📜
𑀢𑁂𑀮𑀓𑀝𑀸𑀳𑀕𑀸𑀣𑀸 ¶
𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲
𑀮𑀁𑀓𑀺𑀲𑁆𑀲𑀭𑁄 𑀚𑀬𑀢𑀼 𑀯𑀸𑀭𑀡𑀭𑀸𑀚𑀕𑀸𑀫𑀻
𑀪𑁄𑀕𑀺𑀦𑁆𑀤𑀪𑁄𑀕 𑀭𑀼𑀘𑀺𑀭𑀸𑀬𑀢 𑀧𑀻𑀡 𑀩𑀸𑀳𑀼,
𑀲𑀸𑀥𑀼𑀧𑀘𑀸𑀭𑀦𑀺𑀭𑀢𑁄 𑀕𑀼𑀡𑀲𑀦𑁆𑀦𑀺𑀯𑀸𑀲𑁄
𑀥𑀫𑁆𑀫𑁂 𑀞𑀺𑀢𑁄 𑀯𑀻𑀕𑀢𑀓𑁄𑀥𑀫𑀤𑀸𑀯𑀮𑁂𑀧𑁄;
𑀬𑁄 𑀲𑀩𑁆𑀩𑀮𑁄𑀓𑀫𑀳𑀺𑀢𑁄 𑀓𑀭𑀼𑀡𑀸𑀥𑀺𑀯𑀸𑀲𑁄
𑀫𑁄𑀓𑁆𑀔𑀸𑀓𑀭𑁄 𑀭𑀯𑀺𑀓𑀼𑀮𑀫𑁆𑀩𑀭 𑀧𑀼𑀡𑁆𑀡 𑀘𑀦𑁆𑀤𑁄,
𑀜𑁂𑀬𑁆𑀬𑁄𑀤𑀥𑀺𑀁 𑀲𑀼𑀯𑀺𑀧𑀼𑀮𑀁 𑀲𑀓𑀮𑀁 𑀯𑀺𑀩𑀼𑀤𑁆𑀥𑁄
𑀮𑁄𑀓𑀼𑀢𑁆𑀢𑀫𑀁 𑀦𑀫𑀣 𑀢𑀁 𑀲𑀺𑀭𑀲𑀸 𑀫𑀼𑀦𑀺𑀦𑁆𑀤𑀁;
𑀲𑁄𑀧𑀸𑀦𑀫𑀸𑀮𑀫𑀫𑀮𑀁 𑀢𑀺𑀤𑀲𑀸𑀮𑀬𑀲𑁆𑀲
𑀲𑀁𑀲𑀸𑀭 𑀲𑀸𑀕𑀭𑀲𑀫𑀼𑀢𑁆𑀢𑀭𑀡𑀸𑀬 𑀲𑁂𑀢𑀼𑀁,
𑀲𑀩𑁆𑀩𑀸𑀕𑀢𑀻𑀪𑀬 𑀯𑀺𑀯𑀚𑁆𑀚𑀺𑀢 𑀔𑁂𑀫 𑀫𑀕𑁆𑀕𑀁
𑀥𑀫𑁆𑀫𑀁 𑀦𑀫𑀲𑁆𑀲𑀣 𑀲𑀤𑀸 𑀫𑀼𑀦𑀺𑀦𑀸 𑀧𑀡𑀻𑀢𑀁;
𑁪. ¶
𑀤𑁂𑀬𑁆𑀬𑀁 𑀢𑀤𑀧𑁆𑀧𑀫𑀧𑀺 𑀬𑀢𑁆𑀣 𑀧𑀲𑀦𑁆𑀦 𑀘𑀺𑀢𑁆𑀢𑀸
𑀤𑀢𑁆𑀯𑀸 𑀦𑀭𑀸 𑀨𑀮𑀫𑀼𑀴𑀸𑀭𑀢𑀭𑀁 𑀮𑀪𑀦𑁆𑀢𑁂,
𑀢𑀁 𑀲𑀩𑁆𑀩𑀤𑀸 𑀤𑀲𑀩𑀮𑁂𑀦𑀧𑀺 𑀲𑀼𑀧𑁆𑀧𑀲𑀢𑁆𑀣𑀁
𑀲𑀗𑁆𑀖𑀁 𑀦𑀫𑀲𑁆𑀲𑀣 𑀲𑀤𑀸𑀫𑀺𑀢𑀧𑀼𑀜𑁆𑀜𑀔𑁂𑀢𑁆𑀢𑀁;
𑀢𑁂𑀚𑁄 𑀩𑀮𑁂𑀦 𑀫𑀳𑀢𑀸 𑀭𑀢𑀦𑀢𑁆𑀢𑀬𑀲𑁆𑀲
𑀮𑁄𑀓𑀢𑁆𑀢𑀬𑀁 𑀲𑀫𑀥𑀺𑀕𑀘𑁆𑀙𑀢𑀺 𑀬𑁂𑀦 𑀫𑁄𑀓𑁆𑀔𑀁,
𑀭𑀓𑁆𑀔𑀸 𑀦 𑀘𑀢𑁆𑀣𑀺 𑀘 𑀲𑀫𑀸 𑀭𑀢𑀦𑀢𑁆𑀢𑀬𑀲𑁆𑀲
𑀢𑀲𑁆𑀫𑀸 𑀲𑀤𑀸 𑀪𑀚𑀣 𑀢𑀁 𑀭𑀢𑀦𑀢𑁆𑀢𑀬𑀁 𑀪𑁄;
𑀮𑀁𑀓𑀺𑀲𑁆𑀲𑀭𑁄 𑀧𑀭𑀳𑀺𑀢𑁂𑀓𑀭𑀢𑁄 𑀦𑀺𑀭𑀸𑀲𑁄
𑀭𑀢𑁆𑀢𑀺𑀫𑁆𑀧𑀺 𑀚𑀸𑀕𑀭𑀭𑀢𑁄 𑀓𑀭𑀼𑀡𑀸𑀥𑀺𑀯𑀸𑀲𑁄,
𑀮𑁄𑀓𑀁 𑀯𑀺𑀩𑁄𑀥𑀬𑀢𑀺 𑀮𑁄𑀓𑀳𑀺𑀢𑀸𑀬 𑀓𑀸𑀫𑀁
𑀥𑀫𑁆𑀫𑀁 𑀲𑀫𑀸𑀘𑀭𑀣 𑀚𑀸𑀕𑀭𑀺𑀬𑀸𑀦𑀼𑀬𑀼𑀢𑁆𑀢𑀸;
𑁭. ¶
𑀲𑀢𑁆𑀢𑁄𑀧𑀓𑀸𑀭 𑀦𑀺𑀭𑀢𑀸 𑀓𑀼𑀲𑀮𑁂 𑀲𑀳𑀸𑀬𑀸
𑀪𑁄 𑀤𑀼𑀮𑁆𑀮𑀪𑀸 𑀪𑀼𑀯𑀺 𑀦𑀭𑀸 𑀯𑀺𑀳𑀢𑀧𑁆𑀧𑀫𑀸𑀤𑀸,
𑀮𑀁𑀓𑀸𑀥𑀺𑀧𑀁 𑀕𑀼𑀡𑀥𑀦𑀁 𑀓𑀼𑀲𑀮𑁂 𑀲𑀳𑀸𑀬𑀁
𑀆𑀕𑀫𑁆𑀫 𑀲𑀁𑀘𑀭𑀣 𑀥𑀫𑁆𑀫𑀫𑀮𑀁 𑀧𑀫𑀸𑀤𑀁;
𑀥𑀫𑁆𑀫𑁄 𑀢𑀺𑀮𑁄𑀓 𑀲𑀭𑀡𑁄 𑀧𑀭𑀫𑁄 𑀭𑀲𑀸𑀦𑀁
𑀥𑀫𑁆𑀫𑁄 𑀫𑀳𑀕𑁆𑀖𑀭𑀢𑀦𑁄 𑀭𑀢𑀦𑁂𑀲𑀼 𑀮𑁄𑀓𑁂,
𑀥𑀫𑁆𑀫𑁄 𑀪𑀯𑁂 𑀢𑀺𑀪𑀯𑀤𑀼𑀓𑁆𑀔 𑀯𑀺𑀦𑀸𑀲𑀳𑁂𑀢𑀼
𑀥𑀫𑁆𑀫𑀁 𑀲𑀫𑀸𑀘𑀭𑀣 𑀚𑀸𑀕𑀭𑀺𑀬𑀸𑀦𑀼𑀬𑀼𑀢𑁆𑀢𑀸;
𑀦𑀺𑀤𑁆𑀤𑀁 𑀯𑀺𑀦𑁄𑀤𑀬𑀣 𑀪𑀸𑀯𑀬𑀣𑀧𑁆𑀧𑀫𑁂𑀬𑁆𑀬𑀁
𑀤𑀼𑀓𑁆𑀔𑀁 𑀅𑀦𑀺𑀘𑁆𑀘𑀫𑁆𑀧𑀺 𑀘𑁂𑀳 𑀅𑀦𑀢𑁆𑀢𑀢𑀜𑁆𑀘,
𑀤𑁂𑀳𑁂 𑀭𑀢𑀺𑀁 𑀚𑀳𑀣 𑀚 𑀚𑀚𑁆𑀚𑀭𑀪𑀸𑀚𑀦𑀸𑀪𑁄
𑀥𑀫𑁆𑀫𑀁 𑀲𑀫𑀸𑀘𑀭𑀣 𑀚𑀸𑀕𑀭𑀺𑀬𑀸𑀦𑀼𑀬𑀼𑀢𑁆𑀢𑀸;
𑁧𑁦. ¶
𑀑𑀓𑀸𑀲 𑀫𑀚𑁆𑀚 𑀫𑀫 𑀦𑀢𑁆𑀣𑀺 𑀲𑀼𑀯𑁂 𑀓𑀭𑀺𑀲𑁆𑀲𑀁
𑀥𑀫𑁆𑀫𑀁 𑀇𑀢𑀻𑀳𑀮𑀲𑀢𑀸 𑀓𑀼𑀲𑀮𑀧𑁆𑀧𑀬𑁄𑀕𑁂,
𑀦𑀸’𑀮𑀁 𑀢𑀺𑀬𑀤𑁆𑀥𑀲𑀼 𑀢𑀣𑀸 𑀪𑀼𑀯𑀦𑀢𑁆𑀢𑀬𑁂 𑀘
𑀓𑀸𑀫𑀁 𑀦 𑀘𑀢𑁆𑀣𑀺 𑀫𑀦𑀼𑀚𑁄 𑀫𑀭𑀡𑀸 𑀧𑀫𑀼𑀢𑁆𑀢𑁄;
𑀔𑀺𑀢𑁆𑀢𑁄 𑀬𑀣𑀸 𑀦𑀪𑀲𑀺 𑀓𑁂𑀦𑀘𑀺𑀤𑁂𑀯 𑀮𑁂𑀟𑁆𑀟𑀼
𑀪𑀽𑀫𑀺𑀁 𑀲𑀫𑀸𑀧𑀢𑁆𑀢𑀺 𑀪𑀸𑀭𑀢𑀬𑀸 𑀔𑀡𑁂𑀦,
𑀚𑀸𑀢𑀢𑁆𑀢𑀫𑁂𑀯 𑀔𑀮𑀼 𑀓𑀸𑀭𑀡𑀫𑁂𑀓𑀫𑀢𑁆𑀭
𑀮𑁄𑀓𑀁 𑀲𑀤𑀸 𑀦𑀦𑀼 𑀥𑀼𑀯𑀁 𑀫𑀭𑀡𑀸𑀬 𑀕𑀦𑁆𑀢𑀼𑀁;
𑀓𑀸𑀫𑀁 𑀦𑀭𑀲𑁆𑀲 𑀧𑀢𑀢𑁄 𑀕𑀺𑀭𑀺𑀫𑀼𑀤𑁆𑀥𑀦𑀸𑀢𑁄
𑀫𑀚𑁆𑀛𑁂 𑀦 𑀓𑀺𑀜𑁆𑀘𑀺 𑀪𑀬𑀦𑀺𑀲𑁆𑀲𑀭𑀡𑀸𑀬 𑀳𑁂𑀢𑀼,
𑀓𑀸𑀫𑀁 𑀯𑀚𑀦𑁆𑀢𑀺 𑀫𑀭𑀡𑀁 𑀢𑀺𑀪𑀯𑁂𑀲𑀼 𑀲𑀢𑁆𑀢𑀸
𑀪𑁄𑀕𑁂 𑀭𑀢𑀺𑀁 𑀧𑀚𑀳𑀣𑀸𑀧𑀺 𑀘 𑀚𑀻𑀯𑀺𑀢𑁂 𑀘;
𑁧𑁩. ¶
𑀓𑀸𑀫𑀁 𑀧𑀢𑀦𑁆𑀢𑀺 𑀫𑀳𑀺𑀬𑀸 𑀔𑀮𑀼 𑀯𑀲𑁆𑀲𑀥𑀸𑀭𑀸
𑀯𑀺𑀚𑁆𑀚𑀼𑀮𑁆𑀮𑀢𑀸 𑀯𑀺𑀢𑀢𑀫𑁂𑀖 𑀫𑀼𑀔𑀸 𑀧𑀫𑀼𑀢𑁆𑀢𑀸,
𑀏𑀯𑀁 𑀦𑀭𑀸 𑀫𑀭𑀡𑀪𑀻𑀫 𑀧𑀧𑀸𑀢𑀫𑀚𑁆𑀛𑁂
