📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀤𑀻𑀖𑀦𑀺𑀓𑀸𑀬𑁂

𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸

𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 ¶ ¶ ¶ 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀧𑀪𑀯𑀦𑀺𑀲𑁆𑀲𑀬𑀯𑀺𑀲𑀼𑀤𑁆𑀥𑀺𑀧𑀝𑀺𑀯𑁂𑀤𑀦𑀢𑁆𑀣𑀁, 𑀢𑀁 𑀧𑀦 𑀥𑀫𑁆𑀫𑀲𑀁𑀯𑀡𑁆𑀡𑀦𑀸𑀲𑀼 𑀯𑀺𑀜𑁆𑀜𑀽𑀦𑀁 𑀩𑀳𑀼𑀫𑀸𑀦𑀼𑀧𑁆𑀧𑀸𑀤𑀦𑀢𑁆𑀣𑀁, 𑀢𑀁 𑀲𑀫𑁆𑀫𑀤𑁂𑀯 𑀢𑁂𑀲𑀁 𑀉𑀕𑁆𑀕𑀳𑀥𑀸𑀭𑀡𑀸𑀤𑀺𑀓𑁆𑀓𑀫𑀮𑀤𑁆𑀥𑀩𑁆𑀩𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀲𑀩𑁆𑀩𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀢𑁆𑀣𑀁. 𑀅𑀣 𑀯𑀸 𑀫𑀗𑁆𑀕𑀮𑀪𑀸𑀯𑀢𑁄, 𑀲𑀩𑁆𑀩𑀓𑀺𑀭𑀺𑀬𑀸𑀲𑀼 𑀧𑀼𑀩𑁆𑀩𑀓𑀺𑀘𑁆𑀘𑀪𑀸𑀯𑀢𑁄, 𑀧𑀡𑁆𑀟𑀺𑀢𑁂𑀳𑀺 𑀲𑀫𑁆𑀫𑀸𑀘𑀭𑀺𑀢𑀪𑀸𑀯𑀢𑁄, 𑀆𑀬𑀢𑀺𑀁 𑀧𑀭𑁂𑀲𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑀢𑁄 𑀘 𑀲𑀁𑀯𑀡𑁆𑀡𑀦𑀸𑀬𑀁 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀺𑀭𑀺𑀬𑀸. 𑀅𑀣 𑀯𑀸 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀭𑀡𑀁 𑀧𑀽𑀚𑀦𑀻𑀬𑀧𑀽𑀚𑀸𑀧𑀼𑀜𑁆𑀜𑀯𑀺𑀲𑁂𑀲𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀁, 𑀢𑀁 𑀅𑀢𑁆𑀢𑀦𑁄 𑀬𑀣𑀸𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀓𑀲𑁆𑀲 𑀓𑀫𑁆𑀫𑀲𑁆𑀲 𑀩𑀮𑀸𑀦𑀼𑀧𑁆𑀧𑀸𑀤𑀦𑀢𑁆𑀣𑀁, 𑀅𑀦𑁆𑀢𑀭𑀸 𑀘 𑀢𑀲𑁆𑀲 𑀅𑀲𑀗𑁆𑀓𑁄𑀘𑀦𑀢𑁆𑀣𑀁, 𑀢𑀤𑀼𑀪𑀬𑀁 𑀅𑀦𑀦𑁆𑀢𑀭𑀸𑀬𑁂𑀦 𑀅𑀝𑁆𑀞𑀓𑀣𑀸𑀬 𑀧𑀭𑀺𑀲𑀫𑀸𑀧𑀦𑀢𑁆𑀣𑀁. 𑀇𑀤𑀫𑁂𑀯 𑀘 𑀧𑀬𑁄𑀚𑀦𑀁 𑀆𑀘𑀭𑀺𑀬𑁂𑀦 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 𑁋 ‘‘𑀇𑀢𑀺 𑀫𑁂 𑀧𑀲𑀦𑁆𑀦𑀫𑀢𑀺𑀦𑁄…𑀧𑁂… 𑀢𑀲𑁆𑀲𑀸𑀦𑀼𑀪𑀸𑀯𑁂𑀦𑀸’’𑀢𑀺. 𑀯𑀢𑁆𑀣𑀼𑀢𑁆𑀢𑀬𑀧𑀽𑀚𑀸 𑀳𑀺 𑀦𑀺𑀭𑀢𑀺𑀲𑀬𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀲𑀫𑁆𑀩𑀼𑀤𑁆𑀥𑀺𑀬𑀸 𑀅𑀧𑀭𑀺𑀫𑁂𑀬𑁆𑀬𑀧𑁆𑀧𑀪𑀸𑀯𑁄 ¶ 𑀧𑀼𑀜𑁆𑀜𑀸𑀢𑀺𑀲𑀬𑁄𑀢𑀺 𑀩𑀳𑀼𑀯𑀺𑀥𑀦𑁆𑀢𑀭𑀸𑀬𑁂𑀧𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀅𑀦𑁆𑀢𑀭𑀸𑀬𑀦𑀺𑀩𑀦𑁆𑀥𑀦𑀲𑀓𑀮𑀲𑀁𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀸𑀬 𑀧𑀳𑁄𑀢𑀺, 𑀪𑀬𑀸𑀤𑀺𑀉𑀧𑀤𑁆𑀤𑀯𑀜𑁆𑀘 𑀦𑀺𑀯𑀸𑀭𑁂𑀢𑀺. 𑀬𑀣𑀸𑀳 𑁋

‘‘𑀧𑀽𑀚𑀸𑀭𑀳𑁂 𑀧𑀽𑀚𑀬𑀢𑁄, 𑀩𑀼𑀤𑁆𑀥𑁂 𑀬𑀤𑀺 𑀯 𑀲𑀸𑀯𑀓𑁂’’𑀢𑀺𑀆𑀤𑀺 (𑀥. 𑀧. 𑁧.𑁧𑁯𑁫; 𑀅𑀧. 𑁧.𑁧𑁦.𑁧), 𑀢𑀣𑀸 𑁋

‘‘𑀬𑁂 ¶ 𑀪𑀺𑀓𑁆𑀔𑀯𑁂 𑀩𑀼𑀤𑁆𑀥𑁂 𑀧𑀲𑀦𑁆𑀦𑀸, 𑀅𑀕𑁆𑀕𑁂 𑀢𑁂 𑀧𑀲𑀦𑁆𑀦𑀸. 𑀅𑀕𑁆𑀕𑁂 𑀔𑁄 𑀧𑀦 𑀧𑀲𑀦𑁆𑀦𑀸𑀦𑀁 𑀅𑀕𑁆𑀕𑁄 𑀯𑀺𑀧𑀸𑀓𑁄 𑀳𑁄𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦).

‘‘𑀩𑀼𑀤𑁆𑀥𑁄𑀢𑀺 ¶ 𑀓𑀺𑀢𑁆𑀢𑀬𑀦𑁆𑀢𑀲𑁆𑀲, 𑀓𑀸𑀬𑁂 𑀪𑀯𑀢𑀺 𑀬𑀸 𑀧𑀻𑀢𑀺;

𑀯𑀭𑀫𑁂𑀯 𑀳𑀺 𑀲𑀸 𑀧𑀻𑀢𑀺, 𑀓𑀲𑀺𑀡𑁂𑀦𑀧𑀺 𑀚𑀫𑁆𑀩𑀼𑀤𑀻𑀧𑀲𑁆𑀲.

𑀥𑀫𑁆𑀫𑁄𑀢𑀺…𑀧𑁂… 𑀲𑀗𑁆𑀖𑁄𑀢𑀺…𑀧𑁂… 𑀤𑀻𑀧𑀲𑁆𑀲𑀸’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁬);

𑀢𑀣𑀸 𑁋

‘‘𑀬𑀲𑁆𑀫𑀺𑀁, 𑀫𑀳𑀸𑀦𑀸𑀫, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲…𑀧𑁂… 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁬.𑁧𑁦; 𑁧𑁧.𑁧𑁧),

‘‘𑀅𑀭𑀜𑁆𑀜𑁂 𑀭𑀼𑀓𑁆𑀔𑀫𑀽𑀮𑁂 𑀯𑀸…𑀧𑁂…

𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸,

𑀮𑁄𑀫𑀳𑀁𑀲𑁄 𑀦 𑀳𑁂𑀲𑁆𑀲𑀢𑀻’’𑀢𑀺. (𑀲𑀁. 𑀦𑀺. 𑁧.𑁨𑁪𑁯) 𑀘

𑀢𑀢𑁆𑀣 𑀬𑀲𑁆𑀲 𑀯𑀢𑁆𑀣𑀼𑀢𑁆𑀢𑀬𑀲𑁆𑀲 𑀯𑀦𑁆𑀤𑀦𑀁 𑀓𑀢𑁆𑀢𑀼𑀓𑀸𑀫𑁄, 𑀢𑀲𑁆𑀲 𑀕𑀼𑀡𑀸𑀢𑀺𑀲𑀬𑀬𑁄𑀕𑀲𑀦𑁆𑀤𑀲𑁆𑀲𑀦𑀢𑁆𑀣𑀁 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺𑀆𑀤𑀺𑀦𑀸 𑀕𑀸𑀣𑀢𑁆𑀢𑀬𑀫𑀸𑀳. 𑀕𑀼𑀡𑀸𑀢𑀺𑀲𑀬𑀬𑁄𑀕𑁂𑀦 𑀳𑀺 𑀯𑀦𑁆𑀤𑀦𑀸𑀭𑀳𑀪𑀸𑀯𑁄, 𑀯𑀦𑁆𑀤𑀦𑀸𑀭𑀳𑁂 𑀘 𑀓𑀢𑀸 𑀯𑀦𑁆𑀤𑀦𑀸 𑀬𑀣𑀸𑀥𑀺𑀧𑁆𑀧𑁂𑀢𑀧𑁆𑀧𑀬𑁄𑀚𑀦𑀁 𑀲𑀸𑀥𑁂𑀢𑀻𑀢𑀺. 𑀢𑀢𑁆𑀣 𑀬𑀲𑁆𑀲𑀸 𑀤𑁂𑀲𑀦𑀸𑀬 𑀲𑀁𑀯𑀡𑁆𑀡𑀦𑀁 𑀓𑀢𑁆𑀢𑀼𑀓𑀸𑀫𑁄, 𑀲𑀸 𑀦 𑀯𑀺𑀦𑀬𑀤𑁂𑀲𑀦𑀸 𑀯𑀺𑀬 𑀓𑀭𑀼𑀡𑀸𑀧𑁆𑀧𑀥𑀸𑀦𑀸, 𑀦𑀸𑀧𑀺 𑀅𑀪𑀺𑀥𑀫𑁆𑀫𑀤𑁂𑀲𑀦𑀸 𑀯𑀺𑀬 𑀧𑀜𑁆𑀜𑀸𑀧𑁆𑀧𑀥𑀸𑀦𑀸, 𑀅𑀣 𑀔𑁄 𑀓𑀭𑀼𑀡𑀸𑀧𑀜𑁆𑀜𑀸𑀧𑁆𑀧𑀥𑀸𑀦𑀸𑀢𑀺 𑀢𑀤𑀼𑀪𑀬𑀧𑁆𑀧𑀥𑀸𑀦𑀫𑁂𑀯 𑀢𑀸𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀣𑁄𑀫𑀦𑀁 𑀓𑀸𑀢𑀼𑀁 𑀢𑀁𑀫𑀽𑀮𑀓𑀢𑁆𑀢𑀸 𑀲𑁂𑀲𑀭𑀢𑀦𑀸𑀦𑀁 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 ¶ 𑀓𑀺𑀭𑀢𑀻𑀢𑀺 𑀓𑀭𑀼𑀡𑀸, 𑀧𑀭𑀤𑀼𑀓𑁆𑀔𑀁 𑀯𑀺𑀓𑁆𑀔𑀺𑀧𑀢𑀺, 𑀅𑀧𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀓𑀺𑀡𑀸𑀢𑀻𑀢𑀺 𑀓𑀭𑀼𑀡𑀸, 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀓𑀸𑀭𑀼𑀡𑀺𑀓𑀁 𑀳𑀺𑀁𑀲𑀢𑀺, 𑀯𑀺𑀩𑀸𑀥𑀢𑀻𑀢𑀺 𑀅𑀢𑁆𑀣𑁄, 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀲𑀸𑀥𑀽𑀦𑀁 ¶ 𑀓𑀫𑁆𑀧𑀦𑀁 𑀳𑀤𑀬𑀔𑁂𑀤𑀁 𑀓𑀭𑁄𑀢𑀻𑀢𑀺 𑀯𑀸 𑀓𑀭𑀼𑀡𑀸. 𑀅𑀣 𑀯𑀸 𑀓𑀫𑀺𑀢𑀺 𑀲𑀼𑀔𑀁, 𑀢𑀁 𑀭𑀼𑀦𑁆𑀥𑀢𑀻𑀢𑀺 𑀓𑀭𑀼𑀡𑀸. 𑀏𑀲𑀸 𑀳𑀺 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸𑀮𑀓𑁆𑀔𑀡𑀸, 𑀅𑀢𑁆𑀢𑀲𑀼𑀔𑀦𑀺𑀭𑀧𑁂𑀓𑁆𑀔𑀢𑀸𑀬 𑀓𑀸𑀭𑀼𑀡𑀺𑀓𑀸𑀦𑀁 𑀲𑀼𑀔𑀁 𑀭𑀼𑀦𑁆𑀥𑀢𑀺 𑀯𑀺𑀩𑀦𑁆𑀥𑀢𑀻𑀢𑀺. 𑀓𑀭𑀼𑀡𑀸𑀬 𑀲𑀻𑀢𑀮𑀁 𑀓𑀭𑀼𑀡𑀸𑀲𑀻𑀢𑀮𑀁, 𑀓𑀭𑀼𑀡𑀸𑀲𑀻𑀢𑀮𑀁 𑀳𑀤𑀬𑀁 𑀅𑀲𑁆𑀲𑀸𑀢𑀺 𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑁄, 𑀢𑀁 𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑀁. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀭𑁂𑀲𑀁 𑀳𑀺𑀢𑁄𑀧𑀲𑀁𑀳𑀸𑀭𑀲𑀼𑀔𑀸𑀤𑀺𑀅𑀧𑀭𑀺𑀳𑀸𑀦𑀺𑀘𑁆𑀙𑀦𑀲𑀪𑀸𑀯𑀢𑀸𑀬, 𑀩𑁆𑀬𑀸𑀧𑀸𑀤𑀸𑀭𑀢𑀻𑀦𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑀸𑀬 𑀘 𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑀲𑀦𑁆𑀢𑀸𑀧𑀯𑀺𑀘𑁆𑀙𑁂𑀤𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀫𑁂𑀢𑁆𑀢𑀸𑀫𑀼𑀤𑀺𑀢𑀸𑀦𑀫𑁆𑀧𑀺 𑀘𑀺𑀢𑁆𑀢𑀲𑀻𑀢𑀮𑀪𑀸𑀯𑀓𑀸𑀭𑀡𑀢𑀸 𑀉𑀧𑀮𑀩𑁆𑀪𑀢𑀺, 𑀢𑀣𑀸𑀧𑀺 ¶ 𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀧𑀭𑀽𑀧𑀢𑀸𑀧𑀸𑀲𑀳𑀦𑀭𑀲𑀸 𑀅𑀯𑀺𑀳𑀺𑀁𑀲𑀸𑀪𑀽𑀢𑀸 𑀓𑀭𑀼𑀡𑀸 𑀯𑀺𑀲𑁂𑀲𑁂𑀦 𑀪𑀕𑀯𑀢𑁄 𑀘𑀺𑀢𑁆𑀢𑀲𑁆𑀲 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺 𑀯𑀺𑀬 𑀲𑀻𑀢𑀻𑀪𑀸𑀯𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺. 𑀓𑀭𑀼𑀡𑀸𑀫𑀼𑀔𑁂𑀦 𑀯𑀸 𑀫𑁂𑀢𑁆𑀢𑀸𑀫𑀼𑀤𑀺𑀢𑀸𑀦𑀫𑁆𑀧𑀺 𑀳𑀤𑀬𑀲𑀻𑀢𑀮𑀪𑀸𑀯𑀓𑀸𑀭𑀡𑀢𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀣 𑀯𑀸 𑀅𑀲𑀸𑀥𑀸𑀭𑀡𑀜𑀸𑀡𑀯𑀺𑀲𑁂𑀲𑀦𑀺𑀩𑀦𑁆𑀥𑀦𑀪𑀽𑀢𑀸 𑀲𑀸𑀢𑀺𑀲𑀬𑀁 𑀦𑀺𑀭𑀯𑀲𑁂𑀲𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀯𑀺𑀬 𑀲𑀯𑀺𑀲𑀬𑀩𑁆𑀬𑀸𑀧𑀺𑀢𑀸𑀬 𑀫𑀳𑀸𑀓𑀭𑀼𑀡𑀸𑀪𑀸𑀯𑀁 𑀉𑀧𑀕𑀢𑀸 𑀓𑀭𑀼𑀡𑀸𑀯 𑀪𑀕𑀯𑀢𑁄 𑀅𑀢𑀺𑀲𑀬𑁂𑀦 𑀳𑀤𑀬𑀲𑀻𑀢𑀮𑀪𑀸𑀯𑀳𑁂𑀢𑀽𑀢𑀺 𑀆𑀳 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺. 𑀅𑀣 𑀯𑀸 𑀲𑀢𑀺𑀧𑀺 𑀫𑁂𑀢𑁆𑀢𑀸𑀫𑀼𑀤𑀺𑀢𑀸𑀦𑀁 𑀲𑀸𑀢𑀺𑀲𑀬𑁂 𑀳𑀤𑀬𑀲𑀻𑀢𑀻𑀪𑀸𑀯𑀦𑀺𑀩𑀦𑁆𑀥𑀦𑀢𑁆𑀢𑁂 𑀲𑀓𑀮𑀩𑀼𑀤𑁆𑀥𑀕𑀼𑀡𑀯𑀺𑀲𑁂𑀲𑀓𑀸𑀭𑀡𑀢𑀸𑀬 𑀢𑀸𑀲𑀫𑁆𑀧𑀺 𑀓𑀸𑀭𑀡𑀦𑁆𑀢𑀺 𑀓𑀭𑀼𑀡𑀸𑀯 𑀪𑀕𑀯𑀢𑁄 𑀳𑀤𑀬𑀲𑀻𑀢𑀮𑀪𑀸𑀯𑀓𑀸𑀭𑀡𑀁 𑀯𑀼𑀢𑁆𑀢𑀸. 𑀓𑀭𑀼𑀡𑀸𑀦𑀺𑀤𑀸𑀦𑀸 𑀳𑀺 𑀲𑀩𑁆𑀩𑁂𑀧𑀺 𑀩𑀼𑀤𑁆𑀥𑀕𑀼𑀡𑀸. 𑀓𑀭𑀼𑀡𑀸𑀦𑀼𑀪𑀸𑀯𑀦𑀺𑀩𑁆𑀩𑀸𑀧𑀺𑀬𑀫𑀸𑀦𑀲𑀁𑀲𑀸𑀭𑀤𑀼𑀓𑁆𑀔𑀲𑀦𑁆𑀢𑀸𑀧𑀲𑁆𑀲 𑀳𑀺 𑀪𑀕𑀯𑀢𑁄 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸𑀬 𑀅𑀦𑁂𑀓𑀸𑀦𑀺𑀧𑀺 𑀅𑀲𑀗𑁆𑀔𑁂𑀬𑁆𑀬𑀸𑀦𑀺 𑀓𑀧𑁆𑀧𑀸𑀦𑀁 𑀅𑀓𑀺𑀮𑀦𑁆𑀢𑀭𑀽𑀧𑀲𑁆𑀲𑁂𑀯 𑀦𑀺𑀭𑀯𑀲𑁂𑀲𑀩𑀼𑀤𑁆𑀥𑀓𑀭𑀥𑀫𑁆𑀫𑀲𑀫𑁆𑀪𑀭𑀡𑀦𑀺𑀬𑀢𑀲𑁆𑀲 𑀲𑀫𑀥𑀺𑀕𑀢𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑀲𑁆𑀲 𑀘 𑀲𑀦𑁆𑀦𑀺𑀳𑀺𑀢𑁂𑀲𑀼𑀧𑀺 𑀲𑀢𑁆𑀢𑀲𑀗𑁆𑀔𑀸𑀭𑀲𑀫𑀼𑀧𑀦𑀻𑀢𑀳𑀤𑀬𑀽𑀧𑀢𑀸𑀧𑀦𑀺𑀫𑀺𑀢𑁆𑀢𑁂𑀲𑀼 𑀦 𑀈𑀲𑀓𑀫𑁆𑀧𑀺 ¶ 𑀘𑀺𑀢𑁆𑀢𑀲𑀻𑀢𑀻𑀪𑀸𑀯𑀲𑁆𑀲𑀜𑁆𑀜𑀣𑀢𑁆𑀢𑀫𑀳𑁄𑀲𑀻𑀢𑀺. 𑀏𑀢𑀲𑁆𑀫𑀺𑀜𑁆𑀘 𑀅𑀢𑁆𑀣𑀯𑀺𑀓𑀧𑁆𑀧𑁂 𑀢𑀻𑀲𑀼𑀧𑀺 𑀅𑀯𑀢𑁆𑀣𑀸𑀲𑀼 𑀪𑀕𑀯𑀢𑁄 𑀓𑀭𑀼𑀡𑀸 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸, 𑀬𑀣𑀸𑀲𑀪𑀸𑀯𑀁 𑀧𑀓𑀸𑀭𑁂𑀳𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀸𑀯 𑀜𑁂𑀬𑁆𑀬𑀸𑀯𑀭𑀡𑀧𑁆𑀧𑀳𑀸𑀦𑀢𑁄 𑀧𑀓𑀸𑀭𑁂𑀳𑀺 𑀥𑀫𑁆𑀫𑀲𑀪𑀸𑀯𑀸𑀯𑀚𑁄𑀢𑀦𑀝𑁆𑀞𑁂𑀦 𑀧𑀚𑁆𑀚𑁄𑀢𑁄𑀢𑀺 𑀧𑀜𑁆𑀜𑀸𑀧𑀚𑁆𑀚𑁄𑀢𑁄, 𑀲𑀯𑀸𑀲𑀦𑀧𑁆𑀧𑀳𑀸𑀦𑀢𑁄 𑀯𑀺𑀲𑁂𑀲𑁂𑀦 𑀳𑀢𑀁 𑀲𑀫𑀼𑀕𑁆𑀖𑀸𑀝𑀺𑀢𑀁 𑀯𑀺𑀳𑀢𑀁, 𑀧𑀜𑁆𑀜𑀸𑀧𑀚𑁆𑀚𑁄𑀢𑁂𑀦 𑀯𑀺𑀳𑀢𑀁 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀁. 𑀫𑀼𑀬𑁆𑀳𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀫𑀼𑀬𑁆𑀳𑀢𑀺, 𑀫𑁄𑀳𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀫𑁄𑀳𑁄, 𑀅𑀯𑀺𑀚𑁆𑀚𑀸, 𑀲𑁆𑀯𑁂𑀯 𑀯𑀺𑀲𑀬𑀲𑀪𑀸𑀯𑀧𑀝𑀺𑀘𑁆𑀙𑀸𑀤𑀦𑀢𑁄 𑀅𑀦𑁆𑀥𑀓𑀸𑀭𑀲𑀭𑀺𑀓𑁆𑀔𑀢𑀸𑀬 𑀢𑀫𑁄 𑀯𑀺𑀬𑀸𑀢𑀺 𑀢𑀫𑁄, 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑁄 𑀫𑁄𑀳𑀢𑀫𑁄 𑀏𑀢𑀲𑁆𑀲𑀸𑀢𑀺 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫𑁄, 𑀢𑀁 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫𑀁 ¶ . 𑀲𑀩𑁆𑀩𑁂𑀲𑀫𑁆𑀧𑀺 𑀳𑀺 𑀔𑀻𑀡𑀸𑀲𑀯𑀸𑀦𑀁 𑀲𑀢𑀺𑀧𑀺 𑀧𑀜𑁆𑀜𑀸𑀧𑀚𑁆𑀚𑁄𑀢𑁂𑀦 𑀅𑀯𑀺𑀚𑁆𑀚𑀸𑀦𑁆𑀥𑀓𑀸𑀭𑀲𑁆𑀲 𑀯𑀺𑀳𑀢𑀪𑀸𑀯𑁂 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁂𑀳𑀺 𑀯𑀺𑀬 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸𑀦𑀁 𑀲𑀸𑀯𑀓𑁂𑀳𑀺, 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁂𑀳𑀺 𑀘 𑀲𑀯𑀸𑀲𑀦𑀧𑁆𑀧𑀳𑀸𑀦𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑀲𑁆𑀲 𑀯𑀺𑀲𑁂𑀲𑁄 𑀯𑀺𑀚𑁆𑀚𑀢𑀻𑀢𑀺 𑀲𑀸𑀢𑀺𑀲𑀬𑁂𑀦 𑀅𑀯𑀺𑀚𑁆𑀚𑀸𑀧𑁆𑀧𑀳𑀸𑀦𑁂𑀦 𑀪𑀕𑀯𑀦𑁆𑀢𑀁 𑀣𑁄𑀫𑁂𑀦𑁆𑀢𑁄 𑀆𑀳 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺.

𑀅𑀣 ¶ 𑀯𑀸 𑀅𑀦𑁆𑀢𑀭𑁂𑀦 𑀧𑀭𑁄𑀧𑀤𑁂𑀲𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀅𑀘𑁆𑀘𑀦𑁆𑀢𑀁 𑀅𑀯𑀺𑀚𑁆𑀚𑀸𑀦𑁆𑀥𑀓𑀸𑀭𑀯𑀺𑀕𑀫𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀢𑀢𑁆𑀢𑀸, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀸𑀬, 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯𑀲𑁆𑀲 𑀲𑀫𑀥𑀺𑀕𑀢𑀢𑁆𑀢𑀸, 𑀧𑀭𑀲𑀦𑁆𑀢𑀢𑀺𑀬𑀜𑁆𑀘 𑀥𑀫𑁆𑀫𑀤𑁂𑀲𑀦𑀸𑀢𑀺𑀲𑀬𑀸𑀦𑀼𑀪𑀸𑀯𑁂𑀦 𑀲𑀫𑁆𑀫𑀤𑁂𑀯 𑀢𑀲𑁆𑀲 𑀧𑀯𑀢𑁆𑀢𑀺𑀢𑀢𑁆𑀢𑀸 𑀪𑀕𑀯𑀸𑀯 𑀯𑀺𑀲𑁂𑀲𑀢𑁄 𑀫𑁄𑀳𑀢𑀫𑀯𑀺𑀕𑀫𑁂𑀦 𑀣𑁄𑀫𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑀯𑀺𑀓𑀧𑁆𑀧𑁂 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑁄’’𑀢𑀺 𑀧𑀤𑁂𑀦 𑀪𑀕𑀯𑀢𑁄 𑀧𑀝𑀺𑀯𑁂𑀥𑀧𑀜𑁆𑀜𑀸 𑀯𑀺𑀬 𑀤𑁂𑀲𑀦𑀸𑀧𑀜𑁆𑀜𑀸𑀧𑀺 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦 𑀏𑀓𑀲𑁂𑀲𑀦𑀬𑁂𑀦 𑀯𑀸 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀣 ¶ 𑀯𑀸 𑀪𑀕𑀯𑀢𑁄 𑀜𑀸𑀡𑀲𑁆𑀲 𑀜𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀢𑁆𑀢𑀸 𑀲𑀓𑀮𑀜𑁂𑀬𑁆𑀬𑀥𑀫𑁆𑀫𑀲𑀪𑀸𑀯𑀸𑀩𑁄𑀥𑀦𑀲𑀫𑀢𑁆𑀣𑁂𑀦 𑀅𑀦𑀸𑀯𑀭𑀡𑀜𑀸𑀡𑀲𑀗𑁆𑀔𑀸𑀢𑁂𑀦 𑀧𑀜𑁆𑀜𑀸𑀧𑀚𑁆𑀚𑁄𑀢𑁂𑀦 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀲𑀪𑀸𑀯𑀘𑁆𑀙𑀸𑀤𑀓𑀲𑁆𑀲 𑀫𑁄𑀳𑀦𑁆𑀥𑀓𑀸𑀭𑀲𑁆𑀲 𑀯𑀺𑀥𑀫𑀺𑀢𑀢𑁆𑀢𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀪𑀕𑀯𑀢𑁄 𑀫𑁄𑀳𑀢𑀫𑀯𑀺𑀦𑀸𑀲𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺. 𑀏𑀢𑁆𑀣 𑀘 𑀫𑁄𑀳𑀢𑀫𑀯𑀺𑀥𑀫𑀦𑀦𑁆𑀢𑁂 𑀅𑀥𑀺𑀕𑀢𑀢𑁆𑀢𑀸 𑀅𑀦𑀸𑀯𑀭𑀡𑀜𑀸𑀡𑀁 𑀓𑀸𑀭𑀡𑀽𑀧𑀘𑀸𑀭𑁂𑀦 𑀲𑀓𑀲𑀦𑁆𑀢𑀸𑀦𑁂 𑀫𑁄𑀳𑀢𑀫𑀯𑀺𑀥𑀫𑀦𑀁 𑀤𑀝𑁆𑀞𑀩𑁆𑀩𑀁. 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀲𑀯𑀸𑀲𑀦𑀧𑁆𑀧𑀳𑀸𑀦𑀫𑁂𑀯 𑀳𑀺 𑀓𑀺𑀮𑁂𑀲𑀸𑀦𑀁 ‘‘𑀜𑁂𑀬𑁆𑀬𑀸𑀯𑀭𑀡𑀧𑁆𑀧𑀳𑀸𑀦’’𑀦𑁆𑀢𑀺, 𑀧𑀭𑀲𑀦𑁆𑀢𑀸𑀦𑁂 𑀧𑀦 𑀫𑁄𑀳𑀢𑀫𑀯𑀺𑀥𑀫𑀦𑀲𑁆𑀲 𑀓𑀸𑀭𑀡𑀪𑀸𑀯𑀢𑁄 𑀅𑀦𑀸𑀯𑀭𑀡𑀜𑀸𑀡𑀁 ‘‘𑀫𑁄𑀳𑀢𑀫𑀯𑀺𑀥𑀫𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀓𑀺𑀁 𑀧𑀦 𑀓𑀸𑀭𑀡𑀁 𑀅𑀯𑀺𑀚𑁆𑀚𑀸𑀯𑀺𑀕𑁆𑀖𑀸𑀢𑁄 𑀬𑁂𑀯𑁂𑀓𑁄 𑀧𑀳𑀸𑀦𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀪𑀕𑀯𑀢𑁄 𑀣𑁄𑀫𑀦𑀸𑀦𑀺𑀫𑀺𑀢𑁆𑀢𑀁 𑀕𑀬𑁆𑀳𑀢𑀺, 𑀦 𑀧𑀦 𑀲𑀸𑀢𑀺𑀲𑀬𑀦𑀺𑀭𑀯𑀲𑁂𑀲𑀓𑀺𑀮𑁂𑀲𑀧𑁆𑀧𑀳𑀸𑀦𑀦𑁆𑀢𑀺? 𑀢𑀧𑁆𑀧𑀳𑀸𑀦𑀯𑀘𑀦𑁂𑀦𑁂𑀯 𑀢𑀤𑁂𑀓𑀝𑁆𑀞𑀢𑀸𑀬 𑀲𑀓𑀮𑀲𑀁𑀓𑀺𑀮𑁂𑀲𑀕𑀡𑀲𑀫𑀼𑀕𑁆𑀖𑀸𑀢𑀚𑁄𑀢𑀺𑀢𑀪𑀸𑀯𑀢𑁄. 𑀦 𑀳𑀺 𑀲𑁄 𑀢𑀸𑀤𑀺𑀲𑁄 𑀓𑀺𑀮𑁂𑀲𑁄 𑀅𑀢𑁆𑀣𑀺, 𑀬𑁄 𑀦𑀺𑀭𑀯𑀲𑁂𑀲𑀅𑀯𑀺𑀚𑁆𑀚𑀸𑀧𑁆𑀧𑀳𑀸𑀦𑁂𑀦 𑀦 𑀧𑀳𑀻𑀬𑀢𑀻𑀢𑀺. 𑀅𑀣 𑀯𑀸 𑀯𑀺𑀚𑁆𑀚𑀸 𑀯𑀺𑀬 𑀲𑀓𑀮𑀓𑀼𑀲𑀮𑀥𑀫𑁆𑀫𑀲𑀫𑀼𑀧𑁆𑀧𑀢𑁆𑀢𑀺𑀬𑀸 𑀦𑀺𑀭𑀯𑀲𑁂𑀲𑀸𑀓𑀼𑀲𑀮𑀥𑀫𑁆𑀫𑀦𑀺𑀩𑁆𑀩𑀢𑁆𑀢𑀺𑀬𑀸, 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀘 𑀅𑀯𑀺𑀚𑁆𑀚𑀸 𑀧𑀥𑀸𑀦𑀓𑀸𑀭𑀡𑀦𑁆𑀢𑀺 𑀢𑀩𑁆𑀩𑀺𑀕𑁆𑀖𑀸𑀢𑀯𑀘𑀦𑁂𑀦 𑀲𑀓𑀮𑀲𑀁𑀓𑀺𑀮𑁂𑀲𑀕𑀡𑀲𑀫𑀼𑀕𑁆𑀖𑀸𑀢𑁄 𑀯𑀼𑀢𑁆𑀢𑁄𑀬𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺.

𑀦𑀭𑀸 𑀘 𑀅𑀫𑀭𑀸 𑀘 𑀦𑀭𑀸𑀫𑀭𑀸, 𑀲𑀳 𑀦𑀭𑀸𑀫𑀭𑁂𑀳𑀻𑀢𑀺 𑀲𑀦𑀭𑀸𑀫𑀭𑁄, 𑀲𑀦𑀭𑀸𑀫𑀭𑁄 𑀘 𑀲𑁄 𑀮𑁄𑀓𑁄 𑀘𑀸𑀢𑀺 𑀲𑀦𑀭𑀸𑀫𑀭𑀮𑁄𑀓𑁄, 𑀢𑀲𑁆𑀲 𑀕𑀭𑀼𑀢𑀺 𑀲𑀦𑀭𑀸𑀫𑀭𑀮𑁄𑀓𑀕𑀭𑀼, 𑀢𑀁 𑀲𑀦𑀭𑀸𑀫𑀭𑀮𑁄𑀓𑀕𑀭𑀼𑀁. 𑀏𑀢𑁂𑀦 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 ¶ 𑀯𑀺𑀬 𑀢𑀤𑀯𑀲𑀺𑀝𑁆𑀞𑀲𑀢𑁆𑀢𑀸𑀦𑀫𑁆𑀧𑀺 𑀬𑀣𑀸𑀭𑀳𑀁 𑀕𑀼𑀡𑀯𑀺𑀲𑁂𑀲𑀸𑀯𑀳𑀢𑁄 𑀪𑀕𑀯𑀢𑁄 𑀉𑀧𑀓𑀸𑀭𑀺𑀢𑀁 ¶ 𑀤𑀲𑁆𑀲𑁂𑀢𑀺. 𑀦 𑀘𑁂𑀢𑁆𑀣 𑀧𑀥𑀸𑀦𑀸𑀧𑀥𑀸𑀦𑀪𑀸𑀯𑁄 𑀘𑁄𑀤𑁂𑀢𑀩𑁆𑀩𑁄. 𑀅𑀜𑁆𑀜𑁄 𑀳𑀺 𑀲𑀤𑁆𑀤𑀓𑁆𑀓𑀫𑁄, 𑀅𑀜𑁆𑀜𑁄 𑀅𑀢𑁆𑀣𑀓𑁆𑀓𑀫𑁄. 𑀏𑀤𑀺𑀲𑁂𑀲𑀼 𑀳𑀺 𑀲𑀫𑀸𑀲𑀧𑀤𑁂𑀲𑀼 ¶ 𑀧𑀥𑀸𑀦𑀫𑁆𑀧𑀺 𑀅𑀧𑁆𑀧𑀥𑀸𑀦𑀁 𑀯𑀺𑀬 𑀦𑀺𑀤𑁆𑀤𑀺𑀲𑀻𑀬𑀢𑀺 𑀬𑀣𑀸 𑁋 ‘‘𑀲𑀭𑀸𑀚𑀺𑀓𑀸𑀬 𑀧𑀭𑀺𑀲𑀸𑀬𑀸’’𑀢𑀺 (𑀅𑀧. 𑀅𑀝𑁆𑀞. 𑁧.𑁮𑁨). 𑀓𑀸𑀫𑀜𑁆𑀘𑁂𑀢𑁆𑀣 𑀲𑀢𑁆𑀢𑀲𑀗𑁆𑀔𑀸𑀭𑀪𑀸𑀚𑀦𑀯𑀲𑁂𑀦 𑀢𑀺𑀯𑀺𑀥𑁄 𑀮𑁄𑀓𑁄, 𑀕𑀭𑀼𑀪𑀸𑀯𑀲𑁆𑀲 𑀧𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀕𑀭𑀼𑀓𑀭𑀡𑀲𑀫𑀢𑁆𑀣𑀲𑁆𑀲𑁂𑀯 𑀬𑀼𑀚𑁆𑀚𑀦𑀢𑁄 𑀲𑀢𑁆𑀢𑀮𑁄𑀓𑀲𑁆𑀲𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀲𑁄 𑀳𑀺 𑀮𑁄𑀓𑀺𑀬𑀦𑁆𑀢𑀺 𑀏𑀢𑁆𑀣 𑀧𑀼𑀜𑁆𑀜𑀧𑀸𑀧𑀸𑀦𑀺 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺 ‘‘𑀮𑁄𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀫𑀭𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀉𑀧𑀧𑀢𑁆𑀢𑀺𑀤𑁂𑀯𑀸 𑀅𑀥𑀺𑀧𑁆𑀧𑁂𑀢𑀸.

𑀅𑀣 𑀯𑀸 𑀲𑀫𑀽𑀳𑀢𑁆𑀣𑁄 𑀮𑁄𑀓-𑀲𑀤𑁆𑀤𑁄 𑀲𑀫𑀼𑀤𑀸𑀬𑀯𑀲𑁂𑀦 𑀮𑁄𑀓𑀻𑀬𑀢𑀺 𑀧𑀜𑁆𑀜𑀸𑀧𑀻𑀬𑀢𑀻𑀢𑀺. 𑀲𑀳 𑀦𑀭𑁂𑀳𑀻𑀢𑀺 𑀲𑀦𑀭𑀸, 𑀲𑀦𑀭𑀸 𑀘 𑀢𑁂 𑀅𑀫𑀭𑀸 𑀘𑁂𑀢𑀺 𑀲𑀦𑀭𑀸𑀫𑀭𑀸, 𑀢𑁂𑀲𑀁 𑀮𑁄𑀓𑁄𑀢𑀺 𑀲𑀦𑀭𑀸𑀫𑀭𑀮𑁄𑀓𑁄𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀅𑀫𑀭-𑀲𑀤𑁆𑀤𑁂𑀦 𑀘𑁂𑀢𑁆𑀣 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀧𑀺 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀢𑁂 𑀳𑀺 𑀫𑀭𑀡𑀸𑀪𑀸𑀯𑀢𑁄 𑀧𑀭𑀫𑀢𑁆𑀣𑀢𑁄 𑀅𑀫𑀭𑀸. 𑀦𑀭𑀸𑀫𑀭𑀸𑀦𑀁𑀬𑁂𑀯 𑀘 𑀕𑀳𑀡𑀁 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑀯𑀲𑁂𑀦, 𑀬𑀣𑀸 𑁋 ‘‘𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 (𑀤𑀻. 𑀦𑀺. 𑁧.𑁧𑁫𑁭). 𑀢𑀣𑀸 𑀳𑀺 𑀲𑀩𑁆𑀩𑀸𑀦𑀢𑁆𑀣𑀧𑀭𑀺𑀳𑀭𑀡𑀧𑀼𑀩𑁆𑀩𑀗𑁆𑀕𑀫𑀸𑀬 𑀦𑀺𑀭𑀯𑀲𑁂𑀲𑀳𑀺𑀢𑀲𑀼𑀔𑀯𑀺𑀥𑀸𑀦𑀢𑀧𑁆𑀧𑀭𑀸𑀬 𑀦𑀺𑀭𑀢𑀺𑀲𑀬𑀸𑀬 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀧𑀚𑀸𑀬 𑀅𑀘𑁆𑀘𑀦𑁆𑀢𑀼𑀧𑀓𑀸𑀭𑀺𑀢𑀸𑀬, 𑀅𑀧𑀭𑀺𑀫𑀺𑀢𑀦𑀺𑀭𑀼𑀧𑀫𑀧𑁆𑀧𑀪𑀸𑀯𑀕𑀼𑀡𑀯𑀺𑀲𑁂𑀲𑀲𑀫𑀗𑁆𑀕𑀺𑀢𑀸𑀬 𑀘 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑁄 𑀪𑀕𑀯𑀸 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀉𑀢𑁆𑀢𑀫𑀁 𑀕𑀸𑀭𑀯𑀝𑁆𑀞𑀸𑀦𑀁, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀦𑀭𑀸𑀫𑀭𑀮𑁄𑀓𑀕𑀭𑀼’’𑀦𑁆𑀢𑀺.

