📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀤𑀻𑀖𑀦𑀺𑀓𑀸𑀬𑁄

𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑀧𑀸𑀴𑀺

𑁧. 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀁

𑀧𑀭𑀺𑀩𑁆𑀩𑀸𑀚𑀓𑀓𑀣𑀸

𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀅𑀦𑁆𑀢𑀭𑀸 𑀘 𑀭𑀸𑀚𑀕𑀳𑀁 𑀅𑀦𑁆𑀢𑀭𑀸 𑀘 𑀦𑀸𑀴𑀦𑁆𑀤𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀲𑀼𑀧𑁆𑀧𑀺𑀬𑁄𑀧𑀺 𑀔𑁄 𑀧𑀭𑀺𑀩𑁆𑀩𑀸𑀚𑀓𑁄 𑀅𑀦𑁆𑀢𑀭𑀸 𑀘 𑀭𑀸𑀚𑀕𑀳𑀁 𑀅𑀦𑁆𑀢𑀭𑀸 𑀘 𑀦𑀸𑀴𑀦𑁆𑀤𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺 𑀲𑀤𑁆𑀥𑀺𑀁 𑀅𑀦𑁆𑀢𑁂𑀯𑀸𑀲𑀺𑀦𑀸 𑀩𑁆𑀭𑀳𑁆𑀫𑀤𑀢𑁆𑀢𑁂𑀦 𑀫𑀸𑀡𑀯𑁂𑀦. 𑀢𑀢𑁆𑀭 𑀲𑀼𑀤𑀁 𑀲𑀼𑀧𑁆𑀧𑀺𑀬𑁄 𑀧𑀭𑀺𑀩𑁆𑀩𑀸𑀚𑀓𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺; 𑀲𑀼𑀧𑁆𑀧𑀺𑀬𑀲𑁆𑀲 𑀧𑀦 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀅𑀦𑁆𑀢𑁂𑀯𑀸𑀲𑀻 𑀩𑁆𑀭𑀳𑁆𑀫𑀤𑀢𑁆𑀢𑁄 𑀫𑀸𑀡𑀯𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺. 𑀇𑀢𑀺𑀳 𑀢𑁂 𑀉𑀪𑁄 𑀆𑀘𑀭𑀺𑀬𑀦𑁆𑀢𑁂𑀯𑀸𑀲𑀻 𑀅𑀜𑁆𑀜𑀫𑀜𑁆𑀜𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀯𑀸𑀤𑀸 𑀪𑀕𑀯𑀦𑁆𑀢𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀸 [𑀅𑀦𑀼𑀩𑀤𑁆𑀥𑀸 (𑀓. 𑀲𑀻. 𑀧𑀻.)] 𑀳𑁄𑀦𑁆𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘.

𑁨. 𑀅𑀣 𑀔𑁄 𑀪𑀕𑀯𑀸 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀁 𑀭𑀸𑀚𑀸𑀕𑀸𑀭𑀓𑁂 𑀏𑀓𑀭𑀢𑁆𑀢𑀺𑀯𑀸𑀲𑀁 𑀉𑀧𑀕𑀘𑁆𑀙𑀺 [𑀉𑀧𑀕𑀜𑁆𑀙𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀲𑀼𑀧𑁆𑀧𑀺𑀬𑁄𑀧𑀺 𑀔𑁄 𑀧𑀭𑀺𑀩𑁆𑀩𑀸𑀚𑀓𑁄 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀁 𑀭𑀸𑀚𑀸𑀕𑀸𑀭𑀓𑁂 𑀏𑀓𑀭𑀢𑁆𑀢𑀺𑀯𑀸𑀲𑀁 𑀉𑀧𑀕𑀘𑁆𑀙𑀺 [𑀉𑀧𑀕𑀜𑁆𑀙𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀅𑀦𑁆𑀢𑁂𑀯𑀸𑀲𑀺𑀦𑀸 𑀩𑁆𑀭𑀳𑁆𑀫𑀤𑀢𑁆𑀢𑁂𑀦 𑀫𑀸𑀡𑀯𑁂𑀦. 𑀢𑀢𑁆𑀭𑀧𑀺 𑀲𑀼𑀤𑀁 𑀲𑀼𑀧𑁆𑀧𑀺𑀬𑁄 𑀧𑀭𑀺𑀩𑁆𑀩𑀸𑀚𑀓𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺; 𑀲𑀼𑀧𑁆𑀧𑀺𑀬𑀲𑁆𑀲 𑀧𑀦 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀅𑀦𑁆𑀢𑁂𑀯𑀸𑀲𑀻 𑀩𑁆𑀭𑀳𑁆𑀫𑀤𑀢𑁆𑀢𑁄 𑀫𑀸𑀡𑀯𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺. 𑀇𑀢𑀺𑀳 𑀢𑁂 𑀉𑀪𑁄 𑀆𑀘𑀭𑀺𑀬𑀦𑁆𑀢𑁂𑀯𑀸𑀲𑀻 𑀅𑀜𑁆𑀜𑀫𑀜𑁆𑀜𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀯𑀸𑀤𑀸 𑀯𑀺𑀳𑀭𑀦𑁆𑀢𑀺.

𑁩. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀺𑀢𑀸𑀦𑀁 𑀫𑀡𑁆𑀟𑀮𑀫𑀸𑀴𑁂 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀬𑀁 𑀲𑀗𑁆𑀔𑀺𑀬𑀥𑀫𑁆𑀫𑁄 𑀉𑀤𑀧𑀸𑀤𑀺 𑁋 ‘‘𑀅𑀘𑁆𑀙𑀭𑀺𑀬𑀁, 𑀆𑀯𑀼𑀲𑁄, 𑀅𑀩𑁆𑀪𑀼𑀢𑀁, 𑀆𑀯𑀼𑀲𑁄, 𑀬𑀸𑀯𑀜𑁆𑀘𑀺𑀤𑀁 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀢𑁆𑀢𑀸𑀦𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸 𑀲𑀼𑀧𑁆𑀧𑀝𑀺𑀯𑀺𑀤𑀺𑀢𑀸. 𑀅𑀬𑀜𑁆𑀳𑀺 𑀲𑀼𑀧𑁆𑀧𑀺𑀬𑁄 𑀧𑀭𑀺𑀩𑁆𑀩𑀸𑀚𑀓𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺; 𑀲𑀼𑀧𑁆𑀧𑀺𑀬𑀲𑁆𑀲 𑀧𑀦 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀅𑀦𑁆𑀢𑁂𑀯𑀸𑀲𑀻 𑀩𑁆𑀭𑀳𑁆𑀫𑀤𑀢𑁆𑀢𑁄 𑀫𑀸𑀡𑀯𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺. 𑀇𑀢𑀺𑀳𑀫𑁂 𑀉𑀪𑁄 𑀆𑀘𑀭𑀺𑀬𑀦𑁆𑀢𑁂𑀯𑀸𑀲𑀻 𑀅𑀜𑁆𑀜𑀫𑀜𑁆𑀜𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀯𑀸𑀤𑀸 𑀪𑀕𑀯𑀦𑁆𑀢𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀸 𑀳𑁄𑀦𑁆𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘𑀸’’𑀢𑀺.

𑁪. 𑀅𑀣 𑀔𑁄 𑀪𑀕𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀇𑀫𑀁 𑀲𑀗𑁆𑀔𑀺𑀬𑀥𑀫𑁆𑀫𑀁 𑀯𑀺𑀤𑀺𑀢𑁆𑀯𑀸 𑀬𑁂𑀦 𑀫𑀡𑁆𑀟𑀮𑀫𑀸𑀴𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀸𑀬𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸 𑀲𑀦𑁆𑀦𑀺𑀧𑀢𑀺𑀢𑀸, 𑀓𑀸 𑀘 𑀧𑀦 𑀯𑁄 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸’’𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀥, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀺𑀢𑀸𑀦𑀁 𑀫𑀡𑁆𑀟𑀮𑀫𑀸𑀴𑁂 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀬𑀁 𑀲𑀗𑁆𑀔𑀺𑀬𑀥𑀫𑁆𑀫𑁄 𑀉𑀤𑀧𑀸𑀤𑀺 𑁋 ‘𑀅𑀘𑁆𑀙𑀭𑀺𑀬𑀁, 𑀆𑀯𑀼𑀲𑁄, 𑀅𑀩𑁆𑀪𑀼𑀢𑀁, 𑀆𑀯𑀼𑀲𑁄, 𑀬𑀸𑀯𑀜𑁆𑀘𑀺𑀤𑀁 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀢𑁆𑀢𑀸𑀦𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸 𑀲𑀼𑀧𑁆𑀧𑀝𑀺𑀯𑀺𑀤𑀺𑀢𑀸. 𑀅𑀬𑀜𑁆𑀳𑀺 𑀲𑀼𑀧𑁆𑀧𑀺𑀬𑁄 𑀧𑀭𑀺𑀩𑁆𑀩𑀸𑀚𑀓𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀩𑀼𑀤𑁆𑀥𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀺; 𑀲𑀼𑀧𑁆𑀧𑀺𑀬𑀲𑁆𑀲 𑀧𑀦 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀅𑀦𑁆𑀢𑁂𑀯𑀸𑀲𑀻 𑀩𑁆𑀭𑀳𑁆𑀫𑀤𑀢𑁆𑀢𑁄 𑀫𑀸𑀡𑀯𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀩𑀼𑀤𑁆𑀥𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀥𑀫𑁆𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺, 𑀲𑀗𑁆𑀖𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀺. 𑀇𑀢𑀺𑀳𑀫𑁂 𑀉𑀪𑁄 𑀆𑀘𑀭𑀺𑀬𑀦𑁆𑀢𑁂𑀯𑀸𑀲𑀻 𑀅𑀜𑁆𑀜𑀫𑀜𑁆𑀜𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀯𑀸𑀤𑀸 𑀪𑀕𑀯𑀦𑁆𑀢𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀸 𑀳𑁄𑀦𑁆𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘𑀸’𑀢𑀺. 𑀅𑀬𑀁 𑀔𑁄 𑀦𑁄, 𑀪𑀦𑁆𑀢𑁂, 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸, 𑀅𑀣 𑀪𑀕𑀯𑀸 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺.

𑁫. ‘‘𑀫𑀫𑀁 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀅𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀥𑀫𑁆𑀫𑀲𑁆𑀲 𑀯𑀸 𑀅𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀲𑀗𑁆𑀖𑀲𑁆𑀲 𑀯𑀸 𑀅𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀢𑀢𑁆𑀭 𑀢𑀼𑀫𑁆𑀳𑁂𑀳𑀺 𑀦 𑀆𑀖𑀸𑀢𑁄 𑀦 𑀅𑀧𑁆𑀧𑀘𑁆𑀘𑀬𑁄 𑀦 𑀘𑁂𑀢𑀲𑁄 𑀅𑀦𑀪𑀺𑀭𑀤𑁆𑀥𑀺 𑀓𑀭𑀡𑀻𑀬𑀸. 𑀫𑀫𑀁 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀅𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀥𑀫𑁆𑀫𑀲𑁆𑀲 𑀯𑀸 𑀅𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀲𑀗𑁆𑀖𑀲𑁆𑀲 𑀯𑀸 𑀅𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀢𑀢𑁆𑀭 𑀘𑁂 𑀢𑀼𑀫𑁆𑀳𑁂 𑀅𑀲𑁆𑀲𑀣 𑀓𑀼𑀧𑀺𑀢𑀸 𑀯𑀸 𑀅𑀦𑀢𑁆𑀢𑀫𑀦𑀸 𑀯𑀸, 𑀢𑀼𑀫𑁆𑀳𑀁 𑀬𑁂𑀯𑀲𑁆𑀲 𑀢𑁂𑀦 𑀅𑀦𑁆𑀢𑀭𑀸𑀬𑁄. 𑀫𑀫𑀁 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀅𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀥𑀫𑁆𑀫𑀲𑁆𑀲 𑀯𑀸 𑀅𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀲𑀗𑁆𑀖𑀲𑁆𑀲 𑀯𑀸 𑀅𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀢𑀢𑁆𑀭 𑀘𑁂 𑀢𑀼𑀫𑁆𑀳𑁂 𑀅𑀲𑁆𑀲𑀣 𑀓𑀼𑀧𑀺𑀢𑀸 𑀯𑀸 𑀅𑀦𑀢𑁆𑀢𑀫𑀦𑀸 𑀯𑀸, 𑀅𑀧𑀺 𑀦𑀼 𑀢𑀼𑀫𑁆𑀳𑁂 𑀧𑀭𑁂𑀲𑀁 𑀲𑀼𑀪𑀸𑀲𑀺𑀢𑀁 𑀤𑀼𑀩𑁆𑀪𑀸𑀲𑀺𑀢𑀁 𑀆𑀚𑀸𑀦𑁂𑀬𑁆𑀬𑀸𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀫𑀫𑀁 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀅𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀥𑀫𑁆𑀫𑀲𑁆𑀲 𑀯𑀸 𑀅𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀲𑀗𑁆𑀖𑀲𑁆𑀲 𑀯𑀸 𑀅𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀢𑀢𑁆𑀭 𑀢𑀼𑀫𑁆𑀳𑁂𑀳𑀺 𑀅𑀪𑀽𑀢𑀁 𑀅𑀪𑀽𑀢𑀢𑁄 𑀦𑀺𑀩𑁆𑀩𑁂𑀞𑁂𑀢𑀩𑁆𑀩𑀁 𑁋 ‘𑀇𑀢𑀺𑀧𑁂𑀢𑀁 𑀅𑀪𑀽𑀢𑀁, 𑀇𑀢𑀺𑀧𑁂𑀢𑀁 𑀅𑀢𑀘𑁆𑀙𑀁, 𑀦𑀢𑁆𑀣𑀺 𑀘𑁂𑀢𑀁 𑀅𑀫𑁆𑀳𑁂𑀲𑀼, 𑀦 𑀘 𑀧𑀦𑁂𑀢𑀁 𑀅𑀫𑁆𑀳𑁂𑀲𑀼 𑀲𑀁𑀯𑀺𑀚𑁆𑀚𑀢𑀻’𑀢𑀺.

𑁬. ‘‘𑀫𑀫𑀁 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀥𑀫𑁆𑀫𑀲𑁆𑀲 𑀯𑀸 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀲𑀗𑁆𑀖𑀲𑁆𑀲 𑀯𑀸 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀢𑀢𑁆𑀭 𑀢𑀼𑀫𑁆𑀳𑁂𑀳𑀺 𑀦 𑀆𑀦𑀦𑁆𑀤𑁄 𑀦 𑀲𑁄𑀫𑀦𑀲𑁆𑀲𑀁 𑀦 𑀘𑁂𑀢𑀲𑁄 𑀉𑀧𑁆𑀧𑀺𑀮𑀸𑀯𑀺𑀢𑀢𑁆𑀢𑀁 𑀓𑀭𑀡𑀻𑀬𑀁. 𑀫𑀫𑀁 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀥𑀫𑁆𑀫𑀲𑁆𑀲 𑀯𑀸 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀲𑀗𑁆𑀖𑀲𑁆𑀲 𑀯𑀸 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀢𑀢𑁆𑀭 𑀘𑁂 𑀢𑀼𑀫𑁆𑀳𑁂 𑀅𑀲𑁆𑀲𑀣 𑀆𑀦𑀦𑁆𑀤𑀺𑀦𑁄 𑀲𑀼𑀫𑀦𑀸 𑀉𑀧𑁆𑀧𑀺𑀮𑀸𑀯𑀺𑀢𑀸 𑀢𑀼𑀫𑁆𑀳𑀁 𑀬𑁂𑀯𑀲𑁆𑀲 𑀢𑁂𑀦 𑀅𑀦𑁆𑀢𑀭𑀸𑀬𑁄. 𑀫𑀫𑀁 𑀯𑀸, 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀥𑀫𑁆𑀫𑀲𑁆𑀲 𑀯𑀸 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀲𑀗𑁆𑀖𑀲𑁆𑀲 𑀯𑀸 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀢𑀢𑁆𑀭 𑀢𑀼𑀫𑁆𑀳𑁂𑀳𑀺 𑀪𑀽𑀢𑀁 𑀪𑀽𑀢𑀢𑁄 𑀧𑀝𑀺𑀚𑀸𑀦𑀺𑀢𑀩𑁆𑀩𑀁 𑁋 ‘𑀇𑀢𑀺𑀧𑁂𑀢𑀁 𑀪𑀽𑀢𑀁, 𑀇𑀢𑀺𑀧𑁂𑀢𑀁 𑀢𑀘𑁆𑀙𑀁, 𑀅𑀢𑁆𑀣𑀺 𑀘𑁂𑀢𑀁 𑀅𑀫𑁆𑀳𑁂𑀲𑀼, 𑀲𑀁𑀯𑀺𑀚𑁆𑀚𑀢𑀺 𑀘 𑀧𑀦𑁂𑀢𑀁 𑀅𑀫𑁆𑀳𑁂𑀲𑀽’𑀢𑀺.

𑀘𑀽𑀴𑀲𑀻𑀮𑀁

𑁭. ‘‘𑀅𑀧𑁆𑀧𑀫𑀢𑁆𑀢𑀓𑀁 𑀔𑁄 𑀧𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀑𑀭𑀫𑀢𑁆𑀢𑀓𑀁 𑀲𑀻𑀮𑀫𑀢𑁆𑀢𑀓𑀁, 𑀬𑁂𑀦 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬. 𑀓𑀢𑀫𑀜𑁆𑀘 𑀢𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀢𑁆𑀢𑀓𑀁 𑀑𑀭𑀫𑀢𑁆𑀢𑀓𑀁 𑀲𑀻𑀮𑀫𑀢𑁆𑀢𑀓𑀁, 𑀬𑁂𑀦 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬?

𑁮. ‘‘‘𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄 𑀦𑀺𑀳𑀺𑀢𑀤𑀡𑁆𑀟𑁄, 𑀦𑀺𑀳𑀺𑀢𑀲𑀢𑁆𑀣𑁄, 𑀮𑀚𑁆𑀚𑀻, 𑀤𑀬𑀸𑀧𑀦𑁆𑀦𑁄, 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀢𑀻’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

‘‘‘𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄 𑀤𑀺𑀦𑁆𑀦𑀸𑀤𑀸𑀬𑀻 𑀤𑀺𑀦𑁆𑀦𑀧𑀸𑀝𑀺𑀓𑀗𑁆𑀔𑀻, 𑀅𑀣𑁂𑀦𑁂𑀦 𑀲𑀼𑀘𑀺𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀻’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

‘‘‘𑀅𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀳𑀸𑀬 𑀩𑁆𑀭𑀳𑁆𑀫𑀘𑀸𑀭𑀻 𑀲𑀫𑀡𑁄 𑀕𑁄𑀢𑀫𑁄 𑀆𑀭𑀸𑀘𑀸𑀭𑀻 [𑀅𑀦𑀸𑀘𑀸𑀭𑀻 (𑀓.)] 𑀯𑀺𑀭𑀢𑁄 [𑀧𑀝𑀺𑀯𑀺𑀭𑀢𑁄 (𑀓𑀢𑁆𑀣𑀘𑀺)] 𑀫𑁂𑀣𑀼𑀦𑀸 𑀕𑀸𑀫𑀥𑀫𑁆𑀫𑀸’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

𑁯. ‘‘‘𑀫𑀼𑀲𑀸𑀯𑀸𑀤𑀁 𑀧𑀳𑀸𑀬 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄 𑀲𑀘𑁆𑀘𑀯𑀸𑀤𑀻 𑀲𑀘𑁆𑀘𑀲𑀦𑁆𑀥𑁄 𑀣𑁂𑀢𑁄 [𑀞𑁂𑀢𑁄 (𑀲𑁆𑀬𑀸. 𑀓𑀁.)] 𑀧𑀘𑁆𑀘𑀬𑀺𑀓𑁄 𑀅𑀯𑀺𑀲𑀁𑀯𑀸𑀤𑀓𑁄 𑀮𑁄𑀓𑀲𑁆𑀲𑀸’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

‘‘‘𑀧𑀺𑀲𑀼𑀡𑀁 𑀯𑀸𑀘𑀁 𑀧𑀳𑀸𑀬 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄, 𑀇𑀢𑁄 𑀲𑀼𑀢𑁆𑀯𑀸 𑀦 𑀅𑀫𑀼𑀢𑁆𑀭 𑀅𑀓𑁆𑀔𑀸𑀢𑀸 𑀇𑀫𑁂𑀲𑀁 𑀪𑁂𑀤𑀸𑀬, 𑀅𑀫𑀼𑀢𑁆𑀭 𑀯𑀸 𑀲𑀼𑀢𑁆𑀯𑀸 𑀦 𑀇𑀫𑁂𑀲𑀁 𑀅𑀓𑁆𑀔𑀸𑀢𑀸 𑀅𑀫𑀽𑀲𑀁 𑀪𑁂𑀤𑀸𑀬. 𑀇𑀢𑀺 𑀪𑀺𑀦𑁆𑀦𑀸𑀦𑀁 𑀯𑀸 𑀲𑀦𑁆𑀥𑀸𑀢𑀸, 𑀲𑀳𑀺𑀢𑀸𑀦𑀁 𑀯𑀸 𑀅𑀦𑀼𑀧𑁆𑀧𑀤𑀸𑀢𑀸 𑀲𑀫𑀕𑁆𑀕𑀸𑀭𑀸𑀫𑁄 𑀲𑀫𑀕𑁆𑀕𑀭𑀢𑁄 𑀲𑀫𑀕𑁆𑀕𑀦𑀦𑁆𑀤𑀻 𑀲𑀫𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

‘‘‘𑀨𑀭𑀼𑀲𑀁 𑀯𑀸𑀘𑀁 𑀧𑀳𑀸𑀬 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄, 𑀬𑀸 𑀲𑀸 𑀯𑀸𑀘𑀸 𑀦𑁂𑀮𑀸 𑀓𑀡𑁆𑀡𑀲𑀼𑀔𑀸 𑀧𑁂𑀫𑀦𑀻𑀬𑀸 𑀳𑀤𑀬𑀗𑁆𑀕𑀫𑀸 𑀧𑁄𑀭𑀻 𑀩𑀳𑀼𑀚𑀦𑀓𑀦𑁆𑀢𑀸 𑀩𑀳𑀼𑀚𑀦𑀫𑀦𑀸𑀧𑀸 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

‘‘‘𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀳𑀸𑀬 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀅𑀢𑁆𑀣𑀯𑀸𑀤𑀻 𑀥𑀫𑁆𑀫𑀯𑀸𑀤𑀻 𑀯𑀺𑀦𑀬𑀯𑀸𑀤𑀻, 𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀓𑀸𑀮𑁂𑀦 𑀲𑀸𑀧𑀤𑁂𑀲𑀁 𑀧𑀭𑀺𑀬𑀦𑁆𑀢𑀯𑀢𑀺𑀁 𑀅𑀢𑁆𑀣𑀲𑀁𑀳𑀺𑀢’𑀦𑁆𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

𑁧𑁦. ‘𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸 [𑀲𑀫𑀸𑀭𑀩𑁆𑀪𑀸 (𑀲𑀻. 𑀓.)] 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂…𑀧𑁂….

‘‘‘𑀏𑀓𑀪𑀢𑁆𑀢𑀺𑀓𑁄 𑀲𑀫𑀡𑁄 𑀕𑁄𑀢𑀫𑁄 𑀭𑀢𑁆𑀢𑀽𑀧𑀭𑀢𑁄 𑀯𑀺𑀭𑀢𑁄 [𑀧𑀝𑀺𑀯𑀺𑀭𑀢𑁄 (𑀓𑀢𑁆𑀣𑀘𑀺)] 𑀯𑀺𑀓𑀸𑀮𑀪𑁄𑀚𑀦𑀸….

𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀸 [𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀼𑀓𑀤𑀲𑁆𑀲𑀦𑀸 (𑀓.)] 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄….

𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀥𑀸𑀭𑀡𑀫𑀡𑁆𑀟𑀦𑀯𑀺𑀪𑀽𑀲𑀦𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄….

𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄….

𑀚𑀸𑀢𑀭𑀽𑀧𑀭𑀚𑀢𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄….

𑀆𑀫𑀓𑀥𑀜𑁆𑀜𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄….

𑀆𑀫𑀓𑀫𑀁𑀲𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄….

𑀇𑀢𑁆𑀣𑀺𑀓𑀼𑀫𑀸𑀭𑀺𑀓𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄….

𑀤𑀸𑀲𑀺𑀤𑀸𑀲𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄….

𑀅𑀚𑁂𑀴𑀓𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄….

𑀓𑀼𑀓𑁆𑀓𑀼𑀝𑀲𑀽𑀓𑀭𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄….

𑀳𑀢𑁆𑀣𑀺𑀕𑀯𑀲𑁆𑀲𑀯𑀴𑀯𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄….

𑀔𑁂𑀢𑁆𑀢𑀯𑀢𑁆𑀣𑀼𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄….

𑀤𑀽𑀢𑁂𑀬𑁆𑀬𑀧𑀳𑀺𑀡𑀕𑀫𑀦𑀸𑀦𑀼𑀬𑁄𑀕𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄….

𑀓𑀬𑀯𑀺𑀓𑁆𑀓𑀬𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄….

𑀢𑀼𑀮𑀸𑀓𑀽𑀝𑀓𑀁𑀲𑀓𑀽𑀝𑀫𑀸𑀦𑀓𑀽𑀝𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄….

𑀉𑀓𑁆𑀓𑁄𑀝𑀦𑀯𑀜𑁆𑀘𑀦𑀦𑀺𑀓𑀢𑀺𑀲𑀸𑀘𑀺𑀬𑁄𑀕𑀸 [𑀲𑀸𑀯𑀺𑀬𑁄𑀕𑀸 (𑀲𑁆𑀬𑀸. 𑀓𑀁. 𑀓.)] 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄….

𑀙𑁂𑀤𑀦𑀯𑀥𑀩𑀦𑁆𑀥𑀦𑀯𑀺𑀧𑀭𑀸𑀫𑁄𑀲𑀆𑀮𑁄𑀧𑀲𑀳𑀲𑀸𑀓𑀸𑀭𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

𑀘𑀽𑀴𑀲𑀻𑀮𑀁 𑀦𑀺𑀝𑁆𑀞𑀺𑀢𑀁.

𑀫𑀚𑁆𑀛𑀺𑀫𑀲𑀻𑀮𑀁

𑁧𑁧. ‘‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 [𑀲𑁂𑀬𑁆𑀬𑀣𑀻𑀤𑀁 (𑀲𑀻. 𑀲𑁆𑀬𑀸.)] 𑁋 𑀫𑀽𑀮𑀩𑀻𑀚𑀁 𑀔𑀦𑁆𑀥𑀩𑀻𑀚𑀁 𑀨𑀴𑀼𑀩𑀻𑀚𑀁 𑀅𑀕𑁆𑀕𑀩𑀻𑀚𑀁 𑀩𑀻𑀚𑀩𑀻𑀚𑀫𑁂𑀯 𑀧𑀜𑁆𑀘𑀫𑀁 [𑀧𑀜𑁆𑀘𑀫𑀁 𑀇𑀢𑀺 𑀯𑀸 (𑀲𑀻. 𑀲𑁆𑀬𑀸. 𑀓.)]; 𑀇𑀢𑀺 𑀏𑀯𑀭𑀽𑀧𑀸 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

𑁧𑁨. ‘‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀲𑀦𑁆𑀦𑀺𑀥𑀺𑀓𑀸𑀭𑀧𑀭𑀺𑀪𑁄𑀕𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀦𑁆𑀦𑀲𑀦𑁆𑀦𑀺𑀥𑀺𑀁 𑀧𑀸𑀦𑀲𑀦𑁆𑀦𑀺𑀥𑀺𑀁 𑀯𑀢𑁆𑀣𑀲𑀦𑁆𑀦𑀺𑀥𑀺𑀁 𑀬𑀸𑀦𑀲𑀦𑁆𑀦𑀺𑀥𑀺𑀁 𑀲𑀬𑀦𑀲𑀦𑁆𑀦𑀺𑀥𑀺𑀁 𑀕𑀦𑁆𑀥𑀲𑀦𑁆𑀦𑀺𑀥𑀺𑀁 𑀆𑀫𑀺𑀲𑀲𑀦𑁆𑀦𑀺𑀥𑀺𑀁 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸 𑀲𑀦𑁆𑀦𑀺𑀥𑀺𑀓𑀸𑀭𑀧𑀭𑀺𑀪𑁄𑀕𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

𑁧𑁩. ‘‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀯𑀺𑀲𑀽𑀓𑀤𑀲𑁆𑀲𑀦𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀦𑀘𑁆𑀘𑀁 𑀕𑀻𑀢𑀁 𑀯𑀸𑀤𑀺𑀢𑀁 𑀧𑁂𑀓𑁆𑀔𑀁 𑀅𑀓𑁆𑀔𑀸𑀦𑀁 𑀧𑀸𑀡𑀺𑀲𑁆𑀲𑀭𑀁 𑀯𑁂𑀢𑀸𑀴𑀁 𑀓𑀼𑀫𑁆𑀪𑀣𑀽𑀡𑀁 [𑀓𑀼𑀫𑁆𑀪𑀣𑀽𑀦𑀁 (𑀲𑁆𑀬𑀸. 𑀓.), 𑀓𑀼𑀫𑁆𑀪𑀣𑀽𑀡𑀁 (𑀲𑀻.)] 𑀲𑁄𑀪𑀦𑀓𑀁 [𑀲𑁄𑀪𑀦𑀖𑀭𑀓𑀁 (𑀲𑀻.), 𑀲𑁄𑀪𑀦𑀕𑀭𑀓𑀁 (𑀲𑁆𑀬𑀸. 𑀓𑀁. 𑀧𑀻.)] 𑀘𑀡𑁆𑀟𑀸𑀮𑀁 𑀯𑀁𑀲𑀁 𑀥𑁄𑀯𑀦𑀁 𑀳𑀢𑁆𑀣𑀺𑀬𑀼𑀤𑁆𑀥𑀁 𑀅𑀲𑁆𑀲𑀬𑀼𑀤𑁆𑀥𑀁 𑀫𑀳𑀺𑀁𑀲𑀬𑀼𑀤𑁆𑀥𑀁 [𑀫𑀳𑀺𑀲𑀬𑀼𑀤𑁆𑀥𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀉𑀲𑀪𑀬𑀼𑀤𑁆𑀥𑀁 𑀅𑀚𑀬𑀼𑀤𑁆𑀥𑀁 𑀫𑁂𑀡𑁆𑀟𑀬𑀼𑀤𑁆𑀥𑀁 𑀓𑀼𑀓𑁆𑀓𑀼𑀝𑀬𑀼𑀤𑁆𑀥𑀁 𑀯𑀝𑁆𑀝𑀓𑀬𑀼𑀤𑁆𑀥𑀁 𑀤𑀡𑁆𑀟𑀬𑀼𑀤𑁆𑀥𑀁 𑀫𑀼𑀝𑁆𑀞𑀺𑀬𑀼𑀤𑁆𑀥𑀁 𑀦𑀺𑀩𑁆𑀩𑀼𑀤𑁆𑀥𑀁 𑀉𑀬𑁆𑀬𑁄𑀥𑀺𑀓𑀁 𑀩𑀮𑀕𑁆𑀕𑀁 𑀲𑁂𑀦𑀸𑀩𑁆𑀬𑀽𑀳𑀁 𑀅𑀦𑀻𑀓𑀤𑀲𑁆𑀲𑀦𑀁 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸 𑀯𑀺𑀲𑀽𑀓𑀤𑀲𑁆𑀲𑀦𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

𑁧𑁪. ‘‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀚𑀽𑀢𑀧𑁆𑀧𑀫𑀸𑀤𑀝𑁆𑀞𑀸𑀦𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀝𑁆𑀞𑀧𑀤𑀁 𑀤𑀲𑀧𑀤𑀁 𑀆𑀓𑀸𑀲𑀁 𑀧𑀭𑀺𑀳𑀸𑀭𑀧𑀣𑀁 𑀲𑀦𑁆𑀢𑀺𑀓𑀁 𑀔𑀮𑀺𑀓𑀁 𑀖𑀝𑀺𑀓𑀁 𑀲𑀮𑀸𑀓𑀳𑀢𑁆𑀣𑀁 𑀅𑀓𑁆𑀔𑀁 𑀧𑀗𑁆𑀕𑀘𑀻𑀭𑀁 𑀯𑀗𑁆𑀓𑀓𑀁 𑀫𑁄𑀓𑁆𑀔𑀘𑀺𑀓𑀁 𑀘𑀺𑀗𑁆𑀕𑀼𑀮𑀺𑀓𑀁 [𑀘𑀺𑀗𑁆𑀕𑀼𑀮𑀓𑀁 (𑀓. 𑀲𑀻.)] 𑀧𑀢𑁆𑀢𑀸𑀴𑁆𑀳𑀓𑀁 𑀭𑀣𑀓𑀁 𑀥𑀦𑀼𑀓𑀁 𑀅𑀓𑁆𑀔𑀭𑀺𑀓𑀁 𑀫𑀦𑁂𑀲𑀺𑀓𑀁 𑀬𑀣𑀸𑀯𑀚𑁆𑀚𑀁 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸 𑀚𑀽𑀢𑀧𑁆𑀧𑀫𑀸𑀤𑀝𑁆𑀞𑀸𑀦𑀸𑀦𑀼𑀬𑁄𑀕𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

𑁧𑁫. ‘‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀆𑀲𑀦𑁆𑀤𑀺𑀁 𑀧𑀮𑁆𑀮𑀗𑁆𑀓𑀁 𑀕𑁄𑀦𑀓𑀁 𑀘𑀺𑀢𑁆𑀢𑀓𑀁 𑀧𑀝𑀺𑀓𑀁 𑀧𑀝𑀮𑀺𑀓𑀁 𑀢𑀽𑀮𑀺𑀓𑀁 𑀯𑀺𑀓𑀢𑀺𑀓𑀁 𑀉𑀤𑁆𑀤𑀮𑁄𑀫𑀺𑀁 𑀏𑀓𑀦𑁆𑀢𑀮𑁄𑀫𑀺𑀁 𑀓𑀝𑁆𑀝𑀺𑀲𑁆𑀲𑀁 𑀓𑁄𑀲𑁂𑀬𑁆𑀬𑀁 𑀓𑀼𑀢𑁆𑀢𑀓𑀁 𑀳𑀢𑁆𑀣𑀢𑁆𑀣𑀭𑀁 𑀅𑀲𑁆𑀲𑀢𑁆𑀣𑀭𑀁 𑀭𑀣𑀢𑁆𑀣𑀭𑀁 [𑀳𑀢𑁆𑀣𑀢𑁆𑀣𑀭𑀡𑀁 𑀅𑀲𑁆𑀲𑀢𑁆𑀣𑀭𑀡𑀁 𑀭𑀣𑀢𑁆𑀣𑀭𑀡𑀁 (𑀲𑀻. 𑀓. 𑀧𑀻.)] 𑀅𑀚𑀺𑀦𑀧𑁆𑀧𑀯𑁂𑀡𑀺𑀁 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀁 𑀲𑀉𑀢𑁆𑀢𑀭𑀘𑁆𑀙𑀤𑀁 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀁 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

𑁧𑁬. ‘‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀫𑀡𑁆𑀟𑀦𑀯𑀺𑀪𑀽𑀲𑀦𑀝𑁆𑀞𑀸𑀦𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀉𑀘𑁆𑀙𑀸𑀤𑀦𑀁 𑀧𑀭𑀺𑀫𑀤𑁆𑀤𑀦𑀁 𑀦𑁆𑀳𑀸𑀧𑀦𑀁 𑀲𑀫𑁆𑀩𑀸𑀳𑀦𑀁 𑀆𑀤𑀸𑀲𑀁 𑀅𑀜𑁆𑀚𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 [𑀫𑀸𑀮𑀸𑀯𑀺𑀮𑁂𑀧𑀦𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀫𑀼𑀔𑀘𑀼𑀡𑁆𑀡𑀁 𑀫𑀼𑀔𑀮𑁂𑀧𑀦𑀁 𑀳𑀢𑁆𑀣𑀩𑀦𑁆𑀥𑀁 𑀲𑀺𑀔𑀸𑀩𑀦𑁆𑀥𑀁 𑀤𑀡𑁆𑀟𑀁 𑀦𑀸𑀴𑀺𑀓𑀁 𑀅𑀲𑀺𑀁 [𑀔𑀕𑁆𑀕𑀁 (𑀲𑀻. 𑀧𑀻.), 𑀅𑀲𑀺𑀁 𑀔𑀕𑁆𑀕𑀁 (𑀲𑁆𑀬𑀸. 𑀓𑀁.)] 𑀙𑀢𑁆𑀢𑀁 𑀘𑀺𑀢𑁆𑀭𑀼𑀧𑀸𑀳𑀦𑀁 𑀉𑀡𑁆𑀳𑀻𑀲𑀁 𑀫𑀡𑀺𑀁 𑀯𑀸𑀮𑀩𑀻𑀚𑀦𑀺𑀁 𑀑𑀤𑀸𑀢𑀸𑀦𑀺 𑀯𑀢𑁆𑀣𑀸𑀦𑀺 𑀤𑀻𑀖𑀤𑀲𑀸𑀦𑀺 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸 𑀫𑀡𑁆𑀟𑀦𑀯𑀺𑀪𑀽𑀲𑀦𑀝𑁆𑀞𑀸𑀦𑀸𑀦𑀼𑀬𑁄𑀕𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

𑁧𑁭. ‘‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀚𑀓𑀣𑀁 𑀘𑁄𑀭𑀓𑀣𑀁 𑀫𑀳𑀸𑀫𑀢𑁆𑀢𑀓𑀣𑀁 𑀲𑁂𑀦𑀸𑀓𑀣𑀁 𑀪𑀬𑀓𑀣𑀁 𑀬𑀼𑀤𑁆𑀥𑀓𑀣𑀁 𑀅𑀦𑁆𑀦𑀓𑀣𑀁 𑀧𑀸𑀦𑀓𑀣𑀁 𑀯𑀢𑁆𑀣𑀓𑀣𑀁 𑀲𑀬𑀦𑀓𑀣𑀁 𑀫𑀸𑀮𑀸𑀓𑀣𑀁 𑀕𑀦𑁆𑀥𑀓𑀣𑀁 𑀜𑀸𑀢𑀺𑀓𑀣𑀁 𑀬𑀸𑀦𑀓𑀣𑀁 𑀕𑀸𑀫𑀓𑀣𑀁 𑀦𑀺𑀕𑀫𑀓𑀣𑀁 𑀦𑀕𑀭𑀓𑀣𑀁 𑀚𑀦𑀧𑀤𑀓𑀣𑀁 𑀇𑀢𑁆𑀣𑀺𑀓𑀣𑀁 [𑀇𑀢𑁆𑀣𑀺𑀓𑀣𑀁 𑀧𑀼𑀭𑀺𑀲𑀓𑀣𑀁 (𑀲𑁆𑀬𑀸. 𑀓𑀁. 𑀓.)] 𑀲𑀽𑀭𑀓𑀣𑀁 𑀯𑀺𑀲𑀺𑀔𑀸𑀓𑀣𑀁 𑀓𑀼𑀫𑁆𑀪𑀝𑁆𑀞𑀸𑀦𑀓𑀣𑀁 𑀧𑀼𑀩𑁆𑀩𑀧𑁂𑀢𑀓𑀣𑀁 𑀦𑀸𑀦𑀢𑁆𑀢𑀓𑀣𑀁 𑀮𑁄𑀓𑀓𑁆𑀔𑀸𑀬𑀺𑀓𑀁 𑀲𑀫𑀼𑀤𑁆𑀤𑀓𑁆𑀔𑀸𑀬𑀺𑀓𑀁 𑀇𑀢𑀺𑀪𑀯𑀸𑀪𑀯𑀓𑀣𑀁 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀓𑀣𑀸𑀬 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

𑁧𑁮. ‘‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀯𑀺𑀕𑁆𑀕𑀸𑀳𑀺𑀓𑀓𑀣𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀲𑀺, 𑀅𑀳𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀫𑀺, 𑀓𑀺𑀁 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀺𑀲𑁆𑀲𑀲𑀺, 𑀫𑀺𑀘𑁆𑀙𑀸 𑀧𑀝𑀺𑀧𑀦𑁆𑀦𑁄 𑀢𑁆𑀯𑀫𑀲𑀺, 𑀅𑀳𑀫𑀲𑁆𑀫𑀺 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑁄, 𑀲𑀳𑀺𑀢𑀁 𑀫𑁂, 𑀅𑀲𑀳𑀺𑀢𑀁 𑀢𑁂, 𑀧𑀼𑀭𑁂𑀯𑀘𑀦𑀻𑀬𑀁 𑀧𑀘𑁆𑀙𑀸 𑀅𑀯𑀘, 𑀧𑀘𑁆𑀙𑀸𑀯𑀘𑀦𑀻𑀬𑀁 𑀧𑀼𑀭𑁂 𑀅𑀯𑀘, 𑀅𑀥𑀺𑀘𑀺𑀡𑁆𑀡𑀁 𑀢𑁂 𑀯𑀺𑀧𑀭𑀸𑀯𑀢𑁆𑀢𑀁, 𑀆𑀭𑁄𑀧𑀺𑀢𑁄 𑀢𑁂 𑀯𑀸𑀤𑁄, 𑀦𑀺𑀕𑁆𑀕𑀳𑀺𑀢𑁄 𑀢𑁆𑀯𑀫𑀲𑀺, 𑀘𑀭 𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀬, 𑀦𑀺𑀩𑁆𑀩𑁂𑀞𑁂𑀳𑀺 𑀯𑀸 𑀲𑀘𑁂 𑀧𑀳𑁄𑀲𑀻𑀢𑀺 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸𑀬 𑀯𑀺𑀕𑁆𑀕𑀸𑀳𑀺𑀓𑀓𑀣𑀸𑀬 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

𑁧𑁯. ‘‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀤𑀽𑀢𑁂𑀬𑁆𑀬𑀧𑀳𑀺𑀡𑀕𑀫𑀦𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀜𑁆𑀜𑀁, 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁, 𑀔𑀢𑁆𑀢𑀺𑀬𑀸𑀦𑀁, 𑀩𑁆𑀭𑀸𑀳𑁆𑀫𑀡𑀸𑀦𑀁, 𑀕𑀳𑀧𑀢𑀺𑀓𑀸𑀦𑀁, 𑀓𑀼𑀫𑀸𑀭𑀸𑀦𑀁 ‘‘𑀇𑀥 𑀕𑀘𑁆𑀙, 𑀅𑀫𑀼𑀢𑁆𑀭𑀸𑀕𑀘𑁆𑀙, 𑀇𑀤𑀁 𑀳𑀭, 𑀅𑀫𑀼𑀢𑁆𑀭 𑀇𑀤𑀁 𑀆𑀳𑀭𑀸’’𑀢𑀺 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸 𑀤𑀽𑀢𑁂𑀬𑁆𑀬𑀧𑀳𑀺𑀡𑀕𑀫𑀦𑀸𑀦𑀼𑀬𑁄𑀕𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

𑁨𑁦. ‘‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀓𑀼𑀳𑀓𑀸 𑀘 𑀳𑁄𑀦𑁆𑀢𑀺, 𑀮𑀧𑀓𑀸 𑀘 𑀦𑁂𑀫𑀺𑀢𑁆𑀢𑀺𑀓𑀸 𑀘 𑀦𑀺𑀧𑁆𑀧𑁂𑀲𑀺𑀓𑀸 𑀘, 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀁𑀲𑀺𑀢𑀸𑀭𑁄 𑀘 [𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀺𑀁 𑀪𑀺𑀢𑀸𑀭𑁄 (𑀲𑀻. 𑀲𑁆𑀬𑀸.), 𑀮𑀸𑀪𑁂𑀦 𑀘 𑀮𑀸𑀪𑀁 𑀦𑀺𑀚𑀺𑀕𑀻𑀲𑀺𑀢𑀸𑀭𑁄 (𑀧𑀻.)] 𑀇𑀢𑀺 [𑀇𑀢𑀺 𑀯𑀸, 𑀇𑀢𑀺 (𑀲𑁆𑀬𑀸. 𑀓𑀁. 𑀓.)] 𑀏𑀯𑀭𑀽𑀧𑀸 𑀓𑀼𑀳𑀦𑀮𑀧𑀦𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

𑀫𑀚𑁆𑀛𑀺𑀫𑀲𑀻𑀮𑀁 𑀦𑀺𑀝𑁆𑀞𑀺𑀢𑀁.

𑀫𑀳𑀸𑀲𑀻𑀮𑀁

𑁨𑁧. ‘‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀗𑁆𑀕𑀁 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀸𑀢𑀁 𑀲𑀼𑀧𑀺𑀦𑀁 𑀮𑀓𑁆𑀔𑀡𑀁 𑀫𑀽𑀲𑀺𑀓𑀘𑁆𑀙𑀺𑀦𑁆𑀦𑀁 𑀅𑀕𑁆𑀕𑀺𑀳𑁄𑀫𑀁 𑀤𑀩𑁆𑀩𑀺𑀳𑁄𑀫𑀁 𑀣𑀼𑀲𑀳𑁄𑀫𑀁 𑀓𑀡𑀳𑁄𑀫𑀁 𑀢𑀡𑁆𑀟𑀼𑀮𑀳𑁄𑀫𑀁 𑀲𑀧𑁆𑀧𑀺𑀳𑁄𑀫𑀁 𑀢𑁂𑀮𑀳𑁄𑀫𑀁 𑀫𑀼𑀔𑀳𑁄𑀫𑀁 𑀮𑁄𑀳𑀺𑀢𑀳𑁄𑀫𑀁 𑀅𑀗𑁆𑀕𑀯𑀺𑀚𑁆𑀚𑀸 𑀯𑀢𑁆𑀣𑀼𑀯𑀺𑀚𑁆𑀚𑀸 𑀔𑀢𑁆𑀢𑀯𑀺𑀚𑁆𑀚𑀸 [𑀔𑁂𑀢𑁆𑀢𑀯𑀺𑀚𑁆𑀚𑀸 (𑀩𑀳𑀽𑀲𑀼)] 𑀲𑀺𑀯𑀯𑀺𑀚𑁆𑀚𑀸 𑀪𑀽𑀢𑀯𑀺𑀚𑁆𑀚𑀸 𑀪𑀽𑀭𑀺𑀯𑀺𑀚𑁆𑀚𑀸 𑀅𑀳𑀺𑀯𑀺𑀚𑁆𑀚𑀸 𑀯𑀺𑀲𑀯𑀺𑀚𑁆𑀚𑀸 𑀯𑀺𑀘𑁆𑀙𑀺𑀓𑀯𑀺𑀚𑁆𑀚𑀸 𑀫𑀽𑀲𑀺𑀓𑀯𑀺𑀚𑁆𑀚𑀸 𑀲𑀓𑀼𑀡𑀯𑀺𑀚𑁆𑀚𑀸 𑀯𑀸𑀬𑀲𑀯𑀺𑀚𑁆𑀚𑀸 𑀧𑀓𑁆𑀓𑀚𑁆𑀛𑀸𑀦𑀁 𑀲𑀭𑀧𑀭𑀺𑀢𑁆𑀢𑀸𑀡𑀁 𑀫𑀺𑀕𑀘𑀓𑁆𑀓𑀁 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

𑁨𑁨. ‘‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀫𑀡𑀺𑀮𑀓𑁆𑀔𑀡𑀁 𑀯𑀢𑁆𑀣𑀮𑀓𑁆𑀔𑀡𑀁 𑀤𑀡𑁆𑀟𑀮𑀓𑁆𑀔𑀡𑀁 𑀲𑀢𑁆𑀣𑀮𑀓𑁆𑀔𑀡𑀁 𑀅𑀲𑀺𑀮𑀓𑁆𑀔𑀡𑀁 𑀉𑀲𑀼𑀮𑀓𑁆𑀔𑀡𑀁 𑀥𑀦𑀼𑀮𑀓𑁆𑀔𑀡𑀁 𑀆𑀯𑀼𑀥𑀮𑀓𑁆𑀔𑀡𑀁 𑀇𑀢𑁆𑀣𑀺𑀮𑀓𑁆𑀔𑀡𑀁 𑀧𑀼𑀭𑀺𑀲𑀮𑀓𑁆𑀔𑀡𑀁 𑀓𑀼𑀫𑀸𑀭𑀮𑀓𑁆𑀔𑀡𑀁 𑀓𑀼𑀫𑀸𑀭𑀺𑀮𑀓𑁆𑀔𑀡𑀁 𑀤𑀸𑀲𑀮𑀓𑁆𑀔𑀡𑀁 𑀤𑀸𑀲𑀺𑀮𑀓𑁆𑀔𑀡𑀁 𑀳𑀢𑁆𑀣𑀺𑀮𑀓𑁆𑀔𑀡𑀁 𑀅𑀲𑁆𑀲𑀮𑀓𑁆𑀔𑀡𑀁 𑀫𑀳𑀺𑀁𑀲𑀮𑀓𑁆𑀔𑀡𑀁 [𑀫𑀳𑀺𑀲𑀮𑀓𑁆𑀔𑀡𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀉𑀲𑀪𑀮𑀓𑁆𑀔𑀡𑀁 𑀕𑁄𑀮𑀓𑁆𑀔𑀡𑀁 𑀅𑀚𑀮𑀓𑁆𑀔𑀡𑀁 𑀫𑁂𑀡𑁆𑀟𑀮𑀓𑁆𑀔𑀡𑀁 𑀓𑀼𑀓𑁆𑀓𑀼𑀝𑀮𑀓𑁆𑀔𑀡𑀁 𑀯𑀝𑁆𑀝𑀓𑀮𑀓𑁆𑀔𑀡𑀁 𑀕𑁄𑀥𑀸𑀮𑀓𑁆𑀔𑀡𑀁 𑀓𑀡𑁆𑀡𑀺𑀓𑀸𑀮𑀓𑁆𑀔𑀡𑀁 𑀓𑀘𑁆𑀙𑀧𑀮𑀓𑁆𑀔𑀡𑀁 𑀫𑀺𑀕𑀮𑀓𑁆𑀔𑀡𑀁 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

𑁨𑁩. ‘‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀜𑁆𑀜𑀁 𑀦𑀺𑀬𑁆𑀬𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀭𑀜𑁆𑀜𑀁 𑀅𑀦𑀺𑀬𑁆𑀬𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀅𑀩𑁆𑀪𑀦𑁆𑀢𑀭𑀸𑀦𑀁 𑀭𑀜𑁆𑀜𑀁 𑀉𑀧𑀬𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀩𑀸𑀳𑀺𑀭𑀸𑀦𑀁 𑀭𑀜𑁆𑀜𑀁 𑀅𑀧𑀬𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀩𑀸𑀳𑀺𑀭𑀸𑀦𑀁 𑀭𑀜𑁆𑀜𑀁 𑀉𑀧𑀬𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀅𑀩𑁆𑀪𑀦𑁆𑀢𑀭𑀸𑀦𑀁 𑀭𑀜𑁆𑀜𑀁 𑀅𑀧𑀬𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀅𑀩𑁆𑀪𑀦𑁆𑀢𑀭𑀸𑀦𑀁 𑀭𑀜𑁆𑀜𑀁 𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀩𑀸𑀳𑀺𑀭𑀸𑀦𑀁 𑀭𑀜𑁆𑀜𑀁 𑀧𑀭𑀸𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀩𑀸𑀳𑀺𑀭𑀸𑀦𑀁 𑀭𑀜𑁆𑀜𑀁 𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀅𑀩𑁆𑀪𑀦𑁆𑀢𑀭𑀸𑀦𑀁 𑀭𑀜𑁆𑀜𑀁 𑀧𑀭𑀸𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀇𑀢𑀺 𑀇𑀫𑀲𑁆𑀲 𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀇𑀫𑀲𑁆𑀲 𑀧𑀭𑀸𑀚𑀬𑁄 𑀪𑀯𑀺𑀲𑁆𑀲𑀢𑀺 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

𑁨𑁪. ‘‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀦𑁆𑀤𑀕𑁆𑀕𑀸𑀳𑁄 𑀪𑀯𑀺𑀲𑁆𑀲𑀢𑀺, 𑀲𑀽𑀭𑀺𑀬𑀕𑁆𑀕𑀸𑀳𑁄 [𑀲𑀼𑀭𑀺𑀬𑀕𑁆𑀕𑀸𑀳𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀪𑀯𑀺𑀲𑁆𑀲𑀢𑀺, 𑀦𑀓𑁆𑀔𑀢𑁆𑀢𑀕𑁆𑀕𑀸𑀳𑁄 𑀪𑀯𑀺𑀲𑁆𑀲𑀢𑀺, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀧𑀣𑀕𑀫𑀦𑀁 𑀪𑀯𑀺𑀲𑁆𑀲𑀢𑀺, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀉𑀧𑁆𑀧𑀣𑀕𑀫𑀦𑀁 𑀪𑀯𑀺𑀲𑁆𑀲𑀢𑀺, 𑀦𑀓𑁆𑀔𑀢𑁆𑀢𑀸𑀦𑀁 𑀧𑀣𑀕𑀫𑀦𑀁 𑀪𑀯𑀺𑀲𑁆𑀲𑀢𑀺, 𑀦𑀓𑁆𑀔𑀢𑁆𑀢𑀸𑀦𑀁 𑀉𑀧𑁆𑀧𑀣𑀕𑀫𑀦𑀁 𑀪𑀯𑀺𑀲𑁆𑀲𑀢𑀺, 𑀉𑀓𑁆𑀓𑀸𑀧𑀸𑀢𑁄 𑀪𑀯𑀺𑀲𑁆𑀲𑀢𑀺, 𑀤𑀺𑀲𑀸𑀟𑀸𑀳𑁄 𑀪𑀯𑀺𑀲𑁆𑀲𑀢𑀺, 𑀪𑀽𑀫𑀺𑀘𑀸𑀮𑁄 𑀪𑀯𑀺𑀲𑁆𑀲𑀢𑀺, 𑀤𑁂𑀯𑀤𑀼𑀤𑁆𑀭𑀪𑀺 [𑀤𑁂𑀯𑀤𑀼𑀦𑁆𑀤𑀼𑀪𑀺 (𑀲𑁆𑀬𑀸. 𑀓𑀁. 𑀧𑀻.)] 𑀪𑀯𑀺𑀲𑁆𑀲𑀢𑀺, 𑀘𑀦𑁆𑀤𑀺𑀫𑀲𑀽𑀭𑀺𑀬𑀦𑀓𑁆𑀔𑀢𑁆𑀢𑀸𑀦𑀁 𑀉𑀕𑁆𑀕𑀫𑀦𑀁 𑀑𑀕𑀫𑀦𑀁 𑀲𑀁𑀓𑀺𑀮𑁂𑀲𑀁 𑀯𑁄𑀤𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑁄 𑀘𑀦𑁆𑀤𑀕𑁆𑀕𑀸𑀳𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑁄 𑀲𑀽𑀭𑀺𑀬𑀕𑁆𑀕𑀸𑀳𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑁄 𑀦𑀓𑁆𑀔𑀢𑁆𑀢𑀕𑁆𑀕𑀸𑀳𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀧𑀣𑀕𑀫𑀦𑀁 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀉𑀧𑁆𑀧𑀣𑀕𑀫𑀦𑀁 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑀁 𑀦𑀓𑁆𑀔𑀢𑁆𑀢𑀸𑀦𑀁 𑀧𑀣𑀕𑀫𑀦𑀁 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑀁 𑀦𑀓𑁆𑀔𑀢𑁆𑀢𑀸𑀦𑀁 𑀉𑀧𑁆𑀧𑀣𑀕𑀫𑀦𑀁 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑁄 𑀉𑀓𑁆𑀓𑀸𑀧𑀸𑀢𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑁄 𑀤𑀺𑀲𑀸𑀟𑀸𑀳𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑁄 𑀪𑀽𑀫𑀺𑀘𑀸𑀮𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑁄 𑀤𑁂𑀯𑀤𑀼𑀤𑁆𑀭𑀪𑀺 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀦𑀓𑁆𑀔𑀢𑁆𑀢𑀸𑀦𑀁 𑀉𑀕𑁆𑀕𑀫𑀦𑀁 𑀑𑀕𑀫𑀦𑀁 𑀲𑀁𑀓𑀺𑀮𑁂𑀲𑀁 𑀯𑁄𑀤𑀸𑀦𑀁 𑀪𑀯𑀺𑀲𑁆𑀲𑀢𑀺 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

𑁨𑁫. ‘‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀼𑀯𑀼𑀝𑁆𑀞𑀺𑀓𑀸 𑀪𑀯𑀺𑀲𑁆𑀲𑀢𑀺, 𑀤𑀼𑀩𑁆𑀩𑀼𑀝𑁆𑀞𑀺𑀓𑀸 𑀪𑀯𑀺𑀲𑁆𑀲𑀢𑀺, 𑀲𑀼𑀪𑀺𑀓𑁆𑀔𑀁 𑀪𑀯𑀺𑀲𑁆𑀲𑀢𑀺, 𑀤𑀼𑀩𑁆𑀪𑀺𑀓𑁆𑀔𑀁 𑀪𑀯𑀺𑀲𑁆𑀲𑀢𑀺, 𑀔𑁂𑀫𑀁 𑀪𑀯𑀺𑀲𑁆𑀲𑀢𑀺, 𑀪𑀬𑀁 𑀪𑀯𑀺𑀲𑁆𑀲𑀢𑀺, 𑀭𑁄𑀕𑁄 𑀪𑀯𑀺𑀲𑁆𑀲𑀢𑀺, 𑀆𑀭𑁄𑀕𑁆𑀬𑀁 𑀪𑀯𑀺𑀲𑁆𑀲𑀢𑀺, 𑀫𑀼𑀤𑁆𑀤𑀸, 𑀕𑀡𑀦𑀸, 𑀲𑀗𑁆𑀔𑀸𑀦𑀁, 𑀓𑀸𑀯𑁂𑀬𑁆𑀬𑀁, 𑀮𑁄𑀓𑀸𑀬𑀢𑀁 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

𑁨𑁬. ‘‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀆𑀯𑀸𑀳𑀦𑀁 𑀯𑀺𑀯𑀸𑀳𑀦𑀁 𑀲𑀁𑀯𑀭𑀡𑀁 𑀯𑀺𑀯𑀭𑀡𑀁 𑀲𑀁𑀓𑀺𑀭𑀡𑀁 𑀯𑀺𑀓𑀺𑀭𑀡𑀁 𑀲𑀼𑀪𑀕𑀓𑀭𑀡𑀁 𑀤𑀼𑀩𑁆𑀪𑀕𑀓𑀭𑀡𑀁 𑀯𑀺𑀭𑀼𑀤𑁆𑀥𑀕𑀩𑁆𑀪𑀓𑀭𑀡𑀁 𑀚𑀺𑀯𑁆𑀳𑀸𑀦𑀺𑀩𑀦𑁆𑀥𑀦𑀁 𑀳𑀦𑀼𑀲𑀁𑀳𑀦𑀦𑀁 𑀳𑀢𑁆𑀣𑀸𑀪𑀺𑀚𑀧𑁆𑀧𑀦𑀁 𑀳𑀦𑀼𑀚𑀧𑁆𑀧𑀦𑀁 𑀓𑀡𑁆𑀡𑀚𑀧𑁆𑀧𑀦𑀁 𑀆𑀤𑀸𑀲𑀧𑀜𑁆𑀳𑀁 𑀓𑀼𑀫𑀸𑀭𑀺𑀓𑀧𑀜𑁆𑀳𑀁 𑀤𑁂𑀯𑀧𑀜𑁆𑀳𑀁 𑀆𑀤𑀺𑀘𑁆𑀘𑀼𑀧𑀝𑁆𑀞𑀸𑀦𑀁 𑀫𑀳𑀢𑀼𑀧𑀝𑁆𑀞𑀸𑀦𑀁 𑀅𑀩𑁆𑀪𑀼𑀚𑁆𑀚𑀮𑀦𑀁 𑀲𑀺𑀭𑀺𑀯𑁆𑀳𑀸𑀬𑀦𑀁 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

𑁨𑁭. ‘‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀦𑁆𑀢𑀺𑀓𑀫𑁆𑀫𑀁 𑀧𑀡𑀺𑀥𑀺𑀓𑀫𑁆𑀫𑀁 𑀪𑀽𑀢𑀓𑀫𑁆𑀫𑀁 𑀪𑀽𑀭𑀺𑀓𑀫𑁆𑀫𑀁 𑀯𑀲𑁆𑀲𑀓𑀫𑁆𑀫𑀁 𑀯𑁄𑀲𑁆𑀲𑀓𑀫𑁆𑀫𑀁 𑀯𑀢𑁆𑀣𑀼𑀓𑀫𑁆𑀫𑀁 𑀯𑀢𑁆𑀣𑀼𑀧𑀭𑀺𑀓𑀫𑁆𑀫𑀁 𑀆𑀘𑀫𑀦𑀁 𑀦𑁆𑀳𑀸𑀧𑀦𑀁 𑀚𑀼𑀳𑀦𑀁 𑀯𑀫𑀦𑀁 𑀯𑀺𑀭𑁂𑀘𑀦𑀁 𑀉𑀤𑁆𑀥𑀁𑀯𑀺𑀭𑁂𑀘𑀦𑀁 𑀅𑀥𑁄𑀯𑀺𑀭𑁂𑀘𑀦𑀁 𑀲𑀻𑀲𑀯𑀺𑀭𑁂𑀘𑀦𑀁 𑀓𑀡𑁆𑀡𑀢𑁂𑀮𑀁 𑀦𑁂𑀢𑁆𑀢𑀢𑀧𑁆𑀧𑀦𑀁 𑀦𑀢𑁆𑀣𑀼𑀓𑀫𑁆𑀫𑀁 𑀅𑀜𑁆𑀚𑀦𑀁 𑀧𑀘𑁆𑀘𑀜𑁆𑀚𑀦𑀁 𑀲𑀸𑀮𑀸𑀓𑀺𑀬𑀁 𑀲𑀮𑁆𑀮𑀓𑀢𑁆𑀢𑀺𑀬𑀁 𑀤𑀸𑀭𑀓𑀢𑀺𑀓𑀺𑀘𑁆𑀙𑀸 𑀫𑀽𑀮𑀪𑁂𑀲𑀚𑁆𑀚𑀸𑀦𑀁 𑀅𑀦𑀼𑀧𑁆𑀧𑀤𑀸𑀦𑀁 𑀑𑀲𑀥𑀻𑀦𑀁 𑀧𑀝𑀺𑀫𑁄𑀓𑁆𑀔𑁄 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑁄 𑀕𑁄𑀢𑀫𑁄’𑀢𑀺 𑁋 𑀇𑀢𑀺 𑀯𑀸 𑀳𑀺, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

‘‘𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀢𑁆𑀢𑀓𑀁 𑀑𑀭𑀫𑀢𑁆𑀢𑀓𑀁 𑀲𑀻𑀮𑀫𑀢𑁆𑀢𑀓𑀁, 𑀬𑁂𑀦 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬.

𑀫𑀳𑀸𑀲𑀻𑀮𑀁 𑀦𑀺𑀝𑁆𑀞𑀺𑀢𑀁.

𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸

𑁨𑁮. ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑁂𑀯 𑀥𑀫𑁆𑀫𑀸 𑀕𑀫𑁆𑀪𑀻𑀭𑀸 𑀤𑀼𑀤𑁆𑀤𑀲𑀸 𑀤𑀼𑀭𑀦𑀼𑀩𑁄𑀥𑀸 𑀲𑀦𑁆𑀢𑀸 𑀧𑀡𑀻𑀢𑀸 𑀅𑀢𑀓𑁆𑀓𑀸𑀯𑀘𑀭𑀸 𑀦𑀺𑀧𑀼𑀡𑀸 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀸, 𑀬𑁂 𑀢𑀣𑀸𑀕𑀢𑁄 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺, 𑀬𑁂𑀳𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀪𑀼𑀘𑁆𑀘𑀁 𑀯𑀡𑁆𑀡𑀁 𑀲𑀫𑁆𑀫𑀸 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁. 𑀓𑀢𑀫𑁂 𑀘 𑀢𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀕𑀫𑁆𑀪𑀻𑀭𑀸 𑀤𑀼𑀤𑁆𑀤𑀲𑀸 𑀤𑀼𑀭𑀦𑀼𑀩𑁄𑀥𑀸 𑀲𑀦𑁆𑀢𑀸 𑀧𑀡𑀻𑀢𑀸 𑀅𑀢𑀓𑁆𑀓𑀸𑀯𑀘𑀭𑀸 𑀦𑀺𑀧𑀼𑀡𑀸 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀸, 𑀬𑁂 𑀢𑀣𑀸𑀕𑀢𑁄 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺, 𑀬𑁂𑀳𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀪𑀼𑀘𑁆𑀘𑀁 𑀯𑀡𑁆𑀡𑀁 𑀲𑀫𑁆𑀫𑀸 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁?

𑁨𑁯. ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄, 𑀧𑀼𑀩𑁆𑀩𑀦𑁆𑀢𑀁 𑀆𑀭𑀩𑁆𑀪 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀺 [𑀅𑀥𑀺𑀯𑀼𑀢𑁆𑀢𑀺𑀧𑀤𑀸𑀦𑀺 (𑀲𑀻. 𑀧𑀻.)] 𑀅𑀪𑀺𑀯𑀤𑀦𑁆𑀢𑀺 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺. 𑀢𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄 𑀧𑀼𑀩𑁆𑀩𑀦𑁆𑀢𑀁 𑀆𑀭𑀩𑁆𑀪 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺?

𑀲𑀲𑁆𑀲𑀢𑀯𑀸𑀤𑁄

𑁩𑁦. ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀲𑁆𑀲𑀢𑀯𑀸𑀤𑀸, 𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺. 𑀢𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀲𑀲𑁆𑀲𑀢𑀯𑀸𑀤𑀸 𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺?

𑁩𑁧. ‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀆𑀢𑀧𑁆𑀧𑀫𑀦𑁆𑀯𑀸𑀬 𑀧𑀥𑀸𑀦𑀫𑀦𑁆𑀯𑀸𑀬 𑀅𑀦𑀼𑀬𑁄𑀕𑀫𑀦𑁆𑀯𑀸𑀬 𑀅𑀧𑁆𑀧𑀫𑀸𑀤𑀫𑀦𑁆𑀯𑀸𑀬 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑀫𑀦𑁆𑀯𑀸𑀬 𑀢𑀣𑀸𑀭𑀽𑀧𑀁 𑀘𑁂𑀢𑁄𑀲𑀫𑀸𑀥𑀺𑀁 𑀨𑀼𑀲𑀢𑀺, 𑀬𑀣𑀸𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 ( ) [(𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀢𑁆𑀢𑀺𑀮𑁂𑀲𑁂) (𑀲𑁆𑀬𑀸. 𑀓.)] 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀧𑀜𑁆𑀘𑀧𑀺 𑀚𑀸𑀢𑀺𑀬𑁄 𑀤𑀲𑀧𑀺 𑀚𑀸𑀢𑀺𑀬𑁄 𑀯𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀢𑀺𑀁𑀲𑀫𑁆𑀧𑀺 𑀚𑀸𑀢𑀺𑀬𑁄 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀧𑀜𑁆𑀜𑀸𑀲𑀫𑁆𑀧𑀺 𑀚𑀸𑀢𑀺𑀬𑁄 𑀚𑀸𑀢𑀺𑀲𑀢𑀫𑁆𑀧𑀺 𑀚𑀸𑀢𑀺𑀲𑀳𑀲𑁆𑀲𑀫𑁆𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑁆𑀧𑀺 𑀅𑀦𑁂𑀓𑀸𑀦𑀺𑀧𑀺 𑀚𑀸𑀢𑀺𑀲𑀢𑀸𑀦𑀺 𑀅𑀦𑁂𑀓𑀸𑀦𑀺𑀧𑀺 𑀚𑀸𑀢𑀺𑀲𑀳𑀲𑁆𑀲𑀸𑀦𑀺 𑀅𑀦𑁂𑀓𑀸𑀦𑀺𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀸𑀦𑀺 𑁋 ‘𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁; 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄’𑀢𑀺. 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺.

‘‘𑀲𑁄 𑀏𑀯𑀫𑀸𑀳 𑁋 ‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘 𑀯𑀜𑁆𑀛𑁄 𑀓𑀽𑀝𑀝𑁆𑀞𑁄 𑀏𑀲𑀺𑀓𑀝𑁆𑀞𑀸𑀬𑀺𑀝𑁆𑀞𑀺𑀢𑁄; 𑀢𑁂 𑀘 𑀲𑀢𑁆𑀢𑀸 𑀲𑀦𑁆𑀥𑀸𑀯𑀦𑁆𑀢𑀺 𑀲𑀁𑀲𑀭𑀦𑁆𑀢𑀺 𑀘𑀯𑀦𑁆𑀢𑀺 𑀉𑀧𑀧𑀚𑁆𑀚𑀦𑁆𑀢𑀺, 𑀅𑀢𑁆𑀣𑀺𑀢𑁆𑀯𑁂𑀯 𑀲𑀲𑁆𑀲𑀢𑀺𑀲𑀫𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀳𑀜𑁆𑀳𑀺 𑀆𑀢𑀧𑁆𑀧𑀫𑀦𑁆𑀯𑀸𑀬 𑀧𑀥𑀸𑀦𑀫𑀦𑁆𑀯𑀸𑀬 𑀅𑀦𑀼𑀬𑁄𑀕𑀫𑀦𑁆𑀯𑀸𑀬 𑀅𑀧𑁆𑀧𑀫𑀸𑀤𑀫𑀦𑁆𑀯𑀸𑀬 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑀫𑀦𑁆𑀯𑀸𑀬 𑀢𑀣𑀸𑀭𑀽𑀧𑀁 𑀘𑁂𑀢𑁄𑀲𑀫𑀸𑀥𑀺𑀁 𑀨𑀼𑀲𑀸𑀫𑀺, 𑀬𑀣𑀸𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀸𑀫𑀺 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀧𑀜𑁆𑀘𑀧𑀺 𑀚𑀸𑀢𑀺𑀬𑁄 𑀤𑀲𑀧𑀺 𑀚𑀸𑀢𑀺𑀬𑁄 𑀯𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀢𑀺𑀁𑀲𑀫𑁆𑀧𑀺 𑀚𑀸𑀢𑀺𑀬𑁄 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀧𑀜𑁆𑀜𑀸𑀲𑀫𑁆𑀧𑀺 𑀚𑀸𑀢𑀺𑀬𑁄 𑀚𑀸𑀢𑀺𑀲𑀢𑀫𑁆𑀧𑀺 𑀚𑀸𑀢𑀺𑀲𑀳𑀲𑁆𑀲𑀫𑁆𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑁆𑀧𑀺 𑀅𑀦𑁂𑀓𑀸𑀦𑀺𑀧𑀺 𑀚𑀸𑀢𑀺𑀲𑀢𑀸𑀦𑀺 𑀅𑀦𑁂𑀓𑀸𑀦𑀺𑀧𑀺 𑀚𑀸𑀢𑀺𑀲𑀳𑀲𑁆𑀲𑀸𑀦𑀺 𑀅𑀦𑁂𑀓𑀸𑀦𑀺𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀸𑀦𑀺 𑁋 𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁; 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄𑀢𑀺. 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀸𑀫𑀺. 𑀇𑀫𑀺𑀦𑀸𑀫𑀳𑀁 𑀏𑀢𑀁 𑀚𑀸𑀦𑀸𑀫𑀺 ‘‘𑀬𑀣𑀸 𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘 𑀯𑀜𑁆𑀛𑁄 𑀓𑀽𑀝𑀝𑁆𑀞𑁄 𑀏𑀲𑀺𑀓𑀝𑁆𑀞𑀸𑀬𑀺𑀝𑁆𑀞𑀺𑀢𑁄; 𑀢𑁂 𑀘 𑀲𑀢𑁆𑀢𑀸 𑀲𑀦𑁆𑀥𑀸𑀯𑀦𑁆𑀢𑀺 𑀲𑀁𑀲𑀭𑀦𑁆𑀢𑀺 𑀘𑀯𑀦𑁆𑀢𑀺 𑀉𑀧𑀧𑀚𑁆𑀚𑀦𑁆𑀢𑀺, 𑀅𑀢𑁆𑀣𑀺𑀢𑁆𑀯𑁂𑀯 𑀲𑀲𑁆𑀲𑀢𑀺𑀲𑀫’’𑀦𑁆𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀞𑀸𑀦𑀁, 𑀬𑀁 𑀆𑀕𑀫𑁆𑀫 𑀬𑀁 𑀆𑀭𑀩𑁆𑀪 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀲𑁆𑀲𑀢𑀯𑀸𑀤𑀸 𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺.

𑁩𑁨. ‘‘𑀤𑀼𑀢𑀺𑀬𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀲𑀲𑁆𑀲𑀢𑀯𑀸𑀤𑀸 𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀆𑀢𑀧𑁆𑀧𑀫𑀦𑁆𑀯𑀸𑀬 𑀧𑀥𑀸𑀦𑀫𑀦𑁆𑀯𑀸𑀬 𑀅𑀦𑀼𑀬𑁄𑀕𑀫𑀦𑁆𑀯𑀸𑀬 𑀅𑀧𑁆𑀧𑀫𑀸𑀤𑀫𑀦𑁆𑀯𑀸𑀬 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑀫𑀦𑁆𑀯𑀸𑀬 𑀢𑀣𑀸𑀭𑀽𑀧𑀁 𑀘𑁂𑀢𑁄𑀲𑀫𑀸𑀥𑀺𑀁 𑀨𑀼𑀲𑀢𑀺, 𑀬𑀣𑀸𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀁 𑀤𑁆𑀯𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸𑀦𑀺 𑀢𑀻𑀡𑀺𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸𑀦𑀺 𑀘𑀢𑁆𑀢𑀸𑀭𑀺𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸𑀦𑀺 𑀧𑀜𑁆𑀘𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸𑀦𑀺 𑀤𑀲𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸𑀦𑀺 𑁋 ‘𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁; 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄’𑀢𑀺. 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺.

‘‘𑀲𑁄 𑀏𑀯𑀫𑀸𑀳 𑁋 ‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘 𑀯𑀜𑁆𑀛𑁄 𑀓𑀽𑀝𑀝𑁆𑀞𑁄 𑀏𑀲𑀺𑀓𑀝𑁆𑀞𑀸𑀬𑀺𑀝𑁆𑀞𑀺𑀢𑁄; 𑀢𑁂 𑀘 𑀲𑀢𑁆𑀢𑀸 𑀲𑀦𑁆𑀥𑀸𑀯𑀦𑁆𑀢𑀺 𑀲𑀁𑀲𑀭𑀦𑁆𑀢𑀺 𑀘𑀯𑀦𑁆𑀢𑀺 𑀉𑀧𑀧𑀚𑁆𑀚𑀦𑁆𑀢𑀺, 𑀅𑀢𑁆𑀣𑀺𑀢𑁆𑀯𑁂𑀯 𑀲𑀲𑁆𑀲𑀢𑀺𑀲𑀫𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀳𑀜𑁆𑀳𑀺 𑀆𑀢𑀧𑁆𑀧𑀫𑀦𑁆𑀯𑀸𑀬 𑀧𑀥𑀸𑀦𑀫𑀦𑁆𑀯𑀸𑀬 𑀅𑀦𑀼𑀬𑁄𑀕𑀫𑀦𑁆𑀯𑀸𑀬 𑀅𑀧𑁆𑀧𑀫𑀸𑀤𑀫𑀦𑁆𑀯𑀸𑀬 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑀫𑀦𑁆𑀯𑀸𑀬 𑀢𑀣𑀸𑀭𑀽𑀧𑀁 𑀘𑁂𑀢𑁄𑀲𑀫𑀸𑀥𑀺𑀁 𑀨𑀼𑀲𑀸𑀫𑀺 𑀬𑀣𑀸𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀸𑀫𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀁 𑀤𑁆𑀯𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸𑀦𑀺 𑀢𑀻𑀡𑀺𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸𑀦𑀺 𑀘𑀢𑁆𑀢𑀸𑀭𑀺𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸𑀦𑀺 𑀧𑀜𑁆𑀘𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸𑀦𑀺 𑀤𑀲𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸𑀦𑀺. 𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁; 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄𑀢𑀺. 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀸𑀫𑀺. 𑀇𑀫𑀺𑀦𑀸𑀫𑀳𑀁 𑀏𑀢𑀁 𑀚𑀸𑀦𑀸𑀫𑀺 ‘‘𑀬𑀣𑀸 𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘 𑀯𑀜𑁆𑀛𑁄 𑀓𑀽𑀝𑀝𑁆𑀞𑁄 𑀏𑀲𑀺𑀓𑀝𑁆𑀞𑀸𑀬𑀺𑀝𑁆𑀞𑀺𑀢𑁄, 𑀢𑁂 𑀘 𑀲𑀢𑁆𑀢𑀸 𑀲𑀦𑁆𑀥𑀸𑀯𑀦𑁆𑀢𑀺 𑀲𑀁𑀲𑀭𑀦𑁆𑀢𑀺 𑀘𑀯𑀦𑁆𑀢𑀺 𑀉𑀧𑀧𑀚𑁆𑀚𑀦𑁆𑀢𑀺, 𑀅𑀢𑁆𑀣𑀺𑀢𑁆𑀯𑁂𑀯 𑀲𑀲𑁆𑀲𑀢𑀺𑀲𑀫’’𑀦𑁆𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀁 𑀞𑀸𑀦𑀁, 𑀬𑀁 𑀆𑀕𑀫𑁆𑀫 𑀬𑀁 𑀆𑀭𑀩𑁆𑀪 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀲𑁆𑀲𑀢𑀯𑀸𑀤𑀸 𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺.

𑁩𑁩. ‘‘𑀢𑀢𑀺𑀬𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀲𑀲𑁆𑀲𑀢𑀯𑀸𑀤𑀸 𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀆𑀢𑀧𑁆𑀧𑀫𑀦𑁆𑀯𑀸𑀬 𑀧𑀥𑀸𑀦𑀫𑀦𑁆𑀯𑀸𑀬 𑀅𑀦𑀼𑀬𑁄𑀕𑀫𑀦𑁆𑀯𑀸𑀬 𑀅𑀧𑁆𑀧𑀫𑀸𑀤𑀫𑀦𑁆𑀯𑀸𑀬 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑀫𑀦𑁆𑀯𑀸𑀬 𑀢𑀣𑀸𑀭𑀽𑀧𑀁 𑀘𑁂𑀢𑁄𑀲𑀫𑀸𑀥𑀺𑀁 𑀨𑀼𑀲𑀢𑀺, 𑀬𑀣𑀸𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀲𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸𑀦𑀺 𑀯𑀻𑀲𑀫𑁆𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸𑀦𑀺 𑀢𑀺𑀁𑀲𑀫𑁆𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸𑀦𑀺 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸𑀦𑀺 𑁋 ‘𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁; 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄’𑀢𑀺. 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺.

‘‘𑀲𑁄 𑀏𑀯𑀫𑀸𑀳 𑁋 ‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘 𑀯𑀜𑁆𑀛𑁄 𑀓𑀽𑀝𑀝𑁆𑀞𑁄 𑀏𑀲𑀺𑀓𑀝𑁆𑀞𑀸𑀬𑀺𑀝𑁆𑀞𑀺𑀢𑁄; 𑀢𑁂 𑀘 𑀲𑀢𑁆𑀢𑀸 𑀲𑀦𑁆𑀥𑀸𑀯𑀦𑁆𑀢𑀺 𑀲𑀁𑀲𑀭𑀦𑁆𑀢𑀺 𑀘𑀯𑀦𑁆𑀢𑀺 𑀉𑀧𑀧𑀚𑁆𑀚𑀦𑁆𑀢𑀺, 𑀅𑀢𑁆𑀣𑀺𑀢𑁆𑀯𑁂𑀯 𑀲𑀲𑁆𑀲𑀢𑀺𑀲𑀫𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀳𑀜𑁆𑀳𑀺 𑀆𑀢𑀧𑁆𑀧𑀫𑀦𑁆𑀯𑀸𑀬 𑀧𑀥𑀸𑀦𑀫𑀦𑁆𑀯𑀸𑀬 𑀅𑀦𑀼𑀬𑁄𑀕𑀫𑀦𑁆𑀯𑀸𑀬 𑀅𑀧𑁆𑀧𑀫𑀸𑀤𑀫𑀦𑁆𑀯𑀸𑀬 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑀫𑀦𑁆𑀯𑀸𑀬 𑀢𑀣𑀸𑀭𑀽𑀧𑀁 𑀘𑁂𑀢𑁄𑀲𑀫𑀸𑀥𑀺𑀁 𑀨𑀼𑀲𑀸𑀫𑀺, 𑀬𑀣𑀸𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀸𑀫𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀲𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸𑀦𑀺 𑀯𑀻𑀲𑀫𑁆𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸𑀦𑀺 𑀢𑀺𑀁𑀲𑀫𑁆𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸𑀦𑀺 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸𑀦𑀺 𑁋 ‘𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁; 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄𑀢𑀺. 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀸𑀫𑀺. 𑀇𑀫𑀺𑀦𑀸𑀫𑀳𑀁 𑀏𑀢𑀁 𑀚𑀸𑀦𑀸𑀫𑀺 ‘‘𑀬𑀣𑀸 𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘 𑀯𑀜𑁆𑀛𑁄 𑀓𑀽𑀝𑀝𑁆𑀞𑁄 𑀏𑀲𑀺𑀓𑀝𑁆𑀞𑀸𑀬𑀺𑀝𑁆𑀞𑀺𑀢𑁄, 𑀢𑁂 𑀘 𑀲𑀢𑁆𑀢𑀸 𑀲𑀦𑁆𑀥𑀸𑀯𑀦𑁆𑀢𑀺 𑀲𑀁𑀲𑀭𑀦𑁆𑀢𑀺 𑀘𑀯𑀦𑁆𑀢𑀺 𑀉𑀧𑀧𑀚𑁆𑀚𑀦𑁆𑀢𑀺, 𑀅𑀢𑁆𑀣𑀺𑀢𑁆𑀯𑁂𑀯 𑀲𑀲𑁆𑀲𑀢𑀺𑀲𑀫’’𑀦𑁆𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑀁 𑀞𑀸𑀦𑀁, 𑀬𑀁 𑀆𑀕𑀫𑁆𑀫 𑀬𑀁 𑀆𑀭𑀩𑁆𑀪 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀲𑁆𑀲𑀢𑀯𑀸𑀤𑀸 𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺.

𑁩𑁪. ‘‘𑀘𑀢𑀼𑀢𑁆𑀣𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀲𑀲𑁆𑀲𑀢𑀯𑀸𑀤𑀸 𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀢𑀓𑁆𑀓𑀻 𑀳𑁄𑀢𑀺 𑀯𑀻𑀫𑀁𑀲𑀻, 𑀲𑁄 𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀯𑀻𑀫𑀁𑀲𑀸𑀦𑀼𑀘𑀭𑀺𑀢𑀁 𑀲𑀬𑀁 𑀧𑀝𑀺𑀪𑀸𑀦𑀁 𑀏𑀯𑀫𑀸𑀳 𑁋 ‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘 𑀯𑀜𑁆𑀛𑁄 𑀓𑀽𑀝𑀝𑁆𑀞𑁄 𑀏𑀲𑀺𑀓𑀝𑁆𑀞𑀸𑀬𑀺𑀝𑁆𑀞𑀺𑀢𑁄; 𑀢𑁂 𑀘 𑀲𑀢𑁆𑀢𑀸 𑀲𑀦𑁆𑀥𑀸𑀯𑀦𑁆𑀢𑀺 𑀲𑀁𑀲𑀭𑀦𑁆𑀢𑀺 𑀘𑀯𑀦𑁆𑀢𑀺 𑀉𑀧𑀧𑀚𑁆𑀚𑀦𑁆𑀢𑀺, 𑀅𑀢𑁆𑀣𑀺𑀢𑁆𑀯𑁂𑀯 𑀲𑀲𑁆𑀲𑀢𑀺𑀲𑀫’𑀦𑁆𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑀁 𑀞𑀸𑀦𑀁, 𑀬𑀁 𑀆𑀕𑀫𑁆𑀫 𑀬𑀁 𑀆𑀭𑀩𑁆𑀪 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀲𑁆𑀲𑀢𑀯𑀸𑀤𑀸 𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺.

𑁩𑁫. ‘‘𑀇𑀫𑁂𑀳𑀺 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀲𑁆𑀲𑀢𑀯𑀸𑀤𑀸 𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀲𑀲𑁆𑀲𑀢𑀯𑀸𑀤𑀸 𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀳𑁂𑀯 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺, 𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭𑁂𑀦; 𑀦𑀢𑁆𑀣𑀺 𑀇𑀢𑁄 𑀩𑀳𑀺𑀤𑁆𑀥𑀸.

𑁩𑁬. ‘‘𑀢𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀺 𑁋 ‘𑀇𑀫𑁂 𑀤𑀺𑀝𑁆𑀞𑀺𑀝𑁆𑀞𑀸𑀦𑀸 𑀏𑀯𑀁𑀕𑀳𑀺𑀢𑀸 𑀏𑀯𑀁𑀧𑀭𑀸𑀫𑀝𑁆𑀞𑀸 𑀏𑀯𑀁𑀕𑀢𑀺𑀓𑀸 𑀪𑀯𑀦𑁆𑀢𑀺 𑀏𑀯𑀁𑀅𑀪𑀺𑀲𑀫𑁆𑀧𑀭𑀸𑀬𑀸’𑀢𑀺, 𑀢𑀜𑁆𑀘 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀺, 𑀢𑀢𑁄 𑀘 𑀉𑀢𑁆𑀢𑀭𑀺𑀢𑀭𑀁 𑀧𑀚𑀸𑀦𑀸𑀢𑀺; 𑀢𑀜𑁆𑀘 𑀧𑀚𑀸𑀦𑀦𑀁 [𑀧𑀚𑀸𑀦𑀁 (?) 𑀤𑀻. 𑀦𑀺. 𑁩.𑁩𑁬 𑀧𑀸𑀴𑀺𑀅𑀝𑁆𑀞𑀓𑀣𑀸 𑀧𑀲𑁆𑀲𑀺𑀢𑀩𑁆𑀩𑀁] 𑀦 𑀧𑀭𑀸𑀫𑀲𑀢𑀺, 𑀅𑀧𑀭𑀸𑀫𑀲𑀢𑁄 𑀘𑀲𑁆𑀲 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀦𑀺𑀩𑁆𑀩𑀼𑀢𑀺 𑀯𑀺𑀤𑀺𑀢𑀸. 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀯𑀺𑀤𑀺𑀢𑁆𑀯𑀸 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄.

𑁩𑁭. ‘‘𑀇𑀫𑁂 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀕𑀫𑁆𑀪𑀻𑀭𑀸 𑀤𑀼𑀤𑁆𑀤𑀲𑀸 𑀤𑀼𑀭𑀦𑀼𑀩𑁄𑀥𑀸 𑀲𑀦𑁆𑀢𑀸 𑀧𑀡𑀻𑀢𑀸 𑀅𑀢𑀓𑁆𑀓𑀸𑀯𑀘𑀭𑀸 𑀦𑀺𑀧𑀼𑀡𑀸 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀸, 𑀬𑁂 𑀢𑀣𑀸𑀕𑀢𑁄 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺, 𑀬𑁂𑀳𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀪𑀼𑀘𑁆𑀘𑀁 𑀯𑀡𑁆𑀡𑀁 𑀲𑀫𑁆𑀫𑀸 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁.

𑀧𑀞𑀫𑀪𑀸𑀡𑀯𑀸𑀭𑁄.

𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑁄

𑁩𑁮. ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀅𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀁 𑀲𑀲𑁆𑀲𑀢𑀁 𑀏𑀓𑀘𑁆𑀘𑀁 𑀅𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺. 𑀢𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀅𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀁 𑀲𑀲𑁆𑀲𑀢𑀁 𑀏𑀓𑀘𑁆𑀘𑀁 𑀅𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺?

𑁩𑁯. ‘‘𑀳𑁄𑀢𑀺 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁄, 𑀬𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀅𑀬𑀁 𑀮𑁄𑀓𑁄 𑀲𑀁𑀯𑀝𑁆𑀝𑀢𑀺. 𑀲𑀁𑀯𑀝𑁆𑀝𑀫𑀸𑀦𑁂 𑀮𑁄𑀓𑁂 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀸 𑀆𑀪𑀲𑁆𑀲𑀭𑀲𑀁𑀯𑀢𑁆𑀢𑀦𑀺𑀓𑀸 𑀳𑁄𑀦𑁆𑀢𑀺. 𑀢𑁂 𑀢𑀢𑁆𑀣 𑀳𑁄𑀦𑁆𑀢𑀺 𑀫𑀦𑁄𑀫𑀬𑀸 𑀧𑀻𑀢𑀺𑀪𑀓𑁆𑀔𑀸 𑀲𑀬𑀁𑀧𑀪𑀸 𑀅𑀦𑁆𑀢𑀮𑀺𑀓𑁆𑀔𑀘𑀭𑀸 𑀲𑀼𑀪𑀝𑁆𑀞𑀸𑀬𑀺𑀦𑁄, 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀢𑀺𑀝𑁆𑀞𑀦𑁆𑀢𑀺.

𑁪𑁦. ‘‘𑀳𑁄𑀢𑀺 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁄, 𑀬𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀅𑀬𑀁 𑀮𑁄𑀓𑁄 𑀯𑀺𑀯𑀝𑁆𑀝𑀢𑀺. 𑀯𑀺𑀯𑀝𑁆𑀝𑀫𑀸𑀦𑁂 𑀮𑁄𑀓𑁂 𑀲𑀼𑀜𑁆𑀜𑀁 𑀩𑁆𑀭𑀳𑁆𑀫𑀯𑀺𑀫𑀸𑀦𑀁 𑀧𑀸𑀢𑀼𑀪𑀯𑀢𑀺. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀲𑀢𑁆𑀢𑁄 𑀆𑀬𑀼𑀓𑁆𑀔𑀬𑀸 𑀯𑀸 𑀧𑀼𑀜𑁆𑀜𑀓𑁆𑀔𑀬𑀸 𑀯𑀸 𑀆𑀪𑀲𑁆𑀲𑀭𑀓𑀸𑀬𑀸 𑀘𑀯𑀺𑀢𑁆𑀯𑀸 𑀲𑀼𑀜𑁆𑀜𑀁 𑀩𑁆𑀭𑀳𑁆𑀫𑀯𑀺𑀫𑀸𑀦𑀁 𑀉𑀧𑀧𑀚𑁆𑀚𑀢𑀺. 𑀲𑁄 𑀢𑀢𑁆𑀣 𑀳𑁄𑀢𑀺 𑀫𑀦𑁄𑀫𑀬𑁄 𑀧𑀻𑀢𑀺𑀪𑀓𑁆𑀔𑁄 𑀲𑀬𑀁𑀧𑀪𑁄 𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀲𑀼𑀪𑀝𑁆𑀞𑀸𑀬𑀻, 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀢𑀺𑀝𑁆𑀞𑀢𑀺.

𑁪𑁧. ‘‘𑀢𑀲𑁆𑀲 𑀢𑀢𑁆𑀣 𑀏𑀓𑀓𑀲𑁆𑀲 𑀤𑀻𑀖𑀭𑀢𑁆𑀢𑀁 𑀦𑀺𑀯𑀼𑀲𑀺𑀢𑀢𑁆𑀢𑀸 𑀅𑀦𑀪𑀺𑀭𑀢𑀺 𑀧𑀭𑀺𑀢𑀲𑁆𑀲𑀦𑀸 𑀉𑀧𑀧𑀚𑁆𑀚𑀢𑀺 𑁋 ‘𑀅𑀳𑁄 𑀯𑀢 𑀅𑀜𑁆𑀜𑁂𑀧𑀺 𑀲𑀢𑁆𑀢𑀸 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑁂𑀬𑁆𑀬𑀼’𑀦𑁆𑀢𑀺. 𑀅𑀣 𑀅𑀜𑁆𑀜𑁂𑀧𑀺 𑀲𑀢𑁆𑀢𑀸 𑀆𑀬𑀼𑀓𑁆𑀔𑀬𑀸 𑀯𑀸 𑀧𑀼𑀜𑁆𑀜𑀓𑁆𑀔𑀬𑀸 𑀯𑀸 𑀆𑀪𑀲𑁆𑀲𑀭𑀓𑀸𑀬𑀸 𑀘𑀯𑀺𑀢𑁆𑀯𑀸 𑀩𑁆𑀭𑀳𑁆𑀫𑀯𑀺𑀫𑀸𑀦𑀁 𑀉𑀧𑀧𑀚𑁆𑀚𑀦𑁆𑀢𑀺 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀲𑀳𑀩𑁆𑀬𑀢𑀁. 𑀢𑁂𑀧𑀺 𑀢𑀢𑁆𑀣 𑀳𑁄𑀦𑁆𑀢𑀺 𑀫𑀦𑁄𑀫𑀬𑀸 𑀧𑀻𑀢𑀺𑀪𑀓𑁆𑀔𑀸 𑀲𑀬𑀁𑀧𑀪𑀸 𑀅𑀦𑁆𑀢𑀮𑀺𑀓𑁆𑀔𑀘𑀭𑀸 𑀲𑀼𑀪𑀝𑁆𑀞𑀸𑀬𑀺𑀦𑁄, 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀢𑀺𑀝𑁆𑀞𑀦𑁆𑀢𑀺.

𑁪𑁨. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁄 𑀲𑁄 𑀲𑀢𑁆𑀢𑁄 𑀧𑀞𑀫𑀁 𑀉𑀧𑀧𑀦𑁆𑀦𑁄 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀫𑀲𑁆𑀫𑀺 𑀩𑁆𑀭𑀳𑁆𑀫𑀸 𑀫𑀳𑀸𑀩𑁆𑀭𑀳𑁆𑀫𑀸 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼𑀤𑀲𑁄 𑀯𑀲𑀯𑀢𑁆𑀢𑀻 𑀇𑀲𑁆𑀲𑀭𑁄 𑀓𑀢𑁆𑀢𑀸 𑀦𑀺𑀫𑁆𑀫𑀸𑀢𑀸 𑀲𑁂𑀝𑁆𑀞𑁄 𑀲𑀚𑀺𑀢𑀸 [𑀲𑀚𑁆𑀚𑀺𑀢𑀸 (𑀲𑁆𑀬𑀸. 𑀓𑀁.)] 𑀯𑀲𑀻 𑀧𑀺𑀢𑀸 𑀪𑀽𑀢𑀪𑀩𑁆𑀬𑀸𑀦𑀁. 𑀫𑀬𑀸 𑀇𑀫𑁂 𑀲𑀢𑁆𑀢𑀸 𑀦𑀺𑀫𑁆𑀫𑀺𑀢𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀫𑀫𑀜𑁆𑀳𑀺 𑀧𑀼𑀩𑁆𑀩𑁂 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑁄 𑀯𑀢 𑀅𑀜𑁆𑀜𑁂𑀧𑀺 𑀲𑀢𑁆𑀢𑀸 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑁂𑀬𑁆𑀬𑀼’’𑀦𑁆𑀢𑀺. 𑀇𑀢𑀺 𑀫𑀫 𑀘 𑀫𑀦𑁄𑀧𑀡𑀺𑀥𑀺, 𑀇𑀫𑁂 𑀘 𑀲𑀢𑁆𑀢𑀸 𑀇𑀢𑁆𑀣𑀢𑁆𑀢𑀁 𑀆𑀕𑀢𑀸’𑀢𑀺.

‘‘𑀬𑁂𑀧𑀺 𑀢𑁂 𑀲𑀢𑁆𑀢𑀸 𑀧𑀘𑁆𑀙𑀸 𑀉𑀧𑀧𑀦𑁆𑀦𑀸, 𑀢𑁂𑀲𑀫𑁆𑀧𑀺 𑀏𑀯𑀁 𑀳𑁄𑀢𑀺 𑁋 ‘𑀅𑀬𑀁 𑀔𑁄 𑀪𑀯𑀁 𑀩𑁆𑀭𑀳𑁆𑀫𑀸 𑀫𑀳𑀸𑀩𑁆𑀭𑀳𑁆𑀫𑀸 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼𑀤𑀲𑁄 𑀯𑀲𑀯𑀢𑁆𑀢𑀻 𑀇𑀲𑁆𑀲𑀭𑁄 𑀓𑀢𑁆𑀢𑀸 𑀦𑀺𑀫𑁆𑀫𑀸𑀢𑀸 𑀲𑁂𑀝𑁆𑀞𑁄 𑀲𑀚𑀺𑀢𑀸 𑀯𑀲𑀻 𑀧𑀺𑀢𑀸 𑀪𑀽𑀢𑀪𑀩𑁆𑀬𑀸𑀦𑀁. 𑀇𑀫𑀺𑀦𑀸 𑀫𑀬𑀁 𑀪𑁄𑀢𑀸 𑀩𑁆𑀭𑀳𑁆𑀫𑀼𑀦𑀸 𑀦𑀺𑀫𑁆𑀫𑀺𑀢𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀇𑀫𑀜𑁆𑀳𑀺 𑀫𑀬𑀁 𑀅𑀤𑁆𑀤𑀲𑀸𑀫 𑀇𑀥 𑀧𑀞𑀫𑀁 𑀉𑀧𑀧𑀦𑁆𑀦𑀁, 𑀫𑀬𑀁 𑀧𑀦𑀫𑁆𑀳 𑀧𑀘𑁆𑀙𑀸 𑀉𑀧𑀧𑀦𑁆𑀦𑀸’𑀢𑀺.

𑁪𑁩. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁄 𑀲𑁄 𑀲𑀢𑁆𑀢𑁄 𑀧𑀞𑀫𑀁 𑀉𑀧𑀧𑀦𑁆𑀦𑁄, 𑀲𑁄 𑀤𑀻𑀖𑀸𑀬𑀼𑀓𑀢𑀭𑁄 𑀘 𑀳𑁄𑀢𑀺 𑀯𑀡𑁆𑀡𑀯𑀦𑁆𑀢𑀢𑀭𑁄 𑀘 𑀫𑀳𑁂𑀲𑀓𑁆𑀔𑀢𑀭𑁄 𑀘. 𑀬𑁂 𑀧𑀦 𑀢𑁂 𑀲𑀢𑁆𑀢𑀸 𑀧𑀘𑁆𑀙𑀸 𑀉𑀧𑀧𑀦𑁆𑀦𑀸, 𑀢𑁂 𑀅𑀧𑁆𑀧𑀸𑀬𑀼𑀓𑀢𑀭𑀸 𑀘 𑀳𑁄𑀦𑁆𑀢𑀺 𑀤𑀼𑀩𑁆𑀩𑀡𑁆𑀡𑀢𑀭𑀸 𑀘 𑀅𑀧𑁆𑀧𑁂𑀲𑀓𑁆𑀔𑀢𑀭𑀸 𑀘.

𑁪𑁪. ‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀯𑀺𑀚𑁆𑀚𑀢𑀺, 𑀬𑀁 𑀅𑀜𑁆𑀜𑀢𑀭𑁄 𑀲𑀢𑁆𑀢𑁄 𑀢𑀫𑁆𑀳𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀢𑀺. 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺. 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀆𑀢𑀧𑁆𑀧𑀫𑀦𑁆𑀯𑀸𑀬 𑀧𑀥𑀸𑀦𑀫𑀦𑁆𑀯𑀸𑀬 𑀅𑀦𑀼𑀬𑁄𑀕𑀫𑀦𑁆𑀯𑀸𑀬 𑀅𑀧𑁆𑀧𑀫𑀸𑀤𑀫𑀦𑁆𑀯𑀸𑀬 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑀫𑀦𑁆𑀯𑀸𑀬 𑀢𑀣𑀸𑀭𑀽𑀧𑀁 𑀘𑁂𑀢𑁄𑀲𑀫𑀸𑀥𑀺𑀁 𑀨𑀼𑀲𑀢𑀺, 𑀬𑀣𑀸𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀢𑀢𑁄 𑀧𑀭𑀁 𑀦𑀸𑀦𑀼𑀲𑁆𑀲𑀭𑀢𑀺.

‘‘𑀲𑁄 𑀏𑀯𑀫𑀸𑀳 𑁋 ‘𑀬𑁄 𑀔𑁄 𑀲𑁄 𑀪𑀯𑀁 𑀩𑁆𑀭𑀳𑁆𑀫𑀸 𑀫𑀳𑀸𑀩𑁆𑀭𑀳𑁆𑀫𑀸 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼𑀤𑀲𑁄 𑀯𑀲𑀯𑀢𑁆𑀢𑀻 𑀇𑀲𑁆𑀲𑀭𑁄 𑀓𑀢𑁆𑀢𑀸 𑀦𑀺𑀫𑁆𑀫𑀸𑀢𑀸 𑀲𑁂𑀝𑁆𑀞𑁄 𑀲𑀚𑀺𑀢𑀸 𑀯𑀲𑀻 𑀧𑀺𑀢𑀸 𑀪𑀽𑀢𑀪𑀩𑁆𑀬𑀸𑀦𑀁, 𑀬𑁂𑀦 𑀫𑀬𑀁 𑀪𑁄𑀢𑀸 𑀩𑁆𑀭𑀳𑁆𑀫𑀼𑀦𑀸 𑀦𑀺𑀫𑁆𑀫𑀺𑀢𑀸, 𑀲𑁄 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀢𑀺. 𑀬𑁂 𑀧𑀦 𑀫𑀬𑀁 𑀅𑀳𑀼𑀫𑁆𑀳𑀸 𑀢𑁂𑀦 𑀪𑁄𑀢𑀸 𑀩𑁆𑀭𑀳𑁆𑀫𑀼𑀦𑀸 𑀦𑀺𑀫𑁆𑀫𑀺𑀢𑀸, 𑀢𑁂 𑀫𑀬𑀁 𑀅𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀸 𑀅𑀧𑁆𑀧𑀸𑀬𑀼𑀓𑀸 𑀘𑀯𑀦𑀥𑀫𑁆𑀫𑀸 𑀇𑀢𑁆𑀣𑀢𑁆𑀢𑀁 𑀆𑀕𑀢𑀸’𑀢𑀺. 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀞𑀸𑀦𑀁, 𑀬𑀁 𑀆𑀕𑀫𑁆𑀫 𑀬𑀁 𑀆𑀭𑀩𑁆𑀪 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀅𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀁 𑀲𑀲𑁆𑀲𑀢𑀁 𑀏𑀓𑀘𑁆𑀘𑀁 𑀅𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺.

𑁪𑁫. ‘‘𑀤𑀼𑀢𑀺𑀬𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀅𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀁 𑀲𑀲𑁆𑀲𑀢𑀁 𑀏𑀓𑀘𑁆𑀘𑀁 𑀅𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺? 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸 𑀦𑀸𑀫 𑀤𑁂𑀯𑀸, 𑀢𑁂 𑀅𑀢𑀺𑀯𑁂𑀮𑀁 𑀳𑀲𑁆𑀲𑀔𑀺𑀟𑁆𑀟𑀸𑀭𑀢𑀺𑀥𑀫𑁆𑀫𑀲𑀫𑀸𑀧𑀦𑁆𑀦𑀸 [𑀳𑀲𑀔𑀺𑀟𑁆𑀟𑀸𑀭𑀢𑀺𑀥𑀫𑁆𑀫𑀲𑀫𑀸𑀧𑀦𑁆𑀦𑀸 (𑀓.)] 𑀯𑀺𑀳𑀭𑀦𑁆𑀢𑀺. 𑀢𑁂𑀲𑀁 𑀅𑀢𑀺𑀯𑁂𑀮𑀁 𑀳𑀲𑁆𑀲𑀔𑀺𑀟𑁆𑀟𑀸𑀭𑀢𑀺𑀥𑀫𑁆𑀫𑀲𑀫𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀲𑀢𑀺 𑀲𑀫𑁆𑀫𑀼𑀲𑁆𑀲𑀢𑀺 [𑀧𑀫𑀼𑀲𑁆𑀲𑀢𑀺 (𑀲𑀻. 𑀲𑁆𑀬𑀸.)]. 𑀲𑀢𑀺𑀬𑀸 𑀲𑀫𑁆𑀫𑁄𑀲𑀸 𑀢𑁂 𑀤𑁂𑀯𑀸 𑀢𑀫𑁆𑀳𑀸 𑀓𑀸𑀬𑀸 𑀘𑀯𑀦𑁆𑀢𑀺.

𑁪𑁬. ‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀯𑀺𑀚𑁆𑀚𑀢𑀺 𑀬𑀁 𑀅𑀜𑁆𑀜𑀢𑀭𑁄 𑀲𑀢𑁆𑀢𑁄 𑀢𑀫𑁆𑀳𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀢𑀺. 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺. 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀆𑀢𑀧𑁆𑀧𑀫𑀦𑁆𑀯𑀸𑀬 𑀧𑀥𑀸𑀦𑀫𑀦𑁆𑀯𑀸𑀬 𑀅𑀦𑀼𑀬𑁄𑀕𑀫𑀦𑁆𑀯𑀸𑀬 𑀅𑀧𑁆𑀧𑀫𑀸𑀤𑀫𑀦𑁆𑀯𑀸𑀬 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑀫𑀦𑁆𑀯𑀸𑀬 𑀢𑀣𑀸𑀭𑀽𑀧𑀁 𑀘𑁂𑀢𑁄𑀲𑀫𑀸𑀥𑀺𑀁 𑀨𑀼𑀲𑀢𑀺, 𑀬𑀣𑀸𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀢𑀢𑁄 𑀧𑀭𑀁 𑀦𑀸𑀦𑀼𑀲𑁆𑀲𑀭𑀢𑀺.

‘‘𑀲𑁄 𑀏𑀯𑀫𑀸𑀳 𑁋 ‘𑀬𑁂 𑀔𑁄 𑀢𑁂 𑀪𑁄𑀦𑁆𑀢𑁄 𑀤𑁂𑀯𑀸 𑀦 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸, 𑀢𑁂 𑀦 𑀅𑀢𑀺𑀯𑁂𑀮𑀁 𑀳𑀲𑁆𑀲𑀔𑀺𑀟𑁆𑀟𑀸𑀭𑀢𑀺𑀥𑀫𑁆𑀫𑀲𑀫𑀸𑀧𑀦𑁆𑀦𑀸 𑀯𑀺𑀳𑀭𑀦𑁆𑀢𑀺. 𑀢𑁂𑀲𑀁 𑀦 𑀅𑀢𑀺𑀯𑁂𑀮𑀁 𑀳𑀲𑁆𑀲𑀔𑀺𑀟𑁆𑀟𑀸𑀭𑀢𑀺𑀥𑀫𑁆𑀫𑀲𑀫𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀲𑀢𑀺 𑀦 𑀲𑀫𑁆𑀫𑀼𑀲𑁆𑀲𑀢𑀺. 𑀲𑀢𑀺𑀬𑀸 𑀅𑀲𑀫𑁆𑀫𑁄𑀲𑀸 𑀢𑁂 𑀤𑁂𑀯𑀸 𑀢𑀫𑁆𑀳𑀸 𑀓𑀸𑀬𑀸 𑀦 𑀘𑀯𑀦𑁆𑀢𑀺; 𑀦𑀺𑀘𑁆𑀘𑀸 𑀥𑀼𑀯𑀸 𑀲𑀲𑁆𑀲𑀢𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀦𑁆𑀢𑀺. 𑀬𑁂 𑀧𑀦 𑀫𑀬𑀁 𑀅𑀳𑀼𑀫𑁆𑀳𑀸 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸, 𑀢𑁂 𑀫𑀬𑀁 𑀅𑀢𑀺𑀯𑁂𑀮𑀁 𑀳𑀲𑁆𑀲𑀔𑀺𑀟𑁆𑀟𑀸𑀭𑀢𑀺𑀥𑀫𑁆𑀫𑀲𑀫𑀸𑀧𑀦𑁆𑀦𑀸 𑀯𑀺𑀳𑀭𑀺𑀫𑁆𑀳𑀸. 𑀢𑁂𑀲𑀁 𑀦𑁄 𑀅𑀢𑀺𑀯𑁂𑀮𑀁 𑀳𑀲𑁆𑀲𑀔𑀺𑀟𑁆𑀟𑀸𑀭𑀢𑀺𑀥𑀫𑁆𑀫𑀲𑀫𑀸𑀧𑀦𑁆𑀦𑀸𑀦𑀁 𑀯𑀺𑀳𑀭𑀢𑀁 𑀲𑀢𑀺 𑀲𑀫𑁆𑀫𑀼𑀲𑁆𑀲𑀢𑀺. 𑀲𑀢𑀺𑀬𑀸 𑀲𑀫𑁆𑀫𑁄𑀲𑀸 𑀏𑀯𑀁 𑀫𑀬𑀁 𑀢𑀫𑁆𑀳𑀸 𑀓𑀸𑀬𑀸 𑀘𑀼𑀢𑀸 𑀅𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀸 𑀅𑀧𑁆𑀧𑀸𑀬𑀼𑀓𑀸 𑀘𑀯𑀦𑀥𑀫𑁆𑀫𑀸 𑀇𑀢𑁆𑀣𑀢𑁆𑀢𑀁 𑀆𑀕𑀢𑀸’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀁 𑀞𑀸𑀦𑀁, 𑀬𑀁 𑀆𑀕𑀫𑁆𑀫 𑀬𑀁 𑀆𑀭𑀩𑁆𑀪 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀅𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀁 𑀲𑀲𑁆𑀲𑀢𑀁 𑀏𑀓𑀘𑁆𑀘𑀁 𑀅𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺.

𑁪𑁭. ‘‘𑀢𑀢𑀺𑀬𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀅𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀁 𑀲𑀲𑁆𑀲𑀢𑀁 𑀏𑀓𑀘𑁆𑀘𑀁 𑀅𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺? 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀫𑀦𑁄𑀧𑀤𑁄𑀲𑀺𑀓𑀸 𑀦𑀸𑀫 𑀤𑁂𑀯𑀸, 𑀢𑁂 𑀅𑀢𑀺𑀯𑁂𑀮𑀁 𑀅𑀜𑁆𑀜𑀫𑀜𑁆𑀜𑀁 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀺. 𑀢𑁂 𑀅𑀢𑀺𑀯𑁂𑀮𑀁 𑀅𑀜𑁆𑀜𑀫𑀜𑁆𑀜𑀁 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀫𑁆𑀳𑀺 𑀘𑀺𑀢𑁆𑀢𑀸𑀦𑀺 𑀧𑀤𑀽𑀲𑁂𑀦𑁆𑀢𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀧𑀤𑀼𑀝𑁆𑀞𑀘𑀺𑀢𑁆𑀢𑀸 𑀓𑀺𑀮𑀦𑁆𑀢𑀓𑀸𑀬𑀸 𑀓𑀺𑀮𑀦𑁆𑀢𑀘𑀺𑀢𑁆𑀢𑀸. 𑀢𑁂 𑀤𑁂𑀯𑀸 𑀢𑀫𑁆𑀳𑀸 𑀓𑀸𑀬𑀸 𑀘𑀯𑀦𑁆𑀢𑀺.

𑁪𑁮. ‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀯𑀺𑀚𑁆𑀚𑀢𑀺 𑀬𑀁 𑀅𑀜𑁆𑀜𑀢𑀭𑁄 𑀲𑀢𑁆𑀢𑁄 𑀢𑀫𑁆𑀳𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀢𑀺. 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺. 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀆𑀢𑀧𑁆𑀧𑀫𑀦𑁆𑀯𑀸𑀬 𑀧𑀥𑀸𑀦𑀫𑀦𑁆𑀯𑀸𑀬 𑀅𑀦𑀼𑀬𑁄𑀕𑀫𑀦𑁆𑀯𑀸𑀬 𑀅𑀧𑁆𑀧𑀫𑀸𑀤𑀫𑀦𑁆𑀯𑀸𑀬 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑀫𑀦𑁆𑀯𑀸𑀬 𑀢𑀣𑀸𑀭𑀽𑀧𑀁 𑀘𑁂𑀢𑁄𑀲𑀫𑀸𑀥𑀺𑀁 𑀨𑀼𑀲𑀢𑀺, 𑀬𑀣𑀸𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀢𑀢𑁄 𑀧𑀭𑀁 𑀦𑀸𑀦𑀼𑀲𑁆𑀲𑀭𑀢𑀺.

‘‘𑀲𑁄 𑀏𑀯𑀫𑀸𑀳 𑁋 ‘𑀬𑁂 𑀔𑁄 𑀢𑁂 𑀪𑁄𑀦𑁆𑀢𑁄 𑀤𑁂𑀯𑀸 𑀦 𑀫𑀦𑁄𑀧𑀤𑁄𑀲𑀺𑀓𑀸, 𑀢𑁂 𑀦𑀸𑀢𑀺𑀯𑁂𑀮𑀁 𑀅𑀜𑁆𑀜𑀫𑀜𑁆𑀜𑀁 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀺. 𑀢𑁂 𑀦𑀸𑀢𑀺𑀯𑁂𑀮𑀁 𑀅𑀜𑁆𑀜𑀫𑀜𑁆𑀜𑀁 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀫𑁆𑀳𑀺 𑀘𑀺𑀢𑁆𑀢𑀸𑀦𑀺 𑀦𑀧𑁆𑀧𑀤𑀽𑀲𑁂𑀦𑁆𑀢𑀺. 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀅𑀧𑁆𑀧𑀤𑀼𑀝𑁆𑀞𑀘𑀺𑀢𑁆𑀢𑀸 𑀅𑀓𑀺𑀮𑀦𑁆𑀢𑀓𑀸𑀬𑀸 𑀅𑀓𑀺𑀮𑀦𑁆𑀢𑀘𑀺𑀢𑁆𑀢𑀸. 𑀢𑁂 𑀤𑁂𑀯𑀸 𑀢𑀫𑁆𑀳𑀸 𑀓𑀸𑀬𑀸 𑀦 𑀘𑀯𑀦𑁆𑀢𑀺, 𑀦𑀺𑀘𑁆𑀘𑀸 𑀥𑀼𑀯𑀸 𑀲𑀲𑁆𑀲𑀢𑀸 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀦𑁆𑀢𑀺. 𑀬𑁂 𑀧𑀦 𑀫𑀬𑀁 𑀅𑀳𑀼𑀫𑁆𑀳𑀸 𑀫𑀦𑁄𑀧𑀤𑁄𑀲𑀺𑀓𑀸, 𑀢𑁂 𑀫𑀬𑀁 𑀅𑀢𑀺𑀯𑁂𑀮𑀁 𑀅𑀜𑁆𑀜𑀫𑀜𑁆𑀜𑀁 𑀉𑀧𑀦𑀺𑀚𑁆𑀛𑀸𑀬𑀺𑀫𑁆𑀳𑀸. 𑀢𑁂 𑀫𑀬𑀁 𑀅𑀢𑀺𑀯𑁂𑀮𑀁 𑀅𑀜𑁆𑀜𑀫𑀜𑁆𑀜𑀁 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀫𑁆𑀳𑀺 𑀘𑀺𑀢𑁆𑀢𑀸𑀦𑀺 𑀧𑀤𑀽𑀲𑀺𑀫𑁆𑀳𑀸, 𑀢𑁂 𑀫𑀬𑀁 𑀅𑀜𑁆𑀜𑀫𑀜𑁆𑀜𑀁 𑀧𑀤𑀼𑀝𑁆𑀞𑀘𑀺𑀢𑁆𑀢𑀸 𑀓𑀺𑀮𑀦𑁆𑀢𑀓𑀸𑀬𑀸 𑀓𑀺𑀮𑀦𑁆𑀢𑀘𑀺𑀢𑁆𑀢𑀸. 𑀏𑀯𑀁 𑀫𑀬𑀁 𑀢𑀫𑁆𑀳𑀸 𑀓𑀸𑀬𑀸 𑀘𑀼𑀢𑀸 𑀅𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀸 𑀅𑀧𑁆𑀧𑀸𑀬𑀼𑀓𑀸 𑀘𑀯𑀦𑀥𑀫𑁆𑀫𑀸 𑀇𑀢𑁆𑀣𑀢𑁆𑀢𑀁 𑀆𑀕𑀢𑀸’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑀁 𑀞𑀸𑀦𑀁, 𑀬𑀁 𑀆𑀕𑀫𑁆𑀫 𑀬𑀁 𑀆𑀭𑀩𑁆𑀪 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀅𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀁 𑀲𑀲𑁆𑀲𑀢𑀁 𑀏𑀓𑀘𑁆𑀘𑀁 𑀅𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺.

𑁪𑁯. ‘‘𑀘𑀢𑀼𑀢𑁆𑀣𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀅𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀁 𑀲𑀲𑁆𑀲𑀢𑀁 𑀏𑀓𑀘𑁆𑀘𑀁 𑀅𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀢𑀓𑁆𑀓𑀻 𑀳𑁄𑀢𑀺 𑀯𑀻𑀫𑀁𑀲𑀻. 𑀲𑁄 𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀯𑀻𑀫𑀁𑀲𑀸𑀦𑀼𑀘𑀭𑀺𑀢𑀁 𑀲𑀬𑀁𑀧𑀝𑀺𑀪𑀸𑀦𑀁 𑀏𑀯𑀫𑀸𑀳 𑁋 ‘𑀬𑀁 𑀔𑁄 𑀇𑀤𑀁 𑀯𑀼𑀘𑁆𑀘𑀢𑀺 𑀘𑀓𑁆𑀔𑀼𑀁 𑀇𑀢𑀺𑀧𑀺 𑀲𑁄𑀢𑀁 𑀇𑀢𑀺𑀧𑀺 𑀖𑀸𑀦𑀁 𑀇𑀢𑀺𑀧𑀺 𑀚𑀺𑀯𑁆𑀳𑀸 𑀇𑀢𑀺𑀧𑀺 𑀓𑀸𑀬𑁄 𑀇𑀢𑀺𑀧𑀺, 𑀅𑀬𑀁 𑀅𑀢𑁆𑀢𑀸 𑀅𑀦𑀺𑀘𑁆𑀘𑁄 𑀅𑀤𑁆𑀥𑀼𑀯𑁄 𑀅𑀲𑀲𑁆𑀲𑀢𑁄 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄. 𑀬𑀜𑁆𑀘 𑀔𑁄 𑀇𑀤𑀁 𑀯𑀼𑀘𑁆𑀘𑀢𑀺 𑀘𑀺𑀢𑁆𑀢𑀦𑁆𑀢𑀺 𑀯𑀸 𑀫𑀦𑁄𑀢𑀺 𑀯𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀸 𑀅𑀬𑀁 𑀅𑀢𑁆𑀢𑀸 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀢𑀻’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑀁 𑀞𑀸𑀦𑀁, 𑀬𑀁 𑀆𑀕𑀫𑁆𑀫 𑀬𑀁 𑀆𑀭𑀩𑁆𑀪 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀅𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀁 𑀲𑀲𑁆𑀲𑀢𑀁 𑀏𑀓𑀘𑁆𑀘𑀁 𑀅𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺.

𑁫𑁦. ‘‘𑀇𑀫𑁂𑀳𑀺 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀅𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀁 𑀲𑀲𑁆𑀲𑀢𑀁 𑀏𑀓𑀘𑁆𑀘𑀁 𑀅𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀅𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀁 𑀲𑀲𑁆𑀲𑀢𑀁 𑀏𑀓𑀘𑁆𑀘𑀁 𑀅𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀳𑁂𑀯 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺, 𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭𑁂𑀦; 𑀦𑀢𑁆𑀣𑀺 𑀇𑀢𑁄 𑀩𑀳𑀺𑀤𑁆𑀥𑀸.

𑁫𑁧. ‘‘𑀢𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀺 𑁋 ‘𑀇𑀫𑁂 𑀤𑀺𑀝𑁆𑀞𑀺𑀝𑁆𑀞𑀸𑀦𑀸 𑀏𑀯𑀁𑀕𑀳𑀺𑀢𑀸 𑀏𑀯𑀁𑀧𑀭𑀸𑀫𑀝𑁆𑀞𑀸 𑀏𑀯𑀁𑀕𑀢𑀺𑀓𑀸 𑀪𑀯𑀦𑁆𑀢𑀺 𑀏𑀯𑀁𑀅𑀪𑀺𑀲𑀫𑁆𑀧𑀭𑀸𑀬𑀸’𑀢𑀺. 𑀢𑀜𑁆𑀘 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀺, 𑀢𑀢𑁄 𑀘 𑀉𑀢𑁆𑀢𑀭𑀺𑀢𑀭𑀁 𑀧𑀚𑀸𑀦𑀸𑀢𑀺, 𑀢𑀜𑁆𑀘 𑀧𑀚𑀸𑀦𑀦𑀁 𑀦 𑀧𑀭𑀸𑀫𑀲𑀢𑀺, 𑀅𑀧𑀭𑀸𑀫𑀲𑀢𑁄 𑀘𑀲𑁆𑀲 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀦𑀺𑀩𑁆𑀩𑀼𑀢𑀺 𑀯𑀺𑀤𑀺𑀢𑀸. 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀯𑀺𑀤𑀺𑀢𑁆𑀯𑀸 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄.

𑁫𑁨. ‘‘𑀇𑀫𑁂 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀕𑀫𑁆𑀪𑀻𑀭𑀸 𑀤𑀼𑀤𑁆𑀤𑀲𑀸 𑀤𑀼𑀭𑀦𑀼𑀩𑁄𑀥𑀸 𑀲𑀦𑁆𑀢𑀸 𑀧𑀡𑀻𑀢𑀸 𑀅𑀢𑀓𑁆𑀓𑀸𑀯𑀘𑀭𑀸 𑀦𑀺𑀧𑀼𑀡𑀸 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀸, 𑀬𑁂 𑀢𑀣𑀸𑀕𑀢𑁄 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺, 𑀬𑁂𑀳𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀪𑀼𑀘𑁆𑀘𑀁 𑀯𑀡𑁆𑀡𑀁 𑀲𑀫𑁆𑀫𑀸 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁.

𑀅𑀦𑁆𑀢𑀸𑀦𑀦𑁆𑀢𑀯𑀸𑀤𑁄

𑁫𑁩. ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀦𑁆𑀢𑀸𑀦𑀦𑁆𑀢𑀺𑀓𑀸 𑀅𑀦𑁆𑀢𑀸𑀦𑀦𑁆𑀢𑀁 𑀮𑁄𑀓𑀲𑁆𑀲 𑀧𑀜𑁆𑀜𑀧𑁂𑀦𑁆𑀢𑀺 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺. 𑀢𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀅𑀦𑁆𑀢𑀸𑀦𑀦𑁆𑀢𑀺𑀓𑀸 𑀅𑀦𑁆𑀢𑀸𑀦𑀦𑁆𑀢𑀁 𑀮𑁄𑀓𑀲𑁆𑀲 𑀧𑀜𑁆𑀜𑀧𑁂𑀦𑁆𑀢𑀺 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺?

𑁫𑁪. ‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀆𑀢𑀧𑁆𑀧𑀫𑀦𑁆𑀯𑀸𑀬 𑀧𑀥𑀸𑀦𑀫𑀦𑁆𑀯𑀸𑀬 𑀅𑀦𑀼𑀬𑁄𑀕𑀫𑀦𑁆𑀯𑀸𑀬 𑀅𑀧𑁆𑀧𑀫𑀸𑀤𑀫𑀦𑁆𑀯𑀸𑀬 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑀫𑀦𑁆𑀯𑀸𑀬 𑀢𑀣𑀸𑀭𑀽𑀧𑀁 𑀘𑁂𑀢𑁄𑀲𑀫𑀸𑀥𑀺𑀁 𑀨𑀼𑀲𑀢𑀺, 𑀬𑀣𑀸𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀅𑀦𑁆𑀢𑀲𑀜𑁆𑀜𑀻 𑀮𑁄𑀓𑀲𑁆𑀫𑀺𑀁 𑀯𑀺𑀳𑀭𑀢𑀺.

‘‘𑀲𑁄 𑀏𑀯𑀫𑀸𑀳 𑁋 ‘𑀅𑀦𑁆𑀢𑀯𑀸 𑀅𑀬𑀁 𑀮𑁄𑀓𑁄 𑀧𑀭𑀺𑀯𑀝𑀼𑀫𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀳𑀜𑁆𑀳𑀺 𑀆𑀢𑀧𑁆𑀧𑀫𑀦𑁆𑀯𑀸𑀬 𑀧𑀥𑀸𑀦𑀫𑀦𑁆𑀯𑀸𑀬 𑀅𑀦𑀼𑀬𑁄𑀕𑀫𑀦𑁆𑀯𑀸𑀬 𑀅𑀧𑁆𑀧𑀫𑀸𑀤𑀫𑀦𑁆𑀯𑀸𑀬 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑀫𑀦𑁆𑀯𑀸𑀬 𑀢𑀣𑀸𑀭𑀽𑀧𑀁 𑀘𑁂𑀢𑁄𑀲𑀫𑀸𑀥𑀺𑀁 𑀨𑀼𑀲𑀸𑀫𑀺, 𑀬𑀣𑀸𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀅𑀦𑁆𑀢𑀲𑀜𑁆𑀜𑀻 𑀮𑁄𑀓𑀲𑁆𑀫𑀺𑀁 𑀯𑀺𑀳𑀭𑀸𑀫𑀺. 𑀇𑀫𑀺𑀦𑀸𑀫𑀳𑀁 𑀏𑀢𑀁 𑀚𑀸𑀦𑀸𑀫𑀺 𑁋 𑀬𑀣𑀸 𑀅𑀦𑁆𑀢𑀯𑀸 𑀅𑀬𑀁 𑀮𑁄𑀓𑁄 𑀧𑀭𑀺𑀯𑀝𑀼𑀫𑁄’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀞𑀸𑀦𑀁, 𑀬𑀁 𑀆𑀕𑀫𑁆𑀫 𑀬𑀁 𑀆𑀭𑀩𑁆𑀪 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀦𑁆𑀢𑀸𑀦𑀦𑁆𑀢𑀺𑀓𑀸 𑀅𑀦𑁆𑀢𑀸𑀦𑀦𑁆𑀢𑀁 𑀮𑁄𑀓𑀲𑁆𑀲 𑀧𑀜𑁆𑀜𑀧𑁂𑀦𑁆𑀢𑀺.

𑁫𑁫. ‘‘𑀤𑀼𑀢𑀺𑀬𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀅𑀦𑁆𑀢𑀸𑀦𑀦𑁆𑀢𑀺𑀓𑀸 𑀅𑀦𑁆𑀢𑀸𑀦𑀦𑁆𑀢𑀁 𑀮𑁄𑀓𑀲𑁆𑀲 𑀧𑀜𑁆𑀜𑀧𑁂𑀦𑁆𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀆𑀢𑀧𑁆𑀧𑀫𑀦𑁆𑀯𑀸𑀬 𑀧𑀥𑀸𑀦𑀫𑀦𑁆𑀯𑀸𑀬 𑀅𑀦𑀼𑀬𑁄𑀕𑀫𑀦𑁆𑀯𑀸𑀬 𑀅𑀧𑁆𑀧𑀫𑀸𑀤𑀫𑀦𑁆𑀯𑀸𑀬 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑀫𑀦𑁆𑀯𑀸𑀬 𑀢𑀣𑀸𑀭𑀽𑀧𑀁 𑀘𑁂𑀢𑁄𑀲𑀫𑀸𑀥𑀺𑀁 𑀨𑀼𑀲𑀢𑀺, 𑀬𑀣𑀸𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀅𑀦𑀦𑁆𑀢𑀲𑀜𑁆𑀜𑀻 𑀮𑁄𑀓𑀲𑁆𑀫𑀺𑀁 𑀯𑀺𑀳𑀭𑀢𑀺.

‘‘𑀲𑁄 𑀏𑀯𑀫𑀸𑀳 𑁋 ‘𑀅𑀦𑀦𑁆𑀢𑁄 𑀅𑀬𑀁 𑀮𑁄𑀓𑁄 𑀅𑀧𑀭𑀺𑀬𑀦𑁆𑀢𑁄. 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀦𑁆𑀢𑀯𑀸 𑀅𑀬𑀁 𑀮𑁄𑀓𑁄 𑀧𑀭𑀺𑀯𑀝𑀼𑀫𑁄’’𑀢𑀺, 𑀢𑁂𑀲𑀁 𑀫𑀼𑀲𑀸. 𑀅𑀦𑀦𑁆𑀢𑁄 𑀅𑀬𑀁 𑀮𑁄𑀓𑁄 𑀅𑀧𑀭𑀺𑀬𑀦𑁆𑀢𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀳𑀜𑁆𑀳𑀺 𑀆𑀢𑀧𑁆𑀧𑀫𑀦𑁆𑀯𑀸𑀬 𑀧𑀥𑀸𑀦𑀫𑀦𑁆𑀯𑀸𑀬 𑀅𑀦𑀼𑀬𑁄𑀕𑀫𑀦𑁆𑀯𑀸𑀬 𑀅𑀧𑁆𑀧𑀫𑀸𑀤𑀫𑀦𑁆𑀯𑀸𑀬 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑀫𑀦𑁆𑀯𑀸𑀬 𑀢𑀣𑀸𑀭𑀽𑀧𑀁 𑀘𑁂𑀢𑁄𑀲𑀫𑀸𑀥𑀺𑀁 𑀨𑀼𑀲𑀸𑀫𑀺, 𑀬𑀣𑀸𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀅𑀦𑀦𑁆𑀢𑀲𑀜𑁆𑀜𑀻 𑀮𑁄𑀓𑀲𑁆𑀫𑀺𑀁 𑀯𑀺𑀳𑀭𑀸𑀫𑀺. 𑀇𑀫𑀺𑀦𑀸𑀫𑀳𑀁 𑀏𑀢𑀁 𑀚𑀸𑀦𑀸𑀫𑀺 𑁋 𑀬𑀣𑀸 𑀅𑀦𑀦𑁆𑀢𑁄 𑀅𑀬𑀁 𑀮𑁄𑀓𑁄 𑀅𑀧𑀭𑀺𑀬𑀦𑁆𑀢𑁄’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀁 𑀞𑀸𑀦𑀁, 𑀬𑀁 𑀆𑀕𑀫𑁆𑀫 𑀬𑀁 𑀆𑀭𑀩𑁆𑀪 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀦𑁆𑀢𑀸𑀦𑀦𑁆𑀢𑀺𑀓𑀸 𑀅𑀦𑁆𑀢𑀸𑀦𑀦𑁆𑀢𑀁 𑀮𑁄𑀓𑀲𑁆𑀲 𑀧𑀜𑁆𑀜𑀧𑁂𑀦𑁆𑀢𑀺.

𑁫𑁬. ‘‘𑀢𑀢𑀺𑀬𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀅𑀦𑁆𑀢𑀸𑀦𑀦𑁆𑀢𑀺𑀓𑀸 𑀅𑀦𑁆𑀢𑀸𑀦𑀦𑁆𑀢𑀁 𑀮𑁄𑀓𑀲𑁆𑀲 𑀧𑀜𑁆𑀜𑀧𑁂𑀦𑁆𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀆𑀢𑀧𑁆𑀧𑀫𑀦𑁆𑀯𑀸𑀬 𑀧𑀥𑀸𑀦𑀫𑀦𑁆𑀯𑀸𑀬 𑀅𑀦𑀼𑀬𑁄𑀕𑀫𑀦𑁆𑀯𑀸𑀬 𑀅𑀧𑁆𑀧𑀫𑀸𑀤𑀫𑀦𑁆𑀯𑀸𑀬 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑀫𑀦𑁆𑀯𑀸𑀬 𑀢𑀣𑀸𑀭𑀽𑀧𑀁 𑀘𑁂𑀢𑁄𑀲𑀫𑀸𑀥𑀺𑀁 𑀨𑀼𑀲𑀢𑀺, 𑀬𑀣𑀸𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀉𑀤𑁆𑀥𑀫𑀥𑁄 𑀅𑀦𑁆𑀢𑀲𑀜𑁆𑀜𑀻 𑀮𑁄𑀓𑀲𑁆𑀫𑀺𑀁 𑀯𑀺𑀳𑀭𑀢𑀺, 𑀢𑀺𑀭𑀺𑀬𑀁 𑀅𑀦𑀦𑁆𑀢𑀲𑀜𑁆𑀜𑀻.

‘‘𑀲𑁄 𑀏𑀯𑀫𑀸𑀳 𑁋 ‘𑀅𑀦𑁆𑀢𑀯𑀸 𑀘 𑀅𑀬𑀁 𑀮𑁄𑀓𑁄 𑀅𑀦𑀦𑁆𑀢𑁄 𑀘. 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀦𑁆𑀢𑀯𑀸 𑀅𑀬𑀁 𑀮𑁄𑀓𑁄 𑀧𑀭𑀺𑀯𑀝𑀼𑀫𑁄’’𑀢𑀺, 𑀢𑁂𑀲𑀁 𑀫𑀼𑀲𑀸. 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀦𑀦𑁆𑀢𑁄 𑀅𑀬𑀁 𑀮𑁄𑀓𑁄 𑀅𑀧𑀭𑀺𑀬𑀦𑁆𑀢𑁄’’𑀢𑀺, 𑀢𑁂𑀲𑀫𑁆𑀧𑀺 𑀫𑀼𑀲𑀸. 𑀅𑀦𑁆𑀢𑀯𑀸 𑀘 𑀅𑀬𑀁 𑀮𑁄𑀓𑁄 𑀅𑀦𑀦𑁆𑀢𑁄 𑀘. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀳𑀜𑁆𑀳𑀺 𑀆𑀢𑀧𑁆𑀧𑀫𑀦𑁆𑀯𑀸𑀬 𑀧𑀥𑀸𑀦𑀫𑀦𑁆𑀯𑀸𑀬 𑀅𑀦𑀼𑀬𑁄𑀕𑀫𑀦𑁆𑀯𑀸𑀬 𑀅𑀧𑁆𑀧𑀫𑀸𑀤𑀫𑀦𑁆𑀯𑀸𑀬 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑀫𑀦𑁆𑀯𑀸𑀬 𑀢𑀣𑀸𑀭𑀽𑀧𑀁 𑀘𑁂𑀢𑁄𑀲𑀫𑀸𑀥𑀺𑀁 𑀨𑀼𑀲𑀸𑀫𑀺, 𑀬𑀣𑀸𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀉𑀤𑁆𑀥𑀫𑀥𑁄 𑀅𑀦𑁆𑀢𑀲𑀜𑁆𑀜𑀻 𑀮𑁄𑀓𑀲𑁆𑀫𑀺𑀁 𑀯𑀺𑀳𑀭𑀸𑀫𑀺, 𑀢𑀺𑀭𑀺𑀬𑀁 𑀅𑀦𑀦𑁆𑀢𑀲𑀜𑁆𑀜𑀻. 𑀇𑀫𑀺𑀦𑀸𑀫𑀳𑀁 𑀏𑀢𑀁 𑀚𑀸𑀦𑀸𑀫𑀺 𑁋 𑀬𑀣𑀸 𑀅𑀦𑁆𑀢𑀯𑀸 𑀘 𑀅𑀬𑀁 𑀮𑁄𑀓𑁄 𑀅𑀦𑀦𑁆𑀢𑁄 𑀘𑀸’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑀁 𑀞𑀸𑀦𑀁, 𑀬𑀁 𑀆𑀕𑀫𑁆𑀫 𑀬𑀁 𑀆𑀭𑀩𑁆𑀪 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀦𑁆𑀢𑀸𑀦𑀦𑁆𑀢𑀺𑀓𑀸 𑀅𑀦𑁆𑀢𑀸𑀦𑀦𑁆𑀢𑀁 𑀮𑁄𑀓𑀲𑁆𑀲 𑀧𑀜𑁆𑀜𑀧𑁂𑀦𑁆𑀢𑀺.

𑁫𑁭. ‘‘𑀘𑀢𑀼𑀢𑁆𑀣𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀅𑀦𑁆𑀢𑀸𑀦𑀦𑁆𑀢𑀺𑀓𑀸 𑀅𑀦𑁆𑀢𑀸𑀦𑀦𑁆𑀢𑀁 𑀮𑁄𑀓𑀲𑁆𑀲 𑀧𑀜𑁆𑀜𑀧𑁂𑀦𑁆𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀢𑀓𑁆𑀓𑀻 𑀳𑁄𑀢𑀺 𑀯𑀻𑀫𑀁𑀲𑀻. 𑀲𑁄 𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀯𑀻𑀫𑀁𑀲𑀸𑀦𑀼𑀘𑀭𑀺𑀢𑀁 𑀲𑀬𑀁𑀧𑀝𑀺𑀪𑀸𑀦𑀁 𑀏𑀯𑀫𑀸𑀳 𑁋 ‘𑀦𑁂𑀯𑀸𑀬𑀁 𑀮𑁄𑀓𑁄 𑀅𑀦𑁆𑀢𑀯𑀸, 𑀦 𑀧𑀦𑀸𑀦𑀦𑁆𑀢𑁄. 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀦𑁆𑀢𑀯𑀸 𑀅𑀬𑀁 𑀮𑁄𑀓𑁄 𑀧𑀭𑀺𑀯𑀝𑀼𑀫𑁄’’𑀢𑀺, 𑀢𑁂𑀲𑀁 𑀫𑀼𑀲𑀸. 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀦𑀦𑁆𑀢𑁄 𑀅𑀬𑀁 𑀮𑁄𑀓𑁄 𑀅𑀧𑀭𑀺𑀬𑀦𑁆𑀢𑁄’’𑀢𑀺, 𑀢𑁂𑀲𑀫𑁆𑀧𑀺 𑀫𑀼𑀲𑀸. 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀦𑁆𑀢𑀯𑀸 𑀘 𑀅𑀬𑀁 𑀮𑁄𑀓𑁄 𑀅𑀦𑀦𑁆𑀢𑁄 𑀘𑀸’’𑀢𑀺, 𑀢𑁂𑀲𑀫𑁆𑀧𑀺 𑀫𑀼𑀲𑀸. 𑀦𑁂𑀯𑀸𑀬𑀁 𑀮𑁄𑀓𑁄 𑀅𑀦𑁆𑀢𑀯𑀸, 𑀦 𑀧𑀦𑀸𑀦𑀦𑁆𑀢𑁄’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑀁 𑀞𑀸𑀦𑀁, 𑀬𑀁 𑀆𑀕𑀫𑁆𑀫 𑀬𑀁 𑀆𑀭𑀩𑁆𑀪 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀦𑁆𑀢𑀸𑀦𑀦𑁆𑀢𑀺𑀓𑀸 𑀅𑀦𑁆𑀢𑀸𑀦𑀦𑁆𑀢𑀁 𑀮𑁄𑀓𑀲𑁆𑀲 𑀧𑀜𑁆𑀜𑀧𑁂𑀦𑁆𑀢𑀺.

𑁫𑁮. ‘‘𑀇𑀫𑁂𑀳𑀺 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀦𑁆𑀢𑀸𑀦𑀦𑁆𑀢𑀺𑀓𑀸 𑀅𑀦𑁆𑀢𑀸𑀦𑀦𑁆𑀢𑀁 𑀮𑁄𑀓𑀲𑁆𑀲 𑀧𑀜𑁆𑀜𑀧𑁂𑀦𑁆𑀢𑀺 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀦𑁆𑀢𑀸𑀦𑀦𑁆𑀢𑀺𑀓𑀸 𑀅𑀦𑁆𑀢𑀸𑀦𑀦𑁆𑀢𑀁 𑀮𑁄𑀓𑀲𑁆𑀲 𑀧𑀜𑁆𑀜𑀧𑁂𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀳𑁂𑀯 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺, 𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭𑁂𑀦; 𑀦𑀢𑁆𑀣𑀺 𑀇𑀢𑁄 𑀩𑀳𑀺𑀤𑁆𑀥𑀸.

𑁫𑁯. ‘‘𑀢𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀺 𑁋 ‘𑀇𑀫𑁂 𑀤𑀺𑀝𑁆𑀞𑀺𑀝𑁆𑀞𑀸𑀦𑀸 𑀏𑀯𑀁𑀕𑀳𑀺𑀢𑀸 𑀏𑀯𑀁𑀧𑀭𑀸𑀫𑀝𑁆𑀞𑀸 𑀏𑀯𑀁𑀕𑀢𑀺𑀓𑀸 𑀪𑀯𑀦𑁆𑀢𑀺 𑀏𑀯𑀁𑀅𑀪𑀺𑀲𑀫𑁆𑀧𑀭𑀸𑀬𑀸’𑀢𑀺. 𑀢𑀜𑁆𑀘 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀺, 𑀢𑀢𑁄 𑀘 𑀉𑀢𑁆𑀢𑀭𑀺𑀢𑀭𑀁 𑀧𑀚𑀸𑀦𑀸𑀢𑀺, 𑀢𑀜𑁆𑀘 𑀧𑀚𑀸𑀦𑀦𑀁 𑀦 𑀧𑀭𑀸𑀫𑀲𑀢𑀺, 𑀅𑀧𑀭𑀸𑀫𑀲𑀢𑁄 𑀘𑀲𑁆𑀲 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀦𑀺𑀩𑁆𑀩𑀼𑀢𑀺 𑀯𑀺𑀤𑀺𑀢𑀸. 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀯𑀺𑀤𑀺𑀢𑁆𑀯𑀸 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄.

𑁬𑁦. ‘‘𑀇𑀫𑁂 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀕𑀫𑁆𑀪𑀻𑀭𑀸 𑀤𑀼𑀤𑁆𑀤𑀲𑀸 𑀤𑀼𑀭𑀦𑀼𑀩𑁄𑀥𑀸 𑀲𑀦𑁆𑀢𑀸 𑀧𑀡𑀻𑀢𑀸 𑀅𑀢𑀓𑁆𑀓𑀸𑀯𑀘𑀭𑀸 𑀦𑀺𑀧𑀼𑀡𑀸 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀸, 𑀬𑁂 𑀢𑀣𑀸𑀕𑀢𑁄 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺, 𑀬𑁂𑀳𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀪𑀼𑀘𑁆𑀘𑀁 𑀯𑀡𑁆𑀡𑀁 𑀲𑀫𑁆𑀫𑀸 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁.

𑀅𑀫𑀭𑀸𑀯𑀺𑀓𑁆𑀔𑁂𑀧𑀯𑀸𑀤𑁄

𑁬𑁧. ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸, 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑀸 𑀲𑀫𑀸𑀦𑀸 𑀯𑀸𑀘𑀸𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀦𑁆𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀁 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺. 𑀢𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑀸 𑀲𑀫𑀸𑀦𑀸 𑀯𑀸𑀘𑀸𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀦𑁆𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀁 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺?

𑁬𑁨. ‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 ‘𑀇𑀤𑀁 𑀓𑀼𑀲𑀮’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, ‘𑀇𑀤𑀁 𑀅𑀓𑀼𑀲𑀮’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀔𑁄 ‘‘𑀇𑀤𑀁 𑀓𑀼𑀲𑀮’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀫𑀺, ‘‘𑀇𑀤𑀁 𑀅𑀓𑀼𑀲𑀮’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀫𑀺. 𑀅𑀳𑀜𑁆𑀘𑁂 𑀔𑁄 𑀧𑀦 ‘‘𑀇𑀤𑀁 𑀓𑀼𑀲𑀮’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀅𑀧𑁆𑀧𑀚𑀸𑀦𑀦𑁆𑀢𑁄, ‘‘𑀇𑀤𑀁 𑀅𑀓𑀼𑀲𑀮’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀅𑀧𑁆𑀧𑀚𑀸𑀦𑀦𑁆𑀢𑁄, ‘𑀇𑀤𑀁 𑀓𑀼𑀲𑀮’𑀦𑁆𑀢𑀺 𑀯𑀸 𑀩𑁆𑀬𑀸𑀓𑀭𑁂𑀬𑁆𑀬𑀁, ‘𑀇𑀤𑀁 𑀅𑀓𑀼𑀲𑀮’𑀦𑁆𑀢𑀺 𑀯𑀸 𑀩𑁆𑀬𑀸𑀓𑀭𑁂𑀬𑁆𑀬𑀁, 𑀢𑀁 𑀫𑀫𑀲𑁆𑀲 𑀫𑀼𑀲𑀸. 𑀬𑀁 𑀫𑀫𑀲𑁆𑀲 𑀫𑀼𑀲𑀸, 𑀲𑁄 𑀫𑀫𑀲𑁆𑀲 𑀯𑀺𑀖𑀸𑀢𑁄. 𑀬𑁄 𑀫𑀫𑀲𑁆𑀲 𑀯𑀺𑀖𑀸𑀢𑁄 𑀲𑁄 𑀫𑀫𑀲𑁆𑀲 𑀅𑀦𑁆𑀢𑀭𑀸𑀬𑁄’𑀢𑀺. 𑀇𑀢𑀺 𑀲𑁄 𑀫𑀼𑀲𑀸𑀯𑀸𑀤𑀪𑀬𑀸 𑀫𑀼𑀲𑀸𑀯𑀸𑀤𑀧𑀭𑀺𑀚𑁂𑀕𑀼𑀘𑁆𑀙𑀸 𑀦𑁂𑀯𑀺𑀤𑀁 𑀓𑀼𑀲𑀮𑀦𑁆𑀢𑀺 𑀩𑁆𑀬𑀸𑀓𑀭𑁄𑀢𑀺, 𑀦 𑀧𑀦𑀺𑀤𑀁 𑀅𑀓𑀼𑀲𑀮𑀦𑁆𑀢𑀺 𑀩𑁆𑀬𑀸𑀓𑀭𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀯𑀸𑀘𑀸𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀁 𑁋 ‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄; 𑀢𑀣𑀸𑀢𑀺𑀧𑀺 𑀫𑁂 𑀦𑁄; 𑀅𑀜𑁆𑀜𑀣𑀸𑀢𑀺𑀧𑀺 𑀫𑁂 𑀦𑁄; 𑀦𑁄𑀢𑀺𑀧𑀺 𑀫𑁂 𑀦𑁄; 𑀦𑁄 𑀦𑁄𑀢𑀺𑀧𑀺 𑀫𑁂 𑀦𑁄’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀞𑀸𑀦𑀁, 𑀬𑀁 𑀆𑀕𑀫𑁆𑀫 𑀬𑀁 𑀆𑀭𑀩𑁆𑀪 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑀸 𑀲𑀫𑀸𑀦𑀸 𑀯𑀸𑀘𑀸𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀦𑁆𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀁.

𑁬𑁩. ‘‘𑀤𑀼𑀢𑀺𑀬𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑀸 𑀲𑀫𑀸𑀦𑀸 𑀯𑀸𑀘𑀸𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀦𑁆𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀁? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 ‘𑀇𑀤𑀁 𑀓𑀼𑀲𑀮’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, ‘𑀇𑀤𑀁 𑀅𑀓𑀼𑀲𑀮’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀔𑁄 ‘‘𑀇𑀤𑀁 𑀓𑀼𑀲𑀮’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀫𑀺, ‘‘𑀇𑀤𑀁 𑀅𑀓𑀼𑀲𑀮’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀫𑀺. 𑀅𑀳𑀜𑁆𑀘𑁂 𑀔𑁄 𑀧𑀦 ‘‘𑀇𑀤𑀁 𑀓𑀼𑀲𑀮’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀅𑀧𑁆𑀧𑀚𑀸𑀦𑀦𑁆𑀢𑁄, ‘‘𑀇𑀤𑀁 𑀅𑀓𑀼𑀲𑀮’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀅𑀧𑁆𑀧𑀚𑀸𑀦𑀦𑁆𑀢𑁄, ‘‘𑀇𑀤𑀁 𑀓𑀼𑀲𑀮’’𑀦𑁆𑀢𑀺 𑀯𑀸 𑀩𑁆𑀬𑀸𑀓𑀭𑁂𑀬𑁆𑀬𑀁, ‘‘𑀇𑀤𑀁 𑀅𑀓𑀼𑀲𑀮’𑀦𑁆𑀢𑀺 𑀯𑀸 𑀩𑁆𑀬𑀸𑀓𑀭𑁂𑀬𑁆𑀬𑀁, 𑀢𑀢𑁆𑀣 𑀫𑁂 𑀅𑀲𑁆𑀲 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀤𑁄𑀲𑁄 𑀯𑀸 𑀧𑀝𑀺𑀖𑁄 𑀯𑀸. 𑀬𑀢𑁆𑀣 [𑀬𑁄 (?)] 𑀫𑁂 𑀅𑀲𑁆𑀲 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀤𑁄𑀲𑁄 𑀯𑀸 𑀧𑀝𑀺𑀖𑁄 𑀯𑀸, 𑀢𑀁 𑀫𑀫𑀲𑁆𑀲 𑀉𑀧𑀸𑀤𑀸𑀦𑀁. 𑀬𑀁 𑀫𑀫𑀲𑁆𑀲 𑀉𑀧𑀸𑀤𑀸𑀦𑀁, 𑀲𑁄 𑀫𑀫𑀲𑁆𑀲 𑀯𑀺𑀖𑀸𑀢𑁄. 𑀬𑁄 𑀫𑀫𑀲𑁆𑀲 𑀯𑀺𑀖𑀸𑀢𑁄, 𑀲𑁄 𑀫𑀫𑀲𑁆𑀲 𑀅𑀦𑁆𑀢𑀭𑀸𑀬𑁄’𑀢𑀺. 𑀇𑀢𑀺 𑀲𑁄 𑀉𑀧𑀸𑀤𑀸𑀦𑀪𑀬𑀸 𑀉𑀧𑀸𑀤𑀸𑀦𑀧𑀭𑀺𑀚𑁂𑀕𑀼𑀘𑁆𑀙𑀸 𑀦𑁂𑀯𑀺𑀤𑀁 𑀓𑀼𑀲𑀮𑀦𑁆𑀢𑀺 𑀩𑁆𑀬𑀸𑀓𑀭𑁄𑀢𑀺, 𑀦 𑀧𑀦𑀺𑀤𑀁 𑀅𑀓𑀼𑀲𑀮𑀦𑁆𑀢𑀺 𑀩𑁆𑀬𑀸𑀓𑀭𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀯𑀸𑀘𑀸𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀁 𑁋 ‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄; 𑀢𑀣𑀸𑀢𑀺𑀧𑀺 𑀫𑁂 𑀦𑁄; 𑀅𑀜𑁆𑀜𑀣𑀸𑀢𑀺𑀧𑀺 𑀫𑁂 𑀦𑁄; 𑀦𑁄𑀢𑀺𑀧𑀺 𑀫𑁂 𑀦𑁄; 𑀦𑁄 𑀦𑁄𑀢𑀺𑀧𑀺 𑀫𑁂 𑀦𑁄’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀁 𑀞𑀸𑀦𑀁, 𑀬𑀁 𑀆𑀕𑀫𑁆𑀫 𑀬𑀁 𑀆𑀭𑀩𑁆𑀪 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑀸 𑀲𑀫𑀸𑀦𑀸 𑀯𑀸𑀘𑀸𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀦𑁆𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀁.

𑁬𑁪. ‘‘𑀢𑀢𑀺𑀬𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑀸 𑀲𑀫𑀸𑀦𑀸 𑀯𑀸𑀘𑀸𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀦𑁆𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀁? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 ‘𑀇𑀤𑀁 𑀓𑀼𑀲𑀮’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, ‘𑀇𑀤𑀁 𑀅𑀓𑀼𑀲𑀮’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀔𑁄 ‘‘𑀇𑀤𑀁 𑀓𑀼𑀲𑀮’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀫𑀺, ‘‘𑀇𑀤𑀁 𑀅𑀓𑀼𑀲𑀮’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀫𑀺. 𑀅𑀳𑀜𑁆𑀘𑁂 𑀔𑁄 𑀧𑀦 ‘‘𑀇𑀤𑀁 𑀓𑀼𑀲𑀮’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀅𑀧𑁆𑀧𑀚𑀸𑀦𑀦𑁆𑀢𑁄 ‘‘𑀇𑀤𑀁 𑀅𑀓𑀼𑀲𑀮’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀅𑀧𑁆𑀧𑀚𑀸𑀦𑀦𑁆𑀢𑁄 ‘‘𑀇𑀤𑀁 𑀓𑀼𑀲𑀮’’𑀦𑁆𑀢𑀺 𑀯𑀸 𑀩𑁆𑀬𑀸𑀓𑀭𑁂𑀬𑁆𑀬𑀁, ‘‘𑀇𑀤𑀁 𑀅𑀓𑀼𑀲𑀮’’𑀦𑁆𑀢𑀺 𑀯𑀸 𑀩𑁆𑀬𑀸𑀓𑀭𑁂𑀬𑁆𑀬𑀁. 𑀲𑀦𑁆𑀢𑀺 𑀳𑀺 𑀔𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀡𑁆𑀟𑀺𑀢𑀸 𑀦𑀺𑀧𑀼𑀡𑀸 𑀓𑀢𑀧𑀭𑀧𑁆𑀧𑀯𑀸𑀤𑀸 𑀯𑀸𑀮𑀯𑁂𑀥𑀺𑀭𑀽𑀧𑀸, 𑀢𑁂 𑀪𑀺𑀦𑁆𑀤𑀦𑁆𑀢𑀸 [𑀯𑁄𑀪𑀺𑀦𑁆𑀤𑀦𑁆𑀢𑀸 (𑀲𑀻. 𑀧𑀻.)] 𑀫𑀜𑁆𑀜𑁂 𑀘𑀭𑀦𑁆𑀢𑀺 𑀧𑀜𑁆𑀜𑀸𑀕𑀢𑁂𑀦 𑀤𑀺𑀝𑁆𑀞𑀺𑀕𑀢𑀸𑀦𑀺, 𑀢𑁂 𑀫𑀁 𑀢𑀢𑁆𑀣 𑀲𑀫𑀦𑀼𑀬𑀼𑀜𑁆𑀚𑁂𑀬𑁆𑀬𑀼𑀁 𑀲𑀫𑀦𑀼𑀕𑀸𑀳𑁂𑀬𑁆𑀬𑀼𑀁 𑀲𑀫𑀦𑀼𑀪𑀸𑀲𑁂𑀬𑁆𑀬𑀼𑀁. 𑀬𑁂 𑀫𑀁 𑀢𑀢𑁆𑀣 𑀲𑀫𑀦𑀼𑀬𑀼𑀜𑁆𑀚𑁂𑀬𑁆𑀬𑀼𑀁 𑀲𑀫𑀦𑀼𑀕𑀸𑀳𑁂𑀬𑁆𑀬𑀼𑀁 𑀲𑀫𑀦𑀼𑀪𑀸𑀲𑁂𑀬𑁆𑀬𑀼𑀁, 𑀢𑁂𑀲𑀸𑀳𑀁 𑀦 𑀲𑀫𑁆𑀧𑀸𑀬𑁂𑀬𑁆𑀬𑀁. 𑀬𑁂𑀲𑀸𑀳𑀁 𑀦 𑀲𑀫𑁆𑀧𑀸𑀬𑁂𑀬𑁆𑀬𑀁, 𑀲𑁄 𑀫𑀫𑀲𑁆𑀲 𑀯𑀺𑀖𑀸𑀢𑁄. 𑀬𑁄 𑀫𑀫𑀲𑁆𑀲 𑀯𑀺𑀖𑀸𑀢𑁄, 𑀲𑁄 𑀫𑀫𑀲𑁆𑀲 𑀅𑀦𑁆𑀢𑀭𑀸𑀬𑁄’𑀢𑀺. 𑀇𑀢𑀺 𑀲𑁄 𑀅𑀦𑀼𑀬𑁄𑀕𑀪𑀬𑀸 𑀅𑀦𑀼𑀬𑁄𑀕𑀧𑀭𑀺𑀚𑁂𑀕𑀼𑀘𑁆𑀙𑀸 𑀦𑁂𑀯𑀺𑀤𑀁 𑀓𑀼𑀲𑀮𑀦𑁆𑀢𑀺 𑀩𑁆𑀬𑀸𑀓𑀭𑁄𑀢𑀺, 𑀦 𑀧𑀦𑀺𑀤𑀁 𑀅𑀓𑀼𑀲𑀮𑀦𑁆𑀢𑀺 𑀩𑁆𑀬𑀸𑀓𑀭𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀯𑀸𑀘𑀸𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀁 𑁋 ‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄; 𑀢𑀣𑀸𑀢𑀺𑀧𑀺 𑀫𑁂 𑀦𑁄; 𑀅𑀜𑁆𑀜𑀣𑀸𑀢𑀺𑀧𑀺 𑀫𑁂 𑀦𑁄; 𑀦𑁄𑀢𑀺𑀧𑀺 𑀫𑁂 𑀦𑁄; 𑀦𑁄 𑀦𑁄𑀢𑀺𑀧𑀺 𑀫𑁂 𑀦𑁄’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑀁 𑀞𑀸𑀦𑀁, 𑀬𑀁 𑀆𑀕𑀫𑁆𑀫 𑀬𑀁 𑀆𑀭𑀩𑁆𑀪 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑀸 𑀲𑀫𑀸𑀦𑀸 𑀯𑀸𑀘𑀸𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀦𑁆𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀁.

𑁬𑁫. ‘‘𑀘𑀢𑀼𑀢𑁆𑀣𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑀸 𑀲𑀫𑀸𑀦𑀸 𑀯𑀸𑀘𑀸𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀦𑁆𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀁? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀫𑀦𑁆𑀤𑁄 𑀳𑁄𑀢𑀺 𑀫𑁄𑀫𑀽𑀳𑁄. 𑀲𑁄 𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀯𑀸𑀘𑀸𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀁 𑁋 ‘𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄’𑀢𑀺 𑀇𑀢𑀺 𑀘𑁂 𑀫𑀁 𑀧𑀼𑀘𑁆𑀙𑀲𑀺, ‘𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄’𑀢𑀺 𑀇𑀢𑀺 𑀘𑁂 𑀫𑁂 𑀅𑀲𑁆𑀲, ‘𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄’𑀢𑀺 𑀇𑀢𑀺 𑀢𑁂 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀁, ‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄, 𑀢𑀣𑀸𑀢𑀺𑀧𑀺 𑀫𑁂 𑀦𑁄, 𑀅𑀜𑁆𑀜𑀣𑀸𑀢𑀺𑀧𑀺 𑀫𑁂 𑀦𑁄, 𑀦𑁄𑀢𑀺𑀧𑀺 𑀫𑁂 𑀦𑁄, 𑀦𑁄 𑀦𑁄𑀢𑀺𑀧𑀺 𑀫𑁂 𑀦𑁄’𑀢𑀺. ‘𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄…𑀧𑁂… ‘𑀅𑀢𑁆𑀣𑀺 𑀘 𑀦𑀢𑁆𑀣𑀺 𑀘 𑀧𑀭𑁄 𑀮𑁄𑀓𑁄…𑀧𑁂… ‘𑀦𑁂𑀯𑀢𑁆𑀣𑀺 𑀦 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄…𑀧𑁂… ‘𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸 …𑀧𑁂… ‘𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸…𑀧𑁂… ‘𑀅𑀢𑁆𑀣𑀺 𑀘 𑀦𑀢𑁆𑀣𑀺 𑀘 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸…𑀧𑁂… ‘𑀦𑁂𑀯𑀢𑁆𑀣𑀺 𑀦 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸…𑀧𑁂… ‘𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 [𑀲𑀼𑀓𑀝𑀤𑀼𑀓𑁆𑀓𑀝𑀸𑀦𑀁 (𑀲𑀻. 𑀲𑁆𑀬𑀸. 𑀓𑀁.)] 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄…𑀧𑁂… ‘𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄…𑀧𑁂… ‘𑀅𑀢𑁆𑀣𑀺 𑀘 𑀦𑀢𑁆𑀣𑀺 𑀘 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄…𑀧𑁂… ‘𑀦𑁂𑀯𑀢𑁆𑀣𑀺 𑀦 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄…𑀧𑁂… ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸…𑀧𑁂… ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸…𑀧𑁂… ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 [𑀦 𑀳𑁄𑀢𑀺 𑀘 (𑀲𑀻. 𑀓.)] 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀇𑀢𑀺 𑀘𑁂 𑀫𑀁 𑀧𑀼𑀘𑁆𑀙𑀲𑀺, ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀇𑀢𑀺 𑀘𑁂 𑀫𑁂 𑀅𑀲𑁆𑀲, ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀇𑀢𑀺 𑀢𑁂 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀁, ‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄, 𑀢𑀣𑀸𑀢𑀺𑀧𑀺 𑀫𑁂 𑀦𑁄, 𑀅𑀜𑁆𑀜𑀣𑀸𑀢𑀺𑀧𑀺 𑀫𑁂 𑀦𑁄, 𑀦𑁄𑀢𑀺𑀧𑀺 𑀫𑁂 𑀦𑁄, 𑀦𑁄 𑀦𑁄𑀢𑀺𑀧𑀺 𑀫𑁂 𑀦𑁄’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑀁 𑀞𑀸𑀦𑀁, 𑀬𑀁 𑀆𑀕𑀫𑁆𑀫 𑀬𑀁 𑀆𑀭𑀩𑁆𑀪 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑀸 𑀲𑀫𑀸𑀦𑀸 𑀯𑀸𑀘𑀸𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀦𑁆𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀁.

𑁬𑁬. ‘‘𑀇𑀫𑁂𑀳𑀺 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑀸 𑀲𑀫𑀸𑀦𑀸 𑀯𑀸𑀘𑀸𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀦𑁆𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀁 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑀸 𑀲𑀫𑀸𑀦𑀸 𑀯𑀸𑀘𑀸𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀦𑁆𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀁, 𑀲𑀩𑁆𑀩𑁂 𑀢𑁂 𑀇𑀫𑁂𑀳𑁂𑀯 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺, 𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭𑁂𑀦, 𑀦𑀢𑁆𑀣𑀺 𑀇𑀢𑁄 𑀩𑀳𑀺𑀤𑁆𑀥𑀸…𑀧𑁂… 𑀬𑁂𑀳𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀪𑀼𑀘𑁆𑀘𑀁 𑀯𑀡𑁆𑀡𑀁 𑀲𑀫𑁆𑀫𑀸 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁.

𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀯𑀸𑀤𑁄

𑁬𑁭. ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺 𑀤𑁆𑀯𑀻𑀳𑀺 𑀯𑀢𑁆𑀣𑀽𑀳𑀺. 𑀢𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺 𑀤𑁆𑀯𑀻𑀳𑀺 𑀯𑀢𑁆𑀣𑀽𑀳𑀺?

𑁬𑁮. ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑀜𑁆𑀜𑀲𑀢𑁆𑀢𑀸 𑀦𑀸𑀫 𑀤𑁂𑀯𑀸. 𑀲𑀜𑁆𑀜𑀼𑀧𑁆𑀧𑀸𑀤𑀸 𑀘 𑀧𑀦 𑀢𑁂 𑀤𑁂𑀯𑀸 𑀢𑀫𑁆𑀳𑀸 𑀓𑀸𑀬𑀸 𑀘𑀯𑀦𑁆𑀢𑀺. 𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀯𑀺𑀚𑁆𑀚𑀢𑀺, 𑀬𑀁 𑀅𑀜𑁆𑀜𑀢𑀭𑁄 𑀲𑀢𑁆𑀢𑁄 𑀢𑀫𑁆𑀳𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀢𑀺. 𑀇𑀢𑁆𑀣𑀢𑁆𑀢𑀁 𑀆𑀕𑀢𑁄 𑀲𑀫𑀸𑀦𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺. 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀆𑀢𑀧𑁆𑀧𑀫𑀦𑁆𑀯𑀸𑀬 𑀧𑀥𑀸𑀦𑀫𑀦𑁆𑀯𑀸𑀬 𑀅𑀦𑀼𑀬𑁄𑀕𑀫𑀦𑁆𑀯𑀸𑀬 𑀅𑀧𑁆𑀧𑀫𑀸𑀤𑀫𑀦𑁆𑀯𑀸𑀬 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑀫𑀦𑁆𑀯𑀸𑀬 𑀢𑀣𑀸𑀭𑀽𑀧𑀁 𑀘𑁂𑀢𑁄𑀲𑀫𑀸𑀥𑀺𑀁 𑀨𑀼𑀲𑀢𑀺, 𑀬𑀣𑀸𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀲𑀜𑁆𑀜𑀼𑀧𑁆𑀧𑀸𑀤𑀁 𑀅𑀦𑀼𑀲𑁆𑀲𑀭𑀢𑀺, 𑀢𑀢𑁄 𑀧𑀭𑀁 𑀦𑀸𑀦𑀼𑀲𑁆𑀲𑀭𑀢𑀺. 𑀲𑁄 𑀏𑀯𑀫𑀸𑀳 𑁋 ‘𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀳𑀜𑁆𑀳𑀺 𑀧𑀼𑀩𑁆𑀩𑁂 𑀦𑀸𑀳𑁄𑀲𑀺𑀁, 𑀲𑁄𑀫𑁆𑀳𑀺 𑀏𑀢𑀭𑀳𑀺 𑀅𑀳𑀼𑀢𑁆𑀯𑀸 𑀲𑀦𑁆𑀢𑀢𑀸𑀬 𑀧𑀭𑀺𑀡𑀢𑁄’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀞𑀸𑀦𑀁, 𑀬𑀁 𑀆𑀕𑀫𑁆𑀫 𑀬𑀁 𑀆𑀭𑀩𑁆𑀪 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺.

𑁬𑁯. ‘‘𑀤𑀼𑀢𑀺𑀬𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀢𑀓𑁆𑀓𑀻 𑀳𑁄𑀢𑀺 𑀯𑀻𑀫𑀁𑀲𑀻. 𑀲𑁄 𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀯𑀻𑀫𑀁𑀲𑀸𑀦𑀼𑀘𑀭𑀺𑀢𑀁 𑀲𑀬𑀁𑀧𑀝𑀺𑀪𑀸𑀦𑀁 𑀏𑀯𑀫𑀸𑀳 𑁋 ‘𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀁 𑀞𑀸𑀦𑀁, 𑀬𑀁 𑀆𑀕𑀫𑁆𑀫 𑀬𑀁 𑀆𑀭𑀩𑁆𑀪 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺.

𑁭𑁦. ‘‘𑀇𑀫𑁂𑀳𑀺 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺 𑀤𑁆𑀯𑀻𑀳𑀺 𑀯𑀢𑁆𑀣𑀽𑀳𑀺. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀳𑁂𑀯 𑀤𑁆𑀯𑀻𑀳𑀺 𑀯𑀢𑁆𑀣𑀽𑀳𑀺, 𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭𑁂𑀦, 𑀦𑀢𑁆𑀣𑀺 𑀇𑀢𑁄 𑀩𑀳𑀺𑀤𑁆𑀥𑀸…𑀧𑁂… 𑀬𑁂𑀳𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀪𑀼𑀘𑁆𑀘𑀁 𑀯𑀡𑁆𑀡𑀁 𑀲𑀫𑁆𑀫𑀸 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁.

𑁭𑁧. ‘‘𑀇𑀫𑁂𑀳𑀺 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄 𑀧𑀼𑀩𑁆𑀩𑀦𑁆𑀢𑀁 𑀆𑀭𑀩𑁆𑀪 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄 𑀧𑀼𑀩𑁆𑀩𑀦𑁆𑀢𑀫𑀸𑀭𑀩𑁆𑀪 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀳𑁂𑀯 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺, 𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭𑁂𑀦, 𑀦𑀢𑁆𑀣𑀺 𑀇𑀢𑁄 𑀩𑀳𑀺𑀤𑁆𑀥𑀸.

𑁭𑁨. ‘‘𑀢𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀺 𑁋 ‘𑀇𑀫𑁂 𑀤𑀺𑀝𑁆𑀞𑀺𑀝𑁆𑀞𑀸𑀦𑀸 𑀏𑀯𑀁𑀕𑀳𑀺𑀢𑀸 𑀏𑀯𑀁𑀧𑀭𑀸𑀫𑀝𑁆𑀞𑀸 𑀏𑀯𑀁𑀕𑀢𑀺𑀓𑀸 𑀪𑀯𑀦𑁆𑀢𑀺 𑀏𑀯𑀁𑀅𑀪𑀺𑀲𑀫𑁆𑀧𑀭𑀸𑀬𑀸’𑀢𑀺. 𑀢𑀜𑁆𑀘 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀺, 𑀢𑀢𑁄 𑀘 𑀉𑀢𑁆𑀢𑀭𑀺𑀢𑀭𑀁 𑀧𑀚𑀸𑀦𑀸𑀢𑀺, 𑀢𑀜𑁆𑀘 𑀧𑀚𑀸𑀦𑀦𑀁 𑀦 𑀧𑀭𑀸𑀫𑀲𑀢𑀺, 𑀅𑀧𑀭𑀸𑀫𑀲𑀢𑁄 𑀘𑀲𑁆𑀲 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀦𑀺𑀩𑁆𑀩𑀼𑀢𑀺 𑀯𑀺𑀤𑀺𑀢𑀸. 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀯𑀺𑀤𑀺𑀢𑁆𑀯𑀸 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄.

𑁭𑁩. ‘‘𑀇𑀫𑁂 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀕𑀫𑁆𑀪𑀻𑀭𑀸 𑀤𑀼𑀤𑁆𑀤𑀲𑀸 𑀤𑀼𑀭𑀦𑀼𑀩𑁄𑀥𑀸 𑀲𑀦𑁆𑀢𑀸 𑀧𑀡𑀻𑀢𑀸 𑀅𑀢𑀓𑁆𑀓𑀸𑀯𑀘𑀭𑀸 𑀦𑀺𑀧𑀼𑀡𑀸 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀸, 𑀬𑁂 𑀢𑀣𑀸𑀕𑀢𑁄 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺, 𑀬𑁂𑀳𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀪𑀼𑀘𑁆𑀘𑀁 𑀯𑀡𑁆𑀡𑀁 𑀲𑀫𑁆𑀫𑀸 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁.

𑀤𑀼𑀢𑀺𑀬𑀪𑀸𑀡𑀯𑀸𑀭𑁄.

𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀸

𑁭𑁪. ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄, 𑀅𑀧𑀭𑀦𑁆𑀢𑀁 𑀆𑀭𑀩𑁆𑀪 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺 𑀘𑀢𑀼𑀘𑀢𑁆𑀢𑀸𑀭𑀻𑀲𑀸𑀬 [𑀘𑀢𑀼𑀘𑀢𑁆𑀢𑀸𑀮𑀻𑀲𑀸𑀬 (𑀲𑁆𑀬𑀸. 𑀓𑀁.)] 𑀯𑀢𑁆𑀣𑀽𑀳𑀺. 𑀢𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄 𑀅𑀧𑀭𑀦𑁆𑀢𑀁 𑀆𑀭𑀩𑁆𑀪 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺 𑀘𑀢𑀼𑀘𑀢𑁆𑀢𑀸𑀭𑀻𑀲𑀸𑀬 𑀯𑀢𑁆𑀣𑀽𑀳𑀺?

𑀲𑀜𑁆𑀜𑀻𑀯𑀸𑀤𑁄

𑁭𑁫. ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀲𑀜𑁆𑀜𑀻𑀯𑀸𑀤𑀸 𑀉𑀤𑁆𑀥𑀫𑀸𑀖𑀸𑀢𑀦𑀁 𑀲𑀜𑁆𑀜𑀺𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀲𑁄𑀴𑀲𑀳𑀺 𑀯𑀢𑁆𑀣𑀽𑀳𑀺. 𑀢𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀲𑀜𑁆𑀜𑀻𑀯𑀸𑀤𑀸 𑀉𑀤𑁆𑀥𑀫𑀸𑀖𑀸𑀢𑀦𑀁 𑀲𑀜𑁆𑀜𑀺𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀲𑁄𑀴𑀲𑀳𑀺 𑀯𑀢𑁆𑀣𑀽𑀳𑀺?

𑁭𑁬. ‘‘‘𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸 𑀲𑀜𑁆𑀜𑀻’𑀢𑀺 𑀦𑀁 𑀧𑀜𑁆𑀜𑀧𑁂𑀦𑁆𑀢𑀺. ‘𑀅𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸 𑀲𑀜𑁆𑀜𑀻’𑀢𑀺 𑀦𑀁 𑀧𑀜𑁆𑀜𑀧𑁂𑀦𑁆𑀢𑀺. ‘𑀭𑀽𑀧𑀻 𑀘 𑀅𑀭𑀽𑀧𑀻 𑀘 𑀅𑀢𑁆𑀢𑀸 𑀳𑁄𑀢𑀺…𑀧𑁂… 𑀦𑁂𑀯𑀭𑀽𑀧𑀻 𑀦𑀸𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀺… 𑀅𑀦𑁆𑀢𑀯𑀸 𑀅𑀢𑁆𑀢𑀸 𑀳𑁄𑀢𑀺… 𑀅𑀦𑀦𑁆𑀢𑀯𑀸 𑀅𑀢𑁆𑀢𑀸 𑀳𑁄𑀢𑀺… 𑀅𑀦𑁆𑀢𑀯𑀸 𑀘 𑀅𑀦𑀦𑁆𑀢𑀯𑀸 𑀘 𑀅𑀢𑁆𑀢𑀸 𑀳𑁄𑀢𑀺… 𑀦𑁂𑀯𑀦𑁆𑀢𑀯𑀸 𑀦𑀸𑀦𑀦𑁆𑀢𑀯𑀸 𑀅𑀢𑁆𑀢𑀸 𑀳𑁄𑀢𑀺… 𑀏𑀓𑀢𑁆𑀢𑀲𑀜𑁆𑀜𑀻 𑀅𑀢𑁆𑀢𑀸 𑀳𑁄𑀢𑀺… 𑀦𑀸𑀦𑀢𑁆𑀢𑀲𑀜𑁆𑀜𑀻 𑀅𑀢𑁆𑀢𑀸 𑀳𑁄𑀢𑀺… 𑀧𑀭𑀺𑀢𑁆𑀢𑀲𑀜𑁆𑀜𑀻 𑀅𑀢𑁆𑀢𑀸 𑀳𑁄𑀢𑀺… 𑀅𑀧𑁆𑀧𑀫𑀸𑀡𑀲𑀜𑁆𑀜𑀻 𑀅𑀢𑁆𑀢𑀸 𑀳𑁄𑀢𑀺… 𑀏𑀓𑀦𑁆𑀢𑀲𑀼𑀔𑀻 𑀅𑀢𑁆𑀢𑀸 𑀳𑁄𑀢𑀺… 𑀏𑀓𑀦𑁆𑀢𑀤𑀼𑀓𑁆𑀔𑀻 𑀅𑀢𑁆𑀢𑀸 𑀳𑁄𑀢𑀺. 𑀲𑀼𑀔𑀤𑀼𑀓𑁆𑀔𑀻 𑀅𑀢𑁆𑀢𑀸 𑀳𑁄𑀢𑀺. 𑀅𑀤𑀼𑀓𑁆𑀔𑀫𑀲𑀼𑀔𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸 𑀲𑀜𑁆𑀜𑀻’𑀢𑀺 𑀦𑀁 𑀧𑀜𑁆𑀜𑀧𑁂𑀦𑁆𑀢𑀺.

𑁭𑁭. ‘‘𑀇𑀫𑁂𑀳𑀺 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀲𑀜𑁆𑀜𑀻𑀯𑀸𑀤𑀸 𑀉𑀤𑁆𑀥𑀫𑀸𑀖𑀸𑀢𑀦𑀁 𑀲𑀜𑁆𑀜𑀺𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀲𑁄𑀴𑀲𑀳𑀺 𑀯𑀢𑁆𑀣𑀽𑀳𑀺. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀲𑀜𑁆𑀜𑀻𑀯𑀸𑀤𑀸 𑀉𑀤𑁆𑀥𑀫𑀸𑀖𑀸𑀢𑀦𑀁 𑀲𑀜𑁆𑀜𑀺𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀳𑁂𑀯 𑀲𑁄𑀴𑀲𑀳𑀺 𑀯𑀢𑁆𑀣𑀽𑀳𑀺, 𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭𑁂𑀦, 𑀦𑀢𑁆𑀣𑀺 𑀇𑀢𑁄 𑀩𑀳𑀺𑀤𑁆𑀥𑀸…𑀧𑁂… 𑀬𑁂𑀳𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀪𑀼𑀘𑁆𑀘𑀁 𑀯𑀡𑁆𑀡𑀁 𑀲𑀫𑁆𑀫𑀸 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁.

𑀅𑀲𑀜𑁆𑀜𑀻𑀯𑀸𑀤𑁄

𑁭𑁮. ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀅𑀲𑀜𑁆𑀜𑀻𑀯𑀸𑀤𑀸 𑀉𑀤𑁆𑀥𑀫𑀸𑀖𑀸𑀢𑀦𑀁 𑀅𑀲𑀜𑁆𑀜𑀺𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀅𑀝𑁆𑀞𑀳𑀺 𑀯𑀢𑁆𑀣𑀽𑀳𑀺. 𑀢𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀅𑀲𑀜𑁆𑀜𑀻𑀯𑀸𑀤𑀸 𑀉𑀤𑁆𑀥𑀫𑀸𑀖𑀸𑀢𑀦𑀁 𑀅𑀲𑀜𑁆𑀜𑀺𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀅𑀝𑁆𑀞𑀳𑀺 𑀯𑀢𑁆𑀣𑀽𑀳𑀺?

𑁭𑁯. ‘‘‘𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸 𑀅𑀲𑀜𑁆𑀜𑀻’𑀢𑀺 𑀦𑀁 𑀧𑀜𑁆𑀜𑀧𑁂𑀦𑁆𑀢𑀺. ‘𑀅𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸 𑀅𑀲𑀜𑁆𑀜𑀻’𑀢𑀺 𑀦𑀁 𑀧𑀜𑁆𑀜𑀧𑁂𑀦𑁆𑀢𑀺. ‘𑀭𑀽𑀧𑀻 𑀘 𑀅𑀭𑀽𑀧𑀻 𑀘 𑀅𑀢𑁆𑀢𑀸 𑀳𑁄𑀢𑀺…𑀧𑁂… 𑀦𑁂𑀯𑀭𑀽𑀧𑀻 𑀦𑀸𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀺… 𑀅𑀦𑁆𑀢𑀯𑀸 𑀅𑀢𑁆𑀢𑀸 𑀳𑁄𑀢𑀺… 𑀅𑀦𑀦𑁆𑀢𑀯𑀸 𑀅𑀢𑁆𑀢𑀸 𑀳𑁄𑀢𑀺… 𑀅𑀦𑁆𑀢𑀯𑀸 𑀘 𑀅𑀦𑀦𑁆𑀢𑀯𑀸 𑀘 𑀅𑀢𑁆𑀢𑀸 𑀳𑁄𑀢𑀺… 𑀦𑁂𑀯𑀦𑁆𑀢𑀯𑀸 𑀦𑀸𑀦𑀦𑁆𑀢𑀯𑀸 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸 𑀅𑀲𑀜𑁆𑀜𑀻’𑀢𑀺 𑀦𑀁 𑀧𑀜𑁆𑀜𑀧𑁂𑀦𑁆𑀢𑀺.

𑁮𑁦. ‘‘𑀇𑀫𑁂𑀳𑀺 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀅𑀲𑀜𑁆𑀜𑀻𑀯𑀸𑀤𑀸 𑀉𑀤𑁆𑀥𑀫𑀸𑀖𑀸𑀢𑀦𑀁 𑀅𑀲𑀜𑁆𑀜𑀺𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀅𑀝𑁆𑀞𑀳𑀺 𑀯𑀢𑁆𑀣𑀽𑀳𑀺. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀅𑀲𑀜𑁆𑀜𑀻𑀯𑀸𑀤𑀸 𑀉𑀤𑁆𑀥𑀫𑀸𑀖𑀸𑀢𑀦𑀁 𑀅𑀲𑀜𑁆𑀜𑀺𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀳𑁂𑀯 𑀅𑀝𑁆𑀞𑀳𑀺 𑀯𑀢𑁆𑀣𑀽𑀳𑀺, 𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭𑁂𑀦, 𑀦𑀢𑁆𑀣𑀺 𑀇𑀢𑁄 𑀩𑀳𑀺𑀤𑁆𑀥𑀸…𑀧𑁂… 𑀬𑁂𑀳𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀪𑀼𑀘𑁆𑀘𑀁 𑀯𑀡𑁆𑀡𑀁 𑀲𑀫𑁆𑀫𑀸 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁.

𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑁄

𑁮𑁧. ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸, 𑀉𑀤𑁆𑀥𑀫𑀸𑀖𑀸𑀢𑀦𑀁 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀺𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀅𑀝𑁆𑀞𑀳𑀺 𑀯𑀢𑁆𑀣𑀽𑀳𑀺. 𑀢𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸 𑀉𑀤𑁆𑀥𑀫𑀸𑀖𑀸𑀢𑀦𑀁 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀺𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀅𑀝𑁆𑀞𑀳𑀺 𑀯𑀢𑁆𑀣𑀽𑀳𑀺?

𑁮𑁨. ‘‘‘𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻’𑀢𑀺 𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 ‘𑀅𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀺…𑀧𑁂… 𑀭𑀽𑀧𑀻 𑀘 𑀅𑀭𑀽𑀧𑀻 𑀘 𑀅𑀢𑁆𑀢𑀸 𑀳𑁄𑀢𑀺… 𑀦𑁂𑀯𑀭𑀽𑀧𑀻 𑀦𑀸𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀺… 𑀅𑀦𑁆𑀢𑀯𑀸 𑀅𑀢𑁆𑀢𑀸 𑀳𑁄𑀢𑀺… 𑀅𑀦𑀦𑁆𑀢𑀯𑀸 𑀅𑀢𑁆𑀢𑀸 𑀳𑁄𑀢𑀺… 𑀅𑀦𑁆𑀢𑀯𑀸 𑀘 𑀅𑀦𑀦𑁆𑀢𑀯𑀸 𑀘 𑀅𑀢𑁆𑀢𑀸 𑀳𑁄𑀢𑀺… 𑀦𑁂𑀯𑀦𑁆𑀢𑀯𑀸 𑀦𑀸𑀦𑀦𑁆𑀢𑀯𑀸 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻’𑀢𑀺 𑀦𑀁 𑀧𑀜𑁆𑀜𑀧𑁂𑀦𑁆𑀢𑀺.

𑁮𑁩. ‘‘𑀇𑀫𑁂𑀳𑀺 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸 𑀉𑀤𑁆𑀥𑀫𑀸𑀖𑀸𑀢𑀦𑀁 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀺𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀅𑀝𑁆𑀞𑀳𑀺 𑀯𑀢𑁆𑀣𑀽𑀳𑀺. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸 𑀉𑀤𑁆𑀥𑀫𑀸𑀖𑀸𑀢𑀦𑀁 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀺𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀳𑁂𑀯 𑀅𑀝𑁆𑀞𑀳𑀺 𑀯𑀢𑁆𑀣𑀽𑀳𑀺…𑀧𑁂… 𑀬𑁂𑀳𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀪𑀼𑀘𑁆𑀘𑀁 𑀯𑀡𑁆𑀡𑀁 𑀲𑀫𑁆𑀫𑀸 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁.

𑀉𑀘𑁆𑀙𑁂𑀤𑀯𑀸𑀤𑁄

𑁮𑁪. ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀘𑁆𑀙𑁂𑀤𑀯𑀸𑀤𑀸 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀺 𑀲𑀢𑁆𑀢𑀳𑀺 𑀯𑀢𑁆𑀣𑀽𑀳𑀺. 𑀢𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀉𑀘𑁆𑀙𑁂𑀤𑀯𑀸𑀤𑀸 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀺 𑀲𑀢𑁆𑀢𑀳𑀺 𑀯𑀢𑁆𑀣𑀽𑀳𑀺?

𑁮𑁫. ‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀏𑀯𑀁𑀯𑀸𑀤𑀻 𑀳𑁄𑀢𑀺 𑀏𑀯𑀁𑀤𑀺𑀝𑁆𑀞𑀺 [𑀏𑀯𑀁𑀤𑀺𑀝𑁆𑀞𑀻 (𑀓. 𑀧𑀻.)] 𑁋 ‘𑀬𑀢𑁄 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀭𑀽𑀧𑀻 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺, 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸, 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀻’𑀢𑀺. 𑀇𑀢𑁆𑀣𑁂𑀓𑁂 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀺.

𑁮𑁬. ‘‘𑀢𑀫𑀜𑁆𑀜𑁄 𑀏𑀯𑀫𑀸𑀳 𑁋 ‘𑀅𑀢𑁆𑀣𑀺 𑀔𑁄, 𑀪𑁄, 𑀏𑀲𑁄 𑀅𑀢𑁆𑀢𑀸, 𑀬𑀁 𑀢𑁆𑀯𑀁 𑀯𑀤𑁂𑀲𑀺, 𑀦𑁂𑀲𑁄 𑀦𑀢𑁆𑀣𑀻𑀢𑀺 𑀯𑀤𑀸𑀫𑀺; 𑀦𑁄 𑀘 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀏𑀢𑁆𑀢𑀸𑀯𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀔𑁄, 𑀪𑁄, 𑀅𑀜𑁆𑀜𑁄 𑀅𑀢𑁆𑀢𑀸 𑀤𑀺𑀩𑁆𑀩𑁄 𑀭𑀽𑀧𑀻 𑀓𑀸𑀫𑀸𑀯𑀘𑀭𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑀪𑀓𑁆𑀔𑁄. 𑀢𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺 𑀦 𑀧𑀲𑁆𑀲𑀲𑀺. 𑀢𑀫𑀳𑀁 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺. 𑀲𑁄 𑀔𑁄, 𑀪𑁄, 𑀅𑀢𑁆𑀢𑀸 𑀬𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺, 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸, 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀻’𑀢𑀺. 𑀇𑀢𑁆𑀣𑁂𑀓𑁂 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀺.

𑁮𑁭. ‘‘𑀢𑀫𑀜𑁆𑀜𑁄 𑀏𑀯𑀫𑀸𑀳 𑁋 ‘𑀅𑀢𑁆𑀣𑀺 𑀔𑁄, 𑀪𑁄, 𑀏𑀲𑁄 𑀅𑀢𑁆𑀢𑀸, 𑀬𑀁 𑀢𑁆𑀯𑀁 𑀯𑀤𑁂𑀲𑀺, 𑀦𑁂𑀲𑁄 𑀦𑀢𑁆𑀣𑀻𑀢𑀺 𑀯𑀤𑀸𑀫𑀺; 𑀦𑁄 𑀘 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀏𑀢𑁆𑀢𑀸𑀯𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀔𑁄, 𑀪𑁄, 𑀅𑀜𑁆𑀜𑁄 𑀅𑀢𑁆𑀢𑀸 𑀤𑀺𑀩𑁆𑀩𑁄 𑀭𑀽𑀧𑀻 𑀫𑀦𑁄𑀫𑀬𑁄 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀻 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑁄. 𑀢𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺 𑀦 𑀧𑀲𑁆𑀲𑀲𑀺. 𑀢𑀫𑀳𑀁 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺. 𑀲𑁄 𑀔𑁄, 𑀪𑁄, 𑀅𑀢𑁆𑀢𑀸 𑀬𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺, 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸, 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀻’𑀢𑀺. 𑀇𑀢𑁆𑀣𑁂𑀓𑁂 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀺.

𑁮𑁮. ‘‘𑀢𑀫𑀜𑁆𑀜𑁄 𑀏𑀯𑀫𑀸𑀳 𑁋 ‘𑀅𑀢𑁆𑀣𑀺 𑀔𑁄, 𑀪𑁄, 𑀏𑀲𑁄 𑀅𑀢𑁆𑀢𑀸, 𑀬𑀁 𑀢𑁆𑀯𑀁 𑀯𑀤𑁂𑀲𑀺, 𑀦𑁂𑀲𑁄 𑀦𑀢𑁆𑀣𑀻𑀢𑀺 𑀯𑀤𑀸𑀫𑀺; 𑀦𑁄 𑀘 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀏𑀢𑁆𑀢𑀸𑀯𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀔𑁄, 𑀪𑁄, 𑀅𑀜𑁆𑀜𑁄 𑀅𑀢𑁆𑀢𑀸 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘‘𑀅𑀦𑀦𑁆𑀢𑁄 𑀆𑀓𑀸𑀲𑁄’’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑁄. 𑀢𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺 𑀦 𑀧𑀲𑁆𑀲𑀲𑀺. 𑀢𑀫𑀳𑀁 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺. 𑀲𑁄 𑀔𑁄, 𑀪𑁄, 𑀅𑀢𑁆𑀢𑀸 𑀬𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺, 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸, 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀻’𑀢𑀺. 𑀇𑀢𑁆𑀣𑁂𑀓𑁂 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀺.

𑁮𑁯. ‘‘𑀢𑀫𑀜𑁆𑀜𑁄 𑀏𑀯𑀫𑀸𑀳 𑁋 ‘𑀅𑀢𑁆𑀣𑀺 𑀔𑁄, 𑀪𑁄, 𑀏𑀲𑁄 𑀅𑀢𑁆𑀢𑀸 𑀬𑀁 𑀢𑁆𑀯𑀁 𑀯𑀤𑁂𑀲𑀺, 𑀦𑁂𑀲𑁄 𑀦𑀢𑁆𑀣𑀻𑀢𑀺 𑀯𑀤𑀸𑀫𑀺; 𑀦𑁄 𑀘 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀏𑀢𑁆𑀢𑀸𑀯𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀔𑁄, 𑀪𑁄, 𑀅𑀜𑁆𑀜𑁄 𑀅𑀢𑁆𑀢𑀸 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀽𑀧𑀕𑁄. 𑀢𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺 𑀦 𑀧𑀲𑁆𑀲𑀲𑀺. 𑀢𑀫𑀳𑀁 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺. 𑀲𑁄 𑀔𑁄, 𑀪𑁄, 𑀅𑀢𑁆𑀢𑀸 𑀬𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺, 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸, 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀻’𑀢𑀺. 𑀇𑀢𑁆𑀣𑁂𑀓𑁂 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀺.

𑁯𑁦. ‘‘𑀢𑀫𑀜𑁆𑀜𑁄 𑀏𑀯𑀫𑀸𑀳 𑁋 ‘𑀅𑀢𑁆𑀣𑀺 𑀔𑁄, 𑀪𑁄, 𑀲𑁄 𑀅𑀢𑁆𑀢𑀸, 𑀬𑀁 𑀢𑁆𑀯𑀁 𑀯𑀤𑁂𑀲𑀺, 𑀦𑁂𑀲𑁄 𑀦𑀢𑁆𑀣𑀻𑀢𑀺 𑀯𑀤𑀸𑀫𑀺; 𑀦𑁄 𑀘 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀏𑀢𑁆𑀢𑀸𑀯𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀔𑁄, 𑀪𑁄, 𑀅𑀜𑁆𑀜𑁄 𑀅𑀢𑁆𑀢𑀸 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘‘𑀦𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀽𑀧𑀕𑁄. 𑀢𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺 𑀦 𑀧𑀲𑁆𑀲𑀲𑀺. 𑀢𑀫𑀳𑀁 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺. 𑀲𑁄 𑀔𑁄, 𑀪𑁄, 𑀅𑀢𑁆𑀢𑀸 𑀬𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺, 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸, 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀻’’𑀢𑀺. 𑀇𑀢𑁆𑀣𑁂𑀓𑁂 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀺.

𑁯𑁧. ‘𑀢𑀫𑀜𑁆𑀜𑁄 𑀏𑀯𑀫𑀸𑀳 𑁋 ‘‘𑀅𑀢𑁆𑀣𑀺 𑀔𑁄, 𑀪𑁄, 𑀏𑀲𑁄 𑀅𑀢𑁆𑀢𑀸, 𑀬𑀁 𑀢𑁆𑀯𑀁 𑀯𑀤𑁂𑀲𑀺, 𑀦𑁂𑀲𑁄 𑀦𑀢𑁆𑀣𑀻𑀢𑀺 𑀯𑀤𑀸𑀫𑀺; 𑀦𑁄 𑀘 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀏𑀢𑁆𑀢𑀸𑀯𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀺. 𑀅𑀢𑁆𑀣𑀺 𑀔𑁄, 𑀪𑁄, 𑀅𑀜𑁆𑀜𑁄 𑀅𑀢𑁆𑀢𑀸 𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘‘𑀲𑀦𑁆𑀢𑀫𑁂𑀢𑀁 𑀧𑀡𑀻𑀢𑀫𑁂𑀢’’𑀦𑁆𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀽𑀧𑀕𑁄. 𑀢𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺 𑀦 𑀧𑀲𑁆𑀲𑀲𑀺. 𑀢𑀫𑀳𑀁 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀺. 𑀲𑁄 𑀔𑁄, 𑀪𑁄, 𑀅𑀢𑁆𑀢𑀸 𑀬𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺, 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸, 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀻’𑀢𑀺. 𑀇𑀢𑁆𑀣𑁂𑀓𑁂 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀺.

𑁯𑁨. ‘‘𑀇𑀫𑁂𑀳𑀺 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀘𑁆𑀙𑁂𑀤𑀯𑀸𑀤𑀸 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀺 𑀲𑀢𑁆𑀢𑀳𑀺 𑀯𑀢𑁆𑀣𑀽𑀳𑀺. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀉𑀘𑁆𑀙𑁂𑀤𑀯𑀸𑀤𑀸 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀳𑁂𑀯 𑀲𑀢𑁆𑀢𑀳𑀺 𑀯𑀢𑁆𑀣𑀽𑀳𑀺…𑀧𑁂… 𑀬𑁂𑀳𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀪𑀼𑀘𑁆𑀘𑀁 𑀯𑀡𑁆𑀡𑀁 𑀲𑀫𑁆𑀫𑀸 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁.

𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑁄

𑁯𑁩. ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸 𑀲𑀢𑁄 𑀲𑀢𑁆𑀢𑀲𑁆𑀲 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀧𑀜𑁆𑀘𑀳𑀺 𑀯𑀢𑁆𑀣𑀽𑀳𑀺. 𑀢𑁂 𑀘 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀺𑀫𑀸𑀕𑀫𑁆𑀫 𑀓𑀺𑀫𑀸𑀭𑀩𑁆𑀪 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸 𑀲𑀢𑁄 𑀲𑀢𑁆𑀢𑀲𑁆𑀲 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀧𑀜𑁆𑀘𑀳𑀺 𑀯𑀢𑁆𑀣𑀽𑀳𑀺?

𑁯𑁪. ‘‘𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀏𑀯𑀁𑀯𑀸𑀤𑀻 𑀳𑁄𑀢𑀺 𑀏𑀯𑀁𑀤𑀺𑀝𑁆𑀞𑀺 𑁋 ‘‘𑀬𑀢𑁄 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺, 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑁄 𑀳𑁄𑀢𑀻’𑀢𑀺. 𑀇𑀢𑁆𑀣𑁂𑀓𑁂 𑀲𑀢𑁄 𑀲𑀢𑁆𑀢𑀲𑁆𑀲 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺.

𑁯𑁫. ‘‘𑀢𑀫𑀜𑁆𑀜𑁄 𑀏𑀯𑀫𑀸𑀳 𑁋‘𑀅𑀢𑁆𑀣𑀺 𑀔𑁄, 𑀪𑁄, 𑀏𑀲𑁄 𑀅𑀢𑁆𑀢𑀸, 𑀬𑀁 𑀢𑁆𑀯𑀁 𑀯𑀤𑁂𑀲𑀺, 𑀦𑁂𑀲𑁄 𑀦𑀢𑁆𑀣𑀻𑀢𑀺 𑀯𑀤𑀸𑀫𑀺; 𑀦𑁄 𑀘 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀏𑀢𑁆𑀢𑀸𑀯𑀢𑀸 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑁄 𑀳𑁄𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀓𑀸𑀫𑀸 𑀳𑀺, 𑀪𑁄, 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸, 𑀢𑁂𑀲𑀁 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸. 𑀬𑀢𑁄 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑁄 𑀳𑁄𑀢𑀻’𑀢𑀺. 𑀇𑀢𑁆𑀣𑁂𑀓𑁂 𑀲𑀢𑁄 𑀲𑀢𑁆𑀢𑀲𑁆𑀲 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺.

