𑀸𑀬 𑀏𑀢𑁆𑀢𑀓𑀦𑁆𑀢𑀻; ()

𑁨𑁫. ¶

𑀢𑀼𑀡𑁆𑀟𑁂 𑀫𑀡𑁆𑀟𑀺𑀢𑀧𑀼𑀡𑁆𑀟𑀭𑀻𑀓𑀤𑀡𑁆𑀟𑁄

𑀧𑀓𑁆𑀔𑁂 𑀓𑁂𑀭𑀯𑀧𑀡𑁆𑀟𑀭𑁂 𑀧𑀲𑀸𑀭𑀻,

𑀦𑀸𑀣𑀲𑁆𑀲𑀼’𑀩𑁆𑀩𑀳𑀺 𑀫𑀢𑁆𑀢𑀳𑀁𑀲𑀭𑀸𑀚𑀸

𑀲𑁂𑀢𑀘𑁆𑀙𑀢𑁆𑀢𑀯𑀺𑀪𑀼𑀢𑀺𑀫𑀼𑀢𑁆𑀢𑀫𑀗𑁆𑀕𑁂; ()

𑁨𑁬.

𑀯𑀢𑁆𑀢𑀫𑁆𑀳𑁄𑀚𑀧𑀮𑁄𑀪𑀺𑀢𑀸𑀮𑀺𑀘𑀓𑁆𑀓𑀁

𑀘𑀓𑁆𑀔𑀯𑀸𑀧𑀸𑀣𑀕𑀢𑀁 𑀚𑀺𑀦𑀗𑁆𑀓𑀼𑀭𑀲𑁆𑀲,

𑀲𑀁𑀤𑀲𑁆𑀲𑁂𑀲𑀺 𑀧𑀥𑀸𑀦𑀪𑀼𑀞𑀺𑀢𑀲𑁆𑀲

𑀦𑀺𑀮𑀲𑁆𑀫𑀺𑀁 𑀓𑀲𑀺𑀡𑀫𑁆𑀳𑀺 𑀪𑀽𑀢𑀺𑀪𑀸𑀭𑀁; ()

𑁨𑁭.

𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀸𑀭𑀺𑀯𑀸𑀧𑀕𑀸𑀬𑀁

𑀲𑁂𑀯𑀸𑀮𑀸𑀤𑀺𑀫𑀮𑀸𑀧𑀦𑁂𑀦 𑀫𑀻𑀦𑀸,

𑀧𑀸𑀤𑀜𑁆𑀘𑀦𑁆𑀤𑀕𑀫𑀻𑀦𑀮𑀓𑁆𑀔𑀡𑀲𑁆𑀲

𑀢𑀲𑁆𑀲’𑀕𑁆𑀕𑁂 𑀯𑀺𑀫𑀮𑀺𑀓𑀭𑀺𑀁𑀲𑀼 𑀯𑀸𑀭𑀺𑀁; ()

𑁨𑁮. ¶

𑀉𑀢𑁆𑀢𑀺𑀡𑁆𑀡𑀲𑁆𑀲 𑀯𑀺𑀲𑀸𑀮𑀲𑀸𑀴𑀲𑀸𑀔𑀻-

𑀲𑀸𑀔𑀸𑀳𑀢𑁆𑀣𑀧𑀼𑀝𑁂𑀳𑀺 𑀧𑀼𑀜𑁆𑀓𑁆𑀦𑀸𑀬,

𑀕𑀢𑁆𑀢𑀁 𑀫𑀦𑁆𑀤𑀲𑀼𑀕𑀦𑁆𑀥𑀕𑀦𑁆𑀥𑀯𑀸𑀳-

𑀯𑀢𑁆𑀣𑀁 𑀲𑀸𑀴𑀯𑀦𑀗𑁆𑀕𑀦𑀸 𑀅𑀤𑀸𑀲𑀺; ()

𑁨𑁯.

𑀮𑁄𑀓𑀺𑀦𑁆𑀤𑁄 𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀢𑁆𑀣𑁄

𑀙𑀸𑀤𑁂𑀢𑁆𑀯𑀸𑀦 𑀢𑀺𑀫𑀡𑁆𑀟𑀮’𑀦𑁆𑀢𑀭𑀺𑀬𑀁,

𑀩𑀦𑁆𑀥𑀺𑀢𑁆𑀯𑁄𑀧𑀭𑀺 𑀓𑀸𑀬𑀩𑀦𑁆𑀥𑀦𑀫𑁆𑀧𑀺

𑀓𑀸𑀲𑀸𑀯𑀁 𑀧𑀭𑀺𑀥𑀸𑀬𑀺 𑀧𑀁𑀲𑀼𑀓𑀽𑀮𑀁; ()

𑁩𑁦.

𑀧𑀸𑀬𑀸𑀲𑀲𑁆𑀲 𑀦𑀺𑀭𑀽𑀤𑀓𑀲𑁆𑀲 𑀊𑀦-

𑀧𑀜𑁆𑀜𑀸𑀲𑀧𑁆𑀧𑀫𑀺𑀢𑁂 𑀯𑀺𑀥𑀸𑀬 𑀧𑀺𑀡𑁆𑀟𑁂,

𑀧𑀸𑀘𑀻𑀦𑀸𑀪𑀺𑀫𑀼𑀔𑁄 𑀦𑀺𑀲𑀚𑁆𑀚 𑀦𑀚𑁆𑀚𑀸

𑀢𑀻𑀭𑁂 𑀢𑀸𑀬 𑀅𑀓𑀸𑀲𑀺 𑀪𑀢𑁆𑀢𑀓𑀺𑀘𑁆𑀘𑀁; ()

𑁩𑁧. ¶

𑀧𑀸𑀬𑀸𑀲𑁄 𑀫𑀥𑀼𑀭𑁄’𑀬𑀫𑀲𑁆𑀲 𑀲𑀢𑁆𑀢-

𑀲𑀢𑁆𑀢𑀸𑀳𑀁 𑀧𑀝𑀺𑀯𑀺𑀤𑁆𑀥𑀩𑁄𑀥𑀺𑀦𑁄 𑀳𑀺,

𑀑𑀚𑀸𑀲𑀫𑀨𑀭𑀡𑀸𑀬 𑀞𑀸𑀦𑀫𑀸𑀲𑀺

𑀢𑀲𑁆𑀫𑀸 𑀲𑁄 𑀧𑀯𑀺𑀳𑀸𑀲𑀺 𑀦𑀺𑀩𑁆𑀩𑀺𑀳𑁂𑀲𑀁; ()

𑁩𑁨.

𑀩𑀼𑀚𑁆𑀛𑁂𑀬𑁆𑀬𑀁 𑀬𑀤𑀺 𑀩𑁄𑀥𑀺𑀫𑀚𑁆𑀚 𑀲𑁄𑀳𑀁

𑀉𑀤𑁆𑀥𑀁𑀲𑁄𑀢𑀫𑀬𑀁 𑀲𑀼𑀯𑀡𑁆𑀡𑀧𑀸𑀢𑀺,

𑀕𑀗𑁆𑀕𑀸𑀬𑀁 𑀔𑀺𑀧𑀓𑀺 𑀕𑀘𑁆𑀙𑀢𑀽𑀢𑀺 𑀯𑀢𑁆𑀯𑀸

𑀥𑀻𑀫𑀸 𑀤𑀓𑁆𑀔𑀺𑀡𑀳𑀢𑁆𑀣𑀕𑀁 𑀢𑀫𑀕𑁆𑀖𑀁; ()

𑁩𑁩.

𑀲𑁄𑀢𑀁 𑀪𑀺𑀦𑁆𑀤𑀺𑀬 𑀲𑀸 𑀲𑀯𑀦𑁆𑀢𑀺𑀫𑀚𑁆𑀛𑁂

𑀞𑀢𑁆𑀯𑀸 𑀧𑀸𑀢𑀺 𑀬𑀢𑁄 𑀅𑀲𑀻𑀢𑀺𑀳𑀢𑁆𑀣𑀁,

𑀉𑀤𑁆𑀥𑀁𑀲𑁄𑀢𑀫𑀼𑀧𑁂𑀘𑁆𑀘 𑀲𑀦𑁆𑀦𑀺𑀫𑀼𑀚𑁆𑀚𑀺

𑀢𑀲𑁆𑀫𑀸 𑀲𑁄’𑀧𑀺 𑀦𑀺𑀫𑀼𑀚𑁆𑀚𑀺 𑀧𑀻𑀢𑀺𑀦𑀚𑁆𑀚𑀁; ()

𑁩𑁪.

𑀦𑀸𑀕𑀸𑀦𑀁 𑀪𑀯𑀦𑀁 𑀉𑀧𑁂𑀘𑁆𑀘 𑀢𑀺𑀡𑁆𑀡𑀁

𑀩𑀼𑀤𑁆𑀥𑀸𑀦𑀁 𑀧𑀦𑀺𑀫𑀫𑁆𑀳𑀺 𑀪𑀤𑁆𑀤𑀓𑀧𑁆𑀧𑁂,

𑀲𑀸𑀧𑀸𑀢𑀺𑀧𑀭𑀺𑀪𑀼𑀢𑁆𑀢𑀲𑁄𑀡𑁆𑀡𑀧𑀸𑀢𑀺

𑀖𑀝𑁆𑀝𑁂𑀢𑁆𑀯𑀸𑀦 𑀞𑀺𑀢𑀸 𑀓𑀢𑀸𑀦𑀼𑀭𑀸𑀯𑀸; ()

𑁩𑁫.

𑀢𑀁 𑀤𑀻𑀖𑀸𑀬𑀼𑀓𑀓𑀸𑀮𑀦𑀸𑀕𑀭𑀸𑀚𑀸

𑀲𑀼𑀢𑁆𑀯𑀸 𑀲𑀤𑁆𑀤𑀫𑀣𑀚𑁆𑀚𑀧𑁂’𑀓𑀩𑀼𑀤𑁆𑀥𑁄,

𑀉𑀧𑁆𑀧𑀦𑁆𑀦𑁄𑀢𑀺 𑀚𑀺𑀦𑀁 𑀅𑀪𑀺𑀢𑁆𑀣𑀯𑀦𑁆𑀢𑁄

𑀅𑀝𑁆𑀞𑀸𑀲𑀺 𑀣𑀼𑀢𑀺𑀕𑀻𑀢𑀺𑀓𑀸𑀲𑀢𑁂𑀳𑀺; ()

𑁩𑁬.

𑀙𑀸𑀬𑀸𑀩𑀤𑁆𑀥𑀯𑀺𑀲𑀸𑀮𑀲𑀸𑀴𑀲𑀸𑀮𑀁

𑀧𑀢𑁆𑀯𑀸𑀲𑀸𑀴𑀯𑀦𑀁 𑀦𑀤𑀻𑀲𑀫𑀻𑀧𑁂,

𑀆𑀚𑀻𑀯𑀝𑁆𑀞𑀫𑀲𑀻𑀮𑀲𑀁𑀯𑀭𑁂𑀦

𑀆𑀤𑁄𑀬𑁂𑀯 𑀯𑀺𑀲𑀼𑀤𑁆𑀥𑀓𑀸𑀬𑀯𑀸𑀘𑁄; ()

𑁩𑁭.

𑀓𑀢𑁆𑀯𑀸𑀝𑁆𑀞𑀸𑀭𑀲𑀧𑀺𑀝𑁆𑀞𑀺𑀓𑀡𑁆𑀝𑀓𑀸𑀦𑀁

𑀓𑁄𑀝𑀻𑀦𑀁𑀧𑀝𑀺𑀧𑀸𑀤𑀦𑀁 𑀓𑀫𑁂𑀦,

𑀧𑀮𑁆𑀮𑀗𑁆𑀓𑀲𑁆𑀲𑀦𑀺𑀲𑀚𑁆𑀚𑀩𑀦𑁆𑀥𑀦𑁂𑀦

𑀓𑀫𑁆𑀫𑀝𑁆𑀞𑀸𑀦𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸; ()

𑁩𑁮. ¶

𑀆𑀦𑀸𑀧𑀸𑀦𑀲𑀢𑀺𑀁𑀧𑀭𑀺𑀕𑁆𑀕𑀳𑁂𑀢𑁆𑀯𑀸

𑀦𑀺𑀩𑁆𑀩𑀢𑁆𑀢𑁂𑀲𑀺𑀫𑀮𑀕𑁆𑀕𑀳𑀻𑀢𑀧𑀼𑀩𑁆𑀩𑁂,

𑀭𑀽𑀧𑀸𑀭𑀽𑀧𑀲𑀫𑀸𑀥𑀬𑁄’𑀝𑁆𑀞𑀧𑀜𑁆𑀘𑀸-

𑀪𑀺𑀜𑁆𑀜𑀸𑀬𑁄 𑀯𑀲𑀺𑀢𑀸𑀘 𑀲𑁄 𑀯𑀲𑀻𑀲𑁄 ()

𑁩𑁯.

𑀛𑀸𑀦𑀲𑁆𑀲𑀸𑀤𑀭𑀢𑁄 𑀤𑀺𑀯𑀸𑀯𑀺𑀳𑀸𑀭𑀁

𑀓𑀢𑁆𑀯𑀸 𑀲𑀸𑀴𑀯𑀦𑁂 𑀲𑀼𑀭𑀸𑀲𑀼𑀭𑁂𑀳𑀺,

𑀥𑀻𑀭𑁄 𑀫𑀕𑁆𑀕𑀫𑀮𑀗𑁆𑀓𑀢𑀁 𑀓𑀭𑀻𑀯

𑀕𑀦𑁆𑀢𑀼𑀁 𑀑𑀢𑀭𑀺𑀬𑀢𑁆𑀭𑀩𑁄𑀥𑀺𑀫𑀽𑀮𑀁; ()

𑁪𑁦.

𑀮𑀸𑀚𑀸𑀤𑀻𑀓𑀼𑀲𑀼𑀫𑁂𑀳𑀺𑀯𑀺𑀧𑁆𑀧𑀓𑀺𑀡𑁆𑀡𑁄

𑀫𑀼𑀢𑁆𑀢𑀸𑀧𑀡𑁆𑀟𑀭𑀯𑀸𑀴𑀼𑀓𑀸𑀢𑁆𑀣𑀢𑁄 𑀲𑁄,

𑀫𑀕𑁆𑀕𑁄 𑀢𑀼𑀗𑁆𑀕𑀢𑀭𑀗𑁆𑀕 𑀪𑀗𑁆𑀕𑀳𑀸𑀭𑀺

𑀮𑀓𑁆𑀔𑀻𑀯𑀸𑀲𑀧𑀬𑁄𑀤𑀥𑀻𑀭𑀺’𑀯𑀸’𑀲𑀺; ()

𑁪𑁧. ¶

𑀫𑀚𑁆𑀛𑀸’𑀭𑁄𑀧𑀺𑀢𑀧𑀗𑁆𑀓𑀚𑀸𑀪𑀺𑀭𑀸𑀫𑀁

𑀫𑀼𑀢𑁆𑀢𑀸𑀤𑀸𑀫𑀲𑀫𑀸𑀓𑀼𑀮𑀁 𑀲𑀫𑀦𑁆𑀢𑀸,

𑀓𑀡𑁆𑀡𑁄𑀮𑀫𑁆𑀩𑀲𑀼𑀯𑀡𑁆𑀡𑀖𑀡𑁆𑀝𑀫𑀲𑁆𑀲

𑀤𑁂𑀝𑀸 𑀤𑀺𑀩𑁆𑀩𑀯𑀺𑀢𑀸𑀦 𑀫𑀼𑀓𑁆𑀔𑀺𑀧𑀺𑀁𑀲𑀼; ()

𑁪𑁨.

𑀮𑁄𑀓𑀢𑁆𑀣𑀁 𑀓𑀭𑀡𑀸𑀬 𑀘𑁄𑀤𑀺𑀢𑀲𑁆𑀫𑀺𑀁

𑀢𑀲𑁆𑀫𑀺𑀁 𑀮𑁄𑀓𑀤𑀺𑀯𑀸𑀓𑀭𑁂’𑀓𑀯𑀻𑀭𑁂,

𑀕𑀘𑁆𑀙𑀦𑁆𑀢𑁂 𑀲𑀳𑀚𑀸𑀢𑀩𑁄𑀥𑀺𑀫𑀽𑀮𑀁

𑀆𑀮𑁄𑀓𑁄 𑀉𑀤𑀧𑀸𑀤𑀺 𑀲𑀩𑁆𑀩𑀮𑁄𑀓𑁂; ()

𑁪𑁩.

𑀆𑀬𑀦𑁆𑀢𑀁 𑀢𑀺𑀡𑁆𑀳𑀸𑀭𑀓𑁄 𑀧𑀣𑀫𑁆𑀳𑀺

𑀤𑀺𑀲𑁆𑀯𑀸 𑀲𑁄𑀢𑁆𑀣𑀺𑀬𑀦𑀸𑀫𑀪𑀽𑀲𑀼𑀭𑁄 𑀢𑀁,

𑀧𑀸𑀤𑀸𑀲𑀺 𑀢𑀺𑀡𑀫𑀼𑀝𑁆𑀞𑀺𑀬𑁄’𑀝𑁆𑀞𑀫𑀢𑁆𑀢𑀸

𑀦𑀸𑀣𑁄 𑀢𑀸𑀦𑀺 𑀢𑀺𑀡𑀸𑀦𑀺 𑀲𑀫𑁆𑀧𑀝𑀺𑀘𑁆𑀙𑀺; ()

𑁪𑁪. ¶

𑀯𑀢𑁆𑀢𑀢𑁆𑀢𑁂 𑀯𑀭𑀧𑀸𑀝𑀺𑀳𑀸𑀭𑀺𑀬𑀫𑁆𑀳𑀺

𑀫𑀕𑁆𑀕𑁂 𑀕𑀦𑁆𑀥𑀕𑀚𑁄’𑀘 𑀚𑀫𑁆𑀳𑀫𑀸𑀦𑁄,

𑀲𑀫𑁆𑀧𑀢𑁆𑀢𑁄 𑀓𑀭𑀼𑀡𑀸𑀓𑀮𑀢𑁆𑀢𑀪𑀢𑁆𑀢𑀸

𑀲𑀫𑁆𑀩𑁄𑀥𑀸𑀥𑀺𑀕𑀫𑀸𑀬 𑀩𑁄𑀥𑀺𑀫𑀽𑀮𑀁; ()

𑁪𑁫.

𑀢𑀲𑁆𑀲𑁄𑀲𑀻𑀤𑀞𑀺𑀢𑀁’𑀯 𑀘𑀓𑁆𑀓𑀯𑀸𑀴𑀁

𑀳𑁂𑀝𑁆𑀞𑀸 𑀤𑀓𑁆𑀔𑀺𑀡𑀢𑁄’𑀢𑁆𑀢𑀭𑀸𑀦𑀦𑀲𑁆𑀲,

𑀧𑀜𑁆𑀜𑀸𑀬𑀼’𑀢𑁆𑀢𑀭𑀘𑀓𑁆𑀓𑀯𑀸𑀴𑀫𑀼𑀤𑁆𑀥𑀁

𑀮𑀗𑁆𑀖𑀺𑀢𑁆𑀯𑀸𑀦𑀞𑀺𑀢𑀁’𑀯 𑀆𑀪𑀯𑀕𑁆𑀕𑀁; ()

𑁪𑁬.

𑀏𑀯𑀁 𑀧𑀘𑁆𑀙𑀺𑀫𑀫𑀼𑀢𑁆𑀢𑀭𑀁 𑀤𑀺𑀲𑀫𑁆𑀧𑀺

𑀅𑀝𑁆𑀞𑀸𑀦𑀦𑁆𑀢𑀺 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄,

𑀕𑀦𑁆𑀢𑁆𑀯𑀸 𑀞𑀸𑀦𑀯𑀭𑀁 𑀧𑀼𑀭𑀢𑁆𑀣𑀺𑀫𑀲𑁆𑀫𑀺𑀁

𑀅𑀝𑁆𑀞𑀸𑀲𑀺 𑀯𑀲𑀺 𑀧𑀘𑁆𑀙𑀺𑀫𑀸𑀦𑀦𑁄 𑀲𑁄; ()

𑁪𑁭. ¶

𑀥𑀻𑀫𑀸 𑀤𑀓𑁆𑀔𑀺𑀡𑀧𑀸𑀡𑀺𑀧𑀮𑁆𑀮𑀯𑁂𑀦

𑀅𑀕𑁆𑀕𑁂 𑀢𑀸𑀦𑀺 𑀢𑀺𑀡𑀸𑀦𑀺 𑀲𑀢𑁆𑀣𑀭𑀻 𑀲𑁄,

𑀢𑀫𑁆𑀳𑀸 𑀘𑀼𑀤𑁆𑀤𑀲𑀳𑀢𑁆𑀣𑀫𑀼𑀧𑁆𑀧𑀢𑀺𑀢𑁆𑀯𑀸

𑀧𑀮𑁆𑀮𑀗𑁆𑀓𑁄 𑀲𑀫𑀮𑀗𑁆𑀓𑀭𑀻 𑀤𑀼𑀫𑀺𑀦𑁆𑀤𑀁; ()

𑁪𑁮.

𑀤𑀓𑁆𑀔𑁄 𑀓𑀸𑀭𑀼𑀧𑀯𑀻𑀡𑀘𑀺𑀢𑁆𑀢𑀓𑀸𑀭𑁄

𑀓𑀸𑀢𑀼𑀁 𑀯𑀸’𑀮𑀺𑀔𑀺𑀢𑀼𑀁 𑀬𑀣𑀸𑀦𑀲𑀓𑁆𑀓𑀸,

𑀅𑀝𑁆𑀞𑀁𑀲𑀼 𑀳𑀭𑀺𑀢𑀸𑀦𑀺 𑀲𑀦𑁆𑀣𑀢𑀸𑀦𑀺

𑀏𑀯𑀁 𑀢𑀸𑀦𑀺 𑀢𑀺𑀡𑀸𑀦𑀺 𑀉𑀧𑁆𑀧𑀢𑀺𑀢𑁆𑀯𑀸; ()

𑁪𑁯.

𑀫𑀁𑀲𑀸𑀤𑀻 𑀉𑀧𑀲𑀼𑀲𑁆𑀲𑀭𑁂 𑀦𑀳𑀸𑀭𑀽

𑀅𑀝𑁆𑀞𑀻𑀘𑁂𑀧𑁆𑀬𑀯𑀲𑀺𑀲𑁆𑀲𑀭𑁂 𑀲𑀭𑀻𑀭𑁂;

𑀫𑀼𑀜𑁆𑀘𑁂𑀬𑁆𑀬𑀁 𑀘𑀢𑀼𑀭𑀸𑀲𑀯𑁂𑀳𑀺 𑀬𑀸𑀯

𑀪𑀺𑀦𑁆𑀤𑀺𑀲𑁆𑀲𑀸𑀫𑀺 𑀦𑀢𑀸𑀯𑀺𑀫𑀁 𑀅𑀳𑀦𑁆𑀢𑀺; ()

𑁫𑁦. ¶

𑀤𑀴𑁆𑀳𑀁 𑀘𑀺𑀦𑁆𑀢𑀺𑀬 𑀤𑀴𑁆𑀳𑀫𑀸𑀦𑀲𑁄 𑀲𑁄

𑀧𑀸𑀘𑀻𑀦𑀸𑀪𑀺𑀫𑀼𑀔𑁄 𑀤𑀼𑀫𑀺𑀦𑁆𑀤𑀩𑀦𑁆𑀥𑀁;

𑀓𑀢𑁆𑀯𑀸 𑀧𑀺𑀝𑁆𑀞𑀺𑀕𑀢𑀁 𑀦𑀺𑀲𑀻𑀤𑀺 𑀩𑁄𑀥𑀺-

𑀧𑀮𑁆𑀮𑀗𑁆𑀓𑀫𑁆𑀳𑀺 𑀬𑀼𑀕𑀦𑁆𑀥𑀭𑁂 𑀭𑀯𑀻’𑀯; ()

𑁫𑁧.

𑀮𑁄𑀓𑁂𑀲𑁄 𑀲𑀲𑀺𑀫𑀡𑁆𑀟𑀮𑀸𑀯𑀪𑀸𑀲𑀁

𑀲𑁂𑀢𑀘𑁆𑀙𑀢𑁆𑀢𑀫𑀥𑀸𑀭𑀬𑀻 𑀢𑀤𑀜𑁆𑀜𑁂,

𑀲𑀼𑀤𑁆𑀥𑀸𑀯𑀸𑀲𑀢𑀮𑀝𑁆𑀞𑀤𑁂𑀯𑀢𑀸 𑀢𑀁

𑀧𑀽𑀚𑁂𑀲𑀼𑀁 𑀫𑀓𑀼𑀝𑀧𑁆𑀧𑀺𑀢𑀜𑁆𑀚𑀮𑀻𑀳𑀺; ()

𑁫𑁨.

