📜

𑀲𑀫𑀦𑁆𑀢𑀓𑀽𑀝𑀯𑀡𑁆𑀡𑀦𑀸 ¶

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑁧.

𑀲𑀢𑀢𑀯𑀺𑀢𑀢 𑀓𑀺𑀢𑁆𑀢𑀺𑀁 𑀥𑀲𑁆𑀢𑀓𑀦𑁆𑀤𑀧𑁆𑀧𑀤𑀧𑁆𑀧𑀁

𑀢𑀺𑀪𑀯𑀳𑀺𑀢𑀯𑀺𑀥𑀸𑀦𑀁 𑀲𑀩𑁆𑀩𑀮𑁄𑀓𑁂𑀓𑀓𑁂𑀢𑀼𑀁,

𑀅𑀫𑀺𑀢𑀫𑀢𑀺𑀫𑀦𑀕𑁆𑀖𑀁 𑀲𑀦𑁆𑀢𑀺𑀤𑀁 𑀫𑁂𑀭𑀼𑀲𑀸𑀭𑀁

𑀲𑀼𑀕𑀢𑀫𑀳𑀫𑀼𑀤𑀸𑀭𑀁 𑀭𑀽𑀧𑀲𑀸𑀭𑀁 𑀦𑀫𑀸𑀫𑀺;

𑁨.

𑀳𑀢𑀤𑀼𑀭𑀺𑀢𑀢𑀼𑀲𑀸𑀭𑀁 𑀫𑁄𑀳𑀧𑀗𑁆𑀓𑁄𑀧𑀢𑀸𑀧𑀁

𑀫𑀦𑀓𑀫𑀮𑀯𑀺𑀓𑀸𑀲𑀁 𑀚𑀦𑁆𑀢𑀼𑀦𑀁 𑀲𑁂𑀲𑀓𑀸𑀦𑀁,

𑀓𑀼𑀫𑀢𑀺𑀓𑀼𑀫𑀼𑀤𑀦𑀸𑀲𑀁 𑀩𑀼𑀤𑁆𑀥𑀧𑀼𑀩𑁆𑀩𑀸𑀘𑀮𑀕𑁆𑀕𑀸

𑀉𑀤𑀺𑀢𑀫𑀳𑀫𑀼𑀤𑀸𑀭𑀁 𑀥𑀫𑁆𑀫𑀪𑀸𑀦𑀼𑀁 𑀦𑀫𑀸𑀫𑀺;

𑁩.

𑀲𑀓𑀮𑀯𑀺𑀫𑀮𑀲𑀻𑀮𑀁 𑀥𑀼𑀢𑀧𑀸𑀧𑀸𑀭𑀺𑀚𑀸𑀮𑀁

𑀲𑀼𑀭𑀦𑀭𑀫𑀳𑀦𑀻𑀬𑀁 𑀧𑀸𑀳𑀼𑀦𑁂𑀬𑁆𑀬𑀸𑀳𑀼𑀦𑁂𑀬𑁆𑀬𑀁,

𑀉𑀚𑀼𑀧𑀣𑀧𑀝𑀺𑀧𑀦𑁆𑀦𑀁 𑀧𑀼𑀜𑁆𑀜𑀔𑁂𑀢𑁆𑀢𑀁 𑀚𑀦𑀸𑀦𑀁

𑀕𑀡𑀫𑀳𑀫𑀪𑀺𑀯𑀦𑁆𑀤𑁂 𑀲𑀸𑀭𑀤𑀁 𑀲𑀸𑀤𑀭𑁂𑀦;

𑁪.

𑀇𑀢𑀺 𑀓𑀴𑀺𑀢 𑀧𑀡𑀸𑀫𑀸 𑀳𑀦𑁆𑀢𑁆𑀯 𑀲𑀩𑁆𑀩𑁄𑀧𑀲𑀕𑁆𑀕𑁂

𑀲𑀼𑀕𑀢𑀯𑀺𑀫𑀮 𑀧𑀸𑀤𑀫𑁆𑀪𑁄𑀚𑀲𑀫𑁆𑀧𑀸𑀢 𑀧𑀽𑀢𑀁,

𑀲𑀼𑀫𑀦𑀲𑀺𑀔𑀭𑀺𑀭𑀸𑀚𑀁 𑀯𑀡𑁆𑀡𑀬𑀺𑀲𑁆𑀲𑀁 𑀲𑀼𑀭𑀸𑀦𑀁

𑀯𑀲𑀢𑀺 𑀫𑀢𑀼𑀮𑀫𑁂𑀢𑀁 𑀲𑀸𑀥𑀼𑀚𑀦𑁆𑀢𑀼 𑀲𑀼𑀡𑀦𑁆𑀢𑀼;

𑁫.

𑀲𑀯𑀡𑀸 𑀮𑀧𑀦𑀸 𑀘𑁂𑀯 𑀲𑀢𑀺𑀬𑀸 𑀘𑀸𑀧𑀺 𑀯𑀦𑁆𑀤𑀦𑀸,

𑀬𑀲𑁆𑀲 𑀲𑀫𑁆𑀫𑀸 𑀲𑀼𑀔𑀻 𑀳𑁄𑀢𑀻 𑀦𑀺𑀩𑁆𑀩𑀸𑀡𑀜𑁆𑀘𑀸𑀥𑀺𑀕𑀘𑁆𑀙𑀢𑀺;

𑁬. ¶

𑀢𑀲𑁆𑀫𑀸 𑀲𑀧𑁆𑀧𑀼𑀭𑀺𑀲𑁂𑀳𑁂’𑀤𑀁 𑀧𑀢𑁆𑀣𑁂𑀦𑁆𑀢𑁂𑀳𑀺 𑀢𑀺𑀲𑀫𑁆𑀧𑀤𑀁,

𑀲𑀯𑀡𑀻𑀬𑀜𑁆𑀳𑀺 𑀲𑀸𑀥𑀽𑀳𑀺 𑀅𑀘𑀺𑀓𑁆𑀔𑀺𑀢𑁆𑀢𑁂𑀦 𑀘𑁂𑀢𑀲𑀸;

𑁭.

𑀬𑁄 𑀮𑁄𑀓𑀢𑀺𑀮𑀓𑁄 𑀦𑀸𑀣𑁄 𑀧𑀽𑀭𑁂𑀢𑁆𑀯𑀸 𑀤𑀲 𑀧𑀸𑀭𑀫𑀻,

𑀚𑀸𑀢𑁄𑀲𑀺 𑀢𑀼𑀲𑀺𑀢𑁂 𑀓𑀸𑀬𑁂 𑀲𑀦𑁆𑀢𑀼𑀲𑀺𑀢𑁄’𑀢𑀺 𑀯𑀺𑀲𑁆𑀲𑀼𑀢𑁄;

𑁮.

𑀆𑀭𑀸𑀥𑀺𑀢𑁄 𑀲𑀼𑀭𑀸𑀤𑀻𑀳𑀺 𑀓𑀸𑀮𑁄 𑀫𑀸𑀭𑀺𑀲 𑀢𑁂 𑀅𑀬𑀁,

𑀢𑀺𑀡𑁆𑀡𑁄 𑀢𑀸𑀭𑀬𑀺𑀫𑀁 𑀮𑁄𑀓𑀁 𑀩𑀳𑀽 𑀅𑀧𑁆𑀧𑀭𑀚𑀓𑁆𑀔𑀓𑀸;

𑁯.

𑀏𑀢𑀤𑀢𑁆𑀣𑀸𑀬 𑀢𑁂 𑀯𑀻𑀭 𑀧𑀽𑀭𑀺𑀢𑀸 𑀤𑀲 𑀧𑀸𑀭𑀫𑀻,

𑀩𑀸𑀳𑀼𑀁 𑀧𑀺𑀢𑀼𑀲𑁆𑀲 𑀧𑀼𑀢𑁆𑀢𑁄’𑀯 𑀮𑁄𑀓𑁄 𑀆𑀮𑀫𑁆𑀩𑀢𑁂 𑀢𑀼𑀯𑀁;

𑁧𑁦.

𑀢𑁂𑀲𑀁 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀫𑀳𑀸𑀲𑀢𑁆𑀢𑁄 𑀫𑀳𑀸𑀫𑀢𑀻,

𑀯𑀺𑀮𑁄𑀓𑀦𑁂 𑀯𑀺𑀮𑁄𑀓𑁂𑀢𑁆𑀯𑀸 𑀧𑀜𑁆𑀘𑀸𑀫𑀮 𑀯𑀺𑀮𑁄𑀘𑀦𑁄;

𑁧𑁧.

𑀚𑀫𑁆𑀩𑀼𑀤𑀻𑀧𑀕𑁆𑀕𑀓𑀫𑀮𑁂 𑀓𑀡𑁆𑀡𑀺𑀓𑀸’𑀯 𑀫𑀦𑁄𑀭𑀫𑀸,

𑀧𑀼𑀭𑀻 𑀓𑀧𑀺𑀴𑀯𑀢𑁆𑀣𑀽’𑀲𑀺 𑀯𑀺𑀲𑀸𑀡𑀸’𑀯 𑀲𑀼𑀥𑀸𑀲𑀺𑀦𑀁;

𑁧𑁨.

𑀲𑀺𑀗𑁆𑀕𑀻𑀦𑀺𑀓𑁆𑀔𑀫𑀬𑀸𑀪𑀸𑀲 𑀢𑀼𑀗𑁆𑀕𑀲𑀺𑀗𑁆𑀕𑀲𑀫𑀗𑁆𑀕𑀺𑀢𑀸,

𑀫𑀡𑀺𑀲𑀻𑀳𑀧𑀜𑁆𑀚𑀭𑀸𑀓𑀺𑀡𑁆𑀡 𑀧𑀸𑀲𑀸𑀤𑀸 𑀬𑀢𑁆𑀣 𑀪𑀸𑀲𑀭𑁂;

𑁧𑁩.

𑀲𑀖𑀦𑁂 𑀕𑀕𑀦𑁂 𑀦𑀺𑀘𑁆𑀘𑀁 𑀲𑀢𑁂𑀭𑀢𑀲𑀢𑀸𑀦𑀺’𑀯,

𑀅𑀦𑀺𑀮𑁂𑀭𑀺𑀢𑀧𑀚𑁆𑀚𑁄𑀢 𑀲𑁄𑀡𑁆𑀡𑀓𑁂𑀢𑀼 𑀅𑀳𑀽 𑀬𑀳𑀺𑀁;

𑁧𑁪.

𑀚𑀦𑀸𑀦𑀁 𑀦𑀻𑀮𑀦𑁂𑀢𑁆𑀢𑁂𑀳𑀺 𑀯𑀤𑀦𑁂𑀳𑀺 𑀢𑀼 𑀬𑀸 𑀧𑀼𑀭𑀻,

𑀫𑀥𑀼𑀧𑀸𑀮𑀺𑀲𑀫𑁄𑀦𑀤𑁆𑀥 𑀓𑀜𑁆𑀚𑀺𑀦𑀻 𑀲𑀺𑀭𑀺𑀫𑀸𑀯𑀳𑁂;

𑁧𑁫.

𑀭𑀗𑁆𑀕𑀢𑀼𑀗𑁆𑀕𑀢𑀼𑀭𑀗𑁆𑀕𑁂𑀳𑀺 𑀕𑀚𑁆𑀚𑀺𑀢𑁂𑀳𑀺 𑀘 𑀬𑀸 𑀧𑀼𑀭𑀻,

𑀲𑀖𑁄𑀲𑀼𑀢𑁆𑀢𑀼𑀗𑁆𑀕𑀓𑀮𑁆𑀮𑁄𑀮 𑀮𑁄𑀮𑀲𑀸𑀕𑀭𑀲𑀦𑁆𑀢𑀺𑀪𑀸;

𑁧𑁬.

𑀅𑀯𑁆𑀳𑀫𑀸𑀦𑀸’𑀯 𑀤𑁂𑀯𑀸𑀦𑀁 𑀧𑀼𑀭𑀮𑀔𑁆𑀬𑀸 𑀪𑀼𑀚𑀸 𑀇𑀯,

𑀫𑀦𑁆𑀤𑀸𑀦𑀺𑀮𑁂𑀭𑀺𑀢𑀸 𑀢𑀼𑀗𑁆𑀕 𑀦𑀸𑀦𑀸𑀭𑀸𑀕𑀤𑁆𑀥𑀚𑀸 𑀬𑀳𑀺𑀁;

𑁧𑁭.

𑀦𑀸𑀦𑀸𑀯𑁂𑀲𑀥𑀭𑀸 𑀬𑀲𑁆𑀫𑀺𑀁 𑀦𑀸𑀦𑀸𑀪𑀽𑀲𑀡 𑀪𑀽𑀲𑀺𑀢𑀸,

𑀦𑀸𑀦𑀸𑀲𑀫𑁆𑀧𑀢𑁆𑀢𑀺𑀲𑀁𑀬𑀼𑀢𑁆𑀢𑀸 𑀦𑀸𑀦𑀸𑀯𑀺𑀚𑁆𑀚𑀸𑀲𑀼 𑀧𑀸𑀭𑀕𑀸;

𑁧𑁮. ¶

𑀦𑀯𑀬𑁄𑀩𑁆𑀩𑀦 𑀉𑀤𑁆𑀤𑀸𑀫𑀸 𑀭𑀽𑀧𑁂𑀦 𑀘 𑀫𑀦𑁄𑀳𑀭𑀸,

𑀲𑀘𑁆𑀘𑁂𑀲𑀼 𑀦𑀺𑀭𑀢𑀸 𑀦𑀺𑀘𑁆𑀘𑀁 𑀅𑀦𑀓𑁆𑀓𑀼𑀝𑁆𑀞𑀓𑀼𑀮𑀸 𑀲𑀺𑀬𑀼𑀁;

𑁧𑁯.

𑀦𑀺𑀘𑁆𑀘𑀁 𑀓𑀻𑀴𑀸 𑀯𑀺𑀤𑀤𑁆𑀥𑀸𑀳𑀺 𑀦𑀭𑀦𑀸𑀭𑀻𑀳𑀺 𑀲𑁂𑀯𑀺𑀢𑀸,

𑀬𑀸 𑀧𑀼𑀭𑀻 𑀲𑀸𑀥𑀼𑀭𑀽𑀧𑀸’𑀲𑀺 𑀫𑀥𑀼𑀭𑀸𑀮𑀸𑀧𑀺𑀦𑀻𑀳𑀺 𑀘;

𑁨𑁦.

𑀢𑀲𑁆𑀫𑀺𑀁 𑀲𑀤𑁆𑀥𑀸𑀤𑀬𑁄𑀧𑁂𑀢 𑀑𑀓𑁆𑀓𑀸𑀓𑀓𑀼𑀮𑀓𑁂𑀢𑀼𑀓𑁄,

𑀲𑀼𑀤𑁆𑀥𑁄𑀤𑀦𑀯𑁆𑀳𑀬𑁄 𑀆𑀲𑀻 𑀯𑀺𑀲𑁆𑀲𑀼𑀢𑁄 𑀪𑀼𑀯𑀦𑀢𑁆𑀢𑀬𑁂;

𑁨𑁧.

𑀬𑀲𑁆𑀲𑀗𑁆𑀖𑀺𑀓𑀫𑀮𑁂 𑀲𑀩𑁆𑀩 𑀪𑀼𑀪𑀼𑀚𑀸𑀦𑀁 𑀫𑀳𑀻𑀢𑀮𑁂,

𑀓𑀺𑀭𑀻𑀝𑀫𑀡𑀺𑀳𑀺𑀗𑁆𑀕𑀸𑀮𑀺 𑀓𑀻𑀴𑀦𑁆𑀢𑀻’𑀯 𑀦𑀺𑀭𑀦𑁆𑀢𑀭𑀁;

𑁨𑁨.

𑀬𑀲𑁆𑀲 𑀧𑀢𑁆𑀣𑀝𑀢𑁂𑀚𑁂𑀦 𑀧𑀼𑀭𑀦𑁂𑀢𑀸𑀧𑀺 𑀤𑀺𑀯𑀸𑀓𑀭𑁄,

𑀯𑀳𑀦𑀻𑀘’𑀫𑁆𑀩𑀭𑁂 𑀮𑀻𑀮𑀁 𑀑𑀲𑀥𑀻𑀧𑀢𑀺𑀦𑁄 𑀤𑀺𑀯𑀸;

𑁨𑁩.

𑀬𑀲𑁆𑀲 𑀤𑀸𑀦𑀧𑁆𑀧𑀯𑀸𑀳𑁄 𑀢𑀼 𑀦𑀸𑀦𑀸𑀬𑀸𑀘𑀓 𑀚𑀦𑁆𑀢𑀼𑀦𑀁,

𑀫𑀦𑁄𑀤𑀥𑀻𑀲𑀼 𑀯𑁂𑀮𑀦𑁆𑀢𑁂𑀢𑀺𑀓𑁆𑀓𑀫𑀦𑁆𑀢𑁄𑀯 𑀲𑀢𑁆𑀢𑀢𑀁;

𑁨𑁪.

𑀫𑀢𑀺𑀬𑀸 𑀲𑀼𑀭𑀫𑀦𑁆𑀢𑀻𑀯 𑀥𑀦𑁂𑀦 𑀥𑀦𑀤𑁄 𑀯𑀺𑀬,

𑀭𑀽𑀧𑁂𑀦 𑀓𑀼𑀲𑀼𑀫𑁂𑀲𑀼’𑀯 𑀬𑁄 𑀚𑀼𑀫𑁆𑀳𑀢𑀺 𑀫𑀳𑀻𑀢𑀮𑁂;

𑁨𑁫.

𑀢𑀲𑁆𑀲𑀸𑀪𑀺𑀲𑀺𑀢𑁆𑀢𑀸 𑀭𑀚𑁆𑀚𑁂𑀦 𑀫𑀳𑀸𑀫𑀸𑀬𑀸𑀢𑀺 𑀯𑀺𑀲𑁆𑀲𑀼𑀢𑀸,

𑀘𑀦𑁆𑀤𑀺𑀓𑀸 𑀯𑀺𑀬 𑀘𑀦𑁆𑀤𑀲𑁆𑀲 𑀕𑀺𑀭𑀺𑀭𑀸𑀚𑀸’𑀯 𑀓𑀧𑀸𑀮𑀺𑀢𑁄;

𑁨𑁬.

𑀮𑀓𑁆𑀔𑀻’𑀯 𑀯𑀸𑀲𑀼𑀤𑁂𑀯𑀲𑁆𑀲 𑀲𑀻𑀢𑀸’𑀯 𑀭𑀸𑀫𑀭𑀸𑀚𑀺𑀦𑁄,

𑀫𑀳𑁂𑀲𑀻𑀲𑀺 𑀯𑀭𑀸𑀭𑁄𑀳𑀸 𑀲𑀼𑀦𑁆𑀤𑀭𑀻 𑀲𑀼𑀦𑁆𑀤𑀭𑀸𑀥𑀭𑀸;

𑁨𑁭.

𑀢𑀲𑁆𑀲𑀸 𑀓𑀼𑀘𑁆𑀙𑀺𑀓𑀭𑀡𑁆𑀟𑀫𑁆𑀳𑀺 𑀅𑀦𑀕𑁆𑀖𑀭𑀢𑀦𑀁 𑀯𑀺𑀬,

𑀔𑀢𑁆𑀢𑀺𑀁𑀲𑀸𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀯𑀺𑀫𑁆𑀳𑀸𑀧𑁂𑀦𑁆𑀢𑁄 𑀲𑀤𑁂𑀯𑀓𑀁;

𑁨𑁮.

𑀲𑀺𑀢𑀫𑁆𑀩𑀼𑀚𑀓𑀭𑁄 𑀲𑀦𑁆𑀢𑁄 𑀲𑀺𑀢𑁂𑀪𑀘𑁆𑀙𑀸𑀧𑀓𑁄 𑀯𑀺𑀬,

𑀓𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀫𑀸𑀢𑀼 𑀧𑀝𑀺𑀲𑀦𑁆𑀥𑀺𑀫𑀕𑀡𑁆𑀳𑀺 𑀲𑁄;

𑁨𑁯.

𑀤𑀲𑁂𑀓𑀸𑀤𑀲𑀫𑀸𑀲𑁂𑀦 𑀢𑀲𑁆𑀲𑁂𑀯𑀁 𑀆𑀲𑀺 𑀘𑁂𑀢𑀦𑀸,

𑀧𑀲𑁆𑀲𑀺𑀢𑀼𑀁 𑀲𑀓𑀜𑀸𑀢𑀻𑀦𑀁 𑀕𑀦𑁆𑀢𑁆𑀯𑀸𑀦 𑀦𑀕𑀭𑀁 𑀢𑀤𑀸;

𑁩𑁦. ¶

𑀦𑀺𑀯𑁂𑀤𑁂𑀢𑁆𑀯𑀸 𑀢𑀫𑀢𑁆𑀣𑀁 𑀲𑀸 𑀭𑀜𑁆𑀜𑁄 𑀢𑁂𑀦 𑀲𑀼𑀲𑀚𑁆𑀚𑀺𑀢𑁂,

𑀲𑀧𑀭𑀺𑀘𑁆𑀙𑀤𑀸 𑀢𑀤𑀸 𑀫𑀕𑁆𑀕𑁂 𑀕𑀘𑁆𑀙𑀦𑁆𑀢𑀺 𑀅𑀦𑁆𑀢𑀭𑀸𑀧𑀣𑁂;

𑁩𑁧.

𑀤𑁂𑀯𑀢𑀸𑀦𑀁 𑀫𑀦𑁄𑀦𑀦𑁆𑀤𑀓𑀭 𑀦𑀦𑁆𑀤𑀦 𑀲𑀦𑁆𑀦𑀺𑀪𑀁,

𑀤𑀺𑀲𑁆𑀯𑀸𑀦 𑀮𑀼𑀫𑁆𑀩𑀺𑀦𑀺𑀁 𑀦𑀸𑀫 𑀉𑀬𑁆𑀬𑀸𑀦𑀁 𑀫𑀦𑀦𑀦𑁆𑀤𑀦𑀁;

𑁩𑁨.

𑀢𑀲𑁆𑀫𑀺𑀁 𑀓𑀻𑀴𑀺𑀢𑀼𑀫𑀼𑀲𑁆𑀲𑀸𑀳𑀸 𑀧𑀯𑀺𑀲𑀺𑀢𑁆𑀯𑀸𑀦 𑀢𑀁 𑀯𑀦𑀁,

𑀓𑀻𑀴𑀦𑁆𑀢𑀺 𑀉𑀧𑀕𑀦𑁆𑀢𑁆𑀯𑀸𑀦 𑀫𑀗𑁆𑀕𑀮𑀁 𑀲𑀸𑀮𑀧𑀸𑀤𑀧𑀁;

𑁩𑁩.

𑀯𑀺𑀮𑁄𑀮 𑀧𑀮𑁆𑀮𑀯𑀸𑀓𑀺𑀡𑁆𑀡𑀁 𑀲𑀼𑀨𑀼𑀮𑁆𑀮𑀓𑀼𑀲𑀼𑀫𑁄𑀦𑀢𑀁,

𑀕𑀳𑁂𑀢𑁆𑀯𑀸 𑀲𑀸𑀮𑀲𑀸𑀔𑀁 𑀲𑀸 𑀲𑀼𑀭𑀢𑁆𑀢𑀓𑀭 𑀧𑀮𑁆𑀮𑀯𑀸;

𑁩𑁪.

𑀤𑁂𑀯𑁂𑀳𑀺 𑀕𑀳𑀺𑀢𑀸’𑀭𑀓𑁆𑀔𑀸 𑀫𑀳𑀫𑀸𑀦𑁂 𑀲𑀤𑁂𑀯𑀓𑁂,

𑀚𑀦𑁂𑀲𑀺 𑀢𑀦𑀬𑀁 𑀫𑀸𑀬𑀸 𑀢𑀢𑁆𑀭𑀝𑁆𑀞𑀸 𑀮𑁄𑀓𑀮𑁄𑀘𑀦𑀁;

𑁩𑁫.

𑀩𑁆𑀭𑀳𑁆𑀫𑀸𑀦𑁄 𑀮𑁄𑀓𑀧𑀸𑀮𑀸 𑀘 𑀫𑀦𑀼𑀲𑁆𑀲𑀸 𑀓𑀫𑀢𑁄 𑀢𑀤𑀸,

𑀲𑁄𑀡𑁆𑀡𑀚𑀸𑀮𑀸𑀚𑀺𑀦𑀸𑀤𑀻𑀳𑀺 𑀕𑀡𑁆𑀳𑀺𑀁𑀲𑀼 𑀚𑀦𑀦𑀦𑁆𑀤𑀦𑀁;

𑁩𑁬.

𑀫𑀳𑀺𑀁 𑀧𑀢𑀺𑀝𑁆𑀞𑀺𑀢𑁄 𑀥𑀻𑀭𑁄 𑀧𑀲𑁆𑀲𑀺𑀢𑁆𑀯𑀸𑀦 𑀢𑀢𑁄 𑀤𑀺𑀲𑀸,

𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀲𑀢𑁆𑀢𑀧𑀤𑀁 𑀕𑀡𑁆𑀢𑁆𑀯𑀸’𑀫𑁆𑀩𑀼𑀚𑁂 𑀞𑀺𑀢𑁄;

𑁩𑁭.

𑀤𑀺𑀲𑀦𑁆𑀢𑀫𑀯𑀮𑁄𑀓𑁂𑀢𑁆𑀯𑀸 𑀲𑀼𑀨𑀼𑀮𑁆𑀮𑀫𑁆𑀩𑀼𑀚𑀮𑁄𑀘𑀦𑁄,

𑀦𑀺𑀘𑁆𑀙𑀸𑀭𑁂𑀲𑀸𑀲𑀪𑀺𑀁 𑀯𑀸𑀘𑀁 𑀅𑀕𑁆𑀕𑁄 𑀲𑁂𑀝𑁆𑀞𑁄’𑀢𑀺𑀆𑀤𑀺𑀦𑀸;

𑁩𑁮.

𑀩𑁆𑀭𑀳𑁆𑀫𑀸𑀫𑀭𑀦𑀭𑀸𑀤𑀻𑀳𑀺 𑀧𑀽𑀚𑀺𑀢𑁄 𑀘 𑀦𑀫𑀲𑁆𑀲𑀺𑀢𑁄,

𑀓𑀫𑁂𑀦 𑀅𑀪𑀺𑀯𑀟𑁆𑀠𑀦𑁆𑀢𑁄 𑀚𑀼𑀡𑁆𑀳𑀧𑀓𑁆𑀔𑁂 𑀲𑀲𑀻 𑀬𑀣𑀸;

𑁩𑁯.

𑀩𑁆𑀭𑀳𑁆𑀫𑀽𑀦𑀁 𑀙𑀢𑁆𑀢𑀙𑀸𑀬𑀸𑀬 𑀫𑀦𑁆𑀤𑀸𑀭𑀓𑀼𑀲𑀼𑀫𑀦𑁆𑀢𑀭𑁂,

𑀲𑀸𑀦𑀦𑁆𑀤𑀸𑀫𑀦𑁆𑀤𑀤𑁂𑀯𑁂𑀳𑀺 𑀥𑀼𑀢𑀘𑀸𑀫𑀭𑀫𑀚𑁆𑀛𑀕𑁄;

𑁪𑁦.

𑀤𑀺𑀩𑁆𑀩𑁂𑀳𑀺 𑀭𑀽𑀧𑀲𑀤𑁆𑀤𑁂𑀳𑀺 𑀕𑀦𑁆𑀥𑁂𑀳𑀺 𑀘 𑀭𑀲𑁂𑀳𑀺 𑀘,

𑀨𑁄𑀝𑁆𑀞𑀩𑁆𑀩𑁂𑀳𑀺 𑀘 𑀤𑀺𑀩𑁆𑀩𑁂𑀳𑀺 𑀫𑁄𑀤𑀫𑀸𑀦𑁄 𑀅𑀦𑁂𑀓𑀥𑀸;

𑁪𑁧.

𑀤𑀺𑀩𑁆𑀩𑁂𑀳𑀺 𑀭𑀫𑀡𑀻𑀬𑁂𑀳𑀺 𑀦𑀘𑁆𑀘𑁂𑀳𑀺 𑀯𑀸𑀤𑀺𑀢𑁂𑀳𑀺 𑀘,

𑀧𑀤𑀸𑀦𑁂𑀓𑀲𑀳𑀲𑁆𑀲𑁂𑀳𑀺 𑀣𑀽𑀬𑀫𑀸𑀦𑀕𑀼𑀡𑀸𑀓𑀭𑁄;

𑁪𑁨. ¶

𑀧𑀢𑁆𑀯𑀸 𑀲𑁄𑀴𑀲𑀫𑀁 𑀯𑀲𑁆𑀲𑀁 𑀜𑀸𑀢𑀺𑀲𑀗𑁆𑀖𑀲𑁆𑀲 𑀫𑀚𑁆𑀛𑀕𑁄,

𑀤𑀲𑁆𑀲𑁂𑀢𑁆𑀯𑀸’𑀲𑁂𑀲𑀲𑀺𑀧𑁆𑀧𑀁 𑀢𑀁 𑀮𑁄𑀓𑁂 𑀯𑀺𑀚𑁆𑀚𑀢𑀺 𑀬𑀁 𑀢𑀤𑀸;

𑁪𑁩.

𑀜𑀸𑀢𑀺𑀲𑀗𑁆𑀖𑀁 𑀧𑀫𑁄𑀤𑁂𑀦𑁆𑀢𑁄 𑀤𑁂𑀯𑁂 𑀘 𑀫𑀦𑀼𑀚𑁂’𑀧𑀺 𑀘,

𑀮𑀤𑁆𑀥𑀸 𑀬𑀲𑁄𑀥𑀭𑀁 𑀤𑁂𑀯𑀺𑀁’𑀦𑀼𑀓𑀽𑀮𑀁 𑀚𑀸𑀢𑀺𑀚𑀸𑀢𑀺𑀬𑀁;

𑁪𑁪.

𑀲𑁄𑀡𑁆𑀡𑀤𑀧𑁆𑀧𑀡𑀲𑀗𑁆𑀓𑀸𑀲 𑀲𑁄𑀫𑁆𑀫𑀸𑀦𑀦 𑀯𑀺𑀪𑀼𑀲𑀺𑀢𑀁,

𑀦𑀻𑀮𑀦𑀻𑀭𑀚𑀲𑀗𑁆𑀓𑀸𑀲 𑀯𑀺𑀲𑀸𑀮𑀸𑀬𑀢 𑀮𑁄𑀘𑀦𑀁;

𑁪𑁫.

𑀲𑀺𑀗𑁆𑀕𑀸𑀭𑀫𑀦𑁆𑀤𑀺𑀭𑀤𑁆𑀯𑀸𑀭𑁂 𑀥𑀚𑁄𑀧𑀫𑀪𑀫𑀼𑀤𑁆𑀯𑀬𑀁,

𑀳𑁂𑀫𑀓𑀸𑀳𑀮𑀲𑀗𑁆𑀓𑀸𑀲 𑀦𑀸𑀲𑀺𑀓𑀁 𑀭𑀽𑀧𑀮𑀓𑁆𑀔𑀺𑀬𑀸

𑁪𑁬.

𑀦𑀻𑀮𑀯𑁂𑀮𑁆𑀮𑀺𑀢𑀥𑀫𑁆𑀫𑀺𑀮𑁆𑀮 𑀚𑀺𑀫𑀼𑀢𑁄𑀪𑀬 𑀓𑁄𑀝𑀺𑀬𑀁,

𑀦𑀺𑀘𑁆𑀘𑀯𑀺𑀚𑁆𑀚𑀼𑀮𑁆𑀮𑀢𑀸𑀘𑀓𑁆𑀓 𑀫𑀦𑀼𑀜𑁆𑀜𑀓𑀡𑁆𑀡𑀧𑀸𑀲𑀓𑀁;

𑁪𑁭.

𑀲𑀸𑀢𑀓𑀼𑀫𑁆𑀪𑀦𑀺𑀪𑀸𑀪𑀸𑀲 𑀧𑀬𑁄𑀥𑀭𑀖𑀝𑀤𑁆𑀯𑀁,

𑀲𑀼𑀯𑀡𑁆𑀡𑀤𑁆𑀤𑀺𑀢𑀝𑀸𑀬𑀸𑀢 𑀦𑀺𑀚𑁆𑀛𑀭𑀸𑀓𑀸𑀭𑀳𑀸𑀭𑀓𑀁

𑁪𑁮.

𑀤𑁂𑀳𑀤𑁂𑀯𑀤𑁆𑀤𑀼𑀫𑀸𑀮𑀫𑁆𑀩 𑀧𑀸𑀭𑁄𑀳𑀸𑀪𑀪𑀼𑀚𑀤𑁆𑀯𑀬𑀁,

𑀅𑀗𑁆𑀕𑀼𑀮𑀻𑀧𑀮𑁆𑀮𑀯𑀦𑁆𑀢𑀫𑁆𑀩𑀼 𑀩𑀺𑀦𑁆𑀤𑀼𑀘𑀸𑀭𑀼 𑀦𑀔𑀸𑀯𑀮𑀺𑀁;

𑁪𑁯.

𑀤𑁂𑀳𑀫𑀸𑀮𑀸𑀮𑀺𑀫𑀸𑀮𑀸𑀪 𑀭𑁄𑀫𑀭𑀸𑀚𑀺𑀯𑀺𑀭𑀸𑀚𑀺𑀢𑀁,

𑀭𑀽𑀧𑀡𑁆𑀡𑀯𑀢𑀭𑀗𑁆𑀕𑀸𑀳 𑀯𑀮𑀺𑀢𑁆𑀢𑀬 𑀯𑀺𑀘𑀺𑀢𑁆𑀢𑀓𑀁;

𑁫𑁦.

𑀲𑁄𑀡𑁆𑀡𑀭𑀫𑁆𑀪𑀸𑀲𑀫𑀸𑀯𑀝𑁆𑀝 𑀧𑀺𑀡𑁄𑀭𑀼𑀤𑁆𑀯𑀬 𑀲𑀼𑀦𑁆𑀤𑀭𑀁,

𑀲𑀦𑁆𑀦𑀺𑀭𑀓𑀮𑀺𑀓𑀸𑀓𑀸𑀭 𑀘𑀸𑀭𑀼𑀚𑀗𑁆𑀖𑀸 𑀯𑀺𑀪𑀽𑀲𑀺𑀢𑀁;

𑁫𑁧.

𑀧𑀘𑁆𑀘𑀓𑁆𑀔𑀭𑀽𑀧𑀮𑀓𑁆𑀔𑀺𑀜𑁆𑀘 𑀮𑀻𑀮𑀸𑀦𑀺𑀘𑀬 𑀲𑀦𑁆𑀦𑀺𑀪𑀁,

𑀕𑀼𑀡𑀸𑀦𑀫𑀸𑀓𑀭𑀁 𑀲𑀸𑀥𑀼 𑀯𑁂𑀮𑀁𑀯 𑀭𑀢𑀺𑀲𑀸𑀕𑀭𑁂;

𑁫𑁨.

𑀓𑀦𑁆𑀢𑁄 𑀯𑀲𑀦𑁆𑀢𑀭𑀸𑀚𑀸’𑀯 𑀓𑀦𑁆𑀤𑀧𑁆𑀧𑁄’𑀯 𑀲𑀼𑀭𑀽𑀧𑀯𑀸,

𑀲𑀲𑀻’𑀯 𑀤𑀲𑁆𑀲𑀦𑀻𑀬𑁄 𑀘 𑀲𑀽𑀭𑀺𑀬𑁄 𑀯𑀺𑀬 𑀢𑁂𑀚𑀯𑀸;

𑁫𑁩.

𑀅𑀘𑀮𑀢𑁆𑀢𑁂𑀦 𑀫𑁂𑀭𑀽𑀯 𑀕𑀫𑁆𑀪𑀻𑀭𑁂𑀦𑀡𑁆𑀡𑀯𑁄 𑀯𑀺𑀬,

𑀩𑁆𑀭𑀳𑁆𑀫𑀲𑁆𑀲𑀭𑁄 𑀧𑀺𑀬𑀁𑀯𑀸𑀤𑀻 𑀧𑀜𑁆𑀕𑁆𑀜𑀸𑀬 𑀘 𑀅𑀦𑀽𑀧𑀫𑁄;

𑁫𑁪. ¶

𑀯𑀲𑀦𑁆𑀢𑁄 𑀲𑁄 𑀫𑀳𑀸𑀯𑀻𑀭𑁄 𑀧𑀼𑀭𑀲𑁆𑀫𑀺𑀁 𑀓𑀧𑀺𑀮𑀯𑁆𑀳𑀬𑁂,

𑀤𑀺𑀲𑁆𑀯𑀸 𑀦𑀺𑀫𑀺𑀢𑁆𑀢𑁂 𑀘𑀢𑀼𑀭𑁄 𑀉𑀬𑁆𑀬𑀸𑀦 𑀕𑀫𑀦𑀜𑁆𑀚𑀲𑁂;

𑁫𑁫.

𑀧𑀩𑁆𑀩𑀚𑁆𑀚𑀸𑀪𑀺𑀭𑀢𑁄 𑀦𑀸𑀣𑁄 𑀕𑀦𑁆𑀢𑁆𑀯𑀸 𑀉𑀬𑁆𑀬𑀸𑀦𑀪𑀽𑀫𑀺𑀬𑀁,

𑀲𑀼𑀨𑀼𑀮𑁆𑀮𑀘𑀫𑁆𑀧𑀓𑀸𑀲𑁄𑀓 𑀦𑀸𑀕𑀸𑀤𑀸’𑀕𑁂𑀳𑀺 𑀫𑀡𑁆𑀟𑀺𑀢𑀁;

𑁫𑁬.

𑀨𑀼𑀮𑁆𑀮𑀧𑀗𑁆𑀓𑀚 𑀓𑀴𑁆𑀳𑀸𑀭 𑀚𑀮𑀸𑀚𑀮𑀬 𑀲𑀢𑀸𑀓𑀼𑀮𑀁,

𑀫𑀦𑁆𑀤𑀫𑀦𑁆𑀤𑀸𑀦𑀺𑀮𑀸𑀬𑀸𑀢 𑀦𑀸𑀦𑀸𑀫𑁄𑀤𑁂𑀳𑀺 𑀯𑀸𑀲𑀺𑀢𑀁;

𑁫𑁭.

𑀲𑀭𑀸 𑀲𑀭𑀁 𑀲𑀫𑀸𑀬𑀸𑀢 𑀫𑀥𑀼𑀩𑁆𑀩𑀢 𑀦𑀺𑀲𑁂𑀯𑀺𑀢𑀁,

𑀨𑀮𑀧𑀼𑀧𑁆𑀨𑀭𑀲𑀼𑀤𑁆𑀤𑀸𑀫 𑀤𑁆𑀯𑀺𑀚 𑀲𑀗𑁆𑀖 𑀦𑀺𑀓𑀽𑀚𑀺𑀢𑀁;

𑁫𑁮.

𑀦𑀘𑁆𑀘𑀦𑁆𑀢 𑀫𑀢𑁆𑀢𑀫𑁄𑀭𑀸𑀦𑀁 𑀦𑀺𑀘𑁆𑀘𑀁 𑀫𑀡𑁆𑀟𑀧𑀲𑀦𑁆𑀢𑀺𑀪𑀁,

𑀤𑀺𑀩𑁆𑀩𑀦𑁆𑀢 𑀫𑀺𑀕𑀲𑀕𑁆𑀖𑀸𑀦𑀁 𑀓𑀻𑀴𑀸𑀫𑀡𑁆𑀟𑀧 𑀲𑀦𑁆𑀦𑀺𑀪𑀁;

𑁫𑁯.

𑀲𑀫𑀻𑀭 𑀲𑀺𑀲𑀺𑀭𑁄𑀤𑀸𑀭 𑀥𑀸𑀭𑀸𑀲𑀻𑀓𑀭 𑀯𑀸𑀭𑀺𑀳𑀺,

𑀥𑀸𑀭𑀸𑀫𑀡𑁆𑀟𑀧 𑀧𑀦𑁆𑀢𑀻𑀳𑀺 𑀚𑀦𑀸𑀦𑀦𑁆𑀤𑀓𑀭𑀁 𑀯𑀭𑀁;

𑁬𑁦.

𑀉𑀬𑁆𑀬𑀸𑀦𑀯𑀦𑀫𑀸𑀕𑀫𑁆𑀫 𑀤𑁂𑀯𑀭𑀸𑀚𑀸𑀯 𑀦𑀦𑁆𑀤𑀦𑀁,

𑀓𑀻𑀴𑀦𑁆𑀢𑁄 𑀦𑀺𑀚𑀧𑀼𑀢𑁆𑀢𑀲𑁆𑀲 𑀲𑀼𑀢𑁆𑀯𑀸𑀦 𑀚𑀸𑀢𑀲𑀸𑀲𑀦𑀁;

𑁬𑁧.

𑀦𑀺𑀯𑀢𑁆𑀢𑁄 𑀯𑀺𑀲𑁆𑀲𑀓𑀫𑁆𑀫𑁂𑀦 𑀲𑀳𑀲𑁆𑀲𑀓𑁆𑀔𑁄𑀯 𑀪𑀽𑀲𑀺𑀢𑁄,

𑀧𑀼𑀭𑀁 𑀧𑀯𑀺𑀲𑀫𑀸𑀦𑁄𑀯 𑀓𑀺𑀲𑀸 𑀕𑁄𑀢𑀫𑀺 𑀪𑀸𑀲𑀺𑀢𑀁;

𑁬𑁨.

𑀲𑀼𑀢𑁆𑀯𑀸𑀦 𑀦𑀺𑀩𑁆𑀩𑀼𑀢𑀧𑀤𑀁 𑀢𑀤𑀸 𑀘𑀺𑀢𑁆𑀢𑀸𑀦𑀼𑀓𑀽𑀮𑀓𑀁,

𑀲𑀦𑁆𑀢𑀼𑀝𑁆𑀞𑁄 𑀲𑀸𑀦𑀼𑀭𑀸𑀕𑁄 𑀘 𑀮𑀓𑁆𑀔𑀕𑁆𑀖𑀁 𑀢𑀸𑀭𑀪𑀸𑀲𑀼𑀭𑀁;

𑁬𑁩.

𑀳𑀸𑀭𑀁 𑀢𑀺𑀲𑁆𑀲𑀸𑀬 𑀧𑁂𑀲𑁂𑀢𑁆𑀯𑀸 𑀕𑀦𑁆𑀢𑁆𑀯𑀸𑀦 𑀲𑀓𑀫𑀦𑁆𑀤𑀺𑀭𑀁,

𑀤𑁂𑀯𑀭𑀸𑀚𑀯𑀺𑀮𑀸𑀲𑁂𑀦 𑀦𑀺𑀲𑀻𑀤𑀺 𑀧𑀯𑀭𑀸𑀲𑀦𑁂;

𑁬𑁪.

𑀅𑀣𑀸𑀕𑀫𑁆𑀫 𑀢𑀤𑀸 𑀦𑁂𑀓𑀦𑀸𑀝𑀺𑀓𑀸 𑀧𑀭𑀺𑀯𑀸𑀭𑀬𑀼𑀁,

𑀯𑀚𑁆𑀚𑀦𑁆𑀢𑀺 𑀪𑁂𑀭𑀺𑀬𑁄 𑀢𑀸𑀲𑀼 𑀧𑀕𑁆𑀕𑀬𑁆𑀳 𑀓𑀸𑀘𑀺 𑀦𑀸𑀭𑀺𑀬𑁄;

𑁬𑁫.

𑀦𑀸𑀦𑀸𑀮𑀬𑀲𑀫𑀸𑀓𑀺𑀡𑁆𑀡𑀁 𑀕𑀻𑀢𑀁 𑀕𑀸𑀬𑀦𑁆𑀢𑀺 𑀓𑀸𑀘𑀺’𑀧𑀺,

𑀥𑀫𑀦𑁆𑀢𑀺 𑀲𑀼𑀲𑀺𑀭𑀁 𑀓𑀸𑀘𑀺 𑀓𑀸𑀘𑀺 𑀯𑀸𑀤𑁂𑀦𑁆𑀢𑀺 𑀢𑀦𑁆𑀢𑀺𑀬𑁄;

𑁬𑁬. ¶

𑀘𑀸𑀭𑀼 𑀩𑀺𑀫𑁆𑀩𑀸𑀥𑀭𑀸𑀭𑀫𑁆𑀫 𑀧𑀬𑁄𑀥𑀭𑀪𑀭𑀸 𑀲𑀼𑀪𑀸,

𑀯𑀺𑀲𑀸𑀮𑀸𑀬𑀢 𑀦𑀻𑀮𑀓𑁆𑀔𑀸 𑀲𑁄𑀫𑀲𑁄𑀫𑁆𑀫𑀸𑀦𑀦𑀸 𑀢𑀤𑀸;

𑁬𑁭.

𑀦𑀘𑁆𑀘𑀦𑁆𑀢𑀺 𑀧𑀼𑀭𑀢𑁄 𑀢𑀲𑁆𑀲 𑀪𑁂𑀭𑀺𑀫𑀡𑁆𑀟𑀮 𑀫𑀚𑁆𑀛𑀕𑀸,

𑀤𑁂𑀯𑀓𑀜𑁆𑀜𑀸𑀯 𑀭𑀗𑁆𑀕𑀫𑁆𑀳𑀻 𑀭𑀲𑀪𑀸𑀯𑀦𑀺𑀭𑀦𑁆𑀢𑀭𑀁;

𑁬𑁮.

𑀤𑀺𑀲𑁆𑀯𑀸𑀦 𑀲𑁄 𑀢𑀫𑀘𑁆𑀙𑀭𑀺𑀬𑀁 𑀯𑀺𑀭𑀢𑁆𑀢𑁄 𑀯𑀺𑀲𑀬𑁂 𑀢𑀤𑀸,

𑀉𑀭𑀢𑁆𑀢𑀸𑀴𑀜𑁆𑀘 𑀅𑀤𑁆𑀤𑀓𑁆𑀔𑀺 𑀲𑀩𑁆𑀩𑀦𑁆𑀢𑀁 𑀪𑁂𑀭𑀺𑀢𑀸𑀴𑀦𑀁;

𑁬𑁯.

𑀧𑀭𑀺𑀤𑁂𑀯𑀁’𑀘𑀼𑀧𑀝𑁆𑀞𑀸𑀲𑀺 𑀕𑀻𑀢𑀁 𑀲𑀁𑀲𑀸𑀭𑀲𑀸𑀕𑀭𑁂,

𑀯𑀸𑀬𑀼𑀯𑁂𑀕 𑀯𑀺𑀓𑀸𑀭𑀁’𑀯 𑀦𑀘𑁆𑀘𑀁 𑀘𑀺𑀦𑁆𑀢𑁂𑀲𑀺 𑀦𑀸𑀬𑀓𑁄;

𑁭𑁦.

’𑀓𑀤𑀸𑀳𑀁 𑀖𑀭𑀫𑁄𑀲𑁆𑀲𑀚𑁆𑀚 𑀧𑀩𑁆𑀩𑀚𑁆𑀚𑀸𑀲𑀺𑀭𑀺 𑀫𑀼𑀩𑁆𑀩𑀳𑁂?’

𑀇𑀘𑁆𑀘𑁂𑀯𑀁 𑀘𑀺𑀦𑁆𑀢𑀬𑀦𑁆𑀢𑁄 𑀲𑁄 𑀲𑀼𑀧𑀦𑁆𑀢𑁄𑀯 𑀲𑀬𑀻 𑀢𑀳𑀺𑀁;

𑁭𑁧.

’𑀬𑀁 𑀦𑀺𑀲𑁆𑀲𑀸𑀬 𑀫𑀬𑀁 𑀏𑀢𑁆𑀣 𑀦𑀘𑁆𑀘𑀕𑀻𑀢𑁂𑀲𑀼 𑀯𑁆𑀬𑀸𑀯𑀝𑀸,

𑀲𑁄’𑀬𑀁’𑀤𑀸𑀦𑀺 𑀲𑀼𑀧𑀻’ 𑀅𑀫𑁆𑀳𑁂 𑀓𑀲𑁆𑀲𑀤𑀸𑀦𑀺 𑀓𑀭𑁄𑀫 𑀢𑀁?;

𑁭𑁨.

𑀇𑀢𑀺 𑀘𑀺𑀦𑁆𑀢𑀺𑀬 𑀢𑁂 𑀢𑀢𑁆𑀣 𑀢𑀼𑀭𑀺𑀬𑁂𑀲𑀼 𑀲𑀓𑁂 𑀲𑀓𑁂,

𑀆𑀮𑀫𑁆𑀩𑀸 𑀲𑀬𑀺𑀢𑀸 𑀓𑀜𑁆𑀜𑀸 𑀲𑀼𑀲𑀜𑁆𑀜𑀸𑀜𑁆𑀜𑀫𑀦𑀺𑀲𑁆𑀲𑀺𑀢𑀸;

𑁭𑁩.

𑀔𑀸𑀤𑀦𑁆𑀢𑀺 𑀓𑀸𑀘𑀺 𑀤𑀦𑁆𑀢𑀸𑀦𑀺 𑀓𑀸𑀘𑀺 𑀮𑀸𑀮𑀸 𑀯𑀳𑀦𑁆𑀢𑀺𑀬𑁄,

𑀓𑀸𑀘𑀺 𑀭𑀼𑀤𑀦𑁆𑀢𑀺𑀬𑁄 𑀢𑀢𑁆𑀣 𑀯𑀺𑀮𑀧𑀦𑁆𑀢𑀺 𑀅𑀣𑀸’𑀧𑀭𑀸;

𑁭𑁪.

𑀓𑀸𑀓𑀘𑁆𑀙𑀦𑁆𑀢𑀺’𑀧𑀺 𑀲𑁂𑀫𑁆𑀳𑀫𑁆𑀧𑀺 𑀕𑀺𑀮𑀦𑁆𑀢𑀺 𑀘 𑀘𑀫𑀦𑁆𑀢𑀺 𑀘,

𑀓𑀭𑁄𑀦𑁆𑀢𑀺 𑀦𑀸𑀤𑀁 𑀦𑀸𑀲𑀸𑀬 𑀖𑀭𑀽’𑀢𑀺 𑀘 𑀔𑀺𑀧𑀦𑁆𑀢𑀺 𑀘;

𑁭𑁫.

𑀫𑀼𑀢𑁆𑀢𑀬𑀦𑁆𑀢𑀺 𑀢𑀤𑀸 𑀓𑀸𑀘𑀺 𑀭𑀳𑀲𑁆𑀲𑀁 𑀯𑀺𑀘𑀭𑀦𑁆𑀢𑀺 𑀘,

𑀤𑀼𑀕𑁆𑀕𑀦𑁆𑀥𑀁 𑀯𑀸𑀢𑀺 𑀢𑀁 𑀞𑀸𑀦𑀁 𑀲𑀼𑀲𑀸𑀦𑀁 𑀆𑀫𑀓𑀁 𑀬𑀣𑀸;

𑁭𑁬.

𑀧𑀩𑀼𑀤𑁆𑀥𑁄 𑀅𑀟𑁆𑀠𑀭𑀢𑁆𑀢𑀫𑁆𑀳𑀺 𑀕𑀢𑁂 𑀢𑀢𑁆𑀣 𑀦𑀺𑀲𑀻𑀤𑀺𑀬,

𑀅𑀤𑁆𑀤𑀓𑁆𑀔𑀺 𑀢𑀸𑀲𑀁 𑀦𑁂𑀓𑀸𑀦𑀺 𑀯𑀺𑀓𑀸𑀭𑀸𑀦𑀺 𑀢𑀳𑀺𑀁 𑀢𑀤𑀸;

𑁭𑁭.

𑀢𑀲𑁆𑀲𑁂𑀯𑀁 𑀧𑁂𑀓𑁆𑀔𑀫𑀸𑀦𑀲𑁆𑀲 𑀪𑀯𑁂 𑀲𑀁𑀯𑀺𑀕𑁆𑀕𑀘𑁂𑀢𑀲𑁄,

𑀆𑀤𑀺𑀢𑁆𑀢𑀁𑀯 𑀉𑀧𑀝𑁆𑀞𑀸𑀲𑀺 𑀫𑀦𑁂 𑀔𑀮𑀼 𑀪𑀯𑀢𑁆𑀢𑀬𑀁;

𑁭𑁮. ¶

𑀤𑀸𑀯𑀸𑀦𑀮 𑀲𑀫𑀸𑀤𑀺𑀢𑁆𑀢 𑀫𑀳𑀸𑀭𑀜𑁆𑀜𑀸𑀬𑀣𑀸 𑀕𑀚𑁄,

𑀢𑀣𑁂𑀯𑀸𑀲𑀺 𑀦𑀭𑀺𑀦𑁆𑀤𑀲𑁆𑀲 𑀕𑁂𑀳𑀢𑁄 𑀕𑀫𑀦𑁂 𑀫𑀢𑀻;

𑁭𑁯.

𑀢𑀢𑁄 𑀯𑀼𑀝𑁆𑀞𑀸𑀬 𑀲𑀬𑀦𑀸 𑀓𑀭𑁄𑀦𑁆𑀢𑁄 𑀅𑀪𑀺𑀦𑀺𑀓𑁆𑀔𑀫𑀁,

𑀯𑀺𑀢𑀓𑁆𑀓𑁂𑀲𑀺 𑀫𑀳𑀸𑀭𑀸𑀚𑀸 𑀧𑀲𑁆𑀲𑀺𑀢𑀼𑀁 𑀲𑀓𑀫𑀢𑁆𑀭𑀚𑀁;

𑁮𑁦.

𑀧𑀯𑀺𑀲𑀺𑀢𑁆𑀯𑀸 𑀢𑀢𑁄 𑀕𑀩𑁆𑀪𑀁 𑀲𑀦𑀺𑀓𑀁 𑀲𑀦𑁆𑀢𑀫𑀸𑀦𑀲𑁄,

𑀧𑀲𑁆𑀲𑀺𑀢𑁆𑀯𑀸 𑀲𑀳 𑀧𑀼𑀢𑁆𑀢𑁂𑀦 𑀦𑀺𑀤𑁆𑀤𑀸𑀬𑀦𑁆𑀢𑀺𑀁 𑀬𑀲𑁄𑀥𑀭𑀁;

𑁮𑁧.

𑀘𑀺𑀭𑀸𑀕𑀢𑀁 𑀫𑀳𑀸𑀧𑁂𑀫𑀁 𑀥𑀸𑀭𑀬𑀁 𑀲𑀓𑀫𑀸𑀦𑀲𑁂,

𑀩𑀼𑀤𑁆𑀥𑁄 𑀳𑀼𑀢𑁆𑀯𑀸𑀧𑀺’𑀫𑀁 𑀲𑀓𑁆𑀓𑀸 𑀧𑀲𑁆𑀲𑀺𑀢𑀼𑀁 𑀇𑀢𑀺 𑀘𑀺𑀦𑁆𑀢𑀺𑀬;

𑁮𑁨.

𑀕𑀢𑁄 𑀦𑀸𑀣𑁄 𑀢𑀢𑁄 𑀞𑀸𑀦𑀸 𑀩𑁄𑀥𑀺𑀬𑀸 𑀩𑀤𑁆𑀥𑀫𑀸𑀦𑀲𑁄

𑀢𑀤𑀳𑁂𑀯𑀸𑀲𑀺 𑀩𑀼𑀤𑁆𑀥𑁄𑀢𑀺 𑀓𑀸𑀫𑀼𑀓𑁄 𑀓𑁄 𑀦 𑀘𑀺𑀦𑁆𑀢𑀬𑁂;

𑁮𑁩.

𑀲𑀺𑀦𑁂𑀭𑀼 𑀫𑀼𑀤𑁆𑀥𑀭𑀦𑁆𑀢𑁄𑀯 𑀧𑀸𑀤𑀼𑀤𑁆𑀥𑀭𑀺𑀬 𑀦𑀺𑀓𑁆𑀔𑀫𑀁,

𑀙𑀦𑁆𑀦𑀫𑀸𑀳𑀽𑀬 𑀆𑀦𑀻𑀢𑀁 𑀓𑀦𑁆𑀣𑀓𑀁 𑀢𑀼𑀭𑀕𑀸𑀥𑀺𑀧𑀁;

𑁮𑁪.

𑀅𑀲𑁆𑀲𑀭𑀸𑀚𑀁 𑀢𑀫𑀸𑀭𑀼𑀬𑁆𑀳 𑀲𑀳 𑀙𑀦𑁆𑀦𑁂𑀦 𑀭𑀢𑁆𑀢𑀺𑀬𑀁,

𑀤𑁂𑀯𑁂𑀳𑀺 𑀯𑀺𑀯𑀝𑀤𑁆𑀯𑀭𑀸 𑀧𑀝𑀺𑀧𑀚𑁆𑀚𑀺 𑀫𑀳𑀸𑀧𑀣𑀁;

𑁮𑁫.

𑀘𑀓𑁆𑀓𑀯𑀸𑀴𑁂𑀲𑀼 𑀦𑁂𑀓𑁂𑀲𑀼 𑀤𑁂𑀯𑀢𑀸 𑀲𑀼𑀲𑀫𑀸𑀕𑀢𑀸,

𑀤𑀻𑀧𑀥𑀽𑀧𑀤𑁆𑀥𑀚𑁂𑀳𑁂 𑀘 𑀕𑀦𑁆𑀥𑀫𑀸𑀮𑁂𑀳𑀺 𑀧𑀽𑀚𑀬𑀼𑀁;

𑁮𑁬.

𑀧𑀼𑀭𑀢𑁄 𑀲𑀝𑁆𑀞𑀻𑀲𑀳𑀲𑁆𑀲𑀸𑀦𑀺 𑀤𑀡𑁆𑀟𑀤𑀻𑀧𑀸𑀦𑀺 𑀥𑀸𑀭𑀬𑀼𑀁,

𑀢𑀣𑀸 𑀤𑀓𑁆𑀔𑀺𑀡𑀧𑀲𑁆𑀲𑀫𑁆𑀳𑀺 𑀯𑀸𑀫𑀧𑀲𑁆𑀲𑁂 𑀘 𑀧𑀘𑁆𑀙𑀢𑁄;

𑁮𑁭.

𑀕𑀕𑀦𑀸 𑀧𑀼𑀧𑁆𑀨𑀯𑀲𑁆𑀲𑀸𑀦𑀺 𑀯𑀲𑁆𑀲𑀸𑀧𑁂𑀲𑀼𑀁 𑀙 𑀤𑁂𑀯𑀢𑀸,

𑀫𑀦𑁆𑀤𑀸𑀭𑀯𑀁 𑀓𑁄𑀓𑀦𑀤𑀁 𑀲𑀼𑀕𑀦𑁆𑀥𑀁 𑀘𑀺𑀢𑁆𑀢𑀧𑀸𑀝 𑀮𑀺𑀁;

𑁮𑁮.

𑀘𑀫𑁆𑀧𑀓𑀸 𑀲𑁄𑀓 𑀧𑀼𑀦𑁆𑀦𑀸𑀕 𑀦𑀸𑀕𑀧𑀽𑀕𑀸𑀕 𑀲𑀫𑁆𑀪𑀯𑀁,

𑀫𑀸𑀮𑀢𑀻𑀯𑀲𑁆𑀲𑀺𑀓𑀻𑀬𑀸𑀤𑀻 𑀦𑀸𑀦𑀸𑀯𑀮𑁆𑀮𑀻𑀳𑀺 𑀲𑀫𑁆𑀪𑀯𑀁;

𑁮𑁯.

𑀧𑀤𑀼𑀫𑀼𑀧𑁆𑀧𑀮 𑀓𑀮𑀳𑀸𑀭 𑀓𑀼𑀫𑀼𑀤𑀸𑀤𑁆𑀬𑀸𑀫𑁆𑀩𑀼 𑀲𑀫𑁆𑀪𑀯𑀁,

𑀲𑀼𑀕𑀦𑁆𑀥𑀫𑀥𑀼 𑀫𑀢𑁆𑀢𑀸𑀳𑀺 𑀙𑀧𑁆𑀧𑀤𑀸𑀮𑀻𑀳𑀺 𑀓𑀽𑀚𑀺𑀢𑀁;

𑁯𑁦. ¶

𑀧𑀼𑀧𑁆𑀨𑀯𑀲𑁆𑀲𑀁 𑀧𑀯𑀲𑁆𑀲𑀺𑀢𑁆𑀣 𑀢𑀺𑀁𑀲𑀬𑁄𑀚𑀦𑀫𑀜𑁆𑀚𑀲𑁂,

𑀧𑀲𑀢𑁆𑀢𑁄 𑀢𑀢𑁆𑀣 𑀢𑀼𑀭𑀕𑁄 𑀤𑀼𑀓𑁆𑀔𑀢𑁄 𑀅𑀕𑀫𑀻 𑀢𑀤𑀸;

𑁯𑁧.

𑀏𑀯𑀁 𑀧𑀽𑀚𑀸𑀯𑀺𑀥𑀸𑀦𑁂𑀳𑀺 𑀕𑀦𑁆𑀢𑁆𑀯𑀸’𑀦𑁄𑀫𑀁 𑀫𑀳𑀸𑀦𑀤𑀺𑀁,

𑀲𑀺𑀢𑀲𑁂𑀓𑀢 𑀲𑀗𑁆𑀓𑀺𑀡𑁆𑀡𑀁 𑀩𑀳𑀼𑀫𑀻𑀦𑀓𑀼𑀮𑀸𑀓𑀼𑀮𑀁;

𑁯𑁨.

𑀢𑀻𑀭𑀝𑁆𑀞𑁄 𑀧𑀲𑁆𑀲𑀺 𑀲𑁄 𑀥𑀻𑀭𑁄 𑀕𑀗𑁆𑀕𑀸𑀦𑀸𑀭𑀺𑀁 𑀭𑀲𑀸𑀯𑀳𑀁,

𑀓𑀭𑁄𑀦𑁆𑀢𑀺𑀁 𑀯𑀻𑀘𑀺𑀩𑀸𑀪𑀸𑀢𑀺 𑀏𑀡𑁂𑀧𑀼𑀧𑁆𑀨𑁄𑀧𑀳𑀸𑀭𑀓𑀁;

𑁯𑁩.

𑀅𑀲𑁆𑀲𑁂𑀦 𑀢𑀁 𑀫𑀳𑀸𑀦𑁄𑀫𑀁 𑀮𑀗𑁆𑀖𑀸𑀧𑁂𑀢𑁆𑀯𑀸 𑀫𑀳𑀸𑀫𑀢𑀻,

𑀧𑀭𑀢𑀻𑀭𑁂 𑀧𑀢𑀺𑀝𑁆𑀞𑀸𑀲𑀺 𑀯𑀺𑀫𑀮𑁂 𑀯𑀸𑀮𑀼𑀓𑀸 𑀢𑀮𑁂;

𑁯𑁪.

𑀧𑀩𑁆𑀩𑀚𑀺𑀢𑀼𑀁 𑀫𑀬𑁂𑀢𑁆𑀣𑁂𑀯 𑀬𑀼𑀢𑁆𑀢𑀁 𑀦𑁄 𑀫𑁂 𑀧𑀧𑀜𑁆𑀘𑀺𑀢𑀼𑀁,

𑀇𑀢𑀺 𑀘𑀺𑀦𑁆𑀢𑀺𑀬 𑀑𑀪𑀸𑀬 𑀥𑀸𑀭𑀺𑀢𑀸𑀪𑀭𑀡𑀸𑀦𑀺 𑀲𑁄;

𑁯𑁫.

𑀙𑀦𑁆𑀦𑀲𑁆𑀲 𑀧𑀝𑀺𑀬𑀸𑀤𑁂𑀢𑁆𑀯𑀸 𑀓𑀦𑁆𑀣𑀓𑀜𑁆𑀘 𑀳𑀬𑀸𑀥𑀺𑀧𑀁,

𑀦𑀺𑀲𑀺𑀢𑀁 𑀔𑀕𑁆𑀕𑀫𑀼𑀕𑁆𑀕𑀬𑁆𑀳 𑀲𑀫𑁄𑀮𑀺𑀁 𑀙𑀺𑀦𑁆𑀤𑀺 𑀓𑀼𑀦𑁆𑀢𑀮𑀁;

𑁯𑁬.

𑀏𑀯𑀫𑀸𑀯𑀚𑁆𑀚𑀬𑀁 𑀦𑀸𑀣𑁄 𑀲𑀘𑁂’𑀳𑀁 𑀲𑀼𑀕𑀢𑁄 𑀪𑀯𑁂,

𑀢𑀺𑀝𑁆𑀞𑀢𑀼 𑀕𑀕𑀦𑁂 𑀕𑀦𑁆𑀢𑁆𑀯𑀸 𑀇𑀢𑀺 𑀉𑀓𑁆𑀔𑀺𑀧𑀺 𑀘’𑀫𑁆𑀩𑀭𑀁;

𑁯𑁭.

𑀢𑀢𑁄 𑀲𑀓𑁆𑀓𑁄 𑀫𑀳𑀕𑁆𑀖𑁂𑀦 𑀫𑀡𑀺𑀘𑀗𑁆𑀕𑁄𑀝𑀓𑁂𑀦 𑀢𑀁,

𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀺𑀭𑀲𑀁 𑀦𑁂𑀢𑁆𑀯𑀸 𑀤𑁂𑀯𑀧𑀼𑀭𑀁 𑀘𑀭𑀁;

𑁯𑁮.

𑀓𑀸𑀭𑁂𑀢𑁆𑀯𑀸 𑀫𑀡𑀺𑀣𑀽𑀧𑀁 𑀲𑁄 𑀦𑀻𑀥𑁂𑀢𑁆𑀯𑀸 𑀢𑀁 𑀲𑀺𑀭𑁄𑀭𑀼𑀳𑀁,

𑀅𑀢𑁆𑀣𑀸𑀳𑀁 𑀧𑀢𑀺𑀫𑀸𑀦𑁂𑀢𑀺 𑀲𑀳𑀤𑁂𑀯𑁂𑀳𑀺 𑀦𑁂𑀓𑀥𑀸;

𑁯𑁯.

𑀫𑀳𑀸𑀩𑁆𑀭𑀳𑁆𑀫𑁄𑀧𑀦𑀻𑀢𑀝𑁆𑀞𑀧𑀭𑀺𑀓𑁆𑀔𑀸𑀭𑀁 𑀫𑀳𑀸𑀫𑀢𑀻,

𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀓𑀸𑀲𑀸𑀯𑀁 𑀦𑀺𑀯𑀢𑁆𑀣𑁄 𑀧𑀸𑀭𑀼𑀢𑁄 𑀢𑀤𑀸;

𑁧𑁦𑁦.

𑀧𑀼𑀩𑁆𑀩𑁂 𑀯𑀺𑀬𑀫𑁆𑀩𑀭𑀁 𑀕𑀬𑁆𑀳 𑀅𑀫𑁆𑀩𑀭𑁂 𑀔𑀺𑀧𑀺 𑀦𑀸𑀬𑀓𑁄,

𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀁 𑀩𑁆𑀭𑀳𑁆𑀫𑀸 𑀦𑁂𑀢𑁆𑀯𑀸 𑀩𑁆𑀭𑀳𑁆𑀫𑀧𑀼𑀭𑀁 𑀘𑀭𑀁;

𑁧𑁦𑁧.

𑀤𑁆𑀯𑀸𑀤𑀲𑀬𑁄𑀚𑀦𑀼𑀩𑁆𑀩𑁂𑀥𑀁 𑀓𑀢𑁆𑀯𑀸 𑀣𑀽𑀧𑀯𑀭𑀁 𑀲𑀼𑀪𑀁,

𑀢𑀢𑁆𑀣 𑀢𑀁 𑀦𑀺𑀤𑀳𑀺𑀢𑁆𑀯𑀸𑀦 𑀧𑀡𑀺𑀧𑀸𑀢𑁂𑀢𑀺 𑀲𑀩𑁆𑀩𑀤𑀸;

𑁧𑁦𑁨. ¶

𑀲𑀫𑁆𑀧𑀼𑀡𑁆𑀡 𑀫𑀦𑀲𑀗𑁆𑀓𑀧𑁆𑀧𑁄 𑀧𑀩𑁆𑀩𑀚𑁆𑀚𑀸𑀲𑀺𑀭𑀺 𑀫𑀼𑀩𑁆𑀩𑀳𑀁,

𑀙𑀸𑀤𑁂𑀦𑁆𑀢𑁄 𑀓𑀸𑀫𑀮𑁂𑀦𑁂𑀯 𑀫𑀭𑀼𑀁 𑀘𑀗𑀓𑁆𑀓𑀫𑀺 𑀦𑀸𑀬𑀓𑁄;

𑁧𑁦𑁩.

𑀢𑀢𑁄 𑀅𑀫𑁆𑀩𑀯𑀦𑀁 𑀕𑀦𑁆𑀢𑁆𑀯𑀸 𑀯𑀺𑀦𑁆𑀤𑀦𑁆𑀢𑁄 𑀧𑀻𑀢𑀺𑀚𑀁 𑀲𑀼𑀔𑀁,

𑀯𑀻𑀢𑀺𑀦𑀸𑀫𑀬𑀺 𑀲𑀢𑁆𑀢𑀸𑀳𑀁 𑀭𑀫𑁆𑀫𑁂 𑀧𑀸𑀤𑀧𑀫𑀡𑁆𑀟𑀧𑁂;

𑁧𑁦𑁪.

𑀢𑀢𑁄 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀧𑀸𑀭𑀼𑀧𑀺𑀢𑁆𑀯𑀸 𑀘𑀻𑀯𑀭𑀁,

𑀕𑀳𑁂𑀢𑁆𑀯𑀸 𑀫𑀡𑀺𑀯𑀡𑁆𑀡𑀁 𑀲𑁄 𑀧𑀢𑁆𑀢𑀁 𑀓𑀭𑀢𑀮𑀫𑁆𑀩𑀼𑀚𑀸;

𑁧𑁦𑁫.

𑀩𑀢𑁆𑀢𑀺𑀁𑀲 𑀮𑀓𑁆𑀔𑀡𑀽𑀧𑁂𑀢𑁄 𑀅𑀦𑀼𑀩𑁆𑀬𑀜𑁆𑀚𑀦 𑀫𑀡𑁆𑀟𑀺𑀢𑁄,

𑀩𑁆𑀭𑀳𑁆𑀫𑀼𑀚𑁆𑀚𑀼𑀕𑀢𑁆𑀢𑁄 𑀪𑀕𑀯𑀸 𑀧𑀼𑀭𑀲𑁂𑀝𑁆𑀞𑀫𑀼𑀧𑀸𑀕𑀫𑀺;

𑁧𑁦𑁬.

𑀯𑀺𑀲𑀺𑀔𑀦𑁆𑀢𑀭𑁂𑀦 𑀕𑀘𑁆𑀙𑀦𑁆𑀢𑀁 𑀮𑁄𑀓𑁂𑀓𑀦𑀬𑀦𑀁 𑀚𑀦𑀸,

𑀤𑀺𑀲𑁆𑀯𑀸 𑀏𑀯𑀁 𑀯𑀺𑀘𑀺𑀦𑁆𑀢𑁂𑀲𑀼𑀁 𑀦𑀸𑀬𑀁 𑀬𑁄 𑀲𑁄 𑀚𑀦𑀸𑀥𑀺𑀧𑁄;

𑁧𑁦𑁭.

𑀓𑀸𑀫𑀁 𑀧𑀼𑀭𑀯𑀥𑀼𑀲𑁄𑀫𑁆𑀫 𑀯𑀢𑁆𑀢𑀲𑀫𑁆𑀩𑀦𑁆𑀥𑀓𑀸𑀭𑀡𑀸,

𑀘𑀦𑁆𑀤𑁄’𑀬𑀫𑀸𑀕𑀢𑁄 𑀅𑀚𑁆𑀚 𑀲𑀓𑀯𑁂𑀲𑁂𑀦 𑀦𑁄 𑀫𑀢𑀺;

𑁧𑁦𑁮.

𑀲𑀼𑀢𑁆𑀯𑀸𑀦 𑀢𑀁 𑀢𑀤𑀸 𑀓𑁂𑀘𑀺 𑀳𑀲𑀦𑁆𑀢𑀸 𑀯𑀘𑀦𑀦𑁆𑀢𑀭𑀁,

𑀦𑀸𑀬𑀁 𑀲𑀲𑀻 𑀲𑀲𑀗𑁂𑀓𑀸 𑀲𑁄 𑀪𑀸𑀦𑀼𑀫𑁂𑀲𑁄’𑀢𑀺 𑀦𑁄 𑀫𑀢𑀺;

𑁧𑁦𑁯.

𑀩𑁄𑀥𑁂𑀢𑀼𑀫𑀸𑀕𑀢𑁄 𑀓𑀸𑀫𑀁 𑀧𑁄𑀭𑀻𑀦𑀁 𑀯𑀤𑀦𑀫𑁆𑀩𑀼𑀚𑁂,

𑀲𑀓𑀻𑀬𑁂𑀦𑁂𑀯 𑀭𑀽𑀧𑁂𑀦 𑀯𑀺𑀫𑁆𑀳𑀬𑀁 𑀧𑁄𑀭𑀺𑀫𑀸𑀦𑀼𑀲𑁂;

𑁧𑁧𑁦.

𑀓𑀺𑀁 𑀪𑁄 𑀉𑀫𑁆𑀫𑀢𑁆𑀢𑀓𑀸 𑀅𑀢𑁆𑀣 𑀏𑀯𑀁 𑀫𑀸 𑀯𑀤𑀣𑀸’𑀥𑀼𑀦𑀸,

𑀲𑀢𑀭𑀁𑀲𑀻 𑀉𑀡𑁆𑀳𑀭𑀁𑀲𑀻 𑀦 𑀲𑁄 𑀏𑀲𑁄 𑀅𑀯𑀺𑀕𑁆𑀕𑀳𑁄;

𑁧𑁧𑁧.

𑀓𑀸𑀫𑁂𑀦𑀸𑀮𑀲𑀚𑀦𑁆𑀢𑀼𑀳𑀺 𑀓𑀻𑀴𑀺𑀢𑀼𑀁 𑀧𑀼𑀭𑀫𑀸𑀕𑀢𑁄,

𑀲𑀭𑀽𑀧𑁂𑀦 𑀦 𑀦𑁄 𑀅𑀢𑁆𑀣𑀺 𑀲𑀁𑀲𑀬𑁄 𑀩𑀮𑀼 𑀫𑀸𑀦𑀲𑁂;

𑁧𑁧𑁨.

𑀢𑁂𑀲𑀁 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀳𑀲𑀦𑁆𑀢𑀸 𑀓𑁂𑀘𑀺 𑀚𑀦𑁆𑀢𑀼𑀦𑁄,

𑀢𑀼𑀫𑁆𑀳𑁂 𑀔𑀮𑀽 𑀦 𑀚𑀸𑀦𑀸𑀣 𑀲𑀩𑀸𑀡𑁂 𑀲𑀥𑀦𑀽 𑀳𑀺 𑀲𑁄;

𑁧𑁧𑁩.

𑀇𑀲𑁆𑀲𑀭𑁄 𑀓𑀦𑁆𑀢𑀭𑀽𑀧𑁂𑀦 𑀢𑀼𑀗𑁆𑀕𑀫𑀦𑁆𑀤𑀺𑀭𑀢𑀸 𑀧𑀼𑀭𑀁,

𑀓𑁂𑀮𑀸𑀲𑁄 𑀇𑀢𑀺 𑀲𑀫𑁆𑀧𑀢𑁆𑀢𑁄 𑀚𑀳𑀸𑀣 𑀯𑀺𑀫𑀢𑀺𑀁 𑀇𑀥;

𑁧𑁧𑁪. ¶

𑀢𑁂𑀲𑀫𑁆𑀧𑀺 𑀯𑀘𑀦𑀁 𑀲𑀼𑀢𑁆𑀯𑀸 𑀳𑀲𑀦𑁆𑀢𑁂𑀓𑁂 𑀚𑀦𑀸 𑀢𑀤𑀸,

𑀦𑀸𑀬𑀁 𑀳𑀭𑁄 𑀢𑀺𑀦𑁂𑀢𑁆𑀢𑁄 𑀲𑁄 𑀓𑁂𑀲𑀯𑁂𑀲𑁄 𑀇𑀥𑀸𑀕𑀢𑁄;

𑁧𑁧𑁫.

𑀯𑀺𑀘𑀺𑀡𑀦𑁆𑀢𑁄 𑀲𑀺𑀭𑀺𑀁 𑀅𑀚𑁆𑀚 𑀧𑀼𑀭𑀲𑁂𑀝𑁆𑀞𑀫𑀼𑀧𑀸𑀕𑀢𑀁,

𑀯𑁂𑀲𑁂𑀦𑀜𑁆𑀜𑁂𑀦 𑀫𑀜𑁆𑀜𑀸𑀫 𑀏𑀢𑁆𑀣 𑀦𑁄 𑀦𑀢𑁆𑀣𑀺 𑀲𑀁𑀲𑀬𑁄;

𑁧𑁧𑁬.

𑀧𑀳𑀭𑀺𑀢𑁆𑀯𑀸 𑀓𑀭𑀁 𑀓𑁂𑀘𑀺 𑀲𑀼𑀢𑁆𑀯𑀸 𑀢𑀁 𑀯𑀘𑀦𑀁 𑀦𑀭𑀸,

𑀳𑀲𑀦𑁆𑀢𑁂𑀯𑀁 𑀢𑀤𑀸𑀯𑁄𑀘𑀼𑀁 𑀯𑀸𑀲𑀼𑀤𑁂𑀯𑁄 𑀦 𑀯𑁂 𑀅𑀬𑀁;

𑁧𑁧𑁭.

𑀓𑀸𑀫𑀁 𑀲𑀭𑁄𑀚𑀦𑀸𑀪𑁄 𑀲𑁄 𑀯𑀸𑀫𑀦𑁄 𑀓𑀡𑁆𑀳𑀯𑀺𑀕𑁆𑀕𑀳𑁄,

𑀅𑀬𑀫𑀜𑁆𑀜𑀢𑀭𑀘𑀡𑁆𑀡𑁂𑀦 𑀆𑀕𑀢𑁄 𑀧𑀸𑀓𑀲𑀸𑀲𑀦𑁄;

𑁧𑁧𑁮.

𑀧𑀼𑀭𑀁 𑀤𑁂𑀯𑀧𑀼𑀭𑀦𑁆𑀢𑁂𑀢𑀁 𑀫𑀜𑁆𑀜𑀫𑀸𑀦𑁄 𑀫𑀳𑀸𑀚𑀼𑀢𑀺𑀁,

𑀧𑀲𑁆𑀲𑀺𑀢𑀼𑀦𑁆𑀢𑀺 𑀧𑀝𑀺𑀜𑁆𑀜𑀸𑀢𑁄 𑀫𑀸 𑀪𑁄𑀦𑁆𑀢𑁄 𑀯𑀺𑀮𑀧𑀦𑁆𑀢𑀼 𑀯𑁂;

𑁧𑁧𑁯.

𑀲𑀼𑀢𑁆𑀯𑀸 𑀢𑁂𑀲𑀁 𑀕𑀺𑀭𑀁 𑀓𑁂𑀘𑀺 𑀓𑁂𑀴𑀺𑀁 𑀓𑀢𑁆𑀯𑀸𑀦 𑀦𑁂𑀓𑀥𑀸,

𑀢𑀼𑀫𑁆𑀳𑁂 𑀲𑀓𑁆𑀓𑀁 𑀦 𑀚𑀸𑀦𑀸𑀣 𑀲𑁄 𑀳𑀺 𑀪𑁄 𑀯𑀚𑀺𑀭𑀸𑀬𑀼𑀥𑁄;

𑁧𑁨𑁦.