𑀲𑁄𑀪𑀦𑀁 𑀕𑀢𑀁 𑀕𑀫𑀦𑀁 𑀏𑀢𑀲𑁆𑀲𑀸𑀢𑀺 𑀲𑀼𑀕𑀢𑁄. 𑀪𑀕𑀯𑀢𑁄 𑀳𑀺 𑀯𑁂𑀦𑁂𑀬𑁆𑀬𑀚𑀦𑀼𑀧𑀲𑀗𑁆𑀓𑀫𑀦𑀁 𑀏𑀓𑀦𑁆𑀢𑁂𑀦 𑀢𑁂𑀲𑀁 𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀢𑁄 𑀲𑁄𑀪𑀦𑀁, 𑀢𑀣𑀸 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦 (𑀤𑀻. 𑀦𑀺. 𑁨.𑁩𑁩; 𑁩.𑁧𑁯𑁮-𑁨𑁦𑁦; 𑀫. 𑀦𑀺. 𑁨.𑁩𑁮𑁫, 𑁩𑁮𑁬) 𑀧𑀝𑀺𑀫𑀡𑁆𑀟𑀺𑀢𑀭𑀽𑀧𑀓𑀸𑀬𑀢𑀸𑀬𑀤𑀼𑀢𑀯𑀺𑀮𑀫𑁆𑀩𑀺𑀢- 𑀔𑀮𑀺𑀢𑀸𑀦𑀼𑀓𑀟𑁆𑀠𑀦𑀦𑀺𑀧𑁆𑀧𑀻𑀴𑀦𑀼𑀓𑁆𑀓𑀼𑀝𑀺𑀓𑀓𑀼𑀝𑀺𑀮𑀸𑀓𑀼𑀮𑀢𑀸𑀤𑀺𑀤𑁄𑀲𑀭𑀳𑀺𑀢𑀁 𑀯𑀺𑀮𑀸𑀲𑀺𑀢𑀭𑀸𑀚𑀳𑀁𑀲𑀯𑀲𑀪𑀯𑀸𑀭𑀡𑀫𑀺𑀕𑀭𑀸𑀚𑀕𑀫𑀦𑀁 𑀓𑀸𑀬𑀕𑀫𑀦𑀁 ¶ 𑀜𑀸𑀡𑀕𑀫𑀦𑀜𑁆𑀘 𑀯𑀺𑀧𑀼𑀮𑀦𑀺𑀫𑁆𑀫𑀮𑀓𑀭𑀼𑀡𑀸𑀲𑀢𑀺𑀯𑀻𑀭𑀺𑀬𑀸𑀤𑀺𑀕𑀼𑀡𑀯𑀺𑀲𑁂𑀲𑀲𑀳𑀺𑀢𑀫𑀪𑀺𑀦𑀻𑀳𑀸𑀭𑀢𑁄 𑀬𑀸𑀯 𑀫𑀳𑀸𑀩𑁄𑀥𑀺 𑀅𑀦𑀯𑀚𑁆𑀚𑀢𑀸𑀬 𑀲𑁄𑀪𑀦𑀫𑁂𑀯𑀸𑀢𑀺.

𑀅𑀣 𑀯𑀸 𑀲𑀬𑀫𑁆𑀪𑀼𑀜𑀸𑀡𑁂𑀦 𑀲𑀓𑀮𑀫𑁆𑀧𑀺 𑀮𑁄𑀓𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦 𑀧𑀭𑀺𑀚𑀸𑀦𑀦𑁆𑀢𑁄 𑀜𑀸𑀡𑁂𑀦 𑀲𑀫𑁆𑀫𑀸 𑀕𑀢𑁄 𑀅𑀯𑀕𑀢𑁄𑀢𑀺 𑀲𑀼𑀕𑀢𑁄. 𑀢𑀣𑀸 𑀮𑁄𑀓𑀲𑀫𑀼𑀤𑀬𑀁 ¶ 𑀧𑀳𑀸𑀦𑀸𑀪𑀺𑀲𑀫𑀬𑀯𑀲𑁂𑀦 𑀧𑀚𑀳𑀦𑁆𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑁂𑀦𑁆𑀢𑁄 𑀲𑀫𑁆𑀫𑀸 𑀕𑀢𑁄 𑀅𑀢𑀻𑀢𑁄𑀢𑀺 𑀲𑀼𑀕𑀢𑁄. 𑀮𑁄𑀓𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀲𑀫𑁆𑀫𑀸 𑀕𑀢𑁄 𑀅𑀥𑀺𑀕𑀢𑁄𑀢𑀺 𑀲𑀼𑀕𑀢𑁄. 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀁 𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀲𑀫𑁆𑀫𑀸 𑀕𑀢𑁄 𑀧𑀝𑀺𑀧𑀦𑁆𑀦𑁄𑀢𑀺 𑀲𑀼𑀕𑀢𑁄. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺, 𑀦 𑀧𑀘𑁆𑀘𑁂𑀢𑀺, 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑀲𑀼𑀕𑀢𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄 ¶ . 𑀅𑀣 𑀯𑀸 𑀲𑀼𑀦𑁆𑀤𑀭𑀁 𑀞𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸 𑀕𑀢𑁄 𑀅𑀥𑀺𑀕𑀢𑁄𑀢𑀺 𑀲𑀼𑀕𑀢𑁄. 𑀬𑀲𑁆𑀫𑀸 𑀯𑀸 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀜𑁆𑀳𑀺𑀢𑀁 𑀯𑀺𑀦𑁂𑀬𑁆𑀬𑀸𑀦𑀁 𑀬𑀣𑀸𑀭𑀳𑀁 𑀓𑀸𑀮𑀬𑀼𑀢𑁆𑀢𑀫𑁂𑀯 𑀘 𑀥𑀫𑁆𑀫𑀁 𑀪𑀸𑀲𑀢𑀺, 𑀢𑀲𑁆𑀫𑀸 𑀲𑀫𑁆𑀫𑀸 𑀕𑀤𑀢𑀻𑀢𑀺 𑀲𑀼𑀕𑀢𑁄, 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸. 𑀇𑀢𑀺 𑀲𑁄𑀪𑀦𑀕𑀫𑀦𑀢𑀸𑀤𑀻𑀳𑀺 𑀲𑀼𑀕𑀢𑁄, 𑀢𑀁 𑀲𑀼𑀕𑀢𑀁.

𑀧𑀼𑀜𑁆𑀜𑀧𑀸𑀧𑀓𑀫𑁆𑀫𑁂𑀳𑀺 𑀉𑀧𑀧𑀚𑁆𑀚𑀦𑀯𑀲𑁂𑀦 𑀕𑀦𑁆𑀢𑀩𑁆𑀩𑀢𑁄 𑀕𑀢𑀺𑀬𑁄, 𑀉𑀧𑀧𑀢𑁆𑀢𑀺𑀪𑀯𑀯𑀺𑀲𑁂𑀲𑀸. 𑀢𑀸 𑀧𑀦 𑀦𑀺𑀭𑀬𑀸𑀤𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑀸, 𑀢𑀸𑀳𑀺 𑀲𑀓𑀮𑀲𑁆𑀲𑀸𑀧𑀺 𑀪𑀯𑀕𑀸𑀫𑀺𑀓𑀫𑁆𑀫𑀲𑁆𑀲 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑁂𑀦 𑀅𑀯𑀺𑀧𑀸𑀓𑀸𑀭𑀳𑀪𑀸𑀯𑀓𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀢𑁆𑀢𑀸 𑀪𑀕𑀯𑀸 𑀧𑀜𑁆𑀘𑀳𑀺𑀧𑀺 𑀕𑀢𑀻𑀳𑀺 𑀲𑀼𑀝𑁆𑀞𑀼 𑀫𑀼𑀢𑁆𑀢𑁄 𑀯𑀺𑀲𑀁𑀬𑀼𑀢𑁆𑀢𑁄𑀢𑀺 𑀆𑀳 𑁋 ‘‘𑀕𑀢𑀺𑀯𑀺𑀫𑀼𑀢𑁆𑀢’’𑀦𑁆𑀢𑀺. 𑀏𑀢𑁂𑀦 𑀪𑀕𑀯𑀢𑁄 𑀓𑀢𑁆𑀣𑀘𑀺𑀧𑀺 𑀕𑀢𑀺𑀬𑀸 𑀅𑀧𑀭𑀺𑀬𑀸𑀧𑀦𑁆𑀦𑀢𑀁 𑀤𑀲𑁆𑀲𑁂𑀢𑀺, 𑀬𑀢𑁄 𑀪𑀕𑀯𑀸 ‘‘𑀤𑁂𑀯𑀸𑀢𑀺𑀤𑁂𑀯𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀦𑁂𑀯𑀸𑀳 𑁋

‘‘𑀬𑁂𑀦 𑀤𑁂𑀯𑀽𑀧𑀧𑀢𑁆𑀬𑀲𑁆𑀲, 𑀕𑀦𑁆𑀥𑀩𑁆𑀩𑁄 𑀯𑀸 𑀯𑀺𑀳𑀗𑁆𑀕𑀫𑁄;

𑀬𑀓𑁆𑀔𑀢𑁆𑀢𑀁 𑀬𑁂𑀦 𑀕𑀘𑁆𑀙𑁂𑀬𑁆𑀬𑀁, 𑀫𑀦𑀼𑀲𑁆𑀲𑀢𑁆𑀢𑀜𑁆𑀘 𑀅𑀩𑁆𑀩𑀚𑁂;

𑀢𑁂 𑀫𑀬𑁆𑀳𑀁 𑀆𑀲𑀯𑀸 𑀔𑀻𑀡𑀸, 𑀯𑀺𑀤𑁆𑀥𑀲𑁆𑀢𑀸 𑀯𑀺𑀦𑀴𑀻𑀓𑀢𑀸’’𑀢𑀺. (𑀅. 𑀦𑀺. 𑁪.𑁩𑁬);

𑀢𑀁𑀢𑀁𑀕𑀢𑀺𑀲𑀁𑀯𑀢𑁆𑀢𑀦𑀓𑀸𑀦𑀜𑁆𑀳𑀺 ¶ 𑀓𑀫𑁆𑀫𑀓𑀺𑀮𑁂𑀲𑀸𑀦𑀁 𑀅𑀕𑁆𑀕𑀫𑀕𑁆𑀕𑁂𑀦 𑀩𑁄𑀥𑀺𑀫𑀽𑀮𑁂𑀬𑁂𑀯 𑀲𑀼𑀧𑁆𑀧𑀳𑀻𑀦𑀢𑁆𑀢𑀸 𑀦𑀢𑁆𑀣𑀺 𑀪𑀕𑀯𑀢𑁄 𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀢𑀺 𑀅𑀘𑁆𑀘𑀦𑁆𑀢𑀫𑁂𑀯 𑀪𑀕𑀯𑀸 𑀲𑀩𑁆𑀩𑀪𑀯𑀬𑁄𑀦𑀺𑀕𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑀲𑀢𑁆𑀢𑀦𑀺𑀓𑀸𑀬𑁂𑀳𑀺 𑀲𑀼𑀧𑀭𑀺𑀫𑀼𑀢𑁆𑀢𑁄, 𑀢𑀁 𑀕𑀢𑀺𑀯𑀺𑀫𑀼𑀢𑁆𑀢𑀁. 𑀯𑀦𑁆𑀤𑁂𑀢𑀺 𑀦𑀫𑀸𑀫𑀺, 𑀣𑁄𑀫𑁂𑀫𑀻𑀢𑀺 𑀯𑀸 𑀅𑀢𑁆𑀣𑁄.

𑀅𑀣 𑀯𑀸 𑀕𑀢𑀺𑀯𑀺𑀫𑀼𑀢𑁆𑀢𑀦𑁆𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀧𑁆𑀧𑀢𑁆𑀢𑀺𑀬𑀸 𑀪𑀕𑀯𑀦𑁆𑀢𑀁 𑀣𑁄𑀫𑁂𑀢𑀺. 𑀏𑀢𑁆𑀣 𑀳𑀺 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀪𑀕𑀯𑀢𑁄 𑀣𑁄𑀫𑀦𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺𑀢𑁄, 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀢𑁄 𑀘. 𑀢𑁂𑀲𑀼 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 𑀅𑀦𑀸𑀯𑀭𑀡𑀜𑀸𑀡𑀸𑀥𑀺𑀕𑀫𑀢𑁄, 𑀲𑀯𑀸𑀲𑀦𑀸𑀦𑀁 𑀲𑀩𑁆𑀩𑁂𑀲𑀁 𑀓𑀺𑀮𑁂𑀲𑀸𑀦𑀁 𑀅𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀢𑁄, 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀢𑁄 𑀘 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀮𑀸𑀪𑀲𑀓𑁆𑀓𑀸𑀭𑀸𑀤𑀺𑀦𑀺𑀭𑀧𑁂𑀓𑁆𑀔𑀘𑀺𑀢𑁆𑀢𑀲𑁆𑀲 ¶ 𑀲𑀩𑁆𑀩𑀤𑀼𑀓𑁆𑀔𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀤𑁂𑀲𑀦𑀸𑀢𑁄, 𑀯𑀺𑀭𑀼𑀤𑁆𑀥𑁂𑀲𑀼𑀧𑀺 𑀦𑀺𑀘𑁆𑀘𑀁 𑀳𑀺𑀢𑀚𑁆𑀛𑀸𑀲𑀬𑀢𑁄, 𑀜𑀸𑀡𑀧𑀭𑀺𑀧𑀸𑀓𑀓𑀸𑀮𑀸𑀕𑀫𑀦𑀢𑁄 𑀘. 𑀲𑀸 𑀧𑀦𑁂𑀢𑁆𑀣 𑀆𑀲𑀬𑀢𑁄 𑀧𑀬𑁄𑀕𑀢𑁄 𑀘 𑀤𑀼𑀯𑀺𑀥𑀸 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺, 𑀢𑀺𑀯𑀺𑀥𑀸 𑀘 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 𑀧𑀓𑀸𑀲𑀺𑀢𑀸 𑀳𑁄𑀢𑀺. 𑀓𑀣𑀁? ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺 𑀏𑀢𑁂𑀦 𑀆𑀲𑀬𑀢𑁄 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺, 𑀲𑀫𑁆𑀫𑀸 𑀕𑀤𑀦𑀢𑁆𑀣𑁂𑀦 𑀲𑀼𑀕𑀢-𑀲𑀤𑁆𑀤𑁂𑀦 𑀧𑀬𑁄𑀕𑀢𑁄 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺, ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫𑀁 𑀕𑀢𑀺𑀯𑀺𑀫𑀼𑀢𑁆𑀢’’𑀦𑁆𑀢𑀺 𑀏𑀢𑁂𑀳𑀺 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀢𑁆𑀣𑁂𑀦 𑀘 𑀲𑀼𑀕𑀢-𑀲𑀤𑁆𑀤𑁂𑀦 𑀢𑀺𑀯𑀺𑀥𑀸𑀧𑀺 ¶ 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺, 𑀅𑀯𑀲𑀺𑀝𑁆𑀞𑁂𑀦, ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺 𑀏𑀢𑁂𑀦 𑀘 𑀲𑀩𑁆𑀩𑀸𑀧𑀺 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀧𑀓𑀸𑀲𑀺𑀢𑀸 𑀳𑁄𑀢𑀻𑀢𑀺.

𑀅𑀣 𑀯𑀸 𑀢𑀻𑀳𑀸𑀓𑀸𑀭𑁂𑀳𑀺 𑀪𑀕𑀯𑀢𑁄 𑀣𑁄𑀫𑀦𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀳𑁂𑀢𑀼𑀢𑁄, 𑀨𑀮𑀢𑁄, 𑀉𑀧𑀓𑀸𑀭𑀢𑁄 𑀘. 𑀢𑀢𑁆𑀣 𑀳𑁂𑀢𑀼 𑀫𑀳𑀸𑀓𑀭𑀼𑀡𑀸, 𑀲𑀸 𑀧𑀞𑀫𑀧𑀤𑁂𑀦 𑀦𑀺𑀤𑀲𑁆𑀲𑀺𑀢𑀸. 𑀨𑀮𑀁 𑀘𑀢𑀼𑀩𑁆𑀩𑀺𑀥𑀁 𑁋 𑀜𑀸𑀡𑀲𑀫𑁆𑀧𑀤𑀸, 𑀧𑀳𑀸𑀦𑀲𑀫𑁆𑀧𑀤𑀸, 𑀆𑀦𑀼𑀪𑀸𑀯𑀲𑀫𑁆𑀧𑀤𑀸, 𑀭𑀽𑀧𑀓𑀸𑀬𑀲𑀫𑁆𑀧𑀤𑀸 𑀘𑀸𑀢𑀺. 𑀢𑀸𑀲𑀼 𑀜𑀸𑀡𑀧𑁆𑀧𑀳𑀸𑀦𑀲𑀫𑁆𑀧𑀤𑀸 𑀤𑀼𑀢𑀺𑀬𑀧𑀤𑁂𑀦 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀢𑁆𑀣𑁂𑀦 𑀘 𑀲𑀼𑀕𑀢-𑀲𑀤𑁆𑀤𑁂𑀦 𑀧𑀓𑀸𑀲𑀺𑀢𑀸 𑀳𑁄𑀦𑁆𑀢𑀺. 𑀆𑀦𑀼𑀪𑀸𑀯𑀲𑀫𑁆𑀧𑀤𑀸 𑀢𑀢𑀺𑀬𑀧𑀤𑁂𑀦, 𑀭𑀽𑀧𑀓𑀸𑀬𑀲𑀫𑁆𑀧𑀤𑀸 ¶ 𑀬𑀣𑀸𑀯𑀼𑀢𑁆𑀢𑀓𑀸𑀬𑀕𑀫𑀦𑀲𑁄𑀪𑀦𑀢𑁆𑀣𑁂𑀦 𑀲𑀼𑀕𑀢-𑀲𑀤𑁆𑀤𑁂𑀦, 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀧𑀸𑀭𑀺𑀧𑀽𑀭𑀺𑀬𑀸 (𑀤𑀻. 𑀦𑀺. 𑁨.𑁩𑁩; 𑁩.𑁧𑁯𑁮-𑁨𑁦𑁦; 𑀫. 𑀦𑀺. 𑁨.𑁩𑁮𑁫-𑁩𑁮𑁬) 𑀯𑀺𑀦𑀸 𑀢𑀤𑀪𑀸𑀯𑀢𑁄. 𑀉𑀧𑀓𑀸𑀭𑁄 𑀅𑀦𑁆𑀢𑀭𑀁 𑀅𑀩𑀸𑀳𑀺𑀭𑀁 𑀓𑀭𑀺𑀢𑁆𑀯𑀸 𑀢𑀺𑀯𑀺𑀥𑀬𑀸𑀦𑀫𑀼𑀔𑁂𑀦 𑀯𑀺𑀫𑀼𑀢𑁆𑀢𑀺𑀥𑀫𑁆𑀫𑀤𑁂𑀲𑀦𑀸, 𑀲𑁄 𑀲𑀫𑁆𑀫𑀸 𑀕𑀤𑀦𑀢𑁆𑀣𑁂𑀦 𑀲𑀼𑀕𑀢-𑀲𑀤𑁆𑀤𑁂𑀦 𑀧𑀓𑀸𑀲𑀺𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺 𑀏𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀫𑀽𑀮𑀁 𑀤𑀲𑁆𑀲𑁂𑀢𑀺. 𑀫𑀳𑀸𑀓𑀭𑀼𑀡𑀸𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀳𑀺 𑀪𑀕𑀯𑀸 𑀲𑀁𑀲𑀸𑀭𑀧𑀗𑁆𑀓𑀢𑁄 𑀲𑀢𑁆𑀢𑀸𑀦𑀁 𑀲𑀫𑀼𑀤𑁆𑀥𑀭𑀡𑀢𑁆𑀣𑀁 𑀓𑀢𑀸𑀪𑀺𑀦𑀻𑀳𑀸𑀭𑁄 𑀅𑀦𑀼𑀧𑀼𑀩𑁆𑀩𑁂𑀦 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀢𑁄𑀢𑀺 𑀓𑀭𑀼𑀡𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀫𑀽𑀮𑀁. ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺 𑀏𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀤𑀲𑁆𑀲𑁂𑀢𑀺. 𑀅𑀦𑀸𑀯𑀭𑀡𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀳𑀺 𑀫𑀕𑁆𑀕𑀜𑀸𑀡𑀁, 𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀘 𑀅𑀦𑀸𑀯𑀭𑀡𑀜𑀸𑀡𑀁 ‘‘𑀲𑀫𑁆𑀫𑀸𑀲𑀫𑁆𑀩𑁄𑀥𑀻’’𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀲𑀫𑁆𑀫𑀸 𑀕𑀤𑀦𑀢𑁆𑀣𑁂𑀦 𑀲𑀼𑀕𑀢-𑀲𑀤𑁆𑀤𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺, 𑀮𑀻𑀦𑀼𑀤𑁆𑀥𑀘𑁆𑀘𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀓𑀸𑀫𑀲𑀼𑀔𑀮𑁆𑀮𑀺𑀓𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕- 𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀪𑀺𑀦𑀺𑀯𑁂𑀲𑀸𑀤𑀺𑀅𑀦𑁆𑀢𑀤𑁆𑀯𑀬𑀭𑀳𑀺𑀢𑀸𑀬 𑀓𑀭𑀼𑀡𑀸𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑀺𑀢𑀸𑀬 ¶ 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀧𑀓𑀸𑀲𑀦𑀢𑁄 𑀲𑀼𑀕𑀢-𑀲𑀤𑁆𑀤𑀲𑁆𑀲. 𑀇𑀢𑀭𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀧𑀥𑀸𑀦𑀸𑀧𑁆𑀧𑀥𑀸𑀦𑀪𑁂𑀤𑀁 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀺. 𑀲𑀁𑀲𑀸𑀭𑀫𑀳𑁄𑀖𑀢𑁄 𑀲𑀢𑁆𑀢𑀲𑀦𑁆𑀢𑀸𑀭𑀡𑀜𑁆𑀘𑁂𑀢𑁆𑀣 𑀧𑀥𑀸𑀦𑀁 𑀧𑀬𑁄𑀚𑀦𑀁, 𑀢𑀤𑀜𑁆𑀜𑀫𑀧𑁆𑀧𑀥𑀸𑀦𑀁. 𑀢𑁂𑀲𑀼 𑀧𑀥𑀸𑀦𑁂𑀦 𑀧𑀭𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺, 𑀇𑀢𑀭𑁂𑀦 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺𑀁, 𑀢𑀤𑀼𑀪𑀬𑁂𑀦 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀸𑀤𑀻𑀲𑀼 (𑀧𑀼. 𑀧. 𑁨𑁪, 𑁧𑁭𑁩) 𑀘𑀢𑀽𑀲𑀼 𑀧𑀼𑀕𑁆𑀕𑀮𑁂𑀲𑀼 𑀪𑀕𑀯𑀢𑁄 𑀘𑀢𑀼𑀢𑁆𑀣𑀧𑀼𑀕𑁆𑀕𑀮𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦 𑀘 𑀅𑀦𑀼𑀢𑁆𑀢𑀭𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀁 𑀉𑀢𑁆𑀢𑀫𑀯𑀦𑁆𑀤𑀦𑀻𑀬𑀪𑀸𑀯𑀁, 𑀅𑀢𑁆𑀢𑀦𑁄 𑀘 𑀯𑀦𑁆𑀤𑀦𑀓𑀺𑀭𑀺𑀬𑀸𑀬 𑀔𑁂𑀢𑁆𑀢𑀗𑁆𑀕𑀢𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀏𑀢𑁆𑀣 𑀘 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀮𑁄𑀓𑀺𑀬𑁂𑀲𑀼 𑀫𑀳𑀕𑁆𑀕𑀢𑀪𑀸𑀯𑀧𑁆𑀧𑀢𑁆𑀢𑀸𑀲𑀸𑀥𑀸𑀭𑀡𑀕𑀼𑀡𑀤𑀻𑀧𑀦𑀢𑁄 𑀪𑀕𑀯𑀢𑁄 𑀲𑀩𑁆𑀩𑀮𑁄𑀓𑀺𑀬𑀕𑀼𑀡𑀲𑀫𑁆𑀧𑀢𑁆𑀢𑀺 ¶ 𑀤𑀲𑁆𑀲𑀺𑀢𑀸 𑀳𑁄𑀢𑀺, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀫𑀕𑁆𑀕𑀜𑀸𑀡𑀤𑀻𑀧𑀦𑀢𑁄 𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑀕𑀼𑀡𑀲𑀫𑁆𑀧𑀢𑁆𑀢𑀺. 𑀢𑀤𑀼𑀪𑀬𑀕𑁆𑀕𑀳𑀡𑀲𑀺𑀤𑁆𑀥𑁄 𑀳𑀺 𑀅𑀢𑁆𑀣𑁄 ‘‘𑀲𑀦𑀭𑀸𑀫𑀭𑀮𑁄𑀓𑀕𑀭𑀼’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀧𑀜𑁆𑀘𑀻𑀬𑀢𑀻𑀢𑀺. 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀘 𑀉𑀧𑀕𑀫𑀦𑀁 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁 ¶ 𑀤𑀲𑁆𑀲𑁂𑀢𑀺, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀅𑀧𑀕𑀫𑀦𑀁. 𑀢𑀣𑀸 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀮𑁄𑀓𑀲𑀫𑀜𑁆𑀜𑀸𑀦𑀼𑀭𑀽𑀧𑀁 𑀪𑀕𑀯𑀢𑁄 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀺, 𑀮𑁄𑀓𑀯𑁄𑀳𑀸𑀭𑀯𑀺𑀲𑀬𑀢𑁆𑀢𑀸 𑀓𑀭𑀼𑀡𑀸𑀬, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀲𑀫𑀜𑁆𑀜𑀸𑀬𑀸𑀦𑀯𑀺𑀥𑀸𑀯𑀦𑀁. 𑀲𑀪𑀸𑀯𑀸𑀦𑀯𑀩𑁄𑀥𑁂𑀦 𑀳𑀺 𑀥𑀫𑁆𑀫𑀸𑀦𑀁 𑀲𑀫𑀜𑁆𑀜𑀁 𑀅𑀢𑀺𑀥𑀸𑀯𑀺𑀢𑁆𑀯𑀸 𑀲𑀢𑁆𑀢𑀸𑀤𑀺𑀧𑀭𑀸𑀫𑀲𑀦𑀁 𑀳𑁄𑀢𑀻𑀢𑀺. 𑀢𑀣𑀸 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀁 𑀤𑀲𑁆𑀲𑁂𑀢𑀺, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀁, 𑀘𑀢𑀼𑀲𑀘𑁆𑀘𑀜𑀸𑀡𑀁, 𑀘𑀢𑀼𑀧𑁆𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀁, 𑀘𑀢𑀼𑀯𑁂𑀲𑁆𑀲𑀸𑀭𑀚𑁆𑀚𑀜𑀸𑀡𑀁. 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀜𑀸𑀡𑀲𑁆𑀲 𑀕𑀳𑀺𑀢𑀢𑁆𑀢𑀸 𑀲𑁂𑀲𑀸𑀲𑀸𑀥𑀸𑀭𑀡𑀜𑀸𑀡𑀸𑀦𑀺, 𑀙 𑀅𑀪𑀺𑀜𑁆𑀜𑀸, 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 (𑀫. 𑀦𑀺. 𑁧.𑁧𑁫𑁧) 𑀅𑀓𑀫𑁆𑀧𑀦𑀜𑀸𑀡𑀸𑀦𑀺, 𑀤𑀲 𑀩𑀮𑀸𑀦𑀺, 𑀘𑀼𑀤𑁆𑀤𑀲 𑀩𑀼𑀤𑁆𑀥𑀜𑀸𑀡𑀸𑀦𑀺, 𑀲𑁄𑀴𑀲 𑀜𑀸𑀡𑀘𑀭𑀺𑀬𑀸, 𑀅𑀝𑁆𑀞𑀸𑀭𑀲 𑀩𑀼𑀤𑁆𑀥𑀥𑀫𑁆𑀫𑀸, (𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁦𑁫; 𑀯𑀺𑀪. 𑀫𑀽𑀮. 𑀝𑀻. 𑀕𑀦𑁆𑀣𑀸𑀭𑀫𑁆𑀪𑀯𑀡𑁆𑀡𑀦𑀸𑀬) 𑀘𑀢𑀼𑀘𑀢𑁆𑀢𑀸𑀭𑀻𑀲 𑀜𑀸𑀡𑀯𑀢𑁆𑀣𑀽𑀦𑀺, (𑀲𑀁. 𑀦𑀺. 𑁨.𑁩𑁪) 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀯𑀢𑁆𑀣𑀽𑀦𑀻𑀢𑀺 (𑀲𑀁. 𑀦𑀺. 𑁨.𑁩𑁪) 𑀏𑀯𑀫𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀧𑀜𑁆𑀜𑀸𑀧𑁆𑀧𑀪𑁂𑀤𑀸𑀦𑀁 𑀯𑀲𑁂𑀦 𑀜𑀸𑀡𑀘𑀸𑀭𑀁 𑀤𑀲𑁆𑀲𑁂𑀢𑀺.

𑀢𑀣𑀸 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀘𑀭𑀡𑀲𑀫𑁆𑀧𑀢𑁆𑀢𑀺𑀁, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀯𑀺𑀚𑁆𑀚𑀸𑀲𑀫𑁆𑀧𑀢𑁆𑀢𑀺𑀁. 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀲𑀢𑁆𑀢𑀸𑀥𑀺𑀧𑀢𑀺𑀢𑀸, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀥𑀫𑁆𑀫𑀸𑀥𑀺𑀧𑀢𑀺𑀢𑀸. 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀮𑁄𑀓𑀦𑀸𑀣𑀪𑀸𑀯𑁄, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀅𑀢𑁆𑀢𑀦𑀸𑀣𑀪𑀸𑀯𑁄. 𑀢𑀣𑀸 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀧𑀼𑀩𑁆𑀩𑀓𑀸𑀭𑀺𑀪𑀸𑀯𑁄, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀓𑀢𑀜𑁆𑀜𑀼𑀢𑀸 ¶ . 𑀢𑀣𑀸 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀅𑀧𑀭𑀦𑁆𑀢𑀧𑀢𑀸, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀅𑀦𑀢𑁆𑀢𑀦𑁆𑀢𑀧𑀢𑀸. 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀯𑀸 𑀩𑀼𑀤𑁆𑀥𑀓𑀭𑀥𑀫𑁆𑀫𑀲𑀺𑀤𑁆𑀥𑀺, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀩𑀼𑀤𑁆𑀥𑀪𑀸𑀯𑀲𑀺𑀤𑁆𑀥𑀺. 𑀢𑀣𑀸 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀧𑀭𑁂𑀲𑀁 𑀢𑀸𑀭𑀡𑀁, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀲𑀬𑀁 𑀢𑀸𑀭𑀡𑀁. 𑀢𑀣𑀸 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀲𑀩𑁆𑀩𑀲𑀢𑁆𑀢𑁂𑀲𑀼 𑀅𑀦𑀼𑀕𑁆𑀕𑀳𑀘𑀺𑀢𑁆𑀢𑀢𑀸, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀭𑀢𑁆𑀢𑀘𑀺𑀢𑁆𑀢𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀲𑀩𑁆𑀩𑁂𑀲𑀜𑁆𑀘 ¶ 𑀩𑀼𑀤𑁆𑀥𑀕𑀼𑀡𑀸𑀦𑀁 𑀓𑀭𑀼𑀡𑀸 𑀆𑀤𑀺, 𑀢𑀦𑁆𑀦𑀺𑀤𑀸𑀦𑀪𑀸𑀯𑀢𑁄. 𑀧𑀜𑁆𑀜𑀸 𑀧𑀭𑀺𑀬𑁄𑀲𑀸𑀦𑀁, 𑀢𑀢𑁄 𑀉𑀢𑁆𑀢𑀭𑀺𑀓𑀭𑀡𑀻𑀬𑀸𑀪𑀸𑀯𑀢𑁄. 𑀇𑀢𑀺 𑀆𑀤𑀺𑀧𑀭𑀺𑀬𑁄𑀲𑀸𑀦𑀤𑀲𑁆𑀲𑀦𑁂𑀦 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀢𑀣𑀸 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀲𑀻𑀮𑀓𑁆𑀔𑀦𑁆𑀥𑀧𑀼𑀩𑁆𑀩𑀗𑁆𑀕𑀫𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀓𑀭𑀼𑀡𑀸𑀦𑀺𑀤𑀸𑀦𑀜𑁆𑀳𑀺 𑀲𑀻𑀮𑀁, 𑀢𑀢𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀺𑀭𑀢𑀺𑀧𑁆𑀧𑀯𑀢𑁆𑀢𑀺𑀢𑁄, 𑀲𑀸 𑀘 𑀛𑀸𑀦𑀢𑁆𑀢𑀬𑀲𑀫𑁆𑀧𑀬𑁄𑀕𑀺𑀦𑀻𑀢𑀺. 𑀧𑀜𑁆𑀜𑀸𑀯𑀘𑀦𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀲𑀻𑀮𑀜𑁆𑀘 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑀸𑀦𑀫𑀸𑀤𑀺, 𑀲𑀫𑀸𑀥𑀺 𑀫𑀚𑁆𑀛𑁂, 𑀧𑀜𑁆𑀜𑀸 𑀧𑀭𑀺𑀬𑁄𑀲𑀸𑀦𑀦𑁆𑀢𑀺. 𑀏𑀯𑀫𑁆𑀧𑀺 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺, 𑀦𑀬𑀢𑁄 𑀤𑀲𑁆𑀲𑀺𑀢𑀢𑁆𑀢𑀸. 𑀏𑀲𑁄 𑀏𑀯 𑀳𑀺 𑀦𑀺𑀭𑀯𑀲𑁂𑀲𑀢𑁄 𑀩𑀼𑀤𑁆𑀥𑀕𑀼𑀡𑀸𑀦𑀁 𑀤𑀲𑁆𑀲𑀦𑀼𑀧𑀸𑀬𑁄, 𑀬𑀤𑀺𑀤𑀁 𑀦𑀬𑀕𑁆𑀕𑀸𑀳𑀡𑀁. 𑀅𑀜𑁆𑀜𑀣𑀸 𑀓𑁄 𑀦𑀸𑀫 𑀲𑀫𑀢𑁆𑀣𑁄 𑀪𑀕𑀯𑀢𑁄 𑀕𑀼𑀡𑁂 𑀅𑀦𑀼𑀧𑀤𑀁 𑀦𑀺𑀭𑀯𑀲𑁂𑀲𑀢𑁄 𑀤𑀲𑁆𑀲𑁂𑀢𑀼𑀁. 𑀢𑁂𑀦𑁂𑀯𑀸𑀳 𑁋

‘‘𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁,

𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄;

𑀔𑀻𑀬𑁂𑀣 ¶ 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂,

𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁦𑁪; 𑀤𑀻. 𑀦𑀺. 𑀅𑀝𑁆𑀞. 𑁩.𑁧𑁪𑁧; 𑀫. 𑀦𑀺. 𑀅𑀝𑁆𑀞. 𑁩.𑁪𑁨𑁫, 𑀉𑀤𑀸. 𑀅𑀝𑁆𑀞. 𑁫𑁩; 𑀩𑀼. 𑀯𑀁. 𑀅𑀝𑁆𑀞. 𑁪.𑁪; 𑀘𑀭𑀺𑀬𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸𑀬𑀁, 𑀧𑀓𑀺𑀡𑁆𑀡𑀓𑀓𑀣𑀸𑀬𑀁; 𑀅𑀧. 𑀅𑀝𑁆𑀞. 𑁨.𑁬.𑁨𑁦);

𑀢𑁂𑀦𑁂𑀯 𑀘 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦𑀸𑀧𑀺 𑀩𑀼𑀤𑁆𑀥𑀕𑀼𑀡𑀧𑀭𑀺𑀘𑁆𑀙𑁂𑀤𑀦𑀁 𑀧𑀢𑀺 𑀅𑀦𑀼𑀬𑀼𑀢𑁆𑀢𑁂𑀦 ‘‘𑀦𑁄 𑀳𑁂𑀢𑀁 𑀪𑀦𑁆𑀢𑁂’’𑀢𑀺 (𑀤𑀻. 𑀦𑀺. 𑁨.𑁧𑁪𑁫) 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸, ‘‘𑀅𑀧𑀺 𑀘 𑀫𑁂 𑀪𑀦𑁆𑀢𑁂 𑀥𑀫𑁆𑀫𑀦𑁆𑀯𑀬𑁄 𑀯𑀺𑀤𑀺𑀢𑁄’’𑀢𑀺 (𑀤𑀻. 𑀦𑀺. 𑁨.𑁧𑁪𑁬) 𑀯𑀼𑀢𑁆𑀢𑀁.

𑀏𑀯𑀁 𑀲𑀗𑁆𑀔𑁂𑀧𑁂𑀦 𑀲𑀓𑀮𑀲𑀩𑁆𑀩𑀜𑁆𑀜𑀼𑀕𑀼𑀡𑁂𑀳𑀺 𑀪𑀕𑀯𑀦𑁆𑀢𑀁 𑀅𑀪𑀺𑀢𑁆𑀣𑀯𑀺𑀢𑁆𑀯𑀸 𑀇𑀤𑀸𑀦𑀺 𑀲𑀤𑁆𑀥𑀫𑁆𑀫𑀁 𑀣𑁄𑀫𑁂𑀢𑀼𑀁 ‘‘𑀩𑀼𑀤𑁆𑀥𑁄𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑀼𑀤𑁆𑀥𑁄𑀢𑀺 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄. 𑀩𑀼𑀤𑁆𑀥𑀪𑀸𑀯𑀦𑁆𑀢𑀺 𑀓𑀫𑁆𑀫𑀦𑀺𑀤𑁆𑀤𑁂𑀲𑁄. 𑀪𑀸𑀯𑁂𑀢𑁆𑀯𑀸, 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀘 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄. 𑀬𑀦𑁆𑀢𑀺 𑀅𑀦𑀺𑀬𑀫𑀢𑁄 𑀓𑀫𑁆𑀫𑀦𑀺𑀤𑁆𑀤𑁂𑀲𑁄. 𑀉𑀧𑀕𑀢𑁄𑀢𑀺 ¶ 𑀅𑀧𑀭𑀓𑀸𑀮𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄. 𑀯𑀦𑁆𑀤𑁂𑀢𑀺 𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄, 𑀢𑀦𑁆𑀢𑀺 ¶ 𑀦𑀺𑀬𑀫𑀦𑀁. 𑀥𑀫𑁆𑀫𑀦𑁆𑀢𑀺 𑀯𑀦𑁆𑀤𑀦𑀓𑀺𑀭𑀺𑀬𑀸𑀬 𑀓𑀫𑁆𑀫𑀦𑀺𑀤𑁆𑀤𑁂𑀲𑁄. 𑀕𑀢𑀫𑀮𑀁, 𑀅𑀦𑀼𑀢𑁆𑀢𑀭𑀦𑁆𑀢𑀺 𑀘 𑀢𑀩𑁆𑀩𑀺𑀲𑁂𑀲𑀦𑀁.

𑀢𑀢𑁆𑀣 𑀩𑀼𑀤𑁆𑀥-𑀲𑀤𑁆𑀤𑀲𑁆𑀲 𑀢𑀸𑀯 ‘‘𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄, 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑁯𑁫-𑁯𑁭; 𑀧𑀝𑀺. 𑀫. 𑁧.𑁧𑁬𑁨) 𑀦𑀺𑀤𑁆𑀤𑁂𑀲𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀲𑀯𑀸𑀲𑀦𑀸𑀬 𑀅𑀜𑁆𑀜𑀸𑀡𑀦𑀺𑀤𑁆𑀤𑀸𑀬 𑀅𑀘𑁆𑀘𑀦𑁆𑀢𑀯𑀺𑀕𑀫𑀢𑁄, 𑀩𑀼𑀤𑁆𑀥𑀺𑀬𑀸 𑀯𑀸 𑀯𑀺𑀓𑀲𑀺𑀢𑀪𑀸𑀯𑀢𑁄 𑀩𑀼𑀤𑁆𑀥𑀯𑀸𑀢𑀺 𑀩𑀼𑀤𑁆𑀥𑁄, 𑀚𑀸𑀕𑀭𑀡𑀯𑀺𑀓𑀲𑀦𑀢𑁆𑀣𑀯𑀲𑁂𑀦. 𑀅𑀣 𑀯𑀸 𑀓𑀲𑁆𑀲𑀘𑀺𑀧𑀺 𑀜𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀦𑀯𑀩𑀼𑀤𑁆𑀥𑀲𑁆𑀲 𑀅𑀪𑀸𑀯𑁂𑀦 𑀜𑁂𑀬𑁆𑀬𑀯𑀺𑀲𑁂𑀲𑀲𑁆𑀲 𑀓𑀫𑁆𑀫𑀪𑀸𑀯𑁂𑀦 𑀅𑀕𑁆𑀕𑀳𑀡𑀢𑁄 𑀓𑀫𑁆𑀫𑀯𑀘𑀦𑀺𑀘𑁆𑀙𑀸𑀬 𑀅𑀪𑀸𑀯𑁂𑀦 𑀅𑀯𑀕𑀫𑀦𑀢𑁆𑀣𑀯𑀲𑁂𑀦𑁂𑀯 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄 𑀮𑀩𑁆𑀪𑀢𑀻𑀢𑀺 𑀩𑀼𑀤𑁆𑀥𑀯𑀸𑀢𑀺 𑀩𑀼𑀤𑁆𑀥𑁄, 𑀬𑀣𑀸 ‘‘𑀤𑀺𑀓𑁆𑀔𑀺𑀢𑁄 𑀦 𑀤𑀤𑀸𑀢𑀻’’𑀢𑀺, 𑀅𑀢𑁆𑀣𑀢𑁄 𑀧𑀦 𑀧𑀸𑀭𑀫𑀺𑀢𑀸𑀧𑀭𑀺𑀪𑀸𑀯𑀺𑀢𑁄 𑀲𑀬𑀫𑁆𑀪𑀽𑀜𑀸𑀡𑁂𑀦 𑀲𑀳 𑀯𑀸𑀲𑀦𑀸𑀬 𑀯𑀺𑀳𑀢𑀯𑀺𑀤𑁆𑀥𑀲𑁆𑀢𑀦𑀺𑀭𑀯𑀲𑁂𑀲𑀓𑀺𑀮𑁂𑀲𑁄 𑀫𑀳𑀸𑀓𑀭𑀼𑀡𑀸𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀅𑀧𑀭𑀺𑀫𑁂𑀬𑁆𑀬 𑀕𑀼𑀡𑀕𑀡𑀸𑀥𑀸𑀭𑁄 𑀔𑀦𑁆𑀥𑀲𑀦𑁆𑀢𑀸𑀦𑁄 𑀩𑀼𑀤𑁆𑀥𑁄. 𑀬𑀣𑀸𑀳 𑁋

‘‘𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯’’𑀦𑁆𑀢𑀺 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑁯𑁫-𑁯𑁭; 𑀧𑀝𑀺. 𑀫. 𑁧.𑁧𑁬𑁨).