𑀬𑁂 𑀭𑀽𑀧𑀸𑀯𑀘𑀭𑁂 𑀯𑀲𑀦𑁆𑀢𑀺 𑀤𑁂𑀯𑀸

𑀢𑁂 𑀘’𑀜𑁆𑀜𑀢𑁆𑀭 𑀅𑀲𑀜𑁆𑀜𑀲𑀢𑁆𑀢𑀤𑁂𑀯𑁂,

𑀲𑀫𑁆𑀧𑀢𑁆𑀯𑀸 𑀯𑀚𑀺𑀭𑀸𑀲𑀦𑁂 𑀦𑀺𑀲𑀺𑀦𑁆𑀦𑀁

𑀧𑀽𑀚𑁂𑀲𑀼𑀁 𑀓𑀼𑀲𑀼𑀫𑀸𑀓𑀼𑀮𑀜𑁆𑀚𑀮𑀻𑀳𑀺 ()

𑁫𑁩. ¶

𑀏𑀓𑀘𑁆𑀘𑁂 𑀧𑀭𑀦𑀺𑀫𑁆𑀫𑀺𑀢𑀸𑀤𑀺𑀮𑁄𑀓𑀸

𑀧𑀢𑁆𑀯𑀸 𑀪𑀢𑁆𑀢𑀺𑀪𑀭𑀸’𑀫𑀭𑀸 𑀫𑀳𑀺𑀁𑀲𑀼,

𑀧𑀽𑀚𑀸𑀪𑀡𑁆𑀟𑀲𑀫𑀸𑀪𑀺𑀓𑀺𑀡𑁆𑀡𑀳𑀢𑁆𑀣𑀸

𑀫𑀸𑀭𑀸𑀭𑀺𑀁 𑀢𑀳𑀺𑀫𑀸𑀧 𑀧𑀸𑀧𑀺𑀫𑀸 𑀓𑀺𑀁; ()

𑁫𑁪.

𑀬𑁂 𑀦𑀺𑀫𑁆𑀫𑀸𑀡𑀭𑀢𑀺𑀫𑁆𑀳𑀺 𑀦𑀺𑀚𑁆𑀚𑀭𑀸 𑀢𑁂;

𑀧𑀢𑁆𑀯𑀸 𑀕𑀦𑁆𑀥𑀓𑀭𑀡𑁆𑀟𑀫𑀡𑁆𑀟𑀮𑁂𑀳𑀺,

𑀲𑀫𑁆𑀧𑀽𑀚𑁂𑀲𑀼𑀫𑀮𑀗𑁆𑀓𑀢𑀗𑁆𑀖𑀺𑀧𑀻𑀞𑀁

𑀦𑀁 𑀲𑁂𑀝𑁆𑀞𑀁 𑀯𑀺𑀚𑀬𑀸𑀲𑀦𑁄𑀧𑀯𑀺𑀝𑁆𑀞𑀁; ()

𑁫𑁫.

𑀅𑀝𑁆𑀞𑀸𑀲𑀺 𑀢𑀼𑀲𑀺𑀢𑀸𑀮𑀬𑀸 𑀲𑀲𑁂𑀦𑁄

𑀧𑀢𑁆𑀯𑀸 𑀲𑀦𑁆𑀢𑀼𑀲𑀺𑀢𑀯𑁆𑀳𑀤𑁂𑀯𑀭𑀸𑀚𑀸,

𑀯𑀺𑀚𑁂𑀦𑁆𑀢𑁄 𑀳𑀭𑀺𑀫𑁄𑀭 𑀧𑀺𑀜𑁆𑀙𑀧𑀼𑀜𑁆𑀚-

𑀲𑁄𑀪𑀁 𑀓𑀜𑁆𑀘𑀦𑀢𑀸𑀮𑀯𑀡𑁆𑀝𑀧𑀦𑁆𑀢𑀺𑀁; ()

𑁫𑁬.

𑀧𑀢𑁆𑀯𑀸 𑀬𑀸𑀫𑀲𑀼𑀭𑀸𑀮𑀬𑀸 𑀲𑀲𑁂𑀦𑁄

𑀲𑀁𑀯𑀺𑀚𑁂𑀲𑀺 𑀲𑀼𑀬𑀸𑀫 𑀤𑁂𑀯𑀭𑀸𑀚𑀸,

𑀥𑀻𑀭𑀁 𑀲𑁄𑀡𑁆𑀡𑀧𑀡𑀸𑀴𑀺𑀓𑀸𑀦𑀺𑀧𑀸𑀢-

𑀥𑀸𑀭𑀸𑀲𑀦𑁆𑀦𑀺𑀪𑀘𑀸𑀭𑀼𑀘𑀸𑀫𑀭𑁂𑀳𑀺; ()

𑁫𑁭. ¶

𑀤𑁂𑀯𑀺𑀦𑁆𑀤𑁄 𑀯𑀺𑀚𑀬𑀼𑀢𑁆𑀢𑀭𑀸𑀔𑁆𑀬𑀲𑀗𑁆𑀔𑀁

𑀯𑀻𑀲𑀁 𑀳𑀢𑁆𑀣𑀲𑀢𑀁 𑀥𑀫𑀻𑀢𑀤𑀜𑁆𑀜𑁂,

𑀧𑀽𑀚𑁂𑀲𑀼𑀁 𑀢𑀫𑀼𑀧𑁂𑀘𑁆𑀘 𑀓𑁄𑀯𑀺𑀴𑀸𑀭-

𑀧𑀼𑀧𑁆𑀨𑀸𑀤𑀻𑀳𑀺 𑀘 𑀢𑀸𑀯𑀢𑀺𑀁𑀲𑀤𑁂𑀯𑀸; ()

𑁫𑁮.

𑀬𑀓𑁆𑀔𑀸𑀤𑀻𑀳𑀺 𑀧𑀼𑀭𑀓𑁆𑀔𑀢𑀸’𑀧𑀺 𑀤𑁂𑀯-

𑀭𑀸𑀚𑀸𑀦𑁄 𑀘𑀢𑀼𑀭𑁄 𑀘𑀢𑀼𑀤𑁆𑀤𑀺𑀲𑀸𑀲𑀼,

𑀭𑀓𑁆𑀔𑀁 𑀲𑀁𑀯𑀺𑀤𑀳𑀺𑀁𑀲𑀼 𑀤𑁂𑀯𑀮𑁄𑀓𑀸

𑀢𑀁 𑀧𑀢𑁆𑀯𑀸𑀦 𑀯𑀺𑀦𑀝𑁆𑀞𑀮𑁄𑀫𑀳𑀝𑁆𑀞𑀁; ()

𑁫𑁯.

𑀯𑀸𑀤𑁂𑀦𑁆𑀢𑁄 𑀲𑀭𑀫𑀡𑁆𑀟𑀮𑀁 𑀯𑀺𑀥𑀸𑀬

𑀯𑀻𑀡𑀁 𑀧𑀜𑁆𑀘𑀲𑀺𑀔𑁄’𑀧𑀺 𑀩𑁂𑀴𑀼𑀯𑀸𑀔𑁆𑀬𑀁,

𑀢𑀁 𑀲𑀫𑁆𑀧𑀽𑀚𑀬𑀺 𑀓𑀸𑀮𑀦𑀸𑀕𑀭𑀸𑀚𑀸

𑀣𑁄𑀫𑁂𑀦𑁆𑀢𑁄 𑀣𑀼𑀢𑀺𑀕𑀻𑀢𑀺𑀓𑀸𑀲𑀢𑁂𑀳𑀺; ()

𑁬𑁦. ¶

𑀏𑀯𑀁 𑀓𑀸𑀳𑀴𑀪𑁂𑀭𑀺𑀲𑀗𑁆𑀔𑀯𑀻𑀡𑀸-

𑀖𑀡𑁆𑀝𑀸𑀯𑀻𑀚𑀦𑀺𑀙𑀢𑁆𑀢𑀘𑀸𑀫𑀭𑁂𑀳𑀺,

𑀦𑀘𑁆𑀘𑀸𑀤𑀻𑀳𑀺𑀘𑀮𑀸𑀚𑀧𑀜𑁆𑀘𑀫𑁂𑀳𑀺

𑀤𑀻𑀧𑀤𑁆𑀥𑀼𑀧𑀥𑀚𑁂𑀳𑀺 𑀫𑀸𑀦𑀬𑀼𑀁 𑀢𑀁; ()

𑁬𑁧.

𑀲𑀺𑀤𑁆𑀥𑀢𑁆𑀣𑁄 𑀧𑀝𑀺𑀲𑀺𑀤𑁆𑀥𑀫𑀸𑀭𑀥𑁂𑀬𑁆𑀬𑁄

𑀓𑀢𑁆𑀢𑀼𑀁 𑀅𑀢𑁆𑀢𑀯𑀲𑁂 𑀲𑀤𑁂𑀯𑀮𑁄𑀓𑀁,

𑀲𑀼𑀢𑁆𑀯𑀸 𑀯𑀸𑀬𑀫𑀢𑀻𑀢𑀺 𑀩𑁄𑀥𑀺𑀫𑀡𑁆𑀟𑁂

𑀫𑀸𑀭𑁄 𑀢𑀢𑁆𑀭 𑀲𑀫𑀸𑀭𑀪𑀺𑀢𑁆𑀣𑀕𑀦𑁆𑀢𑀼𑀁; ()

𑁬𑁨.

𑀢𑀲𑁆𑀫𑀺𑀁 𑀔𑁄 𑀲𑀫𑀬𑁂 𑀪𑀬𑀸𑀯𑀳𑀸𑀦𑀺

𑀫𑀸𑀭𑀲𑁆𑀲𑁄’𑀢𑀭𑀡𑀸𑀬 𑀓𑀸𑀭𑀡𑀸𑀦𑀺,

𑀘𑀓𑁆𑀔𑀘𑀸𑀧𑀸𑀣𑀕𑀢𑀸𑀦𑀺 𑀤𑀼𑀦𑁆𑀦𑀺𑀫𑀺𑀢𑁆𑀢-

𑀭𑀽𑀧𑀸𑀤𑀻𑀦𑀺 𑀢𑀺𑀮𑁄𑀓𑀮𑁄𑀘𑀦𑀲𑁆𑀲; ()

𑁬𑁩. ¶

𑀲𑀼𑀓𑁆𑀔’𑀫𑁆𑀳𑁄𑀥𑀭𑀭𑀸𑀯𑀪𑁂𑀭𑀺𑀭𑀸𑀯-

𑀯𑀺𑀧𑁆𑀨𑀸𑀭𑀸𑀩𑀥𑀺𑀭𑀻𑀓𑀢𑀫𑁆𑀩𑀭𑀫𑁆𑀧𑀺,

𑀪𑀻𑀫𑀁 𑀯𑀺𑀚𑁆𑀚𑀼𑀮𑀢𑀸’𑀲𑀺𑀖𑀝𑁆𑀝𑀡𑁂𑀳𑀺

𑀫𑀸𑀭𑀲𑁆𑀲𑀸’𑀳𑀯𑀫𑁆𑀩𑁆𑀟𑀮𑀸𑀪𑀫𑀸𑀳; ()

𑁬𑁪.

𑀫𑀸𑀭𑀲𑁆𑀲𑀸’𑀕𑀫𑀦𑀜𑁆𑀚𑀲𑁂 𑀭𑀚𑁄𑀯

𑀯𑀸𑀚𑀻𑀦𑀁 𑀔𑀼𑀭𑀖𑀝𑁆𑀝𑀡𑁂𑀦 𑀚𑀸𑀢𑁄,

𑀉𑀓𑁆𑀓𑀸𑀧𑀸𑀢𑀲𑀢𑀁 𑀚𑀦𑁂𑀲𑀺 𑀢𑀲𑁆𑀲

𑀘𑀓𑁆𑀔𑀯𑀸𑀦𑀺𑀝𑁆𑀞𑀨𑀔𑀮𑀁 𑀤𑀺𑀲𑀸𑀲𑀼 𑀟𑀸𑀳𑁄; ()

𑁬𑁫.

𑀯𑁂𑀳𑀸𑀲𑁂 𑀯𑀺𑀘𑀭𑀼𑀁 𑀓𑀩𑀦𑁆𑀥𑀭𑀽𑀧𑀸

𑀓𑀸𑀓𑁄𑀮𑀸 𑀩𑀮𑀺𑀧𑀼𑀝𑁆𑀞𑀯𑀸𑀬𑀲𑀸𑀭𑀻,

𑀉𑀦𑁆𑀦𑀸𑀤𑀺𑀁𑀲𑀼 𑀔𑀭𑀸𑀦𑀺𑀮𑁄 𑀧𑀯𑀸𑀬𑀻

𑀅𑀩𑁆𑀪𑀼𑀝𑁆𑀞𑀸𑀲𑀺 𑀭𑀚𑁄 𑀤𑀺𑀲𑀸𑀲𑀼 𑀥𑀽𑀫𑁄; ()

𑁬𑁬.

𑀆𑀮𑁄𑀓𑁄 𑀯𑀺𑀕𑀢𑁄 𑀖𑀡𑀦𑁆𑀥𑀓𑀸𑀭𑁄

𑀑𑀢𑀺𑀡𑁆𑀡𑁄 𑀫𑀳𑀺𑀓𑀸𑀲𑀫𑀸𑀪𑀺𑀓𑀺𑀡𑁆𑀡𑁄,

𑀆𑀓𑀸𑀲𑁄 𑀧𑀣𑀯𑀺 𑀪𑀽𑀲𑀁 𑀧𑀓𑀫𑁆𑀧𑀺

𑀫𑁂𑀖𑀘𑁆𑀙𑀦𑁆𑀦𑀤𑀺𑀦𑀁 𑀤𑀺𑀦𑀁 𑀩𑀪𑀽𑀯; ()

𑁬𑁭. ¶

𑀲𑀺𑀤𑁆𑀥𑀢𑁆𑀣𑀜𑁆𑀳𑀺 𑀅𑀲𑀺𑀤𑁆𑀥𑀫𑀢𑁆𑀣𑀫𑁂𑀢𑀁

𑀓𑀸𑀢𑀼𑀁 𑀅𑀲𑁆𑀲𑀯𑀫𑀸𑀭𑀓𑀺𑀗𑁆𑀓𑀭𑀸𑀫𑁂,

𑀯𑀢𑁆𑀯𑁂’𑀣𑀸’𑀢𑀺 𑀧𑀚𑀸𑀧𑀢𑀻 𑀲𑀲𑁂𑀦𑁄

𑀢𑀢𑁆𑀣𑁂𑀯’𑀦𑁆𑀢𑀭𑀥𑀸𑀬𑀺 𑀢𑀸𑀯𑀤𑁂𑀯; ()

𑁬𑁮.

𑀲𑀸 𑀲𑁂𑀢𑀸 𑀧𑀼𑀭𑀢𑁄 𑀧𑀚𑀸𑀧𑀢𑀺𑀲𑁆𑀲

𑀆𑀲𑀻 𑀩𑀸𑀭𑀲𑀬𑁄𑀚𑀦𑀁 𑀯𑀺𑀦𑀤𑁆𑀥𑀸,

𑀏𑀯𑀁 𑀤𑀓𑁆𑀔𑀺𑀡𑀯𑀸𑀫𑀦𑁄 𑀘 𑀮𑁄𑀓-

𑀥𑀸𑀢𑁆𑀯𑀦𑁆𑀢𑀸𑀯𑀥𑀻𑀫𑀸𑀲𑀺 𑀧𑀘𑁆𑀙𑀢𑁄’𑀧𑀺; ()

𑁬𑁯.

𑀉𑀤𑁆𑀥𑀁 𑀲𑀸 𑀦𑀯𑀬𑁄𑀚𑀦𑀧𑁆𑀧𑀫𑀸𑀡𑀸

𑀲𑀤𑁆𑀤𑁄 𑀪𑀽𑀫𑀺𑀯𑀺𑀤𑀸𑀭𑀡𑁄𑀭𑀺’𑀯𑀸 𑀲𑀺,

𑀲𑁄’𑀧𑀟𑁆𑀠𑀁 𑀲𑀢𑀬𑁄𑀚𑀦𑀁 𑀩𑀪𑀽𑀯

𑀉𑀘𑁆𑀘𑀁 𑀲𑁄 𑀕𑀺𑀭𑀺𑀫𑁂𑀔𑀮𑁄 𑀕𑀚𑀺𑀦𑁆𑀤𑁄; ()

𑁭𑁦. ¶

𑀦𑀸𑀳𑁂𑀲𑀼𑀁 𑀧𑀭𑀺𑀲𑀸𑀲𑀼 𑀦𑀺𑀫𑁆𑀫𑀺𑀢𑀸𑀲𑀼𑀁

𑀤𑁆𑀯𑁂𑀬𑁄𑀥𑀸 𑀲𑀤𑀺𑀲𑀸𑀬𑀼𑀥𑀸𑀤𑀥𑀸𑀦𑀸,

𑀢𑀩𑁆𑀬𑀸𑀲𑁂𑀦 𑀅𑀮𑀜𑁆𑀳𑀺 𑀮𑁄𑀫𑀳𑀁𑀲𑁄

𑀬𑀲𑁆𑀲𑀸’𑀦𑀼𑀲𑁆𑀲𑀭𑀡𑁂𑀦 𑀘𑁂 𑀲𑀺𑀬𑀸 𑀫𑁂; ()

𑁭𑁧.

𑀫𑀸𑀧𑁂𑀢𑁆𑀯𑀸 𑀲𑀳𑀲𑀸 𑀲𑀳𑀲𑁆𑀲𑀩𑀸𑀳𑀼𑀁

𑀕𑀡𑁆𑀳𑀺𑀢𑁆𑀯𑀸 𑀯𑀺𑀯𑀺𑀥𑀸𑀬𑀼𑀥𑀸𑀦𑀺 𑀢𑁂𑀳𑀺,

𑀆𑀭𑀽𑀴𑁆𑀳𑁄 𑀕𑀺𑀭𑀺𑀫𑁂𑀔𑀮𑀁 𑀲𑀲𑁂𑀦𑁄

𑀫𑀸𑀭𑁄 𑀧𑀸𑀢𑀼𑀭𑀳𑁄𑀲𑀺 𑀩𑀤𑁆𑀥𑀯𑁂𑀭𑁄; ()

𑁭𑁨.

𑀤𑁂𑀯𑁂𑀲𑁄 𑀬𑀲𑀲𑀸 𑀲𑀫𑀁 𑀲𑀓𑁂𑀦

𑀲𑁂𑀢𑀘𑁆𑀙𑀢𑁆𑀢 𑀫𑀕𑀜𑁆𑀙𑀺 𑀲𑀁𑀳𑀭𑀺𑀢𑁆𑀯𑀸,

𑀤𑁂𑀯𑁂𑀲𑁄 𑀬𑀲𑀲𑀸 𑀲𑀫𑀁 𑀲𑀓𑁂𑀦

𑀲𑀗𑀓𑁆𑀔𑀁 𑀧𑀺𑀝𑁆𑀞𑀺𑀕𑀢𑀁 𑀯𑀺𑀥𑀸𑀬 𑀥𑀸𑀯𑀻; () (𑀬𑀫𑀓𑀩𑀦𑁆𑀥𑀦𑀁)

𑁭𑁩. ¶

𑀲𑀗𑁆𑀓𑁄𑀘𑀸’𑀦𑀦𑀓𑀸𑀳𑀮𑁄 𑀚𑀕𑀸𑀫

𑀧𑀸𑀢𑀸𑀮𑀁 𑀔𑀮𑀼 𑀓𑀸𑀮𑀦𑀸𑀕𑀭𑀸𑀚𑀸,

𑀯𑀻𑀡𑀸𑀤𑁄𑀡𑀺𑀲𑀔𑁄 𑀲𑀔𑀸𑀦𑀧𑁂𑀔𑁄

𑀢𑀫𑁆𑀳𑀸 𑀧𑀜𑁆𑀘𑀲𑀺𑀔𑁄 𑀓𑀮𑀳𑀼𑀁 𑀧𑀮𑀸𑀬𑀺; ()

𑁭𑁪.

𑀤𑀺𑀲𑁆𑀯𑀸 𑀫𑀸𑀭𑀩𑀮𑀁 𑀲𑀫𑁄𑀲𑀭𑀦𑁆𑀢𑀁

𑀲𑀫𑁆𑀧𑀢𑁆𑀢𑀸 𑀚𑀦𑀢𑀸 𑀧𑀮𑀸𑀬𑀺 𑀪𑀻𑀢𑀸,

𑀲𑁄𑀲𑀻𑀳𑁄’𑀯 𑀯𑀺𑀳𑀸𑀲𑀺 𑀲𑀓𑁆𑀬𑀲𑀻𑀳𑁄

𑀏𑀓𑁄 𑀓𑀫𑀸𑀭𑀓𑀭𑀺𑀦𑁆𑀤𑀓𑀼𑀫𑁆𑀳𑀪𑁂𑀤𑀻; ()

𑁭𑁫.

𑀧𑀲𑁆𑀲𑀺𑀢𑁆𑀯𑀸’𑀥𑀭𑀓𑀦𑁆𑀢𑀺𑀪𑀸𑀭𑀫𑀲𑁆𑀲

𑀯𑀢𑁆𑀢𑀫𑁆𑀳𑁄𑀭𑀼𑀳 𑀫𑀺𑀦𑁆𑀤𑀺𑀭𑀸𑀯𑀺𑀳𑀸𑀭𑀁,

𑀲𑀺𑀤𑁆𑀥𑀢𑁆𑀣𑁂𑀦 𑀲𑀫𑁄 𑀦𑀘𑀢𑁆𑀣𑀺 𑀮𑁄𑀓𑁂

𑀇𑀘𑁆𑀘𑁂𑀯𑀁 𑀓𑀮𑀺𑀫𑀸’𑀳 𑀫𑀸𑀭𑀲𑁂𑀦𑀁; ()

𑁭𑁬. ¶

𑀏𑀢𑀲𑀲𑀸’𑀪𑀺𑀫𑀼𑀔𑀸 𑀫𑀬𑀁 𑀓𑀤𑀸𑀘𑀺

𑀦𑁄𑀲𑀓𑁆𑀓𑁄𑀫’𑀪𑀺𑀬𑀼𑀚𑁆𑀛𑀺𑀢𑀼𑀦𑁆𑀢𑀺 𑀢𑀸𑀢𑀸,

𑀯𑀢𑁆𑀯𑀸 𑀉𑀢𑁆𑀢𑀭𑀧𑀲𑁆𑀲𑀢𑁄 𑀲𑀫𑀸𑀭𑁄

𑀔𑀦𑁆𑀥𑀸𑀯𑀸𑀭𑀫𑀩𑀦𑁆𑀥𑀺 𑀩𑀤𑁆𑀥𑀯𑁂𑀭𑁄;

𑁭𑁭.

𑀤𑀺𑀲𑁆𑀯𑀸’𑀚𑁆𑀛𑁄𑀢𑁆𑀣𑀭𑀫𑀸𑀦𑀫𑀸𑀭𑀲𑁂𑀦𑀁

𑀆𑀭𑀓𑁆𑀔𑀸𑀯𑀭𑀡𑀁 𑀣𑀺𑀭𑀁 𑀯𑀺𑀥𑀸𑀬,

𑀔𑀦𑁆𑀥𑀸𑀯𑀸𑀭𑀫𑀩𑀦𑁆𑀥𑀺 𑀲𑁄𑀧𑀺 𑀯𑀻𑀭𑁄

𑀚𑁂𑀢𑀼𑀁 𑀢𑀁 𑀤𑀲𑀧𑀸𑀭𑀫𑀻 𑀪𑀝𑁂𑀳𑀺; ()

𑁭𑁮.

𑀫𑀸𑀭𑁄 𑀪𑀼𑀥𑀭𑀫𑁂𑀭𑀼𑀘𑀓𑁆𑀓𑀯𑀸𑀴𑁂

𑀭𑀼𑀓𑁆𑀔𑀸𑀤𑀻𑀦𑀺 𑀯𑀺𑀘𑀼𑀡𑁆𑀡𑀺𑀢𑀼𑀁 𑀲𑀫𑀢𑁆𑀣𑀁,

𑀔𑁄𑀪𑁂𑀢𑁆𑀯𑀸 𑀪𑀼𑀯𑀦𑀢𑁆𑀢𑀬𑀁 𑀤𑀺𑀲𑀸𑀲𑀼

𑀉𑀝𑁆𑀞𑀸𑀧𑁂𑀲𑀺 𑀲𑀫𑀻𑀭𑀡𑀁 𑀲𑀼𑀖𑁄𑀭𑀁; ()

𑁭𑁯.