𑀏𑀲𑁄 𑀳𑀺 𑀪𑁄 𑀫𑀳𑀸𑀩𑁆𑀭𑀳𑁆𑀫𑀸 𑀩𑁆𑀭𑀳𑁆𑀫𑀮𑁄𑀓𑀸 𑀇𑀥𑀸𑀕𑀢𑁄,

𑀧𑀫𑀢𑁆𑀢𑀸 𑀓𑀺𑀦𑁆𑀦𑀼 𑀯𑁂𑀤𑀫𑁆𑀳𑀻 𑀩𑁆𑀭𑀳𑁆𑀫𑀩𑀦𑁆𑀥𑀼 𑀧𑀼𑀭𑁂 𑀇𑀥;

𑁧𑁨𑁧.

𑀅𑀣𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀓𑁂𑀘𑀺 𑀧𑀡𑁆𑀟𑀺𑀢𑀚𑀸𑀢𑀺𑀓𑀸,

𑀦𑁂𑀢𑁂 𑀘𑀦𑁆𑀤𑀸𑀤𑀬𑁄 𑀓𑀸𑀫𑀁 𑀫𑀸 𑀫𑁄𑀳𑀁 𑀪𑁄 𑀧𑀓𑀸𑀲𑀣;

𑁧𑁨𑁨.

𑀘𑀢𑀼𑀭𑀸𑀦𑀦𑁄 𑀫𑀳𑀸𑀩𑁆𑀭𑀳𑁆𑀫𑀸 𑀲𑁄𑀫𑀲𑁄𑀫𑁆𑀫𑀸𑀦𑀦𑁄 𑀅𑀬𑀁,

𑀲𑀫𑀦𑁆𑀢𑀧𑁄𑀢𑁆𑀣𑀓𑁄 𑀩𑁆𑀭𑀳𑁆𑀫𑀸 𑀧𑀢𑁆𑀢𑀳𑀢𑁆𑀣𑁄’𑀬𑀫𑀩𑁆𑀪𑀼𑀢𑁄;

𑁧𑁨𑁩.

𑀓𑀸𑀫𑀁 𑀧𑀸𑀭𑀫𑀺𑀢𑀸𑀧𑀼𑀡𑁆𑀡 𑀧𑀲𑀢𑁆𑀣𑁄 𑀧𑀼𑀭𑀺𑀲𑁄 𑀅𑀬𑀁,

𑀦𑀺𑀘𑁆𑀘𑀁 𑀯𑀦𑁆𑀤𑀣 𑀧𑀽𑀚𑁂𑀣 𑀣𑁄𑀫𑁂𑀣𑁂𑀢𑀁 𑀫𑀳𑀸𑀚𑀼𑀢𑀺𑀁;

𑁧𑁨𑁪.

𑀏𑀯𑀁 𑀯𑀤𑀦𑁆𑀢𑀸 𑀲𑀩𑁆𑀩𑁂 𑀢𑁂 𑀦𑀸𑀕𑀭𑀸 𑀧𑀼𑀭𑀺𑀲𑀼𑀢𑁆𑀢𑀫𑀁,

𑀕𑀦𑁆𑀥𑀧𑀼𑀧𑁆𑀨𑁂𑀳𑀺 𑀧𑀼𑀚𑁂𑀦𑁆𑀢𑀸 𑀦𑀫𑀲𑁆𑀲𑀦𑁆𑀢𑀸 𑀢𑀫𑀦𑁆𑀯𑀕𑀼𑀁;

𑁧𑁨𑁫.

𑀦𑁂𑀢𑁆𑀢𑀸𑀭𑀺𑀢𑁆𑀢𑁂𑀳𑀺 𑀧𑀸𑀚𑁂𑀦𑁆𑀢𑀸 𑀫𑀼𑀦𑀺𑀦𑁄 𑀭𑀽𑀧𑀲𑀸𑀕𑀭𑁂,

𑀚𑀦𑁆𑀢𑀯𑁄 𑀫𑀦𑀦𑀸𑀯𑀸𑀬𑁄 𑀧𑀸𑀭𑀁 𑀧𑀲𑁆𑀲𑀺𑀁𑀲𑀼 𑀦𑁄 𑀢𑀤𑀸;

𑁧𑁨𑁬. ¶

𑀢𑀤𑀸 𑀮𑁄𑀓𑁂𑀓𑀦𑀬𑀦𑁄 𑀲𑀧𑀤𑀸𑀦𑁂𑀦 𑀯𑀻𑀣𑀺𑀬𑀁,

𑀘𑀭𑀁 𑀬𑀸𑀧𑀦𑀫𑀢𑁆𑀢𑀁𑀯 𑀮𑀤𑁆𑀥𑀸𑀕𑀫𑁆𑀫 𑀧𑀼𑀭𑀸 𑀩𑀳𑀺;

𑁧𑁨𑁭.

𑀧𑀡𑁆𑀟𑀯𑀁 𑀕𑀺𑀭𑀺𑀫𑀸𑀲𑀚𑁆𑀚 𑀢𑀲𑁆𑀲𑀘𑁆𑀙𑀸𑀬𑀸𑀬 𑀲𑁄 𑀫𑀼𑀦𑀺;

𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀧𑁂𑀢𑁆𑀯𑀸𑀦 𑀦𑀺𑀲𑀚𑁆𑀚 𑀧𑀼𑀭𑀺𑀲𑀸𑀲𑀪𑁄;

𑁧𑁨𑁮.

𑀅𑀤𑀺𑀝𑁆𑀞𑀧𑀼𑀩𑁆𑀩𑀁 𑀤𑀺𑀲𑁆𑀯𑀸𑀦 𑀧𑀢𑁆𑀢𑁂 𑀫𑀺𑀲𑁆𑀲𑀓𑀪𑁄𑀚𑀦𑀁,

𑀲𑀜𑁆𑀚𑀸𑀢𑀧𑀝𑀺𑀓𑀽𑀮𑁄 𑀢𑀁 𑀦𑀼𑀤𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀸;

𑁧𑁨𑁯.

𑀅𑀫𑀢𑀁 𑀯𑀺𑀬 𑀢𑀁 𑀪𑀼𑀢𑁆𑀯𑀸 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀫𑀼𑀔𑀁 𑀤𑀓𑀸,

𑀧𑀢𑁆𑀢𑁂 𑀯𑀢𑁆𑀢𑀁 𑀘𑀭𑀺𑀢𑁆𑀯𑀸𑀦 𑀫𑀼𑀳𑀼𑀢𑁆𑀢𑀁 𑀢𑀢𑁆𑀣 𑀯𑀺𑀲𑁆𑀲𑀫𑀺;

𑁧𑁩𑁦.

𑀧𑀯𑀢𑁆𑀢𑀺𑀁 𑀢𑀁 𑀦𑀺𑀲𑀸𑀫𑁂𑀢𑁆𑀯𑀸 𑀩𑀺𑀫𑁆𑀩𑀺𑀲𑀸𑀭𑁄 𑀦𑀭𑀺𑀲𑁆𑀲𑀭𑁄,

𑀲𑀻𑀖𑀁 𑀢𑀫𑀼𑀧𑀕𑀦𑁆𑀢𑁆𑀯𑀸𑀦 𑀓𑀢𑀸𑀦𑀼𑀜𑁆𑀜𑁄 𑀦𑀺𑀲𑀻𑀤𑀺𑀬;

𑁧𑁩𑁧.

𑀦𑀺𑀫𑀦𑁆𑀢𑀬𑀺𑀢𑁆𑀯𑀸 𑀭𑀚𑁆𑀚𑁂𑀦 𑀅𑀦𑀺𑀘𑁆𑀙𑀦𑁆𑀢𑁂 𑀬𑀢𑀺𑀲𑁆𑀲𑀭𑁂,

𑀅𑀦𑀼𑀕𑁆𑀕𑀳𑀸𑀬 𑀫𑁂 𑀬𑀼𑀢𑁆𑀢𑀁 𑀩𑀼𑀤𑁆𑀥𑀪𑀽𑀢𑁂𑀦𑀺𑀥𑀸𑀕𑀫𑀁;

𑁧𑁩𑁨.

𑀏𑀯𑀁 𑀦𑀺𑀫𑀦𑁆𑀢𑀺𑀢𑁄 𑀢𑁂𑀦𑀸𑀥𑀺𑀯𑀸𑀲𑁂𑀢𑁆𑀯𑀸 𑀫𑀳𑀸𑀫𑀢𑀻,

𑀅𑀕𑀫𑀸𑀲𑀼𑀭𑀼𑀯𑁂𑀮𑀸𑀬 𑀫𑀢𑀼𑀮𑁄𑀭𑀼 𑀧𑀭𑀓𑁆𑀓𑀫𑁄;

𑁧𑁩𑁩.

𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀦 𑀙𑀩𑁆𑀩𑀲𑁆𑀲𑀫𑀢𑀺𑀤𑀼𑀓𑁆𑀓𑀭𑀁,

𑀧𑀓𑀸𑀲𑁂𑀢𑁆𑀯𑀸𑀦 𑀮𑁄𑀓𑀲𑁆𑀲 𑀫𑁄𑀓𑁆𑀔𑀁 𑀦𑀢𑁆𑀣𑀺𑀢𑀺 𑀢𑁂𑀦 𑀲𑁄;

𑁧𑁩𑁪.

𑀢𑀢𑁄𑀧𑁆𑀧𑀪𑀼𑀢𑀺 𑀯𑀢𑁆𑀢𑀦𑁆𑀢𑁄 𑀫𑀚𑁆𑀛𑀺𑀫𑀧𑁆𑀧𑀝𑀺 𑀧𑀢𑁆𑀢𑀺𑀬𑀁,

𑀓𑀸𑀬𑀲𑁆𑀲𑀸𑀦𑀼𑀕𑁆𑀕𑀳𑀁 𑀓𑀢𑁆𑀯𑀸 𑀢𑀢𑁄 𑀲𑀫𑁆𑀧𑀺𑀡𑀺𑀢𑀺’𑀦𑁆𑀤𑁆𑀭𑀺𑀬𑁄;

𑁧𑁩𑁫.

𑀫𑀽𑀮𑁂’𑀚𑀧𑀸𑀮𑀦𑀺𑀕𑁆𑀭𑁄𑀥𑀧𑀸𑀤𑀧𑀲𑁆𑀲 𑀫𑀳𑀸𑀫𑀼𑀦𑀺,

𑀦𑀺𑀲𑀻𑀤𑀺 𑀦𑀺𑀚𑀲𑁄𑀪𑀸𑀳𑀺 𑀑𑀪𑀸𑀲𑁂𑀦𑁆𑀢𑁄 𑀤𑀺𑀲𑁄𑀤𑀺𑀲𑀁;

𑁧𑁩𑁬.

𑀢𑀤𑀸 𑀲𑁂𑀦𑀸𑀦𑀺 𑀦𑀺𑀕𑀫𑁂 𑀲𑀼𑀚𑀸𑀢𑀸 𑀔𑀻𑀭 𑀤𑀸𑀬𑀺𑀓𑀸,

𑀲𑀫𑁆𑀧𑀼𑀡𑁆𑀡𑀫𑀦𑀲𑀗𑁆𑀓𑀧𑁆𑀧𑀸 𑀬𑀸𑀘𑀺𑀢𑁆𑀯𑀸 𑀯𑀝𑀤𑁂𑀯𑀢𑀁;

𑁧𑁩𑁭.

𑀥𑀻𑀭𑀁 𑀤𑁂𑀯𑁄𑀢𑀺 𑀫𑀜𑁆𑀜𑀦𑁆𑀢𑀺 𑀢𑀼𑀝𑁆𑀞𑀳𑀝𑁆𑀞𑀸 𑀧𑀫𑁄𑀤𑀺𑀢𑀸,

𑀳𑁂𑀫𑀧𑀸𑀢𑀺𑀁 𑀲𑀧𑀸𑀬𑀸𑀲𑀁 𑀤𑀢𑁆𑀯𑀸𑀦 𑀇𑀤𑀫’𑀩𑁆𑀭𑀼𑀯𑀺;

𑁧𑁩𑁮. ¶

𑀬𑀣𑀸 𑀫𑀬𑁆𑀳𑀁 𑀫𑀳𑀸𑀤𑁂𑀯 𑀇𑀤𑁆𑀥𑀸 𑀧𑀢𑁆𑀣𑀺𑀢 𑀧𑀢𑁆𑀣𑀦𑀸,

𑀢𑀣𑁂𑀯 𑀢𑀯 𑀲𑀗𑁆𑀓𑀧𑁆𑀧𑁄 𑀔𑀺𑀧𑁆𑀧𑀫𑁂𑀯 𑀲𑀫𑀺𑀚𑁆𑀛𑀢𑀼;

𑁧𑁩𑁯.

𑀇𑀢𑀺 𑀯𑀢𑁆𑀯𑀸𑀦 𑀯𑀦𑁆𑀤𑀺𑀢𑁆𑀯𑀸 𑀓𑀢𑁆𑀯𑀸 𑀘 𑀦𑀁 𑀧𑀤𑀓𑁆𑀔𑀺𑀡𑀁,

𑀧𑀓𑁆𑀓𑀦𑁆𑀢𑀸𑀬 𑀲𑀼𑀚𑀸𑀢𑀸𑀬 𑀥𑀻𑀭𑁄 𑀧𑀸𑀢𑀺𑀁 𑀲𑀫𑀸𑀤𑀺𑀬;

𑁧𑁪𑁦.

𑀉𑀧𑀕𑀦𑁆𑀢𑁆𑀯𑀸𑀦𑀸𑀢𑀺𑀭𑀫𑁆𑀫𑀁 𑀦𑀤𑀺𑀁 𑀲𑁄 𑀦𑀻𑀮𑀯𑀸𑀳𑀺𑀦𑀺𑀁,

𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀦𑀸𑀫𑀫𑁆𑀳𑀺 𑀦𑀤𑀻𑀢𑀺𑀢𑁆𑀣𑁂 𑀦𑀺𑀲𑀻𑀤𑀺𑀬;

𑁧𑁪𑁧.

𑀪𑀼𑀜𑁆𑀚𑀺𑀢𑁆𑀯𑀸 𑀊𑀦𑀧𑀡𑁆𑀡𑀸𑀲 𑀧𑀺𑀡𑁆𑀟𑀁 𑀓𑀢𑁆𑀯𑀸𑀦 𑀪𑁄𑀚𑀦𑀁,

𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀢𑁄 𑀧𑀸𑀢𑀺𑀁 𑀧𑀝𑀺𑀲𑁄𑀢𑀁 𑀦𑀭𑀸𑀲𑀪𑁄;

𑁧𑁪𑁨.

𑀢𑀢𑁄 𑀲𑀸𑀮𑀯𑀦𑀼𑀬𑁆𑀬𑀸𑀦𑁂 𑀯𑀺𑀲𑁆𑀲𑀫𑀦𑁆𑀢𑁄 𑀤𑀺𑀯𑀸𑀤𑀺𑀦𑁂,

𑀤𑀺𑀲𑁆𑀯𑀸𑀦 𑀲𑀼𑀧𑀺𑀦𑁂 𑀧𑀜𑁆𑀘 𑀅𑀢𑁆𑀣𑀁 𑀢𑁂𑀲𑀁 𑀯𑀺𑀘𑀺𑀦𑁆𑀢𑀺𑀬;

𑁧𑁪𑁩.

𑀆𑀩𑁄𑀥𑀺𑀫𑀽𑀮𑀢𑁄 𑀫𑀕𑁆𑀕𑁂 𑀤𑁂𑀯𑁂𑀳𑀺 𑀲𑀫𑀮𑀗𑁆𑀓𑀢𑁂,

𑀫𑀡𑀺𑀢𑁄𑀭𑀡𑀧𑀸𑀮𑀻𑀳𑀺 𑀧𑀼𑀡𑁆𑀡𑀓𑀼𑀫𑁆𑀪𑀤𑁆𑀥𑀸𑀚𑀸𑀤𑀺𑀳𑀺;

𑁧𑁪𑁪.

𑀲𑀸𑀬𑀡𑁆𑀳𑀲𑀫𑀬𑁂 𑀦𑀸𑀣𑁄 𑀕𑀘𑁆𑀙𑀦𑁆𑀢𑁄 𑀩𑁄𑀥𑀺 𑀲𑀦𑁆𑀢𑀺𑀓𑀁,

𑀤𑀺𑀲𑁆𑀯𑀸𑀦 𑀲𑁄𑀢𑁆𑀣𑀺𑀬𑀁 𑀦𑀸𑀫 𑀣𑀽𑀬𑀫𑀸𑀦𑀁 𑀤𑀺𑀚𑀼𑀢𑁆𑀢𑀫𑀁;

𑁧𑁪𑁫.

𑀢𑁂𑀦 𑀤𑀺𑀦𑁆𑀦𑀝𑁆𑀞 𑀫𑀼𑀝𑁆𑀞𑀺𑀦𑁆𑀢𑀼 𑀕𑀳𑁂𑀢𑁆𑀯𑀸 𑀦𑀻𑀮𑀲𑀤𑁆𑀤𑀮𑀁,

𑀩𑁄𑀥𑀺𑀫𑀽𑀮𑀫𑀼𑀧𑀸𑀕𑀫𑁆𑀫 𑀓𑀢𑁆𑀯𑀸𑀦 𑀢𑀁 𑀧𑀤𑀓𑁆𑀔𑀺𑀡𑀁;

𑁧𑁪𑁬.

𑀅𑀓𑀸𑀲𑀺 𑀢𑀻𑀡𑀲𑀦𑁆𑀣𑀸𑀭𑀁 𑀧𑀸𑀘𑀻𑀦𑀸𑀪𑀺𑀫𑀼𑀔𑀁 𑀢𑀤𑀸,

𑀢𑀢𑁄 𑀫𑀳𑀺𑀁 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀲𑀫𑀼𑀝𑁆𑀞𑀸𑀲𑀺 𑀫𑀳𑀸𑀲𑀦𑀁;

𑁧𑁪𑁭.

𑀉𑀘𑁆𑀘𑀁 𑀘𑀼𑀤𑁆𑀤𑀲𑀳𑀢𑁆𑀣𑁂𑀦 𑀦𑀸𑀦𑀸 𑀘𑀺𑀢𑁆𑀢 𑀯𑀺𑀘𑀺𑀢𑁆𑀢𑀺𑀢𑀁,

𑀅𑀪𑀝𑁆𑀞𑀦𑀳𑀺𑀢𑁆𑀣 𑀢𑀢𑁆𑀭𑀝𑁆𑀞𑁄 𑀇𑀘𑁆𑀘𑁂𑀯𑀁 𑀤𑀴𑁆𑀳𑀫𑀸𑀦𑀲𑁄;

𑁧𑁪𑁮.

𑀓𑀸𑀫𑀁 𑀢𑀘𑁄 𑀦𑀳𑀸𑀭𑀽 𑀘 𑀅𑀝𑁆𑀞𑀺 𑀘 𑀅𑀯𑀲𑀺𑀲𑁆𑀲𑀢𑀼,

𑀉𑀧𑀲𑀼𑀲𑁆𑀲𑀢𑀼 𑀫𑁂 𑀕𑀢𑁆𑀢𑁂 𑀲𑀩𑁆𑀩𑀦𑁆𑀢𑀁 𑀫𑀁𑀲𑀮𑁄𑀳𑀺𑀢𑀁;

𑁧𑁪𑁯.

𑀦 𑀉𑀝𑁆𑀞𑀳𑀸𑀫𑀩𑀼𑀚𑁆𑀛𑀺𑀢𑁆𑀯𑀸 𑀦 𑀚𑀳𑁂 𑀯𑀻𑀭𑀺𑀬𑀁 𑀫𑀫,

𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀏𑀯𑀁 𑀲𑁄 𑀦𑀺𑀲𑀻𑀤𑀺 𑀯𑀚𑀺𑀭𑀸𑀲𑀦𑁂;

𑁧𑁫𑁦. ¶

𑀅𑀦𑀢𑀺𑀓𑁆𑀓𑀫𑀁 𑀞𑀧𑁂𑀢𑁆𑀯𑀸𑀦 𑀘𑀭𑀡𑀁 𑀘𑀭𑀡𑀼𑀧𑀭𑀺,

𑀓𑀫𑀮𑀁 𑀓𑀫𑀮𑁂𑀦𑁂𑀯 𑀫𑀡𑀺𑀩𑀦𑁆𑀥𑀁 𑀯𑀺𑀥𑀸𑀬 𑀲𑁄;

𑁧𑁫𑁧.

𑀩𑀸𑀮𑀸𑀲𑁄𑀓𑀤𑀮𑀸𑀲𑀢𑁆𑀢 𑀧𑀭𑀁 𑀯𑀸’𑀲𑁄𑀓𑀧𑀮𑁆𑀮𑀯𑀁,

𑀦𑀺𑀥𑀸𑀬 𑀦𑀬𑀦𑀸𑀦𑀢𑁆𑀤 𑀧𑀸𑀡𑀺𑀁 𑀧𑀸𑀡𑀺𑀢𑀮𑁂 𑀚𑀺𑀦𑁄;

𑁧𑁫𑁨.

𑀬𑀣𑀸 𑀲𑀜𑁆𑀛𑀸𑀖𑀦𑀸𑀮𑀻𑀠 𑀢𑀼𑀗𑁆𑀕𑀓𑀜𑁆𑀘𑀦 𑀧𑀩𑁆𑀩𑀢𑁄,

𑀲𑀼𑀭𑀢𑁆𑀢𑀘𑀻𑀯𑀭𑀘𑁆𑀙𑀦𑁆𑀦 𑀘𑀸𑀭𑀺𑀕𑀢𑁆𑀢 𑀯𑀺𑀭𑀸𑀚𑀺𑀢𑁄;

𑁧𑁫𑁩.

𑀉𑀤𑀬𑀸𑀯𑀮𑀓𑁄𑀝𑀺𑀫𑁆𑀳𑀺 𑀤𑀺𑀧𑁆𑀧𑀦𑁆𑀢𑁄𑀯 𑀤𑀺𑀯𑀸𑀓𑀭𑁄

𑀓𑀦𑁆𑀥𑀭𑁄𑀧𑀭𑀺 𑀤𑀺𑀧𑁆𑀧𑀦𑁆𑀢 𑀫𑀼𑀔𑀫𑀡𑁆𑀟𑀮𑀫𑀡𑁆𑀟𑀺𑀢𑁄;

𑁧𑁫𑁪.

𑀬𑀣𑀸 𑀘𑀸𑀫𑀺𑀓𑀭𑀩𑁆𑀬𑀫𑁆𑀳𑁂 𑀲𑀼𑀦𑀻𑀮𑀁 𑀲𑀻𑀳𑀧𑀜𑁆𑀚𑀭𑀁,

𑀅𑀲𑀫𑁆𑀧𑀓𑀫𑁆𑀧𑀧𑀫𑁆𑀳𑁂𑀳𑀺 𑀧𑀺𑀳𑀺𑀢𑀤𑁆𑀥𑀲𑀼𑀮𑁄𑀘𑀦𑁄;

𑁧𑁫𑁫.

𑀦𑀻𑀮𑀼𑀧𑁆𑀧𑀮𑀓𑀮𑀸𑀧𑀁𑀘 𑀚𑀦𑀦𑁂𑀢𑁆𑀢𑀸𑀮𑀺𑀧𑀸𑀢𑀦𑀁,

𑀲𑀚𑁆𑀛𑀼𑀤𑀡𑁆𑀟𑀲𑀫𑀸𑀩𑀤𑁆𑀥 𑀩𑁄𑀥𑀺𑀓𑁆𑀔𑀦𑁆𑀥𑀫𑀨𑀲𑁆𑀲𑀺 𑀲𑁄;

𑁧𑁫𑁬.

𑀦𑀺𑀲𑀺𑀦𑁆𑀦𑁄 𑀩𑁄𑀥𑀺𑀢𑁄 𑀙𑁂𑀚𑁆𑀚 𑀧𑀯𑀸𑀴𑀢𑀭𑀼𑀡𑀗𑁆𑀓𑀼𑀭𑀸,

𑀧𑀢𑀫𑀸𑀦𑀸 𑀲𑀫𑀦𑁆𑀢𑀸𑀲𑀼𑀁 𑀢𑁂𑀚𑀁 𑀯𑀺𑀬 𑀓𑀼𑀩𑀼𑀤𑁆𑀥𑀻𑀦𑀁;

𑁧𑁫𑁭.

𑀤𑁂𑀯𑀸 𑀢𑀢𑁆𑀣 𑀲𑀫𑀸𑀕𑀜𑁆𑀚𑀼𑀁 𑀔𑀺𑀧𑁆𑀧𑀁 𑀤𑀲𑀲𑀳𑀲𑁆𑀲𑀺𑀬𑀁,

𑀓𑀫𑀮𑀸𑀲𑀦𑁄𑀭𑀕𑀸 𑀘𑁂𑀯 𑀲𑀺𑀤𑁆𑀥𑀯𑀺𑀚𑁆𑀚𑀸𑀥𑀭𑀸𑀤𑀬𑁄

𑁧𑁫𑁮.

𑀲𑀳𑀫𑁆𑀧𑀢𑀺 𑀫𑀳𑀸𑀩𑁆𑀭𑀳𑁆𑀫𑀸 𑀩𑁆𑀭𑀳𑁆𑀫𑀲𑁂𑀦𑀸𑀧𑀼𑀭𑀓𑁆𑀔𑀢𑁄,

𑀲𑀺𑀢𑀸𑀢𑀧𑀢𑁆𑀢𑀁 𑀥𑀸𑀭𑁂𑀦𑁆𑀢𑁄 𑀞𑀻𑀢𑁄 𑀲𑀫𑁆𑀩𑀼𑀤𑁆𑀥 𑀲𑀦𑁆𑀢𑀺𑀓𑁂;

𑁧𑁫𑁯.

𑀯𑀻𑀲𑀁 𑀭𑀢𑀦 𑀲𑀢𑀸𑀬𑀸𑀫𑀁 𑀯𑀺𑀚𑀬𑀼𑀢𑁆𑀢𑀭 𑀦𑀸𑀫𑀓𑀁,

𑀲𑀗𑁆𑀔𑀁 𑀥𑀫𑁂𑀦𑁆𑀢𑁄 𑀅𑀝𑁆𑀞𑀸𑀲𑀺 𑀲𑀸𑀤𑀭𑁄 𑀧𑀸𑀓𑀲𑀸𑀲𑀦𑁄;

𑁧𑁬𑁦.

𑀲𑀼𑀬𑀸𑀫𑁄 𑀲𑀳 𑀲𑁂𑀦𑀸𑀬 𑀣𑁄𑀫𑀬𑀦𑁆𑀢𑁄 𑀦𑀭𑀸𑀥𑀺𑀧𑀁,

𑀫𑀡𑀺𑀢𑀸𑀮𑀯𑀡𑁆𑀝𑀁 𑀧𑀕𑁆𑀕𑀬𑁆𑀳 𑀫𑀦𑁆𑀤𑀫𑀦𑁆𑀤𑁂𑀦 𑀯𑀻𑀚𑀢𑀺;

𑁧𑁬𑁧.

𑀚𑀺𑀢𑀓𑀺𑀢𑁆𑀢𑀺 𑀮𑀢𑀕𑁆𑀕𑀫𑁆𑀳𑀺 𑀲𑀲𑁆𑀲 𑀧𑀼𑀧𑁆𑀨𑀁𑀘 𑀧𑀼𑀧𑁆𑀨𑀻𑀢𑀁,

𑀯𑀸𑀴𑀯𑀺𑀚𑀦𑀺𑀫𑀼𑀕𑁆𑀕𑀬𑁆𑀳 𑀅𑀝𑁆𑀞𑀸 𑀲𑀦𑁆𑀢𑀼𑀲𑀺𑀢𑁄 𑀢𑀳𑀺𑀁;

𑁧𑁬𑁨. ¶

𑀩𑁂𑀮𑀼𑀯𑀁 𑀯𑀻𑀡𑀫𑀸𑀤𑀸𑀬 𑀕𑀻𑀢𑀁 𑀦𑀸𑀦𑀸𑀮𑀬𑀸𑀦𑀼𑀕𑀁,

𑀧𑀜𑁆𑀘𑀲𑀺𑀔𑁄 𑀞𑀺𑀢𑁄 𑀢𑀢𑁆𑀣 𑀕𑀸𑀬𑀫𑀸𑀦𑁄 𑀅𑀦𑁂𑀓𑀥𑀸;

𑁧𑁬𑁩.

𑀫𑀳𑀸𑀓𑀸𑀮𑁄’𑀧𑀺 𑀦𑀸𑀕𑀺𑀦𑁆𑀤𑁄 𑀦𑀸𑀕𑀲𑀗𑁆𑀖𑀧𑀼𑀭𑀓𑁆𑀔𑀢𑁄,

𑀣𑁄𑀫𑁂𑀦𑁆𑀢𑁄 𑀢𑀢𑁆𑀣 𑀅𑀝𑁆𑀞𑀸𑀲𑀺 𑀦𑀯𑀸𑀭𑀳𑀕𑀼𑀡𑀸𑀤𑀺𑀳𑀺;

𑁧𑁬𑁪.

𑀭𑀗𑁆𑀕𑀪𑀼𑀫𑀺𑀁 𑀫𑀸𑀧𑀬𑀺𑀢𑁆𑀯𑀸 𑀕𑀳𑁂𑀢𑁆𑀯𑀸𑀦 𑀯𑀭𑀗𑁆𑀕𑀦𑀸,

𑀉𑀧𑀳𑀸𑀭𑀁 𑀓𑀭𑁄𑀦𑁆𑀢𑀝𑁆𑀞𑀸 𑀢𑀺𑀫𑁆𑀩𑀭𑀽 𑀲𑀽𑀭𑀺𑀬𑀯𑀘𑁆𑀘𑀲𑀸;

𑁧𑁬𑁫.

𑀆𑀕𑀦𑁆𑀢𑁆𑀯𑀸 𑀲𑀳 𑀲𑁂𑀦𑀸𑀬 𑀲𑀺𑀢𑀗𑁆𑀕𑁄 𑀲𑀺𑀢𑀪𑀼𑀲𑀦𑁄,

𑀥𑀢𑀭𑀝𑁆𑀞𑁄 𑀞𑀺𑀢𑁄 𑀧𑀼𑀩𑁆𑀩𑁂 𑀆𑀭𑀓𑁆𑀔𑀁 𑀓𑀼𑀭𑀼𑀫𑀸𑀦𑀓𑁄;

𑁧𑁬𑁬.

𑀧𑀽𑀭𑁂𑀦𑁆𑀢𑁄 𑀲𑀓𑀲𑁂𑀦𑀸𑀬 𑀤𑀓𑁆𑀔𑀺𑀡𑀲𑁆𑀲𑀁 𑀯𑀺𑀭𑀽𑀴𑁆𑀳𑀓𑁄,

𑀆𑀭𑀓𑁆𑀔𑀁 𑀓𑀼𑀭𑀼𑀫𑀸𑀦𑀝𑁆𑀞𑀸 𑀦𑀻𑀮𑀗𑁆𑀕𑁄 𑀦𑀻𑀮𑀪𑀼𑀲𑀦𑁄;

𑁧𑁬𑁭.

𑀯𑀺𑀭𑀽𑀧𑀓𑁆𑀔𑁄’𑀧𑀺 𑀅𑀝𑁆𑀞𑀸𑀲𑀺 𑀧𑀸𑀮𑀬𑀁 𑀧𑀘𑁆𑀙𑀺𑀫𑀁 𑀤𑀺𑀲𑀁,

𑀭𑀢𑁆𑀢𑀗𑁆𑀕𑀸𑀪𑀭𑀡𑁄 𑀯𑀫𑁆𑀫𑀻 𑀦𑀺𑀚𑀲𑁂𑀦𑀸𑀧𑀼𑀭𑀓𑁆𑀔𑀢𑁄;

𑁧𑁬𑁮.

𑀉𑀢𑁆𑀢𑀭𑀲𑁆𑀲𑀁 𑀲𑀲𑁂𑀦𑀸𑀬 𑀆𑀭𑀓𑁆𑀔𑀁 𑀓𑀼𑀭𑀼𑀫𑀸𑀦𑀓𑁄,

𑀲𑁄𑀡𑁆𑀡𑀯𑀡𑁆𑀡𑀗𑁆𑀕𑀸𑀪𑀭𑀡𑁄 𑀅𑀝𑁆𑀞𑀸𑀲𑀺 𑀦𑀭𑀯𑀸𑀳𑀦𑁄;

𑁧𑁬𑁯.

𑀓𑀺𑀫𑁂𑀢𑁆𑀣 𑀩𑀳𑀼𑀮𑀸𑀧𑁂𑀦 𑀚𑀸𑀢𑀺𑀓𑁆𑀔𑁂𑀢𑁆𑀢𑀫𑁆𑀳𑀺 𑀤𑁂𑀯𑀢𑀸,

𑀦𑀸𑀕𑀢𑀸 𑀦𑁂𑀯 𑀯𑀸𑀳𑁂𑀲𑀼𑀁 𑀲𑀩𑁆𑀩𑁂 𑀏𑀢𑁆𑀣𑁂’𑀯 𑀑𑀲𑀝𑀸;

𑁧𑁭𑁦.

𑀕𑀕𑀦𑀸𑀢𑁄𑀢𑀺𑀡𑁆𑀡𑀓𑁂𑀢𑀼 𑀧𑀸𑀤𑁂𑀳𑀺 𑀧𑀣𑀯𑀻𑀢𑀮𑁂,

𑀦𑀸𑀕𑀸𑀤𑀬𑁄 𑀦 𑀥𑀼𑀢𑀸𑀲𑀼𑀁 𑀓𑁂𑀢𑀼𑀦𑀁 𑀩𑀳𑀼 𑀓𑀸 𑀓𑀣𑀸;

𑁧𑁭𑁧.

𑀦 𑀥𑀽𑀢𑀸 𑀥𑀚𑀧𑀸𑀤𑁂𑀳𑀺 𑀯𑀸𑀬𑀼𑀢𑀼𑀤𑁆𑀤𑀸𑀫𑀯𑀼𑀢𑁆𑀢𑀺𑀳𑀺,

𑀢𑀸𑀭𑀓𑀸 𑀕𑀕𑀦𑁂 𑀩𑁆𑀭𑀽𑀫𑁄 𑀓𑀺𑀦𑁆𑀦𑀼 𑀢𑀢𑁆𑀣 𑀥𑀚𑀸𑀮𑀼𑀢𑀸;

𑁧𑁭𑁨.

𑀧𑀼𑀩𑁆𑀩𑀤𑀺𑀲𑀸 𑀘𑀓𑁆𑀓𑀯𑀸𑀴 𑀲𑀺𑀮𑀸𑀬𑀼𑀕𑁆𑀕𑀢𑀓𑁂𑀢𑀼𑀦𑀁,

𑀧𑀸𑀤𑀸𑀦𑀺 𑀧𑀭𑀪𑀸𑀕𑀸𑀤𑀺 𑀘𑀓𑁆𑀓𑀯𑀸𑀴𑀲𑀺𑀮𑀦𑁆𑀯𑀕𑀼𑀁;

𑁧𑁭𑁩.

𑀘𑀓𑁆𑀓𑀯𑀸𑀴 𑀫𑀳𑀸𑀫𑁂𑀭𑀼 𑀬𑀼𑀕𑀦𑁆𑀥𑀭 𑀦𑀕𑀸𑀤𑀬𑁄,

𑀧𑀼𑀧𑁆𑀨𑀸𑀯𑀢𑀁𑀲𑀓𑀸’𑀯𑀸𑀲𑀼𑀁 𑀦𑀸𑀦𑀸𑀯𑀡𑁆𑀡𑁂𑀳𑀺 𑀲𑀗𑁆𑀔𑀢𑀸;

𑁧𑁭𑁪. ¶

𑀯𑀸𑀫𑀸𑀫𑀦𑁆𑀤𑀫𑀓𑀭𑀦𑁆𑀤 𑀩𑀺𑀦𑁆𑀤𑀼𑀲𑀦𑁆𑀤𑁄𑀳 𑀲𑀼𑀦𑁆𑀤𑀭𑀁,

𑀉𑀮𑁆𑀮𑁄𑀮 𑀧𑀤𑀼𑀫𑀸𑀓𑀺𑀡𑁆𑀡 𑀯𑀺𑀢𑀸𑀦𑀁 𑀯𑀸𑀲𑀺 𑀅𑀫𑁆𑀩𑀭𑀁;

𑁧𑁭𑁫.

𑀔𑀺𑀢𑁆𑀢𑀲𑁄𑀕𑀦𑁆𑀥𑀘𑀼𑀡𑁆𑀡𑀸𑀦𑀺 𑀤𑁂𑀯𑀩𑁆𑀭𑀳𑁆𑀫𑀸𑀤𑀺𑀦𑀸 𑀢𑀳𑀺𑀁,

𑀯𑀺𑀢𑀸𑀦𑀁 𑀯𑀺𑀬 𑀔𑀸𑀬𑀦𑁆𑀢𑀺 𑀘𑀓𑁆𑀓𑀯𑀸𑀴𑀕𑁆𑀕𑀫𑀡𑁆𑀟𑀧𑁂;

𑁧𑁭𑁬.

𑀓𑀧𑁆𑀧𑀽𑀭𑀸𑀕𑀭𑀼𑀥𑀽𑀧𑁂𑀳𑀻 𑀢𑀢𑁆𑀣 𑀢𑀢𑁆𑀣𑀼𑀕𑁆𑀕𑀢𑁂𑀳𑀺 𑀫𑀸,

𑀓𑀸𑀮𑀩𑁆𑀪𑀓𑀽𑀝𑀘𑁆𑀙𑀦𑁆𑀦𑁄𑀯 𑀆𑀲𑀺 𑀫𑀜𑁆𑀜𑀁 𑀓𑀣𑁂𑀫𑀼 𑀓𑀺𑀁;

𑁧𑁭𑁭.

𑀚𑀸𑀢𑀺𑀓𑁆𑀔𑁂𑀢𑁆𑀢𑁂𑀲𑀼 𑀤𑁂𑀯𑁂𑀳𑀺 𑀓𑀢𑀕𑁆𑀖𑀺𑀓𑀼𑀲𑀼𑀫𑀸𑀤𑀺𑀦𑀸,

𑀦𑁄𑀲𑀻𑀦𑀸 𑀥𑀭𑀡𑀻 𑀪𑀸𑀭𑀸 𑀤𑀺𑀲𑁂𑀪𑀸𑀦𑀁 𑀩𑀮𑀁 𑀅𑀳𑁄;

𑁧𑁭𑁮.

𑀅𑀫𑁆𑀩𑀭𑀸𑀮𑀫𑁆𑀩𑀫𑀸𑀦𑀸𑀦𑀻 𑀧𑀼𑀧𑁆𑀨𑀤𑀸𑀫𑀸𑀦𑀺 𑀪𑀽𑀢𑀮𑀁,

𑀆𑀓𑀟𑁆𑀠𑀦𑀸𑀬 𑀤𑁂𑀯𑁂𑀳𑀺 𑀩𑀤𑁆𑀥𑀭𑀚𑁆𑀚𑀼𑀯 𑀪𑀸𑀲𑀭𑁂

𑁧𑁭𑁯.

𑀅𑀜𑁆𑀜𑁄𑀜𑁆𑀜𑀓𑀭𑀫𑀼𑀕𑁆𑀕𑀬𑁆𑀳 𑀕𑀕𑀦𑁂 𑀲𑀼𑀭𑀲𑀼𑀢𑁆𑀤𑀭𑀻,

𑀧𑀭𑀺𑀩𑁆𑀪𑀫𑀦𑁆𑀢𑀸 𑀕𑀸𑀬𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀫𑀦𑁄𑀭𑀫𑀁;

𑁧𑁮𑁦.

𑀉𑀪𑁄 𑀪𑀼𑀚𑁂 𑀯𑀺𑀓𑀸𑀲𑁂𑀢𑁆𑀯𑀸 𑀫𑀡𑁆𑀟𑀺𑀢𑀁 𑀲𑀼𑀭𑀲𑀼𑀢𑁆𑀤𑀭𑀻,

𑀪𑀫𑀦𑁆𑀢𑀺 𑀪𑀦𑁆𑀢𑀪𑁂𑀡𑁆𑀟𑀼𑀯 𑀢𑀢𑁆𑀣 𑀢𑀢𑁆𑀣𑀫𑁆𑀩𑀭𑁂 𑀬𑀼𑀕𑀸;

𑁧𑁮𑁧.

𑀦𑀻𑀮𑀼𑀧𑁆𑀧𑀮𑀓𑀮𑀸𑀧𑀸𑀤𑀻 𑀕𑀳𑁂𑀢𑁆𑀯𑀸𑀦 𑀲𑀼𑀭𑀗𑁆𑀕𑀦𑀸,

𑀞𑀻𑀢𑀸𑀲𑀼𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀧𑀽𑀚𑀫𑀸𑀦𑀸 𑀦𑀭𑀺𑀲𑁆𑀲𑀭𑀁;

𑁧𑁮𑁨.

𑀭𑀢𑁆𑀦𑀧𑀮𑁆𑀮𑀯𑀓𑀮𑀳𑀸𑀭 𑀓𑀫𑀮𑀼𑀧𑁆𑀧𑀮 𑀲𑀗𑁆𑀕𑀢𑁂,

𑀲𑀦𑁆𑀦𑀻𑀭𑀓𑀼𑀲𑀼𑀫𑀸𑀓𑀺𑀡𑁆𑀡𑁂 𑀧𑀼𑀡𑁆𑀡𑁂𑀲𑁄𑀕𑀦𑁆𑀥𑀯𑀸𑀭𑀺𑀳𑀻;

𑁧𑁮𑁩.

𑀓𑀜𑁆𑀘𑀦𑀸𑀤𑀺𑀖𑀝𑁂 𑀕𑀬𑁆𑀳 𑀅𑀫𑁆𑀩𑀭𑁂 𑀲𑀼𑀭𑀲𑀼𑀦𑁆𑀤𑀭𑀻,

𑀓𑀢𑁆𑀯𑀸𑀦 𑀲𑀼𑀕𑀢𑀁 𑀫𑀚𑁆𑀛𑁂 𑀧𑀽𑀚𑀬𑀺𑀁𑀲𑀼 𑀲𑀫𑀦𑁆𑀢𑀢𑁄

𑁧𑁮𑁪.

𑀓𑀜𑁆𑀘𑀦𑀸𑀤𑀸𑀲𑀳𑀢𑁆𑀣𑀸 𑀘 𑀓𑀸𑀘𑀻 𑀓𑀜𑁆𑀜𑀸 𑀢𑀣𑀸 𑀞𑀺𑀢𑀸,

𑀢𑀸𑀮𑀯𑀡𑁆𑀝𑁂 𑀕𑀳𑁂𑀢𑁆𑀯𑀸𑀦 𑀞𑀻𑀢𑀸𑀲𑀼𑀁 𑀓𑀸𑀘𑀺 𑀤𑁂𑀯𑀢𑀸;

𑁧𑁮𑁫.

𑀓𑀸𑀘𑀺 𑀫𑀗𑁆𑀕𑀮 𑀲𑀁𑀬𑀼𑀢𑁆𑀢 𑀯𑀘𑀦𑀸 𑀢𑀯 𑀧𑀢𑁆𑀣𑀦𑀸,

𑀲𑀫𑀺𑀚𑁆𑀛𑀢𑀼𑀢𑀺 𑀖𑁄𑀲𑁂𑀦𑁆𑀢𑀻 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸 𑀚𑀺𑀦𑀁;

𑁧𑁮𑁬. ¶

𑀲𑀺𑀭𑀺𑀯𑀘𑁆𑀙𑀸𑀤𑀺 𑀧𑀕𑁆𑀕𑀬𑁆𑀳 𑀅𑀝𑁆𑀞𑀫𑀗𑁆𑀕𑀮𑀫𑀼𑀢𑁆𑀢𑀫𑀁,

𑀞𑀺𑀢𑀸𑀲𑀼𑀁 𑀕𑀕𑀦𑁂 𑀦𑀸𑀭𑀻 𑀧𑀭𑀺𑀯𑀸𑀭𑁂𑀢𑁆𑀯𑀸 𑀫𑀼𑀦𑀺𑀲𑁆𑀲𑀭𑀁;

𑁧𑁮𑁭.

𑀦𑀘𑁆𑀘𑀦𑁆𑀢𑀺 𑀓𑁂𑀘𑀺 𑀓𑀻𑀴𑀦𑁆𑀢𑀺 𑀲𑁂𑀮𑁂𑀦𑁆𑀢𑀺 𑀘 𑀮𑀮𑀦𑁆𑀢𑀺 𑀘,

𑀯𑀸𑀤𑁂𑀦𑁆𑀢𑀺 𑀓𑁂𑀘𑀺 𑀕𑀸𑀬𑀦𑁆𑀢𑀺 𑀯𑁂𑀮𑀼𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑀺 𑀘;

𑁧𑁮𑁮.

𑀦𑁂𑀓𑀧𑀼𑀧𑁆𑀨𑀕𑁆𑀖𑀺𑀧𑀦𑁆𑀢𑀻 𑀘 𑀢𑀣𑀸 𑀤𑀻𑀧𑀕𑁆𑀖𑀺𑀧𑀦𑁆𑀢𑀺 𑀘,

𑀫𑀡𑀺𑀘𑀸𑀫𑀻𑀓𑀭𑀸𑀲𑀚𑁆𑀛𑀼 𑀅𑀕𑁆𑀖𑀺𑀓𑀸 𑀧𑀦𑁆𑀢𑀺𑀬𑁄 𑀢𑀣𑀸;

𑁧𑁮𑁯.

𑀆𑀩𑁆𑀭𑀳𑁆𑀫𑀪𑀯𑀦𑀼𑀕𑁆𑀕𑀫𑁆𑀫 𑀘𑀓𑁆𑀓𑀯𑀸𑀴𑀲𑀫𑀦𑁆𑀢𑀢𑁄,

𑀢𑀺𑀝𑁆𑀞𑀦𑁆𑀢𑀺 𑀚𑀮𑀫𑀸𑀦𑀸𑀬𑁄 𑀩𑀼𑀤𑁆𑀥𑀲𑁆𑀲 𑀫𑀗𑁆𑀕𑀮𑀼𑀲𑁆𑀲𑀯𑁂;

𑁧𑁯𑁦.

𑀲𑀢𑁆𑀢𑀭𑀢𑀦𑀲𑀫𑁆𑀪𑀼𑀢𑀸 𑀦𑀸𑀦𑀸 𑀢𑁄𑀭𑀡𑀧𑀦𑁆𑀢𑀻𑀬𑁄,

𑀳𑁂𑀫𑀭𑀫𑁆𑀪𑀸𑀫𑀬𑀸 𑀘𑀸𑀧𑀺 𑀢𑀣𑀸 𑀤𑀼𑀲𑁆𑀲𑀫𑀬𑀸 𑀲𑀺𑀬𑀼𑀁;

𑁧𑁯𑁧.

𑀦𑀸𑀦𑀸𑀯𑀡𑁆𑀡𑁂𑀳𑀺 𑀦𑁂𑀓𑁂𑀳𑀺 𑀙𑀢𑁆𑀢𑁂𑀳𑀺 𑀘 𑀦𑀺𑀭𑀦𑁆𑀢𑀭𑀁,

𑀘𑀓𑁆𑀓𑀯𑀸𑀴𑁄𑀤𑀭𑀁 𑀆𑀲𑀺 𑀲𑀭𑀁𑀘 𑀓𑀫𑀮𑀸𑀓𑀼𑀮𑀁;

𑁧𑁯𑁨.

𑀢𑀢𑁆𑀣 𑀢𑀢𑁆𑀣𑀼𑀚𑁆𑀚𑀮𑀸𑀦𑁂𑀓 𑀬𑀦𑁆𑀢𑀤𑀻𑀧𑀸𑀯𑀮𑀻 𑀫𑀳𑀻,

𑀢𑀸𑀭𑀓𑀸𑀚𑀸𑀮𑀓𑀸𑀓𑀺𑀡𑁆𑀡 𑀕𑀕𑀦𑀗𑁆𑀕𑀦𑀲𑀦𑁆𑀢𑀺𑀪𑀸;

𑁧𑁯𑁩.

𑀥𑀚𑀦𑁆𑀢𑀭𑀺𑀢 𑀙𑀢𑁆𑀢𑀸’𑀲𑀼𑀁 𑀘𑀓𑁆𑀓𑀯𑀸𑀴𑀕𑀺𑀭𑀽𑀧𑀭𑀺,

𑀦𑀺𑀭𑀦𑁆𑀢𑀭𑀸’𑀲𑀼𑀁 𑀢𑀢𑁆𑀣𑁂𑀯 𑀖𑀝𑀤𑀻𑀧𑀸 𑀘 𑀢𑁄𑀭𑀡;

𑁧𑁯𑁪.

𑀦𑀸𑀦𑀸𑀢𑀼𑀭𑀺𑀬𑀦𑀸𑀤𑁂𑀳𑀺 𑀦𑀸𑀦𑀸𑀲𑀗𑁆𑀕𑀻𑀢𑀺𑀢𑀸𑀳𑀺 𑀘,

𑀲𑀸𑀥𑀼𑀯𑀸𑀤𑁂𑀳𑀺 𑀦𑁂𑀓𑁂𑀳𑀺 𑀘𑀓𑁆𑀓𑀯𑀸𑀴𑁄 𑀨𑀼𑀝𑁄 𑀅𑀳𑀽;

𑁧𑁯𑁫.

𑀅𑀳𑁄 𑀫𑀳𑀦𑁆𑀢𑀢𑀸 𑀢𑀲𑁆𑀲 𑀩𑀼𑀤𑁆𑀥𑀲𑁆𑀲 𑀓𑀢𑀫𑀗𑁆𑀕𑀮𑁂,

𑀧𑀽𑀚𑀸𑀯𑀺𑀲𑁂𑀲𑀁 𑀢𑀁 𑀓𑁄 𑀳𑀺 𑀫𑀼𑀔𑁂𑀦𑁂𑀓𑁂𑀦 𑀪𑀸𑀲𑀢𑀻;

𑁧𑁯𑁬.

𑀘𑀢𑀼𑀫𑁆𑀫𑀼𑀔𑁄 𑀲𑀳𑀲𑁆𑀲𑀓𑁆𑀔𑁄 𑀤𑁆𑀯𑀺𑀲𑀳𑀲𑁆𑀲𑀦𑀬𑀦𑁄 𑀨𑀡𑀻,

𑀤𑀲𑀓𑀡𑁆𑀞𑁄’𑀧𑀺 𑀢𑀁 𑀲𑀩𑁆𑀩𑀁 𑀦𑁂𑀯 𑀲𑀓𑁆𑀓𑁄𑀦𑁆𑀢𑀺 𑀪𑀸𑀲𑀺𑀢𑀼𑀁;

𑁧𑁯𑁭.

𑀏𑀯𑀁 𑀲𑀼𑀭𑀸𑀲𑀼𑀭𑀩𑁆𑀭𑀳𑁆𑀫 𑀯𑁂𑀦𑀢𑁂𑀬𑁆𑀬𑁄𑀭𑀕𑀸𑀤𑀺𑀳𑀺,

𑀦𑀺𑀭𑀦𑁆𑀢𑀭𑀁 𑀓𑀢𑀸𑀦𑁂𑀓 𑀫𑀳𑀸𑀫𑀳 𑀲𑀫𑀸𑀓𑀼𑀮𑁂;

𑁧𑁯𑁮. ¶

𑀢𑀲𑁆𑀫𑀺𑀦𑁆𑀢𑀼 𑀯𑀸𑀲𑀭𑁂 𑀫𑀸𑀭𑁄 𑀧𑀲𑁆𑀲𑀺𑀢𑁆𑀯𑀸 𑀪𑀼𑀯𑀦𑀁 𑀇𑀤𑀁,

𑀆𑀫𑀦𑁆𑀢𑁂𑀢𑁆𑀯𑀸 𑀲𑀸𑀦𑀼𑀯𑀭𑁂 𑀆𑀳𑁂𑀯𑀁 𑀲𑀓𑀼𑀢𑀽𑀳𑀮𑁄;

𑁧𑁯𑁯.

𑀲𑀩𑁆𑀩𑁂 𑀤𑀺𑀩𑁆𑀩𑀯𑀺𑀫𑀸𑀦𑀸 𑀪𑁄 𑀲𑀼𑀜𑁆𑀜𑀸 𑀤𑀺𑀲𑁆𑀲𑀦𑁆𑀢𑀺 𑀙𑀟𑁆𑀟𑀺𑀢𑀸,

𑀧𑀼𑀭𑀧𑀸𑀮𑀫𑁆𑀧𑀳𑀸𑀧𑁂𑀢𑁆𑀯𑀸 𑀓𑁆𑀯 𑀕𑀢𑀸’𑀲𑀼𑀁 𑀲𑀤𑁂𑀯𑀓𑀸;

𑁨𑁦𑁦.

𑀓𑀺𑀫𑁆𑀪𑁄 𑀫𑀸𑀭 𑀦 𑀚𑀸𑀦𑀸𑀲𑀺 𑀫𑀢𑁆𑀢𑁄 𑀲𑀼𑀢𑁆𑀢𑁄’𑀲𑀺 𑀅𑀚𑁆𑀚 𑀓𑀺𑀁,

𑀲𑀼𑀤𑁆𑀥𑁄𑀤𑀦𑀺𑀬 𑀲𑀺𑀤𑁆𑀥𑀢𑁆𑀣𑁄 𑀫𑀸𑀬𑀸𑀬 𑀢𑀦𑀬𑁄 𑀅𑀬𑀁;

𑁨𑁦𑁧.

𑀧𑀼𑀭𑁂𑀢𑁆𑀯𑀸 𑀧𑀸𑀭𑀫𑀻 𑀲𑀩𑁆𑀩𑀸 𑀓𑀢𑁆𑀯𑀸𑀦 𑀅𑀪𑀺𑀦𑀺𑀓𑁆𑀔𑀫𑀁,

𑀩𑁄𑀥𑀺𑀫𑀼𑀮𑁂 𑀦𑀺𑀲𑀺𑀦𑁆𑀦𑁄 𑀲𑀺 𑀅𑀚𑁆𑀚 𑀩𑀼𑀤𑁆𑀥𑁄 𑀪𑀯𑀸𑀫𑀻𑀢𑀺;

𑁨𑁦𑁨.

𑀢𑀲𑁆𑀲 𑀧𑀽𑀚𑀸𑀯𑀺𑀥𑀸𑀦𑀢𑁆𑀣𑀁 𑀤𑀲𑀲𑀳𑀲𑁆𑀲𑀻𑀲𑀼 𑀤𑁂𑀯𑀢𑀸,

𑀲𑀫𑀸𑀕𑀢𑀸 𑀳𑀝𑁆𑀞𑀢𑀼𑀝𑁆𑀞𑀸 𑀓𑀭𑁄𑀦𑁆𑀢𑀚𑁆𑀚 𑀫𑀳𑀸𑀫𑀳𑀁;

𑁨𑁦𑁩.

𑀓𑀺𑀦𑁆𑀦𑀼 𑀢𑁂 𑀩𑀥𑀺𑀭𑀁 𑀲𑁄𑀢𑀁 𑀓𑀺𑀦𑁆𑀦𑀼 𑀧𑀭𑀺𑀳𑀸𑀬𑀺 𑀮𑁄𑀘𑀦𑀁,

𑀥𑀚𑀕𑁆𑀕𑀸 𑀢𑁂 𑀦 𑀤𑀺𑀲𑁆𑀲𑀦𑁆𑀢𑀺 𑀉𑀮𑁆𑀮𑁄𑀮𑀁 𑀢𑁂 𑀦 𑀲𑀽𑀬𑀢𑀺;

𑁨𑁦𑁪.

𑀢𑁂𑀲𑀁 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀦𑁆𑀢𑀓𑁄 𑀔𑀮𑀼 𑀧𑀸𑀧𑀺𑀫𑀸,

𑀤𑀼𑀓𑁆𑀔𑀺𑀢𑁄 𑀤𑀼𑀫𑁆𑀫𑀦𑁄 𑀢𑁂𑀲𑀁 𑀲𑁄𑀘𑀦𑁆𑀢𑁄 𑀇𑀤𑀫𑁆𑀩𑁆𑀭𑀼𑀯𑀺;

𑁨𑁦𑁫.

𑀅𑀳𑁄 𑀯𑀢𑀸’𑀢𑀺𑀧𑀭𑀺𑀳𑀸𑀦𑀺 𑀲𑀁𑀲𑀸𑀭𑀲𑁆𑀲 𑀫𑀳𑀸 𑀅𑀬𑀁,

𑀅𑀲𑀸𑀭𑁄 𑀔𑀮𑀼 𑀲𑀁𑀲𑀸𑀭𑁄 𑀲𑀺𑀤𑁆𑀥𑀢𑁆𑀣𑁂 𑀯𑀺𑀪𑀯𑀁 𑀕𑀢𑁂;

𑁨𑁦𑁬.

𑀅𑀳𑁄 𑀯𑀢𑀸’𑀢𑀺 𑀦𑀝𑁆𑀞𑀫𑁆𑀳𑀸 𑀢𑀺𑀯𑀝𑁆𑀝𑀁 𑀧𑀭𑀺𑀧𑀼𑀭𑀺𑀢𑀁,

𑀳𑁄𑀢𑀺 𑀪𑁄 𑀤𑀳𑀦𑀸 𑀤𑀟𑁆𑀠𑀯𑀦𑀁𑀯𑀸𑀢𑀺 𑀅𑀮𑀓𑁆𑀔𑀺𑀓𑀁;

𑁨𑁦𑁭.

𑀦𑀺𑀭𑀸𑀮𑁄𑀓𑀁 𑀢𑀺𑀮𑁄𑀓𑀁 𑀪𑁄 𑀅𑀲𑀼𑀭𑀁 𑀯𑀸𑀲𑀭𑀁 𑀬𑀣𑀸,

𑀧𑀭𑀺𑀫𑁄𑀲𑀭𑀢𑀦𑀁 𑀳𑁄𑀢𑀺 𑀭𑀚𑁆𑀚𑀁 𑀯𑁂𑀤𑀁 𑀚𑀕𑀢𑁆𑀢𑀬𑀁;

𑁨𑁦𑁮.

𑀫𑀫𑁂𑀲 𑀯𑀺𑀲𑀬𑀁 𑀳𑀺𑀢𑁆𑀯𑀸 𑀬𑀸𑀢𑀺 𑀲𑀺𑀤𑁆𑀥𑀢𑁆𑀣𑀤𑀸𑀭𑀓𑁄,

𑀢𑁂𑀦 𑀬𑀸𑀢𑁂𑀦 𑀫𑀕𑁆𑀕𑁂𑀦 𑀦𑀺𑀓𑁆𑀔𑀫𑀦𑁆𑀢𑀺 𑀩𑀳𑀼𑀚𑁆𑀚𑀦𑀸;

𑁨𑁦𑁯.

𑀪𑀯𑀦𑁆𑀢𑀁 𑀦 𑀓𑀭𑁄𑀢𑁂𑀲𑁄 𑀬𑀸𑀯 𑀲𑀼𑀤𑁆𑀥𑁄𑀤𑀦𑀢𑁆𑀭𑀚𑁄,

𑀏𑀣 𑀕𑀘𑁆𑀙𑀸𑀫 𑀲𑀺𑀤𑁆𑀥𑀢𑁆𑀣𑀫𑀲𑀺𑀤𑁆𑀥𑀢𑁆𑀣𑀁 𑀓𑀭𑁄𑀫 𑀪𑁄;

𑁨𑁧𑁦.

𑀫𑀸𑀧𑁂𑀣 𑀪𑁂𑀭𑀯𑀁 𑀯𑀡𑁆𑀡𑀁 𑀩𑀻𑀪𑀘𑁆𑀙𑀁 𑀤𑀼𑀤𑁆𑀤𑀲𑀁 𑀔𑀭𑀁,

𑀲𑀤𑁆𑀤𑁂𑀦𑁂𑀯 𑀧𑀮𑀸𑀧𑁂𑀣 𑀢𑀽𑀮𑀪𑀝𑁆𑀝𑀁𑀯 𑀯𑀸𑀬𑀼𑀦𑀸;

𑁨𑁧𑁧. ¶

𑀢𑀲𑁆𑀲 𑀢𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀫𑀸𑀭𑀲𑁂𑀦𑀸 𑀲𑀫𑀸𑀕𑀫𑀼𑀁,

𑀦𑀸𑀦𑀸𑀯𑁂𑀲𑀥𑀭𑀸 𑀳𑀼𑀢𑁆𑀯𑀸 𑀦𑀸𑀦𑀸𑀬𑀼𑀥 𑀲𑀫𑀗𑁆𑀕𑀺𑀦𑁄;

𑁨𑁧𑁨.

𑀬𑁄𑀚𑀦𑀸𑀦𑀁 𑀢𑀤𑀸 𑀫𑀸𑀭𑁄 𑀤𑀺𑀬𑀟𑁆𑀠𑀲𑀢𑀫𑀼𑀘𑁆𑀘𑀢𑁄,

𑀕𑀺𑀭𑀺𑀫𑁂𑀔𑀮𑀫𑀸𑀭𑀼𑀬𑁆𑀳 𑀲𑁂𑀦𑀸𑀬 𑀲𑀳𑀲𑀸’𑀕𑀫𑀻;

𑁨𑁧𑁩.

𑀤𑀺𑀲𑁆𑀯𑀸𑀦 𑀤𑀼𑀭𑀢𑁄 𑀏𑀢𑁆𑀢𑀁 𑀤𑁂𑀯𑀸 𑀫𑀸𑀭𑀁 𑀲𑀯𑀸𑀳𑀺𑀦𑀺𑀁,

𑀪𑀬𑀝𑁆𑀝𑀸𑀧𑀕𑀫𑀼𑀁 𑀔𑀺𑀧𑁆𑀧𑀁 𑀥𑀸𑀯𑀫𑀸𑀦𑀸 𑀤𑀺𑀲𑁄𑀤𑀺𑀲𑀁;

𑁨𑁧𑁪.

𑀲𑀁𑀔𑀺𑀧𑁆𑀧 𑀔𑀺𑀧𑁆𑀧𑀁 𑀲𑀘𑁆𑀙𑀢𑁆𑀢𑀁 𑀩𑁆𑀭𑀳𑁆𑀫𑀸 𑀥𑀸𑀯𑀺 𑀧𑀭𑀫𑁆𑀫𑀼𑀔𑁄,

𑀓𑀢𑁆𑀯𑀸𑀦 𑀧𑀺𑀝𑁆𑀞𑀺𑀬𑀁 𑀲𑀗𑁆𑀔𑀁 𑀲𑀓𑁆𑀓𑁄 𑀥𑀸𑀯𑀺 𑀯𑀺𑀲𑀗𑁆𑀓𑀺𑀢𑁄;

𑁨𑁧𑁫.

𑀫𑀳𑀸𑀓𑀸𑀮𑁄’𑀧𑀺 𑀦𑀸𑀕𑀺𑀦𑁆𑀤𑁄 𑀦𑀺𑀫𑀼𑀚𑁆𑀚 𑀫𑀳𑀺𑀬𑀁 𑀢𑀤𑀸,

𑀯𑀢𑁆𑀢𑀤𑀢𑁆𑀢𑀓𑀭𑁄 𑀪𑀻𑀭𑀼 𑀲𑀓𑁂 𑀦𑀺𑀧𑀢𑀺 𑀫𑀜𑁆𑀘𑀓𑁂;

𑁨𑁧𑁬.

𑀲𑀁 𑀲𑀁 𑀧𑀽𑀚𑀸𑀯𑀺𑀥𑀸𑀦𑀦𑁆𑀢𑀼 𑀙𑀟𑁆𑀟𑁂𑀢𑁆𑀯𑀸𑀦 𑀲𑀤𑁂𑀯𑀓𑀸,

𑀕𑀢𑀸𑀲𑀼𑀁 𑀲𑀼𑀜𑁆𑀜𑀓𑀁 𑀆𑀲𑀺 𑀘𑀓𑁆𑀓𑀯𑀸𑀴𑀫𑀺𑀤𑀁 𑀢𑀤𑀸;

𑁨𑁧𑁭.

𑀦𑀺𑀲𑁆𑀲𑀺𑀭𑀻𑀓𑀁 𑀧𑀤𑁂𑀲𑀁 𑀢𑀁 𑀅𑀲𑁄𑀪𑀁 𑀅𑀲𑀫𑀜𑁆𑀚𑀲𑀁,

𑀅𑀳𑁄𑀲𑀺 𑀧𑀢𑀺𑀢𑀸𑀦𑁂𑀓 𑀧𑀽𑀚𑀸𑀪𑀡𑁆𑀟𑀲𑀫𑀸𑀓𑀼𑀮𑀁;

𑁨𑁧𑁮.

𑀏𑀓𑁄𑀯 𑀢𑀢𑁆𑀣 𑀲𑀼𑀕𑀢𑁄 𑀦𑀺𑀲𑀻𑀤𑀺 𑀯𑀚𑀺𑀭𑀸𑀲𑀦𑁂,

𑀧𑀚𑁆𑀚𑀮𑀁 𑀦𑀺𑀚𑀲𑀺𑀭𑀺𑀬𑀸 𑀲𑀽𑀭𑀺𑀬𑁄𑀯 𑀬𑀼𑀕𑀦𑁆𑀥𑀭𑁂;

𑁨𑁧𑁯.

𑀅𑀓𑀫𑁆𑀧𑁄 𑀘 𑀅𑀲𑀦𑁆𑀢𑁆𑀭𑀸𑀲𑀻 𑀮𑁄𑀫𑀳𑀁𑀲 𑀯𑀺𑀯𑀚𑁆𑀚𑀺𑀢𑁄,

𑀅𑀪𑀻𑀢𑁄 𑀲𑀻𑀳𑀭𑀸𑀚𑀸𑀯 𑀫𑀺𑀕𑀘𑁆𑀙𑀸𑀧𑀸𑀦𑀫𑀕𑁆𑀕𑀢𑁄;

𑁨𑁨𑁦.

𑀢𑀢𑁄 𑀥𑀫𑁆𑀫𑀺𑀲𑁆𑀲𑀭𑀲𑁆𑀲𑀕𑁆𑀕𑁂 𑀤𑀼𑀦𑁆𑀦𑀺𑀫𑀺𑀢𑁆𑀢𑀸𑀦𑀺 𑀚𑀸𑀬𑀭𑀼𑀁,

𑀅𑀦𑁆𑀥𑀓𑀸𑀭𑀁 𑀤𑀺𑀲𑀸 𑀆𑀲𑀼𑀁 𑀥𑀽𑀫𑀓𑁂𑀢𑀼 𑀘 𑀅𑀫𑁆𑀩𑀭𑁂;

𑁨𑁨𑁧.

𑀤𑀺𑀦𑀁 𑀤𑀼𑀤𑁆𑀤𑀺𑀦𑀓𑀁 𑀆𑀲𑀺 𑀳𑀢𑀭𑀁𑀲𑀺 𑀤𑀺𑀯𑀸𑀓𑀭𑁄,

𑀉𑀓𑁆𑀓𑀸𑀧𑀢𑁄’𑀧𑀺 𑀧𑀜𑁆𑀜𑀸𑀬𑀺 𑀤𑀺𑀲𑀸𑀟𑀸𑀳𑁄𑀧𑀧𑀚𑁆𑀚𑀣;

𑁨𑁨𑁨.

𑀅𑀖𑀦𑁂 𑀕𑀕𑀦𑁂 𑀆𑀲𑀼𑀁 𑀇𑀦𑁆𑀤𑀘𑀸𑀧𑀯𑀺𑀭𑀚𑁆𑀚𑀼𑀢𑀻,

𑀅𑀦𑀮𑀸𑀲𑀦𑀺𑀬𑁄’𑀤𑀺𑀢𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀧𑀢𑀦𑁆𑀢𑀻 𑀘

𑁨𑁨𑁩.

𑀓𑀸𑀓𑁄𑀮𑀲𑀗𑁆𑀖𑀸 𑀯𑀲𑁆𑀲𑀺𑀁𑀲𑀼 𑀉𑀡𑁆𑀡 𑀲𑀓𑀼𑀡𑀓𑁄𑀲𑀺𑀬𑀸,

𑀘𑀭𑀺𑀁𑀲𑀼 𑀅𑀫𑁆𑀩𑀭𑁂’𑀧𑁂𑀢𑀸 𑀓𑀩𑀦𑁆𑀥𑀸 𑀘 𑀪𑀬𑀸𑀯𑀳𑀸;

𑁨𑁨𑁪. ¶

𑀲𑁂𑀦𑀁 𑀲𑀁𑀯𑀺𑀤𑀳𑀺𑀢𑁆𑀯𑀸𑀦 𑀢𑀢𑁄 𑀫𑀸𑀭𑁄 𑀅𑀪𑀺𑀤𑁆𑀤𑀯𑀺,

𑀆𑀕𑀦𑁆𑀢𑁆𑀯𑀸 𑀘𑀓𑁆𑀓𑀯𑀸𑀴𑀫𑁆𑀳𑀺 𑀞𑀺𑀢𑁄 𑀚𑀺𑀦𑀫𑀼𑀤𑀺𑀓𑁆𑀔𑀺𑀬;

𑁨𑁨𑁫.

𑀏𑀓𑀓𑀲𑁆𑀲 𑀫𑀦𑀼𑀲𑁆𑀲𑀲𑁆𑀲 𑀲𑀦𑁆𑀢𑀺𑀓𑁄𑀧𑀕𑀫𑀁 𑀫𑀫,

𑀦 𑀬𑀼𑀢𑁆𑀢𑀜𑁆𑀳𑀺 𑀕𑀚𑁄 𑀬𑀸𑀢𑀺 𑀕𑀚𑀁 𑀦𑁄 𑀬𑀸𑀢𑀺 𑀓𑁄𑀢𑁆𑀣𑀼𑀓𑀁;

𑁨𑁨𑁬.

𑀦𑁂𑀢𑀁 𑀕𑀭𑀼 𑀧𑀮𑀸𑀧𑁂𑀢𑀼𑀁 𑀓𑀸𑀮𑁄 𑀇𑀢𑀺 𑀯𑀺𑀘𑀺𑀦𑁆𑀢𑀺𑀬,

𑀫𑀸𑀧𑁂𑀲𑀺 𑀓𑀼𑀧𑀺𑀢𑁄 𑀔𑀺𑀧𑁆𑀧𑀁 𑀓𑀧𑁆𑀧𑀦𑀺𑀮 𑀲𑀫𑀸𑀦𑀺𑀮𑀁;

𑁨𑁨𑁭.

𑀔𑀺𑀧𑀦𑁆𑀢𑁄 𑀕𑀕𑀦𑁂 𑀔𑀺𑀧𑁆𑀧𑀁 𑀉𑀤𑁆𑀥𑀭𑀺𑀢𑁆𑀯𑀸 𑀯𑀦𑀲𑁆𑀧𑀢𑀻,

𑀓𑀢𑁆𑀯𑀸𑀦 𑀯𑀦𑀫𑀼𑀫𑁆𑀫𑀽𑀮𑀁 𑀯𑀺𑀤𑁆𑀥𑀁𑀲𑁂𑀦𑁆𑀢𑁄 𑀅𑀲𑁂𑀲𑀓𑀁;

𑁨𑁨𑁮.

𑀘𑀸𑀮𑁂𑀢𑁆𑀯𑀸 𑀢𑀸𑀮𑀲𑀸𑀮𑀸𑀤𑀺𑀁 𑀮𑀼𑀜𑁆𑀘𑀺𑀢𑁆𑀯𑀸 𑀕𑀕𑀦𑁂 𑀔𑀺𑀧𑀁,

𑀧𑀸𑀢𑁂𑀦𑁆𑀢𑁄 𑀘𑀓𑁆𑀓𑀯𑀸𑀴𑀦𑁆𑀢𑁂 𑀯𑀸𑀚𑀺𑀲𑀻𑀳 𑀕𑀚𑀸𑀤𑀬𑁄;

𑁨𑁨𑁯.

𑀧𑀳𑀭𑀺𑀢𑁆𑀯𑀸 𑀯𑀺𑀯𑀢𑁆𑀢𑁂𑀢𑁆𑀯𑀸 𑀕𑀺𑀭𑀺𑀓𑀽𑀝𑀸𑀦𑀺 𑀉𑀓𑁆𑀔𑀺𑀧𑀁,

𑀪𑀫𑀬𑀦𑁆𑀢𑁄 𑀦𑀪𑁄𑀫𑀚𑁆𑀛𑁂 𑀥𑀸𑀯𑀢𑁂𑀯 𑀢𑀢𑁄 𑀢𑀢𑁄;

𑁨𑁩𑁦.

𑀲𑀺𑀮𑀸𑀳𑀺 𑀲𑀺𑀮𑀸𑀲𑀗𑁆𑀖𑀝𑁆𑀝 𑀫𑀳𑀸𑀦𑀸𑀤𑀁 𑀧𑀯𑀢𑁆𑀢𑀬𑀁,

𑀧𑀸𑀢𑁂𑀦𑁆𑀢𑁄 𑀤𑀳𑀦𑀜𑁆𑀘𑀸𑀧𑀺 𑀥𑀽𑀫𑀫𑀫𑁆𑀩𑀭 𑀫𑀼𑀓𑁆𑀔𑀺𑀧𑀁;

𑁨𑁩𑁧.

𑀪𑀫𑀬𑀦𑁆𑀢𑁄 𑀕𑀳𑁂𑀢𑁆𑀯𑀸𑀦 𑀅𑀫𑁆𑀩𑀭𑁂 𑀙𑀤𑀦𑀺𑀝𑁆𑀞𑀺𑀓𑀸,

𑀧𑀸𑀲𑀸𑀤𑁂 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀳𑀭𑀦𑁆𑀢𑁄 𑀦𑀕𑀸𑀤𑀺𑀲𑀼;

𑁨𑁩𑁨.

𑀔𑀦𑀦𑁆𑀢𑁄 𑀧𑀣𑀯𑀺𑀁 𑀧𑀁𑀲𑀼𑀁 𑀕𑀳𑁂𑀢𑁆𑀯𑀸𑀫𑁆𑀩𑀭𑀫𑀡𑁆𑀟𑀮𑁂,

𑀩𑀦𑁆𑀥𑀦𑁆𑀢𑁄𑀯 𑀧𑀭𑀁 𑀪𑀼𑀫𑀺𑀁 𑀪𑀺𑀦𑁆𑀤𑀦𑁆𑀢𑁄 𑀢𑀼𑀗𑁆𑀕𑀧𑀩𑁆𑀩𑀢𑁂;

𑁨𑁩𑁩.

𑀪𑀬𑀸𑀦𑀓𑁂𑀦 𑀲𑀤𑁆𑀤𑁂𑀦 𑀉𑀧𑀕𑀫𑁆𑀫 𑀫𑀳𑀸𑀫𑀼𑀦𑀺𑀁,

𑀘𑀸𑀮𑁂𑀢𑀼𑀁 𑀦𑁂𑀯 𑀲𑁄 𑀲𑀓𑁆𑀔𑀺 𑀅𑀁𑀲𑀼𑀫𑀢𑁆𑀢𑀫𑁆𑀧𑀺 𑀘𑀻𑀯𑀭𑁂;

𑁨𑁩𑁪.

𑀢𑀤𑀸𑀲𑀺 𑀯𑀺𑀚𑀬𑁄 𑀢𑀲𑁆𑀲 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄,

𑀧𑀞𑀫𑁂 𑀫𑀸𑀭𑀬𑀼𑀤𑁆𑀥𑀫𑁆𑀳𑀺 𑀫𑀸𑀭𑀲𑁆𑀲𑀸𑀲𑀺 𑀧𑀭𑀸𑀚𑀬𑁄;

𑁨𑁩𑁫.

𑀏𑀯𑀁 𑀫𑀳𑀸𑀦𑀼𑀪𑀸𑀯𑁄𑀢𑀺 𑀫𑀦𑁆𑀢𑁆𑀯𑀸𑀦 𑀦𑀭𑀲𑀸𑀭𑀣𑀺𑀁,

𑀦𑀺𑀘𑁆𑀘𑀁 𑀯𑀦𑁆𑀤𑀣 𑀧𑀽𑀚𑁂𑀣 𑀲𑁄 𑀳𑀺 𑀯𑁄 𑀲𑀭𑀡𑀁 𑀲𑀤𑀸;

𑀇𑀢𑀺 𑀧𑀞𑀫𑁄 𑀯𑀺𑀚𑀬𑁄.

𑁨𑁩𑁬. ¶

𑀤𑀺𑀲𑁆𑀯𑀸 𑀦𑀫𑀼𑀘𑀺 𑀥𑀻𑀭𑀲𑁆𑀲 𑀫𑀸𑀮𑀼𑀢𑁂𑀦𑀸𑀦𑀼𑀧𑀤𑁆𑀤𑀯𑀁,

𑀤𑀼𑀓𑁆𑀔𑀻 𑀘 𑀤𑀼𑀫𑁆𑀫𑀦𑁄 𑀆𑀲𑀺 𑀓𑁄𑀥𑁂𑀦𑀸𑀢𑀼𑀭𑀫𑀸𑀦𑀲𑁄;

𑁨𑁩𑁭.

𑀳𑁄𑀢𑀼 𑀤𑀸𑀦𑀺 𑀫𑀳𑁄𑀖𑁂𑀦 𑀧𑀯𑀸𑀳𑁂𑀫𑀺 𑀇𑀫𑀁 𑀬𑀢𑀺𑀁,

𑀫𑀸𑀧𑁂𑀢𑁆𑀯𑀸𑀦 𑀫𑀳𑀸𑀫𑁂𑀖𑀁 𑀲𑁄𑀘𑀦𑀸𑀬 𑀅𑀮𑀁 𑀫𑀫;

𑁨𑁩𑁮.

𑀇𑀢𑀺 𑀘𑀺𑀦𑁆𑀢𑀺𑀬 𑀲𑁄 𑀫𑀸𑀭𑁄 𑀫𑀳𑀸𑀫𑁂𑀖𑀫𑀫𑀸𑀧𑀬𑀺,

𑀤𑀺𑀲𑀸𑀲𑀼𑀫𑁆𑀧𑀺𑀳𑀺𑀢𑀸 𑀲𑀩𑁆𑀩𑀸 𑀅𑀦𑁆𑀥𑀓𑀸𑀭𑁄 𑀅𑀯𑀢𑁆𑀣𑀭𑀺;

𑁨𑁩𑁯.

𑀉𑀧𑀭𑀽𑀧𑀭𑀺 𑀕𑀼𑀡𑀸 𑀳𑀼𑀢𑁆𑀯𑀸 𑀲𑀳𑀲𑁆𑀲𑀸𑀦𑀺 𑀲𑀢𑀸𑀦𑀺’𑀧𑀺,

𑀥𑀸𑀭𑀸𑀥𑀭𑀸 𑀫𑀳𑀸𑀥𑀸𑀭𑀸 𑀯𑀢𑁆𑀢𑀬𑀺𑀁𑀲𑀼 𑀲𑀫𑀦𑁆𑀢𑀢𑁄;

𑁨𑁪𑁦.