𑀅𑀧𑀺-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂, 𑀢𑁂𑀦 ‘‘𑀏𑀯𑀁 𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑁄 𑀲𑁄𑀧𑀺 𑀦𑀸𑀫 𑀪𑀕𑀯𑀸’’𑀢𑀺 𑀯𑀓𑁆𑀔𑀫𑀸𑀦𑀕𑀼𑀡𑁂 ¶ 𑀥𑀫𑁆𑀫𑁂 𑀲𑀫𑁆𑀪𑀸𑀯𑀦𑀁 𑀤𑀻𑀧𑁂𑀢𑀺. 𑀩𑀼𑀤𑁆𑀥𑀪𑀸𑀯𑀦𑁆𑀢𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁. 𑀪𑀸𑀯𑁂𑀢𑁆𑀯𑀸𑀢𑀺 𑀉𑀧𑁆𑀧𑀸𑀤𑁂𑀢𑁆𑀯𑀸, 𑀯𑀟𑁆𑀠𑁂𑀢𑁆𑀯𑀸 𑀘. 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸. 𑀉𑀧𑀕𑀢𑁄𑀢𑀺 𑀧𑀢𑁆𑀢𑁄, 𑀅𑀥𑀺𑀕𑀢𑁄𑀢𑀺 𑀅𑀢𑁆𑀣𑁄, 𑀏𑀢𑀲𑁆𑀲 ‘‘𑀩𑀼𑀤𑁆𑀥𑀪𑀸𑀯’’𑀦𑁆𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀕𑀢𑀫𑀮𑀦𑁆𑀢𑀺 𑀯𑀺𑀕𑀢𑀫𑀮𑀁, 𑀦𑀺𑀤𑁆𑀤𑁄𑀲𑀦𑁆𑀢𑀺 𑀅𑀢𑁆𑀣𑁄. 𑀯𑀦𑁆𑀤𑁂𑀢𑀺 𑀧𑀡𑀫𑀸𑀫𑀺, 𑀣𑁄𑀫𑁂𑀫𑀺 ¶ 𑀯𑀸. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀉𑀢𑁆𑀢𑀭𑀭𑀳𑀺𑀢𑀁, 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀦𑁆𑀢𑀺 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀅𑀧𑀸𑀬𑀢𑁄 𑀘, 𑀲𑀁𑀲𑀸𑀭𑀢𑁄 𑀘 𑀅𑀧𑀢𑀫𑀸𑀦𑁂 𑀓𑀢𑁆𑀯𑀸 𑀥𑀸𑀭𑀬𑀢𑀻𑀢𑀺 𑀥𑀫𑁆𑀫𑁄.

𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀏𑀯𑀁 𑀯𑀺𑀯𑀺𑀥𑀕𑀼𑀡𑀲𑀫𑀦𑁆𑀦𑀸𑀕𑀢𑁄 𑀩𑀼𑀤𑁆𑀥𑁄𑀧𑀺 𑀪𑀕𑀯𑀸 𑀬𑀁 𑀅𑀭𑀺𑀬𑀲𑀗𑁆𑀔𑀸𑀢𑀁 𑀥𑀫𑁆𑀫𑀁 𑀪𑀸𑀯𑁂𑀢𑁆𑀯𑀸, 𑀨𑀮𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀧𑀦 𑀲𑀘𑁆𑀙𑀺𑀓𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀢𑁄, 𑀢𑀫𑁂𑀢𑀁 𑀩𑀼𑀤𑁆𑀥𑀸𑀦𑀫𑁆𑀧𑀺 𑀩𑀼𑀤𑁆𑀥𑀪𑀸𑀯𑀳𑁂𑀢𑀼𑀪𑀽𑀢𑀁 𑀲𑀩𑁆𑀩𑀤𑁄𑀲𑀫𑀮𑀭𑀳𑀺𑀢𑀁 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀢𑀭𑀸𑀪𑀸𑀯𑁂𑀦 𑀅𑀦𑀼𑀢𑁆𑀢𑀭𑀁 𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑀁 𑀦𑀫𑀸𑀫𑀻𑀢𑀺. 𑀧𑀭𑀺𑀬𑀢𑁆𑀢𑀺𑀲𑀤𑁆𑀥𑀫𑁆𑀫𑀲𑁆𑀲𑀸𑀧𑀺 𑀢𑀧𑁆𑀧𑀓𑀸𑀲𑀦𑀢𑁆𑀢𑀸 𑀇𑀥 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀣 ¶ 𑀯𑀸 ‘‘𑀅𑀪𑀺𑀥𑀫𑁆𑀫𑀦𑀬𑀲𑀫𑀼𑀤𑁆𑀤𑀁 𑀪𑀸𑀯𑁂𑀢𑁆𑀯𑀸 𑀅𑀥𑀺𑀕𑀘𑁆𑀙𑀺, 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑀫𑁆𑀫𑀲𑀻’’𑀢𑀺 𑀘 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲𑀸𑀧𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀲𑀫𑁆𑀫𑀲𑀦𑀧𑀭𑀺𑀬𑀸𑀬𑁄 𑀮𑀩𑁆𑀪𑀢𑀻𑀢𑀺 𑀲𑁄𑀧𑀺 𑀇𑀥 𑀯𑀼𑀢𑁆𑀢𑁄 𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑁄. 𑀢𑀣𑀸 ‘‘𑀬𑀁 𑀥𑀫𑁆𑀫𑀁 𑀪𑀸𑀯𑁂𑀢𑁆𑀯𑀸, 𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀩𑀼𑀤𑁆𑀥𑀓𑀭𑀥𑀫𑁆𑀫𑀪𑀽𑀢𑀸𑀳𑀺 𑀧𑀸𑀭𑀫𑀺𑀢𑀸𑀳𑀺 𑀲𑀳 𑀧𑀼𑀩𑁆𑀩𑀪𑀸𑀕𑁂 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀬𑁄𑀧𑀺 𑀇𑀥 𑀥𑀫𑁆𑀫-𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀸𑀧𑀺 𑀳𑀺 𑀯𑀺𑀕𑀢𑀧𑀝𑀺𑀧𑀓𑁆𑀔𑀢𑀸𑀬 𑀯𑀺𑀕𑀢𑀫𑀮𑀸, 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀅𑀦𑀼𑀢𑁆𑀢𑀭𑀸 𑀘𑀸𑀢𑀺. 𑀢𑀣𑀸 𑀳𑀺 𑀲𑀢𑁆𑀢𑀸𑀦𑀁 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀸𑀬 𑀓𑀢𑀫𑀳𑀸𑀪𑀺𑀦𑀻𑀳𑀸𑀭𑁄 𑀫𑀳𑀸𑀓𑀭𑀼𑀡𑀸𑀥𑀺𑀯𑀸𑀲𑀧𑁂𑀲𑀮𑀚𑁆𑀛𑀸𑀲𑀬𑁄 𑀧𑀜𑁆𑀜𑀸𑀯𑀺𑀲𑁂𑀲𑀧𑀭𑀺𑀬𑁄𑀤𑀸𑀢𑀦𑀺𑀫𑁆𑀫𑀮𑀸𑀦𑀁 𑀤𑀸𑀦𑀤𑀫𑀲𑀜𑁆𑀜𑀫𑀸𑀤𑀻𑀦𑀁 𑀉𑀢𑁆𑀢𑀫𑀥𑀫𑁆𑀫𑀸𑀦𑀁 𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀓𑀧𑁆𑀧𑀸𑀦𑀁 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁂𑀬𑁆𑀬𑀸𑀦𑀺 𑀲𑀓𑁆𑀓𑀘𑁆𑀘𑀁 𑀦𑀺𑀭𑀦𑁆𑀢𑀭𑀁 𑀦𑀺𑀭𑀯𑀲𑁂𑀲𑀁 𑀪𑀸𑀯𑀦𑀸𑀧𑀘𑁆𑀘𑀓𑁆𑀔𑀓𑀭𑀡𑁂𑀳𑀺 𑀓𑀫𑁆𑀫𑀸𑀤𑀻𑀲𑀼 𑀅𑀥𑀺𑀕𑀢𑀯𑀲𑀻𑀪𑀸𑀯𑁄, 𑀅𑀘𑁆𑀙𑀭𑀺𑀬𑀸𑀘𑀺𑀦𑁆𑀢𑁂𑀬𑁆𑀬𑀫𑀳𑀸𑀦𑀼𑀪𑀸𑀯𑁄, 𑀅𑀥𑀺𑀲𑀻𑀮𑀅𑀥𑀺𑀘𑀺𑀢𑁆𑀢𑀸𑀦𑀁 𑀧𑀭𑀫𑀼𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀪𑀕𑀯𑀸 𑀧𑀘𑁆𑀘𑀬𑀸𑀓𑀸𑀭𑁂 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀼𑀔𑁂𑀦 𑀫𑀳𑀸𑀯𑀚𑀺𑀭𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺.

𑀏𑀢𑁆𑀣 ¶ 𑀘 ‘‘𑀪𑀸𑀯𑁂𑀢𑁆𑀯𑀸’’𑀢𑀺 𑀏𑀢𑁂𑀦 𑀯𑀺𑀚𑁆𑀚𑀸𑀲𑀫𑁆𑀧𑀤𑀸𑀬 𑀥𑀫𑁆𑀫𑀁 𑀣𑁄𑀫𑁂𑀢𑀺, ‘𑀲𑀘𑁆𑀙𑀺𑀓𑀢𑁆𑀯𑀸’𑀢𑀺 𑀏𑀢𑁂𑀦 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀤𑀸𑀬. 𑀢𑀣𑀸 𑀧𑀞𑀫𑁂𑀦 𑀛𑀸𑀦𑀲𑀫𑁆𑀧𑀤𑀸𑀬, 𑀤𑀼𑀢𑀺𑀬𑁂𑀦 𑀯𑀺𑀫𑁄𑀓𑁆𑀔𑀲𑀫𑁆𑀧𑀤𑀸𑀬. 𑀧𑀞𑀫𑁂𑀦 𑀯𑀸 𑀲𑀫𑀸𑀥𑀺𑀲𑀫𑁆𑀧𑀤𑀸𑀬, 𑀤𑀼𑀢𑀺𑀬𑁂𑀦 𑀲𑀫𑀸𑀧𑀢𑁆𑀢𑀺𑀲𑀫𑁆𑀧𑀤𑀸𑀬. 𑀅𑀣 𑀯𑀸 𑀧𑀞𑀫𑁂𑀦 𑀔𑀬𑀜𑀸𑀡𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀅𑀦𑀼𑀧𑁆𑀧𑀸𑀤𑀜𑀸𑀡𑀪𑀸𑀯𑁂𑀦. 𑀧𑀼𑀭𑀺𑀫𑁂𑀦 𑀯𑀸 𑀯𑀺𑀚𑁆𑀚𑀽𑀧𑀫𑀢𑀸𑀬, 𑀤𑀼𑀢𑀺𑀬𑁂𑀦 𑀯𑀚𑀺𑀭𑀽𑀧𑀫𑀢𑀸𑀬. 𑀧𑀼𑀭𑀺𑀫𑁂𑀦 𑀯𑀸 𑀯𑀺𑀭𑀸𑀕𑀲𑀫𑁆𑀧𑀢𑁆𑀢𑀺𑀬𑀸, 𑀤𑀼𑀢𑀺𑀬𑁂𑀦 𑀦𑀺𑀭𑁄𑀥𑀲𑀫𑁆𑀧𑀢𑁆𑀢𑀺𑀬𑀸. 𑀢𑀣𑀸 𑀧𑀞𑀫𑁂𑀦 𑀦𑀺𑀬𑁆𑀬𑀸𑀦𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀦𑀺𑀲𑁆𑀲𑀭𑀡𑀪𑀸𑀯𑁂𑀦. 𑀧𑀞𑀫𑁂𑀦 𑀯𑀸 𑀳𑁂𑀢𑀼𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀅𑀲𑀗𑁆𑀔𑀢𑀪𑀸𑀯𑁂𑀦. 𑀧𑀞𑀫𑁂𑀦 𑀯𑀸 𑀤𑀲𑁆𑀲𑀦𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀯𑀺𑀯𑁂𑀓𑀪𑀸𑀯𑁂𑀦. 𑀧𑀞𑀫𑁂𑀦 𑀯𑀸 𑀅𑀥𑀺𑀧𑀢𑀺𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀅𑀫𑀢𑀪𑀸𑀯𑁂𑀦 𑀥𑀫𑁆𑀫𑀁 𑀣𑁄𑀫𑁂𑀢𑀺. 𑀅𑀣 𑀯𑀸 ‘‘𑀬𑀁 𑀥𑀫𑁆𑀫𑀁 𑀪𑀸𑀯𑁂𑀢𑁆𑀯𑀸 𑀩𑀼𑀤𑁆𑀥𑀪𑀸𑀯𑀁 𑀉𑀧𑀕𑀢𑁄’’𑀢𑀺 𑀏𑀢𑁂𑀦 𑀲𑁆𑀯𑀸𑀓𑁆𑀔𑀸𑀢𑀢𑀸𑀬 𑀥𑀫𑁆𑀫𑀁 𑀣𑁄𑀫𑁂𑀢𑀺, ‘‘𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺 ¶ 𑀏𑀢𑁂𑀦 𑀲𑀦𑁆𑀤𑀺𑀝𑁆𑀞𑀺𑀓𑀢𑀸𑀬. 𑀢𑀣𑀸 𑀧𑀼𑀭𑀺𑀫𑁂𑀦 𑀅𑀓𑀸𑀮𑀺𑀓𑀢𑀸𑀬, 𑀧𑀘𑁆𑀙𑀺𑀫𑁂𑀦 𑀏𑀳𑀺𑀧𑀲𑁆𑀲𑀺𑀓𑀢𑀸𑀬. 𑀧𑀼𑀭𑀺𑀫𑁂𑀦 𑀯𑀸 𑀑𑀧𑀦𑁂𑀬𑁆𑀬𑀺𑀓𑀢𑀸𑀬, 𑀧𑀘𑁆𑀙𑀺𑀫𑁂𑀦 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀢𑀸𑀬 𑀥𑀫𑁆𑀫𑀁 𑀣𑁄𑀫𑁂𑀢𑀺.

‘‘𑀕𑀢𑀫𑀮’’𑀦𑁆𑀢𑀺 𑀇𑀫𑀺𑀦𑀸 𑀲𑀁𑀓𑀺𑀮𑁂𑀲𑀸𑀪𑀸𑀯𑀤𑀻𑀧𑀦𑁂𑀦 𑀥𑀫𑁆𑀫𑀲𑁆𑀲 𑀧𑀭𑀺𑀲𑀼𑀤𑁆𑀥𑀢𑀁 𑀤𑀲𑁆𑀲𑁂𑀢𑀺, ‘‘𑀅𑀦𑀼𑀢𑁆𑀢𑀭’’𑀦𑁆𑀢𑀺 𑀏𑀢𑁂𑀦 𑀅𑀜𑁆𑀜𑀲𑁆𑀲 𑀯𑀺𑀲𑀺𑀝𑁆𑀞𑀲𑁆𑀲 𑀅𑀪𑀸𑀯𑀤𑀻𑀧𑀦𑁂𑀦 𑀯𑀺𑀧𑀼𑀮𑀧𑀭𑀺𑀧𑀼𑀡𑁆𑀡𑀢𑀁. 𑀧𑀞𑀫𑁂𑀦 𑀯𑀸 𑀧𑀳𑀸𑀦𑀲𑀫𑁆𑀧𑀤𑀁 𑀥𑀫𑁆𑀫𑀲𑁆𑀲 𑀤𑀲𑁆𑀲𑁂𑀢𑀺, 𑀤𑀼𑀢𑀺𑀬𑁂𑀦 𑀧𑀪𑀸𑀯𑀲𑀫𑁆𑀧𑀤𑀁. 𑀪𑀸𑀯𑁂𑀢𑀩𑁆𑀩𑀢𑀸𑀬 𑀯𑀸 𑀥𑀫𑁆𑀫𑀲𑁆𑀲 𑀕𑀢𑀫𑀮𑀪𑀸𑀯𑁄 𑀬𑁄𑀚𑁂𑀢𑀩𑁆𑀩𑁄 ¶ . 𑀪𑀸𑀯𑀦𑀸𑀕𑀼𑀡𑁂𑀦 𑀳𑀺 𑀲𑁄 𑀤𑁄𑀲𑀸𑀦𑀁 𑀲𑀫𑀼𑀕𑁆𑀖𑀸𑀢𑀓𑁄 𑀳𑁄𑀢𑀻𑀢𑀺. 𑀲𑀘𑁆𑀙𑀺𑀓𑀸𑀢𑀩𑁆𑀩𑀪𑀸𑀯𑁂𑀦 𑀅𑀦𑀼𑀢𑁆𑀢𑀭𑀪𑀸𑀯𑁄 𑀬𑁄𑀚𑁂𑀢𑀩𑁆𑀩𑁄. 𑀲𑀘𑁆𑀙𑀺𑀓𑀺𑀭𑀺𑀬𑀸𑀦𑀺𑀩𑁆𑀩𑀢𑁆𑀢𑀺𑀢𑁄 𑀳𑀺 𑀢𑀤𑀼𑀢𑁆𑀢𑀭𑀺𑀓𑀭𑀡𑀻𑀬𑀸𑀪𑀸𑀯𑀢𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀅𑀦𑀼𑀢𑁆𑀢𑀭𑁄𑀢𑀺. 𑀢𑀣𑀸 ‘‘𑀪𑀸𑀯𑁂𑀢𑁆𑀯𑀸’’𑀢𑀺 𑀏𑀢𑁂𑀦 𑀲𑀳 𑀧𑀼𑀩𑁆𑀩𑀪𑀸𑀕𑀲𑀻𑀮𑀸𑀤𑀻𑀳𑀺 𑀲𑁂𑀓𑁆𑀔𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀓𑁆𑀔𑀦𑁆𑀥𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺, ‘‘𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺 𑀏𑀢𑁂𑀦 𑀲𑀳 𑀅𑀲𑀗𑁆𑀔𑀢𑀸𑀬 𑀥𑀸𑀢𑀼𑀬𑀸 𑀅𑀲𑁂𑀓𑁆𑀔𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀓𑁆𑀔𑀦𑁆𑀥𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀻𑀢𑀺.

𑀏𑀯𑀁 𑀲𑀗𑁆𑀔𑁂𑀧𑁂𑀦𑁂𑀯 𑀲𑀩𑁆𑀩𑀥𑀫𑁆𑀫𑀕𑀼𑀡𑁂𑀳𑀺 𑀲𑀤𑁆𑀥𑀫𑁆𑀫𑀁 𑀅𑀪𑀺𑀢𑁆𑀣𑀯𑀺𑀢𑁆𑀯𑀸, 𑀇𑀤𑀸𑀦𑀺 𑀅𑀭𑀺𑀬𑀲𑀗𑁆𑀖𑀁 𑀣𑁄𑀫𑁂𑀢𑀼𑀁 ‘‘𑀲𑀼𑀕𑀢𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀕𑀢𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑀦𑀺𑀤𑁆𑀤𑁂𑀲𑁄, 𑀢𑀲𑁆𑀲 ‘‘𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀑𑀭𑀲𑀸𑀦𑀦𑁆𑀢𑀺 𑀧𑀼𑀢𑁆𑀢𑀯𑀺𑀲𑁂𑀲𑀦𑀁. 𑀫𑀸𑀭𑀲𑁂𑀦𑀫𑀣𑀦𑀸𑀦𑀦𑁆𑀢𑀺 ¶ 𑀑𑀭𑀲𑀧𑀼𑀢𑁆𑀢𑀪𑀸𑀯𑁂 𑀓𑀸𑀭𑀡𑀦𑀺𑀤𑁆𑀤𑁂𑀲𑁄, 𑀢𑁂𑀦 𑀓𑀺𑀮𑁂𑀲𑀧𑁆𑀧𑀳𑀸𑀦𑀫𑁂𑀯 𑀪𑀕𑀯𑀢𑁄 𑀑𑀭𑀲𑀧𑀼𑀢𑁆𑀢𑀪𑀸𑀯𑀓𑀸𑀭𑀡𑀁 𑀅𑀦𑀼𑀚𑀸𑀦𑀸𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀝𑁆𑀞𑀦𑁆𑀦𑀦𑁆𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑀦𑀺𑀤𑁆𑀤𑁂𑀲𑁄, 𑀢𑁂𑀦 𑀘 𑀲𑀢𑀺𑀧𑀺 𑀢𑁂𑀲𑀁 𑀲𑀢𑁆𑀢𑀯𑀺𑀲𑁂𑀲𑀪𑀸𑀯𑁂𑀦 𑀅𑀦𑁂𑀓𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀪𑀸𑀯𑁂 𑀇𑀫𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄. 𑀲𑀫𑀽𑀳𑀦𑁆𑀢𑀺 𑀲𑀫𑀼𑀤𑀸𑀬𑀦𑀺𑀤𑁆𑀤𑁂𑀲𑁄. 𑀅𑀭𑀺𑀬𑀲𑀗𑁆𑀖𑀦𑁆𑀢𑀺 𑀕𑀼𑀡𑀯𑀺𑀲𑀺𑀝𑁆𑀞𑀲𑀗𑁆𑀖𑀸𑀢𑀪𑀸𑀯𑀦𑀺𑀤𑁆𑀤𑁂𑀲𑁄, 𑀢𑁂𑀦 𑀅𑀲𑀢𑀺𑀧𑀺 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀓𑀸𑀬𑀲𑀸𑀫𑀕𑁆𑀕𑀺𑀬𑀁 𑀅𑀭𑀺𑀬𑀲𑀗𑁆𑀖𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀪𑀸𑀯𑀢𑁄. 𑀢𑀢𑁆𑀣 𑀉𑀭𑀲𑀺 𑀪𑀯𑀸 𑀚𑀸𑀢𑀸, 𑀲𑀁𑀯𑀤𑁆𑀥𑀸 𑀘 𑀑𑀭𑀲𑀸. 𑀬𑀣𑀸 𑀳𑀺 𑀲𑀢𑁆𑀢𑀸𑀦𑀁 𑀑𑀭𑀲𑀧𑀼𑀢𑁆𑀢𑀸 𑀅𑀢𑁆𑀢𑀚𑀸𑀢𑀢𑀸𑀬 𑀧𑀺𑀢𑀼𑀲𑀦𑁆𑀢𑀓𑀲𑁆𑀲 𑀤𑀸𑀬𑀚𑁆𑀚𑀲𑁆𑀲 𑀯𑀺𑀲𑁂𑀲𑁂𑀦 𑀪𑀸𑀕𑀺𑀦𑁄 𑀳𑁄𑀦𑁆𑀢𑀺, 𑀏𑀯𑀫𑁂𑀢𑁂𑀧𑀺 𑀅𑀭𑀺𑀬𑀧𑀼𑀕𑁆𑀕𑀮𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀯𑀦𑀦𑁆𑀢𑁂 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀢𑀸𑀬 𑀪𑀕𑀯𑀢𑁄 𑀲𑀦𑁆𑀢𑀓𑀲𑁆𑀲 𑀯𑀺𑀫𑀼𑀢𑁆𑀢𑀺𑀲𑀼𑀔𑀲𑁆𑀲, 𑀅𑀭𑀺𑀬𑀥𑀫𑁆𑀫𑀭𑀢𑀦𑀲𑁆𑀲 𑀘 𑀏𑀓𑀦𑁆𑀢𑀪𑀸𑀕𑀺𑀦𑁄𑀢𑀺 𑀑𑀭𑀲𑀸 𑀯𑀺𑀬 𑀑𑀭𑀲𑀸. 𑀅𑀣 𑀯𑀸 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸𑀦𑀼𑀪𑀸𑀯𑁂𑀦 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀫𑀸𑀦𑀸, 𑀑𑀓𑁆𑀓𑀦𑁆𑀢𑀸 𑀘 𑀅𑀭𑀺𑀬𑀲𑀸𑀯𑀓𑀸 𑀪𑀕𑀯𑀢𑁄 𑀉𑀭𑁄𑀯𑀸𑀬𑀸𑀫𑀚𑀦𑀺𑀢𑀸𑀪𑀺𑀚𑀸𑀢𑀢𑀸𑀬 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 ‘‘𑀑𑀭𑀲𑀧𑀼𑀢𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀦𑁆𑀢𑀺. 𑀲𑀸𑀯𑀓𑁂𑀳𑀺 𑀧𑀯𑀢𑁆𑀢𑀺𑀬𑀫𑀸𑀦𑀸𑀧𑀺 𑀳𑀺 𑀥𑀫𑁆𑀫𑀤𑁂𑀲𑀦𑀸 𑀪𑀕𑀯𑀢𑁄 ‘‘𑀥𑀫𑁆𑀫𑀤𑁂𑀲𑀦𑀸’’ 𑀇𑀘𑁆𑀘𑁂𑀯 𑀯𑀼𑀘𑁆𑀘𑀢𑀺, 𑀢𑀁𑀫𑀽𑀮𑀓𑀢𑁆𑀢𑀸, 𑀮𑀓𑁆𑀔𑀡𑀸𑀤𑀺𑀯𑀺𑀲𑁂𑀲𑀸𑀪𑀸𑀯𑀢𑁄 𑀘.

𑀬𑀤𑀺𑀧𑀺 𑀅𑀭𑀺𑀬𑀲𑀸𑀯𑀓𑀸𑀦𑀁 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀲𑀫𑀬𑁂 𑀪𑀕𑀯𑀢𑁄 𑀯𑀺𑀬 𑀢𑀤𑀦𑁆𑀢𑀭𑀸𑀬𑀓𑀭𑀡𑀢𑁆𑀣𑀁 𑀤𑁂𑀯𑀧𑀼𑀢𑁆𑀢𑀫𑀸𑀭𑁄 ¶ , 𑀫𑀸𑀭𑀯𑀸𑀳𑀺𑀦𑀻 𑀯𑀸 𑀦 𑀏𑀓𑀦𑁆𑀢𑁂𑀦 𑀅𑀧𑀲𑀸𑀤𑁂𑀢𑀺, 𑀢𑁂𑀳𑀺 𑀧𑀦 𑀅𑀧𑀲𑀸𑀤𑁂𑀢𑀩𑁆𑀩𑀢𑀸𑀬 𑀓𑀸𑀭𑀡𑁂 𑀯𑀺𑀫𑀣𑀺𑀢𑁂 𑀢𑁂𑀧𑀺 𑀯𑀺𑀫𑀣𑀺𑀢𑀸 ¶ 𑀏𑀯 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀆𑀳 𑁋 ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 ‘𑀫𑀸𑀭𑀫𑀸𑀭𑀲𑁂𑀦𑀫𑀣𑀦𑀸𑀦’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀔𑀦𑁆𑀥𑀸𑀪𑀺𑀲𑀗𑁆𑀔𑀸𑀭𑀫𑀸𑀭𑀸𑀦𑀁 𑀯𑀺𑀬 𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑁆𑀲𑀸𑀧𑀺 𑀕𑀼𑀡𑀫𑀸𑀭𑀡𑁂 ¶ 𑀲𑀳𑀸𑀬𑀪𑀸𑀯𑀽𑀧𑀕𑀫𑀦𑀢𑁄 𑀓𑀺𑀮𑁂𑀲𑀩𑀮𑀓𑀸𑀬𑁄 ‘‘𑀲𑁂𑀦𑀸’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋 ‘‘𑀓𑀸𑀫𑀸 𑀢𑁂 𑀧𑀞𑀫𑀸 𑀲𑁂𑀦𑀸’’𑀢𑀺𑀆𑀤𑀺 (𑀲𑀼. 𑀦𑀺. 𑁪𑁩𑁮; 𑀫𑀳𑀸𑀦𑀺. 𑁨𑁮, 𑁬𑁮; 𑀘𑀽𑀴𑀦𑀺. 𑁪𑁭). 𑀲𑀸 𑀘 𑀢𑁂𑀳𑀺 𑀤𑀺𑀬𑀟𑁆𑀠𑀲𑀳𑀲𑁆𑀲𑀪𑁂𑀤𑀸, 𑀅𑀦𑀦𑁆𑀢𑀪𑁂𑀤𑀸 𑀯𑀸 𑀓𑀺𑀮𑁂𑀲𑀯𑀸𑀳𑀺𑀦𑀻 𑀲𑀢𑀺𑀥𑀫𑁆𑀫𑀯𑀺𑀘𑀬𑀯𑀻𑀭𑀺𑀬𑀲𑀫𑀣𑀸𑀤𑀺𑀕𑀼𑀡𑀧𑀳𑀭𑀡𑁂𑀳𑀺 𑀑𑀥𑀺𑀲𑁄 𑀯𑀺𑀫𑀣𑀺𑀢𑀸, 𑀯𑀺𑀳𑀢𑀸, 𑀯𑀺𑀤𑁆𑀥𑀲𑁆𑀢𑀸 𑀘𑀸𑀢𑀺 𑀫𑀸𑀭𑀲𑁂𑀦𑀫𑀣𑀦𑀸, 𑀅𑀭𑀺𑀬𑀲𑀸𑀯𑀓𑀸. 𑀏𑀢𑁂𑀦 𑀢𑁂𑀲𑀁 𑀪𑀕𑀯𑀢𑁄 𑀅𑀦𑀼𑀚𑀸𑀢𑀧𑀼𑀢𑁆𑀢𑀢𑀁 𑀤𑀲𑁆𑀲𑁂𑀢𑀺.

𑀆𑀭𑀓𑀢𑁆𑀢𑀸 𑀓𑀺𑀮𑁂𑀲𑁂𑀳𑀺, 𑀅𑀦𑀬𑁂 𑀦 𑀇𑀭𑀺𑀬𑀦𑀢𑁄, 𑀅𑀬𑁂 𑀘 𑀇𑀭𑀺𑀬𑀦𑀢𑁄 𑀅𑀭𑀺𑀬𑀸, 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀅𑀣 𑀯𑀸 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 ‘‘𑀲𑀭𑀡’’𑀦𑁆𑀢𑀺 𑀅𑀭𑀡𑀻𑀬𑀢𑁄 𑀉𑀧𑀕𑀦𑁆𑀢𑀩𑁆𑀩𑀢𑁄, 𑀉𑀧𑀕𑀢𑀸𑀦𑀜𑁆𑀘 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄 𑀅𑀭𑀺𑀬𑀸, 𑀅𑀭𑀺𑀬𑀸𑀦𑀁 𑀲𑀗𑁆𑀖𑁄𑀢𑀺 𑀅𑀭𑀺𑀬𑀲𑀗𑁆𑀖𑁄, 𑀅𑀭𑀺𑀬𑁄 𑀘 𑀲𑁄, 𑀲𑀗𑁆𑀖𑁄 𑀘𑀸𑀢𑀺 𑀯𑀸 𑀅𑀭𑀺𑀬𑀲𑀗𑁆𑀖𑁄, 𑀢𑀁 𑀅𑀭𑀺𑀬𑀲𑀗𑁆𑀖𑀁. 𑀪𑀕𑀯𑀢𑁄 𑀅𑀧𑀭𑀪𑀸𑀕𑁂 𑀩𑀼𑀤𑁆𑀥𑀥𑀫𑁆𑀫𑀭𑀢𑀦𑀸𑀦𑀫𑁆𑀧𑀺 𑀲𑀫𑀥𑀺𑀕𑀫𑁄 𑀲𑀗𑁆𑀖𑀭𑀢𑀦𑀸𑀥𑀻𑀦𑁄𑀢𑀺 𑀅𑀲𑁆𑀲 𑀅𑀭𑀺𑀬𑀲𑀗𑁆𑀖𑀲𑁆𑀲 𑀩𑀳𑀽𑀧𑀓𑀸𑀭𑀢𑀁 𑀤𑀲𑁆𑀲𑁂𑀢𑀼𑀁 𑀇𑀥𑁂𑀯 ‘‘𑀲𑀺𑀭𑀲𑀸 𑀯𑀦𑁆𑀤𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀢𑁆𑀣 𑀘 ‘‘𑀲𑀼𑀕𑀢𑀲𑁆𑀲 𑀑𑀭𑀲𑀸𑀦𑀁 𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀏𑀢𑁂𑀦 𑀅𑀭𑀺𑀬𑀲𑀗𑁆𑀖𑀲𑁆𑀲 𑀧𑀪𑀯𑀲𑀫𑁆𑀧𑀤𑀁 𑀤𑀲𑁆𑀲𑁂𑀢𑀺, ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺 𑀏𑀢𑁂𑀦 𑀧𑀳𑀸𑀦𑀲𑀫𑁆𑀧𑀤𑀁, 𑀲𑀓𑀮𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀤𑀻𑀧𑀦𑀢𑁄. ‘‘𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀽𑀳’’𑀦𑁆𑀢𑀺 𑀏𑀢𑁂𑀦 𑀜𑀸𑀡𑀲𑀫𑁆𑀧𑀤𑀁, 𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑀪𑀸𑀯𑀤𑀻𑀧𑀦𑀢𑁄. ‘‘𑀅𑀭𑀺𑀬𑀲𑀗𑁆𑀖’’𑀦𑁆𑀢𑀺 𑀏𑀢𑁂𑀦 𑀧𑀪𑀯𑀲𑀫𑁆𑀧𑀤𑀁 𑀤𑀲𑁆𑀲𑁂𑀢𑀺, 𑀲𑀩𑁆𑀩𑀲𑀗𑁆𑀖𑀸𑀦𑀁 𑀅𑀕𑁆𑀕𑀪𑀸𑀯𑀤𑀻𑀧𑀦𑀢𑁄. 𑀅𑀣 𑀯𑀸 ‘‘𑀲𑀼𑀕𑀢𑀲𑁆𑀲 𑀑𑀭𑀲𑀸𑀦𑀁 𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀅𑀭𑀺𑀬𑀲𑀗𑁆𑀖𑀲𑁆𑀲 𑀯𑀺𑀲𑀼𑀤𑁆𑀥𑀦𑀺𑀲𑁆𑀲𑀬𑀪𑀸𑀯𑀤𑀻𑀧𑀦𑀁, ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺 𑀲𑀫𑁆𑀫𑀸𑀉𑀚𑀼𑀜𑀸𑀬𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀪𑀸𑀯𑀤𑀻𑀧𑀦𑀁, ‘‘𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀽𑀳’’𑀦𑁆𑀢𑀺 𑀆𑀳𑀼𑀦𑁂𑀬𑁆𑀬𑀸𑀤𑀺𑀪𑀸𑀯𑀤𑀻𑀧𑀦𑀁, ‘‘𑀅𑀭𑀺𑀬𑀲𑀗𑁆𑀖’’𑀦𑁆𑀢𑀺 𑀅𑀦𑀼𑀢𑁆𑀢𑀭𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀪𑀸𑀯𑀤𑀻𑀧𑀦𑀁. 𑀢𑀣𑀸 ‘‘𑀲𑀼𑀕𑀢𑀲𑁆𑀲 𑀑𑀭𑀲𑀸𑀦𑀁 𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀏𑀢𑁂𑀦 𑀅𑀭𑀺𑀬𑀲𑀗𑁆𑀖𑀲𑁆𑀲 𑀮𑁄𑀓𑀼𑀢𑁆𑀢𑀭𑀲𑀭𑀡𑀕𑀫𑀦𑀲𑀩𑁆𑀪𑀸𑀯𑀁 𑀤𑀻𑀧𑁂𑀢𑀺. 𑀮𑁄𑀓𑀼𑀢𑁆𑀢𑀭𑀲𑀭𑀡𑀕𑀫𑀦𑁂𑀦 𑀳𑀺 𑀢𑁂 𑀪𑀕𑀯𑀢𑁄 𑀑𑀭𑀲𑀧𑀼𑀢𑁆𑀢𑀸 𑀚𑀸𑀢𑀸. ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺 ¶ 𑀏𑀢𑁂𑀦 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀤𑀸𑀲𑀺𑀤𑁆𑀥𑀁 𑀧𑀼𑀩𑁆𑀩𑀪𑀸𑀕𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀓𑀢𑀸𑀪𑀺𑀦𑀻𑀳𑀸𑀭𑀸 𑀳𑀺 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀸 𑀫𑀸𑀭𑀁, 𑀫𑀸𑀭𑀧𑀭𑀺𑀲𑀁 𑀯𑀸 𑀅𑀪𑀺𑀯𑀺𑀚𑀺𑀦𑀦𑁆𑀢𑀺. ‘‘𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀽𑀳’’𑀦𑁆𑀢𑀺 𑀏𑀢𑁂𑀦 ¶ 𑀯𑀺𑀤𑁆𑀥𑀲𑁆𑀢𑀯𑀺𑀧𑀓𑁆𑀔𑁂 𑀲𑁂𑀓𑁆𑀔𑀸𑀲𑁂𑀓𑁆𑀔𑀥𑀫𑁆𑀫𑁂 𑀤𑀲𑁆𑀲𑁂𑀢𑀺, 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀫𑀕𑁆𑀕𑀨𑀮𑀥𑀫𑁆𑀫𑀸𑀦𑀁 𑀧𑀓𑀸𑀲𑀺𑀢𑀢𑁆𑀢𑀸. ‘‘𑀅𑀭𑀺𑀬𑀲𑀗𑁆𑀖’’𑀦𑁆𑀢𑀺 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀭𑀡𑀕𑀫𑀦𑀜𑁆𑀘 𑀲𑀸𑀯𑀓𑀸𑀦𑀁 𑀲𑀩𑁆𑀩𑀕𑀼𑀡𑀸𑀦𑀫𑀸𑀤𑀺, 𑀲𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀸 𑀲𑁂𑀓𑁆𑀔𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀫𑀚𑁆𑀛𑁂, 𑀅𑀲𑁂𑀓𑁆𑀔𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 ¶ 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀗𑁆𑀔𑁂𑀧𑀢𑁄 𑀲𑀩𑁆𑀩𑁂 𑀅𑀭𑀺𑀬𑀲𑀗𑁆𑀖𑀕𑀼𑀡𑀸 𑀧𑀓𑀸𑀲𑀺𑀢𑀸 𑀳𑁄𑀦𑁆𑀢𑀺.

𑀏𑀯𑀁 𑀕𑀸𑀣𑀸𑀢𑁆𑀢𑀬𑁂𑀦 𑀲𑀗𑁆𑀔𑁂𑀧𑀢𑁄 𑀲𑀓𑀮𑀕𑀼𑀡𑀲𑀗𑁆𑀓𑀺𑀢𑁆𑀢𑀦𑀫𑀼𑀔𑁂𑀦 𑀭𑀢𑀦𑀢𑁆𑀢𑀬𑀲𑁆𑀲 𑀧𑀡𑀸𑀫𑀁 𑀓𑀢𑁆𑀯𑀸, 𑀇𑀤𑀸𑀦𑀺 𑀢𑀁 𑀦𑀺𑀧𑀘𑁆𑀘𑀓𑀸𑀭𑀁 𑀬𑀣𑀸𑀥𑀺𑀧𑁆𑀧𑁂𑀢𑁂 𑀧𑀬𑁄𑀚𑀦𑁂 𑀧𑀭𑀺𑀡𑀸𑀫𑁂𑀦𑁆𑀢𑁄 ‘‘𑀇𑀢𑀺 𑀫𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀭𑀢𑀺𑀚𑀦𑀦𑀝𑁆𑀞𑁂𑀦 𑀭𑀢𑀦𑀁, 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀸. 𑀢𑁂𑀲𑀜𑁆𑀳𑀺 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀪𑀽𑀢𑀕𑀼𑀡𑁂 𑀆𑀯𑀚𑁆𑀚𑀦𑁆𑀢𑀲𑁆𑀲 𑀅𑀫𑀢𑀸𑀥𑀺𑀕𑀫𑀳𑁂𑀢𑀼𑀪𑀽𑀢𑀁 𑀅𑀦𑀧𑁆𑀧𑀓𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸𑀳 𑁋

‘‘𑀬𑀲𑁆𑀫𑀺𑀁, 𑀫𑀳𑀸𑀦𑀸𑀫, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀉𑀚𑀼𑀕𑀢𑀫𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺 𑀢𑀣𑀸𑀕𑀢𑀁 𑀆𑀭𑀩𑁆𑀪. 𑀉𑀚𑀼𑀕𑀢𑀘𑀺𑀢𑁆𑀢𑁄 𑀔𑁄 𑀧𑀦, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚𑀁, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁬.𑁧𑁦; 𑀅. 𑀦𑀺. 𑁧𑁧.𑁧𑁧).