𑀯𑀸𑀢𑁄 𑀧𑀸𑀭𑀫𑀺𑀥𑀸𑀫𑀯𑀸𑀭𑀺𑀢𑁄 𑀲𑁄

𑀦𑀺𑀢𑁆𑀢𑁂𑀚𑀁 𑀧𑀮𑀬𑀸𑀦𑀺𑀮𑀲𑁆𑀲𑀫𑁄𑀧𑀺,

𑀧𑀢𑁆𑀢𑁄 𑀘𑀸𑀫𑀭𑀫𑀦𑁆𑀤𑀫𑀸𑀭𑀼𑀢𑁄𑀯

𑀢𑀦𑁆𑀤𑁂𑀳𑁄𑀢𑀼𑀧𑀭𑀺𑀲𑁆𑀲𑀫𑀁 𑀚𑀳𑀸𑀲𑀺; ()

𑁮𑁦. ¶

𑀥𑀸𑀭𑀸𑀯𑁂𑀕𑀯𑀺𑀳𑀺𑀦𑁆𑀦𑀪𑀽𑀫𑀺𑀪𑀸𑀕𑀁

𑀕𑀫𑁆𑀪𑀻𑀭𑀸’𑀲𑀦𑀺𑀭𑀸𑀯𑀦𑀺𑀩𑁆𑀪𑀭𑀸’𑀖𑀁,

𑀫𑀸𑀭𑁄 𑀫𑀸𑀧𑀬𑀺 𑀢𑀼𑀗𑁆𑀕𑀯𑀻𑀘𑀪𑀗𑁆𑀕𑀁

𑀯𑀲𑁆𑀲𑁄𑀖𑀁 𑀧𑀭𑀺𑀧𑀸𑀢𑀭𑀼𑀓𑁆𑀔𑀲𑁂𑀮𑀁; ()

𑁮𑁧.

𑀯𑀻𑀭𑁄 𑀧𑀸𑀭𑀫𑀺𑀧𑀸𑀴𑀺𑀩𑀦𑁆𑀥𑀦𑁂𑀦

𑀭𑀓𑁆𑀔𑀁 𑀩𑀦𑁆𑀥𑀺 𑀦𑀺𑀚𑀦𑁆𑀢𑀪𑀸𑀯𑀔𑁂𑀢𑁆𑀢𑁂,

𑀢𑁂𑀦𑁄’𑀖𑁄 𑀯𑀺𑀧𑀣𑀗𑁆𑀕𑀫𑁄 𑀯𑀺𑀧𑀓𑁆𑀔-

𑀲𑁂𑀦𑀸𑀬𑀸’𑀲𑀺 𑀧𑀯𑀸𑀳𑀡𑁂 𑀦𑀺𑀤𑀸𑀦𑀁; ()

𑁮𑁨.

𑀢𑁂𑀚𑁄𑀔𑀡𑁆𑀟𑀲𑀫𑀸𑀦𑀫𑀢𑁆𑀢𑀦𑁄 𑀲𑁄

𑀢𑀢𑁆𑀢𑀁 𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁,

𑀫𑀸𑀧𑁂𑀢𑁆𑀯𑁄’𑀧𑀮𑀯𑀲𑁆𑀲𑀫𑀧𑁆𑀧𑀲𑀬𑁆𑀳𑀁

𑀛𑀸𑀧𑁂𑀢𑀼𑀁 𑀢𑀫𑀼𑀧𑀓𑁆𑀓𑀫𑀺𑀢𑁆𑀣 𑀫𑀸𑀭𑁄; ()

𑁮𑁩. ¶

𑀫𑀸𑀭𑀲𑁆𑀲𑁂𑀯 𑀧𑀢𑀦𑁆𑀢𑀫𑀼𑀢𑁆𑀢𑀫𑀗𑁆𑀕𑁂

𑀖𑁄𑀭𑀁 𑀧𑀸𑀭𑀫𑀺𑀯𑀸𑀬𑀼𑀯𑁂𑀕𑀭𑀼𑀤𑁆𑀥𑀁,

𑀢𑀁𑀯𑀲𑁆𑀲𑀁 𑀯𑀚𑀺𑀭𑀸𑀲𑀦𑀽𑀧𑀘𑀸𑀭𑁂

𑀧𑀽𑀚𑀸𑀧𑀼𑀧𑁆𑀨𑀕𑀼𑀴𑀢𑁆𑀢𑀦𑀁 𑀚𑀕𑀸𑀫; ()

𑁮𑁪.

𑀅𑀲𑁆𑀲𑀤𑁆𑀥𑁄 𑀯𑀺𑀲𑀤𑀺𑀤𑁆𑀥𑀢𑀺𑀡𑁆𑀳𑀥𑀸𑀭𑀁

𑀆𑀤𑀺𑀢𑁆𑀢𑀁 𑀧𑀺𑀳𑀺𑀢𑀫𑁆𑀩𑀭𑁄’𑀤𑀭𑀁 𑀲𑁄,

𑀫𑀸𑀧𑁂𑀲𑀺 𑀅𑀲𑀺𑀲𑀢𑁆𑀢𑀺𑀢𑁄𑀫𑀭𑀸𑀤𑀺-

𑀯𑀲𑁆𑀲𑀁 𑀲𑀩𑁆𑀩𑀤𑀺𑀲𑀸𑀦𑀺𑀧𑀸𑀢𑀫𑀸𑀦𑀁; ()

𑁮𑁫.

𑀢𑀲𑁆𑀫𑀺𑀁 𑀧𑀸𑀭𑀫𑀺𑀯𑀫𑁆𑀫𑀯𑀫𑁆𑀫𑀺𑀢𑀲𑁆𑀫𑀺𑀁

𑀯𑀺𑀲𑁆𑀲𑀝𑁆𑀞𑀸’𑀬𑀼𑀥𑀯𑀼𑀝𑁆𑀞𑀺 𑀓𑀼𑀡𑁆𑀞𑀺𑀢𑀕𑁆𑀕𑀸,

𑀧𑀢𑁆𑀯𑀸 𑀲𑀫𑁆𑀧𑀢𑀺 𑀧𑀼𑀧𑁆𑀨𑀯𑀼𑀝𑁆𑀞𑀺𑀪𑀸𑀯𑀁

𑀢𑀧𑁆𑀧𑀸𑀤𑀸𑀲𑀦𑀫𑀢𑁆𑀣𑀓𑁂 𑀧𑀧𑀸𑀢; ()

𑁮𑁬. ¶

𑀫𑀸𑀭𑁄 𑀯𑀺𑀘𑁆𑀘𑀺𑀝𑀘𑀺𑀘𑁆𑀘𑀺𑀝𑀸𑀬𑀫𑀸𑀦𑀁

𑀲𑀁𑀯𑀝𑁆𑀝𑀸𑀦𑀮𑀔𑀡𑁆𑀟𑀯𑀺𑀩𑁆𑀪𑀫𑀁 𑀲𑁄,

𑀯𑀲𑁆𑀲𑀗𑁆𑀕𑀸𑀭𑀫𑀬𑀁 𑀲𑀯𑀺𑀧𑁆𑀨𑀼𑀮𑀺𑀗𑁆𑀕𑀁

𑀉𑀝𑁆𑀞𑀸𑀧𑁂𑀲𑀺 𑀧𑀮𑀸𑀲𑀧𑀓𑀼𑀧𑁆𑀨𑀯𑀡𑁆𑀡𑀁; ()

𑁮𑁭.

𑀔𑀺𑀧𑁆𑀧𑀁𑀧𑀸𑀭𑀫𑀺𑀫𑀦𑁆𑀢𑀚𑀧𑁆𑀧𑀦𑁂𑀦

𑀅𑀗𑁆𑀕𑀸𑀭𑀸𑀦𑀺𑀦𑀺𑀯𑀸𑀭𑀺𑀢𑀸𑀦𑀺𑀢𑀸𑀦𑀺,

𑀢𑀁𑀩𑀼𑀤𑁆𑀥𑀗𑁆𑀓𑀼𑀭𑀧𑀼𑀡𑁆𑀡𑀘𑀦𑁆𑀤𑀩𑀺𑀫𑁆𑀩𑀁

𑀲𑁂𑀯𑀦𑁆𑀢𑀸𑀦𑀺𑀯𑀺𑀓𑀺𑀡𑁆𑀡𑀪𑀸𑀦𑀺𑀯𑀸𑀲𑀼𑀁; ()

𑁮𑁮.

𑀪𑀲𑁆𑀫𑀻𑀓𑀸𑀢𑀼𑀫𑀮𑀦𑁆𑀢𑀺𑀫𑀸𑀭𑀯𑁂𑀭𑀺𑀁

𑀥𑀽𑀫𑀸𑀓𑀺𑀡𑁆𑀡𑀫𑀦𑀺𑀕𑁆𑀕𑀢𑀕𑁆𑀕𑀺𑀚𑀸𑀮𑀁,

𑀫𑀸𑀭𑁄𑀪𑁂𑀭𑀯𑀭𑀸𑀯𑀫𑀼𑀲𑁆𑀲𑀤𑀸𑀪-

𑀫𑀩𑁆𑀪𑀼𑀝𑁆𑀞𑀸𑀧𑀬𑀺𑀔𑀸𑀭𑀪𑀲𑁆𑀫𑀯𑀲𑁆𑀲𑀁; ()

𑁮𑁯.

𑀲𑁂𑀢𑀸𑀫𑀼𑀤𑁆𑀥𑀦𑀺𑀯𑀺𑀧𑁆𑀧𑀓𑀺𑀡𑁆𑀡𑀪𑀲𑁆𑀫𑀺𑀁

𑀢𑀁𑀯𑀲𑁆𑀲𑀁𑀘𑀺𑀢𑀧𑀸𑀭𑀫𑀻𑀩𑀮𑁂𑀦,

𑀧𑀢𑁆𑀯𑀸𑀘𑀦𑁆𑀤𑀦𑀕𑀦𑁆𑀥𑀘𑀼𑀡𑁆𑀡𑀪𑀸𑀯𑀁

𑀫𑀸𑀭𑀸𑀭𑀺𑀲𑁆𑀲𑀧𑀧𑀸𑀢𑀧𑀸𑀤𑀫𑀽𑀮𑁂; ()

𑁯𑁦. ¶

𑀅𑀲𑁆𑀫𑀺𑀁 𑀕𑀼𑀯𑀮𑀬𑀸𑀮𑀯𑀸𑀴𑀕𑀩𑁆𑀪𑁂

𑀲𑀫𑁆𑀧𑀸𑀢𑀸𑀦𑀮𑀤𑀟𑁆𑀠𑀯𑀡𑁆𑀡𑀼𑀥𑀸𑀭𑀁,

𑀉𑀢𑁆𑀢𑀸𑀲𑀸𑀯𑀳𑀫𑀢𑁆𑀢𑀦𑁄’𑀧𑀺 𑀓𑀡𑁆𑀳𑁄

𑀯𑀲𑁆𑀲𑀸𑀧𑁂𑀲𑀺 𑀉𑀴𑀸𑀭𑀯𑀡𑁆𑀡𑀼𑀯𑀲𑁆𑀲𑀁; ()

𑁯𑁧.

𑀤𑀺𑀲𑁆𑀯𑀸’𑀗𑀓𑁆𑀖𑀻𑀦𑀔𑀭𑀸𑀮𑀺𑀭𑀁𑀲𑀺𑀕𑀗𑁆𑀕𑀸-

𑀢𑀻𑀭𑀼𑀲𑁆𑀲𑀸𑀭𑀺𑀢𑀯𑀡𑁆𑀡𑀼𑀭𑀸𑀲𑀺 𑀫𑀲𑁆𑀲,

𑀅𑀗𑁆𑀕𑀸𑀭𑁄’𑀯’𑀥𑀺𑀓𑁄𑀥𑀧𑀸𑀯𑀓𑁂𑀦

𑀓𑀡𑁆𑀳𑁄 𑀓𑀡𑁆𑀳𑀢𑀭𑁄’𑀲𑀺 𑀛𑀸𑀧𑀺𑀢𑀢𑁆𑀢𑁄; ()

𑁯𑁨.

𑀥𑀽𑀧𑀸𑀬𑀦𑁆𑀢𑀫𑀯𑀻𑀘𑀺𑀫𑀘𑁆𑀘𑀺𑀫𑀦𑁆𑀢𑀁

𑀲𑀫𑁆𑀨𑀼𑀝𑁆𑀞𑀁 𑀖𑀦𑀨𑁂𑀡𑀡𑀩𑀼𑀩𑁆𑀩𑀼𑀮𑁂𑀳𑀺,

𑀯𑀲𑁆𑀲𑀁 𑀧𑀗𑁆𑀓𑀫𑀬𑀁 𑀪𑀼𑀲𑀁 𑀦𑀺𑀫𑀼𑀕𑁆𑀕𑁄

𑀫𑀸𑀭𑁄 𑀫𑀸𑀧𑀬𑀺 𑀧𑀜𑁆𑀘𑀓𑀸𑀫𑀧𑀗𑁆𑀓𑁂; ()

𑁯𑁩. ¶

𑀢𑀲𑁆𑀫𑀺𑀁𑀧𑀸𑀭𑀫𑀺𑀲𑀢𑁆𑀢𑀻𑀲𑀺𑀢𑀺𑀪𑀽𑀢𑁂

𑀧𑀗𑁆𑀓𑁂 𑀘𑀦𑁆𑀤𑀦𑀧𑀗𑁆𑀓𑀪𑀸𑀯𑀬𑀸𑀢𑁂,

𑀫𑀸𑀭𑁄 𑀧𑀲𑁆𑀲𑀺𑀬 𑀨𑀼𑀮𑁆𑀮𑀧𑀗𑁆𑀓𑀚𑀸𑀳𑀁

𑀓𑁄𑀧𑀸 𑀧𑀗𑁆𑀓𑀳𑀢𑀸𑀦𑀦𑁄𑀭𑀺𑀯𑀸𑀲𑀺; ()

𑁯𑁪.

𑀫𑀸𑀭𑀸𑀭𑀺𑀁 𑀇𑀫𑀺𑀦𑀸 𑀳𑀦𑀸𑀫𑀳𑀦𑁆𑀢𑀻

𑀲𑁄 𑀮𑁄𑀓𑀦𑁆𑀢𑀭𑀺𑀬𑀦𑁆𑀥𑀓𑀸𑀭𑀖𑁄𑀭𑀁,

𑀫𑀸𑀭𑁄 𑀲𑀽𑀯𑀺𑀯𑀺𑀤𑀸𑀭𑀺𑀬𑀁 𑀤𑀺𑀲𑀸𑀲𑀼

𑀉𑀝𑁆𑀞𑀸𑀧𑁂𑀲𑀺𑀖𑀦𑀦𑁆𑀥𑀓𑀸𑀭𑀔𑀦𑁆𑀥𑀁; ()

𑁯𑁫.

𑀲𑁄’𑀬𑀁 𑀧𑀸𑀭𑀫𑀺𑀚𑀸𑀢𑀭𑀁𑀲𑀺𑀚𑀸𑀮-

𑀪𑀺𑀦𑁆𑀦𑀸’𑀲𑁂𑀲𑀢𑀫𑁄𑀚𑀺𑀦𑀗𑁆𑀓𑀼𑀭𑁂𑀡𑁄,

𑀧𑀮𑁆𑀮𑀗𑁆𑀓𑁄𑀤𑀬𑀧𑀩𑁆𑀩𑀢𑁄𑀤𑀺𑀢𑁄’𑀲𑀺

𑀓𑀸𑀫𑀁 𑀫𑀸𑀭𑀢𑀼𑀲𑀸𑀭𑀲𑁄𑀲𑀦𑀸𑀬; ()

𑁯𑁬. ¶

𑀏𑀢𑀁 𑀕𑀡𑁆𑀳𑀣 𑀩𑀦𑁆𑀥𑀣𑀸’𑀢𑀺 𑀯𑀢𑁆𑀯𑀸

𑀦𑀺𑀝𑁆𑀞𑀁 𑀓𑀧𑁆𑀧𑀫𑀯𑀡𑁆𑀡𑀺𑀬𑀁 𑀓𑀯𑀻𑀳𑀺,

𑀲𑀤𑁆𑀥𑀺𑀁 𑀫𑀸𑀭𑀩𑀮𑁂𑀦𑀼’𑀧𑀸𑀕𑀢𑁄 𑀲𑁄

𑀓𑀼𑀤𑁆𑀥𑁄 𑀬𑀼𑀤𑁆𑀥𑀫𑀓𑀸 𑀧𑀫𑀢𑁆𑀢𑀩𑀦𑁆𑀥𑀼; ()

𑁯𑁭.

𑀢𑀁 𑀤𑀺𑀲𑁆𑀯𑀸’𑀘𑀮𑀦𑀺𑀘𑁆𑀘𑀮𑀝𑁆𑀞𑀫𑁂𑀲

𑀧𑀮𑁆𑀮𑀗𑁆𑀓𑁄 𑀦𑀘𑀧𑀸𑀧𑀼𑀡𑀸𑀢𑀺 𑀢𑀼𑀬𑁆𑀳𑀁,

𑀫𑀬𑁆𑀳𑀁 𑀳𑁂’𑀲𑀼’𑀧𑀓𑀧𑀓𑁆𑀧𑀢𑁂𑀯 𑀢𑀲𑁆𑀫𑀸

𑀅𑀲𑁆𑀫𑀸 𑀯𑀼𑀝𑁆𑀞𑀳𑀣𑀸’𑀯𑀼𑀲𑁄𑀢𑁆𑀬’𑀯𑁄𑀘; ()

𑁯𑁮.

𑀏𑀓𑀸’𑀧𑀻 𑀲𑀫𑀢𑀺𑀁𑀲𑀧𑀸𑀭𑀫𑀻𑀦𑀁

𑀧𑀮𑁆𑀮𑀗𑁆𑀓𑀢𑁆𑀣𑀫𑀧𑀽𑀭𑀺𑀢𑀸 𑀢𑀬𑀸’𑀢𑀺,

𑀯𑀼𑀢𑁆𑀢𑁂 𑀲𑁄 𑀔𑀺𑀧𑀺 𑀦𑀺𑀚𑁆𑀚𑀺𑀢𑁄’𑀭𑀘𑀓𑁆𑀓𑀁

𑀘𑀓𑁆𑀓𑀁 𑀘𑀓𑁆𑀓𑀯𑀭𑀗𑁆𑀓𑀺𑀢𑀲𑁆𑀲 𑀲𑀻𑀲𑁂; ()

𑁯𑁯.

𑀢𑀁 𑀘𑀓𑁆𑀓𑀸𑀬𑀼𑀥𑀫𑀼𑀚𑁆𑀛𑀺𑀢𑀧𑁆𑀧𑀪𑀸𑀯𑀁

𑀬𑀼𑀤𑁆𑀥𑁂 𑀮𑀤𑁆𑀥𑀚𑀬𑀲𑁆𑀲 𑀫𑀸𑀭𑀚𑀺𑀲𑁆𑀲,

𑀉𑀲𑁆𑀲𑀺𑀲𑀫𑁆𑀳𑀺 𑀯𑀭𑀸𑀲𑀦𑀽𑀧𑀘𑀸𑀭𑁂

𑀲𑁂𑀢𑀘𑁆𑀙𑀦𑁆𑀢𑀫𑀺𑀯𑀼𑀲𑁆𑀲𑀺𑀢𑀁 𑀭𑀭𑀸𑀚; ()

𑁧𑁦𑁦. ¶

𑀢𑀼𑀬𑁆𑀳𑀁 𑀲𑀜𑁆𑀘𑀺𑀦𑀦𑀫𑁆𑀳𑀺 𑀧𑀸𑀭𑀫𑀻𑀦𑀁

𑀓𑁄 𑀲𑀓𑁆𑀔𑀻’𑀢𑀺 𑀅𑀳𑀜𑁆𑀘 𑀲𑀓𑁆𑀔𑀺𑀳𑁄𑀫𑀺,

𑀲𑀓𑁆𑀔𑀻’𑀕𑀦𑁆𑀢𑀺 𑀧𑀯𑀢𑁆𑀢𑀫𑀸𑀭𑀲𑁂𑀦𑀸-

𑀖𑁄𑀲𑁄 𑀪𑀼𑀫𑀺𑀯𑀺𑀤𑀸𑀭𑀡𑁄𑀭𑀺’𑀯𑀸𑀲𑀺; ()

𑁧𑁦𑁧.

𑀤𑀸𑀧𑁂𑀦𑁆𑀢𑁄𑀦𑀺𑀚𑀲𑀓𑁆𑀔𑀺𑀫𑀼𑀕𑁆𑀕𑀢𑁂𑀚𑁄

𑀩𑀸𑀳𑀼𑀁𑀢𑀸𑀯𑀧𑀲𑀸𑀭𑀬𑀻 𑀧𑀯𑀺𑀭𑁄,

𑀲𑀓𑁆𑀔𑀻𑀳𑀦𑁆𑀢𑀻𑀯𑀤𑀁’𑀯 𑀫𑀸𑀭𑀲𑁂𑀦𑀁

𑀢𑀚𑁆𑀚𑁂𑀦𑁆𑀢𑁄’𑀯 𑀩𑀪𑀽𑀯 𑀪𑀼𑀫𑀺𑀘𑀸𑀮𑁄; ()

𑁧𑁦𑁨.

𑀫𑀸𑀢𑀗𑁆𑀕𑁄 𑀕𑀺𑀭𑀺𑀫𑁂𑀔𑀮𑁄 𑀙𑀺𑀢𑀸𑀭𑀺𑀁

𑀯𑀦𑁆𑀤𑀦𑁆𑀢𑁄’𑀯𑀧𑀧𑀸𑀢 𑀚𑀦𑁆𑀦𑀼𑀓𑁂𑀳𑀺,

𑀫𑀸𑀭𑁄 𑀮𑀤𑁆𑀥𑀧𑀭𑀸𑀚𑀬𑁄 𑀦𑀺𑀯𑀢𑁆𑀣-

𑀯𑀢𑁆𑀣𑀲𑁆𑀲𑀸’𑀧𑀺 𑀅𑀦𑀺𑀲𑁆𑀲𑀭𑁄 𑀧𑀮𑀸𑀬𑀺; ()

𑁧𑁦𑁩. ¶

𑀖𑁄𑀭𑀫𑀸𑀭𑀩𑀮𑀯𑀸𑀭𑀡𑀸𑀥𑀺𑀧-

𑀫𑀸𑀦𑀤𑀧𑁆𑀧𑀦𑀺𑀪𑀓𑀼𑀫𑁆𑀪𑀤𑀸𑀭𑀡𑁄,

𑀩𑁄𑀥𑀺𑀫𑀽𑀮𑀯𑀚𑀺𑀭𑀸𑀲𑀦𑁄𑀧𑀭𑀺

𑀓𑁂𑀲𑀭𑀻𑀯 𑀯𑀺𑀭𑀭𑀸𑀚 𑀫𑀸𑀭𑀚𑀺; ()

𑀇𑀢𑀺 𑀫𑁂𑀥𑀸𑀦𑀦𑁆𑀤𑀸𑀪𑀺𑀥𑀸𑀦𑁂𑀦 𑀬𑀢𑀺𑀦𑀸 𑀯𑀺𑀭𑀘𑀺𑀢𑁂 𑀲𑀓𑀮 𑀓𑀯𑀓𑀺𑀚𑀦 𑀳𑀤𑀬𑀸𑀦𑀦𑁆𑀤𑀤𑀸𑀦𑀦𑀺𑀤𑀸𑀦𑁂 𑀚𑀺𑀦𑀯𑀁𑀲𑀤𑀻𑀧𑁂 𑀅𑀯𑀺𑀤𑀽𑀭𑁂 𑀦𑀺𑀤𑀸𑀦𑁂 𑀤𑁂𑀯𑀧𑀼𑀢𑁆𑀢 𑀫𑀸𑀭𑀩𑀮 𑀯𑀺𑀤𑁆𑀥𑀁𑀲𑀦 𑀧𑀯𑀢𑁆𑀢𑀺𑀧𑀭𑀺𑀤𑀻𑀧𑁄 𑀤𑁆𑀯𑀸𑀤𑀲𑀫𑁄 𑀲𑀕𑁆𑀕𑁄.

𑁧.