𑀲𑁄𑀤𑀸𑀫𑀺𑀦𑀻𑀲𑀳𑀲𑁆𑀲𑁂𑀳𑀺 𑀯𑀺𑀦𑀤𑁆𑀥𑀁𑀯 𑀦𑀪𑀁 𑀅𑀳𑀽,

𑀢𑀢𑁆𑀣 𑀢𑀢𑁆𑀣 𑀤𑀺𑀲𑀸𑀪𑀸𑀕𑁂 𑀇𑀦𑁆𑀤𑀘𑀸𑀧𑀸 𑀅𑀯𑀢𑁆𑀢𑀣;

𑁨𑁪𑁧.

𑀫𑀳𑀸𑀭𑀚𑀢𑀭𑀚𑁆𑀚𑀽𑀳𑀺 𑀲𑀺𑀩𑁆𑀩𑀺𑀢𑀸𑀯 𑀦𑀪𑀸𑀯𑀦𑀻,

𑀥𑀭𑀸𑀥𑀭𑁄𑀭𑀼𑀥𑀸𑀭𑀸𑀳𑀺 𑀦𑀺𑀭𑀦𑁆𑀢𑀭𑀧𑀯𑀢𑁆𑀢𑀺𑀳𑀺;

𑁨𑁪𑁨.

𑀢𑀢𑁆𑀣 𑀢𑀢𑁆𑀣 𑀧𑀢𑀦𑁆𑀢𑀸𑀦𑀺 𑀖𑁄𑀭𑀸𑀲𑀦𑀺𑀲𑀢𑀸 𑀅𑀳𑀼𑀁,

𑀫𑀳𑀸𑀪𑀻𑀫 𑀦𑀪𑁄 𑀪𑁂𑀭𑀺𑀲𑁆𑀲𑀦𑀸 𑀆𑀲𑀼𑀁 𑀢𑀳𑀺𑀁 𑀢𑀳𑀺𑀁;

𑁨𑁪𑁩.

𑀉𑀤𑁆𑀥𑀭𑀦𑁆𑀢𑁄 𑀫𑀳𑀸𑀲𑁂𑀮𑁂 𑀫𑀳𑁄𑀖𑁄 𑀘 𑀢𑀤𑀼𑀩𑁆𑀪𑀯𑁂,

𑀓𑁂𑀮𑀸𑀲 𑀲𑀺𑀔𑀭𑀸𑀓𑀸𑀭 𑀏𑀡𑁂𑀧𑀼𑀜𑁆𑀚𑁂 𑀲𑀫𑀼𑀩𑁆𑀩𑀳𑀁;

𑁨𑁪𑁪.

𑀫𑀳𑀸𑀣𑀽𑀧𑀧𑁆𑀧𑀫𑀸𑀡𑀸𑀤𑀺 𑀫𑀳𑀸𑀩𑀼𑀩𑁆𑀩𑀼𑀮𑀫𑀼𑀩𑁆𑀩𑀳𑀁,

𑀕𑀫𑁆𑀪𑀻𑀭𑁄 𑀧𑀼𑀣𑀼𑀮𑁄 𑀘𑀡𑁆𑀟𑁄 𑀉𑀧𑀕𑀫𑁆𑀫 𑀚𑀺𑀦𑀦𑁆𑀢𑀺𑀓𑀁;

𑁨𑁪𑁫.

𑀲𑀭𑀻𑀭𑁂 𑀮𑁄𑀫𑀫𑀢𑁆𑀢𑀫𑁆𑀧𑀺 𑀢𑁂𑀫𑁂𑀢𑀼𑀫𑀲𑀫𑀢𑁆𑀣𑀓𑁄,

𑀕𑀢𑁄 𑀫𑀳𑁄𑀖𑁄 𑀩𑀼𑀤𑁆𑀥𑀲𑁆𑀲’𑀪𑁄’𑀦𑀼𑀪𑀸𑀯𑀫𑀳𑀦𑁆𑀢𑀢𑀸;

𑁨𑁪𑁬.

𑀢𑀤𑀸𑀲𑀺 𑀯𑀺𑀚𑀬𑁄 𑀢𑀲𑁆𑀲 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄,

𑀤𑀼𑀢𑀺𑀬𑁂 𑀫𑀸𑀭𑀬𑀼𑀤𑁆𑀥𑀫𑁆𑀳𑀺 𑀫𑀸𑀭𑀲𑁆𑀲𑀸𑀲𑀻 𑀧𑀭𑀸𑀚𑀬𑁄;

𑁨𑁪𑁭.

𑀏𑀯𑀁 𑀫𑀳𑀸𑀦𑀼𑀪𑀸𑀯𑁄𑀢𑀺 𑀫𑀦𑁆𑀢𑁆𑀯𑀸𑀦 𑀦𑀭 𑀲𑀸𑀭𑀣𑀺𑀁,

𑀦𑀺𑀘𑁆𑀘𑀁 𑀯𑀦𑁆𑀤𑀣 𑀧𑀽𑀚𑁂𑀣 𑀲𑁄 𑀳𑀺 𑀯𑁄 𑀲𑀭𑀡𑀁 𑀲𑀤𑀸;

𑀤𑀼𑀢𑀺𑀬𑁄 𑀯𑀺𑀚𑀬𑁄.

𑁨𑁪𑁮. ¶

𑀢𑀢𑁄 𑀫𑀸𑀭𑁄 𑀅𑀲𑀓𑁆𑀓𑁄𑀦𑁆𑀢𑁄 𑀯𑀲𑁆𑀲𑁄𑀖𑁂𑀦 𑀉𑀧𑀤𑁆𑀤𑀯𑀁,

𑀓𑀸𑀢𑀼𑀁 𑀢𑀲𑁆𑀲 𑀉𑀲𑀽𑀬𑀸𑀤𑀺 𑀓𑁄𑀧𑀸𑀓𑀼𑀮𑀫𑀦𑁄 𑀢𑀤𑀸;

𑁨𑁪𑁯.

𑀪𑀯𑀢𑀚𑁆𑀚 𑀓𑀺𑀫𑁂𑀢𑁂𑀦 𑀫𑀸𑀭𑀡𑁂 𑀢𑀲𑁆𑀲 𑀓𑀺𑀁 𑀕𑀭𑀼,

𑀇𑀤𑀸𑀦𑀗𑁆𑀕𑀸𑀭𑀯𑀼𑀝𑁆𑀞𑀻𑀳𑀺 𑀛𑀸𑀧𑁂𑀫𑀺 𑀲𑀳𑀲𑀸 𑀇𑀫𑀁;

𑁨𑁫𑁦.

𑀇𑀢𑀺 𑀘𑀺𑀦𑁆𑀢𑀺𑀬 𑀲𑁄 𑀫𑀸𑀭𑁄 𑀫𑀸𑀧𑁂𑀢𑁆𑀯𑀸𑀗𑁆𑀕𑀸𑀭 𑀯𑀼𑀝𑁆𑀞𑀺𑀬𑁄,

𑀧𑁂𑀲𑁂𑀲𑀺 𑀦𑀪𑀲𑀸 𑀢𑀲𑁆𑀲 𑀲𑀫𑁆𑀩𑀼𑀤𑁆𑀥𑀲𑁆𑀲 𑀉𑀧𑀦𑁆𑀢𑀺𑀓𑀁;

𑁨𑁫𑁧.

𑀫𑀳𑀸𑀧𑀩𑁆𑀩𑀢𑀲𑀗𑁆𑀓𑀸𑀲 𑀚𑀮𑀺𑀢𑀗𑁆𑀕𑀸𑀭 𑀭𑀸𑀲𑀬𑁄,

𑀥𑀸𑀯𑀺𑀁𑀲𑀼 𑀦𑀳𑀲𑀸 𑀢𑀢𑁆𑀣 𑀅𑀘𑁆𑀘𑀺𑀫𑀦𑁆𑀢𑁄 𑀫𑀳𑀩𑁆𑀪𑀬𑀸;

𑁨𑁫𑁨.

𑀘𑀺𑀘𑁆𑀘𑀺𑀝𑀸𑀬𑀦 𑀲𑀤𑁆𑀤𑁂𑀳𑀺 𑀧𑀽𑀭𑀬𑀦𑁆𑀢𑁄 𑀤𑀺𑀲𑀦𑁆𑀢𑀭𑀁,

𑀥𑀽𑀧𑀸𑀬𑀦𑁆𑀢𑁄 𑀨𑀼𑀮𑀺𑀗𑁆𑀕𑁂𑀳𑀺 𑀫𑀸𑀭𑀲𑁆𑀲𑀸𑀧𑀺 𑀪𑀬𑀸𑀯𑀳𑀸;

𑁨𑁫𑁩.

𑀉𑀚𑁆𑀚𑀸𑀮𑁂𑀦𑁆𑀢𑀸 𑀫𑀳𑀸𑀭𑀼𑀓𑁆𑀔𑁂 𑀧𑀩𑁆𑀩𑀢𑁂’𑀧𑀺 𑀘 𑀲𑀫𑁆𑀫𑀼𑀔𑁂,

𑀦𑀭𑀓𑁄𑀤𑀭𑀼𑀕𑁆𑀕𑀢𑀸 𑀅𑀕𑁆𑀕𑀻 𑀭𑀸𑀲𑀻𑀯𑀸𑀢𑀺 𑀪𑀬𑀸𑀯𑀳𑀸;

𑁨𑁫𑁪.

𑀉𑀧𑀕𑀦𑁆𑀢𑁆𑀯𑀸 𑀫𑀼𑀳𑀼𑀢𑁆𑀢𑁂𑀦 𑀦𑀺𑀲𑀺𑀦𑁆𑀦𑀁 𑀫𑀼𑀦𑀺𑀧𑀼𑀗𑁆𑀕𑀯𑀁,

𑀫𑀥𑀼𑀫𑀢𑁆𑀢𑀸𑀮𑀺𑀛𑀗𑁆𑀓𑀸𑀭 𑀦𑀸𑀤𑀸𑀓𑀼𑀮𑀤𑀺𑀲𑀸𑀫𑀼𑀔𑀸;

𑁨𑁫𑁫.

𑀧𑀸𑀢𑁂𑀦𑁆𑀢𑀺 𑀲𑀢𑀢𑀸𑀫𑀦𑁆𑀤 𑀫𑀓𑀭𑀦𑁆𑀤𑀚 𑀩𑀺𑀦𑁆𑀤𑀯𑁄,

𑀫𑀸𑀮𑀸𑀯𑀢𑀁𑀲𑀓𑀸 𑀳𑀼𑀢𑁆𑀯𑀸 𑀧𑀸𑀤𑀫𑀼𑀮𑁂 𑀧𑀢𑀺𑀁𑀲𑀼 𑀢𑀸;

𑁨𑁫𑁬.

𑀢𑀤𑀸𑀲𑀺 𑀯𑀺𑀚𑀬𑁄 𑀢𑀲𑁆𑀲 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄,

𑀢𑀢𑀺𑀬𑁂 𑀫𑀸𑀭 𑀬𑀼𑀤𑁆𑀥𑀫𑁆𑀳𑀺 𑀫𑀸𑀭𑀲𑁆𑀲𑀸𑀲𑀺 𑀧𑀭𑀸𑀚𑀬𑁄;

𑁨𑁫𑁭.

𑀏𑀯𑀁 𑀫𑀳𑀸𑀦𑀼𑀪𑀸𑀯𑁄𑀢𑀺 𑀫𑀦𑁆𑀢𑁆𑀯𑀸𑀦 𑀦𑀭𑀲𑀸𑀭𑀣𑀺𑀁,

𑀦𑀺𑀘𑁆𑀘𑀁 𑀯𑀦𑁆𑀤𑀣 𑀧𑀽𑀚𑁂𑀣 𑀲𑁄 𑀳𑀺 𑀯𑁄 𑀲𑀭𑀡𑀁 𑀲𑀤𑀸;

𑀢𑀢𑀺𑀬𑁄 𑀯𑀺𑀚𑀬𑁄.

𑁨𑁫𑁮.

𑀢𑁂𑀦𑀸𑀦𑀼𑀧𑀤𑁆𑀤𑀼𑀢𑀁 𑀩𑀼𑀤𑁆𑀥𑀁 𑀧𑀲𑁆𑀲𑀺𑀢𑁆𑀯𑀸𑀦 𑀧𑀚𑀸𑀧𑀢𑀺,

𑀤𑀼𑀓𑁆𑀔𑀺𑀢𑁄 𑀤𑀼𑀫𑁆𑀫𑀦𑁄 𑀳𑀼𑀢𑁆𑀯𑀸 𑀏𑀯𑀁 𑀘𑀺𑀦𑁆𑀢𑁂𑀲𑀺 𑀤𑀼𑀫𑁆𑀫𑀢𑀺;

𑁨𑁫𑁯.

𑀧𑀸𑀲𑀸𑀡𑀯𑀲𑁆𑀲𑀁 𑀫𑀸𑀧𑁂𑀢𑁆𑀯𑀸 𑀘𑀼𑀡𑁆𑀡𑁂𑀢𑁆𑀯𑀸 𑀧𑀦𑀺𑀫𑀁 𑀬𑀢𑀺𑀁,

𑀯𑀺𑀤𑁆𑀥𑀁𑀲𑁂𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀸𑀧𑁂𑀲𑀽𑀧𑀮𑀯𑀲𑁆𑀲𑀓𑀁;

𑁨𑁬𑁦. ¶

𑀢𑀲𑁆𑀫𑀺𑀁 𑀯𑀲𑁆𑀲𑁂’𑀢𑀺 𑀩𑀻𑀪𑀘𑁆𑀙𑀸 𑀥𑀽𑀫𑀸𑀬𑀦𑁆𑀢𑀸 𑀲𑀚𑁄𑀢𑀺𑀓𑀸,

𑀚𑀮𑀺𑀢𑀗𑁆𑀕𑀸𑀭𑀲𑀗𑁆𑀓𑀸𑀲𑀸 𑀧𑀸𑀲𑀸𑀡𑀼𑀘𑁆𑀘𑀸𑀯𑀘𑀸 𑀩𑀳𑀽;

𑁨𑁬𑁧.

𑀓𑀭𑀸𑀦𑀜𑁆𑀜𑁄𑀜𑁆𑀜𑀲𑀗𑁆𑀖𑀝𑁆𑀝𑀸 𑀫𑀳𑀦𑁆𑀢𑀁 𑀪𑁂𑀭𑀯𑀁 𑀭𑀯𑀁,

𑀤𑀼𑀤𑁆𑀤𑀺𑀦𑀁 𑀥𑀽𑀫𑀚𑀸𑀮𑀸𑀳𑀺 𑀓𑀼𑀭𑀼𑀫𑀸𑀦𑀸 𑀲𑀫𑀦𑁆𑀢𑀢𑁄;

𑁨𑁬𑁨.

𑀲𑀢𑁆𑀣𑀽𑀧𑀕𑀦𑁆𑀢𑁆𑀯𑀸𑀪𑀺𑀫𑀼𑀔𑀁 𑀲𑀦𑁆𑀢𑀫𑀸𑀮𑀸𑀕𑀼𑀮𑀸 𑀯𑀺𑀬,

𑀧𑀢𑀺𑀁𑀲𑀼 𑀲𑀺𑀭𑀺𑀧𑀸𑀤𑁂 𑀢𑁂 𑀅𑀫𑀦𑁆𑀤𑀸𑀫𑁄𑀤𑀯𑀸𑀳𑀺𑀦𑁄;

𑁨𑁬𑁩.

𑀢𑀤𑀸𑀲𑀺 𑀯𑀺𑀚𑀬𑁄 𑀢𑀲𑁆𑀲 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄,

𑀘𑀢𑀼𑀢𑁆𑀣𑁂 𑀫𑀸𑀭𑀬𑀼𑀤𑁆𑀥𑀫𑁆𑀳𑀺 𑀫𑀸𑀭𑀲𑁆𑀲𑀸𑀲𑀺 𑀧𑀭𑀸𑀚𑀬𑁄;

𑁨𑁬𑁪.

𑀏𑀯𑀁 𑀫𑀳𑀸𑀦𑀼𑀪𑀸𑀯𑁄𑀢𑀺 𑀫𑀦𑁆𑀢𑁆𑀯𑀸𑀦 𑀦𑀭𑀲𑀸𑀭𑀣𑀺𑀁,

𑀦𑀺𑀘𑁆𑀘𑀁 𑀯𑀦𑁆𑀤𑀣 𑀧𑀽𑀚𑁂𑀣 𑀲𑁄 𑀳𑀺 𑀯𑁄 𑀲𑀭𑀡𑀁 𑀲𑀤𑀸;

𑀘𑀢𑀼𑀢𑁆𑀣𑁄 𑀯𑀺𑀚𑀬𑁄.

𑁨𑁬𑁫.

𑀤𑀺𑀲𑁆𑀯𑀸𑀦𑀢𑁆𑀢𑀫𑀦𑁄 𑀫𑀸𑀭𑁄 𑀤𑀺𑀢𑁆𑀢𑁄 𑀓𑁄𑀥𑀕𑁆𑀕𑀺𑀦𑀸 𑀢𑀤𑀸,

𑀫𑀸𑀧𑁂𑀢𑁆𑀯𑀸’𑀬𑀼𑀥𑀯𑀲𑁆𑀲𑀁 𑀲𑁄 𑀧𑁂𑀲𑁂𑀲𑀺 𑀢𑀤𑀼𑀧𑀦𑁆𑀢𑀺𑀓𑀁;

𑁨𑁬𑁬.

𑀦𑁂𑀢𑁆𑀢𑀺𑀁𑀲𑀘𑁆𑀙𑀽𑀭𑀺𑀓𑀸 𑀲𑀢𑁆𑀢𑀺 𑀳𑁂𑀡𑁆𑀟𑀺𑀯𑀸𑀮 𑀕𑀤𑀸𑀤𑀬𑁄,

𑀢𑀺𑀡𑁆𑀕𑀥𑀸𑀭𑀸 𑀧𑀚𑁆𑀚𑀮𑀺𑀢𑀸 𑀅𑀘𑀺𑀭𑀚𑁆𑀚𑀼𑀢𑀺 𑀲𑀦𑁆𑀦𑀺𑀪𑀸;

𑁨𑁬𑁭.

𑀬𑀣𑀸 𑀧𑀼𑀧𑁆𑀨𑁄𑀧𑀳𑀸𑀭𑁄𑀧𑀕𑀦𑁆𑀢𑁆𑀯𑀸𑀦 𑀕𑀕𑀦𑀗𑁆𑀕𑀦𑀸,

𑀏𑀯𑀁 𑀲𑀫𑁆𑀩𑀼𑀤𑁆𑀥𑀧𑀸𑀤𑁂𑀲𑀼 𑀧𑀢𑀺𑀁𑀲𑀼 𑀧𑀭𑀺𑀯𑀢𑁆𑀢𑀺𑀢𑀸;

𑁨𑁬𑁮.

𑀢𑀤𑀸𑀲𑀺 𑀯𑀺𑀚𑀬𑁄 𑀢𑀲𑁆𑀲 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄,

𑀧𑀜𑁆𑀘𑀫𑁂 𑀫𑀸𑀭𑀬𑀼𑀤𑁆𑀥𑀫𑁆𑀳𑀺 𑀫𑀸𑀭𑀲𑁆𑀲𑀸𑀲𑀺 𑀧𑀭𑀸𑀚𑀬𑁄;

𑁨𑁬𑁯.

𑀏𑀯𑀁 𑀫𑀳𑀸𑀦𑀼𑀪𑀸𑀯𑁄𑀢𑀺 𑀫𑀦𑁆𑀢𑁆𑀯𑀸𑀦 𑀦𑀭𑀲𑀸𑀭𑀣𑀺𑀁,

𑀦𑀺𑀘𑁆𑀘𑀁 𑀯𑀦𑁆𑀤𑀣 𑀧𑀽𑀚𑁂𑀣 𑀲𑁄 𑀳𑀺 𑀯𑁄 𑀲𑀭𑀡𑀁 𑀲𑀤𑀸;

𑀧𑀜𑁆𑀘𑀫𑁄 𑀯𑀺𑀚𑀬𑁄.

𑁨𑁭𑁦.

𑀢𑀁 𑀤𑀺𑀲𑁆𑀯𑀸 𑀧𑀸𑀧𑀺𑀫𑀸 𑀓𑀼𑀤𑁆𑀥𑁄 𑀬𑀁 𑀬𑀁 𑀢𑀲𑁆𑀲 𑀓𑀭𑁄𑀫’𑀳𑀁,

𑀢𑀁 𑀢𑀁’𑀤𑀸𑀦𑀻 𑀦 𑀲𑀓𑁆𑀓𑁄𑀢𑀺 𑀓𑀺𑀜𑁆𑀘𑀺 𑀓𑀸𑀓𑀼𑀫𑀼’𑀧𑀓𑁆𑀓𑀫𑀁;

𑁨𑁭𑁧. ¶

𑀫𑀸𑀧𑁂𑀲𑀺 𑀓𑀼𑀓𑁆𑀓𑀼𑀮𑀁 𑀯𑀲𑁆𑀲𑀁 𑀫𑀸𑀭𑀫𑀻𑀢’𑀥𑀼𑀦𑀸 𑀫𑀼𑀦𑀺𑀁,

𑀲𑁄’𑀕𑀸’𑀓𑀸𑀲𑀸 𑀲𑀫𑁆𑀧𑀤𑀺𑀢𑁆𑀢𑁄 𑀥𑀽𑀫𑀸𑀬𑀦𑁆𑀢𑁄𑀯 𑀧𑀚𑁆𑀚𑀮𑀁;

𑁨𑁭𑁨.

𑀚𑀺𑀦𑀲𑁆𑀲𑀸𑀪𑀺𑀫𑀼𑀔𑀁 𑀕𑀦𑁆𑀢𑁆𑀯𑀸 𑀓𑀼𑀓𑁆𑀓𑀼𑀮𑁄 𑀧𑀭𑀺𑀯𑀢𑁆𑀢𑀺𑀬,

𑀘𑀦𑁆𑀤𑀦𑀲𑁆𑀲 𑀲𑀺𑀢𑀩𑁆𑀪𑀲𑁆𑀲 𑀥𑀽𑀮𑀻 𑀳𑀼𑀢𑁆𑀯𑀸𑀦 𑀧𑀕𑁆𑀖𑀭𑀺;

𑁨𑁭𑁩.

𑀢𑀤𑀸𑀲𑀺 𑀯𑀺𑀚𑀬𑁄 𑀢𑀲𑁆𑀲 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄,

𑀙𑀝𑁆𑀞𑁂 𑀦𑀫𑀼𑀘𑀺 𑀬𑀼𑀤𑁆𑀥𑀫𑁆𑀳𑀺 𑀫𑀸𑀭𑀲𑁆𑀲𑀸𑀲𑀻 𑀧𑀭𑀸𑀚𑀬𑁄;

𑁨𑁭𑁪.

𑀏𑀯𑀁 𑀫𑀳𑀸𑀦𑀼𑀪𑀸𑀯𑁄𑀢𑀺 𑀫𑀦𑁆𑀢𑁆𑀯𑀸𑀦 𑀦𑀭𑀲𑀸𑀭𑀣𑀺𑀁,

𑀦𑀺𑀘𑁆𑀘𑀁 𑀯𑀦𑁆𑀤𑀣 𑀧𑀽𑀚𑁂𑀣 𑀲𑁄 𑀳𑀺 𑀯𑁄 𑀲𑀭𑀡𑀁 𑀲𑀤𑀸;

𑀙𑀝𑁆𑀞𑁄 𑀯𑀺𑀚𑀬𑁄.

𑁨𑁭𑁫.

𑀢𑀢𑁄 𑀤𑀺𑀲𑁆𑀯𑀸𑀦 𑀢𑀁 𑀓𑀡𑁆𑀳𑁄 𑀓𑀡𑁆𑀳𑀲𑁂𑀦𑀸 𑀧𑀼𑀭𑀓𑁆𑀔𑀢𑁄,

𑀲𑀗𑁆𑀓𑀼𑀤𑁆𑀥𑁄 𑀧𑁂𑀲𑀬𑀺 𑀢𑀢𑁆𑀣 𑀯𑀲𑁆𑀲𑀁 𑀲𑁄 𑀲𑀺𑀓𑀢𑀸𑀫𑀬𑀁;

𑁨𑁭𑁬.

𑀔𑀤𑀻𑀭𑀗𑁆𑀕𑀸𑀭 𑀲𑀗𑁆𑀓𑀸𑀲𑀸 𑀯𑀸𑀮𑀼𑀓𑀸 𑀕𑀕𑀦𑀸𑀕𑀢𑀸,

𑀪𑀲𑁆𑀲𑀦𑁆𑀢𑀸 𑀚𑀺𑀦𑀧𑀸𑀤𑀦𑁆𑀢𑁂 𑀯𑀸𑀲𑀘𑀼𑀡𑁆𑀡𑀢𑁆𑀢𑀫𑀸𑀕𑀢𑀸;

𑁨𑁭𑁭.

𑀢𑀤𑀸𑀲𑀺 𑀯𑀺𑀚𑀬𑁄 𑀢𑀲𑁆𑀲 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄,

𑀲𑀢𑁆𑀢𑀫𑁂 𑀫𑀸𑀭𑀬𑀼𑀤𑁆𑀥𑀫𑁆𑀳𑀺 𑀫𑀸𑀭𑀲𑁆𑀲𑀸𑀲𑀺 𑀧𑀭𑀸𑀚𑀬𑁄;

𑁨𑁭𑁮.

𑀏𑀯𑀁 𑀫𑀳𑀸𑀦𑀼𑀪𑀸𑀯𑁄𑀢𑀺 𑀫𑀦𑁆𑀢𑁆𑀯𑀸𑀦 𑀦𑀭 𑀲𑀸𑀭𑀣𑀺𑀁,

𑀦𑀺𑀘𑁆𑀘𑀁 𑀯𑀦𑁆𑀤𑀣 𑀧𑀽𑀚𑁂𑀣 𑀲𑁄 𑀳𑀺 𑀯𑁄 𑀲𑀭𑀡𑀁 𑀲𑀤𑀸;

𑀲𑀢𑁆𑀢𑀫𑁄 𑀯𑀺𑀚𑀬𑁄.

𑁨𑁭𑁯.

𑀢𑀫𑁆𑀧𑀺 𑀤𑀺𑀲𑁆𑀯𑀸 𑀅𑀲𑀚𑁆𑀚𑀦𑁆𑀢𑁄 𑀅𑀳𑀺𑀭𑀻 𑀓𑁄𑀧𑀓𑁂𑀢𑀼𑀓𑁄,

𑀫𑀸𑀧𑁂𑀢𑁆𑀯𑀸 𑀧𑀮𑀺𑀧𑀦𑁆𑀤𑀸𑀦𑀺 𑀢𑀢𑁆𑀣 𑀑𑀲𑀻𑀤𑀬𑀸𑀫𑀺 𑀢𑀁;

𑁨𑁮𑁦.

𑀇𑀢𑀺 𑀘𑀺𑀦𑁆𑀢𑀺𑀬 𑀫𑀸𑀧𑁂𑀢𑁆𑀯𑀸 𑀧𑁂𑀲𑁂𑀲𑀺 𑀧𑀮𑀺𑀧𑀁 𑀖𑀦𑀁,

𑀥𑀽𑀧𑀸𑀬𑀦𑁆𑀢𑁄 𑀧𑀚𑁆𑀚𑀮𑀦𑁆𑀢𑁄 𑀕𑀦𑁆𑀢𑁆𑀯𑀸 𑀲𑁄 𑀦𑀪𑀲𑀸 𑀮𑀳𑀼𑀁;

𑁨𑁮𑁧.

𑀲𑀫𑁆𑀩𑀼𑀤𑁆𑀥𑀲𑀺𑀭𑀺𑀧𑀸𑀤𑀫𑁆𑀳𑀺 𑀲𑀫𑁆𑀧𑀢𑁆𑀢𑁄 𑀦𑀺𑀩𑁆𑀩𑀼𑀢𑁄 𑀢𑀢𑁄,

𑀦𑀸𑀦𑀸𑀲𑀼𑀕𑀦𑁆𑀥𑀲𑀫𑁆𑀪𑀼𑀢 𑀕𑀦𑁆𑀥𑀓𑀤𑁆𑀤𑀫𑀢𑀁 𑀕𑀢𑁄;

𑁨𑁮𑁨. ¶

𑀢𑀤𑀸𑀲𑀺 𑀯𑀺𑀚𑀬𑁄 𑀢𑀲𑁆𑀲 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄,

𑀅𑀝𑁆𑀞𑀫𑁂 𑀫𑀸𑀭𑀬𑀼𑀤𑁆𑀥𑀫𑁆𑀳𑀺 𑀫𑀸𑀭𑀲𑁆𑀲𑀸𑀲𑀺 𑀧𑀭𑀸𑀚𑀬𑁄;

𑁨𑁮𑁩.

𑀏𑀯𑀁 𑀫𑀳𑀸𑀦𑀼𑀪𑀸𑀯𑁄𑀢𑀺 𑀫𑀦𑁆𑀢𑁆𑀯𑀸𑀦 𑀦𑀭𑀲𑀸𑀭𑀣𑀺𑀁,

𑀦𑀺𑀘𑁆𑀘𑀁 𑀯𑀦𑁆𑀤𑀣 𑀧𑀽𑀚𑁂𑀣 𑀲𑁄 𑀳𑀺 𑀯𑁄 𑀲𑀭𑀡𑀁 𑀲𑀤𑀸;

𑁨𑁮𑁪.

𑀑𑀮𑁄𑀓𑁂𑀦𑁆𑀢𑁄 𑀢𑀢𑁄 𑀫𑀸𑀭𑁄 𑀫𑀸𑀭𑀸𑀭𑀺𑀁 𑀲𑀺𑀭𑀺𑀬𑀼𑀚𑁆𑀚𑀮𑀁,

𑀤𑀺𑀲𑁆𑀯𑀸 𑀘𑀺𑀢𑁆𑀢𑀫𑁆𑀧𑀲𑀸𑀤𑁂𑀢𑀼𑀫𑀲𑀓𑁆𑀓𑁄𑀦𑁆𑀢𑁄’𑀢𑀺 𑀓𑁄𑀧𑀯𑀸;

𑁨𑁮𑁫.

𑀅𑀚𑁆𑀚𑁂𑀢𑀫𑀦𑁆𑀥𑀓𑀸𑀭𑀲𑁆𑀫𑀺𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀫𑁄𑀳𑀺𑀢𑀼𑀁,

𑀫𑀬𑁆𑀳𑀁 𑀪𑀸𑀭𑁄𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀸𑀧𑁂𑀲𑀺 𑀢𑀺𑀫𑀺𑀭𑀁 𑀖𑀦𑀁;

𑁨𑁮𑁬.

𑀮𑁄𑀓𑀦𑁆𑀢𑀭𑁂𑀲𑀼 𑀲𑀫𑁆𑀪𑀼𑀢 𑀢𑀺𑀫𑀺𑀲𑁄’𑀯 𑀪𑀬𑀸𑀯𑀳𑁄,

𑀕𑀦𑁆𑀢𑁆𑀯𑀸𑀦 𑀕𑀕𑀦𑀸 𑀲𑁄 𑀳𑀺 𑀧𑀢𑁆𑀯𑀸𑀦 𑀫𑀼𑀦𑀺𑀲𑀦𑁆𑀢𑀺𑀓𑀁;

𑁨𑁮𑁭.

𑀬𑀣𑀸 𑀢𑀺𑀫𑀺𑀭𑀫𑀸𑀬𑀸𑀢𑀺 𑀯𑀺𑀦𑀸𑀲𑀁 𑀲𑀼𑀭𑀺𑀬𑀼𑀕𑁆𑀕𑀢𑁂,

𑀏𑀯𑀫𑀸𑀲𑀺 𑀚𑀺𑀦𑀕𑁆𑀕𑀫𑁆𑀳𑀺 𑀅𑀦𑁆𑀥𑀓𑀸𑀭𑁄 𑀢𑀣𑀸𑀯𑀺𑀥𑁄;

𑁨𑁮𑁮.

𑀢𑀤𑀸𑀲𑀺 𑀯𑀺𑀚𑀬𑁄 𑀢𑀲𑁆𑀲 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄,

𑀦𑀯𑀫𑁂 𑀫𑀸𑀭𑀬𑀼𑀤𑁆𑀥𑀫𑁆𑀳𑀺 𑀫𑀸𑀭𑀲𑁆𑀲𑀸𑀲𑀺 𑀧𑀭𑀸𑀚𑀬𑁄;

𑁨𑁮𑁯.

𑀏𑀯𑀁 𑀫𑀳𑀸𑀦𑀼𑀪𑀸𑀯𑁄𑀢𑀺 𑀫𑀦𑁆𑀢𑁆𑀯𑀸𑀦 𑀦𑀭𑀲𑀸𑀭𑀣𑀺𑀁,

𑀦𑀺𑀘𑁆𑀘𑀁 𑀯𑀦𑁆𑀤𑀣 𑀧𑀽𑀚𑁂𑀣 𑀲𑁄 𑀳𑀺 𑀯𑁄 𑀲𑀭𑀡𑀁 𑀲𑀤𑀸;

𑀦𑀯𑀫𑁄 𑀯𑀺𑀚𑀬𑁄.

𑁨𑁯𑁦.

𑀏𑀯𑀁 𑀦𑀯𑀳𑀺 𑀯𑀼𑀝𑁆𑀞𑀺𑀳𑀺 𑀓𑀢𑁆𑀯𑀸 𑀫𑀸𑀭𑁄 𑀫𑀳𑀸 𑀪𑀯𑀁,

𑀦 𑀢𑀲𑁆𑀲𑁄𑀧𑀤𑁆𑀤𑀯𑀁 𑀤𑀺𑀲𑁆𑀯𑀸 𑀤𑀺𑀢𑁆𑀢𑀓𑁄𑀧𑀸𑀦𑀮𑀸𑀓𑀼𑀮𑁄;

𑁨𑁯𑁧.

𑀕𑀳𑁂𑀢𑁆𑀯𑀸𑀦 𑀢𑀢𑁄 𑀔𑀺𑀧𑁆𑀧𑀁 𑀞𑀧𑀺𑀢𑀁 𑀅𑀢𑁆𑀢𑀕𑀼𑀢𑁆𑀢𑀺𑀬𑀸,

𑀘𑀓𑁆𑀓𑀸𑀬𑀼𑀥𑀁 𑀫𑀳𑀸𑀢𑁂𑀚𑀁 𑀓𑀼𑀧𑀺𑀢𑁄 𑀔𑀺𑀧𑀺 𑀯𑁂𑀕𑀲𑀸;

𑁨𑁯𑁨.

𑀥𑀸𑀭𑀸𑀥𑀭𑀁 𑀢𑀫𑀼𑀕𑁆𑀕𑀬𑁆𑀳 𑀓𑀼𑀤𑁆𑀥𑁄 𑀧𑀳𑀭𑀢𑁂 𑀬𑀤𑀻,

𑀓𑀮𑀻𑀭𑀁𑀯 𑀅𑀲𑀚𑁆𑀚𑀦𑁆𑀢𑁄 𑀯𑀺𑀔𑀡𑁆𑀟𑁂𑀢𑀺 𑀧𑀚𑀸𑀧𑀢𑀺;

𑁨𑁯𑁩.

𑀢𑀣𑁂𑀯 𑀲𑁄 𑀫𑀳𑀺𑀁 𑀓𑀼𑀤𑁆𑀥𑁄 𑀫𑀸𑀭𑁄 𑀔𑀺𑀧𑀢𑀺 𑀯𑁂𑀕𑀯𑀸,

𑀦 𑀪𑀯𑀦𑁆𑀢𑁄𑀲𑀥𑀸 𑀧𑀸𑀡𑀸 𑀯𑀺𑀲𑀼𑀲𑁆𑀲𑀦𑁆𑀢𑀺 𑀲𑀭𑀸𑀤𑀬𑁄;

𑁨𑁯𑁪. ¶

𑀢𑀣𑁂𑀯 𑀓𑀼𑀧𑀺𑀢𑁄 𑀢𑁂𑀦 𑀔𑀺𑀧𑀢𑁂 𑀲𑁄 𑀫𑀳𑀫𑁆𑀩𑀼𑀥𑀺𑀁,

𑀯𑀺𑀮𑀬𑀁 𑀚𑀮𑀚𑀸 𑀬𑀦𑁆𑀢𑀺 𑀲𑀼𑀲𑁆𑀲𑀢𑁂 𑀲𑁄 𑀫𑀳𑀡𑁆𑀡𑀯𑁄;

𑁨𑁯𑁫.

𑀏𑀯𑀁 𑀫𑀳𑀸𑀦𑀼𑀪𑀸𑀯𑁄 𑀲𑁄 𑀕𑀘𑁆𑀙𑀦𑁆𑀢𑁄 𑀚𑀮𑀫𑁆𑀩𑀭𑁂,

𑀧𑀢𑁆𑀯𑀸𑀦 𑀧𑀢𑀺𑀢𑁄 𑀦𑀸𑀣𑀁 𑀳𑀼𑀢𑁆𑀯𑀸𑀦 𑀧𑀼𑀧𑁆𑀨𑀘𑀼𑀫𑁆𑀩𑀝𑀁;

𑁨𑁯𑁬.

𑀢𑀤𑀸𑀲𑀺 𑀯𑀺𑀚𑀬𑁄 𑀢𑀲𑁆𑀲 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄,

𑀤𑀲𑀫𑁂 𑀫𑀸𑀭𑀬𑀼𑀤𑁆𑀥𑀫𑁆𑀳𑀺 𑀫𑀸𑀭𑀲𑁆𑀲𑀸𑀲𑀺 𑀧𑀭𑀸𑀚𑀬𑁄;

𑁨𑁯𑁭.

𑀏𑀯𑀁 𑀫𑀳𑀸𑀦𑀼𑀪𑀸𑀯𑁄𑀢𑀺 𑀫𑀦𑁆𑀢𑁆𑀯𑀸𑀦 𑀦𑀭𑀲𑀸𑀭𑀣𑀺𑀁,

𑀦𑀺𑀘𑁆𑀘𑀁 𑀯𑀦𑁆𑀤𑀣 𑀧𑀽𑀚𑁂𑀣 𑀲𑁄 𑀳𑀺 𑀯𑁄 𑀲𑀭𑀡𑀁 𑀲𑀤𑀸;

𑀤𑀲𑀫𑁄 𑀯𑀺𑀚𑀬𑁄.

𑁨𑁯𑁮.

𑀇𑀢𑀺 𑀓𑁄𑀧𑀕𑁆𑀕𑀺𑀦𑀸 𑀤𑀺𑀢𑁆𑀢𑀫𑀦𑀁 𑀫𑀸𑀭𑀁 𑀢𑀤𑀸 𑀚𑀺𑀦𑁄,

𑀓𑀭𑀼𑀡𑀸𑀚𑀮𑀲𑁂𑀓𑁂𑀦 𑀦𑀺𑀩𑁆𑀩𑀸𑀧𑁂𑀦𑁆𑀢𑁄 𑀦𑀺𑀲𑀻𑀤𑀺 𑀲𑁄;

𑁨𑁯𑁯.

𑀏𑀯𑀁 𑀓𑀢𑁆𑀯𑀸𑀧𑀺 𑀲𑁄 𑀓𑀼𑀤𑁆𑀥𑁄 𑀅𑀮𑀤𑁆𑀥𑀯𑀺𑀚𑀬𑁄 𑀢𑀤𑀸,

𑀆𑀫𑀦𑁆𑀢𑁂𑀲𑀺 𑀲𑀓𑀁 𑀲𑁂𑀦𑀁 𑀧𑀮𑀬𑀸𑀦𑀮𑀪𑁂𑀭𑀯𑀁;

𑁩𑁦𑁦.

𑀏𑀣𑀸𑀲𑀼 𑀯𑀢’𑀭𑁂 𑀫𑀬𑁆𑀳𑀁 𑀅𑀲𑁆𑀲𑀯𑀸 𑀫𑀸𑀭𑀓𑀺𑀗𑁆𑀓𑀭𑀸,

𑀦𑀸𑀦𑀸𑀯𑁂𑀲𑀥𑀭𑀸 𑀳𑁄𑀣 𑀥𑀸𑀭𑁂𑀣 𑀯𑀺𑀯𑀺𑀥𑀸𑀬𑀼𑀥𑁂;

𑁩𑁦𑁧.

𑀲𑀤𑁆𑀤𑁂𑀳𑁂𑀢𑀁 𑀧𑀮𑀸𑀧𑁂𑀣 𑀬𑀸𑀣 𑀕𑀡𑁆𑀳𑀣 𑀩𑀦𑁆𑀥𑀣,

𑀧𑀸𑀤𑁂 𑀕𑀳𑁂𑀢𑁆𑀯𑀸 𑀔𑀺𑀧𑀣 𑀘𑀓𑁆𑀓𑀯𑀸𑀴𑀦𑁆𑀢𑀭𑀁 𑀇𑀢𑁄;

𑁩𑁦𑁨.

𑀅𑀣𑀕𑀸 𑀲𑀳 𑀯𑀸𑀘𑀸𑀳𑀺 𑀪𑀺𑀁𑀲𑀸 𑀲𑀸 𑀫𑀸𑀭𑀯𑀸𑀳𑀺𑀦𑀻,

𑀢𑀼𑀭𑀗𑁆𑀕 𑀯𑁆𑀬𑀕𑁆𑀖 𑀫𑀸𑀢𑀗𑁆𑀕 𑀲𑀻𑀳𑀸𑀤𑀺𑀭𑀽𑀧 𑀪𑀺𑀁𑀲𑀦𑀸;

𑁩𑁦𑁩.

𑀲𑀸 𑀫𑀸𑀭𑀲𑁆𑀲𑀼𑀪𑀢𑁄 𑀧𑀲𑁆𑀲𑁂 𑀘𑀢𑀼𑀯𑀻𑀲𑀢𑀺𑀬𑁄𑀚𑀦𑁂,

𑀞𑀺𑀢𑀸 𑀧𑀘𑁆𑀙𑀺𑀫𑀪𑀸𑀕𑀫𑁆𑀳𑀻 𑀘𑀓𑁆𑀓𑀯𑀸𑀴𑀲𑀺𑀮𑀸𑀯𑀥𑀺𑀁;

𑁩𑁦𑁪.

𑀩𑀳𑀮𑀢𑁆𑀢𑁂𑀦 𑀲𑀸 𑀆𑀲𑀺 𑀲𑀫𑁆𑀧𑀼𑀡𑁆𑀡 𑀦𑀯𑀬𑁄𑀚𑀦𑀸,

𑀬𑀓𑁆𑀔 𑀧𑁂𑀢 𑀧𑀺𑀲𑀸𑀘𑀸𑀤𑀺 𑀯𑁂𑀲𑁂𑀳𑀺 𑀪𑀬𑀯𑀸𑀳𑀺𑀦𑀻;

𑁩𑁦𑁫.

𑀲𑀁𑀯𑀝𑁆𑀝 𑀯𑀸𑀢𑀲𑀫𑁆𑀧𑀸𑀢 𑀔𑀼𑀪𑀻𑀢𑀫𑁆𑀩𑀼𑀥𑀺𑀦𑁄 𑀯𑀺𑀬,

𑀉𑀮𑁆𑀮𑁄𑀮 𑀪𑀺𑀫𑀖𑁄𑀲𑁄 𑀢𑀼 𑀕𑀢𑁄 𑀩𑁆𑀭𑀳𑁆𑀫𑀧𑀼𑀭𑀸𑀯𑀥𑀺𑀁;

𑁩𑁦𑁬. ¶

𑀤𑀦𑁆𑀢 𑀲𑀗𑁆𑀖𑀝𑁆𑀝 𑀲𑀜𑁆𑀚𑀸𑀢 𑀚𑀸𑀮𑀸𑀫𑀸𑀮𑀸 𑀲𑀫𑀸𑀓𑀼𑀮𑀸,

𑀢𑁂𑀲𑀁𑀕𑀸𑀭𑀸’𑀯 𑀤𑀺𑀢𑁆𑀢𑀸𑀲𑀼𑀁 𑀓𑁄𑀥𑀼𑀫𑁆𑀫𑀻𑀮𑀺𑀢 𑀮𑁄𑀘𑀦𑀸

𑁩𑁦𑁭.

𑀯𑀳𑀦𑁆𑀢𑀺 𑀥𑀽𑀫𑀓𑁆𑀔𑀦𑁆𑀥𑀸𑀦𑀺 𑀫𑀼𑀔𑀓𑁄𑀝𑀭 𑀓𑁄𑀝𑀺𑀳𑀻,

𑀦𑀻𑀳𑀝𑀸 𑀦𑀻𑀳𑀝𑀸 𑀚𑀺𑀯𑁆𑀳𑀸 𑀲𑀼𑀪𑀻𑀫𑁄𑀭𑀕𑀢𑀁 𑀕𑀢𑀸;

𑁩𑁦𑁮.

𑀉𑀤𑁆𑀥𑀭𑀺𑀢𑁆𑀯𑀸𑀦 𑀢𑀸𑀮𑀸𑀤𑀺 𑀓𑀭𑀺𑀢𑁆𑀯𑀸𑀦 𑀲𑀭𑀸𑀲𑀦𑁂,

𑀪𑀼𑀚𑀗𑁆𑀕𑁂 𑀘 𑀕𑀼𑀡𑁂 𑀓𑁂𑀘𑀺 𑀕𑀸𑀴𑁆𑀳𑀫𑀸𑀓𑀟𑁆𑀠𑀬𑀦𑁆𑀢𑀺 𑀘;

𑁩𑁦𑁯.

𑀧𑀼𑀡𑁆𑀟𑀭𑀻𑀓𑀘𑁆𑀙 𑀲𑀻𑀳𑀸𑀤𑀻 𑀔𑀺𑀧𑀦𑁆𑀢𑀸𑀪𑀺𑀫𑀼𑀔𑁂 𑀢𑀤𑀸,

𑀥𑀸𑀯𑀦𑁆𑀢𑁂𑀓𑁂 𑀲𑀫𑀼𑀕𑁆𑀕𑀬𑁆𑀳 𑀧𑀼𑀭𑀢𑁄 𑀤𑀺𑀢𑁆𑀢𑀧𑀩𑁆𑀩𑀢𑁂;

𑁩𑁧𑁦.

𑀪𑀬𑀸𑀦𑀓𑀸𑀢𑀺 𑀦𑁂𑀓𑀸𑀦𑀺 𑀲𑀻𑀲𑀸𑀦𑁂𑀓 𑀓𑀮𑁂𑀩𑀭𑁂,

𑀫𑀸𑀧𑀬𑀺𑀢𑁆𑀯𑀸𑀦 𑀧𑀼𑀭𑀢𑁄 𑀥𑀸𑀯𑀦𑁆𑀢𑀺 𑀓𑁂𑀘𑀺 𑀓𑀺𑀗𑁆𑀓𑀭𑀸;

𑁩𑁧𑁧.

𑀲𑀻𑀲𑁂𑀦 𑀲𑀻𑀳𑀲𑀗𑁆𑀓𑀸𑀲𑀸 𑀕𑀢𑁆𑀢𑁂𑀦 𑀫𑀦𑀼𑀚𑁄𑀧𑀫𑀸,

𑀩𑀼𑀤𑁆𑀥𑀲𑁆𑀲𑀸𑀪𑀺𑀫𑀼𑀔𑀁 𑀓𑁂𑀘𑀺 𑀥𑀸𑀯𑀦𑁆𑀢𑀺 𑀫𑀸𑀭 𑀓𑀺𑀗𑁆𑀓𑀭𑀸;

𑁩𑁧𑁨.

𑀓𑀡𑁆𑀞𑀻𑀭𑀯𑀸𑀓𑀸𑀭𑀤𑁂𑀳𑀸 𑀫𑀼𑀔𑁂𑀦 𑀔𑀮𑀼 𑀭𑀓𑁆𑀔𑀲𑀸,

𑀳𑀼𑀢𑁆𑀯𑀸𑀦 𑀅𑀪𑀺𑀥𑀸𑀯𑀦𑁆𑀢𑀺 𑀓𑁂𑀘𑀺𑀫𑀸𑀭𑀲𑁆𑀲 𑀓𑀺𑀗𑁆𑀓𑀭𑀸;

𑁩𑁧𑁩.

𑀤𑀡𑁆𑀟𑀫𑀸𑀦𑀯𑀓𑀸 𑀲𑀻𑀲𑀪𑀸𑀕𑁂𑀦𑀸’𑀢𑀺𑀪𑀬𑀸𑀯𑀳𑀸,

𑀕𑀢𑁆𑀢𑁂𑀦 𑀭𑀓𑁆𑀔𑀲𑀸 𑀳𑀼𑀢𑁆𑀯𑀸 𑀓𑁂𑀘𑀺 𑀥𑀸𑀯𑀦𑁆𑀢𑀺 𑀓𑀺𑀗𑀓𑀭𑀸;

𑁩𑁧𑁪.

𑀤𑀻𑀧𑀘𑁆𑀙𑁂𑀪 𑀢𑀼𑀭𑀗𑁆𑀕𑀸𑀦𑀁 𑀯𑁆𑀬𑀕𑁆𑀖 𑀔𑀕𑁆𑀕𑀯𑀺𑀲𑀸𑀡𑀺𑀦𑀁,

𑀯𑀭𑀸𑀳 𑀫𑀳𑀺𑀲𑀸𑀤𑀻𑀦𑀁 𑀓𑀡𑁆𑀡𑀧𑀸𑀯𑀼𑀭 𑀪𑁄𑀕𑀺𑀦𑀁;

𑁩𑁧𑁫.

𑀲𑀻𑀲𑀸𑀓𑀸𑀭 𑀫𑀳𑀸𑀲𑀻𑀲𑁂 𑀢𑀩𑁆𑀩𑀺𑀭𑀼𑀤𑁆𑀥𑁂 𑀓𑀮𑁂𑀩𑀭𑁂,

𑀫𑀸𑀧𑁂𑀢𑁆𑀯𑀸 𑀅𑀪𑀺𑀥𑀸𑀯𑀦𑁆𑀢𑀺 𑀓𑁂𑀘𑀺 𑀫𑀸𑀭𑀲𑁆𑀲 𑀓𑀺𑀗𑁆𑀓𑀭𑀸;

𑁩𑁧𑁬.

𑀆𑀓𑀟𑁆𑀠𑁂𑀦𑁆𑀢𑀸 𑀓𑀧𑁄𑀮𑀸𑀦𑀁 𑀓𑀭𑀲𑀸𑀔𑀸𑀳𑀺 𑀲𑀫𑁆𑀫𑀼𑀔𑁂,

𑀤𑀲𑁆𑀲𑀬𑀦𑁆𑀢𑀸 𑀫𑀳𑀸𑀤𑀸𑀞𑀁 𑀓𑁂𑀘𑁂𑀦𑁆𑀢𑀺 𑀫𑀸𑀭𑀓𑀺𑀗𑁆𑀓𑀭𑀸;

𑁩𑁧𑁭.

𑀢𑀺𑀔𑀺𑀡𑀕𑁆𑀕𑀦𑀔𑀸 𑀓𑁂𑀘𑀺 𑀨𑀸𑀮𑀬𑀦𑁆𑀢𑀸 𑀲𑀓𑁄𑀤𑀭𑁂,

𑀅𑀦𑁆𑀢𑁂 𑀕𑀮𑁂 𑀧𑀺𑀮𑀦𑁆𑀥𑀺𑀢𑁆𑀯𑀸 𑀥𑀸𑀯𑀦𑁆𑀢𑀺 𑀓𑀺𑀗𑁆𑀓𑀭𑀸𑀧𑀭𑁂;

𑁩𑁧𑁮.

𑀕𑀺𑀮𑀦𑁆𑀢𑀸 𑀓𑁂𑀘𑀺 𑀨𑀡𑀺𑀦𑁄 𑀉𑀕𑁆𑀕𑀺𑀭𑀦𑁆𑀢𑀸 𑀢𑀣𑁂𑀯 𑀘,

𑀲𑀻𑀲 𑀓𑀦𑁆𑀥𑀭 𑀓𑀡𑁆𑀡𑀦𑁆𑀢 𑀩𑀸𑀳𑀼 𑀅𑀗𑁆𑀕𑀼𑀮𑀺 𑀆𑀤𑀺𑀲𑀼;

𑁩𑁧𑁯. ¶

𑀲𑀓𑀮𑁂𑀲𑀼 𑀲𑀭𑀻𑀭𑁂𑀲𑀼 𑀯𑀺𑀲𑀥𑀽𑀫𑀕𑁆𑀕𑀺 𑀲𑀗𑁆𑀓𑀼𑀮𑁂,

𑀥𑀸𑀭𑁂𑀦𑁆𑀢𑀸’𑀲𑀺𑀯𑀺𑀲𑁂 𑀓𑁂𑀘𑀺 𑀥𑀸𑀯𑀦𑁆𑀢𑁆𑀬𑀕𑁆𑀕𑁂 𑀪𑀬𑀸𑀯𑀳𑀸;

𑁩𑁨𑁦.

𑀧𑀤𑀺𑀢𑁆𑀢𑀸𑀬𑁄𑀕𑀼𑀮𑁂 𑀕𑀬𑁆𑀳 𑀔𑀺𑀧𑀦𑁆𑀢𑁂𑀓𑁂 𑀅𑀦𑁂𑀓𑀥𑀸,

𑀤𑀺𑀢𑁆𑀢𑀧𑀩𑁆𑀩𑀢𑀫𑀼𑀤𑁆𑀥𑀘𑁆𑀘 𑀓𑁂𑀘𑀺 𑀅𑀕𑁆𑀕𑀺𑀓𑀧𑀸𑀮𑀓𑁂,

𑀔𑀺𑀧𑀦𑁆𑀦𑀸 𑀅𑀪𑀺𑀥𑀸𑀯𑀦𑁆𑀢𑀺 𑀤𑀝𑁆𑀞𑁄𑀝𑁆𑀞𑀸 𑀪𑀻𑀫𑀮𑁄𑀘𑀦𑀸;

𑁩𑁨𑁧.

𑀮𑀸𑀮𑀬𑀦𑁆𑀢𑀸 𑀲𑀓𑀸 𑀚𑀺𑀯𑁆𑀳𑀸 𑀔𑀦𑁆𑀥𑁂 𑀓𑀢𑁆𑀯𑀸𑀦 𑀫𑀼𑀕𑁆𑀕𑀭𑁂,

𑀫𑀢𑁆𑀢𑀪𑀼𑀚𑀗𑁆𑀕 𑀯𑁂𑀲𑁂𑀦 𑀥𑀸𑀯𑀦𑁆𑀢𑀺 𑀅𑀧𑀭𑁂 𑀪𑀝𑀸;

𑁩𑁨𑁨.

𑀧𑀺𑀩𑀦𑁆𑀢𑀸 𑀮𑁄𑀳𑀺𑀢𑀸𑀦𑁂𑀓𑁂 𑀔𑀸𑀤𑀦𑁆𑀢𑀸 𑀧𑀺𑀲𑀺𑀢𑁂 𑀧𑀭𑁂,

𑀧𑀺𑀲𑀸𑀘𑀸𑀯’𑀘𑀭𑀼𑀁 𑀓𑁂𑀘𑀺 𑀫𑀼𑀦𑀺𑀭𑀸𑀚𑀲𑁆𑀲 𑀅𑀕𑁆𑀕𑀢𑁄;

𑁩𑁨𑁩.

𑀉𑀮𑁆𑀮𑀗𑁆𑀖𑀦𑁆𑀢𑀸 𑀘 𑀲𑁂𑀮𑁂𑀦𑁆𑀢𑀸 𑀥𑀸𑀯𑀦𑁆𑀢𑀸 𑀚𑀮𑀺𑀢𑀸𑀬𑀼𑀥𑀸,

𑀪𑀺𑀫𑀯𑁂𑀲𑀥𑀭𑀸 𑀬𑀓𑁆𑀔𑀸 𑀓𑁂𑀘𑁂𑀦𑁆𑀢𑀺 𑀪𑀓𑀼𑀝𑀻𑀫𑀼𑀔𑀸;

𑁩𑁨𑁪.

𑀧𑀡𑀼𑀡𑁆𑀡 𑀲𑀭𑀯𑀲𑁆𑀲𑁂𑀳𑀺 𑀓𑀼𑀦𑁆𑀢𑀢𑁄𑀫𑀭 𑀯𑀼𑀝𑁆𑀞𑀺𑀳𑀺,

𑀪𑁂𑀡𑁆𑀟𑀺𑀯𑀸𑀮𑀸’𑀲𑀺𑀘𑀓𑁆𑀓𑁂𑀳𑀺 𑀦𑀺𑀩𑁆𑀪𑀭𑀸𑀲𑀺 𑀤𑀺𑀕𑀦𑁆𑀢𑀭𑀁;

𑁩𑁨𑁫.

𑀬𑀁 𑀤𑀺𑀝𑁆𑀞 𑀲𑀼𑀢 𑀫𑀢𑁆𑀢𑁂𑀦 𑀫𑀭𑀡𑀁 𑀘𑀺𑀢𑁆𑀢 𑀯𑀺𑀩𑁆𑀪𑀫𑀁,

𑀬𑀸𑀢𑀺 𑀮𑁄𑀓𑁄 𑀓𑀣𑀁 𑀓𑁄 𑀢𑀁 𑀦𑀺𑀲𑁆𑀲𑁂𑀲𑀁 𑀪𑀸𑀲𑀢𑁂 𑀦𑀭𑁄;

𑁩𑁨𑁬.

𑀦𑁂𑀓𑀤𑀦𑁆𑀢𑀲𑀳𑀲𑁆𑀲𑁂𑀳𑀺 𑀦𑀺𑀓𑁆𑀔𑀦𑁆𑀢𑀕𑁆𑀕𑀺𑀲𑀺𑀔𑀸𑀬𑀼𑀢𑀁,

𑀤𑀸𑀦𑀦𑀺𑀚𑁆𑀛𑀭𑀲𑀫𑁆𑀧𑀸𑀢𑀁 𑀪𑀻𑀫𑀕𑀚𑁆𑀚𑀦𑀕𑀚𑁆𑀚𑀺𑀢𑀁;

𑁩𑁨𑁭.

𑀦𑁂𑀓𑀲𑀢 𑀓𑀭𑀕𑁆𑀕𑁂𑀳𑀺 𑀥𑀢𑀸𑀬𑁄𑀮𑀕𑀼𑀴𑀸𑀤𑀺𑀓𑀁,

𑀲𑀦𑁆𑀦𑀤𑁆𑀥𑀁 𑀓𑀯𑀘𑀸𑀤𑀻𑀳𑀺 𑀕𑀺𑀭𑀺𑀁𑀘 𑀕𑀺𑀭𑀺𑀫𑁂𑀔𑀮𑀁;

𑁩𑁨𑁮.

𑀆𑀭𑀽𑀴𑁆𑀳𑁄 𑀧𑀸𑀧𑀺𑀫𑀸 𑀢𑀢𑁆𑀣 𑀉𑀲𑁆𑀲𑀸𑀧𑁂𑀢𑁆𑀯𑀸 𑀚𑀬𑀤𑁆𑀥𑀚𑀁,

𑀯𑀺𑀲𑀸𑀮𑀸𑀯𑀢𑁆𑀢 𑀤𑀸𑀞𑀕𑁆𑀕𑁄 𑀘𑀺𑀧𑀺𑀝𑀕𑁆𑀕 𑀪𑀕𑁆𑀕 𑀦𑀸𑀲𑀺𑀓𑁄;

𑁩𑁨𑁯.

𑀤𑀝𑁆𑀞𑁄𑀝𑁆𑀞 𑀪𑀻𑀫𑀯𑀤𑀦𑁄 𑀪𑀓𑀼𑀝𑀻 𑀯𑀮𑀺 𑀮𑀮𑀸𑀝𑀓𑁄,

𑀓𑁄𑀥𑀸𑀦𑀮𑁂𑀳𑀺 𑀲𑀦𑁆𑀤𑀺𑀤𑁆𑀥 𑀫𑀳𑀓𑁆𑀔𑁄 𑀢𑀫𑁆𑀩𑀤𑀸𑀞𑀻𑀓𑁄;

𑁩𑁩𑁦.

𑀦𑀻𑀮𑀧𑀩𑁆𑀩𑀢 𑀲𑀗𑁆𑀓𑀸𑀲 𑀯𑀺𑀲𑀫𑀗𑁆𑀕𑁄 𑀫𑀳𑁄𑀤𑀭𑁄,

𑀕𑁄𑀦𑀲𑁄𑀭𑀕 𑀲𑀧𑁆𑀧𑀸𑀤𑀺 𑀅𑀗𑁆𑀕𑀻𑀓𑀢 𑀲𑀼𑀪𑀺𑀁𑀲𑀦𑁄;

𑁩𑁩𑁧. ¶

𑀲𑀳𑀲𑁆𑀲𑀩𑀸𑀳𑀼𑀁 𑀫𑀸𑀧𑁂𑀢𑁆𑀯𑀸 𑀙𑀽𑀭𑀺𑀓𑀸 𑀬𑀝𑁆𑀞𑀺 𑀲𑀢𑁆𑀢𑀺 𑀘,

𑀓𑁄𑀤𑀡𑁆𑀟𑀘𑀡𑁆𑀟𑀩𑀸𑀡𑁂 𑀘 𑀘𑀓𑁆𑀓 𑀓𑀼𑀦𑁆𑀢𑀕𑀤𑀸𑀤𑀺 𑀘;

𑁩𑁩𑁨.

𑀲𑀗𑁆𑀓𑀼 𑀯𑁂𑀢𑀸𑀮𑀺𑀓𑀸 𑀨𑀭𑀲𑀼 𑀧𑀸𑀲𑀫𑀼𑀕𑁆𑀕𑀭 𑀅𑀗𑁆𑀓𑀼𑀲𑁂,

𑀕𑀳𑁂𑀢𑁆𑀯𑀸 𑀓𑀡𑀬𑀜𑁆𑀘𑀸𑀣 𑀢𑀺𑀲𑀽𑀮 𑀯𑀚𑀺𑀭𑀸𑀬𑀼𑀥𑁂;

𑁩𑁩𑁩.

𑀧𑀭𑀺𑀯𑀢𑁆𑀢𑁂𑀲𑀺 𑀆𑀓𑀸𑀲𑁂 𑀢𑁂𑀲𑀫𑀜𑁆𑀜𑁄𑀜𑁆𑀜 𑀖𑀝𑁆𑀝𑀦𑀸,

𑀉𑀕𑁆𑀕𑀢𑁂𑀳𑀺 𑀨𑀼𑀮𑀺𑀗𑁆𑀕𑁂𑀳𑀺 𑀥𑀸𑀯𑀦𑁆𑀢𑁂𑀳𑀺 𑀲𑀫𑀦𑁆𑀢𑀢𑁄;

𑁩𑁩𑁪.

𑀅𑀕𑁆𑀕𑀺 𑀘𑀓𑁆𑀓𑀧𑀭𑀻𑀢𑀁𑀘 𑀓𑀼𑀭𑀼𑀫𑀸𑀦𑁄 𑀦𑀺𑀚𑀁 𑀢𑀦𑀼𑀁,

𑀆𑀯𑀳𑀦𑁆𑀢𑁄 𑀪𑀬𑀁 𑀩𑁆𑀭𑀳𑁆𑀫 𑀲𑀼𑀭 𑀲𑀺𑀤𑁆𑀥𑀸𑀤𑀻𑀦𑀁 𑀢𑀤𑀸,

𑀲 𑀫𑀸𑀭𑀲𑁂𑀦𑁄 𑀲𑁄 𑀫𑀸𑀭𑁄 𑀪𑀕𑀯𑀦𑁆𑀢𑀫𑀼𑀧𑀸𑀕𑀫𑀺;

𑁩𑁩𑁫.

𑀉𑀤𑀬𑀸𑀯𑀮𑀓𑀽𑀝𑀫𑁆𑀳𑀺 𑀪𑀸𑀲𑀦𑁆𑀢𑁄𑀯 𑀧𑀪𑀸𑀓𑀭𑁄,

𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀫𑁂𑀭𑀽’𑀯 𑀢𑀺𑀓𑀽𑀝𑀸𑀘𑀮 𑀫𑀼𑀤𑁆𑀥𑀦𑀺;

𑁩𑁩𑁬.

𑀓𑀢𑁆𑀯𑀸𑀦 𑀧𑀺𑀝𑁆𑀞𑀺𑀢𑁄 𑀩𑁄𑀥𑀺𑀁 𑀪𑀽𑀭𑀼𑀳𑀁 𑀯𑀚𑀺𑀭𑀸𑀲𑀦𑁂,

𑀦𑀺𑀲𑀺𑀦𑁆𑀦𑁄 𑀪𑀕𑀯𑀸’𑀢𑀻𑀯 𑀦𑀺𑀘𑁆𑀘𑀮𑁄 𑀅𑀢𑀺𑀭𑁄𑀘𑀢𑀺;

𑁩𑁩𑁭.

𑀅𑀓𑀫𑁆𑀧𑁄 𑀲𑁄 𑀫𑀼𑀦𑀻 𑀏𑀯𑀫𑀕𑁆𑀕𑁂’𑀓𑀸𑀲𑀺 𑀦𑀺𑀚𑀁 𑀩𑀮𑀁,

𑀲𑀫𑁆𑀫𑀧𑁆𑀧𑀥𑀸𑀦𑀲𑀁𑀬𑀼𑀢𑁆𑀢𑁄 𑀤𑀬𑀸𑀫𑁂𑀢𑁆𑀢𑁄 𑀫𑀳𑁂𑀲𑀺𑀓𑁄;

𑁩𑁩𑁮.

𑀘𑀢𑀼𑀩𑀼𑀤𑁆𑀥𑀪𑀼𑀫𑀺𑀲𑀗𑁆𑀔𑀸𑀢 𑀚𑀬𑀪𑀼𑀫𑀺𑀫𑀼𑀤𑀺𑀓𑁆𑀔𑀺𑀬,

𑀘𑀢𑀼𑀲𑁆𑀲𑀗𑁆𑀕𑀳𑀯𑀢𑁆𑀣𑀽𑀦𑀁 𑀬𑁄𑀚𑁂𑀢𑁆𑀯𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑁂;

𑁩𑁩𑁯.

𑀬𑁄𑀚𑁂𑀢𑁆𑀯𑀸𑀦 𑀣𑀺𑀭𑀁 𑀢𑀢𑁆𑀣 𑀲𑀤𑁆𑀥𑀸𑀤𑀺𑀩𑀮𑀓𑁄𑀝𑁆𑀞𑀓𑁂,

𑀲𑀢𑀺𑀧𑀝𑁆𑀞𑀸𑀦𑀧𑀸𑀓𑀸𑀭𑁂 𑀅𑀪𑁂𑀚𑁆𑀚𑀺𑀦𑁆𑀤𑁆𑀭𑀺𑀬 𑀕𑁄𑀧𑀼𑀭𑁂;

𑁩𑁪𑁦.

𑀣𑀺𑀭𑀜𑀸𑀡𑀬𑀼𑀥𑀸𑀓𑀺𑀡𑁆𑀡𑁂 𑀫𑁂𑀢𑁆𑀢𑀸 𑀲𑀦𑁆𑀦𑀸𑀳 𑀯𑀫𑁆𑀫𑀺𑀢𑁄,

𑀅𑀪𑀻𑀢 𑀪𑀸𑀭𑀢𑀻 𑀪𑀼𑀭𑀺 𑀪𑁂𑀭𑀺𑀲𑀗𑁆𑀔 𑀧𑀼𑀭𑀓𑁆𑀔𑀢𑁄;

𑁩𑁪𑁧.

𑀘𑀢𑀼𑀭𑀗𑁆𑀕𑀯𑀺𑀭𑀺𑀬𑀼𑀢𑁆𑀢𑀼𑀗𑁆𑀕 𑀫𑀸𑀢𑀗𑁆𑀕𑀓𑁆𑀔𑀦𑁆𑀥𑀲𑀗𑁆𑀕𑀢𑁄,

𑀧𑀼𑀜𑁆𑀜𑀲𑀫𑁆𑀪𑀸𑀭𑀪𑀸𑀭𑁂𑀦 𑀓𑀫𑁆𑀧𑀬𑀁 𑀯𑀲𑀼𑀥𑀸𑀢𑀮𑀁;

𑁩𑁪𑁨.

𑀘𑀭𑀺𑀬𑀢𑁆𑀢𑀬 𑀲𑀗𑁆𑀔𑀸𑀢’𑀫𑀼𑀲𑁆𑀲𑀸𑀧𑀺𑀢 𑀚𑀬𑀤𑁆𑀥𑀚𑁄,

𑀏𑀯𑀁 𑀯𑀺𑀥𑀸𑀬 𑀫𑀸𑀭𑀸𑀭𑀺 𑀫𑀸𑀭𑀲𑀗𑁆𑀕𑀸𑀫 𑀫𑀡𑁆𑀟𑀮𑀁;

𑁩𑁪𑁩.

𑀤𑀸𑀦𑀸𑀤𑀬𑁄 𑀫𑀳𑀸𑀬𑁄𑀥𑁂 𑀆𑀳𑀽𑀬 𑀲𑀳𑀚𑀸𑀢𑀓𑁂,

𑀲𑀼𑀡𑀸𑀣 𑀪𑁄 𑀕𑀺𑀭𑀁 𑀫𑀬𑁆𑀳𑀁 𑀪𑀯𑀢𑀚𑁆𑀚 𑀫𑀳𑀸 𑀪𑀯𑁄;

𑁩𑁪𑁪. ¶

𑀏𑀣 𑀬𑀸𑀣 𑀲𑀫𑀕𑁆𑀕𑀢𑁆𑀣 𑀦 𑀑𑀲𑁆𑀲𑀓𑁆𑀓𑀣 𑀲𑀼𑀚𑁆𑀛𑀣,

𑀯𑀺𑀚𑁂𑀢𑀼𑀁 𑀫𑀸𑀭𑀬𑀼𑀤𑁆𑀥𑀫𑁆𑀳𑀻 𑀦 𑀲𑀓𑁆𑀓𑀸’𑀲𑁂𑀲𑀚𑀦𑁆𑀢𑀼𑀳𑀺;

𑁩𑁪𑁫.

𑀅𑀚𑁆𑀚 𑀕𑀘𑁆𑀙𑀢𑀺 𑀦𑀺𑀝𑁆𑀞𑀸𑀦𑀁 𑀲𑁄 𑀪𑁄 𑀧𑀸𑀭𑀫𑀺𑀢𑀸𑀪𑀝𑀸,

𑀲𑀳𑀼𑀲𑁆𑀲𑀸𑀳𑀸 𑀫𑀫𑀕𑁆𑀕𑀫𑁆𑀳𑀺 𑀤𑀲𑁆𑀲𑁂𑀣 𑀯𑀻𑀭𑀺𑀬𑀁 𑀲𑀓𑀁;

𑁩𑁪𑁬.

𑀅𑀣 𑀤𑀸𑀦𑀪𑀝𑁄 𑀆𑀳 𑀅𑀧𑁆𑀨𑁄𑀝𑀁 𑀤𑀺𑀕𑀼𑀡𑀁 𑀪𑀼𑀚𑀁,

𑀧𑀲𑁆𑀲𑀤𑀸𑀦𑀺 𑀫𑀳𑀸𑀯𑀻𑀭 𑀩𑀮𑀁 𑀫𑁂 𑀫𑀸𑀭𑀥𑀁𑀲𑀦𑁂;

𑁩𑁪𑁭.

𑀧𑀭𑀫𑀢𑁆𑀣𑀧𑀸𑀭𑀫𑀺 𑀬𑁄𑀥𑀁 𑀢𑀣𑁂’𑀯 𑀉𑀧𑀧𑀸𑀭𑀫𑀺𑀁,

𑀉𑀪𑁄 𑀧𑀲𑁆𑀲𑁂 𑀓𑀭𑀺𑀢𑁆𑀯𑀸𑀦 𑀲𑀲𑁂𑀦𑁄 𑀥𑀸𑀯𑀺 𑀤𑀧𑁆𑀧𑀯𑀸;

𑁩𑁪𑁮.

𑀢𑀣𑁂𑀯 𑀲𑀻𑀮𑀦𑀸𑀫𑀯𑁆𑀳𑁄 𑀧𑀸𑀭𑀫𑀻𑀪𑀝’𑀫𑀼𑀢𑁆𑀢𑀫𑁄,

𑀦𑀺𑀓𑁆𑀔𑀫𑁆𑀫 𑀲𑀳 𑀲𑁂𑀦𑀸𑀬 𑀫𑀸𑀭𑀲𑁂𑀦𑀫𑀪𑀺𑀤𑁆𑀤𑀯𑀻;

𑁩𑁪𑁯.

𑀢𑀣𑀸𑀦𑁂𑀓𑁆𑀔𑀫𑁆𑀫𑀦𑀸𑀫𑁄𑀧𑀺 𑀲𑀦𑁆𑀦𑀤𑁆𑀥𑁄’𑀲𑀪𑀝𑁄 𑀪𑀝𑁄,

𑀫𑀸𑀭𑀲𑁂𑀦𑀸𑀫𑀺𑀕𑁂 𑀳𑀦𑁆𑀢𑀼𑀁 𑀥𑀸𑀯𑀺 𑀤𑀻𑀧𑀻’𑀯 𑀲𑀸𑀳𑀲𑁄;

𑁩𑁫𑁦.

𑀧𑀜𑁆𑀜𑀸𑀬𑁄𑀥𑁄’𑀧𑀺 𑀕𑀘𑁆𑀙𑀦𑁆𑀢𑁄 𑀲𑀸𑀝𑁄𑀧𑁄 𑀥𑀸𑀯𑀺 𑀤𑀧𑁆𑀧𑀯𑀸,

𑀫𑀸𑀭𑀫𑁂𑀭𑀼𑀫𑀳𑀸 𑀅𑀚𑁆𑀚 𑀲𑀲𑁂𑀦𑀼𑀫𑁆𑀫𑀽𑀮𑀬𑀸𑀫𑀺𑀢𑀺;

𑁩𑁫𑁧.

𑀯𑀻𑀭𑀺𑀬𑀧𑀸𑀭𑀫𑀺𑀢𑀸 𑀬𑁄𑀥𑁄 𑀤𑀝𑁆𑀞𑁄𑀝𑁆𑀞𑁄 𑀪𑀻𑀫𑀕𑀚𑁆𑀚𑀦𑁄,

𑀲𑁄𑀲𑁂𑀫𑀺 𑀫𑀫 𑀢𑁂𑀚𑁂𑀦 𑀯𑀤𑀁’𑀕𑀸 𑀫𑀸𑀭 𑀲𑀸𑀕𑀭𑀁;

𑁩𑁫𑁨.

𑀔𑀦𑁆𑀢𑀺𑀲𑀘𑁆𑀘𑀯𑁆𑀳𑀬𑀸 𑀘𑁂𑀯 𑀢𑀢𑁄’𑀥𑀺𑀝𑁆𑀞𑀸𑀦𑀓𑁄 𑀪𑀝𑁄,

𑀆𑀲𑀼 𑀥𑀸𑀯𑀺𑀁𑀲𑀼 𑀧𑀸𑀢𑁂𑀢𑀼𑀁 𑀫𑀸𑀭𑀲𑁆𑀲 𑀫𑀓𑀭𑀤𑁆𑀥𑀚𑀁;

𑁩𑁫𑁩.

𑀫𑁂𑀢𑁆𑀢𑀸𑀦𑀸𑀫𑁄 𑀫𑀳𑀸𑀬𑁄𑀥𑁄 𑀫𑀸𑀭𑁄 𑀫𑀬𑁆𑀳𑀫𑀮𑀦𑁆𑀢𑀺’𑀕𑀸,

𑀉𑀧𑁂𑀓𑁆𑀔𑀓𑁄’𑀧𑀻 𑀲𑁄 𑀬𑁄𑀥𑁄 𑀫𑀸𑀭𑀲𑁂𑀦𑀁 𑀧𑀤𑀸𑀮𑀺𑀢𑀼𑀁;

𑁩𑁫𑁪.

𑀧𑁂𑀲𑁂𑀢𑁆𑀯𑁂𑀯𑀁 𑀚𑀺𑀦𑁄 𑀲𑁂𑀦𑀁’𑀲𑀭𑀻𑀭𑀁 𑀤𑀴𑁆𑀳𑀯𑀺𑀓𑁆𑀓𑀫𑀁,

𑀦𑀺𑀲𑀺𑀤𑀺 𑀢𑀲𑁆𑀲 𑀢𑁂𑀚𑁂𑀦 𑀦𑀺𑀭𑀼𑀲𑁆𑀲𑀸𑀳𑀸𑀲𑀺 𑀲𑀸 𑀘𑀫𑀽;

𑁩𑁫𑁫.

𑀅𑀳𑁄 𑀪𑁄 𑀯𑀺𑀫𑁆𑀳𑀬𑀁 𑀤𑀸𑀦𑀺 𑀲𑀼𑀡𑀸𑀣 𑀫𑀼𑀦𑀺𑀦𑁄 𑀫𑀫,

𑀚𑁂𑀢𑀺 𑀏𑀓𑁄 𑀦𑀺𑀲𑀺𑀦𑁆𑀦𑁄𑀯 𑀲𑀫𑀸𑀭𑀁 𑀫𑀸𑀭𑀯𑀸𑀳𑀺𑀦𑀺𑀁;

𑁩𑁫𑁬.

𑀓𑁄𑀧𑀸𑀦𑀮𑁂𑀦 𑀲𑀦𑁆𑀤𑀺𑀢𑁆𑀢𑀁 𑀤𑀼𑀝𑁆𑀞 𑀭𑀼𑀝𑁆𑀞𑀁 𑀧𑀚𑀸𑀧𑀢𑀺𑀁,

𑀅𑀤𑀼𑀝𑁆𑀞𑁄 𑀚𑁂𑀢𑀺 𑀲𑀫𑁆𑀩𑀼𑀤𑁆𑀥𑁄 𑀆𑀦𑀼𑀪𑀸𑀯𑁄 𑀳𑀺 𑀢𑀸𑀤𑀺𑀲𑁄;

𑁩𑁫𑁭. ¶

𑀤𑀺𑀢𑁆𑀢𑀸𑀬𑀼𑀥𑁂 𑀔𑀺𑀧𑀦𑁆𑀢𑁂’𑀧𑀺 𑀯𑀺𑀚𑁆𑀛𑀦𑁆𑀢𑁂 𑀯𑀲𑀯𑀢𑁆𑀢𑀺𑀦𑀻,

𑀦𑀺𑀭𑀸𑀬𑀼𑀥𑁄’𑀯 𑀢𑀁 𑀚𑁂𑀢𑀺 𑀆𑀦𑀼𑀪𑀸𑀯𑁄 𑀳𑀺 𑀢𑀸𑀤𑀺𑀲𑁄;

𑁩𑁫𑁮.

𑀲𑀳𑀸𑀝𑁄𑀧𑀁 𑀲𑀳𑀗𑀓𑀸𑀭𑀁 𑀫𑀸𑀭𑀁 𑀲𑀸𑀟𑀫𑁆𑀩𑀭𑀁 𑀢𑀤𑀸,

𑀦𑀺𑀘𑁆𑀘𑀮𑁄 𑀚𑁂𑀢𑀺 𑀲𑀫𑁆𑀩𑀼𑀤𑁆𑀥𑁄 𑀆𑀦𑀼𑀪𑀸𑀯𑁄 𑀳𑀺 𑀢𑀸𑀤𑀺𑀲𑁄;

𑁩𑁫𑁯.