𑀘𑀺𑀢𑁆𑀢𑀻𑀓𑀢𑀸𑀤𑀺𑀪𑀸𑀯𑁄 𑀯𑀸 𑀭𑀢𑀦𑀝𑁆𑀞𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀁 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺. (𑀔𑀼. 𑀧𑀸. 𑀅𑀝𑁆𑀞. 𑁬.𑁩; 𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩; 𑀲𑀼. 𑀦𑀺. 𑀅𑀝𑁆𑀞. 𑁧.𑁨𑁨𑁬; 𑀫𑀳𑀸𑀦𑀺. 𑀅𑀝𑁆𑀞. 𑁫𑁦);

𑀘𑀺𑀢𑁆𑀢𑀻𑀓𑀢𑀪𑀸𑀯𑀸𑀤𑀬𑁄 ¶ 𑀘 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀩𑀼𑀤𑁆𑀥𑀸𑀤𑀻𑀲𑀼 𑀏𑀯 𑀮𑀩𑁆𑀪𑀦𑁆𑀢𑀻𑀢𑀺. 𑀯𑀦𑁆𑀤𑀦𑀸𑀯 𑀯𑀦𑁆𑀤𑀦𑀸𑀫𑀬𑀁, 𑀬𑀣𑀸 ‘‘𑀤𑀸𑀦𑀫𑀬𑀁, 𑀲𑀻𑀮𑀫𑀬’’𑀦𑁆𑀢𑀺 (𑀤𑀻. 𑀦𑀺. 𑁩.𑁩𑁦𑁫; 𑀇𑀢𑀺𑀯𑀼. 𑁬𑁦; 𑀦𑁂𑀢𑁆𑀢𑀺. 𑁩𑁪). 𑀯𑀦𑁆𑀤𑀦𑀸 𑀘𑁂𑀢𑁆𑀣 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑀦𑀺𑀦𑁆𑀦𑀢𑀸, 𑀣𑁄𑀫𑀦𑀸 𑀯𑀸. 𑀧𑀼𑀚𑁆𑀚𑀪𑀯𑀨𑀮𑀦𑀺𑀩𑁆𑀩𑀢𑁆𑀢𑀦𑀢𑁄 𑀧𑀼𑀜𑁆𑀜𑀁, 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀁 𑀧𑀼𑀡𑀸𑀢𑀻𑀢𑀺 𑀯𑀸. 𑀲𑀼𑀯𑀺𑀳𑀢𑀦𑁆𑀢𑀭𑀸𑀬𑁄𑀢𑀺 𑀲𑀼𑀝𑁆𑀞𑀼 𑀯𑀺𑀳𑀢𑀦𑁆𑀢𑀭𑀸𑀬𑁄, 𑀏𑀢𑁂𑀦 𑀅𑀢𑁆𑀢𑀦𑁄 𑀧𑀲𑀸𑀤𑀲𑀫𑁆𑀧𑀢𑁆𑀢𑀺𑀬𑀸, 𑀭𑀢𑁆𑀢𑀦𑀢𑁆𑀢𑀬𑀲𑁆𑀲 ¶ 𑀘 𑀔𑁂𑀢𑁆𑀢𑀪𑀸𑀯𑀲𑀫𑁆𑀧𑀢𑁆𑀢𑀺𑀬𑀸 𑀢𑀁 𑀧𑀼𑀜𑁆𑀜𑀁 𑀅𑀢𑁆𑀣𑀧𑁆𑀧𑀓𑀸𑀲𑀦𑀲𑁆𑀲 𑀉𑀧𑀖𑀸𑀢𑀓𑀉𑀧𑀤𑁆𑀤𑀯𑀸𑀦𑀁 𑀯𑀺𑀳𑀦𑀦𑁂 𑀲𑀫𑀢𑁆𑀣𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀳𑀼𑀢𑁆𑀯𑀸𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸, 𑀢𑀲𑁆𑀲 ‘‘𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀬𑀁 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸𑀫𑀬𑀁 𑀧𑀼𑀜𑁆𑀜𑀁, 𑀢𑀲𑁆𑀲. 𑀆𑀦𑀼𑀪𑀸𑀯𑁂𑀦𑀸𑀢𑀺 𑀩𑀮𑁂𑀦.

𑀏𑀯𑀁 ¶ 𑀭𑀢𑀦𑀢𑁆𑀢𑀬𑀲𑁆𑀲 𑀦𑀺𑀧𑀘𑁆𑀘𑀓𑀸𑀭𑀓𑀭𑀡𑁂 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸, 𑀇𑀤𑀸𑀦𑀺 𑀬𑀲𑁆𑀲𑀸 𑀥𑀫𑁆𑀫𑀤𑁂𑀲𑀦𑀸𑀬 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀢𑀼𑀓𑀸𑀫𑁄, 𑀢𑀲𑁆𑀲𑀸 𑀢𑀸𑀯 𑀕𑀼𑀡𑀸𑀪𑀺𑀢𑁆𑀣𑀯𑀦𑀯𑀲𑁂𑀦 𑀉𑀧𑀜𑁆𑀜𑀸𑀧𑀦𑀢𑁆𑀣𑀁 ‘‘𑀤𑀻𑀖𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀻𑀖𑀲𑀼𑀢𑁆𑀢𑀗𑁆𑀓𑀺𑀢𑀲𑁆𑀲𑀸𑀢𑀺 𑀤𑀻𑀖𑀧𑁆𑀧𑀫𑀸𑀡𑀲𑀼𑀢𑁆𑀢𑀮𑀓𑁆𑀔𑀺𑀢𑀲𑁆𑀲, 𑀏𑀢𑁂𑀦 ‘‘𑀤𑀻𑀖𑁄’’𑀢𑀺 𑀅𑀬𑀁 𑀇𑀫𑀲𑁆𑀲 𑀆𑀕𑀫𑀲𑁆𑀲 𑀅𑀢𑁆𑀣𑀸𑀦𑀼𑀕𑀢𑀸 𑀲𑀫𑀜𑁆𑀜𑀸𑀢𑀺 𑀤𑀲𑁆𑀲𑁂𑀢𑀺. 𑀦𑀦𑀼 𑀘 𑀲𑀼𑀢𑁆𑀢𑀸𑀦𑀺𑀬𑁂𑀯 𑀆𑀕𑀫𑁄, 𑀓𑀲𑁆𑀲 𑀧𑀦 𑀲𑀼𑀢𑁆𑀢𑁂𑀳𑀺 𑀅𑀗𑁆𑀓𑀦𑀦𑁆𑀢𑀺? 𑀲𑀘𑁆𑀘𑀫𑁂𑀢𑀁 𑀧𑀭𑀫𑀢𑁆𑀣𑀢𑁄, 𑀲𑀼𑀢𑁆𑀢𑀸𑀦𑀺 𑀧𑀦 𑀉𑀧𑀸𑀤𑀸𑀬𑀧𑀜𑁆𑀜𑀢𑁆𑀢𑁄 𑀆𑀕𑀫𑁄. 𑀬𑀣𑀸 𑀳𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑀼𑀤𑀸𑀬𑁂 ‘‘𑀲𑀼𑀢𑁆𑀢’’𑀦𑁆𑀢𑀺 𑀯𑁄𑀳𑀸𑀭𑁄, 𑀏𑀯𑀁 𑀲𑀼𑀢𑁆𑀢𑀲𑀫𑀼𑀤𑀸𑀬𑁂 ‘‘𑀆𑀕𑀫𑁄’’𑀢𑀺 𑀯𑁄𑀳𑀸𑀭𑁄. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀦𑀺𑀧𑀼𑀡𑀢𑁆𑀣𑀲𑀩𑁆𑀪𑀸𑀯𑀢𑁄 𑀦𑀺𑀧𑀼𑀡𑀲𑁆𑀲. 𑀆𑀕𑀫𑀺𑀲𑁆𑀲𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦, 𑀏𑀢𑀲𑁆𑀫𑀸 𑀯𑀸 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸𑀤𑀬𑁄𑀢𑀺 𑀆𑀕𑀫𑁄, 𑀆𑀕𑀫𑁄 𑀘 𑀲𑁄 𑀯𑀭𑁄 𑀘𑀸𑀢𑀺 𑀆𑀕𑀫𑀯𑀭𑁄, 𑀆𑀕𑀫𑀲𑀫𑁆𑀫𑀢𑁂𑀳𑀺 𑀯𑀸 𑀯𑀭𑁄𑀢𑀺 𑀆𑀕𑀫𑀯𑀭𑁄, 𑀢𑀲𑁆𑀲. 𑀩𑀼𑀤𑁆𑀥𑀸𑀦𑀁 𑀅𑀦𑀼𑀩𑀼𑀤𑁆𑀥𑀸 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀸, 𑀩𑀼𑀤𑁆𑀥𑀸𑀦𑀁 𑀲𑀘𑁆𑀘𑀧𑀝𑀺𑀯𑁂𑀥𑀁 𑀅𑀦𑀼𑀕𑀫𑁆𑀫 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑀸 𑀅𑀕𑁆𑀕𑀲𑀸𑀯𑀓𑀸𑀤𑀬𑁄 ¶ 𑀅𑀭𑀺𑀬𑀸. 𑀢𑁂𑀳𑀺 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀯𑀲𑁂𑀦, 𑀕𑀼𑀡𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀘 𑀲𑀁𑀯𑀡𑁆𑀡𑀺𑀢𑀲𑁆𑀲. 𑀅𑀣 𑀯𑀸 𑀩𑀼𑀤𑁆𑀥𑀸 𑀘 𑀅𑀦𑀼𑀩𑀼𑀤𑁆𑀥𑀸 𑀘 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑁂𑀯 𑀳𑀺 𑀢𑀺𑀡𑁆𑀡𑀫𑁆𑀧𑀺 𑀧𑀺𑀝𑀓𑀸𑀦𑀁 𑀅𑀢𑁆𑀣𑀯𑀡𑁆𑀡𑀦𑀸𑀓𑁆𑀓𑀫𑁄 𑀪𑀸𑀲𑀺𑀢𑁄, 𑀬𑀸 ‘‘𑀧𑀓𑀺𑀡𑁆𑀡𑀓𑀤𑁂𑀲𑀦𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀢𑁄 𑀲𑀗𑁆𑀕𑀸𑀬𑀦𑀸𑀤𑀺𑀯𑀲𑁂𑀦 𑀲𑀸𑀯𑀓𑁂𑀳𑀻𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺.

𑀲𑀤𑁆𑀥𑀸𑀯𑀳𑀕𑀼𑀡𑀲𑁆𑀲𑀸𑀢𑀺 𑀩𑀼𑀤𑁆𑀥𑀸𑀤𑀻𑀲𑀼 𑀧𑀲𑀸𑀤𑀸𑀯𑀳𑀲𑀫𑁆𑀧𑀢𑁆𑀢𑀺𑀓𑀲𑁆𑀲. 𑀅𑀬𑀜𑁆𑀳𑀺 𑀆𑀕𑀫𑁄 𑀩𑁆𑀭𑀳𑁆𑀫𑀚𑀸𑀮𑀸𑀤𑀻𑀲𑀼 (𑀤𑀻. 𑀦𑀺. 𑁧.𑁫-𑁭, 𑁨𑁬-𑁨𑁮) 𑀲𑀻𑀮𑀤𑀺𑀝𑁆𑀞𑀸𑀤𑀻𑀦𑀁 𑀅𑀦𑀯𑀲𑁂𑀲𑀦𑀺𑀤𑁆𑀤𑁂𑀲𑀸𑀤𑀺𑀯𑀲𑁂𑀦, 𑀫𑀳𑀸𑀧𑀤𑀸𑀦𑀸𑀤𑀻𑀲𑀼 (𑀤𑀻. 𑀦𑀺. 𑁨.𑁩-𑁫) 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀫𑁆𑀧𑀺 𑀕𑀼𑀡𑀦𑀺𑀤𑁆𑀤𑁂𑀲𑀸𑀤𑀺𑀯𑀲𑁂𑀦, 𑀧𑀸𑀣𑀺𑀓𑀲𑀼𑀢𑁆𑀢𑀸𑀤𑀻𑀲𑀼 (𑀤𑀻. 𑀦𑀺. 𑁩.𑁩,𑁪) 𑀢𑀺𑀢𑁆𑀣𑀺𑀬𑁂 𑀦𑀺𑀫𑀤𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀲𑀻𑀳𑀦𑀸𑀤 𑀦𑀤𑀦𑀸𑀤𑀺𑀯𑀲𑁂𑀦, 𑀅𑀦𑀼𑀢𑁆𑀢𑀭𑀺𑀬𑀲𑀼𑀢𑁆𑀢𑀸𑀤𑀻𑀲𑀼 (𑀅. 𑀦𑀺. 𑁬.𑁮) 𑀘 𑀯𑀺𑀲𑁂𑀲𑀢𑁄 𑀩𑀼𑀤𑁆𑀥𑀕𑀼𑀡𑀯𑀺𑀪𑀸𑀯𑀦𑁂𑀦 𑀭𑀢𑀦𑀢𑁆𑀢𑀬𑁂 𑀲𑀸𑀢𑀺𑀲𑀬𑀧𑁆𑀧𑀲𑀸𑀤𑀁 𑀆𑀯𑀳𑀢𑀺. 𑀲𑀁𑀯𑀡𑁆𑀡𑀦𑀸𑀲𑀼 𑀘𑀸𑀬𑀁 𑀆𑀘𑀭𑀺𑀬𑀲𑁆𑀲 𑀧𑀓𑀢𑀺, 𑀬𑀸 𑀢𑀁𑀢𑀁𑀲𑀁𑀯𑀡𑁆𑀡𑀦𑀸𑀲𑀼 𑀆𑀤𑀺𑀢𑁄 𑀢𑀲𑁆𑀲 𑀢𑀲𑁆𑀲 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀯𑀺𑀲𑁂𑀲𑀕𑀼𑀡𑀓𑀺𑀢𑁆𑀢𑀦𑁂𑀦 𑀣𑁄𑀫𑀦𑀸. 𑀢𑀣𑀸 𑀳𑀺 𑀧𑀧𑀜𑁆𑀘𑀲𑀽𑀤𑀦𑀻𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀻𑀫𑀦𑁄𑀭𑀣𑀧𑀽𑀭𑀡𑀻𑀲𑀼 𑀅𑀝𑁆𑀞𑀲𑀸𑀮𑀺𑀦𑀻𑀆𑀤𑀻𑀲𑀼 𑀘 𑀬𑀣𑀸𑀓𑁆𑀓𑀫𑀁 ‘‘𑀧𑀭𑀯𑀸𑀤𑀫𑀣𑀦𑀲𑁆𑀲 𑀜𑀸𑀡𑀧𑁆𑀧𑀪𑁂𑀤𑀚𑀦𑀦𑀲𑁆𑀲 ¶ 𑀥𑀫𑁆𑀫𑀓𑀣𑀺𑀓𑀧𑀼𑀗𑁆𑀕𑀯𑀸𑀦𑀁 𑀯𑀺𑀘𑀺𑀢𑁆𑀢𑀧𑁆𑀧𑀝𑀺𑀪𑀸𑀦𑀚𑀦𑀦𑀲𑁆𑀲 𑀢𑀲𑁆𑀲 𑀕𑀫𑁆𑀪𑀻𑀭𑀜𑀸𑀡𑁂𑀳𑀺 𑀑𑀕𑀸𑀴𑁆𑀳𑀲𑁆𑀲 𑀅𑀪𑀺𑀡𑁆𑀳𑀲𑁄 𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀲𑁆𑀲 𑀅𑀪𑀺𑀥𑀫𑁆𑀫𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀣𑁄𑀫𑀦𑀸 𑀓𑀢𑀸.

𑀅𑀢𑁆𑀣𑁄 𑀓𑀣𑀻𑀬𑀢𑀺 𑀏𑀢𑀸𑀬𑀸𑀢𑀺 𑀅𑀢𑁆𑀣𑀓𑀣𑀸, 𑀲𑀸 𑀏𑀯 𑀅𑀝𑁆𑀞𑀓𑀣𑀸, 𑀢𑁆𑀣-𑀓𑀸𑀭𑀲𑁆𑀲 𑀝𑁆𑀞-𑀓𑀸𑀭𑀁 𑀓𑀢𑁆𑀯𑀸, 𑀬𑀣𑀸 ‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄’’𑀢𑀺 (𑀧𑀝𑀺. 𑀫. 𑁨.𑁮). 𑀆𑀤𑀺𑀢𑁄 𑀢𑀺𑀆𑀤𑀺𑀫𑁆𑀳𑀺 𑀧𑀞𑀫𑀲𑀗𑁆𑀕𑀻𑀢𑀺𑀬𑀁. 𑀙𑀴𑀪𑀺𑀜𑁆𑀜𑀢𑀸𑀬 𑀧𑀭𑀫𑁂𑀦 𑀘𑀺𑀢𑁆𑀢𑀯𑀲𑀻𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸, 𑀛𑀸𑀦𑀸𑀤𑀻𑀲𑀼 𑀧𑀜𑁆𑀘𑀯𑀺𑀥𑀯𑀲𑀺𑀢𑀸𑀲𑀩𑁆𑀪𑀸𑀯𑀢𑁄 𑀘 𑀯𑀲𑀺𑀦𑁄, 𑀣𑁂𑀭𑀸 𑀫𑀳𑀸𑀓𑀲𑁆𑀲𑀧𑀸𑀤𑀬𑁄. 𑀢𑁂𑀲𑀁 𑀲𑀢𑁂𑀳𑀺 𑀧𑀜𑁆𑀘𑀳𑀺. 𑀬𑀸𑀢𑀺 𑀬𑀸 𑀅𑀝𑁆𑀞𑀓𑀣𑀸. 𑀲𑀗𑁆𑀕𑀻𑀢𑀸𑀢𑀺 𑀅𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 ‘‘𑀅𑀬𑀁 𑀏𑀢𑀲𑁆𑀲 𑀅𑀢𑁆𑀣𑁄, 𑀅𑀬𑀁 𑀏𑀢𑀲𑁆𑀲 𑀅𑀢𑁆𑀣𑁄’’𑀢𑀺 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀸. 𑀅𑀦𑀼𑀲𑀗𑁆𑀕𑀻𑀢𑀸 ¶ 𑀘 𑀬𑀲𑀢𑁆𑀣𑁂𑀭𑀸𑀤𑀻𑀳𑀺 ¶ 𑀧𑀘𑁆𑀙𑀸𑀧𑀺 𑀤𑀼𑀢𑀺𑀬𑀢𑀢𑀺𑀬𑀲𑀗𑁆𑀕𑀻𑀢𑀻𑀲𑀼, 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀲𑀁𑀯𑀡𑁆𑀡𑀦𑀸𑀬 𑀆𑀕𑀫𑀦𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀺.

𑀲𑀻𑀳𑀲𑁆𑀲 𑀮𑀸𑀦𑀢𑁄 𑀕𑀳𑀡𑀢𑁄 𑀲𑀻𑀳𑀴𑁄, 𑀲𑀻𑀳𑀓𑀼𑀫𑀸𑀭𑁄. 𑀢𑀁𑀯𑀁𑀲𑀚𑀸𑀢𑀢𑀸𑀬 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀔𑀢𑁆𑀢𑀺𑀬𑀸𑀦𑀁, 𑀢𑁂𑀲𑀁 𑀦𑀺𑀯𑀸𑀲𑀢𑀸𑀬 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀲𑁆𑀲 𑀘 𑀲𑀻𑀳𑀴𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀪𑀢𑀸𑀢𑀺 𑀚𑀫𑁆𑀩𑀼𑀤𑀻𑀧𑀢𑁄 𑀆𑀦𑀻𑀢𑀸. 𑀅𑀣𑀸𑀢𑀺 𑀧𑀘𑁆𑀙𑀸. 𑀅𑀧𑀭𑀪𑀸𑀕𑁂 𑀳𑀺 𑀅𑀲𑀗𑁆𑀓𑀭𑀢𑁆𑀣𑀁 𑀲𑀻𑀳𑀴𑀪𑀸𑀲𑀸𑀬 𑀅𑀝𑁆𑀞𑀓𑀣𑀸 𑀞𑀧𑀺𑀢𑀸𑀢𑀺. 𑀢𑁂𑀦𑀲𑁆𑀲 𑀫𑀽𑀮𑀝𑁆𑀞𑀓𑀣𑀸 𑀲𑀩𑁆𑀩𑀲𑀸𑀥𑀸𑀭𑀡𑀸 𑀦 𑀳𑁄𑀢𑀻𑀢𑀺 𑀇𑀤𑀁 𑀅𑀢𑁆𑀣𑀧𑁆𑀧𑀓𑀸𑀲𑀦𑀁 𑀏𑀓𑀦𑁆𑀢𑁂𑀦 𑀓𑀭𑀡𑀻𑀬𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀤𑀻𑀧𑀯𑀸𑀲𑀻𑀦𑀫𑀢𑁆𑀣𑀸𑀬𑀸’’𑀢𑀺. 𑀢𑀢𑁆𑀣 𑀤𑀻𑀧𑀯𑀸𑀲𑀻𑀦𑀦𑁆𑀢𑀺 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀁. 𑀤𑀻𑀧𑀯𑀸𑀲𑀻𑀦𑀦𑁆𑀢𑀺 𑀯𑀸 𑀲𑀻𑀳𑀴𑀤𑀻𑀧𑀯𑀸𑀲𑀻𑀦𑀁 𑀅𑀢𑁆𑀣𑀸𑀬 𑀲𑀻𑀳𑀴𑀪𑀸𑀲𑀸𑀬 𑀞𑀧𑀺𑀢𑀸𑀢𑀺 𑀬𑁄𑀚𑀦𑀸.

𑀅𑀧𑀦𑁂𑀢𑁆𑀯𑀸𑀦𑀸𑀢𑀺 𑀓𑀜𑁆𑀘𑀼𑀓𑀲𑀤𑀺𑀲𑀁 𑀲𑀻𑀳𑀴𑀪𑀸𑀲𑀁 𑀅𑀧𑀦𑁂𑀢𑁆𑀯𑀸. 𑀢𑀢𑁄𑀢𑀺 𑀅𑀝𑁆𑀞𑀓𑀣𑀸𑀢𑁄. 𑀅𑀳𑀦𑁆𑀢𑀺 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑀺𑀲𑀢𑀺. 𑀫𑀦𑁄𑀭𑀫𑀁 𑀪𑀸𑀲𑀦𑁆𑀢𑀺 𑀫𑀸𑀕𑀥𑀪𑀸𑀲𑀁. 𑀲𑀸 𑀳𑀺 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀽𑀢𑀸 𑀧𑀡𑁆𑀟𑀺𑀢𑀸𑀦𑀁 𑀫𑀦𑀁 𑀭𑀫𑀬𑀢𑀻𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀢𑀦𑁆𑀢𑀺𑀦𑀬𑀸𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺, 𑀧𑀸𑀴𑀺𑀕𑀢𑀺𑀬𑀸 𑀅𑀦𑀼𑀮𑁄𑀫𑀺𑀓𑀁 𑀧𑀸𑀴𑀺𑀪𑀸𑀲𑀸𑀬𑀸𑀦𑀼𑀯𑀺𑀥𑀸𑀬𑀺𑀦𑀺𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀕𑀢𑀤𑁄𑀲𑀦𑁆𑀢𑀺 𑀅𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀸𑀲𑀦𑁆𑀢𑀭𑀭𑀳𑀺𑀢𑀁.

𑀲𑀫𑀬𑀁 𑀅𑀯𑀺𑀮𑁄𑀫𑁂𑀦𑁆𑀢𑁄𑀢𑀺 𑀲𑀺𑀤𑁆𑀥𑀦𑁆𑀢𑀁 𑀅𑀯𑀺𑀭𑁄𑀥𑁂𑀦𑁆𑀢𑁄, 𑀏𑀢𑁂𑀦 𑀅𑀢𑁆𑀣𑀤𑁄𑀲𑀸𑀪𑀸𑀯𑀫𑀸𑀳. 𑀅𑀯𑀺𑀭𑀼𑀤𑁆𑀥𑀢𑁆𑀢𑀸 𑀏𑀯 𑀳𑀺 𑀣𑁂𑀭𑀯𑀸𑀤𑀸𑀧𑀺 𑀇𑀥 𑀧𑀓𑀸𑀲𑀺𑀬𑀺𑀲𑁆𑀲𑀦𑁆𑀢𑀺. 𑀣𑁂𑀭𑀯𑀁𑀲𑀧𑀤𑀻𑀧𑀸𑀦𑀦𑁆𑀢𑀺 𑀣𑀺𑀭𑁂𑀳𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀣𑁂𑀭𑀸, 𑀫𑀳𑀸𑀓𑀲𑁆𑀲𑀧𑀸𑀤𑀬𑁄. 𑀢𑁂𑀳𑀺 𑀆𑀕𑀢𑀸 𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀣𑁂𑀭𑀯𑀁𑀲𑁄, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀸 ¶ 𑀳𑀼𑀢𑁆𑀯𑀸 𑀆𑀕𑀫𑀸𑀥𑀺𑀕𑀫𑀲𑀫𑁆𑀧𑀦𑁆𑀦𑀢𑁆𑀢𑀸 𑀧𑀜𑁆𑀜𑀸𑀧𑀚𑁆𑀚𑁄𑀢𑁂𑀦 𑀢𑀲𑁆𑀲 𑀲𑀫𑀼𑀚𑁆𑀚𑀮𑀦𑀢𑁄 𑀣𑁂𑀭𑀯𑀁𑀲𑀧𑀤𑀻𑀧𑀸, 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄 𑀣𑁂𑀭𑀸, 𑀢𑁂𑀲𑀁. 𑀯𑀺𑀯𑀺𑀥𑁂𑀳𑀺 𑀆𑀓𑀸𑀭𑁂𑀳𑀺 𑀦𑀺𑀘𑁆𑀙𑀻𑀬𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑁄, 𑀕𑀡𑁆𑀞𑀺𑀝𑁆𑀞𑀸𑀦𑁂𑀲𑀼 𑀔𑀻𑀮𑀫𑀤𑁆𑀤𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀯𑀺𑀫𑀢𑀺𑀘𑁆𑀙𑁂𑀤𑀓𑀣𑀸. 𑀲𑀼𑀝𑁆𑀞𑀼 𑀦𑀺𑀧𑀼𑀡𑁄 𑀲𑀡𑁆𑀳𑁄 𑀯𑀺𑀦𑀺𑀘𑁆𑀙𑀬𑁄 𑀏𑀢𑁂𑀲𑀦𑁆𑀢𑀺 𑀲𑀼𑀦𑀺𑀧𑀼𑀡𑀯𑀺𑀦𑀺𑀘𑁆𑀙𑀬𑀸. 𑀅𑀣 𑀯𑀸 𑀯𑀺𑀦𑀺𑀘𑁆𑀙𑀺𑀦𑁄𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑁄, 𑀬𑀣𑀸𑀯𑀼𑀢𑁆𑀢𑀯𑀺𑀲𑀬𑀁 𑀜𑀸𑀡𑀁. 𑀲𑀼𑀝𑁆𑀞𑀼 𑀦𑀺𑀧𑀼𑀡𑁄 𑀙𑁂𑀓𑁄 𑀯𑀺𑀦𑀺𑀘𑁆𑀙𑀬𑁄 𑀏𑀢𑁂𑀲𑀦𑁆𑀢𑀺 𑀲𑀼𑀦𑀺𑀧𑀼𑀡𑀯𑀺𑀦𑀺𑀘𑁆𑀙𑀬𑀸, 𑀏𑀢𑁂𑀦 𑀫𑀳𑀸𑀓𑀲𑁆𑀲𑀧𑀸𑀤𑀺𑀣𑁂𑀭𑀧𑀭𑀫𑁆𑀧𑀭𑀸𑀪𑀢𑁄, 𑀢𑀢𑁄𑀬𑁂𑀯 𑀘 𑀅𑀯𑀺𑀧𑀭𑀻𑀢𑁄 𑀲𑀡𑁆𑀳𑀲𑀼𑀔𑀼𑀫𑁄 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 ¶ 𑀯𑀺𑀦𑀺𑀘𑁆𑀙𑀬𑁄𑀢𑀺 𑀢𑀲𑁆𑀲 𑀧𑀫𑀸𑀡𑀪𑀽𑀢𑀢𑀁 𑀤𑀲𑁆𑀲𑁂𑀢𑀺.

𑀲𑀼𑀚𑀦𑀲𑁆𑀲 𑀘𑀸𑀢𑀺 𑀘-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑁂𑀦 𑀦 𑀓𑁂𑀯𑀮𑀁 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀫𑁂𑀯 𑀅𑀢𑁆𑀣𑀸𑀬, 𑀅𑀣 𑀔𑁄 𑀲𑀸𑀥𑀼𑀚𑀦𑀢𑁄𑀲𑀦𑀢𑁆𑀣𑀜𑁆𑀘𑀸𑀢𑀺 𑀤𑀲𑁆𑀲𑁂𑀢𑀺, 𑀢𑁂𑀦 𑀘 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀯𑀸𑀲𑀻𑀦𑀫𑁆𑀧𑀺 𑀅𑀢𑁆𑀣𑀸𑀬𑀸𑀢𑀺 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄 𑀳𑁄𑀢𑀺, 𑀉𑀕𑁆𑀕𑀳𑀡𑀸𑀤𑀺𑀲𑀼𑀓𑀭𑀢𑀸𑀬 𑀢𑁂𑀲𑀫𑁆𑀧𑀺 𑀩𑀳𑀼𑀧𑀓𑀸𑀭𑀢𑁆𑀢𑀸. 𑀘𑀺𑀭𑀝𑁆𑀞𑀺𑀢𑀢𑁆𑀣𑀦𑁆𑀢𑀺 𑀘𑀺𑀭𑀝𑁆𑀞𑀺𑀢𑀺𑀅𑀢𑁆𑀣𑀁 ¶ , 𑀘𑀺𑀭𑀓𑀸𑀮𑀝𑁆𑀞𑀺𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀳𑀺 𑀅𑀢𑁆𑀣𑀧𑁆𑀧𑀓𑀸𑀲𑀦𑀁 𑀅𑀯𑀺𑀧𑀭𑀻𑀢𑀩𑁆𑀬𑀜𑁆𑀚𑀦𑀲𑀼𑀦𑀺𑀓𑁆𑀔𑁂𑀧𑀲𑁆𑀲 𑀅𑀢𑁆𑀣𑀲𑀼𑀦𑀬𑀲𑁆𑀲 𑀘 𑀉𑀧𑀸𑀬𑀪𑀸𑀯𑀢𑁄 𑀲𑀤𑁆𑀥𑀫𑁆𑀫𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀬𑀸 𑀲𑀁𑀯𑀢𑁆𑀢𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀤𑁆𑀥𑀫𑁆𑀫𑀲𑁆𑀲 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀅𑀦𑀦𑁆𑀢𑀭𑀥𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀤𑁆𑀯𑁂? 𑀲𑀼𑀦𑀺𑀓𑁆𑀔𑀢𑁆𑀢𑀜𑁆𑀘 𑀧𑀤𑀩𑁆𑀬𑀜𑁆𑀚𑀦𑀁, 𑀅𑀢𑁆𑀣𑁄 𑀘 𑀲𑀼𑀦𑀻𑀢𑁄’’𑀢𑀺 (𑀅. 𑀦𑀺. 𑁨.𑁨𑁧).

𑀬𑀁 𑀅𑀢𑁆𑀣𑀯𑀡𑁆𑀡𑀦𑀁 𑀓𑀢𑁆𑀢𑀼𑀓𑀸𑀫𑁄, 𑀢𑀲𑁆𑀲𑀸 𑀫𑀳𑀢𑁆𑀢𑀁 𑀧𑀭𑀺𑀳𑀭𑀺𑀢𑀼𑀁 ‘‘𑀲𑀻𑀮𑀓𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 𑁋 ‘‘𑀦 𑀢𑀁 𑀇𑀥 𑀯𑀺𑀘𑀸𑀭𑀬𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀯𑀸 𑀬𑀁 𑀅𑀝𑁆𑀞𑀓𑀣𑀁 𑀓𑀢𑁆𑀢𑀼𑀓𑀸𑀫𑁄, 𑀢𑀤𑁂𑀓𑀤𑁂𑀲𑀪𑀸𑀯𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀘 𑀕𑀳𑁂𑀢𑀩𑁆𑀩𑁄𑀢𑀺 𑀓𑀣𑀺𑀓𑀸𑀦𑀁 𑀉𑀧𑀤𑁂𑀲𑀁 𑀓𑀭𑁄𑀦𑁆𑀢𑁄 𑀢𑀢𑁆𑀣 𑀯𑀺𑀘𑀸𑀭𑀺𑀢𑀥𑀫𑁆𑀫𑁂 𑀉𑀤𑁆𑀤𑁂𑀲𑀯𑀲𑁂𑀦 𑀤𑀲𑁆𑀲𑁂𑀢𑀺 ‘‘𑀲𑀻𑀮𑀓𑀣𑀸’’ 𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀲𑀻𑀮𑀓𑀣𑀸𑀢𑀺 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀸𑀤𑀺𑀯𑀲𑁂𑀦 𑀲𑀻𑀮𑀯𑀺𑀢𑁆𑀣𑀸𑀭𑀓𑀣𑀸. 𑀥𑀼𑀢𑀥𑀫𑁆𑀫𑀸𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀸𑀤𑀬𑁄 (𑀯𑀺𑀲𑀼𑀤𑁆𑀥𑀺. 𑁧.𑁨𑁨; 𑀣𑁂𑀭𑀕𑀸. 𑀅𑀝𑁆𑀞. 𑁨.𑁮𑁪𑁫, 𑁮𑁪𑁯) 𑀢𑁂𑀭𑀲 𑀓𑀺𑀮𑁂𑀲𑀥𑀼𑀦𑀦𑀓𑀥𑀫𑁆𑀫𑀸. 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀲𑀩𑁆𑀩𑀸𑀦𑀻𑀢𑀺 𑀧𑀸𑀴𑀺𑀬𑀁 𑀆𑀕𑀢𑀸𑀦𑀺 𑀅𑀝𑁆𑀞𑀢𑀺𑀁𑀲, 𑀅𑀝𑁆𑀞𑀓𑀣𑀸𑀬𑀁 𑀤𑁆𑀯𑁂𑀢𑀺 𑀦𑀺𑀭𑀯𑀲𑁂𑀲𑀸𑀦𑀺 𑀬𑁄𑀕𑀓𑀫𑁆𑀫𑀲𑁆𑀲 𑀪𑀸𑀯𑀦𑀸𑀬 𑀧𑀯𑀢𑁆𑀢𑀺𑀝𑁆𑀞𑀸𑀦𑀸𑀦𑀺. 𑀘𑀭𑀺𑀬𑀸𑀯𑀺𑀥𑀸𑀦𑀲𑀳𑀺𑀢𑁄𑀢𑀺 𑀭𑀸𑀕𑀘𑀭𑀺𑀢𑀸𑀤𑀻𑀦𑀁 𑀲𑀪𑀸𑀯𑀸𑀤𑀺𑀯𑀺𑀥𑀸𑀦𑁂𑀦 𑀲𑀳𑀺𑀢𑁄. 𑀛𑀸𑀦𑀸𑀦𑀺 𑀘𑀢𑁆𑀢𑀸𑀭𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺, 𑀲𑀫𑀸𑀧𑀢𑁆𑀢𑀺𑀬𑁄 ¶ 𑀘𑀢𑀲𑁆𑀲𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄. 𑀅𑀝𑁆𑀞𑀧𑀺 𑀯𑀸 𑀧𑀝𑀺𑀮𑀤𑁆𑀥𑀫𑀢𑁆𑀢𑀸𑀦𑀺 𑀛𑀸𑀦𑀸𑀦𑀺, 𑀲𑀫𑀸𑀧𑀚𑁆𑀚𑀦𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀲𑀫𑀸𑀧𑀢𑁆𑀢𑀺𑀬𑁄. 𑀛𑀸𑀦𑀸𑀦𑀺 𑀯𑀸 𑀭𑀽𑀧𑀸𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 ¶ , 𑀲𑀫𑀸𑀧𑀢𑁆𑀢𑀺𑀬𑁄 𑀨𑀮𑀲𑀫𑀸𑀧𑀢𑁆𑀢𑀺𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑁄.

𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀪𑁂𑀤𑀸 𑀙 𑀅𑀪𑀺𑀜𑁆𑀜𑀸𑀬𑁄 𑀲𑀩𑁆𑀩𑀸 𑀅𑀪𑀺𑀜𑁆𑀜𑀸𑀬𑁄. 𑀜𑀸𑀡𑀯𑀺𑀪𑀗𑁆𑀕𑀸𑀤𑀻𑀲𑀼 𑀆𑀕𑀢𑀦𑀬𑁂𑀦 𑀏𑀓𑀯𑀺𑀥𑀸𑀤𑀺𑀦𑀸 𑀧𑀜𑁆𑀜𑀸𑀬 𑀲𑀗𑁆𑀓𑀮𑁂𑀢𑁆𑀯𑀸 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀦𑀺𑀘𑁆𑀙𑀬𑁄 𑀧𑀜𑁆𑀜𑀸𑀲𑀗𑁆𑀓𑀮𑀦𑀦𑀺𑀘𑁆𑀙𑀬𑁄.

𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀳𑁂𑀢𑀸𑀤𑀻𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀪𑀸𑀯𑁄 𑀧𑀘𑁆𑀘𑀬𑀸𑀓𑀸𑀭𑁄, 𑀢𑀲𑁆𑀲 𑀤𑁂𑀲𑀦𑀸 𑀧𑀘𑁆𑀘𑀬𑀸𑀓𑀸𑀭𑀤𑁂𑀲𑀦𑀸, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸𑀢𑀺 𑀅𑀢𑁆𑀣𑁄. 𑀲𑀸 𑀧𑀦 𑀖𑀦𑀯𑀺𑀦𑀺𑀩𑁆𑀪𑁄𑀕𑀲𑁆𑀲 𑀲𑀼𑀤𑀼𑀓𑁆𑀓𑀭𑀢𑀸𑀬 𑀲𑀡𑁆𑀳𑀲𑀼𑀔𑀼𑀫𑀸, 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀺𑀲𑀗𑁆𑀓𑀭𑀭𑀳𑀺𑀢𑀸, 𑀏𑀓𑀢𑁆𑀢𑀦𑀬𑀸𑀤𑀺𑀲𑀳𑀺𑀢𑀸 𑀘 𑀢𑀢𑁆𑀣 𑀯𑀺𑀘𑀸𑀭𑀺𑀢𑀸𑀢𑀺 𑀆𑀳 𑁋 ‘‘𑀲𑀼𑀧𑀭𑀺𑀲𑀼𑀤𑁆𑀥𑀦𑀺𑀧𑀼𑀡𑀦𑀬𑀸’’𑀢𑀺. 𑀧𑀝𑀺𑀲𑀫𑁆𑀪𑀺𑀤𑀸𑀤𑀻𑀲𑀼 𑀆𑀕𑀢𑀦𑀬𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀯𑀺𑀘𑀸𑀭𑀺𑀢𑀢𑁆𑀢𑀸 𑀅𑀯𑀺𑀫𑀼𑀢𑁆𑀢𑀢𑀦𑁆𑀢𑀺 𑀫𑀕𑁆𑀕𑀸.