𑀦𑀺𑀔𑀺𑀮𑀫𑀸𑀭𑀢𑀼𑀲𑀸𑀭𑀯𑀺𑀲𑁄𑀲𑀺𑀦𑁄

𑀅𑀣𑀚𑀺𑀦𑀗𑁆𑀓𑀼𑀭𑀤𑀻𑀥𑀺𑀢𑀺𑀫𑀸𑀮𑀺𑀦𑁄,

𑀭𑀯𑀺 𑀓𑀢𑀸𑀯𑀲𑀭𑁄’𑀯’𑀧𑀭𑀸𑀘𑀮𑀁

(𑀤𑀼𑀢’𑀯𑀺𑀮𑀫𑁆𑀩𑀺𑀢) 𑀕𑀸𑀫𑀺𑀫𑀼𑀧𑀸𑀕𑀫𑀻; ()

𑁨. ¶

𑀚𑀮𑀥𑀺𑀯𑀸𑀭𑀺𑀲𑀺𑀦𑁂𑀳𑀲𑀼𑀧𑀼𑀭𑀺𑀢𑁂

𑀅𑀪𑀯𑀺 𑀧𑀁𑀲𑀼𑀫𑀳𑀻𑀢𑀮𑀫𑀮𑁆𑀮𑀓𑁂,

𑀧𑀡𑀺𑀳𑀺𑀢𑀸𑀧𑀭𑀪𑀼𑀥𑀭𑀯𑀢𑁆𑀢𑀺𑀓𑀸-

𑀚𑀮𑀺𑀢𑀤𑀻𑀧𑀲𑀺𑀔𑁂’𑀯 𑀦𑀪𑁄𑀫𑀡𑀺; ()

𑁩.

𑀉𑀤𑀬𑀧𑀩𑁆𑀩𑀢𑀕𑀩𑁆𑀪𑀲𑀫𑀼𑀩𑁆𑀪𑀯𑀁

𑀲𑀓𑀬𑀲𑁄𑀧𑀝𑀺𑀩𑀺𑀫𑁆𑀩𑀲𑀫𑀁𑀲𑀼𑀪𑀁,

𑀲𑀧𑀤𑀺 𑀢𑀧𑁆𑀧𑀫𑀼𑀔𑁂 𑀲𑀲𑀺𑀫𑀡𑁆𑀟𑀮𑀁

𑀓𑀲𑀺𑀡𑀫𑀡𑁆𑀟𑀮𑀯𑀺𑀩𑁆𑀪𑀫𑀫𑀼𑀩𑁆𑀩𑀳𑀺; ()

𑁪.

𑀅𑀭𑀼𑀡𑀯𑀡𑁆𑀡𑀲𑀼𑀥𑀸𑀓𑀭 𑀪𑀸𑀓𑀭𑀸

𑀤𑀺𑀯𑀲𑀲𑀦𑁆𑀥𑀺𑀯𑀺𑀮𑀸𑀲𑀺𑀦𑀺𑀬𑀸 𑀔𑀡𑀁,

𑀧𑀭𑀺𑀳𑀭𑀺𑀁𑀲𑀼’𑀤𑀬𑀸𑀧𑀭𑀪𑀼𑀥𑀭-

𑀲𑀯𑀡𑀕𑀁 𑀫𑀡𑀺𑀫𑀡𑁆𑀟𑀦 𑀯𑀺𑀩𑁆𑀪𑀫𑀁; ()

𑁫. ¶

𑀭𑀯𑀺𑀥𑀼𑀭𑀸 𑀯𑀺𑀥𑀼𑀭𑀸 𑀲𑀭𑀲𑀻𑀯𑀥𑀼

𑀓𑀫𑀮𑀓𑁄𑀫𑀮𑀓𑁄𑀲𑀧𑀼𑀝𑀜𑁆𑀚𑀮𑀻,

𑀉𑀧𑀯𑀦𑁂 𑀧𑀯𑀦𑁂’𑀭𑀺𑀢𑀪𑀽𑀭𑀼𑀳𑀸

𑀧𑀦𑀫𑀺𑀢𑀸𑀦𑀫𑀺𑀢𑀸𑀯 𑀢𑀧𑁄𑀥𑀦𑀁; () (𑀬𑀫𑀓𑀩𑀦𑁆𑀥𑀦𑀁;)

𑁬.

𑀅𑀧𑀭𑀲𑀸𑀕𑀭𑀫𑀼𑀤𑁆𑀥𑀦𑀺 𑀪𑀸𑀲𑀼𑀭𑀁

𑀢𑀺𑀫𑀺𑀭𑀚𑀸𑀮𑀧𑀭𑀁 𑀭𑀯𑀺𑀫𑀡𑁆𑀟𑀮𑀁,

𑀫𑀼𑀓𑀼𑀮𑀺𑀢𑀫𑁆𑀩𑀼𑀭𑀼𑀳𑀲𑁆𑀲𑀺𑀭𑀺𑀫𑀸𑀳𑀭𑀺

𑀪𑀫𑀭𑀘𑀓𑁆𑀓𑀪𑀭𑀁 𑀲𑀭𑀲𑀽𑀧𑀭𑀺; ()

𑁭.

𑀮𑀯𑀡𑀯𑀸𑀭𑀺𑀥𑀺𑀓𑀸𑀘𑀲𑀭𑀸𑀯𑀓𑁂

𑀅𑀧𑀭𑀪𑀽𑀥𑀭 𑀓𑀽𑀝 𑀪𑀼𑀚𑀧𑁆𑀧𑀺𑀢𑀸,

𑀲𑀽𑀭𑀺𑀬𑀫𑀡𑁆𑀟𑀮𑀧𑀸𑀢𑀺 𑀦𑀺𑀫𑀼𑀚𑁆𑀚𑀺𑀬

𑀧𑀼𑀭𑀺𑀫𑀬𑀸𑀫𑀫𑀼𑀔𑀁𑀦𑀓𑀺𑀫𑀸𑀳𑀭𑀺; ()

𑁮. ¶

𑀫𑀡𑀺𑀧𑀪𑀸𑀭𑀼𑀡 𑀪𑀸𑀓𑀭 𑀫𑀡𑁆𑀟𑀮𑀁

𑀢𑀫𑀦𑀼𑀪𑀼𑀬 𑀫𑀳𑀫𑁆𑀩𑀼𑀥𑀺𑀭𑀸𑀳𑀼𑀦𑀸,

𑀫𑀼𑀔𑀕𑀢𑀁𑀯𑀫𑀺𑀢𑀁 𑀯𑀺𑀬𑀓 𑀮𑁄𑀳𑀺𑀢𑀁

𑀚𑀮𑀤𑀭𑀸𑀚𑀺 𑀭𑀭𑀸𑀚 𑀤𑀺𑀦𑀘𑁆𑀘𑀬𑁂; ()

𑁯.

𑀯𑀺𑀢𑀢𑀫𑁂𑀖𑀧𑀪𑀸𑀳𑀺 𑀫𑀼𑀳𑀼𑀁 𑀫𑀼𑀳𑀼𑀁

𑀓𑀴𑀺𑀢 𑀧𑀸𑀝𑀮 𑀧𑀮𑁆𑀮𑀯 𑀲𑀫𑁆𑀧𑀤𑀁,

𑀯𑀦𑀖𑀝𑀁 𑀯𑀺𑀝𑀧𑀦𑁆𑀢𑀭𑀕𑀁 𑀓𑀫𑀸

𑀨𑀽𑀝𑀢𑀫𑁄𑀧𑀝𑀮𑀁𑀧𑀭𑀺𑀡𑀸𑀫𑀬𑀻 ()

𑁧𑁦.

𑀲𑀼𑀪𑀚𑀦𑁂𑀪𑀚𑀦𑁂𑀦𑀺𑀭𑀧𑁂𑀓𑁆𑀔𑀺𑀦𑀻

𑀯𑀺𑀧𑀢𑀺𑀦𑀻 𑀧𑀢𑀺𑀦𑀻𑀯 𑀭𑀚𑀲𑁆𑀲𑀮𑀸,

𑀲𑀼𑀫𑀥𑀼𑀧𑁂 𑀫𑀥𑀼𑀧𑁂 𑀧𑀭𑀺𑀯𑀚𑁆𑀚𑀬𑀼𑀁

𑀓𑀫𑀮𑀺𑀦𑀻𑀫𑀮𑀺𑀦𑀻𑀓𑀢𑀦𑀺𑀭𑀚𑀸; () (𑀬𑀫𑀓𑀩𑀦𑁆𑀥𑀦𑀁;)

𑁧𑁧. ¶

𑀫𑀥𑀼𑀫𑀤𑀸𑀮𑀺𑀓𑀼𑀮𑀸 𑀫𑀓𑀼𑀮𑀸𑀯𑀮𑀻

𑀅𑀦𑀺𑀮𑀪𑀗𑁆𑀕 𑀢𑀭𑀗𑁆𑀕 𑀪𑀼𑀚𑁂𑀭𑀺𑀢𑀸,

𑀧𑀤𑀼𑀫𑀺𑀦𑀻 𑀭𑀫𑀡𑀻𑀳𑀺 𑀲𑀺𑀭𑀺𑀫𑀢𑁄

𑀲𑀼𑀫𑀳𑀺𑀢𑀸𑀫𑀡𑀺𑀓𑀺𑀗𑁆𑀓𑀺𑀡𑀺𑀲𑁂𑀡𑀺𑀯; ()

𑁧𑁨.

𑀭𑀲𑀺𑀓𑀧𑀓𑁆𑀓 𑀨𑀮𑀸𑀨𑀮 𑀲𑀸𑀮𑀺𑀲𑀼

𑀢𑀭𑀼𑀲𑀺𑀭𑁂𑀲𑀼 𑀲𑀫𑁄𑀲𑀭𑀫𑀸𑀦𑀓𑀸,

𑀢𑀺𑀫𑀺𑀭𑀔𑀡𑁆𑀟𑀦𑀺𑀪𑀸 𑀩𑀥𑀺𑀭𑀻𑀓𑀭𑀼𑀁

𑀭𑀯𑀺𑀧𑀣𑀁 𑀯𑀺𑀭𑀼𑀢𑁂𑀳𑀺 𑀯𑀺𑀪𑀗𑁆𑀕𑀫𑀸; ()

𑁧𑁩.

𑀓𑀼𑀫𑀼𑀤𑀺𑀦𑀻𑀧𑀫𑀤𑀸’𑀣𑀲𑀼𑀥𑀸𑀓𑀭-

𑀓𑀭𑀲𑀢𑁂𑀳𑀺 𑀧𑀭𑀸𑀫𑀲𑀦𑀸𑀧𑀭𑀁,

𑀓𑀼𑀲𑀼𑀫𑀳𑀸𑀲𑀯𑀺𑀮𑀸𑀲𑀥𑀭𑀸 𑀪𑀼𑀲𑀁

𑀪𑀼𑀯𑀦𑀯𑀦𑁆𑀤𑀺𑀭𑀕𑀩𑁆𑀪𑀫𑀮𑀗𑁆𑀓𑀭𑀺; ()

𑁧𑁪. ¶

𑀳𑀺𑀫𑀓𑀭𑁄 𑀳𑀭𑀺𑀡𑀜𑁆𑀚𑀦𑀳𑀸𑀭𑀺𑀦𑀸

𑀦𑀺𑀚𑀓𑀭𑁂𑀦 𑀦𑀺𑀭𑀸𑀓𑀭𑀺 𑀢𑀗𑁆𑀔𑀡𑁂,

𑀲𑀓𑀮𑀮𑁄𑀓’𑀯𑀺𑀮𑁄𑀘𑀦 𑀲𑀫𑁆𑀪𑀯𑀁

𑀖𑀦𑀢𑀫𑁄𑀧𑀝𑀮𑀁𑀳𑀺𑀲𑀚𑁄 𑀬𑀣𑀸; () (𑀲𑀺𑀮𑁂𑀲𑀩𑀦𑁆𑀥𑀦𑀁)

𑁧𑁫.

𑀲𑀧𑀤𑀺𑀧𑀸𑀭𑀫𑀺𑀢𑀸𑀭𑀫𑀺𑀢𑀸𑀲𑀬𑁄

𑀦𑀯𑀫’𑀦𑀼𑀲𑁆𑀲𑀢𑀺𑀬𑀸𑀲𑀢𑀺𑀬𑀸 𑀧𑀭𑀁,

𑀅𑀥𑀺𑀓𑀢𑀸’𑀥𑀺 𑀲𑀫𑀸𑀥𑀺 𑀲𑀫𑀸𑀳𑀺𑀢𑁄

𑀧𑀼𑀭𑀺𑀫𑀚𑀸𑀢𑀺𑀪𑀯𑁂 𑀢𑀺𑀪𑀯𑁂 𑀲𑀭𑀺; () (𑀬𑀫𑀓𑀩𑀦𑁆𑀥𑀦𑀁)

𑁧𑁬.

𑀲𑀼𑀫𑀢𑀺𑀧𑀸𑀤𑀓 𑀛𑀸𑀦 𑀲𑀫𑀼𑀝𑁆𑀞𑀺𑀢𑁄

𑀧𑀼𑀭𑀺𑀫𑀔𑀦𑁆𑀥𑀲𑀫𑀽𑀳𑀫𑀦𑀼𑀓𑁆𑀓𑀫𑀁,

𑀅𑀲𑀭𑀺𑀲𑁄’𑀧𑀦𑀺𑀲𑀺𑀦𑁆𑀦𑀚𑀬𑀸𑀲𑀦-

𑀧𑁆𑀧𑀪𑀼𑀢𑀺 𑀬𑀸𑀯𑀲𑀼𑀫𑁂𑀥𑀪𑀯𑀸𑀯𑀥𑀺𑀁; ()

𑁧𑁭. ¶

𑀇𑀥𑀪𑀯𑁂 𑀲𑀫𑀦𑀦𑁆𑀢𑀭𑀚𑀸𑀢𑀺𑀬𑀁

𑀢𑀤𑀺𑀬𑀔𑀦𑁆𑀥𑀧𑀩𑀦𑁆𑀥𑀫𑀦𑀼𑀲𑁆𑀲𑀭𑀺,

𑀢𑀺𑀘𑀢𑀼𑀧𑀜𑁆𑀘𑀙𑀲𑀢𑁆𑀢 𑀦𑀯’𑀝𑁆𑀞𑀧𑀺

𑀤𑀲𑀧𑀺 𑀯𑀺𑀲𑀢𑀺𑀢𑀺𑀁𑀲𑀢𑀺 𑀚𑀸𑀢𑀺𑀬𑁄; ()

𑁧𑁮.

𑀮𑀳𑀼𑀫𑀦𑀼𑀲𑁆𑀲𑀭𑀺𑀢𑀸𑀴𑀺𑀲 𑀚𑀸𑀢𑀺𑀬𑁄

𑀧𑀪𑀯 𑀔𑀦𑁆𑀥𑀯𑀲𑁂𑀦 𑀢𑀳𑀺𑀁𑀢𑀳𑀺𑀁,

𑀪𑀯𑀲𑀢𑀁𑀪𑀯𑀼𑀧𑀟𑁆𑀠𑀲𑀢𑀁𑀪𑀯-

𑀤𑀲𑀲𑀢𑀁𑀪𑀯𑀮𑀓𑁆𑀔𑀫𑀣𑀸𑀧𑀭𑀁 ()

𑁧𑁯.

𑀅𑀧𑀭𑀺𑀫𑀸𑀡 𑀬𑀼𑀕𑀦𑁆𑀢𑀕𑀚𑀸𑀢𑀺𑀬𑁄

𑀅𑀧𑀭𑀺𑀫𑀸𑀡 𑀯𑀺𑀯𑀝𑁆𑀝𑀕𑀚𑀸𑀢𑀺𑀬𑁄,

𑀅𑀧𑀭𑀺𑀫𑀸𑀡 𑀬𑀼𑀕𑀦𑁆𑀢 𑀯𑀺𑀯𑀝𑁆𑀝𑀕𑀸

𑀅𑀧𑀭𑀺𑀫𑀸𑀡 𑀕𑀼𑀡𑁄 𑀲𑀭𑀺𑀚𑀸𑀢𑀺𑀬𑁄; ()

𑁨𑁦. ¶

𑀘𑀢𑀼𑀲𑀼𑀬𑁄𑀦𑀺𑀲𑀼𑀲𑀢𑁆𑀢𑀫𑀦𑀝𑁆𑀞𑀺𑀢𑀺-

𑀢𑀺𑀪𑀯𑀧𑀜𑁆𑀘𑀕𑀢𑀻𑀲𑀼𑀧𑀭𑀺𑀩𑁆𑀪𑀫𑀺𑀁,

𑀓𑀲𑀺𑀭𑀪𑀸𑀭𑀯𑀳𑁄 𑀅𑀳𑀫𑀜𑁆𑀚𑀲𑁂

𑀲𑀓𑀝𑀪𑀸𑀭𑀯𑀳𑁄 𑀕𑀯𑀚𑁄𑀬𑀣𑀸; ()

𑁨𑁧.

𑀇𑀢𑀺𑀲𑀫𑀜𑁆𑀜 𑀥𑀭𑁄’𑀲𑀺𑀫𑀫𑀼𑀢𑁆𑀭’𑀳𑀁

𑀇𑀢𑀺 𑀦𑀺𑀳𑀻𑀦𑀧𑀲𑀢𑁆𑀣 𑀓𑀼𑀮𑁄 𑀪𑀯𑀺𑀁,

𑀇𑀢𑀺 𑀪𑀯𑀺𑀁 𑀅𑀪𑀻𑀭𑀽𑀧𑀯𑀺𑀭𑀽𑀧𑀺𑀫𑀸

𑀇𑀢𑀺𑀧𑀺 𑀪𑀢𑁆𑀢 𑀨𑀔𑀮𑀸𑀨𑀮 𑀫𑀸𑀳𑀭𑀺𑀁; ()

𑁨𑁨. ¶

𑀅𑀦𑀼𑀪𑀯𑀺𑀁𑀓𑀼𑀲𑀮𑀸𑀓𑀼𑀲𑀮𑀸𑀭𑀳𑀁

𑀯𑀺𑀯𑀺𑀥𑀤𑀼𑀓𑁆𑀔𑀫𑀤𑀼𑀓𑁆𑀔 𑀫𑀤𑀼𑀓𑁆𑀔 𑀔𑀁,

𑀤𑀲𑀲𑀢𑀸𑀬𑀼 𑀲𑀢𑀸𑀬𑀼𑀫𑀺𑀢𑁄𑀪𑀯𑀺𑀁

𑀇𑀢𑀺𑀪𑀯𑀁𑀢𑀺𑀪𑀯𑀁𑀲𑀫𑀦𑀼𑀲𑁆𑀲𑀭𑀺; () (𑀬𑀫𑀓𑀩𑀦𑁆𑀥𑀦𑀁)

𑁨𑁩.

𑀇𑀢𑀺𑀳 𑀬𑀸𑀯𑀲𑀼𑀫𑁂𑀥 𑀪𑀯𑀁 𑀲𑀼𑀥𑀻

𑀲𑀼𑀫𑀭𑀺𑀬𑀸’𑀢𑀺𑀕𑀢𑀸’𑀫𑀺𑀢𑀚𑀸𑀢𑀺𑀬𑁄,

𑀅𑀲𑀭𑀺 𑀲𑁄𑀧𑀝𑀺𑀮𑁄𑀫𑀯𑀲𑀸 𑀢𑀢𑁄-

𑀧𑁆𑀧𑀪𑀼𑀢𑀺 𑀬𑀸𑀯 𑀇𑀢𑁄 𑀢𑀢𑀺𑀬𑀁 𑀪𑀯𑀁; ()

𑁨𑁪.

𑀧𑀼𑀦𑀭𑀫𑀼𑀢𑁆𑀭 𑀢𑀢𑁄𑀪𑀯𑀢𑁄 𑀘𑀼𑀢𑁄

𑀲𑀫𑀼𑀧𑀧𑀚𑁆𑀚𑀺 𑀫𑀦𑀦𑁆𑀢𑀭𑀚𑀸𑀢𑀺𑀬𑀁,

𑀢𑀳𑀺𑀫𑀳𑀁𑀢𑀼𑀲𑀺𑀢𑁂 𑀢𑀺𑀤𑀲𑀸𑀮𑀬𑁂

𑀪𑀯𑀺𑀫𑀢𑀺𑀚𑁆𑀚𑀼𑀢𑀺 𑀲𑀦𑁆𑀢𑀼𑀲𑀺𑀢𑀸𑀪𑀺𑀥𑁄; ()

𑁨𑁫. ¶

𑀢𑀼𑀲𑀺𑀢𑀤𑁂𑀯𑀦𑀺𑀓𑀸𑀬𑀲𑀫𑀢𑁆𑀯𑀬𑁄

𑀧𑀭𑀫𑀭𑀽𑀧 𑀯𑀺𑀮𑀸𑀲𑀥𑀭𑁄’𑀪𑀯𑀺𑀁,

𑀲𑀼𑀫𑀥𑀼𑀭𑀸𑀫𑀢𑀫𑀸𑀳𑀭𑀺 𑀫𑀺𑀤𑀺𑀲𑀁

𑀅𑀦𑀼𑀪𑀯𑀺𑀁𑀲𑀼𑀔𑀫𑀺𑀦𑁆𑀤𑁆𑀭𑀺𑀬 𑀕𑁄𑀘𑀭𑀁; ()

𑁨𑁬.

𑀲𑀫𑀼𑀧𑀚𑀻𑀯𑀺𑀫𑀫𑀸𑀦𑀼𑀲𑀳𑀸𑀬𑀦-

𑀘𑀢𑀼𑀲𑀳𑀲𑁆𑀲 𑀫𑀳𑀁𑀢𑀼𑀲𑀺𑀢𑀸𑀮𑀬𑁂,

𑀫𑀭𑀼𑀕𑀡𑀫𑁆𑀩𑀼𑀭𑀼𑀳𑀸𑀲𑀦𑀬𑀸𑀘𑀦𑀁

𑀇𑀳 𑀧𑀝𑀺𑀘𑁆𑀘 𑀢𑀢𑁄 𑀪𑀯𑀢𑁄 𑀘𑀼𑀢𑁄; ()

𑁨𑁭.

𑀚𑀦𑀦𑀺𑀭𑀸𑀚𑀺𑀦𑀺𑀬𑀸 𑀫𑀡𑀺𑀘𑁂𑀢𑀺𑀬𑁂

𑀲𑀼𑀕𑀢𑀥𑀸𑀢𑀼𑀫𑀺𑀯𑀸’𑀲𑀫𑀓𑀼𑀘𑁆𑀙𑀺𑀬𑀁,

𑀭𑀯𑀺𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀫𑀳𑀁 𑀧𑀺𑀢𑁆𑀭-

𑀦𑀭𑀧𑀢𑀺𑀁 𑀅𑀥𑀺𑀓𑀺𑀘𑁆𑀘 𑀲𑀫𑀧𑁆𑀧𑀬𑀺𑀁; ()

𑁨𑁮.

𑀇𑀢𑀺𑀳 𑀭𑀽𑀧𑀫𑀭𑀽𑀧𑀫𑀦𑀸𑀤𑀺𑀓𑀁

𑀯𑀺𑀧𑀭𑀺𑀯𑀢𑁆𑀢𑀢𑀺 𑀯𑀢𑁆𑀢𑀢𑀺 𑀦𑀸𑀧𑀭𑀁,

𑀯𑀺𑀲𑀢𑀺𑀬𑀸 𑀲𑀢𑀺 𑀬𑀸𑀯 𑀥𑀺𑀬𑀸’𑀲𑀦𑀁

𑀯𑀺𑀳𑀢𑀫𑁄𑀳𑀢𑀫𑁄’𑀲𑀺 𑀪𑀯𑁂 𑀲𑀼𑀥𑀻; () (𑀬𑀫𑀓𑀩𑀦𑁆𑀥𑀦𑀁;)

𑁨𑁯. ¶

𑀘𑀼𑀢𑀼𑀧𑀧𑀢𑁆𑀢𑀺𑀧𑀩𑀦𑁆𑀥𑀯𑀲𑁂𑀦𑀳𑀺

𑀅𑀯𑀲𑀯𑀓𑀢𑁆𑀢𑀦𑀥𑀸𑀢𑀼𑀧𑀭𑀫𑁆𑀧𑀭𑀸,

𑀚𑀮𑀺𑀢𑀤𑀻𑀧𑀲𑀺𑀔𑁂’𑀯 𑀧𑀯𑀢𑁆𑀢𑀢𑀺

𑀦𑀬𑀺𑀥𑀧𑀼𑀕𑁆𑀕𑀮𑀯𑁂𑀤𑀓𑀓𑀸𑀭𑀓𑁄; ()

𑁩𑁦.