𑀳𑀢𑁆𑀣𑀲𑁆𑀲 𑀭𑀣𑀧𑀢𑁆𑀢𑀻𑀳𑀺 𑀥𑀸𑀯𑀦𑁆𑀢𑀁 𑀢𑀫𑀺𑀢𑁄𑀘𑀺𑀢𑁄,

𑀦𑀺𑀲𑀺𑀦𑁆𑀦𑁄𑀯 𑀚𑀺𑀦𑁄 𑀚𑁂𑀢𑀺 𑀆𑀦𑀼𑀪𑀸𑀯𑁄 𑀳𑀺 𑀢𑀸𑀤𑀺𑀲𑁄;

𑁩𑁬𑁦.

𑀪𑀸𑀲𑀦𑁆𑀢𑀁 𑀦𑁂𑀓𑀥𑀸 𑀓𑀡𑁆𑀡 𑀓𑀞𑁄𑀭 𑀕𑀺𑀭𑀫𑀦𑁆𑀢𑀓𑀁,

𑀦𑀺𑀲𑁆𑀲𑀤𑁆𑀤𑁄 𑀚𑁂𑀢𑀺 𑀲𑀫𑁆𑀩𑀼𑀤𑁆𑀥𑁄 𑀆𑀦𑀼𑀪𑀸𑀯𑁄 𑀳𑀺 𑀢𑀸𑀤𑀺𑀲𑁄;

𑁩𑁬𑁧.

𑀫𑀸𑀭𑁄𑀧𑀸𑀕𑀫𑁆𑀫 𑀅𑀝𑁆𑀞𑀸𑀲𑀺 𑀮𑀗𑁆𑀖𑀺𑀢𑀼𑀁 𑀅𑀲𑀫𑀢𑁆𑀣𑀓𑁄,

𑀩𑀼𑀤𑁆𑀥𑀢𑁂𑀚𑀕𑁆𑀕𑀺 𑀧𑀸𑀓𑀸𑀭𑀁 𑀤𑀺𑀢𑁆𑀢𑀫𑀩𑁆𑀪𑀼𑀕𑁆𑀕𑀢𑀁 𑀣𑀺𑀭𑀁;

𑁩𑁬𑁨.

𑀢𑀤𑀸𑀳 𑀦𑀫𑀼𑀘𑀺 𑀓𑀼𑀤𑁆𑀥𑁄 𑀪𑀼𑀚𑀫𑀼𑀓𑁆𑀔𑀺𑀧𑁆𑀧’𑀫𑀻𑀤𑀺𑀲𑀁,

𑀔𑀺𑀧𑁆𑀧𑀁 𑀲𑀺𑀤𑁆𑀥𑀢𑁆𑀣 𑀳𑁂 𑀕𑀘𑁆𑀙 𑀲𑀦𑁆𑀢𑀓𑁂𑀤𑀁 𑀫𑀫𑀸𑀲𑀦𑀁;

𑁩𑁬𑁩.

𑀦𑁄 𑀘𑁂 𑀕𑀘𑁆𑀙𑀲𑀺 𑀢𑁂 𑀳𑀤𑀬𑀁 𑀨𑀸𑀮𑁂𑀫𑀺 𑀦𑀔𑀲𑀢𑁆𑀢𑀺𑀳𑀺,

𑀯𑀺𑀘𑀼𑀡𑁆𑀡𑁂𑀫𑀺 𑀢𑀼𑀯𑀁 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀧𑀣𑀯𑀻𑀢𑀮𑁂;

𑁩𑁬𑁪.

𑀧𑀲𑁆𑀲 𑀫𑁂 𑀫𑀳𑀢𑀺𑀁 𑀲𑁂𑀦𑀁 𑀧𑀲𑁆𑀲 𑀆𑀬𑀼𑀥𑀲𑀜𑁆𑀘𑀬𑀁,

𑀢𑁂𑀦 𑀢𑀁 𑀅𑀪𑀺𑀫𑀤𑁆𑀤𑀸𑀫𑀺 𑀢𑀼𑀯𑀝𑀁 𑀕𑀘𑁆𑀙𑀺𑀤𑀁 𑀫𑀫;

𑁩𑁬𑁫.

𑀅𑀣𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀚𑀺𑀦𑁄’𑀳 𑀫𑀥𑀼𑀭𑀗𑁆𑀕𑀺𑀭𑁄,

𑀓𑀤𑀸 𑀢𑁂 𑀧𑀽𑀭𑀺𑀢𑀸 𑀫𑀸𑀭 𑀧𑀮𑁆𑀮𑀗𑁆𑀓𑀢𑁆𑀣𑀸𑀬 𑀧𑀸𑀭𑀫𑀻;

𑁩𑁬𑁬.

𑀓𑀤𑀸 𑀅𑀤𑀸𑀲𑀺 𑀲𑀻𑀲𑀸𑀤𑀻 𑀤𑀸𑀦𑀁 𑀲𑀻𑀮𑀁 𑀓𑀣𑀁 𑀢𑀯,

𑀢𑀤𑀢𑁆𑀣𑀸𑀬 𑀓𑀣𑀸𑀧𑁂𑀳𑀺 𑀓𑁂 𑀢𑁂 𑀧𑀘𑁆𑀘𑀓𑁆𑀔𑀓𑀸𑀭𑀓𑀸;

𑁩𑁬𑁭.

𑀅𑀣𑀸’𑀳 𑀨𑀭𑀼𑀲𑁄 𑀫𑀸𑀭𑁄 𑀦𑁂𑀢𑀁 𑀕𑀭𑀼 𑀫𑀼𑀦𑁂 𑀫𑀫,

𑀅𑀬𑀁 𑀲𑀸 𑀧𑀭𑀺𑀲𑀸 𑀲𑀩𑁆𑀩𑀸 𑀢𑀲𑁆𑀲 𑀧𑀘𑁆𑀘𑀓𑁆𑀔𑀓𑀸𑀭𑀓𑀁;

𑁩𑁬𑁮.

𑀉𑀕𑁆𑀖𑁄𑀲𑁂𑀲𑀺 𑀫𑀳𑀸𑀲𑁂𑀦𑀸 𑀧𑀓𑁆𑀔𑀻’𑀳𑀦𑁆𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁,

𑀪𑀼𑀫𑀼𑀤𑁆𑀭𑀺𑀬𑀦 𑀫𑀢𑁆𑀢𑁄𑀯 𑀢𑀢𑁄 𑀓𑁄𑀮𑀸𑀳𑀮𑁄 𑀅𑀳𑀼;

𑁩𑁬𑁯.

𑀅𑀣𑀸𑀳 𑀫𑀸𑀭𑁄 𑀲𑀫𑀡 𑀅𑀳𑀁 𑀲𑀓𑁆𑀔𑀺 𑀓𑀣𑀸𑀧𑀬𑀺𑀁,

𑀢𑀯 𑀓𑁄 𑀲𑀓𑁆𑀔𑀺 𑀬𑀚𑁆𑀚𑀢𑁆𑀣𑀺 𑀓𑀣𑀸𑀧𑁂𑀳𑀺 𑀮𑀳𑀼𑀁 𑀫𑀫;

𑁩𑁭𑁦. ¶

𑀅𑀣𑀸𑀳 𑀪𑀕𑀯𑀸 𑀢𑀲𑁆𑀲 𑀕𑀫𑁆𑀪𑀻𑀭𑀁 𑀫𑀥𑀼𑀭𑀁 𑀕𑀺𑀭𑀁,

𑀦𑀺𑀘𑁆𑀙𑀸𑀭𑁂𑀦𑁆𑀢𑀸 𑀫𑀬𑀽𑀭𑀲𑁆𑀲 𑀲𑀼𑀦𑀸𑀤𑀁 𑀨𑀡𑀺𑀦𑁄 𑀬𑀣𑀸;

𑁩𑁭𑁧.

𑀢𑀯𑁂𑀯 𑀫𑁂 𑀦 𑀲𑀦𑁆𑀢𑀻𑀥 𑀧𑀘𑁆𑀘𑀓𑁆𑀔𑀢𑁆𑀣𑀁 𑀲𑀘𑁂𑀢𑀦𑀸,

𑀅𑀘𑁂𑀢𑀦𑀸𑀯 𑀫𑁂𑀤𑀸𑀦𑀺 𑀲𑀦𑁆𑀢𑀺 𑀧𑀘𑁆𑀘𑀓𑁆𑀔𑀯𑀸𑀤𑀺𑀦𑁄;

𑁩𑁭𑁨.

𑀇𑀢𑀺 𑀯𑀢𑁆𑀯𑀸𑀦 𑀫𑀸𑀭𑀸𑀭𑀺 𑀲𑀜𑁆𑀢𑁆𑀥𑀸 𑀚𑀺𑀫𑀽𑀢 𑀕𑀩𑁆𑀪𑀢𑁄,

𑀦𑀺𑀓𑁆𑀔𑀦𑁆𑀢 𑀯𑀺𑀚𑁆𑀚𑀼𑀲𑀗𑁆𑀓𑀸𑀲𑀁 𑀓𑀭𑀁 𑀘𑀸𑀫𑀻𑀓𑀭𑀚𑁆𑀚𑀼𑀢𑀺𑀁;

𑁩𑁭𑁩.

𑀭𑀢𑁆𑀢 𑀘𑀻𑀯𑀭𑀕𑀩𑁆𑀪𑀫𑁆𑀳𑀸 𑀦𑀻𑀳𑀭𑀺𑀢𑁆𑀯𑀸 𑀚𑀺𑀦𑁄 𑀢𑀤𑀸,

𑀥𑀭𑀡𑁆𑀬𑀪𑀺𑀫𑀼𑀔𑀁’𑀓𑀸𑀲𑀺 𑀉𑀤𑁆𑀤𑀺𑀲𑁆𑀲 𑀪𑀼𑀫𑀺𑀓𑀸𑀫𑀺𑀦𑀺𑀁;

𑁩𑁭𑁪.

𑀤𑀸𑀦𑀫𑀸𑀦𑀸𑀤𑀺𑀓𑀫𑁆𑀫𑁂 𑀫𑁂 𑀓𑀫𑁆𑀧𑀦𑁆𑀢𑀻 𑀚𑀸𑀢𑀺𑀚𑀸𑀢𑀺𑀬𑀁,

𑀓𑀺𑀫𑀚𑁆𑀚 𑀦𑀺𑀲𑁆𑀲𑀡𑀸𑀲𑀻’𑀢𑀺 𑀚𑀺𑀦𑁄 𑀯𑀸𑀘𑀫𑀼𑀤𑀸𑀳𑀭𑀻;

𑁩𑁭𑁫.

𑀲𑀓𑁆𑀔𑀺’𑀳𑀦𑁆𑀢𑀺 𑀯𑀤𑀦𑁆𑀢𑀻𑀯 𑀢𑀢𑁄 𑀪𑀼𑀫𑀺𑀯𑀭𑀗𑁆𑀕𑀦𑀸,

𑀲𑀴𑀺𑀮𑀸𑀯𑀦𑀺𑀧𑀭𑀺𑀬𑀦𑁆𑀢𑀸 𑀕𑀚𑁆𑀚𑀦𑁆𑀢𑀺 𑀦𑀘𑁆𑀘𑀺 𑀢𑀸𑀯𑀤𑁂;

𑁩𑁭𑁬.

𑀫𑀳𑀻 𑀲𑀸𑀕𑀭 𑀊𑀫𑀻’𑀯 𑀉𑀝𑁆𑀞𑀸𑀧𑁂𑀦𑁆𑀢𑀺 𑀫𑀳𑀽𑀫𑀺𑀬𑁄,

𑀙𑀤𑁆𑀥𑀸 𑀓𑀫𑁆𑀧𑀺 𑀓𑀼𑀮𑀸𑀮𑀲𑁆𑀲 𑀘𑀓𑁆𑀓𑀁𑀯𑀸𑀢𑀺 𑀧𑀭𑀺𑀩𑁆𑀪𑀫𑀺;

𑁩𑁭𑁭.

𑀳𑀺𑀫𑀯𑀸 𑀕𑀺𑀭𑀺𑀭𑀸𑀚𑀸 𑀘 𑀬𑀼𑀕𑀦𑁆𑀥𑀭 𑀦𑀕𑀸𑀤𑀬𑁄,

𑀓𑀽𑀝𑀩𑀸𑀕𑀸 𑀲𑀫𑀼𑀓𑁆𑀔𑀺𑀧𑁆𑀧 𑀦𑀘𑁆𑀘𑀺𑀁𑀲𑀼 𑀦𑀝𑀓𑀸 𑀯𑀺𑀬;

𑁩𑁭𑁮.

𑀤𑀺𑀲𑁆𑀯𑀸 𑀲𑀼𑀢𑁆𑀯𑀸 𑀢𑀫𑀘𑁆𑀙𑁂𑀭𑀁 𑀕𑀬𑁂𑀦𑀼𑀩𑁆𑀩𑀺𑀕𑁆𑀕 𑀫𑀸𑀦𑀲𑀸,

𑀫𑀸𑀭𑀲𑁂𑀦𑀸 𑀧𑀪𑀺𑀦𑁆𑀦𑀸𑀲𑀺 𑀪𑀺𑀦𑁆𑀦𑀯𑁂𑀮𑁄𑀯 𑀲𑀸𑀕𑀭𑁄;

𑁩𑁭𑁯.

𑀪𑀬𑁂𑀦𑀝𑁆𑀝𑀲𑁆𑀲𑀭𑀸 𑀪𑀦𑁆𑀢𑀸 𑀧𑀢𑀦𑁆𑀢𑀜𑁆𑀜𑁄𑀜𑁆𑀜 𑀖𑀝𑁆𑀝𑀦𑀸,

𑀯𑀺𑀓𑀺𑀭𑀺𑀢𑁆𑀯𑀸 𑀓𑀘𑁂 𑀧𑀺𑀝𑁆𑀞𑁂 𑀥𑀸𑀯𑀺𑀁𑀲𑀼 𑀫𑀸𑀭𑀓𑀺𑀗𑁆𑀓𑀭𑀸;

𑁩𑁮𑁦.

𑀕𑀳𑀺𑀢𑀸𑀬𑀼𑀥𑀸𑀦𑀺 𑀙𑀟𑁆𑀟𑁂𑀦𑁆𑀢𑀸 𑀧𑀺𑀤𑀳𑀦𑁆𑀢𑀸𑀦𑀦𑀁 𑀓𑀭𑀸,

𑀦𑀺𑀯𑀢𑁆𑀣𑀯𑀢𑁆𑀣𑀫𑀢𑁆𑀢𑁂’𑀧𑀺 𑀥𑀸𑀯𑀺𑀁𑀲𑀼 𑀅𑀦𑀧𑁂𑀓𑁆𑀔𑀓𑀸;

𑁩𑁮𑁧.

𑀅𑀗𑁆𑀕𑀼𑀮𑀺𑀬𑁄 𑀫𑀼𑀔𑁂 𑀓𑁂𑀘𑀺 𑀧𑀓𑁆𑀔𑀺𑀧𑀦𑁆𑀢𑀺 𑀭𑀼𑀤𑀦𑁆𑀢𑀺 𑀘,

𑀓𑁂𑀘𑀺 𑀯𑀦𑁆𑀤𑀦𑁆𑀢𑀺 𑀬𑀸𑀯𑀦𑁆𑀢𑀺 𑀅𑀪𑀬𑀁 𑀲𑀸𑀫𑀺 𑀤𑁂𑀳𑀺 𑀦𑁄;

𑁩𑁮𑁨.

𑀲𑀺𑀤𑁆𑀥𑀢𑁆𑀣𑁄’𑀬𑀁 𑀚𑀺𑀢𑁄 𑀓𑀺𑀦𑁆𑀦𑀼 𑀦𑀺𑀲𑁆𑀲𑀸𑀲𑀸 𑀭𑀼𑀤𑁆𑀥𑀪𑀸𑀲𑀦𑀸,

𑀧𑀺𑀝𑁆𑀞𑀺𑀧𑀲𑁆𑀲𑀫𑀼𑀤𑀺𑀓𑁆𑀔𑀦𑁆𑀢𑀺 𑀥𑀸𑀯𑀺𑀁𑀲𑀼 𑀘𑀓𑀺𑀢𑀸 𑀧𑀭𑁂;

𑁩𑁮𑁩. ¶

𑀕𑀺𑀭𑀺𑀫𑁂𑀔𑀮𑁄’𑀧𑀺 𑀦𑀸𑀕𑀺𑀦𑁆𑀤𑁄 𑀚𑀦𑁆𑀦𑀼𑀓𑁂𑀦 𑀧𑀢𑀻 𑀢𑀤𑀸,

𑀫𑀸𑀭𑁄’𑀧𑀺 𑀧𑀢𑀺𑀢𑁄 𑀔𑀺𑀧𑁆𑀧𑀁 𑀥𑀸𑀯𑀺𑀢𑁆𑀯𑀸’𑀤𑀲𑁆𑀲𑀦𑀁 𑀕𑀢𑁄;

𑁩𑁮𑁪.

𑀢𑀗𑁆𑀓𑀡𑁂 𑀉𑀕𑁆𑀕𑀢𑁄 𑀆𑀲𑀺 𑀲𑀢𑁆𑀣𑀼 𑀓𑀺𑀢𑁆𑀢𑀺 𑀚𑀬𑀤𑁆𑀥𑀚𑁄,

𑀅𑀯𑀳𑁂𑀦𑁆𑀢𑁄𑀯 𑀲𑀼𑀭𑀸𑀤𑀻𑀦𑀁 𑀩𑁆𑀭𑀳𑁆𑀫𑀮𑁄𑀓𑀸𑀯𑀥𑀺𑀁 𑀕𑀢𑁄;

𑁩𑁮𑁫.

𑀢𑀤𑀸𑀲𑀺 𑀯𑀺𑀚𑀬𑁄 𑀢𑀲𑁆𑀲 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄,

𑀘𑀭𑀺𑀫𑁂 𑀫𑀸𑀭𑀬𑀼𑀤𑁆𑀥𑀫𑁆𑀳𑀺 𑀫𑀸𑀭𑀲𑁆𑀲𑀸𑀲𑀺 𑀧𑀭𑀸𑀚𑀬𑁄;

𑁩𑁮𑁬.

𑀏𑀯𑀁 𑀫𑀳𑀸𑀦𑀼𑀪𑀸𑀯𑁄𑀢𑀺 𑀫𑀦𑁆𑀢𑁆𑀯𑀸𑀦 𑀦𑀭𑀲𑀸𑀭𑀣𑀺𑀁,

𑀦𑀺𑀘𑁆𑀘𑀁 𑀯𑀦𑁆𑀤𑀣 𑀧𑀽𑀚𑁂𑀣 𑀲𑁄 𑀳𑀺 𑀯𑁄 𑀲𑀭𑀡𑀁 𑀲𑀤𑀸;

𑀏𑀓𑀸𑀤𑀲𑀫𑁄 𑀯𑀺𑀚𑀬𑁄.

𑁩𑁮𑁭.

𑀮𑀤𑁆𑀥𑀸𑀪𑀺𑀯𑀺𑀚𑀬𑁂 𑀩𑀼𑀤𑁆𑀥𑁂 𑀦𑀺𑀲𑀺𑀦𑁆𑀦𑁂 𑀯𑀚𑀺𑀭𑀸𑀲𑀦𑁂,

𑀧𑀭𑀺𑀯𑀸𑀭𑀬𑀼𑀁 𑀕𑀢𑀸𑀕𑀫𑁆𑀫 𑀧𑀼𑀭𑁂 𑀯𑀺𑀬 𑀲𑀼𑀭𑀸𑀤𑀬𑁄;

𑁩𑁮𑁮.

𑀤𑁂𑀯𑀸 𑀢𑁂 𑀦𑀺𑀔𑀺𑀮𑀸 𑀦𑁂𑀢𑁆𑀯𑀸 𑀦𑀸𑀦𑀸𑀧𑀽𑀚𑀸𑀯𑀺𑀥𑀺𑀁 𑀢𑀢𑁄,

𑀲𑀦𑁆𑀢𑀼𑀝𑁆𑀞𑀸 𑀫𑀼𑀦𑀺𑀦𑁄’𑀓𑀸𑀲𑀼𑀁 𑀫𑀳𑀦𑁆𑀢𑀁 𑀚𑀬𑀫𑀗𑁆𑀕𑀮𑀁;

𑁩𑁮𑁯.

𑀲𑀫𑁆𑀧𑀢𑁆𑀢𑀸𑀣 𑀦𑀺𑀲𑀸𑀓𑀦𑁆𑀢𑀸 𑀫𑀸𑀦𑁂𑀢𑀼𑀁𑀘 𑀫𑀼𑀦𑀺𑀲𑁆𑀲𑀭𑀁,

𑀧𑀼𑀩𑁆𑀩𑀸𑀧𑀭𑀫𑁆𑀩𑀭𑁂 𑀮𑀕𑁆𑀕 𑀲𑀲𑀻𑀡𑀓𑁆𑀓𑀡𑁆𑀡 𑀪𑀼𑀲𑀡;

𑁩𑁯𑁦.

𑀲𑀼𑀦𑀻𑀮𑀸𑀓𑀸𑀲 𑀥𑀫𑁆𑀫𑀺𑀮𑁆𑀮𑁂 𑀥𑀢𑁆𑀢 𑀢𑀸𑀭𑀸𑀮𑀺𑀫𑀸𑀮𑀺𑀓𑀸,

𑀯𑀻𑀚𑁂𑀦𑁆𑀢𑀻𑀯 𑀤𑀺𑀲𑀸 𑀩𑀸𑀳𑀸 𑀨𑀼𑀮𑁆𑀮𑀘𑀽𑀢𑀓 𑀘𑀸𑀫𑀭𑁂;

𑁩𑁯𑁧.

𑀫𑀮𑁆𑀮𑀺𑀓𑀸 𑀫𑀼𑀓𑀼𑀮𑀸𑀲𑀢𑁆𑀢 𑀲𑀫𑁆𑀫𑀢𑁆𑀢𑀸𑀮𑀺𑀕𑀡𑀸 𑀢𑀤𑀸,

𑀥𑀫𑁂𑀦𑁆𑀢𑀸 𑀯𑀺𑀬 𑀲𑀗𑁆𑀔𑀸𑀦𑀺 𑀓𑀽𑀚𑁂𑀦𑁆𑀢𑀺 𑀫𑀥𑀼𑀭𑀁 𑀕𑀺𑀭𑀁;

𑁩𑁯𑁨.

𑀲𑀸𑀫𑁄𑀤 𑀫𑀓𑀭𑀦𑁆𑀤𑁂𑀳𑀺 𑀫𑀦𑁆𑀤𑀫𑀦𑁆𑀤𑀸𑀦𑀺𑀮𑀸𑀕𑀢𑀸,

𑀲𑀚𑀼𑀡𑁆𑀳𑀸 𑀚𑀺𑀦𑀩𑀺𑀫𑁆𑀩𑀫𑁆𑀳𑀺 𑀉𑀢𑀼𑀁 𑀕𑀸𑀳𑁂𑀦𑁆𑀢𑀺 𑀲𑀻𑀢𑀮𑀁;

𑁩𑁯𑁩.

𑀅𑀯𑀺𑀚𑁆𑀚𑀸𑀤𑀺 𑀫𑀳𑀸𑀫𑀽𑀮𑀁 𑀢𑀺𑀯𑀝𑁆𑀝𑀢𑁆𑀣𑀺𑀭 𑀔𑀦𑁆𑀥𑀓𑀁,

𑀲𑀁𑀲𑀸𑀭 𑀯𑀺𑀲𑀭𑀼𑀓𑁆𑀔𑀁 𑀲𑁄 𑀆𑀭𑀤𑁆𑀥𑀼𑀫𑁆𑀫𑀼𑀮𑀺𑀢𑀼𑀁 𑀢𑀤𑀸;

𑁩𑁯𑁪.

𑀪𑀸𑀯𑁂𑀦𑁆𑀢𑁄 𑀧𑀼𑀭𑀺𑀫𑁂 𑀬𑀸𑀫𑁂 𑀲𑀭𑀦𑁆𑀢𑁄 𑀔𑀦𑁆𑀥𑀲𑀦𑁆𑀢𑀢𑀺𑀁,

𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺 𑀜𑀸𑀡𑀁 𑀮𑀤𑁆𑀥𑀸 𑀦𑀭𑀺𑀲𑁆𑀲𑀭𑁄;

𑁩𑁯𑁫. ¶

𑀢𑀣𑀸 𑀫𑀚𑁆𑀛𑀺𑀫 𑀬𑀸𑀫𑀫𑁆𑀳𑀺 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀲𑁄𑀥𑀦𑀸,

𑀘𑀼𑀢𑀼𑀧𑀧𑀸𑀢 𑀜𑀸𑀡𑀜𑁆𑀘 𑀅𑀥𑀺𑀕𑀁𑀢𑁆𑀯𑀸𑀦 𑀲𑀩𑁆𑀩𑀲𑁄;

𑁩𑁯𑁬.

𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀘𑀺𑀦𑁆𑀢𑀬𑀦𑁆𑀢𑁄 𑀚𑀭𑀸𑀤𑀬𑁄,

𑀯𑀺𑀧𑀲𑁆𑀲𑀺𑀢𑁆𑀯𑀸 𑀦𑀸𑀫𑀭𑀽𑀧𑁂 𑀆𑀭𑁄𑀧𑁂𑀢𑁆𑀯𑀸 𑀢𑀺𑀮𑀓𑁆𑀔𑀡𑀁;

𑁩𑁯𑁭.

𑀲𑀫𑁆𑀫𑀲𑀦𑁆𑀢𑁄 𑀓𑀺𑀮𑁂𑀲𑁂𑀳𑀺 𑀯𑀺𑀯𑁂𑀘𑁂𑀢𑁆𑀯𑀸 𑀲𑀓𑀁 𑀫𑀦𑀁,

𑀆𑀲𑀯𑀸𑀦𑀁 𑀔𑀬𑁂 𑀜𑀸𑀡𑀸 𑀮𑀤𑁆𑀥𑀸 𑀅𑀕𑁆𑀕𑀨𑀮𑀁 𑀢𑀤𑀸;

𑁩𑁯𑁮.

𑀧𑀢𑁆𑀢𑁄 𑀦𑀺𑀩𑁆𑀩𑀸𑀡𑀦𑀕𑀭𑀁 𑀩𑁄𑀚𑁆𑀛𑀗𑁆𑀕 𑀭𑀢𑀦𑀺𑀲𑁆𑀲𑀭𑁄,

𑀲𑀤𑁆𑀥𑀫𑁆𑀫𑀭𑀸𑀚𑀸 𑀳𑀼𑀢𑁆𑀯𑀸𑀦 𑀧𑀻𑀢𑀺𑀯𑀸𑀘𑀫𑀼𑀤𑀸𑀳𑀭𑀻;

𑁩𑁯𑁯.

𑀅𑀦𑁂𑀓𑀚𑀸𑀢𑀺 𑀲𑀁𑀲𑀸𑀭𑀁 𑀲𑀦𑁆𑀥𑀸𑀯𑀺𑀲𑁆𑀲𑀁 𑀅𑀦𑀺𑀩𑁆𑀩𑀺𑀲𑀁,

𑀕𑀳𑀓𑀸𑀭𑀓𑀁 𑀕𑀯𑁂𑀲𑀦𑁆𑀢𑁄 𑀤𑀼𑀓𑁆𑀔𑀸 𑀚𑀸𑀢𑀺 𑀧𑀼𑀦𑀧𑁆𑀧𑀼𑀦𑀁;

𑁪𑁦𑁦.

𑀕𑀳𑀓𑀸𑀭𑀓 𑀤𑀺𑀝𑁆𑀞𑁄𑀲𑀺 𑀧𑀼𑀦 𑀕𑁂𑀳𑀁 𑀦 𑀓𑀸𑀳𑀲𑀺,

𑀲𑀩𑁆𑀩𑀸 𑀢𑁂 𑀨𑀸𑀲𑀼𑀓𑀸 𑀪𑀕𑁆𑀕𑀸 𑀕𑀳𑀓𑀽𑀝𑀁 𑀯𑀺𑀲𑀗𑁆𑀔𑀺𑀢𑀁,

𑀯𑀺𑀲𑀗𑁆𑀔𑀸𑀭𑀕𑀢𑀁 𑀘𑀺𑀢𑁆𑀢𑀁 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸;

𑁪𑁦𑁧.

𑀇𑀘𑁆𑀘𑁂𑀯 𑀫𑀕𑁆𑀕𑀫𑀢𑀤𑀸𑀦𑀯𑀺𑀥𑀺𑀧𑁆𑀧𑀯𑀻𑀡,

𑀓𑀸𑀭𑀼𑀜𑁆𑀜𑀧𑀼𑀜𑁆𑀜𑀳𑀤𑀬𑁂𑀦 𑀫𑀳𑁄𑀤𑀬𑁂𑀦,

𑀧𑀢𑁆𑀯𑀸 𑀪𑀯𑀡𑁆𑀡𑀯𑀫𑀧𑀸𑀭𑀫𑀦𑀦𑁆𑀢𑀤𑀼𑀓𑁆𑀔𑀁,

𑀬𑁂𑀦𑁄𑀘𑀺𑀢𑀸 𑀧𑀭𑀫𑀧𑀸𑀭𑀫𑀺𑀢𑀸 𑀚𑀺𑀦𑁂𑀦;

𑁪𑁦𑁨.

𑀬𑁄𑀘𑁂𑀯 𑀲𑀩𑁆𑀩𑀯𑀺𑀪𑀯𑀁 𑀧𑀡𑀼𑀤𑀺𑀢𑁆𑀯 𑀭𑀚𑁆𑀚𑀁

𑀦𑀺𑀓𑁆𑀔𑀫𑁆𑀫 𑀧𑀢𑁆𑀯 𑀘𑀮𑀧𑀢𑁆𑀢𑀫𑀳𑀻𑀭𑀼𑀳𑀲𑁆𑀲,

𑀫𑀽𑀮𑁂 𑀦𑀺𑀲𑀚𑁆𑀚 𑀲𑀩𑀮𑀁 𑀧𑀩𑀮𑀜𑁆𑀘 𑀫𑀸𑀭𑀁,

𑀧𑀸𑀧𑀸𑀭𑀬𑁄 𑀘 𑀯𑀺𑀚𑀺𑀢𑁄 𑀲 𑀤𑀤𑀸𑀢𑀼 𑀲𑀦𑁆𑀢𑀺𑀁;

𑀅𑀪𑀺𑀲𑀫𑁆𑀩𑁄𑀥𑀺 𑀓𑀣𑀸.

𑁪𑁦𑁩.

𑀢𑀺𑀮𑁄𑀓𑀦𑀸𑀣𑁄 𑀲𑀼𑀕𑀢𑁄 𑀢𑀢𑁄 𑀢𑀤𑀸

𑀉𑀤𑀸𑀦𑀯𑀸𑀘𑀁 𑀲𑀫𑀼𑀤𑀸𑀳𑀭𑀺𑀢𑁆𑀯𑀸,

𑀧𑀮𑁆𑀮𑀗𑁆𑀓𑀫𑀸𑀪𑀼𑀚𑁆𑀚 𑀤𑀼𑀫𑀺𑀦𑁆𑀤𑀫𑀽𑀮𑁂

𑀘𑀺𑀦𑁆𑀢𑁂𑀲𑀺 𑀏𑀯𑀁 𑀯𑀚𑀺𑀭𑀸𑀲𑀦𑀲𑁆𑀫𑀺𑀁;

𑁪𑁦𑁪. ¶

𑀤𑀸𑀦𑀸𑀤𑀬𑁄 𑀧𑀸𑀭𑀫𑀺𑀢𑀸 𑀘𑀺𑀦𑀺𑀢𑁆𑀯𑀸

𑀅𑀲𑀗𑁆𑀔𑀓𑀧𑁆𑀧𑀸𑀦𑀺 𑀘 𑀔𑁂𑀧𑀬𑀺𑀢𑁆𑀯𑀸,

𑀅𑀲𑁆𑀲𑁂𑀯 𑀧𑀮𑁆𑀮𑀗𑁆𑀓𑀯𑀭𑀲𑁆𑀲 𑀳𑁂𑀢𑀼

𑀲𑀦𑁆𑀥𑀸𑀯𑀺𑀢𑀁 𑀢𑀁 𑀪𑀚𑀺𑀢𑀁 𑀯𑀬𑀚𑁆𑀚;

𑁪𑁦𑁫.

𑀬𑀸𑀯𑀲𑁆𑀲𑀼 𑀧𑀼𑀡𑁆𑀡 𑀫𑀫 𑀘𑁂𑀢𑀦𑀸𑀬𑁄

𑀢𑀸𑀯𑁂𑀢𑁆𑀣 𑀅𑀘𑁆𑀙𑀸𑀫𑀺 𑀦 𑀯𑀼𑀝𑁆𑀞𑀳𑀸𑀫𑀺,

𑀫𑀁𑀢𑁆𑀯𑀸𑀦 𑀲𑁄 𑀦𑁂𑀓𑀲𑀳𑀲𑁆𑀲𑀲𑀗𑁆𑀔𑀸

𑀚𑀺𑀦𑁄 𑀲𑀫𑀸𑀧𑀢𑁆𑀢𑀺 𑀯𑀮𑀜𑁆𑀚𑀺 𑀢𑀢𑁆𑀣;

𑁪𑁦𑁬.

𑀤𑁂𑀯𑀸𑀢𑀺𑀤𑁂𑀯𑁄 𑀢𑀺𑀪𑀯𑁂𑀓𑀦𑀸𑀣𑁄

𑀳𑀢𑀸𑀯𑀓𑀸𑀲𑁄 𑀚𑀺𑀢𑀧𑀜𑁆𑀘𑀫𑀸𑀭𑁄,

𑀧𑀺𑀢𑀸𑀫𑀳𑀸𑀤𑀻𑀳𑀺 𑀫𑀳𑀻𑀬𑀫𑀸𑀦𑁄

𑀔𑁂𑀧𑁂𑀲𑀺 𑀲𑀢𑁆𑀣𑀸 𑀤𑀺𑀯𑀲𑀸𑀦𑀺 𑀲𑀢𑁆𑀢;

𑀇𑀢𑀺 𑀧𑀞𑀫 𑀲𑀢𑁆𑀢𑀸𑀳𑀁.

𑁪𑁦𑁭.

𑀬𑀲𑁆𑀫𑀸𑀲𑀦𑀁 𑀦𑁂𑀯 𑀚𑀳𑀸𑀢𑀺 𑀢𑀲𑁆𑀫𑀸

𑀢𑀺𑀲𑀦𑁆𑀥𑀺𑀬𑀼𑀢𑁆𑀢𑁂𑀦 𑀦𑀺𑀲𑀻𑀤𑀺𑀢𑁂𑀯,

𑀅𑀚𑁆𑀚𑀸𑀧𑀺 𑀓𑀢𑁆𑀢𑀩𑁆𑀩𑀫𑀦𑁂𑀦 𑀅𑀢𑁆𑀣𑀺

𑀤𑁂𑀯𑀸𑀦𑀫𑀺𑀘𑁆𑀙𑀸𑀲𑀺 𑀫𑀦𑀫𑁆𑀳𑀺 𑀓𑀗𑁆𑀔𑀸;

𑁪𑁦𑁮.

𑀢𑁂𑀲𑀁 𑀫𑀦𑀁 𑀲𑁄 𑀫𑀦𑀲𑀸 𑀯𑀺𑀤𑀺𑀢𑁆𑀯𑀸

𑀯𑀺𑀦𑁄𑀤𑀦𑀢𑁆𑀣𑀁 𑀯𑀺𑀫𑀢𑀺𑀦𑁆𑀢𑀼 𑀢𑁂𑀲𑀁,

𑀉𑀝𑁆𑀞𑀸𑀬 𑀢𑀫𑁆𑀳𑀸 𑀦𑀪𑀫𑀼𑀧𑁆𑀧𑀢𑀺𑀢𑁆𑀯𑀸

𑀤𑀲𑁆𑀲𑁂𑀲𑀺 𑀢𑁂𑀲𑀁 𑀫𑀼𑀦𑀺𑀧𑀸𑀝𑀺𑀳𑁂𑀭𑀁;

𑁪𑁦𑁯.

𑀯𑀺𑀦𑁄𑀤𑀬𑀺𑀢𑁆𑀯𑀸 𑀲𑀼𑀕𑀢𑁄 𑀢𑀤𑁂𑀯𑀁

𑀲𑀼𑀥𑀸𑀲𑀺𑀦𑀁 𑀘𑁂𑀢𑀲𑀺 𑀓𑀗𑁆𑀔𑀭𑀸𑀲𑀺𑀁,

𑀧𑀮𑁆𑀮𑀗𑁆𑀓𑀢𑁄 𑀉𑀢𑁆𑀢𑀭𑀧𑀼𑀩𑁆𑀩𑀓𑀡𑁆𑀡𑀁

𑀆𑀓𑀸𑀲𑀢𑁄𑀭𑀼𑀬𑁆𑀳 𑀚𑀮𑀁 𑀭𑀯𑀻𑀯;

𑁪𑁧𑁦.

𑀚𑀺𑀦𑁄 𑀤𑀼𑀫𑀺𑀦𑁆𑀤𑀲𑁆𑀲 𑀘 𑀆𑀲𑀦𑀲𑁆𑀲

𑀩𑀳𑀽𑀧𑀓𑀸𑀭𑀢𑁆𑀢𑀫𑀦𑀼𑀲𑁆𑀲𑀭𑀦𑁆𑀢𑁄,

𑀞𑀺𑀢𑁄 𑀧𑀤𑀁 𑀓𑀺𑀜𑁆𑀘𑀺 𑀅𑀓𑁄𑀧𑀬𑀦𑁆𑀢𑁄

𑀇𑀢𑁄 𑀘𑀺𑀢𑁄 𑀮𑁄𑀓 𑀦 𑀫𑀼𑀚𑁆𑀚𑀳𑀦𑁆𑀢𑁄;

𑁪𑁧𑁧. ¶

𑀦𑀻𑀮𑀸𑀬𑀢𑀓𑁆𑀔𑀸𑀫𑀮𑀓𑀦𑁆𑀢𑀺𑀢𑁄𑀬

𑀥𑀸𑀭𑀸𑀦𑀺𑀧𑀸𑀢𑁂𑀦 𑀤𑀼𑀫𑀺𑀦𑁆𑀤𑀭𑀸𑀚𑀁,

𑀦𑀺𑀲𑀺𑀜𑁆𑀘𑀫𑀸𑀦𑁄 𑀤𑀺𑀯𑀲𑀸𑀦𑀺 𑀲𑀢𑁆𑀢

𑀧𑀽𑀚𑁂𑀲𑀺 𑀢𑀁’𑀦𑀺𑀫𑀺𑀲𑀮𑁄𑀘𑀦𑁂𑀳𑀺;

𑁪𑁧𑁨.

𑀅𑀚𑁆𑀚𑀸𑀧𑀺 𑀢𑀲𑁆𑀫𑀺𑀁 𑀥𑀭𑀡𑀺𑀧𑁆𑀧𑀤𑁂𑀲𑁂

𑀓𑀢𑀲𑁆𑀲 𑀣𑀽𑀧𑀲𑁆𑀲 𑀢𑀤𑁂𑀯 𑀦𑀸𑀫𑀁,

𑀅𑀳𑁄𑀲𑀺 𑀤𑁂𑀯𑀸 𑀘 𑀦𑀭𑁄’𑀭𑀕𑀸 𑀘

𑀫𑀳𑁂𑀦𑁆𑀢𑀺 𑀢𑁂 𑀢𑁂𑀦 𑀤𑀺𑀯𑀁 𑀧𑀬𑀦𑁆𑀢𑀺;

𑀇𑀢𑀺 𑀤𑀼𑀢𑀺𑀬 𑀲𑀢𑁆𑀢𑀸𑀳𑀁.

𑁪𑁧𑁩.

𑀤𑁂𑀯𑀸 𑀢𑀢𑁄 𑀤𑁂𑀯𑀯𑀭𑀲𑁆𑀲 𑀢𑀲𑁆𑀲

𑀲𑀼𑀘𑀗𑁆𑀓𑀫𑀁’𑀓𑀁𑀲𑀼 𑀫𑀡𑀻𑀳𑀺 𑀦𑀸𑀦𑀸,

𑀧𑀮𑁆𑀮𑀗𑁆𑀓𑀢𑁄 𑀞𑀸𑀦𑀯𑀭𑀲𑁆𑀲 𑀫𑀚𑁆𑀛𑁂

𑀧𑀼𑀩𑁆𑀩𑀸𑀧𑀭𑀸𑀲𑀸𑀬𑀦𑀫𑀦𑁆𑀢𑀭𑀸𑀮𑁂;

𑁪𑁧𑁪.

𑀦𑀭𑀺𑀦𑁆𑀤 𑀦𑀸𑀕𑀺𑀦𑁆𑀤 𑀲𑀼𑀭𑀺𑀦𑁆𑀤 𑀧𑀽𑀚𑀺𑀢𑁄

𑀙𑀩𑁆𑀩𑀡𑁆𑀡𑀭𑀁𑀲𑀻𑀳𑀺 𑀲𑀫𑀼𑀚𑁆𑀚𑀮𑀦𑁆𑀢𑁄,

𑀦𑀻𑀮𑀫𑁆𑀩𑀭𑁂 𑀢𑀸𑀭𑀓𑀺𑀢𑁄 𑀲𑀲𑀻’𑀯

𑀲𑁄 𑀘𑀗𑁆𑀓𑀫𑀻 𑀲𑀢𑁆𑀢 𑀅𑀳𑀸𑀦𑀺 𑀢𑀢𑁆𑀣;

𑁪𑁧𑁫.

𑀅𑀚𑁆𑀚𑀸𑀧𑀺 𑀢𑀲𑁆𑀫𑀺𑀁 𑀥𑀭𑀡𑀺𑀧𑁆𑀧𑀤𑁂𑀲𑁂

𑀓𑀢𑀲𑁆𑀲 𑀣𑀽𑀧𑀲𑁆𑀲 𑀢𑀤𑁂𑀯 𑀦𑀸𑀫𑀁,

𑀅𑀳𑁄𑀲𑀺 𑀤𑁂𑀯𑀸 𑀘 𑀦𑀭𑁄𑀭𑀕𑀸 𑀘

𑀫𑀳𑁂𑀦𑁆𑀢𑀺 𑀢𑁂 𑀢𑁂𑀦 𑀤𑀺𑀯𑀁 𑀧𑀬𑀦𑁆𑀢𑀺;

𑀇𑀢𑀺 𑀢𑀢𑀺𑀬 𑀲𑀢𑁆𑀢𑀸𑀳𑀁.

𑁪𑁧𑁬.

𑀢𑀢𑁄 𑀤𑀼𑀫𑀺𑀦𑁆𑀤𑀲𑁆𑀲 𑀲𑀼𑀭𑀸𑀲𑀼𑀭𑀺𑀦𑁆𑀤𑀸

𑀫𑀳𑀻𑀢𑀮𑁂 𑀧𑀘𑁆𑀙𑀺𑀫𑁄𑀢𑁆𑀢𑀭𑀸𑀬𑀁,

𑀫𑀸𑀧𑀺𑀁𑀲𑀼 𑀦𑀸𑀦𑀸𑀭𑀢𑀦𑀸𑀮𑀬𑀕𑁆𑀕𑀁

𑀦𑀺𑀲𑀚𑁆𑀚 𑀧𑀮𑁆𑀮𑀗𑁆𑀓𑀯𑀭𑁂 𑀢𑀳𑀺𑀁 𑀲𑁄;

𑁪𑁧𑁭. ¶

𑀲𑀼𑀤𑀼𑀤𑁆𑀤𑀲𑀸𑀕𑀸𑀥𑀫𑀧𑀸𑀭𑀧𑀸𑀭𑀁

𑀲𑀫𑀦𑁆𑀢𑀧𑀝𑁆𑀞𑀸𑀦𑀢𑀭𑀗𑁆𑀕𑀪𑀗𑁆𑀕𑀺𑀁,

𑀥𑀫𑁆𑀫𑁄𑀤𑀥𑀺𑀁 𑀜𑀸𑀡𑀲𑀼𑀫𑁂𑀭𑀼𑀫𑀢𑁆𑀣𑀸

𑀲𑀸𑀮𑁄𑀮𑀬𑀁 𑀔𑁂𑀧𑀬𑀳𑀸𑀦𑀺 𑀲𑀢𑁆𑀢;

𑁪𑁧𑁮.

𑀅𑀚𑁆𑀚𑀸𑀧𑀺 𑀢𑀲𑁆𑀫𑀺𑀁 𑀥𑀭𑀡𑀺𑀧𑁆𑀧𑀤𑁂𑀲𑁂

𑀓𑀢𑀲𑁆𑀲 𑀣𑀽𑀧𑀲𑁆𑀲 𑀢𑀤𑁂𑀯 𑀦𑀸𑀫𑀁,

𑀅𑀳𑁄𑀲𑀺 𑀤𑁂𑀯𑀸 𑀘 𑀦𑀭𑁄𑀭𑀕𑀸 𑀘

𑀫𑀳𑁂𑀦𑁆𑀢𑀺 𑀢𑁂 𑀢𑁂𑀦 𑀤𑀺𑀯𑀁 𑀧𑀬𑀦𑁆𑀢𑀺;

𑀇𑀢𑀺 𑀘𑀢𑀼𑀢𑁆𑀣 𑀲𑀢𑁆𑀢𑀸𑀳𑀁.

𑁪𑁧𑁯.

𑀢𑀢𑁄 𑀚𑀺𑀦𑁄 𑀕𑀦𑁆𑀢𑁆𑀯’𑀚𑀧𑀸𑀮𑀫𑀽𑀮𑁂

𑀯𑀺𑀫𑀼𑀢𑁆𑀢𑀺𑀚𑀁 𑀲𑀸𑀤𑀼𑀨𑀮𑀁’𑀦𑀼𑀪𑁄𑀦𑁆𑀢𑁄,

𑀲𑀢𑁆𑀢𑀸𑀳𑀫𑀢𑁆𑀢𑀁 𑀅𑀢𑀺𑀯𑀢𑁆𑀢𑀬𑀻 𑀲𑁄

𑀤𑁂𑀯𑀸𑀢𑀺𑀤𑁂𑀯𑁄 𑀓𑀭𑀼𑀡𑀸𑀕𑀼𑀡𑀕𑁆𑀕𑁄;

𑁪𑁨𑁦.

𑀢𑀤𑀸𑀕𑀢𑀸 𑀫𑀸𑀭𑀯𑀥𑀽 𑀫𑀼𑀦𑀺𑀢𑁆𑀤𑀁

𑀧𑀮𑁄𑀪𑀺𑀢𑀼𑀁 𑀬𑀸 𑀧𑀺𑀢𑀼𑀦𑁄 𑀲𑀓𑀸𑀲𑀸,

𑀢𑀸𑀲𑀁 𑀧𑀬𑁄𑀕𑀫𑁆𑀧𑀺𑀥 𑀩𑀺𑀦𑁆𑀤𑀼𑀫𑀢𑁆𑀢𑀁

𑀓𑀣𑀻𑀬𑀢𑁂 𑀢𑀁 𑀲𑀫𑀼𑀧𑀸𑀕𑀢𑀢𑁆𑀢𑀸;

𑁪𑁨𑁧.

𑀢𑀤𑀸 𑀲 𑀫𑀸𑀭𑁄 𑀲𑀫𑀭𑁂 𑀚𑀺𑀦𑁂𑀦

𑀧𑀭𑀸𑀚𑀺𑀢𑁄 𑀲𑁄𑀘𑀦𑀓𑁄’𑀧𑀕𑀁𑀢𑁆𑀯𑀸,

𑀧𑀚𑁆𑀛𑀸𑀬𑀫𑀸𑀦𑁄’𑀣 𑀅𑀥𑁄𑀫𑀼𑀔𑁄’𑀘

𑀦𑀺𑀲𑀻𑀤𑀺 𑀢𑀼𑀡𑁆𑀳𑀻 𑀯𑀺𑀮𑀺𑀔𑀁 𑀙𑀫𑀸𑀬𑀁;

𑁪𑁨𑁨.

𑀧𑀭𑀸𑀚𑀬𑀁 𑀫𑀬𑁆𑀳 𑀫𑀫𑁂𑀯 𑀤𑁄𑀲𑁄

𑀦 𑀢𑀲𑁆𑀲 𑀓𑀲𑁆𑀫𑀸𑀳𑀫𑀬𑀁’𑀘 𑀦𑀸𑀲𑀺𑀁,

𑀲𑀻𑀲𑀓𑁆𑀔𑀺𑀫𑀁𑀲𑀸𑀤𑀺 𑀘 𑀧𑀼𑀢𑁆𑀢𑀤𑀸𑀭𑁂

𑀦𑀸𑀤𑀦𑁆𑀢𑀺 𑀏𑀯𑀁 𑀫𑀦𑀲𑀻 𑀓𑀭𑁄𑀦𑁆𑀢𑁄;

𑁪𑁨𑁩.

𑀧𑀯𑀢𑁆𑀢𑀺𑀫𑁂𑀢𑀁 𑀫𑀓𑀭𑀤𑁆𑀥𑀚𑀲𑁆𑀲

𑀲𑀼𑀢𑁆𑀯𑀸𑀦 𑀢𑀡𑁆𑀳𑀸 𑀅𑀭𑀢𑀻 𑀭𑀕𑀸 𑀘,

𑀬𑀢𑁆𑀣𑀘𑁆𑀙𑀺 𑀫𑀸𑀭𑁄 𑀧𑀭𑀺𑀲𑁄𑀘𑀬𑀦𑁆𑀢𑁄

𑀢𑀢𑁆𑀣𑀸𑀕𑀫𑀼𑀁 𑀢𑀸 𑀘𑀓𑀺𑀢𑀸 𑀔𑀡𑁂𑀦;

𑁪𑁨𑁪. ¶

𑀤𑀺𑀲𑁆𑀯𑀸𑀦 𑀢𑀁 𑀢𑀢𑁆𑀣 𑀢𑀣𑀸 𑀦𑀺𑀲𑀺𑀦𑁆𑀦𑀁

𑀦𑀺𑀲𑁆𑀲𑀸𑀲𑀭𑀼𑀤𑁆𑀥𑀁 𑀕𑀺𑀭𑀫𑀼𑀕𑁆𑀕𑀺𑀭𑀦𑁆𑀢𑀻,

𑀢𑀼𑀲𑀸𑀭 𑀩𑀺𑀦𑁆𑀤𑀼𑀦𑀺𑀯𑀳𑁂𑀳𑀺’𑀲𑀸𑀭

𑀧𑀗𑁆𑀓𑁂𑀭𑀼𑀳𑀸𑀓𑀸𑀭 𑀯𑀺𑀲𑀸𑀮𑀦𑁂𑀢𑁆𑀢𑀸;

𑁪𑁨𑁫.

𑀳𑀸 𑀢𑀸𑀢 𑀳𑀸 𑀢𑀸𑀢 𑀓𑀺𑀫𑀸𑀲𑀺 𑀢𑁂𑀤𑀁

𑀦𑀝𑁆𑀞𑀦𑁆𑀦𑀼 𑀢𑁂 𑀓𑀺𑀁 𑀯𑀤 𑀧𑀢𑁆𑀣𑀲𑀻 𑀓𑀺𑀁,

𑀓𑁄 𑀢𑁂 𑀤𑀺𑀲𑁄 𑀓𑁂𑀦 𑀧𑀭𑀸𑀚𑀺𑀢𑁄’𑀲𑀺

𑀓𑀺𑀫𑀸𑀦𑀬𑀺𑀲𑁆𑀲𑀸𑀫 𑀳𑀦𑀸𑀫 𑀓𑀁 𑀦𑁄;

𑁪𑁨𑁬.

𑀓𑀺𑀫𑁆𑀳𑁄𑀢𑀺𑀬𑁄𑀤𑀸𑀦𑀺 𑀦 𑀧𑀲𑁆𑀲𑀣𑁂𑀢𑀁

𑀲𑀼𑀤𑁆𑀥𑁄𑀤𑀦𑀻𑀬𑀁 𑀢𑀢𑀓𑀺𑀢𑁆𑀢𑀺𑀖𑁄𑀲𑀁,

𑀫𑀼𑀔𑀫𑁆𑀳𑀺 𑀫𑀬𑁆𑀳𑀁 𑀫𑀲𑀺𑀫𑀓𑁆𑀔𑀬𑀦𑁆𑀢𑀁

𑀅𑀢𑀺𑀘𑁆𑀘 𑀬𑀦𑁆𑀢𑀁 𑀯𑀺𑀲𑀬𑀁 𑀧𑀲𑀬𑁆𑀳;

𑁪𑁨𑁭.

𑀦 𑀪𑀸𑀭𑀺𑀬𑀸 𑀢𑀸𑀢 𑀫𑀦𑀼𑀲𑁆𑀲𑀪𑀽𑀢𑀁

𑀓𑀢𑁆𑀢𑀼𑀁 𑀯𑀲𑀁 𑀓𑁄 𑀯𑀲𑀫𑁂𑀢𑀺 𑀦𑀸𑀫𑁆𑀳𑀁,

𑀢𑀁 𑀭𑀸𑀕𑀧𑀸𑀲𑁂𑀦 𑀕𑀚𑀁’𑀯 𑀫𑀢𑁆𑀢𑀁

𑀲𑀼𑀩𑀦𑁆𑀥𑀓𑀁 𑀩𑀦𑁆𑀥𑀺𑀬 𑀆𑀦𑀬𑁂𑀫;

𑁪𑁨𑁮.

𑀦 𑀭𑀸𑀕𑀧𑀸𑀲𑁂𑀦 𑀳𑀺 𑀆𑀦𑀦𑀻𑀬𑁄

𑀫𑀸𑀭𑀲𑁆𑀲 𑀥𑁂𑀬𑁆𑀬𑀁 𑀲𑀫𑀢𑀺𑀓𑁆𑀓𑀫𑀻𑀯,

𑀅𑀧𑁂𑀢𑀭𑀸𑀕𑁄 𑀅𑀭𑀳𑀸 𑀅𑀓𑀫𑁆𑀧𑁄

𑀲𑁄𑀯𑀸𑀫 𑀢𑀲𑁆𑀫𑀸 𑀲𑀼𑀪𑀕𑀸 𑀢𑀦𑀼𑀚𑀸;

𑁪𑁨𑁯.

𑀲𑀘𑁂𑀢𑀦𑁄 𑀲𑁄 𑀳𑀺 𑀫𑀦𑀼𑀲𑁆𑀲𑀪𑀼𑀢𑁄

𑀅𑀘𑁂𑀢𑀦𑀜𑁆𑀘𑁂 𑀲𑀫𑀼𑀧𑀸𑀕𑀫𑀸𑀫,

𑀓𑀭𑁄𑀫 𑀢𑀁 𑀦𑁄 𑀯𑀲𑀕𑀁 𑀓𑀺𑀫𑁂𑀢𑁆𑀣

𑀘𑀺𑀢𑁆𑀢𑀁 𑀩𑀮𑀁 𑀧𑀲𑁆𑀲𑀣 𑀦𑁄 𑀔𑀡𑁂𑀦;

𑁪𑁩𑁦.

𑀭𑀽𑀧𑁂𑀦 𑀦𑁂𑀢𑁆𑀢𑀁 𑀲𑀼𑀫𑀦𑁄𑀳𑀭𑁂𑀦

𑀕𑀦𑁆𑀥𑁂𑀦 𑀖𑀸𑀡𑀁 𑀲𑀯𑀡𑀁 𑀲𑀭𑁂𑀦,

𑀨𑀲𑁆𑀲𑁂𑀦 𑀕𑀢𑁆𑀢𑀁 𑀭𑀲𑀲𑀸 𑀭𑀲𑀜𑁆𑀜𑀁

𑀫𑀦𑀜𑁆𑀘 𑀧𑀸𑀲𑁂𑀦 𑀘 𑀓𑀸𑀫𑀚𑁂𑀦

𑁪𑁩𑁧. ¶

𑀲𑀼𑀩𑀸𑀳𑀼𑀧𑀸𑀲𑁂𑀦 𑀘 𑀢𑀲𑁆𑀲 𑀕𑀻𑀯𑀁

𑀩𑀸𑀳𑀼𑀤𑁆𑀯𑀬𑀁 𑀥𑀸𑀭𑀺𑀢𑀫𑀸𑀮𑀤𑀸𑀫𑀸,

𑀩𑀦𑁆𑀥𑀺𑀢𑁆𑀯𑀤𑀸𑀦𑁂𑀯 𑀢𑀫𑀸’𑀦𑀬𑀸𑀫

𑀩𑀮𑀜𑁆𑀳𑀺 𑀦𑁄 𑀧𑀲𑁆𑀲𑀣 𑀢𑀸𑀢’𑀤𑀸𑀦𑀺;

𑁪𑁩𑁨.

𑀯𑀢𑁆𑀯𑀸𑀦 𑀏𑀯𑀁 𑀯𑀘𑀦𑀁 𑀧𑀺𑀢𑀼𑀲𑁆𑀲

𑀧𑀡𑀫𑁆𑀫 𑀧𑀸𑀤𑀸𑀦𑀺 𑀧𑀕𑀩𑁆𑀪𑀺𑀢𑀦𑁆𑀢𑀸,

𑀬𑀢𑁆𑀣𑀘𑁆𑀙𑀺 𑀫𑀸𑀭𑀸𑀭𑀺 𑀯𑀺𑀭𑁄𑀘𑀫𑀸𑀦𑁄

𑀢𑀢𑁆𑀣𑀸’𑀕𑀫𑀼𑀁 𑀔𑀺𑀧𑁆𑀧𑀫𑀼𑀤𑀕𑁆𑀕𑀘𑀺𑀢𑁆𑀢𑀸;

𑁪𑁩𑁩.

𑀲𑀸𑀫𑁄𑀤𑀫𑀸𑀮𑀸𑀓𑀼𑀮𑀓𑁂𑀲𑀪𑀸𑀭

𑀧𑀬𑁄𑀥𑀭𑀸 𑀓𑀼𑀗𑀓𑁆𑀓𑀼𑀫𑀳𑀸𑀭𑀺𑀳𑀸𑀭𑀸,

𑀩𑀺𑀫𑁆𑀩𑀸𑀥𑀭𑀸 𑀘𑀸𑀭𑀼𑀲𑀪𑀸 𑀧𑀪𑀸𑀲𑀸

𑀉𑀫𑁆𑀫𑀸𑀤𑀬𑀦𑁆𑀢𑀻 𑀚𑀦𑀫𑀸𑀦𑀲𑀸𑀦𑀺;

𑁪𑁩𑁪.

𑀫𑀼𑀤𑁆𑀥𑁂𑀦 𑀫𑀺𑀲𑁆𑀲𑀁 𑀫𑀥𑀼𑀭𑁂 𑀦𑀺𑀫𑀼𑀕𑁆𑀕𑀁

𑀲𑁆𑀦𑁂𑀳𑁂𑀦 𑀢𑀺𑀦𑁆𑀢𑀁 𑀭𑀲𑀢𑁄’𑀦𑀼𑀯𑀺𑀤𑁆𑀥𑀁,

𑀪𑀸𑀲𑀺𑀁𑀲𑀼 𑀯𑀸𑀘𑀁 𑀳𑀤𑀬𑀗𑁆𑀕𑀫𑀦𑁆𑀢𑀸

𑀯𑀺𑀮𑁄𑀓𑀦𑁂𑀦𑁂𑀯 𑀥𑀺𑀢𑀺𑀁 𑀳𑀭𑀦𑁆𑀢𑀻;

𑁪𑁩𑁫.

𑀯𑀲𑀦𑁆𑀢𑀓𑀦𑁆𑀢𑁄 𑀦𑀯𑀬𑁄𑀩𑁆𑀩𑀦𑁄’𑀲𑀺

𑀲𑀼𑀯𑀡𑁆𑀡𑀯𑀡𑁆𑀡𑁄 𑀳𑀤𑀬𑀗𑁆𑀕𑀫𑁄’𑀲𑀺

𑀏𑀓𑁄 𑀦𑀺𑀲𑀺𑀦𑁆𑀦𑁄’𑀲𑀺 𑀯𑀝𑀲𑁆𑀲 𑀫𑀽𑀮𑁂

𑀲𑀺𑀫𑀦𑁆𑀢𑀺𑀦𑀻 𑀲𑀸𑀫𑀺 𑀓𑀼𑀳𑀺𑀦𑁆𑀦𑀼 𑀢𑀼𑀬𑁆𑀳𑀁;

𑁪𑁩𑁬.

𑀢𑀭𑀗𑁆𑀕𑀳𑀻𑀦𑁄’𑀧𑀺 𑀢𑀭𑀗𑁆𑀕𑀫𑀸𑀮𑀻

𑀲𑀲𑀗𑁆𑀓𑀳𑀻𑀦𑀸 𑀭𑀚𑀦𑀻 𑀘 𑀲𑀸𑀫𑀻,

𑀳𑀁𑀲𑀸’𑀮𑀺𑀳𑀻𑀦𑀸 𑀲𑀭𑀲𑀻 𑀲𑀼𑀨𑀼𑀮𑁆𑀮𑀸

𑀦𑀸𑀪𑀸𑀢𑀺 𑀓𑀦𑁆𑀢𑀸 𑀯𑀺𑀭𑀢𑁄 𑀥𑀯𑁄’𑀧𑀺;

𑁪𑁩𑁭.

𑀯𑀲𑀦𑁆𑀢𑀓𑀸𑀮𑁄 𑀘 𑀯𑀦𑀁 𑀲𑀼𑀨𑀼𑀮𑁆𑀮𑀁

𑀦𑀺𑀲𑀸𑀓𑀭𑀸𑀪𑀸 𑀪𑀫𑀭𑀸𑀮𑀺𑀕𑀻𑀢𑀁,

𑀲𑀼𑀕𑀦𑁆𑀥𑀫𑀦𑁆𑀤𑁄𑀧𑀕𑀢𑀸 𑀲𑀫𑀻𑀭𑀸

𑀯𑀺𑀭𑁄𑀘𑀲𑀺 𑀢𑁆𑀯𑀫𑁆𑀧𑀺 𑀘 𑀬𑁄𑀩𑁆𑀩𑀦𑁂𑀦;

𑁪𑁩𑁮. ¶

𑀫𑀬𑀫𑁆𑀧𑀺 𑀘𑁂𑀢𑁆𑀣𑁂𑀯 𑀲𑀫𑀸𑀕𑀢𑀫𑁆𑀳

𑀫𑀦𑁄’𑀦𑀼𑀓𑀽𑀮𑀸 𑀘 𑀫𑀦𑀼𑀜𑁆𑀜𑀭𑀽𑀧𑀸,

𑀓𑀭𑁄𑀢𑀺 𑀓𑀺𑀁𑀢𑁆𑀯’𑀚𑁆𑀚 𑀲𑀓𑀸𑀫𑀤𑀸𑀳𑁄

𑀓𑀸𑀫𑀸𑀓𑀭𑁄’𑀤𑀸𑀦𑀺 𑀲𑀫𑀸𑀕𑀢𑁄 𑀦𑁄;

𑁪𑁩𑁯.

𑀫𑀸 𑀢𑁂𑀤𑀺𑀲𑀁 𑀬𑁄𑀩𑁆𑀩𑀦𑀭𑀽𑀧𑀲𑀸𑀭𑀁

𑀲𑀼𑀯𑀺𑀕𑁆𑀕𑀳𑀁 𑀙𑀸𑀤𑀬 𑀘𑀻𑀯𑀭𑁂𑀦,

𑀢𑁂𑀦𑁂𑀯 𑀦𑁄 𑀦𑁂𑀢𑁆𑀢𑀫𑀦𑀫𑁆𑀳𑀺 𑀲𑀸𑀫𑀺

𑀫𑀸 𑀤𑁂𑀳𑀺 𑀤𑀸𑀳𑀁 𑀢𑀯 𑀤𑀸𑀲𑀺𑀪𑀼𑀢𑁂;

𑁪𑁪𑁦.

𑀦𑀔𑀁𑀲𑀼 𑀲𑀼𑀢𑁆𑀢𑁂’𑀭𑀼𑀡𑀧𑀸𑀦𑀺𑀧𑀸𑀤𑁂

𑀦𑁂𑀢𑁆𑀢𑀺𑀦𑁆𑀤𑀦𑀻𑀮𑀸𑀦𑀺’𑀯 𑀆𑀯𑀼𑀡𑀦𑁆𑀢𑁄,

𑀢𑁆𑀯𑀫𑀘𑁆𑀙𑀺 𑀦𑁄 𑀲𑀸𑀫𑀺 𑀫𑀼𑀔𑀫𑁆𑀩𑀼𑀚𑁂𑀲𑀼

𑀦 𑀏𑀦𑁆𑀢𑀺 𑀓𑀺𑀦𑁆𑀢𑁂 𑀦𑀬𑀦𑀸𑀮𑀺𑀫𑀸𑀮𑀸;

𑁪𑁪𑁧.

𑀲𑀼𑀥𑀸𑀲𑀺𑀮𑀸𑀕𑀻𑀜𑁆𑀚𑀓 𑀮𑁄𑀳𑀤𑀸𑀭𑀼

𑀚𑀸𑀢𑁂𑀳𑀺 𑀢𑁆𑀯𑀁 𑀥𑀻𑀭 𑀦 𑀦𑀺𑀫𑁆𑀫𑀺𑀢𑁄’𑀲𑀺,

𑀭𑀽𑀧𑀻’𑀲𑀺 𑀲𑁄𑀫𑁆𑀫𑁄’𑀲𑀺 𑀢𑀣𑀸𑀧𑀺 𑀲𑀸𑀫𑀺

𑀓𑀺𑀁 𑀓𑀸𑀫𑀭𑀸𑀕𑀁 𑀫𑀦𑀲𑀸 𑀦𑀼𑀤𑁂𑀲𑀺;

𑁪𑁪𑁨.

𑀅𑀬𑀜𑁆𑀘 𑀩𑀸𑀮𑀸 𑀘𑀢𑀼𑀭𑀸 𑀭𑀢𑀻𑀲𑀼

𑀩𑀸𑀮𑁂𑀢𑀺 𑀓𑀗𑁆𑀔𑀁 𑀚𑀳 𑀫𑀸𑀦𑀲𑀫𑁆𑀳𑀺,

𑀓𑀺𑀁 𑀫𑀜𑁆𑀚𑀭𑀻 𑀪𑀺𑀚𑁆𑀚𑀢𑀺 𑀲𑀫𑁆𑀧𑀨𑀼𑀮𑁆𑀮𑀸

𑀫𑀢𑁆𑀢𑀸𑀮𑀺𑀭𑀸𑀚𑁂 𑀧𑀭𑀺𑀘𑀼𑀫𑁆𑀩𑀫𑀸𑀦𑁂;

𑁪𑁪𑁩.

𑀅𑀬𑀜𑁆𑀘 𑀭𑀸𑀫𑀸 𑀭𑀫𑀡𑀻𑀬𑀭𑀽𑀧𑀸

𑀧𑀻𑀡𑁄𑀭𑀼𑀕𑀡𑁆𑀟𑀸 𑀓𑀼𑀯𑀫𑀡𑁆𑀟𑀮𑀸 𑀘,

𑀢𑀁 𑀓𑀸𑀫𑀺𑀦𑀺𑀁 𑀓𑀸𑀫𑀬 𑀨𑀼𑀮𑁆𑀮𑀓𑀜𑁆𑀚𑁂

𑀳𑀁𑀲𑁄 𑀬𑀣𑀸 𑀓𑁂𑀲𑀭 𑀲𑀫𑁆𑀧𑀕𑀺𑀤𑁆𑀥𑁄;

𑁪𑁪𑁪.

𑀘𑀺𑀦𑁆𑀢𑀸𑀫𑀡𑀺𑀁 𑀪𑀤𑁆𑀤𑀖𑀝𑀜𑁆𑀘 𑀓𑀧𑁆𑀧

𑀢𑀭𑀼𑀁 𑀲𑀫𑀸𑀧𑀚𑁆𑀚 𑀤𑀴𑀺𑀤𑁆𑀤𑀪𑀸𑀯𑀸,

𑀦𑀸𑀧𑁂𑀦𑁆𑀢𑀺 𑀲𑀢𑁆𑀢𑀸 𑀔𑀮𑀼 𑀤𑀼𑀩𑁆𑀪𑀕𑀢𑁆𑀢𑀸

𑀢𑀣𑁂𑀯 𑀦𑁄’𑀲𑀻 𑀢𑀯 𑀧𑀸𑀤𑀲𑁂𑀯𑀸;

𑁪𑁪𑁫. ¶

𑀏𑀯𑀜𑁆𑀳𑀺 𑀢𑀸 𑀭𑀜𑁆𑀚𑀦𑀫𑀜𑁆𑀚𑀼𑀪𑀸𑀲𑀸

𑀲𑀳𑀲𑁆𑀲𑀫𑁂𑀓𑀜𑁆𑀘 𑀲𑀢𑀸𑀦𑀺 𑀅𑀝𑁆𑀞,

𑀯𑁂𑀲𑀸𑀦𑀺 𑀲𑀫𑁆𑀫𑀸 𑀅𑀪𑀺𑀦𑀺𑀫𑁆𑀫𑀺𑀡𑀺𑀢𑁆𑀯𑀸

𑀧𑀮𑁄𑀪𑀬𑀼𑀦𑁆𑀢𑀁 𑀩𑀳𑀽𑀥𑀸 𑀫𑀼𑀦𑀺𑀦𑁆𑀤𑀁;

𑀢𑀢𑁄 𑀢𑀡𑁆𑀳𑀸?.

𑁪𑁪𑁬.

𑀬𑀓𑁆𑀔𑁄𑀲𑀺 𑀫𑀢𑁆𑀢𑁄𑀲𑀺 𑀲𑀺𑀮𑀸𑀫𑀬𑁄𑀲𑀺

𑀅𑀘𑁂𑀢𑀦𑁄𑀲𑀸’𑀣 𑀅𑀬𑁄𑀫𑀬𑁄𑀲𑀺,

𑀅𑀯𑀻𑀢𑀭𑀸𑀕𑀜𑁆𑀳𑀺 𑀲𑀘𑁂𑀢𑀦𑀜𑁆𑀘𑁂

𑀅𑀦𑁂𑀦𑀼𑀧𑀸𑀬𑁂𑀦𑀼’𑀧𑀲𑀗𑁆𑀓𑀫𑀸𑀫;

𑁪𑁪𑁭.

𑀨𑀮𑁂𑀬𑁆𑀬 𑀔𑀻𑀧𑁆𑀧𑀁 𑀳𑀤𑀬𑀜𑁆𑀳𑀺 𑀢𑀲𑁆𑀲

𑀉𑀡𑁆𑀳𑀁𑀯 𑀭𑀢𑁆𑀢𑀁 𑀫𑀼𑀔𑀢𑀼’𑀕𑁆𑀕𑀫𑁂𑀬𑁆𑀬,

𑀲𑀺𑀬𑀸𑀯 𑀔𑀺𑀧𑁆𑀧𑀁 𑀅𑀧𑀺 𑀘𑀺𑀢𑁆𑀢𑀔𑁂𑀧𑀁

𑀉𑀫𑁆𑀫𑀸𑀤𑀪𑀸𑀯𑀁𑀘 𑀲 𑀧𑀸𑀧𑀼𑀡𑁂𑀬𑁆𑀬;

𑁪𑁪𑁮.

𑀬𑀣𑀸 𑀧𑀮𑀼𑀢𑁆𑀢𑁄 𑀳𑀭𑀺𑀢𑁄𑀧𑀮𑀫𑁆𑀳𑀺

𑀔𑀺𑀢𑁆𑀢𑁄 𑀦𑀴𑁄 𑀲𑀼𑀲𑁆𑀲𑀢𑀺 𑀆𑀢𑀧𑁂𑀦,

𑀏𑀯𑀁 𑀯𑀺𑀲𑀼𑀲𑁆𑀲𑁂𑀢𑀺 𑀯𑀺𑀲𑀸𑀤𑀫𑁂𑀢𑀺

𑀲𑁄 𑀫𑀼𑀘𑁆𑀙𑀢𑀺 𑀫𑀼𑀬𑁆𑀳𑀢𑀺 𑀤𑀼𑀓𑁆𑀔𑀫𑁂𑀢𑀺;

𑁪𑁪𑁯.

𑀲𑁄𑀓𑀸𑀯𑀓𑀺𑀡𑁆𑀡𑁂 𑀦𑀼 𑀯𑀦𑀫𑁆𑀳𑀺 𑀛𑀸𑀬𑀲𑀺

𑀯𑀺𑀢𑁆𑀢𑀦𑁆𑀦𑀼 𑀚𑀺𑀢𑁄 𑀉𑀤 𑀧𑀢𑁆𑀣𑀬𑀸𑀦𑁄,

𑀆𑀕𑀼𑀦𑁆𑀦𑀽 𑀕𑀸𑀫𑀲𑁆𑀫𑀺𑀁 𑀅𑀓𑀸𑀲𑀺 𑀓𑀺𑀜𑁆𑀘𑀺

𑀚𑀦𑁂𑀦 𑀓𑀲𑁆𑀫𑀸 𑀦 𑀓𑀭𑁄𑀲𑀺 𑀲𑀓𑁆𑀔𑀺𑀁;

𑀲𑀢𑁆𑀣𑀸?.

𑁪𑁫𑁦.

𑀅𑀢𑁆𑀣𑀲𑁆𑀲 𑀧𑀢𑁆𑀢𑀺𑀁 𑀳𑀤𑀬𑀲𑁆𑀲 𑀲𑀦𑁆𑀢𑀺𑀁

𑀙𑁂𑀢𑁆𑀯𑀸𑀦 𑀲𑁂𑀦𑀁 𑀧𑀺𑀬𑀲𑀸𑀢𑀭𑀽𑀧𑀁

𑀏𑀓𑁄’𑀳𑀁 𑀛𑀸𑀬𑀁 𑀲𑀼𑀔𑀫𑀦𑀼𑀩𑁄𑀥𑀺𑀁

𑀚𑀦𑁂𑀦 𑀢𑀲𑁆𑀫𑀸 𑀦 𑀓𑀭𑁄𑀫 𑀲𑀓𑁆𑀔𑀺𑀁;

𑀇𑀫𑀸 ¶ 𑀤𑁆𑀯𑁂 𑀧𑀸𑀮𑀺𑀬𑀁?.

𑁪𑁫𑁧.

𑀧𑀮𑀼𑀝𑁆𑀞𑀕𑀢𑁆𑀢𑀁 𑀤𑀳𑀦𑁂𑀦 𑀫𑀓𑁆𑀓𑀝𑀺𑀁

𑀲𑀼𑀲𑀸𑀦𑀧𑁂𑀢𑀺𑀜𑁆𑀘 𑀚𑀺𑀕𑀼𑀘𑁆𑀙𑀦𑀻𑀬𑀁,

𑀚𑁂𑀕𑀼𑀘𑁆𑀙𑀺𑀬𑀁 𑀚𑀗𑁆𑀕𑀫 𑀫𑀻𑀴𑁆𑀳𑀭𑀸𑀲𑀺𑀁

𑀤𑀺𑀲𑁆𑀯𑀸𑀦 𑀓𑁄 𑀢𑀁 𑀯𑀭𑀬𑁂 𑀲𑀧𑀜𑁆𑀜𑁄;

𑀅𑀣 𑀅𑀭𑀢𑀺?.

𑁪𑁫𑁨.

𑀓𑀣𑀁 𑀯𑀺𑀳𑀸𑀭𑀻 𑀩𑀳𑀼𑀮𑁄 𑀘 𑀪𑀺𑀓𑁆𑀔𑀼

𑀧𑀜𑁆𑀘𑁄𑀖𑀢𑀺𑀡𑁆𑀡𑁂 𑀅𑀢𑀭𑀻𑀥 𑀙𑀝𑁆𑀞𑀁,

𑀓𑀣𑀁 𑀛𑀸𑀬𑀺𑀁 𑀩𑀳𑀼𑀮𑀁 𑀓𑀸𑀫𑀲𑀜𑁆𑀜𑀸

𑀧𑀭𑀺𑀩𑀸𑀳𑀺𑀭𑀸 𑀳𑁄𑀦𑁆𑀢𑀺 𑀅𑀮𑀤𑁆𑀥 𑀬𑁄 𑀢𑀁;

𑀲𑀢𑁆𑀣𑀸?.

𑁪𑁫𑁩.

𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄

𑀅𑀲𑀗𑁆𑀔𑀭𑀸𑀦𑁄 𑀲𑀢𑀺𑀫𑀸 𑀅𑀦𑁄𑀓𑁄,

𑀅𑀜𑁆𑀜𑀸𑀬 𑀥𑀫𑁆𑀫𑀁 𑀅𑀯𑀺𑀢𑀓𑁆𑀓 𑀛𑀸𑀬𑀻

𑀦 𑀓𑀼𑀧𑁆𑀧𑀢𑀻 𑀦𑀲𑁆𑀲𑀭𑀢𑀻 𑀦 𑀣𑀻𑀦𑁄;

𑁪𑁫𑁪.

𑀏𑀯𑀁 𑀯𑀺𑀳𑀸𑀭𑀻 𑀩𑀳𑀼𑀮𑁄 𑀘 𑀪𑀺𑀓𑁆𑀔𑀼

𑀧𑀜𑁆𑀘𑁄𑀖𑀢𑀺𑀡𑁆𑀡𑁂 𑀅𑀢𑀭𑀻𑀥 𑀙𑀝𑁆𑀞𑀁,

𑀏𑀯𑀁 𑀛𑀸𑀬𑀺𑀁 𑀩𑀳𑀼𑀮𑀁 𑀓𑀸𑀫𑀲𑀜𑁆𑀜𑀸

𑀧𑀭𑀺𑀩𑀸𑀳𑀺𑀭𑀸 𑀳𑁄𑀦𑁆𑀢𑀺 𑀅𑀮𑀤𑁆𑀥 𑀬𑁄 𑀢𑀁;

𑀅𑀣 𑀭𑀕𑀸?.

𑁪𑁫𑁫.

𑀅𑀘𑁆𑀙𑁂𑀘𑁆𑀙𑀺 𑀢𑀡𑁆𑀳𑀁 𑀕𑀡𑀲𑀗𑁆𑀖𑀘𑀸𑀭𑀻

𑀅𑀤𑁆𑀥𑀸 𑀢𑀭𑀺𑀲𑁆𑀲𑀦𑁆𑀢𑀻 𑀩𑀳𑀽 𑀘 𑀲𑀤𑁆𑀥𑀸,

𑀩𑀳𑀼𑀁 𑀯𑀢𑀸𑀬𑀁 𑀚𑀦𑀢’𑀫𑀦𑁄𑀓𑁄

𑀅𑀘𑁆𑀙𑀺𑀚𑁆𑀚 𑀦𑁂𑀲𑁆𑀲𑀢𑀺 𑀫𑀘𑁆𑀘𑀼𑀭𑀸𑀚𑀲𑁆𑀲 𑀧𑀸𑀭𑀁;

𑀲𑀢𑁆𑀣𑀸? ¶ .

𑁪𑁫𑁬.