𑁯𑁬. ‘‘𑀢𑀫𑀜𑁆𑀜𑁄 𑀏𑀯𑀫𑀸𑀳 𑁋 ‘𑀅𑀢𑁆𑀣𑀺 𑀔𑁄, 𑀪𑁄, 𑀏𑀲𑁄 𑀅𑀢𑁆𑀢𑀸, 𑀬𑀁 𑀢𑁆𑀯𑀁 𑀯𑀤𑁂𑀲𑀺, 𑀦𑁂𑀲𑁄 𑀦𑀢𑁆𑀣𑀻𑀢𑀺 𑀯𑀤𑀸𑀫𑀺; 𑀦𑁄 𑀘 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀏𑀢𑁆𑀢𑀸𑀯𑀢𑀸 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑁄 𑀳𑁄𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑀤𑁂𑀯 𑀢𑀢𑁆𑀣 𑀯𑀺𑀢𑀓𑁆𑀓𑀺𑀢𑀁 𑀯𑀺𑀘𑀸𑀭𑀺𑀢𑀁, 𑀏𑀢𑁂𑀦𑁂𑀢𑀁 𑀑𑀴𑀸𑀭𑀺𑀓𑀁 𑀅𑀓𑁆𑀔𑀸𑀬𑀢𑀺. 𑀬𑀢𑁄 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑁄 𑀳𑁄𑀢𑀻’𑀢𑀺. 𑀇𑀢𑁆𑀣𑁂𑀓𑁂 𑀲𑀢𑁄 𑀲𑀢𑁆𑀢𑀲𑁆𑀲 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺.

𑁯𑁭. ‘‘𑀢𑀫𑀜𑁆𑀜𑁄 𑀏𑀯𑀫𑀸𑀳 𑁋 ‘𑀅𑀢𑁆𑀣𑀺 𑀔𑁄, 𑀪𑁄, 𑀏𑀲𑁄 𑀅𑀢𑁆𑀢𑀸, 𑀬𑀁 𑀢𑁆𑀯𑀁 𑀯𑀤𑁂𑀲𑀺, 𑀦𑁂𑀲𑁄 𑀦𑀢𑁆𑀣𑀻𑀢𑀺 𑀯𑀤𑀸𑀫𑀺; 𑀦𑁄 𑀘 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀏𑀢𑁆𑀢𑀸𑀯𑀢𑀸 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑁄 𑀳𑁄𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑀤𑁂𑀯 𑀢𑀢𑁆𑀣 𑀧𑀻𑀢𑀺𑀕𑀢𑀁 𑀘𑁂𑀢𑀲𑁄 𑀉𑀧𑁆𑀧𑀺𑀮𑀸𑀯𑀺𑀢𑀢𑁆𑀢𑀁, 𑀏𑀢𑁂𑀦𑁂𑀢𑀁 𑀑𑀴𑀸𑀭𑀺𑀓𑀁 𑀅𑀓𑁆𑀔𑀸𑀬𑀢𑀺. 𑀬𑀢𑁄 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺, 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄, 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 ‘‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’’𑀢𑀺, 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑁄 𑀳𑁄𑀢𑀻’𑀢𑀺. 𑀇𑀢𑁆𑀣𑁂𑀓𑁂 𑀲𑀢𑁄 𑀲𑀢𑁆𑀢𑀲𑁆𑀲 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺.

𑁯𑁮. ‘‘𑀢𑀫𑀜𑁆𑀜𑁄 𑀏𑀯𑀫𑀸𑀳 𑁋 ‘𑀅𑀢𑁆𑀣𑀺 𑀔𑁄, 𑀪𑁄, 𑀏𑀲𑁄 𑀅𑀢𑁆𑀢𑀸, 𑀬𑀁 𑀢𑁆𑀯𑀁 𑀯𑀤𑁂𑀲𑀺, 𑀦𑁂𑀲𑁄 𑀦𑀢𑁆𑀣𑀻𑀢𑀺 𑀯𑀤𑀸𑀫𑀺; 𑀦𑁄 𑀘 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀏𑀢𑁆𑀢𑀸𑀯𑀢𑀸 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑁄 𑀳𑁄𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑀤𑁂𑀯 𑀢𑀢𑁆𑀣 𑀲𑀼𑀔𑀫𑀺𑀢𑀺 𑀘𑁂𑀢𑀲𑁄 𑀆𑀪𑁄𑀕𑁄, 𑀏𑀢𑁂𑀦𑁂𑀢𑀁 𑀑𑀴𑀸𑀭𑀺𑀓𑀁 𑀅𑀓𑁆𑀔𑀸𑀬𑀢𑀺. 𑀬𑀢𑁄 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑁄, 𑀅𑀬𑀁 𑀅𑀢𑁆𑀢𑀸 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑁄 𑀳𑁄𑀢𑀻’𑀢𑀺. 𑀇𑀢𑁆𑀣𑁂𑀓𑁂 𑀲𑀢𑁄 𑀲𑀢𑁆𑀢𑀲𑁆𑀲 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺.

𑁯𑁯. ‘‘𑀇𑀫𑁂𑀳𑀺 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸 𑀲𑀢𑁄 𑀲𑀢𑁆𑀢𑀲𑁆𑀲 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀧𑀜𑁆𑀘𑀳𑀺 𑀯𑀢𑁆𑀣𑀽𑀳𑀺. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸 𑀲𑀢𑁄 𑀲𑀢𑁆𑀢𑀲𑁆𑀲 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀳𑁂𑀯 𑀧𑀜𑁆𑀘𑀳𑀺 𑀯𑀢𑁆𑀣𑀽𑀳𑀺…𑀧𑁂… 𑀬𑁂𑀳𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀪𑀼𑀘𑁆𑀘𑀁 𑀯𑀡𑁆𑀡𑀁 𑀲𑀫𑁆𑀫𑀸 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁.

𑁧𑁦𑁦. ‘‘𑀇𑀫𑁂𑀳𑀺 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄 𑀅𑀧𑀭𑀦𑁆𑀢𑀁 𑀆𑀭𑀩𑁆𑀪 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺 𑀘𑀢𑀼𑀘𑀢𑁆𑀢𑀸𑀭𑀻𑀲𑀸𑀬 𑀯𑀢𑁆𑀣𑀽𑀳𑀺. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄 𑀅𑀧𑀭𑀦𑁆𑀢𑀁 𑀆𑀭𑀩𑁆𑀪 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀳𑁂𑀯 𑀘𑀢𑀼𑀘𑀢𑁆𑀢𑀸𑀭𑀻𑀲𑀸𑀬 𑀯𑀢𑁆𑀣𑀽𑀳𑀺…𑀧𑁂… 𑀬𑁂𑀳𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀪𑀼𑀘𑁆𑀘𑀁 𑀯𑀡𑁆𑀡𑀁 𑀲𑀫𑁆𑀫𑀸 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁.

𑁧𑁦𑁧. ‘‘𑀇𑀫𑁂𑀳𑀺 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸 𑀘 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀘 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀘 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀁 𑀆𑀭𑀩𑁆𑀪 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺 𑀤𑁆𑀯𑀸𑀲𑀝𑁆𑀞𑀺𑀬𑀸 𑀯𑀢𑁆𑀣𑀽𑀳𑀺.

𑁧𑁦𑁨. ‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸 𑀯𑀸 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀯𑀸 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀯𑀸 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀁 𑀆𑀭𑀩𑁆𑀪 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀳𑁂𑀯 𑀤𑁆𑀯𑀸𑀲𑀝𑁆𑀞𑀺𑀬𑀸 𑀯𑀢𑁆𑀣𑀽𑀳𑀺, 𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭𑁂𑀦; 𑀦𑀢𑁆𑀣𑀺 𑀇𑀢𑁄 𑀩𑀳𑀺𑀤𑁆𑀥𑀸.

𑁧𑁦𑁩. ‘‘𑀢𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀺 𑁋 ‘𑀇𑀫𑁂 𑀤𑀺𑀝𑁆𑀞𑀺𑀝𑁆𑀞𑀸𑀦𑀸 𑀏𑀯𑀁𑀕𑀳𑀺𑀢𑀸 𑀏𑀯𑀁𑀧𑀭𑀸𑀫𑀝𑁆𑀞𑀸 𑀏𑀯𑀁𑀕𑀢𑀺𑀓𑀸 𑀪𑀯𑀦𑁆𑀢𑀺 𑀏𑀯𑀁𑀅𑀪𑀺𑀲𑀫𑁆𑀧𑀭𑀸𑀬𑀸’𑀢𑀺. 𑀢𑀜𑁆𑀘 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀺, 𑀢𑀢𑁄 𑀘 𑀉𑀢𑁆𑀢𑀭𑀺𑀢𑀭𑀁 𑀧𑀚𑀸𑀦𑀸𑀢𑀺, 𑀢𑀜𑁆𑀘 𑀧𑀚𑀸𑀦𑀦𑀁 𑀦 𑀧𑀭𑀸𑀫𑀲𑀢𑀺, 𑀅𑀧𑀭𑀸𑀫𑀲𑀢𑁄 𑀘𑀲𑁆𑀲 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀦𑀺𑀩𑁆𑀩𑀼𑀢𑀺 𑀯𑀺𑀤𑀺𑀢𑀸. 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀯𑀺𑀤𑀺𑀢𑁆𑀯𑀸 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄.

𑁧𑁦𑁪. ‘‘𑀇𑀫𑁂 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀕𑀫𑁆𑀪𑀻𑀭𑀸 𑀤𑀼𑀤𑁆𑀤𑀲𑀸 𑀤𑀼𑀭𑀦𑀼𑀩𑁄𑀥𑀸 𑀲𑀦𑁆𑀢𑀸 𑀧𑀡𑀻𑀢𑀸 𑀅𑀢𑀓𑁆𑀓𑀸𑀯𑀘𑀭𑀸 𑀦𑀺𑀧𑀼𑀡𑀸 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀸, 𑀬𑁂 𑀢𑀣𑀸𑀕𑀢𑁄 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺, 𑀬𑁂𑀳𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀪𑀼𑀘𑁆𑀘𑀁 𑀯𑀡𑁆𑀡𑀁 𑀲𑀫𑁆𑀫𑀸 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼𑀁.

𑀧𑀭𑀺𑀢𑀲𑁆𑀲𑀺𑀢𑀯𑀺𑀧𑁆𑀨𑀦𑁆𑀤𑀺𑀢𑀯𑀸𑀭𑁄

𑁧𑁦𑁫. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀲𑁆𑀲𑀢𑀯𑀸𑀤𑀸 𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀢𑁂𑀲𑀁 𑀪𑀯𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀚𑀸𑀦𑀢𑀁 𑀅𑀧𑀲𑁆𑀲𑀢𑀁 𑀯𑁂𑀤𑀬𑀺𑀢𑀁 𑀢𑀡𑁆𑀳𑀸𑀕𑀢𑀸𑀦𑀁 𑀧𑀭𑀺𑀢𑀲𑁆𑀲𑀺𑀢𑀯𑀺𑀧𑁆𑀨𑀦𑁆𑀤𑀺𑀢𑀫𑁂𑀯.

𑁧𑁦𑁬. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀅𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀁 𑀲𑀲𑁆𑀲𑀢𑀁 𑀏𑀓𑀘𑁆𑀘𑀁 𑀅𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀢𑁂𑀲𑀁 𑀪𑀯𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀚𑀸𑀦𑀢𑀁 𑀅𑀧𑀲𑁆𑀲𑀢𑀁 𑀯𑁂𑀤𑀬𑀺𑀢𑀁 𑀢𑀡𑁆𑀳𑀸𑀕𑀢𑀸𑀦𑀁 𑀧𑀭𑀺𑀢𑀲𑁆𑀲𑀺𑀢𑀯𑀺𑀧𑁆𑀨𑀦𑁆𑀤𑀺𑀢𑀫𑁂𑀯.

𑁧𑁦𑁭. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀦𑁆𑀢𑀸𑀦𑀦𑁆𑀢𑀺𑀓𑀸 𑀅𑀦𑁆𑀢𑀸𑀦𑀦𑁆𑀢𑀁 𑀮𑁄𑀓𑀲𑁆𑀲 𑀧𑀜𑁆𑀜𑀧𑁂𑀦𑁆𑀢𑀺 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀢𑁂𑀲𑀁 𑀪𑀯𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀚𑀸𑀦𑀢𑀁 𑀅𑀧𑀲𑁆𑀲𑀢𑀁 𑀯𑁂𑀤𑀬𑀺𑀢𑀁 𑀢𑀡𑁆𑀳𑀸𑀕𑀢𑀸𑀦𑀁 𑀧𑀭𑀺𑀢𑀲𑁆𑀲𑀺𑀢𑀯𑀺𑀧𑁆𑀨𑀦𑁆𑀤𑀺𑀢𑀫𑁂𑀯.

𑁧𑁦𑁮. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑀸 𑀲𑀫𑀸𑀦𑀸 𑀯𑀸𑀘𑀸𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀦𑁆𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀁 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀢𑁂𑀲𑀁 𑀪𑀯𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀚𑀸𑀦𑀢𑀁 𑀅𑀧𑀲𑁆𑀲𑀢𑀁 𑀯𑁂𑀤𑀬𑀺𑀢𑀁 𑀢𑀡𑁆𑀳𑀸𑀕𑀢𑀸𑀦𑀁 𑀧𑀭𑀺𑀢𑀲𑁆𑀲𑀺𑀢𑀯𑀺𑀧𑁆𑀨𑀦𑁆𑀤𑀺𑀢𑀫𑁂𑀯.

𑁧𑁦𑁯. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺 𑀤𑁆𑀯𑀻𑀳𑀺 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀢𑁂𑀲𑀁 𑀪𑀯𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀚𑀸𑀦𑀢𑀁 𑀅𑀧𑀲𑁆𑀲𑀢𑀁 𑀯𑁂𑀤𑀬𑀺𑀢𑀁 𑀢𑀡𑁆𑀳𑀸𑀕𑀢𑀸𑀦𑀁 𑀧𑀭𑀺𑀢𑀲𑁆𑀲𑀺𑀢𑀯𑀺𑀧𑁆𑀨𑀦𑁆𑀤𑀺𑀢𑀫𑁂𑀯.

𑁧𑁧𑁦. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄 𑀧𑀼𑀩𑁆𑀩𑀦𑁆𑀢𑀁 𑀆𑀭𑀩𑁆𑀪 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀢𑁂𑀲𑀁 𑀪𑀯𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀚𑀸𑀦𑀢𑀁 𑀅𑀧𑀲𑁆𑀲𑀢𑀁 𑀯𑁂𑀤𑀬𑀺𑀢𑀁 𑀢𑀡𑁆𑀳𑀸𑀕𑀢𑀸𑀦𑀁 𑀧𑀭𑀺𑀢𑀲𑁆𑀲𑀺𑀢𑀯𑀺𑀧𑁆𑀨𑀦𑁆𑀤𑀺𑀢𑀫𑁂𑀯.

𑁧𑁧𑁧. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀲𑀜𑁆𑀜𑀻𑀯𑀸𑀤𑀸 𑀉𑀤𑁆𑀥𑀫𑀸𑀖𑀸𑀢𑀦𑀁 𑀲𑀜𑁆𑀜𑀺𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀲𑁄𑀴𑀲𑀳𑀺 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀢𑁂𑀲𑀁 𑀪𑀯𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀚𑀸𑀦𑀢𑀁 𑀅𑀧𑀲𑁆𑀲𑀢𑀁 𑀯𑁂𑀤𑀬𑀺𑀢𑀁 𑀢𑀡𑁆𑀳𑀸𑀕𑀢𑀸𑀦𑀁 𑀧𑀭𑀺𑀢𑀲𑁆𑀲𑀺𑀢𑀯𑀺𑀧𑁆𑀨𑀦𑁆𑀤𑀺𑀢𑀫𑁂𑀯.

𑁧𑁧𑁨. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀅𑀲𑀜𑁆𑀜𑀻𑀯𑀸𑀤𑀸 𑀉𑀤𑁆𑀥𑀫𑀸𑀖𑀸𑀢𑀦𑀁 𑀅𑀲𑀜𑁆𑀜𑀺𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀅𑀝𑁆𑀞𑀳𑀺 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀢𑁂𑀲𑀁 𑀪𑀯𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀚𑀸𑀦𑀢𑀁 𑀅𑀧𑀲𑁆𑀲𑀢𑀁 𑀯𑁂𑀤𑀬𑀺𑀢𑀁 𑀢𑀡𑁆𑀳𑀸𑀕𑀢𑀸𑀦𑀁 𑀧𑀭𑀺𑀢𑀲𑁆𑀲𑀺𑀢𑀯𑀺𑀧𑁆𑀨𑀦𑁆𑀤𑀺𑀢𑀫𑁂𑀯.

𑁧𑁧𑁩. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸 𑀉𑀤𑁆𑀥𑀫𑀸𑀖𑀸𑀢𑀦𑀁 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀺𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀅𑀝𑁆𑀞𑀳𑀺 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀢𑁂𑀲𑀁 𑀪𑀯𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀚𑀸𑀦𑀢𑀁 𑀅𑀧𑀲𑁆𑀲𑀢𑀁 𑀯𑁂𑀤𑀬𑀺𑀢𑀁 𑀢𑀡𑁆𑀳𑀸𑀕𑀢𑀸𑀦𑀁 𑀧𑀭𑀺𑀢𑀲𑁆𑀲𑀺𑀢𑀯𑀺𑀧𑁆𑀨𑀦𑁆𑀤𑀺𑀢𑀫𑁂𑀯.

𑁧𑁧𑁪. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀘𑁆𑀙𑁂𑀤𑀯𑀸𑀤𑀸 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀺 𑀲𑀢𑁆𑀢𑀳𑀺 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀢𑁂𑀲𑀁 𑀪𑀯𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀚𑀸𑀦𑀢𑀁 𑀅𑀧𑀲𑁆𑀲𑀢𑀁 𑀯𑁂𑀤𑀬𑀺𑀢𑀁 𑀢𑀡𑁆𑀳𑀸𑀕𑀢𑀸𑀦𑀁 𑀧𑀭𑀺𑀢𑀲𑁆𑀲𑀺𑀢𑀯𑀺𑀧𑁆𑀨𑀦𑁆𑀤𑀺𑀢𑀫𑁂𑀯.

𑁧𑁧𑁫. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸 𑀲𑀢𑁄 𑀲𑀢𑁆𑀢𑀲𑁆𑀲 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀧𑀜𑁆𑀘𑀳𑀺 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀢𑁂𑀲𑀁 𑀪𑀯𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀚𑀸𑀦𑀢𑀁 𑀅𑀧𑀲𑁆𑀲𑀢𑀁 𑀯𑁂𑀤𑀬𑀺𑀢𑀁 𑀢𑀡𑁆𑀳𑀸𑀕𑀢𑀸𑀦𑀁 𑀧𑀭𑀺𑀢𑀲𑁆𑀲𑀺𑀢𑀯𑀺𑀧𑁆𑀨𑀦𑁆𑀤𑀺𑀢𑀫𑁂𑀯.

𑁧𑁧𑁬. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄 𑀅𑀧𑀭𑀦𑁆𑀢𑀁 𑀆𑀭𑀩𑁆𑀪 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺 𑀘𑀢𑀼𑀘𑀢𑁆𑀢𑀸𑀭𑀻𑀲𑀸𑀬 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀢𑁂𑀲𑀁 𑀪𑀯𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀚𑀸𑀦𑀢𑀁 𑀅𑀧𑀲𑁆𑀲𑀢𑀁 𑀯𑁂𑀤𑀬𑀺𑀢𑀁 𑀢𑀡𑁆𑀳𑀸𑀕𑀢𑀸𑀦𑀁 𑀧𑀭𑀺𑀢𑀲𑁆𑀲𑀺𑀢𑀯𑀺𑀧𑁆𑀨𑀦𑁆𑀤𑀺𑀢𑀫𑁂𑀯.

𑁧𑁧𑁭. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸 𑀘 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀘 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀘 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀁 𑀆𑀭𑀩𑁆𑀪 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺 𑀤𑁆𑀯𑀸𑀲𑀝𑁆𑀞𑀺𑀬𑀸 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀢𑁂𑀲𑀁 𑀪𑀯𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀚𑀸𑀦𑀢𑀁 𑀅𑀧𑀲𑁆𑀲𑀢𑀁 𑀯𑁂𑀤𑀬𑀺𑀢𑀁 𑀢𑀡𑁆𑀳𑀸𑀕𑀢𑀸𑀦𑀁 𑀧𑀭𑀺𑀢𑀲𑁆𑀲𑀺𑀢𑀯𑀺𑀧𑁆𑀨𑀦𑁆𑀤𑀺𑀢𑀫𑁂𑀯.

𑀨𑀲𑁆𑀲𑀧𑀘𑁆𑀘𑀬𑀸𑀯𑀸𑀭𑁄

𑁧𑁧𑁮. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀲𑁆𑀲𑀢𑀯𑀸𑀤𑀸 𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸.

𑁧𑁧𑁯. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀅𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀁 𑀲𑀲𑁆𑀲𑀢𑀁 𑀏𑀓𑀘𑁆𑀘𑀁 𑀅𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸.

𑁧𑁨𑁦. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀦𑁆𑀢𑀸𑀦𑀦𑁆𑀢𑀺𑀓𑀸 𑀅𑀦𑁆𑀢𑀸𑀦𑀦𑁆𑀢𑀁 𑀮𑁄𑀓𑀲𑁆𑀲 𑀧𑀜𑁆𑀜𑀧𑁂𑀦𑁆𑀢𑀺 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸.

𑁧𑁨𑁧. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑀸 𑀲𑀫𑀸𑀦𑀸 𑀯𑀸𑀘𑀸𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀦𑁆𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀁 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸.

𑁧𑁨𑁨. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺 𑀤𑁆𑀯𑀻𑀳𑀺 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸.

𑁧𑁨𑁩. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄 𑀧𑀼𑀩𑁆𑀩𑀦𑁆𑀢𑀁 𑀆𑀭𑀩𑁆𑀪 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸.

𑁧𑁨𑁪. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀲𑀜𑁆𑀜𑀻𑀯𑀸𑀤𑀸 𑀉𑀤𑁆𑀥𑀫𑀸𑀖𑀸𑀢𑀦𑀁 𑀲𑀜𑁆𑀜𑀺𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀲𑁄𑀴𑀲𑀳𑀺 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸.

𑁧𑁨𑁫. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀅𑀲𑀜𑁆𑀜𑀻𑀯𑀸𑀤𑀸 𑀉𑀤𑁆𑀥𑀫𑀸𑀖𑀸𑀢𑀦𑀁 𑀅𑀲𑀜𑁆𑀜𑀺𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀅𑀝𑁆𑀞𑀳𑀺 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸.

𑁧𑁨𑁬. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸 𑀉𑀤𑁆𑀥𑀫𑀸𑀖𑀸𑀢𑀦𑀁 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀺𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀅𑀝𑁆𑀞𑀳𑀺 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸.

𑁧𑁨𑁭. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀘𑁆𑀙𑁂𑀤𑀯𑀸𑀤𑀸 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀺 𑀲𑀢𑁆𑀢𑀳𑀺 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸.

𑁧𑁨𑁮. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸 𑀲𑀢𑁄 𑀲𑀢𑁆𑀢𑀲𑁆𑀲 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀧𑀜𑁆𑀘𑀳𑀺 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸.

𑁧𑁨𑁯. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄 𑀅𑀧𑀭𑀦𑁆𑀢𑀁 𑀆𑀭𑀩𑁆𑀪 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺 𑀘𑀢𑀼𑀘𑀢𑁆𑀢𑀸𑀭𑀻𑀲𑀸𑀬 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸.

𑁧𑁩𑁦. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸 𑀘 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀘 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀘 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀁 𑀆𑀭𑀩𑁆𑀪 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺 𑀤𑁆𑀯𑀸𑀲𑀝𑁆𑀞𑀺𑀬𑀸 𑀯𑀢𑁆𑀣𑀽𑀳𑀺, 𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸.

𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺𑀯𑀸𑀭𑁄

𑁧𑁩𑁧. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀲𑁆𑀲𑀢𑀯𑀸𑀤𑀸 𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁧𑁩𑁨. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘 𑀅𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀁 𑀲𑀲𑁆𑀲𑀢𑀁 𑀏𑀓𑀘𑁆𑀘𑀁 𑀅𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁧𑁩𑁩. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀦𑁆𑀢𑀸𑀦𑀦𑁆𑀢𑀺𑀓𑀸 𑀅𑀦𑁆𑀢𑀸𑀦𑀦𑁆𑀢𑀁 𑀮𑁄𑀓𑀲𑁆𑀲 𑀧𑀜𑁆𑀜𑀧𑁂𑀦𑁆𑀢𑀺 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁧𑁩𑁪. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑀸 𑀲𑀫𑀸𑀦𑀸 𑀯𑀸𑀘𑀸𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀦𑁆𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀁 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁧𑁩𑁫. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺 𑀤𑁆𑀯𑀻𑀳𑀺 𑀯𑀢𑁆𑀣𑀽𑀳𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁧𑁩𑁬. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄 𑀧𑀼𑀩𑁆𑀩𑀦𑁆𑀢𑀁 𑀆𑀭𑀩𑁆𑀪 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁧𑁩𑁭. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀲𑀜𑁆𑀜𑀻𑀯𑀸𑀤𑀸 𑀉𑀤𑁆𑀥𑀫𑀸𑀖𑀸𑀢𑀦𑀁 𑀲𑀜𑁆𑀜𑀺𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀲𑁄𑀴𑀲𑀳𑀺 𑀯𑀢𑁆𑀣𑀽𑀳𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁧𑁩𑁮. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀅𑀲𑀜𑁆𑀜𑀻𑀯𑀸𑀤𑀸, 𑀉𑀤𑁆𑀥𑀫𑀸𑀖𑀸𑀢𑀦𑀁 𑀅𑀲𑀜𑁆𑀜𑀺𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀅𑀝𑁆𑀞𑀳𑀺 𑀯𑀢𑁆𑀣𑀽𑀳𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁧𑁩𑁯. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸 𑀉𑀤𑁆𑀥𑀫𑀸𑀖𑀸𑀢𑀦𑀁 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀺𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀅𑀝𑁆𑀞𑀳𑀺 𑀯𑀢𑁆𑀣𑀽𑀳𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁧𑁪𑁦. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀘𑁆𑀙𑁂𑀤𑀯𑀸𑀤𑀸 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀺 𑀲𑀢𑁆𑀢𑀳𑀺 𑀯𑀢𑁆𑀣𑀽𑀳𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁧𑁪𑁧. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸 𑀲𑀢𑁄 𑀲𑀢𑁆𑀢𑀲𑁆𑀲 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺 𑀧𑀜𑁆𑀘𑀳𑀺 𑀯𑀢𑁆𑀣𑀽𑀳𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁧𑁪𑁨. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄 𑀅𑀧𑀭𑀦𑁆𑀢𑀁 𑀆𑀭𑀩𑁆𑀪 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺 𑀘𑀢𑀼𑀘𑀢𑁆𑀢𑀸𑀭𑀻𑀲𑀸𑀬 𑀯𑀢𑁆𑀣𑀽𑀳𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁧𑁪𑁩. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸 𑀘 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀘 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀘 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀁 𑀆𑀭𑀩𑁆𑀪 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺 𑀤𑁆𑀯𑀸𑀲𑀝𑁆𑀞𑀺𑀬𑀸 𑀯𑀢𑁆𑀣𑀽𑀳𑀺, 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸 𑀧𑀝𑀺𑀲𑀁𑀯𑁂𑀤𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑀤𑀺𑀝𑁆𑀞𑀺𑀕𑀢𑀺𑀓𑀸𑀥𑀺𑀝𑁆𑀞𑀸𑀦𑀯𑀝𑁆𑀝𑀓𑀣𑀸

𑁧𑁪𑁪. ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀲𑁆𑀲𑀢𑀯𑀸𑀤𑀸 𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺 𑀘𑀢𑀽𑀳𑀺 𑀯𑀢𑁆𑀣𑀽𑀳𑀺, 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸 𑀏𑀓𑀘𑁆𑀘𑀅𑀲𑀲𑁆𑀲𑀢𑀺𑀓𑀸…𑀧𑁂… 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀦𑁆𑀢𑀸𑀦𑀦𑁆𑀢𑀺𑀓𑀸… 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸… 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸… 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸… 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀲𑀜𑁆𑀜𑀻𑀯𑀸𑀤𑀸… 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀅𑀲𑀜𑁆𑀜𑀻𑀯𑀸𑀤𑀸… 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸… 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀉𑀘𑁆𑀙𑁂𑀤𑀯𑀸𑀤𑀸… 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸… 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀸… 𑀬𑁂𑀧𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸 𑀘 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀘 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀘 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀁 𑀆𑀭𑀩𑁆𑀪 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺 𑀤𑁆𑀯𑀸𑀲𑀝𑁆𑀞𑀺𑀬𑀸 𑀯𑀢𑁆𑀣𑀽𑀳𑀺, 𑀲𑀩𑁆𑀩𑁂 𑀢𑁂 𑀙𑀳𑀺 𑀨𑀲𑁆𑀲𑀸𑀬𑀢𑀦𑁂𑀳𑀺 𑀨𑀼𑀲𑁆𑀲 𑀨𑀼𑀲𑁆𑀲 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀺 𑀢𑁂𑀲𑀁 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺.

𑀯𑀺𑀯𑀝𑁆𑀝𑀓𑀣𑀸𑀤𑀺

𑁧𑁪𑁫. ‘‘𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀇𑀫𑁂𑀳𑀺 𑀲𑀩𑁆𑀩𑁂𑀳𑁂𑀯 𑀉𑀢𑁆𑀢𑀭𑀺𑀢𑀭𑀁 𑀧𑀚𑀸𑀦𑀸𑀢𑀺.

𑁧𑁪𑁬. ‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸 𑀯𑀸 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀯𑀸 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀯𑀸 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀁 𑀆𑀭𑀩𑁆𑀪 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀳𑁂𑀯 𑀤𑁆𑀯𑀸𑀲𑀝𑁆𑀞𑀺𑀬𑀸 𑀯𑀢𑁆𑀣𑀽𑀳𑀺 𑀅𑀦𑁆𑀢𑁄𑀚𑀸𑀮𑀻𑀓𑀢𑀸, 𑀏𑀢𑁆𑀣 𑀲𑀺𑀢𑀸𑀯 𑀉𑀫𑁆𑀫𑀼𑀚𑁆𑀚𑀫𑀸𑀦𑀸 𑀉𑀫𑁆𑀫𑀼𑀚𑁆𑀚𑀦𑁆𑀢𑀺, 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸 𑀅𑀦𑁆𑀢𑁄𑀚𑀸𑀮𑀻𑀓𑀢𑀸𑀯 𑀉𑀫𑁆𑀫𑀼𑀚𑁆𑀚𑀫𑀸𑀦𑀸 𑀉𑀫𑁆𑀫𑀼𑀚𑁆𑀚𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑁄 𑀓𑁂𑀯𑀝𑁆𑀝𑁄 𑀯𑀸 𑀓𑁂𑀯𑀝𑁆𑀝𑀦𑁆𑀢𑁂𑀯𑀸𑀲𑀻 𑀯𑀸 𑀲𑀼𑀔𑀼𑀫𑀘𑁆𑀙𑀺𑀓𑁂𑀦 𑀚𑀸𑀮𑁂𑀦 𑀧𑀭𑀺𑀢𑁆𑀢𑀁 𑀉𑀤𑀓𑀤𑀳𑀁 [𑀉𑀤𑀓𑀭𑀳𑀤𑀁 (𑀲𑀻. 𑀲𑁆𑀬𑀸. 𑀧𑀻.)] 𑀑𑀢𑁆𑀣𑀭𑁂𑀬𑁆𑀬. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀬𑁂 𑀔𑁄 𑀓𑁂𑀘𑀺 𑀇𑀫𑀲𑁆𑀫𑀺𑀁 𑀉𑀤𑀓𑀤𑀳𑁂 𑀑𑀴𑀸𑀭𑀺𑀓𑀸 𑀧𑀸𑀡𑀸, 𑀲𑀩𑁆𑀩𑁂 𑀢𑁂 𑀅𑀦𑁆𑀢𑁄𑀚𑀸𑀮𑀻𑀓𑀢𑀸. 𑀏𑀢𑁆𑀣 𑀲𑀺𑀢𑀸𑀯 𑀉𑀫𑁆𑀫𑀼𑀚𑁆𑀚𑀫𑀸𑀦𑀸 𑀉𑀫𑁆𑀫𑀼𑀚𑁆𑀚𑀦𑁆𑀢𑀺; 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸 𑀅𑀦𑁆𑀢𑁄𑀚𑀸𑀮𑀻𑀓𑀢𑀸𑀯 𑀉𑀫𑁆𑀫𑀼𑀚𑁆𑀚𑀫𑀸𑀦𑀸 𑀉𑀫𑁆𑀫𑀼𑀚𑁆𑀚𑀦𑁆𑀢𑀻’𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑁂 𑀳𑀺 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸 𑀯𑀸 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀯𑀸 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀯𑀸 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀁 𑀆𑀭𑀩𑁆𑀪 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀳𑁂𑀯 𑀤𑁆𑀯𑀸𑀲𑀝𑁆𑀞𑀺𑀬𑀸 𑀯𑀢𑁆𑀣𑀽𑀳𑀺 𑀅𑀦𑁆𑀢𑁄𑀚𑀸𑀮𑀻𑀓𑀢𑀸 𑀏𑀢𑁆𑀣 𑀲𑀺𑀢𑀸𑀯 𑀉𑀫𑁆𑀫𑀼𑀚𑁆𑀚𑀫𑀸𑀦𑀸 𑀉𑀫𑁆𑀫𑀼𑀚𑁆𑀚𑀦𑁆𑀢𑀺, 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸 𑀅𑀦𑁆𑀢𑁄𑀚𑀸𑀮𑀻𑀓𑀢𑀸𑀯 𑀉𑀫𑁆𑀫𑀼𑀚𑁆𑀚𑀫𑀸𑀦𑀸 𑀉𑀫𑁆𑀫𑀼𑀚𑁆𑀚𑀦𑁆𑀢𑀺.

𑁧𑁪𑁭. ‘‘𑀉𑀘𑁆𑀙𑀺𑀦𑁆𑀦𑀪𑀯𑀦𑁂𑀢𑁆𑀢𑀺𑀓𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄 𑀢𑀺𑀝𑁆𑀞𑀢𑀺. 𑀬𑀸𑀯𑀲𑁆𑀲 𑀓𑀸𑀬𑁄 𑀞𑀲𑁆𑀲𑀢𑀺, 𑀢𑀸𑀯 𑀦𑀁 𑀤𑀓𑁆𑀔𑀦𑁆𑀢𑀺 𑀤𑁂𑀯𑀫𑀦𑀼𑀲𑁆𑀲𑀸. 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀤𑁆𑀥𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸 𑀦 𑀦𑀁 𑀤𑀓𑁆𑀔𑀦𑁆𑀢𑀺 𑀤𑁂𑀯𑀫𑀦𑀼𑀲𑁆𑀲𑀸.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀫𑁆𑀩𑀧𑀺𑀡𑁆𑀟𑀺𑀬𑀸 𑀯𑀡𑁆𑀝𑀘𑁆𑀙𑀺𑀦𑁆𑀦𑀸𑀬 𑀬𑀸𑀦𑀺 𑀓𑀸𑀦𑀺𑀘𑀺 𑀅𑀫𑁆𑀩𑀸𑀦𑀺 𑀯𑀡𑁆𑀝𑀧𑀝𑀺𑀩𑀦𑁆𑀥𑀸𑀦𑀺 [𑀯𑀡𑁆𑀝𑀽𑀧𑀦𑀺𑀩𑀦𑁆𑀥𑀦𑀸𑀦𑀺 (𑀲𑀻. 𑀧𑀻.), 𑀯𑀡𑁆𑀟𑀧𑀝𑀺𑀩𑀤𑁆𑀥𑀸𑀦𑀺 (𑀓.)], 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀢𑀤𑀦𑁆𑀯𑀬𑀸𑀦𑀺 𑀪𑀯𑀦𑁆𑀢𑀺; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀉𑀘𑁆𑀙𑀺𑀦𑁆𑀦𑀪𑀯𑀦𑁂𑀢𑁆𑀢𑀺𑀓𑁄 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄 𑀢𑀺𑀝𑁆𑀞𑀢𑀺, 𑀬𑀸𑀯𑀲𑁆𑀲 𑀓𑀸𑀬𑁄 𑀞𑀲𑁆𑀲𑀢𑀺, 𑀢𑀸𑀯 𑀦𑀁 𑀤𑀓𑁆𑀔𑀦𑁆𑀢𑀺 𑀤𑁂𑀯𑀫𑀦𑀼𑀲𑁆𑀲𑀸, 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀤𑁆𑀥𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸 𑀦 𑀦𑀁 𑀤𑀓𑁆𑀔𑀦𑁆𑀢𑀺 𑀤𑁂𑀯𑀫𑀦𑀼𑀲𑁆𑀲𑀸’’𑀢𑀺.

𑁧𑁪𑁮. 𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂, 𑀓𑁄 𑀦𑀸𑀫𑁄 𑀅𑀬𑀁, 𑀪𑀦𑁆𑀢𑁂, 𑀥𑀫𑁆𑀫𑀧𑀭𑀺𑀬𑀸𑀬𑁄’’𑀢𑀺? ‘‘𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀆𑀦𑀦𑁆𑀤, 𑀇𑀫𑀁 𑀥𑀫𑁆𑀫𑀧𑀭𑀺𑀬𑀸𑀬𑀁 𑀅𑀢𑁆𑀣𑀚𑀸𑀮𑀦𑁆𑀢𑀺𑀧𑀺 𑀦𑀁 𑀥𑀸𑀭𑁂𑀳𑀺, 𑀥𑀫𑁆𑀫𑀚𑀸𑀮𑀦𑁆𑀢𑀺𑀧𑀺 𑀦𑀁 𑀥𑀸𑀭𑁂𑀳𑀺, 𑀩𑁆𑀭𑀳𑁆𑀫𑀚𑀸𑀮𑀦𑁆𑀢𑀺𑀧𑀺 𑀦𑀁 𑀥𑀸𑀭𑁂𑀳𑀺, 𑀤𑀺𑀝𑁆𑀞𑀺𑀚𑀸𑀮𑀦𑁆𑀢𑀺𑀧𑀺 𑀦𑀁 𑀥𑀸𑀭𑁂𑀳𑀺, 𑀅𑀦𑀼𑀢𑁆𑀢𑀭𑁄 𑀲𑀗𑁆𑀕𑀸𑀫𑀯𑀺𑀚𑀬𑁄𑀢𑀺𑀧𑀺 𑀦𑀁 𑀥𑀸𑀭𑁂𑀳𑀻’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸.

𑁧𑁪𑁯. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀯𑁂𑀬𑁆𑀬𑀸𑀓𑀭𑀡𑀲𑁆𑀫𑀺𑀁 𑀪𑀜𑁆𑀜𑀫𑀸𑀦𑁂 𑀤𑀲𑀲𑀳𑀲𑁆𑀲𑀻 [𑀲𑀳𑀲𑁆𑀲𑀻 (𑀓𑀢𑁆𑀣𑀘𑀺)] 𑀮𑁄𑀓𑀥𑀸𑀢𑀼 𑀅𑀓𑀫𑁆𑀧𑀺𑀢𑁆𑀣𑀸𑀢𑀺.

𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀧𑀞𑀫𑀁.

𑁨. 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀁

𑀭𑀸𑀚𑀸𑀫𑀘𑁆𑀘𑀓𑀣𑀸

𑁧𑁫𑁦. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀅𑀫𑁆𑀩𑀯𑀦𑁂 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀅𑀟𑁆𑀠𑀢𑁂𑀴𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀓𑁄𑀫𑀼𑀤𑀺𑀬𑀸 𑀘𑀸𑀢𑀼𑀫𑀸𑀲𑀺𑀦𑀺𑀬𑀸 𑀧𑀼𑀡𑁆𑀡𑀸𑀬 𑀧𑀼𑀡𑁆𑀡𑀫𑀸𑀬 𑀭𑀢𑁆𑀢𑀺𑀬𑀸 𑀭𑀸𑀚𑀸𑀫𑀘𑁆𑀘𑀧𑀭𑀺𑀯𑀼𑀢𑁄 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀢𑀤𑀳𑀼𑀧𑁄𑀲𑀣𑁂 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘𑀭𑀫𑀡𑀻𑀬𑀸 𑀯𑀢 𑀪𑁄 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀅𑀪𑀺𑀭𑀽𑀧𑀸 𑀯𑀢 𑀪𑁄 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀤𑀲𑁆𑀲𑀦𑀻𑀬𑀸 𑀯𑀢 𑀪𑁄 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀧𑀸𑀲𑀸𑀤𑀺𑀓𑀸 𑀯𑀢 𑀪𑁄 𑀤𑁄𑀲𑀺𑀦𑀸 𑀭𑀢𑁆𑀢𑀺, 𑀮𑀓𑁆𑀔𑀜𑁆𑀜𑀸 𑀯𑀢 𑀪𑁄 𑀤𑁄𑀲𑀺𑀦𑀸 𑀭𑀢𑁆𑀢𑀺. 𑀓𑀁 𑀦𑀼 𑀔𑁆𑀯𑀚𑁆𑀚 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀧𑀬𑀺𑀭𑀼𑀧𑀸𑀲𑁂𑀬𑁆𑀬𑀸𑀫, 𑀬𑀁 𑀦𑁄 𑀧𑀬𑀺𑀭𑀼𑀧𑀸𑀲𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑁂𑀬𑁆𑀬𑀸’’𑀢𑀺?

𑁧𑁫𑁧. 𑀏𑀯𑀁 𑀯𑀼𑀢𑁆𑀢𑁂, 𑀅𑀜𑁆𑀜𑀢𑀭𑁄 𑀭𑀸𑀚𑀸𑀫𑀘𑁆𑀘𑁄 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀅𑀚𑀸𑀢𑀲𑀢𑁆𑀢𑀼𑀁 𑀯𑁂𑀤𑁂𑀳𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁, 𑀤𑁂𑀯, 𑀧𑀽𑀭𑀡𑁄 𑀓𑀲𑁆𑀲𑀧𑁄 𑀲𑀗𑁆𑀖𑀻 𑀘𑁂𑀯 𑀕𑀡𑀻 𑀘 𑀕𑀡𑀸𑀘𑀭𑀺𑀬𑁄 𑀘 𑀜𑀸𑀢𑁄 𑀬𑀲𑀲𑁆𑀲𑀻 𑀢𑀺𑀢𑁆𑀣𑀓𑀭𑁄 𑀲𑀸𑀥𑀼𑀲𑀫𑁆𑀫𑀢𑁄 𑀩𑀳𑀼𑀚𑀦𑀲𑁆𑀲 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄. 𑀢𑀁 𑀤𑁂𑀯𑁄 𑀧𑀽𑀭𑀡𑀁 𑀓𑀲𑁆𑀲𑀧𑀁 𑀧𑀬𑀺𑀭𑀼𑀧𑀸𑀲𑀢𑀼. 𑀅𑀧𑁆𑀧𑁂𑀯 𑀦𑀸𑀫 𑀤𑁂𑀯𑀲𑁆𑀲 𑀧𑀽𑀭𑀡𑀁 𑀓𑀲𑁆𑀲𑀧𑀁 𑀧𑀬𑀺𑀭𑀼𑀧𑀸𑀲𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑁂𑀬𑁆𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑁧𑁫𑁨. 𑀅𑀜𑁆𑀜𑀢𑀭𑁄𑀧𑀺 𑀔𑁄 𑀭𑀸𑀚𑀸𑀫𑀘𑁆𑀘𑁄 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀅𑀚𑀸𑀢𑀲𑀢𑁆𑀢𑀼𑀁 𑀯𑁂𑀤𑁂𑀳𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁, 𑀤𑁂𑀯, 𑀫𑀓𑁆𑀔𑀮𑀺 𑀕𑁄𑀲𑀸𑀮𑁄 𑀲𑀗𑁆𑀖𑀻 𑀘𑁂𑀯 𑀕𑀡𑀻 𑀘 𑀕𑀡𑀸𑀘𑀭𑀺𑀬𑁄 𑀘 𑀜𑀸𑀢𑁄 𑀬𑀲𑀲𑁆𑀲𑀻 𑀢𑀺𑀢𑁆𑀣𑀓𑀭𑁄 𑀲𑀸𑀥𑀼𑀲𑀫𑁆𑀫𑀢𑁄 𑀩𑀳𑀼𑀚𑀦𑀲𑁆𑀲 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄. 𑀢𑀁 𑀤𑁂𑀯𑁄 𑀫𑀓𑁆𑀔𑀮𑀺𑀁 𑀕𑁄𑀲𑀸𑀮𑀁 𑀧𑀬𑀺𑀭𑀼𑀧𑀸𑀲𑀢𑀼. 𑀅𑀧𑁆𑀧𑁂𑀯 𑀦𑀸𑀫 𑀤𑁂𑀯𑀲𑁆𑀲 𑀫𑀓𑁆𑀔𑀮𑀺𑀁 𑀕𑁄𑀲𑀸𑀮𑀁 𑀧𑀬𑀺𑀭𑀼𑀧𑀸𑀲𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑁂𑀬𑁆𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑁧𑁫𑁩. 𑀅𑀜𑁆𑀜𑀢𑀭𑁄𑀧𑀺 𑀔𑁄 𑀭𑀸𑀚𑀸𑀫𑀘𑁆𑀘𑁄 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀅𑀚𑀸𑀢𑀲𑀢𑁆𑀢𑀼𑀁 𑀯𑁂𑀤𑁂𑀳𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁, 𑀤𑁂𑀯, 𑀅𑀚𑀺𑀢𑁄 𑀓𑁂𑀲𑀓𑀫𑁆𑀩𑀮𑁄 𑀲𑀗𑁆𑀖𑀻 𑀘𑁂𑀯 𑀕𑀡𑀻 𑀘 𑀕𑀡𑀸𑀘𑀭𑀺𑀬𑁄 𑀘 𑀜𑀸𑀢𑁄 𑀬𑀲𑀲𑁆𑀲𑀻 𑀢𑀺𑀢𑁆𑀣𑀓𑀭𑁄 𑀲𑀸𑀥𑀼𑀲𑀫𑁆𑀫𑀢𑁄 𑀩𑀳𑀼𑀚𑀦𑀲𑁆𑀲 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄. 𑀢𑀁 𑀤𑁂𑀯𑁄 𑀅𑀚𑀺𑀢𑀁 𑀓𑁂𑀲𑀓𑀫𑁆𑀩𑀮𑀁 𑀧𑀬𑀺𑀭𑀼𑀧𑀸𑀲𑀢𑀼. 𑀅𑀧𑁆𑀧𑁂𑀯 𑀦𑀸𑀫 𑀤𑁂𑀯𑀲𑁆𑀲 𑀅𑀚𑀺𑀢𑀁 𑀓𑁂𑀲𑀓𑀫𑁆𑀩𑀮𑀁 𑀧𑀬𑀺𑀭𑀼𑀧𑀸𑀲𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑁂𑀬𑁆𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑁧𑁫𑁪. 𑀅𑀜𑁆𑀜𑀢𑀭𑁄𑀧𑀺 𑀔𑁄 𑀭𑀸𑀚𑀸𑀫𑀘𑁆𑀘𑁄 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀅𑀚𑀸𑀢𑀲𑀢𑁆𑀢𑀼𑀁 𑀯𑁂𑀤𑁂𑀳𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁, 𑀤𑁂𑀯, 𑀧𑀓𑀼𑀥𑁄 [𑀧𑀓𑀼𑀤𑁆𑀥𑁄 (𑀲𑀻.)] 𑀓𑀘𑁆𑀘𑀸𑀬𑀦𑁄 𑀲𑀗𑁆𑀖𑀻 𑀘𑁂𑀯 𑀕𑀡𑀻 𑀘 𑀕𑀡𑀸𑀘𑀭𑀺𑀬𑁄 𑀘 𑀜𑀸𑀢𑁄 𑀬𑀲𑀲𑁆𑀲𑀻 𑀢𑀺𑀢𑁆𑀣𑀓𑀭𑁄 𑀲𑀸𑀥𑀼𑀲𑀫𑁆𑀫𑀢𑁄 𑀩𑀳𑀼𑀚𑀦𑀲𑁆𑀲 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄. 𑀢𑀁 𑀤𑁂𑀯𑁄 𑀧𑀓𑀼𑀥𑀁 𑀓𑀘𑁆𑀘𑀸𑀬𑀦𑀁 𑀧𑀬𑀺𑀭𑀼𑀧𑀸𑀲𑀢𑀼. 𑀅𑀧𑁆𑀧𑁂𑀯 𑀦𑀸𑀫 𑀤𑁂𑀯𑀲𑁆𑀲 𑀧𑀓𑀼𑀥𑀁 𑀓𑀘𑁆𑀘𑀸𑀬𑀦𑀁 𑀧𑀬𑀺𑀭𑀼𑀧𑀸𑀲𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑁂𑀬𑁆𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑁧𑁫𑁫. 𑀅𑀜𑁆𑀜𑀢𑀭𑁄𑀧𑀺 𑀔𑁄 𑀭𑀸𑀚𑀸𑀫𑀘𑁆𑀘𑁄 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀅𑀚𑀸𑀢𑀲𑀢𑁆𑀢𑀼𑀁 𑀯𑁂𑀤𑁂𑀳𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁, 𑀤𑁂𑀯, 𑀲𑀜𑁆𑀘𑀬𑁄 [𑀲𑀜𑁆𑀚𑀬𑁄 (𑀲𑀻. 𑀲𑁆𑀬𑀸.)] 𑀩𑁂𑀮𑀝𑁆𑀞𑀧𑀼𑀢𑁆𑀢𑁄 [𑀩𑁂𑀮𑁆𑀮𑀝𑁆𑀞𑀺𑀧𑀼𑀢𑁆𑀢𑁄 (𑀲𑀻.), 𑀯𑁂𑀮𑀝𑁆𑀞𑀧𑀼𑀢𑁆𑀢𑁄 (𑀲𑁆𑀬𑀸.)] 𑀲𑀗𑁆𑀖𑀻 𑀘𑁂𑀯 𑀕𑀡𑀻 𑀘 𑀕𑀡𑀸𑀘𑀭𑀺𑀬𑁄 𑀘 𑀜𑀸𑀢𑁄 𑀬𑀲𑀲𑁆𑀲𑀻 𑀢𑀺𑀢𑁆𑀣𑀓𑀭𑁄 𑀲𑀸𑀥𑀼𑀲𑀫𑁆𑀫𑀢𑁄 𑀩𑀳𑀼𑀚𑀦𑀲𑁆𑀲 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄. 𑀢𑀁 𑀤𑁂𑀯𑁄 𑀲𑀜𑁆𑀘𑀬𑀁 𑀩𑁂𑀮𑀝𑁆𑀞𑀧𑀼𑀢𑁆𑀢𑀁 𑀧𑀬𑀺𑀭𑀼𑀧𑀸𑀲𑀢𑀼. 𑀅𑀧𑁆𑀧𑁂𑀯 𑀦𑀸𑀫 𑀤𑁂𑀯𑀲𑁆𑀲 𑀲𑀜𑁆𑀘𑀬𑀁 𑀩𑁂𑀮𑀝𑁆𑀞𑀧𑀼𑀢𑁆𑀢𑀁 𑀧𑀬𑀺𑀭𑀼𑀧𑀸𑀲𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑁂𑀬𑁆𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑁧𑁫𑁬. 𑀅𑀜𑁆𑀜𑀢𑀭𑁄𑀧𑀺 𑀔𑁄 𑀭𑀸𑀚𑀸𑀫𑀘𑁆𑀘𑁄 𑀭𑀸𑀚𑀸𑀦𑀁 𑀫𑀸𑀕𑀥𑀁 𑀅𑀚𑀸𑀢𑀲𑀢𑁆𑀢𑀼𑀁 𑀯𑁂𑀤𑁂𑀳𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁, 𑀤𑁂𑀯, 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 [𑀦𑀸𑀣𑀧𑀼𑀢𑁆𑀢𑁄 (𑀲𑀻.), 𑀦𑀸𑀢𑀧𑀼𑀢𑁆𑀢𑁄 (𑀧𑀻.)] 𑀲𑀗𑁆𑀖𑀻 𑀘𑁂𑀯 𑀕𑀡𑀻 𑀘 𑀕𑀡𑀸𑀘𑀭𑀺𑀬𑁄 𑀘 𑀜𑀸𑀢𑁄 𑀬𑀲𑀲𑁆𑀲𑀻 𑀢𑀺𑀢𑁆𑀣𑀓𑀭𑁄 𑀲𑀸𑀥𑀼𑀲𑀫𑁆𑀫𑀢𑁄 𑀩𑀳𑀼𑀚𑀦𑀲𑁆𑀲 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄. 𑀢𑀁 𑀤𑁂𑀯𑁄 𑀦𑀺𑀕𑀡𑁆𑀞𑀁 𑀦𑀸𑀝𑀧𑀼𑀢𑁆𑀢𑀁 𑀧𑀬𑀺𑀭𑀼𑀧𑀸𑀲𑀢𑀼. 𑀅𑀧𑁆𑀧𑁂𑀯 𑀦𑀸𑀫 𑀤𑁂𑀯𑀲𑁆𑀲 𑀦𑀺𑀕𑀡𑁆𑀞𑀁 𑀦𑀸𑀝𑀧𑀼𑀢𑁆𑀢𑀁 𑀧𑀬𑀺𑀭𑀼𑀧𑀸𑀲𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑁂𑀬𑁆𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑀓𑁄𑀫𑀸𑀭𑀪𑀘𑁆𑀘𑀚𑀻𑀯𑀓𑀓𑀣𑀸

𑁧𑁫𑁭. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀅𑀯𑀺𑀤𑀽𑀭𑁂 𑀢𑀼𑀡𑁆𑀳𑀻𑀪𑀽𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀢𑁆𑀯𑀁 𑀧𑀦, 𑀲𑀫𑁆𑀫 𑀚𑀻𑀯𑀓, 𑀓𑀺𑀁 𑀢𑀼𑀡𑁆𑀳𑀻’’𑀢𑀺? ‘‘𑀅𑀬𑀁, 𑀤𑁂𑀯, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀫𑁆𑀳𑀸𑀓𑀁 𑀅𑀫𑁆𑀩𑀯𑀦𑁂 𑀯𑀺𑀳𑀭𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀅𑀟𑁆𑀠𑀢𑁂𑀴𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀢𑀁 𑀔𑁄 𑀧𑀦 𑀪𑀕𑀯𑀦𑁆𑀢𑀁 [𑀪𑀕𑀯𑀦𑁆𑀢𑀁 𑀕𑁄𑀢𑀫𑀁 (𑀲𑀻. 𑀓. 𑀧𑀻.)] 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀢𑀁 𑀤𑁂𑀯𑁄 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀢𑀼. 𑀅𑀧𑁆𑀧𑁂𑀯 𑀦𑀸𑀫 𑀤𑁂𑀯𑀲𑁆𑀲 𑀪𑀕𑀯𑀦𑁆𑀢𑀁 𑀧𑀬𑀺𑀭𑀼𑀧𑀸𑀲𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑁂𑀬𑁆𑀬𑀸’𑀢𑀺.

𑁧𑁫𑁮. ‘‘𑀢𑁂𑀦 𑀳𑀺, 𑀲𑀫𑁆𑀫 𑀚𑀻𑀯𑀓, 𑀳𑀢𑁆𑀣𑀺𑀬𑀸𑀦𑀸𑀦𑀺 𑀓𑀧𑁆𑀧𑀸𑀧𑁂𑀳𑀻’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀚𑀻𑀯𑀓𑁄 𑀓𑁄𑀫𑀸𑀭𑀪𑀘𑁆𑀘𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀧𑀜𑁆𑀘𑀫𑀢𑁆𑀢𑀸𑀦𑀺 𑀳𑀢𑁆𑀣𑀺𑀦𑀺𑀓𑀸𑀲𑀢𑀸𑀦𑀺 𑀓𑀧𑁆𑀧𑀸𑀧𑁂𑀢𑁆𑀯𑀸 𑀭𑀜𑁆𑀜𑁄 𑀘 𑀆𑀭𑁄𑀳𑀡𑀻𑀬𑀁 𑀦𑀸𑀕𑀁, 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀧𑀝𑀺𑀯𑁂𑀤𑁂𑀲𑀺 𑁋 ‘‘𑀓𑀧𑁆𑀧𑀺𑀢𑀸𑀦𑀺 𑀔𑁄 𑀢𑁂, 𑀤𑁂𑀯, 𑀳𑀢𑁆𑀣𑀺𑀬𑀸𑀦𑀸𑀦𑀺, 𑀬𑀲𑁆𑀲𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺.

𑁧𑁫𑁯. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀧𑀜𑁆𑀘𑀲𑀼 𑀳𑀢𑁆𑀣𑀺𑀦𑀺𑀓𑀸𑀲𑀢𑁂𑀲𑀼 𑀧𑀘𑁆𑀘𑁂𑀓𑀸 𑀇𑀢𑁆𑀣𑀺𑀬𑁄 𑀆𑀭𑁄𑀧𑁂𑀢𑁆𑀯𑀸 𑀆𑀭𑁄𑀳𑀡𑀻𑀬𑀁 𑀦𑀸𑀕𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀉𑀓𑁆𑀓𑀸𑀲𑀼 𑀥𑀸𑀭𑀺𑀬𑀫𑀸𑀦𑀸𑀲𑀼 𑀭𑀸𑀚𑀕𑀳𑀫𑁆𑀳𑀸 𑀦𑀺𑀬𑁆𑀬𑀸𑀲𑀺 𑀫𑀳𑀘𑁆𑀘𑀭𑀸𑀚𑀸𑀦𑀼𑀪𑀸𑀯𑁂𑀦, 𑀬𑁂𑀦 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀅𑀫𑁆𑀩𑀯𑀦𑀁 𑀢𑁂𑀦 𑀧𑀸𑀬𑀸𑀲𑀺.

𑀅𑀣 𑀔𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀅𑀯𑀺𑀤𑀽𑀭𑁂 𑀅𑀫𑁆𑀩𑀯𑀦𑀲𑁆𑀲 𑀅𑀳𑀼𑀤𑁂𑀯 𑀪𑀬𑀁, 𑀅𑀳𑀼 𑀙𑀫𑁆𑀪𑀺𑀢𑀢𑁆𑀢𑀁, 𑀅𑀳𑀼 𑀮𑁄𑀫𑀳𑀁𑀲𑁄. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀪𑀻𑀢𑁄 𑀲𑀁𑀯𑀺𑀕𑁆𑀕𑁄 𑀮𑁄𑀫𑀳𑀝𑁆𑀞𑀚𑀸𑀢𑁄 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺 𑀫𑀁, 𑀲𑀫𑁆𑀫 𑀚𑀻𑀯𑀓, 𑀦 𑀯𑀜𑁆𑀘𑁂𑀲𑀺? 𑀓𑀘𑁆𑀘𑀺 𑀫𑀁, 𑀲𑀫𑁆𑀫 𑀚𑀻𑀯𑀓, 𑀦 𑀧𑀮𑀫𑁆𑀪𑁂𑀲𑀺? 𑀓𑀘𑁆𑀘𑀺 𑀫𑀁, 𑀲𑀫𑁆𑀫 𑀚𑀻𑀯𑀓, 𑀦 𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀤𑁂𑀲𑀺? 𑀓𑀣𑀜𑁆𑀳𑀺 𑀦𑀸𑀫 𑀢𑀸𑀯 𑀫𑀳𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀟𑁆𑀠𑀢𑁂𑀴𑀲𑀸𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀦𑁂𑀯 𑀔𑀺𑀧𑀺𑀢𑀲𑀤𑁆𑀤𑁄 𑀪𑀯𑀺𑀲𑁆𑀲𑀢𑀺, 𑀦 𑀉𑀓𑁆𑀓𑀸𑀲𑀺𑀢𑀲𑀤𑁆𑀤𑁄 𑀦 𑀦𑀺𑀕𑁆𑀖𑁄𑀲𑁄’’𑀢𑀺.

‘‘𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚, 𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚. 𑀦 𑀢𑀁 𑀤𑁂𑀯, 𑀯𑀜𑁆𑀘𑁂𑀫𑀺; 𑀦 𑀢𑀁, 𑀤𑁂𑀯, 𑀧𑀮𑀫𑁆𑀪𑀸𑀫𑀺; 𑀦 𑀢𑀁, 𑀤𑁂𑀯, 𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀤𑁂𑀫𑀺. 𑀅𑀪𑀺𑀓𑁆𑀓𑀫, 𑀫𑀳𑀸𑀭𑀸𑀚, 𑀅𑀪𑀺𑀓𑁆𑀓𑀫, 𑀫𑀳𑀸𑀭𑀸𑀚, 𑀏𑀢𑁂 𑀫𑀡𑁆𑀟𑀮𑀫𑀸𑀴𑁂 𑀤𑀻𑀧𑀸 [𑀧𑀤𑀻𑀧𑀸 (𑀲𑀻. 𑀲𑁆𑀬𑀸.)] 𑀛𑀸𑀬𑀦𑁆𑀢𑀻’’𑀢𑀺.

𑀲𑀸𑀫𑀜𑁆𑀜𑀨𑀮𑀧𑀼𑀘𑁆𑀙𑀸

𑁧𑁬𑁦. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀬𑀸𑀯𑀢𑀺𑀓𑀸 𑀦𑀸𑀕𑀲𑁆𑀲 𑀪𑀽𑀫𑀺 𑀦𑀸𑀕𑁂𑀦 𑀕𑀦𑁆𑀢𑁆𑀯𑀸, 𑀦𑀸𑀕𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸, 𑀧𑀢𑁆𑀢𑀺𑀓𑁄𑀯 [𑀧𑀤𑀺𑀓𑁄𑀯 (𑀲𑁆𑀬𑀸.)] 𑀬𑁂𑀦 𑀫𑀡𑁆𑀟𑀮𑀫𑀸𑀴𑀲𑁆𑀲 𑀤𑁆𑀯𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀚𑀻𑀯𑀓𑀁 𑀓𑁄𑀫𑀸𑀭𑀪𑀘𑁆𑀘𑀁 𑀏𑀢𑀤𑀯𑁄𑀘 𑁋 ‘‘𑀓𑀳𑀁 𑀧𑀦, 𑀲𑀫𑁆𑀫 𑀚𑀻𑀯𑀓, 𑀪𑀕𑀯𑀸’’𑀢𑀺? ‘‘𑀏𑀲𑁄, 𑀫𑀳𑀸𑀭𑀸𑀚, 𑀪𑀕𑀯𑀸; 𑀏𑀲𑁄, 𑀫𑀳𑀸𑀭𑀸𑀚, 𑀪𑀕𑀯𑀸 𑀫𑀚𑁆𑀛𑀺𑀫𑀁 𑀣𑀫𑁆𑀪𑀁 𑀦𑀺𑀲𑁆𑀲𑀸𑀬 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀺𑀦𑁆𑀦𑁄 𑀧𑀼𑀭𑀓𑁆𑀔𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀸’’𑀢𑀺.

𑁧𑁬𑁧. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀢𑀼𑀡𑁆𑀳𑀻𑀪𑀽𑀢𑀁 𑀢𑀼𑀡𑁆𑀳𑀻𑀪𑀽𑀢𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀭𑀳𑀤𑀫𑀺𑀯 𑀯𑀺𑀧𑁆𑀧𑀲𑀦𑁆𑀦𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘𑀇𑀫𑀺𑀦𑀸 𑀫𑁂 𑀉𑀧𑀲𑀫𑁂𑀦 𑀉𑀤𑀬𑀪𑀤𑁆𑀤𑁄 [𑀉𑀤𑀸𑀬𑀺𑀪𑀤𑁆𑀤𑁄 (𑀲𑀻. 𑀧𑀻.)] 𑀓𑀼𑀫𑀸𑀭𑁄 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀼, 𑀬𑁂𑀦𑁂𑀢𑀭𑀳𑀺 𑀉𑀧𑀲𑀫𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀫𑀦𑁆𑀦𑀸𑀕𑀢𑁄’’𑀢𑀺. ‘‘𑀅𑀕𑀫𑀸 𑀔𑁄 𑀢𑁆𑀯𑀁, 𑀫𑀳𑀸𑀭𑀸𑀚, 𑀬𑀣𑀸𑀧𑁂𑀫’’𑀦𑁆𑀢𑀺. ‘‘𑀧𑀺𑀬𑁄 𑀫𑁂, 𑀪𑀦𑁆𑀢𑁂, 𑀉𑀤𑀬𑀪𑀤𑁆𑀤𑁄 𑀓𑀼𑀫𑀸𑀭𑁄. 𑀇𑀫𑀺𑀦𑀸 𑀫𑁂, 𑀪𑀦𑁆𑀢𑁂, 𑀉𑀧𑀲𑀫𑁂𑀦 𑀉𑀤𑀬𑀪𑀤𑁆𑀤𑁄 𑀓𑀼𑀫𑀸𑀭𑁄 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀼 𑀬𑁂𑀦𑁂𑀢𑀭𑀳𑀺 𑀉𑀧𑀲𑀫𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀫𑀦𑁆𑀦𑀸𑀕𑀢𑁄’’𑀢𑀺.

𑁧𑁬𑁨. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸, 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀼𑀘𑁆𑀙𑁂𑀬𑁆𑀬𑀸𑀫𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀓𑀺𑀜𑁆𑀘𑀺𑀤𑁂𑀯 𑀤𑁂𑀲𑀁 [𑀓𑀺𑀜𑁆𑀘𑀺𑀤𑁂𑀯 𑀤𑁂𑀲𑀁 𑀮𑁂𑀲𑀫𑀢𑁆𑀢𑀁 (𑀲𑁆𑀬𑀸. 𑀓𑀁. 𑀓.)]; 𑀲𑀘𑁂 𑀫𑁂 𑀪𑀕𑀯𑀸 𑀑𑀓𑀸𑀲𑀁 𑀓𑀭𑁄𑀢𑀺 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀸𑀬𑀸’’𑀢𑀺. ‘‘𑀧𑀼𑀘𑁆𑀙, 𑀫𑀳𑀸𑀭𑀸𑀚, 𑀬𑀤𑀸𑀓𑀗𑁆𑀔𑀲𑀻’’𑀢𑀺.

𑁧𑁬𑁩. ‘‘𑀬𑀣𑀸 𑀦𑀼 𑀔𑁄 𑀇𑀫𑀸𑀦𑀺, 𑀪𑀦𑁆𑀢𑁂, 𑀧𑀼𑀣𑀼𑀲𑀺𑀧𑁆𑀧𑀸𑀬𑀢𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀳𑀢𑁆𑀣𑀸𑀭𑁄𑀳𑀸 𑀅𑀲𑁆𑀲𑀸𑀭𑁄𑀳𑀸 𑀭𑀣𑀺𑀓𑀸 𑀥𑀦𑀼𑀕𑁆𑀕𑀳𑀸 𑀘𑁂𑀮𑀓𑀸 𑀘𑀮𑀓𑀸 𑀧𑀺𑀡𑁆𑀟𑀤𑀸𑀬𑀓𑀸 𑀉𑀕𑁆𑀕𑀸 𑀭𑀸𑀚𑀧𑀼𑀢𑁆𑀢𑀸 𑀧𑀓𑁆𑀔𑀦𑁆𑀤𑀺𑀦𑁄 𑀫𑀳𑀸𑀦𑀸𑀕𑀸 𑀲𑀽𑀭𑀸 𑀘𑀫𑁆𑀫𑀬𑁄𑀥𑀺𑀦𑁄 𑀤𑀸𑀲𑀺𑀓𑀧𑀼𑀢𑁆𑀢𑀸 𑀆𑀴𑀸𑀭𑀺𑀓𑀸 𑀓𑀧𑁆𑀧𑀓𑀸 𑀦𑁆𑀳𑀸𑀧𑀓𑀸 [𑀦𑀳𑀸𑀧𑀺𑀓𑀸 (𑀲𑀻.), 𑀦𑁆𑀳𑀸𑀧𑀺𑀓𑀸 (𑀲𑁆𑀬𑀸.)] 𑀲𑀽𑀤𑀸 𑀫𑀸𑀮𑀸𑀓𑀸𑀭𑀸 𑀭𑀚𑀓𑀸 𑀧𑁂𑀲𑀓𑀸𑀭𑀸 𑀦𑀴𑀓𑀸𑀭𑀸 𑀓𑀼𑀫𑁆𑀪𑀓𑀸𑀭𑀸 𑀕𑀡𑀓𑀸 𑀫𑀼𑀤𑁆𑀤𑀺𑀓𑀸, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀏𑀯𑀁𑀕𑀢𑀸𑀦𑀺 𑀧𑀼𑀣𑀼𑀲𑀺𑀧𑁆𑀧𑀸𑀬𑀢𑀦𑀸𑀦𑀺, 𑀢𑁂 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀺𑀧𑁆𑀧𑀨𑀮𑀁 𑀉𑀧𑀚𑀻𑀯𑀦𑁆𑀢𑀺; 𑀢𑁂 𑀢𑁂𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀦𑁆𑀢𑀺 𑀧𑀻𑀡𑁂𑀦𑁆𑀢𑀺 [𑀧𑀻𑀦𑁂𑀦𑁆𑀢𑀺 (𑀓𑀢𑁆𑀣𑀘𑀺)], 𑀫𑀸𑀢𑀸𑀧𑀺𑀢𑀭𑁄 𑀲𑀼𑀔𑁂𑀦𑁆𑀢𑀺 𑀧𑀻𑀡𑁂𑀦𑁆𑀢𑀺, 𑀧𑀼𑀢𑁆𑀢𑀤𑀸𑀭𑀁 𑀲𑀼𑀔𑁂𑀦𑁆𑀢𑀺 𑀧𑀻𑀡𑁂𑀦𑁆𑀢𑀺, 𑀫𑀺𑀢𑁆𑀢𑀸𑀫𑀘𑁆𑀘𑁂 𑀲𑀼𑀔𑁂𑀦𑁆𑀢𑀺 𑀧𑀻𑀡𑁂𑀦𑁆𑀢𑀺, 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 [𑀲𑀫𑀡𑁂𑀲𑀼 𑀩𑁆𑀭𑀸𑀳𑁆𑀫𑀡𑁂𑀲𑀼 (𑀓.)] 𑀉𑀤𑁆𑀥𑀕𑁆𑀕𑀺𑀓𑀁 𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀧𑁂𑀦𑁆𑀢𑀺 𑀲𑁄𑀯𑀕𑁆𑀕𑀺𑀓𑀁 𑀲𑀼𑀔𑀯𑀺𑀧𑀸𑀓𑀁 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁. 𑀲𑀓𑁆𑀓𑀸 𑀦𑀼 𑀔𑁄, 𑀪𑀦𑁆𑀢𑁂, 𑀏𑀯𑀫𑁂𑀯 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀜𑁆𑀜𑀧𑁂𑀢𑀼’’𑀦𑁆𑀢𑀺?

𑁧𑁬𑁪. ‘‘𑀅𑀪𑀺𑀚𑀸𑀦𑀸𑀲𑀺 𑀦𑁄 𑀢𑁆𑀯𑀁, 𑀫𑀳𑀸𑀭𑀸𑀚, 𑀇𑀫𑀁 𑀧𑀜𑁆𑀳𑀁 𑀅𑀜𑁆𑀜𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀧𑀼𑀘𑁆𑀙𑀺𑀢𑀸’’𑀢𑀺? ‘‘𑀅𑀪𑀺𑀚𑀸𑀦𑀸𑀫𑀳𑀁, 𑀪𑀦𑁆𑀢𑁂, 𑀇𑀫𑀁 𑀧𑀜𑁆𑀳𑀁 𑀅𑀜𑁆𑀜𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀧𑀼𑀘𑁆𑀙𑀺𑀢𑀸’’𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑁂, 𑀫𑀳𑀸𑀭𑀸𑀚, 𑀩𑁆𑀬𑀸𑀓𑀭𑀺𑀁𑀲𑀼, 𑀲𑀘𑁂 𑀢𑁂 𑀅𑀕𑀭𑀼 𑀪𑀸𑀲𑀲𑁆𑀲𑀽’’𑀢𑀺. ‘‘𑀦 𑀔𑁄 𑀫𑁂, 𑀪𑀦𑁆𑀢𑁂, 𑀕𑀭𑀼, 𑀬𑀢𑁆𑀣𑀲𑁆𑀲 𑀪𑀕𑀯𑀸 𑀦𑀺𑀲𑀺𑀦𑁆𑀦𑁄, 𑀪𑀕𑀯𑀦𑁆𑀢𑀭𑀽𑀧𑁄 𑀯𑀸’’𑀢𑀺 [𑀘𑀸𑀢𑀺 (𑀲𑀻. 𑀓.)]. ‘‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀪𑀸𑀲𑀲𑁆𑀲𑀽’’𑀢𑀺.

𑀧𑀽𑀭𑀡𑀓𑀲𑁆𑀲𑀧𑀯𑀸𑀤𑁄

𑁧𑁬𑁫. ‘‘𑀏𑀓𑀫𑀺𑀤𑀸𑀳𑀁, 𑀪𑀦𑁆𑀢𑁂, 𑀲𑀫𑀬𑀁 𑀬𑁂𑀦 𑀧𑀽𑀭𑀡𑁄 𑀓𑀲𑁆𑀲𑀧𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀽𑀭𑀡𑁂𑀦 𑀓𑀲𑁆𑀲𑀧𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀧𑀽𑀭𑀡𑀁 𑀓𑀲𑁆𑀲𑀧𑀁 𑀏𑀢𑀤𑀯𑁄𑀘𑀁 𑁋 ‘𑀬𑀣𑀸 𑀦𑀼 𑀔𑁄 𑀇𑀫𑀸𑀦𑀺, 𑀪𑁄 𑀓𑀲𑁆𑀲𑀧, 𑀧𑀼𑀣𑀼𑀲𑀺𑀧𑁆𑀧𑀸𑀬𑀢𑀦𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀳𑀢𑁆𑀣𑀸𑀭𑁄𑀳𑀸 𑀅𑀲𑁆𑀲𑀸𑀭𑁄𑀳𑀸 𑀭𑀣𑀺𑀓𑀸 𑀥𑀦𑀼𑀕𑁆𑀕𑀳𑀸 𑀘𑁂𑀮𑀓𑀸 𑀘𑀮𑀓𑀸 𑀧𑀺𑀡𑁆𑀟𑀤𑀸𑀬𑀓𑀸 𑀉𑀕𑁆𑀕𑀸 𑀭𑀸𑀚𑀧𑀼𑀢𑁆𑀢𑀸 𑀧𑀓𑁆𑀔𑀦𑁆𑀤𑀺𑀦𑁄 𑀫𑀳𑀸𑀦𑀸𑀕𑀸 𑀲𑀽𑀭𑀸 𑀘𑀫𑁆𑀫𑀬𑁄𑀥𑀺𑀦𑁄 𑀤𑀸𑀲𑀺𑀓𑀧𑀼𑀢𑁆𑀢𑀸 𑀆𑀴𑀸𑀭𑀺𑀓𑀸 𑀓𑀧𑁆𑀧𑀓𑀸 𑀦𑁆𑀳𑀸𑀧𑀓𑀸 𑀲𑀽𑀤𑀸 𑀫𑀸𑀮𑀸𑀓𑀸𑀭𑀸 𑀭𑀚𑀓𑀸 𑀧𑁂𑀲𑀓𑀸𑀭𑀸 𑀦𑀴𑀓𑀸𑀭𑀸 𑀓𑀼𑀫𑁆𑀪𑀓𑀸𑀭𑀸 𑀕𑀡𑀓𑀸 𑀫𑀼𑀤𑁆𑀤𑀺𑀓𑀸, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀏𑀯𑀁𑀕𑀢𑀸𑀦𑀺 𑀧𑀼𑀣𑀼𑀲𑀺𑀧𑁆𑀧𑀸𑀬𑀢𑀦𑀸𑀦𑀺- 𑀢𑁂 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀺𑀧𑁆𑀧𑀨𑀮𑀁 𑀉𑀧𑀚𑀻𑀯𑀦𑁆𑀢𑀺; 𑀢𑁂 𑀢𑁂𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀦𑁆𑀢𑀺 𑀧𑀻𑀡𑁂𑀦𑁆𑀢𑀺, 𑀫𑀸𑀢𑀸𑀧𑀺𑀢𑀭𑁄 𑀲𑀼𑀔𑁂𑀦𑁆𑀢𑀺 𑀧𑀻𑀡𑁂𑀦𑁆𑀢𑀺, 𑀧𑀼𑀢𑁆𑀢𑀤𑀸𑀭𑀁 𑀲𑀼𑀔𑁂𑀦𑁆𑀢𑀺 𑀧𑀻𑀡𑁂𑀦𑁆𑀢𑀺, 𑀫𑀺𑀢𑁆𑀢𑀸𑀫𑀘𑁆𑀘𑁂 𑀲𑀼𑀔𑁂𑀦𑁆𑀢𑀺 𑀧𑀻𑀡𑁂𑀦𑁆𑀢𑀺, 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀉𑀤𑁆𑀥𑀕𑁆𑀕𑀺𑀓𑀁 𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀧𑁂𑀦𑁆𑀢𑀺 𑀲𑁄𑀯𑀕𑁆𑀕𑀺𑀓𑀁 𑀲𑀼𑀔𑀯𑀺𑀧𑀸𑀓𑀁 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁. 𑀲𑀓𑁆𑀓𑀸 𑀦𑀼 𑀔𑁄, 𑀪𑁄 𑀓𑀲𑁆𑀲𑀧, 𑀏𑀯𑀫𑁂𑀯 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀜𑁆𑀜𑀧𑁂𑀢𑀼’𑀦𑁆𑀢𑀺?

𑁧𑁬𑁬. ‘‘𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀧𑀽𑀭𑀡𑁄 𑀓𑀲𑁆𑀲𑀧𑁄 𑀫𑀁 𑀏𑀢𑀤𑀯𑁄𑀘 𑁋 ‘𑀓𑀭𑁄𑀢𑁄 𑀔𑁄, 𑀫𑀳𑀸𑀭𑀸𑀚, 𑀓𑀸𑀭𑀬𑀢𑁄, 𑀙𑀺𑀦𑁆𑀤𑀢𑁄 𑀙𑁂𑀤𑀸𑀧𑀬𑀢𑁄, 𑀧𑀘𑀢𑁄 𑀧𑀸𑀘𑀸𑀧𑀬𑀢𑁄 𑀲𑁄𑀘𑀬𑀢𑁄, 𑀲𑁄𑀘𑀸𑀧𑀬𑀢𑁄, 𑀓𑀺𑀮𑀫𑀢𑁄 𑀓𑀺𑀮𑀫𑀸𑀧𑀬𑀢𑁄, 𑀨𑀦𑁆𑀤𑀢𑁄 𑀨𑀦𑁆𑀤𑀸𑀧𑀬𑀢𑁄, 𑀧𑀸𑀡𑀫𑀢𑀺𑀧𑀸𑀢𑀸𑀧𑀬𑀢𑁄, 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑁄, 𑀲𑀦𑁆𑀥𑀺𑀁 𑀙𑀺𑀦𑁆𑀤𑀢𑁄, 𑀦𑀺𑀮𑁆𑀮𑁄𑀧𑀁 𑀳𑀭𑀢𑁄, 𑀏𑀓𑀸𑀕𑀸𑀭𑀺𑀓𑀁 𑀓𑀭𑁄𑀢𑁄, 𑀧𑀭𑀺𑀧𑀦𑁆𑀣𑁂 𑀢𑀺𑀝𑁆𑀞𑀢𑁄, 𑀧𑀭𑀤𑀸𑀭𑀁 𑀕𑀘𑁆𑀙𑀢𑁄, 𑀫𑀼𑀲𑀸 𑀪𑀡𑀢𑁄, 𑀓𑀭𑁄𑀢𑁄 𑀦 𑀓𑀭𑀻𑀬𑀢𑀺 𑀧𑀸𑀧𑀁. 𑀔𑀼𑀭𑀧𑀭𑀺𑀬𑀦𑁆𑀢𑁂𑀦 𑀘𑁂𑀧𑀺 𑀘𑀓𑁆𑀓𑁂𑀦 𑀬𑁄 𑀇𑀫𑀺𑀲𑁆𑀲𑀸 𑀧𑀣𑀯𑀺𑀬𑀸 𑀧𑀸𑀡𑁂 𑀏𑀓𑀁 𑀫𑀁𑀲𑀔𑀮𑀁 𑀏𑀓𑀁 𑀫𑀁𑀲𑀧𑀼𑀜𑁆𑀚𑀁 𑀓𑀭𑁂𑀬𑁆𑀬, 𑀦𑀢𑁆𑀣𑀺 𑀢𑀢𑁄𑀦𑀺𑀤𑀸𑀦𑀁 𑀧𑀸𑀧𑀁, 𑀦𑀢𑁆𑀣𑀺 𑀧𑀸𑀧𑀲𑁆𑀲 𑀆𑀕𑀫𑁄. 𑀤𑀓𑁆𑀔𑀺𑀡𑀁 𑀘𑁂𑀧𑀺 𑀕𑀗𑁆𑀕𑀸𑀬 𑀢𑀻𑀭𑀁 𑀕𑀘𑁆𑀙𑁂𑀬𑁆𑀬 𑀳𑀦𑀦𑁆𑀢𑁄 𑀖𑀸𑀢𑁂𑀦𑁆𑀢𑁄 𑀙𑀺𑀦𑁆𑀤𑀦𑁆𑀢𑁄 𑀙𑁂𑀤𑀸𑀧𑁂𑀦𑁆𑀢𑁄 𑀧𑀘𑀦𑁆𑀢𑁄 𑀧𑀸𑀘𑀸𑀧𑁂𑀦𑁆𑀢𑁄, 𑀦𑀢𑁆𑀣𑀺 𑀢𑀢𑁄𑀦𑀺𑀤𑀸𑀦𑀁 𑀧𑀸𑀧𑀁, 𑀦𑀢𑁆𑀣𑀺 𑀧𑀸𑀧𑀲𑁆𑀲 𑀆𑀕𑀫𑁄. 𑀉𑀢𑁆𑀢𑀭𑀜𑁆𑀘𑁂𑀧𑀺 𑀕𑀗𑁆𑀕𑀸𑀬 𑀢𑀻𑀭𑀁 𑀕𑀘𑁆𑀙𑁂𑀬𑁆𑀬 𑀤𑀤𑀦𑁆𑀢𑁄 𑀤𑀸𑀧𑁂𑀦𑁆𑀢𑁄 𑀬𑀚𑀦𑁆𑀢𑁄 𑀬𑀚𑀸𑀧𑁂𑀦𑁆𑀢𑁄, 𑀦𑀢𑁆𑀣𑀺 𑀢𑀢𑁄𑀦𑀺𑀤𑀸𑀦𑀁 𑀧𑀼𑀜𑁆𑀜𑀁, 𑀦𑀢𑁆𑀣𑀺 𑀧𑀼𑀜𑁆𑀜𑀲𑁆𑀲 𑀆𑀕𑀫𑁄. 𑀤𑀸𑀦𑁂𑀦 𑀤𑀫𑁂𑀦 𑀲𑀁𑀬𑀫𑁂𑀦 𑀲𑀘𑁆𑀘𑀯𑀚𑁆𑀚𑁂𑀦 𑀦𑀢𑁆𑀣𑀺 𑀧𑀼𑀜𑁆𑀜𑀁, 𑀦𑀢𑁆𑀣𑀺 𑀧𑀼𑀜𑁆𑀜𑀲𑁆𑀲 𑀆𑀕𑀫𑁄’𑀢𑀺. 𑀇𑀢𑁆𑀣𑀁 𑀔𑁄 𑀫𑁂, 𑀪𑀦𑁆𑀢𑁂, 𑀧𑀽𑀭𑀡𑁄 𑀓𑀲𑁆𑀲𑀧𑁄 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀅𑀓𑀺𑀭𑀺𑀬𑀁 𑀩𑁆𑀬𑀸𑀓𑀸𑀲𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀅𑀫𑁆𑀩𑀁 𑀯𑀸 𑀧𑀼𑀝𑁆𑀞𑁄 𑀮𑀩𑀼𑀚𑀁 𑀩𑁆𑀬𑀸𑀓𑀭𑁂𑀬𑁆𑀬, 𑀮𑀩𑀼𑀚𑀁 𑀯𑀸 𑀧𑀼𑀝𑁆𑀞𑁄 𑀅𑀫𑁆𑀩𑀁 𑀩𑁆𑀬𑀸𑀓𑀭𑁂𑀬𑁆𑀬; 𑀏𑀯𑀫𑁂𑀯 𑀔𑁄 𑀫𑁂, 𑀪𑀦𑁆𑀢𑁂, 𑀧𑀽𑀭𑀡𑁄 𑀓𑀲𑁆𑀲𑀧𑁄 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀅𑀓𑀺𑀭𑀺𑀬𑀁 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀓𑀣𑀜𑁆𑀳𑀺 𑀦𑀸𑀫 𑀫𑀸𑀤𑀺𑀲𑁄 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀯𑀺𑀚𑀺𑀢𑁂 𑀯𑀲𑀦𑁆𑀢𑀁 𑀅𑀧𑀲𑀸𑀤𑁂𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸’𑀢𑀺. 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀧𑀽𑀭𑀡𑀲𑁆𑀲 𑀓𑀲𑁆𑀲𑀧𑀲𑁆𑀲 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀁 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀁. 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁄𑀲𑀺𑀢𑁆𑀯𑀸 𑀅𑀦𑀢𑁆𑀢𑀫𑀦𑁄, 𑀅𑀦𑀢𑁆𑀢𑀫𑀦𑀯𑀸𑀘𑀁 𑀅𑀦𑀺𑀘𑁆𑀙𑀸𑀭𑁂𑀢𑁆𑀯𑀸, 𑀢𑀫𑁂𑀯 𑀯𑀸𑀘𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀅𑀦𑀺𑀓𑁆𑀓𑀼𑀚𑁆𑀚𑀦𑁆𑀢𑁄 [𑀅𑀦𑀺𑀓𑁆𑀓𑀼𑀚𑁆𑀚𑁂𑀦𑁆𑀢𑁄 (𑀲𑁆𑀬𑀸. 𑀓𑀁. 𑀓.)] 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀁 [𑀧𑀓𑁆𑀓𑀸𑀫𑀺𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)].

𑀫𑀓𑁆𑀔𑀮𑀺𑀕𑁄𑀲𑀸𑀮𑀯𑀸𑀤𑁄

𑁧𑁬𑁭. ‘‘𑀏𑀓𑀫𑀺𑀤𑀸𑀳𑀁, 𑀪𑀦𑁆𑀢𑁂, 𑀲𑀫𑀬𑀁 𑀬𑁂𑀦 𑀫𑀓𑁆𑀔𑀮𑀺 𑀕𑁄𑀲𑀸𑀮𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀓𑁆𑀔𑀮𑀺𑀦𑀸 𑀕𑁄𑀲𑀸𑀮𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀫𑀓𑁆𑀔𑀮𑀺𑀁 𑀕𑁄𑀲𑀸𑀮𑀁 𑀏𑀢𑀤𑀯𑁄𑀘𑀁 𑁋 ‘𑀬𑀣𑀸 𑀦𑀼 𑀔𑁄 𑀇𑀫𑀸𑀦𑀺, 𑀪𑁄 𑀕𑁄𑀲𑀸𑀮, 𑀧𑀼𑀣𑀼𑀲𑀺𑀧𑁆𑀧𑀸𑀬𑀢𑀦𑀸𑀦𑀺…𑀧𑁂… 𑀲𑀓𑁆𑀓𑀸 𑀦𑀼 𑀔𑁄, 𑀪𑁄 𑀕𑁄𑀲𑀸𑀮, 𑀏𑀯𑀫𑁂𑀯 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀜𑁆𑀜𑀧𑁂𑀢𑀼’𑀦𑁆𑀢𑀺?

𑁧𑁬𑁮. ‘‘𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀫𑀓𑁆𑀔𑀮𑀺 𑀕𑁄𑀲𑀸𑀮𑁄 𑀫𑀁 𑀏𑀢𑀤𑀯𑁄𑀘 𑁋 ‘𑀦𑀢𑁆𑀣𑀺 𑀫𑀳𑀸𑀭𑀸𑀚 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬, 𑀅𑀳𑁂𑀢𑀽 [𑀅𑀳𑁂𑀢𑀼 (𑀓𑀢𑁆𑀣𑀘𑀺)] 𑀅𑀧𑀘𑁆𑀘𑀬𑀸 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺. 𑀦𑀢𑁆𑀣𑀺 𑀳𑁂𑀢𑀼, 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸, 𑀅𑀳𑁂𑀢𑀽 𑀅𑀧𑀘𑁆𑀘𑀬𑀸 𑀲𑀢𑁆𑀢𑀸 𑀯𑀺𑀲𑀼𑀚𑁆𑀛𑀦𑁆𑀢𑀺. 𑀦𑀢𑁆𑀣𑀺 𑀅𑀢𑁆𑀢𑀓𑀸𑀭𑁂, 𑀦𑀢𑁆𑀣𑀺 𑀧𑀭𑀓𑀸𑀭𑁂, 𑀦𑀢𑁆𑀣𑀺 𑀧𑀼𑀭𑀺𑀲𑀓𑀸𑀭𑁂, 𑀦𑀢𑁆𑀣𑀺 𑀩𑀮𑀁, 𑀦𑀢𑁆𑀣𑀺 𑀯𑀻𑀭𑀺𑀬𑀁, 𑀦𑀢𑁆𑀣𑀺 𑀧𑀼𑀭𑀺𑀲𑀣𑀸𑀫𑁄, 𑀦𑀢𑁆𑀣𑀺 𑀧𑀼𑀭𑀺𑀲𑀧𑀭𑀓𑁆𑀓𑀫𑁄. 𑀲𑀩𑁆𑀩𑁂 𑀲𑀢𑁆𑀢𑀸 𑀲𑀩𑁆𑀩𑁂 𑀧𑀸𑀡𑀸 𑀲𑀩𑁆𑀩𑁂 𑀪𑀽𑀢𑀸 𑀲𑀩𑁆𑀩𑁂 𑀚𑀻𑀯𑀸 𑀅𑀯𑀲𑀸 𑀅𑀩𑀮𑀸 𑀅𑀯𑀻𑀭𑀺𑀬𑀸 𑀦𑀺𑀬𑀢𑀺𑀲𑀗𑁆𑀕𑀢𑀺𑀪𑀸𑀯𑀧𑀭𑀺𑀡𑀢𑀸 𑀙𑀲𑁆𑀯𑁂𑀯𑀸𑀪𑀺𑀚𑀸𑀢𑀻𑀲𑀼 𑀲𑀼𑀔𑀤𑀼𑀓𑁆𑀔𑀁 [𑀲𑀼𑀔𑀜𑁆𑀘 𑀤𑀼𑀓𑁆𑀔𑀜𑁆𑀘 (𑀲𑁆𑀬𑀸.)] 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀺. 𑀘𑀼𑀤𑁆𑀤𑀲 𑀔𑁄 𑀧𑀦𑀺𑀫𑀸𑀦𑀺 𑀬𑁄𑀦𑀺𑀧𑀫𑀼𑀔𑀲𑀢𑀲𑀳𑀲𑁆𑀲𑀸𑀦𑀺 𑀲𑀝𑁆𑀞𑀺 𑀘 𑀲𑀢𑀸𑀦𑀺 𑀙 𑀘 𑀲𑀢𑀸𑀦𑀺 𑀧𑀜𑁆𑀘 𑀘 𑀓𑀫𑁆𑀫𑀼𑀦𑁄 𑀲𑀢𑀸𑀦𑀺 𑀧𑀜𑁆𑀘 𑀘 𑀓𑀫𑁆𑀫𑀸𑀦𑀺 𑀢𑀻𑀡𑀺 𑀘 𑀓𑀫𑁆𑀫𑀸𑀦𑀺 𑀓𑀫𑁆𑀫𑁂 𑀘 𑀅𑀟𑁆𑀠𑀓𑀫𑁆𑀫𑁂 𑀘 𑀤𑁆𑀯𑀝𑁆𑀞𑀺𑀧𑀝𑀺𑀧𑀤𑀸 𑀤𑁆𑀯𑀝𑁆𑀞𑀦𑁆𑀢𑀭𑀓𑀧𑁆𑀧𑀸 𑀙𑀴𑀸𑀪𑀺𑀚𑀸𑀢𑀺𑀬𑁄 𑀅𑀝𑁆𑀞 𑀧𑀼𑀭𑀺𑀲𑀪𑀽𑀫𑀺𑀬𑁄 𑀏𑀓𑀽𑀦𑀧𑀜𑁆𑀜𑀸𑀲 𑀆𑀚𑀻𑀯𑀓𑀲𑀢𑁂 𑀏𑀓𑀽𑀦𑀧𑀜𑁆𑀜𑀸𑀲 𑀧𑀭𑀺𑀩𑁆𑀩𑀸𑀚𑀓𑀲𑀢𑁂 𑀏𑀓𑀽𑀦𑀧𑀜𑁆𑀜𑀸𑀲 𑀦𑀸𑀕𑀸𑀯𑀸𑀲𑀲𑀢𑁂 𑀯𑀻𑀲𑁂 𑀇𑀦𑁆𑀤𑁆𑀭𑀺𑀬𑀲𑀢𑁂 𑀢𑀺𑀁𑀲𑁂 𑀦𑀺𑀭𑀬𑀲𑀢𑁂 𑀙𑀢𑁆𑀢𑀺𑀁𑀲 𑀭𑀚𑁄𑀥𑀸𑀢𑀼𑀬𑁄 𑀲𑀢𑁆𑀢 𑀲𑀜𑁆𑀜𑀻𑀕𑀩𑁆𑀪𑀸 𑀲𑀢𑁆𑀢 𑀅𑀲𑀜𑁆𑀜𑀻𑀕𑀩𑁆𑀪𑀸 𑀲𑀢𑁆𑀢 𑀦𑀺𑀕𑀡𑁆𑀞𑀺𑀕𑀩𑁆𑀪𑀸 𑀲𑀢𑁆𑀢 𑀤𑁂𑀯𑀸 𑀲𑀢𑁆𑀢 𑀫𑀸𑀦𑀼𑀲𑀸 𑀲𑀢𑁆𑀢 𑀧𑀺𑀲𑀸𑀘𑀸 𑀲𑀢𑁆𑀢 𑀲𑀭𑀸 𑀲𑀢𑁆𑀢 𑀧𑀯𑀼𑀝𑀸 [𑀲𑀧𑀼𑀝𑀸 (𑀓.), 𑀧𑀩𑀼𑀝𑀸 (𑀲𑀻.)] 𑀲𑀢𑁆𑀢 𑀧𑀯𑀼𑀝𑀲𑀢𑀸𑀦𑀺 𑀲𑀢𑁆𑀢 𑀧𑀧𑀸𑀢𑀸 𑀲𑀢𑁆𑀢 𑀧𑀧𑀸𑀢𑀲𑀢𑀸𑀦𑀺 𑀲𑀢𑁆𑀢 𑀲𑀼𑀧𑀺𑀦𑀸 𑀲𑀢𑁆𑀢 𑀲𑀼𑀧𑀺𑀦𑀲𑀢𑀸𑀦𑀺 𑀘𑀼𑀮𑁆𑀮𑀸𑀲𑀻𑀢𑀺 𑀫𑀳𑀸𑀓𑀧𑁆𑀧𑀺𑀦𑁄 [𑀫𑀳𑀸𑀓𑀧𑁆𑀧𑀼𑀦𑁄 (𑀓. 𑀲𑀻. 𑀧𑀻.)] 𑀲𑀢𑀲𑀳𑀲𑁆𑀲𑀸𑀦𑀺, 𑀬𑀸𑀦𑀺 𑀩𑀸𑀮𑁂 𑀘 𑀧𑀡𑁆𑀟𑀺𑀢𑁂 𑀘 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀢𑀢𑁆𑀣 𑀦𑀢𑁆𑀣𑀺 ‘‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀢𑀧𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀅𑀧𑀭𑀺𑀧𑀓𑁆𑀓𑀁 𑀯𑀸 𑀓𑀫𑁆𑀫𑀁 𑀧𑀭𑀺𑀧𑀸𑀘𑁂𑀲𑁆𑀲𑀸𑀫𑀺, 𑀧𑀭𑀺𑀧𑀓𑁆𑀓𑀁 𑀯𑀸 𑀓𑀫𑁆𑀫𑀁 𑀨𑀼𑀲𑁆𑀲 𑀨𑀼𑀲𑁆𑀲 𑀩𑁆𑀬𑀦𑁆𑀢𑀺𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀳𑁂𑀯𑀁 𑀦𑀢𑁆𑀣𑀺. 𑀤𑁄𑀡𑀫𑀺𑀢𑁂 𑀲𑀼𑀔𑀤𑀼𑀓𑁆𑀔𑁂 𑀧𑀭𑀺𑀬𑀦𑁆𑀢𑀓𑀢𑁂 𑀲𑀁𑀲𑀸𑀭𑁂, 𑀦𑀢𑁆𑀣𑀺 𑀳𑀸𑀬𑀦𑀯𑀟𑁆𑀠𑀦𑁂, 𑀦𑀢𑁆𑀣𑀺 𑀉𑀓𑁆𑀓𑀁𑀲𑀸𑀯𑀓𑀁𑀲𑁂. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀼𑀢𑁆𑀢𑀕𑀼𑀴𑁂 𑀔𑀺𑀢𑁆𑀢𑁂 𑀦𑀺𑀩𑁆𑀩𑁂𑀞𑀺𑀬𑀫𑀸𑀦𑀫𑁂𑀯 𑀧𑀮𑁂𑀢𑀺, 𑀏𑀯𑀫𑁂𑀯 𑀩𑀸𑀮𑁂 𑀘 𑀧𑀡𑁆𑀟𑀺𑀢𑁂 𑀘 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀻’𑀢𑀺.

𑁧𑁬𑁯. ‘‘𑀇𑀢𑁆𑀣𑀁 𑀔𑁄 𑀫𑁂, 𑀪𑀦𑁆𑀢𑁂, 𑀫𑀓𑁆𑀔𑀮𑀺 𑀕𑁄𑀲𑀸𑀮𑁄 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀲𑀁𑀲𑀸𑀭𑀲𑀼𑀤𑁆𑀥𑀺𑀁 𑀩𑁆𑀬𑀸𑀓𑀸𑀲𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀅𑀫𑁆𑀩𑀁 𑀯𑀸 𑀧𑀼𑀝𑁆𑀞𑁄 𑀮𑀩𑀼𑀚𑀁 𑀩𑁆𑀬𑀸𑀓𑀭𑁂𑀬𑁆𑀬, 𑀮𑀩𑀼𑀚𑀁 𑀯𑀸 𑀧𑀼𑀝𑁆𑀞𑁄 𑀅𑀫𑁆𑀩𑀁 𑀩𑁆𑀬𑀸𑀓𑀭𑁂𑀬𑁆𑀬; 𑀏𑀯𑀫𑁂𑀯 𑀔𑁄 𑀫𑁂, 𑀪𑀦𑁆𑀢𑁂, 𑀫𑀓𑁆𑀔𑀮𑀺 𑀕𑁄𑀲𑀸𑀮𑁄 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀲𑀁𑀲𑀸𑀭𑀲𑀼𑀤𑁆𑀥𑀺𑀁 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀓𑀣𑀜𑁆𑀳𑀺 𑀦𑀸𑀫 𑀫𑀸𑀤𑀺𑀲𑁄 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀯𑀺𑀚𑀺𑀢𑁂 𑀯𑀲𑀦𑁆𑀢𑀁 𑀅𑀧𑀲𑀸𑀤𑁂𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸’𑀢𑀺. 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀫𑀓𑁆𑀔𑀮𑀺𑀲𑁆𑀲 𑀕𑁄𑀲𑀸𑀮𑀲𑁆𑀲 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀁 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀁. 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀅𑀦𑀢𑁆𑀢𑀫𑀦𑁄, 𑀅𑀦𑀢𑁆𑀢𑀫𑀦𑀯𑀸𑀘𑀁 𑀅𑀦𑀺𑀘𑁆𑀙𑀸𑀭𑁂𑀢𑁆𑀯𑀸, 𑀢𑀫𑁂𑀯 𑀯𑀸𑀘𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀅𑀦𑀺𑀓𑁆𑀓𑀼𑀚𑁆𑀚𑀦𑁆𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀁.

𑀅𑀚𑀺𑀢𑀓𑁂𑀲𑀓𑀫𑁆𑀩𑀮𑀯𑀸𑀤𑁄

𑁧𑁭𑁦. ‘‘𑀏𑀓𑀫𑀺𑀤𑀸𑀳𑀁, 𑀪𑀦𑁆𑀢𑁂, 𑀲𑀫𑀬𑀁 𑀬𑁂𑀦 𑀅𑀚𑀺𑀢𑁄 𑀓𑁂𑀲𑀓𑀫𑁆𑀩𑀮𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀚𑀺𑀢𑁂𑀦 𑀓𑁂𑀲𑀓𑀫𑁆𑀩𑀮𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀚𑀺𑀢𑀁 𑀓𑁂𑀲𑀓𑀫𑁆𑀩𑀮𑀁 𑀏𑀢𑀤𑀯𑁄𑀘𑀁 𑁋 ‘𑀬𑀣𑀸 𑀦𑀼 𑀔𑁄 𑀇𑀫𑀸𑀦𑀺, 𑀪𑁄 𑀅𑀚𑀺𑀢, 𑀧𑀼𑀣𑀼𑀲𑀺𑀧𑁆𑀧𑀸𑀬𑀢𑀦𑀸𑀦𑀺…𑀧𑁂… 𑀲𑀓𑁆𑀓𑀸 𑀦𑀼 𑀔𑁄, 𑀪𑁄 𑀅𑀚𑀺𑀢, 𑀏𑀯𑀫𑁂𑀯 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀜𑁆𑀜𑀧𑁂𑀢𑀼’𑀦𑁆𑀢𑀺?

𑁧𑁭𑁧. ‘‘𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀅𑀚𑀺𑀢𑁄 𑀓𑁂𑀲𑀓𑀫𑁆𑀩𑀮𑁄 𑀫𑀁 𑀏𑀢𑀤𑀯𑁄𑀘 𑁋 ‘𑀦𑀢𑁆𑀣𑀺, 𑀫𑀳𑀸𑀭𑀸𑀚, 𑀤𑀺𑀦𑁆𑀦𑀁, 𑀦𑀢𑁆𑀣𑀺 𑀬𑀺𑀝𑁆𑀞𑀁, 𑀦𑀢𑁆𑀣𑀺 𑀳𑀼𑀢𑀁, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄, 𑀦𑀢𑁆𑀣𑀺 𑀅𑀬𑀁 𑀮𑁄𑀓𑁄 [𑀧𑀭𑀮𑁄𑀓𑁄 (𑀲𑁆𑀬𑀸.)], 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀫𑀸𑀢𑀸, 𑀦𑀢𑁆𑀣𑀺 𑀧𑀺𑀢𑀸, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀮𑁄𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑁆𑀫𑀕𑁆𑀕𑀢𑀸 [𑀲𑀫𑀕𑁆𑀕𑀢𑀸 (𑀓.), 𑀲𑀫𑀕𑁆𑀕𑀢𑀸 (𑀲𑁆𑀬𑀸.)] 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸, 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀺. 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄 𑀅𑀬𑀁 𑀧𑀼𑀭𑀺𑀲𑁄, 𑀬𑀤𑀸 𑀓𑀸𑀮𑀗𑁆𑀓𑀭𑁄𑀢𑀺, 𑀧𑀣𑀯𑀻 𑀧𑀣𑀯𑀺𑀓𑀸𑀬𑀁 𑀅𑀦𑀼𑀧𑁂𑀢𑀺 𑀅𑀦𑀼𑀧𑀕𑀘𑁆𑀙𑀢𑀺, 𑀆𑀧𑁄 𑀆𑀧𑁄𑀓𑀸𑀬𑀁 𑀅𑀦𑀼𑀧𑁂𑀢𑀺 𑀅𑀦𑀼𑀧𑀕𑀘𑁆𑀙𑀢𑀺, 𑀢𑁂𑀚𑁄 𑀢𑁂𑀚𑁄𑀓𑀸𑀬𑀁 𑀅𑀦𑀼𑀧𑁂𑀢𑀺 𑀅𑀦𑀼𑀧𑀕𑀘𑁆𑀙𑀢𑀺, 𑀯𑀸𑀬𑁄 𑀯𑀸𑀬𑁄𑀓𑀸𑀬𑀁 𑀅𑀦𑀼𑀧𑁂𑀢𑀺 𑀅𑀦𑀼𑀧𑀕𑀘𑁆𑀙𑀢𑀺, 𑀆𑀓𑀸𑀲𑀁 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀗𑁆𑀓𑀫𑀦𑁆𑀢𑀺. 𑀆𑀲𑀦𑁆𑀤𑀺𑀧𑀜𑁆𑀘𑀫𑀸 𑀧𑀼𑀭𑀺𑀲𑀸 𑀫𑀢𑀁 𑀆𑀤𑀸𑀬 𑀕𑀘𑁆𑀙𑀦𑁆𑀢𑀺. 𑀬𑀸𑀯𑀸𑀴𑀸𑀳𑀦𑀸 𑀧𑀤𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺. 𑀓𑀸𑀧𑁄𑀢𑀓𑀸𑀦𑀺 𑀅𑀝𑁆𑀞𑀻𑀦𑀺 𑀪𑀯𑀦𑁆𑀢𑀺, 𑀪𑀲𑁆𑀲𑀦𑁆𑀢𑀸 𑀆𑀳𑀼𑀢𑀺𑀬𑁄. 𑀤𑀢𑁆𑀢𑀼𑀧𑀜𑁆𑀜𑀢𑁆𑀢𑀁 𑀬𑀤𑀺𑀤𑀁 𑀤𑀸𑀦𑀁. 𑀢𑁂𑀲𑀁 𑀢𑀼𑀘𑁆𑀙𑀁 𑀫𑀼𑀲𑀸 𑀯𑀺𑀮𑀸𑀧𑁄 𑀬𑁂 𑀓𑁂𑀘𑀺 𑀅𑀢𑁆𑀣𑀺𑀓𑀯𑀸𑀤𑀁 𑀯𑀤𑀦𑁆𑀢𑀺. 𑀩𑀸𑀮𑁂 𑀘 𑀧𑀡𑁆𑀟𑀺𑀢𑁂 𑀘 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀦𑁆𑀢𑀺 𑀯𑀺𑀦𑀲𑁆𑀲𑀦𑁆𑀢𑀺, 𑀦 𑀳𑁄𑀦𑁆𑀢𑀺 𑀧𑀭𑀁 𑀫𑀭𑀡𑀸’𑀢𑀺.

𑁧𑁭𑁨. ‘‘𑀇𑀢𑁆𑀣𑀁 𑀔𑁄 𑀫𑁂, 𑀪𑀦𑁆𑀢𑁂, 𑀅𑀚𑀺𑀢𑁄 𑀓𑁂𑀲𑀓𑀫𑁆𑀩𑀮𑁄 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀉𑀘𑁆𑀙𑁂𑀤𑀁 𑀩𑁆𑀬𑀸𑀓𑀸𑀲𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀅𑀫𑁆𑀩𑀁 𑀯𑀸 𑀧𑀼𑀝𑁆𑀞𑁄 𑀮𑀩𑀼𑀚𑀁 𑀩𑁆𑀬𑀸𑀓𑀭𑁂𑀬𑁆𑀬, 𑀮𑀩𑀼𑀚𑀁 𑀯𑀸 𑀧𑀼𑀝𑁆𑀞𑁄 𑀅𑀫𑁆𑀩𑀁 𑀩𑁆𑀬𑀸𑀓𑀭𑁂𑀬𑁆𑀬; 𑀏𑀯𑀫𑁂𑀯 𑀔𑁄 𑀫𑁂, 𑀪𑀦𑁆𑀢𑁂, 𑀅𑀚𑀺𑀢𑁄 𑀓𑁂𑀲𑀓𑀫𑁆𑀩𑀮𑁄 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀉𑀘𑁆𑀙𑁂𑀤𑀁 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀓𑀣𑀜𑁆𑀳𑀺 𑀦𑀸𑀫 𑀫𑀸𑀤𑀺𑀲𑁄 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀯𑀺𑀚𑀺𑀢𑁂 𑀯𑀲𑀦𑁆𑀢𑀁 𑀅𑀧𑀲𑀸𑀤𑁂𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸’𑀢𑀺. 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀚𑀺𑀢𑀲𑁆𑀲 𑀓𑁂𑀲𑀓𑀫𑁆𑀩𑀮𑀲𑁆𑀲 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀁 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀁. 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀅𑀦𑀢𑁆𑀢𑀫𑀦𑁄 𑀅𑀦𑀢𑁆𑀢𑀫𑀦𑀯𑀸𑀘𑀁 𑀅𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀢𑀫𑁂𑀯 𑀯𑀸𑀘𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀅𑀦𑀺𑀓𑁆𑀓𑀼𑀚𑁆𑀚𑀦𑁆𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀁.

𑀧𑀓𑀼𑀥𑀓𑀘𑁆𑀘𑀸𑀬𑀦𑀯𑀸𑀤𑁄

𑁧𑁭𑁩. ‘‘𑀏𑀓𑀫𑀺𑀤𑀸𑀳𑀁, 𑀪𑀦𑁆𑀢𑁂, 𑀲𑀫𑀬𑀁 𑀬𑁂𑀦 𑀧𑀓𑀼𑀥𑁄 𑀓𑀘𑁆𑀘𑀸𑀬𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀓𑀼𑀥𑁂𑀦 𑀓𑀘𑁆𑀘𑀸𑀬𑀦𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀧𑀓𑀼𑀥𑀁 𑀓𑀘𑁆𑀘𑀸𑀬𑀦𑀁 𑀏𑀢𑀤𑀯𑁄𑀘𑀁 𑁋 ‘𑀬𑀣𑀸 𑀦𑀼 𑀔𑁄 𑀇𑀫𑀸𑀦𑀺, 𑀪𑁄 𑀓𑀘𑁆𑀘𑀸𑀬𑀦, 𑀧𑀼𑀣𑀼𑀲𑀺𑀧𑁆𑀧𑀸𑀬𑀢𑀦𑀸𑀦𑀺…𑀧𑁂… 𑀲𑀓𑁆𑀓𑀸 𑀦𑀼 𑀔𑁄, 𑀪𑁄 𑀓𑀘𑁆𑀘𑀸𑀬𑀦, 𑀏𑀯𑀫𑁂𑀯 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀜𑁆𑀜𑀧𑁂𑀢𑀼’𑀦𑁆𑀢𑀺?

𑁧𑁭𑁪. ‘‘𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀧𑀓𑀼𑀥𑁄 𑀓𑀘𑁆𑀘𑀸𑀬𑀦𑁄 𑀫𑀁 𑀏𑀢𑀤𑀯𑁄𑀘 𑁋 ‘𑀲𑀢𑁆𑀢𑀺𑀫𑁂, 𑀫𑀳𑀸𑀭𑀸𑀚, 𑀓𑀸𑀬𑀸 𑀅𑀓𑀝𑀸 𑀅𑀓𑀝𑀯𑀺𑀥𑀸 𑀅𑀦𑀺𑀫𑁆𑀫𑀺𑀢𑀸 𑀅𑀦𑀺𑀫𑁆𑀫𑀸𑀢𑀸 𑀯𑀜𑁆𑀛𑀸 𑀓𑀽𑀝𑀝𑁆𑀞𑀸 𑀏𑀲𑀺𑀓𑀝𑁆𑀞𑀸𑀬𑀺𑀝𑁆𑀞𑀺𑀢𑀸. 𑀢𑁂 𑀦 𑀇𑀜𑁆𑀚𑀦𑁆𑀢𑀺, 𑀦 𑀯𑀺𑀧𑀭𑀺𑀡𑀫𑀦𑁆𑀢𑀺, 𑀦 𑀅𑀜𑁆𑀜𑀫𑀜𑁆𑀜𑀁 𑀩𑁆𑀬𑀸𑀩𑀸𑀥𑁂𑀦𑁆𑀢𑀺, 𑀦𑀸𑀮𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀼𑀔𑀸𑀬 𑀯𑀸 𑀤𑀼𑀓𑁆𑀔𑀸𑀬 𑀯𑀸 𑀲𑀼𑀔𑀤𑀼𑀓𑁆𑀔𑀸𑀬 𑀯𑀸. 𑀓𑀢𑀫𑁂 𑀲𑀢𑁆𑀢? 𑀧𑀣𑀯𑀺𑀓𑀸𑀬𑁄, 𑀆𑀧𑁄𑀓𑀸𑀬𑁄, 𑀢𑁂𑀚𑁄𑀓𑀸𑀬𑁄, 𑀯𑀸𑀬𑁄𑀓𑀸𑀬𑁄, 𑀲𑀼𑀔𑁂, 𑀤𑀼𑀓𑁆𑀔𑁂, 𑀚𑀻𑀯𑁂 𑀲𑀢𑁆𑀢𑀫𑁂 𑁋 𑀇𑀫𑁂 𑀲𑀢𑁆𑀢 𑀓𑀸𑀬𑀸 𑀅𑀓𑀝𑀸 𑀅𑀓𑀝𑀯𑀺𑀥𑀸 𑀅𑀦𑀺𑀫𑁆𑀫𑀺𑀢𑀸 𑀅𑀦𑀺𑀫𑁆𑀫𑀸𑀢𑀸 𑀯𑀜𑁆𑀛𑀸 𑀓𑀽𑀝𑀝𑁆𑀞𑀸 𑀏𑀲𑀺𑀓𑀝𑁆𑀞𑀸𑀬𑀺𑀝𑁆𑀞𑀺𑀢𑀸. 𑀢𑁂 𑀦 𑀇𑀜𑁆𑀚𑀦𑁆𑀢𑀺, 𑀦 𑀯𑀺𑀧𑀭𑀺𑀡𑀫𑀦𑁆𑀢𑀺, 𑀦 𑀅𑀜𑁆𑀜𑀫𑀜𑁆𑀜𑀁 𑀩𑁆𑀬𑀸𑀩𑀸𑀥𑁂𑀦𑁆𑀢𑀺, 𑀦𑀸𑀮𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀼𑀔𑀸𑀬 𑀯𑀸 𑀤𑀼𑀓𑁆𑀔𑀸𑀬 𑀯𑀸 𑀲𑀼𑀔𑀤𑀼𑀓𑁆𑀔𑀸𑀬 𑀯𑀸. 𑀢𑀢𑁆𑀣 𑀦𑀢𑁆𑀣𑀺 𑀳𑀦𑁆𑀢𑀸 𑀯𑀸 𑀖𑀸𑀢𑁂𑀢𑀸 𑀯𑀸, 𑀲𑁄𑀢𑀸 𑀯𑀸 𑀲𑀸𑀯𑁂𑀢𑀸 𑀯𑀸, 𑀯𑀺𑀜𑁆𑀜𑀸𑀢𑀸 𑀯𑀸 𑀯𑀺𑀜𑁆𑀜𑀸𑀧𑁂𑀢𑀸 𑀯𑀸. 𑀬𑁄𑀧𑀺 𑀢𑀺𑀡𑁆𑀳𑁂𑀦 𑀲𑀢𑁆𑀣𑁂𑀦 𑀲𑀻𑀲𑀁 𑀙𑀺𑀦𑁆𑀤𑀢𑀺, 𑀦 𑀓𑁄𑀘𑀺 𑀓𑀺𑀜𑁆𑀘𑀺 [𑀓𑀜𑁆𑀘𑀺 (𑀓𑀁.)] 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺; 𑀲𑀢𑁆𑀢𑀦𑁆𑀦𑀁 𑀢𑁆𑀯𑁂𑀯 [𑀲𑀢𑁆𑀢𑀦𑁆𑀦𑀁 𑀬𑁂𑀯 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀓𑀸𑀬𑀸𑀦𑀫𑀦𑁆𑀢𑀭𑁂𑀦 𑀲𑀢𑁆𑀣𑀁 𑀯𑀺𑀯𑀭𑀫𑀦𑀼𑀧𑀢𑀢𑀻’𑀢𑀺.

𑁧𑁭𑁫. ‘‘𑀇𑀢𑁆𑀣𑀁 𑀔𑁄 𑀫𑁂, 𑀪𑀦𑁆𑀢𑁂, 𑀧𑀓𑀼𑀥𑁄 𑀓𑀘𑁆𑀘𑀸𑀬𑀦𑁄 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀅𑀜𑁆𑀜𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀸𑀲𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀅𑀫𑁆𑀩𑀁 𑀯𑀸 𑀧𑀼𑀝𑁆𑀞𑁄 𑀮𑀩𑀼𑀚𑀁 𑀩𑁆𑀬𑀸𑀓𑀭𑁂𑀬𑁆𑀬, 𑀮𑀩𑀼𑀚𑀁 𑀯𑀸 𑀧𑀼𑀝𑁆𑀞𑁄 𑀅𑀫𑁆𑀩𑀁 𑀩𑁆𑀬𑀸𑀓𑀭𑁂𑀬𑁆𑀬; 𑀏𑀯𑀫𑁂𑀯 𑀔𑁄 𑀫𑁂, 𑀪𑀦𑁆𑀢𑁂, 𑀧𑀓𑀼𑀥𑁄 𑀓𑀘𑁆𑀘𑀸𑀬𑀦𑁄 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀅𑀜𑁆𑀜𑁂𑀦 𑀅𑀜𑁆𑀜𑀁 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀓𑀣𑀜𑁆𑀳𑀺 𑀦𑀸𑀫 𑀫𑀸𑀤𑀺𑀲𑁄 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀯𑀺𑀚𑀺𑀢𑁂 𑀯𑀲𑀦𑁆𑀢𑀁 𑀅𑀧𑀲𑀸𑀤𑁂𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸’𑀢𑀺. 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀧𑀓𑀼𑀥𑀲𑁆𑀲 𑀓𑀘𑁆𑀘𑀸𑀬𑀦𑀲𑁆𑀲 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀁 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀁, 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀅𑀦𑀢𑁆𑀢𑀫𑀦𑁄, 𑀅𑀦𑀢𑁆𑀢𑀫𑀦𑀯𑀸𑀘𑀁 𑀅𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀢𑀫𑁂𑀯 𑀯𑀸𑀘𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀅𑀦𑀺𑀓𑁆𑀓𑀼𑀚𑁆𑀚𑀦𑁆𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀁.

𑀦𑀺𑀕𑀡𑁆𑀞𑀦𑀸𑀝𑀧𑀼𑀢𑁆𑀢𑀯𑀸𑀤𑁄

𑁧𑁭𑁬. ‘‘𑀏𑀓𑀫𑀺𑀤𑀸𑀳𑀁, 𑀪𑀦𑁆𑀢𑁂, 𑀲𑀫𑀬𑀁 𑀬𑁂𑀦 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀺𑀕𑀡𑁆𑀞𑁂𑀦 𑀦𑀸𑀝𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀦𑀺𑀕𑀡𑁆𑀞𑀁 𑀦𑀸𑀝𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀁 𑁋 ‘𑀬𑀣𑀸 𑀦𑀼 𑀔𑁄 𑀇𑀫𑀸𑀦𑀺, 𑀪𑁄 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀧𑀼𑀣𑀼𑀲𑀺𑀧𑁆𑀧𑀸𑀬𑀢𑀦𑀸𑀦𑀺…𑀧𑁂… 𑀲𑀓𑁆𑀓𑀸 𑀦𑀼 𑀔𑁄, 𑀪𑁄 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀯𑀫𑁂𑀯 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀜𑁆𑀜𑀧𑁂𑀢𑀼’𑀦𑁆𑀢𑀺?

𑁧𑁭𑁭. ‘‘𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀫𑀁 𑀏𑀢𑀤𑀯𑁄𑀘 𑁋 ‘𑀇𑀥, 𑀫𑀳𑀸𑀭𑀸𑀚, 𑀦𑀺𑀕𑀡𑁆𑀞𑁄 𑀘𑀸𑀢𑀼𑀬𑀸𑀫𑀲𑀁𑀯𑀭𑀲𑀁𑀯𑀼𑀢𑁄 𑀳𑁄𑀢𑀺. 𑀓𑀣𑀜𑁆𑀘, 𑀫𑀳𑀸𑀭𑀸𑀚, 𑀦𑀺𑀕𑀡𑁆𑀞𑁄 𑀘𑀸𑀢𑀼𑀬𑀸𑀫𑀲𑀁𑀯𑀭𑀲𑀁𑀯𑀼𑀢𑁄 𑀳𑁄𑀢𑀺? 𑀇𑀥, 𑀫𑀳𑀸𑀭𑀸𑀚, 𑀦𑀺𑀕𑀡𑁆𑀞𑁄 𑀲𑀩𑁆𑀩𑀯𑀸𑀭𑀺𑀯𑀸𑀭𑀺𑀢𑁄 𑀘 𑀳𑁄𑀢𑀺, 𑀲𑀩𑁆𑀩𑀯𑀸𑀭𑀺𑀬𑀼𑀢𑁆𑀢𑁄 𑀘, 𑀲𑀩𑁆𑀩𑀯𑀸𑀭𑀺𑀥𑀼𑀢𑁄 𑀘, 𑀲𑀩𑁆𑀩𑀯𑀸𑀭𑀺𑀨𑀼𑀝𑁄 𑀘. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀦𑀺𑀕𑀡𑁆𑀞𑁄 𑀘𑀸𑀢𑀼𑀬𑀸𑀫𑀲𑀁𑀯𑀭𑀲𑀁𑀯𑀼𑀢𑁄 𑀳𑁄𑀢𑀺. 𑀬𑀢𑁄 𑀔𑁄, 𑀫𑀳𑀸𑀭𑀸𑀚, 𑀦𑀺𑀕𑀡𑁆𑀞𑁄 𑀏𑀯𑀁 𑀘𑀸𑀢𑀼𑀬𑀸𑀫𑀲𑀁𑀯𑀭𑀲𑀁𑀯𑀼𑀢𑁄 𑀳𑁄𑀢𑀺; 𑀅𑀬𑀁 𑀯𑀼𑀘𑁆𑀘𑀢𑀺, 𑀫𑀳𑀸𑀭𑀸𑀚, 𑀦𑀺𑀕𑀡𑁆𑀞𑁄 [𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 (𑀲𑁆𑀬𑀸. 𑀓.)] 𑀕𑀢𑀢𑁆𑀢𑁄 𑀘 𑀬𑀢𑀢𑁆𑀢𑁄 𑀘 𑀞𑀺𑀢𑀢𑁆𑀢𑁄 𑀘𑀸’𑀢𑀺.

𑁧𑁭𑁮. ‘‘𑀇𑀢𑁆𑀣𑀁 𑀔𑁄 𑀫𑁂, 𑀪𑀦𑁆𑀢𑁂, 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀘𑀸𑀢𑀼𑀬𑀸𑀫𑀲𑀁𑀯𑀭𑀁 𑀩𑁆𑀬𑀸𑀓𑀸𑀲𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀅𑀫𑁆𑀩𑀁 𑀯𑀸 𑀧𑀼𑀝𑁆𑀞𑁄 𑀮𑀩𑀼𑀚𑀁 𑀩𑁆𑀬𑀸𑀓𑀭𑁂𑀬𑁆𑀬, 𑀮𑀩𑀼𑀚𑀁 𑀯𑀸 𑀧𑀼𑀝𑁆𑀞𑁄 𑀅𑀫𑁆𑀩𑀁 𑀩𑁆𑀬𑀸𑀓𑀭𑁂𑀬𑁆𑀬; 𑀏𑀯𑀫𑁂𑀯 𑀔𑁄 𑀫𑁂, 𑀪𑀦𑁆𑀢𑁂, 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀘𑀸𑀢𑀼𑀬𑀸𑀫𑀲𑀁𑀯𑀭𑀁 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀓𑀣𑀜𑁆𑀳𑀺 𑀦𑀸𑀫 𑀫𑀸𑀤𑀺𑀲𑁄 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀯𑀺𑀚𑀺𑀢𑁂 𑀯𑀲𑀦𑁆𑀢𑀁 𑀅𑀧𑀲𑀸𑀤𑁂𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸’𑀢𑀺. 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀦𑀺𑀕𑀡𑁆𑀞𑀲𑁆𑀲 𑀦𑀸𑀝𑀧𑀼𑀢𑁆𑀢𑀲𑁆𑀲 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀁 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀁. 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀅𑀦𑀢𑁆𑀢𑀫𑀦𑁄 𑀅𑀦𑀢𑁆𑀢𑀫𑀦𑀯𑀸𑀘𑀁 𑀅𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀢𑀫𑁂𑀯 𑀯𑀸𑀘𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀅𑀦𑀺𑀓𑁆𑀓𑀼𑀚𑁆𑀚𑀦𑁆𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀁.

𑀲𑀜𑁆𑀘𑀬𑀩𑁂𑀮𑀝𑁆𑀞𑀧𑀼𑀢𑁆𑀢𑀯𑀸𑀤𑁄

𑁧𑁭𑁯. ‘‘𑀏𑀓𑀫𑀺𑀤𑀸𑀳𑀁, 𑀪𑀦𑁆𑀢𑁂, 𑀲𑀫𑀬𑀁 𑀬𑁂𑀦 𑀲𑀜𑁆𑀘𑀬𑁄 𑀩𑁂𑀮𑀝𑁆𑀞𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀜𑁆𑀘𑀬𑁂𑀦 𑀩𑁂𑀮𑀝𑁆𑀞𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀅𑀳𑀁 𑀪𑀦𑁆𑀢𑁂, 𑀲𑀜𑁆𑀘𑀬𑀁 𑀩𑁂𑀮𑀝𑁆𑀞𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀁 𑁋 ‘𑀬𑀣𑀸 𑀦𑀼 𑀔𑁄 𑀇𑀫𑀸𑀦𑀺, 𑀪𑁄 𑀲𑀜𑁆𑀘𑀬, 𑀧𑀼𑀣𑀼𑀲𑀺𑀧𑁆𑀧𑀸𑀬𑀢𑀦𑀸𑀦𑀺…𑀧𑁂… 𑀲𑀓𑁆𑀓𑀸 𑀦𑀼 𑀔𑁄, 𑀪𑁄 𑀲𑀜𑁆𑀘𑀬, 𑀏𑀯𑀫𑁂𑀯 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀜𑁆𑀜𑀧𑁂𑀢𑀼’𑀦𑁆𑀢𑀺?

𑁧𑁮𑁦. ‘‘𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀲𑀜𑁆𑀘𑀬𑁄 𑀩𑁂𑀮𑀝𑁆𑀞𑀧𑀼𑀢𑁆𑀢𑁄 𑀫𑀁 𑀏𑀢𑀤𑀯𑁄𑀘 𑁋 ‘𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄𑀢𑀺 𑀇𑀢𑀺 𑀘𑁂 𑀫𑀁 𑀧𑀼𑀘𑁆𑀙𑀲𑀺, 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄𑀢𑀺 𑀇𑀢𑀺 𑀘𑁂 𑀫𑁂 𑀅𑀲𑁆𑀲, 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄𑀢𑀺 𑀇𑀢𑀺 𑀢𑁂 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀁. 𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄, 𑀢𑀣𑀸𑀢𑀺𑀧𑀺 𑀫𑁂 𑀦𑁄, 𑀅𑀜𑁆𑀜𑀣𑀸𑀢𑀺𑀧𑀺 𑀫𑁂 𑀦𑁄, 𑀦𑁄𑀢𑀺𑀧𑀺 𑀫𑁂 𑀦𑁄, 𑀦𑁄 𑀦𑁄𑀢𑀺𑀧𑀺 𑀫𑁂 𑀦𑁄. 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄…𑀧𑁂… 𑀅𑀢𑁆𑀣𑀺 𑀘 𑀦𑀢𑁆𑀣𑀺 𑀘 𑀧𑀭𑁄 𑀮𑁄𑀓𑁄…𑀧𑁂… 𑀦𑁂𑀯𑀢𑁆𑀣𑀺 𑀦 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄…𑀧𑁂… 𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸…𑀧𑁂… 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸…𑀧𑁂… 𑀅𑀢𑁆𑀣𑀺 𑀘 𑀦𑀢𑁆𑀣𑀺 𑀘 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸…𑀧𑁂… 𑀦𑁂𑀯𑀢𑁆𑀣𑀺 𑀦 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸…𑀧𑁂… 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄…𑀧𑁂… 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄…𑀧𑁂…𑀅𑀢𑁆𑀣𑀺 𑀘 𑀦𑀢𑁆𑀣𑀺 𑀘 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄…𑀧𑁂… 𑀦𑁂𑀯𑀢𑁆𑀣𑀺 𑀦 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄…𑀧𑁂… 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸…𑀧𑁂… 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸…𑀧𑁂… 𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸…𑀧𑁂… 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀇𑀢𑀺 𑀘𑁂 𑀫𑀁 𑀧𑀼𑀘𑁆𑀙𑀲𑀺, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀇𑀢𑀺 𑀘𑁂 𑀫𑁂 𑀅𑀲𑁆𑀲, 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀇𑀢𑀺 𑀢𑁂 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀁. 𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄, 𑀢𑀣𑀸𑀢𑀺𑀧𑀺 𑀫𑁂 𑀦𑁄, 𑀅𑀜𑁆𑀜𑀣𑀸𑀢𑀺𑀧𑀺 𑀫𑁂 𑀦𑁄, 𑀦𑁄𑀢𑀺𑀧𑀺 𑀫𑁂 𑀦𑁄, 𑀦𑁄 𑀦𑁄𑀢𑀺𑀧𑀺 𑀫𑁂 𑀦𑁄’𑀢𑀺.

𑁧𑁮𑁧. ‘‘𑀇𑀢𑁆𑀣𑀁 𑀔𑁄 𑀫𑁂, 𑀪𑀦𑁆𑀢𑁂, 𑀲𑀜𑁆𑀘𑀬𑁄 𑀩𑁂𑀮𑀝𑁆𑀞𑀧𑀼𑀢𑁆𑀢𑁄 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀯𑀺𑀓𑁆𑀔𑁂𑀧𑀁 𑀩𑁆𑀬𑀸𑀓𑀸𑀲𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀅𑀫𑁆𑀩𑀁 𑀯𑀸 𑀧𑀼𑀝𑁆𑀞𑁄 𑀮𑀩𑀼𑀚𑀁 𑀩𑁆𑀬𑀸𑀓𑀭𑁂𑀬𑁆𑀬, 𑀮𑀩𑀼𑀚𑀁 𑀯𑀸 𑀧𑀼𑀝𑁆𑀞𑁄 𑀅𑀫𑁆𑀩𑀁 𑀩𑁆𑀬𑀸𑀓𑀭𑁂𑀬𑁆𑀬; 𑀏𑀯𑀫𑁂𑀯 𑀔𑁄 𑀫𑁂, 𑀪𑀦𑁆𑀢𑁂, 𑀲𑀜𑁆𑀘𑀬𑁄 𑀩𑁂𑀮𑀝𑁆𑀞𑀧𑀼𑀢𑁆𑀢𑁄 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀯𑀺𑀓𑁆𑀔𑁂𑀧𑀁 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀅𑀬𑀜𑁆𑀘 𑀇𑀫𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀩𑁆𑀩𑀩𑀸𑀮𑁄 𑀲𑀩𑁆𑀩𑀫𑀽𑀴𑁆𑀳𑁄. 𑀓𑀣𑀜𑁆𑀳𑀺 𑀦𑀸𑀫 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀯𑀺𑀓𑁆𑀔𑁂𑀧𑀁 𑀩𑁆𑀬𑀸𑀓𑀭𑀺𑀲𑁆𑀲𑀢𑀻’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀓𑀣𑀜𑁆𑀳𑀺 𑀦𑀸𑀫 𑀫𑀸𑀤𑀺𑀲𑁄 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀯𑀺𑀚𑀺𑀢𑁂 𑀯𑀲𑀦𑁆𑀢𑀁 𑀅𑀧𑀲𑀸𑀤𑁂𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸’𑀢𑀺. 𑀲𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀲𑀜𑁆𑀘𑀬𑀲𑁆𑀲 𑀩𑁂𑀮𑀝𑁆𑀞𑀧𑀼𑀢𑁆𑀢𑀲𑁆𑀲 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀁 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀁. 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀅𑀦𑀢𑁆𑀢𑀫𑀦𑁄 𑀅𑀦𑀢𑁆𑀢𑀫𑀦𑀯𑀸𑀘𑀁 𑀅𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀢𑀫𑁂𑀯 𑀯𑀸𑀘𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀅𑀦𑀺𑀓𑁆𑀓𑀼𑀚𑁆𑀚𑀦𑁆𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀁.

𑀧𑀞𑀫𑀲𑀦𑁆𑀤𑀺𑀝𑁆𑀞𑀺𑀓𑀲𑀸𑀫𑀜𑁆𑀜𑀨𑀮𑀁

𑁧𑁮𑁨. ‘‘𑀲𑁄𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀫𑁆𑀧𑀺 𑀧𑀼𑀘𑁆𑀙𑀸𑀫𑀺 𑁋 ‘𑀬𑀣𑀸 𑀦𑀼 𑀔𑁄 𑀇𑀫𑀸𑀦𑀺, 𑀪𑀦𑁆𑀢𑁂, 𑀧𑀼𑀣𑀼𑀲𑀺𑀧𑁆𑀧𑀸𑀬𑀢𑀦𑀸𑀦𑀺 𑀲𑁂𑀬𑁆𑀬𑀣𑀺𑀤𑀁 𑁋 𑀳𑀢𑁆𑀣𑀸𑀭𑁄𑀳𑀸 𑀅𑀲𑁆𑀲𑀸𑀭𑁄𑀳𑀸 𑀭𑀣𑀺𑀓𑀸 𑀥𑀦𑀼𑀕𑁆𑀕𑀳𑀸 𑀘𑁂𑀮𑀓𑀸 𑀘𑀮𑀓𑀸 𑀧𑀺𑀡𑁆𑀟𑀤𑀸𑀬𑀓𑀸 𑀉𑀕𑁆𑀕𑀸 𑀭𑀸𑀚𑀧𑀼𑀢𑁆𑀢𑀸 𑀧𑀓𑁆𑀔𑀦𑁆𑀤𑀺𑀦𑁄 𑀫𑀳𑀸𑀦𑀸𑀕𑀸 𑀲𑀽𑀭𑀸 𑀘𑀫𑁆𑀫𑀬𑁄𑀥𑀺𑀦𑁄 𑀤𑀸𑀲𑀺𑀓𑀧𑀼𑀢𑁆𑀢𑀸 𑀆𑀴𑀸𑀭𑀺𑀓𑀸 𑀓𑀧𑁆𑀧𑀓𑀸 𑀦𑁆𑀳𑀸𑀧𑀓𑀸 𑀲𑀽𑀤𑀸 𑀫𑀸𑀮𑀸𑀓𑀸𑀭𑀸 𑀭𑀚𑀓𑀸 𑀧𑁂𑀲𑀓𑀸𑀭𑀸 𑀦𑀴𑀓𑀸𑀭𑀸 𑀓𑀼𑀫𑁆𑀪𑀓𑀸𑀭𑀸 𑀕𑀡𑀓𑀸 𑀫𑀼𑀤𑁆𑀤𑀺𑀓𑀸, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀏𑀯𑀁𑀕𑀢𑀸𑀦𑀺 𑀧𑀼𑀣𑀼𑀲𑀺𑀧𑁆𑀧𑀸𑀬𑀢𑀦𑀸𑀦𑀺, 𑀢𑁂 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀺𑀧𑁆𑀧𑀨𑀮𑀁 𑀉𑀧𑀚𑀻𑀯𑀦𑁆𑀢𑀺, 𑀢𑁂 𑀢𑁂𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀦𑁆𑀢𑀺 𑀧𑀻𑀡𑁂𑀦𑁆𑀢𑀺, 𑀫𑀸𑀢𑀸𑀧𑀺𑀢𑀭𑁄 𑀲𑀼𑀔𑁂𑀦𑁆𑀢𑀺 𑀧𑀻𑀡𑁂𑀦𑁆𑀢𑀺, 𑀧𑀼𑀢𑁆𑀢𑀤𑀸𑀭𑀁 𑀲𑀼𑀔𑁂𑀦𑁆𑀢𑀺 𑀧𑀻𑀡𑁂𑀦𑁆𑀢𑀺, 𑀫𑀺𑀢𑁆𑀢𑀸𑀫𑀘𑁆𑀘𑁂 𑀲𑀼𑀔𑁂𑀦𑁆𑀢𑀺 𑀧𑀻𑀡𑁂𑀦𑁆𑀢𑀺, 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀉𑀤𑁆𑀥𑀕𑁆𑀕𑀺𑀓𑀁 𑀤𑀓𑁆𑀔𑀺𑀡𑀁 𑀧𑀢𑀺𑀝𑁆𑀞𑀧𑁂𑀦𑁆𑀢𑀺 𑀲𑁄𑀯𑀕𑁆𑀕𑀺𑀓𑀁 𑀲𑀼𑀔𑀯𑀺𑀧𑀸𑀓𑀁 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁. 𑀲𑀓𑁆𑀓𑀸 𑀦𑀼 𑀔𑁄 𑀫𑁂, 𑀪𑀦𑁆𑀢𑁂, 𑀏𑀯𑀫𑁂𑀯 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀜𑁆𑀜𑀧𑁂𑀢𑀼’𑀦𑁆𑀢𑀺?

𑁧𑁮𑁩. ‘‘𑀲𑀓𑁆𑀓𑀸, 𑀫𑀳𑀸𑀭𑀸𑀚. 𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺. 𑀬𑀣𑀸 𑀢𑁂 𑀔𑀫𑁂𑀬𑁆𑀬, 𑀢𑀣𑀸 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀇𑀥 𑀢𑁂 𑀅𑀲𑁆𑀲 𑀧𑀼𑀭𑀺𑀲𑁄 𑀤𑀸𑀲𑁄 𑀓𑀫𑁆𑀫𑀓𑀸𑀭𑁄 [𑀓𑀫𑁆𑀫𑀓𑀭𑁄 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀧𑀼𑀩𑁆𑀩𑀼𑀝𑁆𑀞𑀸𑀬𑀻 𑀧𑀘𑁆𑀙𑀸𑀦𑀺𑀧𑀸𑀢𑀻 𑀓𑀺𑀗𑁆𑀓𑀸𑀭𑀧𑀝𑀺𑀲𑁆𑀲𑀸𑀯𑀻 𑀫𑀦𑀸𑀧𑀘𑀸𑀭𑀻 𑀧𑀺𑀬𑀯𑀸𑀤𑀻 𑀫𑀼𑀔𑀼𑀮𑁆𑀮𑁄𑀓𑀓𑁄 [𑀫𑀼𑀔𑀼𑀮𑁆𑀮𑁄𑀓𑀺𑀓𑁄 (𑀲𑁆𑀬𑀸. 𑀓𑀁. 𑀓.)]. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀘𑁆𑀙𑀭𑀺𑀬𑀁, 𑀯𑀢 𑀪𑁄, 𑀅𑀩𑁆𑀪𑀼𑀢𑀁, 𑀯𑀢 𑀪𑁄, 𑀧𑀼𑀜𑁆𑀜𑀸𑀦𑀁 𑀕𑀢𑀺, 𑀧𑀼𑀜𑁆𑀜𑀸𑀦𑀁 𑀯𑀺𑀧𑀸𑀓𑁄. 𑀅𑀬𑀜𑁆𑀳𑀺 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀫𑀦𑀼𑀲𑁆𑀲𑁄; 𑀅𑀳𑀫𑁆𑀧𑀺 𑀫𑀦𑀼𑀲𑁆𑀲𑁄. 𑀅𑀬𑀜𑁆𑀳𑀺 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺, 𑀤𑁂𑀯𑁄 𑀫𑀜𑁆𑀜𑁂. 𑀅𑀳𑀁 𑀧𑀦𑀫𑁆𑀳𑀺𑀲𑁆𑀲 𑀤𑀸𑀲𑁄 𑀓𑀫𑁆𑀫𑀓𑀸𑀭𑁄 𑀧𑀼𑀩𑁆𑀩𑀼𑀝𑁆𑀞𑀸𑀬𑀻 𑀧𑀘𑁆𑀙𑀸𑀦𑀺𑀧𑀸𑀢𑀻 𑀓𑀺𑀗𑁆𑀓𑀸𑀭𑀧𑀝𑀺𑀲𑁆𑀲𑀸𑀯𑀻 𑀫𑀦𑀸𑀧𑀘𑀸𑀭𑀻 𑀧𑀺𑀬𑀯𑀸𑀤𑀻 𑀫𑀼𑀔𑀼𑀮𑁆𑀮𑁄𑀓𑀓𑁄. 𑀲𑁄 𑀯𑀢𑀲𑁆𑀲𑀸𑀳𑀁 𑀧𑀼𑀜𑁆𑀜𑀸𑀦𑀺 𑀓𑀭𑁂𑀬𑁆𑀬𑀁. 𑀬𑀁𑀦𑀽𑀦𑀸𑀳𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬’𑀦𑁆𑀢𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬. 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀓𑀸𑀬𑁂𑀦 𑀲𑀁𑀯𑀼𑀢𑁄 𑀯𑀺𑀳𑀭𑁂𑀬𑁆𑀬, 𑀯𑀸𑀘𑀸𑀬 𑀲𑀁𑀯𑀼𑀢𑁄 𑀯𑀺𑀳𑀭𑁂𑀬𑁆𑀬, 𑀫𑀦𑀲𑀸 𑀲𑀁𑀯𑀼𑀢𑁄 𑀯𑀺𑀳𑀭𑁂𑀬𑁆𑀬, 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑀢𑀸𑀬 𑀲𑀦𑁆𑀢𑀼𑀝𑁆𑀞𑁄, 𑀅𑀪𑀺𑀭𑀢𑁄 𑀧𑀯𑀺𑀯𑁂𑀓𑁂. 𑀢𑀁 𑀘𑁂 𑀢𑁂 𑀧𑀼𑀭𑀺𑀲𑀸 𑀏𑀯𑀫𑀸𑀭𑁄𑀘𑁂𑀬𑁆𑀬𑀼𑀁 𑁋 ‘𑀬𑀕𑁆𑀖𑁂 𑀤𑁂𑀯 𑀚𑀸𑀦𑁂𑀬𑁆𑀬𑀸𑀲𑀺, 𑀬𑁄 𑀢𑁂 𑀲𑁄 𑀧𑀼𑀭𑀺𑀲𑁄 [𑀬𑁄 𑀢𑁂 𑀧𑀼𑀭𑀺𑀲𑁄 (𑀲𑀻. 𑀓.)] 𑀤𑀸𑀲𑁄 𑀓𑀫𑁆𑀫𑀓𑀸𑀭𑁄 𑀧𑀼𑀩𑁆𑀩𑀼𑀝𑁆𑀞𑀸𑀬𑀻 𑀧𑀘𑁆𑀙𑀸𑀦𑀺𑀧𑀸𑀢𑀻 𑀓𑀺𑀗𑁆𑀓𑀸𑀭𑀧𑀝𑀺𑀲𑁆𑀲𑀸𑀯𑀻 𑀫𑀦𑀸𑀧𑀘𑀸𑀭𑀻 𑀧𑀺𑀬𑀯𑀸𑀤𑀻 𑀫𑀼𑀔𑀼𑀮𑁆𑀮𑁄𑀓𑀓𑁄; 𑀲𑁄, 𑀤𑁂𑀯, 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄. 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀓𑀸𑀬𑁂𑀦 𑀲𑀁𑀯𑀼𑀢𑁄 𑀯𑀺𑀳𑀭𑀢𑀺, 𑀯𑀸𑀘𑀸𑀬 𑀲𑀁𑀯𑀼𑀢𑁄 𑀯𑀺𑀳𑀭𑀢𑀺, 𑀫𑀦𑀲𑀸 𑀲𑀁𑀯𑀼𑀢𑁄 𑀯𑀺𑀳𑀭𑀢𑀺, 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑀢𑀸𑀬 𑀲𑀦𑁆𑀢𑀼𑀝𑁆𑀞𑁄, 𑀅𑀪𑀺𑀭𑀢𑁄 𑀧𑀯𑀺𑀯𑁂𑀓𑁂’𑀢𑀺. 𑀅𑀧𑀺 𑀦𑀼 𑀢𑁆𑀯𑀁 𑀏𑀯𑀁 𑀯𑀤𑁂𑀬𑁆𑀬𑀸𑀲𑀺 𑁋 ‘𑀏𑀢𑀼 𑀫𑁂, 𑀪𑁄, 𑀲𑁄 𑀧𑀼𑀭𑀺𑀲𑁄, 𑀧𑀼𑀦𑀤𑁂𑀯 𑀳𑁄𑀢𑀼 𑀤𑀸𑀲𑁄 𑀓𑀫𑁆𑀫𑀓𑀸𑀭𑁄 𑀧𑀼𑀩𑁆𑀩𑀼𑀝𑁆𑀞𑀸𑀬𑀻 𑀧𑀘𑁆𑀙𑀸𑀦𑀺𑀧𑀸𑀢𑀻 𑀓𑀺𑀗𑁆𑀓𑀸𑀭𑀧𑀝𑀺𑀲𑁆𑀲𑀸𑀯𑀻 𑀫𑀦𑀸𑀧𑀘𑀸𑀭𑀻 𑀧𑀺𑀬𑀯𑀸𑀤𑀻 𑀫𑀼𑀔𑀼𑀮𑁆𑀮𑁄𑀓𑀓𑁄’𑀢𑀺?

𑁧𑁮𑁪. ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂. 𑀅𑀣 𑀔𑁄 𑀦𑀁 𑀫𑀬𑀫𑁂𑀯 𑀅𑀪𑀺𑀯𑀸𑀤𑁂𑀬𑁆𑀬𑀸𑀫𑀧𑀺, 𑀧𑀘𑁆𑀘𑀼𑀝𑁆𑀞𑁂𑀬𑁆𑀬𑀸𑀫𑀧𑀺, 𑀆𑀲𑀦𑁂𑀦𑀧𑀺 𑀦𑀺𑀫𑀦𑁆𑀢𑁂𑀬𑁆𑀬𑀸𑀫, 𑀅𑀪𑀺𑀦𑀺𑀫𑀦𑁆𑀢𑁂𑀬𑁆𑀬𑀸𑀫𑀧𑀺 𑀦𑀁 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀳𑀺, 𑀥𑀫𑁆𑀫𑀺𑀓𑀫𑁆𑀧𑀺𑀲𑁆𑀲 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑁂𑀬𑁆𑀬𑀸𑀫𑀸’’𑀢𑀺.

𑁧𑁮𑁫. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀬𑀤𑀺 𑀏𑀯𑀁 𑀲𑀦𑁆𑀢𑁂 𑀳𑁄𑀢𑀺 𑀯𑀸 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀦𑁄 𑀯𑀸’’𑀢𑀺? ‘‘𑀅𑀤𑁆𑀥𑀸 𑀔𑁄, 𑀪𑀦𑁆𑀢𑁂, 𑀏𑀯𑀁 𑀲𑀦𑁆𑀢𑁂 𑀳𑁄𑀢𑀺 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮’’𑀦𑁆𑀢𑀺. ‘‘𑀇𑀤𑀁 𑀔𑁄 𑀢𑁂, 𑀫𑀳𑀸𑀭𑀸𑀚, 𑀫𑀬𑀸 𑀧𑀞𑀫𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺.

𑀤𑀼𑀢𑀺𑀬𑀲𑀦𑁆𑀤𑀺𑀝𑁆𑀞𑀺𑀓𑀲𑀸𑀫𑀜𑁆𑀜𑀨𑀮𑀁

𑁧𑁮𑁬. ‘‘𑀲𑀓𑁆𑀓𑀸 𑀧𑀦, 𑀪𑀦𑁆𑀢𑁂, 𑀅𑀜𑁆𑀜𑀫𑁆𑀧𑀺 𑀏𑀯𑀫𑁂𑀯 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀜𑁆𑀜𑀧𑁂𑀢𑀼’’𑀦𑁆𑀢𑀺? ‘‘𑀲𑀓𑁆𑀓𑀸, 𑀫𑀳𑀸𑀭𑀸𑀚. 𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺. 𑀬𑀣𑀸 𑀢𑁂 𑀔𑀫𑁂𑀬𑁆𑀬, 𑀢𑀣𑀸 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚, 𑀇𑀥 𑀢𑁂 𑀅𑀲𑁆𑀲 𑀧𑀼𑀭𑀺𑀲𑁄 𑀓𑀲𑁆𑀲𑀓𑁄 𑀕𑀳𑀧𑀢𑀺𑀓𑁄 𑀓𑀭𑀓𑀸𑀭𑀓𑁄 𑀭𑀸𑀲𑀺𑀯𑀟𑁆𑀠𑀓𑁄. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀅𑀩𑁆𑀪𑀼𑀢𑀁 𑀯𑀢 𑀪𑁄, 𑀧𑀼𑀜𑁆𑀜𑀸𑀦𑀁 𑀕𑀢𑀺, 𑀧𑀼𑀜𑁆𑀜𑀸𑀦𑀁 𑀯𑀺𑀧𑀸𑀓𑁄. 𑀅𑀬𑀜𑁆𑀳𑀺 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀫𑀦𑀼𑀲𑁆𑀲𑁄, 𑀅𑀳𑀫𑁆𑀧𑀺 𑀫𑀦𑀼𑀲𑁆𑀲𑁄. 𑀅𑀬𑀜𑁆𑀳𑀺 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺, 𑀤𑁂𑀯𑁄 𑀫𑀜𑁆𑀜𑁂. 𑀅𑀳𑀁 𑀧𑀦𑀫𑁆𑀳𑀺𑀲𑁆𑀲 𑀓𑀲𑁆𑀲𑀓𑁄 𑀕𑀳𑀧𑀢𑀺𑀓𑁄 𑀓𑀭𑀓𑀸𑀭𑀓𑁄 𑀭𑀸𑀲𑀺𑀯𑀟𑁆𑀠𑀓𑁄. 𑀲𑁄 𑀯𑀢𑀲𑁆𑀲𑀸𑀳𑀁 𑀧𑀼𑀜𑁆𑀜𑀸𑀦𑀺 𑀓𑀭𑁂𑀬𑁆𑀬𑀁. 𑀬𑀁𑀦𑀽𑀦𑀸𑀳𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬’𑀦𑁆𑀢𑀺.

‘‘𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀧𑁆𑀧𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀫𑀳𑀦𑁆𑀢𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬, 𑀅𑀧𑁆𑀧𑀁 𑀯𑀸 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀫𑀳𑀦𑁆𑀢𑀁 𑀯𑀸 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬. 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀓𑀸𑀬𑁂𑀦 𑀲𑀁𑀯𑀼𑀢𑁄 𑀯𑀺𑀳𑀭𑁂𑀬𑁆𑀬, 𑀯𑀸𑀘𑀸𑀬 𑀲𑀁𑀯𑀼𑀢𑁄 𑀯𑀺𑀳𑀭𑁂𑀬𑁆𑀬, 𑀫𑀦𑀲𑀸 𑀲𑀁𑀯𑀼𑀢𑁄 𑀯𑀺𑀳𑀭𑁂𑀬𑁆𑀬, 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑀢𑀸𑀬 𑀲𑀦𑁆𑀢𑀼𑀝𑁆𑀞𑁄, 𑀅𑀪𑀺𑀭𑀢𑁄 𑀧𑀯𑀺𑀯𑁂𑀓𑁂. 𑀢𑀁 𑀘𑁂 𑀢𑁂 𑀧𑀼𑀭𑀺𑀲𑀸 𑀏𑀯𑀫𑀸𑀭𑁄𑀘𑁂𑀬𑁆𑀬𑀼𑀁 𑁋 ‘𑀬𑀕𑁆𑀖𑁂, 𑀤𑁂𑀯 𑀚𑀸𑀦𑁂𑀬𑁆𑀬𑀸𑀲𑀺, 𑀬𑁄 𑀢𑁂 𑀲𑁄 𑀧𑀼𑀭𑀺𑀲𑁄 [𑀬𑁄 𑀢𑁂 𑀧𑀼𑀭𑀺𑀲𑁄 (𑀲𑀻.)] 𑀓𑀲𑁆𑀲𑀓𑁄 𑀕𑀳𑀧𑀢𑀺𑀓𑁄 𑀓𑀭𑀓𑀸𑀭𑀓𑁄 𑀭𑀸𑀲𑀺𑀯𑀟𑁆𑀠𑀓𑁄; 𑀲𑁄 𑀤𑁂𑀯 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄. 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀓𑀸𑀬𑁂𑀦 𑀲𑀁𑀯𑀼𑀢𑁄 𑀯𑀺𑀳𑀭𑀢𑀺, 𑀯𑀸𑀘𑀸𑀬 𑀲𑀁𑀯𑀼𑀢𑁄 𑀯𑀺𑀳𑀭𑀢𑀺, 𑀫𑀦𑀲𑀸 𑀲𑀁𑀯𑀼𑀢𑁄 𑀯𑀺𑀳𑀭𑀢𑀺, 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑀢𑀸𑀬 𑀲𑀦𑁆𑀢𑀼𑀝𑁆𑀞𑁄, 𑀅𑀪𑀺𑀭𑀢𑁄 𑀧𑀯𑀺𑀯𑁂𑀓𑁂’’𑀢𑀺. 𑀅𑀧𑀺 𑀦𑀼 𑀢𑁆𑀯𑀁 𑀏𑀯𑀁 𑀯𑀤𑁂𑀬𑁆𑀬𑀸𑀲𑀺 𑁋 ‘𑀏𑀢𑀼 𑀫𑁂, 𑀪𑁄, 𑀲𑁄 𑀧𑀼𑀭𑀺𑀲𑁄, 𑀧𑀼𑀦𑀤𑁂𑀯 𑀳𑁄𑀢𑀼 𑀓𑀲𑁆𑀲𑀓𑁄 𑀕𑀳𑀧𑀢𑀺𑀓𑁄 𑀓𑀭𑀓𑀸𑀭𑀓𑁄 𑀭𑀸𑀲𑀺𑀯𑀟𑁆𑀠𑀓𑁄’𑀢𑀺?

𑁧𑁮𑁭. ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂. 𑀅𑀣 𑀔𑁄 𑀦𑀁 𑀫𑀬𑀫𑁂𑀯 𑀅𑀪𑀺𑀯𑀸𑀤𑁂𑀬𑁆𑀬𑀸𑀫𑀧𑀺, 𑀧𑀘𑁆𑀘𑀼𑀝𑁆𑀞𑁂𑀬𑁆𑀬𑀸𑀫𑀧𑀺, 𑀆𑀲𑀦𑁂𑀦𑀧𑀺 𑀦𑀺𑀫𑀦𑁆𑀢𑁂𑀬𑁆𑀬𑀸𑀫, 𑀅𑀪𑀺𑀦𑀺𑀫𑀦𑁆𑀢𑁂𑀬𑁆𑀬𑀸𑀫𑀧𑀺 𑀦𑀁 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀳𑀺, 𑀥𑀫𑁆𑀫𑀺𑀓𑀫𑁆𑀧𑀺𑀲𑁆𑀲 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑁂𑀬𑁆𑀬𑀸𑀫𑀸’’𑀢𑀺.

𑁧𑁮𑁮. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀫𑀳𑀸𑀭𑀸𑀚? 𑀬𑀤𑀺 𑀏𑀯𑀁 𑀲𑀦𑁆𑀢𑁂 𑀳𑁄𑀢𑀺 𑀯𑀸 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀦𑁄 𑀯𑀸’’𑀢𑀺? ‘‘𑀅𑀤𑁆𑀥𑀸 𑀔𑁄, 𑀪𑀦𑁆𑀢𑁂, 𑀏𑀯𑀁 𑀲𑀦𑁆𑀢𑁂 𑀳𑁄𑀢𑀺 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮’’𑀦𑁆𑀢𑀺. ‘‘𑀇𑀤𑀁 𑀔𑁄 𑀢𑁂, 𑀫𑀳𑀸𑀭𑀸𑀚, 𑀫𑀬𑀸 𑀤𑀼𑀢𑀺𑀬𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺.

𑀧𑀡𑀻𑀢𑀢𑀭𑀲𑀸𑀫𑀜𑁆𑀜𑀨𑀮𑀁

𑁧𑁮𑁯. ‘‘𑀲𑀓𑁆𑀓𑀸 𑀧𑀦, 𑀪𑀦𑁆𑀢𑁂, 𑀅𑀜𑁆𑀜𑀫𑁆𑀧𑀺 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀜𑁆𑀜𑀧𑁂𑀢𑀼𑀁 𑀇𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘𑀸’’𑀢𑀺? ‘‘𑀲𑀓𑁆𑀓𑀸, 𑀫𑀳𑀸𑀭𑀸𑀚. 𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀲𑀼𑀡𑁄𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺.

𑁧𑁯𑁦. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀇𑀥, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸. 𑀲𑁄 𑀇𑀫𑀁 𑀮𑁄𑀓𑀁 𑀲𑀤𑁂𑀯𑀓𑀁 𑀲𑀫𑀸𑀭𑀓𑀁 𑀲𑀩𑁆𑀭𑀳𑁆𑀫𑀓𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺.

𑁧𑁯𑁧. ‘‘𑀢𑀁 𑀥𑀫𑁆𑀫𑀁 𑀲𑀼𑀡𑀸𑀢𑀺 𑀕𑀳𑀧𑀢𑀺 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁄 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄. 𑀲𑁄 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀣𑀸𑀕𑀢𑁂 𑀲𑀤𑁆𑀥𑀁 𑀧𑀝𑀺𑀮𑀪𑀢𑀺. 𑀲𑁄 𑀢𑁂𑀦 𑀲𑀤𑁆𑀥𑀸𑀧𑀝𑀺𑀮𑀸𑀪𑁂𑀦 𑀲𑀫𑀦𑁆𑀦𑀸𑀕𑀢𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄 𑀭𑀚𑁄𑀧𑀣𑁄, 𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸. 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬’𑀦𑁆𑀢𑀺.

𑁧𑁯𑁨. ‘‘𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀧𑁆𑀧𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀫𑀳𑀦𑁆𑀢𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀅𑀧𑁆𑀧𑀁 𑀯𑀸 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀫𑀳𑀦𑁆𑀢𑀁 𑀯𑀸 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺.

𑁧𑁯𑁩. ‘‘𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄, 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼, 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑀼𑀲𑀮𑁂𑀦, 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 [𑀕𑀼𑀢𑁆𑀢𑀤𑁆𑀯𑀸𑀭𑁄, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 (𑀓.)], 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀲𑀦𑁆𑀢𑀼𑀝𑁆𑀞𑁄.

𑀘𑀽𑀴𑀲𑀻𑀮𑀁

𑁧𑁯𑁪. ‘‘𑀓𑀣𑀜𑁆𑀘, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺? 𑀇𑀥, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

‘‘𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀤𑀺𑀦𑁆𑀦𑀸𑀤𑀸𑀬𑀻 𑀤𑀺𑀦𑁆𑀦𑀧𑀸𑀝𑀺𑀓𑀗𑁆𑀔𑀻, 𑀅𑀣𑁂𑀦𑁂𑀦 𑀲𑀼𑀘𑀺𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

‘‘𑀅𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀳𑀸𑀬 𑀩𑁆𑀭𑀳𑁆𑀫𑀘𑀸𑀭𑀻 𑀳𑁄𑀢𑀺 𑀆𑀭𑀸𑀘𑀸𑀭𑀻 𑀯𑀺𑀭𑀢𑁄 𑀫𑁂𑀣𑀼𑀦𑀸 𑀕𑀸𑀫𑀥𑀫𑁆𑀫𑀸. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

‘‘𑀫𑀼𑀲𑀸𑀯𑀸𑀤𑀁 𑀧𑀳𑀸𑀬 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀲𑀘𑁆𑀘𑀯𑀸𑀤𑀻 𑀲𑀘𑁆𑀘𑀲𑀦𑁆𑀥𑁄 𑀣𑁂𑀢𑁄 𑀧𑀘𑁆𑀘𑀬𑀺𑀓𑁄 𑀅𑀯𑀺𑀲𑀁𑀯𑀸𑀤𑀓𑁄 𑀮𑁄𑀓𑀲𑁆𑀲. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

‘‘𑀧𑀺𑀲𑀼𑀡𑀁 𑀯𑀸𑀘𑀁 𑀧𑀳𑀸𑀬 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺; 𑀇𑀢𑁄 𑀲𑀼𑀢𑁆𑀯𑀸 𑀦 𑀅𑀫𑀼𑀢𑁆𑀭 𑀅𑀓𑁆𑀔𑀸𑀢𑀸 𑀇𑀫𑁂𑀲𑀁 𑀪𑁂𑀤𑀸𑀬; 𑀅𑀫𑀼𑀢𑁆𑀭 𑀯𑀸 𑀲𑀼𑀢𑁆𑀯𑀸 𑀦 𑀇𑀫𑁂𑀲𑀁 𑀅𑀓𑁆𑀔𑀸𑀢𑀸, 𑀅𑀫𑀽𑀲𑀁 𑀪𑁂𑀤𑀸𑀬. 𑀇𑀢𑀺 𑀪𑀺𑀦𑁆𑀦𑀸𑀦𑀁 𑀯𑀸 𑀲𑀦𑁆𑀥𑀸𑀢𑀸, 𑀲𑀳𑀺𑀢𑀸𑀦𑀁 𑀯𑀸 𑀅𑀦𑀼𑀧𑁆𑀧𑀤𑀸𑀢𑀸, 𑀲𑀫𑀕𑁆𑀕𑀸𑀭𑀸𑀫𑁄 𑀲𑀫𑀕𑁆𑀕𑀭𑀢𑁄 𑀲𑀫𑀕𑁆𑀕𑀦𑀦𑁆𑀤𑀻 𑀲𑀫𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

‘‘𑀨𑀭𑀼𑀲𑀁 𑀯𑀸𑀘𑀁 𑀧𑀳𑀸𑀬 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺; 𑀬𑀸 𑀲𑀸 𑀯𑀸𑀘𑀸 𑀦𑁂𑀮𑀸 𑀓𑀡𑁆𑀡𑀲𑀼𑀔𑀸 𑀧𑁂𑀫𑀦𑀻𑀬𑀸 𑀳𑀤𑀬𑀗𑁆𑀕𑀫𑀸 𑀧𑁄𑀭𑀻 𑀩𑀳𑀼𑀚𑀦𑀓𑀦𑁆𑀢𑀸 𑀩𑀳𑀼𑀚𑀦𑀫𑀦𑀸𑀧𑀸 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

‘‘𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀳𑀸𑀬 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀅𑀢𑁆𑀣𑀯𑀸𑀤𑀻 𑀥𑀫𑁆𑀫𑀯𑀸𑀤𑀻 𑀯𑀺𑀦𑀬𑀯𑀸𑀤𑀻, 𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺 𑀓𑀸𑀮𑁂𑀦 𑀲𑀸𑀧𑀤𑁂𑀲𑀁 𑀧𑀭𑀺𑀬𑀦𑁆𑀢𑀯𑀢𑀺𑀁 𑀅𑀢𑁆𑀣𑀲𑀁𑀳𑀺𑀢𑀁. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

‘‘𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺…𑀧𑁂… 𑀏𑀓𑀪𑀢𑁆𑀢𑀺𑀓𑁄 𑀳𑁄𑀢𑀺 𑀭𑀢𑁆𑀢𑀽𑀧𑀭𑀢𑁄 𑀯𑀺𑀭𑀢𑁄 𑀯𑀺𑀓𑀸𑀮𑀪𑁄𑀚𑀦𑀸. 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀥𑀸𑀭𑀡𑀫𑀡𑁆𑀟𑀦𑀯𑀺𑀪𑀽𑀲𑀦𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀚𑀸𑀢𑀭𑀽𑀧𑀭𑀚𑀢𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀆𑀫𑀓𑀥𑀜𑁆𑀜𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀆𑀫𑀓𑀫𑀁𑀲𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀢𑁆𑀣𑀺𑀓𑀼𑀫𑀸𑀭𑀺𑀓𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀤𑀸𑀲𑀺𑀤𑀸𑀲𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀅𑀚𑁂𑀴𑀓𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀓𑀼𑀓𑁆𑀓𑀼𑀝𑀲𑀽𑀓𑀭𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀳𑀢𑁆𑀣𑀺𑀕𑀯𑀲𑁆𑀲𑀯𑀴𑀯𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀔𑁂𑀢𑁆𑀢𑀯𑀢𑁆𑀣𑀼𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀤𑀽𑀢𑁂𑀬𑁆𑀬𑀧𑀳𑀺𑀡𑀕𑀫𑀦𑀸𑀦𑀼𑀬𑁄𑀕𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀓𑀬𑀯𑀺𑀓𑁆𑀓𑀬𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀢𑀼𑀮𑀸𑀓𑀽𑀝𑀓𑀁𑀲𑀓𑀽𑀝𑀫𑀸𑀦𑀓𑀽𑀝𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀉𑀓𑁆𑀓𑁄𑀝𑀦𑀯𑀜𑁆𑀘𑀦𑀦𑀺𑀓𑀢𑀺𑀲𑀸𑀘𑀺𑀬𑁄𑀕𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀙𑁂𑀤𑀦𑀯𑀥𑀩𑀦𑁆𑀥𑀦𑀯𑀺𑀧𑀭𑀸𑀫𑁄𑀲𑀆𑀮𑁄𑀧𑀲𑀳𑀲𑀸𑀓𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

𑀘𑀽𑀴𑀲𑀻𑀮𑀁 𑀦𑀺𑀝𑁆𑀞𑀺𑀢𑀁.

𑀫𑀚𑁆𑀛𑀺𑀫𑀲𑀻𑀮𑀁

𑁧𑁯𑁫. ‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀫𑀽𑀮𑀩𑀻𑀚𑀁 𑀔𑀦𑁆𑀥𑀩𑀻𑀚𑀁 𑀨𑀴𑀼𑀩𑀻𑀚𑀁 𑀅𑀕𑁆𑀕𑀩𑀻𑀚𑀁 𑀩𑀻𑀚𑀩𑀻𑀚𑀫𑁂𑀯 𑀧𑀜𑁆𑀘𑀫𑀁, 𑀇𑀢𑀺 𑀏𑀯𑀭𑀽𑀧𑀸 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

𑁧𑁯𑁬. ‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀲𑀦𑁆𑀦𑀺𑀥𑀺𑀓𑀸𑀭𑀧𑀭𑀺𑀪𑁄𑀕𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀦𑁆𑀦𑀲𑀦𑁆𑀦𑀺𑀥𑀺𑀁 𑀧𑀸𑀦𑀲𑀦𑁆𑀦𑀺𑀥𑀺𑀁 𑀯𑀢𑁆𑀣𑀲𑀦𑁆𑀦𑀺𑀥𑀺𑀁 𑀬𑀸𑀦𑀲𑀦𑁆𑀦𑀺𑀥𑀺𑀁 𑀲𑀬𑀦𑀲𑀦𑁆𑀦𑀺𑀥𑀺𑀁 𑀕𑀦𑁆𑀥𑀲𑀦𑁆𑀦𑀺𑀥𑀺𑀁 𑀆𑀫𑀺𑀲𑀲𑀦𑁆𑀦𑀺𑀥𑀺𑀁, 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸 𑀲𑀦𑁆𑀦𑀺𑀥𑀺𑀓𑀸𑀭𑀧𑀭𑀺𑀪𑁄𑀕𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

𑁧𑁯𑁭. ‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀯𑀺𑀲𑀽𑀓𑀤𑀲𑁆𑀲𑀦𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀦𑀘𑁆𑀘𑀁 𑀕𑀻𑀢𑀁 𑀯𑀸𑀤𑀺𑀢𑀁 𑀧𑁂𑀓𑁆𑀔𑀁 𑀅𑀓𑁆𑀔𑀸𑀦𑀁 𑀧𑀸𑀡𑀺𑀲𑁆𑀲𑀭𑀁 𑀯𑁂𑀢𑀸𑀴𑀁 𑀓𑀼𑀫𑁆𑀪𑀣𑀽𑀡𑀁 𑀲𑁄𑀪𑀦𑀓𑀁 𑀘𑀡𑁆𑀟𑀸𑀮𑀁 𑀯𑀁𑀲𑀁 𑀥𑁄𑀯𑀦𑀁 𑀳𑀢𑁆𑀣𑀺𑀬𑀼𑀤𑁆𑀥𑀁 𑀅𑀲𑁆𑀲𑀬𑀼𑀤𑁆𑀥𑀁 𑀫𑀳𑀺𑀁𑀲𑀬𑀼𑀤𑁆𑀥𑀁 𑀉𑀲𑀪𑀬𑀼𑀤𑁆𑀥𑀁 𑀅𑀚𑀬𑀼𑀤𑁆𑀥𑀁 𑀫𑁂𑀡𑁆𑀟𑀬𑀼𑀤𑁆𑀥𑀁 𑀓𑀼𑀓𑁆𑀓𑀼𑀝𑀬𑀼𑀤𑁆𑀥𑀁 𑀯𑀝𑁆𑀝𑀓𑀬𑀼𑀤𑁆𑀥𑀁 𑀤𑀡𑁆𑀟𑀬𑀼𑀤𑁆𑀥𑀁 𑀫𑀼𑀝𑁆𑀞𑀺𑀬𑀼𑀤𑁆𑀥𑀁 𑀦𑀺𑀩𑁆𑀩𑀼𑀤𑁆𑀥𑀁 𑀉𑀬𑁆𑀬𑁄𑀥𑀺𑀓𑀁 𑀩𑀮𑀕𑁆𑀕𑀁 𑀲𑁂𑀦𑀸𑀩𑁆𑀬𑀽𑀳𑀁 𑀅𑀦𑀻𑀓𑀤𑀲𑁆𑀲𑀦𑀁 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸 𑀯𑀺𑀲𑀽𑀓𑀤𑀲𑁆𑀲𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

𑁧𑁯𑁮. ‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀚𑀽𑀢𑀧𑁆𑀧𑀫𑀸𑀤𑀝𑁆𑀞𑀸𑀦𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀝𑁆𑀞𑀧𑀤𑀁 𑀤𑀲𑀧𑀤𑀁 𑀆𑀓𑀸𑀲𑀁 𑀧𑀭𑀺𑀳𑀸𑀭𑀧𑀣𑀁 𑀲𑀦𑁆𑀢𑀺𑀓𑀁 𑀔𑀮𑀺𑀓𑀁 𑀖𑀝𑀺𑀓𑀁 𑀲𑀮𑀸𑀓𑀳𑀢𑁆𑀣𑀁 𑀅𑀓𑁆𑀔𑀁 𑀧𑀗𑁆𑀕𑀘𑀻𑀭𑀁 𑀯𑀗𑁆𑀓𑀓𑀁 𑀫𑁄𑀓𑁆𑀔𑀘𑀺𑀓𑀁 𑀘𑀺𑀗𑁆𑀕𑀼𑀮𑀺𑀓𑀁 𑀧𑀢𑁆𑀢𑀸𑀴𑁆𑀳𑀓𑀁 𑀭𑀣𑀓𑀁 𑀥𑀦𑀼𑀓𑀁 𑀅𑀓𑁆𑀔𑀭𑀺𑀓𑀁 𑀫𑀦𑁂𑀲𑀺𑀓𑀁 𑀬𑀣𑀸𑀯𑀚𑁆𑀚𑀁 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸 𑀚𑀽𑀢𑀧𑁆𑀧𑀫𑀸𑀤𑀝𑁆𑀞𑀸𑀦𑀸𑀦𑀼𑀬𑁄𑀕𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

𑁧𑁯𑁯. ‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀆𑀲𑀦𑁆𑀤𑀺𑀁 𑀧𑀮𑁆𑀮𑀗𑁆𑀓𑀁 𑀕𑁄𑀦𑀓𑀁 𑀘𑀺𑀢𑁆𑀢𑀓𑀁 𑀧𑀝𑀺𑀓𑀁 𑀧𑀝𑀮𑀺𑀓𑀁 𑀢𑀽𑀮𑀺𑀓𑀁 𑀯𑀺𑀓𑀢𑀺𑀓𑀁 𑀉𑀤𑁆𑀤𑀮𑁄𑀫𑀺𑀁 𑀏𑀓𑀦𑁆𑀢𑀮𑁄𑀫𑀺𑀁 𑀓𑀝𑁆𑀝𑀺𑀲𑁆𑀲𑀁 𑀓𑁄𑀲𑁂𑀬𑁆𑀬𑀁 𑀓𑀼𑀢𑁆𑀢𑀓𑀁 𑀳𑀢𑁆𑀣𑀢𑁆𑀣𑀭𑀁 𑀅𑀲𑁆𑀲𑀢𑁆𑀣𑀭𑀁 𑀭𑀣𑀢𑁆𑀣𑀭𑀁 𑀅𑀚𑀺𑀦𑀧𑁆𑀧𑀯𑁂𑀡𑀺𑀁 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀁 𑀲𑀉𑀢𑁆𑀢𑀭𑀘𑁆𑀙𑀤𑀁 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀁 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

𑁨𑁦𑁦. ‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀫𑀡𑁆𑀟𑀦𑀯𑀺𑀪𑀽𑀲𑀦𑀝𑁆𑀞𑀸𑀦𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀉𑀘𑁆𑀙𑀸𑀤𑀦𑀁 𑀧𑀭𑀺𑀫𑀤𑁆𑀤𑀦𑀁 𑀦𑁆𑀳𑀸𑀧𑀦𑀁 𑀲𑀫𑁆𑀩𑀸𑀳𑀦𑀁 𑀆𑀤𑀸𑀲𑀁 𑀅𑀜𑁆𑀚𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀫𑀼𑀔𑀘𑀼𑀡𑁆𑀡𑀁 𑀫𑀼𑀔𑀮𑁂𑀧𑀦𑀁 𑀳𑀢𑁆𑀣𑀩𑀦𑁆𑀥𑀁 𑀲𑀺𑀔𑀸𑀩𑀦𑁆𑀥𑀁 𑀤𑀡𑁆𑀟𑀁 𑀦𑀸𑀴𑀺𑀓𑀁 𑀅𑀲𑀺𑀁 [𑀔𑀕𑁆𑀕𑀁 (𑀲𑀻. 𑀧𑀻.), 𑀅𑀲𑀺𑀁 𑀔𑀕𑁆𑀕𑀁 (𑀲𑁆𑀬𑀸. 𑀓𑀁.), 𑀔𑀕𑁆𑀕𑀁 𑀅𑀲𑀺𑀁 (𑀓.)] 𑀙𑀢𑁆𑀢𑀁 𑀘𑀺𑀢𑁆𑀭𑀼𑀧𑀸𑀳𑀦𑀁 𑀉𑀡𑁆𑀳𑀻𑀲𑀁 𑀫𑀡𑀺𑀁 𑀯𑀸𑀮𑀩𑀻𑀚𑀦𑀺𑀁 𑀑𑀤𑀸𑀢𑀸𑀦𑀺 𑀯𑀢𑁆𑀣𑀸𑀦𑀺 𑀤𑀻𑀖𑀤𑀲𑀸𑀦𑀺 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸 𑀫𑀡𑁆𑀟𑀦𑀯𑀺𑀪𑀽𑀲𑀦𑀝𑁆𑀞𑀸𑀦𑀸𑀦𑀼𑀬𑁄𑀕𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

𑁨𑁦𑁧. ‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀚𑀓𑀣𑀁 𑀘𑁄𑀭𑀓𑀣𑀁 𑀫𑀳𑀸𑀫𑀢𑁆𑀢𑀓𑀣𑀁 𑀲𑁂𑀦𑀸𑀓𑀣𑀁 𑀪𑀬𑀓𑀣𑀁 𑀬𑀼𑀤𑁆𑀥𑀓𑀣𑀁 𑀅𑀦𑁆𑀦𑀓𑀣𑀁 𑀧𑀸𑀦𑀓𑀣𑀁 𑀯𑀢𑁆𑀣𑀓𑀣𑀁 𑀲𑀬𑀦𑀓𑀣𑀁 𑀫𑀸𑀮𑀸𑀓𑀣𑀁 𑀕𑀦𑁆𑀥𑀓𑀣𑀁 𑀜𑀸𑀢𑀺𑀓𑀣𑀁 𑀬𑀸𑀦𑀓𑀣𑀁 𑀕𑀸𑀫𑀓𑀣𑀁 𑀦𑀺𑀕𑀫𑀓𑀣𑀁 𑀦𑀕𑀭𑀓𑀣𑀁 𑀚𑀦𑀧𑀤𑀓𑀣𑀁 𑀇𑀢𑁆𑀣𑀺𑀓𑀣𑀁 [𑀇𑀢𑁆𑀣𑀺𑀓𑀣𑀁 𑀧𑀼𑀭𑀺𑀲𑀓𑀣𑀁 𑀓𑀼𑀫𑀸𑀭𑀓𑀣𑀁 𑀓𑀼𑀫𑀸𑀭𑀺𑀓𑀣𑀁 (𑀓.)] 𑀲𑀽𑀭𑀓𑀣𑀁 𑀯𑀺𑀲𑀺𑀔𑀸𑀓𑀣𑀁 𑀓𑀼𑀫𑁆𑀪𑀝𑁆𑀞𑀸𑀦𑀓𑀣𑀁 𑀧𑀼𑀩𑁆𑀩𑀧𑁂𑀢𑀓𑀣𑀁 𑀦𑀸𑀦𑀢𑁆𑀢𑀓𑀣𑀁 𑀮𑁄𑀓𑀓𑁆𑀔𑀸𑀬𑀺𑀓𑀁 𑀲𑀫𑀼𑀤𑁆𑀤𑀓𑁆𑀔𑀸𑀬𑀺𑀓𑀁 𑀇𑀢𑀺𑀪𑀯𑀸𑀪𑀯𑀓𑀣𑀁 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀓𑀣𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

𑁨𑁦𑁨. ‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀯𑀺𑀕𑁆𑀕𑀸𑀳𑀺𑀓𑀓𑀣𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀲𑀺, 𑀅𑀳𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀫𑀺, 𑀓𑀺𑀁 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀺𑀲𑁆𑀲𑀲𑀺, 𑀫𑀺𑀘𑁆𑀙𑀸 𑀧𑀝𑀺𑀧𑀦𑁆𑀦𑁄 𑀢𑁆𑀯𑀫𑀲𑀺, 𑀅𑀳𑀫𑀲𑁆𑀫𑀺 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑁄, 𑀲𑀳𑀺𑀢𑀁 𑀫𑁂, 𑀅𑀲𑀳𑀺𑀢𑀁 𑀢𑁂, 𑀧𑀼𑀭𑁂 𑀯𑀘𑀦𑀻𑀬𑀁 𑀧𑀘𑁆𑀙𑀸 𑀅𑀯𑀘, 𑀧𑀘𑁆𑀙𑀸 𑀯𑀘𑀦𑀻𑀬𑀁 𑀧𑀼𑀭𑁂 𑀅𑀯𑀘, 𑀅𑀥𑀺𑀘𑀺𑀡𑁆𑀡𑀁 𑀢𑁂 𑀯𑀺𑀧𑀭𑀸𑀯𑀢𑁆𑀢𑀁, 𑀆𑀭𑁄𑀧𑀺𑀢𑁄 𑀢𑁂 𑀯𑀸𑀤𑁄, 𑀦𑀺𑀕𑁆𑀕𑀳𑀺𑀢𑁄 𑀢𑁆𑀯𑀫𑀲𑀺, 𑀘𑀭 𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀬, 𑀦𑀺𑀩𑁆𑀩𑁂𑀞𑁂𑀳𑀺 𑀯𑀸 𑀲𑀘𑁂 𑀧𑀳𑁄𑀲𑀻𑀢𑀺 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸𑀬 𑀯𑀺𑀕𑁆𑀕𑀸𑀳𑀺𑀓𑀓𑀣𑀸𑀬 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

𑁨𑁦𑁩. ‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀁 𑀤𑀽𑀢𑁂𑀬𑁆𑀬𑀧𑀳𑀺𑀡𑀕𑀫𑀦𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀜𑁆𑀜𑀁, 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁, 𑀔𑀢𑁆𑀢𑀺𑀬𑀸𑀦𑀁, 𑀩𑁆𑀭𑀸𑀳𑁆𑀫𑀡𑀸𑀦𑀁, 𑀕𑀳𑀧𑀢𑀺𑀓𑀸𑀦𑀁, 𑀓𑀼𑀫𑀸𑀭𑀸𑀦𑀁 𑁋 ‘𑀇𑀥 𑀕𑀘𑁆𑀙, 𑀅𑀫𑀼𑀢𑁆𑀭𑀸𑀕𑀘𑁆𑀙, 𑀇𑀤𑀁 𑀳𑀭, 𑀅𑀫𑀼𑀢𑁆𑀭 𑀇𑀤𑀁 𑀆𑀳𑀭𑀸’𑀢𑀺 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸 𑀤𑀽𑀢𑁂𑀬𑁆𑀬𑀧𑀳𑀺𑀡𑀕𑀫𑀦𑀸𑀦𑀼𑀬𑁄𑀕𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

𑁨𑁦𑁪. ‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀓𑀼𑀳𑀓𑀸 𑀘 𑀳𑁄𑀦𑁆𑀢𑀺 𑀮𑀧𑀓𑀸 𑀘 𑀦𑁂𑀫𑀺𑀢𑁆𑀢𑀺𑀓𑀸 𑀘 𑀦𑀺𑀧𑁆𑀧𑁂𑀲𑀺𑀓𑀸 𑀘 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀁𑀲𑀺𑀢𑀸𑀭𑁄 𑀘. 𑀇𑀢𑀺 𑀏𑀯𑀭𑀽𑀧𑀸 𑀓𑀼𑀳𑀦𑀮𑀧𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁’’.

𑀫𑀚𑁆𑀛𑀺𑀫𑀲𑀻𑀮𑀁 𑀦𑀺𑀝𑁆𑀞𑀺𑀢𑀁.

𑀫𑀳𑀸𑀲𑀻𑀮𑀁

𑁨𑁦𑁫. ‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀗𑁆𑀕𑀁 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀸𑀢𑀁 𑀲𑀼𑀧𑀺𑀦𑀁 𑀮𑀓𑁆𑀔𑀡𑀁 𑀫𑀽𑀲𑀺𑀓𑀘𑁆𑀙𑀺𑀦𑁆𑀦𑀁 𑀅𑀕𑁆𑀕𑀺𑀳𑁄𑀫𑀁 𑀤𑀩𑁆𑀩𑀺𑀳𑁄𑀫𑀁 𑀣𑀼𑀲𑀳𑁄𑀫𑀁 𑀓𑀡𑀳𑁄𑀫𑀁 𑀢𑀡𑁆𑀟𑀼𑀮𑀳𑁄𑀫𑀁 𑀲𑀧𑁆𑀧𑀺𑀳𑁄𑀫𑀁 𑀢𑁂𑀮𑀳𑁄𑀫𑀁 𑀫𑀼𑀔𑀳𑁄𑀫𑀁 𑀮𑁄𑀳𑀺𑀢𑀳𑁄𑀫𑀁 𑀅𑀗𑁆𑀕𑀯𑀺𑀚𑁆𑀚𑀸 𑀯𑀢𑁆𑀣𑀼𑀯𑀺𑀚𑁆𑀚𑀸 𑀔𑀢𑁆𑀢𑀯𑀺𑀚𑁆𑀚𑀸 𑀲𑀺𑀯𑀯𑀺𑀚𑁆𑀚𑀸 𑀪𑀽𑀢𑀯𑀺𑀚𑁆𑀚𑀸 𑀪𑀽𑀭𑀺𑀯𑀺𑀚𑁆𑀚𑀸 𑀅𑀳𑀺𑀯𑀺𑀚𑁆𑀚𑀸 𑀯𑀺𑀲𑀯𑀺𑀚𑁆𑀚𑀸 𑀯𑀺𑀘𑁆𑀙𑀺𑀓𑀯𑀺𑀚𑁆𑀚𑀸 𑀫𑀽𑀲𑀺𑀓𑀯𑀺𑀚𑁆𑀚𑀸 𑀲𑀓𑀼𑀡𑀯𑀺𑀚𑁆𑀚𑀸 𑀯𑀸𑀬𑀲𑀯𑀺𑀚𑁆𑀚𑀸 𑀧𑀓𑁆𑀓𑀚𑁆𑀛𑀸𑀦𑀁 𑀲𑀭𑀧𑀭𑀺𑀢𑁆𑀢𑀸𑀡𑀁 𑀫𑀺𑀕𑀘𑀓𑁆𑀓𑀁 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

𑁨𑁦𑁬. ‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀫𑀡𑀺𑀮𑀓𑁆𑀔𑀡𑀁 𑀯𑀢𑁆𑀣𑀮𑀓𑁆𑀔𑀡𑀁 𑀤𑀡𑁆𑀟𑀮𑀓𑁆𑀔𑀡𑀁 𑀲𑀢𑁆𑀣𑀮𑀓𑁆𑀔𑀡𑀁 𑀅𑀲𑀺𑀮𑀓𑁆𑀔𑀡𑀁 𑀉𑀲𑀼𑀮𑀓𑁆𑀔𑀡𑀁 𑀥𑀦𑀼𑀮𑀓𑁆𑀔𑀡𑀁 𑀆𑀯𑀼𑀥𑀮𑀓𑁆𑀔𑀡𑀁 𑀇𑀢𑁆𑀣𑀺𑀮𑀓𑁆𑀔𑀡𑀁 𑀧𑀼𑀭𑀺𑀲𑀮𑀓𑁆𑀔𑀡𑀁 𑀓𑀼𑀫𑀸𑀭𑀮𑀓𑁆𑀔𑀡𑀁 𑀓𑀼𑀫𑀸𑀭𑀺𑀮𑀓𑁆𑀔𑀡𑀁 𑀤𑀸𑀲𑀮𑀓𑁆𑀔𑀡𑀁 𑀤𑀸𑀲𑀺𑀮𑀓𑁆𑀔𑀡𑀁 𑀳𑀢𑁆𑀣𑀺𑀮𑀓𑁆𑀔𑀡𑀁 𑀅𑀲𑁆𑀲𑀮𑀓𑁆𑀔𑀡𑀁 𑀫𑀳𑀺𑀁𑀲𑀮𑀓𑁆𑀔𑀡𑀁 𑀉𑀲𑀪𑀮𑀓𑁆𑀔𑀡𑀁 𑀕𑁄𑀮𑀓𑁆𑀔𑀡𑀁 𑀅𑀚𑀮𑀓𑁆𑀔𑀡𑀁 𑀫𑁂𑀡𑁆𑀟𑀮𑀓𑁆𑀔𑀡𑀁 𑀓𑀼𑀓𑁆𑀓𑀼𑀝𑀮𑀓𑁆𑀔𑀡𑀁 𑀯𑀝𑁆𑀝𑀓𑀮𑀓𑁆𑀔𑀡𑀁 𑀕𑁄𑀥𑀸𑀮𑀓𑁆𑀔𑀡𑀁 𑀓𑀡𑁆𑀡𑀺𑀓𑀮𑀓𑁆𑀔𑀡𑀁 𑀓𑀘𑁆𑀙𑀧𑀮𑀓𑁆𑀔𑀡𑀁 𑀫𑀺𑀕𑀮𑀓𑁆𑀔𑀡𑀁 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

𑁨𑁦𑁭. ‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀜𑁆𑀜𑀁 𑀦𑀺𑀬𑁆𑀬𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀭𑀜𑁆𑀜𑀁 𑀅𑀦𑀺𑀬𑁆𑀬𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀅𑀩𑁆𑀪𑀦𑁆𑀢𑀭𑀸𑀦𑀁 𑀭𑀜𑁆𑀜𑀁 𑀉𑀧𑀬𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀩𑀸𑀳𑀺𑀭𑀸𑀦𑀁 𑀭𑀜𑁆𑀜𑀁 𑀅𑀧𑀬𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀩𑀸𑀳𑀺𑀭𑀸𑀦𑀁 𑀭𑀜𑁆𑀜𑀁 𑀉𑀧𑀬𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀅𑀩𑁆𑀪𑀦𑁆𑀢𑀭𑀸𑀦𑀁 𑀭𑀜𑁆𑀜𑀁 𑀅𑀧𑀬𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀅𑀩𑁆𑀪𑀦𑁆𑀢𑀭𑀸𑀦𑀁 𑀭𑀜𑁆𑀜𑀁 𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀩𑀸𑀳𑀺𑀭𑀸𑀦𑀁 𑀭𑀜𑁆𑀜𑀁 𑀧𑀭𑀸𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀩𑀸𑀳𑀺𑀭𑀸𑀦𑀁 𑀭𑀜𑁆𑀜𑀁 𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀅𑀩𑁆𑀪𑀦𑁆𑀢𑀭𑀸𑀦𑀁 𑀭𑀜𑁆𑀜𑀁 𑀧𑀭𑀸𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀇𑀢𑀺 𑀇𑀫𑀲𑁆𑀲 𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀇𑀫𑀲𑁆𑀲 𑀧𑀭𑀸𑀚𑀬𑁄 𑀪𑀯𑀺𑀲𑁆𑀲𑀢𑀺 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

𑁨𑁦𑁮. ‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀦𑁆𑀤𑀕𑁆𑀕𑀸𑀳𑁄 𑀪𑀯𑀺𑀲𑁆𑀲𑀢𑀺, 𑀲𑀽𑀭𑀺𑀬𑀕𑁆𑀕𑀸𑀳𑁄 𑀪𑀯𑀺𑀲𑁆𑀲𑀢𑀺, 𑀦𑀓𑁆𑀔𑀢𑁆𑀢𑀕𑁆𑀕𑀸𑀳𑁄 𑀪𑀯𑀺𑀲𑁆𑀲𑀢𑀺, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀧𑀣𑀕𑀫𑀦𑀁 𑀪𑀯𑀺𑀲𑁆𑀲𑀢𑀺, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀉𑀧𑁆𑀧𑀣𑀕𑀫𑀦𑀁 𑀪𑀯𑀺𑀲𑁆𑀲𑀢𑀺, 𑀦𑀓𑁆𑀔𑀢𑁆𑀢𑀸𑀦𑀁 𑀧𑀣𑀕𑀫𑀦𑀁 𑀪𑀯𑀺𑀲𑁆𑀲𑀢𑀺, 𑀦𑀓𑁆𑀔𑀢𑁆𑀢𑀸𑀦𑀁 𑀉𑀧𑁆𑀧𑀣𑀕𑀫𑀦𑀁 𑀪𑀯𑀺𑀲𑁆𑀲𑀢𑀺, 𑀉𑀓𑁆𑀓𑀸𑀧𑀸𑀢𑁄 𑀪𑀯𑀺𑀲𑁆𑀲𑀢𑀺, 𑀤𑀺𑀲𑀸𑀟𑀸𑀳𑁄 𑀪𑀯𑀺𑀲𑁆𑀲𑀢𑀺, 𑀪𑀽𑀫𑀺𑀘𑀸𑀮𑁄 𑀪𑀯𑀺𑀲𑁆𑀲𑀢𑀺, 𑀤𑁂𑀯𑀤𑀼𑀤𑁆𑀭𑀪𑀺 𑀪𑀯𑀺𑀲𑁆𑀲𑀢𑀺, 𑀘𑀦𑁆𑀤𑀺𑀫𑀲𑀽𑀭𑀺𑀬𑀦𑀓𑁆𑀔𑀢𑁆𑀢𑀸𑀦𑀁 𑀉𑀕𑁆𑀕𑀫𑀦𑀁 𑀑𑀕𑀫𑀦𑀁 𑀲𑀁𑀓𑀺𑀮𑁂𑀲𑀁 𑀯𑁄𑀤𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑁄 𑀘𑀦𑁆𑀤𑀕𑁆𑀕𑀸𑀳𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑁄 𑀲𑀽𑀭𑀺𑀬𑀕𑁆𑀕𑀸𑀳𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑁄 𑀦𑀓𑁆𑀔𑀢𑁆𑀢𑀕𑁆𑀕𑀸𑀳𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀧𑀣𑀕𑀫𑀦𑀁 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀉𑀧𑁆𑀧𑀣𑀕𑀫𑀦𑀁 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑀁 𑀦𑀓𑁆𑀔𑀢𑁆𑀢𑀸𑀦𑀁 𑀧𑀣𑀕𑀫𑀦𑀁 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑀁 𑀦𑀓𑁆𑀔𑀢𑁆𑀢𑀸𑀦𑀁 𑀉𑀧𑁆𑀧𑀣𑀕𑀫𑀦𑀁 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑁄 𑀉𑀓𑁆𑀓𑀸𑀧𑀸𑀢𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑁄 𑀤𑀺𑀲𑀸𑀟𑀸𑀳𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑁄 𑀪𑀽𑀫𑀺𑀘𑀸𑀮𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑁄 𑀤𑁂𑀯𑀤𑀼𑀤𑁆𑀭𑀪𑀺 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀯𑀺𑀧𑀸𑀓𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀦𑀓𑁆𑀔𑀢𑁆𑀢𑀸𑀦𑀁 𑀉𑀕𑁆𑀕𑀫𑀦𑀁 𑀑𑀕𑀫𑀦𑀁 𑀲𑀁𑀓𑀺𑀮𑁂𑀲𑀁 𑀯𑁄𑀤𑀸𑀦𑀁 𑀪𑀯𑀺𑀲𑁆𑀲𑀢𑀺 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

𑁨𑁦𑁯. ‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀼𑀯𑀼𑀝𑁆𑀞𑀺𑀓𑀸 𑀪𑀯𑀺𑀲𑁆𑀲𑀢𑀺, 𑀤𑀼𑀩𑁆𑀩𑀼𑀝𑁆𑀞𑀺𑀓𑀸 𑀪𑀯𑀺𑀲𑁆𑀲𑀢𑀺, 𑀲𑀼𑀪𑀺𑀓𑁆𑀔𑀁 𑀪𑀯𑀺𑀲𑁆𑀲𑀢𑀺, 𑀤𑀼𑀩𑁆𑀪𑀺𑀓𑁆𑀔𑀁 𑀪𑀯𑀺𑀲𑁆𑀲𑀢𑀺, 𑀔𑁂𑀫𑀁 𑀪𑀯𑀺𑀲𑁆𑀲𑀢𑀺, 𑀪𑀬𑀁 𑀪𑀯𑀺𑀲𑁆𑀲𑀢𑀺, 𑀭𑁄𑀕𑁄 𑀪𑀯𑀺𑀲𑁆𑀲𑀢𑀺, 𑀆𑀭𑁄𑀕𑁆𑀬𑀁 𑀪𑀯𑀺𑀲𑁆𑀲𑀢𑀺, 𑀫𑀼𑀤𑁆𑀤𑀸, 𑀕𑀡𑀦𑀸, 𑀲𑀗𑁆𑀔𑀸𑀦𑀁, 𑀓𑀸𑀯𑁂𑀬𑁆𑀬𑀁, 𑀮𑁄𑀓𑀸𑀬𑀢𑀁 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

𑁨𑁧𑁦. ‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀆𑀯𑀸𑀳𑀦𑀁 𑀯𑀺𑀯𑀸𑀳𑀦𑀁 𑀲𑀁𑀯𑀭𑀡𑀁 𑀯𑀺𑀯𑀭𑀡𑀁 𑀲𑀗𑁆𑀓𑀺𑀭𑀡𑀁 𑀯𑀺𑀓𑀺𑀭𑀡𑀁 𑀲𑀼𑀪𑀕𑀓𑀭𑀡𑀁 𑀤𑀼𑀩𑁆𑀪𑀕𑀓𑀭𑀡𑀁 𑀯𑀺𑀭𑀼𑀤𑁆𑀥𑀕𑀩𑁆𑀪𑀓𑀭𑀡𑀁 𑀚𑀺𑀯𑁆𑀳𑀸𑀦𑀺𑀩𑀦𑁆𑀥𑀦𑀁 𑀳𑀦𑀼𑀲𑀁𑀳𑀦𑀦𑀁 𑀳𑀢𑁆𑀣𑀸𑀪𑀺𑀚𑀧𑁆𑀧𑀦𑀁 𑀳𑀦𑀼𑀚𑀧𑁆𑀧𑀦𑀁 𑀓𑀡𑁆𑀡𑀚𑀧𑁆𑀧𑀦𑀁 𑀆𑀤𑀸𑀲𑀧𑀜𑁆𑀳𑀁 𑀓𑀼𑀫𑀸𑀭𑀺𑀓𑀧𑀜𑁆𑀳𑀁 𑀤𑁂𑀯𑀧𑀜𑁆𑀳𑀁 𑀆𑀤𑀺𑀘𑁆𑀘𑀼𑀧𑀝𑁆𑀞𑀸𑀦𑀁 𑀫𑀳𑀢𑀼𑀧𑀝𑁆𑀞𑀸𑀦𑀁 𑀅𑀩𑁆𑀪𑀼𑀚𑁆𑀚𑀮𑀦𑀁 𑀲𑀺𑀭𑀺𑀯𑁆𑀳𑀸𑀬𑀦𑀁 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

𑁨𑁧𑁧. ‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀦𑁆𑀢𑀺𑀓𑀫𑁆𑀫𑀁 𑀧𑀡𑀺𑀥𑀺𑀓𑀫𑁆𑀫𑀁 𑀪𑀽𑀢𑀓𑀫𑁆𑀫𑀁 𑀪𑀽𑀭𑀺𑀓𑀫𑁆𑀫𑀁 𑀯𑀲𑁆𑀲𑀓𑀫𑁆𑀫𑀁 𑀯𑁄𑀲𑁆𑀲𑀓𑀫𑁆𑀫𑀁 𑀯𑀢𑁆𑀣𑀼𑀓𑀫𑁆𑀫𑀁 𑀯𑀢𑁆𑀣𑀼𑀧𑀭𑀺𑀓𑀫𑁆𑀫𑀁 𑀆𑀘𑀫𑀦𑀁 𑀦𑁆𑀳𑀸𑀧𑀦𑀁 𑀚𑀼𑀳𑀦𑀁 𑀯𑀫𑀦𑀁 𑀯𑀺𑀭𑁂𑀘𑀦𑀁 𑀉𑀤𑁆𑀥𑀁𑀯𑀺𑀭𑁂𑀘𑀦𑀁 𑀅𑀥𑁄𑀯𑀺𑀭𑁂𑀘𑀦𑀁 𑀲𑀻𑀲𑀯𑀺𑀭𑁂𑀘𑀦𑀁 𑀓𑀡𑁆𑀡𑀢𑁂𑀮𑀁 𑀦𑁂𑀢𑁆𑀢𑀢𑀧𑁆𑀧𑀦𑀁 𑀦𑀢𑁆𑀣𑀼𑀓𑀫𑁆𑀫𑀁 𑀅𑀜𑁆𑀚𑀦𑀁 𑀧𑀘𑁆𑀘𑀜𑁆𑀚𑀦𑀁 𑀲𑀸𑀮𑀸𑀓𑀺𑀬𑀁 𑀲𑀮𑁆𑀮𑀓𑀢𑁆𑀢𑀺𑀬𑀁 𑀤𑀸𑀭𑀓𑀢𑀺𑀓𑀺𑀘𑁆𑀙𑀸, 𑀫𑀽𑀮𑀪𑁂𑀲𑀚𑁆𑀚𑀸𑀦𑀁 𑀅𑀦𑀼𑀧𑁆𑀧𑀤𑀸𑀦𑀁, 𑀑𑀲𑀥𑀻𑀦𑀁 𑀧𑀝𑀺𑀫𑁄𑀓𑁆𑀔𑁄 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

𑁨𑁧𑁨. ‘‘𑀲 𑀔𑁄 𑀲𑁄, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀏𑀯𑀁 𑀲𑀻𑀮𑀲𑀫𑁆𑀧𑀦𑁆𑀦𑁄 𑀦 𑀓𑀼𑀢𑁄𑀘𑀺 𑀪𑀬𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀬𑀤𑀺𑀤𑀁 𑀲𑀻𑀮𑀲𑀁𑀯𑀭𑀢𑁄. 𑀲𑁂𑀬𑁆𑀬𑀣𑀸𑀧𑀺 𑁋 𑀫𑀳𑀸𑀭𑀸𑀚, 𑀭𑀸𑀚𑀸 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑁄 𑀦𑀺𑀳𑀢𑀧𑀘𑁆𑀘𑀸𑀫𑀺𑀢𑁆𑀢𑁄 𑀦 𑀓𑀼𑀢𑁄𑀘𑀺 𑀪𑀬𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀬𑀤𑀺𑀤𑀁 𑀧𑀘𑁆𑀘𑀢𑁆𑀣𑀺𑀓𑀢𑁄; 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀏𑀯𑀁 𑀲𑀻𑀮𑀲𑀫𑁆𑀧𑀦𑁆𑀦𑁄 𑀦 𑀓𑀼𑀢𑁄𑀘𑀺 𑀪𑀬𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀬𑀤𑀺𑀤𑀁 𑀲𑀻𑀮𑀲𑀁𑀯𑀭𑀢𑁄. 𑀲𑁄 𑀇𑀫𑀺𑀦𑀸 𑀅𑀭𑀺𑀬𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀚𑁆𑀛𑀢𑁆𑀢𑀁 𑀅𑀦𑀯𑀚𑁆𑀚𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺.