𑀓𑀸𑀫𑀁 𑀧𑀢𑀦𑁆𑀢𑀺 𑀦𑀳𑀺 𑀓𑁄𑀘𑀺 𑀪𑀯𑁂𑀲𑀼 𑀦𑀺𑀘𑁆𑀘𑁄;
𑀯𑁂𑀮𑀸𑀢𑀝𑁂 𑀧𑀝𑀼𑀢𑀭𑁄𑀭𑀼 𑀢𑀭𑀁𑀕𑀫𑀸𑀮𑀸
𑀦𑀸𑀲𑀁 𑀯𑀚𑀦𑁆𑀢𑀺 𑀲𑀢𑀢𑀁 𑀲𑀮𑀺𑀮𑀸𑀮𑀬𑀲𑁆𑀲,
𑀦𑀸𑀲𑀁 𑀢𑀣𑀸 𑀲𑀫𑀼𑀧𑀬𑀦𑁆𑀢𑀺 𑀦𑀭𑀸𑀫𑀭𑀸𑀦𑀁
𑀧𑀸𑀡𑀸𑀦𑀺 𑀤𑀸𑀭𑀼𑀡𑀢𑀭𑁂 𑀫𑀭𑀡𑁄𑀤𑀥𑀺𑀫𑁆𑀳𑀺;
𑀭𑀼𑀤𑁆𑀥𑁄𑀧𑀺 𑀲𑁄 𑀭𑀣𑀯𑀭𑀲𑁆𑀲𑀕𑀚𑀸𑀥𑀺𑀧𑁂𑀳𑀺
𑀬𑁄𑀥𑁂𑀳𑀺 𑀘𑀸𑀧𑀺 𑀲𑀩𑀮𑁂𑀳𑀺 𑀘 𑀲𑀸𑀬𑀼𑀥𑁂𑀳𑀺,
𑀮𑁄𑀓𑀁 𑀯𑀺𑀯𑀁𑀘𑀺𑀬 𑀲𑀤𑀸 𑀫𑀭𑀡𑀽𑀲𑀪𑁄 𑀲𑁄
𑀓𑀸𑀫𑀁 𑀦𑀺𑀳𑀦𑁆𑀢𑀺 𑀪𑀼𑀯𑀦𑀢𑁆𑀢𑀬 𑀲𑀸𑀮𑀺 𑀤𑀡𑁆𑀟𑀁;
𑁧𑁬. ¶
𑀪𑁄 𑀫𑀸𑀭𑀼𑀢𑁂𑀦 𑀫𑀳𑀢𑀸 𑀯𑀺𑀳𑀢𑁄 𑀧𑀤𑀻𑀧𑁄
𑀔𑀺𑀧𑁆𑀧𑀁 𑀯𑀺𑀦𑀸𑀲 𑀫𑀼𑀔𑀫𑁂𑀢𑀺 𑀫𑀳𑀧𑁆𑀧𑀪𑁄𑀧𑀺,
𑀮𑁄𑀓𑁂 𑀢𑀣𑀸 𑀫𑀭𑀡𑀘𑀡𑁆𑀟 𑀲𑀫𑀻𑀭𑀡𑁂𑀦
𑀔𑀺𑀧𑁆𑀧𑀁 𑀯𑀺𑀦𑀲𑁆𑀲𑀢𑀺 𑀦𑀭𑀸𑀬𑀼𑀫𑀳𑀸 𑀧𑀤𑀻𑀧𑁄;
𑀭𑀸𑀫𑀚𑁆𑀚𑀼𑀦𑀧𑁆𑀧𑀪𑀽𑀢𑀺 𑀪𑀽𑀧𑀢𑀺 𑀧𑀼𑀁𑀕𑀯𑀸 𑀘
𑀲𑀽𑀭𑀸 𑀧𑀼𑀭𑁂 𑀭𑀡𑀫𑀼𑀔𑁂 𑀯𑀺𑀚𑀺𑀢𑀸𑀭𑀺 𑀲𑀗𑁆𑀖𑀸,
𑀢𑁂𑀧𑀻𑀳 𑀘𑀡𑁆𑀟 𑀫𑀭𑀡𑁄𑀖 𑀦𑀺𑀫𑀼𑀕𑁆𑀕𑀤𑁂𑀳𑀸
𑀦𑀸𑀲𑀁 𑀕𑀢𑀸 𑀚𑀕𑀢𑀺 𑀓𑁂 𑀫𑀭𑀡𑀸 𑀧𑀫𑀼𑀢𑁆𑀢𑀸?
𑀮𑀓𑁆𑀔𑀻 𑀘 𑀲𑀸𑀕𑀭𑀧𑀝𑀸 𑀲𑀥𑀭𑀸𑀥𑀭𑀸 𑀘
𑀲𑀫𑁆𑀧𑀢𑁆𑀢𑀺𑀬𑁄 𑀘 𑀯𑀺𑀯𑀺𑀥𑀸 𑀅𑀧𑀺 𑀭𑀽𑀧𑀲𑁄𑀪𑀸,
𑀲𑀩𑁆𑀩𑀸 𑀘 𑀢𑀸 𑀅𑀧𑀺 𑀘 𑀫𑀺𑀢𑁆𑀢𑀲𑀼𑀢𑀸 𑀘 𑀤𑀸𑀭𑀸
𑀓𑁂 𑀘𑀸𑀧𑀺 𑀓𑀁 𑀅𑀦𑀼𑀕𑀢𑀸 𑀫𑀭𑀡𑀁 𑀯𑀚𑀦𑁆𑀢𑀁?
𑁧𑁯. ¶
𑀩𑁆𑀭𑀳𑁆𑀫𑀸𑀲𑀼𑀭𑀸𑀲𑀼𑀭𑀕𑀡𑀸 𑀘 𑀫𑀳𑀸𑀦𑀼𑀪𑀸𑀯𑀸
𑀕𑀦𑁆𑀥𑀩𑁆𑀩𑀓𑀺𑀦𑁆𑀦𑀭𑀫𑀳𑁄𑀭𑀕𑀭𑀓𑁆𑀔𑀲𑀸 𑀘,
𑀢𑁂 𑀘𑀸 𑀧𑀭𑁂 𑀘 𑀫𑀭𑀡𑀕𑁆𑀕𑀺𑀲𑀺𑀔𑀸𑀬 𑀲𑀩𑁆𑀩𑁂
𑀅𑀦𑁆𑀢𑁂 𑀧𑀢𑀦𑁆𑀢𑀺 𑀲𑀮𑀪𑀸 𑀇𑀯 𑀔𑀻𑀡𑀧𑀼𑀜𑁆𑀜𑀸;
𑀬𑁂 𑀲𑀸𑀭𑀺𑀧𑀼𑀢𑁆𑀢𑀧𑀫𑀼𑀔𑀸 𑀫𑀼𑀦𑀺𑀲𑀸𑀯𑀓𑀸 𑀘
𑀲𑀼𑀤𑁆𑀥𑀸 𑀲𑀤𑀸𑀲𑀯𑀦𑀼𑀤𑀸 𑀧𑀭𑀫𑀺𑀤𑁆𑀥𑀺𑀧𑀢𑁆𑀢𑀸,
𑀢𑁂 𑀘𑀸𑀧𑀺 𑀫𑀘𑁆𑀘𑀼𑀯𑀴𑀪𑀸 𑀫𑀼𑀔 𑀲𑀦𑁆𑀦𑀺𑀫𑀼𑀕𑁆𑀕𑀸
𑀤𑀻𑀧𑀸𑀦𑀺𑀯𑀸𑀦𑀮𑀳𑀢𑀸 𑀔𑀬𑀢𑀁 𑀉𑀧𑁂𑀢𑀸;
𑀩𑀼𑀤𑁆𑀥𑀸𑀧𑀺 𑀩𑀼𑀤𑁆𑀥𑀓𑀫𑀮𑀸𑀫𑀮𑀘𑀸𑀭𑀼𑀦𑁂𑀢𑁆𑀢𑀸
𑀩𑀢𑁆𑀢𑀺𑀁𑀲𑀮𑀓𑁆𑀔𑀡 𑀯𑀺𑀭𑀸𑀚𑀺𑀢 𑀭𑀽𑀧𑀲𑁄𑀪𑀸,
𑀲𑀩𑁆𑀩𑀸𑀲𑀘𑀓𑁆𑀔𑀬𑀓𑀭𑀸𑀧𑀺 𑀘 𑀮𑁄𑀓𑀦𑀸𑀣𑀸
𑀲𑀫𑁆𑀫𑀤𑁆𑀤𑀺𑀢𑀸 𑀫𑀭𑀡𑀫𑀢𑁆𑀢𑀫𑀳𑀸𑀕𑀚𑁂𑀦;
𑁨𑁨. ¶
𑀭𑁄𑀕𑀸𑀢𑀼𑀭𑁂𑀲𑀼 𑀓𑀭𑀼𑀡𑀸 𑀦 𑀚𑀭𑀸𑀢𑀼𑀭𑁂𑀲𑀼
𑀔𑀺𑀟𑁆𑀟𑀸𑀧𑀭𑁂𑀲𑀼 𑀲𑀼𑀓𑀼𑀫𑀸𑀭𑀓𑀼𑀫𑀸𑀭𑀓𑁂𑀲𑀼,
𑀮𑁄𑀓𑀁 𑀲𑀤𑀸 𑀳𑀦𑀢𑀺 𑀫𑀘𑁆𑀘𑀼 𑀫𑀳𑀸𑀕𑀚𑀺𑀦𑁆𑀤𑁄
𑀤𑀯𑀸𑀦𑀮𑁄 𑀯𑀦𑀫𑀺𑀯𑀸𑀯𑀭𑀢𑀁 𑀅𑀲𑁂𑀲𑀁;
𑀆𑀧𑀼𑀡𑁆𑀡𑀢𑀸 𑀦 𑀲𑀮𑀺𑀮𑁂 𑀦 𑀚𑀮𑀸𑀲𑀬𑀲𑁆𑀲
𑀓𑀝𑁆𑀞𑀲𑁆𑀲 𑀘𑀸𑀧𑀺 𑀩𑀳𑀼𑀢𑀸 𑀦 𑀳𑀼𑀢𑀸𑀲𑀦𑀲𑁆𑀲,
𑀪𑀼𑀢𑁆𑀯𑀸𑀦 𑀲𑁄 𑀢𑀺𑀪𑀽𑀯𑀦𑀫𑁆𑀧𑀺 𑀢𑀣𑀸 𑀅𑀲𑁂𑀲𑀁
𑀪𑁄 𑀦𑀺𑀤𑁆𑀤𑀬𑁄 𑀦 𑀔𑀮𑀼 𑀧𑀻𑀢𑀺𑀫𑀼𑀧𑁂𑀢𑀺 𑀫𑀘𑁆𑀘𑀼;
𑀪𑁄 𑀫𑁄𑀳 𑀫𑁄𑀳𑀺𑀢𑀢𑀬𑀸 𑀯𑀺𑀯𑀲𑁄 𑀅𑀥𑀜𑁆𑀜𑁄
𑀮𑁄𑀓𑁄 𑀧𑀢𑀢𑁆𑀬𑀧𑀺𑀧𑀺 𑀫𑀘𑁆𑀘𑀼𑀫𑀼𑀔𑁂 𑀲𑀼𑀪𑀻𑀫𑁂,
𑀪𑁄𑀕𑁂 𑀭𑀢𑀺𑀁 𑀲𑀫𑀼𑀧𑀬𑀸𑀢𑀺 𑀦𑀺𑀳𑀻𑀦𑀧𑀜𑁆𑀜𑁄
𑀤𑁄𑀮𑀸 𑀢𑀭𑀗𑁆𑀕𑀘𑀧𑀮𑁂 𑀲𑀼𑀧𑀺𑀦𑁄𑀧𑀫𑁂𑀬𑁆𑀬𑁂;
𑁨𑁫. ¶
𑀏𑀓𑁄𑀧𑀺 𑀫𑀘𑁆𑀘𑀼𑀭𑀪𑀺𑀳𑀦𑁆𑀢𑀼𑀫𑀮𑀁 𑀢𑀺𑀮𑁄𑀓𑀁
𑀓𑀺𑀁 𑀦𑀺𑀤𑁆𑀤𑀬𑀸 𑀅𑀧𑀺 𑀚𑀭𑀸𑀫𑀭𑀡𑀸𑀦𑀼𑀬𑀸𑀬𑀻,
𑀓𑁄 𑀯𑀸 𑀓𑀭𑁂𑀬𑁆𑀬 𑀯𑀺𑀪𑀲𑀼𑀯𑁂𑀲𑀼 𑀘 𑀚𑀻𑀯𑀺𑀢𑀸𑀲𑀁
𑀚𑀸𑀢𑁄 𑀦𑀭𑁄 𑀲𑀼𑀧𑀺𑀦 𑀲𑀁𑀕𑀫 𑀲𑀦𑁆𑀦𑀺𑀪𑁂𑀲𑀼;
𑀦𑀺𑀘𑁆𑀘𑀸𑀢𑀼𑀭𑀁 𑀚𑀕𑀤𑀺𑀤𑀁 𑀲𑀪𑀬𑀁 𑀲𑀲𑁄𑀓𑀁
𑀤𑀺𑀲𑁆𑀯𑀸 𑀘 𑀓𑁄𑀥𑀫𑀤𑀫𑁄𑀳𑀚𑀭𑀸𑀪𑀺𑀪𑀽𑀢𑀁,
𑀉𑀩𑁆𑀩𑁂𑀕𑀫𑀢𑁆𑀢𑀫𑀧𑀺 𑀬𑀲𑁆𑀲 𑀦 𑀯𑀺𑀚𑁆𑀚𑀢𑀻 𑀘𑁂
𑀲𑁄 𑀤𑀸𑀭𑀼𑀡𑁄𑀦 𑀫𑀭𑀡𑀁 𑀯𑀢 𑀢𑀁 𑀥𑀺𑀭𑀢𑁆𑀣𑀼!