𑀧𑀼𑀭𑀺𑀫𑀔𑀦𑁆𑀥𑀧𑀩𑀦𑁆𑀥𑀫𑀦𑁂𑀓𑀥𑀸

𑀇𑀢𑀺𑀯𑀯𑀢𑁆𑀣𑀬𑀢𑁄 𑀳𑀺 𑀓𑀼𑀤𑀺𑀝𑁆𑀞𑀺𑀬𑁄,

𑀅𑀧𑀕𑀢𑀸’𑀢𑁆𑀢𑀦𑀺 𑀯𑀻𑀲𑀢𑀺𑀯𑀢𑁆𑀣𑀼𑀓𑀸

𑀢𑀫𑀺𑀳𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺’𑀢𑀺 𑀯𑀼𑀘𑁆𑀘𑀢𑀺; ()

𑁩𑁧. ¶

𑀲𑀢𑀺𑀫𑀢𑁄 𑀭𑀯𑀺𑀫𑀡𑁆𑀟𑀮𑀲𑀦𑁆𑀢𑀺𑀪𑀸

𑀲𑀓𑀝𑀫𑀕𑁆𑀕𑀦𑀺𑀪𑀸’𑀬𑀫𑀦𑀼𑀲𑁆𑀲𑀢𑀺,

𑀧𑀼𑀭𑀺𑀫𑀚𑀸𑀢𑀺𑀲𑀼 𑀦𑀸𑀪𑀺𑀯𑀺𑀭𑀚𑁆𑀛𑀢𑀺

𑀲𑀭𑀯𑀬𑁂 𑀲𑀭𑀪𑀗𑁆𑀕𑀲𑀭𑁄 𑀬𑀣𑀸; ()

𑁩𑁨.

𑀅𑀘𑀼𑀢𑀺𑀬𑀸𑀘𑀼𑀢𑀺𑀬𑀸𑀫𑀢𑀺 𑀫𑀸𑀲𑀦𑁂

𑀲𑀼𑀢𑀯𑀢𑀻’𑀢𑀯𑀢𑀻’𑀳𑀢𑀺 𑀩𑀼𑀚𑁆𑀛𑀺𑀢𑀼𑀁,

𑀲𑀫𑀼𑀤𑀺𑀢𑁂’𑀫𑀼𑀤𑀺𑀢𑁂 𑀓𑀼𑀫𑀼𑀤𑀸𑀦𑀺’𑀫

𑀦𑀓𑀫𑀮𑀸 𑀓𑀫𑀮𑀸𑀦𑀺 𑀅𑀮𑀗𑁆𑀓𑀭𑀺; () (𑀬𑀫𑀓𑀩𑀦𑁆𑀥𑀦𑀁;)

𑁩𑁩.

𑀭𑀼𑀘𑀺𑀭𑀘𑀦𑁆𑀤𑀫𑀭𑀺𑀘𑀺𑀯𑀺𑀮𑁂𑀧𑀺𑀦𑀻

𑀓𑀼𑀫𑀼𑀤𑀲𑀡𑁆𑀟𑀯𑀺𑀓𑀸𑀲𑀯𑀺𑀳𑀸𑀲𑀺𑀦𑀻,

𑀭𑀚𑀦𑀺𑀫𑀚𑁆𑀛𑀺𑀫𑀬𑀸𑀫𑀯𑀺𑀮𑀸𑀲𑀺𑀦𑀻

𑀢𑀤𑀥𑀺𑀲𑀻𑀮𑀥𑀦𑀁 𑀯𑀺𑀚𑀸𑀪𑀸𑀲𑀺 𑀓𑀺𑀁 ()

𑁩𑁪. ¶

𑀖𑀦𑀲𑀼𑀦𑀻𑀮𑀯𑀺𑀲𑀸𑀮𑀢𑀧𑁄𑀯𑀦𑀁

𑀅𑀦𑀮𑀪𑀸𑀲𑀼𑀭𑀓𑀻𑀝𑀓𑀼𑀮𑀸𑀓𑀼𑀮𑀁,

𑀭𑀚𑀦𑀺𑀭𑀸𑀚𑀺𑀦𑀺𑀬𑀸 𑀓𑀼𑀲𑀼𑀫𑀸𑀓𑀼𑀮𑀸-

𑀯𑀺𑀭𑀴𑀓𑁂𑀲𑀓𑀮𑀸𑀧𑀲𑀺𑀭𑀺𑀁 𑀪𑀚𑀻; ()

𑁩𑁫.

𑀢𑀤𑀼𑀧𑀳𑀸𑀭𑀭𑀢𑀸𑀬𑀺’𑀯 𑀓𑁄𑀫𑀼𑀤𑀻-

𑀪𑀼𑀚𑀮𑀢𑀸𑀬 𑀯𑀺𑀪𑀸𑀯𑀭𑀺𑀪𑀻𑀭𑀼𑀬𑀸,

𑀕𑀳𑀺𑀢𑀮𑀸𑀚𑀓𑀪𑀸𑀚𑀦𑀯𑀺𑀩𑁆𑀪𑀫𑀁

𑀨𑀼𑀝𑀺𑀢𑀓𑁂𑀭𑀯𑀓𑀸𑀦𑀦 𑀫𑀸𑀳𑀭𑀺; ()

𑁩𑁬.

𑀢𑀺𑀪𑀼𑀯𑀦𑁂𑀓𑀭𑀯𑀺𑀁 𑀭𑀯𑀺𑀪𑀢𑁆𑀢𑀭𑀺

𑀅𑀧𑀭𑀤𑀻𑀧𑀕𑀢𑁂 𑀲𑀭𑀲𑀻𑀯𑀥𑀽,

𑀭𑀚𑀦𑀺𑀬𑀸 𑀯𑀺𑀳𑀺𑀢𑀸𑀯𑀲𑀭𑀸’𑀧𑀺 𑀓𑀺𑀁

𑀧𑀭𑀺𑀘𑀭𑀺𑀁𑀲𑀼 𑀧𑀢𑀺𑀩𑁆𑀩𑀢𑀫𑀩𑁆𑀪𑀼𑀢𑀁; ()

𑁩𑁭.

𑀧𑀭𑀺𑀮𑀲𑀺𑀁𑀲𑀼 𑀪𑀼𑀲𑀁 𑀪𑀼𑀯𑀦𑁂’𑀯𑀼 𑀪𑁄

𑀭𑀯𑀺𑀧𑀣𑁂 𑀯𑀺𑀢𑀢𑀸, 𑀯𑀺𑀢𑀢𑀸𑀭𑀓𑀸,

𑀅𑀦𑀺𑀫𑀺𑀲𑁂 𑀳𑀺 𑀫𑀳𑀸𑀬 𑀫𑀳𑀺𑀫𑀢𑁄

𑀚𑀮𑀺𑀢𑀤𑀻𑀧𑀲𑀺𑀔𑀸𑀘 𑀫𑀳𑀻𑀢𑀮𑁂; ()

𑁩𑁮. ¶

𑀫𑀓𑀭𑀢𑁂𑀦𑀓𑁂𑀢𑀦𑀲𑀦𑁆𑀢𑀺𑀪𑀸

𑀢𑀼𑀳𑀺𑀦𑀤𑀻𑀥𑀺𑀢𑀺𑀤𑀻𑀥𑀺𑀢𑀺 𑀫𑀚𑁆𑀛𑀺𑀫𑁂,

𑀦𑀺𑀲𑀺 𑀤𑀤𑀸𑀭 𑀲𑀤𑀸𑀭𑀲𑀭𑀸𑀕𑀺𑀦𑀁

𑀳𑀤𑀬𑀓𑁂𑀭𑀯𑀓𑁂𑀭𑀯𑀓𑀸𑀦𑀦𑀁; () (𑀬𑀫𑀓𑀩𑀦𑁆𑀥𑀦𑀁)

𑁩𑁯.

𑀅𑀣 𑀪𑀯𑀸𑀪𑀯𑀤𑀺𑀝𑁆𑀞𑀺𑀯𑀺𑀪𑁂𑀤 𑀦𑀁

𑀯𑀺𑀫𑀢𑀺 𑀫𑁄𑀳 𑀢𑀫𑁄𑀧𑀼𑀝𑀧𑀸𑀝 𑀦𑀁,

𑀘𑀼𑀢𑀼𑀧𑀧𑀸𑀢𑀧𑀪𑀼𑀢𑀺 𑀯𑀺𑀚𑀸𑀦 𑀦𑀁

𑀓𑀣𑀫𑀮𑀢𑁆𑀣 𑀲𑀤𑀺𑀩𑁆𑀩𑀯𑀺𑀮𑁄𑀘 𑀦𑀁; ()

𑁪𑁦.

𑀓𑀼𑀲𑀮𑀓𑀫𑁆𑀫𑀧𑀪𑀸𑀯𑀲𑀫𑀼𑀩𑁆𑀪𑀯𑀁

𑀲𑀼𑀔𑀼𑀫𑀤𑀼𑀭𑀕𑀢𑀸𑀦𑀺’𑀧𑀺 𑀕𑁄𑀘𑀭𑀁,

𑀅𑀦𑀺𑀫𑀺𑀲𑀸𑀦 𑀧𑀲𑀸𑀤𑀯𑀺𑀮𑁄𑀘𑀦𑀁

𑀭𑀼𑀥𑀺𑀭𑀲𑁂𑀫𑁆𑀪𑀫𑀓𑀮𑀸𑀧𑀕𑀢𑀁𑀓 𑀬𑀣𑀸; ()

𑁪𑁧. ¶

𑀢𑀣𑀭𑀺𑀯’𑀓𑁆𑀔𑀺𑀲𑀫𑁂𑀦 𑀲𑀼𑀥𑀸𑀲𑀺𑀦𑀁

𑀯𑀺𑀫𑀢𑀺𑀤𑀺𑀝𑁆𑀞𑀺𑀫𑀺𑀲𑁄𑀥𑀦𑀳𑁂𑀢𑀼𑀦𑀸,

𑀳𑀢𑀫𑀦𑁄𑀧𑀓𑀺𑀮𑁂𑀲𑀫𑀮𑁂𑀦 𑀲𑁄

𑀯𑀺𑀕𑀢𑀫𑀸𑀦𑀼𑀲𑀓𑁂𑀦𑀳𑀺 𑀘𑀓𑁆𑀔𑀼𑀦𑀸; ()

𑁪𑁨.

𑀓𑀭𑀢𑀮𑀫𑁆𑀩𑀼𑀭𑀼𑀳𑁄𑀧𑀭𑀺𑀘𑀓𑁆𑀔𑀼𑀫𑀸

𑀬𑀣𑀸𑀭𑀺𑀯𑀸’𑀫𑀮𑀓𑀻𑀩𑀤𑀭𑀻𑀨𑀮𑀁,

𑀘𑀼𑀢𑀼𑀧𑀧𑀢𑁆𑀢𑀺𑀕𑀢𑁂𑀧𑀺 𑀢𑀣𑀸𑀕𑀢𑁂

𑀢𑀺𑀪𑀼𑀯𑀦𑀫𑁆𑀳𑀺 𑀬𑀣𑀺𑀘𑁆𑀙𑀺𑀢 𑀫𑀤𑁆𑀤𑀲; ()

𑁪𑁩.

𑀦𑀯𑀼𑀧𑀧𑀸𑀢𑀔𑀡𑁂𑀘 𑀘𑀼𑀢𑀺𑀓𑁆𑀔𑀡𑁂

𑀯𑀺𑀲𑀬𑀪𑀸𑀯𑀫𑀼𑀧𑁂𑀦𑁆𑀢𑀺 𑀢𑀣𑀸𑀕𑀢𑀸,

𑀢𑀤𑀼𑀧𑀘𑀸𑀭𑀯𑀲𑁂𑀦𑀺’𑀳𑀤𑀲𑁆𑀲𑀦𑀁

𑀔𑀫𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀲𑀪𑁄; ()

𑁪𑁪. ¶

𑀉𑀧𑀥𑀺𑀳𑀻𑀦’𑀥𑀺𑀳𑀦𑀻𑀦𑀢𑀣𑀸𑀕𑀢𑁂

𑀅𑀦𑀧𑀦𑀻𑀢𑀧𑀡𑀻𑀢 𑀢𑀣𑀸𑀕𑀢𑁂,

𑀅𑀦𑀪𑀺𑀭𑀽𑀧’𑀪𑀺𑀭𑀽𑀧𑀢𑀣𑀸𑀕𑀢𑁂

𑀲𑀼𑀕𑀢𑀺 𑀤𑀼𑀕𑁆𑀕𑀢𑀺 𑀤𑀼𑀕𑁆𑀕 𑀫𑀼𑀧𑀸𑀕𑀢𑁂; () (𑀬𑀫𑀓𑀩𑀦𑁆𑀥𑀦𑀁;)

𑁪𑁫.

𑀢𑀺𑀭𑀺𑀬𑀫𑀼𑀤𑁆𑀥𑀫𑀥𑁄𑀧𑀢𑀺𑀢𑀻𑀬 𑀲𑁄

𑀫𑀢𑀺𑀧𑀳𑀁 𑀅𑀪𑀺𑀧𑀲𑁆𑀲𑀺 𑀬𑀣𑀸𑀭𑀳𑀁,

𑀦𑀺𑀘𑀺𑀢𑀓𑀫𑁆𑀫𑀧𑀣𑁂𑀘 𑀢𑀣𑀸𑀕𑀢𑁂

𑀉𑀧𑀭𑀺 𑀧𑀸𑀤𑀓𑀛𑀸𑀦𑀲𑀫𑀼𑀝𑁆𑀞𑀺𑀢𑁄; ()

𑁪𑁬.

𑀅𑀓𑀼𑀲𑀮𑀸𑀦𑀺 𑀓𑀭𑀺𑀁𑀲𑀼 𑀇𑀫𑁂 𑀢𑀺𑀥𑀸

𑀲𑀼𑀘𑀭𑀺𑀢𑀸𑀦𑀺 𑀓𑀭𑀺𑀁𑀲𑀼 𑀢𑀺𑀥𑀸 𑀇𑀫𑁂,

𑀅𑀭𑀺𑀬𑀫𑀕𑁆𑀕𑀨𑀮𑁂𑀳𑀺𑀓 𑀲𑀫𑀗𑁆𑀕𑀺𑀦𑁄

𑀦𑀲𑀫𑀡𑀸’𑀢𑀺𑀧𑀺 𑀅𑀦𑁆𑀢𑀺𑀫𑀯𑀢𑁆𑀣𑀼𑀦𑀸; ()

𑁪𑁭.

𑀕𑀼𑀡𑀦𑀺𑀭𑀸𑀓𑀭𑀡𑁂𑀦 𑀅𑀲𑀸𑀥𑀯𑁄

𑀉𑀧𑀯𑀤𑀺𑀁𑀲𑀼 𑀦𑀲𑀦𑁆𑀢𑀺 𑀕𑀼𑀡𑀸’𑀢𑀺’𑀫𑁂,

𑀅𑀧𑀺𑀘𑀲𑀧𑁆𑀧𑀼𑀭𑀺𑀲𑀸’𑀭𑀺𑀬𑀧𑀼𑀕𑁆𑀕𑀮𑁂

𑀢𑀤𑀦𑀼𑀭𑀽𑀧𑀕𑀼𑀡𑁂𑀳𑀺 𑀧𑀲𑀁𑀲𑀬𑀼𑀁; ()

𑁪𑁮.

𑀯𑀺𑀢𑀣𑀮𑀤𑁆𑀥𑀺𑀧𑀭𑀸𑀫𑀲𑀦𑀸 𑀇𑀫𑁂

𑀧𑀭𑀫𑀮𑀤𑁆𑀥𑀺𑀧𑀭𑀸𑀫𑀲𑀦𑀸 𑀇𑀫𑁂,

𑀕𑀳𑀺𑀢𑀮𑀤𑁆𑀥𑀺𑀯𑀲𑁂𑀦 𑀢𑀳𑀺𑀁𑀢𑀳𑀺𑀁

𑀦𑀺𑀘𑀺𑀢𑀓𑀫𑁆𑀫𑀧𑀣𑀸 𑀚𑀦𑀢𑀸 𑀅𑀬𑀁; ()

𑁪𑁯.

𑀘𑀢𑀼𑀭𑀧𑀸𑀬𑀫𑀧𑀸𑀬𑀫𑀧𑀸𑀬𑀢𑀺𑀁

𑀉𑀧𑀕𑀢𑀸 𑀲𑀼𑀕𑀢𑀺 𑀲𑀼𑀕𑀢𑀺𑀁𑀇𑀢𑀺,

𑀬𑀢𑀺 𑀲𑀫𑀸𑀳𑀺𑀢𑀯𑀸𑀳𑀺𑀢𑀯𑀸’ 𑀤𑁆𑀤𑀲

𑀅𑀦𑀺𑀫𑀺𑀲𑀓𑁆𑀔𑀺𑀲𑀫𑀓𑁆𑀔𑀺𑀲𑀫𑀦𑁆𑀯𑀺𑀢𑁄; () (𑀬𑀫𑀓𑀩𑀦𑁆𑀥𑀦𑀁)

𑁫𑁦. ¶

𑀲𑀫𑁆𑀫𑀸𑀲𑀫𑁆𑀫𑀲𑀢𑁄𑀲𑀢𑁄 𑀲𑀢𑀺𑀫𑀢𑁄 𑀓𑀫𑁆𑀫𑀸𑀤𑀺𑀳𑁂𑀢𑀼𑀩𑁆𑀪𑀯𑀁

𑀭𑀽𑀧𑀸𑀭𑀽𑀧𑀫𑀦𑀸𑀕𑀢𑀗𑁆𑀦𑀺 𑀫𑀳𑀸 𑀫𑁄𑀳𑀦𑁆𑀥𑀓𑀸𑀭𑁄 𑀥𑀺𑀬𑀸,

𑀅𑀩𑁆𑀪𑀢𑁆𑀣𑀗𑁆𑀕𑀫𑀺 𑀬𑀸𑀬 𑀲𑁄𑀴𑀲𑀯𑀺𑀥𑀸 𑀓𑀗𑁆𑀔𑀸𑀘𑀢𑁂𑀓𑀸𑀮𑀺𑀓𑀸

𑀲𑀸𑀓𑀗𑁆𑀔𑀸𑀢𑀭𑀡𑀩𑁆𑀩𑀺𑀲𑀼𑀤𑁆𑀥𑀼 𑀤𑀼𑀢𑀺𑀬𑁂𑀬𑀸𑀫𑁂 𑀧𑀯𑀢𑁆𑀢𑀸 𑀫𑀢𑀺; ()

𑀇𑀢𑀺 𑀫𑁂𑀥𑀸𑀦𑀦𑁆𑀤𑀸𑀪𑀺𑀥𑀸𑀦𑁂𑀦𑀬𑀢𑀺𑀦𑀸 𑀯𑀺𑀭𑀘𑀺𑀢𑁂 𑀲𑀓𑀮𑀓𑀯𑀺𑀚𑀦 𑀳𑀤𑀬𑀸𑀦𑀦𑁆𑀤𑀤𑀸𑀦𑀦𑀺𑀤𑀸𑀦𑁂 𑀚𑀺𑀦𑀯𑀁𑀲𑀤𑀻𑀧𑁂 𑀅𑀯𑀺𑀤𑀼𑀭𑁂 𑀦𑀺𑀤𑀸𑀦𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀥𑀺𑀕𑀫 𑀧𑀯𑀢𑁆𑀢𑀺𑀧𑀭𑀺𑀤𑀻𑀧𑁄 𑀢𑁂𑀭𑀲𑀫𑁄 𑀲𑀕𑁆𑀕𑁄.

𑁧. ¶

𑀲𑀼𑀥𑀸𑀓𑀭𑁂 𑀯𑀺𑀓𑀲𑀺𑀢𑀓𑁂𑀭𑀯𑀸𑀓𑀭𑁂

𑀓𑀫𑁂𑀦𑀼’ 𑀧𑀸𑀲𑀢𑀺 𑀲𑀢𑀺 𑀧𑀘𑁆𑀙𑀺𑀫𑀁 𑀤𑀺𑀲𑀁,

𑀯𑀺𑀳𑀸𑀯𑀭𑀻 𑀲𑀲𑀺𑀭𑀼𑀘𑀺𑀭𑀸𑀦𑀦𑀁 𑀚𑀺𑀦𑀁

𑀪𑀚𑀦𑁆𑀢𑀺 𑀧𑀘𑁆𑀙𑀺𑀫𑀫𑀣𑀬𑀸𑀫 𑀫𑁄𑀢𑀭𑀺; ()

𑁨.

𑀔𑀡𑀁 𑀦𑀺𑀲𑀸𑀧𑀢𑀺 𑀯𑀺𑀭𑀳𑀸𑀢𑀼𑀭𑁂𑀯’𑀬𑀁

𑀦𑀺𑀲𑀸𑀯𑀥𑀽 𑀫𑀮𑀺𑀦𑀧𑀬𑁄𑀥𑀭𑀫𑁆𑀩𑀭𑀸,

𑀘𑀢𑀼𑀤𑁆𑀤𑀺𑀲𑀸𑀬𑀢𑀦𑀬𑀦𑁂𑀳𑀺 𑀲𑀫𑁆𑀧𑀢𑀺

𑀫𑀼𑀫𑁄𑀘 𑀲𑀻𑀓𑀭𑀦𑀺𑀓𑀭𑀲𑁆𑀲𑀼𑀩𑀺𑀦𑁆𑀤𑀯𑁄; ()

𑁩.

𑀓𑀺𑀮𑁂𑀲𑀦𑀸𑀲𑀦𑀧𑀲𑀼𑀢𑁄 𑀲𑀫𑀸𑀥𑀺𑀦𑀸

𑀧𑀼𑀣𑀼𑀚𑁆𑀚𑀦𑁄 𑀢𑀤𑀦𑀼𑀲𑀬𑀁 𑀬𑀣𑀼𑀩𑁆𑀩𑀳𑁂,

𑀢𑀣𑀁’𑀲𑀼𑀦𑀸 𑀪𑀼𑀯𑀦𑀓𑀮𑀗𑁆𑀓𑀲𑁄𑀥𑀦𑁄

𑀦𑀳𑁂 𑀓𑀮𑀸𑀦𑀺𑀥𑀺 𑀲𑀓𑀮𑀗𑁆𑀓 𑀫𑀼𑀩𑁆𑀩𑀳𑀻; ()

𑁪. ¶

𑀧𑀼𑀭𑀢𑁆𑀣𑀺𑀫𑁂 𑀦𑀪𑀲𑀺 𑀯𑀺𑀓𑀺𑀡𑁆𑀡 𑀢𑀸𑀭𑀓𑀸-

𑀧𑀩𑀦𑁆𑀥𑀦𑀺𑀩𑁆𑀪𑀭𑀢𑀺𑀫𑀺𑀭𑀁 𑀯𑀺𑀬𑀸𑀓𑀭𑀻

𑀦𑀺𑀲𑀸𑀯𑀥𑀼 𑀯𑀮𑀬𑀺𑀢𑀳𑀸𑀭𑀪𑀸𑀲𑀼𑀭-

𑀲𑀼𑀦𑀻𑀮𑀓𑁄𑀫𑀮𑀦𑀯𑀓𑀼𑀦𑁆𑀢𑀮𑀲𑁆𑀲𑀺𑀭𑀺𑀁; ()

𑁫.

𑀯𑀺𑀧𑀲𑁆𑀲𑀦𑀸𑀩𑀮𑀯𑀺𑀫𑀮𑀻𑀓𑀢𑀦𑁆𑀢𑀭𑁄

𑀚𑀺𑀦𑀗𑁆𑀓𑀼𑀭𑁄 𑀤𑀼𑀭𑀺𑀢𑀫𑀮𑀁𑀯 𑀘𑀦𑁆𑀤𑀺𑀫𑀸,

𑀫𑀭𑀺𑀘𑀺𑀲𑀜𑁆𑀘𑀬𑀥𑀯𑀮𑀻𑀓𑀢𑀫𑁆𑀩𑀭𑁄

𑀢𑀫𑁄𑀘𑀬𑀁 𑀢𑀫𑀦𑀼𑀘𑀭𑀁 𑀦𑀺𑀭𑀸𑀓𑀭𑀻; ()

𑁬.

𑀧𑀯𑀸𑀬𑀺 𑀲𑀻𑀢𑀮𑀫𑀮𑀬𑀸𑀦𑀺𑀮𑁄 𑀪𑀼𑀲𑀁

𑀤𑀺𑀲𑀗𑁆𑀕𑀦𑀸 𑀲𑀺𑀲𑀺𑀭𑀢𑀼𑀲𑀸𑀭𑀩𑀺𑀦𑁆𑀤𑀯𑁄,

𑀫𑀼𑀫𑁄𑀘 𑀲𑀸 𑀯𑀺𑀘𑀭𑀺 𑀦𑀺𑀲𑀸 𑀦𑀺𑀲𑀸𑀓𑀭-

𑀫𑀭𑀻𑀘𑀺𑀫𑀜𑁆𑀚𑀭𑀺𑀧𑀭𑀺𑀘𑀼𑀫𑁆𑀩𑀺𑀢𑁂 𑀪𑀼𑀯𑀺; ()

𑁭. ¶

𑀦𑀺𑀭𑀗𑁆𑀕𑀡𑁂 𑀦𑀺𑀭𑀼𑀧𑀓𑀺𑀮𑁂𑀲 𑀦𑀺𑀘𑁆𑀘𑀮𑁂

𑀫𑀼𑀤𑀼𑀫𑁆𑀳𑀺 𑀓𑀫𑁆𑀫𑀦𑀺𑀬𑀯𑀺𑀲𑀼𑀤𑁆𑀥𑀺𑀪𑀸𑀯𑀕𑁂,

𑀲𑀫𑀸𑀳𑀺𑀢𑁂 𑀫𑀦𑀲𑀺 𑀯𑀺𑀧𑀲𑁆𑀲𑀦𑀸𑀫𑀦𑀁

𑀅𑀣𑀸𑀲𑀯𑀓𑁆𑀔𑀬𑀫𑀢𑀺𑀬𑀸’ 𑀪𑀻𑀦𑀻𑀳𑀭𑀺; ()

𑁮.