𑀫𑀳𑀸𑀲𑀻𑀮𑀁 𑀦𑀺𑀝𑁆𑀞𑀺𑀢𑀁.

𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄

𑁨𑁧𑁩. ‘‘𑀓𑀣𑀜𑁆𑀘, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀳𑁄𑀢𑀺? 𑀇𑀥, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸 𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺, 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸…𑀧𑁂… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸…𑀧𑁂… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻. 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸 𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁, 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺, 𑀭𑀓𑁆𑀔𑀢𑀺 𑀫𑀦𑀺𑀦𑁆𑀤𑁆𑀭𑀺𑀬𑀁, 𑀫𑀦𑀺𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀲𑁄 𑀇𑀫𑀺𑀦𑀸 𑀅𑀭𑀺𑀬𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀚𑁆𑀛𑀢𑁆𑀢𑀁 𑀅𑀩𑁆𑀬𑀸𑀲𑁂𑀓𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀳𑁄𑀢𑀺.

𑀲𑀢𑀺𑀲𑀫𑁆𑀧𑀚𑀜𑁆𑀜𑀁

𑁨𑁧𑁪. ‘‘𑀓𑀣𑀜𑁆𑀘, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺? 𑀇𑀥, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀆𑀮𑁄𑀓𑀺𑀢𑁂 𑀯𑀺𑀮𑁄𑀓𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀫𑀺𑀜𑁆𑀚𑀺𑀢𑁂 𑀧𑀲𑀸𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀅𑀲𑀺𑀢𑁂 𑀧𑀻𑀢𑁂 𑀔𑀸𑀬𑀺𑀢𑁂 𑀲𑀸𑀬𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀕𑀢𑁂 𑀞𑀺𑀢𑁂 𑀦𑀺𑀲𑀺𑀦𑁆𑀦𑁂 𑀲𑀼𑀢𑁆𑀢𑁂 𑀚𑀸𑀕𑀭𑀺𑀢𑁂 𑀪𑀸𑀲𑀺𑀢𑁂 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺.

𑀲𑀦𑁆𑀢𑁄𑀲𑁄

𑁨𑁧𑁫. ‘‘𑀓𑀣𑀜𑁆𑀘, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺? 𑀇𑀥, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀓𑀸𑀬𑀧𑀭𑀺𑀳𑀸𑀭𑀺𑀓𑁂𑀦 𑀘𑀻𑀯𑀭𑁂𑀦, 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑁂𑀦 𑀧𑀺𑀡𑁆𑀟𑀧𑀸𑀢𑁂𑀦. 𑀲𑁄 𑀬𑁂𑀦 𑀬𑁂𑀦𑁂𑀯 𑀧𑀓𑁆𑀓𑀫𑀢𑀺, 𑀲𑀫𑀸𑀤𑀸𑀬𑁂𑀯 𑀧𑀓𑁆𑀓𑀫𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀧𑀓𑁆𑀔𑀻 𑀲𑀓𑀼𑀡𑁄 𑀬𑁂𑀦 𑀬𑁂𑀦𑁂𑀯 𑀟𑁂𑀢𑀺, 𑀲𑀧𑀢𑁆𑀢𑀪𑀸𑀭𑁄𑀯 𑀟𑁂𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀓𑀸𑀬𑀧𑀭𑀺𑀳𑀸𑀭𑀺𑀓𑁂𑀦 𑀘𑀻𑀯𑀭𑁂𑀦 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑁂𑀦 𑀧𑀺𑀡𑁆𑀟𑀧𑀸𑀢𑁂𑀦. 𑀲𑁄 𑀬𑁂𑀦 𑀬𑁂𑀦𑁂𑀯 𑀧𑀓𑁆𑀓𑀫𑀢𑀺, 𑀲𑀫𑀸𑀤𑀸𑀬𑁂𑀯 𑀧𑀓𑁆𑀓𑀫𑀢𑀺. 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺.

𑀦𑀻𑀯𑀭𑀡𑀧𑁆𑀧𑀳𑀸𑀦𑀁

𑁨𑁧𑁬. ‘‘𑀲𑁄 𑀇𑀫𑀺𑀦𑀸 𑀘 𑀅𑀭𑀺𑀬𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀇𑀫𑀺𑀦𑀸 𑀘 𑀅𑀭𑀺𑀬𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀇𑀫𑀺𑀦𑀸 𑀘 𑀅𑀭𑀺𑀬𑁂𑀦 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀇𑀫𑀸𑀬 𑀘 𑀅𑀭𑀺𑀬𑀸𑀬 𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄, 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀺 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀁 𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀲𑀼𑀲𑀸𑀦𑀁 𑀯𑀦𑀧𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀮𑀧𑀼𑀜𑁆𑀚𑀁. 𑀲𑁄 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑁄 𑀦𑀺𑀲𑀻𑀤𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸.

𑁨𑁧𑁭. ‘‘𑀲𑁄 𑀅𑀪𑀺𑀚𑁆𑀛𑀁 𑀮𑁄𑀓𑁂 𑀧𑀳𑀸𑀬 𑀯𑀺𑀕𑀢𑀸𑀪𑀺𑀚𑁆𑀛𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺, 𑀅𑀪𑀺𑀚𑁆𑀛𑀸𑀬 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀩𑁆𑀬𑀸𑀧𑀸𑀤𑀧𑀤𑁄𑀲𑀁 𑀧𑀳𑀸𑀬 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀯𑀺𑀳𑀭𑀢𑀺 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻, 𑀩𑁆𑀬𑀸𑀧𑀸𑀤𑀧𑀤𑁄𑀲𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀣𑀺𑀦𑀫𑀺𑀤𑁆𑀥𑀁 𑀧𑀳𑀸𑀬 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄 𑀯𑀺𑀳𑀭𑀢𑀺 𑀆𑀮𑁄𑀓𑀲𑀜𑁆𑀜𑀻, 𑀲𑀢𑁄 𑀲𑀫𑁆𑀧𑀚𑀸𑀦𑁄, 𑀣𑀺𑀦𑀫𑀺𑀤𑁆𑀥𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀸𑀬 𑀅𑀦𑀼𑀤𑁆𑀥𑀢𑁄 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀁 𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑁄, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀯𑀺𑀘𑀺𑀓𑀺𑀘𑁆𑀙𑀁 𑀧𑀳𑀸𑀬 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀳𑀭𑀢𑀺, 𑀅𑀓𑀣𑀁𑀓𑀣𑀻 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀯𑀺𑀘𑀺𑀓𑀺𑀘𑁆𑀙𑀸𑀬 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺.

𑁨𑁧𑁮. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀇𑀡𑀁 𑀆𑀤𑀸𑀬 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀬𑁆𑀬. 𑀢𑀲𑁆𑀲 𑀢𑁂 𑀓𑀫𑁆𑀫𑀦𑁆𑀢𑀸 𑀲𑀫𑀺𑀚𑁆𑀛𑁂𑀬𑁆𑀬𑀼𑀁. 𑀲𑁄 𑀬𑀸𑀦𑀺 𑀘 𑀧𑁄𑀭𑀸𑀡𑀸𑀦𑀺 𑀇𑀡𑀫𑀽𑀮𑀸𑀦𑀺, 𑀢𑀸𑀦𑀺 𑀘 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬 [𑀩𑁆𑀬𑀦𑁆𑀢𑀻𑀓𑀭𑁂𑀬𑁆𑀬 (𑀲𑀻. 𑀲𑁆𑀬𑀸. 𑀓𑀁.)], 𑀲𑀺𑀬𑀸 𑀘𑀲𑁆𑀲 𑀉𑀢𑁆𑀢𑀭𑀺𑀁 𑀅𑀯𑀲𑀺𑀝𑁆𑀞𑀁 𑀤𑀸𑀭𑀪𑀭𑀡𑀸𑀬. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀳𑀁 𑀔𑁄 𑀧𑀼𑀩𑁆𑀩𑁂 𑀇𑀡𑀁 𑀆𑀤𑀸𑀬 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀲𑀺𑀁. 𑀢𑀲𑁆𑀲 𑀫𑁂 𑀢𑁂 𑀓𑀫𑁆𑀫𑀦𑁆𑀢𑀸 𑀲𑀫𑀺𑀚𑁆𑀛𑀺𑀁𑀲𑀼. 𑀲𑁄𑀳𑀁 𑀬𑀸𑀦𑀺 𑀘 𑀧𑁄𑀭𑀸𑀡𑀸𑀦𑀺 𑀇𑀡𑀫𑀽𑀮𑀸𑀦𑀺, 𑀢𑀸𑀦𑀺 𑀘 𑀩𑁆𑀬𑀦𑁆𑀢𑀺𑀁 𑀅𑀓𑀸𑀲𑀺𑀁, 𑀅𑀢𑁆𑀣𑀺 𑀘 𑀫𑁂 𑀉𑀢𑁆𑀢𑀭𑀺𑀁 𑀅𑀯𑀲𑀺𑀝𑁆𑀞𑀁 𑀤𑀸𑀭𑀪𑀭𑀡𑀸𑀬𑀸’𑀢𑀺. 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀮𑀪𑁂𑀣 𑀧𑀸𑀫𑁄𑀚𑁆𑀚𑀁, 𑀅𑀥𑀺𑀕𑀘𑁆𑀙𑁂𑀬𑁆𑀬 𑀲𑁄𑀫𑀦𑀲𑁆𑀲𑀁.

𑁨𑁧𑁯. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀆𑀩𑀸𑀥𑀺𑀓𑁄 𑀅𑀲𑁆𑀲 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄; 𑀪𑀢𑁆𑀢𑀜𑁆𑀘𑀲𑁆𑀲 𑀦𑀘𑁆𑀙𑀸𑀤𑁂𑀬𑁆𑀬, 𑀦 𑀘𑀲𑁆𑀲 𑀓𑀸𑀬𑁂 𑀩𑀮𑀫𑀢𑁆𑀢𑀸. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀫𑁆𑀳𑀸 𑀆𑀩𑀸𑀥𑀸 𑀫𑀼𑀘𑁆𑀘𑁂𑀬𑁆𑀬; 𑀪𑀢𑁆𑀢𑀁 𑀘𑀲𑁆𑀲 𑀙𑀸𑀤𑁂𑀬𑁆𑀬, 𑀲𑀺𑀬𑀸 𑀘𑀲𑁆𑀲 𑀓𑀸𑀬𑁂 𑀩𑀮𑀫𑀢𑁆𑀢𑀸. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀳𑀁 𑀔𑁄 𑀧𑀼𑀩𑁆𑀩𑁂 𑀆𑀩𑀸𑀥𑀺𑀓𑁄 𑀅𑀳𑁄𑀲𑀺𑀁 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄; 𑀪𑀢𑁆𑀢𑀜𑁆𑀘 𑀫𑁂 𑀦𑀘𑁆𑀙𑀸𑀤𑁂𑀲𑀺, 𑀦 𑀘 𑀫𑁂 𑀆𑀲𑀺 [𑀦 𑀘𑀲𑁆𑀲 𑀫𑁂 (𑀓.)] 𑀓𑀸𑀬𑁂 𑀩𑀮𑀫𑀢𑁆𑀢𑀸. 𑀲𑁄𑀫𑁆𑀳𑀺 𑀏𑀢𑀭𑀳𑀺 𑀢𑀫𑁆𑀳𑀸 𑀆𑀩𑀸𑀥𑀸 𑀫𑀼𑀢𑁆𑀢𑁄; 𑀪𑀢𑁆𑀢𑀜𑁆𑀘 𑀫𑁂 𑀙𑀸𑀤𑁂𑀢𑀺, 𑀅𑀢𑁆𑀣𑀺 𑀘 𑀫𑁂 𑀓𑀸𑀬𑁂 𑀩𑀮𑀫𑀢𑁆𑀢𑀸’𑀢𑀺. 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀮𑀪𑁂𑀣 𑀧𑀸𑀫𑁄𑀚𑁆𑀚𑀁, 𑀅𑀥𑀺𑀕𑀘𑁆𑀙𑁂𑀬𑁆𑀬 𑀲𑁄𑀫𑀦𑀲𑁆𑀲𑀁.

𑁨𑁨𑁦. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀩𑀦𑁆𑀥𑀦𑀸𑀕𑀸𑀭𑁂 𑀩𑀤𑁆𑀥𑁄 𑀅𑀲𑁆𑀲. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀫𑁆𑀳𑀸 𑀩𑀦𑁆𑀥𑀦𑀸𑀕𑀸𑀭𑀸 𑀫𑀼𑀘𑁆𑀘𑁂𑀬𑁆𑀬 𑀲𑁄𑀢𑁆𑀣𑀺𑀦𑀸 𑀅𑀩𑁆𑀪𑀬𑁂𑀦 [𑀉𑀩𑁆𑀩𑀬𑁂𑀦 (𑀲𑀻. 𑀓.)], 𑀦 𑀘𑀲𑁆𑀲 𑀓𑀺𑀜𑁆𑀘𑀺 𑀪𑁄𑀕𑀸𑀦𑀁 𑀯𑀬𑁄. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀳𑀁 𑀔𑁄 𑀧𑀼𑀩𑁆𑀩𑁂 𑀩𑀦𑁆𑀥𑀦𑀸𑀕𑀸𑀭𑁂 𑀩𑀤𑁆𑀥𑁄 𑀅𑀳𑁄𑀲𑀺𑀁, 𑀲𑁄𑀫𑁆𑀳𑀺 𑀏𑀢𑀭𑀳𑀺 𑀢𑀫𑁆𑀳𑀸 𑀩𑀦𑁆𑀥𑀦𑀸𑀕𑀸𑀭𑀸 𑀫𑀼𑀢𑁆𑀢𑁄 𑀲𑁄𑀢𑁆𑀣𑀺𑀦𑀸 𑀅𑀩𑁆𑀪𑀬𑁂𑀦. 𑀦𑀢𑁆𑀣𑀺 𑀘 𑀫𑁂 𑀓𑀺𑀜𑁆𑀘𑀺 𑀪𑁄𑀕𑀸𑀦𑀁 𑀯𑀬𑁄’𑀢𑀺. 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀮𑀪𑁂𑀣 𑀧𑀸𑀫𑁄𑀚𑁆𑀚𑀁, 𑀅𑀥𑀺𑀕𑀘𑁆𑀙𑁂𑀬𑁆𑀬 𑀲𑁄𑀫𑀦𑀲𑁆𑀲𑀁.

𑁨𑁨𑁧. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀤𑀸𑀲𑁄 𑀅𑀲𑁆𑀲 𑀅𑀦𑀢𑁆𑀢𑀸𑀥𑀻𑀦𑁄 𑀧𑀭𑀸𑀥𑀻𑀦𑁄 𑀦 𑀬𑁂𑀦𑀓𑀸𑀫𑀁𑀕𑀫𑁄. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀫𑁆𑀳𑀸 𑀤𑀸𑀲𑀩𑁆𑀬𑀸 𑀫𑀼𑀘𑁆𑀘𑁂𑀬𑁆𑀬 𑀅𑀢𑁆𑀢𑀸𑀥𑀻𑀦𑁄 𑀅𑀧𑀭𑀸𑀥𑀻𑀦𑁄 𑀪𑀼𑀚𑀺𑀲𑁆𑀲𑁄 𑀬𑁂𑀦𑀓𑀸𑀫𑀁𑀕𑀫𑁄. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀳𑀁 𑀔𑁄 𑀧𑀼𑀩𑁆𑀩𑁂 𑀤𑀸𑀲𑁄 𑀅𑀳𑁄𑀲𑀺𑀁 𑀅𑀦𑀢𑁆𑀢𑀸𑀥𑀻𑀦𑁄 𑀧𑀭𑀸𑀥𑀻𑀦𑁄 𑀦 𑀬𑁂𑀦𑀓𑀸𑀫𑀁𑀕𑀫𑁄. 𑀲𑁄𑀫𑁆𑀳𑀺 𑀏𑀢𑀭𑀳𑀺 𑀢𑀫𑁆𑀳𑀸 𑀤𑀸𑀲𑀩𑁆𑀬𑀸 𑀫𑀼𑀢𑁆𑀢𑁄 𑀅𑀢𑁆𑀢𑀸𑀥𑀻𑀦𑁄 𑀅𑀧𑀭𑀸𑀥𑀻𑀦𑁄 𑀪𑀼𑀚𑀺𑀲𑁆𑀲𑁄 𑀬𑁂𑀦𑀓𑀸𑀫𑀁𑀕𑀫𑁄’𑀢𑀺. 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀮𑀪𑁂𑀣 𑀧𑀸𑀫𑁄𑀚𑁆𑀚𑀁, 𑀅𑀥𑀺𑀕𑀘𑁆𑀙𑁂𑀬𑁆𑀬 𑀲𑁄𑀫𑀦𑀲𑁆𑀲𑀁.

𑁨𑁨𑁨. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀲𑀥𑀦𑁄 𑀲𑀪𑁄𑀕𑁄 𑀓𑀦𑁆𑀢𑀸𑀭𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑁂𑀬𑁆𑀬 𑀤𑀼𑀩𑁆𑀪𑀺𑀓𑁆𑀔𑀁 𑀲𑀧𑁆𑀧𑀝𑀺𑀪𑀬𑀁. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀁 𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀭𑁂𑀬𑁆𑀬 𑀲𑁄𑀢𑁆𑀣𑀺𑀦𑀸, 𑀕𑀸𑀫𑀦𑁆𑀢𑀁 𑀅𑀦𑀼𑀧𑀸𑀧𑀼𑀡𑁂𑀬𑁆𑀬 𑀔𑁂𑀫𑀁 𑀅𑀧𑁆𑀧𑀝𑀺𑀪𑀬𑀁. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀳𑀁 𑀔𑁄 𑀧𑀼𑀩𑁆𑀩𑁂 𑀲𑀥𑀦𑁄 𑀲𑀪𑁄𑀕𑁄 𑀓𑀦𑁆𑀢𑀸𑀭𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀁 𑀤𑀼𑀩𑁆𑀪𑀺𑀓𑁆𑀔𑀁 𑀲𑀧𑁆𑀧𑀝𑀺𑀪𑀬𑀁. 𑀲𑁄𑀫𑁆𑀳𑀺 𑀏𑀢𑀭𑀳𑀺 𑀢𑀁 𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀺𑀡𑁆𑀡𑁄 𑀲𑁄𑀢𑁆𑀣𑀺𑀦𑀸, 𑀕𑀸𑀫𑀦𑁆𑀢𑀁 𑀅𑀦𑀼𑀧𑁆𑀧𑀢𑁆𑀢𑁄 𑀔𑁂𑀫𑀁 𑀅𑀧𑁆𑀧𑀝𑀺𑀪𑀬’𑀦𑁆𑀢𑀺. 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀮𑀪𑁂𑀣 𑀧𑀸𑀫𑁄𑀚𑁆𑀚𑀁, 𑀅𑀥𑀺𑀕𑀘𑁆𑀙𑁂𑀬𑁆𑀬 𑀲𑁄𑀫𑀦𑀲𑁆𑀲𑀁.

𑁨𑁨𑁩. ‘‘𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀬𑀣𑀸 𑀇𑀡𑀁 𑀬𑀣𑀸 𑀭𑁄𑀕𑀁 𑀬𑀣𑀸 𑀩𑀦𑁆𑀥𑀦𑀸𑀕𑀸𑀭𑀁 𑀬𑀣𑀸 𑀤𑀸𑀲𑀩𑁆𑀬𑀁 𑀬𑀣𑀸 𑀓𑀦𑁆𑀢𑀸𑀭𑀤𑁆𑀥𑀸𑀦𑀫𑀕𑁆𑀕𑀁, 𑀏𑀯𑀁 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀅𑀧𑁆𑀧𑀳𑀻𑀦𑁂 𑀅𑀢𑁆𑀢𑀦𑀺 𑀲𑀫𑀦𑀼𑀧𑀲𑁆𑀲𑀢𑀺.

𑁨𑁨𑁪. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀬𑀣𑀸 𑀆𑀡𑀡𑁆𑀬𑀁 𑀬𑀣𑀸 𑀆𑀭𑁄𑀕𑁆𑀬𑀁 𑀬𑀣𑀸 𑀩𑀦𑁆𑀥𑀦𑀸𑀫𑁄𑀓𑁆𑀔𑀁 𑀬𑀣𑀸 𑀪𑀼𑀚𑀺𑀲𑁆𑀲𑀁 𑀬𑀣𑀸 𑀔𑁂𑀫𑀦𑁆𑀢𑀪𑀽𑀫𑀺𑀁; 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀻𑀦𑁂 𑀅𑀢𑁆𑀢𑀦𑀺 𑀲𑀫𑀦𑀼𑀧𑀲𑁆𑀲𑀢𑀺.

𑁨𑁨𑁫. ‘‘𑀢𑀲𑁆𑀲𑀺𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀻𑀦𑁂 𑀅𑀢𑁆𑀢𑀦𑀺 𑀲𑀫𑀦𑀼𑀧𑀲𑁆𑀲𑀢𑁄 𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀺, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑁂𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺.

𑀧𑀞𑀫𑀚𑁆𑀛𑀸𑀦𑀁

𑁨𑁨𑁬. ‘‘𑀲𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺, 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀇𑀫𑀫𑁂𑀯 𑀓𑀸𑀬𑀁 𑀯𑀺𑀯𑁂𑀓𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀪𑀺𑀲𑀦𑁆𑀤𑁂𑀢𑀺 𑀧𑀭𑀺𑀲𑀦𑁆𑀤𑁂𑀢𑀺 𑀧𑀭𑀺𑀧𑀽𑀭𑁂𑀢𑀺 𑀧𑀭𑀺𑀧𑁆𑀨𑀭𑀢𑀺, 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀯𑀺𑀯𑁂𑀓𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀧𑁆𑀨𑀼𑀝𑀁 𑀳𑁄𑀢𑀺.

𑁨𑁨𑁭. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀤𑀓𑁆𑀔𑁄 𑀦𑁆𑀳𑀸𑀧𑀓𑁄 𑀯𑀸 𑀦𑁆𑀳𑀸𑀧𑀓𑀦𑁆𑀢𑁂𑀯𑀸𑀲𑀻 𑀯𑀸 𑀓𑀁𑀲𑀣𑀸𑀮𑁂 𑀦𑁆𑀳𑀸𑀦𑀻𑀬𑀘𑀼𑀡𑁆𑀡𑀸𑀦𑀺 𑀆𑀓𑀺𑀭𑀺𑀢𑁆𑀯𑀸 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑀓𑀁 𑀧𑀭𑀺𑀧𑁆𑀨𑁄𑀲𑀓𑀁 𑀲𑀦𑁆𑀦𑁂𑀬𑁆𑀬, 𑀲𑀸𑀬𑀁 𑀦𑁆𑀳𑀸𑀦𑀻𑀬𑀧𑀺𑀡𑁆𑀟𑀺 𑀲𑁆𑀦𑁂𑀳𑀸𑀦𑀼𑀕𑀢𑀸 𑀲𑁆𑀦𑁂𑀳𑀧𑀭𑁂𑀢𑀸 𑀲𑀦𑁆𑀢𑀭𑀩𑀸𑀳𑀺𑀭𑀸 𑀨𑀼𑀝𑀸 𑀲𑁆𑀦𑁂𑀳𑁂𑀦, 𑀦 𑀘 𑀧𑀕𑁆𑀖𑀭𑀡𑀻; 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀇𑀫𑀫𑁂𑀯 𑀓𑀸𑀬𑀁 𑀯𑀺𑀯𑁂𑀓𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀪𑀺𑀲𑀦𑁆𑀤𑁂𑀢𑀺 𑀧𑀭𑀺𑀲𑀦𑁆𑀤𑁂𑀢𑀺 𑀧𑀭𑀺𑀧𑀽𑀭𑁂𑀢𑀺 𑀧𑀭𑀺𑀧𑁆𑀨𑀭𑀢𑀺, 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀯𑀺𑀯𑁂𑀓𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀧𑁆𑀨𑀼𑀝𑀁 𑀳𑁄𑀢𑀺. 𑀇𑀤𑀫𑁆𑀧𑀺 𑀔𑁄, 𑀫𑀳𑀸𑀭𑀸𑀚, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

𑀤𑀼𑀢𑀺𑀬𑀚𑁆𑀛𑀸𑀦𑀁

𑁨𑁨𑁮. ‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀇𑀫𑀫𑁂𑀯 𑀓𑀸𑀬𑀁 𑀲𑀫𑀸𑀥𑀺𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀪𑀺𑀲𑀦𑁆𑀤𑁂𑀢𑀺 𑀧𑀭𑀺𑀲𑀦𑁆𑀤𑁂𑀢𑀺 𑀧𑀭𑀺𑀧𑀽𑀭𑁂𑀢𑀺 𑀧𑀭𑀺𑀧𑁆𑀨𑀭𑀢𑀺, 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀲𑀫𑀸𑀥𑀺𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀧𑁆𑀨𑀼𑀝𑀁 𑀳𑁄𑀢𑀺.

𑁨𑁨𑁯. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀉𑀤𑀓𑀭𑀳𑀤𑁄 𑀕𑀫𑁆𑀪𑀻𑀭𑁄 𑀉𑀩𑁆𑀪𑀺𑀤𑁄𑀤𑀓𑁄 [𑀉𑀩𑁆𑀪𑀺𑀢𑁄𑀤𑀓𑁄 (𑀲𑁆𑀬𑀸. 𑀓𑀁. 𑀓.)] 𑀢𑀲𑁆𑀲 𑀦𑁂𑀯𑀲𑁆𑀲 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀉𑀤𑀓𑀲𑁆𑀲 𑀆𑀬𑀫𑀼𑀔𑀁, 𑀦 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀉𑀤𑀓𑀲𑁆𑀲 𑀆𑀬𑀫𑀼𑀔𑀁, 𑀦 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀉𑀤𑀓𑀲𑁆𑀲 𑀆𑀬𑀫𑀼𑀔𑀁, 𑀦 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀉𑀤𑀓𑀲𑁆𑀲 𑀆𑀬𑀫𑀼𑀔𑀁, 𑀤𑁂𑀯𑁄 𑀘 𑀦 𑀓𑀸𑀮𑁂𑀦𑀓𑀸𑀮𑀁 𑀲𑀫𑁆𑀫𑀸𑀥𑀸𑀭𑀁 𑀅𑀦𑀼𑀧𑁆𑀧𑀯𑁂𑀘𑁆𑀙𑁂𑀬𑁆𑀬. 𑀅𑀣 𑀔𑁄 𑀢𑀫𑁆𑀳𑀸𑀯 𑀉𑀤𑀓𑀭𑀳𑀤𑀸 𑀲𑀻𑀢𑀸 𑀯𑀸𑀭𑀺𑀥𑀸𑀭𑀸 𑀉𑀩𑁆𑀪𑀺𑀚𑁆𑀚𑀺𑀢𑁆𑀯𑀸 𑀢𑀫𑁂𑀯 𑀉𑀤𑀓𑀭𑀳𑀤𑀁 𑀲𑀻𑀢𑁂𑀦 𑀯𑀸𑀭𑀺𑀦𑀸 𑀅𑀪𑀺𑀲𑀦𑁆𑀤𑁂𑀬𑁆𑀬 𑀧𑀭𑀺𑀲𑀦𑁆𑀤𑁂𑀬𑁆𑀬 𑀧𑀭𑀺𑀧𑀽𑀭𑁂𑀬𑁆𑀬 𑀧𑀭𑀺𑀧𑁆𑀨𑀭𑁂𑀬𑁆𑀬, 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀉𑀤𑀓𑀭𑀳𑀤𑀲𑁆𑀲 𑀲𑀻𑀢𑁂𑀦 𑀯𑀸𑀭𑀺𑀦𑀸 𑀅𑀧𑁆𑀨𑀼𑀝𑀁 𑀅𑀲𑁆𑀲. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀇𑀫𑀫𑁂𑀯 𑀓𑀸𑀬𑀁 𑀲𑀫𑀸𑀥𑀺𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀪𑀺𑀲𑀦𑁆𑀤𑁂𑀢𑀺 𑀧𑀭𑀺𑀲𑀦𑁆𑀤𑁂𑀢𑀺 𑀧𑀭𑀺𑀧𑀽𑀭𑁂𑀢𑀺 𑀧𑀭𑀺𑀧𑁆𑀨𑀭𑀢𑀺, 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀲𑀫𑀸𑀥𑀺𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀧𑁆𑀨𑀼𑀝𑀁 𑀳𑁄𑀢𑀺. 𑀇𑀤𑀫𑁆𑀧𑀺 𑀔𑁄, 𑀫𑀳𑀸𑀭𑀸𑀚, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

𑀢𑀢𑀺𑀬𑀚𑁆𑀛𑀸𑀦𑀁

𑁨𑁩𑁦. ‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄, 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺, 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀇𑀫𑀫𑁂𑀯 𑀓𑀸𑀬𑀁 𑀦𑀺𑀧𑁆𑀧𑀻𑀢𑀺𑀓𑁂𑀦 𑀲𑀼𑀔𑁂𑀦 𑀅𑀪𑀺𑀲𑀦𑁆𑀤𑁂𑀢𑀺 𑀧𑀭𑀺𑀲𑀦𑁆𑀤𑁂𑀢𑀺 𑀧𑀭𑀺𑀧𑀽𑀭𑁂𑀢𑀺 𑀧𑀭𑀺𑀧𑁆𑀨𑀭𑀢𑀺, 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀦𑀺𑀧𑁆𑀧𑀻𑀢𑀺𑀓𑁂𑀦 𑀲𑀼𑀔𑁂𑀦 𑀅𑀧𑁆𑀨𑀼𑀝𑀁 𑀳𑁄𑀢𑀺.

𑁨𑁩𑁧. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀉𑀧𑁆𑀧𑀮𑀺𑀦𑀺𑀬𑀁 𑀯𑀸 𑀧𑀤𑀼𑀫𑀺𑀦𑀺𑀬𑀁 𑀯𑀸 𑀧𑀼𑀡𑁆𑀟𑀭𑀻𑀓𑀺𑀦𑀺𑀬𑀁 𑀯𑀸 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀉𑀤𑀓𑀸𑀦𑀼𑀕𑁆𑀕𑀢𑀸𑀦𑀺 𑀅𑀦𑁆𑀢𑁄𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀺, 𑀢𑀸𑀦𑀺 𑀬𑀸𑀯 𑀘𑀕𑁆𑀕𑀸 𑀬𑀸𑀯 𑀘 𑀫𑀽𑀮𑀸 𑀲𑀻𑀢𑁂𑀦 𑀯𑀸𑀭𑀺𑀦𑀸 𑀅𑀪𑀺𑀲𑀦𑁆𑀦𑀸𑀦𑀺 𑀧𑀭𑀺𑀲𑀦𑁆𑀦𑀸𑀦𑀺 [𑀅𑀪𑀺𑀲𑀦𑁆𑀤𑀸𑀦𑀺 𑀧𑀭𑀺𑀲𑀦𑁆𑀤𑀸𑀦𑀺 (𑀓.)] 𑀧𑀭𑀺𑀧𑀽𑀭𑀸𑀦𑀺 𑀧𑀭𑀺𑀧𑁆𑀨𑀼𑀝𑀸𑀦𑀺 [𑀧𑀭𑀺𑀧𑁆𑀨𑀼𑀝𑁆𑀞𑀸𑀦𑀺 (𑀧𑀻.)], 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑀁 𑀉𑀧𑁆𑀧𑀮𑀸𑀦𑀁 𑀯𑀸 𑀧𑀤𑀼𑀫𑀸𑀦𑀁 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀁 𑀯𑀸 𑀲𑀻𑀢𑁂𑀦 𑀯𑀸𑀭𑀺𑀦𑀸 𑀅𑀧𑁆𑀨𑀼𑀝𑀁 𑀅𑀲𑁆𑀲; 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀇𑀫𑀫𑁂𑀯 𑀓𑀸𑀬𑀁 𑀦𑀺𑀧𑁆𑀧𑀻𑀢𑀺𑀓𑁂𑀦 𑀲𑀼𑀔𑁂𑀦 𑀅𑀪𑀺𑀲𑀦𑁆𑀤𑁂𑀢𑀺 𑀧𑀭𑀺𑀲𑀦𑁆𑀤𑁂𑀢𑀺 𑀧𑀭𑀺𑀧𑀽𑀭𑁂𑀢𑀺 𑀧𑀭𑀺𑀧𑁆𑀨𑀭𑀢𑀺, 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀦𑀺𑀧𑁆𑀧𑀻𑀢𑀺𑀓𑁂𑀦 𑀲𑀼𑀔𑁂𑀦 𑀅𑀧𑁆𑀨𑀼𑀝𑀁 𑀳𑁄𑀢𑀺. 𑀇𑀤𑀫𑁆𑀧𑀺 𑀔𑁄, 𑀫𑀳𑀸𑀭𑀸𑀚, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

𑀘𑀢𑀼𑀢𑁆𑀣𑀚𑁆𑀛𑀸𑀦𑀁

𑁨𑁩𑁨. ‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸, 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀲𑁄 𑀇𑀫𑀫𑁂𑀯 𑀓𑀸𑀬𑀁 𑀧𑀭𑀺𑀲𑀼𑀤𑁆𑀥𑁂𑀦 𑀘𑁂𑀢𑀲𑀸 𑀧𑀭𑀺𑀬𑁄𑀤𑀸𑀢𑁂𑀦 𑀨𑀭𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀧𑀭𑀺𑀲𑀼𑀤𑁆𑀥𑁂𑀦 𑀘𑁂𑀢𑀲𑀸 𑀧𑀭𑀺𑀬𑁄𑀤𑀸𑀢𑁂𑀦 𑀅𑀧𑁆𑀨𑀼𑀝𑀁 𑀳𑁄𑀢𑀺.

𑁨𑁩𑁩. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀑𑀤𑀸𑀢𑁂𑀦 𑀯𑀢𑁆𑀣𑁂𑀦 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀅𑀲𑁆𑀲, 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀑𑀤𑀸𑀢𑁂𑀦 𑀯𑀢𑁆𑀣𑁂𑀦 𑀅𑀧𑁆𑀨𑀼𑀝𑀁 𑀅𑀲𑁆𑀲; 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀇𑀫𑀫𑁂𑀯 𑀓𑀸𑀬𑀁 𑀧𑀭𑀺𑀲𑀼𑀤𑁆𑀥𑁂𑀦 𑀘𑁂𑀢𑀲𑀸 𑀧𑀭𑀺𑀬𑁄𑀤𑀸𑀢𑁂𑀦 𑀨𑀭𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀧𑀭𑀺𑀲𑀼𑀤𑁆𑀥𑁂𑀦 𑀘𑁂𑀢𑀲𑀸 𑀧𑀭𑀺𑀬𑁄𑀤𑀸𑀢𑁂𑀦 𑀅𑀧𑁆𑀨𑀼𑀝𑀁 𑀳𑁄𑀢𑀺. 𑀇𑀤𑀫𑁆𑀧𑀺 𑀔𑁄, 𑀫𑀳𑀸𑀭𑀸𑀚, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

𑀯𑀺𑀧𑀲𑁆𑀲𑀦𑀸𑀜𑀸𑀡𑀁

𑁨𑁩𑁪. ‘‘𑀲𑁄 [𑀧𑀼𑀦 𑀘𑀧𑀭𑀁 𑀫𑀳𑀸𑀭𑀸𑀚 𑀪𑀺𑀓𑁆𑀔𑀼 𑀲𑁄 (𑀓.)] 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀜𑀸𑀡𑀤𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀅𑀬𑀁 𑀔𑁄 𑀫𑁂 𑀓𑀸𑀬𑁄 𑀭𑀽𑀧𑀻 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑁄 𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑁄 𑀅𑀦𑀺𑀘𑁆𑀘𑀼𑀘𑁆𑀙𑀸𑀤𑀦-𑀧𑀭𑀺𑀫𑀤𑁆𑀤𑀦-𑀪𑁂𑀤𑀦-𑀯𑀺𑀤𑁆𑀥𑀁𑀲𑀦-𑀥𑀫𑁆𑀫𑁄; 𑀇𑀤𑀜𑁆𑀘 𑀧𑀦 𑀫𑁂 𑀯𑀺𑀜𑁆𑀜𑀸𑀡𑀁 𑀏𑀢𑁆𑀣 𑀲𑀺𑀢𑀁 𑀏𑀢𑁆𑀣 𑀧𑀝𑀺𑀩𑀤𑁆𑀥’𑀦𑁆𑀢𑀺.

𑁨𑁩𑁫. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀼𑀪𑁄 𑀚𑀸𑀢𑀺𑀫𑀸 𑀅𑀝𑁆𑀞𑀁𑀲𑁄 𑀲𑀼𑀧𑀭𑀺𑀓𑀫𑁆𑀫𑀓𑀢𑁄 𑀅𑀘𑁆𑀙𑁄 𑀯𑀺𑀧𑁆𑀧𑀲𑀦𑁆𑀦𑁄 𑀅𑀦𑀸𑀯𑀺𑀮𑁄 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑁄. 𑀢𑀢𑁆𑀭𑀸𑀲𑁆𑀲 𑀲𑀼𑀢𑁆𑀢𑀁 𑀆𑀯𑀼𑀢𑀁 𑀦𑀻𑀮𑀁 𑀯𑀸 𑀧𑀻𑀢𑀁 𑀯𑀸 𑀮𑁄𑀳𑀺𑀢𑀁 𑀯𑀸 [𑀧𑀻𑀢𑀓𑀁 𑀯𑀸 𑀮𑁄𑀳𑀺𑀢𑀓𑀁 𑀯𑀸 (𑀓.)] 𑀑𑀤𑀸𑀢𑀁 𑀯𑀸 𑀧𑀡𑁆𑀟𑀼𑀲𑀼𑀢𑁆𑀢𑀁 𑀯𑀸. 𑀢𑀫𑁂𑀦𑀁 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀳𑀢𑁆𑀣𑁂 𑀓𑀭𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑁂𑀬𑁆𑀬 𑁋 ‘𑀅𑀬𑀁 𑀔𑁄 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀼𑀪𑁄 𑀚𑀸𑀢𑀺𑀫𑀸 𑀅𑀝𑁆𑀞𑀁𑀲𑁄 𑀲𑀼𑀧𑀭𑀺𑀓𑀫𑁆𑀫𑀓𑀢𑁄 𑀅𑀘𑁆𑀙𑁄 𑀯𑀺𑀧𑁆𑀧𑀲𑀦𑁆𑀦𑁄 𑀅𑀦𑀸𑀯𑀺𑀮𑁄 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑁄; 𑀢𑀢𑁆𑀭𑀺𑀤𑀁 𑀲𑀼𑀢𑁆𑀢𑀁 𑀆𑀯𑀼𑀢𑀁 𑀦𑀻𑀮𑀁 𑀯𑀸 𑀧𑀻𑀢𑀁 𑀯𑀸 𑀮𑁄𑀳𑀺𑀢𑀁 𑀯𑀸 𑀑𑀤𑀸𑀢𑀁 𑀯𑀸 𑀧𑀡𑁆𑀟𑀼𑀲𑀼𑀢𑁆𑀢𑀁 𑀯𑀸’𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀜𑀸𑀡𑀤𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀅𑀬𑀁 𑀔𑁄 𑀫𑁂 𑀓𑀸𑀬𑁄 𑀭𑀽𑀧𑀻 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑁄 𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑁄 𑀅𑀦𑀺𑀘𑁆𑀘𑀼𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑁄; 𑀇𑀤𑀜𑁆𑀘 𑀧𑀦 𑀫𑁂 𑀯𑀺𑀜𑁆𑀜𑀸𑀡𑀁 𑀏𑀢𑁆𑀣 𑀲𑀺𑀢𑀁 𑀏𑀢𑁆𑀣 𑀧𑀝𑀺𑀩𑀤𑁆𑀥’𑀦𑁆𑀢𑀺. 𑀇𑀤𑀫𑁆𑀧𑀺 𑀔𑁄, 𑀫𑀳𑀸𑀭𑀸𑀚, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

𑀫𑀦𑁄𑀫𑀬𑀺𑀤𑁆𑀥𑀺𑀜𑀸𑀡𑀁

𑁨𑁩𑁬. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀫𑀦𑁄𑀫𑀬𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀸𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀇𑀫𑀫𑁆𑀳𑀸 𑀓𑀸𑀬𑀸 𑀅𑀜𑁆𑀜𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀺𑀦𑀸𑀢𑀺 𑀭𑀽𑀧𑀺𑀁 𑀫𑀦𑁄𑀫𑀬𑀁 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀺𑀁 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀁.

𑁨𑁩𑁭. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀫𑀼𑀜𑁆𑀚𑀫𑁆𑀳𑀸 𑀈𑀲𑀺𑀓𑀁 𑀧𑀯𑀸𑀳𑁂𑀬𑁆𑀬 [𑀧𑀩𑁆𑀩𑀸𑀳𑁂𑀬𑁆𑀬 (𑀲𑁆𑀬𑀸. 𑀓.)]. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀬𑀁 𑀫𑀼𑀜𑁆𑀚𑁄, 𑀅𑀬𑀁 𑀈𑀲𑀺𑀓𑀸, 𑀅𑀜𑁆𑀜𑁄 𑀫𑀼𑀜𑁆𑀚𑁄, 𑀅𑀜𑁆𑀜𑀸 𑀈𑀲𑀺𑀓𑀸, 𑀫𑀼𑀜𑁆𑀚𑀫𑁆𑀳𑀸 𑀢𑁆𑀯𑁂𑀯 𑀈𑀲𑀺𑀓𑀸 𑀧𑀯𑀸𑀴𑁆𑀳𑀸’𑀢𑀺 [𑀧𑀩𑁆𑀩𑀸𑀴𑁆𑀳𑀸𑀢𑀺 (𑀲𑁆𑀬𑀸. 𑀓.)]. 𑀲𑁂𑀬𑁆𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀅𑀲𑀺𑀁 𑀓𑁄𑀲𑀺𑀬𑀸 𑀧𑀯𑀸𑀳𑁂𑀬𑁆𑀬. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀬𑀁 𑀅𑀲𑀺, 𑀅𑀬𑀁 𑀓𑁄𑀲𑀺, 𑀅𑀜𑁆𑀜𑁄 𑀅𑀲𑀺, 𑀅𑀜𑁆𑀜𑀸 𑀓𑁄𑀲𑀺, 𑀓𑁄𑀲𑀺𑀬𑀸 𑀢𑁆𑀯𑁂𑀯 𑀅𑀲𑀺 𑀧𑀯𑀸𑀴𑁆𑀳𑁄’’𑀢𑀺. 𑀲𑁂𑀬𑁆𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀅𑀳𑀺𑀁 𑀓𑀭𑀡𑁆𑀟𑀸 𑀉𑀤𑁆𑀥𑀭𑁂𑀬𑁆𑀬. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀬𑀁 𑀅𑀳𑀺, 𑀅𑀬𑀁 𑀓𑀭𑀡𑁆𑀟𑁄. 𑀅𑀜𑁆𑀜𑁄 𑀅𑀳𑀺, 𑀅𑀜𑁆𑀜𑁄 𑀓𑀭𑀡𑁆𑀟𑁄, 𑀓𑀭𑀡𑁆𑀟𑀸 𑀢𑁆𑀯𑁂𑀯 𑀅𑀳𑀺 𑀉𑀩𑁆𑀪𑀢𑁄’𑀢𑀺 [𑀉𑀤𑁆𑀥𑀭𑀺𑀢𑁄 (𑀲𑁆𑀬𑀸. 𑀓𑀁.)]. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀫𑀦𑁄𑀫𑀬𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀸𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀇𑀫𑀫𑁆𑀳𑀸 𑀓𑀸𑀬𑀸 𑀅𑀜𑁆𑀜𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀺𑀦𑀸𑀢𑀺 𑀭𑀽𑀧𑀺𑀁 𑀫𑀦𑁄𑀫𑀬𑀁 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀺𑀁 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀁. 𑀇𑀤𑀫𑁆𑀧𑀺 𑀔𑁄, 𑀫𑀳𑀸𑀭𑀸𑀚, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

𑀇𑀤𑁆𑀥𑀺𑀯𑀺𑀥𑀜𑀸𑀡𑀁

𑁨𑁩𑁮. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀇𑀤𑁆𑀥𑀺𑀯𑀺𑀥𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀺; 𑀆𑀯𑀺𑀪𑀸𑀯𑀁 𑀢𑀺𑀭𑁄𑀪𑀸𑀯𑀁 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑀢𑀺 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂. 𑀧𑀣𑀯𑀺𑀬𑀸𑀧𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀢𑀺 𑀲𑁂𑀬𑁆𑀬𑀣𑀸𑀧𑀺 𑀉𑀤𑀓𑁂. 𑀉𑀤𑀓𑁂𑀧𑀺 𑀅𑀪𑀺𑀚𑁆𑀚𑀫𑀸𑀦𑁂 𑀕𑀘𑁆𑀙𑀢𑀺 [𑀅𑀪𑀺𑀚𑁆𑀚𑀫𑀸𑀦𑁄 (𑀲𑀻. 𑀓.)] 𑀲𑁂𑀬𑁆𑀬𑀣𑀸𑀧𑀺 𑀧𑀣𑀯𑀺𑀬𑀸. 𑀆𑀓𑀸𑀲𑁂𑀧𑀺 𑀧𑀮𑁆𑀮𑀗𑁆𑀓𑁂𑀦 𑀓𑀫𑀢𑀺 𑀲𑁂𑀬𑁆𑀬𑀣𑀸𑀧𑀺 𑀧𑀓𑁆𑀔𑀻 𑀲𑀓𑀼𑀡𑁄. 𑀇𑀫𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀧𑀸𑀡𑀺𑀦𑀸 𑀧𑀭𑀸𑀫𑀲𑀢𑀺 𑀧𑀭𑀺𑀫𑀚𑁆𑀚𑀢𑀺. 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺.

𑁨𑁩𑁯. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀤𑀓𑁆𑀔𑁄 𑀓𑀼𑀫𑁆𑀪𑀓𑀸𑀭𑁄 𑀯𑀸 𑀓𑀼𑀫𑁆𑀪𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀲𑀼𑀧𑀭𑀺𑀓𑀫𑁆𑀫𑀓𑀢𑀸𑀬 𑀫𑀢𑁆𑀢𑀺𑀓𑀸𑀬 𑀬𑀁 𑀬𑀤𑁂𑀯 𑀪𑀸𑀚𑀦𑀯𑀺𑀓𑀢𑀺𑀁 𑀆𑀓𑀗𑁆𑀔𑁂𑀬𑁆𑀬, 𑀢𑀁 𑀢𑀤𑁂𑀯 𑀓𑀭𑁂𑀬𑁆𑀬 𑀅𑀪𑀺𑀦𑀺𑀧𑁆𑀨𑀸𑀤𑁂𑀬𑁆𑀬. 𑀲𑁂𑀬𑁆𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀤𑀓𑁆𑀔𑁄 𑀤𑀦𑁆𑀢𑀓𑀸𑀭𑁄 𑀯𑀸 𑀤𑀦𑁆𑀢𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀲𑀼𑀧𑀭𑀺𑀓𑀫𑁆𑀫𑀓𑀢𑀲𑁆𑀫𑀺𑀁 𑀤𑀦𑁆𑀢𑀲𑁆𑀫𑀺𑀁 𑀬𑀁 𑀬𑀤𑁂𑀯 𑀤𑀦𑁆𑀢𑀯𑀺𑀓𑀢𑀺𑀁 𑀆𑀓𑀗𑁆𑀔𑁂𑀬𑁆𑀬, 𑀢𑀁 𑀢𑀤𑁂𑀯 𑀓𑀭𑁂𑀬𑁆𑀬 𑀅𑀪𑀺𑀦𑀺𑀧𑁆𑀨𑀸𑀤𑁂𑀬𑁆𑀬. 𑀲𑁂𑀬𑁆𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀤𑀓𑁆𑀔𑁄 𑀲𑀼𑀯𑀡𑁆𑀡𑀓𑀸𑀭𑁄 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀲𑀼𑀧𑀭𑀺𑀓𑀫𑁆𑀫𑀓𑀢𑀲𑁆𑀫𑀺𑀁 𑀲𑀼𑀯𑀡𑁆𑀡𑀲𑁆𑀫𑀺𑀁 𑀬𑀁 𑀬𑀤𑁂𑀯 𑀲𑀼𑀯𑀡𑁆𑀡𑀯𑀺𑀓𑀢𑀺𑀁 𑀆𑀓𑀗𑁆𑀔𑁂𑀬𑁆𑀬, 𑀢𑀁 𑀢𑀤𑁂𑀯 𑀓𑀭𑁂𑀬𑁆𑀬 𑀅𑀪𑀺𑀦𑀺𑀧𑁆𑀨𑀸𑀤𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀇𑀤𑁆𑀥𑀺𑀯𑀺𑀥𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀺; 𑀆𑀯𑀺𑀪𑀸𑀯𑀁 𑀢𑀺𑀭𑁄𑀪𑀸𑀯𑀁 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑀢𑀺 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂. 𑀧𑀣𑀯𑀺𑀬𑀸𑀧𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀢𑀺 𑀲𑁂𑀬𑁆𑀬𑀣𑀸𑀧𑀺 𑀉𑀤𑀓𑁂. 𑀉𑀤𑀓𑁂𑀧𑀺 𑀅𑀪𑀺𑀚𑁆𑀚𑀫𑀸𑀦𑁂 𑀕𑀘𑁆𑀙𑀢𑀺 𑀲𑁂𑀬𑁆𑀬𑀣𑀸𑀧𑀺 𑀧𑀣𑀯𑀺𑀬𑀸. 𑀆𑀓𑀸𑀲𑁂𑀧𑀺 𑀧𑀮𑁆𑀮𑀗𑁆𑀓𑁂𑀦 𑀓𑀫𑀢𑀺 𑀲𑁂𑀬𑁆𑀬𑀣𑀸𑀧𑀺 𑀧𑀓𑁆𑀔𑀻 𑀲𑀓𑀼𑀡𑁄. 𑀇𑀫𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀧𑀸𑀡𑀺𑀦𑀸 𑀧𑀭𑀸𑀫𑀲𑀢𑀺 𑀧𑀭𑀺𑀫𑀚𑁆𑀚𑀢𑀺. 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺. 𑀇𑀤𑀫𑁆𑀧𑀺 𑀔𑁄, 𑀫𑀳𑀸𑀭𑀸𑀚, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

𑀤𑀺𑀩𑁆𑀩𑀲𑁄𑀢𑀜𑀸𑀡𑀁

𑁨𑁪𑁦. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀯𑀺𑀲𑀼𑀤𑁆𑀥𑀸𑀬 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸𑀬 𑀉𑀪𑁄 𑀲𑀤𑁆𑀤𑁂 𑀲𑀼𑀡𑀸𑀢𑀺 𑀤𑀺𑀩𑁆𑀩𑁂 𑀘 𑀫𑀸𑀦𑀼𑀲𑁂 𑀘 𑀬𑁂 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀘.

𑁨𑁪𑁧. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄. 𑀲𑁄 𑀲𑀼𑀡𑁂𑀬𑁆𑀬 𑀪𑁂𑀭𑀺𑀲𑀤𑁆𑀤𑀫𑁆𑀧𑀺 𑀫𑀼𑀤𑀺𑀗𑁆𑀕𑀲𑀤𑁆𑀤𑀫𑁆𑀧𑀺 [𑀫𑀼𑀢𑀺𑀗𑁆𑀕𑀲𑀤𑁆𑀤𑀫𑁆𑀧𑀺 (𑀲𑀻. 𑀧𑀻.)] 𑀲𑀗𑁆𑀔𑀧𑀡𑀯𑀤𑀺𑀦𑁆𑀤𑀺𑀫𑀲𑀤𑁆𑀤𑀫𑁆𑀧𑀺 [𑀲𑀗𑁆𑀔𑀧𑀡𑀯𑀤𑁂𑀡𑁆𑀟𑀺𑀫𑀲𑀤𑁆𑀤𑀫𑁆𑀧𑀺 (𑀲𑀻. 𑀧𑀻.), 𑀲𑀗𑁆𑀔𑀲𑀤𑁆𑀤𑀁𑀧𑀺 𑀧𑀡𑀯𑀲𑀤𑁆𑀤𑀁𑀧𑀺 𑀤𑁂𑀦𑁆𑀤𑀺𑀫𑀲𑀤𑁆𑀤𑀁𑀧𑀺 (𑀲𑁆𑀬𑀸. 𑀓𑀁.)]. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀪𑁂𑀭𑀺𑀲𑀤𑁆𑀤𑁄’ 𑀇𑀢𑀺𑀧𑀺, ‘𑀫𑀼𑀤𑀺𑀗𑁆𑀕𑀲𑀤𑁆𑀤𑁄’ 𑀇𑀢𑀺𑀧𑀺, ‘𑀲𑀗𑁆𑀔𑀧𑀡𑀯𑀤𑀺𑀦𑁆𑀤𑀺𑀫𑀲𑀤𑁆𑀤𑁄’ 𑀇𑀢𑀺𑀧𑀺 [𑀲𑀗𑁆𑀔𑀲𑀤𑁆𑀤𑁄 𑀇𑀢𑀺𑀧𑀺 𑀧𑀡𑀯𑀲𑀤𑁆𑀤𑁄 𑀇𑀢𑀺𑀧𑀺 𑀤𑁂𑀦𑁆𑀤𑀺𑀫𑀲𑀤𑁆𑀤𑁄 𑀇𑀢𑀺𑀧𑀺 (𑀲𑁆𑀬𑀸. 𑀓𑀁.)]. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀯𑀺𑀲𑀼𑀤𑁆𑀥𑀸𑀬 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸𑀬 𑀉𑀪𑁄 𑀲𑀤𑁆𑀤𑁂 𑀲𑀼𑀡𑀸𑀢𑀺 𑀤𑀺𑀩𑁆𑀩𑁂 𑀘 𑀫𑀸𑀦𑀼𑀲𑁂 𑀘 𑀬𑁂 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀘. 𑀇𑀤𑀫𑁆𑀧𑀺 𑀔𑁄, 𑀫𑀳𑀸𑀭𑀸𑀚, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

𑀘𑁂𑀢𑁄𑀧𑀭𑀺𑀬𑀜𑀸𑀡𑀁

𑁨𑁪𑁨. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀢𑀺 𑁋 𑀲𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 ‘𑀲𑀭𑀸𑀕𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀯𑀻𑀢𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 ‘𑀯𑀻𑀢𑀭𑀸𑀕𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀲𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁 ‘𑀲𑀤𑁄𑀲𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀯𑀻𑀢𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁 ‘𑀯𑀻𑀢𑀤𑁄𑀲𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀲𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁 ‘𑀲𑀫𑁄𑀳𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀯𑀻𑀢𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁 ‘𑀯𑀻𑀢𑀫𑁄𑀳𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀲𑀗𑁆𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 ‘𑀲𑀗𑁆𑀔𑀺𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀯𑀺𑀓𑁆𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 ‘𑀯𑀺𑀓𑁆𑀔𑀺𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁 ‘𑀫𑀳𑀕𑁆𑀕𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀅𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁 ‘𑀅𑀫𑀳𑀕𑁆𑀕𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀲𑀉𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁 ‘𑀲𑀉𑀢𑁆𑀢𑀭𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀅𑀦𑀼𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁 ‘𑀅𑀦𑀼𑀢𑁆𑀢𑀭𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 ‘𑀲𑀫𑀸𑀳𑀺𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 ‘𑀅𑀲𑀫𑀸𑀳𑀺𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 ‘𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀅𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 ‘𑀅𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺.

𑁨𑁪𑁩. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀤𑀳𑀭𑁄 𑀬𑀼𑀯𑀸 𑀫𑀡𑁆𑀟𑀦𑀚𑀸𑀢𑀺𑀓𑁄 𑀆𑀤𑀸𑀲𑁂 𑀯𑀸 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀘𑁆𑀙𑁂 𑀯𑀸 𑀉𑀤𑀓𑀧𑀢𑁆𑀢𑁂 𑀲𑀓𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀲𑀓𑀡𑀺𑀓𑀁 𑀯𑀸 ‘𑀲𑀓𑀡𑀺𑀓’𑀦𑁆𑀢𑀺 𑀚𑀸𑀦𑁂𑀬𑁆𑀬, 𑀅𑀓𑀡𑀺𑀓𑀁 𑀯𑀸 ‘𑀅𑀓𑀡𑀺𑀓’𑀦𑁆𑀢𑀺 𑀚𑀸𑀦𑁂𑀬𑁆𑀬; 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀢𑀺 𑁋 𑀲𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 ‘𑀲𑀭𑀸𑀕𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀯𑀻𑀢𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 ‘𑀯𑀻𑀢𑀭𑀸𑀕𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀲𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁 ‘𑀲𑀤𑁄𑀲𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀯𑀻𑀢𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁 ‘𑀯𑀻𑀢𑀤𑁄𑀲𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀲𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁 ‘𑀲𑀫𑁄𑀳𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀯𑀻𑀢𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁 ‘𑀯𑀻𑀢𑀫𑁄𑀳𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀲𑀗𑁆𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 ‘𑀲𑀗𑁆𑀔𑀺𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀯𑀺𑀓𑁆𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 ‘𑀯𑀺𑀓𑁆𑀔𑀺𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁 ‘𑀫𑀳𑀕𑁆𑀕𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀅𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁 ‘𑀅𑀫𑀳𑀕𑁆𑀕𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀲𑀉𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁 ‘𑀲𑀉𑀢𑁆𑀢𑀭𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀅𑀦𑀼𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁 ‘𑀅𑀦𑀼𑀢𑁆𑀢𑀭𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 ‘𑀲𑀫𑀸𑀳𑀺𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 ‘𑀅𑀲𑀫𑀸𑀳𑀺𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 ‘𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢’’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀅𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 ‘𑀅𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀇𑀤𑀫𑁆𑀧𑀺 𑀔𑁄, 𑀫𑀳𑀸𑀭𑀸𑀚, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁

𑁨𑁪𑁪. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀧𑀜𑁆𑀘𑀧𑀺 𑀚𑀸𑀢𑀺𑀬𑁄 𑀤𑀲𑀧𑀺 𑀚𑀸𑀢𑀺𑀬𑁄 𑀯𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀢𑀺𑀁𑀲𑀫𑁆𑀧𑀺 𑀚𑀸𑀢𑀺𑀬𑁄 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀧𑀜𑁆𑀜𑀸𑀲𑀫𑁆𑀧𑀺 𑀚𑀸𑀢𑀺𑀬𑁄 𑀚𑀸𑀢𑀺𑀲𑀢𑀫𑁆𑀧𑀺 𑀚𑀸𑀢𑀺𑀲𑀳𑀲𑁆𑀲𑀫𑁆𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑁆𑀧𑀺 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂, ‘𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁; 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄’𑀢𑀺. 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺.

𑁨𑁪𑁫. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀲𑀓𑀫𑁆𑀳𑀸 𑀕𑀸𑀫𑀸 𑀅𑀜𑁆𑀜𑀁 𑀕𑀸𑀫𑀁 𑀕𑀘𑁆𑀙𑁂𑀬𑁆𑀬, 𑀢𑀫𑁆𑀳𑀸𑀧𑀺 𑀕𑀸𑀫𑀸 𑀅𑀜𑁆𑀜𑀁 𑀕𑀸𑀫𑀁 𑀕𑀘𑁆𑀙𑁂𑀬𑁆𑀬. 𑀲𑁄 𑀢𑀫𑁆𑀳𑀸 𑀕𑀸𑀫𑀸 𑀲𑀓𑀁𑀬𑁂𑀯 𑀕𑀸𑀫𑀁 𑀧𑀘𑁆𑀘𑀸𑀕𑀘𑁆𑀙𑁂𑀬𑁆𑀬. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀳𑀁 𑀔𑁄 𑀲𑀓𑀫𑁆𑀳𑀸 𑀕𑀸𑀫𑀸 𑀅𑀫𑀼𑀁 𑀕𑀸𑀫𑀁 𑀅𑀕𑀘𑁆𑀙𑀺𑀁 [𑀅𑀕𑀜𑁆𑀙𑀺𑀁 (𑀲𑁆𑀬𑀸. 𑀓𑀁.)], 𑀢𑀢𑁆𑀭𑀸𑀧𑀺 𑀏𑀯𑀁 𑀅𑀝𑁆𑀞𑀸𑀲𑀺𑀁, 𑀏𑀯𑀁 𑀦𑀺𑀲𑀻𑀤𑀺𑀁, 𑀏𑀯𑀁 𑀅𑀪𑀸𑀲𑀺𑀁, 𑀏𑀯𑀁 𑀢𑀼𑀡𑁆𑀳𑀻 𑀅𑀳𑁄𑀲𑀺𑀁, 𑀢𑀫𑁆𑀳𑀸𑀧𑀺 𑀕𑀸𑀫𑀸 𑀅𑀫𑀼𑀁 𑀕𑀸𑀫𑀁 𑀅𑀕𑀘𑁆𑀙𑀺𑀁, 𑀢𑀢𑁆𑀭𑀸𑀧𑀺 𑀏𑀯𑀁 𑀅𑀝𑁆𑀞𑀸𑀲𑀺𑀁, 𑀏𑀯𑀁 𑀦𑀺𑀲𑀻𑀤𑀺𑀁, 𑀏𑀯𑀁 𑀅𑀪𑀸𑀲𑀺𑀁, 𑀏𑀯𑀁 𑀢𑀼𑀡𑁆𑀳𑀻 𑀅𑀳𑁄𑀲𑀺𑀁, 𑀲𑁄𑀫𑁆𑀳𑀺 𑀢𑀫𑁆𑀳𑀸 𑀕𑀸𑀫𑀸 𑀲𑀓𑀁𑀬𑁂𑀯 𑀕𑀸𑀫𑀁 𑀧𑀘𑁆𑀘𑀸𑀕𑀢𑁄’𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀧𑀜𑁆𑀘𑀧𑀺 𑀚𑀸𑀢𑀺𑀬𑁄 𑀤𑀲𑀧𑀺 𑀚𑀸𑀢𑀺𑀬𑁄 𑀯𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀢𑀺𑀁𑀲𑀫𑁆𑀧𑀺 𑀚𑀸𑀢𑀺𑀬𑁄 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀧𑀜𑁆𑀜𑀸𑀲𑀫𑁆𑀧𑀺 𑀚𑀸𑀢𑀺𑀬𑁄 𑀚𑀸𑀢𑀺𑀲𑀢𑀫𑁆𑀧𑀺 𑀚𑀸𑀢𑀺𑀲𑀳𑀲𑁆𑀲𑀫𑁆𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑁆𑀧𑀺 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂, ‘𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁; 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄, 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄’𑀢𑀺, 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺. 𑀇𑀤𑀫𑁆𑀧𑀺 𑀔𑁄, 𑀫𑀳𑀸𑀭𑀸𑀚, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁

𑁨𑁪𑁬. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂, 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺 𑁋 ‘𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸. 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸. 𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’𑀢𑀺. 𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂, 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺.

𑁨𑁪𑁭. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀫𑀚𑁆𑀛𑁂 𑀲𑀺𑀗𑁆𑀖𑀸𑀝𑀓𑁂 𑀧𑀸𑀲𑀸𑀤𑁄. 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀞𑀺𑀢𑁄 𑀧𑀲𑁆𑀲𑁂𑀬𑁆𑀬 𑀫𑀦𑀼𑀲𑁆𑀲𑁂 𑀕𑁂𑀳𑀁 𑀧𑀯𑀺𑀲𑀦𑁆𑀢𑁂𑀧𑀺 𑀦𑀺𑀓𑁆𑀔𑀫𑀦𑁆𑀢𑁂𑀧𑀺 𑀭𑀣𑀺𑀓𑀸𑀬𑀧𑀺 𑀯𑀻𑀣𑀺𑀁 𑀲𑀜𑁆𑀘𑀭𑀦𑁆𑀢𑁂 [𑀭𑀣𑀺𑀬𑀸𑀧𑀻 𑀭𑀣𑀺𑀁 𑀲𑀜𑁆𑀘𑀭𑀦𑁆𑀢𑁂 (𑀲𑀻.), 𑀭𑀣𑀺𑀬𑀸𑀬 𑀯𑀺𑀣𑀺𑀁 𑀲𑀜𑁆𑀘𑀭𑀦𑁆𑀢𑁂𑀧𑀺 (𑀲𑁆𑀬𑀸.)] 𑀫𑀚𑁆𑀛𑁂 𑀲𑀺𑀗𑁆𑀖𑀸𑀝𑀓𑁂 𑀦𑀺𑀲𑀺𑀦𑁆𑀦𑁂𑀧𑀺. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀏𑀢𑁂 𑀫𑀦𑀼𑀲𑁆𑀲𑀸 𑀕𑁂𑀳𑀁 𑀧𑀯𑀺𑀲𑀦𑁆𑀢𑀺, 𑀏𑀢𑁂 𑀦𑀺𑀓𑁆𑀔𑀫𑀦𑁆𑀢𑀺, 𑀏𑀢𑁂 𑀭𑀣𑀺𑀓𑀸𑀬 𑀯𑀻𑀣𑀺𑀁 𑀲𑀜𑁆𑀘𑀭𑀦𑁆𑀢𑀺, 𑀏𑀢𑁂 𑀫𑀚𑁆𑀛𑁂 𑀲𑀺𑀗𑁆𑀖𑀸𑀝𑀓𑁂 𑀦𑀺𑀲𑀺𑀦𑁆𑀦𑀸’𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂, 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺 𑁋 ‘𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸. 𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸. 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’𑀢𑀺. 𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂; 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺. ‘𑀇𑀤𑀫𑁆𑀧𑀺 𑀔𑁄, 𑀫𑀳𑀸𑀭𑀸𑀚, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘.

𑀆𑀲𑀯𑀓𑁆𑀔𑀬𑀜𑀸𑀡𑀁

𑁨𑁪𑁮. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀇𑀫𑁂 𑀆𑀲𑀯𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀆𑀲𑀯𑀲𑀫𑀼𑀤𑀬𑁄𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀆𑀲𑀯𑀦𑀺𑀭𑁄𑀥𑁄𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀢𑀲𑁆𑀲 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀪𑀯𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀅𑀯𑀺𑀚𑁆𑀚𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, ‘𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺’𑀢𑀺 𑀜𑀸𑀡𑀁 𑀳𑁄𑀢𑀺, ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺.

𑁨𑁪𑁯. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀳𑀸𑀭𑀸𑀚, 𑀧𑀩𑁆𑀩𑀢𑀲𑀗𑁆𑀔𑁂𑀧𑁂 𑀉𑀤𑀓𑀭𑀳𑀤𑁄 𑀅𑀘𑁆𑀙𑁄 𑀯𑀺𑀧𑁆𑀧𑀲𑀦𑁆𑀦𑁄 𑀅𑀦𑀸𑀯𑀺𑀮𑁄. 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀢𑀻𑀭𑁂 𑀞𑀺𑀢𑁄 𑀧𑀲𑁆𑀲𑁂𑀬𑁆𑀬 𑀲𑀺𑀧𑁆𑀧𑀺𑀲𑀫𑁆𑀩𑀼𑀓𑀫𑁆𑀧𑀺 𑀲𑀓𑁆𑀔𑀭𑀓𑀣𑀮𑀫𑁆𑀧𑀺 𑀫𑀘𑁆𑀙𑀕𑀼𑀫𑁆𑀩𑀫𑁆𑀧𑀺 𑀘𑀭𑀦𑁆𑀢𑀫𑁆𑀧𑀺 𑀢𑀺𑀝𑁆𑀞𑀦𑁆𑀢𑀫𑁆𑀧𑀺. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀬𑀁 𑀔𑁄 𑀉𑀤𑀓𑀭𑀳𑀤𑁄 𑀅𑀘𑁆𑀙𑁄 𑀯𑀺𑀧𑁆𑀧𑀲𑀦𑁆𑀦𑁄 𑀅𑀦𑀸𑀯𑀺𑀮𑁄. 𑀢𑀢𑁆𑀭𑀺𑀫𑁂 𑀲𑀺𑀧𑁆𑀧𑀺𑀲𑀫𑁆𑀩𑀼𑀓𑀸𑀧𑀺 𑀲𑀓𑁆𑀔𑀭𑀓𑀣𑀮𑀸𑀧𑀺 𑀫𑀘𑁆𑀙𑀕𑀼𑀫𑁆𑀩𑀸𑀧𑀺 𑀘𑀭𑀦𑁆𑀢𑀺𑀧𑀺 𑀢𑀺𑀝𑁆𑀞𑀦𑁆𑀢𑀺𑀧𑀻’𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀪𑀺𑀓𑁆𑀔𑀼 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. ‘𑀲𑁄 𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. ‘𑀇𑀫𑁂 𑀆𑀲𑀯𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀆𑀲𑀯𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀆𑀲𑀯𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀢𑀲𑁆𑀲 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀪𑀯𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀅𑀯𑀺𑀚𑁆𑀚𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, ‘𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺, ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺. 𑀇𑀤𑀁 𑀔𑁄, 𑀫𑀳𑀸𑀭𑀸𑀚, 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀭𑀺𑀫𑁂𑀳𑀺 𑀲𑀦𑁆𑀤𑀺𑀝𑁆𑀞𑀺𑀓𑁂𑀳𑀺 𑀲𑀸𑀫𑀜𑁆𑀜𑀨𑀮𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀜𑁆𑀘 𑀧𑀡𑀻𑀢𑀢𑀭𑀜𑁆𑀘. 𑀇𑀫𑀲𑁆𑀫𑀸 𑀘 𑀧𑀦, 𑀫𑀳𑀸𑀭𑀸𑀚, 𑀲𑀦𑁆𑀤𑀺𑀝𑁆𑀞𑀺𑀓𑀸 𑀲𑀸𑀫𑀜𑁆𑀜𑀨𑀮𑀸 𑀅𑀜𑁆𑀜𑀁 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀉𑀢𑁆𑀢𑀭𑀺𑀢𑀭𑀁 𑀯𑀸 𑀧𑀡𑀻𑀢𑀢𑀭𑀁 𑀯𑀸 𑀦𑀢𑁆𑀣𑀻’’𑀢𑀺.

𑀅𑀚𑀸𑀢𑀲𑀢𑁆𑀢𑀼𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸

𑁨𑁫𑁦. 𑀏𑀯𑀁 𑀯𑀼𑀢𑁆𑀢𑁂, 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 ‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’𑀢𑀺; 𑀏𑀯𑀫𑁂𑀯𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢𑀁. 𑀅𑀘𑁆𑀘𑀬𑁄 𑀫𑀁, 𑀪𑀦𑁆𑀢𑁂, 𑀅𑀘𑁆𑀘𑀕𑀫𑀸 𑀬𑀣𑀸𑀩𑀸𑀮𑀁 𑀬𑀣𑀸𑀫𑀽𑀴𑁆𑀳𑀁 𑀬𑀣𑀸𑀅𑀓𑀼𑀲𑀮𑀁, 𑀬𑁄𑀳𑀁 𑀧𑀺𑀢𑀭𑀁 𑀥𑀫𑁆𑀫𑀺𑀓𑀁 𑀥𑀫𑁆𑀫𑀭𑀸𑀚𑀸𑀦𑀁 𑀇𑀲𑁆𑀲𑀭𑀺𑀬𑀓𑀸𑀭𑀡𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺𑀁. 𑀢𑀲𑁆𑀲 𑀫𑁂, 𑀪𑀦𑁆𑀢𑁂 𑀪𑀕𑀯𑀸 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀆𑀬𑀢𑀺𑀁 𑀲𑀁𑀯𑀭𑀸𑀬𑀸’’𑀢𑀺.

𑁨𑁫𑁧. ‘‘𑀢𑀕𑁆𑀖 𑀢𑁆𑀯𑀁, 𑀫𑀳𑀸𑀭𑀸𑀚, 𑀅𑀘𑁆𑀘𑀬𑁄 𑀅𑀘𑁆𑀘𑀕𑀫𑀸 𑀬𑀣𑀸𑀩𑀸𑀮𑀁 𑀬𑀣𑀸𑀫𑀽𑀴𑁆𑀳𑀁 𑀬𑀣𑀸𑀅𑀓𑀼𑀲𑀮𑀁, 𑀬𑀁 𑀢𑁆𑀯𑀁 𑀧𑀺𑀢𑀭𑀁 𑀥𑀫𑁆𑀫𑀺𑀓𑀁 𑀥𑀫𑁆𑀫𑀭𑀸𑀚𑀸𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺. 𑀬𑀢𑁄 𑀘 𑀔𑁄 𑀢𑁆𑀯𑀁, 𑀫𑀳𑀸𑀭𑀸𑀚, 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀲𑀺, 𑀢𑀁 𑀢𑁂 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫. 𑀯𑀼𑀤𑁆𑀥𑀺𑀳𑁂𑀲𑀸, 𑀫𑀳𑀸𑀭𑀸𑀚, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂, 𑀬𑁄 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀢𑀺, 𑀆𑀬𑀢𑀺𑀁 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻’’𑀢𑀺.

𑁨𑁫𑁨. 𑀏𑀯𑀁 𑀯𑀼𑀢𑁆𑀢𑁂, 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀳𑀦𑁆𑀤 𑀘 𑀤𑀸𑀦𑀺 𑀫𑀬𑀁, 𑀪𑀦𑁆𑀢𑁂, 𑀕𑀘𑁆𑀙𑀸𑀫 𑀩𑀳𑀼𑀓𑀺𑀘𑁆𑀘𑀸 𑀫𑀬𑀁 𑀩𑀳𑀼𑀓𑀭𑀡𑀻𑀬𑀸’’𑀢𑀺. ‘‘𑀬𑀲𑁆𑀲𑀤𑀸𑀦𑀺 𑀢𑁆𑀯𑀁, 𑀫𑀳𑀸𑀭𑀸𑀚, 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑁨𑁫𑁩. 𑀅𑀣 𑀔𑁄 𑀪𑀕𑀯𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀔𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀭𑀸𑀚𑀸. 𑀉𑀧𑀳𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀭𑀸𑀚𑀸. 𑀲𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀧𑀺𑀢𑀭𑀁 𑀥𑀫𑁆𑀫𑀺𑀓𑀁 𑀥𑀫𑁆𑀫𑀭𑀸𑀚𑀸𑀦𑀁 𑀚𑀻𑀯𑀺𑀢𑀸 𑀦 𑀯𑁄𑀭𑁄𑀧𑁂𑀲𑁆𑀲𑀣, 𑀇𑀫𑀲𑁆𑀫𑀺𑀜𑁆𑀜𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀣𑀸’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀤𑀼𑀢𑀺𑀬𑀁.

𑁩. 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑀁

𑁨𑁫𑁪. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀬𑁂𑀦 𑀇𑀘𑁆𑀙𑀸𑀦𑀗𑁆𑀕𑀮𑀁 𑀦𑀸𑀫 𑀓𑁄𑀲𑀮𑀸𑀦𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁄 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀇𑀘𑁆𑀙𑀸𑀦𑀗𑁆𑀕𑀮𑁂 𑀯𑀺𑀳𑀭𑀢𑀺 𑀇𑀘𑁆𑀙𑀸𑀦𑀗𑁆𑀕𑀮𑀯𑀦𑀲𑀡𑁆𑀟𑁂.

𑀧𑁄𑀓𑁆𑀔𑀭𑀲𑀸𑀢𑀺𑀯𑀢𑁆𑀣𑀼

𑁨𑁫𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀺 𑀉𑀓𑁆𑀓𑀝𑁆𑀞𑀁 [𑀧𑁄𑀓𑁆𑀔𑀭𑀲𑀸𑀢𑀻 (𑀲𑀻.), 𑀧𑁄𑀓𑁆𑀔𑀭𑀲𑀸𑀤𑀺 (𑀧𑀻.)] 𑀅𑀚𑁆𑀛𑀸𑀯𑀲𑀢𑀺 𑀲𑀢𑁆𑀢𑀼𑀲𑁆𑀲𑀤𑀁 𑀲𑀢𑀺𑀡𑀓𑀝𑁆𑀞𑁄𑀤𑀓𑀁 𑀲𑀥𑀜𑁆𑀜𑀁 𑀭𑀸𑀚𑀪𑁄𑀕𑁆𑀕𑀁 𑀭𑀜𑁆𑀜𑀸 𑀧𑀲𑁂𑀦𑀤𑀺𑀦𑀸 𑀓𑁄𑀲𑀮𑁂𑀦 𑀤𑀺𑀦𑁆𑀦𑀁 𑀭𑀸𑀚𑀤𑀸𑀬𑀁 𑀩𑁆𑀭𑀳𑁆𑀫𑀤𑁂𑀬𑁆𑀬𑀁. 𑀅𑀲𑁆𑀲𑁄𑀲𑀺 𑀔𑁄 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀺 𑁋 ‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀇𑀘𑁆𑀙𑀸𑀦𑀗𑁆𑀕𑀮𑀁 𑀅𑀦𑀼𑀧𑁆𑀧𑀢𑁆𑀢𑁄 𑀇𑀘𑁆𑀙𑀸𑀦𑀗𑁆𑀕𑀮𑁂 𑀯𑀺𑀳𑀭𑀢𑀺 𑀇𑀘𑁆𑀙𑀸𑀦𑀗𑁆𑀕𑀮𑀯𑀦𑀲𑀡𑁆𑀟𑁂. 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’ [𑀪𑀕𑀯𑀸𑀢𑀺 (𑀲𑁆𑀬𑀸. 𑀓𑀁.), 𑀉𑀧𑀭𑀺𑀲𑁄𑀡𑀤𑀡𑁆𑀟𑀲𑀼𑀢𑁆𑀢𑀸𑀤𑀻𑀲𑀼𑀧𑀺 𑀩𑀼𑀤𑁆𑀥𑀕𑀼𑀡𑀓𑀣𑀸𑀬𑀁 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺]. 𑀲𑁄 𑀇𑀫𑀁 𑀮𑁄𑀓𑀁 𑀲𑀤𑁂𑀯𑀓𑀁 𑀲𑀫𑀸𑀭𑀓𑀁 𑀲𑀩𑁆𑀭𑀳𑁆𑀫𑀓𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁, 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀲𑀸𑀥𑀼 𑀔𑁄 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻’’𑀢𑀺.

𑀅𑀫𑁆𑀩𑀝𑁆𑀞𑀫𑀸𑀡𑀯𑁄

𑁨𑁫𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀅𑀫𑁆𑀩𑀝𑁆𑀞𑁄 𑀦𑀸𑀫 𑀫𑀸𑀡𑀯𑁄 𑀅𑀦𑁆𑀢𑁂𑀯𑀸𑀲𑀻 𑀳𑁄𑀢𑀺 𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 [𑀩𑁂𑀤𑀸𑀦𑀁 (𑀓.)] 𑀧𑀸𑀭𑀕𑀽 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀁 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁 𑀧𑀤𑀓𑁄 𑀯𑁂𑀬𑁆𑀬𑀸𑀓𑀭𑀡𑁄 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀯𑀬𑁄 𑀅𑀦𑀼𑀜𑁆𑀜𑀸𑀢𑀧𑀝𑀺𑀜𑁆𑀜𑀸𑀢𑁄 𑀲𑀓𑁂 𑀆𑀘𑀭𑀺𑀬𑀓𑁂 𑀢𑁂𑀯𑀺𑀚𑁆𑀚𑀓𑁂 𑀧𑀸𑀯𑀘𑀦𑁂 𑁋 ‘‘𑀬𑀫𑀳𑀁 𑀚𑀸𑀦𑀸𑀫𑀺, 𑀢𑀁 𑀢𑁆𑀯𑀁 𑀚𑀸𑀦𑀸𑀲𑀺; 𑀬𑀁 𑀢𑁆𑀯𑀁 𑀚𑀸𑀦𑀸𑀲𑀺 𑀢𑀫𑀳𑀁 𑀚𑀸𑀦𑀸𑀫𑀻’’𑀢𑀺.

𑁨𑁫𑁭. 𑀅𑀣 𑀔𑁄 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀺 𑀅𑀫𑁆𑀩𑀝𑁆𑀞𑀁 𑀫𑀸𑀡𑀯𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀬𑀁, 𑀢𑀸𑀢 𑀅𑀫𑁆𑀩𑀝𑁆𑀞, 𑀲𑀫𑀡𑁄 𑀕𑁄𑀢𑀫𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀇𑀘𑁆𑀙𑀸𑀦𑀗𑁆𑀕𑀮𑀁 𑀅𑀦𑀼𑀧𑁆𑀧𑀢𑁆𑀢𑁄 𑀇𑀘𑁆𑀙𑀸𑀦𑀗𑁆𑀕𑀮𑁂 𑀯𑀺𑀳𑀭𑀢𑀺 𑀇𑀘𑁆𑀙𑀸𑀦𑀗𑁆𑀕𑀮𑀯𑀦𑀲𑀡𑁆𑀟𑁂. 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’. 𑀲𑁄 𑀇𑀫𑀁 𑀮𑁄𑀓𑀁 𑀲𑀤𑁂𑀯𑀓𑀁 𑀲𑀫𑀸𑀭𑀓𑀁 𑀲𑀩𑁆𑀭𑀳𑁆𑀫𑀓𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁, 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀲𑀸𑀥𑀼 𑀔𑁄 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻𑀢𑀺. 𑀏𑀳𑀺 𑀢𑁆𑀯𑀁 𑀢𑀸𑀢 𑀅𑀫𑁆𑀩𑀝𑁆𑀞, 𑀬𑁂𑀦 𑀲𑀫𑀡𑁄 𑀕𑁄𑀢𑀫𑁄 𑀢𑁂𑀦𑀼𑀧𑀲𑀗𑁆𑀓𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀫𑀡𑀁 𑀕𑁄𑀢𑀫𑀁 𑀚𑀸𑀦𑀸𑀳𑀺, 𑀬𑀤𑀺 𑀯𑀸 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀢𑀣𑀸𑀲𑀦𑁆𑀢𑀁𑀬𑁂𑀯 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄, 𑀬𑀤𑀺 𑀯𑀸 𑀦𑁄 𑀢𑀣𑀸. 𑀬𑀤𑀺 𑀯𑀸 𑀲𑁄 𑀪𑀯𑀁 𑀕𑁄𑀢𑀫𑁄 𑀢𑀸𑀤𑀺𑀲𑁄, 𑀬𑀤𑀺 𑀯𑀸 𑀦 𑀢𑀸𑀤𑀺𑀲𑁄, 𑀢𑀣𑀸 𑀫𑀬𑀁 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀯𑁂𑀤𑀺𑀲𑁆𑀲𑀸𑀫𑀸’’𑀢𑀺.

𑁨𑁫𑁮. ‘‘𑀬𑀣𑀸 𑀓𑀣𑀁 𑀧𑀦𑀸𑀳𑀁, 𑀪𑁄, 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀚𑀸𑀦𑀺𑀲𑁆𑀲𑀸𑀫𑀺 𑁋 ‘𑀬𑀤𑀺 𑀯𑀸 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀢𑀣𑀸𑀲𑀦𑁆𑀢𑀁𑀬𑁂𑀯 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄, 𑀬𑀤𑀺 𑀯𑀸 𑀦𑁄 𑀢𑀣𑀸. 𑀬𑀤𑀺 𑀯𑀸 𑀲𑁄 𑀪𑀯𑀁 𑀕𑁄𑀢𑀫𑁄 𑀢𑀸𑀤𑀺𑀲𑁄, 𑀬𑀤𑀺 𑀯𑀸 𑀦 𑀢𑀸𑀤𑀺𑀲𑁄’’’𑀢𑀺?

‘‘𑀆𑀕𑀢𑀸𑀦𑀺 𑀔𑁄, 𑀢𑀸𑀢 𑀅𑀫𑁆𑀩𑀝𑁆𑀞, 𑀅𑀫𑁆𑀳𑀸𑀓𑀁 𑀫𑀦𑁆𑀢𑁂𑀲𑀼 𑀤𑁆𑀯𑀢𑁆𑀢𑀺𑀁𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑁆𑀯𑁂𑀬𑁂𑀯 𑀕𑀢𑀺𑀬𑁄 𑀪𑀯𑀦𑁆𑀢𑀺 𑀅𑀦𑀜𑁆𑀜𑀸. 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄 𑀲𑀢𑁆𑀢𑀭𑀢𑀦𑀲𑀫𑀦𑁆𑀦𑀸𑀕𑀢𑁄. 𑀢𑀲𑁆𑀲𑀺𑀫𑀸𑀦𑀺 𑀲𑀢𑁆𑀢 𑀭𑀢𑀦𑀸𑀦𑀺 𑀪𑀯𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀓𑁆𑀓𑀭𑀢𑀦𑀁, 𑀳𑀢𑁆𑀣𑀺𑀭𑀢𑀦𑀁, 𑀅𑀲𑁆𑀲𑀭𑀢𑀦𑀁, 𑀫𑀡𑀺𑀭𑀢𑀦𑀁, 𑀇𑀢𑁆𑀣𑀺𑀭𑀢𑀦𑀁, 𑀕𑀳𑀧𑀢𑀺𑀭𑀢𑀦𑀁, 𑀧𑀭𑀺𑀡𑀸𑀬𑀓𑀭𑀢𑀦𑀫𑁂𑀯 𑀲𑀢𑁆𑀢𑀫𑀁. 𑀧𑀭𑁄𑀲𑀳𑀲𑁆𑀲𑀁 𑀔𑁄 𑀧𑀦𑀲𑁆𑀲 𑀧𑀼𑀢𑁆𑀢𑀸 𑀪𑀯𑀦𑁆𑀢𑀺 𑀲𑀽𑀭𑀸 𑀯𑀻𑀭𑀗𑁆𑀕𑀭𑀽𑀧𑀸 𑀧𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀸. 𑀲𑁄 𑀇𑀫𑀁 𑀧𑀣𑀯𑀺𑀁 𑀲𑀸𑀕𑀭𑀧𑀭𑀺𑀬𑀦𑁆𑀢𑀁 𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦 𑀥𑀫𑁆𑀫𑁂𑀦 𑀅𑀪𑀺𑀯𑀺𑀚𑀺𑀬 𑀅𑀚𑁆𑀛𑀸𑀯𑀲𑀢𑀺. 𑀲𑀘𑁂 𑀔𑁄 𑀧𑀦 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺, 𑀅𑀭𑀳𑀁 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀯𑀝𑁆𑀝𑀘𑁆𑀙𑀤𑁄. 𑀅𑀳𑀁 𑀔𑁄 𑀧𑀦, 𑀢𑀸𑀢 𑀅𑀫𑁆𑀩𑀝𑁆𑀞, 𑀫𑀦𑁆𑀢𑀸𑀦𑀁 𑀤𑀸𑀢𑀸; 𑀢𑁆𑀯𑀁 𑀫𑀦𑁆𑀢𑀸𑀦𑀁 𑀧𑀝𑀺𑀕𑁆𑀕𑀳𑁂𑀢𑀸’’𑀢𑀺.

𑁨𑁫𑁯. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀩𑁆𑀭𑀸𑀳𑁆𑀫𑀡𑀁 𑀧𑁄𑀓𑁆𑀔𑀭𑀲𑀸𑀢𑀺𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀯𑀴𑀯𑀸𑀭𑀣𑀫𑀸𑀭𑀼𑀬𑁆𑀳 𑀲𑀫𑁆𑀩𑀳𑀼𑀮𑁂𑀳𑀺 𑀫𑀸𑀡𑀯𑀓𑁂𑀳𑀺 𑀲𑀤𑁆𑀥𑀺𑀁 𑀬𑁂𑀦 𑀇𑀘𑁆𑀙𑀸𑀦𑀗𑁆𑀕𑀮𑀯𑀦𑀲𑀡𑁆𑀟𑁄 𑀢𑁂𑀦 𑀧𑀸𑀬𑀸𑀲𑀺. 𑀬𑀸𑀯𑀢𑀺𑀓𑀸 𑀬𑀸𑀦𑀲𑁆𑀲 𑀪𑀽𑀫𑀺 𑀬𑀸𑀦𑁂𑀦 𑀕𑀦𑁆𑀢𑁆𑀯𑀸 𑀬𑀸𑀦𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸 𑀧𑀢𑁆𑀢𑀺𑀓𑁄𑀯 𑀆𑀭𑀸𑀫𑀁 𑀧𑀸𑀯𑀺𑀲𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽 𑀅𑀩𑁆𑀪𑁄𑀓𑀸𑀲𑁂 𑀘𑀗𑁆𑀓𑀫𑀦𑁆𑀢𑀺. 𑀅𑀣 𑀔𑁄 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀓𑀳𑀁 𑀦𑀼 𑀔𑁄, 𑀪𑁄, 𑀏𑀢𑀭𑀳𑀺 𑀲𑁄 𑀪𑀯𑀁 𑀕𑁄𑀢𑀫𑁄 𑀯𑀺𑀳𑀭𑀢𑀺? 𑀢𑀜𑁆𑀳𑀺 𑀫𑀬𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀇𑀥𑀽𑀧𑀲𑀗𑁆𑀓𑀦𑁆𑀢𑀸’’𑀢𑀺.

𑁨𑁬𑁦. 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀅𑀪𑀺𑀜𑁆𑀜𑀸𑀢𑀓𑁄𑀮𑀜𑁆𑀜𑁄 𑀘𑁂𑀯 𑀅𑀪𑀺𑀜𑁆𑀜𑀸𑀢𑀲𑁆𑀲 𑀘 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀅𑀦𑁆𑀢𑁂𑀯𑀸𑀲𑀻. 𑀅𑀕𑀭𑀼 𑀔𑁄 𑀧𑀦 𑀪𑀕𑀯𑀢𑁄 𑀏𑀯𑀭𑀽𑀧𑁂𑀳𑀺 𑀓𑀼𑀮𑀧𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀓𑀣𑀸𑀲𑀮𑁆𑀮𑀸𑀧𑁄 𑀳𑁄𑀢𑀻’’𑀢𑀺. 𑀢𑁂 𑀅𑀫𑁆𑀩𑀝𑁆𑀞𑀁 𑀫𑀸𑀡𑀯𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀏𑀲𑁄 𑀅𑀫𑁆𑀩𑀝𑁆𑀞 𑀯𑀺𑀳𑀸𑀭𑁄 𑀲𑀁𑀯𑀼𑀢𑀤𑁆𑀯𑀸𑀭𑁄, 𑀢𑁂𑀦 𑀅𑀧𑁆𑀧𑀲𑀤𑁆𑀤𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑀭𑀫𑀸𑀦𑁄 𑀆𑀴𑀺𑀦𑁆𑀤𑀁 𑀧𑀯𑀺𑀲𑀺𑀢𑁆𑀯𑀸 𑀉𑀓𑁆𑀓𑀸𑀲𑀺𑀢𑁆𑀯𑀸 𑀅𑀕𑁆𑀕𑀴𑀁 𑀆𑀓𑁄𑀝𑁂𑀳𑀺, 𑀯𑀺𑀯𑀭𑀺𑀲𑁆𑀲𑀢𑀺 𑀢𑁂 𑀪𑀕𑀯𑀸 𑀤𑁆𑀯𑀸𑀭’’𑀦𑁆𑀢𑀺.

𑁨𑁬𑁧. 𑀅𑀣 𑀔𑁄 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀬𑁂𑀦 𑀲𑁄 𑀯𑀺𑀳𑀸𑀭𑁄 𑀲𑀁𑀯𑀼𑀢𑀤𑁆𑀯𑀸𑀭𑁄, 𑀢𑁂𑀦 𑀅𑀧𑁆𑀧𑀲𑀤𑁆𑀤𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑀭𑀫𑀸𑀦𑁄 𑀆𑀴𑀺𑀦𑁆𑀤𑀁 𑀧𑀯𑀺𑀲𑀺𑀢𑁆𑀯𑀸 𑀉𑀓𑁆𑀓𑀸𑀲𑀺𑀢𑁆𑀯𑀸 𑀅𑀕𑁆𑀕𑀴𑀁 𑀆𑀓𑁄𑀝𑁂𑀲𑀺. 𑀯𑀺𑀯𑀭𑀺 𑀪𑀕𑀯𑀸 𑀤𑁆𑀯𑀸𑀭𑀁. 𑀧𑀸𑀯𑀺𑀲𑀺 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄. 𑀫𑀸𑀡𑀯𑀓𑀸𑀧𑀺 𑀧𑀯𑀺𑀲𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼, 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀫𑁆𑀩𑀝𑁆𑀞𑁄 𑀧𑀦 𑀫𑀸𑀡𑀯𑁄 𑀘𑀗𑁆𑀓𑀫𑀦𑁆𑀢𑁄𑀧𑀺 𑀦𑀺𑀲𑀺𑀦𑁆𑀦𑁂𑀦 𑀪𑀕𑀯𑀢𑀸 𑀓𑀜𑁆𑀘𑀺 𑀓𑀜𑁆𑀘𑀺 [𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 (𑀓.)] 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑀺, 𑀞𑀺𑀢𑁄𑀧𑀺 𑀦𑀺𑀲𑀺𑀦𑁆𑀦𑁂𑀦 𑀪𑀕𑀯𑀢𑀸 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑀺.

𑁨𑁬𑁨. 𑀅𑀣 𑀔𑁄 𑀪𑀕𑀯𑀸 𑀅𑀫𑁆𑀩𑀝𑁆𑀞𑀁 𑀫𑀸𑀡𑀯𑀁 𑀏𑀢𑀤𑀯𑁄𑀘 𑁋 ‘‘𑀏𑀯𑀁 𑀦𑀼 𑀢𑁂, 𑀅𑀫𑁆𑀩𑀝𑁆𑀞, 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀼𑀤𑁆𑀥𑁂𑀳𑀺 𑀫𑀳𑀮𑁆𑀮𑀓𑁂𑀳𑀺 𑀆𑀘𑀭𑀺𑀬𑀧𑀸𑀘𑀭𑀺𑀬𑁂𑀳𑀺 𑀲𑀤𑁆𑀥𑀺𑀁 𑀓𑀣𑀸𑀲𑀮𑁆𑀮𑀸𑀧𑁄 𑀳𑁄𑀢𑀺, 𑀬𑀣𑀬𑀺𑀤𑀁 𑀘𑀭𑀁 𑀢𑀺𑀝𑁆𑀞𑀁 𑀦𑀺𑀲𑀺𑀦𑁆𑀦𑁂𑀦 𑀫𑀬𑀸 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑀻’’𑀢𑀺?

𑀧𑀞𑀫𑀇𑀩𑁆𑀪𑀯𑀸𑀤𑁄

𑁨𑁬𑁩. ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫. 𑀕𑀘𑁆𑀙𑀦𑁆𑀢𑁄 𑀯𑀸 𑀳𑀺, 𑀪𑁄 𑀕𑁄𑀢𑀫, 𑀕𑀘𑁆𑀙𑀦𑁆𑀢𑁂𑀦 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼𑀫𑀭𑀳𑀢𑀺, 𑀞𑀺𑀢𑁄 𑀯𑀸 𑀳𑀺, 𑀪𑁄 𑀕𑁄𑀢𑀫, 𑀞𑀺𑀢𑁂𑀦 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼𑀫𑀭𑀳𑀢𑀺, 𑀦𑀺𑀲𑀺𑀦𑁆𑀦𑁄 𑀯𑀸 𑀳𑀺, 𑀪𑁄 𑀕𑁄𑀢𑀫, 𑀦𑀺𑀲𑀺𑀦𑁆𑀦𑁂𑀦 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼𑀫𑀭𑀳𑀢𑀺, 𑀲𑀬𑀸𑀦𑁄 𑀯𑀸 𑀳𑀺, 𑀪𑁄 𑀕𑁄𑀢𑀫, 𑀲𑀬𑀸𑀦𑁂𑀦 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀺𑀢𑀼𑀫𑀭𑀳𑀢𑀺. 𑀬𑁂 𑀘 𑀔𑁄 𑀢𑁂, 𑀪𑁄 𑀕𑁄𑀢𑀫, 𑀫𑀼𑀡𑁆𑀟𑀓𑀸 𑀲𑀫𑀡𑀓𑀸 𑀇𑀩𑁆𑀪𑀸 𑀓𑀡𑁆𑀳𑀸 [𑀓𑀺𑀡𑁆𑀳𑀸 (𑀓. 𑀲𑀻. 𑀧𑀻.)] 𑀩𑀦𑁆𑀥𑀼𑀧𑀸𑀤𑀸𑀧𑀘𑁆𑀘𑀸, 𑀢𑁂𑀳𑀺𑀧𑀺 𑀫𑁂 𑀲𑀤𑁆𑀥𑀺𑀁 𑀏𑀯𑀁 𑀓𑀣𑀸𑀲𑀮𑁆𑀮𑀸𑀧𑁄 𑀳𑁄𑀢𑀺, 𑀬𑀣𑀭𑀺𑀯 𑀪𑁄𑀢𑀸 𑀕𑁄𑀢𑀫𑁂𑀦𑀸’’𑀢𑀺. ‘‘𑀅𑀢𑁆𑀣𑀺𑀓𑀯𑀢𑁄 𑀔𑁄 𑀧𑀦 𑀢𑁂, 𑀅𑀫𑁆𑀩𑀝𑁆𑀞, 𑀇𑀥𑀸𑀕𑀫𑀦𑀁 𑀅𑀳𑁄𑀲𑀺, 𑀬𑀸𑀬𑁂𑀯 𑀔𑁄 𑀧𑀦𑀢𑁆𑀣𑀸𑀬 𑀆𑀕𑀘𑁆𑀙𑁂𑀬𑁆𑀬𑀸𑀣 [𑀆𑀕𑀘𑁆𑀙𑁂𑀬𑁆𑀬𑀸𑀣𑁄 (𑀲𑀻. 𑀧𑀻.)], 𑀢𑀫𑁂𑀯 𑀅𑀢𑁆𑀣𑀁 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁂𑀬𑁆𑀬𑀸𑀣 [𑀫𑀦𑀲𑀺𑀓𑀭𑁂𑀬𑁆𑀬𑀸𑀣𑁄 (𑀲𑀻. 𑀧𑀻.)]. 𑀅𑀯𑀼𑀲𑀺𑀢𑀯𑀸𑀬𑁂𑀯 𑀔𑁄 𑀧𑀦 𑀪𑁄 𑀅𑀬𑀁 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀯𑀼𑀲𑀺𑀢𑀫𑀸𑀦𑀻 𑀓𑀺𑀫𑀜𑁆𑀜𑀢𑁆𑀭 𑀅𑀯𑀼𑀲𑀺𑀢𑀢𑁆𑀢𑀸’’𑀢𑀺.

𑁨𑁬𑁪. 𑀅𑀣 𑀔𑁄 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀪𑀕𑀯𑀢𑀸 𑀅𑀯𑀼𑀲𑀺𑀢𑀯𑀸𑀤𑁂𑀦 𑀯𑀼𑀘𑁆𑀘𑀫𑀸𑀦𑁄 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄 𑀪𑀕𑀯𑀦𑁆𑀢𑀁𑀬𑁂𑀯 𑀔𑀼𑀁𑀲𑁂𑀦𑁆𑀢𑁄 𑀪𑀕𑀯𑀦𑁆𑀢𑀁𑀬𑁂𑀯 𑀯𑀫𑁆𑀪𑁂𑀦𑁆𑀢𑁄 𑀪𑀕𑀯𑀦𑁆𑀢𑀁𑀬𑁂𑀯 𑀉𑀧𑀯𑀤𑀫𑀸𑀦𑁄 𑁋 ‘‘𑀲𑀫𑀡𑁄 𑀘 𑀫𑁂, 𑀪𑁄, 𑀕𑁄𑀢𑀫𑁄 𑀧𑀸𑀧𑀺𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀘𑀡𑁆𑀟𑀸, 𑀪𑁄 𑀕𑁄𑀢𑀫, 𑀲𑀓𑁆𑀬𑀚𑀸𑀢𑀺; 𑀨𑀭𑀼𑀲𑀸, 𑀪𑁄 𑀕𑁄𑀢𑀫, 𑀲𑀓𑁆𑀬𑀚𑀸𑀢𑀺; 𑀮𑀳𑀼𑀲𑀸, 𑀪𑁄 𑀕𑁄𑀢𑀫, 𑀲𑀓𑁆𑀬𑀚𑀸𑀢𑀺; 𑀪𑀲𑁆𑀲𑀸, 𑀪𑁄 𑀕𑁄𑀢𑀫, 𑀲𑀓𑁆𑀬𑀚𑀸𑀢𑀺; 𑀇𑀩𑁆𑀪𑀸 𑀲𑀦𑁆𑀢𑀸 𑀇𑀩𑁆𑀪𑀸 𑀲𑀫𑀸𑀦𑀸 𑀦 𑀩𑁆𑀭𑀸𑀳𑁆𑀫𑀡𑁂 𑀲𑀓𑁆𑀓𑀭𑁄𑀦𑁆𑀢𑀺, 𑀦 𑀩𑁆𑀭𑀸𑀳𑁆𑀫𑀡𑁂 𑀕𑀭𑀼𑀁 𑀓𑀭𑁄𑀦𑁆𑀢𑀺 [𑀕𑀭𑀼𑀓𑀭𑁄𑀦𑁆𑀢𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀦 𑀩𑁆𑀭𑀸𑀳𑁆𑀫𑀡𑁂 𑀫𑀸𑀦𑁂𑀦𑁆𑀢𑀺, 𑀦 𑀩𑁆𑀭𑀸𑀳𑁆𑀫𑀡𑁂 𑀧𑀽𑀚𑁂𑀦𑁆𑀢𑀺, 𑀦 𑀩𑁆𑀭𑀸𑀳𑁆𑀫𑀡𑁂 𑀅𑀧𑀘𑀸𑀬𑀦𑁆𑀢𑀺. 𑀢𑀬𑀺𑀤𑀁, 𑀪𑁄 𑀕𑁄𑀢𑀫, 𑀦𑀘𑁆𑀙𑀦𑁆𑀦𑀁, 𑀢𑀬𑀺𑀤𑀁 𑀦𑀧𑁆𑀧𑀢𑀺𑀭𑀽𑀧𑀁, 𑀬𑀤𑀺𑀫𑁂 𑀲𑀓𑁆𑀬𑀸 𑀇𑀩𑁆𑀪𑀸 𑀲𑀦𑁆𑀢𑀸 𑀇𑀩𑁆𑀪𑀸 𑀲𑀫𑀸𑀦𑀸 𑀦 𑀩𑁆𑀭𑀸𑀳𑁆𑀫𑀡𑁂 𑀲𑀓𑁆𑀓𑀭𑁄𑀦𑁆𑀢𑀺, 𑀦 𑀩𑁆𑀭𑀸𑀳𑁆𑀫𑀡𑁂 𑀕𑀭𑀼𑀁 𑀓𑀭𑁄𑀦𑁆𑀢𑀺, 𑀦 𑀩𑁆𑀭𑀸𑀳𑁆𑀫𑀡𑁂 𑀫𑀸𑀦𑁂𑀦𑁆𑀢𑀺, 𑀦 𑀩𑁆𑀭𑀸𑀳𑁆𑀫𑀡𑁂 𑀧𑀽𑀚𑁂𑀦𑁆𑀢𑀺, 𑀦 𑀩𑁆𑀭𑀸𑀳𑁆𑀫𑀡𑁂 𑀅𑀧𑀘𑀸𑀬𑀦𑁆𑀢𑀻’’𑀢𑀺. 𑀇𑀢𑀺𑀳 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀇𑀤𑀁 𑀧𑀞𑀫𑀁 𑀲𑀓𑁆𑀬𑁂𑀲𑀼 𑀇𑀩𑁆𑀪𑀯𑀸𑀤𑀁 𑀦𑀺𑀧𑀸𑀢𑁂𑀲𑀺.

𑀤𑀼𑀢𑀺𑀬𑀇𑀩𑁆𑀪𑀯𑀸𑀤𑁄

𑁨𑁬𑁫. ‘‘𑀓𑀺𑀁 𑀧𑀦 𑀢𑁂, 𑀅𑀫𑁆𑀩𑀝𑁆𑀞, 𑀲𑀓𑁆𑀬𑀸 𑀅𑀧𑀭𑀤𑁆𑀥𑀼’’𑀦𑁆𑀢𑀺? ‘‘𑀏𑀓𑀫𑀺𑀤𑀸𑀳𑀁, 𑀪𑁄 𑀕𑁄𑀢𑀫, 𑀲𑀫𑀬𑀁 𑀆𑀘𑀭𑀺𑀬𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀓𑀧𑀺𑀮𑀯𑀢𑁆𑀣𑀼𑀁 𑀅𑀕𑀫𑀸𑀲𑀺𑀁. 𑀬𑁂𑀦 𑀲𑀓𑁆𑀬𑀸𑀦𑀁 𑀲𑀦𑁆𑀥𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀲𑀓𑁆𑀬𑀸 𑀘𑁂𑀯 𑀲𑀓𑁆𑀬𑀓𑀼𑀫𑀸𑀭𑀸 𑀘 𑀲𑀦𑁆𑀥𑀸𑀕𑀸𑀭𑁂 [𑀲𑀦𑁆𑀣𑀸𑀕𑀸𑀭𑁂 (𑀲𑀻. 𑀧𑀻.)] 𑀉𑀘𑁆𑀘𑁂𑀲𑀼 𑀆𑀲𑀦𑁂𑀲𑀼 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁 𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑁂𑀳𑀺 [𑀅𑀗𑁆𑀕𑀼𑀮𑀺𑀧𑀢𑁄𑀤𑀓𑁂𑀦 (𑀧𑀻.)] 𑀲𑀜𑁆𑀚𑀕𑁆𑀖𑀦𑁆𑀢𑀸 𑀲𑀁𑀓𑀻𑀴𑀦𑁆𑀢𑀸, 𑀅𑀜𑁆𑀜𑀤𑀢𑁆𑀣𑀼 𑀫𑀫𑀜𑁆𑀜𑁂𑀯 𑀫𑀜𑁆𑀜𑁂 𑀅𑀦𑀼𑀚𑀕𑁆𑀖𑀦𑁆𑀢𑀸, 𑀦 𑀫𑀁 𑀓𑁄𑀘𑀺 𑀆𑀲𑀦𑁂𑀦𑀧𑀺 𑀦𑀺𑀫𑀦𑁆𑀢𑁂𑀲𑀺. 𑀢𑀬𑀺𑀤𑀁, 𑀪𑁄 𑀕𑁄𑀢𑀫, 𑀦𑀘𑁆𑀙𑀦𑁆𑀦𑀁, 𑀢𑀬𑀺𑀤𑀁 𑀦𑀧𑁆𑀧𑀢𑀺𑀭𑀽𑀧𑀁, 𑀬𑀤𑀺𑀫𑁂 𑀲𑀓𑁆𑀬𑀸 𑀇𑀩𑁆𑀪𑀸 𑀲𑀦𑁆𑀢𑀸 𑀇𑀩𑁆𑀪𑀸 𑀲𑀫𑀸𑀦𑀸 𑀦 𑀩𑁆𑀭𑀸𑀳𑁆𑀫𑀡𑁂 𑀲𑀓𑁆𑀓𑀭𑁄𑀦𑁆𑀢𑀺, 𑀦 𑀩𑁆𑀭𑀸𑀳𑁆𑀫𑀡𑁂 𑀕𑀭𑀼𑀁 𑀓𑀭𑁄𑀦𑁆𑀢𑀺, 𑀦 𑀩𑁆𑀭𑀸𑀳𑁆𑀫𑀡𑁂 𑀫𑀸𑀦𑁂𑀦𑁆𑀢𑀺, 𑀦 𑀩𑁆𑀭𑀸𑀳𑁆𑀫𑀡𑁂 𑀧𑀽𑀚𑁂𑀦𑁆𑀢𑀺, 𑀦 𑀩𑁆𑀭𑀸𑀳𑁆𑀫𑀡𑁂 𑀅𑀧𑀘𑀸𑀬𑀦𑁆𑀢𑀻’’𑀢𑀺. 𑀇𑀢𑀺𑀳 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀇𑀤𑀁 𑀤𑀼𑀢𑀺𑀬𑀁 𑀲𑀓𑁆𑀬𑁂𑀲𑀼 𑀇𑀩𑁆𑀪𑀯𑀸𑀤𑀁 𑀦𑀺𑀧𑀸𑀢𑁂𑀲𑀺.

𑀢𑀢𑀺𑀬𑀇𑀩𑁆𑀪𑀯𑀸𑀤𑁄

𑁨𑁬𑁬. ‘‘𑀮𑀝𑀼𑀓𑀺𑀓𑀸𑀧𑀺 𑀔𑁄, 𑀅𑀫𑁆𑀩𑀝𑁆𑀞, 𑀲𑀓𑀼𑀡𑀺𑀓𑀸 𑀲𑀓𑁂 𑀓𑀼𑀮𑀸𑀯𑀓𑁂 𑀓𑀸𑀫𑀮𑀸𑀧𑀺𑀦𑀻 𑀳𑁄𑀢𑀺. 𑀲𑀓𑀁 𑀔𑁄 𑀧𑀦𑁂𑀢𑀁, 𑀅𑀫𑁆𑀩𑀝𑁆𑀞, 𑀲𑀓𑁆𑀬𑀸𑀦𑀁 𑀬𑀤𑀺𑀤𑀁 𑀓𑀧𑀺𑀮𑀯𑀢𑁆𑀣𑀼𑀁, 𑀦𑀸𑀭𑀳𑀢𑀸𑀬𑀲𑁆𑀫𑀸 𑀅𑀫𑁆𑀩𑀝𑁆𑀞𑁄 𑀇𑀫𑀸𑀬 𑀅𑀧𑁆𑀧𑀫𑀢𑁆𑀢𑀸𑀬 𑀅𑀪𑀺𑀲𑀚𑁆𑀚𑀺𑀢𑀼’’𑀦𑁆𑀢𑀺. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑁄 𑀕𑁄𑀢𑀫, 𑀯𑀡𑁆𑀡𑀸 𑁋 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸 𑀲𑀼𑀤𑁆𑀤𑀸. 𑀇𑀫𑁂𑀲𑀜𑁆𑀳𑀺, 𑀪𑁄 𑀕𑁄𑀢𑀫, 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑀢𑀬𑁄 𑀯𑀡𑁆𑀡𑀸 𑁋 𑀔𑀢𑁆𑀢𑀺𑀬𑀸 𑀘 𑀯𑁂𑀲𑁆𑀲𑀸 𑀘 𑀲𑀼𑀤𑁆𑀤𑀸 𑀘 𑁋 𑀅𑀜𑁆𑀜𑀤𑀢𑁆𑀣𑀼 𑀩𑁆𑀭𑀸𑀳𑁆𑀫𑀡𑀲𑁆𑀲𑁂𑀯 𑀧𑀭𑀺𑀘𑀸𑀭𑀓𑀸 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀢𑀬𑀺𑀤𑀁, 𑀪𑁄 𑀕𑁄𑀢𑀫, 𑀦𑀘𑁆𑀙𑀦𑁆𑀦𑀁, 𑀢𑀬𑀺𑀤𑀁 𑀦𑀧𑁆𑀧𑀢𑀺𑀭𑀽𑀧𑀁, 𑀬𑀤𑀺𑀫𑁂 𑀲𑀓𑁆𑀬𑀸 𑀇𑀩𑁆𑀪𑀸 𑀲𑀦𑁆𑀢𑀸 𑀇𑀩𑁆𑀪𑀸 𑀲𑀫𑀸𑀦𑀸 𑀦 𑀩𑁆𑀭𑀸𑀳𑁆𑀫𑀡𑁂 𑀲𑀓𑁆𑀓𑀭𑁄𑀦𑁆𑀢𑀺, 𑀦 𑀩𑁆𑀭𑀸𑀳𑁆𑀫𑀡𑁂 𑀕𑀭𑀼𑀁 𑀓𑀭𑁄𑀦𑁆𑀢𑀺, 𑀦 𑀩𑁆𑀭𑀸𑀳𑁆𑀫𑀡𑁂 𑀫𑀸𑀦𑁂𑀦𑁆𑀢𑀺, 𑀦 𑀩𑁆𑀭𑀸𑀳𑁆𑀫𑀡𑁂 𑀧𑀽𑀚𑁂𑀦𑁆𑀢𑀺, 𑀦 𑀩𑁆𑀭𑀸𑀳𑁆𑀫𑀡𑁂 𑀅𑀧𑀘𑀸𑀬𑀦𑁆𑀢𑀻’’𑀢𑀺. 𑀇𑀢𑀺𑀳 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀇𑀤𑀁 𑀢𑀢𑀺𑀬𑀁 𑀲𑀓𑁆𑀬𑁂𑀲𑀼 𑀇𑀩𑁆𑀪𑀯𑀸𑀤𑀁 𑀦𑀺𑀧𑀸𑀢𑁂𑀲𑀺.

𑀤𑀸𑀲𑀺𑀧𑀼𑀢𑁆𑀢𑀯𑀸𑀤𑁄

𑁨𑁬𑁭. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀢𑀺𑀩𑀸𑀴𑁆𑀳𑀁 𑀔𑁄 𑀅𑀬𑀁 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀲𑀓𑁆𑀬𑁂𑀲𑀼 𑀇𑀩𑁆𑀪𑀯𑀸𑀤𑁂𑀦 𑀦𑀺𑀫𑁆𑀫𑀸𑀤𑁂𑀢𑀺, 𑀬𑀁𑀦𑀽𑀦𑀸𑀳𑀁 𑀕𑁄𑀢𑁆𑀢𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀅𑀫𑁆𑀩𑀝𑁆𑀞𑀁 𑀫𑀸𑀡𑀯𑀁 𑀏𑀢𑀤𑀯𑁄𑀘 𑁋 ‘‘𑀓𑀣𑀁 𑀕𑁄𑀢𑁆𑀢𑁄𑀲𑀺, 𑀅𑀫𑁆𑀩𑀝𑁆𑀞𑀸’’𑀢𑀺? ‘‘𑀓𑀡𑁆𑀳𑀸𑀬𑀦𑁄𑀳𑀫𑀲𑁆𑀫𑀺, 𑀪𑁄 𑀕𑁄𑀢𑀫𑀸’’𑀢𑀺. 𑀧𑁄𑀭𑀸𑀡𑀁 𑀔𑁄 𑀧𑀦 𑀢𑁂 𑀅𑀫𑁆𑀩𑀝𑁆𑀞 𑀫𑀸𑀢𑀸𑀧𑁂𑀢𑁆𑀢𑀺𑀓𑀁 𑀦𑀸𑀫𑀕𑁄𑀢𑁆𑀢𑀁 𑀅𑀦𑀼𑀲𑁆𑀲𑀭𑀢𑁄 𑀅𑀬𑁆𑀬𑀧𑀼𑀢𑁆𑀢𑀸 𑀲𑀓𑁆𑀬𑀸 𑀪𑀯𑀦𑁆𑀢𑀺; 𑀤𑀸𑀲𑀺𑀧𑀼𑀢𑁆𑀢𑁄 𑀢𑁆𑀯𑀫𑀲𑀺 𑀲𑀓𑁆𑀬𑀸𑀦𑀁. 𑀲𑀓𑁆𑀬𑀸 𑀔𑁄 𑀧𑀦, 𑀅𑀫𑁆𑀩𑀝𑁆𑀞, 𑀭𑀸𑀚𑀸𑀦𑀁 𑀑𑀓𑁆𑀓𑀸𑀓𑀁 𑀧𑀺𑀢𑀸𑀫𑀳𑀁 𑀤𑀳𑀦𑁆𑀢𑀺.

‘‘𑀪𑀽𑀢𑀧𑀼𑀩𑁆𑀩𑀁, 𑀅𑀫𑁆𑀩𑀝𑁆𑀞, 𑀭𑀸𑀚𑀸 𑀑𑀓𑁆𑀓𑀸𑀓𑁄 𑀬𑀸 𑀲𑀸 𑀫𑀳𑁂𑀲𑀻 𑀧𑀺𑀬𑀸 𑀫𑀦𑀸𑀧𑀸, 𑀢𑀲𑁆𑀲𑀸 𑀧𑀼𑀢𑁆𑀢𑀲𑁆𑀲 𑀭𑀚𑁆𑀚𑀁 𑀧𑀭𑀺𑀡𑀸𑀫𑁂𑀢𑀼𑀓𑀸𑀫𑁄 𑀚𑁂𑀝𑁆𑀞𑀓𑀼𑀫𑀸𑀭𑁂 𑀭𑀝𑁆𑀞𑀲𑁆𑀫𑀸 𑀧𑀩𑁆𑀩𑀸𑀚𑁂𑀲𑀺 𑁋 𑀑𑀓𑁆𑀓𑀸𑀫𑀼𑀔𑀁 𑀓𑀭𑀓𑀡𑁆𑀟𑀁 [𑀉𑀓𑁆𑀓𑀸𑀫𑀼𑀔𑀁 𑀓𑀭𑀓𑀡𑁆𑀟𑀼𑀁 (𑀲𑀻. 𑀲𑁆𑀬𑀸.)] 𑀳𑀢𑁆𑀣𑀺𑀦𑀺𑀓𑀁 𑀲𑀺𑀦𑀺𑀲𑀽𑀭𑀁 [𑀲𑀺𑀦𑀺𑀧𑀼𑀭𑀁 (𑀲𑀻. 𑀲𑁆𑀬𑀸.)]. 𑀢𑁂 𑀭𑀝𑁆𑀞𑀲𑁆𑀫𑀸 𑀧𑀩𑁆𑀩𑀸𑀚𑀺𑀢𑀸 𑀳𑀺𑀫𑀯𑀦𑁆𑀢𑀧𑀲𑁆𑀲𑁂 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀫𑀳𑀸𑀲𑀸𑀓𑀲𑀡𑁆𑀟𑁄, 𑀢𑀢𑁆𑀣 𑀯𑀸𑀲𑀁 𑀓𑀧𑁆𑀧𑁂𑀲𑀼𑀁. 𑀢𑁂 𑀚𑀸𑀢𑀺𑀲𑀫𑁆𑀪𑁂𑀤𑀪𑀬𑀸 𑀲𑀓𑀸𑀳𑀺 𑀪𑀕𑀺𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑀼𑀁.

‘‘𑀅𑀣 𑀔𑁄, 𑀅𑀫𑁆𑀩𑀝𑁆𑀞, 𑀭𑀸𑀚𑀸 𑀑𑀓𑁆𑀓𑀸𑀓𑁄 𑀅𑀫𑀘𑁆𑀘𑁂 𑀧𑀸𑀭𑀺𑀲𑀚𑁆𑀚𑁂 𑀆𑀫𑀦𑁆𑀢𑁂𑀲𑀺 𑁋 ‘𑀓𑀳𑀁 𑀦𑀼 𑀔𑁄, 𑀪𑁄, 𑀏𑀢𑀭𑀳𑀺 𑀓𑀼𑀫𑀸𑀭𑀸 𑀲𑀫𑁆𑀫𑀦𑁆𑀢𑀻’𑀢𑀺? ‘𑀅𑀢𑁆𑀣𑀺, 𑀤𑁂𑀯, 𑀳𑀺𑀫𑀯𑀦𑁆𑀢𑀧𑀲𑁆𑀲𑁂 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀫𑀳𑀸𑀲𑀸𑀓𑀲𑀡𑁆𑀟𑁄, 𑀢𑀢𑁆𑀣𑁂𑀢𑀭𑀳𑀺 𑀓𑀼𑀫𑀸𑀭𑀸 𑀲𑀫𑁆𑀫𑀦𑁆𑀢𑀺. 𑀢𑁂 𑀚𑀸𑀢𑀺𑀲𑀫𑁆𑀪𑁂𑀤𑀪𑀬𑀸 𑀲𑀓𑀸𑀳𑀺 𑀪𑀕𑀺𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀻’𑀢𑀺. 𑀅𑀣 𑀔𑁄, 𑀅𑀫𑁆𑀩𑀝𑁆𑀞, 𑀭𑀸𑀚𑀸 𑀑𑀓𑁆𑀓𑀸𑀓𑁄 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘𑀲𑀓𑁆𑀬𑀸 𑀯𑀢, 𑀪𑁄, 𑀓𑀼𑀫𑀸𑀭𑀸, 𑀧𑀭𑀫𑀲𑀓𑁆𑀬𑀸 𑀯𑀢, 𑀪𑁄, 𑀓𑀼𑀫𑀸𑀭𑀸’𑀢𑀺. 𑀢𑀤𑀕𑁆𑀕𑁂 𑀔𑁄 𑀧𑀦 𑀅𑀫𑁆𑀩𑀝𑁆𑀞 𑀲𑀓𑁆𑀬𑀸 𑀧𑀜𑁆𑀜𑀸𑀬𑀦𑁆𑀢𑀺; 𑀲𑁄 𑀘 𑀦𑁂𑀲𑀁 𑀧𑀼𑀩𑁆𑀩𑀧𑀼𑀭𑀺𑀲𑁄.

‘‘𑀭𑀜𑁆𑀜𑁄 𑀔𑁄 𑀧𑀦, 𑀅𑀫𑁆𑀩𑀝𑁆𑀞, 𑀑𑀓𑁆𑀓𑀸𑀓𑀲𑁆𑀲 𑀤𑀺𑀲𑀸 𑀦𑀸𑀫 𑀤𑀸𑀲𑀻 𑀅𑀳𑁄𑀲𑀺. 𑀲𑀸 𑀓𑀡𑁆𑀳𑀁 𑀦𑀸𑀫 [𑀲𑀸 𑀓𑀡𑁆𑀳𑀁 (𑀧𑀻.)] 𑀚𑀦𑁂𑀲𑀺. 𑀚𑀸𑀢𑁄 𑀓𑀡𑁆𑀳𑁄 𑀧𑀩𑁆𑀬𑀸𑀳𑀸𑀲𑀺 𑁋 ‘𑀥𑁄𑀯𑀣 𑀫𑀁, 𑀅𑀫𑁆𑀫, 𑀦𑀳𑀸𑀧𑁂𑀣 𑀫𑀁 𑀅𑀫𑁆𑀫, 𑀇𑀫𑀲𑁆𑀫𑀸 𑀫𑀁 𑀅𑀲𑀼𑀘𑀺𑀲𑁆𑀫𑀸 𑀧𑀭𑀺𑀫𑁄𑀘𑁂𑀣, 𑀅𑀢𑁆𑀣𑀸𑀬 𑀯𑁄 𑀪𑀯𑀺𑀲𑁆𑀲𑀸𑀫𑀻’𑀢𑀺. 𑀬𑀣𑀸 𑀔𑁄 𑀧𑀦 𑀅𑀫𑁆𑀩𑀝𑁆𑀞 𑀏𑀢𑀭𑀳𑀺 𑀫𑀦𑀼𑀲𑁆𑀲𑀸 𑀧𑀺𑀲𑀸𑀘𑁂 𑀤𑀺𑀲𑁆𑀯𑀸 ‘𑀧𑀺𑀲𑀸𑀘𑀸’𑀢𑀺 𑀲𑀜𑁆𑀚𑀸𑀦𑀦𑁆𑀢𑀺; 𑀏𑀯𑀫𑁂𑀯 𑀔𑁄, 𑀅𑀫𑁆𑀩𑀝𑁆𑀞, 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸 𑀧𑀺𑀲𑀸𑀘𑁂 ‘𑀓𑀡𑁆𑀳𑀸’𑀢𑀺 𑀲𑀜𑁆𑀚𑀸𑀦𑀦𑁆𑀢𑀺. 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘𑀅𑀬𑀁 𑀚𑀸𑀢𑁄 𑀧𑀩𑁆𑀬𑀸𑀳𑀸𑀲𑀺, 𑀓𑀡𑁆𑀳𑁄 𑀚𑀸𑀢𑁄, 𑀧𑀺𑀲𑀸𑀘𑁄 𑀚𑀸𑀢𑁄’𑀢𑀺. 𑀢𑀤𑀕𑁆𑀕𑁂 𑀔𑁄 𑀧𑀦, 𑀅𑀫𑁆𑀩𑀝𑁆𑀞 𑀓𑀡𑁆𑀳𑀸𑀬𑀦𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀲𑁄 𑀘 𑀓𑀡𑁆𑀳𑀸𑀬𑀦𑀸𑀦𑀁 𑀧𑀼𑀩𑁆𑀩𑀧𑀼𑀭𑀺𑀲𑁄. 𑀇𑀢𑀺 𑀔𑁄 𑀢𑁂, 𑀅𑀫𑁆𑀩𑀝𑁆𑀞, 𑀧𑁄𑀭𑀸𑀡𑀁 𑀫𑀸𑀢𑀸𑀧𑁂𑀢𑁆𑀢𑀺𑀓𑀁 𑀦𑀸𑀫𑀕𑁄𑀢𑁆𑀢𑀁 𑀅𑀦𑀼𑀲𑁆𑀲𑀭𑀢𑁄 𑀅𑀬𑁆𑀬𑀧𑀼𑀢𑁆𑀢𑀸 𑀲𑀓𑁆𑀬𑀸 𑀪𑀯𑀦𑁆𑀢𑀺, 𑀤𑀸𑀲𑀺𑀧𑀼𑀢𑁆𑀢𑁄 𑀢𑁆𑀯𑀫𑀲𑀺 𑀲𑀓𑁆𑀬𑀸𑀦’’𑀦𑁆𑀢𑀺.

𑁨𑁬𑁮. 𑀏𑀯𑀁 𑀯𑀼𑀢𑁆𑀢𑁂, 𑀢𑁂 𑀫𑀸𑀡𑀯𑀓𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀫𑀸 𑀪𑀯𑀁 𑀕𑁄𑀢𑀫𑁄 𑀅𑀫𑁆𑀩𑀝𑁆𑀞𑀁 𑀅𑀢𑀺𑀩𑀸𑀴𑁆𑀳𑀁 𑀤𑀸𑀲𑀺𑀧𑀼𑀢𑁆𑀢𑀯𑀸𑀤𑁂𑀦 𑀦𑀺𑀫𑁆𑀫𑀸𑀤𑁂𑀲𑀺. 𑀲𑀼𑀚𑀸𑀢𑁄 𑀘, 𑀪𑁄 𑀕𑁄𑀢𑀫 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄, 𑀓𑀼𑀮𑀧𑀼𑀢𑁆𑀢𑁄 𑀘 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄, 𑀩𑀳𑀼𑀲𑁆𑀲𑀼𑀢𑁄 𑀘 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄, 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄 𑀘 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄, 𑀧𑀡𑁆𑀟𑀺𑀢𑁄 𑀘 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄, 𑀧𑀳𑁄𑀢𑀺 𑀘 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀪𑁄𑀢𑀸 𑀕𑁄𑀢𑀫𑁂𑀦 𑀲𑀤𑁆𑀥𑀺𑀁 𑀅𑀲𑁆𑀫𑀺𑀁 𑀯𑀘𑀦𑁂 𑀧𑀝𑀺𑀫𑀦𑁆𑀢𑁂𑀢𑀼’’𑀦𑁆𑀢𑀺.

𑁨𑁬𑁯. 𑀅𑀣 𑀔𑁄 𑀪𑀕𑀯𑀸 𑀢𑁂 𑀫𑀸𑀡𑀯𑀓𑁂 𑀏𑀢𑀤𑀯𑁄𑀘 𑁋 ‘‘𑀲𑀘𑁂 𑀔𑁄 𑀢𑀼𑀫𑁆𑀳𑀸𑀓𑀁 𑀫𑀸𑀡𑀯𑀓𑀸𑀦𑀁 𑀏𑀯𑀁 𑀳𑁄𑀢𑀺 𑁋 ‘𑀤𑀼𑀚𑁆𑀚𑀸𑀢𑁄 𑀘 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄, 𑀅𑀓𑀼𑀮𑀧𑀼𑀢𑁆𑀢𑁄 𑀘 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄, 𑀅𑀧𑁆𑀧𑀲𑁆𑀲𑀼𑀢𑁄 𑀘 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄, 𑀅𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄 𑀘 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄, 𑀤𑀼𑀧𑁆𑀧𑀜𑁆𑀜𑁄 𑀘 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄, 𑀦 𑀘 𑀧𑀳𑁄𑀢𑀺 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀲𑀤𑁆𑀥𑀺𑀁 𑀅𑀲𑁆𑀫𑀺𑀁 𑀯𑀘𑀦𑁂 𑀧𑀝𑀺𑀫𑀦𑁆𑀢𑁂𑀢𑀼’𑀦𑁆𑀢𑀺, 𑀢𑀺𑀝𑁆𑀞𑀢𑀼 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄, 𑀢𑀼𑀫𑁆𑀳𑁂 𑀫𑀬𑀸 𑀲𑀤𑁆𑀥𑀺𑀁 𑀫𑀦𑁆𑀢𑀯𑁆𑀳𑁄 𑀅𑀲𑁆𑀫𑀺𑀁 𑀯𑀘𑀦𑁂. 𑀲𑀘𑁂 𑀧𑀦 𑀢𑀼𑀫𑁆𑀳𑀸𑀓𑀁 𑀫𑀸𑀡𑀯𑀓𑀸𑀦𑀁 𑀏𑀯𑀁 𑀳𑁄𑀢𑀺 𑁋 ‘𑀲𑀼𑀚𑀸𑀢𑁄 𑀘 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄, 𑀓𑀼𑀮𑀧𑀼𑀢𑁆𑀢𑁄 𑀘 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄, 𑀩𑀳𑀼𑀲𑁆𑀲𑀼𑀢𑁄 𑀘 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄, 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄 𑀘 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄, 𑀧𑀡𑁆𑀟𑀺𑀢𑁄 𑀘 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄, 𑀧𑀳𑁄𑀢𑀺 𑀘 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀲𑀤𑁆𑀥𑀺𑀁 𑀅𑀲𑁆𑀫𑀺𑀁 𑀯𑀘𑀦𑁂 𑀧𑀝𑀺𑀫𑀦𑁆𑀢𑁂𑀢𑀼’𑀦𑁆𑀢𑀺, 𑀢𑀺𑀝𑁆𑀞𑀣 𑀢𑀼𑀫𑁆𑀳𑁂; 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀫𑀬𑀸 𑀲𑀤𑁆𑀥𑀺𑀁 𑀧𑀝𑀺𑀫𑀦𑁆𑀢𑁂𑀢𑀽’’𑀢𑀺.

‘‘𑀲𑀼𑀚𑀸𑀢𑁄 𑀘, 𑀪𑁄 𑀕𑁄𑀢𑀫, 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄, 𑀓𑀼𑀮𑀧𑀼𑀢𑁆𑀢𑁄 𑀘 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄, 𑀩𑀳𑀼𑀲𑁆𑀲𑀼𑀢𑁄 𑀘 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄, 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄 𑀘 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄, 𑀧𑀡𑁆𑀟𑀺𑀢𑁄 𑀘 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄, 𑀧𑀳𑁄𑀢𑀺 𑀘 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀪𑁄𑀢𑀸 𑀕𑁄𑀢𑀫𑁂𑀦 𑀲𑀤𑁆𑀥𑀺𑀁 𑀅𑀲𑁆𑀫𑀺𑀁 𑀯𑀘𑀦𑁂 𑀧𑀝𑀺𑀫𑀦𑁆𑀢𑁂𑀢𑀼𑀁, 𑀢𑀼𑀡𑁆𑀳𑀻 𑀫𑀬𑀁 𑀪𑀯𑀺𑀲𑁆𑀲𑀸𑀫, 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀪𑁄𑀢𑀸 𑀕𑁄𑀢𑀫𑁂𑀦 𑀲𑀤𑁆𑀥𑀺𑀁 𑀅𑀲𑁆𑀫𑀺𑀁 𑀯𑀘𑀦𑁂 𑀧𑀝𑀺𑀫𑀦𑁆𑀢𑁂𑀢𑀽’’𑀢𑀺.

𑁨𑁭𑁦. 𑀅𑀣 𑀔𑁄 𑀪𑀕𑀯𑀸 𑀅𑀫𑁆𑀩𑀝𑁆𑀞𑀁 𑀫𑀸𑀡𑀯𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁 𑀔𑁄 𑀧𑀦 𑀢𑁂, 𑀅𑀫𑁆𑀩𑀝𑁆𑀞, 𑀲𑀳𑀥𑀫𑁆𑀫𑀺𑀓𑁄 𑀧𑀜𑁆𑀳𑁄 𑀆𑀕𑀘𑁆𑀙𑀢𑀺, 𑀅𑀓𑀸𑀫𑀸 𑀩𑁆𑀬𑀸𑀓𑀸𑀢𑀩𑁆𑀩𑁄. 𑀲𑀘𑁂 𑀢𑁆𑀯𑀁 𑀦 𑀩𑁆𑀬𑀸𑀓𑀭𑀺𑀲𑁆𑀲𑀲𑀺, 𑀅𑀜𑁆𑀜𑁂𑀦 𑀯𑀸 𑀅𑀜𑁆𑀜𑀁 𑀧𑀝𑀺𑀘𑀭𑀺𑀲𑁆𑀲𑀲𑀺, 𑀢𑀼𑀡𑁆𑀳𑀻 𑀯𑀸 𑀪𑀯𑀺𑀲𑁆𑀲𑀲𑀺, 𑀧𑀓𑁆𑀓𑀫𑀺𑀲𑁆𑀲𑀲𑀺 𑀯𑀸 𑀏𑀢𑁆𑀣𑁂𑀯 𑀢𑁂 𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀨𑀮𑀺𑀲𑁆𑀲𑀢𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀫𑁆𑀩𑀝𑁆𑀞, 𑀓𑀺𑀦𑁆𑀢𑀺 𑀢𑁂 𑀲𑀼𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀼𑀤𑁆𑀥𑀸𑀦𑀁 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 𑀓𑀼𑀢𑁄𑀧𑀪𑀼𑀢𑀺𑀓𑀸 𑀓𑀡𑁆𑀳𑀸𑀬𑀦𑀸, 𑀓𑁄 𑀘 𑀓𑀡𑁆𑀳𑀸𑀬𑀦𑀸𑀦𑀁 𑀧𑀼𑀩𑁆𑀩𑀧𑀼𑀭𑀺𑀲𑁄’’𑀢𑀺?

𑀏𑀯𑀁 𑀯𑀼𑀢𑁆𑀢𑁂, 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀅𑀫𑁆𑀩𑀝𑁆𑀞𑀁 𑀫𑀸𑀡𑀯𑀁 𑀏𑀢𑀤𑀯𑁄𑀘 𑁋 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀫𑁆𑀩𑀝𑁆𑀞, 𑀓𑀺𑀦𑁆𑀢𑀺 𑀢𑁂 𑀲𑀼𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀼𑀤𑁆𑀥𑀸𑀦𑀁 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 𑀓𑀼𑀢𑁄𑀧𑀪𑀼𑀢𑀺𑀓𑀸 𑀓𑀡𑁆𑀳𑀸𑀬𑀦𑀸, 𑀓𑁄 𑀘 𑀓𑀡𑁆𑀳𑀸𑀬𑀦𑀸𑀦𑀁 𑀧𑀼𑀩𑁆𑀩𑀧𑀼𑀭𑀺𑀲𑁄’’𑀢𑀺? 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀅𑀫𑁆𑀩𑀝𑁆𑀞𑀁 𑀫𑀸𑀡𑀯𑀁 𑀏𑀢𑀤𑀯𑁄𑀘 𑁋 ‘‘𑀩𑁆𑀬𑀸𑀓𑀭𑁄𑀳𑀺 𑀤𑀸𑀦𑀺 𑀅𑀫𑁆𑀩𑀝𑁆𑀞, 𑀦 𑀤𑀸𑀦𑀺, 𑀢𑁂 𑀢𑀼𑀡𑁆𑀳𑀻𑀪𑀸𑀯𑀲𑁆𑀲 𑀓𑀸𑀮𑁄. 𑀬𑁄 𑀔𑁄, 𑀅𑀫𑁆𑀩𑀝𑁆𑀞, 𑀢𑀣𑀸𑀕𑀢𑁂𑀦 𑀬𑀸𑀯𑀢𑀢𑀺𑀬𑀓𑀁 𑀲𑀳𑀥𑀫𑁆𑀫𑀺𑀓𑀁 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀦 𑀩𑁆𑀬𑀸𑀓𑀭𑁄𑀢𑀺, 𑀏𑀢𑁆𑀣𑁂𑀯𑀲𑁆𑀲 𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀨𑀮𑀺𑀲𑁆𑀲𑀢𑀻’’𑀢𑀺.

𑁨𑁭𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀚𑀺𑀭𑀧𑀸𑀡𑀻 𑀬𑀓𑁆𑀔𑁄 𑀫𑀳𑀦𑁆𑀢𑀁 𑀅𑀬𑁄𑀓𑀽𑀝𑀁 𑀆𑀤𑀸𑀬 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁 [𑀲𑀜𑁆𑀚𑁄𑀢𑀺𑀪𑀽𑀢𑀁 (𑀲𑁆𑀬𑀸.)] 𑀅𑀫𑁆𑀩𑀝𑁆𑀞𑀲𑁆𑀲 𑀫𑀸𑀡𑀯𑀲𑁆𑀲 𑀉𑀧𑀭𑀺 𑀯𑁂𑀳𑀸𑀲𑀁 𑀞𑀺𑀢𑁄 𑀳𑁄𑀢𑀺 𑁋 ‘‘𑀲𑀘𑀸𑀬𑀁 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀪𑀕𑀯𑀢𑀸 𑀬𑀸𑀯𑀢𑀢𑀺𑀬𑀓𑀁 𑀲𑀳𑀥𑀫𑁆𑀫𑀺𑀓𑀁 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀦 𑀩𑁆𑀬𑀸𑀓𑀭𑀺𑀲𑁆𑀲𑀢𑀺, 𑀏𑀢𑁆𑀣𑁂𑀯𑀲𑁆𑀲 𑀲𑀢𑁆𑀢𑀥𑀸 𑀫𑀼𑀤𑁆𑀥𑀁 𑀨𑀸𑀮𑁂𑀲𑁆𑀲𑀸𑀫𑀻’’𑀢𑀺. 𑀢𑀁 𑀔𑁄 𑀧𑀦 𑀯𑀚𑀺𑀭𑀧𑀸𑀡𑀺𑀁 𑀬𑀓𑁆𑀔𑀁 𑀪𑀕𑀯𑀸 𑀘𑁂𑀯 𑀧𑀲𑁆𑀲𑀢𑀺 𑀅𑀫𑁆𑀩𑀝𑁆𑀞𑁄 𑀘 𑀫𑀸𑀡𑀯𑁄.

𑁨𑁭𑁨. 𑀅𑀣 𑀔𑁄 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀪𑀻𑀢𑁄 𑀲𑀁𑀯𑀺𑀕𑁆𑀕𑁄 𑀮𑁄𑀫𑀳𑀝𑁆𑀞𑀚𑀸𑀢𑁄 𑀪𑀕𑀯𑀦𑁆𑀢𑀁𑀬𑁂𑀯 𑀢𑀸𑀡𑀁 𑀕𑀯𑁂𑀲𑀻 𑀪𑀕𑀯𑀦𑁆𑀢𑀁𑀬𑁂𑀯 𑀮𑁂𑀡𑀁 𑀕𑀯𑁂𑀲𑀻 𑀪𑀕𑀯𑀦𑁆𑀢𑀁𑀬𑁂𑀯 𑀲𑀭𑀡𑀁 𑀕𑀯𑁂𑀲𑀻 𑁋 𑀉𑀧𑀦𑀺𑀲𑀻𑀤𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀫𑁂𑀢𑀁 [𑀓𑀺𑀁 𑀫𑁂 𑀢𑀁 (𑀓.)] 𑀪𑀯𑀁 𑀕𑁄𑀢𑀫𑁄 𑀆𑀳? 𑀧𑀼𑀦𑀪𑀯𑀁 𑀕𑁄𑀢𑀫𑁄 𑀩𑁆𑀭𑀯𑀺𑀢𑀽’’𑀢𑀺 [𑀩𑁆𑀭𑀽𑀢𑀼 (𑀲𑁆𑀬𑀸.)].

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀫𑁆𑀩𑀝𑁆𑀞, 𑀓𑀺𑀦𑁆𑀢𑀺 𑀢𑁂 𑀲𑀼𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀼𑀤𑁆𑀥𑀸𑀦𑀁 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 𑀓𑀼𑀢𑁄𑀧𑀪𑀼𑀢𑀺𑀓𑀸 𑀓𑀡𑁆𑀳𑀸𑀬𑀦𑀸, 𑀓𑁄 𑀘 𑀓𑀡𑁆𑀳𑀸𑀬𑀦𑀸𑀦𑀁 𑀧𑀼𑀩𑁆𑀩𑀧𑀼𑀭𑀺𑀲𑁄’’𑀢𑀺? ‘‘𑀏𑀯𑀫𑁂𑀯 𑀫𑁂, 𑀪𑁄 𑀕𑁄𑀢𑀫, 𑀲𑀼𑀢𑀁 𑀬𑀣𑁂𑀯 𑀪𑀯𑀁 𑀕𑁄𑀢𑀫𑁄 𑀆𑀳. 𑀢𑀢𑁄𑀧𑀪𑀼𑀢𑀺𑀓𑀸 𑀓𑀡𑁆𑀳𑀸𑀬𑀦𑀸; 𑀲𑁄 𑀘 𑀓𑀡𑁆𑀳𑀸𑀬𑀦𑀸𑀦𑀁 𑀧𑀼𑀩𑁆𑀩𑀧𑀼𑀭𑀺𑀲𑁄’’𑀢𑀺.

𑀅𑀫𑁆𑀩𑀝𑁆𑀞𑀯𑀁𑀲𑀓𑀣𑀸

𑁨𑁭𑁩. 𑀏𑀯𑀁 𑀯𑀼𑀢𑁆𑀢𑁂, 𑀢𑁂 𑀫𑀸𑀡𑀯𑀓𑀸 𑀉𑀦𑁆𑀦𑀸𑀤𑀺𑀦𑁄 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸 𑀅𑀳𑁂𑀲𑀼𑀁 𑁋 ‘‘𑀤𑀼𑀚𑁆𑀚𑀸𑀢𑁄 𑀓𑀺𑀭, 𑀪𑁄, 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄; 𑀅𑀓𑀼𑀮𑀧𑀼𑀢𑁆𑀢𑁄 𑀓𑀺𑀭, 𑀪𑁄, 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄; 𑀤𑀸𑀲𑀺𑀧𑀼𑀢𑁆𑀢𑁄 𑀓𑀺𑀭, 𑀪𑁄, 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀲𑀓𑁆𑀬𑀸𑀦𑀁. 𑀅𑀬𑁆𑀬𑀧𑀼𑀢𑁆𑀢𑀸 𑀓𑀺𑀭, 𑀪𑁄, 𑀅𑀫𑁆𑀩𑀝𑁆𑀞𑀲𑁆𑀲 𑀫𑀸𑀡𑀯𑀲𑁆𑀲 𑀲𑀓𑁆𑀬𑀸 𑀪𑀯𑀦𑁆𑀢𑀺. 𑀥𑀫𑁆𑀫𑀯𑀸𑀤𑀺𑀁𑀬𑁂𑀯 𑀓𑀺𑀭 𑀫𑀬𑀁 𑀲𑀫𑀡𑀁 𑀕𑁄𑀢𑀫𑀁 𑀅𑀧𑀲𑀸𑀤𑁂𑀢𑀩𑁆𑀩𑀁 𑀅𑀫𑀜𑁆𑀜𑀺𑀫𑁆𑀳𑀸’’𑀢𑀺.

𑁨𑁭𑁪. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀢𑀺𑀩𑀸𑀴𑁆𑀳𑀁 𑀔𑁄 𑀇𑀫𑁂 𑀫𑀸𑀡𑀯𑀓𑀸 𑀅𑀫𑁆𑀩𑀝𑁆𑀞𑀁 𑀫𑀸𑀡𑀯𑀁 𑀤𑀸𑀲𑀺𑀧𑀼𑀢𑁆𑀢𑀯𑀸𑀤𑁂𑀦 𑀦𑀺𑀫𑁆𑀫𑀸𑀤𑁂𑀦𑁆𑀢𑀺, 𑀬𑀁𑀦𑀽𑀦𑀸𑀳𑀁 𑀧𑀭𑀺𑀫𑁄𑀘𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑁂 𑀫𑀸𑀡𑀯𑀓𑁂 𑀏𑀢𑀤𑀯𑁄𑀘 𑁋 ‘‘𑀫𑀸 𑀔𑁄 𑀢𑀼𑀫𑁆𑀳𑁂, 𑀫𑀸𑀡𑀯𑀓𑀸, 𑀅𑀫𑁆𑀩𑀝𑁆𑀞𑀁 𑀫𑀸𑀡𑀯𑀁 𑀅𑀢𑀺𑀩𑀸𑀴𑁆𑀳𑀁 𑀤𑀸𑀲𑀺𑀧𑀼𑀢𑁆𑀢𑀯𑀸𑀤𑁂𑀦 𑀦𑀺𑀫𑁆𑀫𑀸𑀤𑁂𑀣. 𑀉𑀴𑀸𑀭𑁄 𑀲𑁄 𑀓𑀡𑁆𑀳𑁄 𑀇𑀲𑀺 𑀅𑀳𑁄𑀲𑀺. 𑀲𑁄 𑀤𑀓𑁆𑀔𑀺𑀡𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀩𑁆𑀭𑀳𑁆𑀫𑀫𑀦𑁆𑀢𑁂 𑀅𑀥𑀻𑀬𑀺𑀢𑁆𑀯𑀸 𑀭𑀸𑀚𑀸𑀦𑀁 𑀑𑀓𑁆𑀓𑀸𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀤𑁆𑀤𑀭𑀽𑀧𑀺𑀁 𑀥𑀻𑀢𑀭𑀁 𑀬𑀸𑀘𑀺. 𑀢𑀲𑁆𑀲 𑀭𑀸𑀚𑀸 𑀑𑀓𑁆𑀓𑀸𑀓𑁄 𑁋 ‘𑀓𑁄 𑀦𑁂𑀯𑀁 𑀭𑁂 𑀅𑀬𑀁 𑀫𑀬𑁆𑀳𑀁 𑀤𑀸𑀲𑀺𑀧𑀼𑀢𑁆𑀢𑁄 𑀲𑀫𑀸𑀦𑁄 𑀫𑀤𑁆𑀤𑀭𑀽𑀧𑀺𑀁 𑀥𑀻𑀢𑀭𑀁 𑀬𑀸𑀘𑀢𑀻’’’ 𑀢𑀺, 𑀓𑀼𑀧𑀺𑀢𑁄 𑀅𑀦𑀢𑁆𑀢𑀫𑀦𑁄 𑀔𑀼𑀭𑀧𑁆𑀧𑀁 𑀲𑀦𑁆𑀦𑀬𑁆𑀳𑀺 [𑀲𑀦𑁆𑀦𑀳𑀺 (𑀓.)]. 𑀲𑁄 𑀢𑀁 𑀔𑀼𑀭𑀧𑁆𑀧𑀁 𑀦𑁂𑀯 𑀅𑀲𑀓𑁆𑀔𑀺 𑀫𑀼𑀜𑁆𑀘𑀺𑀢𑀼𑀁, 𑀦𑁄 𑀧𑀝𑀺𑀲𑀁𑀳𑀭𑀺𑀢𑀼𑀁.

‘‘𑀅𑀣 𑀔𑁄, 𑀫𑀸𑀡𑀯𑀓𑀸, 𑀅𑀫𑀘𑁆𑀘𑀸 𑀧𑀸𑀭𑀺𑀲𑀚𑁆𑀚𑀸 𑀓𑀡𑁆𑀳𑀁 𑀇𑀲𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘𑀼𑀁 𑁋 ‘𑀲𑁄𑀢𑁆𑀣𑀺, 𑀪𑀤𑁆𑀤𑀦𑁆𑀢𑁂 [𑀪𑀤𑀦𑁆𑀢𑁂 (𑀲𑀻. 𑀲𑁆𑀬𑀸.)], 𑀳𑁄𑀢𑀼 𑀭𑀜𑁆𑀜𑁄; 𑀲𑁄𑀢𑁆𑀣𑀺, 𑀪𑀤𑁆𑀤𑀦𑁆𑀢𑁂, 𑀳𑁄𑀢𑀼 𑀭𑀜𑁆𑀜𑁄’𑀢𑀺. ‘𑀲𑁄𑀢𑁆𑀣𑀺 𑀪𑀯𑀺𑀲𑁆𑀲𑀢𑀺 𑀭𑀜𑁆𑀜𑁄, 𑀅𑀧𑀺 𑀘 𑀭𑀸𑀚𑀸 𑀬𑀤𑀺 𑀅𑀥𑁄 𑀔𑀼𑀭𑀧𑁆𑀧𑀁 𑀫𑀼𑀜𑁆𑀘𑀺𑀲𑁆𑀲𑀢𑀺, 𑀬𑀸𑀯𑀢𑀸 𑀭𑀜𑁆𑀜𑁄 𑀯𑀺𑀚𑀺𑀢𑀁, 𑀏𑀢𑁆𑀢𑀸𑀯𑀢𑀸 𑀧𑀣𑀯𑀻 𑀉𑀦𑁆𑀤𑁆𑀭𑀺𑀬𑀺𑀲𑁆𑀲𑀢𑀻’𑀢𑀺. ‘𑀲𑁄𑀢𑁆𑀣𑀺, 𑀪𑀤𑁆𑀤𑀦𑁆𑀢𑁂, 𑀳𑁄𑀢𑀼 𑀭𑀜𑁆𑀜𑁄, 𑀲𑁄𑀢𑁆𑀣𑀺 𑀚𑀦𑀧𑀤𑀲𑁆𑀲𑀸’𑀢𑀺. ‘𑀲𑁄𑀢𑁆𑀣𑀺 𑀪𑀯𑀺𑀲𑁆𑀲𑀢𑀺 𑀭𑀜𑁆𑀜𑁄, 𑀲𑁄𑀢𑁆𑀣𑀺 𑀚𑀦𑀧𑀤𑀲𑁆𑀲, 𑀅𑀧𑀺 𑀘 𑀭𑀸𑀚𑀸 𑀬𑀤𑀺 𑀉𑀤𑁆𑀥𑀁 𑀔𑀼𑀭𑀧𑁆𑀧𑀁 𑀫𑀼𑀜𑁆𑀘𑀺𑀲𑁆𑀲𑀢𑀺, 𑀬𑀸𑀯𑀢𑀸 𑀭𑀜𑁆𑀜𑁄 𑀯𑀺𑀚𑀺𑀢𑀁, 𑀏𑀢𑁆𑀢𑀸𑀯𑀢𑀸 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀤𑁂𑀯𑁄 𑀦 𑀯𑀲𑁆𑀲𑀺𑀲𑁆𑀲𑀢𑀻’𑀢𑀺. ‘𑀲𑁄𑀢𑁆𑀣𑀺, 𑀪𑀤𑁆𑀤𑀦𑁆𑀢𑁂, 𑀳𑁄𑀢𑀼 𑀭𑀜𑁆𑀜𑁄 𑀲𑁄𑀢𑁆𑀣𑀺 𑀚𑀦𑀧𑀤𑀲𑁆𑀲 𑀤𑁂𑀯𑁄 𑀘 𑀯𑀲𑁆𑀲𑀢𑀽’𑀢𑀺. ‘𑀲𑁄𑀢𑁆𑀣𑀺 𑀪𑀯𑀺𑀲𑁆𑀲𑀢𑀺 𑀭𑀜𑁆𑀜𑁄 𑀲𑁄𑀢𑁆𑀣𑀺 𑀚𑀦𑀧𑀤𑀲𑁆𑀲 𑀤𑁂𑀯𑁄 𑀘 𑀯𑀲𑁆𑀲𑀺𑀲𑁆𑀲𑀢𑀺, 𑀅𑀧𑀺 𑀘 𑀭𑀸𑀚𑀸 𑀚𑁂𑀝𑁆𑀞𑀓𑀼𑀫𑀸𑀭𑁂 𑀔𑀼𑀭𑀧𑁆𑀧𑀁 𑀧𑀢𑀺𑀝𑁆𑀞𑀸𑀧𑁂𑀢𑀼, 𑀲𑁄𑀢𑁆𑀣𑀺 𑀓𑀼𑀫𑀸𑀭𑁄 𑀧𑀮𑁆𑀮𑁄𑀫𑁄 𑀪𑀯𑀺𑀲𑁆𑀲𑀢𑀻’𑀢𑀺. 𑀅𑀣 𑀔𑁄, 𑀫𑀸𑀡𑀯𑀓𑀸, 𑀅𑀫𑀘𑁆𑀘𑀸 𑀑𑀓𑁆𑀓𑀸𑀓𑀲𑁆𑀲 𑀆𑀭𑁄𑀘𑁂𑀲𑀼𑀁 𑁋 ‘𑀑𑀓𑁆𑀓𑀸𑀓𑁄 𑀚𑁂𑀝𑁆𑀞𑀓𑀼𑀫𑀸𑀭𑁂 𑀔𑀼𑀭𑀧𑁆𑀧𑀁 𑀧𑀢𑀺𑀝𑁆𑀞𑀸𑀧𑁂𑀢𑀼. 𑀲𑁄𑀢𑁆𑀣𑀺 𑀓𑀼𑀫𑀸𑀭𑁄 𑀧𑀮𑁆𑀮𑁄𑀫𑁄 𑀪𑀯𑀺𑀲𑁆𑀲𑀢𑀻’𑀢𑀺. 𑀅𑀣 𑀔𑁄 𑀭𑀸𑀚𑀸 𑀑𑀓𑁆𑀓𑀸𑀓𑁄 𑀚𑁂𑀝𑁆𑀞𑀓𑀼𑀫𑀸𑀭𑁂 𑀔𑀼𑀭𑀧𑁆𑀧𑀁 𑀧𑀢𑀺𑀝𑁆𑀞𑀧𑁂𑀲𑀺, 𑀲𑁄𑀢𑁆𑀣𑀺 𑀓𑀼𑀫𑀸𑀭𑁄 𑀧𑀮𑁆𑀮𑁄𑀫𑁄 𑀲𑀫𑀪𑀯𑀺. 𑀅𑀣 𑀔𑁄 𑀢𑀲𑁆𑀲 𑀭𑀸𑀚𑀸 𑀑𑀓𑁆𑀓𑀸𑀓𑁄 𑀪𑀻𑀢𑁄 𑀲𑀁𑀯𑀺𑀕𑁆𑀕𑁄 𑀮𑁄𑀫𑀳𑀝𑁆𑀞𑀚𑀸𑀢𑁄 𑀩𑁆𑀭𑀳𑁆𑀫𑀤𑀡𑁆𑀟𑁂𑀦 𑀢𑀚𑁆𑀚𑀺𑀢𑁄 𑀫𑀤𑁆𑀤𑀭𑀽𑀧𑀺𑀁 𑀥𑀻𑀢𑀭𑀁 𑀅𑀤𑀸𑀲𑀺. 𑀫𑀸 𑀔𑁄 𑀢𑀼𑀫𑁆𑀳𑁂, 𑀫𑀸𑀡𑀯𑀓𑀸, 𑀅𑀫𑁆𑀩𑀝𑁆𑀞𑀁 𑀫𑀸𑀡𑀯𑀁 𑀅𑀢𑀺𑀩𑀸𑀴𑁆𑀳𑀁 𑀤𑀸𑀲𑀺𑀧𑀼𑀢𑁆𑀢𑀯𑀸𑀤𑁂𑀦 𑀦𑀺𑀫𑁆𑀫𑀸𑀤𑁂𑀣, 𑀉𑀴𑀸𑀭𑁄 𑀲𑁄 𑀓𑀡𑁆𑀳𑁄 𑀇𑀲𑀺 𑀅𑀳𑁄𑀲𑀻’’𑀢𑀺.

𑀔𑀢𑁆𑀢𑀺𑀬𑀲𑁂𑀝𑁆𑀞𑀪𑀸𑀯𑁄

𑁨𑁭𑁫. 𑀅𑀣 𑀔𑁄 𑀪𑀕𑀯𑀸 𑀅𑀫𑁆𑀩𑀝𑁆𑀞𑀁 𑀫𑀸𑀡𑀯𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀫𑁆𑀩𑀝𑁆𑀞, 𑀇𑀥 𑀔𑀢𑁆𑀢𑀺𑀬𑀓𑀼𑀫𑀸𑀭𑁄 𑀩𑁆𑀭𑀸𑀳𑁆𑀫𑀡𑀓𑀜𑁆𑀜𑀸𑀬 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀬𑁆𑀬, 𑀢𑁂𑀲𑀁 𑀲𑀁𑀯𑀸𑀲𑀫𑀦𑁆𑀯𑀸𑀬 𑀧𑀼𑀢𑁆𑀢𑁄 𑀚𑀸𑀬𑁂𑀣. 𑀬𑁄 𑀲𑁄 𑀔𑀢𑁆𑀢𑀺𑀬𑀓𑀼𑀫𑀸𑀭𑁂𑀦 𑀩𑁆𑀭𑀸𑀳𑁆𑀫𑀡𑀓𑀜𑁆𑀜𑀸𑀬 𑀧𑀼𑀢𑁆𑀢𑁄 𑀉𑀧𑁆𑀧𑀦𑁆𑀦𑁄, 𑀅𑀧𑀺 𑀦𑀼 𑀲𑁄 𑀮𑀪𑁂𑀣 𑀩𑁆𑀭𑀸𑀳𑁆𑀫𑀡𑁂𑀲𑀼 𑀆𑀲𑀦𑀁 𑀯𑀸 𑀉𑀤𑀓𑀁 𑀯𑀸’’𑀢𑀺? ‘‘𑀮𑀪𑁂𑀣, 𑀪𑁄 𑀕𑁄𑀢𑀫’’. ‘‘𑀅𑀧𑀺𑀦𑀼 𑀦𑀁 𑀩𑁆𑀭𑀸𑀳𑁆𑀫𑀡𑀸 𑀪𑁄𑀚𑁂𑀬𑁆𑀬𑀼𑀁 𑀲𑀤𑁆𑀥𑁂 𑀯𑀸 𑀣𑀸𑀮𑀺𑀧𑀸𑀓𑁂 𑀯𑀸 𑀬𑀜𑁆𑀜𑁂 𑀯𑀸 𑀧𑀸𑀳𑀼𑀦𑁂 𑀯𑀸’’𑀢𑀺? ‘‘𑀪𑁄𑀚𑁂𑀬𑁆𑀬𑀼𑀁, 𑀪𑁄 𑀕𑁄𑀢𑀫’’. ‘‘𑀅𑀧𑀺𑀦𑀼 𑀦𑀁 𑀩𑁆𑀭𑀸𑀳𑁆𑀫𑀡𑀸 𑀫𑀦𑁆𑀢𑁂 𑀯𑀸𑀘𑁂𑀬𑁆𑀬𑀼𑀁 𑀯𑀸 𑀦𑁄 𑀯𑀸’’𑀢𑀺? ‘‘𑀯𑀸𑀘𑁂𑀬𑁆𑀬𑀼𑀁, 𑀪𑁄 𑀕𑁄𑀢𑀫’’. ‘‘𑀅𑀧𑀺𑀦𑀼𑀲𑁆𑀲 𑀇𑀢𑁆𑀣𑀻𑀲𑀼 𑀆𑀯𑀝𑀁 𑀯𑀸 𑀅𑀲𑁆𑀲 𑀅𑀦𑀸𑀯𑀝𑀁 𑀯𑀸’’𑀢𑀺? ‘‘𑀅𑀦𑀸𑀯𑀝𑀁 𑀳𑀺𑀲𑁆𑀲, 𑀪𑁄 𑀕𑁄𑀢𑀫’’. ‘‘𑀅𑀧𑀺𑀦𑀼 𑀦𑀁 𑀔𑀢𑁆𑀢𑀺𑀬𑀸 𑀔𑀢𑁆𑀢𑀺𑀬𑀸𑀪𑀺𑀲𑁂𑀓𑁂𑀦 𑀅𑀪𑀺𑀲𑀺𑀜𑁆𑀘𑁂𑀬𑁆𑀬𑀼’’𑀦𑁆𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’? ‘‘𑀫𑀸𑀢𑀺𑀢𑁄 𑀳𑀺, 𑀪𑁄 𑀕𑁄𑀢𑀫, 𑀅𑀦𑀼𑀧𑀧𑀦𑁆𑀦𑁄’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀫𑁆𑀩𑀝𑁆𑀞, 𑀇𑀥 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑁄 𑀔𑀢𑁆𑀢𑀺𑀬𑀓𑀜𑁆𑀜𑀸𑀬 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀓𑀧𑁆𑀧𑁂𑀬𑁆𑀬, 𑀢𑁂𑀲𑀁 𑀲𑀁𑀯𑀸𑀲𑀫𑀦𑁆𑀯𑀸𑀬 𑀧𑀼𑀢𑁆𑀢𑁄 𑀚𑀸𑀬𑁂𑀣. 𑀬𑁄 𑀲𑁄 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑁂𑀦 𑀔𑀢𑁆𑀢𑀺𑀬𑀓𑀜𑁆𑀜𑀸𑀬 𑀧𑀼𑀢𑁆𑀢𑁄 𑀉𑀧𑁆𑀧𑀦𑁆𑀦𑁄, 𑀅𑀧𑀺𑀦𑀼 𑀲𑁄 𑀮𑀪𑁂𑀣 𑀩𑁆𑀭𑀸𑀳𑁆𑀫𑀡𑁂𑀲𑀼 𑀆𑀲𑀦𑀁 𑀯𑀸 𑀉𑀤𑀓𑀁 𑀯𑀸’’𑀢𑀺? ‘‘𑀮𑀪𑁂𑀣, 𑀪𑁄 𑀕𑁄𑀢𑀫’’. ‘‘𑀅𑀧𑀺𑀦𑀼 𑀦𑀁 𑀩𑁆𑀭𑀸𑀳𑁆𑀫𑀡𑀸 𑀪𑁄𑀚𑁂𑀬𑁆𑀬𑀼𑀁 𑀲𑀤𑁆𑀥𑁂 𑀯𑀸 𑀣𑀸𑀮𑀺𑀧𑀸𑀓𑁂 𑀯𑀸 𑀬𑀜𑁆𑀜𑁂 𑀯𑀸 𑀧𑀸𑀳𑀼𑀦𑁂 𑀯𑀸’’𑀢𑀺? ‘‘𑀪𑁄𑀚𑁂𑀬𑁆𑀬𑀼𑀁, 𑀪𑁄 𑀕𑁄𑀢𑀫’’. ‘‘𑀅𑀧𑀺𑀦𑀼 𑀦𑀁 𑀩𑁆𑀭𑀸𑀳𑁆𑀫𑀡𑀸 𑀫𑀦𑁆𑀢𑁂 𑀯𑀸𑀘𑁂𑀬𑁆𑀬𑀼𑀁 𑀯𑀸 𑀦𑁄 𑀯𑀸’’𑀢𑀺? ‘‘𑀯𑀸𑀘𑁂𑀬𑁆𑀬𑀼𑀁, 𑀪𑁄 𑀕𑁄𑀢𑀫’’. ‘‘𑀅𑀧𑀺𑀦𑀼𑀲𑁆𑀲 𑀇𑀢𑁆𑀣𑀻𑀲𑀼 𑀆𑀯𑀝𑀁 𑀯𑀸 𑀅𑀲𑁆𑀲 𑀅𑀦𑀸𑀯𑀝𑀁 𑀯𑀸’’𑀢𑀺? ‘‘𑀅𑀦𑀸𑀯𑀝𑀁 𑀳𑀺𑀲𑁆𑀲, 𑀪𑁄 𑀕𑁄𑀢𑀫’’. ‘‘𑀅𑀧𑀺𑀦𑀼 𑀦𑀁 𑀔𑀢𑁆𑀢𑀺𑀬𑀸 𑀔𑀢𑁆𑀢𑀺𑀬𑀸𑀪𑀺𑀲𑁂𑀓𑁂𑀦 𑀅𑀪𑀺𑀲𑀺𑀜𑁆𑀘𑁂𑀬𑁆𑀬𑀼’’𑀦𑁆𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’? ‘‘𑀧𑀺𑀢𑀺𑀢𑁄 𑀳𑀺, 𑀪𑁄 𑀕𑁄𑀢𑀫, 𑀅𑀦𑀼𑀧𑀧𑀦𑁆𑀦𑁄’’𑀢𑀺.

𑁨𑁭𑁬. ‘‘𑀇𑀢𑀺 𑀔𑁄, 𑀅𑀫𑁆𑀩𑀝𑁆𑀞, 𑀇𑀢𑁆𑀣𑀺𑀬𑀸 𑀯𑀸 𑀇𑀢𑁆𑀣𑀺𑀁 𑀓𑀭𑀺𑀢𑁆𑀯𑀸 𑀧𑀼𑀭𑀺𑀲𑁂𑀦 𑀯𑀸 𑀧𑀼𑀭𑀺𑀲𑀁 𑀓𑀭𑀺𑀢𑁆𑀯𑀸 𑀔𑀢𑁆𑀢𑀺𑀬𑀸𑀯 𑀲𑁂𑀝𑁆𑀞𑀸, 𑀳𑀻𑀦𑀸 𑀩𑁆𑀭𑀸𑀳𑁆𑀫𑀡𑀸. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀫𑁆𑀩𑀝𑁆𑀞, 𑀇𑀥 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀁 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀧𑀓𑀭𑀡𑁂 𑀔𑀼𑀭𑀫𑀼𑀡𑁆𑀟𑀁 𑀓𑀭𑀺𑀢𑁆𑀯𑀸 𑀪𑀲𑁆𑀲𑀧𑀼𑀝𑁂𑀦 𑀯𑀥𑀺𑀢𑁆𑀯𑀸 𑀭𑀝𑁆𑀞𑀸 𑀯𑀸 𑀦𑀕𑀭𑀸 𑀯𑀸 𑀧𑀩𑁆𑀩𑀸𑀚𑁂𑀬𑁆𑀬𑀼𑀁. 𑀅𑀧𑀺𑀦𑀼 𑀲𑁄 𑀮𑀪𑁂𑀣 𑀩𑁆𑀭𑀸𑀳𑁆𑀫𑀡𑁂𑀲𑀼 𑀆𑀲𑀦𑀁 𑀯𑀸 𑀉𑀤𑀓𑀁 𑀯𑀸’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’. ‘‘𑀅𑀧𑀺𑀦𑀼 𑀦𑀁 𑀩𑁆𑀭𑀸𑀳𑁆𑀫𑀡𑀸 𑀪𑁄𑀚𑁂𑀬𑁆𑀬𑀼𑀁 𑀲𑀤𑁆𑀥𑁂 𑀯𑀸 𑀣𑀸𑀮𑀺𑀧𑀸𑀓𑁂 𑀯𑀸 𑀬𑀜𑁆𑀜𑁂 𑀯𑀸 𑀧𑀸𑀳𑀼𑀦𑁂 𑀯𑀸’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’. ‘‘𑀅𑀧𑀺𑀦𑀼 𑀦𑀁 𑀩𑁆𑀭𑀸𑀳𑁆𑀫𑀡𑀸 𑀫𑀦𑁆𑀢𑁂 𑀯𑀸𑀘𑁂𑀬𑁆𑀬𑀼𑀁 𑀯𑀸 𑀦𑁄 𑀯𑀸’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’. ‘‘𑀅𑀧𑀺𑀦𑀼𑀲𑁆𑀲 𑀇𑀢𑁆𑀣𑀻𑀲𑀼 𑀆𑀯𑀝𑀁 𑀯𑀸 𑀅𑀲𑁆𑀲 𑀅𑀦𑀸𑀯𑀝𑀁 𑀯𑀸’’𑀢𑀺? ‘‘𑀆𑀯𑀝𑀁 𑀳𑀺𑀲𑁆𑀲, 𑀪𑁄 𑀕𑁄𑀢𑀫’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀫𑁆𑀩𑀝𑁆𑀞, 𑀇𑀥 𑀔𑀢𑁆𑀢𑀺𑀬𑀸 𑀔𑀢𑁆𑀢𑀺𑀬𑀁 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀧𑀓𑀭𑀡𑁂 𑀔𑀼𑀭𑀫𑀼𑀡𑁆𑀟𑀁 𑀓𑀭𑀺𑀢𑁆𑀯𑀸 𑀪𑀲𑁆𑀲𑀧𑀼𑀝𑁂𑀦 𑀯𑀥𑀺𑀢𑁆𑀯𑀸 𑀭𑀝𑁆𑀞𑀸 𑀯𑀸 𑀦𑀕𑀭𑀸 𑀯𑀸 𑀧𑀩𑁆𑀩𑀸𑀚𑁂𑀬𑁆𑀬𑀼𑀁. 𑀅𑀧𑀺𑀦𑀼 𑀲𑁄 𑀮𑀪𑁂𑀣 𑀩𑁆𑀭𑀸𑀳𑁆𑀫𑀡𑁂𑀲𑀼 𑀆𑀲𑀦𑀁 𑀯𑀸 𑀉𑀤𑀓𑀁 𑀯𑀸’’𑀢𑀺? ‘‘𑀮𑀪𑁂𑀣, 𑀪𑁄 𑀕𑁄𑀢𑀫’’. ‘‘𑀅𑀧𑀺𑀦𑀼 𑀦𑀁 𑀩𑁆𑀭𑀸𑀳𑁆𑀫𑀡𑀸 𑀪𑁄𑀚𑁂𑀬𑁆𑀬𑀼𑀁 𑀲𑀤𑁆𑀥𑁂 𑀯𑀸 𑀣𑀸𑀮𑀺𑀧𑀸𑀓𑁂 𑀯𑀸 𑀬𑀜𑁆𑀜𑁂 𑀯𑀸 𑀧𑀸𑀳𑀼𑀦𑁂 𑀯𑀸’’𑀢𑀺? ‘‘𑀪𑁄𑀚𑁂𑀬𑁆𑀬𑀼𑀁, 𑀪𑁄 𑀕𑁄𑀢𑀫’’. ‘‘𑀅𑀧𑀺𑀦𑀼 𑀦𑀁 𑀩𑁆𑀭𑀸𑀳𑁆𑀫𑀡𑀸 𑀫𑀦𑁆𑀢𑁂 𑀯𑀸𑀘𑁂𑀬𑁆𑀬𑀼𑀁 𑀯𑀸 𑀦𑁄 𑀯𑀸’’𑀢𑀺? ‘‘𑀯𑀸𑀘𑁂𑀬𑁆𑀬𑀼𑀁, 𑀪𑁄 𑀕𑁄𑀢𑀫’’. ‘‘𑀅𑀧𑀺𑀦𑀼𑀲𑁆𑀲 𑀇𑀢𑁆𑀣𑀻𑀲𑀼 𑀆𑀯𑀝𑀁 𑀯𑀸 𑀅𑀲𑁆𑀲 𑀅𑀦𑀸𑀯𑀝𑀁 𑀯𑀸’’𑀢𑀺? ‘‘𑀅𑀦𑀸𑀯𑀝𑀁 𑀳𑀺𑀲𑁆𑀲, 𑀪𑁄 𑀕𑁄𑀢𑀫’’.

𑁨𑁭𑁭. ‘‘𑀏𑀢𑁆𑀢𑀸𑀯𑀢𑀸 𑀔𑁄, 𑀅𑀫𑁆𑀩𑀝𑁆𑀞, 𑀔𑀢𑁆𑀢𑀺𑀬𑁄 𑀧𑀭𑀫𑀦𑀺𑀳𑀻𑀦𑀢𑀁 𑀧𑀢𑁆𑀢𑁄 𑀳𑁄𑀢𑀺, 𑀬𑀤𑁂𑀯 𑀦𑀁 𑀔𑀢𑁆𑀢𑀺𑀬𑀸 𑀔𑀼𑀭𑀫𑀼𑀡𑁆𑀟𑀁 𑀓𑀭𑀺𑀢𑁆𑀯𑀸 𑀪𑀲𑁆𑀲𑀧𑀼𑀝𑁂𑀦 𑀯𑀥𑀺𑀢𑁆𑀯𑀸 𑀭𑀝𑁆𑀞𑀸 𑀯𑀸 𑀦𑀕𑀭𑀸 𑀯𑀸 𑀧𑀩𑁆𑀩𑀸𑀚𑁂𑀦𑁆𑀢𑀺. 𑀇𑀢𑀺 𑀔𑁄, 𑀅𑀫𑁆𑀩𑀝𑁆𑀞, 𑀬𑀤𑀸 𑀔𑀢𑁆𑀢𑀺𑀬𑁄 𑀧𑀭𑀫𑀦𑀺𑀳𑀻𑀦𑀢𑀁 𑀧𑀢𑁆𑀢𑁄 𑀳𑁄𑀢𑀺, 𑀢𑀤𑀸𑀧𑀺 𑀔𑀢𑁆𑀢𑀺𑀬𑀸𑀯 𑀲𑁂𑀝𑁆𑀞𑀸, 𑀳𑀻𑀦𑀸 𑀩𑁆𑀭𑀸𑀳𑁆𑀫𑀡𑀸. 𑀩𑁆𑀭𑀳𑁆𑀫𑀼𑀦𑀸 𑀧𑁂𑀲𑀸, 𑀅𑀫𑁆𑀩𑀝𑁆𑀞 [𑀩𑁆𑀭𑀳𑁆𑀫𑀼𑀦𑀸𑀧𑀺 𑀅𑀫𑁆𑀩𑀝𑁆𑀞 (𑀓.), 𑀩𑁆𑀭𑀳𑁆𑀫𑀼𑀦𑀸𑀧𑀺 𑀏𑀲𑁄 𑀅𑀫𑁆𑀩𑀝𑁆𑀞 (𑀧𑀻.)], 𑀲𑀦𑀗𑁆𑀓𑀼𑀫𑀸𑀭𑁂𑀦 𑀕𑀸𑀣𑀸 𑀪𑀸𑀲𑀺𑀢𑀸 𑁋

‘𑀔𑀢𑁆𑀢𑀺𑀬𑁄 𑀲𑁂𑀝𑁆𑀞𑁄 𑀚𑀦𑁂𑀢𑀲𑁆𑀫𑀺𑀁,

𑀬𑁂 𑀕𑁄𑀢𑁆𑀢𑀧𑀝𑀺𑀲𑀸𑀭𑀺𑀦𑁄;

𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄,

𑀲𑁄 𑀲𑁂𑀝𑁆𑀞𑁄 𑀤𑁂𑀯𑀫𑀸𑀦𑀼𑀲𑁂’𑀢𑀺.

‘‘𑀲𑀸 𑀔𑁄 𑀧𑀦𑁂𑀲𑀸, 𑀅𑀫𑁆𑀩𑀝𑁆𑀞, 𑀩𑁆𑀭𑀳𑁆𑀫𑀼𑀦𑀸 𑀲𑀦𑀗𑁆𑀓𑀼𑀫𑀸𑀭𑁂𑀦 𑀕𑀸𑀣𑀸 𑀲𑀼𑀕𑀻𑀢𑀸 𑀦𑁄 𑀤𑀼𑀕𑁆𑀕𑀻𑀢𑀸, 𑀲𑀼𑀪𑀸𑀲𑀺𑀢𑀸 𑀦𑁄 𑀤𑀼𑀩𑁆𑀪𑀸𑀲𑀺𑀢𑀸, 𑀅𑀢𑁆𑀣𑀲𑀁𑀳𑀺𑀢𑀸 𑀦𑁄 𑀅𑀦𑀢𑁆𑀣𑀲𑀁𑀳𑀺𑀢𑀸, 𑀅𑀦𑀼𑀫𑀢𑀸 𑀫𑀬𑀸. 𑀅𑀳𑀫𑁆𑀧𑀺 𑀳𑀺, 𑀅𑀫𑁆𑀩𑀝𑁆𑀞, 𑀏𑀯𑀁 𑀯𑀤𑀸𑀫𑀺 𑁋

‘𑀔𑀢𑁆𑀢𑀺𑀬𑁄 𑀲𑁂𑀝𑁆𑀞𑁄 𑀚𑀦𑁂𑀢𑀲𑁆𑀫𑀺𑀁,

𑀬𑁂 𑀕𑁄𑀢𑁆𑀢𑀧𑀝𑀺𑀲𑀸𑀭𑀺𑀦𑁄;

𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄,

𑀲𑁄 𑀲𑁂𑀝𑁆𑀞𑁄 𑀤𑁂𑀯𑀫𑀸𑀦𑀼𑀲𑁂’𑀢𑀺.

𑀪𑀸𑀡𑀯𑀸𑀭𑁄 𑀧𑀞𑀫𑁄.

𑀯𑀺𑀚𑁆𑀚𑀸𑀘𑀭𑀡𑀓𑀣𑀸

𑁨𑁭𑁮. ‘‘𑀓𑀢𑀫𑀁 𑀧𑀦 𑀢𑀁, 𑀪𑁄 𑀕𑁄𑀢𑀫, 𑀘𑀭𑀡𑀁, 𑀓𑀢𑀫𑀸 𑀘 𑀧𑀦 𑀲𑀸 𑀯𑀺𑀚𑁆𑀚𑀸’’𑀢𑀺? ‘‘𑀦 𑀔𑁄, 𑀅𑀫𑁆𑀩𑀝𑁆𑀞, 𑀅𑀦𑀼𑀢𑁆𑀢𑀭𑀸𑀬 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸𑀬 𑀚𑀸𑀢𑀺𑀯𑀸𑀤𑁄 𑀯𑀸 𑀯𑀼𑀘𑁆𑀘𑀢𑀺, 𑀕𑁄𑀢𑁆𑀢𑀯𑀸𑀤𑁄 𑀯𑀸 𑀯𑀼𑀘𑁆𑀘𑀢𑀺, 𑀫𑀸𑀦𑀯𑀸𑀤𑁄 𑀯𑀸 𑀯𑀼𑀘𑁆𑀘𑀢𑀺 𑁋 ‘𑀅𑀭𑀳𑀲𑀺 𑀯𑀸 𑀫𑀁 𑀢𑁆𑀯𑀁, 𑀦 𑀯𑀸 𑀫𑀁 𑀢𑁆𑀯𑀁 𑀅𑀭𑀳𑀲𑀻’𑀢𑀺. 𑀬𑀢𑁆𑀣 𑀔𑁄, 𑀅𑀫𑁆𑀩𑀝𑁆𑀞, 𑀆𑀯𑀸𑀳𑁄 𑀯𑀸 𑀳𑁄𑀢𑀺, 𑀯𑀺𑀯𑀸𑀳𑁄 𑀯𑀸 𑀳𑁄𑀢𑀺, 𑀆𑀯𑀸𑀳𑀯𑀺𑀯𑀸𑀳𑁄 𑀯𑀸 𑀳𑁄𑀢𑀺, 𑀏𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑀚𑀸𑀢𑀺𑀯𑀸𑀤𑁄 𑀯𑀸 𑀇𑀢𑀺𑀧𑀺 𑀕𑁄𑀢𑁆𑀢𑀯𑀸𑀤𑁄 𑀯𑀸 𑀇𑀢𑀺𑀧𑀺 𑀫𑀸𑀦𑀯𑀸𑀤𑁄 𑀯𑀸 𑀇𑀢𑀺𑀧𑀺 𑁋 ‘𑀅𑀭𑀳𑀲𑀺 𑀯𑀸 𑀫𑀁 𑀢𑁆𑀯𑀁, 𑀦 𑀯𑀸 𑀫𑀁 𑀢𑁆𑀯𑀁 𑀅𑀭𑀳𑀲𑀻’𑀢𑀺. 𑀬𑁂 𑀳𑀺 𑀓𑁂𑀘𑀺 𑀅𑀫𑁆𑀩𑀝𑁆𑀞 𑀚𑀸𑀢𑀺𑀯𑀸𑀤𑀯𑀺𑀦𑀺𑀩𑀤𑁆𑀥𑀸 𑀯𑀸 𑀕𑁄𑀢𑁆𑀢𑀯𑀸𑀤𑀯𑀺𑀦𑀺𑀩𑀤𑁆𑀥𑀸 𑀯𑀸 𑀫𑀸𑀦𑀯𑀸𑀤𑀯𑀺𑀦𑀺𑀩𑀤𑁆𑀥𑀸 𑀯𑀸 𑀆𑀯𑀸𑀳𑀯𑀺𑀯𑀸𑀳𑀯𑀺𑀦𑀺𑀩𑀤𑁆𑀥𑀸 𑀯𑀸, 𑀆𑀭𑀓𑀸 𑀢𑁂 𑀅𑀦𑀼𑀢𑁆𑀢𑀭𑀸𑀬 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸𑀬. 𑀧𑀳𑀸𑀬 𑀔𑁄, 𑀅𑀫𑁆𑀩𑀝𑁆𑀞, 𑀚𑀸𑀢𑀺𑀯𑀸𑀤𑀯𑀺𑀦𑀺𑀩𑀤𑁆𑀥𑀜𑁆𑀘 𑀕𑁄𑀢𑁆𑀢𑀯𑀸𑀤𑀯𑀺𑀦𑀺𑀩𑀤𑁆𑀥𑀜𑁆𑀘 𑀫𑀸𑀦𑀯𑀸𑀤𑀯𑀺𑀦𑀺𑀩𑀤𑁆𑀥𑀜𑁆𑀘 𑀆𑀯𑀸𑀳𑀯𑀺𑀯𑀸𑀳𑀯𑀺𑀦𑀺𑀩𑀤𑁆𑀥𑀜𑁆𑀘 𑀅𑀦𑀼𑀢𑁆𑀢𑀭𑀸𑀬 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸𑀬 𑀲𑀘𑁆𑀙𑀺𑀓𑀺𑀭𑀺𑀬𑀸 𑀳𑁄𑀢𑀻’’𑀢𑀺.

𑁨𑁭𑁯. ‘‘𑀓𑀢𑀫𑀁 𑀧𑀦 𑀢𑀁, 𑀪𑁄 𑀕𑁄𑀢𑀫, 𑀘𑀭𑀡𑀁, 𑀓𑀢𑀫𑀸 𑀘 𑀲𑀸 𑀯𑀺𑀚𑁆𑀚𑀸’’𑀢𑀺? ‘‘𑀇𑀥, 𑀅𑀫𑁆𑀩𑀝𑁆𑀞, 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸. 𑀲𑁄 𑀇𑀫𑀁 𑀮𑁄𑀓𑀁 𑀲𑀤𑁂𑀯𑀓𑀁 𑀲𑀫𑀸𑀭𑀓𑀁 𑀲𑀩𑁆𑀭𑀳𑁆𑀫𑀓𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀢𑀁 𑀥𑀫𑁆𑀫𑀁 𑀲𑀼𑀡𑀸𑀢𑀺 𑀕𑀳𑀧𑀢𑀺 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁄 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄. 𑀲𑁄 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀣𑀸𑀕𑀢𑁂 𑀲𑀤𑁆𑀥𑀁 𑀧𑀝𑀺𑀮𑀪𑀢𑀺. 𑀲𑁄 𑀢𑁂𑀦 𑀲𑀤𑁆𑀥𑀸𑀧𑀝𑀺𑀮𑀸𑀪𑁂𑀦 𑀲𑀫𑀦𑁆𑀦𑀸𑀕𑀢𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺…𑀧𑁂… (𑀬𑀣𑀸 𑁧𑁯𑁧 𑀆𑀤𑀬𑁄 𑀅𑀦𑀼𑀘𑁆𑀙𑁂𑀤𑀸, 𑀏𑀯𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁).…

‘‘𑀲𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺, 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺, 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺…𑀧𑁂… 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀘𑀭𑀡𑀲𑁆𑀫𑀺𑀁.

‘‘𑀧𑀼𑀦 𑀘𑀧𑀭𑀁, 𑀅𑀫𑁆𑀩𑀝𑁆𑀞, 𑀪𑀺𑀓𑁆𑀔𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺…𑀧𑁂… 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀘𑀭𑀡𑀲𑁆𑀫𑀺𑀁.

‘‘𑀧𑀼𑀦 𑀘𑀧𑀭𑀁, 𑀅𑀫𑁆𑀩𑀝𑁆𑀞, 𑀪𑀺𑀓𑁆𑀔𑀼 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄, 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺, 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺…𑀧𑁂… 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀘𑀭𑀡𑀲𑁆𑀫𑀺𑀁.

‘‘𑀧𑀼𑀦 𑀘𑀧𑀭𑀁, 𑀅𑀫𑁆𑀩𑀝𑁆𑀞, 𑀪𑀺𑀓𑁆𑀔𑀼 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸, 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺…𑀧𑁂… 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀘𑀭𑀡𑀲𑁆𑀫𑀺𑀁. 𑀇𑀤𑀁 𑀔𑁄 𑀢𑀁, 𑀅𑀫𑁆𑀩𑀝𑁆𑀞, 𑀘𑀭𑀡𑀁.

‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀜𑀸𑀡𑀤𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺…𑀧𑁂… 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀯𑀺𑀚𑁆𑀚𑀸𑀬…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀺, 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀯𑀺𑀚𑁆𑀚𑀸𑀬. 𑀅𑀬𑀁 𑀔𑁄 𑀲𑀸, 𑀅𑀫𑁆𑀩𑀝𑁆𑀞, 𑀯𑀺𑀚𑁆𑀚𑀸.

‘‘𑀅𑀬𑀁 𑀯𑀼𑀘𑁆𑀘𑀢𑀺, 𑀅𑀫𑁆𑀩𑀝𑁆𑀞, 𑀪𑀺𑀓𑁆𑀔𑀼 ‘𑀯𑀺𑀚𑁆𑀚𑀸𑀲𑀫𑁆𑀧𑀦𑁆𑀦𑁄’ 𑀇𑀢𑀺𑀧𑀺, ‘𑀘𑀭𑀡𑀲𑀫𑁆𑀧𑀦𑁆𑀦𑁄’ 𑀇𑀢𑀺𑀧𑀺, ‘𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄’ 𑀇𑀢𑀺𑀧𑀺. 𑀇𑀫𑀸𑀬 𑀘 𑀅𑀫𑁆𑀩𑀝𑁆𑀞 𑀯𑀺𑀚𑁆𑀚𑀸𑀲𑀫𑁆𑀧𑀤𑀸𑀬 𑀘𑀭𑀡𑀲𑀫𑁆𑀧𑀤𑀸𑀬 𑀘 𑀅𑀜𑁆𑀜𑀸 𑀯𑀺𑀚𑁆𑀚𑀸𑀲𑀫𑁆𑀧𑀤𑀸 𑀘 𑀘𑀭𑀡𑀲𑀫𑁆𑀧𑀤𑀸 𑀘 𑀉𑀢𑁆𑀢𑀭𑀺𑀢𑀭𑀸 𑀯𑀸 𑀧𑀡𑀻𑀢𑀢𑀭𑀸 𑀯𑀸 𑀦𑀢𑁆𑀣𑀺.

𑀘𑀢𑀼𑀅𑀧𑀸𑀬𑀫𑀼𑀔𑀁

𑁨𑁮𑁦. ‘‘𑀇𑀫𑀸𑀬 𑀔𑁄, 𑀅𑀫𑁆𑀩𑀝𑁆𑀞, 𑀅𑀦𑀼𑀢𑁆𑀢𑀭𑀸𑀬 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸𑀬 𑀘𑀢𑁆𑀢𑀸𑀭𑀺 𑀅𑀧𑀸𑀬𑀫𑀼𑀔𑀸𑀦𑀺 𑀪𑀯𑀦𑁆𑀢𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀇𑀥, 𑀅𑀫𑁆𑀩𑀝𑁆𑀞, 𑀏𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀇𑀫𑀜𑁆𑀜𑁂𑀯 𑀅𑀦𑀼𑀢𑁆𑀢𑀭𑀁 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀁 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑁄 𑀔𑀸𑀭𑀺𑀯𑀺𑀥𑀫𑀸𑀤𑀸𑀬 [𑀔𑀸𑀭𑀺𑀯𑀺𑀯𑀺𑀥𑀫𑀸𑀤𑀸𑀬 (𑀲𑀻. 𑀲𑁆𑀬𑀸. 𑀧𑀻.)] 𑀅𑀭𑀜𑁆𑀜𑀸𑀬𑀢𑀦𑀁 𑀅𑀚𑁆𑀛𑁄𑀕𑀸𑀳𑀢𑀺 𑁋 ‘𑀧𑀯𑀢𑁆𑀢𑀨𑀮𑀪𑁄𑀚𑀦𑁄 𑀪𑀯𑀺𑀲𑁆𑀲𑀸𑀫𑀻’𑀢𑀺. 𑀲𑁄 𑀅𑀜𑁆𑀜𑀤𑀢𑁆𑀣𑀼 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀲𑁆𑀲𑁂𑀯 𑀧𑀭𑀺𑀘𑀸𑀭𑀓𑁄 𑀲𑀫𑁆𑀧𑀚𑁆𑀚𑀢𑀺. 𑀇𑀫𑀸𑀬 𑀔𑁄, 𑀅𑀫𑁆𑀩𑀝𑁆𑀞, 𑀅𑀦𑀼𑀢𑁆𑀢𑀭𑀸𑀬 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸𑀬 𑀇𑀤𑀁 𑀧𑀞𑀫𑀁 𑀅𑀧𑀸𑀬𑀫𑀼𑀔𑀁 𑀪𑀯𑀢𑀺.

‘‘𑀧𑀼𑀦 𑀘𑀧𑀭𑀁, 𑀅𑀫𑁆𑀩𑀝𑁆𑀞, 𑀇𑀥𑁂𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀇𑀫𑀜𑁆𑀘𑁂𑀯 𑀅𑀦𑀼𑀢𑁆𑀢𑀭𑀁 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀁 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑁄 𑀧𑀯𑀢𑁆𑀢𑀨𑀮𑀪𑁄𑀚𑀦𑀢𑀜𑁆𑀘 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑁄 𑀓𑀼𑀤𑀸𑀮𑀧𑀺𑀝𑀓𑀁 [𑀓𑀼𑀤𑁆𑀤𑀸𑀮𑀧𑀺𑀝𑀓𑀁 (𑀲𑀻. 𑀲𑁆𑀬𑀸. 𑀧𑀻.)] 𑀆𑀤𑀸𑀬 𑀅𑀭𑀜𑁆𑀜𑀯𑀦𑀁 𑀅𑀚𑁆𑀛𑁄𑀕𑀸𑀳𑀢𑀺 𑁋 ‘𑀓𑀦𑁆𑀤𑀫𑀽𑀮𑀨𑀮𑀪𑁄𑀚𑀦𑁄 𑀪𑀯𑀺𑀲𑁆𑀲𑀸𑀫𑀻’𑀢𑀺. 𑀲𑁄 𑀅𑀜𑁆𑀜𑀤𑀢𑁆𑀣𑀼 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀲𑁆𑀲𑁂𑀯 𑀧𑀭𑀺𑀘𑀸𑀭𑀓𑁄 𑀲𑀫𑁆𑀧𑀚𑁆𑀚𑀢𑀺. 𑀇𑀫𑀸𑀬 𑀔𑁄, 𑀅𑀫𑁆𑀩𑀝𑁆𑀞, 𑀅𑀦𑀼𑀢𑁆𑀢𑀭𑀸𑀬 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸𑀬 𑀇𑀤𑀁 𑀤𑀼𑀢𑀺𑀬𑀁 𑀅𑀧𑀸𑀬𑀫𑀼𑀔𑀁 𑀪𑀯𑀢𑀺.