𑀪𑁄 𑀪𑁄 𑀦 𑀧𑀲𑁆𑀲𑀣 𑀚𑀭𑀸𑀲𑀺𑀥𑀭𑀜𑁆𑀳𑀺 𑀫𑀘𑁆𑀘𑀼
𑀫𑀸𑀳𑀜𑁆𑀜𑀫𑀸𑀦𑀫𑀔𑀺𑀮𑀁 𑀲𑀢𑀢𑀁 𑀢𑀺𑀮𑁄𑀓𑀁,
𑀓𑀺𑀁 𑀦𑀺𑀤𑁆𑀤𑀬𑀸 𑀦𑀬𑀣 𑀯𑀻𑀢𑀪𑀬𑀸 𑀢𑀺𑀬𑀸𑀫𑀁
𑀥𑀫𑁆𑀫𑀁 𑀲𑀤𑀸’𑀲𑀯𑀦𑀼𑀤𑀁 𑀘𑀭𑀣’𑀧𑁆𑀧𑀫𑀢𑁆𑀢𑀸;
𑁨𑁮. ¶
𑀪𑀸𑀯𑁂𑀣 𑀪𑁄 𑀫𑀭𑀡𑀫𑀸𑀭𑀯𑀺𑀯𑀚𑁆𑀚𑀦𑀸𑀬
𑀮𑁄𑀓𑁂 𑀲𑀤𑀸 𑀫𑀭𑀡 𑀲𑀜𑁆𑀜𑀫𑀺𑀫𑀁 𑀬𑀢𑀢𑁆𑀢𑀸,
𑀏𑀯𑀜𑁆𑀳𑀺 𑀪𑀸𑀯𑀦𑀭𑀢𑀲𑁆𑀲 𑀦𑀭𑀲𑁆𑀲 𑀢𑀲𑁆𑀲
𑀢𑀡𑁆𑀳𑀸 𑀧𑀳𑀻𑀬𑀢𑀺 𑀲𑀭𑀻𑀭𑀕𑀢𑀸 𑀅𑀲𑁂𑀲𑀸;
𑀭𑀽𑀧𑀁 𑀚𑀭𑀸 𑀧𑀺𑀬𑀢𑀭𑀁 𑀫𑀮𑀺𑀦𑀻𑀓𑀭𑁄𑀢𑀺
𑀲𑀩𑁆𑀩𑀁 𑀩𑀮𑀁 𑀳𑀭𑀢𑀺 𑀅𑀢𑁆𑀢𑀦𑀺 𑀖𑁄𑀭𑀭𑁄𑀕𑁄,
𑀦𑀸𑀦𑀽𑀧𑀪𑁄𑀕 𑀧𑀭𑀺𑀭𑀓𑁆𑀔𑀺𑀢 𑀫𑀢𑁆𑀢𑀪𑀸𑀯𑀁
𑀪𑁄 𑀫𑀘𑁆𑀘𑀼 𑀲𑀁𑀳𑀭𑀢𑀺 𑀓𑀺𑀁 𑀨𑀮𑀫𑀢𑁆𑀢𑀪𑀸𑀯𑁂?
𑀓𑀫𑁆𑀫𑀸𑀦𑀺𑀮𑀸𑀧𑀳𑀢𑀭𑁄𑀕𑀢𑀭𑀁𑀕𑀪𑀁𑀕𑁂
𑀲𑀁𑀲𑀸𑀭 𑀲𑀸𑀕𑀭 𑀫𑀼𑀔𑁂 𑀯𑀺𑀢𑀢𑁂 𑀯𑀺𑀧𑀦𑁆𑀦𑀸,
𑀫𑀸 𑀫𑀸𑀧𑀫𑀸𑀤𑀫𑀓𑀭𑀺𑀢𑁆𑀣 𑀓𑀭𑁄𑀣 𑀫𑁄𑀓𑁆𑀔𑀁
𑀤𑀼𑀓𑁆𑀔𑁄𑀤𑀬𑁄 𑀦𑀦𑀼 𑀧𑀫𑀸𑀤𑀫𑀬𑀁 𑀦𑀭𑀸𑀦𑀁;
𑁩𑁧. ¶
𑀪𑁄𑀕𑀸 𑀘 𑀫𑀺𑀢𑁆𑀢𑀲𑀼𑀢𑀧𑁄𑀭𑀺𑀲 𑀩𑀦𑁆𑀥𑀯𑀸 𑀘
𑀦𑀸𑀭𑀻 𑀘 𑀚𑀻𑀯𑀺𑀢𑀲𑀫𑀸 𑀅𑀧𑀺 𑀔𑁂𑀢𑁆𑀢𑀯𑀢𑁆𑀣𑀼,
𑀲𑀩𑁆𑀩𑀸𑀦𑀺 𑀢𑀸𑀦𑀺 𑀧𑀭𑀮𑁄𑀓𑀫𑀺𑀢𑁄 𑀯𑀚𑀦𑁆𑀢𑀁
𑀦𑀸𑀦𑀼𑀩𑁆𑀩𑀚𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀁𑀯 𑀮𑁄𑀓𑁂;
𑀪𑁄 𑀯𑀺𑀚𑁆𑀚𑀼𑀘𑀁𑀘𑀮𑀢𑀭𑁂 𑀪𑀯𑀲𑀸𑀕𑀭𑀫𑁆𑀳𑀺
𑀔𑀺𑀢𑁆𑀢𑀸 𑀧𑀼𑀭𑀸 𑀓𑀢𑀫𑀳𑀸𑀧𑀯𑀦𑁂𑀦 𑀢𑁂𑀦,
𑀓𑀸𑀫𑀁 𑀯𑀺𑀪𑀺𑀚𑁆𑀚𑀢𑀺 𑀔𑀡𑁂𑀦 𑀲𑀭𑀻𑀭𑀦𑀸𑀯𑀸
𑀳𑀢𑁆𑀣𑁂 𑀓𑀭𑁄𑀣 𑀧𑀭𑀫𑀁 𑀕𑀼𑀡𑀳𑀢𑁆𑀣𑀲𑀸𑀭𑀁;
𑀦𑀺𑀘𑁆𑀘𑀁 𑀯𑀺𑀪𑀺𑀚𑁆𑀚𑀢𑀺𑀳 𑀆𑀫𑀓 𑀪𑀸𑀚𑀦𑀁𑀯
𑀲𑀁𑀭𑀓𑁆𑀔𑀺𑀢𑁄𑀧𑀺 𑀩𑀳𑀼𑀥𑀸 𑀇𑀳 𑀅𑀢𑁆𑀢𑀪𑀸𑀯𑁄,
𑀥𑀫𑁆𑀫𑀁 𑀲𑀫𑀸𑀘𑀭𑀣 𑀲𑀕𑁆𑀕𑀧𑀢𑀺𑀧𑁆𑀧𑀢𑀺𑀝𑁆𑀞𑀁
𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑀫𑀺𑀳𑀫𑁂𑀯 𑀨𑀮𑀁 𑀤𑀤𑀸𑀢𑀺;
𑁩𑁪. ¶
𑀭𑀦𑁆𑀢𑁆𑀯𑀸 𑀲𑀤𑀸 𑀧𑀺𑀬𑀢𑀭𑁂 𑀤𑀺𑀯𑀺 𑀤𑁂𑀯𑀭𑀚𑁆𑀚𑁂
𑀦𑀫𑁆𑀳𑀸 𑀘𑀯𑀦𑁆𑀢𑀺 𑀯𑀺𑀩𑀼𑀥𑀸 𑀅𑀧𑀺 𑀔𑀻𑀡𑀧𑀼𑀜𑁆𑀜𑀸,
𑀲𑀩𑁆𑀩𑀁 𑀲𑀼𑀔𑀁 𑀤𑀺𑀯𑀺 𑀪𑀼𑀯𑀻𑀳 𑀯𑀺𑀬𑁄𑀕𑀦𑀺𑀝𑁆𑀞𑀁
𑀓𑁄 𑀧𑀜𑁆𑀜𑀯𑀸 𑀪𑀯𑀲𑀼𑀔𑁂𑀲𑀼 𑀭𑀢𑀺𑀁 𑀓𑀭𑁂𑀬𑁆𑀬?
𑀩𑀼𑀤𑁆𑀥𑁄 𑀲𑀲𑀸𑀯𑀓𑀕𑀡𑁄 𑀚𑀕𑀤𑁂𑀓𑀦𑀸𑀣𑁄
𑀢𑀸𑀭𑀸𑀯𑀮𑀻𑀧𑀭𑀺𑀯𑀼𑀢𑁄𑀧𑀺 𑀘 𑀧𑀼𑀡𑁆𑀡𑀘𑀦𑁆𑀤𑁄,
𑀇𑀦𑁆𑀤𑁄𑀧𑀺 𑀤𑁂𑀯𑀫𑀓𑀼𑀝𑀁𑀓𑀺𑀢 𑀧𑀸𑀤𑀓𑀜𑁆𑀚𑁄
𑀓𑁄 𑀨𑁂𑀡𑀧𑀺𑀡𑁆𑀟-𑀦-𑀲𑀫𑁄 𑀢𑀺𑀪𑀯𑁂𑀲𑀼 𑀚𑀸𑀢𑁄?