𑀲𑀩𑀸𑀭𑀲𑀗𑁆𑀕𑀺𑀓𑀪𑀯𑀘𑀓𑁆𑀓 𑀫𑀚𑁆𑀛𑀕𑀸

𑀅𑀦𑀼𑀓𑁆𑀓𑀫𑁂𑀦’𑀧𑀺 𑀧𑀝𑀺𑀮𑁄𑀫𑀢𑁄 𑀲𑀼𑀥𑀻

𑀯𑀯𑀢𑁆𑀣𑀬𑀁 𑀬𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀁

𑀯𑀺𑀲𑀼𑀤𑁆𑀥𑀺𑀬𑀸 𑀯𑀺𑀲𑀤𑁆𑀥𑀺𑀬𑀸 𑀢𑀤𑀼𑀘𑁆𑀘𑀢𑁂; ()

𑁯.

𑀔𑀡𑁂𑀦 𑀬𑁄 𑀲𑀭𑀢𑀺 𑀲𑀳𑀲𑁆𑀲𑀮𑁄𑀘𑀦𑁄

𑀬𑀣𑀸𑀯𑀢𑁄 𑀤𑀲𑀲𑀢𑀫𑀢𑁆𑀣 𑀫𑀲𑁆𑀲𑀧𑀺,

𑀯𑀺𑀥𑀸𑀢𑀼𑀦𑁄 𑀦𑀺𑀚𑀘𑀭𑀡𑀗𑁆𑀕𑀼𑀮𑀺𑀧𑁆𑀧𑀪𑀸-

𑀯𑀺𑀪𑀼𑀲𑀺𑀢𑀸’𑀔𑀺𑀮𑀪𑀼𑀯𑀦𑁄𑀤𑀭𑀲𑁆𑀲’𑀧𑀺; ()

𑁧𑁦. ¶

𑀅𑀲𑁂𑀲𑀦𑀻𑀯𑀭𑀡𑀢𑀼𑀲𑀸𑀭𑀲𑁄𑀲𑀺𑀦𑁄

𑀲𑀫𑀸𑀥𑀺𑀲𑀫𑁆𑀪𑀯’ 𑀔𑀺𑀮𑀛𑀸𑀦𑀮𑀸𑀪𑀺𑀦𑁄,

𑀚𑀕𑀢𑁆𑀢𑀬𑀁 𑀓𑀭𑀩𑀤𑀭𑀁’𑀯 𑀤𑀲𑁆𑀲𑀺𑀦𑁄

𑀦𑀬𑀲𑁆𑀲 𑀓𑀲𑁆𑀲𑀘𑀺 𑀯𑀺𑀲𑀬𑀢𑁆𑀢 𑀫𑀸𑀕𑀢𑀁; ()

𑁧𑁧.

𑀅𑀤𑀺𑀝𑁆𑀞 𑀫𑀧𑁆𑀧𑀝𑀺 𑀯𑀺𑀤𑀺𑀢𑀁 𑀲𑀬𑀁𑀧𑀼𑀭𑀸

𑀅𑀦𑀼𑀢𑁆𑀢𑀭𑀁𑀢𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀁,

𑀇𑀫𑀲𑁆𑀲 𑀕𑁄𑀢𑀫𑀲𑀫𑀡𑀲𑁆𑀲 𑀲𑀺𑀚𑁆𑀛𑀢𑁂

𑀕𑀭𑀽𑀧𑀲𑁂𑀯𑀦𑀯𑀺𑀭𑀳𑀲𑁆𑀲 𑀅𑀩𑁆𑀪𑀽𑀢𑀁; ()

𑁧𑁨.

𑀪𑀯𑁂𑀪𑀯𑁂 𑀧𑀭𑀺𑀯𑀺𑀢𑀤𑀸𑀦𑀧𑀸𑀭𑀫𑀺-

𑀩𑀮𑁂𑀦’𑀳𑀽 𑀯𑀺𑀚𑀝𑀺𑀢𑀮𑁄𑀪𑀩𑀦𑁆𑀥𑀦𑁄,

𑀲𑀫𑁂𑀢𑁆𑀢𑀺𑀔𑀦𑁆𑀢𑁆𑀬𑀦𑀼𑀕𑀢𑀲𑀻𑀮𑀧𑀸𑀭𑀫𑀻-

𑀚𑀮𑁂𑀦 𑀦𑀺𑀩𑁆𑀩𑀼𑀢𑀧𑀝𑀺𑀖𑀸𑀤𑀺𑀧𑀸𑀯𑀓𑁄; ()

𑁧𑁩. ¶

𑀪𑀯𑁂𑀪𑀯𑁂 𑀪𑀯𑀺 𑀣𑀺𑀭𑀜𑀸𑀡𑀧𑀸𑀭𑀫𑀻-

𑀧𑀥𑀁𑀲𑀺𑀢𑀸’𑀔𑀺𑀮𑀯𑀺𑀧𑀭𑀻𑀢𑀤𑀲𑁆𑀲𑀦𑁄,

𑀯𑀺𑀦𑀸𑀬𑀓𑀧𑁆𑀧𑀪𑀼𑀢𑀺 𑀕𑀭𑀽𑀧𑀲𑁂𑀯𑀦-

𑀯𑀲𑁂𑀦 𑀧𑀼𑀘𑁆𑀙𑀺𑀬 𑀳𑀢𑀫𑁄𑀳𑀲𑀁𑀲𑀬𑁄; ()

𑁧𑁪.

𑀪𑀯𑁂𑀪𑀯𑁂 𑀩𑀼𑀥𑀚𑀦𑀧𑀼𑀚𑀦𑀸𑀤𑀺𑀦𑀸

𑀕𑀭𑀽𑀪𑀺𑀯𑀸𑀤𑀦𑀩𑀳𑀼𑀫𑀸𑀦𑀦𑀸𑀤𑀺𑀦𑀸,

𑀚𑀦𑀸𑀧𑀘𑀸𑀬𑀦𑀯𑀺𑀥𑀺𑀦𑀸 𑀯𑀺𑀦𑁄𑀤𑀬𑀺

𑀲𑀤𑀧𑁆𑀧 𑀫𑀼𑀦𑁆𑀦𑀢𑀺 𑀫𑀪𑀺𑀫𑀸𑀦 𑀫𑀼𑀤𑁆𑀥𑀝𑀁; ()

𑁧𑁫.

𑀪𑀯𑁂𑀪𑀯𑁂 𑀯𑀺𑀪𑀯𑀭𑀢𑀺𑀁 𑀭𑀢𑀺𑀁𑀪𑀯𑁂

𑀅𑀦𑀗𑁆𑀕𑀲𑀗𑁆𑀕𑀫𑀭𑀢𑀺 𑀫𑀗𑁆𑀕𑀦𑀸𑀭𑀢𑀺𑀁,

𑀖𑀭𑀸’𑀪𑀺𑀦𑀺𑀓𑁆𑀔𑀫𑀺𑀬’𑀦𑀕𑀸𑀭𑀺𑀬𑀁𑀭𑀢𑁄

𑀅𑀧𑀸𑀦𑀼𑀤𑀻 𑀧𑀝𑀺𑀮𑀪𑀺 𑀛𑀸𑀦 𑀫𑀢𑁆𑀢𑀦𑀸; ()

𑁧𑁬. ¶

𑀪𑀯𑁂𑀪𑀯𑁂 𑀲’𑀯𑀻𑀭𑀺𑀬 𑀲𑀘𑁆𑀘𑀧𑀸𑀭𑀫𑀻-

𑀧𑀭𑀸𑀬𑀡𑁄 𑀅𑀥𑀺𑀓𑀼𑀲𑀮𑁂𑀲𑀼 𑀘𑀸𑀭𑀢𑀺𑀁,

𑀚𑀳𑀁 𑀯𑀘𑀻𑀤𑀼𑀭𑀺𑀢𑀫𑀮𑀁 𑀘𑀢𑀼𑀩𑁆𑀩𑀺𑀥𑀁

𑀯𑀺𑀲𑁄𑀥𑀬𑀻 𑀦𑀺𑀚𑀳𑀤𑀬𑀜𑁆𑀘 𑀧𑀕𑁆𑀕𑀳𑀻; ()

𑁧𑁭.

𑀪𑀯𑁂 𑀪𑀯𑁂 𑀇𑀢𑀺 𑀲𑀫𑀢𑀺𑀁𑀲𑀧𑀸𑀭𑀫𑀻-

𑀯𑀺𑀲𑀼𑀚𑁆𑀛𑀺𑀢𑀸’ 𑀓𑀼𑀲𑀮𑀫𑀦𑁄𑀫𑀮𑀺𑀫𑀲𑁄,

𑀓𑀫𑁂𑀦 𑀇𑀦𑁆𑀤𑁆𑀭𑀺𑀬 𑀧𑀭𑀺𑀧𑀸𑀓𑀢𑀁 𑀕𑀢𑁄

𑀦𑀘𑀜𑁆𑀜𑀲𑀫𑁆𑀧𑀤 𑀫𑀳𑀺𑀧𑀢𑁆𑀣𑀬𑀻 𑀲𑀼𑀥𑀻; ()

𑁧𑁮.

𑀪𑀯𑁂 𑀪𑀯𑁂 𑀅𑀕𑀡𑀺𑀢𑀫𑁂𑀯 𑀩𑁄𑀥𑀺𑀬𑀸

𑀤𑀬𑀸𑀬 𑀘𑁄𑀤𑀺𑀢𑀳𑀤𑀬𑁄’𑀳𑀺 𑀓𑀧𑀢𑁆𑀣𑀦𑀁,

𑀅𑀓𑀸 𑀘𑀢𑀼𑀩𑁆𑀩𑀺𑀥𑀨𑀮𑀲𑀫𑁆𑀧𑀤𑀸 𑀢𑀢𑁄

𑀧𑀤𑀺𑀲𑁆𑀲𑀭𑁂 𑀦𑀺𑀭𑀯𑀲𑀭𑀸 𑀭𑀺𑀯’𑀦𑁆𑀢𑀦𑀺; ()

𑁧𑁯. ¶

𑀪𑀯𑁂 𑀪𑀯𑁂 𑀲𑀓𑀧𑀡𑀺𑀥𑀸𑀦𑀲𑀢𑁆𑀢𑀺𑀬𑀸

𑀢𑀺𑀥𑀸’𑀳𑀺𑀲𑀗𑁆𑀔𑀢𑀓𑀼𑀲𑀮𑀁 𑀇𑀫𑀲𑁆𑀲 𑀪𑁄,

𑀦𑀲𑀸𑀥𑀬𑁂 𑀓𑀺𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀁

𑀅𑀦𑀜𑁆𑀜𑀧𑀼𑀕𑁆𑀕𑀮𑀯𑀺𑀲𑀬𑀁 𑀦𑀲𑀁𑀲𑀬𑁄; ()

𑁨𑁦.

𑀅𑀦𑀺𑀘𑁆𑀘𑀢𑁄’𑀤𑀬𑀯𑀬𑀢𑀸𑀬 𑀤𑀼𑀓𑁆𑀔𑀢𑁄

𑀲𑀤𑀼𑀓𑁆𑀔𑀢𑀸𑀬𑀧𑀺 𑀅𑀯𑀺𑀥𑁂𑀬𑀢𑀸𑀤𑀺𑀦𑀸,

𑀅𑀦𑀢𑁆𑀢𑀢𑁄 𑀯𑀭𑀫𑀢𑀺 𑀔𑀦𑁆𑀥𑀧𑀜𑁆𑀘𑀓𑀁

𑀧𑀼𑀦𑀧𑁆𑀧𑀼𑀦𑀁 𑀲𑀫𑀼𑀧𑀧𑀭𑀺𑀓𑁆𑀔 𑀫𑀼𑀲𑁆𑀲𑀳𑀻; ()

𑁨𑁧.

𑀓𑀮𑀸𑀧𑀲𑀫𑁆𑀫𑀲𑀦𑀫𑀼𑀔𑁂𑀦 𑀩𑀸𑀭𑀲-

𑀯𑀺𑀥𑁂 𑀅𑀦𑀸𑀤𑀺𑀓𑀪𑀯𑀘𑀓𑁆𑀓𑀦𑀺𑀲𑁆𑀲𑀺𑀢𑁂,

𑀓𑀫𑁂𑀦 𑀲𑀢𑁆𑀢𑀲𑀼 𑀅𑀦𑀼𑀧𑀲𑁆𑀲𑀦𑀸𑀲𑀼 𑀲𑁄

𑀚𑀺𑀦𑀗𑁆𑀓𑀼𑀭𑁄 𑀢𑀤𑀯𑀬𑀯𑁂’𑀪𑀺𑀦𑀻𑀳𑀭𑀺; ()

𑁨𑁨. ¶

𑀅𑀦𑀺𑀘𑁆𑀘𑀢𑁄𑀪𑀼𑀲𑀫𑀦𑀼𑀧𑀲𑁆𑀲𑀫𑀼𑀤𑁆𑀥𑀭𑀺

𑀅𑀲𑁂𑀲𑀲𑀗𑁆𑀔𑀢𑀕𑀢𑀦𑀺𑀘𑁆𑀘𑀲𑀜𑁆𑀜𑀺𑀢𑀁,

𑀅𑀦𑀢𑁆𑀢𑀢𑁄 𑀲𑀫𑀦𑀼𑀯𑀺𑀧𑀲𑁆𑀲 𑀤𑀼𑀓𑁆𑀔𑀢𑁄

𑀲𑀲𑀗𑁆𑀔𑀢𑁂𑀧𑀚𑀳𑀺 𑀲𑀼𑀔𑀢𑁆𑀢𑀲𑀜𑁆𑀜𑀺𑀢𑀁; ()

𑁨𑁩.

𑀯𑀺𑀦𑁄𑀤𑀬𑀻 𑀲𑀼𑀫𑀢𑀺 𑀯𑀺𑀭𑀸𑀕𑀦𑀺𑀩𑁆𑀩𑀺𑀤𑀸-

𑀯𑀲𑁂𑀦 𑀲𑀗𑁆𑀔𑀢𑀕𑀢𑀭𑀸𑀕𑀦𑀦𑁆𑀤𑀺𑀬𑁄,

𑀦𑀺𑀭𑁄𑀥𑀦𑀺𑀲𑁆𑀲𑀚𑀦𑀯𑀲𑀸’𑀦𑀼𑀧𑀲𑁆𑀲𑀺𑀬

𑀢𑀣𑁄𑀤𑀬𑀸𑀤𑀺𑀬𑀦𑀫𑀲𑁂𑀲𑀗𑁆𑀖𑀢𑁂; ()

𑁨𑁪.

𑀯𑀺𑀥𑀸𑀬𑀤𑀼𑀩𑁆𑀩𑀺𑀥𑀫𑀦𑀼𑀧𑀲𑁆𑀲𑀢𑁄 𑀓𑀲𑀢𑁄

𑀅𑀲𑁂𑀲𑀲𑀗𑁆𑀔𑀢𑀫𑀧𑀺 𑀦𑀸𑀫𑀭𑀽𑀧𑀢𑁄,

𑀦𑀺𑀤𑀸𑀦𑀢𑁄 𑀧𑀼𑀦𑀔𑀡𑀢𑁄’𑀤𑀬𑀩𑁆𑀩𑀬𑀁

𑀉𑀧𑀝𑁆𑀞𑀳𑀺 𑀤𑁆𑀯𑀺𑀕𑀼𑀡𑀺𑀢𑀧𑀜𑁆𑀘𑀯𑀺𑀲𑀥𑀸; ()

𑁨𑁫. ¶

𑀲𑀼𑀥𑀻𑀫𑀢𑁄 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀬𑀺’𑀫𑁂

𑀯𑀺𑀧𑀲𑁆𑀲𑀓𑀲𑁆𑀲𑀺’𑀢𑀺 𑀤𑀲𑀼𑀧𑀓𑁆𑀓𑀺𑀮𑁂𑀲𑀓𑀸,

𑀪𑀯𑀼𑀁𑀧𑀪𑀸𑀲𑀢𑀺𑀫𑀢𑀺𑀧𑀻𑀢𑀺𑀦𑀺𑀘𑁆𑀙𑀬𑁄

𑀲𑀼𑀔𑀻’𑀳𑀦𑀸𑀲𑀫𑀣𑀦𑀺𑀓𑀦𑁆𑀢𑁆𑀬𑀼𑀧𑁂𑀓𑁆𑀔𑀦𑀸; ()

𑁨𑁬. ¶

𑀧𑀲𑀦𑁆𑀦𑀮𑁄𑀳𑀺𑀢 𑀧𑀭𑀺𑀧𑀼𑀡𑁆𑀡𑀯𑀺𑀕𑁆𑀕𑀳𑀸

𑀯𑀺𑀦𑀺𑀕𑁆𑀕𑀢𑀸 𑀦𑀺𑀭𑀯𑀥𑀺𑀮𑁄𑀓𑀥𑀸𑀢𑀼𑀲𑀼,

𑀯𑀺𑀧𑀲𑁆𑀲𑀦𑀸𑀩𑀮𑀧𑀪𑀯𑀸’𑀪𑀺𑀧𑀢𑁆𑀣𑀭𑀺

𑀲𑀼𑀥𑀦𑁆𑀢𑀓𑀜𑁆𑀘𑀦𑀭𑀲𑀧𑀺𑀜𑁆𑀚𑀭𑀧𑁆𑀧𑀪𑀸; ()

𑁨𑁭.

𑀅𑀬𑀁𑀧𑀣𑁄 𑀦𑀪𑀯𑀢𑀺 𑀢𑀧𑁆𑀧𑀪𑀸𑀤𑀬𑁄

𑀯𑀺𑀲𑀢𑁆𑀢𑀺𑀓𑀸𑀧𑀪𑀼𑀢𑀺𑀓𑀺𑀮𑁂𑀲𑀯𑀢𑁆𑀣𑀼𑀓𑀸,

𑀧𑀼𑀦𑁄𑀤𑀬𑀩𑁆𑀩𑀬 𑀫𑀦𑀼𑀧𑀲𑁆𑀲𑀢𑁄 𑀢𑀢𑁄

𑀧𑀣𑁄 𑀲𑀫𑀼𑀩𑁆𑀪𑀯𑀺 𑀤𑀲𑀼𑀧𑀓𑁆𑀓𑀺𑀮𑁂𑀲𑀕𑀁; ()

𑁨𑁮.

𑀧𑀣𑀸𑀧𑀣𑀁 𑀲𑀫𑀼𑀧𑀧𑀭𑀺𑀓𑁆𑀔𑀢𑁄𑀇𑀢𑀺

𑀲𑀼𑀥𑀻𑀫𑀢𑁄 𑀢𑀭𑀼𑀡𑀯𑀺𑀧𑀲𑁆𑀲𑀓𑀲𑁆𑀲𑀬𑀸,

𑀲𑀫𑀼𑀝𑁆𑀞𑀺𑀢𑀸 𑀦𑀺𑀲𑀺𑀢𑀯𑀺𑀧𑀲𑁆𑀲𑀦𑀸𑀫𑀢𑀺

𑀧𑀣𑀸𑀧𑀣𑀺𑀓𑁆𑀔𑀡𑀓𑀯𑀺𑀲𑀼𑀤𑁆𑀥𑀺 𑀯𑀼𑀘𑁆𑀘𑀢𑁂; ()

𑁨𑁯. ¶

𑀦𑀭𑀸𑀲𑀪𑁄 𑀅𑀥𑀺𑀕𑀢𑀜𑀸𑀢𑀢𑀻𑀭𑀡-

𑀧𑀭𑀺𑀜𑁆𑀜𑀯𑀸 𑀉𑀧𑀭𑀺𑀧𑀳𑀸𑀡𑀲𑀗𑁆𑀔𑀬𑀸,

𑀧𑀭𑀺𑀜𑁆𑀜𑀬𑀸 𑀉𑀪𑀬 𑀯𑀺𑀲𑀼𑀤𑁆𑀥𑀺𑀲𑀺𑀤𑁆𑀥𑀺𑀬𑀸

𑀢𑀺𑀲𑀘𑁆𑀘𑀤𑀲𑁆𑀲𑀦𑀧𑀲𑀼𑀢𑁄 𑀲𑀫𑀸𑀭𑀪𑀻; ()

𑁩𑁦.

𑀅𑀦𑀺𑀘𑁆𑀘𑀮𑀓𑁆𑀔𑀡𑀫𑀧𑀓𑀺 𑀤𑀼𑀓𑁆𑀔𑀮𑀓𑁆𑀔𑀡𑀁

𑀅𑀦𑀢𑁆𑀢𑀮𑀓𑁆𑀔𑀡𑀫𑀣 𑀲𑀩𑁆𑀩𑀲𑀗𑁆𑀔𑀢𑁂,

𑀬𑀣𑀸𑀯𑀢𑁄 𑀦𑀲𑀫𑀦𑀼𑀧𑀲𑁆𑀲𑀺 𑀲𑀦𑁆𑀢𑀢𑀺-

𑀭𑀺𑀬𑀸𑀧𑀣𑁂𑀳𑀺𑀘 𑀧𑀺𑀳𑀺𑀢𑀁𑀖𑀡𑁂𑀦𑀲𑁄; ()

𑁩𑁧.

𑀯𑀺𑀲𑁄𑀥𑀬𑀁 𑀫𑀢𑀺𑀫𑀼𑀤𑀬𑀩𑁆𑀩𑀬𑁂 𑀢𑀢𑁄

𑀮𑀳𑀼𑀁 𑀢𑀺𑀮𑀓𑁆𑀔𑀡𑀯𑀺𑀲𑀤𑀢𑁆𑀢𑀕𑁄 𑀪𑀼𑀲𑀁,

𑀯𑀺𑀧𑀲𑁆𑀲𑀦𑀸𑀧𑀣𑀧𑀝𑀺𑀧𑀦𑁆𑀦 𑀫𑀢𑁆𑀢𑀦𑀸

𑀅𑀮𑀢𑁆𑀣𑀪𑀗𑁆𑀕𑀥𑀺𑀪𑀬𑀜𑀸𑀡𑀫𑀸𑀤𑀺𑀓𑀁; ()

𑁩𑁨. ¶

𑀲𑀬𑀫𑁆𑀪𑀼𑀦𑁄 𑀉𑀧𑀭𑀺𑀦𑀯𑀸𑀦𑀼𑀧𑀲𑁆𑀲𑀦𑀸-

𑀯𑀺𑀪𑀸𑀯𑀦𑀸 𑀦𑀯𑀕𑀼𑀡𑀯𑀡𑁆𑀡𑀦𑀸𑀬𑀺𑀥,

𑀯𑀺𑀥𑀻𑀬𑀢𑁂 𑀦𑀯𑀯𑀺𑀥𑀜𑁆𑀡𑀪𑀸𑀯𑀦𑀸

𑀧𑀯𑀼𑀘𑁆𑀘𑀢𑁂 𑀲𑀧𑀓𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺𑀢𑀺; ()

𑁩𑁩.

𑀫𑀢𑀻𑀳𑀺𑀢𑀺𑀳𑀺𑀧𑀺 𑀘𑀢𑀼𑀲𑀘𑁆𑀘𑀙𑀸𑀤𑀓-

𑀢𑀫𑁄𑀯𑀺𑀥𑀁𑀲𑀦 𑀲𑀫𑀦𑀦𑁆𑀢𑀭𑀁 𑀣𑀺𑀭𑀁,

𑀦𑀺𑀭𑁄𑀥𑀕𑁄𑀘𑀭𑀫𑀮𑀪𑀺𑀢𑁆𑀣 𑀕𑁄𑀢𑁆𑀭𑀪𑀼-

𑀫𑀢𑀺𑀁 𑀲𑀼𑀥𑀻 𑀅𑀦𑀭𑀺𑀬𑀕𑁄𑀢𑁆𑀢𑀩𑀸𑀳𑀺𑀭𑀁; ()

𑁩𑁪. ¶

𑀧𑀲𑀢𑁆𑀣𑀕𑁄𑀢𑁆𑀭𑀪𑀼𑀫𑀢𑀺𑀤𑀺𑀦𑁆𑀦𑀲𑀜𑁆𑀜𑀓𑀁

𑀲𑀫𑀽𑀮𑀫𑀼𑀤𑁆𑀥𑀝𑀓𑀮𑀼𑀲𑀢𑁆𑀢𑀬𑀁 𑀲𑀼𑀥𑀻,

𑀯𑀺𑀩𑀦𑁆𑀥𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑀦𑀸𑀤𑀺𑀓𑀁

𑀅𑀣𑀸𑀤𑀺𑀫𑀁𑀧𑀝𑀺𑀮𑀪𑀻 𑀜𑀸𑀡𑀤𑀲𑁆𑀲𑀦𑀁; ()

𑁩𑁫.