‘‘𑀧𑀼𑀦 𑀘𑀧𑀭𑀁, 𑀅𑀫𑁆𑀩𑀝𑁆𑀞, 𑀇𑀥𑁂𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀇𑀫𑀜𑁆𑀘𑁂𑀯 𑀅𑀦𑀼𑀢𑁆𑀢𑀭𑀁 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀁 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑁄 𑀧𑀯𑀢𑁆𑀢𑀨𑀮𑀪𑁄𑀚𑀦𑀢𑀜𑁆𑀘 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑁄 𑀓𑀦𑁆𑀤𑀫𑀽𑀮𑀨𑀮𑀪𑁄𑀚𑀦𑀢𑀜𑁆𑀘 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑁄 𑀕𑀸𑀫𑀲𑀸𑀫𑀦𑁆𑀢𑀁 𑀯𑀸 𑀦𑀺𑀕𑀫𑀲𑀸𑀫𑀦𑁆𑀢𑀁 𑀯𑀸 𑀅𑀕𑁆𑀬𑀸𑀕𑀸𑀭𑀁 𑀓𑀭𑀺𑀢𑁆𑀯𑀸 𑀅𑀕𑁆𑀕𑀺𑀁 𑀧𑀭𑀺𑀘𑀭𑀦𑁆𑀢𑁄 𑀅𑀘𑁆𑀙𑀢𑀺. 𑀲𑁄 𑀅𑀜𑁆𑀜𑀤𑀢𑁆𑀣𑀼 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀲𑁆𑀲𑁂𑀯 𑀧𑀭𑀺𑀘𑀸𑀭𑀓𑁄 𑀲𑀫𑁆𑀧𑀚𑁆𑀚𑀢𑀺. 𑀇𑀫𑀸𑀬 𑀔𑁄, 𑀅𑀫𑁆𑀩𑀝𑁆𑀞, 𑀅𑀦𑀼𑀢𑁆𑀢𑀭𑀸𑀬 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸𑀬 𑀇𑀤𑀁 𑀢𑀢𑀺𑀬𑀁 𑀅𑀧𑀸𑀬𑀫𑀼𑀔𑀁 𑀪𑀯𑀢𑀺.

‘‘𑀧𑀼𑀦 𑀘𑀧𑀭𑀁, 𑀅𑀫𑁆𑀩𑀝𑁆𑀞, 𑀇𑀥𑁂𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀇𑀫𑀁 𑀘𑁂𑀯 𑀅𑀦𑀼𑀢𑁆𑀢𑀭𑀁 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀁 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑁄 𑀧𑀯𑀢𑁆𑀢𑀨𑀮𑀪𑁄𑀚𑀦𑀢𑀜𑁆𑀘 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑁄 𑀓𑀦𑁆𑀤𑀫𑀽𑀮𑀨𑀮𑀪𑁄𑀚𑀦𑀢𑀜𑁆𑀘 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑁄 𑀅𑀕𑁆𑀕𑀺𑀧𑀸𑀭𑀺𑀘𑀭𑀺𑀬𑀜𑁆𑀘 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑁄 𑀘𑀸𑀢𑀼𑀫𑀳𑀸𑀧𑀣𑁂 𑀘𑀢𑀼𑀤𑁆𑀯𑀸𑀭𑀁 𑀅𑀕𑀸𑀭𑀁 𑀓𑀭𑀺𑀢𑁆𑀯𑀸 𑀅𑀘𑁆𑀙𑀢𑀺 𑁋 ‘𑀬𑁄 𑀇𑀫𑀸𑀳𑀺 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀆𑀕𑀫𑀺𑀲𑁆𑀲𑀢𑀺 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸, 𑀢𑀫𑀳𑀁 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁 𑀧𑀝𑀺𑀧𑀽𑀚𑁂𑀲𑁆𑀲𑀸𑀫𑀻’𑀢𑀺. 𑀲𑁄 𑀅𑀜𑁆𑀜𑀤𑀢𑁆𑀣𑀼 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑀲𑁆𑀲𑁂𑀯 𑀧𑀭𑀺𑀘𑀸𑀭𑀓𑁄 𑀲𑀫𑁆𑀧𑀚𑁆𑀚𑀢𑀺. 𑀇𑀫𑀸𑀬 𑀔𑁄, 𑀅𑀫𑁆𑀩𑀝𑁆𑀞, 𑀅𑀦𑀼𑀢𑁆𑀢𑀭𑀸𑀬 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸𑀬 𑀇𑀤𑀁 𑀘𑀢𑀼𑀢𑁆𑀣𑀁 𑀅𑀧𑀸𑀬𑀫𑀼𑀔𑀁 𑀪𑀯𑀢𑀺. 𑀇𑀫𑀸𑀬 𑀔𑁄, 𑀅𑀫𑁆𑀩𑀝𑁆𑀞, 𑀅𑀦𑀼𑀢𑁆𑀢𑀭𑀸𑀬 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸𑀬 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀧𑀸𑀬𑀫𑀼𑀔𑀸𑀦𑀺 𑀪𑀯𑀦𑁆𑀢𑀺.

𑁨𑁮𑁧. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀫𑁆𑀩𑀝𑁆𑀞, 𑀅𑀧𑀺𑀦𑀼 𑀢𑁆𑀯𑀁 𑀇𑀫𑀸𑀬 𑀅𑀦𑀼𑀢𑁆𑀢𑀭𑀸𑀬 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸𑀬 𑀲𑀦𑁆𑀤𑀺𑀲𑁆𑀲𑀲𑀺 𑀲𑀸𑀘𑀭𑀺𑀬𑀓𑁄’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’. ‘𑀓𑁄𑀘𑀸𑀳𑀁, 𑀪𑁄 𑀕𑁄𑀢𑀫, 𑀲𑀸𑀘𑀭𑀺𑀬𑀓𑁄, 𑀓𑀸 𑀘 𑀅𑀦𑀼𑀢𑁆𑀢𑀭𑀸 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸? 𑀆𑀭𑀓𑀸𑀳𑀁, 𑀪𑁄 𑀕𑁄𑀢𑀫, 𑀅𑀦𑀼𑀢𑁆𑀢𑀭𑀸𑀬 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸𑀬 𑀲𑀸𑀘𑀭𑀺𑀬𑀓𑁄’’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀫𑁆𑀩𑀝𑁆𑀞, 𑀅𑀧𑀺𑀦𑀼 𑀢𑁆𑀯𑀁 𑀇𑀫𑀜𑁆𑀘𑁂𑀯 𑀅𑀦𑀼𑀢𑁆𑀢𑀭𑀁 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀁 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑁄 𑀔𑀸𑀭𑀺𑀯𑀺𑀥𑀫𑀸𑀤𑀸𑀬 𑀅𑀭𑀜𑁆𑀜𑀯𑀦𑀫𑀚𑁆𑀛𑁄𑀕𑀸𑀳𑀲𑀺 𑀲𑀸𑀘𑀭𑀺𑀬𑀓𑁄 𑁋 ‘𑀧𑀯𑀢𑁆𑀢𑀨𑀮𑀪𑁄𑀚𑀦𑁄 𑀪𑀯𑀺𑀲𑁆𑀲𑀸𑀫𑀻’’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀫𑁆𑀩𑀝𑁆𑀞, 𑀅𑀧𑀺𑀦𑀼 𑀢𑁆𑀯𑀁 𑀇𑀫𑀜𑁆𑀘𑁂𑀯 𑀅𑀦𑀼𑀢𑁆𑀢𑀭𑀁 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀁 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑁄 𑀧𑀯𑀢𑁆𑀢𑀨𑀮𑀪𑁄𑀚𑀦𑀢𑀜𑁆𑀘 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑁄 𑀓𑀼𑀤𑀸𑀮𑀧𑀺𑀝𑀓𑀁 𑀆𑀤𑀸𑀬 𑀅𑀭𑀜𑁆𑀜𑀯𑀦𑀫𑀚𑁆𑀛𑁄𑀕𑀸𑀳𑀲𑀺 𑀲𑀸𑀘𑀭𑀺𑀬𑀓𑁄 𑁋 ‘𑀓𑀦𑁆𑀤𑀫𑀽𑀮𑀨𑀮𑀪𑁄𑀚𑀦𑁄 𑀪𑀯𑀺𑀲𑁆𑀲𑀸𑀫𑀻’’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀫𑁆𑀩𑀝𑁆𑀞, 𑀅𑀧𑀺𑀦𑀼 𑀢𑁆𑀯𑀁 𑀇𑀫𑀜𑁆𑀘𑁂𑀯 𑀅𑀦𑀼𑀢𑁆𑀢𑀭𑀁 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀁 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑁄 𑀧𑀯𑀢𑁆𑀢𑀨𑀮𑀪𑁄𑀚𑀦𑀢𑀜𑁆𑀘 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑁄 𑀓𑀦𑁆𑀤𑀫𑀽𑀮𑀨𑀮𑀪𑁄𑀚𑀦𑀢𑀜𑁆𑀘 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑁄 𑀕𑀸𑀫𑀲𑀸𑀫𑀦𑁆𑀢𑀁 𑀯𑀸 𑀦𑀺𑀕𑀫𑀲𑀸𑀫𑀦𑁆𑀢𑀁 𑀯𑀸 𑀅𑀕𑁆𑀬𑀸𑀕𑀸𑀭𑀁 𑀓𑀭𑀺𑀢𑁆𑀯𑀸 𑀅𑀕𑁆𑀕𑀺𑀁 𑀧𑀭𑀺𑀘𑀭𑀦𑁆𑀢𑁄 𑀅𑀘𑁆𑀙𑀲𑀺 𑀲𑀸𑀘𑀭𑀺𑀬𑀓𑁄’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀫𑁆𑀩𑀝𑁆𑀞, 𑀅𑀧𑀺𑀦𑀼 𑀢𑁆𑀯𑀁 𑀇𑀫𑀜𑁆𑀘𑁂𑀯 𑀅𑀦𑀼𑀢𑁆𑀢𑀭𑀁 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀁 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑁄 𑀧𑀯𑀢𑁆𑀢𑀨𑀮𑀪𑁄𑀚𑀦𑀢𑀜𑁆𑀘 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑁄 𑀓𑀦𑁆𑀤𑀫𑀽𑀮𑀨𑀮𑀪𑁄𑀚𑀦𑀢𑀜𑁆𑀘 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑁄 𑀅𑀕𑁆𑀕𑀺𑀧𑀸𑀭𑀺𑀘𑀭𑀺𑀬𑀜𑁆𑀘 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑁄 𑀘𑀸𑀢𑀼𑀫𑀳𑀸𑀧𑀣𑁂 𑀘𑀢𑀼𑀤𑁆𑀯𑀸𑀭𑀁 𑀅𑀕𑀸𑀭𑀁 𑀓𑀭𑀺𑀢𑁆𑀯𑀸 𑀅𑀘𑁆𑀙𑀲𑀺 𑀲𑀸𑀘𑀭𑀺𑀬𑀓𑁄 𑁋 ‘𑀬𑁄 𑀇𑀫𑀸𑀳𑀺 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀆𑀕𑀫𑀺𑀲𑁆𑀲𑀢𑀺 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸, 𑀢𑀁 𑀫𑀬𑀁 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁 𑀧𑀝𑀺𑀧𑀽𑀚𑁂𑀲𑁆𑀲𑀸𑀫𑀸’’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

𑁨𑁮𑁨. ‘‘𑀇𑀢𑀺 𑀔𑁄, 𑀅𑀫𑁆𑀩𑀝𑁆𑀞, 𑀇𑀫𑀸𑀬 𑀘𑁂𑀯 𑀢𑁆𑀯𑀁 𑀅𑀦𑀼𑀢𑁆𑀢𑀭𑀸𑀬 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸𑀬 𑀧𑀭𑀺𑀳𑀻𑀦𑁄 𑀲𑀸𑀘𑀭𑀺𑀬𑀓𑁄. 𑀬𑁂 𑀘𑀺𑀫𑁂 𑀅𑀦𑀼𑀢𑁆𑀢𑀭𑀸𑀬 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸𑀬 𑀘𑀢𑁆𑀢𑀸𑀭𑀺 𑀅𑀧𑀸𑀬𑀫𑀼𑀔𑀸𑀦𑀺 𑀪𑀯𑀦𑁆𑀢𑀺, 𑀢𑀢𑁄 𑀘 𑀢𑁆𑀯𑀁 𑀧𑀭𑀺𑀳𑀻𑀦𑁄 𑀲𑀸𑀘𑀭𑀺𑀬𑀓𑁄. 𑀪𑀸𑀲𑀺𑀢𑀸 𑀔𑁄 𑀧𑀦 𑀢𑁂 𑀏𑀲𑀸, 𑀅𑀫𑁆𑀩𑀝𑁆𑀞, 𑀆𑀘𑀭𑀺𑀬𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀧𑁄𑀓𑁆𑀔𑀭𑀲𑀸𑀢𑀺𑀦𑀸 𑀯𑀸𑀘𑀸 𑁋 ‘𑀓𑁂 𑀘 𑀫𑀼𑀡𑁆𑀟𑀓𑀸 𑀲𑀫𑀡𑀓𑀸 𑀇𑀩𑁆𑀪𑀸 𑀓𑀡𑁆𑀳𑀸 𑀩𑀦𑁆𑀥𑀼𑀧𑀸𑀤𑀸𑀧𑀘𑁆𑀘𑀸, 𑀓𑀸 𑀘 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀸𑀓𑀘𑁆𑀙𑀸’𑀢𑀺 𑀅𑀢𑁆𑀢𑀦𑀸 𑀆𑀧𑀸𑀬𑀺𑀓𑁄𑀧𑀺 𑀅𑀧𑀭𑀺𑀧𑀽𑀭𑀫𑀸𑀦𑁄. 𑀧𑀲𑁆𑀲, 𑀅𑀫𑁆𑀩𑀝𑁆𑀞, 𑀬𑀸𑀯 𑀅𑀧𑀭𑀤𑁆𑀥𑀜𑁆𑀘 𑀢𑁂 𑀇𑀤𑀁 𑀆𑀘𑀭𑀺𑀬𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲.

𑀧𑀼𑀩𑁆𑀩𑀓𑀇𑀲𑀺𑀪𑀸𑀯𑀸𑀦𑀼𑀬𑁄𑀕𑁄

𑁨𑁮𑁩. ‘‘𑀩𑁆𑀭𑀸𑀳𑁆𑀫𑀡𑁄 𑀔𑁄 𑀧𑀦, 𑀅𑀫𑁆𑀩𑀝𑁆𑀞, 𑀧𑁄𑀓𑁆𑀔𑀭𑀲𑀸𑀢𑀺 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀤𑀢𑁆𑀢𑀺𑀓𑀁 𑀪𑀼𑀜𑁆𑀚𑀢𑀺. 𑀢𑀲𑁆𑀲 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀲𑀫𑁆𑀫𑀼𑀔𑀻𑀪𑀸𑀯𑀫𑁆𑀧𑀺 𑀦 𑀤𑀤𑀸𑀢𑀺. 𑀬𑀤𑀸𑀧𑀺 𑀢𑁂𑀦 𑀫𑀦𑁆𑀢𑁂𑀢𑀺, 𑀢𑀺𑀭𑁄𑀤𑀼𑀲𑁆𑀲𑀦𑁆𑀢𑁂𑀦 𑀫𑀦𑁆𑀢𑁂𑀢𑀺. 𑀬𑀲𑁆𑀲 𑀔𑁄 𑀧𑀦, 𑀅𑀫𑁆𑀩𑀝𑁆𑀞, 𑀥𑀫𑁆𑀫𑀺𑀓𑀁 𑀧𑀬𑀸𑀢𑀁 𑀪𑀺𑀓𑁆𑀔𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀓𑀣𑀁 𑀢𑀲𑁆𑀲 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀲𑀫𑁆𑀫𑀼𑀔𑀻𑀪𑀸𑀯𑀫𑁆𑀧𑀺 𑀦 𑀤𑀤𑁂𑀬𑁆𑀬. 𑀧𑀲𑁆𑀲, 𑀅𑀫𑁆𑀩𑀝𑁆𑀞, 𑀬𑀸𑀯 𑀅𑀧𑀭𑀤𑁆𑀥𑀜𑁆𑀘 𑀢𑁂 𑀇𑀤𑀁 𑀆𑀘𑀭𑀺𑀬𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲.

𑁨𑁮𑁪. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀫𑁆𑀩𑀝𑁆𑀞, 𑀇𑀥 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀳𑀢𑁆𑀣𑀺𑀕𑀻𑀯𑀸𑀬 𑀯𑀸 𑀦𑀺𑀲𑀺𑀦𑁆𑀦𑁄 𑀅𑀲𑁆𑀲𑀧𑀺𑀝𑁆𑀞𑁂 𑀯𑀸 𑀦𑀺𑀲𑀺𑀦𑁆𑀦𑁄 𑀭𑀣𑀽𑀧𑀢𑁆𑀣𑀭𑁂 𑀯𑀸 𑀞𑀺𑀢𑁄 𑀉𑀕𑁆𑀕𑁂𑀳𑀺 𑀯𑀸 𑀭𑀸𑀚𑀜𑁆𑀜𑁂𑀳𑀺 𑀯𑀸 𑀓𑀺𑀜𑁆𑀘𑀺𑀤𑁂𑀯 𑀫𑀦𑁆𑀢𑀦𑀁 𑀫𑀦𑁆𑀢𑁂𑀬𑁆𑀬. 𑀲𑁄 𑀢𑀫𑁆𑀳𑀸 𑀧𑀤𑁂𑀲𑀸 𑀅𑀧𑀓𑁆𑀓𑀫𑁆𑀫 𑀏𑀓𑀫𑀦𑁆𑀢𑀁 𑀢𑀺𑀝𑁆𑀞𑁂𑀬𑁆𑀬. 𑀅𑀣 𑀆𑀕𑀘𑁆𑀙𑁂𑀬𑁆𑀬 𑀲𑀼𑀤𑁆𑀤𑁄 𑀯𑀸 𑀲𑀼𑀤𑁆𑀤𑀤𑀸𑀲𑁄 𑀯𑀸, 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀞𑀺𑀢𑁄 𑀢𑀤𑁂𑀯 𑀫𑀦𑁆𑀢𑀦𑀁 𑀫𑀦𑁆𑀢𑁂𑀬𑁆𑀬 𑁋 ‘𑀏𑀯𑀫𑁆𑀧𑀺 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀆𑀳, 𑀏𑀯𑀫𑁆𑀧𑀺 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀆𑀳𑀸’𑀢𑀺. 𑀅𑀧𑀺𑀦𑀼 𑀲𑁄 𑀭𑀸𑀚𑀪𑀡𑀺𑀢𑀁 𑀯𑀸 𑀪𑀡𑀢𑀺 𑀭𑀸𑀚𑀫𑀦𑁆𑀢𑀦𑀁 𑀯𑀸 𑀫𑀦𑁆𑀢𑁂𑀢𑀺? 𑀏𑀢𑁆𑀢𑀸𑀯𑀢𑀸 𑀲𑁄 𑀅𑀲𑁆𑀲 𑀭𑀸𑀚𑀸 𑀯𑀸 𑀭𑀸𑀚𑀫𑀢𑁆𑀢𑁄 𑀯𑀸’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

𑁨𑁮𑁫. ‘‘𑀏𑀯𑀫𑁂𑀯 𑀔𑁄 𑀢𑁆𑀯𑀁, 𑀅𑀫𑁆𑀩𑀝𑁆𑀞, 𑀬𑁂 𑀢𑁂 𑀅𑀳𑁂𑀲𑀼𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀩𑁆𑀩𑀓𑀸 𑀇𑀲𑀬𑁄 𑀫𑀦𑁆𑀢𑀸𑀦𑀁 𑀓𑀢𑁆𑀢𑀸𑀭𑁄 𑀫𑀦𑁆𑀢𑀸𑀦𑀁 𑀧𑀯𑀢𑁆𑀢𑀸𑀭𑁄, 𑀬𑁂𑀲𑀫𑀺𑀤𑀁 𑀏𑀢𑀭𑀳𑀺 𑀩𑁆𑀭𑀸𑀳𑁆𑀫𑀡𑀸 𑀧𑁄𑀭𑀸𑀡𑀁 𑀫𑀦𑁆𑀢𑀧𑀤𑀁 𑀕𑀻𑀢𑀁 𑀧𑀯𑀼𑀢𑁆𑀢𑀁 𑀲𑀫𑀺𑀳𑀺𑀢𑀁, 𑀢𑀤𑀦𑀼𑀕𑀸𑀬𑀦𑁆𑀢𑀺 𑀢𑀤𑀦𑀼𑀪𑀸𑀲𑀦𑁆𑀢𑀺 𑀪𑀸𑀲𑀺𑀢𑀫𑀦𑀼𑀪𑀸𑀲𑀦𑁆𑀢𑀺 𑀯𑀸𑀘𑀺𑀢𑀫𑀦𑀼𑀯𑀸𑀘𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀝𑁆𑀞𑀓𑁄 𑀯𑀸𑀫𑀓𑁄 𑀯𑀸𑀫𑀤𑁂𑀯𑁄 𑀯𑁂𑀲𑁆𑀲𑀸𑀫𑀺𑀢𑁆𑀢𑁄 𑀬𑀫𑀢𑀕𑁆𑀕𑀺 [𑀬𑀫𑀤𑀕𑁆𑀕𑀺 (𑀓.)] 𑀅𑀗𑁆𑀕𑀻𑀭𑀲𑁄 𑀪𑀸𑀭𑀤𑁆𑀯𑀸𑀚𑁄 𑀯𑀸𑀲𑁂𑀝𑁆𑀞𑁄 𑀓𑀲𑁆𑀲𑀧𑁄 𑀪𑀕𑀼 𑁋 ‘𑀢𑁆𑀬𑀸𑀳𑀁 𑀫𑀦𑁆𑀢𑁂 𑀅𑀥𑀺𑀬𑀸𑀫𑀺 𑀲𑀸𑀘𑀭𑀺𑀬𑀓𑁄’𑀢𑀺, 𑀢𑀸𑀯𑀢𑀸 𑀢𑁆𑀯𑀁 𑀪𑀯𑀺𑀲𑁆𑀲𑀲𑀺 𑀇𑀲𑀺 𑀯𑀸 𑀇𑀲𑀺𑀢𑁆𑀣𑀸𑀬 𑀯𑀸 𑀧𑀝𑀺𑀧𑀦𑁆𑀦𑁄𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁨𑁮𑁬. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀫𑁆𑀩𑀝𑁆𑀞, 𑀓𑀺𑀦𑁆𑀢𑀺 𑀢𑁂 𑀲𑀼𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀼𑀤𑁆𑀥𑀸𑀦𑀁 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 𑁋 𑀬𑁂 𑀢𑁂 𑀅𑀳𑁂𑀲𑀼𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀩𑁆𑀩𑀓𑀸 𑀇𑀲𑀬𑁄 𑀫𑀦𑁆𑀢𑀸𑀦𑀁 𑀓𑀢𑁆𑀢𑀸𑀭𑁄 𑀫𑀦𑁆𑀢𑀸𑀦𑀁 𑀧𑀯𑀢𑁆𑀢𑀸𑀭𑁄, 𑀬𑁂𑀲𑀫𑀺𑀤𑀁 𑀏𑀢𑀭𑀳𑀺 𑀩𑁆𑀭𑀸𑀳𑁆𑀫𑀡𑀸 𑀧𑁄𑀭𑀸𑀡𑀁 𑀫𑀦𑁆𑀢𑀧𑀤𑀁 𑀕𑀻𑀢𑀁 𑀧𑀯𑀼𑀢𑁆𑀢𑀁 𑀲𑀫𑀺𑀳𑀺𑀢𑀁, 𑀢𑀤𑀦𑀼𑀕𑀸𑀬𑀦𑁆𑀢𑀺 𑀢𑀤𑀦𑀼𑀪𑀸𑀲𑀦𑁆𑀢𑀺 𑀪𑀸𑀲𑀺𑀢𑀫𑀦𑀼𑀪𑀸𑀲𑀦𑁆𑀢𑀺 𑀯𑀸𑀘𑀺𑀢𑀫𑀦𑀼𑀯𑀸𑀘𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀝𑁆𑀞𑀓𑁄 𑀯𑀸𑀫𑀓𑁄 𑀯𑀸𑀫𑀤𑁂𑀯𑁄 𑀯𑁂𑀲𑁆𑀲𑀸𑀫𑀺𑀢𑁆𑀢𑁄 𑀬𑀫𑀢𑀕𑁆𑀕𑀺 𑀅𑀗𑁆𑀕𑀻𑀭𑀲𑁄 𑀪𑀸𑀭𑀤𑁆𑀯𑀸𑀚𑁄 𑀯𑀸𑀲𑁂𑀝𑁆𑀞𑁄 𑀓𑀲𑁆𑀲𑀧𑁄 𑀪𑀕𑀼, 𑀏𑀯𑀁 𑀲𑀼 𑀢𑁂 𑀲𑀼𑀦𑁆𑀳𑀸𑀢𑀸 𑀲𑀼𑀯𑀺𑀮𑀺𑀢𑁆𑀢𑀸 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽 𑀆𑀫𑀼𑀓𑁆𑀓𑀫𑀡𑀺𑀓𑀼𑀡𑁆𑀟𑀮𑀸𑀪𑀭𑀡𑀸 [𑀆𑀫𑀼𑀢𑁆𑀢𑀫𑀸𑀮𑀸𑀪𑀭𑀡𑀸 (𑀲𑀻. 𑀲𑁆𑀬𑀸. 𑀧𑀻.)] 𑀑𑀤𑀸𑀢𑀯𑀢𑁆𑀣𑀯𑀲𑀦𑀸 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀧𑀭𑀺𑀘𑀸𑀭𑁂𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀢𑁆𑀯𑀁 𑀏𑀢𑀭𑀳𑀺 𑀲𑀸𑀘𑀭𑀺𑀬𑀓𑁄’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

‘‘…𑀧𑁂… 𑀏𑀯𑀁 𑀲𑀼 𑀢𑁂 𑀲𑀸𑀮𑀻𑀦𑀁 𑀑𑀤𑀦𑀁 𑀲𑀼𑀘𑀺𑀫𑀁𑀲𑀽𑀧𑀲𑁂𑀘𑀦𑀁 𑀯𑀺𑀘𑀺𑀢𑀓𑀸𑀴𑀓𑀁 𑀅𑀦𑁂𑀓𑀲𑀽𑀧𑀁 𑀅𑀦𑁂𑀓𑀩𑁆𑀬𑀜𑁆𑀚𑀦𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀢𑁆𑀯𑀁 𑀏𑀢𑀭𑀳𑀺 𑀲𑀸𑀘𑀭𑀺𑀬𑀓𑁄’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

‘‘…𑀧𑁂… 𑀏𑀯𑀁 𑀲𑀼 𑀢𑁂 𑀯𑁂𑀞𑀓𑀦𑀢𑀧𑀲𑁆𑀲𑀸𑀳𑀺 𑀦𑀸𑀭𑀻𑀳𑀺 𑀧𑀭𑀺𑀘𑀸𑀭𑁂𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀢𑁆𑀯𑀁 𑀏𑀢𑀭𑀳𑀺 𑀲𑀸𑀘𑀭𑀺𑀬𑀓𑁄’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

‘‘…𑀧𑁂… 𑀏𑀯𑀁 𑀲𑀼 𑀢𑁂 𑀓𑀼𑀢𑁆𑀢𑀯𑀸𑀮𑁂𑀳𑀺 𑀯𑀴𑀯𑀸𑀭𑀣𑁂𑀳𑀺 𑀤𑀻𑀖𑀸𑀳𑀺 𑀧𑀢𑁄𑀤𑀮𑀝𑁆𑀞𑀻𑀳𑀺 𑀯𑀸𑀳𑀦𑁂 𑀯𑀺𑀢𑀼𑀤𑁂𑀦𑁆𑀢𑀸 𑀯𑀺𑀧𑀭𑀺𑀬𑀸𑀬𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀢𑁆𑀯𑀁 𑀏𑀢𑀭𑀳𑀺 𑀲𑀸𑀘𑀭𑀺𑀬𑀓𑁄’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

‘‘…𑀧𑁂… 𑀏𑀯𑀁 𑀲𑀼 𑀢𑁂 𑀉𑀓𑁆𑀓𑀺𑀡𑁆𑀡𑀧𑀭𑀺𑀔𑀸𑀲𑀼 𑀑𑀓𑁆𑀔𑀺𑀢𑁆𑀢𑀧𑀮𑀺𑀖𑀸𑀲𑀼 𑀦𑀕𑀭𑀽𑀧𑀓𑀸𑀭𑀺𑀓𑀸𑀲𑀼 𑀤𑀻𑀖𑀸𑀲𑀺𑀯𑀼𑀥𑁂𑀳𑀺 [𑀤𑀻𑀖𑀸𑀲𑀺𑀩𑀤𑁆𑀥𑁂𑀳𑀺 (𑀲𑁆𑀬𑀸. 𑀧𑀻.)] 𑀧𑀼𑀭𑀺𑀲𑁂𑀳𑀺 𑀭𑀓𑁆𑀔𑀸𑀧𑁂𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀢𑁆𑀯𑀁 𑀏𑀢𑀭𑀳𑀺 𑀲𑀸𑀘𑀭𑀺𑀬𑀓𑁄’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

‘‘𑀇𑀢𑀺 𑀔𑁄, 𑀅𑀫𑁆𑀩𑀝𑁆𑀞, 𑀦𑁂𑀯 𑀢𑁆𑀯𑀁 𑀇𑀲𑀺 𑀦 𑀇𑀲𑀺𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑁄 𑀲𑀸𑀘𑀭𑀺𑀬𑀓𑁄. 𑀬𑀲𑁆𑀲 𑀔𑁄 𑀧𑀦, 𑀅𑀫𑁆𑀩𑀝𑁆𑀞, 𑀫𑀬𑀺 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 𑀲𑁄 𑀫𑀁 𑀧𑀜𑁆𑀳𑁂𑀦, 𑀅𑀳𑀁 𑀯𑁂𑀬𑁆𑀬𑀸𑀓𑀭𑀡𑁂𑀦 𑀲𑁄𑀥𑀺𑀲𑁆𑀲𑀸𑀫𑀻’’𑀢𑀺.

𑀤𑁆𑀯𑁂𑀮𑀓𑁆𑀔𑀡𑀸𑀤𑀲𑁆𑀲𑀦𑀁

𑁨𑁮𑁭. 𑀅𑀣 𑀔𑁄 𑀪𑀕𑀯𑀸 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑁆𑀫 𑀘𑀗𑁆𑀓𑀫𑀁 𑀅𑀩𑁆𑀪𑀼𑀝𑁆𑀞𑀸𑀲𑀺. 𑀅𑀫𑁆𑀩𑀝𑁆𑀞𑁄𑀧𑀺 𑀫𑀸𑀡𑀯𑁄 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑁆𑀫 𑀘𑀗𑁆𑀓𑀫𑀁 𑀅𑀩𑁆𑀪𑀼𑀝𑁆𑀞𑀸𑀲𑀺. 𑀅𑀣 𑀔𑁄 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀪𑀕𑀯𑀦𑁆𑀢𑀁 𑀘𑀗𑁆𑀓𑀫𑀦𑁆𑀢𑀁 𑀅𑀦𑀼𑀘𑀗𑁆𑀓𑀫𑀫𑀸𑀦𑁄 𑀪𑀕𑀯𑀢𑁄 𑀓𑀸𑀬𑁂 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀲𑀫𑀦𑁆𑀦𑁂𑀲𑀺. 𑀅𑀤𑁆𑀤𑀲𑀸 𑀔𑁄 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀪𑀕𑀯𑀢𑁄 𑀓𑀸𑀬𑁂 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀬𑁂𑀪𑀼𑀬𑁆𑀬𑁂𑀦 𑀞𑀧𑁂𑀢𑁆𑀯𑀸 𑀤𑁆𑀯𑁂. 𑀤𑁆𑀯𑀻𑀲𑀼 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺 𑀦 𑀲𑀫𑁆𑀧𑀲𑀻𑀤𑀢𑀺 𑁋 𑀓𑁄𑀲𑁄𑀳𑀺𑀢𑁂 𑀘 𑀯𑀢𑁆𑀣𑀕𑀼𑀬𑁆𑀳𑁂 𑀧𑀳𑀽𑀢𑀚𑀺𑀯𑁆𑀳𑀢𑀸𑀬 𑀘.

𑁨𑁮𑁮. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀧𑀲𑁆𑀲𑀢𑀺 𑀔𑁄 𑀫𑁂 𑀅𑀬𑀁 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀬𑁂𑀪𑀼𑀬𑁆𑀬𑁂𑀦 𑀞𑀧𑁂𑀢𑁆𑀯𑀸 𑀤𑁆𑀯𑁂. 𑀤𑁆𑀯𑀻𑀲𑀼 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺 𑀦 𑀲𑀫𑁆𑀧𑀲𑀻𑀤𑀢𑀺 𑁋 𑀓𑁄𑀲𑁄𑀳𑀺𑀢𑁂 𑀘 𑀯𑀢𑁆𑀣𑀕𑀼𑀬𑁆𑀳𑁂 𑀧𑀳𑀽𑀢𑀚𑀺𑀯𑁆𑀳𑀢𑀸𑀬 𑀘𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀸𑀲𑀺 𑀬𑀣𑀸 𑀅𑀤𑁆𑀤𑀲 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀪𑀕𑀯𑀢𑁄 𑀓𑁄𑀲𑁄𑀳𑀺𑀢𑀁 𑀯𑀢𑁆𑀣𑀕𑀼𑀬𑁆𑀳𑀁. 𑀅𑀣 𑀔𑁄 𑀪𑀕𑀯𑀸 𑀚𑀺𑀯𑁆𑀳𑀁 𑀦𑀺𑀦𑁆𑀦𑀸𑀫𑁂𑀢𑁆𑀯𑀸 𑀉𑀪𑁄𑀧𑀺 𑀓𑀡𑁆𑀡𑀲𑁄𑀢𑀸𑀦𑀺 𑀅𑀦𑀼𑀫𑀲𑀺 𑀧𑀝𑀺𑀫𑀲𑀺, 𑀉𑀪𑁄𑀧𑀺 𑀦𑀸𑀲𑀺𑀓𑀲𑁄𑀢𑀸𑀦𑀺 𑀅𑀦𑀼𑀫𑀲𑀺 𑀧𑀝𑀺𑀫𑀲𑀺, 𑀓𑁂𑀯𑀮𑀫𑁆𑀧𑀺 𑀦𑀮𑀸𑀝𑀫𑀡𑁆𑀟𑀮𑀁 𑀚𑀺𑀯𑁆𑀳𑀸𑀬 𑀙𑀸𑀤𑁂𑀲𑀺. 𑀅𑀣 𑀔𑁄 𑀅𑀫𑁆𑀩𑀝𑁆𑀞𑀲𑁆𑀲 𑀫𑀸𑀡𑀯𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀫𑀦𑁆𑀦𑀸𑀕𑀢𑁄 𑀔𑁄 𑀲𑀫𑀡𑁄 𑀕𑁄𑀢𑀫𑁄 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀧𑀭𑀺𑀧𑀼𑀡𑁆𑀡𑁂𑀳𑀺, 𑀦𑁄 𑀅𑀧𑀭𑀺𑀧𑀼𑀡𑁆𑀡𑁂𑀳𑀻’’𑀢𑀺. 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀳𑀦𑁆𑀤 𑀘 𑀤𑀸𑀦𑀺 𑀫𑀬𑀁, 𑀪𑁄 𑀕𑁄𑀢𑀫, 𑀕𑀘𑁆𑀙𑀸𑀫, 𑀩𑀳𑀼𑀓𑀺𑀘𑁆𑀘𑀸 𑀫𑀬𑀁 𑀩𑀳𑀼𑀓𑀭𑀡𑀻𑀬𑀸’’𑀢𑀺. ‘‘𑀬𑀲𑁆𑀲𑀤𑀸𑀦𑀺 𑀢𑁆𑀯𑀁, 𑀅𑀫𑁆𑀩𑀝𑁆𑀞, 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺. 𑀅𑀣 𑀔𑁄 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀯𑀴𑀯𑀸𑀭𑀣𑀫𑀸𑀭𑀼𑀬𑁆𑀳 𑀧𑀓𑁆𑀓𑀸𑀫𑀺.

𑁨𑁮𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀺 𑀉𑀓𑁆𑀓𑀝𑁆𑀞𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀳𑀢𑀸 𑀩𑁆𑀭𑀸𑀳𑁆𑀫𑀡𑀕𑀡𑁂𑀦 𑀲𑀤𑁆𑀥𑀺𑀁 𑀲𑀓𑁂 𑀆𑀭𑀸𑀫𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀅𑀫𑁆𑀩𑀝𑁆𑀞𑀁𑀬𑁂𑀯 𑀫𑀸𑀡𑀯𑀁 𑀧𑀝𑀺𑀫𑀸𑀦𑁂𑀦𑁆𑀢𑁄. 𑀅𑀣 𑀔𑁄 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀬𑁂𑀦 𑀲𑀓𑁄 𑀆𑀭𑀸𑀫𑁄 𑀢𑁂𑀦 𑀧𑀸𑀬𑀸𑀲𑀺. 𑀬𑀸𑀯𑀢𑀺𑀓𑀸 𑀬𑀸𑀦𑀲𑁆𑀲 𑀪𑀽𑀫𑀺, 𑀬𑀸𑀦𑁂𑀦 𑀕𑀦𑁆𑀢𑁆𑀯𑀸 𑀬𑀸𑀦𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸 𑀧𑀢𑁆𑀢𑀺𑀓𑁄𑀯 𑀬𑁂𑀦 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀺 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀁 𑀧𑁄𑀓𑁆𑀔𑀭𑀲𑀸𑀢𑀺𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑁨𑁯𑁦. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀅𑀫𑁆𑀩𑀝𑁆𑀞𑀁 𑀫𑀸𑀡𑀯𑀁 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀺 𑀏𑀢𑀤𑀯𑁄𑀘 𑁋 ‘‘𑀓𑀘𑁆𑀘𑀺, 𑀢𑀸𑀢 𑀅𑀫𑁆𑀩𑀝𑁆𑀞, 𑀅𑀤𑁆𑀤𑀲 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫’’𑀦𑁆𑀢𑀺? ‘‘𑀅𑀤𑁆𑀤𑀲𑀸𑀫 𑀔𑁄 𑀫𑀬𑀁, 𑀪𑁄, 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫’’𑀦𑁆𑀢𑀺. ‘‘𑀓𑀘𑁆𑀘𑀺, 𑀢𑀸𑀢 𑀅𑀫𑁆𑀩𑀝𑁆𑀞, 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀢𑀣𑀸 𑀲𑀦𑁆𑀢𑀁𑀬𑁂𑀯 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑀦𑁄 𑀅𑀜𑁆𑀜𑀣𑀸; 𑀓𑀘𑁆𑀘𑀺 𑀧𑀦 𑀲𑁄 𑀪𑀯𑀁 𑀕𑁄𑀢𑀫𑁄 𑀢𑀸𑀤𑀺𑀲𑁄 𑀦𑁄 𑀅𑀜𑁆𑀜𑀸𑀤𑀺𑀲𑁄’’𑀢𑀺? ‘‘𑀢𑀣𑀸 𑀲𑀦𑁆𑀢𑀁𑀬𑁂𑀯, 𑀪𑁄, 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑀦𑁄 𑀅𑀜𑁆𑀜𑀣𑀸, 𑀢𑀸𑀤𑀺𑀲𑁄𑀯 𑀲𑁄 𑀪𑀯𑀁 𑀕𑁄𑀢𑀫𑁄 𑀦𑁄 𑀅𑀜𑁆𑀜𑀸𑀤𑀺𑀲𑁄. 𑀲𑀫𑀦𑁆𑀦𑀸𑀕𑀢𑁄 𑀘 𑀲𑁄 𑀪𑀯𑀁 𑀕𑁄𑀢𑀫𑁄 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀧𑀭𑀺𑀧𑀼𑀡𑁆𑀡𑁂𑀳𑀺 𑀦𑁄 𑀅𑀧𑀭𑀺𑀧𑀼𑀡𑁆𑀡𑁂𑀳𑀻’’𑀢𑀺. ‘‘𑀅𑀳𑀼 𑀧𑀦 𑀢𑁂, 𑀢𑀸𑀢 𑀅𑀫𑁆𑀩𑀝𑁆𑀞, 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀲𑀤𑁆𑀥𑀺𑀁 𑀓𑁄𑀘𑀺𑀤𑁂𑀯 𑀓𑀣𑀸𑀲𑀮𑁆𑀮𑀸𑀧𑁄’’𑀢𑀺? ‘‘𑀅𑀳𑀼 𑀔𑁄 𑀫𑁂, 𑀪𑁄, 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀲𑀤𑁆𑀥𑀺𑀁 𑀓𑁄𑀘𑀺𑀤𑁂𑀯 𑀓𑀣𑀸𑀲𑀮𑁆𑀮𑀸𑀧𑁄’’𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑁂, 𑀢𑀸𑀢 𑀅𑀫𑁆𑀩𑀝𑁆𑀞, 𑀅𑀳𑀼 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀲𑀤𑁆𑀥𑀺𑀁 𑀓𑁄𑀘𑀺𑀤𑁂𑀯 𑀓𑀣𑀸𑀲𑀮𑁆𑀮𑀸𑀧𑁄’’𑀢𑀺? 𑀅𑀣 𑀔𑁄 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄 𑀬𑀸𑀯𑀢𑀓𑁄 [𑀬𑀸𑀯𑀢𑀺𑀓𑁄 (𑀓. 𑀧𑀻.)] 𑀅𑀳𑁄𑀲𑀺 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀓𑀣𑀸𑀲𑀮𑁆𑀮𑀸𑀧𑁄, 𑀢𑀁 𑀲𑀩𑁆𑀩𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀆𑀭𑁄𑀘𑁂𑀲𑀺.

𑁨𑁯𑁧. 𑀏𑀯𑀁 𑀯𑀼𑀢𑁆𑀢𑁂, 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀺 𑀅𑀫𑁆𑀩𑀝𑁆𑀞𑀁 𑀫𑀸𑀡𑀯𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑁄 𑀯𑀢 𑀭𑁂 𑀅𑀫𑁆𑀳𑀸𑀓𑀁 𑀧𑀡𑁆𑀟𑀺𑀢𑀓 [𑀧𑀡𑁆𑀟𑀺𑀢𑀓𑀸], 𑀅𑀳𑁄 𑀯𑀢 𑀭𑁂 𑀅𑀫𑁆𑀳𑀸𑀓𑀁 𑀩𑀳𑀼𑀲𑁆𑀲𑀼𑀢𑀓 [𑀩𑀳𑀼𑀲𑁆𑀲𑀼𑀢𑀓𑀸], 𑀅𑀳𑁄 𑀯𑀢 𑀭𑁂 𑀅𑀫𑁆𑀳𑀸𑀓𑀁 𑀢𑁂𑀯𑀺𑀚𑁆𑀚𑀓 [𑀢𑁂𑀯𑀺𑀚𑁆𑀚𑀓𑀸], 𑀏𑀯𑀭𑀽𑀧𑁂𑀦 𑀓𑀺𑀭, 𑀪𑁄, 𑀧𑀼𑀭𑀺𑀲𑁄 𑀅𑀢𑁆𑀣𑀘𑀭𑀓𑁂𑀦 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬. 𑀬𑀤𑁂𑀯 𑀔𑁄 𑀢𑁆𑀯𑀁, 𑀅𑀫𑁆𑀩𑀝𑁆𑀞, 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀏𑀯𑀁 𑀆𑀲𑀚𑁆𑀚 𑀆𑀲𑀚𑁆𑀚 𑀅𑀯𑀘𑀸𑀲𑀺, 𑀅𑀣 𑀔𑁄 𑀲𑁄 𑀪𑀯𑀁 𑀕𑁄𑀢𑀫𑁄 𑀅𑀫𑁆𑀳𑁂𑀧𑀺 𑀏𑀯𑀁 𑀉𑀧𑀦𑁂𑀬𑁆𑀬 𑀉𑀧𑀦𑁂𑀬𑁆𑀬 𑀅𑀯𑀘. 𑀅𑀳𑁄 𑀯𑀢 𑀭𑁂 𑀅𑀫𑁆𑀳𑀸𑀓𑀁 𑀧𑀡𑁆𑀟𑀺𑀢𑀓, 𑀅𑀳𑁄 𑀯𑀢 𑀭𑁂 𑀅𑀫𑁆𑀳𑀸𑀓𑀁 𑀩𑀳𑀼𑀲𑁆𑀲𑀼𑀢𑀓, 𑀅𑀳𑁄 𑀯𑀢 𑀭𑁂 𑀅𑀫𑁆𑀳𑀸𑀓𑀁 𑀢𑁂𑀯𑀺𑀚𑁆𑀚𑀓, 𑀏𑀯𑀭𑀽𑀧𑁂𑀦 𑀓𑀺𑀭, 𑀪𑁄, 𑀧𑀼𑀭𑀺𑀲𑁄 𑀅𑀢𑁆𑀣𑀘𑀭𑀓𑁂𑀦 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬𑀸’’𑀢𑀺, 𑀓𑀼𑀧𑀺𑀢𑁄 [𑀲𑁄 𑀓𑀼𑀧𑀺𑀢𑁄 (𑀧𑀻.)] 𑀅𑀦𑀢𑁆𑀢𑀫𑀦𑁄 𑀅𑀫𑁆𑀩𑀝𑁆𑀞𑀁 𑀫𑀸𑀡𑀯𑀁 𑀧𑀤𑀲𑀸𑀬𑁂𑀯 𑀧𑀯𑀢𑁆𑀢𑁂𑀲𑀺. 𑀇𑀘𑁆𑀙𑀢𑀺 𑀘 𑀢𑀸𑀯𑀤𑁂𑀯 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁.

𑀧𑁄𑀓𑁆𑀔𑀭𑀲𑀸𑀢𑀺𑀩𑀼𑀤𑁆𑀥𑀼𑀧𑀲𑀗𑁆𑀓𑀫𑀦𑀁

𑁨𑁯𑁨. 𑀅𑀣 𑀔𑁄 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀁 𑀧𑁄𑀓𑁆𑀔𑀭𑀲𑀸𑀢𑀺𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀢𑀺𑀯𑀺𑀓𑀸𑀮𑁄 𑀔𑁄, 𑀪𑁄, 𑀅𑀚𑁆𑀚 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁. 𑀲𑁆𑀯𑁂𑀤𑀸𑀦𑀺 [𑀤𑀸𑀦𑀺 𑀲𑁆𑀯𑁂 (𑀲𑀻. 𑀓.)] 𑀪𑀯𑀁 𑀧𑁄𑀓𑁆𑀔𑀭𑀲𑀸𑀢𑀺 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀺 𑀲𑀓𑁂 𑀦𑀺𑀯𑁂𑀲𑀦𑁂 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀬𑀸𑀦𑁂 𑀆𑀭𑁄𑀧𑁂𑀢𑁆𑀯𑀸 𑀉𑀓𑁆𑀓𑀸𑀲𑀼 𑀥𑀸𑀭𑀺𑀬𑀫𑀸𑀦𑀸𑀲𑀼 𑀉𑀓𑁆𑀓𑀝𑁆𑀞𑀸𑀬 𑀦𑀺𑀬𑁆𑀬𑀸𑀲𑀺, 𑀬𑁂𑀦 𑀇𑀘𑁆𑀙𑀸𑀦𑀗𑁆𑀕𑀮𑀯𑀦𑀲𑀡𑁆𑀟𑁄 𑀢𑁂𑀦 𑀧𑀸𑀬𑀸𑀲𑀺. 𑀬𑀸𑀯𑀢𑀺𑀓𑀸 𑀬𑀸𑀦𑀲𑁆𑀲 𑀪𑀽𑀫𑀺 𑀬𑀸𑀦𑁂𑀦 𑀕𑀦𑁆𑀢𑁆𑀯𑀸, 𑀬𑀸𑀦𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸 𑀧𑀢𑁆𑀢𑀺𑀓𑁄𑀯 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺, 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑁨𑁯𑁩. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀆𑀕𑀫𑀸 𑀦𑀼 𑀔𑁄 𑀇𑀥, 𑀪𑁄 𑀕𑁄𑀢𑀫, 𑀅𑀫𑁆𑀳𑀸𑀓𑀁 𑀅𑀦𑁆𑀢𑁂𑀯𑀸𑀲𑀻 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄’’𑀢𑀺? ‘‘𑀆𑀕𑀫𑀸 𑀔𑁄 𑀢𑁂 [𑀢𑁂𑀥 (𑀲𑁆𑀬𑀸.), 𑀢𑁂 𑀇𑀥 (𑀧𑀻.)], 𑀩𑁆𑀭𑀸𑀳𑁆𑀫𑀡, 𑀅𑀦𑁆𑀢𑁂𑀯𑀸𑀲𑀻 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄’’𑀢𑀺. ‘‘𑀅𑀳𑀼 𑀧𑀦 𑀢𑁂, 𑀪𑁄 𑀕𑁄𑀢𑀫, 𑀅𑀫𑁆𑀩𑀝𑁆𑀞𑁂𑀦 𑀫𑀸𑀡𑀯𑁂𑀦 𑀲𑀤𑁆𑀥𑀺𑀁 𑀓𑁄𑀘𑀺𑀤𑁂𑀯 𑀓𑀣𑀸𑀲𑀮𑁆𑀮𑀸𑀧𑁄’’𑀢𑀺? ‘‘𑀅𑀳𑀼 𑀔𑁄 𑀫𑁂, 𑀩𑁆𑀭𑀸𑀳𑁆𑀫𑀡, 𑀅𑀫𑁆𑀩𑀝𑁆𑀞𑁂𑀦 𑀫𑀸𑀡𑀯𑁂𑀦 𑀲𑀤𑁆𑀥𑀺𑀁 𑀓𑁄𑀘𑀺𑀤𑁂𑀯 𑀓𑀣𑀸𑀲𑀮𑁆𑀮𑀸𑀧𑁄’’𑀢𑀺. ‘‘𑀬𑀣𑀸𑀓𑀣𑀁 𑀧𑀦 𑀢𑁂, 𑀪𑁄 𑀕𑁄𑀢𑀫, 𑀅𑀳𑀼 𑀅𑀫𑁆𑀩𑀝𑁆𑀞𑁂𑀦 𑀫𑀸𑀡𑀯𑁂𑀦 𑀲𑀤𑁆𑀥𑀺𑀁 𑀓𑁄𑀘𑀺𑀤𑁂𑀯 𑀓𑀣𑀸𑀲𑀮𑁆𑀮𑀸𑀧𑁄’’𑀢𑀺? 𑀅𑀣 𑀔𑁄 𑀪𑀕𑀯𑀸 𑀬𑀸𑀯𑀢𑀓𑁄 𑀅𑀳𑁄𑀲𑀺 𑀅𑀫𑁆𑀩𑀝𑁆𑀞𑁂𑀦 𑀫𑀸𑀡𑀯𑁂𑀦 𑀲𑀤𑁆𑀥𑀺𑀁 𑀓𑀣𑀸𑀲𑀮𑁆𑀮𑀸𑀧𑁄, 𑀢𑀁 𑀲𑀩𑁆𑀩𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀆𑀭𑁄𑀘𑁂𑀲𑀺. 𑀏𑀯𑀁 𑀯𑀼𑀢𑁆𑀢𑁂, 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀺 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀩𑀸𑀮𑁄, 𑀪𑁄 𑀕𑁄𑀢𑀫, 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄, 𑀔𑀫𑀢𑀼 𑀪𑀯𑀁 𑀕𑁄𑀢𑀫𑁄 𑀅𑀫𑁆𑀩𑀝𑁆𑀞𑀲𑁆𑀲 𑀫𑀸𑀡𑀯𑀲𑁆𑀲𑀸’’𑀢𑀺. ‘‘𑀲𑀼𑀔𑀻 𑀳𑁄𑀢𑀼, 𑀩𑁆𑀭𑀸𑀳𑁆𑀫𑀡, 𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄’’𑀢𑀺.

𑁨𑁯𑁪. 𑀅𑀣 𑀔𑁄 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀺 𑀪𑀕𑀯𑀢𑁄 𑀓𑀸𑀬𑁂 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀲𑀫𑀦𑁆𑀦𑁂𑀲𑀺. 𑀅𑀤𑁆𑀤𑀲𑀸 𑀔𑁄 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀺 𑀪𑀕𑀯𑀢𑁄 𑀓𑀸𑀬𑁂 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀬𑁂𑀪𑀼𑀬𑁆𑀬𑁂𑀦 𑀞𑀧𑁂𑀢𑁆𑀯𑀸 𑀤𑁆𑀯𑁂. 𑀤𑁆𑀯𑀻𑀲𑀼 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺 𑀦 𑀲𑀫𑁆𑀧𑀲𑀻𑀤𑀢𑀺 𑁋 𑀓𑁄𑀲𑁄𑀳𑀺𑀢𑁂 𑀘 𑀯𑀢𑁆𑀣𑀕𑀼𑀬𑁆𑀳𑁂 𑀧𑀳𑀽𑀢𑀚𑀺𑀯𑁆𑀳𑀢𑀸𑀬 𑀘.

𑁨𑁯𑁫. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀧𑀲𑁆𑀲𑀢𑀺 𑀔𑁄 𑀫𑁂 𑀅𑀬𑀁 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀺 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀬𑁂𑀪𑀼𑀬𑁆𑀬𑁂𑀦 𑀞𑀧𑁂𑀢𑁆𑀯𑀸 𑀤𑁆𑀯𑁂. 𑀤𑁆𑀯𑀻𑀲𑀼 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺 𑀦 𑀲𑀫𑁆𑀧𑀲𑀻𑀤𑀢𑀺 𑁋 𑀓𑁄𑀲𑁄𑀳𑀺𑀢𑁂 𑀘 𑀯𑀢𑁆𑀣𑀕𑀼𑀬𑁆𑀳𑁂, 𑀧𑀳𑀽𑀢𑀚𑀺𑀯𑁆𑀳𑀢𑀸𑀬 𑀘𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀸𑀲𑀺 𑀬𑀣𑀸 𑀅𑀤𑁆𑀤𑀲 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀺 𑀪𑀕𑀯𑀢𑁄 𑀓𑁄𑀲𑁄𑀳𑀺𑀢𑀁 𑀯𑀢𑁆𑀣𑀕𑀼𑀬𑁆𑀳𑀁. 𑀅𑀣 𑀔𑁄 𑀪𑀕𑀯𑀸 𑀚𑀺𑀯𑁆𑀳𑀁 𑀦𑀺𑀦𑁆𑀦𑀸𑀫𑁂𑀢𑁆𑀯𑀸 𑀉𑀪𑁄𑀧𑀺 𑀓𑀡𑁆𑀡𑀲𑁄𑀢𑀸𑀦𑀺 𑀅𑀦𑀼𑀫𑀲𑀺 𑀧𑀝𑀺𑀫𑀲𑀺, 𑀉𑀪𑁄𑀧𑀺 𑀦𑀸𑀲𑀺𑀓𑀲𑁄𑀢𑀸𑀦𑀺 𑀅𑀦𑀼𑀫𑀲𑀺 𑀧𑀝𑀺𑀫𑀲𑀺, 𑀓𑁂𑀯𑀮𑀫𑁆𑀧𑀺 𑀦𑀮𑀸𑀝𑀫𑀡𑁆𑀟𑀮𑀁 𑀚𑀺𑀯𑁆𑀳𑀸𑀬 𑀙𑀸𑀤𑁂𑀲𑀺.

𑁨𑁯𑁬. 𑀅𑀣 𑀔𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀫𑀦𑁆𑀦𑀸𑀕𑀢𑁄 𑀔𑁄 𑀲𑀫𑀡𑁄 𑀕𑁄𑀢𑀫𑁄 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀧𑀭𑀺𑀧𑀼𑀡𑁆𑀡𑁂𑀳𑀺 𑀦𑁄 𑀅𑀧𑀭𑀺𑀧𑀼𑀡𑁆𑀡𑁂𑀳𑀻’’𑀢𑀺. 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂 𑀪𑀯𑀁 𑀕𑁄𑀢𑀫𑁄 𑀅𑀚𑁆𑀚𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦.

𑁨𑁯𑁭. 𑀅𑀣 𑀔𑁄 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀺 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑁂𑀲𑀺 𑁋 ‘‘𑀓𑀸𑀮𑁄, 𑀪𑁄 𑀕𑁄𑀢𑀫, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀺 𑀪𑀕𑀯𑀦𑁆𑀢𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀺 𑀲𑀫𑁆𑀧𑀯𑀸𑀭𑁂𑀲𑀺, 𑀫𑀸𑀡𑀯𑀓𑀸𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑀁. 𑀅𑀣 𑀔𑁄 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀺 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀅𑀜𑁆𑀜𑀢𑀭𑀁 𑀦𑀻𑀘𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑁨𑁯𑁮. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀔𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀓𑀣𑀁 𑀲𑀻𑀮𑀓𑀣𑀁 𑀲𑀕𑁆𑀕𑀓𑀣𑀁; 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁, 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺. 𑀬𑀤𑀸 𑀪𑀕𑀯𑀸 𑀅𑀜𑁆𑀜𑀸𑀲𑀺 𑀩𑁆𑀭𑀸𑀳𑁆𑀫𑀡𑀁 𑀧𑁄𑀓𑁆𑀔𑀭𑀲𑀸𑀢𑀺𑀁 𑀓𑀮𑁆𑀮𑀘𑀺𑀢𑁆𑀢𑀁 𑀫𑀼𑀤𑀼𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑀁 𑀉𑀤𑀕𑁆𑀕𑀘𑀺𑀢𑁆𑀢𑀁 𑀧𑀲𑀦𑁆𑀦𑀘𑀺𑀢𑁆𑀢𑀁, 𑀅𑀣 𑀬𑀸 𑀩𑀼𑀤𑁆𑀥𑀸𑀦𑀁 𑀲𑀸𑀫𑀼𑀓𑁆𑀓𑀁𑀲𑀺𑀓𑀸 𑀥𑀫𑁆𑀫𑀤𑁂𑀲𑀦𑀸, 𑀢𑀁 𑀧𑀓𑀸𑀲𑁂𑀲𑀺 𑁋 𑀤𑀼𑀓𑁆𑀔𑀁 𑀲𑀫𑀼𑀤𑀬𑀁 𑀦𑀺𑀭𑁄𑀥𑀁 𑀫𑀕𑁆𑀕𑀁. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀼𑀤𑁆𑀥𑀁 𑀯𑀢𑁆𑀣𑀁 𑀅𑀧𑀕𑀢𑀓𑀸𑀴𑀓𑀁 𑀲𑀫𑁆𑀫𑀤𑁂𑀯 𑀭𑀚𑀦𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬; 𑀏𑀯𑀫𑁂𑀯 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀢𑀲𑁆𑀫𑀺𑀜𑁆𑀜𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺.

𑀧𑁄𑀓𑁆𑀔𑀭𑀲𑀸𑀢𑀺𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸

𑁨𑁯𑁯. 𑀅𑀣 𑀔𑁄 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑁄 𑀧𑀢𑁆𑀢𑀥𑀫𑁆𑀫𑁄 𑀯𑀺𑀤𑀺𑀢𑀥𑀫𑁆𑀫𑁄 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑁄 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀕𑀢𑀓𑀣𑀁𑀓𑀣𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀅𑀧𑀭𑀧𑁆𑀧𑀘𑁆𑀘𑀬𑁄 𑀲𑀢𑁆𑀣𑀼𑀲𑀸𑀲𑀦𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫. 𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀕𑁄𑀢𑀫, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬, ‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’𑀢𑀺; 𑀏𑀯𑀫𑁂𑀯𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁, 𑀪𑁄 𑀕𑁄𑀢𑀫, 𑀲𑀧𑀼𑀢𑁆𑀢𑁄 𑀲𑀪𑀭𑀺𑀬𑁄 𑀲𑀧𑀭𑀺𑀲𑁄 𑀲𑀸𑀫𑀘𑁆𑀘𑁄 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢𑀁. 𑀬𑀣𑀸 𑀘 𑀪𑀯𑀁 𑀕𑁄𑀢𑀫𑁄 𑀉𑀓𑁆𑀓𑀝𑁆𑀞𑀸𑀬 𑀅𑀜𑁆𑀜𑀸𑀦𑀺 𑀉𑀧𑀸𑀲𑀓𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑀺, 𑀏𑀯𑀫𑁂𑀯 𑀪𑀯𑀁 𑀕𑁄𑀢𑀫𑁄 𑀧𑁄𑀓𑁆𑀔𑀭𑀲𑀸𑀢𑀺𑀓𑀼𑀮𑀁 𑀉𑀧𑀲𑀗𑁆𑀓𑀫𑀢𑀼. 𑀢𑀢𑁆𑀣 𑀬𑁂 𑀢𑁂 𑀫𑀸𑀡𑀯𑀓𑀸 𑀯𑀸 𑀫𑀸𑀡𑀯𑀺𑀓𑀸 𑀯𑀸 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀅𑀪𑀺𑀯𑀸𑀤𑁂𑀲𑁆𑀲𑀦𑁆𑀢𑀺 𑀯𑀸 𑀧𑀘𑁆𑀘𑀼𑀝𑁆𑀞𑀺𑀲𑁆𑀲𑀦𑁆𑀢𑀺 [𑀧𑀘𑁆𑀘𑀼𑀝𑁆𑀞𑀲𑁆𑀲𑀦𑁆𑀢𑀺 (𑀧𑀻.)] 𑀯𑀸 𑀆𑀲𑀦𑀁 𑀯𑀸 𑀉𑀤𑀓𑀁 𑀯𑀸 𑀤𑀲𑁆𑀲𑀦𑁆𑀢𑀺 𑀘𑀺𑀢𑁆𑀢𑀁 𑀯𑀸 𑀧𑀲𑀸𑀤𑁂𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀢𑀁 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺. ‘‘𑀓𑀮𑁆𑀬𑀸𑀡𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡𑀸’’𑀢𑀺.

𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀢𑀢𑀺𑀬𑀁.

𑁪. 𑀲𑁄𑀡𑀤𑀡𑁆𑀟𑀲𑀼𑀢𑁆𑀢𑀁

𑀘𑀫𑁆𑀧𑁂𑀬𑁆𑀬𑀓𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸

𑁩𑁦𑁦. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀅𑀗𑁆𑀕𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀬𑁂𑀦 𑀘𑀫𑁆𑀧𑀸 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀘𑀫𑁆𑀧𑀸𑀬𑀁 𑀯𑀺𑀳𑀭𑀢𑀺 𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀘𑀫𑁆𑀧𑀁 𑀅𑀚𑁆𑀛𑀸𑀯𑀲𑀢𑀺 𑀲𑀢𑁆𑀢𑀼𑀲𑁆𑀲𑀤𑀁 𑀲𑀢𑀺𑀡𑀓𑀝𑁆𑀞𑁄𑀤𑀓𑀁 𑀲𑀥𑀜𑁆𑀜𑀁 𑀭𑀸𑀚𑀪𑁄𑀕𑁆𑀕𑀁 𑀭𑀜𑁆𑀜𑀸 𑀫𑀸𑀕𑀥𑁂𑀦 𑀲𑁂𑀦𑀺𑀬𑁂𑀦 𑀩𑀺𑀫𑁆𑀩𑀺𑀲𑀸𑀭𑁂𑀦 𑀤𑀺𑀦𑁆𑀦𑀁 𑀭𑀸𑀚𑀤𑀸𑀬𑀁 𑀩𑁆𑀭𑀳𑁆𑀫𑀤𑁂𑀬𑁆𑀬𑀁.

𑁩𑁦𑁧. 𑀅𑀲𑁆𑀲𑁄𑀲𑀼𑀁 𑀔𑁄 𑀘𑀫𑁆𑀧𑁂𑀬𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑁋 ‘‘𑀲𑀫𑀡𑁄 𑀔𑀮𑀼 𑀪𑁄 𑀕𑁄𑀢𑀫𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀅𑀗𑁆𑀕𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀘𑀫𑁆𑀧𑀁 𑀅𑀦𑀼𑀧𑁆𑀧𑀢𑁆𑀢𑁄 𑀘𑀫𑁆𑀧𑀸𑀬𑀁 𑀯𑀺𑀳𑀭𑀢𑀺 𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂. 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀲𑁄 𑀇𑀫𑀁 𑀮𑁄𑀓𑀁 𑀲𑀤𑁂𑀯𑀓𑀁 𑀲𑀫𑀸𑀭𑀓𑀁 𑀲𑀩𑁆𑀭𑀳𑁆𑀫𑀓𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀲𑀸𑀥𑀼 𑀔𑁄 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻’’𑀢𑀺. 𑀅𑀣 𑀔𑁄 𑀘𑀫𑁆𑀧𑁂𑀬𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀘𑀫𑁆𑀧𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀗𑁆𑀖𑀲𑀗𑁆𑀖𑀻 [𑀲𑀗𑁆𑀖𑀸 𑀲𑀗𑁆𑀖𑀻 (𑀲𑀻. 𑀲𑁆𑀬𑀸. 𑀧𑀻.)] 𑀕𑀡𑀻𑀪𑀽𑀢𑀸 𑀬𑁂𑀦 𑀕𑀕𑁆𑀕𑀭𑀸 𑀧𑁄𑀓𑁆𑀔𑀭𑀡𑀻 𑀢𑁂𑀦𑀼𑀧𑀲𑀗𑁆𑀓𑀫𑀦𑁆𑀢𑀺.

𑁩𑁦𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀉𑀧𑀭𑀺𑀧𑀸𑀲𑀸𑀤𑁂 𑀤𑀺𑀯𑀸𑀲𑁂𑀬𑁆𑀬𑀁 𑀉𑀧𑀕𑀢𑁄 𑀳𑁄𑀢𑀺. 𑀅𑀤𑁆𑀤𑀲𑀸 𑀔𑁄 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀘𑀫𑁆𑀧𑁂𑀬𑁆𑀬𑀓𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀘𑀫𑁆𑀧𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀗𑁆𑀖𑀲𑀗𑁆𑀖𑀻 [𑀲𑀗𑁆𑀖𑁂 𑀲𑀗𑁆𑀖𑀻 (𑀲𑀻. 𑀧𑀻.) 𑀲𑀗𑁆𑀖𑀸 𑀲𑀗𑁆𑀖𑀻 (𑀲𑁆𑀬𑀸.)] 𑀕𑀡𑀻𑀪𑀽𑀢𑁂 𑀬𑁂𑀦 𑀕𑀕𑁆𑀕𑀭𑀸 𑀧𑁄𑀓𑁆𑀔𑀭𑀡𑀻 𑀢𑁂𑀦𑀼𑀧𑀲𑀗𑁆𑀓𑀫𑀦𑁆𑀢𑁂. 𑀤𑀺𑀲𑁆𑀯𑀸 𑀔𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀦𑀼 𑀔𑁄, 𑀪𑁄 𑀔𑀢𑁆𑀢𑁂, 𑀘𑀫𑁆𑀧𑁂𑀬𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀘𑀫𑁆𑀧𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀗𑁆𑀖𑀲𑀗𑁆𑀖𑀻 𑀕𑀡𑀻𑀪𑀽𑀢𑀸 𑀬𑁂𑀦 𑀕𑀕𑁆𑀕𑀭𑀸 𑀧𑁄𑀓𑁆𑀔𑀭𑀡𑀻 𑀢𑁂𑀦𑀼𑀧𑀲𑀗𑁆𑀓𑀫𑀦𑁆𑀢𑀻’’𑀢𑀺? ‘‘𑀅𑀢𑁆𑀣𑀺 𑀔𑁄, 𑀪𑁄, 𑀲𑀫𑀡𑁄 𑀕𑁄𑀢𑀫𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀅𑀗𑁆𑀕𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀘𑀫𑁆𑀧𑀁 𑀅𑀦𑀼𑀧𑁆𑀧𑀢𑁆𑀢𑁄 𑀘𑀫𑁆𑀧𑀸𑀬𑀁 𑀯𑀺𑀳𑀭𑀢𑀺 𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂. 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀢𑀫𑁂𑀢𑁂 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀦𑁆𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀪𑁄 𑀔𑀢𑁆𑀢𑁂, 𑀬𑁂𑀦 𑀘𑀫𑁆𑀧𑁂𑀬𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀢𑁂𑀦𑀼𑀧𑀲𑀗𑁆𑀓𑀫, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘𑀫𑁆𑀧𑁂𑀬𑁆𑀬𑀓𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀏𑀯𑀁 𑀯𑀤𑁂𑀳𑀺 𑁋 ‘𑀲𑁄𑀡𑀤𑀡𑁆𑀟𑁄, 𑀪𑁄, 𑀩𑁆𑀭𑀸𑀳𑁆𑀫𑀡𑁄 𑀏𑀯𑀫𑀸𑀳 𑁋 𑀆𑀕𑀫𑁂𑀦𑁆𑀢𑀼 𑀓𑀺𑀭 𑀪𑀯𑀦𑁆𑀢𑁄, 𑀲𑁄𑀡𑀤𑀡𑁆𑀟𑁄𑀧𑀺 𑀩𑁆𑀭𑀸𑀳𑁆𑀫𑀡𑁄 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀢𑀻’’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀲𑁄 𑀔𑀢𑁆𑀢𑀸 𑀲𑁄𑀡𑀤𑀡𑁆𑀟𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀘𑀫𑁆𑀧𑁂𑀬𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘𑀫𑁆𑀧𑁂𑀬𑁆𑀬𑀓𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀏𑀢𑀤𑀯𑁄𑀘 𑁋 ‘‘𑀲𑁄𑀡𑀤𑀡𑁆𑀟𑁄 𑀪𑁄 𑀩𑁆𑀭𑀸𑀳𑁆𑀫𑀡𑁄 𑀏𑀯𑀫𑀸𑀳 𑁋 ‘𑀆𑀕𑀫𑁂𑀦𑁆𑀢𑀼 𑀓𑀺𑀭 𑀪𑀯𑀦𑁆𑀢𑁄, 𑀲𑁄𑀡𑀤𑀡𑁆𑀟𑁄𑀧𑀺 𑀩𑁆𑀭𑀸𑀳𑁆𑀫𑀡𑁄 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀢𑀻’’’𑀢𑀺.

𑀲𑁄𑀡𑀤𑀡𑁆𑀟𑀕𑀼𑀡𑀓𑀣𑀸

𑁩𑁦𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀦𑀸𑀦𑀸𑀯𑁂𑀭𑀚𑁆𑀚𑀓𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀜𑁆𑀘𑀫𑀢𑁆𑀢𑀸𑀦𑀺 𑀩𑁆𑀭𑀸𑀳𑁆𑀫𑀡𑀲𑀢𑀸𑀦𑀺 𑀘𑀫𑁆𑀧𑀸𑀬𑀁 𑀧𑀝𑀺𑀯𑀲𑀦𑁆𑀢𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦. 𑀅𑀲𑁆𑀲𑁄𑀲𑀼𑀁 𑀔𑁄 𑀢𑁂 𑀩𑁆𑀭𑀸𑀳𑁆𑀫𑀡𑀸 𑁋 ‘‘𑀲𑁄𑀡𑀤𑀡𑁆𑀟𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀬𑁂𑀦 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑁄𑀡𑀤𑀡𑁆𑀟𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀲𑀘𑁆𑀘𑀁 𑀓𑀺𑀭 𑀪𑀯𑀁 𑀲𑁄𑀡𑀤𑀡𑁆𑀟𑁄 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀢𑀻’’𑀢𑀺? ‘‘𑀏𑀯𑀁 𑀔𑁄 𑀫𑁂, 𑀪𑁄, 𑀳𑁄𑀢𑀺 𑁋 ‘𑀅𑀳𑀫𑁆𑀧𑀺 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀻’’’𑀢𑀺.

‘‘𑀫𑀸 𑀪𑀯𑀁 𑀲𑁄𑀡𑀤𑀡𑁆𑀟𑁄 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺. 𑀦 𑀅𑀭𑀳𑀢𑀺 𑀪𑀯𑀁 𑀲𑁄𑀡𑀤𑀡𑁆𑀟𑁄 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁. 𑀲𑀘𑁂 𑀪𑀯𑀁 𑀲𑁄𑀡𑀤𑀡𑁆𑀟𑁄 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀢𑀺, 𑀪𑁄𑀢𑁄 𑀲𑁄𑀡𑀤𑀡𑁆𑀟𑀲𑁆𑀲 𑀬𑀲𑁄 𑀳𑀸𑀬𑀺𑀲𑁆𑀲𑀢𑀺, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀬𑀲𑁄 𑀅𑀪𑀺𑀯𑀟𑁆𑀠𑀺𑀲𑁆𑀲𑀢𑀺. 𑀬𑀫𑁆𑀧𑀺 𑀪𑁄𑀢𑁄 𑀲𑁄𑀡𑀤𑀡𑁆𑀟𑀲𑁆𑀲 𑀬𑀲𑁄 𑀳𑀸𑀬𑀺𑀲𑁆𑀲𑀢𑀺, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀬𑀲𑁄 𑀅𑀪𑀺𑀯𑀟𑁆𑀠𑀺𑀲𑁆𑀲𑀢𑀺, 𑀇𑀫𑀺𑀦𑀸𑀧𑀗𑁆𑀕𑁂𑀦 𑀦 𑀅𑀭𑀳𑀢𑀺 𑀪𑀯𑀁 𑀲𑁄𑀡𑀤𑀡𑁆𑀟𑁄 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁; 𑀲𑀫𑀡𑁄𑀢𑁆𑀯𑁂𑀯 𑀕𑁄𑀢𑀫𑁄 𑀅𑀭𑀳𑀢𑀺 𑀪𑀯𑀦𑁆𑀢𑀁 𑀲𑁄𑀡𑀤𑀡𑁆𑀟𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁.

‘‘𑀪𑀯𑀜𑁆𑀳𑀺 𑀲𑁄𑀡𑀤𑀡𑁆𑀟𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘, 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦. 𑀬𑀫𑁆𑀧𑀺 𑀪𑀯𑀁 𑀲𑁄𑀡𑀤𑀡𑁆𑀟𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘, 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦, 𑀇𑀫𑀺𑀦𑀸𑀧𑀗𑁆𑀕𑁂𑀦 𑀦 𑀅𑀭𑀳𑀢𑀺 𑀪𑀯𑀁 𑀲𑁄𑀡𑀤𑀡𑁆𑀟𑁄 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁; 𑀲𑀫𑀡𑁄𑀢𑁆𑀯𑁂𑀯 𑀕𑁄𑀢𑀫𑁄 𑀅𑀭𑀳𑀢𑀺 𑀪𑀯𑀦𑁆𑀢𑀁 𑀲𑁄𑀡𑀤𑀡𑁆𑀟𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁.

‘‘𑀪𑀯𑀜𑁆𑀳𑀺 𑀲𑁄𑀡𑀤𑀡𑁆𑀟𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄…𑀧𑁂…

‘‘𑀪𑀯𑀜𑁆𑀳𑀺 𑀲𑁄𑀡𑀤𑀡𑁆𑀟𑁄 𑀅𑀚𑁆𑀛𑀸𑀬𑀓𑁄, 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀁 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁 𑀧𑀤𑀓𑁄 𑀯𑁂𑀬𑁆𑀬𑀸𑀓𑀭𑀡𑁄, 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀯𑀬𑁄…𑀧𑁂…

‘‘𑀪𑀯𑀜𑁆𑀳𑀺 𑀲𑁄𑀡𑀤𑀡𑁆𑀟𑁄 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀩𑁆𑀭𑀳𑁆𑀫𑀯𑀡𑁆𑀡𑀻 𑀩𑁆𑀭𑀳𑁆𑀫𑀯𑀘𑁆𑀙𑀲𑀻 [𑀩𑁆𑀭𑀳𑁆𑀫𑀟𑁆𑀠𑀻 (𑀲𑀻.), 𑀩𑁆𑀭𑀳𑁆𑀫𑀯𑀘𑁆𑀘𑀲𑀻 (𑀧𑀻.)] 𑀅𑀔𑀼𑀤𑁆𑀤𑀸𑀯𑀓𑀸𑀲𑁄 𑀤𑀲𑁆𑀲𑀦𑀸𑀬…𑀧𑁂…

‘‘𑀪𑀯𑀜𑁆𑀳𑀺 𑀲𑁄𑀡𑀤𑀡𑁆𑀟𑁄 𑀲𑀻𑀮𑀯𑀸 𑀯𑀼𑀤𑁆𑀥𑀲𑀻𑀮𑀻 𑀯𑀼𑀤𑁆𑀥𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄…𑀧𑁂…

‘‘𑀪𑀯𑀜𑁆𑀳𑀺 𑀲𑁄𑀡𑀤𑀡𑁆𑀟𑁄 𑀓𑀮𑁆𑀬𑀸𑀡𑀯𑀸𑀘𑁄 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄 𑀧𑁄𑀭𑀺𑀬𑀸 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀯𑀺𑀲𑁆𑀲𑀝𑁆𑀞𑀸𑀬 𑀅𑀦𑁂𑀮𑀕𑀮𑀸𑀬 [𑀅𑀦𑁂𑀴𑀕𑀮𑀸𑀬 (𑀲𑀻. 𑀧𑀻.), 𑀅𑀦𑁂𑀮𑀕𑀴𑀸𑀬 (𑀓)] 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸…𑀧𑁂…

‘‘𑀪𑀯𑀜𑁆𑀳𑀺 𑀲𑁄𑀡𑀤𑀡𑁆𑀟𑁄 𑀩𑀳𑀽𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑁄 𑀢𑀻𑀡𑀺 𑀫𑀸𑀡𑀯𑀓𑀲𑀢𑀸𑀦𑀺 𑀫𑀦𑁆𑀢𑁂 𑀯𑀸𑀘𑁂𑀢𑀺. 𑀩𑀳𑀽 𑀔𑁄 𑀧𑀦 𑀦𑀸𑀦𑀸𑀤𑀺𑀲𑀸 𑀦𑀸𑀦𑀸𑀚𑀦𑀧𑀤𑀸 𑀫𑀸𑀡𑀯𑀓𑀸 𑀆𑀕𑀘𑁆𑀙𑀦𑁆𑀢𑀺 𑀪𑁄𑀢𑁄 𑀲𑁄𑀡𑀤𑀡𑁆𑀟𑀲𑁆𑀲 𑀲𑀦𑁆𑀢𑀺𑀓𑁂 𑀫𑀦𑁆𑀢𑀢𑁆𑀣𑀺𑀓𑀸 𑀫𑀦𑁆𑀢𑁂 𑀅𑀥𑀺𑀬𑀺𑀢𑀼𑀓𑀸𑀫𑀸 …𑀧𑁂…

‘‘𑀪𑀯𑀜𑁆𑀳𑀺 𑀲𑁄𑀡𑀤𑀡𑁆𑀟𑁄 𑀚𑀺𑀡𑁆𑀡𑁄 𑀯𑀼𑀤𑁆𑀥𑁄 𑀫𑀳𑀮𑁆𑀮𑀓𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄; 𑀲𑀫𑀡𑁄 𑀕𑁄𑀢𑀫𑁄 𑀢𑀭𑀼𑀡𑁄 𑀘𑁂𑀯 𑀢𑀭𑀼𑀡𑀧𑀩𑁆𑀩𑀚𑀺𑀢𑁄 𑀘…𑀧𑁂…

‘‘𑀪𑀯𑀜𑁆𑀳𑀺 𑀲𑁄𑀡𑀤𑀡𑁆𑀟𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄…𑀧𑁂…

‘‘𑀪𑀯𑀜𑁆𑀳𑀺 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄…𑀧𑁂…

‘‘𑀪𑀯𑀜𑁆𑀳𑀺 𑀲𑁄𑀡𑀤𑀡𑁆𑀟𑁄 𑀘𑀫𑁆𑀧𑀁 𑀅𑀚𑁆𑀛𑀸𑀯𑀲𑀢𑀺 𑀲𑀢𑁆𑀢𑀼𑀲𑁆𑀲𑀤𑀁 𑀲𑀢𑀺𑀡𑀓𑀝𑁆𑀞𑁄𑀤𑀓𑀁 𑀲𑀥𑀜𑁆𑀜𑀁 𑀭𑀸𑀚𑀪𑁄𑀕𑁆𑀕𑀁, 𑀭𑀜𑁆𑀜𑀸 𑀫𑀸𑀕𑀥𑁂𑀦 𑀲𑁂𑀦𑀺𑀬𑁂𑀦 𑀩𑀺𑀫𑁆𑀩𑀺𑀲𑀸𑀭𑁂𑀦 𑀤𑀺𑀦𑁆𑀦𑀁, 𑀭𑀸𑀚𑀤𑀸𑀬𑀁 𑀩𑁆𑀭𑀳𑁆𑀫𑀤𑁂𑀬𑁆𑀬𑀁. 𑀬𑀫𑁆𑀧𑀺 𑀪𑀯𑀁 𑀲𑁄𑀡𑀤𑀡𑁆𑀟𑁄 𑀘𑀫𑁆𑀧𑀁 𑀅𑀚𑁆𑀛𑀸𑀯𑀲𑀢𑀺 𑀲𑀢𑁆𑀢𑀼𑀲𑁆𑀲𑀤𑀁 𑀲𑀢𑀺𑀡𑀓𑀝𑁆𑀞𑁄𑀤𑀓𑀁 𑀲𑀥𑀜𑁆𑀜𑀁 𑀭𑀸𑀚𑀪𑁄𑀕𑁆𑀕𑀁, 𑀭𑀜𑁆𑀜𑀸 𑀫𑀸𑀕𑀥𑁂𑀦 𑀲𑁂𑀦𑀺𑀬𑁂𑀦 𑀩𑀺𑀫𑁆𑀩𑀺𑀲𑀸𑀭𑁂𑀦 𑀤𑀺𑀦𑁆𑀦𑀁, 𑀭𑀸𑀚𑀤𑀸𑀬𑀁 𑀩𑁆𑀭𑀳𑁆𑀫𑀤𑁂𑀬𑁆𑀬𑀁. 𑀇𑀫𑀺𑀦𑀸𑀧𑀗𑁆𑀕𑁂𑀦 𑀦 𑀅𑀭𑀳𑀢𑀺 𑀪𑀯𑀁 𑀲𑁄𑀡𑀤𑀡𑁆𑀟𑁄 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁; 𑀲𑀫𑀡𑁄𑀢𑁆𑀯𑁂𑀯 𑀕𑁄𑀢𑀫𑁄 𑀅𑀭𑀳𑀢𑀺 𑀪𑀯𑀦𑁆𑀢𑀁 𑀲𑁄𑀡𑀤𑀡𑁆𑀟𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼’’𑀦𑁆𑀢𑀺.

𑀩𑀼𑀤𑁆𑀥𑀕𑀼𑀡𑀓𑀣𑀸

𑁩𑁦𑁪. 𑀏𑀯𑀁 𑀯𑀼𑀢𑁆𑀢𑁂, 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀢𑁂 𑀩𑁆𑀭𑀸𑀳𑁆𑀫𑀡𑁂 𑀏𑀢𑀤𑀯𑁄𑀘 𑁋

‘‘𑀢𑁂𑀦 𑀳𑀺, 𑀪𑁄, 𑀫𑀫𑀧𑀺 𑀲𑀼𑀡𑀸𑀣, 𑀬𑀣𑀸 𑀫𑀬𑀫𑁂𑀯 𑀅𑀭𑀳𑀸𑀫 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁; 𑀦𑀢𑁆𑀯𑁂𑀯 𑀅𑀭𑀳𑀢𑀺 𑀲𑁄 𑀪𑀯𑀁 𑀕𑁄𑀢𑀫𑁄 𑀅𑀫𑁆𑀳𑀸𑀓𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁. 𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘, 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸, 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦. 𑀬𑀫𑁆𑀧𑀺 𑀪𑁄 𑀲𑀫𑀡𑁄 𑀕𑁄𑀢𑀫𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸, 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦, 𑀇𑀫𑀺𑀦𑀸𑀧𑀗𑁆𑀕𑁂𑀦 𑀦 𑀅𑀭𑀳𑀢𑀺 𑀲𑁄 𑀪𑀯𑀁 𑀕𑁄𑀢𑀫𑁄 𑀅𑀫𑁆𑀳𑀸𑀓𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁; 𑀅𑀣 𑀔𑁄 𑀫𑀬𑀫𑁂𑀯 𑀅𑀭𑀳𑀸𑀫 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁.

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀫𑀳𑀦𑁆𑀢𑀁 𑀜𑀸𑀢𑀺𑀲𑀗𑁆𑀖𑀁 𑀑𑀳𑀸𑀬 𑀧𑀩𑁆𑀩𑀚𑀺𑀢𑁄…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀧𑀳𑀽𑀢𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀑𑀳𑀸𑀬 𑀧𑀩𑁆𑀩𑀚𑀺𑀢𑁄 𑀪𑀽𑀫𑀺𑀕𑀢𑀜𑁆𑀘 𑀯𑁂𑀳𑀸𑀲𑀝𑁆𑀞𑀁 𑀘…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀤𑀳𑀭𑁄𑀯 𑀲𑀫𑀸𑀦𑁄 𑀬𑀼𑀯𑀸 𑀲𑀼𑀲𑀼𑀓𑀸𑀴𑀓𑁂𑀲𑁄 𑀪𑀤𑁆𑀭𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀞𑀫𑁂𑀦 𑀯𑀬𑀲𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀅𑀓𑀸𑀫𑀓𑀸𑀦𑀁 𑀫𑀸𑀢𑀸𑀧𑀺𑀢𑀽𑀦𑀁 𑀅𑀲𑁆𑀲𑀼𑀫𑀼𑀔𑀸𑀦𑀁 𑀭𑀼𑀤𑀦𑁆𑀢𑀸𑀦𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀩𑁆𑀭𑀳𑁆𑀫𑀯𑀡𑁆𑀡𑀻, 𑀩𑁆𑀭𑀳𑁆𑀫𑀯𑀘𑁆𑀙𑀲𑀻, 𑀅𑀔𑀼𑀤𑁆𑀤𑀸𑀯𑀓𑀸𑀲𑁄 𑀤𑀲𑁆𑀲𑀦𑀸𑀬…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀲𑀻𑀮𑀯𑀸 𑀅𑀭𑀺𑀬𑀲𑀻𑀮𑀻 𑀓𑀼𑀲𑀮𑀲𑀻𑀮𑀻 𑀓𑀼𑀲𑀮𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀓𑀮𑁆𑀬𑀸𑀡𑀯𑀸𑀘𑁄 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄 𑀧𑁄𑀭𑀺𑀬𑀸 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀯𑀺𑀲𑁆𑀲𑀝𑁆𑀞𑀸𑀬 𑀅𑀦𑁂𑀮𑀕𑀮𑀸𑀬 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀩𑀳𑀽𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑁄…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀔𑀻𑀡𑀓𑀸𑀫𑀭𑀸𑀕𑁄 𑀯𑀺𑀕𑀢𑀘𑀸𑀧𑀮𑁆𑀮𑁄…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀓𑀫𑁆𑀫𑀯𑀸𑀤𑀻 𑀓𑀺𑀭𑀺𑀬𑀯𑀸𑀤𑀻 𑀅𑀧𑀸𑀧𑀧𑀼𑀭𑁂𑀓𑁆𑀔𑀸𑀭𑁄 𑀩𑁆𑀭𑀳𑁆𑀫𑀜𑁆𑀜𑀸𑀬 𑀧𑀚𑀸𑀬…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀉𑀘𑁆𑀘𑀸 𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀅𑀲𑀫𑁆𑀪𑀺𑀦𑁆𑀦𑀔𑀢𑁆𑀢𑀺𑀬𑀓𑀼𑀮𑀸…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀅𑀟𑁆𑀠𑀸 𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀫𑀳𑀤𑁆𑀥𑀦𑀸 𑀫𑀳𑀸𑀪𑁄𑀕𑀸…𑀧𑁂…

‘‘𑀲𑀫𑀡𑀁 𑀔𑀮𑀼, 𑀪𑁄, 𑀕𑁄𑀢𑀫𑀁 𑀢𑀺𑀭𑁄𑀭𑀝𑁆𑀞𑀸 𑀢𑀺𑀭𑁄𑀚𑀦𑀧𑀤𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀆𑀕𑀘𑁆𑀙𑀦𑁆𑀢𑀺…𑀧𑁂…

‘‘𑀲𑀫𑀡𑀁 𑀔𑀮𑀼, 𑀪𑁄, 𑀕𑁄𑀢𑀫𑀁 𑀅𑀦𑁂𑀓𑀸𑀦𑀺 𑀤𑁂𑀯𑀢𑀸𑀲𑀳𑀲𑁆𑀲𑀸𑀦𑀺 𑀧𑀸𑀡𑁂𑀳𑀺 𑀲𑀭𑀡𑀁 𑀕𑀢𑀸𑀦𑀺…𑀧𑁂…

‘‘𑀲𑀫𑀡𑀁 𑀔𑀮𑀼, 𑀪𑁄, 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’ 𑀢𑀺…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀏𑀳𑀺𑀲𑁆𑀯𑀸𑀕𑀢𑀯𑀸𑀤𑀻 𑀲𑀔𑀺𑀮𑁄 𑀲𑀫𑁆𑀫𑁄𑀤𑀓𑁄 𑀅𑀩𑁆𑀪𑀸𑀓𑀼𑀝𑀺𑀓𑁄 𑀉𑀢𑁆𑀢𑀸𑀦𑀫𑀼𑀔𑁄 𑀧𑀼𑀩𑁆𑀩𑀪𑀸𑀲𑀻…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄…𑀧𑁂…

‘‘𑀲𑀫𑀡𑁂 𑀔𑀮𑀼, 𑀪𑁄, 𑀕𑁄𑀢𑀫𑁂 𑀩𑀳𑀽 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘 𑀅𑀪𑀺𑀧𑁆𑀧𑀲𑀦𑁆𑀦𑀸…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀬𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀧𑀝𑀺𑀯𑀲𑀢𑀺, 𑀦 𑀢𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀅𑀫𑀦𑀼𑀲𑁆𑀲𑀸 𑀫𑀦𑀼𑀲𑁆𑀲𑁂 𑀯𑀺𑀳𑁂𑀞𑁂𑀦𑁆𑀢𑀺…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀲𑀗𑁆𑀖𑀻 𑀕𑀡𑀻 𑀕𑀡𑀸𑀘𑀭𑀺𑀬𑁄 𑀧𑀼𑀣𑀼𑀢𑀺𑀢𑁆𑀣𑀓𑀭𑀸𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀬𑀣𑀸 𑀔𑁄 𑀧𑀦, 𑀪𑁄, 𑀏𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀬𑀣𑀸 𑀯𑀸 𑀢𑀣𑀸 𑀯𑀸 𑀬𑀲𑁄 𑀲𑀫𑀼𑀤𑀸𑀕𑀘𑁆𑀙𑀢𑀺, 𑀦 𑀳𑁂𑀯𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀬𑀲𑁄 𑀲𑀫𑀼𑀤𑀸𑀕𑀢𑁄. 𑀅𑀣 𑀔𑁄 𑀅𑀦𑀼𑀢𑁆𑀢𑀭𑀸𑀬 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸𑀬 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀬𑀲𑁄 𑀲𑀫𑀼𑀤𑀸𑀕𑀢𑁄…𑀧𑁂…

‘‘𑀲𑀫𑀡𑀁 𑀔𑀮𑀼, 𑀪𑁄, 𑀕𑁄𑀢𑀫𑀁 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀲𑀧𑀼𑀢𑁆𑀢𑁄 𑀲𑀪𑀭𑀺𑀬𑁄 𑀲𑀧𑀭𑀺𑀲𑁄 𑀲𑀸𑀫𑀘𑁆𑀘𑁄 𑀧𑀸𑀡𑁂𑀳𑀺 𑀲𑀭𑀡𑀁 𑀕𑀢𑁄…𑀧𑁂…

‘‘𑀲𑀫𑀡𑀁 𑀔𑀮𑀼, 𑀪𑁄, 𑀕𑁄𑀢𑀫𑀁 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀲𑀧𑀼𑀢𑁆𑀢𑁄 𑀲𑀪𑀭𑀺𑀬𑁄 𑀲𑀧𑀭𑀺𑀲𑁄 𑀲𑀸𑀫𑀘𑁆𑀘𑁄 𑀧𑀸𑀡𑁂𑀳𑀺 𑀲𑀭𑀡𑀁 𑀕𑀢𑁄…𑀧𑁂…

‘‘𑀲𑀫𑀡𑀁 𑀔𑀮𑀼, 𑀪𑁄, 𑀕𑁄𑀢𑀫𑀁 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀺 𑀲𑀧𑀼𑀢𑁆𑀢𑁄 𑀲𑀪𑀭𑀺𑀬𑁄 𑀲𑀧𑀭𑀺𑀲𑁄 𑀲𑀸𑀫𑀘𑁆𑀘𑁄 𑀧𑀸𑀡𑁂𑀳𑀺 𑀲𑀭𑀡𑀁 𑀕𑀢𑁄…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀘𑀫𑁆𑀧𑀁 𑀅𑀦𑀼𑀧𑁆𑀧𑀢𑁆𑀢𑁄, 𑀘𑀫𑁆𑀧𑀸𑀬𑀁 𑀯𑀺𑀳𑀭𑀢𑀺 𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂. 𑀬𑁂 𑀔𑁄 𑀧𑀦, 𑀪𑁄, 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀫𑁆𑀳𑀸𑀓𑀁 𑀕𑀸𑀫𑀔𑁂𑀢𑁆𑀢𑀁 𑀆𑀕𑀘𑁆𑀙𑀦𑁆𑀢𑀺 𑀅𑀢𑀺𑀣𑀻 𑀦𑁄 𑀢𑁂 𑀳𑁄𑀦𑁆𑀢𑀺. 𑀅𑀢𑀺𑀣𑀻 𑀔𑁄 𑀧𑀦𑀫𑁆𑀳𑁂𑀳𑀺 𑀲𑀓𑁆𑀓𑀸𑀢𑀩𑁆𑀩𑀸 𑀕𑀭𑀼𑀓𑀸𑀢𑀩𑁆𑀩𑀸 𑀫𑀸𑀦𑁂𑀢𑀩𑁆𑀩𑀸 𑀧𑀽𑀚𑁂𑀢𑀩𑁆𑀩𑀸 𑀅𑀧𑀘𑁂𑀢𑀩𑁆𑀩𑀸. 𑀬𑀫𑁆𑀧𑀺, 𑀪𑁄, 𑀲𑀫𑀡𑁄 𑀕𑁄𑀢𑀫𑁄 𑀘𑀫𑁆𑀧𑀁 𑀅𑀦𑀼𑀧𑁆𑀧𑀢𑁆𑀢𑁄 𑀘𑀫𑁆𑀧𑀸𑀬𑀁 𑀯𑀺𑀳𑀭𑀢𑀺 𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂, 𑀅𑀢𑀺𑀣𑀺𑀫𑁆𑀳𑀸𑀓𑀁 𑀲𑀫𑀡𑁄 𑀕𑁄𑀢𑀫𑁄; 𑀅𑀢𑀺𑀣𑀺 𑀔𑁄 𑀧𑀦𑀫𑁆𑀳𑁂𑀳𑀺 𑀲𑀓𑁆𑀓𑀸𑀢𑀩𑁆𑀩𑁄 𑀕𑀭𑀼𑀓𑀸𑀢𑀩𑁆𑀩𑁄 𑀫𑀸𑀦𑁂𑀢𑀩𑁆𑀩𑁄 𑀧𑀽𑀚𑁂𑀢𑀩𑁆𑀩𑁄 𑀅𑀧𑀘𑁂𑀢𑀩𑁆𑀩𑁄. 𑀇𑀫𑀺𑀦𑀸𑀧𑀗𑁆𑀕𑁂𑀦 𑀦 𑀅𑀭𑀳𑀢𑀺 𑀲𑁄 𑀪𑀯𑀁 𑀕𑁄𑀢𑀫𑁄 𑀅𑀫𑁆𑀳𑀸𑀓𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁. 𑀅𑀣 𑀔𑁄 𑀫𑀬𑀫𑁂𑀯 𑀅𑀭𑀳𑀸𑀫 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁. 𑀏𑀢𑁆𑀢𑀓𑁂 𑀔𑁄 𑀅𑀳𑀁, 𑀪𑁄, 𑀢𑀲𑁆𑀲 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀯𑀡𑁆𑀡𑁂 𑀧𑀭𑀺𑀬𑀸𑀧𑀼𑀡𑀸𑀫𑀺, 𑀦𑁄 𑀘 𑀔𑁄 𑀲𑁄 𑀪𑀯𑀁 𑀕𑁄𑀢𑀫𑁄 𑀏𑀢𑁆𑀢𑀓𑀯𑀡𑁆𑀡𑁄. 𑀅𑀧𑀭𑀺𑀫𑀸𑀡𑀯𑀡𑁆𑀡𑁄 𑀳𑀺 𑀲𑁄 𑀪𑀯𑀁 𑀕𑁄𑀢𑀫𑁄’’𑀢𑀺.

𑁩𑁦𑁫. 𑀏𑀯𑀁 𑀯𑀼𑀢𑁆𑀢𑁂, 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀲𑁄𑀡𑀤𑀡𑁆𑀟𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀬𑀣𑀸 𑀔𑁄 𑀪𑀯𑀁 𑀲𑁄𑀡𑀤𑀡𑁆𑀟𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀡𑁆𑀡𑁂 𑀪𑀸𑀲𑀢𑀺 𑀇𑀢𑁄 𑀘𑁂𑀧𑀺 𑀲𑁄 𑀪𑀯𑀁 𑀕𑁄𑀢𑀫𑁄 𑀬𑁄𑀚𑀦𑀲𑀢𑁂 𑀯𑀺𑀳𑀭𑀢𑀺, 𑀅𑀮𑀫𑁂𑀯 𑀲𑀤𑁆𑀥𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁 𑀅𑀧𑀺 𑀧𑀼𑀝𑁄𑀲𑁂𑀦𑀸’’𑀢𑀺. ‘‘𑀢𑁂𑀦 𑀳𑀺, 𑀪𑁄, 𑀲𑀩𑁆𑀩𑁂𑀯 𑀫𑀬𑀁 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺.

𑀲𑁄𑀡𑀤𑀡𑁆𑀟𑀧𑀭𑀺𑀯𑀺𑀢𑀓𑁆𑀓𑁄

𑁩𑁦𑁬. 𑀅𑀣 𑀔𑁄 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀫𑀳𑀢𑀸 𑀩𑁆𑀭𑀸𑀳𑁆𑀫𑀡𑀕𑀡𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀕𑀕𑁆𑀕𑀭𑀸 𑀧𑁄𑀓𑁆𑀔𑀭𑀡𑀻 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀣 𑀔𑁄 𑀲𑁄𑀡𑀤𑀡𑁆𑀟𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀢𑀺𑀭𑁄𑀯𑀦𑀲𑀡𑁆𑀟𑀕𑀢𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀲𑀫𑀡𑀁 𑀕𑁄𑀢𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬𑀁; 𑀢𑀢𑁆𑀭 𑀘𑁂 𑀫𑀁 𑀲𑀫𑀡𑁄 𑀕𑁄𑀢𑀫𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀦 𑀔𑁄 𑀏𑀲, 𑀩𑁆𑀭𑀸𑀳𑁆𑀫𑀡, 𑀧𑀜𑁆𑀳𑁄 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀏𑀯𑀁 𑀦𑀸𑀫𑁂𑀲, 𑀩𑁆𑀭𑀸𑀳𑁆𑀫𑀡, 𑀧𑀜𑁆𑀳𑁄 𑀧𑀼𑀘𑁆𑀙𑀺𑀢𑀩𑁆𑀩𑁄’𑀢𑀺, 𑀢𑁂𑀦 𑀫𑀁 𑀅𑀬𑀁 𑀧𑀭𑀺𑀲𑀸 𑀧𑀭𑀺𑀪𑀯𑁂𑀬𑁆𑀬 𑁋 ‘𑀩𑀸𑀮𑁄 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀅𑀩𑁆𑀬𑀢𑁆𑀢𑁄, 𑀦𑀸𑀲𑀓𑁆𑀔𑀺 𑀲𑀫𑀡𑀁 𑀕𑁄𑀢𑀫𑀁 𑀬𑁄𑀦𑀺𑀲𑁄 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼’𑀦𑁆𑀢𑀺. 𑀬𑀁 𑀔𑁄 𑀧𑀦𑀸𑀬𑀁 𑀧𑀭𑀺𑀲𑀸 𑀧𑀭𑀺𑀪𑀯𑁂𑀬𑁆𑀬, 𑀬𑀲𑁄𑀧𑀺 𑀢𑀲𑁆𑀲 𑀳𑀸𑀬𑁂𑀣. 𑀬𑀲𑁆𑀲 𑀔𑁄 𑀧𑀦 𑀬𑀲𑁄 𑀳𑀸𑀬𑁂𑀣, 𑀪𑁄𑀕𑀸𑀧𑀺 𑀢𑀲𑁆𑀲 𑀳𑀸𑀬𑁂𑀬𑁆𑀬𑀼𑀁. 𑀬𑀲𑁄𑀮𑀤𑁆𑀥𑀸 𑀔𑁄 𑀧𑀦𑀫𑁆𑀳𑀸𑀓𑀁 𑀪𑁄𑀕𑀸. 𑀫𑀫𑀜𑁆𑀘𑁂𑀯 𑀔𑁄 𑀧𑀦 𑀲𑀫𑀡𑁄 𑀕𑁄𑀢𑀫𑁄 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬, 𑀢𑀲𑁆𑀲 𑀘𑀸𑀳𑀁 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑁂𑀦 𑀘𑀺𑀢𑁆𑀢𑀁 𑀦 𑀆𑀭𑀸𑀥𑁂𑀬𑁆𑀬𑀁; 𑀢𑀢𑁆𑀭 𑀘𑁂 𑀫𑀁 𑀲𑀫𑀡𑁄 𑀕𑁄𑀢𑀫𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀦 𑀔𑁄 𑀏𑀲, 𑀩𑁆𑀭𑀸𑀳𑁆𑀫𑀡, 𑀧𑀜𑁆𑀳𑁄 𑀏𑀯𑀁 𑀩𑁆𑀬𑀸𑀓𑀸𑀢𑀩𑁆𑀩𑁄, 𑀏𑀯𑀁 𑀦𑀸𑀫𑁂𑀲, 𑀩𑁆𑀭𑀸𑀳𑁆𑀫𑀡, 𑀧𑀜𑁆𑀳𑁄 𑀩𑁆𑀬𑀸𑀓𑀸𑀢𑀩𑁆𑀩𑁄’𑀢𑀺, 𑀢𑁂𑀦 𑀫𑀁 𑀅𑀬𑀁 𑀧𑀭𑀺𑀲𑀸 𑀧𑀭𑀺𑀪𑀯𑁂𑀬𑁆𑀬 𑁋 ‘𑀩𑀸𑀮𑁄 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀅𑀩𑁆𑀬𑀢𑁆𑀢𑁄, 𑀦𑀸𑀲𑀓𑁆𑀔𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑁂𑀦 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀼’𑀦𑁆𑀢𑀺. 𑀬𑀁 𑀔𑁄 𑀧𑀦𑀸𑀬𑀁 𑀧𑀭𑀺𑀲𑀸 𑀧𑀭𑀺𑀪𑀯𑁂𑀬𑁆𑀬, 𑀬𑀲𑁄𑀧𑀺 𑀢𑀲𑁆𑀲 𑀳𑀸𑀬𑁂𑀣. 𑀬𑀲𑁆𑀲 𑀔𑁄 𑀧𑀦 𑀬𑀲𑁄 𑀳𑀸𑀬𑁂𑀣, 𑀪𑁄𑀕𑀸𑀧𑀺 𑀢𑀲𑁆𑀲 𑀳𑀸𑀬𑁂𑀬𑁆𑀬𑀼𑀁. 𑀬𑀲𑁄𑀮𑀤𑁆𑀥𑀸 𑀔𑁄 𑀧𑀦𑀫𑁆𑀳𑀸𑀓𑀁 𑀪𑁄𑀕𑀸. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀏𑀯𑀁 𑀲𑀫𑀻𑀧𑀕𑀢𑁄 𑀲𑀫𑀸𑀦𑁄 𑀅𑀤𑀺𑀲𑁆𑀯𑀸𑀯 𑀲𑀫𑀡𑀁 𑀕𑁄𑀢𑀫𑀁 𑀦𑀺𑀯𑀢𑁆𑀢𑁂𑀬𑁆𑀬𑀁, 𑀢𑁂𑀦 𑀫𑀁 𑀅𑀬𑀁 𑀧𑀭𑀺𑀲𑀸 𑀧𑀭𑀺𑀪𑀯𑁂𑀬𑁆𑀬 𑁋 ‘𑀩𑀸𑀮𑁄 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀅𑀩𑁆𑀬𑀢𑁆𑀢𑁄 𑀫𑀸𑀦𑀣𑀤𑁆𑀥𑁄 𑀪𑀻𑀢𑁄 𑀘, 𑀦𑁄 𑀯𑀺𑀲𑀳𑀢𑀺 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁, 𑀓𑀣𑀜𑁆𑀳𑀺 𑀦𑀸𑀫 𑀏𑀯𑀁 𑀲𑀫𑀻𑀧𑀕𑀢𑁄 𑀲𑀫𑀸𑀦𑁄 𑀅𑀤𑀺𑀲𑁆𑀯𑀸 𑀲𑀫𑀡𑀁 𑀕𑁄𑀢𑀫𑀁 𑀦𑀺𑀯𑀢𑁆𑀢𑀺𑀲𑁆𑀲𑀢𑀻’𑀢𑀺. 𑀬𑀁 𑀔𑁄 𑀧𑀦𑀸𑀬𑀁 𑀧𑀭𑀺𑀲𑀸 𑀧𑀭𑀺𑀪𑀯𑁂𑀬𑁆𑀬, 𑀬𑀲𑁄𑀧𑀺 𑀢𑀲𑁆𑀲 𑀳𑀸𑀬𑁂𑀣. 𑀬𑀲𑁆𑀲 𑀔𑁄 𑀧𑀦 𑀬𑀲𑁄 𑀳𑀸𑀬𑁂𑀣, 𑀪𑁄𑀕𑀸𑀧𑀺 𑀢𑀲𑁆𑀲 𑀳𑀸𑀬𑁂𑀬𑁆𑀬𑀼𑀁, 𑀬𑀲𑁄𑀮𑀤𑁆𑀥𑀸 𑀔𑁄 𑀧𑀦𑀫𑁆𑀳𑀸𑀓𑀁 𑀪𑁄𑀕𑀸’’𑀢𑀺.

𑁩𑁦𑁭. 𑀅𑀣 𑀔𑁄 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀘𑀫𑁆𑀧𑁂𑀬𑁆𑀬𑀓𑀸𑀧𑀺 𑀔𑁄 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼; 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼; 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼; 𑀅𑀧𑁆𑀧𑁂𑀓𑀘𑁆𑀘𑁂 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼; 𑀅𑀧𑁆𑀧𑁂𑀓𑀘𑁆𑀘𑁂 𑀦𑀸𑀫𑀕𑁄𑀢𑁆𑀢𑀁 𑀲𑀸𑀯𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼; 𑀅𑀧𑁆𑀧𑁂𑀓𑀘𑁆𑀘𑁂 𑀢𑀼𑀡𑁆𑀳𑀻𑀪𑀽𑀢𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼.

𑁩𑁦𑁮. 𑀢𑀢𑁆𑀭𑀧𑀺 𑀲𑀼𑀤𑀁 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀏𑀢𑀤𑁂𑀯 𑀩𑀳𑀼𑀮𑀫𑀦𑀼𑀯𑀺𑀢𑀓𑁆𑀓𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑁋 ‘‘𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀲𑀫𑀡𑀁 𑀕𑁄𑀢𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬𑀁; 𑀢𑀢𑁆𑀭 𑀘𑁂 𑀫𑀁 𑀲𑀫𑀡𑁄 𑀕𑁄𑀢𑀫𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀦 𑀔𑁄 𑀏𑀲, 𑀩𑁆𑀭𑀸𑀳𑁆𑀫𑀡, 𑀧𑀜𑁆𑀳𑁄 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑁄, 𑀏𑀯𑀁 𑀦𑀸𑀫𑁂𑀲, 𑀩𑁆𑀭𑀸𑀳𑁆𑀫𑀡, 𑀧𑀜𑁆𑀳𑁄 𑀧𑀼𑀘𑁆𑀙𑀺𑀢𑀩𑁆𑀩𑁄’𑀢𑀺, 𑀢𑁂𑀦 𑀫𑀁 𑀅𑀬𑀁 𑀧𑀭𑀺𑀲𑀸 𑀧𑀭𑀺𑀪𑀯𑁂𑀬𑁆𑀬 𑁋 ‘𑀩𑀸𑀮𑁄 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀅𑀩𑁆𑀬𑀢𑁆𑀢𑁄, 𑀦𑀸𑀲𑀓𑁆𑀔𑀺 𑀲𑀫𑀡𑀁 𑀕𑁄𑀢𑀫𑀁 𑀬𑁄𑀦𑀺𑀲𑁄 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼’𑀦𑁆𑀢𑀺. 𑀬𑀁 𑀔𑁄 𑀧𑀦𑀸𑀬𑀁 𑀧𑀭𑀺𑀲𑀸 𑀧𑀭𑀺𑀪𑀯𑁂𑀬𑁆𑀬, 𑀬𑀲𑁄𑀧𑀺 𑀢𑀲𑁆𑀲 𑀳𑀸𑀬𑁂𑀣. 𑀬𑀲𑁆𑀲 𑀔𑁄 𑀧𑀦 𑀬𑀲𑁄 𑀳𑀸𑀬𑁂𑀣, 𑀪𑁄𑀕𑀸𑀧𑀺 𑀢𑀲𑁆𑀲 𑀳𑀸𑀬𑁂𑀬𑁆𑀬𑀼𑀁. 𑀬𑀲𑁄𑀮𑀤𑁆𑀥𑀸 𑀔𑁄 𑀧𑀦𑀫𑁆𑀳𑀸𑀓𑀁 𑀪𑁄𑀕𑀸. 𑀫𑀫𑀜𑁆𑀘𑁂𑀯 𑀔𑁄 𑀧𑀦 𑀲𑀫𑀡𑁄 𑀕𑁄𑀢𑀫𑁄 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬, 𑀢𑀲𑁆𑀲 𑀘𑀸𑀳𑀁 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑁂𑀦 𑀘𑀺𑀢𑁆𑀢𑀁 𑀦 𑀆𑀭𑀸𑀥𑁂𑀬𑁆𑀬𑀁; 𑀢𑀢𑁆𑀭 𑀘𑁂 𑀫𑀁 𑀲𑀫𑀡𑁄 𑀕𑁄𑀢𑀫𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀦 𑀔𑁄 𑀏𑀲, 𑀩𑁆𑀭𑀸𑀳𑁆𑀫𑀡, 𑀧𑀜𑁆𑀳𑁄 𑀏𑀯𑀁 𑀩𑁆𑀬𑀸𑀓𑀸𑀢𑀩𑁆𑀩𑁄, 𑀏𑀯𑀁 𑀦𑀸𑀫𑁂𑀲, 𑀩𑁆𑀭𑀸𑀳𑁆𑀫𑀡, 𑀧𑀜𑁆𑀳𑁄 𑀩𑁆𑀬𑀸𑀓𑀸𑀢𑀩𑁆𑀩𑁄’𑀢𑀺, 𑀢𑁂𑀦 𑀫𑀁 𑀅𑀬𑀁 𑀧𑀭𑀺𑀲𑀸 𑀧𑀭𑀺𑀪𑀯𑁂𑀬𑁆𑀬 𑁋 ‘𑀩𑀸𑀮𑁄 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀅𑀩𑁆𑀬𑀢𑁆𑀢𑁄, 𑀦𑀸𑀲𑀓𑁆𑀔𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑁂𑀦 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀼’𑀦𑁆𑀢𑀺. 𑀬𑀁 𑀔𑁄 𑀧𑀦𑀸𑀬𑀁 𑀧𑀭𑀺𑀲𑀸 𑀧𑀭𑀺𑀪𑀯𑁂𑀬𑁆𑀬, 𑀬𑀲𑁄𑀧𑀺 𑀢𑀲𑁆𑀲 𑀳𑀸𑀬𑁂𑀣. 𑀬𑀲𑁆𑀲 𑀔𑁄 𑀧𑀦 𑀬𑀲𑁄 𑀳𑀸𑀬𑁂𑀣, 𑀪𑁄𑀕𑀸𑀧𑀺 𑀢𑀲𑁆𑀲 𑀳𑀸𑀬𑁂𑀬𑁆𑀬𑀼𑀁. 𑀬𑀲𑁄𑀮𑀤𑁆𑀥𑀸 𑀔𑁄 𑀧𑀦𑀫𑁆𑀳𑀸𑀓𑀁 𑀪𑁄𑀕𑀸. 𑀅𑀳𑁄 𑀯𑀢 𑀫𑀁 𑀲𑀫𑀡𑁄 𑀕𑁄𑀢𑀫𑁄 𑀲𑀓𑁂 𑀆𑀘𑀭𑀺𑀬𑀓𑁂 𑀢𑁂𑀯𑀺𑀚𑁆𑀚𑀓𑁂 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬, 𑀅𑀤𑁆𑀥𑀸 𑀯𑀢𑀲𑁆𑀲𑀸𑀳𑀁 𑀘𑀺𑀢𑁆𑀢𑀁 𑀆𑀭𑀸𑀥𑁂𑀬𑁆𑀬𑀁 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑁂𑀦𑀸’’𑀢𑀺.

𑀩𑁆𑀭𑀸𑀳𑁆𑀫𑀡𑀧𑀜𑁆𑀜𑀢𑁆𑀢𑀺

𑁩𑁦𑁯. 𑀅𑀣 𑀔𑁄 𑀪𑀕𑀯𑀢𑁄 𑀲𑁄𑀡𑀤𑀡𑁆𑀟𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀏𑀢𑀤𑀳𑁄𑀲𑀺 𑁋 ‘‘𑀯𑀺𑀳𑀜𑁆𑀜𑀢𑀺 𑀔𑁄 𑀅𑀬𑀁 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀲𑀓𑁂𑀦 𑀘𑀺𑀢𑁆𑀢𑁂𑀦. 𑀬𑀁𑀦𑀽𑀦𑀸𑀳𑀁 𑀲𑁄𑀡𑀤𑀡𑁆𑀟𑀁 𑀩𑁆𑀭𑀸𑀳𑁆𑀫𑀡𑀁 𑀲𑀓𑁂 𑀆𑀘𑀭𑀺𑀬𑀓𑁂 𑀢𑁂𑀯𑀺𑀚𑁆𑀚𑀓𑁂 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀲𑁄𑀡𑀤𑀡𑁆𑀟𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑀺𑀳𑀺 𑀧𑀦, 𑀩𑁆𑀭𑀸𑀳𑁆𑀫𑀡, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀁 𑀧𑀜𑁆𑀜𑀧𑁂𑀦𑁆𑀢𑀺; ‘𑀩𑁆𑀭𑀸𑀳𑁆𑀫𑀡𑁄𑀲𑁆𑀫𑀻’𑀢𑀺 𑀘 𑀯𑀤𑀫𑀸𑀦𑁄 𑀲𑀫𑁆𑀫𑀸 𑀯𑀤𑁂𑀬𑁆𑀬, 𑀦 𑀘 𑀧𑀦 𑀫𑀼𑀲𑀸𑀯𑀸𑀤𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺?

𑁩𑁧𑁦. 𑀅𑀣 𑀔𑁄 𑀲𑁄𑀡𑀤𑀡𑁆𑀟𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀬𑀁 𑀯𑀢 𑀦𑁄 𑀅𑀳𑁄𑀲𑀺 𑀇𑀘𑁆𑀙𑀺𑀢𑀁, 𑀬𑀁 𑀆𑀓𑀗𑁆𑀔𑀺𑀢𑀁, 𑀬𑀁 𑀅𑀥𑀺𑀧𑁆𑀧𑁂𑀢𑀁, 𑀬𑀁 𑀅𑀪𑀺𑀧𑀢𑁆𑀣𑀺𑀢𑀁 𑁋 ‘𑀅𑀳𑁄 𑀯𑀢 𑀫𑀁 𑀲𑀫𑀡𑁄 𑀕𑁄𑀢𑀫𑁄 𑀲𑀓𑁂 𑀆𑀘𑀭𑀺𑀬𑀓𑁂 𑀢𑁂𑀯𑀺𑀚𑁆𑀚𑀓𑁂 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬, 𑀅𑀤𑁆𑀥𑀸 𑀯𑀢𑀲𑁆𑀲𑀸𑀳𑀁 𑀘𑀺𑀢𑁆𑀢𑀁 𑀆𑀭𑀸𑀥𑁂𑀬𑁆𑀬𑀁 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑁂𑀦𑀸’𑀢𑀺, 𑀢𑀢𑁆𑀭 𑀫𑀁 𑀲𑀫𑀡𑁄 𑀕𑁄𑀢𑀫𑁄 𑀲𑀓𑁂 𑀆𑀘𑀭𑀺𑀬𑀓𑁂 𑀢𑁂𑀯𑀺𑀚𑁆𑀚𑀓𑁂 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀅𑀤𑁆𑀥𑀸 𑀯𑀢𑀲𑁆𑀲𑀸𑀳𑀁 𑀘𑀺𑀢𑁆𑀢𑀁 𑀆𑀭𑀸𑀥𑁂𑀲𑁆𑀲𑀸𑀫𑀺 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑁂𑀦𑀸’’𑀢𑀺.

𑁩𑁧𑁧. 𑀅𑀣 𑀔𑁄 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀅𑀩𑁆𑀪𑀼𑀦𑁆𑀦𑀸𑀫𑁂𑀢𑁆𑀯𑀸 𑀓𑀸𑀬𑀁 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀧𑀭𑀺𑀲𑀁 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀜𑁆𑀘𑀳𑀺, 𑀪𑁄 𑀕𑁄𑀢𑀫, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀁 𑀧𑀜𑁆𑀜𑀧𑁂𑀦𑁆𑀢𑀺; ‘𑀩𑁆𑀭𑀸𑀳𑁆𑀫𑀡𑁄𑀲𑁆𑀫𑀻’𑀢𑀺 𑀘 𑀯𑀤𑀫𑀸𑀦𑁄 𑀲𑀫𑁆𑀫𑀸 𑀯𑀤𑁂𑀬𑁆𑀬, 𑀦 𑀘 𑀧𑀦 𑀫𑀼𑀲𑀸𑀯𑀸𑀤𑀁 𑀆𑀧𑀚𑁆𑀚𑁂𑀬𑁆𑀬. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀳𑁄𑀢𑀺 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘, 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦; 𑀅𑀚𑁆𑀛𑀸𑀬𑀓𑁄 𑀳𑁄𑀢𑀺 𑀫𑀦𑁆𑀢𑀥𑀭𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀁 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁 𑀧𑀤𑀓𑁄 𑀯𑁂𑀬𑁆𑀬𑀸𑀓𑀭𑀡𑁄 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀯𑀬𑁄; 𑀅𑀪𑀺𑀭𑀽𑀧𑁄 𑀳𑁄𑀢𑀺 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀩𑁆𑀭𑀳𑁆𑀫𑀯𑀡𑁆𑀡𑀻 𑀩𑁆𑀭𑀳𑁆𑀫𑀯𑀘𑁆𑀙𑀲𑀻 𑀅𑀔𑀼𑀤𑁆𑀤𑀸𑀯𑀓𑀸𑀲𑁄 𑀤𑀲𑁆𑀲𑀦𑀸𑀬; 𑀲𑀻𑀮𑀯𑀸 𑀳𑁄𑀢𑀺 𑀯𑀼𑀤𑁆𑀥𑀲𑀻𑀮𑀻 𑀯𑀼𑀤𑁆𑀥𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄; 𑀧𑀡𑁆𑀟𑀺𑀢𑁄 𑀘 𑀳𑁄𑀢𑀺 𑀫𑁂𑀥𑀸𑀯𑀻 𑀧𑀞𑀫𑁄 𑀯𑀸 𑀤𑀼𑀢𑀺𑀬𑁄 𑀯𑀸 𑀲𑀼𑀚𑀁 𑀧𑀕𑁆𑀕𑀡𑁆𑀳𑀦𑁆𑀢𑀸𑀦𑀁. 𑀇𑀫𑁂𑀳𑀺 𑀔𑁄, 𑀪𑁄 𑀕𑁄𑀢𑀫, 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀁 𑀧𑀜𑁆𑀜𑀧𑁂𑀦𑁆𑀢𑀺; ‘𑀩𑁆𑀭𑀸𑀳𑁆𑀫𑀡𑁄𑀲𑁆𑀫𑀻’𑀢𑀺 𑀘 𑀯𑀤𑀫𑀸𑀦𑁄 𑀲𑀫𑁆𑀫𑀸 𑀯𑀤𑁂𑀬𑁆𑀬, 𑀦 𑀘 𑀧𑀦 𑀫𑀼𑀲𑀸𑀯𑀸𑀤𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺.

‘‘𑀇𑀫𑁂𑀲𑀁 𑀧𑀦, 𑀩𑁆𑀭𑀸𑀳𑁆𑀫𑀡, 𑀧𑀜𑁆𑀘𑀦𑁆𑀦𑀁 𑀅𑀗𑁆𑀕𑀸𑀦𑀁 𑀲𑀓𑁆𑀓𑀸 𑀏𑀓𑀁 𑀅𑀗𑁆𑀕𑀁 𑀞𑀧𑀬𑀺𑀢𑁆𑀯𑀸 𑀘𑀢𑀽𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀁 𑀧𑀜𑁆𑀜𑀧𑁂𑀢𑀼𑀁; ‘𑀩𑁆𑀭𑀸𑀳𑁆𑀫𑀡𑁄𑀲𑁆𑀫𑀻’𑀢𑀺 𑀘 𑀯𑀤𑀫𑀸𑀦𑁄 𑀲𑀫𑁆𑀫𑀸 𑀯𑀤𑁂𑀬𑁆𑀬, 𑀦 𑀘 𑀧𑀦 𑀫𑀼𑀲𑀸𑀯𑀸𑀤𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺? ‘‘𑀲𑀓𑁆𑀓𑀸, 𑀪𑁄 𑀕𑁄𑀢𑀫. 𑀇𑀫𑁂𑀲𑀜𑁆𑀳𑀺, 𑀪𑁄 𑀕𑁄𑀢𑀫, 𑀧𑀜𑁆𑀘𑀦𑁆𑀦𑀁 𑀅𑀗𑁆𑀕𑀸𑀦𑀁 𑀯𑀡𑁆𑀡𑀁 𑀞𑀧𑀬𑀸𑀫. 𑀓𑀺𑀜𑁆𑀳𑀺 𑀯𑀡𑁆𑀡𑁄 𑀓𑀭𑀺𑀲𑁆𑀲𑀢𑀺? 𑀬𑀢𑁄 𑀔𑁄, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀳𑁄𑀢𑀺 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦; 𑀅𑀚𑁆𑀛𑀸𑀬𑀓𑁄 𑀘 𑀳𑁄𑀢𑀺 𑀫𑀦𑁆𑀢𑀥𑀭𑁄 𑀘 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀁 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁 𑀧𑀤𑀓𑁄 𑀯𑁂𑀬𑁆𑀬𑀸𑀓𑀭𑀡𑁄 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀯𑀬𑁄; 𑀲𑀻𑀮𑀯𑀸 𑀘 𑀳𑁄𑀢𑀺 𑀯𑀼𑀤𑁆𑀥𑀲𑀻𑀮𑀻 𑀯𑀼𑀤𑁆𑀥𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄; 𑀧𑀡𑁆𑀟𑀺𑀢𑁄 𑀘 𑀳𑁄𑀢𑀺 𑀫𑁂𑀥𑀸𑀯𑀻 𑀧𑀞𑀫𑁄 𑀯𑀸 𑀤𑀼𑀢𑀺𑀬𑁄 𑀯𑀸 𑀲𑀼𑀚𑀁 𑀧𑀕𑁆𑀕𑀡𑁆𑀳𑀦𑁆𑀢𑀸𑀦𑀁. 𑀇𑀫𑁂𑀳𑀺 𑀔𑁄 𑀪𑁄 𑀕𑁄𑀢𑀫 𑀘𑀢𑀽𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀁 𑀧𑀜𑁆𑀜𑀧𑁂𑀦𑁆𑀢𑀺; ‘𑀩𑁆𑀭𑀸𑀳𑁆𑀫𑀡𑁄𑀲𑁆𑀫𑀻’𑀢𑀺 𑀘 𑀯𑀤𑀫𑀸𑀦𑁄 𑀲𑀫𑁆𑀫𑀸 𑀯𑀤𑁂𑀬𑁆𑀬, 𑀦 𑀘 𑀧𑀦 𑀫𑀼𑀲𑀸𑀯𑀸𑀤𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺.

𑁩𑁧𑁨. ‘‘𑀇𑀫𑁂𑀲𑀁 𑀧𑀦, 𑀩𑁆𑀭𑀸𑀳𑁆𑀫𑀡, 𑀘𑀢𑀼𑀦𑁆𑀦𑀁 𑀅𑀗𑁆𑀕𑀸𑀦𑀁 𑀲𑀓𑁆𑀓𑀸 𑀏𑀓𑀁 𑀅𑀗𑁆𑀕𑀁 𑀞𑀧𑀬𑀺𑀢𑁆𑀯𑀸 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀁 𑀧𑀜𑁆𑀜𑀧𑁂𑀢𑀼𑀁; ‘𑀩𑁆𑀭𑀸𑀳𑁆𑀫𑀡𑁄𑀲𑁆𑀫𑀻’𑀢𑀺 𑀘 𑀯𑀤𑀫𑀸𑀦𑁄 𑀲𑀫𑁆𑀫𑀸 𑀯𑀤𑁂𑀬𑁆𑀬, 𑀦 𑀘 𑀧𑀦 𑀫𑀼𑀲𑀸𑀯𑀸𑀤𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺? ‘‘𑀲𑀓𑁆𑀓𑀸, 𑀪𑁄 𑀕𑁄𑀢𑀫. 𑀇𑀫𑁂𑀲𑀜𑁆𑀳𑀺, 𑀪𑁄 𑀕𑁄𑀢𑀫, 𑀘𑀢𑀼𑀦𑁆𑀦𑀁 𑀅𑀗𑁆𑀕𑀸𑀦𑀁 𑀫𑀦𑁆𑀢𑁂 𑀞𑀧𑀬𑀸𑀫. 𑀓𑀺𑀜𑁆𑀳𑀺 𑀫𑀦𑁆𑀢𑀸 𑀓𑀭𑀺𑀲𑁆𑀲𑀦𑁆𑀢𑀺? 𑀬𑀢𑁄 𑀔𑁄, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀳𑁄𑀢𑀺 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦; 𑀲𑀻𑀮𑀯𑀸 𑀘 𑀳𑁄𑀢𑀺 𑀯𑀼𑀤𑁆𑀥𑀲𑀻𑀮𑀻 𑀯𑀼𑀤𑁆𑀥𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄; 𑀧𑀡𑁆𑀟𑀺𑀢𑁄 𑀘 𑀳𑁄𑀢𑀺 𑀫𑁂𑀥𑀸𑀯𑀻 𑀧𑀞𑀫𑁄 𑀯𑀸 𑀤𑀼𑀢𑀺𑀬𑁄 𑀯𑀸 𑀲𑀼𑀚𑀁 𑀧𑀕𑁆𑀕𑀡𑁆𑀳𑀦𑁆𑀢𑀸𑀦𑀁. 𑀇𑀫𑁂𑀳𑀺 𑀔𑁄, 𑀪𑁄 𑀕𑁄𑀢𑀫, 𑀢𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀁 𑀧𑀜𑁆𑀜𑀧𑁂𑀦𑁆𑀢𑀺; ‘𑀩𑁆𑀭𑀸𑀳𑁆𑀫𑀡𑁄𑀲𑁆𑀫𑀻’𑀢𑀺 𑀘 𑀯𑀤𑀫𑀸𑀦𑁄 𑀲𑀫𑁆𑀫𑀸 𑀯𑀤𑁂𑀬𑁆𑀬, 𑀦 𑀘 𑀧𑀦 𑀫𑀼𑀲𑀸𑀯𑀸𑀤𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺.

‘‘𑀇𑀫𑁂𑀲𑀁 𑀧𑀦, 𑀩𑁆𑀭𑀸𑀳𑁆𑀫𑀡, 𑀢𑀺𑀡𑁆𑀡𑀁 𑀅𑀗𑁆𑀕𑀸𑀦𑀁 𑀲𑀓𑁆𑀓𑀸 𑀏𑀓𑀁 𑀅𑀗𑁆𑀕𑀁 𑀞𑀧𑀬𑀺𑀢𑁆𑀯𑀸 𑀤𑁆𑀯𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀁 𑀧𑀜𑁆𑀜𑀧𑁂𑀢𑀼𑀁; ‘𑀩𑁆𑀭𑀸𑀳𑁆𑀫𑀡𑁄𑀲𑁆𑀫𑀻’𑀢𑀺 𑀘 𑀯𑀤𑀫𑀸𑀦𑁄 𑀲𑀫𑁆𑀫𑀸 𑀯𑀤𑁂𑀬𑁆𑀬, 𑀦 𑀘 𑀧𑀦 𑀫𑀼𑀲𑀸𑀯𑀸𑀤𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺? ‘‘𑀲𑀓𑁆𑀓𑀸, 𑀪𑁄 𑀕𑁄𑀢𑀫. 𑀇𑀫𑁂𑀲𑀜𑁆𑀳𑀺, 𑀪𑁄 𑀕𑁄𑀢𑀫, 𑀢𑀺𑀡𑁆𑀡𑀁 𑀅𑀗𑁆𑀕𑀸𑀦𑀁 𑀚𑀸𑀢𑀺𑀁 𑀞𑀧𑀬𑀸𑀫. 𑀓𑀺𑀜𑁆𑀳𑀺 𑀚𑀸𑀢𑀺 𑀓𑀭𑀺𑀲𑁆𑀲𑀢𑀺? 𑀬𑀢𑁄 𑀔𑁄, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑁄 𑀲𑀻𑀮𑀯𑀸 𑀳𑁄𑀢𑀺 𑀯𑀼𑀤𑁆𑀥𑀲𑀻𑀮𑀻 𑀯𑀼𑀤𑁆𑀥𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄; 𑀧𑀡𑁆𑀟𑀺𑀢𑁄 𑀘 𑀳𑁄𑀢𑀺 𑀫𑁂𑀥𑀸𑀯𑀻 𑀧𑀞𑀫𑁄 𑀯𑀸 𑀤𑀼𑀢𑀺𑀬𑁄 𑀯𑀸 𑀲𑀼𑀚𑀁 𑀧𑀕𑁆𑀕𑀡𑁆𑀳𑀦𑁆𑀢𑀸𑀦𑀁. 𑀇𑀫𑁂𑀳𑀺 𑀔𑁄, 𑀪𑁄 𑀕𑁄𑀢𑀫, 𑀤𑁆𑀯𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀁 𑀧𑀜𑁆𑀜𑀧𑁂𑀦𑁆𑀢𑀺; ‘𑀩𑁆𑀭𑀸𑀳𑁆𑀫𑀡𑁄𑀲𑁆𑀫𑀻’𑀢𑀺 𑀘 𑀯𑀤𑀫𑀸𑀦𑁄 𑀲𑀫𑁆𑀫𑀸 𑀯𑀤𑁂𑀬𑁆𑀬, 𑀦 𑀘 𑀧𑀦 𑀫𑀼𑀲𑀸𑀯𑀸𑀤𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺.

𑁩𑁧𑁩. 𑀏𑀯𑀁 𑀯𑀼𑀢𑁆𑀢𑁂, 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀲𑁄𑀡𑀤𑀡𑁆𑀟𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀫𑀸 𑀪𑀯𑀁 𑀲𑁄𑀡𑀤𑀡𑁆𑀟𑁄 𑀏𑀯𑀁 𑀅𑀯𑀘, 𑀫𑀸 𑀪𑀯𑀁 𑀲𑁄𑀡𑀤𑀡𑁆𑀟𑁄 𑀏𑀯𑀁 𑀅𑀯𑀘. 𑀅𑀧𑀯𑀤𑀢𑁂𑀯 𑀪𑀯𑀁 𑀲𑁄𑀡𑀤𑀡𑁆𑀟𑁄 𑀯𑀡𑁆𑀡𑀁, 𑀅𑀧𑀯𑀤𑀢𑀺 𑀫𑀦𑁆𑀢𑁂, 𑀅𑀧𑀯𑀤𑀢𑀺 𑀚𑀸𑀢𑀺𑀁 𑀏𑀓𑀁𑀲𑁂𑀦. 𑀪𑀯𑀁 𑀲𑁄𑀡𑀤𑀡𑁆𑀟𑁄 𑀲𑀫𑀡𑀲𑁆𑀲𑁂𑀯 𑀕𑁄𑀢𑀫𑀲𑁆𑀲 𑀯𑀸𑀤𑀁 𑀅𑀦𑀼𑀧𑀓𑁆𑀔𑀦𑁆𑀤𑀢𑀻’’𑀢𑀺.

𑁩𑁧𑁪. 𑀅𑀣 𑀔𑁄 𑀪𑀕𑀯𑀸 𑀢𑁂 𑀩𑁆𑀭𑀸𑀳𑁆𑀫𑀡𑁂 𑀏𑀢𑀤𑀯𑁄𑀘 𑁋 ‘‘𑀲𑀘𑁂 𑀔𑁄 𑀢𑀼𑀫𑁆𑀳𑀸𑀓𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀏𑀯𑀁 𑀳𑁄𑀢𑀺 𑁋 ‘𑀅𑀧𑁆𑀧𑀲𑁆𑀲𑀼𑀢𑁄 𑀘 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄, 𑀅𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄 𑀘 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄, 𑀤𑀼𑀧𑁆𑀧𑀜𑁆𑀜𑁄 𑀘 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄, 𑀦 𑀘 𑀧𑀳𑁄𑀢𑀺 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀲𑀤𑁆𑀥𑀺𑀁 𑀅𑀲𑁆𑀫𑀺𑀁 𑀯𑀘𑀦𑁂 𑀧𑀝𑀺𑀫𑀦𑁆𑀢𑁂𑀢𑀼’𑀦𑁆𑀢𑀺, 𑀢𑀺𑀝𑁆𑀞𑀢𑀼 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄, 𑀢𑀼𑀫𑁆𑀳𑁂 𑀫𑀬𑀸 𑀲𑀤𑁆𑀥𑀺𑀁 𑀫𑀦𑁆𑀢𑀯𑁆𑀳𑁄 𑀅𑀲𑁆𑀫𑀺𑀁 𑀯𑀘𑀦𑁂. 𑀲𑀘𑁂 𑀧𑀦 𑀢𑀼𑀫𑁆𑀳𑀸𑀓𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀏𑀯𑀁 𑀳𑁄𑀢𑀺 𑁋 ‘𑀩𑀳𑀼𑀲𑁆𑀲𑀼𑀢𑁄 𑀘 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄, 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄 𑀘 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄, 𑀧𑀡𑁆𑀟𑀺𑀢𑁄 𑀘 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄, 𑀧𑀳𑁄𑀢𑀺 𑀘 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀲𑀤𑁆𑀥𑀺𑀁 𑀅𑀲𑁆𑀫𑀺𑀁 𑀯𑀘𑀦𑁂 𑀧𑀝𑀺𑀫𑀦𑁆𑀢𑁂𑀢𑀼’𑀦𑁆𑀢𑀺, 𑀢𑀺𑀝𑁆𑀞𑀣 𑀢𑀼𑀫𑁆𑀳𑁂, 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀫𑀬𑀸 𑀲𑀤𑁆𑀥𑀺𑀁 𑀧𑀝𑀺𑀫𑀦𑁆𑀢𑁂𑀢𑀽’’𑀢𑀺.

𑁩𑁧𑁫. 𑀏𑀯𑀁 𑀯𑀼𑀢𑁆𑀢𑁂, 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀢𑀺𑀝𑁆𑀞𑀢𑀼 𑀪𑀯𑀁 𑀕𑁄𑀢𑀫𑁄, 𑀢𑀼𑀡𑁆𑀳𑀻 𑀪𑀯𑀁 𑀕𑁄𑀢𑀫𑁄 𑀳𑁄𑀢𑀼, 𑀅𑀳𑀫𑁂𑀯 𑀢𑁂𑀲𑀁 𑀲𑀳𑀥𑀫𑁆𑀫𑁂𑀦 𑀧𑀝𑀺𑀯𑀘𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀔𑁄 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀢𑁂 𑀩𑁆𑀭𑀸𑀳𑁆𑀫𑀡𑁂 𑀏𑀢𑀤𑀯𑁄𑀘 𑁋 ‘‘𑀫𑀸 𑀪𑀯𑀦𑁆𑀢𑁄 𑀏𑀯𑀁 𑀅𑀯𑀘𑀼𑀢𑁆𑀣, 𑀫𑀸 𑀪𑀯𑀦𑁆𑀢𑁄 𑀏𑀯𑀁 𑀅𑀯𑀘𑀼𑀢𑁆𑀣 𑁋 ‘𑀅𑀧𑀯𑀤𑀢𑁂𑀯 𑀪𑀯𑀁 𑀲𑁄𑀡𑀤𑀡𑁆𑀟𑁄 𑀯𑀡𑁆𑀡𑀁, 𑀅𑀧𑀯𑀤𑀢𑀺 𑀫𑀦𑁆𑀢𑁂, 𑀅𑀧𑀯𑀤𑀢𑀺 𑀚𑀸𑀢𑀺𑀁 𑀏𑀓𑀁𑀲𑁂𑀦. 𑀪𑀯𑀁 𑀲𑁄𑀡𑀤𑀡𑁆𑀟𑁄 𑀲𑀫𑀡𑀲𑁆𑀲𑁂𑀯 𑀕𑁄𑀢𑀫𑀲𑁆𑀲 𑀯𑀸𑀤𑀁 𑀅𑀦𑀼𑀧𑀓𑁆𑀔𑀦𑁆𑀤𑀢𑀻’𑀢𑀺. 𑀦𑀸𑀳𑀁, 𑀪𑁄, 𑀅𑀧𑀯𑀤𑀸𑀫𑀺 𑀯𑀡𑁆𑀡𑀁 𑀯𑀸 𑀫𑀦𑁆𑀢𑁂 𑀯𑀸 𑀚𑀸𑀢𑀺𑀁 𑀯𑀸’’𑀢𑀺.

𑁩𑁧𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑁄𑀡𑀤𑀡𑁆𑀟𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑁄 𑀅𑀗𑁆𑀕𑀓𑁄 𑀦𑀸𑀫 𑀫𑀸𑀡𑀯𑀓𑁄 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀢𑁂 𑀩𑁆𑀭𑀸𑀳𑁆𑀫𑀡𑁂 𑀏𑀢𑀤𑀯𑁄𑀘 𑁋 ‘‘𑀧𑀲𑁆𑀲𑀦𑁆𑀢𑀺 𑀦𑁄 𑀪𑁄𑀦𑁆𑀢𑁄 𑀇𑀫𑀁 𑀅𑀗𑁆𑀕𑀓𑀁 𑀫𑀸𑀡𑀯𑀓𑀁 𑀅𑀫𑁆𑀳𑀸𑀓𑀁 𑀪𑀸𑀕𑀺𑀦𑁂𑀬𑁆𑀬’’𑀦𑁆𑀢𑀺? ‘‘𑀏𑀯𑀁, 𑀪𑁄’’. ‘‘𑀅𑀗𑁆𑀕𑀓𑁄 𑀔𑁄, 𑀪𑁄, 𑀫𑀸𑀡𑀯𑀓𑁄 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀩𑁆𑀭𑀳𑁆𑀫𑀯𑀡𑁆𑀡𑀻 𑀩𑁆𑀭𑀳𑁆𑀫𑀯𑀘𑁆𑀙𑀲𑀻 𑀅𑀔𑀼𑀤𑁆𑀤𑀸𑀯𑀓𑀸𑀲𑁄 𑀤𑀲𑁆𑀲𑀦𑀸𑀬, 𑀦𑀸𑀲𑁆𑀲 𑀇𑀫𑀺𑀲𑁆𑀲𑀁 𑀧𑀭𑀺𑀲𑀸𑀬𑀁 𑀲𑀫𑀲𑀫𑁄 𑀅𑀢𑁆𑀣𑀺 𑀯𑀡𑁆𑀡𑁂𑀦 𑀞𑀧𑁂𑀢𑁆𑀯𑀸 𑀲𑀫𑀡𑀁 𑀕𑁄𑀢𑀫𑀁. 𑀅𑀗𑁆𑀕𑀓𑁄 𑀔𑁄 𑀫𑀸𑀡𑀯𑀓𑁄 𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄, 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀁 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁 𑀧𑀤𑀓𑁄 𑀯𑁂𑀬𑁆𑀬𑀸𑀓𑀭𑀡𑁄 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀯𑀬𑁄. 𑀅𑀳𑀫𑀲𑁆𑀲 𑀫𑀦𑁆𑀢𑁂 𑀯𑀸𑀘𑁂𑀢𑀸. 𑀅𑀗𑁆𑀕𑀓𑁄 𑀔𑁄 𑀫𑀸𑀡𑀯𑀓𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦. 𑀅𑀳𑀫𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀚𑀸𑀦𑀸𑀫𑀺. 𑀅𑀗𑁆𑀕𑀓𑁄 𑀔𑁄 𑀫𑀸𑀡𑀯𑀓𑁄 𑀧𑀸𑀡𑀫𑁆𑀧𑀺 𑀳𑀦𑁂𑀬𑁆𑀬, 𑀅𑀤𑀺𑀦𑁆𑀦𑀫𑁆𑀧𑀺 𑀆𑀤𑀺𑀬𑁂𑀬𑁆𑀬, 𑀧𑀭𑀤𑀸𑀭𑀫𑁆𑀧𑀺 𑀕𑀘𑁆𑀙𑁂𑀬𑁆𑀬, 𑀫𑀼𑀲𑀸𑀯𑀸𑀤𑀫𑁆𑀧𑀺 𑀪𑀡𑁂𑀬𑁆𑀬, 𑀫𑀚𑁆𑀚𑀫𑁆𑀧𑀺 𑀧𑀺𑀯𑁂𑀬𑁆𑀬, 𑀏𑀢𑁆𑀣 𑀤𑀸𑀦𑀺, 𑀪𑁄, 𑀓𑀺𑀁 𑀯𑀡𑁆𑀡𑁄 𑀓𑀭𑀺𑀲𑁆𑀲𑀢𑀺, 𑀓𑀺𑀁 𑀫𑀦𑁆𑀢𑀸, 𑀓𑀺𑀁 𑀚𑀸𑀢𑀺? 𑀬𑀢𑁄 𑀔𑁄, 𑀪𑁄, 𑀩𑁆𑀭𑀸𑀳𑁆𑀫𑀡𑁄 𑀲𑀻𑀮𑀯𑀸 𑀘 𑀳𑁄𑀢𑀺 𑀯𑀼𑀤𑁆𑀥𑀲𑀻𑀮𑀻 𑀯𑀼𑀤𑁆𑀥𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀧𑀡𑁆𑀟𑀺𑀢𑁄 𑀘 𑀳𑁄𑀢𑀺 𑀫𑁂𑀥𑀸𑀯𑀻 𑀧𑀞𑀫𑁄 𑀯𑀸 𑀤𑀼𑀢𑀺𑀬𑁄 𑀯𑀸 𑀲𑀼𑀚𑀁 𑀧𑀕𑁆𑀕𑀡𑁆𑀳𑀦𑁆𑀢𑀸𑀦𑀁. 𑀇𑀫𑁂𑀳𑀺 𑀔𑁄, 𑀪𑁄, 𑀤𑁆𑀯𑀻𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀁 𑀧𑀜𑁆𑀜𑀧𑁂𑀦𑁆𑀢𑀺; ‘𑀩𑁆𑀭𑀸𑀳𑁆𑀫𑀡𑁄𑀲𑁆𑀫𑀻’𑀢𑀺 𑀘 𑀯𑀤𑀫𑀸𑀦𑁄 𑀲𑀫𑁆𑀫𑀸 𑀯𑀤𑁂𑀬𑁆𑀬, 𑀦 𑀘 𑀧𑀦 𑀫𑀼𑀲𑀸𑀯𑀸𑀤𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺.

𑀲𑀻𑀮𑀧𑀜𑁆𑀜𑀸𑀓𑀣𑀸

𑁩𑁧𑁭. ‘‘𑀇𑀫𑁂𑀲𑀁 𑀧𑀦, 𑀩𑁆𑀭𑀸𑀳𑁆𑀫𑀡, 𑀤𑁆𑀯𑀺𑀦𑁆𑀦𑀁 𑀅𑀗𑁆𑀕𑀸𑀦𑀁 𑀲𑀓𑁆𑀓𑀸 𑀏𑀓𑀁 𑀅𑀗𑁆𑀕𑀁 𑀞𑀧𑀬𑀺𑀢𑁆𑀯𑀸 𑀏𑀓𑁂𑀦 𑀅𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀁 𑀧𑀜𑁆𑀜𑀧𑁂𑀢𑀼𑀁; ‘𑀩𑁆𑀭𑀸𑀳𑁆𑀫𑀡𑁄𑀲𑁆𑀫𑀻’𑀢𑀺 𑀘 𑀯𑀤𑀫𑀸𑀦𑁄 𑀲𑀫𑁆𑀫𑀸 𑀯𑀤𑁂𑀬𑁆𑀬, 𑀦 𑀘 𑀧𑀦 𑀫𑀼𑀲𑀸𑀯𑀸𑀤𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫. 𑀲𑀻𑀮𑀧𑀭𑀺𑀥𑁄𑀢𑀸 𑀳𑀺, 𑀪𑁄 𑀕𑁄𑀢𑀫, 𑀧𑀜𑁆𑀜𑀸; 𑀧𑀜𑁆𑀜𑀸𑀧𑀭𑀺𑀥𑁄𑀢𑀁 𑀲𑀻𑀮𑀁. 𑀬𑀢𑁆𑀣 𑀲𑀻𑀮𑀁 𑀢𑀢𑁆𑀣 𑀧𑀜𑁆𑀜𑀸, 𑀬𑀢𑁆𑀣 𑀧𑀜𑁆𑀜𑀸 𑀢𑀢𑁆𑀣 𑀲𑀻𑀮𑀁. 𑀲𑀻𑀮𑀯𑀢𑁄 𑀧𑀜𑁆𑀜𑀸, 𑀧𑀜𑁆𑀜𑀯𑀢𑁄 𑀲𑀻𑀮𑀁. 𑀲𑀻𑀮𑀧𑀜𑁆𑀜𑀸𑀡𑀜𑁆𑀘 𑀧𑀦 𑀮𑁄𑀓𑀲𑁆𑀫𑀺𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀕𑁄𑀢𑀫, 𑀳𑀢𑁆𑀣𑁂𑀦 𑀯𑀸 𑀳𑀢𑁆𑀣𑀁 𑀥𑁄𑀯𑁂𑀬𑁆𑀬, 𑀧𑀸𑀤𑁂𑀦 𑀯𑀸 𑀧𑀸𑀤𑀁 𑀥𑁄𑀯𑁂𑀬𑁆𑀬; 𑀏𑀯𑀫𑁂𑀯 𑀔𑁄, 𑀪𑁄 𑀕𑁄𑀢𑀫, 𑀲𑀻𑀮𑀧𑀭𑀺𑀥𑁄𑀢𑀸 𑀧𑀜𑁆𑀜𑀸, 𑀧𑀜𑁆𑀜𑀸𑀧𑀭𑀺𑀥𑁄𑀢𑀁 𑀲𑀻𑀮𑀁. 𑀬𑀢𑁆𑀣 𑀲𑀻𑀮𑀁 𑀢𑀢𑁆𑀣 𑀧𑀜𑁆𑀜𑀸, 𑀬𑀢𑁆𑀣 𑀧𑀜𑁆𑀜𑀸 𑀢𑀢𑁆𑀣 𑀲𑀻𑀮𑀁. 𑀲𑀻𑀮𑀯𑀢𑁄 𑀧𑀜𑁆𑀜𑀸, 𑀧𑀜𑁆𑀜𑀯𑀢𑁄 𑀲𑀻𑀮𑀁. 𑀲𑀻𑀮𑀧𑀜𑁆𑀜𑀸𑀡𑀜𑁆𑀘 𑀧𑀦 𑀮𑁄𑀓𑀲𑁆𑀫𑀺𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺. ‘‘𑀏𑀯𑀫𑁂𑀢𑀁, 𑀩𑁆𑀭𑀸𑀳𑁆𑀫𑀡, 𑀏𑀯𑀫𑁂𑀢𑀁, 𑀩𑁆𑀭𑀸𑀳𑁆𑀫𑀡, 𑀲𑀻𑀮𑀧𑀭𑀺𑀥𑁄𑀢𑀸 𑀳𑀺, 𑀩𑁆𑀭𑀸𑀳𑁆𑀫𑀡, 𑀧𑀜𑁆𑀜𑀸, 𑀧𑀜𑁆𑀜𑀸𑀧𑀭𑀺𑀥𑁄𑀢𑀁 𑀲𑀻𑀮𑀁. 𑀬𑀢𑁆𑀣 𑀲𑀻𑀮𑀁 𑀢𑀢𑁆𑀣 𑀧𑀜𑁆𑀜𑀸, 𑀬𑀢𑁆𑀣 𑀧𑀜𑁆𑀜𑀸 𑀢𑀢𑁆𑀣 𑀲𑀻𑀮𑀁. 𑀲𑀻𑀮𑀯𑀢𑁄 𑀧𑀜𑁆𑀜𑀸, 𑀧𑀜𑁆𑀜𑀯𑀢𑁄 𑀲𑀻𑀮𑀁. 𑀲𑀻𑀮𑀧𑀜𑁆𑀜𑀸𑀡𑀜𑁆𑀘 𑀧𑀦 𑀮𑁄𑀓𑀲𑁆𑀫𑀺𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡, 𑀳𑀢𑁆𑀣𑁂𑀦 𑀯𑀸 𑀳𑀢𑁆𑀣𑀁 𑀥𑁄𑀯𑁂𑀬𑁆𑀬, 𑀧𑀸𑀤𑁂𑀦 𑀯𑀸 𑀧𑀸𑀤𑀁 𑀥𑁄𑀯𑁂𑀬𑁆𑀬; 𑀏𑀯𑀫𑁂𑀯 𑀔𑁄, 𑀩𑁆𑀭𑀸𑀳𑁆𑀫𑀡, 𑀲𑀻𑀮𑀧𑀭𑀺𑀥𑁄𑀢𑀸 𑀧𑀜𑁆𑀜𑀸, 𑀧𑀜𑁆𑀜𑀸𑀧𑀭𑀺𑀥𑁄𑀢𑀁 𑀲𑀻𑀮𑀁. 𑀬𑀢𑁆𑀣 𑀲𑀻𑀮𑀁 𑀢𑀢𑁆𑀣 𑀧𑀜𑁆𑀜𑀸, 𑀬𑀢𑁆𑀣 𑀧𑀜𑁆𑀜𑀸 𑀢𑀢𑁆𑀣 𑀲𑀻𑀮𑀁. 𑀲𑀻𑀮𑀯𑀢𑁄 𑀧𑀜𑁆𑀜𑀸, 𑀧𑀜𑁆𑀜𑀯𑀢𑁄 𑀲𑀻𑀮𑀁. 𑀲𑀻𑀮𑀧𑀜𑁆𑀜𑀸𑀡𑀜𑁆𑀘 𑀧𑀦 𑀮𑁄𑀓𑀲𑁆𑀫𑀺𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺.

𑁩𑁧𑁮. ‘‘𑀓𑀢𑀫𑀁 𑀧𑀦 𑀢𑀁, 𑀩𑁆𑀭𑀸𑀳𑁆𑀫𑀡, 𑀲𑀻𑀮𑀁? 𑀓𑀢𑀫𑀸 𑀲𑀸 𑀧𑀜𑁆𑀜𑀸’’𑀢𑀺? ‘‘𑀏𑀢𑁆𑀢𑀓𑀧𑀭𑀫𑀸𑀯 𑀫𑀬𑀁, 𑀪𑁄 𑀕𑁄𑀢𑀫, 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂. 𑀲𑀸𑀥𑀼 𑀯𑀢 𑀪𑀯𑀦𑁆𑀢𑀁𑀬𑁂𑀯 𑀕𑁄𑀢𑀫𑀁 𑀧𑀝𑀺𑀪𑀸𑀢𑀼 𑀏𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄’’𑀢𑀺. ‘‘𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡, 𑀲𑀼𑀡𑁄𑀳𑀺; 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀳𑀺; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀇𑀥, 𑀩𑁆𑀭𑀸𑀳𑁆𑀫𑀡, 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… (𑀬𑀣𑀸 𑁧𑁯𑁦-𑁨𑁧𑁨 𑀅𑀦𑀼𑀘𑁆𑀙𑁂𑀤𑁂𑀲𑀼 𑀢𑀣𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁). 𑀏𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺. 𑀇𑀤𑀁 𑀔𑁄 𑀢𑀁, 𑀩𑁆𑀭𑀸𑀳𑁆𑀫𑀡, 𑀲𑀻𑀮𑀁…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺…𑀧𑁂… 𑀜𑀸𑀡𑀤𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺, 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀧𑀜𑁆𑀜𑀸𑀬…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀺, 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀧𑀜𑁆𑀜𑀸𑀬 𑀅𑀬𑀁 𑀔𑁄 𑀲𑀸, 𑀩𑁆𑀭𑀸𑀳𑁆𑀫𑀡, 𑀧𑀜𑁆𑀜𑀸’’𑀢𑀺.

𑀲𑁄𑀡𑀤𑀡𑁆𑀟𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸

𑁩𑁧𑁯. 𑀏𑀯𑀁 𑀯𑀼𑀢𑁆𑀢𑁂, 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫. 𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀕𑁄𑀢𑀫, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬, ‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’𑀢𑀺; 𑀏𑀯𑀫𑁂𑀯𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀥𑀫𑁆𑀫𑀜𑁆𑀘, 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢𑀁. 𑀅𑀥𑀺𑀯𑀸𑀲𑁂𑀢𑀼 𑀘 𑀫𑁂 𑀪𑀯𑀁 𑀕𑁄𑀢𑀫𑁄 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦.

𑁩𑁨𑁦. 𑀅𑀣 𑀔𑁄 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀲𑀓𑁂 𑀦𑀺𑀯𑁂𑀲𑀦𑁂 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀓𑀸𑀮𑁄, 𑀪𑁄 𑀕𑁄𑀢𑀫, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀲𑁄𑀡𑀤𑀡𑁆𑀟𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀺 𑀲𑀫𑁆𑀧𑀯𑀸𑀭𑁂𑀲𑀺.

𑁩𑁨𑁧. 𑀅𑀣 𑀔𑁄 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀅𑀜𑁆𑀜𑀢𑀭𑀁 𑀦𑀻𑀘𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄𑀡𑀤𑀡𑁆𑀟𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀜𑁆𑀘𑁂𑀯 𑀔𑁄 𑀧𑀦, 𑀪𑁄 𑀕𑁄𑀢𑀫, 𑀧𑀭𑀺𑀲𑀕𑀢𑁄 𑀲𑀫𑀸𑀦𑁄 𑀆𑀲𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀅𑀪𑀺𑀯𑀸𑀤𑁂𑀬𑁆𑀬𑀁, 𑀢𑁂𑀦 𑀫𑀁 𑀲𑀸 𑀧𑀭𑀺𑀲𑀸 𑀧𑀭𑀺𑀪𑀯𑁂𑀬𑁆𑀬. 𑀬𑀁 𑀔𑁄 𑀧𑀦 𑀲𑀸 𑀧𑀭𑀺𑀲𑀸 𑀧𑀭𑀺𑀪𑀯𑁂𑀬𑁆𑀬, 𑀬𑀲𑁄𑀧𑀺 𑀢𑀲𑁆𑀲 𑀳𑀸𑀬𑁂𑀣. 𑀬𑀲𑁆𑀲 𑀔𑁄 𑀧𑀦 𑀬𑀲𑁄 𑀳𑀸𑀬𑁂𑀣, 𑀪𑁄𑀕𑀸𑀧𑀺 𑀢𑀲𑁆𑀲 𑀳𑀸𑀬𑁂𑀬𑁆𑀬𑀼𑀁. 𑀬𑀲𑁄𑀮𑀤𑁆𑀥𑀸 𑀔𑁄 𑀧𑀦𑀫𑁆𑀳𑀸𑀓𑀁 𑀪𑁄𑀕𑀸. 𑀅𑀳𑀜𑁆𑀘𑁂𑀯 𑀔𑁄 𑀧𑀦, 𑀪𑁄 𑀕𑁄𑀢𑀫, 𑀧𑀭𑀺𑀲𑀕𑀢𑁄 𑀲𑀫𑀸𑀦𑁄 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑁂𑀬𑁆𑀬𑀁, 𑀆𑀲𑀦𑀸 𑀫𑁂 𑀢𑀁 𑀪𑀯𑀁 𑀕𑁄𑀢𑀫𑁄 𑀧𑀘𑁆𑀘𑀼𑀝𑁆𑀞𑀸𑀦𑀁 𑀥𑀸𑀭𑁂𑀢𑀼. 𑀅𑀳𑀜𑁆𑀘𑁂𑀯 𑀔𑁄 𑀧𑀦, 𑀪𑁄 𑀕𑁄𑀢𑀫, 𑀧𑀭𑀺𑀲𑀕𑀢𑁄 𑀲𑀫𑀸𑀦𑁄 𑀯𑁂𑀞𑀦𑀁 𑀑𑀫𑀼𑀜𑁆𑀘𑁂𑀬𑁆𑀬𑀁, 𑀲𑀺𑀭𑀲𑀸 𑀫𑁂 𑀢𑀁 𑀪𑀯𑀁 𑀕𑁄𑀢𑀫𑁄 𑀅𑀪𑀺𑀯𑀸𑀤𑀦𑀁 𑀥𑀸𑀭𑁂𑀢𑀼. 𑀅𑀳𑀜𑁆𑀘𑁂𑀯 𑀔𑁄 𑀧𑀦, 𑀪𑁄 𑀕𑁄𑀢𑀫, 𑀬𑀸𑀦𑀕𑀢𑁄 𑀲𑀫𑀸𑀦𑁄 𑀬𑀸𑀦𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀅𑀪𑀺𑀯𑀸𑀤𑁂𑀬𑁆𑀬𑀁, 𑀢𑁂𑀦 𑀫𑀁 𑀲𑀸 𑀧𑀭𑀺𑀲𑀸 𑀧𑀭𑀺𑀪𑀯𑁂𑀬𑁆𑀬. 𑀬𑀁 𑀔𑁄 𑀧𑀦 𑀲𑀸 𑀧𑀭𑀺𑀲𑀸 𑀧𑀭𑀺𑀪𑀯𑁂𑀬𑁆𑀬, 𑀬𑀲𑁄𑀧𑀺 𑀢𑀲𑁆𑀲 𑀳𑀸𑀬𑁂𑀣, 𑀬𑀲𑁆𑀲 𑀔𑁄 𑀧𑀦 𑀬𑀲𑁄 𑀳𑀸𑀬𑁂𑀣, 𑀪𑁄𑀕𑀸𑀧𑀺 𑀢𑀲𑁆𑀲 𑀳𑀸𑀬𑁂𑀬𑁆𑀬𑀼𑀁. 𑀬𑀲𑁄𑀮𑀤𑁆𑀥𑀸 𑀔𑁄 𑀧𑀦𑀫𑁆𑀳𑀸𑀓𑀁 𑀪𑁄𑀕𑀸. 𑀅𑀳𑀜𑁆𑀘𑁂𑀯 𑀔𑁄 𑀧𑀦, 𑀪𑁄 𑀕𑁄𑀢𑀫, 𑀬𑀸𑀦𑀕𑀢𑁄 𑀲𑀫𑀸𑀦𑁄 𑀧𑀢𑁄𑀤𑀮𑀝𑁆𑀞𑀺𑀁 𑀅𑀩𑁆𑀪𑀼𑀦𑁆𑀦𑀸𑀫𑁂𑀬𑁆𑀬𑀁, 𑀬𑀸𑀦𑀸 𑀫𑁂 𑀢𑀁 𑀪𑀯𑀁 𑀕𑁄𑀢𑀫𑁄 𑀧𑀘𑁆𑀘𑁄𑀭𑁄𑀳𑀦𑀁 𑀥𑀸𑀭𑁂𑀢𑀼. 𑀅𑀳𑀜𑁆𑀘𑁂𑀯 𑀔𑁄 𑀧𑀦, 𑀪𑁄 𑀕𑁄𑀢𑀫, 𑀬𑀸𑀦𑀕𑀢𑁄 𑀲𑀫𑀸𑀦𑁄 𑀙𑀢𑁆𑀢𑀁 𑀅𑀧𑀦𑀸𑀫𑁂𑀬𑁆𑀬𑀁, 𑀲𑀺𑀭𑀲𑀸 𑀫𑁂 𑀢𑀁 𑀪𑀯𑀁 𑀕𑁄𑀢𑀫𑁄 𑀅𑀪𑀺𑀯𑀸𑀤𑀦𑀁 𑀥𑀸𑀭𑁂𑀢𑀽’’𑀢𑀺.

𑁩𑁨𑁨. 𑀅𑀣 𑀔𑁄 𑀪𑀕𑀯𑀸 𑀲𑁄𑀡𑀤𑀡𑁆𑀟𑀁 𑀩𑁆𑀭𑀸𑀳𑁆𑀫𑀡𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀻𑀢𑀺.

𑀲𑁄𑀡𑀤𑀡𑁆𑀟𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀘𑀢𑀼𑀢𑁆𑀣𑀁.

𑁫. 𑀓𑀽𑀝𑀤𑀦𑁆𑀢𑀲𑀼𑀢𑁆𑀢𑀁

𑀔𑀸𑀡𑀼𑀫𑀢𑀓𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸

𑁩𑁨𑁩. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀫𑀕𑀥𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀬𑁂𑀦 𑀔𑀸𑀡𑀼𑀫𑀢𑀁 𑀦𑀸𑀫 𑀫𑀕𑀥𑀸𑀦𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁄 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀔𑀸𑀡𑀼𑀫𑀢𑁂 𑀯𑀺𑀳𑀭𑀢𑀺 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑀽𑀝𑀤𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀔𑀸𑀡𑀼𑀫𑀢𑀁 𑀅𑀚𑁆𑀛𑀸𑀯𑀲𑀢𑀺 𑀲𑀢𑁆𑀢𑀼𑀲𑁆𑀲𑀤𑀁 𑀲𑀢𑀺𑀡𑀓𑀝𑁆𑀞𑁄𑀤𑀓𑀁 𑀲𑀥𑀜𑁆𑀜𑀁 𑀭𑀸𑀚𑀪𑁄𑀕𑁆𑀕𑀁 𑀭𑀜𑁆𑀜𑀸 𑀫𑀸𑀕𑀥𑁂𑀦 𑀲𑁂𑀦𑀺𑀬𑁂𑀦 𑀩𑀺𑀫𑁆𑀩𑀺𑀲𑀸𑀭𑁂𑀦 𑀤𑀺𑀦𑁆𑀦𑀁 𑀭𑀸𑀚𑀤𑀸𑀬𑀁 𑀩𑁆𑀭𑀳𑁆𑀫𑀤𑁂𑀬𑁆𑀬𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑀽𑀝𑀤𑀦𑁆𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀫𑀳𑀸𑀬𑀜𑁆𑀜𑁄 𑀉𑀧𑀓𑁆𑀔𑀝𑁄 𑀳𑁄𑀢𑀺. 𑀲𑀢𑁆𑀢 𑀘 𑀉𑀲𑀪𑀲𑀢𑀸𑀦𑀺 𑀲𑀢𑁆𑀢 𑀘 𑀯𑀘𑁆𑀙𑀢𑀭𑀲𑀢𑀸𑀦𑀺 𑀲𑀢𑁆𑀢 𑀘 𑀯𑀘𑁆𑀙𑀢𑀭𑀻𑀲𑀢𑀸𑀦𑀺 𑀲𑀢𑁆𑀢 𑀘 𑀅𑀚𑀲𑀢𑀸𑀦𑀺 𑀲𑀢𑁆𑀢 𑀘 𑀉𑀭𑀩𑁆𑀪𑀲𑀢𑀸𑀦𑀺 𑀣𑀽𑀡𑀽𑀧𑀦𑀻𑀢𑀸𑀦𑀺 𑀳𑁄𑀦𑁆𑀢𑀺 𑀬𑀜𑁆𑀜𑀢𑁆𑀣𑀸𑀬.

𑁩𑁨𑁪. 𑀅𑀲𑁆𑀲𑁄𑀲𑀼𑀁 𑀔𑁄 𑀔𑀸𑀡𑀼𑀫𑀢𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑁋 ‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀫𑀕𑀥𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀔𑀸𑀡𑀼𑀫𑀢𑀁 𑀅𑀦𑀼𑀧𑁆𑀧𑀢𑁆𑀢𑁄 𑀔𑀸𑀡𑀼𑀫𑀢𑁂 𑀯𑀺𑀳𑀭𑀢𑀺 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀁. 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀲𑁄 𑀇𑀫𑀁 𑀮𑁄𑀓𑀁 𑀲𑀤𑁂𑀯𑀓𑀁 𑀲𑀫𑀸𑀭𑀓𑀁 𑀲𑀩𑁆𑀭𑀳𑁆𑀫𑀓𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀲𑀸𑀥𑀼 𑀔𑁄 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻’’𑀢𑀺.

𑁩𑁨𑁫. 𑀅𑀣 𑀔𑁄 𑀔𑀸𑀡𑀼𑀫𑀢𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀔𑀸𑀡𑀼𑀫𑀢𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀗𑁆𑀖𑀲𑀗𑁆𑀖𑀻 𑀕𑀡𑀻𑀪𑀽𑀢𑀸 𑀬𑁂𑀦 𑀅𑀫𑁆𑀩𑀮𑀝𑁆𑀞𑀺𑀓𑀸 𑀢𑁂𑀦𑀼𑀧𑀲𑀗𑁆𑀓𑀫𑀦𑁆𑀢𑀺.

𑁩𑁨𑁬. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑀽𑀝𑀤𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀉𑀧𑀭𑀺𑀧𑀸𑀲𑀸𑀤𑁂 𑀤𑀺𑀯𑀸𑀲𑁂𑀬𑁆𑀬𑀁 𑀉𑀧𑀕𑀢𑁄 𑀳𑁄𑀢𑀺. 𑀅𑀤𑁆𑀤𑀲𑀸 𑀔𑁄 𑀓𑀽𑀝𑀤𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀔𑀸𑀡𑀼𑀫𑀢𑀓𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀔𑀸𑀡𑀼𑀫𑀢𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀗𑁆𑀖𑀲𑀗𑁆𑀖𑀻 𑀕𑀡𑀻𑀪𑀽𑀢𑁂 𑀬𑁂𑀦 𑀅𑀫𑁆𑀩𑀮𑀝𑁆𑀞𑀺𑀓𑀸 𑀢𑁂𑀦𑀼𑀧𑀲𑀗𑁆𑀓𑀫𑀦𑁆𑀢𑁂. 𑀤𑀺𑀲𑁆𑀯𑀸 𑀔𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀦𑀼 𑀔𑁄, 𑀪𑁄 𑀔𑀢𑁆𑀢𑁂, 𑀔𑀸𑀡𑀼𑀫𑀢𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀔𑀸𑀡𑀼𑀫𑀢𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀗𑁆𑀖𑀲𑀗𑁆𑀖𑀻 𑀕𑀡𑀻𑀪𑀽𑀢𑀸 𑀬𑁂𑀦 𑀅𑀫𑁆𑀩𑀮𑀝𑁆𑀞𑀺𑀓𑀸 𑀢𑁂𑀦𑀼𑀧𑀲𑀗𑁆𑀓𑀫𑀦𑁆𑀢𑀻’’𑀢𑀺?

𑁩𑁨𑁭. ‘‘𑀅𑀢𑁆𑀣𑀺 𑀔𑁄, 𑀪𑁄, 𑀲𑀫𑀡𑁄 𑀕𑁄𑀢𑀫𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀫𑀕𑀥𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀔𑀸𑀡𑀼𑀫𑀢𑀁 𑀅𑀦𑀼𑀧𑁆𑀧𑀢𑁆𑀢𑁄, 𑀔𑀸𑀡𑀼𑀫𑀢𑁂 𑀯𑀺𑀳𑀭𑀢𑀺 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀁. 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀢𑀫𑁂𑀢𑁂 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀦𑁆𑀢𑀻’’𑀢𑀺.

𑁩𑁨𑁮. 𑀅𑀣 𑀔𑁄 𑀓𑀽𑀝𑀤𑀦𑁆𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀼𑀢𑀁 𑀔𑁄 𑀧𑀦 𑀫𑁂𑀢𑀁 𑁋 ‘𑀲𑀫𑀡𑁄 𑀕𑁄𑀢𑀫𑁄 𑀢𑀺𑀯𑀺𑀥𑀁 𑀬𑀜𑁆𑀜𑀲𑀫𑁆𑀧𑀤𑀁 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀁 𑀚𑀸𑀦𑀸𑀢𑀻’𑀢𑀺. 𑀦 𑀔𑁄 𑀧𑀦𑀸𑀳𑀁 𑀚𑀸𑀦𑀸𑀫𑀺 𑀢𑀺𑀯𑀺𑀥𑀁 𑀬𑀜𑁆𑀜𑀲𑀫𑁆𑀧𑀤𑀁 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀁. 𑀇𑀘𑁆𑀙𑀸𑀫𑀺 𑀘𑀸𑀳𑀁 𑀫𑀳𑀸𑀬𑀜𑁆𑀜𑀁 𑀬𑀚𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀲𑀫𑀡𑀁 𑀕𑁄𑀢𑀫𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀺𑀯𑀺𑀥𑀁 𑀬𑀜𑁆𑀜𑀲𑀫𑁆𑀧𑀤𑀁 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀁 𑀧𑀼𑀘𑁆𑀙𑁂𑀬𑁆𑀬’’𑀦𑁆𑀢𑀺.

𑁩𑁨𑁯. 𑀅𑀣 𑀔𑁄 𑀓𑀽𑀝𑀤𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀔𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦 𑀳𑀺, 𑀪𑁄 𑀔𑀢𑁆𑀢𑁂, 𑀬𑁂𑀦 𑀔𑀸𑀡𑀼𑀫𑀢𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀢𑁂𑀦𑀼𑀧𑀲𑀗𑁆𑀓𑀫. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀔𑀸𑀡𑀼𑀫𑀢𑀓𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀏𑀯𑀁 𑀯𑀤𑁂𑀳𑀺 𑁋 ‘𑀓𑀽𑀝𑀤𑀦𑁆𑀢𑁄, 𑀪𑁄, 𑀩𑁆𑀭𑀸𑀳𑁆𑀫𑀡𑁄 𑀏𑀯𑀫𑀸𑀳 𑁋 ‘‘𑀆𑀕𑀫𑁂𑀦𑁆𑀢𑀼 𑀓𑀺𑀭 𑀪𑀯𑀦𑁆𑀢𑁄, 𑀓𑀽𑀝𑀤𑀦𑁆𑀢𑁄𑀧𑀺 𑀩𑁆𑀭𑀸𑀳𑁆𑀫𑀡𑁄 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀢𑀻’’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀲𑁄 𑀔𑀢𑁆𑀢𑀸 𑀓𑀽𑀝𑀤𑀦𑁆𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀔𑀸𑀡𑀼𑀫𑀢𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀔𑀸𑀡𑀼𑀫𑀢𑀓𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀏𑀢𑀤𑀯𑁄𑀘 𑁋 ‘‘𑀓𑀽𑀝𑀤𑀦𑁆𑀢𑁄, 𑀪𑁄, 𑀩𑁆𑀭𑀸𑀳𑁆𑀫𑀡𑁄 𑀏𑀯𑀫𑀸𑀳 𑁋 ‘𑀆𑀕𑀫𑁂𑀦𑁆𑀢𑀼 𑀓𑀺𑀭 𑀪𑁄𑀦𑁆𑀢𑁄, 𑀓𑀽𑀝𑀤𑀦𑁆𑀢𑁄𑀧𑀺 𑀩𑁆𑀭𑀸𑀳𑁆𑀫𑀡𑁄 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀢𑀻’’’𑀢𑀺.

𑀓𑀽𑀝𑀤𑀦𑁆𑀢𑀕𑀼𑀡𑀓𑀣𑀸

𑁩𑁩𑁦. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀦𑁂𑀓𑀸𑀦𑀺 𑀩𑁆𑀭𑀸𑀳𑁆𑀫𑀡𑀲𑀢𑀸𑀦𑀺 𑀔𑀸𑀡𑀼𑀫𑀢𑁂 𑀧𑀝𑀺𑀯𑀲𑀦𑁆𑀢𑀺 𑁋 ‘‘𑀓𑀽𑀝𑀤𑀦𑁆𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀫𑀳𑀸𑀬𑀜𑁆𑀜𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀸’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀢𑁂 𑀩𑁆𑀭𑀸𑀳𑁆𑀫𑀡𑀸 𑁋 ‘‘𑀓𑀽𑀝𑀤𑀦𑁆𑀢𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀬𑁂𑀦 𑀓𑀽𑀝𑀤𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼.

𑁩𑁩𑁧. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀽𑀝𑀤𑀦𑁆𑀢𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀲𑀘𑁆𑀘𑀁 𑀓𑀺𑀭 𑀪𑀯𑀁 𑀓𑀽𑀝𑀤𑀦𑁆𑀢𑁄 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀢𑀻’’𑀢𑀺? ‘‘𑀏𑀯𑀁 𑀔𑁄 𑀫𑁂, 𑀪𑁄, 𑀳𑁄𑀢𑀺 𑁋 ‘𑀅𑀳𑀫𑁆𑀧𑀺 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀻’’’𑀢𑀺.

‘‘𑀫𑀸 𑀪𑀯𑀁 𑀓𑀽𑀝𑀤𑀦𑁆𑀢𑁄 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺. 𑀦 𑀅𑀭𑀳𑀢𑀺 𑀪𑀯𑀁 𑀓𑀽𑀝𑀤𑀦𑁆𑀢𑁄 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁. 𑀲𑀘𑁂 𑀪𑀯𑀁 𑀓𑀽𑀝𑀤𑀦𑁆𑀢𑁄 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀢𑀺, 𑀪𑁄𑀢𑁄 𑀓𑀽𑀝𑀤𑀦𑁆𑀢𑀲𑁆𑀲 𑀬𑀲𑁄 𑀳𑀸𑀬𑀺𑀲𑁆𑀲𑀢𑀺, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀬𑀲𑁄 𑀅𑀪𑀺𑀯𑀟𑁆𑀠𑀺𑀲𑁆𑀲𑀢𑀺. 𑀬𑀫𑁆𑀧𑀺 𑀪𑁄𑀢𑁄 𑀓𑀽𑀝𑀤𑀦𑁆𑀢𑀲𑁆𑀲 𑀬𑀲𑁄 𑀳𑀸𑀬𑀺𑀲𑁆𑀲𑀢𑀺, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀬𑀲𑁄 𑀅𑀪𑀺𑀯𑀟𑁆𑀠𑀺𑀲𑁆𑀲𑀢𑀺, 𑀇𑀫𑀺𑀦𑀸𑀧𑀗𑁆𑀕𑁂𑀦 𑀦 𑀅𑀭𑀳𑀢𑀺 𑀪𑀯𑀁 𑀓𑀽𑀝𑀤𑀦𑁆𑀢𑁄 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁. 𑀲𑀫𑀡𑁄 𑀢𑁆𑀯𑁂𑀯 𑀕𑁄𑀢𑀫𑁄 𑀅𑀭𑀳𑀢𑀺 𑀪𑀯𑀦𑁆𑀢𑀁 𑀓𑀽𑀝𑀤𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁.

‘‘𑀪𑀯𑀜𑁆𑀳𑀺 𑀓𑀽𑀝𑀤𑀦𑁆𑀢𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦. 𑀬𑀫𑁆𑀧𑀺 𑀪𑀯𑀁 𑀓𑀽𑀝𑀤𑀦𑁆𑀢𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦, 𑀇𑀫𑀺𑀦𑀸𑀧𑀗𑁆𑀕𑁂𑀦 𑀦 𑀅𑀭𑀳𑀢𑀺 𑀪𑀯𑀁 𑀓𑀽𑀝𑀤𑀦𑁆𑀢𑁄 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁. 𑀲𑀫𑀡𑁄 𑀢𑁆𑀯𑁂𑀯 𑀕𑁄𑀢𑀫𑁄 𑀅𑀭𑀳𑀢𑀺 𑀪𑀯𑀦𑁆𑀢𑀁 𑀓𑀽𑀝𑀤𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁.

‘‘𑀪𑀯𑀜𑁆𑀳𑀺 𑀓𑀽𑀝𑀤𑀦𑁆𑀢𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑁄 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑁄…𑀧𑁂…

‘‘𑀪𑀯𑀜𑁆𑀳𑀺 𑀓𑀽𑀝𑀤𑀦𑁆𑀢𑁄 𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀁 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁 𑀧𑀤𑀓𑁄 𑀯𑁂𑀬𑁆𑀬𑀸𑀓𑀭𑀡𑁄 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀯𑀬𑁄…𑀧𑁂…

‘‘𑀪𑀯𑀜𑁆𑀳𑀺 𑀓𑀽𑀝𑀤𑀦𑁆𑀢𑁄 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀩𑁆𑀭𑀳𑁆𑀫𑀯𑀡𑁆𑀡𑀻 𑀩𑁆𑀭𑀳𑁆𑀫𑀯𑀘𑁆𑀙𑀲𑀻 𑀅𑀔𑀼𑀤𑁆𑀤𑀸𑀯𑀓𑀸𑀲𑁄 𑀤𑀲𑁆𑀲𑀦𑀸𑀬…𑀧𑁂…

‘‘𑀪𑀯𑀜𑁆𑀳𑀺 𑀓𑀽𑀝𑀤𑀦𑁆𑀢𑁄 𑀲𑀻𑀮𑀯𑀸 𑀯𑀼𑀤𑁆𑀥𑀲𑀻𑀮𑀻 𑀯𑀼𑀤𑁆𑀥𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄…𑀧𑁂…

‘‘𑀪𑀯𑀜𑁆𑀳𑀺 𑀓𑀽𑀝𑀤𑀦𑁆𑀢𑁄 𑀓𑀮𑁆𑀬𑀸𑀡𑀯𑀸𑀘𑁄 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄 𑀧𑁄𑀭𑀺𑀬𑀸 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀯𑀺𑀲𑁆𑀲𑀝𑁆𑀞𑀸𑀬 𑀅𑀦𑁂𑀮𑀕𑀮𑀸𑀬 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸…𑀧𑁂…

‘‘𑀪𑀯𑀜𑁆𑀳𑀺 𑀓𑀽𑀝𑀤𑀦𑁆𑀢𑁄 𑀩𑀳𑀽𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑁄 𑀢𑀻𑀡𑀺 𑀫𑀸𑀡𑀯𑀓𑀲𑀢𑀸𑀦𑀺 𑀫𑀦𑁆𑀢𑁂 𑀯𑀸𑀘𑁂𑀢𑀺, 𑀩𑀳𑀽 𑀔𑁄 𑀧𑀦 𑀦𑀸𑀦𑀸𑀤𑀺𑀲𑀸 𑀦𑀸𑀦𑀸𑀚𑀦𑀧𑀤𑀸 𑀫𑀸𑀡𑀯𑀓𑀸 𑀆𑀕𑀘𑁆𑀙𑀦𑁆𑀢𑀺 𑀪𑁄𑀢𑁄 𑀓𑀽𑀝𑀤𑀦𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀫𑀦𑁆𑀢𑀢𑁆𑀣𑀺𑀓𑀸 𑀫𑀦𑁆𑀢𑁂 𑀅𑀥𑀺𑀬𑀺𑀢𑀼𑀓𑀸𑀫𑀸…𑀧𑁂…

‘‘𑀪𑀯𑀜𑁆𑀳𑀺 𑀓𑀽𑀝𑀤𑀦𑁆𑀢𑁄 𑀚𑀺𑀡𑁆𑀡𑁄 𑀯𑀼𑀤𑁆𑀥𑁄 𑀫𑀳𑀮𑁆𑀮𑀓𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄. 𑀲𑀫𑀡𑁄 𑀕𑁄𑀢𑀫𑁄 𑀢𑀭𑀼𑀡𑁄 𑀘𑁂𑀯 𑀢𑀭𑀼𑀡𑀧𑀩𑁆𑀩𑀚𑀺𑀢𑁄 𑀘…𑀧𑁂…

‘‘𑀪𑀯𑀜𑁆𑀳𑀺 𑀓𑀽𑀝𑀤𑀦𑁆𑀢𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄…𑀧𑁂…

‘‘𑀪𑀯𑀜𑁆𑀳𑀺 𑀓𑀽𑀝𑀤𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄…𑀧𑁂…

‘‘𑀪𑀯𑀜𑁆𑀳𑀺 𑀓𑀽𑀝𑀤𑀦𑁆𑀢𑁄 𑀔𑀸𑀡𑀼𑀫𑀢𑀁 𑀅𑀚𑁆𑀛𑀸𑀯𑀲𑀢𑀺 𑀲𑀢𑁆𑀢𑀼𑀲𑁆𑀲𑀤𑀁 𑀲𑀢𑀺𑀡𑀓𑀝𑁆𑀞𑁄𑀤𑀓𑀁 𑀲𑀥𑀜𑁆𑀜𑀁 𑀭𑀸𑀚𑀪𑁄𑀕𑁆𑀕𑀁 𑀭𑀜𑁆𑀜𑀸 𑀫𑀸𑀕𑀥𑁂𑀦 𑀲𑁂𑀦𑀺𑀬𑁂𑀦 𑀩𑀺𑀫𑁆𑀩𑀺𑀲𑀸𑀭𑁂𑀦 𑀤𑀺𑀦𑁆𑀦𑀁 𑀭𑀸𑀚𑀤𑀸𑀬𑀁 𑀩𑁆𑀭𑀳𑁆𑀫𑀤𑁂𑀬𑁆𑀬𑀁. 𑀬𑀫𑁆𑀧𑀺 𑀪𑀯𑀁 𑀓𑀽𑀝𑀤𑀦𑁆𑀢𑁄 𑀔𑀸𑀡𑀼𑀫𑀢𑀁 𑀅𑀚𑁆𑀛𑀸𑀯𑀲𑀢𑀺 𑀲𑀢𑁆𑀢𑀼𑀲𑁆𑀲𑀤𑀁 𑀲𑀢𑀺𑀡𑀓𑀝𑁆𑀞𑁄𑀤𑀓𑀁 𑀲𑀥𑀜𑁆𑀜𑀁 𑀭𑀸𑀚𑀪𑁄𑀕𑁆𑀕𑀁, 𑀭𑀜𑁆𑀜𑀸 𑀫𑀸𑀕𑀥𑁂𑀦 𑀲𑁂𑀦𑀺𑀬𑁂𑀦 𑀩𑀺𑀫𑁆𑀩𑀺𑀲𑀸𑀭𑁂𑀦 𑀤𑀺𑀦𑁆𑀦𑀁 𑀭𑀸𑀚𑀤𑀸𑀬𑀁 𑀩𑁆𑀭𑀳𑁆𑀫𑀤𑁂𑀬𑁆𑀬𑀁, 𑀇𑀫𑀺𑀦𑀸𑀧𑀗𑁆𑀕𑁂𑀦 𑀦 𑀅𑀭𑀳𑀢𑀺 𑀪𑀯𑀁 𑀓𑀽𑀝𑀤𑀦𑁆𑀢𑁄 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁. 𑀲𑀫𑀡𑁄𑀢𑁆𑀯𑁂𑀯 𑀕𑁄𑀢𑀫𑁄 𑀅𑀭𑀳𑀢𑀺 𑀪𑀯𑀦𑁆𑀢𑀁 𑀓𑀽𑀝𑀤𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼’’𑀦𑁆𑀢𑀺.

𑀩𑀼𑀤𑁆𑀥𑀕𑀼𑀡𑀓𑀣𑀸

𑁩𑁩𑁨. 𑀏𑀯𑀁 𑀯𑀼𑀢𑁆𑀢𑁂 𑀓𑀽𑀝𑀤𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀢𑁂 𑀩𑁆𑀭𑀸𑀳𑁆𑀫𑀡𑁂 𑀏𑀢𑀤𑀯𑁄𑀘 𑁋

‘‘𑀢𑁂𑀦 𑀳𑀺, 𑀪𑁄, 𑀫𑀫𑀧𑀺 𑀲𑀼𑀡𑀸𑀣, 𑀬𑀣𑀸 𑀫𑀬𑀫𑁂𑀯 𑀅𑀭𑀳𑀸𑀫 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁, 𑀦 𑀢𑁆𑀯𑁂𑀯 𑀅𑀭𑀳𑀢𑀺 𑀲𑁄 𑀪𑀯𑀁 𑀕𑁄𑀢𑀫𑁄 𑀅𑀫𑁆𑀳𑀸𑀓𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁. 𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦. 𑀬𑀫𑁆𑀧𑀺, 𑀪𑁄, 𑀲𑀫𑀡𑁄 𑀕𑁄𑀢𑀫𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦, 𑀇𑀫𑀺𑀦𑀸𑀧𑀗𑁆𑀕𑁂𑀦 𑀦 𑀅𑀭𑀳𑀢𑀺 𑀲𑁄 𑀪𑀯𑀁 𑀕𑁄𑀢𑀫𑁄 𑀅𑀫𑁆𑀳𑀸𑀓𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁. 𑀅𑀣 𑀔𑁄 𑀫𑀬𑀫𑁂𑀯 𑀅𑀭𑀳𑀸𑀫 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁.

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀫𑀳𑀦𑁆𑀢𑀁 𑀜𑀸𑀢𑀺𑀲𑀗𑁆𑀖𑀁 𑀑𑀳𑀸𑀬 𑀧𑀩𑁆𑀩𑀚𑀺𑀢𑁄…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀧𑀳𑀽𑀢𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀑𑀳𑀸𑀬 𑀧𑀩𑁆𑀩𑀚𑀺𑀢𑁄 𑀪𑀽𑀫𑀺𑀕𑀢𑀜𑁆𑀘 𑀯𑁂𑀳𑀸𑀲𑀝𑁆𑀞𑀁 𑀘…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀤𑀳𑀭𑁄𑀯 𑀲𑀫𑀸𑀦𑁄 𑀬𑀼𑀯𑀸 𑀲𑀼𑀲𑀼𑀓𑀸𑀴𑀓𑁂𑀲𑁄 𑀪𑀤𑁆𑀭𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀞𑀫𑁂𑀦 𑀯𑀬𑀲𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀅𑀓𑀸𑀫𑀓𑀸𑀦𑀁 𑀫𑀸𑀢𑀸𑀧𑀺𑀢𑀽𑀦𑀁 𑀅𑀲𑁆𑀲𑀼𑀫𑀼𑀔𑀸𑀦𑀁 𑀭𑀼𑀤𑀦𑁆𑀢𑀸𑀦𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀩𑁆𑀭𑀳𑁆𑀫𑀯𑀡𑁆𑀡𑀻 𑀩𑁆𑀭𑀳𑁆𑀫𑀯𑀘𑁆𑀙𑀲𑀻 𑀅𑀔𑀼𑀤𑁆𑀤𑀸𑀯𑀓𑀸𑀲𑁄 𑀤𑀲𑁆𑀲𑀦𑀸𑀬 …𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀲𑀻𑀮𑀯𑀸 𑀅𑀭𑀺𑀬𑀲𑀻𑀮𑀻 𑀓𑀼𑀲𑀮𑀲𑀻𑀮𑀻 𑀓𑀼𑀲𑀮𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀓𑀮𑁆𑀬𑀸𑀡𑀯𑀸𑀘𑁄 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑁄 𑀧𑁄𑀭𑀺𑀬𑀸 𑀯𑀸𑀘𑀸𑀬 𑀲𑀫𑀦𑁆𑀦𑀸𑀕𑀢𑁄 𑀯𑀺𑀲𑁆𑀲𑀝𑁆𑀞𑀸𑀬 𑀅𑀦𑁂𑀮𑀕𑀮𑀸𑀬 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀺𑀬𑀸…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀩𑀳𑀽𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑁄…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀔𑀻𑀡𑀓𑀸𑀫𑀭𑀸𑀕𑁄 𑀯𑀺𑀕𑀢𑀘𑀸𑀧𑀮𑁆𑀮𑁄…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀓𑀫𑁆𑀫𑀯𑀸𑀤𑀻 𑀓𑀺𑀭𑀺𑀬𑀯𑀸𑀤𑀻 𑀅𑀧𑀸𑀧𑀧𑀼𑀭𑁂𑀓𑁆𑀔𑀸𑀭𑁄 𑀩𑁆𑀭𑀳𑁆𑀫𑀜𑁆𑀜𑀸𑀬 𑀧𑀚𑀸𑀬…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀉𑀘𑁆𑀘𑀸 𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀅𑀲𑀫𑁆𑀪𑀺𑀦𑁆𑀦𑀔𑀢𑁆𑀢𑀺𑀬𑀓𑀼𑀮𑀸…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀅𑀟𑁆𑀠𑀸 𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀫𑀳𑀤𑁆𑀥𑀦𑀸 𑀫𑀳𑀸𑀪𑁄𑀕𑀸…𑀧𑁂…

‘‘𑀲𑀫𑀡𑀁 𑀔𑀮𑀼, 𑀪𑁄, 𑀕𑁄𑀢𑀫𑀁 𑀢𑀺𑀭𑁄𑀭𑀝𑁆𑀞𑀸 𑀢𑀺𑀭𑁄𑀚𑀦𑀧𑀤𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀆𑀕𑀘𑁆𑀙𑀦𑁆𑀢𑀺…𑀧𑁂…

‘‘𑀲𑀫𑀡𑀁 𑀔𑀮𑀼, 𑀪𑁄, 𑀕𑁄𑀢𑀫𑀁 𑀅𑀦𑁂𑀓𑀸𑀦𑀺 𑀤𑁂𑀯𑀢𑀸𑀲𑀳𑀲𑁆𑀲𑀸𑀦𑀺 𑀧𑀸𑀡𑁂𑀳𑀺 𑀲𑀭𑀡𑀁 𑀕𑀢𑀸𑀦𑀺…𑀧𑁂…

‘‘𑀲𑀫𑀡𑀁 𑀔𑀮𑀼, 𑀪𑁄, 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’ 𑀢𑀺…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀏𑀳𑀺𑀲𑁆𑀯𑀸𑀕𑀢𑀯𑀸𑀤𑀻 𑀲𑀔𑀺𑀮𑁄 𑀲𑀫𑁆𑀫𑁄𑀤𑀓𑁄 𑀅𑀩𑁆𑀪𑀸𑀓𑀼𑀝𑀺𑀓𑁄 𑀉𑀢𑁆𑀢𑀸𑀦𑀫𑀼𑀔𑁄 𑀧𑀼𑀩𑁆𑀩𑀪𑀸𑀲𑀻…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄…𑀧𑁂…

‘‘𑀲𑀫𑀡𑁂 𑀔𑀮𑀼, 𑀪𑁄, 𑀕𑁄𑀢𑀫𑁂 𑀩𑀳𑀽 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘 𑀅𑀪𑀺𑀧𑁆𑀧𑀲𑀦𑁆𑀦𑀸…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀬𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀧𑀝𑀺𑀯𑀲𑀢𑀺 𑀦 𑀢𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀅𑀫𑀦𑀼𑀲𑁆𑀲𑀸 𑀫𑀦𑀼𑀲𑁆𑀲𑁂 𑀯𑀺𑀳𑁂𑀞𑁂𑀦𑁆𑀢𑀺…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀲𑀗𑁆𑀖𑀻 𑀕𑀡𑀻 𑀕𑀡𑀸𑀘𑀭𑀺𑀬𑁄 𑀧𑀼𑀣𑀼𑀢𑀺𑀢𑁆𑀣𑀓𑀭𑀸𑀦𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀬𑀣𑀸 𑀔𑁄 𑀧𑀦, 𑀪𑁄, 𑀏𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀬𑀣𑀸 𑀯𑀸 𑀢𑀣𑀸 𑀯𑀸 𑀬𑀲𑁄 𑀲𑀫𑀼𑀤𑀸𑀕𑀘𑁆𑀙𑀢𑀺, 𑀦 𑀳𑁂𑀯𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀬𑀲𑁄 𑀲𑀫𑀼𑀤𑀸𑀕𑀢𑁄. 𑀅𑀣 𑀔𑁄 𑀅𑀦𑀼𑀢𑁆𑀢𑀭𑀸𑀬 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀤𑀸𑀬 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀬𑀲𑁄 𑀲𑀫𑀼𑀤𑀸𑀕𑀢𑁄…𑀧𑁂…

‘‘𑀲𑀫𑀡𑀁 𑀔𑀮𑀼, 𑀪𑁄, 𑀕𑁄𑀢𑀫𑀁 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀲𑀧𑀼𑀢𑁆𑀢𑁄 𑀲𑀪𑀭𑀺𑀬𑁄 𑀲𑀧𑀭𑀺𑀲𑁄 𑀲𑀸𑀫𑀘𑁆𑀘𑁄 𑀧𑀸𑀡𑁂𑀳𑀺 𑀲𑀭𑀡𑀁 𑀕𑀢𑁄…𑀧𑁂…

‘‘𑀲𑀫𑀡𑀁 𑀔𑀮𑀼, 𑀪𑁄, 𑀕𑁄𑀢𑀫𑀁 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀲𑀧𑀼𑀢𑁆𑀢𑁄 𑀲𑀪𑀭𑀺𑀬𑁄 𑀲𑀧𑀭𑀺𑀲𑁄 𑀲𑀸𑀫𑀘𑁆𑀘𑁄 𑀧𑀸𑀡𑁂𑀳𑀺 𑀲𑀭𑀡𑀁 𑀕𑀢𑁄…𑀧𑁂…

‘‘𑀲𑀫𑀡𑀁 𑀔𑀮𑀼, 𑀪𑁄, 𑀕𑁄𑀢𑀫𑀁 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀺 𑀲𑀧𑀼𑀢𑁆𑀢𑁄 𑀲𑀪𑀭𑀺𑀬𑁄 𑀲𑀧𑀭𑀺𑀲𑁄 𑀲𑀸𑀫𑀘𑁆𑀘𑁄 𑀧𑀸𑀡𑁂𑀳𑀺 𑀲𑀭𑀡𑀁 𑀕𑀢𑁄…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀲𑁂𑀦𑀺𑀬𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀲𑁆𑀲 𑀲𑀓𑁆𑀓𑀢𑁄 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄…𑀧𑁂…

‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀔𑀸𑀡𑀼𑀫𑀢𑀁 𑀅𑀦𑀼𑀧𑁆𑀧𑀢𑁆𑀢𑁄 𑀔𑀸𑀡𑀼𑀫𑀢𑁂 𑀯𑀺𑀳𑀭𑀢𑀺 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀁. 𑀬𑁂 𑀔𑁄 𑀧𑀦, 𑀪𑁄, 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀫𑁆𑀳𑀸𑀓𑀁 𑀕𑀸𑀫𑀔𑁂𑀢𑁆𑀢𑀁 𑀆𑀕𑀘𑁆𑀙𑀦𑁆𑀢𑀺, 𑀅𑀢𑀺𑀣𑀻 𑀦𑁄 𑀢𑁂 𑀳𑁄𑀦𑁆𑀢𑀺. 𑀅𑀢𑀺𑀣𑀻 𑀔𑁄 𑀧𑀦𑀫𑁆𑀳𑁂𑀳𑀺 𑀲𑀓𑁆𑀓𑀸𑀢𑀩𑁆𑀩𑀸 𑀕𑀭𑀼𑀓𑀸𑀢𑀩𑁆𑀩𑀸 𑀫𑀸𑀦𑁂𑀢𑀩𑁆𑀩𑀸 𑀧𑀽𑀚𑁂𑀢𑀩𑁆𑀩𑀸 𑀅𑀧𑀘𑁂𑀢𑀩𑁆𑀩𑀸. 𑀬𑀫𑁆𑀧𑀺, 𑀪𑁄, 𑀲𑀫𑀡𑁄 𑀕𑁄𑀢𑀫𑁄 𑀔𑀸𑀡𑀼𑀫𑀢𑀁 𑀅𑀦𑀼𑀧𑁆𑀧𑀢𑁆𑀢𑁄 𑀔𑀸𑀡𑀼𑀫𑀢𑁂 𑀯𑀺𑀳𑀭𑀢𑀺 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀁, 𑀅𑀢𑀺𑀣𑀺𑀫𑁆𑀳𑀸𑀓𑀁 𑀲𑀫𑀡𑁄 𑀕𑁄𑀢𑀫𑁄. 𑀅𑀢𑀺𑀣𑀺 𑀔𑁄 𑀧𑀦𑀫𑁆𑀳𑁂𑀳𑀺 𑀲𑀓𑁆𑀓𑀸𑀢𑀩𑁆𑀩𑁄 𑀕𑀭𑀼𑀓𑀸𑀢𑀩𑁆𑀩𑁄 𑀫𑀸𑀦𑁂𑀢𑀩𑁆𑀩𑁄 𑀧𑀽𑀚𑁂𑀢𑀩𑁆𑀩𑁄 𑀅𑀧𑀘𑁂𑀢𑀩𑁆𑀩𑁄. 𑀇𑀫𑀺𑀦𑀸𑀧𑀗𑁆𑀕𑁂𑀦 𑀦𑀸𑀭𑀳𑀢𑀺 𑀲𑁄 𑀪𑀯𑀁 𑀕𑁄𑀢𑀫𑁄 𑀅𑀫𑁆𑀳𑀸𑀓𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁. 𑀅𑀣 𑀔𑁄 𑀫𑀬𑀫𑁂𑀯 𑀅𑀭𑀳𑀸𑀫 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁. 𑀏𑀢𑁆𑀢𑀓𑁂 𑀔𑁄 𑀅𑀳𑀁, 𑀪𑁄, 𑀢𑀲𑁆𑀲 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀯𑀡𑁆𑀡𑁂 𑀧𑀭𑀺𑀬𑀸𑀧𑀼𑀡𑀸𑀫𑀺, 𑀦𑁄 𑀘 𑀔𑁄 𑀲𑁄 𑀪𑀯𑀁 𑀕𑁄𑀢𑀫𑁄 𑀏𑀢𑁆𑀢𑀓𑀯𑀡𑁆𑀡𑁄. 𑀅𑀧𑀭𑀺𑀫𑀸𑀡𑀯𑀡𑁆𑀡𑁄 𑀳𑀺 𑀲𑁄 𑀪𑀯𑀁 𑀕𑁄𑀢𑀫𑁄’’𑀢𑀺.