𑀮𑀻𑀮𑀸𑀯𑀢𑀁𑀲𑀫𑀧𑀺 𑀬𑁄𑀩𑁆𑀩𑀦 𑀭𑀽𑀧𑀲𑁄𑀪𑀁
𑀅𑀢𑁆𑀢𑀽𑀧𑀫𑀁 𑀧𑀺𑀬𑀚𑀦𑁂𑀦 𑀘 𑀲𑀫𑁆𑀧𑀬𑁄𑀕𑀁,
𑀤𑀺𑀲𑁆𑀯𑀸𑀧𑀺 𑀯𑀺𑀚𑁆𑀚𑀼𑀘𑀧𑀮𑀁 𑀓𑀼𑀭𑀼𑀢𑁂 𑀧𑀫𑀸𑀤𑀁
𑀪𑁄 𑀫𑁄𑀳𑀫𑁄𑀳𑀺𑀢𑀚𑀦𑁄 𑀪𑀯𑀭𑀸𑀕𑀭𑀢𑁆𑀢𑁄;
𑁩𑁭. ¶
𑀧𑀼𑀢𑁆𑀢𑁄 𑀧𑀺𑀢𑀸 𑀪𑀯𑀢𑀺 𑀫𑀸𑀢𑀼 𑀧𑀢𑀻𑀳 𑀧𑀼𑀢𑁆𑀢𑁄
𑀦𑀸𑀭𑀻 𑀓𑀤𑀸𑀘𑀺 𑀚𑀦𑀦𑀻 𑀘 𑀧𑀺𑀢𑀸 𑀘 𑀧𑀼𑀢𑁆𑀢𑁄,
𑀏𑀯𑀁 𑀲𑀤𑀸 𑀯𑀺𑀧𑀭𑀺𑀯𑀢𑁆𑀢𑀢𑀺 𑀚𑀻𑀯𑀮𑁄𑀓𑁄
𑀘𑀺𑀢𑁆𑀢𑁂 𑀲𑀤𑀸𑀢𑀺𑀘𑀧𑀮𑁂 𑀔𑀮𑀼 𑀚𑀸𑀢𑀺𑀭𑀗𑁆𑀕𑁂;
𑀭𑀦𑁆𑀢𑁆𑀯𑀸 𑀧𑀼𑀭𑁂 𑀯𑀺𑀯𑀺𑀥𑀨𑀼𑀮𑁆𑀮𑀮𑀢𑀸𑀓𑀼𑀮𑁂𑀳𑀺
𑀤𑁂𑀯𑀸𑀧𑀺 𑀦𑀦𑁆𑀤𑀦𑀯𑀦𑁂 𑀲𑀼𑀭𑀲𑀼𑀦𑁆𑀤𑀭𑀻𑀳𑀺,
𑀢𑁂 𑀯𑁂’𑀓𑀤𑀸 𑀯𑀺𑀢𑀢𑀓𑀡𑁆𑀝𑀓𑀲𑀁𑀓𑀝𑁂𑀲𑀼
𑀪𑁄 𑀓𑁄𑀝𑀺𑀲𑀺𑀫𑁆𑀩𑀮𑀺𑀯𑀦𑁂𑀲𑀼 𑀨𑀼𑀲𑀦𑁆𑀢𑀺 𑀤𑀼𑀓𑁆𑀔𑀁;
𑀪𑀼𑀢𑁆𑀯𑀸 𑀲𑀼𑀥𑀦𑁆𑀦𑀫𑀧𑀺 𑀓𑀜𑁆𑀘𑀦𑀪𑀸𑀚𑀦𑁂𑀲𑀼
𑀲𑀕𑁆𑀕𑁂 𑀧𑀼𑀭𑁂 𑀲𑀼𑀭𑀯𑀭𑀸 𑀧𑀭𑀫𑀺𑀤𑁆𑀥𑀺𑀧𑀢𑁆𑀢𑀸,
𑀢𑁂 𑀘𑀸𑀧𑀺 𑀧𑀚𑁆𑀚𑀮𑀺𑀢𑀮𑁄𑀳𑀕𑀼𑀮𑀁 𑀕𑀺𑀮𑀦𑁆𑀢𑀺
𑀓𑀸𑀫𑀁 𑀓𑀤𑀸𑀘𑀺 𑀦𑀭𑀓𑀸𑀮𑀬 𑀯𑀸𑀲𑀪𑀽𑀢𑀸;
𑁪𑁦. ¶
𑀪𑀼𑀢𑁆𑀯𑀸 𑀦𑀭𑀺𑀲𑁆𑀲𑀭𑀯𑀭𑀸 𑀘 𑀫𑀳𑀺𑀁 𑀅𑀲𑁂𑀲𑀁
𑀤𑁂𑀯𑀸𑀥𑀺𑀧𑀸 𑀘 𑀤𑀺𑀯𑀺 𑀤𑀺𑀩𑁆𑀩𑀲𑀼𑀔𑀁 𑀲𑀼𑀭𑀫𑁆𑀫𑀁,
𑀯𑀸𑀲𑀁 𑀓𑀤𑀸𑀘𑀺 𑀔𑀼𑀭𑀲𑀜𑁆𑀘𑀺𑀢𑀪𑀽𑀢𑀮𑁂𑀲𑀼
𑀢𑁂 𑀯𑀸 𑀫𑀳𑀸𑀭𑀣𑀕𑀡𑀸𑀦𑀼𑀕𑀢𑀸 𑀤𑀺𑀯𑀻𑀳;
𑀤𑁂𑀯𑀗𑁆𑀕𑀦𑀸 𑀮𑀮𑀺𑀢𑀪𑀺𑀦𑁆𑀦𑀢𑀭𑀗𑁆𑀕𑀫𑀸𑀮𑁂
𑀭𑀗𑁆𑀕𑁂 𑀫𑀳𑀺𑀲𑁆𑀲𑀭𑀚𑀝𑀸𑀫𑀓𑀼𑀝𑀸𑀦𑀼𑀬𑀸𑀢𑁂,
𑀭𑀦𑁆𑀢𑁆𑀯𑀸 𑀧𑀼𑀭𑁂 𑀲𑀼𑀭𑀯𑀭𑀸 𑀧𑀫𑀤𑀸𑀲𑀳𑀸𑀬𑀸
𑀢𑁂 𑀘𑀸𑀧𑀺 𑀖𑁄𑀭𑀢𑀭𑀯𑁂𑀢𑀭𑀡𑀺𑀁 𑀧𑀢𑀦𑁆𑀢𑀺;
𑀨𑀼𑀮𑁆𑀮𑀸𑀦𑀺 𑀧𑀮𑁆𑀮𑀯𑀮𑀢𑀸𑀨𑀮𑀲𑀁𑀓𑀼𑀮𑀸𑀦𑀺
𑀭𑀫𑁆𑀫𑀸𑀦𑀺 𑀦𑀦𑁆𑀤𑀦𑀯𑀦𑀸𑀦𑀺 𑀫𑀦𑁄𑀭𑀫𑀸𑀦𑀺,
𑀤𑀺𑀩𑁆𑀩𑀘𑁆𑀙𑀭𑀸𑀮𑀮𑀺𑀢𑀧𑀼𑀡𑁆𑀡𑀤𑀭𑀻𑀫𑀼𑀔𑀸𑀦𑀺
𑀓𑁂𑀮𑀸𑀲𑀫𑁂𑀭𑀼𑀲𑀺𑀔𑀭𑀸𑀦𑀺 𑀘 𑀬𑀦𑁆𑀢𑀺 𑀦𑀸𑀲𑀁;
𑁪𑁩. ¶
𑀤𑁄𑀮𑀸’𑀦𑀺𑀮𑀸’𑀦𑀮𑀢𑀭𑀁𑀕𑀲𑀫𑀸 𑀳𑀺 𑀪𑁄𑀕𑀸
𑀯𑀺𑀚𑁆𑀚𑀼𑀧𑁆𑀧𑀪𑀸𑀢𑀺𑀘𑀧𑀮𑀸𑀦𑀺 𑀘 𑀚𑀻𑀯𑀺𑀢𑀸𑀦𑀺,
𑀫𑀸𑀬𑀸𑀫𑀭𑀻𑀘𑀺𑀚𑀮𑀲𑁄𑀫𑀲𑀫𑀁 𑀲𑀭𑀻𑀭𑀁
𑀓𑁄 𑀚𑀻𑀯𑀺𑀢𑁂 𑀘 𑀯𑀺𑀪𑀯𑁂 𑀘 𑀓𑀭𑁂𑀬𑁆𑀬 𑀭𑀸𑀕𑀁?
𑀓𑀺𑀁 𑀤𑀼𑀓𑁆𑀔𑀫𑀢𑁆𑀣𑀺 𑀦 𑀪𑀯𑁂𑀲𑀼 𑀘 𑀤𑀸𑀭𑀼𑀡𑁂𑀲𑀼
𑀲𑀢𑁆𑀢𑁄𑀧𑀺 𑀢𑀲𑁆𑀲 𑀯𑀺𑀯𑀺𑀥𑀲𑁆𑀲 𑀦 𑀪𑀸𑀚𑀦𑁄 𑀓𑁄,
𑀚𑀸𑀢𑁄 𑀬𑀣𑀸 𑀫𑀭𑀡𑀭𑁄𑀕𑀚𑀭𑀸𑀪𑀺𑀪𑀽𑀢𑁄
𑀓𑁄 𑀲𑀚𑁆𑀚𑀦𑁄 𑀪𑀯𑀭𑀢𑀺𑀁 𑀧𑀺𑀳𑀬𑁂𑀬𑁆𑀬’𑀩𑀸𑀮𑁄?
𑀓𑁂 𑀯𑀸𑀧𑀺 𑀧𑀚𑁆𑀚𑀮𑀺𑀢𑀮𑁄𑀳𑀕𑀼𑀮𑀁 𑀕𑀺𑀮𑀦𑁆𑀢𑀺
𑀲𑀓𑁆𑀓𑀸 𑀓𑀣𑀜𑁆𑀘𑀺𑀤𑀧𑀺 𑀧𑀸𑀡𑀺𑀢𑀮𑁂𑀦 𑀪𑀻𑀫𑀁,
𑀤𑀼𑀓𑁆𑀔𑁄𑀤𑀬𑀁 𑀅𑀲𑀼𑀘𑀺𑀦𑀺𑀲𑁆𑀲𑀯𑀦𑀁 𑀅𑀦𑀦𑁆𑀢𑀁
𑀓𑁄 𑀓𑀸𑀫𑀬𑁂𑀣 𑀔𑀮𑀼 𑀤𑁂𑀳𑀫𑀺𑀫𑀁 𑀅𑀩𑀸𑀮𑁄?
𑁪𑁬. ¶
𑀮𑁄𑀓𑁂 𑀦 𑀫𑀘𑁆𑀘𑀼𑀲𑀫𑀫𑀢𑁆𑀣𑀺 𑀪𑀬𑀁 𑀦𑀭𑀸𑀦𑀁
𑀦 𑀯𑁆𑀬𑀸𑀥𑀺𑀤𑀼𑀓𑁆𑀔𑀲𑀫𑀫𑀢𑁆𑀣𑀺 𑀘 𑀓𑀺𑀁𑀘𑀺 𑀤𑀼𑀓𑁆𑀔𑀁,
𑀏𑀯𑀁 𑀯𑀺𑀭𑀽𑀧𑀓𑀭𑀡𑀁 𑀦 𑀚𑀭𑀸𑀲𑀫𑀸𑀦𑀁
𑀫𑁄𑀳𑁂𑀦 𑀪𑁄 𑀭𑀢𑀺𑀫𑀼𑀧𑁂𑀢𑀺 𑀢𑀣𑀸𑀧𑀺 𑀤𑁂𑀳𑁂;
𑀦𑀺𑀲𑁆𑀲𑀸𑀭𑀢𑁄 𑀦𑀮𑀓𑀮𑀻𑀓𑀤𑀮𑀻𑀲𑀫𑀸𑀦𑀁
𑀅𑀢𑁆𑀢𑀸𑀦𑀫𑁂𑀯 𑀧𑀭𑀺𑀳𑀜𑁆𑀜𑀢𑀺 𑀅𑀢𑁆𑀢𑀳𑁂𑀢𑀼,
𑀲𑀫𑁆𑀧𑁄𑀲𑀺𑀢𑁄𑀧𑀺 𑀓𑀼𑀲𑀳𑀸𑀬 𑀇𑀯𑀸𑀓𑀢𑀜𑁆𑀜𑀽
𑀓𑀸𑀬𑁄 𑀦 𑀬𑀲𑁆𑀲 𑀅𑀦𑀼𑀕𑀘𑁆𑀙𑀢𑀺 𑀓𑀸𑀮𑀓𑁂𑀭𑀸;
𑀢𑀁 𑀨𑁂𑀡𑀧𑀺𑀡𑁆𑀟𑀲𑀤𑀺𑀲𑀁 𑀯𑀺𑀲𑀲𑀽𑀮𑀓𑀧𑁆𑀧𑀁
𑀢𑁄𑀬𑀸’𑀦𑀺𑀮𑀸’𑀦𑀮𑀫𑀳𑀻𑀉𑀭𑀕𑀸𑀥𑀺𑀯𑀸𑀲𑀁,
𑀚𑀺𑀡𑁆𑀡𑀸𑀮𑀬𑀁𑀯 𑀧𑀭𑀺𑀤𑀼𑀩𑁆𑀩𑀮𑀫𑀢𑁆𑀢𑀪𑀸𑀯𑀁
𑀤𑀺𑀲𑁆𑀯𑀸 𑀦𑀭𑁄 𑀓𑀣𑀫𑀼𑀧𑁂𑀢𑀺 𑀭𑀢𑀺𑀁 𑀲𑀧𑀜𑁆𑀜𑁄?
𑁪𑁯. ¶
𑀆𑀬𑀼𑀓𑁆𑀔𑀬𑀁 𑀲𑀫𑀼𑀧𑀬𑀸𑀢𑀺 𑀔𑀡𑁂 𑀔𑀡𑁂𑀧𑀺
𑀅𑀦𑁆𑀯𑁂𑀢𑀺 𑀫𑀘𑁆𑀘𑀼 𑀳𑀦𑀦𑀸𑀬 𑀚𑀭𑀸𑀲𑀺𑀧𑀸𑀡𑀻,
𑀓𑀸𑀮𑀁 𑀢𑀣𑀸 𑀦 𑀧𑀭𑀺𑀯𑀢𑁆𑀢𑀢𑀺 𑀢𑀁 𑀅𑀢𑀻𑀢𑀁
𑀤𑀼𑀓𑁆𑀔𑀁 𑀇𑀤𑀁 𑀦𑀦𑀼 𑀪𑀯𑁂𑀲𑀼 𑀅𑀘𑀺𑀦𑁆𑀢𑀦𑀻𑀬𑀁?