𑀇𑀢𑀺 ¶ 𑀧𑀦 𑀲𑀩𑁆𑀩𑀦𑁆𑀢𑀺 𑀇𑀢𑀺-𑀲𑀤𑁆𑀤𑁄 𑀧𑀭𑀺𑀲𑀫𑀸𑀧𑀦𑁂, 𑀧𑀦-𑀲𑀤𑁆𑀤𑁄 𑀯𑀘𑀦𑀸𑀮𑀗𑁆𑀓𑀸𑀭𑁂, 𑀏𑀢𑀁 𑀲𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀇𑀥𑀸𑀢𑀺 𑀇𑀫𑀺𑀲𑁆𑀲𑀸 𑀅𑀝𑁆𑀞𑀓𑀣𑀸𑀬𑀁. 𑀦 𑀯𑀺𑀘𑀸𑀭𑀬𑀺𑀲𑁆𑀲𑀸𑀫𑀺, 𑀧𑀼𑀦𑀭𑀼𑀢𑁆𑀢𑀺𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀤𑀸𑀦𑀺 𑀢𑀲𑁆𑀲𑁂𑀯 𑀅𑀯𑀺𑀘𑀸𑀭𑀡𑀲𑁆𑀲 𑀏𑀓𑀦𑁆𑀢𑀓𑀸𑀭𑀡𑀁 𑀦𑀺𑀤𑁆𑀥𑀸𑀭𑁂𑀦𑁆𑀢𑁄 ‘‘𑀫𑀚𑁆𑀛𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀫𑀚𑁆𑀛𑁂 𑀞𑀢𑁆𑀯𑀸’’𑀢𑀺 𑀏𑀢𑁂𑀦 𑀫𑀚𑁆𑀛𑁂𑀪𑀸𑀯𑀤𑀻𑀧𑀦𑁂𑀦 𑀯𑀺𑀲𑁂𑀲𑀢𑁄 𑀘𑀢𑀼𑀦𑁆𑀦𑀁 𑀆𑀕𑀫𑀸𑀦𑀁 𑀲𑀸𑀥𑀸𑀭𑀡𑀝𑁆𑀞𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄, 𑀦 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀻𑀆𑀤𑀬𑁄 𑀯𑀺𑀬 𑀅𑀲𑀸𑀥𑀸𑀭𑀡𑀝𑁆𑀞𑀓𑀣𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀯𑀺𑀲𑁂𑀲𑀢𑁄’’𑀢𑀺 𑀇𑀤𑀁 𑀯𑀺𑀦𑀬𑀸𑀪𑀺𑀥𑀫𑁆𑀫𑀸𑀦𑀫𑁆𑀧𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀬𑀣𑀸𑀭𑀳𑀁 𑀅𑀢𑁆𑀣𑀯𑀡𑁆𑀡𑀦𑀸 𑀳𑁄𑀢𑀺 𑀬𑁂𑀯𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀇𑀘𑁆𑀘𑁂𑀯𑀸𑀢𑀺 𑀇𑀢𑀺 𑀏𑀯. 𑀢𑀫𑁆𑀧𑀻𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀫𑁆𑀧𑀺. 𑀏𑀢𑀸𑀬𑀸𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸. 𑀏𑀢𑁆𑀣 𑀘 ‘‘𑀲𑀻𑀳𑀴𑀤𑀻𑀧𑀁 𑀆𑀪𑀢𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀣𑀧𑁆𑀧𑀓𑀸𑀲𑀦𑀲𑁆𑀲 𑀦𑀺𑀫𑀺𑀢𑁆𑀢𑀁 𑀤𑀲𑁆𑀲𑁂𑀢𑀺, ‘‘𑀤𑀻𑀧𑀯𑀸𑀲𑀻𑀦𑀫𑀢𑁆𑀣𑀸𑀬, 𑀲𑀼𑀚𑀦𑀲𑁆𑀲 𑀘 𑀢𑀼𑀝𑁆𑀞𑀢𑁆𑀣𑀁, 𑀘𑀺𑀭𑀝𑁆𑀞𑀺𑀢𑀢𑁆𑀣𑀜𑁆𑀘 𑀥𑀫𑁆𑀫𑀲𑁆𑀲𑀸’’𑀢𑀺 𑀏𑀢𑁂𑀦 𑀧𑀬𑁄𑀚𑀦𑀁, 𑀅𑀯𑀲𑀺𑀝𑁆𑀞𑁂𑀦 𑀓𑀭𑀡𑀧𑁆𑀧𑀓𑀸𑀭𑀁. 𑀲𑀻𑀮𑀓𑀣𑀸𑀤𑀻𑀦𑀁 𑀅𑀯𑀺𑀘𑀸𑀭𑀡𑀫𑁆𑀧𑀺 𑀳𑀺 𑀇𑀥 𑀓𑀭𑀡𑀧𑁆𑀧𑀓𑀸𑀭𑁄 𑀏𑀯𑀸𑀢𑀺.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸

𑀯𑀺𑀪𑀸𑀕𑀯𑀦𑁆𑀢𑀸𑀦𑀁 ¶ ¶ 𑀲𑀪𑀸𑀯𑀯𑀺𑀪𑀸𑀯𑀦𑀁 𑀯𑀺𑀪𑀸𑀕𑀤𑀲𑁆𑀲𑀦𑀯𑀲𑁂𑀦𑁂𑀯 𑀳𑁄𑀢𑀻𑀢𑀺 𑀧𑀞𑀫𑀁 𑀢𑀸𑀯 𑀯𑀕𑁆𑀕𑀲𑀼𑀢𑁆𑀢𑀯𑀲𑁂𑀦 ¶ 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀤𑀻𑀖𑀸𑀕𑀫𑁄 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 ‘‘𑀤𑀻𑀖𑀲𑁆𑀲 𑀆𑀕𑀫𑀯𑀭𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀬𑀤𑀺𑀤𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀺𑀁 𑀯𑀘𑀦𑁂. 𑀬𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻𑀢𑀺 𑀧𑀝𑀺𑀜𑁆𑀜𑀸𑀢𑀁, 𑀲𑁄 𑀤𑀻𑀖𑀸𑀕𑀫𑁄 𑀦𑀸𑀫 𑀯𑀕𑁆𑀕𑀲𑀼𑀢𑁆𑀢𑀯𑀲𑁂𑀦 𑀏𑀯𑀁 𑀯𑀺𑀪𑀸𑀕𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀢𑀢𑁆𑀣𑀸𑀢𑀺 ‘‘𑀤𑀻𑀖𑀸𑀕𑀫𑀦𑀺𑀲𑁆𑀲𑀺𑀢𑀫𑀢𑁆𑀣’’𑀦𑁆𑀢𑀺 𑀏𑀢𑀲𑁆𑀫𑀺𑀁 𑀯𑀘𑀦𑁂. 𑀬𑁄 𑀤𑀻𑀖𑀸𑀕𑀫𑁄 𑀯𑀼𑀢𑁆𑀢𑁄, 𑀲𑁄 𑀯𑀕𑁆𑀕𑀸𑀤𑀺𑀯𑀲𑁂𑀦 𑀏𑀤𑀺𑀲𑁄𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄 𑀲𑀁𑀯𑀡𑁆𑀡𑀦𑀸𑀬 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀬𑀁 𑀦𑀺𑀓𑁆𑀔𑀺𑀢𑁆𑀢𑀸𑀦𑀼𑀓𑁆𑀓𑀫𑁂𑀦𑁂𑀯 𑀧𑀯𑀢𑁆𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀢𑀲𑁆𑀲 𑀯𑀕𑁆𑀕𑁂𑀲𑀼…𑀧𑁂… 𑀯𑀼𑀢𑁆𑀢𑀁 𑀦𑀺𑀤𑀸𑀦𑀫𑀸𑀤𑀻’’𑀢𑀺 𑀆𑀳. 𑀓𑀲𑁆𑀫𑀸 𑀧𑀦 𑀘𑀢𑀽𑀲𑀼 𑀆𑀕𑀫𑁂𑀲𑀼 𑀤𑀻𑀖𑀸𑀕𑀫𑁄 𑀧𑀞𑀫𑀁 𑀲𑀗𑁆𑀕𑀻𑀢𑁄, 𑀢𑀢𑁆𑀣 𑀘 𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑁄 𑀆𑀤𑀺𑀢𑁄 𑀦𑀺𑀓𑁆𑀔𑀺𑀢𑁆𑀢𑁄, 𑀢𑀲𑁆𑀫𑀺𑀜𑁆𑀘 𑀩𑁆𑀭𑀳𑁆𑀫𑀚𑀸𑀮𑀦𑁆𑀢𑀺? 𑀦𑀸𑀬𑀫𑀦𑀼𑀬𑁄𑀕𑁄 𑀓𑀢𑁆𑀣𑀘𑀺𑀧𑀺 𑀦 𑀧𑀯𑀢𑁆𑀢𑀢𑀺, 𑀅𑀧𑀺 𑀘 𑀲𑀤𑁆𑀥𑀸𑀯𑀳𑀕𑀼𑀡𑀢𑁄 𑀤𑀻𑀖𑀦𑀺𑀓𑀸𑀬𑁄 𑀧𑀞𑀫𑀁 𑀲𑀗𑁆𑀕𑀻𑀢𑁄. 𑀲𑀤𑁆𑀥𑀸 𑀳𑀺 𑀓𑀼𑀲𑀮𑀥𑀫𑁆𑀫𑀸𑀦𑀁 𑀩𑀻𑀚𑀁. 𑀬𑀣𑀸𑀳 𑁋 ‘‘𑀲𑀤𑁆𑀥𑀸 𑀩𑀻𑀚𑀁 𑀢𑀧𑁄 𑀯𑀼𑀝𑁆𑀞𑀻’’𑀢𑀺, (𑀲𑀁. 𑀦𑀺. 𑁧.𑁧𑁯𑁭; 𑀲𑀼. 𑀦𑀺. 𑁭𑁭) 𑀲𑀤𑁆𑀥𑀸𑀯𑀳𑀕𑀼𑀡𑀢𑀸 𑀘𑀲𑁆𑀲 𑀤𑀲𑁆𑀲𑀺𑀢𑀸𑀬𑁂𑀯. 𑀓𑀺𑀜𑁆𑀘 𑀓𑀢𑀺𑀧𑀬𑀲𑀼𑀢𑁆𑀢𑀲𑀗𑁆𑀕𑀳𑀢𑁄, 𑀅𑀧𑁆𑀧𑀧𑀭𑀺𑀫𑀸𑀡𑀢𑁄 𑀘 𑀕𑀳𑀡𑀥𑀸𑀭𑀡𑀸𑀤𑀺𑀲𑀼𑀔𑀢𑁄. 𑀢𑀣𑀸𑀳𑁂𑀲 𑀘𑀢𑀼𑀢𑁆𑀢𑀺𑀁𑀲𑀲𑀼𑀢𑁆𑀢𑀲𑀗𑁆𑀕𑀳𑁄 𑀘𑀢𑀼𑀲𑀝𑁆𑀞𑀺𑀪𑀸𑀡𑀯𑀸𑀭𑀧𑀭𑀺𑀫𑀸𑀡𑁄 𑀘. 𑀲𑀻𑀮𑀓𑀣𑀸𑀩𑀸𑀳𑀼𑀮𑁆𑀮𑀢𑁄 𑀧𑀦 𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑁄 𑀧𑀞𑀫𑀁 𑀦𑀺𑀓𑁆𑀔𑀺𑀢𑁆𑀢𑁄. 𑀲𑀻𑀮𑀜𑁆𑀳𑀺 𑀲𑀸𑀲𑀦𑀲𑁆𑀲 𑀆𑀤𑀺, 𑀲𑀻𑀮𑀧𑀢𑀺𑀝𑁆𑀞𑀸𑀦𑀢𑁆𑀢𑀸 𑀲𑀩𑁆𑀩𑀕𑀼𑀡𑀸𑀦𑀁. 𑀢𑁂𑀦𑁂𑀯𑀸𑀳 𑁋 ‘‘𑀢𑀲𑁆𑀫𑀸 𑀢𑀺𑀳, 𑀢𑁆𑀯𑀁 𑀪𑀺𑀓𑁆𑀔𑀼, 𑀆𑀤𑀺𑀫𑁂𑀯 𑀯𑀺𑀲𑁄𑀥𑁂𑀳𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀓𑁄 𑀘𑀸𑀤𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁? 𑀲𑀻𑀮𑀜𑁆𑀘 𑀲𑀼𑀯𑀺𑀲𑀼𑀤𑁆𑀥’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁫.𑁩𑁯𑁫). 𑀏𑀢𑁂𑀦 𑀘𑀲𑁆𑀲 𑀯𑀕𑁆𑀕𑀲𑁆𑀲 𑀅𑀦𑁆𑀯𑀢𑁆𑀣𑀲𑀜𑁆𑀜𑀢𑀸 𑀯𑀼𑀢𑁆𑀢𑀸 𑀳𑁄𑀢𑀺. 𑀤𑀺𑀝𑁆𑀞𑀺𑀯𑀺𑀦𑀺𑀯𑁂𑀞𑀦𑀓𑀣𑀸𑀪𑀸𑀯𑀢𑁄 𑀧𑀦 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀲𑁆𑀲 𑀦𑀺𑀭𑀯𑀲𑁂𑀲𑀤𑀺𑀝𑁆𑀞𑀺𑀯𑀺𑀪𑀚𑀦𑀁 𑀩𑁆𑀭𑀳𑁆𑀫𑀚𑀸𑀮𑀁 𑀧𑀞𑀫𑀁 𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀧𑀺𑀝𑀓𑁂 𑀳𑀺 𑀩𑀼𑀤𑁆𑀥𑀯𑀘𑀦𑁂 𑀩𑁆𑀭𑀳𑁆𑀫𑀚𑀸𑀮𑀲𑀤𑀺𑀲𑀁 𑀤𑀺𑀝𑁆𑀞𑀺𑀕𑀢𑀸𑀦𑀺 𑀦𑀺𑀕𑁆𑀕𑀼𑀫𑁆𑀩𑀁 𑀦𑀺𑀚𑁆𑀚𑀝𑀁 𑀓𑀢𑁆𑀯𑀸 𑀯𑀺𑀪𑀢𑁆𑀢𑀲𑀼𑀢𑁆𑀢𑀁 𑀦𑀢𑁆𑀣𑀻𑀢𑀺.

𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸

𑀬𑀲𑁆𑀲𑀸 ¶ ¶ 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀬𑀁 𑀦𑀺𑀓𑁆𑀔𑀺𑀢𑁆𑀢𑀸𑀦𑀼𑀓𑁆𑀓𑀫𑁂𑀦 𑀲𑀁𑀯𑀡𑁆𑀡𑀦𑀁 𑀓𑀢𑁆𑀢𑀼𑀓𑀸𑀫𑁄, 𑀢𑀁, 𑀢𑀲𑁆𑀲𑀸 𑀘 𑀢𑀦𑁆𑀢𑀺𑀆𑀭𑀼𑀴𑁆𑀳𑀸𑀬 𑀇𑀥 𑀯𑀘𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺…𑀧𑁂… 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀆𑀳. 𑀢𑀢𑁆𑀣 𑀬𑀣𑀸𑀧𑀘𑁆𑀘𑀬𑀁 𑀢𑀢𑁆𑀣 𑀢𑀢𑁆𑀣 𑀤𑁂𑀲𑀺𑀢𑀢𑁆𑀢𑀸 ¶ , 𑀧𑀜𑁆𑀜𑀢𑁆𑀢𑀢𑁆𑀢𑀸 𑀘 𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀁 𑀥𑀫𑁆𑀫𑀯𑀺𑀦𑀬𑀸𑀦𑀁 𑀲𑀗𑁆𑀕𑀳𑁂𑀢𑁆𑀯𑀸 𑀕𑀸𑀬𑀦𑀁 𑀓𑀣𑀦𑀁 𑀲𑀗𑁆𑀕𑀻𑀢𑀺, 𑀏𑀢𑁂𑀦 𑀢𑀁𑀢𑀁𑀲𑀺𑀓𑁆𑀔𑀸𑀧𑀤𑀸𑀦𑀁 𑀲𑀼𑀢𑁆𑀢𑀸𑀦𑀜𑁆𑀘 𑀆𑀤𑀺𑀧𑀭𑀺𑀬𑁄𑀲𑀸𑀦𑁂𑀲𑀼, 𑀅𑀦𑁆𑀢𑀭𑀦𑁆𑀢𑀭𑀸 𑀘 𑀲𑀫𑁆𑀩𑀦𑁆𑀥𑀯𑀲𑁂𑀦 𑀞𑀧𑀺𑀢𑀁 𑀲𑀗𑁆𑀕𑀻𑀢𑀺𑀓𑀸𑀭𑀯𑀘𑀦𑀁 𑀲𑀗𑁆𑀕𑀳𑀺𑀢𑀁 𑀳𑁄𑀢𑀺. 𑀫𑀳𑀸𑀯𑀺𑀲𑀬𑀢𑁆𑀢𑀸, 𑀧𑀽𑀚𑀦𑀻𑀬𑀢𑁆𑀢𑀸 𑀘 𑀫𑀳𑀢𑀻 𑀲𑀗𑁆𑀕𑀻𑀢𑀺 𑀫𑀳𑀸𑀲𑀗𑁆𑀕𑀻𑀢𑀺, 𑀧𑀞𑀫𑀸 𑀫𑀳𑀸𑀲𑀗𑁆𑀕𑀻𑀢𑀺 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺, 𑀢𑀲𑁆𑀲𑀸 𑀧𑀯𑀢𑁆𑀢𑀺𑀓𑀸𑀮𑁄 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁄, 𑀢𑀲𑁆𑀫𑀺𑀁 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂. 𑀦𑀺𑀤𑀸𑀦𑀦𑁆𑀢𑀺 𑀘 𑀤𑁂𑀲𑀦𑀁 𑀤𑁂𑀲𑀓𑀸𑀮𑀸𑀤𑀺𑀯𑀲𑁂𑀦 𑀅𑀯𑀺𑀤𑀺𑀢𑀁 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀦𑀺𑀤𑀲𑁆𑀲𑁂𑀢𑀻𑀢𑀺 𑀦𑀺𑀤𑀸𑀦𑀁. 𑀲𑀢𑁆𑀢𑀸𑀦𑀁 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀲𑀭𑀡𑀸𑀤𑀺𑀧𑀝𑀺𑀮𑀸𑀪𑀳𑁂𑀢𑀼𑀪𑀽𑀢𑀸𑀲𑀼 𑀯𑀺𑀚𑁆𑀚𑀫𑀸𑀦𑀸𑀲𑀼𑀧𑀺 𑀅𑀜𑁆𑀜𑀸𑀲𑀼 𑀪𑀕𑀯𑀢𑁄 𑀓𑀺𑀭𑀺𑀬𑀸𑀲𑀼 ‘‘𑀩𑀼𑀤𑁆𑀥𑁄 𑀩𑁄𑀥𑁂𑀬𑁆𑀬’’𑀦𑁆𑀢𑀺 (𑀩𑀼. 𑀯𑀁. 𑀅𑀝𑁆𑀞. 𑀭𑀢𑀦𑀘𑀗𑁆𑀓𑀫𑀦𑀓𑀡𑁆𑀟𑀯𑀡𑁆𑀡𑀦𑀸; 𑀘𑀭𑀺𑀬𑀸. 𑀉𑀤𑁆𑀥𑀸𑀦𑀕𑀸𑀣𑀸𑀯𑀡𑁆𑀡𑀦𑀸) 𑀧𑀝𑀺𑀜𑁆𑀜𑀸𑀬 𑀅𑀦𑀼𑀮𑁄𑀫𑀢𑁄 𑀯𑁂𑀦𑁂𑀬𑁆𑀬𑀸𑀦𑀁 𑀫𑀕𑁆𑀕𑀨𑀮𑀧𑁆𑀧𑀢𑁆𑀢𑀻𑀦𑀁 𑀳𑁂𑀢𑀼𑀪𑀽𑀢𑀸 𑀓𑀺𑀭𑀺𑀬𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀩𑀼𑀤𑁆𑀥𑀓𑀺𑀘𑁆𑀘𑀦𑁆𑀢𑀺 𑀆𑀳 𑁋 ‘‘𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀜𑁆𑀳𑀺 𑀆𑀤𑀺𑀁 𑀓𑀢𑁆𑀯𑀸’’𑀢𑀺. 𑀢𑀢𑁆𑀣 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀥𑀫𑁆𑀫𑁄𑀬𑁂𑀯 𑀧𑀯𑀢𑁆𑀢𑀦𑀝𑁆𑀞𑁂𑀦 𑀘𑀓𑁆𑀓𑀦𑁆𑀢𑀺 𑀥𑀫𑁆𑀫𑀘𑀓𑁆𑀓𑀁. 𑀅𑀣 𑀯𑀸 𑀘𑀓𑁆𑀓𑀦𑁆𑀢𑀺 𑀆𑀡𑀸, 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 𑀥𑀫𑁆𑀫𑀜𑁆𑀘 𑀢𑀁 𑀘𑀓𑁆𑀓𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀥𑀫𑁆𑀫𑁂𑀦 𑀜𑀸𑀬𑁂𑀦 𑀘𑀓𑁆𑀓𑀦𑁆𑀢𑀺𑀧𑀺 𑀥𑀫𑁆𑀫𑀘𑀓𑁆𑀓𑀁. 𑀬𑀣𑀸𑀳 𑁋

‘‘𑀥𑀫𑁆𑀫𑀜𑁆𑀘 𑀧𑀯𑀢𑁆𑀢𑁂𑀢𑀺 𑀘𑀓𑁆𑀓𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀘𑀓𑁆𑀓𑀜𑁆𑀘 𑀧𑀯𑀢𑁆𑀢𑁂𑀢𑀺 𑀥𑀫𑁆𑀫𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀥𑀫𑁆𑀫𑁂𑀦 𑀧𑀯𑀢𑁆𑀢𑁂𑀢𑀻𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀥𑀫𑁆𑀫𑀘𑀭𑀺𑀬𑀸𑀬 𑀧𑀯𑀢𑁆𑀢𑁂𑀢𑀻𑀢𑀺 𑀥𑀫𑁆𑀫𑀘𑀓𑁆𑀓’’𑀦𑁆𑀢𑀺𑀆𑀤𑀺 (𑀧𑀝𑀺. 𑀫. 𑁨, 𑁩𑁯, 𑁪𑁧).

‘‘𑀓𑀢𑀩𑀼𑀤𑁆𑀥𑀓𑀺𑀘𑁆𑀘𑁂’’𑀢𑀺 𑀏𑀢𑁂𑀦 𑀩𑀼𑀤𑁆𑀥𑀓𑀢𑁆𑀢𑀩𑁆𑀩𑀲𑁆𑀲 𑀓𑀲𑁆𑀲𑀘𑀺𑀧𑀺 𑀅𑀲𑁂𑀲𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀦𑀦𑀼 𑀘 𑀲𑀸𑀯𑀓𑁂𑀳𑀺 𑀯𑀺𑀦𑀻𑀢𑀸𑀧𑀺 𑀯𑀺𑀦𑁂𑀬𑁆𑀬𑀸 ¶ 𑀪𑀕𑀯𑀢𑀸𑀬𑁂𑀯 𑀯𑀺𑀦𑀻𑀢𑀸 𑀳𑁄𑀦𑁆𑀢𑀺, 𑀬𑀢𑁄 𑀲𑀸𑀯𑀓𑀪𑀸𑀲𑀺𑀢𑀁 𑀲𑀼𑀢𑁆𑀢𑀁 ‘‘𑀩𑀼𑀤𑁆𑀥𑀯𑀘𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀲𑀸𑀯𑀓𑀯𑀺𑀦𑁂𑀬𑁆𑀬𑀸 𑀘 𑀦 𑀢𑀸𑀯 𑀯𑀺𑀦𑀻𑀢𑀸𑀢𑀺? 𑀦𑀸𑀬𑀁 𑀤𑁄𑀲𑁄 𑀢𑁂𑀲𑀁 𑀯𑀺𑀦𑀬𑀦𑀼𑀧𑀸𑀬𑀲𑁆𑀲 𑀲𑀸𑀯𑀓𑁂𑀲𑀼 𑀞𑀧𑀺𑀢𑀢𑁆𑀢𑀸. 𑀢𑁂𑀦𑁂𑀯𑀸𑀳 𑁋

‘‘𑀦 𑀢𑀸𑀯𑀸𑀳𑀁, 𑀧𑀸𑀧𑀺𑀫, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀬𑀸𑀯 𑀫𑁂 𑀪𑀺𑀓𑁆𑀔𑀽 𑀦 𑀲𑀸𑀯𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸…𑀧𑁂… 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳 ¶ 𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲’’𑀦𑁆𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁧𑁬𑁮; 𑀲𑀁. 𑀦𑀺. 𑁫.𑁮𑁨𑁨; 𑀉𑀤𑀸. 𑁫𑁧).

‘‘𑀓𑀼𑀲𑀺𑀦𑀸𑀭𑀸𑀬’’𑀦𑁆𑀢𑀺𑀆𑀤𑀺 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑀤𑁂𑀲𑀓𑀸𑀮𑀯𑀺𑀲𑁂𑀲𑀤𑀲𑁆𑀲𑀦𑀁 ‘‘𑀅𑀧𑀭𑀺𑀦𑀺𑀩𑁆𑀩𑀼𑀢𑁄 𑀪𑀕𑀯𑀸’’𑀢𑀺 𑀕𑀸𑀳𑀲𑁆𑀲 𑀫𑀺𑀘𑁆𑀙𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀮𑁄𑀓𑁂 𑀚𑀸𑀢𑀲𑀁𑀯𑀤𑁆𑀥𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘 ¶ . 𑀢𑀣𑀸 𑀳𑀺 𑀫𑀦𑀼𑀲𑁆𑀲𑀪𑀸𑀯𑀲𑁆𑀲 𑀲𑀼𑀧𑀸𑀓𑀝𑀓𑀭𑀡𑀢𑁆𑀣𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑀸 𑀘𑀭𑀺𑀫𑀪𑀯𑁂 𑀤𑀸𑀭𑀧𑀭𑀺𑀕𑁆𑀕𑀳𑀸𑀤𑀻𑀦𑀺𑀧𑀺 𑀓𑀭𑁄𑀦𑁆𑀢𑀻𑀢𑀺. 𑀉𑀧𑀸𑀤𑀻𑀬𑀢𑁂 𑀓𑀫𑁆𑀫𑀓𑀺𑀮𑁂𑀲𑁂𑀳𑀻𑀢𑀺 𑀉𑀧𑀸𑀤𑀺, 𑀯𑀺𑀧𑀸𑀓𑀓𑁆𑀔𑀦𑁆𑀥𑀸 𑀓𑀝𑀢𑁆𑀢𑀸 𑀘 𑀭𑀽𑀧𑀁. 𑀲𑁄 𑀧𑀦 𑀉𑀧𑀸𑀤𑀺 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀫𑀸𑀭𑀦𑀺𑀫𑁆𑀫𑀣𑀦𑁂𑀦 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀁 𑀅𑀦𑁄𑀲𑁆𑀲𑀝𑁆𑀞𑁄, 𑀇𑀥 𑀔𑀦𑁆𑀥𑀫𑀘𑁆𑀘𑀼𑀫𑀸𑀭𑀦𑀺𑀫𑁆𑀫𑀣𑀦𑁂𑀦 𑀑𑀲𑁆𑀲𑀝𑁆𑀞𑁄 𑀦𑀺𑀲𑁆𑀲𑁂𑀲𑀺𑀢𑁄𑀢𑀺 𑀅𑀬𑀁 𑀅𑀦𑀼𑀧𑀸𑀤𑀺𑀲𑁂𑀲𑀸, 𑀦𑀺𑀩𑁆𑀩𑀸𑀦𑀥𑀸𑀢𑀼. 𑀦𑀺𑀩𑁆𑀩𑀸𑀦𑀥𑀸𑀢𑀽𑀢𑀺 𑀘𑁂𑀢𑁆𑀣 𑀦𑀺𑀩𑁆𑀩𑀼𑀢𑀺𑀫𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀘𑀸𑀬𑀁 𑀓𑀭𑀡𑀦𑀺𑀤𑁆𑀤𑁂𑀲𑁄. ‘‘𑀥𑀸𑀢𑀼𑀪𑀸𑀚𑀦𑀤𑀺𑀯𑀲𑁂’’𑀢𑀺 𑀇𑀤𑀁 𑀦 ‘‘𑀲𑀦𑁆𑀦𑀺𑀧𑀢𑀺𑀢𑀸𑀦’’𑀦𑁆𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀁, 𑀉𑀲𑁆𑀲𑀸𑀳𑀚𑀦𑀦𑀲𑁆𑀲 𑀧𑀦 𑀯𑀺𑀲𑁂𑀲𑀦𑀁, ‘‘𑀥𑀸𑀢𑀼𑀪𑀸𑀚𑀦𑀤𑀺𑀯𑀲𑁂 𑀪𑀺𑀓𑁆𑀔𑀽𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀲𑀻’’𑀢𑀺. 𑀥𑀸𑀢𑀼𑀪𑀸𑀚𑀦𑀤𑀺𑀯𑀲𑀢𑁄 𑀳𑀺 𑀧𑀼𑀭𑀺𑀫𑀧𑀼𑀭𑀺𑀫𑀢𑀭𑀤𑀺𑀯𑀲𑁂𑀲𑀼 𑀪𑀺𑀓𑁆𑀔𑀽 𑀲𑀫𑀸𑀕𑀢𑀸𑀢𑀺. 𑀅𑀣 𑀯𑀸 𑀥𑀸𑀢𑀼𑀪𑀸𑀚𑀦𑀤𑀺𑀯𑀲𑁂 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀓𑀸𑀬𑀲𑀸𑀫𑀕𑁆𑀕𑀻𑀯𑀲𑁂𑀦 𑀲𑀳𑀺𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀗𑁆𑀖𑀲𑁆𑀲 𑀣𑁂𑀭𑁄 𑀲𑀗𑁆𑀖𑀢𑁆𑀣𑁂𑀭𑁄, 𑀲𑁄 𑀧𑀦 𑀲𑀗𑁆𑀖𑁄 𑀓𑀺𑀁 𑀧𑀭𑀺𑀫𑀸𑀡𑀸𑀦𑀦𑁆𑀢𑀺 𑀆𑀳 𑁋 ‘‘𑀲𑀢𑁆𑀢𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦’’𑀦𑁆𑀢𑀺. 𑀦𑀺𑀘𑁆𑀘𑀲𑀸𑀧𑁂𑀓𑁆𑀔𑀢𑀸𑀬 𑀳𑀺 𑀏𑀤𑀺𑀲𑁂𑀲𑀼 𑀲𑀫𑀸𑀲𑁄 𑀳𑁄𑀢𑀺𑀬𑁂𑀯, 𑀬𑀣𑀸 𑁋 ‘‘𑀤𑁂𑀯𑀤𑀢𑁆𑀢𑀲𑁆𑀲 𑀕𑀭𑀼𑀓𑀼𑀮’’𑀦𑁆𑀢𑀺.

𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀧𑀼𑀦 𑀤𑀼𑀮𑁆𑀮𑀪𑀪𑀸𑀯𑀁 𑀫𑀜𑁆𑀜𑀫𑀸𑀦𑁄 𑀪𑀺𑀓𑁆𑀔𑀽𑀦𑀁 ¶ 𑀉𑀲𑁆𑀲𑀸𑀳𑀁 𑀚𑀦𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀥𑀸𑀢𑀼𑀪𑀸𑀚𑀦𑀤𑀺𑀯𑀲𑁂 𑀲𑀦𑁆𑀦𑀺𑀧𑀢𑀺𑀢𑀸𑀦’’𑀦𑁆𑀢𑀺 𑀇𑀤𑀁 ‘‘𑀪𑀺𑀓𑁆𑀔𑀽𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀲𑀻’’𑀢𑀺 𑀏𑀢𑁆𑀣 ‘‘𑀪𑀺𑀓𑁆𑀔𑀽𑀦’’𑀦𑁆𑀢𑀺 𑀇𑀫𑀺𑀦𑀸𑀧𑀺 𑀧𑀤𑁂𑀦 𑀲𑀫𑁆𑀩𑀦𑁆𑀥𑀦𑀻𑀬𑀁. 𑀲𑀼𑀪𑀤𑁆𑀤𑁂𑀦 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁂𑀦 𑀯𑀼𑀢𑁆𑀢𑀯𑀘𑀦𑀫𑀦𑀼𑀲𑁆𑀲𑀭𑀦𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀅𑀦𑀼𑀲𑁆𑀲𑀭𑀦𑁆𑀢𑁄 𑀥𑀫𑁆𑀫𑀲𑀁𑀯𑁂𑀕𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑀤𑁆𑀥𑀫𑁆𑀫𑀁 𑀅𑀦𑁆𑀢𑀭𑀥𑀸𑀧𑁂𑀬𑁆𑀬𑀼𑀁 𑀲𑀗𑁆𑀕𑀸𑀬𑁂𑀬𑁆𑀬𑀁…𑀧𑁂… 𑀘𑀺𑀭𑀝𑁆𑀞𑀺𑀢𑀺𑀓𑀁 𑀢𑀲𑁆𑀲 𑀓𑀺𑀫𑀜𑁆𑀜𑀁 𑀆𑀡𑀡𑁆𑀬𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀢𑁂𑀲𑀁 𑀧𑀤𑀸𑀦𑀁 ‘‘𑀇𑀢𑀺 𑀘𑀺𑀦𑁆𑀢𑀬𑀦𑁆𑀢𑁄’’𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀢𑀣𑀸 ‘‘𑀬𑀜𑁆𑀘𑀸𑀳’’𑀦𑁆𑀢𑀺 𑀏𑀢𑀲𑁆𑀲 ‘‘𑀅𑀦𑀼𑀕𑁆𑀕𑀳𑀺𑀢𑁄 𑀧𑀲𑀁𑀲𑀺𑀢𑁄’’𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀬𑀁 𑀧𑀸𑀧𑀪𑀺𑀓𑁆𑀔𑀽𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀓𑀸𑀭𑀡𑀦𑀺𑀤𑁆𑀤𑁂𑀲𑁄 𑀯𑀸, 𑀬𑁂𑀦 𑀓𑀸𑀭𑀡𑁂𑀦 𑀅𑀦𑁆𑀢𑀭𑀥𑀸𑀧𑁂𑀬𑁆𑀬𑀼𑀁, 𑀢𑀤𑁂𑀢𑀁 𑀓𑀸𑀭𑀡𑀁 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄, 𑀅𑀤𑁆𑀥𑀦𑀺𑀬𑀦𑁆𑀢𑀺 𑀅𑀤𑁆𑀥𑀸𑀦𑀫𑀕𑁆𑀕𑀕𑀸𑀫𑀺, 𑀅𑀤𑁆𑀥𑀸𑀦𑀓𑁆𑀔𑀫𑀦𑁆𑀢𑀺 𑀅𑀢𑁆𑀣𑁄.

𑀬𑀜𑁆𑀘𑀸𑀳𑀦𑁆𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀬𑀲𑁆𑀫𑀸, 𑀬𑁂𑀦 𑀓𑀸𑀭𑀡𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁 𑀯𑀸 𑀏𑀢𑀁, 𑀢𑁂𑀦 ‘‘𑀅𑀦𑀼𑀕𑁆𑀕𑀳𑀺𑀢𑁄 𑀧𑀲𑀁𑀲𑀺𑀢𑁄’’𑀢𑀺 𑀏𑀢𑁆𑀣 𑀅𑀦𑀼𑀕𑁆𑀕𑀡𑁆𑀳𑀦𑀁 𑀧𑀲𑀁𑀲𑀦𑀜𑁆𑀘 𑀧𑀭𑀸𑀫𑀲𑀢𑀺. ‘‘𑀘𑀻𑀯𑀭𑁂 𑀲𑀸𑀥𑀸𑀭𑀡𑀧𑀭𑀺𑀪𑁄𑀕𑁂𑀦𑀸’’𑀢𑀺 𑀏𑀢𑁆𑀣 ‘‘𑀅𑀢𑁆𑀢𑀦𑀸 𑀲𑀫𑀲𑀫𑀝𑁆𑀞𑀧𑀦𑁂𑀦𑀸’’𑀢𑀺 𑀇𑀥 𑀅𑀢𑁆𑀢𑀦𑀸-𑀲𑀤𑁆𑀤𑀁 𑀆𑀦𑁂𑀢𑁆𑀯𑀸 𑀘𑀻𑀯𑀭𑁂 𑀅𑀢𑁆𑀢𑀦𑀸 ¶ ¶ 𑀲𑀸𑀥𑀸𑀭𑀡𑀧𑀭𑀺𑀪𑁄𑀕𑁂𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀬𑀲𑁆𑀲 𑀬𑁂𑀦 𑀳𑀺 𑀲𑀫𑁆𑀩𑀦𑁆𑀥𑁄 𑀤𑀽𑀭𑀝𑁆𑀞𑀫𑁆𑀧𑀺 𑀘 𑀢𑀲𑁆𑀲 𑀢𑀦𑁆𑀢𑀺 𑀅𑀣 𑀯𑀸 𑀪𑀕𑀯𑀢𑀸 𑀘𑀻𑀯𑀭𑁂 𑀲𑀸𑀥𑀸𑀭𑀡𑀧𑀭𑀺𑀪𑁄𑀕𑁂𑀦 𑀪𑀕𑀯𑀢𑀸 𑀅𑀦𑀼𑀕𑁆𑀕𑀳𑀺𑀢𑁄𑀢𑀺 𑀬𑁄𑀚𑀦𑀻𑀬𑀁, 𑀏𑀢𑀲𑁆𑀲𑀸𑀧𑀺 𑀳𑀺 𑀓𑀭𑀡𑀦𑀺𑀤𑁆𑀤𑁂𑀲𑀲𑁆𑀲 𑀲𑀳𑀬𑁄𑀕𑀓𑀢𑁆𑀢𑀼𑀢𑁆𑀣𑀚𑁄𑀢𑀓𑀢𑁆𑀢𑀲𑀫𑁆𑀪𑀯𑀢𑁄. 𑀬𑀸𑀯𑀤𑁂𑀢𑀺 𑀬𑀸𑀯𑀤𑁂𑀯, 𑀬𑀢𑁆𑀢𑀓𑀁 𑀓𑀸𑀮𑀁, 𑀬𑀢𑁆𑀢𑀓𑁂 𑀯𑀸 𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑁂, 𑀅𑀪𑀺𑀜𑁆𑀜𑀸𑀯𑀺𑀳𑀸𑀭𑁂 𑀯𑀸 𑀆𑀓𑀗𑁆𑀔𑀦𑁆𑀢𑁄 𑀯𑀺𑀳𑀭𑀸𑀫𑀺 𑀘𑁂𑀯 𑀯𑁄𑀳𑀭𑀸𑀫𑀺 𑀘, 𑀢𑀣𑀸 𑀓𑀲𑁆𑀲𑀧𑁄𑀧𑀻𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘 𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀙𑀴𑀪𑀺𑀜𑁆𑀜𑀪𑀸𑀯𑀲𑀸𑀫𑀜𑁆𑀜𑁂𑀦 𑀣𑀼𑀢𑀺𑀫𑀢𑁆𑀢𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀪𑀕𑀯𑀸 𑀯𑀺𑀬 𑀤𑁂𑀯𑀲𑀺𑀓𑀁 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀸 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀢𑀺, 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀸𑀤𑀺𑀯𑀲𑁂𑀦 𑀯𑀸 𑀅𑀪𑀺𑀜𑁆𑀜𑀸𑀬𑁄 𑀯𑀴𑀜𑁆𑀚𑁂𑀢𑀻𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀙𑀴𑀪𑀺𑀜𑁆𑀜𑀸𑀧𑁆𑀧𑀪𑁂𑀤𑁂’’𑀢𑀺 ¶ . 𑀢𑀲𑁆𑀲 𑀓𑀺𑀫𑀜𑁆𑀜𑀁 𑀆𑀡𑀡𑁆𑀬𑀁 𑀪𑀯𑀺𑀲𑁆𑀲𑀢𑀺, 𑀅𑀜𑁆𑀜𑀢𑁆𑀭 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀦𑀦𑀼 𑀫𑀁 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀉𑀧𑀫𑀸𑀯𑀲𑁂𑀦 𑀯𑀺𑀪𑀸𑀯𑁂𑀢𑀺.

𑀢𑀢𑁄 𑀧𑀭𑀦𑁆𑀢𑀺 𑀢𑀢𑁄 𑀪𑀺𑀓𑁆𑀔𑀽𑀦𑀁 𑀉𑀲𑁆𑀲𑀸𑀳𑀚𑀦𑀦𑀢𑁄 𑀧𑀭𑀢𑁄. 𑀧𑀼𑀭𑁂 𑀅𑀥𑀫𑁆𑀫𑁄 𑀤𑀺𑀧𑁆𑀧𑀢𑀻𑀢𑀺 𑀅𑀧𑀺𑀦𑀸𑀫 𑀤𑀺𑀩𑁆𑀩𑀢𑀺, 𑀬𑀸𑀯 𑀅𑀥𑀫𑁆𑀫𑁄 𑀥𑀫𑁆𑀫𑀁 𑀧𑀝𑀺𑀩𑀸𑀳𑀺𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺, 𑀢𑀢𑁄 𑀧𑀼𑀭𑁂𑀢𑀭𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀆𑀲𑀦𑁆𑀦𑁂 𑀅𑀦𑀺𑀘𑁆𑀙𑀺𑀢𑁂 𑀳𑀺 𑀅𑀬𑀁 𑀧𑀼𑀭𑁂-𑀲𑀤𑁆𑀤𑁄. 𑀤𑀺𑀧𑁆𑀧𑀢𑀻𑀢𑀺 𑀘 𑀤𑀺𑀧𑁆𑀧𑀺𑀲𑁆𑀲𑀢𑀺. 𑀧𑀼𑀭𑁂𑀲𑀤𑁆𑀤𑀲𑀦𑁆𑀦𑀺𑀬𑁄𑀕𑁂𑀦 𑀳𑀺 𑀅𑀦𑀸𑀕𑀢𑀢𑁆𑀣𑁂 𑀅𑀬𑀁 𑀯𑀢𑁆𑀢𑀫𑀸𑀦𑀧𑁆𑀧𑀬𑁄𑀕𑁄, 𑀬𑀣𑀸 𑁋 ‘‘𑀧𑀼𑀭𑀸 𑀯𑀲𑁆𑀲𑀢𑀺 𑀤𑁂𑀯𑁄’’𑀢𑀺.

‘‘𑀲𑀓𑀮𑀦𑀯𑀗𑁆𑀕𑀲𑀢𑁆𑀣𑀼𑀲𑀸𑀲𑀦𑀧𑀭𑀺𑀬𑀢𑁆𑀢𑀺𑀥𑀭𑁂…𑀧𑁂… 𑀏𑀓𑀽𑀦𑀧𑀜𑁆𑀘𑀲𑀢𑁂 𑀧𑀭𑀺𑀕𑁆𑀕𑀳𑁂𑀲𑀻’’𑀢𑀺 𑀏𑀢𑁂𑀦 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑀧𑀭𑀺𑀬𑀦𑁆𑀢𑀸𑀦𑀁 𑀬𑀣𑀸𑀯𑀼𑀢𑁆𑀢𑀧𑀼𑀕𑁆𑀕𑀮𑀸𑀦𑀁 𑀲𑀢𑀺𑀧𑀺 𑀆𑀕𑀫𑀸𑀥𑀺𑀕𑀫𑀲𑀩𑁆𑀪𑀸𑀯𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀧𑀦 𑀢𑁂𑀯𑀺𑀚𑁆𑀚𑀸𑀤𑀺𑀕𑀼𑀡𑀬𑀼𑀢𑁆𑀢𑀸𑀦𑀁 𑀆𑀕𑀫𑀸𑀥𑀺𑀕𑀫𑀲𑀫𑁆𑀧𑀢𑁆𑀢𑀺𑀬𑀸 𑀉𑀓𑁆𑀓𑀁𑀲𑀕𑀢𑀢𑁆𑀢𑀸 𑀲𑀗𑁆𑀕𑀻𑀢𑀺𑀬𑀸 𑀩𑀳𑀼𑀧𑀓𑀸𑀭𑀢𑀁 𑀤𑀲𑁆𑀲𑁂𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀲𑀗𑁆𑀕𑀻𑀢𑀺𑀓𑁆𑀔𑀦𑁆𑀥𑀓𑁂, (𑀧𑀸𑀭𑀸. 𑁪𑁩𑁭) 𑀅𑀧𑀘𑁆𑀘𑀓𑁆𑀔𑀁 𑀦𑀸𑀫 𑀦𑀢𑁆𑀣𑀺 𑀧𑀕𑀼𑀡𑀧𑁆𑀧𑀯𑀢𑁆𑀢𑀺𑀪𑀸𑀯𑀢𑁄, 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀧𑀦 ‘‘𑀅𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑀦𑀸𑀫 𑀦𑀢𑁆𑀣𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸) 𑀯𑀼𑀢𑁆𑀢𑀁, 𑀢𑀁 ‘‘𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀢𑁄’’𑀢𑀺 𑀯𑀼𑀢𑁆𑀢𑀫𑁆𑀧𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀝𑀺𑀕𑁆𑀕𑀳𑀺𑀢𑀫𑁂𑀯𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑁂 𑀲𑀦𑁆𑀥𑀸𑀬𑀸𑀳. 𑀧𑀯𑀢𑁆𑀢𑀺𑀦𑁄𑀢𑀺 𑀧𑀕𑀼𑀡𑀸𑀦𑀺. 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀦𑀯𑀧𑁆𑀧𑀸𑀬𑀸𑀬 𑀧𑀭𑀺𑀲𑀸𑀬 𑀯𑀺𑀩𑁆𑀪𑀫𑀦𑁂𑀦 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀏𑀯𑀫𑀸𑀳 𑁋 ‘‘𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻’’𑀢𑀺. 𑀢𑀢𑁆𑀣 𑀫𑀢𑁆𑀢𑀦𑁆𑀢𑀺 𑀧𑀫𑀸𑀡𑀁. 𑀙𑀦𑁆𑀤𑀸 𑀆𑀕𑀫𑀦𑀁 𑀯𑀺𑀬𑀸𑀢𑀺 𑀧𑀤𑀯𑀺𑀪𑀸𑀕𑁄. ‘‘𑀓𑀺𑀜𑁆𑀘𑀸𑀧𑀺 𑀲𑁂𑀓𑁆𑀔𑁄’’𑀢𑀺 𑀇𑀤𑀁 ¶ 𑀦 𑀲𑁂𑀓𑁆𑀔𑀸𑀦𑀁 𑀅𑀕𑀢𑀺𑀕𑀫𑀦𑀲𑀩𑁆𑀪𑀸𑀯𑁂𑀦 𑀯𑀼𑀢𑁆𑀢𑀁, 𑀅𑀲𑁂𑀓𑁆𑀔𑀸𑀦𑀫𑁂𑀯 𑀧𑀦 𑀉𑀘𑁆𑀘𑀺𑀦𑀺𑀢𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁 ¶ . 𑀧𑀞𑀫𑀫𑀕𑁆𑀕𑁂𑀦𑁂𑀯 𑀳𑀺 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺 𑀧𑀳𑀻𑀬𑀦𑁆𑀢𑀻𑀢𑀺. ‘‘𑀅𑀪𑀩𑁆𑀩𑁄 𑀙𑀦𑁆𑀤𑀸…𑀧𑁂… 𑀅𑀕𑀢𑀺𑀁 𑀕𑀦𑁆𑀢𑀼’’𑀦𑁆𑀢𑀺 𑀘 𑀥𑀫𑁆𑀫𑀲𑀗𑁆𑀕𑀻𑀢𑀺𑀬𑀸 𑀢𑀲𑁆𑀲 𑀬𑁄𑀕𑁆𑀬𑀪𑀸𑀯𑀤𑀲𑁆𑀲𑀦𑁂𑀦 𑀯𑀺𑀚𑁆𑀚𑀫𑀸𑀦𑀕𑀼𑀡𑀓𑀣𑀦𑀁. 𑀧𑀭𑀺𑀬𑀢𑁆𑀢𑁄𑀢𑀺 𑀅𑀥𑀻𑀢𑁄.