𑁩𑁩𑁩. 𑀏𑀯𑀁 𑀯𑀼𑀢𑁆𑀢𑁂, 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀓𑀽𑀝𑀤𑀦𑁆𑀢𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀬𑀣𑀸 𑀔𑁄 𑀪𑀯𑀁 𑀓𑀽𑀝𑀤𑀦𑁆𑀢𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀡𑁆𑀡𑁂 𑀪𑀸𑀲𑀢𑀺, 𑀇𑀢𑁄 𑀘𑁂𑀧𑀺 𑀲𑁄 𑀪𑀯𑀁 𑀕𑁄𑀢𑀫𑁄 𑀬𑁄𑀚𑀦𑀲𑀢𑁂 𑀯𑀺𑀳𑀭𑀢𑀺, 𑀅𑀮𑀫𑁂𑀯 𑀲𑀤𑁆𑀥𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁 𑀅𑀧𑀺 𑀧𑀼𑀝𑁄𑀲𑁂𑀦𑀸’’𑀢𑀺. ‘‘𑀢𑁂𑀦 𑀳𑀺, 𑀪𑁄, 𑀲𑀩𑁆𑀩𑁂𑀯 𑀫𑀬𑀁 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺.

𑀫𑀳𑀸𑀯𑀺𑀚𑀺𑀢𑀭𑀸𑀚𑀬𑀜𑁆𑀜𑀓𑀣𑀸

𑁩𑁩𑁪. 𑀅𑀣 𑀔𑁄 𑀓𑀽𑀝𑀤𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀫𑀳𑀢𑀸 𑀩𑁆𑀭𑀸𑀳𑁆𑀫𑀡𑀕𑀡𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀅𑀫𑁆𑀩𑀮𑀝𑁆𑀞𑀺𑀓𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀔𑀸𑀡𑀼𑀫𑀢𑀓𑀸𑀧𑀺 𑀔𑁄 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼; 𑀅𑀧𑁆𑀧𑁂𑀓𑀘𑁆𑀘𑁂 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼, 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼; 𑀅𑀧𑁆𑀧𑁂𑀓𑀘𑁆𑀘𑁂 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼; 𑀅𑀧𑁆𑀧𑁂𑀓𑀘𑁆𑀘𑁂 𑀦𑀸𑀫𑀕𑁄𑀢𑁆𑀢𑀁 𑀲𑀸𑀯𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼; 𑀅𑀧𑁆𑀧𑁂𑀓𑀘𑁆𑀘𑁂 𑀢𑀼𑀡𑁆𑀳𑀻𑀪𑀽𑀢𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼.

𑁩𑁩𑁫. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀓𑀽𑀝𑀤𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀼𑀢𑀁 𑀫𑁂𑀢𑀁, 𑀪𑁄 𑀕𑁄𑀢𑀫 𑁋 ‘𑀲𑀫𑀡𑁄 𑀕𑁄𑀢𑀫𑁄 𑀢𑀺𑀯𑀺𑀥𑀁 𑀬𑀜𑁆𑀜𑀲𑀫𑁆𑀧𑀤𑀁 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀁 𑀚𑀸𑀦𑀸𑀢𑀻’𑀢𑀺. 𑀦 𑀔𑁄 𑀧𑀦𑀸𑀳𑀁 𑀚𑀸𑀦𑀸𑀫𑀺 𑀢𑀺𑀯𑀺𑀥𑀁 𑀬𑀜𑁆𑀜𑀲𑀫𑁆𑀧𑀤𑀁 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀁. 𑀇𑀘𑁆𑀙𑀸𑀫𑀺 𑀘𑀸𑀳𑀁 𑀫𑀳𑀸𑀬𑀜𑁆𑀜𑀁 𑀬𑀚𑀺𑀢𑀼𑀁. 𑀲𑀸𑀥𑀼 𑀫𑁂 𑀪𑀯𑀁 𑀕𑁄𑀢𑀫𑁄 𑀢𑀺𑀯𑀺𑀥𑀁 𑀬𑀜𑁆𑀜𑀲𑀫𑁆𑀧𑀤𑀁 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀁 𑀤𑁂𑀲𑁂𑀢𑀽’’𑀢𑀺.

𑁩𑁩𑁬. ‘‘𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡, 𑀲𑀼𑀡𑀸𑀳𑀺 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀳𑀺, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀓𑀽𑀝𑀤𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀪𑀽𑀢𑀧𑀼𑀩𑁆𑀩𑀁, 𑀩𑁆𑀭𑀸𑀳𑁆𑀫𑀡, 𑀭𑀸𑀚𑀸 𑀫𑀳𑀸𑀯𑀺𑀚𑀺𑀢𑁄 𑀦𑀸𑀫 𑀅𑀳𑁄𑀲𑀺 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑁄 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑁄 𑀧𑀳𑀽𑀢𑀥𑀦𑀥𑀜𑁆𑀜𑁄 𑀧𑀭𑀺𑀧𑀼𑀡𑁆𑀡𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑁄. 𑀅𑀣 𑀔𑁄, 𑀩𑁆𑀭𑀸𑀳𑁆𑀫𑀡, 𑀭𑀜𑁆𑀜𑁄 𑀫𑀳𑀸𑀯𑀺𑀚𑀺𑀢𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀅𑀥𑀺𑀕𑀢𑀸 𑀔𑁄 𑀫𑁂 𑀯𑀺𑀧𑀼𑀮𑀸 𑀫𑀸𑀦𑀼𑀲𑀓𑀸 𑀪𑁄𑀕𑀸, 𑀫𑀳𑀦𑁆𑀢𑀁 𑀧𑀣𑀯𑀺𑀫𑀡𑁆𑀟𑀮𑀁 𑀅𑀪𑀺𑀯𑀺𑀚𑀺𑀬 𑀅𑀚𑁆𑀛𑀸𑀯𑀲𑀸𑀫𑀺, 𑀬𑀁𑀦𑀽𑀦𑀸𑀳𑀁 𑀫𑀳𑀸𑀬𑀜𑁆𑀜𑀁 𑀬𑀚𑁂𑀬𑁆𑀬𑀁, 𑀬𑀁 𑀫𑀫 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’𑀢𑀺.

𑁩𑁩𑁭. ‘‘𑀅𑀣 𑀔𑁄, 𑀩𑁆𑀭𑀸𑀳𑁆𑀫𑀡, 𑀭𑀸𑀚𑀸 𑀫𑀳𑀸𑀯𑀺𑀚𑀺𑀢𑁄 𑀧𑀼𑀭𑁄𑀳𑀺𑀢𑀁 𑀩𑁆𑀭𑀸𑀳𑁆𑀫𑀡𑀁 𑀆𑀫𑀦𑁆𑀢𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘𑀇𑀥 𑀫𑀬𑁆𑀳𑀁, 𑀩𑁆𑀭𑀸𑀳𑁆𑀫𑀡, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 𑀅𑀥𑀺𑀕𑀢𑀸 𑀔𑁄 𑀫𑁂 𑀯𑀺𑀧𑀼𑀮𑀸 𑀫𑀸𑀦𑀼𑀲𑀓𑀸 𑀪𑁄𑀕𑀸, 𑀫𑀳𑀦𑁆𑀢𑀁 𑀧𑀣𑀯𑀺𑀫𑀡𑁆𑀟𑀮𑀁 𑀅𑀪𑀺𑀯𑀺𑀚𑀺𑀬 𑀅𑀚𑁆𑀛𑀸𑀯𑀲𑀸𑀫𑀺. 𑀬𑀁𑀦𑀽𑀦𑀸𑀳𑀁 𑀫𑀳𑀸𑀬𑀜𑁆𑀜𑀁 𑀬𑀚𑁂𑀬𑁆𑀬𑀁 𑀬𑀁 𑀫𑀫 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’𑀢𑀺. 𑀇𑀘𑁆𑀙𑀸𑀫𑀳𑀁, 𑀩𑁆𑀭𑀸𑀳𑁆𑀫𑀡, 𑀫𑀳𑀸𑀬𑀜𑁆𑀜𑀁 𑀬𑀚𑀺𑀢𑀼𑀁. 𑀅𑀦𑀼𑀲𑀸𑀲𑀢𑀼 𑀫𑀁 𑀪𑀯𑀁 𑀬𑀁 𑀫𑀫 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’’𑀢𑀺.

𑁩𑁩𑁮. ‘‘𑀏𑀯𑀁 𑀯𑀼𑀢𑁆𑀢𑁂, 𑀩𑁆𑀭𑀸𑀳𑁆𑀫𑀡, 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀭𑀸𑀚𑀸𑀦𑀁 𑀫𑀳𑀸𑀯𑀺𑀚𑀺𑀢𑀁 𑀏𑀢𑀤𑀯𑁄𑀘 𑁋 ‘𑀪𑁄𑀢𑁄 𑀔𑁄 𑀭𑀜𑁆𑀜𑁄 𑀚𑀦𑀧𑀤𑁄 𑀲𑀓𑀡𑁆𑀝𑀓𑁄 𑀲𑀉𑀧𑁆𑀧𑀻𑀴𑁄, 𑀕𑀸𑀫𑀖𑀸𑀢𑀸𑀧𑀺 𑀤𑀺𑀲𑁆𑀲𑀦𑁆𑀢𑀺, 𑀦𑀺𑀕𑀫𑀖𑀸𑀢𑀸𑀧𑀺 𑀤𑀺𑀲𑁆𑀲𑀦𑁆𑀢𑀺, 𑀦𑀕𑀭𑀖𑀸𑀢𑀸𑀧𑀺 𑀤𑀺𑀲𑁆𑀲𑀦𑁆𑀢𑀺, 𑀧𑀦𑁆𑀣𑀤𑀼𑀳𑀦𑀸𑀧𑀺 𑀤𑀺𑀲𑁆𑀲𑀦𑁆𑀢𑀺. 𑀪𑀯𑀁 𑀔𑁄 𑀧𑀦 𑀭𑀸𑀚𑀸 𑀏𑀯𑀁 𑀲𑀓𑀡𑁆𑀝𑀓𑁂 𑀚𑀦𑀧𑀤𑁂 𑀲𑀉𑀧𑁆𑀧𑀻𑀴𑁂 𑀩𑀮𑀺𑀫𑀼𑀤𑁆𑀥𑀭𑁂𑀬𑁆𑀬, 𑀅𑀓𑀺𑀘𑁆𑀘𑀓𑀸𑀭𑀻 𑀅𑀲𑁆𑀲 𑀢𑁂𑀦 𑀪𑀯𑀁 𑀭𑀸𑀚𑀸. 𑀲𑀺𑀬𑀸 𑀔𑁄 𑀧𑀦 𑀪𑁄𑀢𑁄 𑀭𑀜𑁆𑀜𑁄 𑀏𑀯𑀫𑀲𑁆𑀲 𑁋 ‘‘𑀅𑀳𑀫𑁂𑀢𑀁 𑀤𑀲𑁆𑀲𑀼𑀔𑀻𑀮𑀁 𑀯𑀥𑁂𑀦 𑀯𑀸 𑀩𑀦𑁆𑀥𑁂𑀦 𑀯𑀸 𑀚𑀸𑀦𑀺𑀬𑀸 𑀯𑀸 𑀕𑀭𑀳𑀸𑀬 𑀯𑀸 𑀧𑀩𑁆𑀩𑀸𑀚𑀦𑀸𑀬 𑀯𑀸 𑀲𑀫𑀽𑀳𑀦𑀺𑀲𑁆𑀲𑀸𑀫𑀻’’𑀢𑀺, 𑀦 𑀔𑁄 𑀧𑀦𑁂𑀢𑀲𑁆𑀲 𑀤𑀲𑁆𑀲𑀼𑀔𑀻𑀮𑀲𑁆𑀲 𑀏𑀯𑀁 𑀲𑀫𑁆𑀫𑀸 𑀲𑀫𑀼𑀕𑁆𑀖𑀸𑀢𑁄 𑀳𑁄𑀢𑀺. 𑀬𑁂 𑀢𑁂 𑀳𑀢𑀸𑀯𑀲𑁂𑀲𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂 𑀧𑀘𑁆𑀙𑀸 𑀭𑀜𑁆𑀜𑁄 𑀚𑀦𑀧𑀤𑀁 𑀯𑀺𑀳𑁂𑀞𑁂𑀲𑁆𑀲𑀦𑁆𑀢𑀺. 𑀅𑀧𑀺 𑀘 𑀔𑁄 𑀇𑀤𑀁 𑀲𑀁𑀯𑀺𑀥𑀸𑀦𑀁 𑀆𑀕𑀫𑁆𑀫 𑀏𑀯𑀫𑁂𑀢𑀲𑁆𑀲 𑀤𑀲𑁆𑀲𑀼𑀔𑀻𑀮𑀲𑁆𑀲 𑀲𑀫𑁆𑀫𑀸 𑀲𑀫𑀼𑀕𑁆𑀖𑀸𑀢𑁄 𑀳𑁄𑀢𑀺. 𑀢𑁂𑀦 𑀳𑀺 𑀪𑀯𑀁 𑀭𑀸𑀚𑀸 𑀬𑁂 𑀪𑁄𑀢𑁄 𑀭𑀜𑁆𑀜𑁄 𑀚𑀦𑀧𑀤𑁂 𑀉𑀲𑁆𑀲𑀳𑀦𑁆𑀢𑀺 𑀓𑀲𑀺𑀕𑁄𑀭𑀓𑁆𑀔𑁂, 𑀢𑁂𑀲𑀁 𑀪𑀯𑀁 𑀭𑀸𑀚𑀸 𑀩𑀻𑀚𑀪𑀢𑁆𑀢𑀁 𑀅𑀦𑀼𑀧𑁆𑀧𑀤𑁂𑀢𑀼. 𑀬𑁂 𑀪𑁄𑀢𑁄 𑀭𑀜𑁆𑀜𑁄 𑀚𑀦𑀧𑀤𑁂 𑀉𑀲𑁆𑀲𑀳𑀦𑁆𑀢𑀺 𑀯𑀸𑀡𑀺𑀚𑁆𑀚𑀸𑀬, 𑀢𑁂𑀲𑀁 𑀪𑀯𑀁 𑀭𑀸𑀚𑀸 𑀧𑀸𑀪𑀢𑀁 𑀅𑀦𑀼𑀧𑁆𑀧𑀤𑁂𑀢𑀼. 𑀬𑁂 𑀪𑁄𑀢𑁄 𑀭𑀜𑁆𑀜𑁄 𑀚𑀦𑀧𑀤𑁂 𑀉𑀲𑁆𑀲𑀳𑀦𑁆𑀢𑀺 𑀭𑀸𑀚𑀧𑁄𑀭𑀺𑀲𑁂, 𑀢𑁂𑀲𑀁 𑀪𑀯𑀁 𑀭𑀸𑀚𑀸 𑀪𑀢𑁆𑀢𑀯𑁂𑀢𑀦𑀁 𑀧𑀓𑀧𑁆𑀧𑁂𑀢𑀼. 𑀢𑁂 𑀘 𑀫𑀦𑀼𑀲𑁆𑀲𑀸 𑀲𑀓𑀫𑁆𑀫𑀧𑀲𑀼𑀢𑀸 𑀭𑀜𑁆𑀜𑁄 𑀚𑀦𑀧𑀤𑀁 𑀦 𑀯𑀺𑀳𑁂𑀞𑁂𑀲𑁆𑀲𑀦𑁆𑀢𑀺; 𑀫𑀳𑀸 𑀘 𑀭𑀜𑁆𑀜𑁄 𑀭𑀸𑀲𑀺𑀓𑁄 𑀪𑀯𑀺𑀲𑁆𑀲𑀢𑀺. 𑀔𑁂𑀫𑀝𑁆𑀞𑀺𑀢𑀸 𑀚𑀦𑀧𑀤𑀸 𑀅𑀓𑀡𑁆𑀝𑀓𑀸 𑀅𑀦𑀼𑀧𑁆𑀧𑀻𑀴𑀸. 𑀫𑀦𑀼𑀲𑁆𑀲𑀸 𑀫𑀼𑀤𑀸 𑀫𑁄𑀤𑀫𑀸𑀦𑀸 𑀉𑀭𑁂 𑀧𑀼𑀢𑁆𑀢𑁂 𑀦𑀘𑁆𑀘𑁂𑀦𑁆𑀢𑀸 𑀅𑀧𑀸𑀭𑀼𑀢𑀖𑀭𑀸 𑀫𑀜𑁆𑀜𑁂 𑀯𑀺𑀳𑀭𑀺𑀲𑁆𑀲𑀦𑁆𑀢𑀻’𑀢𑀺. ‘𑀏𑀯𑀁, 𑀪𑁄’𑀢𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀭𑀸𑀚𑀸 𑀫𑀳𑀸𑀯𑀺𑀚𑀺𑀢𑁄 𑀧𑀼𑀭𑁄𑀳𑀺𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂 𑀭𑀜𑁆𑀜𑁄 𑀚𑀦𑀧𑀤𑁂 𑀉𑀲𑁆𑀲𑀳𑀺𑀁𑀲𑀼 𑀓𑀲𑀺𑀕𑁄𑀭𑀓𑁆𑀔𑁂, 𑀢𑁂𑀲𑀁 𑀭𑀸𑀚𑀸 𑀫𑀳𑀸𑀯𑀺𑀚𑀺𑀢𑁄 𑀩𑀻𑀚𑀪𑀢𑁆𑀢𑀁 𑀅𑀦𑀼𑀧𑁆𑀧𑀤𑀸𑀲𑀺. 𑀬𑁂 𑀘 𑀭𑀜𑁆𑀜𑁄 𑀚𑀦𑀧𑀤𑁂 𑀉𑀲𑁆𑀲𑀳𑀺𑀁𑀲𑀼 𑀯𑀸𑀡𑀺𑀚𑁆𑀚𑀸𑀬, 𑀢𑁂𑀲𑀁 𑀭𑀸𑀚𑀸 𑀫𑀳𑀸𑀯𑀺𑀚𑀺𑀢𑁄 𑀧𑀸𑀪𑀢𑀁 𑀅𑀦𑀼𑀧𑁆𑀧𑀤𑀸𑀲𑀺. 𑀬𑁂 𑀘 𑀭𑀜𑁆𑀜𑁄 𑀚𑀦𑀧𑀤𑁂 𑀉𑀲𑁆𑀲𑀳𑀺𑀁𑀲𑀼 𑀭𑀸𑀚𑀧𑁄𑀭𑀺𑀲𑁂, 𑀢𑁂𑀲𑀁 𑀭𑀸𑀚𑀸 𑀫𑀳𑀸𑀯𑀺𑀚𑀺𑀢𑁄 𑀪𑀢𑁆𑀢𑀯𑁂𑀢𑀦𑀁 𑀧𑀓𑀧𑁆𑀧𑁂𑀲𑀺. 𑀢𑁂 𑀘 𑀫𑀦𑀼𑀲𑁆𑀲𑀸 𑀲𑀓𑀫𑁆𑀫𑀧𑀲𑀼𑀢𑀸 𑀭𑀜𑁆𑀜𑁄 𑀚𑀦𑀧𑀤𑀁 𑀦 𑀯𑀺𑀳𑁂𑀞𑀺𑀁𑀲𑀼, 𑀫𑀳𑀸 𑀘 𑀭𑀜𑁆𑀜𑁄 𑀭𑀸𑀲𑀺𑀓𑁄 𑀅𑀳𑁄𑀲𑀺. 𑀔𑁂𑀫𑀝𑁆𑀞𑀺𑀢𑀸 𑀚𑀦𑀧𑀤𑀸 𑀅𑀓𑀡𑁆𑀝𑀓𑀸 𑀅𑀦𑀼𑀧𑁆𑀧𑀻𑀴𑀸 𑀫𑀦𑀼𑀲𑁆𑀲𑀸 𑀫𑀼𑀤𑀸 𑀫𑁄𑀤𑀫𑀸𑀦𑀸 𑀉𑀭𑁂 𑀧𑀼𑀢𑁆𑀢𑁂 𑀦𑀘𑁆𑀘𑁂𑀦𑁆𑀢𑀸 𑀅𑀧𑀸𑀭𑀼𑀢𑀖𑀭𑀸 𑀫𑀜𑁆𑀜𑁂 𑀯𑀺𑀳𑀭𑀺𑀁𑀲𑀼. 𑀅𑀣 𑀔𑁄, 𑀩𑁆𑀭𑀸𑀳𑁆𑀫𑀡, 𑀭𑀸𑀚𑀸 𑀫𑀳𑀸𑀯𑀺𑀚𑀺𑀢𑁄 𑀧𑀼𑀭𑁄𑀳𑀺𑀢𑀁 𑀩𑁆𑀭𑀸𑀳𑁆𑀫𑀡𑀁 𑀆𑀫𑀦𑁆𑀢𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘𑀲𑀫𑀽𑀳𑀢𑁄 𑀔𑁄 𑀫𑁂 𑀪𑁄𑀢𑁄 𑀤𑀲𑁆𑀲𑀼𑀔𑀻𑀮𑁄, 𑀪𑁄𑀢𑁄 𑀲𑀁𑀯𑀺𑀥𑀸𑀦𑀁 𑀆𑀕𑀫𑁆𑀫 𑀫𑀳𑀸 𑀘 𑀫𑁂 𑀭𑀸𑀲𑀺𑀓𑁄. 𑀔𑁂𑀫𑀝𑁆𑀞𑀺𑀢𑀸 𑀚𑀦𑀧𑀤𑀸 𑀅𑀓𑀡𑁆𑀝𑀓𑀸 𑀅𑀦𑀼𑀧𑁆𑀧𑀻𑀴𑀸 𑀫𑀦𑀼𑀲𑁆𑀲𑀸 𑀫𑀼𑀤𑀸 𑀫𑁄𑀤𑀫𑀸𑀦𑀸 𑀉𑀭𑁂 𑀧𑀼𑀢𑁆𑀢𑁂 𑀦𑀘𑁆𑀘𑁂𑀦𑁆𑀢𑀸 𑀅𑀧𑀸𑀭𑀼𑀢𑀖𑀭𑀸 𑀫𑀜𑁆𑀜𑁂 𑀯𑀺𑀳𑀭𑀦𑁆𑀢𑀺. 𑀇𑀘𑁆𑀙𑀸𑀫𑀳𑀁 𑀩𑁆𑀭𑀸𑀳𑁆𑀫𑀡 𑀫𑀳𑀸𑀬𑀜𑁆𑀜𑀁 𑀬𑀚𑀺𑀢𑀼𑀁. 𑀅𑀦𑀼𑀲𑀸𑀲𑀢𑀼 𑀫𑀁 𑀪𑀯𑀁 𑀬𑀁 𑀫𑀫 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’𑀢𑀺.

𑀘𑀢𑀼𑀧𑀭𑀺𑀓𑁆𑀔𑀸𑀭𑀁

𑁩𑁩𑁯. ‘‘𑀢𑁂𑀦 𑀳𑀺 𑀪𑀯𑀁 𑀭𑀸𑀚𑀸 𑀬𑁂 𑀪𑁄𑀢𑁄 𑀭𑀜𑁆𑀜𑁄 𑀚𑀦𑀧𑀤𑁂 𑀔𑀢𑁆𑀢𑀺𑀬𑀸 𑀆𑀦𑀼𑀬𑀦𑁆𑀢𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘 𑀢𑁂 𑀪𑀯𑀁 𑀭𑀸𑀚𑀸 𑀆𑀫𑀦𑁆𑀢𑀬𑀢𑀁 𑁋 ‘𑀇𑀘𑁆𑀙𑀸𑀫𑀳𑀁, 𑀪𑁄, 𑀫𑀳𑀸𑀬𑀜𑁆𑀜𑀁 𑀬𑀚𑀺𑀢𑀼𑀁, 𑀅𑀦𑀼𑀚𑀸𑀦𑀦𑁆𑀢𑀼 𑀫𑁂 𑀪𑀯𑀦𑁆𑀢𑁄 𑀬𑀁 𑀫𑀫 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’𑀢𑀺. 𑀬𑁂 𑀪𑁄𑀢𑁄 𑀭𑀜𑁆𑀜𑁄 𑀚𑀦𑀧𑀤𑁂 𑀅𑀫𑀘𑁆𑀘𑀸 𑀧𑀸𑀭𑀺𑀲𑀚𑁆𑀚𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘…𑀧𑁂… 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘…𑀧𑁂… 𑀕𑀳𑀧𑀢𑀺𑀦𑁂𑀘𑀬𑀺𑀓𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘, 𑀢𑁂 𑀪𑀯𑀁 𑀭𑀸𑀚𑀸 𑀆𑀫𑀦𑁆𑀢𑀬𑀢𑀁 𑁋 ‘𑀇𑀘𑁆𑀙𑀸𑀫𑀳𑀁, 𑀪𑁄, 𑀫𑀳𑀸𑀬𑀜𑁆𑀜𑀁 𑀬𑀚𑀺𑀢𑀼𑀁, 𑀅𑀦𑀼𑀚𑀸𑀦𑀦𑁆𑀢𑀼 𑀫𑁂 𑀪𑀯𑀦𑁆𑀢𑁄 𑀬𑀁 𑀫𑀫 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’𑀢𑀺. ‘𑀏𑀯𑀁, 𑀪𑁄’𑀢𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀭𑀸𑀚𑀸 𑀫𑀳𑀸𑀯𑀺𑀚𑀺𑀢𑁄 𑀧𑀼𑀭𑁄𑀳𑀺𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂 𑀭𑀜𑁆𑀜𑁄 𑀚𑀦𑀧𑀤𑁂 𑀔𑀢𑁆𑀢𑀺𑀬𑀸 𑀆𑀦𑀼𑀬𑀦𑁆𑀢𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘, 𑀢𑁂 𑀭𑀸𑀚𑀸 𑀫𑀳𑀸𑀯𑀺𑀚𑀺𑀢𑁄 𑀆𑀫𑀦𑁆𑀢𑁂𑀲𑀺 𑁋 ‘𑀇𑀘𑁆𑀙𑀸𑀫𑀳𑀁, 𑀪𑁄, 𑀫𑀳𑀸𑀬𑀜𑁆𑀜𑀁 𑀬𑀚𑀺𑀢𑀼𑀁, 𑀅𑀦𑀼𑀚𑀸𑀦𑀦𑁆𑀢𑀼 𑀫𑁂 𑀪𑀯𑀦𑁆𑀢𑁄 𑀬𑀁 𑀫𑀫 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺. ‘𑀬𑀚𑀢𑀁 𑀪𑀯𑀁 𑀭𑀸𑀚𑀸 𑀬𑀜𑁆𑀜𑀁, 𑀬𑀜𑁆𑀜𑀓𑀸𑀮𑁄 𑀫𑀳𑀸𑀭𑀸𑀚𑀸’𑀢𑀺. 𑀬𑁂 𑀭𑀜𑁆𑀜𑁄 𑀚𑀦𑀧𑀤𑁂 𑀅𑀫𑀘𑁆𑀘𑀸 𑀧𑀸𑀭𑀺𑀲𑀚𑁆𑀚𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘…𑀧𑁂… 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘…𑀧𑁂… 𑀕𑀳𑀧𑀢𑀺𑀦𑁂𑀘𑀬𑀺𑀓𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘, 𑀢𑁂 𑀭𑀸𑀚𑀸 𑀫𑀳𑀸𑀯𑀺𑀚𑀺𑀢𑁄 𑀆𑀫𑀦𑁆𑀢𑁂𑀲𑀺 𑁋 ‘𑀇𑀘𑁆𑀙𑀸𑀫𑀳𑀁, 𑀪𑁄, 𑀫𑀳𑀸𑀬𑀜𑁆𑀜𑀁 𑀬𑀚𑀺𑀢𑀼𑀁. 𑀅𑀦𑀼𑀚𑀸𑀦𑀦𑁆𑀢𑀼 𑀫𑁂 𑀪𑀯𑀦𑁆𑀢𑁄 𑀬𑀁 𑀫𑀫 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’𑀢𑀺. ‘𑀬𑀚𑀢𑀁 𑀪𑀯𑀁 𑀭𑀸𑀚𑀸 𑀬𑀜𑁆𑀜𑀁, 𑀬𑀜𑁆𑀜𑀓𑀸𑀮𑁄 𑀫𑀳𑀸𑀭𑀸𑀚𑀸’𑀢𑀺. 𑀇𑀢𑀺𑀫𑁂 𑀘𑀢𑁆𑀢𑀸𑀭𑁄 𑀅𑀦𑀼𑀫𑀢𑀺𑀧𑀓𑁆𑀔𑀸 𑀢𑀲𑁆𑀲𑁂𑀯 𑀬𑀜𑁆𑀜𑀲𑁆𑀲 𑀧𑀭𑀺𑀓𑁆𑀔𑀸𑀭𑀸 𑀪𑀯𑀦𑁆𑀢𑀺.

𑀅𑀝𑁆𑀞 𑀧𑀭𑀺𑀓𑁆𑀔𑀸𑀭𑀸

𑁩𑁪𑁦. ‘‘𑀭𑀸𑀚𑀸 𑀫𑀳𑀸𑀯𑀺𑀚𑀺𑀢𑁄 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀉𑀪𑀢𑁄 𑀲𑀼𑀚𑀸𑀢𑁄 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀩𑁆𑀭𑀳𑁆𑀫𑀯𑀡𑁆𑀡𑀻 𑀩𑁆𑀭𑀳𑁆𑀫𑀯𑀘𑁆𑀙𑀲𑀻 𑀅𑀔𑀼𑀤𑁆𑀤𑀸𑀯𑀓𑀸𑀲𑁄 𑀤𑀲𑁆𑀲𑀦𑀸𑀬; 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑁄 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑁄 𑀧𑀳𑀽𑀢𑀥𑀦𑀥𑀜𑁆𑀜𑁄 𑀧𑀭𑀺𑀧𑀼𑀡𑁆𑀡𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑁄; 𑀩𑀮𑀯𑀸 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲𑀯𑀸𑀬 𑀑𑀯𑀸𑀤𑀧𑀝𑀺𑀓𑀭𑀸𑀬 𑀲𑀳𑀢𑀺 [𑀧𑀢𑀧𑀢𑀺 (𑀲𑀻. 𑀧𑀻.), 𑀢𑀧𑀢𑀺 (𑀲𑁆𑀬𑀸.)] 𑀫𑀜𑁆𑀜𑁂 𑀧𑀘𑁆𑀘𑀢𑁆𑀣𑀺𑀓𑁂 𑀬𑀲𑀲𑀸; 𑀲𑀤𑁆𑀥𑁄 𑀤𑀸𑀬𑀓𑁄 𑀤𑀸𑀦𑀧𑀢𑀺 𑀅𑀦𑀸𑀯𑀝𑀤𑁆𑀯𑀸𑀭𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀓𑀧𑀡𑀤𑁆𑀥𑀺𑀓𑀯𑀡𑀺𑀩𑁆𑀩𑀓𑀬𑀸𑀘𑀓𑀸𑀦𑀁 𑀑𑀧𑀸𑀦𑀪𑀽𑀢𑁄 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺; 𑀩𑀳𑀼𑀲𑁆𑀲𑀼𑀢𑁄 𑀢𑀲𑁆𑀲 𑀢𑀲𑁆𑀲 𑀲𑀼𑀢𑀚𑀸𑀢𑀲𑁆𑀲, 𑀢𑀲𑁆𑀲 𑀢𑀲𑁆𑀲𑁂𑀯 𑀔𑁄 𑀧𑀦 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀚𑀸𑀦𑀸𑀢𑀺 ‘𑀅𑀬𑀁 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄 𑀅𑀬𑀁 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄’𑀢𑀺; 𑀧𑀡𑁆𑀟𑀺𑀢𑁄, 𑀯𑀺𑀬𑀢𑁆𑀢𑁄, 𑀫𑁂𑀥𑀸𑀯𑀻, 𑀧𑀝𑀺𑀩𑀮𑁄, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀢𑁆𑀣𑁂 𑀘𑀺𑀦𑁆𑀢𑁂𑀢𑀼𑀁. 𑀭𑀸𑀚𑀸 𑀫𑀳𑀸𑀯𑀺𑀚𑀺𑀢𑁄 𑀇𑀫𑁂𑀳𑀺 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀇𑀢𑀺 𑀇𑀫𑀸𑀦𑀺𑀧𑀺 𑀅𑀝𑁆𑀞𑀗𑁆𑀕𑀸𑀦𑀺 𑀢𑀲𑁆𑀲𑁂𑀯 𑀬𑀜𑁆𑀜𑀲𑁆𑀲 𑀧𑀭𑀺𑀓𑁆𑀔𑀸𑀭𑀸 𑀪𑀯𑀦𑁆𑀢𑀺.

𑀘𑀢𑀼𑀧𑀭𑀺𑀓𑁆𑀔𑀸𑀭𑀁

𑁩𑁪𑁧. ‘‘𑀧𑀼𑀭𑁄𑀳𑀺𑀢𑁄 [𑀧𑀼𑀭𑁄𑀳𑀺𑀢𑁄𑀧𑀺 (𑀓. 𑀲𑀻. 𑀓.)] 𑀩𑁆𑀭𑀸𑀳𑁆𑀫𑀡𑁄 𑀘𑀢𑀼𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀉𑀪𑀢𑁄 𑀲𑀼𑀚𑀸𑀢𑁄 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦; 𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀁 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁 𑀧𑀤𑀓𑁄 𑀯𑁂𑀬𑁆𑀬𑀸𑀓𑀭𑀡𑁄 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀯𑀬𑁄; 𑀲𑀻𑀮𑀯𑀸 𑀯𑀼𑀤𑁆𑀥𑀲𑀻𑀮𑀻 𑀯𑀼𑀤𑁆𑀥𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄; 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀧𑀞𑀫𑁄 𑀯𑀸 𑀤𑀼𑀢𑀺𑀬𑁄 𑀯𑀸 𑀲𑀼𑀚𑀁 𑀧𑀕𑁆𑀕𑀡𑁆𑀳𑀦𑁆𑀢𑀸𑀦𑀁. 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀇𑀫𑁂𑀳𑀺 𑀘𑀢𑀽𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀇𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀢𑀲𑁆𑀲𑁂𑀯 𑀬𑀜𑁆𑀜𑀲𑁆𑀲 𑀧𑀭𑀺𑀓𑁆𑀔𑀸𑀭𑀸 𑀪𑀯𑀦𑁆𑀢𑀺.

𑀢𑀺𑀲𑁆𑀲𑁄 𑀯𑀺𑀥𑀸

𑁩𑁪𑁨. ‘‘𑀅𑀣 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀭𑀜𑁆𑀜𑁄 𑀫𑀳𑀸𑀯𑀺𑀚𑀺𑀢𑀲𑁆𑀲 𑀧𑀼𑀩𑁆𑀩𑁂𑀯 𑀬𑀜𑁆𑀜𑀸 𑀢𑀺𑀲𑁆𑀲𑁄 𑀯𑀺𑀥𑀸 𑀤𑁂𑀲𑁂𑀲𑀺. 𑀲𑀺𑀬𑀸 𑀔𑁄 𑀧𑀦 𑀪𑁄𑀢𑁄 𑀭𑀜𑁆𑀜𑁄 𑀫𑀳𑀸𑀬𑀜𑁆𑀜𑀁 𑀬𑀺𑀝𑁆𑀞𑀼𑀓𑀸𑀫𑀲𑁆𑀲 [𑀬𑀺𑀝𑁆𑀞𑀓𑀸𑀫𑀲𑁆𑀲 (𑀓.)] 𑀓𑁄𑀘𑀺𑀤𑁂𑀯 𑀯𑀺𑀧𑁆𑀧𑀝𑀺𑀲𑀸𑀭𑁄 𑁋 ‘𑀫𑀳𑀸 𑀯𑀢 𑀫𑁂 𑀪𑁄𑀕𑀓𑁆𑀔𑀦𑁆𑀥𑁄 𑀯𑀺𑀕𑀘𑁆𑀙𑀺𑀲𑁆𑀲𑀢𑀻’𑀢𑀺, 𑀲𑁄 𑀪𑁄𑀢𑀸 𑀭𑀜𑁆𑀜𑀸 𑀯𑀺𑀧𑁆𑀧𑀝𑀺𑀲𑀸𑀭𑁄 𑀦 𑀓𑀭𑀡𑀻𑀬𑁄. 𑀲𑀺𑀬𑀸 𑀔𑁄 𑀧𑀦 𑀪𑁄𑀢𑁄 𑀭𑀜𑁆𑀜𑁄 𑀫𑀳𑀸𑀬𑀜𑁆𑀜𑀁 𑀬𑀚𑀫𑀸𑀦𑀲𑁆𑀲 𑀓𑁄𑀘𑀺𑀤𑁂𑀯 𑀯𑀺𑀧𑁆𑀧𑀝𑀺𑀲𑀸𑀭𑁄 𑁋 ‘𑀫𑀳𑀸 𑀯𑀢 𑀫𑁂 𑀪𑁄𑀕𑀓𑁆𑀔𑀦𑁆𑀥𑁄 𑀯𑀺𑀕𑀘𑁆𑀙𑀢𑀻’𑀢𑀺, 𑀲𑁄 𑀪𑁄𑀢𑀸 𑀭𑀜𑁆𑀜𑀸 𑀯𑀺𑀧𑁆𑀧𑀝𑀺𑀲𑀸𑀭𑁄 𑀦 𑀓𑀭𑀡𑀻𑀬𑁄. 𑀲𑀺𑀬𑀸 𑀔𑁄 𑀧𑀦 𑀪𑁄𑀢𑁄 𑀭𑀜𑁆𑀜𑁄 𑀫𑀳𑀸𑀬𑀜𑁆𑀜𑀁 𑀬𑀺𑀝𑁆𑀞𑀲𑁆𑀲 𑀓𑁄𑀘𑀺𑀤𑁂𑀯 𑀯𑀺𑀧𑁆𑀧𑀝𑀺𑀲𑀸𑀭𑁄 𑁋 ‘𑀫𑀳𑀸 𑀯𑀢 𑀫𑁂 𑀪𑁄𑀕𑀓𑁆𑀔𑀦𑁆𑀥𑁄 𑀯𑀺𑀕𑀢𑁄’𑀢𑀺, 𑀲𑁄 𑀪𑁄𑀢𑀸 𑀭𑀜𑁆𑀜𑀸 𑀯𑀺𑀧𑁆𑀧𑀝𑀺𑀲𑀸𑀭𑁄 𑀦 𑀓𑀭𑀡𑀻𑀬𑁄’’𑀢𑀺. 𑀇𑀫𑀸 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀭𑀜𑁆𑀜𑁄 𑀫𑀳𑀸𑀯𑀺𑀚𑀺𑀢𑀲𑁆𑀲 𑀧𑀼𑀩𑁆𑀩𑁂𑀯 𑀬𑀜𑁆𑀜𑀸 𑀢𑀺𑀲𑁆𑀲𑁄 𑀯𑀺𑀥𑀸 𑀤𑁂𑀲𑁂𑀲𑀺.

𑀤𑀲 𑀆𑀓𑀸𑀭𑀸

𑁩𑁪𑁩. ‘‘𑀅𑀣 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀭𑀜𑁆𑀜𑁄 𑀫𑀳𑀸𑀯𑀺𑀚𑀺𑀢𑀲𑁆𑀲 𑀧𑀼𑀩𑁆𑀩𑁂𑀯 𑀬𑀜𑁆𑀜𑀸 𑀤𑀲𑀳𑀸𑀓𑀸𑀭𑁂𑀳𑀺 𑀧𑀝𑀺𑀕𑁆𑀕𑀸𑀳𑀓𑁂𑀲𑀼 𑀯𑀺𑀧𑁆𑀧𑀝𑀺𑀲𑀸𑀭𑀁 𑀧𑀝𑀺𑀯𑀺𑀦𑁂𑀲𑀺. ‘𑀆𑀕𑀫𑀺𑀲𑁆𑀲𑀦𑁆𑀢𑀺 𑀔𑁄 𑀪𑁄𑀢𑁄 𑀬𑀜𑁆𑀜𑀁 𑀧𑀸𑀡𑀸𑀢𑀺𑀧𑀸𑀢𑀺𑀦𑁄𑀧𑀺 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸𑀧𑀺. 𑀬𑁂 𑀢𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑀺𑀦𑁄, 𑀢𑁂𑀲𑀜𑁆𑀜𑁂𑀯 𑀢𑁂𑀦. 𑀬𑁂 𑀢𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸, 𑀢𑁂 𑀆𑀭𑀩𑁆𑀪 𑀬𑀚𑀢𑀁 𑀪𑀯𑀁, 𑀲𑀚𑁆𑀚𑀢𑀁 𑀪𑀯𑀁, 𑀫𑁄𑀤𑀢𑀁 𑀪𑀯𑀁, 𑀘𑀺𑀢𑁆𑀢𑀫𑁂𑀯 𑀪𑀯𑀁 𑀅𑀦𑁆𑀢𑀭𑀁 𑀧𑀲𑀸𑀤𑁂𑀢𑀼. 𑀆𑀕𑀫𑀺𑀲𑁆𑀲𑀦𑁆𑀢𑀺 𑀔𑁄 𑀪𑁄𑀢𑁄 𑀬𑀜𑁆𑀜𑀁 𑀅𑀤𑀺𑀦𑁆𑀦𑀸𑀤𑀸𑀬𑀺𑀦𑁄𑀧𑀺 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑀸𑀧𑀺…𑀧𑁂… 𑀓𑀸𑀫𑁂𑀲𑀼 𑀫𑀺𑀘𑁆𑀙𑀸𑀘𑀸𑀭𑀺𑀦𑁄𑀧𑀺 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑀸𑀧𑀺… 𑀫𑀼𑀲𑀸𑀯𑀸𑀤𑀺𑀦𑁄𑀧𑀺 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑀸𑀧𑀺… 𑀧𑀺𑀲𑀼𑀡𑀯𑀸𑀘𑀺𑀦𑁄𑀧𑀺 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑀸𑀧𑀺… 𑀨𑀭𑀼𑀲𑀯𑀸𑀘𑀺𑀦𑁄𑀧𑀺 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑀸𑀧𑀺… 𑀲𑀫𑁆𑀨𑀧𑁆𑀧𑀮𑀸𑀧𑀺𑀦𑁄𑀧𑀺 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑀸𑀧𑀺 … 𑀅𑀪𑀺𑀚𑁆𑀛𑀸𑀮𑀼𑀦𑁄𑀧𑀺 𑀅𑀦𑀪𑀺𑀚𑁆𑀛𑀸𑀮𑀼𑀦𑁄𑀧𑀺… 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸𑀧𑀺 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸𑀧𑀺… 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸𑀧𑀺…. 𑀬𑁂 𑀢𑀢𑁆𑀣 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸, 𑀢𑁂𑀲𑀜𑁆𑀜𑁂𑀯 𑀢𑁂𑀦. 𑀬𑁂 𑀢𑀢𑁆𑀣 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸, 𑀢𑁂 𑀆𑀭𑀩𑁆𑀪 𑀬𑀚𑀢𑀁 𑀪𑀯𑀁, 𑀲𑀚𑁆𑀚𑀢𑀁 𑀪𑀯𑀁, 𑀫𑁄𑀤𑀢𑀁 𑀪𑀯𑀁, 𑀘𑀺𑀢𑁆𑀢𑀫𑁂𑀯 𑀪𑀯𑀁 𑀅𑀦𑁆𑀢𑀭𑀁 𑀧𑀲𑀸𑀤𑁂𑀢𑀽’𑀢𑀺. 𑀇𑀫𑁂𑀳𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀭𑀜𑁆𑀜𑁄 𑀫𑀳𑀸𑀯𑀺𑀚𑀺𑀢𑀲𑁆𑀲 𑀧𑀼𑀩𑁆𑀩𑁂𑀯 𑀬𑀜𑁆𑀜𑀸 𑀤𑀲𑀳𑀸𑀓𑀸𑀭𑁂𑀳𑀺 𑀧𑀝𑀺𑀕𑁆𑀕𑀸𑀳𑀓𑁂𑀲𑀼 𑀯𑀺𑀧𑁆𑀧𑀝𑀺𑀲𑀸𑀭𑀁 𑀧𑀝𑀺𑀯𑀺𑀦𑁂𑀲𑀺.

𑀲𑁄𑀴𑀲 𑀆𑀓𑀸𑀭𑀸

𑁩𑁪𑁪. ‘‘𑀅𑀣 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀭𑀜𑁆𑀜𑁄 𑀫𑀳𑀸𑀯𑀺𑀚𑀺𑀢𑀲𑁆𑀲 𑀫𑀳𑀸𑀬𑀜𑁆𑀜𑀁 𑀬𑀚𑀫𑀸𑀦𑀲𑁆𑀲 𑀲𑁄𑀴𑀲𑀳𑀸𑀓𑀸𑀭𑁂𑀳𑀺 𑀘𑀺𑀢𑁆𑀢𑀁 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺 𑀲𑀺𑀬𑀸 𑀔𑁄 𑀧𑀦 𑀪𑁄𑀢𑁄 𑀭𑀜𑁆𑀜𑁄 𑀫𑀳𑀸𑀬𑀜𑁆𑀜𑀁 𑀬𑀚𑀫𑀸𑀦𑀲𑁆𑀲 𑀓𑁄𑀘𑀺𑀤𑁂𑀯 𑀯𑀢𑁆𑀢𑀸 𑁋 ‘𑀭𑀸𑀚𑀸 𑀔𑁄 𑀫𑀳𑀸𑀯𑀺𑀚𑀺𑀢𑁄 𑀫𑀳𑀸𑀬𑀜𑁆𑀜𑀁 𑀬𑀚𑀢𑀺, 𑀦𑁄 𑀘 𑀔𑁄 𑀢𑀲𑁆𑀲 𑀆𑀫𑀦𑁆𑀢𑀺𑀢𑀸 𑀔𑀢𑁆𑀢𑀺𑀬𑀸 𑀆𑀦𑀼𑀬𑀦𑁆𑀢𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘; 𑀅𑀣 𑀘 𑀧𑀦 𑀪𑀯𑀁 𑀭𑀸𑀚𑀸 𑀏𑀯𑀭𑀽𑀧𑀁 𑀫𑀳𑀸𑀬𑀜𑁆𑀜𑀁 𑀬𑀚𑀢𑀻’𑀢𑀺. 𑀏𑀯𑀫𑁆𑀧𑀺 𑀪𑁄𑀢𑁄 𑀭𑀜𑁆𑀜𑁄 𑀯𑀢𑁆𑀢𑀸 𑀥𑀫𑁆𑀫𑀢𑁄 𑀦𑀢𑁆𑀣𑀺. 𑀪𑁄𑀢𑀸 𑀔𑁄 𑀧𑀦 𑀭𑀜𑁆𑀜𑀸 𑀆𑀫𑀦𑁆𑀢𑀺𑀢𑀸 𑀔𑀢𑁆𑀢𑀺𑀬𑀸 𑀆𑀦𑀼𑀬𑀦𑁆𑀢𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘. 𑀇𑀫𑀺𑀦𑀸𑀧𑁂𑀢𑀁 𑀪𑀯𑀁 𑀭𑀸𑀚𑀸 𑀚𑀸𑀦𑀸𑀢𑀼, 𑀬𑀚𑀢𑀁 𑀪𑀯𑀁, 𑀲𑀚𑁆𑀚𑀢𑀁 𑀪𑀯𑀁, 𑀫𑁄𑀤𑀢𑀁 𑀪𑀯𑀁, 𑀘𑀺𑀢𑁆𑀢𑀫𑁂𑀯 𑀪𑀯𑀁 𑀅𑀦𑁆𑀢𑀭𑀁 𑀧𑀲𑀸𑀤𑁂𑀢𑀼.

‘‘𑀲𑀺𑀬𑀸 𑀔𑁄 𑀧𑀦 𑀪𑁄𑀢𑁄 𑀭𑀜𑁆𑀜𑁄 𑀫𑀳𑀸𑀬𑀜𑁆𑀜𑀁 𑀬𑀚𑀫𑀸𑀦𑀲𑁆𑀲 𑀓𑁄𑀘𑀺𑀤𑁂𑀯 𑀯𑀢𑁆𑀢𑀸 𑁋 ‘𑀭𑀸𑀚𑀸 𑀔𑁄 𑀫𑀳𑀸𑀯𑀺𑀚𑀺𑀢𑁄 𑀫𑀳𑀸𑀬𑀜𑁆𑀜𑀁 𑀬𑀚𑀢𑀺, 𑀦𑁄 𑀘 𑀔𑁄 𑀢𑀲𑁆𑀲 𑀆𑀫𑀦𑁆𑀢𑀺𑀢𑀸 𑀅𑀫𑀘𑁆𑀘𑀸 𑀧𑀸𑀭𑀺𑀲𑀚𑁆𑀚𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘…𑀧𑁂… 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘…𑀧𑁂… 𑀕𑀳𑀧𑀢𑀺𑀦𑁂𑀘𑀬𑀺𑀓𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘, 𑀅𑀣 𑀘 𑀧𑀦 𑀪𑀯𑀁 𑀭𑀸𑀚𑀸 𑀏𑀯𑀭𑀽𑀧𑀁 𑀫𑀳𑀸𑀬𑀜𑁆𑀜𑀁 𑀬𑀚𑀢𑀻’𑀢𑀺. 𑀏𑀯𑀫𑁆𑀧𑀺 𑀪𑁄𑀢𑁄 𑀭𑀜𑁆𑀜𑁄 𑀯𑀢𑁆𑀢𑀸 𑀥𑀫𑁆𑀫𑀢𑁄 𑀦𑀢𑁆𑀣𑀺. 𑀪𑁄𑀢𑀸 𑀔𑁄 𑀧𑀦 𑀭𑀜𑁆𑀜𑀸 𑀆𑀫𑀦𑁆𑀢𑀺𑀢𑀸 𑀕𑀳𑀧𑀢𑀺𑀦𑁂𑀘𑀬𑀺𑀓𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘. 𑀇𑀫𑀺𑀦𑀸𑀧𑁂𑀢𑀁 𑀪𑀯𑀁 𑀭𑀸𑀚𑀸 𑀚𑀸𑀦𑀸𑀢𑀼, 𑀬𑀚𑀢𑀁 𑀪𑀯𑀁, 𑀲𑀚𑁆𑀚𑀢𑀁 𑀪𑀯𑀁, 𑀫𑁄𑀤𑀢𑀁 𑀪𑀯𑀁, 𑀘𑀺𑀢𑁆𑀢𑀫𑁂𑀯 𑀪𑀯𑀁 𑀅𑀦𑁆𑀢𑀭𑀁 𑀧𑀲𑀸𑀤𑁂𑀢𑀼.

‘‘𑀲𑀺𑀬𑀸 𑀔𑁄 𑀧𑀦 𑀪𑁄𑀢𑁄 𑀭𑀜𑁆𑀜𑁄 𑀫𑀳𑀸𑀬𑀜𑁆𑀜𑀁 𑀬𑀚𑀫𑀸𑀦𑀲𑁆𑀲 𑀓𑁄𑀘𑀺𑀤𑁂𑀯 𑀯𑀢𑁆𑀢𑀸 𑁋 ‘𑀭𑀸𑀚𑀸 𑀔𑁄 𑀫𑀳𑀸𑀯𑀺𑀚𑀺𑀢𑁄 𑀫𑀳𑀸𑀬𑀜𑁆𑀜𑀁 𑀬𑀚𑀢𑀺, 𑀦𑁄 𑀘 𑀔𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦, 𑀅𑀣 𑀘 𑀧𑀦 𑀪𑀯𑀁 𑀭𑀸𑀚𑀸 𑀏𑀯𑀭𑀽𑀧𑀁 𑀫𑀳𑀸𑀬𑀜𑁆𑀜𑀁 𑀬𑀚𑀢𑀻’𑀢𑀺. 𑀏𑀯𑀫𑁆𑀧𑀺 𑀪𑁄𑀢𑁄 𑀭𑀜𑁆𑀜𑁄 𑀯𑀢𑁆𑀢𑀸 𑀥𑀫𑁆𑀫𑀢𑁄 𑀦𑀢𑁆𑀣𑀺. 𑀪𑀯𑀁 𑀔𑁄 𑀧𑀦 𑀭𑀸𑀚𑀸 𑀉𑀪𑀢𑁄 𑀲𑀼𑀚𑀸𑀢𑁄 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦. 𑀇𑀫𑀺𑀦𑀸𑀧𑁂𑀢𑀁 𑀪𑀯𑀁 𑀭𑀸𑀚𑀸 𑀚𑀸𑀦𑀸𑀢𑀼, 𑀬𑀚𑀢𑀁 𑀪𑀯𑀁, 𑀲𑀚𑁆𑀚𑀢𑀁 𑀪𑀯𑀁, 𑀫𑁄𑀤𑀢𑀁 𑀪𑀯𑀁, 𑀘𑀺𑀢𑁆𑀢𑀫𑁂𑀯 𑀪𑀯𑀁 𑀅𑀦𑁆𑀢𑀭𑀁 𑀧𑀲𑀸𑀤𑁂𑀢𑀼.

‘‘𑀲𑀺𑀬𑀸 𑀔𑁄 𑀧𑀦 𑀪𑁄𑀢𑁄 𑀭𑀜𑁆𑀜𑁄 𑀫𑀳𑀸𑀬𑀜𑁆𑀜𑀁 𑀬𑀚𑀫𑀸𑀦𑀲𑁆𑀲 𑀓𑁄𑀘𑀺𑀤𑁂𑀯 𑀯𑀢𑁆𑀢𑀸 𑁋 ‘𑀭𑀸𑀚𑀸 𑀔𑁄 𑀫𑀳𑀸𑀯𑀺𑀚𑀺𑀢𑁄 𑀫𑀳𑀸𑀬𑀜𑁆𑀜𑀁 𑀬𑀚𑀢𑀺 𑀦𑁄 𑀘 𑀔𑁄 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀩𑁆𑀭𑀳𑁆𑀫𑀯𑀡𑁆𑀡𑀻 𑀩𑁆𑀭𑀳𑁆𑀫𑀯𑀘𑁆𑀙𑀲𑀻 𑀅𑀔𑀼𑀤𑁆𑀤𑀸𑀯𑀓𑀸𑀲𑁄 𑀤𑀲𑁆𑀲𑀦𑀸𑀬…𑀧𑁂… 𑀦𑁄 𑀘 𑀔𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑁄 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑁄 𑀧𑀳𑀽𑀢𑀥𑀦𑀥𑀜𑁆𑀜𑁄 𑀧𑀭𑀺𑀧𑀼𑀡𑁆𑀡𑀓𑁄𑀲𑀓𑁄𑀝𑁆𑀞𑀸𑀕𑀸𑀭𑁄…𑀧𑁂… 𑀦𑁄 𑀘 𑀔𑁄 𑀩𑀮𑀯𑀸 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲𑀯𑀸𑀬 𑀑𑀯𑀸𑀤𑀧𑀝𑀺𑀓𑀭𑀸𑀬 𑀲𑀳𑀢𑀺 𑀫𑀜𑁆𑀜𑁂 𑀧𑀘𑁆𑀘𑀢𑁆𑀣𑀺𑀓𑁂 𑀬𑀲𑀲𑀸…𑀧𑁂… 𑀦𑁄 𑀘 𑀔𑁄 𑀲𑀤𑁆𑀥𑁄 𑀤𑀸𑀬𑀓𑁄 𑀤𑀸𑀦𑀧𑀢𑀺 𑀅𑀦𑀸𑀯𑀝𑀤𑁆𑀯𑀸𑀭𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀓𑀧𑀡𑀤𑁆𑀥𑀺𑀓𑀯𑀡𑀺𑀩𑁆𑀩𑀓𑀬𑀸𑀘𑀓𑀸𑀦𑀁 𑀑𑀧𑀸𑀦𑀪𑀽𑀢𑁄 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀺…𑀧𑁂… 𑀦𑁄 𑀘 𑀔𑁄 𑀩𑀳𑀼𑀲𑁆𑀲𑀼𑀢𑁄 𑀢𑀲𑁆𑀲 𑀢𑀲𑁆𑀲 𑀲𑀼𑀢𑀚𑀸𑀢𑀲𑁆𑀲…𑀧𑁂… 𑀦𑁄 𑀘 𑀔𑁄 𑀢𑀲𑁆𑀲 𑀢𑀲𑁆𑀲𑁂𑀯 𑀔𑁄 𑀧𑀦 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀚𑀸𑀦𑀸𑀢𑀺 ‘‘𑀅𑀬𑀁 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄, 𑀅𑀬𑀁 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄’’𑀢𑀺…𑀧𑁂… 𑀦𑁄 𑀘 𑀔𑁄 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀧𑀝𑀺𑀩𑀮𑁄 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀢𑁆𑀣𑁂 𑀘𑀺𑀦𑁆𑀢𑁂𑀢𑀼𑀁, 𑀅𑀣 𑀘 𑀧𑀦 𑀪𑀯𑀁 𑀭𑀸𑀚𑀸 𑀏𑀯𑀭𑀽𑀧𑀁 𑀫𑀳𑀸𑀬𑀜𑁆𑀜𑀁 𑀬𑀚𑀢𑀻’𑀢𑀺. 𑀏𑀯𑀫𑁆𑀧𑀺 𑀪𑁄𑀢𑁄 𑀭𑀜𑁆𑀜𑁄 𑀯𑀢𑁆𑀢𑀸 𑀥𑀫𑁆𑀫𑀢𑁄 𑀦𑀢𑁆𑀣𑀺. 𑀪𑀯𑀁 𑀔𑁄 𑀧𑀦 𑀭𑀸𑀚𑀸 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀧𑀝𑀺𑀩𑀮𑁄 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀅𑀢𑁆𑀣𑁂 𑀘𑀺𑀦𑁆𑀢𑁂𑀢𑀼𑀁. 𑀇𑀫𑀺𑀦𑀸𑀧𑁂𑀢𑀁 𑀪𑀯𑀁 𑀭𑀸𑀚𑀸 𑀚𑀸𑀦𑀸𑀢𑀼, 𑀬𑀚𑀢𑀁 𑀪𑀯𑀁, 𑀲𑀚𑁆𑀚𑀢𑀁 𑀪𑀯𑀁, 𑀫𑁄𑀤𑀢𑀁 𑀪𑀯𑀁, 𑀘𑀺𑀢𑁆𑀢𑀫𑁂𑀯 𑀪𑀯𑀁 𑀅𑀦𑁆𑀢𑀭𑀁 𑀧𑀲𑀸𑀤𑁂𑀢𑀼.

‘‘𑀲𑀺𑀬𑀸 𑀔𑁄 𑀧𑀦 𑀪𑁄𑀢𑁄 𑀭𑀜𑁆𑀜𑁄 𑀫𑀳𑀸𑀬𑀜𑁆𑀜𑀁 𑀬𑀚𑀫𑀸𑀦𑀲𑁆𑀲 𑀓𑁄𑀘𑀺𑀤𑁂𑀯 𑀯𑀢𑁆𑀢𑀸 𑁋 ‘𑀭𑀸𑀚𑀸 𑀔𑁄 𑀫𑀳𑀸𑀯𑀺𑀚𑀺𑀢𑁄 𑀫𑀳𑀸𑀬𑀜𑁆𑀜𑀁 𑀬𑀚𑀢𑀺. 𑀦𑁄 𑀘 𑀔𑁆𑀯𑀲𑁆𑀲 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦; 𑀅𑀣 𑀘 𑀧𑀦 𑀪𑀯𑀁 𑀭𑀸𑀚𑀸 𑀏𑀯𑀭𑀽𑀧𑀁 𑀫𑀳𑀸𑀬𑀜𑁆𑀜𑀁 𑀬𑀚𑀢𑀻’𑀢𑀺. 𑀏𑀯𑀫𑁆𑀧𑀺 𑀪𑁄𑀢𑁄 𑀭𑀜𑁆𑀜𑁄 𑀯𑀢𑁆𑀢𑀸 𑀥𑀫𑁆𑀫𑀢𑁄 𑀦𑀢𑁆𑀣𑀺. 𑀪𑁄𑀢𑁄 𑀔𑁄 𑀧𑀦 𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀉𑀪𑀢𑁄 𑀲𑀼𑀚𑀸𑀢𑁄 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀅𑀓𑁆𑀔𑀺𑀢𑁆𑀢𑁄 𑀅𑀦𑀼𑀧𑀓𑁆𑀓𑀼𑀝𑁆𑀞𑁄 𑀚𑀸𑀢𑀺𑀯𑀸𑀤𑁂𑀦. 𑀇𑀫𑀺𑀦𑀸𑀧𑁂𑀢𑀁 𑀪𑀯𑀁 𑀭𑀸𑀚𑀸 𑀚𑀸𑀦𑀸𑀢𑀼, 𑀬𑀚𑀢𑀁 𑀪𑀯𑀁, 𑀲𑀚𑁆𑀚𑀢𑀁 𑀪𑀯𑀁, 𑀫𑁄𑀤𑀢𑀁 𑀪𑀯𑀁, 𑀘𑀺𑀢𑁆𑀢𑀫𑁂𑀯 𑀪𑀯𑀁 𑀅𑀦𑁆𑀢𑀭𑀁 𑀧𑀲𑀸𑀤𑁂𑀢𑀼.

‘‘𑀲𑀺𑀬𑀸 𑀔𑁄 𑀧𑀦 𑀪𑁄𑀢𑁄 𑀭𑀜𑁆𑀜𑁄 𑀫𑀳𑀸𑀬𑀜𑁆𑀜𑀁 𑀬𑀚𑀫𑀸𑀦𑀲𑁆𑀲 𑀓𑁄𑀘𑀺𑀤𑁂𑀯 𑀯𑀢𑁆𑀢𑀸 𑁋 ‘𑀭𑀸𑀚𑀸 𑀔𑁄 𑀫𑀳𑀸𑀯𑀺𑀚𑀺𑀢𑁄 𑀫𑀳𑀸𑀬𑀜𑁆𑀜𑀁 𑀬𑀚𑀢𑀺. 𑀦𑁄 𑀘 𑀔𑁆𑀯𑀲𑁆𑀲 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀅𑀚𑁆𑀛𑀸𑀬𑀓𑁄 𑀫𑀦𑁆𑀢𑀥𑀭𑁄 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀁 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸𑀦𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁 𑀧𑀤𑀓𑁄 𑀯𑁂𑀬𑁆𑀬𑀸𑀓𑀭𑀡𑁄 𑀮𑁄𑀓𑀸𑀬𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀲𑀼 𑀅𑀦𑀯𑀬𑁄…𑀧𑁂… 𑀦𑁄 𑀘 𑀔𑁆𑀯𑀲𑁆𑀲 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀲𑀻𑀮𑀯𑀸 𑀯𑀼𑀤𑁆𑀥𑀲𑀻𑀮𑀻 𑀯𑀼𑀤𑁆𑀥𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄…𑀧𑁂… 𑀦𑁄 𑀘 𑀔𑁆𑀯𑀲𑁆𑀲 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀧𑀞𑀫𑁄 𑀯𑀸 𑀤𑀼𑀢𑀺𑀬𑁄 𑀯𑀸 𑀲𑀼𑀚𑀁 𑀧𑀕𑁆𑀕𑀡𑁆𑀳𑀦𑁆𑀢𑀸𑀦𑀁, 𑀅𑀣 𑀘 𑀧𑀦 𑀪𑀯𑀁 𑀭𑀸𑀚𑀸 𑀏𑀯𑀭𑀽𑀧𑀁 𑀫𑀳𑀸𑀬𑀜𑁆𑀜𑀁 𑀬𑀚𑀢𑀻’𑀢𑀺. 𑀏𑀯𑀫𑁆𑀧𑀺 𑀪𑁄𑀢𑁄 𑀭𑀜𑁆𑀜𑁄 𑀯𑀢𑁆𑀢𑀸 𑀥𑀫𑁆𑀫𑀢𑁄 𑀦𑀢𑁆𑀣𑀺. 𑀪𑁄𑀢𑁄 𑀔𑁄 𑀧𑀦 𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀧𑀞𑀫𑁄 𑀯𑀸 𑀤𑀼𑀢𑀺𑀬𑁄 𑀯𑀸 𑀲𑀼𑀚𑀁 𑀧𑀕𑁆𑀕𑀡𑁆𑀳𑀦𑁆𑀢𑀸𑀦𑀁. 𑀇𑀫𑀺𑀦𑀸𑀧𑁂𑀢𑀁 𑀪𑀯𑀁 𑀭𑀸𑀚𑀸 𑀚𑀸𑀦𑀸𑀢𑀼, 𑀬𑀚𑀢𑀁 𑀪𑀯𑀁, 𑀲𑀚𑁆𑀚𑀢𑀁 𑀪𑀯𑀁, 𑀫𑁄𑀤𑀢𑀁 𑀪𑀯𑀁, 𑀘𑀺𑀢𑁆𑀢𑀫𑁂𑀯 𑀪𑀯𑀁 𑀅𑀦𑁆𑀢𑀭𑀁 𑀧𑀲𑀸𑀤𑁂𑀢𑀽𑀢𑀺. 𑀇𑀫𑁂𑀳𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀭𑀜𑁆𑀜𑁄 𑀫𑀳𑀸𑀯𑀺𑀚𑀺𑀢𑀲𑁆𑀲 𑀫𑀳𑀸𑀬𑀜𑁆𑀜𑀁 𑀬𑀚𑀫𑀸𑀦𑀲𑁆𑀲 𑀲𑁄𑀴𑀲𑀳𑀺 𑀆𑀓𑀸𑀭𑁂𑀳𑀺 𑀘𑀺𑀢𑁆𑀢𑀁 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺.

𑁩𑁪𑁫. ‘‘𑀢𑀲𑁆𑀫𑀺𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀜𑁆𑀜𑁂 𑀦𑁂𑀯 𑀕𑀸𑀯𑁄 𑀳𑀜𑁆𑀜𑀺𑀁𑀲𑀼, 𑀦 𑀅𑀚𑁂𑀴𑀓𑀸 𑀳𑀜𑁆𑀜𑀺𑀁𑀲𑀼, 𑀦 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀳𑀜𑁆𑀜𑀺𑀁𑀲𑀼, 𑀦 𑀯𑀺𑀯𑀺𑀥𑀸 𑀧𑀸𑀡𑀸 𑀲𑀁𑀖𑀸𑀢𑀁 𑀆𑀧𑀚𑁆𑀚𑀺𑀁𑀲𑀼, 𑀦 𑀭𑀼𑀓𑁆𑀔𑀸 𑀙𑀺𑀚𑁆𑀚𑀺𑀁𑀲𑀼 𑀬𑀽𑀧𑀢𑁆𑀣𑀸𑀬, 𑀦 𑀤𑀩𑁆𑀪𑀸 𑀮𑀽𑀬𑀺𑀁𑀲𑀼 𑀩𑀭𑀺𑀳𑀺𑀲𑀢𑁆𑀣𑀸𑀬 [𑀧𑀭𑀺𑀳𑀺𑀁𑀲𑀢𑁆𑀣𑀸𑀬 (𑀲𑁆𑀬𑀸. 𑀓. 𑀲𑀻. 𑀓.), 𑀧𑀭𑀳𑀺𑀁𑀲𑀢𑁆𑀣𑀸𑀬 (𑀓.)]. 𑀬𑁂𑀧𑀺𑀲𑁆𑀲 𑀅𑀳𑁂𑀲𑀼𑀁 𑀤𑀸𑀲𑀸𑀢𑀺 𑀯𑀸 𑀧𑁂𑀲𑁆𑀲𑀸𑀢𑀺 𑀯𑀸 𑀓𑀫𑁆𑀫𑀓𑀭𑀸𑀢𑀺 𑀯𑀸, 𑀢𑁂𑀧𑀺 𑀦 𑀤𑀡𑁆𑀟𑀢𑀚𑁆𑀚𑀺𑀢𑀸 𑀦 𑀪𑀬𑀢𑀚𑁆𑀚𑀺𑀢𑀸 𑀦 𑀅𑀲𑁆𑀲𑀼𑀫𑀼𑀔𑀸 𑀭𑀼𑀤𑀫𑀸𑀦𑀸 𑀧𑀭𑀺𑀓𑀫𑁆𑀫𑀸𑀦𑀺 𑀅𑀓𑀁𑀲𑀼. 𑀅𑀣 𑀔𑁄 𑀬𑁂 𑀇𑀘𑁆𑀙𑀺𑀁𑀲𑀼, 𑀢𑁂 𑀅𑀓𑀁𑀲𑀼, 𑀬𑁂 𑀦 𑀇𑀘𑁆𑀙𑀺𑀁𑀲𑀼, 𑀦 𑀢𑁂 𑀅𑀓𑀁𑀲𑀼; 𑀬𑀁 𑀇𑀘𑁆𑀙𑀺𑀁𑀲𑀼, 𑀢𑀁 𑀅𑀓𑀁𑀲𑀼, 𑀬𑀁 𑀦 𑀇𑀘𑁆𑀙𑀺𑀁𑀲𑀼, 𑀦 𑀢𑀁 𑀅𑀓𑀁𑀲𑀼. 𑀲𑀧𑁆𑀧𑀺𑀢𑁂𑀮𑀦𑀯𑀦𑀻𑀢𑀤𑀥𑀺𑀫𑀥𑀼𑀨𑀸𑀡𑀺𑀢𑁂𑀦 𑀘𑁂𑀯 𑀲𑁄 𑀬𑀜𑁆𑀜𑁄 𑀦𑀺𑀝𑁆𑀞𑀸𑀦𑀫𑀕𑀫𑀸𑀲𑀺.

𑁩𑁪𑁬. ‘‘𑀅𑀣 𑀔𑁄, 𑀩𑁆𑀭𑀸𑀳𑁆𑀫𑀡, 𑀔𑀢𑁆𑀢𑀺𑀬𑀸 𑀆𑀦𑀼𑀬𑀦𑁆𑀢𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘, 𑀅𑀫𑀘𑁆𑀘𑀸 𑀧𑀸𑀭𑀺𑀲𑀚𑁆𑀚𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘, 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘, 𑀕𑀳𑀧𑀢𑀺𑀦𑁂𑀘𑀬𑀺𑀓𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘 𑀧𑀳𑀽𑀢𑀁 𑀲𑀸𑀧𑀢𑁂𑀬𑁆𑀬𑀁 𑀆𑀤𑀸𑀬 𑀭𑀸𑀚𑀸𑀦𑀁 𑀫𑀳𑀸𑀯𑀺𑀚𑀺𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀇𑀤𑀁, 𑀤𑁂𑀯, 𑀧𑀳𑀽𑀢𑀁 𑀲𑀸𑀧𑀢𑁂𑀬𑁆𑀬𑀁 𑀤𑁂𑀯𑀜𑁆𑀜𑁂𑀯 𑀉𑀤𑁆𑀤𑀺𑀲𑁆𑀲𑀸𑀪𑀢𑀁, 𑀢𑀁 𑀤𑁂𑀯𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀽’𑀢𑀺. ‘𑀅𑀮𑀁, 𑀪𑁄, 𑀫𑀫𑀸𑀧𑀺𑀤𑀁 𑀧𑀳𑀽𑀢𑀁 𑀲𑀸𑀧𑀢𑁂𑀬𑁆𑀬𑀁 𑀥𑀫𑁆𑀫𑀺𑀓𑁂𑀦 𑀩𑀮𑀺𑀦𑀸 𑀅𑀪𑀺𑀲𑀗𑁆𑀔𑀢𑀁; 𑀢𑀜𑁆𑀘 𑀯𑁄 𑀳𑁄𑀢𑀼, 𑀇𑀢𑁄 𑀘 𑀪𑀺𑀬𑁆𑀬𑁄 𑀳𑀭𑀣𑀸’𑀢𑀺. 𑀢𑁂 𑀭𑀜𑁆𑀜𑀸 𑀧𑀝𑀺𑀓𑁆𑀔𑀺𑀢𑁆𑀢𑀸 𑀏𑀓𑀫𑀦𑁆𑀢𑀁 𑀅𑀧𑀓𑁆𑀓𑀫𑁆𑀫 𑀏𑀯𑀁 𑀲𑀫𑀘𑀺𑀦𑁆𑀢𑁂𑀲𑀼𑀁 𑁋 ‘𑀦 𑀔𑁄 𑀏𑀢𑀁 𑀅𑀫𑁆𑀳𑀸𑀓𑀁 𑀧𑀢𑀺𑀭𑀽𑀧𑀁, 𑀬𑀁 𑀫𑀬𑀁 𑀇𑀫𑀸𑀦𑀺 𑀲𑀸𑀧𑀢𑁂𑀬𑁆𑀬𑀸𑀦𑀺 𑀧𑀼𑀦𑀤𑁂𑀯 𑀲𑀓𑀸𑀦𑀺 𑀖𑀭𑀸𑀦𑀺 𑀧𑀝𑀺𑀳𑀭𑁂𑀬𑁆𑀬𑀸𑀫. 𑀭𑀸𑀚𑀸 𑀔𑁄 𑀫𑀳𑀸𑀯𑀺𑀚𑀺𑀢𑁄 𑀫𑀳𑀸𑀬𑀜𑁆𑀜𑀁 𑀬𑀚𑀢𑀺, 𑀳𑀦𑁆𑀤𑀲𑁆𑀲 𑀫𑀬𑀁 𑀅𑀦𑀼𑀬𑀸𑀕𑀺𑀦𑁄 𑀳𑁄𑀫𑀸’𑀢𑀺.

𑁩𑁪𑁭. ‘‘𑀅𑀣 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀼𑀭𑀢𑁆𑀣𑀺𑀫𑁂𑀦 𑀬𑀜𑁆𑀜𑀯𑀸𑀝𑀲𑁆𑀲 [𑀬𑀜𑁆𑀜𑀸𑀯𑀸𑀝𑀲𑁆𑀲 (𑀲𑀻. 𑀧𑀻. 𑀓.)] 𑀔𑀢𑁆𑀢𑀺𑀬𑀸 𑀆𑀦𑀼𑀬𑀦𑁆𑀢𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘 𑀤𑀸𑀦𑀸𑀦𑀺 𑀧𑀝𑁆𑀞𑀧𑁂𑀲𑀼𑀁. 𑀤𑀓𑁆𑀔𑀺𑀡𑁂𑀦 𑀬𑀜𑁆𑀜𑀯𑀸𑀝𑀲𑁆𑀲 𑀅𑀫𑀘𑁆𑀘𑀸 𑀧𑀸𑀭𑀺𑀲𑀚𑁆𑀚𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘 𑀤𑀸𑀦𑀸𑀦𑀺 𑀧𑀝𑁆𑀞𑀧𑁂𑀲𑀼𑀁. 𑀧𑀘𑁆𑀙𑀺𑀫𑁂𑀦 𑀬𑀜𑁆𑀜𑀯𑀸𑀝𑀲𑁆𑀲 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘 𑀤𑀸𑀦𑀸𑀦𑀺 𑀧𑀝𑁆𑀞𑀧𑁂𑀲𑀼𑀁. 𑀉𑀢𑁆𑀢𑀭𑁂𑀦 𑀬𑀜𑁆𑀜𑀯𑀸𑀝𑀲𑁆𑀲 𑀕𑀳𑀧𑀢𑀺𑀦𑁂𑀘𑀬𑀺𑀓𑀸 𑀦𑁂𑀕𑀫𑀸 𑀘𑁂𑀯 𑀚𑀸𑀦𑀧𑀤𑀸 𑀘 𑀤𑀸𑀦𑀸𑀦𑀺 𑀧𑀝𑁆𑀞𑀧𑁂𑀲𑀼𑀁.

‘‘𑀢𑁂𑀲𑀼𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀜𑁆𑀜𑁂𑀲𑀼 𑀦𑁂𑀯 𑀕𑀸𑀯𑁄 𑀳𑀜𑁆𑀜𑀺𑀁𑀲𑀼, 𑀦 𑀅𑀚𑁂𑀴𑀓𑀸 𑀳𑀜𑁆𑀜𑀺𑀁𑀲𑀼, 𑀦 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀳𑀜𑁆𑀜𑀺𑀁𑀲𑀼, 𑀦 𑀯𑀺𑀯𑀺𑀥𑀸 𑀧𑀸𑀡𑀸 𑀲𑀁𑀖𑀸𑀢𑀁 𑀆𑀧𑀚𑁆𑀚𑀺𑀁𑀲𑀼, 𑀦 𑀭𑀼𑀓𑁆𑀔𑀸 𑀙𑀺𑀚𑁆𑀚𑀺𑀁𑀲𑀼 𑀬𑀽𑀧𑀢𑁆𑀣𑀸𑀬, 𑀦 𑀤𑀩𑁆𑀪𑀸 𑀮𑀽𑀬𑀺𑀁𑀲𑀼 𑀩𑀭𑀺𑀳𑀺𑀲𑀢𑁆𑀣𑀸𑀬. 𑀬𑁂𑀧𑀺 𑀦𑁂𑀲𑀁 𑀅𑀳𑁂𑀲𑀼𑀁 𑀤𑀸𑀲𑀸𑀢𑀺 𑀯𑀸 𑀧𑁂𑀲𑁆𑀲𑀸𑀢𑀺 𑀯𑀸 𑀓𑀫𑁆𑀫𑀓𑀭𑀸𑀢𑀺 𑀯𑀸, 𑀢𑁂𑀧𑀺 𑀦 𑀤𑀡𑁆𑀟𑀢𑀚𑁆𑀚𑀺𑀢𑀸 𑀦 𑀪𑀬𑀢𑀚𑁆𑀚𑀺𑀢𑀸 𑀦 𑀅𑀲𑁆𑀲𑀼𑀫𑀼𑀔𑀸 𑀭𑀼𑀤𑀫𑀸𑀦𑀸 𑀧𑀭𑀺𑀓𑀫𑁆𑀫𑀸𑀦𑀺 𑀅𑀓𑀁𑀲𑀼. 𑀅𑀣 𑀔𑁄 𑀬𑁂 𑀇𑀘𑁆𑀙𑀺𑀁𑀲𑀼, 𑀢𑁂 𑀅𑀓𑀁𑀲𑀼, 𑀬𑁂 𑀦 𑀇𑀘𑁆𑀙𑀺𑀁𑀲𑀼, 𑀦 𑀢𑁂 𑀅𑀓𑀁𑀲𑀼; 𑀬𑀁 𑀇𑀘𑁆𑀙𑀺𑀁𑀲𑀼, 𑀢𑀁 𑀅𑀓𑀁𑀲𑀼, 𑀬𑀁 𑀦 𑀇𑀘𑁆𑀙𑀺𑀁𑀲𑀼 𑀦 𑀢𑀁 𑀅𑀓𑀁𑀲𑀼. 𑀲𑀧𑁆𑀧𑀺𑀢𑁂𑀮𑀦𑀯𑀦𑀻𑀢𑀤𑀥𑀺𑀫𑀥𑀼𑀨𑀸𑀡𑀺𑀢𑁂𑀦 𑀘𑁂𑀯 𑀢𑁂 𑀬𑀜𑁆𑀜𑀸 𑀦𑀺𑀝𑁆𑀞𑀸𑀦𑀫𑀕𑀫𑀁𑀲𑀼.

‘‘𑀇𑀢𑀺 𑀘𑀢𑁆𑀢𑀸𑀭𑁄 𑀘 𑀅𑀦𑀼𑀫𑀢𑀺𑀧𑀓𑁆𑀔𑀸, 𑀭𑀸𑀚𑀸 𑀫𑀳𑀸𑀯𑀺𑀚𑀺𑀢𑁄 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀘𑀢𑀽𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄; 𑀢𑀺𑀲𑁆𑀲𑁄 𑀘 𑀯𑀺𑀥𑀸 𑀅𑀬𑀁 𑀯𑀼𑀘𑁆𑀘𑀢𑀺 𑀩𑁆𑀭𑀸𑀳𑁆𑀫𑀡 𑀢𑀺𑀯𑀺𑀥𑀸 𑀬𑀜𑁆𑀜𑀲𑀫𑁆𑀧𑀤𑀸 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀸’’𑀢𑀺.

𑁩𑁪𑁮. 𑀏𑀯𑀁 𑀯𑀼𑀢𑁆𑀢𑁂, 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀉𑀦𑁆𑀦𑀸𑀤𑀺𑀦𑁄 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸 𑀅𑀳𑁂𑀲𑀼𑀁 𑁋 ‘‘𑀅𑀳𑁄 𑀬𑀜𑁆𑀜𑁄, 𑀅𑀳𑁄 𑀬𑀜𑁆𑀜𑀲𑀫𑁆𑀧𑀤𑀸’’𑀢𑀺! 𑀓𑀽𑀝𑀤𑀦𑁆𑀢𑁄 𑀧𑀦 𑀩𑁆𑀭𑀸𑀳𑁆𑀫𑀡𑁄 𑀢𑀽𑀡𑁆𑀳𑀻𑀪𑀽𑀢𑁄𑀯 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀓𑀽𑀝𑀤𑀦𑁆𑀢𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀲𑁆𑀫𑀸 𑀧𑀦 𑀪𑀯𑀁 𑀓𑀽𑀝𑀤𑀦𑁆𑀢𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀼𑀪𑀸𑀲𑀺𑀢𑀁 𑀲𑀼𑀪𑀸𑀲𑀺𑀢𑀢𑁄 𑀦𑀸𑀩𑁆𑀪𑀦𑀼𑀫𑁄𑀤𑀢𑀻’’𑀢𑀺? ‘‘𑀦𑀸𑀳𑀁, 𑀪𑁄, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀼𑀪𑀸𑀲𑀺𑀢𑀁 𑀲𑀼𑀪𑀸𑀲𑀺𑀢𑀢𑁄 𑀦𑀸𑀩𑁆𑀪𑀦𑀼𑀫𑁄𑀤𑀸𑀫𑀺. 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬, 𑀬𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀼𑀪𑀸𑀲𑀺𑀢𑀁 𑀲𑀼𑀪𑀸𑀲𑀺𑀢𑀢𑁄 𑀦𑀸𑀩𑁆𑀪𑀦𑀼𑀫𑁄𑀤𑁂𑀬𑁆𑀬. 𑀅𑀧𑀺 𑀘 𑀫𑁂, 𑀪𑁄, 𑀏𑀯𑀁 𑀳𑁄𑀢𑀺 𑁋 𑀲𑀫𑀡𑁄 𑀕𑁄𑀢𑀫𑁄 𑀦 𑀏𑀯𑀫𑀸𑀳 𑁋 ‘𑀏𑀯𑀁 𑀫𑁂 𑀲𑀼𑀢’𑀦𑁆𑀢𑀺 𑀯𑀸 ‘𑀏𑀯𑀁 𑀅𑀭𑀳𑀢𑀺 𑀪𑀯𑀺𑀢𑀼’𑀦𑁆𑀢𑀺 𑀯𑀸; 𑀅𑀧𑀺 𑀘 𑀲𑀫𑀡𑁄 𑀕𑁄𑀢𑀫𑁄 𑁋 ‘𑀏𑀯𑀁 𑀢𑀤𑀸 𑀆𑀲𑀺, 𑀇𑀢𑁆𑀣𑀁 𑀢𑀤𑀸 𑀆𑀲𑀺’ 𑀢𑁆𑀯𑁂𑀯 𑀪𑀸𑀲𑀢𑀺. 𑀢𑀲𑁆𑀲 𑀫𑀬𑁆𑀳𑀁 𑀪𑁄 𑀏𑀯𑀁 𑀳𑁄𑀢𑀺 𑁋 ‘𑀅𑀤𑁆𑀥𑀸 𑀲𑀫𑀡𑁄 𑀕𑁄𑀢𑀫𑁄 𑀢𑁂𑀦 𑀲𑀫𑀬𑁂𑀦 𑀭𑀸𑀚𑀸 𑀯𑀸 𑀅𑀳𑁄𑀲𑀺 𑀫𑀳𑀸𑀯𑀺𑀚𑀺𑀢𑁄 𑀬𑀜𑁆𑀜𑀲𑁆𑀲𑀸𑀫𑀺 𑀧𑀼𑀭𑁄𑀳𑀺𑀢𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲 𑀬𑀜𑁆𑀜𑀲𑁆𑀲 𑀬𑀸𑀚𑁂𑀢𑀸’𑀢𑀺. 𑀅𑀪𑀺𑀚𑀸𑀦𑀸𑀢𑀺 𑀧𑀦 𑀪𑀯𑀁 𑀕𑁄𑀢𑀫𑁄 𑀏𑀯𑀭𑀽𑀧𑀁 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸 𑀯𑀸 𑀬𑀸𑀚𑁂𑀢𑁆𑀯𑀸 𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺𑀢𑀸𑀢𑀺’’? ‘‘𑀅𑀪𑀺𑀚𑀸𑀦𑀸𑀫𑀳𑀁, 𑀩𑁆𑀭𑀸𑀳𑁆𑀫𑀡, 𑀏𑀯𑀭𑀽𑀧𑀁 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸 𑀯𑀸 𑀬𑀸𑀚𑁂𑀢𑁆𑀯𑀸 𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺𑀢𑀸, 𑀅𑀳𑀁 𑀢𑁂𑀦 𑀲𑀫𑀬𑁂𑀦 𑀧𑀼𑀭𑁄𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺𑀁 𑀢𑀲𑁆𑀲 𑀬𑀜𑁆𑀜𑀲𑁆𑀲 𑀬𑀸𑀚𑁂𑀢𑀸’’𑀢𑀺.

𑀦𑀺𑀘𑁆𑀘𑀤𑀸𑀦𑀅𑀦𑀼𑀓𑀼𑀮𑀬𑀜𑁆𑀜𑀁

𑁩𑁪𑁯. ‘‘𑀅𑀢𑁆𑀣𑀺 𑀧𑀦, 𑀪𑁄 𑀕𑁄𑀢𑀫, 𑀅𑀜𑁆𑀜𑁄 𑀬𑀜𑁆𑀜𑁄 𑀇𑀫𑀸𑀬 𑀢𑀺𑀯𑀺𑀥𑀸𑀬 𑀬𑀜𑁆𑀜𑀲𑀫𑁆𑀧𑀤𑀸𑀬 [𑀢𑀺𑀯𑀺𑀥𑀬𑀜𑁆𑀜𑀲𑀫𑁆𑀧𑀤𑀸𑀬 (𑀓.)] 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀸𑀬 𑀅𑀧𑁆𑀧𑀝𑁆𑀞𑀢𑀭𑁄 [𑀅𑀧𑁆𑀧𑀢𑁆𑀣𑀢𑀭𑁄 (𑀲𑁆𑀬𑀸. 𑀓𑀁.)] 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 [𑀅𑀧𑁆𑀧𑀲𑀫𑀸𑀭𑀩𑁆𑀪𑀢𑀭𑁄 (𑀲𑀻. 𑀧𑀻. 𑀓.)] 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘𑀸’’𑀢𑀺?

‘‘𑀅𑀢𑁆𑀣𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀜𑁆𑀜𑁄 𑀬𑀜𑁆𑀜𑁄 𑀇𑀫𑀸𑀬 𑀢𑀺𑀯𑀺𑀥𑀸𑀬 𑀬𑀜𑁆𑀜𑀲𑀫𑁆𑀧𑀤𑀸𑀬 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀸𑀬 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘𑀸’’𑀢𑀺.

‘‘𑀓𑀢𑀫𑁄 𑀧𑀦 𑀲𑁄, 𑀪𑁄 𑀕𑁄𑀢𑀫, 𑀬𑀜𑁆𑀜𑁄 𑀇𑀫𑀸𑀬 𑀢𑀺𑀯𑀺𑀥𑀸𑀬 𑀬𑀜𑁆𑀜𑀲𑀫𑁆𑀧𑀤𑀸𑀬 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀸𑀬 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘𑀸’’𑀢𑀺?

‘‘𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺, 𑀩𑁆𑀭𑀸𑀳𑁆𑀫𑀡, 𑀦𑀺𑀘𑁆𑀘𑀤𑀸𑀦𑀸𑀦𑀺 𑀅𑀦𑀼𑀓𑀼𑀮𑀬𑀜𑁆𑀜𑀸𑀦𑀺 𑀲𑀻𑀮𑀯𑀦𑁆𑀢𑁂 𑀧𑀩𑁆𑀩𑀚𑀺𑀢𑁂 𑀉𑀤𑁆𑀤𑀺𑀲𑁆𑀲 𑀤𑀺𑀬𑁆𑀬𑀦𑁆𑀢𑀺; 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀜𑁆𑀜𑁄 𑀇𑀫𑀸𑀬 𑀢𑀺𑀯𑀺𑀥𑀸𑀬 𑀬𑀜𑁆𑀜𑀲𑀫𑁆𑀧𑀤𑀸𑀬 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀸𑀬 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘𑀸’’𑀢𑀺.

‘‘𑀓𑁄 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀢𑀁 𑀦𑀺𑀘𑁆𑀘𑀤𑀸𑀦𑀁 𑀅𑀦𑀼𑀓𑀼𑀮𑀬𑀜𑁆𑀜𑀁 𑀇𑀫𑀸𑀬 𑀢𑀺𑀯𑀺𑀥𑀸𑀬 𑀬𑀜𑁆𑀜𑀲𑀫𑁆𑀧𑀤𑀸𑀬 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀸𑀬 𑀅𑀧𑁆𑀧𑀝𑁆𑀞𑀢𑀭𑀜𑁆𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑀜𑁆𑀘 𑀫𑀳𑀧𑁆𑀨𑀮𑀢𑀭𑀜𑁆𑀘 𑀫𑀳𑀸𑀦𑀺𑀲𑀁𑀲𑀢𑀭𑀜𑁆𑀘𑀸’’𑀢𑀺?

‘‘𑀦 𑀔𑁄, 𑀩𑁆𑀭𑀸𑀳𑁆𑀫𑀡, 𑀏𑀯𑀭𑀽𑀧𑀁 𑀬𑀜𑁆𑀜𑀁 𑀉𑀧𑀲𑀗𑁆𑀓𑀫𑀦𑁆𑀢𑀺 𑀅𑀭𑀳𑀦𑁆𑀢𑁄 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀤𑀺𑀲𑁆𑀲𑀦𑁆𑀢𑀺 𑀳𑁂𑀢𑁆𑀣, 𑀩𑁆𑀭𑀸𑀳𑁆𑀫𑀡, 𑀤𑀡𑁆𑀟𑀧𑁆𑀧𑀳𑀸𑀭𑀸𑀧𑀺 𑀕𑀮𑀕𑁆𑀕𑀳𑀸𑀧𑀺, 𑀢𑀲𑁆𑀫𑀸 𑀏𑀯𑀭𑀽𑀧𑀁 𑀬𑀜𑁆𑀜𑀁 𑀦 𑀉𑀧𑀲𑀗𑁆𑀓𑀫𑀦𑁆𑀢𑀺 𑀅𑀭𑀳𑀦𑁆𑀢𑁄 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑀸. 𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺, 𑀩𑁆𑀭𑀸𑀳𑁆𑀫𑀡, 𑀦𑀺𑀘𑁆𑀘𑀤𑀸𑀦𑀸𑀦𑀺 𑀅𑀦𑀼𑀓𑀼𑀮𑀬𑀜𑁆𑀜𑀸𑀦𑀺 𑀲𑀻𑀮𑀯𑀦𑁆𑀢𑁂 𑀧𑀩𑁆𑀩𑀚𑀺𑀢𑁂 𑀉𑀤𑁆𑀤𑀺𑀲𑁆𑀲 𑀤𑀺𑀬𑁆𑀬𑀦𑁆𑀢𑀺; 𑀏𑀯𑀭𑀽𑀧𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀜𑁆𑀜𑀁 𑀉𑀧𑀲𑀗𑁆𑀓𑀫𑀦𑁆𑀢𑀺 𑀅𑀭𑀳𑀦𑁆𑀢𑁄 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦 𑀳𑁂𑀢𑁆𑀣, 𑀩𑁆𑀭𑀸𑀳𑁆𑀫𑀡, 𑀤𑀺𑀲𑁆𑀲𑀦𑁆𑀢𑀺 𑀤𑀡𑁆𑀟𑀧𑁆𑀧𑀳𑀸𑀭𑀸𑀧𑀺 𑀕𑀮𑀕𑁆𑀕𑀳𑀸𑀧𑀺, 𑀢𑀲𑁆𑀫𑀸 𑀏𑀯𑀭𑀽𑀧𑀁 𑀬𑀜𑁆𑀜𑀁 𑀉𑀧𑀲𑀗𑁆𑀓𑀫𑀦𑁆𑀢𑀺 𑀅𑀭𑀳𑀦𑁆𑀢𑁄 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀲𑀫𑀸𑀧𑀦𑁆𑀦𑀸. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀢𑀁 𑀦𑀺𑀘𑁆𑀘𑀤𑀸𑀦𑀁 𑀅𑀦𑀼𑀓𑀼𑀮𑀬𑀜𑁆𑀜𑀁 𑀇𑀫𑀸𑀬 𑀢𑀺𑀯𑀺𑀥𑀸𑀬 𑀬𑀜𑁆𑀜𑀲𑀫𑁆𑀧𑀤𑀸𑀬 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀸𑀬 𑀅𑀧𑁆𑀧𑀝𑁆𑀞𑀢𑀭𑀜𑁆𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑀜𑁆𑀘 𑀫𑀳𑀧𑁆𑀨𑀮𑀢𑀭𑀜𑁆𑀘 𑀫𑀳𑀸𑀦𑀺𑀲𑀁𑀲𑀢𑀭𑀜𑁆𑀘𑀸’’𑀢𑀺.

𑁩𑁫𑁦. ‘‘𑀅𑀢𑁆𑀣𑀺 𑀧𑀦, 𑀪𑁄 𑀕𑁄𑀢𑀫, 𑀅𑀜𑁆𑀜𑁄 𑀬𑀜𑁆𑀜𑁄 𑀇𑀫𑀸𑀬 𑀘 𑀢𑀺𑀯𑀺𑀥𑀸𑀬 𑀬𑀜𑁆𑀜𑀲𑀫𑁆𑀧𑀤𑀸𑀬 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀸𑀬 𑀇𑀫𑀺𑀦𑀸 𑀘 𑀦𑀺𑀘𑁆𑀘𑀤𑀸𑀦𑁂𑀦 𑀅𑀦𑀼𑀓𑀼𑀮𑀬𑀜𑁆𑀜𑁂𑀦 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘𑀸’’𑀢𑀺?

‘‘𑀅𑀢𑁆𑀣𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀜𑁆𑀜𑁄 𑀬𑀜𑁆𑀜𑁄 𑀇𑀫𑀸𑀬 𑀘 𑀢𑀺𑀯𑀺𑀥𑀸𑀬 𑀬𑀜𑁆𑀜𑀲𑀫𑁆𑀧𑀤𑀸𑀬 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀸𑀬 𑀇𑀫𑀺𑀦𑀸 𑀘 𑀦𑀺𑀘𑁆𑀘𑀤𑀸𑀦𑁂𑀦 𑀅𑀦𑀼𑀓𑀼𑀮𑀬𑀜𑁆𑀜𑁂𑀦 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘𑀸’’𑀢𑀺.

‘‘𑀓𑀢𑀫𑁄 𑀧𑀦 𑀲𑁄, 𑀪𑁄 𑀕𑁄𑀢𑀫, 𑀬𑀜𑁆𑀜𑁄 𑀇𑀫𑀸𑀬 𑀘 𑀢𑀺𑀯𑀺𑀥𑀸𑀬 𑀬𑀜𑁆𑀜𑀲𑀫𑁆𑀧𑀤𑀸𑀬 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀸𑀬 𑀇𑀫𑀺𑀦𑀸 𑀘 𑀦𑀺𑀘𑁆𑀘𑀤𑀸𑀦𑁂𑀦 𑀅𑀦𑀼𑀓𑀼𑀮𑀬𑀜𑁆𑀜𑁂𑀦 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘𑀸’’𑀢𑀺?

‘‘𑀬𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀘𑀸𑀢𑀼𑀤𑁆𑀤𑀺𑀲𑀁 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀸𑀭𑀁 𑀓𑀭𑁄𑀢𑀺, 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀜𑁆𑀜𑁄 𑀇𑀫𑀸𑀬 𑀘 𑀢𑀺𑀯𑀺𑀥𑀸𑀬 𑀬𑀜𑁆𑀜𑀲𑀫𑁆𑀧𑀤𑀸𑀬 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀸𑀬 𑀇𑀫𑀺𑀦𑀸 𑀘 𑀦𑀺𑀘𑁆𑀘𑀤𑀸𑀦𑁂𑀦 𑀅𑀦𑀼𑀓𑀼𑀮𑀬𑀜𑁆𑀜𑁂𑀦 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘𑀸’’𑀢𑀺.

𑁩𑁫𑁧. ‘‘𑀅𑀢𑁆𑀣𑀺 𑀧𑀦, 𑀪𑁄 𑀕𑁄𑀢𑀫, 𑀅𑀜𑁆𑀜𑁄 𑀬𑀜𑁆𑀜𑁄 𑀇𑀫𑀸𑀬 𑀘 𑀢𑀺𑀯𑀺𑀥𑀸𑀬 𑀬𑀜𑁆𑀜𑀲𑀫𑁆𑀧𑀤𑀸𑀬 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀸𑀬 𑀇𑀫𑀺𑀦𑀸 𑀘 𑀦𑀺𑀘𑁆𑀘𑀤𑀸𑀦𑁂𑀦 𑀅𑀦𑀼𑀓𑀼𑀮𑀬𑀜𑁆𑀜𑁂𑀦 𑀇𑀫𑀺𑀦𑀸 𑀘 𑀯𑀺𑀳𑀸𑀭𑀤𑀸𑀦𑁂𑀦 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘𑀸’’𑀢𑀺?

‘‘𑀅𑀢𑁆𑀣𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀜𑁆𑀜𑁄 𑀬𑀜𑁆𑀜𑁄 𑀇𑀫𑀸𑀬 𑀘 𑀢𑀺𑀯𑀺𑀥𑀸𑀬 𑀬𑀜𑁆𑀜𑀲𑀫𑁆𑀧𑀤𑀸𑀬 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀸𑀬 𑀇𑀫𑀺𑀦𑀸 𑀘 𑀦𑀺𑀘𑁆𑀘𑀤𑀸𑀦𑁂𑀦 𑀅𑀦𑀼𑀓𑀼𑀮𑀬𑀜𑁆𑀜𑁂𑀦 𑀇𑀫𑀺𑀦𑀸 𑀘 𑀯𑀺𑀳𑀸𑀭𑀤𑀸𑀦𑁂𑀦 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘𑀸’’𑀢𑀺.

‘‘𑀓𑀢𑀫𑁄 𑀧𑀦 𑀲𑁄, 𑀪𑁄 𑀕𑁄𑀢𑀫, 𑀬𑀜𑁆𑀜𑁄 𑀇𑀫𑀸𑀬 𑀘 𑀢𑀺𑀯𑀺𑀥𑀸𑀬 𑀬𑀜𑁆𑀜𑀲𑀫𑁆𑀧𑀤𑀸𑀬 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀸𑀬 𑀇𑀫𑀺𑀦𑀸 𑀘 𑀦𑀺𑀘𑁆𑀘𑀤𑀸𑀦𑁂𑀦 𑀅𑀦𑀼𑀓𑀼𑀮𑀬𑀜𑁆𑀜𑁂𑀦 𑀇𑀫𑀺𑀦𑀸 𑀘 𑀯𑀺𑀳𑀸𑀭𑀤𑀸𑀦𑁂𑀦 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘𑀸’’𑀢𑀺?

‘‘𑀬𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀲𑀦𑁆𑀦𑀘𑀺𑀢𑁆𑀢𑁄 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀢𑀺, 𑀥𑀫𑁆𑀫𑀁 𑀲𑀭𑀡𑀁 𑀕𑀘𑁆𑀙𑀢𑀺, 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀢𑀺; 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀜𑁆𑀜𑁄 𑀇𑀫𑀸𑀬 𑀘 𑀢𑀺𑀯𑀺𑀥𑀸𑀬 𑀬𑀜𑁆𑀜𑀲𑀫𑁆𑀧𑀤𑀸𑀬 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀸𑀬 𑀇𑀫𑀺𑀦𑀸 𑀘 𑀦𑀺𑀘𑁆𑀘𑀤𑀸𑀦𑁂𑀦 𑀅𑀦𑀼𑀓𑀼𑀮𑀬𑀜𑁆𑀜𑁂𑀦 𑀇𑀫𑀺𑀦𑀸 𑀘 𑀯𑀺𑀳𑀸𑀭𑀤𑀸𑀦𑁂𑀦 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘𑀸’’𑀢𑀺.

𑁩𑁫𑁨. ‘‘𑀅𑀢𑁆𑀣𑀺 𑀧𑀦, 𑀪𑁄 𑀕𑁄𑀢𑀫, 𑀅𑀜𑁆𑀜𑁄 𑀬𑀜𑁆𑀜𑁄 𑀇𑀫𑀸𑀬 𑀘 𑀢𑀺𑀯𑀺𑀥𑀸𑀬 𑀬𑀜𑁆𑀜𑀲𑀫𑁆𑀧𑀤𑀸𑀬 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀸𑀬 𑀇𑀫𑀺𑀦𑀸 𑀘 𑀦𑀺𑀘𑁆𑀘𑀤𑀸𑀦𑁂𑀦 𑀅𑀦𑀼𑀓𑀼𑀮𑀬𑀜𑁆𑀜𑁂𑀦 𑀇𑀫𑀺𑀦𑀸 𑀘 𑀯𑀺𑀳𑀸𑀭𑀤𑀸𑀦𑁂𑀦 𑀇𑀫𑁂𑀳𑀺 𑀘 𑀲𑀭𑀡𑀕𑀫𑀦𑁂𑀳𑀺 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘𑀸’’𑀢𑀺?

‘‘𑀅𑀢𑁆𑀣𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀜𑁆𑀜𑁄 𑀬𑀜𑁆𑀜𑁄 𑀇𑀫𑀸𑀬 𑀘 𑀢𑀺𑀯𑀺𑀥𑀸𑀬 𑀬𑀜𑁆𑀜𑀲𑀫𑁆𑀧𑀤𑀸𑀬 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀸𑀬 𑀇𑀫𑀺𑀦𑀸 𑀘 𑀦𑀺𑀘𑁆𑀘𑀤𑀸𑀦𑁂𑀦 𑀅𑀦𑀼𑀓𑀼𑀮𑀬𑀜𑁆𑀜𑁂𑀦 𑀇𑀫𑀺𑀦𑀸 𑀘 𑀯𑀺𑀳𑀸𑀭𑀤𑀸𑀦𑁂𑀦 𑀇𑀫𑁂𑀳𑀺 𑀘 𑀲𑀭𑀡𑀕𑀫𑀦𑁂𑀳𑀺 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘𑀸’’𑀢𑀺.

‘‘𑀓𑀢𑀫𑁄 𑀧𑀦 𑀲𑁄, 𑀪𑁄 𑀕𑁄𑀢𑀫, 𑀬𑀜𑁆𑀜𑁄 𑀇𑀫𑀸𑀬 𑀘 𑀢𑀺𑀯𑀺𑀥𑀸𑀬 𑀬𑀜𑁆𑀜𑀲𑀫𑁆𑀧𑀤𑀸𑀬 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀸𑀬 𑀇𑀫𑀺𑀦𑀸 𑀘 𑀦𑀺𑀘𑁆𑀘𑀤𑀸𑀦𑁂𑀦 𑀅𑀦𑀼𑀓𑀼𑀮𑀬𑀜𑁆𑀜𑁂𑀦 𑀇𑀫𑀺𑀦𑀸 𑀘 𑀯𑀺𑀳𑀸𑀭𑀤𑀸𑀦𑁂𑀦 𑀇𑀫𑁂𑀳𑀺 𑀘 𑀲𑀭𑀡𑀕𑀫𑀦𑁂𑀳𑀺 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘𑀸’’𑀢𑀺?

‘‘𑀬𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀸𑀤𑀺𑀬𑀢𑀺 𑁋 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀁, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀺𑀁, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀺𑀁, 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀺𑀁, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀯𑁂𑀭𑀫𑀡𑀺𑀁. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀜𑁆𑀜𑁄 𑀇𑀫𑀸𑀬 𑀘 𑀢𑀺𑀯𑀺𑀥𑀸𑀬 𑀬𑀜𑁆𑀜𑀲𑀫𑁆𑀧𑀤𑀸𑀬 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀸𑀬 𑀇𑀫𑀺𑀦𑀸 𑀘 𑀦𑀺𑀘𑁆𑀘𑀤𑀸𑀦𑁂𑀦 𑀅𑀦𑀼𑀓𑀼𑀮𑀬𑀜𑁆𑀜𑁂𑀦 𑀇𑀫𑀺𑀦𑀸 𑀘 𑀯𑀺𑀳𑀸𑀭𑀤𑀸𑀦𑁂𑀦 𑀇𑀫𑁂𑀳𑀺 𑀘 𑀲𑀭𑀡𑀕𑀫𑀦𑁂𑀳𑀺 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘𑀸’’𑀢𑀺.

𑁩𑁫𑁩. ‘‘𑀅𑀢𑁆𑀣𑀺 𑀧𑀦, 𑀪𑁄 𑀕𑁄𑀢𑀫, 𑀅𑀜𑁆𑀜𑁄 𑀬𑀜𑁆𑀜𑁄 𑀇𑀫𑀸𑀬 𑀘 𑀢𑀺𑀯𑀺𑀥𑀸𑀬 𑀬𑀜𑁆𑀜𑀲𑀫𑁆𑀧𑀤𑀸𑀬 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀸𑀬 𑀇𑀫𑀺𑀦𑀸 𑀘 𑀦𑀺𑀘𑁆𑀘𑀤𑀸𑀦𑁂𑀦 𑀅𑀦𑀼𑀓𑀼𑀮𑀬𑀜𑁆𑀜𑁂𑀦 𑀇𑀫𑀺𑀦𑀸 𑀘 𑀯𑀺𑀳𑀸𑀭𑀤𑀸𑀦𑁂𑀦 𑀇𑀫𑁂𑀳𑀺 𑀘 𑀲𑀭𑀡𑀕𑀫𑀦𑁂𑀳𑀺 𑀇𑀫𑁂𑀳𑀺 𑀘 𑀲𑀺𑀓𑁆𑀔𑀸𑀧𑀤𑁂𑀳𑀺 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘𑀸’’𑀢𑀺?

‘‘𑀅𑀢𑁆𑀣𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀜𑁆𑀜𑁄 𑀬𑀜𑁆𑀜𑁄 𑀇𑀫𑀸𑀬 𑀘 𑀢𑀺𑀯𑀺𑀥𑀸𑀬 𑀬𑀜𑁆𑀜𑀲𑀫𑁆𑀧𑀤𑀸𑀬 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀸𑀬 𑀇𑀫𑀺𑀦𑀸 𑀘 𑀦𑀺𑀘𑁆𑀘𑀤𑀸𑀦𑁂𑀦 𑀅𑀦𑀼𑀓𑀼𑀮𑀬𑀜𑁆𑀜𑁂𑀦 𑀇𑀫𑀺𑀦𑀸 𑀘 𑀯𑀺𑀳𑀸𑀭𑀤𑀸𑀦𑁂𑀦 𑀇𑀫𑁂𑀳𑀺 𑀘 𑀲𑀭𑀡𑀕𑀫𑀦𑁂𑀳𑀺 𑀇𑀫𑁂𑀳𑀺 𑀘 𑀲𑀺𑀓𑁆𑀔𑀸𑀧𑀤𑁂𑀳𑀺 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘𑀸’’𑀢𑀺.

‘‘𑀓𑀢𑀫𑁄 𑀧𑀦 𑀲𑁄, 𑀪𑁄 𑀕𑁄𑀢𑀫, 𑀬𑀜𑁆𑀜𑁄 𑀇𑀫𑀸𑀬 𑀘 𑀢𑀺𑀯𑀺𑀥𑀸𑀬 𑀬𑀜𑁆𑀜𑀲𑀫𑁆𑀧𑀤𑀸𑀬 𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀸𑀬 𑀇𑀫𑀺𑀦𑀸 𑀘 𑀦𑀺𑀘𑁆𑀘𑀤𑀸𑀦𑁂𑀦 𑀅𑀦𑀼𑀓𑀼𑀮𑀬𑀜𑁆𑀜𑁂𑀦 𑀇𑀫𑀺𑀦𑀸 𑀘 𑀯𑀺𑀳𑀸𑀭𑀤𑀸𑀦𑁂𑀦 𑀇𑀫𑁂𑀳𑀺 𑀘 𑀲𑀭𑀡𑀕𑀫𑀦𑁂𑀳𑀺 𑀇𑀫𑁂𑀳𑀺 𑀘 𑀲𑀺𑀓𑁆𑀔𑀸𑀧𑀤𑁂𑀳𑀺 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘𑀸’’𑀢𑀺?

‘‘𑀇𑀥, 𑀩𑁆𑀭𑀸𑀳𑁆𑀫𑀡, 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… (𑀬𑀣𑀸 𑁧𑁯𑁦-𑁨𑁧𑁨 𑀅𑀦𑀼𑀘𑁆𑀙𑁂𑀤𑁂𑀲𑀼, 𑀏𑀯𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁). 𑀏𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀜𑁆𑀜𑁄 𑀧𑀼𑀭𑀺𑀫𑁂𑀳𑀺 𑀬𑀜𑁆𑀜𑁂𑀳𑀺 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀜𑁆𑀜𑁄 𑀧𑀼𑀭𑀺𑀫𑁂𑀳𑀺 𑀬𑀜𑁆𑀜𑁂𑀳𑀺 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘𑀸𑀢𑀺. 𑀜𑀸𑀡𑀤𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺…𑀧𑁂… 𑀅𑀬𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀜𑁆𑀜𑁄 𑀧𑀼𑀭𑀺𑀫𑁂𑀳𑀺 𑀬𑀜𑁆𑀜𑁂𑀳𑀺 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀺. 𑀅𑀬𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀬𑀜𑁆𑀜𑁄 𑀧𑀼𑀭𑀺𑀫𑁂𑀳𑀺 𑀬𑀜𑁆𑀜𑁂𑀳𑀺 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘. 𑀇𑀫𑀸𑀬 𑀘, 𑀩𑁆𑀭𑀸𑀳𑁆𑀫𑀡, 𑀬𑀜𑁆𑀜𑀲𑀫𑁆𑀧𑀤𑀸𑀬 𑀅𑀜𑁆𑀜𑀸 𑀬𑀜𑁆𑀜𑀲𑀫𑁆𑀧𑀤𑀸 𑀉𑀢𑁆𑀢𑀭𑀺𑀢𑀭𑀸 𑀯𑀸 𑀧𑀡𑀻𑀢𑀢𑀭𑀸 𑀯𑀸 𑀦𑀢𑁆𑀣𑀻’’𑀢𑀺.

𑀓𑀽𑀝𑀤𑀦𑁆𑀢𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸

𑁩𑁫𑁪. 𑀏𑀯𑀁 𑀯𑀼𑀢𑁆𑀢𑁂, 𑀓𑀽𑀝𑀤𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫! 𑀲𑁂𑀬𑁆𑀬𑀣𑀸𑀧𑀺 𑀪𑁄 𑀕𑁄𑀢𑀫, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 ‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’𑀢𑀺; 𑀏𑀯𑀫𑁂𑀯𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢𑀁. 𑀏𑀲𑀸𑀳𑀁 𑀪𑁄 𑀕𑁄𑀢𑀫 𑀲𑀢𑁆𑀢 𑀘 𑀉𑀲𑀪𑀲𑀢𑀸𑀦𑀺 𑀲𑀢𑁆𑀢 𑀘 𑀯𑀘𑁆𑀙𑀢𑀭𑀲𑀢𑀸𑀦𑀺 𑀲𑀢𑁆𑀢 𑀘 𑀯𑀘𑁆𑀙𑀢𑀭𑀻𑀲𑀢𑀸𑀦𑀺 𑀲𑀢𑁆𑀢 𑀘 𑀅𑀚𑀲𑀢𑀸𑀦𑀺 𑀲𑀢𑁆𑀢 𑀘 𑀉𑀭𑀩𑁆𑀪𑀲𑀢𑀸𑀦𑀺 𑀫𑀼𑀜𑁆𑀘𑀸𑀫𑀺, 𑀚𑀻𑀯𑀺𑀢𑀁 𑀤𑁂𑀫𑀺, 𑀳𑀭𑀺𑀢𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀔𑀸𑀤𑀦𑁆𑀢𑀼, 𑀲𑀻𑀢𑀸𑀦𑀺 𑀘 𑀧𑀸𑀦𑀻𑀬𑀸𑀦𑀺 𑀧𑀺𑀯𑀦𑁆𑀢𑀼, 𑀲𑀻𑀢𑁄 𑀘 𑀦𑁂𑀲𑀁 𑀯𑀸𑀢𑁄 𑀉𑀧𑀯𑀸𑀬𑀢𑀽’’𑀢𑀺.

𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸

𑁩𑁫𑁫. 𑀅𑀣 𑀔𑁄 𑀪𑀕𑀯𑀸 𑀓𑀽𑀝𑀤𑀦𑁆𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁, 𑀤𑀸𑀦𑀓𑀣𑀁 𑀲𑀻𑀮𑀓𑀣𑀁 𑀲𑀕𑁆𑀕𑀓𑀣𑀁; 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺. 𑀬𑀤𑀸 𑀪𑀕𑀯𑀸 𑀅𑀜𑁆𑀜𑀸𑀲𑀺 𑀓𑀽𑀝𑀤𑀦𑁆𑀢𑀁 𑀩𑁆𑀭𑀸𑀳𑁆𑀫𑀡𑀁 𑀓𑀮𑁆𑀮𑀘𑀺𑀢𑁆𑀢𑀁 𑀫𑀼𑀤𑀼𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑀁 𑀉𑀤𑀕𑁆𑀕𑀘𑀺𑀢𑁆𑀢𑀁 𑀧𑀲𑀦𑁆𑀦𑀘𑀺𑀢𑁆𑀢𑀁, 𑀅𑀣 𑀬𑀸 𑀩𑀼𑀤𑁆𑀥𑀸𑀦𑀁 𑀲𑀸𑀫𑀼𑀓𑁆𑀓𑀁𑀲𑀺𑀓𑀸 𑀥𑀫𑁆𑀫𑀤𑁂𑀲𑀦𑀸, 𑀢𑀁 𑀧𑀓𑀸𑀲𑁂𑀲𑀺 𑁋 𑀤𑀼𑀓𑁆𑀔𑀁 𑀲𑀫𑀼𑀤𑀬𑀁 𑀦𑀺𑀭𑁄𑀥𑀁 𑀫𑀕𑁆𑀕𑀁. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀼𑀤𑁆𑀥𑀁 𑀯𑀢𑁆𑀣𑀁 𑀅𑀧𑀕𑀢𑀓𑀸𑀴𑀓𑀁 𑀲𑀫𑁆𑀫𑀤𑁂𑀯 𑀭𑀚𑀦𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀏𑀯𑀫𑁂𑀯 𑀓𑀽𑀝𑀤𑀦𑁆𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀢𑀲𑁆𑀫𑀺𑀜𑁆𑀜𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺.

𑁩𑁫𑁬. 𑀅𑀣 𑀔𑁄 𑀓𑀽𑀝𑀤𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀤𑀺𑀝𑁆𑀞𑀥𑀫𑁆𑀫𑁄 𑀧𑀢𑁆𑀢𑀥𑀫𑁆𑀫𑁄 𑀯𑀺𑀤𑀺𑀢𑀥𑀫𑁆𑀫𑁄 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑁄 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀕𑀢𑀓𑀣𑀁𑀓𑀣𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀅𑀧𑀭𑀧𑁆𑀧𑀘𑁆𑀘𑀬𑁄 𑀲𑀢𑁆𑀣𑀼𑀲𑀸𑀲𑀦𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂 𑀪𑀯𑀁 𑀕𑁄𑀢𑀫𑁄 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦.

𑁩𑁫𑁭. 𑀅𑀣 𑀔𑁄 𑀓𑀽𑀝𑀤𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀓𑀽𑀝𑀤𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀲𑀓𑁂 𑀬𑀜𑁆𑀜𑀯𑀸𑀝𑁂 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀓𑀸𑀮𑁄, 𑀪𑁄 𑀕𑁄𑀢𑀫; 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺.

𑁩𑁫𑁮. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀓𑀽𑀝𑀤𑀦𑁆𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀬𑀜𑁆𑀜𑀯𑀸𑀝𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺.

𑀅𑀣 𑀔𑁄 𑀓𑀽𑀝𑀤𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀺 𑀲𑀫𑁆𑀧𑀯𑀸𑀭𑁂𑀲𑀺. 𑀅𑀣 𑀔𑁄 𑀓𑀽𑀝𑀤𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀅𑀜𑁆𑀜𑀢𑀭𑀁 𑀦𑀻𑀘𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀓𑀽𑀝𑀤𑀦𑁆𑀢𑀁 𑀩𑁆𑀭𑀸𑀳𑁆𑀫𑀡𑀁 𑀪𑀕𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀻𑀢𑀺.

𑀓𑀽𑀝𑀤𑀦𑁆𑀢𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀧𑀜𑁆𑀘𑀫𑀁.

𑁬. 𑀫𑀳𑀸𑀮𑀺𑀲𑀼𑀢𑁆𑀢𑀁

𑀩𑁆𑀭𑀸𑀳𑁆𑀫𑀡𑀤𑀽𑀢𑀯𑀢𑁆𑀣𑀼

𑁩𑁫𑁯. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀓𑁄𑀲𑀮𑀓𑀸 𑀘 𑀩𑁆𑀭𑀸𑀳𑁆𑀫𑀡𑀤𑀽𑀢𑀸 𑀫𑀸𑀕𑀥𑀓𑀸 𑀘 𑀩𑁆𑀭𑀸𑀳𑁆𑀫𑀡𑀤𑀽𑀢𑀸 𑀯𑁂𑀲𑀸𑀮𑀺𑀬𑀁 𑀧𑀝𑀺𑀯𑀲𑀦𑁆𑀢𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦. 𑀅𑀲𑁆𑀲𑁄𑀲𑀼𑀁 𑀔𑁄 𑀢𑁂 𑀓𑁄𑀲𑀮𑀓𑀸 𑀘 𑀩𑁆𑀭𑀸𑀳𑁆𑀫𑀡𑀤𑀽𑀢𑀸 𑀫𑀸𑀕𑀥𑀓𑀸 𑀘 𑀩𑁆𑀭𑀸𑀳𑁆𑀫𑀡𑀤𑀽𑀢𑀸 𑁋 ‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’. 𑀲𑁄 𑀇𑀫𑀁 𑀮𑁄𑀓𑀁 𑀲𑀤𑁂𑀯𑀓𑀁 𑀲𑀫𑀸𑀭𑀓𑀁 𑀲𑀩𑁆𑀭𑀳𑁆𑀫𑀓𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀲𑀸𑀥𑀼 𑀔𑁄 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻’’𑀢𑀺.

𑁩𑁬𑁦. 𑀅𑀣 𑀔𑁄 𑀢𑁂 𑀓𑁄𑀲𑀮𑀓𑀸 𑀘 𑀩𑁆𑀭𑀸𑀳𑁆𑀫𑀡𑀤𑀽𑀢𑀸 𑀫𑀸𑀕𑀥𑀓𑀸 𑀘 𑀩𑁆𑀭𑀸𑀳𑁆𑀫𑀡𑀤𑀽𑀢𑀸 𑀬𑁂𑀦 𑀫𑀳𑀸𑀯𑀦𑀁 𑀓𑀽𑀝𑀸𑀕𑀸𑀭𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀦𑀸𑀕𑀺𑀢𑁄 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑁄 𑀳𑁄𑀢𑀺. 𑀅𑀣 𑀔𑁄 𑀢𑁂 𑀓𑁄𑀲𑀮𑀓𑀸 𑀘 𑀩𑁆𑀭𑀸𑀳𑁆𑀫𑀡𑀤𑀽𑀢𑀸 𑀫𑀸𑀕𑀥𑀓𑀸 𑀘 𑀩𑁆𑀭𑀸𑀳𑁆𑀫𑀡𑀤𑀽𑀢𑀸 𑀬𑁂𑀦𑀸𑀬𑀲𑁆𑀫𑀸 𑀦𑀸𑀕𑀺𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀺𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀳𑀁 𑀦𑀼 𑀔𑁄, 𑀪𑁄 𑀦𑀸𑀕𑀺𑀢, 𑀏𑀢𑀭𑀳𑀺 𑀲𑁄 𑀪𑀯𑀁 𑀕𑁄𑀢𑀫𑁄 𑀯𑀺𑀳𑀭𑀢𑀺? 𑀤𑀲𑁆𑀲𑀦𑀓𑀸𑀫𑀸 𑀳𑀺 𑀫𑀬𑀁 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫’’𑀦𑁆𑀢𑀺. ‘‘𑀅𑀓𑀸𑀮𑁄 𑀔𑁄, 𑀆𑀯𑀼𑀲𑁄, 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬, 𑀧𑀝𑀺𑀲𑀮𑁆𑀮𑀻𑀦𑁄 𑀪𑀕𑀯𑀸’’𑀢𑀺. 𑀅𑀣 𑀔𑁄 𑀢𑁂 𑀓𑁄𑀲𑀮𑀓𑀸 𑀘 𑀩𑁆𑀭𑀸𑀳𑁆𑀫𑀡𑀤𑀽𑀢𑀸 𑀫𑀸𑀕𑀥𑀓𑀸 𑀘 𑀩𑁆𑀭𑀸𑀳𑁆𑀫𑀡𑀤𑀽𑀢𑀸 𑀢𑀢𑁆𑀣𑁂𑀯 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼 𑁋 ‘‘𑀤𑀺𑀲𑁆𑀯𑀸𑀯 𑀫𑀬𑀁 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺.

𑀑𑀝𑁆𑀞𑀤𑁆𑀥𑀮𑀺𑀘𑁆𑀙𑀯𑀻𑀯𑀢𑁆𑀣𑀼

𑁩𑁬𑁧. 𑀑𑀝𑁆𑀞𑀤𑁆𑀥𑁄𑀧𑀺 𑀮𑀺𑀘𑁆𑀙𑀯𑀻 𑀫𑀳𑀢𑀺𑀬𑀸 𑀮𑀺𑀘𑁆𑀙𑀯𑀻𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀬𑁂𑀦 𑀫𑀳𑀸𑀯𑀦𑀁 𑀓𑀽𑀝𑀸𑀕𑀸𑀭𑀲𑀸𑀮𑀸 𑀬𑁂𑀦𑀸𑀬𑀲𑁆𑀫𑀸 𑀦𑀸𑀕𑀺𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀺𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀑𑀝𑁆𑀞𑀤𑁆𑀥𑁄𑀧𑀺 𑀮𑀺𑀘𑁆𑀙𑀯𑀻 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀺𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀳𑀁 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀺𑀢, 𑀏𑀢𑀭𑀳𑀺 𑀲𑁄 𑀪𑀕𑀯𑀸 𑀯𑀺𑀳𑀭𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀤𑀲𑁆𑀲𑀦𑀓𑀸𑀫𑀸 𑀳𑀺 𑀫𑀬𑀁 𑀢𑀁 𑀪𑀕𑀯𑀦𑁆𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺. ‘‘𑀅𑀓𑀸𑀮𑁄 𑀔𑁄, 𑀫𑀳𑀸𑀮𑀺, 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬, 𑀧𑀝𑀺𑀲𑀮𑁆𑀮𑀻𑀦𑁄 𑀪𑀕𑀯𑀸’’𑀢𑀺. 𑀑𑀝𑁆𑀞𑀤𑁆𑀥𑁄𑀧𑀺 𑀮𑀺𑀘𑁆𑀙𑀯𑀻 𑀢𑀢𑁆𑀣𑁂𑀯 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺 𑁋 ‘‘𑀤𑀺𑀲𑁆𑀯𑀸𑀯 𑀅𑀳𑀁 𑀢𑀁 𑀪𑀕𑀯𑀦𑁆𑀢𑀁 𑀕𑀫𑀺𑀲𑁆𑀲𑀸𑀫𑀺 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺.

𑁩𑁬𑁨. 𑀅𑀣 𑀔𑁄 𑀲𑀻𑀳𑁄 𑀲𑀫𑀡𑀼𑀤𑁆𑀤𑁂𑀲𑁄 𑀬𑁂𑀦𑀸𑀬𑀲𑁆𑀫𑀸 𑀦𑀸𑀕𑀺𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀺𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀲𑀻𑀳𑁄 𑀲𑀫𑀡𑀼𑀤𑁆𑀤𑁂𑀲𑁄 𑀆𑀬𑀲𑁆𑀫𑀦𑁆𑀢𑀁 𑀦𑀸𑀕𑀺𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀢𑁂, 𑀪𑀦𑁆𑀢𑁂 𑀓𑀲𑁆𑀲𑀧, 𑀲𑀫𑁆𑀩𑀳𑀼𑀮𑀸 𑀓𑁄𑀲𑀮𑀓𑀸 𑀘 𑀩𑁆𑀭𑀸𑀳𑁆𑀫𑀡𑀤𑀽𑀢𑀸 𑀫𑀸𑀕𑀥𑀓𑀸 𑀘 𑀩𑁆𑀭𑀸𑀳𑁆𑀫𑀡𑀤𑀽𑀢𑀸 𑀇𑀥𑀽𑀧𑀲𑀗𑁆𑀓𑀦𑁆𑀢𑀸 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬; 𑀑𑀝𑁆𑀞𑀤𑁆𑀥𑁄𑀧𑀺 𑀮𑀺𑀘𑁆𑀙𑀯𑀻 𑀫𑀳𑀢𑀺𑀬𑀸 𑀮𑀺𑀘𑁆𑀙𑀯𑀻𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀇𑀥𑀽𑀧𑀲𑀗𑁆𑀓𑀦𑁆𑀢𑁄 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬, 𑀲𑀸𑀥𑀼, 𑀪𑀦𑁆𑀢𑁂 𑀓𑀲𑁆𑀲𑀧, 𑀮𑀪𑀢𑀁 𑀏𑀲𑀸 𑀚𑀦𑀢𑀸 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬𑀸’’𑀢𑀺.

‘‘𑀢𑁂𑀦 𑀳𑀺, 𑀲𑀻𑀳, 𑀢𑁆𑀯𑀜𑁆𑀜𑁂𑀯 𑀪𑀕𑀯𑀢𑁄 𑀆𑀭𑁄𑀘𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀲𑀻𑀳𑁄 𑀲𑀫𑀡𑀼𑀤𑁆𑀤𑁂𑀲𑁄 𑀆𑀬𑀲𑁆𑀫𑀢𑁄 𑀦𑀸𑀕𑀺𑀢𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀲𑀻𑀳𑁄 𑀲𑀫𑀡𑀼𑀤𑁆𑀤𑁂𑀲𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀢𑁂, 𑀪𑀦𑁆𑀢𑁂, 𑀲𑀫𑁆𑀩𑀳𑀼𑀮𑀸 𑀓𑁄𑀲𑀮𑀓𑀸 𑀘 𑀩𑁆𑀭𑀸𑀳𑁆𑀫𑀡𑀤𑀽𑀢𑀸 𑀫𑀸𑀕𑀥𑀓𑀸 𑀘 𑀩𑁆𑀭𑀸𑀳𑁆𑀫𑀡𑀤𑀽𑀢𑀸 𑀇𑀥𑀽𑀧𑀲𑀗𑁆𑀓𑀦𑁆𑀢𑀸 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬, 𑀑𑀝𑁆𑀞𑀤𑁆𑀥𑁄𑀧𑀺 𑀮𑀺𑀘𑁆𑀙𑀯𑀻 𑀫𑀳𑀢𑀺𑀬𑀸 𑀮𑀺𑀘𑁆𑀙𑀯𑀻𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀇𑀥𑀽𑀧𑀲𑀗𑁆𑀓𑀦𑁆𑀢𑁄 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬. 𑀲𑀸𑀥𑀼, 𑀪𑀦𑁆𑀢𑁂, 𑀮𑀪𑀢𑀁 𑀏𑀲𑀸 𑀚𑀦𑀢𑀸 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬𑀸’’𑀢𑀺. ‘‘𑀢𑁂𑀦 𑀳𑀺, 𑀲𑀻𑀳, 𑀯𑀺𑀳𑀸𑀭𑀧𑀘𑁆𑀙𑀸𑀬𑀸𑀬𑀁 𑀆𑀲𑀦𑀁 𑀧𑀜𑁆𑀜𑀧𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀲𑀻𑀳𑁄 𑀲𑀫𑀡𑀼𑀤𑁆𑀤𑁂𑀲𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀯𑀺𑀳𑀸𑀭𑀧𑀘𑁆𑀙𑀸𑀬𑀸𑀬𑀁 𑀆𑀲𑀦𑀁 𑀧𑀜𑁆𑀜𑀧𑁂𑀲𑀺.

𑁩𑁬𑁩. 𑀅𑀣 𑀔𑁄 𑀪𑀕𑀯𑀸 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑁆𑀫 𑀯𑀺𑀳𑀸𑀭𑀧𑀘𑁆𑀙𑀸𑀬𑀸𑀬𑀁 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀢𑁂 𑀓𑁄𑀲𑀮𑀓𑀸 𑀘 𑀩𑁆𑀭𑀸𑀳𑁆𑀫𑀡𑀤𑀽𑀢𑀸 𑀫𑀸𑀕𑀥𑀓𑀸 𑀘 𑀩𑁆𑀭𑀸𑀳𑁆𑀫𑀡𑀤𑀽𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀑𑀝𑁆𑀞𑀤𑁆𑀥𑁄𑀧𑀺 𑀮𑀺𑀘𑁆𑀙𑀯𑀻 𑀫𑀳𑀢𑀺𑀬𑀸 𑀮𑀺𑀘𑁆𑀙𑀯𑀻𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑁩𑁬𑁪. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀑𑀝𑁆𑀞𑀤𑁆𑀥𑁄 𑀮𑀺𑀘𑁆𑀙𑀯𑀻 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀼𑀭𑀺𑀫𑀸𑀦𑀺, 𑀪𑀦𑁆𑀢𑁂, 𑀤𑀺𑀯𑀲𑀸𑀦𑀺 𑀧𑀼𑀭𑀺𑀫𑀢𑀭𑀸𑀦𑀺 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀬𑀤𑀕𑁆𑀕𑁂 𑀅𑀳𑀁, 𑀫𑀳𑀸𑀮𑀺, 𑀪𑀕𑀯𑀦𑁆𑀢𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀸𑀫𑀺, 𑀦 𑀘𑀺𑀭𑀁 𑀢𑀻𑀡𑀺 𑀯𑀲𑁆𑀲𑀸𑀦𑀺, 𑀤𑀺𑀩𑁆𑀩𑀸𑀦𑀺 𑀳𑀺 𑀔𑁄 𑀭𑀽𑀧𑀸𑀦𑀺 𑀧𑀲𑁆𑀲𑀸𑀫𑀺 𑀧𑀺𑀬𑀭𑀽𑀧𑀸𑀦𑀺 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀺 𑀭𑀚𑀦𑀻𑀬𑀸𑀦𑀺, 𑀦𑁄 𑀘 𑀔𑁄 𑀤𑀺𑀩𑁆𑀩𑀸𑀦𑀺 𑀲𑀤𑁆𑀤𑀸𑀦𑀺 𑀲𑀼𑀡𑀸𑀫𑀺 𑀧𑀺𑀬𑀭𑀽𑀧𑀸𑀦𑀺 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀺 𑀭𑀚𑀦𑀻𑀬𑀸𑀦𑀻’𑀢𑀺. 𑀲𑀦𑁆𑀢𑀸𑀦𑁂𑀯 𑀦𑀼 𑀔𑁄, 𑀪𑀦𑁆𑀢𑁂, 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀤𑀺𑀩𑁆𑀩𑀸𑀦𑀺 𑀲𑀤𑁆𑀤𑀸𑀦𑀺 𑀦𑀸𑀲𑁆𑀲𑁄𑀲𑀺 𑀧𑀺𑀬𑀭𑀽𑀧𑀸𑀦𑀺 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀺 𑀭𑀚𑀦𑀻𑀬𑀸𑀦𑀺, 𑀉𑀤𑀸𑀳𑀼 𑀅𑀲𑀦𑁆𑀢𑀸𑀦𑀻’’𑀢𑀺?

𑀏𑀓𑀁𑀲𑀪𑀸𑀯𑀺𑀢𑀲𑀫𑀸𑀥𑀺

𑁩𑁬𑁫. ‘‘𑀲𑀦𑁆𑀢𑀸𑀦𑁂𑀯 𑀔𑁄, 𑀫𑀳𑀸𑀮𑀺, 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀤𑀺𑀩𑁆𑀩𑀸𑀦𑀺 𑀲𑀤𑁆𑀤𑀸𑀦𑀺 𑀦𑀸𑀲𑁆𑀲𑁄𑀲𑀺 𑀧𑀺𑀬𑀭𑀽𑀧𑀸𑀦𑀺 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀺 𑀭𑀚𑀦𑀻𑀬𑀸𑀦𑀺, 𑀦𑁄 𑀅𑀲𑀦𑁆𑀢𑀸𑀦𑀻’’𑀢𑀺. ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑁂𑀦 𑀲𑀦𑁆𑀢𑀸𑀦𑁂𑀯 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀤𑀺𑀩𑁆𑀩𑀸𑀦𑀺 𑀲𑀤𑁆𑀤𑀸𑀦𑀺 𑀦𑀸𑀲𑁆𑀲𑁄𑀲𑀺 𑀧𑀺𑀬𑀭𑀽𑀧𑀸𑀦𑀺 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀺 𑀭𑀚𑀦𑀻𑀬𑀸𑀦𑀺, 𑀦𑁄 𑀅𑀲𑀦𑁆𑀢𑀸𑀦𑀻’’𑀢𑀺?

𑁩𑁬𑁬. ‘‘𑀇𑀥, 𑀫𑀳𑀸𑀮𑀺, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀏𑀓𑀁𑀲𑀪𑀸𑀯𑀺𑀢𑁄 𑀲𑀫𑀸𑀥𑀺 𑀳𑁄𑀢𑀺 𑀤𑀺𑀩𑁆𑀩𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁, 𑀦𑁄 𑀘 𑀔𑁄 𑀤𑀺𑀩𑁆𑀩𑀸𑀦𑀁 𑀲𑀤𑁆𑀤𑀸𑀦𑀁 𑀲𑀯𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁. 𑀲𑁄 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀏𑀓𑀁𑀲𑀪𑀸𑀯𑀺𑀢𑁂 𑀲𑀫𑀸𑀥𑀺𑀫𑁆𑀳𑀺 𑀤𑀺𑀩𑁆𑀩𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁, 𑀦𑁄 𑀘 𑀔𑁄 𑀤𑀺𑀩𑁆𑀩𑀸𑀦𑀁 𑀲𑀤𑁆𑀤𑀸𑀦𑀁 𑀲𑀯𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁. 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀤𑀺𑀩𑁆𑀩𑀸𑀦𑀺 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀺𑀬𑀭𑀽𑀧𑀸𑀦𑀺 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀺 𑀭𑀚𑀦𑀻𑀬𑀸𑀦𑀺, 𑀦𑁄 𑀘 𑀔𑁄 𑀤𑀺𑀩𑁆𑀩𑀸𑀦𑀺 𑀲𑀤𑁆𑀤𑀸𑀦𑀺 𑀲𑀼𑀡𑀸𑀢𑀺 𑀧𑀺𑀬𑀭𑀽𑀧𑀸𑀦𑀺 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀺 𑀭𑀚𑀦𑀻𑀬𑀸𑀦𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀏𑀯𑀜𑁆𑀳𑁂𑀢𑀁, 𑀫𑀳𑀸𑀮𑀺, 𑀳𑁄𑀢𑀺 𑀪𑀺𑀓𑁆𑀔𑀼𑀦𑁄 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀏𑀓𑀁𑀲𑀪𑀸𑀯𑀺𑀢𑁂 𑀲𑀫𑀸𑀥𑀺𑀫𑁆𑀳𑀺 𑀤𑀺𑀩𑁆𑀩𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁, 𑀦𑁄 𑀘 𑀔𑁄 𑀤𑀺𑀩𑁆𑀩𑀸𑀦𑀁 𑀲𑀤𑁆𑀤𑀸𑀦𑀁 𑀲𑀯𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁.

𑁩𑁬𑁭. ‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀮𑀺, 𑀪𑀺𑀓𑁆𑀔𑀼𑀦𑁄 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬…𑀧𑁂… 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 … 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬… 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀏𑀓𑀁𑀲𑀪𑀸𑀯𑀺𑀢𑁄 𑀲𑀫𑀸𑀥𑀺 𑀳𑁄𑀢𑀺 𑀤𑀺𑀩𑁆𑀩𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁, 𑀦𑁄 𑀘 𑀔𑁄 𑀤𑀺𑀩𑁆𑀩𑀸𑀦𑀁 𑀲𑀤𑁆𑀤𑀸𑀦𑀁 𑀲𑀯𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁. 𑀲𑁄 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀏𑀓𑀁𑀲𑀪𑀸𑀯𑀺𑀢𑁂 𑀲𑀫𑀸𑀥𑀺𑀫𑁆𑀳𑀺 𑀤𑀺𑀩𑁆𑀩𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁, 𑀦𑁄 𑀘 𑀔𑁄 𑀤𑀺𑀩𑁆𑀩𑀸𑀦𑀁 𑀲𑀤𑁆𑀤𑀸𑀦𑀁 𑀲𑀯𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁. 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀤𑀺𑀩𑁆𑀩𑀸𑀦𑀺 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀺𑀬𑀭𑀽𑀧𑀸𑀦𑀺 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀺 𑀭𑀚𑀦𑀻𑀬𑀸𑀦𑀺, 𑀦𑁄 𑀘 𑀔𑁄 𑀤𑀺𑀩𑁆𑀩𑀸𑀦𑀺 𑀲𑀤𑁆𑀤𑀸𑀦𑀺 𑀲𑀼𑀡𑀸𑀢𑀺 𑀧𑀺𑀬𑀭𑀽𑀧𑀸𑀦𑀺 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀺 𑀭𑀚𑀦𑀻𑀬𑀸𑀦𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀏𑀯𑀜𑁆𑀳𑁂𑀢𑀁, 𑀫𑀳𑀸𑀮𑀺, 𑀳𑁄𑀢𑀺 𑀪𑀺𑀓𑁆𑀔𑀼𑀦𑁄 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀏𑀓𑀁𑀲𑀪𑀸𑀯𑀺𑀢𑁂 𑀲𑀫𑀸𑀥𑀺𑀫𑁆𑀳𑀺 𑀤𑀺𑀩𑁆𑀩𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁, 𑀦𑁄 𑀘 𑀔𑁄 𑀤𑀺𑀩𑁆𑀩𑀸𑀦𑀁 𑀲𑀤𑁆𑀤𑀸𑀦𑀁 𑀲𑀯𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁.

𑁩𑁬𑁮. ‘‘𑀇𑀥, 𑀫𑀳𑀸𑀮𑀺, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀏𑀓𑀁𑀲𑀪𑀸𑀯𑀺𑀢𑁄 𑀲𑀫𑀸𑀥𑀺 𑀳𑁄𑀢𑀺 𑀤𑀺𑀩𑁆𑀩𑀸𑀦𑀁 𑀲𑀤𑁆𑀤𑀸𑀦𑀁 𑀲𑀯𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁, 𑀦𑁄 𑀘 𑀔𑁄 𑀤𑀺𑀩𑁆𑀩𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁. 𑀲𑁄 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀏𑀓𑀁𑀲𑀪𑀸𑀯𑀺𑀢𑁂 𑀲𑀫𑀸𑀥𑀺𑀫𑁆𑀳𑀺 𑀤𑀺𑀩𑁆𑀩𑀸𑀦𑀁 𑀲𑀤𑁆𑀤𑀸𑀦𑀁 𑀲𑀯𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁, 𑀦𑁄 𑀘 𑀔𑁄 𑀤𑀺𑀩𑁆𑀩𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁. 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀤𑀺𑀩𑁆𑀩𑀸𑀦𑀺 𑀲𑀤𑁆𑀤𑀸𑀦𑀺 𑀲𑀼𑀡𑀸𑀢𑀺 𑀧𑀺𑀬𑀭𑀽𑀧𑀸𑀦𑀺 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀺 𑀭𑀚𑀦𑀻𑀬𑀸𑀦𑀺, 𑀦𑁄 𑀘 𑀔𑁄 𑀤𑀺𑀩𑁆𑀩𑀸𑀦𑀺 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀺𑀬𑀭𑀽𑀧𑀸𑀦𑀺 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀺 𑀭𑀚𑀦𑀻𑀬𑀸𑀦𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀏𑀯𑀜𑁆𑀳𑁂𑀢𑀁, 𑀫𑀳𑀸𑀮𑀺, 𑀳𑁄𑀢𑀺 𑀪𑀺𑀓𑁆𑀔𑀼𑀦𑁄 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀏𑀓𑀁𑀲𑀪𑀸𑀯𑀺𑀢𑁂 𑀲𑀫𑀸𑀥𑀺𑀫𑁆𑀳𑀺 𑀤𑀺𑀩𑁆𑀩𑀸𑀦𑀁 𑀲𑀤𑁆𑀤𑀸𑀦𑀁 𑀲𑀯𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁, 𑀦𑁄 𑀘 𑀔𑁄 𑀤𑀺𑀩𑁆𑀩𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁.

𑁩𑁬𑁯. ‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀮𑀺, 𑀪𑀺𑀓𑁆𑀔𑀼𑀦𑁄 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬…𑀧𑁂… 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬… 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬… 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀏𑀓𑀁𑀲𑀪𑀸𑀯𑀺𑀢𑁄 𑀲𑀫𑀸𑀥𑀺 𑀳𑁄𑀢𑀺 𑀤𑀺𑀩𑁆𑀩𑀸𑀦𑀁 𑀲𑀤𑁆𑀤𑀸𑀦𑀁 𑀲𑀯𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁, 𑀦𑁄 𑀘 𑀔𑁄 𑀤𑀺𑀩𑁆𑀩𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁. 𑀲𑁄 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀏𑀓𑀁𑀲𑀪𑀸𑀯𑀺𑀢𑁂 𑀲𑀫𑀸𑀥𑀺𑀫𑁆𑀳𑀺 𑀤𑀺𑀩𑁆𑀩𑀸𑀦𑀁 𑀲𑀤𑁆𑀤𑀸𑀦𑀁 𑀲𑀯𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁, 𑀦𑁄 𑀘 𑀔𑁄 𑀤𑀺𑀩𑁆𑀩𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁. 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀤𑀺𑀩𑁆𑀩𑀸𑀦𑀺 𑀲𑀤𑁆𑀤𑀸𑀦𑀺 𑀲𑀼𑀡𑀸𑀢𑀺 𑀧𑀺𑀬𑀭𑀽𑀧𑀸𑀦𑀺 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀺 𑀭𑀚𑀦𑀻𑀬𑀸𑀦𑀺, 𑀦𑁄 𑀘 𑀔𑁄 𑀤𑀺𑀩𑁆𑀩𑀸𑀦𑀺 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀺𑀬𑀭𑀽𑀧𑀸𑀦𑀺 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀺 𑀭𑀚𑀦𑀻𑀬𑀸𑀦𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀏𑀯𑀜𑁆𑀳𑁂𑀢𑀁, 𑀫𑀳𑀸𑀮𑀺, 𑀳𑁄𑀢𑀺 𑀪𑀺𑀓𑁆𑀔𑀼𑀦𑁄 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀏𑀓𑀁𑀲𑀪𑀸𑀯𑀺𑀢𑁂 𑀲𑀫𑀸𑀥𑀺𑀫𑁆𑀳𑀺 𑀤𑀺𑀩𑁆𑀩𑀸𑀦𑀁 𑀲𑀤𑁆𑀤𑀸𑀦𑀁 𑀲𑀯𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁, 𑀦𑁄 𑀘 𑀔𑁄 𑀤𑀺𑀩𑁆𑀩𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁.

𑁩𑁭𑁦. ‘‘𑀇𑀥, 𑀫𑀳𑀸𑀮𑀺, 𑀪𑀺𑀓𑁆𑀔𑀼𑀦𑁄 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀉𑀪𑀬𑀁𑀲𑀪𑀸𑀯𑀺𑀢𑁄 𑀲𑀫𑀸𑀥𑀺 𑀳𑁄𑀢𑀺 𑀤𑀺𑀩𑁆𑀩𑀸𑀦𑀜𑁆𑀘 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁 𑀤𑀺𑀩𑁆𑀩𑀸𑀦𑀜𑁆𑀘 𑀲𑀤𑁆𑀤𑀸𑀦𑀁 𑀲𑀯𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁. 𑀲𑁄 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀉𑀪𑀬𑀁𑀲𑀪𑀸𑀯𑀺𑀢𑁂 𑀲𑀫𑀸𑀥𑀺𑀫𑁆𑀳𑀺 𑀤𑀺𑀩𑁆𑀩𑀸𑀦𑀜𑁆𑀘 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁, 𑀤𑀺𑀩𑁆𑀩𑀸𑀦𑀜𑁆𑀘 𑀲𑀤𑁆𑀤𑀸𑀦𑀁 𑀲𑀯𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁. 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀤𑀺𑀩𑁆𑀩𑀸𑀦𑀺 𑀘 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀺𑀬𑀭𑀽𑀧𑀸𑀦𑀺 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀺 𑀭𑀚𑀦𑀻𑀬𑀸𑀦𑀺, 𑀤𑀺𑀩𑁆𑀩𑀸𑀦𑀺 𑀘 𑀲𑀤𑁆𑀤𑀸𑀦𑀺 𑀲𑀼𑀡𑀸𑀢𑀺 𑀧𑀺𑀬𑀭𑀽𑀧𑀸𑀦𑀺 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀺 𑀭𑀚𑀦𑀻𑀬𑀸𑀦𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀏𑀯𑀜𑁆𑀳𑁂𑀢𑀁, 𑀫𑀳𑀸𑀮𑀺, 𑀳𑁄𑀢𑀺 𑀪𑀺𑀓𑁆𑀔𑀼𑀦𑁄 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀉𑀪𑀬𑀁𑀲𑀪𑀸𑀯𑀺𑀢𑁂 𑀲𑀫𑀸𑀥𑀺𑀫𑁆𑀳𑀺 𑀤𑀺𑀩𑁆𑀩𑀸𑀦𑀜𑁆𑀘 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁 𑀤𑀺𑀩𑁆𑀩𑀸𑀦𑀜𑁆𑀘 𑀲𑀤𑁆𑀤𑀸𑀦𑀁 𑀲𑀯𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁.

𑁩𑁭𑁧. ‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀮𑀺, 𑀪𑀺𑀓𑁆𑀔𑀼𑀦𑁄 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬…𑀧𑁂… 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬… 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬… 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀉𑀪𑀬𑀁𑀲𑀪𑀸𑀯𑀺𑀢𑁄 𑀲𑀫𑀸𑀥𑀺 𑀳𑁄𑀢𑀺 𑀤𑀺𑀩𑁆𑀩𑀸𑀦𑀜𑁆𑀘 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁, 𑀤𑀺𑀩𑁆𑀩𑀸𑀦𑀜𑁆𑀘 𑀲𑀤𑁆𑀤𑀸𑀦𑀁 𑀲𑀯𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁. 𑀲𑁄 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀉𑀪𑀬𑀁𑀲𑀪𑀸𑀯𑀺𑀢𑁂 𑀲𑀫𑀸𑀥𑀺𑀫𑁆𑀳𑀺 𑀤𑀺𑀩𑁆𑀩𑀸𑀦𑀜𑁆𑀘 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁 𑀤𑀺𑀩𑁆𑀩𑀸𑀦𑀜𑁆𑀘 𑀲𑀤𑁆𑀤𑀸𑀦𑀁 𑀲𑀯𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁. 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀤𑀺𑀩𑁆𑀩𑀸𑀦𑀺 𑀘 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀺𑀬𑀭𑀽𑀧𑀸𑀦𑀺 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀺 𑀭𑀚𑀦𑀻𑀬𑀸𑀦𑀺, 𑀤𑀺𑀩𑁆𑀩𑀸𑀦𑀺 𑀘 𑀲𑀤𑁆𑀤𑀸𑀦𑀺 𑀲𑀼𑀡𑀸𑀢𑀺 𑀧𑀺𑀬𑀭𑀽𑀧𑀸𑀦𑀺 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀺 𑀭𑀚𑀦𑀻𑀬𑀸𑀦𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀏𑀯𑀜𑁆𑀳𑁂𑀢𑀁, 𑀫𑀳𑀸𑀮𑀺, 𑀳𑁄𑀢𑀺 𑀪𑀺𑀓𑁆𑀔𑀼𑀦𑁄 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀉𑀪𑀬𑀁𑀲𑀪𑀸𑀯𑀺𑀢𑁂 𑀲𑀫𑀸𑀥𑀺𑀫𑁆𑀳𑀺 𑀤𑀺𑀩𑁆𑀩𑀸𑀦𑀜𑁆𑀘 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁, 𑀤𑀺𑀩𑁆𑀩𑀸𑀦𑀜𑁆𑀘 𑀲𑀤𑁆𑀤𑀸𑀦𑀁 𑀲𑀯𑀦𑀸𑀬 𑀧𑀺𑀬𑀭𑀽𑀧𑀸𑀦𑀁 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀁 𑀭𑀚𑀦𑀻𑀬𑀸𑀦𑀁. 𑀅𑀬𑀁 𑀔𑁄 𑀫𑀳𑀸𑀮𑀺, 𑀳𑁂𑀢𑀼, 𑀅𑀬𑀁 𑀧𑀘𑁆𑀘𑀬𑁄, 𑀬𑁂𑀦 𑀲𑀦𑁆𑀢𑀸𑀦𑁂𑀯 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄 𑀤𑀺𑀩𑁆𑀩𑀸𑀦𑀺 𑀲𑀤𑁆𑀤𑀸𑀦𑀺 𑀦𑀸𑀲𑁆𑀲𑁄𑀲𑀺 𑀧𑀺𑀬𑀭𑀽𑀧𑀸𑀦𑀺 𑀓𑀸𑀫𑀽𑀧𑀲𑀁𑀳𑀺𑀢𑀸𑀦𑀺 𑀭𑀚𑀦𑀻𑀬𑀸𑀦𑀺, 𑀦𑁄 𑀅𑀲𑀦𑁆𑀢𑀸𑀦𑀻’’𑀢𑀺.

𑁩𑁭𑁨. ‘‘𑀏𑀢𑀸𑀲𑀁 𑀦𑀽𑀦, 𑀪𑀦𑁆𑀢𑁂, 𑀲𑀫𑀸𑀥𑀺𑀪𑀸𑀯𑀦𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀳𑁂𑀢𑀼 𑀪𑀺𑀓𑁆𑀔𑀽 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀻’’𑀢𑀺. ‘‘𑀦 𑀔𑁄, 𑀫𑀳𑀸𑀮𑀺, 𑀏𑀢𑀸𑀲𑀁 𑀲𑀫𑀸𑀥𑀺𑀪𑀸𑀯𑀦𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀳𑁂𑀢𑀼 𑀪𑀺𑀓𑁆𑀔𑀽 𑀫𑀬𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺. 𑀅𑀢𑁆𑀣𑀺 𑀔𑁄, 𑀫𑀳𑀸𑀮𑀺, 𑀅𑀜𑁆𑀜𑁂𑀯 𑀥𑀫𑁆𑀫𑀸 𑀉𑀢𑁆𑀢𑀭𑀺𑀢𑀭𑀸 𑀘 𑀧𑀡𑀻𑀢𑀢𑀭𑀸 𑀘, 𑀬𑁂𑀲𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀳𑁂𑀢𑀼 𑀪𑀺𑀓𑁆𑀔𑀽 𑀫𑀬𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀻’’𑀢𑀺.

𑀘𑀢𑀼𑀅𑀭𑀺𑀬𑀨𑀮𑀁

𑁩𑁭𑁩. ‘‘𑀓𑀢𑀫𑁂 𑀧𑀦 𑀢𑁂, 𑀪𑀦𑁆𑀢𑁂, 𑀥𑀫𑁆𑀫𑀸 𑀉𑀢𑁆𑀢𑀭𑀺𑀢𑀭𑀸 𑀘 𑀧𑀡𑀻𑀢𑀢𑀭𑀸 𑀘, 𑀬𑁂𑀲𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀳𑁂𑀢𑀼 𑀪𑀺𑀓𑁆𑀔𑀽 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀻’’𑀢𑀺? ‘‘𑀇𑀥, 𑀫𑀳𑀸𑀮𑀺, 𑀪𑀺𑀓𑁆𑀔𑀼 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄. 𑀅𑀬𑀫𑁆𑀧𑀺 𑀔𑁄, 𑀫𑀳𑀸𑀮𑀺, 𑀥𑀫𑁆𑀫𑁄 𑀉𑀢𑁆𑀢𑀭𑀺𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘, 𑀬𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀳𑁂𑀢𑀼 𑀪𑀺𑀓𑁆𑀔𑀽 𑀫𑀬𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀮𑀺, 𑀪𑀺𑀓𑁆𑀔𑀼 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸 𑀲𑀓𑀤𑀸𑀕𑀸𑀫𑀻 𑀳𑁄𑀢𑀺, 𑀲𑀓𑀺𑀤𑁂𑀯 [𑀲𑀓𑀺𑀁𑀤𑁂𑀯 (𑀓.)] 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺. 𑀅𑀬𑀫𑁆𑀧𑀺 𑀔𑁄, 𑀫𑀳𑀸𑀮𑀺, 𑀥𑀫𑁆𑀫𑁄 𑀉𑀢𑁆𑀢𑀭𑀺𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘, 𑀬𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀳𑁂𑀢𑀼 𑀪𑀺𑀓𑁆𑀔𑀽 𑀫𑀬𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀮𑀺, 𑀪𑀺𑀓𑁆𑀔𑀼 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀑𑀧𑀧𑀸𑀢𑀺𑀓𑁄 𑀳𑁄𑀢𑀺, 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻, 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀢𑀲𑁆𑀫𑀸 𑀮𑁄𑀓𑀸. 𑀅𑀬𑀫𑁆𑀧𑀺 𑀔𑁄, 𑀫𑀳𑀸𑀮𑀺, 𑀥𑀫𑁆𑀫𑁄 𑀉𑀢𑁆𑀢𑀭𑀺𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘, 𑀬𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀳𑁂𑀢𑀼 𑀪𑀺𑀓𑁆𑀔𑀽 𑀫𑀬𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑀳𑀸𑀮𑀺, 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀫𑁆𑀧𑀺 𑀔𑁄, 𑀫𑀳𑀸𑀮𑀺, 𑀥𑀫𑁆𑀫𑁄 𑀉𑀢𑁆𑀢𑀭𑀺𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘, 𑀬𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀳𑁂𑀢𑀼 𑀪𑀺𑀓𑁆𑀔𑀽 𑀫𑀬𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀺. 𑀇𑀫𑁂 𑀔𑁄 𑀢𑁂, 𑀫𑀳𑀸𑀮𑀺, 𑀥𑀫𑁆𑀫𑀸 𑀉𑀢𑁆𑀢𑀭𑀺𑀢𑀭𑀸 𑀘 𑀧𑀡𑀻𑀢𑀢𑀭𑀸 𑀘, 𑀬𑁂𑀲𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀳𑁂𑀢𑀼 𑀪𑀺𑀓𑁆𑀔𑀽 𑀫𑀬𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀻’’𑀢𑀺.

𑀅𑀭𑀺𑀬𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑁄

𑁩𑁭𑁪. ‘‘𑀅𑀢𑁆𑀣𑀺 𑀧𑀦, 𑀪𑀦𑁆𑀢𑁂, 𑀫𑀕𑁆𑀕𑁄 𑀅𑀢𑁆𑀣𑀺 𑀧𑀝𑀺𑀧𑀤𑀸 𑀏𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’’𑀢𑀺? ‘‘𑀅𑀢𑁆𑀣𑀺 𑀔𑁄, 𑀫𑀳𑀸𑀮𑀺, 𑀫𑀕𑁆𑀕𑁄 𑀅𑀢𑁆𑀣𑀺 𑀧𑀝𑀺𑀧𑀤𑀸 𑀏𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’’𑀢𑀺.

𑁩𑁭𑁫. ‘‘𑀓𑀢𑀫𑁄 𑀧𑀦, 𑀪𑀦𑁆𑀢𑁂, 𑀫𑀕𑁆𑀕𑁄 𑀓𑀢𑀫𑀸 𑀧𑀝𑀺𑀧𑀤𑀸 𑀏𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’’𑀢𑀺? ‘‘𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀬𑀁 𑀔𑁄, 𑀫𑀳𑀸𑀮𑀺, 𑀫𑀕𑁆𑀕𑁄 𑀅𑀬𑀁 𑀧𑀝𑀺𑀧𑀤𑀸 𑀏𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀬.

𑀤𑁆𑀯𑁂𑀧𑀩𑁆𑀩𑀚𑀺𑀢𑀯𑀢𑁆𑀣𑀼

𑁩𑁭𑁬. ‘‘𑀏𑀓𑀫𑀺𑀤𑀸𑀳𑀁, 𑀫𑀳𑀸𑀮𑀺, 𑀲𑀫𑀬𑀁 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀸𑀫𑀺 𑀖𑁄𑀲𑀺𑀢𑀸𑀭𑀸𑀫𑁂. 𑀅𑀣 𑀔𑁄 𑀤𑁆𑀯𑁂 𑀧𑀩𑁆𑀩𑀚𑀺𑀢𑀸 𑁋 𑀫𑀼𑀡𑁆𑀟𑀺𑀬𑁄 𑀘 𑀧𑀭𑀺𑀩𑁆𑀩𑀸𑀚𑀓𑁄 𑀚𑀸𑀮𑀺𑀬𑁄 𑀘 𑀤𑀸𑀭𑀼𑀧𑀢𑁆𑀢𑀺𑀓𑀦𑁆𑀢𑁂𑀯𑀸𑀲𑀻 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀬𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀢𑁂 𑀤𑁆𑀯𑁂 𑀧𑀩𑁆𑀩𑀚𑀺𑀢𑀸 𑀫𑀁 𑀏𑀢𑀤𑀯𑁄𑀘𑀼𑀁 𑁋 ‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀕𑁄𑀢𑀫, 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁, 𑀉𑀤𑀸𑀳𑀼 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺?

𑁩𑁭𑁭. ‘‘‘𑀢𑁂𑀦 𑀳𑀸𑀯𑀼𑀲𑁄, 𑀲𑀼𑀡𑀸𑀣 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘𑀏𑀯𑀫𑀸𑀯𑀼𑀲𑁄’𑀢𑀺 𑀔𑁄 𑀢𑁂 𑀤𑁆𑀯𑁂 𑀧𑀩𑁆𑀩𑀚𑀺𑀢𑀸 𑀫𑀫 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀅𑀳𑀁 𑀏𑀢𑀤𑀯𑁄𑀘𑀁 𑁋 𑀇𑀥𑀸𑀯𑀼𑀲𑁄 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… (𑀬𑀣𑀸 𑁧𑁯𑁦-𑁨𑁧𑁨 𑀅𑀦𑀼𑀘𑁆𑀙𑁂𑀤𑁂𑀲𑀼 𑀏𑀯𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁). 𑀏𑀯𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀬𑁄 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀏𑀯𑀁 𑀚𑀸𑀦𑀸𑀢𑀺 𑀏𑀯𑀁 𑀧𑀲𑁆𑀲𑀢𑀺, 𑀓𑀮𑁆𑀮𑀁 𑀦𑀼 𑀔𑁄 𑀢𑀲𑁆𑀲𑁂𑀢𑀁 𑀯𑀘𑀦𑀸𑀬 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸𑀢𑀺? 𑀬𑁄 𑀲𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀏𑀯𑀁 𑀚𑀸𑀦𑀸𑀢𑀺 𑀏𑀯𑀁 𑀧𑀲𑁆𑀲𑀢𑀺, 𑀓𑀮𑁆𑀮𑀁 𑀢𑀲𑁆𑀲𑁂𑀢𑀁 𑀯𑀘𑀦𑀸𑀬 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸, ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸𑀢𑀺. 𑀅𑀳𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀏𑀯𑀁 𑀚𑀸𑀦𑀸𑀫𑀺 𑀏𑀯𑀁 𑀧𑀲𑁆𑀲𑀸𑀫𑀺. 𑀅𑀣 𑀘 𑀧𑀦𑀸𑀳𑀁 𑀦 𑀯𑀤𑀸𑀫𑀺 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀬𑁄 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀏𑀯𑀁 𑀚𑀸𑀦𑀸𑀢𑀺 𑀏𑀯𑀁 𑀧𑀲𑁆𑀲𑀢𑀺, 𑀓𑀮𑁆𑀮𑀁 𑀦𑀼 𑀔𑁄 𑀢𑀲𑁆𑀲𑁂𑀢𑀁 𑀯𑀘𑀦𑀸𑀬 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸𑀢𑀺? 𑀬𑁄 𑀲𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀏𑀯𑀁 𑀚𑀸𑀦𑀸𑀢𑀺 𑀏𑀯𑀁 𑀧𑀲𑁆𑀲𑀢𑀺, 𑀓𑀮𑁆𑀮𑀁 𑀢𑀲𑁆𑀲𑁂𑀢𑀁 𑀯𑀘𑀦𑀸𑀬 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸𑀢𑀺. 𑀅𑀳𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀏𑀯𑀁 𑀚𑀸𑀦𑀸𑀫𑀺 𑀏𑀯𑀁 𑀧𑀲𑁆𑀲𑀸𑀫𑀺. 𑀅𑀣 𑀘 𑀧𑀦𑀸𑀳𑀁 𑀦 𑀯𑀤𑀸𑀫𑀺 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸…𑀧𑁂… 𑀜𑀸𑀡𑀤𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺…𑀧𑁂… 𑀬𑁄 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀏𑀯𑀁 𑀚𑀸𑀦𑀸𑀢𑀺 𑀏𑀯𑀁 𑀧𑀲𑁆𑀲𑀢𑀺, 𑀓𑀮𑁆𑀮𑀁 𑀦𑀼 𑀔𑁄 𑀢𑀲𑁆𑀲𑁂𑀢𑀁 𑀯𑀘𑀦𑀸𑀬 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸𑀢𑀺? 𑀬𑁄 𑀲𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀏𑀯𑀁 𑀚𑀸𑀦𑀸𑀢𑀺 𑀏𑀯𑀁 𑀧𑀲𑁆𑀲𑀢𑀺, 𑀓𑀮𑁆𑀮𑀁 [𑀦 𑀓𑀮𑁆𑀮𑀁 (𑀲𑀻. 𑀲𑁆𑀬𑀸. 𑀓𑀁. 𑀓.)] 𑀢𑀲𑁆𑀲𑁂𑀢𑀁 𑀯𑀘𑀦𑀸𑀬 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺 𑀯𑀸 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸𑀢𑀺. 𑀅𑀳𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀏𑀯𑀁 𑀚𑀸𑀦𑀸𑀫𑀺 𑀏𑀯𑀁 𑀧𑀲𑁆𑀲𑀸𑀫𑀺. 𑀅𑀣 𑀘 𑀧𑀦𑀸𑀳𑀁 𑀦 𑀯𑀤𑀸𑀫𑀺 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀺. 𑀬𑁄 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀏𑀯𑀁 𑀚𑀸𑀦𑀸𑀢𑀺 𑀏𑀯𑀁 𑀧𑀲𑁆𑀲𑀢𑀺, 𑀓𑀮𑁆𑀮𑀁 𑀦𑀼 𑀔𑁄 𑀢𑀲𑁆𑀲𑁂𑀢𑀁 𑀯𑀘𑀦𑀸𑀬 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸𑀢𑀺? 𑀬𑁄 𑀲𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀏𑀯𑀁 𑀚𑀸𑀦𑀸𑀢𑀺 𑀏𑀯𑀁 𑀧𑀲𑁆𑀲𑀢𑀺 𑀦 𑀓𑀮𑁆𑀮𑀁 𑀢𑀲𑁆𑀲𑁂𑀢𑀁 𑀯𑀘𑀦𑀸𑀬 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸𑀢𑀺. 𑀅𑀳𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀏𑀯𑀁 𑀚𑀸𑀦𑀸𑀫𑀺 𑀏𑀯𑀁 𑀧𑀲𑁆𑀲𑀸𑀫𑀺. 𑀅𑀣 𑀘 𑀧𑀦𑀸𑀳𑀁 𑀦 𑀯𑀤𑀸𑀫𑀺 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑁄 𑀑𑀝𑁆𑀞𑀤𑁆𑀥𑁄 𑀮𑀺𑀘𑁆𑀙𑀯𑀻 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀻𑀢𑀺.

𑀫𑀳𑀸𑀮𑀺𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀙𑀝𑁆𑀞𑀁.

𑁭. 𑀚𑀸𑀮𑀺𑀬𑀲𑀼𑀢𑁆𑀢𑀁

𑀤𑁆𑀯𑁂𑀧𑀩𑁆𑀩𑀚𑀺𑀢𑀯𑀢𑁆𑀣𑀼

𑁩𑁭𑁮. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀫𑁆𑀩𑀺𑀬𑀁 𑀯𑀺𑀳𑀭𑀢𑀺 𑀖𑁄𑀲𑀺𑀢𑀸𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀤𑁆𑀯𑁂 𑀧𑀩𑁆𑀩𑀚𑀺𑀢𑀸 𑁋 𑀫𑀼𑀡𑁆𑀟𑀺𑀬𑁄 𑀘 𑀧𑀭𑀺𑀩𑁆𑀩𑀸𑀚𑀓𑁄 𑀚𑀸𑀮𑀺𑀬𑁄 𑀘 𑀤𑀸𑀭𑀼𑀧𑀢𑁆𑀢𑀺𑀓𑀦𑁆𑀢𑁂𑀯𑀸𑀲𑀻 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀢𑁂 𑀤𑁆𑀯𑁂 𑀧𑀩𑁆𑀩𑀚𑀺𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀕𑁄𑀢𑀫, 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁, 𑀉𑀤𑀸𑀳𑀼 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’𑀦𑁆𑀢𑀺?

𑁩𑁭𑁯. ‘‘𑀢𑁂𑀦 𑀳𑀸𑀯𑀼𑀲𑁄, 𑀲𑀼𑀡𑀸𑀣 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀢𑁂 𑀤𑁆𑀯𑁂 𑀧𑀩𑁆𑀩𑀚𑀺𑀢𑀸 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀇𑀥𑀸𑀯𑀼𑀲𑁄, 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… (𑀬𑀣𑀸 𑁧𑁯𑁦-𑁨𑁧𑁨 𑀅𑀦𑀼𑀘𑁆𑀙𑁂𑀤𑁂𑀲𑀼 𑀏𑀯𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁). 𑀏𑀯𑀁 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀬𑁄 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀏𑀯𑀁 𑀚𑀸𑀦𑀸𑀢𑀺 𑀏𑀯𑀁 𑀧𑀲𑁆𑀲𑀢𑀺, 𑀓𑀮𑁆𑀮𑀁 𑀦𑀼 𑀔𑁄 𑀢𑀲𑁆𑀲𑁂𑀢𑀁 𑀯𑀘𑀦𑀸𑀬 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸𑀢𑀺. 𑀬𑁄 𑀲𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀏𑀯𑀁 𑀚𑀸𑀦𑀸𑀢𑀺 𑀏𑀯𑀁 𑀧𑀲𑁆𑀲𑀢𑀺, 𑀓𑀮𑁆𑀮𑀁 𑀢𑀲𑁆𑀲𑁂𑀢𑀁 𑀯𑀘𑀦𑀸𑀬 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸𑀢𑀺. 𑀅𑀳𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀏𑀯𑀁 𑀚𑀸𑀦𑀸𑀫𑀺 𑀏𑀯𑀁 𑀧𑀲𑁆𑀲𑀸𑀫𑀺. 𑀅𑀣 𑀘 𑀧𑀦𑀸𑀳𑀁 𑀦 𑀯𑀤𑀸𑀫𑀺 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀬𑁄 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀏𑀯𑀁 𑀚𑀸𑀦𑀸𑀢𑀺 𑀏𑀯𑀁 𑀧𑀲𑁆𑀲𑀢𑀺, 𑀓𑀮𑁆𑀮𑀁 𑀦𑀼 𑀔𑁄 𑀢𑀲𑁆𑀲𑁂𑀢𑀁 𑀯𑀘𑀦𑀸𑀬 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸𑀢𑀺? 𑀬𑁄 𑀲𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀏𑀯𑀁 𑀚𑀸𑀦𑀸𑀢𑀺 𑀏𑀯𑀁 𑀧𑀲𑁆𑀲𑀢𑀺 𑀓𑀮𑁆𑀮𑀁, 𑀢𑀲𑁆𑀲𑁂𑀢𑀁 𑀯𑀘𑀦𑀸𑀬 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸𑀢𑀺. 𑀅𑀳𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀏𑀯𑀁 𑀚𑀸𑀦𑀸𑀫𑀺 𑀏𑀯𑀁 𑀧𑀲𑁆𑀲𑀸𑀫𑀺. 𑀅𑀣 𑀘 𑀧𑀦𑀸𑀳𑀁 𑀦 𑀯𑀤𑀸𑀫𑀺 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸…𑀧𑁂… 𑀜𑀸𑀡𑀤𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺…𑀧𑁂… 𑀬𑁄 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀏𑀯𑀁 𑀚𑀸𑀦𑀸𑀢𑀺 𑀏𑀯𑀁 𑀧𑀲𑁆𑀲𑀢𑀺, 𑀓𑀮𑁆𑀮𑀁 𑀦𑀼 𑀔𑁄 𑀢𑀲𑁆𑀲𑁂𑀢𑀁 𑀯𑀘𑀦𑀸𑀬 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸𑀢𑀺. 𑀬𑁄 𑀲𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀏𑀯𑀁 𑀚𑀸𑀦𑀸𑀢𑀺 𑀏𑀯𑀁 𑀧𑀲𑁆𑀲𑀢𑀺 𑀓𑀮𑁆𑀮𑀁 𑀢𑀲𑁆𑀲𑁂𑀢𑀁 𑀯𑀘𑀦𑀸𑀬 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸𑀢𑀺. 𑀅𑀳𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀏𑀯𑀁 𑀚𑀸𑀦𑀸𑀫𑀺 𑀏𑀯𑀁 𑀧𑀲𑁆𑀲𑀸𑀫𑀺. 𑀅𑀣 𑀘 𑀧𑀦𑀸𑀳𑀁 𑀦 𑀯𑀤𑀸𑀫𑀺 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸…𑀧𑁂….

𑁩𑁮𑁦. …𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀺. 𑀬𑁄 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀏𑀯𑀁 𑀚𑀸𑀦𑀸𑀢𑀺 𑀏𑀯𑀁 𑀧𑀲𑁆𑀲𑀢𑀺, 𑀓𑀮𑁆𑀮𑀁 𑀦𑀼 𑀔𑁄 𑀢𑀲𑁆𑀲𑁂𑀢𑀁 𑀯𑀘𑀦𑀸𑀬 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸𑀢𑀺? 𑀬𑁄 𑀲𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀏𑀯𑀁 𑀚𑀸𑀦𑀸𑀢𑀺 𑀏𑀯𑀁 𑀧𑀲𑁆𑀲𑀢𑀺, 𑀦 𑀓𑀮𑁆𑀮𑀁 𑀢𑀲𑁆𑀲𑁂𑀢𑀁 𑀯𑀘𑀦𑀸𑀬 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸𑀢𑀺. 𑀅𑀳𑀁 𑀔𑁄 𑀧𑀦𑁂𑀢𑀁, 𑀆𑀯𑀼𑀲𑁄, 𑀏𑀯𑀁 𑀚𑀸𑀦𑀸𑀫𑀺 𑀏𑀯𑀁 𑀧𑀲𑁆𑀲𑀸𑀫𑀺. 𑀅𑀣 𑀘 𑀧𑀦𑀸𑀳𑀁 𑀦 𑀯𑀤𑀸𑀫𑀺 𑁋 ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸 ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀤𑁆𑀯𑁂 𑀧𑀩𑁆𑀩𑀚𑀺𑀢𑀸 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀚𑀸𑀮𑀺𑀬𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀲𑀢𑁆𑀢𑀫𑀁.

𑁮. 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀁

𑀅𑀘𑁂𑀮𑀓𑀲𑁆𑀲𑀧𑀯𑀢𑁆𑀣𑀼

𑁩𑁮𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀉𑀭𑀼𑀜𑁆𑀜𑀸𑀬𑀁 [𑀉𑀚𑀼𑀜𑁆𑀜𑀸𑀬𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀯𑀺𑀳𑀭𑀢𑀺 𑀓𑀡𑁆𑀡𑀓𑀢𑁆𑀣𑀮𑁂 𑀫𑀺𑀕𑀤𑀸𑀬𑁂. 𑀅𑀣 𑀔𑁄 𑀅𑀘𑁂𑀮𑁄 𑀓𑀲𑁆𑀲𑀧𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀅𑀘𑁂𑀮𑁄 𑀓𑀲𑁆𑀲𑀧𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀼𑀢𑀁 𑀫𑁂𑀢𑀁, 𑀪𑁄 𑀕𑁄𑀢𑀫 𑁋 ‘𑀲𑀫𑀡𑁄 𑀕𑁄𑀢𑀫𑁄 𑀲𑀩𑁆𑀩𑀁 𑀢𑀧𑀁 𑀕𑀭𑀳𑀢𑀺, 𑀲𑀩𑁆𑀩𑀁 𑀢𑀧𑀲𑁆𑀲𑀺𑀁 𑀮𑀽𑀔𑀸𑀚𑀻𑀯𑀺𑀁 𑀏𑀓𑀁𑀲𑁂𑀦 𑀉𑀧𑀓𑁆𑀓𑁄𑀲𑀢𑀺 𑀉𑀧𑀯𑀤𑀢𑀻’𑀢𑀺. 𑀬𑁂 𑀢𑁂, 𑀪𑁄 𑀕𑁄𑀢𑀫, 𑀏𑀯𑀫𑀸𑀳𑀁𑀲𑀼 𑁋 ‘𑀲𑀫𑀡𑁄 𑀕𑁄𑀢𑀫𑁄 𑀲𑀩𑁆𑀩𑀁 𑀢𑀧𑀁 𑀕𑀭𑀳𑀢𑀺, 𑀲𑀩𑁆𑀩𑀁 𑀢𑀧𑀲𑁆𑀲𑀺𑀁 𑀮𑀽𑀔𑀸𑀚𑀻𑀯𑀺𑀁 𑀏𑀓𑀁𑀲𑁂𑀦 𑀉𑀧𑀓𑁆𑀓𑁄𑀲𑀢𑀺 𑀉𑀧𑀯𑀤𑀢𑀻’𑀢𑀺, 𑀓𑀘𑁆𑀘𑀺 𑀢𑁂 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀯𑀼𑀢𑁆𑀢𑀯𑀸𑀤𑀺𑀦𑁄, 𑀦 𑀘 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺, 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁄𑀦𑁆𑀢𑀺, 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀯𑀸𑀤𑁄 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑀢𑀺? 𑀅𑀦𑀩𑁆𑀪𑀓𑁆𑀔𑀸𑀢𑀼𑀓𑀸𑀫𑀸 𑀳𑀺 𑀫𑀬𑀁 𑀪𑀯𑀦𑁆𑀢𑀁 𑀕𑁄𑀢𑀫’’𑀦𑁆𑀢𑀺.

𑁩𑁮𑁨. ‘‘𑀬𑁂 𑀢𑁂, 𑀓𑀲𑁆𑀲𑀧, 𑀏𑀯𑀫𑀸𑀳𑀁𑀲𑀼 𑁋 ‘𑀲𑀫𑀡𑁄 𑀕𑁄𑀢𑀫𑁄 𑀲𑀩𑁆𑀩𑀁 𑀢𑀧𑀁 𑀕𑀭𑀳𑀢𑀺, 𑀲𑀩𑁆𑀩𑀁 𑀢𑀧𑀲𑁆𑀲𑀺𑀁 𑀮𑀽𑀔𑀸𑀚𑀻𑀯𑀺𑀁 𑀏𑀓𑀁𑀲𑁂𑀦 𑀉𑀧𑀓𑁆𑀓𑁄𑀲𑀢𑀺 𑀉𑀧𑀯𑀤𑀢𑀻’𑀢𑀺, 𑀦 𑀫𑁂 𑀢𑁂 𑀯𑀼𑀢𑁆𑀢𑀯𑀸𑀤𑀺𑀦𑁄, 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀺 𑀘 𑀧𑀦 𑀫𑀁 𑀢𑁂 𑀅𑀲𑀢𑀸 𑀅𑀪𑀽𑀢𑁂𑀦. 𑀇𑀥𑀸𑀳𑀁, 𑀓𑀲𑁆𑀲𑀧, 𑀏𑀓𑀘𑁆𑀘𑀁 𑀢𑀧𑀲𑁆𑀲𑀺𑀁 𑀮𑀽𑀔𑀸𑀚𑀻𑀯𑀺𑀁 𑀧𑀲𑁆𑀲𑀸𑀫𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀁. 𑀇𑀥 𑀧𑀦𑀸𑀳𑀁, 𑀓𑀲𑁆𑀲𑀧, 𑀏𑀓𑀘𑁆𑀘𑀁 𑀢𑀧𑀲𑁆𑀲𑀺𑀁 𑀮𑀽𑀔𑀸𑀚𑀻𑀯𑀺𑀁 𑀧𑀲𑁆𑀲𑀸𑀫𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀁.

𑁩𑁮𑁩. ‘‘𑀇𑀥𑀸𑀳𑀁, 𑀓𑀲𑁆𑀲𑀧, 𑀏𑀓𑀘𑁆𑀘𑀁 𑀢𑀧𑀲𑁆𑀲𑀺𑀁 𑀅𑀧𑁆𑀧𑀤𑀼𑀓𑁆𑀔𑀯𑀺𑀳𑀸𑀭𑀺𑀁 𑀧𑀲𑁆𑀲𑀸𑀫𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀁. 𑀇𑀥 𑀧𑀦𑀸𑀳𑀁, 𑀓𑀲𑁆𑀲𑀧, 𑀏𑀓𑀘𑁆𑀘𑀁 𑀢𑀧𑀲𑁆𑀲𑀺𑀁 𑀅𑀧𑁆𑀧𑀤𑀼𑀓𑁆𑀔𑀯𑀺𑀳𑀸𑀭𑀺𑀁 𑀧𑀲𑁆𑀲𑀸𑀫𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀁. 𑀬𑁄𑀳𑀁, 𑀓𑀲𑁆𑀲𑀧, 𑀇𑀫𑁂𑀲𑀁 𑀢𑀧𑀲𑁆𑀲𑀻𑀦𑀁 𑀏𑀯𑀁 𑀆𑀕𑀢𑀺𑀜𑁆𑀘 𑀕𑀢𑀺𑀜𑁆𑀘 𑀘𑀼𑀢𑀺𑀜𑁆𑀘 𑀉𑀧𑀧𑀢𑁆𑀢𑀺𑀜𑁆𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀫𑀺, 𑀲𑁄𑀳𑀁 𑀓𑀺𑀁 𑀲𑀩𑁆𑀩𑀁 𑀢𑀧𑀁 𑀕𑀭𑀳𑀺𑀲𑁆𑀲𑀸𑀫𑀺, 𑀲𑀩𑁆𑀩𑀁 𑀯𑀸 𑀢𑀧𑀲𑁆𑀲𑀺𑀁 𑀮𑀽𑀔𑀸𑀚𑀻𑀯𑀺𑀁 𑀏𑀓𑀁𑀲𑁂𑀦 𑀉𑀧𑀓𑁆𑀓𑁄𑀲𑀺𑀲𑁆𑀲𑀸𑀫𑀺 𑀉𑀧𑀯𑀤𑀺𑀲𑁆𑀲𑀸𑀫𑀺?

𑁩𑁮𑁪. ‘‘𑀲𑀦𑁆𑀢𑀺, 𑀓𑀲𑁆𑀲𑀧, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀡𑁆𑀟𑀺𑀢𑀸 𑀦𑀺𑀧𑀼𑀡𑀸 𑀓𑀢𑀧𑀭𑀧𑁆𑀧𑀯𑀸𑀤𑀸 𑀯𑀸𑀮𑀯𑁂𑀥𑀺𑀭𑀽𑀧𑀸. 𑀢𑁂 𑀪𑀺𑀦𑁆𑀤𑀦𑁆𑀢𑀸 𑀫𑀜𑁆𑀜𑁂 𑀘𑀭𑀦𑁆𑀢𑀺 𑀧𑀜𑁆𑀜𑀸𑀕𑀢𑁂𑀦 𑀤𑀺𑀝𑁆𑀞𑀺𑀕𑀢𑀸𑀦𑀺. 𑀢𑁂𑀳𑀺𑀧𑀺 𑀫𑁂 𑀲𑀤𑁆𑀥𑀺𑀁 𑀏𑀓𑀘𑁆𑀘𑁂𑀲𑀼 𑀞𑀸𑀦𑁂𑀲𑀼 𑀲𑀫𑁂𑀢𑀺, 𑀏𑀓𑀘𑁆𑀘𑁂𑀲𑀼 𑀞𑀸𑀦𑁂𑀲𑀼 𑀦 𑀲𑀫𑁂𑀢𑀺. 𑀬𑀁 𑀢𑁂 𑀏𑀓𑀘𑁆𑀘𑀁 𑀯𑀤𑀦𑁆𑀢𑀺 ‘𑀲𑀸𑀥𑀽’𑀢𑀺, 𑀫𑀬𑀫𑁆𑀧𑀺 𑀢𑀁 𑀏𑀓𑀘𑁆𑀘𑀁 𑀯𑀤𑁂𑀫 ‘𑀲𑀸𑀥𑀽’𑀢𑀺. 𑀬𑀁 𑀢𑁂 𑀏𑀓𑀘𑁆𑀘𑀁 𑀯𑀤𑀦𑁆𑀢𑀺 ‘𑀦 𑀲𑀸𑀥𑀽’𑀢𑀺, 𑀫𑀬𑀫𑁆𑀧𑀺 𑀢𑀁 𑀏𑀓𑀘𑁆𑀘𑀁 𑀯𑀤𑁂𑀫 ‘𑀦 𑀲𑀸𑀥𑀽’𑀢𑀺. 𑀬𑀁 𑀢𑁂 𑀏𑀓𑀘𑁆𑀘𑀁 𑀯𑀤𑀦𑁆𑀢𑀺 ‘𑀲𑀸𑀥𑀽’𑀢𑀺, 𑀫𑀬𑀁 𑀢𑀁 𑀏𑀓𑀘𑁆𑀘𑀁 𑀯𑀤𑁂𑀫 ‘𑀦 𑀲𑀸𑀥𑀽’𑀢𑀺. 𑀬𑀁 𑀢𑁂 𑀏𑀓𑀘𑁆𑀘𑀁 𑀯𑀤𑀦𑁆𑀢𑀺 ‘𑀦 𑀲𑀸𑀥𑀽’𑀢𑀺, 𑀫𑀬𑀁 𑀢𑀁 𑀏𑀓𑀘𑁆𑀘𑀁 𑀯𑀤𑁂𑀫 ‘𑀲𑀸𑀥𑀽’𑀢𑀺.

‘‘𑀬𑀁 𑀫𑀬𑀁 𑀏𑀓𑀘𑁆𑀘𑀁 𑀯𑀤𑁂𑀫 ‘𑀲𑀸𑀥𑀽’𑀢𑀺, 𑀧𑀭𑁂𑀧𑀺 𑀢𑀁 𑀏𑀓𑀘𑁆𑀘𑀁 𑀯𑀤𑀦𑁆𑀢𑀺 ‘𑀲𑀸𑀥𑀽’𑀢𑀺. 𑀬𑀁 𑀫𑀬𑀁 𑀏𑀓𑀘𑁆𑀘𑀁 𑀯𑀤𑁂𑀫 ‘𑀦 𑀲𑀸𑀥𑀽’𑀢𑀺, 𑀧𑀭𑁂𑀧𑀺 𑀢𑀁 𑀏𑀓𑀘𑁆𑀘𑀁 𑀯𑀤𑀦𑁆𑀢𑀺 ‘𑀦 𑀲𑀸𑀥𑀽’𑀢𑀺. 𑀬𑀁 𑀫𑀬𑀁 𑀏𑀓𑀘𑁆𑀘𑀁 𑀯𑀤𑁂𑀫 ‘𑀦 𑀲𑀸𑀥𑀽’𑀢𑀺, 𑀧𑀭𑁂 𑀢𑀁 𑀏𑀓𑀘𑁆𑀘𑀁 𑀯𑀤𑀦𑁆𑀢𑀺 ‘𑀲𑀸𑀥𑀽’𑀢𑀺. 𑀬𑀁 𑀫𑀬𑀁 𑀏𑀓𑀘𑁆𑀘𑀁 𑀯𑀤𑁂𑀫 ‘𑀲𑀸𑀥𑀽’𑀢𑀺, 𑀧𑀭𑁂 𑀢𑀁 𑀏𑀓𑀘𑁆𑀘𑀁 𑀯𑀤𑀦𑁆𑀢𑀺 ‘𑀦 𑀲𑀸𑀥𑀽’𑀢𑀺.

𑀲𑀫𑀦𑀼𑀬𑀼𑀜𑁆𑀚𑀸𑀧𑀦𑀓𑀣𑀸

𑁩𑁮𑁫. ‘‘𑀢𑁆𑀬𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀸𑀫𑀺 𑁋 𑀬𑁂𑀲𑀼 𑀦𑁄, 𑀆𑀯𑀼𑀲𑁄, 𑀞𑀸𑀦𑁂𑀲𑀼 𑀦 𑀲𑀫𑁂𑀢𑀺, 𑀢𑀺𑀝𑁆𑀞𑀦𑁆𑀢𑀼 𑀢𑀸𑀦𑀺 𑀞𑀸𑀦𑀸𑀦𑀺. 𑀬𑁂𑀲𑀼 𑀞𑀸𑀦𑁂𑀲𑀼 𑀲𑀫𑁂𑀢𑀺, 𑀢𑀢𑁆𑀣 𑀯𑀺𑀜𑁆𑀜𑀽 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀁 𑀲𑀫𑀦𑀼𑀕𑀸𑀳𑀦𑁆𑀢𑀁 𑀲𑀫𑀦𑀼𑀪𑀸𑀲𑀦𑁆𑀢𑀁 𑀲𑀢𑁆𑀣𑀸𑀭𑀸 𑀯𑀸 𑀲𑀢𑁆𑀣𑀸𑀭𑀁 𑀲𑀗𑁆𑀖𑁂𑀦 𑀯𑀸 𑀲𑀗𑁆𑀖𑀁 𑁋 ‘𑀬𑁂 𑀇𑀫𑁂𑀲𑀁 𑀪𑀯𑀢𑀁 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀅𑀓𑀼𑀲𑀮𑀲𑀗𑁆𑀔𑀸𑀢𑀸, 𑀲𑀸𑀯𑀚𑁆𑀚𑀸 𑀲𑀸𑀯𑀚𑁆𑀚𑀲𑀗𑁆𑀔𑀸𑀢𑀸, 𑀅𑀲𑁂𑀯𑀺𑀢𑀩𑁆𑀩𑀸 𑀅𑀲𑁂𑀯𑀺𑀢𑀩𑁆𑀩𑀲𑀗𑁆𑀔𑀸𑀢𑀸, 𑀦 𑀅𑀮𑀫𑀭𑀺𑀬𑀸 𑀦 𑀅𑀮𑀫𑀭𑀺𑀬𑀲𑀗𑁆𑀔𑀸𑀢𑀸, 𑀓𑀡𑁆𑀳𑀸 𑀓𑀡𑁆𑀳𑀲𑀗𑁆𑀔𑀸𑀢𑀸. 𑀓𑁄 𑀇𑀫𑁂 𑀥𑀫𑁆𑀫𑁂 𑀅𑀦𑀯𑀲𑁂𑀲𑀁 𑀧𑀳𑀸𑀬 𑀯𑀢𑁆𑀢𑀢𑀺, 𑀲𑀫𑀡𑁄 𑀯𑀸 𑀕𑁄𑀢𑀫𑁄, 𑀧𑀭𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀕𑀡𑀸𑀘𑀭𑀺𑀬𑀸’𑀢𑀺?

𑁩𑁮𑁬. ‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀓𑀲𑁆𑀲𑀧, 𑀯𑀺𑀚𑁆𑀚𑀢𑀺, 𑀬𑀁 𑀯𑀺𑀜𑁆𑀜𑀽 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀸 𑀲𑀫𑀦𑀼𑀕𑀸𑀳𑀦𑁆𑀢𑀸 𑀲𑀫𑀦𑀼𑀪𑀸𑀲𑀦𑁆𑀢𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀬𑁂 𑀇𑀫𑁂𑀲𑀁 𑀪𑀯𑀢𑀁 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀅𑀓𑀼𑀲𑀮𑀲𑀗𑁆𑀔𑀸𑀢𑀸, 𑀲𑀸𑀯𑀚𑁆𑀚𑀸 𑀲𑀸𑀯𑀚𑁆𑀚𑀲𑀗𑁆𑀔𑀸𑀢𑀸, 𑀅𑀲𑁂𑀯𑀺𑀢𑀩𑁆𑀩𑀸 𑀅𑀲𑁂𑀯𑀺𑀢𑀩𑁆𑀩𑀲𑀗𑁆𑀔𑀸𑀢𑀸, 𑀦 𑀅𑀮𑀫𑀭𑀺𑀬𑀸 𑀦 𑀅𑀮𑀫𑀭𑀺𑀬𑀲𑀗𑁆𑀔𑀸𑀢𑀸, 𑀓𑀡𑁆𑀳𑀸 𑀓𑀡𑁆𑀳𑀲𑀗𑁆𑀔𑀸𑀢𑀸. 𑀲𑀫𑀡𑁄 𑀕𑁄𑀢𑀫𑁄 𑀇𑀫𑁂 𑀥𑀫𑁆𑀫𑁂 𑀅𑀦𑀯𑀲𑁂𑀲𑀁 𑀧𑀳𑀸𑀬 𑀯𑀢𑁆𑀢𑀢𑀺, 𑀬𑀁 𑀯𑀸 𑀧𑀦 𑀪𑁄𑀦𑁆𑀢𑁄 𑀧𑀭𑁂 𑀕𑀡𑀸𑀘𑀭𑀺𑀬𑀸’𑀢𑀺. 𑀇𑀢𑀺𑀳, 𑀓𑀲𑁆𑀲𑀧, 𑀯𑀺𑀜𑁆𑀜𑀽 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀸 𑀲𑀫𑀦𑀼𑀕𑀸𑀳𑀦𑁆𑀢𑀸 𑀲𑀫𑀦𑀼𑀪𑀸𑀲𑀦𑁆𑀢𑀸 𑀅𑀫𑁆𑀳𑁂𑀯 𑀢𑀢𑁆𑀣 𑀬𑁂𑀪𑀼𑀬𑁆𑀬𑁂𑀦 𑀧𑀲𑀁𑀲𑁂𑀬𑁆𑀬𑀼𑀁.