𑀅𑀧𑁆𑀧𑀸𑀬𑀼𑀓𑀲𑁆𑀲 𑀫𑀭𑀡𑀁 𑀲𑀼𑀮𑀪𑀁 𑀪𑀯𑁂𑀲𑀼
𑀤𑀻𑀖𑀸𑀬𑀼𑀓𑀲𑁆𑀲 𑀘 𑀚𑀭𑀸 𑀯𑁆𑀬𑀲𑀦𑀁 𑀘’𑀦𑁂𑀓𑀁,
𑀏𑀯𑀁 𑀪𑀯𑁂 𑀉𑀪𑀬𑀢𑁄𑀧𑀺 𑀘 𑀤𑀼𑀓𑁆𑀔𑀫𑁂𑀯
𑀥𑀫𑁆𑀫𑀁 𑀲𑀫𑀸𑀘𑀭𑀣 𑀤𑀼𑀓𑁆𑀔𑀯𑀺𑀦𑀸𑀲𑀦𑀸𑀬;
𑀤𑀼𑀓𑁆𑀔𑀕𑁆𑀕𑀺𑀦𑀸 𑀲𑀼𑀫𑀳𑀢𑀸 𑀧𑀭𑀺𑀧𑀻𑀴𑀺𑀢𑁂𑀲𑀼
𑀮𑁄𑀓𑀢𑁆𑀢𑀬𑀲𑁆𑀲 𑀯𑀲𑀢𑁄 𑀪𑀯𑀯𑀸𑀭𑀓𑁂𑀲𑀼,
𑀲𑀩𑁆𑀩𑀢𑁆𑀢𑀢𑀸 𑀲𑀼𑀘𑀭𑀺𑀢𑀲𑁆𑀲 𑀧𑀫𑀸𑀤𑀓𑀸𑀮𑁄
𑀪𑁄 𑀪𑁄 𑀦 𑀳𑁄𑀢𑀺 𑀧𑀭𑀫𑀁 𑀓𑀼𑀲𑀮𑀁 𑀘𑀺𑀡𑀸𑀣;
𑁫𑁨. ¶
𑀅𑀧𑁆𑀧𑀁 𑀲𑀼𑀔𑀁 𑀚𑀮𑀮𑀯𑀁 𑀯𑀺𑀬 𑀪𑁄 𑀢𑀺𑀡𑀕𑁆𑀕𑁂
𑀤𑀼𑀓𑁆𑀔𑀦𑁆𑀢𑀼 𑀲𑀸𑀕𑀭𑀚𑀮𑀁 𑀯𑀺𑀬 𑀲𑀩𑁆𑀩𑀮𑁄𑀓𑁂,
𑀲𑀁𑀓𑀧𑁆𑀧𑀦𑀸 𑀢𑀤𑀧𑀺 𑀳𑁄𑀢𑀺 𑀲𑀪𑀸𑀯𑀢𑁄 𑀳𑀺
𑀲𑀩𑁆𑀩𑀁 𑀢𑀺𑀮𑁄𑀓𑀫𑀧𑀺 𑀓𑁂𑀯𑀮𑀤𑀼𑀓𑁆𑀔𑀫𑁂𑀯;
𑀓𑀸𑀬𑁄 𑀦 𑀬𑀲𑁆𑀲 𑀅𑀦𑀼𑀕𑀘𑁆𑀙𑀢𑀺 𑀓𑀸𑀬𑀳𑁂𑀢𑀼
𑀩𑀸𑀮𑁄 𑀅𑀦𑁂𑀓𑀯𑀺𑀥𑀫𑀸𑀘𑀭𑀢𑀻𑀳 𑀤𑀼𑀓𑁆𑀔𑀁,
𑀓𑀸𑀬𑁄 𑀲𑀤𑀸 𑀓𑀮𑀺 𑀫𑀮𑀸𑀓𑀮𑀺𑀮𑀜𑁆𑀳𑀺 𑀮𑁄𑀓𑁂
𑀓𑀸𑀬𑁂 𑀭𑀢𑁄’𑀦𑀯𑀭𑀢𑀁 𑀯𑁆𑀬𑀲𑀦𑀁 𑀧𑀭𑁂𑀢𑀺
𑀫𑀻𑀴𑁆𑀳𑀸𑀓𑀭𑀁 𑀓𑀮𑀺𑀫𑀮𑀸𑀓𑀭𑀫𑀸𑀫𑀕𑀦𑁆𑀥𑀁
𑀲𑀽𑀴𑀸𑀲𑀺𑀲𑀮𑁆𑀮𑀯𑀺𑀲𑀧𑀦𑁆𑀦𑀕𑀭𑁄𑀕𑀪𑀽𑀢𑀁,
𑀤𑁂𑀳𑀁 𑀯𑀺𑀧𑀲𑁆𑀲𑀣 𑀚𑀭𑀸𑀫𑀭𑀡𑀸𑀥𑀺𑀯𑀸𑀲𑀁
𑀢𑀼𑀘𑁆𑀙𑀁 𑀲𑀤𑀸 𑀯𑀺𑀕𑀢𑀲𑀸𑀭𑀫𑀺𑀫𑀁 𑀯𑀺𑀦𑀺𑀦𑁆𑀤𑁆𑀬𑀁;
𑁫𑁫. ¶
𑀤𑀼𑀓𑁆𑀔𑀁 𑀅𑀦𑀺𑀘𑁆𑀘𑀫𑀲𑀼𑀪𑀁 𑀯𑀢 𑀅𑀢𑁆𑀢𑀪𑀸𑀯𑀁
𑀫𑀸 𑀲𑀁𑀓𑀺𑀮𑁂𑀲𑀬 𑀦 𑀯𑀺𑀚𑁆𑀚𑀢𑀺 𑀚𑀸𑀢𑀼 𑀦𑀺𑀘𑁆𑀘𑁄,
𑀅𑀫𑁆𑀪𑁄 𑀦 𑀯𑀺𑀚𑁆𑀚𑀢𑀺 𑀳𑀺 𑀅𑀧𑁆𑀧𑀫𑀧𑀻𑀳 𑀲𑀸𑀭𑀁
𑀲𑀸𑀭𑀁 𑀲𑀫𑀸𑀘𑀭𑀣 𑀥𑀫𑁆𑀫𑀫𑀮𑀁 𑀧𑀫𑀸𑀤𑀁;
𑀫𑀸𑀬𑀸𑀫𑀭𑀻𑀘𑀺𑀓𑀤𑀮𑀻𑀦𑀮𑀨𑁂𑀡𑀧𑀼𑀜𑁆𑀚-
𑀕𑀁𑀕𑀸𑀢𑀭𑀗𑁆𑀕𑀚𑀮𑀩𑀼𑀩𑁆𑀩𑀼𑀮𑀲𑀦𑁆𑀦𑀺𑀪𑁂𑀲𑀼,
𑀔𑀦𑁆𑀥𑁂𑀲𑀼 𑀧𑀜𑁆𑀘𑀲𑀼 𑀙𑀴𑀸𑀬𑀢𑀦𑁂𑀲𑀼 𑀢𑁂𑀲𑀼
𑀅𑀢𑁆𑀢𑀸 𑀦 𑀯𑀺𑀚𑁆𑀚𑀢𑀺 𑀳𑀺 𑀓𑁄 𑀦 𑀯𑀤𑁂𑀬𑁆𑀬’𑀩𑀸𑀮𑁄?
𑀯𑀜𑁆𑀛𑀸𑀲𑀼𑀢𑁄 𑀲𑀲𑀯𑀺𑀲𑀸𑀡𑀫𑀬𑁂 𑀭𑀣𑁂 𑀢𑀼,
𑀥𑀸𑀯𑁂𑀬𑁆𑀬 𑀘𑁂 𑀘𑀺𑀭𑀢𑀭𑀁 𑀲𑀥𑀼𑀭𑀁 𑀕𑀳𑁂𑀢𑁆𑀯𑀸,
𑀤𑀻𑀧𑀘𑁆𑀘𑀺𑀫𑀸𑀮𑀫𑀺𑀯 𑀢𑀁 𑀔𑀡𑀪𑀗𑁆𑀕𑀪𑀽𑀢𑀁
𑀅𑀢𑁆𑀢𑀸𑀢𑀺 𑀤𑀼𑀩𑁆𑀩𑀮𑀢𑀭𑀦𑁆𑀢𑀼 𑀯𑀤𑁂𑀬𑁆𑀬 𑀤𑁂𑀳𑀁;
𑁫𑁮. ¶
𑀩𑀸𑀮𑁄 𑀬𑀣𑀸 𑀲𑀮𑀺𑀮𑀩𑀼𑀩𑁆𑀩𑀼𑀮𑀪𑀸𑀚𑀦𑁂𑀦
𑀆𑀓𑀡𑁆𑀞𑀢𑁄 𑀯𑀢 𑀧𑀺𑀩𑁂𑀬𑁆𑀬 𑀫𑀭𑀻𑀘𑀺𑀢𑁄𑀬𑀁,
𑀅𑀢𑁆𑀢𑀸𑀦𑀺 𑀲𑀸𑀭𑀭𑀳𑀺𑀢𑀁 𑀓𑀤𑀮𑀻𑀲𑀫𑀸𑀦𑀁
𑀫𑁄𑀳𑀸 𑀪𑀡𑁂𑀬𑁆𑀬 𑀔𑀮𑀼 𑀤𑁂𑀳𑀫𑀺𑀫𑀁 𑀅𑀦𑀢𑁆𑀢𑀁;
𑀬𑁄’𑀤𑀼𑀫𑁆𑀩𑀭𑀲𑁆𑀲 𑀓𑀼𑀲𑀼𑀫𑁂𑀦 𑀫𑀭𑀻𑀘𑀺𑀢𑁄𑀬𑀁
𑀯𑀸𑀲𑀁 𑀬𑀤𑀺𑀘𑁆𑀙𑀢𑀺 𑀲 𑀔𑁂𑀤𑀫𑀼𑀧𑁂𑀢𑀺 𑀩𑀸𑀮𑁄,
𑀅𑀢𑁆𑀢𑀸𑀦𑀫𑁂𑀯 𑀧𑀭𑀺𑀳𑀜𑁆𑀜𑀢𑀺 𑀅𑀢𑁆𑀢𑀳𑁂𑀢𑀼
𑀅𑀢𑁆𑀢𑀸 𑀦 𑀯𑀺𑀚𑁆𑀚𑀢𑀺 𑀓𑀤𑀸𑀘𑀺𑀤𑀧𑀻𑀳 𑀤𑁂𑀳𑁂;
𑀧𑁄𑀲𑁄 𑀬𑀣𑀸 𑀳𑀺 𑀓𑀤𑀮𑀻 𑀲𑀼𑀯𑀺𑀦𑀺𑀩𑁆𑀪𑀼𑀚𑀦𑁆𑀢𑁄
𑀲𑀸𑀭𑀁 𑀢𑀤𑀧𑁆𑀧𑀫𑁆𑀧𑀺 𑀦𑁄𑀧𑀮𑀪𑁂𑀬𑁆𑀬 𑀓𑀸𑀫𑀁,
𑀔𑀦𑁆𑀥𑁂𑀲𑀼 𑀧𑀁𑀘𑀲𑀼 𑀙𑀴𑀸𑀬𑀢𑀦𑁂𑀲𑀼 𑀢𑁂𑀲𑀼
𑀲𑀼𑀜𑁆𑀜𑁂𑀲𑀼 𑀓𑀺𑀜𑁆𑀘𑀺𑀤𑀧𑀺 𑀦𑁄𑀧𑀮𑀪𑁂𑀬𑁆𑀬 𑀲𑀸𑀭𑀁;
𑁬𑁧. ¶
𑀲𑀼𑀢𑁆𑀢𑀁 𑀯𑀺𑀦𑀸 𑀦 𑀧𑀝𑀪𑀸𑀯𑀫𑀺𑀳𑀢𑁆𑀣𑀺 𑀓𑀺𑀁𑀘𑀺
𑀤𑁂𑀳𑀁 𑀯𑀺𑀦𑀸 𑀦 𑀔𑀮𑀼 𑀓𑁄𑀘𑀺 𑀫𑀺𑀳𑀢𑁆𑀣𑀺 𑀲𑀢𑁆𑀢𑁄,
𑀤𑁂𑀳𑁄 𑀲𑀪𑀸𑀯𑀭𑀳𑀺𑀢𑁄 𑀔𑀡𑀪𑀁𑀕𑀬𑀼𑀢𑁆𑀢𑁄,
𑀓𑁄 𑀅𑀢𑁆𑀢𑀳𑁂𑀢𑀼 𑀅𑀧𑀭𑁄 𑀪𑀼𑀯𑀺 𑀯𑀺𑀚𑁆𑀚𑀢𑀻𑀳?