𑀦𑀬𑀦𑁆𑀢𑀺 𑀯𑁂 𑀫𑀳𑀸𑀯𑀻𑀭𑀸 𑀲𑀤𑁆𑀥𑀫𑁆𑀫𑁂𑀦 𑀢𑀣𑀸𑀕𑀢𑀸,

𑀥𑀫𑁆𑀫𑁂𑀦 𑀦𑀬𑀫𑀸𑀦𑀸𑀦𑀁 𑀓𑀸 𑀉𑀲𑀽𑀬𑀸 𑀯𑀺𑀚𑀸𑀦𑀢𑀁;

𑀇𑀫𑀸 𑀧𑀜𑁆𑀘 𑀧𑀸𑀮𑀺𑀬𑀁?.

𑁪𑁫𑁭.

𑀲𑀼𑀢𑁆𑀯𑀸𑀦 𑀢𑀁 𑀥𑀫𑁆𑀫𑀯𑀭𑀁 𑀚𑀺𑀦𑀲𑁆𑀲

𑀧𑀫𑀢𑁆𑀢𑀩𑀦𑁆𑀥𑀼𑀲𑁆𑀲 𑀭𑀕𑀸𑀤𑀺𑀭𑀸𑀫𑀸,

𑀧𑀮𑁄𑀪𑀺𑀢𑀼𑀁 𑀦𑁂’𑀯 𑀲𑀫𑀢𑁆𑀣𑀓𑀸 𑀢𑀁

𑀅𑀕𑀁𑀲𑀼 𑀔𑀺𑀧𑁆𑀧𑀁 𑀧𑀺𑀢𑀼𑀦𑁄 𑀲𑀓𑀸𑀲𑀁;

𑁪𑁫𑁮.

𑀫𑀸𑀭𑁄 𑀢𑀤𑀸𑀭𑀸’𑀯 𑀲𑀫𑁂𑀓𑁆𑀔𑀫𑀸𑀦𑁄

𑀤𑀺𑀲𑁆𑀯𑀸𑀕𑀢𑀸 𑀓𑁂𑀯𑀮𑀫𑁂𑀯 𑀢𑀸𑀬𑁄,

𑀫𑀸 𑀓𑀢𑁆𑀣 𑀓𑀸𑀫𑀁 𑀫𑀫 𑀪𑀸𑀲𑀺𑀢𑀸𑀦𑀺

𑀓𑀸𑀫𑀢𑁆𑀣 𑀧𑀸𑀢𑀼𑀁 𑀫𑀺𑀕𑀢𑀡𑁆𑀳𑀺𑀓𑀸𑀧𑀁;

𑁪𑁫𑁯.

𑀩𑀸𑀮𑀸 𑀓𑀼𑀫𑀼𑀤𑀦𑀸𑀴𑁂𑀳𑀺 𑀧𑀩𑁆𑀩𑀢𑀁 𑀅𑀪𑀺𑀫𑀦𑁆𑀣𑀣,

𑀕𑀺𑀭𑀺𑀁 𑀦𑀔𑁂𑀦 𑀔𑀡𑀣 𑀅𑀬𑁄 𑀤𑀦𑁆𑀢𑁂𑀳𑀺 𑀔𑀸𑀤𑀣;

𑁪𑁬𑁦.

𑀲𑁂𑀮𑀁𑀯 𑀲𑀺𑀭𑀲𑀺 𑀊𑀳𑀘𑁆𑀘 𑀧𑀸𑀢𑀸𑀮𑁂 𑀕𑀸𑀥𑀫𑁂𑀲𑀣,

𑀔𑀸𑀦𑀼𑀁𑀯 𑀉𑀭𑀲𑀸’𑀲𑀚𑁆𑀚 𑀦𑀺𑀩𑁆𑀩𑀺𑀚𑁆𑀚𑀸𑀧𑁂𑀣 𑀕𑁄𑀢𑀫𑀸;

𑀇𑀫𑀸 𑀤𑁆𑀯𑁂 𑀧𑀸𑀮𑀺𑀬𑀁?.

𑁪𑁬𑁧.

𑀯𑀢𑁆𑀯𑀸𑀦 𑀏𑀯𑀁 𑀯𑀺𑀫𑀦𑁄 𑀲 𑀫𑀸𑀭𑁄

𑀲𑀝𑀻𑀢𑀼𑀓𑁄 𑀲𑀫𑁆𑀪𑀯𑀦𑀁 𑀧𑀬𑀸𑀲𑀺,

𑀲𑀢𑁆𑀣𑀸𑀣 𑀭𑀸𑀕𑀸 𑀧𑀭𑀺𑀫𑀼𑀢𑁆𑀢𑀘𑀺𑀢𑁆𑀢𑁄

𑀚𑀳𑀸𑀲𑀺 𑀢𑀲𑁆𑀫𑀺𑀁 𑀤𑀺𑀯𑀲𑀸𑀦𑀺 𑀲𑀢𑁆𑀢;

𑁪𑁬𑁨.

𑀅𑀚𑁆𑀚𑀸𑀧𑀺 𑀢𑀁 𑀲𑀸𑀔𑀺𑀯𑀭𑀫𑁆𑀧𑀺𑀢𑁂𑀦

’𑀦𑀼𑀪𑀼𑀢𑀫𑀢𑁆𑀢𑁂𑀦 𑀫𑀳𑁂𑀦𑁆𑀢𑀺 𑀲𑀩𑁆𑀩𑁂,

𑀢𑁂𑀦𑁂𑀯 𑀢𑁂 𑀲𑀕𑁆𑀕𑀕𑀢𑀸 𑀯𑀺𑀫𑀸𑀦𑁂

𑀫𑁄𑀤𑀦𑁆𑀢𑀺 𑀓𑀸𑀫𑁂𑀳𑀺 𑀅𑀦𑀽𑀧𑀫𑁂𑀳𑀺;

𑀇𑀢𑀺 𑀧𑀜𑁆𑀘𑀫 𑀲𑀢𑁆𑀢𑀸𑀳𑀁.

𑁪𑁬𑁩. ¶

𑀢𑀢𑁄 𑀫𑀼𑀦𑀺𑀦𑁆𑀤𑁄 𑀫𑀼𑀘𑀮𑀺𑀦𑁆𑀤𑀫𑀽𑀮𑁂

𑀦𑀺𑀲𑀻𑀤𑀺 𑀕𑀦𑁆𑀢𑁆𑀯𑀸 𑀧𑀯𑀭𑀸𑀲𑀦𑀫𑁆𑀳𑀺,

𑀬𑀼𑀕𑀦𑁆𑀥𑀭𑁂 𑀩𑀸𑀮𑀭𑀯𑀻’𑀯 𑀭𑀁𑀲𑀺

𑀚𑀸𑀮𑀸𑀳𑀺 𑀮𑁄𑀓𑀁 𑀧𑀭𑀺𑀧𑀽𑀭𑀬𑀦𑁆𑀢𑁄;

𑁪𑁬𑁪.

𑀅𑀣𑀸𑀦 𑀫𑁂𑀖𑁄 𑀚𑀮𑀤𑀸 𑀲𑀢𑁂𑀳𑀺

𑀧𑀧𑀽𑀭𑀬𑀁 𑀔𑀁 𑀣𑀦𑀬𑀁 𑀲𑀯𑀺𑀚𑁆𑀚𑀼,

𑀲𑀲𑀻𑀢𑀯𑀸𑀢𑁄 𑀓𑀺𑀭𑀫𑀫𑁆𑀩𑀼𑀥𑀸𑀭𑀁

𑀯𑀺𑀭𑁄𑀘𑀫𑀸𑀦𑁄 𑀯𑀺𑀲𑀓𑀡𑁆𑀞𑀺𑀓𑀸𑀳𑀺;

𑁪𑁬𑁫.

𑀅𑀫𑀦𑁆𑀤𑀦𑀡𑁆𑀤𑁄 𑀫𑀼𑀘𑀮𑀺𑀦𑁆𑀤𑀪𑁄𑀕𑀻

𑀤𑀺𑀲𑁆𑀯𑀸 𑀫𑀼𑀦𑀺𑀦𑁆𑀤𑀁 𑀫𑀼𑀘𑀮𑀺𑀦𑁆𑀤𑀫𑀽𑀮𑁂,

𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸𑀦 𑀯𑀺𑀲𑀸𑀮𑀪𑁄𑀕𑀸

𑀙𑀸𑀤𑁂𑀢𑁆𑀯 𑀲𑀫𑁆𑀫𑀸 𑀲𑀨𑀡𑁄 𑀨𑀡𑁂𑀦;

𑁪𑁬𑁬.

𑀅𑀚𑁆𑀛𑁂𑀲𑀺 𑀲𑁄 𑀢𑀲𑁆𑀲 𑀅𑀦𑀼𑀕𑁆𑀕𑀳𑀸𑀬

𑀦𑀺𑀲𑀻𑀤𑀺 𑀕𑀦𑁆𑀢𑁆𑀯𑀸 𑀪𑀼𑀚𑀕𑀸’𑀲𑀦𑀫𑁆𑀳𑀺,

𑀲𑀢𑁆𑀣𑀸 𑀢𑀤𑀸 𑀭𑀽𑀧𑀺𑀬𑀫𑀦𑁆𑀤𑀺𑀭𑁂𑀯

𑀲𑀢𑁆𑀢𑀸𑀫𑀳𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄;

𑁪𑁬𑁭.

𑀅𑀚𑁆𑀚𑀸𑀧𑀺 𑀢𑀁 𑀲𑀸𑀔𑀺𑀯𑀭𑀫𑁆𑀧𑀺 𑀢𑁂𑀦

’𑀦𑀼𑀪𑀼𑀢𑀫𑀢𑁆𑀢𑁂𑀦 𑀫𑀳𑁂𑀦𑁆𑀢𑀺 𑀲𑀩𑁆𑀩𑁂,

𑀢𑁂𑀦𑁂𑀯 𑀢𑁂 𑀲𑀕𑁆𑀕𑀕𑀢𑀸 𑀯𑀺𑀫𑀸𑀦𑁂

𑀫𑁄𑀤𑀦𑁆𑀢𑀺 𑀓𑀸𑀫𑁂𑀳𑀺 𑀅𑀦𑀽𑀧𑀫𑁂𑀳𑀺;

𑀇𑀢𑀺 𑀙𑀝𑁆𑀞𑀫 𑀲𑀢𑁆𑀢𑀸𑀳𑀁.

𑁪𑁬𑁮.

𑀢𑀢𑁄’𑀧𑀕𑀦𑁆𑀢𑁆𑀯𑀸 𑀬𑀢𑀺𑀭𑀸𑀚 𑀭𑀸𑀚𑀸

𑀦𑀺𑀲𑀻𑀤𑀺 𑀭𑀸𑀚𑀸𑀬𑀢𑀦𑀲𑁆𑀲 𑀫𑀽𑀮𑁂,

𑀯𑀺𑀫𑀼𑀢𑁆𑀢𑀺𑀚𑀁 𑀧𑀻𑀢𑀺𑀲𑀼𑀔𑀁’𑀦𑀼𑀪𑁄𑀦𑁆𑀢𑁄

𑀲𑀢𑁆𑀢𑀸𑀳𑀫𑀢𑁆𑀢𑀁 𑀓𑀭𑀼𑀡𑀸𑀕𑀼𑀡𑀕𑁆𑀕𑁄;

𑁪𑁬𑁯.

𑀅𑀚𑁆𑀚𑀸𑀧𑀺 𑀢𑀁 𑀲𑀸𑀔𑀺𑀯𑀭𑀫𑁆𑀧𑀺 𑀢𑁂𑀦

’𑀦𑀼𑀪𑀼𑀢𑀫𑀢𑁆𑀢𑁂𑀦 𑀫𑀳𑁂𑀦𑁆𑀢𑀻 𑀲𑀩𑁆𑀩𑁂,

𑀢𑁂𑀦𑁂𑀯 𑀢𑁂 𑀲𑀕𑁆𑀕𑀕𑀢𑀸 𑀯𑀺𑀫𑀸𑀦𑁂

𑀫𑁄𑀤𑀦𑁆𑀢𑀺 𑀓𑀸𑀫𑁂𑀳𑀺 𑀅𑀦𑀽𑀧𑀫𑁂𑀳𑀺;

𑀇𑀢𑀺 𑀲𑀢𑁆𑀢𑀫 𑀲𑀢𑁆𑀢𑀸𑀳𑀁.

𑁪𑁭𑁦. ¶

𑀆𑀳𑀸𑀭 𑀓𑀺𑀘𑁆𑀘𑀸𑀤𑀺 𑀯𑀺𑀯𑀚𑁆𑀚𑀺𑀢𑀲𑁆𑀲

𑀲𑀼𑀔𑀸𑀦𑀼𑀪𑁄𑀦𑁆𑀢𑀲𑁆𑀲 𑀯𑀺𑀫𑀼𑀢𑁆𑀢𑀺𑀚𑀸𑀦𑀺,

𑀲𑀫𑁆𑀧𑀻𑀡𑀺𑀢𑀗𑁆𑀕𑀲𑁆𑀲 𑀚𑀺𑀦𑀲𑁆𑀲 𑀢𑀲𑁆𑀲

𑀇𑀘𑁆𑀘𑀘𑁆𑀘𑀕𑀼𑀁 𑀲𑀢𑁆𑀢𑀤𑀺𑀦𑀸𑀦𑀺 𑀲𑀢𑁆𑀢;

𑁪𑁭𑁧.

𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀢𑀢𑁄’𑀧𑀦𑀻𑀢

𑀫𑀼𑀔𑁄𑀤𑀓𑀸𑀤𑀺𑀫𑁆𑀧𑀭𑀺𑀪𑀼𑀜𑁆𑀚𑀺𑀬𑀸𑀦,

𑀦𑀺𑀲𑀺𑀦𑁆𑀦𑀫𑀢𑁆𑀢𑁂 𑀬𑀢𑀺𑀭𑀸𑀚 𑀭𑀸𑀚𑁂

𑀢𑀢𑁆𑀣𑀸’𑀕𑀫𑀼𑀁 𑀤𑁆𑀯𑁂 𑀯𑀸𑀡𑀺𑀚𑀸 𑀔𑀡𑁂𑀦;

𑁪𑁭𑁨.

𑀉𑀲𑁆𑀲𑀸𑀳𑀺𑀢𑀸 𑀤𑁂𑀯𑀯𑀭𑁂𑀦 𑀲𑀫𑁆𑀫𑀸

𑀲𑀸𑀮𑁄𑀳𑀺𑀢𑀸 𑀢𑀲𑁆𑀲 𑀢𑀧𑀼𑀲𑁆𑀲-𑀪𑀮𑁆𑀮𑀺𑀓𑀸,

𑀫𑀦𑁆𑀣𑀜𑁆𑀘 𑀲𑀸𑀤𑀼𑀁 𑀫𑀥𑀼𑀧𑀺𑀡𑁆𑀟𑀺𑀓𑀜𑁆𑀘

𑀆𑀤𑀸𑀬 𑀦𑀸𑀣𑀁 𑀇𑀤𑀫𑀩𑁆𑀭𑀼𑀯𑀼𑀦𑁆𑀢𑁂;

𑁪𑁭𑁩.

𑀇𑀤𑀜𑁆𑀳𑀺 𑀦𑁄 𑀥𑀻𑀭 𑀅𑀦𑀼𑀕𑁆𑀕𑀳𑀸𑀬

𑀧𑀝𑀺𑀕𑁆𑀕𑀳𑁂𑀢𑁆𑀯 𑀧𑀭𑀺𑀪𑀼𑀜𑁆𑀚 𑀤𑀸𑀦𑀁,

𑀳𑀺𑀢𑀸𑀬 𑀢𑀁 𑀳𑁄𑀢𑀺 𑀲𑀼𑀔𑀸𑀬 𑀘𑁂𑀯

𑀅𑀦𑀧𑁆𑀧𑀓𑀧𑁆𑀧𑁂𑀲𑀼 𑀅𑀦𑀸𑀕𑀢𑁂𑀲𑀼;

𑁪𑁭𑁪.

𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀫𑀼𑀦𑀺 𑀤𑁂𑀯𑀤𑀺𑀦𑁆𑀦

𑀧𑀢𑁆𑀢𑁂𑀦 𑀧𑀘𑁆𑀘𑀕𑁆𑀖𑀲𑀺𑀮𑀸𑀫𑀬𑁂𑀦,

𑀪𑀼𑀢𑁆𑀯𑀸𑀦 𑀢𑁂𑀲𑀁 𑀅𑀦𑀼𑀫𑁄𑀤𑀦𑀢𑁆𑀣𑀁

𑀤𑁂𑀲𑁂𑀲𑀺 𑀥𑀫𑁆𑀫𑀁 𑀯𑀭𑀤𑀁 𑀧𑀲𑀢𑁆𑀣𑀁;

𑁪𑁭𑁫.

𑀤𑁆𑀯𑁂 𑀪𑀸𑀢𑀺𑀓𑀸 𑀯𑀸𑀡𑀻𑀚𑀓𑀸 𑀚𑀺𑀦𑀲𑁆𑀲

𑀥𑀫𑁆𑀫𑀁 𑀲𑀼𑀡𑀺𑀢𑁆𑀯𑀸𑀦 𑀧𑀲𑀦𑁆𑀦𑀘𑀺𑀢𑁆𑀢𑀸,

𑀤𑁆𑀯𑁂 𑀯𑀸𑀘𑀺𑀓𑁄𑀧𑀸𑀲𑀓𑀢𑀁 𑀕𑀢𑀸𑀲𑀼𑀁

𑀬𑀸𑀘𑀺𑀁𑀲𑀼 𑀢𑁂 𑀢𑀁 𑀧𑀼𑀦 𑀧𑀽𑀚𑀦𑀻𑀬𑀁;

𑁪𑁭𑁬.

𑀧𑀭𑀸𑀫𑀲𑀺𑀢𑁆𑀯𑀸𑀦 𑀲𑀺𑀭𑀁 𑀢𑀢𑁄 𑀲𑁄

𑀅𑀤𑀸 𑀚𑀺𑀦𑁄 𑀓𑀼𑀦𑁆𑀢𑀮 𑀥𑀸𑀢𑀼𑀫𑀼𑀝𑁆𑀞𑀺𑀁,

𑀢𑁂 𑀢𑁂𑀦 𑀢𑀼𑀝𑁆𑀞𑀸 𑀲𑀼𑀫𑀦𑀸 𑀧𑀢𑀻𑀢𑀸

𑀫𑀳𑀺𑀁𑀲𑀼 𑀦𑁂𑀢𑁆𑀯𑀸 𑀯𑀺𑀪𑀯𑀸𑀦𑀼𑀭𑀽𑀧𑀁;

𑁪𑁭𑁭. ¶

𑀲𑀢𑁆𑀣𑀸’𑀣 𑀕𑀦𑁆𑀢𑁆𑀯𑀸 𑀅𑀚𑀧𑀸𑀮𑀫𑀽𑀮𑁂

𑀲𑀳𑀲𑁆𑀲 𑀭𑀁𑀲𑀻𑀯 𑀬𑀼𑀕𑀦𑁆𑀥𑀭𑀫𑁆𑀳𑀺,

𑀦𑀺𑀲𑀚𑁆𑀚 𑀮𑁄𑀓𑀁 𑀅𑀦𑀼𑀮𑁄𑀓𑀬𑀦𑁆𑀢𑁄

𑀯𑀺𑀢𑀓𑁆𑀓𑀺 𑀏𑀯𑀁 𑀫𑀦𑀲𑀸 𑀯𑀺𑀢𑀓𑁆𑀓𑀁;

𑁪𑁭𑁮.

𑀫𑀬𑀚𑁆𑀛𑀧𑀦𑁆𑀦𑁄 𑀯𑀭𑀥𑀫𑁆𑀫𑀲𑀸𑀭𑁄

𑀲𑀲𑀲𑁆𑀲 𑀲𑀺𑀦𑁆𑀥𑀽’𑀯 𑀅𑀕𑀸𑀥𑀧𑀸𑀭𑁄,

𑀅𑀩𑀼𑀤𑁆𑀥𑀲𑀢𑁆𑀢𑁂𑀳𑀺 𑀢𑀫𑀚𑁆𑀚 𑀓𑀲𑁆𑀲

𑀧𑀓𑀸𑀲𑀬𑀺𑀲𑁆𑀲𑀜𑁆𑀳𑀺 𑀚𑀴𑁄 𑀳𑀺 𑀮𑁄𑀓𑁄;

𑁪𑁭𑁯.

𑀤𑁂𑀲𑁂𑀫𑀺 𑀘𑁂 𑀥𑀫𑁆𑀫𑀯𑀭𑀁 𑀧𑀡𑀻𑀢𑀁

𑀓𑀺𑀮𑀦𑁆𑀢𑀪𑀸𑀯𑁄𑀯 𑀫𑀫𑀲𑁆𑀲 𑀅𑀲𑁆𑀫𑀸,

𑀓𑀺𑀫𑀢𑁆𑀢𑀤𑀼𑀓𑁆𑀔𑁂 𑀦𑀺𑀢𑀺 𑀘𑀺𑀦𑁆𑀢𑀬𑀦𑁆𑀢𑁄

𑀦𑀼𑀬𑁆𑀬𑀸𑀫𑀫𑀸𑀓𑀸 𑀫𑀼𑀦𑀺 𑀤𑁂𑀲𑀦𑀫𑁆𑀳𑀺;

𑁪𑁮𑁦.

𑀲𑀳𑀫𑁆𑀧𑀢𑀻 𑀦𑀸𑀫 𑀢𑀢𑁄 𑀯𑀺𑀥𑀸𑀢𑀸

𑀲𑀘𑁂𑀢𑀲𑀸 𑀢𑀲𑁆𑀲 𑀫𑀦𑀁 𑀯𑀺𑀤𑀺𑀢𑁆𑀯𑀸,

𑀯𑀺𑀦𑀲𑁆𑀲𑀢𑀻𑀤𑀁 𑀔𑀮𑀼 𑀲𑀩𑁆𑀩𑀮𑁄𑀓𑀁

𑀅𑀤𑁂𑀲𑀺𑀢𑁂 𑀢𑁂𑀦𑀺’𑀢𑀺 𑀓𑀫𑁆𑀧𑀫𑀸𑀦𑁄;

𑁪𑁮𑁧.

𑀲𑀓𑀸𑀲𑀫𑀸𑀕𑀫𑁆𑀫 𑀚𑀺𑀦𑀲𑁆𑀲 𑀢𑀲𑁆𑀲

𑀲𑀕𑀸𑀭𑀯𑁄 𑀩𑁆𑀭𑀳𑁆𑀫𑀕𑀡𑁂𑀦 𑀢𑀢𑁆𑀣,

𑀦𑀺𑀳𑀘𑁆𑀘 𑀚𑀸𑀦𑀼𑀁 𑀧𑀣𑀯𑀻𑀢𑀮𑀫𑁆𑀳𑀺

𑀦𑀫𑀲𑁆𑀲𑀫𑀸𑀦𑁄 𑀇𑀤𑀫𑀩𑁆𑀭𑀽𑀯𑀻 𑀲𑁄;

𑁪𑁮𑁨.

𑀢𑁆𑀯𑀁 𑀤𑁂𑀯𑀤𑁂𑀯𑁄 𑀲 𑀲𑀼𑀫𑁂𑀥𑀓𑀸𑀮𑁂

𑀧𑀮𑁄𑀓𑀺𑀢𑀁 𑀮𑁄𑀓𑀫𑀼𑀤𑀺𑀓𑁆𑀔𑀫𑀸𑀦𑁄,

𑀯𑀺𑀳𑀸𑀬 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂

𑀮𑀤𑁆𑀥𑀸’𑀫𑀢𑀁 𑀢𑀁 𑀓𑀭𑀼𑀡𑀸𑀕𑀼𑀡𑁂𑀦;

𑁪𑁮𑁩.

𑀧𑀯𑀺𑀲𑁆𑀲 𑀲𑀁𑀲𑀸𑀭𑀯𑀦𑀁 𑀯𑀺𑀤𑀼𑀕𑁆𑀕𑀁

𑀫𑀁𑀲𑀓𑁆𑀔𑀺𑀲𑀻𑀲𑀸𑀤𑀺𑀫’𑀤𑀸𑀲𑀺 𑀤𑀸𑀦𑀁,

𑀯𑁂𑀤𑁂𑀲𑀺 𑀤𑀼𑀓𑁆𑀔𑀁 𑀅𑀫𑀺𑀢𑀁 𑀅𑀲𑀬𑁆𑀳𑀁

𑀢𑀁 𑀢𑁂 𑀧𑀭𑀢𑁆𑀣𑀁’𑀯 𑀦 𑀅𑀢𑁆𑀢𑀳𑁂𑀢𑀼𑀁;

𑁪𑁮𑁪. ¶

𑀲𑀦𑁆𑀢𑀻𑀥 𑀲𑀢𑁆𑀢𑀸 𑀔𑀮𑀼 𑀫𑀦𑁆𑀤𑀭𑀸𑀕𑀸

𑀜𑀸𑀢𑀼𑀁 𑀲𑀫𑀢𑁆𑀣𑀸 𑀲𑀼𑀕𑀢𑀲𑁆𑀲 𑀥𑀫𑁆𑀫𑀁,

𑀆𑀭𑀸𑀥𑀺𑀢𑁄 𑀫𑁂 𑀓𑀭𑀼𑀡𑀸𑀕𑀼𑀡𑀕𑁆𑀕𑁄

𑀤𑁂𑀲𑁂𑀳𑀺 𑀥𑀫𑁆𑀫𑀁 𑀅𑀦𑀼𑀓𑀫𑁆𑀧𑀫𑀸𑀦𑁄;

𑁪𑁮𑁫.

𑀓𑀸𑀮𑁂 𑀯𑀺𑀓𑀸𑀲𑀦𑁆𑀢𑀺 𑀔𑀭𑀁𑀲𑀼 𑀫𑀺𑀲𑁆𑀲𑀸

𑀣𑀮𑀫𑁆𑀩𑀼𑀚𑀸𑀢𑀸 𑀓𑀼𑀲𑀼𑀫𑀸𑀦𑀺 𑀦𑀸𑀦𑀸,

𑀢𑀣𑁂’𑀯 𑀢𑁂 𑀥𑀫𑁆𑀫𑀓𑀭𑀸𑀪𑀺𑀨𑀼𑀝𑁆𑀞𑀸

𑀯𑀺𑀓𑀸𑀲𑀫𑀸𑀬𑀦𑁆𑀢𑀻 𑀚𑀦𑀸 𑀅𑀦𑁂𑀓𑀸

𑁪𑁮𑁬.

𑀲𑀫𑁆𑀧𑀦𑁆𑀦 𑀯𑀺𑀚𑁆𑀚𑀸𑀘𑀭𑀡𑁄 𑀲𑀢𑀻𑀫𑀸

𑀚𑀼𑀢𑀺𑀦𑁆𑀥𑀭𑁄 𑀅𑀦𑁆𑀢𑀺𑀫𑀤𑁂𑀳𑀥𑀸𑀭𑀻,

𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀲𑁆𑀲 𑀦𑀺𑀫𑀦𑁆𑀢𑀡𑀁 𑀲𑁄

𑀚𑀦𑁂𑀲𑀺 𑀲𑀢𑁆𑀢𑁂 𑀓𑀭𑀼𑀡𑀸 𑀫𑀦𑀲𑁆𑀫𑀺𑀁;

𑁪𑁮𑁭.

𑀅𑀧𑀸𑀭𑀼𑀢𑀸 𑀢𑁂𑀲𑀁 𑀅𑀫𑀢𑀲𑁆𑀲 𑀤𑁆𑀯𑀸𑀭𑀸

𑀬𑁂 𑀲𑁄𑀢𑀯𑀦𑁆𑀢𑁄 𑀧𑀫𑀼𑀜𑁆𑀘𑀦𑁆𑀢𑀼 𑀲𑀤𑁆𑀥𑀁,

𑀯𑀺𑀳𑀺𑀁𑀲𑀲𑀜𑁆𑀜𑀻 𑀧𑀕𑀼𑀡𑀁 𑀦 𑀪𑀸𑀲𑀺𑀁

𑀥𑀫𑁆𑀫𑀁 𑀧𑀡𑀻𑀢𑀁 𑀫𑀦𑀼𑀚𑁂𑀲𑀼 𑀩𑁆𑀭𑀳𑁆𑀫𑁂;

𑁪𑁮𑁮.

𑀧𑀝𑀺𑀕𑁆𑀕𑀳𑁂𑀲𑀻𑀢𑀺 𑀉𑀤𑀕𑁆𑀕𑀘𑀺𑀢𑁆𑀢𑁄

𑀅𑀚𑁆𑀛𑁂𑀲𑀦𑀁 𑀫𑁂 𑀘𑀢𑀼𑀭𑀸𑀡𑀦𑁄 𑀲𑁄,

𑀦𑀢𑁆𑀯𑀸𑀦 𑀦𑀸𑀣𑀁 𑀲𑀳𑀧𑀸𑀭𑀺𑀲𑀚𑁆𑀚𑁄

𑀧𑀓𑁆𑀓𑀸𑀫𑀺 𑀢𑀫𑁆𑀳𑀸 𑀪𑀯𑀦𑀁 𑀔𑀡𑁂𑀦;

𑁪𑁮𑁯.

𑀢𑀢𑁄 𑀚𑀺𑀦𑁄 𑀢𑁂𑀦 𑀕𑀳𑀺𑀢𑀦𑀼𑀜𑁆𑀜𑁄

𑀤𑁂𑀲𑁂𑀫𑀺 𑀓𑀲𑁆𑀲𑁂𑀢𑀺 𑀉𑀤𑀺𑀓𑁆𑀔𑀫𑀸𑀦𑁄,

𑀆𑀴𑀸𑀭-𑀉𑀤𑁆𑀤𑁂 𑀲𑀫𑀼𑀤𑀺𑀓𑁆𑀔 𑀥𑀻𑀭𑁄,

𑀫𑀦𑁆𑀢𑁆𑀯𑀸𑀦 𑀢𑁂𑀲𑀁 𑀅𑀘𑀺𑀭𑀘𑁆𑀘𑀼𑀢𑀺𑀢𑁆𑀢𑀁;

𑁪𑁯𑁦.

𑀓𑀳𑀦𑁆𑀦𑀼𑀔𑁄’𑀳𑀁 𑀯𑀭𑀥𑀫𑁆𑀫𑀘𑀓𑁆𑀓𑀁

𑀅𑀜𑁆𑀜𑁂𑀦 𑀓𑁂𑀦𑀸𑀧𑀺 𑀅𑀯𑀢𑁆𑀢𑀦𑀻𑀬𑀁,

𑀮𑁄𑀓𑀲𑁆𑀲 𑀘𑀺𑀦𑁆𑀢𑀸𑀫𑀡𑀺𑀲𑀦𑁆𑀢𑀺𑀪𑀕𑁆𑀕𑀁

𑀧𑀯𑀢𑁆𑀢𑀬𑀺𑀲𑁆𑀲𑀦𑁆𑀢𑀻 𑀯𑀺𑀘𑀺𑀦𑁆𑀢𑀬𑀦𑁆𑀢𑁄;

𑁪𑁯𑁧. ¶

𑀤𑀺𑀲𑁆𑀯𑀸𑀦 𑀪𑀺𑀓𑁆𑀔𑀽 𑀫𑀼𑀦𑀺 𑀧𑀜𑁆𑀘𑀯𑀕𑁆𑀕𑁂

𑀆𑀤𑀸𑀬 𑀧𑀢𑁆𑀢𑀜𑁆𑀘 𑀢𑀺𑀘𑀻𑀯𑀭𑀜𑁆𑀘,

𑀩𑀸𑀭𑀸𑀡𑀲𑀻𑀬𑀁 𑀫𑀺𑀕𑀤𑀸𑀬𑀫𑁂𑀦𑁆𑀢𑁄

𑀅𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺 𑀲𑀢𑁆𑀣𑀸;

𑁪𑁯𑁨.

𑀢𑀢𑁆𑀣𑀸𑀫𑀭𑀩𑁆𑀭𑀳𑁆𑀫𑀕𑀡𑁂𑀳𑀺 𑀧𑀽𑀢

𑀧𑀣𑁂 𑀨𑀡𑀻 𑀧𑀓𑁆𑀔𑀺 𑀘𑀢𑀼𑀧𑁆𑀧𑀤𑀸 𑀘,

𑀆𑀭𑀜𑁆𑀜𑀤𑁂𑀯𑀸 𑀢𑀭𑀼𑀧𑀩𑁆𑀩𑀢𑀸 𑀘

𑀫𑀳𑀺𑀁𑀲𑀼 𑀦𑁂𑀓𑁂𑀳𑀺 𑀲𑀼𑀯𑀺𑀫𑁆𑀳𑀬𑁂𑀳𑀺;

𑁪𑁯𑁩.

𑀢𑀢𑁄𑀧𑀕𑀸 𑀲𑁄 𑀫𑀺𑀕𑀤𑀸𑀬𑀫𑀕𑁆𑀕𑁂

𑀤𑀺𑀲𑁆𑀯𑀸 𑀬𑀢𑀻𑀲𑀁 𑀬𑀢𑀬𑁄’𑀧𑀕𑀦𑁆𑀢𑁆𑀯𑀸,

𑀅𑀓𑀁𑀲𑀼 𑀯𑀢𑁆𑀢𑀁 𑀧𑀝𑀺𑀧𑀢𑁆𑀢𑀺𑀲𑀸𑀭𑀸

𑀧𑀯𑀢𑁆𑀢𑀬𑀻 𑀢𑀢𑁆𑀣 𑀲 𑀥𑀫𑁆𑀫𑀘𑀓𑁆𑀓𑀁;

𑁪𑁯𑁪.

𑀅𑀜𑁆𑀜𑀸𑀤𑀺𑀓𑁄𑀡𑁆𑀟𑀜𑁆𑀜𑀯𑀲𑀺𑀧𑁆𑀧𑀥𑀸𑀦𑀸

𑀓𑁄𑀝𑀻𑀦𑀫𑀝𑁆𑀞𑀸𑀭𑀲 𑀓𑀜𑁆𑀚𑀬𑁄𑀦𑀻,

𑀅𑀲𑀻𑀢𑀺𑀓𑁄𑀝𑀻’𑀧𑀺 𑀲𑀼𑀥𑀸𑀲𑀺 𑀲𑀗𑁆𑀖𑀸

𑀅𑀜𑁆𑀜𑀸𑀲𑀼𑀫𑀕𑁆𑀕𑀁 𑀓𑀫𑀢𑁄 𑀢𑀤𑀸 𑀢𑁂;

𑁪𑁯𑁫.

𑀅𑀢𑀺𑀘𑁆𑀘𑀬𑀸𑀢𑀫𑁆𑀳𑀺 𑀦𑀺𑀤𑀸𑀖𑀓𑀸𑀮𑁂

𑀯𑀲𑁆𑀲𑀸𑀦𑀓𑀸𑀮𑁂 𑀲𑀫𑀼𑀧𑀸𑀕𑀢𑀲𑁆𑀫𑀺𑀁,

𑀢𑀢𑁆𑀣𑁂𑀯 𑀯𑀲𑁆𑀲𑀁 𑀉𑀧𑀕𑀫𑁆𑀫 𑀥𑀻𑀭𑁄

𑀢𑁂𑀫𑀸𑀲𑀫𑀢𑁆𑀢𑀁 𑀅𑀯𑀲𑀻 𑀯𑀲𑀻𑀲𑁄;

𑁪𑁯𑁬.

𑀢𑀢𑁄 𑀬𑀲𑀁 𑀢𑀲𑁆𑀲 𑀲𑀳𑀸𑀬𑀓𑁂𑀧𑀺

𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑁂,

𑀪𑀼𑀢𑀺𑀁 𑀚𑀦𑀸𑀦𑀁 𑀅𑀦𑀼𑀩𑁆𑀭𑀽𑀳𑀬𑀦𑁆𑀢𑁄

𑀯𑀲𑁆𑀲𑀲𑁆𑀲 𑀅𑀦𑁆𑀢𑀁 𑀅𑀓𑀭𑀻 𑀢𑀳𑀺𑀁 𑀲𑁄;

𑁪𑁯𑁭.

𑀯𑀲𑁆𑀲𑀘𑁆𑀘𑀬𑁂 𑀮𑁄𑀓𑀯𑀺𑀤𑀽 𑀫𑀼𑀦𑀺𑀦𑁆𑀤𑁄

𑀆𑀫𑀦𑁆𑀢𑀬𑀻 𑀢𑁂 𑀬𑀢𑀬𑁄 𑀲𑀧𑀼𑀢𑁆𑀢𑁂,

𑀢𑁂’𑀣𑀸𑀕𑀫𑀼𑀁 𑀦𑀺𑀩𑁆𑀩𑀡𑀣𑀸 𑀓𑀢𑀜𑁆𑀚𑀮𑀻

’𑀤𑀫𑀩𑁆𑀭𑀼𑀯𑀺 𑀢𑁂𑀲𑀫’𑀦𑀦𑁆𑀢 𑀧𑀜𑁆𑀜𑁄;

𑁪𑁯𑁮. ¶

𑀉𑀕𑁆𑀖𑁄𑀲𑀬𑀦𑁆𑀢𑀸 𑀫𑀫 𑀥𑀫𑁆𑀫𑀖𑁄𑀲𑀁

𑀲𑀫𑀸𑀳𑀦𑀦𑁆𑀢𑀸 𑀫𑀫 𑀥𑀫𑁆𑀫𑀪𑁂𑀭𑀺𑀁,

𑀲𑀸𑀥𑀼𑀁 𑀥𑀫𑁂𑀦𑁆𑀢𑀸 𑀫𑀫 𑀥𑀫𑁆𑀫𑀲𑀗𑁆𑀔𑀁

𑀘𑀭𑀸𑀣 𑀢𑀼𑀫𑁆𑀳𑁂 𑀲𑀦𑀭𑀸𑀫𑀭𑀸𑀦𑀁;

𑁪𑁯𑁯.

𑀚𑀬𑀤𑁆𑀥𑀚𑀁 𑀫𑁂 𑀪𑀼𑀯𑀦𑀼𑀓𑁆𑀔𑀺𑀧𑀦𑁆𑀢𑀸

𑀉𑀲𑁆𑀲𑀸𑀧𑀬𑀦𑁆𑀢𑀸 𑀫𑀫 𑀥𑀫𑁆𑀫𑀓𑁂𑀢𑀼𑀁,

𑀅𑀣𑀼𑀓𑁆𑀔𑀺𑀧𑀦𑁆𑀢𑀸 𑀫𑀫 𑀥𑀫𑁆𑀫𑀓𑀼𑀦𑁆𑀢𑀁

𑀘𑀭𑀸𑀣 𑀮𑁄𑀓𑁂𑀲𑀼 𑀲𑀤𑁂𑀯𑀓𑁂𑀲𑀼;

𑁫𑁦𑁦.

𑀲𑀼𑀲𑀚𑁆𑀚𑀺𑀢𑀢𑁆𑀢𑀁 𑀅𑀫𑀢𑀲𑁆𑀲 𑀫𑀕𑁆𑀕𑀁

𑀲𑀓𑀡𑁆𑀝𑀓𑀢𑁆𑀢𑀁 𑀦𑀭𑀓𑀸𑀬𑀦𑀲𑁆𑀲,

𑀫𑀸𑀭𑀸𑀦𑀦𑀲𑁆𑀫𑀺𑀁 𑀫𑀲𑀺𑀫𑀓𑁆𑀔𑀺𑀢𑀢𑁆𑀢𑀁

𑀓𑀣𑁂𑀣 𑀮𑁄𑀓𑀲𑁆𑀲 𑀲𑀤𑁂𑀯𑀓𑀲𑁆𑀲;

𑁫𑁦𑁧.

𑀩𑀼𑀤𑁆𑀥𑀦𑁆𑀢𑀭𑀁 𑀲𑀼𑀧𑁆𑀧𑀺𑀳𑀺𑀢𑀁 𑀅𑀘𑀸𑀭𑀁

𑀧𑀼𑀭𑀲𑁆𑀲 𑀫𑁄𑀓𑁆𑀔𑀲𑁆𑀲 𑀯𑀺𑀲𑀸𑀮𑀤𑁆𑀯𑀸𑀭𑀁,

𑀅𑀯𑀸𑀧𑀼𑀭𑀻 𑀦𑁄 𑀪𑀕𑀯𑀸’𑀥𑀼𑀦𑀸 𑀪𑁄

𑀬𑀣𑀚𑁆𑀚 𑀲𑀩𑁆𑀩𑁂𑀢𑀻 𑀦𑀺𑀯𑁂𑀤𑀬𑀯𑁆𑀳𑁄;

𑁫𑁦𑁨.

𑀉𑀧𑁆𑀧𑀦𑁆𑀦𑀪𑀸𑀯𑀁 𑀪𑀼𑀯𑀦𑁂 𑀫𑀫𑀚𑁆𑀚

𑀢𑀣𑁂𑀯 𑀥𑀫𑁆𑀫𑀲𑁆𑀲 𑀘 𑀧𑀸𑀢𑀼𑀪𑀸𑀯𑀁,

𑀉𑀧𑁆𑀧𑀦𑁆𑀦𑀪𑀸𑀯𑀜𑁆𑀘 𑀫𑀫𑁄𑀭𑀲𑀸𑀦𑀁

𑀧𑀓𑀸𑀲𑀬𑀦𑁆𑀢𑀸 𑀚𑀕𑀢𑀺𑀁 𑀘𑀭𑀸𑀣;

𑁫𑁦𑁩.

𑀯𑀦𑀫𑁆𑀳𑀺 𑀧𑀦𑁆𑀢𑁂 𑀕𑀺𑀭𑀺𑀕𑀩𑁆𑀪𑀭𑀸𑀬𑀁

𑀭𑀼𑀓𑁆𑀔𑀲𑁆𑀲 𑀫𑀽𑀮𑁂’𑀧𑀺 𑀘 𑀲𑀼𑀜𑁆𑀜𑀸’𑀕𑀸𑀭𑁂,

𑀯𑀲𑀁 𑀬𑀢𑀢𑁆𑀢𑀸 𑀫𑀫 𑀥𑀫𑁆𑀫𑀫𑀕𑁆𑀕𑀁

𑀤𑁂𑀲𑁂𑀣 𑀮𑁄𑀓𑁂 𑀲𑀦𑀭𑀸𑀫𑀭𑀸𑀦𑀁;

𑁫𑁦𑁪.

𑀯𑀢𑁆𑀯𑀸𑀦 𑀏𑀯𑀁 𑀬𑀢𑀬𑁄 𑀤𑀺𑀲𑀸𑀲𑀼

𑀧𑁂𑀲𑁂𑀢𑁆𑀯 𑀦𑀸𑀣𑁄 𑀉𑀭𑀼𑀯𑁂𑀮𑀕𑀸𑀫𑀻,

𑀧𑀝𑀺𑀧𑀚𑁆𑀚𑀺 𑀫𑀕𑁆𑀕𑀁 𑀅𑀣 𑀅𑀦𑁆𑀢𑀭𑀸𑀮𑁂

𑀓𑀧𑁆𑀧𑀸𑀲𑀺𑀓𑀯𑁆𑀳𑀁 𑀯𑀺𑀧𑀺𑀦𑀁 𑀧𑀯𑀺𑀲𑁆𑀲;

𑁫𑁦𑁫. ¶

𑀢𑀲𑁆𑀫𑀺𑀁 𑀭𑀫𑀦𑁆𑀢𑁂 𑀲𑀫𑀢𑀺𑀁𑀲𑀫𑀢𑁆𑀢𑁂

𑀭𑀸𑀚𑁄𑀭𑀲𑁂 𑀲𑁄 𑀧𑀯𑀭𑁄 𑀯𑀺𑀦𑁂𑀢𑁆𑀯𑀸,

𑀤𑀢𑁆𑀯𑀸’𑀫𑀢𑀁 𑀥𑀫𑁆𑀫𑀫𑀣𑀼𑀤𑁆𑀤𑀺𑀲𑀺𑀢𑁆𑀯𑀸

𑀅𑀕𑁄𑀭𑀼𑀯𑁂𑀮𑀁 𑀕𑀚𑀭𑀸𑀚𑀕𑀸𑀫𑀻;

𑁫𑁦𑁬.

𑀢𑀢𑁆𑀣𑁄𑀭𑀼𑀯𑁂𑀮𑀸𑀥𑀺𑀓𑀓𑀲𑁆𑀲𑀧𑁄𑀢𑀺

𑀧𑀲𑀺𑀤𑁆𑀥𑀦𑀸𑀫𑀲𑁆𑀲 𑀲𑀲𑀺𑀲𑁆𑀲𑀓𑀲𑁆𑀲,

𑀅𑀕𑁆𑀕𑀁 𑀨𑀮𑀁 𑀲𑁄 𑀧𑀭𑀺𑀧𑀸𑀯𑀬𑀦𑁆𑀢𑁄

𑀯𑀲𑀻 𑀯𑀲𑀦𑁆𑀢𑁂 𑀯𑀲𑀻𑀦𑀁 𑀯𑀭𑀺𑀝𑁆𑀞𑁄;

𑁫𑁦𑁭.

𑀢𑀤𑀸𑀳𑀭𑀼𑀁 𑀦𑁂𑀕𑀫 𑀦𑀸𑀕𑀭𑀸 𑀘

𑀬𑀜𑁆𑀜𑀁 𑀫𑀳𑀸𑀓𑀲𑁆𑀲𑀧 𑀢𑀸𑀧𑀲𑀲𑁆𑀲,

𑀚𑀺𑀦𑁄 𑀯𑀺𑀤𑀺𑀢𑁆𑀯𑀸𑀲𑁆𑀲 𑀫𑀦𑀁 𑀫𑀦𑁂𑀦

𑀯𑀲𑀻 𑀯𑀺𑀲𑀼𑀁 𑀢𑀲𑁆𑀲 𑀧𑀲𑀸𑀤 𑀳𑁂𑀢𑀼;

𑀓𑀣𑀁?

𑁫𑁦𑁮.

𑀕𑀦𑁆𑀢𑁆𑀯𑀸𑀦 𑀉𑀢𑁆𑀢𑀭𑀓𑀼𑀭𑀼𑀁 𑀪𑀕𑀯𑀸 𑀢𑀤𑀸𑀦𑀺

𑀧𑀺𑀡𑁆𑀟𑀜𑁆𑀘𑀭𑀺𑀢𑁆𑀯 𑀭𑀫𑀡𑀻𑀬 𑀳𑀺𑀫𑀸𑀮𑀬𑀤𑁆𑀤𑀺𑀁,

𑀆𑀕𑀫𑁆𑀫 𑀲𑀸𑀤𑀼𑀭𑀲 𑀦𑀻𑀭 𑀪𑀭𑀸𑀪𑀺𑀭𑀸𑀫𑁂

’𑀦𑁄𑀢𑀢𑁆𑀢𑀓𑁂 𑀫𑀼𑀦𑀺𑀯𑀭𑁄 𑀧𑀭𑀺𑀪𑀼𑀜𑁆𑀚𑀺𑀬𑀸𑀦;

𑁫𑁦𑁯.

𑀘𑀺𑀦𑁆𑀢𑁂𑀲𑀺 𑀏𑀯𑀫𑀳𑀫𑀧𑁆𑀧𑀢𑀭𑀁𑀯 𑀓𑀸𑀮𑀁

𑀞𑀲𑁆𑀲𑀸𑀫𑀺 𑀲𑀸𑀲𑀦 𑀫𑀫𑀜𑁆𑀳𑀺 𑀅𑀦𑀸𑀕𑀢𑁂𑀲𑀼,

𑀮𑀗𑁆𑀓𑀸𑀢𑀮𑁂 𑀪𑀯𑀢𑀺 𑀢𑀢𑁆𑀣 𑀇𑀤𑀸𑀦𑀺 𑀬𑀓𑁆𑀔

𑀲𑀫𑁆𑀩𑀸𑀥𑀫𑀢𑁆𑀣𑀺 𑀫𑀫 𑀢𑀢𑁆𑀣 𑀕𑀢𑁂𑀲𑀼’𑀤𑀸𑀦𑀺;

𑁫𑁧𑁦.

𑀲𑀩𑁆𑀩𑀸’𑀫𑀦𑀼𑀲𑁆𑀲𑀚 𑀪𑀬𑀁 𑀧𑀯𑀺𑀦𑀲𑁆𑀲𑀢𑀻’𑀢𑀺

𑀫𑀦𑁆𑀢𑁆𑀯𑀸 𑀢𑀢𑁄 𑀬𑀢𑀺𑀯𑀭𑁄 𑀓𑀭𑀼𑀡𑀸𑀬 𑀲𑀢𑁆𑀢𑁂,

𑀲𑀜𑁆𑀛𑀸𑀖𑀦𑁂𑀳𑀺 𑀧𑀭𑀺𑀦𑀤𑁆𑀥 𑀭𑀯𑀻𑀯 𑀭𑀢𑁆𑀢

𑀦𑀺𑀕𑁆𑀭𑁄𑀥𑀧𑀓𑁆𑀓 𑀲𑀤𑀺𑀲𑀁 𑀘𑀭𑀧𑀁𑀲𑀼𑀓𑀽𑀮𑀁;

𑁫𑁧𑁧.

𑀥𑀸𑀭𑁂𑀢𑁆𑀯 𑀲𑁂𑀮𑀫𑀬 𑀲𑀼𑀦𑁆𑀤𑀭 𑀧𑀢𑁆𑀢𑀳𑀢𑁆𑀣𑁄

𑀙𑀩𑁆𑀩𑀡𑁆𑀡𑀭𑀁𑀲𑀺 𑀦𑀺𑀯𑀳𑀁 𑀤𑀺𑀲𑀺 𑀧𑀽𑀭𑀬𑀦𑁆𑀢𑁄,

𑀲𑀫𑁆𑀩𑁄𑀥𑀺𑀢𑁄 𑀦𑀯𑀫 𑀨𑀼𑀲𑁆𑀲𑀚 𑀧𑀼𑀡𑁆𑀡𑀫𑀸𑀬𑀁

𑀮𑀗𑁆𑀓𑀸𑀢𑀮𑀁 𑀯𑀺𑀚𑀬𑀺𑀢𑀼𑀁 𑀦𑀪𑀲𑀸’𑀕𑀫𑀸𑀲𑀺;

𑁫𑁧𑁨. ¶

𑀩𑁆𑀭𑀳𑁆𑀫𑀸𑀲𑀼𑀭𑀸𑀫𑀭 𑀨𑀡𑀺 𑀕𑀭𑀼𑀴𑀸 𑀘 𑀲𑀺𑀤𑁆𑀥

𑀯𑀺𑀚𑁆𑀚𑀸𑀥𑀭𑀸𑀤𑀺 𑀚𑀦𑀢𑀸 𑀲𑀳𑀧𑀸𑀭𑀺𑀲𑀚𑁆𑀚𑀸,

𑀓𑁂𑀢𑀸’𑀢𑀧𑀢𑁆𑀢 𑀖𑀝 𑀤𑀻𑀧𑀼𑀭𑀼 𑀢𑁄𑀭𑀡𑁂𑀳𑀺

𑀧𑀽𑀚𑀁 𑀅𑀓𑀁𑀲𑀼 𑀫𑀳𑀢𑀺𑀁 𑀕𑀕𑀦𑀸𑀬𑀦𑀫𑁆𑀳𑀺;

𑁫𑁧𑁩.

𑀮𑀗𑁆𑀓𑀗𑁆𑀕𑀦𑀸 𑀉𑀭𑀲𑀺 𑀪𑀸𑀲𑀼𑀭 𑀢𑀸𑀭 𑀳𑀸𑀭

𑀲𑀗𑁆𑀓𑀸𑀲 𑀲𑀻𑀢𑀮 𑀫𑀦𑁄𑀳𑀭 𑀦𑀻𑀭 𑀧𑀽𑀭𑀸,

𑀢𑀲𑁆𑀫𑀺𑀁 𑀫𑀳𑀸𑀤𑀺𑀧𑀤 𑀯𑀸𑀮𑀼𑀓 𑀦𑀸𑀫 𑀕𑀗𑁆𑀕𑀸

𑀪𑀼𑀫𑀚𑁆𑀛𑀕𑀸𑀲𑀺 𑀚𑀦 𑀦𑁂𑀢𑁆𑀢 𑀳𑀭𑀸𑀪𑀺𑀭𑀸𑀫𑀸;

𑁫𑁧𑁪.

𑀢𑀲𑁆𑀲𑀸𑀯𑀺𑀤𑀽𑀭 𑀲𑀼𑀘𑀺 𑀭𑀫𑁆𑀫𑀢𑀭𑁂 𑀧𑀤𑁂𑀲𑁂

𑀆𑀬𑀸𑀫𑀢𑁄 𑀫𑀺𑀢𑀢𑀺𑀬𑁄𑀚𑀦 𑀯𑀺𑀢𑁆𑀣𑀢𑁂𑀦,

𑀘𑀢𑁆𑀢𑀸𑀭𑀺 𑀕𑀸𑀯𑀼𑀢𑀫𑀺𑀢𑀁 𑀦𑀬𑀦𑀸𑀪𑀺𑀭𑀸𑀫𑀁

𑀆𑀲𑀸𑀭 𑀲𑀻𑀢𑀚𑀮 𑀦𑀺𑀚𑁆𑀛𑀭 𑀪𑀼𑀭𑀺𑀖𑁄𑀲𑀁;

𑁫𑁧𑁫.

𑀫𑀢𑁆𑀢𑀸𑀮𑀺𑀧𑀸𑀮𑀺 𑀔𑀕 𑀕𑀻𑀢𑀺𑀚 𑀫𑀺𑀲𑁆𑀲𑀭𑀸𑀕𑀁

𑀲𑀫𑁆𑀫𑀢𑁆𑀢 𑀘𑀺𑀢𑁆𑀢 𑀫𑀺𑀕𑀲𑀗𑁆𑀖 𑀦𑀺𑀲𑁂𑀯𑀺𑀢𑀁 𑀢𑀁,

𑀦𑀘𑁆𑀘𑀦𑁆𑀢 𑀦𑁂𑀓𑀲𑀺𑀔𑀺 𑀲𑀗𑁆𑀕𑀢 𑀧𑀸𑀤𑀧𑀺𑀡𑁆𑀟𑀁

𑀉𑀬𑁆𑀬𑀸𑀦𑀫𑀸𑀲𑀺 𑀉𑀭𑀼𑀦𑀸𑀕𑀯𑀦𑀸𑀪𑀺𑀥𑀸𑀦𑀁;

𑁫𑁧𑁬.

𑀭𑀫𑁆𑀫𑁂 𑀢𑀤𑀸 𑀭𑀢𑀦𑀤𑀻𑀧𑀯𑀭𑀫𑁆𑀳𑀺 𑀮𑀗𑁆𑀓𑀸

𑀮𑁄𑀓𑀸𑀪𑀺𑀥𑀸𑀦 𑀳𑀭𑀺𑀓𑀡𑁆𑀟𑀓 𑀬𑀓𑁆𑀔𑀤𑀸𑀲𑁂,

𑀑𑀤𑀼𑀫𑁆𑀩𑀭𑁂 𑀲𑀼𑀫𑀦𑀓𑀽𑀝𑀓 𑀢𑀡𑁆𑀟𑀼𑀮𑁂𑀬𑁆𑀬𑁂

𑀲𑁂𑀮𑁂𑀲𑀼 𑀫𑀸𑀭𑀕𑀺𑀭𑀺 𑀫𑀺𑀲𑁆𑀲𑀓𑀭𑀺𑀝𑁆𑀞𑀦𑀸𑀫𑁂;

𑁫𑁧𑁭.

𑀬𑁂’𑀜𑁆𑀜𑁂𑀧𑀺 𑀲𑀦𑁆𑀢𑀺 𑀕𑀺𑀭𑀬𑁄 𑀯𑀦𑀭𑀸𑀫𑀡𑁂𑀬𑁆𑀬𑀸

𑀕𑀗𑁆𑀕𑀸 𑀦𑀤𑀻 𑀕𑀺𑀭𑀺𑀕𑀼𑀳𑀸 𑀲𑀺𑀓𑀢𑀸𑀢𑀮𑀸 𑀘,

𑀢𑀢𑁆𑀣𑀸𑀯𑀲𑀦𑁆𑀢𑀺 𑀭𑀳𑀲𑀸 𑀨𑀭𑀼𑀲𑀸𑀦𑀺𑀭𑀼𑀤𑁆𑀤𑀸

𑀧𑀸𑀡𑀸𑀢𑀺𑀧𑀸𑀢 𑀦𑀺𑀭𑀢𑀸 𑀲𑀞𑀓𑀽𑀝 𑀬𑀓𑁆𑀔𑀸;

𑁫𑁧𑁮.

𑀲𑀗𑁆𑀕𑀫𑁆𑀫 𑀢𑁂 𑀫𑀳𑀢𑀺 𑀦𑀸𑀕𑀯𑀦𑀫𑁆𑀳𑀺 𑀢𑀫𑁆𑀳𑀺

𑀲𑀫𑁆𑀫𑀦𑁆𑀢𑀬𑀺𑀁𑀲𑀼 𑀲𑀪𑀝𑀸 𑀲𑀳 𑀧𑀸𑀭𑀺𑀲𑀚𑁆𑀚𑀸,

𑀢𑁆𑀯𑀁 𑀓𑁄’𑀲𑀺 𑀭𑁂! 𑀇𑀢𑀺 𑀧𑀭𑁄 𑀅𑀧𑀭𑀁 𑀔𑀭𑁂𑀦

𑀢𑀺𑀓𑁆𑀔𑁂𑀦 𑀯𑀸𑀤𑀓𑀡𑀬𑁂𑀦 𑀅𑀭𑀼𑀦𑁆𑀢𑀼𑀤𑀦𑁆𑀢𑀸;

𑁫𑁧𑁯. ¶

𑀓𑀼𑀚𑁆𑀛𑀺𑀁𑀲𑀼 𑀢𑁂 𑀅𑀣𑀺𑀢𑀭𑀻𑀢𑀭 𑀓𑀸𑀭𑀡𑁂𑀦

𑀯𑀸𑀓𑁆𑀬𑁂𑀦 𑀬𑀼𑀤𑁆𑀥 𑀧𑀭𑀺𑀭𑀤𑁆𑀥 𑀧𑀕𑀩𑁆𑀪𑀺𑀢𑀢𑁆𑀢𑀸,

𑀲𑀗𑁆𑀔𑀸𑀪𑀺𑀢𑀸𑀧𑀕 𑀧𑀢𑀻𑀯’𑀦𑀯𑀝𑁆𑀞𑀘𑀺𑀢𑁆𑀢𑀸

𑀲𑀸𑀭𑀫𑁆𑀪𑀕𑀩𑁆𑀩𑀺𑀢𑀫𑀦𑀸 𑀧𑀭𑀺𑀭𑀸𑀯𑀬𑀦𑁆𑀢𑀺;

𑁫𑁨𑁦.

𑀢𑀲𑁆𑀫𑀺𑀁 𑀔𑀡𑁂’𑀪𑀺𑀫𑀢𑀤𑁄 𑀲𑀼𑀕𑀢𑁄 𑀦𑀪𑀫𑁆𑀳𑀺

𑀆𑀕𑀫𑁆𑀫 𑀢𑁂𑀲’𑀫𑀦𑀼𑀓𑀫𑁆𑀧𑀺𑀢 𑀫𑀸𑀦𑀲𑁂𑀦,

𑀕𑁄𑀧𑀸𑀦𑀲𑀻 𑀲𑀫 𑀫𑀦𑁄𑀳𑀭 𑀭𑀁𑀲𑀺𑀫𑀸𑀮𑀺

𑀢𑀢𑁆𑀣𑀘𑁆𑀙𑀺 𑀔𑁂 𑀕𑀼𑀡𑀫𑀡𑀻 𑀫𑀡𑀺𑀓𑀡𑁆𑀡𑀺𑀓𑀸𑀯;

𑁫𑁨𑁧.

𑀢𑁂𑀲𑀁 𑀚𑀺𑀦𑁄 𑀓𑀮𑀳𑀯𑀽𑀧𑀲𑀫𑀸𑀬 𑀳𑁂𑀢𑀼

𑀫𑀸𑀧𑁂𑀲𑀺 𑀯𑀼𑀝𑁆𑀞𑀺 𑀢𑀺𑀫𑀺𑀭𑀸’𑀦𑀺𑀮𑀲𑀻𑀢𑀪𑀻𑀢𑀺𑀁,

𑀢𑀢𑁆𑀣𑀸𑀲𑀺 𑀕𑀚𑁆𑀚𑀺𑀢𑀖𑀦𑁄 𑀲𑀼𑀭𑀘𑀸𑀧𑀔𑀺𑀢𑁆𑀢

𑀥𑀸𑀭𑀸𑀲𑀭𑁂𑀳𑀺 𑀯𑀺𑀢𑀼𑀤𑀁 𑀦𑀺𑀲𑀺𑀯𑀸𑀭 𑀲𑀗𑁆𑀖𑀁;

𑁫𑁨𑁨.

𑀅𑀦𑁆𑀥𑀸𑀯 𑀢𑁂 𑀖𑀦𑀢𑀭𑁂 𑀢𑀺𑀫𑀺𑀭𑁂 𑀦𑀺𑀫𑀼𑀕𑁆𑀕𑀸

𑀫𑀼𑀴𑁆𑀳𑀸 𑀤𑀺𑀲𑀜𑁆𑀘 𑀯𑀺𑀤𑀺𑀲𑀁 𑀦 𑀯𑀺𑀤𑀺𑀁𑀲𑀼 𑀪𑀻𑀢𑀸,

𑀘𑀡𑁆𑀟𑀸𑀦𑀺𑀮𑀼𑀤𑁆𑀥𑀝 𑀫𑀳𑀸 𑀕𑀺𑀭𑀺𑀓𑀽𑀝𑀭𑀼𑀓𑁆𑀔

𑀲𑀫𑁆𑀧𑀸𑀢 𑀪𑀻𑀢 𑀭𑀼𑀤𑀺𑀢𑀸 𑀕𑀢𑀺𑀫𑁂𑀲𑀬𑀦𑁆𑀢𑀺;

𑁫𑁨𑁩.

𑀲𑀻𑀢𑁂𑀦 𑀢𑁂 𑀅𑀣 𑀤𑀺𑀚𑁂 𑀧𑀭𑀺𑀓𑁄𑀝𑀬𑀦𑁆𑀢𑀸

𑀅𑀜𑁆𑀜𑁄𑀜𑁆𑀜𑀕𑀢𑁆𑀢𑀫𑀯𑀮𑀫𑁆𑀩 𑀧𑀭𑁄𑀤𑀬𑀺𑀁𑀲𑀼,

𑀭𑀽𑀧𑀸𑀦𑀺 𑀦𑁂𑀓𑀪𑀬𑀤𑀸𑀦𑀺 𑀘 𑀖𑁄𑀲𑀡𑀸𑀦𑀺

𑀯𑀢𑁆𑀢𑀺𑀁𑀲𑀼 𑀢𑁂𑀦 𑀯𑀺𑀯𑀺𑀥𑀁 𑀪𑀬𑀫𑀸𑀲𑀺 𑀢𑁂𑀲𑀁;

𑁫𑁨𑁪.

𑀩𑀼𑀤𑁆𑀥𑀸𑀧𑀺 𑀤𑀼𑀓𑁆𑀔𑀺𑀢𑀫𑀦𑀸 𑀧𑀭𑀤𑀼𑀓𑁆𑀔𑀓𑁂𑀦

𑀓𑀲𑁆𑀫𑀸 𑀓𑀭𑁄𑀦𑁆𑀢𑀺 𑀅𑀦𑀬𑀁’𑀢𑀺 𑀦 𑀘𑀺𑀦𑁆𑀢𑀦𑀻𑀬𑀁,

𑀮𑁄𑀓𑁄 𑀳𑀦𑀸𑀢𑀺 𑀯𑀺𑀝𑀧𑀺 𑀨𑀮𑀤𑀸𑀦 𑀳𑁂𑀢𑀼

𑀲𑀢𑁆𑀣𑁂𑀦 𑀲𑁄𑀫 𑀭𑀺𑀧𑀼𑀕𑀸𑀳𑀓 𑀯𑀸𑀲𑀭𑀫𑁆𑀳𑀺;

𑁫𑁨𑁫.

𑀲𑀢𑁆𑀣𑀸 𑀢𑀢𑁄 𑀢𑀫𑀦𑀼𑀤𑁄 𑀲𑀪𑀬𑁂 𑀲𑀲𑁄𑀓𑁂

𑀤𑀺𑀲𑁆𑀯𑀸𑀦 𑀕𑀼𑀬𑁆𑀳𑀓 𑀚𑀦𑁂 𑀓𑀭𑀼𑀡𑀸𑀬𑀺𑀢𑀢𑁆𑀢𑁄,

𑀯𑀼𑀝𑁆𑀞𑀺𑀁 𑀢𑀫𑀜𑁆𑀘 𑀧𑀯𑀦𑀁 𑀧𑀡𑀼𑀤𑀺𑀢𑁆𑀯 𑀲𑀩𑁆𑀩𑀁

𑀤𑀲𑁆𑀲𑁂𑀲𑀺 𑀅𑀢𑁆𑀢𑀫𑀔𑀺𑀮𑀁 𑀤𑀼𑀫𑀡𑀻𑀯 𑀔𑀫𑁆𑀳𑀺;

𑁫𑁨𑁬. ¶

𑀤𑀺𑀲𑁆𑀯𑀸𑀦 𑀢𑁂 𑀫𑀼𑀦𑀺𑀯𑀭’𑀜𑁆𑀚𑀮𑀺 𑀧𑀗𑁆𑀓𑀚𑁂𑀳𑀺

𑀲𑀚𑁆𑀚𑁂𑀢𑁆𑀯 𑀲𑀻𑀲 𑀲𑀭𑀲𑀻 𑀇𑀤𑀫’𑀩𑁆𑀭𑀼𑀯𑀺𑀁𑀲𑀼,

𑀬𑀸𑀘𑀸𑀫 𑀦𑁄’𑀪𑀬𑀧𑀤𑀁 𑀪𑀯𑀢𑁄 𑀲𑀓𑀸𑀲𑀸

𑀤𑀸𑀲𑁂𑀲𑀼 𑀥𑀻𑀭 𑀓𑀭𑀼𑀡𑀁 𑀓𑀭𑀡𑀻𑀬𑀫𑁂𑀯;

𑁫𑁨𑁭.

𑀏𑀯𑀁 𑀢𑀤𑀸’𑀯𑀘 𑀚𑀺𑀦𑁄 𑀫𑀥𑀼𑀭𑀲𑁆𑀲𑀭𑁂𑀦

𑀆𑀫𑀦𑁆𑀢 𑀢𑁂 𑀦𑀺𑀲𑀺𑀘𑀭𑁂’𑀯𑀦𑀢𑁂 𑀲𑀫𑁂𑀓𑁆𑀔,

𑀢𑀼𑀫𑁆𑀳𑁂 𑀤𑀤𑀸𑀣 𑀬𑀤𑀺 𑀞𑀸𑀦𑀫𑀫𑁂𑀓𑀤𑁂𑀲𑀁

𑀲𑀩𑁆𑀩𑁂 𑀅𑀧𑁂𑀦𑁆𑀢𑀻 𑀖𑀦𑀯𑀸𑀢𑀚 𑀲𑀻𑀢𑀤𑀼𑀓𑁆𑀔𑀸;

𑁫𑁨𑁮.

𑀬𑀚𑁆𑀚𑁂𑀯𑀫𑀻𑀢𑀺𑀫’𑀧𑀬𑀸𑀢𑀺 𑀓𑀭𑁄𑀫 𑀪𑁄 𑀢𑀁

𑀕𑀡𑁆𑀳𑀸𑀳𑀺 𑀥𑀻𑀭 𑀬𑀤𑀺 𑀇𑀘𑁆𑀙𑀲𑀺 𑀲𑀩𑁆𑀩𑀤𑀻𑀧𑀁,

𑀯𑀢𑁆𑀯𑀸𑀦 𑀢𑁂𑀳𑀺 𑀧𑀭𑀺𑀤𑀺𑀦𑁆𑀦 𑀙𑀫𑀸𑀬 𑀫𑀕𑁆𑀕𑁄

𑀑𑀕𑀫𑁆𑀫 𑀢𑀢𑁆𑀣 𑀧𑀼𑀣𑀼 𑀧𑀢𑁆𑀣𑀭𑀺 𑀘𑀫𑁆𑀫 𑀓𑀡𑁆𑀟𑀁;

𑁫𑁨𑁯.

𑀢𑀲𑁆𑀫𑀺𑀁 𑀦𑀺𑀲𑀚𑁆𑀚 𑀓𑀲𑀺𑀡𑀁 𑀲𑀫𑀸𑀧𑀚𑁆𑀚 𑀢𑁂𑀚𑁄

𑀚𑀸𑀮𑀸𑀓𑀼𑀮𑀁 𑀚𑀮𑀺𑀢 𑀫𑀕𑁆𑀕𑀻𑀫𑀫𑀸𑀧𑀬𑀻 𑀲𑁄,

𑀲𑁄 𑀥𑀽𑀫𑀓𑁂𑀢𑀼 𑀕𑀕𑀦𑀼𑀕𑁆𑀕𑀢 𑀢𑀼𑀗𑁆𑀕𑀲𑀺𑀗𑁆𑀕𑁄

𑀲𑀦𑁆𑀤𑀟𑁆𑀠𑀬𑀁 𑀕𑀺𑀭𑀺𑀯𑀦𑀸𑀦𑀼’𑀭𑀼𑀖𑁄𑀲𑀬𑀦𑁆𑀢𑁄;

𑁫𑁩𑁦.

𑀭𑀼𑀓𑁆𑀔𑁂𑀳𑀺 𑀭𑀼𑀓𑁆𑀔𑀯𑀦 𑀧𑀩𑁆𑀩𑀢 𑀮𑀗𑁆𑀖𑀦𑁂𑀦

𑀲𑀸𑀔𑀸𑀫𑀺𑀕𑁂 𑀘 𑀯𑀺𑀳𑀕𑁂 𑀅𑀦𑀼𑀩𑀦𑁆𑀥𑀬𑀁’𑀯,

𑀯𑁂𑀲𑁆𑀲𑀸𑀦𑀭𑁄 𑀯𑀦𑀫𑀭𑀽 𑀫𑀺𑀕𑀲𑀽𑀓𑀭𑁂’𑀧𑀺

𑀲𑀦𑁆𑀥𑀸𑀯𑀺 𑀕𑀼𑀬𑁆𑀳𑀓 𑀚𑀦𑁂 𑀇𑀢𑀺 𑀘𑀺𑀦𑁆𑀢𑀬𑀦𑁆𑀢𑁄;

𑁫𑁩𑁧.

𑀤𑀺𑀲𑁆𑀯𑀸𑀦 𑀢𑀢𑁆𑀣 𑀧𑀘𑀼𑀭𑀸𑀢𑀦 𑀯𑀺𑀧𑁆𑀨𑀼𑀮𑀺𑀗𑁆𑀕

𑀲𑀫𑁆𑀫𑀺𑀲𑁆𑀲 𑀚𑀸𑀮 𑀤𑀳𑀦𑀁 𑀕𑀼𑀳𑀓𑀸 𑀲𑀫𑁂𑀘𑁆𑀘,

𑀥𑀸𑀯𑀼𑀁 𑀯𑀺𑀓𑀺𑀡𑁆𑀡𑀓𑀘 𑀩𑀧𑁆𑀧𑀚𑀮’𑀤𑁆𑀤𑀦𑁂𑀢𑁆𑀢𑀸

𑀤𑀸𑀭𑀢𑁆𑀢𑀚𑁂𑀳𑀺 𑀲𑀳𑀺𑀢𑀸 𑀕𑀢𑀺𑀫𑁂𑀲𑀫𑀸𑀦𑀸;

𑁫𑁩𑁨.

𑀲𑀫𑁆𑀩𑀼𑀤𑁆𑀥𑀢𑁂𑀚 𑀧𑀭𑀺𑀤𑀟𑁆𑀠 𑀲𑀭𑀻𑀭𑀘𑀺𑀢𑁆𑀢𑀸

𑀆𑀳𑀘𑁆𑀘 𑀲𑀸𑀕𑀭𑀢𑀝𑀁 𑀧𑀭𑀺𑀥𑀸𑀯𑀫𑀸𑀦𑀸,

𑀢𑀲𑁆𑀫𑀺𑀫𑁆𑀧𑀺 𑀢𑁂 𑀧𑀯𑀺𑀲𑀺𑀢𑀼𑀁 𑀲𑀭𑀡𑀁 𑀦 𑀮𑀤𑁆𑀥𑀸

𑀙𑀫𑁆𑀳𑀺 𑀢𑀢𑁄 𑀲𑀧𑀤𑀺 𑀲𑀦𑁆𑀦𑀺𑀧𑀢𑀺𑀁𑀲𑀼 𑀲𑀩𑁆𑀩𑁂;

𑁫𑁩𑁩. ¶

𑀤𑀺𑀲𑁆𑀯𑀸𑀦 𑀢𑁂 𑀫𑀼𑀦𑀺𑀯𑀭𑁄 𑀲𑀳𑀬𑁂 𑀲𑀲𑁄𑀓𑁂

𑀭𑀫𑁆𑀫𑀁 𑀢𑀤𑀸 𑀚𑀮𑀥𑀺𑀫𑀚𑁆𑀛𑀕𑀢𑀁 𑀫𑀳𑀦𑁆𑀢𑀁,

𑀇𑀤𑁆𑀥𑀻𑀳𑀺 𑀲𑁂𑀳𑀺 𑀕𑀺𑀭𑀺𑀤𑀻𑀧𑀫𑀺’𑀥𑀸𑀦𑀬𑀺𑀢𑁆𑀯𑀸

𑀆𑀭𑁄𑀧𑀬𑀺𑀢𑁆𑀯 𑀦𑀺𑀔𑀺𑀮𑁂 𑀧𑀼𑀦 𑀢𑀢𑁆𑀣’𑀓𑀸𑀲𑀺;

𑁫𑁩𑁪.

𑀓𑀢𑁆𑀯𑁂𑀯𑀫𑁂’𑀲𑀫𑀲𑀫𑁄’𑀧𑀲𑀫𑀦𑁆𑀢’𑀫𑀻𑀢𑀺𑀁

𑀢𑀢𑁆𑀣𑁂𑀯 𑀪𑀸𑀲𑀼𑀭𑀢𑀭𑁄 𑀪𑀕𑀯𑀸 𑀦𑀺𑀲𑀻𑀤𑀺,

𑀩𑁆𑀭𑀳𑁆𑀫𑀸𑀫𑀭𑀸’𑀲𑀼𑀭𑀨𑀡𑀻 𑀕𑀭𑀼𑀴𑀸𑀤𑀺 𑀲𑀺𑀤𑁆𑀥𑀸

𑀲𑀗𑁆𑀕𑀫𑁆𑀫’𑀓𑀁𑀲𑀼 𑀫𑀳𑀢𑀺𑀁 𑀫𑀳𑀫’𑀕𑁆𑀕𑀭𑀽𑀧𑀁;

𑁫𑁩𑁫.

𑀤𑁂𑀲𑁂𑀲𑀺 𑀲𑀁𑀲𑀤𑀺 𑀚𑀺𑀦𑁄 𑀲𑀼𑀢𑀺𑀲𑀸𑀥𑀼 𑀥𑀫𑁆𑀫𑀁

𑀢𑀲𑁆𑀫𑀺𑀁 𑀲𑀤𑀸𑀲𑀯𑀦𑀼𑀤𑀁 𑀲𑀺𑀯𑀤𑀁 𑀚𑀦𑀸𑀦𑀁,

𑀲𑀼𑀢𑁆𑀯𑀸𑀦 𑀦𑁂𑀓𑀲𑀢𑀓𑁄𑀝𑀺 𑀧𑀫𑀸𑀡 𑀧𑀸𑀡𑀸

𑀮𑀤𑁆𑀥𑀸 𑀢𑀤𑀸 𑀲𑀫𑀪𑀯𑀼𑀁 𑀘𑀭𑀥𑀫𑁆𑀫𑀘𑀓𑁆𑀔𑀼𑀁;

𑁫𑁩𑁬.

𑀢𑀲𑁆𑀫𑀺𑀁 𑀤𑀺𑀦𑁂 𑀲𑀼𑀫𑀦𑀓𑀽𑀝 𑀯𑀭𑀸𑀥𑀺𑀯𑀸𑀲𑁄

𑀢𑁂𑀚𑀺𑀤𑁆𑀥𑀺𑀩𑀼𑀤𑁆𑀥𑀺𑀯𑀺𑀪𑀯𑁄 𑀲𑀼𑀫𑀦𑀸𑀪𑀺𑀥𑀸𑀦𑁄,

𑀤𑁂𑀯𑁄 𑀧𑀲𑀦𑁆𑀦𑀳𑀤𑀬𑁄 𑀭𑀢𑀦𑀢𑁆𑀢𑀬𑀫𑁆𑀳𑀺

𑀲𑀫𑁆𑀧𑀸𑀧𑀼𑀡𑀺𑀢𑁆𑀣 𑀧𑀞𑀫𑀁 𑀨𑀮𑀫𑀼𑀢𑁆𑀢𑀫𑀁 𑀲𑁄;

𑁫𑁩𑁭.

𑀉𑀝𑁆𑀞𑀸𑀬 𑀢𑀼𑀝𑁆𑀞𑀯𑀤𑀦𑁄 𑀓𑀢𑀧𑀜𑁆𑀚𑀮𑀻𑀓𑁄

𑀫𑀼𑀕𑁆𑀕𑁄 𑀚𑀺𑀦𑀕𑁆𑀕 𑀦𑀔𑀭𑀁𑀲𑀺 𑀧𑀬𑁄𑀤𑀥𑀺𑀫𑁆𑀳𑀺

𑀯𑀦𑁆𑀤𑀺𑀢𑁆𑀯 𑀏𑀯𑀫𑀯𑀘𑀸’𑀢𑀼𑀮 𑀯𑀻𑀭 𑀥𑀻𑀭

𑀮𑁄𑀓𑀕𑁆𑀕 𑀧𑀼𑀕𑁆𑀕𑀮 𑀯𑀭𑀁 𑀤𑀤 𑀲𑀸𑀫𑀺 𑀥𑀻𑀲;

𑁫𑁩𑁮.

𑀤𑀸𑀲𑁄𑀲𑁆𑀫𑀺 𑀢𑁂 𑀘𑀭𑀡 𑀧𑀗𑁆𑀓𑀚 𑀧𑀽𑀚𑀓𑁄𑀳𑀁

𑀲𑀤𑁆𑀥𑀸𑀤𑀬𑀸𑀤𑀺 𑀯𑀺𑀪𑀯𑁄 𑀢𑀦𑀬𑁄’𑀳𑀫𑀲𑁆𑀫𑀺,

𑀢𑀼𑀫𑁆𑀳𑁂 𑀯𑀺𑀦𑀸 𑀔𑀡𑀮𑀯𑀁 𑀯𑀲𑀺𑀢𑀼𑀁 𑀦 𑀇𑀘𑁆𑀙𑁂

𑀢𑀲𑁆𑀫𑀸 𑀤𑀤𑀸𑀢𑀼 𑀪𑀕𑀯𑀸 𑀫𑀫 𑀧𑀽𑀚𑀦𑀻𑀬𑀁;

𑁫𑁩𑁯.