𑁩𑁮𑁭. ‘‘𑀅𑀧𑀭𑀫𑁆𑀧𑀺 𑀦𑁄, 𑀓𑀲𑁆𑀲𑀧, 𑀯𑀺𑀜𑁆𑀜𑀽 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀁 𑀲𑀫𑀦𑀼𑀕𑀸𑀳𑀦𑁆𑀢𑀁 𑀲𑀫𑀦𑀼𑀪𑀸𑀲𑀦𑁆𑀢𑀁 𑀲𑀢𑁆𑀣𑀸𑀭𑀸 𑀯𑀸 𑀲𑀢𑁆𑀣𑀸𑀭𑀁 𑀲𑀗𑁆𑀖𑁂𑀦 𑀯𑀸 𑀲𑀗𑁆𑀖𑀁 𑁋 ‘𑀬𑁂 𑀇𑀫𑁂𑀲𑀁 𑀪𑀯𑀢𑀁 𑀥𑀫𑁆𑀫𑀸 𑀓𑀼𑀲𑀮𑀸 𑀓𑀼𑀲𑀮𑀲𑀗𑁆𑀔𑀸𑀢𑀸, 𑀅𑀦𑀯𑀚𑁆𑀚𑀸 𑀅𑀦𑀯𑀚𑁆𑀚𑀲𑀗𑁆𑀔𑀸𑀢𑀸, 𑀲𑁂𑀯𑀺𑀢𑀩𑁆𑀩𑀸 𑀲𑁂𑀯𑀺𑀢𑀩𑁆𑀩𑀲𑀗𑁆𑀔𑀸𑀢𑀸, 𑀅𑀮𑀫𑀭𑀺𑀬𑀸 𑀅𑀮𑀫𑀭𑀺𑀬𑀲𑀗𑁆𑀔𑀸𑀢𑀸, 𑀲𑀼𑀓𑁆𑀓𑀸 𑀲𑀼𑀓𑁆𑀓𑀲𑀗𑁆𑀔𑀸𑀢𑀸. 𑀓𑁄 𑀇𑀫𑁂 𑀥𑀫𑁆𑀫𑁂 𑀅𑀦𑀯𑀲𑁂𑀲𑀁 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺, 𑀲𑀫𑀡𑁄 𑀯𑀸 𑀕𑁄𑀢𑀫𑁄, 𑀧𑀭𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀕𑀡𑀸𑀘𑀭𑀺𑀬𑀸’ 𑀢𑀺?

𑁩𑁮𑁮. ‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀓𑀲𑁆𑀲𑀧, 𑀯𑀺𑀚𑁆𑀚𑀢𑀺, 𑀬𑀁 𑀯𑀺𑀜𑁆𑀜𑀽 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀸 𑀲𑀫𑀦𑀼𑀕𑀸𑀳𑀦𑁆𑀢𑀸 𑀲𑀫𑀦𑀼𑀪𑀸𑀲𑀦𑁆𑀢𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀬𑁂 𑀇𑀫𑁂𑀲𑀁 𑀪𑀯𑀢𑀁 𑀥𑀫𑁆𑀫𑀸 𑀓𑀼𑀲𑀮𑀸 𑀓𑀼𑀲𑀮𑀲𑀗𑁆𑀔𑀸𑀢𑀸, 𑀅𑀦𑀯𑀚𑁆𑀚𑀸 𑀅𑀦𑀯𑀚𑁆𑀚𑀲𑀗𑁆𑀔𑀸𑀢𑀸, 𑀲𑁂𑀯𑀺𑀢𑀩𑁆𑀩𑀸 𑀲𑁂𑀯𑀺𑀢𑀩𑁆𑀩𑀲𑀗𑁆𑀔𑀸𑀢𑀸, 𑀅𑀮𑀫𑀭𑀺𑀬𑀸 𑀅𑀮𑀫𑀭𑀺𑀬𑀲𑀗𑁆𑀔𑀸𑀢𑀸, 𑀲𑀼𑀓𑁆𑀓𑀸 𑀲𑀼𑀓𑁆𑀓𑀲𑀗𑁆𑀔𑀸𑀢𑀸. 𑀲𑀫𑀡𑁄 𑀕𑁄𑀢𑀫𑁄 𑀇𑀫𑁂 𑀥𑀫𑁆𑀫𑁂 𑀅𑀦𑀯𑀲𑁂𑀲𑀁 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺, 𑀬𑀁 𑀯𑀸 𑀧𑀦 𑀪𑁄𑀦𑁆𑀢𑁄 𑀧𑀭𑁂 𑀕𑀡𑀸𑀘𑀭𑀺𑀬𑀸’𑀢𑀺. 𑀇𑀢𑀺𑀳, 𑀓𑀲𑁆𑀲𑀧, 𑀯𑀺𑀜𑁆𑀜𑀽 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀸 𑀲𑀫𑀦𑀼𑀕𑀸𑀳𑀦𑁆𑀢𑀸 𑀲𑀫𑀦𑀼𑀪𑀸𑀲𑀦𑁆𑀢𑀸 𑀅𑀫𑁆𑀳𑁂𑀯 𑀢𑀢𑁆𑀣 𑀬𑁂𑀪𑀼𑀬𑁆𑀬𑁂𑀦 𑀧𑀲𑀁𑀲𑁂𑀬𑁆𑀬𑀼𑀁.

𑁩𑁮𑁯. ‘‘𑀅𑀧𑀭𑀫𑁆𑀧𑀺 𑀦𑁄, 𑀓𑀲𑁆𑀲𑀧, 𑀯𑀺𑀜𑁆𑀜𑀽 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀁 𑀲𑀫𑀦𑀼𑀕𑀸𑀳𑀦𑁆𑀢𑀁 𑀲𑀫𑀦𑀼𑀪𑀸𑀲𑀦𑁆𑀢𑀁 𑀲𑀢𑁆𑀣𑀸𑀭𑀸 𑀯𑀸 𑀲𑀢𑁆𑀣𑀸𑀭𑀁 𑀲𑀗𑁆𑀖𑁂𑀦 𑀯𑀸 𑀲𑀗𑁆𑀖𑀁 𑁋 ‘𑀬𑁂 𑀇𑀫𑁂𑀲𑀁 𑀪𑀯𑀢𑀁 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀅𑀓𑀼𑀲𑀮𑀲𑀗𑁆𑀔𑀸𑀢𑀸, 𑀲𑀸𑀯𑀚𑁆𑀚𑀸 𑀲𑀸𑀯𑀚𑁆𑀚𑀲𑀗𑁆𑀔𑀸𑀢𑀸, 𑀅𑀲𑁂𑀯𑀺𑀢𑀩𑁆𑀩𑀸 𑀅𑀲𑁂𑀯𑀺𑀢𑀩𑁆𑀩𑀲𑀗𑁆𑀔𑀸𑀢𑀸, 𑀦 𑀅𑀮𑀫𑀭𑀺𑀬𑀸 𑀦 𑀅𑀮𑀫𑀭𑀺𑀬𑀲𑀗𑁆𑀔𑀸𑀢𑀸, 𑀓𑀡𑁆𑀳𑀸 𑀓𑀡𑁆𑀳𑀲𑀗𑁆𑀔𑀸𑀢𑀸. 𑀓𑁄 𑀇𑀫𑁂 𑀥𑀫𑁆𑀫𑁂 𑀅𑀦𑀯𑀲𑁂𑀲𑀁 𑀧𑀳𑀸𑀬 𑀯𑀢𑁆𑀢𑀢𑀺, 𑀕𑁄𑀢𑀫𑀲𑀸𑀯𑀓𑀲𑀗𑁆𑀖𑁄 𑀯𑀸, 𑀧𑀭𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀕𑀡𑀸𑀘𑀭𑀺𑀬𑀲𑀸𑀯𑀓𑀲𑀗𑁆𑀖𑀸’𑀢𑀺?

𑁩𑁯𑁦. ‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀓𑀲𑁆𑀲𑀧, 𑀯𑀺𑀚𑁆𑀚𑀢𑀺, 𑀬𑀁 𑀯𑀺𑀜𑁆𑀜𑀽 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀸 𑀲𑀫𑀦𑀼𑀕𑀸𑀳𑀦𑁆𑀢𑀸 𑀲𑀫𑀦𑀼𑀪𑀸𑀲𑀦𑁆𑀢𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀬𑁂 𑀇𑀫𑁂𑀲𑀁 𑀪𑀯𑀢𑀁 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀅𑀓𑀼𑀲𑀮𑀲𑀗𑁆𑀔𑀸𑀢𑀸, 𑀲𑀸𑀯𑀚𑁆𑀚𑀸 𑀲𑀸𑀯𑀚𑁆𑀚𑀲𑀗𑁆𑀔𑀸𑀢𑀸, 𑀅𑀲𑁂𑀯𑀺𑀢𑀩𑁆𑀩𑀸 𑀅𑀲𑁂𑀯𑀺𑀢𑀩𑁆𑀩𑀲𑀗𑁆𑀔𑀸𑀢𑀸, 𑀦 𑀅𑀮𑀫𑀭𑀺𑀬𑀸 𑀦 𑀅𑀮𑀫𑀭𑀺𑀬𑀲𑀗𑁆𑀔𑀸𑀢𑀸, 𑀓𑀡𑁆𑀳𑀸 𑀓𑀡𑁆𑀳𑀲𑀗𑁆𑀔𑀸𑀢𑀸. 𑀕𑁄𑀢𑀫𑀲𑀸𑀯𑀓𑀲𑀗𑁆𑀖𑁄 𑀇𑀫𑁂 𑀥𑀫𑁆𑀫𑁂 𑀅𑀦𑀯𑀲𑁂𑀲𑀁 𑀧𑀳𑀸𑀬 𑀯𑀢𑁆𑀢𑀢𑀺, 𑀬𑀁 𑀯𑀸 𑀧𑀦 𑀪𑁄𑀦𑁆𑀢𑁄 𑀧𑀭𑁂 𑀕𑀡𑀸𑀘𑀭𑀺𑀬𑀲𑀸𑀯𑀓𑀲𑀗𑁆𑀖𑀸’𑀢𑀺. 𑀇𑀢𑀺𑀳, 𑀓𑀲𑁆𑀲𑀧, 𑀯𑀺𑀜𑁆𑀜𑀽 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀸 𑀲𑀫𑀦𑀼𑀕𑀸𑀳𑀦𑁆𑀢𑀸 𑀲𑀫𑀦𑀼𑀪𑀸𑀲𑀦𑁆𑀢𑀸 𑀅𑀫𑁆𑀳𑁂𑀯 𑀢𑀢𑁆𑀣 𑀬𑁂𑀪𑀼𑀬𑁆𑀬𑁂𑀦 𑀧𑀲𑀁𑀲𑁂𑀬𑁆𑀬𑀼𑀁.

𑁩𑁯𑁧. ‘‘𑀅𑀧𑀭𑀫𑁆𑀧𑀺 𑀦𑁄, 𑀓𑀲𑁆𑀲𑀧, 𑀯𑀺𑀜𑁆𑀜𑀽 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀁 𑀲𑀫𑀦𑀼𑀕𑀸𑀳𑀦𑁆𑀢𑀁 𑀲𑀫𑀦𑀼𑀪𑀸𑀲𑀦𑁆𑀢𑀁 𑀲𑀢𑁆𑀣𑀸𑀭𑀸 𑀯𑀸 𑀲𑀢𑁆𑀣𑀸𑀭𑀁 𑀲𑀗𑁆𑀖𑁂𑀦 𑀯𑀸 𑀲𑀗𑁆𑀖𑀁. ‘𑀬𑁂 𑀇𑀫𑁂𑀲𑀁 𑀪𑀯𑀢𑀁 𑀥𑀫𑁆𑀫𑀸 𑀓𑀼𑀲𑀮𑀸 𑀓𑀼𑀲𑀮𑀲𑀗𑁆𑀔𑀸𑀢𑀸, 𑀅𑀦𑀯𑀚𑁆𑀚𑀸 𑀅𑀦𑀯𑀚𑁆𑀚𑀲𑀗𑁆𑀔𑀸𑀢𑀸, 𑀲𑁂𑀯𑀺𑀢𑀩𑁆𑀩𑀸 𑀲𑁂𑀯𑀺𑀢𑀩𑁆𑀩𑀲𑀗𑁆𑀔𑀸𑀢𑀸, 𑀅𑀮𑀫𑀭𑀺𑀬𑀸 𑀅𑀮𑀫𑀭𑀺𑀬𑀲𑀗𑁆𑀔𑀸𑀢𑀸, 𑀲𑀼𑀓𑁆𑀓𑀸 𑀲𑀼𑀓𑁆𑀓𑀲𑀗𑁆𑀔𑀸𑀢𑀸. 𑀓𑁄 𑀇𑀫𑁂 𑀥𑀫𑁆𑀫𑁂 𑀅𑀦𑀯𑀲𑁂𑀲𑀁 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺, 𑀕𑁄𑀢𑀫𑀲𑀸𑀯𑀓𑀲𑀗𑁆𑀖𑁄 𑀯𑀸, 𑀧𑀭𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀕𑀡𑀸𑀘𑀭𑀺𑀬𑀲𑀸𑀯𑀓𑀲𑀗𑁆𑀖𑀸’𑀢𑀺?

𑁩𑁯𑁨. ‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀓𑀲𑁆𑀲𑀧, 𑀯𑀺𑀚𑁆𑀚𑀢𑀺, 𑀬𑀁 𑀯𑀺𑀜𑁆𑀜𑀽 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀸 𑀲𑀫𑀦𑀼𑀕𑀸𑀳𑀦𑁆𑀢𑀸 𑀲𑀫𑀦𑀼𑀪𑀸𑀲𑀦𑁆𑀢𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀬𑁂 𑀇𑀫𑁂𑀲𑀁 𑀪𑀯𑀢𑀁 𑀥𑀫𑁆𑀫𑀸 𑀓𑀼𑀲𑀮𑀸 𑀓𑀼𑀲𑀮𑀲𑀗𑁆𑀔𑀸𑀢𑀸, 𑀅𑀦𑀯𑀚𑁆𑀚𑀸 𑀅𑀦𑀯𑀚𑁆𑀚𑀲𑀗𑁆𑀔𑀸𑀢𑀸, 𑀲𑁂𑀯𑀺𑀢𑀩𑁆𑀩𑀸 𑀲𑁂𑀯𑀺𑀢𑀩𑁆𑀩𑀲𑀗𑁆𑀔𑀸𑀢𑀸, 𑀅𑀮𑀫𑀭𑀺𑀬𑀸 𑀅𑀮𑀫𑀭𑀺𑀬𑀲𑀗𑁆𑀔𑀸𑀢𑀸, 𑀲𑀼𑀓𑁆𑀓𑀸 𑀲𑀼𑀓𑁆𑀓𑀲𑀗𑁆𑀔𑀸𑀢𑀸. 𑀕𑁄𑀢𑀫𑀲𑀸𑀯𑀓𑀲𑀗𑁆𑀖𑁄 𑀇𑀫𑁂 𑀥𑀫𑁆𑀫𑁂 𑀅𑀦𑀯𑀲𑁂𑀲𑀁 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺, 𑀬𑀁 𑀯𑀸 𑀧𑀦 𑀪𑁄𑀦𑁆𑀢𑁄 𑀧𑀭𑁂 𑀕𑀡𑀸𑀘𑀭𑀺𑀬𑀲𑀸𑀯𑀓𑀲𑀗𑁆𑀖𑀸’𑀢𑀺. 𑀇𑀢𑀺𑀳, 𑀓𑀲𑁆𑀲𑀧, 𑀯𑀺𑀜𑁆𑀜𑀽 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀸 𑀲𑀫𑀦𑀼𑀕𑀸𑀳𑀦𑁆𑀢𑀸 𑀲𑀫𑀦𑀼𑀪𑀸𑀲𑀦𑁆𑀢𑀸 𑀅𑀫𑁆𑀳𑁂𑀯 𑀢𑀢𑁆𑀣 𑀬𑁂𑀪𑀼𑀬𑁆𑀬𑁂𑀦 𑀧𑀲𑀁𑀲𑁂𑀬𑁆𑀬𑀼𑀁.

𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄

𑁩𑁯𑁩. ‘‘𑀅𑀢𑁆𑀣𑀺, 𑀓𑀲𑁆𑀲𑀧, 𑀫𑀕𑁆𑀕𑁄 𑀅𑀢𑁆𑀣𑀺 𑀧𑀝𑀺𑀧𑀤𑀸, 𑀬𑀣𑀸𑀧𑀝𑀺𑀧𑀦𑁆𑀦𑁄 𑀲𑀸𑀫𑀁𑀬𑁂𑀯 𑀜𑀲𑁆𑀲𑀢𑀺 𑀲𑀸𑀫𑀁 𑀤𑀓𑁆𑀔𑀢𑀺 [𑀤𑀓𑁆𑀔𑀺𑀢𑀺 (𑀲𑀻.)] 𑁋 ‘𑀲𑀫𑀡𑁄𑀯 𑀕𑁄𑀢𑀫𑁄 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀅𑀢𑁆𑀣𑀯𑀸𑀤𑀻 𑀥𑀫𑁆𑀫𑀯𑀸𑀤𑀻 𑀯𑀺𑀦𑀬𑀯𑀸𑀤𑀻’𑀢𑀺. 𑀓𑀢𑀫𑁄 𑀘, 𑀓𑀲𑁆𑀲𑀧, 𑀫𑀕𑁆𑀕𑁄, 𑀓𑀢𑀫𑀸 𑀘 𑀧𑀝𑀺𑀧𑀤𑀸, 𑀬𑀣𑀸𑀧𑀝𑀺𑀧𑀦𑁆𑀦𑁄 𑀲𑀸𑀫𑀁𑀬𑁂𑀯 𑀜𑀲𑁆𑀲𑀢𑀺 𑀲𑀸𑀫𑀁 𑀤𑀓𑁆𑀔𑀢𑀺 𑁋 ‘𑀲𑀫𑀡𑁄𑀯 𑀕𑁄𑀢𑀫𑁄 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀅𑀢𑁆𑀣𑀯𑀸𑀤𑀻 𑀥𑀫𑁆𑀫𑀯𑀸𑀤𑀻 𑀯𑀺𑀦𑀬𑀯𑀸𑀤𑀻’𑀢𑀺? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺. 𑀅𑀬𑀁 𑀔𑁄, 𑀓𑀲𑁆𑀲𑀧, 𑀫𑀕𑁆𑀕𑁄, 𑀅𑀬𑀁 𑀧𑀝𑀺𑀧𑀤𑀸, 𑀬𑀣𑀸𑀧𑀝𑀺𑀧𑀦𑁆𑀦𑁄 𑀲𑀸𑀫𑀁𑀬𑁂𑀯 𑀜𑀲𑁆𑀲𑀢𑀺 𑀲𑀸𑀫𑀁 𑀤𑀓𑁆𑀔𑀢𑀺 ‘𑀲𑀫𑀡𑁄𑀯 𑀕𑁄𑀢𑀫𑁄 𑀓𑀸𑀮𑀯𑀸𑀤𑀻 𑀪𑀽𑀢𑀯𑀸𑀤𑀻 𑀅𑀢𑁆𑀣𑀯𑀸𑀤𑀻 𑀥𑀫𑁆𑀫𑀯𑀸𑀤𑀻 𑀯𑀺𑀦𑀬𑀯𑀸𑀤𑀻’’’𑀢𑀺.

𑀢𑀧𑁄𑀧𑀓𑁆𑀓𑀫𑀓𑀣𑀸

𑁩𑁯𑁪. 𑀏𑀯𑀁 𑀯𑀼𑀢𑁆𑀢𑁂, 𑀅𑀘𑁂𑀮𑁄 𑀓𑀲𑁆𑀲𑀧𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀫𑁂𑀧𑀺 𑀔𑁄, 𑀆𑀯𑀼𑀲𑁄 𑀕𑁄𑀢𑀫, 𑀢𑀧𑁄𑀧𑀓𑁆𑀓𑀫𑀸 𑀏𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀸𑀫𑀜𑁆𑀜𑀲𑀗𑁆𑀔𑀸𑀢𑀸 𑀘 𑀩𑁆𑀭𑀳𑁆𑀫𑀜𑁆𑀜𑀲𑀗𑁆𑀔𑀸𑀢𑀸 𑀘. 𑀅𑀘𑁂𑀮𑀓𑁄 𑀳𑁄𑀢𑀺, 𑀫𑀼𑀢𑁆𑀢𑀸𑀘𑀸𑀭𑁄, 𑀳𑀢𑁆𑀣𑀸𑀧𑀮𑁂𑀔𑀦𑁄, 𑀦 𑀏𑀳𑀺𑀪𑀤𑁆𑀤𑀦𑁆𑀢𑀺𑀓𑁄, 𑀦 𑀢𑀺𑀝𑁆𑀞𑀪𑀤𑁆𑀤𑀦𑁆𑀢𑀺𑀓𑁄, 𑀦𑀸𑀪𑀺𑀳𑀝𑀁, 𑀦 𑀉𑀤𑁆𑀤𑀺𑀲𑁆𑀲𑀓𑀢𑀁, 𑀦 𑀦𑀺𑀫𑀦𑁆𑀢𑀦𑀁 𑀲𑀸𑀤𑀺𑀬𑀢𑀺. 𑀲𑁄 𑀦 𑀓𑀼𑀫𑁆𑀪𑀺𑀫𑀼𑀔𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀦 𑀓𑀴𑁄𑀧𑀺𑀫𑀼𑀔𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀦 𑀏𑀴𑀓𑀫𑀦𑁆𑀢𑀭𑀁, 𑀦 𑀤𑀡𑁆𑀟𑀫𑀦𑁆𑀢𑀭𑀁, 𑀦 𑀫𑀼𑀲𑀮𑀫𑀦𑁆𑀢𑀭𑀁, 𑀦 𑀤𑁆𑀯𑀺𑀦𑁆𑀦𑀁 𑀪𑀼𑀜𑁆𑀚𑀫𑀸𑀦𑀸𑀦𑀁, 𑀦 𑀕𑀩𑁆𑀪𑀺𑀦𑀺𑀬𑀸, 𑀦 𑀧𑀸𑀬𑀫𑀸𑀦𑀸𑀬, 𑀦 𑀧𑀼𑀭𑀺𑀲𑀦𑁆𑀢𑀭𑀕𑀢𑀸𑀬, 𑀦 𑀲𑀗𑁆𑀓𑀺𑀢𑁆𑀢𑀻𑀲𑀼, 𑀦 𑀬𑀢𑁆𑀣 𑀲𑀸 𑀉𑀧𑀝𑁆𑀞𑀺𑀢𑁄 𑀳𑁄𑀢𑀺, 𑀦 𑀬𑀢𑁆𑀣 𑀫𑀓𑁆𑀔𑀺𑀓𑀸 𑀲𑀡𑁆𑀟𑀲𑀡𑁆𑀟𑀘𑀸𑀭𑀺𑀦𑀻, 𑀦 𑀫𑀘𑁆𑀙𑀁, 𑀦 𑀫𑀁𑀲𑀁, 𑀦 𑀲𑀼𑀭𑀁, 𑀦 𑀫𑁂𑀭𑀬𑀁, 𑀦 𑀣𑀼𑀲𑁄𑀤𑀓𑀁 𑀧𑀺𑀯𑀢𑀺. 𑀲𑁄 𑀏𑀓𑀸𑀕𑀸𑀭𑀺𑀓𑁄 𑀯𑀸 𑀳𑁄𑀢𑀺 𑀏𑀓𑀸𑀮𑁄𑀧𑀺𑀓𑁄, 𑀤𑁆𑀯𑀸𑀕𑀸𑀭𑀺𑀓𑁄 𑀯𑀸 𑀳𑁄𑀢𑀺 𑀤𑁆𑀯𑀸𑀮𑁄𑀧𑀺𑀓𑁄…𑀧𑁂… 𑀲𑀢𑁆𑀢𑀸𑀕𑀸𑀭𑀺𑀓𑁄 𑀯𑀸 𑀳𑁄𑀢𑀺 𑀲𑀢𑁆𑀢𑀸𑀮𑁄𑀧𑀺𑀓𑁄; 𑀏𑀓𑀺𑀲𑁆𑀲𑀸𑀧𑀺 𑀤𑀢𑁆𑀢𑀺𑀬𑀸 𑀬𑀸𑀧𑁂𑀢𑀺, 𑀤𑁆𑀯𑀻𑀳𑀺𑀧𑀺 𑀤𑀢𑁆𑀢𑀻𑀳𑀺 𑀬𑀸𑀧𑁂𑀢𑀺… 𑀲𑀢𑁆𑀢𑀳𑀺𑀧𑀺 𑀤𑀢𑁆𑀢𑀻𑀳𑀺 𑀬𑀸𑀧𑁂𑀢𑀺; 𑀏𑀓𑀸𑀳𑀺𑀓𑀫𑁆𑀧𑀺 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺, 𑀤𑁆𑀯𑀻𑀳𑀺𑀓𑀫𑁆𑀧𑀺 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺… 𑀲𑀢𑁆𑀢𑀸𑀳𑀺𑀓𑀫𑁆𑀧𑀺 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺. 𑀇𑀢𑀺 𑀏𑀯𑀭𑀽𑀧𑀁 𑀅𑀤𑁆𑀥𑀫𑀸𑀲𑀺𑀓𑀫𑁆𑀧𑀺 𑀧𑀭𑀺𑀬𑀸𑀬𑀪𑀢𑁆𑀢𑀪𑁄𑀚𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺.

𑁩𑁯𑁫. ‘‘𑀇𑀫𑁂𑀧𑀺 𑀔𑁄, 𑀆𑀯𑀼𑀲𑁄 𑀕𑁄𑀢𑀫, 𑀢𑀧𑁄𑀧𑀓𑁆𑀓𑀫𑀸 𑀏𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀸𑀫𑀜𑁆𑀜𑀲𑀗𑁆𑀔𑀸𑀢𑀸 𑀘 𑀩𑁆𑀭𑀳𑁆𑀫𑀜𑁆𑀜𑀲𑀗𑁆𑀔𑀸𑀢𑀸 𑀘. 𑀲𑀸𑀓𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀲𑀸𑀫𑀸𑀓𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀦𑀻𑀯𑀸𑀭𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀤𑀤𑁆𑀤𑀼𑀮𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀳𑀝𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀓𑀡𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀆𑀘𑀸𑀫𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀧𑀺𑀜𑁆𑀜𑀸𑀓𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀢𑀺𑀡𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀕𑁄𑀫𑀬𑀪𑀓𑁆𑀔𑁄 𑀯𑀸 𑀳𑁄𑀢𑀺, 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀬𑀸𑀧𑁂𑀢𑀺 𑀧𑀯𑀢𑁆𑀢𑀨𑀮𑀪𑁄𑀚𑀻.

𑁩𑁯𑁬. ‘‘𑀇𑀫𑁂𑀧𑀺 𑀔𑁄, 𑀆𑀯𑀼𑀲𑁄 𑀕𑁄𑀢𑀫, 𑀢𑀧𑁄𑀧𑀓𑁆𑀓𑀫𑀸 𑀏𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀸𑀫𑀜𑁆𑀜𑀲𑀗𑁆𑀔𑀸𑀢𑀸 𑀘 𑀩𑁆𑀭𑀳𑁆𑀫𑀜𑁆𑀜𑀲𑀗𑁆𑀔𑀸𑀢𑀸 𑀘. 𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀫𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀙𑀯𑀤𑀼𑀲𑁆𑀲𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀧𑀁𑀲𑀼𑀓𑀽𑀮𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀢𑀺𑀭𑀻𑀝𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀅𑀚𑀺𑀦𑀫𑁆𑀧𑀺 𑀥𑀸𑀭𑁂𑀢𑀺, 𑀅𑀚𑀺𑀦𑀓𑁆𑀔𑀺𑀧𑀫𑁆𑀧𑀺 𑀥𑀸𑀭𑁂𑀢𑀺, 𑀓𑀼𑀲𑀘𑀻𑀭𑀫𑁆𑀧𑀺 𑀥𑀸𑀭𑁂𑀢𑀺, 𑀯𑀸𑀓𑀘𑀻𑀭𑀫𑁆𑀧𑀺 𑀥𑀸𑀭𑁂𑀢𑀺, 𑀨𑀮𑀓𑀘𑀻𑀭𑀫𑁆𑀧𑀺 𑀥𑀸𑀭𑁂𑀢𑀺, 𑀓𑁂𑀲𑀓𑀫𑁆𑀩𑀮𑀫𑁆𑀧𑀺 𑀥𑀸𑀭𑁂𑀢𑀺, 𑀯𑀸𑀴𑀓𑀫𑁆𑀩𑀮𑀫𑁆𑀧𑀺 𑀥𑀸𑀭𑁂𑀢𑀺, 𑀉𑀮𑀽𑀓𑀧𑀓𑁆𑀔𑀺𑀓𑀫𑁆𑀧𑀺 𑀥𑀸𑀭𑁂𑀢𑀺, 𑀓𑁂𑀲𑀫𑀲𑁆𑀲𑀼𑀮𑁄𑀘𑀓𑁄𑀧𑀺 𑀳𑁄𑀢𑀺 𑀓𑁂𑀲𑀫𑀲𑁆𑀲𑀼𑀮𑁄𑀘𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄, 𑀉𑀩𑁆𑀪𑀝𑁆𑀞𑀓𑁄𑀧𑀺 [𑀉𑀩𑁆𑀪𑀝𑁆𑀞𑀺𑀓𑁄𑀧𑀺 (𑀓.)] 𑀳𑁄𑀢𑀺 𑀆𑀲𑀦𑀧𑀝𑀺𑀓𑁆𑀔𑀺𑀢𑁆𑀢𑁄, 𑀉𑀓𑁆𑀓𑀼𑀝𑀺𑀓𑁄𑀧𑀺 𑀳𑁄𑀢𑀺 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀫𑀦𑀼𑀬𑀼𑀢𑁆𑀢𑁄, 𑀓𑀡𑁆𑀝𑀓𑀸𑀧𑀲𑁆𑀲𑀬𑀺𑀓𑁄𑀧𑀺 𑀳𑁄𑀢𑀺 𑀓𑀡𑁆𑀝𑀓𑀸𑀧𑀲𑁆𑀲𑀬𑁂 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀨𑀮𑀓𑀲𑁂𑀬𑁆𑀬𑀫𑁆𑀧𑀺 𑀓𑀧𑁆𑀧𑁂𑀢𑀺, 𑀣𑀡𑁆𑀟𑀺𑀮𑀲𑁂𑀬𑁆𑀬𑀫𑁆𑀧𑀺 𑀓𑀧𑁆𑀧𑁂𑀢𑀺, 𑀏𑀓𑀧𑀲𑁆𑀲𑀬𑀺𑀓𑁄𑀧𑀺 𑀳𑁄𑀢𑀺 𑀭𑀚𑁄𑀚𑀮𑁆𑀮𑀥𑀭𑁄, 𑀅𑀩𑁆𑀪𑁄𑀓𑀸𑀲𑀺𑀓𑁄𑀧𑀺 𑀳𑁄𑀢𑀺 𑀬𑀣𑀸𑀲𑀦𑁆𑀣𑀢𑀺𑀓𑁄, 𑀯𑁂𑀓𑀝𑀺𑀓𑁄𑀧𑀺 𑀳𑁄𑀢𑀺 𑀯𑀺𑀓𑀝𑀪𑁄𑀚𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄, 𑀅𑀧𑀸𑀦𑀓𑁄𑀧𑀺 𑀳𑁄𑀢𑀺 𑀅𑀧𑀸𑀦𑀓𑀢𑁆𑀢𑀫𑀦𑀼𑀬𑀼𑀢𑁆𑀢𑁄, 𑀲𑀸𑀬𑀢𑀢𑀺𑀬𑀓𑀫𑁆𑀧𑀺 𑀉𑀤𑀓𑁄𑀭𑁄𑀳𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀻’’𑀢𑀺.

𑀢𑀧𑁄𑀧𑀓𑁆𑀓𑀫𑀦𑀺𑀭𑀢𑁆𑀣𑀓𑀣𑀸

𑁩𑁯𑁭. ‘‘𑀅𑀘𑁂𑀮𑀓𑁄 𑀘𑁂𑀧𑀺, 𑀓𑀲𑁆𑀲𑀧, 𑀳𑁄𑀢𑀺, 𑀫𑀼𑀢𑁆𑀢𑀸𑀘𑀸𑀭𑁄, 𑀳𑀢𑁆𑀣𑀸𑀧𑀮𑁂𑀔𑀦𑁄…𑀧𑁂… 𑀇𑀢𑀺 𑀏𑀯𑀭𑀽𑀧𑀁 𑀅𑀤𑁆𑀥𑀫𑀸𑀲𑀺𑀓𑀫𑁆𑀧𑀺 𑀧𑀭𑀺𑀬𑀸𑀬𑀪𑀢𑁆𑀢𑀪𑁄𑀚𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀢𑀲𑁆𑀲 𑀘𑀸𑀬𑀁 𑀲𑀻𑀮𑀲𑀫𑁆𑀧𑀤𑀸 𑀘𑀺𑀢𑁆𑀢𑀲𑀫𑁆𑀧𑀤𑀸 𑀧𑀜𑁆𑀜𑀸𑀲𑀫𑁆𑀧𑀤𑀸 𑀅𑀪𑀸𑀯𑀺𑀢𑀸 𑀳𑁄𑀢𑀺 𑀅𑀲𑀘𑁆𑀙𑀺𑀓𑀢𑀸. 𑀅𑀣 𑀔𑁄 𑀲𑁄 𑀆𑀭𑀓𑀸𑀯 𑀲𑀸𑀫𑀜𑁆𑀜𑀸 𑀆𑀭𑀓𑀸𑀯 𑀩𑁆𑀭𑀳𑁆𑀫𑀜𑁆𑀜𑀸. 𑀬𑀢𑁄 𑀔𑁄, 𑀓𑀲𑁆𑀲𑀧, 𑀪𑀺𑀓𑁆𑀔𑀼 𑀅𑀯𑁂𑀭𑀁 𑀅𑀩𑁆𑀬𑀸𑀧𑀚𑁆𑀚𑀁 𑀫𑁂𑀢𑁆𑀢𑀘𑀺𑀢𑁆𑀢𑀁 𑀪𑀸𑀯𑁂𑀢𑀺, 𑀆𑀲𑀯𑀸𑀦𑀜𑁆𑀘 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀓𑀲𑁆𑀲𑀧, 𑀪𑀺𑀓𑁆𑀔𑀼 𑀲𑀫𑀡𑁄 𑀇𑀢𑀺𑀧𑀺 𑀩𑁆𑀭𑀸𑀳𑁆𑀫𑀡𑁄 𑀇𑀢𑀺𑀧𑀺.

‘‘𑀲𑀸𑀓𑀪𑀓𑁆𑀔𑁄 𑀘𑁂𑀧𑀺, 𑀓𑀲𑁆𑀲𑀧, 𑀳𑁄𑀢𑀺, 𑀲𑀸𑀫𑀸𑀓𑀪𑀓𑁆𑀔𑁄…𑀧𑁂… 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀬𑀸𑀧𑁂𑀢𑀺 𑀧𑀯𑀢𑁆𑀢𑀨𑀮𑀪𑁄𑀚𑀻. 𑀢𑀲𑁆𑀲 𑀘𑀸𑀬𑀁 𑀲𑀻𑀮𑀲𑀫𑁆𑀧𑀤𑀸 𑀘𑀺𑀢𑁆𑀢𑀲𑀫𑁆𑀧𑀤𑀸 𑀧𑀜𑁆𑀜𑀸𑀲𑀫𑁆𑀧𑀤𑀸 𑀅𑀪𑀸𑀯𑀺𑀢𑀸 𑀳𑁄𑀢𑀺 𑀅𑀲𑀘𑁆𑀙𑀺𑀓𑀢𑀸. 𑀅𑀣 𑀔𑁄 𑀲𑁄 𑀆𑀭𑀓𑀸𑀯 𑀲𑀸𑀫𑀜𑁆𑀜𑀸 𑀆𑀭𑀓𑀸𑀯 𑀩𑁆𑀭𑀳𑁆𑀫𑀜𑁆𑀜𑀸. 𑀬𑀢𑁄 𑀔𑁄, 𑀓𑀲𑁆𑀲𑀧, 𑀪𑀺𑀓𑁆𑀔𑀼 𑀅𑀯𑁂𑀭𑀁 𑀅𑀩𑁆𑀬𑀸𑀧𑀚𑁆𑀚𑀁 𑀫𑁂𑀢𑁆𑀢𑀘𑀺𑀢𑁆𑀢𑀁 𑀪𑀸𑀯𑁂𑀢𑀺, 𑀆𑀲𑀯𑀸𑀦𑀜𑁆𑀘 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀓𑀲𑁆𑀲𑀧, 𑀪𑀺𑀓𑁆𑀔𑀼 𑀲𑀫𑀡𑁄 𑀇𑀢𑀺𑀧𑀺 𑀩𑁆𑀭𑀸𑀳𑁆𑀫𑀡𑁄 𑀇𑀢𑀺𑀧𑀺.

‘‘𑀲𑀸𑀡𑀸𑀦𑀺 𑀘𑁂𑀧𑀺, 𑀓𑀲𑁆𑀲𑀧, 𑀥𑀸𑀭𑁂𑀢𑀺, 𑀫𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀢𑀺…𑀧𑁂… 𑀲𑀸𑀬𑀢𑀢𑀺𑀬𑀓𑀫𑁆𑀧𑀺 𑀉𑀤𑀓𑁄𑀭𑁄𑀳𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀢𑀲𑁆𑀲 𑀘𑀸𑀬𑀁 𑀲𑀻𑀮𑀲𑀫𑁆𑀧𑀤𑀸 𑀘𑀺𑀢𑁆𑀢𑀲𑀫𑁆𑀧𑀤𑀸 𑀧𑀜𑁆𑀜𑀸𑀲𑀫𑁆𑀧𑀤𑀸 𑀅𑀪𑀸𑀯𑀺𑀢𑀸 𑀳𑁄𑀢𑀺 𑀅𑀲𑀘𑁆𑀙𑀺𑀓𑀢𑀸. 𑀅𑀣 𑀔𑁄 𑀲𑁄 𑀆𑀭𑀓𑀸𑀯 𑀲𑀸𑀫𑀜𑁆𑀜𑀸 𑀆𑀭𑀓𑀸𑀯 𑀩𑁆𑀭𑀳𑁆𑀫𑀜𑁆𑀜𑀸. 𑀬𑀢𑁄 𑀔𑁄, 𑀓𑀲𑁆𑀲𑀧, 𑀪𑀺𑀓𑁆𑀔𑀼 𑀅𑀯𑁂𑀭𑀁 𑀅𑀩𑁆𑀬𑀸𑀧𑀚𑁆𑀚𑀁 𑀫𑁂𑀢𑁆𑀢𑀘𑀺𑀢𑁆𑀢𑀁 𑀪𑀸𑀯𑁂𑀢𑀺, 𑀆𑀲𑀯𑀸𑀦𑀜𑁆𑀘 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀓𑀲𑁆𑀲𑀧, 𑀪𑀺𑀓𑁆𑀔𑀼 𑀲𑀫𑀡𑁄 𑀇𑀢𑀺𑀧𑀺 𑀩𑁆𑀭𑀸𑀳𑁆𑀫𑀡𑁄 𑀇𑀢𑀺𑀧𑀻’’𑀢𑀺.

𑁩𑁯𑁮. 𑀏𑀯𑀁 𑀯𑀼𑀢𑁆𑀢𑁂, 𑀅𑀘𑁂𑀮𑁄 𑀓𑀲𑁆𑀲𑀧𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀤𑀼𑀓𑁆𑀓𑀭𑀁, 𑀪𑁄 𑀕𑁄𑀢𑀫, 𑀲𑀸𑀫𑀜𑁆𑀜𑀁 𑀤𑀼𑀓𑁆𑀓𑀭𑀁 𑀩𑁆𑀭𑀳𑁆𑀫𑀜𑁆𑀜’’𑀦𑁆𑀢𑀺. ‘‘𑀧𑀓𑀢𑀺 𑀔𑁄 𑀏𑀲𑀸, 𑀓𑀲𑁆𑀲𑀧, 𑀮𑁄𑀓𑀲𑁆𑀫𑀺𑀁 ‘𑀤𑀼𑀓𑁆𑀓𑀭𑀁 𑀲𑀸𑀫𑀜𑁆𑀜𑀁 𑀤𑀼𑀓𑁆𑀓𑀭𑀁 𑀩𑁆𑀭𑀳𑁆𑀫𑀜𑁆𑀜’𑀦𑁆𑀢𑀺. 𑀅𑀘𑁂𑀮𑀓𑁄 𑀘𑁂𑀧𑀺, 𑀓𑀲𑁆𑀲𑀧, 𑀳𑁄𑀢𑀺, 𑀫𑀼𑀢𑁆𑀢𑀸𑀘𑀸𑀭𑁄, 𑀳𑀢𑁆𑀣𑀸𑀧𑀮𑁂𑀔𑀦𑁄…𑀧𑁂… 𑀇𑀢𑀺 𑀏𑀯𑀭𑀽𑀧𑀁 𑀅𑀤𑁆𑀥𑀫𑀸𑀲𑀺𑀓𑀫𑁆𑀧𑀺 𑀧𑀭𑀺𑀬𑀸𑀬𑀪𑀢𑁆𑀢𑀪𑁄𑀚𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀇𑀫𑀸𑀬 𑀘, 𑀓𑀲𑁆𑀲𑀧, 𑀫𑀢𑁆𑀢𑀸𑀬 𑀇𑀫𑀺𑀦𑀸 𑀢𑀧𑁄𑀧𑀓𑁆𑀓𑀫𑁂𑀦 𑀲𑀸𑀫𑀜𑁆𑀜𑀁 𑀯𑀸 𑀅𑀪𑀯𑀺𑀲𑁆𑀲 𑀩𑁆𑀭𑀳𑁆𑀫𑀜𑁆𑀜𑀁 𑀯𑀸 𑀤𑀼𑀓𑁆𑀓𑀭𑀁 𑀲𑀼𑀤𑀼𑀓𑁆𑀓𑀭𑀁, 𑀦𑁂𑀢𑀁 𑀅𑀪𑀯𑀺𑀲𑁆𑀲 𑀓𑀮𑁆𑀮𑀁 𑀯𑀘𑀦𑀸𑀬 𑁋 ‘𑀤𑀼𑀓𑁆𑀓𑀭𑀁 𑀲𑀸𑀫𑀜𑁆𑀜𑀁 𑀤𑀼𑀓𑁆𑀓𑀭𑀁 𑀩𑁆𑀭𑀳𑁆𑀫𑀜𑁆𑀜’𑀦𑁆𑀢𑀺.

‘‘𑀲𑀓𑁆𑀓𑀸 𑀘 𑀧𑀦𑁂𑀢𑀁 𑀅𑀪𑀯𑀺𑀲𑁆𑀲 𑀓𑀸𑀢𑀼𑀁 𑀕𑀳𑀧𑀢𑀺𑀦𑀸 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁂𑀦 𑀯𑀸 𑀅𑀦𑁆𑀢𑀫𑀲𑁄 𑀓𑀼𑀫𑁆𑀪𑀤𑀸𑀲𑀺𑀬𑀸𑀧𑀺 𑁋 ‘𑀳𑀦𑁆𑀤𑀸𑀳𑀁 𑀅𑀘𑁂𑀮𑀓𑁄 𑀳𑁄𑀫𑀺, 𑀫𑀼𑀢𑁆𑀢𑀸𑀘𑀸𑀭𑁄, 𑀳𑀢𑁆𑀣𑀸𑀧𑀮𑁂𑀔𑀦𑁄…𑀧𑁂… 𑀇𑀢𑀺 𑀏𑀯𑀭𑀽𑀧𑀁 𑀅𑀤𑁆𑀥𑀫𑀸𑀲𑀺𑀓𑀫𑁆𑀧𑀺 𑀧𑀭𑀺𑀬𑀸𑀬𑀪𑀢𑁆𑀢𑀪𑁄𑀚𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀸𑀫𑀻’𑀢𑀺.

‘‘𑀬𑀲𑁆𑀫𑀸 𑀘 𑀔𑁄, 𑀓𑀲𑁆𑀲𑀧, 𑀅𑀜𑁆𑀜𑀢𑁆𑀭𑁂𑀯 𑀇𑀫𑀸𑀬 𑀫𑀢𑁆𑀢𑀸𑀬 𑀅𑀜𑁆𑀜𑀢𑁆𑀭 𑀇𑀫𑀺𑀦𑀸 𑀢𑀧𑁄𑀧𑀓𑁆𑀓𑀫𑁂𑀦 𑀲𑀸𑀫𑀜𑁆𑀜𑀁 𑀯𑀸 𑀳𑁄𑀢𑀺 𑀩𑁆𑀭𑀳𑁆𑀫𑀜𑁆𑀜𑀁 𑀯𑀸 𑀤𑀼𑀓𑁆𑀓𑀭𑀁 𑀲𑀼𑀤𑀼𑀓𑁆𑀓𑀭𑀁, 𑀢𑀲𑁆𑀫𑀸 𑀏𑀢𑀁 𑀓𑀮𑁆𑀮𑀁 𑀯𑀘𑀦𑀸𑀬 𑁋 ‘𑀤𑀼𑀓𑁆𑀓𑀭𑀁 𑀲𑀸𑀫𑀜𑁆𑀜𑀁 𑀤𑀼𑀓𑁆𑀓𑀭𑀁 𑀩𑁆𑀭𑀳𑁆𑀫𑀜𑁆𑀜’𑀦𑁆𑀢𑀺. 𑀬𑀢𑁄 𑀔𑁄, 𑀓𑀲𑁆𑀲𑀧, 𑀪𑀺𑀓𑁆𑀔𑀼 𑀅𑀯𑁂𑀭𑀁 𑀅𑀩𑁆𑀬𑀸𑀧𑀚𑁆𑀚𑀁 𑀫𑁂𑀢𑁆𑀢𑀘𑀺𑀢𑁆𑀢𑀁 𑀪𑀸𑀯𑁂𑀢𑀺, 𑀆𑀲𑀯𑀸𑀦𑀜𑁆𑀘 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀓𑀲𑁆𑀲𑀧, 𑀪𑀺𑀓𑁆𑀔𑀼 𑀲𑀫𑀡𑁄 𑀇𑀢𑀺𑀧𑀺 𑀩𑁆𑀭𑀸𑀳𑁆𑀫𑀡𑁄 𑀇𑀢𑀺𑀧𑀺.

‘‘𑀲𑀸𑀓𑀪𑀓𑁆𑀔𑁄 𑀘𑁂𑀧𑀺, 𑀓𑀲𑁆𑀲𑀧, 𑀳𑁄𑀢𑀺, 𑀲𑀸𑀫𑀸𑀓𑀪𑀓𑁆𑀔𑁄…𑀧𑁂… 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀬𑀸𑀧𑁂𑀢𑀺 𑀧𑀯𑀢𑁆𑀢𑀨𑀮𑀪𑁄𑀚𑀻. 𑀇𑀫𑀸𑀬 𑀘, 𑀓𑀲𑁆𑀲𑀧, 𑀫𑀢𑁆𑀢𑀸𑀬 𑀇𑀫𑀺𑀦𑀸 𑀢𑀧𑁄𑀧𑀓𑁆𑀓𑀫𑁂𑀦 𑀲𑀸𑀫𑀜𑁆𑀜𑀁 𑀯𑀸 𑀅𑀪𑀯𑀺𑀲𑁆𑀲 𑀩𑁆𑀭𑀳𑁆𑀫𑀜𑁆𑀜𑀁 𑀯𑀸 𑀤𑀼𑀓𑁆𑀓𑀭𑀁 𑀲𑀼𑀤𑀼𑀓𑁆𑀓𑀭𑀁, 𑀦𑁂𑀢𑀁 𑀅𑀪𑀯𑀺𑀲𑁆𑀲 𑀓𑀮𑁆𑀮𑀁 𑀯𑀘𑀦𑀸𑀬 𑁋 ‘𑀤𑀼𑀓𑁆𑀓𑀭𑀁 𑀲𑀸𑀫𑀜𑁆𑀜𑀁 𑀤𑀼𑀓𑁆𑀓𑀭𑀁 𑀩𑁆𑀭𑀳𑁆𑀫𑀜𑁆𑀜’𑀦𑁆𑀢𑀺.

‘‘𑀲𑀓𑁆𑀓𑀸 𑀘 𑀧𑀦𑁂𑀢𑀁 𑀅𑀪𑀯𑀺𑀲𑁆𑀲 𑀓𑀸𑀢𑀼𑀁 𑀕𑀳𑀧𑀢𑀺𑀦𑀸 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁂𑀦 𑀯𑀸 𑀅𑀦𑁆𑀢𑀫𑀲𑁄 𑀓𑀼𑀫𑁆𑀪𑀤𑀸𑀲𑀺𑀬𑀸𑀧𑀺 𑁋 ‘𑀳𑀦𑁆𑀤𑀸𑀳𑀁 𑀲𑀸𑀓𑀪𑀓𑁆𑀔𑁄 𑀯𑀸 𑀳𑁄𑀫𑀺, 𑀲𑀸𑀫𑀸𑀓𑀪𑀓𑁆𑀔𑁄 𑀯𑀸…𑀧𑁂… 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀬𑀸𑀧𑁂𑀫𑀺 𑀧𑀯𑀢𑁆𑀢𑀨𑀮𑀪𑁄𑀚𑀻’𑀢𑀺.

‘‘𑀬𑀲𑁆𑀫𑀸 𑀘 𑀔𑁄, 𑀓𑀲𑁆𑀲𑀧, 𑀅𑀜𑁆𑀜𑀢𑁆𑀭𑁂𑀯 𑀇𑀫𑀸𑀬 𑀫𑀢𑁆𑀢𑀸𑀬 𑀅𑀜𑁆𑀜𑀢𑁆𑀭 𑀇𑀫𑀺𑀦𑀸 𑀢𑀧𑁄𑀧𑀓𑁆𑀓𑀫𑁂𑀦 𑀲𑀸𑀫𑀜𑁆𑀜𑀁 𑀯𑀸 𑀳𑁄𑀢𑀺 𑀩𑁆𑀭𑀳𑁆𑀫𑀜𑁆𑀜𑀁 𑀯𑀸 𑀤𑀼𑀓𑁆𑀓𑀭𑀁 𑀲𑀼𑀤𑀼𑀓𑁆𑀓𑀭𑀁, 𑀢𑀲𑁆𑀫𑀸 𑀏𑀢𑀁 𑀓𑀮𑁆𑀮𑀁 𑀯𑀘𑀦𑀸𑀬 𑁋 ‘𑀤𑀼𑀓𑁆𑀓𑀭𑀁 𑀲𑀸𑀫𑀜𑁆𑀜𑀁 𑀤𑀼𑀓𑁆𑀓𑀭𑀁 𑀩𑁆𑀭𑀳𑁆𑀫𑀜𑁆𑀜’𑀦𑁆𑀢𑀺. 𑀬𑀢𑁄 𑀔𑁄, 𑀓𑀲𑁆𑀲𑀧, 𑀪𑀺𑀓𑁆𑀔𑀼 𑀅𑀯𑁂𑀭𑀁 𑀅𑀩𑁆𑀬𑀸𑀧𑀚𑁆𑀚𑀁 𑀫𑁂𑀢𑁆𑀢𑀘𑀺𑀢𑁆𑀢𑀁 𑀪𑀸𑀯𑁂𑀢𑀺, 𑀆𑀲𑀯𑀸𑀦𑀜𑁆𑀘 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀓𑀲𑁆𑀲𑀧, 𑀪𑀺𑀓𑁆𑀔𑀼 𑀲𑀫𑀡𑁄 𑀇𑀢𑀺𑀧𑀺 𑀩𑁆𑀭𑀸𑀳𑁆𑀫𑀡𑁄 𑀇𑀢𑀺𑀧𑀺.

‘‘𑀲𑀸𑀡𑀸𑀦𑀺 𑀘𑁂𑀧𑀺, 𑀓𑀲𑁆𑀲𑀧, 𑀥𑀸𑀭𑁂𑀢𑀺, 𑀫𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀢𑀺…𑀧𑁂… 𑀲𑀸𑀬𑀢𑀢𑀺𑀬𑀓𑀫𑁆𑀧𑀺 𑀉𑀤𑀓𑁄𑀭𑁄𑀳𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀇𑀫𑀸𑀬 𑀘, 𑀓𑀲𑁆𑀲𑀧, 𑀫𑀢𑁆𑀢𑀸𑀬 𑀇𑀫𑀺𑀦𑀸 𑀢𑀧𑁄𑀧𑀓𑁆𑀓𑀫𑁂𑀦 𑀲𑀸𑀫𑀜𑁆𑀜𑀁 𑀯𑀸 𑀅𑀪𑀯𑀺𑀲𑁆𑀲 𑀩𑁆𑀭𑀳𑁆𑀫𑀜𑁆𑀜𑀁 𑀯𑀸 𑀤𑀼𑀓𑁆𑀓𑀭𑀁 𑀲𑀼𑀤𑀼𑀓𑁆𑀓𑀭𑀁, 𑀦𑁂𑀢𑀁 𑀅𑀪𑀯𑀺𑀲𑁆𑀲 𑀓𑀮𑁆𑀮𑀁 𑀯𑀘𑀦𑀸𑀬 𑁋 ‘𑀤𑀼𑀓𑁆𑀓𑀭𑀁 𑀲𑀸𑀫𑀜𑁆𑀜𑀁 𑀤𑀼𑀓𑁆𑀓𑀭𑀁 𑀩𑁆𑀭𑀳𑁆𑀫𑀜𑁆𑀜’𑀦𑁆𑀢𑀺.

‘‘𑀲𑀓𑁆𑀓𑀸 𑀘 𑀧𑀦𑁂𑀢𑀁 𑀅𑀪𑀯𑀺𑀲𑁆𑀲 𑀓𑀸𑀢𑀼𑀁 𑀕𑀳𑀧𑀢𑀺𑀦𑀸 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁂𑀦 𑀯𑀸 𑀅𑀦𑁆𑀢𑀫𑀲𑁄 𑀓𑀼𑀫𑁆𑀪𑀤𑀸𑀲𑀺𑀬𑀸𑀧𑀺 𑁋 ‘𑀳𑀦𑁆𑀤𑀸𑀳𑀁 𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀫𑀺, 𑀫𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀫𑀺…𑀧𑁂… 𑀲𑀸𑀬𑀢𑀢𑀺𑀬𑀓𑀫𑁆𑀧𑀺 𑀉𑀤𑀓𑁄𑀭𑁄𑀳𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀸𑀫𑀻’𑀢𑀺.

‘‘𑀬𑀲𑁆𑀫𑀸 𑀘 𑀔𑁄, 𑀓𑀲𑁆𑀲𑀧, 𑀅𑀜𑁆𑀜𑀢𑁆𑀭𑁂𑀯 𑀇𑀫𑀸𑀬 𑀫𑀢𑁆𑀢𑀸𑀬 𑀅𑀜𑁆𑀜𑀢𑁆𑀭 𑀇𑀫𑀺𑀦𑀸 𑀢𑀧𑁄𑀧𑀓𑁆𑀓𑀫𑁂𑀦 𑀲𑀸𑀫𑀜𑁆𑀜𑀁 𑀯𑀸 𑀳𑁄𑀢𑀺 𑀩𑁆𑀭𑀳𑁆𑀫𑀜𑁆𑀜𑀁 𑀯𑀸 𑀤𑀼𑀓𑁆𑀓𑀭𑀁 𑀲𑀼𑀤𑀼𑀓𑁆𑀓𑀭𑀁, 𑀢𑀲𑁆𑀫𑀸 𑀏𑀢𑀁 𑀓𑀮𑁆𑀮𑀁 𑀯𑀘𑀦𑀸𑀬 𑁋 ‘𑀤𑀼𑀓𑁆𑀓𑀭𑀁 𑀲𑀸𑀫𑀜𑁆𑀜𑀁 𑀤𑀼𑀓𑁆𑀓𑀭𑀁 𑀩𑁆𑀭𑀳𑁆𑀫𑀜𑁆𑀜’𑀦𑁆𑀢𑀺. 𑀬𑀢𑁄 𑀔𑁄, 𑀓𑀲𑁆𑀲𑀧, 𑀪𑀺𑀓𑁆𑀔𑀼 𑀅𑀯𑁂𑀭𑀁 𑀅𑀩𑁆𑀬𑀸𑀧𑀚𑁆𑀚𑀁 𑀫𑁂𑀢𑁆𑀢𑀘𑀺𑀢𑁆𑀢𑀁 𑀪𑀸𑀯𑁂𑀢𑀺, 𑀆𑀲𑀯𑀸𑀦𑀜𑁆𑀘 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀓𑀲𑁆𑀲𑀧, 𑀪𑀺𑀓𑁆𑀔𑀼 𑀲𑀫𑀡𑁄 𑀇𑀢𑀺𑀧𑀺 𑀩𑁆𑀭𑀸𑀳𑁆𑀫𑀡𑁄 𑀇𑀢𑀺𑀧𑀻’’𑀢𑀺.

𑁩𑁯𑁯. 𑀏𑀯𑀁 𑀯𑀼𑀢𑁆𑀢𑁂, 𑀅𑀘𑁂𑀮𑁄 𑀓𑀲𑁆𑀲𑀧𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀤𑀼𑀚𑁆𑀚𑀸𑀦𑁄, 𑀪𑁄 𑀕𑁄𑀢𑀫, 𑀲𑀫𑀡𑁄, 𑀤𑀼𑀚𑁆𑀚𑀸𑀦𑁄 𑀩𑁆𑀭𑀸𑀳𑁆𑀫𑀡𑁄’’𑀢𑀺. ‘‘𑀧𑀓𑀢𑀺 𑀔𑁄 𑀏𑀲𑀸, 𑀓𑀲𑁆𑀲𑀧, 𑀮𑁄𑀓𑀲𑁆𑀫𑀺𑀁 ‘𑀤𑀼𑀚𑁆𑀚𑀸𑀦𑁄 𑀲𑀫𑀡𑁄 𑀤𑀼𑀚𑁆𑀚𑀸𑀦𑁄 𑀩𑁆𑀭𑀸𑀳𑁆𑀫𑀡𑁄’𑀢𑀺. 𑀅𑀘𑁂𑀮𑀓𑁄 𑀘𑁂𑀧𑀺, 𑀓𑀲𑁆𑀲𑀧, 𑀳𑁄𑀢𑀺, 𑀫𑀼𑀢𑁆𑀢𑀸𑀘𑀸𑀭𑁄, 𑀳𑀢𑁆𑀣𑀸𑀧𑀮𑁂𑀔𑀦𑁄…𑀧𑁂… 𑀇𑀢𑀺 𑀏𑀯𑀭𑀽𑀧𑀁 𑀅𑀤𑁆𑀥𑀫𑀸𑀲𑀺𑀓𑀫𑁆𑀧𑀺 𑀧𑀭𑀺𑀬𑀸𑀬𑀪𑀢𑁆𑀢𑀪𑁄𑀚𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀇𑀫𑀸𑀬 𑀘, 𑀓𑀲𑁆𑀲𑀧, 𑀫𑀢𑁆𑀢𑀸𑀬 𑀇𑀫𑀺𑀦𑀸 𑀢𑀧𑁄𑀧𑀓𑁆𑀓𑀫𑁂𑀦 𑀲𑀫𑀡𑁄 𑀯𑀸 𑀅𑀪𑀯𑀺𑀲𑁆𑀲 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑀼𑀚𑁆𑀚𑀸𑀦𑁄 𑀲𑀼𑀤𑀼𑀚𑁆𑀚𑀸𑀦𑁄, 𑀦𑁂𑀢𑀁 𑀅𑀪𑀯𑀺𑀲𑁆𑀲 𑀓𑀮𑁆𑀮𑀁 𑀯𑀘𑀦𑀸𑀬 𑁋 ‘𑀤𑀼𑀚𑁆𑀚𑀸𑀦𑁄 𑀲𑀫𑀡𑁄 𑀤𑀼𑀚𑁆𑀚𑀸𑀦𑁄 𑀩𑁆𑀭𑀸𑀳𑁆𑀫𑀡𑁄’𑀢𑀺.

‘‘𑀲𑀓𑁆𑀓𑀸 𑀘 𑀧𑀦𑁂𑀲𑁄 𑀅𑀪𑀯𑀺𑀲𑁆𑀲 𑀜𑀸𑀢𑀼𑀁 𑀕𑀳𑀧𑀢𑀺𑀦𑀸 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁂𑀦 𑀯𑀸 𑀅𑀦𑁆𑀢𑀫𑀲𑁄 𑀓𑀼𑀫𑁆𑀪𑀤𑀸𑀲𑀺𑀬𑀸𑀧𑀺 𑁋 ‘𑀅𑀬𑀁 𑀅𑀘𑁂𑀮𑀓𑁄 𑀳𑁄𑀢𑀺, 𑀫𑀼𑀢𑁆𑀢𑀸𑀘𑀸𑀭𑁄, 𑀳𑀢𑁆𑀣𑀸𑀧𑀮𑁂𑀔𑀦𑁄…𑀧𑁂… 𑀇𑀢𑀺 𑀏𑀯𑀭𑀽𑀧𑀁 𑀅𑀤𑁆𑀥𑀫𑀸𑀲𑀺𑀓𑀫𑁆𑀧𑀺 𑀧𑀭𑀺𑀬𑀸𑀬𑀪𑀢𑁆𑀢𑀪𑁄𑀚𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀻’𑀢𑀺.

‘‘𑀬𑀲𑁆𑀫𑀸 𑀘 𑀔𑁄, 𑀓𑀲𑁆𑀲𑀧, 𑀅𑀜𑁆𑀜𑀢𑁆𑀭𑁂𑀯 𑀇𑀫𑀸𑀬 𑀫𑀢𑁆𑀢𑀸𑀬 𑀅𑀜𑁆𑀜𑀢𑁆𑀭 𑀇𑀫𑀺𑀦𑀸 𑀢𑀧𑁄𑀧𑀓𑁆𑀓𑀫𑁂𑀦 𑀲𑀫𑀡𑁄 𑀯𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑀼𑀚𑁆𑀚𑀸𑀦𑁄 𑀲𑀼𑀤𑀼𑀚𑁆𑀚𑀸𑀦𑁄, 𑀢𑀲𑁆𑀫𑀸 𑀏𑀢𑀁 𑀓𑀮𑁆𑀮𑀁 𑀯𑀘𑀦𑀸𑀬 𑁋 ‘𑀤𑀼𑀚𑁆𑀚𑀸𑀦𑁄 𑀲𑀫𑀡𑁄 𑀤𑀼𑀚𑁆𑀚𑀸𑀦𑁄 𑀩𑁆𑀭𑀸𑀳𑁆𑀫𑀡𑁄’𑀢𑀺. 𑀬𑀢𑁄 𑀔𑁄 [𑀬𑀢𑁄 𑀘 𑀔𑁄 (𑀓.)], 𑀓𑀲𑁆𑀲𑀧, 𑀪𑀺𑀓𑁆𑀔𑀼 𑀅𑀯𑁂𑀭𑀁 𑀅𑀩𑁆𑀬𑀸𑀧𑀚𑁆𑀚𑀁 𑀫𑁂𑀢𑁆𑀢𑀘𑀺𑀢𑁆𑀢𑀁 𑀪𑀸𑀯𑁂𑀢𑀺, 𑀆𑀲𑀯𑀸𑀦𑀜𑁆𑀘 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀓𑀲𑁆𑀲𑀧, 𑀪𑀺𑀓𑁆𑀔𑀼 𑀲𑀫𑀡𑁄 𑀇𑀢𑀺𑀧𑀺 𑀩𑁆𑀭𑀸𑀳𑁆𑀫𑀡𑁄 𑀇𑀢𑀺𑀧𑀺.

‘‘𑀲𑀸𑀓𑀪𑀓𑁆𑀔𑁄 𑀘𑁂𑀧𑀺, 𑀓𑀲𑁆𑀲𑀧, 𑀳𑁄𑀢𑀺 𑀲𑀸𑀫𑀸𑀓𑀪𑀓𑁆𑀔𑁄…𑀧𑁂… 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀬𑀸𑀧𑁂𑀢𑀺 𑀧𑀯𑀢𑁆𑀢𑀨𑀮𑀪𑁄𑀚𑀻. 𑀇𑀫𑀸𑀬 𑀘, 𑀓𑀲𑁆𑀲𑀧, 𑀫𑀢𑁆𑀢𑀸𑀬 𑀇𑀫𑀺𑀦𑀸 𑀢𑀧𑁄𑀧𑀓𑁆𑀓𑀫𑁂𑀦 𑀲𑀫𑀡𑁄 𑀯𑀸 𑀅𑀪𑀯𑀺𑀲𑁆𑀲 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑀼𑀚𑁆𑀚𑀸𑀦𑁄 𑀲𑀼𑀤𑀼𑀚𑁆𑀚𑀸𑀦𑁄, 𑀦𑁂𑀢𑀁 𑀅𑀪𑀯𑀺𑀲𑁆𑀲 𑀓𑀮𑁆𑀮𑀁 𑀯𑀘𑀦𑀸𑀬 𑁋 ‘𑀤𑀼𑀚𑁆𑀚𑀸𑀦𑁄 𑀲𑀫𑀡𑁄 𑀤𑀼𑀚𑁆𑀚𑀸𑀦𑁄 𑀩𑁆𑀭𑀸𑀳𑁆𑀫𑀡𑁄’𑀢𑀺.

‘‘𑀲𑀓𑁆𑀓𑀸 𑀘 𑀧𑀦𑁂𑀲𑁄 𑀅𑀪𑀯𑀺𑀲𑁆𑀲 𑀜𑀸𑀢𑀼𑀁 𑀕𑀳𑀧𑀢𑀺𑀦𑀸 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁂𑀦 𑀯𑀸 𑀅𑀦𑁆𑀢𑀫𑀲𑁄 𑀓𑀼𑀫𑁆𑀪𑀤𑀸𑀲𑀺𑀬𑀸𑀧𑀺 𑁋 ‘𑀅𑀬𑀁 𑀲𑀸𑀓𑀪𑀓𑁆𑀔𑁄 𑀯𑀸 𑀳𑁄𑀢𑀺 𑀲𑀸𑀫𑀸𑀓𑀪𑀓𑁆𑀔𑁄…𑀧𑁂… 𑀯𑀦𑀫𑀽𑀮𑀨𑀮𑀸𑀳𑀸𑀭𑁄 𑀬𑀸𑀧𑁂𑀢𑀺 𑀧𑀯𑀢𑁆𑀢𑀨𑀮𑀪𑁄𑀚𑀻’𑀢𑀺.

‘‘𑀬𑀲𑁆𑀫𑀸 𑀘 𑀔𑁄, 𑀓𑀲𑁆𑀲𑀧, 𑀅𑀜𑁆𑀜𑀢𑁆𑀭𑁂𑀯 𑀇𑀫𑀸𑀬 𑀫𑀢𑁆𑀢𑀸𑀬 𑀅𑀜𑁆𑀜𑀢𑁆𑀭 𑀇𑀫𑀺𑀦𑀸 𑀢𑀧𑁄𑀧𑀓𑁆𑀓𑀫𑁂𑀦 𑀲𑀫𑀡𑁄 𑀯𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑀼𑀚𑁆𑀚𑀸𑀦𑁄 𑀲𑀼𑀤𑀼𑀚𑁆𑀚𑀸𑀦𑁄, 𑀢𑀲𑁆𑀫𑀸 𑀏𑀢𑀁 𑀓𑀮𑁆𑀮𑀁 𑀯𑀘𑀦𑀸𑀬 𑁋 ‘𑀤𑀼𑀚𑁆𑀚𑀸𑀦𑁄 𑀲𑀫𑀡𑁄 𑀤𑀼𑀚𑁆𑀚𑀸𑀦𑁄 𑀩𑁆𑀭𑀸𑀳𑁆𑀫𑀡𑁄’𑀢𑀺. 𑀬𑀢𑁄 𑀔𑁄, 𑀓𑀲𑁆𑀲𑀧, 𑀪𑀺𑀓𑁆𑀔𑀼 𑀅𑀯𑁂𑀭𑀁 𑀅𑀩𑁆𑀬𑀸𑀧𑀚𑁆𑀚𑀁 𑀫𑁂𑀢𑁆𑀢𑀘𑀺𑀢𑁆𑀢𑀁 𑀪𑀸𑀯𑁂𑀢𑀺, 𑀆𑀲𑀯𑀸𑀦𑀜𑁆𑀘 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀓𑀲𑁆𑀲𑀧, 𑀪𑀺𑀓𑁆𑀔𑀼 𑀲𑀫𑀡𑁄 𑀇𑀢𑀺𑀧𑀺 𑀩𑁆𑀭𑀸𑀳𑁆𑀫𑀡𑁄 𑀇𑀢𑀺𑀧𑀺.

‘‘𑀲𑀸𑀡𑀸𑀦𑀺 𑀘𑁂𑀧𑀺, 𑀓𑀲𑁆𑀲𑀧, 𑀥𑀸𑀭𑁂𑀢𑀺, 𑀫𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀢𑀺…𑀧𑁂… 𑀲𑀸𑀬𑀢𑀢𑀺𑀬𑀓𑀫𑁆𑀧𑀺 𑀉𑀤𑀓𑁄𑀭𑁄𑀳𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀇𑀫𑀸𑀬 𑀘, 𑀓𑀲𑁆𑀲𑀧, 𑀫𑀢𑁆𑀢𑀸𑀬 𑀇𑀫𑀺𑀦𑀸 𑀢𑀧𑁄𑀧𑀓𑁆𑀓𑀫𑁂𑀦 𑀲𑀫𑀡𑁄 𑀯𑀸 𑀅𑀪𑀯𑀺𑀲𑁆𑀲 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑀼𑀚𑁆𑀚𑀸𑀦𑁄 𑀲𑀼𑀤𑀼𑀚𑁆𑀚𑀸𑀦𑁄, 𑀦𑁂𑀢𑀁 𑀅𑀪𑀯𑀺𑀲𑁆𑀲 𑀓𑀮𑁆𑀮𑀁 𑀯𑀘𑀦𑀸𑀬 𑁋 ‘𑀤𑀼𑀚𑁆𑀚𑀸𑀦𑁄 𑀲𑀫𑀡𑁄 𑀤𑀼𑀚𑁆𑀚𑀸𑀦𑁄 𑀩𑁆𑀭𑀸𑀳𑁆𑀫𑀡𑁄’𑀢𑀺.

‘‘𑀲𑀓𑁆𑀓𑀸 𑀘 𑀧𑀦𑁂𑀲𑁄 𑀅𑀪𑀯𑀺𑀲𑁆𑀲 𑀜𑀸𑀢𑀼𑀁 𑀕𑀳𑀧𑀢𑀺𑀦𑀸 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁂𑀦 𑀯𑀸 𑀅𑀦𑁆𑀢𑀫𑀲𑁄 𑀓𑀼𑀫𑁆𑀪𑀤𑀸𑀲𑀺𑀬𑀸𑀧𑀺 𑁋 ‘𑀅𑀬𑀁 𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀢𑀺, 𑀫𑀲𑀸𑀡𑀸𑀦𑀺𑀧𑀺 𑀥𑀸𑀭𑁂𑀢𑀺…𑀧𑁂… 𑀲𑀸𑀬𑀢𑀢𑀺𑀬𑀓𑀫𑁆𑀧𑀺 𑀉𑀤𑀓𑁄𑀭𑁄𑀳𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀻’𑀢𑀺.

‘‘𑀬𑀲𑁆𑀫𑀸 𑀘 𑀔𑁄, 𑀓𑀲𑁆𑀲𑀧, 𑀅𑀜𑁆𑀜𑀢𑁆𑀭𑁂𑀯 𑀇𑀫𑀸𑀬 𑀫𑀢𑁆𑀢𑀸𑀬 𑀅𑀜𑁆𑀜𑀢𑁆𑀭 𑀇𑀫𑀺𑀦𑀸 𑀢𑀧𑁄𑀧𑀓𑁆𑀓𑀫𑁂𑀦 𑀲𑀫𑀡𑁄 𑀯𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑀼𑀚𑁆𑀚𑀸𑀦𑁄 𑀲𑀼𑀤𑀼𑀚𑁆𑀚𑀸𑀦𑁄, 𑀢𑀲𑁆𑀫𑀸 𑀏𑀢𑀁 𑀓𑀮𑁆𑀮𑀁 𑀯𑀘𑀦𑀸𑀬 𑁋 ‘𑀤𑀼𑀚𑁆𑀚𑀸𑀦𑁄 𑀲𑀫𑀡𑁄 𑀤𑀼𑀚𑁆𑀚𑀸𑀦𑁄 𑀩𑁆𑀭𑀸𑀳𑁆𑀫𑀡𑁄’𑀢𑀺. 𑀬𑀢𑁄 𑀔𑁄, 𑀓𑀲𑁆𑀲𑀧, 𑀪𑀺𑀓𑁆𑀔𑀼 𑀅𑀯𑁂𑀭𑀁 𑀅𑀩𑁆𑀬𑀸𑀧𑀚𑁆𑀚𑀁 𑀫𑁂𑀢𑁆𑀢𑀘𑀺𑀢𑁆𑀢𑀁 𑀪𑀸𑀯𑁂𑀢𑀺, 𑀆𑀲𑀯𑀸𑀦𑀜𑁆𑀘 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀓𑀲𑁆𑀲𑀧, 𑀪𑀺𑀓𑁆𑀔𑀼 𑀲𑀫𑀡𑁄 𑀇𑀢𑀺𑀧𑀺 𑀩𑁆𑀭𑀸𑀳𑁆𑀫𑀡𑁄 𑀇𑀢𑀺𑀧𑀻’’𑀢𑀺.

𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀲𑀫𑁆𑀧𑀤𑀸

𑁪𑁦𑁦. 𑀏𑀯𑀁 𑀯𑀼𑀢𑁆𑀢𑁂, 𑀅𑀘𑁂𑀮𑁄 𑀓𑀲𑁆𑀲𑀧𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀢𑀫𑀸 𑀧𑀦 𑀲𑀸, 𑀪𑁄 𑀕𑁄𑀢𑀫, 𑀲𑀻𑀮𑀲𑀫𑁆𑀧𑀤𑀸, 𑀓𑀢𑀫𑀸 𑀘𑀺𑀢𑁆𑀢𑀲𑀫𑁆𑀧𑀤𑀸, 𑀓𑀢𑀫𑀸 𑀧𑀜𑁆𑀜𑀸𑀲𑀫𑁆𑀧𑀤𑀸’’𑀢𑀺? ‘‘𑀇𑀥, 𑀓𑀲𑁆𑀲𑀧, 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… (𑀬𑀣𑀸 𑁧𑁯𑁦-𑁧𑁯𑁩 𑀅𑀦𑀼𑀘𑁆𑀙𑁂𑀤𑁂𑀲𑀼, 𑀏𑀯𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁) 𑀪𑀬𑀤𑀲𑁆𑀲𑀸𑀯𑀻 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼, 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑀼𑀲𑀮𑁂𑀦 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄 𑀲𑀻𑀮𑀲𑀫𑁆𑀧𑀦𑁆𑀦𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀦𑁆𑀢𑀼𑀝𑁆𑀞𑁄.

𑁪𑁦𑁧. ‘‘𑀓𑀣𑀜𑁆𑀘, 𑀓𑀲𑁆𑀲𑀧, 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺? 𑀇𑀥, 𑀓𑀲𑁆𑀲𑀧, 𑀪𑀺𑀓𑁆𑀔𑀼 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄, 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑀫𑁆𑀧𑀤𑀸𑀬 …𑀧𑁂… (𑀬𑀣𑀸 𑁧𑁯𑁪 𑀬𑀸𑀯 𑁨𑁧𑁦 𑀅𑀦𑀼𑀘𑁆𑀙𑁂𑀤𑁂𑀲𑀼)

‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀦𑁆𑀢𑀺𑀓𑀫𑁆𑀫𑀁 𑀧𑀡𑀺𑀥𑀺𑀓𑀫𑁆𑀫𑀁…𑀧𑁂… (𑀬𑀣𑀸 𑁨𑁧𑁧 𑀅𑀦𑀼𑀘𑁆𑀙𑁂𑀤𑁂) 𑀑𑀲𑀥𑀻𑀦𑀁 𑀧𑀢𑀺𑀫𑁄𑀓𑁆𑀔𑁄 𑀇𑀢𑀺 𑀯𑀸 𑀇𑀢𑀺, 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑀫𑁆𑀧𑀤𑀸𑀬.

‘‘𑀲 𑀔𑁄 𑀲𑁄 [𑀅𑀬𑀁 𑀔𑁄 (𑀓.)], 𑀓𑀲𑁆𑀲𑀧, 𑀪𑀺𑀓𑁆𑀔𑀼 𑀏𑀯𑀁 𑀲𑀻𑀮𑀲𑀫𑁆𑀧𑀦𑁆𑀦𑁄 𑀦 𑀓𑀼𑀢𑁄𑀘𑀺 𑀪𑀬𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀬𑀤𑀺𑀤𑀁 𑀲𑀻𑀮𑀲𑀁𑀯𑀭𑀢𑁄. 𑀲𑁂𑀬𑁆𑀬𑀣𑀸𑀧𑀺, 𑀓𑀲𑁆𑀲𑀧, 𑀭𑀸𑀚𑀸 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄 𑀦𑀺𑀳𑀢𑀧𑀘𑁆𑀘𑀸𑀫𑀺𑀢𑁆𑀢𑁄 𑀦 𑀓𑀼𑀢𑁄𑀘𑀺 𑀪𑀬𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀬𑀤𑀺𑀤𑀁 𑀧𑀘𑁆𑀘𑀢𑁆𑀣𑀺𑀓𑀢𑁄. 𑀏𑀯𑀫𑁂𑀯 𑀔𑁄, 𑀓𑀲𑁆𑀲𑀧, 𑀪𑀺𑀓𑁆𑀔𑀼 𑀏𑀯𑀁 𑀲𑀻𑀮𑀲𑀫𑁆𑀧𑀦𑁆𑀦𑁄 𑀦 𑀓𑀼𑀢𑁄𑀘𑀺 𑀪𑀬𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀬𑀤𑀺𑀤𑀁 𑀲𑀻𑀮𑀲𑀁𑀯𑀭𑀢𑁄. 𑀲𑁄 𑀇𑀫𑀺𑀦𑀸 𑀅𑀭𑀺𑀬𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀚𑁆𑀛𑀢𑁆𑀢𑀁 𑀅𑀦𑀯𑀚𑁆𑀚𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀯𑀁 𑀔𑁄, 𑀓𑀲𑁆𑀲𑀧, 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺. 𑀅𑀬𑀁 𑀔𑁄, 𑀓𑀲𑁆𑀲𑀧, 𑀲𑀻𑀮𑀲𑀫𑁆𑀧𑀤𑀸…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀘𑀺𑀢𑁆𑀢𑀲𑀫𑁆𑀧𑀤𑀸𑀬…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀘𑀺𑀢𑁆𑀢𑀲𑀫𑁆𑀧𑀤𑀸𑀬. 𑀅𑀬𑀁 𑀔𑁄, 𑀓𑀲𑁆𑀲𑀧, 𑀘𑀺𑀢𑁆𑀢𑀲𑀫𑁆𑀧𑀤𑀸.

‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂…𑀧𑁂… 𑀜𑀸𑀡𑀤𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺…𑀧𑁂… 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀧𑀜𑁆𑀜𑀸𑀲𑀫𑁆𑀧𑀤𑀸𑀬…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀺…𑀧𑁂… 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀧𑀜𑁆𑀜𑀸𑀲𑀫𑁆𑀧𑀤𑀸𑀬. 𑀅𑀬𑀁 𑀔𑁄, 𑀓𑀲𑁆𑀲𑀧, 𑀧𑀜𑁆𑀜𑀸𑀲𑀫𑁆𑀧𑀤𑀸.

‘‘𑀇𑀫𑀸𑀬 𑀘, 𑀓𑀲𑁆𑀲𑀧, 𑀲𑀻𑀮𑀲𑀫𑁆𑀧𑀤𑀸𑀬 𑀘𑀺𑀢𑁆𑀢𑀲𑀫𑁆𑀧𑀤𑀸𑀬 𑀧𑀜𑁆𑀜𑀸𑀲𑀫𑁆𑀧𑀤𑀸𑀬 𑀅𑀜𑁆𑀜𑀸 𑀲𑀻𑀮𑀲𑀫𑁆𑀧𑀤𑀸 𑀘𑀺𑀢𑁆𑀢𑀲𑀫𑁆𑀧𑀤𑀸 𑀧𑀜𑁆𑀜𑀸𑀲𑀫𑁆𑀧𑀤𑀸 𑀉𑀢𑁆𑀢𑀭𑀺𑀢𑀭𑀸 𑀯𑀸 𑀧𑀡𑀻𑀢𑀢𑀭𑀸 𑀯𑀸 𑀦𑀢𑁆𑀣𑀺.

𑀲𑀻𑀳𑀦𑀸𑀤𑀓𑀣𑀸

𑁪𑁦𑁨. ‘‘𑀲𑀦𑁆𑀢𑀺, 𑀓𑀲𑁆𑀲𑀧, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀻𑀮𑀯𑀸𑀤𑀸. 𑀢𑁂 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀲𑀻𑀮𑀲𑁆𑀲 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺. 𑀬𑀸𑀯𑀢𑀸, 𑀓𑀲𑁆𑀲𑀧, 𑀅𑀭𑀺𑀬𑀁 𑀧𑀭𑀫𑀁 𑀲𑀻𑀮𑀁, 𑀦𑀸𑀳𑀁 𑀢𑀢𑁆𑀣 𑀅𑀢𑁆𑀢𑀦𑁄 𑀲𑀫𑀲𑀫𑀁 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀓𑀼𑀢𑁄 𑀪𑀺𑀬𑁆𑀬𑁄! 𑀅𑀣 𑀔𑁄 𑀅𑀳𑀫𑁂𑀯 𑀢𑀢𑁆𑀣 𑀪𑀺𑀬𑁆𑀬𑁄, 𑀬𑀤𑀺𑀤𑀁 𑀅𑀥𑀺𑀲𑀻𑀮𑀁.

‘‘𑀲𑀦𑁆𑀢𑀺, 𑀓𑀲𑁆𑀲𑀧, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀢𑀧𑁄𑀚𑀺𑀕𑀼𑀘𑁆𑀙𑀸𑀯𑀸𑀤𑀸. 𑀢𑁂 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀢𑀧𑁄𑀚𑀺𑀕𑀼𑀘𑁆𑀙𑀸𑀬 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺. 𑀬𑀸𑀯𑀢𑀸, 𑀓𑀲𑁆𑀲𑀧, 𑀅𑀭𑀺𑀬𑀸 𑀧𑀭𑀫𑀸 𑀢𑀧𑁄𑀚𑀺𑀕𑀼𑀘𑁆𑀙𑀸, 𑀦𑀸𑀳𑀁 𑀢𑀢𑁆𑀣 𑀅𑀢𑁆𑀢𑀦𑁄 𑀲𑀫𑀲𑀫𑀁 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀓𑀼𑀢𑁄 𑀪𑀺𑀬𑁆𑀬𑁄! 𑀅𑀣 𑀔𑁄 𑀅𑀳𑀫𑁂𑀯 𑀢𑀢𑁆𑀣 𑀪𑀺𑀬𑁆𑀬𑁄, 𑀬𑀤𑀺𑀤𑀁 𑀅𑀥𑀺𑀚𑁂𑀕𑀼𑀘𑁆𑀙𑀁.

‘‘𑀲𑀦𑁆𑀢𑀺, 𑀓𑀲𑁆𑀲𑀧, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀜𑁆𑀜𑀸𑀯𑀸𑀤𑀸. 𑀢𑁂 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀧𑀜𑁆𑀜𑀸𑀬 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺. 𑀬𑀸𑀯𑀢𑀸, 𑀓𑀲𑁆𑀲𑀧, 𑀅𑀭𑀺𑀬𑀸 𑀧𑀭𑀫𑀸 𑀧𑀜𑁆𑀜𑀸, 𑀦𑀸𑀳𑀁 𑀢𑀢𑁆𑀣 𑀅𑀢𑁆𑀢𑀦𑁄 𑀲𑀫𑀲𑀫𑀁 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀓𑀼𑀢𑁄 𑀪𑀺𑀬𑁆𑀬𑁄! 𑀅𑀣 𑀔𑁄 𑀅𑀳𑀫𑁂𑀯 𑀢𑀢𑁆𑀣 𑀪𑀺𑀬𑁆𑀬𑁄, 𑀬𑀤𑀺𑀤𑀁 𑀅𑀥𑀺𑀧𑀜𑁆𑀜𑀁.

‘‘𑀲𑀦𑁆𑀢𑀺, 𑀓𑀲𑁆𑀲𑀧, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀯𑀺𑀫𑀼𑀢𑁆𑀢𑀺𑀯𑀸𑀤𑀸. 𑀢𑁂 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀯𑀺𑀫𑀼𑀢𑁆𑀢𑀺𑀬𑀸 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺. 𑀬𑀸𑀯𑀢𑀸, 𑀓𑀲𑁆𑀲𑀧, 𑀅𑀭𑀺𑀬𑀸 𑀧𑀭𑀫𑀸 𑀯𑀺𑀫𑀼𑀢𑁆𑀢𑀺, 𑀦𑀸𑀳𑀁 𑀢𑀢𑁆𑀣 𑀅𑀢𑁆𑀢𑀦𑁄 𑀲𑀫𑀲𑀫𑀁 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀓𑀼𑀢𑁄 𑀪𑀺𑀬𑁆𑀬𑁄! 𑀅𑀣 𑀔𑁄 𑀅𑀳𑀫𑁂𑀯 𑀢𑀢𑁆𑀣 𑀪𑀺𑀬𑁆𑀬𑁄, 𑀬𑀤𑀺𑀤𑀁 𑀅𑀥𑀺𑀯𑀺𑀫𑀼𑀢𑁆𑀢𑀺.

𑁪𑁦𑁩. ‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀓𑀲𑁆𑀲𑀧, 𑀯𑀺𑀚𑁆𑀚𑀢𑀺, 𑀬𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀲𑀻𑀳𑀦𑀸𑀤𑀁 𑀔𑁄 𑀲𑀫𑀡𑁄 𑀕𑁄𑀢𑀫𑁄 𑀦𑀤𑀢𑀺, 𑀢𑀜𑁆𑀘 𑀔𑁄 𑀲𑀼𑀜𑁆𑀜𑀸𑀕𑀸𑀭𑁂 𑀦𑀤𑀢𑀺, 𑀦𑁄 𑀧𑀭𑀺𑀲𑀸𑀲𑀽’𑀢𑀺. 𑀢𑁂 𑁋 ‘𑀫𑀸 𑀳𑁂𑀯’𑀦𑁆𑀢𑀺𑀲𑁆𑀲𑀼 𑀯𑀘𑀦𑀻𑀬𑀸. ‘𑀲𑀻𑀳𑀦𑀸𑀤𑀜𑁆𑀘 𑀲𑀫𑀡𑁄 𑀕𑁄𑀢𑀫𑁄 𑀦𑀤𑀢𑀺, 𑀧𑀭𑀺𑀲𑀸𑀲𑀼 𑀘 𑀦𑀤𑀢𑀻’𑀢𑀺 𑀏𑀯𑀫𑀲𑁆𑀲𑀼, 𑀓𑀲𑁆𑀲𑀧, 𑀯𑀘𑀦𑀻𑀬𑀸.

‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀓𑀲𑁆𑀲𑀧, 𑀯𑀺𑀚𑁆𑀚𑀢𑀺, 𑀬𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀲𑀻𑀳𑀦𑀸𑀤𑀜𑁆𑀘 𑀲𑀫𑀡𑁄 𑀕𑁄𑀢𑀫𑁄 𑀦𑀤𑀢𑀺, 𑀧𑀭𑀺𑀲𑀸𑀲𑀼 𑀘 𑀦𑀤𑀢𑀺, 𑀦𑁄 𑀘 𑀔𑁄 𑀯𑀺𑀲𑀸𑀭𑀤𑁄 𑀦𑀤𑀢𑀻’𑀢𑀺. 𑀢𑁂 𑁋 ‘𑀫𑀸 𑀳𑁂𑀯’𑀦𑁆𑀢𑀺𑀲𑁆𑀲𑀼 𑀯𑀘𑀦𑀻𑀬𑀸. ‘𑀲𑀻𑀳𑀦𑀸𑀤𑀜𑁆𑀘 𑀲𑀫𑀡𑁄 𑀕𑁄𑀢𑀫𑁄 𑀦𑀤𑀢𑀺, 𑀧𑀭𑀺𑀲𑀸𑀲𑀼 𑀘 𑀦𑀤𑀢𑀺, 𑀯𑀺𑀲𑀸𑀭𑀤𑁄 𑀘 𑀦𑀤𑀢𑀻’’𑀢𑀺 𑀏𑀯𑀫𑀲𑁆𑀲𑀼, 𑀓𑀲𑁆𑀲𑀧, 𑀯𑀘𑀦𑀻𑀬𑀸.

‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀓𑀲𑁆𑀲𑀧, 𑀯𑀺𑀚𑁆𑀚𑀢𑀺, 𑀬𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀲𑀻𑀳𑀦𑀸𑀤𑀜𑁆𑀘 𑀲𑀫𑀡𑁄 𑀕𑁄𑀢𑀫𑁄 𑀦𑀤𑀢𑀺, 𑀧𑀭𑀺𑀲𑀸𑀲𑀼 𑀘 𑀦𑀤𑀢𑀺, 𑀯𑀺𑀲𑀸𑀭𑀤𑁄 𑀘 𑀦𑀤𑀢𑀺, 𑀦𑁄 𑀘 𑀔𑁄 𑀦𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺…𑀧𑁂… 𑀧𑀜𑁆𑀳𑀜𑁆𑀘 𑀦𑀁 𑀧𑀼𑀘𑁆𑀙𑀦𑁆𑀢𑀺; 𑀦𑁄 𑀘 𑀔𑁄 𑀦𑁂𑀲𑀁 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀩𑁆𑀬𑀸𑀓𑀭𑁄𑀢𑀺…𑀧𑁂… 𑀧𑀜𑁆𑀳𑀜𑁆𑀘 𑀦𑁂𑀲𑀁 𑀧𑀼𑀝𑁆𑀞𑁄 𑀩𑁆𑀬𑀸𑀓𑀭𑁄𑀢𑀺; 𑀦𑁄 𑀘 𑀔𑁄 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑁂𑀦 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀺…𑀧𑁂… 𑀧𑀜𑁆𑀳𑀲𑁆𑀲 𑀘 𑀯𑁂𑀬𑁆𑀬𑀸𑀓𑀭𑀡𑁂𑀦 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀺; 𑀦𑁄 𑀘 𑀔𑁄 𑀲𑁄𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺…𑀧𑁂… 𑀲𑁄𑀢𑀩𑁆𑀩𑀜𑁆𑀘𑀲𑁆𑀲 𑀫𑀜𑁆𑀜𑀦𑁆𑀢𑀺; 𑀦𑁄 𑀘 𑀔𑁄 𑀲𑀼𑀢𑁆𑀯𑀸 𑀧𑀲𑀻𑀤𑀦𑁆𑀢𑀺…𑀧𑁂… 𑀲𑀼𑀢𑁆𑀯𑀸 𑀘𑀲𑁆𑀲 𑀧𑀲𑀻𑀤𑀦𑁆𑀢𑀺; 𑀦𑁄 𑀘 𑀔𑁄 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁄𑀦𑁆𑀢𑀺…𑀧𑁂… 𑀧𑀲𑀦𑁆𑀦𑀸𑀓𑀸𑀭𑀜𑁆𑀘 𑀓𑀭𑁄𑀦𑁆𑀢𑀺; 𑀦𑁄 𑀘 𑀔𑁄 𑀢𑀣𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀺…𑀧𑁂… 𑀢𑀣𑀢𑁆𑀢𑀸𑀬 𑀘 𑀧𑀝𑀺𑀧𑀚𑁆𑀚𑀦𑁆𑀢𑀺; 𑀦𑁄 𑀘 𑀔𑁄 𑀧𑀝𑀺𑀧𑀦𑁆𑀦𑀸 𑀆𑀭𑀸𑀥𑁂𑀦𑁆𑀢𑀻’𑀢𑀺. 𑀢𑁂 𑁋 ‘𑀫𑀸 𑀳𑁂𑀯’𑀦𑁆𑀢𑀺𑀲𑁆𑀲𑀼 𑀯𑀘𑀦𑀻𑀬𑀸. ‘𑀲𑀻𑀳𑀦𑀸𑀤𑀜𑁆𑀘 𑀲𑀫𑀡𑁄 𑀕𑁄𑀢𑀫𑁄 𑀦𑀤𑀢𑀺, 𑀧𑀭𑀺𑀲𑀸𑀲𑀼 𑀘 𑀦𑀤𑀢𑀺, 𑀯𑀺𑀲𑀸𑀭𑀤𑁄 𑀘 𑀦𑀤𑀢𑀺, 𑀧𑀜𑁆𑀳𑀜𑁆𑀘 𑀦𑀁 𑀧𑀼𑀘𑁆𑀙𑀦𑁆𑀢𑀺, 𑀧𑀜𑁆𑀳𑀜𑁆𑀘 𑀦𑁂𑀲𑀁 𑀧𑀼𑀝𑁆𑀞𑁄 𑀩𑁆𑀬𑀸𑀓𑀭𑁄𑀢𑀺, 𑀧𑀜𑁆𑀳𑀲𑁆𑀲 𑀘 𑀯𑁂𑀬𑁆𑀬𑀸𑀓𑀭𑀡𑁂𑀦 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀺, 𑀲𑁄𑀢𑀩𑁆𑀩𑀜𑁆𑀘𑀲𑁆𑀲 𑀫𑀜𑁆𑀜𑀦𑁆𑀢𑀺, 𑀲𑀼𑀢𑁆𑀯𑀸 𑀘𑀲𑁆𑀲 𑀧𑀲𑀻𑀤𑀦𑁆𑀢𑀺, 𑀧𑀲𑀦𑁆𑀦𑀸𑀓𑀸𑀭𑀜𑁆𑀘 𑀓𑀭𑁄𑀦𑁆𑀢𑀺, 𑀢𑀣𑀢𑁆𑀢𑀸𑀬 𑀘 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀧𑀝𑀺𑀧𑀦𑁆𑀦𑀸 𑀘 𑀆𑀭𑀸𑀥𑁂𑀦𑁆𑀢𑀻’𑀢𑀺 𑀏𑀯𑀫𑀲𑁆𑀲𑀼, 𑀓𑀲𑁆𑀲𑀧, 𑀯𑀘𑀦𑀻𑀬𑀸.

𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑀓𑀣𑀸

𑁪𑁦𑁪. ‘‘𑀏𑀓𑀫𑀺𑀤𑀸𑀳𑀁, 𑀓𑀲𑁆𑀲𑀧, 𑀲𑀫𑀬𑀁 𑀭𑀸𑀚𑀕𑀳𑁂 𑀯𑀺𑀳𑀭𑀸𑀫𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀢𑀢𑁆𑀭 𑀫𑀁 𑀅𑀜𑁆𑀜𑀢𑀭𑁄 𑀢𑀧𑀩𑁆𑀭𑀳𑁆𑀫𑀘𑀸𑀭𑀻 𑀦𑀺𑀕𑁆𑀭𑁄𑀥𑁄 𑀦𑀸𑀫 𑀅𑀥𑀺𑀚𑁂𑀕𑀼𑀘𑁆𑀙𑁂 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺. 𑀢𑀲𑁆𑀲𑀸𑀳𑀁 𑀅𑀥𑀺𑀚𑁂𑀕𑀼𑀘𑁆𑀙𑁂 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀩𑁆𑀬𑀸𑀓𑀸𑀲𑀺𑀁. 𑀩𑁆𑀬𑀸𑀓𑀢𑁂 𑀘 𑀧𑀦 𑀫𑁂 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺 𑀧𑀭𑀁 𑀯𑀺𑀬 𑀫𑀢𑁆𑀢𑀸𑀬𑀸’’𑀢𑀺. ‘‘𑀓𑁄 𑀳𑀺, 𑀪𑀦𑁆𑀢𑁂, 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀦 𑀅𑀢𑁆𑀢𑀫𑀦𑁄 𑀅𑀲𑁆𑀲 𑀧𑀭𑀁 𑀯𑀺𑀬 𑀫𑀢𑁆𑀢𑀸𑀬? 𑀅𑀳𑀫𑁆𑀧𑀺 𑀳𑀺, 𑀪𑀦𑁆𑀢𑁂, 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀅𑀢𑁆𑀢𑀫𑀦𑁄 𑀧𑀭𑀁 𑀯𑀺𑀬 𑀫𑀢𑁆𑀢𑀸𑀬. 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑁋 ‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’𑀢𑀺; 𑀏𑀯𑀫𑁂𑀯𑀁 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀮𑀪𑁂𑀬𑁆𑀬𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀁 𑀉𑀧𑀲𑀫𑁆𑀧𑀤’’𑀦𑁆𑀢𑀺.

𑁪𑁦𑁫. ‘‘𑀬𑁄 𑀔𑁄, 𑀓𑀲𑁆𑀲𑀧, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀆𑀓𑀗𑁆𑀔𑀢𑀺 𑀧𑀩𑁆𑀩𑀚𑁆𑀚𑀁, 𑀆𑀓𑀗𑁆𑀔𑀢𑀺 𑀉𑀧𑀲𑀫𑁆𑀧𑀤𑀁, 𑀲𑁄 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀭𑀺𑀯𑀲𑀢𑀺, 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀆𑀭𑀤𑁆𑀥𑀘𑀺𑀢𑁆𑀢𑀸 𑀪𑀺𑀓𑁆𑀔𑀽 𑀧𑀩𑁆𑀩𑀸𑀚𑁂𑀦𑁆𑀢𑀺, 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺 𑀪𑀺𑀓𑁆𑀔𑀼𑀪𑀸𑀯𑀸𑀬. 𑀅𑀧𑀺 𑀘 𑀫𑁂𑀢𑁆𑀣 𑀧𑀼𑀕𑁆𑀕𑀮𑀯𑁂𑀫𑀢𑁆𑀢𑀢𑀸 𑀯𑀺𑀤𑀺𑀢𑀸’’𑀢𑀺. ‘‘𑀲𑀘𑁂, 𑀪𑀦𑁆𑀢𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀆𑀓𑀗𑁆𑀔𑀦𑁆𑀢𑀺 𑀧𑀩𑁆𑀩𑀚𑁆𑀚𑀁, 𑀆𑀓𑀗𑁆𑀔𑀦𑁆𑀢𑀺 𑀉𑀧𑀲𑀫𑁆𑀧𑀤𑀁, 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀭𑀺𑀯𑀲𑀦𑁆𑀢𑀺, 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀆𑀭𑀤𑁆𑀥𑀘𑀺𑀢𑁆𑀢𑀸 𑀪𑀺𑀓𑁆𑀔𑀽 𑀧𑀩𑁆𑀩𑀸𑀚𑁂𑀦𑁆𑀢𑀺, 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺 𑀪𑀺𑀓𑁆𑀔𑀼𑀪𑀸𑀯𑀸𑀬. 𑀅𑀳𑀁 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺 𑀧𑀭𑀺𑀯𑀲𑀺𑀲𑁆𑀲𑀸𑀫𑀺, 𑀘𑀢𑀼𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀆𑀭𑀤𑁆𑀥𑀘𑀺𑀢𑁆𑀢𑀸 𑀪𑀺𑀓𑁆𑀔𑀽 𑀧𑀩𑁆𑀩𑀸𑀚𑁂𑀦𑁆𑀢𑀼, 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀼 𑀪𑀺𑀓𑁆𑀔𑀼𑀪𑀸𑀯𑀸𑀬𑀸’’𑀢𑀺.

𑀅𑀮𑀢𑁆𑀣 𑀔𑁄 𑀅𑀘𑁂𑀮𑁄 𑀓𑀲𑁆𑀲𑀧𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀅𑀮𑀢𑁆𑀣 𑀉𑀧𑀲𑀫𑁆𑀧𑀤𑀁. 𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑁄 𑀔𑁄 𑀧𑀦𑀸𑀬𑀲𑁆𑀫𑀸 𑀓𑀲𑁆𑀲𑀧𑁄 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀦 𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺, 𑀢𑀤𑀦𑀼𑀢𑁆𑀢𑀭𑀁 𑁋 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑁋 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄 𑀔𑁄 𑀧𑀦𑀸𑀬𑀲𑁆𑀫𑀸 𑀓𑀲𑁆𑀲𑀧𑁄 𑀅𑀭𑀳𑀢𑀁 𑀅𑀳𑁄𑀲𑀻𑀢𑀺.

𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀅𑀝𑁆𑀞𑀫𑀁.

𑁯. 𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑀁

𑀧𑁄𑀝𑁆𑀞𑀧𑀸𑀤𑀧𑀭𑀺𑀩𑁆𑀩𑀸𑀚𑀓𑀯𑀢𑁆𑀣𑀼

𑁪𑁦𑁬. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀧𑁄𑀝𑁆𑀞𑀧𑀸𑀤𑁄 𑀧𑀭𑀺𑀩𑁆𑀩𑀸𑀚𑀓𑁄 𑀲𑀫𑀬𑀧𑁆𑀧𑀯𑀸𑀤𑀓𑁂 𑀢𑀺𑀦𑁆𑀤𑀼𑀓𑀸𑀘𑀻𑀭𑁂 𑀏𑀓𑀲𑀸𑀮𑀓𑁂 𑀫𑀮𑁆𑀮𑀺𑀓𑀸𑀬 𑀆𑀭𑀸𑀫𑁂 𑀧𑀝𑀺𑀯𑀲𑀢𑀺 𑀫𑀳𑀢𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀢𑀺𑀁𑀲𑀫𑀢𑁆𑀢𑁂𑀳𑀺 𑀧𑀭𑀺𑀩𑁆𑀩𑀸𑀚𑀓𑀲𑀢𑁂𑀳𑀺. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺.

𑁪𑁦𑁭. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀅𑀢𑀺𑀧𑁆𑀧𑀕𑁄 𑀔𑁄 𑀢𑀸𑀯 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀬𑁂𑀦 𑀲𑀫𑀬𑀧𑁆𑀧𑀯𑀸𑀤𑀓𑁄 𑀢𑀺𑀦𑁆𑀤𑀼𑀓𑀸𑀘𑀻𑀭𑁄 𑀏𑀓𑀲𑀸𑀮𑀓𑁄 𑀫𑀮𑁆𑀮𑀺𑀓𑀸𑀬 𑀆𑀭𑀸𑀫𑁄, 𑀬𑁂𑀦 𑀧𑁄𑀝𑁆𑀞𑀧𑀸𑀤𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀲𑀫𑀬𑀧𑁆𑀧𑀯𑀸𑀤𑀓𑁄 𑀢𑀺𑀦𑁆𑀤𑀼𑀓𑀸𑀘𑀻𑀭𑁄 𑀏𑀓𑀲𑀸𑀮𑀓𑁄 𑀫𑀮𑁆𑀮𑀺𑀓𑀸𑀬 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺.

𑁪𑁦𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀧𑁄𑀝𑁆𑀞𑀧𑀸𑀤𑁄 𑀧𑀭𑀺𑀩𑁆𑀩𑀸𑀚𑀓𑁄 𑀫𑀳𑀢𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀉𑀦𑁆𑀦𑀸𑀤𑀺𑀦𑀺𑀬𑀸 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸𑀬 𑀅𑀦𑁂𑀓𑀯𑀺𑀳𑀺𑀢𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀓𑀣𑁂𑀦𑁆𑀢𑀺𑀬𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀚𑀓𑀣𑀁 𑀘𑁄𑀭𑀓𑀣𑀁 𑀫𑀳𑀸𑀫𑀢𑁆𑀢𑀓𑀣𑀁 𑀲𑁂𑀦𑀸𑀓𑀣𑀁 𑀪𑀬𑀓𑀣𑀁 𑀬𑀼𑀤𑁆𑀥𑀓𑀣𑀁 𑀅𑀦𑁆𑀦𑀓𑀣𑀁 𑀧𑀸𑀦𑀓𑀣𑀁 𑀯𑀢𑁆𑀣𑀓𑀣𑀁 𑀲𑀬𑀦𑀓𑀣𑀁 𑀫𑀸𑀮𑀸𑀓𑀣𑀁 𑀕𑀦𑁆𑀥𑀓𑀣𑀁 𑀜𑀸𑀢𑀺𑀓𑀣𑀁 𑀬𑀸𑀦𑀓𑀣𑀁 𑀕𑀸𑀫𑀓𑀣𑀁 𑀦𑀺𑀕𑀫𑀓𑀣𑀁 𑀦𑀕𑀭𑀓𑀣𑀁 𑀚𑀦𑀧𑀤𑀓𑀣𑀁 𑀇𑀢𑁆𑀣𑀺𑀓𑀣𑀁 𑀲𑀽𑀭𑀓𑀣𑀁 𑀯𑀺𑀲𑀺𑀔𑀸𑀓𑀣𑀁 𑀓𑀼𑀫𑁆𑀪𑀝𑁆𑀞𑀸𑀦𑀓𑀣𑀁 𑀧𑀼𑀩𑁆𑀩𑀧𑁂𑀢𑀓𑀣𑀁 𑀦𑀸𑀦𑀢𑁆𑀢𑀓𑀣𑀁 𑀮𑁄𑀓𑀓𑁆𑀔𑀸𑀬𑀺𑀓𑀁 𑀲𑀫𑀼𑀤𑁆𑀤𑀓𑁆𑀔𑀸𑀬𑀺𑀓𑀁 𑀇𑀢𑀺𑀪𑀯𑀸𑀪𑀯𑀓𑀣𑀁 𑀇𑀢𑀺 𑀯𑀸.

𑁪𑁦𑁯. 𑀅𑀤𑁆𑀤𑀲𑀸 𑀔𑁄 𑀧𑁄𑀝𑁆𑀞𑀧𑀸𑀤𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁; 𑀤𑀺𑀲𑁆𑀯𑀸𑀦 𑀲𑀓𑀁 𑀧𑀭𑀺𑀲𑀁 𑀲𑀡𑁆𑀞𑀧𑁂𑀲𑀺 𑁋 ‘‘𑀅𑀧𑁆𑀧𑀲𑀤𑁆𑀤𑀸 𑀪𑁄𑀦𑁆𑀢𑁄 𑀳𑁄𑀦𑁆𑀢𑀼, 𑀫𑀸 𑀪𑁄𑀦𑁆𑀢𑁄 𑀲𑀤𑁆𑀤𑀫𑀓𑀢𑁆𑀣. 𑀅𑀬𑀁 𑀲𑀫𑀡𑁄 𑀕𑁄𑀢𑀫𑁄 𑀆𑀕𑀘𑁆𑀙𑀢𑀺. 𑀅𑀧𑁆𑀧𑀲𑀤𑁆𑀤𑀓𑀸𑀫𑁄 𑀔𑁄 𑀲𑁄 𑀆𑀬𑀲𑁆𑀫𑀸 𑀅𑀧𑁆𑀧𑀲𑀤𑁆𑀤𑀲𑁆𑀲 𑀯𑀡𑁆𑀡𑀯𑀸𑀤𑀻. 𑀅𑀧𑁆𑀧𑁂𑀯 𑀦𑀸𑀫 𑀅𑀧𑁆𑀧𑀲𑀤𑁆𑀤𑀁 𑀧𑀭𑀺𑀲𑀁 𑀯𑀺𑀤𑀺𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀢𑁂 𑀧𑀭𑀺𑀩𑁆𑀩𑀸𑀚𑀓𑀸 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁.

𑁪𑁧𑁦. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀧𑁄𑀝𑁆𑀞𑀧𑀸𑀤𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀣 𑀔𑁄 𑀧𑁄𑀝𑁆𑀞𑀧𑀸𑀤𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀢𑀼 𑀔𑁄, 𑀪𑀦𑁆𑀢𑁂, 𑀪𑀕𑀯𑀸. 𑀲𑁆𑀯𑀸𑀕𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄. 𑀘𑀺𑀭𑀲𑁆𑀲𑀁 𑀔𑁄, 𑀪𑀦𑁆𑀢𑁂, 𑀪𑀕𑀯𑀸 𑀇𑀫𑀁 𑀧𑀭𑀺𑀬𑀸𑀬𑀫𑀓𑀸𑀲𑀺, 𑀬𑀤𑀺𑀤𑀁 𑀇𑀥𑀸𑀕𑀫𑀦𑀸𑀬. 𑀦𑀺𑀲𑀻𑀤𑀢𑀼, 𑀪𑀦𑁆𑀢𑁂, 𑀪𑀕𑀯𑀸, 𑀇𑀤𑀁 𑀆𑀲𑀦𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺.

𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀧𑁄𑀝𑁆𑀞𑀧𑀸𑀤𑁄𑀧𑀺 𑀔𑁄 𑀧𑀭𑀺𑀩𑁆𑀩𑀸𑀚𑀓𑁄 𑀅𑀜𑁆𑀜𑀢𑀭𑀁 𑀦𑀻𑀘𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀧𑁄𑀝𑁆𑀞𑀧𑀸𑀤𑀁 𑀧𑀭𑀺𑀩𑁆𑀩𑀸𑀚𑀓𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀓𑀸𑀬 𑀦𑀼𑀢𑁆𑀣 [𑀓𑀸𑀬 𑀦𑁄𑀢𑁆𑀣 (𑀲𑁆𑀬𑀸. 𑀓.)], 𑀧𑁄𑀝𑁆𑀞𑀧𑀸𑀤, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸, 𑀓𑀸 𑀘 𑀧𑀦 𑀯𑁄 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸’’𑀢𑀺?

𑀅𑀪𑀺𑀲𑀜𑁆𑀜𑀸𑀦𑀺𑀭𑁄𑀥𑀓𑀣𑀸

𑁪𑁧𑁧. 𑀏𑀯𑀁 𑀯𑀼𑀢𑁆𑀢𑁂 𑀧𑁄𑀝𑁆𑀞𑀧𑀸𑀤𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀢𑀺𑀝𑁆𑀞𑀢𑁂𑀲𑀸, 𑀪𑀦𑁆𑀢𑁂, 𑀓𑀣𑀸, 𑀬𑀸𑀬 𑀫𑀬𑀁 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸. 𑀦𑁂𑀲𑀸, 𑀪𑀦𑁆𑀢𑁂, 𑀓𑀣𑀸 𑀪𑀕𑀯𑀢𑁄 𑀤𑀼𑀮𑁆𑀮𑀪𑀸 𑀪𑀯𑀺𑀲𑁆𑀲𑀢𑀺 𑀧𑀘𑁆𑀙𑀸𑀧𑀺 𑀲𑀯𑀦𑀸𑀬. 𑀧𑀼𑀭𑀺𑀫𑀸𑀦𑀺, 𑀪𑀦𑁆𑀢𑁂, 𑀤𑀺𑀯𑀲𑀸𑀦𑀺 𑀧𑀼𑀭𑀺𑀫𑀢𑀭𑀸𑀦𑀺, 𑀦𑀸𑀦𑀸𑀢𑀺𑀢𑁆𑀣𑀺𑀬𑀸𑀦𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀓𑁄𑀢𑀽𑀳𑀮𑀲𑀸𑀮𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀪𑀺𑀲𑀜𑁆𑀜𑀸𑀦𑀺𑀭𑁄𑀥𑁂 𑀓𑀣𑀸 𑀉𑀤𑀧𑀸𑀤𑀺 𑁋 ‘𑀓𑀣𑀁 𑀦𑀼 𑀔𑁄, 𑀪𑁄, 𑀅𑀪𑀺𑀲𑀜𑁆𑀜𑀸𑀦𑀺𑀭𑁄𑀥𑁄 𑀳𑁄𑀢𑀻’𑀢𑀺? 𑀢𑀢𑁆𑀭𑁂𑀓𑀘𑁆𑀘𑁂 𑀏𑀯𑀫𑀸𑀳𑀁𑀲𑀼 𑁋 ‘𑀅𑀳𑁂𑀢𑀽 𑀅𑀧𑁆𑀧𑀘𑁆𑀘𑀬𑀸 𑀧𑀼𑀭𑀺𑀲𑀲𑁆𑀲 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀦𑁆𑀢𑀺𑀧𑀺 𑀦𑀺𑀭𑀼𑀚𑁆𑀛𑀦𑁆𑀢𑀺𑀧𑀺. 𑀬𑀲𑁆𑀫𑀺𑀁 𑀲𑀫𑀬𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀜𑁆𑀜𑀻 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺. 𑀬𑀲𑁆𑀫𑀺𑀁 𑀲𑀫𑀬𑁂 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀅𑀲𑀜𑁆𑀜𑀻 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀻’𑀢𑀺. 𑀇𑀢𑁆𑀣𑁂𑀓𑁂 𑀅𑀪𑀺𑀲𑀜𑁆𑀜𑀸𑀦𑀺𑀭𑁄𑀥𑀁 𑀧𑀜𑁆𑀜𑀧𑁂𑀦𑁆𑀢𑀺.

‘‘𑀢𑀫𑀜𑁆𑀜𑁄 𑀏𑀯𑀫𑀸𑀳 𑁋 ‘𑀦 𑀔𑁄 𑀧𑀦 𑀫𑁂𑀢𑀁 [𑀦 𑀔𑁄 𑀦𑀸𑀫𑁂𑀢𑀁 (𑀲𑀻. 𑀧𑀻.)], 𑀪𑁄, 𑀏𑀯𑀁 𑀪𑀯𑀺𑀲𑁆𑀲𑀢𑀺. 𑀲𑀜𑁆𑀜𑀸 𑀳𑀺, 𑀪𑁄, 𑀧𑀼𑀭𑀺𑀲𑀲𑁆𑀲 𑀅𑀢𑁆𑀢𑀸. 𑀲𑀸 𑀘 𑀔𑁄 𑀉𑀧𑁂𑀢𑀺𑀧𑀺 𑀅𑀧𑁂𑀢𑀺𑀧𑀺. 𑀬𑀲𑁆𑀫𑀺𑀁 𑀲𑀫𑀬𑁂 𑀉𑀧𑁂𑀢𑀺, 𑀲𑀜𑁆𑀜𑀻 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺. 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀧𑁂𑀢𑀺, 𑀅𑀲𑀜𑁆𑀜𑀻 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀻’𑀢𑀺. 𑀇𑀢𑁆𑀣𑁂𑀓𑁂 𑀅𑀪𑀺𑀲𑀜𑁆𑀜𑀸𑀦𑀺𑀭𑁄𑀥𑀁 𑀧𑀜𑁆𑀜𑀧𑁂𑀦𑁆𑀢𑀺.

‘‘𑀢𑀫𑀜𑁆𑀜𑁄 𑀏𑀯𑀫𑀸𑀳 𑁋 ‘𑀦 𑀔𑁄 𑀧𑀦 𑀫𑁂𑀢𑀁, 𑀪𑁄, 𑀏𑀯𑀁 𑀪𑀯𑀺𑀲𑁆𑀲𑀢𑀺. 𑀲𑀦𑁆𑀢𑀺 𑀳𑀺, 𑀪𑁄, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀫𑀳𑀺𑀤𑁆𑀥𑀺𑀓𑀸 𑀫𑀳𑀸𑀦𑀼𑀪𑀸𑀯𑀸. 𑀢𑁂 𑀇𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀜𑁆𑀜𑀁 𑀉𑀧𑀓𑀟𑁆𑀠𑀦𑁆𑀢𑀺𑀧𑀺 𑀅𑀧𑀓𑀟𑁆𑀠𑀦𑁆𑀢𑀺𑀧𑀺. 𑀬𑀲𑁆𑀫𑀺𑀁 𑀲𑀫𑀬𑁂 𑀉𑀧𑀓𑀟𑁆𑀠𑀦𑁆𑀢𑀺, 𑀲𑀜𑁆𑀜𑀻 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺. 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀧𑀓𑀟𑁆𑀠𑀦𑁆𑀢𑀺, 𑀅𑀲𑀜𑁆𑀜𑀻 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀻’𑀢𑀺. 𑀇𑀢𑁆𑀣𑁂𑀓𑁂 𑀅𑀪𑀺𑀲𑀜𑁆𑀜𑀸𑀦𑀺𑀭𑁄𑀥𑀁 𑀧𑀜𑁆𑀜𑀧𑁂𑀦𑁆𑀢𑀺.

‘‘𑀢𑀫𑀜𑁆𑀜𑁄 𑀏𑀯𑀫𑀸𑀳 𑁋 ‘𑀦 𑀔𑁄 𑀧𑀦 𑀫𑁂𑀢𑀁, 𑀪𑁄, 𑀏𑀯𑀁 𑀪𑀯𑀺𑀲𑁆𑀲𑀢𑀺. 𑀲𑀦𑁆𑀢𑀺 𑀳𑀺, 𑀪𑁄, 𑀤𑁂𑀯𑀢𑀸 𑀫𑀳𑀺𑀤𑁆𑀥𑀺𑀓𑀸 𑀫𑀳𑀸𑀦𑀼𑀪𑀸𑀯𑀸. 𑀢𑀸 𑀇𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀜𑁆𑀜𑀁 𑀉𑀧𑀓𑀟𑁆𑀠𑀦𑁆𑀢𑀺𑀧𑀺 𑀅𑀧𑀓𑀟𑁆𑀠𑀦𑁆𑀢𑀺𑀧𑀺. 𑀬𑀲𑁆𑀫𑀺𑀁 𑀲𑀫𑀬𑁂 𑀉𑀧𑀓𑀟𑁆𑀠𑀦𑁆𑀢𑀺, 𑀲𑀜𑁆𑀜𑀻 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺. 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀧𑀓𑀟𑁆𑀠𑀦𑁆𑀢𑀺, 𑀅𑀲𑀜𑁆𑀜𑀻 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀻’𑀢𑀺. 𑀇𑀢𑁆𑀣𑁂𑀓𑁂 𑀅𑀪𑀺𑀲𑀜𑁆𑀜𑀸𑀦𑀺𑀭𑁄𑀥𑀁 𑀧𑀜𑁆𑀜𑀧𑁂𑀦𑁆𑀢𑀺.

‘‘𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁𑀬𑁂𑀯 𑀆𑀭𑀩𑁆𑀪 𑀲𑀢𑀺 𑀉𑀤𑀧𑀸𑀤𑀺 𑁋 ‘𑀅𑀳𑁄 𑀦𑀽𑀦 𑀪𑀕𑀯𑀸, 𑀅𑀳𑁄 𑀦𑀽𑀦 𑀲𑀼𑀕𑀢𑁄, 𑀬𑁄 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀲𑀼𑀓𑀼𑀲𑀮𑁄’𑀢𑀺. 𑀪𑀕𑀯𑀸, 𑀪𑀦𑁆𑀢𑁂, 𑀓𑀼𑀲𑀮𑁄, 𑀪𑀕𑀯𑀸 𑀧𑀓𑀢𑀜𑁆𑀜𑀽 𑀅𑀪𑀺𑀲𑀜𑁆𑀜𑀸𑀦𑀺𑀭𑁄𑀥𑀲𑁆𑀲. 𑀓𑀣𑀁 𑀦𑀼 𑀔𑁄, 𑀪𑀦𑁆𑀢𑁂, 𑀅𑀪𑀺𑀲𑀜𑁆𑀜𑀸𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺?

𑀲𑀳𑁂𑀢𑀼𑀓𑀲𑀜𑁆𑀜𑀼𑀧𑁆𑀧𑀸𑀤𑀦𑀺𑀭𑁄𑀥𑀓𑀣𑀸

𑁪𑁧𑁨. ‘‘𑀢𑀢𑁆𑀭, 𑀧𑁄𑀝𑁆𑀞𑀧𑀸𑀤, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀫𑀸𑀳𑀁𑀲𑀼 𑁋 ‘𑀅𑀳𑁂𑀢𑀽 𑀅𑀧𑁆𑀧𑀘𑁆𑀘𑀬𑀸 𑀧𑀼𑀭𑀺𑀲𑀲𑁆𑀲 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀦𑁆𑀢𑀺𑀧𑀺 𑀦𑀺𑀭𑀼𑀚𑁆𑀛𑀦𑁆𑀢𑀺𑀧𑀻’𑀢𑀺, 𑀆𑀤𑀺𑀢𑁄𑀯 𑀢𑁂𑀲𑀁 𑀅𑀧𑀭𑀤𑁆𑀥𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀲𑀳𑁂𑀢𑀽 𑀳𑀺, 𑀧𑁄𑀝𑁆𑀞𑀧𑀸𑀤, 𑀲𑀧𑁆𑀧𑀘𑁆𑀘𑀬𑀸 𑀧𑀼𑀭𑀺𑀲𑀲𑁆𑀲 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀦𑁆𑀢𑀺𑀧𑀺 𑀦𑀺𑀭𑀼𑀚𑁆𑀛𑀦𑁆𑀢𑀺𑀧𑀺. 𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀢𑀺’’.

𑁪𑁧𑁩. ‘‘𑀓𑀸 𑀘 𑀲𑀺𑀓𑁆𑀔𑀸’’𑀢𑀺? 𑀪𑀕𑀯𑀸 𑀅𑀯𑁄𑀘 𑁋 ‘‘𑀇𑀥, 𑀧𑁄𑀝𑁆𑀞𑀧𑀸𑀤, 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… (𑀬𑀣𑀸 𑁧𑁯𑁦-𑁨𑁧𑁨 𑀅𑀦𑀼𑀘𑁆𑀙𑁂𑀤𑁂𑀲𑀼, 𑀏𑀯𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁). 𑀏𑀯𑀁 𑀔𑁄, 𑀧𑁄𑀝𑁆𑀞𑀧𑀸𑀤, 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺…𑀧𑁂… 𑀢𑀲𑁆𑀲𑀺𑀫𑁂 𑀧𑀜𑁆𑀘𑀦𑀻𑀯𑀭𑀡𑁂 𑀧𑀳𑀻𑀦𑁂 𑀅𑀢𑁆𑀢𑀦𑀺 𑀲𑀫𑀦𑀼𑀧𑀲𑁆𑀲𑀢𑁄 𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀺, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑁂𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀲𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺, 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺, 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑀲𑁆𑀲 𑀬𑀸 𑀧𑀼𑀭𑀺𑀫𑀸 𑀓𑀸𑀫𑀲𑀜𑁆𑀜𑀸, 𑀲𑀸 𑀦𑀺𑀭𑀼𑀚𑁆𑀛𑀢𑀺. 𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺, 𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀲𑀼𑀔𑀼𑀫-𑀲𑀘𑁆𑀘𑀲𑀜𑁆𑀜𑀻𑀬𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺. 𑀏𑀯𑀫𑁆𑀧𑀺 𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀢𑀺. 𑀅𑀬𑀁 𑀲𑀺𑀓𑁆𑀔𑀸’’𑀢𑀺 𑀪𑀕𑀯𑀸 𑀅𑀯𑁄𑀘.

‘‘𑀧𑀼𑀦 𑀘𑀧𑀭𑀁, 𑀧𑁄𑀝𑁆𑀞𑀧𑀸𑀤, 𑀪𑀺𑀓𑁆𑀔𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑀲𑁆𑀲 𑀬𑀸 𑀧𑀼𑀭𑀺𑀫𑀸 𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀸, 𑀲𑀸 𑀦𑀺𑀭𑀼𑀚𑁆𑀛𑀢𑀺. 𑀲𑀫𑀸𑀥𑀺𑀚𑀧𑀻𑀢𑀺𑀲𑀼𑀔𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺, 𑀲𑀫𑀸𑀥𑀺𑀚𑀧𑀻𑀢𑀺𑀲𑀼𑀔𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀻𑀬𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺. 𑀏𑀯𑀫𑁆𑀧𑀺 𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀢𑀺. 𑀅𑀬𑀫𑁆𑀧𑀺 𑀲𑀺𑀓𑁆𑀔𑀸’’𑀢𑀺 𑀪𑀕𑀯𑀸 𑀅𑀯𑁄𑀘.

‘‘𑀧𑀼𑀦 𑀘𑀧𑀭𑀁, 𑀧𑁄𑀝𑁆𑀞𑀧𑀸𑀤, 𑀪𑀺𑀓𑁆𑀔𑀼 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄, 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’’𑀢𑀺, 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑀲𑁆𑀲 𑀬𑀸 𑀧𑀼𑀭𑀺𑀫𑀸 𑀲𑀫𑀸𑀥𑀺𑀚𑀧𑀻𑀢𑀺𑀲𑀼𑀔𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀸, 𑀲𑀸 𑀦𑀺𑀭𑀼𑀚𑁆𑀛𑀢𑀺. 𑀉𑀧𑁂𑀓𑁆𑀔𑀸𑀲𑀼𑀔𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺, 𑀉𑀧𑁂𑀓𑁆𑀔𑀸𑀲𑀼𑀔𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀻𑀬𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺. 𑀏𑀯𑀫𑁆𑀧𑀺 𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀢𑀺. 𑀅𑀬𑀫𑁆𑀧𑀺 𑀲𑀺𑀓𑁆𑀔𑀸’’𑀢𑀺 𑀪𑀕𑀯𑀸 𑀅𑀯𑁄𑀘.

‘‘𑀧𑀼𑀦 𑀘𑀧𑀭𑀁, 𑀧𑁄𑀝𑁆𑀞𑀧𑀸𑀤, 𑀪𑀺𑀓𑁆𑀔𑀼 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑀲𑁆𑀲 𑀬𑀸 𑀧𑀼𑀭𑀺𑀫𑀸 𑀉𑀧𑁂𑀓𑁆𑀔𑀸𑀲𑀼𑀔𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀸, 𑀲𑀸 𑀦𑀺𑀭𑀼𑀚𑁆𑀛𑀢𑀺. 𑀅𑀤𑀼𑀓𑁆𑀔𑀫𑀲𑀼𑀔𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀻𑀬𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺. 𑀏𑀯𑀫𑁆𑀧𑀺 𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀢𑀺. 𑀅𑀬𑀫𑁆𑀧𑀺 𑀲𑀺𑀓𑁆𑀔𑀸’’𑀢𑀺 𑀪𑀕𑀯𑀸 𑀅𑀯𑁄𑀘.

‘‘𑀧𑀼𑀦 𑀘𑀧𑀭𑀁, 𑀧𑁄𑀝𑁆𑀞𑀧𑀸𑀤, 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘𑀅𑀦𑀦𑁆𑀢𑁄 𑀆𑀓𑀸𑀲𑁄’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑀲𑁆𑀲 𑀬𑀸 𑀧𑀼𑀭𑀺𑀫𑀸 𑀭𑀽𑀧𑀲𑀜𑁆𑀜𑀸 [𑀧𑀼𑀭𑀺𑀫𑀲𑀜𑁆𑀜𑀸 (𑀓.)], 𑀲𑀸 𑀦𑀺𑀭𑀼𑀚𑁆𑀛𑀢𑀺. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀻𑀬𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺. 𑀏𑀯𑀫𑁆𑀧𑀺 𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀢𑀺. 𑀅𑀬𑀫𑁆𑀧𑀺 𑀲𑀺𑀓𑁆𑀔𑀸’’𑀢𑀺 𑀪𑀕𑀯𑀸 𑀅𑀯𑁄𑀘.

‘‘𑀧𑀼𑀦 𑀘𑀧𑀭𑀁, 𑀧𑁄𑀝𑁆𑀞𑀧𑀸𑀤, 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑀲𑁆𑀲 𑀬𑀸 𑀧𑀼𑀭𑀺𑀫𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀸, 𑀲𑀸 𑀦𑀺𑀭𑀼𑀚𑁆𑀛𑀢𑀺. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀻𑀬𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺. 𑀏𑀯𑀫𑁆𑀧𑀺 𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀢𑀺. 𑀅𑀬𑀫𑁆𑀧𑀺 𑀲𑀺𑀓𑁆𑀔𑀸’’𑀢𑀺 𑀪𑀕𑀯𑀸 𑀅𑀯𑁄𑀘.

‘‘𑀧𑀼𑀦 𑀘𑀧𑀭𑀁, 𑀧𑁄𑀝𑁆𑀞𑀧𑀸𑀤, 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀦𑀢𑁆𑀣𑀺 𑀓𑀺𑀜𑁆𑀘𑀻’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑀲𑁆𑀲 𑀬𑀸 𑀧𑀼𑀭𑀺𑀫𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀸, 𑀲𑀸 𑀦𑀺𑀭𑀼𑀚𑁆𑀛𑀢𑀺. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀼𑀔𑀼𑀫𑀲𑀘𑁆𑀘𑀲𑀜𑁆𑀜𑀻𑀬𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀺. 𑀏𑀯𑀫𑁆𑀧𑀺 𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀺𑀓𑁆𑀔𑀸 𑀏𑀓𑀸 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀢𑀺. 𑀅𑀬𑀫𑁆𑀧𑀺 𑀲𑀺𑀓𑁆𑀔𑀸’’𑀢𑀺 𑀪𑀕𑀯𑀸 𑀅𑀯𑁄𑀘.

𑁪𑁧𑁪. ‘‘𑀬𑀢𑁄 𑀔𑁄, 𑀧𑁄𑀝𑁆𑀞𑀧𑀸𑀤, 𑀪𑀺𑀓𑁆𑀔𑀼 𑀇𑀥 𑀲𑀓𑀲𑀜𑁆𑀜𑀻 𑀳𑁄𑀢𑀺, 𑀲𑁄 𑀢𑀢𑁄 𑀅𑀫𑀼𑀢𑁆𑀭 𑀢𑀢𑁄 𑀅𑀫𑀼𑀢𑁆𑀭 𑀅𑀦𑀼𑀧𑀼𑀩𑁆𑀩𑁂𑀦 𑀲𑀜𑁆𑀜𑀕𑁆𑀕𑀁 𑀨𑀼𑀲𑀢𑀺. 𑀢𑀲𑁆𑀲 𑀲𑀜𑁆𑀜𑀕𑁆𑀕𑁂 𑀞𑀺𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀘𑁂𑀢𑀬𑀫𑀸𑀦𑀲𑁆𑀲 𑀫𑁂 𑀧𑀸𑀧𑀺𑀬𑁄, 𑀅𑀘𑁂𑀢𑀬𑀫𑀸𑀦𑀲𑁆𑀲 𑀫𑁂 𑀲𑁂𑀬𑁆𑀬𑁄. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀘𑁂𑀢𑁂𑀬𑁆𑀬𑀁, 𑀅𑀪𑀺𑀲𑀗𑁆𑀔𑀭𑁂𑀬𑁆𑀬𑀁, 𑀇𑀫𑀸 𑀘 𑀫𑁂 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑁂𑀬𑁆𑀬𑀼𑀁, 𑀅𑀜𑁆𑀜𑀸 𑀘 𑀑𑀴𑀸𑀭𑀺𑀓𑀸 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁; 𑀬𑀁𑀦𑀽𑀦𑀸𑀳𑀁 𑀦 𑀘𑁂𑀯 𑀘𑁂𑀢𑁂𑀬𑁆𑀬𑀁 𑀦 𑀘 𑀅𑀪𑀺𑀲𑀗𑁆𑀔𑀭𑁂𑀬𑁆𑀬’𑀦𑁆𑀢𑀺. 𑀲𑁄 𑀦 𑀘𑁂𑀯 𑀘𑁂𑀢𑁂𑀢𑀺, 𑀦 𑀘 𑀅𑀪𑀺𑀲𑀗𑁆𑀔𑀭𑁄𑀢𑀺. 𑀢𑀲𑁆𑀲 𑀅𑀘𑁂𑀢𑀬𑀢𑁄 𑀅𑀦𑀪𑀺𑀲𑀗𑁆𑀔𑀭𑁄𑀢𑁄 𑀢𑀸 𑀘𑁂𑀯 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀅𑀜𑁆𑀜𑀸 𑀘 𑀑𑀴𑀸𑀭𑀺𑀓𑀸 𑀲𑀜𑁆𑀜𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑁄 𑀦𑀺𑀭𑁄𑀥𑀁 𑀨𑀼𑀲𑀢𑀺. 𑀏𑀯𑀁 𑀔𑁄, 𑀧𑁄𑀝𑁆𑀞𑀧𑀸𑀤, 𑀅𑀦𑀼𑀧𑀼𑀩𑁆𑀩𑀸𑀪𑀺𑀲𑀜𑁆𑀜𑀸𑀦𑀺𑀭𑁄𑀥-𑀲𑀫𑁆𑀧𑀚𑀸𑀦-𑀲𑀫𑀸𑀧𑀢𑁆𑀢𑀺 𑀳𑁄𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀧𑁄𑀝𑁆𑀞𑀧𑀸𑀤, 𑀅𑀧𑀺 𑀦𑀼 𑀢𑁂 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑀸 𑀅𑀦𑀼𑀧𑀼𑀩𑁆𑀩𑀸𑀪𑀺𑀲𑀜𑁆𑀜𑀸𑀦𑀺𑀭𑁄𑀥-𑀲𑀫𑁆𑀧𑀚𑀸𑀦-𑀲𑀫𑀸𑀧𑀢𑁆𑀢𑀺 𑀲𑀼𑀢𑀧𑀼𑀩𑁆𑀩𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂. 𑀏𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀆𑀚𑀸𑀦𑀸𑀫𑀺 𑁋 ‘𑀬𑀢𑁄 𑀔𑁄, 𑀧𑁄𑀝𑁆𑀞𑀧𑀸𑀤, 𑀪𑀺𑀓𑁆𑀔𑀼 𑀇𑀥 𑀲𑀓𑀲𑀜𑁆𑀜𑀻 𑀳𑁄𑀢𑀺, 𑀲𑁄 𑀢𑀢𑁄 𑀅𑀫𑀼𑀢𑁆𑀭 𑀢𑀢𑁄 𑀅𑀫𑀼𑀢𑁆𑀭 𑀅𑀦𑀼𑀧𑀼𑀩𑁆𑀩𑁂𑀦 𑀲𑀜𑁆𑀜𑀕𑁆𑀕𑀁 𑀨𑀼𑀲𑀢𑀺, 𑀢𑀲𑁆𑀲 𑀲𑀜𑁆𑀜𑀕𑁆𑀕𑁂 𑀞𑀺𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀘𑁂𑀢𑀬𑀫𑀸𑀦𑀲𑁆𑀲 𑀫𑁂 𑀧𑀸𑀧𑀺𑀬𑁄, 𑀅𑀘𑁂𑀢𑀬𑀫𑀸𑀦𑀲𑁆𑀲 𑀫𑁂 𑀲𑁂𑀬𑁆𑀬𑁄. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀘𑁂𑀢𑁂𑀬𑁆𑀬𑀁 𑀅𑀪𑀺𑀲𑀗𑁆𑀔𑀭𑁂𑀬𑁆𑀬𑀁, 𑀇𑀫𑀸 𑀘 𑀫𑁂 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑁂𑀬𑁆𑀬𑀼𑀁, 𑀅𑀜𑁆𑀜𑀸 𑀘 𑀑𑀴𑀸𑀭𑀺𑀓𑀸 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁; 𑀬𑀁𑀦𑀽𑀦𑀸𑀳𑀁 𑀦 𑀘𑁂𑀯 𑀘𑁂𑀢𑁂𑀬𑁆𑀬𑀁, 𑀦 𑀘 𑀅𑀪𑀺𑀲𑀗𑁆𑀔𑀭𑁂𑀬𑁆𑀬’’𑀦𑁆𑀢𑀺. 𑀲𑁄 𑀦 𑀘𑁂𑀯 𑀘𑁂𑀢𑁂𑀢𑀺, 𑀦 𑀘𑀸𑀪𑀺𑀲𑀗𑁆𑀔𑀭𑁄𑀢𑀺, 𑀢𑀲𑁆𑀲 𑀅𑀘𑁂𑀢𑀬𑀢𑁄 𑀅𑀦𑀪𑀺𑀲𑀗𑁆𑀔𑀭𑁄𑀢𑁄 𑀢𑀸 𑀘𑁂𑀯 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀅𑀜𑁆𑀜𑀸 𑀘 𑀑𑀴𑀸𑀭𑀺𑀓𑀸 𑀲𑀜𑁆𑀜𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑁄 𑀦𑀺𑀭𑁄𑀥𑀁 𑀨𑀼𑀲𑀢𑀺. 𑀏𑀯𑀁 𑀔𑁄, 𑀧𑁄𑀝𑁆𑀞𑀧𑀸𑀤, 𑀅𑀦𑀼𑀧𑀼𑀩𑁆𑀩𑀸𑀪𑀺𑀲𑀜𑁆𑀜𑀸𑀦𑀺𑀭𑁄𑀥-𑀲𑀫𑁆𑀧𑀚𑀸𑀦-𑀲𑀫𑀸𑀧𑀢𑁆𑀢𑀺 𑀳𑁄𑀢𑀻’’’𑀢𑀺. ‘‘𑀏𑀯𑀁, 𑀧𑁄𑀝𑁆𑀞𑀧𑀸𑀤𑀸’’𑀢𑀺.

𑁪𑁧𑁫. ‘‘𑀏𑀓𑀜𑁆𑀜𑁂𑀯 𑀦𑀼 𑀔𑁄, 𑀪𑀦𑁆𑀢𑁂, 𑀪𑀕𑀯𑀸 𑀲𑀜𑁆𑀜𑀕𑁆𑀕𑀁 𑀧𑀜𑁆𑀜𑀧𑁂𑀢𑀺, 𑀉𑀤𑀸𑀳𑀼 𑀧𑀼𑀣𑀽𑀧𑀺 𑀲𑀜𑁆𑀜𑀕𑁆𑀕𑁂 𑀧𑀜𑁆𑀜𑀧𑁂𑀢𑀻’’𑀢𑀺? ‘‘𑀏𑀓𑀫𑁆𑀧𑀺 𑀔𑁄 𑀅𑀳𑀁, 𑀧𑁄𑀝𑁆𑀞𑀧𑀸𑀤, 𑀲𑀜𑁆𑀜𑀕𑁆𑀕𑀁 𑀧𑀜𑁆𑀜𑀧𑁂𑀫𑀺, 𑀧𑀼𑀣𑀽𑀧𑀺 𑀲𑀜𑁆𑀜𑀕𑁆𑀕𑁂 𑀧𑀜𑁆𑀜𑀧𑁂𑀫𑀻’’𑀢𑀺. ‘‘𑀬𑀣𑀸 𑀓𑀣𑀁 𑀧𑀦, 𑀪𑀦𑁆𑀢𑁂, 𑀪𑀕𑀯𑀸 𑀏𑀓𑀫𑁆𑀧𑀺 𑀲𑀜𑁆𑀜𑀕𑁆𑀕𑀁 𑀧𑀜𑁆𑀜𑀧𑁂𑀢𑀺, 𑀧𑀼𑀣𑀽𑀧𑀺 𑀲𑀜𑁆𑀜𑀕𑁆𑀕𑁂 𑀧𑀜𑁆𑀜𑀧𑁂𑀢𑀻’’𑀢𑀺? ‘‘𑀬𑀣𑀸 𑀬𑀣𑀸 𑀔𑁄, 𑀧𑁄𑀝𑁆𑀞𑀧𑀸𑀤, 𑀦𑀺𑀭𑁄𑀥𑀁 𑀨𑀼𑀲𑀢𑀺, 𑀢𑀣𑀸 𑀢𑀣𑀸𑀳𑀁 𑀲𑀜𑁆𑀜𑀕𑁆𑀕𑀁 𑀧𑀜𑁆𑀜𑀧𑁂𑀫𑀺. 𑀏𑀯𑀁 𑀔𑁄 𑀅𑀳𑀁, 𑀧𑁄𑀝𑁆𑀞𑀧𑀸𑀤, 𑀏𑀓𑀫𑁆𑀧𑀺 𑀲𑀜𑁆𑀜𑀕𑁆𑀕𑀁 𑀧𑀜𑁆𑀜𑀧𑁂𑀫𑀺, 𑀧𑀼𑀣𑀽𑀧𑀺 𑀲𑀜𑁆𑀜𑀕𑁆𑀕𑁂 𑀧𑀜𑁆𑀜𑀧𑁂𑀫𑀻’’𑀢𑀺.

𑁪𑁧𑁬. ‘‘𑀲𑀜𑁆𑀜𑀸 𑀦𑀼 𑀔𑁄, 𑀪𑀦𑁆𑀢𑁂, 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀘𑁆𑀙𑀸 𑀜𑀸𑀡𑀁, 𑀉𑀤𑀸𑀳𑀼 𑀜𑀸𑀡𑀁 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀘𑁆𑀙𑀸 𑀲𑀜𑁆𑀜𑀸, 𑀉𑀤𑀸𑀳𑀼 𑀲𑀜𑁆𑀜𑀸 𑀘 𑀜𑀸𑀡𑀜𑁆𑀘 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺? ‘‘𑀲𑀜𑁆𑀜𑀸 𑀔𑁄, 𑀧𑁄𑀝𑁆𑀞𑀧𑀸𑀤, 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀘𑁆𑀙𑀸 𑀜𑀸𑀡𑀁, 𑀲𑀜𑁆𑀜𑀼𑀧𑁆𑀧𑀸𑀤𑀸 𑀘 𑀧𑀦 𑀜𑀸𑀡𑀼𑀧𑁆𑀧𑀸𑀤𑁄 𑀳𑁄𑀢𑀺. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀇𑀤𑀧𑁆𑀧𑀘𑁆𑀘𑀬𑀸 𑀓𑀺𑀭 𑀫𑁂 𑀜𑀸𑀡𑀁 𑀉𑀤𑀧𑀸𑀤𑀻’𑀢𑀺. 𑀇𑀫𑀺𑀦𑀸 𑀔𑁄 𑀏𑀢𑀁, 𑀧𑁄𑀝𑁆𑀞𑀧𑀸𑀤, 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁 𑁋 𑀬𑀣𑀸 𑀲𑀜𑁆𑀜𑀸 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀘𑁆𑀙𑀸 𑀜𑀸𑀡𑀁, 𑀲𑀜𑁆𑀜𑀼𑀧𑁆𑀧𑀸𑀤𑀸 𑀘 𑀧𑀦 𑀜𑀸𑀡𑀼𑀧𑁆𑀧𑀸𑀤𑁄 𑀳𑁄𑀢𑀻’’𑀢𑀺.

𑀲𑀜𑁆𑀜𑀸𑀅𑀢𑁆𑀢𑀓𑀣𑀸

𑁪𑁧𑁭. ‘‘𑀲𑀜𑁆𑀜𑀸 𑀦𑀼 𑀔𑁄, 𑀪𑀦𑁆𑀢𑁂, 𑀧𑀼𑀭𑀺𑀲𑀲𑁆𑀲 𑀅𑀢𑁆𑀢𑀸, 𑀉𑀤𑀸𑀳𑀼 𑀅𑀜𑁆𑀜𑀸 𑀲𑀜𑁆𑀜𑀸 𑀅𑀜𑁆𑀜𑁄 𑀅𑀢𑁆𑀢𑀸’’𑀢𑀺? ‘‘𑀓𑀁 𑀧𑀦 𑀢𑁆𑀯𑀁, 𑀧𑁄𑀝𑁆𑀞𑀧𑀸𑀤, 𑀅𑀢𑁆𑀢𑀸𑀦𑀁 𑀧𑀘𑁆𑀘𑁂𑀲𑀻’’𑀢𑀺? ‘‘𑀑𑀴𑀸𑀭𑀺𑀓𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀢𑁆𑀢𑀸𑀦𑀁 𑀧𑀘𑁆𑀘𑁂𑀫𑀺 𑀭𑀽𑀧𑀺𑀁 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀁 𑀓𑀩𑀴𑀻𑀓𑀸𑀭𑀸𑀳𑀸𑀭𑀪𑀓𑁆𑀔’’𑀦𑁆𑀢𑀺 [𑀓𑀩𑀴𑀻𑀓𑀸𑀭𑀪𑀓𑁆𑀔𑀦𑁆𑀢𑀺 (𑀲𑁆𑀬𑀸. 𑀓.)]. ‘‘𑀑𑀴𑀸𑀭𑀺𑀓𑁄 𑀘 𑀳𑀺 𑀢𑁂, 𑀧𑁄𑀝𑁆𑀞𑀧𑀸𑀤, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲 𑀭𑀽𑀧𑀻 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑀪𑀓𑁆𑀔𑁄. 𑀏𑀯𑀁 𑀲𑀦𑁆𑀢𑀁 𑀔𑁄 𑀢𑁂, 𑀧𑁄𑀝𑁆𑀞𑀧𑀸𑀤, 𑀅𑀜𑁆𑀜𑀸𑀯 𑀲𑀜𑁆𑀜𑀸 𑀪𑀯𑀺𑀲𑁆𑀲𑀢𑀺 𑀅𑀜𑁆𑀜𑁄 𑀅𑀢𑁆𑀢𑀸. 𑀢𑀤𑀫𑀺𑀦𑀸𑀧𑁂𑀢𑀁, 𑀧𑁄𑀝𑁆𑀞𑀧𑀸𑀤, 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁 𑀬𑀣𑀸 𑀅𑀜𑁆𑀜𑀸𑀯 𑀲𑀜𑁆𑀜𑀸 𑀪𑀯𑀺𑀲𑁆𑀲𑀢𑀺 𑀅𑀜𑁆𑀜𑁄 𑀅𑀢𑁆𑀢𑀸. 𑀢𑀺𑀝𑁆𑀞𑀢𑁂𑀯 𑀲𑀸𑀬𑀁 [𑀢𑀺𑀝𑁆𑀞𑀢𑁂𑀯𑀸𑀬𑀁 (𑀲𑀻. 𑀧𑀻.)], 𑀧𑁄𑀝𑁆𑀞𑀧𑀸𑀤, 𑀑𑀴𑀸𑀭𑀺𑀓𑁄 𑀅𑀢𑁆𑀢𑀸 𑀭𑀽𑀧𑀻 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑀪𑀓𑁆𑀔𑁄, 𑀅𑀣 𑀇𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀜𑁆𑀜𑀸 𑀘 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀜𑁆𑀜𑀸 𑀘 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀇𑀫𑀺𑀦𑀸 𑀔𑁄 𑀏𑀢𑀁, 𑀧𑁄𑀝𑁆𑀞𑀧𑀸𑀤, 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁 𑀬𑀣𑀸 𑀅𑀜𑁆𑀜𑀸𑀯 𑀲𑀜𑁆𑀜𑀸 𑀪𑀯𑀺𑀲𑁆𑀲𑀢𑀺 𑀅𑀜𑁆𑀜𑁄 𑀅𑀢𑁆𑀢𑀸’’𑀢𑀺.

𑁪𑁧𑁮. ‘‘𑀫𑀦𑁄𑀫𑀬𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀢𑁆𑀢𑀸𑀦𑀁 𑀧𑀘𑁆𑀘𑁂𑀫𑀺 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀺𑀁 𑀅𑀳𑀻𑀦𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺. ‘‘𑀫𑀦𑁄𑀫𑀬𑁄 𑀘 𑀳𑀺 𑀢𑁂, 𑀧𑁄𑀝𑁆𑀞𑀧𑀸𑀤, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀻 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑁄, 𑀏𑀯𑀁 𑀲𑀦𑁆𑀢𑀫𑁆𑀧𑀺 𑀔𑁄 𑀢𑁂, 𑀧𑁄𑀝𑁆𑀞𑀧𑀸𑀤, 𑀅𑀜𑁆𑀜𑀸𑀯 𑀲𑀜𑁆𑀜𑀸 𑀪𑀯𑀺𑀲𑁆𑀲𑀢𑀺 𑀅𑀜𑁆𑀜𑁄 𑀅𑀢𑁆𑀢𑀸. 𑀢𑀤𑀫𑀺𑀦𑀸𑀧𑁂𑀢𑀁, 𑀧𑁄𑀝𑁆𑀞𑀧𑀸𑀤, 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁 𑀬𑀣𑀸 𑀅𑀜𑁆𑀜𑀸𑀯 𑀲𑀜𑁆𑀜𑀸 𑀪𑀯𑀺𑀲𑁆𑀲𑀢𑀺 𑀅𑀜𑁆𑀜𑁄 𑀅𑀢𑁆𑀢𑀸. 𑀢𑀺𑀝𑁆𑀞𑀢𑁂𑀯 𑀲𑀸𑀬𑀁, 𑀧𑁄𑀝𑁆𑀞𑀧𑀸𑀤, 𑀫𑀦𑁄𑀫𑀬𑁄 𑀅𑀢𑁆𑀢𑀸 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀻 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑁄, 𑀅𑀣 𑀇𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀜𑁆𑀜𑀸 𑀘 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀜𑁆𑀜𑀸 𑀘 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀇𑀫𑀺𑀦𑀸𑀧𑀺 𑀔𑁄 𑀏𑀢𑀁, 𑀧𑁄𑀝𑁆𑀞𑀧𑀸𑀤, 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁 𑀬𑀣𑀸 𑀅𑀜𑁆𑀜𑀸𑀯 𑀲𑀜𑁆𑀜𑀸 𑀪𑀯𑀺𑀲𑁆𑀲𑀢𑀺 𑀅𑀜𑁆𑀜𑁄 𑀅𑀢𑁆𑀢𑀸’’𑀢𑀺.

𑁪𑁧𑁯. ‘‘𑀅𑀭𑀽𑀧𑀺𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀢𑁆𑀢𑀸𑀦𑀁 𑀧𑀘𑁆𑀘𑁂𑀫𑀺 𑀲𑀜𑁆𑀜𑀸𑀫𑀬’’𑀦𑁆𑀢𑀺. ‘‘𑀅𑀭𑀽𑀧𑀻 𑀘 𑀳𑀺 𑀢𑁂, 𑀧𑁄𑀝𑁆𑀞𑀧𑀸𑀤, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲 𑀲𑀜𑁆𑀜𑀸𑀫𑀬𑁄, 𑀏𑀯𑀁 𑀲𑀦𑁆𑀢𑀫𑁆𑀧𑀺 𑀔𑁄 𑀢𑁂, 𑀧𑁄𑀝𑁆𑀞𑀧𑀸𑀤, 𑀅𑀜𑁆𑀜𑀸𑀯 𑀲𑀜𑁆𑀜𑀸 𑀪𑀯𑀺𑀲𑁆𑀲𑀢𑀺 𑀅𑀜𑁆𑀜𑁄 𑀅𑀢𑁆𑀢𑀸. 𑀢𑀤𑀫𑀺𑀦𑀸𑀧𑁂𑀢𑀁, 𑀧𑁄𑀝𑁆𑀞𑀧𑀸𑀤, 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁 𑀬𑀣𑀸 𑀅𑀜𑁆𑀜𑀸𑀯 𑀲𑀜𑁆𑀜𑀸 𑀪𑀯𑀺𑀲𑁆𑀲𑀢𑀺 𑀅𑀜𑁆𑀜𑁄 𑀅𑀢𑁆𑀢𑀸. 𑀢𑀺𑀝𑁆𑀞𑀢𑁂𑀯 𑀲𑀸𑀬𑀁, 𑀧𑁄𑀝𑁆𑀞𑀧𑀸𑀤, 𑀅𑀭𑀽𑀧𑀻 𑀅𑀢𑁆𑀢𑀸 𑀲𑀜𑁆𑀜𑀸𑀫𑀬𑁄, 𑀅𑀣 𑀇𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀜𑁆𑀜𑀸 𑀘 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀜𑁆𑀜𑀸 𑀘 𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀇𑀫𑀺𑀦𑀸𑀧𑀺 𑀔𑁄 𑀏𑀢𑀁, 𑀧𑁄𑀝𑁆𑀞𑀧𑀸𑀤, 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁 𑀬𑀣𑀸 𑀅𑀜𑁆𑀜𑀸𑀯 𑀲𑀜𑁆𑀜𑀸 𑀪𑀯𑀺𑀲𑁆𑀲𑀢𑀺 𑀅𑀜𑁆𑀜𑁄 𑀅𑀢𑁆𑀢𑀸’’𑀢𑀺.

𑁪𑁨𑁦. ‘‘𑀲𑀓𑁆𑀓𑀸 𑀧𑀦𑁂𑀢𑀁, 𑀪𑀦𑁆𑀢𑁂, 𑀫𑀬𑀸 𑀜𑀸𑀢𑀼𑀁 𑁋 ‘𑀲𑀜𑁆𑀜𑀸 𑀧𑀼𑀭𑀺𑀲𑀲𑁆𑀲 𑀅𑀢𑁆𑀢𑀸’𑀢𑀺 𑀯𑀸 ‘𑀅𑀜𑁆𑀜𑀸𑀯 𑀲𑀜𑁆𑀜𑀸 𑀅𑀜𑁆𑀜𑁄 𑀅𑀢𑁆𑀢𑀸𑀢𑀺 𑀯𑀸’𑀢𑀺? ‘‘𑀤𑀼𑀚𑁆𑀚𑀸𑀦𑀁 𑀔𑁄 𑀏𑀢𑀁 [𑀏𑀯𑀁 (𑀓.)], 𑀧𑁄𑀝𑁆𑀞𑀧𑀸𑀤, 𑀢𑀬𑀸 𑀅𑀜𑁆𑀜𑀤𑀺𑀝𑁆𑀞𑀺𑀓𑁂𑀦 𑀅𑀜𑁆𑀜𑀔𑀦𑁆𑀢𑀺𑀓𑁂𑀦 𑀅𑀜𑁆𑀜𑀭𑀼𑀘𑀺𑀓𑁂𑀦 𑀅𑀜𑁆𑀜𑀢𑁆𑀭𑀸𑀬𑁄𑀕𑁂𑀦 𑀅𑀜𑁆𑀜𑀢𑁆𑀭𑀸𑀘𑀭𑀺𑀬𑀓𑁂𑀦 𑁋 ‘𑀲𑀜𑁆𑀜𑀸 𑀧𑀼𑀭𑀺𑀲𑀲𑁆𑀲 𑀅𑀢𑁆𑀢𑀸’𑀢𑀺 𑀯𑀸, ‘𑀅𑀜𑁆𑀜𑀸𑀯 𑀲𑀜𑁆𑀜𑀸 𑀅𑀜𑁆𑀜𑁄 𑀅𑀢𑁆𑀢𑀸𑀢𑀺 𑀯𑀸’’’𑀢𑀺.

‘‘𑀲𑀘𑁂 𑀢𑀁, 𑀪𑀦𑁆𑀢𑁂, 𑀫𑀬𑀸 𑀤𑀼𑀚𑁆𑀚𑀸𑀦𑀁 𑀅𑀜𑁆𑀜𑀤𑀺𑀝𑁆𑀞𑀺𑀓𑁂𑀦 𑀅𑀜𑁆𑀜𑀔𑀦𑁆𑀢𑀺𑀓𑁂𑀦 𑀅𑀜𑁆𑀜𑀭𑀼𑀘𑀺𑀓𑁂𑀦 𑀅𑀜𑁆𑀜𑀢𑁆𑀭𑀸𑀬𑁄𑀕𑁂𑀦 𑀅𑀜𑁆𑀜𑀢𑁆𑀭𑀸𑀘𑀭𑀺𑀬𑀓𑁂𑀦 𑁋 ‘𑀲𑀜𑁆𑀜𑀸 𑀧𑀼𑀭𑀺𑀲𑀲𑁆𑀲 𑀅𑀢𑁆𑀢𑀸’𑀢𑀺 𑀯𑀸, ‘𑀅𑀜𑁆𑀜𑀸𑀯 𑀲𑀜𑁆𑀜𑀸 𑀅𑀜𑁆𑀜𑁄 𑀅𑀢𑁆𑀢𑀸’𑀢𑀺 𑀯𑀸; ‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’𑀦𑁆𑀢𑀺? 𑀅𑀩𑁆𑀬𑀸𑀓𑀢𑀁 𑀔𑁄 𑀏𑀢𑀁, 𑀧𑁄𑀝𑁆𑀞𑀧𑀸𑀤, 𑀫𑀬𑀸 𑁋 ‘𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’𑀦𑁆𑀢𑀺.

‘‘𑀓𑀺𑀁 𑀧𑀦, 𑀪𑀦𑁆𑀢𑁂, ‘𑀅𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’’𑀦𑁆𑀢𑀺? ‘‘𑀏𑀢𑀫𑁆𑀧𑀺 𑀔𑁄, 𑀧𑁄𑀝𑁆𑀞𑀧𑀸𑀤, 𑀫𑀬𑀸 𑀅𑀩𑁆𑀬𑀸𑀓𑀢𑀁 𑁋 ‘𑀅𑀲𑀲𑁆𑀲𑀢𑁄 𑀮𑁄𑀓𑁄, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’’𑀦𑁆𑀢𑀺.

‘‘𑀓𑀺𑀁 𑀧𑀦, 𑀪𑀦𑁆𑀢𑁂, ‘𑀅𑀦𑁆𑀢𑀯𑀸 𑀮𑁄𑀓𑁄…𑀧𑁂… ‘𑀅𑀦𑀦𑁆𑀢𑀯𑀸 𑀮𑁄𑀓𑁄 … ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁… ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀁… ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’’𑀦𑁆𑀢𑀺? ‘‘𑀏𑀢𑀫𑁆𑀧𑀺 𑀔𑁄, 𑀧𑁄𑀝𑁆𑀞𑀧𑀸𑀤, 𑀫𑀬𑀸 𑀅𑀩𑁆𑀬𑀸𑀓𑀢𑀁 𑁋 ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’’𑀦𑁆𑀢𑀺.

‘‘𑀓𑀲𑁆𑀫𑀸 𑀧𑀦𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀅𑀩𑁆𑀬𑀸𑀓𑀢’’𑀦𑁆𑀢𑀺? ‘‘𑀦 𑀳𑁂𑀢𑀁, 𑀧𑁄𑀝𑁆𑀞𑀧𑀸𑀤, 𑀅𑀢𑁆𑀣𑀲𑀁𑀳𑀺𑀢𑀁 𑀦 𑀥𑀫𑁆𑀫𑀲𑀁𑀳𑀺𑀢𑀁 𑀦𑀸𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀁, 𑀦 𑀦𑀺𑀩𑁆𑀩𑀺𑀤𑀸𑀬 𑀦 𑀯𑀺𑀭𑀸𑀕𑀸𑀬 𑀦 𑀦𑀺𑀭𑁄𑀥𑀸𑀬 𑀦 𑀉𑀧𑀲𑀫𑀸𑀬 𑀦 𑀅𑀪𑀺𑀜𑁆𑀜𑀸𑀬 𑀦 𑀲𑀫𑁆𑀩𑁄𑀥𑀸𑀬 𑀦 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀏𑀢𑀁 𑀫𑀬𑀸 𑀅𑀩𑁆𑀬𑀸𑀓𑀢’’𑀦𑁆𑀢𑀺.

‘‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀪𑀕𑀯𑀢𑀸 𑀩𑁆𑀬𑀸𑀓𑀢’’𑀦𑁆𑀢𑀺? ‘‘𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀔𑁄, 𑀧𑁄𑀝𑁆𑀞𑀧𑀸𑀤, 𑀫𑀬𑀸 𑀩𑁆𑀬𑀸𑀓𑀢𑀁. 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀔𑁄, 𑀧𑁄𑀝𑁆𑀞𑀧𑀸𑀤, 𑀫𑀬𑀸 𑀩𑁆𑀬𑀸𑀓𑀢𑀁. 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀔𑁄, 𑀧𑁄𑀝𑁆𑀞𑀧𑀸𑀤, 𑀫𑀬𑀸 𑀩𑁆𑀬𑀸𑀓𑀢𑀁. 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀔𑁄, 𑀧𑁄𑀝𑁆𑀞𑀧𑀸𑀤, 𑀫𑀬𑀸 𑀩𑁆𑀬𑀸𑀓𑀢’’𑀦𑁆𑀢𑀺.

‘‘𑀓𑀲𑁆𑀫𑀸 𑀧𑀦𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀩𑁆𑀬𑀸𑀓𑀢’’𑀦𑁆𑀢𑀺? ‘‘𑀏𑀢𑀜𑁆𑀳𑀺, 𑀧𑁄𑀝𑁆𑀞𑀧𑀸𑀤, 𑀅𑀢𑁆𑀣𑀲𑀁𑀳𑀺𑀢𑀁, 𑀏𑀢𑀁 𑀥𑀫𑁆𑀫𑀲𑀁𑀳𑀺𑀢𑀁, 𑀏𑀢𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀁, 𑀏𑀢𑀁 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺; 𑀢𑀲𑁆𑀫𑀸 𑀏𑀢𑀁 𑀫𑀬𑀸 𑀩𑁆𑀬𑀸𑀓𑀢’’𑀦𑁆𑀢𑀺. ‘‘𑀏𑀯𑀫𑁂𑀢𑀁, 𑀪𑀕𑀯𑀸, 𑀏𑀯𑀫𑁂𑀢𑀁, 𑀲𑀼𑀕𑀢. 𑀬𑀲𑁆𑀲𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑁪𑁨𑁧. 𑀅𑀣 𑀔𑁄 𑀢𑁂 𑀧𑀭𑀺𑀩𑁆𑀩𑀸𑀚𑀓𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀧𑁄𑀝𑁆𑀞𑀧𑀸𑀤𑀁 𑀧𑀭𑀺𑀩𑁆𑀩𑀸𑀚𑀓𑀁 𑀲𑀫𑀦𑁆𑀢𑀢𑁄 𑀯𑀸𑀘𑀸 [𑀯𑀸𑀘𑀸𑀬 (𑀲𑁆𑀬𑀸. 𑀓.)] 𑀲𑀦𑁆𑀦𑀺𑀢𑁄𑀤𑀓𑁂𑀦 𑀲𑀜𑁆𑀛𑀩𑁆𑀪𑀭𑀺𑀫𑀓𑀁𑀲𑀼 𑁋 ‘‘𑀏𑀯𑀫𑁂𑀯 𑀧𑀦𑀸𑀬𑀁 𑀪𑀯𑀁 𑀧𑁄𑀝𑁆𑀞𑀧𑀸𑀤𑁄 𑀬𑀜𑁆𑀜𑀤𑁂𑀯 𑀲𑀫𑀡𑁄 𑀕𑁄𑀢𑀫𑁄 𑀪𑀸𑀲𑀢𑀺, 𑀢𑀁 𑀢𑀤𑁂𑀯𑀲𑁆𑀲 𑀅𑀩𑁆𑀪𑀦𑀼𑀫𑁄𑀤𑀢𑀺 𑁋 ‘𑀏𑀯𑀫𑁂𑀢𑀁 𑀪𑀕𑀯𑀸 𑀏𑀯𑀫𑁂𑀢𑀁, 𑀲𑀼𑀕𑀢𑀸’𑀢𑀺. 𑀦 𑀔𑁄 𑀧𑀦 𑀫𑀬𑀁 𑀓𑀺𑀜𑁆𑀘𑀺 [𑀓𑀜𑁆𑀘𑀺 (𑀧𑀻.)] 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀏𑀓𑀁𑀲𑀺𑀓𑀁 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫 𑁋 ‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺 𑀯𑀸, ‘𑀅𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺 𑀯𑀸, ‘𑀅𑀦𑁆𑀢𑀯𑀸 𑀮𑁄𑀓𑁄’𑀢𑀺 𑀯𑀸, ‘𑀅𑀦𑀦𑁆𑀢𑀯𑀸 𑀮𑁄𑀓𑁄’𑀢𑀺 𑀯𑀸, ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸, ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸, ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸, ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸, ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸, ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀧𑁄𑀝𑁆𑀞𑀧𑀸𑀤𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑁂 𑀧𑀭𑀺𑀩𑁆𑀩𑀸𑀚𑀓𑁂 𑀏𑀢𑀤𑀯𑁄𑀘 𑁋 ‘‘𑀅𑀳𑀫𑁆𑀧𑀺 𑀔𑁄, 𑀪𑁄, 𑀦 𑀓𑀺𑀜𑁆𑀘𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀏𑀓𑀁𑀲𑀺𑀓𑀁 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑁋 ‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺 𑀯𑀸, ‘𑀅𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺 𑀯𑀸…𑀧𑁂… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸; 𑀅𑀧𑀺 𑀘 𑀲𑀫𑀡𑁄 𑀕𑁄𑀢𑀫𑁄 𑀪𑀽𑀢𑀁 𑀢𑀘𑁆𑀙𑀁 𑀢𑀣𑀁 𑀧𑀝𑀺𑀧𑀤𑀁 𑀧𑀜𑁆𑀜𑀧𑁂𑀢𑀺 𑀥𑀫𑁆𑀫𑀝𑁆𑀞𑀺𑀢𑀢𑀁 𑀥𑀫𑁆𑀫𑀦𑀺𑀬𑀸𑀫𑀢𑀁. 𑀪𑀽𑀢𑀁 𑀔𑁄 𑀧𑀦 𑀢𑀘𑁆𑀙𑀁 𑀢𑀣𑀁 𑀧𑀝𑀺𑀧𑀤𑀁 𑀧𑀜𑁆𑀜𑀧𑁂𑀦𑁆𑀢𑀲𑁆𑀲 𑀥𑀫𑁆𑀫𑀝𑁆𑀞𑀺𑀢𑀢𑀁 𑀥𑀫𑁆𑀫𑀦𑀺𑀬𑀸𑀫𑀢𑀁, 𑀓𑀣𑀜𑁆𑀳𑀺 𑀦𑀸𑀫 𑀫𑀸𑀤𑀺𑀲𑁄 𑀯𑀺𑀜𑁆𑀜𑀽 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀼𑀪𑀸𑀲𑀺𑀢𑀁 𑀲𑀼𑀪𑀸𑀲𑀺𑀢𑀢𑁄 𑀦𑀸𑀩𑁆𑀪𑀦𑀼𑀫𑁄𑀤𑁂𑀬𑁆𑀬𑀸’’𑀢𑀺?

𑀘𑀺𑀢𑁆𑀢𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑀧𑁄𑀝𑁆𑀞𑀧𑀸𑀤𑀯𑀢𑁆𑀣𑀼

𑁪𑁨𑁨. 𑀅𑀣 𑀔𑁄 𑀤𑁆𑀯𑀻𑀳𑀢𑀻𑀳𑀲𑁆𑀲 𑀅𑀘𑁆𑀘𑀬𑁂𑀦 𑀘𑀺𑀢𑁆𑀢𑁄 𑀘 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄 𑀧𑁄𑀝𑁆𑀞𑀧𑀸𑀤𑁄 𑀘 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘𑀺𑀢𑁆𑀢𑁄 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀧𑁄𑀝𑁆𑀞𑀧𑀸𑀤𑁄 𑀧𑀦 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀧𑁄𑀝𑁆𑀞𑀧𑀸𑀤𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀢𑀤𑀸 𑀫𑀁, 𑀪𑀦𑁆𑀢𑁂, 𑀢𑁂 𑀧𑀭𑀺𑀩𑁆𑀩𑀸𑀚𑀓𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀲𑀫𑀦𑁆𑀢𑀢𑁄 𑀯𑀸𑀘𑀸𑀲𑀦𑁆𑀦𑀺𑀢𑁄𑀤𑀓𑁂𑀦 𑀲𑀜𑁆𑀛𑀩𑁆𑀪𑀭𑀺𑀫𑀓𑀁𑀲𑀼 𑁋 ‘𑀏𑀯𑀫𑁂𑀯 𑀧𑀦𑀸𑀬𑀁 𑀪𑀯𑀁 𑀧𑁄𑀝𑁆𑀞𑀧𑀸𑀤𑁄 𑀬𑀜𑁆𑀜𑀤𑁂𑀯 𑀲𑀫𑀡𑁄 𑀕𑁄𑀢𑀫𑁄 𑀪𑀸𑀲𑀢𑀺, 𑀢𑀁 𑀢𑀤𑁂𑀯𑀲𑁆𑀲 𑀅𑀩𑁆𑀪𑀦𑀼𑀫𑁄𑀤𑀢𑀺 𑁋 ‘𑀏𑀯𑀫𑁂𑀢𑀁 𑀪𑀕𑀯𑀸 𑀏𑀯𑀫𑁂𑀢𑀁 𑀲𑀼𑀕𑀢𑀸’’𑀢𑀺. 𑀦 𑀔𑁄 𑀧𑀦 𑀫𑀬𑀁 𑀓𑀺𑀜𑁆𑀘𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀏𑀓𑀁𑀲𑀺𑀓𑀁 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫 𑁋 ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑀯𑀸, ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑀯𑀸, ‘‘𑀅𑀦𑁆𑀢𑀯𑀸 𑀮𑁄𑀓𑁄’’𑀢𑀺 𑀯𑀸, ‘‘𑀅𑀦𑀦𑁆𑀢𑀯𑀸 𑀮𑁄𑀓𑁄’’𑀢𑀺 𑀯𑀸, ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺 𑀯𑀸, ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’𑀦𑁆𑀢𑀺 𑀯𑀸, ‘‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑀯𑀸, ‘‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑀯𑀸, ‘‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑀯𑀸, ‘‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑀯𑀸’𑀢𑀺. 𑀏𑀯𑀁 𑀯𑀼𑀢𑁆𑀢𑀸𑀳𑀁, 𑀪𑀦𑁆𑀢𑁂, 𑀢𑁂 𑀧𑀭𑀺𑀩𑁆𑀩𑀸𑀚𑀓𑁂 𑀏𑀢𑀤𑀯𑁄𑀘𑀁 𑁋 ‘𑀅𑀳𑀫𑁆𑀧𑀺 𑀔𑁄, 𑀪𑁄, 𑀦 𑀓𑀺𑀜𑁆𑀘𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀏𑀓𑀁𑀲𑀺𑀓𑀁 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 𑁋 ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑀯𑀸, ‘‘𑀅𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺 𑀯𑀸…𑀧𑁂… ‘‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑀯𑀸; 𑀅𑀧𑀺 𑀘 𑀲𑀫𑀡𑁄 𑀕𑁄𑀢𑀫𑁄 𑀪𑀽𑀢𑀁 𑀢𑀘𑁆𑀙𑀁 𑀢𑀣𑀁 𑀧𑀝𑀺𑀧𑀤𑀁 𑀧𑀜𑁆𑀜𑀧𑁂𑀢𑀺 𑀥𑀫𑁆𑀫𑀝𑁆𑀞𑀺𑀢𑀢𑀁 𑀥𑀫𑁆𑀫𑀦𑀺𑀬𑀸𑀫𑀢𑀁. 𑀪𑀽𑀢𑀁 𑀔𑁄 𑀧𑀦 𑀢𑀘𑁆𑀙𑀁 𑀢𑀣𑀁 𑀧𑀝𑀺𑀧𑀤𑀁 𑀧𑀜𑁆𑀜𑀧𑁂𑀦𑁆𑀢𑀲𑁆𑀲 𑀥𑀫𑁆𑀫𑀝𑁆𑀞𑀺𑀢𑀢𑀁 𑀥𑀫𑁆𑀫𑀦𑀺𑀬𑀸𑀫𑀢𑀁, 𑀓𑀣𑀜𑁆𑀳𑀺 𑀦𑀸𑀫 𑀫𑀸𑀤𑀺𑀲𑁄 𑀯𑀺𑀜𑁆𑀜𑀽 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀼𑀪𑀸𑀲𑀺𑀢𑀁 𑀲𑀼𑀪𑀸𑀲𑀺𑀢𑀢𑁄 𑀦𑀸𑀩𑁆𑀪𑀦𑀼𑀫𑁄𑀤𑁂𑀬𑁆𑀬𑀸’’𑀢𑀺?

𑁪𑁨𑁩. ‘‘𑀲𑀩𑁆𑀩𑁂𑀯 𑀔𑁄 𑀏𑀢𑁂, 𑀧𑁄𑀝𑁆𑀞𑀧𑀸𑀤, 𑀧𑀭𑀺𑀩𑁆𑀩𑀸𑀚𑀓𑀸 𑀅𑀦𑁆𑀥𑀸 𑀅𑀘𑀓𑁆𑀔𑀼𑀓𑀸; 𑀢𑁆𑀯𑀁𑀬𑁂𑀯 𑀦𑁂𑀲𑀁 𑀏𑀓𑁄 𑀘𑀓𑁆𑀔𑀼𑀫𑀸. 𑀏𑀓𑀁𑀲𑀺𑀓𑀸𑀧𑀺 𑀳𑀺 𑀔𑁄, 𑀧𑁄𑀝𑁆𑀞𑀧𑀸𑀤, 𑀫𑀬𑀸 𑀥𑀫𑁆𑀫𑀸 𑀤𑁂𑀲𑀺𑀢𑀸 𑀧𑀜𑁆𑀜𑀢𑁆𑀢𑀸; 𑀅𑀦𑁂𑀓𑀁𑀲𑀺𑀓𑀸𑀧𑀺 𑀳𑀺 𑀔𑁄, 𑀧𑁄𑀝𑁆𑀞𑀧𑀸𑀤, 𑀫𑀬𑀸 𑀥𑀫𑁆𑀫𑀸 𑀤𑁂𑀲𑀺𑀢𑀸 𑀧𑀜𑁆𑀜𑀢𑁆𑀢𑀸.

‘‘𑀓𑀢𑀫𑁂 𑀘 𑀢𑁂, 𑀧𑁄𑀝𑁆𑀞𑀧𑀸𑀤, 𑀫𑀬𑀸 𑀅𑀦𑁂𑀓𑀁𑀲𑀺𑀓𑀸 𑀥𑀫𑁆𑀫𑀸 𑀤𑁂𑀲𑀺𑀢𑀸 𑀧𑀜𑁆𑀜𑀢𑁆𑀢𑀸? ‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺 [𑀮𑁄𑀓𑁄𑀢𑀺 𑀯𑀸 (𑀲𑀻. 𑀓.)] 𑀔𑁄, 𑀧𑁄𑀝𑁆𑀞𑀧𑀸𑀤, 𑀫𑀬𑀸 𑀅𑀦𑁂𑀓𑀁𑀲𑀺𑀓𑁄 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄; ‘𑀅𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺 [𑀮𑁄𑀓𑁄𑀢𑀺 𑀯𑀸 (𑀲𑀻. 𑀓.)] 𑀔𑁄, 𑀧𑁄𑀝𑁆𑀞𑀧𑀸𑀤, 𑀫𑀬𑀸 𑀅𑀦𑁂𑀓𑀁𑀲𑀺𑀓𑁄 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄; ‘𑀅𑀦𑁆𑀢𑀯𑀸 𑀮𑁄𑀓𑁄’𑀢𑀺 [𑀮𑁄𑀓𑁄𑀢𑀺 𑀯𑀸 (𑀲𑀻. 𑀓.)] 𑀔𑁄 𑀧𑁄𑀝𑁆𑀞𑀧𑀸𑀤…𑀧𑁂… ‘𑀅𑀦𑀦𑁆𑀢𑀯𑀸 𑀮𑁄𑀓𑁄’𑀢𑀺 [𑀮𑁄𑀓𑁄𑀢𑀺 𑀯𑀸 (𑀲𑀻. 𑀓.)] 𑀔𑁄 𑀧𑁄𑀝𑁆𑀞𑀧𑀸𑀤… ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀔𑁄 𑀧𑁄𑀝𑁆𑀞𑀧𑀸𑀤… ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀔𑁄 𑀧𑁄𑀝𑁆𑀞𑀧𑀸𑀤… ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀔𑁄 𑀧𑁄𑀝𑁆𑀞𑀧𑀸𑀤… 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀔𑁄 𑀧𑁄𑀝𑁆𑀞𑀧𑀸𑀤… ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀔𑁄 𑀧𑁄𑀝𑁆𑀞𑀧𑀸𑀤… ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀔𑁄, 𑀧𑁄𑀝𑁆𑀞𑀧𑀸𑀤, 𑀫𑀬𑀸 𑀅𑀦𑁂𑀓𑀁𑀲𑀺𑀓𑁄 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄.

‘‘𑀓𑀲𑁆𑀫𑀸 𑀘 𑀢𑁂, 𑀧𑁄𑀝𑁆𑀞𑀧𑀸𑀤, 𑀫𑀬𑀸 𑀅𑀦𑁂𑀓𑀁𑀲𑀺𑀓𑀸 𑀥𑀫𑁆𑀫𑀸 𑀤𑁂𑀲𑀺𑀢𑀸 𑀧𑀜𑁆𑀜𑀢𑁆𑀢𑀸? 𑀦 𑀳𑁂𑀢𑁂, 𑀧𑁄𑀝𑁆𑀞𑀧𑀸𑀤, 𑀅𑀢𑁆𑀣𑀲𑀁𑀳𑀺𑀢𑀸 𑀦 𑀥𑀫𑁆𑀫𑀲𑀁𑀳𑀺𑀢𑀸 𑀦 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀸 𑀦 𑀦𑀺𑀩𑁆𑀩𑀺𑀤𑀸𑀬 𑀦 𑀯𑀺𑀭𑀸𑀕𑀸𑀬 𑀦 𑀦𑀺𑀭𑁄𑀥𑀸𑀬 𑀦 𑀉𑀧𑀲𑀫𑀸𑀬 𑀦 𑀅𑀪𑀺𑀜𑁆𑀜𑀸𑀬 𑀦 𑀲𑀫𑁆𑀩𑁄𑀥𑀸𑀬 𑀦 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀢𑁂 𑀫𑀬𑀸 𑀅𑀦𑁂𑀓𑀁𑀲𑀺𑀓𑀸 𑀥𑀫𑁆𑀫𑀸 𑀤𑁂𑀲𑀺𑀢𑀸 𑀧𑀜𑁆𑀜𑀢𑁆𑀢𑀸’’.

𑀏𑀓𑀁𑀲𑀺𑀓𑀥𑀫𑁆𑀫𑁄

𑁪𑁨𑁪. ‘‘𑀓𑀢𑀫𑁂 𑀘 𑀢𑁂, 𑀧𑁄𑀝𑁆𑀞𑀧𑀸𑀤, 𑀫𑀬𑀸 𑀏𑀓𑀁𑀲𑀺𑀓𑀸 𑀥𑀫𑁆𑀫𑀸 𑀤𑁂𑀲𑀺𑀢𑀸 𑀧𑀜𑁆𑀜𑀢𑁆𑀢𑀸? 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀔𑁄, 𑀧𑁄𑀝𑁆𑀞𑀧𑀸𑀤, 𑀫𑀬𑀸 𑀏𑀓𑀁𑀲𑀺𑀓𑁄 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄. 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀔𑁄, 𑀧𑁄𑀝𑁆𑀞𑀧𑀸𑀤, 𑀫𑀬𑀸 𑀏𑀓𑀁𑀲𑀺𑀓𑁄 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄. 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀔𑁄, 𑀧𑁄𑀝𑁆𑀞𑀧𑀸𑀤, 𑀫𑀬𑀸 𑀏𑀓𑀁𑀲𑀺𑀓𑁄 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄. 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀔𑁄, 𑀧𑁄𑀝𑁆𑀞𑀧𑀸𑀤, 𑀫𑀬𑀸 𑀏𑀓𑀁𑀲𑀺𑀓𑁄 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄.

‘‘𑀓𑀲𑁆𑀫𑀸 𑀘 𑀢𑁂, 𑀧𑁄𑀝𑁆𑀞𑀧𑀸𑀤, 𑀫𑀬𑀸 𑀏𑀓𑀁𑀲𑀺𑀓𑀸 𑀥𑀫𑁆𑀫𑀸 𑀤𑁂𑀲𑀺𑀢𑀸 𑀧𑀜𑁆𑀜𑀢𑁆𑀢𑀸? 𑀏𑀢𑁂, 𑀧𑁄𑀝𑁆𑀞𑀧𑀸𑀤, 𑀅𑀢𑁆𑀣𑀲𑀁𑀳𑀺𑀢𑀸, 𑀏𑀢𑁂 𑀥𑀫𑁆𑀫𑀲𑀁𑀳𑀺𑀢𑀸, 𑀏𑀢𑁂 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀸 𑀏𑀢𑁂 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀢𑁂 𑀫𑀬𑀸 𑀏𑀓𑀁𑀲𑀺𑀓𑀸 𑀥𑀫𑁆𑀫𑀸 𑀤𑁂𑀲𑀺𑀢𑀸 𑀧𑀜𑁆𑀜𑀢𑁆𑀢𑀸.

𑁪𑁨𑁫. ‘‘𑀲𑀦𑁆𑀢𑀺, 𑀧𑁄𑀝𑁆𑀞𑀧𑀸𑀤, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘𑀏𑀓𑀦𑁆𑀢𑀲𑀼𑀔𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸’𑀢𑀺. 𑀢𑁆𑀬𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀸𑀫𑀺 𑁋 ‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘‘𑀏𑀓𑀦𑁆𑀢𑀲𑀼𑀔𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸’𑀢𑀺? 𑀢𑁂 𑀘𑁂 𑀫𑁂 𑀏𑀯𑀁 𑀧𑀼𑀝𑁆𑀞𑀸 ‘𑀆𑀫𑀸’𑀢𑀺 𑀧𑀝𑀺𑀚𑀸𑀦𑀦𑁆𑀢𑀺. 𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀧𑀺 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀓𑀦𑁆𑀢𑀲𑀼𑀔𑀁 𑀮𑁄𑀓𑀁 𑀚𑀸𑀦𑀁 𑀧𑀲𑁆𑀲𑀁 𑀯𑀺𑀳𑀭𑀣𑀸’𑀢𑀺? 𑀇𑀢𑀺 𑀧𑀼𑀝𑁆𑀞𑀸 ‘𑀦𑁄’𑀢𑀺 𑀯𑀤𑀦𑁆𑀢𑀺.

‘‘𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀧𑀺 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀓𑀁 𑀯𑀸 𑀭𑀢𑁆𑀢𑀺𑀁 𑀏𑀓𑀁 𑀯𑀸 𑀤𑀺𑀯𑀲𑀁 𑀉𑀧𑀟𑁆𑀠𑀁 𑀯𑀸 𑀭𑀢𑁆𑀢𑀺𑀁 𑀉𑀧𑀟𑁆𑀠𑀁 𑀯𑀸 𑀤𑀺𑀯𑀲𑀁 𑀏𑀓𑀦𑁆𑀢𑀲𑀼𑀔𑀺𑀁 𑀅𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀣𑀸’𑀢𑀺 [𑀲𑀫𑁆𑀧𑀚𑀸𑀦𑀸𑀣𑀸𑀢𑀺 (𑀲𑀻. 𑀲𑁆𑀬𑀸. 𑀓.)]? 𑀇𑀢𑀺 𑀧𑀼𑀝𑁆𑀞𑀸 ‘𑀦𑁄’𑀢𑀺 𑀯𑀤𑀦𑁆𑀢𑀺. 𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀧𑀺 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀚𑀸𑀦𑀸𑀣 𑁋 ‘‘𑀅𑀬𑀁 𑀫𑀕𑁆𑀕𑁄 𑀅𑀬𑀁 𑀧𑀝𑀺𑀧𑀤𑀸 𑀏𑀓𑀦𑁆𑀢𑀲𑀼𑀔𑀲𑁆𑀲 𑀮𑁄𑀓𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’’’𑀢𑀺? 𑀇𑀢𑀺 𑀧𑀼𑀝𑁆𑀞𑀸 ‘𑀦𑁄’𑀢𑀺 𑀯𑀤𑀦𑁆𑀢𑀺.

‘‘𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀧𑀺 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀬𑀸 𑀢𑀸 𑀤𑁂𑀯𑀢𑀸 𑀏𑀓𑀦𑁆𑀢𑀲𑀼𑀔𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸, 𑀢𑀸𑀲𑀁 𑀪𑀸𑀲𑀫𑀸𑀦𑀸𑀦𑀁 𑀲𑀤𑁆𑀤𑀁 𑀲𑀼𑀡𑀸𑀣 𑁋 ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑀸𑀢𑁆𑀣, 𑀫𑀸𑀭𑀺𑀲𑀸, 𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑀸𑀢𑁆𑀣, 𑀫𑀸𑀭𑀺𑀲𑀸, 𑀏𑀓𑀦𑁆𑀢𑀲𑀼𑀔𑀲𑁆𑀲 𑀮𑁄𑀓𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬; 𑀫𑀬𑀫𑁆𑀧𑀺 𑀳𑀺, 𑀫𑀸𑀭𑀺𑀲𑀸, 𑀏𑀯𑀁𑀧𑀝𑀺𑀧𑀦𑁆𑀦𑀸 𑀏𑀓𑀦𑁆𑀢𑀲𑀼𑀔𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’𑀢𑀺? 𑀇𑀢𑀺 𑀧𑀼𑀝𑁆𑀞𑀸 ‘𑀦𑁄’𑀢𑀺 𑀯𑀤𑀦𑁆𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀧𑁄𑀝𑁆𑀞𑀧𑀸𑀤, 𑀦𑀦𑀼 𑀏𑀯𑀁 𑀲𑀦𑁆𑀢𑁂 𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺? ‘‘𑀅𑀤𑁆𑀥𑀸 𑀔𑁄, 𑀪𑀦𑁆𑀢𑁂, 𑀏𑀯𑀁 𑀲𑀦𑁆𑀢𑁂 𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺.

𑁪𑁨𑁬. ‘‘𑀲𑁂𑀬𑁆𑀬𑀣𑀸𑀧𑀺, 𑀧𑁄𑀝𑁆𑀞𑀧𑀸𑀤, 𑀧𑀼𑀭𑀺𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀳𑀁 𑀬𑀸 𑀇𑀫𑀲𑁆𑀫𑀺𑀁 𑀚𑀦𑀧𑀤𑁂 𑀚𑀦𑀧𑀤𑀓𑀮𑁆𑀬𑀸𑀡𑀻, 𑀢𑀁 𑀇𑀘𑁆𑀙𑀸𑀫𑀺 𑀢𑀁 𑀓𑀸𑀫𑁂𑀫𑀻’𑀢𑀺. 𑀢𑀫𑁂𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀬𑀁 𑀢𑁆𑀯𑀁 𑀚𑀦𑀧𑀤𑀓𑀮𑁆𑀬𑀸𑀡𑀺𑀁 𑀇𑀘𑁆𑀙𑀲𑀺 𑀓𑀸𑀫𑁂𑀲𑀺, 𑀚𑀸𑀦𑀸𑀲𑀺 𑀢𑀁 𑀚𑀦𑀧𑀤𑀓𑀮𑁆𑀬𑀸𑀡𑀺𑀁 𑀔𑀢𑁆𑀢𑀺𑀬𑀻 𑀯𑀸 𑀩𑁆𑀭𑀸𑀳𑁆𑀫𑀡𑀻 𑀯𑀸 𑀯𑁂𑀲𑁆𑀲𑀻 𑀯𑀸 𑀲𑀼𑀤𑁆𑀤𑀻 𑀯𑀸’𑀢𑀺? 𑀇𑀢𑀺 𑀧𑀼𑀝𑁆𑀞𑁄 ‘𑀦𑁄’𑀢𑀺 𑀯𑀤𑁂𑀬𑁆𑀬. 𑀢𑀫𑁂𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀬𑀁 𑀢𑁆𑀯𑀁 𑀚𑀦𑀧𑀤𑀓𑀮𑁆𑀬𑀸𑀡𑀺𑀁 𑀇𑀘𑁆𑀙𑀲𑀺 𑀓𑀸𑀫𑁂𑀲𑀺, 𑀚𑀸𑀦𑀸𑀲𑀺 𑀢𑀁 𑀚𑀦𑀧𑀤𑀓𑀮𑁆𑀬𑀸𑀡𑀺𑀁 𑀏𑀯𑀁𑀦𑀸𑀫𑀸 𑀏𑀯𑀁𑀕𑁄𑀢𑁆𑀢𑀸𑀢𑀺 𑀯𑀸, 𑀤𑀻𑀖𑀸 𑀯𑀸 𑀭𑀲𑁆𑀲𑀸 𑀯𑀸 𑀫𑀚𑁆𑀛𑀺𑀫𑀸 𑀯𑀸 𑀓𑀸𑀴𑀻 𑀯𑀸 𑀲𑀸𑀫𑀸 𑀯𑀸 𑀫𑀗𑁆𑀕𑀼𑀭𑀘𑁆𑀙𑀯𑀻 𑀯𑀸𑀢𑀺, 𑀅𑀫𑀼𑀓𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀦𑀕𑀭𑁂 𑀯𑀸’𑀢𑀺? 𑀇𑀢𑀺 𑀧𑀼𑀝𑁆𑀞𑁄 ‘𑀦𑁄’𑀢𑀺 𑀯𑀤𑁂𑀬𑁆𑀬. 𑀢𑀫𑁂𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀬𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺 𑀦 𑀧𑀲𑁆𑀲𑀲𑀺, 𑀢𑀁 𑀢𑁆𑀯𑀁 𑀇𑀘𑁆𑀙𑀲𑀺 𑀓𑀸𑀫𑁂𑀲𑀻’𑀢𑀺? 𑀇𑀢𑀺 𑀧𑀼𑀝𑁆𑀞𑁄 ‘𑀆𑀫𑀸’𑀢𑀺 𑀯𑀤𑁂𑀬𑁆𑀬.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀧𑁄𑀝𑁆𑀞𑀧𑀸𑀤, 𑀦𑀦𑀼 𑀏𑀯𑀁 𑀲𑀦𑁆𑀢𑁂 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺? ‘‘𑀅𑀤𑁆𑀥𑀸 𑀔𑁄, 𑀪𑀦𑁆𑀢𑁂, 𑀏𑀯𑀁 𑀲𑀦𑁆𑀢𑁂 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺.

‘‘𑀏𑀯𑀫𑁂𑀯 𑀔𑁄, 𑀧𑁄𑀝𑁆𑀞𑀧𑀸𑀤, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘𑀏𑀓𑀦𑁆𑀢𑀲𑀼𑀔𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸’𑀢𑀺. 𑀢𑁆𑀬𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀸𑀫𑀺 𑁋 ‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘‘𑀏𑀓𑀦𑁆𑀢𑀲𑀼𑀔𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸’’’𑀢𑀺? 𑀢𑁂 𑀘𑁂 𑀫𑁂 𑀏𑀯𑀁 𑀧𑀼𑀝𑁆𑀞𑀸 ‘𑀆𑀫𑀸’𑀢𑀺 𑀧𑀝𑀺𑀚𑀸𑀦𑀦𑁆𑀢𑀺. 𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀧𑀺 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀓𑀦𑁆𑀢𑀲𑀼𑀔𑀁 𑀮𑁄𑀓𑀁 𑀚𑀸𑀦𑀁 𑀧𑀲𑁆𑀲𑀁 𑀯𑀺𑀳𑀭𑀣𑀸’𑀢𑀺? 𑀇𑀢𑀺 𑀧𑀼𑀝𑁆𑀞𑀸 ‘𑀦𑁄’𑀢𑀺 𑀯𑀤𑀦𑁆𑀢𑀺.

‘‘𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀧𑀺 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀓𑀁 𑀯𑀸 𑀭𑀢𑁆𑀢𑀺𑀁 𑀏𑀓𑀁 𑀯𑀸 𑀤𑀺𑀯𑀲𑀁 𑀉𑀧𑀟𑁆𑀠𑀁 𑀯𑀸 𑀭𑀢𑁆𑀢𑀺𑀁 𑀉𑀧𑀟𑁆𑀠𑀁 𑀯𑀸 𑀤𑀺𑀯𑀲𑀁 𑀏𑀓𑀦𑁆𑀢𑀲𑀼𑀔𑀺𑀁 𑀅𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀣𑀸’𑀢𑀺? 𑀇𑀢𑀺 𑀧𑀼𑀝𑁆𑀞𑀸 ‘𑀦𑁄’𑀢𑀺 𑀯𑀤𑀦𑁆𑀢𑀺. 𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀧𑀺 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀚𑀸𑀦𑀸𑀣 𑁋 ‘‘𑀅𑀬𑀁 𑀫𑀕𑁆𑀕𑁄 𑀅𑀬𑀁 𑀧𑀝𑀺𑀧𑀤𑀸 𑀏𑀓𑀦𑁆𑀢𑀲𑀼𑀔𑀲𑁆𑀲 𑀮𑁄𑀓𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’𑀢𑀺? 𑀇𑀢𑀺 𑀧𑀼𑀝𑁆𑀞𑀸 ‘𑀦𑁄’𑀢𑀺 𑀯𑀤𑀦𑁆𑀢𑀺.

‘‘𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀧𑀺 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀬𑀸 𑀢𑀸 𑀤𑁂𑀯𑀢𑀸 𑀏𑀓𑀦𑁆𑀢𑀲𑀼𑀔𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸, 𑀢𑀸𑀲𑀁 𑀪𑀸𑀲𑀫𑀸𑀦𑀸𑀦𑀁 𑀲𑀤𑁆𑀤𑀁 𑀲𑀼𑀡𑀸𑀣 𑁋 ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑀸𑀢𑁆𑀣, 𑀫𑀸𑀭𑀺𑀲𑀸, 𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑀸𑀢𑁆𑀣, 𑀫𑀸𑀭𑀺𑀲𑀸, 𑀏𑀓𑀦𑁆𑀢𑀲𑀼𑀔𑀲𑁆𑀲 𑀮𑁄𑀓𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬; 𑀫𑀬𑀫𑁆𑀧𑀺 𑀳𑀺, 𑀫𑀸𑀭𑀺𑀲𑀸, 𑀏𑀯𑀁𑀧𑀝𑀺𑀧𑀦𑁆𑀦𑀸 𑀏𑀓𑀦𑁆𑀢𑀲𑀼𑀔𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’’’𑀢𑀺? 𑀇𑀢𑀺 𑀧𑀼𑀝𑁆𑀞𑀸 ‘𑀦𑁄’𑀢𑀺 𑀯𑀤𑀦𑁆𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀧𑁄𑀝𑁆𑀞𑀧𑀸𑀤, 𑀦𑀦𑀼 𑀏𑀯𑀁 𑀲𑀦𑁆𑀢𑁂 𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺? ‘‘𑀅𑀤𑁆𑀥𑀸 𑀔𑁄, 𑀪𑀦𑁆𑀢𑁂, 𑀏𑀯𑀁 𑀲𑀦𑁆𑀢𑁂 𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺.

𑁪𑁨𑁭. ‘‘𑀲𑁂𑀬𑁆𑀬𑀣𑀸𑀧𑀺, 𑀧𑁄𑀝𑁆𑀞𑀧𑀸𑀤, 𑀧𑀼𑀭𑀺𑀲𑁄 𑀘𑀸𑀢𑀼𑀫𑀳𑀸𑀧𑀣𑁂 𑀦𑀺𑀲𑁆𑀲𑁂𑀡𑀺𑀁 𑀓𑀭𑁂𑀬𑁆𑀬 𑀧𑀸𑀲𑀸𑀤𑀲𑁆𑀲 𑀆𑀭𑁄𑀳𑀡𑀸𑀬. 𑀢𑀫𑁂𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀬𑀲𑁆𑀲 𑀢𑁆𑀯𑀁 [𑀬𑀁 𑀢𑁆𑀯𑀁 (𑀲𑀻. 𑀓.)] 𑀧𑀸𑀲𑀸𑀤𑀲𑁆𑀲 𑀆𑀭𑁄𑀳𑀡𑀸𑀬 𑀦𑀺𑀲𑁆𑀲𑁂𑀡𑀺𑀁 𑀓𑀭𑁄𑀲𑀺, 𑀚𑀸𑀦𑀸𑀲𑀺 𑀢𑀁 𑀧𑀸𑀲𑀸𑀤𑀁 𑀧𑀼𑀭𑀢𑁆𑀣𑀺𑀫𑀸𑀬 𑀯𑀸 𑀤𑀺𑀲𑀸𑀬 𑀤𑀓𑁆𑀔𑀺𑀡𑀸𑀬 𑀯𑀸 𑀤𑀺𑀲𑀸𑀬 𑀧𑀘𑁆𑀙𑀺𑀫𑀸𑀬 𑀯𑀸 𑀤𑀺𑀲𑀸𑀬 𑀉𑀢𑁆𑀢𑀭𑀸𑀬 𑀯𑀸 𑀤𑀺𑀲𑀸𑀬 𑀉𑀘𑁆𑀘𑁄 𑀯𑀸 𑀦𑀻𑀘𑁄 𑀯𑀸 𑀫𑀚𑁆𑀛𑀺𑀫𑁄 𑀯𑀸’𑀢𑀺? 𑀇𑀢𑀺 𑀧𑀼𑀝𑁆𑀞𑁄 ‘𑀦𑁄’𑀢𑀺 𑀯𑀤𑁂𑀬𑁆𑀬. 𑀢𑀫𑁂𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀬𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺 𑀦 𑀧𑀲𑁆𑀲𑀲𑀺, 𑀢𑀲𑁆𑀲 𑀢𑁆𑀯𑀁 𑀧𑀸𑀲𑀸𑀤𑀲𑁆𑀲 𑀆𑀭𑁄𑀳𑀡𑀸𑀬 𑀦𑀺𑀲𑁆𑀲𑁂𑀡𑀺𑀁 𑀓𑀭𑁄𑀲𑀻’𑀢𑀺? 𑀇𑀢𑀺 𑀧𑀼𑀝𑁆𑀞𑁄 ‘𑀆𑀫𑀸’𑀢𑀺 𑀯𑀤𑁂𑀬𑁆𑀬.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀧𑁄𑀝𑁆𑀞𑀧𑀸𑀤, 𑀦𑀦𑀼 𑀏𑀯𑀁 𑀲𑀦𑁆𑀢𑁂 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺? ‘‘𑀅𑀤𑁆𑀥𑀸 𑀔𑁄, 𑀪𑀦𑁆𑀢𑁂, 𑀏𑀯𑀁 𑀲𑀦𑁆𑀢𑁂 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺.