𑀤𑀺𑀲𑁆𑀯𑀸 𑀫𑀭𑀻𑀘𑀺𑀲𑀮𑀺𑀮𑀜𑁆𑀳𑀺 𑀲𑀼𑀤𑀽𑀭𑀢𑁄 𑀪𑁄
𑀩𑀸𑀮𑁄 𑀫𑀺𑀕𑁄 𑀲𑀫𑀼𑀧𑀥𑀸𑀯𑀢𑀺 𑀢𑁄𑀬𑀲𑀜𑁆𑀜𑀻,
𑀏𑀯𑀁 𑀲𑀪𑀸𑀯𑀭𑀳𑀺𑀢𑁂 𑀯𑀺𑀧𑀭𑀻𑀢𑀲𑀺𑀤𑁆𑀥𑁂
𑀤𑁂𑀳𑁂 𑀧𑀭𑁂𑀢𑀺 𑀧𑀭𑀺𑀓𑀧𑁆𑀧𑀦𑀬𑀸 𑀳𑀺 𑀭𑀸𑀕𑀁;
𑀤𑁂𑀳𑁂 𑀲𑀪𑀸𑀯𑀭𑀳𑀺𑀢𑁂 𑀧𑀭𑀺𑀓𑀧𑁆𑀧𑀲𑀺𑀤𑁆𑀥𑁂
𑀅𑀢𑁆𑀢𑀸 𑀦 𑀯𑀺𑀚𑁆𑀚𑀢𑀺 𑀳𑀺 𑀯𑀺𑀚𑁆𑀚𑀼𑀫𑀺𑀯𑀦𑁆𑀢𑀮𑀺𑀓𑁆𑀔𑁂,
𑀪𑀸𑀯𑁂𑀣 𑀪𑀸𑀯𑀦𑀭𑀢𑀸 𑀯𑀺𑀕𑀢𑀧𑁆𑀧𑀫𑀸𑀤𑀸
𑀲𑀩𑁆𑀩𑀸𑀲𑀯𑀧𑁆𑀧𑀳𑀦𑀦𑀸𑀬 𑀅𑀦𑀢𑁆𑀢𑀲𑀜𑁆𑀜𑀁;
𑁬𑁪. ¶
𑀮𑀸𑀮𑀸𑀓𑀭𑀻𑀲𑀭𑀼𑀥𑀺𑀭𑀲𑁆𑀲𑀼𑀯𑀲𑀸𑀦𑀼𑀮𑀺𑀢𑁆𑀢𑀁
𑀤𑁂𑀳𑀁 𑀇𑀫𑀁 𑀓𑀮𑀺𑀫𑀮𑀸𑀓𑀮𑀺𑀮𑀁 𑀅𑀲𑀸𑀭𑀁,
𑀲𑀢𑁆𑀢𑀸 𑀲𑀤𑀸 𑀧𑀭𑀺𑀳𑀭𑀦𑁆𑀢𑀺 𑀚𑀺𑀕𑀼𑀘𑁆𑀙𑀦𑀻𑀬𑀁
𑀦𑀸𑀦𑀸𑀲𑀼𑀘𑀻𑀳𑀺 𑀧𑀭𑀺𑀧𑀼𑀡𑁆𑀡𑀖𑀝𑀁 𑀬𑀣𑁂𑀯;
𑀡𑀳𑀸𑀢𑁆𑀯𑀸 𑀚𑀮𑀜𑁆𑀳𑀺 𑀲𑀓𑀮𑀁 𑀘𑀢𑀼𑀲𑀸𑀕𑀭𑀲𑁆𑀲
𑀫𑁂𑀭𑀼𑀧𑁆𑀧𑀫𑀸𑀡𑀫𑀧𑀺 𑀕𑀦𑁆𑀥𑀫𑀦𑀼𑀢𑁆𑀢𑀭𑀜𑁆𑀘,
𑀧𑀧𑁆𑀧𑁄𑀢𑀺 𑀦𑁂𑀯 𑀫𑀦𑀼𑀚𑁄 𑀳𑀺 𑀲𑀼𑀘𑀺𑀁 𑀓𑀤𑀸𑀘𑀺
𑀓𑀺𑀁 𑀪𑁄 𑀯𑀺𑀧𑀲𑁆𑀲𑀣 𑀕𑀼𑀡𑀁 𑀓𑀺𑀫𑀼 𑀅𑀢𑁆𑀢𑀪𑀸𑀯𑁂?
𑀤𑁂𑀳𑁄 𑀲 𑀏𑀯 𑀯𑀺𑀯𑀺𑀥𑀸𑀲𑀼𑀘𑀺𑀲𑀦𑁆𑀦𑀺𑀥𑀸𑀦𑁄
𑀤𑁂𑀳𑁄 𑀲 𑀏𑀯 𑀯𑀥𑀩𑀦𑁆𑀥𑀦𑀭𑁄𑀕𑀪𑀽𑀢𑁄,
𑀤𑁂𑀳𑁄 𑀲 𑀏𑀯 𑀦𑀯𑀥𑀸 𑀧𑀭𑀺𑀪𑀺𑀦𑁆𑀦𑀕𑀡𑁆𑀟𑁄
𑀤𑁂𑀳𑀁 𑀯𑀺𑀦𑀸 𑀪𑀬𑀓𑀭𑀁 𑀦 𑀲𑀼𑀲𑀸𑀦𑀫𑀢𑁆𑀣𑀺;
𑁬𑁭. ¶
𑀅𑀦𑁆𑀢𑁄𑀕𑀢𑀁 𑀬𑀤𑀺𑀯 𑀫𑀼𑀢𑁆𑀢𑀓𑀭𑀻𑀲𑀪𑀸𑀕𑁄
𑀤𑁂𑀳𑀸 𑀩𑀳𑀺𑀁 𑀅𑀢𑀺𑀘𑀭𑁂𑀬𑁆𑀬 𑀯𑀺𑀦𑀺𑀓𑁆𑀔𑀫𑀺𑀢𑁆𑀯𑀸,
𑀫𑀸𑀢𑀸 𑀧𑀺𑀢𑀸 𑀯𑀺𑀓𑀭𑀼𑀡𑀸 𑀘 𑀯𑀺𑀦𑀝𑁆𑀞𑀧𑁂𑀫𑀸
𑀓𑀸𑀫𑀁 𑀪𑀯𑁂𑀬𑁆𑀬𑀼 𑀓𑀺𑀫𑀼 𑀩𑀦𑁆𑀥𑀼𑀲𑀼𑀢𑀸 𑀘 𑀤𑀸𑀭𑀸?
𑀤𑁂𑀳𑀁 𑀬𑀣𑀸 𑀦𑀯𑀫𑀼𑀔𑀁 𑀓𑀺𑀫𑀺𑀲𑀗𑁆𑀖𑀕𑁂𑀳𑀁
𑀫𑀁𑀲𑀝𑁆𑀞𑀺𑀲𑁂𑀤𑀭𑀼𑀥𑀺𑀭𑀸𑀓𑀮𑀺𑀮𑀁 𑀯𑀺𑀕𑀦𑁆𑀥𑀁,
𑀧𑁄𑀲𑁂𑀦𑁆𑀢𑀺 𑀬𑁂 𑀯𑀺𑀯𑀺𑀥𑀧𑀸𑀧𑀫𑀺𑀳𑀸𑀘𑀭𑀺𑀢𑁆𑀯𑀸
𑀢𑁂 𑀫𑁄𑀳𑀺𑀢𑀸 𑀫𑀭𑀡𑀥𑀫𑁆𑀫𑀫𑀳𑁄 𑀯𑀢𑁂𑀯𑀁!
𑀕𑀡𑁆𑀟𑀽𑀧𑀫𑁂 𑀯𑀺𑀯𑀺𑀥𑀭𑁄𑀕 𑀦𑀺𑀯𑀸𑀲𑀪𑀽𑀢𑁂
𑀓𑀸𑀬𑁂 𑀲𑀤𑀸 𑀭𑀼𑀥𑀺𑀭𑀫𑀼𑀢𑁆𑀢𑀓𑀭𑀻𑀲𑀧𑀼𑀡𑁆𑀡𑁂,
𑀬𑁄 𑀏𑀢𑁆𑀣 𑀦𑀦𑁆𑀤𑀢𑀺 𑀦𑀭𑁄 𑀲𑀲𑀺𑀕𑀸𑀮𑀪𑀓𑁆𑀔𑁂
𑀓𑀸𑀫𑀜𑁆𑀳𑀺 𑀲𑁄𑀘𑀢𑀺 𑀧𑀭𑀢𑁆𑀣 𑀲 𑀩𑀸𑀮𑀩𑀼𑀤𑁆𑀥𑀺;
𑁭𑁦. ¶
𑀪𑁄 𑀨𑁂𑀡𑀧𑀺𑀡𑁆𑀟𑀲𑀤𑀺𑀲𑁄 𑀯𑀺𑀬 𑀲𑀸𑀭𑀳𑀻𑀦𑁄
𑀫𑀻𑀴𑁆𑀳𑀸𑀮𑀬𑁄 𑀯𑀺𑀬 𑀲𑀤𑀸 𑀧𑀝𑀺𑀓𑀽𑀮𑀕𑀦𑁆𑀥𑁄,
𑀆𑀲𑀻𑀯𑀺𑀲𑀸𑀮𑀬𑀦𑀺𑀪𑁄 𑀲𑀪𑀬𑁄 𑀲𑀤𑀼𑀓𑁆𑀔𑁄
𑀤𑁂𑀳𑁄 𑀲𑀤𑀸 𑀲𑀯𑀢𑀺 𑀮𑁄𑀡𑀖𑀝𑁄𑀯 𑀪𑀺𑀦𑁆𑀦𑁄;
𑀚𑀸𑀢𑀁 𑀬𑀣𑀸 𑀦 𑀓𑀫𑀮𑀁 𑀪𑀼𑀯𑀺 𑀦𑀺𑀦𑁆𑀤𑀦𑀻𑀬𑀁
𑀧𑀗𑁆𑀓𑁂𑀲𑀼 𑀪𑁄 𑀅𑀲𑀼𑀘𑀺𑀢𑁄𑀬 𑀲𑀫𑀸𑀓𑀼𑀮𑁂𑀲𑀼,
𑀚𑀸𑀢𑀁 𑀢𑀣𑀸 𑀧𑀭𑀳𑀺𑀢𑀫𑁆𑀧𑀺 𑀘 𑀤𑁂𑀳𑀪𑀽𑀢𑀁
𑀢𑀁 𑀦𑀺𑀦𑁆𑀤𑀦𑀻𑀬𑀫𑀺𑀳 𑀚𑀸𑀢𑀼 𑀦 𑀳𑁄𑀢𑀺 𑀮𑁄𑀓𑁂;
𑀤𑁆𑀯𑀢𑁆𑀢𑀺𑀁𑀲𑀪𑀸𑀕𑀧𑀭𑀺𑀧𑀽𑀭𑀢𑀭𑁄 𑀯𑀺𑀲𑁂𑀲𑁄
𑀓𑀸𑀬𑁄 𑀬𑀣𑀸 𑀳𑀺 𑀦𑀭𑀦𑀸𑀭𑀺 𑀕𑀡𑀲𑁆𑀲 𑀮𑁄𑀓𑁂,
𑀓𑀸𑀬𑁂𑀲𑀼 𑀓𑀺𑀁 𑀨𑀮𑀫𑀺𑀳𑀢𑁆𑀣𑀺 𑀘 𑀧𑀡𑁆𑀟𑀺𑀢𑀸𑀦𑀁
𑀓𑀸𑀫𑀁 𑀢𑀤𑁂𑀯 𑀦𑀦𑀼 𑀳𑁄𑀢𑀺 𑀧𑀭𑁄𑀧𑀓𑀸𑀭𑀁;
𑁭𑁩. ¶
𑀧𑁄𑀲𑁄𑀦 𑀧𑀡𑁆𑀟𑀺𑀢𑀢𑀭𑁂𑀦 𑀢𑀣𑀸𑀧𑀺 𑀤𑁂𑀳𑁄
𑀲𑀩𑁆𑀩𑀢𑁆𑀢𑀦𑀸 𑀘𑀺𑀭𑀢𑀭𑀁 𑀧𑀭𑀺𑀧𑀸𑀮𑀦𑀻𑀬𑁄,
𑀥𑀫𑁆𑀫𑀁 𑀘𑀭𑁂𑀬𑁆𑀬 𑀲𑀼𑀘𑀺𑀭𑀁 𑀔𑀮𑀼 𑀚𑀻𑀯𑀫𑀸𑀦𑁄
𑀥𑀫𑁆𑀫𑁂 𑀳𑀯𑁂 𑀫𑀡𑀺𑀯𑀭𑁄 𑀇𑀯 𑀓𑀸𑀫𑀤𑁄 𑀪𑁄
𑀔𑀻𑀭𑁂 𑀬𑀣𑀸 𑀲𑀼𑀧𑀭𑀺𑀪𑀸𑀯𑀺𑀢𑀫𑁄𑀲𑀥𑀫𑁆𑀳𑀺
𑀲𑁆𑀦𑁂𑀳𑁂𑀦 𑀑𑀲𑀥𑀩𑀮𑀁 𑀧𑀭𑀺𑀪𑀸𑀲𑀢𑁂𑀯,
𑀥𑀫𑁆𑀫𑁄 𑀢𑀣𑀸 𑀇𑀳 𑀲𑀫𑀸𑀘𑀭𑀺𑀢𑁄 𑀳𑀺 𑀮𑁄𑀓𑁂
𑀙𑀸𑀬𑀸𑀯 𑀬𑀸𑀢𑀺 𑀧𑀭𑀮𑁄𑀓 𑀫𑀺𑀢𑁄 𑀯𑀚𑀦𑁆𑀢𑀁;
𑀓𑀸𑀬𑀲𑁆𑀲 𑀪𑁄 𑀯𑀺𑀭𑀘𑀺𑀢𑀲𑁆𑀲 𑀬𑀣𑀸𑀦𑀼𑀓𑀽𑀮𑀁
𑀙𑀸𑀬𑀸 𑀯𑀺𑀪𑀸𑀢𑀺 𑀭𑀼𑀘𑀺𑀭𑀸𑀫𑀮𑀤𑀧𑁆𑀧𑀡𑁂 𑀢𑀼,
𑀓𑀢𑁆𑀯𑀸 𑀢𑀣𑁂𑀯 𑀧𑀭𑀫𑀁 𑀓𑀼𑀲𑀮𑀁 𑀧𑀭𑀢𑁆𑀣
𑀲𑀫𑁆𑀪𑀽𑀲𑀺𑀢𑀸 𑀇𑀯 𑀪𑀯𑀦𑁆𑀢𑀺 𑀨𑀮𑁂𑀦 𑀢𑁂𑀦;