𑀲𑀼𑀢𑁆𑀯𑀸𑀦 𑀢𑀁 𑀥𑀺𑀢𑀺𑀫𑀢𑀻 𑀧𑀭𑀺𑀫𑀚𑁆𑀚 𑀲𑀻𑀲𑀁

𑀲𑀁𑀲𑀢𑁆𑀢 𑀙𑀧𑁆𑀧𑀤 𑀲𑀭𑁄𑀭𑀼𑀳 𑀲𑀦𑁆𑀦𑀺𑀪𑁂𑀦,

𑀳𑀢𑁆𑀣𑁂𑀦 𑀦𑀻𑀮 𑀲𑀓 𑀓𑀼𑀦𑁆𑀢𑀮 𑀥𑀸𑀢𑀼𑀫𑀼𑀝𑁆𑀞𑀺𑀁

𑀤𑀚𑁆𑀚𑀸𑀣 𑀲𑁄 𑀫𑀡𑀺𑀫𑀬𑁂𑀦 𑀓𑀭𑀡𑁆𑀟𑀓𑁂𑀦;

𑁫𑁪𑁦. ¶

𑀧𑀕𑁆𑀕𑀬𑁆𑀳 𑀩𑀸𑀳𑀼𑀬𑀼𑀕𑀮𑁂𑀦 𑀞𑀻𑀢𑁄 𑀦𑀫𑀺𑀢𑁆𑀯𑀸

𑀫𑀼𑀤𑁆𑀥𑀸 𑀤𑀥𑀸𑀲𑀺 𑀫𑀓𑀼𑀝𑀁 𑀯𑀺𑀬 𑀧𑀻𑀡𑀺𑀢𑀢𑁆𑀢𑁄,

𑀓𑀢𑁆𑀯𑀸’𑀣 𑀲𑁄 𑀯𑀭 𑀫𑀳𑀁 𑀢𑀺𑀤𑀺𑀯𑁂𑀳𑀺 𑀲𑀤𑁆𑀥𑀺

’𑀫𑀧𑁆𑀧𑁂𑀢𑁆𑀯 𑀥𑀻𑀭 𑀨𑀭𑀺𑀪𑀼𑀢𑁆𑀢 𑀯𑀲𑀼𑀦𑁆𑀥𑀭𑀸𑀬𑀁;

𑁫𑁪𑁧.

𑀲𑁄’𑀓𑀸𑀲𑀺 𑀦𑀻𑀮𑀭𑀢𑀦𑁂𑀳𑀺 𑀫𑀳𑀸𑀭𑀳𑁂𑀳𑀺

𑀉𑀩𑁆𑀩𑁂𑀥𑀢𑁄 𑀭𑀢𑀦 𑀲𑀢𑁆𑀢 𑀧𑀫𑀸𑀡 𑀣𑀽𑀧𑀁,

𑀦𑀸𑀣𑁂 𑀥𑀭𑀦𑁆𑀢𑀲𑀫𑀬𑁂𑀯 𑀧𑀢𑀺𑀝𑁆𑀞𑀳𑀻 𑀲𑁄

𑀣𑀽𑀧𑁄 𑀢𑀺𑀮𑁄𑀓𑀲𑀼𑀔𑀤𑁄 𑀫𑀡𑀺 𑀓𑀸𑀫𑀤𑁄’𑀯;

𑁫𑁪𑁨.

𑀧𑀘𑁆𑀙𑀸 𑀢𑀺𑀮𑁄𑀓𑀲𑀭𑀡𑁂 𑀧𑀭𑀺𑀦𑀺𑀩𑁆𑀩𑀼𑀢𑀫𑁆𑀳𑀺

𑀔𑀻𑀡𑀸 𑀲𑀯𑁄 𑀲𑀫𑀳𑀺𑀫𑁄 𑀲𑀭𑀪𑀼 𑀬𑀢𑀺𑀦𑁆𑀤𑁄,

𑀆𑀤𑀸𑀬 𑀢𑀁 𑀘𑀺𑀢𑀓𑀢𑁄 𑀚𑀺𑀦𑀕𑀻𑀯𑀥𑀸𑀢𑀼𑀁

𑀢𑀲𑁆𑀫𑀺𑀁 𑀦𑀺𑀥𑀸𑀬’𑀓𑀭𑀺 𑀩𑀸𑀭𑀲 𑀳𑀢𑁆𑀣𑀣𑀽𑀧𑀁;

𑁫𑁪𑁩.

𑀘𑀽𑀴𑀸𑀪𑀬𑀳𑁆𑀯𑀯𑀦𑀺𑀧𑁄 𑀲𑀫𑀬𑁂’𑀧𑀭𑀲𑁆𑀫𑀺𑀁

𑀩𑀢𑁆𑀢𑀺𑀁𑀲 𑀳𑀢𑁆𑀣𑀫’𑀓𑀭𑀺𑀬𑀢𑁆𑀣 𑀯𑀭𑁄𑀭𑀼𑀣𑀽𑀧𑀁,

𑀤𑀼𑀝𑁆𑀞𑀸𑀤𑀺𑀕𑀸𑀫𑀡𑀺 𑀦𑀼𑀧𑁄 𑀤𑀫𑀺𑀴𑁂 𑀳𑀦𑀦𑁆𑀢𑁄

𑀓𑀸𑀭𑁂𑀲𑀺 𑀓𑀜𑁆𑀘𑀼𑀓𑀫𑀣𑁄 𑀘𑀢𑀼𑀲𑀝𑁆𑀞𑀺𑀳𑀢𑁆𑀣𑀁;

𑁫𑁪𑁪.

𑀏𑀯𑀁 𑀲 𑀲𑀻𑀳𑀮𑀫𑀳𑀸𑀲𑀭𑀫𑀚𑀛𑀭𑀽𑀴𑁆𑀳𑀁

𑀲𑁂𑀢𑀫𑁆𑀩𑀼𑀚𑀁’𑀯 𑀫𑀥𑀼𑀧𑀸𑀯𑀮𑀺 𑀲𑁂𑀯𑀦𑀻𑀬𑀁,

𑀪𑀼𑀫𑀗𑁆𑀕𑀦𑀸 𑀓𑀭𑀢𑀮𑁂 𑀲𑀺𑀢𑀯𑀺𑀢𑁆𑀣𑀮𑀻𑀮𑁄

𑀣𑀽𑀧𑁄 𑀤𑀤𑀸𑀢𑀼 𑀫𑀲𑀫𑁄𑀧𑀲𑀫𑀁 𑀚𑀦𑀸𑀦𑀁;

𑁫𑁪𑁫.

𑀮𑀗𑁆𑀓𑁄𑀧𑀲𑀕𑁆𑀕𑀫’𑀯𑀥𑀽𑀬 𑀯𑀺𑀥𑀸𑀬 𑀔𑁂𑀫𑀁

𑀮𑀗𑁆𑀓𑀁 𑀦𑀺𑀚𑀸𑀬 𑀯𑀭𑀓𑀼𑀦𑁆𑀢𑀮 𑀥𑀸𑀢𑀼𑀬𑀸 𑀢𑀁,

𑀓𑀢𑁆𑀯𑀸𑀦 𑀪𑀸𑀲𑀼𑀭𑀢𑀭𑀁 𑀫𑀼𑀦𑀺 𑀫𑀗𑁆𑀕𑀮𑀸𑀬

𑀧𑀸𑀬𑀸𑀲𑀺 𑀢𑀸𑀭𑀓 𑀧𑀣𑁂’𑀦𑀼𑀭𑀼𑀯𑁂𑀮𑀫𑁂𑀯;

𑁫𑁪𑁬.

𑀢𑀲𑁆𑀫𑀺𑀁 𑀯𑀺𑀥𑀸𑀬 𑀩𑀳𑀼𑀯𑀺𑀫𑁆𑀳𑀺𑀢 𑀧𑀸𑀝𑀺𑀳𑁂𑀭𑀁

𑀪𑁂𑀢𑁆𑀯𑀸 𑀲𑀲𑀺𑀲𑁆𑀲𑀓𑀺’𑀲𑀺𑀦𑁄 𑀧𑀼𑀦 𑀤𑀺𑀝𑁆𑀞𑀺𑀚𑀸𑀮𑀁,

𑀤𑀢𑁆𑀯𑀸𑀦 𑀦𑀺𑀩𑁆𑀩𑀼𑀢𑀺𑀧𑀤𑀁 𑀲𑀳𑀲𑀺𑀲𑁆𑀲𑀓𑀲𑁆𑀲

𑀦𑀺𑀩𑁆𑀩𑀸𑀡 𑀲𑀼𑀦𑁆𑀤𑀭 𑀧𑀼𑀭𑀁 𑀧𑀭𑀺𑀧𑀽𑀭𑀬𑀺𑀢𑁆𑀣;

𑁫𑁪𑁭. ¶

𑀢𑀫𑁆𑀳𑀸 𑀯𑀺𑀓𑀸𑀲𑀺𑀢 𑀓𑀼𑀲𑁂𑀲𑀬 𑀓𑀸𑀦𑀦𑀸𑀪

𑀯𑀻𑀢𑀸𑀲𑀯𑁂𑀳𑀺 𑀦𑀺𑀯𑀼𑀢𑁄 𑀲𑀼𑀕𑀢𑁂𑀪𑀕𑀸𑀫𑀻,

𑀧𑀸𑀬𑀸𑀲𑀺 𑀭𑀸𑀚𑀕𑀳 𑀕𑀸𑀫𑀻’𑀫𑀼𑀤𑀸𑀭𑀫𑀕𑁆𑀕𑀁

𑀯𑁂𑀦𑁂𑀬𑁆𑀬 𑀚𑀦𑁆𑀢𑀼 𑀓𑀫𑀮𑀸𑀓𑀭 𑀪𑀸𑀦𑀼𑀭𑀽𑀧𑁄;

𑁫𑁪𑁮.

𑀢𑀲𑁆𑀫𑀺𑀁 𑀕𑀢𑁂 𑀚𑀺𑀦𑀯𑀭𑁂 𑀯𑀭 𑀩𑀺𑀫𑁆𑀩𑀺𑀲𑀸𑀭𑁄

𑀧𑀽𑀚𑀁 𑀅𑀓𑀸𑀲𑀺 𑀫𑀳𑀢𑀺𑀁 𑀲𑀳 𑀤𑁂𑀯𑀢𑀸𑀳𑀺,

𑀢𑀲𑁆𑀫𑀺𑀜𑁆𑀳𑀺 𑀲𑀁𑀲𑀤𑀺 𑀮𑀪𑀺𑀁𑀲𑀼 𑀅𑀦𑀧𑁆𑀧𑀧𑀸𑀡𑀸

𑀫𑀕𑁆𑀕𑁂 𑀨𑀮𑁂 𑀘 𑀲𑀭𑀡𑁂 𑀘 𑀧𑀢𑀺𑀝𑁆𑀞𑀳𑀺𑀁𑀲𑀼

𑁫𑁪𑁯.

𑀭𑀸𑀚𑀸 𑀢𑀢𑁄 𑀯𑀺𑀧𑀼𑀮 𑀯𑁂𑀮𑀼𑀯𑀦𑀸𑀪𑀺𑀭𑀸𑀫𑀁

𑀲𑀸𑀮𑀗𑁆𑀓𑀢𑀁 𑀯𑀺𑀯𑀺𑀥 𑀧𑀸𑀤𑀧 𑀫𑀡𑁆𑀟𑀧𑁂𑀳𑀺,

𑀧𑀸𑀤𑀸𑀲𑀺 𑀤𑀓𑁆𑀔𑀺𑀡𑀓𑀭𑁂 𑀚𑀮𑀧𑀸𑀢𑀦𑁂𑀦

𑀓𑀢𑁆𑀯𑀸 𑀥𑀭𑀸𑀥𑀭𑀥𑀭𑀁 𑀳𑀺𑀫𑀯𑀜𑁆𑀘 𑀓𑀫𑁆𑀧𑀁;

𑁫𑁫𑁦.

𑀢𑀲𑁆𑀫𑀺𑀁 𑀲𑀫𑀦𑁆𑀢𑀦𑀬𑀦𑁄 𑀦𑀬𑀦𑀸𑀪𑀺𑀭𑀸𑀫𑁄

𑀪𑀼𑀢𑀺𑀁 𑀚𑀦𑀲𑁆𑀲 𑀲𑀢𑀢𑀁 𑀅𑀪𑀺𑀯𑀟𑁆𑀠𑀬𑀦𑁆𑀢𑁄,

𑀥𑀫𑁆𑀫𑀫𑁆𑀩𑀼 𑀯𑀼𑀝𑁆𑀞𑀺 𑀦𑀺𑀓𑀭𑀁 𑀧𑀭𑀺𑀯𑀲𑁆𑀲𑀬𑀦𑁆𑀢𑁄

𑀯𑀲𑁆𑀲𑀁 𑀯𑀲𑀻 𑀅𑀤𑀼𑀢𑀺𑀬𑁄 𑀤𑀼𑀢𑀺𑀬𑀫𑁆𑀳𑀺 𑀯𑀲𑁆𑀲𑁂;

𑁫𑁫𑁧.

𑀤𑁂𑀯𑀺𑀦𑁆𑀤 𑀫𑁄𑀮𑀺 𑀲𑀫𑀮𑀗𑁆𑀓𑀢 𑀧𑀸𑀤𑀧𑀺𑀝𑁆𑀞𑁄

𑀮𑁄𑀓𑀲𑁆𑀲 𑀅𑀢𑁆𑀣𑀘𑀭𑀡𑁂 𑀲𑀢𑀢𑀸𑀪𑀺𑀬𑀼𑀢𑁆𑀢𑁄,

𑀢𑀢𑁆𑀣𑁂𑀯 𑀲𑁄 𑀳𑀺 𑀢𑀢𑀺𑀬𑁂’𑀧𑀺 𑀘𑀢𑀼𑀢𑁆𑀣𑀯𑀲𑁆𑀲𑁂

𑀯𑀸𑀲𑀁 𑀅𑀓𑀸𑀲𑀺 𑀲𑀼𑀕𑀢𑁄 𑀲𑀺𑀭𑀺𑀲𑀦𑁆𑀢𑀺𑀯𑀸𑀲𑁄;

𑁫𑁫𑁨.

𑀮𑁄𑀓𑀲𑁆𑀲 𑀥𑀫𑁆𑀫 𑀫’𑀫𑀮𑀁 𑀲𑀢𑀢𑀁 𑀯𑀳𑀦𑁆𑀢𑁄

𑀲𑀸𑀯𑀢𑁆𑀣𑀺𑀬𑀁 𑀭𑀼𑀘𑀺𑀭 𑀚𑁂𑀢𑀯𑀦𑁂’𑀪𑀺𑀭𑀸𑀫𑁂,

𑀯𑀸𑀲𑀁 𑀅𑀓𑀸𑀲𑀺 𑀲𑀼𑀔𑀤𑁄 𑀫𑀼𑀦𑀺𑀧𑀜𑁆𑀘𑀫𑀲𑁆𑀫𑀺𑀁

𑀯𑁂𑀦𑁂𑀬𑁆𑀬 𑀲𑀢𑁆𑀢𑀲𑀫𑀬𑀁 𑀲𑀫𑀼𑀤𑀺𑀓𑁆𑀔𑀫𑀸𑀦𑁄;

𑀇𑀢𑀺 𑀮𑀗𑁆𑀓𑀸𑀬 𑀧𑀞𑀫𑀸’𑀕𑀫𑀦𑀁.

𑁫𑁫𑁩.

𑀅𑀣 𑀪𑀕𑀯𑀢𑀺 𑀢𑀲𑁆𑀫𑀺𑀁 𑀚𑁂𑀢𑀦𑀸𑀫𑁂 𑀯𑀦𑀲𑁆𑀫𑀺𑀁

𑀦𑀺𑀯𑀲𑀢𑀺 𑀲𑀢𑀺𑀮𑀗𑁆𑀓𑀸 𑀫𑀗𑁆𑀕𑀮𑀸’𑀯𑀸𑀲𑀭𑀽𑀧𑀸,

𑀉𑀧𑀯𑀦𑀫𑀺𑀯 𑀦𑀸𑀓𑁂 𑀦𑀦𑁆𑀤𑀦𑀁 𑀤𑁂𑀯𑀢𑀸𑀦𑀁

𑀅𑀫𑀭 𑀉𑀭𑀕𑀯𑀸𑀲𑀸 𑀭𑀫𑁆𑀫𑀭𑀽𑀧𑀸 𑀩𑀪𑀽𑀯;

𑁫𑁫𑁪. ¶

𑀢𑀳𑀺𑀫𑀢𑀺 𑀭𑀼𑀘𑀺𑀭𑀲𑁆𑀫𑀺𑀁 𑀯𑀟𑁆𑀠𑀫𑀸𑀦𑀸𑀤𑀺 𑀲𑁂𑀮𑁂

𑀫𑀥𑀼𑀭 𑀲𑀮𑀺𑀮𑀯𑀸𑀳𑁂 𑀭𑀫𑁆𑀫𑀓𑀮𑁆𑀬𑀸𑀡𑀺𑀓𑀸𑀤𑁄,

𑀉𑀤𑀥𑀺 𑀪𑀼𑀚𑀕𑀯𑀸𑀲𑁂 𑀦𑀸𑀕𑀤𑀻𑀧𑀦𑁆𑀢𑀺𑀓𑁂 𑀘

𑀫𑀳𑀢𑀺 𑀫𑀳𑀺𑀫 𑀬𑀼𑀢𑁆𑀢𑀸 𑀦𑀸𑀕𑀲𑀗𑁆𑀖𑀸 𑀯𑀲𑀦𑁆𑀢𑀺;

𑁫𑁫𑁫.

𑀧𑀘𑀼𑀭 𑀫𑀳𑀺𑀫 𑀬𑀼𑀢𑁆𑀢𑁄 𑀯𑀟𑁆𑀠𑀫𑀸𑀦𑀸𑀘𑀮𑀲𑁆𑀫𑀺𑀁

𑀅𑀥𑀺𑀧𑀢𑀺 𑀪𑀼𑀚𑀕𑀸𑀦𑀁 𑀆𑀲𑀺 𑀘𑀽𑀮𑁄𑀤𑀭𑀯𑁆𑀳𑁄,

𑀫𑀳𑀼𑀤𑀭 𑀇𑀢𑀺 𑀦𑀸𑀫𑁄 𑀦𑀸𑀕𑀤𑀻𑀧𑁄𑀤𑀥𑀺𑀫𑁆𑀳𑀺

𑀦𑀺𑀯𑀲𑀢𑀺 𑀅𑀣 𑀢𑁂𑀲𑀁 𑀧𑀩𑁆𑀩𑀢𑁂𑀬𑁆𑀬𑁄’𑀭𑀕𑀺𑀦𑁆𑀤𑁄;

𑁫𑁫𑁬.

𑀇𑀢𑀭 𑀪𑀼𑀚𑀕 𑀭𑀜𑁆𑀜𑁄 𑀥𑀻𑀢𑀭𑀁 𑀦𑀸𑀕𑀓𑀜𑁆𑀜𑀁

𑀧𑀺𑀬𑀢𑀭𑀫’𑀪𑀺𑀭𑀽𑀧𑀁’𑀓𑀸𑀲𑀺 𑀤𑀸𑀭𑀁 𑀢𑀤𑀸 𑀳𑀺,

𑀅𑀣 𑀘 𑀤𑀼𑀳𑀺𑀢𑀼𑀬𑀸 𑀲𑁄 𑀤𑀻𑀬𑀫𑀸𑀦𑀁 𑀤𑀤𑀦𑁆𑀢𑁄

𑀭𑀼𑀘𑀺𑀭 𑀫𑀡𑀻𑀫𑀬𑀕𑁆𑀖𑀁 𑀆𑀲𑀦𑀜𑁆𑀘𑀸𑀧𑀤𑀸𑀲𑀺;

𑁫𑁫𑁭.

𑀤𑀼𑀳𑀺𑀢𑀭𑀺 𑀫𑀢𑀓𑀸𑀮𑁂 𑀢𑁂’𑀣 𑀧𑀮𑁆𑀮𑀗𑁆𑀓𑀳𑁂𑀢𑀼

𑀚𑀮𑀚 𑀣𑀮𑀚 𑀦𑀸𑀕𑀸 𑀬𑀼𑀤𑁆𑀥𑀲𑀚𑁆𑀚𑀸 𑀅𑀳𑁂𑀲𑀼𑀁,

𑀅𑀣 𑀣𑀮𑀚 𑀪𑀼𑀚𑀗𑁆𑀕𑀸 𑀪𑀗𑁆𑀕𑀓𑀮𑁆𑀮𑁄𑀮𑀫𑀸𑀮𑀸

𑀲𑀤𑀺𑀲 𑀮𑀽𑀮𑀺𑀢 𑀘𑀺𑀢𑁆𑀢𑀸 𑀕𑀩𑁆𑀩𑀺𑀢𑁂𑀯𑀁 𑀭𑀯𑀦𑁆𑀢𑀺;

𑁫𑁫𑁮.

𑀓𑀺𑀫𑀼’𑀤𑀥𑀺𑀚 𑀨𑀡𑀻𑀦𑀁 𑀓𑀺𑀢𑁆𑀢𑀺 𑀲𑀫𑁆𑀧𑀢𑁆𑀢𑀺𑀬𑀸 𑀦𑁄

𑀅𑀧𑀺 𑀬𑀲𑀧𑀭𑀺𑀯𑀸𑀭𑀸 𑀓𑀺𑀁 𑀩𑀮𑁂𑀦𑀺𑀤𑁆𑀥𑀺𑀬𑀸 𑀓𑀺𑀁,

𑀅𑀳𑀫𑀳𑀫𑀻𑀢𑀺 𑀕𑀩𑁆𑀩𑀸 𑀓𑀺𑀁 𑀓𑀺𑀫𑀺𑀲𑁆𑀲𑀸𑀬 𑀢𑁂𑀲𑀁

𑀪𑀯𑀢𑀺 𑀢𑀺𑀫𑀺𑀭’𑀭𑀻𑀦𑀁 𑀪𑀸𑀦𑀼𑀫𑀕𑁆𑀕𑀼𑀦𑁆𑀦𑀢𑀻 𑀓𑀸;

𑁫𑁫𑁯.

𑀅𑀣 𑀚𑀮𑀚’𑀮𑀕𑀤𑁆𑀤𑀸 𑀕𑀚𑁆𑀚𑀦𑀁 𑀕𑀚𑁆𑀚𑀬𑀦𑁆𑀢𑀸

𑀪𑀬𑀚𑀦𑀓 𑀧𑀕𑀩𑁆𑀪𑀸 𑀨𑁄𑀝𑀬𑀦𑁆𑀢𑀸 𑀪𑀽𑀚𑀸𑀦𑀁,

𑀅𑀳𑀫𑀳 𑀧𑀪𑀽 𑀭𑁂!𑀭𑁂! 𑀧𑀩𑁆𑀩𑀢𑁂𑀬𑁆𑀬𑀸𑀦’𑀫𑁂𑀢𑀁

𑀧𑀝𑀼𑀢𑀭𑀟𑀲𑀺𑀢𑁄𑀝𑁆𑀞𑀸 𑀓𑀓𑁆𑀔’𑀴𑁂𑀯𑀁 𑀭𑀯𑀦𑁆𑀢𑀺;

𑁫𑁬𑁦.

𑀧𑀝𑀼𑀢𑀭 𑀕𑀭𑀼𑀦𑀸𑀤𑀸 𑀢𑀸𑀯 𑀕𑀚𑁆𑀚𑀦𑁆𑀢𑀺 𑀤𑀦𑁆𑀢𑀻

𑀦𑀬𑀦 𑀧𑀣𑀫𑀼’𑀧𑁂𑀦𑁆𑀢𑁂 𑀬𑀸𑀯 𑀓𑀡𑁆𑀞𑀺𑀭𑀯𑀸𑀦𑀁,

𑀢𑀣𑀭𑀺𑀯 𑀣𑀮𑀚𑀸𑀢𑀸 𑀚𑀼𑀫𑁆𑀳𑀬𑀦𑁆𑀢𑀸 𑀲𑀫𑀕𑁆𑀕𑀸

𑀦𑀬𑀦 𑀧𑀣𑀕𑀢𑀸 𑀦𑁄 𑀲𑀼𑀜𑁆𑀜𑀤𑀧𑁆𑀧𑀸 𑀪𑀯𑀦𑁆𑀢𑀺;

𑁫𑁬𑁧. ¶

𑀇𑀢𑀺 𑀢𑀤𑀼𑀪𑀬𑀲𑁂𑀦𑀸 𑀖𑀝𑁆𑀝𑀬𑀦𑁆𑀢𑀸’𑀜𑁆𑀜𑀫𑀜𑁆𑀜𑀁

𑀯𑀺𑀯𑀺𑀥 𑀧𑀳𑀭𑀡𑁆𑀳𑁄 𑀉𑀕𑁆𑀕𑀺𑀭𑀦𑁆𑀢𑀻 𑀕𑀺𑀭𑀦𑁆𑀢𑀺,

𑀲𑀢𑀢 𑀔𑀼𑀪𑀺𑀢 𑀯𑁂𑀮𑀸 𑀲𑀸𑀕𑀭𑀽𑀫𑀻𑀯 𑀪𑀦𑁆𑀢𑀸

𑀮𑀼𑀮𑀺𑀢 𑀮𑀼𑀮𑀺𑀢 𑀘𑀺𑀢𑁆𑀢𑀸 𑀬𑀼𑀤𑁆𑀥𑀦𑀺𑀦𑁆𑀦𑀸 𑀞𑀺𑀢𑀸𑀲𑀼𑀁;

𑁫𑁬𑁨.

𑀅𑀣 𑀢𑀤𑀳𑀼 𑀫𑀼𑀦𑀺𑀦𑁆𑀤𑁄 𑀬𑀸𑀫𑀺𑀦𑀻𑀬𑀸𑀫’𑀫𑀦𑁆𑀢𑁂

𑀧𑀢𑀺𑀦𑀺𑀬 𑀫𑀢𑀺𑀚𑀸𑀮𑀁 𑀮𑁄𑀓𑀫𑁄𑀮𑁄𑀓𑀬𑀦𑁆𑀢𑁄,

𑀲𑀫𑀭 𑀯𑀲𑀕𑀢𑀸𑀦𑀁 𑀪𑁄𑀕𑀻𑀦𑀁 𑀪𑀸𑀯𑀺𑀪𑀼𑀢𑀺𑀁

𑀢𑀤𑀼𑀧𑀭𑀺 𑀘’𑀪𑀺𑀯𑀼𑀤𑁆𑀥𑀺𑀁 𑀧𑀲𑁆𑀲𑀺 𑀮𑀗𑁆𑀓𑀸𑀢𑀮𑀲𑁆𑀲;

𑁫𑁬𑁩.

𑀅𑀣 𑀫𑀼𑀦𑀺 𑀫𑀥𑀼𑀫𑀸𑀲𑁂’𑀧𑁄𑀲𑀣𑁂 𑀓𑀸𑀮𑀧𑀓𑁆𑀔𑁂

𑀓𑀢 𑀦𑀺𑀔𑀺𑀮 𑀯𑀺𑀥𑀸𑀦𑁄 𑀕𑀬𑁆𑀳 𑀲𑀗𑁆𑀖𑀸𑀝𑀺𑀓𑀸𑀤𑀺𑀁,

𑀅𑀦𑀼𑀕𑀢𑀺𑀓𑀫𑀼𑀤𑀺𑀓𑁆𑀔𑀁 𑀧𑀜𑁆𑀘𑀦𑁂𑀢𑁆𑀢𑁄 𑀲𑀫𑀦𑁆𑀢𑀸

𑀲𑀼𑀫𑀦 𑀲𑀼𑀫𑀦 𑀦𑀸𑀫𑀁 𑀧𑀲𑁆𑀲𑀺 𑀤𑁂𑀯𑀁 𑀲𑀫𑀺𑀤𑁆𑀥𑀺𑀁;

𑁫𑁬𑁪.

𑀢𑀤𑀳𑀼 𑀲𑀼𑀫𑀦𑀤𑁂𑀯𑁄 𑀚𑁂𑀢𑀦𑀸𑀫𑁂 𑀲𑀼𑀭𑀫𑁆𑀫𑁂

𑀅𑀥𑀺𑀯𑀲𑀢𑀺 𑀯𑀺𑀳𑀸𑀭𑁂 𑀤𑁆𑀯𑀸𑀭𑀓𑁄𑀝𑁆𑀞𑁄𑀧𑀓𑀝𑁆𑀞𑁂,

𑀞𑀺𑀢 𑀯𑀺𑀝𑀧 𑀲𑀫𑀺𑀤𑁆𑀥𑁂 𑀔𑀻𑀭𑀺𑀓𑀸𑀧𑀸𑀤𑀧𑀲𑁆𑀫𑀺𑀁

𑀲𑀼𑀕𑀢 𑀫𑀪𑀺𑀦𑀫𑀦𑁆𑀢𑁄 𑀅𑀦𑁆𑀯𑀳𑀁 𑀧𑀽𑀚𑀬𑀦𑁆𑀢𑁄;

𑁫𑁬𑁫.

𑀢𑀫𑀲𑀫𑁆𑀫𑀼𑀦𑀺 𑀤𑀺𑀲𑁆𑀯𑀸’𑀫𑀦𑁆𑀢𑀬𑀺𑀢𑁆𑀯𑀸’𑀕𑀢𑁂 𑀢𑀁

𑀇𑀤𑀫𑀯𑀘 𑀫𑀬𑀸 𑀪𑁄 𑀲𑀤𑁆𑀥𑀺𑀫𑀸𑀕𑀘𑁆𑀙 𑀮𑀗𑁆𑀓𑀁,

𑀲𑀳 𑀢𑀯 𑀪𑀯𑀦𑀫𑁆𑀳𑀸 𑀧𑀼𑀩𑁆𑀩𑀯𑀼𑀢𑁆𑀣𑀧𑁆𑀧𑀤𑁂𑀲𑁂

𑀢𑀯 𑀪𑀯𑀢𑀺 𑀧𑀢𑀺𑀝𑁆𑀞𑀸 𑀪𑁄𑀕𑀺𑀦𑀜𑁆𑀚𑀸’𑀪𑀺𑀯𑀼𑀤𑁆𑀥𑀺;

𑁫𑁬𑁬.

𑀅𑀣 𑀫𑀼𑀦𑀺𑀯𑀘𑀦𑀁 𑀲𑁄 𑀫𑀼𑀤𑁆𑀥𑀦𑀸𑀫’𑀕𑁆𑀕𑀳𑁂𑀢𑁆𑀯𑀸

𑀲𑀫𑀼𑀤𑀺𑀢𑀳𑀤𑀬𑁄 𑀢𑀁 𑀭𑀼𑀓𑁆𑀔𑀫𑀼𑀤𑁆𑀥𑀘𑁆𑀘 𑀫𑀽𑀮𑀸,

𑀲𑀼𑀕𑀢𑀫𑀼𑀧𑀭𑀺 𑀓𑀢𑁆𑀯𑀸 𑀥𑀸𑀭𑀬𑀦𑁆𑀢𑁄 𑀲𑀼𑀨𑀼𑀮𑁆𑀮𑀁

𑀩𑀭𑀺𑀳𑀺 𑀩𑀭𑀺𑀳𑀺 𑀙𑀢𑁆𑀢𑀸𑀓𑀸𑀭𑀫𑀸𑀕𑀸 𑀦𑀪𑀫𑁆𑀳𑀻;

𑁫𑁬𑁭.

𑀤𑀲𑀩𑀮 𑀢𑀦𑀼𑀪𑀸’𑀪𑀺𑀲𑁆𑀲𑀗𑁆𑀕𑀫𑀸 𑀲𑁄 𑀤𑀼𑀫𑀦𑁆𑀤𑁄

𑀢𑀭𑀮 𑀫𑀡𑀻𑀯 𑀦𑀸𑀦𑀸’𑀪𑀸𑀳𑀺 𑀲𑀫𑁆𑀪𑀸𑀯𑀦𑀻𑀬𑁄,

𑀯𑀺𑀮𑀲𑀺𑀢 𑀇𑀯 𑀲𑀩𑁆𑀩𑁂 𑀭𑀼𑀓𑁆𑀔𑀲𑁂𑀮𑀸𑀤𑀬𑁄’𑀧𑀺

𑀅𑀧𑀕𑀢 𑀲𑀓𑀯𑀡𑁆𑀡𑀸𑀯𑀡𑁆𑀡𑀯𑀦𑁆𑀢𑀸 𑀯𑀺𑀭𑁂𑀚𑀼𑀁;

𑁫𑁬𑁮. ¶

𑀔𑀕 𑀪𑀼𑀚𑀕 𑀲𑀼𑀭𑀸𑀤𑀺 𑀫𑀲𑁆𑀲𑀺𑀢𑀸 𑀙𑀧𑁆𑀧𑀪𑀸𑀳𑀺

𑀦𑀺𑀚𑀧𑀢𑀺 𑀦𑀺𑀚𑀚𑀸𑀬𑀸 𑀲𑁆𑀯𑀜𑁆𑀜𑀫𑀜𑁆𑀜𑀸𑀲𑀼 𑀫𑀼𑀬𑁆𑀳𑀼𑀁,

𑀅𑀲𑀺𑀢 𑀕𑀕𑀦 𑀫𑀚𑁆𑀛𑁂 𑀲𑁄𑀪𑀫𑀸𑀦𑁄 𑀫𑀼𑀦𑀺𑀦𑁆𑀤𑁄

𑀯𑀺𑀢𑀢 𑀯𑀺𑀯𑀺𑀥 𑀭𑀁𑀲𑀻 𑀭𑀁𑀲𑀺𑀫𑀸𑀮𑀻𑀯 𑀕𑀜𑁆𑀙𑀺;

𑁫𑁬𑁯.

𑀚𑀮𑀤 𑀧𑀝𑀮 𑀲𑀡𑁆𑀟𑁂 𑀯𑀚𑁆𑀛𑀫𑀼𑀤𑁆𑀤𑀸𑀴𑀬𑀺𑀢𑁆𑀯𑀸

𑀩𑀳𑀺 𑀯𑀺𑀮𑀲𑀺𑀢𑀓𑀸𑀬𑁄 𑀲𑁄𑀫𑁆𑀫𑀤𑁄𑀲𑀸𑀓𑀭𑁄,𑀯

𑀓𑀢𑀼𑀧𑀭𑀺 𑀢𑀭𑀼𑀙𑀸𑀬𑁄 𑀚𑁄𑀢𑀫𑀸𑀦𑁄 𑀲𑀫𑀸𑀦𑁄

𑀉𑀭𑀕 𑀲𑀫𑀭𑀞𑀸𑀦𑀁 𑀕𑀦𑁆𑀣𑁆𑀯𑀸’𑀓𑀸𑀲𑁂 𑀦𑀺𑀲𑀚𑁆𑀚;

𑁫𑁭𑁦.

𑀖𑀦𑀢𑀭 𑀢𑀺𑀫𑀺𑀭𑀁 𑀲𑁄 𑀇𑀤𑁆𑀥𑀺𑀬𑀸 𑀲𑀗𑁆𑀖𑀭𑀺𑀢𑁆𑀯𑀸

𑀢𑀳𑀺𑀫𑀢𑀺𑀭𑀯 𑀪𑀻𑀫𑀁 𑀖𑁄𑀭𑀲𑀁𑀭𑀫𑁆𑀪𑀯𑀦𑁆𑀢𑀁,

𑀅𑀲𑀦𑀺 𑀲𑀢 𑀦𑀺𑀧𑀸𑀢𑀁 𑀯𑀲𑁆𑀲𑀥𑀸𑀭𑀸 𑀓𑀭𑀸𑀮𑀁

𑀉𑀭𑀼𑀢𑀭 𑀢𑀢 𑀫𑁂𑀖𑀁 𑀫𑀸𑀧𑀬𑀻 𑀲𑀻𑀢𑀯𑀸𑀢𑀁;

𑁫𑁭𑁧.

𑀇𑀢𑀺 𑀢𑀺𑀪𑀼𑀯𑀦𑀦𑀸𑀣𑁄 𑀤𑀧𑁆𑀧𑀺𑀢𑁂 𑀦𑀸𑀕𑀲𑀗𑁆𑀖𑁂

𑀯𑀺𑀫𑀤 𑀓𑀭𑀡 𑀳𑁂𑀢𑀼 𑀤𑀲𑁆𑀲𑀬𑀻 𑀪𑁂𑀭𑀯𑀸𑀦𑀻,

𑀅𑀣’𑀧𑀕𑀢 𑀧𑀕𑀩𑁆𑀪𑁂 𑀢𑁂 𑀯𑀺𑀤𑀺𑀢𑁆𑀯𑀸𑀦 𑀲𑀢𑁆𑀣𑀸

𑀅𑀧𑀦𑀼𑀤𑀺 𑀪𑀬𑀚𑀸𑀢𑀁 𑀢𑀗𑁆𑀔𑀡𑀁𑀬𑁂𑀯 𑀢𑀢𑁆𑀣;

𑁫𑁭𑁨.

𑀢𑀭𑀼𑀡 𑀢𑀭𑀡𑀺𑀲𑁄𑀪𑀸 𑀓𑁂𑀢𑀼𑀫𑀸𑀮𑀸𑀯𑀺𑀮𑀸𑀲𑀺𑀁

𑀲𑀼𑀪𑀭𑀼𑀘𑀺 𑀫𑀼𑀔𑀯𑀦𑁆𑀤𑀁 𑀮𑀓𑁆𑀔𑀡𑀸𑀓𑀺𑀡𑁆𑀡𑀕𑀢𑁆𑀢𑀁,

𑀢𑀺𑀪𑀯 𑀯𑀺𑀪𑀯𑀤𑀸𑀬𑀺𑀁 𑀢𑀁 𑀯𑀺𑀤𑀺𑀢𑁆𑀯𑀸𑀦 𑀦𑀸𑀕𑀸

𑀘𑀼𑀢𑀧𑀳𑀭𑀡 𑀳𑀢𑁆𑀣𑀸 𑀯𑀦𑁆𑀤𑀫𑀸𑀦𑀸 𑀫𑀳𑀺𑀁𑀲𑀼;

𑁫𑁭𑁩.

𑀲𑀺𑀭𑀲𑀻 𑀦𑀺𑀳𑀺𑀢𑀧𑀸𑀡𑀻 𑀭𑀢𑁆𑀢𑀧𑀗𑁆𑀓𑁂𑀭𑀼𑀳𑁂𑀳𑀺

𑀯𑀺𑀓𑀘 𑀯𑀤𑀦 𑀦𑁂𑀢𑁆𑀢𑀸’𑀫𑀦𑁆𑀤 𑀓𑀜𑁆𑀚𑀼𑀧𑁆𑀧𑀮𑁂𑀳𑀺,

𑀲𑀓 𑀲𑀓 𑀥𑀢 𑀦𑀸𑀦𑀸𑀯𑀡𑁆𑀡 𑀯𑀫𑁆𑀫𑀸𑀤𑀺𑀓𑁂𑀳𑀺

𑀯𑀺𑀯𑀺𑀥 𑀓𑀼𑀲𑀼𑀫𑀯𑀢𑁆𑀣𑀸’𑀫𑀦𑁆𑀤 𑀤𑀻𑀧𑀤𑁆𑀥𑀚𑁂𑀳𑀺;

𑁫𑁭𑁪.

𑀉𑀭𑀕 𑀪𑀯𑀦𑀯𑀸𑀲𑀸 𑀦𑀸𑀕𑀓𑀜𑁆𑀜𑀸 𑀲𑀫𑁂𑀘𑁆𑀘

𑀓𑀼𑀘 𑀓𑀮𑀲 𑀲𑀳𑀲𑁆𑀲𑀁 𑀥𑀸𑀭𑀬𑀦𑁆𑀢𑀺 𑀲𑀮𑀻𑀮𑀁,

𑀮𑀮𑀺𑀢 𑀓𑀡𑀓 𑀯𑀮𑁆𑀮𑀺 𑀮𑀻𑀮𑀫𑀸𑀥𑀢𑁆𑀢 𑀕𑀢𑁆𑀢𑀸

𑀣𑀼𑀢𑀺 𑀫𑀼𑀔𑀭 𑀫𑀼𑀔𑀸 𑀢𑀸 𑀲𑀸𑀥𑀼 𑀓𑀻𑀴𑀁 𑀅𑀓𑀁𑀲𑀼;

𑁫𑁭𑁫. ¶

𑀅𑀣 𑀫𑀼𑀦𑀺 𑀉𑀭𑀕𑀸𑀦𑀁 𑀯𑀺𑀕𑁆𑀕𑀳𑀁 𑀢𑀁 𑀲𑀫𑁂𑀢𑀼𑀁

𑀲𑀼𑀢𑀺𑀫𑀦 𑀓𑀫𑀦𑀻𑀬𑀁 𑀦𑀺𑀘𑁆𑀙𑀭𑀁 𑀩𑁆𑀭𑀳𑁆𑀫𑀖𑁄𑀲𑀁,

𑀅𑀚𑀭𑀫𑀫𑀭 𑀫𑀕𑁆𑀕𑀁 𑀲𑀼𑀧𑁆𑀧𑀲𑀢𑁆𑀣𑀁 𑀲𑀼𑀥𑀺𑀳𑀺

𑀯𑀭𑀫𑀢𑀺 𑀯𑀭𑀥𑀫𑁆𑀫𑀁 𑀤𑁂𑀲𑀬𑀻 𑀦𑀁 𑀨𑀡𑀻𑀦𑀁;

𑁫𑁭𑁬.

𑀦 𑀪𑁄 𑀪𑁄 𑀲𑀁𑀲𑀸𑀭𑁂 𑀔𑀮𑀼 𑀪𑀯𑀢𑀺 𑀲𑀸𑀭𑀁 𑀮𑀯𑀫𑁆𑀧𑀺

𑀯𑀺𑀲𑁂𑀲𑀸 𑀢𑀁 𑀲𑀻𑀢𑀁 𑀚𑀮𑀺𑀢 𑀤𑀳𑀦𑁂 𑀯𑀺𑀚𑁆𑀚𑀢𑀺 𑀓𑀤𑀸,

𑀲𑀤𑀸 𑀭𑀸𑀕𑀁 𑀭𑁄𑀕𑀁 𑀩𑁆𑀬𑀥𑀢𑀺 𑀚𑀦𑀢𑀁 𑀦𑁂𑀓𑀤𑀼𑀭𑀺𑀢𑀁

𑀢𑀣𑀸𑀧𑀸’𑀬𑀼𑀁 𑀧𑀸𑀢𑁄 𑀭𑀯𑀺𑀭𑀪𑀺𑀫𑀼𑀔𑀼𑀲𑁆𑀲𑀸𑀯 𑀲𑀤𑀺𑀲𑀁;

𑁫𑁭𑁭.

𑀲𑀭𑀻𑀭𑁄’𑀬𑀁 𑀩𑀢𑁆𑀢𑀺𑀁𑀲 𑀯𑀺𑀥 𑀓𑀼𑀡𑀧𑁄 𑀲𑀸𑀭 𑀭𑀳𑀺𑀢𑁄

𑀧𑀭𑀺𑀢𑁆𑀢𑀁 𑀬𑁄𑀩𑁆𑀩𑀜𑁆𑀜𑀁 𑀓𑀼𑀲𑀼𑀫 𑀲𑀤𑀺𑀲𑀁 𑀦𑀺𑀕𑁆𑀕𑀢𑀲𑀺𑀭𑀺,

𑀧𑀳𑀦𑁆𑀢𑁆𑀯𑀸 𑀕𑀦𑁆𑀢𑀩𑁆𑀩𑀁 𑀪𑀯𑀚 𑀯𑀺𑀪𑀯𑀁 𑀲𑀫𑁆𑀪𑀢𑀫𑀺𑀤𑀁

𑀅𑀣𑁂𑀯𑀁 𑀲𑀦𑁆𑀢𑁂 𑀪𑁄 𑀯𑀭𑀬𑀢𑀺 𑀪𑀯𑀁 𑀓𑁄 𑀦𑀼 𑀳𑀺 𑀩𑀼𑀥𑁄;

𑁫𑁭𑁮.

𑀧𑀮𑀸𑀲𑀻 𑀫𑀓𑁆𑀔𑀻 𑀓𑁄𑀥𑀽𑀧𑀳 𑀫𑀢𑁄 𑀫𑀸𑀦𑀯𑀺𑀪𑀯𑁄

𑀚𑀦𑁄’𑀢𑀻𑀢𑁄’𑀢𑁄 𑀪𑁄 𑀧𑀬𑀢𑀺 𑀦𑀭𑀓𑀁 𑀤𑀸𑀭𑀼𑀡𑀢𑀭𑀁,

𑀨𑀡𑀻 𑀫𑀚𑁆𑀚𑀸𑀭𑁄 𑀲𑀸 𑀕𑀼𑀳𑀓 𑀓𑀧𑀬𑁄 𑀪𑀽𑀬 𑀩𑀳𑀼𑀲𑁄

𑀯𑀥𑁂𑀦𑁆𑀢𑀜𑁆𑀜𑁄𑀜𑁆𑀜𑀁 𑀢𑁂 𑀦𑀦𑀼𑀪𑀯𑀫𑀺𑀤𑀁 𑀤𑀼𑀓𑁆𑀔𑀫’𑀦𑀺𑀲𑀁;

𑁫𑁭𑁯.

𑀧𑀼𑀭𑁂 𑀓𑀸𑀓𑁄’𑀮𑀼𑀓𑀸 𑀅𑀣 𑀯𑀦𑀪𑀯𑀸 𑀨𑀦𑁆𑀤𑀦 𑀇𑀲𑀸

𑀓𑀭𑀺𑀢𑁆𑀯𑀸’𑀝𑁆𑀞𑀸𑀦𑁂’𑀖𑀁 𑀘𑀺𑀭𑀫𑀦𑀼𑀪𑀯𑀼𑀁 𑀤𑀼𑀓𑁆𑀔𑀫𑀦𑀺𑀲𑀁,

𑀅𑀳𑁄 𑀓𑀧𑁆𑀧𑀝𑁆𑀞𑀦𑁆𑀢𑀁 𑀲𑀭𑀣 𑀤𑀼𑀭𑀺𑀢𑀁 𑀯𑁂𑀭𑀚𑀫𑀺𑀤𑀁

𑀦 𑀳𑁂𑀢𑁆𑀣𑀲𑁆𑀲𑀸𑀤𑁄 𑀪𑁄’𑀡𑀼𑀫𑀧𑀺 𑀓𑀮𑀳𑁂 𑀫𑁂𑀢𑁆𑀢𑀺𑀫’𑀫𑀢𑀁;

𑁫𑁮𑁦.

𑀩𑀮𑀁 𑀩𑀸𑀮𑀸𑀦𑀁 𑀪𑁄 𑀲𑀓 𑀲𑀓 𑀯𑀥𑀸𑀬𑁂𑀯 𑀪𑀯𑀢𑀺

𑀅𑀢𑀻𑀢𑁂𑀓𑀸 𑀔𑀼𑀤𑁆𑀤𑀸 𑀮𑀝𑀼𑀓𑀺𑀓𑀤𑀺𑀚𑀸 𑀦𑀝𑁆𑀞𑀢𑀦𑀬𑀸,

𑀕𑀚𑀁 𑀩𑀸𑀮𑀁 𑀫𑀢𑁆𑀢𑀁 𑀧𑀯𑀺𑀥𑀺 𑀦 𑀩𑀮𑀁 𑀳𑁄𑀢𑀺 𑀲𑀭𑀡𑀁

𑀅𑀣𑀝𑁆𑀞𑀸𑀦𑁂 𑀓𑀺𑀁 𑀪𑁄 𑀓𑀼𑀭𑀼𑀣 𑀯𑀻𑀭𑀺𑀬𑀁 𑀪𑀼𑀢𑀺 𑀳𑀦𑀦𑀁;

𑁫𑁮𑁧.

𑀦 𑀤𑀼𑀓𑁆𑀔𑀁 𑀢𑁂𑀲𑀁 𑀬𑁂 𑀯𑀺𑀕𑀢 𑀓𑀮𑀳𑀸 𑀏𑀓𑀫𑀦𑀲𑀸

𑀅𑀢𑀻𑀢𑁂 𑀪𑁄 𑀮𑀸𑀧𑀸 𑀅𑀖𑀝𑀺𑀢 𑀫𑀸𑀦𑀸 𑀧𑁂𑀬𑁆𑀬𑀯𑀘𑀦𑀸,

𑀲𑀼𑀔𑀁 𑀯𑀸𑀲𑀁’𑀓𑀸𑀲𑀼𑀁 𑀬𑀤𑀳𑀦𑀺 𑀪𑀯𑀼𑀁 𑀢𑁂’𑀣 𑀯𑀺𑀥𑀼𑀭𑀸

𑀯𑀲𑀁 𑀯𑁆𑀬𑀸𑀥𑀲𑁆𑀲𑀸𑀕𑀼𑀁 𑀢𑀤𑀳𑀦𑀺 𑀅𑀳𑁄!𑀫𑁂𑀥𑀕 𑀩𑀮𑀁;

𑁫𑁮𑁨. ¶

𑀇𑀢𑀺 𑀢𑀺𑀔𑀺𑀡 𑀲𑀼𑀥𑀺𑀫𑀸 𑀓𑀢𑁆𑀢𑀼𑀫𑁂𑀢𑁂 𑀲𑀫𑀕𑁆𑀕𑁂

𑀅𑀯𑀤𑀺 𑀧𑀯𑀭 𑀥𑀫𑁆𑀫𑀁 𑀲𑀸𑀥𑀼 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀁,

𑀅𑀣 𑀫𑀼𑀤𑀺𑀢𑀫𑀦𑀸 𑀢𑁂 𑀧𑀻𑀡𑀺𑀢𑀸 𑀢𑀲𑁆𑀲 𑀦𑀸𑀕𑀸

𑀫𑀡𑀺𑀫𑀬𑀫’𑀢𑀼𑀮𑀁 𑀢𑀁 𑀆𑀲𑀦𑀁 𑀧𑀽𑀚𑀬𑀺𑀁𑀲𑀼;

𑁫𑁮𑁩.

𑀅𑀣 𑀫𑀼𑀦𑀺 𑀕𑀕𑀦𑀫𑁆𑀩𑁄𑀭𑀼𑀬𑁆𑀳 𑀪𑀼𑀫𑀺𑀧𑁆𑀧𑀤𑁂𑀲𑀁

𑀢𑀭𑀼𑀡 𑀭𑀯𑀺𑀯 𑀢𑀲𑁆𑀫𑀺𑀁 𑀆𑀲𑀦𑁂 𑀆𑀲𑀺 𑀪𑀸𑀲𑀁,

𑀅𑀣 𑀪𑀼𑀚𑀕𑀕𑀡𑀸 𑀢𑁂 𑀤𑀺𑀩𑁆𑀩 𑀔𑀚𑁆𑀚𑀸𑀤𑀺𑀓𑁂𑀳𑀺

𑀧𑀭𑀺𑀯𑀺𑀲𑀺𑀬 𑀫𑀼𑀦𑀺𑀦𑁆𑀤𑀁 𑀲𑀸𑀥𑀼 𑀥𑀫𑁆𑀫𑀁 𑀲𑀼𑀡𑀺𑀁𑀲𑀼;

𑁫𑁮𑁪.

𑀅𑀣 𑀚𑀮 𑀣𑀮𑀚𑀸𑀦𑀁 𑀢𑀢𑁆𑀣 𑀬𑀼𑀤𑁆𑀥𑀸’𑀕𑀢𑀸𑀦𑀁

𑀅𑀕𑀡𑀺𑀢 𑀪𑀽𑀚𑀕𑀸𑀦𑀁’𑀲𑀻𑀢𑀺𑀓𑁄𑀝𑀻 𑀪𑀼𑀚𑀗𑁆𑀕𑀸,

𑀯𑀺𑀫𑀮 𑀲𑀭𑀡𑀲𑀻𑀮𑁂 𑀲𑀼𑀧𑁆𑀧𑀢𑀺𑀝𑁆𑀞𑀸 𑀲𑀼𑀢𑀼𑀝𑁆𑀞𑀸

𑀅𑀓𑀭𑀼’𑀫𑀢𑀺𑀫𑀼𑀴𑀸𑀭𑀁 𑀲𑀢𑁆𑀣𑀼 𑀧𑀽𑀚𑀸𑀯𑀺𑀥𑀸𑀦𑀁;

𑁫𑁮𑁫.

𑀅𑀣 𑀫𑀳𑀼𑀤𑀭 𑀭𑀜𑁆𑀕𑁆𑀜𑁄 𑀫𑀸𑀢𑀼𑀮𑁄 𑀦𑀸𑀕𑀭𑀸𑀚𑀸

𑀫𑀦𑀺𑀦𑀬𑀦𑀓𑀦𑀸𑀫𑁄 𑀭𑀫𑁆𑀫𑀓𑀴𑁆𑀬𑀸𑀡𑀤𑁂𑀲𑀸,

𑀉𑀭𑀕 𑀲𑀫𑀭 𑀳𑁂𑀢𑀽 𑀆𑀕𑀢𑁄 𑀦𑀸𑀕𑀤𑀻𑀧𑀁

𑀲𑀼𑀕𑀢𑀯𑀭 𑀲𑀭𑀻𑀭𑀁 𑀤𑀺𑀲𑁆𑀯 𑀦𑀢𑁆𑀯𑀸𑀮𑀧𑁂𑀯𑀁;

𑁫𑁮𑁬.

𑀬𑀤𑀺 𑀲𑀼𑀕𑀢! 𑀇𑀫𑀁 𑀢𑁆𑀯𑀁 𑀦𑀸𑀕𑀢𑁄 𑀅𑀲𑁆𑀲 𑀞𑀸𑀦𑀁

𑀫𑀬𑀫𑀧𑀕𑀢 𑀧𑀸𑀡𑀸 𑀳𑁄𑀫 𑀛𑀢𑁆𑀯𑀸’𑀜𑁆𑀜𑀫𑀜𑁆𑀜𑀁,

𑀭𑀼𑀥𑀺𑀭𑀯𑀳 𑀯𑀺𑀓𑀺𑀡𑁆𑀡𑁄 𑀅𑀲𑁆𑀲 𑀪𑀼𑀫𑀺𑀧𑁆𑀧𑀤𑁂𑀲𑁄

𑀧𑀲𑀫𑀺 𑀤𑀳𑀦 𑀤𑀺𑀢𑁆𑀢𑀁 𑀅𑀫𑁆𑀩𑀼𑀤𑁂𑀦𑁂𑀯 𑀢𑀁 𑀢𑁆𑀯𑀁;

𑁫𑁮𑁭.

𑀫𑀫 𑀪𑀕𑀯! 𑀧𑀼𑀭𑀸𑀫𑁂 𑀤𑀺𑀝𑁆𑀞𑀧𑀼𑀩𑁆𑀩𑀁 𑀢𑀯𑁂𑀢𑀁

𑀭𑀼𑀘𑀺𑀭 𑀲𑀺𑀭𑀺𑀲𑀭𑀻𑀭𑀁 𑀭𑀁𑀲𑀺𑀚𑀸𑀮𑀸’𑀪𑀺𑀓𑀺𑀡𑁆𑀡𑀁,

𑀅𑀧𑀺 𑀲𑀼𑀫𑀥𑀼𑀭 𑀥𑀫𑁆𑀫𑀁 𑀤𑁂𑀲𑀬𑀦𑁆𑀢𑁂 𑀲𑀼𑀭𑀸𑀦𑀁

𑀤𑀲𑀩𑀮 𑀲𑀼𑀢𑀧𑀼𑀩𑁆𑀩𑀁 𑀆𑀦𑀼𑀪𑀸𑀯𑀜𑁆𑀘 𑀢𑀼𑀬𑁆𑀳𑀁;

𑁫𑁮𑁮.

𑀅𑀳𑀫𑀲𑀫 𑀧𑀼𑀭𑁂 𑀢𑁂 𑀯𑀺𑀲𑁆𑀲𑀼𑀢𑁄𑀬𑁂𑀯 𑀤𑀸𑀲𑁄

𑀬𑀤𑀺 𑀫𑀦𑀲𑀺 𑀤𑀬𑀸 𑀢𑁂 𑀳𑁄𑀢𑀺 𑀤𑀸𑀲𑁂 𑀧𑀼𑀦𑀸’𑀧𑀺,

𑀧𑀯𑀭 𑀭𑀢𑀦𑀤𑀻𑀧𑁂 𑀳𑁄𑀢𑀺 𑀓𑀴𑁆𑀬𑀸𑀡𑀺𑀕𑀗𑁆𑀕𑀸

𑀫𑀫 𑀯𑀲𑀢𑀺 𑀢𑀳𑀺𑀁 𑀢𑀁 𑀤𑀝𑁆𑀞𑀼𑀓𑀸𑀫𑁄’𑀪𑀺𑀬𑀸𑀘𑁂;

𑁫𑁮𑁯. ¶

𑀇𑀢𑀺 𑀬𑀢𑀺𑀧𑀢𑀺 𑀢𑀲𑁆𑀲𑀸’𑀭𑀸𑀥𑀦𑀁 𑀧𑀕𑁆𑀕𑀳𑁂𑀢𑁆𑀯𑀸

𑀲𑀓 𑀧𑀭𑀺𑀘𑀺𑀢 𑀪𑀼𑀫𑁆𑀬𑀸 𑀘𑁂𑀢𑀺𑀬𑀢𑁆𑀣𑀁 𑀯𑀺𑀥𑀸𑀬,

𑀫𑀡𑀺𑀫𑀬 𑀧𑀭𑀺𑀪𑀼𑀢𑁆𑀢𑀁 𑀆𑀲𑀦𑀁 𑀘𑀸’𑀧𑀺 𑀢𑁂𑀲𑀁

𑀲 𑀲𑀼𑀫𑀦 𑀢𑀭𑀼 𑀭𑀸𑀚𑀁 𑀧𑀽𑀚𑀦𑀢𑁆𑀣𑀁 𑀯𑀺𑀥𑀸𑀬;

𑁫𑁯𑁦.

𑀤𑀲𑀩𑀮 𑀧𑀭𑀺𑀪𑀼𑀢𑁆𑀢𑀁 𑀲𑀩𑁆𑀩𑀫𑁂𑀢𑀁 𑀪𑀼𑀚𑀗𑁆𑀕𑀸

𑀫𑀡𑀺𑀭𑀺𑀯 𑀭𑀼𑀘𑀻𑀤𑀁 𑀢𑁂 𑀥𑀸𑀢𑀼𑀬𑁄𑀬𑁂𑀯 𑀢𑀲𑁆𑀫𑀸,

𑀫𑀳𑀣 𑀦𑀫𑀣 𑀦𑀺𑀘𑁆𑀘𑀁 𑀫𑀁𑀯 𑀲𑀕𑁆𑀕𑀸’𑀧𑀯𑀕𑁆𑀕𑀁

𑀤𑀤𑀢𑀺 𑀇𑀢𑀺 𑀘 𑀯𑀢𑁆𑀯𑀸 𑀑𑀯𑀤𑀺𑀢𑁆𑀯𑀸𑀦 𑀲𑀢𑁆𑀣𑀸;

𑁫𑁯𑁧.

𑀦𑀪𑀢𑀮’𑀫𑀼’𑀧𑀕𑀦𑁆𑀢𑁆𑀯𑀸 𑀤𑁂𑀯𑀦𑀸𑀕𑁂 𑀫𑀳𑁂𑀦𑁆𑀢𑁂

𑀤𑀺𑀲𑀺 𑀤𑀺𑀲𑀺 𑀯𑀺𑀲𑀭𑀦𑁆𑀢𑁄 𑀦𑀻𑀮𑀧𑀻𑀢𑀸𑀤𑀺 𑀭𑀁𑀲𑀺,

𑀫𑀦 𑀦𑀬𑀦 𑀳𑀭𑀦𑁆𑀢𑁄 𑀚𑀦𑁆𑀢𑀼𑀦𑀁 𑀮𑁄𑀓𑀲𑀸𑀭𑁄

𑀅𑀕𑀫𑀺 𑀭𑀯𑀺’𑀯 𑀔𑀫𑁆𑀳𑀸 𑀚𑁂𑀢𑀦𑀸𑀫𑀁 𑀯𑀺𑀳𑀸𑀭𑀁;

𑁫𑁯𑁨.

𑀅𑀣 𑀫𑀦𑀼𑀚𑀫𑀭𑀸𑀦𑀁 𑀦𑀢𑁆𑀢𑀲𑀺𑀤𑁆𑀥𑀸𑀤𑀺𑀓𑀸𑀦𑀁

𑀲𑀢𑀢’𑀫𑀫𑀢 𑀥𑀫𑁆𑀫𑀁 𑀤𑁂𑀲𑀬𑀦𑁆𑀢𑁄 𑀨𑀡𑀻𑀦𑀁,

𑀯𑀦𑀪𑀯𑀦 𑀲𑀼𑀭𑀫𑁆𑀫𑁂 𑀫𑀗𑁆𑀓𑀼𑀮𑀯𑁆𑀳𑁂 𑀦𑀕𑀺𑀦𑁆𑀤𑁂

𑀅𑀓𑀭𑀺 𑀫𑀼𑀦𑀺 𑀦𑀺𑀯𑀸𑀲𑀁 𑀙𑀝𑁆𑀞𑀫𑁂 𑀳𑀸𑀬𑀦𑀫𑁆𑀳𑀺;

𑁫𑁯𑁩.

𑀲𑀼𑀭𑀧𑀼𑀭𑀼𑀧𑀯𑀦𑁂’𑀣𑁄 𑀧𑀸𑀭𑀺𑀚𑀸𑀢𑀲𑁆𑀲 𑀫𑀽𑀮𑁂

𑀅𑀭𑀼𑀡 𑀫𑀼𑀤𑀼𑀲𑀺𑀮𑀸𑀬𑀁 𑀪𑀸𑀲𑀫𑀸𑀦𑁄 𑀫𑀼𑀦𑀺𑀦𑁆𑀤𑁄

𑀲𑀼𑀦𑀺𑀧𑀼𑀡’𑀫𑀪𑀺𑀥𑀫𑁆𑀫𑀁 𑀤𑁂𑀲𑀬𑀦𑁆𑀢𑁄 𑀲𑀼𑀭𑀸𑀦𑀁

𑀅𑀓𑀭𑀺 𑀯𑀭𑀦𑀺𑀯𑀸𑀲𑀁 𑀲𑀢𑁆𑀢𑀫𑁂 𑀢𑀢𑁆𑀣 𑀯𑀲𑁆𑀲𑁂;

𑁫𑁯𑁪.

𑀅𑀣 𑀲𑀼𑀔𑀤 𑀫𑀼𑀦𑀺𑀦𑁆𑀤𑁄 𑀚𑁂𑀢𑀦𑀸𑀫𑁂 𑀯𑀺𑀳𑀸𑀭𑁂

𑀅𑀯𑀲𑀺 𑀯𑀺𑀫𑀮𑀧𑀜𑁆𑀜𑁄 𑀅𑀝𑁆𑀞𑀫𑁂 𑀲𑀸𑀭𑀤𑀲𑁆𑀫𑀺𑀁,

𑀅𑀚𑀭’𑀫𑀫𑀭 𑀲𑀦𑁆𑀢𑀺𑀁 𑀨𑀲𑀫𑀸𑀦𑁄 𑀧𑀭𑁂𑀲𑀁

𑀯𑀺𑀯𑀺𑀥 𑀦𑀬 𑀯𑀺𑀘𑀺𑀢𑁆𑀢𑀁 𑀤𑁂𑀲𑀦𑀁 𑀤𑁂𑀲𑀬𑀦𑁆𑀢𑁄;

𑀇𑀢𑀺 𑀮𑀗𑁆𑀓𑀸𑀬 𑀤𑀼𑀢𑀺𑀬𑀸𑀕𑀫𑀦𑀁.

𑁫𑁯𑁫.

𑀏𑀯𑀁 𑀚𑀺𑀦𑁄 𑀚𑁂𑀢𑀯𑀦𑁂 𑀯𑀲𑀦𑁆𑀢𑁄

𑀦𑀻𑀲𑁆𑀲𑀸𑀬 𑀲𑀸𑀯𑀢𑁆𑀣𑀺𑀧𑀼𑀭𑀁 𑀯𑀺𑀳𑀸𑀲𑀺,

𑀲𑀸 𑀓𑀺𑀤𑀺𑀲𑀻 𑀆𑀲𑀺 𑀧𑀼𑀭𑀻 𑀢𑀤𑀸𑀦𑀻

𑀢𑀁 𑀓𑀻𑀤𑀺𑀲𑀁 𑀚𑁂𑀢𑀯𑀦𑀁 𑀯𑀺𑀳𑀸𑀭𑀁;

𑁫𑁯𑁬. ¶

𑀪𑀽𑀫𑀗𑁆𑀕𑀦𑀸𑀬𑀸𑀳𑀺𑀢 𑀉𑀢𑁆𑀢𑀫𑀗𑁆𑀕𑁂

𑀪𑀸𑀲𑀦𑁆𑀢 𑀦𑀸𑀦𑀸𑀭𑀢𑀦𑀸𑀪𑀺𑀭𑀸𑀫𑀸,

𑀯𑀺𑀲𑀸𑀮𑀫𑁄𑀮𑀻𑀯 𑀯𑀺𑀲𑀸𑀮𑀪𑁄𑀕𑀸

𑀲𑀸 𑀚𑀫𑁆𑀩𑀼𑀤𑀻𑀧𑀫𑁆𑀳𑀻 𑀩𑀪𑀼𑀯 𑀭𑀫𑁆𑀫𑀸;

𑁫𑁯𑁭.

𑀲𑀺𑀭𑀻𑀦𑀺𑀓𑁂𑀢𑁂 𑀲𑀺𑀭𑀺𑀫𑀸𑀯𑀳𑀦𑁆𑀢𑀻

𑀯𑀺𑀭𑀸𑀚𑀢𑁂 𑀬𑀸 𑀯𑀲𑀼𑀥𑀸 𑀢𑀮𑀲𑁆𑀫𑀺𑀁,

𑀲𑀸 𑀤𑁂𑀯𑀭𑀸𑀚𑀲𑁆𑀲’𑀫𑀭𑀸𑀯𑀢𑀻’𑀯

𑀭𑀜𑁆𑀜𑁄 𑀓𑀼𑀯𑁂𑀭𑀲𑁆𑀲’𑀮𑀓𑀸𑀯 𑀭𑀫𑁆𑀫𑀸;

𑁫𑁯𑁮.

𑀲𑀸 𑀧𑀼𑀜𑁆𑀜𑀧𑀜𑁆𑀜𑀸𑀮𑀼 𑀚𑀦𑀸𑀥𑀺𑀯𑀼𑀢𑁆𑀣𑀸

𑀲𑁄𑀡𑁆𑀡𑀸𑀤𑀺 𑀧𑀼𑀡𑁆𑀡𑀸𑀧𑀦𑀸𑀓𑀺𑀡𑁆𑀡𑀯𑀻𑀣𑀻,

𑀉𑀢𑁆𑀢𑀼𑀗𑁆𑀕 𑀫𑀸𑀢𑀗𑁆𑀕 𑀢𑀼𑀭𑀗𑁆𑀕 𑀭𑀗𑁆𑀕𑀸

𑀲𑀸 𑀭𑀸𑀚𑀢𑁂 𑀓𑀜𑁆𑀘𑀦 𑀫𑀦𑁆𑀤𑀺𑀭𑀸𑀮𑀻;

𑁫𑁯𑁯.

𑀭𑀭𑀸𑀚 𑀲𑀸 𑀪𑀸𑀲𑀼𑀭 𑀭𑀸𑀚𑀧𑀼𑀢𑁆𑀢𑀸

𑀧𑀼𑀜𑁆𑀜𑀗𑁆𑀕𑀦𑀸𑀮𑀸𑀲 𑀯𑀺𑀮𑀸𑀲𑀬𑀦𑁆𑀢𑀻,

𑀯𑁂𑀤𑀗𑁆𑀕𑀧𑀸𑀭𑀗𑁆𑀕𑀢 𑀯𑀺𑀧𑁆𑀧𑀘𑀸𑀭𑀸

𑀤𑁆𑀯𑀺𑀧𑀜𑁆𑀘 𑀲𑀤𑁆𑀤𑁂𑀳𑀺 𑀘 𑀦𑀺𑀘𑁆𑀘𑀖𑁄𑀲𑀸;

𑁬𑁦𑁦.

𑀅𑀦𑁂𑀓𑀲𑀺𑀧𑁆𑀧𑀻 𑀲𑀢 𑀲𑀫𑁆𑀧𑀓𑀺𑀡𑁆𑀡𑀸

𑀦𑀸𑀦𑀸𑀤𑀺𑀲𑀸𑀳𑀸’𑀕𑀢 𑀲𑀢𑁆𑀣𑀯𑀸𑀳𑀸,

𑀧𑀳𑀼𑀢𑀔𑀻𑀡𑀸𑀲𑀯𑀧𑀸𑀤𑀧𑀽𑀢𑀸

𑀩𑀪𑀸𑀲 𑀲𑀸 𑀫𑀗𑁆𑀕𑀮 𑀫𑀦𑁆𑀤𑀺𑀭𑀁’𑀯;

𑁬𑁦𑁧.

𑀪𑀯𑀦𑁆𑀢𑀭𑁂 𑀬𑁄 𑀘𑀭𑀺𑀬𑀁 𑀘𑀭𑀦𑁆𑀢𑁄

𑀲𑀼𑀯𑁄’𑀧𑀦𑀺𑀲𑁆𑀲𑀸𑀬 𑀯𑀲𑀁 𑀕𑀼𑀡𑁂𑀦,

𑀬𑀜𑁆𑀜𑀗𑁆𑀕𑀲𑀸𑀔𑀺𑀁 𑀫𑀢𑀲𑀻𑀦𑀧𑀢𑁆𑀢𑀁

𑀅𑀓𑀸 𑀲𑀫𑀺𑀤𑁆𑀥𑀁 𑀨𑀮𑀧𑀮𑁆𑀮𑀯𑁂𑀳𑀺;

𑁬𑁦𑁨.

𑀇𑀤𑀸𑀦𑀺 𑀧𑀢𑁆𑀯𑀸𑀦 𑀪𑀯𑀲𑁆𑀲 𑀅𑀦𑁆𑀢𑀁

𑀦𑀺𑀲𑁆𑀲𑀸𑀬 𑀬𑀁 𑀲𑁄 𑀯𑀲𑀢𑁂 𑀫𑀼𑀦𑀺𑀦𑁆𑀤𑁄,

𑀢𑀲𑁆𑀲𑀸 𑀕𑀼𑀡𑀁 𑀓𑁄 𑀳𑀺 𑀅𑀲𑁂𑀲𑀬𑀺𑀢𑁆𑀯𑀸

𑀓𑀣𑁂𑀢𑀺 𑀲𑀸 𑀯𑀲𑁆𑀲𑀽’𑀧𑀫𑀸𑀬 𑀢𑀲𑁆𑀲𑀸;

𑁬𑁦𑁩. ¶

𑀢𑀲𑁆𑀲𑁄𑀧𑀓𑀝𑁆𑀞𑁂 𑀭𑀢𑀦𑀁𑀯’𑀦𑀕𑁆𑀖𑀁

𑀫𑀦𑁄𑀳𑀭𑁄 𑀉𑀢𑁆𑀢𑀫𑀲𑀢𑁆𑀢𑀲𑁂𑀯𑀺,

𑀚𑀦𑀸𑀦𑀫𑀸𑀓𑀔𑀺𑀗𑀢𑀤𑁄 𑀯𑀺𑀳𑀸𑀭𑁄

𑀩𑀪𑀼𑀯 𑀚𑁂𑀢𑀸𑀤𑀺 𑀯𑀦𑀯𑁆𑀳𑀬𑁂𑀦;

𑁬𑁦𑁪.

𑀲𑀫𑀨𑀼𑀮𑁆𑀮 𑀧𑀼𑀧𑁆𑀨𑀭𑀲 𑀫𑁄𑀤𑀺𑀢 𑀙𑀧𑁆𑀧𑀤𑀸𑀮𑀻

𑀛𑀗𑁆𑀓𑀸𑀭 𑀦𑀸𑀤 𑀧𑀭𑀺𑀯𑀸𑀤𑀺𑀢 𑀢𑀦𑁆𑀢𑀺𑀦𑀸𑀤𑀸,

𑀲𑀫𑁆𑀫𑀢𑁆𑀢’𑀦𑀦𑁆𑀢 𑀤𑀺𑀚 𑀓𑀼𑀚𑀺𑀢 𑀕𑀻𑀢𑀯𑀦𑁆𑀢𑀸

𑀢𑀺𑀝𑁆𑀞𑀦𑁆𑀢𑀺 𑀬𑀢𑁆𑀣 𑀢𑀭𑀯𑁄 𑀦𑀝𑀓𑀸𑀯 𑀙𑁂𑀓𑀸;

𑁬𑁦𑁫.

𑀔𑀻𑀭𑀡𑁆𑀡𑀯𑀸𑀳𑀭𑀺𑀬 𑀥𑁄𑀯𑀺𑀬 𑀔𑀻𑀭𑀦𑀻𑀭𑀸

𑀲𑁄𑀲𑁂𑀢𑁆𑀯 𑀲𑀚𑁆𑀛𑀼𑀫𑀮𑀬𑁂 𑀲𑀲𑀺𑀓𑀦𑁆𑀢𑀺 𑀫𑀲𑁆𑀲𑀁

𑀬𑀢𑁆𑀣𑁄𑀓𑀺𑀭𑀺𑀢𑁆𑀯 𑀢𑀦𑀺𑀢𑀸 𑀯𑀺𑀬 𑀯𑀸𑀮𑀼𑀓𑀸𑀬𑁄

𑀲𑀸 𑀫𑀸𑀮𑀓𑀸𑀯𑀮𑀺 𑀩𑀪𑀸𑀲 𑀧𑀬𑁄𑀤𑀥𑀺’𑀯;

𑁬𑁦𑁬.

𑀯𑀺𑀚𑁆𑀚𑁄𑀢𑀫𑀸𑀦 𑀭𑀢𑀦𑀧𑁆𑀧𑀫𑀼𑀔𑀸𑀦𑀦𑀫𑁆𑀳𑀺

𑀲𑁄𑀧𑀸𑀦 𑀫𑀸𑀮 𑀧𑀤𑀕𑀡𑁆𑀞𑀺𑀤𑀼𑀚𑁂𑀳𑀺 𑀳𑀸𑀲𑀁,

𑀓𑀢𑁆𑀯𑁂𑀯 𑀤𑁂𑀯𑀪𑀯𑀦𑀸𑀦𑀫𑀳𑀁 𑀯𑀺𑀭𑀸𑀕

𑀯𑀦𑁆𑀢𑀻’𑀢𑀺 𑀕𑀦𑁆𑀥𑀓𑀼𑀝𑀺 𑀬𑀢𑁆𑀣 𑀧𑀳𑀸𑀲𑀬𑀺𑀢𑁆𑀣;

𑁬𑁦𑁭.

𑀓𑀫𑁆𑀫𑀸𑀭 𑀕𑀕𑁆𑀕𑀭𑀺 𑀫𑀼𑀔𑁄’𑀧𑀭𑀺 𑀲𑀫𑁆𑀧𑀧𑀼𑀡𑁆𑀡𑀸

𑀅𑀗𑁆𑀕𑀸𑀭 𑀓𑀦𑁆𑀢𑀭 𑀯𑀺𑀦𑀺𑀕𑁆𑀕𑀢 𑀚𑀸𑀮𑀓𑀸𑀯,

𑀲𑀫𑁆𑀩𑀼𑀤𑁆𑀥𑀤𑁂𑀳 𑀧𑀭𑀺𑀦𑀺𑀕𑁆𑀕𑀢 𑀭𑀁𑀲𑀺𑀫𑀸𑀮𑀸

𑀤𑀸𑀬𑀕𑁆𑀕 𑀦𑀺𑀕𑁆𑀕𑀢 𑀓𑀭𑀸 𑀯𑀺𑀲𑀭𑀦𑁆𑀢𑀺 𑀬𑀲𑁆𑀫𑀺𑀁;

𑁬𑁦𑁮.

𑀢𑀼𑀫𑁆𑀳𑁂 𑀲𑀭𑀸𑀕 𑀚𑀦𑀲𑀗𑁆𑀕𑀫𑀢𑁄’𑀢𑀺 𑀕𑀻𑀢𑀸

𑀥𑀜𑁆𑀜𑀸 𑀫𑀬𑀦𑁆𑀢𑀻 𑀯𑀺𑀫𑀮𑁂𑀳𑀻 𑀲𑀫𑀗𑁆𑀕𑀺𑀢𑀢𑁆𑀢𑀸,

𑀢𑀼𑀝𑁆𑀞𑀸𑀯 𑀳𑀸𑀲 𑀫𑀓𑀭𑀸 𑀲𑀼𑀭𑀧𑀸𑀤𑀧𑀸𑀦𑀁

𑀭𑀸𑀚𑁂𑀦𑁆𑀢𑀺 𑀬𑀢𑁆𑀣 𑀬𑀢𑀺𑀦𑀺𑀲𑁆𑀲𑀺𑀢 𑀧𑀸𑀤𑀧𑀺𑀦𑁆𑀤𑀸;

𑁬𑁦𑁯.

𑀧𑀼𑀦𑁆𑀦𑀸𑀕 𑀦𑀻𑀧 𑀯𑀓𑀼𑀮’𑀚𑁆𑀚𑀼𑀦 𑀭𑀸𑀚𑀭𑀼𑀓𑁆𑀔

𑀦𑀸𑀕𑀸’𑀕 𑀘𑀽𑀢 𑀬𑀼𑀕𑀧𑀢𑁆𑀢𑀓 𑀘𑀫𑁆𑀧𑀓𑀸𑀦𑀁,

𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡 𑀥𑀭𑀡𑀻 𑀭𑀢𑀦𑁂𑀳𑀺 𑀦𑀸𑀦𑀸

𑀧𑀘𑁆𑀙𑀦𑁆𑀦 𑀤𑀺𑀩𑁆𑀩𑀪𑀯𑀦𑀁 𑀯𑀺𑀬 𑀪𑀸𑀢𑀺 𑀬𑀢𑁆𑀣;

𑁬𑁧𑁦. ¶

𑀩𑁆𑀭𑀳𑁆𑀫𑀸𑀲𑀼𑀭𑀸𑀲𑀼𑀭 𑀦𑀭𑁄𑀭𑀕 𑀮𑀺𑀗𑁆𑀕𑀺𑀲𑀺𑀤𑁆𑀥

𑀯𑀺𑀚𑁆𑀚𑀸𑀥𑀭𑀸𑀤𑀺 𑀚𑀦𑀢𑀸 𑀓𑀢𑀯𑀦𑁆𑀤𑀦𑁂𑀳𑀺,

𑀢𑁂𑀳𑁂𑀯 𑀖𑀼𑀝𑁆𑀞 𑀣𑀼𑀢𑀺𑀫𑀗𑁆𑀕𑀮 𑀕𑀻𑀢𑀺𑀓𑀸𑀳𑀺

𑀬𑀢𑁆𑀣𑁄𑀧𑀕𑀸𑀦 𑀫𑀦𑀦𑁂𑀢𑁆𑀢𑀕𑀡𑀸 𑀫𑀼𑀤𑁂𑀦𑁆𑀢𑀺;

𑁬𑁧𑁧.