𑀕𑀸𑀯𑁄 ¶ 𑀘𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑁄𑀘𑀭𑁄, 𑀕𑁄𑀘𑀭𑁄 𑀯𑀺𑀬 𑀕𑁄𑀘𑀭𑁄, 𑀪𑀺𑀓𑁆𑀔𑀸𑀘𑀭𑀡𑀝𑁆𑀞𑀸𑀦𑀁. 𑀯𑀺𑀲𑀪𑀸𑀕𑀧𑀼𑀕𑁆𑀕𑀮𑁄 𑀲𑀼𑀪𑀤𑁆𑀤𑀲𑀤𑀺𑀲𑁄. 𑀲𑀢𑁆𑀢𑀺𑀧𑀜𑁆𑀚𑀭𑀦𑁆𑀢𑀺 𑀲𑀢𑁆𑀢𑀺𑀔𑀕𑁆𑀕𑀸𑀤𑀺𑀳𑀢𑁆𑀣𑁂𑀳𑀺 𑀧𑀼𑀭𑀺𑀲𑁂𑀳𑀺 𑀫𑀮𑁆𑀮𑀭𑀸𑀚𑀽𑀦𑀁 𑀪𑀕𑀯𑀢𑁄 𑀥𑀸𑀢𑀼𑀆𑀭𑀓𑁆𑀔𑀓𑀭𑀡𑀁 𑀲𑀦𑁆𑀥𑀸𑀬𑀸𑀳. 𑀢𑀁 𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀢𑀁 𑀓𑀭𑀡𑀻𑀬𑀁 𑀓𑀭𑁄𑀢𑀽𑀢𑀺 𑀲𑀗𑁆𑀕𑀸𑀳𑀓𑁂𑀦 𑀙𑀺𑀦𑁆𑀤𑀺𑀢𑀩𑁆𑀩𑀁 𑀙𑀺𑀦𑁆𑀤𑀺𑀢𑁆𑀯𑀸 𑀏𑀓𑀦𑁆𑀢𑀓𑀭𑀡𑀻𑀬𑀁 𑀓𑀭𑁄𑀢𑀽𑀢𑀺 𑀅𑀢𑁆𑀣𑁄. 𑀫𑀳𑀸𑀚𑀦𑀦𑁆𑀢𑀺 𑀩𑀳𑀼𑀚𑀦𑀁. 𑀕𑀦𑁆𑀥𑀓𑀼𑀝𑀺𑀁 𑀯𑀦𑁆𑀤𑀺𑀢𑁆𑀯𑀸 𑀧𑀭𑀺𑀪𑁄𑀕𑀘𑁂𑀢𑀺𑀬𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀢𑀦𑁆𑀢𑀺 𑀬𑀣𑀸 𑀅𑀜𑁆𑀜𑁄𑀧𑀺 𑀬𑀣𑀸𑀯𑀼𑀢𑁆𑀢𑀲𑀪𑀸𑀯𑁄, 𑀏𑀯𑀦𑁆𑀢𑀺 𑀅𑀢𑁆𑀣𑁄. 𑀲𑀁𑀯𑁂𑀚𑁂𑀲𑀻𑀢𑀺 ‘‘𑀦𑀦𑀼 𑀪𑀕𑀯𑀢𑀸 𑀧𑀝𑀺𑀓𑀘𑁆𑀘𑁂𑀯 𑀅𑀓𑁆𑀔𑀸𑀢𑀁 𑁋 ‘𑀲𑀩𑁆𑀩𑁂𑀳𑁂𑀯 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄’’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁧𑁮𑁩; 𑀲𑀁. 𑀦𑀺. 𑁫.𑁩𑁭𑁯; 𑀅. 𑀦𑀺. 𑁧𑁦.𑁪𑁮; 𑀘𑀽𑀴𑀯. 𑁪𑁩𑁭) 𑀲𑀁𑀯𑁂𑀕𑀁 𑀚𑀦𑁂𑀲𑀺. 𑀉𑀲𑁆𑀲𑀦𑁆𑀦𑀥𑀸𑀢𑀼𑀓𑀦𑁆𑀢𑀺 𑀉𑀧𑀘𑀺𑀢𑀤𑁄𑀲𑀁. 𑀪𑁂𑀲𑀚𑁆𑀚𑀫𑀢𑁆𑀢𑀸𑀢𑀺 𑀅𑀧𑁆𑀧𑀓𑀁 𑀪𑁂𑀲𑀚𑁆𑀚𑀁. 𑀅𑀧𑁆𑀧𑀢𑁆𑀣𑁄 𑀳𑀺 𑀅𑀬𑀁 𑀫𑀢𑁆𑀢𑀸-𑀲𑀤𑁆𑀤𑁄, ‘‘𑀫𑀢𑁆𑀢𑀸𑀲𑀼𑀔𑀧𑀭𑀺𑀘𑁆𑀘𑀸𑀕𑁄’’𑀢𑀺𑀆𑀤𑀻𑀲𑀼 (𑀥. 𑀧. 𑁨𑁯𑁦) 𑀯𑀺𑀬. 𑀤𑀼𑀢𑀺𑀬𑀤𑀺𑀯𑀲𑁂𑀢𑀺 𑀤𑁂𑀯𑀢𑀸𑀬 𑀲𑀁𑀯𑁂𑀚𑀺𑀢𑀤𑀺𑀯𑀲𑀢𑁄, 𑀚𑁂𑀢𑀯𑀦𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑀤𑀺𑀯𑀲𑀢𑁄 𑀯𑀸 𑀤𑀼𑀢𑀺𑀬𑀤𑀺𑀯𑀲𑁂. 𑀆𑀡𑀸𑀯 𑀘𑀓𑁆𑀓𑀁 𑀆𑀡𑀸𑀘𑀓𑁆𑀓𑀁.

𑀏𑀢𑀤𑀕𑁆𑀕𑀦𑁆𑀢𑀺 𑀏𑀲𑁄 𑀅𑀕𑁆𑀕𑁄. 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀳𑀺 𑀅𑀬𑀁 𑀦𑀺𑀤𑁆𑀤𑁂𑀲𑁄. 𑀬𑀤𑀺𑀤𑀦𑁆𑀢𑀺 𑀘 𑀬𑁄 𑀅𑀬𑀁, 𑀬𑀤𑀺𑀤𑀁 𑀔𑀦𑁆𑀥𑀧𑀜𑁆𑀘𑀓𑀦𑁆𑀢𑀺 𑀯𑀸 𑀬𑁄𑀚𑁂𑀢𑀩𑁆𑀩𑀁. ‘‘𑀧𑀞𑀫𑀁 ¶ 𑀆𑀯𑀼𑀲𑁄 𑀉𑀧𑀸𑀮𑀺 𑀧𑀸𑀭𑀸𑀚𑀺𑀓𑀁 𑀓𑀢𑁆𑀣 𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀢𑀲𑁆𑀲 𑀲𑀗𑁆𑀕𑀻𑀢𑀺𑀬𑀸 𑀧𑀼𑀭𑀺𑀫𑀓𑀸𑀮𑁂 𑀧𑀞𑀫𑀪𑀸𑀯𑁄 𑀦 𑀬𑀼𑀢𑁆𑀢𑁄𑀢𑀺? 𑀦𑁄 𑀦 𑀬𑀼𑀢𑁆𑀢𑁄, 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀸𑀦𑀼𑀓𑁆𑀓𑀫𑁂𑀦 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀦𑀼𑀓𑁆𑀓𑀫𑁂𑀦 𑀘 𑀧𑀞𑀫𑀪𑀸𑀯𑀲𑁆𑀲 𑀲𑀺𑀤𑁆𑀥𑀢𑁆𑀢𑀸. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀪𑀕𑀯𑀢𑁄 𑀥𑀭𑀫𑀸𑀦𑀓𑀸𑀮𑁂 𑀞𑀺𑀢𑀸𑀦𑀼𑀓𑁆𑀓𑀫𑁂𑀦𑁂𑀯 𑀲𑀗𑁆𑀕𑀻𑀢𑀸𑀦𑀺, 𑀯𑀺𑀲𑁂𑀲𑀢𑁄 𑀯𑀺𑀦𑀬𑀸𑀪𑀺𑀥𑀫𑁆𑀫𑀧𑀺𑀝𑀓𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀯𑀢𑁆𑀣𑀼𑀫𑁆𑀧𑀺 𑀧𑀼𑀘𑁆𑀙𑀻’’𑀢𑀺𑀆𑀤𑀺 ‘𑀓𑀢𑁆𑀣 𑀧𑀜𑁆𑀜𑀢𑁆𑀢’𑀦𑁆𑀢𑀺𑀆𑀤𑀺𑀦𑀸 𑀤𑀲𑁆𑀲𑀺𑀢𑁂𑀦 𑀲𑀳 𑀢𑀤𑀯𑀲𑀺𑀝𑁆𑀞𑀫𑁆𑀧𑀺 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀞𑀫𑀧𑀸𑀭𑀸𑀚𑀺𑀓𑁂𑀢𑀺 𑀧𑀞𑀫𑀧𑀸𑀭𑀸𑀚𑀺𑀓𑀧𑀸𑀴𑀺𑀬𑀁 (𑀧𑀸𑀭𑀸. 𑁨𑁪), 𑀢𑁂𑀦𑁂𑀯𑀸𑀳 𑁋 ‘‘𑀦 𑀳𑀺 𑀢𑀣𑀸𑀕𑀢𑀸 𑀏𑀓𑀩𑁆𑀬𑀜𑁆𑀚𑀦𑀫𑁆𑀧𑀺 𑀦𑀺𑀭𑀢𑁆𑀣𑀓𑀁 𑀯𑀤𑀦𑁆𑀢𑀻’’𑀢𑀺.

𑀚𑀸𑀢𑀓𑀸𑀤𑀺𑀓𑁂 ¶ 𑀔𑀼𑀤𑁆𑀤𑀓𑀦𑀺𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑁂, 𑀬𑁂𑀪𑀼𑀬𑁆𑀬𑁂𑀦 𑀘 𑀥𑀫𑁆𑀫𑀦𑀺𑀤𑁆𑀤𑁂𑀲𑀪𑀽𑀢𑁂 𑀢𑀸𑀤𑀺𑀲𑁂 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀲𑀗𑁆𑀕𑀡𑁆𑀳𑀺𑀢𑀼𑀁 𑀬𑀼𑀢𑁆𑀢𑀁, 𑀦 𑀧𑀦 𑀤𑀻𑀖𑀦𑀺𑀓𑀸𑀬𑀸𑀤𑀺𑀧𑁆𑀧𑀓𑀸𑀭𑁂 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂, 𑀦𑀸𑀧𑀺 𑀧𑀜𑁆𑀜𑀢𑁆𑀢𑀺𑀦𑀺𑀤𑁆𑀤𑁂𑀲𑀪𑀽𑀢𑁂 𑀯𑀺𑀦𑀬𑀧𑀺𑀝𑀓𑁂𑀢𑀺 𑀤𑀻𑀖𑀪𑀸𑀡𑀓𑀸 ‘‘𑀚𑀸𑀢𑀓𑀸𑀤𑀻𑀦𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀲𑀗𑁆𑀕𑀳𑁄’’𑀢𑀺 𑀯𑀤𑀦𑁆𑀢𑀺. 𑀘𑀭𑀺𑀬𑀸𑀧𑀺𑀝𑀓𑀩𑀼𑀤𑁆𑀥𑀯𑀁𑀲𑀸𑀦𑀜𑁆𑀘𑁂𑀢𑁆𑀣 𑀅𑀕𑁆𑀕𑀳𑀡𑀁, 𑀚𑀸𑀢𑀓𑀕𑀢𑀺𑀓𑀢𑁆𑀢𑀸. 𑀫𑀚𑁆𑀛𑀺𑀫𑀪𑀸𑀡𑀓𑀸 𑀧𑀦 ‘‘𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀤𑁂𑀲𑀺𑀢𑀸𑀦𑀁 𑀚𑀸𑀢𑀓𑀸𑀤𑀻𑀦𑀁 𑀬𑀣𑀸𑀦𑀼𑀮𑁄𑀫𑀤𑁂𑀲𑀦𑀸𑀪𑀸𑀯𑀢𑁄 𑀢𑀸𑀤𑀺𑀲𑁂 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂 𑀲𑀗𑁆𑀕𑀳𑁄 𑀬𑀼𑀢𑁆𑀢𑁄, 𑀦 𑀧𑀦 𑀲𑀪𑀸𑀯𑀥𑀫𑁆𑀫𑀦𑀺𑀤𑁆𑀤𑁂𑀲𑀪𑀽𑀢𑁂 𑀬𑀣𑀸𑀥𑀫𑁆𑀫𑀲𑀸𑀲𑀦𑁂 𑀅𑀪𑀺𑀥𑀫𑁆𑀫𑀧𑀺𑀝𑀓𑁂’’𑀢𑀺 𑀚𑀸𑀢𑀓𑀸𑀤𑀻𑀦𑀁 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀧𑀭𑀺𑀬𑀸𑀧𑀦𑁆𑀦𑀢𑀁 𑀓𑀣𑀬𑀦𑁆𑀢𑀺. 𑀢𑀢𑁆𑀣 𑀘 𑀬𑀼𑀢𑁆𑀢𑀁 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀏𑀯𑀁 ¶ 𑀦𑀺𑀫𑀺𑀢𑁆𑀢𑀧𑀬𑁄𑀚𑀦𑀓𑀸𑀮𑀤𑁂𑀲𑀓𑀸𑀭𑀓𑀓𑀭𑀡𑀧𑁆𑀧𑀓𑀸𑀭𑁂𑀳𑀺 𑀧𑀞𑀫𑀁 𑀲𑀗𑁆𑀕𑀻𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀢𑁆𑀣 𑀯𑀯𑀢𑁆𑀣𑀸𑀧𑀺𑀢𑀲𑀺𑀤𑁆𑀥𑁂𑀲𑀼 𑀥𑀫𑁆𑀫𑀯𑀺𑀦𑀬𑁂𑀲𑀼 𑀦𑀸𑀦𑀧𑁆𑀧𑀓𑀸𑀭𑀓𑁄𑀲𑀮𑁆𑀮𑀢𑁆𑀣𑀁 𑀏𑀓𑀯𑀺𑀥𑀸𑀤𑀺𑀪𑁂𑀤𑁂 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀫𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀫𑀼𑀢𑁆𑀢𑀺𑀭𑀲𑀦𑁆𑀢𑀺 𑀯𑀺𑀫𑀼𑀢𑁆𑀢𑀺𑀕𑀼𑀡𑀁, 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀓𑀁 𑀯𑀸, 𑀅𑀕𑁆𑀕𑀨𑀮𑀦𑀺𑀧𑁆𑀨𑀸𑀤𑀦𑀢𑁄, 𑀯𑀺𑀫𑀼𑀢𑁆𑀢𑀺𑀓𑀺𑀘𑁆𑀘𑀁 𑀯𑀸, 𑀓𑀺𑀮𑁂𑀲𑀸𑀦𑀁 ¶ 𑀅𑀘𑁆𑀘𑀦𑁆𑀢𑀁 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀸𑀤𑀦𑀢𑁄. 𑀓𑁂𑀘𑀺 𑀧𑀦 ‘‘𑀯𑀺𑀫𑀼𑀢𑁆𑀢𑀺𑀅𑀲𑁆𑀲𑀸𑀤’’𑀦𑁆𑀢𑀺 𑀯𑀤𑀦𑁆𑀢𑀺.

𑀓𑀺𑀜𑁆𑀘𑀸𑀧𑀺 𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀓𑀺𑀮𑁂𑀲𑀯𑀺𑀦𑀬𑀦𑁂𑀦 𑀯𑀺𑀦𑀬𑁄, 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀅𑀧𑀸𑀬𑀧𑀢𑀦𑀸𑀤𑀺𑀢𑁄 𑀥𑀸𑀭𑀡𑁂𑀦 𑀥𑀫𑁆𑀫𑁄, 𑀇𑀥𑀸𑀥𑀺𑀧𑁆𑀧𑁂𑀢𑁂 𑀧𑀦 𑀥𑀫𑁆𑀫𑀯𑀺𑀦𑀬𑁂 𑀦𑀺𑀤𑁆𑀥𑀸𑀭𑁂𑀢𑀼𑀁 ‘‘𑀢𑀢𑁆𑀣 𑀯𑀺𑀦𑀬𑀧𑀺𑀝𑀓’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀯𑀲𑁂𑀲𑀁 𑀩𑀼𑀤𑁆𑀥𑀯𑀘𑀦𑀁 𑀥𑀫𑁆𑀫𑁄, 𑀔𑀦𑁆𑀥𑀸𑀤𑀺𑀯𑀲𑁂𑀦 𑀲𑀪𑀸𑀯𑀥𑀫𑁆𑀫𑀤𑁂𑀲𑀦𑀸𑀩𑀸𑀳𑀼𑀮𑁆𑀮𑀢𑁄. 𑀅𑀣 𑀯𑀸 𑀬𑀤𑀺𑀧𑀺 𑀥𑀫𑁆𑀫𑁄𑀬𑁂𑀯 𑀯𑀺𑀦𑀬𑁄𑀧𑀺, 𑀧𑀭𑀺𑀬𑀢𑁆𑀢𑀺𑀬𑀸𑀤𑀺𑀪𑀸𑀯𑀢𑁄, 𑀯𑀺𑀦𑀬𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂 𑀧𑀦 𑀪𑀺𑀦𑁆𑀦𑀸𑀥𑀺𑀓𑀭𑀡𑀪𑀸𑀯𑁂𑀦 𑀧𑀬𑀼𑀢𑁆𑀢𑁄 𑀥𑀫𑁆𑀫-𑀲𑀤𑁆𑀤𑁄 𑀯𑀺𑀦𑀬𑀢𑀦𑁆𑀢𑀺𑀯𑀺𑀥𑀼𑀭𑀁 𑀢𑀦𑁆𑀢𑀺𑀁 𑀤𑀻𑀧𑁂𑀢𑀺 𑀬𑀣𑀸 ‘‘𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑀸, 𑀕𑁄𑀩𑀮𑀺𑀩𑀤𑁆𑀥’’𑀦𑁆𑀢𑀺 𑀘.

‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭’’𑀦𑁆𑀢𑀺 𑀅𑀬𑀁 𑀕𑀸𑀣𑀸 𑀪𑀕𑀯𑀢𑀸 𑀅𑀢𑁆𑀢𑀦𑁄 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀧𑀤𑀝𑁆𑀞𑀸𑀦𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁂𑀦 𑀏𑀓𑀽𑀦𑀯𑀻𑀲𑀢𑀺𑀫𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀁 𑀪𑀸𑀲𑀺𑀢𑀸. 𑀢𑁂𑀦𑀸𑀳 ‘‘𑀇𑀤𑀁 𑀧𑀞𑀫𑀩𑀼𑀤𑁆𑀥𑀯𑀘𑀦’’𑀦𑁆𑀢𑀺. 𑀇𑀤𑀁 𑀓𑀺𑀭 𑀲𑀩𑁆𑀩𑀩𑀼𑀤𑁆𑀥𑁂𑀳𑀺 𑀅𑀯𑀺𑀚𑀳𑀺𑀢𑀁 𑀉𑀤𑀸𑀦𑀁. 𑀅𑀬𑀫𑀲𑁆𑀲 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀅𑀳𑀁 𑀇𑀫𑀲𑁆𑀲 𑀅𑀢𑁆𑀢𑀪𑀸𑀯𑀕𑁂𑀳𑀲𑁆𑀲 𑀓𑀸𑀭𑀓𑀁 𑀢𑀡𑁆𑀳𑀸𑀯𑀟𑁆𑀠𑀓𑀺𑀁 𑀕𑀯𑁂𑀲𑀦𑁆𑀢𑁄 𑀬𑁂𑀦 𑀜𑀸𑀡𑁂𑀦 𑀢𑀁 𑀤𑀝𑁆𑀞𑀼𑀁 𑀲𑀓𑁆𑀓𑀸, 𑀢𑀲𑁆𑀲 𑀩𑁄𑀥𑀺𑀜𑀸𑀡𑀲𑁆𑀲𑀢𑁆𑀣𑀸𑀬 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀓𑀢𑀸𑀪𑀺𑀦𑀻𑀳𑀸𑀭𑁄 ¶ 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁 𑀅𑀦𑁂𑀓𑀚𑀸𑀢𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀁 𑀲𑀁𑀲𑀸𑀭𑀯𑀝𑁆𑀝𑀁 𑀅𑀦𑀺𑀩𑁆𑀩𑀺𑀲𑀁 𑀢𑀁 𑀜𑀸𑀡𑀁 𑀅𑀯𑀺𑀦𑁆𑀤𑀦𑁆𑀢𑁄 𑀅𑀮𑀪𑀦𑁆𑀢𑁄𑀬𑁂𑀯 𑀲𑀦𑁆𑀥𑀸𑀯𑀺𑀲𑁆𑀲𑀁 𑀲𑀁𑀲𑀭𑀺𑀁. 𑀬𑀲𑁆𑀫𑀸 𑀚𑀭𑀸𑀯𑁆𑀬𑀸𑀥𑀺𑀫𑀭𑀡𑀫𑀺𑀲𑁆𑀲𑀢𑀸𑀬 𑀚𑀸𑀢𑀺 𑀦𑀸𑀫𑁂𑀲𑀸 𑀧𑀼𑀦𑀧𑁆𑀧𑀼𑀦𑀁 𑀉𑀧𑀕𑀦𑁆𑀢𑀼𑀁 𑀤𑀼𑀓𑁆𑀔𑀸, 𑀦 𑀘 𑀲𑀸 𑀢𑀲𑁆𑀫𑀺𑀁 𑀅𑀤𑀺𑀝𑁆𑀞𑁂 𑀦𑀺𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀢𑀁 𑀕𑀯𑁂𑀲𑀦𑁆𑀢𑁄 𑀲𑀦𑁆𑀥𑀸𑀯𑀺𑀲𑁆𑀲𑀦𑁆𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑁄𑀲𑀻𑀢𑀺 𑀇𑀤𑀸𑀦𑀺 𑀫𑀬𑀸 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁂𑀦 𑀤𑀺𑀝𑁆𑀞𑁄 𑀅𑀲𑀺. 𑀧𑀼𑀦 𑀕𑁂𑀳𑀦𑁆𑀢𑀺 𑀧𑀼𑀦 𑀇𑀫𑀁 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀁 𑀫𑀫 𑀕𑁂𑀳𑀁. 𑀦 𑀓𑀸𑀳𑀲𑀺 𑀦 𑀓𑀭𑀺𑀲𑁆𑀲𑀲𑀺. 𑀢𑀯 𑀲𑀩𑁆𑀩𑀸 𑀅𑀯𑀲𑁂𑀲𑀸𑀓𑀺𑀮𑁂𑀲𑀨𑀸𑀲𑀼𑀓𑀸 𑀫𑀬𑀸 𑀪𑀕𑁆𑀕𑀸. 𑀇𑀫𑀲𑁆𑀲 𑀢𑀬𑀸 𑀓𑀢𑀲𑁆𑀲 𑀅𑀢𑁆𑀢𑀪𑀸𑀯𑀕𑁂𑀳𑀲𑁆𑀲 𑀓𑀽𑀝𑀁 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀁 𑀓𑀡𑁆𑀡𑀺𑀓𑀫𑀡𑁆𑀟𑀮𑀁 𑀯𑀺𑀲𑀗𑁆𑀔𑀢𑀁 𑀯𑀺𑀤𑁆𑀥𑀁𑀲𑀺𑀢𑀁. 𑀯𑀺𑀲𑀗𑁆𑀔𑀸𑀭𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀕𑀢𑀁 𑀅𑀦𑀼𑀧𑀯𑀺𑀝𑁆𑀞𑀁 𑀇𑀤𑀸𑀦𑀺 𑀫𑀫 𑀘𑀺𑀢𑁆𑀢𑀁, 𑀅𑀳𑀜𑁆𑀘 ¶ 𑀢𑀡𑁆𑀳𑀸𑀦𑀁 𑀔𑀬𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑀁 𑀅𑀚𑁆𑀛𑀕𑀸 𑀅𑀥𑀺𑀕𑀢𑁄 𑀧𑀢𑁆𑀢𑁄𑀲𑁆𑀫𑀻𑀢𑀺. 𑀅𑀬𑀁 𑀫𑀦𑀲𑀸 𑀧𑀯𑀢𑁆𑀢𑀺𑀢𑀥𑀫𑁆𑀫𑀸𑀦𑀫𑀸𑀤𑀺. ‘‘𑀬𑀤𑀸 𑀳𑀯𑁂 𑀧𑀸𑀢𑀼𑀪𑀯𑀦𑁆𑀢𑀺 𑀥𑀫𑁆𑀫𑀸’’𑀢𑀺 (𑀉𑀤𑀸. 𑁧, 𑁨, 𑁩) 𑀅𑀬𑀁 𑀧𑀦 𑀯𑀸𑀘𑀸𑀬 𑀧𑀯𑀢𑁆𑀢𑀺𑀢𑀥𑀫𑁆𑀫𑀸𑀦𑀁 𑀆𑀤𑀻𑀢𑀺 𑀯𑀤𑀦𑁆𑀢𑀺. 𑀅𑀦𑁆𑀢𑁄𑀚𑀧𑁆𑀧𑀦𑀯𑀲𑁂𑀦 𑀓𑀺𑀭 𑀪𑀕𑀯𑀸 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭’’𑀦𑁆𑀢𑀺𑀆𑀤𑀺𑀫𑀸𑀳 (𑀥. 𑀧. 𑁧𑁫𑁩). ‘‘𑀧𑀸𑀝𑀺𑀧𑀤𑀤𑀺𑀯𑀲𑁂’’𑀢𑀺 𑀇𑀤𑀁 ‘‘𑀲𑀩𑁆𑀩𑀜𑁆𑀜𑀼𑀪𑀸𑀯𑀧𑁆𑀧𑀢𑁆𑀢𑀲𑁆𑀲𑀸’’𑀢𑀺 ¶ 𑀦 𑀏𑀢𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, ‘‘𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸’’𑀢𑀺 𑀏𑀢𑁂𑀦 𑀧𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀫𑁂𑀯 𑀳𑀺 𑀪𑀕𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄𑀢𑀺.

𑀯𑀬𑀥𑀫𑁆𑀫𑀸𑀢𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀫𑀼𑀔𑁂𑀦 𑀤𑀼𑀓𑁆𑀔𑀸𑀦𑀢𑁆𑀢𑀮𑀓𑁆𑀔𑀡𑀫𑁆𑀧𑀺 𑀲𑀗𑁆𑀔𑀸𑀭𑀸𑀦𑀁 𑀯𑀺𑀪𑀸𑀯𑁂𑀢𑀺 ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁, 𑀬𑀁 𑀤𑀼𑀓𑁆𑀔𑀁 𑀢𑀤𑀦𑀢𑁆𑀢𑀸’’𑀢𑀺 (𑀲𑀁. 𑀦𑀺. 𑁩.𑁧𑁫; 𑀧𑀝𑀺. 𑀫. 𑁨.𑁧𑁦) 𑀯𑀘𑀦𑀢𑁄. 𑀮𑀓𑁆𑀔𑀡𑀢𑁆𑀢𑀬𑀯𑀺𑀪𑀸𑀯𑀦𑀦𑀬𑁂𑀦𑁂𑀯 𑀘 𑀢𑀤𑀸𑀭𑀫𑁆𑀫𑀡𑀁 𑀯𑀺𑀧𑀲𑁆𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 𑀲𑀩𑁆𑀩𑀢𑀺𑀢𑁆𑀣𑀺𑀬𑀸𑀦𑀁 𑀅𑀯𑀺𑀲𑀬𑀪𑀽𑀢𑀁 𑀩𑀼𑀤𑁆𑀥𑀸𑀯𑁂𑀡𑀺𑀓𑀁 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀸𑀥𑀺𑀝𑁆𑀞𑀸𑀦𑀁 𑀅𑀯𑀺𑀧𑀭𑀻𑀢𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀧𑁆𑀧𑀝𑀺𑀧𑀤𑀁 𑀧𑀓𑀸𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀤𑀸𑀦𑀺 𑀢𑀢𑁆𑀣 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀦𑀺𑀬𑁄𑀚𑁂𑀢𑀺 ‘‘𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣𑀸’’𑀢𑀺. 𑀅𑀣 𑀯𑀸 ‘‘𑀯𑀬𑀥𑀫𑁆𑀫𑀸 𑀲𑀗𑁆𑀔𑀸𑀭𑀸’’𑀢𑀺 𑀏𑀢𑁂𑀦 𑀲𑀗𑁆𑀔𑁂𑀧𑁂𑀦 𑀲𑀁𑀯𑁂𑀚𑁂𑀢𑁆𑀯𑀸 ‘‘𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣𑀸’’𑀢𑀺 𑀲𑀗𑁆𑀔𑁂𑀧𑁂𑀦𑁂𑀯 𑀦𑀺𑀭𑀯𑀲𑁂𑀲𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀅𑀧𑁆𑀧𑀫𑀸𑀤𑀧𑀤𑀜𑁆𑀳𑀺 𑀲𑀺𑀓𑁆𑀔𑀸𑀢𑁆𑀢𑀬𑀲𑀗𑁆𑀕𑀳𑀺𑀢𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀲𑀸𑀲𑀦𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺.

𑀧𑀞𑀫𑀲𑀗𑁆𑀕𑀻𑀢𑀺𑀬𑀁 𑀅𑀲𑀗𑁆𑀕𑀻𑀢𑀁 𑀲𑀗𑁆𑀕𑀻𑀢𑀺𑀓𑁆𑀔𑀦𑁆𑀥𑀓𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀸𑀤𑀺. 𑀓𑁂𑀘𑀺 𑀧𑀦 ‘‘𑀲𑀼𑀪𑀲𑀼𑀢𑁆𑀢𑀫𑁆𑀧𑀺 (𑀤𑀻. 𑀦𑀺. 𑁧.𑁪𑁪𑁪) 𑀧𑀞𑀫𑀲𑀗𑁆𑀕𑀻𑀢𑀺𑀬𑀁 𑀅𑀲𑀗𑁆𑀕𑀻𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀧𑀦 𑀦 𑀬𑀼𑀚𑁆𑀚𑀢𑀺. 𑀧𑀞𑀫𑀲𑀗𑁆𑀕𑀻𑀢𑀺𑀢𑁄 ¶ 𑀧𑀼𑀭𑁂𑀢𑀭𑀫𑁂𑀯 𑀳𑀺 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂𑀦 𑀲𑀼𑀪𑀲𑁆𑀲 𑀫𑀸𑀡𑀯𑀲𑁆𑀲 𑀪𑀸𑀲𑀺𑀢𑀦𑁆𑀢𑀺.

𑀤𑀴𑁆𑀳𑀺𑀓𑀫𑁆𑀫𑀲𑀺𑀣𑀺𑀮𑀻𑀓𑀭𑀡𑀧𑁆𑀧𑀬𑁄𑀚𑀦𑀸 𑀬𑀣𑀸𑀓𑁆𑀓𑀫𑀁 𑀧𑀓𑀢𑀺𑀲𑀸𑀯𑀚𑁆𑀚𑀧𑀡𑁆𑀡𑀢𑁆𑀢𑀺𑀲𑀸𑀯𑀚𑁆𑀚𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀢𑁂𑀦𑀸𑀢𑀺 𑀯𑀺𑀯𑀺𑀥𑀦𑀬𑀢𑁆𑀢𑀸𑀤𑀺𑀦𑀸. 𑀏𑀢𑀦𑁆𑀢𑀺 𑀯𑀺𑀯𑀺𑀥𑀯𑀺𑀲𑁂𑀲𑀦𑀬𑀢𑁆𑀢𑀸𑀢𑀺 𑀕𑀸𑀣𑀸𑀯𑀘𑀦𑀁. 𑀏𑀢𑀲𑁆𑀲𑀸𑀢𑀺 𑀯𑀺𑀦𑀬𑀲𑁆𑀲.

𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸𑀤𑀺𑀪𑁂𑀤𑁂𑀢𑀺 ¶ 𑀬𑁄 𑀢𑀁 𑀲𑀼𑀢𑁆𑀢𑀁 𑀲𑀚𑁆𑀛𑀸𑀬𑀢𑀺, 𑀲𑀼𑀡𑀸𑀢𑀺, 𑀯𑀸𑀘𑁂𑀢𑀺, 𑀘𑀺𑀦𑁆𑀢𑁂𑀢𑀺, 𑀤𑁂𑀲𑁂𑀢𑀺 𑀘, 𑀲𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑁄 𑀲𑀻𑀮𑀸𑀤𑀺𑀅𑀢𑁆𑀣𑁄 𑀢𑀲𑁆𑀲𑀸𑀧𑀺 𑀳𑁄𑀢𑀺, 𑀢𑁂𑀦 𑀧𑀭𑀲𑁆𑀲 𑀲𑀸𑀥𑁂𑀢𑀩𑁆𑀩𑀢𑁄 𑀧𑀭𑀲𑁆𑀲𑀸𑀧𑀺 𑀳𑁄𑀢𑀻𑀢𑀺, 𑀢𑀤𑀼𑀪𑀬𑀁 𑀢𑀁 𑀲𑀼𑀢𑁆𑀢𑀁 𑀲𑀽𑀘𑁂𑀢𑀺 𑀤𑀻𑀧𑁂𑀢𑀺. 𑀢𑀣𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀜𑁆𑀘𑀸𑀢𑀺 𑀏𑀯𑀫𑀸𑀤𑀺𑀪𑁂𑀤𑁂 𑀅𑀢𑁆𑀣𑁂 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀢𑁆𑀣-𑀲𑀤𑁆𑀤𑁄 𑀘𑀸𑀬𑀁 𑀳𑀺𑀢𑀧𑀭𑀺𑀬𑀸𑀬𑀯𑀘𑀦𑀁, 𑀦 𑀪𑀸𑀲𑀺𑀢𑀢𑁆𑀣𑀯𑀘𑀦𑀁, 𑀬𑀤𑀺 𑀲𑀺𑀬𑀸, 𑀲𑀼𑀢𑁆𑀢𑀁 𑀅𑀢𑁆𑀢𑀦𑁄𑀧𑀺 𑀪𑀸𑀲𑀺𑀢𑀢𑁆𑀣𑀁 𑀲𑀽𑀘𑁂𑀢𑀺, 𑀧𑀭𑀲𑁆𑀲𑀸𑀧𑀻𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑀲𑀺𑀬𑀸. 𑀲𑀼𑀢𑁆𑀢𑁂𑀦 𑀘 𑀬𑁄 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄 𑀲𑁄 𑀢𑀲𑁆𑀲𑁂𑀯 𑀳𑁄𑀢𑀻𑀢𑀺, 𑀦 𑀢𑁂𑀦 𑀧𑀭𑀢𑁆𑀣𑁄 𑀲𑀽𑀘𑀺𑀢𑁄 𑀳𑁄𑀢𑀺, 𑀢𑁂𑀦 𑀲𑀽𑀘𑁂𑀢𑀩𑁆𑀩𑀲𑁆𑀲 𑀧𑀭𑀢𑁆𑀣𑀲𑁆𑀲 𑀦𑀺𑀯𑀢𑁆𑀢𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀸 𑀅𑀢𑁆𑀣𑀕𑀳𑀡𑀜𑁆𑀘 𑀦 𑀓𑀢𑁆𑀢𑀩𑁆𑀩𑀁. 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀯𑀺𑀦𑀺𑀫𑁆𑀫𑀼𑀢𑁆𑀢𑀲𑁆𑀲 𑀪𑀸𑀲𑀺𑀢𑀢𑁆𑀣𑀲𑁆𑀲 𑀅𑀪𑀸𑀯𑀸 𑀆𑀤𑀺𑀕𑁆𑀕𑀳𑀡𑀜𑁆𑀘 𑀦 𑀓𑀢𑁆𑀢𑀩𑁆𑀩𑀁. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀲𑁆𑀲 𑀳𑀺𑀢𑀧𑀭𑀺𑀬𑀸𑀬𑀲𑁆𑀲 𑀅𑀢𑁆𑀣𑀲𑁆𑀲 𑀲𑀼𑀢𑁆𑀢𑁂 𑀅𑀲𑀫𑁆𑀪𑀯𑀢𑁄 𑀲𑀼𑀢𑁆𑀢𑀥𑀸𑀭𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸 𑀯𑀼𑀢𑁆𑀢𑀸.