𑁭𑁬. ¶
𑀤𑁂𑀳𑁂 𑀢𑀣𑀸 𑀯𑀺𑀯𑀺𑀥𑀤𑀼𑀓𑁆𑀔 𑀦𑀺𑀯𑀸𑀲𑀪𑀽𑀢𑁂
𑀫𑁄𑀳𑀸 𑀧𑀫𑀸𑀤𑀯𑀲𑀕𑀸 𑀲𑀼𑀔𑀲𑀜𑁆𑀜𑀫𑀽𑀴𑁆𑀳𑀸,
𑀢𑀺𑀓𑁆𑀔𑁂 𑀬𑀣𑀸 𑀔𑀼𑀭𑀫𑀼𑀔𑁂 𑀫𑀥𑀼𑀮𑁂𑀳𑀫𑀸𑀦𑁄
𑀩𑀸𑀴𑁆𑀳𑀜𑁆𑀘 𑀤𑀼𑀓𑁆𑀔𑀫𑀦𑀼𑀕𑀘𑁆𑀙𑀢𑀺 𑀳𑀻𑀦𑀧𑀜𑁆𑀜𑁄;
𑀲𑀁𑀓𑀧𑁆𑀧𑀭𑀸𑀕𑀯𑀺𑀕𑀢𑁂 𑀦𑀺𑀭𑀢𑀢𑁆𑀢𑀪𑀸𑀯𑁂
𑀤𑀼𑀓𑁆𑀔𑀁 𑀲𑀤𑀸 𑀲𑀫𑀥𑀺𑀕𑀘𑁆𑀙𑀢𑀺 𑀅𑀧𑁆𑀧𑀧𑀜𑁆𑀜𑁄,
𑀫𑀽𑀴𑁆𑀳𑀲𑁆𑀲 𑀘𑁂𑀯 𑀲𑀼𑀔𑀲𑀜𑁆𑀜𑀫𑀺𑀳𑀢𑁆𑀣𑀺𑀮𑁄𑀓𑁂
𑀓𑀺𑀁𑀧𑀓𑁆𑀓𑀫𑁂𑀯 𑀦𑀦𑀼 𑀳𑁄𑀢𑀺 𑀯𑀺𑀘𑀸𑀭𑀫𑀸𑀦𑁂;
𑀲𑀩𑁆𑀩𑁄𑀧𑀪𑁄𑀕 𑀥𑀦𑀥𑀜𑁆𑀜𑀯𑀺𑀲𑁂𑀲𑀮𑀸𑀪𑀻
𑀭𑀽𑀧𑁂𑀦 𑀪𑁄 𑀲 𑀫𑀓𑀭𑀤𑁆𑀥𑀚𑀲𑀦𑁆𑀦𑀺𑀪𑁄𑀧𑀺,
𑀬𑁄 𑀬𑁄𑀩𑁆𑀩𑀦𑁂𑀧𑀺 𑀫𑀭𑀡𑀁 𑀮𑀪𑀢𑁂 𑀅𑀓𑀸𑀫𑀁
𑀓𑀸𑀫𑀁 𑀧𑀭𑀢𑁆𑀣𑀧𑀭𑀧𑀸𑀡𑀳𑀭𑁄 𑀦𑀭𑁄 𑀳𑀺;
𑀲𑁄 𑀬𑀸𑀘𑀓𑁄 𑀪𑀯𑀢𑀺 𑀪𑀺𑀦𑁆𑀦𑀓𑀧𑀸𑀮𑀳𑀢𑁆𑀣𑁄
𑀫𑀼𑀡𑁆𑀟𑁄 𑀥𑀺𑀕𑀓𑁆𑀔𑀭𑀲𑀢𑁂𑀳𑀺 𑀘 𑀢𑀚𑁆𑀚𑀬𑀦𑁆𑀢𑁄,
𑀪𑀺𑀓𑁆𑀔𑀁 𑀲𑀤𑀸𑀭𑀺𑀪𑀯𑀦𑁂 𑀲𑀓𑀼𑀘𑁂𑀮𑀯𑀸𑀲𑁄
𑀤𑁂𑀳𑁂 𑀧𑀭𑀢𑁆𑀣𑀺 𑀧𑀭𑀘𑀺𑀢𑁆𑀢𑀳𑀭𑁄 𑀦𑀭𑁄 𑀬𑁄;
𑁮𑁦. ¶
𑀇𑀢𑁆𑀣𑀻 𑀦𑀫𑀼𑀜𑁆𑀘𑀢𑀺 𑀲𑀤𑀸 𑀧𑀼𑀦 𑀇𑀢𑁆𑀣𑀺𑀪𑀸𑀯𑀸
𑀦𑀸𑀭𑀻 𑀲𑀤𑀸 𑀪𑀯𑀢𑀺 𑀲𑁄 𑀧𑀼𑀭𑀺𑀲𑁄 𑀧𑀭𑀢𑁆𑀣,
𑀬𑁄 𑀆𑀘𑀭𑁂𑀬𑁆𑀬 𑀧𑀭𑀤𑀸𑀭𑀫𑀮𑀗𑁆𑀖𑀦𑀻𑀬𑀁
𑀖𑁄𑀭𑀜𑁆𑀘 𑀯𑀺𑀦𑁆𑀤𑀢𑀺 𑀲𑀤𑀸 𑀯𑁆𑀬𑀲𑀦𑀜𑁆𑀘 𑀦𑁂𑀓𑀁;
𑀤𑀻𑀦𑁄 𑀯𑀺𑀕𑀦𑁆𑀥𑀯𑀤𑀦𑁄 𑀘 𑀚𑀴𑁄 𑀅𑀧𑀜𑁆𑀜𑁄
𑀫𑀽𑀕𑁄 𑀲𑀤𑀸 𑀪𑀯𑀢𑀺 𑀅𑀧𑁆𑀧𑀺𑀬𑀤𑀲𑁆𑀲𑀦𑁄 𑀘,
𑀧𑀧𑁆𑀧𑁄𑀢𑀺 𑀤𑀼𑀓𑁆𑀔𑀫𑀢𑀼𑀮𑀜𑁆𑀘 𑀫𑀦𑀼𑀲𑁆𑀲𑀪𑀽𑀢𑁄
𑀯𑀸𑀘𑀁 𑀫𑀼𑀲𑀸 𑀪𑀡𑀢𑀺 𑀬𑁄 𑀳𑀺 𑀅𑀧𑀜𑁆𑀜𑀲𑀢𑁆𑀢𑁄;
𑀉𑀫𑁆𑀫𑀢𑁆𑀢𑀓𑀸 𑀯𑀺𑀕𑀢𑀮𑀚𑁆𑀚𑀕𑀼𑀡𑀸 𑀪𑀯𑀦𑁆𑀢𑀺
𑀤𑀻𑀦𑀸 𑀲𑀤𑀸 𑀯𑁆𑀬𑀲𑀦𑀲𑁄𑀓𑀧𑀭𑀸𑀬𑀡𑀸 𑀘,
𑀚𑀸𑀢𑀸 𑀪𑀯𑁂𑀲𑀼 𑀯𑀺𑀯𑀺𑀥𑁂𑀲𑀼 𑀯𑀺𑀭𑀽𑀧𑀤𑁂𑀳𑀸
𑀧𑀻𑀢𑁆𑀯𑀸 𑀳𑀮𑀸𑀳𑀮𑀯𑀺𑀲𑀁𑀯 𑀲𑀼𑀭𑀁 𑀯𑀺𑀧𑀜𑁆𑀜𑀸;
𑀧𑀸𑀧𑀸𑀦𑀺 𑀬𑁂𑀦 𑀇𑀳 𑀆𑀘𑀭𑀺𑀢𑀸𑀦𑀺 𑀬𑀸𑀦𑀺
𑀬𑁄 𑀯𑀲𑁆𑀲𑀓𑁄𑀝𑀺𑀦𑀳𑀼𑀢𑀸𑀦𑀺 𑀅𑀦𑀧𑁆𑀧𑀓𑀸𑀦𑀺,
𑀮𑀤𑁆𑀥𑀸𑀦 𑀖𑁄𑀭𑀫𑀢𑀼𑀮𑀁 𑀦𑀭𑀓𑁂𑀲𑀼 𑀤𑀼𑀓𑁆𑀔𑀁
𑀧𑀧𑁆𑀧𑁄𑀢𑀺 𑀘𑁂𑀢𑁆𑀣 𑀯𑀺𑀯𑀺𑀥𑀯𑁆𑀬𑀲𑀦𑀜𑁆𑀘 𑀦𑁂𑀓𑀁;
𑁮𑁪. ¶
𑀮𑁄𑀓𑀢𑁆𑀢𑀬𑁂𑀲𑀼 𑀲𑀓𑀮𑁂𑀲𑀼 𑀲𑀫𑀁 𑀦 𑀓𑀺𑀁𑀘𑀺
𑀮𑁄𑀓𑀲𑁆𑀲 𑀲𑀦𑁆𑀢𑀺𑀓𑀭𑀡𑀁 𑀭𑀢𑀦𑀢𑁆𑀢𑀬𑁂𑀦,
𑀢𑀁𑀢𑁂𑀚𑀲𑀸 𑀲𑀼𑀫𑀳𑀢𑀸 𑀚𑀺𑀢𑀲𑀩𑁆𑀩𑀧𑀸𑀧𑁄
𑀲𑁄𑀳𑀁 𑀲𑀤𑀸𑀥𑀺𑀕𑀢𑀲𑀩𑁆𑀩𑀲𑀼𑀔𑁄 𑀪𑀯𑁂𑀬𑁆𑀬𑀁;
𑀮𑁄𑀓𑀢𑁆𑀢𑀬𑁂𑀲𑀼 𑀲𑀓𑀮𑁂𑀲𑀼 𑀘 𑀲𑀩𑁆𑀩𑀲𑀢𑁆𑀢𑀸
𑀫𑀺𑀢𑁆𑀢𑀸 𑀘 𑀫𑀚𑁆𑀛𑀭𑀺𑀧𑀼𑀩𑀦𑁆𑀥𑀼𑀚𑀦𑀸 𑀘 𑀲𑀩𑁆𑀩𑁂,
𑀢𑁂 𑀲𑀩𑁆𑀩𑀤𑀸 𑀯𑀺𑀕𑀢𑀭𑁄𑀕𑀪𑀬𑀸 𑀯𑀺𑀲𑁄𑀓𑀸
𑀲𑀩𑁆𑀩𑀁 𑀲𑀼𑀔𑀁 𑀅𑀥𑀺𑀕𑀢𑀸 𑀫𑀼𑀤𑀺𑀢𑀸 𑀪𑀯𑀦𑁆𑀢𑀼;
𑀓𑀸𑀬𑁄 𑀓𑀭𑀻𑀲𑀪𑀭𑀺𑀢𑁄 𑀯𑀺𑀬 𑀪𑀺𑀦𑁆𑀦𑀓𑀼𑀫𑁆𑀪𑁄
𑀓𑀸𑀬𑁄 𑀲𑀤𑀸 𑀓𑀮𑀺𑀫𑀮𑀯𑁆𑀬𑀲𑀦𑀸𑀥𑀺𑀯𑀸𑀲𑁄,
𑀓𑀸𑀬𑁂 𑀯𑀺𑀳𑀜𑁆𑀜𑀢𑀺 𑀘 𑀲𑀩𑁆𑀩𑀲𑀼𑀔𑀦𑁆𑀢𑀺 𑀮𑁄𑀓𑁄
𑀓𑀸𑀬𑁄 𑀲𑀤𑀸 𑀫𑀭𑀡𑀭𑁄𑀕𑀚𑀭𑀸𑀥𑀺𑀯𑀸𑀲𑁄;
𑁮𑁭. ¶
𑀲𑁄 𑀬𑁄𑀩𑁆𑀩𑀦𑁄𑀢𑀺 𑀣𑀯𑀺𑀭𑁄𑀢𑀺 𑀘 𑀩𑀸𑀮𑀓𑁄𑀢𑀺
𑀲𑀢𑁆𑀢𑁂 𑀦 𑀧𑁂𑀓𑁆𑀔𑀢𑀺 𑀯𑀺𑀳𑀜𑁆𑀜𑀢𑀺𑀭𑁂𑀯 𑀫𑀘𑁆𑀘𑀼,
𑀲𑁄𑀳𑀁 𑀞𑀺𑀢𑁄𑀧𑀺 𑀲𑀬𑀺𑀢𑁄𑀧𑀺 𑀘 𑀧𑀓𑁆𑀓𑀫𑀦𑁆𑀢𑁄
𑀕𑀘𑁆𑀙𑀸𑀫𑀺 𑀫𑀘𑁆𑀘𑀼𑀯𑀤𑀦𑀁 𑀦𑀺𑀬𑀢𑀁 𑀢𑀣𑀸 𑀳𑀺;
𑀏𑀯𑀁 𑀬𑀣𑀸 𑀯𑀺𑀳𑀺𑀢𑀤𑁄𑀲𑀫𑀺𑀤𑀁 𑀲𑀭𑀻𑀭𑀁
𑀦𑀺𑀘𑁆𑀘𑀁𑀯 𑀢𑀕𑁆𑀕𑀢𑀫𑀦𑀸 𑀳𑀤𑀬𑁂 𑀓𑀭𑁄𑀣,
𑀫𑁂𑀢𑁆𑀢𑀁 𑀧𑀭𑀺𑀢𑁆𑀢𑀫𑀲𑀼𑀪𑀁 𑀫𑀭𑀡𑀲𑁆𑀲𑀢𑀺𑀜𑁆𑀘
𑀪𑀸𑀯𑁂𑀣 𑀪𑀸𑀯𑀦𑀭𑀢𑀸 𑀲𑀢𑀢𑀁 𑀬𑀢𑀢𑁆𑀢𑀸;
𑀤𑀸𑀦𑀸𑀤𑀺 𑀧𑀼𑀜𑁆𑀜𑀓𑀺𑀭𑀺𑀬𑀸𑀦𑀺 𑀲𑀼𑀔𑀼𑀤𑁆𑀭𑀬𑀸𑀦𑀺
𑀓𑀢𑁆𑀯𑀸 𑀘 𑀢𑀫𑁆𑀨𑀮𑀫𑀲𑁂𑀲 𑀫𑀺𑀳𑀧𑁆𑀧𑀫𑁂𑀬𑁆𑀬𑀁,
𑀤𑁂𑀬𑁆𑀬𑀁 𑀲𑀤𑀸 𑀧𑀭𑀳𑀺𑀢𑀸𑀬 𑀲𑀼𑀔𑀸𑀬 𑀘𑁂𑀯
𑀓𑀺𑀫𑁆𑀪𑁄 𑀢𑀤𑁂𑀯 𑀦𑀦𑀼 𑀳𑀢𑁆𑀣𑀕𑀢𑀜𑁆𑀳𑀺 𑀲𑀸𑀭𑀁?