𑀦𑀺𑀕𑁆𑀖𑁄𑀲𑀺𑀢𑀸𑀫𑀮 𑀲𑀼𑀲𑀻𑀢𑀮 𑀦𑀺𑀚𑁆𑀛𑀭𑁂𑀳𑀺

𑀲𑀫𑁆𑀫𑀢𑁆𑀢 𑀦𑁂𑀓𑀤𑀺𑀚 𑀖𑀼𑀝𑁆𑀞 𑀚𑀮𑀸𑀲𑀬𑁂𑀳𑀺,

𑀓𑀺𑀜𑁆𑀚𑀓𑁆𑀔 𑀧𑀢𑁆𑀢 𑀧𑀭𑀺𑀓𑀺𑀡𑁆𑀡 𑀲𑀺𑀮𑀸𑀢𑀮𑁂𑀳𑀺

𑀢𑀼𑀲𑁆𑀲𑀦𑁆𑀢𑀺 𑀬𑀢𑁆𑀣 𑀲𑀢𑀢𑀁 𑀬𑀢𑀻𑀦𑀁 𑀫𑀦𑀸𑀢𑀺;

𑁬𑁧𑁨.

𑀬𑁄 𑀦𑁂𑀓 𑀓𑀧𑁆𑀧 𑀲𑀢 𑀲𑀜𑁆𑀘𑀺𑀢 𑀧𑀼𑀜𑁆𑀜𑀭𑀸𑀲𑀺

𑀳𑀺𑀢𑁆𑀯𑀸’𑀫𑀺𑀢𑀁 𑀓𑀧𑀺𑀮𑀯𑀢𑁆𑀣𑀼 𑀫𑀳𑀸𑀲𑀺𑀭𑀺𑀫𑁆𑀧𑀺,

𑀆𑀕𑀫𑁆𑀫 𑀬𑀢𑁆𑀣 𑀦𑀻𑀭𑀢𑁄 𑀲𑀼𑀕𑀢𑁄 𑀫𑀳𑁂𑀲𑀺

𑀓𑁄 𑀢𑀢𑁆𑀣 𑀪𑀼𑀢𑀺 𑀫𑀢𑀼𑀮𑀁 𑀓𑀣𑀺𑀓𑁄 𑀓𑀣𑁂𑀢𑀺;

𑁬𑁧𑁩.

𑀢𑀲𑁆𑀫𑀺𑀁 𑀚𑀺𑀦𑁄 𑀯𑀲𑀢𑀺 𑀚𑁂𑀢𑀯𑀦𑁂 𑀯𑀺𑀳𑀸𑀭𑁂

𑀇𑀦𑁆𑀤𑁄 𑀬𑀣𑀸 𑀭𑀼𑀘𑀺𑀭 𑀦𑀦𑁆𑀤𑀦 𑀓𑀸𑀦𑀦𑀫𑁆𑀳𑀺,

𑀩𑁆𑀭𑀳𑁆𑀫𑀸’𑀯 𑀩𑁆𑀭𑀳𑁆𑀫𑀪𑀯𑀦𑁂 𑀲𑀧𑀺𑀢𑀸𑀫𑀳𑁂𑀳𑀺

𑀢𑀸𑀭𑀸𑀯𑀮𑀻 𑀧𑀭𑀺𑀯𑀼𑀢𑁄 𑀕𑀕𑀦𑁂’𑀯 𑀯𑀦𑁆𑀤𑁄;

𑁬𑁧𑁪.

𑀢𑀤𑀸𑀕𑀫𑁆𑀫 𑀫𑀳𑀸𑀦𑀸𑀕𑁄 𑀫𑀡𑀺 𑀅𑀓𑁆𑀔𑀺𑀓𑀦𑀸𑀫𑀓𑁄,

𑀮𑀗𑁆𑀓𑀸𑀢𑁄 𑀚𑀺𑀦𑀧𑀸𑀤𑀲𑁆𑀫𑀺𑀁 𑀨𑀡𑀺𑀁 𑀧𑀘𑁆𑀘𑁂𑀤’𑀫𑀩𑁆𑀭𑀼𑀯𑀺;

𑁬𑁧𑁫.

𑀲𑀫𑁆𑀩𑀼𑀤𑁆𑀥𑀸 𑀥𑀻𑀭 𑀮𑁄𑀓𑀲𑁆𑀫𑀺𑀁 𑀮𑁄𑀓𑀲𑁆𑀲𑀢𑁆𑀣𑀸𑀪𑀺𑀯𑀼𑀤𑁆𑀥𑀺𑀬𑀸,

𑀚𑀸𑀬𑀦𑁆𑀢𑀺 𑀲𑀸𑀫𑀺 𑀢𑀼𑀫𑁆𑀳𑀸𑀓𑀁 𑀤𑀬𑀸𑀬𑀦𑁆𑀢𑁄’𑀕𑀥𑀸 𑀫𑀬𑀁;

𑁬𑁧𑁬.

𑀢𑁂𑀦 𑀫𑁂 𑀤𑀸𑀲𑀪𑀼𑀢𑀲𑁆𑀲 𑀲𑀁𑀲𑀸𑀭𑀦𑁆𑀤𑀼𑀖𑀭𑀸 𑀣𑀺𑀭𑀸,

𑀫𑀼𑀢𑁆𑀢𑀺𑀁 𑀬𑀤𑀺𑀘𑁆𑀙𑀲𑁂 𑀫𑀬𑁆𑀳𑀁 𑀕𑀳𑀡𑀻𑀬𑀁 𑀦𑀺𑀫𑀦𑁆𑀢𑀡𑀁;

𑁬𑁧𑁭.

𑀲𑀼𑀢𑁆𑀯𑀸𑀦 𑀢𑀁 𑀫𑀳𑀸𑀦𑀸𑀕𑁄 𑀫𑀳𑀸𑀦𑀸𑀕 𑀦𑀺𑀫𑀦𑁆𑀢𑀡𑀁,

𑀧𑀝𑀺𑀕𑁆𑀕𑀳𑁂𑀲𑀺 𑀢𑀁 𑀢𑀼𑀡𑁆𑀳𑀻𑀪𑀸𑀯𑁂𑀦 𑀓𑀭𑀼𑀡𑀸𑀬 𑀲𑁄;

𑁬𑁧𑁮.

𑀜𑀢𑁆𑀯𑀸 𑀢𑀁 𑀲𑀼𑀫𑀦𑁄 𑀦𑀸𑀕𑁄 𑀮𑀳𑀼𑀫𑀸𑀕𑀫𑁆𑀫 𑀲𑀻𑀳𑀮𑀁,

𑀓𑀴𑁆𑀬𑀸𑀡𑀸𑀧𑀕𑀧𑀲𑁆𑀲𑀫𑁆𑀳𑀺 𑀫𑀦𑁄𑀦𑀦𑁆𑀤𑀦 𑀪𑀼𑀢𑀮𑁂;

𑁬𑁧𑁯.

𑀲𑀚𑁆𑀛𑀼 𑀓𑀫𑁆𑀩𑀼𑀫𑀡𑀺 𑀫𑀼𑀢𑁆𑀢 𑀧𑀯𑀸𑀮 𑀯𑀚𑀺𑀭𑀸𑀫𑀬𑁂,

𑀯𑀳𑀸𑀭𑀳𑁂 𑀫𑀳𑀸𑀣𑀽𑀦𑁂 𑀖𑀝𑀓𑀸𑀤𑀺𑀁 𑀦𑀺𑀥𑀸𑀧𑀺𑀬;

𑁬𑁨𑁦. ¶

𑀤𑀢𑁆𑀯𑀸 𑀢𑀼𑀮𑀸𑀤𑀬𑁄 𑀲𑁂𑀲 𑀫𑀦𑁆𑀤𑀺𑀭𑀗𑁆𑀕𑁂 𑀢𑀣𑁂𑀯 𑀘,

𑀯𑀺𑀝𑀗𑁆𑀓 𑀯𑁆𑀬𑀸𑀮 𑀲𑀻𑀳𑀸𑀤𑀺 𑀧𑀦𑁆𑀢𑀺𑀬𑁄’𑀧𑀺 𑀢𑀣𑁂𑀯𑀳𑀺;

𑁬𑁨𑁧.

𑀲𑀸𑀢𑀓𑀼𑀫𑁆𑀳𑀫𑀬𑀸’𑀦𑁂𑀓 𑀘𑀺𑀢𑁆𑀢𑁂𑀳𑀺 𑀲𑀸𑀥𑀼 𑀘𑀺𑀢𑁆𑀢𑀺𑀢𑀁,

𑀦𑀺𑀫𑁆𑀫𑀸𑀬 𑀕𑁄𑀧𑀸𑀦𑀲𑀺𑀬𑁄 𑀧𑀓𑁆𑀔𑀧𑀸𑀲𑁂 𑀘 𑀓𑀡𑁆𑀡𑀺𑀓𑀁;

𑁬𑁨𑁨.

𑀲𑀺𑀗𑁆𑀕𑀺 𑀦𑀺𑀓𑁆𑀔𑁂𑀦 𑀲𑀺𑀗𑁆𑀕𑀜𑁆𑀘 𑀙𑀤𑀦𑀺𑀦𑁆𑀤𑀫𑀡𑀻𑀳𑀺 𑀘,

𑀲𑁄𑀡𑁆𑀡 𑀓𑀺𑀗𑁆𑀓𑀺𑀡𑀺 𑀫𑀸𑀮𑀸𑀬𑁄 𑀓𑀡𑁆𑀡𑀫𑀸𑀮𑀸 𑀘 𑀫𑀸𑀧𑀺𑀬;

𑁬𑁨𑁩.

𑀘𑀺𑀢𑁆𑀢𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀫𑀼𑀢𑁆𑀢𑁄𑀮𑀫𑁆𑀩𑁂 𑀢𑀳𑀺𑀁 𑀢𑀳𑀺𑀁,

𑀓𑀢𑁆𑀯𑀸𑀦 𑀕𑀦𑁆𑀥𑀤𑀸𑀫𑁂𑀳𑀺 𑀧𑀼𑀧𑁆𑀨𑀤𑀸𑀫𑁂𑀳𑀺 𑀲𑀗𑁆𑀓𑀼𑀮𑀁;

𑁬𑁨𑁪.

𑀇𑀦𑁆𑀤𑀦𑀻𑀮𑀫𑀬𑀁 𑀪𑀼𑀫𑀺 𑀫𑀚𑁆𑀛𑁂’𑀦𑀕𑁆𑀖 𑀫𑀳𑀸𑀲𑀦𑀁,

𑀫𑀸𑀧𑁂𑀲𑀺 𑀧𑀭𑀺𑀢𑁄 𑀲𑁂𑀲 𑀪𑀺𑀓𑁆𑀔𑀽𑀦𑀜𑁆𑀘 𑀲𑀼𑀪𑀸𑀲𑀦𑁂;

𑁬𑁨𑁫.

𑀭𑀢𑀦𑁂𑀳𑁂’𑀯𑀸𑀧𑀲𑁆𑀲𑀬𑁂 𑀯𑁂𑀤𑀺𑀓𑀸 𑀏𑀴𑀺𑀓𑀸𑀫𑀬𑁂,

𑀫𑀼𑀢𑁆𑀢𑀸 𑀯𑀸𑀮𑀼𑀓 𑀲𑀗𑁆𑀓𑀺𑀡𑁆𑀡𑀁 𑀫𑀸𑀮𑀓𑀜𑁆𑀘 𑀫𑀦𑁄𑀭𑀫𑀁;

𑁬𑁨𑁬.

𑀲𑀢𑁆𑀢 𑀭𑀢𑀦 𑀲𑀫𑁆𑀪𑀼𑀢 𑀢𑁄𑀭𑀡𑀽’𑀧𑀭𑀺 𑀢𑁄𑀭𑀡𑁂,

𑀲𑀦𑁆𑀢𑀻𑀭 𑀓𑀼𑀲𑀼𑀫𑀸’𑀓𑀺𑀡𑁆𑀡 𑀳𑀸𑀝𑀓𑀸𑀤𑀺 𑀖𑀝𑀸𑀓𑀼𑀮𑀁;

𑁬𑁨𑁭.

𑀦𑁂𑀓 𑀭𑀸𑀕𑀤𑁆𑀥𑀚𑀸𑀓𑀺𑀡𑁆𑀡 𑀯𑀺𑀢𑀸𑀦 𑀲𑀫𑀮𑀗𑁆𑀓𑀢𑀁,

𑀤𑀻𑀧 𑀥𑀽𑀧𑀸𑀮𑀺 𑀲𑀗𑁆𑀓𑀺𑀡𑁆𑀡 𑀕𑀦𑁆𑀥𑀧𑀼𑀧𑁆𑀨 𑀲𑀫𑀸𑀓𑀼𑀮𑀁;

𑁬𑁨𑁮.

𑀏𑀯𑀫𑀸𑀤𑀺𑀳𑀺 𑀦𑁂𑀓𑁂𑀳𑀺 𑀯𑀡𑁆𑀡𑁂𑀳𑀺 𑀲𑀫𑀮𑀗𑁆𑀓𑀢𑀁,

𑀫𑀸𑀧𑁂𑀢𑁆𑀯𑀸 𑀫𑀡𑁆𑀟𑀧𑀁 𑀲𑁂𑀝𑁆𑀞𑀁 𑀤𑁂𑀯𑀫𑀡𑁆𑀟𑀧 𑀲𑀦𑁆𑀢𑀺𑀪𑀁;

𑁬𑁨𑁯.

𑀲𑀻𑀢 𑀯𑀸𑀮𑀼𑀓 𑀲𑀜𑁆𑀙𑀦𑁆𑀦𑀁 𑀫𑀼𑀤𑀼 𑀧𑀸𑀤𑀧𑀝𑀢𑁆𑀣𑀢𑀁,

𑀫𑀸𑀧𑁂𑀢𑁆𑀯𑁂𑀯𑀁 𑀫𑀳𑀸𑀫𑀕𑁆𑀕𑀁 𑀲𑀼𑀭𑀜𑁆𑀚𑀲 𑀲𑀫𑀜𑁆𑀚𑀲𑀁;

𑁬𑁩𑁦.

𑀲𑀜𑁆𑀘𑀺𑀦𑀺𑀢𑁆𑀯𑀸𑀦 𑀢𑁂 𑀦𑀸𑀕𑀸 𑀔𑀚𑁆𑀚 𑀪𑁄𑀚𑁆𑀚 𑀨𑀮𑀸𑀨𑀮𑁂,

𑀤𑀺𑀩𑁆𑀩𑀦𑁆𑀦𑀧𑀸𑀦𑁂 𑀧𑀘𑀼𑀭𑁂 𑀧𑀝𑀺𑀫𑀕𑁆𑀕𑀁 𑀕𑀫𑀼𑀁 𑀢𑀤𑀸;

𑁬𑁩𑁧.

𑀢𑀢𑁄 𑀓𑀸𑀭𑀼𑀡𑀺𑀓𑁄 𑀦𑀸𑀣𑁄 𑀩𑁄𑀥𑀺𑀢𑁄 𑀅𑀝𑁆𑀞𑀫𑁂 𑀲𑀫𑁂,

𑀯𑁂𑀲𑀸𑀔 𑀧𑀼𑀡𑁆𑀡𑀫𑀸𑀲𑀺𑀫𑁆𑀳𑀺 𑀲𑀦𑁆𑀦𑀺𑀧𑀸𑀢𑀺𑀬 𑀲𑀸𑀯𑀓𑁂;

𑁬𑁩𑁨.

𑀏𑀣𑀚𑁆𑀚 𑀪𑀺𑀓𑁆𑀔𑀯𑁄 𑀮𑀗𑁆𑀓𑀁 𑀦𑀸𑀕𑀸𑀦𑀁’𑀦𑀼𑀕𑁆𑀕𑀳𑀸𑀬 𑀪𑁄,

𑀫𑀡𑀺𑀅𑀓𑁆𑀔𑀺𑀓𑁄 𑀦𑀺𑀫𑀦𑁆𑀢𑁂𑀲𑀺 𑀧𑀲𑀦𑁆𑀦𑁄 𑀩𑀼𑀤𑁆𑀥𑀲𑀸𑀲𑀦𑁂;

𑁬𑁩𑁩.

𑀲𑀼𑀢𑁆𑀯𑀸𑀦 𑀯𑀘𑀦𑀁 𑀢𑀲𑁆𑀲 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀺𑀭𑀻𑀫𑀢𑁄,

𑀅𑀲𑁆𑀲𑀯𑀸 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀧𑀘𑁆𑀘𑀲𑁆𑀲𑁄𑀲𑀼𑀁 𑀲𑀫𑀸𑀳𑀺𑀢𑀸;

𑁬𑁩𑁪. ¶

𑀲𑀸𑀭𑀺𑀧𑀼𑀢𑁆𑀢𑁄 𑀢𑀢𑁄 𑀣𑁂𑀭𑁄 𑀧𑀜𑁆𑀜𑀸𑀬’𑀕𑁆𑀕 𑀥𑀼𑀭𑀦𑁆𑀥𑀭𑁄,

𑀧𑀢𑁆𑀢𑀘𑀻𑀯𑀭𑀫𑀸’𑀤𑀸𑀬 𑀅𑀕𑀫𑀸 𑀚𑀺𑀦𑀼’𑀧𑀦𑁆𑀢𑀺𑀓𑀁;

𑁬𑁩𑁫.

𑀫𑁄𑀕𑁆𑀕𑀮𑁆𑀮𑀸𑀦𑁄 𑀫𑀳𑀸𑀣𑁂𑀭𑁄 𑀤𑀼𑀢𑀺𑀬𑁄 𑀅𑀕𑁆𑀕𑀲𑀸𑀯𑀓𑁄,

𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑁄𑀧𑀸𑀕 𑀚𑀺𑀦 𑀲𑀦𑁆𑀢𑀺𑀓𑀁;

𑁬𑁩𑁬.

𑀥𑀽𑀢𑀧𑀸𑀧𑁄 𑀥𑀼𑀢𑀗𑁆𑀕𑀕𑁆𑀕𑁄 𑀫𑀳𑀸𑀓𑀲𑁆𑀲𑀧 𑀦𑀸𑀫𑀓𑁄,

𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀆𑀕𑀫𑀸 𑀚𑀺𑀦𑀲𑀦𑁆𑀢𑀺𑀓𑀁;

𑁬𑁩𑁭.

𑀲𑀸𑀲𑀦𑁂 𑀯𑀺𑀦𑀬𑀜𑁆𑀜 𑀦𑀫𑀕𑁆𑀕𑁄’ 𑀧𑀸𑀮𑀺𑀯𑁆𑀳𑀬𑁄 𑀬𑀢,

𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀚𑀺𑀦𑀦𑁆𑀢𑀺𑀓𑀫𑀼’𑀧𑀸𑀕𑀫𑀺;

𑁬𑁩𑁮.

𑀤𑀺𑀩𑁆𑀩𑀘𑀓𑁆𑀔𑀽𑀦𑀫𑀕𑁆𑀕𑁄 𑀬𑁄 𑀭𑀼𑀤𑁆𑀥𑀧𑀸𑀧𑀸𑀭𑀺 𑀤𑀧𑁆𑀧𑀓𑁄,

𑀣𑁂𑀭𑁄’𑀦𑀼𑀭𑀼𑀤𑁆𑀥𑁄 𑀯𑀭𑀤𑁄 𑀲𑁄𑀧𑀸𑀕 𑀫𑀼𑀦𑀺𑀲𑀦𑁆𑀢𑀺𑀓𑀁;

𑁬𑁩𑁯.

𑀫𑀡𑀺𑀯 𑀓𑀸𑀫𑀤𑁄 𑀓𑀸𑀫𑀫𑀼’𑀧𑀯𑀸𑀦𑁄’𑀢𑀺 𑀯𑀺𑀲𑁆𑀲𑀼𑀢𑁄,

𑀜𑀸𑀡𑀻 𑀕𑀡𑀻 𑀤𑀓𑁆𑀔𑀺𑀡𑁂𑀬𑁆𑀬𑁄 𑀣𑁂𑀭𑁄𑀧𑀸𑀕 𑀚𑀺𑀦𑀦𑁆𑀢𑀺𑀓𑀁;

𑁬𑁪𑁦.

𑀩𑀓𑁆𑀓𑀼𑀮𑁄 𑀯𑀺𑀫𑀮𑁄 𑀲𑀻𑀮 𑀲𑀫𑀸𑀥𑀸𑀤𑀺 𑀕𑀼𑀡𑀸𑀓𑀭𑁄,

𑀆𑀕𑀢𑁄 𑀲𑀧𑀭𑀺𑀓𑁆𑀔𑀸𑀭𑁄 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀢𑀤𑀸;

𑁬𑁪𑁧.

𑀩𑀼𑀤𑁆𑀥𑀲𑀸𑀲𑀦 𑀥𑁄𑀭𑀬𑁆𑀳𑁄 𑀣𑁂𑀭𑁄 𑀅𑀗𑁆𑀕𑀼𑀮𑀺𑀫𑀸𑀮𑀓𑁄,

𑀲𑀳𑀸’𑀕𑀦𑁆𑀢𑀼𑀁 𑀫𑀼𑀦𑀺𑀦𑁆𑀤𑁂𑀦 𑀲𑀦𑁆𑀦𑀤𑁆𑀥𑁄 𑀲𑀳𑀲𑀸 𑀕𑀢𑁄;

𑁬𑁪𑁨.

𑀲𑀸𑀲𑀦𑁄𑀤𑀬 𑀲𑁂𑀮𑀕𑁆𑀕𑁂 𑀲𑀽𑀭𑀺𑀬𑁄 𑀯𑀺𑀬 𑀪𑀸𑀢𑀺 𑀬𑁄,

𑀲𑁄’𑀬𑀁 𑀭𑀸𑀳𑀼𑀮𑀣𑁂𑀭𑁄’𑀧𑀺 𑀮𑀳𑀼’𑀕𑀸 𑀧𑀺𑀢𑀼 𑀲𑀦𑁆𑀢𑀺𑀓𑀁;

𑁬𑁪𑁩.

𑀪𑀤𑁆𑀤𑀸𑀘𑀸𑀭𑁄 𑀪𑀤𑁆𑀤𑀺𑀬𑀯𑁆𑀳𑁄 𑀣𑁂𑀭𑁄 𑀪𑀤𑁆𑀤𑀖𑀝𑁄 𑀯𑀺𑀬,

𑀧𑀸𑀓𑀝𑁄 𑀪𑀼𑀯𑀦𑁂 𑀲𑁄’𑀧𑀺 𑀕𑀢𑁄 𑀲𑀫𑁆𑀩𑀼𑀤𑁆𑀥 𑀲𑀦𑁆𑀢𑀺𑀓𑀁;

𑁬𑁪𑁪.

𑀤𑁂𑀯𑀤𑁆𑀤𑀼𑀫𑁄’𑀯 𑀮𑁄𑀓𑀲𑁆𑀲 𑀬𑁄 𑀤𑀤𑀸𑀢𑀺’𑀘𑁆𑀙𑀺𑀢𑀺’𑀘𑁆𑀙𑀺𑀢𑀁,

𑀚𑀺𑀦𑁄𑀭𑀲𑁄𑀧𑀺 𑀲𑁂𑀮𑀯𑁆𑀳𑁄 𑀕𑀢𑁄 𑀲𑀫𑁆𑀩𑀼𑀤𑁆𑀥𑀲𑀦𑁆𑀢𑀺𑀓𑀁;

𑁬𑁪𑁫.

𑀬𑀸𑀫𑀺𑀦𑀻 𑀲𑀸𑀫𑀺𑀓𑁄’𑀯𑀸𑀢𑀺 𑀪𑀸𑀢𑀺 𑀬𑁄 𑀲𑀸𑀲𑀦𑀫𑁆𑀩𑀭𑁂,

𑀫𑀳𑀸𑀦𑀸𑀫 𑀫𑀳𑀸𑀣𑁂𑀭𑁄 𑀲𑁄𑀧𑀸𑀕 𑀫𑀼𑀦𑀺𑀲𑀦𑁆𑀢𑀺𑀓𑀁;

𑁬𑁪𑁬.

𑀫𑀦𑁄𑀲𑀺𑀮𑀸𑀢𑀮𑀕𑁆𑀕𑀫𑁆𑀳𑀺 𑀚𑀼𑀫𑁆𑀳𑀫𑀸𑀦𑁄’𑀯 𑀓𑁂𑀲𑀭𑀻,

𑀲𑀼𑀪𑀼𑀢𑀺𑀯𑁆𑀳 𑀫𑀳𑀸𑀣𑁂𑀭𑁄 𑀩𑀼𑀤𑁆𑀥𑀼𑀧𑀦𑁆𑀢𑀺𑀓 𑀫𑀸𑀕𑀢𑁄;

𑁬𑁪𑁭.

𑀩𑀼𑀤𑁆𑀥𑀲𑀸𑀲𑀦 𑀙𑀤𑁆𑀤𑀦𑁆𑀢 𑀲𑀭𑀲𑀻 𑀲𑀸𑀭𑀲𑁄 𑀯𑀺𑀬,

𑀯𑀺𑀲𑁆𑀲𑀼𑀢𑁄 𑀢𑀺𑀲𑁆𑀲𑀣𑁂𑀭𑁄’𑀧𑀺 𑀕𑀢𑁄 𑀪𑀺𑀓𑁆𑀔𑀼𑀲𑀫𑀸𑀕𑀫𑀁;

𑁬𑁪𑁮. ¶

𑀚𑀺𑀦𑀲𑀸𑀲𑀦 𑀲𑀫𑁆𑀨𑀼𑀮𑁆𑀮𑀲𑀭𑀲𑀻𑀭𑀼𑀳 𑀫𑀚𑁆𑀛𑀕𑁄,

𑀫𑀥𑀼𑀩𑁆𑀩𑀢 𑀦𑀺𑀪𑁄 𑀭𑀸𑀥𑀣𑁂𑀭𑁄’𑀧𑀺 𑀲𑀳𑀲𑀸 𑀕𑀢𑁄;

𑁬𑁪𑁯.

𑀪𑀕𑀼 𑀤𑀩𑁆𑀩𑁄𑀧’𑀲𑁂𑀦𑁄 𑀘 𑀓𑁄𑀡𑁆𑀟𑀜𑁆𑀜’𑀲𑁆𑀲𑀚𑀺 𑀲𑀻𑀯𑀮𑀺,

𑀏𑀢𑁂 𑀚𑀺𑀦𑀢𑁆𑀭𑀚𑀸 𑀣𑁂𑀭𑀸 𑀕𑀢𑀸𑀲𑀼𑀁 𑀫𑀼𑀦𑀺𑀲𑀦𑁆𑀢𑀺𑀓𑀁;

𑁬𑁫𑁦.

𑀓𑀼𑀫𑀸𑀭𑀓𑀲𑁆𑀲𑀧𑁄 𑀧𑀼𑀡𑁆𑀡𑁄𑀲𑁄𑀡𑁄𑀲𑁄𑀪𑀺𑀢 𑀭𑁂𑀯𑀢𑀸,

𑀣𑁂𑀭𑀸𑀧𑁂𑀢𑁂 𑀅𑀪𑀺𑀜𑁆𑀜𑀸𑀢𑀸 𑀕𑀢𑀸𑀲𑀼𑀁 𑀲𑀢𑁆𑀣𑀼𑀲𑀦𑁆𑀢𑀺𑀓𑀁;

𑁬𑁫𑁧.

𑀯𑀗𑁆𑀕𑀻𑀲𑁄 𑀲𑀸𑀕𑀢𑁄 𑀦𑀦𑁆𑀤𑁄 𑀪𑀸𑀭𑀤𑁆𑀯𑀸𑀚𑁄 𑀕𑀯𑀫𑁆𑀧𑀢𑀺,

𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀕𑀢𑀸𑀲𑀼𑀁 𑀚𑀺𑀦𑀲𑀦𑁆𑀢𑀺𑀓𑀁;

𑁬𑁫𑁨.

𑀏𑀯𑀫𑀸𑀤𑀺 𑀫𑀳𑀸𑀦𑀸𑀕𑀸 𑀧𑀜𑁆𑀘𑀲𑀢 𑀚𑀺𑀦𑁄𑀭𑀲𑀸,

𑀲𑀫𑀸𑀕𑀜𑁆𑀙𑀼𑀁 𑀲𑀳𑀸𑀕𑀦𑁆𑀢𑀼𑀁 𑀫𑀼𑀦𑀺𑀦𑀸 𑀮𑁄𑀓𑀲𑀸𑀫𑀺𑀦𑀁;

𑁬𑁫𑁩.

𑀢𑀢𑁄 𑀲𑁄 𑀚𑀕𑀤𑀸𑀦𑀦𑁆𑀤𑁄 𑀓𑀭𑀼𑀡𑀸𑀬𑀸𑀪𑀺𑀭𑀸𑀥𑀺𑀢𑁄,

𑀫𑁂𑀭𑀼𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑁄𑀯 𑀅𑀦𑁂𑀓𑀚𑁆𑀚𑀼𑀢𑀺 𑀯𑀺𑀚𑁆𑀚𑀼𑀬𑀸;

𑁬𑁫𑁪.

𑀦𑀺𑀯𑀸𑀲𑁂𑀢𑁆𑀯𑀸 𑀲𑀼𑀤𑁆𑀥𑀭𑀁𑀲𑀺 𑀯𑀺𑀲𑀭𑀦𑁆𑀢𑀭𑀯𑀸𑀲𑀓𑀁,

𑀢𑀲𑁆𑀲𑀽𑀧𑀭𑀺 𑀚𑀺𑀦𑁄 𑀭𑀢𑁆𑀢𑀁 𑀩𑀦𑁆𑀥𑀺𑀢𑁆𑀯𑀸 𑀓𑀸𑀬𑀩𑀦𑁆𑀥𑀁;

𑁬𑁫𑁫.

𑀅𑀘𑁆𑀘𑀼𑀕𑁆𑀕𑀢𑀁 𑀫𑀳𑀸𑀣𑀽𑀧𑀁 𑀘𑀸𑀭𑀼 𑀘𑀸𑀫𑀻𑀓𑀭𑀚𑁆𑀚𑀼𑀢𑀺𑀁,

𑀧𑀝𑀺𑀘𑁆𑀙𑀸𑀤𑀬𑀫𑀸𑀦𑁄𑀯 𑀭𑀢𑁆𑀢𑀓𑀫𑁆𑀩𑀮 𑀓𑀜𑁆𑀘𑀼𑀦𑀸;

𑁬𑁫𑁬.

𑀯𑀡𑁆𑀡 𑀦𑀺𑀕𑁆𑀭𑁄𑀥𑀧𑀓𑁆𑀓𑀁𑀯 𑀲𑀼𑀭𑀢𑁆𑀢𑀁 𑀧𑀁𑀲𑀼𑀓𑀼𑀮𑀺𑀓𑀁,

𑀲𑀗𑁆𑀖𑀸𑀝𑀺𑀬𑀸 𑀓𑀭𑀺𑀢𑁆𑀯𑀸𑀦 𑀲𑀕𑀼𑀡𑀁 𑀉𑀢𑁆𑀢𑀭𑀻𑀬𑀓𑀁;

𑁬𑁫𑁭.

𑀳𑀼𑀢𑁆𑀯𑀸𑀦 𑀲𑀼𑀧𑀝𑀺𑀘𑁆𑀙𑀦𑁆𑀢𑁄 𑀧𑀸𑀭𑀼𑀧𑀺𑀢𑁆𑀯𑀸𑀦 𑀲𑀸𑀥𑀼𑀓𑀁,

𑀧𑀢𑁆𑀢𑀢𑁆𑀣𑀸𑀬 𑀧𑀲𑀸𑀭𑁂𑀲𑀺 𑀚𑀸𑀮𑀸𑀓𑀼𑀮𑀓𑀭𑀜𑁆𑀚𑀺𑀦𑁄;

𑁬𑁫𑁮.

𑀮𑁄𑀓𑀦𑀸𑀣𑀧𑁆𑀧𑀪𑀸𑀯𑁂𑀦 𑀢𑀢𑁄 𑀧𑀢𑁆𑀢𑀫𑀥𑀼𑀩𑁆𑀩𑀢𑁄,

𑀧𑀸𑀡𑀺 𑀲𑀭𑁄𑀭𑀼𑀳𑀲𑁆𑀲𑀦𑁆𑀢𑁄 𑀲𑀫𑁆𑀧𑀢𑁆𑀢𑁄𑀲𑀺 𑀢𑀫𑀕𑁆𑀕𑀳𑀺;

𑁬𑁫𑁯.

𑀢𑀢𑁄 𑀲𑀲𑀺𑀲𑁆𑀲𑀓𑁄 𑀦𑀸𑀣𑁄 𑀉𑀕𑁆𑀕𑀦𑁆𑀢𑁆𑀯𑀸 𑀕𑀕𑀦𑀗𑁆𑀕𑀦𑀁,

𑀦𑀸𑀦𑀸𑀯𑀡𑁆𑀡𑀫𑁆𑀩𑀼𑀤𑁂 𑀢𑀢𑁆𑀣 𑀫𑀤𑁆𑀤𑀦𑁆𑀢𑁄 𑀕𑀦𑁆𑀢𑀼𑀫𑀸𑀭𑀳𑀪𑀺;

𑁬𑁬𑁦.

𑀢𑀢𑁄 𑀲𑀫𑁆𑀩𑀼𑀤𑁆𑀥 𑀤𑁂𑀳𑀲𑁆𑀫𑀸 𑀦𑀺𑀓𑁆𑀔𑀦𑁆𑀢𑀸𑀲𑀼𑀁 𑀙 𑀭𑀁𑀲𑀺𑀬𑁄,

𑀳𑁂𑀫𑀓𑀡𑁆𑀡𑀺𑀓𑀢𑁄 𑀬𑀸𑀢 𑀫𑀡𑀺𑀕𑁄𑀧𑀸𑀦𑀲𑀻 𑀬𑀣𑀸;

𑁬𑁬𑁧.

𑀩𑀸𑀡𑀺𑀦𑁆𑀤𑀻𑀯𑀭 𑀧𑀼𑀧𑁆𑀨𑁂𑀳𑀺 𑀫𑁂𑀯’𑀓𑀺𑀦𑁆𑀤𑀫𑀡𑀺𑀳𑀺 𑀘,

𑀙𑀸𑀤𑁂𑀦𑁆𑀢𑀺 𑀯𑀺𑀬 𑀦𑀓𑁆𑀔𑀢𑁆𑀢𑀸 𑀦𑀻𑀮𑀁’𑀲𑀼 𑀫𑀼𑀦𑀺𑀤𑁂𑀳𑀢𑁄;

𑁬𑁬𑁨. ¶

𑀘𑀫𑁆𑀧𑀓𑀼𑀤𑁆𑀤𑀸𑀮𑀫𑀸𑀮𑀸𑀪𑀻 𑀳𑁂𑀫𑀘𑀼𑀡𑁆𑀡𑀫𑁆𑀩𑀭𑁂𑀳𑀺 𑀘,

𑀧𑀽𑀭𑀬𑀦𑁆𑀢𑀺 𑀯𑀺𑀬𑀸𑀲𑀗𑁆𑀕 𑀧𑀻𑀢𑀁𑀲𑀽 𑀚𑀺𑀦𑀤𑁂𑀳𑀢𑁄;

𑁬𑁬𑁩.

𑀪𑀡𑁆𑀟𑀻𑀧𑀼𑀧𑁆𑀨𑀓𑀤𑀫𑁆𑀩𑁂𑀳𑀺 𑀮𑁄𑀳𑀺𑀢𑀗𑁆𑀓𑀫𑀡𑀺𑀳𑀺 𑀘,

𑀮𑁄𑀳𑀺𑀢𑀸𑀪𑀸 𑀧𑀧𑀽𑀭𑁂𑀦𑁆𑀢𑀺 𑀤𑀺𑀲𑀸’𑀕𑀸 𑀫𑀼𑀦𑀺𑀤𑁂𑀳𑀢𑁄;

𑁬𑁬𑁪.

𑀳𑀸𑀭 𑀫𑀮𑁆𑀮𑀺𑀓 𑀫𑀸𑀮𑀸𑀳𑀺 𑀲𑁄𑀫𑀁𑀲𑀼 𑀨𑀮𑀺𑀓𑀸𑀤𑀺𑀳𑀺,

𑀧𑀽𑀭𑀬𑀦𑁆𑀢𑀺 𑀯𑀺𑀬𑀸𑀲𑀗𑁆𑀕 𑀑𑀤𑀸𑀢𑀸 𑀫𑀼𑀦𑀺𑀤𑁂𑀳𑀢𑁄;

𑁬𑁬𑁫.

𑀧𑀺𑀜𑁆𑀚𑀼𑀫𑀜𑁆𑀚𑁂𑀝𑁆𑀞𑀭𑀸𑀲𑀻𑀳𑀺 𑀧𑀤𑀼𑀫𑀸𑀪𑀫𑀡𑀻𑀳𑀺 𑀘,

𑀤𑀺𑀲𑀁 𑀙𑀸𑀤𑀬𑀫𑀸𑀦𑀸𑀕𑀸 𑀫𑀜𑁆𑀚𑀺𑀝𑁆𑀞𑀸𑀪𑀸 𑀚𑀺𑀦𑀗𑁆𑀕𑀢𑁄;

𑁬𑁬𑁬.

𑀦𑁂𑀓𑀺𑀦𑁆𑀤𑀘𑀸𑀧 𑀓𑀺𑀡𑁆𑀡𑀁𑀯 𑀤𑀺𑀯𑀲𑀁 𑀭𑀢𑀦𑀼𑀢𑁆𑀣𑀢𑀁,

𑀘𑀺𑀢𑁆𑀢𑀧𑀝𑀁𑀯 𑀫𑀼𑀜𑁆𑀘𑀦𑁆𑀢𑀁 𑀫𑀺𑀲𑁆𑀲𑀸𑀪𑀸𑀕𑀸 𑀚𑀺𑀦𑀗𑁆𑀕𑀢𑁄;

𑁬𑁬𑁭.

𑀕𑀺𑀭𑀺𑀓𑀽𑀝 𑀓𑀽𑀝𑀸𑀕𑀸𑀭 𑀫𑀢𑁆𑀢𑀸 𑀙𑀩𑁆𑀩𑀡𑁆𑀡 𑀭𑀁𑀲𑀺𑀬𑁄,

𑀆𑀯𑁂𑀮𑀯𑁂𑀮𑀸 𑀥𑀸𑀯𑀦𑁆𑀢𑀺 𑀤𑀺𑀧𑁆𑀧𑀫𑀸𑀦𑁂𑀢𑀭𑁂𑀢𑀭𑀸;

𑁬𑁬𑁮.

𑀕𑀘𑁆𑀙𑀫𑀸𑀦𑀸’𑀳𑀦𑀺𑀢𑁆𑀯𑀸𑀦 𑀘𑀓𑁆𑀓𑀯𑀸𑀴 𑀲𑀺𑀮𑀼𑀘𑁆𑀘𑀬𑁂,

𑀉𑀕𑁆𑀕𑀦𑁆𑀢𑁆𑀯𑀸 𑀧𑀭𑀢𑁄 𑀬𑀦𑁆𑀢𑀻 𑀦𑀻𑀭 𑀦𑀺𑀚𑁆𑀛𑀭 𑀲𑀦𑁆𑀦𑀻𑀪𑀸;

𑁬𑁬𑁯.

𑀲𑀫𑁆𑀫𑀼𑀔𑁂 𑀲𑀫𑁆𑀫𑀼𑀔𑁂 𑀢𑀸𑀬𑁄 𑀭𑀼𑀓𑁆𑀔𑀧𑀩𑁆𑀩𑀢 𑀆𑀤𑀬𑁄,

𑀓𑀸𑀭𑀬𑀦𑁆𑀢𑀸 𑀲𑀓𑀁 𑀯𑀡𑁆𑀡𑀁 𑀥𑀸𑀯𑀦𑁆𑀢𑀸’𑀧𑀺 𑀘 𑀲𑀺𑀦𑁆𑀥𑀯𑁄;

𑁬𑁭𑁦.

𑀉𑀤𑁆𑀥𑀫𑀼𑀕𑁆𑀕𑀢𑀭𑀁𑀲𑀻𑀳𑀺 𑀭𑀜𑁆𑀚𑀺𑀢𑀸 𑀚𑀮𑀤𑀸 𑀢𑀤𑀸,

𑀦𑀸𑀦𑀸𑀯𑀡𑁆𑀡𑁂 𑀧𑀼𑀦𑁂𑀯𑀸𑀲𑀺 𑀦𑀽𑀢𑀦𑁄 𑀭𑀯𑀺𑀫𑀡𑁆𑀟𑀮𑁄;

𑁬𑁭𑁧.

𑀚𑀺𑀦𑀧𑁆𑀧𑀳𑀸 𑀧𑀯𑀸𑀳𑁂𑀲𑀼 𑀦𑀺𑀫𑀼𑀕𑁆𑀕𑀸 𑀤𑁂𑀯𑀢𑀸 𑀕𑀢𑀸,

𑀧𑀽𑀚𑁂𑀢𑀼𑀁𑀯 𑀦𑀺𑀚𑀢𑁆𑀢𑁂𑀳𑀺 𑀦𑀸𑀦𑀸𑀯𑀡𑁆𑀡𑀸 𑀲𑀺𑀬𑀼𑀁 𑀢𑀤𑀸;

𑁬𑁭𑁨.

𑀧𑀯𑀺𑀝𑁆𑀞𑀸 𑀩𑀼𑀤𑁆𑀥𑀭𑀁𑀲𑀻𑀦𑀫𑀦𑁆𑀢𑀭𑀁 𑀤𑁂𑀯𑀥𑀻𑀢𑀭𑁄,

𑀅𑀲𑀜𑁆𑀚𑀸𑀦𑀻𑀬 𑀫𑀼𑀬𑁆𑀳𑀺𑀁𑀲𑀼 𑀫𑀼𑀳𑀼𑀢𑁆𑀢𑀁 𑀅𑀢𑁆𑀢𑀦𑁄 𑀥𑀯𑀁;

𑁬𑁭𑁩.

𑀲𑀼𑀭𑀸 𑀲𑀼𑀭𑁄𑀭𑀕 𑀩𑁆𑀭𑀳𑁆𑀫 𑀲𑀺𑀤𑁆𑀥 𑀯𑀺𑀚𑁆𑀚𑀸𑀥𑀭𑀸𑀤𑀬𑁄,

𑀘𑀸𑀫𑀭𑀘𑁆𑀙𑀢𑁆𑀢𑀓𑁂𑀢𑀼𑀳𑀺 𑀧𑀽𑀚𑀬𑀦𑁆𑀢𑀸 𑀚𑀺𑀦𑀦𑁆𑀢𑁆𑀯𑀕𑀼𑀁;

𑁬𑁭𑁪.

𑀅𑀕𑁆𑀖𑀺𑀓𑀁 𑀧𑀦𑁆𑀢𑀺𑀬𑁄 𑀓𑁂𑀘𑀺 𑀢𑁄𑀭𑀡𑀽𑀧𑀭𑀺 𑀢𑁄𑀭𑀡𑁂,

𑀖𑀝𑀤𑀻𑀧𑀸𑀮𑀺𑀬𑁄 𑀢𑀦𑁆𑀣 𑀓𑀭𑁄𑀦𑁆𑀢𑀺 𑀅𑀪𑀺𑀢𑁄’𑀪𑀺𑀢𑁄;

𑁬𑁭𑁫.

𑀧𑀸𑀤𑀧𑀝𑁂 𑀧𑀢𑁆𑀣𑀭𑀦𑁆𑀢𑀺 𑀯𑀺𑀢𑀢𑁆𑀯𑀦𑁆𑀢𑀺 𑀯𑀺𑀢𑀸𑀦𑀓𑁂,

𑀢𑀢𑁆𑀣𑀽𑀧𑀭𑀺 𑀅𑀦𑁂𑀓𑀸𑀦𑀻 𑀓𑀼𑀲𑀼𑀫𑀸𑀦𑁄’𑀓𑀺𑀭𑀦𑁆𑀢𑀺 𑀘;

𑁬𑁭𑁬. ¶

𑀓𑀢𑀫𑀁 𑀤𑁂𑀯𑀮𑁄𑀓𑀦𑁆𑀦𑀼𑀬𑀸𑀢𑀺 𑀮𑁄𑀓𑀕𑁆𑀕𑀦𑀸𑀬𑀓𑁄,

𑀬𑀸𑀢𑀺 𑀓𑀺𑀁 𑀩𑀼𑀳𑁆𑀫𑀮𑁄𑀓𑀦𑁆𑀦𑀼 𑀅𑀫𑁆𑀳𑀸𑀓𑀁 𑀪𑀯𑀦𑀦𑁆𑀦𑀼 𑀔𑁄;

𑁬𑁭𑁭.

𑀓𑀢𑁆𑀣 𑀦𑀼 𑀔𑁄 𑀤𑁂𑀯𑀤𑁂𑀯𑁄 𑀓𑀲𑁆𑀲𑀦𑀼𑀕𑁆𑀕𑀳𑀩𑀼𑀤𑁆𑀥𑀻𑀬𑀸,

𑀬𑀸𑀢𑀻’𑀢𑀺 𑀓𑀗𑁆𑀔𑀺𑀢𑀸 𑀓𑁂𑀘𑀺 𑀲𑀁𑀲𑀭𑀦𑁆𑀢𑀺 𑀇𑀢𑁄𑀘𑀺𑀢𑁄;

𑁬𑁭𑁮.

𑀫𑀸𑀧𑁂𑀢𑁆𑀯𑀸 𑀅𑀪𑀺𑀢𑁄 𑀫𑀕𑁆𑀕𑁂 𑀫𑀡𑁆𑀟𑀧𑁂 𑀭𑀢𑀦𑀸𑀫𑀬𑁂,

𑀲𑀬𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀓𑀸𑀘𑀺 𑀢𑀺𑀝𑁆𑀞𑀦𑁆𑀢𑀺 𑀤𑁂𑀯𑀢𑀸;

𑁬𑁭𑁯.

𑀢𑀳𑀺𑀁 𑀢𑀳𑀺𑀁 𑀧𑀝𑁆𑀞𑀧𑁂𑀦𑁆𑀢𑀸 𑀲𑀼𑀥𑀦𑁆𑀢 𑀫𑀥𑀼𑀭𑁄𑀤𑀓𑀁,

𑀬𑀸𑀯𑀫𑀸𑀦𑀸 𑀚𑀺𑀦𑀁 𑀓𑁂𑀘𑀺 𑀢𑀺𑀝𑁆𑀞𑀦𑁆𑀢𑀺 𑀘 𑀫𑀳𑀦𑁆𑀢𑀺 𑀘;

𑁬𑁮𑁦.

𑀏𑀯𑀁 𑀫𑀳𑀸𑀫𑀳𑁂 𑀦𑀸𑀣𑁄 𑀯𑀢𑁆𑀢𑀫𑀸𑀦𑁂 𑀅𑀦𑀽𑀧𑀫𑁂,

𑀚𑀮𑀁 𑀲𑀫𑁆𑀩𑀼𑀤𑁆𑀥𑀲𑀺𑀭𑀺𑀬𑀸 𑀦𑀽𑀢𑀦𑁄 𑀲𑀽𑀭𑀺𑀬𑁄 𑀯𑀺𑀬;

𑁬𑁮𑁧.

𑀩𑁆𑀭𑀳𑁆𑀫𑀲𑁂𑀦𑀸𑀪𑀺𑀢𑁄 𑀬𑀸𑀦 𑀩𑁆𑀭𑀳𑁆𑀫𑀸𑀯𑀸𑀣 𑀲𑀳𑀫𑁆𑀧𑀢𑀺,

𑀲𑀼𑀭𑀲𑁂𑀦𑀸𑀪𑀺𑀢𑁄 𑀬𑀸𑀦 𑀲𑀓𑁆𑀓𑁄𑀯 𑀲𑀫𑀮𑀗𑁆𑀓𑀢𑁄;

𑁬𑁮𑁨.

𑀕𑀕𑀸𑀮𑀺𑀫𑀪𑀺𑀢𑁄 𑀬𑀸𑀦 𑀕𑀳𑀗𑁆𑀕𑀸 𑀫𑀡𑀺 𑀲𑀦𑁆𑀦𑀺𑀪𑁄,

𑀥𑀢𑀭𑀝𑁆𑀞𑀔𑀕𑀺𑀦𑁆𑀤𑁄𑀯 𑀳𑀁𑀲𑀲𑁂𑀦𑀸𑀮𑀺 𑀧𑀼𑀩𑁆𑀩𑀕𑁄;

𑁬𑁮𑁩.

𑀅𑀧𑁂𑀢 𑀭𑀸𑀕𑀤𑁄𑀲𑁂𑀳𑀺 𑀯𑀻𑀢𑀫𑁄𑀳𑁂𑀳𑀺 𑀲𑀩𑁆𑀩𑀲𑁄,

𑀧𑀝𑀺𑀲𑀫𑁆𑀪𑀺𑀤𑀢𑁆𑀢 𑀲𑀫𑁆𑀧𑀢𑁆𑀢 𑀲𑀸𑀯𑀓𑁂𑀳𑀺 𑀅𑀦𑀼𑀕𑁆𑀕𑀢𑁄;

𑁬𑁮𑁪.

𑀬𑁂𑀲𑀁 𑀬𑁂𑀲𑀁 𑀫𑀦𑀲𑁆𑀫𑀺𑀁 𑀬𑀁 𑀬𑀫𑀢𑁆𑀣𑀺 𑀓𑀺𑀜𑁆𑀘𑀺 𑀲𑀁𑀲𑀬𑀁,

𑀢𑁂𑀲𑀁 𑀢𑀁 𑀢𑀁 𑀧𑀡𑀼𑀤𑁂𑀦𑁆𑀢𑁄 𑀤𑁂𑀲𑀦𑀸𑀬 𑀲𑀼𑀥𑀸𑀲𑀺𑀦𑀁;

𑁬𑁮𑁫.

𑀢𑀢𑁆𑀣 𑀢𑀢𑁆𑀣𑀸𑀦𑀼𑀭𑀽𑀧𑁂𑀦 𑀧𑀸𑀝𑀺𑀳𑀸𑀭𑀺𑀬 𑀓𑀫𑁆𑀩𑀼𑀦𑀸,

𑀮𑁄𑀓𑀲𑁆𑀲 𑀦𑀬𑀦𑀸𑀮𑀻 𑀲𑁄 𑀢𑁄𑀲𑀲𑁆𑀲𑀼𑀲𑀼 𑀦𑀺𑀫𑀼𑀚𑁆𑀚𑀬𑀁;

𑁬𑁮𑁬.

𑀲𑀫𑁆𑀧𑀢𑁆𑀢𑁄’𑀮𑀗𑁆𑀓𑀢𑀁 𑀮𑀗𑁆𑀓𑀫𑀣𑀸𑀕𑀼 𑀨𑀡𑀺𑀦𑁄 𑀢𑀤𑀸,

𑀧𑀝𑀺𑀫𑀕𑁆𑀕𑀁 𑀓𑀭𑁄𑀦𑁆𑀢𑀸 𑀢𑁂 𑀢𑀢𑁆𑀣 𑀢𑀢𑁆𑀣 𑀫𑀳𑀸𑀫𑀳𑀁;

𑁬𑁮𑁭.

𑀉𑀭𑀕𑀸𑀦𑀫𑀦𑁆𑀢𑀭𑁂 𑀤𑁂𑀯𑀸 𑀩𑁆𑀭𑀳𑁆𑀫𑀸𑀲𑀼𑀁 𑀢𑁂𑀲𑀫𑀦𑁆𑀢𑀭𑁂,

𑀏𑀯𑀁 𑀲𑀫𑁆𑀫𑀺𑀲𑁆𑀲𑀓𑁄 𑀮𑁄𑀓𑁂 𑀩𑁆𑀭𑀳𑁆𑀫𑀮𑁄𑀓𑀸 𑀧𑀧𑀽𑀭𑀬𑀺;

𑁬𑁮𑁮.

𑀬𑁂 𑀧𑀲𑁆𑀲𑀦𑁆𑀢𑀺 𑀚𑀺𑀦𑀁 𑀢𑀢𑁆𑀣 𑀲𑀲𑀺𑀲𑁆𑀲𑀁 𑀲𑀺𑀭𑀺𑀬𑀸 𑀚𑀮𑀁,

𑀲𑀼𑀮𑀤𑁆𑀥𑀸 𑀢𑁂𑀳𑀺 𑀦𑁂𑀢𑁆𑀢𑀸𑀦𑀺 𑀢𑁂𑀲𑀫𑀓𑁆𑀔𑀻𑀦𑀺 𑀮𑁄𑀘𑀦𑀸;

𑁬𑁮𑁯.

𑀬𑁂 𑀲𑀼𑀡𑀦𑁆𑀢𑀺 𑀢𑀤𑀸 𑀥𑀫𑁆𑀫𑀁 𑀥𑀫𑁆𑀫𑀺𑀲𑁆𑀲𑀭 𑀧𑀪𑀸𑀯𑀺𑀢𑀁,

𑀲𑀼𑀮𑀤𑁆𑀥𑀸 𑀢𑁂𑀳𑀺 𑀲𑁄𑀢𑀸𑀦𑀺 𑀢𑁂𑀲𑀁 𑀲𑁄𑀢𑀸𑀦𑀺 𑀲𑁄𑀢𑀓𑀸;

𑁬𑁯𑁦. ¶

𑀬𑁂 𑀮𑀧𑀦𑁆𑀢𑀺 𑀢𑀤𑀸 𑀩𑀼𑀤𑁆𑀥𑀕𑀼𑀡𑀜𑁆𑀳𑀺 𑀕𑀼𑀡𑀪𑀽𑀲𑀡𑀸,

𑀲𑀼𑀮𑀤𑁆𑀥𑀸 𑀢𑁂𑀳𑀺 𑀯𑁂 𑀚𑀺𑀯𑁆𑀳𑀸 𑀢𑁂𑀲𑀁 𑀚𑀺𑀯𑁆𑀳𑀸 𑀭𑀲𑀜𑁆𑀜𑀓𑀸

𑁬𑁯𑁧.

𑀬𑁂 𑀯𑀦𑁆𑀤𑀦𑁆𑀢𑀺 𑀚𑀺𑀦𑀁 𑀬𑀦𑁆𑀢𑀁 𑀲𑀲𑀗𑁆𑀖𑀁 𑀕𑀕𑀦𑀗𑁆𑀕𑀦𑁂,

𑀲𑀼𑀮𑀤𑁆𑀥𑀸 𑀢𑁂𑀳𑀺 𑀳𑀢𑁆𑀣𑀸𑀦𑀺 𑀢𑁂𑀲𑀁𑀬𑁂𑀯 𑀪𑀼𑀚𑀸 𑀪𑀼𑀚𑀸;

𑁬𑁯𑁨.

𑀢𑀤𑀸 𑀢𑀣𑀸𑀕𑀢𑀁 𑀤𑀺𑀲𑁆𑀯𑀸 𑀬𑁂 𑀲𑀦𑁆𑀢𑀼𑀝𑁆𑀞𑀸 𑀢𑀣𑀸𑀕𑀢𑀁,

𑀢𑀣𑀸𑀕𑀢𑀸𑀦𑀁 𑀲𑀩𑁆𑀩𑁂𑀲𑀁 𑀬𑁄 𑀢𑁄𑀲𑁄 𑀳𑁄𑀢𑀼 𑀲𑀩𑁆𑀩𑀤𑀸;

𑁬𑁯𑁩.

𑀕𑀢𑁄 𑀓𑀮𑁆𑀬𑀸𑀡𑀻𑀬𑀁 𑀦𑀸𑀣𑁄 𑀫𑀳𑁂𑀦𑁆𑀢𑁂𑀯𑀁 𑀲𑀤𑁂𑀯𑀓𑁂,

𑀢𑁂𑀲𑀁 𑀧𑀽𑀚𑀸𑀯𑀺𑀥𑀸𑀦𑀁 𑀓𑁄 𑀫𑀼𑀔𑁂𑀦𑁂𑀓𑁂𑀦 𑀪𑀸𑀲𑀢𑀺;

𑁬𑁯𑁪.

𑀢𑀢𑁄 𑀕𑀗𑁆𑀕𑀸 𑀫𑀦𑀼𑀜𑁆𑀜𑀜𑁆𑀳𑀺 𑀲𑀫𑁆𑀧𑀢𑁆𑀢𑀁 𑀢𑀁 𑀲𑀧𑀼𑀢𑁆𑀢𑀓𑀁,

𑀢𑀭𑀗𑁆𑀕 𑀫𑀼𑀤𑀼 𑀩𑀸𑀳𑀸𑀳𑀺 𑀕𑀳𑁂𑀢𑁆𑀯𑀸 𑀘𑀭𑀡𑀫𑁆𑀩𑀼𑀚𑁂;

𑁬𑁯𑁫.

𑀧𑀸𑀤𑁂 𑀧𑀓𑁆𑀔𑀸𑀮𑀬𑀺 𑀲𑀫𑁆𑀫𑀸 𑀨𑁂𑀡 𑀧𑀼𑀧𑁆𑀨𑀼𑀧𑀳𑀸𑀭𑀺𑀓𑀸,

𑀢𑀢𑁄 𑀢𑀢𑁄𑀢𑀼𑀁 𑀕𑀡𑁆𑀳𑀺𑀢𑁆𑀯𑀸 𑀅𑀓𑀸 𑀤𑁂𑀳𑀲𑁆𑀲𑀦𑀼𑀕𑁆𑀕𑀳𑀁;

𑁬𑁯𑁬.

𑀢𑀢𑁄 𑀲𑁄 𑀬𑀸𑀘𑀺𑀢𑁄 𑀲𑀢𑁆𑀣𑀸 𑀦𑀸𑀕𑀲𑀗𑁆𑀖𑁂𑀳𑀺 𑀯𑀦𑁆𑀤𑀺𑀬,

𑀅𑀕𑀫𑀸 𑀫𑀡𑁆𑀟𑀧𑀁 𑀭𑀫𑁆𑀫𑀁 𑀫𑀦𑁄𑀦𑀦𑁆𑀤𑀦𑀫𑀸𑀯𑀳𑀁;

𑁬𑁯𑁭.

𑀕𑀦𑁆𑀢𑁆𑀯𑀸 𑀫𑀡𑁆𑀟𑀧 𑀫𑀚𑁆𑀛𑀫𑁆𑀳𑀺 𑀩𑀼𑀤𑁆𑀥𑀸𑀭𑀳 𑀫𑀳𑀸𑀲𑀦𑁂,

𑀦𑀺𑀲𑀻𑀤𑁄𑀪𑀸𑀲𑀬𑀁 𑀆𑀲𑀸 𑀭𑀯𑀻𑀯 𑀉𑀤𑀬𑀸𑀯𑀮𑁂;

𑁬𑁯𑁮.

𑀢𑀢𑁄 𑀪𑀺𑀓𑁆𑀔𑀼 𑀦𑀺𑀲𑀻𑀤𑀺𑀁𑀲𑀼 𑀧𑀢𑁆𑀢 𑀧𑀢𑁆𑀢𑀸𑀲𑀦𑁂 𑀢𑀤𑀸,

𑀩𑀪𑀸𑀲 𑀫𑀡𑁆𑀟𑀧𑀁’𑀢𑀻𑀯 𑀲𑀭𑀁𑀯 𑀧𑀤𑀼𑀫𑀸𑀓𑀼𑀮𑀁;

𑁬𑁯𑁯.

𑀚𑀦𑀦𑁂𑀢𑁆𑀢𑀸𑀮𑀺𑀦𑁄’𑀕𑀫𑁆𑀫 𑀯𑀲𑀻 𑀲𑁄𑀫𑁆𑀫𑀫𑀼𑀔𑀫𑁆𑀩𑀼𑀚𑁂,

𑀧𑀢𑀦𑁆𑀢𑀸 𑀓𑀼𑀲𑀮𑀸𑀫𑁄𑀤𑁂 𑀕𑀡𑁆𑀳𑀦𑁆𑀢𑀸 𑀢𑀺𑀢𑁆𑀢𑀺𑀦𑁄 𑀕𑀢𑀸;

𑁭𑁦𑁦.

𑀢𑀣𑀸 𑀲𑀪𑀺𑀓𑁆𑀔𑀼𑀓𑀸 𑀦𑀸𑀕𑀸 𑀫𑀼𑀦𑀺𑀦𑁄 𑀭𑀽𑀧𑀲𑀸𑀕𑀭𑁂,

𑀦𑁂𑀢𑁆𑀢𑀺𑀦𑁆𑀤 𑀫𑀡𑀺𑀦𑀸𑀯𑀸𑀳𑀺 𑀧𑀸𑀭𑀁 𑀕𑀦𑁆𑀢𑀼𑀁 𑀦 𑀢𑁂 𑀧𑀪𑀼;

𑁭𑁦𑁧.

𑀢𑀢𑁄 𑀲𑀲𑀗𑁆𑀖𑀁 𑀲𑀼𑀕𑀢𑀁 𑀲𑀚𑀦𑁄 𑀫𑀡𑀺 𑀅𑀓𑁆𑀔𑀺𑀓𑁄,

𑀲𑀓𑁆𑀓𑀘𑁆𑀘𑀁 𑀲𑀓𑀳𑀢𑁆𑀣𑁂𑀳𑀺 𑀅𑀦𑁆𑀦𑀧𑀸𑀦𑁂𑀦 𑀢𑀧𑁆𑀧𑀬𑀻;

𑁭𑁦𑁨.

𑀅𑀣𑁄𑀦𑀻𑀢 𑀧𑀢𑁆𑀢𑀧𑀸𑀡𑀺𑀫’𑀘𑁆𑀘𑀬𑀺𑀢𑁆𑀯𑀸 𑀢𑀣𑀸𑀕𑀢𑀁,

𑀪𑀢𑁆𑀢𑀺𑀦𑀺𑀦𑁆𑀦𑁄 𑀦𑀺𑀫𑀦𑁆𑀢𑁂𑀲𑀺 𑀤𑁂𑀲𑀦𑀢𑁆𑀣𑀸𑀦𑀼𑀫𑁄𑀤𑀦𑀁;

𑁭𑁦𑁩.

𑀢𑀢𑁄 𑀩𑁆𑀭𑀳𑁆𑀫𑀲𑁆𑀲𑀭𑁄 𑀲𑀢𑁆𑀣𑀸 𑀦𑀺𑀘𑁆𑀙𑀭𑀁 𑀩𑁆𑀭𑀳𑁆𑀫𑀖𑁄𑀲𑀦𑀁,

𑀯𑀺𑀜𑁆𑀜𑀸𑀧𑁂𑀦𑁆𑀢𑁄 𑀚𑀦𑁂 𑀲𑀩𑁆𑀩𑁂 𑀲𑀓𑀲𑀤𑁆𑀤𑁂𑀦 𑀤𑁂𑀲𑀦𑀁;

𑁭𑁦𑁪.

𑀤𑁂𑀲𑁂𑀲𑁆𑀯𑁂𑀯𑀁 𑀚𑀺𑀦𑁄 𑀥𑀫𑁆𑀫’𑀫𑀦𑀺𑀮𑀸𑀲𑀦𑀓𑀸𑀤𑀺𑀦𑀁,

𑀧𑀻𑀢𑀺𑀧𑀸𑀫𑁄𑀚𑁆𑀚 𑀚𑀦𑀦𑀁 𑀦𑀺𑀩𑁆𑀩𑀸𑀡𑀸𑀫𑀢’𑀫𑀸𑀯𑀳𑀁;

𑁭𑁦𑁫.

𑀪𑁄 𑀪𑁄 𑀲𑀼𑀡𑀸𑀣 𑀪𑀼𑀚𑀕𑀸 𑀪𑀯𑀲𑀸𑀕𑀭𑀫𑁆𑀳𑀺

𑀧𑀸𑀧𑀸𑀭𑀺𑀦𑀓𑁆𑀓𑀫𑀓𑀭𑀸𑀓𑀼𑀮 𑀤𑀼𑀕𑁆𑀕𑀫𑀫𑁆𑀳𑀺,

𑀫𑀕𑁆𑀕𑀸 𑀚𑀦𑀸 𑀔𑀮𑀼 𑀮𑀪𑀦𑁆𑀢𑀺 𑀓𑀤𑀸 𑀧𑀢𑀺𑀝𑁆𑀞𑀁,

𑀑𑀳𑀸𑀬 𑀩𑀼𑀤𑁆𑀥𑀣𑀺𑀭𑀲𑀸𑀭𑀢𑀭𑀺𑀁 𑀯𑀺𑀲𑀸𑀮𑀁;

𑁭𑁦𑁬.

𑀮𑀤𑁆𑀥𑀸𑀦 𑀤𑀼𑀮𑁆𑀮𑀪𑀢𑀭𑀁 𑀫𑀼𑀦𑀺𑀧𑀸𑀢𑀼𑀪𑀽𑀢

𑀓𑀸𑀮𑀁 𑀘𑀺𑀭𑁂𑀦 𑀪𑀼𑀚𑀕𑀸 𑀦 𑀧𑀫𑀸𑀤𑀬𑀺𑀢𑁆𑀣,

𑀚𑀸𑀢𑀻 𑀚𑀭𑀸 𑀫𑀭𑀡 𑀤𑀼𑀓𑁆𑀔 𑀧𑀭𑀺𑀤𑁆𑀤𑀯𑀸 𑀘

𑀲𑀁𑀲𑀸𑀭𑀺𑀓𑀲𑁆𑀲 𑀦 𑀢𑀢𑁄𑀧’𑀕𑀢𑀲𑁆𑀲 𑀳𑁄𑀢𑀺;

𑁭𑁦𑁭.

𑀢𑀸𑀭𑀼𑀜𑁆𑀜𑀫𑀫𑁆𑀩𑀼𑀚𑀲𑀺𑀭𑀺𑀁𑀯 𑀧𑀭𑀺𑀢𑁆𑀢𑀓𑀸𑀮𑀁

𑀧𑀸𑀡𑀁 𑀢𑀼𑀲𑀸𑀭𑀮𑀯’𑀲𑀸𑀭𑀢𑀭𑀁 𑀚𑀦𑀸𑀦𑀁,

𑀪𑁄𑀕𑀁 𑀤𑀥𑀸𑀢𑀺 𑀚𑀮𑀥𑀺𑀫𑁆𑀳𑀺 𑀢𑀭𑀗𑁆𑀕𑀪𑀗𑁆𑀕𑀺𑀁

𑀦𑀺𑀘𑁆𑀘𑀁 𑀫𑀦𑁄 𑀤𑀳𑀢𑀺 𑀲𑁄𑀓𑀲𑀺𑀔𑀻𑀪𑀺 𑀦𑀸𑀦𑀸;

𑁭𑁦𑁮.

𑀓𑀢𑁆𑀯𑀸𑀦 𑀭𑀸𑀕𑀫𑀺𑀲𑀬𑁄’𑀧𑀺 𑀔𑀕𑀸 𑀤𑀼𑀧𑀜𑁆𑀜𑀸

𑀣𑀺𑀭𑀽𑀧𑀺 𑀦𑀸𑀭𑀺𑀓𑀼𑀲𑀼𑀫𑁂𑀲𑀼𑀧𑀺 𑀭𑀽𑀧𑀕𑀺𑀤𑁆𑀥𑀸,

𑀧𑀢𑁆𑀢𑀸’𑀦𑀬𑀁 𑀔𑀮𑀼 𑀧𑀼𑀭𑁂 𑀧𑀭𑀺𑀳𑀻𑀦 𑀛𑀸𑀦𑀸

𑀭𑀽𑀧𑁂 𑀦 𑀭𑀚𑁆𑀚𑀣 𑀢𑀢𑁄 𑀔𑀮𑀼 𑀲𑀸𑀥𑀼𑀧𑀜𑁆𑀜𑀸;

𑁭𑁦𑁯.

𑀲𑀤𑁆𑀤𑀸𑀦𑀼𑀭𑀸𑀕𑀫𑀦𑀼𑀕𑁄𑀧𑀺 𑀧𑀼𑀭𑁂 𑀲𑀺𑀔𑀡𑁆𑀟𑀻

𑀲𑀼𑀢𑁆𑀯𑀸𑀦 𑀫𑁄𑀭𑀺 𑀫𑀥𑀼𑀭𑀁 𑀕𑀺𑀭𑀫𑀜𑁆𑀚𑀺𑀢𑀗𑁆𑀕𑁄,

𑀯𑁆𑀬𑀸𑀥𑀲𑁆𑀲 𑀳𑀢𑁆𑀣𑀫𑀕𑀫𑀸𑀲𑀺 𑀪𑀯𑁂𑀲𑀼 𑀢𑀲𑁆𑀫𑀸

𑀦𑀢𑁆𑀣𑁂𑀯 𑀲𑀤𑁆𑀤𑀲𑀫𑀤𑀼𑀓𑁆𑀔𑀓𑀭𑀁 𑀚𑀦𑀸𑀦𑀁;

𑁭𑁧𑁦.

𑀑𑀳𑀸𑀬 𑀦𑁂𑀓𑀓𑀼𑀲𑀼𑀫𑁂𑀲𑀼 𑀧𑀭𑀸𑀕𑀭𑀸𑀕𑀁

𑀫𑀢𑁆𑀢𑁂𑀪𑀓𑀼𑀫𑁆𑀪 𑀫𑀕𑀫𑀸 𑀫𑀤𑀕𑀦𑁆𑀥𑀮𑀼𑀤𑁆𑀥𑁄,

𑀪𑀺𑀗𑁆𑀕𑁄 𑀧𑀪𑀕𑁆𑀕 𑀢𑀦𑀼𑀓𑁄 𑀓𑀭𑀺𑀓𑀡𑁆𑀡𑀢𑀸𑀮𑀸

𑀦𑀢𑁆𑀣𑁂𑀯 𑀕𑀦𑁆𑀥𑀲𑀤𑀺𑀲𑀁 𑀢𑀺𑀪𑀯𑁂𑀲𑀼 𑀧𑀸𑀲𑀁;

𑁭𑁧𑁧.

𑀕𑀫𑁆𑀪𑀻𑀭 𑀦𑀻𑀭𑀥𑀺𑀪𑀯𑁄 𑀧𑀯𑀼𑀭𑀸𑀲𑀦𑁄’𑀧𑀺

𑀫𑀺𑀘𑁆𑀙𑁄 𑀕𑀺𑀮𑀺𑀢𑁆𑀯 𑀩𑀮𑀺𑀲𑀁 𑀭𑀲𑀕𑁂𑀥𑀳𑁂𑀢𑀼,

𑀧𑀧𑁆𑀧𑁄𑀢𑀺 𑀤𑀼𑀓𑁆𑀔𑀫𑀢𑀼𑀮𑀁 𑀦 𑀭𑀲𑁂𑀲𑀼 𑀲𑀸𑀢

𑀫𑀢𑁆𑀣𑀺𑀢𑀺 𑀫𑀦𑁆𑀢𑁆𑀯 𑀧𑀚𑀪𑀸𑀣 𑀭𑀲𑁂𑀲𑀼 𑀕𑁂𑀥𑀁;

𑁭𑁧𑁨. ¶

𑀪𑁄 𑀩𑀼𑀳𑁆𑀫𑀮𑁄𑀓𑀸’𑀕𑀢 𑀲𑀼𑀤𑁆𑀥𑀲𑀢𑁆𑀢𑁄

𑀩𑀼𑀤𑁆𑀥𑀢𑁆𑀢𑀫𑁂𑀯 𑀦𑀺𑀬𑀢𑁄 𑀅𑀧𑀺 𑀩𑁄𑀥𑀺𑀲𑀢𑁆𑀢𑁄,

𑀣𑀺𑀲𑀗𑁆𑀕𑀫𑀸𑀬 𑀧𑀭𑀺𑀳𑀸𑀬𑀺 𑀲𑀭𑀚𑁆𑀚𑀢𑁄’𑀧𑀺

𑀢𑀲𑁆𑀫𑀸 𑀳𑀺 𑀨𑀲𑁆𑀲𑀲𑀤𑀺𑀲𑁄 𑀅𑀦𑀬𑁄 𑀦𑀯𑀢𑁆𑀣𑀺;

𑁭𑁧𑁩.

𑀪𑁂𑀭𑀡𑁆𑀟 𑀧𑁂𑀮𑀓 𑀓𑀧𑀼’𑀤𑁆𑀤𑀓 𑀳𑁂𑀢𑀼𑀳𑀻𑀦

𑀲𑀢𑁆𑀢𑀸𑀧𑀺 𑀤𑀸𑀦𑀭𑀼𑀘𑀺 𑀤𑀸𑀦𑀫𑀡𑀺𑀧𑁆𑀧𑀪𑀸𑀯𑀸,

𑀧𑀢𑁆𑀢𑀸’𑀧𑀯𑀕𑁆𑀕 𑀯𑀭𑀲𑀸𑀭𑀧𑀼𑀭𑀁 𑀪𑀼𑀚𑀗𑁆𑀕𑀸

𑀓𑁄 𑀦𑀧𑁆𑀧𑀤𑀸𑀢𑀺 𑀥𑀦𑀺𑀓𑁄 𑀲𑀺𑀯’𑀫𑁂𑀲𑀫𑀸𑀦𑁄;

𑁭𑁧𑁪.

𑀧𑀸𑀮𑁂𑀢𑁆𑀯 𑀲𑀻𑀮𑀫’𑀫𑀮𑀁 𑀯𑀺𑀲𑀓𑀡𑁆𑀞𑀺𑀓𑀸𑀧𑀺

𑀇𑀦𑁆𑀤𑀲𑁆𑀲 𑀦𑀦𑁆𑀤𑀦𑀯𑀦𑁂’𑀲𑀺 𑀧𑀺𑀬𑀸 𑀫𑀳𑁂𑀲𑀻,

𑀢𑀲𑁆𑀫𑀸 𑀧𑀲𑀢𑁆𑀣𑀯𑀺𑀪𑀯𑀁 𑀬𑀤𑀺 𑀧𑀢𑁆𑀣𑀬𑀯𑁆𑀳𑁄

𑀧𑀸𑀮𑁂𑀣 𑀲𑀻𑀮𑀫’𑀫𑀮𑀁 𑀔𑀮𑀼 𑀚𑀺𑀯𑀺𑀢𑀁’𑀯;

𑁭𑁧𑁫.

𑀲𑀕𑁆𑀕𑁄 𑀯𑀺𑀲𑀸𑀮 𑀭𑀢𑀦𑀸𑀮𑀬 𑀲𑀫𑁆𑀧𑀓𑀺𑀡𑁆𑀡𑁄

𑀲𑀸𑀦𑀦𑁆𑀤’𑀫𑀦𑁆𑀤 𑀲𑀼𑀭𑀲𑀼𑀦𑁆𑀤𑀭𑀺 𑀲𑀼𑀦𑁆𑀤𑀭𑁄 𑀲𑁄,

𑀨𑀼𑀮𑁆𑀮𑀫𑁆𑀩𑀼𑀚𑀸𑀓𑀭 𑀯𑀦𑀸𑀤𑀺𑀳𑀺 𑀦𑀦𑁆𑀤𑀦𑀻𑀬𑁄

𑀢𑀢𑁆𑀣𑀸𑀫𑀭𑀸 𑀯𑀺𑀬’𑀫𑀭𑀸’𑀯𑀺𑀭𑀢𑀁 𑀭𑀫𑀦𑁆𑀢𑀺;

𑁭𑁧𑁬.

𑀢𑀫𑁆𑀳𑀸𑀧𑀺 𑀪𑁄 𑀭𑀼𑀘𑀺𑀭 𑀩𑁆𑀭𑀳𑁆𑀫𑀦𑀺𑀓𑀸𑀬 𑀪𑀼𑀢𑀺

𑀭𑀫𑁆𑀫𑀸 𑀢𑀢𑁄𑀧𑀺 𑀫𑀳𑀺𑀢𑀁 𑀅𑀫𑀢𑀁 𑀯𑀭𑀺𑀝𑁆𑀞𑀁,

𑀢𑀲𑁆𑀫𑀸𑀢𑁆𑀢𑀓𑀸𑀫 𑀦𑀺𑀭𑀢𑀸 𑀚𑀦𑀢𑀸 𑀲𑀧𑀜𑁆𑀜𑀸

𑀢𑀡𑁆𑀳𑀓𑁆𑀔𑀬𑀸𑀬 𑀲𑀢𑀢𑀁 𑀯𑀻𑀭𑀺𑀬𑀁 𑀓𑀭𑁄𑀣;

𑁭𑁧𑁭.

𑀏𑀯𑀁 𑀲𑀤𑁆𑀥𑀫𑁆𑀫𑀫𑀕𑁆𑀕𑀁 𑀯𑀭𑀫𑀢𑀺 𑀲𑀼𑀕𑀢𑁄 𑀤𑁂𑀲𑀬𑀺 𑀧𑀦𑁆𑀦𑀕𑀸𑀦𑀁

𑀲𑀼𑀢𑁆𑀯𑀸 𑀢𑁂 𑀲𑀫𑁆𑀧𑀳𑀝𑁆𑀞𑀸 𑀫𑀳𑀫𑀳𑀫𑀓𑀭𑀼𑀁 𑀦𑀺𑀚𑁆𑀚𑀭𑀸𑀤𑀻𑀳𑀺 𑀲𑀤𑁆𑀥𑀺𑀁,

𑀢𑁂𑀲𑀁 𑀯𑁂 𑀤𑁂𑀲𑀦𑀸𑀬𑀁 𑀲𑀼𑀭𑀯𑀺𑀝𑀧𑀺 𑀲𑀫𑀸 𑀲𑀸𑀢𑁆𑀣𑀺𑀓𑀸 𑀢𑀢𑁆𑀣 𑀚𑀸𑀢𑀸

𑀲𑁄 𑀦𑀸𑀣𑁄 𑀢𑀜𑁆𑀘 𑀥𑀫𑁆𑀫𑀁 𑀪𑀕𑀯𑀢𑀺 𑀢𑀦𑀬𑀸 𑀢𑁂 𑀘 𑀯𑁄 𑀧𑀸𑀮𑀬𑀦𑁆𑀢𑀼

𑀓𑀮𑁆𑀬𑀸𑀡𑀺 𑀤𑁂𑀲𑀸𑀕𑀫𑀦𑀁.

𑁭𑁧𑁮. ¶

𑀦𑀕𑀸𑀥𑀺𑀭𑀸𑀚𑁂 𑀲𑀼𑀫𑀦𑀸𑀪𑀺𑀥𑀸𑀦𑁂

𑀯𑀲𑀁 𑀲𑀼𑀫𑁂𑀥𑁄 𑀲𑀼𑀫𑀦𑀸𑀪𑀺𑀥𑀸𑀦𑁄,

𑀤𑁂𑀯𑁄 𑀢𑀤𑀸’𑀕𑀫𑁆𑀫 𑀲𑀧𑀸𑀭𑀺𑀲𑀚𑁆𑀚𑁄

𑀓𑀮𑁆𑀬𑀸𑀡𑀺𑀬𑀁 𑀢𑀢𑁆𑀣 𑀨𑀡𑀻𑀳𑀺 𑀲𑀤𑁆𑀥𑀺𑀁;

𑁭𑁧𑁯.

𑀤𑀢𑁆𑀯𑀸’𑀧𑀯𑀕𑁆𑀕𑀲𑁆𑀲 𑀦𑀺𑀤𑀸𑀦𑀤𑀸𑀦𑀁

𑀲𑀼𑀢𑁆𑀯𑀸𑀦 𑀥𑀫𑁆𑀫𑀁 𑀲𑀼𑀢𑀺𑀲𑀻𑀢𑀺𑀪𑀼𑀢𑀁,

𑀧𑀳𑀝𑁆𑀞𑀘𑀺𑀢𑁆𑀢𑁄 𑀉𑀧𑀕𑀫𑁆𑀫 𑀩𑀼𑀤𑁆𑀥𑀁

𑀦𑀢𑁆𑀯𑀸𑀳 𑀏𑀯𑀁 𑀓𑀢𑀧𑀜𑁆𑀚𑀮𑀻𑀓𑁄;

𑁭𑁨𑁦.