𑀬𑀤𑁂𑀯𑀦𑀦𑁆𑀢𑀭𑀨𑀮𑀤𑀦𑁆𑀢𑀺 𑀧𑀡𑁆𑀟𑀺𑀢𑀸

𑀯𑀤𑀦𑁆𑀢𑀺𑀢𑀧𑁆𑀨𑀮𑀫𑀧𑀺 𑀧𑀘𑁆𑀘𑀯𑁂𑀓𑁆𑀔𑀡𑀁,

𑀅𑀮𑀢𑁆𑀣 𑀲𑁄 𑀧𑀼𑀦 𑀤𑀼𑀢𑀺𑀬𑀸𑀬 𑀪𑀼𑀫𑀺𑀬𑀸

𑀯𑀺𑀧𑀲𑁆𑀲𑀦𑀁 𑀲𑀫𑀥𑀺𑀕𑀫𑀸𑀬 𑀪𑀸𑀯𑀬𑀻; ()

𑁩𑁬.

𑀪𑀼𑀲𑁄𑀯𑀺𑀲𑁄𑀲𑀺𑀢 𑀪𑀯𑀤𑀼𑀓𑁆𑀔𑀓𑀤𑁆𑀤𑀫𑀁

𑀅𑀓𑀸𑀮𑀺𑀓𑀁 𑀢𑀦𑀼𑀓𑀢𑀓𑀺𑀩𑁆𑀩𑀺𑀲𑀢𑁆𑀢𑀬𑀁,

𑀅𑀦𑀼𑀢𑁆𑀢𑀭𑀁 𑀤𑀼𑀢𑀺𑀬𑀫𑀮𑀢𑁆𑀣 𑀢𑀧𑁆𑀨𑀮𑀁

𑀲𑀧𑀘𑁆𑀘𑀯𑁂𑀓𑁆𑀔𑀡𑀫𑀣 𑀜𑀸𑀡𑀤𑀲𑁆𑀲𑀦𑀁; ()

𑁩𑁭. ¶

𑀯𑀺𑀧𑀲𑁆𑀲𑀦𑀁𑀧𑀼𑀦𑀭𑀧𑀺𑀪𑀸𑀯𑀬𑀁 𑀲𑀬𑀁

𑀲𑀫𑀼𑀤𑁆𑀥𑀝𑀸𑀮𑀬𑀧𑀝𑀺𑀖𑀁 𑀪𑀯𑀸𑀧𑀳𑀁,

𑀲𑀧𑀘𑁆𑀘𑀯𑁂𑀓𑁆𑀔𑀡𑀨𑀮𑀜𑀸𑀡𑀫𑀚𑁆𑀛𑀕𑀸

𑀅𑀦𑀼𑀢𑁆𑀢𑀭𑀁 𑀢𑀢𑀺𑀬𑀓 𑀜𑀸𑀡𑀤𑀲𑁆𑀲𑀦𑀁; ()

𑁩𑁮.

𑀢𑀺𑀮𑀓𑁆𑀔𑀡𑀁 𑀣𑀺𑀭𑀫𑀢𑀺𑀫𑀸’𑀪𑀺𑀧𑀢𑁆𑀢𑀺𑀬𑀸

𑀲𑀼𑀪𑀸𑀯𑀬𑀺𑀓 𑀉𑀧𑀭𑀺 𑀘𑀢𑀼𑀢𑁆𑀣𑀪𑀼𑀫𑀺𑀬𑀸,

𑀅𑀯𑀸𑀭𑀺𑀬𑀸𑀲𑀦𑀺𑀭𑀺𑀯 𑀢𑀸𑀮𑀫𑀢𑁆𑀣𑀓𑁂

𑀓𑀺𑀮𑁂𑀲𑀫𑀼𑀤𑁆𑀥𑀦𑀺𑀭𑀦𑀺𑀳𑀘𑁆𑀘𑀘𑀸𑀭𑀺𑀦𑀁; ()

𑁩𑁯.

𑀦𑀺𑀯𑀸𑀭𑀺𑀢𑀸𑀔𑀺𑀮 𑀪𑀯𑀘𑀓𑁆𑀓𑀯𑀺𑀩𑁆𑀪𑀫𑀁

𑀲𑀯𑀸𑀲𑀦𑀸𑀧𑀭𑀺𑀫𑀺𑀢 𑀧𑀓𑀸𑀧𑀦𑀸𑀲𑀦𑀁,

𑀅𑀦𑀜𑁆𑀜𑀕𑁄𑀘𑀭 𑀯𑀭𑀜𑀸𑀡𑀤𑀲𑁆𑀲𑀦𑀁

𑀅𑀮𑀢𑁆𑀣 𑀢𑀧𑁆𑀨𑀮𑀫𑀧𑀺𑀧𑀘𑁆𑀘𑀯𑁂𑀓𑁆𑀔𑀡𑀁; ()

𑁪𑁦. ¶

𑀢𑀤𑀸𑀲𑀯𑀓𑁆𑀔𑀬𑀫𑀢𑀺𑀕𑁆𑀜𑀸𑀡𑀤𑀲𑁆𑀲𑀦-

𑀯𑀺𑀲𑀼𑀤𑁆𑀥𑀺𑀯𑀼𑀘𑁆𑀘𑀢𑀺 𑀅𑀭𑀳𑀢𑁆𑀢𑀧𑀢𑁆𑀢𑀺𑀬𑀸,

𑀲𑀳𑁂𑀯𑀘𑀼𑀤𑁆𑀤𑀲𑀯𑀺𑀥 𑀩𑀼𑀤𑁆𑀥𑀩𑀼𑀤𑁆𑀥𑀺𑀬𑁄

𑀚𑀺𑀦𑁄 𑀘𑀢𑀼𑀩𑁆𑀩𑀺𑀥 𑀧𑀝𑀺𑀲𑀫𑁆𑀪𑀺𑀤𑀸𑀮𑀪𑀻; ()

𑁪𑁧.

𑀅𑀲𑀸𑀥𑀸𑀭𑀡𑀁 𑀜𑀸𑀡𑀙𑀓𑁆𑀓𑀁𑀩𑀮𑀸𑀦𑀺

𑀤𑀲’𑀝𑁆𑀞𑀸𑀭𑀲𑀸𑀯𑁂𑀡𑀺𑀓𑀸 𑀩𑀼𑀤𑁆𑀥𑀥𑀫𑁆𑀫𑀸,

𑀘𑀢𑀼𑀤𑁆𑀥𑀸𑀯𑀺𑀲𑀸𑀭𑀚𑁆𑀚𑀫𑀺𑀤𑁆𑀥𑀸𑀦𑀼𑀪𑀸𑀯𑀸

𑀲𑀫𑀺𑀤𑁆𑀥𑀸𑀲𑀳𑁂𑀘𑀸𑀭𑀳𑀢𑁆𑀢𑁂𑀦 𑀢𑀲𑁆𑀲; ()

𑁪𑁨.

𑀅𑀪𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑁂 𑀅𑀪𑀺𑀜𑁆𑀜𑀸𑀬 𑀲𑀸𑀫𑀁

𑀧𑀭𑀺𑀜𑁆𑀜𑁂𑀬𑁆𑀬 𑀥𑀫𑁆𑀫𑁂 𑀧𑀭𑀺𑀜𑁆𑀜𑀸𑀬 𑀲𑀸𑀫𑀁,

𑀧𑀳𑀸𑀢𑀩𑁆𑀩 𑀥𑀫𑁆𑀫𑁂 𑀧𑀳𑀦𑁆𑀢𑁆𑀯𑀸𑀦 𑀲𑀸𑀫𑀁

𑀲𑀦𑀺𑀩𑁆𑀩𑀸𑀦𑀫𑀕𑁆𑀕𑀧𑁆𑀨𑀮𑀁 𑀲𑀘𑁆𑀙𑀺𑀓𑀢𑁆𑀯𑀸; ()

𑁪𑁩. ¶

𑀲𑀺𑀬𑀸𑀬𑀸𑀯𑀢𑀸𑀜𑁂𑀬𑁆𑀬 𑀥𑀫𑁆𑀫𑀧𑁆𑀧𑀯𑀢𑁆𑀢𑀺

𑀲𑀺𑀬𑀸𑀢𑀸𑀯𑀢𑀸 𑀢𑀲𑁆𑀲 𑀜𑀸𑀡𑀧𑁆𑀧𑀯𑀢𑁆𑀢𑀺,

𑀅𑀪𑀺𑀜𑁆𑀜𑀸𑀬 𑀲𑀩𑁆𑀩𑀜𑁆𑀜𑀼𑀢𑀸𑀜𑀸𑀡 𑀫𑀸𑀲𑀺

𑀲𑀳𑁂𑀯𑀸𑀭𑀳𑀢𑁆𑀢𑁂𑀦 𑀲𑀩𑁆𑀩𑀜𑁆𑀜𑀼 𑀩𑀼𑀤𑁆𑀥𑁄; ()

𑁪𑁪.

𑀫𑀳𑀸𑀫𑁄𑀳𑀦𑀺𑀤𑁆𑀤𑀸𑀧𑀕𑁄𑀫𑀕𑁆𑀕𑀜𑀸𑀡-

𑀧𑁆𑀧𑀩𑀼𑀤𑁆𑀥𑁄’𑀳𑀺𑀲𑀫𑁆𑀩𑁄𑀥𑀺𑀬𑀸 𑀲𑁄𑀪𑀫𑀸𑀦𑁄,

𑀫𑀼𑀦𑀺𑀦𑁆𑀤𑁄 𑀤𑀺𑀦𑀺𑀦𑁆𑀤𑀁’ 𑀲𑀼𑀲𑀦𑁆𑀤𑁄𑀳𑀳𑀸𑀲𑀺-

’𑀦𑁆𑀤𑀺𑀭𑀸𑀫𑀦𑁆𑀤𑀺𑀭𑀺𑀦𑁆𑀤𑀺𑀯𑀭𑀸𑀪𑀁𑀅𑀳𑀸𑀲𑀺; ()

𑁪𑁫.

𑀲𑀼𑀩𑀼𑀤𑁆𑀥𑀸𑀪𑀺𑀲𑀫𑁆𑀩𑁄𑀥𑀺𑀧𑀼𑀩𑁆𑀩𑀸𑀘𑀮𑀫𑁆𑀪𑀸

𑀲𑀳𑁂𑀯𑀸𑀭𑀼𑀡𑁄 𑀩𑀼𑀤𑁆𑀥𑀲𑀽𑀭𑁄𑀤𑀬𑁂𑀦,

𑀲𑀫𑀼𑀝𑁆𑀞𑀸𑀲𑀺 𑀯𑁂𑀦𑁂𑀬𑁆𑀬 𑀩𑀦𑁆𑀥𑀽𑀳𑀺𑀲𑀤𑁆𑀥𑀺𑀁

𑀧𑀩𑀼𑀚𑁆𑀛𑀺𑀁𑀲𑀼 𑀅𑀩𑁆𑀪𑀼𑀕𑁆𑀕𑀢𑀫𑁆𑀳𑁄𑀚𑀓𑁄𑀲𑀸; ()

𑁪𑁬. ¶

𑀉𑀴𑀸𑀭𑀸𑀯𑀪𑀸𑀲𑁄 𑀢𑀤𑀸 𑀚𑀸𑀢𑀺𑀔𑁂𑀢𑁆𑀢𑁂

𑀪𑀼𑀲𑀁𑀧𑀸𑀢𑀼𑀪𑀼𑀢𑁄 𑀫𑀳𑀻𑀲𑀫𑁆𑀧𑀯𑁂𑀥𑀺,

𑀲𑀺𑀴𑀸𑀲𑀸𑀴𑀲𑁂𑀴𑀸𑀯𑀢𑀁𑀲𑀸 𑀲𑀼𑀪𑀸𑀦𑀺

𑀦𑀺𑀫𑀢𑁆𑀢𑀸𑀦𑀺 𑀩𑀢𑁆𑀢𑀺𑀁𑀲𑀚𑀸𑀢𑀸𑀢𑀺𑀮𑁄𑀓𑁂; ()

𑁪𑁭.

𑀢𑀫𑁄𑀚𑀸𑀮𑀯𑀺𑀤𑁆𑀥𑀁𑀲𑀦𑀸𑀤𑀻𑀦𑀺 𑀮𑁄𑀓𑁂

𑀓𑀭𑁄𑀦𑁆𑀢𑁄𑀯 𑀘𑀢𑁆𑀢𑀸𑀭𑀺𑀓𑀺𑀘𑁆𑀘𑀸𑀦𑀺’𑀫𑀸𑀦𑀺,

𑀲𑀫𑀼𑀝𑁆𑀞𑀸𑀲𑀺 𑀢𑀲𑁆𑀫𑀺𑀁𑀔𑀡𑁂 𑀭𑀁𑀲𑀺𑀫𑀸𑀮𑀺

𑀭𑀺𑀯𑀸𑀤𑀺𑀘𑁆𑀘𑀯𑀁𑀲𑀼𑀩𑁆𑀪𑀯𑁄 𑀩𑀼𑀤𑁆𑀥𑀲𑀽𑀭𑁄; ()

𑁪𑁮.

𑀫𑀳𑀻𑀮𑀸𑀚𑀯𑀼𑀝𑁆𑀞𑀻𑀳𑀺 𑀲𑀜𑁆𑀙𑀦𑁆𑀦𑀪𑀼𑀢𑀸

𑀦𑀪𑀁 𑀓𑀦𑀺𑀩𑁆𑀪𑀭𑀁 𑀕𑀦𑁆𑀥𑀥𑀼𑀧𑀤𑁆𑀥𑀚𑁂𑀳𑀺,

𑀙𑀡𑁆𑀳𑁄𑀓𑀼𑀮𑀸 𑀓𑁂𑀯𑀮𑀁 𑀮𑁄𑀓𑀥𑀸𑀢𑀼

𑀫𑀳𑀸𑀫𑀗𑁆𑀕𑀮𑀸𑀯𑀸𑀲 𑀓𑀮𑀻𑀮𑀸𑀯𑀮𑀫𑁆𑀩𑀺𑀁 ()

𑁪𑁯. ¶

𑀢𑀤𑀸𑀢𑀧𑁆𑀧𑀤𑀫𑁆𑀪𑁄𑀚 𑀧𑀽𑀚𑀸𑀕𑀢𑀸𑀦𑀁

𑀲𑀺𑀭𑁄 𑀪𑀢𑁆𑀢𑀺𑀪𑀸𑀭𑀜𑁆𑀚𑀮𑀻𑀦𑀁 𑀲𑀼𑀭𑀸𑀦𑀁,

𑀦𑀺𑀭𑀸𑀮𑀫𑁆𑀩𑀫𑀸𑀓𑀸𑀲 𑀭𑀦𑁆𑀥𑀁 𑀩𑀪𑀸𑀲

𑀧𑀪𑀸𑀲𑀸𑀭 𑀘𑀽𑀴𑀸𑀫𑀡𑀺𑀳𑀓𑀸’𑀓𑀭𑀸𑀴𑀁; ()

𑁫𑁦.

𑀕𑀼𑀡𑁄𑀦𑀸𑀫 𑀲𑀓𑁆𑀔𑀦𑁆𑀥𑀲𑀦𑁆𑀢𑀸𑀦 𑀲𑀼𑀤𑁆𑀥𑀺

𑀲𑀓𑁄𑀲𑀼𑀤𑁆𑀥𑀔𑀦𑁆𑀯𑁆𑀥𑀧𑁆𑀧𑀩𑀦𑁆𑀥𑁄𑀳𑀺 𑀩𑀼𑀤𑁆𑀥𑁄,

𑀦𑀫𑁄𑀩𑀼𑀤𑁆𑀥𑀪𑀼𑀢𑀲𑁆𑀲 𑀦𑀺𑀧𑁆𑀨𑀦𑁆𑀢𑀜𑀸𑀡-

𑀧𑁆𑀧𑀳𑀸𑀡𑀸𑀦𑀼𑀪𑀸𑀯𑀸𑀳𑀺𑀭𑀽𑀧𑀲𑁆𑀲𑀢𑀲𑁆𑀲; ()

𑀇𑀢𑀺 𑀫𑁂𑀥𑀸𑀦𑀦𑁆𑀤𑀸𑀪𑀺𑀥𑀸𑀦𑁂𑀦𑀬𑀢𑀺𑀦𑀸 𑀯𑀺𑀭𑀘𑀺𑀢𑁂 𑀲𑀓𑀮𑀓𑀯𑀺𑀚𑀦 𑀳𑀤𑀬𑀸𑀦𑀦𑁆𑀤𑀤𑀸𑀦𑀦𑀺𑀤𑀸𑀦𑁂 𑀚𑀺𑀦𑀯𑀁𑀲𑀤𑀻𑀧𑁂 𑀅𑀯𑀺𑀤𑀼𑀭𑁂 𑀦𑀺𑀤𑀸𑀦𑁂 𑀫𑀳𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀜𑀸𑀡𑀸𑀪𑀺𑀲𑀫𑁆𑀩𑁄𑀥𑀺 𑀲𑀫𑀥𑀺𑀕𑀫 𑀧𑀯𑀢𑁆𑀢𑀺𑀧𑀭𑀺𑀤𑀻𑀧𑁄 𑀘𑀼𑀤𑁆𑀤𑀲𑀫𑁄 𑀲𑀕𑁆𑀕𑁄.

𑀚𑀺𑀦𑀯𑀁𑀲𑀤𑀻𑀧𑁂 𑀅𑀯𑀺𑀤𑀼𑀭𑁂 𑀦𑀺𑀤𑀸𑀦𑀪𑀸𑀕𑁄 𑀤𑀼𑀢𑀺𑀬𑁄.

𑁧. ¶

𑀅𑀲𑁆𑀲𑁂𑀯 𑀧𑀓𑀮𑁆𑀮𑀗𑁆𑀓𑀯𑀭𑀲𑁆𑀲𑀓𑀸𑀭𑀡𑀸

𑀲𑀻𑀲𑀓𑁆𑀔𑀺𑀫𑀁𑀲𑀸𑀦𑀺 𑀘 𑀤𑀸𑀭𑀲𑀼𑀦𑀯𑁄,

𑀤𑀢𑁆𑀯𑀸 𑀘𑀺𑀭𑀲𑁆𑀲𑀁 𑀅𑀓𑀭𑀺𑀦𑁆𑀢𑀺 𑀤𑀼𑀓𑁆𑀓𑀭𑀁

𑀲𑁄 (𑀇𑀦𑁆𑀤𑀯𑀁𑀲𑀸’)𑀪𑀺𑀥𑀚𑁄 𑀯𑀺𑀘𑀺𑀦𑁆𑀢𑀬𑀻; ()

𑁨.

𑀧𑀮𑁆𑀮𑀗𑁆𑀓𑀢𑁄 𑀢𑀸𑀯 𑀦𑀯𑀼𑀝𑁆𑀞𑀳𑀁 𑀢𑀳𑀺𑀁

𑀧𑀮𑁆𑀮𑀗𑁆𑀓𑀫𑀸𑀥𑀸𑀬 𑀦𑀺𑀲𑀚𑁆𑀚 𑀲𑀢𑁆𑀢𑀳𑀁,

𑀲𑀗𑁆𑀓𑀧𑁆𑀧𑀧𑀼𑀡𑁆𑀡𑁄’𑀥𑀺𑀲𑀫𑀸𑀥𑀬𑁄 𑀫𑀼𑀦𑀺

𑀲𑀫𑁆𑀫𑀸 𑀲𑀫𑀸𑀧𑀚𑁆𑀚𑀺 𑀅𑀦𑁂𑀓𑀓𑁄𑀝𑀺𑀬𑁄; ()

𑁩.

𑀦𑀸’𑀬𑀁 𑀚𑀳𑀸𑀢𑁂 𑀯𑀺𑀚𑀬𑀸𑀲𑀦𑀸’𑀮𑀬𑀁

𑀬𑀁𑀓𑀺𑀜𑁆𑀘𑀺𑀓𑀺𑀘𑁆𑀘𑀁 𑀓𑀭𑀡𑀺𑀬𑀫𑀲𑁆𑀲𑀳𑀺,

𑀲𑀁𑀯𑀺𑀚𑁆𑀚𑀢𑁂 𑀤𑀸𑀦𑀺𑀧𑀺 𑀓𑀸𑀘𑀺 𑀤𑁂𑀯𑀢𑀸

𑀲𑀗𑁆𑀓𑀸𑀪𑀺𑀖𑀸’𑀢𑀸𑀪𑀺𑀯𑀺𑀢𑀓𑁆𑀓𑀬𑀼𑀁 𑀇𑀢𑀺; ()

𑁪. ¶

𑀢𑀸𑀲𑀁 𑀯𑀺𑀤𑀺𑀢𑁆𑀯𑀸𑀦 𑀯𑀺𑀢𑀓𑁆𑀓𑀫𑀸𑀲𑀦𑀸

𑀅𑀩𑁆𑀪𑀼𑀝𑁆𑀞𑀺𑀢𑁄 𑀲𑁄 𑀕𑀕𑀦𑀗𑁆𑀕𑀡𑀁 𑀔𑀡𑀁,

𑀲𑀁𑀤𑀲𑁆𑀲𑀬𑀦𑁆𑀢𑁄 𑀬𑀫𑀧𑀸𑀝𑀺𑀳𑀸𑀭𑀺𑀬𑀁

𑀦𑀺𑀲𑁆𑀲𑀁𑀲𑀬𑁄 𑀲𑀁𑀲𑀬𑀲𑀮𑁆𑀮𑀫𑀼𑀤𑁆𑀥𑀭𑀻; ()

𑁫.

𑀦𑀺𑀲𑁆𑀲𑀸𑀬 𑀧𑀮𑁆𑀮𑀗𑁆𑀓𑀫𑀺𑀫𑀁 𑀫𑀳𑀻𑀭𑀼𑀳𑀁

𑀲𑀫𑁆𑀧𑀢𑁆𑀢𑀲𑀫𑁆𑀩𑁄𑀥𑀺𑀧𑀤𑁄’𑀲𑁆𑀫𑀺 𑀘𑀺𑀦𑁆𑀢𑀺𑀬,

𑀑𑀭𑀼𑀬𑁆𑀳 𑀧𑀓𑀮𑁆𑀮𑀗𑁆𑀓𑀞𑀺𑀢𑀧𑁆𑀧𑀤𑁂𑀲𑀢𑁄

𑀧𑀼𑀩𑁆𑀩𑀼𑀢𑁆𑀢𑀭𑀸𑀦𑀜𑁆𑀳𑀺 𑀤𑀺𑀲𑀸𑀦 𑀫𑀦𑁆𑀢𑀭𑀸; ()

𑁬.

𑀲𑀢𑁆𑀢𑀸𑀳 𑀫𑀺𑀦𑁆𑀤𑀺𑀯𑀭𑀘𑀸𑀭𑀼𑀮𑁄𑀘𑀦-

𑀧𑀜𑁆𑀘𑀧𑁆𑀧𑀪𑀸𑀲𑀸𑀭𑀦𑀺𑀲𑁂𑀘𑀦𑁂𑀦 𑀲𑁄,

𑀲𑀫𑀧𑀽𑀚𑀬𑀦𑁆𑀢𑁄 𑀚𑀬𑀩𑁄𑀥𑀺𑀫𑀸𑀲𑀦𑀁

𑀅𑀝𑁆𑀞𑀸𑀲𑀺 𑀮𑁄𑀓𑁂𑀓𑀯𑀺𑀮𑁄𑀘𑀦𑁄 𑀚𑀺𑀦𑁄; ()

𑁭. ¶

𑀕𑀦𑁆𑀢𑁆𑀯𑀸 𑀞𑀻𑀢𑀝𑁆𑀞𑀸𑀦𑀚𑀬𑀸𑀲𑀦𑀦𑁆𑀢𑀭𑀸

𑀧𑀼𑀩𑁆𑀩𑀸𑀧𑀭𑀲𑁆𑀲𑀁 𑀤𑀺𑀲𑀺 𑀲𑀢𑁆𑀢𑀯𑀸𑀲𑀭𑀁,

𑀦𑀺𑀓𑁆𑀔𑀺𑀢𑁆𑀢𑀘𑀓𑁆𑀓𑀗𑁆𑀓𑀺𑀢𑀧𑀸𑀤𑀧𑀗𑁆𑀓𑀚𑁄

𑀲𑁄 𑀘𑀗𑁆𑀓𑀫𑀻 𑀦𑀺𑀫𑁆𑀫𑀺𑀢𑀭𑀢𑀦𑀘𑀗𑁆𑀓𑀫𑁂; ()

𑁮.