𑀳𑁂𑀢𑀼𑀁 𑀯𑀺𑀦𑀸 𑀦 𑀪𑀯𑀢𑀻 𑀳𑀺 𑀘 𑀓𑀺𑀁𑀘𑀺 𑀮𑁄𑀓𑁂
𑀲𑀤𑁆𑀤𑁄𑀯 𑀧𑀸𑀡𑀺𑀢𑀮𑀖𑀝𑁆𑀝𑀦𑀳𑁂𑀢𑀼𑀚𑀸𑀢𑁄,
𑀏𑀯𑀜𑁆𑀘 𑀳𑁂𑀢𑀼𑀨𑀮 𑀪𑀸𑀯𑀯𑀺𑀪𑀸𑀕𑀪𑀺𑀦𑁆𑀦𑁄
𑀮𑁄𑀓𑁄 𑀉𑀤𑁂𑀢𑀺 𑀘 𑀯𑀺𑀦𑀲𑁆𑀲𑀢𑀺 𑀢𑀺𑀝𑁆𑀞𑀢𑀻 𑀘;
𑁯𑁧. ¶
𑀓𑀫𑁆𑀫𑀲𑁆𑀲 𑀓𑀸𑀭𑀡𑀸𑀫𑀬𑀜𑁆𑀳𑀺 𑀬𑀣𑀸 𑀅𑀯𑀺𑀚𑁆𑀚𑀸
𑀪𑁄 𑀓𑀫𑁆𑀫𑀦𑀸 𑀲𑀫𑀥𑀺𑀕𑀘𑁆𑀙𑀢𑀺 𑀚𑀸𑀢𑀺𑀪𑁂𑀤𑀁,
𑀚𑀸𑀢𑀺𑀁 𑀧𑀝𑀺𑀘𑁆𑀘 𑀘 𑀚𑀭𑀸𑀫𑀭𑀡𑀸𑀤𑀺𑀤𑀼𑀓𑁆𑀔𑀁
𑀲𑀢𑁆𑀢𑀸 𑀲𑀤𑀸 𑀧𑀝𑀺𑀮𑀪𑀦𑁆𑀢𑀺 𑀅𑀦𑀸𑀤𑀺𑀓𑀸𑀮𑁂;
𑀓𑀫𑁆𑀫𑀁 𑀬𑀣𑀸 𑀦 𑀪𑀯𑀢𑀻𑀳 𑀘 𑀫𑁄𑀳𑀦𑀸𑀲𑀸
𑀓𑀫𑁆𑀫𑀓𑁆𑀔𑀬𑀸𑀧𑀺 𑀘 𑀦 𑀳𑁄𑀢𑀺 𑀪𑀯𑁂𑀲𑀼 𑀚𑀸𑀢𑀺,
𑀚𑀸𑀢𑀺𑀓𑁆𑀔𑀬𑀸 𑀇𑀳 𑀚𑀭𑀸𑀫𑀭𑀡𑀸𑀤𑀺𑀤𑀼𑀓𑁆𑀔𑀁
𑀲𑀩𑁆𑀩𑀓𑁆𑀔𑀬𑁄 𑀪𑀯𑀢𑀺 𑀤𑀻𑀧𑁂𑀯𑀸𑀦𑀺𑀮𑁂𑀦;
𑀬𑁄 𑀧𑀲𑁆𑀲𑀢𑀻𑀳 𑀲𑀢𑀢𑀁 𑀫𑀼𑀦𑀺𑀥𑀫𑁆𑀫𑀓𑀸𑀬𑀁
𑀩𑀼𑀤𑁆𑀥𑀁 𑀲 𑀧𑀲𑁆𑀲𑀢𑀺 𑀦𑀭𑁄 𑀇𑀢𑀺 𑀲𑁄 𑀅𑀯𑁄𑀘,
𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀫𑀫𑀮𑀜𑁆𑀘 𑀢𑀺𑀮𑁄𑀓𑀦𑀸𑀣𑀁
𑀲𑀫𑁆𑀧𑀲𑁆𑀲𑀺𑀢𑀼𑀁 𑀯𑀺𑀘𑀺𑀦𑀣𑀸’𑀧𑀺 𑀘 𑀥𑀫𑁆𑀫𑀢𑀁 𑀪𑁄;
𑁯𑁪. ¶
𑀲𑀮𑁆𑀮𑀁𑀯 𑀪𑁄 𑀲𑀼𑀦𑀺𑀲𑀺𑀢𑀁 𑀳𑀤𑀬𑁂 𑀦𑀺𑀫𑀼𑀕𑁆𑀕𑀁
𑀤𑁄𑀲𑀢𑁆𑀢𑀬𑀁 𑀯𑀺𑀯𑀺𑀥𑀧𑀸𑀧𑀫𑀮𑁂𑀦 𑀮𑀺𑀢𑁆𑀢𑀁,
𑀦𑀸𑀦𑀸𑀯𑀺𑀥𑀩𑁆𑀬𑀲𑀦𑀪𑀸𑀚𑀦𑀫𑀧𑁆𑀧𑀲𑀦𑁆𑀦𑀁
𑀧𑀜𑁆𑀜𑀸𑀫𑀬𑁂𑀦 𑀩𑀮𑀺𑀲𑁂𑀦 𑀦𑀺𑀭𑀸𑀓𑀭𑁄𑀣;
𑀦𑀸𑀓𑀫𑁆𑀧𑀬𑀦𑁆𑀢𑀺 𑀲𑀓𑀮𑀸𑀧𑀺 𑀘 𑀮𑁄𑀓𑀥𑀫𑁆𑀫𑀸
𑀘𑀺𑀢𑁆𑀢𑀁 𑀲𑀤𑀸𑀧𑀕𑀢𑀧𑀸𑀧𑀓𑀺𑀮𑁂𑀲𑀲𑀮𑁆𑀮𑀁,
𑀭𑀽𑀧𑀸𑀤𑀬𑁄 𑀘 𑀯𑀺𑀯𑀺𑀥𑀸 𑀯𑀺𑀲𑀬𑀸 𑀲𑀫𑀕𑁆𑀕𑀸
𑀨𑀼𑀝𑁆𑀞𑀁𑀯 𑀫𑁂𑀭𑀼𑀲𑀺𑀔𑀭𑀁 𑀫𑀳𑀢𑀸𑀦𑀺𑀮𑁂𑀦;
𑀲𑀁𑀲𑀸𑀭𑀤𑀼𑀓𑁆𑀔𑀫𑀕𑀡𑁂𑀬𑁆𑀬 𑀬𑀣𑀸 𑀫𑀼𑀦𑀺𑀦𑁆𑀤𑁄
𑀕𑀫𑁆𑀪𑀺𑀭𑀧𑀸𑀭𑀫𑀺𑀢 𑀲𑀸𑀕𑀭𑀫𑀼𑀢𑁆𑀢𑀭𑀺𑀢𑁆𑀯𑀸,
𑀜𑁂𑀬𑁆𑀬𑀁 𑀅𑀩𑁄𑀥𑀺 𑀦𑀺𑀧𑀼𑀡𑀁 𑀳𑀢𑀫𑁄𑀳𑀚𑀸𑀮𑁄
𑀢𑀲𑁆𑀫𑀸 𑀲𑀤𑀸 𑀧𑀭𑀳𑀺𑀢𑀁 𑀧𑀭𑀫𑀁 𑀘𑀺𑀡𑀸𑀣;
𑀑𑀳𑀸𑀬 𑀲𑁄’𑀥𑀺𑀕𑀢𑀫𑁄𑀓𑁆𑀔𑀲𑀼𑀔𑀁 𑀧𑀭𑁂𑀲𑀁
𑀅𑀢𑁆𑀣𑀸𑀬 𑀲𑀁𑀘𑀭𑀺 𑀪𑀯𑁂𑀲𑀼 𑀫𑀳𑀩𑁆𑀪𑀬𑁂𑀲𑀼,
𑀏𑀯𑀁 𑀲𑀤𑀸 𑀧𑀭𑀳𑀺𑀢𑀁 𑀧𑀼𑀭𑀢𑁄 𑀓𑀭𑀺𑀢𑁆𑀯𑀸
𑀥𑀫𑁆𑀫𑁄 𑀫𑀬𑀸𑀦𑀼𑀘𑀭𑀺𑀢𑁄 𑀚𑀕𑀤𑀢𑁆𑀣𑀫𑁂𑀯;
𑁯𑁮. ¶
𑀮𑀤𑁆𑀥𑀸𑀦 𑀤𑀼𑀮𑁆𑀮𑀪𑀢𑀭𑀜𑁆𑀘 𑀫𑀦𑀼𑀲𑁆𑀲𑀬𑁄𑀦𑀺𑀁
𑀲𑀩𑁆𑀩𑀁 𑀧𑀧𑀜𑁆𑀘𑀭𑀳𑀺𑀢𑀁 𑀔𑀡𑀲𑀫𑁆𑀧𑀤𑀜𑁆𑀘,
𑀜𑀢𑁆𑀯𑀸𑀦 𑀆𑀲𑀯𑀦𑀼𑀤𑁂𑀓𑀳𑀺𑀢𑀜𑁆𑀘 𑀥𑀫𑁆𑀫𑀁
𑀓𑁄 𑀧𑀜𑁆𑀜𑀯𑀸 𑀅𑀦𑀯𑀭𑀁 𑀦 𑀪𑀚𑁂𑀬𑁆𑀬 𑀥𑀫𑁆𑀫𑀁?
𑀮𑀤𑁆𑀥𑀸𑀦 𑀩𑀼𑀤𑁆𑀥𑀲𑀫𑀬𑀁 𑀅𑀢𑀺𑀤𑀼𑀮𑁆𑀮𑀪𑀁𑀘
𑀲𑀤𑁆𑀥𑀫𑁆𑀫 𑀫𑀕𑁆𑀕𑀫𑀲𑀫𑀁 𑀲𑀺𑀯𑀤𑀁 𑀢𑀣𑁂𑀯,
𑀓𑀮𑁆𑀬𑀸𑀡𑀫𑀺𑀢𑁆𑀢𑀧𑀯𑀭𑁂 𑀫𑀢𑀺𑀲𑀫𑁆𑀧𑀤𑀜𑁆𑀘
𑀓𑁄 𑀩𑀼𑀤𑁆𑀥𑀺𑀫𑀸 𑀅𑀦𑀯𑀭𑀁 𑀦 𑀪𑀚𑁂𑀬𑁆𑀬 𑀥𑀫𑁆𑀫𑀁?
𑀏𑀯𑀫𑁆𑀧𑀺 𑀤𑀼𑀮𑁆𑀮𑀪𑀢𑀭𑀁 𑀯𑀺𑀪𑀯𑁂 𑀲𑀼𑀮𑀤𑁆𑀥𑀸
𑀫𑀘𑁆𑀙𑁂𑀭𑀤𑁄𑀲 𑀯𑀺𑀭𑀢𑀸 𑀉𑀪𑀬𑀢𑁆𑀣𑀓𑀸𑀫𑀸,
𑀲𑀤𑁆𑀥𑀸𑀤𑀺𑀥𑀫𑁆𑀫𑀲𑀳𑀺𑀢𑀸 𑀲𑀢𑀢𑀧𑁆𑀧𑀫𑀢𑁆𑀢𑀸
𑀪𑁄! 𑀪𑁄! 𑀓𑀭𑁄𑀣 𑀅𑀫𑀢𑀸𑀥𑀺𑀕𑀫𑀸𑀬 𑀧𑀼𑀜𑁆𑀜𑀁;