𑀦 𑀯𑁂 𑀨𑀡𑀻𑀦𑀁 𑀦𑀧𑀺 𑀫𑀸𑀦𑀼𑀲𑀸𑀦𑀁

𑀦𑀸𑀦𑀺𑀫𑁆𑀫𑀺𑀲𑀸𑀦𑀁 𑀦 𑀧𑀺𑀢𑀸𑀫𑀳𑀸𑀦𑀁,

𑀳𑀺𑀢𑀢𑁆𑀣 𑀫𑁂𑀯𑀸𑀔𑀺𑀮 𑀮𑁄𑀓𑀦𑀸𑀣𑀸

𑀚𑀸𑀬𑀦𑁆𑀢𑀻 𑀮𑁄𑀓𑁂 𑀓𑀭𑀼𑀡𑀸𑀕𑀼𑀡𑀕𑁆𑀕𑀸;

𑁭𑁨𑁧.

𑀅𑀦𑁆𑀢𑁄𑀕𑀥𑀸 𑀦𑀽𑀦 𑀫𑀬𑀫𑁆𑀧𑀺 𑀢𑀼𑀬𑁆𑀳𑀁

𑀤𑀬𑀸𑀬 𑀢𑀲𑁆𑀫𑀸 𑀨𑀡𑀻𑀦𑀁 𑀯𑀺𑀫𑁂𑀲𑀁,

𑀓𑀭𑁄𑀳𑀺 𑀫𑀬𑁆𑀳𑀁 𑀪𑀯𑀦𑀫𑁆𑀳𑀺 𑀥𑀻𑀭

𑀧𑀸𑀤𑀁’𑀲𑀼𑀦𑀸’𑀢𑀻𑀯 𑀧𑀯𑀺𑀢𑁆𑀢𑀭𑀽𑀧𑀁;

𑁭𑁨𑁨.

𑀬𑁄’𑀬𑀁 𑀦𑀕𑁄 𑀤𑀺𑀲𑁆𑀲𑀢𑀺’𑀢𑁄 𑀧𑀼𑀭𑀢𑁆𑀣

𑀪𑀼𑀫𑀗𑁆𑀕𑀦𑀸 𑀫𑁄𑀮𑀺𑀲𑀺𑀭𑀺𑀁 𑀯𑀳𑀦𑁆𑀢𑁄,

𑀲𑀫𑀦𑁆𑀢𑀓𑀽𑀝𑁄𑀢𑀺 𑀲𑀫𑀦𑁆𑀢𑀘𑀓𑁆𑀔𑀼

𑀚𑀸𑀦𑀸𑀢𑀺 𑀮𑁄𑀓𑁄 𑀯𑀲𑀢𑀺𑀁 𑀫𑀫𑁂𑀢𑀁;

𑁭𑁨𑁩.

𑀬𑁄 𑀦𑀻𑀮 𑀦𑀸𑀦𑀸 𑀯𑀦𑀭𑀸𑀚𑀺 𑀭𑀸𑀚𑀺𑀢𑁄

𑀆𑀲𑀸𑀭 𑀥𑀸𑀭𑀸 𑀕𑀺𑀭𑀺 𑀦𑀺𑀚𑁆𑀛𑀭𑀸𑀓𑀼𑀮𑁄,

𑀆𑀧𑀻𑀢 𑀦𑀻𑀮𑀸𑀭𑀼𑀡 𑀧𑀮𑁆𑀮𑀯𑀸𑀯𑀮𑀻

𑀚𑀺𑀫𑀽𑀢𑀓𑀽𑀝𑁄 𑀯𑀺𑀬 𑀪𑀸𑀢𑀺 𑀉𑀕𑁆𑀕𑀢𑁄;

𑁭𑁨𑁪.

𑀬𑁄 𑀲𑀺𑀦𑁆𑀥𑀼𑀯𑀸𑀭𑀺𑀁 𑀉𑀭𑀲𑀸 𑀧𑀪𑁂𑀚𑁆𑀚

𑀆𑀕𑀫𑁆𑀫 𑀢𑁂 𑀧𑀸𑀤𑀧𑀡𑀸𑀫 𑀳𑁂𑀢𑀼,

𑀯𑀺𑀚𑁆𑀚𑁄𑀢𑀫𑀸𑀦𑁄 𑀯𑀺𑀬𑀘𑀓𑁆𑀓𑀧𑀸𑀡𑀺

𑀫𑀳𑀸𑀢𑀺 𑀢𑀼𑀗𑁆𑀕𑀕𑁆𑀕 𑀥𑀭𑀸𑀥𑀭𑀺𑀦𑁆𑀤𑁄;

𑁭𑁨𑁫. ¶

𑀕𑀗𑁆𑀕𑀸𑀯𑀥𑀽 𑀓𑀼𑀝𑀓𑀺𑀭𑀻𑀝𑀥𑀸𑀭𑀻

𑀲𑀸𑀫𑀦𑁆𑀢 𑀲𑁂𑀮𑀺𑀦𑁆𑀤 𑀘𑀫𑀽𑀧𑀢𑀻𑀓𑁄,

𑀬𑁄’𑀬𑀁 𑀥𑀭𑀸𑀥𑀸𑀭 𑀫𑀳𑀸𑀫𑀳𑀻𑀧𑁄

𑀭 𑀭𑀸𑀚 𑀮𑀗𑁆𑀓𑀸 𑀦𑀕𑀭𑀗𑁆𑀕𑀡𑀫𑁆𑀳𑀺;

𑁭𑁨𑁬.

𑀧𑀸𑀭𑁄𑀳 𑀤𑀦𑁆𑀢𑁄 𑀘𑀺𑀢𑀓𑀽𑀝 𑀓𑀼𑀫𑁆𑀪𑁄

𑀅𑀦𑁂𑀓 𑀲𑁄𑀡𑁆𑀟𑀺𑀓𑁆𑀔 𑀲𑀯𑀦𑁆𑀢𑀺 𑀳𑀢𑁆𑀣𑁄,

𑀬𑁄 𑀦𑀺𑀚𑁆𑀛𑀭𑀸𑀲𑀸𑀭 𑀫𑀤𑀧𑁆𑀧𑀯𑀸𑀳𑁄

𑀕𑀚𑁄𑀭𑀺𑀯𑀸’𑀪𑀸𑀢𑀺 𑀲𑀼𑀭𑀸𑀥𑀺𑀧𑀲𑁆𑀲;

𑁭𑁨𑁭.

𑀲𑀫𑁆𑀨𑀽𑀮𑁆𑀮 𑀧𑀼𑀧𑁆𑀨𑀢𑁆𑀣𑀩𑀓𑀸’𑀦𑀧𑀢𑁆𑀢𑀸

𑀲𑀢𑁆𑀥𑀢𑁆𑀢 𑀭𑀢𑁆𑀢𑀗𑁆𑀓𑀼𑀭𑀫𑁄𑀮𑀺𑀫𑀸𑀮𑀸,

𑀓𑀦𑁆𑀢𑀸𑀮𑀢𑀸’𑀮𑀺𑀗𑁆𑀕𑀺𑀢 𑀔𑀦𑁆𑀥𑀤𑁂𑀳𑀸

𑀢𑀺𑀝𑁆𑀞𑀦𑁆𑀢𑀺 𑀪𑀽𑀧𑀸𑀯 𑀬𑀳𑀺𑀁 𑀓𑀼𑀚𑀺𑀦𑁆𑀤𑀸;

𑁭𑁨𑁮.

𑀲𑀺𑀤𑁆𑀥𑀗𑁆𑀕𑀦𑀸 𑀭𑀢𑁆𑀢𑀧𑀤𑀫𑁆𑀩𑀼𑀚𑀸𑀮𑀻

𑀲𑀫𑁆𑀳𑀺𑀦𑁆𑀦 𑀳𑀢𑁆𑀣𑀸𑀪𑀭𑀡𑀸𑀮𑀺 𑀬𑀼𑀢𑁆𑀢𑀸,

𑀓𑁂𑀓𑀻𑀓𑀮𑀸𑀧𑀼𑀧𑁆𑀧𑀮 𑀫𑀸𑀮𑀫𑀸𑀮𑀻

𑀲𑀺𑀮𑀸𑀢𑀮𑀸𑀓𑀜𑁆𑀚 𑀦𑀺𑀪𑀦𑁆𑀢𑀺 𑀬𑀢𑁆𑀣;

𑁭𑁨𑁯.

𑀫𑀗𑁆𑀕𑀼𑀭 𑀧𑀸𑀞𑀻𑀦 𑀲𑀯𑀗𑁆𑀓 𑀲𑀺𑀗𑁆𑀕𑀼

𑀭𑁄𑀳𑀺𑀘𑁆𑀘 𑀫𑀼𑀜𑁆𑀚𑀸?𑀫𑀭 𑀧𑀸𑀯𑀼𑀲𑁂𑀳𑀺,

𑀓𑀼𑀮𑀻𑀭𑀦𑀓𑁆𑀓𑀸𑀤’𑀦𑀺𑀫𑁂𑀲𑀓𑁂𑀳𑀺

𑀦𑀺𑀓𑀻𑀴𑀻𑀢𑀁 𑀤𑀤𑁆𑀤𑀭 𑀭𑀢𑁆𑀢𑀧𑁂𑀳𑀺;

𑁭𑁩𑁦.

𑀦𑀺𑀘𑁆𑀘𑀜𑁆𑀳𑀺 𑀲𑀁𑀭𑀸𑀯 𑀯𑀺𑀭𑀸𑀘𑀺𑀢𑀸𑀦𑀁

𑀩𑀮𑀸𑀓 𑀓𑀸𑀤𑀫𑁆𑀩 𑀓𑀤𑀫𑁆𑀩𑀓𑀸𑀦𑀁,

𑀆𑀧𑀸𑀦𑀲𑀸𑀮𑀸 𑀯𑀺𑀬 𑀲𑀸𑀭𑀲𑀸𑀦𑀁

𑀳𑀁𑀲𑀸𑀮𑀺𑀦𑀁 𑀫𑀗𑁆𑀕𑀮 𑀯𑀸𑀲𑀪𑀽𑀢𑀁;

𑁭𑁩𑁧.

𑀦𑀺𑀭𑀦𑁆𑀢𑀭𑀸𑀫𑁄𑀤 𑀫𑀼𑀤𑀸𑀯𑀕𑁂𑀳𑀺

𑀲𑀼𑀨𑀼𑀮𑁆𑀮 𑀓𑁄𑀓𑀸𑀲’𑀭𑀯𑀺𑀦𑁆𑀤𑀓𑁂𑀳𑀺,

𑀲𑁄𑀕𑀦𑁆𑀥𑀺’𑀓𑀺𑀦𑁆𑀤𑀻𑀯𑀭 𑀓𑁂𑀭𑀯𑁂𑀳𑀺

𑀓𑀺𑀜𑁆𑀚𑀓𑁆𑀔 𑀙𑀦𑁆𑀦𑀡𑁆𑀡𑀢𑀮𑁂𑀳𑀺 𑀘𑀺𑀢𑁆𑀢𑀁;

𑁭𑁩𑁨. ¶

𑀲𑀻𑀢𑀘𑁆𑀙 𑀲𑀸𑀢𑁄𑀤𑀓 𑀲𑀫𑁆𑀧𑀧𑀼𑀡𑁆𑀡

𑀲𑀭𑁄𑀚𑀺𑀦𑀻 𑀮𑀗𑁆𑀓𑀢 𑀪𑀼𑀫𑀺𑀪𑀸𑀕𑁄,

𑀬𑁄’𑀬𑀁 𑀧𑀼𑀭𑁂 𑀪𑀸𑀢𑀺 𑀫𑀦𑀼𑀜𑁆𑀜𑀭𑀽𑀧𑁄

𑀲𑀫𑀦𑁆𑀢𑀓𑀽𑀝𑁄 𑀲 𑀲𑀫𑀦𑁆𑀢𑀓𑀽𑀝𑁄;

𑁭𑁩𑁩.

𑀤𑀮𑀺𑀢 𑀯𑀺𑀧𑀺𑀦𑀲𑀡𑁆𑀟𑀸 𑀬𑀢𑁆𑀣 𑀲𑁂𑀮𑁂 𑀲𑀫𑀦𑁆𑀢𑀸

𑀲𑀫𑀼𑀧𑀕𑀢 𑀚𑀦𑀸𑀦𑀁 𑀘𑀺𑀢𑁆𑀢𑀫𑀸𑀫𑁄𑀤𑀬𑀦𑁆𑀢𑀺,

𑀫𑀥𑀼𑀓 𑀯𑀝 𑀓𑀭𑁂𑀭𑀺 𑀩𑁄𑀥𑀺 𑀚𑀫𑁆𑀩𑀻𑀭 𑀪𑀮𑁆𑀮𑀺

𑀔𑀤𑀺𑀭’𑀪𑀬 𑀓𑀤𑀫𑁆𑀩𑀸 𑀨𑀼𑀮𑁆𑀮 𑀲𑁂𑀮𑁆𑀮𑀽 𑀧𑀮𑀸𑀲𑀸;

𑁭𑁩𑁪.

𑀧𑀡𑀲’𑀫𑀢 𑀧𑀺𑀮𑀓𑁆𑀔𑀸 𑀓𑀡𑁆𑀳𑀯𑀡𑁆𑀝’𑀓𑁆𑀔 𑀘𑀺𑀜𑁆𑀘𑀸

𑀮𑀩𑀼𑀚 𑀩𑀤𑀭𑀺 𑀦𑀻𑀧𑀸 𑀨𑀦𑁆𑀤𑀦𑀺’𑀦𑁆𑀤𑀻𑀯𑀭𑀸𑀯

𑀫𑀓𑀼𑀮’𑀲𑀦 𑀧𑀺𑀬𑀸𑀮𑀸 𑀕𑀤𑁆𑀤𑀪𑀡𑁆𑀟’𑀚𑁆𑀚𑀼𑀦𑀸 𑀘

𑀓𑀫𑀼𑀓 𑀲𑀮𑁆𑀮 𑀢𑀺𑀦𑁆𑀤𑀼’𑀤𑀼𑀫𑁆𑀩𑀭𑀫𑁆𑀩𑀲𑁆𑀲’𑀓𑀡𑁆𑀡𑀸;

𑁭𑁩𑁫.

𑀧𑀼𑀦𑁆𑀦𑀸𑀕 𑀘𑀫𑁆𑀧𑀓 𑀤𑀼𑀫𑀼𑀧𑁆𑀧𑀮 𑀤𑀸𑀟𑀺𑀫𑀸 𑀘

𑀔𑀚𑁆𑀚𑀽𑀭𑀺 𑀢𑀸𑀮 𑀕𑀺𑀭𑀺𑀫𑀮𑁆𑀮𑀺𑀓’𑀲𑁄𑀓 𑀢𑀸𑀮𑀸,

𑀳𑀺𑀦𑁆𑀢𑀸𑀮 𑀦𑀸𑀕 𑀦𑀺𑀯𑀼𑀮𑀸 𑀬𑀼𑀕𑀧𑀢𑁆𑀢’𑀭𑀺𑀝𑁆𑀞

𑀲𑁂𑀢𑀫𑁆𑀩 𑀏𑀭𑀯𑀢𑀓𑀸𑀧𑀺 𑀘 𑀓𑁂𑀢𑀓𑀸 𑀘

𑁭𑁩𑁬.

𑀲𑀫𑀨𑀼𑀮𑁆𑀮𑀪𑀡𑁆𑀟𑀺 𑀲𑀼𑀫𑀦’𑀚𑁆𑀚𑀓 𑀬𑀽𑀣𑀺𑀓𑀸 𑀘

𑀯𑀸𑀲𑀦𑁆𑀢𑀺 𑀘𑀺𑀢𑁆𑀢𑀓 𑀚𑀧𑀸 𑀭𑀯𑀺𑀫𑀸𑀮𑀢𑀻 𑀘,

𑀓𑀼𑀦𑁆𑀤𑀲𑁆𑀲’𑀫𑀸𑀭𑀓 𑀓𑀼𑀭𑀡𑁆𑀟𑀓 𑀩𑀻𑀚𑀧𑀽𑀭

𑀲𑁂𑀨𑀸𑀮𑀺𑀓𑀸 𑀘 𑀢𑀺𑀡𑀲𑀽𑀮 𑀲𑀫𑀻𑀭𑀡𑀸 𑀘;

𑁭𑁩𑁭.

𑀯𑁄𑀘𑀼’𑀘𑁆𑀚𑀼 𑀓𑀻𑀘𑀓 𑀳𑀮𑀺𑀤𑁆𑀤𑀺 𑀯𑀺𑀴𑀗𑁆𑀕𑀺 𑀩𑀺𑀫𑁆𑀩𑀺

𑀦𑀻𑀮𑀻 𑀯𑀘𑀸’𑀢𑀺𑀯𑀺𑀲𑀸𑀮𑀸𑀩𑀼 𑀘 𑀦𑀸𑀕𑀯𑀮𑁆𑀮𑀻,

𑀯𑀮𑁆𑀮𑀻𑀳 𑀲𑀸𑀭𑀤’𑀧𑀭𑀸𑀚𑀺𑀢𑀯𑀸𑀭𑀼’𑀲𑀻𑀭𑀸

𑀨𑀮𑀸𑀤𑀺 𑀦𑁂𑀓 𑀯𑀦𑀭𑀸𑀚𑀺 𑀯𑀺𑀭𑀸𑀚𑀺𑀢𑁄 𑀲𑁄;

𑁭𑁩𑁮.

𑀢𑀺𑀝𑁆𑀞𑀦𑁆𑀢𑀺 𑀓𑁂𑀘𑀺 𑀢𑀭𑀯𑁄 𑀲𑀼𑀭𑀪𑀺𑀁 𑀓𑀺𑀭𑀦𑁆𑀢𑀸

𑀢𑀢𑁆𑀣𑁂𑀯 𑀓𑁂𑀘𑀺 𑀨𑀮𑀺𑀢𑀸 𑀫𑀥𑀼𑀭𑀧𑁆𑀨𑀮𑀸𑀦𑀺,

𑀅𑀦𑁆𑀤𑁄𑀮𑀺𑀢𑀸 𑀨𑀮𑀺𑀢𑀧𑀮𑁆𑀮𑀯𑀺𑀢𑀸 𑀮𑀢𑀸𑀬𑁄

𑀲𑀦𑁆𑀥𑀸𑀭𑀬𑀁 𑀯𑀺𑀝𑀧 𑀚𑀢𑁆𑀢𑀼𑀲𑀼 𑀪𑀦𑁆𑀢𑀺 𑀓𑁂𑀘𑀺;

𑁭𑁩𑁯. ¶

𑀲𑀸𑀫𑀦𑁆𑀢𑀕𑁂 𑀚𑀦𑀕𑀡𑁂 𑀲𑀢𑀢𑀁 𑀤𑀼𑀫𑀺𑀦𑁆𑀤𑀸

𑀲𑀫𑁆𑀧𑀻𑀡𑀬𑀦𑁆𑀢𑀺 𑀤𑀮𑀺𑀢𑀸 𑀨𑀮𑀺𑀦𑁄 𑀘 𑀬𑀲𑁆𑀫𑀺𑀁,

𑀢𑁂 𑀅𑀯𑁆𑀳𑀬𑀦𑁆𑀢𑀺 𑀯𑀺𑀬 𑀮𑁄𑀘𑀦 𑀕𑁄𑀘𑀭𑁂𑀳𑀺

𑀯𑀸𑀢𑁂’𑀭𑀺𑀢𑁂𑀳𑀺 𑀢𑀭𑀼𑀡𑀸𑀭𑀼𑀡 𑀧𑀮𑁆𑀮𑀯𑁂𑀳𑀺;

𑁭𑁪𑁦.

𑀢𑀲𑁆𑀫𑀺𑀁 𑀯𑀦𑁂 𑀯𑀦𑀲𑀼𑀭𑀸 𑀦𑀺𑀚𑀯𑀲𑀼𑀦𑁆𑀤𑀭𑀻𑀳𑀺

𑀭𑀫𑁆𑀫𑁂 𑀲𑀺𑀮𑀸𑀢𑀮𑀤𑀳𑁂 𑀲𑀺𑀓𑀢𑀸𑀢𑀮𑁂 𑀘,

𑀦𑀘𑁆𑀘𑀦𑁆𑀢𑀺 𑀢𑀦𑁆𑀢𑀺 𑀢𑀼𑀭𑀺𑀬𑀸𑀦𑀺 𑀘 𑀯𑀸𑀤𑀬𑀦𑁆𑀢𑀺

𑀕𑀸𑀬𑀦𑁆𑀢𑀺 𑀫𑀸𑀮𑀪𑀭𑀺𑀦𑁄 𑀲𑀢𑀢𑀁 𑀧𑀢𑀻𑀢𑀸;

𑁭𑁪𑁧.

𑀲𑀺𑀤𑁆𑀥𑀸 𑀘 𑀲𑀺𑀤𑁆𑀥𑀯𑀦𑀺𑀢𑀸 𑀳𑀺 𑀢𑀳𑀺𑀁 𑀢𑀳𑀺𑀁 𑀢𑁂

𑀤𑀺𑀩𑁆𑀩𑀦𑁆𑀢𑀺 𑀧𑀼𑀧𑁆𑀨𑀨𑀮 𑀧𑀢𑁆𑀢𑀭𑀲𑀸𑀳𑀺𑀦𑀦𑁆𑀤𑀺,

𑀅𑀘𑁆𑀙𑀦𑁆𑀢𑀺 𑀢𑀢𑁆𑀣 𑀕𑀺𑀭𑀺𑀧𑀸𑀤𑀧 𑀭𑀸𑀫𑀡𑁂𑀬𑁆𑀬𑁂

𑀬𑁄𑀕𑁂𑀳𑀺 𑀲𑀗𑁆𑀕𑀢 𑀫𑀦𑀸 𑀩𑀳𑀺𑀢𑀸𑀧𑀲𑀸𑀧𑀺;

𑁭𑁪𑁨.

𑀢𑀲𑁆𑀫𑀺𑀁 𑀯𑀦𑁂 𑀳𑀭𑀺𑀡 𑀭𑁄𑀳𑀺𑀢 𑀧𑀼𑀡𑁆𑀟𑀭𑀻𑀓

𑀕𑁄𑀓𑀡𑁆𑀡 𑀲𑀮𑁆𑀮 𑀲𑀲 𑀚𑀫𑁆𑀩𑀼𑀓 𑀲𑀽𑀓𑀭𑀸 𑀘,

𑀲𑀸𑀔𑀸𑀫𑀺𑀕𑁂’𑀡𑀺𑀯𑀕 𑀩𑀩𑁆𑀩𑀼 𑀭𑀼𑀭𑀽 𑀓𑀼𑀭𑀼𑀗𑁆𑀕

𑀕𑁄𑀥𑀸’𑀔𑀼 𑀧𑀫𑁆𑀧𑀓 𑀓𑀧𑀻 𑀕𑀯𑀬𑀸 𑀘’𑀦𑁂𑀓𑀸;

𑁭𑁪𑁩.

𑀢𑁂 𑀯𑀕𑁆𑀕 𑀯𑀕𑁆𑀕 𑀘𑀭𑀺𑀦𑁄 𑀳𑀬𑀫𑀸𑀭𑀓𑀸𑀤𑀻

𑀦𑀸𑀦𑀸 𑀘𑀢𑀼𑀧𑁆𑀧𑀤𑀕𑀡𑀸 𑀫𑀼𑀤𑀺𑀢𑀸 𑀯𑀲𑀦𑁆𑀢𑀺,

𑀧𑀓𑁆𑀔𑀻𑀧𑀺 𑀓𑁄𑀲𑀺𑀬 𑀓𑀧𑁄𑀢𑀓 𑀦𑀻𑀮𑀕𑀻𑀯

𑀥𑀗𑁆𑀓𑀸’𑀝 𑀮𑀸𑀧 𑀧𑀭𑀧𑀼𑀝𑁆𑀞 𑀫𑀥𑀼𑀩𑁆𑀩𑀢𑀸𑀯;

𑁭𑁪𑁪.

𑀦𑀺𑀚𑁆𑀚𑀺𑀯𑁆𑀳 𑀤𑀺𑀦𑁆𑀤𑀺𑀳 𑀘𑀓𑁄𑀭𑀓 𑀲𑀸𑀴𑀺𑀓𑀸 𑀘

𑀘𑀓𑁆𑀓𑀯𑁆𑀳 𑀓𑀻𑀭 𑀓𑀼𑀭𑀭𑀸 𑀓𑀼𑀮𑀮𑀸 𑀘 𑀓𑀗𑁆𑀓𑀸,

𑀘𑀺𑀢𑁆𑀭𑀘𑁆𑀙𑀤𑀸 𑀫𑀥𑀼𑀭 𑀓𑀽𑀚𑀓 𑀦𑁂𑀓𑀧𑀓𑁆𑀔𑀻

𑀲𑀗𑁆𑀕𑀫𑁆𑀫 𑀬𑀢𑁆𑀣 𑀦𑀺𑀯𑀲𑀦𑁆𑀢𑀺 𑀫𑀦𑀼𑀜𑁆𑀜𑀭𑀽𑀧𑀸;

𑁭𑁪𑁫.

𑀢𑁂𑀲𑀁 𑀯𑀦𑀦𑁆𑀢𑀫𑀣 𑀦𑀸𑀝𑀓𑀫𑀡𑁆𑀟𑀮𑀸’𑀘

𑀕𑀻𑀢𑀸𑀮𑀬𑀁 𑀯𑀺𑀬 𑀅𑀳𑁄𑀲𑀺 𑀘 𑀕𑀸𑀬𑀓𑀸𑀦𑀁,

𑀆𑀧𑀸𑀦𑀪𑀼𑀫𑀺 𑀲𑀤𑀺𑀲𑀁 𑀫𑀺𑀕𑀧𑀓𑁆𑀔𑀺𑀓𑀸𑀦𑀁

𑀦𑀺𑀘𑁆𑀘𑀼𑀲𑁆𑀲𑀯𑀁 𑀭𑀢𑀺𑀓𑀭𑀁 𑀦𑀬𑀦𑀸𑀪𑀺𑀭𑀸𑀫𑀁;

𑁭𑁪𑁬. ¶

𑀏𑀯𑀁 𑀯𑀺𑀥𑁄 𑀯𑀺𑀧𑀺𑀦𑀭𑀸𑀚𑀺 𑀯𑀺𑀭𑀸𑀚𑀺𑀢𑁂𑀳𑀺

𑀓𑀽𑀝𑁂𑀳𑀺 𑀦𑁂𑀓𑀲𑀼𑀭 𑀲𑀼𑀦𑁆𑀤𑀭𑀺 𑀫𑀡𑁆𑀟𑀺𑀢𑁂𑀳𑀺,

𑀅𑀢𑁆𑀬𑀼𑀘𑁆𑀘 𑀦𑀻𑀮𑀲𑀺𑀔𑀺𑀕𑀻𑀯 𑀲𑀫𑀸𑀦 𑀯𑀡𑁆𑀡𑁄

𑀏𑀲𑁄 𑀲𑀫𑀦𑁆𑀢𑀕𑀺𑀭𑀺 𑀫𑁂 𑀯𑀲𑀢𑀻 𑀫𑀼𑀦𑀺𑀦𑁆𑀤;

𑁭𑁪𑁭.

𑀏𑀯𑀁 𑀧𑀢𑀻𑀢 𑀫𑀦𑀲𑁄 𑀲𑀼𑀫𑀦𑀸𑀪𑀺𑀥𑀸𑀦𑁄

𑀯𑀢𑁆𑀯𑀸𑀦 𑀦𑀢𑁆𑀯𑀫𑀲𑀫𑀁 𑀕𑀫𑀦𑁄𑀧𑀬𑀼𑀢𑁆𑀢𑀁,

𑀓𑀸𑀲𑀸𑀣 𑀲𑁄𑀧𑀺 𑀫𑀼𑀦𑀺 𑀢𑀲𑁆𑀲 𑀯𑀘𑀁 𑀧𑀝𑀺𑀘𑁆𑀘

𑀲𑀩𑁆𑀪𑀺𑀓𑁆𑀔𑀼 𑀦𑀺𑀓𑁆𑀔𑀫𑀺 𑀚𑀺𑀦𑁄 𑀕𑀕𑀦𑀸𑀬𑀦𑀫𑁆𑀳𑀺;

𑁭𑁪𑁮.

𑀦𑀺𑀘𑁆𑀘𑁂𑀢𑀦𑀸𑀧𑀺 𑀕𑀺𑀭𑀺𑀧𑀸𑀤𑀧 𑀆𑀤𑀬𑁄𑀧𑀺

𑀦𑀸𑀕𑀸 𑀲𑀼𑀧𑀡𑁆𑀡 𑀫𑀺𑀕 𑀧𑀓𑁆𑀔𑀺𑀓 𑀳𑁂𑀢𑀼𑀓𑀸𑀧𑀺,

𑀯𑀺𑀚𑁆𑀚𑀸𑀥𑀭𑀸𑀫𑀭’𑀲𑀼𑀭𑀸 𑀘𑀢𑀼𑀭𑀸𑀡𑀦𑀸𑀧𑀺

𑀲𑀗𑁆𑀕𑀫𑁆𑀫’𑀓𑀁𑀲𑀼 𑀲𑀼𑀫𑀦𑀸 𑀫𑀳𑀫𑀩𑁆𑀪𑀼𑀢𑀁 𑀢𑁂;

𑁭𑁪𑁯.

𑀫𑀼𑀦𑀺𑀦𑁆𑀤𑁂 𑀧𑀬𑀦𑁆𑀢𑁂 𑀲𑀫𑀺𑀤𑁆𑀥𑀁 𑀢𑀺𑀮𑁄𑀓𑀁

𑀕𑀺𑀭𑀺𑀦𑁆𑀤𑀸𑀪𑀺𑀦𑀦𑁆𑀤𑀸 𑀤𑀼𑀫𑀺𑀦𑁆𑀤𑀸 𑀧𑀩𑀼𑀤𑁆𑀥𑀸,

𑀫𑀺𑀕𑀺𑀦𑁆𑀤𑀸 𑀲𑀼𑀢𑀼𑀝𑁆𑀞𑀸 𑀔𑀕𑀺𑀦𑁆𑀤𑀸 𑀲𑀼𑀖𑀼𑀝𑁆𑀞𑀸

𑀧𑀯𑀼𑀝𑁆𑀞𑁄 𑀫𑀳𑀺𑀦𑁆𑀤𑁄 𑀧𑀡𑀝𑁆𑀞𑁄 𑀦𑀺𑀤𑀸𑀖𑁄;

𑁭𑁫𑁦.

𑀕𑀘𑁆𑀙𑀦𑁆𑀢𑁂 𑀕𑀕𑀦𑀸𑀬𑀦𑁂𑀦 𑀲𑀼𑀕𑀢𑁂 𑀪𑀸𑀦𑀼’𑀲𑀺 𑀲𑀦𑁆𑀢𑁄 𑀢𑀤𑀸

𑀯𑀸𑀭𑁂𑀲𑀼𑀁 𑀲𑀽𑀭𑀺𑀬𑀸𑀢𑀧𑀜𑁆𑀘 𑀚𑀮𑀤𑀸 𑀲𑀺𑀜𑁆𑀚𑀺𑀁𑀲𑀼 𑀪𑀼𑀫𑁆𑀬𑀸 𑀚𑀮𑀁,

𑀫𑀦𑁆𑀤𑀸𑀫𑀦𑁆𑀤 𑀲𑀼𑀕𑀦𑁆𑀥 𑀫𑀼𑀤𑁆𑀥 𑀧𑀯𑀦𑁄 𑀧𑀸𑀧𑁂𑀢𑀺 𑀲𑀺𑀢𑀁 𑀲𑀼𑀔𑀁,

𑀤𑁂𑀯𑀸𑀤𑀺 𑀥𑀚 𑀙𑀢𑁆𑀢 𑀘𑀸𑀫𑀭𑀓𑀭𑀸 𑀧𑀽𑀚𑁂𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀘;

𑁭𑁫𑁧.

𑀲𑀦𑁆𑀦𑀻𑀭 𑀳𑀺𑀦𑁆𑀢𑀸𑀮’𑀕 𑀲𑀺𑀦𑁆𑀤𑀺 𑀧𑀽𑀕

𑀢𑀸𑀮𑀫𑁆𑀩𑀲𑀸𑀮𑀸𑀤𑀺 𑀫𑀳𑀻𑀭𑀼𑀳𑀺𑀢𑁆𑀤𑀸,

𑀢𑀺𑀝𑁆𑀞𑀦𑁆𑀢𑀺 𑀢𑁂 𑀘𑀸𑀫𑀭𑀳𑀢𑁆𑀣𑀓𑀸’𑀯

𑀧𑀼𑀧𑁆𑀨𑁂𑀳𑀺 𑀙𑀦𑁆𑀦𑁄 𑀕𑀕𑀦𑀗𑁆𑀕𑀦𑁄𑀧𑀺;

𑁭𑁫𑁨.

𑀅𑀦𑁂𑀦 𑀯𑀺𑀥𑀺𑀦𑀸 𑀚𑀕𑀤𑁂𑀓 𑀦𑀸𑀣𑁄

𑀧𑀯𑀢𑁆𑀢𑀫𑀸𑀦𑁂𑀲𑀼 𑀫𑀳𑀸𑀫𑀳𑁂𑀲𑀼,

𑀤𑀺𑀲𑀜𑁆𑀘 𑀯𑀺𑀤𑀺𑀲𑀁 𑀧𑀭𑀺𑀧𑀽𑀭𑀬𑀦𑁆𑀢𑁄

𑀚𑀩𑁆𑀩𑀡𑁆𑀡𑀭𑀁𑀲𑀻𑀳𑀺 𑀅𑀕𑀸 𑀦𑀕𑀺𑀦𑁆𑀤𑀁;

𑁭𑁫𑁩. ¶

𑀢𑀲𑁆𑀫𑀺𑀁 𑀲𑀫𑀦𑁆𑀢𑀦𑀕𑀫𑀼𑀤𑁆𑀥𑀦𑀺 𑀮𑁄𑀓𑀦𑀸𑀣𑁄

𑀙𑀩𑁆𑀩𑀡𑁆𑀡𑀭𑀁𑀲𑀺 𑀦𑀺𑀓𑀭𑀁 𑀤𑀺𑀲𑀺 𑀧𑀢𑁆𑀣𑀭𑀦𑁆𑀢𑁄,

𑀪𑀺𑀓𑁆𑀔𑀽𑀳𑀺 𑀲𑁄 𑀧𑀭𑀺𑀯𑀼𑀢𑁄 𑀧𑀭𑀲𑀸𑀕𑀭𑀦𑁆𑀢𑀁

𑀑𑀮𑁄𑀓𑀬𑀁 𑀞𑀺𑀢𑀺𑀫𑀓𑀸𑀲𑀺 𑀅𑀅𑀦𑁄𑀫𑀯𑀡𑁆𑀡𑁄;

𑁭𑁫𑁪.

𑀮𑀗𑁆𑀓𑀸𑀯𑀥𑀽 𑀲𑀼𑀫𑀦𑀓𑀽𑀝 𑀓𑀺𑀭𑀻𑀝 𑀓𑀽𑀝𑀁

𑀲𑀚𑁆𑀚𑁂𑀲𑀺’𑀦𑀕𑁆𑀖 𑀚𑀦 𑀭𑀸𑀚 𑀫𑀡𑀻 𑀫𑀳𑀦𑁆𑀢𑁄,

𑀇𑀘𑁆𑀙𑀢𑁆𑀣𑀤𑀁 𑀲𑀺𑀯𑀤𑀫𑀧𑁆𑀧𑀝𑀺𑀫𑀁 𑀢𑀺𑀮𑁄𑀓𑁂

𑀢𑀁’𑀤𑀸𑀦𑀺 𑀪𑁄 𑀪𑀚𑀣 𑀲𑁂𑀯𑀣 𑀲𑀩𑁆𑀩𑀓𑀸𑀮𑀁;

𑁭𑁫𑁫.

𑀓𑀸𑀲𑀼𑀁 𑀢𑀤𑀸 𑀲𑀼𑀭𑀯𑀭𑀸 𑀲𑀼𑀭𑀲𑀼𑀦𑁆𑀤𑀭𑀻𑀳𑀺

𑀮𑀗𑁆𑀓𑀸𑀬 𑀲𑁂𑀮𑀲𑀺𑀔𑀭𑁂𑀲𑀼 𑀫𑀳𑀸𑀲𑀫𑀚𑁆𑀚𑀁,

𑀯𑀚𑁆𑀚𑀺𑀁𑀲𑀼 𑀪𑁂𑀭𑀺 𑀯𑀺𑀓𑀢𑀻 𑀲𑀬𑀫𑁂𑀯 𑀲𑀩𑁆𑀩𑀸

𑀪𑀲𑁆𑀲𑀺𑀁𑀲𑀼 𑀤𑀺𑀩𑁆𑀩𑀓𑀼𑀲𑀼𑀫𑀸𑀪𑀭𑀡𑀸 𑀦𑀪𑀫𑁆𑀳𑀸;

𑁭𑁫𑁬.

𑀮𑀗𑁆𑀓𑀫𑁆𑀩𑀭𑀁 𑀦𑀺𑀔𑀺𑀮𑀫𑀸𑀲𑀺 𑀘 𑀙𑀢𑁆𑀢𑀙𑀢𑁆𑀢𑀁

𑀦𑀸𑀦𑀸 𑀯𑀺𑀭𑀸𑀕 𑀥𑀚 𑀓𑁂𑀢𑀼 𑀲𑀫𑀸𑀓𑀼𑀮𑀜𑁆𑀘,

𑀦𑀸𑀦𑀸𑀲𑀼𑀕𑀦𑁆𑀥 𑀓𑀼𑀲𑀼𑀫𑀸𑀤𑀺 𑀤𑀺𑀲𑀦𑁆𑀢𑀭𑀸𑀮𑀁,

𑀦𑀸𑀦𑀕𑁆𑀖𑀺𑀓𑀸𑀯𑀮𑀺 𑀯𑀺𑀭𑀸𑀚𑀺𑀢 𑀫𑀦𑁆𑀢𑀴𑀺𑀓𑁆𑀔𑀁;

𑁭𑁫𑁭.

𑀢𑀲𑁆𑀫𑀺𑀁 𑀤𑀺𑀦𑁂’𑀲𑀺 𑀭𑀢𑀦𑀁 𑀫𑀡𑀺𑀢𑁄𑀭𑀡𑁂𑀳𑀺

𑀤𑀻𑀧𑀸𑀮𑀺 𑀧𑀼𑀡𑁆𑀡𑀖𑀝𑀧𑀦𑁆𑀢𑀻𑀳𑀺 𑀤𑀲𑁆𑀲𑀦𑀻𑀬𑀁,

𑀲𑀫𑁆𑀩𑀼𑀤𑁆𑀥 𑀤𑁂𑀳𑀧𑀭𑀺𑀢𑁄𑀕𑀢 𑀙𑀧𑁆𑀧𑀪𑀸𑀳𑀺

𑀭𑀢𑁆𑀢𑀁 𑀦𑀪𑀸𑀯𑀦𑀺 𑀘𑀭𑀸𑀘𑀭 𑀲𑀩𑁆𑀩𑀤𑀩𑁆𑀩𑀁;

𑁭𑁫𑁮.

𑀫𑀸𑀮𑀸𑀯𑀢𑀁𑀲 𑀲𑀫𑀓𑀸 𑀕𑀺𑀭𑀬𑁄 𑀲𑀫𑀦𑁆𑀢𑀸

𑀳𑀼𑀢𑁆𑀯𑀸 𑀦𑀫𑀦𑁆𑀢𑀺 𑀘 𑀪𑀫𑀦𑁆𑀢𑀺 𑀲𑀘𑁂𑀢𑀦𑀸’𑀯,

𑀲𑀩𑁆𑀩𑁂𑀧𑀺 𑀢𑀢𑁆𑀣 𑀢𑀭𑀯𑁄𑀘 𑀮𑀢𑀸𑀤𑀬𑁄 𑀘

𑀦𑀘𑁆𑀘𑀦𑁆𑀢𑀺 𑀤𑀺𑀩𑁆𑀩𑀦𑀝𑀓𑀸 𑀯𑀺𑀬 𑀑𑀦𑀢𑀕𑁆𑀕𑀸;

𑁭𑁫𑁯.

𑀏𑀯𑀁 𑀢𑀤𑀸 𑀫𑀳𑀢 𑀯𑀺𑀫𑁆𑀳𑀬 𑀧𑀸𑀝𑀺𑀳𑁂𑀭𑁂

𑀩𑀼𑀤𑁆𑀥𑀸𑀦𑀼𑀪𑀸𑀯 𑀚𑀦𑀺𑀢𑁂 𑀇𑀥 𑀯𑀢𑁆𑀢𑀫𑀸𑀦𑁂,

𑀢𑀢𑁆𑀯𑀸𑀦 𑀥𑀻𑀭𑀘𑀭𑀡𑀁 𑀲𑀫𑀦𑁄 𑀲𑀼𑀥𑀸𑀲𑀻

𑀏𑀯𑀁 𑀯𑀤𑀻 𑀧𑀭𑀫 𑀧𑀺𑀢𑀺𑀫𑀦𑁄 𑀉𑀤𑀕𑁆𑀕𑁄;

𑁭𑁬𑁦. ¶

𑀬𑁂 𑀢𑁂 𑀫𑀼𑀤𑀼 𑀓𑁄𑀫𑀮 𑀭𑀢𑁆𑀢𑀧𑀸𑀤𑀸

𑀲𑀼𑀭𑀢𑁆𑀢 𑀨𑀼𑀮𑁆𑀮𑀫𑁆𑀩𑀼𑀭𑀼𑀳𑁄𑀧𑀫𑀸𑀦𑀸,

𑀯𑀝𑁆𑀝𑀸𑀦𑀼𑀧𑀼𑀩𑁆𑀩𑀸𑀬𑀢 𑀅𑀗𑁆𑀕𑀼𑀮𑀺𑀓𑀸

𑀲𑀼𑀢𑀫𑁆𑀩𑀢𑀼𑀗𑁆𑀕𑀕𑁆𑀕 𑀦𑀔𑀸𑀯𑀮𑀻𑀓𑀸;

𑁭𑁬𑁧.

𑀲𑀼𑀯𑀡𑁆𑀡𑀓𑀼𑀫𑁆𑀫𑀼’𑀦𑁆𑀦𑀢 𑀧𑀸𑀤𑀧𑀺𑀝𑁆𑀞𑀺

𑀦𑀺𑀕𑀼𑀴𑁆𑀳 𑀕𑁄𑀧𑁆𑀨𑀸𑀬𑀢 𑀧𑀡𑁆𑀳𑀺𑀪𑀸𑀕𑀸

𑀲𑀫𑀘𑁆𑀙𑀫𑀸𑀬𑀁 𑀲𑀓𑀮𑀁 𑀧𑀢𑀺𑀝𑁆𑀞𑀺𑀢𑀸

𑀦 𑀮𑀺𑀫𑁆𑀧𑀢𑁂 𑀲𑀼𑀘𑁆𑀙𑀯𑀺𑀢𑀸 𑀭𑀚𑀸𑀤𑀺;

𑁭𑁬𑁨.

𑀲𑀫𑁆𑀫𑀢𑁆𑀢 𑀳𑀢𑁆𑀣𑁄𑀲𑀪 𑀳𑀁𑀲 𑀲𑀻𑀳

𑀲𑀫𑀸𑀦 𑀮𑀻𑀮𑀸𑀬 𑀬𑀳𑀺𑀁 𑀧𑀬𑀸𑀢𑀺,

𑀦𑀺𑀦𑁆𑀦𑀼𑀦𑁆𑀦𑀢𑀸 𑀪𑁂𑀭𑀺𑀢𑀮𑀸’𑀯 𑀪𑀼𑀫𑀺

𑀳𑁄𑀢𑀸𑀣 𑀧𑀼𑀧𑁆𑀨𑀸𑀤𑀺 𑀲𑀼𑀫𑀡𑁆𑀟𑀺𑀢𑀸 𑀘;

𑁭𑁬𑁩.

𑀅𑀧𑁂𑀦𑁆𑀢𑀺 𑀫𑀕𑁆𑀕𑀸 𑀲𑀬𑀫𑁂𑀯 𑀔𑀸𑀡𑀼

𑀲𑀓𑀡𑁆𑀝𑀫𑀽𑀮𑀸 𑀓𑀞𑀮𑀸 𑀘 𑀲𑀩𑁆𑀩𑁂,

𑀕𑀫𑁆𑀪𑀻𑀭 𑀦𑀻𑀭𑀸𑀧𑀕 𑀧𑀗𑁆𑀓𑀤𑀼𑀕𑁆𑀕𑀸

𑀳𑀺𑀢𑁆𑀯𑀸 𑀲𑀪𑀸𑀯𑀁 𑀭𑀫𑀡𑀻𑀬𑀫𑁂𑀦𑁆𑀢𑀺;

𑁭𑁬𑁪.

𑀯𑀚𑀦𑁆𑀢𑀺 𑀪𑀼𑀫𑀺𑀁 𑀕𑀺𑀭𑀬𑁄 𑀧𑀼𑀭𑀢𑁆𑀣

𑀧𑀲𑀸𑀭𑀺𑀢𑁂 𑀧𑀸𑀤𑀯𑀭𑁂 𑀚𑀺𑀦𑀲𑁆𑀲,

𑀦𑀺𑀩𑁆𑀩𑀸𑀢𑀺 𑀅𑀕𑁆𑀕𑀻 𑀦𑀭𑀓𑁄𑀤𑀭𑁂𑀧𑀺

𑀕𑀡𑁆𑀳𑀦𑁆𑀢𑀺 𑀧𑀸𑀤𑁂 𑀧𑀤𑀼𑀫𑀸𑀤𑀬𑁄 𑀘;

𑁭𑁬𑁫.

𑀇𑀤𑀜𑁆𑀳𑀺 𑀢𑁂 𑀧𑀸𑀤𑀢𑀮𑁂 𑀬𑀢𑀻𑀲

𑀲𑀦𑀸𑀪𑀺 𑀦𑁂𑀫𑀺 𑀖𑀝𑀺𑀓𑀸𑀯𑀮𑀻𑀳𑀺,

𑀲𑀼𑀲𑀡𑁆𑀞𑀺𑀢𑀁 𑀘𑀸’𑀭𑀲𑀳𑀲𑁆𑀲𑀯𑀦𑁆𑀢𑀁

𑀲𑀦𑁆𑀤𑀺𑀲𑁆𑀲𑀢𑁂 𑀘𑀓𑁆𑀓𑀯𑀭𑀁 𑀫𑀳𑀦𑁆𑀢𑀁;

𑁭𑁬𑁬.

𑀢𑀫𑁂𑀯 𑀘𑀓𑁆𑀓𑀁 𑀧𑀭𑀺𑀯𑀸𑀭𑀬𑀺𑀢𑁆𑀯𑀸

𑀲𑀺𑀭𑀺𑀯𑀘𑁆𑀙 𑀲𑁄𑀯𑀢𑁆𑀣𑀺’𑀯𑀢𑀁𑀲𑀓𑀸 𑀘,

𑀧𑀸𑀲𑀸𑀤 𑀪𑀤𑁆𑀭𑀸𑀲𑀦 𑀧𑀼𑀡𑁆𑀡𑀧𑀸𑀢𑀺

𑀲𑀺𑀢𑀸𑀢𑀧𑀢𑁆𑀢𑀸𑀲𑀺 𑀫𑀬𑀽𑀭𑀳𑀢𑁆𑀣𑀸;

𑁭𑁬𑁭. ¶

𑀦𑀻𑀮𑀸𑀤𑀺𑀪𑁂𑀤𑀸 𑀓𑀫𑀮𑀼𑀧𑁆𑀧𑀮𑀸 𑀘

𑀲𑀫𑁂𑀭𑀼 𑀲𑀢𑁆𑀢𑀤𑁆𑀤𑀺 𑀫𑀳𑀸𑀲𑀫𑀼𑀤𑁆𑀤𑀸,

𑀲𑀢𑁆𑀢𑀸𑀧𑀕𑀸 𑀲𑀢𑁆𑀢 𑀫𑀳𑀸𑀲𑀭𑀸 𑀘

𑀳𑀺𑀫𑀸𑀮𑀬𑁄 𑀘𑀓𑁆𑀓𑀯𑀸𑀴𑀤𑁆𑀤𑀺𑀓𑁄 𑀘;

𑁭𑁬𑁮.

𑀘𑀦𑁆𑀤𑀓𑁆𑀓𑀢𑀸𑀭𑀸 𑀘 𑀙𑀤𑁂𑀯𑀮𑁄𑀓𑀸

𑀧𑀺𑀢𑀸𑀫𑀳𑀸𑀯𑀸𑀲 𑀫𑀦𑀼𑀲𑁆𑀲𑀮𑁄𑀓𑀁,

𑀲𑀼𑀯𑀡𑁆𑀡 𑀦𑀸𑀯𑀸 𑀲𑀺𑀯𑀺𑀓𑀸 𑀘 𑀲𑀗𑁆𑀔𑀁

𑀓𑁂𑀮𑀸𑀲𑀲𑁂𑀮𑀁 𑀥𑀚𑀢𑁄𑀭𑀡𑀸 𑀘;

𑁭𑁬𑁯.

𑀘𑀺𑀦𑁆𑀢𑀸𑀫𑀡𑀼𑀡𑁆𑀳𑀻𑀲 𑀲𑀯𑀘𑁆𑀙 𑀥𑁂𑀦𑀽

𑀫𑀻𑀦𑀤𑁆𑀯𑀬𑀁 𑀘𑀓𑁆𑀓𑀯𑀢𑁆𑀢𑀺 𑀲𑀲𑁂𑀦𑁄,

𑀲𑀻𑀳’𑀲𑁆𑀲 𑀫𑀸𑀢𑀗𑁆𑀕 𑀯𑀺𑀬𑀕𑁆𑀖𑀭𑀸𑀚𑀸

𑀳𑀁𑀲𑁄𑀲𑀪𑁄 𑀓𑀺𑀫𑁆𑀧𑀼𑀭𑀺𑀲𑁄 𑀫𑀬𑀽𑀭𑁄;

𑁭𑁭𑁦.

𑀓𑁄𑀜𑁆𑀘𑀸 𑀘 𑀏𑀭𑀸𑀯𑀡 𑀳𑀢𑁆𑀣𑀺𑀭𑀸𑀚𑀸

𑀲𑀘𑀓𑁆𑀓𑀯𑀸𑀓𑀸 𑀫𑀓𑀭𑀸𑀤𑀬𑁄 𑀘,

𑀦𑀸𑀦𑀸 𑀫𑀳𑀸𑀫𑀗𑁆𑀕𑀮 𑀮𑀓𑁆𑀔𑀡𑀸 𑀢𑁂

𑀯𑀺𑀭𑁄𑀘𑀫𑀸𑀦𑀸 𑀯𑀺𑀮𑀲𑀦𑁆𑀢𑀺 𑀦𑀺𑀘𑁆𑀘𑀁;

𑁭𑁭𑁧.

𑀚𑀸𑀢𑀓𑁆𑀔𑀡𑁂 𑀬𑀲𑁆𑀲 𑀫𑀳𑀺𑀁 𑀧𑀪𑁂𑀚𑁆𑀚

𑀯𑀺𑀲𑀸𑀮 𑀲𑀢𑁆𑀢𑀼𑀤𑁆𑀤𑀬 𑀧𑀗𑁆𑀓𑀚𑀸𑀦𑀺,

𑀧𑀝𑀺𑀕𑁆𑀕𑀳𑁂𑀲𑀼𑀁 𑀘𑀭𑀡𑀸𑀦𑀺 𑀬𑀸𑀦𑀺

𑀢𑁂 𑀢𑀸𑀦𑀺𑀫𑀸𑀦𑀘𑁆𑀙𑀭𑀺𑀬𑀸𑀦𑀺 𑀮𑁄𑀓𑁂;

𑁭𑁭𑁨.

𑀯𑀦𑁆𑀤𑀸𑀧𑀦𑀢𑁆𑀣𑀸𑀬𑀼’𑀧𑀦𑀻𑀢𑀓𑀸𑀮𑁂

𑀧𑀺𑀢𑀽𑀳𑀺 𑀢𑁂 𑀤𑁂𑀯𑀮 𑀢𑀸𑀧𑀲𑀺𑀦𑁆𑀤𑀁,

𑀧𑀸𑀤𑀸𑀦𑀺 𑀕𑀦𑁆𑀢𑁆𑀯𑀸𑀦 𑀚𑀝𑀸𑀲𑀼 𑀢𑀲𑁆𑀲

𑀆𑀲𑀼𑀁 𑀢𑀯𑁂’𑀢𑀗𑁆𑀖𑀺𑀬𑀼𑀕𑀁 𑀅𑀳𑁄 𑀪𑁄;

𑁭𑁭𑁩.

𑀲𑀼𑀤𑁆𑀥𑁄𑀤𑀦𑀯𑁆𑀳𑀲𑁆𑀲 𑀦𑀭𑀸𑀥𑀺𑀧𑀲𑁆𑀲

𑀲𑀦𑁆𑀢𑁄𑀲 𑀢𑁄𑀬𑁂𑀳𑀺 𑀧𑀧𑀽𑀭𑀺𑀢𑀲𑁆𑀲,

𑀲𑀺𑀭𑁄 𑀯𑀺𑀲𑀼𑀤𑁆𑀥𑀫𑁆𑀩𑀼 𑀭𑀼𑀳𑀸𑀓𑀭𑀲𑁆𑀲

𑀲𑀭𑁄𑀭𑀼 𑀳𑀸𑀲𑀼𑀁 𑀘𑀭𑀡𑀸𑀦𑀺 𑀢𑀼𑀬𑁆𑀳𑀁;

𑁭𑁭𑁪. ¶

𑀬𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀡𑀸𑀯𑀲𑀸𑀦𑁂

𑀑𑀦𑀫𑁆𑀫 𑀫𑁂𑀭𑀽𑀤𑀬 𑀧𑀩𑁆𑀩𑀦𑀺𑀡𑁆𑀤𑀸,

𑀧𑀝𑀺𑀕𑁆𑀕𑀳𑁂𑀲𑀼𑀁 𑀘𑀭𑀡𑀸𑀦𑀺 𑀬𑀸𑀦𑀺

𑀢𑁂 𑀢𑀸𑀦𑀺𑀫𑀸’𑀦𑀘𑁆𑀙𑀭𑀺𑀬𑀸𑀦𑀺 𑀮𑁄𑀓𑁂;

𑁭𑁭𑁫.

𑀬𑀁 𑀯𑀦𑁆𑀤𑀫𑀸𑀦𑁄 𑀢𑀺𑀤𑀺𑀯𑀸𑀥𑀺𑀧𑁄 𑀲𑁄

𑀬𑀲𑁆𑀲𑀸𑀦𑀼𑀪𑀸𑀯𑁂𑀦 𑀕𑀢𑀸𑀬𑀼𑀓𑁄𑀧𑀺,

𑀲𑀓𑀺𑀬𑀞𑀸𑀦𑁂’𑀲𑀺𑀦𑀧𑀼𑀦𑀸𑀧𑀺 𑀢𑁂’𑀯𑀁

𑀧𑀸𑀤𑀫𑁆𑀩𑀼𑀚𑀁 𑀥𑀻𑀭!𑀫𑀳𑀸𑀦𑀼𑀪𑀸𑀯𑀁;

𑁭𑁭𑁬.

𑀤𑁂𑀳𑀻𑀦𑀫𑀕𑁆𑀕𑁄𑀧𑀺 𑀦𑀺𑀲𑀸𑀓𑀭𑀸𑀭𑀺

𑀫𑀸𑀦𑀼𑀦𑁆𑀦𑀢𑁄 𑀲𑁄 𑀲𑀬𑀺𑀢𑀲𑁆𑀲 𑀢𑀼𑀬𑁆𑀳𑀁,

𑀧𑀸𑀤𑀲𑁆𑀲 𑀅𑀦𑁆𑀢𑀫𑁆𑀧𑀺 𑀦 𑀲𑀓𑁆𑀔𑀺 𑀤𑀝𑁆𑀞𑀼𑀁

𑀅𑀘𑁆𑀙𑁂𑀭 𑀭𑀽𑀧𑀁 𑀇𑀤𑀫𑀗𑁆𑀖𑀺𑀓𑀜𑁆𑀚𑀁;

𑁭𑁭𑁭.

𑀕𑀗𑁆𑀕𑀸𑀬 𑀕𑀗𑁆𑀕𑀸𑀧𑀢𑀺 𑀲𑀦𑁆𑀦𑀺𑀥𑀸𑀦𑁂

𑀢𑀻𑀭𑁂 𑀢𑀤𑀸 𑀦𑀫𑁆𑀫𑀤 𑀚𑀺𑀫𑁆𑀳𑀕𑀲𑁆𑀲,

𑀧𑀸𑀤𑀲𑁆𑀲 𑀮𑀜𑁆𑀙𑀁 𑀅𑀓𑀭𑀻 𑀫𑀼𑀦𑀺𑀦𑁆𑀤

𑀫𑀬𑁆𑀳𑀁’𑀧𑀺 𑀳𑁄𑀢𑀁 𑀓𑀭𑀼𑀡𑀸 𑀢𑀯𑁂𑀲𑀸;

𑁭𑁭𑁮.

𑀆𑀭𑀸𑀥𑀺𑀢𑁄 𑀲𑀘𑁆𑀘𑀓 𑀢𑀸𑀧𑀲𑁂𑀦

𑀅𑀓𑀸 𑀢𑀼𑀯𑀁 𑀲𑀘𑁆𑀘𑀓 𑀩𑀤𑁆𑀥𑀲𑁂𑀮𑁂,

𑀧𑀸𑀤𑀲𑁆𑀲 𑀮𑀜𑁆𑀙𑀁 𑀚𑀕𑀢𑁄 𑀳𑀺𑀢𑀸𑀬

𑀫𑀬𑁆𑀳𑀫𑁆𑀧𑀺 𑀳𑁄𑀢𑀁 𑀢𑀫𑀦𑀼𑀕𑁆𑀕𑀳𑀦𑁆𑀢𑁂;

𑁭𑁭𑁯.

𑀲𑀼𑀢𑁆𑀯𑀸𑀦 𑀦𑀸𑀣𑁄 𑀕𑀺𑀭𑀫𑁂𑀢𑀫𑀲𑁆𑀲

𑀧𑀲𑁆𑀲𑀁 𑀫𑀳𑀸𑀪𑀼𑀢𑀺’𑀫𑀦𑀸𑀕𑀢𑁂𑀲𑀼,

𑀮𑁄𑀓𑀲𑁆𑀲 𑀮𑁄𑀓𑁂𑀳𑀺 𑀫𑀳𑀻𑀬 𑀫𑀸𑀦𑁄

𑀅𑀓𑀸𑀲𑀺 𑀯𑀸𑀫𑁂𑀦 𑀧𑀤𑁂𑀦 𑀮𑀜𑁆𑀙𑀁;

𑁭𑁮𑁦.

𑀲𑀫𑁆𑀩𑁄𑀥𑀺𑀢𑁄 𑀅𑀝𑁆𑀞𑀫 𑀲𑀸𑀭𑀤𑀲𑁆𑀫𑀺𑀁

𑀯𑁂𑀲𑀸𑀔𑀫𑀸𑀲𑁂 𑀫𑀼𑀡𑀺 𑀧𑀼𑀡𑁆𑀡𑀫𑀸𑀬𑀁,

𑀧𑀸𑀤𑀲𑁆𑀲’𑀪𑀺𑀜𑁆𑀜𑀸𑀡𑀫𑀓𑀸’𑀧𑀭𑀡𑁆𑀳𑁂

𑀲𑀤𑁂𑀯𑀓𑁂 𑀲𑀲𑁆𑀲𑀫𑀡𑁂 𑀫𑀳𑁂𑀦𑁆𑀢𑁂;

𑁭𑁮𑁧. ¶

𑀧𑀢𑀗𑀓𑁆𑀕𑀺𑀓𑀸 𑀲𑀺𑀢𑁆𑀣𑀓 𑀫𑀢𑁆𑀣𑀓𑀫𑁆𑀳𑀺

𑀬𑀣𑀗𑁆𑀓𑀺𑀢𑀸 𑀔𑀢𑁆𑀢𑀺𑀬 𑀫𑀼𑀤𑁆𑀤𑀺𑀓𑀸𑀬,

𑀆𑀲𑁂𑀯’𑀫𑁂𑀯𑀁 𑀚𑀺𑀦𑀧𑀸𑀤𑀮𑀜𑁆𑀙𑀁

𑀲𑀫𑀦𑁆𑀢𑀓𑀽𑀝𑀫𑁆𑀳𑀺 𑀦𑀫𑀲𑁆𑀲𑀦𑀻𑀬𑀁;

𑁭𑁮𑁨.

𑀅𑀓𑀸𑀮𑀫𑁂𑀖𑁄 𑀘 𑀢𑀢𑁄 𑀧𑀯𑀲𑁆𑀲𑀺

𑀯𑀲𑁆𑀲𑀺𑀁𑀲𑀼 𑀦𑀸𑀦𑀸𑀭𑀢𑀦𑀸𑀦𑀺 𑀔𑀫𑁆𑀳𑀸,

𑀢𑀣𑀸 𑀧𑀭𑀺𑀢𑁄 𑀓𑀼𑀲𑀼𑀫𑀫𑁆𑀩𑀭𑀸𑀦𑀺

𑀲𑀼𑀯𑀡𑁆𑀡𑀘𑀼𑀡𑁆𑀡𑀸𑀦𑀺 𑀚𑀺𑀦𑁂𑀓𑀯𑀡𑁆𑀡𑀸;

𑁭𑁮𑁩.

𑀢𑀢𑁄’𑀧𑀕𑀦𑁆𑀢𑁆𑀯𑀸 𑀲𑀼𑀕𑀢𑁂𑀪𑀕𑀸𑀫𑀻

𑀢𑀲𑁆𑀫𑀺𑀁 𑀦𑀺𑀢𑀫𑁆𑀩𑁂 𑀕𑀺𑀭𑀺𑀕𑀩𑁆𑀪𑀭𑀸𑀬𑀁,

𑀤𑀺𑀯𑀸𑀯𑀺𑀳𑀸𑀭𑀸𑀬 𑀦𑀺𑀲𑀻𑀤𑀺 𑀬𑀢𑁆𑀣

𑀲𑀼𑀧𑀸𑀓𑀝𑀁 𑀢𑀁 𑀪𑀕𑀯𑀸𑀕𑀼𑀳𑀸’𑀢𑀺;

𑁭𑁮𑁪.

𑀢𑀢𑁄𑀭𑀳𑀦𑁆𑀢𑀸 𑀲𑀼𑀕𑀢𑁄𑀭𑀲𑀸 𑀢𑁂

𑀕𑀦𑁆𑀥𑀸𑀤𑀺𑀦𑀸 𑀲𑀸𑀥𑀼 𑀫𑀳𑁂𑀢𑁆𑀯 𑀲𑀩𑁆𑀩𑁂,

𑀯𑀦𑁆𑀤𑀺𑀢𑁆𑀯 𑀓𑀢𑁆𑀯𑀸𑀦 𑀧𑀤𑀓𑁆𑀔𑀺𑀡𑀦𑁆𑀢𑀁

𑀢𑀳𑀁 𑀢𑀳𑀁’𑀓𑀁𑀲𑀼 𑀤𑀺𑀯𑀸𑀯𑀺𑀳𑀸𑀭𑀁;

𑁭𑁮𑁫.

𑀮𑀢𑀗𑁆𑀕𑀦𑀸𑀬𑁄 𑀯𑀺𑀝𑀧𑀻𑀥𑀯𑀸𑀦

𑀫𑀸𑀮𑀫𑁆𑀩 𑀲𑀸𑀔𑀸𑀧𑀼𑀣𑀼𑀮𑀁’𑀲𑀧𑀲𑁆𑀲𑁂,

𑀲𑀼𑀨𑀼𑀮𑁆𑀮 𑀦𑀫𑀜𑁆𑀚𑀽𑀓𑀭 𑀫𑀜𑁆𑀚𑀭𑀻𑀳𑀺

𑀦𑀫𑀲𑁆𑀲𑀫𑀸𑀦𑀸’𑀯 𑀲𑀤𑁄𑀦𑀢𑀕𑁆𑀕𑀸;

𑁭𑁮𑁬.

𑀢𑀺𑀝𑁆𑀞𑀦𑁆𑀢𑀺 𑀭𑀼𑀓𑁆𑀔𑀸 𑀦𑀝𑀓𑀸’𑀯 𑀢𑀢𑁆𑀣

𑀲𑀼𑀨𑀼𑀮𑁆𑀮 𑀲𑀸𑀔𑀸𑀓𑀭’𑀫𑀼𑀓𑁆𑀔𑀺𑀧𑀺𑀢𑁆𑀯𑀸,

𑀦𑀫𑀲𑁆𑀲𑀫𑀸𑀦𑀸 𑀯𑀺𑀬 𑀑𑀦𑀢𑀕𑁆𑀕𑀸

𑀯𑀢𑁆𑀢𑀦𑁆𑀢𑀺 𑀫𑀸𑀦𑀘𑁆𑀙𑀭𑀺𑀬𑀸𑀦𑀺 𑀦𑀺𑀘𑁆𑀘𑀁;

𑁭𑁮𑁭.

𑀢𑀣𑁂𑀯 𑀉𑀘𑁆𑀘𑀸𑀯𑀘 𑀧𑀩𑁆𑀩𑀢𑀸 𑀘

𑀦𑀫𑀲𑁆𑀲𑀫𑀸𑀦𑀸 𑀯𑀺𑀬 𑀧𑀸𑀤𑀮𑀜𑁆𑀙𑀁,

𑀢𑀺𑀝𑁆𑀞𑀦𑁆𑀢𑀺 𑀦𑀺𑀦𑁆𑀦𑀕𑁆𑀕 𑀲𑀺𑀔𑀸 𑀲𑀫𑀦𑁆𑀢𑀸

𑀇𑀤𑀫𑁆𑀧𑀺 𑀦𑀺𑀘𑁆𑀘𑀩𑀪𑀼𑀢𑀫𑁂𑀯 𑀢𑀢𑁆𑀣;

𑁭𑁮𑁮. ¶

𑀢𑀲𑁆𑀫𑀺𑀁 𑀦𑀕𑁂 𑀧𑀸𑀤𑀯𑀭𑀗𑁆𑀓𑀺𑀢𑀲𑁆𑀫𑀺𑀁

𑀔𑀮𑀫𑀡𑁆𑀟𑀮𑁄𑀓𑀸𑀲 𑀧𑀤𑁂𑀲𑀫𑀢𑁆𑀢𑁂,

𑀲𑀫𑁄𑀲𑀭𑀦𑁆𑀢𑁂 𑀩𑀳𑀼𑀓𑁂 𑀚𑀦𑁂𑀧𑀺

𑀳𑁄𑀢𑁂𑀯 𑀑𑀓𑀸𑀲𑀫,𑀳𑁄 𑀧𑀤𑀗𑁆𑀓𑀁;

𑁭𑁮𑁯.

𑀲𑀫𑁄𑀲𑀭𑀺𑀢𑁆𑀯𑀸𑀦 𑀫𑀳𑁂𑀢𑁆𑀯 𑀲𑀢𑁆𑀢𑁂

𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁂 𑀚𑀮𑀤𑀸 𑀲𑀫𑁂𑀘𑁆𑀘,

𑀲𑁄𑀥𑁂𑀦𑁆𑀢𑀺 𑀫𑀸𑀮’𑀫𑁆𑀩𑀼𑀯𑀳𑁂𑀳𑀺 𑀲𑀸𑀥𑀼

𑀇𑀤𑀫𑁆𑀧𑀺 𑀦𑀺𑀘𑁆𑀘𑀩𑁆𑀪𑀼𑀢𑀫𑁂𑀯 𑀢𑀢𑁆𑀣;

𑁭𑁯𑁦.

𑀧𑀸𑀤𑁂𑀦 𑀨𑀼𑀝𑁆𑀞𑀲𑁆𑀲 𑀲𑀺𑀮𑀸𑀢𑀮𑀲𑁆𑀲

𑀏𑀢𑀸𑀤𑀺𑀲𑀸𑀦𑀘𑁆𑀙𑀭𑀺𑀬𑀸𑀦𑀺 𑀳𑁄𑀦𑁆𑀢𑀺,

𑀮𑁄𑀓𑁂𑀓𑀦𑀸𑀣𑀲𑁆𑀲 𑀅𑀦𑀸𑀲𑀯𑀲𑁆𑀲

𑀫𑀳𑀩𑁆𑀪𑀼𑀢𑀁 𑀓𑁄𑀦𑀼 𑀓𑀣𑀁 𑀪𑀡𑁂𑀬𑁆𑀬;

𑁭𑁯𑁧.

𑀤𑀺𑀯𑀸𑀯𑀺𑀳𑀸𑀭𑀁 𑀪𑀕𑀯𑀸 𑀲𑀲𑀗𑁆𑀖𑁄

𑀓𑀢𑁆𑀯𑀸𑀦 𑀢𑀲𑁆𑀫𑀺𑀁 𑀧𑀦 𑀓𑀺𑀜𑁆𑀘𑀺𑀓𑀸𑀮𑀁,

𑀫𑀳𑀻𑀬𑀫𑀸𑀦𑁂𑀲𑀼 𑀲𑀤𑁂𑀯𑀓𑁂𑀲𑀼

𑀢𑀢𑁄 𑀕𑀢𑁄 𑀭𑁄𑀳𑀡𑀫𑀫𑁆𑀩𑀭𑀫𑁆𑀳𑀸;

𑁭𑁯𑁨.

𑀢𑀲𑁆𑀫𑀺𑀁 𑀲𑀲𑀗𑁆𑀖𑁄 𑀫𑀼𑀦𑀺 𑀤𑀻𑀖𑀯𑀸𑀧𑀺𑀬𑀁

𑀣𑀽𑀧𑀲𑁆𑀲 𑀞𑀸𑀦𑁂 𑀧𑀭𑀫𑀸𑀬 𑀪𑀼𑀫𑀺𑀬𑀸,

𑀕𑀭𑀼𑀁 𑀓𑀭𑁄𑀦𑁆𑀢𑁄 𑀧𑀦 𑀢𑀁 𑀫𑀳𑀻𑀢𑀮𑀁

𑀦𑀺𑀭𑁄𑀥𑀪𑀸𑀯𑁂𑀦 𑀦𑀺𑀲𑀻𑀤𑀺 𑀲𑀢𑁆𑀭𑀚𑁄;

𑁭𑁯𑁩.

𑀢𑀢𑁄’𑀦𑀼𑀭𑀸𑀥𑀁 𑀪𑀕𑀯𑀸 𑀦𑀪𑀫𑁆𑀳𑀸

𑀕𑀦𑁆𑀢𑁆𑀯𑀸𑀦 𑀩𑁄𑀥𑀺𑀝𑁆𑀞𑀺𑀢𑀪𑀼𑀫𑀺𑀬𑀸 𑀘,

𑀞𑀸𑀦𑁂 𑀫𑀳𑀸𑀫𑀗𑁆𑀕𑀮𑀘𑁂𑀢𑀺𑀬𑀲𑁆𑀲

𑀢𑀣𑁂𑀯 𑀅𑀓𑁆𑀔𑀦𑁆𑀢𑀺𑀦𑀳𑀺𑀢𑀲𑁆𑀲 𑀞𑀸𑀦𑁂;

𑁭𑁯𑁪.

𑀦𑀺𑀲𑀻𑀤𑀺 𑀧𑀢𑁆𑀯𑀸𑀦 𑀦𑀺𑀭𑀸𑀥𑀧𑀻𑀢𑀺𑀁

𑀲𑀲𑀸𑀯𑀓𑁄 𑀧𑁂𑀓𑁆𑀔𑀫’𑀦𑀸𑀕𑀢𑀤𑁆𑀥𑀁,

𑀧𑀢𑀺𑀝𑁆𑀞𑀺𑀢𑀸 𑀫𑁂 𑀧𑀦 𑀩𑁄𑀥𑀺𑀥𑀸𑀢𑀼

𑀓𑀭𑁄𑀦𑁆𑀢𑀺 𑀮𑁄𑀓𑁂’𑀢𑀺 𑀚𑀦𑀲𑁆𑀲 𑀯𑀼𑀤𑁆𑀥𑀺𑀁;

𑁭𑁯𑁫. ¶

𑀯𑀼𑀝𑁆𑀞𑀸𑀬 𑀢𑀼𑀝𑁆𑀞𑁄 𑀪𑀕𑀯𑀸 𑀦𑀺𑀭𑁄𑀥𑀸

𑀕𑀢𑁄 𑀲𑀺𑀮𑀸𑀣𑀽𑀧𑀯𑀭𑀲𑁆𑀲 𑀞𑀸𑀦𑀁,

𑀞𑀺𑀢𑁄 𑀢𑀳𑀺𑀁 𑀥𑀫𑁆𑀫𑀫𑀣𑀼𑀤𑁆𑀤𑀺𑀲𑀺𑀢𑁆𑀯𑀸

𑀕𑀢𑁄 𑀦𑀪𑀸 𑀚𑁂𑀢𑀯𑀦𑀁 𑀲𑀼𑀭𑀫𑁆𑀫𑀁;

𑁭𑁯𑁬.

𑀏𑀯𑀁 𑀲𑁄 𑀥𑀫𑁆𑀫𑀭𑀸𑀚𑀸 𑀚𑀦𑀳𑀺𑀢𑀯𑀺𑀳𑀺𑀢𑁄 𑀯𑀻𑀢 𑀤𑁄𑀲𑀸𑀭𑀺𑀯𑀕𑁆𑀕𑁄

𑀮𑀗𑁆𑀓𑀸𑀭𑀸𑀫𑀸𑀬 𑀭𑀫𑁆𑀫𑁂 𑀲𑀼𑀫𑀦𑀕𑀺𑀭𑀺𑀲𑀺𑀭𑁂’𑀓𑀸𑀲𑀺 𑀬𑀁 𑀧𑀸𑀤𑀮𑀜𑁆𑀙𑀁

𑀢𑀁 𑀯𑁄 𑀲𑀕𑁆𑀕𑀸’𑀧𑀯𑀕𑁆𑀕𑀁 𑀤𑀤𑀢𑀺 𑀫𑀼𑀦𑀺𑀲𑀫𑀁 𑀘𑀺𑀢𑁆𑀢 𑀫𑀢𑁆𑀢𑁂 𑀧𑀲𑀦𑁆𑀦𑁂

𑀢𑀲𑁆𑀫𑀸 𑀪𑁄!𑀪𑁄! 𑀧𑀳𑀝𑁆𑀞𑀸 𑀦𑀫𑀣 𑀫𑀳𑀣 𑀢𑀁 𑀲𑀸𑀥𑀼 𑀲𑀸𑀥𑀼𑀧𑁆𑀧𑀲𑀢𑁆𑀣𑀁;

𑀇𑀢𑀺 𑀲𑀫𑀦𑁆𑀢𑀓𑀽𑀝 𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀕𑁆𑀭𑀦𑁆𑀣 𑀲𑀫𑀸𑀧𑁆𑀢𑀺𑀬.

𑁧.

𑀅𑀦𑀦𑁆𑀢𑀭𑀸 𑀲𑀫𑀢𑁆𑀢𑀸𑀬𑀁 𑀲𑀼𑀫𑀡𑀤𑁆𑀤𑀺𑀲𑀼 𑀯𑀡𑁆𑀡𑀦𑀸,

𑀢𑀣𑁂𑀯 𑀲𑀸𑀥𑀽 𑀲𑀗𑁆𑀓𑀧𑁆𑀧𑀸 𑀔𑀺𑀧𑁆𑀧𑀁 𑀧𑀧𑁆𑀧𑁄𑀦𑁆𑀢𑀼 𑀧𑀸𑀡𑀺𑀦𑀁;

𑁨.

𑀬𑁄 𑀬𑀸𑀘𑀺𑀢𑁄’𑀭𑀜𑁆𑀜𑀯𑀸𑀲𑀻 𑀕𑀼𑀡𑀸𑀥𑀸𑀭 𑀲𑀼𑀥𑀻𑀫𑀢𑀸,

𑀭𑀸𑀳𑀼𑀮𑀢𑁆𑀣𑁂𑀭𑀦𑀸𑀫𑁂𑀦 𑀯𑀺𑀲𑁆𑀲𑀼𑀢𑁂𑀦 𑀫𑀳𑀻𑀢𑀮𑁂;

𑁩.

𑀪𑀼𑀯𑀦𑁄𑀤𑀭𑀫𑁆𑀳𑀺 𑀧𑀜𑁆𑀜𑀸𑀢𑁄 𑀭𑀯𑀻𑀯𑀫𑁆𑀩𑀭 𑀫𑀡𑁆𑀟𑀮𑁂,

𑀅𑀭𑀜𑁆𑀜𑀭𑀢𑀦𑀸𑀦𑀦𑁆𑀤 𑀫𑀳𑀸𑀣𑁂𑀭𑁄 𑀫𑀳𑀸𑀕𑀡𑀻;

𑁪.

𑀚𑀻𑀯𑀺𑀢𑀁 𑀯𑀺𑀬 𑀬𑁄 𑀲𑀢𑁆𑀣𑀼𑀲𑀸𑀲𑀦𑀲𑁆𑀲 𑀫𑀳𑀸𑀓𑀯𑀻,

𑀲𑀸𑀭𑁄 𑀲𑀼𑀧𑁆𑀧𑀝𑀺𑀧𑀢𑁆𑀢𑀻𑀲𑀼 𑀲𑀢𑁆𑀣𑀲𑀸𑀕𑀭 𑀧𑀸𑀭𑀕𑁄;

𑁫.

𑀢𑀲𑁆𑀲 𑀲𑀺𑀲𑁆𑀲𑁄’𑀲𑀺 𑀬𑁄 𑀯𑀺𑀧𑁆𑀧𑀕𑀸𑀫 𑀯𑀁𑀲𑁂𑀓 𑀓𑁂𑀢𑀼𑀓𑁄

𑀜𑀸𑀢𑀸𑀕𑀫𑁄’𑀭𑀜𑁆𑀜𑀯𑀸𑀲𑀻 𑀲𑀻𑀮𑀸𑀤𑀺 𑀕𑀼𑀡𑀪𑀽𑀲𑀡𑁄;

𑁬.

𑀬𑁄’𑀓𑀸 𑀲𑀻𑀳𑀮𑀪𑀸𑀲𑀸𑀬 𑀲𑀻𑀳𑀮𑀁 𑀲𑀤𑁆𑀤𑀮𑀓𑁆𑀔𑀡𑀁,

𑀢𑁂𑀦 𑀯𑁂𑀤𑁂𑀳𑀣𑁂𑀭𑁂𑀦 𑀓𑀢𑀸𑀬𑀫𑁆𑀧𑀺𑀬𑀲𑀻𑀮𑀺𑀦𑀸;

𑀲𑀺𑀤𑁆𑀥𑀺𑀭𑀢𑁆𑀣𑀼.