‘‘𑀏𑀯𑀫𑁂𑀯 𑀔𑁄, 𑀧𑁄𑀝𑁆𑀞𑀧𑀸𑀤, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘𑀏𑀓𑀦𑁆𑀢𑀲𑀼𑀔𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸’𑀢𑀺. 𑀢𑁆𑀬𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀸𑀫𑀺 𑁋 ‘𑀲𑀘𑁆𑀘𑀁 𑀓𑀺𑀭 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 ‘‘𑀏𑀓𑀦𑁆𑀢𑀲𑀼𑀔𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸’𑀢𑀺? 𑀢𑁂 𑀘𑁂 𑀫𑁂 𑀏𑀯𑀁 𑀧𑀼𑀝𑁆𑀞𑀸 ‘𑀆𑀫𑀸’𑀢𑀺 𑀧𑀝𑀺𑀚𑀸𑀦𑀦𑁆𑀢𑀺. 𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀧𑀺 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀓𑀦𑁆𑀢𑀲𑀼𑀔𑀁 𑀮𑁄𑀓𑀁 𑀚𑀸𑀦𑀁 𑀧𑀲𑁆𑀲𑀁 𑀯𑀺𑀳𑀭𑀣𑀸’𑀢𑀺? 𑀇𑀢𑀺 𑀧𑀼𑀝𑁆𑀞𑀸 ‘𑀦𑁄’𑀢𑀺 𑀯𑀤𑀦𑁆𑀢𑀺.

‘‘𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀧𑀺 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀏𑀓𑀁 𑀯𑀸 𑀭𑀢𑁆𑀢𑀺𑀁 𑀏𑀓𑀁 𑀯𑀸 𑀤𑀺𑀯𑀲𑀁 𑀉𑀧𑀟𑁆𑀠𑀁 𑀯𑀸 𑀭𑀢𑁆𑀢𑀺𑀁 𑀉𑀧𑀟𑁆𑀠𑀁 𑀯𑀸 𑀤𑀺𑀯𑀲𑀁 𑀏𑀓𑀦𑁆𑀢𑀲𑀼𑀔𑀺𑀁 𑀅𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀣𑀸’𑀢𑀺? 𑀇𑀢𑀺 𑀧𑀼𑀝𑁆𑀞𑀸 ‘𑀦𑁄’𑀢𑀺 𑀯𑀤𑀦𑁆𑀢𑀺. 𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀧𑀺 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀚𑀸𑀦𑀸𑀣 𑀅𑀬𑀁 𑀫𑀕𑁆𑀕𑁄 𑀅𑀬𑀁 𑀧𑀝𑀺𑀧𑀤𑀸 𑀏𑀓𑀦𑁆𑀢𑀲𑀼𑀔𑀲𑁆𑀲 𑀮𑁄𑀓𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’𑀢𑀺? 𑀇𑀢𑀺 𑀧𑀼𑀝𑁆𑀞𑀸 ‘𑀦𑁄’𑀢𑀺 𑀯𑀤𑀦𑁆𑀢𑀺.

‘‘𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀧𑀺 𑀧𑀦 𑀢𑀼𑀫𑁆𑀳𑁂 𑀆𑀬𑀲𑁆𑀫𑀦𑁆𑀢𑁄 𑀬𑀸 𑀢𑀸 𑀤𑁂𑀯𑀢𑀸 𑀏𑀓𑀦𑁆𑀢𑀲𑀼𑀔𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’ 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 𑀲𑀤𑁆𑀤𑀁 𑀲𑀼𑀡𑀸𑀣- ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑀸𑀢𑁆𑀣, 𑀫𑀸𑀭𑀺𑀲𑀸, 𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑀸𑀢𑁆𑀣, 𑀫𑀸𑀭𑀺𑀲𑀸, 𑀏𑀓𑀦𑁆𑀢𑀲𑀼𑀔𑀲𑁆𑀲 𑀮𑁄𑀓𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬; 𑀫𑀬𑀫𑁆𑀧𑀺 𑀳𑀺, 𑀫𑀸𑀭𑀺𑀲𑀸, 𑀏𑀯𑀁 𑀧𑀝𑀺𑀧𑀦𑁆𑀦𑀸 𑀏𑀓𑀦𑁆𑀢𑀲𑀼𑀔𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’𑀢𑀺? 𑀇𑀢𑀺 𑀧𑀼𑀝𑁆𑀞𑀸 ‘‘𑀦𑁄’’𑀢𑀺 𑀯𑀤𑀦𑁆𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀧𑁄𑀝𑁆𑀞𑀧𑀸𑀤, 𑀦𑀦𑀼 𑀏𑀯𑀁 𑀲𑀦𑁆𑀢𑁂 𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺? ‘‘𑀅𑀤𑁆𑀥𑀸 𑀔𑁄, 𑀪𑀦𑁆𑀢𑁂, 𑀏𑀯𑀁 𑀲𑀦𑁆𑀢𑁂 𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺.

𑀢𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑀸

𑁪𑁨𑁮. ‘‘𑀢𑀬𑁄 𑀔𑁄 𑀫𑁂, 𑀧𑁄𑀝𑁆𑀞𑀧𑀸𑀤, 𑀅𑀢𑁆𑀢𑀧𑀝𑀺𑀮𑀸𑀪𑀸 𑁋 𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄, 𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄, 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄. 𑀓𑀢𑀫𑁄 𑀘, 𑀧𑁄𑀝𑁆𑀞𑀧𑀸𑀤, 𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄? 𑀭𑀽𑀧𑀻 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑀪𑀓𑁆𑀔𑁄 [𑀓𑀩𑀴𑀻𑀓𑀸𑀭𑀪𑀓𑁆𑀔𑁄 (𑀲𑁆𑀬𑀸. 𑀓.)], 𑀅𑀬𑀁 𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄. 𑀓𑀢𑀫𑁄 𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄? 𑀭𑀽𑀧𑀻 𑀫𑀦𑁄𑀫𑀬𑁄 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀻 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑁄, 𑀅𑀬𑀁 𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄. 𑀓𑀢𑀫𑁄 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄? 𑀅𑀭𑀽𑀧𑀻 𑀲𑀜𑁆𑀜𑀸𑀫𑀬𑁄, 𑀅𑀬𑀁 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄.

𑁪𑁨𑁯. ‘‘𑀑𑀴𑀸𑀭𑀺𑀓𑀲𑁆𑀲𑀧𑀺 𑀔𑁄 𑀅𑀳𑀁, 𑀧𑁄𑀝𑁆𑀞𑀧𑀸𑀤, 𑀅𑀢𑁆𑀢𑀧𑀝𑀺𑀮𑀸𑀪𑀲𑁆𑀲 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫𑀺 𑁋 𑀬𑀣𑀸𑀧𑀝𑀺𑀧𑀦𑁆𑀦𑀸𑀦𑀁 𑀯𑁄 𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸 𑀧𑀳𑀻𑀬𑀺𑀲𑁆𑀲𑀦𑁆𑀢𑀺, 𑀯𑁄𑀤𑀸𑀦𑀺𑀬𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀦𑁆𑀢𑀺, 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀁 𑀯𑁂𑀧𑀼𑀮𑁆𑀮𑀢𑁆𑀢𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀣𑀸𑀢𑀺. 𑀲𑀺𑀬𑀸 𑀔𑁄 𑀧𑀦 𑀢𑁂, 𑀧𑁄𑀝𑁆𑀞𑀧𑀸𑀤, 𑀏𑀯𑀫𑀲𑁆𑀲 𑁋 𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸 𑀧𑀳𑀻𑀬𑀺𑀲𑁆𑀲𑀦𑁆𑀢𑀺, 𑀯𑁄𑀤𑀸𑀦𑀺𑀬𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀦𑁆𑀢𑀺, 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀁 𑀯𑁂𑀧𑀼𑀮𑁆𑀮𑀢𑁆𑀢𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀢𑀺, 𑀤𑀼𑀓𑁆𑀔𑁄 𑀘 𑀔𑁄 𑀯𑀺𑀳𑀸𑀭𑁄𑀢𑀺, 𑀦 𑀔𑁄 𑀧𑀦𑁂𑀢𑀁, 𑀧𑁄𑀝𑁆𑀞𑀧𑀸𑀤, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀲𑀁𑀓𑀺𑀮𑁂𑀲𑀺𑀓𑀸 𑀘𑁂𑀯 𑀥𑀫𑁆𑀫𑀸 𑀧𑀳𑀻𑀬𑀺𑀲𑁆𑀲𑀦𑁆𑀢𑀺, 𑀯𑁄𑀤𑀸𑀦𑀺𑀬𑀸 𑀘 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀦𑁆𑀢𑀺, 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀁 𑀯𑁂𑀧𑀼𑀮𑁆𑀮𑀢𑁆𑀢𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀢𑀺, 𑀧𑀸𑀫𑀼𑀚𑁆𑀚𑀁 𑀘𑁂𑀯 𑀪𑀯𑀺𑀲𑁆𑀲𑀢𑀺 𑀧𑀻𑀢𑀺 𑀘 𑀧𑀲𑁆𑀲𑀤𑁆𑀥𑀺 𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀲𑀼𑀔𑁄 𑀘 𑀯𑀺𑀳𑀸𑀭𑁄.

𑁪𑁩𑁦. ‘‘𑀫𑀦𑁄𑀫𑀬𑀲𑁆𑀲𑀧𑀺 𑀔𑁄 𑀅𑀳𑀁, 𑀧𑁄𑀝𑁆𑀞𑀧𑀸𑀤, 𑀅𑀢𑁆𑀢𑀧𑀝𑀺𑀮𑀸𑀪𑀲𑁆𑀲 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫𑀺 𑀬𑀣𑀸𑀧𑀝𑀺𑀧𑀦𑁆𑀦𑀸𑀦𑀁 𑀯𑁄 𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸 𑀧𑀳𑀻𑀬𑀺𑀲𑁆𑀲𑀦𑁆𑀢𑀺, 𑀯𑁄𑀤𑀸𑀦𑀺𑀬𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀦𑁆𑀢𑀺, 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀁 𑀯𑁂𑀧𑀼𑀮𑁆𑀮𑀢𑁆𑀢𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀣𑀸𑀢𑀺. 𑀲𑀺𑀬𑀸 𑀔𑁄 𑀧𑀦 𑀢𑁂, 𑀧𑁄𑀝𑁆𑀞𑀧𑀸𑀤, 𑀏𑀯𑀫𑀲𑁆𑀲 𑁋 ‘𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸 𑀧𑀳𑀻𑀬𑀺𑀲𑁆𑀲𑀦𑁆𑀢𑀺, 𑀯𑁄𑀤𑀸𑀦𑀺𑀬𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀦𑁆𑀢𑀺, 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀁 𑀯𑁂𑀧𑀼𑀮𑁆𑀮𑀢𑁆𑀢𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀢𑀺, 𑀤𑀼𑀓𑁆𑀔𑁄 𑀘 𑀔𑁄 𑀯𑀺𑀳𑀸𑀭𑁄’𑀢𑀺, 𑀦 𑀔𑁄 𑀧𑀦𑁂𑀢𑀁, 𑀧𑁄𑀝𑁆𑀞𑀧𑀸𑀤, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀲𑀁𑀓𑀺𑀮𑁂𑀲𑀺𑀓𑀸 𑀘𑁂𑀯 𑀥𑀫𑁆𑀫𑀸 𑀧𑀳𑀻𑀬𑀺𑀲𑁆𑀲𑀦𑁆𑀢𑀺, 𑀯𑁄𑀤𑀸𑀦𑀺𑀬𑀸 𑀘 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀦𑁆𑀢𑀺, 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀁 𑀯𑁂𑀧𑀼𑀮𑁆𑀮𑀢𑁆𑀢𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀢𑀺, 𑀧𑀸𑀫𑀼𑀚𑁆𑀚𑀁 𑀘𑁂𑀯 𑀪𑀯𑀺𑀲𑁆𑀲𑀢𑀺 𑀧𑀻𑀢𑀺 𑀘 𑀧𑀲𑁆𑀲𑀤𑁆𑀥𑀺 𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀲𑀼𑀔𑁄 𑀘 𑀯𑀺𑀳𑀸𑀭𑁄.

𑁪𑁩𑁧. ‘‘𑀅𑀭𑀽𑀧𑀲𑁆𑀲𑀧𑀺 𑀔𑁄 𑀅𑀳𑀁, 𑀧𑁄𑀝𑁆𑀞𑀧𑀸𑀤, 𑀅𑀢𑁆𑀢𑀧𑀝𑀺𑀮𑀸𑀪𑀲𑁆𑀲 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫𑀺 𑀬𑀣𑀸𑀧𑀝𑀺𑀧𑀦𑁆𑀦𑀸𑀦𑀁 𑀯𑁄 𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸 𑀧𑀳𑀻𑀬𑀺𑀲𑁆𑀲𑀦𑁆𑀢𑀺, 𑀯𑁄𑀤𑀸𑀦𑀺𑀬𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀦𑁆𑀢𑀺, 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀁 𑀯𑁂𑀧𑀼𑀮𑁆𑀮𑀢𑁆𑀢𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀣𑀸𑀢𑀺. 𑀲𑀺𑀬𑀸 𑀔𑁄 𑀧𑀦 𑀢𑁂, 𑀧𑁄𑀝𑁆𑀞𑀧𑀸𑀤, 𑀏𑀯𑀫𑀲𑁆𑀲 𑁋 ‘𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸 𑀧𑀳𑀻𑀬𑀺𑀲𑁆𑀲𑀦𑁆𑀢𑀺, 𑀯𑁄𑀤𑀸𑀦𑀺𑀬𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀦𑁆𑀢𑀺, 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀁 𑀯𑁂𑀧𑀼𑀮𑁆𑀮𑀢𑁆𑀢𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀢𑀺, 𑀤𑀼𑀓𑁆𑀔𑁄 𑀘 𑀔𑁄 𑀯𑀺𑀳𑀸𑀭𑁄’𑀢𑀺, 𑀦 𑀔𑁄 𑀧𑀦𑁂𑀢𑀁, 𑀧𑁄𑀝𑁆𑀞𑀧𑀸𑀤, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀲𑀁𑀓𑀺𑀮𑁂𑀲𑀺𑀓𑀸 𑀘𑁂𑀯 𑀥𑀫𑁆𑀫𑀸 𑀧𑀳𑀻𑀬𑀺𑀲𑁆𑀲𑀦𑁆𑀢𑀺, 𑀯𑁄𑀤𑀸𑀦𑀺𑀬𑀸 𑀘 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀦𑁆𑀢𑀺, 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀁 𑀯𑁂𑀧𑀼𑀮𑁆𑀮𑀢𑁆𑀢𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀢𑀺, 𑀧𑀸𑀫𑀼𑀚𑁆𑀚𑀁 𑀘𑁂𑀯 𑀪𑀯𑀺𑀲𑁆𑀲𑀢𑀺 𑀧𑀻𑀢𑀺 𑀘 𑀧𑀲𑁆𑀲𑀤𑁆𑀥𑀺 𑀘 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀲𑀼𑀔𑁄 𑀘 𑀯𑀺𑀳𑀸𑀭𑁄.

𑁪𑁩𑁨. ‘‘𑀧𑀭𑁂 𑀘𑁂, 𑀧𑁄𑀝𑁆𑀞𑀧𑀸𑀤, 𑀅𑀫𑁆𑀳𑁂 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀓𑀢𑀫𑁄 𑀧𑀦 𑀲𑁄, 𑀆𑀯𑀼𑀲𑁄, 𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄, 𑀬𑀲𑁆𑀲 𑀢𑀼𑀫𑁆𑀳𑁂 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀣, 𑀬𑀣𑀸𑀧𑀝𑀺𑀧𑀦𑁆𑀦𑀸𑀦𑀁 𑀯𑁄 𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸 𑀧𑀳𑀻𑀬𑀺𑀲𑁆𑀲𑀦𑁆𑀢𑀺, 𑀯𑁄𑀤𑀸𑀦𑀺𑀬𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀦𑁆𑀢𑀺, 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀁 𑀯𑁂𑀧𑀼𑀮𑁆𑀮𑀢𑁆𑀢𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀣𑀸’𑀢𑀺, 𑀢𑁂𑀲𑀁 𑀫𑀬𑀁 𑀏𑀯𑀁 𑀧𑀼𑀝𑁆𑀞𑀸 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀫 𑁋 ‘𑀅𑀬𑀁 𑀯𑀸 𑀲𑁄, 𑀆𑀯𑀼𑀲𑁄, 𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄, 𑀬𑀲𑁆𑀲 𑀫𑀬𑀁 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫, 𑀬𑀣𑀸𑀧𑀝𑀺𑀧𑀦𑁆𑀦𑀸𑀦𑀁 𑀯𑁄 𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸 𑀧𑀳𑀻𑀬𑀺𑀲𑁆𑀲𑀦𑁆𑀢𑀺, 𑀯𑁄𑀤𑀸𑀦𑀺𑀬𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀦𑁆𑀢𑀺, 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀁 𑀯𑁂𑀧𑀼𑀮𑁆𑀮𑀢𑁆𑀢𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀣𑀸’𑀢𑀺.

𑁪𑁩𑁩. ‘‘𑀧𑀭𑁂 𑀘𑁂, 𑀧𑁄𑀝𑁆𑀞𑀧𑀸𑀤, 𑀅𑀫𑁆𑀳𑁂 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀓𑀢𑀫𑁄 𑀧𑀦 𑀲𑁄, 𑀆𑀯𑀼𑀲𑁄, 𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄, 𑀬𑀲𑁆𑀲 𑀢𑀼𑀫𑁆𑀳𑁂 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀣, 𑀬𑀣𑀸𑀧𑀝𑀺𑀧𑀦𑁆𑀦𑀸𑀦𑀁 𑀯𑁄 𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸 𑀧𑀳𑀻𑀬𑀺𑀲𑁆𑀲𑀦𑁆𑀢𑀺, 𑀯𑁄𑀤𑀸𑀦𑀺𑀬𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀦𑁆𑀢𑀺, 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀁 𑀯𑁂𑀧𑀼𑀮𑁆𑀮𑀢𑁆𑀢𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀣𑀸’𑀢𑀺? 𑀢𑁂𑀲𑀁 𑀫𑀬𑀁 𑀏𑀯𑀁 𑀧𑀼𑀝𑁆𑀞𑀸 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀫 𑁋 ‘𑀅𑀬𑀁 𑀯𑀸 𑀲𑁄, 𑀆𑀯𑀼𑀲𑁄, 𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀬𑀲𑁆𑀲 𑀫𑀬𑀁 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫, 𑀬𑀣𑀸𑀧𑀝𑀺𑀧𑀦𑁆𑀦𑀸𑀦𑀁 𑀯𑁄 𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸 𑀧𑀳𑀻𑀬𑀺𑀲𑁆𑀲𑀦𑁆𑀢𑀺, 𑀯𑁄𑀤𑀸𑀦𑀺𑀬𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀦𑁆𑀢𑀺, 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀁 𑀯𑁂𑀧𑀼𑀮𑁆𑀮𑀢𑁆𑀢𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀣𑀸’𑀢𑀺.

𑁪𑁩𑁪. ‘‘𑀧𑀭𑁂 𑀘𑁂, 𑀧𑁄𑀝𑁆𑀞𑀧𑀸𑀤, 𑀅𑀫𑁆𑀳𑁂 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀓𑀢𑀫𑁄 𑀧𑀦 𑀲𑁄, 𑀆𑀯𑀼𑀲𑁄, 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄, 𑀬𑀲𑁆𑀲 𑀢𑀼𑀫𑁆𑀳𑁂 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀣, 𑀬𑀣𑀸𑀧𑀝𑀺𑀧𑀦𑁆𑀦𑀸𑀦𑀁 𑀯𑁄 𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸 𑀧𑀳𑀻𑀬𑀺𑀲𑁆𑀲𑀦𑁆𑀢𑀺, 𑀯𑁄𑀤𑀸𑀦𑀺𑀬𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀦𑁆𑀢𑀺, 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀁 𑀯𑁂𑀧𑀼𑀮𑁆𑀮𑀢𑁆𑀢𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀣𑀸’𑀢𑀺, 𑀢𑁂𑀲𑀁 𑀫𑀬𑀁 𑀏𑀯𑀁 𑀧𑀼𑀝𑁆𑀞𑀸 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀫 𑁋 ‘𑀅𑀬𑀁 𑀯𑀸 𑀲𑁄, 𑀆𑀯𑀼𑀲𑁄, 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀬𑀲𑁆𑀲 𑀫𑀬𑀁 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫, 𑀬𑀣𑀸𑀧𑀝𑀺𑀧𑀦𑁆𑀦𑀸𑀦𑀁 𑀯𑁄 𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸 𑀧𑀳𑀻𑀬𑀺𑀲𑁆𑀲𑀦𑁆𑀢𑀺, 𑀯𑁄𑀤𑀸𑀦𑀺𑀬𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀦𑁆𑀢𑀺, 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀁 𑀯𑁂𑀧𑀼𑀮𑁆𑀮𑀢𑁆𑀢𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀣𑀸’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀧𑁄𑀝𑁆𑀞𑀧𑀸𑀤, 𑀦𑀦𑀼 𑀏𑀯𑀁 𑀲𑀦𑁆𑀢𑁂 𑀲𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺? ‘‘𑀅𑀤𑁆𑀥𑀸 𑀔𑁄, 𑀪𑀦𑁆𑀢𑁂, 𑀏𑀯𑀁 𑀲𑀦𑁆𑀢𑁂 𑀲𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺.

𑁪𑁩𑁫. ‘‘𑀲𑁂𑀬𑁆𑀬𑀣𑀸𑀧𑀺, 𑀧𑁄𑀝𑁆𑀞𑀧𑀸𑀤, 𑀧𑀼𑀭𑀺𑀲𑁄 𑀦𑀺𑀲𑁆𑀲𑁂𑀡𑀺𑀁 𑀓𑀭𑁂𑀬𑁆𑀬 𑀧𑀸𑀲𑀸𑀤𑀲𑁆𑀲 𑀆𑀭𑁄𑀳𑀡𑀸𑀬 𑀢𑀲𑁆𑀲𑁂𑀯 𑀧𑀸𑀲𑀸𑀤𑀲𑁆𑀲 𑀳𑁂𑀝𑁆𑀞𑀸. 𑀢𑀫𑁂𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘𑀅𑀫𑁆𑀪𑁄 𑀧𑀼𑀭𑀺𑀲, 𑀬𑀲𑁆𑀲 𑀢𑁆𑀯𑀁 𑀧𑀸𑀲𑀸𑀤𑀲𑁆𑀲 𑀆𑀭𑁄𑀳𑀡𑀸𑀬 𑀦𑀺𑀲𑁆𑀲𑁂𑀡𑀺𑀁 𑀓𑀭𑁄𑀲𑀺, 𑀚𑀸𑀦𑀸𑀲𑀺 𑀢𑀁 𑀧𑀸𑀲𑀸𑀤𑀁, 𑀧𑀼𑀭𑀢𑁆𑀣𑀺𑀫𑀸𑀬 𑀯𑀸 𑀤𑀺𑀲𑀸𑀬 𑀤𑀓𑁆𑀔𑀺𑀡𑀸𑀬 𑀯𑀸 𑀤𑀺𑀲𑀸𑀬 𑀧𑀘𑁆𑀙𑀺𑀫𑀸𑀬 𑀯𑀸 𑀤𑀺𑀲𑀸𑀬 𑀉𑀢𑁆𑀢𑀭𑀸𑀬 𑀯𑀸 𑀤𑀺𑀲𑀸𑀬 𑀉𑀘𑁆𑀘𑁄 𑀯𑀸 𑀦𑀻𑀘𑁄 𑀯𑀸 𑀫𑀚𑁆𑀛𑀺𑀫𑁄 𑀯𑀸’𑀢𑀺? 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀬𑀁 𑀯𑀸 𑀲𑁄, 𑀆𑀯𑀼𑀲𑁄, 𑀧𑀸𑀲𑀸𑀤𑁄, 𑀬𑀲𑁆𑀲𑀸𑀳𑀁 𑀆𑀭𑁄𑀳𑀡𑀸𑀬 𑀦𑀺𑀲𑁆𑀲𑁂𑀡𑀺𑀁 𑀓𑀭𑁄𑀫𑀺, 𑀢𑀲𑁆𑀲𑁂𑀯 𑀧𑀸𑀲𑀸𑀤𑀲𑁆𑀲 𑀳𑁂𑀝𑁆𑀞𑀸’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀧𑁄𑀝𑁆𑀞𑀧𑀸𑀤, 𑀦𑀦𑀼 𑀏𑀯𑀁 𑀲𑀦𑁆𑀢𑁂 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺? ‘‘𑀅𑀤𑁆𑀥𑀸 𑀔𑁄, 𑀪𑀦𑁆𑀢𑁂, 𑀏𑀯𑀁 𑀲𑀦𑁆𑀢𑁂 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺.

𑁪𑁩𑁬. ‘‘𑀏𑀯𑀫𑁂𑀯 𑀔𑁄, 𑀧𑁄𑀝𑁆𑀞𑀧𑀸𑀤, 𑀧𑀭𑁂 𑀘𑁂 𑀅𑀫𑁆𑀳𑁂 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀓𑀢𑀫𑁄 𑀧𑀦 𑀲𑁄, 𑀆𑀯𑀼𑀲𑁄, 𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄…𑀧𑁂… 𑀓𑀢𑀫𑁄 𑀧𑀦 𑀲𑁄, 𑀆𑀯𑀼𑀲𑁄, 𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄…𑀧𑁂… 𑀓𑀢𑀫𑁄 𑀧𑀦 𑀲𑁄, 𑀆𑀯𑀼𑀲𑁄, 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄, 𑀬𑀲𑁆𑀲 𑀢𑀼𑀫𑁆𑀳𑁂 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀣, 𑀬𑀣𑀸𑀧𑀝𑀺𑀧𑀦𑁆𑀦𑀸𑀦𑀁 𑀯𑁄 𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸 𑀧𑀳𑀻𑀬𑀺𑀲𑁆𑀲𑀦𑁆𑀢𑀺, 𑀯𑁄𑀤𑀸𑀦𑀺𑀬𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀦𑁆𑀢𑀺, 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀁 𑀯𑁂𑀧𑀼𑀮𑁆𑀮𑀢𑁆𑀢𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀣𑀸’𑀢𑀺, 𑀢𑁂𑀲𑀁 𑀫𑀬𑀁 𑀏𑀯𑀁 𑀧𑀼𑀝𑁆𑀞𑀸 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀫 𑁋 ‘𑀅𑀬𑀁 𑀯𑀸 𑀲𑁄, 𑀆𑀯𑀼𑀲𑁄, 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄, 𑀬𑀲𑁆𑀲 𑀫𑀬𑀁 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀫, 𑀬𑀣𑀸𑀧𑀝𑀺𑀧𑀦𑁆𑀦𑀸𑀦𑀁 𑀯𑁄 𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸 𑀧𑀳𑀻𑀬𑀺𑀲𑁆𑀲𑀦𑁆𑀢𑀺, 𑀯𑁄𑀤𑀸𑀦𑀺𑀬𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀺𑀲𑁆𑀲𑀦𑁆𑀢𑀺, 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀁 𑀯𑁂𑀧𑀼𑀮𑁆𑀮𑀢𑁆𑀢𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀣𑀸’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀧𑁄𑀝𑁆𑀞𑀧𑀸𑀤, 𑀦𑀦𑀼 𑀏𑀯𑀁 𑀲𑀦𑁆𑀢𑁂 𑀲𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺? ‘‘𑀅𑀤𑁆𑀥𑀸 𑀔𑁄, 𑀪𑀦𑁆𑀢𑁂, 𑀏𑀯𑀁 𑀲𑀦𑁆𑀢𑁂 𑀲𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺.

𑁪𑁩𑁭. 𑀏𑀯𑀁 𑀯𑀼𑀢𑁆𑀢𑁂 𑀘𑀺𑀢𑁆𑀢𑁄 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑀲𑁆𑀫𑀺𑀁, 𑀪𑀦𑁆𑀢𑁂, 𑀲𑀫𑀬𑁂 𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀳𑁄𑀢𑀺, 𑀫𑁄𑀖𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀳𑁄𑀢𑀺, 𑀫𑁄𑀖𑁄 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀳𑁄𑀢𑀺; 𑀑𑀴𑀸𑀭𑀺𑀓𑁄 𑀯𑀸𑀲𑁆𑀲 𑀅𑀢𑁆𑀢𑀧𑀝𑀺𑀮𑀸𑀪𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀘𑁆𑀘𑁄 𑀳𑁄𑀢𑀺. 𑀬𑀲𑁆𑀫𑀺𑀁, 𑀪𑀦𑁆𑀢𑁂, 𑀲𑀫𑀬𑁂 𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀳𑁄𑀢𑀺, 𑀫𑁄𑀖𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀳𑁄𑀢𑀺, 𑀫𑁄𑀖𑁄 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀳𑁄𑀢𑀺; 𑀫𑀦𑁄𑀫𑀬𑁄 𑀯𑀸𑀲𑁆𑀲 𑀅𑀢𑁆𑀢𑀧𑀝𑀺𑀮𑀸𑀪𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀘𑁆𑀘𑁄 𑀳𑁄𑀢𑀺. 𑀬𑀲𑁆𑀫𑀺𑀁, 𑀪𑀦𑁆𑀢𑁂, 𑀲𑀫𑀬𑁂 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀳𑁄𑀢𑀺, 𑀫𑁄𑀖𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀳𑁄𑀢𑀺, 𑀫𑁄𑀖𑁄 𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀳𑁄𑀢𑀺; 𑀅𑀭𑀽𑀧𑁄 𑀯𑀸𑀲𑁆𑀲 𑀅𑀢𑁆𑀢𑀧𑀝𑀺𑀮𑀸𑀪𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀘𑁆𑀘𑁄 𑀳𑁄𑀢𑀻’’𑀢𑀺.

‘‘𑀬𑀲𑁆𑀫𑀺𑀁, 𑀘𑀺𑀢𑁆𑀢, 𑀲𑀫𑀬𑁂 𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀳𑁄𑀢𑀺, 𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀦 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺; 𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑁆𑀯𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀬𑀲𑁆𑀫𑀺𑀁, 𑀘𑀺𑀢𑁆𑀢, 𑀲𑀫𑀬𑁂 𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀳𑁄𑀢𑀺, 𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀦 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺; 𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑁆𑀯𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀬𑀲𑁆𑀫𑀺𑀁, 𑀘𑀺𑀢𑁆𑀢, 𑀲𑀫𑀬𑁂 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀳𑁄𑀢𑀺, 𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀦 𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺; 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑁆𑀯𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀁 𑀕𑀘𑁆𑀙𑀢𑀺.

𑁪𑁩𑁮. ‘‘𑀲𑀘𑁂 𑀢𑀁, 𑀘𑀺𑀢𑁆𑀢, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀅𑀳𑁄𑀲𑀺 𑀢𑁆𑀯𑀁 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀦 𑀢𑁆𑀯𑀁 𑀦𑀸𑀳𑁄𑀲𑀺; 𑀪𑀯𑀺𑀲𑁆𑀲𑀲𑀺 𑀢𑁆𑀯𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀦 𑀢𑁆𑀯𑀁 𑀦 𑀪𑀯𑀺𑀲𑁆𑀲𑀲𑀺; 𑀅𑀢𑁆𑀣𑀺 𑀢𑁆𑀯𑀁 𑀏𑀢𑀭𑀳𑀺, 𑀦 𑀢𑁆𑀯𑀁 𑀦𑀢𑁆𑀣𑀻’𑀢𑀺, 𑀏𑀯𑀁 𑀧𑀼𑀝𑁆𑀞𑁄 𑀢𑁆𑀯𑀁, 𑀘𑀺𑀢𑁆𑀢, 𑀓𑀺𑀦𑁆𑀢𑀺 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀻’’𑀢𑀺?

‘‘𑀲𑀘𑁂 𑀫𑀁, 𑀪𑀦𑁆𑀢𑁂, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀅𑀳𑁄𑀲𑀺 𑀢𑁆𑀯𑀁 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀦 𑀢𑁆𑀯𑀁 𑀦 𑀅𑀳𑁄𑀲𑀺; 𑀪𑀯𑀺𑀲𑁆𑀲𑀲𑀺 𑀢𑁆𑀯𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀦 𑀢𑁆𑀯𑀁 𑀦 𑀪𑀯𑀺𑀲𑁆𑀲𑀲𑀺; 𑀅𑀢𑁆𑀣𑀺 𑀢𑁆𑀯𑀁 𑀏𑀢𑀭𑀳𑀺, 𑀦 𑀢𑁆𑀯𑀁 𑀦𑀢𑁆𑀣𑀻’𑀢𑀺. 𑀏𑀯𑀁 𑀧𑀼𑀝𑁆𑀞𑁄 𑀅𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀁 𑁋 ‘𑀅𑀳𑁄𑀲𑀸𑀳𑀁 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀦𑀸𑀳𑀁 𑀦 𑀅𑀳𑁄𑀲𑀺𑀁; 𑀪𑀯𑀺𑀲𑁆𑀲𑀸𑀫𑀳𑀁 𑀅𑀦𑀸𑀕𑀢𑀫𑀤𑁆𑀥𑀸𑀦𑀁, 𑀦𑀸𑀳𑀁 𑀦 𑀪𑀯𑀺𑀲𑁆𑀲𑀸𑀫𑀺; 𑀅𑀢𑁆𑀣𑀸𑀳𑀁 𑀏𑀢𑀭𑀳𑀺, 𑀦𑀸𑀳𑀁 𑀦𑀢𑁆𑀣𑀻’𑀢𑀺. 𑀏𑀯𑀁 𑀧𑀼𑀝𑁆𑀞𑁄 𑀅𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬’’𑀦𑁆𑀢𑀺.

‘‘𑀲𑀘𑁂 𑀧𑀦 𑀢𑀁, 𑀘𑀺𑀢𑁆𑀢, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀬𑁄 𑀢𑁂 𑀅𑀳𑁄𑀲𑀺 𑀅𑀢𑀻𑀢𑁄 𑀅𑀢𑁆𑀢𑀧𑀝𑀺𑀮𑀸𑀪𑁄, 𑀲𑁄𑀯 [𑀲𑁆𑀯𑁂𑀯 (𑀲𑀻. 𑀧𑀻.), 𑀲𑁄𑀬𑁂𑀯 (𑀲𑁆𑀬𑀸.)] 𑀢𑁂 𑀅𑀢𑁆𑀢𑀧𑀝𑀺𑀮𑀸𑀪𑁄 𑀲𑀘𑁆𑀘𑁄, 𑀫𑁄𑀖𑁄 𑀅𑀦𑀸𑀕𑀢𑁄, 𑀫𑁄𑀖𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄? 𑀬𑁄 [𑀬𑁄 𑀯𑀸 (𑀧𑀻.)] 𑀢𑁂 𑀪𑀯𑀺𑀲𑁆𑀲𑀢𑀺 𑀅𑀦𑀸𑀕𑀢𑁄 𑀅𑀢𑁆𑀢𑀧𑀝𑀺𑀮𑀸𑀪𑁄, 𑀲𑁄𑀯 𑀢𑁂 𑀅𑀢𑁆𑀢𑀧𑀝𑀺𑀮𑀸𑀪𑁄 𑀲𑀘𑁆𑀘𑁄, 𑀫𑁄𑀖𑁄 𑀅𑀢𑀻𑀢𑁄, 𑀫𑁄𑀖𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄? 𑀬𑁄 [𑀬𑁄 𑀯𑀸 (𑀧𑀻.)] 𑀢𑁂 𑀏𑀢𑀭𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀢𑁆𑀢𑀧𑀝𑀺𑀮𑀸𑀪𑁄, 𑀲𑁄𑀯 [𑀲𑁄 𑀘 (𑀓.)] 𑀢𑁂 𑀅𑀢𑁆𑀢𑀧𑀝𑀺𑀮𑀸𑀪𑁄 𑀲𑀘𑁆𑀘𑁄, 𑀫𑁄𑀖𑁄 𑀅𑀢𑀻𑀢𑁄, 𑀫𑁄𑀖𑁄 𑀅𑀦𑀸𑀕𑀢𑁄’𑀢𑀺. 𑀏𑀯𑀁 𑀧𑀼𑀝𑁆𑀞𑁄 𑀢𑁆𑀯𑀁, 𑀘𑀺𑀢𑁆𑀢, 𑀓𑀺𑀦𑁆𑀢𑀺 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀻’’𑀢𑀺?

‘‘𑀲𑀘𑁂 𑀧𑀦 𑀫𑀁, 𑀪𑀦𑁆𑀢𑁂, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀬𑁄 𑀢𑁂 𑀅𑀳𑁄𑀲𑀺 𑀅𑀢𑀻𑀢𑁄 𑀅𑀢𑁆𑀢𑀧𑀝𑀺𑀮𑀸𑀪𑁄, 𑀲𑁄𑀯 𑀢𑁂 𑀅𑀢𑁆𑀢𑀧𑀝𑀺𑀮𑀸𑀪𑁄 𑀲𑀘𑁆𑀘𑁄, 𑀫𑁄𑀖𑁄 𑀅𑀦𑀸𑀕𑀢𑁄, 𑀫𑁄𑀖𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄. 𑀬𑁄 𑀢𑁂 𑀪𑀯𑀺𑀲𑁆𑀲𑀢𑀺 𑀅𑀦𑀸𑀕𑀢𑁄 𑀅𑀢𑁆𑀢𑀧𑀝𑀺𑀮𑀸𑀪𑁄, 𑀲𑁄𑀯 𑀢𑁂 𑀅𑀢𑁆𑀢𑀧𑀝𑀺𑀮𑀸𑀪𑁄 𑀲𑀘𑁆𑀘𑁄, 𑀫𑁄𑀖𑁄 𑀅𑀢𑀻𑀢𑁄, 𑀫𑁄𑀖𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄. 𑀬𑁄 𑀢𑁂 𑀏𑀢𑀭𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀢𑁆𑀢𑀧𑀝𑀺𑀮𑀸𑀪𑁄, 𑀲𑁄𑀯 𑀢𑁂 𑀅𑀢𑁆𑀢𑀧𑀝𑀺𑀮𑀸𑀪𑁄 𑀲𑀘𑁆𑀘𑁄, 𑀫𑁄𑀖𑁄 𑀅𑀢𑀻𑀢𑁄, 𑀫𑁄𑀖𑁄 𑀅𑀦𑀸𑀕𑀢𑁄’𑀢𑀺. 𑀏𑀯𑀁 𑀧𑀼𑀝𑁆𑀞𑁄 𑀅𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀁 𑁋 ‘𑀬𑁄 𑀫𑁂 𑀅𑀳𑁄𑀲𑀺 𑀅𑀢𑀻𑀢𑁄 𑀅𑀢𑁆𑀢𑀧𑀝𑀺𑀮𑀸𑀪𑁄, 𑀲𑁄𑀯 𑀫𑁂 𑀅𑀢𑁆𑀢𑀧𑀝𑀺𑀮𑀸𑀪𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀘𑁆𑀘𑁄 𑀅𑀳𑁄𑀲𑀺, 𑀫𑁄𑀖𑁄 𑀅𑀦𑀸𑀕𑀢𑁄, 𑀫𑁄𑀖𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄. 𑀬𑁄 𑀫𑁂 𑀪𑀯𑀺𑀲𑁆𑀲𑀢𑀺 𑀅𑀦𑀸𑀕𑀢𑁄 𑀅𑀢𑁆𑀢𑀧𑀝𑀺𑀮𑀸𑀪𑁄, 𑀲𑁄𑀯 𑀫𑁂 𑀅𑀢𑁆𑀢𑀧𑀝𑀺𑀮𑀸𑀪𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀘𑁆𑀘𑁄 𑀪𑀯𑀺𑀲𑁆𑀲𑀢𑀺, 𑀫𑁄𑀖𑁄 𑀅𑀢𑀻𑀢𑁄, 𑀫𑁄𑀖𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄. 𑀬𑁄 𑀫𑁂 𑀏𑀢𑀭𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀢𑁆𑀢𑀧𑀝𑀺𑀮𑀸𑀪𑁄, 𑀲𑁄𑀯 𑀫𑁂 𑀅𑀢𑁆𑀢𑀧𑀝𑀺𑀮𑀸𑀪𑁄 𑀲𑀘𑁆𑀘𑁄, 𑀫𑁄𑀖𑁄 𑀅𑀢𑀻𑀢𑁄, 𑀫𑁄𑀖𑁄 𑀅𑀦𑀸𑀕𑀢𑁄’𑀢𑀺. 𑀏𑀯𑀁 𑀧𑀼𑀝𑁆𑀞𑁄 𑀅𑀳𑀁, 𑀪𑀦𑁆𑀢𑁂, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬’’𑀦𑁆𑀢𑀺.

𑁪𑁩𑁯. ‘‘𑀏𑀯𑀫𑁂𑀯 𑀔𑁄, 𑀘𑀺𑀢𑁆𑀢, 𑀬𑀲𑁆𑀫𑀺𑀁 𑀲𑀫𑀬𑁂 𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀳𑁄𑀢𑀺, 𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀦 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀢𑁆𑀯𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀬𑀲𑁆𑀫𑀺𑀁, 𑀘𑀺𑀢𑁆𑀢, 𑀲𑀫𑀬𑁂 𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀳𑁄𑀢𑀺…𑀧𑁂… 𑀬𑀲𑁆𑀫𑀺𑀁, 𑀘𑀺𑀢𑁆𑀢, 𑀲𑀫𑀬𑁂 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀳𑁄𑀢𑀺, 𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀦 𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺; 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀢𑁆𑀯𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀁 𑀕𑀘𑁆𑀙𑀢𑀺.

𑁪𑁪𑁦. ‘‘𑀲𑁂𑀬𑁆𑀬𑀣𑀸𑀧𑀺, 𑀘𑀺𑀢𑁆𑀢, 𑀕𑀯𑀸 𑀔𑀻𑀭𑀁, 𑀔𑀻𑀭𑀫𑁆𑀳𑀸 𑀤𑀥𑀺, 𑀤𑀥𑀺𑀫𑁆𑀳𑀸 𑀦𑀯𑀦𑀻𑀢𑀁, 𑀦𑀯𑀦𑀻𑀢𑀫𑁆𑀳𑀸 𑀲𑀧𑁆𑀧𑀺, 𑀲𑀧𑁆𑀧𑀺𑀫𑁆𑀳𑀸 𑀲𑀧𑁆𑀧𑀺𑀫𑀡𑁆𑀟𑁄. 𑀬𑀲𑁆𑀫𑀺𑀁 𑀲𑀫𑀬𑁂 𑀔𑀻𑀭𑀁 𑀳𑁄𑀢𑀺, 𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀤𑀥𑀻𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀦 𑀦𑀯𑀦𑀻𑀢𑀦𑁆𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀦 𑀲𑀧𑁆𑀧𑀻𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀦 𑀲𑀧𑁆𑀧𑀺𑀫𑀡𑁆𑀟𑁄𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺; 𑀔𑀻𑀭𑀁 𑀢𑁆𑀯𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀬𑀲𑁆𑀫𑀺𑀁 𑀲𑀫𑀬𑁂 𑀤𑀥𑀺 𑀳𑁄𑀢𑀺…𑀧𑁂… 𑀦𑀯𑀦𑀻𑀢𑀁 𑀳𑁄𑀢𑀺… 𑀲𑀧𑁆𑀧𑀺 𑀳𑁄𑀢𑀺… 𑀲𑀧𑁆𑀧𑀺𑀫𑀡𑁆𑀟𑁄 𑀳𑁄𑀢𑀺, 𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀔𑀻𑀭𑀦𑁆𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀦 𑀤𑀥𑀻𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀦 𑀦𑀯𑀦𑀻𑀢𑀦𑁆𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀦 𑀲𑀧𑁆𑀧𑀻𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺; 𑀲𑀧𑁆𑀧𑀺𑀫𑀡𑁆𑀟𑁄 𑀢𑁆𑀯𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀏𑀯𑀫𑁂𑀯 𑀔𑁄, 𑀘𑀺𑀢𑁆𑀢, 𑀬𑀲𑁆𑀫𑀺𑀁 𑀲𑀫𑀬𑁂 𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀳𑁄𑀢𑀺…𑀧𑁂… 𑀬𑀲𑁆𑀫𑀺𑀁, 𑀘𑀺𑀢𑁆𑀢, 𑀲𑀫𑀬𑁂 𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀳𑁄𑀢𑀺…𑀧𑁂… 𑀬𑀲𑁆𑀫𑀺𑀁, 𑀘𑀺𑀢𑁆𑀢, 𑀲𑀫𑀬𑁂 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀳𑁄𑀢𑀺, 𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀑𑀴𑀸𑀭𑀺𑀓𑁄 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀦 𑀫𑀦𑁄𑀫𑀬𑁄 𑀅𑀢𑁆𑀢𑀧𑀝𑀺𑀮𑀸𑀪𑁄𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺; 𑀅𑀭𑀽𑀧𑁄 𑀅𑀢𑁆𑀢𑀧𑀝𑀺𑀮𑀸𑀪𑁄 𑀢𑁆𑀯𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀇𑀫𑀸 𑀔𑁄 𑀘𑀺𑀢𑁆𑀢, 𑀮𑁄𑀓𑀲𑀫𑀜𑁆𑀜𑀸 𑀮𑁄𑀓𑀦𑀺𑀭𑀼𑀢𑁆𑀢𑀺𑀬𑁄 𑀮𑁄𑀓𑀯𑁄𑀳𑀸𑀭𑀸 𑀮𑁄𑀓𑀧𑀜𑁆𑀜𑀢𑁆𑀢𑀺𑀬𑁄, 𑀬𑀸𑀳𑀺 𑀢𑀣𑀸𑀕𑀢𑁄 𑀯𑁄𑀳𑀭𑀢𑀺 𑀅𑀧𑀭𑀸𑀫𑀲’’𑀦𑁆𑀢𑀺.

𑁪𑁪𑁧. 𑀏𑀯𑀁 𑀯𑀼𑀢𑁆𑀢𑁂, 𑀧𑁄𑀝𑁆𑀞𑀧𑀸𑀤𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂! 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂, 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑁋 ‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’𑀢𑀺. 𑀏𑀯𑀫𑁂𑀯𑀁 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺.

𑀘𑀺𑀢𑁆𑀢𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑀉𑀧𑀲𑀫𑁆𑀧𑀤𑀸

𑁪𑁪𑁨. 𑀘𑀺𑀢𑁆𑀢𑁄 𑀧𑀦 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂; 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂! 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 𑁋 ‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’𑀢𑀺. 𑀏𑀯𑀫𑁂𑀯𑀁 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀮𑀪𑁂𑀬𑁆𑀬𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀁 𑀉𑀧𑀲𑀫𑁆𑀧𑀤’’𑀦𑁆𑀢𑀺.

𑁪𑁪𑁩. 𑀅𑀮𑀢𑁆𑀣 𑀔𑁄 𑀘𑀺𑀢𑁆𑀢𑁄 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀅𑀮𑀢𑁆𑀣 𑀉𑀧𑀲𑀫𑁆𑀧𑀤𑀁. 𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑁄 𑀔𑁄 𑀧𑀦𑀸𑀬𑀲𑁆𑀫𑀸 𑀘𑀺𑀢𑁆𑀢𑁄 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀦 𑀘𑀺𑀭𑀲𑁆𑀲𑁂𑀯 𑁋 𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺, 𑀢𑀤𑀦𑀼𑀢𑁆𑀢𑀭𑀁 𑁋 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑁋 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄 𑀔𑁄 𑀧𑀦𑀸𑀬𑀲𑁆𑀫𑀸 𑀘𑀺𑀢𑁆𑀢𑁄 𑀳𑀢𑁆𑀣𑀺𑀲𑀸𑀭𑀺𑀧𑀼𑀢𑁆𑀢𑁄 𑀅𑀭𑀳𑀢𑀁 𑀅𑀳𑁄𑀲𑀻𑀢𑀺.

𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀦𑀯𑀫𑀁.

𑁧𑁦. 𑀲𑀼𑀪𑀲𑀼𑀢𑁆𑀢𑀁

𑀲𑀼𑀪𑀫𑀸𑀡𑀯𑀯𑀢𑁆𑀣𑀼

𑁪𑁪𑁪. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂 𑀅𑀘𑀺𑀭𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀼𑀪𑁄 𑀫𑀸𑀡𑀯𑁄 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑁄 𑀲𑀸𑀯𑀢𑁆𑀣𑀺𑀬𑀁 𑀧𑀝𑀺𑀯𑀲𑀢𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦.

𑁪𑁪𑁫. 𑀅𑀣 𑀔𑁄 𑀲𑀼𑀪𑁄 𑀫𑀸𑀡𑀯𑁄 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑁄 𑀅𑀜𑁆𑀜𑀢𑀭𑀁 𑀫𑀸𑀡𑀯𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀫𑀸𑀡𑀯𑀓, 𑀬𑁂𑀦 𑀲𑀫𑀡𑁄 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀫 𑀯𑀘𑀦𑁂𑀦 𑀲𑀫𑀡𑀁 𑀆𑀦𑀦𑁆𑀤𑀁 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙 𑁋 ‘𑀲𑀼𑀪𑁄 𑀫𑀸𑀡𑀯𑁄 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑁄 𑀪𑀯𑀦𑁆𑀢𑀁 𑀆𑀦𑀦𑁆𑀤𑀁 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙𑀢𑀻’𑀢𑀺. 𑀏𑀯𑀜𑁆𑀘 𑀯𑀤𑁂𑀳𑀺 𑁋 ‘𑀲𑀸𑀥𑀼 𑀓𑀺𑀭 𑀪𑀯𑀁 𑀆𑀦𑀦𑁆𑀤𑁄 𑀬𑁂𑀦 𑀲𑀼𑀪𑀲𑁆𑀲 𑀫𑀸𑀡𑀯𑀲𑁆𑀲 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’’𑀢𑀺.

𑁪𑁪𑁬. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀲𑁄 𑀫𑀸𑀡𑀯𑀓𑁄 𑀲𑀼𑀪𑀲𑁆𑀲 𑀫𑀸𑀡𑀯𑀲𑁆𑀲 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀫𑀸𑀡𑀯𑀓𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀲𑀼𑀪𑁄 𑀫𑀸𑀡𑀯𑁄 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑁄 𑀪𑀯𑀦𑁆𑀢𑀁 𑀆𑀦𑀦𑁆𑀤𑀁 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙𑀢𑀺; 𑀏𑀯𑀜𑁆𑀘 𑀯𑀤𑁂𑀢𑀺 𑁋 ‘𑀲𑀸𑀥𑀼 𑀓𑀺𑀭 𑀪𑀯𑀁 𑀆𑀦𑀦𑁆𑀤𑁄 𑀬𑁂𑀦 𑀲𑀼𑀪𑀲𑁆𑀲 𑀫𑀸𑀡𑀯𑀲𑁆𑀲 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’’𑀢𑀺.

𑁪𑁪𑁭. 𑀏𑀯𑀁 𑀯𑀼𑀢𑁆𑀢𑁂, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑀁 𑀫𑀸𑀡𑀯𑀓𑀁 𑀏𑀢𑀤𑀯𑁄𑀘 𑁋 ‘‘𑀅𑀓𑀸𑀮𑁄 𑀔𑁄, 𑀫𑀸𑀡𑀯𑀓. 𑀅𑀢𑁆𑀣𑀺 𑀫𑁂 𑀅𑀚𑁆𑀚 𑀪𑁂𑀲𑀚𑁆𑀚𑀫𑀢𑁆𑀢𑀸 𑀧𑀻𑀢𑀸. 𑀅𑀧𑁆𑀧𑁂𑀯𑀦𑀸𑀫 𑀲𑁆𑀯𑁂𑀧𑀺 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘 𑀉𑀧𑀸𑀤𑀸𑀬𑀸’’𑀢𑀺.

‘‘𑀏𑀯𑀁, 𑀪𑁄’’𑀢𑀺 𑀔𑁄 𑀲𑁄 𑀫𑀸𑀡𑀯𑀓𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀲𑀼𑀪𑁄 𑀫𑀸𑀡𑀯𑁄 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀼𑀪𑀁 𑀫𑀸𑀡𑀯𑀁 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑀁 𑀏𑀢𑀤𑀯𑁄𑀘, ‘‘𑀅𑀯𑁄𑀘𑀼𑀫𑁆𑀳𑀸 𑀔𑁄 𑀫𑀬𑀁 𑀪𑁄𑀢𑁄 𑀯𑀘𑀦𑁂𑀦 𑀢𑀁 𑀪𑀯𑀦𑁆𑀢𑀁 𑀆𑀦𑀦𑁆𑀤𑀁 𑁋 ‘𑀲𑀼𑀪𑁄 𑀫𑀸𑀡𑀯𑁄 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑁄 𑀪𑀯𑀦𑁆𑀢𑀁 𑀆𑀦𑀦𑁆𑀤𑀁 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙𑀢𑀺, 𑀏𑀯𑀜𑁆𑀘 𑀯𑀤𑁂𑀢𑀺 𑁋 ‘‘𑀲𑀸𑀥𑀼 𑀓𑀺𑀭 𑀪𑀯𑀁 𑀆𑀦𑀦𑁆𑀤𑁄 𑀬𑁂𑀦 𑀲𑀼𑀪𑀲𑁆𑀲 𑀫𑀸𑀡𑀯𑀲𑁆𑀲 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀪𑁄, 𑀲𑀫𑀡𑁄 𑀆𑀦𑀦𑁆𑀤𑁄 𑀫𑀁 𑀏𑀢𑀤𑀯𑁄𑀘 𑁋 ‘𑀅𑀓𑀸𑀮𑁄 𑀔𑁄, 𑀫𑀸𑀡𑀯𑀓. 𑀅𑀢𑁆𑀣𑀺 𑀫𑁂 𑀅𑀚𑁆𑀚 𑀪𑁂𑀲𑀚𑁆𑀚𑀫𑀢𑁆𑀢𑀸 𑀧𑀻𑀢𑀸. 𑀅𑀧𑁆𑀧𑁂𑀯𑀦𑀸𑀫 𑀲𑁆𑀯𑁂𑀧𑀺 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘 𑀉𑀧𑀸𑀤𑀸𑀬𑀸’𑀢𑀺. 𑀏𑀢𑁆𑀢𑀸𑀯𑀢𑀸𑀧𑀺 𑀔𑁄, 𑀪𑁄, 𑀓𑀢𑀫𑁂𑀯 𑀏𑀢𑀁, 𑀬𑀢𑁄 𑀔𑁄 𑀲𑁄 𑀪𑀯𑀁 𑀆𑀦𑀦𑁆𑀤𑁄 𑀑𑀓𑀸𑀲𑀫𑀓𑀸𑀲𑀺 𑀲𑁆𑀯𑀸𑀢𑀦𑀸𑀬𑀧𑀺 𑀉𑀧𑀲𑀗𑁆𑀓𑀫𑀦𑀸𑀬𑀸’’𑀢𑀺.

𑁪𑁪𑁮. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀘𑁂𑀢𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀘𑁆𑀙𑀸𑀲𑀫𑀡𑁂𑀦 𑀬𑁂𑀦 𑀲𑀼𑀪𑀲𑁆𑀲 𑀫𑀸𑀡𑀯𑀲𑁆𑀲 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺.

𑀅𑀣 𑀔𑁄 𑀲𑀼𑀪𑁄 𑀫𑀸𑀡𑀯𑁄 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑁄 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀼𑀪𑁄 𑀫𑀸𑀡𑀯𑁄 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀪𑀯𑀜𑁆𑀳𑀺 𑀆𑀦𑀦𑁆𑀤𑁄 𑀢𑀲𑁆𑀲 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀤𑀻𑀖𑀭𑀢𑁆𑀢𑀁 𑀉𑀧𑀝𑁆𑀞𑀸𑀓𑁄 𑀲𑀦𑁆𑀢𑀺𑀓𑀸𑀯𑀘𑀭𑁄 𑀲𑀫𑀻𑀧𑀘𑀸𑀭𑀻. 𑀪𑀯𑀫𑁂𑀢𑀁 𑀆𑀦𑀦𑁆𑀤𑁄 𑀚𑀸𑀦𑁂𑀬𑁆𑀬, 𑀬𑁂𑀲𑀁 𑀲𑁄 𑀪𑀯𑀁 𑀕𑁄𑀢𑀫𑁄 𑀥𑀫𑁆𑀫𑀸𑀦𑀁 𑀯𑀡𑁆𑀡𑀯𑀸𑀤𑀻 𑀅𑀳𑁄𑀲𑀺, 𑀬𑀢𑁆𑀣 𑀘 𑀇𑀫𑀁 𑀚𑀦𑀢𑀁 𑀲𑀫𑀸𑀤𑀧𑁂𑀲𑀺 𑀦𑀺𑀯𑁂𑀲𑁂𑀲𑀺 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀓𑀢𑀫𑁂𑀲𑀸𑀦𑀁 𑀔𑁄, 𑀪𑁄 𑀆𑀦𑀦𑁆𑀤, 𑀥𑀫𑁆𑀫𑀸𑀦𑀁 𑀲𑁄 𑀪𑀯𑀁 𑀕𑁄𑀢𑀫𑁄 𑀯𑀡𑁆𑀡𑀯𑀸𑀤𑀻 𑀅𑀳𑁄𑀲𑀺; 𑀓𑀢𑁆𑀣 𑀘 𑀇𑀫𑀁 𑀚𑀦𑀢𑀁 𑀲𑀫𑀸𑀤𑀧𑁂𑀲𑀺 𑀦𑀺𑀯𑁂𑀲𑁂𑀲𑀺 𑀧𑀢𑀺𑀝𑁆𑀞𑀸𑀧𑁂𑀲𑀻’’𑀢𑀺?

𑁪𑁪𑁯. ‘‘𑀢𑀺𑀡𑁆𑀡𑀁 𑀔𑁄, 𑀫𑀸𑀡𑀯, 𑀔𑀦𑁆𑀥𑀸𑀦𑀁 𑀲𑁄 𑀪𑀕𑀯𑀸 𑀯𑀡𑁆𑀡𑀯𑀸𑀤𑀻 𑀅𑀳𑁄𑀲𑀺; 𑀏𑀢𑁆𑀣 𑀘 𑀇𑀫𑀁 𑀚𑀦𑀢𑀁 𑀲𑀫𑀸𑀤𑀧𑁂𑀲𑀺 𑀦𑀺𑀯𑁂𑀲𑁂𑀲𑀺 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀓𑀢𑀫𑁂𑀲𑀁 𑀢𑀺𑀡𑁆𑀡𑀁? 𑀅𑀭𑀺𑀬𑀲𑁆𑀲 𑀲𑀻𑀮𑀓𑁆𑀔𑀦𑁆𑀥𑀲𑁆𑀲, 𑀅𑀭𑀺𑀬𑀲𑁆𑀲 𑀲𑀫𑀸𑀥𑀺𑀓𑁆𑀔𑀦𑁆𑀥𑀲𑁆𑀲, 𑀅𑀭𑀺𑀬𑀲𑁆𑀲 𑀧𑀜𑁆𑀜𑀸𑀓𑁆𑀔𑀦𑁆𑀥𑀲𑁆𑀲. 𑀇𑀫𑁂𑀲𑀁 𑀔𑁄, 𑀫𑀸𑀡𑀯, 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁 𑀲𑁄 𑀪𑀕𑀯𑀸 𑀯𑀡𑁆𑀡𑀯𑀸𑀤𑀻 𑀅𑀳𑁄𑀲𑀺; 𑀏𑀢𑁆𑀣 𑀘 𑀇𑀫𑀁 𑀚𑀦𑀢𑀁 𑀲𑀫𑀸𑀤𑀧𑁂𑀲𑀺 𑀦𑀺𑀯𑁂𑀲𑁂𑀲𑀺 𑀧𑀢𑀺𑀝𑁆𑀞𑀸𑀧𑁂𑀲𑀻’’𑀢𑀺.

𑀲𑀻𑀮𑀓𑁆𑀔𑀦𑁆𑀥𑁄

𑁪𑁫𑁦. ‘‘𑀓𑀢𑀫𑁄 𑀧𑀦 𑀲𑁄, 𑀪𑁄 𑀆𑀦𑀦𑁆𑀤, 𑀅𑀭𑀺𑀬𑁄 𑀲𑀻𑀮𑀓𑁆𑀔𑀦𑁆𑀥𑁄, 𑀬𑀲𑁆𑀲 𑀲𑁄 𑀪𑀯𑀁 𑀕𑁄𑀢𑀫𑁄 𑀯𑀡𑁆𑀡𑀯𑀸𑀤𑀻 𑀅𑀳𑁄𑀲𑀺, 𑀬𑀢𑁆𑀣 𑀘 𑀇𑀫𑀁 𑀚𑀦𑀢𑀁 𑀲𑀫𑀸𑀤𑀧𑁂𑀲𑀺 𑀦𑀺𑀯𑁂𑀲𑁂𑀲𑀺 𑀧𑀢𑀺𑀝𑁆𑀞𑀸𑀧𑁂𑀲𑀻’’𑀢𑀺?

‘‘𑀇𑀥, 𑀫𑀸𑀡𑀯, 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸. 𑀲𑁄 𑀇𑀫𑀁 𑀮𑁄𑀓𑀁 𑀲𑀤𑁂𑀯𑀓𑀁 𑀲𑀫𑀸𑀭𑀓𑀁 𑀲𑀩𑁆𑀭𑀳𑁆𑀫𑀓𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀢𑀁 𑀥𑀫𑁆𑀫𑀁 𑀲𑀼𑀡𑀸𑀢𑀺 𑀕𑀳𑀧𑀢𑀺 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁄 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄. 𑀲𑁄 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀢𑀣𑀸𑀕𑀢𑁂 𑀲𑀤𑁆𑀥𑀁 𑀧𑀝𑀺𑀮𑀪𑀢𑀺. 𑀲𑁄 𑀢𑁂𑀦 𑀲𑀤𑁆𑀥𑀸𑀧𑀝𑀺𑀮𑀸𑀪𑁂𑀦 𑀲𑀫𑀦𑁆𑀦𑀸𑀕𑀢𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄 𑀭𑀚𑁄𑀧𑀣𑁄, 𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸, 𑀦𑀬𑀺𑀤𑀁 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁 𑀲𑀗𑁆𑀔𑀮𑀺𑀔𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬’𑀦𑁆𑀢𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀧𑁆𑀧𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀫𑀳𑀦𑁆𑀢𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀅𑀧𑁆𑀧𑀁 𑀯𑀸 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀫𑀳𑀦𑁆𑀢𑀁 𑀯𑀸 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺. 𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺, 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄, 𑀅𑀦𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼, 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑀼𑀲𑀮𑁂𑀦, 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄, 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄, 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀲𑀦𑁆𑀢𑀼𑀝𑁆𑀞𑁄.

𑁪𑁫𑁧. ‘‘𑀓𑀣𑀜𑁆𑀘, 𑀫𑀸𑀡𑀯, 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺? 𑀇𑀥, 𑀫𑀸𑀡𑀯, 𑀪𑀺𑀓𑁆𑀔𑀼 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄, 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀢𑀺. 𑀬𑀫𑁆𑀧𑀺, 𑀫𑀸𑀡𑀯, 𑀪𑀺𑀓𑁆𑀔𑀼 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄, 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀢𑀺; 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁. (𑀬𑀣𑀸 𑁧𑁯𑁪 𑀬𑀸𑀯 𑁨𑁧𑁦 𑀅𑀦𑀼𑀘𑁆𑀙𑁂𑀤𑁂𑀲𑀼 𑀏𑀯𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁).

‘‘𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀦𑁆𑀢𑀺𑀓𑀫𑁆𑀫𑀁 𑀧𑀡𑀺𑀥𑀺𑀓𑀫𑁆𑀫𑀁 𑀪𑀽𑀢𑀓𑀫𑁆𑀫𑀁 𑀪𑀽𑀭𑀺𑀓𑀫𑁆𑀫𑀁 𑀯𑀲𑁆𑀲𑀓𑀫𑁆𑀫𑀁 𑀯𑁄𑀲𑁆𑀲𑀓𑀫𑁆𑀫𑀁 𑀯𑀢𑁆𑀣𑀼𑀓𑀫𑁆𑀫𑀁 𑀯𑀢𑁆𑀣𑀼𑀧𑀭𑀺𑀓𑀫𑁆𑀫𑀁 𑀆𑀘𑀫𑀦𑀁 𑀦𑁆𑀳𑀸𑀧𑀦𑀁 𑀚𑀼𑀳𑀦𑀁 𑀯𑀫𑀦𑀁 𑀯𑀺𑀭𑁂𑀘𑀦𑀁 𑀉𑀤𑁆𑀥𑀁𑀯𑀺𑀭𑁂𑀘𑀦𑀁 𑀅𑀥𑁄𑀯𑀺𑀭𑁂𑀘𑀦𑀁 𑀲𑀻𑀲𑀯𑀺𑀭𑁂𑀘𑀦𑀁 𑀓𑀡𑁆𑀡𑀢𑁂𑀮𑀁 𑀦𑁂𑀢𑁆𑀢𑀢𑀧𑁆𑀧𑀦𑀁 𑀦𑀢𑁆𑀣𑀼𑀓𑀫𑁆𑀫𑀁 𑀅𑀜𑁆𑀚𑀦𑀁 𑀧𑀘𑁆𑀘𑀜𑁆𑀚𑀦𑀁 𑀲𑀸𑀮𑀸𑀓𑀺𑀬𑀁 𑀲𑀮𑁆𑀮𑀓𑀢𑁆𑀢𑀺𑀬𑀁 𑀤𑀸𑀭𑀓𑀢𑀺𑀓𑀺𑀘𑁆𑀙𑀸 𑀫𑀽𑀮𑀪𑁂𑀲𑀚𑁆𑀚𑀸𑀦𑀁 𑀅𑀦𑀼𑀧𑁆𑀧𑀤𑀸𑀦𑀁 𑀑𑀲𑀥𑀻𑀦𑀁 𑀧𑀝𑀺𑀫𑁄𑀓𑁆𑀔𑁄 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀬𑀫𑁆𑀧𑀺, 𑀫𑀸𑀡𑀯, 𑀪𑀺𑀓𑁆𑀔𑀼 𑀬𑀣𑀸 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀤𑁆𑀥𑀸𑀤𑁂𑀬𑁆𑀬𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀢𑁂 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁, 𑀲𑀦𑁆𑀢𑀺𑀓𑀫𑁆𑀫𑀁 𑀧𑀡𑀺𑀥𑀺𑀓𑀫𑁆𑀫𑀁…𑀧𑁂… 𑀑𑀲𑀥𑀻𑀦𑀁 𑀧𑀝𑀺𑀫𑁄𑀓𑁆𑀔𑁄 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬 𑀫𑀺𑀘𑁆𑀙𑀸𑀚𑀻𑀯𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺𑀁.

𑁪𑁫𑁨. ‘‘𑀲 𑀔𑁄 𑀲𑁄 [𑀅𑀬𑀁 𑀔𑁄 𑀲𑁄 (𑀓.)], 𑀫𑀸𑀡𑀯, 𑀪𑀺𑀓𑁆𑀔𑀼 𑀏𑀯𑀁 𑀲𑀻𑀮𑀲𑀫𑁆𑀧𑀦𑁆𑀦𑁄 𑀦 𑀓𑀼𑀢𑁄𑀘𑀺 𑀪𑀬𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀬𑀤𑀺𑀤𑀁 𑀲𑀻𑀮𑀲𑀁𑀯𑀭𑀢𑁄. 𑀲𑁂𑀬𑁆𑀬𑀣𑀸𑀧𑀺, 𑀫𑀸𑀡𑀯, 𑀭𑀸𑀚𑀸 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄 𑀦𑀺𑀳𑀢𑀧𑀘𑁆𑀘𑀸𑀫𑀺𑀢𑁆𑀢𑁄 𑀦 𑀓𑀼𑀢𑁄𑀘𑀺 𑀪𑀬𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀬𑀤𑀺𑀤𑀁 𑀧𑀘𑁆𑀘𑀢𑁆𑀣𑀺𑀓𑀢𑁄. 𑀏𑀯𑀫𑁂𑀯 𑀔𑁄, 𑀫𑀸𑀡𑀯, 𑀪𑀺𑀓𑁆𑀔𑀼 𑀏𑀯𑀁 𑀲𑀻𑀮𑀲𑀫𑁆𑀧𑀦𑁆𑀦𑁄 𑀦 𑀓𑀼𑀢𑁄𑀘𑀺 𑀪𑀬𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀬𑀤𑀺𑀤𑀁 𑀲𑀻𑀮𑀲𑀁𑀯𑀭𑀢𑁄. 𑀲𑁄 𑀇𑀫𑀺𑀦𑀸 𑀅𑀭𑀺𑀬𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀚𑁆𑀛𑀢𑁆𑀢𑀁 𑀅𑀦𑀯𑀚𑁆𑀚𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀯𑀁 𑀔𑁄, 𑀫𑀸𑀡𑀯, 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺.

𑁪𑁫𑁩. ‘‘𑀅𑀬𑀁 𑀔𑁄 𑀲𑁄, 𑀫𑀸𑀡𑀯, 𑀅𑀭𑀺𑀬𑁄 𑀲𑀻𑀮𑀓𑁆𑀔𑀦𑁆𑀥𑁄 𑀬𑀲𑁆𑀲 𑀲𑁄 𑀪𑀕𑀯𑀸 𑀯𑀡𑁆𑀡𑀯𑀸𑀤𑀻 𑀅𑀳𑁄𑀲𑀺, 𑀬𑀢𑁆𑀣 𑀘 𑀇𑀫𑀁 𑀚𑀦𑀢𑀁 𑀲𑀫𑀸𑀤𑀧𑁂𑀲𑀺 𑀦𑀺𑀯𑁂𑀲𑁂𑀲𑀺 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀅𑀢𑁆𑀣𑀺 𑀘𑁂𑀯𑁂𑀢𑁆𑀣 𑀉𑀢𑁆𑀢𑀭𑀺𑀓𑀭𑀡𑀻𑀬’’𑀦𑁆𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀪𑁄 𑀆𑀦𑀦𑁆𑀤, 𑀅𑀩𑁆𑀪𑀼𑀢𑀁, 𑀪𑁄 𑀆𑀦𑀦𑁆𑀤! 𑀲𑁄 𑀘𑀸𑀬𑀁, 𑀪𑁄 𑀆𑀦𑀦𑁆𑀤, 𑀅𑀭𑀺𑀬𑁄 𑀲𑀻𑀮𑀓𑁆𑀔𑀦𑁆𑀥𑁄 𑀧𑀭𑀺𑀧𑀼𑀡𑁆𑀡𑁄, 𑀦𑁄 𑀅𑀧𑀭𑀺𑀧𑀼𑀡𑁆𑀡𑁄. 𑀏𑀯𑀁 𑀧𑀭𑀺𑀧𑀼𑀡𑁆𑀡𑀁 𑀘𑀸𑀳𑀁, 𑀪𑁄, 𑀆𑀦𑀦𑁆𑀤, 𑀅𑀭𑀺𑀬𑀁 𑀲𑀻𑀮𑀓𑁆𑀔𑀦𑁆𑀥𑀁 𑀇𑀢𑁄 𑀩𑀳𑀺𑀤𑁆𑀥𑀸 𑀅𑀜𑁆𑀜𑁂𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺. 𑀏𑀯𑀁 𑀧𑀭𑀺𑀧𑀼𑀡𑁆𑀡𑀜𑁆𑀘, 𑀪𑁄 𑀆𑀦𑀦𑁆𑀤, 𑀅𑀭𑀺𑀬𑀁 𑀲𑀻𑀮𑀓𑁆𑀔𑀦𑁆𑀥𑀁 𑀇𑀢𑁄 𑀩𑀳𑀺𑀤𑁆𑀥𑀸 𑀅𑀜𑁆𑀜𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀢𑁆𑀢𑀦𑀺 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀼𑀁, 𑀢𑁂 𑀢𑀸𑀯𑀢𑀓𑁂𑀦𑁂𑀯 𑀅𑀢𑁆𑀢𑀫𑀦𑀸 𑀅𑀲𑁆𑀲𑀼 𑁋 ‘𑀅𑀮𑀫𑁂𑀢𑁆𑀢𑀸𑀯𑀢𑀸, 𑀓𑀢𑀫𑁂𑀢𑁆𑀢𑀸𑀯𑀢𑀸, 𑀅𑀦𑀼𑀧𑁆𑀧𑀢𑁆𑀢𑁄 𑀦𑁄 𑀲𑀸𑀫𑀜𑁆𑀜𑀢𑁆𑀣𑁄, 𑀦𑀢𑁆𑀣𑀺 𑀦𑁄 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺𑀓𑀭𑀡𑀻𑀬’𑀦𑁆𑀢𑀺. 𑀅𑀣 𑀘 𑀧𑀦 𑀪𑀯𑀁 𑀆𑀦𑀦𑁆𑀤𑁄 𑀏𑀯𑀫𑀸𑀳 𑁋 ‘𑀅𑀢𑁆𑀣𑀺 𑀘𑁂𑀯𑁂𑀢𑁆𑀣 𑀉𑀢𑁆𑀢𑀭𑀺𑀓𑀭𑀡𑀻𑀬’’’𑀦𑁆𑀢𑀺 [𑀇𑀫𑀲𑁆𑀲 𑀅𑀦𑀦𑁆𑀢𑀭𑀁 𑀲𑀻. 𑀧𑀻. 𑀧𑁄𑀢𑁆𑀣𑀓𑁂𑀲𑀼 ‘‘𑀧𑀞𑀫𑀪𑀸𑀡𑀯𑀸𑀭𑀁’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺].

𑀲𑀫𑀸𑀥𑀺𑀓𑁆𑀔𑀦𑁆𑀥𑁄

𑁪𑁫𑁪. ‘‘𑀓𑀢𑀫𑁄 𑀧𑀦 𑀲𑁄, 𑀪𑁄 𑀆𑀦𑀦𑁆𑀤, 𑀅𑀭𑀺𑀬𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄, 𑀬𑀲𑁆𑀲 𑀲𑁄 𑀪𑀯𑀁 𑀕𑁄𑀢𑀫𑁄 𑀯𑀡𑁆𑀡𑀯𑀸𑀤𑀻 𑀅𑀳𑁄𑀲𑀺, 𑀬𑀢𑁆𑀣 𑀘 𑀇𑀫𑀁 𑀚𑀦𑀢𑀁 𑀲𑀫𑀸𑀤𑀧𑁂𑀲𑀺 𑀦𑀺𑀯𑁂𑀲𑁂𑀲𑀺 𑀧𑀢𑀺𑀝𑁆𑀞𑀸𑀧𑁂𑀲𑀻’’𑀢𑀺?

‘‘𑀓𑀣𑀜𑁆𑀘, 𑀫𑀸𑀡𑀯, 𑀪𑀺𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀳𑁄𑀢𑀺? 𑀇𑀥, 𑀫𑀸𑀡𑀯, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻; 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺, 𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀲𑁄𑀢𑁂𑀦 𑀲𑀤𑁆𑀤𑀁 𑀲𑀼𑀢𑁆𑀯𑀸…𑀧𑁂… 𑀖𑀸𑀦𑁂𑀦 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸… 𑀚𑀺𑀯𑁆𑀳𑀸𑀬 𑀭𑀲𑀁 𑀲𑀸𑀬𑀺𑀢𑁆𑀯𑀸… 𑀓𑀸𑀬𑁂𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻; 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀫𑀦𑀺𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑁆𑀲𑀯𑁂𑀬𑁆𑀬𑀼𑀁 𑀢𑀲𑁆𑀲 𑀲𑀁𑀯𑀭𑀸𑀬 𑀧𑀝𑀺𑀧𑀚𑁆𑀚𑀢𑀺, 𑀭𑀓𑁆𑀔𑀢𑀺 𑀫𑀦𑀺𑀦𑁆𑀤𑁆𑀭𑀺𑀬𑀁, 𑀫𑀦𑀺𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀺. 𑀲𑁄 𑀇𑀫𑀺𑀦𑀸 𑀅𑀭𑀺𑀬𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀚𑁆𑀛𑀢𑁆𑀢𑀁 𑀅𑀩𑁆𑀬𑀸𑀲𑁂𑀓𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀏𑀯𑀁 𑀔𑁄, 𑀫𑀸𑀡𑀯, 𑀪𑀺𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀳𑁄𑀢𑀺.

𑁪𑁫𑁫. ‘‘𑀓𑀣𑀜𑁆𑀘, 𑀫𑀸𑀡𑀯, 𑀪𑀺𑀓𑁆𑀔𑀼 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺? 𑀇𑀥, 𑀫𑀸𑀡𑀯, 𑀪𑀺𑀓𑁆𑀔𑀼 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀆𑀮𑁄𑀓𑀺𑀢𑁂 𑀯𑀺𑀮𑁄𑀓𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀫𑀺𑀜𑁆𑀚𑀺𑀢𑁂 𑀧𑀲𑀸𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀅𑀲𑀺𑀢𑁂 𑀧𑀻𑀢𑁂 𑀔𑀸𑀬𑀺𑀢𑁂 𑀲𑀸𑀬𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀕𑀢𑁂 𑀞𑀺𑀢𑁂 𑀦𑀺𑀲𑀺𑀦𑁆𑀦𑁂 𑀲𑀼𑀢𑁆𑀢𑁂 𑀚𑀸𑀕𑀭𑀺𑀢𑁂 𑀪𑀸𑀲𑀺𑀢𑁂 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺. 𑀏𑀯𑀁 𑀔𑁄, 𑀫𑀸𑀡𑀯, 𑀪𑀺𑀓𑁆𑀔𑀼 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺.

𑁪𑁫𑁬. ‘‘𑀓𑀣𑀜𑁆𑀘, 𑀫𑀸𑀡𑀯, 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺? 𑀇𑀥, 𑀫𑀸𑀡𑀯, 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀓𑀸𑀬𑀧𑀭𑀺𑀳𑀸𑀭𑀺𑀓𑁂𑀦 𑀘𑀻𑀯𑀭𑁂𑀦 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑁂𑀦 𑀧𑀺𑀡𑁆𑀟𑀧𑀸𑀢𑁂𑀦. 𑀲𑁄 𑀬𑁂𑀦 𑀬𑁂𑀦𑁂𑀯 𑀧𑀓𑁆𑀓𑀫𑀢𑀺, 𑀲𑀫𑀸𑀤𑀸𑀬𑁂𑀯 𑀧𑀓𑁆𑀓𑀫𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀫𑀸𑀡𑀯, 𑀧𑀓𑁆𑀔𑀻 𑀲𑀓𑀼𑀡𑁄 𑀬𑁂𑀦 𑀬𑁂𑀦𑁂𑀯 𑀟𑁂𑀢𑀺, 𑀲𑀧𑀢𑁆𑀢𑀪𑀸𑀭𑁄𑀯 𑀟𑁂𑀢𑀺; 𑀏𑀯𑀫𑁂𑀯 𑀔𑁄, 𑀫𑀸𑀡𑀯, 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀓𑀸𑀬𑀧𑀭𑀺𑀳𑀸𑀭𑀺𑀓𑁂𑀦 𑀘𑀻𑀯𑀭𑁂𑀦 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑁂𑀦 𑀧𑀺𑀡𑁆𑀟𑀧𑀸𑀢𑁂𑀦. 𑀲𑁄 𑀬𑁂𑀦 𑀬𑁂𑀦𑁂𑀯 𑀧𑀓𑁆𑀓𑀫𑀢𑀺, 𑀲𑀫𑀸𑀤𑀸𑀬𑁂𑀯 𑀧𑀓𑁆𑀓𑀫𑀢𑀺. 𑀏𑀯𑀁 𑀔𑁄, 𑀫𑀸𑀡𑀯, 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺.

𑁪𑁫𑁭. ‘‘𑀲𑁄 𑀇𑀫𑀺𑀦𑀸 𑀘 𑀅𑀭𑀺𑀬𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀇𑀫𑀺𑀦𑀸 𑀘 𑀅𑀭𑀺𑀬𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀇𑀫𑀺𑀦𑀸 𑀘 𑀅𑀭𑀺𑀬𑁂𑀦 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀇𑀫𑀸𑀬 𑀘 𑀅𑀭𑀺𑀬𑀸𑀬 𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀺 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀁 𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀲𑀼𑀲𑀸𑀦𑀁 𑀯𑀦𑀧𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀮𑀧𑀼𑀜𑁆𑀚𑀁. 𑀲𑁄 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑁄 𑀦𑀺𑀲𑀻𑀤𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸, 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬, 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸.

𑁪𑁫𑁮. ‘‘𑀲𑁄 𑀅𑀪𑀺𑀚𑁆𑀛𑀁 𑀮𑁄𑀓𑁂 𑀧𑀳𑀸𑀬 𑀯𑀺𑀕𑀢𑀸𑀪𑀺𑀚𑁆𑀛𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺 𑀅𑀪𑀺𑀚𑁆𑀛𑀸𑀬 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀩𑁆𑀬𑀸𑀧𑀸𑀤𑀧𑀤𑁄𑀲𑀁 𑀧𑀳𑀸𑀬 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀯𑀺𑀳𑀭𑀢𑀺 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀩𑁆𑀬𑀸𑀧𑀸𑀤𑀧𑀤𑁄𑀲𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀣𑀺𑀦𑀫𑀺𑀤𑁆𑀥𑀁 𑀧𑀳𑀸𑀬 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄 𑀯𑀺𑀳𑀭𑀢𑀺 𑀆𑀮𑁄𑀓𑀲𑀜𑁆𑀜𑀻 𑀲𑀢𑁄 𑀲𑀫𑁆𑀧𑀚𑀸𑀦𑁄, 𑀣𑀺𑀦𑀫𑀺𑀤𑁆𑀥𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀸𑀬 𑀅𑀦𑀼𑀤𑁆𑀥𑀢𑁄 𑀯𑀺𑀳𑀭𑀢𑀺 𑀅𑀚𑁆𑀛𑀢𑁆𑀢𑀁 𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑁄 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀸 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺. 𑀯𑀺𑀘𑀺𑀓𑀺𑀘𑁆𑀙𑀁 𑀧𑀳𑀸𑀬 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀳𑀭𑀢𑀺 𑀅𑀓𑀣𑀁𑀓𑀣𑀻 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀯𑀺𑀘𑀺𑀓𑀺𑀘𑁆𑀙𑀸𑀬 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺.

𑁪𑁫𑁯. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀸𑀡𑀯, 𑀧𑀼𑀭𑀺𑀲𑁄 𑀇𑀡𑀁 𑀆𑀤𑀸𑀬 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀬𑁆𑀬. 𑀢𑀲𑁆𑀲 𑀢𑁂 𑀓𑀫𑁆𑀫𑀦𑁆𑀢𑀸 𑀲𑀫𑀺𑀚𑁆𑀛𑁂𑀬𑁆𑀬𑀼𑀁. 𑀲𑁄 𑀬𑀸𑀦𑀺 𑀘 𑀧𑁄𑀭𑀸𑀡𑀸𑀦𑀺 𑀇𑀡𑀫𑀽𑀮𑀸𑀦𑀺 𑀢𑀸𑀦𑀺 𑀘 𑀩𑁆𑀬𑀦𑁆𑀢𑀺𑀁 𑀓𑀭𑁂𑀬𑁆𑀬, 𑀲𑀺𑀬𑀸 𑀘𑀲𑁆𑀲 𑀉𑀢𑁆𑀢𑀭𑀺𑀁 𑀅𑀯𑀲𑀺𑀝𑁆𑀞𑀁 𑀤𑀸𑀭𑀪𑀭𑀡𑀸𑀬. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀳𑀁 𑀔𑁄 𑀧𑀼𑀩𑁆𑀩𑁂 𑀇𑀡𑀁 𑀆𑀤𑀸𑀬 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀲𑀺𑀁. 𑀢𑀲𑁆𑀲 𑀫𑁂 𑀢𑁂 𑀓𑀫𑁆𑀫𑀦𑁆𑀢𑀸 𑀲𑀫𑀺𑀚𑁆𑀛𑀺𑀁𑀲𑀼. 𑀲𑁄𑀳𑀁 𑀬𑀸𑀦𑀺 𑀘 𑀧𑁄𑀭𑀸𑀡𑀸𑀦𑀺 𑀇𑀡𑀫𑀽𑀮𑀸𑀦𑀺 𑀢𑀸𑀦𑀺 𑀘 𑀩𑁆𑀬𑀦𑁆𑀢𑀺𑀁 𑀅𑀓𑀸𑀲𑀺𑀁, 𑀅𑀢𑁆𑀣𑀺 𑀘 𑀫𑁂 𑀉𑀢𑁆𑀢𑀭𑀺𑀁 𑀅𑀯𑀲𑀺𑀝𑁆𑀞𑀁 𑀤𑀸𑀭𑀪𑀭𑀡𑀸𑀬𑀸’𑀢𑀺. 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀮𑀪𑁂𑀣 𑀧𑀸𑀫𑁄𑀚𑁆𑀚𑀁, 𑀅𑀥𑀺𑀕𑀘𑁆𑀙𑁂𑀬𑁆𑀬 𑀲𑁄𑀫𑀦𑀲𑁆𑀲𑀁.

𑁪𑁬𑁦. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀸𑀡𑀯, 𑀧𑀼𑀭𑀺𑀲𑁄 𑀆𑀩𑀸𑀥𑀺𑀓𑁄 𑀅𑀲𑁆𑀲 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄; 𑀪𑀢𑁆𑀢𑀜𑁆𑀘𑀲𑁆𑀲 𑀦𑀘𑁆𑀙𑀸𑀤𑁂𑀬𑁆𑀬, 𑀦 𑀘𑀲𑁆𑀲 𑀓𑀸𑀬𑁂 𑀩𑀮𑀫𑀢𑁆𑀢𑀸. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀫𑁆𑀳𑀸 𑀆𑀩𑀸𑀥𑀸 𑀫𑀼𑀘𑁆𑀘𑁂𑀬𑁆𑀬, 𑀪𑀢𑁆𑀢𑀜𑁆𑀘𑀲𑁆𑀲 𑀙𑀸𑀤𑁂𑀬𑁆𑀬, 𑀲𑀺𑀬𑀸 𑀘𑀲𑁆𑀲 𑀓𑀸𑀬𑁂 𑀩𑀮𑀫𑀢𑁆𑀢𑀸. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀳𑀁 𑀔𑁄 𑀧𑀼𑀩𑁆𑀩𑁂 𑀆𑀩𑀸𑀥𑀺𑀓𑁄 𑀅𑀳𑁄𑀲𑀺𑀁 𑀤𑀼𑀓𑁆𑀔𑀺𑀢𑁄 𑀩𑀸𑀴𑁆𑀳𑀕𑀺𑀮𑀸𑀦𑁄, 𑀪𑀢𑁆𑀢𑀜𑁆𑀘 𑀫𑁂 𑀦𑀘𑁆𑀙𑀸𑀤𑁂𑀲𑀺, 𑀦 𑀘 𑀫𑁂 𑀆𑀲𑀺 𑀓𑀸𑀬𑁂 𑀩𑀮𑀫𑀢𑁆𑀢𑀸. 𑀲𑁄𑀫𑁆𑀳𑀺 𑀏𑀢𑀭𑀳𑀺 𑀢𑀫𑁆𑀳𑀸 𑀆𑀩𑀸𑀥𑀸 𑀫𑀼𑀢𑁆𑀢𑁄 𑀪𑀢𑁆𑀢𑀜𑁆𑀘 𑀫𑁂 𑀙𑀸𑀤𑁂𑀢𑀺, 𑀅𑀢𑁆𑀣𑀺 𑀘 𑀫𑁂 𑀓𑀸𑀬𑁂 𑀩𑀮𑀫𑀢𑁆𑀢𑀸’𑀢𑀺. 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀮𑀪𑁂𑀣 𑀧𑀸𑀫𑁄𑀚𑁆𑀚𑀁, 𑀅𑀥𑀺𑀕𑀘𑁆𑀙𑁂𑀬𑁆𑀬 𑀲𑁄𑀫𑀦𑀲𑁆𑀲𑀁.

𑁪𑁬𑁧. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀸𑀡𑀯, 𑀧𑀼𑀭𑀺𑀲𑁄 𑀩𑀦𑁆𑀥𑀦𑀸𑀕𑀸𑀭𑁂 𑀩𑀤𑁆𑀥𑁄 𑀅𑀲𑁆𑀲. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀫𑁆𑀳𑀸 𑀩𑀦𑁆𑀥𑀦𑀸𑀕𑀸𑀭𑀸 𑀫𑀼𑀘𑁆𑀘𑁂𑀬𑁆𑀬 𑀲𑁄𑀢𑁆𑀣𑀺𑀦𑀸 𑀅𑀩𑁆𑀪𑀬𑁂𑀦, 𑀦 𑀘𑀲𑁆𑀲 𑀓𑀺𑀜𑁆𑀘𑀺 𑀪𑁄𑀕𑀸𑀦𑀁 𑀯𑀬𑁄. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀳𑀁 𑀔𑁄 𑀧𑀼𑀩𑁆𑀩𑁂 𑀩𑀦𑁆𑀥𑀦𑀸𑀕𑀸𑀭𑁂 𑀩𑀤𑁆𑀥𑁄 𑀅𑀳𑁄𑀲𑀺𑀁. 𑀲𑁄𑀫𑁆𑀳𑀺 𑀏𑀢𑀭𑀳𑀺 𑀢𑀫𑁆𑀳𑀸 𑀩𑀦𑁆𑀥𑀦𑀸𑀕𑀸𑀭𑀸 𑀫𑀼𑀢𑁆𑀢𑁄 𑀲𑁄𑀢𑁆𑀣𑀺𑀦𑀸 𑀅𑀩𑁆𑀪𑀬𑁂𑀦, 𑀦𑀢𑁆𑀣𑀺 𑀘 𑀫𑁂 𑀓𑀺𑀜𑁆𑀘𑀺 𑀪𑁄𑀕𑀸𑀦𑀁 𑀯𑀬𑁄’𑀢𑀺. 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀮𑀪𑁂𑀣 𑀧𑀸𑀫𑁄𑀚𑁆𑀚𑀁, 𑀅𑀥𑀺𑀕𑀘𑁆𑀙𑁂𑀬𑁆𑀬 𑀲𑁄𑀫𑀦𑀲𑁆𑀲𑀁.

𑁪𑁬𑁨. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀸𑀡𑀯, 𑀧𑀼𑀭𑀺𑀲𑁄 𑀤𑀸𑀲𑁄 𑀅𑀲𑁆𑀲 𑀅𑀦𑀢𑁆𑀢𑀸𑀥𑀻𑀦𑁄 𑀧𑀭𑀸𑀥𑀻𑀦𑁄 𑀦 𑀬𑁂𑀦𑀓𑀸𑀫𑀁𑀕𑀫𑁄. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀫𑁆𑀳𑀸 𑀤𑀸𑀲𑀩𑁆𑀬𑀸 𑀫𑀼𑀘𑁆𑀘𑁂𑀬𑁆𑀬, 𑀅𑀢𑁆𑀢𑀸𑀥𑀻𑀦𑁄 𑀅𑀧𑀭𑀸𑀥𑀻𑀦𑁄 𑀪𑀼𑀚𑀺𑀲𑁆𑀲𑁄 𑀬𑁂𑀦𑀓𑀸𑀫𑀁𑀕𑀫𑁄. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀳𑀁 𑀔𑁄 𑀧𑀼𑀩𑁆𑀩𑁂 𑀤𑀸𑀲𑁄 𑀅𑀳𑁄𑀲𑀺𑀁 𑀅𑀦𑀢𑁆𑀢𑀸𑀥𑀻𑀦𑁄 𑀧𑀭𑀸𑀥𑀻𑀦𑁄 𑀦 𑀬𑁂𑀦𑀓𑀸𑀫𑀁𑀕𑀫𑁄. 𑀲𑁄𑀫𑁆𑀳𑀺 𑀏𑀢𑀭𑀳𑀺 𑀢𑀫𑁆𑀳𑀸 𑀤𑀸𑀲𑀩𑁆𑀬𑀸 𑀫𑀼𑀢𑁆𑀢𑁄 𑀅𑀢𑁆𑀢𑀸𑀥𑀻𑀦𑁄 𑀅𑀧𑀭𑀸𑀥𑀻𑀦𑁄 𑀪𑀼𑀚𑀺𑀲𑁆𑀲𑁄 𑀬𑁂𑀦𑀓𑀸𑀫𑀁𑀕𑀫𑁄’𑀢𑀺. 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀮𑀪𑁂𑀣 𑀧𑀸𑀫𑁄𑀚𑁆𑀚𑀁, 𑀅𑀥𑀺𑀕𑀘𑁆𑀙𑁂𑀬𑁆𑀬 𑀲𑁄𑀫𑀦𑀲𑁆𑀲𑀁.

𑁪𑁬𑁩. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀸𑀡𑀯, 𑀧𑀼𑀭𑀺𑀲𑁄 𑀲𑀥𑀦𑁄 𑀲𑀪𑁄𑀕𑁄 𑀓𑀦𑁆𑀢𑀸𑀭𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑁂𑀬𑁆𑀬 𑀤𑀼𑀩𑁆𑀪𑀺𑀓𑁆𑀔𑀁 𑀲𑀧𑁆𑀧𑀝𑀺𑀪𑀬𑀁. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀢𑀁 𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀭𑁂𑀬𑁆𑀬, 𑀲𑁄𑀢𑁆𑀣𑀺𑀦𑀸 𑀕𑀸𑀫𑀦𑁆𑀢𑀁 𑀅𑀦𑀼𑀧𑀸𑀧𑀼𑀡𑁂𑀬𑁆𑀬 𑀔𑁂𑀫𑀁 𑀅𑀧𑁆𑀧𑀝𑀺𑀪𑀬𑀁. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀳𑀁 𑀔𑁄 𑀧𑀼𑀩𑁆𑀩𑁂 𑀲𑀥𑀦𑁄 𑀲𑀪𑁄𑀕𑁄 𑀓𑀦𑁆𑀢𑀸𑀭𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀁 𑀤𑀼𑀩𑁆𑀪𑀺𑀓𑁆𑀔𑀁 𑀲𑀧𑁆𑀧𑀝𑀺𑀪𑀬𑀁. 𑀲𑁄𑀫𑁆𑀳𑀺 𑀏𑀢𑀭𑀳𑀺 𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀺𑀡𑁆𑀡𑁄, 𑀲𑁄𑀢𑁆𑀣𑀺𑀦𑀸 𑀕𑀸𑀫𑀦𑁆𑀢𑀁 𑀅𑀦𑀼𑀧𑁆𑀧𑀢𑁆𑀢𑁄 𑀔𑁂𑀫𑀁 𑀅𑀧𑁆𑀧𑀝𑀺𑀪𑀬’𑀦𑁆𑀢𑀺. 𑀲𑁄 𑀢𑀢𑁄𑀦𑀺𑀤𑀸𑀦𑀁 𑀮𑀪𑁂𑀣 𑀧𑀸𑀫𑁄𑀚𑁆𑀚𑀁, 𑀅𑀥𑀺𑀕𑀘𑁆𑀙𑁂𑀬𑁆𑀬 𑀲𑁄𑀫𑀦𑀲𑁆𑀲𑀁.

𑁪𑁬𑁪. ‘‘𑀏𑀯𑀫𑁂𑀯 𑀔𑁄, 𑀫𑀸𑀡𑀯, 𑀪𑀺𑀓𑁆𑀔𑀼 𑀬𑀣𑀸 𑀇𑀡𑀁 𑀬𑀣𑀸 𑀭𑁄𑀕𑀁 𑀬𑀣𑀸 𑀩𑀦𑁆𑀥𑀦𑀸𑀕𑀸𑀭𑀁 𑀬𑀣𑀸 𑀤𑀸𑀲𑀩𑁆𑀬𑀁 𑀬𑀣𑀸 𑀓𑀦𑁆𑀢𑀸𑀭𑀤𑁆𑀥𑀸𑀦𑀫𑀕𑁆𑀕𑀁, 𑀏𑀯𑀁 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀅𑀧𑁆𑀧𑀳𑀻𑀦𑁂 𑀅𑀢𑁆𑀢𑀦𑀺 𑀲𑀫𑀦𑀼𑀧𑀲𑁆𑀲𑀢𑀺.

𑁪𑁬𑁫. ‘‘𑀲𑁂𑀬𑁆𑀬𑀣𑀸𑀧𑀺, 𑀫𑀸𑀡𑀯, 𑀬𑀣𑀸 𑀆𑀡𑀡𑁆𑀬𑀁 𑀬𑀣𑀸 𑀆𑀭𑁄𑀕𑁆𑀬𑀁 𑀬𑀣𑀸 𑀩𑀦𑁆𑀥𑀦𑀸𑀫𑁄𑀓𑁆𑀔𑀁 𑀬𑀣𑀸 𑀪𑀼𑀚𑀺𑀲𑁆𑀲𑀁 𑀬𑀣𑀸 𑀔𑁂𑀫𑀦𑁆𑀢𑀪𑀽𑀫𑀺𑀁. 𑀏𑀯𑀫𑁂𑀯 𑀪𑀺𑀓𑁆𑀔𑀼 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀻𑀦𑁂 𑀅𑀢𑁆𑀢𑀦𑀺 𑀲𑀫𑀦𑀼𑀧𑀲𑁆𑀲𑀢𑀺.

𑁪𑁬𑁬. ‘‘𑀢𑀲𑁆𑀲𑀺𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀻𑀦𑁂 𑀅𑀢𑁆𑀢𑀦𑀺 𑀲𑀫𑀦𑀼𑀧𑀲𑁆𑀲𑀢𑁄 𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀺, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑁂𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺.

𑁪𑁬𑁭. ‘‘𑀲𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀇𑀫𑀫𑁂𑀯 𑀓𑀸𑀬𑀁 𑀯𑀺𑀯𑁂𑀓𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀪𑀺𑀲𑀦𑁆𑀤𑁂𑀢𑀺 𑀧𑀭𑀺𑀲𑀦𑁆𑀤𑁂𑀢𑀺 𑀧𑀭𑀺𑀧𑀽𑀭𑁂𑀢𑀺 𑀧𑀭𑀺𑀧𑁆𑀨𑀭𑀢𑀺, 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀯𑀺𑀯𑁂𑀓𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀧𑁆𑀨𑀼𑀝𑀁 𑀳𑁄𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀫𑀸𑀡𑀯, 𑀤𑀓𑁆𑀔𑁄 𑀦𑁆𑀳𑀸𑀧𑀓𑁄 𑀯𑀸 𑀦𑁆𑀳𑀸𑀧𑀓𑀦𑁆𑀢𑁂𑀯𑀸𑀲𑀻 𑀯𑀸 𑀓𑀁𑀲𑀣𑀸𑀮𑁂 𑀦𑁆𑀳𑀸𑀦𑀻𑀬𑀘𑀼𑀡𑁆𑀡𑀸𑀦𑀺 𑀆𑀓𑀺𑀭𑀺𑀢𑁆𑀯𑀸 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑀓𑀁 𑀧𑀭𑀺𑀧𑁆𑀨𑁄𑀲𑀓𑀁 𑀲𑀦𑁆𑀤𑁂𑀬𑁆𑀬. 𑀲𑀸𑀬𑀁 𑀦𑁆𑀳𑀸𑀦𑀻𑀬𑀧𑀺𑀡𑁆𑀟𑀺 𑀲𑁆𑀦𑁂𑀳𑀸𑀦𑀼𑀕𑀢𑀸 𑀲𑁆𑀦𑁂𑀳𑀧𑀭𑁂𑀢𑀸 𑀲𑀦𑁆𑀢𑀭𑀩𑀸𑀳𑀺𑀭𑀸 𑀨𑀼𑀝𑀸 𑀲𑁆𑀦𑁂𑀳𑁂𑀦, 𑀦 𑀘 𑀧𑀕𑁆𑀖𑀭𑀡𑀻. 𑀏𑀯𑀫𑁂𑀯 𑀔𑁄, 𑀫𑀸𑀡𑀯, 𑀪𑀺𑀓𑁆𑀔𑀼 𑀇𑀫𑀫𑁂𑀯 𑀓𑀸𑀬𑀁 𑀯𑀺𑀯𑁂𑀓𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀪𑀺𑀲𑀦𑁆𑀤𑁂𑀢𑀺 𑀧𑀭𑀺𑀲𑀦𑁆𑀤𑁂𑀢𑀺 𑀧𑀭𑀺𑀧𑀽𑀭𑁂𑀢𑀺 𑀧𑀭𑀺𑀧𑁆𑀨𑀭𑀢𑀺, 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀯𑀺𑀯𑁂𑀓𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀧𑁆𑀨𑀼𑀝𑀁 𑀳𑁄𑀢𑀺. 𑀬𑀫𑁆𑀧𑀺, 𑀫𑀸𑀡𑀯, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀇𑀫𑀫𑁂𑀯 𑀓𑀸𑀬𑀁 𑀯𑀺𑀯𑁂𑀓𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀪𑀺𑀲𑀦𑁆𑀤𑁂𑀢𑀺 𑀧𑀭𑀺𑀲𑀦𑁆𑀤𑁂𑀢𑀺 𑀧𑀭𑀺𑀧𑀽𑀭𑁂𑀢𑀺 𑀧𑀭𑀺𑀧𑁆𑀨𑀭𑀢𑀺, 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀯𑀺𑀯𑁂𑀓𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀧𑁆𑀨𑀼𑀝𑀁 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀫𑀸𑀥𑀺𑀲𑁆𑀫𑀺𑀁.

𑁪𑁬𑁮. ‘‘𑀧𑀼𑀦 𑀘𑀧𑀭𑀁, 𑀫𑀸𑀡𑀯, 𑀪𑀺𑀓𑁆𑀔𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀇𑀫𑀫𑁂𑀯 𑀓𑀸𑀬𑀁 𑀲𑀫𑀸𑀥𑀺𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀪𑀺𑀲𑀦𑁆𑀤𑁂𑀢𑀺 𑀧𑀭𑀺𑀲𑀦𑁆𑀤𑁂𑀢𑀺 𑀧𑀭𑀺𑀧𑀽𑀭𑁂𑀢𑀺 𑀧𑀭𑀺𑀧𑁆𑀨𑀭𑀢𑀺, 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀲𑀫𑀸𑀥𑀺𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀧𑁆𑀨𑀼𑀝𑀁 𑀳𑁄𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀫𑀸𑀡𑀯, 𑀉𑀤𑀓𑀭𑀳𑀤𑁄 𑀕𑀫𑁆𑀪𑀻𑀭𑁄 𑀉𑀩𑁆𑀪𑀺𑀤𑁄𑀤𑀓𑁄. 𑀢𑀲𑁆𑀲 𑀦𑁂𑀯𑀲𑁆𑀲 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀉𑀤𑀓𑀲𑁆𑀲 𑀆𑀬𑀫𑀼𑀔𑀁, 𑀦 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀉𑀤𑀓𑀲𑁆𑀲 𑀆𑀬𑀫𑀼𑀔𑀁, 𑀦 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀉𑀤𑀓𑀲𑁆𑀲 𑀆𑀬𑀫𑀼𑀔𑀁, 𑀦 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀉𑀤𑀓𑀲𑁆𑀲 𑀆𑀬𑀫𑀼𑀔𑀁, 𑀤𑁂𑀯𑁄 𑀘 𑀦 𑀓𑀸𑀮𑁂𑀦 𑀓𑀸𑀮𑀁 𑀲𑀫𑁆𑀫𑀸 𑀥𑀸𑀭𑀁 𑀅𑀦𑀼𑀧𑀯𑁂𑀘𑁆𑀙𑁂𑀬𑁆𑀬. 𑀅𑀣 𑀔𑁄 𑀢𑀫𑁆𑀳𑀸𑀯 𑀉𑀤𑀓𑀭𑀳𑀤𑀸 𑀲𑀻𑀢𑀸 𑀯𑀸𑀭𑀺𑀥𑀸𑀭𑀸 𑀉𑀩𑁆𑀪𑀺𑀚𑁆𑀚𑀺𑀢𑁆𑀯𑀸 𑀢𑀫𑁂𑀯 𑀉𑀤𑀓𑀭𑀳𑀤𑀁 𑀲𑀻𑀢𑁂𑀦 𑀯𑀸𑀭𑀺𑀦𑀸 𑀅𑀪𑀺𑀲𑀦𑁆𑀤𑁂𑀬𑁆𑀬 𑀧𑀭𑀺𑀲𑀦𑁆𑀤𑁂𑀬𑁆𑀬 𑀧𑀭𑀺𑀧𑀽𑀭𑁂𑀬𑁆𑀬 𑀧𑀭𑀺𑀧𑁆𑀨𑀭𑁂𑀬𑁆𑀬, 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀉𑀤𑀓𑀭𑀳𑀤𑀲𑁆𑀲 𑀲𑀻𑀢𑁂𑀦 𑀯𑀸𑀭𑀺𑀦𑀸 𑀅𑀧𑁆𑀨𑀼𑀝𑀁 𑀅𑀲𑁆𑀲. 𑀏𑀯𑀫𑁂𑀯 𑀔𑁄, 𑀫𑀸𑀡𑀯, 𑀪𑀺𑀓𑁆𑀔𑀼…𑀧𑁂… 𑀬𑀫𑁆𑀧𑀺, 𑀫𑀸𑀡𑀯, 𑀪𑀺𑀓𑁆𑀔𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸… 𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀲𑁄 𑀇𑀫𑀫𑁂𑀯 𑀓𑀸𑀬𑀁 𑀲𑀫𑀸𑀥𑀺𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀪𑀺𑀲𑀦𑁆𑀤𑁂𑀢𑀺 𑀧𑀭𑀺𑀲𑀦𑁆𑀤𑁂𑀢𑀺 𑀧𑀭𑀺𑀧𑀽𑀭𑁂𑀢𑀺 𑀧𑀭𑀺𑀧𑁆𑀨𑀭𑀢𑀺, 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀲𑀫𑀸𑀥𑀺𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀅𑀧𑁆𑀨𑀼𑀝𑀁 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀫𑀸𑀥𑀺𑀲𑁆𑀫𑀺𑀁.

𑁪𑁬𑁯. ‘‘𑀧𑀼𑀦 𑀘𑀧𑀭𑀁, 𑀫𑀸𑀡𑀯, 𑀪𑀺𑀓𑁆𑀔𑀼 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄, 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’’𑀢𑀺, 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀇𑀫𑀫𑁂𑀯 𑀓𑀸𑀬𑀁 𑀦𑀺𑀧𑁆𑀧𑀻𑀢𑀺𑀓𑁂𑀦 𑀲𑀼𑀔𑁂𑀦 𑀅𑀪𑀺𑀲𑀦𑁆𑀤𑁂𑀢𑀺 𑀧𑀭𑀺𑀲𑀦𑁆𑀤𑁂𑀢𑀺 𑀧𑀭𑀺𑀧𑀽𑀭𑁂𑀢𑀺 𑀧𑀭𑀺𑀧𑁆𑀨𑀭𑀢𑀺, 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀦𑀺𑀧𑁆𑀧𑀻𑀢𑀺𑀓𑁂𑀦 𑀲𑀼𑀔𑁂𑀦 𑀅𑀧𑁆𑀨𑀼𑀝𑀁 𑀳𑁄𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀫𑀸𑀡𑀯, 𑀉𑀧𑁆𑀧𑀮𑀺𑀦𑀺𑀬𑀁 𑀯𑀸 𑀧𑀤𑀼𑀫𑀺𑀦𑀺𑀬𑀁 𑀯𑀸 𑀧𑀼𑀡𑁆𑀟𑀭𑀻𑀓𑀺𑀦𑀺𑀬𑀁 𑀯𑀸 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀉𑀤𑀓𑀸𑀦𑀼𑀕𑁆𑀕𑀢𑀸𑀦𑀺 𑀅𑀦𑁆𑀢𑁄𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀺, 𑀢𑀸𑀦𑀺 𑀬𑀸𑀯 𑀘𑀕𑁆𑀕𑀸 𑀬𑀸𑀯 𑀘 𑀫𑀽𑀮𑀸 𑀲𑀻𑀢𑁂𑀦 𑀯𑀸𑀭𑀺𑀦𑀸 𑀅𑀪𑀺𑀲𑀦𑁆𑀦𑀸𑀦𑀺 𑀧𑀭𑀺𑀲𑀦𑁆𑀦𑀸𑀦𑀺 𑀧𑀭𑀺𑀧𑀽𑀭𑀸𑀦𑀺 𑀧𑀭𑀺𑀧𑁆𑀨𑀼𑀝𑀸𑀦𑀺, 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑀁 𑀉𑀧𑁆𑀧𑀮𑀸𑀦𑀁 𑀯𑀸 𑀧𑀤𑀼𑀫𑀸𑀦𑀁 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀁 𑀯𑀸 𑀲𑀻𑀢𑁂𑀦 𑀯𑀸𑀭𑀺𑀦𑀸 𑀅𑀧𑁆𑀨𑀼𑀝𑀁 𑀅𑀲𑁆𑀲. 𑀏𑀯𑀫𑁂𑀯 𑀔𑁄, 𑀫𑀸𑀡𑀯, 𑀪𑀺𑀓𑁆𑀔𑀼…𑀧𑁂… 𑀬𑀫𑁆𑀧𑀺, 𑀫𑀸𑀡𑀯, 𑀪𑀺𑀓𑁆𑀔𑀼 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸…𑀧𑁂… 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀇𑀫𑀫𑁂𑀯 𑀓𑀸𑀬𑀁 𑀦𑀺𑀧𑁆𑀧𑀻𑀢𑀺𑀓𑁂𑀦 𑀲𑀼𑀔𑁂𑀦 𑀅𑀪𑀺𑀲𑀦𑁆𑀤𑁂𑀢𑀺 𑀧𑀭𑀺𑀲𑀦𑁆𑀤𑁂𑀢𑀺 𑀧𑀭𑀺𑀧𑀽𑀭𑁂𑀢𑀺 𑀧𑀭𑀺𑀧𑁆𑀨𑀭𑀢𑀺, 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀦𑀺𑀧𑁆𑀧𑀻𑀢𑀺𑀓𑁂𑀦 𑀲𑀼𑀔𑁂𑀦 𑀅𑀧𑁆𑀨𑀼𑀝𑀁 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀫𑀸𑀥𑀺𑀲𑁆𑀫𑀺𑀁.

𑁪𑁭𑁦. ‘‘𑀧𑀼𑀦 𑀘𑀧𑀭𑀁, 𑀫𑀸𑀡𑀯, 𑀪𑀺𑀓𑁆𑀔𑀼 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀇𑀫𑀫𑁂𑀯 𑀓𑀸𑀬𑀁 𑀧𑀭𑀺𑀲𑀼𑀤𑁆𑀥𑁂𑀦 𑀘𑁂𑀢𑀲𑀸 𑀧𑀭𑀺𑀬𑁄𑀤𑀸𑀢𑁂𑀦 𑀨𑀭𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺; 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀧𑀭𑀺𑀲𑀼𑀤𑁆𑀥𑁂𑀦 𑀘𑁂𑀢𑀲𑀸 𑀧𑀭𑀺𑀬𑁄𑀤𑀸𑀢𑁂𑀦 𑀅𑀧𑁆𑀨𑀼𑀝𑀁 𑀳𑁄𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀫𑀸𑀡𑀯, 𑀧𑀼𑀭𑀺𑀲𑁄 𑀑𑀤𑀸𑀢𑁂𑀦 𑀯𑀢𑁆𑀣𑁂𑀦 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀅𑀲𑁆𑀲, 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀑𑀤𑀸𑀢𑁂𑀦 𑀯𑀢𑁆𑀣𑁂𑀦 𑀅𑀧𑁆𑀨𑀼𑀝𑀁 𑀅𑀲𑁆𑀲. 𑀏𑀯𑀫𑁂𑀯 𑀔𑁄, 𑀫𑀸𑀡𑀯, 𑀪𑀺𑀓𑁆𑀔𑀼…𑀧𑁂… 𑀬𑀫𑁆𑀧𑀺, 𑀫𑀸𑀡𑀯, 𑀪𑀺𑀓𑁆𑀔𑀼 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑁄 𑀇𑀫𑀫𑁂𑀯 𑀓𑀸𑀬𑀁 𑀧𑀭𑀺𑀲𑀼𑀤𑁆𑀥𑁂𑀦 𑀘𑁂𑀢𑀲𑀸 𑀧𑀭𑀺𑀬𑁄𑀤𑀸𑀢𑁂𑀦 𑀨𑀭𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺; 𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀧𑀭𑀺𑀲𑀼𑀤𑁆𑀥𑁂𑀦 𑀘𑁂𑀢𑀲𑀸 𑀧𑀭𑀺𑀬𑁄𑀤𑀸𑀢𑁂𑀦 𑀅𑀧𑁆𑀨𑀼𑀝𑀁 𑀳𑁄𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀫𑀸𑀥𑀺𑀲𑁆𑀫𑀺𑀁.

𑁪𑁭𑁧. ‘‘𑀅𑀬𑀁 𑀔𑁄 𑀲𑁄, 𑀫𑀸𑀡𑀯, 𑀅𑀭𑀺𑀬𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀬𑀲𑁆𑀲 𑀲𑁄 𑀪𑀕𑀯𑀸 𑀯𑀡𑁆𑀡𑀯𑀸𑀤𑀻 𑀅𑀳𑁄𑀲𑀺, 𑀬𑀢𑁆𑀣 𑀘 𑀇𑀫𑀁 𑀚𑀦𑀢𑀁 𑀲𑀫𑀸𑀤𑀧𑁂𑀲𑀺 𑀦𑀺𑀯𑁂𑀲𑁂𑀲𑀺 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀅𑀢𑁆𑀣𑀺 𑀘𑁂𑀯𑁂𑀢𑁆𑀣 𑀉𑀢𑁆𑀢𑀭𑀺𑀓𑀭𑀡𑀻𑀬’’𑀦𑁆𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀪𑁄 𑀆𑀦𑀦𑁆𑀤, 𑀅𑀩𑁆𑀪𑀼𑀢𑀁, 𑀪𑁄 𑀆𑀦𑀦𑁆𑀤! 𑀲𑁄 𑀘𑀸𑀬𑀁, 𑀪𑁄 𑀆𑀦𑀦𑁆𑀤, 𑀅𑀭𑀺𑀬𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀧𑀭𑀺𑀧𑀼𑀡𑁆𑀡𑁄, 𑀦𑁄 𑀅𑀧𑀭𑀺𑀧𑀼𑀡𑁆𑀡𑁄. 𑀏𑀯𑀁 𑀧𑀭𑀺𑀧𑀼𑀡𑁆𑀡𑀁 𑀘𑀸𑀳𑀁, 𑀪𑁄 𑀆𑀦𑀦𑁆𑀤, 𑀅𑀭𑀺𑀬𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑀁 𑀇𑀢𑁄 𑀩𑀳𑀺𑀤𑁆𑀥𑀸 𑀅𑀜𑁆𑀜𑁂𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺. 𑀏𑀯𑀁 𑀧𑀭𑀺𑀧𑀼𑀡𑁆𑀡𑀜𑁆𑀘, 𑀪𑁄 𑀆𑀦𑀦𑁆𑀤, 𑀅𑀭𑀺𑀬𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑀁 𑀇𑀢𑁄 𑀩𑀳𑀺𑀤𑁆𑀥𑀸 𑀅𑀜𑁆𑀜𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀢𑁆𑀢𑀦𑀺 𑀲𑀫𑀦𑀼𑀧𑀲𑁆𑀲𑁂𑀬𑁆𑀬𑀼𑀁, 𑀢𑁂 𑀢𑀸𑀯𑀢𑀓𑁂𑀦𑁂𑀯 𑀅𑀢𑁆𑀢𑀫𑀦𑀸 𑀅𑀲𑁆𑀲𑀼 𑁋 ‘𑀅𑀮𑀫𑁂𑀢𑁆𑀢𑀸𑀯𑀢𑀸, 𑀓𑀢𑀫𑁂𑀢𑁆𑀢𑀸𑀯𑀢𑀸, 𑀅𑀦𑀼𑀧𑁆𑀧𑀢𑁆𑀢𑁄 𑀦𑁄 𑀲𑀸𑀫𑀜𑁆𑀜𑀢𑁆𑀣𑁄, 𑀦𑀢𑁆𑀣𑀺 𑀦𑁄 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺𑀓𑀭𑀡𑀻𑀬’𑀦𑁆𑀢𑀺. 𑀅𑀣 𑀘 𑀧𑀦 𑀪𑀯𑀁 𑀆𑀦𑀦𑁆𑀤𑁄 𑀏𑀯𑀫𑀸𑀳 𑁋 ‘𑀅𑀢𑁆𑀣𑀺 𑀘𑁂𑀯𑁂𑀢𑁆𑀣 𑀉𑀢𑁆𑀢𑀭𑀺𑀓𑀭𑀡𑀻𑀬’’’𑀦𑁆𑀢𑀺.

𑀧𑀜𑁆𑀜𑀸𑀓𑁆𑀔𑀦𑁆𑀥𑁄

𑁪𑁭𑁨. ‘‘𑀓𑀢𑀫𑁄 𑀧𑀦 𑀲𑁄, 𑀪𑁄 𑀆𑀦𑀦𑁆𑀤, 𑀅𑀭𑀺𑀬𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑁄, 𑀬𑀲𑁆𑀲 𑀪𑁄 𑀪𑀯𑀁 𑀕𑁄𑀢𑀫𑁄 𑀯𑀡𑁆𑀡𑀯𑀸𑀤𑀻 𑀅𑀳𑁄𑀲𑀺, 𑀬𑀢𑁆𑀣 𑀘 𑀇𑀫𑀁 𑀚𑀦𑀢𑀁 𑀲𑀫𑀸𑀤𑀧𑁂𑀲𑀺 𑀦𑀺𑀯𑁂𑀲𑁂𑀲𑀺 𑀧𑀢𑀺𑀝𑁆𑀞𑀸𑀧𑁂𑀲𑀻’’𑀢𑀺?

‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀜𑀸𑀡𑀤𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀅𑀬𑀁 𑀔𑁄 𑀫𑁂 𑀓𑀸𑀬𑁄 𑀭𑀽𑀧𑀻 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑁄 𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑁄 𑀅𑀦𑀺𑀘𑁆𑀘𑀼𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑁄; 𑀇𑀤𑀜𑁆𑀘 𑀧𑀦 𑀫𑁂 𑀯𑀺𑀜𑁆𑀜𑀸𑀡𑀁 𑀏𑀢𑁆𑀣 𑀲𑀺𑀢𑀁 𑀏𑀢𑁆𑀣 𑀧𑀝𑀺𑀩𑀤𑁆𑀥’𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀫𑀸𑀡𑀯, 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀼𑀪𑁄 𑀚𑀸𑀢𑀺𑀫𑀸 𑀅𑀝𑁆𑀞𑀁𑀲𑁄 𑀲𑀼𑀧𑀭𑀺𑀓𑀫𑁆𑀫𑀓𑀢𑁄 𑀅𑀘𑁆𑀙𑁄 𑀯𑀺𑀧𑁆𑀧𑀲𑀦𑁆𑀦𑁄 𑀅𑀦𑀸𑀯𑀺𑀮𑁄 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑁄. 𑀢𑀢𑁆𑀭𑀸𑀲𑁆𑀲 𑀲𑀼𑀢𑁆𑀢𑀁 𑀆𑀯𑀼𑀢𑀁 𑀦𑀻𑀮𑀁 𑀯𑀸 𑀧𑀻𑀢𑀁 𑀯𑀸 𑀮𑁄𑀳𑀺𑀢𑀁 𑀯𑀸 𑀑𑀤𑀸𑀢𑀁 𑀯𑀸 𑀧𑀡𑁆𑀟𑀼𑀲𑀼𑀢𑁆𑀢𑀁 𑀯𑀸. 𑀢𑀫𑁂𑀦𑀁 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀳𑀢𑁆𑀣𑁂 𑀓𑀭𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑁂𑀬𑁆𑀬 𑁋 ‘𑀅𑀬𑀁 𑀔𑁄 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀼𑀪𑁄 𑀚𑀸𑀢𑀺𑀫𑀸 𑀅𑀝𑁆𑀞𑀁𑀲𑁄 𑀲𑀼𑀧𑀭𑀺𑀓𑀫𑁆𑀫𑀓𑀢𑁄 𑀅𑀘𑁆𑀙𑁄 𑀯𑀺𑀧𑁆𑀧𑀲𑀦𑁆𑀦𑁄 𑀅𑀦𑀸𑀯𑀺𑀮𑁄 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑁄. 𑀢𑀢𑁆𑀭𑀺𑀤𑀁 𑀲𑀼𑀢𑁆𑀢𑀁 𑀆𑀯𑀼𑀢𑀁 𑀦𑀻𑀮𑀁 𑀯𑀸 𑀧𑀻𑀢𑀁 𑀯𑀸 𑀮𑁄𑀳𑀺𑀢𑀁 𑀯𑀸 𑀑𑀤𑀸𑀢𑀁 𑀯𑀸 𑀧𑀡𑁆𑀟𑀼𑀲𑀼𑀢𑁆𑀢𑀁 𑀯𑀸’𑀢𑀺. 𑀏𑀯𑀫𑁂𑀯 𑀔𑁄, 𑀫𑀸𑀡𑀯, 𑀪𑀺𑀓𑁆𑀔𑀼 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀜𑀸𑀡𑀤𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘𑀅𑀬𑀁 𑀔𑁄 𑀫𑁂 𑀓𑀸𑀬𑁄 𑀭𑀽𑀧𑀻 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑁄 𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑁄 𑀅𑀦𑀺𑀘𑁆𑀘𑀼𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀪𑁂𑀤𑀦-𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑁄. 𑀇𑀤𑀜𑁆𑀘 𑀧𑀦 𑀫𑁂 𑀯𑀺𑀜𑁆𑀜𑀸𑀡𑀁 𑀏𑀢𑁆𑀣 𑀲𑀺𑀢𑀁 𑀏𑀢𑁆𑀣 𑀧𑀝𑀺𑀩𑀤𑁆𑀥’𑀦𑁆𑀢𑀺. 𑀬𑀫𑁆𑀧𑀺, 𑀫𑀸𑀡𑀯, 𑀪𑀺𑀓𑁆𑀔𑀼 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂…𑀧𑁂… 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀜𑀸𑀡𑀤𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀺…𑀧𑁂… 𑀏𑀢𑁆𑀣 𑀧𑀝𑀺𑀩𑀤𑁆𑀥𑀦𑁆𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀧𑀜𑁆𑀜𑀸𑀬.

𑁪𑁭𑁩. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀫𑀦𑁄𑀫𑀬𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀸𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀇𑀫𑀫𑁆𑀳𑀸 𑀓𑀸𑀬𑀸 𑀅𑀜𑁆𑀜𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀺𑀦𑀸𑀢𑀺 𑀭𑀽𑀧𑀺𑀁 𑀫𑀦𑁄𑀫𑀬𑀁 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀺𑀁 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀁.

‘‘𑀲𑁂𑀬𑁆𑀬𑀣𑀸𑀧𑀺, 𑀫𑀸𑀡𑀯, 𑀧𑀼𑀭𑀺𑀲𑁄 𑀫𑀼𑀜𑁆𑀚𑀫𑁆𑀳𑀸 𑀈𑀲𑀺𑀓𑀁 𑀧𑀯𑀸𑀳𑁂𑀬𑁆𑀬. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀬𑀁 𑀫𑀼𑀜𑁆𑀚𑁄 𑀅𑀬𑀁 𑀈𑀲𑀺𑀓𑀸; 𑀅𑀜𑁆𑀜𑁄 𑀫𑀼𑀜𑁆𑀚𑁄 𑀅𑀜𑁆𑀜𑀸 𑀈𑀲𑀺𑀓𑀸; 𑀫𑀼𑀜𑁆𑀚𑀫𑁆𑀳𑀸 𑀢𑁆𑀯𑁂𑀯 𑀈𑀲𑀺𑀓𑀸 𑀧𑀯𑀸𑀴𑁆𑀳𑀸’𑀢𑀺. 𑀲𑁂𑀬𑁆𑀬𑀣𑀸 𑀯𑀸 𑀧𑀦, 𑀫𑀸𑀡𑀯, 𑀧𑀼𑀭𑀺𑀲𑁄 𑀅𑀲𑀺𑀁 𑀓𑁄𑀲𑀺𑀬𑀸 𑀧𑀯𑀸𑀳𑁂𑀬𑁆𑀬. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀬𑀁 𑀅𑀲𑀺, 𑀅𑀬𑀁 𑀓𑁄𑀲𑀺; 𑀅𑀜𑁆𑀜𑁄 𑀅𑀲𑀺, 𑀅𑀜𑁆𑀜𑀸 𑀓𑁄𑀲𑀺; 𑀓𑁄𑀲𑀺𑀬𑀸 𑀢𑁆𑀯𑁂𑀯 𑀅𑀲𑀺 𑀧𑀯𑀸𑀴𑁆𑀳𑁄’𑀢𑀺. 𑀲𑁂𑀬𑁆𑀬𑀣𑀸 𑀯𑀸 𑀧𑀦, 𑀫𑀸𑀡𑀯, 𑀧𑀼𑀭𑀺𑀲𑁄 𑀅𑀳𑀺𑀁 𑀓𑀭𑀡𑁆𑀟𑀸 𑀉𑀤𑁆𑀥𑀭𑁂𑀬𑁆𑀬. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀬𑀁 𑀅𑀳𑀺, 𑀅𑀬𑀁 𑀓𑀭𑀡𑁆𑀟𑁄; 𑀅𑀜𑁆𑀜𑁄 𑀅𑀳𑀺, 𑀅𑀜𑁆𑀜𑁄 𑀓𑀭𑀡𑁆𑀟𑁄; 𑀓𑀭𑀡𑁆𑀟𑀸 𑀢𑁆𑀯𑁂𑀯 𑀅𑀳𑀺 𑀉𑀩𑁆𑀪𑀢𑁄’𑀢𑀺. 𑀏𑀯𑀫𑁂𑀯 𑀔𑁄, 𑀫𑀸𑀡𑀯, 𑀪𑀺𑀓𑁆𑀔𑀼…𑀧𑁂… 𑀬𑀫𑁆𑀧𑀺, 𑀫𑀸𑀡𑀯, 𑀪𑀺𑀓𑁆𑀔𑀼 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀫𑀦𑁄𑀫𑀬𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀸𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺…𑀧𑁂…. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀧𑀜𑁆𑀜𑀸𑀬.

𑁪𑁭𑁪. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀇𑀤𑁆𑀥𑀺𑀯𑀺𑀥𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺. 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀺. 𑀆𑀯𑀺𑀪𑀸𑀯𑀁 𑀢𑀺𑀭𑁄𑀪𑀸𑀯𑀁 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑀢𑀺 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂. 𑀧𑀣𑀯𑀺𑀬𑀸𑀧𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀉𑀤𑀓𑁂. 𑀉𑀤𑀓𑁂𑀧𑀺 𑀅𑀪𑀺𑀚𑁆𑀚𑀫𑀸𑀦𑁂 𑀕𑀘𑁆𑀙𑀢𑀺 𑀲𑁂𑀬𑁆𑀬𑀣𑀸𑀧𑀺 𑀧𑀣𑀯𑀺𑀬𑀁. 𑀆𑀓𑀸𑀲𑁂𑀧𑀺 𑀧𑀮𑁆𑀮𑀗𑁆𑀓𑁂𑀦 𑀓𑀫𑀢𑀺 𑀲𑁂𑀬𑁆𑀬𑀣𑀸𑀧𑀺 𑀧𑀓𑁆𑀔𑀻 𑀲𑀓𑀼𑀡𑁄. 𑀇𑀫𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀏𑀯𑀁 𑀫𑀳𑀺𑀤𑁆𑀥𑀺𑀓𑁂 𑀏𑀯𑀁 𑀫𑀳𑀸𑀦𑀼𑀪𑀸𑀯𑁂 𑀧𑀸𑀡𑀺𑀦𑀸 𑀧𑀭𑀸𑀫𑀲𑀢𑀺 𑀧𑀭𑀺𑀫𑀚𑁆𑀚𑀢𑀺. 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀫𑀸𑀡𑀯, 𑀤𑀓𑁆𑀔𑁄 𑀓𑀼𑀫𑁆𑀪𑀓𑀸𑀭𑁄 𑀯𑀸 𑀓𑀼𑀫𑁆𑀪𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀲𑀼𑀧𑀭𑀺𑀓𑀫𑁆𑀫𑀓𑀢𑀸𑀬 𑀫𑀢𑁆𑀢𑀺𑀓𑀸𑀬 𑀬𑀜𑁆𑀜𑀤𑁂𑀯 𑀪𑀸𑀚𑀦𑀯𑀺𑀓𑀢𑀺𑀁 𑀆𑀓𑀗𑁆𑀔𑁂𑀬𑁆𑀬, 𑀢𑀁 𑀢𑀤𑁂𑀯 𑀓𑀭𑁂𑀬𑁆𑀬 𑀅𑀪𑀺𑀦𑀺𑀧𑁆𑀨𑀸𑀤𑁂𑀬𑁆𑀬. 𑀲𑁂𑀬𑁆𑀬𑀣𑀸 𑀯𑀸 𑀧𑀦, 𑀫𑀸𑀡𑀯, 𑀤𑀓𑁆𑀔𑁄 𑀤𑀦𑁆𑀢𑀓𑀸𑀭𑁄 𑀯𑀸 𑀤𑀦𑁆𑀢𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀲𑀼𑀧𑀭𑀺𑀓𑀫𑁆𑀫𑀓𑀢𑀲𑁆𑀫𑀺𑀁 𑀤𑀦𑁆𑀢𑀲𑁆𑀫𑀺𑀁 𑀬𑀜𑁆𑀜𑀤𑁂𑀯 𑀤𑀦𑁆𑀢𑀯𑀺𑀓𑀢𑀺𑀁 𑀆𑀓𑀗𑁆𑀔𑁂𑀬𑁆𑀬, 𑀢𑀁 𑀢𑀤𑁂𑀯 𑀓𑀭𑁂𑀬𑁆𑀬 𑀅𑀪𑀺𑀦𑀺𑀧𑁆𑀨𑀸𑀤𑁂𑀬𑁆𑀬. 𑀲𑁂𑀬𑁆𑀬𑀣𑀸 𑀯𑀸 𑀧𑀦, 𑀫𑀸𑀡𑀯, 𑀤𑀓𑁆𑀔𑁄 𑀲𑀼𑀯𑀡𑁆𑀡𑀓𑀸𑀭𑁄 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀲𑀼𑀧𑀭𑀺𑀓𑀫𑁆𑀫𑀓𑀢𑀲𑁆𑀫𑀺𑀁 𑀲𑀼𑀯𑀡𑁆𑀡𑀲𑁆𑀫𑀺𑀁 𑀬𑀜𑁆𑀜𑀤𑁂𑀯 𑀲𑀼𑀯𑀡𑁆𑀡𑀯𑀺𑀓𑀢𑀺𑀁 𑀆𑀓𑀗𑁆𑀔𑁂𑀬𑁆𑀬, 𑀢𑀁 𑀢𑀤𑁂𑀯 𑀓𑀭𑁂𑀬𑁆𑀬 𑀅𑀪𑀺𑀦𑀺𑀧𑁆𑀨𑀸𑀤𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀫𑀸𑀡𑀯, 𑀪𑀺𑀓𑁆𑀔𑀼 …𑀧𑁂… 𑀬𑀫𑁆𑀧𑀺 𑀫𑀸𑀡𑀯 𑀪𑀺𑀓𑁆𑀔𑀼 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀇𑀤𑁆𑀥𑀺𑀯𑀺𑀥𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺. 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺 …𑀧𑁂… 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀧𑀜𑁆𑀜𑀸𑀬.

𑁪𑁭𑁫. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂…𑀧𑁂… 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀯𑀺𑀲𑀼𑀤𑁆𑀥𑀸𑀬 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸𑀬 𑀉𑀪𑁄 𑀲𑀤𑁆𑀤𑁂 𑀲𑀼𑀡𑀸𑀢𑀺 𑀤𑀺𑀩𑁆𑀩𑁂 𑀘 𑀫𑀸𑀦𑀼𑀲𑁂 𑀘 𑀬𑁂 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀘. 𑀲𑁂𑀬𑁆𑀬𑀣𑀸𑀧𑀺, 𑀫𑀸𑀡𑀯, 𑀧𑀼𑀭𑀺𑀲𑁄 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄. 𑀲𑁄 𑀲𑀼𑀡𑁂𑀬𑁆𑀬 𑀪𑁂𑀭𑀺𑀲𑀤𑁆𑀤𑀫𑁆𑀧𑀺 𑀫𑀼𑀤𑀺𑀗𑁆𑀕𑀲𑀤𑁆𑀤𑀫𑁆𑀧𑀺 𑀲𑀗𑁆𑀔𑀧𑀡𑀯𑀤𑀺𑀦𑁆𑀤𑀺𑀫𑀲𑀤𑁆𑀤𑀫𑁆𑀧𑀺. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀪𑁂𑀭𑀺𑀲𑀤𑁆𑀤𑁄 𑀇𑀢𑀺𑀧𑀺 𑀫𑀼𑀤𑀺𑀗𑁆𑀕𑀲𑀤𑁆𑀤𑁄 𑀇𑀢𑀺𑀧𑀺 𑀲𑀗𑁆𑀔𑀧𑀡𑀯𑀤𑀺𑀦𑁆𑀤𑀺𑀫𑀲𑀤𑁆𑀤𑁄 𑀇𑀢𑀺’𑀧𑀺 [𑀇𑀢𑀺𑀧𑀻𑀢𑀺 (𑀓.)]. 𑀏𑀯𑀫𑁂𑀯 𑀔𑁄, 𑀫𑀸𑀡𑀯, 𑀪𑀺𑀓𑁆𑀔𑀼…𑀧𑁂…. 𑀬𑀫𑁆𑀧𑀺 𑀫𑀸𑀡𑀯, 𑀪𑀺𑀓𑁆𑀔𑀼 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂…𑀧𑁂… 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀯𑀺𑀲𑀼𑀤𑁆𑀥𑀸𑀬 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸𑀬 𑀉𑀪𑁄 𑀲𑀤𑁆𑀤𑁂 𑀲𑀼𑀡𑀸𑀢𑀺 𑀤𑀺𑀩𑁆𑀩𑁂 𑀘 𑀫𑀸𑀦𑀼𑀲𑁂 𑀘 𑀬𑁂 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀘. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀧𑀜𑁆𑀜𑀸𑀬.

𑁪𑁭𑁬. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀢𑀺, ‘𑀲𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 𑀲𑀭𑀸𑀕𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, ‘𑀯𑀻𑀢𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 𑀯𑀻𑀢𑀭𑀸𑀕𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, ‘𑀲𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁 𑀲𑀤𑁄𑀲𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, ‘𑀯𑀻𑀢𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁 𑀯𑀻𑀢𑀤𑁄𑀲𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, ‘𑀲𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁 𑀲𑀫𑁄𑀳𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, ‘𑀯𑀻𑀢𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁 𑀯𑀻𑀢𑀫𑁄𑀳𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, ‘𑀲𑀗𑁆𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 𑀲𑀗𑁆𑀔𑀺𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, ‘𑀯𑀺𑀓𑁆𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 𑀯𑀺𑀓𑁆𑀔𑀺𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, ‘𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁 𑀫𑀳𑀕𑁆𑀕𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, ‘𑀅𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁 𑀅𑀫𑀳𑀕𑁆𑀕𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, ‘𑀲𑀉𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁 𑀲𑀉𑀢𑁆𑀢𑀭𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, ‘𑀅𑀦𑀼𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁 𑀅𑀦𑀼𑀢𑁆𑀢𑀭𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, ‘𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 𑀲𑀫𑀸𑀳𑀺𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, ‘𑀅𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 𑀅𑀲𑀫𑀸𑀳𑀺𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, ‘𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, ‘𑀅𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 𑀅𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀫𑀸𑀡𑀯, 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀤𑀳𑀭𑁄 𑀬𑀼𑀯𑀸 𑀫𑀡𑁆𑀟𑀦𑀚𑀸𑀢𑀺𑀓𑁄 𑀆𑀤𑀸𑀲𑁂 𑀯𑀸 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀘𑁆𑀙𑁂 𑀯𑀸 𑀉𑀤𑀓𑀧𑀢𑁆𑀢𑁂 𑀲𑀓𑀁 𑀫𑀼𑀔𑀦𑀺𑀫𑀺𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀲𑀓𑀡𑀺𑀓𑀁 𑀯𑀸 𑀲𑀓𑀡𑀺𑀓𑀦𑁆𑀢𑀺 𑀚𑀸𑀦𑁂𑀬𑁆𑀬, 𑀅𑀓𑀡𑀺𑀓𑀁 𑀯𑀸 𑀅𑀓𑀡𑀺𑀓𑀦𑁆𑀢𑀺 𑀚𑀸𑀦𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀫𑀸𑀡𑀯, 𑀪𑀺𑀓𑁆𑀔𑀼…𑀧𑁂… 𑀬𑀫𑁆𑀧𑀺, 𑀫𑀸𑀡𑀯, 𑀪𑀺𑀓𑁆𑀔𑀼 𑀏𑀯𑀁 𑀲𑀫𑀸𑀳𑀺𑀢𑁂…𑀧𑁂… 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀧𑀭𑀲𑀢𑁆𑀢𑀸𑀦𑀁 𑀧𑀼𑀭𑀧𑀼𑀕𑁆𑀕𑀮𑀸𑀦𑀁 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀧𑀚𑀸𑀦𑀸𑀢𑀺, 𑀲𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 𑀲𑀭𑀸𑀕𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀢𑀺…𑀧𑁂… 𑀅𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 𑀅𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀧𑀜𑁆𑀜𑀸𑀬.

𑁪𑁭𑁭. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂…𑀧𑁂… 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺. 𑀲𑁂𑀬𑁆𑀬𑀣𑀺𑀤𑀁, 𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄 𑀢𑀺𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀘𑀢𑀲𑁆𑀲𑁄𑀧𑀺 𑀚𑀸𑀢𑀺𑀬𑁄 𑀧𑀜𑁆𑀘𑀧𑀺 𑀚𑀸𑀢𑀺𑀬𑁄 𑀤𑀲𑀧𑀺 𑀚𑀸𑀢𑀺𑀬𑁄 𑀯𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀢𑀺𑀁𑀲𑀫𑁆𑀧𑀺 𑀚𑀸𑀢𑀺𑀬𑁄 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀚𑀸𑀢𑀺𑀬𑁄 𑀧𑀜𑁆𑀜𑀸𑀲𑀫𑁆𑀧𑀺 𑀚𑀸𑀢𑀺𑀬𑁄 𑀚𑀸𑀢𑀺𑀲𑀢𑀫𑁆𑀧𑀺 𑀚𑀸𑀢𑀺𑀲𑀳𑀲𑁆𑀲𑀫𑁆𑀧𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑁆𑀧𑀺 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀯𑀺𑀯𑀝𑁆𑀝𑀓𑀧𑁆𑀧𑁂 𑀅𑀦𑁂𑀓𑁂𑀧𑀺 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑁂 𑁋 ‘𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄. 𑀲𑁄 𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺𑀁; 𑀢𑀢𑁆𑀭𑀸𑀧𑀸𑀲𑀺𑀁 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄 𑀏𑀯𑀁𑀯𑀡𑁆𑀡𑁄 𑀏𑀯𑀫𑀸𑀳𑀸𑀭𑁄 𑀏𑀯𑀁𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄; 𑀲𑁄 𑀢𑀢𑁄 𑀘𑀼𑀢𑁄 𑀇𑀥𑀽𑀧𑀧𑀦𑁆𑀦𑁄’𑀢𑀺. 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀫𑀸𑀡𑀯, 𑀧𑀼𑀭𑀺𑀲𑁄 𑀲𑀓𑀫𑁆𑀳𑀸 𑀕𑀸𑀫𑀸 𑀅𑀜𑁆𑀜𑀁 𑀕𑀸𑀫𑀁 𑀕𑀘𑁆𑀙𑁂𑀬𑁆𑀬; 𑀢𑀫𑁆𑀳𑀸𑀧𑀺 𑀕𑀸𑀫𑀸 𑀅𑀜𑁆𑀜𑀁 𑀕𑀸𑀫𑀁 𑀕𑀘𑁆𑀙𑁂𑀬𑁆𑀬; 𑀲𑁄 𑀢𑀫𑁆𑀳𑀸 𑀕𑀸𑀫𑀸 𑀲𑀓𑀁𑀬𑁂𑀯 𑀕𑀸𑀫𑀁 𑀧𑀘𑁆𑀘𑀸𑀕𑀘𑁆𑀙𑁂𑀬𑁆𑀬. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀳𑀁 𑀔𑁄 𑀲𑀓𑀫𑁆𑀳𑀸 𑀕𑀸𑀫𑀸 𑀅𑀫𑀼𑀁 𑀕𑀸𑀫𑀁 𑀅𑀕𑀘𑁆𑀙𑀺𑀁, 𑀢𑀢𑁆𑀭 𑀏𑀯𑀁 𑀅𑀝𑁆𑀞𑀸𑀲𑀺𑀁 𑀏𑀯𑀁 𑀦𑀺𑀲𑀻𑀤𑀺𑀁 𑀏𑀯𑀁 𑀅𑀪𑀸𑀲𑀺𑀁 𑀏𑀯𑀁 𑀢𑀼𑀡𑁆𑀳𑀻 𑀅𑀳𑁄𑀲𑀺𑀁. 𑀲𑁄 𑀢𑀫𑁆𑀳𑀸𑀧𑀺 𑀕𑀸𑀫𑀸 𑀅𑀫𑀼𑀁 𑀕𑀸𑀫𑀁 𑀕𑀘𑁆𑀙𑀺𑀁, 𑀢𑀢𑁆𑀭𑀸𑀧𑀺 𑀏𑀯𑀁 𑀅𑀝𑁆𑀞𑀸𑀲𑀺𑀁 𑀏𑀯𑀁 𑀦𑀺𑀲𑀻𑀤𑀺𑀁 𑀏𑀯𑀁 𑀅𑀪𑀸𑀲𑀺𑀁 𑀏𑀯𑀁 𑀢𑀼𑀡𑁆𑀳𑀻 𑀅𑀳𑁄𑀲𑀺𑀁. 𑀲𑁄𑀫𑁆𑀳𑀺 𑀢𑀫𑁆𑀳𑀸 𑀕𑀸𑀫𑀸 𑀲𑀓𑀁𑀬𑁂𑀯 𑀕𑀸𑀫𑀁 𑀧𑀘𑁆𑀘𑀸𑀕𑀢𑁄’𑀢𑀺. 𑀏𑀯𑀫𑁂𑀯 𑀔𑁄, 𑀫𑀸𑀡𑀯, 𑀪𑀺𑀓𑁆𑀔𑀼…𑀧𑁂… 𑀬𑀫𑁆𑀧𑀺, 𑀫𑀸𑀡𑀯, 𑀪𑀺𑀓𑁆𑀔𑀼 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂…𑀧𑁂… 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀏𑀓𑀫𑁆𑀧𑀺 𑀚𑀸𑀢𑀺𑀁…𑀧𑁂… 𑀇𑀢𑀺 𑀲𑀸𑀓𑀸𑀭𑀁 𑀲𑀉𑀤𑁆𑀤𑁂𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀧𑀜𑁆𑀜𑀸𑀬.

𑁪𑁭𑁮. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂…𑀧𑁂… 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂, 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺 𑁋 ‘𑀇𑀫𑁂 𑀯𑀢 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸. 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸. 𑀇𑀫𑁂 𑀯𑀸 𑀧𑀦 𑀪𑁄𑀦𑁆𑀢𑁄 𑀲𑀢𑁆𑀢𑀸 𑀓𑀸𑀬𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀘𑀻𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀦𑁄𑀲𑀼𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀭𑀺𑀬𑀸𑀦𑀁 𑀅𑀦𑀼𑀧𑀯𑀸𑀤𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀸. 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸’𑀢𑀺. 𑀇𑀢𑀺 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂, 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀫𑀸𑀡𑀯, 𑀫𑀚𑁆𑀛𑁂𑀲𑀺𑀗𑁆𑀖𑀸𑀝𑀓𑁂 𑀧𑀸𑀲𑀸𑀤𑁄, 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀞𑀺𑀢𑁄 𑀧𑀲𑁆𑀲𑁂𑀬𑁆𑀬 𑀫𑀦𑀼𑀲𑁆𑀲𑁂 𑀕𑁂𑀳𑀁 𑀧𑀯𑀺𑀲𑀦𑁆𑀢𑁂𑀧𑀺 𑀦𑀺𑀓𑁆𑀔𑀫𑀦𑁆𑀢𑁂𑀧𑀺 𑀭𑀣𑀺𑀓𑀸𑀬𑀧𑀺 𑀯𑀻𑀣𑀺𑀁 𑀲𑀜𑁆𑀘𑀭𑀦𑁆𑀢𑁂 𑀫𑀚𑁆𑀛𑁂𑀲𑀺𑀗𑁆𑀖𑀸𑀝𑀓𑁂 𑀦𑀺𑀲𑀺𑀦𑁆𑀦𑁂𑀧𑀺. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀏𑀢𑁂 𑀫𑀦𑀼𑀲𑁆𑀲𑀸 𑀕𑁂𑀳𑀁 𑀧𑀯𑀺𑀲𑀦𑁆𑀢𑀺, 𑀏𑀢𑁂 𑀦𑀺𑀓𑁆𑀔𑀫𑀦𑁆𑀢𑀺, 𑀏𑀢𑁂 𑀭𑀣𑀺𑀓𑀸𑀬 𑀯𑀻𑀣𑀺𑀁 𑀲𑀜𑁆𑀘𑀭𑀦𑁆𑀢𑀺, 𑀏𑀢𑁂 𑀫𑀚𑁆𑀛𑁂𑀲𑀺𑀗𑁆𑀖𑀸𑀝𑀓𑁂 𑀦𑀺𑀲𑀺𑀦𑁆𑀦𑀸’𑀢𑀺. 𑀏𑀯𑀫𑁂𑀯 𑀔𑁄, 𑀫𑀸𑀡𑀯, 𑀪𑀺𑀓𑁆𑀔𑀼…𑀧𑁂… 𑀬𑀫𑁆𑀧𑀺, 𑀫𑀸𑀡𑀯, 𑀪𑀺𑀓𑁆𑀔𑀼 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂…𑀧𑁂… 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀳𑀻𑀦𑁂 𑀧𑀡𑀻𑀢𑁂 𑀲𑀼𑀯𑀡𑁆𑀡𑁂 𑀤𑀼𑀩𑁆𑀩𑀡𑁆𑀡𑁂 𑀲𑀼𑀕𑀢𑁂 𑀤𑀼𑀕𑁆𑀕𑀢𑁂, 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀧𑀜𑁆𑀜𑀸𑀬.

𑁪𑁭𑁯. ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀅𑀦𑀗𑁆𑀕𑀡𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀫𑀼𑀤𑀼𑀪𑀽𑀢𑁂 𑀓𑀫𑁆𑀫𑀦𑀺𑀬𑁂 𑀞𑀺𑀢𑁂 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺; 𑀇𑀫𑁂 𑀆𑀲𑀯𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀆𑀲𑀯𑀲𑀫𑀼𑀤𑀬𑁄𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀆𑀲𑀯𑀦𑀺𑀭𑁄𑀥𑁄𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀢𑀲𑁆𑀲 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀪𑀯𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀅𑀯𑀺𑀚𑁆𑀚𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀫𑀸𑀡𑀯, 𑀧𑀩𑁆𑀩𑀢𑀲𑀗𑁆𑀔𑁂𑀧𑁂 𑀉𑀤𑀓𑀭𑀳𑀤𑁄 𑀅𑀘𑁆𑀙𑁄 𑀯𑀺𑀧𑁆𑀧𑀲𑀦𑁆𑀦𑁄 𑀅𑀦𑀸𑀯𑀺𑀮𑁄. 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀢𑀻𑀭𑁂 𑀞𑀺𑀢𑁄 𑀧𑀲𑁆𑀲𑁂𑀬𑁆𑀬 𑀲𑀺𑀧𑁆𑀧𑀺𑀓𑀲𑀫𑁆𑀩𑀼𑀓𑀫𑁆𑀧𑀺 𑀲𑀓𑁆𑀔𑀭𑀓𑀣𑀮𑀫𑁆𑀧𑀺 𑀫𑀘𑁆𑀙𑀕𑀼𑀫𑁆𑀩𑀫𑁆𑀧𑀺 𑀘𑀭𑀦𑁆𑀢𑀫𑁆𑀧𑀺 𑀢𑀺𑀝𑁆𑀞𑀦𑁆𑀢𑀫𑁆𑀧𑀺. 𑀢𑀲𑁆𑀲 𑀏𑀯𑀫𑀲𑁆𑀲 𑁋 ‘𑀅𑀬𑀁 𑀔𑁄 𑀉𑀤𑀓𑀭𑀳𑀤𑁄 𑀅𑀘𑁆𑀙𑁄 𑀯𑀺𑀧𑁆𑀧𑀲𑀦𑁆𑀦𑁄 𑀅𑀦𑀸𑀯𑀺𑀮𑁄. 𑀢𑀢𑁆𑀭𑀺𑀫𑁂 𑀲𑀺𑀧𑁆𑀧𑀺𑀓𑀲𑀫𑁆𑀩𑀼𑀓𑀸𑀧𑀺 𑀲𑀓𑁆𑀔𑀭𑀓𑀣𑀮𑀸𑀧𑀺 𑀫𑀘𑁆𑀙𑀕𑀼𑀫𑁆𑀩𑀸𑀧𑀺 𑀘𑀭𑀦𑁆𑀢𑀺𑀧𑀺 𑀢𑀺𑀝𑁆𑀞𑀦𑁆𑀢𑀺𑀧𑀻’𑀢𑀺. 𑀏𑀯𑀫𑁂𑀯 𑀔𑁄, 𑀫𑀸𑀡𑀯, 𑀪𑀺𑀓𑁆𑀔𑀼…𑀧𑁂… 𑀬𑀫𑁆𑀧𑀺, 𑀫𑀸𑀡𑀯, 𑀪𑀺𑀓𑁆𑀔𑀼 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂…𑀧𑁂… 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺. 𑀲𑁄 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺…𑀧𑁂… 𑀆𑀲𑀯𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀢𑀲𑁆𑀲 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀪𑀯𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀅𑀯𑀺𑀚𑁆𑀚𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀺, ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀧𑀜𑁆𑀜𑀸𑀬.

𑁪𑁮𑁦. ‘‘𑀅𑀬𑀁 𑀔𑁄, 𑀲𑁄 𑀫𑀸𑀡𑀯, 𑀅𑀭𑀺𑀬𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀬𑀲𑁆𑀲 𑀲𑁄 𑀪𑀕𑀯𑀸 𑀯𑀡𑁆𑀡𑀯𑀸𑀤𑀻 𑀅𑀳𑁄𑀲𑀺, 𑀬𑀢𑁆𑀣 𑀘 𑀇𑀫𑀁 𑀚𑀦𑀢𑀁 𑀲𑀫𑀸𑀤𑀧𑁂𑀲𑀺 𑀦𑀺𑀯𑁂𑀲𑁂𑀲𑀺 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀦𑀢𑁆𑀣𑀺 𑀘𑁂𑀯𑁂𑀢𑁆𑀣 𑀉𑀢𑁆𑀢𑀭𑀺𑀓𑀭𑀡𑀻𑀬’’𑀦𑁆𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀪𑁄 𑀆𑀦𑀦𑁆𑀤, 𑀅𑀩𑁆𑀪𑀼𑀢𑀁, 𑀪𑁄 𑀆𑀦𑀦𑁆𑀤! 𑀲𑁄 𑀘𑀸𑀬𑀁, 𑀪𑁄 𑀆𑀦𑀦𑁆𑀤, 𑀅𑀭𑀺𑀬𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀧𑀭𑀺𑀧𑀼𑀡𑁆𑀡𑁄, 𑀦𑁄 𑀅𑀧𑀭𑀺𑀧𑀼𑀡𑁆𑀡𑁄. 𑀏𑀯𑀁 𑀧𑀭𑀺𑀧𑀼𑀡𑁆𑀡𑀁 𑀘𑀸𑀳𑀁, 𑀪𑁄 𑀆𑀦𑀦𑁆𑀤, 𑀅𑀭𑀺𑀬𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑀁 𑀇𑀢𑁄 𑀩𑀳𑀺𑀤𑁆𑀥𑀸 𑀅𑀜𑁆𑀜𑁂𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺. 𑀦𑀢𑁆𑀣𑀺 𑀘𑁂𑀯𑁂𑀢𑁆𑀣 [𑀦 𑀲𑀫𑀦𑀼𑀧𑀲𑁆𑀲𑀸𑀫𑀺…𑀧𑁂… 𑀦𑀢𑁆𑀣𑀺 𑀦𑁄 𑀓𑀺𑀜𑁆𑀘𑀺 (𑀲𑁆𑀬𑀸. 𑀓.)] 𑀉𑀢𑁆𑀢𑀭𑀺𑀓𑀭𑀡𑀻𑀬𑀁 [𑀉𑀢𑁆𑀢𑀭𑀺𑀁 𑀓𑀭𑀡𑀻𑀬𑀦𑁆𑀢𑀺 (𑀲𑀻. 𑀲𑁆𑀬𑀸. 𑀧𑀻.) 𑀉𑀢𑁆𑀢𑀭𑀺𑀓𑀭𑀡𑀻𑀬𑀦𑁆𑀢𑀺 (𑀓.)]. 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀆𑀦𑀦𑁆𑀤, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀆𑀦𑀦𑁆𑀤! 𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀆𑀦𑀦𑁆𑀤, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 ‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’𑀢𑀺. 𑀏𑀯𑀫𑁂𑀯𑀁 𑀪𑁄𑀢𑀸 𑀆𑀦𑀦𑁆𑀤𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁, 𑀪𑁄 𑀆𑀦𑀦𑁆𑀤, 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀆𑀦𑀦𑁆𑀤𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺.

𑀲𑀼𑀪𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀤𑀲𑀫𑀁.

𑁧𑁧. 𑀓𑁂𑀯𑀝𑁆𑀝𑀲𑀼𑀢𑁆𑀢𑀁

𑀓𑁂𑀯𑀝𑁆𑀝𑀕𑀳𑀧𑀢𑀺𑀧𑀼𑀢𑁆𑀢𑀯𑀢𑁆𑀣𑀼

𑁪𑁮𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀦𑀸𑀴𑀦𑁆𑀤𑀸𑀬𑀁 𑀯𑀺𑀳𑀭𑀢𑀺 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑁂. 𑀅𑀣 𑀔𑁄 𑀓𑁂𑀯𑀝𑁆𑀝𑁄 𑀕𑀳𑀧𑀢𑀺𑀧𑀼𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀓𑁂𑀯𑀝𑁆𑀝𑁄 𑀕𑀳𑀧𑀢𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁, 𑀪𑀦𑁆𑀢𑁂, 𑀦𑀸𑀴𑀦𑁆𑀤𑀸 𑀇𑀤𑁆𑀥𑀸 𑀘𑁂𑀯 𑀨𑀻𑀢𑀸 𑀘 𑀩𑀳𑀼𑀚𑀦𑀸 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀸 𑀪𑀕𑀯𑀢𑀺 𑀅𑀪𑀺𑀧𑁆𑀧𑀲𑀦𑁆𑀦𑀸. 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀲𑀫𑀸𑀤𑀺𑀲𑀢𑀼, 𑀬𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸, 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀢𑀺; 𑀏𑀯𑀸𑀬𑀁 𑀦𑀸𑀴𑀦𑁆𑀤𑀸 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀪𑀕𑀯𑀢𑀺 𑀅𑀪𑀺𑀧𑁆𑀧𑀲𑀻𑀤𑀺𑀲𑁆𑀲𑀢𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀪𑀕𑀯𑀸 𑀓𑁂𑀯𑀝𑁆𑀝𑀁 𑀕𑀳𑀧𑀢𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀦 𑀔𑁄 𑀅𑀳𑀁, 𑀓𑁂𑀯𑀝𑁆𑀝, 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀫𑀺 𑁋 𑀏𑀣 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀕𑀺𑀳𑀻𑀦𑀁 𑀑𑀤𑀸𑀢𑀯𑀲𑀦𑀸𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀣𑀸’’𑀢𑀺.

𑁪𑁮𑁨. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀓𑁂𑀯𑀝𑁆𑀝𑁄 𑀕𑀳𑀧𑀢𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀦𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀥𑀁𑀲𑁂𑀫𑀺; 𑀅𑀧𑀺 𑀘, 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀬𑀁, 𑀪𑀦𑁆𑀢𑁂, 𑀦𑀸𑀴𑀦𑁆𑀤𑀸 𑀇𑀤𑁆𑀥𑀸 𑀘𑁂𑀯 𑀨𑀻𑀢𑀸 𑀘 𑀩𑀳𑀼𑀚𑀦𑀸 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀸 𑀪𑀕𑀯𑀢𑀺 𑀅𑀪𑀺𑀧𑁆𑀧𑀲𑀦𑁆𑀦𑀸. 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀲𑀫𑀸𑀤𑀺𑀲𑀢𑀼, 𑀬𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀢𑀺; 𑀏𑀯𑀸𑀬𑀁 𑀦𑀸𑀴𑀦𑁆𑀤𑀸 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀪𑀕𑀯𑀢𑀺 𑀅𑀪𑀺𑀧𑁆𑀧𑀲𑀻𑀤𑀺𑀲𑁆𑀲𑀢𑀻’’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀓𑁂𑀯𑀝𑁆𑀝𑀁 𑀕𑀳𑀧𑀢𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀦 𑀔𑁄 𑀅𑀳𑀁, 𑀓𑁂𑀯𑀝𑁆𑀝, 𑀪𑀺𑀓𑁆𑀔𑀽𑀦𑀁 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀫𑀺 𑁋 𑀏𑀣 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀕𑀺𑀳𑀻𑀦𑀁 𑀑𑀤𑀸𑀢𑀯𑀲𑀦𑀸𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀣𑀸’’’𑀢𑀺.

𑀢𑀢𑀺𑀬𑀫𑁆𑀧𑀺 𑀔𑁄 𑀓𑁂𑀯𑀝𑁆𑀝𑁄 𑀕𑀳𑀧𑀢𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀦𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀥𑀁𑀲𑁂𑀫𑀺; 𑀅𑀧𑀺 𑀘, 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀬𑀁, 𑀪𑀦𑁆𑀢𑁂, 𑀦𑀸𑀴𑀦𑁆𑀤𑀸 𑀇𑀤𑁆𑀥𑀸 𑀘𑁂𑀯 𑀨𑀻𑀢𑀸 𑀘 𑀩𑀳𑀼𑀚𑀦𑀸 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀸 𑀪𑀕𑀯𑀢𑀺 𑀅𑀪𑀺𑀧𑁆𑀧𑀲𑀦𑁆𑀦𑀸. 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀲𑀫𑀸𑀤𑀺𑀲𑀢𑀼, 𑀬𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀢𑀺. 𑀏𑀯𑀸𑀬𑀁 𑀦𑀸𑀴𑀦𑁆𑀤𑀸 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀪𑀕𑀯𑀢𑀺 𑀅𑀪𑀺𑀧𑁆𑀧𑀲𑀻𑀤𑀺𑀲𑁆𑀲𑀢𑀻’𑀢𑀺.

𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁

𑁪𑁮𑁩. ‘‘𑀢𑀻𑀡𑀺 𑀔𑁄 𑀇𑀫𑀸𑀦𑀺, 𑀓𑁂𑀯𑀝𑁆𑀝, 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀫𑀬𑀸 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑀺𑀢𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁, 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁, 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁.

𑁪𑁮𑁪. ‘‘𑀓𑀢𑀫𑀜𑁆𑀘, 𑀓𑁂𑀯𑀝𑁆𑀝, 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁? 𑀇𑀥, 𑀓𑁂𑀯𑀝𑁆𑀝, 𑀪𑀺𑀓𑁆𑀔𑀼 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺. 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀺; 𑀆𑀯𑀺𑀪𑀸𑀯𑀁 𑀢𑀺𑀭𑁄𑀪𑀸𑀯𑀁 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑀢𑀺 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂; 𑀧𑀣𑀯𑀺𑀬𑀸𑀧𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀢𑀺 𑀲𑁂𑀬𑁆𑀬𑀣𑀸𑀧𑀺 𑀉𑀤𑀓𑁂; 𑀉𑀤𑀓𑁂𑀧𑀺 𑀅𑀪𑀺𑀚𑁆𑀚𑀫𑀸𑀦𑁂 𑀕𑀘𑁆𑀙𑀢𑀺 𑀲𑁂𑀬𑁆𑀬𑀣𑀸𑀧𑀺 𑀧𑀣𑀯𑀺𑀬𑀁; 𑀆𑀓𑀸𑀲𑁂𑀧𑀺 𑀧𑀮𑁆𑀮𑀗𑁆𑀓𑁂𑀦 𑀓𑀫𑀢𑀺 𑀲𑁂𑀬𑁆𑀬𑀣𑀸𑀧𑀺 𑀧𑀓𑁆𑀔𑀻 𑀲𑀓𑀼𑀡𑁄; 𑀇𑀫𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀏𑀯𑀁 𑀫𑀳𑀺𑀤𑁆𑀥𑀺𑀓𑁂 𑀏𑀯𑀁 𑀫𑀳𑀸𑀦𑀼𑀪𑀸𑀯𑁂 𑀧𑀸𑀡𑀺𑀦𑀸 𑀧𑀭𑀸𑀫𑀲𑀢𑀺 𑀧𑀭𑀺𑀫𑀚𑁆𑀚𑀢𑀺; 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀺.

‘‘𑀢𑀫𑁂𑀦𑀁 𑀅𑀜𑁆𑀜𑀢𑀭𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀧𑀲𑁆𑀲𑀢𑀺 𑀢𑀁 𑀪𑀺𑀓𑁆𑀔𑀼𑀁 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀁 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀦𑁆𑀢𑀁, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀦𑁆𑀢𑀁; 𑀆𑀯𑀺𑀪𑀸𑀯𑀁 𑀢𑀺𑀭𑁄𑀪𑀸𑀯𑀁; 𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑀁 𑀕𑀘𑁆𑀙𑀦𑁆𑀢𑀁 𑀲𑁂𑀬𑁆𑀬𑀣𑀸𑀧𑀺 𑀆𑀓𑀸𑀲𑁂; 𑀧𑀣𑀯𑀺𑀬𑀸𑀧𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀦𑁆𑀢𑀁 𑀲𑁂𑀬𑁆𑀬𑀣𑀸𑀧𑀺 𑀉𑀤𑀓𑁂; 𑀉𑀤𑀓𑁂𑀧𑀺 𑀅𑀪𑀺𑀚𑁆𑀚𑀫𑀸𑀦𑁂 𑀕𑀘𑁆𑀙𑀦𑁆𑀢𑀁 𑀲𑁂𑀬𑁆𑀬𑀣𑀸𑀧𑀺 𑀧𑀣𑀯𑀺𑀬𑀁; 𑀆𑀓𑀸𑀲𑁂𑀧𑀺 𑀧𑀮𑁆𑀮𑀗𑁆𑀓𑁂𑀦 𑀓𑀫𑀦𑁆𑀢𑀁 𑀲𑁂𑀬𑁆𑀬𑀣𑀸𑀧𑀺 𑀧𑀓𑁆𑀔𑀻 𑀲𑀓𑀼𑀡𑁄; 𑀇𑀫𑁂𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀏𑀯𑀁 𑀫𑀳𑀺𑀤𑁆𑀥𑀺𑀓𑁂 𑀏𑀯𑀁 𑀫𑀳𑀸𑀦𑀼𑀪𑀸𑀯𑁂 𑀧𑀸𑀡𑀺𑀦𑀸 𑀧𑀭𑀸𑀫𑀲𑀦𑁆𑀢𑀁 𑀧𑀭𑀺𑀫𑀚𑁆𑀚𑀦𑁆𑀢𑀁 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀦𑁆𑀢𑀁.

‘‘𑀢𑀫𑁂𑀦𑀁 𑀲𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀅𑀜𑁆𑀜𑀢𑀭𑀲𑁆𑀲 𑀅𑀲𑁆𑀲𑀤𑁆𑀥𑀲𑁆𑀲 𑀅𑀧𑁆𑀧𑀲𑀦𑁆𑀦𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀅𑀘𑁆𑀙𑀭𑀺𑀬𑀁 𑀯𑀢, 𑀪𑁄, 𑀅𑀩𑁆𑀪𑀼𑀢𑀁 𑀯𑀢, 𑀪𑁄, 𑀲𑀫𑀡𑀲𑁆𑀲 𑀫𑀳𑀺𑀤𑁆𑀥𑀺𑀓𑀢𑀸 𑀫𑀳𑀸𑀦𑀼𑀪𑀸𑀯𑀢𑀸. 𑀅𑀫𑀸𑀳𑀁 𑀪𑀺𑀓𑁆𑀔𑀼𑀁 𑀅𑀤𑁆𑀤𑀲𑀁 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀁 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀦𑁆𑀢𑀁, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀦𑁆𑀢𑀁…𑀧𑁂… 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀦𑁆𑀢’𑀦𑁆𑀢𑀺.

‘‘𑀢𑀫𑁂𑀦𑀁 𑀲𑁄 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄 𑀢𑀁 𑀲𑀤𑁆𑀥𑀁 𑀧𑀲𑀦𑁆𑀦𑀁 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀢𑁆𑀣𑀺 𑀔𑁄, 𑀪𑁄, 𑀕𑀦𑁆𑀥𑀸𑀭𑀻 𑀦𑀸𑀫 𑀯𑀺𑀚𑁆𑀚𑀸. 𑀢𑀸𑀬 𑀲𑁄 𑀪𑀺𑀓𑁆𑀔𑀼 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀢𑀺 𑁋 𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀺, 𑀩𑀳𑀼𑀥𑀸𑀧𑀺 𑀳𑀼𑀢𑁆𑀯𑀸 𑀏𑀓𑁄 𑀳𑁄𑀢𑀺…𑀧𑁂… 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀧𑀺 𑀓𑀸𑀬𑁂𑀦 𑀯𑀲𑀁 𑀯𑀢𑁆𑀢𑁂𑀢𑀻’𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀓𑁂𑀯𑀝𑁆𑀝, 𑀅𑀧𑀺 𑀦𑀼 𑀲𑁄 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄 𑀢𑀁 𑀲𑀤𑁆𑀥𑀁 𑀧𑀲𑀦𑁆𑀦𑀁 𑀏𑀯𑀁 𑀯𑀤𑁂𑀬𑁆𑀬𑀸’’𑀢𑀺? ‘‘𑀯𑀤𑁂𑀬𑁆𑀬, 𑀪𑀦𑁆𑀢𑁂’’𑀢𑀺. ‘‘𑀇𑀫𑀁 𑀔𑁄 𑀅𑀳𑀁, 𑀓𑁂𑀯𑀝𑁆𑀝, 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑁂 𑀆𑀤𑀻𑀦𑀯𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑁂𑀦 𑀅𑀝𑁆𑀝𑀻𑀬𑀸𑀫𑀺 𑀳𑀭𑀸𑀬𑀸𑀫𑀺 𑀚𑀺𑀕𑀼𑀘𑁆𑀙𑀸𑀫𑀺’’.

𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁

𑁪𑁮𑁫. ‘‘𑀓𑀢𑀫𑀜𑁆𑀘, 𑀓𑁂𑀯𑀝𑁆𑀝, 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁? 𑀇𑀥, 𑀓𑁂𑀯𑀝𑁆𑀝, 𑀪𑀺𑀓𑁆𑀔𑀼 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀘𑀺𑀢𑁆𑀢𑀫𑁆𑀧𑀺 𑀆𑀤𑀺𑀲𑀢𑀺, 𑀘𑁂𑀢𑀲𑀺𑀓𑀫𑁆𑀧𑀺 𑀆𑀤𑀺𑀲𑀢𑀺, 𑀯𑀺𑀢𑀓𑁆𑀓𑀺𑀢𑀫𑁆𑀧𑀺 𑀆𑀤𑀺𑀲𑀢𑀺, 𑀯𑀺𑀘𑀸𑀭𑀺𑀢𑀫𑁆𑀧𑀺 𑀆𑀤𑀺𑀲𑀢𑀺 𑁋 ‘𑀏𑀯𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑁆𑀣𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑀺𑀧𑀺 𑀢𑁂 𑀘𑀺𑀢𑁆𑀢’𑀦𑁆𑀢𑀺.

‘‘𑀢𑀫𑁂𑀦𑀁 𑀅𑀜𑁆𑀜𑀢𑀭𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀧𑀲𑁆𑀲𑀢𑀺 𑀢𑀁 𑀪𑀺𑀓𑁆𑀔𑀼𑀁 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀘𑀺𑀢𑁆𑀢𑀫𑁆𑀧𑀺 𑀆𑀤𑀺𑀲𑀦𑁆𑀢𑀁, 𑀘𑁂𑀢𑀲𑀺𑀓𑀫𑁆𑀧𑀺 𑀆𑀤𑀺𑀲𑀦𑁆𑀢𑀁, 𑀯𑀺𑀢𑀓𑁆𑀓𑀺𑀢𑀫𑁆𑀧𑀺 𑀆𑀤𑀺𑀲𑀦𑁆𑀢𑀁, 𑀯𑀺𑀘𑀸𑀭𑀺𑀢𑀫𑁆𑀧𑀺 𑀆𑀤𑀺𑀲𑀦𑁆𑀢𑀁 𑁋 ‘𑀏𑀯𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑁆𑀣𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑀺𑀧𑀺 𑀢𑁂 𑀘𑀺𑀢𑁆𑀢’𑀦𑁆𑀢𑀺. 𑀢𑀫𑁂𑀦𑀁 𑀲𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀅𑀜𑁆𑀜𑀢𑀭𑀲𑁆𑀲 𑀅𑀲𑁆𑀲𑀤𑁆𑀥𑀲𑁆𑀲 𑀅𑀧𑁆𑀧𑀲𑀦𑁆𑀦𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀅𑀘𑁆𑀙𑀭𑀺𑀬𑀁 𑀯𑀢, 𑀪𑁄, 𑀅𑀩𑁆𑀪𑀼𑀢𑀁 𑀯𑀢, 𑀪𑁄, 𑀲𑀫𑀡𑀲𑁆𑀲 𑀫𑀳𑀺𑀤𑁆𑀥𑀺𑀓𑀢𑀸 𑀫𑀳𑀸𑀦𑀼𑀪𑀸𑀯𑀢𑀸. 𑀅𑀫𑀸𑀳𑀁 𑀪𑀺𑀓𑁆𑀔𑀼𑀁 𑀅𑀤𑁆𑀤𑀲𑀁 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀘𑀺𑀢𑁆𑀢𑀫𑁆𑀧𑀺 𑀆𑀤𑀺𑀲𑀦𑁆𑀢𑀁, 𑀘𑁂𑀢𑀲𑀺𑀓𑀫𑁆𑀧𑀺 𑀆𑀤𑀺𑀲𑀦𑁆𑀢𑀁, 𑀯𑀺𑀢𑀓𑁆𑀓𑀺𑀢𑀫𑁆𑀧𑀺 𑀆𑀤𑀺𑀲𑀦𑁆𑀢𑀁, 𑀯𑀺𑀘𑀸𑀭𑀺𑀢𑀫𑁆𑀧𑀺 𑀆𑀤𑀺𑀲𑀦𑁆𑀢𑀁 𑁋 ‘‘𑀏𑀯𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑁆𑀣𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑀺𑀧𑀺 𑀢𑁂 𑀘𑀺𑀢𑁆𑀢’’’𑀦𑁆𑀢𑀺.

‘‘𑀢𑀫𑁂𑀦𑀁 𑀲𑁄 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄 𑀢𑀁 𑀲𑀤𑁆𑀥𑀁 𑀧𑀲𑀦𑁆𑀦𑀁 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀢𑁆𑀣𑀺 𑀔𑁄, 𑀪𑁄, 𑀫𑀡𑀺𑀓𑀸 𑀦𑀸𑀫 𑀯𑀺𑀚𑁆𑀚𑀸; 𑀢𑀸𑀬 𑀲𑁄 𑀪𑀺𑀓𑁆𑀔𑀼 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀘𑀺𑀢𑁆𑀢𑀫𑁆𑀧𑀺 𑀆𑀤𑀺𑀲𑀢𑀺, 𑀘𑁂𑀢𑀲𑀺𑀓𑀫𑁆𑀧𑀺 𑀆𑀤𑀺𑀲𑀢𑀺, 𑀯𑀺𑀢𑀓𑁆𑀓𑀺𑀢𑀫𑁆𑀧𑀺 𑀆𑀤𑀺𑀲𑀢𑀺, 𑀯𑀺𑀘𑀸𑀭𑀺𑀢𑀫𑁆𑀧𑀺 𑀆𑀤𑀺𑀲𑀢𑀺 𑁋 ‘𑀏𑀯𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑁆𑀣𑀫𑁆𑀧𑀺 𑀢𑁂 𑀫𑀦𑁄, 𑀇𑀢𑀺𑀧𑀺 𑀢𑁂 𑀘𑀺𑀢𑁆𑀢’’’𑀦𑁆𑀢𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀓𑁂𑀯𑀝𑁆𑀝, 𑀅𑀧𑀺 𑀦𑀼 𑀲𑁄 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄 𑀢𑀁 𑀲𑀤𑁆𑀥𑀁 𑀧𑀲𑀦𑁆𑀦𑀁 𑀏𑀯𑀁 𑀯𑀤𑁂𑀬𑁆𑀬𑀸’’𑀢𑀺? ‘‘𑀯𑀤𑁂𑀬𑁆𑀬, 𑀪𑀦𑁆𑀢𑁂’’𑀢𑀺. ‘‘𑀇𑀫𑀁 𑀔𑁄 𑀅𑀳𑀁, 𑀓𑁂𑀯𑀝𑁆𑀝, 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑁂 𑀆𑀤𑀻𑀦𑀯𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑁂𑀦 𑀅𑀝𑁆𑀝𑀻𑀬𑀸𑀫𑀺 𑀳𑀭𑀸𑀬𑀸𑀫𑀺 𑀚𑀺𑀕𑀼𑀘𑁆𑀙𑀸𑀫𑀺’’.

𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁

𑁪𑁮𑁬. ‘‘𑀓𑀢𑀫𑀜𑁆𑀘, 𑀓𑁂𑀯𑀝𑁆𑀝, 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁? 𑀇𑀥, 𑀓𑁂𑀯𑀝𑁆𑀝, 𑀪𑀺𑀓𑁆𑀔𑀼 𑀏𑀯𑀫𑀦𑀼𑀲𑀸𑀲𑀢𑀺 𑁋 ‘𑀏𑀯𑀁 𑀯𑀺𑀢𑀓𑁆𑀓𑁂𑀣, 𑀫𑀸 𑀏𑀯𑀁 𑀯𑀺𑀢𑀓𑁆𑀓𑀬𑀺𑀢𑁆𑀣, 𑀏𑀯𑀁 𑀫𑀦𑀲𑀺𑀓𑀭𑁄𑀣, 𑀫𑀸 𑀏𑀯𑀁 𑀫𑀦𑀲𑀸𑀓𑀢𑁆𑀣, 𑀇𑀤𑀁 𑀧𑀚𑀳𑀣, 𑀇𑀤𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀣𑀸’𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀓𑁂𑀯𑀝𑁆𑀝, 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁.

‘‘𑀧𑀼𑀦 𑀘𑀧𑀭𑀁, 𑀓𑁂𑀯𑀝𑁆𑀝, 𑀇𑀥 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 …𑀧𑁂… (𑀬𑀣𑀸 𑁧𑁯𑁦-𑁨𑁧𑁨 𑀅𑀦𑀼𑀘𑁆𑀙𑁂𑀤𑁂𑀲𑀼 𑀏𑀯𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁). 𑀏𑀯𑀁 𑀔𑁄, 𑀓𑁂𑀯𑀝𑁆𑀝, 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀤𑀫𑁆𑀧𑀺 𑀯𑀼𑀘𑁆𑀘𑀢𑀺, 𑀓𑁂𑀯𑀝𑁆𑀝, 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀤𑀫𑁆𑀧𑀺 𑀯𑀼𑀘𑁆𑀘𑀢𑀺, 𑀓𑁂𑀯𑀝𑁆𑀝, 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁…𑀧𑁂… 𑀜𑀸𑀡𑀤𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺…𑀧𑁂… 𑀇𑀤𑀫𑁆𑀧𑀺 𑀯𑀼𑀘𑁆𑀘𑀢𑀺, 𑀓𑁂𑀯𑀝𑁆𑀝, 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁…𑀧𑁂… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀺…𑀧𑁂… 𑀇𑀤𑀫𑁆𑀧𑀺 𑀯𑀼𑀘𑁆𑀘𑀢𑀺, 𑀓𑁂𑀯𑀝𑁆𑀝, 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀁.

‘‘𑀇𑀫𑀸𑀦𑀺 𑀔𑁄, 𑀓𑁂𑀯𑀝𑁆𑀝, 𑀢𑀻𑀡𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀫𑀬𑀸 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑀺𑀢𑀸𑀦𑀺’’.

𑀪𑀽𑀢𑀦𑀺𑀭𑁄𑀥𑁂𑀲𑀓𑀪𑀺𑀓𑁆𑀔𑀼𑀯𑀢𑁆𑀣𑀼

𑁪𑁮𑁭. ‘‘𑀪𑀽𑀢𑀧𑀼𑀩𑁆𑀩𑀁, 𑀓𑁂𑀯𑀝𑁆𑀝, 𑀇𑀫𑀲𑁆𑀫𑀺𑀜𑁆𑀜𑁂𑀯 𑀪𑀺𑀓𑁆𑀔𑀼𑀲𑀗𑁆𑀖𑁂 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀓𑀢𑁆𑀣 𑀦𑀼 𑀔𑁄 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’𑀢𑀺?

𑁪𑁮𑁮. ‘‘𑀅𑀣 𑀔𑁄 𑀲𑁄, 𑀓𑁂𑀯𑀝𑁆𑀝, 𑀪𑀺𑀓𑁆𑀔𑀼 𑀢𑀣𑀸𑀭𑀽𑀧𑀁 𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀺, 𑀬𑀣𑀸𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀤𑁂𑀯𑀬𑀸𑀦𑀺𑀬𑁄 𑀫𑀕𑁆𑀕𑁄 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀲𑁄, 𑀓𑁂𑀯𑀝𑁆𑀝, 𑀪𑀺𑀓𑁆𑀔𑀼 𑀬𑁂𑀦 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂 𑀤𑁂𑀯𑁂 𑀏𑀢𑀤𑀯𑁄𑀘 𑁋 ‘𑀓𑀢𑁆𑀣 𑀦𑀼 𑀔𑁄, 𑀆𑀯𑀼𑀲𑁄, 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’𑀢𑀺?

‘‘𑀏𑀯𑀁 𑀯𑀼𑀢𑁆𑀢𑁂, 𑀓𑁂𑀯𑀝𑁆𑀝, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀼𑀁 𑁋 ‘𑀫𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀼, 𑀦 𑀚𑀸𑀦𑀸𑀫, 𑀬𑀢𑁆𑀣𑀺𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽𑀢𑀺 [𑀯𑀸𑀬𑁄𑀥𑀸𑀢𑀼. 𑀅𑀢𑁆𑀣𑀺 𑀔𑁄 (𑀧𑀻. 𑀏𑀯𑀫𑀼𑀧𑀭𑀺𑀧𑀺)]. 𑀅𑀢𑁆𑀣𑀺 𑀔𑁄 [𑀯𑀸𑀬𑁄𑀥𑀸𑀢𑀼. 𑀅𑀢𑁆𑀣𑀺 𑀔𑁄 (𑀧𑀻. 𑀏𑀯𑀫𑀼𑀧𑀭𑀺𑀧𑀺)], 𑀪𑀺𑀓𑁆𑀔𑀼, 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀅𑀫𑁆𑀳𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀸 𑀘 𑀧𑀡𑀻𑀢𑀢𑀭𑀸 𑀘. 𑀢𑁂 𑀔𑁄 𑀏𑀢𑀁 𑀚𑀸𑀦𑁂𑀬𑁆𑀬𑀼𑀁, 𑀬𑀢𑁆𑀣𑀺𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’𑀢𑀺.

𑁪𑁮𑁯. ‘‘𑀅𑀣 𑀔𑁄 𑀲𑁄, 𑀓𑁂𑀯𑀝𑁆𑀝, 𑀪𑀺𑀓𑁆𑀔𑀼 𑀬𑁂𑀦 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑁂 𑀏𑀢𑀤𑀯𑁄𑀘 𑁋 ‘𑀓𑀢𑁆𑀣 𑀦𑀼 𑀔𑁄, 𑀆𑀯𑀼𑀲𑁄, 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀓𑁂𑀯𑀝𑁆𑀝, 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀼𑀁 𑁋 ‘𑀫𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀼, 𑀦 𑀚𑀸𑀦𑀸𑀫, 𑀬𑀢𑁆𑀣𑀺𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼, 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽𑀢𑀺. 𑀅𑀢𑁆𑀣𑀺 𑀔𑁄, 𑀪𑀺𑀓𑁆𑀔𑀼, 𑀢𑀸𑀯𑀢𑀺𑀁𑀲𑀸 𑀦𑀸𑀫 𑀤𑁂𑀯𑀸 𑀅𑀫𑁆𑀳𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀸 𑀘 𑀧𑀡𑀻𑀢𑀢𑀭𑀸 𑀘. 𑀢𑁂 𑀔𑁄 𑀏𑀢𑀁 𑀚𑀸𑀦𑁂𑀬𑁆𑀬𑀼𑀁, 𑀬𑀢𑁆𑀣𑀺𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’𑀢𑀺.

𑁪𑁯𑁦. ‘‘𑀅𑀣 𑀔𑁄 𑀲𑁄, 𑀓𑁂𑀯𑀝𑁆𑀝, 𑀪𑀺𑀓𑁆𑀔𑀼 𑀬𑁂𑀦 𑀢𑀸𑀯𑀢𑀺𑀁𑀲𑀸 𑀤𑁂𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀸𑀯𑀢𑀺𑀁𑀲𑁂 𑀤𑁂𑀯𑁂 𑀏𑀢𑀤𑀯𑁄𑀘 𑁋 ‘𑀓𑀢𑁆𑀣 𑀦𑀼 𑀔𑁄, 𑀆𑀯𑀼𑀲𑁄, 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀓𑁂𑀯𑀝𑁆𑀝, 𑀢𑀸𑀯𑀢𑀺𑀁𑀲𑀸 𑀤𑁂𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀼𑀁 𑁋 ‘𑀫𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀼, 𑀦 𑀚𑀸𑀦𑀸𑀫, 𑀬𑀢𑁆𑀣𑀺𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽𑀢𑀺. 𑀅𑀢𑁆𑀣𑀺 𑀔𑁄, 𑀪𑀺𑀓𑁆𑀔𑀼, 𑀲𑀓𑁆𑀓𑁄 𑀦𑀸𑀫 𑀤𑁂𑀯𑀸𑀦𑀫𑀺𑀦𑁆𑀤𑁄 𑀅𑀫𑁆𑀳𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘. 𑀲𑁄 𑀔𑁄 𑀏𑀢𑀁 𑀚𑀸𑀦𑁂𑀬𑁆𑀬, 𑀬𑀢𑁆𑀣𑀺𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’𑀢𑀺.

𑁪𑁯𑁧. ‘‘𑀅𑀣 𑀔𑁄 𑀲𑁄, 𑀓𑁂𑀯𑀝𑁆𑀝, 𑀪𑀺𑀓𑁆𑀔𑀼 𑀬𑁂𑀦 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘𑀓𑀢𑁆𑀣 𑀦𑀼 𑀔𑁄, 𑀆𑀯𑀼𑀲𑁄, 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀓𑁂𑀯𑀝𑁆𑀝, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘𑀅𑀳𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀼, 𑀦 𑀚𑀸𑀦𑀸𑀫𑀺, 𑀬𑀢𑁆𑀣𑀺𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽𑀢𑀺. 𑀅𑀢𑁆𑀣𑀺 𑀔𑁄, 𑀪𑀺𑀓𑁆𑀔𑀼, 𑀬𑀸𑀫𑀸 𑀦𑀸𑀫 𑀤𑁂𑀯𑀸…𑀧𑁂… 𑀲𑀼𑀬𑀸𑀫𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄… 𑀢𑀼𑀲𑀺𑀢𑀸 𑀦𑀸𑀫 𑀤𑁂𑀯𑀸… 𑀲𑀦𑁆𑀢𑀼𑀲𑁆𑀲𑀺𑀢𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄… 𑀦𑀺𑀫𑁆𑀫𑀸𑀦𑀭𑀢𑀻 𑀦𑀸𑀫 𑀤𑁂𑀯𑀸 … 𑀲𑀼𑀦𑀺𑀫𑁆𑀫𑀺𑀢𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄… 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻 𑀦𑀸𑀫 𑀤𑁂𑀯𑀸… 𑀯𑀲𑀯𑀢𑁆𑀢𑀻 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀅𑀫𑁆𑀳𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘. 𑀲𑁄 𑀔𑁄 𑀏𑀢𑀁 𑀚𑀸𑀦𑁂𑀬𑁆𑀬, 𑀬𑀢𑁆𑀣𑀺𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’𑀢𑀺.

𑁪𑁯𑁨. ‘‘𑀅𑀣 𑀔𑁄 𑀲𑁄, 𑀓𑁂𑀯𑀝𑁆𑀝, 𑀪𑀺𑀓𑁆𑀔𑀼 𑀬𑁂𑀦 𑀯𑀲𑀯𑀢𑁆𑀢𑀻 𑀤𑁂𑀯𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀲𑀯𑀢𑁆𑀢𑀺𑀁 𑀤𑁂𑀯𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘𑀓𑀢𑁆𑀣 𑀦𑀼 𑀔𑁄, 𑀆𑀯𑀼𑀲𑁄, 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀓𑁂𑀯𑀝𑁆𑀝, 𑀯𑀲𑀯𑀢𑁆𑀢𑀻 𑀤𑁂𑀯𑀧𑀼𑀢𑁆𑀢𑁄 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘𑀅𑀳𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀼, 𑀦 𑀚𑀸𑀦𑀸𑀫𑀺 𑀬𑀢𑁆𑀣𑀺𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽𑀢𑀺. 𑀅𑀢𑁆𑀣𑀺 𑀔𑁄, 𑀪𑀺𑀓𑁆𑀔𑀼, 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀦𑀸𑀫 𑀤𑁂𑀯𑀸 𑀅𑀫𑁆𑀳𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑀸 𑀘 𑀧𑀡𑀻𑀢𑀢𑀭𑀸 𑀘. 𑀢𑁂 𑀔𑁄 𑀏𑀢𑀁 𑀚𑀸𑀦𑁂𑀬𑁆𑀬𑀼𑀁, 𑀬𑀢𑁆𑀣𑀺𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’𑀢𑀺.

𑁪𑁯𑁩. ‘‘𑀅𑀣 𑀔𑁄 𑀲𑁄, 𑀓𑁂𑀯𑀝𑁆𑀝, 𑀪𑀺𑀓𑁆𑀔𑀼 𑀢𑀣𑀸𑀭𑀽𑀧𑀁 𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀺, 𑀬𑀣𑀸𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀩𑁆𑀭𑀳𑁆𑀫𑀬𑀸𑀦𑀺𑀬𑁄 𑀫𑀕𑁆𑀕𑁄 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀲𑁄, 𑀓𑁂𑀯𑀝𑁆𑀝, 𑀪𑀺𑀓𑁆𑀔𑀼 𑀬𑁂𑀦 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀤𑁂𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑁆𑀭𑀳𑁆𑀫𑀓𑀸𑀬𑀺𑀓𑁂 𑀤𑁂𑀯𑁂 𑀏𑀢𑀤𑀯𑁄𑀘 𑁋 ‘𑀓𑀢𑁆𑀣 𑀦𑀼 𑀔𑁄, 𑀆𑀯𑀼𑀲𑁄, 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀓𑁂𑀯𑀝𑁆𑀝, 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀤𑁂𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀼𑀁 𑁋 ‘𑀫𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀼, 𑀦 𑀚𑀸𑀦𑀸𑀫, 𑀬𑀢𑁆𑀣𑀺𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽𑀢𑀺. 𑀅𑀢𑁆𑀣𑀺 𑀔𑁄, 𑀪𑀺𑀓𑁆𑀔𑀼, 𑀩𑁆𑀭𑀳𑁆𑀫𑀸 𑀫𑀳𑀸𑀩𑁆𑀭𑀳𑁆𑀫𑀸 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼𑀤𑀲𑁄 𑀯𑀲𑀯𑀢𑁆𑀢𑀻 𑀇𑀲𑁆𑀲𑀭𑁄 𑀓𑀢𑁆𑀢𑀸 𑀦𑀺𑀫𑁆𑀫𑀸𑀢𑀸 𑀲𑁂𑀝𑁆𑀞𑁄 𑀲𑀚𑀺𑀢𑀸 𑀯𑀲𑀻 𑀧𑀺𑀢𑀸 𑀪𑀽𑀢𑀪𑀩𑁆𑀬𑀸𑀦𑀁 𑀅𑀫𑁆𑀳𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘. 𑀲𑁄 𑀔𑁄 𑀏𑀢𑀁 𑀚𑀸𑀦𑁂𑀬𑁆𑀬, 𑀬𑀢𑁆𑀣𑀺𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’’𑀢𑀺.

‘‘‘𑀓𑀳𑀁 𑀧𑀦𑀸𑀯𑀼𑀲𑁄, 𑀏𑀢𑀭𑀳𑀺 𑀲𑁄 𑀫𑀳𑀸𑀩𑁆𑀭𑀳𑁆𑀫𑀸’𑀢𑀺? ‘𑀫𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀼, 𑀦 𑀚𑀸𑀦𑀸𑀫, 𑀬𑀢𑁆𑀣 𑀯𑀸 𑀩𑁆𑀭𑀳𑁆𑀫𑀸 𑀬𑁂𑀦 𑀯𑀸 𑀩𑁆𑀭𑀳𑁆𑀫𑀸 𑀬𑀳𑀺𑀁 𑀯𑀸 𑀩𑁆𑀭𑀳𑁆𑀫𑀸; 𑀅𑀧𑀺 𑀘, 𑀪𑀺𑀓𑁆𑀔𑀼, 𑀬𑀣𑀸 𑀦𑀺𑀫𑀺𑀢𑁆𑀢𑀸 𑀤𑀺𑀲𑁆𑀲𑀦𑁆𑀢𑀺, 𑀆𑀮𑁄𑀓𑁄 𑀲𑀜𑁆𑀚𑀸𑀬𑀢𑀺, 𑀑𑀪𑀸𑀲𑁄 𑀧𑀸𑀢𑀼𑀪𑀯𑀢𑀺, 𑀩𑁆𑀭𑀳𑁆𑀫𑀸 𑀧𑀸𑀢𑀼𑀪𑀯𑀺𑀲𑁆𑀲𑀢𑀺, 𑀩𑁆𑀭𑀳𑁆𑀫𑀼𑀦𑁄 𑀳𑁂𑀢𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀧𑀸𑀢𑀼𑀪𑀸𑀯𑀸𑀬, 𑀬𑀤𑀺𑀤𑀁 𑀆𑀮𑁄𑀓𑁄 𑀲𑀜𑁆𑀚𑀸𑀬𑀢𑀺, 𑀑𑀪𑀸𑀲𑁄 𑀧𑀸𑀢𑀼𑀪𑀯𑀢𑀻’𑀢𑀺. 𑀅𑀣 𑀔𑁄 𑀲𑁄, 𑀓𑁂𑀯𑀝𑁆𑀝, 𑀫𑀳𑀸𑀩𑁆𑀭𑀳𑁆𑀫𑀸 𑀦𑀘𑀺𑀭𑀲𑁆𑀲𑁂𑀯 𑀧𑀸𑀢𑀼𑀭𑀳𑁄𑀲𑀺.

𑁪𑁯𑁪. ‘‘𑀅𑀣 𑀔𑁄 𑀲𑁄, 𑀓𑁂𑀯𑀝𑁆𑀝, 𑀪𑀺𑀓𑁆𑀔𑀼 𑀬𑁂𑀦 𑀲𑁄 𑀫𑀳𑀸𑀩𑁆𑀭𑀳𑁆𑀫𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀏𑀢𑀤𑀯𑁄𑀘 𑁋 ‘𑀓𑀢𑁆𑀣 𑀦𑀼 𑀔𑁄, 𑀆𑀯𑀼𑀲𑁄, 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’’𑀢𑀺? 𑀏𑀯𑀁 𑀯𑀼𑀢𑁆𑀢𑁂, 𑀓𑁂𑀯𑀝𑁆𑀝, 𑀲𑁄 𑀫𑀳𑀸𑀩𑁆𑀭𑀳𑁆𑀫𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘𑀅𑀳𑀫𑀲𑁆𑀫𑀺, 𑀪𑀺𑀓𑁆𑀔𑀼, 𑀩𑁆𑀭𑀳𑁆𑀫𑀸 𑀫𑀳𑀸𑀩𑁆𑀭𑀳𑁆𑀫𑀸 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼𑀤𑀲𑁄 𑀯𑀲𑀯𑀢𑁆𑀢𑀻 𑀇𑀲𑁆𑀲𑀭𑁄 𑀓𑀢𑁆𑀢𑀸 𑀦𑀺𑀫𑁆𑀫𑀸𑀢𑀸 𑀲𑁂𑀝𑁆𑀞𑁄 𑀲𑀚𑀺𑀢𑀸 𑀯𑀲𑀻 𑀧𑀺𑀢𑀸 𑀪𑀽𑀢𑀪𑀩𑁆𑀬𑀸𑀦’𑀦𑁆𑀢𑀺.