𑀲𑁄 𑀩𑁄𑀥𑀺𑀢𑁄 𑀉𑀢𑁆𑀢𑀭𑀧𑀘𑁆𑀙𑀺𑀫𑀦𑁆𑀢𑀭𑀸

𑀤𑁂𑀯𑁂𑀳𑀺 𑀦𑀸𑀦𑀸𑀭𑀢𑀦𑁂𑀳𑀺 𑀦𑀺𑀫𑁆𑀫𑀺𑀢𑁂,

𑀲𑀢𑁆𑀢𑀸𑀳𑀫𑀢𑁆𑀢𑀁 𑀫𑀡𑀺𑀫𑀦𑁆𑀤𑀺𑀭𑁂 𑀫𑀼𑀦𑀺

𑀲𑀫𑁆𑀫𑀸𑀪𑀺𑀥𑀫𑁆𑀫𑀁 𑀧𑀯𑀺𑀳𑀸𑀲𑀺 𑀲𑀫𑁆𑀫𑀲𑀁; ()

𑁯.

𑀫𑀦𑁆𑀣𑀸𑀘𑀮𑁂’𑀦𑀫𑁆𑀩𑀼𑀦𑀺𑀥𑀺𑀁’𑀯 𑀓𑁂𑀲𑀯𑁄

𑀯𑀺𑀜𑁆𑀜𑀸𑀡𑀓𑀡𑁆𑀟𑀸𑀤𑀺𑀝𑀲𑀸 𑀘𑀢𑀼𑀩𑁆𑀩𑀺𑀥𑀁,

𑀢𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑁄 𑀫𑀼𑀦𑀺 𑀥𑀫𑁆𑀫𑀲𑀗𑁆𑀕𑀡𑀺-

𑀫𑀸𑀮𑁄𑀮𑀬𑀻 𑀜𑀸𑀡𑀩𑀮𑁂𑀦 𑀤𑀼𑀤𑁆𑀤𑀲𑀁; ()

𑁧𑁦. ¶

𑀯𑁂𑀪𑀗𑁆𑀕𑀺𑀬𑀁 𑀔𑀦𑁆𑀥𑀯𑀺𑀪𑀗𑁆𑀕𑀫𑀸𑀤𑀺𑀓𑀁

𑀕𑀫𑁆𑀪𑀻𑀭𑀫𑀝𑁆𑀞𑀸𑀭𑀲𑀥𑀸 𑀲𑀼𑀤𑀼𑀩𑁆𑀩𑀼𑀥𑀁,

𑀲𑁄 𑀫𑀸𑀭𑀪𑀗𑁆𑀕𑁄’𑀣 𑀯𑀺𑀪𑀗𑁆𑀕𑀲𑀸𑀕𑀭𑀁

𑀲𑀁𑀔𑁄𑀪𑀬𑀻 𑀜𑀸𑀡𑀬𑀼𑀕𑀦𑁆𑀢𑀯𑀸𑀬𑀼𑀦𑀸; ()

𑁧𑁧.

𑀲𑁄 𑀥𑀸𑀢𑀼𑀲𑀼𑀜𑁆𑀜𑀢𑁆𑀢𑀧𑀚𑀸𑀦𑀦𑁄 𑀚𑀺𑀦𑁄

𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀺𑀯𑀲𑀪𑀸𑀯𑀥𑀸𑀢𑀼𑀬𑁄,

𑀯𑀺𑀢𑁆𑀣𑀸𑀭𑀬𑀦𑁆𑀢𑁄 𑀢𑀤𑀦𑀦𑁆𑀢𑀭𑀁 𑀯𑀭𑀁

𑀦𑀸𑀦𑀸𑀦𑀬𑀁 𑀥𑀸𑀢𑀼𑀓𑀣𑀁 𑀯𑀯𑀢𑁆𑀣𑀬𑀻; ()

𑁧𑁨.

𑀔𑀦𑁆𑀥𑀸𑀤𑀺𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀙𑀩𑁆𑀩𑀺𑀥𑀸

𑀧𑀜𑁆𑀜𑀢𑁆𑀢𑀺𑀬𑁄’𑀢𑀺 𑀲𑀼𑀯𑀺𑀪𑀢𑁆𑀢𑀫𑀸𑀢𑀺𑀓𑀁,

𑀧𑀜𑁆𑀜𑀸𑀬 𑀲𑀩𑁆𑀩𑀜𑁆𑀜𑀼𑀚𑀺𑀦𑁄’𑀣 𑀧𑀼𑀕𑁆𑀕𑀮-

𑀧𑀜𑁆𑀜𑀢𑁆𑀢𑀺 𑀫𑀸𑀮𑁄𑀮𑀬𑀺 𑀅𑀕𑁆𑀕𑀧𑀼𑀕𑁆𑀕𑀮𑁄; ()

𑁧𑁩. ¶

𑀯𑀸𑀤𑀻𑀪𑀲𑀻𑀳𑁄 𑀲𑀓𑀯𑀸𑀤𑀫𑀡𑁆𑀟𑀮𑀁

𑀑𑀭𑀼𑀬𑁆𑀳 𑀲𑀫𑁆𑀫𑀸 𑀧𑀭𑀯𑀸𑀤𑀫𑀡𑁆𑀟𑀮𑀁,

𑀲𑀼𑀢𑁆𑀢𑀸𑀦𑀺 𑀲𑀗𑁆𑀕𑀬𑁆𑀳 𑀲𑀳𑀲𑁆𑀲𑀫𑀝𑁆𑀞𑀥𑀸

𑀲𑀁𑀔𑀺𑀢𑁆𑀢 𑀫𑀸𑀤𑁄 𑀫𑀼𑀔𑀯𑀸𑀤𑀬𑀼𑀢𑁆𑀢𑀺𑀓𑀁; ()

𑁧𑁪.

𑀜𑀸𑀡𑁂𑀦 𑀯𑀺𑀢𑁆𑀣𑀸𑀭𑀺𑀬𑀫𑀸𑀦 𑀫𑀢𑁆𑀢𑀦𑁄

𑀓𑀺𑀜𑁆𑀘𑀸𑀧𑁆𑀬’𑀦𑀦𑁆𑀢𑀸𑀧𑀭𑀺𑀬𑀦𑁆𑀢 𑀫𑀼𑀢𑁆𑀢𑀫𑀁,

𑀢𑀓𑁆𑀓𑀻𑀳𑀺 𑀦𑀓𑁆𑀓𑀸𑀯𑀘𑀭𑀁 𑀦𑀓𑁂𑀳𑀺𑀘𑀺

𑀦𑀸𑀣𑁄 𑀓𑀣𑀸𑀯𑀢𑁆𑀣𑀼 𑀫𑀣𑀸’𑀪𑀺𑀲𑀫𑁆𑀫𑀲𑀺; ()

𑁧𑁫.

𑀬𑀁 𑀫𑀽𑀮𑀔𑀦𑁆𑀥𑀸𑀤𑀺𑀯𑀲𑀸 𑀤𑀲𑀩𑁆𑀩𑀺𑀥𑀁

𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀧𑀤𑀸’𑀦𑀼𑀭𑀽𑀧𑀢𑁄,

𑀦𑀺𑀝𑁆𑀞𑀸𑀦𑀢𑁄 𑀲𑀁𑀲𑀬𑀢𑁄 𑀯𑀺𑀪𑀸𑀕𑀺𑀬𑀁

𑀕𑀫𑁆𑀪𑀻𑀭𑀜𑀸𑀡𑁂𑀦’𑀣 𑀲𑀸𑀕𑀭𑀽𑀧𑀫𑀁; ()

𑁧𑁬. ¶

𑀲𑀦𑁆𑀢𑀁 𑀧𑀡𑀺𑀢𑀁 𑀦𑀺𑀧𑀼𑀡𑀁 𑀲𑀼𑀤𑀼𑀤𑁆𑀤𑀲𑀁

𑀕𑀼𑀴𑁆𑀳𑀁 𑀅𑀢𑀓𑁆𑀓𑀸𑀯𑀘𑀭𑀁 𑀅𑀘𑀺𑀦𑁆𑀢𑀺𑀬𑀁,

𑀦𑀸𑀦𑀸𑀦𑀬𑀁 𑀢𑀁 𑀬𑀫𑀓𑀁 𑀲𑀼𑀲𑀜𑁆𑀜𑀫𑁄

𑀥𑀫𑁆𑀫𑀲𑁆𑀲𑀭𑁄 𑀲𑀫𑁆𑀫𑀲𑀺 𑀦𑀺𑀧𑁆𑀧𑀤𑁂𑀲𑀢𑁄; ()

𑁧𑁭.

𑀦𑀸𑀦𑀸𑀦𑀬𑀼’𑀢𑁆𑀢𑀼𑀗𑁆𑀕𑀢𑀭𑀗𑁆𑀕𑀦𑀺𑀩𑁆𑀪𑀭𑀁

𑀦𑁂𑀬𑁆𑀬𑀢𑁆𑀣𑀦𑀻𑀢𑀢𑁆𑀣𑀫𑀡𑀺𑀳𑀺 𑀫𑀡𑁆𑀟𑀺𑀢𑀁,

𑀥𑀫𑁆𑀫𑀦𑁆𑀢𑀭𑀸𑀯𑀝𑁆𑀝𑀲𑀢𑀁 𑀅𑀣𑀸𑀧𑀭𑀁

𑀲𑀤𑁆𑀥𑀫𑁆𑀫𑀔𑀦𑁆𑀥𑁄𑀤𑀓𑀔𑀦𑁆𑀥𑀧𑀽𑀭𑀺𑀢𑀁; ()

𑁧𑁮.

𑀲𑀢𑁆𑀣𑀸 𑀘𑀢𑀼𑀩𑁆𑀩𑀺𑀲 𑀢𑀺𑀫𑀢𑁆𑀢𑀧𑀘𑁆𑀘𑀬-

𑀯𑁂𑀮𑀁 𑀧𑀭𑀺𑀘𑁆𑀙𑁂𑀤𑀯𑀺𑀲𑀸𑀮𑀧𑀝𑁆𑀝𑀦𑀁,

𑀕𑀫𑁆𑀪𑀻𑀭𑀧𑀝𑁆𑀞𑀸𑀦 𑀫𑀳𑀡𑁆𑀡𑀯𑀁 𑀓𑀣𑀁

𑀆𑀮𑁄𑀮𑀬𑀁 𑀲𑀫𑁆𑀫𑀲𑀺 𑀜𑀸𑀡𑀫𑁂𑀭𑀼𑀦𑀸; ()

𑁧𑁯. ¶

𑀦𑀺𑀲𑁆𑀲𑀗𑁆𑀕𑀜𑀸𑀡𑁄 𑀫𑀼𑀦𑀺 𑀳𑁂𑀢𑀼𑀧𑀘𑁆𑀘𑀬𑁄

𑀇𑀘𑁆𑀘𑀸𑀤𑀺𑀦𑀸’𑀭𑁄𑀧𑀺𑀢𑀫𑀸𑀢𑀺𑀓𑀸𑀭𑀳𑀁,

𑀦𑀺𑀤𑁆𑀤𑀺𑀝𑁆𑀞𑀦𑀺𑀤𑁂𑀤𑀲𑀧𑀤𑀁 𑀧𑀧𑀜𑁆𑀘𑀺𑀢-

𑀜𑁂𑀬𑁆𑀬𑀁 𑀘𑀢𑀼𑀩𑁆𑀩𑀻𑀲𑀯𑀺𑀥𑀁 𑀲𑀼𑀤𑀼𑀩𑁆𑀩𑀼𑀥𑀁; ()

𑁨𑁦.

𑀦𑀺𑀲𑁆𑀲𑀸𑀬 𑀩𑀸𑀯𑀻𑀲𑀯𑀺𑀥𑁂 𑀢𑀺𑀓𑁂 𑀢𑀺𑀓-

𑀧𑀝𑁆𑀞𑀸𑀦 𑀫𑀦𑁆𑀢𑁄𑀕𑀥𑀦𑀸𑀫𑀭𑀽𑀧𑀺𑀓𑁂

𑀦𑀺𑀲𑁆𑀲𑀸𑀬 𑀦𑀺𑀲𑁆𑀲𑁂𑀲𑀓𑁂 𑀢𑀣𑀸 𑀤𑀼𑀓-

𑀧𑀝𑁆𑀞𑀸𑀦 𑀫𑀦𑁆𑀢𑁄𑀕𑀥𑀦𑀸𑀫𑀭𑀽𑀧𑀺𑀓𑁂 ()

𑁨𑁧.

𑀩𑀸𑀯𑀺𑀲𑀫𑀢𑁆𑀢𑀸 𑀢𑀺𑀓𑀫𑀸𑀢𑀺𑀓𑀸 𑀤𑀼𑀓𑁂

𑀧𑀓𑁆𑀔𑀺𑀧𑁆𑀧 𑀧𑀝𑁆𑀞𑀸𑀦𑀯𑀺𑀤𑀁 𑀤𑀼𑀓𑀦𑁆𑀢𑀺𑀓𑀁,

𑀩𑀸𑀯𑀻𑀲𑀫𑀢𑁆𑀢𑀸𑀬 𑀢𑀺𑀓𑁂 𑀲𑀢𑀁𑀤𑀼𑀓𑁂

𑀧𑀓𑁆𑀔𑀺𑀧𑁆𑀧 𑀧𑀝𑁆𑀞𑀸𑀦𑀫𑀺𑀤𑀁𑀓 𑀢𑀺𑀓𑀤𑁆𑀤𑀼𑀓𑀁; ()

𑁨𑁨. ¶

𑀓𑀢𑁆𑀯𑀸 𑀢𑀺𑀓𑁂𑀲𑁆𑀯𑁂’𑀯 𑀢𑀺𑀓𑁂 𑀤𑀼𑀯𑀻𑀲𑀢𑀺

𑀧𑀝𑁆𑀞𑀸𑀦 𑀫𑀦𑁆𑀢𑁄𑀕𑀢𑀺𑀓𑁂 𑀢𑀺𑀓𑀢𑁆𑀢𑀺𑀓𑀁,

𑀓𑀢𑁆𑀯𑀸 𑀤𑀼𑀓𑁂𑀲𑁆𑀯𑁂’𑀯 𑀢𑀣𑀸 𑀲𑀢𑀁𑀤𑀼𑀓𑁂

𑀧𑀝𑁆𑀞𑀸𑀦 𑀫𑀦𑁆𑀢𑀸𑀕𑁂𑀢𑀺𑀓𑁂 𑀤𑀼𑀓𑀤𑁆𑀤𑀼𑀓𑀁; ()

𑁨𑁩.

𑀇𑀘𑁆𑀘𑀸𑀦𑀼𑀮𑁄𑀫𑁂 𑀚𑀦𑀬𑀸𑀦𑀺 𑀧𑀓𑁆𑀔𑀺𑀧𑀁

𑀙 𑀧𑁆𑀧𑀘𑁆𑀘𑀦𑀻𑀬𑁂’𑀧𑀺 𑀦𑀬𑀸𑀦𑀺 𑀧𑀓𑁆𑀔𑀺𑀧𑀁,

𑀏𑀯𑀁 𑀔𑀺𑀧𑀺𑀢𑁆𑀯𑀸 𑀅𑀦𑀼𑀮𑁄𑀫𑀧𑀘𑁆𑀘𑀦𑀺-

𑀬𑁂𑀘𑀸’𑀧𑀺 𑀙 𑀧𑁆𑀧𑀘𑁆𑀘𑀦𑀺𑀬𑀸’𑀦𑀼𑀮𑁄𑀫𑀓𑁂; ()

𑁨𑁪.

𑀕𑀫𑁆𑀪𑀻𑀭𑀧𑀝𑁆𑀞𑀸𑀦𑀫𑀳𑁄𑀤𑀥𑀺𑀁 𑀇𑀢𑀺

𑀲𑀗𑁆𑀔𑁄𑀪𑀬𑀁 𑀲𑀫𑁆𑀫𑀲𑀺 𑀜𑀸𑀡𑀫𑁂𑀭𑀼𑀦𑀸,

𑀢𑀁 𑀲𑀫𑁆𑀫𑀲𑀦𑁆𑀢𑀲𑁆𑀲 𑀲𑀯𑀢𑁆𑀣𑀼𑀓𑀁 𑀙𑀯𑀺-

𑀯𑀡𑁆𑀡𑁄 𑀧𑀲𑀦𑁆𑀢𑁄’𑀲𑀺 𑀧𑀲𑀻𑀤𑀺 𑀮𑁄𑀳𑀺𑀢𑀁; ()

𑁨𑁫. ¶

𑀢𑀲𑁆𑀫𑀺𑀁𑀔𑀡𑁂 𑀘𑀢𑁆𑀢𑀚𑀯𑀡𑁆𑀡𑀥𑀸𑀢𑀼𑀬𑁄

𑀅𑀝𑁆𑀞𑀁𑀲𑀼 𑀞𑀸𑀦𑀫𑁆𑀳𑀺 𑀅𑀲𑀺𑀢𑀺𑀳𑀢𑁆𑀣𑀓𑁂,

𑀅𑀜𑁆𑀜𑀢𑁆𑀭’𑀥𑀺𑀝𑁆𑀞𑀸𑀦𑀩𑀮𑀁 𑀲𑀭𑀻𑀭𑀢𑁄

𑀙𑀩𑁆𑀩𑀡𑁆𑀡𑀭𑀁𑀲𑀻 𑀯𑀺𑀲𑀭𑀸’𑀳𑀺𑀦𑀺𑀘𑁆𑀙𑀭𑀼𑀁; ()

𑁨𑁬.

𑀲𑁂𑀯𑀸𑀮𑀓𑀸𑀮𑀺𑀦𑁆𑀤𑀺𑀦𑀤𑀺’𑀦𑁆𑀤𑀺𑀭𑀸𑀧𑀢𑀺-

𑀦𑀺𑀮𑀫𑁆𑀩𑀭𑀺’𑀦𑁆𑀤𑀺𑀯𑀭𑀯𑀡𑁆𑀡𑀲𑀦𑁆𑀢𑀺𑀪𑀸,

𑀓𑁂𑀲’𑀓𑁆𑀔𑀺𑀫𑀲𑁆𑀲𑀽𑀳𑀺𑀓 𑀯𑀺𑀦𑀺𑀕𑁆𑀕𑀢𑀸 𑀪𑀼𑀲𑀁

𑀦𑀻𑀮𑀧𑁆𑀧𑀪𑀸’𑀲𑁂𑀲𑀤𑀺𑀲𑀸 𑀅𑀮𑀗𑁆𑀓𑀭𑀼𑀁; ()

𑁨𑁭.

𑀢𑀸𑀲𑀁 𑀯𑀲𑀸’ 𑀲𑁂𑀲𑀤𑀺𑀲𑀸𑀯𑀺𑀮𑀸𑀲𑀺𑀦𑀻

𑀆𑀲𑀼𑀁 𑀬𑀣𑀸 𑀧𑀸𑀭𑀼𑀢𑀦𑀻𑀮𑀓𑀫𑁆𑀩𑀮𑀸,

𑀢𑀸 𑀘𑀓𑁆𑀓𑀯𑀸𑀴𑀸𑀢𑀺 𑀧𑀧𑀽𑀭𑀬𑀦𑁆𑀢𑀺𑀬𑁄

𑀥𑀸𑀯𑀺𑀁𑀲𑀼 𑀦𑀺𑀮𑁄𑀧𑀮𑀘𑀼𑀡𑁆𑀡𑀲𑀦𑁆𑀦𑀺𑀪𑀸; ()

𑁨𑁮. ¶

𑀦𑀺𑀲𑁆𑀲𑁂𑀲𑀮𑁄𑀓𑀁 𑀳𑀭𑀺𑀢𑀸𑀮𑀓𑀼𑀗𑁆𑀓𑀼𑀫-

𑀘𑀼𑀡𑁆𑀡𑁂𑀳𑀺 𑀲𑁄𑀯𑀡𑁆𑀡𑀭𑀲𑁂𑀳𑀺 𑀫𑀺𑀲𑁆𑀲𑀓𑀁,

𑀆𑀮𑁂𑀧𑀬𑀦𑁆𑀢𑀻𑀯𑀺𑀬 𑀧𑀻𑀢𑀭𑀁𑀲𑀺𑀬𑁄

𑀬𑀸 𑀦𑀺𑀕𑁆𑀕𑀢𑀸 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑀸; ()

𑁨𑁯.

𑀢𑀸𑀲𑀁 𑀯𑀲𑁂𑀦𑀸’𑀲𑀺 𑀲𑀺𑀡𑁂𑀭𑀼𑀧𑀩𑁆𑀩𑀢-

𑀭𑀸𑀚𑀸 𑀯𑀺𑀮𑀺𑀦𑁄’𑀯 𑀫𑀳𑀡𑁆𑀡𑀯𑁂 𑀚𑀮𑀁,

𑀲𑀁𑀓𑀧𑁆𑀧𑀺𑀢𑀸’𑀯’𑀝𑁆𑀞 𑀤𑀺𑀲𑀸𑀕𑀚𑀸’𑀪𑀯𑀼𑀁

𑀦𑀺𑀤𑁆𑀥𑀦𑁆𑀢𑀘𑀸𑀫𑀻𑀓𑀭𑀓𑀧𑁆𑀧𑀦𑀸𑀤𑀺𑀦𑀸; ()

𑁩𑁦.

𑀮𑀸𑀔𑀸𑀭𑀲𑀸𑀦𑀁 𑀧𑀭𑀺𑀲𑁂𑀘𑀦𑀁 𑀯𑀺𑀬

𑀦𑀺𑀦𑁆𑀤𑀽𑀭𑀘𑀼𑀡𑁆𑀡𑁄’𑀓𑀺𑀭𑀡𑀁’𑀯 𑀬𑀸𑀤𑀺𑀲𑀺,

𑀲𑀜𑁆𑀛𑀸𑀧𑀪𑀸𑀭𑀢𑁆𑀢𑀲𑀼𑀭𑀢𑁆𑀢𑀭𑀁𑀲𑀺𑀬𑁄

𑀦𑀺𑀓𑁆𑀔𑀫𑁆𑀫 𑀥𑀸𑀯𑀺𑀁𑀲𑀼 𑀲𑀫𑀁𑀲𑀮𑁄𑀳𑀺𑀢𑀸; ()

𑁩𑁧.

𑀢𑀸𑀲𑀁 𑀯𑀲𑁂𑀦𑀸’𑀔𑀺𑀮𑀪𑀽𑀫𑀺𑀓𑀸𑀫𑀺𑀦𑀻

𑀆𑀲𑀻 𑀦𑀺𑀫𑀼𑀕𑁆𑀕𑀸𑀭𑀺𑀯 𑀉𑀢𑁆𑀢𑀭𑀡𑁆𑀡𑀯𑁂,

𑀅𑀫𑁆𑀪𑁄𑀚𑀭𑀸𑀕𑁂𑀳𑀺 𑀲𑀼𑀦𑀺𑀫𑁆𑀫𑀺𑀢𑀸𑀦𑀺’𑀯

𑀲𑀩𑁆𑀩𑀸𑀦𑀺 𑀤𑀩𑁆𑀩𑀸𑀦𑁆𑀬’𑀪𑀯𑀼𑀁 𑀚𑀕𑀢𑁆𑀢𑀬𑁂;()

𑁩𑁨. ¶

𑀬𑀸𑀓𑀼𑀦𑁆𑀤𑀲𑁄𑀕𑀦𑁆𑀥𑀺𑀓𑀘𑀦𑁆𑀤𑀘𑀦𑁆𑀤𑀺𑀓𑀸-

𑀓𑀧𑁆𑀧𑀽𑀭𑀔𑀻𑀭𑁄𑀤𑀥𑀺𑀯𑀻𑀘𑀺𑀧𑀡𑁆𑀟𑀭𑀸,

𑀅𑀝𑁆𑀞𑀻𑀳𑀺 𑀤𑀸𑀞𑀸𑀳𑀻 𑀯𑀺𑀢𑀲𑁆𑀲𑀝𑀸 𑀪𑀼𑀲𑀁

𑀑𑀤𑀸𑀢𑀭𑀁𑀲𑀻 𑀥𑀯𑀮𑀻𑀓𑀭𑀼𑀁 𑀤𑀺𑀲𑀸; ()

𑁩𑁩.