𑀅𑀣 ¶ 𑀯𑀸 𑀲𑀼𑀢𑁆𑀢𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀬𑁂 𑀅𑀢𑁆𑀢𑀢𑁆𑀣𑀸𑀤𑀬𑁄 𑀅𑀢𑁆𑀣𑀧𑁆𑀧𑀪𑁂𑀤𑀸 𑀯𑀼𑀢𑁆𑀢𑀸 ‘‘𑀦 𑀳𑀜𑁆𑀜𑀤𑀢𑁆𑀣𑀢𑁆𑀣𑀺𑀧𑀲𑀁𑀲𑀮𑀸𑀪𑀸’’𑀢𑀺 𑀏𑀢𑀲𑁆𑀲 𑀧𑀤𑀲𑁆𑀲 𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁬𑁩; 𑀘𑀽𑀴𑀦𑀺. 𑁮𑁫) ‘‘𑀅𑀢𑁆𑀢𑀢𑁆𑀣𑁄, 𑀧𑀭𑀢𑁆𑀣𑁄, 𑀉𑀪𑀬𑀢𑁆𑀣𑁄, 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀅𑀢𑁆𑀣𑁄, 𑀲𑀫𑁆𑀧𑀭𑀸𑀬𑀺𑀓𑁄 𑀅𑀢𑁆𑀣𑁄, 𑀉𑀢𑁆𑀢𑀸𑀦𑁄 𑀅𑀢𑁆𑀣𑁄, 𑀕𑀫𑁆𑀪𑀻𑀭𑁄 𑀅𑀢𑁆𑀣𑁄, 𑀕𑀽𑀴𑁆𑀳𑁄 𑀅𑀢𑁆𑀣𑁄, 𑀧𑀝𑀺𑀘𑁆𑀙𑀦𑁆𑀦𑁄 𑀅𑀢𑁆𑀣𑁄, 𑀦𑁂𑀬𑁆𑀬𑁄 𑀅𑀢𑁆𑀣𑁄, 𑀦𑀻𑀢𑁄 𑀅𑀢𑁆𑀣𑁄, 𑀅𑀦𑀯𑀚𑁆𑀚𑁄 𑀅𑀢𑁆𑀣𑁄, 𑀦𑀺𑀓𑁆𑀓𑀺𑀮𑁂𑀲𑁄 𑀅𑀢𑁆𑀣𑁄, 𑀯𑁄𑀤𑀸𑀦𑁄 𑀅𑀢𑁆𑀣𑁄, 𑀧𑀭𑀫𑀢𑁆𑀣𑁄’’𑀢𑀺 𑀢𑁂 𑀲𑀼𑀢𑁆𑀢𑀁 𑀲𑀽𑀘𑁂𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀅𑀢𑁆𑀣-𑀲𑀤𑁆𑀤𑁄 𑀪𑀸𑀲𑀺𑀢𑀢𑁆𑀣𑀧𑀭𑀺𑀬𑀸𑀬𑁄𑀧𑀺 𑀳𑁄𑀢𑀺. 𑀏𑀢𑁆𑀣 𑀳𑀺 𑀧𑀼𑀭𑀺𑀫𑀓𑀸 𑀧𑀜𑁆𑀘 𑀅𑀢𑁆𑀣𑀧𑁆𑀧𑀪𑁂𑀤𑀸 𑀳𑀺𑀢𑀧𑀭𑀺𑀬𑀸𑀬𑀸, 𑀢𑀢𑁄 𑀧𑀭𑁂 𑀙 𑀪𑀸𑀲𑀺𑀢𑀢𑁆𑀣𑀪𑁂𑀤𑀸, 𑀧𑀘𑁆𑀙𑀺𑀫𑀓𑀸 𑀧𑀦 𑀉𑀪𑀬𑀲𑀪𑀸𑀯𑀸. 𑀢𑀢𑁆𑀣 𑀤𑀼𑀭𑀥𑀺𑀕𑀫𑀢𑀸𑀬 𑀯𑀺𑀪𑀸𑀯𑀦𑁂 𑀅𑀮𑀤𑁆𑀥𑀕𑀸𑀥𑁄 𑀕𑀫𑁆𑀪𑀻𑀭𑁄. 𑀦 𑀯𑀺𑀯𑀝𑁄 𑀕𑀽𑀴𑁆𑀳𑁄. 𑀫𑀽𑀮𑀼𑀤𑀓𑀸𑀤𑀬𑁄 𑀯𑀺𑀬 𑀧𑀁𑀲𑀼𑀦𑀸 𑀅𑀓𑁆𑀔𑀭𑀲𑀦𑁆𑀦𑀺𑀯𑁂𑀲𑀸𑀤𑀺𑀦𑀸 𑀢𑀺𑀭𑁄𑀳𑀺𑀢𑁄 𑀧𑀝𑀺𑀘𑁆𑀙𑀦𑁆𑀦𑁄 ¶ . 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 ¶ 𑀜𑀸𑀧𑁂𑀢𑀩𑁆𑀩𑁄 𑀦𑁂𑀬𑁆𑀬𑁄. 𑀬𑀣𑀸𑀭𑀼𑀢𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄 𑀦𑀻𑀢𑁄. 𑀅𑀦𑀯𑀚𑁆𑀚𑀦𑀺𑀓𑁆𑀓𑀺𑀮𑁂𑀲𑀯𑁄𑀤𑀸𑀦𑀸 𑀧𑀭𑀺𑀬𑀸𑀬𑀯𑀲𑁂𑀦 𑀯𑀼𑀢𑁆𑀢𑀸, 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀥𑀫𑁆𑀫𑀯𑀲𑁂𑀦 𑀯𑀸. 𑀧𑀭𑀫𑀢𑁆𑀣𑁄 𑀦𑀺𑀩𑁆𑀩𑀸𑀦𑀁, 𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑀲𑀪𑀸𑀯𑁄 𑀏𑀯 𑀯𑀸. 𑀅𑀣 𑀯𑀸 ‘‘𑀅𑀢𑁆𑀢𑀦𑀸 𑀘 𑀅𑀧𑁆𑀧𑀺𑀘𑁆𑀙𑁄 𑀳𑁄𑀢𑀻’’𑀢𑀺 𑀅𑀢𑁆𑀢𑀢𑁆𑀣𑀁, ‘‘𑀅𑀧𑁆𑀧𑀺𑀘𑁆𑀙𑀸𑀓𑀣𑀜𑁆𑀘 𑀧𑀭𑁂𑀲𑀁 𑀓𑀢𑁆𑀢𑀸 𑀳𑁄𑀢𑀻’’𑀢𑀺 𑀧𑀭𑀢𑁆𑀣𑀁 𑀲𑀽𑀘𑁂𑀢𑀺. 𑀏𑀯𑀁 ‘‘𑀅𑀢𑁆𑀢𑀦𑀸 𑀘 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁪.𑁯𑁯, 𑁨𑁬𑁫) 𑀲𑀼𑀢𑁆𑀢𑀸𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀯𑀺𑀦𑀬𑀸𑀪𑀺𑀥𑀫𑁆𑀫𑁂𑀳𑀺 𑀘 𑀯𑀺𑀲𑁂𑀲𑁂𑀢𑁆𑀯𑀸 𑀲𑀼𑀢𑁆𑀢-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀢𑀲𑁆𑀫𑀸 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑀧𑁆𑀧𑀯𑀢𑁆𑀢𑀸𑀬 𑀤𑁂𑀲𑀦𑀸𑀬 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀢𑀸𑀤𑀻𑀦𑀺 𑀲𑀸𑀢𑀺𑀲𑀬𑀁 𑀧𑀓𑀸𑀲𑀺𑀢𑀸𑀦𑀺 𑀳𑁄𑀢𑀺 𑀢𑀧𑁆𑀧𑀭𑀪𑀸𑀯𑀢𑁄, 𑀦 𑀆𑀡𑀸𑀥𑀫𑁆𑀫𑀲𑀪𑀸𑀯𑀯𑀲𑀧𑁆𑀧𑀯𑀢𑁆𑀢𑀸𑀬𑀸𑀢𑀺 𑀇𑀤𑀫𑁂𑀯 𑀘 ‘‘𑀅𑀢𑁆𑀣𑀸𑀦𑀁 𑀲𑀽𑀘𑀦𑀢𑁄 𑀲𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀲𑀼𑀢𑁆𑀢𑁂 𑀘 𑀆𑀡𑀸𑀥𑀫𑁆𑀫𑀲𑀪𑀸𑀯𑀸 𑀘 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀁 𑀅𑀦𑀼𑀯𑀢𑁆𑀢𑀦𑁆𑀢𑀺, 𑀦 𑀯𑀺𑀦𑀬𑀸𑀪𑀺𑀥𑀫𑁆𑀫𑁂𑀲𑀼 𑀯𑀺𑀬 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑁄 𑀆𑀡𑀸𑀥𑀫𑁆𑀫𑀲𑀪𑀸𑀯𑁂. 𑀢𑀲𑁆𑀫𑀸 𑀯𑁂𑀦𑁂𑀬𑁆𑀬𑀸𑀦𑀁 𑀏𑀓𑀦𑁆𑀢𑀳𑀺𑀢𑀧𑀝𑀺𑀮𑀸𑀪𑀲𑀁𑀯𑀢𑁆𑀢𑀦𑀺𑀓𑀸 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸 𑀳𑁄𑀢𑀻𑀢𑀺 ‘‘𑀲𑀼𑀯𑀼𑀢𑁆𑀢𑀸 𑀘𑁂𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀲𑀯𑀢𑀻𑀢𑀺 𑀨𑀮𑀢𑀺. ‘‘𑀲𑀼𑀢𑁆𑀢𑀸𑀡𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 ‘‘𑀲𑀼𑀝𑁆𑀞𑀼 𑀘 𑀦𑁂 𑀢𑀸𑀬𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀢𑁆𑀣𑀸𑀤𑀺𑀯𑀺𑀥𑀸𑀦𑁂𑀲𑀼 𑀘 𑀲𑀼𑀢𑁆𑀢𑀲𑁆𑀲 𑀧𑀫𑀸𑀡𑀪𑀸𑀯𑁄, 𑀅𑀢𑁆𑀢𑀢𑁆𑀣𑀸𑀤𑀻𑀦𑀜𑁆𑀘 𑀲𑀗𑁆𑀕𑀸𑀳𑀓𑀢𑁆𑀢𑀁 𑀬𑁄𑀚𑁂𑀢𑀩𑁆𑀩𑀁 𑀢𑀤𑀢𑁆𑀣𑀧𑁆𑀧𑀓𑀸𑀲𑀦𑀧𑀥𑀸𑀦𑀢𑁆𑀢𑀸 𑀲𑀼𑀢𑁆𑀢𑀲𑁆𑀲. 𑀯𑀺𑀦𑀬𑀸𑀪𑀺𑀥𑀫𑁆𑀫𑁂𑀳𑀺 𑀯𑀺𑀲𑁂𑀲𑀦𑀜𑁆𑀘 𑀬𑁄𑀚𑁂𑀢𑀩𑁆𑀩𑀁. 𑀏𑀢𑀦𑁆𑀢𑀺 ‘‘𑀅𑀢𑁆𑀣𑀸𑀦𑀁 𑀲𑀽𑀘𑀦𑀢𑁄’’𑀢𑀺𑀆𑀤𑀺𑀓𑀁 𑀅𑀢𑁆𑀣𑀯𑀘𑀦𑀁. 𑀏𑀢𑀲𑁆𑀲𑀸𑀢𑀺 𑀲𑀼𑀢𑁆𑀢𑀲𑁆𑀲.

𑀅𑀪𑀺𑀓𑁆𑀓𑀫𑀦𑁆𑀢𑀻𑀢𑀺 𑀏𑀢𑁆𑀣 𑀅𑀪𑀺-𑀲𑀤𑁆𑀤𑁄 𑀓𑀫𑀦𑀓𑀺𑀭𑀺𑀬𑀸𑀬 𑀯𑀼𑀤𑁆𑀥𑀺𑀪𑀸𑀯𑀁 𑀅𑀢𑀺𑀭𑁂𑀓𑀢𑀁 𑀤𑀻𑀧𑁂𑀢𑀺, 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀮𑀓𑁆𑀔𑀺𑀢𑀸𑀢𑀺 𑀏𑀢𑁆𑀣 𑀜𑀸𑀡𑀮𑀓𑁆𑀔𑀡𑀓𑀺𑀭𑀺𑀬𑀸𑀦𑀁 𑀲𑀼𑀧𑀸𑀓𑀝𑀢𑀸𑀯𑀺𑀲𑁂𑀲𑀁, 𑀅𑀪𑀺𑀓𑁆𑀓𑀦𑁆𑀢𑁂𑀦𑀸𑀢𑀺 ¶ 𑀏𑀢𑁆𑀣 𑀓𑀦𑁆𑀢𑀺𑀬𑀸 𑀅𑀥𑀺𑀓𑀢𑁆𑀢𑀁 𑀯𑀺𑀲𑀺𑀝𑁆𑀞𑀢𑀦𑁆𑀢𑀺 𑀬𑀼𑀢𑁆𑀢𑀁 𑀓𑀺𑀭𑀺𑀬𑀸𑀯𑀺𑀲𑁂𑀲𑀓𑀢𑁆𑀢𑀸 𑀉𑀧𑀲𑀕𑁆𑀕𑀲𑁆𑀲. 𑀅𑀪𑀺𑀭𑀸𑀚𑀸 𑀅𑀪𑀺𑀯𑀺𑀦𑀬𑁂𑀢𑀺 𑀧𑀦 𑀧𑀽𑀚𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑁂𑀲𑀼 𑀭𑀸𑀚𑀯𑀺𑀦𑀬𑁂𑀲𑀼 𑀅𑀪𑀺-𑀲𑀤𑁆𑀤𑁄 𑀧𑀯𑀢𑁆𑀢𑀢𑀻𑀢𑀺 𑀓𑀣𑀫𑁂𑀢𑀁 𑀬𑀼𑀚𑁆𑀚𑁂𑀬𑁆𑀬𑀸𑀢𑀺 ¶ ? 𑀧𑀽𑀚𑀦𑀧𑀭𑀺𑀘𑁆𑀙𑁂𑀤𑀦𑀓𑀺𑀭𑀺𑀬𑀸𑀤𑀻𑀧𑀦𑀢𑁄, 𑀢𑀸𑀳𑀺 𑀘 𑀓𑀺𑀭𑀺𑀬𑀸𑀳𑀺 𑀭𑀸𑀚𑀯𑀺𑀦𑀬𑀸𑀦𑀁 𑀬𑀼𑀢𑁆𑀢𑀢𑁆𑀢𑀸. 𑀏𑀢𑁆𑀣 𑀳𑀺 𑀅𑀢𑀺𑀫𑀸𑀮𑀸𑀤𑀻𑀲𑀼 𑀅𑀢𑀺-𑀲𑀤𑁆𑀤𑁄 𑀯𑀺𑀬, 𑀅𑀪𑀺-𑀲𑀤𑁆𑀤𑁄 𑀬𑀣𑀸 𑀲𑀳 𑀲𑀸𑀥𑀦𑁂𑀦 𑀓𑀺𑀭𑀺𑀬𑀁 𑀯𑀤𑀢𑀻𑀢𑀺 𑀅𑀪𑀺𑀭𑀸𑀚𑀅𑀪𑀺𑀯𑀺𑀦𑀬-𑀲𑀤𑁆𑀤𑀸 𑀲𑀺𑀤𑁆𑀥𑀸, 𑀏𑀯𑀁 𑀅𑀪𑀺𑀥𑀫𑁆𑀫𑀲𑀤𑁆𑀤𑁂 𑀅𑀪𑀺-𑀲𑀤𑁆𑀤𑁄 𑀲𑀳 𑀲𑀸𑀥𑀦𑁂𑀦 𑀯𑀼𑀟𑁆𑀠𑀺𑀬𑀸𑀤𑀺𑀓𑀺𑀭𑀺𑀬𑀁 𑀤𑀻𑀧𑁂𑀢𑀻𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀪𑀸𑀯𑀦𑀸𑀨𑀭𑀡𑀯𑀼𑀟𑁆𑀠𑀻𑀳𑀺 ¶ 𑀯𑀼𑀟𑁆𑀠𑀺𑀫𑀦𑁆𑀢𑁄𑀧𑀺 𑀥𑀫𑁆𑀫𑀸 𑀯𑀼𑀢𑁆𑀢𑀸. 𑀆𑀭𑀫𑁆𑀫𑀡𑀸𑀤𑀻𑀳𑀻𑀢𑀺 𑀆𑀭𑀫𑁆𑀫𑀡𑀲𑀫𑁆𑀧𑀬𑀼𑀢𑁆𑀢𑀓𑀫𑁆𑀫𑀤𑁆𑀯𑀸𑀭𑀧𑀝𑀺𑀧𑀤𑀸𑀤𑀻𑀳𑀺. 𑀅𑀯𑀺𑀲𑀺𑀝𑁆𑀞𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀯𑀺𑀲𑀺𑀝𑁆𑀞𑁂𑀲𑀼 𑀯𑀺𑀦𑀬𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑁂𑀲𑀼 𑀅𑀯𑀺𑀲𑀺𑀝𑁆𑀞𑀁 𑀲𑀫𑀸𑀦𑀁. 𑀢𑀁 𑀧𑀺𑀝𑀓𑀲𑀤𑁆𑀤𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸𑀯𑀼𑀢𑁆𑀢𑁂𑀦𑀸𑀢𑀺 ‘‘𑀏𑀯𑀁 𑀤𑀼𑀯𑀺𑀥𑀢𑁆𑀣𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦.

𑀓𑀣𑁂𑀢𑀩𑁆𑀩𑀸𑀦𑀁 𑀅𑀢𑁆𑀣𑀸𑀦𑀁 𑀤𑁂𑀲𑀓𑀸𑀬𑀢𑁆𑀢𑁂𑀦 𑀆𑀡𑀸𑀤𑀺𑀯𑀺𑀥𑀺𑀦𑀸 𑀅𑀢𑀺𑀲𑀚𑁆𑀚𑀦𑀁 𑀧𑀩𑁄𑀥𑀦𑀁 𑀤𑁂𑀲𑀦𑀸. 𑀲𑀸𑀲𑀺𑀢𑀩𑁆𑀩𑀧𑀼𑀕𑁆𑀕𑀮𑀕𑀢𑁂𑀦 𑀬𑀣𑀸𑀧𑀭𑀸𑀥𑀸𑀤𑀺𑀲𑀸𑀲𑀺𑀢𑀩𑁆𑀩𑀪𑀸𑀯𑁂𑀦 𑀅𑀦𑀼𑀲𑀸𑀲𑀦𑀁 𑀯𑀺𑀦𑀬𑀦𑀁 𑀲𑀸𑀲𑀦𑀁. 𑀓𑀣𑁂𑀢𑀩𑁆𑀩𑀲𑁆𑀲 𑀲𑀁𑀯𑀭𑀸𑀲𑀁𑀯𑀭𑀸𑀤𑀺𑀦𑁄 𑀅𑀢𑁆𑀣𑀲𑁆𑀲 𑀓𑀣𑀦𑀁 𑀯𑀘𑀦𑀧𑀝𑀺𑀩𑀤𑁆𑀥𑀢𑀸𑀓𑀭𑀡𑀁 𑀓𑀣𑀸. 𑀓𑀣𑀻𑀬𑀢𑀺 𑀯𑀸 𑀏𑀢𑁆𑀣𑀸𑀢𑀺 𑀓𑀣𑀸. 𑀲𑀁𑀯𑀭𑀸𑀲𑀁𑀯𑀭𑀲𑁆𑀲 𑀓𑀣𑀸 𑀲𑀁𑀯𑀭𑀸𑀲𑀁𑀯𑀭𑀓𑀣𑀸. 𑀏𑀲 𑀦𑀬𑁄 𑀇𑀢𑀭𑁂𑀲𑀼𑀧𑀺. 𑀪𑁂𑀤-𑀲𑀤𑁆𑀤𑁄 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑁂𑀢𑀩𑁆𑀩𑁄 ‘‘𑀤𑁂𑀲𑀦𑀸𑀪𑁂𑀤𑀁 𑀲𑀸𑀲𑀦𑀪𑁂𑀤𑀁 𑀓𑀣𑀸𑀪𑁂𑀤𑀜𑁆𑀘 𑀬𑀣𑀸𑀭𑀳𑀁 𑀧𑀭𑀺𑀤𑀻𑀧𑀬𑁂’’𑀢𑀺. 𑀪𑁂𑀤𑀦𑁆𑀢𑀺 𑀘 𑀦𑀸𑀦𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀺𑀓𑁆𑀔𑀸 𑀘 𑀧𑀳𑀸𑀦𑀸𑀦𑀺 𑀘 𑀕𑀫𑁆𑀪𑀻𑀭𑀪𑀸𑀯𑁄 𑀘 𑀲𑀺𑀓𑁆𑀔𑀸𑀧𑁆𑀧𑀳𑀸𑀦𑀕𑀫𑁆𑀪𑀻𑀭𑀪𑀸𑀯𑀁, 𑀢𑀜𑁆𑀘 𑀧𑀭𑀺𑀤𑀻𑀧𑀬𑁂. 𑀏𑀢𑁆𑀣 𑀬𑀣𑀸𑀢𑀺 𑀉𑀧𑀸𑀭𑀫𑁆𑀪𑀦𑀺𑀲𑁆𑀲𑀭𑀡𑀥𑀫𑁆𑀫𑀓𑁄𑀲𑀭𑀓𑁆𑀔𑀡𑀳𑁂𑀢𑀼𑀧𑀭𑀺𑀬𑀸𑀧𑀼𑀡𑀦𑀁 ¶ 𑀲𑀼𑀧𑁆𑀧𑀝𑀺𑀧𑀢𑁆𑀢𑀺 𑀤𑀼𑀧𑁆𑀧𑀝𑀺𑀧𑀢𑁆𑀢𑀻𑀢𑀺 𑀏𑀢𑁂𑀳𑀺 𑀧𑀓𑀸𑀭𑁂𑀳𑀺. 𑀆𑀡𑀁 𑀧𑀡𑁂𑀢𑀼𑀁 𑀅𑀭𑀳𑀢𑀻𑀢𑀺 𑀆𑀡𑀸𑀭𑀳𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁆𑀢𑀸. 𑀯𑁄𑀳𑀸𑀭𑀧𑀭𑀫𑀢𑁆𑀣𑀸𑀦𑀫𑁆𑀧𑀺 𑀲𑀩𑁆𑀪𑀸𑀯𑀢𑁄 𑀆𑀳 𑀆𑀡𑀸𑀩𑀸𑀳𑀼𑀮𑁆𑀮𑀢𑁄𑀢𑀺. 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀘𑀼𑀭𑀸𑀧𑀭𑀸𑀥𑀸 𑀲𑁂𑀬𑁆𑀬𑀲𑀓𑀸𑀤𑀬𑁄. 𑀅𑀚𑁆𑀛𑀸𑀲𑀬𑁄 𑀆𑀲𑀬𑁄𑀯 𑀅𑀢𑁆𑀣𑀢𑁄 𑀤𑀺𑀝𑁆𑀞𑀺, 𑀜𑀸𑀡𑀜𑁆𑀘. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋

‘‘𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺 𑀘, 𑀔𑀦𑁆𑀢𑀺 𑀘𑁂𑀯𑀸𑀦𑀼𑀮𑁄𑀫𑀺𑀓𑁂;

𑀬𑀣𑀸𑀪𑀽𑀢𑀜𑁆𑀘 𑀬𑀁 𑀜𑀸𑀡𑀁, 𑀏𑀢𑀁 𑀆𑀲𑀬𑀲𑀤𑁆𑀤𑀺𑀢’’𑀦𑁆𑀢𑀺. (𑀯𑀺𑀲𑀼𑀤𑁆𑀥𑀺. 𑀝𑀻. 𑁧.𑁧𑁩𑁬);

𑀅𑀦𑀼𑀲𑀬𑀸 𑀓𑀸𑀫𑀭𑀸𑀕𑀪𑀯𑀭𑀸𑀕𑀤𑀺𑀝𑁆𑀞𑀺𑀧𑀝𑀺𑀖𑀯𑀺𑀘𑀺𑀓𑀺𑀘𑁆𑀙𑀸𑀫𑀸𑀦𑀸𑀯𑀺𑀚𑁆𑀚𑀸𑀯𑀲𑁂𑀦 𑀲𑀢𑁆𑀢 𑀅𑀦𑀸𑀕𑀢𑀸 𑀓𑀺𑀮𑁂𑀲𑀸, 𑀅𑀢𑀻𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀘 𑀢𑀣𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀦 𑀳𑀺 𑀓𑀸𑀮𑀪𑁂𑀤𑁂𑀦 𑀥𑀫𑁆𑀫𑀸𑀦𑀁 𑀲𑀪𑀸𑀯𑀪𑁂𑀤𑁄 𑀅𑀢𑁆𑀣𑀻𑀢𑀺. 𑀘𑀭𑀺𑀬𑀸𑀢𑀺 𑀙 𑀫𑀽𑀮𑀘𑀭𑀺𑀬𑀸, 𑀅𑀦𑁆𑀢𑀭𑀪𑁂𑀤𑁂𑀦 𑀅𑀦𑁂𑀓𑀯𑀺𑀥𑀸, 𑀲𑀁𑀲𑀕𑁆𑀕𑀯𑀲𑁂𑀦 𑀢𑁂𑀲𑀝𑁆𑀞𑀺 𑀳𑁄𑀦𑁆𑀢𑀺. 𑀢𑁂 𑀧𑀦 𑀅𑀫𑁆𑀳𑁂𑀳𑀺 𑀅𑀲𑀫𑁆𑀫𑁄𑀳𑀦𑁆𑀢𑀭𑀥𑀸𑀦𑀲𑀼𑀢𑁆𑀢𑀝𑀻𑀓𑀸𑀬𑀁 𑀯𑀺𑀪𑀸𑀕𑀢𑁄 𑀤𑀲𑁆𑀲𑀺𑀢𑀸, 𑀅𑀢𑁆𑀣𑀺𑀓𑁂𑀳𑀺 𑀢𑀢𑁄 𑀕𑀳𑁂𑀢𑀩𑁆𑀩𑀸. 𑀅𑀣 𑀯𑀸 𑀘𑀭𑀺𑀬𑀸𑀢𑀺 𑀘𑀭𑀺𑀢𑀁, 𑀢𑀁 𑀲𑀼𑀘𑀭𑀺𑀢𑀤𑀼𑀘𑁆𑀘𑀭𑀺𑀢𑀯𑀲𑁂𑀦 𑀤𑀼𑀯𑀺𑀥𑀁. 𑀅𑀥𑀺𑀫𑀼𑀢𑁆𑀢𑀺 𑀦𑀸𑀫 𑀲𑀢𑁆𑀢𑀸𑀦𑀁 𑀧𑀼𑀩𑁆𑀩𑀧𑀭𑀺𑀘𑀬𑀯𑀲𑁂𑀦 𑀅𑀪𑀺𑀭𑀼𑀘𑀺, 𑀲𑀸 𑀤𑀼𑀯𑀺𑀥𑀸 𑀳𑀻𑀦𑀧𑀡𑀻𑀢𑀪𑁂𑀤𑁂𑀦. 𑀖𑀦𑀯𑀺𑀦𑀺𑀩𑁆𑀪𑁄𑀕𑀸𑀪𑀸𑀯𑀢𑁄 𑀤𑀺𑀝𑁆𑀞𑀺𑀫𑀸𑀦𑀢𑀡𑁆𑀳𑀸𑀯𑀲𑁂𑀦 ¶ ‘‘𑀅𑀳𑀁 𑀫𑀫𑀸’’𑀢𑀺 𑀲𑀜𑁆𑀜𑀺𑀦𑁄. 𑀫𑀳𑀦𑁆𑀢𑁄 𑀲𑀁𑀯𑀭𑁄 𑀅𑀲𑀁𑀯𑀭𑁄. 𑀩𑀼𑀤𑁆𑀥𑀺𑀅𑀢𑁆𑀣𑁄 𑀳𑀺 𑀅𑀬’𑀫𑀓𑀸𑀭𑁄 𑀬𑀣𑀸 ‘‘𑀅𑀲𑁂𑀓𑁆𑀔𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑁧𑁧).

𑀢𑀻𑀲𑀼𑀧𑀺 ¶ 𑀘𑁂𑀢𑁂𑀲𑀼 𑀏𑀢𑁂 𑀥𑀫𑁆𑀫𑀢𑁆𑀣𑀤𑁂𑀲𑀦𑀸 𑀧𑀝𑀺𑀯𑁂𑀥𑀸𑀢𑀺 𑀏𑀢𑁆𑀣 𑀢𑀦𑁆𑀢𑀺𑀅𑀢𑁆𑀣𑁄 𑀢𑀦𑁆𑀢𑀺𑀤𑁂𑀲𑀦𑀸 𑀢𑀦𑁆𑀢𑀺𑀅𑀢𑁆𑀣𑀧𑀝𑀺𑀯𑁂𑀥𑁄 𑀘 𑀢𑀦𑁆𑀢𑀺𑀯𑀺𑀲𑀬𑀸 𑀳𑁄𑀦𑁆𑀢𑀻𑀢𑀺 𑀯𑀺𑀦𑀬𑀧𑀺𑀝𑀓𑀸𑀤𑀻𑀦𑀁 𑀅𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀸𑀥𑀸𑀭𑀪𑀸𑀯𑁄 ¶ 𑀬𑀼𑀢𑁆𑀢𑁄, 𑀧𑀺𑀝𑀓𑀸𑀦𑀺 𑀧𑀦 𑀢𑀦𑁆𑀢𑀺 𑀬𑁂𑀯𑀸𑀢𑀺 𑀢𑁂𑀲𑀁 𑀥𑀫𑁆𑀫𑀸𑀥𑀸𑀭𑀪𑀸𑀯𑁄 𑀓𑀣𑀁 𑀬𑀼𑀚𑁆𑀚𑁂𑀬𑁆𑀬𑀸𑀢𑀺? 𑀢𑀦𑁆𑀢𑀺𑀲𑀫𑀼𑀤𑀸𑀬𑀲𑁆𑀲 𑀅𑀯𑀬𑀯𑀢𑀦𑁆𑀢𑀺𑀬𑀸 𑀆𑀥𑀸𑀭𑀪𑀸𑀯𑀢𑁄. 𑀅𑀯𑀬𑀯𑀲𑁆𑀲 𑀳𑀺 𑀲𑀫𑀼𑀤𑀸𑀬𑁄 𑀆𑀥𑀸𑀭𑀪𑀸𑀯𑁂𑀦 𑀯𑀼𑀘𑁆𑀘𑀢𑀺, 𑀬𑀣𑀸 𑁋 ‘‘𑀭𑀼𑀓𑁆𑀔𑁂 𑀲𑀸𑀔𑀸’’𑀢𑀺. 𑀥𑀫𑁆𑀫𑀸𑀤𑀻𑀦𑀜𑁆𑀘 𑀤𑀼𑀓𑁆𑀔𑁄𑀕𑀸𑀳𑀪𑀸𑀯𑀢𑁄 𑀢𑁂𑀳𑀺 𑀯𑀺𑀦𑀬𑀸𑀤𑀬𑁄 𑀕𑀫𑁆𑀪𑀻𑀭𑀸𑀢𑀺 𑀯𑀺𑀦𑀬𑀸𑀤𑀻𑀦𑀜𑁆𑀘 𑀘𑀢𑀼𑀩𑁆𑀩𑀺𑀥𑁄 𑀕𑀫𑁆𑀪𑀻𑀭𑀪𑀸𑀯𑁄 𑀯𑀼𑀢𑁆𑀢𑁄. 𑀢𑀲𑁆𑀫𑀸 𑀥𑀫𑁆𑀫𑀸𑀤𑀬𑁄 𑀏𑀯 𑀤𑀼𑀓𑁆𑀔𑁄𑀕𑀸𑀳𑀢𑁆𑀢𑀸 𑀕𑀫𑁆𑀪𑀻𑀭𑀸, 𑀦 𑀯𑀺𑀦𑀬𑀸𑀤𑀬𑁄𑀢𑀺 𑀦 𑀘𑁄𑀤𑁂𑀢𑀩𑁆𑀩𑀫𑁂𑀢𑀁 𑀲𑀫𑀼𑀔𑁂𑀦, 𑀯𑀺𑀲𑀬𑀯𑀺𑀲𑀬𑀻𑀫𑀼𑀔𑁂𑀦 𑀘 𑀯𑀺𑀦𑀬𑀸𑀤𑀻𑀦𑀁𑀬𑁂𑀯 𑀕𑀫𑁆𑀪𑀻𑀭𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀥𑀫𑁆𑀫𑁄 𑀳𑀺 𑀯𑀺𑀦𑀬𑀸𑀤𑀬𑁄, 𑀢𑁂𑀲𑀁 𑀯𑀺𑀲𑀬𑁄 𑀅𑀢𑁆𑀣𑁄, 𑀥𑀫𑁆𑀫𑀢𑁆𑀣𑀯𑀺𑀲𑀬𑀸 𑀘 𑀤𑁂𑀲𑀦𑀸𑀧𑀝𑀺𑀯𑁂𑀥𑁄𑀢𑀺. 𑀢𑀢𑁆𑀣 𑀧𑀝𑀺𑀯𑁂𑀥𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄 𑀥𑀫𑁆𑀫𑀢𑁆𑀣𑀸𑀦𑀁, 𑀤𑁂𑀲𑀦𑀸𑀜𑀸𑀡𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄 𑀤𑁂𑀲𑀦𑀸𑀬 𑀘 𑀤𑀼𑀓𑁆𑀔𑁄𑀕𑀸𑀳𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀧𑀝𑀺𑀯𑁂𑀥𑀲𑁆𑀲 𑀧𑀦 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸, 𑀢𑀩𑁆𑀩𑀺𑀲𑀬𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀘 𑀤𑀼𑀓𑁆𑀓𑀭𑀪𑀸𑀯𑀢𑁄 𑀤𑀼𑀓𑁆𑀔𑁄𑀕𑀸𑀳𑀢𑀸 𑀯𑁂𑀤𑀺𑀢𑀩𑁆𑀩𑀸.

‘‘𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀏𑀢𑁂𑀦 𑀯𑀘𑀦𑁂𑀦 𑀥𑀫𑁆𑀫𑀲𑁆𑀲 𑀳𑁂𑀢𑀼𑀪𑀸𑀯𑁄 𑀓𑀣𑀁 𑀜𑀸𑀢𑀩𑁆𑀩𑁄𑀢𑀺? ‘‘𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀏𑀢𑀲𑁆𑀲 𑀲𑀫𑀸𑀲𑀧𑀤𑀲𑁆𑀲 𑀅𑀯𑀬𑀯𑀧𑀤𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸. ‘‘𑀥𑀫𑁆𑀫𑁂 𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀏𑀢𑁆𑀣 𑀳𑀺 ‘‘𑀥𑀫𑁆𑀫𑁂’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀳𑁂𑀢𑀼𑀫𑁆𑀳𑀻’’𑀢𑀺 𑀯𑀼𑀢𑁆𑀢𑀁, ‘‘𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀏𑀢𑀲𑁆𑀲 𑀘 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀜𑀸𑀡’’𑀦𑁆𑀢𑀺. 𑀢𑀲𑁆𑀫𑀸 𑀳𑁂𑀢𑀼𑀥𑀫𑁆𑀫-𑀲𑀤𑁆𑀤𑀸 𑀏𑀓𑀢𑁆𑀣𑀸, 𑀜𑀸𑀡𑀧𑀝𑀺𑀲𑀫𑁆𑀪𑀺𑀤𑀸-𑀲𑀤𑁆𑀤𑀸 𑀘𑀸𑀢𑀺 𑀇𑀫𑀫𑀢𑁆𑀣𑀁 𑀯𑀤𑀦𑁆𑀢𑁂𑀦 𑀲𑀸𑀥𑀺𑀢𑁄 𑀥𑀫𑁆𑀫𑀲𑁆𑀲 𑀳𑁂𑀢𑀼𑀪𑀸𑀯𑁄, 𑀅𑀢𑁆𑀣𑀲𑁆𑀲 𑀳𑁂𑀢𑀼𑀨𑀮𑀪𑀸𑀯𑁄 𑀘 𑀏𑀯𑀫𑁂𑀯 𑀤𑀝𑁆𑀞𑀩𑁆𑀩𑁄.

𑀬𑀣𑀸𑀥𑀫𑁆𑀫𑀦𑁆𑀢𑀺 𑀘𑁂𑀢𑁆𑀣 𑀥𑀫𑁆𑀫-𑀲𑀤𑁆𑀤𑁄 𑀳𑁂𑀢𑀼𑀁 𑀳𑁂𑀢𑀼𑀨𑀮𑀜𑁆𑀘 𑀲𑀩𑁆𑀩𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀪𑀸𑀯𑀯𑀸𑀘𑀓𑁄 𑀳𑁂𑀲, 𑀦 𑀧𑀭𑀺𑀬𑀢𑁆𑀢𑀺𑀳𑁂𑀢𑀼𑀪𑀸𑀯𑀯𑀸𑀘𑀓𑁄, 𑀢𑀲𑁆𑀫𑀸 𑀬𑀣𑀸𑀥𑀫𑁆𑀫𑀦𑁆𑀢𑀺 𑀬𑁄 𑀬𑁄 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀺𑀥𑀫𑁆𑀫𑁄 ¶ , 𑀢𑀲𑁆𑀫𑀺𑀁 𑀢𑀲𑁆𑀫𑀺𑀦𑁆𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀸𑀦𑀼𑀭𑀽𑀧𑀁 𑀯𑀸 𑀬𑀣𑀸𑀥𑀫𑁆𑀫𑀁. 𑀤𑁂𑀲𑀦𑀸𑀧𑀺 𑀳𑀺 𑀧𑀝𑀺𑀯𑁂𑀥𑁄 𑀯𑀺𑀬 𑀅𑀯𑀺𑀧𑀭𑀻𑀢𑀲𑀯𑀺𑀲𑀬𑀯𑀺𑀪𑀸𑀯𑀦𑀢𑁄 𑀥𑀫𑁆𑀫𑀸𑀦𑀼𑀭𑀽𑀧𑀁 𑀧𑀯𑀢𑁆𑀢𑀢𑀺, 𑀬𑀢𑁄 ‘𑀅𑀯𑀺𑀧𑀭𑀻𑀢𑀸𑀪𑀺𑀮𑀸𑀧𑁄’𑀢𑀺 𑀯𑀼𑀘𑁆𑀘𑀢𑀺. 𑀥𑀫𑁆𑀫𑀸𑀪𑀺𑀮𑀸𑀧𑁄𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀓𑁄 𑀅𑀯𑀺𑀧𑀭𑀻𑀢𑀸𑀪𑀺𑀮𑀸𑀧𑁄, 𑀏𑀢𑁂𑀦 ‘‘𑀢𑀢𑁆𑀭 𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁧𑁮) 𑀏𑀢𑁆𑀣 𑀯𑀼𑀢𑁆𑀢𑀁 𑀲𑀪𑀸𑀯𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑀺, 𑀲𑀤𑁆𑀤𑀲𑀪𑀸𑀯𑀢𑁆𑀢𑀸 𑀤𑁂𑀲𑀦𑀸𑀬. 𑀢𑀣𑀸 𑀳𑀺 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀬 ¶ 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀪𑀸𑀯𑁄 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑀧𑀸𑀴𑀺𑀬𑀁 (𑀯𑀺𑀪. 𑁭𑁪𑁯) 𑀯𑀼𑀢𑁆𑀢𑁄. 𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀢𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀁 𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑀅𑀝𑁆𑀞. 𑁬𑁪𑁨) 𑀲𑀤𑁆𑀤𑀸𑀭𑀫𑁆𑀫𑀡𑀢𑀸 ¶ 𑀤𑀲𑁆𑀲𑀺𑀢𑀸. ‘‘𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀅𑀬𑀁 𑀲𑀤𑁆𑀤𑁄 𑀯𑀸𑀘𑀓𑁄’’𑀢𑀺 𑀯𑀘𑀦𑀯𑀘𑀦𑀻𑀬𑁂 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑀁𑀢𑀁𑀯𑀘𑀦𑀻𑀬 𑀯𑀺𑀪𑀸𑀯𑀦𑀯𑀲𑁂𑀦 𑀧𑀯𑀢𑁆𑀢𑀺𑀢𑁄 𑀳𑀺 𑀲𑀤𑁆𑀤𑁄 𑀤𑁂𑀲𑀦𑀸𑀢𑀺. ‘‘𑀅𑀦𑀼𑀮𑁄𑀫𑀸𑀤𑀺𑀯𑀲𑁂𑀦 𑀯𑀸 𑀓𑀣𑀦’’𑀦𑁆𑀢𑀺 𑀏𑀢𑁂𑀦 𑀢𑀲𑁆𑀲𑀸 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀬𑀸 𑀅𑀪𑀺𑀮𑀸𑀧𑀁 𑀓𑀣𑀦𑀁 𑀢𑀲𑁆𑀲 𑀯𑀘𑀦𑀲𑁆𑀲 𑀧𑀯𑀢𑁆𑀢𑀦𑀁 𑀤𑀲𑁆𑀲𑁂𑀢𑀺. ‘‘𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀏𑀢𑁂𑀦 ‘‘𑀤𑁂𑀲𑀦𑀸𑀢𑀺 𑀧𑀜𑁆𑀜𑀢𑁆𑀢𑀻’’𑀢𑀺 𑀏𑀢𑀁 𑀯𑀘𑀦𑀁 𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀁 𑀧𑀜𑁆𑀜𑀢𑁆𑀢𑀺𑀁 𑀲𑀦𑁆𑀥𑀸𑀬𑀸𑀢𑀺 𑀤𑀲𑁆𑀲𑁂𑀢𑀺.