‘‘𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑁄, 𑀓𑁂𑀯𑀝𑁆𑀝, 𑀪𑀺𑀓𑁆𑀔𑀼 𑀢𑀁 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀏𑀢𑀤𑀯𑁄𑀘 𑁋 ‘𑀦 𑀔𑁄𑀳𑀁 𑀢𑀁, 𑀆𑀯𑀼𑀲𑁄, 𑀏𑀯𑀁 𑀧𑀼𑀘𑁆𑀙𑀸𑀫𑀺 𑁋 ‘‘𑀢𑁆𑀯𑀫𑀲𑀺 𑀩𑁆𑀭𑀳𑁆𑀫𑀸 𑀫𑀳𑀸𑀩𑁆𑀭𑀳𑁆𑀫𑀸 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼𑀤𑀲𑁄 𑀯𑀲𑀯𑀢𑁆𑀢𑀻 𑀇𑀲𑁆𑀲𑀭𑁄 𑀓𑀢𑁆𑀢𑀸 𑀦𑀺𑀫𑁆𑀫𑀸𑀢𑀸 𑀲𑁂𑀝𑁆𑀞𑁄 𑀲𑀚𑀺𑀢𑀸 𑀯𑀲𑀻 𑀧𑀺𑀢𑀸 𑀪𑀽𑀢𑀪𑀩𑁆𑀬𑀸𑀦’’𑀦𑁆𑀢𑀺. 𑀏𑀯𑀜𑁆𑀘 𑀔𑁄 𑀅𑀳𑀁 𑀢𑀁, 𑀆𑀯𑀼𑀲𑁄, 𑀧𑀼𑀘𑁆𑀙𑀸𑀫𑀺 𑁋 ‘‘𑀓𑀢𑁆𑀣 𑀦𑀼 𑀔𑁄, 𑀆𑀯𑀼𑀲𑁄, 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’’’𑀢𑀺?

‘‘𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑁄, 𑀓𑁂𑀯𑀝𑁆𑀝, 𑀫𑀳𑀸𑀩𑁆𑀭𑀳𑁆𑀫𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘𑀅𑀳𑀫𑀲𑁆𑀫𑀺, 𑀪𑀺𑀓𑁆𑀔𑀼, 𑀩𑁆𑀭𑀳𑁆𑀫𑀸 𑀫𑀳𑀸𑀩𑁆𑀭𑀳𑁆𑀫𑀸 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼𑀤𑀲𑁄 𑀯𑀲𑀯𑀢𑁆𑀢𑀻 𑀇𑀲𑁆𑀲𑀭𑁄 𑀓𑀢𑁆𑀢𑀸 𑀦𑀺𑀫𑁆𑀫𑀸𑀢𑀸 𑀲𑁂𑀝𑁆𑀞𑁄 𑀲𑀚𑀺𑀢𑀸 𑀯𑀲𑀻 𑀧𑀺𑀢𑀸 𑀪𑀽𑀢𑀪𑀩𑁆𑀬𑀸𑀦’𑀦𑁆𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀲𑁄, 𑀓𑁂𑀯𑀝𑁆𑀝, 𑀪𑀺𑀓𑁆𑀔𑀼 𑀢𑀁 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀏𑀢𑀤𑀯𑁄𑀘 𑁋 ‘𑀦 𑀔𑁄𑀳𑀁 𑀢𑀁, 𑀆𑀯𑀼𑀲𑁄, 𑀏𑀯𑀁 𑀧𑀼𑀘𑁆𑀙𑀸𑀫𑀺 𑁋 ‘‘𑀢𑁆𑀯𑀫𑀲𑀺 𑀩𑁆𑀭𑀳𑁆𑀫𑀸 𑀫𑀳𑀸𑀩𑁆𑀭𑀳𑁆𑀫𑀸 𑀅𑀪𑀺𑀪𑀽 𑀅𑀦𑀪𑀺𑀪𑀽𑀢𑁄 𑀅𑀜𑁆𑀜𑀤𑀢𑁆𑀣𑀼𑀤𑀲𑁄 𑀯𑀲𑀯𑀢𑁆𑀢𑀻 𑀇𑀲𑁆𑀲𑀭𑁄 𑀓𑀢𑁆𑀢𑀸 𑀦𑀺𑀫𑁆𑀫𑀸𑀢𑀸 𑀲𑁂𑀝𑁆𑀞𑁄 𑀲𑀚𑀺𑀢𑀸 𑀯𑀲𑀻 𑀧𑀺𑀢𑀸 𑀪𑀽𑀢𑀪𑀩𑁆𑀬𑀸𑀦’’𑀦𑁆𑀢𑀺. 𑀏𑀯𑀜𑁆𑀘 𑀔𑁄 𑀅𑀳𑀁 𑀢𑀁, 𑀆𑀯𑀼𑀲𑁄, 𑀧𑀼𑀘𑁆𑀙𑀸𑀫𑀺 𑁋 ‘‘𑀓𑀢𑁆𑀣 𑀦𑀼 𑀔𑁄, 𑀆𑀯𑀼𑀲𑁄, 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’’’𑀢𑀺?

𑁪𑁯𑁫. ‘‘𑀅𑀣 𑀔𑁄 𑀲𑁄, 𑀓𑁂𑀯𑀝𑁆𑀝, 𑀫𑀳𑀸𑀩𑁆𑀭𑀳𑁆𑀫𑀸 𑀢𑀁 𑀪𑀺𑀓𑁆𑀔𑀼𑀁 𑀩𑀸𑀳𑀸𑀬𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀧𑀦𑁂𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘 𑁋 ‘𑀇𑀫𑁂 𑀔𑁄 𑀫𑀁, 𑀪𑀺𑀓𑁆𑀔𑀼, 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀤𑁂𑀯𑀸 𑀏𑀯𑀁 𑀚𑀸𑀦𑀦𑁆𑀢𑀺, ‘‘𑀦𑀢𑁆𑀣𑀺 𑀓𑀺𑀜𑁆𑀘𑀺 𑀩𑁆𑀭𑀳𑁆𑀫𑀼𑀦𑁄 𑀅𑀜𑁆𑀜𑀸𑀢𑀁, 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀩𑁆𑀭𑀳𑁆𑀫𑀼𑀦𑁄 𑀅𑀤𑀺𑀝𑁆𑀞𑀁, 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀩𑁆𑀭𑀳𑁆𑀫𑀼𑀦𑁄 𑀅𑀯𑀺𑀤𑀺𑀢𑀁, 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀩𑁆𑀭𑀳𑁆𑀫𑀼𑀦𑁄 𑀅𑀲𑀘𑁆𑀙𑀺𑀓𑀢’’𑀦𑁆𑀢𑀺. 𑀢𑀲𑁆𑀫𑀸𑀳𑀁 𑀢𑁂𑀲𑀁 𑀲𑀫𑁆𑀫𑀼𑀔𑀸 𑀦 𑀩𑁆𑀬𑀸𑀓𑀸𑀲𑀺𑀁. 𑀅𑀳𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀼, 𑀦 𑀚𑀸𑀦𑀸𑀫𑀺 𑀬𑀢𑁆𑀣𑀺𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽𑀢𑀺. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀼, 𑀢𑀼𑀬𑁆𑀳𑁂𑀯𑁂𑀢𑀁 𑀤𑀼𑀓𑁆𑀓𑀝𑀁, 𑀢𑀼𑀬𑁆𑀳𑁂𑀯𑁂𑀢𑀁 𑀅𑀧𑀭𑀤𑁆𑀥𑀁, 𑀬𑀁 𑀢𑁆𑀯𑀁 𑀢𑀁 𑀪𑀕𑀯𑀦𑁆𑀢𑀁 𑀅𑀢𑀺𑀥𑀸𑀯𑀺𑀢𑁆𑀯𑀸 𑀩𑀳𑀺𑀤𑁆𑀥𑀸 𑀧𑀭𑀺𑀬𑁂𑀝𑁆𑀞𑀺𑀁 𑀆𑀧𑀚𑁆𑀚𑀲𑀺 𑀇𑀫𑀲𑁆𑀲 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀸𑀬. 𑀕𑀘𑁆𑀙 𑀢𑁆𑀯𑀁, 𑀪𑀺𑀓𑁆𑀔𑀼, 𑀢𑀫𑁂𑀯 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀇𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙, 𑀬𑀣𑀸 𑀘 𑀢𑁂 𑀪𑀕𑀯𑀸 𑀩𑁆𑀬𑀸𑀓𑀭𑁄𑀢𑀺, 𑀢𑀣𑀸 𑀦𑀁 𑀥𑀸𑀭𑁂𑀬𑁆𑀬𑀸𑀲𑀻’𑀢𑀺.

𑁪𑁯𑁬. ‘‘𑀅𑀣 𑀔𑁄 𑀲𑁄, 𑀓𑁂𑀯𑀝𑁆𑀝, 𑀪𑀺𑀓𑁆𑀔𑀼 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬 𑀏𑀯𑀫𑁂𑀯 𑀩𑁆𑀭𑀳𑁆𑀫𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁄 𑀫𑀫 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀲𑁄, 𑀓𑁂𑀯𑀝𑁆𑀝, 𑀪𑀺𑀓𑁆𑀔𑀼 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄, 𑀓𑁂𑀯𑀝𑁆𑀝, 𑀲𑁄 𑀪𑀺𑀓𑁆𑀔𑀼 𑀫𑀁 𑀏𑀢𑀤𑀯𑁄𑀘 𑁋 ‘𑀓𑀢𑁆𑀣 𑀦𑀼 𑀔𑁄, 𑀪𑀦𑁆𑀢𑁂, 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’𑀢𑀺?

𑀢𑀻𑀭𑀤𑀲𑁆𑀲𑀺𑀲𑀓𑀼𑀡𑀼𑀧𑀫𑀸

𑁪𑁯𑁭. ‘‘𑀏𑀯𑀁 𑀯𑀼𑀢𑁆𑀢𑁂, 𑀅𑀳𑀁, 𑀓𑁂𑀯𑀝𑁆𑀝, 𑀢𑀁 𑀪𑀺𑀓𑁆𑀔𑀼𑀁 𑀏𑀢𑀤𑀯𑁄𑀘𑀁 𑁋 ‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀼, 𑀲𑀸𑀫𑀼𑀤𑁆𑀤𑀺𑀓𑀸 𑀯𑀸𑀡𑀺𑀚𑀸 𑀢𑀻𑀭𑀤𑀲𑁆𑀲𑀺𑀁 𑀲𑀓𑀼𑀡𑀁 𑀕𑀳𑁂𑀢𑁆𑀯𑀸 𑀦𑀸𑀯𑀸𑀬 𑀲𑀫𑀼𑀤𑁆𑀤𑀁 𑀅𑀚𑁆𑀛𑁄𑀕𑀸𑀳𑀦𑁆𑀢𑀺. 𑀢𑁂 𑀅𑀢𑀻𑀭𑀤𑀓𑁆𑀔𑀺𑀦𑀺𑀬𑀸 𑀦𑀸𑀯𑀸𑀬 𑀢𑀻𑀭𑀤𑀲𑁆𑀲𑀺𑀁 𑀲𑀓𑀼𑀡𑀁 𑀫𑀼𑀜𑁆𑀘𑀦𑁆𑀢𑀺. 𑀲𑁄 𑀕𑀘𑁆𑀙𑀢𑁂𑀯 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁, 𑀕𑀘𑁆𑀙𑀢𑀺 𑀤𑀓𑁆𑀔𑀺𑀡𑀁 𑀤𑀺𑀲𑀁, 𑀕𑀘𑁆𑀙𑀢𑀺 𑀧𑀘𑁆𑀙𑀺𑀫𑀁 𑀤𑀺𑀲𑀁, 𑀕𑀘𑁆𑀙𑀢𑀺 𑀉𑀢𑁆𑀢𑀭𑀁 𑀤𑀺𑀲𑀁, 𑀕𑀘𑁆𑀙𑀢𑀺 𑀉𑀤𑁆𑀥𑀁 𑀤𑀺𑀲𑀁, 𑀕𑀘𑁆𑀙𑀢𑀺 𑀅𑀦𑀼𑀤𑀺𑀲𑀁. 𑀲𑀘𑁂 𑀲𑁄 𑀲𑀫𑀦𑁆𑀢𑀸 𑀢𑀻𑀭𑀁 𑀧𑀲𑁆𑀲𑀢𑀺, 𑀢𑀣𑀸𑀕𑀢𑀓𑁄𑀯 [𑀢𑀣𑀸𑀧𑀓𑁆𑀓𑀦𑁆𑀢𑁄𑀯 (𑀲𑁆𑀬𑀸.)] 𑀳𑁄𑀢𑀺. 𑀲𑀘𑁂 𑀧𑀦 𑀲𑁄 𑀲𑀫𑀦𑁆𑀢𑀸 𑀢𑀻𑀭𑀁 𑀦 𑀧𑀲𑁆𑀲𑀢𑀺, 𑀢𑀫𑁂𑀯 𑀦𑀸𑀯𑀁 𑀧𑀘𑁆𑀘𑀸𑀕𑀘𑁆𑀙𑀢𑀺. 𑀏𑀯𑀫𑁂𑀯 𑀔𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀬𑀢𑁄 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀧𑀭𑀺𑀬𑁂𑀲𑀫𑀸𑀦𑁄 𑀇𑀫𑀲𑁆𑀲 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀁 𑀦𑀸𑀚𑁆𑀛𑀕𑀸, 𑀅𑀣 𑀫𑀫𑀜𑁆𑀜𑁂𑀯 𑀲𑀦𑁆𑀢𑀺𑀓𑁂 𑀧𑀘𑁆𑀘𑀸𑀕𑀢𑁄. 𑀦 𑀔𑁄 𑀏𑀲𑁄, 𑀪𑀺𑀓𑁆𑀔𑀼, 𑀧𑀜𑁆𑀳𑁄 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋 ‘𑀓𑀢𑁆𑀣 𑀦𑀼 𑀔𑁄, 𑀪𑀦𑁆𑀢𑁂, 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’𑀢𑀺?

𑁪𑁯𑁮. ‘‘𑀏𑀯𑀜𑁆𑀘 𑀔𑁄 𑀏𑀲𑁄, 𑀪𑀺𑀓𑁆𑀔𑀼, 𑀧𑀜𑁆𑀳𑁄 𑀧𑀼𑀘𑁆𑀙𑀺𑀢𑀩𑁆𑀩𑁄 𑁋

‘𑀓𑀢𑁆𑀣 𑀆𑀧𑁄 𑀘 𑀧𑀣𑀯𑀻, 𑀢𑁂𑀚𑁄 𑀯𑀸𑀬𑁄 𑀦 𑀕𑀸𑀥𑀢𑀺;

𑀓𑀢𑁆𑀣 𑀤𑀻𑀖𑀜𑁆𑀘 𑀭𑀲𑁆𑀲𑀜𑁆𑀘, 𑀅𑀡𑀼𑀁 𑀣𑀽𑀮𑀁 𑀲𑀼𑀪𑀸𑀲𑀼𑀪𑀁;

𑀓𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀻’𑀢𑀺.

𑁪𑁯𑁯. ‘‘𑀢𑀢𑁆𑀭 𑀯𑁂𑀬𑁆𑀬𑀸𑀓𑀭𑀡𑀁 𑀪𑀯𑀢𑀺 𑁋

‘𑀯𑀺𑀜𑁆𑀜𑀸𑀡𑀁 𑀅𑀦𑀺𑀤𑀲𑁆𑀲𑀦𑀁, 𑀅𑀦𑀦𑁆𑀢𑀁 𑀲𑀩𑁆𑀩𑀢𑁄𑀧𑀪𑀁;

𑀏𑀢𑁆𑀣 𑀆𑀧𑁄 𑀘 𑀧𑀣𑀯𑀻, 𑀢𑁂𑀚𑁄 𑀯𑀸𑀬𑁄 𑀦 𑀕𑀸𑀥𑀢𑀺.

𑀏𑀢𑁆𑀣 𑀤𑀻𑀖𑀜𑁆𑀘 𑀭𑀲𑁆𑀲𑀜𑁆𑀘, 𑀅𑀡𑀼𑀁 𑀣𑀽𑀮𑀁 𑀲𑀼𑀪𑀸𑀲𑀼𑀪𑀁;

𑀏𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀺;

𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦, 𑀏𑀢𑁆𑀣𑁂𑀢𑀁 𑀉𑀧𑀭𑀼𑀚𑁆𑀛𑀢𑀻’𑀢𑀺.

𑁫𑁦𑁦. 𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑁄 𑀓𑁂𑀯𑀝𑁆𑀝𑁄 𑀕𑀳𑀧𑀢𑀺𑀧𑀼𑀢𑁆𑀢𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀻𑀢𑀺.

𑀓𑁂𑀯𑀝𑁆𑀝𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀏𑀓𑀸𑀤𑀲𑀫𑀁.

𑁧𑁨. 𑀮𑁄𑀳𑀺𑀘𑁆𑀘𑀲𑀼𑀢𑁆𑀢𑀁

𑀮𑁄𑀳𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼

𑁫𑁦𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀬𑁂𑀦 𑀲𑀸𑀮𑀯𑀢𑀺𑀓𑀸 𑀢𑀤𑀯𑀲𑀭𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀮𑁄𑀳𑀺𑀘𑁆𑀘𑁄 𑀩𑁆𑀭𑀸𑀳𑁆𑀫𑀡𑁄 𑀲𑀸𑀮𑀯𑀢𑀺𑀓𑀁 𑀅𑀚𑁆𑀛𑀸𑀯𑀲𑀢𑀺 𑀲𑀢𑁆𑀢𑀼𑀲𑁆𑀲𑀤𑀁 𑀲𑀢𑀺𑀡𑀓𑀝𑁆𑀞𑁄𑀤𑀓𑀁 𑀲𑀥𑀜𑁆𑀜𑀁 𑀭𑀸𑀚𑀪𑁄𑀕𑁆𑀕𑀁 𑀭𑀜𑁆𑀜𑀸 𑀧𑀲𑁂𑀦𑀤𑀺𑀦𑀸 𑀓𑁄𑀲𑀮𑁂𑀦 𑀤𑀺𑀦𑁆𑀦𑀁 𑀭𑀸𑀚𑀤𑀸𑀬𑀁, 𑀩𑁆𑀭𑀳𑁆𑀫𑀤𑁂𑀬𑁆𑀬𑀁.

𑁫𑁦𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀮𑁄𑀳𑀺𑀘𑁆𑀘𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑁋 ‘‘𑀇𑀥 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀅𑀥𑀺𑀕𑀘𑁆𑀙𑁂𑀬𑁆𑀬, 𑀓𑀼𑀲𑀮𑀁 𑀥𑀫𑁆𑀫𑀁 𑀅𑀥𑀺𑀕𑀦𑁆𑀢𑁆𑀯𑀸 𑀦 𑀧𑀭𑀲𑁆𑀲 𑀆𑀭𑁄𑀘𑁂𑀬𑁆𑀬, 𑀓𑀺𑀜𑁆𑀳𑀺 𑀧𑀭𑁄 𑀧𑀭𑀲𑁆𑀲 𑀓𑀭𑀺𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀼𑀭𑀸𑀡𑀁 𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀁 𑀦𑀯𑀁 𑀩𑀦𑁆𑀥𑀦𑀁 𑀓𑀭𑁂𑀬𑁆𑀬, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀧𑀸𑀧𑀓𑀁 𑀮𑁄𑀪𑀥𑀫𑁆𑀫𑀁 𑀯𑀤𑀸𑀫𑀺, 𑀓𑀺𑀜𑁆𑀳𑀺 𑀧𑀭𑁄 𑀧𑀭𑀲𑁆𑀲 𑀓𑀭𑀺𑀲𑁆𑀲𑀢𑀻’’𑀢𑀺.

𑁫𑁦𑁩. 𑀅𑀲𑁆𑀲𑁄𑀲𑀺 𑀔𑁄 𑀮𑁄𑀳𑀺𑀘𑁆𑀘𑁄 𑀩𑁆𑀭𑀸𑀳𑁆𑀫𑀡𑁄 𑁋 ‘‘𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀸𑀮𑀯𑀢𑀺𑀓𑀁 𑀅𑀦𑀼𑀧𑁆𑀧𑀢𑁆𑀢𑁄. 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’. 𑀲𑁄 𑀇𑀫𑀁 𑀮𑁄𑀓𑀁 𑀲𑀤𑁂𑀯𑀓𑀁 𑀲𑀫𑀸𑀭𑀓𑀁 𑀲𑀩𑁆𑀭𑀳𑁆𑀫𑀓𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀲𑀸𑀥𑀼 𑀔𑁄 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻’’𑀢𑀺.

𑁫𑁦𑁪. 𑀅𑀣 𑀔𑁄 𑀮𑁄𑀳𑀺𑀘𑁆𑀘𑁄 𑀩𑁆𑀭𑀸𑀳𑁆𑀫𑀡𑁄 𑀭𑁄𑀲𑀺𑀓𑀁 [𑀪𑁂𑀲𑀺𑀓𑀁 (𑀲𑀻. 𑀧𑀻.)] 𑀦𑁆𑀳𑀸𑀧𑀺𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀲𑀫𑁆𑀫 𑀭𑁄𑀲𑀺𑀓𑁂, 𑀬𑁂𑀦 𑀲𑀫𑀡𑁄 𑀕𑁄𑀢𑀫𑁄 𑀢𑁂𑀦𑀼𑀧𑀲𑀗𑁆𑀓𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀫 𑀯𑀘𑀦𑁂𑀦 𑀲𑀫𑀡𑀁 𑀕𑁄𑀢𑀫𑀁 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙 𑁋 𑀮𑁄𑀳𑀺𑀘𑁆𑀘𑁄, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑁄 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙𑀢𑀻’’𑀢𑀺. 𑀏𑀯𑀜𑁆𑀘 𑀯𑀤𑁂𑀳𑀺 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀓𑀺𑀭 𑀪𑀯𑀁 𑀕𑁄𑀢𑀫𑁄 𑀮𑁄𑀳𑀺𑀘𑁆𑀘𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺.

𑁫𑁦𑁫. ‘‘𑀏𑀯𑀁, 𑀪𑁄’’𑀢𑀺 [𑀏𑀯𑀁 𑀪𑀦𑁆𑀢𑁂𑀢𑀺 (𑀲𑀻. 𑀧𑀻.)] 𑀔𑁄 𑀭𑁄𑀲𑀺𑀓𑀸 𑀦𑁆𑀳𑀸𑀧𑀺𑀢𑁄 𑀮𑁄𑀳𑀺𑀘𑁆𑀘𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀭𑁄𑀲𑀺𑀓𑀸 𑀦𑁆𑀳𑀸𑀧𑀺𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀮𑁄𑀳𑀺𑀘𑁆𑀘𑁄, 𑀪𑀦𑁆𑀢𑁂, 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙𑀢𑀺; 𑀏𑀯𑀜𑁆𑀘 𑀯𑀤𑁂𑀢𑀺 𑁋 𑀅𑀥𑀺𑀯𑀸𑀲𑁂𑀢𑀼 𑀓𑀺𑀭, 𑀪𑀦𑁆𑀢𑁂, 𑀪𑀕𑀯𑀸 𑀮𑁄𑀳𑀺𑀘𑁆𑀘𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦.

𑁫𑁦𑁬. 𑀅𑀣 𑀔𑁄 𑀭𑁄𑀲𑀺𑀓𑀸 𑀦𑁆𑀳𑀸𑀧𑀺𑀢𑁄 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀬𑁂𑀦 𑀮𑁄𑀳𑀺𑀘𑁆𑀘𑁄 𑀩𑁆𑀭𑀸𑀳𑁆𑀫𑀡𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀮𑁄𑀳𑀺𑀘𑁆𑀘𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘 𑁋 ‘‘𑀅𑀯𑁄𑀘𑀼𑀫𑁆𑀳𑀸 𑀔𑁄 𑀫𑀬𑀁 𑀪𑁄𑀢𑁄 [𑀫𑀬𑀁 𑀪𑀦𑁆𑀢𑁂 𑀢𑀯 (𑀲𑀻. 𑀧𑀻.)] 𑀯𑀘𑀦𑁂𑀦 𑀢𑀁 𑀪𑀕𑀯𑀦𑁆𑀢𑀁 𑁋 ‘𑀮𑁄𑀳𑀺𑀘𑁆𑀘𑁄, 𑀪𑀦𑁆𑀢𑁂, 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙𑀢𑀺; 𑀏𑀯𑀜𑁆𑀘 𑀯𑀤𑁂𑀢𑀺 𑁋 𑀅𑀥𑀺𑀯𑀸𑀲𑁂𑀢𑀼 𑀓𑀺𑀭, 𑀪𑀦𑁆𑀢𑁂, 𑀪𑀕𑀯𑀸 𑀮𑁄𑀳𑀺𑀘𑁆𑀘𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’𑀢𑀺. 𑀅𑀥𑀺𑀯𑀼𑀢𑁆𑀣𑀜𑁆𑀘 𑀧𑀦 𑀢𑁂𑀦 𑀪𑀕𑀯𑀢𑀸’’𑀢𑀺.

𑁫𑁦𑁭. 𑀅𑀣 𑀔𑁄 𑀮𑁄𑀳𑀺𑀘𑁆𑀘𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀲𑀓𑁂 𑀦𑀺𑀯𑁂𑀲𑀦𑁂 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀭𑁄𑀲𑀺𑀓𑀁 𑀦𑁆𑀳𑀸𑀧𑀺𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀲𑀫𑁆𑀫 𑀭𑁄𑀲𑀺𑀓𑁂, 𑀬𑁂𑀦 𑀲𑀫𑀡𑁄 𑀕𑁄𑀢𑀫𑁄 𑀢𑁂𑀦𑀼𑀧𑀲𑀗𑁆𑀓𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀓𑀸𑀮𑀁 𑀆𑀭𑁄𑀘𑁂𑀳𑀺 𑁋 𑀓𑀸𑀮𑁄 𑀪𑁄, 𑀕𑁄𑀢𑀫, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀭𑁄𑀲𑀺𑀓𑀸 𑀦𑁆𑀳𑀸𑀧𑀺𑀢𑁄 𑀮𑁄𑀳𑀺𑀘𑁆𑀘𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀭𑁄𑀲𑀺𑀓𑀸 𑀦𑁆𑀳𑀸𑀧𑀺𑀢𑁄 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑁂𑀲𑀺 𑁋 ‘‘𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺.

𑁫𑁦𑁮. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀲𑀸𑀮𑀯𑀢𑀺𑀓𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑁄𑀲𑀺𑀓𑀸 𑀦𑁆𑀳𑀸𑀧𑀺𑀢𑁄 𑀪𑀕𑀯𑀦𑁆𑀢𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑁄 𑀳𑁄𑀢𑀺. 𑀅𑀣 𑀔𑁄 𑀭𑁄𑀲𑀺𑀓𑀸 𑀦𑁆𑀳𑀸𑀧𑀺𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀮𑁄𑀳𑀺𑀘𑁆𑀘𑀲𑁆𑀲, 𑀪𑀦𑁆𑀢𑁂, 𑀩𑁆𑀭𑀸𑀳𑁆𑀫𑀡𑀲𑁆𑀲 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑁋 ‘𑀇𑀥 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀅𑀥𑀺𑀕𑀘𑁆𑀙𑁂𑀬𑁆𑀬, 𑀓𑀼𑀲𑀮𑀁 𑀥𑀫𑁆𑀫𑀁 𑀅𑀥𑀺𑀕𑀦𑁆𑀢𑁆𑀯𑀸 𑀦 𑀧𑀭𑀲𑁆𑀲 𑀆𑀭𑁄𑀘𑁂𑀬𑁆𑀬 𑁋 𑀓𑀺𑀜𑁆𑀳𑀺 𑀧𑀭𑁄 𑀧𑀭𑀲𑁆𑀲 𑀓𑀭𑀺𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀼𑀭𑀸𑀡𑀁 𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀁 𑀦𑀯𑀁 𑀩𑀦𑁆𑀥𑀦𑀁 𑀓𑀭𑁂𑀬𑁆𑀬, 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀧𑀸𑀧𑀓𑀁 𑀮𑁄𑀪𑀥𑀫𑁆𑀫𑀁 𑀯𑀤𑀸𑀫𑀺 𑁋 𑀓𑀺𑀜𑁆𑀳𑀺 𑀧𑀭𑁄 𑀧𑀭𑀲𑁆𑀲 𑀓𑀭𑀺𑀲𑁆𑀲𑀢𑀻’𑀢𑀺. 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀮𑁄𑀳𑀺𑀘𑁆𑀘𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀲𑁆𑀫𑀸 𑀧𑀸𑀧𑀓𑀸 𑀤𑀺𑀝𑁆𑀞𑀺𑀕𑀢𑀸 𑀯𑀺𑀯𑁂𑀘𑁂𑀢𑀽’’𑀢𑀺. ‘‘𑀅𑀧𑁆𑀧𑁂𑀯 𑀦𑀸𑀫 𑀲𑀺𑀬𑀸 𑀭𑁄𑀲𑀺𑀓𑁂, 𑀅𑀧𑁆𑀧𑁂𑀯 𑀦𑀸𑀫 𑀲𑀺𑀬𑀸 𑀭𑁄𑀲𑀺𑀓𑁂’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀮𑁄𑀳𑀺𑀘𑁆𑀘𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀮𑁄𑀳𑀺𑀘𑁆𑀘𑁄 𑀩𑁆𑀭𑀸𑀳𑁆𑀫𑀡𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀺 𑀲𑀫𑁆𑀧𑀯𑀸𑀭𑁂𑀲𑀺.

𑀮𑁄𑀳𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀸𑀦𑀼𑀬𑁄𑀕𑁄

𑁫𑁦𑁯. 𑀅𑀣 𑀔𑁄 𑀮𑁄𑀳𑀺𑀘𑁆𑀘𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀅𑀜𑁆𑀜𑀢𑀭𑀁 𑀦𑀻𑀘𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀮𑁄𑀳𑀺𑀘𑁆𑀘𑀁 𑀩𑁆𑀭𑀸𑀳𑁆𑀫𑀡𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁂, 𑀮𑁄𑀳𑀺𑀘𑁆𑀘, 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑁋 ‘𑀇𑀥 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀅𑀥𑀺𑀕𑀘𑁆𑀙𑁂𑀬𑁆𑀬, 𑀓𑀼𑀲𑀮𑀁 𑀥𑀫𑁆𑀫𑀁 𑀅𑀥𑀺𑀕𑀦𑁆𑀢𑁆𑀯𑀸 𑀦 𑀧𑀭𑀲𑁆𑀲 𑀆𑀭𑁄𑀘𑁂𑀬𑁆𑀬 𑁋 𑀓𑀺𑀜𑁆𑀳𑀺 𑀧𑀭𑁄 𑀧𑀭𑀲𑁆𑀲 𑀓𑀭𑀺𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀼𑀭𑀸𑀡𑀁 𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀁 𑀦𑀯𑀁 𑀩𑀦𑁆𑀥𑀦𑀁 𑀓𑀭𑁂𑀬𑁆𑀬, 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀧𑀸𑀧𑀓𑀁 𑀮𑁄𑀪𑀥𑀫𑁆𑀫𑀁 𑀯𑀤𑀸𑀫𑀺, 𑀓𑀺𑀜𑁆𑀳𑀺 𑀧𑀭𑁄 𑀧𑀭𑀲𑁆𑀲 𑀓𑀭𑀺𑀲𑁆𑀲𑀢𑀻’’’ 𑀢𑀺? ‘‘𑀏𑀯𑀁, 𑀪𑁄 𑀕𑁄𑀢𑀫’’. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀮𑁄𑀳𑀺𑀘𑁆𑀘 𑀦𑀦𑀼 𑀢𑁆𑀯𑀁 𑀲𑀸𑀮𑀯𑀢𑀺𑀓𑀁 𑀅𑀚𑁆𑀛𑀸𑀯𑀲𑀲𑀻’’𑀢𑀺? ‘‘𑀏𑀯𑀁, 𑀪𑁄 𑀕𑁄𑀢𑀫’’. ‘‘𑀬𑁄 𑀦𑀼 𑀔𑁄, 𑀮𑁄𑀳𑀺𑀘𑁆𑀘, 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀮𑁄𑀳𑀺𑀘𑁆𑀘𑁄 𑀩𑁆𑀭𑀸𑀳𑁆𑀫𑀡𑁄 𑀲𑀸𑀮𑀯𑀢𑀺𑀓𑀁 𑀅𑀚𑁆𑀛𑀸𑀯𑀲𑀢𑀺. 𑀬𑀸 𑀲𑀸𑀮𑀯𑀢𑀺𑀓𑀸𑀬 𑀲𑀫𑀼𑀤𑀬𑀲𑀜𑁆𑀚𑀸𑀢𑀺 𑀮𑁄𑀳𑀺𑀘𑁆𑀘𑁄𑀯 𑀢𑀁 𑀩𑁆𑀭𑀸𑀳𑁆𑀫𑀡𑁄 𑀏𑀓𑀓𑁄 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀦 𑀅𑀜𑁆𑀜𑁂𑀲𑀁 𑀤𑀤𑁂𑀬𑁆𑀬𑀸’𑀢𑀺. 𑀏𑀯𑀁 𑀯𑀸𑀤𑀻 𑀲𑁄 𑀬𑁂 𑀢𑀁 𑀉𑀧𑀚𑀻𑀯𑀦𑁆𑀢𑀺, 𑀢𑁂𑀲𑀁 𑀅𑀦𑁆𑀢𑀭𑀸𑀬𑀓𑀭𑁄 𑀯𑀸 𑀳𑁄𑀢𑀺, 𑀦𑁄 𑀯𑀸’’𑀢𑀺?

‘‘𑀅𑀦𑁆𑀢𑀭𑀸𑀬𑀓𑀭𑁄, 𑀪𑁄 𑀕𑁄𑀢𑀫’’. ‘‘𑀅𑀦𑁆𑀢𑀭𑀸𑀬𑀓𑀭𑁄 𑀲𑀫𑀸𑀦𑁄 𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀸 𑀢𑁂𑀲𑀁 𑀳𑁄𑀢𑀺 𑀅𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀸’’𑀢𑀺? ‘‘𑀅𑀳𑀺𑀢𑀸𑀦𑀼𑀓𑀫𑁆𑀧𑀻, 𑀪𑁄 𑀕𑁄𑀢𑀫’’. ‘‘𑀅𑀳𑀺𑀢𑀸𑀦𑀼𑀓𑀫𑁆𑀧𑀺𑀲𑁆𑀲 𑀫𑁂𑀢𑁆𑀢𑀁 𑀯𑀸 𑀢𑁂𑀲𑀼 𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺 𑀲𑀧𑀢𑁆𑀢𑀓𑀁 𑀯𑀸’’𑀢𑀺? ‘‘𑀲𑀧𑀢𑁆𑀢𑀓𑀁, 𑀪𑁄 𑀕𑁄𑀢𑀫’’. ‘‘𑀲𑀧𑀢𑁆𑀢𑀓𑁂 𑀘𑀺𑀢𑁆𑀢𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀯𑀸 𑀳𑁄𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀯𑀸’’𑀢𑀺? ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀪𑁄 𑀕𑁄𑀢𑀫’’. ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑁆𑀲 𑀔𑁄 𑀅𑀳𑀁, 𑀮𑁄𑀳𑀺𑀘𑁆𑀘, 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀯𑀤𑀸𑀫𑀺 𑁋 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸’’.

𑁫𑁧𑁦. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀮𑁄𑀳𑀺𑀘𑁆𑀘, 𑀦𑀦𑀼 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀓𑀸𑀲𑀺𑀓𑁄𑀲𑀮𑀁 𑀅𑀚𑁆𑀛𑀸𑀯𑀲𑀢𑀻’’𑀢𑀺? ‘‘𑀏𑀯𑀁, 𑀪𑁄 𑀕𑁄𑀢𑀫’’. ‘‘𑀬𑁄 𑀦𑀼 𑀔𑁄, 𑀮𑁄𑀳𑀺𑀘𑁆𑀘, 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀓𑀸𑀲𑀺𑀓𑁄𑀲𑀮𑀁 𑀅𑀚𑁆𑀛𑀸𑀯𑀲𑀢𑀺; 𑀬𑀸 𑀓𑀸𑀲𑀺𑀓𑁄𑀲𑀮𑁂 𑀲𑀫𑀼𑀤𑀬𑀲𑀜𑁆𑀚𑀸𑀢𑀺, 𑀭𑀸𑀚𑀸𑀯 𑀢𑀁 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀏𑀓𑀓𑁄 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀦 𑀅𑀜𑁆𑀜𑁂𑀲𑀁 𑀤𑀤𑁂𑀬𑁆𑀬𑀸’𑀢𑀺. 𑀏𑀯𑀁 𑀯𑀸𑀤𑀻 𑀲𑁄 𑀬𑁂 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀉𑀧𑀚𑀻𑀯𑀦𑁆𑀢𑀺 𑀢𑀼𑀫𑁆𑀳𑁂 𑀘𑁂𑀯 𑀅𑀜𑁆𑀜𑁂 𑀘, 𑀢𑁂𑀲𑀁 𑀅𑀦𑁆𑀢𑀭𑀸𑀬𑀓𑀭𑁄 𑀯𑀸 𑀳𑁄𑀢𑀺, 𑀦𑁄 𑀯𑀸’’𑀢𑀺?

‘‘𑀅𑀦𑁆𑀢𑀭𑀸𑀬𑀓𑀭𑁄, 𑀪𑁄 𑀕𑁄𑀢𑀫’’. ‘‘𑀅𑀦𑁆𑀢𑀭𑀸𑀬𑀓𑀭𑁄 𑀲𑀫𑀸𑀦𑁄 𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀸 𑀢𑁂𑀲𑀁 𑀳𑁄𑀢𑀺 𑀅𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀸’’𑀢𑀺? ‘‘𑀅𑀳𑀺𑀢𑀸𑀦𑀼𑀓𑀫𑁆𑀧𑀻, 𑀪𑁄 𑀕𑁄𑀢𑀫’’. ‘‘𑀅𑀳𑀺𑀢𑀸𑀦𑀼𑀓𑀫𑁆𑀧𑀺𑀲𑁆𑀲 𑀫𑁂𑀢𑁆𑀢𑀁 𑀯𑀸 𑀢𑁂𑀲𑀼 𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺 𑀲𑀧𑀢𑁆𑀢𑀓𑀁 𑀯𑀸’’𑀢𑀺? ‘‘𑀲𑀧𑀢𑁆𑀢𑀓𑀁, 𑀪𑁄 𑀕𑁄𑀢𑀫’’. ‘‘𑀲𑀧𑀢𑁆𑀢𑀓𑁂 𑀘𑀺𑀢𑁆𑀢𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀯𑀸 𑀳𑁄𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀯𑀸’’𑀢𑀺? ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀪𑁄 𑀕𑁄𑀢𑀫’’. ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑁆𑀲 𑀔𑁄 𑀅𑀳𑀁, 𑀮𑁄𑀳𑀺𑀘𑁆𑀘, 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀯𑀤𑀸𑀫𑀺 𑁋 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸’’.

𑁫𑁧𑁧. ‘‘𑀇𑀢𑀺 𑀓𑀺𑀭, 𑀮𑁄𑀳𑀺𑀘𑁆𑀘, 𑀬𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀮𑁄𑀳𑀺𑀘𑁆𑀘𑁄 𑀩𑁆𑀭𑀸𑀳𑁆𑀫𑀡𑁄 𑀲𑀸𑀮𑀯𑀢𑀺𑀓𑀁 𑀅𑀚𑁆𑀛𑀸𑀯𑀲𑀢𑀺; 𑀬𑀸 𑀲𑀸𑀮𑀯𑀢𑀺𑀓𑀸𑀬 𑀲𑀫𑀼𑀤𑀬𑀲𑀜𑁆𑀚𑀸𑀢𑀺, 𑀮𑁄𑀳𑀺𑀘𑁆𑀘𑁄𑀯 𑀢𑀁 𑀩𑁆𑀭𑀸𑀳𑁆𑀫𑀡𑁄 𑀏𑀓𑀓𑁄 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀦 𑀅𑀜𑁆𑀜𑁂𑀲𑀁 𑀤𑀤𑁂𑀬𑁆𑀬𑀸’’𑀢𑀺. 𑀏𑀯𑀁𑀯𑀸𑀤𑀻 𑀲𑁄 𑀬𑁂 𑀢𑀁 𑀉𑀧𑀚𑀻𑀯𑀦𑁆𑀢𑀺, 𑀢𑁂𑀲𑀁 𑀅𑀦𑁆𑀢𑀭𑀸𑀬𑀓𑀭𑁄 𑀳𑁄𑀢𑀺. 𑀅𑀦𑁆𑀢𑀭𑀸𑀬𑀓𑀭𑁄 𑀲𑀫𑀸𑀦𑁄 𑀅𑀳𑀺𑀢𑀸𑀦𑀼𑀓𑀫𑁆𑀧𑀻 𑀳𑁄𑀢𑀺, 𑀅𑀳𑀺𑀢𑀸𑀦𑀼𑀓𑀫𑁆𑀧𑀺𑀲𑁆𑀲 𑀲𑀧𑀢𑁆𑀢𑀓𑀁 𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺, 𑀲𑀧𑀢𑁆𑀢𑀓𑁂 𑀘𑀺𑀢𑁆𑀢𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀳𑁄𑀢𑀺. 𑀏𑀯𑀫𑁂𑀯 𑀔𑁄, 𑀮𑁄𑀳𑀺𑀘𑁆𑀘, 𑀬𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀇𑀥 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀅𑀥𑀺𑀕𑀘𑁆𑀙𑁂𑀬𑁆𑀬, 𑀓𑀼𑀲𑀮𑀁 𑀥𑀫𑁆𑀫𑀁 𑀅𑀥𑀺𑀕𑀦𑁆𑀢𑁆𑀯𑀸 𑀦 𑀧𑀭𑀲𑁆𑀲 𑀆𑀭𑁄𑀘𑁂𑀬𑁆𑀬, 𑀓𑀺𑀜𑁆𑀳𑀺 𑀧𑀭𑁄 𑀧𑀭𑀲𑁆𑀲 𑀓𑀭𑀺𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀼𑀭𑀸𑀡𑀁 𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀁 𑀦𑀯𑀁 𑀩𑀦𑁆𑀥𑀦𑀁 𑀓𑀭𑁂𑀬𑁆𑀬…𑀧𑁂… 𑀓𑀭𑀺𑀲𑁆𑀲𑀢𑀻’’𑀢𑀺. 𑀏𑀯𑀁𑀯𑀸𑀤𑀻 𑀲𑁄 𑀬𑁂 𑀢𑁂 𑀓𑀼𑀮𑀧𑀼𑀢𑁆𑀢𑀸 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀆𑀕𑀫𑁆𑀫 𑀏𑀯𑀭𑀽𑀧𑀁 𑀉𑀴𑀸𑀭𑀁 𑀯𑀺𑀲𑁂𑀲𑀁 𑀅𑀥𑀺𑀕𑀘𑁆𑀙𑀦𑁆𑀢𑀺, 𑀲𑁄𑀢𑀸𑀧𑀢𑁆𑀢𑀺𑀨𑀮𑀫𑁆𑀧𑀺 𑀲𑀘𑁆𑀙𑀺𑀓𑀭𑁄𑀦𑁆𑀢𑀺, 𑀲𑀓𑀤𑀸𑀕𑀸𑀫𑀺𑀨𑀮𑀫𑁆𑀧𑀺 𑀲𑀘𑁆𑀙𑀺𑀓𑀭𑁄𑀦𑁆𑀢𑀺, 𑀅𑀦𑀸𑀕𑀸𑀫𑀺𑀨𑀮𑀫𑁆𑀧𑀺 𑀲𑀘𑁆𑀙𑀺𑀓𑀭𑁄𑀦𑁆𑀢𑀺, 𑀅𑀭𑀳𑀢𑁆𑀢𑀫𑁆𑀧𑀺 𑀲𑀘𑁆𑀙𑀺𑀓𑀭𑁄𑀦𑁆𑀢𑀺, 𑀬𑁂 𑀘𑀺𑀫𑁂 𑀤𑀺𑀩𑁆𑀩𑀸 𑀕𑀩𑁆𑀪𑀸 𑀧𑀭𑀺𑀧𑀸𑀘𑁂𑀦𑁆𑀢𑀺 𑀤𑀺𑀩𑁆𑀩𑀸𑀦𑀁 𑀪𑀯𑀸𑀦𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸, 𑀢𑁂𑀲𑀁 𑀅𑀦𑁆𑀢𑀭𑀸𑀬𑀓𑀭𑁄 𑀳𑁄𑀢𑀺, 𑀅𑀦𑁆𑀢𑀭𑀸𑀬𑀓𑀭𑁄 𑀲𑀫𑀸𑀦𑁄 𑀅𑀳𑀺𑀢𑀸𑀦𑀼𑀓𑀫𑁆𑀧𑀻 𑀳𑁄𑀢𑀺, 𑀅𑀳𑀺𑀢𑀸𑀦𑀼𑀓𑀫𑁆𑀧𑀺𑀲𑁆𑀲 𑀲𑀧𑀢𑁆𑀢𑀓𑀁 𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺, 𑀲𑀧𑀢𑁆𑀢𑀓𑁂 𑀘𑀺𑀢𑁆𑀢𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀳𑁄𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑁆𑀲 𑀔𑁄 𑀅𑀳𑀁, 𑀮𑁄𑀳𑀺𑀘𑁆𑀘, 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀯𑀤𑀸𑀫𑀺 𑁋 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸.

𑁫𑁧𑁨. ‘‘𑀇𑀢𑀺 𑀓𑀺𑀭, 𑀮𑁄𑀳𑀺𑀘𑁆𑀘, 𑀬𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀓𑀸𑀲𑀺𑀓𑁄𑀲𑀮𑀁 𑀅𑀚𑁆𑀛𑀸𑀯𑀲𑀢𑀺; 𑀬𑀸 𑀓𑀸𑀲𑀺𑀓𑁄𑀲𑀮𑁂 𑀲𑀫𑀼𑀤𑀬𑀲𑀜𑁆𑀚𑀸𑀢𑀺, 𑀭𑀸𑀚𑀸𑀯 𑀢𑀁 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀏𑀓𑀓𑁄 𑀧𑀭𑀺𑀪𑀼𑀜𑁆𑀚𑁂𑀬𑁆𑀬, 𑀦 𑀅𑀜𑁆𑀜𑁂𑀲𑀁 𑀤𑀤𑁂𑀬𑁆𑀬𑀸’’𑀢𑀺. 𑀏𑀯𑀁𑀯𑀸𑀤𑀻 𑀲𑁄 𑀬𑁂 𑀭𑀸𑀚𑀸𑀦𑀁 𑀧𑀲𑁂𑀦𑀤𑀺𑀁 𑀓𑁄𑀲𑀮𑀁 𑀉𑀧𑀚𑀻𑀯𑀦𑁆𑀢𑀺 𑀢𑀼𑀫𑁆𑀳𑁂 𑀘𑁂𑀯 𑀅𑀜𑁆𑀜𑁂 𑀘, 𑀢𑁂𑀲𑀁 𑀅𑀦𑁆𑀢𑀭𑀸𑀬𑀓𑀭𑁄 𑀳𑁄𑀢𑀺. 𑀅𑀦𑁆𑀢𑀭𑀸𑀬𑀓𑀭𑁄 𑀲𑀫𑀸𑀦𑁄 𑀅𑀳𑀺𑀢𑀸𑀦𑀼𑀓𑀫𑁆𑀧𑀻 𑀳𑁄𑀢𑀺, 𑀅𑀳𑀺𑀢𑀸𑀦𑀼𑀓𑀫𑁆𑀧𑀺𑀲𑁆𑀲 𑀲𑀧𑀢𑁆𑀢𑀓𑀁 𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺, 𑀲𑀧𑀢𑁆𑀢𑀓𑁂 𑀘𑀺𑀢𑁆𑀢𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀳𑁄𑀢𑀺. 𑀏𑀯𑀫𑁂𑀯 𑀔𑁄, 𑀮𑁄𑀳𑀺𑀘𑁆𑀘, 𑀬𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀇𑀥 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀅𑀥𑀺𑀕𑀘𑁆𑀙𑁂𑀬𑁆𑀬, 𑀓𑀼𑀲𑀮𑀁 𑀥𑀫𑁆𑀫𑀁 𑀅𑀥𑀺𑀕𑀦𑁆𑀢𑁆𑀯𑀸 𑀦 𑀧𑀭𑀲𑁆𑀲 𑀆𑀭𑁄𑀘𑁂𑀬𑁆𑀬, 𑀓𑀺𑀜𑁆𑀳𑀺 𑀧𑀭𑁄 𑀧𑀭𑀲𑁆𑀲 𑀓𑀭𑀺𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫…𑀧𑁂… 𑀓𑀺𑀜𑁆𑀳𑀺 𑀧𑀭𑁄 𑀧𑀭𑀲𑁆𑀲 𑀓𑀭𑀺𑀲𑁆𑀲𑀢𑀻’’𑀢𑀺, 𑀏𑀯𑀁 𑀯𑀸𑀤𑀻 𑀲𑁄 𑀬𑁂 𑀢𑁂 𑀓𑀼𑀮𑀧𑀼𑀢𑁆𑀢𑀸 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀆𑀕𑀫𑁆𑀫 𑀏𑀯𑀭𑀽𑀧𑀁 𑀉𑀴𑀸𑀭𑀁 𑀯𑀺𑀲𑁂𑀲𑀁 𑀅𑀥𑀺𑀕𑀘𑁆𑀙𑀦𑁆𑀢𑀺, 𑀲𑁄𑀢𑀸𑀧𑀢𑁆𑀢𑀺𑀨𑀮𑀫𑁆𑀧𑀺 𑀲𑀘𑁆𑀙𑀺𑀓𑀭𑁄𑀦𑁆𑀢𑀺, 𑀲𑀓𑀤𑀸𑀕𑀸𑀫𑀺𑀨𑀮𑀫𑁆𑀧𑀺 𑀲𑀘𑁆𑀙𑀺𑀓𑀭𑁄𑀦𑁆𑀢𑀺, 𑀅𑀦𑀸𑀕𑀸𑀫𑀺𑀨𑀮𑀫𑁆𑀧𑀺 𑀲𑀘𑁆𑀙𑀺𑀓𑀭𑁄𑀦𑁆𑀢𑀺, 𑀅𑀭𑀳𑀢𑁆𑀢𑀫𑁆𑀧𑀺 𑀲𑀘𑁆𑀙𑀺𑀓𑀭𑁄𑀦𑁆𑀢𑀺. 𑀬𑁂 𑀘𑀺𑀫𑁂 𑀤𑀺𑀩𑁆𑀩𑀸 𑀕𑀩𑁆𑀪𑀸 𑀧𑀭𑀺𑀧𑀸𑀘𑁂𑀦𑁆𑀢𑀺 𑀤𑀺𑀩𑁆𑀩𑀸𑀦𑀁 𑀪𑀯𑀸𑀦𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸, 𑀢𑁂𑀲𑀁 𑀅𑀦𑁆𑀢𑀭𑀸𑀬𑀓𑀭𑁄 𑀳𑁄𑀢𑀺, 𑀅𑀦𑁆𑀢𑀭𑀸𑀬𑀓𑀭𑁄 𑀲𑀫𑀸𑀦𑁄 𑀅𑀳𑀺𑀢𑀸𑀦𑀼𑀓𑀫𑁆𑀧𑀻 𑀳𑁄𑀢𑀺, 𑀅𑀳𑀺𑀢𑀸𑀦𑀼𑀓𑀫𑁆𑀧𑀺𑀲𑁆𑀲 𑀲𑀧𑀢𑁆𑀢𑀓𑀁 𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀳𑁄𑀢𑀺, 𑀲𑀧𑀢𑁆𑀢𑀓𑁂 𑀘𑀺𑀢𑁆𑀢𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀳𑁄𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑁆𑀲 𑀔𑁄 𑀅𑀳𑀁, 𑀮𑁄𑀳𑀺𑀘𑁆𑀘, 𑀤𑁆𑀯𑀺𑀦𑁆𑀦𑀁 𑀕𑀢𑀻𑀦𑀁 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀯𑀤𑀸𑀫𑀺 𑁋 𑀦𑀺𑀭𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁 𑀯𑀸.

𑀢𑀬𑁄 𑀘𑁄𑀤𑀦𑀸𑀭𑀳𑀸

𑁫𑁧𑁩. ‘‘𑀢𑀬𑁄 𑀔𑁄𑀫𑁂, 𑀮𑁄𑀳𑀺𑀘𑁆𑀘, 𑀲𑀢𑁆𑀣𑀸𑀭𑁄, 𑀬𑁂 𑀮𑁄𑀓𑁂 𑀘𑁄𑀤𑀦𑀸𑀭𑀳𑀸; 𑀬𑁄 𑀘 𑀧𑀦𑁂𑀯𑀭𑀽𑀧𑁂 𑀲𑀢𑁆𑀣𑀸𑀭𑁄 𑀘𑁄𑀤𑁂𑀢𑀺, 𑀲𑀸 𑀘𑁄𑀤𑀦𑀸 𑀪𑀽𑀢𑀸 𑀢𑀘𑁆𑀙𑀸 𑀥𑀫𑁆𑀫𑀺𑀓𑀸 𑀅𑀦𑀯𑀚𑁆𑀚𑀸. 𑀓𑀢𑀫𑁂 𑀢𑀬𑁄? 𑀇𑀥, 𑀮𑁄𑀳𑀺𑀘𑁆𑀘, 𑀏𑀓𑀘𑁆𑀘𑁄 𑀲𑀢𑁆𑀣𑀸 𑀬𑀲𑁆𑀲𑀢𑁆𑀣𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺, 𑀲𑁆𑀯𑀸𑀲𑁆𑀲 𑀲𑀸𑀫𑀜𑁆𑀜𑀢𑁆𑀣𑁄 𑀅𑀦𑀦𑀼𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀲𑁄 𑀢𑀁 𑀲𑀸𑀫𑀜𑁆𑀜𑀢𑁆𑀣𑀁 𑀅𑀦𑀦𑀼𑀧𑀸𑀧𑀼𑀡𑀺𑀢𑁆𑀯𑀸 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 ‘‘𑀇𑀤𑀁 𑀯𑁄 𑀳𑀺𑀢𑀸𑀬 𑀇𑀤𑀁 𑀯𑁄 𑀲𑀼𑀔𑀸𑀬𑀸’’𑀢𑀺. 𑀢𑀲𑁆𑀲 𑀲𑀸𑀯𑀓𑀸 𑀦 𑀲𑀼𑀲𑁆𑀲𑀽𑀲𑀦𑁆𑀢𑀺, 𑀦 𑀲𑁄𑀢𑀁 𑀑𑀤𑀳𑀦𑁆𑀢𑀺, 𑀦 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀯𑁄𑀓𑁆𑀓𑀫𑁆𑀫 𑀘 𑀲𑀢𑁆𑀣𑀼𑀲𑀸𑀲𑀦𑀸 𑀯𑀢𑁆𑀢𑀦𑁆𑀢𑀺. 𑀲𑁄 𑀏𑀯𑀫𑀲𑁆𑀲 𑀘𑁄𑀤𑁂𑀢𑀩𑁆𑀩𑁄 𑁋 ‘‘𑀆𑀬𑀲𑁆𑀫𑀸 𑀔𑁄 𑀬𑀲𑁆𑀲𑀢𑁆𑀣𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀲𑁄 𑀢𑁂 𑀲𑀸𑀫𑀜𑁆𑀜𑀢𑁆𑀣𑁄 𑀅𑀦𑀦𑀼𑀧𑁆𑀧𑀢𑁆𑀢𑁄, 𑀢𑀁 𑀢𑁆𑀯𑀁 𑀲𑀸𑀫𑀜𑁆𑀜𑀢𑁆𑀣𑀁 𑀅𑀦𑀦𑀼𑀧𑀸𑀧𑀼𑀡𑀺𑀢𑁆𑀯𑀸 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺 𑁋 ‘𑀇𑀤𑀁 𑀯𑁄 𑀳𑀺𑀢𑀸𑀬 𑀇𑀤𑀁 𑀯𑁄 𑀲𑀼𑀔𑀸𑀬𑀸’𑀢𑀺. 𑀢𑀲𑁆𑀲 𑀢𑁂 𑀲𑀸𑀯𑀓𑀸 𑀦 𑀲𑀼𑀲𑁆𑀲𑀽𑀲𑀦𑁆𑀢𑀺, 𑀦 𑀲𑁄𑀢𑀁 𑀑𑀤𑀳𑀦𑁆𑀢𑀺, 𑀦 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀯𑁄𑀓𑁆𑀓𑀫𑁆𑀫 𑀘 𑀲𑀢𑁆𑀣𑀼𑀲𑀸𑀲𑀦𑀸 𑀯𑀢𑁆𑀢𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀑𑀲𑀓𑁆𑀓𑀦𑁆𑀢𑀺𑀬𑀸 𑀯𑀸 𑀉𑀲𑁆𑀲𑀓𑁆𑀓𑁂𑀬𑁆𑀬, 𑀧𑀭𑀫𑁆𑀫𑀼𑀔𑀺𑀁 𑀯𑀸 𑀆𑀮𑀺𑀗𑁆𑀕𑁂𑀬𑁆𑀬, 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀧𑀸𑀧𑀓𑀁 𑀮𑁄𑀪𑀥𑀫𑁆𑀫𑀁 𑀯𑀤𑀸𑀫𑀺 𑁋 𑀓𑀺𑀜𑁆𑀳𑀺 𑀧𑀭𑁄 𑀧𑀭𑀲𑁆𑀲 𑀓𑀭𑀺𑀲𑁆𑀲𑀢𑀻’’𑀢𑀺. 𑀅𑀬𑀁 𑀔𑁄, 𑀮𑁄𑀳𑀺𑀘𑁆𑀘, 𑀧𑀞𑀫𑁄 𑀲𑀢𑁆𑀣𑀸, 𑀬𑁄 𑀮𑁄𑀓𑁂 𑀘𑁄𑀤𑀦𑀸𑀭𑀳𑁄; 𑀬𑁄 𑀘 𑀧𑀦𑁂𑀯𑀭𑀽𑀧𑀁 𑀲𑀢𑁆𑀣𑀸𑀭𑀁 𑀘𑁄𑀤𑁂𑀢𑀺, 𑀲𑀸 𑀘𑁄𑀤𑀦𑀸 𑀪𑀽𑀢𑀸 𑀢𑀘𑁆𑀙𑀸 𑀥𑀫𑁆𑀫𑀺𑀓𑀸 𑀅𑀦𑀯𑀚𑁆𑀚𑀸.

𑁫𑁧𑁪. ‘‘𑀧𑀼𑀦 𑀘𑀧𑀭𑀁, 𑀮𑁄𑀳𑀺𑀘𑁆𑀘, 𑀇𑀥𑁂𑀓𑀘𑁆𑀘𑁄 𑀲𑀢𑁆𑀣𑀸 𑀬𑀲𑁆𑀲𑀢𑁆𑀣𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺, 𑀲𑁆𑀯𑀸𑀲𑁆𑀲 𑀲𑀸𑀫𑀜𑁆𑀜𑀢𑁆𑀣𑁄 𑀅𑀦𑀦𑀼𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀲𑁄 𑀢𑀁 𑀲𑀸𑀫𑀜𑁆𑀜𑀢𑁆𑀣𑀁 𑀅𑀦𑀦𑀼𑀧𑀸𑀧𑀼𑀡𑀺𑀢𑁆𑀯𑀸 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 ‘‘𑀇𑀤𑀁 𑀯𑁄 𑀳𑀺𑀢𑀸𑀬, 𑀇𑀤𑀁 𑀯𑁄 𑀲𑀼𑀔𑀸𑀬𑀸’’𑀢𑀺. 𑀢𑀲𑁆𑀲 𑀲𑀸𑀯𑀓𑀸 𑀲𑀼𑀲𑁆𑀲𑀽𑀲𑀦𑁆𑀢𑀺, 𑀲𑁄𑀢𑀁 𑀑𑀤𑀳𑀦𑁆𑀢𑀺, 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀦 𑀘 𑀯𑁄𑀓𑁆𑀓𑀫𑁆𑀫 𑀲𑀢𑁆𑀣𑀼𑀲𑀸𑀲𑀦𑀸 𑀯𑀢𑁆𑀢𑀦𑁆𑀢𑀺. 𑀲𑁄 𑀏𑀯𑀫𑀲𑁆𑀲 𑀘𑁄𑀤𑁂𑀢𑀩𑁆𑀩𑁄 𑁋 ‘‘𑀆𑀬𑀲𑁆𑀫𑀸 𑀔𑁄 𑀬𑀲𑁆𑀲𑀢𑁆𑀣𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀲𑁄 𑀢𑁂 𑀲𑀸𑀫𑀜𑁆𑀜𑀢𑁆𑀣𑁄 𑀅𑀦𑀦𑀼𑀧𑁆𑀧𑀢𑁆𑀢𑁄. 𑀢𑀁 𑀢𑁆𑀯𑀁 𑀲𑀸𑀫𑀜𑁆𑀜𑀢𑁆𑀣𑀁 𑀅𑀦𑀦𑀼𑀧𑀸𑀧𑀼𑀡𑀺𑀢𑁆𑀯𑀸 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺 𑁋 ‘𑀇𑀤𑀁 𑀯𑁄 𑀳𑀺𑀢𑀸𑀬 𑀇𑀤𑀁 𑀯𑁄 𑀲𑀼𑀔𑀸𑀬𑀸’𑀢𑀺. 𑀢𑀲𑁆𑀲 𑀢𑁂 𑀲𑀸𑀯𑀓𑀸 𑀲𑀼𑀲𑁆𑀲𑀽𑀲𑀦𑁆𑀢𑀺, 𑀲𑁄𑀢𑀁 𑀑𑀤𑀳𑀦𑁆𑀢𑀺, 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀦 𑀘 𑀯𑁄𑀓𑁆𑀓𑀫𑁆𑀫 𑀲𑀢𑁆𑀣𑀼𑀲𑀸𑀲𑀦𑀸 𑀯𑀢𑁆𑀢𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀓𑀁 𑀔𑁂𑀢𑁆𑀢𑀁 𑀑𑀳𑀸𑀬 𑀧𑀭𑀁 𑀔𑁂𑀢𑁆𑀢𑀁 𑀦𑀺𑀤𑁆𑀤𑀸𑀬𑀺𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬, 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀧𑀸𑀧𑀓𑀁 𑀮𑁄𑀪𑀥𑀫𑁆𑀫𑀁 𑀯𑀤𑀸𑀫𑀺 𑁋 𑀓𑀺𑀜𑁆𑀳𑀺 𑀧𑀭𑁄 𑀧𑀭𑀲𑁆𑀲 𑀓𑀭𑀺𑀲𑁆𑀲𑀢𑀻’’𑀢𑀺. 𑀅𑀬𑀁 𑀔𑁄, 𑀮𑁄𑀳𑀺𑀘𑁆𑀘, 𑀤𑀼𑀢𑀺𑀬𑁄 𑀲𑀢𑁆𑀣𑀸, 𑀬𑁄, 𑀮𑁄𑀓𑁂 𑀘𑁄𑀤𑀦𑀸𑀭𑀳𑁄; 𑀬𑁄 𑀘 𑀧𑀦𑁂𑀯𑀭𑀽𑀧𑀁 𑀲𑀢𑁆𑀣𑀸𑀭𑀁 𑀘𑁄𑀤𑁂𑀢𑀺, 𑀲𑀸 𑀘𑁄𑀤𑀦𑀸 𑀪𑀽𑀢𑀸 𑀢𑀘𑁆𑀙𑀸 𑀥𑀫𑁆𑀫𑀺𑀓𑀸 𑀅𑀦𑀯𑀚𑁆𑀚𑀸.

𑁫𑁧𑁫. ‘‘𑀧𑀼𑀦 𑀘𑀧𑀭𑀁, 𑀮𑁄𑀳𑀺𑀘𑁆𑀘, 𑀇𑀥𑁂𑀓𑀘𑁆𑀘𑁄 𑀲𑀢𑁆𑀣𑀸 𑀬𑀲𑁆𑀲𑀢𑁆𑀣𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺, 𑀲𑁆𑀯𑀸𑀲𑁆𑀲 𑀲𑀸𑀫𑀜𑁆𑀜𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀲𑁄 𑀢𑀁 𑀲𑀸𑀫𑀜𑁆𑀜𑀢𑁆𑀣𑀁 𑀅𑀦𑀼𑀧𑀸𑀧𑀼𑀡𑀺𑀢𑁆𑀯𑀸 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑁋 ‘‘𑀇𑀤𑀁 𑀯𑁄 𑀳𑀺𑀢𑀸𑀬 𑀇𑀤𑀁 𑀯𑁄 𑀲𑀼𑀔𑀸𑀬𑀸’’𑀢𑀺. 𑀢𑀲𑁆𑀲 𑀲𑀸𑀯𑀓𑀸 𑀦 𑀲𑀼𑀲𑁆𑀲𑀽𑀲𑀦𑁆𑀢𑀺, 𑀦 𑀲𑁄𑀢𑀁 𑀑𑀤𑀳𑀦𑁆𑀢𑀺, 𑀦 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀯𑁄𑀓𑁆𑀓𑀫𑁆𑀫 𑀘 𑀲𑀢𑁆𑀣𑀼𑀲𑀸𑀲𑀦𑀸 𑀯𑀢𑁆𑀢𑀦𑁆𑀢𑀺. 𑀲𑁄 𑀏𑀯𑀫𑀲𑁆𑀲 𑀘𑁄𑀤𑁂𑀢𑀩𑁆𑀩𑁄 𑁋 ‘‘𑀆𑀬𑀲𑁆𑀫𑀸 𑀔𑁄 𑀬𑀲𑁆𑀲𑀢𑁆𑀣𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀲𑁄 𑀢𑁂 𑀲𑀸𑀫𑀜𑁆𑀜𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄. 𑀢𑀁 𑀢𑁆𑀯𑀁 𑀲𑀸𑀫𑀜𑁆𑀜𑀢𑁆𑀣𑀁 𑀅𑀦𑀼𑀧𑀸𑀧𑀼𑀡𑀺𑀢𑁆𑀯𑀸 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺 𑁋 ‘𑀇𑀤𑀁 𑀯𑁄 𑀳𑀺𑀢𑀸𑀬 𑀇𑀤𑀁 𑀯𑁄 𑀲𑀼𑀔𑀸𑀬𑀸’𑀢𑀺. 𑀢𑀲𑁆𑀲 𑀢𑁂 𑀲𑀸𑀯𑀓𑀸 𑀦 𑀲𑀼𑀲𑁆𑀲𑀽𑀲𑀦𑁆𑀢𑀺, 𑀦 𑀲𑁄𑀢𑀁 𑀑𑀤𑀳𑀦𑁆𑀢𑀺, 𑀦 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀯𑁄𑀓𑁆𑀓𑀫𑁆𑀫 𑀘 𑀲𑀢𑁆𑀣𑀼𑀲𑀸𑀲𑀦𑀸 𑀯𑀢𑁆𑀢𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀼𑀭𑀸𑀡𑀁 𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀁 𑀦𑀯𑀁 𑀩𑀦𑁆𑀥𑀦𑀁 𑀓𑀭𑁂𑀬𑁆𑀬, 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀧𑀸𑀧𑀓𑀁 𑀮𑁄𑀪𑀥𑀫𑁆𑀫𑀁 𑀯𑀤𑀸𑀫𑀺, 𑀓𑀺𑀜𑁆𑀳𑀺 𑀧𑀭𑁄 𑀧𑀭𑀲𑁆𑀲 𑀓𑀭𑀺𑀲𑁆𑀲𑀢𑀻’’𑀢𑀺. 𑀅𑀬𑀁 𑀔𑁄, 𑀮𑁄𑀳𑀺𑀘𑁆𑀘, 𑀢𑀢𑀺𑀬𑁄 𑀲𑀢𑁆𑀣𑀸, 𑀬𑁄 𑀮𑁄𑀓𑁂 𑀘𑁄𑀤𑀦𑀸𑀭𑀳𑁄; 𑀬𑁄 𑀘 𑀧𑀦𑁂𑀯𑀭𑀽𑀧𑀁 𑀲𑀢𑁆𑀣𑀸𑀭𑀁 𑀘𑁄𑀤𑁂𑀢𑀺, 𑀲𑀸 𑀘𑁄𑀤𑀦𑀸 𑀪𑀽𑀢𑀸 𑀢𑀘𑁆𑀙𑀸 𑀥𑀫𑁆𑀫𑀺𑀓𑀸 𑀅𑀦𑀯𑀚𑁆𑀚𑀸. 𑀇𑀫𑁂 𑀔𑁄, 𑀮𑁄𑀳𑀺𑀘𑁆𑀘, 𑀢𑀬𑁄 𑀲𑀢𑁆𑀣𑀸𑀭𑁄, 𑀬𑁂 𑀮𑁄𑀓𑁂 𑀘𑁄𑀤𑀦𑀸𑀭𑀳𑀸, 𑀬𑁄 𑀘 𑀧𑀦𑁂𑀯𑀭𑀽𑀧𑁂 𑀲𑀢𑁆𑀣𑀸𑀭𑁄 𑀘𑁄𑀤𑁂𑀢𑀺, 𑀲𑀸 𑀘𑁄𑀤𑀦𑀸 𑀪𑀽𑀢𑀸 𑀢𑀘𑁆𑀙𑀸 𑀥𑀫𑁆𑀫𑀺𑀓𑀸 𑀅𑀦𑀯𑀚𑁆𑀚𑀸𑀢𑀺.

𑀦𑀘𑁄𑀤𑀦𑀸𑀭𑀳𑀲𑀢𑁆𑀣𑀼

𑁫𑁧𑁬. 𑀏𑀯𑀁 𑀯𑀼𑀢𑁆𑀢𑁂, 𑀮𑁄𑀳𑀺𑀘𑁆𑀘𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀢𑁆𑀣𑀺 𑀧𑀦, 𑀪𑁄 𑀕𑁄𑀢𑀫, 𑀓𑁄𑀘𑀺 𑀲𑀢𑁆𑀣𑀸, 𑀬𑁄 𑀮𑁄𑀓𑁂 𑀦𑀘𑁄𑀤𑀦𑀸𑀭𑀳𑁄’’𑀢𑀺? ‘‘𑀅𑀢𑁆𑀣𑀺 𑀔𑁄, 𑀮𑁄𑀳𑀺𑀘𑁆𑀘, 𑀲𑀢𑁆𑀣𑀸, 𑀬𑁄 𑀮𑁄𑀓𑁂 𑀦𑀘𑁄𑀤𑀦𑀸𑀭𑀳𑁄’’𑀢𑀺. ‘‘𑀓𑀢𑀫𑁄 𑀧𑀦 𑀲𑁄, 𑀪𑁄 𑀕𑁄𑀢𑀫, 𑀲𑀢𑁆𑀣𑀸, 𑀬𑁄 𑀮𑁄𑀓𑁂 𑀦𑀘𑁄𑀤𑀦𑀸𑀭𑀳𑁄’’𑀢𑀺?

‘‘𑀇𑀥, 𑀮𑁄𑀳𑀺𑀘𑁆𑀘, 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… (𑀬𑀣𑀸 𑁧𑁯𑁦-𑁨𑁧𑁨 𑀅𑀦𑀼𑀘𑁆𑀙𑁂𑀤𑁂𑀲𑀼 𑀏𑀯𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁). 𑀏𑀯𑀁 𑀔𑁄, 𑀮𑁄𑀳𑀺𑀘𑁆𑀘, 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺… 𑀬𑀲𑁆𑀫𑀺𑀁 𑀔𑁄, 𑀮𑁄𑀳𑀺𑀘𑁆𑀘, 𑀲𑀢𑁆𑀣𑀭𑀺 𑀲𑀸𑀯𑀓𑁄 𑀏𑀯𑀭𑀽𑀧𑀁 𑀉𑀴𑀸𑀭𑀁 𑀯𑀺𑀲𑁂𑀲𑀁 𑀅𑀥𑀺𑀕𑀘𑁆𑀙𑀢𑀺, 𑀅𑀬𑀫𑁆𑀧𑀺 𑀔𑁄, 𑀮𑁄𑀳𑀺𑀘𑁆𑀘, 𑀲𑀢𑁆𑀣𑀸, 𑀬𑁄 𑀮𑁄𑀓𑁂 𑀦𑀘𑁄𑀤𑀦𑀸𑀭𑀳𑁄. 𑀬𑁄 𑀘 𑀧𑀦𑁂𑀯𑀭𑀽𑀧𑀁 𑀲𑀢𑁆𑀣𑀸𑀭𑀁 𑀘𑁄𑀤𑁂𑀢𑀺, 𑀲𑀸 𑀘𑁄𑀤𑀦𑀸 𑀅𑀪𑀽𑀢𑀸 𑀅𑀢𑀘𑁆𑀙𑀸 𑀅𑀥𑀫𑁆𑀫𑀺𑀓𑀸 𑀲𑀸𑀯𑀚𑁆𑀚𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀬𑀲𑁆𑀫𑀺𑀁 𑀔𑁄, 𑀮𑁄𑀳𑀺𑀘𑁆𑀘, 𑀲𑀢𑁆𑀣𑀭𑀺 𑀲𑀸𑀯𑀓𑁄 𑀏𑀯𑀭𑀽𑀧𑀁 𑀉𑀴𑀸𑀭𑀁 𑀯𑀺𑀲𑁂𑀲𑀁 𑀅𑀥𑀺𑀕𑀘𑁆𑀙𑀢𑀺, 𑀅𑀬𑀫𑁆𑀧𑀺 𑀔𑁄, 𑀮𑁄𑀳𑀺𑀘𑁆𑀘, 𑀲𑀢𑁆𑀣𑀸, 𑀬𑁄 𑀮𑁄𑀓𑁂 𑀦𑀘𑁄𑀤𑀦𑀸𑀭𑀳𑁄, 𑀬𑁄 𑀘 𑀧𑀦𑁂𑀯𑀭𑀽𑀧𑀁 𑀲𑀢𑁆𑀣𑀸𑀭𑀁 𑀘𑁄𑀤𑁂𑀢𑀺, 𑀲𑀸 𑀘𑁄𑀤𑀦𑀸 𑀅𑀪𑀽𑀢𑀸 𑀅𑀢𑀘𑁆𑀙𑀸 𑀅𑀥𑀫𑁆𑀫𑀺𑀓𑀸 𑀲𑀸𑀯𑀚𑁆𑀚𑀸… 𑀜𑀸𑀡𑀤𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺…𑀧𑁂… 𑀬𑀲𑁆𑀫𑀺𑀁 𑀔𑁄, 𑀮𑁄𑀳𑀺𑀘𑁆𑀘, 𑀲𑀢𑁆𑀣𑀭𑀺 𑀲𑀸𑀯𑀓𑁄 𑀏𑀯𑀭𑀽𑀧𑀁 𑀉𑀴𑀸𑀭𑀁 𑀯𑀺𑀲𑁂𑀲𑀁 𑀅𑀥𑀺𑀕𑀘𑁆𑀙𑀢𑀺, 𑀅𑀬𑀫𑁆𑀧𑀺 𑀔𑁄, 𑀮𑁄𑀳𑀺𑀘𑁆𑀘, 𑀲𑀢𑁆𑀣𑀸, 𑀬𑁄 𑀮𑁄𑀓𑁂 𑀦𑀘𑁄𑀤𑀦𑀸𑀭𑀳𑁄, 𑀬𑁄 𑀘 𑀧𑀦𑁂𑀯𑀭𑀽𑀧𑀁 𑀲𑀢𑁆𑀣𑀸𑀭𑀁 𑀘𑁄𑀤𑁂𑀢𑀺, 𑀲𑀸 𑀘𑁄𑀤𑀦𑀸 𑀅𑀪𑀽𑀢𑀸 𑀅𑀢𑀘𑁆𑀙𑀸 𑀅𑀥𑀫𑁆𑀫𑀺𑀓𑀸 𑀲𑀸𑀯𑀚𑁆𑀚𑀸… 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀺. 𑀬𑀲𑁆𑀫𑀺𑀁 𑀔𑁄, 𑀮𑁄𑀳𑀺𑀘𑁆𑀘, 𑀲𑀢𑁆𑀣𑀭𑀺 𑀲𑀸𑀯𑀓𑁄 𑀏𑀯𑀭𑀽𑀧𑀁 𑀉𑀴𑀸𑀭𑀁 𑀯𑀺𑀲𑁂𑀲𑀁 𑀅𑀥𑀺𑀕𑀘𑁆𑀙𑀢𑀺, 𑀅𑀬𑀫𑁆𑀧𑀺 𑀔𑁄, 𑀮𑁄𑀳𑀺𑀘𑁆𑀘, 𑀲𑀢𑁆𑀣𑀸, 𑀬𑁄 𑀮𑁄𑀓𑁂 𑀦𑀘𑁄𑀤𑀦𑀸𑀭𑀳𑁄, 𑀬𑁄 𑀘 𑀧𑀦𑁂𑀯𑀭𑀽𑀧𑀁 𑀲𑀢𑁆𑀣𑀸𑀭𑀁 𑀘𑁄𑀤𑁂𑀢𑀺, 𑀲𑀸 𑀘𑁄𑀤𑀦𑀸 𑀅𑀪𑀽𑀢𑀸 𑀅𑀢𑀘𑁆𑀙𑀸 𑀅𑀥𑀫𑁆𑀫𑀺𑀓𑀸 𑀲𑀸𑀯𑀚𑁆𑀚𑀸’’𑀢𑀺.

𑁫𑁧𑁭. 𑀏𑀯𑀁 𑀯𑀼𑀢𑁆𑀢𑁂, 𑀮𑁄𑀳𑀺𑀘𑁆𑀘𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀕𑁄𑀢𑀫, 𑀧𑀼𑀭𑀺𑀲𑁄 𑀧𑀼𑀭𑀺𑀲𑀁 𑀦𑀭𑀓𑀧𑀧𑀸𑀢𑀁 𑀧𑀢𑀦𑁆𑀢𑀁 𑀓𑁂𑀲𑁂𑀲𑀼 𑀕𑀳𑁂𑀢𑁆𑀯𑀸 𑀉𑀤𑁆𑀥𑀭𑀺𑀢𑁆𑀯𑀸 𑀣𑀮𑁂 𑀧𑀢𑀺𑀝𑁆𑀞𑀧𑁂𑀬𑁆𑀬, 𑀏𑀯𑀫𑁂𑀯𑀸𑀳𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀦𑀭𑀓𑀧𑀧𑀸𑀢𑀁 𑀧𑀧𑀢𑀦𑁆𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀣𑀮𑁂 𑀧𑀢𑀺𑀝𑁆𑀞𑀸𑀧𑀺𑀢𑁄. 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀕𑁄𑀢𑀫, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬, ‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’𑀢𑀺. 𑀏𑀯𑀫𑁂𑀯𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺.

𑀮𑁄𑀳𑀺𑀘𑁆𑀘𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀤𑁆𑀯𑀸𑀤𑀲𑀫𑀁.

𑁧𑁩. 𑀢𑁂𑀯𑀺𑀚𑁆𑀚𑀲𑀼𑀢𑁆𑀢𑀁

𑁫𑁧𑁮. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀬𑁂𑀦 𑀫𑀦𑀲𑀸𑀓𑀝𑀁 𑀦𑀸𑀫 𑀓𑁄𑀲𑀮𑀸𑀦𑀁 𑀩𑁆𑀭𑀸𑀳𑁆𑀫𑀡𑀕𑀸𑀫𑁄 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀫𑀦𑀲𑀸𑀓𑀝𑁂 𑀯𑀺𑀳𑀭𑀢𑀺 𑀉𑀢𑁆𑀢𑀭𑁂𑀦 𑀫𑀦𑀲𑀸𑀓𑀝𑀲𑁆𑀲 𑀅𑀘𑀺𑀭𑀯𑀢𑀺𑀬𑀸 𑀦𑀤𑀺𑀬𑀸 𑀢𑀻𑀭𑁂 𑀅𑀫𑁆𑀩𑀯𑀦𑁂.

𑁫𑁧𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀫𑀦𑀲𑀸𑀓𑀝𑁂 𑀧𑀝𑀺𑀯𑀲𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀗𑁆𑀓𑀻 𑀩𑁆𑀭𑀸𑀳𑁆𑀫𑀡𑁄 𑀢𑀸𑀭𑀼𑀓𑁆𑀔𑁄 𑀩𑁆𑀭𑀸𑀳𑁆𑀫𑀡𑁄 𑀧𑁄𑀓𑁆𑀔𑀭𑀲𑀸𑀢𑀺 𑀩𑁆𑀭𑀸𑀳𑁆𑀫𑀡𑁄 𑀚𑀸𑀡𑀼𑀲𑁄𑀡𑀺 𑀩𑁆𑀭𑀸𑀳𑁆𑀫𑀡𑁄 𑀢𑁄𑀤𑁂𑀬𑁆𑀬𑁄 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑁂 𑀘 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀜𑁆𑀜𑀸𑀢𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸.

𑁫𑁨𑁦. 𑀅𑀣 𑀔𑁄 𑀯𑀸𑀲𑁂𑀝𑁆𑀞𑀪𑀸𑀭𑀤𑁆𑀯𑀸𑀚𑀸𑀦𑀁 𑀫𑀸𑀡𑀯𑀸𑀦𑀁 𑀚𑀗𑁆𑀖𑀯𑀺𑀳𑀸𑀭𑀁 𑀅𑀦𑀼𑀘𑀗𑁆𑀓𑀫𑀦𑁆𑀢𑀸𑀦𑀁 𑀅𑀦𑀼𑀯𑀺𑀘𑀭𑀦𑁆𑀢𑀸𑀦𑀁 𑀫𑀕𑁆𑀕𑀸𑀫𑀕𑁆𑀕𑁂 𑀓𑀣𑀸 𑀉𑀤𑀧𑀸𑀤𑀺. 𑀅𑀣 𑀔𑁄 𑀯𑀸𑀲𑁂𑀝𑁆𑀞𑁄 𑀫𑀸𑀡𑀯𑁄 𑀏𑀯𑀫𑀸𑀳 𑁋 ‘‘𑀅𑀬𑀫𑁂𑀯 𑀉𑀚𑀼𑀫𑀕𑁆𑀕𑁄, 𑀅𑀬𑀫𑀜𑁆𑀚𑀲𑀸𑀬𑀦𑁄 𑀦𑀺𑀬𑁆𑀬𑀸𑀦𑀺𑀓𑁄 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀩𑁆𑀭𑀳𑁆𑀫𑀲𑀳𑀩𑁆𑀬𑀢𑀸𑀬, 𑀬𑁆𑀯𑀸𑀬𑀁 𑀅𑀓𑁆𑀔𑀸𑀢𑁄 𑀩𑁆𑀭𑀸𑀳𑁆𑀫𑀡𑁂𑀦 𑀧𑁄𑀓𑁆𑀔𑀭𑀲𑀸𑀢𑀺𑀦𑀸’’𑀢𑀺. 𑀪𑀸𑀭𑀤𑁆𑀯𑀸𑀚𑁄𑀧𑀺 𑀫𑀸𑀡𑀯𑁄 𑀏𑀯𑀫𑀸𑀳 𑁋 ‘‘𑀅𑀬𑀫𑁂𑀯 𑀉𑀚𑀼𑀫𑀕𑁆𑀕𑁄, 𑀅𑀬𑀫𑀜𑁆𑀚𑀲𑀸𑀬𑀦𑁄 𑀦𑀺𑀬𑁆𑀬𑀸𑀦𑀺𑀓𑁄, 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀩𑁆𑀭𑀳𑁆𑀫𑀲𑀳𑀩𑁆𑀬𑀢𑀸𑀬, 𑀬𑁆𑀯𑀸𑀬𑀁 𑀅𑀓𑁆𑀔𑀸𑀢𑁄 𑀩𑁆𑀭𑀸𑀳𑁆𑀫𑀡𑁂𑀦 𑀢𑀸𑀭𑀼𑀓𑁆𑀔𑁂𑀦𑀸’’𑀢𑀺. 𑀦𑁂𑀯 𑀔𑁄 𑀅𑀲𑀓𑁆𑀔𑀺 𑀯𑀸𑀲𑁂𑀝𑁆𑀞𑁄 𑀫𑀸𑀡𑀯𑁄 𑀪𑀸𑀭𑀤𑁆𑀯𑀸𑀚𑀁 𑀫𑀸𑀡𑀯𑀁 𑀲𑀜𑁆𑀜𑀸𑀧𑁂𑀢𑀼𑀁, 𑀦 𑀧𑀦 𑀅𑀲𑀓𑁆𑀔𑀺 𑀪𑀸𑀭𑀤𑁆𑀯𑀸𑀚𑁄 𑀫𑀸𑀡𑀯𑁄𑀧𑀺 𑀯𑀸𑀲𑁂𑀝𑁆𑀞𑀁 𑀫𑀸𑀡𑀯𑀁 𑀲𑀜𑁆𑀜𑀸𑀧𑁂𑀢𑀼𑀁.

𑁫𑁨𑁧. 𑀅𑀣 𑀔𑁄 𑀯𑀸𑀲𑁂𑀝𑁆𑀞𑁄 𑀫𑀸𑀡𑀯𑁄 𑀪𑀸𑀭𑀤𑁆𑀯𑀸𑀚𑀁 𑀫𑀸𑀡𑀯𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀔𑁄, 𑀪𑀸𑀭𑀤𑁆𑀯𑀸𑀚, 𑀲𑀫𑀡𑁄 𑀕𑁄𑀢𑀫𑁄 𑀲𑀓𑁆𑀬𑀧𑀼𑀢𑁆𑀢𑁄 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀫𑀦𑀲𑀸𑀓𑀝𑁂 𑀯𑀺𑀳𑀭𑀢𑀺 𑀉𑀢𑁆𑀢𑀭𑁂𑀦 𑀫𑀦𑀲𑀸𑀓𑀝𑀲𑁆𑀲 𑀅𑀘𑀺𑀭𑀯𑀢𑀺𑀬𑀸 𑀦𑀤𑀺𑀬𑀸 𑀢𑀻𑀭𑁂 𑀅𑀫𑁆𑀩𑀯𑀦𑁂. 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺. 𑀆𑀬𑀸𑀫, 𑀪𑁄 𑀪𑀸𑀭𑀤𑁆𑀯𑀸𑀚, 𑀬𑁂𑀦 𑀲𑀫𑀡𑁄 𑀕𑁄𑀢𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀲𑀫𑀡𑀁 𑀕𑁄𑀢𑀫𑀁 𑀧𑀼𑀘𑁆𑀙𑀺𑀲𑁆𑀲𑀸𑀫. 𑀬𑀣𑀸 𑀦𑁄 𑀲𑀫𑀡𑁄 𑀕𑁄𑀢𑀫𑁄 𑀩𑁆𑀬𑀸𑀓𑀭𑀺𑀲𑁆𑀲𑀢𑀺, 𑀢𑀣𑀸 𑀦𑀁 𑀥𑀸𑀭𑁂𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀪𑀸𑀭𑀤𑁆𑀯𑀸𑀚𑁄 𑀫𑀸𑀡𑀯𑁄 𑀯𑀸𑀲𑁂𑀝𑁆𑀞𑀲𑁆𑀲 𑀫𑀸𑀡𑀯𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺.

𑀫𑀕𑁆𑀕𑀸𑀫𑀕𑁆𑀕𑀓𑀣𑀸

𑁫𑁨𑁨. 𑀅𑀣 𑀔𑁄 𑀯𑀸𑀲𑁂𑀝𑁆𑀞𑀪𑀸𑀭𑀤𑁆𑀯𑀸𑀚𑀸 𑀫𑀸𑀡𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀸𑀲𑁂𑀝𑁆𑀞𑁄 𑀫𑀸𑀡𑀯𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥, 𑀪𑁄 𑀕𑁄𑀢𑀫, 𑀅𑀫𑁆𑀳𑀸𑀓𑀁 𑀚𑀗𑁆𑀖𑀯𑀺𑀳𑀸𑀭𑀁 𑀅𑀦𑀼𑀘𑀗𑁆𑀓𑀫𑀦𑁆𑀢𑀸𑀦𑀁 𑀅𑀦𑀼𑀯𑀺𑀘𑀭𑀦𑁆𑀢𑀸𑀦𑀁 𑀫𑀕𑁆𑀕𑀸𑀫𑀕𑁆𑀕𑁂 𑀓𑀣𑀸 𑀉𑀤𑀧𑀸𑀤𑀺. 𑀅𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀬𑀫𑁂𑀯 𑀉𑀚𑀼𑀫𑀕𑁆𑀕𑁄, 𑀅𑀬𑀫𑀜𑁆𑀚𑀲𑀸𑀬𑀦𑁄 𑀦𑀺𑀬𑁆𑀬𑀸𑀦𑀺𑀓𑁄 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀩𑁆𑀭𑀳𑁆𑀫𑀲𑀳𑀩𑁆𑀬𑀢𑀸𑀬, 𑀬𑁆𑀯𑀸𑀬𑀁 𑀅𑀓𑁆𑀔𑀸𑀢𑁄 𑀩𑁆𑀭𑀸𑀳𑁆𑀫𑀡𑁂𑀦 𑀧𑁄𑀓𑁆𑀔𑀭𑀲𑀸𑀢𑀺𑀦𑀸’𑀢𑀺. 𑀪𑀸𑀭𑀤𑁆𑀯𑀸𑀚𑁄 𑀫𑀸𑀡𑀯𑁄 𑀏𑀯𑀫𑀸𑀳 𑁋 ‘𑀅𑀬𑀫𑁂𑀯 𑀉𑀚𑀼𑀫𑀕𑁆𑀕𑁄 𑀅𑀬𑀫𑀜𑁆𑀚𑀲𑀸𑀬𑀦𑁄 𑀦𑀺𑀬𑁆𑀬𑀸𑀦𑀺𑀓𑁄 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀩𑁆𑀭𑀳𑁆𑀫𑀲𑀳𑀩𑁆𑀬𑀢𑀸𑀬, 𑀬𑁆𑀯𑀸𑀬𑀁 𑀅𑀓𑁆𑀔𑀸𑀢𑁄 𑀩𑁆𑀭𑀸𑀳𑁆𑀫𑀡𑁂𑀦 𑀢𑀸𑀭𑀼𑀓𑁆𑀔𑁂𑀦𑀸’𑀢𑀺. 𑀏𑀢𑁆𑀣, 𑀪𑁄 𑀕𑁄𑀢𑀫, 𑀅𑀢𑁆𑀣𑁂𑀯 𑀯𑀺𑀕𑁆𑀕𑀳𑁄, 𑀅𑀢𑁆𑀣𑀺 𑀯𑀺𑀯𑀸𑀤𑁄, 𑀅𑀢𑁆𑀣𑀺 𑀦𑀸𑀦𑀸𑀯𑀸𑀤𑁄’’𑀢𑀺.

𑁫𑁨𑁩. ‘‘𑀇𑀢𑀺 𑀓𑀺𑀭, 𑀯𑀸𑀲𑁂𑀝𑁆𑀞, 𑀢𑁆𑀯𑀁 𑀏𑀯𑀁 𑀯𑀤𑁂𑀲𑀺 𑁋 ‘‘𑀅𑀬𑀫𑁂𑀯 𑀉𑀚𑀼𑀫𑀕𑁆𑀕𑁄, 𑀅𑀬𑀫𑀜𑁆𑀚𑀲𑀸𑀬𑀦𑁄 𑀦𑀺𑀬𑁆𑀬𑀸𑀦𑀺𑀓𑁄 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀩𑁆𑀭𑀳𑁆𑀫𑀲𑀳𑀩𑁆𑀬𑀢𑀸𑀬, 𑀬𑁆𑀯𑀸𑀬𑀁 𑀅𑀓𑁆𑀔𑀸𑀢𑁄 𑀩𑁆𑀭𑀸𑀳𑁆𑀫𑀡𑁂𑀦 𑀧𑁄𑀓𑁆𑀔𑀭𑀲𑀸𑀢𑀺𑀦𑀸’’𑀢𑀺. 𑀪𑀸𑀭𑀤𑁆𑀯𑀸𑀚𑁄 𑀫𑀸𑀡𑀯𑁄 𑀏𑀯𑀫𑀸𑀳 𑁋 ‘‘𑀅𑀬𑀫𑁂𑀯 𑀉𑀚𑀼𑀫𑀕𑁆𑀕𑁄 𑀅𑀬𑀫𑀜𑁆𑀚𑀲𑀸𑀬𑀦𑁄 𑀦𑀺𑀬𑁆𑀬𑀸𑀦𑀺𑀓𑁄 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀩𑁆𑀭𑀳𑁆𑀫𑀲𑀳𑀩𑁆𑀬𑀢𑀸𑀬, 𑀬𑁆𑀯𑀸𑀬𑀁 𑀅𑀓𑁆𑀔𑀸𑀢𑁄 𑀩𑁆𑀭𑀸𑀳𑁆𑀫𑀡𑁂𑀦 𑀢𑀸𑀭𑀼𑀓𑁆𑀔𑁂𑀦𑀸’’𑀢𑀺. 𑀅𑀣 𑀓𑀺𑀲𑁆𑀫𑀺𑀁 𑀧𑀦 𑀯𑁄, 𑀯𑀸𑀲𑁂𑀝𑁆𑀞, 𑀯𑀺𑀕𑁆𑀕𑀳𑁄, 𑀓𑀺𑀲𑁆𑀫𑀺𑀁 𑀯𑀺𑀯𑀸𑀤𑁄, 𑀓𑀺𑀲𑁆𑀫𑀺𑀁 𑀦𑀸𑀦𑀸𑀯𑀸𑀤𑁄’’𑀢𑀺?

𑁫𑁨𑁪. ‘‘𑀫𑀕𑁆𑀕𑀸𑀫𑀕𑁆𑀕𑁂, 𑀪𑁄 𑀕𑁄𑀢𑀫. 𑀓𑀺𑀜𑁆𑀘𑀸𑀧𑀺, 𑀪𑁄 𑀕𑁄𑀢𑀫, 𑀩𑁆𑀭𑀸𑀳𑁆𑀫𑀡𑀸 𑀦𑀸𑀦𑀸𑀫𑀕𑁆𑀕𑁂 𑀧𑀜𑁆𑀜𑀧𑁂𑀦𑁆𑀢𑀺, 𑀅𑀤𑁆𑀥𑀭𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀢𑀺𑀢𑁆𑀢𑀺𑀭𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀙𑀦𑁆𑀤𑁄𑀓𑀸 𑀩𑁆𑀭𑀸𑀳𑁆𑀫𑀡𑀸 𑀩𑀯𑁆𑀳𑀸𑀭𑀺𑀚𑁆𑀛𑀸 𑀩𑁆𑀭𑀸𑀳𑁆𑀫𑀡𑀸, 𑀅𑀣 𑀔𑁄 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀦𑀺𑀬𑁆𑀬𑀸𑀦𑀺𑀓𑀸 𑀦𑀺𑀬𑁆𑀬𑀦𑁆𑀢𑀺 𑀢𑀓𑁆𑀓𑀭𑀲𑁆𑀲 𑀩𑁆𑀭𑀳𑁆𑀫𑀲𑀳𑀩𑁆𑀬𑀢𑀸𑀬.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀕𑁄𑀢𑀫, 𑀕𑀸𑀫𑀲𑁆𑀲 𑀯𑀸 𑀦𑀺𑀕𑀫𑀲𑁆𑀲 𑀯𑀸 𑀅𑀯𑀺𑀤𑀽𑀭𑁂 𑀩𑀳𑀽𑀦𑀺 𑀘𑁂𑀧𑀺 𑀦𑀸𑀦𑀸𑀫𑀕𑁆𑀕𑀸𑀦𑀺 𑀪𑀯𑀦𑁆𑀢𑀺, 𑀅𑀣 𑀔𑁄 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀕𑀸𑀫𑀲𑀫𑁄𑀲𑀭𑀡𑀸𑀦𑀺 𑀪𑀯𑀦𑁆𑀢𑀺; 𑀏𑀯𑀫𑁂𑀯 𑀔𑁄, 𑀪𑁄 𑀕𑁄𑀢𑀫, 𑀓𑀺𑀜𑁆𑀘𑀸𑀧𑀺 𑀩𑁆𑀭𑀸𑀳𑁆𑀫𑀡𑀸 𑀦𑀸𑀦𑀸𑀫𑀕𑁆𑀕𑁂 𑀧𑀜𑁆𑀜𑀧𑁂𑀦𑁆𑀢𑀺, 𑀅𑀤𑁆𑀥𑀭𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀢𑀺𑀢𑁆𑀢𑀺𑀭𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀙𑀦𑁆𑀤𑁄𑀓𑀸 𑀩𑁆𑀭𑀸𑀳𑁆𑀫𑀡𑀸 𑀩𑀯𑁆𑀳𑀸𑀭𑀺𑀚𑁆𑀛𑀸 𑀩𑁆𑀭𑀸𑀳𑁆𑀫𑀡𑀸, 𑀅𑀣 𑀔𑁄 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀦𑀺𑀬𑁆𑀬𑀸𑀦𑀺𑀓𑀸 𑀦𑀺𑀬𑁆𑀬𑀦𑁆𑀢𑀺 𑀢𑀓𑁆𑀓𑀭𑀲𑁆𑀲 𑀩𑁆𑀭𑀳𑁆𑀫𑀲𑀳𑀩𑁆𑀬𑀢𑀸𑀬𑀸’’𑀢𑀺.

𑀯𑀸𑀲𑁂𑀝𑁆𑀞𑀫𑀸𑀡𑀯𑀸𑀦𑀼𑀬𑁄𑀕𑁄

𑁫𑁨𑁫. ‘‘𑀦𑀺𑀬𑁆𑀬𑀦𑁆𑀢𑀻𑀢𑀺 𑀯𑀸𑀲𑁂𑀝𑁆𑀞 𑀯𑀤𑁂𑀲𑀺’’? ‘‘𑀦𑀺𑀬𑁆𑀬𑀦𑁆𑀢𑀻𑀢𑀺, 𑀪𑁄 𑀕𑁄𑀢𑀫, 𑀯𑀤𑀸𑀫𑀺’’. ‘‘𑀦𑀺𑀬𑁆𑀬𑀦𑁆𑀢𑀻𑀢𑀺, 𑀯𑀸𑀲𑁂𑀝𑁆𑀞, 𑀯𑀤𑁂𑀲𑀺’’? ‘‘𑀦𑀺𑀬𑁆𑀬𑀦𑁆𑀢𑀻𑀢𑀺, 𑀪𑁄 𑀕𑁄𑀢𑀫, 𑀯𑀤𑀸𑀫𑀺’’. ‘‘𑀦𑀺𑀬𑁆𑀬𑀦𑁆𑀢𑀻𑀢𑀺, 𑀯𑀸𑀲𑁂𑀝𑁆𑀞, 𑀯𑀤𑁂𑀲𑀺’’? ‘‘𑀦𑀺𑀬𑁆𑀬𑀦𑁆𑀢𑀻’’𑀢𑀺, 𑀪𑁄 𑀕𑁄𑀢𑀫, 𑀯𑀤𑀸𑀫𑀺’’.

‘‘𑀓𑀺𑀁 𑀧𑀦, 𑀯𑀸𑀲𑁂𑀝𑁆𑀞, 𑀅𑀢𑁆𑀣𑀺 𑀓𑁄𑀘𑀺 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀏𑀓𑀩𑁆𑀭𑀸𑀳𑁆𑀫𑀡𑁄𑀧𑀺, 𑀬𑁂𑀦 𑀩𑁆𑀭𑀳𑁆𑀫𑀸 𑀲𑀓𑁆𑀔𑀺𑀤𑀺𑀝𑁆𑀞𑁄’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

‘‘𑀓𑀺𑀁 𑀧𑀦, 𑀯𑀸𑀲𑁂𑀝𑁆𑀞, 𑀅𑀢𑁆𑀣𑀺 𑀓𑁄𑀘𑀺 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀏𑀓𑀸𑀘𑀭𑀺𑀬𑁄𑀧𑀺, 𑀬𑁂𑀦 𑀩𑁆𑀭𑀳𑁆𑀫𑀸 𑀲𑀓𑁆𑀔𑀺𑀤𑀺𑀝𑁆𑀞𑁄’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

‘‘𑀓𑀺𑀁 𑀧𑀦, 𑀯𑀸𑀲𑁂𑀝𑁆𑀞, 𑀅𑀢𑁆𑀣𑀺 𑀓𑁄𑀘𑀺 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀏𑀓𑀸𑀘𑀭𑀺𑀬𑀧𑀸𑀘𑀭𑀺𑀬𑁄𑀧𑀺, 𑀬𑁂𑀦 𑀩𑁆𑀭𑀳𑁆𑀫𑀸 𑀲𑀓𑁆𑀔𑀺𑀤𑀺𑀝𑁆𑀞𑁄’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

‘‘𑀓𑀺𑀁 𑀧𑀦, 𑀯𑀸𑀲𑁂𑀝𑁆𑀞, 𑀅𑀢𑁆𑀣𑀺 𑀓𑁄𑀘𑀺 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀬𑀸𑀯 𑀲𑀢𑁆𑀢𑀫𑀸 𑀆𑀘𑀭𑀺𑀬𑀸𑀫𑀳𑀬𑀼𑀕𑀸 [𑀲𑀢𑁆𑀢𑀫𑀸𑀘𑀭𑀺𑀬𑀫𑀳𑀬𑀼𑀕𑀸 (𑀲𑁆𑀬𑀸.)] 𑀬𑁂𑀦 𑀩𑁆𑀭𑀳𑁆𑀫𑀸 𑀲𑀓𑁆𑀔𑀺𑀤𑀺𑀝𑁆𑀞𑁄’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

𑁫𑁨𑁬. ‘‘𑀓𑀺𑀁 𑀧𑀦, 𑀯𑀸𑀲𑁂𑀝𑁆𑀞, 𑀬𑁂𑀧𑀺 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀩𑁆𑀩𑀓𑀸 𑀇𑀲𑀬𑁄 𑀫𑀦𑁆𑀢𑀸𑀦𑀁 𑀓𑀢𑁆𑀢𑀸𑀭𑁄 𑀫𑀦𑁆𑀢𑀸𑀦𑀁 𑀧𑀯𑀢𑁆𑀢𑀸𑀭𑁄, 𑀬𑁂𑀲𑀫𑀺𑀤𑀁 𑀏𑀢𑀭𑀳𑀺 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀧𑁄𑀭𑀸𑀡𑀁 𑀫𑀦𑁆𑀢𑀧𑀤𑀁 𑀕𑀻𑀢𑀁 𑀧𑀯𑀼𑀢𑁆𑀢𑀁 𑀲𑀫𑀺𑀳𑀺𑀢𑀁 [𑀲𑀫𑀻𑀳𑀺𑀢𑀁 (𑀲𑁆𑀬𑀸.)], 𑀢𑀤𑀦𑀼𑀕𑀸𑀬𑀦𑁆𑀢𑀺, 𑀢𑀤𑀦𑀼𑀪𑀸𑀲𑀦𑁆𑀢𑀺, 𑀪𑀸𑀲𑀺𑀢𑀫𑀦𑀼𑀪𑀸𑀲𑀦𑁆𑀢𑀺, 𑀯𑀸𑀘𑀺𑀢𑀫𑀦𑀼𑀯𑀸𑀘𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀝𑁆𑀞𑀓𑁄 𑀯𑀸𑀫𑀓𑁄 𑀯𑀸𑀫𑀤𑁂𑀯𑁄 𑀯𑁂𑀲𑁆𑀲𑀸𑀫𑀺𑀢𑁆𑀢𑁄 𑀬𑀫𑀢𑀕𑁆𑀕𑀺 𑀅𑀗𑁆𑀕𑀻𑀭𑀲𑁄 𑀪𑀸𑀭𑀤𑁆𑀯𑀸𑀚𑁄 𑀯𑀸𑀲𑁂𑀝𑁆𑀞𑁄 𑀓𑀲𑁆𑀲𑀧𑁄 𑀪𑀕𑀼. 𑀢𑁂𑀧𑀺 𑀏𑀯𑀫𑀸𑀳𑀁𑀲𑀼 𑁋 ‘𑀫𑀬𑀫𑁂𑀢𑀁 𑀚𑀸𑀦𑀸𑀫, 𑀫𑀬𑀫𑁂𑀢𑀁 𑀧𑀲𑁆𑀲𑀸𑀫, 𑀬𑀢𑁆𑀣 𑀯𑀸 𑀩𑁆𑀭𑀳𑁆𑀫𑀸, 𑀬𑁂𑀦 𑀯𑀸 𑀩𑁆𑀭𑀳𑁆𑀫𑀸, 𑀬𑀳𑀺𑀁 𑀯𑀸 𑀩𑁆𑀭𑀳𑁆𑀫𑀸’’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

𑁫𑁨𑁭. ‘‘𑀇𑀢𑀺 𑀓𑀺𑀭, 𑀯𑀸𑀲𑁂𑀝𑁆𑀞, 𑀦𑀢𑁆𑀣𑀺 𑀓𑁄𑀘𑀺 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀏𑀓𑀩𑁆𑀭𑀸𑀳𑁆𑀫𑀡𑁄𑀧𑀺, 𑀬𑁂𑀦 𑀩𑁆𑀭𑀳𑁆𑀫𑀸 𑀲𑀓𑁆𑀔𑀺𑀤𑀺𑀝𑁆𑀞𑁄. 𑀦𑀢𑁆𑀣𑀺 𑀓𑁄𑀘𑀺 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀏𑀓𑀸𑀘𑀭𑀺𑀬𑁄𑀧𑀺, 𑀬𑁂𑀦 𑀩𑁆𑀭𑀳𑁆𑀫𑀸 𑀲𑀓𑁆𑀔𑀺𑀤𑀺𑀝𑁆𑀞𑁄. 𑀦𑀢𑁆𑀣𑀺 𑀓𑁄𑀘𑀺 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀏𑀓𑀸𑀘𑀭𑀺𑀬𑀧𑀸𑀘𑀭𑀺𑀬𑁄𑀧𑀺, 𑀬𑁂𑀦 𑀩𑁆𑀭𑀳𑁆𑀫𑀸 𑀲𑀓𑁆𑀔𑀺𑀤𑀺𑀝𑁆𑀞𑁄. 𑀦𑀢𑁆𑀣𑀺 𑀓𑁄𑀘𑀺 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀬𑀸𑀯 𑀲𑀢𑁆𑀢𑀫𑀸 𑀆𑀘𑀭𑀺𑀬𑀸𑀫𑀳𑀬𑀼𑀕𑀸 𑀬𑁂𑀦 𑀩𑁆𑀭𑀳𑁆𑀫𑀸 𑀲𑀓𑁆𑀔𑀺𑀤𑀺𑀝𑁆𑀞𑁄. 𑀬𑁂𑀧𑀺 𑀓𑀺𑀭 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀩𑁆𑀩𑀓𑀸 𑀇𑀲𑀬𑁄 𑀫𑀦𑁆𑀢𑀸𑀦𑀁 𑀓𑀢𑁆𑀢𑀸𑀭𑁄 𑀫𑀦𑁆𑀢𑀸𑀦𑀁 𑀧𑀯𑀢𑁆𑀢𑀸𑀭𑁄, 𑀬𑁂𑀲𑀫𑀺𑀤𑀁 𑀏𑀢𑀭𑀳𑀺 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀧𑁄𑀭𑀸𑀡𑀁 𑀫𑀦𑁆𑀢𑀧𑀤𑀁 𑀕𑀻𑀢𑀁 𑀧𑀯𑀼𑀢𑁆𑀢𑀁 𑀲𑀫𑀺𑀳𑀺𑀢𑀁, 𑀢𑀤𑀦𑀼𑀕𑀸𑀬𑀦𑁆𑀢𑀺, 𑀢𑀤𑀦𑀼𑀪𑀸𑀲𑀦𑁆𑀢𑀺, 𑀪𑀸𑀲𑀺𑀢𑀫𑀦𑀼𑀪𑀸𑀲𑀦𑁆𑀢𑀺, 𑀯𑀸𑀘𑀺𑀢𑀫𑀦𑀼𑀯𑀸𑀘𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀝𑁆𑀞𑀓𑁄 𑀯𑀸𑀫𑀓𑁄 𑀯𑀸𑀫𑀤𑁂𑀯𑁄 𑀯𑁂𑀲𑁆𑀲𑀸𑀫𑀺𑀢𑁆𑀢𑁄 𑀬𑀫𑀢𑀕𑁆𑀕𑀺 𑀅𑀗𑁆𑀕𑀻𑀭𑀲𑁄 𑀪𑀸𑀭𑀤𑁆𑀯𑀸𑀚𑁄 𑀯𑀸𑀲𑁂𑀝𑁆𑀞𑁄 𑀓𑀲𑁆𑀲𑀧𑁄 𑀪𑀕𑀼, 𑀢𑁂𑀧𑀺 𑀦 𑀏𑀯𑀫𑀸𑀳𑀁𑀲𑀼 𑁋 ‘𑀫𑀬𑀫𑁂𑀢𑀁 𑀚𑀸𑀦𑀸𑀫, 𑀫𑀬𑀫𑁂𑀢𑀁 𑀧𑀲𑁆𑀲𑀸𑀫, 𑀬𑀢𑁆𑀣 𑀯𑀸 𑀩𑁆𑀭𑀳𑁆𑀫𑀸, 𑀬𑁂𑀦 𑀯𑀸 𑀩𑁆𑀭𑀳𑁆𑀫𑀸, 𑀬𑀳𑀺𑀁 𑀯𑀸 𑀩𑁆𑀭𑀳𑁆𑀫𑀸’𑀢𑀺. 𑀢𑁂𑀯 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀏𑀯𑀫𑀸𑀳𑀁𑀲𑀼 𑁋 ‘𑀬𑀁 𑀦 𑀚𑀸𑀦𑀸𑀫, 𑀬𑀁 𑀦 𑀧𑀲𑁆𑀲𑀸𑀫, 𑀢𑀲𑁆𑀲 𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑀁 𑀤𑁂𑀲𑁂𑀫. 𑀅𑀬𑀫𑁂𑀯 𑀉𑀚𑀼𑀫𑀕𑁆𑀕𑁄 𑀅𑀬𑀫𑀜𑁆𑀚𑀲𑀸𑀬𑀦𑁄 𑀦𑀺𑀬𑁆𑀬𑀸𑀦𑀺𑀓𑁄, 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀩𑁆𑀭𑀳𑁆𑀫𑀲𑀳𑀩𑁆𑀬𑀢𑀸𑀬𑀸’’’𑀢𑀺.

𑁫𑁨𑁮. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀯𑀸𑀲𑁂𑀝𑁆𑀞, 𑀦𑀦𑀼 𑀏𑀯𑀁 𑀲𑀦𑁆𑀢𑁂 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺? ‘‘𑀅𑀤𑁆𑀥𑀸 𑀔𑁄, 𑀪𑁄 𑀕𑁄𑀢𑀫, 𑀏𑀯𑀁 𑀲𑀦𑁆𑀢𑁂 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺.

‘‘𑀲𑀸𑀥𑀼, 𑀯𑀸𑀲𑁂𑀝𑁆𑀞, 𑀢𑁂 𑀯𑀢 [𑀢𑁂𑀯 (𑀓.)], 𑀯𑀸𑀲𑁂𑀝𑁆𑀞, 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀬𑀁 𑀦 𑀚𑀸𑀦𑀦𑁆𑀢𑀺, 𑀬𑀁 𑀦 𑀧𑀲𑁆𑀲𑀦𑁆𑀢𑀺, 𑀢𑀲𑁆𑀲 𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑀁 𑀤𑁂𑀲𑁂𑀲𑁆𑀲𑀦𑁆𑀢𑀺. ‘𑀅𑀬𑀫𑁂𑀯 𑀉𑀚𑀼𑀫𑀕𑁆𑀕𑁄, 𑀅𑀬𑀫𑀜𑁆𑀚𑀲𑀸𑀬𑀦𑁄 𑀦𑀺𑀬𑁆𑀬𑀸𑀦𑀺𑀓𑁄, 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀩𑁆𑀭𑀳𑁆𑀫𑀲𑀳𑀩𑁆𑀬𑀢𑀸𑀬𑀸’𑀢𑀺, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁫𑁨𑁯. ‘‘𑀲𑁂𑀬𑁆𑀬𑀣𑀸𑀧𑀺, 𑀯𑀸𑀲𑁂𑀝𑁆𑀞, 𑀅𑀦𑁆𑀥𑀯𑁂𑀡𑀺 𑀧𑀭𑀫𑁆𑀧𑀭𑀲𑀁𑀲𑀢𑁆𑀢𑀸 𑀧𑀼𑀭𑀺𑀫𑁄𑀧𑀺 𑀦 𑀧𑀲𑁆𑀲𑀢𑀺, 𑀫𑀚𑁆𑀛𑀺𑀫𑁄𑀧𑀺 𑀦 𑀧𑀲𑁆𑀲𑀢𑀺, 𑀧𑀘𑁆𑀙𑀺𑀫𑁄𑀧𑀺 𑀦 𑀧𑀲𑁆𑀲𑀢𑀺. 𑀏𑀯𑀫𑁂𑀯 𑀔𑁄, 𑀯𑀸𑀲𑁂𑀝𑁆𑀞, 𑀅𑀦𑁆𑀥𑀯𑁂𑀡𑀽𑀧𑀫𑀁 𑀫𑀜𑁆𑀜𑁂 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀪𑀸𑀲𑀺𑀢𑀁, 𑀧𑀼𑀭𑀺𑀫𑁄𑀧𑀺 𑀦 𑀧𑀲𑁆𑀲𑀢𑀺, 𑀫𑀚𑁆𑀛𑀺𑀫𑁄𑀧𑀺 𑀦 𑀧𑀲𑁆𑀲𑀢𑀺, 𑀧𑀘𑁆𑀙𑀺𑀫𑁄𑀧𑀺 𑀦 𑀧𑀲𑁆𑀲𑀢𑀺. 𑀢𑁂𑀲𑀫𑀺𑀤𑀁 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀪𑀸𑀲𑀺𑀢𑀁 𑀳𑀲𑁆𑀲𑀓𑀜𑁆𑀜𑁂𑀯 𑀲𑀫𑁆𑀧𑀚𑁆𑀚𑀢𑀺, 𑀦𑀸𑀫𑀓𑀜𑁆𑀜𑁂𑀯 𑀲𑀫𑁆𑀧𑀚𑁆𑀚𑀢𑀺, 𑀭𑀺𑀢𑁆𑀢𑀓𑀜𑁆𑀜𑁂𑀯 𑀲𑀫𑁆𑀧𑀚𑁆𑀚𑀢𑀺, 𑀢𑀼𑀘𑁆𑀙𑀓𑀜𑁆𑀜𑁂𑀯 𑀲𑀫𑁆𑀧𑀚𑁆𑀚𑀢𑀺.

𑁫𑁩𑁦. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀯𑀸𑀲𑁂𑀝𑁆𑀞, 𑀧𑀲𑁆𑀲𑀦𑁆𑀢𑀺 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑁂, 𑀅𑀜𑁆𑀜𑁂 𑀘𑀸𑀧𑀺 𑀩𑀳𑀼𑀚𑀦𑀸, 𑀬𑀢𑁄 𑀘 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀉𑀕𑁆𑀕𑀘𑁆𑀙𑀦𑁆𑀢𑀺, 𑀬𑀢𑁆𑀣 𑀘 𑀑𑀕𑀘𑁆𑀙𑀦𑁆𑀢𑀺, 𑀆𑀬𑀸𑀘𑀦𑁆𑀢𑀺 𑀣𑁄𑀫𑀬𑀦𑁆𑀢𑀺 𑀧𑀜𑁆𑀚𑀮𑀺𑀓𑀸 𑀦𑀫𑀲𑁆𑀲𑀫𑀸𑀦𑀸 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀻’’𑀢𑀺?

‘‘𑀏𑀯𑀁, 𑀪𑁄 𑀕𑁄𑀢𑀫, 𑀧𑀲𑁆𑀲𑀦𑁆𑀢𑀺 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑁂, 𑀅𑀜𑁆𑀜𑁂 𑀘𑀸𑀧𑀺 𑀩𑀳𑀼𑀚𑀦𑀸, 𑀬𑀢𑁄 𑀘 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀉𑀕𑁆𑀕𑀘𑁆𑀙𑀦𑁆𑀢𑀺, 𑀬𑀢𑁆𑀣 𑀘 𑀑𑀕𑀘𑁆𑀙𑀦𑁆𑀢𑀺, 𑀆𑀬𑀸𑀘𑀦𑁆𑀢𑀺 𑀣𑁄𑀫𑀬𑀦𑁆𑀢𑀺 𑀧𑀜𑁆𑀚𑀮𑀺𑀓𑀸 𑀦𑀫𑀲𑁆𑀲𑀫𑀸𑀦𑀸 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀻’’𑀢𑀺.

𑁫𑁩𑁧. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀯𑀸𑀲𑁂𑀝𑁆𑀞, 𑀬𑀁 𑀧𑀲𑁆𑀲𑀦𑁆𑀢𑀺 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑁂, 𑀅𑀜𑁆𑀜𑁂 𑀘𑀸𑀧𑀺 𑀩𑀳𑀼𑀚𑀦𑀸, 𑀬𑀢𑁄 𑀘 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀉𑀕𑁆𑀕𑀘𑁆𑀙𑀦𑁆𑀢𑀺, 𑀬𑀢𑁆𑀣 𑀘 𑀑𑀕𑀘𑁆𑀙𑀦𑁆𑀢𑀺, 𑀆𑀬𑀸𑀘𑀦𑁆𑀢𑀺 𑀣𑁄𑀫𑀬𑀦𑁆𑀢𑀺 𑀧𑀜𑁆𑀚𑀮𑀺𑀓𑀸 𑀦𑀫𑀲𑁆𑀲𑀫𑀸𑀦𑀸 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀺, 𑀧𑀳𑁄𑀦𑁆𑀢𑀺 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑀁 𑀤𑁂𑀲𑁂𑀢𑀼𑀁 𑁋 ‘‘𑀅𑀬𑀫𑁂𑀯 𑀉𑀚𑀼𑀫𑀕𑁆𑀕𑁄, 𑀅𑀬𑀫𑀜𑁆𑀚𑀲𑀸𑀬𑀦𑁄 𑀦𑀺𑀬𑁆𑀬𑀸𑀦𑀺𑀓𑁄, 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀲𑀳𑀩𑁆𑀬𑀢𑀸𑀬𑀸’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

‘‘𑀇𑀢𑀺 𑀓𑀺𑀭, 𑀯𑀸𑀲𑁂𑀝𑁆𑀞, 𑀬𑀁 𑀧𑀲𑁆𑀲𑀦𑁆𑀢𑀺 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑁂, 𑀅𑀜𑁆𑀜𑁂 𑀘𑀸𑀧𑀺 𑀩𑀳𑀼𑀚𑀦𑀸, 𑀬𑀢𑁄 𑀘 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀉𑀕𑁆𑀕𑀘𑁆𑀙𑀦𑁆𑀢𑀺, 𑀬𑀢𑁆𑀣 𑀘 𑀑𑀕𑀘𑁆𑀙𑀦𑁆𑀢𑀺, 𑀆𑀬𑀸𑀘𑀦𑁆𑀢𑀺 𑀣𑁄𑀫𑀬𑀦𑁆𑀢𑀺 𑀧𑀜𑁆𑀚𑀮𑀺𑀓𑀸 𑀦𑀫𑀲𑁆𑀲𑀫𑀸𑀦𑀸 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀦𑀧𑁆𑀧𑀳𑁄𑀦𑁆𑀢𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑀁 𑀤𑁂𑀲𑁂𑀢𑀼𑀁 𑁋 ‘‘𑀅𑀬𑀫𑁂𑀯 𑀉𑀚𑀼𑀫𑀕𑁆𑀕𑁄, 𑀅𑀬𑀫𑀜𑁆𑀚𑀲𑀸𑀬𑀦𑁄 𑀦𑀺𑀬𑁆𑀬𑀸𑀦𑀺𑀓𑁄, 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀲𑀳𑀩𑁆𑀬𑀢𑀸𑀬𑀸’’𑀢𑀺.

𑁫𑁩𑁨. ‘‘𑀇𑀢𑀺 𑀧𑀦 [𑀓𑀺𑀁 𑀧𑀦 (𑀲𑀻. 𑀲𑁆𑀬𑀸. 𑀧𑀻.)] 𑀦 𑀓𑀺𑀭 𑀢𑁂𑀯𑀺𑀚𑁆𑀚𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀩𑁆𑀭𑀳𑁆𑀫𑀸 𑀲𑀓𑁆𑀔𑀺𑀤𑀺𑀝𑁆𑀞𑁄. 𑀦𑀧𑀺 𑀓𑀺𑀭 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀆𑀘𑀭𑀺𑀬𑁂𑀳𑀺 𑀩𑁆𑀭𑀳𑁆𑀫𑀸 𑀲𑀓𑁆𑀔𑀺𑀤𑀺𑀝𑁆𑀞𑁄. 𑀦𑀧𑀺 𑀓𑀺𑀭 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑁂𑀳𑀺 𑀩𑁆𑀭𑀳𑁆𑀫𑀸 𑀲𑀓𑁆𑀔𑀺𑀤𑀺𑀝𑁆𑀞𑁄. 𑀦𑀧𑀺 𑀓𑀺𑀭 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀬𑀸𑀯 𑀲𑀢𑁆𑀢𑀫𑀸 [𑀲𑀢𑁆𑀢𑀫𑁂𑀳𑀺 (?)] 𑀆𑀘𑀭𑀺𑀬𑀸𑀫𑀳𑀬𑀼𑀕𑁂𑀳𑀺 𑀩𑁆𑀭𑀳𑁆𑀫𑀸 𑀲𑀓𑁆𑀔𑀺𑀤𑀺𑀝𑁆𑀞𑁄. 𑀬𑁂𑀧𑀺 𑀓𑀺𑀭 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀩𑁆𑀩𑀓𑀸 𑀇𑀲𑀬𑁄 𑀫𑀦𑁆𑀢𑀸𑀦𑀁 𑀓𑀢𑁆𑀢𑀸𑀭𑁄 𑀫𑀦𑁆𑀢𑀸𑀦𑀁 𑀧𑀯𑀢𑁆𑀢𑀸𑀭𑁄, 𑀬𑁂𑀲𑀫𑀺𑀤𑀁 𑀏𑀢𑀭𑀳𑀺 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀧𑁄𑀭𑀸𑀡𑀁 𑀫𑀦𑁆𑀢𑀧𑀤𑀁 𑀕𑀻𑀢𑀁 𑀧𑀯𑀼𑀢𑁆𑀢𑀁 𑀲𑀫𑀺𑀳𑀺𑀢𑀁, 𑀢𑀤𑀦𑀼𑀕𑀸𑀬𑀦𑁆𑀢𑀺, 𑀢𑀤𑀦𑀼𑀪𑀸𑀲𑀦𑁆𑀢𑀺, 𑀪𑀸𑀲𑀺𑀢𑀫𑀦𑀼𑀪𑀸𑀲𑀦𑁆𑀢𑀺, 𑀯𑀸𑀘𑀺𑀢𑀫𑀦𑀼𑀯𑀸𑀘𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀝𑁆𑀞𑀓𑁄 𑀯𑀸𑀫𑀓𑁄 𑀯𑀸𑀫𑀤𑁂𑀯𑁄 𑀯𑁂𑀲𑁆𑀲𑀸𑀫𑀺𑀢𑁆𑀢𑁄 𑀬𑀫𑀢𑀕𑁆𑀕𑀺 𑀅𑀗𑁆𑀕𑀻𑀭𑀲𑁄 𑀪𑀸𑀭𑀤𑁆𑀯𑀸𑀚𑁄 𑀯𑀸𑀲𑁂𑀝𑁆𑀞𑁄 𑀓𑀲𑁆𑀲𑀧𑁄 𑀪𑀕𑀼, 𑀢𑁂𑀧𑀺 𑀦 𑀏𑀯𑀫𑀸𑀳𑀁𑀲𑀼 𑁋 ‘‘𑀫𑀬𑀫𑁂𑀢𑀁 𑀚𑀸𑀦𑀸𑀫, 𑀫𑀬𑀫𑁂𑀢𑀁 𑀧𑀲𑁆𑀲𑀸𑀫, 𑀬𑀢𑁆𑀣 𑀯𑀸 𑀩𑁆𑀭𑀳𑁆𑀫𑀸, 𑀬𑁂𑀦 𑀯𑀸 𑀩𑁆𑀭𑀳𑁆𑀫𑀸, 𑀬𑀳𑀺𑀁 𑀯𑀸 𑀩𑁆𑀭𑀳𑁆𑀫𑀸’’𑀢𑀺. 𑀢𑁂𑀯 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀬𑀁 𑀦 𑀚𑀸𑀦𑀸𑀫, 𑀬𑀁 𑀦 𑀧𑀲𑁆𑀲𑀸𑀫, 𑀢𑀲𑁆𑀲 𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑀁 𑀤𑁂𑀲𑁂𑀫 𑁋 𑀅𑀬𑀫𑁂𑀯 𑀉𑀚𑀼𑀫𑀕𑁆𑀕𑁄 𑀅𑀬𑀫𑀜𑁆𑀚𑀲𑀸𑀬𑀦𑁄 𑀦𑀺𑀬𑁆𑀬𑀸𑀦𑀺𑀓𑁄 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀩𑁆𑀭𑀳𑁆𑀫𑀲𑀳𑀩𑁆𑀬𑀢𑀸𑀬𑀸’’𑀢𑀺.

𑁫𑁩𑁩. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀯𑀸𑀲𑁂𑀝𑁆𑀞, 𑀦𑀦𑀼 𑀏𑀯𑀁 𑀲𑀦𑁆𑀢𑁂 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺? ‘‘𑀅𑀤𑁆𑀥𑀸 𑀔𑁄, 𑀪𑁄 𑀕𑁄𑀢𑀫, 𑀏𑀯𑀁 𑀲𑀦𑁆𑀢𑁂 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺.

‘‘𑀲𑀸𑀥𑀼, 𑀯𑀸𑀲𑁂𑀝𑁆𑀞, 𑀢𑁂 𑀯𑀢, 𑀯𑀸𑀲𑁂𑀝𑁆𑀞, 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀬𑀁 𑀦 𑀚𑀸𑀦𑀦𑁆𑀢𑀺, 𑀬𑀁 𑀦 𑀧𑀲𑁆𑀲𑀦𑁆𑀢𑀺, 𑀢𑀲𑁆𑀲 𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑀁 𑀤𑁂𑀲𑁂𑀲𑁆𑀲𑀦𑁆𑀢𑀺 𑁋 ‘‘𑀅𑀬𑀫𑁂𑀯 𑀉𑀚𑀼𑀫𑀕𑁆𑀕𑁄, 𑀅𑀬𑀫𑀜𑁆𑀚𑀲𑀸𑀬𑀦𑁄 𑀦𑀺𑀬𑁆𑀬𑀸𑀦𑀺𑀓𑁄, 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀩𑁆𑀭𑀳𑁆𑀫𑀲𑀳𑀩𑁆𑀬𑀢𑀸𑀬𑀸’’𑀢𑀺, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑀚𑀦𑀧𑀤𑀓𑀮𑁆𑀬𑀸𑀡𑀻𑀉𑀧𑀫𑀸

𑁫𑁩𑁪. ‘‘𑀲𑁂𑀬𑁆𑀬𑀣𑀸𑀧𑀺, 𑀯𑀸𑀲𑁂𑀝𑁆𑀞, 𑀧𑀼𑀭𑀺𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀳𑀁 𑀬𑀸 𑀇𑀫𑀲𑁆𑀫𑀺𑀁 𑀚𑀦𑀧𑀤𑁂 𑀚𑀦𑀧𑀤𑀓𑀮𑁆𑀬𑀸𑀡𑀻, 𑀢𑀁 𑀇𑀘𑁆𑀙𑀸𑀫𑀺, 𑀢𑀁 𑀓𑀸𑀫𑁂𑀫𑀻’’𑀢𑀺. 𑀢𑀫𑁂𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘‘𑀅𑀫𑁆𑀪𑁄 𑀧𑀼𑀭𑀺𑀲, 𑀬𑀁 𑀢𑁆𑀯𑀁 𑀚𑀦𑀧𑀤𑀓𑀮𑁆𑀬𑀸𑀡𑀺𑀁 𑀇𑀘𑁆𑀙𑀲𑀺 𑀓𑀸𑀫𑁂𑀲𑀺, 𑀚𑀸𑀦𑀸𑀲𑀺 𑀢𑀁 𑀚𑀦𑀧𑀤𑀓𑀮𑁆𑀬𑀸𑀡𑀺𑀁 𑁋 𑀔𑀢𑁆𑀢𑀺𑀬𑀻 𑀯𑀸 𑀩𑁆𑀭𑀸𑀳𑁆𑀫𑀡𑀻 𑀯𑀸 𑀯𑁂𑀲𑁆𑀲𑀻 𑀯𑀸 𑀲𑀼𑀤𑁆𑀤𑀻 𑀯𑀸’’𑀢𑀺? 𑀇𑀢𑀺 𑀧𑀼𑀝𑁆𑀞𑁄 ‘‘𑀦𑁄’’𑀢𑀺 𑀯𑀤𑁂𑀬𑁆𑀬.

‘‘𑀢𑀫𑁂𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘‘𑀅𑀫𑁆𑀪𑁄 𑀧𑀼𑀭𑀺𑀲, 𑀬𑀁 𑀢𑁆𑀯𑀁 𑀚𑀦𑀧𑀤𑀓𑀮𑁆𑀬𑀸𑀡𑀺𑀁 𑀇𑀘𑁆𑀙𑀲𑀺 𑀓𑀸𑀫𑁂𑀲𑀺, 𑀚𑀸𑀦𑀸𑀲𑀺 𑀢𑀁 𑀚𑀦𑀧𑀤𑀓𑀮𑁆𑀬𑀸𑀡𑀺𑀁 𑁋 𑀏𑀯𑀁𑀦𑀸𑀫𑀸 𑀏𑀯𑀁𑀕𑁄𑀢𑁆𑀢𑀸𑀢𑀺 𑀯𑀸, 𑀤𑀻𑀖𑀸 𑀯𑀸 𑀭𑀲𑁆𑀲𑀸 𑀯𑀸 𑀫𑀚𑁆𑀛𑀺𑀫𑀸 𑀯𑀸 𑀓𑀸𑀴𑀻 𑀯𑀸 𑀲𑀸𑀫𑀸 𑀯𑀸 𑀫𑀗𑁆𑀕𑀼𑀭𑀘𑁆𑀙𑀯𑀻 𑀯𑀸𑀢𑀺, 𑀅𑀫𑀼𑀓𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀦𑀕𑀭𑁂 𑀯𑀸’’𑀢𑀺? 𑀇𑀢𑀺 𑀧𑀼𑀝𑁆𑀞𑁄 ‘𑀦𑁄’𑀢𑀺 𑀯𑀤𑁂𑀬𑁆𑀬. 𑀢𑀫𑁂𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘‘𑀅𑀫𑁆𑀪𑁄 𑀧𑀼𑀭𑀺𑀲, 𑀬𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺 𑀦 𑀧𑀲𑁆𑀲𑀲𑀺, 𑀢𑀁 𑀢𑁆𑀯𑀁 𑀇𑀘𑁆𑀙𑀲𑀺 𑀓𑀸𑀫𑁂𑀲𑀻’’𑀢𑀺? 𑀇𑀢𑀺 𑀧𑀼𑀝𑁆𑀞𑁄 ‘‘𑀆𑀫𑀸’’𑀢𑀺 𑀯𑀤𑁂𑀬𑁆𑀬.

𑁫𑁩𑁫. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀯𑀸𑀲𑁂𑀝𑁆𑀞, 𑀦𑀦𑀼 𑀏𑀯𑀁 𑀲𑀦𑁆𑀢𑁂 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺? ‘‘𑀅𑀤𑁆𑀥𑀸 𑀔𑁄, 𑀪𑁄 𑀕𑁄𑀢𑀫, 𑀏𑀯𑀁 𑀲𑀦𑁆𑀢𑁂 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺.

𑁫𑁩𑁬. ‘‘𑀏𑀯𑀫𑁂𑀯 𑀔𑁄, 𑀯𑀸𑀲𑁂𑀝𑁆𑀞, 𑀦 𑀓𑀺𑀭 𑀢𑁂𑀯𑀺𑀚𑁆𑀚𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀩𑁆𑀭𑀳𑁆𑀫𑀸 𑀲𑀓𑁆𑀔𑀺𑀤𑀺𑀝𑁆𑀞𑁄, 𑀦𑀧𑀺 𑀓𑀺𑀭 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀆𑀘𑀭𑀺𑀬𑁂𑀳𑀺 𑀩𑁆𑀭𑀳𑁆𑀫𑀸 𑀲𑀓𑁆𑀔𑀺𑀤𑀺𑀝𑁆𑀞𑁄, 𑀦𑀧𑀺 𑀓𑀺𑀭 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑁂𑀳𑀺 𑀩𑁆𑀭𑀳𑁆𑀫𑀸 𑀲𑀓𑁆𑀔𑀺𑀤𑀺𑀝𑁆𑀞𑁄. 𑀦𑀧𑀺 𑀓𑀺𑀭 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀬𑀸𑀯 𑀲𑀢𑁆𑀢𑀫𑀸 𑀆𑀘𑀭𑀺𑀬𑀸𑀫𑀳𑀬𑀼𑀕𑁂𑀳𑀺 𑀩𑁆𑀭𑀳𑁆𑀫𑀸 𑀲𑀓𑁆𑀔𑀺𑀤𑀺𑀝𑁆𑀞𑁄. 𑀬𑁂𑀧𑀺 𑀓𑀺𑀭 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀩𑁆𑀩𑀓𑀸 𑀇𑀲𑀬𑁄 𑀫𑀦𑁆𑀢𑀸𑀦𑀁 𑀓𑀢𑁆𑀢𑀸𑀭𑁄 𑀫𑀦𑁆𑀢𑀸𑀦𑀁 𑀧𑀯𑀢𑁆𑀢𑀸𑀭𑁄, 𑀬𑁂𑀲𑀫𑀺𑀤𑀁 𑀏𑀢𑀭𑀳𑀺 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀧𑁄𑀭𑀸𑀡𑀁 𑀫𑀦𑁆𑀢𑀧𑀤𑀁 𑀕𑀻𑀢𑀁 𑀧𑀯𑀼𑀢𑁆𑀢𑀁 𑀲𑀫𑀺𑀳𑀺𑀢𑀁, 𑀢𑀤𑀦𑀼𑀕𑀸𑀬𑀦𑁆𑀢𑀺, 𑀢𑀤𑀦𑀼𑀪𑀸𑀲𑀦𑁆𑀢𑀺, 𑀪𑀸𑀲𑀺𑀢𑀫𑀦𑀼𑀪𑀸𑀲𑀦𑁆𑀢𑀺, 𑀯𑀸𑀘𑀺𑀢𑀫𑀦𑀼𑀯𑀸𑀘𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀝𑁆𑀞𑀓𑁄 𑀯𑀸𑀫𑀓𑁄 𑀯𑀸𑀫𑀤𑁂𑀯𑁄 𑀯𑁂𑀲𑁆𑀲𑀸𑀫𑀺𑀢𑁆𑀢𑁄 𑀬𑀫𑀢𑀕𑁆𑀕𑀺 𑀅𑀗𑁆𑀕𑀻𑀭𑀲𑁄 𑀪𑀸𑀭𑀤𑁆𑀯𑀸𑀚𑁄 𑀯𑀸𑀲𑁂𑀝𑁆𑀞𑁄 𑀓𑀲𑁆𑀲𑀧𑁄 𑀪𑀕𑀼, 𑀢𑁂𑀧𑀺 𑀦 𑀏𑀯𑀫𑀸𑀳𑀁𑀲𑀼 𑁋 ‘‘𑀫𑀬𑀫𑁂𑀢𑀁 𑀚𑀸𑀦𑀸𑀫, 𑀫𑀬𑀫𑁂𑀢𑀁 𑀧𑀲𑁆𑀲𑀸𑀫, 𑀬𑀢𑁆𑀣 𑀯𑀸 𑀩𑁆𑀭𑀳𑁆𑀫𑀸, 𑀬𑁂𑀦 𑀯𑀸 𑀩𑁆𑀭𑀳𑁆𑀫𑀸, 𑀬𑀳𑀺𑀁 𑀯𑀸 𑀩𑁆𑀭𑀳𑁆𑀫𑀸’’𑀢𑀺. 𑀢𑁂𑀯 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀬𑀁 𑀦 𑀚𑀸𑀦𑀸𑀫, 𑀬𑀁 𑀦 𑀧𑀲𑁆𑀲𑀸𑀫, 𑀢𑀲𑁆𑀲 𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑀁 𑀤𑁂𑀲𑁂𑀫 𑁋 𑀅𑀬𑀫𑁂𑀯 𑀉𑀚𑀼𑀫𑀕𑁆𑀕𑁄 𑀅𑀬𑀫𑀜𑁆𑀚𑀲𑀸𑀬𑀦𑁄 𑀦𑀺𑀬𑁆𑀬𑀸𑀦𑀺𑀓𑁄 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀩𑁆𑀭𑀳𑁆𑀫𑀲𑀳𑀩𑁆𑀬𑀢𑀸𑀬𑀸’’𑀢𑀺.

𑁫𑁩𑁭. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀯𑀸𑀲𑁂𑀝𑁆𑀞, 𑀦𑀦𑀼 𑀏𑀯𑀁 𑀲𑀦𑁆𑀢𑁂 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺? ‘‘𑀅𑀤𑁆𑀥𑀸 𑀔𑁄, 𑀪𑁄 𑀕𑁄𑀢𑀫, 𑀏𑀯𑀁 𑀲𑀦𑁆𑀢𑁂 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺.

‘‘𑀲𑀸𑀥𑀼, 𑀯𑀸𑀲𑁂𑀝𑁆𑀞, 𑀢𑁂 𑀯𑀢, 𑀯𑀸𑀲𑁂𑀝𑁆𑀞, 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀬𑀁 𑀦 𑀚𑀸𑀦𑀦𑁆𑀢𑀺, 𑀬𑀁 𑀦 𑀧𑀲𑁆𑀲𑀦𑁆𑀢𑀺, 𑀢𑀲𑁆𑀲 𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑀁 𑀤𑁂𑀲𑁂𑀲𑁆𑀲𑀦𑁆𑀢𑀺 𑁋 𑀅𑀬𑀫𑁂𑀯 𑀉𑀚𑀼𑀫𑀕𑁆𑀕𑁄 𑀅𑀬𑀫𑀜𑁆𑀚𑀲𑀸𑀬𑀦𑁄 𑀦𑀺𑀬𑁆𑀬𑀸𑀦𑀺𑀓𑁄 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀩𑁆𑀭𑀳𑁆𑀫𑀲𑀳𑀩𑁆𑀬𑀢𑀸𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑀦𑀺𑀲𑁆𑀲𑁂𑀡𑀻𑀉𑀧𑀫𑀸

𑁫𑁩𑁮. ‘‘𑀲𑁂𑀬𑁆𑀬𑀣𑀸𑀧𑀺, 𑀯𑀸𑀲𑁂𑀝𑁆𑀞, 𑀧𑀼𑀭𑀺𑀲𑁄 𑀘𑀸𑀢𑀼𑀫𑀳𑀸𑀧𑀣𑁂 𑀦𑀺𑀲𑁆𑀲𑁂𑀡𑀺𑀁 𑀓𑀭𑁂𑀬𑁆𑀬 𑁋 𑀧𑀸𑀲𑀸𑀤𑀲𑁆𑀲 𑀆𑀭𑁄𑀳𑀡𑀸𑀬. 𑀢𑀫𑁂𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘‘𑀅𑀫𑁆𑀪𑁄 𑀧𑀼𑀭𑀺𑀲, 𑀬𑀲𑁆𑀲 𑀢𑁆𑀯𑀁 [𑀬𑀁 𑀢𑁆𑀯𑀁 (𑀲𑁆𑀬𑀸.)] 𑀧𑀸𑀲𑀸𑀤𑀲𑁆𑀲 𑀆𑀭𑁄𑀳𑀡𑀸𑀬 𑀦𑀺𑀲𑁆𑀲𑁂𑀡𑀺𑀁 𑀓𑀭𑁄𑀲𑀺, 𑀚𑀸𑀦𑀸𑀲𑀺 𑀢𑀁 𑀧𑀸𑀲𑀸𑀤𑀁 𑁋 𑀧𑀼𑀭𑀢𑁆𑀣𑀺𑀫𑀸𑀬 𑀯𑀸 𑀤𑀺𑀲𑀸𑀬 𑀤𑀓𑁆𑀔𑀺𑀡𑀸𑀬 𑀯𑀸 𑀤𑀺𑀲𑀸𑀬 𑀧𑀘𑁆𑀙𑀺𑀫𑀸𑀬 𑀯𑀸 𑀤𑀺𑀲𑀸𑀬 𑀉𑀢𑁆𑀢𑀭𑀸𑀬 𑀯𑀸 𑀤𑀺𑀲𑀸𑀬 𑀉𑀘𑁆𑀘𑁄 𑀯𑀸 𑀦𑀻𑀘𑁄 𑀯𑀸 𑀫𑀚𑁆𑀛𑀺𑀫𑁄 𑀯𑀸’’𑀢𑀺? 𑀇𑀢𑀺 𑀧𑀼𑀝𑁆𑀞𑁄 ‘‘𑀦𑁄’’𑀢𑀺 𑀯𑀤𑁂𑀬𑁆𑀬.

‘‘𑀢𑀫𑁂𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘‘𑀅𑀫𑁆𑀪𑁄 𑀧𑀼𑀭𑀺𑀲, 𑀬𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺, 𑀦 𑀧𑀲𑁆𑀲𑀲𑀺, 𑀢𑀲𑁆𑀲 𑀢𑁆𑀯𑀁 𑀧𑀸𑀲𑀸𑀤𑀲𑁆𑀲 𑀆𑀭𑁄𑀳𑀡𑀸𑀬 𑀦𑀺𑀲𑁆𑀲𑁂𑀡𑀺𑀁 𑀓𑀭𑁄𑀲𑀻’’𑀢𑀺? 𑀇𑀢𑀺 𑀧𑀼𑀝𑁆𑀞𑁄 ‘‘𑀆𑀫𑀸’’𑀢𑀺 𑀯𑀤𑁂𑀬𑁆𑀬.

𑁫𑁩𑁯. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀯𑀸𑀲𑁂𑀝𑁆𑀞, 𑀦𑀦𑀼 𑀏𑀯𑀁 𑀲𑀦𑁆𑀢𑁂 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺? ‘‘𑀅𑀤𑁆𑀥𑀸 𑀔𑁄, 𑀪𑁄 𑀕𑁄𑀢𑀫, 𑀏𑀯𑀁 𑀲𑀦𑁆𑀢𑁂 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺.

𑁫𑁪𑁦. ‘‘𑀏𑀯𑀫𑁂𑀯 𑀔𑁄, 𑀯𑀸𑀲𑁂𑀝𑁆𑀞, 𑀦 𑀓𑀺𑀭 𑀢𑁂𑀯𑀺𑀚𑁆𑀚𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀩𑁆𑀭𑀳𑁆𑀫𑀸 𑀲𑀓𑁆𑀔𑀺𑀤𑀺𑀝𑁆𑀞𑁄, 𑀦𑀧𑀺 𑀓𑀺𑀭 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀆𑀘𑀭𑀺𑀬𑁂𑀳𑀺 𑀩𑁆𑀭𑀳𑁆𑀫𑀸 𑀲𑀓𑁆𑀔𑀺𑀤𑀺𑀝𑁆𑀞𑁄, 𑀦𑀧𑀺 𑀓𑀺𑀭 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑁂𑀳𑀺 𑀩𑁆𑀭𑀳𑁆𑀫𑀸 𑀲𑀓𑁆𑀔𑀺𑀤𑀺𑀝𑁆𑀞𑁄, 𑀦𑀧𑀺 𑀓𑀺𑀭 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀬𑀸𑀯 𑀲𑀢𑁆𑀢𑀫𑀸 𑀆𑀘𑀭𑀺𑀬𑀸𑀫𑀳𑀬𑀼𑀕𑁂𑀳𑀺 𑀩𑁆𑀭𑀳𑁆𑀫𑀸 𑀲𑀓𑁆𑀔𑀺𑀤𑀺𑀝𑁆𑀞𑁄. 𑀬𑁂𑀧𑀺 𑀓𑀺𑀭 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀩𑁆𑀩𑀓𑀸 𑀇𑀲𑀬𑁄 𑀫𑀦𑁆𑀢𑀸𑀦𑀁 𑀓𑀢𑁆𑀢𑀸𑀭𑁄 𑀫𑀦𑁆𑀢𑀸𑀦𑀁 𑀧𑀯𑀢𑁆𑀢𑀸𑀭𑁄, 𑀬𑁂𑀲𑀫𑀺𑀤𑀁 𑀏𑀢𑀭𑀳𑀺 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀧𑁄𑀭𑀸𑀡𑀁 𑀫𑀦𑁆𑀢𑀧𑀤𑀁 𑀕𑀻𑀢𑀁 𑀧𑀯𑀼𑀢𑁆𑀢𑀁 𑀲𑀫𑀺𑀳𑀺𑀢𑀁, 𑀢𑀤𑀦𑀼𑀕𑀸𑀬𑀦𑁆𑀢𑀺, 𑀢𑀤𑀦𑀼𑀪𑀸𑀲𑀦𑁆𑀢𑀺, 𑀪𑀸𑀲𑀺𑀢𑀫𑀦𑀼𑀪𑀸𑀲𑀦𑁆𑀢𑀺, 𑀯𑀸𑀘𑀺𑀢𑀫𑀦𑀼𑀯𑀸𑀘𑁂𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀝𑁆𑀞𑀓𑁄 𑀯𑀸𑀫𑀓𑁄 𑀯𑀸𑀫𑀤𑁂𑀯𑁄 𑀯𑁂𑀲𑁆𑀲𑀸𑀫𑀺𑀢𑁆𑀢𑁄 𑀬𑀫𑀢𑀕𑁆𑀕𑀺 𑀅𑀗𑁆𑀕𑀻𑀭𑀲𑁄 𑀪𑀸𑀭𑀤𑁆𑀯𑀸𑀚𑁄 𑀯𑀸𑀲𑁂𑀝𑁆𑀞𑁄 𑀓𑀲𑁆𑀲𑀧𑁄 𑀪𑀕𑀼, 𑀢𑁂𑀧𑀺 𑀦 𑀏𑀯𑀫𑀸𑀳𑀁𑀲𑀼 𑁋 𑀫𑀬𑀫𑁂𑀢𑀁 𑀚𑀸𑀦𑀸𑀫, 𑀫𑀬𑀫𑁂𑀢𑀁 𑀧𑀲𑁆𑀲𑀸𑀫, 𑀬𑀢𑁆𑀣 𑀯𑀸 𑀩𑁆𑀭𑀳𑁆𑀫𑀸, 𑀬𑁂𑀦 𑀯𑀸 𑀩𑁆𑀭𑀳𑁆𑀫𑀸, 𑀬𑀳𑀺𑀁 𑀯𑀸 𑀩𑁆𑀭𑀳𑁆𑀫𑀸𑀢𑀺. 𑀢𑁂𑀯 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀬𑀁 𑀦 𑀚𑀸𑀦𑀸𑀫, 𑀬𑀁 𑀦 𑀧𑀲𑁆𑀲𑀸𑀫, 𑀢𑀲𑁆𑀲 𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑀁 𑀤𑁂𑀲𑁂𑀫, 𑀅𑀬𑀫𑁂𑀯 𑀉𑀚𑀼𑀫𑀕𑁆𑀕𑁄 𑀅𑀬𑀫𑀜𑁆𑀚𑀲𑀸𑀬𑀦𑁄 𑀦𑀺𑀬𑁆𑀬𑀸𑀦𑀺𑀓𑁄 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀩𑁆𑀭𑀳𑁆𑀫𑀲𑀳𑀩𑁆𑀬𑀢𑀸𑀬𑀸’’𑀢𑀺.

𑁫𑁪𑁧. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀯𑀸𑀲𑁂𑀝𑁆𑀞, 𑀦𑀦𑀼 𑀏𑀯𑀁 𑀲𑀦𑁆𑀢𑁂 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺? ‘‘𑀅𑀤𑁆𑀥𑀸 𑀔𑁄, 𑀪𑁄 𑀕𑁄𑀢𑀫, 𑀏𑀯𑀁 𑀲𑀦𑁆𑀢𑁂 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀧𑁆𑀧𑀸𑀝𑀺𑀳𑀻𑀭𑀓𑀢𑀁 𑀪𑀸𑀲𑀺𑀢𑀁 𑀲𑀫𑁆𑀧𑀚𑁆𑀚𑀢𑀻’’𑀢𑀺.

‘‘𑀲𑀸𑀥𑀼, 𑀯𑀸𑀲𑁂𑀝𑁆𑀞. 𑀢𑁂 𑀯𑀢, 𑀯𑀸𑀲𑁂𑀝𑁆𑀞, 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀬𑀁 𑀦 𑀚𑀸𑀦𑀦𑁆𑀢𑀺, 𑀬𑀁 𑀦 𑀧𑀲𑁆𑀲𑀦𑁆𑀢𑀺, 𑀢𑀲𑁆𑀲 𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑀁 𑀤𑁂𑀲𑁂𑀲𑁆𑀲𑀦𑁆𑀢𑀺. 𑀅𑀬𑀫𑁂𑀯 𑀉𑀚𑀼𑀫𑀕𑁆𑀕𑁄 𑀅𑀬𑀫𑀜𑁆𑀚𑀲𑀸𑀬𑀦𑁄 𑀦𑀺𑀬𑁆𑀬𑀸𑀦𑀺𑀓𑁄 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀩𑁆𑀭𑀳𑁆𑀫𑀲𑀩𑁆𑀬𑀢𑀸𑀬𑀸𑀢𑀺, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑀅𑀘𑀺𑀭𑀯𑀢𑀻𑀦𑀤𑀻𑀉𑀧𑀫𑀸

𑁫𑁪𑁨. ‘‘𑀲𑁂𑀬𑁆𑀬𑀣𑀸𑀧𑀺, 𑀯𑀸𑀲𑁂𑀝𑁆𑀞, 𑀅𑀬𑀁 𑀅𑀘𑀺𑀭𑀯𑀢𑀻 𑀦𑀤𑀻 𑀧𑀽𑀭𑀸 𑀉𑀤𑀓𑀲𑁆𑀲 𑀲𑀫𑀢𑀺𑀢𑁆𑀢𑀺𑀓𑀸 𑀓𑀸𑀓𑀧𑁂𑀬𑁆𑀬𑀸. 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀧𑀸𑀭𑀢𑁆𑀣𑀺𑀓𑁄 𑀧𑀸𑀭𑀕𑀯𑁂𑀲𑀻 𑀧𑀸𑀭𑀕𑀸𑀫𑀻 𑀧𑀸𑀭𑀁 𑀢𑀭𑀺𑀢𑀼𑀓𑀸𑀫𑁄. 𑀲𑁄 𑀑𑀭𑀺𑀫𑁂 𑀢𑀻𑀭𑁂 𑀞𑀺𑀢𑁄 𑀧𑀸𑀭𑀺𑀫𑀁 𑀢𑀻𑀭𑀁 𑀅𑀯𑁆𑀳𑁂𑀬𑁆𑀬 𑁋 ‘‘𑀏𑀳𑀺 𑀧𑀸𑀭𑀸𑀧𑀸𑀭𑀁, 𑀏𑀳𑀺 𑀧𑀸𑀭𑀸𑀧𑀸𑀭’’𑀦𑁆𑀢𑀺.

𑁫𑁪𑁩. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀯𑀸𑀲𑁂𑀝𑁆𑀞, 𑀅𑀧𑀺 𑀦𑀼 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀯𑁆𑀳𑀸𑀬𑀦𑀳𑁂𑀢𑀼 𑀯𑀸 𑀆𑀬𑀸𑀘𑀦𑀳𑁂𑀢𑀼 𑀯𑀸 𑀧𑀢𑁆𑀣𑀦𑀳𑁂𑀢𑀼 𑀯𑀸 𑀅𑀪𑀺𑀦𑀦𑁆𑀤𑀦𑀳𑁂𑀢𑀼 𑀯𑀸 𑀅𑀘𑀺𑀭𑀯𑀢𑀺𑀬𑀸 𑀦𑀤𑀺𑀬𑀸 𑀧𑀸𑀭𑀺𑀫𑀁 𑀢𑀻𑀭𑀁 𑀑𑀭𑀺𑀫𑀁 𑀢𑀻𑀭𑀁 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

𑁫𑁪𑁪. ‘‘𑀏𑀯𑀫𑁂𑀯 𑀔𑁄, 𑀯𑀸𑀲𑁂𑀝𑁆𑀞, 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀬𑁂 𑀥𑀫𑁆𑀫𑀸 𑀩𑁆𑀭𑀸𑀳𑁆𑀫𑀡𑀓𑀸𑀭𑀓𑀸 𑀢𑁂 𑀥𑀫𑁆𑀫𑁂 𑀧𑀳𑀸𑀬 𑀯𑀢𑁆𑀢𑀫𑀸𑀦𑀸, 𑀬𑁂 𑀥𑀫𑁆𑀫𑀸 𑀅𑀩𑁆𑀭𑀸𑀳𑁆𑀫𑀡𑀓𑀸𑀭𑀓𑀸 𑀢𑁂 𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀫𑀸𑀦𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀇𑀦𑁆𑀤𑀫𑀯𑁆𑀳𑀬𑀸𑀫, 𑀲𑁄𑀫𑀫𑀯𑁆𑀳𑀬𑀸𑀫, 𑀯𑀭𑀼𑀡𑀫𑀯𑁆𑀳𑀬𑀸𑀫, 𑀈𑀲𑀸𑀦𑀫𑀯𑁆𑀳𑀬𑀸𑀫, 𑀧𑀚𑀸𑀧𑀢𑀺𑀫𑀯𑁆𑀳𑀬𑀸𑀫, 𑀩𑁆𑀭𑀳𑁆𑀫𑀫𑀯𑁆𑀳𑀬𑀸𑀫, 𑀫𑀳𑀺𑀤𑁆𑀥𑀺𑀫𑀯𑁆𑀳𑀬𑀸𑀫, 𑀬𑀫𑀫𑀯𑁆𑀳𑀬𑀸𑀫𑀸’’𑀢𑀺.

‘‘𑀢𑁂 𑀯𑀢, 𑀯𑀸𑀲𑁂𑀝𑁆𑀞, 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀬𑁂 𑀥𑀫𑁆𑀫𑀸 𑀩𑁆𑀭𑀸𑀳𑁆𑀫𑀡𑀓𑀸𑀭𑀓𑀸 𑀢𑁂 𑀥𑀫𑁆𑀫𑁂 𑀧𑀳𑀸𑀬 𑀯𑀢𑁆𑀢𑀫𑀸𑀦𑀸, 𑀬𑁂 𑀥𑀫𑁆𑀫𑀸 𑀅𑀩𑁆𑀭𑀸𑀳𑁆𑀫𑀡𑀓𑀸𑀭𑀓𑀸 𑀢𑁂 𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀫𑀸𑀦𑀸 𑀅𑀯𑁆𑀳𑀸𑀬𑀦𑀳𑁂𑀢𑀼 𑀯𑀸 𑀆𑀬𑀸𑀘𑀦𑀳𑁂𑀢𑀼 𑀯𑀸 𑀧𑀢𑁆𑀣𑀦𑀳𑁂𑀢𑀼 𑀯𑀸 𑀅𑀪𑀺𑀦𑀦𑁆𑀤𑀦𑀳𑁂𑀢𑀼 𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀩𑁆𑀭𑀳𑁆𑀫𑀸𑀦𑀁 𑀲𑀳𑀩𑁆𑀬𑀽𑀧𑀕𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁫𑁪𑁫. ‘‘𑀲𑁂𑀬𑁆𑀬𑀣𑀸𑀧𑀺, 𑀯𑀸𑀲𑁂𑀝𑁆𑀞, 𑀅𑀬𑀁 𑀅𑀘𑀺𑀭𑀯𑀢𑀻 𑀦𑀤𑀻 𑀧𑀽𑀭𑀸 𑀉𑀤𑀓𑀲𑁆𑀲 𑀲𑀫𑀢𑀺𑀢𑁆𑀢𑀺𑀓𑀸 𑀓𑀸𑀓𑀧𑁂𑀬𑁆𑀬𑀸. 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀧𑀸𑀭𑀢𑁆𑀣𑀺𑀓𑁄 𑀧𑀸𑀭𑀕𑀯𑁂𑀲𑀻 𑀧𑀸𑀭𑀕𑀸𑀫𑀻 𑀧𑀸𑀭𑀁 𑀢𑀭𑀺𑀢𑀼𑀓𑀸𑀫𑁄. 𑀲𑁄 𑀑𑀭𑀺𑀫𑁂 𑀢𑀻𑀭𑁂 𑀤𑀴𑁆𑀳𑀸𑀬 𑀅𑀦𑁆𑀤𑀼𑀬𑀸 𑀧𑀘𑁆𑀙𑀸𑀩𑀸𑀳𑀁 𑀕𑀸𑀴𑁆𑀳𑀩𑀦𑁆𑀥𑀦𑀁 𑀩𑀤𑁆𑀥𑁄.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀯𑀸𑀲𑁂𑀝𑁆𑀞, 𑀅𑀧𑀺 𑀦𑀼 𑀲𑁄 𑀧𑀼𑀭𑀺𑀲𑁄 𑀅𑀘𑀺𑀭𑀯𑀢𑀺𑀬𑀸 𑀦𑀤𑀺𑀬𑀸 𑀑𑀭𑀺𑀫𑀸 𑀢𑀻𑀭𑀸 𑀧𑀸𑀭𑀺𑀫𑀁 𑀢𑀻𑀭𑀁 𑀕𑀘𑁆𑀙𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

𑁫𑁪𑁬. ‘‘𑀏𑀯𑀫𑁂𑀯 𑀔𑁄, 𑀯𑀸𑀲𑁂𑀝𑁆𑀞, 𑀧𑀜𑁆𑀘𑀺𑀫𑁂 𑀓𑀸𑀫𑀕𑀼𑀡𑀸 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀅𑀦𑁆𑀤𑀽𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺, 𑀩𑀦𑁆𑀥𑀦𑀦𑁆𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀓𑀢𑀫𑁂 𑀧𑀜𑁆𑀘? 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸…𑀧𑁂… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 𑀕𑀦𑁆𑀥𑀸… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸.

‘‘𑀇𑀫𑁂 𑀔𑁄, 𑀯𑀸𑀲𑁂𑀝𑁆𑀞, 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀅𑀦𑁆𑀤𑀽𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺, 𑀩𑀦𑁆𑀥𑀦𑀦𑁆𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀫𑁂 𑀔𑁄 𑀯𑀸𑀲𑁂𑀝𑁆𑀞 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀧𑀦𑁆𑀦𑀸 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄 𑀅𑀦𑀺𑀲𑁆𑀲𑀭𑀡𑀧𑀜𑁆𑀜𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀢𑁂 𑀯𑀢, 𑀯𑀸𑀲𑁂𑀝𑁆𑀞, 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀬𑁂 𑀥𑀫𑁆𑀫𑀸 𑀩𑁆𑀭𑀸𑀳𑁆𑀫𑀡𑀓𑀸𑀭𑀓𑀸, 𑀢𑁂 𑀥𑀫𑁆𑀫𑁂 𑀧𑀳𑀸𑀬 𑀯𑀢𑁆𑀢𑀫𑀸𑀦𑀸, 𑀬𑁂 𑀥𑀫𑁆𑀫𑀸 𑀅𑀩𑁆𑀭𑀸𑀳𑁆𑀫𑀡𑀓𑀸𑀭𑀓𑀸, 𑀢𑁂 𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀫𑀸𑀦𑀸 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀕𑀥𑀺𑀢𑀸 𑀫𑀼𑀘𑁆𑀙𑀺𑀢𑀸 𑀅𑀚𑁆𑀛𑁄𑀧𑀦𑁆𑀦𑀸 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄 𑀅𑀦𑀺𑀲𑁆𑀲𑀭𑀡𑀧𑀜𑁆𑀜𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀓𑀸𑀫𑀦𑁆𑀤𑀼𑀩𑀦𑁆𑀥𑀦𑀩𑀤𑁆𑀥𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀩𑁆𑀭𑀳𑁆𑀫𑀸𑀦𑀁 𑀲𑀳𑀩𑁆𑀬𑀽𑀧𑀕𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁫𑁪𑁭. ‘‘𑀲𑁂𑀬𑁆𑀬𑀣𑀸𑀧𑀺, 𑀯𑀸𑀲𑁂𑀝𑁆𑀞, 𑀅𑀬𑀁 𑀅𑀘𑀺𑀭𑀯𑀢𑀻 𑀦𑀤𑀻 𑀧𑀽𑀭𑀸 𑀉𑀤𑀓𑀲𑁆𑀲 𑀲𑀫𑀢𑀺𑀢𑁆𑀢𑀺𑀓𑀸 𑀓𑀸𑀓𑀧𑁂𑀬𑁆𑀬𑀸. 𑀅𑀣 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀧𑀸𑀭𑀢𑁆𑀣𑀺𑀓𑁄 𑀧𑀸𑀭𑀕𑀯𑁂𑀲𑀻 𑀧𑀸𑀭𑀕𑀸𑀫𑀻 𑀧𑀸𑀭𑀁 𑀢𑀭𑀺𑀢𑀼𑀓𑀸𑀫𑁄. 𑀲𑁄 𑀑𑀭𑀺𑀫𑁂 𑀢𑀻𑀭𑁂 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀧𑀚𑁆𑀚𑁂𑀬𑁆𑀬.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀯𑀸𑀲𑁂𑀝𑁆𑀞, 𑀅𑀧𑀺 𑀦𑀼 𑀲𑁄 𑀧𑀼𑀭𑀺𑀲𑁄 𑀅𑀘𑀺𑀭𑀯𑀢𑀺𑀬𑀸 𑀦𑀤𑀺𑀬𑀸 𑀑𑀭𑀺𑀫𑀸 𑀢𑀻𑀭𑀸 𑀧𑀸𑀭𑀺𑀫𑀁 𑀢𑀻𑀭𑀁 𑀕𑀘𑁆𑀙𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’.

𑁫𑁪𑁮. ‘‘𑀏𑀯𑀫𑁂𑀯 𑀔𑁄, 𑀯𑀸𑀲𑁂𑀝𑁆𑀞, 𑀧𑀜𑁆𑀘𑀺𑀫𑁂 𑀦𑀻𑀯𑀭𑀡𑀸 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀆𑀯𑀭𑀡𑀸𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺, 𑀦𑀻𑀯𑀭𑀡𑀸𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺, 𑀑𑀦𑀸𑀳𑀦𑀸𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺, 𑀧𑀭𑀺𑀬𑁄𑀦𑀸𑀳𑀦𑀸𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀓𑀢𑀫𑁂 𑀧𑀜𑁆𑀘? 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁, 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁, 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀦𑀻𑀯𑀭𑀡𑀁, 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀁. 𑀇𑀫𑁂 𑀔𑁄, 𑀯𑀸𑀲𑁂𑀝𑁆𑀞, 𑀧𑀜𑁆𑀘 𑀦𑀻𑀯𑀭𑀡𑀸 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀆𑀯𑀭𑀡𑀸𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺, 𑀦𑀻𑀯𑀭𑀡𑀸𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺, 𑀑𑀦𑀸𑀳𑀦𑀸𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺, 𑀧𑀭𑀺𑀬𑁄𑀦𑀸𑀳𑀦𑀸𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺.

𑁫𑁪𑁯. ‘‘𑀇𑀫𑁂𑀳𑀺 𑀔𑁄, 𑀯𑀸𑀲𑁂𑀝𑁆𑀞, 𑀧𑀜𑁆𑀘𑀳𑀺 𑀦𑀻𑀯𑀭𑀡𑁂𑀳𑀺 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀆𑀯𑀼𑀝𑀸 𑀦𑀺𑀯𑀼𑀝𑀸 𑀑𑀦𑀤𑁆𑀥𑀸 [𑀑𑀨𑀼𑀝𑀸 (𑀲𑀻. 𑀓.), 𑀑𑀨𑀼𑀢𑀸 (𑀲𑁆𑀬𑀸.)] 𑀧𑀭𑀺𑀬𑁄𑀦𑀤𑁆𑀥𑀸. 𑀢𑁂 𑀯𑀢, 𑀯𑀸𑀲𑁂𑀝𑁆𑀞, 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀬𑁂 𑀥𑀫𑁆𑀫𑀸 𑀩𑁆𑀭𑀸𑀳𑁆𑀫𑀡𑀓𑀸𑀭𑀓𑀸 𑀢𑁂 𑀥𑀫𑁆𑀫𑁂 𑀧𑀳𑀸𑀬 𑀯𑀢𑁆𑀢𑀫𑀸𑀦𑀸, 𑀬𑁂 𑀥𑀫𑁆𑀫𑀸 𑀅𑀩𑁆𑀭𑀸𑀳𑁆𑀫𑀡𑀓𑀸𑀭𑀓𑀸 𑀢𑁂 𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀫𑀸𑀦𑀸 𑀧𑀜𑁆𑀘𑀳𑀺 𑀦𑀻𑀯𑀭𑀡𑁂𑀳𑀺 𑀆𑀯𑀼𑀝𑀸 𑀦𑀺𑀯𑀼𑀝𑀸 𑀑𑀦𑀤𑁆𑀥𑀸 𑀧𑀭𑀺𑀬𑁄𑀦𑀤𑁆𑀥𑀸 [𑀧𑀭𑀺𑀬𑁄𑀦𑀤𑁆𑀥𑀸, 𑀢𑁂 (𑀲𑁆𑀬𑀸. 𑀓.)] 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀩𑁆𑀭𑀳𑁆𑀫𑀸𑀦𑀁 𑀲𑀳𑀩𑁆𑀬𑀽𑀧𑀕𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑀲𑀁𑀲𑀦𑁆𑀤𑀦𑀓𑀣𑀸

𑁫𑁫𑁦. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀯𑀸𑀲𑁂𑀝𑁆𑀞, 𑀓𑀺𑀦𑁆𑀢𑀺 𑀢𑁂 𑀲𑀼𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀼𑀤𑁆𑀥𑀸𑀦𑀁 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁, 𑀲𑀧𑀭𑀺𑀕𑁆𑀕𑀳𑁄 𑀯𑀸 𑀩𑁆𑀭𑀳𑁆𑀫𑀸 𑀅𑀧𑀭𑀺𑀕𑁆𑀕𑀳𑁄 𑀯𑀸’’𑀢𑀺? ‘‘𑀅𑀧𑀭𑀺𑀕𑁆𑀕𑀳𑁄, 𑀪𑁄 𑀕𑁄𑀢𑀫’’. ‘‘𑀲𑀯𑁂𑀭𑀘𑀺𑀢𑁆𑀢𑁄 𑀯𑀸 𑀅𑀯𑁂𑀭𑀘𑀺𑀢𑁆𑀢𑁄 𑀯𑀸’’𑀢𑀺? ‘‘𑀅𑀯𑁂𑀭𑀘𑀺𑀢𑁆𑀢𑁄, 𑀪𑁄 𑀕𑁄𑀢𑀫’’. ‘‘𑀲𑀩𑁆𑀬𑀸𑀧𑀚𑁆𑀚𑀘𑀺𑀢𑁆𑀢𑁄 𑀯𑀸 𑀅𑀩𑁆𑀬𑀸𑀧𑀚𑁆𑀚𑀘𑀺𑀢𑁆𑀢𑁄 𑀯𑀸’’𑀢𑀺? ‘‘𑀅𑀩𑁆𑀬𑀸𑀧𑀚𑁆𑀚𑀘𑀺𑀢𑁆𑀢𑁄, 𑀪𑁄 𑀕𑁄𑀢𑀫’’. ‘‘𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀯𑀸 𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀯𑀸’’𑀢𑀺? ‘‘𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄, 𑀪𑁄 𑀕𑁄𑀢𑀫’’. ‘‘𑀯𑀲𑀯𑀢𑁆𑀢𑀻 𑀯𑀸 𑀅𑀯𑀲𑀯𑀢𑁆𑀢𑀻 𑀯𑀸’’𑀢𑀺? ‘‘𑀯𑀲𑀯𑀢𑁆𑀢𑀻, 𑀪𑁄 𑀕𑁄𑀢𑀫’’.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀯𑀸𑀲𑁂𑀝𑁆𑀞, 𑀲𑀧𑀭𑀺𑀕𑁆𑀕𑀳𑀸 𑀯𑀸 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀅𑀧𑀭𑀺𑀕𑁆𑀕𑀳𑀸 𑀯𑀸’’𑀢𑀺? ‘‘𑀲𑀧𑀭𑀺𑀕𑁆𑀕𑀳𑀸, 𑀪𑁄 𑀕𑁄𑀢𑀫’’. ‘‘𑀲𑀯𑁂𑀭𑀘𑀺𑀢𑁆𑀢𑀸 𑀯𑀸 𑀅𑀯𑁂𑀭𑀘𑀺𑀢𑁆𑀢𑀸 𑀯𑀸’’𑀢𑀺? ‘‘𑀲𑀯𑁂𑀭𑀘𑀺𑀢𑁆𑀢𑀸, 𑀪𑁄 𑀕𑁄𑀢𑀫’’. ‘‘𑀲𑀩𑁆𑀬𑀸𑀧𑀚𑁆𑀚𑀘𑀺𑀢𑁆𑀢𑀸 𑀯𑀸 𑀅𑀩𑁆𑀬𑀸𑀧𑀚𑁆𑀚𑀘𑀺𑀢𑁆𑀢𑀸 𑀯𑀸’’𑀢𑀺? ‘‘𑀲𑀩𑁆𑀬𑀸𑀧𑀚𑁆𑀚𑀘𑀺𑀢𑁆𑀢𑀸, 𑀪𑁄 𑀕𑁄𑀢𑀫’’. ‘‘𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀸 𑀯𑀸 𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀸 𑀯𑀸’’𑀢𑀺? ‘‘𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀸, 𑀪𑁄 𑀕𑁄𑀢𑀫’’. ‘‘𑀯𑀲𑀯𑀢𑁆𑀢𑀻 𑀯𑀸 𑀅𑀯𑀲𑀯𑀢𑁆𑀢𑀻 𑀯𑀸’’𑀢𑀺? ‘‘𑀅𑀯𑀲𑀯𑀢𑁆𑀢𑀻, 𑀪𑁄 𑀕𑁄𑀢𑀫’’.

𑁫𑁫𑁧. ‘‘𑀇𑀢𑀺 𑀓𑀺𑀭, 𑀯𑀸𑀲𑁂𑀝𑁆𑀞, 𑀲𑀧𑀭𑀺𑀕𑁆𑀕𑀳𑀸 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀅𑀧𑀭𑀺𑀕𑁆𑀕𑀳𑁄 𑀩𑁆𑀭𑀳𑁆𑀫𑀸. 𑀅𑀧𑀺 𑀦𑀼 𑀔𑁄 𑀲𑀧𑀭𑀺𑀕𑁆𑀕𑀳𑀸𑀦𑀁 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀧𑀭𑀺𑀕𑁆𑀕𑀳𑁂𑀦 𑀩𑁆𑀭𑀳𑁆𑀫𑀼𑀦𑀸 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀻’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’. ‘‘𑀲𑀸𑀥𑀼, 𑀯𑀸𑀲𑁂𑀝𑁆𑀞, 𑀢𑁂 𑀯𑀢, 𑀯𑀸𑀲𑁂𑀝𑁆𑀞, 𑀲𑀧𑀭𑀺𑀕𑁆𑀕𑀳𑀸 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀭𑀺𑀕𑁆𑀕𑀳𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀲𑀳𑀩𑁆𑀬𑀽𑀧𑀕𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

‘‘𑀇𑀢𑀺 𑀓𑀺𑀭, 𑀯𑀸𑀲𑁂𑀝𑁆𑀞, 𑀲𑀯𑁂𑀭𑀘𑀺𑀢𑁆𑀢𑀸 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸, 𑀅𑀯𑁂𑀭𑀘𑀺𑀢𑁆𑀢𑁄 𑀩𑁆𑀭𑀳𑁆𑀫𑀸…𑀧𑁂… 𑀲𑀩𑁆𑀬𑀸𑀧𑀚𑁆𑀚𑀘𑀺𑀢𑁆𑀢𑀸 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀅𑀩𑁆𑀬𑀸𑀧𑀚𑁆𑀚𑀘𑀺𑀢𑁆𑀢𑁄 𑀩𑁆𑀭𑀳𑁆𑀫𑀸… 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀸 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀩𑁆𑀭𑀳𑁆𑀫𑀸… 𑀅𑀯𑀲𑀯𑀢𑁆𑀢𑀻 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀯𑀲𑀯𑀢𑁆𑀢𑀻 𑀩𑁆𑀭𑀳𑁆𑀫𑀸, 𑀅𑀧𑀺 𑀦𑀼 𑀔𑁄 𑀅𑀯𑀲𑀯𑀢𑁆𑀢𑀻𑀦𑀁 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀲𑀯𑀢𑁆𑀢𑀺𑀦𑀸 𑀩𑁆𑀭𑀳𑁆𑀫𑀼𑀦𑀸 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀻’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’. ‘‘𑀲𑀸𑀥𑀼, 𑀯𑀸𑀲𑁂𑀝𑁆𑀞, 𑀢𑁂 𑀯𑀢, 𑀯𑀸𑀲𑁂𑀝𑁆𑀞, 𑀅𑀯𑀲𑀯𑀢𑁆𑀢𑀻 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀯𑀲𑀯𑀢𑁆𑀢𑀺𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀲𑀳𑀩𑁆𑀬𑀽𑀧𑀕𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑁫𑁫𑁨. ‘‘𑀇𑀥 𑀔𑁄 𑀧𑀦 𑀢𑁂, 𑀯𑀸𑀲𑁂𑀝𑁆𑀞, 𑀢𑁂𑀯𑀺𑀚𑁆𑀚𑀸 𑀩𑁆𑀭𑀸𑀳𑁆𑀫𑀡𑀸 𑀆𑀲𑀻𑀤𑀺𑀢𑁆𑀯𑀸 [𑀆𑀤𑀺𑀲𑀺𑀢𑁆𑀯𑀸 (𑀓.)] 𑀲𑀁𑀲𑀻𑀤𑀦𑁆𑀢𑀺, 𑀲𑀁𑀲𑀻𑀤𑀺𑀢𑁆𑀯𑀸 𑀯𑀺𑀲𑀸𑀭𑀁 [𑀯𑀺𑀲𑀸𑀤𑀁 (𑀲𑀻. 𑀧𑀻.), 𑀯𑀺𑀲𑀢𑁆𑀢𑀁 (𑀲𑁆𑀬𑀸.)] 𑀧𑀸𑀧𑀼𑀡𑀦𑁆𑀢𑀺, 𑀲𑀼𑀓𑁆𑀔𑀢𑀭𑀁 [𑀲𑀼𑀓𑁆𑀔𑀢𑀭𑀡𑀁 (𑀓.)] 𑀫𑀜𑁆𑀜𑁂 𑀢𑀭𑀦𑁆𑀢𑀺. 𑀢𑀲𑁆𑀫𑀸 𑀇𑀤𑀁 𑀢𑁂𑀯𑀺𑀚𑁆𑀚𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀢𑁂𑀯𑀺𑀚𑁆𑀚𑀸𑀇𑀭𑀺𑀡𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀢𑁂𑀯𑀺𑀚𑁆𑀚𑀸𑀯𑀺𑀯𑀦𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀢𑁂𑀯𑀺𑀚𑁆𑀚𑀸𑀩𑁆𑀬𑀲𑀦𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀻’’𑀢𑀺.

𑁫𑁫𑁩. 𑀏𑀯𑀁 𑀯𑀼𑀢𑁆𑀢𑁂, 𑀯𑀸𑀲𑁂𑀝𑁆𑀞𑁄 𑀫𑀸𑀡𑀯𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀼𑀢𑀁 𑀫𑁂𑀢𑀁, 𑀪𑁄 𑀕𑁄𑀢𑀫, 𑀲𑀫𑀡𑁄 𑀕𑁄𑀢𑀫𑁄 𑀩𑁆𑀭𑀳𑁆𑀫𑀸𑀦𑀁 𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑀁 𑀚𑀸𑀦𑀸𑀢𑀻’’𑀢𑀺. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀯𑀸𑀲𑁂𑀝𑁆𑀞. 𑀆𑀲𑀦𑁆𑀦𑁂 𑀇𑀢𑁄 𑀫𑀦𑀲𑀸𑀓𑀝𑀁, 𑀦 𑀇𑀢𑁄 𑀤𑀽𑀭𑁂 𑀫𑀦𑀲𑀸𑀓𑀝’’𑀦𑁆𑀢𑀺? ‘‘𑀏𑀯𑀁, 𑀪𑁄 𑀕𑁄𑀢𑀫, 𑀆𑀲𑀦𑁆𑀦𑁂 𑀇𑀢𑁄 𑀫𑀦𑀲𑀸𑀓𑀝𑀁, 𑀦 𑀇𑀢𑁄 𑀤𑀽𑀭𑁂 𑀫𑀦𑀲𑀸𑀓𑀝’’𑀦𑁆𑀢𑀺.

𑁫𑁫𑁪. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀯𑀸𑀲𑁂𑀝𑁆𑀞, 𑀇𑀥𑀲𑁆𑀲 𑀧𑀼𑀭𑀺𑀲𑁄 𑀫𑀦𑀲𑀸𑀓𑀝𑁂 𑀚𑀸𑀢𑀲𑀁𑀯𑀤𑁆𑀥𑁄. 𑀢𑀫𑁂𑀦𑀁 𑀫𑀦𑀲𑀸𑀓𑀝𑀢𑁄 𑀢𑀸𑀯𑀤𑁂𑀯 𑀅𑀯𑀲𑀝𑀁 𑀫𑀦𑀲𑀸𑀓𑀝𑀲𑁆𑀲 𑀫𑀕𑁆𑀕𑀁 𑀧𑀼𑀘𑁆𑀙𑁂𑀬𑁆𑀬𑀼𑀁. 𑀲𑀺𑀬𑀸 𑀦𑀼 𑀔𑁄, 𑀯𑀸𑀲𑁂𑀝𑁆𑀞, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀫𑀦𑀲𑀸𑀓𑀝𑁂 𑀚𑀸𑀢𑀲𑀁𑀯𑀤𑁆𑀥𑀲𑁆𑀲 𑀫𑀦𑀲𑀸𑀓𑀝𑀲𑁆𑀲 𑀫𑀕𑁆𑀕𑀁 𑀧𑀼𑀝𑁆𑀞𑀲𑁆𑀲 𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀯𑀸 𑀯𑀺𑀢𑁆𑀣𑀸𑀬𑀺𑀢𑀢𑁆𑀢𑀁 𑀯𑀸’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫’’. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’? ‘‘𑀅𑀫𑀼 𑀳𑀺, 𑀪𑁄 𑀕𑁄𑀢𑀫, 𑀧𑀼𑀭𑀺𑀲𑁄 𑀫𑀦𑀲𑀸𑀓𑀝𑁂 𑀚𑀸𑀢𑀲𑀁𑀯𑀤𑁆𑀥𑁄, 𑀢𑀲𑁆𑀲 𑀲𑀩𑁆𑀩𑀸𑀦𑁂𑀯 𑀫𑀦𑀲𑀸𑀓𑀝𑀲𑁆𑀲 𑀫𑀕𑁆𑀕𑀸𑀦𑀺 𑀲𑀼𑀯𑀺𑀤𑀺𑀢𑀸𑀦𑀻’’𑀢𑀺.

‘‘𑀲𑀺𑀬𑀸 𑀔𑁄, 𑀯𑀸𑀲𑁂𑀝𑁆𑀞, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀫𑀦𑀲𑀸𑀓𑀝𑁂 𑀚𑀸𑀢𑀲𑀁𑀯𑀤𑁆𑀥𑀲𑁆𑀲 𑀫𑀦𑀲𑀸𑀓𑀝𑀲𑁆𑀲 𑀫𑀕𑁆𑀕𑀁 𑀧𑀼𑀝𑁆𑀞𑀲𑁆𑀲 𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀯𑀸 𑀯𑀺𑀢𑁆𑀣𑀸𑀬𑀺𑀢𑀢𑁆𑀢𑀁 𑀯𑀸, 𑀦 𑀢𑁆𑀯𑁂𑀯 𑀢𑀣𑀸𑀕𑀢𑀲𑁆𑀲 𑀩𑁆𑀭𑀳𑁆𑀫𑀮𑁄𑀓𑁂 𑀯𑀸 𑀩𑁆𑀭𑀳𑁆𑀫𑀮𑁄𑀓𑀕𑀸𑀫𑀺𑀦𑀺𑀬𑀸 𑀯𑀸 𑀧𑀝𑀺𑀧𑀤𑀸𑀬 𑀧𑀼𑀝𑁆𑀞𑀲𑁆𑀲 𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀯𑀸 𑀯𑀺𑀢𑁆𑀣𑀸𑀬𑀺𑀢𑀢𑁆𑀢𑀁 𑀯𑀸. 𑀩𑁆𑀭𑀳𑁆𑀫𑀸𑀦𑀁 𑀘𑀸𑀳𑀁, 𑀯𑀸𑀲𑁂𑀝𑁆𑀞, 𑀧𑀚𑀸𑀦𑀸𑀫𑀺 𑀩𑁆𑀭𑀳𑁆𑀫𑀮𑁄𑀓𑀜𑁆𑀘 𑀩𑁆𑀭𑀳𑁆𑀫𑀮𑁄𑀓𑀕𑀸𑀫𑀺𑀦𑀺𑀜𑁆𑀘 𑀧𑀝𑀺𑀧𑀤𑀁, 𑀬𑀣𑀸 𑀧𑀝𑀺𑀧𑀦𑁆𑀦𑁄 𑀘 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀧𑀦𑁆𑀦𑁄, 𑀢𑀜𑁆𑀘 𑀧𑀚𑀸𑀦𑀸𑀫𑀻’’𑀢𑀺.

𑁫𑁫𑁫. 𑀏𑀯𑀁 𑀯𑀼𑀢𑁆𑀢𑁂, 𑀯𑀸𑀲𑁂𑀝𑁆𑀞𑁄 𑀫𑀸𑀡𑀯𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀼𑀢𑀁 𑀫𑁂𑀢𑀁, 𑀪𑁄 𑀕𑁄𑀢𑀫, 𑀲𑀫𑀡𑁄 𑀕𑁄𑀢𑀫𑁄 𑀩𑁆𑀭𑀳𑁆𑀫𑀸𑀦𑀁 𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑀁 𑀤𑁂𑀲𑁂𑀢𑀻’’𑀢𑀺. ‘‘𑀲𑀸𑀥𑀼 𑀦𑁄 𑀪𑀯𑀁 𑀕𑁄𑀢𑀫𑁄 𑀩𑁆𑀭𑀳𑁆𑀫𑀸𑀦𑀁 𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑀁 𑀤𑁂𑀲𑁂𑀢𑀼 𑀉𑀮𑁆𑀮𑀼𑀫𑁆𑀧𑀢𑀼 𑀪𑀯𑀁 𑀕𑁄𑀢𑀫𑁄 𑀩𑁆𑀭𑀸𑀳𑁆𑀫𑀡𑀺𑀁 𑀧𑀚’’𑀦𑁆𑀢𑀺. ‘‘𑀢𑁂𑀦 𑀳𑀺, 𑀯𑀸𑀲𑁂𑀝𑁆𑀞, 𑀲𑀼𑀡𑀸𑀳𑀺; 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁 𑀪𑁄’’𑀢𑀺 𑀔𑁄 𑀯𑀸𑀲𑁂𑀝𑁆𑀞𑁄 𑀫𑀸𑀡𑀯𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺.

𑀩𑁆𑀭𑀳𑁆𑀫𑀮𑁄𑀓𑀫𑀕𑁆𑀕𑀤𑁂𑀲𑀦𑀸

𑁫𑁫𑁬. 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀇𑀥, 𑀯𑀸𑀲𑁂𑀝𑁆𑀞, 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… (𑀬𑀣𑀸 𑁧𑁯𑁦-𑁨𑁧𑁨 𑀅𑀦𑀼𑀘𑁆𑀙𑁂𑀤𑁂𑀲𑀼 𑀏𑀯𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁). 𑀏𑀯𑀁 𑀔𑁄, 𑀯𑀸𑀲𑁂𑀝𑁆𑀞, 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺…𑀧𑁂… 𑀢𑀲𑁆𑀲𑀺𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀻𑀦𑁂 𑀅𑀢𑁆𑀢𑀦𑀺 𑀲𑀫𑀦𑀼𑀧𑀲𑁆𑀲𑀢𑁄 𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀺, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑁂𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺.

‘‘𑀲𑁄 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀢𑀣𑀸 𑀤𑀼𑀢𑀺𑀬𑀁. 𑀢𑀣𑀸 𑀢𑀢𑀺𑀬𑀁. 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀯𑀸𑀲𑁂𑀝𑁆𑀞, 𑀩𑀮𑀯𑀸 𑀲𑀗𑁆𑀔𑀥𑀫𑁄 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀘𑀢𑀼𑀤𑁆𑀤𑀺𑀲𑀸 𑀯𑀺𑀜𑁆𑀜𑀸𑀧𑁂𑀬𑁆𑀬; 𑀏𑀯𑀫𑁂𑀯 𑀔𑁄, 𑀯𑀸𑀲𑁂𑀝𑁆𑀞, 𑀏𑀯𑀁 𑀪𑀸𑀯𑀺𑀢𑀸𑀬 𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀬𑀁 𑀧𑀫𑀸𑀡𑀓𑀢𑀁 𑀓𑀫𑁆𑀫𑀁 𑀦 𑀢𑀁 𑀢𑀢𑁆𑀭𑀸𑀯𑀲𑀺𑀲𑁆𑀲𑀢𑀺, 𑀦 𑀢𑀁 𑀢𑀢𑁆𑀭𑀸𑀯𑀢𑀺𑀝𑁆𑀞𑀢𑀺. 𑀅𑀬𑀫𑁆𑀧𑀺 𑀔𑁄, 𑀯𑀸𑀲𑁂𑀝𑁆𑀞, 𑀩𑁆𑀭𑀳𑁆𑀫𑀸𑀦𑀁 𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑁄.

‘‘𑀧𑀼𑀦 𑀘𑀧𑀭𑀁, 𑀯𑀸𑀲𑁂𑀝𑁆𑀞, 𑀪𑀺𑀓𑁆𑀔𑀼 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀢𑀣𑀸 𑀤𑀼𑀢𑀺𑀬𑀁. 𑀢𑀣𑀸 𑀢𑀢𑀺𑀬𑀁. 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀯𑀸𑀲𑁂𑀝𑁆𑀞, 𑀩𑀮𑀯𑀸 𑀲𑀗𑁆𑀔𑀥𑀫𑁄 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀘𑀢𑀼𑀤𑁆𑀤𑀺𑀲𑀸 𑀯𑀺𑀜𑁆𑀜𑀸𑀧𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀯𑀸𑀲𑁂𑀝𑁆𑀞, 𑀏𑀯𑀁 𑀪𑀸𑀯𑀺𑀢𑀸𑀬 𑀉𑀧𑁂𑀓𑁆𑀔𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀬𑀁 𑀧𑀫𑀸𑀡𑀓𑀢𑀁 𑀓𑀫𑁆𑀫𑀁 𑀦 𑀢𑀁 𑀢𑀢𑁆𑀭𑀸𑀯𑀲𑀺𑀲𑁆𑀲𑀢𑀺, 𑀦 𑀢𑀁 𑀢𑀢𑁆𑀭𑀸𑀯𑀢𑀺𑀝𑁆𑀞𑀢𑀺. 𑀅𑀬𑀁 𑀔𑁄, 𑀯𑀸𑀲𑁂𑀝𑁆𑀞, 𑀩𑁆𑀭𑀳𑁆𑀫𑀸𑀦𑀁 𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑁄.

𑁫𑁫𑁭. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀯𑀸𑀲𑁂𑀝𑁆𑀞, 𑀏𑀯𑀁𑀯𑀺𑀳𑀸𑀭𑀻 𑀪𑀺𑀓𑁆𑀔𑀼 𑀲𑀧𑀭𑀺𑀕𑁆𑀕𑀳𑁄 𑀯𑀸 𑀅𑀧𑀭𑀺𑀕𑁆𑀕𑀳𑁄 𑀯𑀸’’𑀢𑀺? ‘‘𑀅𑀧𑀭𑀺𑀕𑁆𑀕𑀳𑁄, 𑀪𑁄 𑀕𑁄𑀢𑀫’’. ‘‘𑀲𑀯𑁂𑀭𑀘𑀺𑀢𑁆𑀢𑁄 𑀯𑀸 𑀅𑀯𑁂𑀭𑀘𑀺𑀢𑁆𑀢𑁄 𑀯𑀸’’𑀢𑀺? ‘‘𑀅𑀯𑁂𑀭𑀘𑀺𑀢𑁆𑀢𑁄, 𑀪𑁄 𑀕𑁄𑀢𑀫’’. ‘‘𑀲𑀩𑁆𑀬𑀸𑀧𑀚𑁆𑀚𑀘𑀺𑀢𑁆𑀢𑁄 𑀯𑀸 𑀅𑀩𑁆𑀬𑀸𑀧𑀚𑁆𑀚𑀘𑀺𑀢𑁆𑀢𑁄 𑀯𑀸’’𑀢𑀺? ‘‘𑀅𑀩𑁆𑀬𑀸𑀧𑀚𑁆𑀚𑀘𑀺𑀢𑁆𑀢𑁄, 𑀪𑁄 𑀕𑁄𑀢𑀫’’. ‘‘𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀯𑀸 𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀯𑀸’’𑀢𑀺? ‘‘𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄, 𑀪𑁄 𑀕𑁄𑀢𑀫’’. ‘‘𑀯𑀲𑀯𑀢𑁆𑀢𑀻 𑀯𑀸 𑀅𑀯𑀲𑀯𑀢𑁆𑀢𑀻 𑀯𑀸’’𑀢𑀺? ‘‘𑀯𑀲𑀯𑀢𑁆𑀢𑀻, 𑀪𑁄 𑀕𑁄𑀢𑀫’’.

‘‘𑀇𑀢𑀺 𑀓𑀺𑀭, 𑀯𑀸𑀲𑁂𑀝𑁆𑀞, 𑀅𑀧𑀭𑀺𑀕𑁆𑀕𑀳𑁄 𑀪𑀺𑀓𑁆𑀔𑀼, 𑀅𑀧𑀭𑀺𑀕𑁆𑀕𑀳𑁄 𑀩𑁆𑀭𑀳𑁆𑀫𑀸. 𑀅𑀧𑀺 𑀦𑀼 𑀔𑁄 𑀅𑀧𑀭𑀺𑀕𑁆𑀕𑀳𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀕𑁆𑀕𑀳𑁂𑀦 𑀩𑁆𑀭𑀳𑁆𑀫𑀼𑀦𑀸 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀻’’𑀢𑀺? ‘‘𑀏𑀯𑀁, 𑀪𑁄 𑀕𑁄𑀢𑀫’’. ‘‘𑀲𑀸𑀥𑀼, 𑀯𑀸𑀲𑁂𑀝𑁆𑀞, 𑀲𑁄 𑀯𑀢 𑀯𑀸𑀲𑁂𑀝𑁆𑀞 𑀅𑀧𑀭𑀺𑀕𑁆𑀕𑀳𑁄 𑀪𑀺𑀓𑁆𑀔𑀼 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀭𑀺𑀕𑁆𑀕𑀳𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀲𑀳𑀩𑁆𑀬𑀽𑀧𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺, 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺.

𑁫𑁫𑁮. ‘‘𑀇𑀢𑀺 𑀓𑀺𑀭, 𑀯𑀸𑀲𑁂𑀝𑁆𑀞, 𑀅𑀯𑁂𑀭𑀘𑀺𑀢𑁆𑀢𑁄 𑀪𑀺𑀓𑁆𑀔𑀼, 𑀅𑀯𑁂𑀭𑀘𑀺𑀢𑁆𑀢𑁄 𑀩𑁆𑀭𑀳𑁆𑀫𑀸…𑀧𑁂… 𑀅𑀩𑁆𑀬𑀸𑀧𑀚𑁆𑀚𑀘𑀺𑀢𑁆𑀢𑁄 𑀪𑀺𑀓𑁆𑀔𑀼, 𑀅𑀩𑁆𑀬𑀸𑀧𑀚𑁆𑀚𑀘𑀺𑀢𑁆𑀢𑁄 𑀩𑁆𑀭𑀳𑁆𑀫𑀸… 𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀪𑀺𑀓𑁆𑀔𑀼, 𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀩𑁆𑀭𑀳𑁆𑀫𑀸… 𑀯𑀲𑀯𑀢𑁆𑀢𑀻 𑀪𑀺𑀓𑁆𑀔𑀼, 𑀯𑀲𑀯𑀢𑁆𑀢𑀻 𑀩𑁆𑀭𑀳𑁆𑀫𑀸, 𑀅𑀧𑀺 𑀦𑀼 𑀔𑁄 𑀯𑀲𑀯𑀢𑁆𑀢𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀲𑀯𑀢𑁆𑀢𑀺𑀦𑀸 𑀩𑁆𑀭𑀳𑁆𑀫𑀼𑀦𑀸 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀻’’𑀢𑀺? ‘‘𑀏𑀯𑀁, 𑀪𑁄 𑀕𑁄𑀢𑀫’’. ‘‘𑀲𑀸𑀥𑀼, 𑀯𑀸𑀲𑁂𑀝𑁆𑀞, 𑀲𑁄 𑀯𑀢, 𑀯𑀸𑀲𑁂𑀝𑁆𑀞, 𑀯𑀲𑀯𑀢𑁆𑀢𑀻 𑀪𑀺𑀓𑁆𑀔𑀼 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀯𑀲𑀯𑀢𑁆𑀢𑀺𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀲𑀳𑀩𑁆𑀬𑀽𑀧𑀕𑁄 𑀪𑀯𑀺𑀲𑁆𑀲𑀢𑀻𑀢𑀺, 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀻’’𑀢𑀺.

𑁫𑁫𑁯. 𑀏𑀯𑀁 𑀯𑀼𑀢𑁆𑀢𑁂, 𑀯𑀸𑀲𑁂𑀝𑁆𑀞𑀪𑀸𑀭𑀤𑁆𑀯𑀸𑀚𑀸 𑀫𑀸𑀡𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫! 𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀕𑁄𑀢𑀫, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 ‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’𑀢𑀺. 𑀏𑀯𑀫𑁂𑀯𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀢𑁂 𑀫𑀬𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫, 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑁂 𑀦𑁄 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑁂 𑀲𑀭𑀡𑀁 𑀕𑀢𑁂’’𑀢𑀺.

𑀢𑁂𑀯𑀺𑀚𑁆𑀚𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀢𑁂𑀭𑀲𑀫𑀁.

𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀩𑁆𑀭𑀳𑁆𑀫𑀸𑀲𑀸𑀫𑀜𑁆𑀜𑀅𑀫𑁆𑀩𑀝𑁆𑀞,

𑀲𑁄𑀡𑀓𑀽𑀝𑀫𑀳𑀸𑀮𑀺𑀚𑀸𑀮𑀺𑀦𑀻;

𑀲𑀻𑀳𑀧𑁄𑀝𑁆𑀞𑀧𑀸𑀤𑀲𑀼𑀪𑁄 𑀓𑁂𑀯𑀝𑁆𑀝𑁄,

𑀮𑁄𑀳𑀺𑀘𑁆𑀘𑀢𑁂𑀯𑀺𑀚𑁆𑀚𑀸 𑀢𑁂𑀭𑀲𑀸𑀢𑀺.

𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑀧𑀸𑀴𑀺 𑀦𑀺𑀝𑁆𑀞𑀺𑀢𑀸.