𑀦𑀦𑀼 𑀘 ‘‘𑀥𑀫𑁆𑀫𑁄 𑀢𑀦𑁆𑀢𑀻’’𑀢𑀺 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀥𑀫𑁆𑀫𑀲𑁆𑀲 𑀲𑀤𑁆𑀤𑀲𑀪𑀸𑀯𑀢𑁆𑀢𑀸 𑀥𑀫𑁆𑀫𑀤𑁂𑀲𑀦𑀸𑀦𑀁 𑀯𑀺𑀲𑁂𑀲𑁄 𑀦 𑀲𑀺𑀬𑀸𑀢𑀺? 𑀦, 𑀢𑁂𑀲𑀁 𑀢𑁂𑀲𑀁 𑀅𑀢𑁆𑀣𑀸𑀦𑀁 𑀩𑁄𑀥𑀓𑀪𑀸𑀯𑁂𑀦 𑀜𑀸𑀢𑁄, 𑀉𑀕𑁆𑀕𑀳𑀡𑀸𑀤𑀺𑀯𑀲𑁂𑀦 𑀘 𑀧𑀼𑀩𑁆𑀩𑁂 𑀯𑀯𑀢𑁆𑀣𑀸𑀧𑀺𑀢𑁄 𑀲𑀤𑁆𑀤𑀧𑁆𑀧𑀩𑀦𑁆𑀥𑁄 𑀥𑀫𑁆𑀫𑁄, 𑀧𑀘𑁆𑀙𑀸 𑀧𑀭𑁂𑀲𑀁 𑀅𑀯𑀩𑁄𑀥𑀦𑀢𑁆𑀣𑀁 𑀧𑀯𑀢𑁆𑀢𑀺𑀢𑁄 𑀢𑀤𑀢𑁆𑀣𑀧𑁆𑀧𑀓𑀸𑀲𑀓𑁄 ¶ 𑀲𑀤𑁆𑀤𑁄 𑀤𑁂𑀲𑀦𑀸𑀢𑀺. 𑀅𑀣 𑀯𑀸 𑀬𑀣𑀸𑀯𑀼𑀢𑁆𑀢𑀲𑀤𑁆𑀤𑀲𑀫𑀼𑀝𑁆𑀞𑀸𑀧𑀓𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀤𑁂𑀲𑀦𑀸, 𑀫𑀼𑀲𑀸𑀯𑀸𑀤𑀸𑀤𑀬𑁄 𑀯𑀺𑀬. ‘‘𑀯𑀘𑀦𑀲𑁆𑀲 𑀧𑀯𑀢𑁆𑀢𑀦’’𑀦𑁆𑀢𑀺 𑀘 𑀬𑀣𑀸𑀯𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀬𑀼𑀚𑁆𑀚𑀢𑀺. 𑀲𑁄 𑀳𑀺 𑀯𑀘𑀦𑀁 𑀧𑀯𑀢𑁆𑀢𑁂𑀢𑀺, 𑀢𑀜𑁆𑀘 𑀢𑁂𑀦 𑀧𑀯𑀢𑁆𑀢𑀻𑀬𑀢𑀺 𑀤𑁂𑀲𑀻𑀬𑀢𑀺. ‘‘𑀲𑁄 𑀘 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀅𑀪𑀺𑀲𑀫𑀬𑀁 𑀬𑁂𑀦 𑀧𑀓𑀸𑀭𑁂𑀦 𑀅𑀪𑀺𑀲𑀫𑁂𑀢𑀺, 𑀬𑀁 𑀅𑀪𑀺𑀲𑀫𑁂𑀢𑀺, 𑀬𑁄 𑀘 𑀢𑀲𑁆𑀲 𑀲𑀪𑀸𑀯𑁄, 𑀢𑁂𑀳𑀺 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀯𑀺𑀲𑀬𑀢𑁄 𑀅𑀲𑀫𑁆𑀫𑁄𑀳𑀢𑁄 𑀘 𑀅𑀢𑁆𑀣𑀸𑀦𑀼𑀭𑀽𑀧𑀁 𑀥𑀫𑁆𑀫𑁂𑀲𑀽’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑀺 𑀯𑀺𑀲𑀬𑀢𑁄 𑀅𑀢𑁆𑀣𑀸𑀤𑀺𑀅𑀦𑀼𑀭𑀽𑀧𑀁 𑀥𑀫𑁆𑀫𑀸𑀤𑀻𑀲𑀼 𑀅𑀯𑀩𑁄𑀥𑁄 𑀅𑀯𑀺𑀚𑁆𑀚𑀸𑀤𑀺𑀥𑀫𑁆𑀫𑀲𑀗𑁆𑀔𑀸𑀭𑀸𑀤𑀺𑀅𑀢𑁆𑀣𑀢𑀤𑀼𑀪𑀬𑀧𑀜𑁆𑀜𑀸𑀧𑀦𑀸𑀭𑀫𑁆𑀫𑀡𑁄 𑀮𑁄𑀓𑀺𑀬𑁄 𑀅𑀪𑀺𑀲𑀫𑀬𑁄, 𑀅𑀲𑀫𑁆𑀫𑁄𑀳𑀢𑁄 𑀅𑀢𑁆𑀣𑀸𑀤𑀺𑀅𑀦𑀼𑀭𑀽𑀧𑀁 𑀥𑀫𑁆𑀫𑀸𑀤𑀻𑀲𑀼 𑀅𑀯𑀩𑁄𑀥𑁄 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁄 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑁄 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀢𑁆𑀣𑀧𑀜𑁆𑀜𑀢𑁆𑀢𑀻𑀲𑀼 𑀲𑀫𑁆𑀫𑁄𑀳𑀯𑀺𑀤𑁆𑀥𑀁𑀲𑀦𑁄 𑀮𑁄𑀓𑀼𑀢𑁆𑀢𑀭𑁄 𑀅𑀪𑀺𑀲𑀫𑀬𑁄𑀢𑀺. 𑀅𑀪𑀺𑀲𑀫𑀬𑀢𑁄 𑀅𑀜𑁆𑀜𑀫𑁆𑀧𑀺 𑀧𑀝𑀺𑀯𑁂𑀥𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀲𑀁 𑀢𑁂𑀲𑀁 𑀯𑀸’’𑀢𑀺𑀆𑀤𑀺𑀫𑀸𑀳. ‘𑀧𑀝𑀺𑀯𑁂𑀥𑀦𑀁 𑀧𑀝𑀺𑀯𑁂𑀥𑁄’𑀢𑀺 𑀇𑀫𑀺𑀦𑀸 𑀳𑀺 𑀯𑀘𑀦𑀢𑁆𑀣𑁂𑀦 𑀅𑀪𑀺𑀲𑀫𑀬𑁄, ‘𑀧𑀝𑀺𑀯𑀺𑀚𑁆𑀛𑀻𑀬𑀢𑀻𑀢𑀺 𑀧𑀝𑀺𑀯𑁂𑀥𑁄’𑀢𑀺 𑀇𑀫𑀺𑀦𑀸 𑀢𑀁𑀢𑀁𑀭𑀽𑀧𑀸𑀤𑀺𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑀲𑀪𑀸𑀯𑁄 𑀘 ‘‘𑀧𑀝𑀺𑀯𑁂𑀥𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀬𑀣𑀸𑀯𑀼𑀢𑁆𑀢𑁂𑀳𑀺 𑀥𑀫𑁆𑀫𑀸𑀤𑀻𑀳𑀺 𑀧𑀺𑀝𑀓𑀸𑀦𑀁 𑀕𑀫𑁆𑀪𑀻𑀭𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀸𑀦𑀺 𑀬𑀲𑁆𑀫𑀸 𑀏𑀢𑁂𑀲𑀼 𑀧𑀺𑀝𑀓𑁂𑀲𑀽’’𑀢𑀺𑀆𑀤𑀺𑀫𑀸𑀳. 𑀬𑁄 𑀘𑁂𑀢𑁆𑀣𑀸𑀢𑀺 𑀏𑀢𑁂𑀲𑀼 𑀢𑀁𑀢𑀁𑀧𑀺𑀝𑀓𑀕𑀢𑁂𑀲𑀼 𑀥𑀫𑁆𑀫𑀸𑀤𑀻𑀲𑀼 𑀬𑁄 𑀧𑀝𑀺𑀯𑁂𑀥𑁄, 𑀏𑀢𑁂𑀲𑀼 𑀘 𑀧𑀺𑀝𑀓𑁂𑀲𑀼 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀬𑁄 𑀅𑀯𑀺𑀧𑀭𑀻𑀢𑀲𑀪𑀸𑀯𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀤𑀼𑀓𑁆𑀔𑁄𑀕𑀸𑀳𑀢𑀸 𑀘 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀻𑀦𑀁 ¶ 𑀥𑀫𑁆𑀫𑀢𑁆𑀣𑀸𑀦𑀁 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀢𑀸𑀬, 𑀢𑁂𑀲𑀁 𑀧𑀜𑁆𑀜𑀸𑀧𑀦𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄 𑀢𑀁𑀤𑁂𑀲𑀦𑀸𑀬, 𑀧𑀝𑀺𑀯𑁂𑀥𑀦𑀲𑀗𑁆𑀔𑀸𑀢𑀲𑁆𑀲 𑀧𑀝𑀺𑀯𑁂𑀥𑀲𑁆𑀲 𑀉𑀧𑁆𑀧𑀸𑀤𑀦𑀯𑀺𑀲𑀬𑀺𑀓𑀭𑀡𑀸𑀦𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸, 𑀅𑀯𑀺𑀧𑀭𑀻𑀢𑀲𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀧𑀝𑀺𑀯𑁂𑀥𑀲𑁆𑀲 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑀸𑀬 𑀏𑀯 𑀯𑁂𑀤𑀺𑀢𑀩𑁆𑀩𑀸.

𑀬𑀦𑁆𑀢𑀺 ¶ 𑀬𑀁 𑀧𑀭𑀺𑀬𑀢𑁆𑀢𑀺𑀤𑀼𑀕𑁆𑀕𑀳𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀢𑁆𑀣𑀦𑁆𑀢𑀺 𑀪𑀸𑀲𑀺𑀢𑀢𑁆𑀣𑀁, 𑀧𑀬𑁄𑀚𑀦𑀢𑁆𑀣𑀜𑁆𑀘. 𑀦 𑀉𑀧𑀧𑀭𑀺𑀓𑁆𑀔𑀦𑁆𑀢𑀻𑀢𑀺 𑀦 𑀯𑀺𑀘𑀸𑀭𑁂𑀦𑁆𑀢𑀺. 𑀦 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀻𑀢𑀺 𑀦𑀺𑀚𑁆𑀛𑀸𑀦𑀧𑀜𑁆𑀜𑀁 𑀦𑀓𑁆𑀔𑀫𑀦𑁆𑀢𑀺, 𑀦𑀺𑀚𑁆𑀛𑀸𑀬𑀺𑀢𑁆𑀯𑀸 ¶ 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀭𑁄𑀘𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀸 𑀦 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀻𑀢𑀺 𑀏𑀯𑀁 𑀏𑀢𑀸𑀬 𑀧𑀭𑀺𑀬𑀢𑁆𑀢𑀺𑀬𑀸. 𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀦𑀺𑀲𑀁𑀲𑀸 𑀅𑀢𑁆𑀢𑀦𑁄 𑀉𑀧𑀭𑀺 𑀧𑀭𑁂𑀳𑀺 𑀆𑀭𑁄𑀧𑀺𑀢𑀯𑀸𑀤𑀲𑁆𑀲 𑀦𑀺𑀕𑁆𑀕𑀳𑀲𑁆𑀲 𑀧𑀫𑁄𑀓𑁆𑀔𑀧𑁆𑀧𑀬𑁄𑀚𑀦𑀸 𑀳𑀼𑀢𑁆𑀯𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺, 𑀯𑀸𑀤𑀧𑁆𑀧𑀫𑁄𑀓𑁆𑀔𑀸 𑀯𑀸 𑀦𑀺𑀦𑁆𑀤𑀸𑀧𑀫𑁄𑀓𑁆𑀔𑀸. 𑀬𑀲𑁆𑀲 𑀘𑀢𑁆𑀣𑀸𑀬𑀸𑀢𑀺 𑀬𑀲𑁆𑀲 𑀘 𑀲𑀻𑀮𑀸𑀤𑀺𑀧𑀽𑀭𑀡𑀲𑁆𑀲 𑀅𑀦𑀼𑀧𑀸𑀤𑀸𑀯𑀺𑀫𑁄𑀓𑁆𑀔𑀲𑁆𑀲 𑀯𑀸 𑀅𑀢𑁆𑀣𑀸𑀬 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑀜𑀸𑀬𑁂𑀦 𑀧𑀭𑀺𑀬𑀸𑀧𑀼𑀡𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀲𑁆𑀲𑀸𑀢𑀺 𑀅𑀲𑁆𑀲 𑀥𑀫𑁆𑀫𑀲𑁆𑀲. 𑀦𑀸𑀦𑀼𑀪𑁄𑀦𑁆𑀢𑀻𑀢𑀺 𑀦 𑀯𑀺𑀦𑁆𑀤𑀦𑁆𑀢𑀺. 𑀢𑁂𑀲𑀁 𑀢𑁂 𑀥𑀫𑁆𑀫𑀸 𑀤𑀼𑀕𑁆𑀕𑀳𑀺𑀢𑀢𑁆𑀢𑀸 𑀉𑀧𑀸𑀭𑀫𑁆𑀪𑀫𑀸𑀦𑀤𑀩𑁆𑀩𑀫𑀓𑁆𑀔𑀧𑀮𑀸𑀲𑀸𑀤𑀺𑀳𑁂𑀢𑀼𑀪𑀸𑀯𑁂𑀦 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀪𑀡𑁆𑀟𑀸𑀕𑀸𑀭𑁂 𑀦𑀺𑀬𑀼𑀢𑁆𑀢𑁄 𑀪𑀡𑁆𑀟𑀸𑀕𑀸𑀭𑀺𑀓𑁄, 𑀪𑀡𑁆𑀟𑀸𑀕𑀸𑀭𑀺𑀓𑁄 𑀯𑀺𑀬 𑀪𑀡𑁆𑀟𑀸𑀕𑀸𑀭𑀺𑀓𑁄, 𑀥𑀫𑁆𑀫𑀭𑀢𑀦𑀸𑀦𑀼𑀧𑀸𑀮𑀓𑁄. 𑀅𑀜𑁆𑀜𑀢𑁆𑀣𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲𑁂𑀯 𑀲𑀢𑁄 𑀧𑀭𑀺𑀬𑀢𑁆𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺.

‘‘𑀢𑀸𑀲𑀁𑀬𑁂𑀯𑀸’’𑀢𑀺 𑀅𑀯𑀥𑀸𑀭𑀡𑀁 𑀧𑀸𑀧𑀼𑀡𑀺𑀢𑀩𑁆𑀩𑀸𑀦𑀁 𑀙𑀴𑀪𑀺𑀜𑁆𑀜𑀸𑀘𑀢𑀼𑀧𑁆𑀧𑀝𑀺𑀲𑀫𑁆𑀪𑀺𑀤𑀸𑀤𑀻𑀦𑀁 𑀯𑀺𑀦𑀬𑁂 𑀧𑀪𑁂𑀤𑀯𑀘𑀦𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑁂𑀭𑀜𑁆𑀚𑀓𑀡𑁆𑀟𑁂 (𑀧𑀸𑀭𑀸. 𑁧𑁨) 𑀳𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸𑀯 𑀯𑀺𑀪𑀢𑁆𑀢𑀸. 𑀤𑀼𑀢𑀺𑀬𑁂 𑀧𑀦 ‘‘𑀢𑀸𑀲𑀁𑀬𑁂𑀯𑀸’’𑀢𑀺 𑀅𑀯𑀥𑀸𑀭𑀡𑀁 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀅𑀧𑁂𑀓𑁆𑀔𑀺𑀢𑁆𑀯𑀸 𑀓𑀢𑀁, 𑀦 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸. 𑀢𑀸 𑀳𑀺 𑀙𑀲𑀼 𑀅𑀪𑀺𑀜𑁆𑀜𑀸𑀲𑀼 𑀅𑀦𑁆𑀢𑁄𑀕𑀥𑀸𑀢𑀺 𑀲𑀼𑀢𑁆𑀢𑁂 𑀯𑀺𑀪𑀢𑁆𑀢𑀸 𑀬𑁂𑀯𑀸𑀢𑀺.

𑀤𑀼𑀕𑁆𑀕𑀳𑀺𑀢𑀁 𑀕𑀡𑁆𑀳𑀸𑀢𑀺, ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀬𑀣𑀸 𑀢𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺 𑀅𑀦𑀜𑁆𑀜’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁩𑁯𑁬). 𑀥𑀫𑁆𑀫𑀘𑀺𑀦𑁆𑀢𑀦𑁆𑀢𑀺 ¶ 𑀥𑀫𑁆𑀫𑀲𑀪𑀸𑀯𑀯𑀺𑀘𑀸𑀭𑀡𑀁, ‘‘𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦𑁂𑀯 𑀤𑀸𑀦𑀁 𑀳𑁄𑀢𑀺, 𑀲𑀬𑀫𑁂𑀯 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀲𑀩𑁆𑀩𑀁 𑀘𑀺𑀢𑁆𑀢𑀁 𑀅𑀲𑀪𑀸𑀯𑀥𑀫𑁆𑀫𑀸𑀭𑀫𑁆𑀫𑀡’’𑀦𑁆𑀢𑀺 𑀘 𑀏𑀯𑀫𑀸𑀤𑀺. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀧𑀺𑀝𑀓𑀸𑀦𑀁.

𑀏𑀢𑀦𑁆𑀢𑀺 𑀏𑀢𑀁 𑀩𑀼𑀤𑁆𑀥𑀯𑀘𑀦𑀁. 𑀅𑀢𑁆𑀣𑀸𑀦𑀼𑀮𑁄𑀫𑀢𑁄 𑀅𑀦𑀼𑀮𑁄𑀫𑀺𑀓𑁄. 𑀅𑀦𑀼𑀮𑁄𑀫𑀺𑀓𑀢𑀁𑀬𑁂𑀯 𑀯𑀺𑀪𑀸𑀯𑁂𑀢𑀼𑀁 ‘‘𑀓𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀓𑀦𑀺𑀓𑀸𑀬𑀫𑁆𑀧𑀻𑀢𑀺 𑀏𑀓𑀲𑀫𑀽𑀳𑀫𑁆𑀧𑀺 ¶ . 𑀧𑁄𑀡𑀺𑀓𑀸 𑀘𑀺𑀓𑁆𑀔𑀮𑁆𑀮𑀺𑀓𑀸 𑀘 𑀔𑀢𑁆𑀢𑀺𑀬𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀧𑁄𑀡𑀺𑀓𑀦𑀺𑀓𑀸𑀬𑁄 𑀘𑀺𑀓𑁆𑀔𑀮𑁆𑀮𑀺𑀓𑀦𑀺𑀓𑀸𑀬𑁄 𑀘.

𑀦𑀯𑀧𑁆𑀧𑀪𑁂𑀤𑀦𑁆𑀢𑀺 𑀏𑀢𑁆𑀣 𑀓𑀣𑀁 𑀦𑀯𑀧𑁆𑀧𑀪𑁂𑀤𑀁? 𑀲𑀕𑀸𑀣𑀓𑀜𑁆𑀳𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁, 𑀦𑀺𑀕𑁆𑀕𑀸𑀣𑀓𑀜𑁆𑀘 𑀲𑀼𑀢𑁆𑀢𑀁 𑀯𑁂𑀬𑁆𑀬𑀸𑀓𑀭𑀡𑀁, 𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑀜𑁆𑀘 𑀲𑀼𑀢𑁆𑀢𑀁 𑀉𑀤𑀸𑀦𑀸𑀤𑀺𑀯𑀺𑀲𑁂𑀲𑀲𑀜𑁆𑀜𑀸𑀭𑀳𑀺𑀢𑀁 𑀦𑀢𑁆𑀣𑀺, 𑀬𑀁 𑀲𑀼𑀢𑁆𑀢𑀗𑁆𑀕𑀁 𑀲𑀺𑀬𑀸, 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀦𑀜𑁆𑀘 (𑀔𑀼. 𑀧𑀸. 𑁫.𑁨; 𑀲𑀼. 𑀦𑀺. 𑁨𑁨𑁫) 𑀲𑀼𑀢𑁆𑀢𑀗𑁆𑀕𑀲𑀗𑁆𑀕𑀳𑁄 𑀦 𑀲𑀺𑀬𑀸, 𑀕𑀸𑀣𑀸𑀪𑀸𑀯𑀢𑁄, 𑀥𑀫𑁆𑀫𑀧𑀤𑀸𑀤𑀻𑀦𑀁 𑀯𑀺𑀬, 𑀕𑁂𑀬𑁆𑀬𑀗𑁆𑀕𑀲𑀗𑁆𑀕𑀳𑁄 𑀯𑀸 𑀲𑀺𑀬𑀸, 𑀲𑀕𑀸𑀣𑀓𑀢𑁆𑀢𑀸, 𑀲𑀕𑀸𑀣𑀯𑀕𑁆𑀕𑀲𑁆𑀲 𑀯𑀺𑀬, 𑀢𑀣𑀸 𑀉𑀪𑀢𑁄𑀯𑀺𑀪𑀗𑁆𑀕𑀸𑀤𑀻𑀲𑀼 𑀲𑀕𑀸𑀣𑀓𑀧𑁆𑀧𑀤𑁂𑀲𑀸𑀦𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋

‘‘𑀲𑀼𑀢𑁆𑀢𑀦𑁆𑀢𑀺 ¶ 𑀲𑀸𑀫𑀜𑁆𑀜𑀯𑀺𑀥𑀺, 𑀯𑀺𑀲𑁂𑀲𑀯𑀺𑀥𑀬𑁄 𑀧𑀭𑁂;

𑀲𑀦𑀺𑀫𑀺𑀢𑁆𑀢𑀸 𑀦𑀺𑀭𑀼𑀴𑁆𑀳𑀢𑁆𑀢𑀸 𑀲𑀳𑀢𑀸𑀜𑁆𑀜𑁂𑀦 𑀦𑀸𑀜𑁆𑀜𑀢𑁄’’. (𑀲𑀸𑀭𑀢𑁆𑀣. 𑀝𑀻. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸);

𑀲𑀩𑁆𑀩𑀲𑁆𑀲𑀸𑀧𑀺 𑀳𑀺 𑀩𑀼𑀤𑁆𑀥𑀯𑀘𑀦𑀲𑁆𑀲 𑀲𑀼𑀢𑁆𑀢𑀦𑁆𑀢𑀺 𑀅𑀬𑀁 𑀲𑀸𑀫𑀜𑁆𑀜𑀯𑀺𑀥𑀺. 𑀢𑁂𑀦𑁂𑀯𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀦𑁄 𑀦𑁂𑀢𑁆𑀢𑀺𑀬𑀁 𑁋 ‘‘𑀦𑀯𑀯𑀺𑀥𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑁂𑀝𑁆𑀞𑀻’’𑀢𑀺 (𑀦𑁂𑀢𑁆𑀢𑀺. 𑀲𑀗𑁆𑀕𑀳𑀯𑀸𑀭). ‘‘𑀏𑀢𑁆𑀢𑀓𑀁 𑀢𑀲𑁆𑀲 𑀪𑀕𑀯𑀢𑁄 𑀲𑀼𑀢𑁆𑀢𑀸𑀕𑀢𑀁 𑀲𑀼𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀁 (𑀧𑀸𑀘𑀺. 𑁨𑁫𑁫, 𑁧𑁨𑁪𑁨), 𑀲𑀓𑀯𑀸𑀤𑁂 𑀧𑀜𑁆𑀘𑀲𑀼𑀢𑁆𑀢𑀲𑀢𑀸𑀦𑀻’’𑀢𑀺 (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀓𑀣𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸) 𑀏𑀯𑀫𑀸𑀤𑀺 𑀘 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀓𑀁.

𑀯𑀺𑀲𑁂𑀲𑀯𑀺𑀥𑀬𑁄 ¶ 𑀧𑀭𑁂 𑀲𑀦𑀺𑀫𑀺𑀢𑁆𑀢𑀸 𑀢𑀤𑁂𑀓𑀤𑁂𑀲𑁂𑀲𑀼 𑀕𑁂𑀬𑁆𑀬𑀸𑀤𑀬𑁄 𑀯𑀺𑀲𑁂𑀲𑀯𑀺𑀥𑀬𑁄 𑀢𑁂𑀦 𑀢𑁂𑀦 𑀦𑀺𑀫𑀺𑀢𑁆𑀢𑁂𑀦 𑀧𑀢𑀺𑀝𑁆𑀞𑀺𑀢𑀸. 𑀢𑀣𑀸 𑀳𑀺 𑀕𑁂𑀬𑁆𑀬𑀲𑁆𑀲 𑀲𑀕𑀸𑀣𑀓𑀢𑁆𑀢𑀁 𑀢𑀩𑁆𑀪𑀸𑀯𑀦𑀺𑀫𑀺𑀢𑁆𑀢𑀁. 𑀮𑁄𑀓𑁂𑀧𑀺 𑀳𑀺 𑀲𑀲𑀺𑀮𑁄𑀓𑀁 𑀲𑀕𑀸𑀣𑀓𑀁 (𑀦𑁂𑀢𑁆𑀢𑀺. 𑀅𑀝𑁆𑀞. 𑁧𑁩) 𑀘𑀼𑀡𑁆𑀡𑀺𑀬𑀕𑀦𑁆𑀣𑀁 ‘𑀕𑁂𑀬𑁆𑀬’𑀦𑁆𑀢𑀺 𑀯𑀤𑀦𑁆𑀢𑀺. 𑀕𑀸𑀣𑀸𑀯𑀺𑀭𑀳𑁂 𑀧𑀦 𑀲𑀢𑀺 𑀧𑀼𑀘𑁆𑀙𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀪𑀸𑀯𑁄 𑀯𑁂𑀬𑁆𑀬𑀸𑀓𑀭𑀡𑀲𑁆𑀲 𑀢𑀩𑁆𑀪𑀸𑀯𑀦𑀺𑀫𑀺𑀢𑁆𑀢𑀁. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀜𑁆𑀳𑀺 ‘𑀩𑁆𑀬𑀸𑀓𑀭𑀡’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀩𑁆𑀬𑀸𑀓𑀭𑀡𑀫𑁂𑀯 𑀯𑁂𑀬𑁆𑀬𑀸𑀓𑀭𑀡𑀁. 𑀏𑀯𑀁 𑀲𑀦𑁆𑀢𑁂 𑀲𑀕𑀸𑀣𑀓𑀸𑀤𑀻𑀦𑀫𑁆𑀧𑀺 𑀧𑀼𑀘𑁆𑀙𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺, 𑀕𑁂𑀬𑁆𑀬𑀸𑀤𑀺𑀲𑀜𑁆𑀜𑀸𑀦𑀁 𑀅𑀦𑁄𑀓𑀸𑀲𑀪𑀸𑀯𑀢𑁄, ‘𑀕𑀸𑀣𑀸𑀯𑀺𑀭𑀳𑁂 𑀲𑀢𑀻’𑀢𑀺 𑀯𑀺𑀲𑁂𑀲𑀺𑀢𑀢𑁆𑀢𑀸 𑀘. 𑀢𑀣𑀸 𑀳𑀺 𑀥𑀫𑁆𑀫𑀧𑀤𑀸𑀤𑀻𑀲𑀼 𑀓𑁂𑀯𑀮𑀁 𑀕𑀸𑀣𑀸𑀩𑀦𑁆𑀥𑁂𑀲𑀼, 𑀲𑀕𑀸𑀣𑀓𑀢𑁆𑀢𑁂𑀧𑀺 𑀲𑁄𑀫𑀦𑀲𑁆𑀲𑀜𑀸𑀡𑀫𑀬𑀺𑀓𑀕𑀸𑀣𑀸𑀬𑀼𑀢𑁆𑀢𑁂𑀲𑀼, ‘𑀯𑀼𑀢𑁆𑀢𑀜𑁆𑀳𑁂𑀢’𑀦𑁆𑀢𑀺𑀆𑀤𑀺𑀯𑀘𑀦𑀲𑀫𑁆𑀩𑀦𑁆𑀥𑁂𑀲𑀼, 𑀅𑀩𑁆𑀪𑀼𑀢𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀘 𑀲𑀼𑀢𑁆𑀢𑀯𑀺𑀲𑁂𑀲𑁂𑀲𑀼 𑀬𑀣𑀸𑀓𑁆𑀓𑀫𑀁 𑀕𑀸𑀣𑀸𑀉𑀤𑀸𑀦𑀇𑀢𑀺𑀯𑀼𑀢𑁆𑀢𑀓𑀅𑀩𑁆𑀪𑀼𑀢𑀥𑀫𑁆𑀫𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸, 𑀢𑀣𑀸 𑀲𑀢𑀺𑀧𑀺 ¶ 𑀕𑀸𑀣𑀸𑀩𑀦𑁆𑀥𑀪𑀸𑀯𑁂 𑀪𑀕𑀯𑀢𑁄 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀼 𑀘𑀭𑀺𑀬𑀸𑀦𑀼𑀪𑀸𑀯𑀧𑁆𑀧𑀓𑀸𑀲𑀓𑁂𑀲𑀼 𑀚𑀸𑀢𑀓𑀲𑀜𑁆𑀜𑀸, 𑀲𑀢𑀺𑀧𑀺 𑀧𑀜𑁆𑀳𑀸𑀯𑀺𑀲𑁆𑀲𑀚𑁆𑀚𑀦𑀪𑀸𑀯𑁂, 𑀲𑀕𑀸𑀣𑀓𑀢𑁆𑀢𑁂 𑀘 𑀓𑁂𑀲𑀼𑀘𑀺 𑀲𑀼𑀢𑁆𑀢𑀦𑁆𑀢𑁂𑀲𑀼 𑀯𑁂𑀤𑀲𑁆𑀲 𑀮𑀪𑀸𑀧𑀦𑀢𑁄 𑀯𑁂𑀤𑀮𑁆𑀮𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸𑀢𑀺 𑀏𑀯𑀁 𑀢𑁂𑀦 𑀢𑁂𑀦 𑀲𑀕𑀸𑀣𑀓𑀢𑁆𑀢𑀸𑀤𑀺𑀦𑀸 𑀦𑀺𑀫𑀺𑀢𑁆𑀢𑁂𑀦 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑀯𑀺𑀲𑁂𑀲𑁂𑀲𑀼 𑀕𑁂𑀬𑁆𑀬𑀸𑀤𑀺𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸𑀢𑀺 𑀯𑀺𑀲𑁂𑀲𑀯𑀺𑀥𑀬𑁄 𑀲𑀼𑀢𑁆𑀢𑀗𑁆𑀕𑀢𑁄 𑀧𑀭𑁂 𑀕𑁂𑀬𑁆𑀬𑀸𑀤𑀬𑁄. 𑀬𑀁 𑀧𑀦𑁂𑀢𑁆𑀣 𑀕𑁂𑀬𑁆𑀬𑀗𑁆𑀕𑀸𑀤𑀺𑀦𑀺𑀫𑀺𑀢𑁆𑀢𑀭𑀳𑀺𑀢𑀁, 𑀢𑀁 𑀲𑀼𑀢𑁆𑀢𑀗𑁆𑀕𑀁 𑀯𑀺𑀲𑁂𑀲𑀲𑀜𑁆𑀜𑀸𑀧𑀭𑀺𑀳𑀸𑀭𑁂𑀦 𑀲𑀸𑀫𑀜𑁆𑀜𑀲𑀜𑁆𑀜𑀸𑀬 𑀧𑀯𑀢𑁆𑀢𑀦𑀢𑁄𑀢𑀺. 𑀦𑀦𑀼 𑀘 𑀲𑀕𑀸𑀣𑀓𑀁 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁, 𑀦𑀺𑀕𑁆𑀕𑀸𑀣𑀓𑀁 𑀲𑀼𑀢𑁆𑀢𑀁 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺 𑀲𑀼𑀢𑁆𑀢𑀗𑁆𑀕𑀁 𑀦 𑀲𑀫𑁆𑀪𑀯𑀢𑀻𑀢𑀺 𑀘𑁄𑀤𑀦𑀸 𑀢𑀤𑀯𑀢𑁆𑀣𑀸 𑀯𑀸𑀢𑀺? 𑀦 𑀢𑀤𑀯𑀢𑁆𑀣𑀸, 𑀲𑁄𑀥𑀺𑀢𑀢𑁆𑀢𑀸. 𑀲𑁄𑀥𑀺𑀢𑀜𑁆𑀳𑀺 𑀧𑀼𑀩𑁆𑀩𑁂 𑀕𑀸𑀣𑀸𑀯𑀺𑀭𑀳𑁂 𑀲𑀢𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀪𑀸𑀯𑁄 𑀯𑁂𑀬𑁆𑀬𑀸𑀓𑀭𑀡𑀲𑁆𑀲 𑀢𑀩𑁆𑀪𑀸𑀯𑀦𑀺𑀫𑀺𑀢𑁆𑀢𑀦𑁆𑀢𑀺.

𑀬𑀜𑁆𑀘 𑀯𑀼𑀢𑁆𑀢𑀁 𑁋 ‘‘𑀕𑀸𑀣𑀸𑀪𑀸𑀯𑀢𑁄 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀦𑀁 (𑀔𑀼. 𑀧𑀸. 𑁫.𑁧, 𑁨, 𑁩) 𑀲𑀼𑀢𑁆𑀢𑀗𑁆𑀕𑀲𑀗𑁆𑀕𑀳𑁄 ¶ 𑀦 𑀲𑀺𑀬𑀸’’𑀢𑀺, 𑀢𑀁 𑀦, 𑀦𑀺𑀭𑀼𑀴𑁆𑀳𑀢𑁆𑀢𑀸. 𑀦𑀺𑀭𑀼𑀴𑁆𑀳𑁄 𑀳𑀺 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀦𑀁 𑀲𑀼𑀢𑁆𑀢𑀪𑀸𑀯𑁄. 𑀦 𑀳𑀺 𑀢𑀸𑀦𑀺 𑀥𑀫𑁆𑀫𑀧𑀤𑀩𑀼𑀤𑁆𑀥𑀯𑀁𑀲𑀸𑀤𑀬𑁄 ¶ 𑀯𑀺𑀬 𑀕𑀸𑀣𑀸𑀪𑀸𑀯𑁂𑀦 𑀧𑀜𑁆𑀜𑀸𑀢𑀸𑀦𑀺, 𑀅𑀣 𑀔𑁄 𑀲𑀼𑀢𑁆𑀢𑀪𑀸𑀯𑁂𑀦. 𑀢𑁂𑀦𑁂𑀯 𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀼𑀢𑁆𑀢𑀦𑀸𑀫𑀓’’𑀦𑁆𑀢𑀺 𑀦𑀸𑀫𑀕𑁆𑀕𑀳𑀡𑀁 𑀓𑀢𑀁. 𑀬𑀜𑁆𑀘 𑀧𑀦 𑀯𑀼𑀢𑁆𑀢𑀁 𑁋 ‘‘𑀲𑀕𑀸𑀣𑀓𑀢𑁆𑀢𑀸 𑀕𑁂𑀬𑁆𑀬𑀗𑁆𑀕𑀲𑀗𑁆𑀕𑀳𑁄 𑀲𑀺𑀬𑀸’’𑀢𑀺, 𑀢𑀤𑀧𑀺 𑀦𑀢𑁆𑀣𑀺, 𑀬𑀲𑁆𑀫𑀸 𑀲𑀳𑀢𑀸𑀜𑁆𑀜𑁂𑀦. 𑀲𑀳 𑀕𑀸𑀣𑀸𑀳𑀻𑀢𑀺 𑀳𑀺 𑀲𑀕𑀸𑀣𑀓𑀁. 𑀲𑀳𑀪𑀸𑀯𑁄 𑀦𑀸𑀫 𑀅𑀢𑁆𑀣𑀢𑁄 𑀅𑀜𑁆𑀜𑁂𑀦 𑀳𑁄𑀢𑀺, 𑀦 𑀘 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀲𑀼 𑀓𑀣𑀸𑀯𑀺𑀦𑀺𑀫𑀼𑀢𑁆𑀢𑁄 𑀓𑁄𑀘𑀺 𑀲𑀼𑀢𑁆𑀢𑀧𑀤𑁂𑀲𑁄 𑀅𑀢𑁆𑀣𑀺, 𑀬𑁄 ‘𑀲𑀳 𑀕𑀸𑀣𑀸𑀳𑀻’𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀦 𑀘 𑀲𑀫𑀼𑀤𑀸𑀬𑁄 𑀦𑀸𑀫 𑀓𑁄𑀘𑀺 𑀅𑀢𑁆𑀣𑀺, 𑀬𑀤𑀧𑀺 𑀯𑀼𑀢𑁆𑀢𑀁 𑁋 ‘‘𑀉𑀪𑀢𑁄𑀯𑀺𑀪𑀗𑁆𑀕𑀸𑀤𑀻𑀲𑀼 𑀲𑀕𑀸𑀣𑀓𑀧𑁆𑀧𑀤𑁂𑀲𑀸𑀦𑀁 𑀕𑁂𑀬𑁆𑀬𑀗𑁆𑀕𑀲𑀗𑁆𑀕𑀳𑁄 𑀲𑀺𑀬𑀸’’𑀢𑀺 𑀢𑀤𑀧𑀺 𑀦, 𑀅𑀜𑁆𑀜𑀢𑁄. 𑀅𑀜𑁆𑀜𑀸 𑀏𑀯 𑀳𑀺 𑀢𑀸 𑀕𑀸𑀣𑀸 𑀚𑀸𑀢𑀓𑀸𑀤𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸. 𑀅𑀢𑁄 𑀦 𑀢𑀸𑀳𑀺 𑀉𑀪𑀢𑁄𑀯𑀺𑀪𑀗𑁆𑀕𑀸𑀤𑀻𑀦𑀁 𑀕𑁂𑀬𑁆𑀬𑀗𑁆𑀕𑀪𑀸𑀯𑁄𑀢𑀺. 𑀏𑀯𑀁 𑀲𑀼𑀢𑁆𑀢𑀸𑀤𑀻𑀦𑀁 𑀅𑀗𑁆𑀕𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

‘‘𑀅𑀬𑀁 𑀥𑀫𑁆𑀫𑁄…𑀧𑁂… 𑀅𑀬𑀁 𑀯𑀺𑀦𑀬𑁄, 𑀇𑀫𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻’’𑀢𑀺 𑀩𑀼𑀤𑁆𑀥𑀯𑀘𑀦𑀁 𑀥𑀫𑁆𑀫𑀯𑀺𑀦𑀬𑀸𑀤𑀺𑀪𑁂𑀤𑁂𑀦 𑀯𑀯𑀢𑁆𑀣𑀧𑁂𑀢𑁆𑀯𑀸 𑀲𑀗𑁆𑀕𑀸𑀬𑀦𑁆𑀢𑁂𑀦 𑀫𑀳𑀸𑀓𑀲𑁆𑀲𑀧𑀧𑁆𑀧𑀫𑀼𑀔𑁂𑀦 𑀯𑀲𑀺𑀕𑀡𑁂𑀦 𑀅𑀦𑁂𑀓𑀘𑁆𑀙𑀭𑀺𑀬𑀧𑀸𑀢𑀼𑀪𑀸𑀯𑀧𑀝𑀺𑀫𑀡𑁆𑀟𑀺𑀢𑀸𑀬 𑀲𑀗𑁆𑀕𑀻𑀢𑀺𑀬𑀸 𑀇𑀫𑀲𑁆𑀲 𑀤𑀻𑀖𑀸𑀕𑀫𑀲𑁆𑀲 𑀧𑀞𑀫𑀫𑀚𑁆𑀛𑀺𑀫𑀩𑀼𑀤𑁆𑀥𑀯𑀘𑀦𑀸𑀤𑀺𑀪𑀸𑀯𑁄 𑀯𑀯𑀢𑁆𑀣𑀸𑀧𑀺𑀢𑁄𑀢𑀺 𑀤𑀲𑁆𑀲𑁂𑀢𑀺, ‘‘𑀏𑀯𑀫𑁂𑀢𑀁 𑀅𑀪𑁂𑀤𑀢𑁄’’𑀢𑀺𑀆𑀤𑀺𑀦𑀸.

𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑀧𑀭𑀺𑀩𑁆𑀩𑀸𑀚𑀓𑀓𑀣𑀸𑀯𑀡𑁆𑀡𑀦𑀸

𑀏𑀯𑀁 ¶ ¶ ¶ 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀬𑀤𑀢𑁆𑀣𑀁 𑀲𑀸 𑀇𑀥 𑀤𑀲𑁆𑀲𑀺𑀢𑀸, 𑀇𑀤𑀸𑀦𑀺 𑀢𑀁 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀇𑀫𑀺𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳.

𑁧. 𑀏𑀢𑁆𑀢𑀸𑀯𑀢𑀸 𑀘 𑀩𑁆𑀭𑀳𑁆𑀫𑀚𑀸𑀮𑀲𑁆𑀲 𑀲𑀸𑀥𑀸𑀭𑀡𑀢𑁄 𑀩𑀸𑀳𑀺𑀭𑀦𑀺𑀤𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀩𑁆𑀪𑀦𑁆𑀢𑀭𑀦𑀺𑀤𑀸𑀦𑀁 𑀲𑀁𑀯𑀡𑁆𑀡𑁂𑀢𑀼𑀁 ‘‘𑀢𑀢𑁆𑀣 𑀏𑀯’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀙𑀳𑀺 𑀆𑀓𑀸𑀭𑁂𑀳𑀺 𑀲𑀁𑀯𑀡𑁆𑀡𑀦𑀸 𑀓𑀸𑀢𑀩𑁆𑀩𑀸 𑀲𑀫𑁆𑀩𑀦𑁆𑀥𑀢𑁄 𑀧𑀤𑀢𑁄 𑀧𑀤𑀯𑀺𑀪𑀸𑀕𑀢𑁄 𑀧𑀤𑀢𑁆𑀣𑀢𑁄 𑀅𑀦𑀼𑀬𑁄𑀕𑀢𑁄 𑀧𑀭𑀺𑀳𑀸𑀭𑀢𑁄 𑀘𑀸𑀢𑀺. 𑀢𑀢𑁆𑀣 𑀲𑀫𑁆𑀩𑀦𑁆𑀥𑁄 𑀦𑀸𑀫 𑀤𑁂𑀲𑀦𑀸𑀲𑀫𑁆𑀩𑀦𑁆𑀥𑁄. 𑀬𑀁 𑀮𑁄𑀓𑀺𑀬𑀸 ‘‘𑀉𑀫𑁆𑀫𑀼𑀕𑁆𑀖𑀸𑀢𑁄’’𑀢𑀺 𑀯𑀤𑀦𑁆𑀢𑀺. 𑀲𑁄 𑀧𑀦 𑀧𑀸𑀴𑀺𑀬𑀸 𑀦𑀺𑀤𑀸𑀦𑀧𑀸𑀴𑀺𑀯𑀲𑁂𑀦, 𑀦𑀺𑀤𑀸𑀦𑀧𑀸𑀴𑀺𑀬𑀸 𑀧𑀦 𑀲𑀗𑁆𑀕𑀻𑀢𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀁 𑀤𑀲𑁆𑀲𑁂𑀦𑁆𑀢𑁂𑀦 𑀦𑀺𑀤𑀸𑀦𑀧𑀸𑀴𑀺𑀬𑀸 𑀲𑀫𑁆𑀩𑀦𑁆𑀥𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 𑀧𑀤𑀸𑀤𑀺𑀯𑀲𑁂𑀦 𑀲𑀁𑀯𑀡𑁆𑀡𑀦𑀁 𑀓𑀭𑁄𑀦𑁆𑀢𑁄 ‘‘𑀏𑀯𑀦𑁆𑀢𑀺 𑀦𑀺𑀧𑀸𑀢𑀧𑀤’’𑀦𑁆𑀢𑀺𑀆𑀤𑀺𑀫𑀸𑀳. ‘‘𑀫𑁂𑀢𑀺𑀆𑀤𑀻𑀦𑀻’’𑀢𑀺 𑀏𑀢𑁆𑀣 𑀅𑀦𑁆𑀢𑀭𑀸-𑀲𑀤𑁆𑀤-𑀘-𑀲𑀤𑁆𑀤𑀸𑀦𑀁 𑀦𑀺𑀧𑀸𑀢𑀧𑀤𑀪𑀸𑀯𑁄, 𑀯𑀢𑁆𑀢𑀩𑁆𑀩𑁄, 𑀦 𑀯𑀸 𑀯𑀢𑁆𑀢𑀩𑁆𑀩𑁄 𑀢𑁂𑀲𑀁 𑀦𑀬𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸, 𑀢𑀤𑀯𑀲𑀺𑀝𑁆𑀞𑀸𑀦𑀁 𑀆𑀧𑀝𑀺-𑀲𑀤𑁆𑀤𑀸𑀦𑀁 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀕𑀡𑁆𑀳𑀦𑀢𑁄. ‘‘𑀧𑀤𑀯𑀺𑀪𑀸𑀕𑁄’’𑀢𑀺 𑀧𑀤𑀸𑀦𑀁 𑀯𑀺𑀲𑁂𑀲𑁄, 𑀦 𑀧𑀦 𑀧𑀤𑀯𑀺𑀕𑁆𑀕𑀳𑁄. 𑀅𑀣 𑀯𑀸 𑀧𑀤𑀸𑀦𑀺 𑀘 𑀧𑀤𑀯𑀺𑀪𑀸𑀕𑁄 𑀘 𑀧𑀤𑀯𑀺𑀪𑀸𑀕𑁄, 𑀧𑀤𑀯𑀺𑀕𑁆𑀕𑀳𑁄 𑀘 𑀧𑀤𑀯𑀺𑀪𑀸𑀕𑁄 𑀘 𑀧𑀤𑀯𑀺𑀪𑀸𑀕𑁄𑀢𑀺 𑀯𑀸 𑀏𑀓𑀲𑁂𑀲𑀯𑀲𑁂𑀦 𑀧𑀤𑀧𑀤𑀯𑀺𑀕𑁆𑀕𑀳𑀸𑀧𑀺 𑀧𑀤𑀯𑀺𑀪𑀸𑀕 𑀲𑀤𑁆𑀤𑁂𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀧𑀤𑀯𑀺𑀕𑁆𑀕𑀳𑁄 ‘‘𑀪𑀺𑀓𑁆𑀔𑀽𑀦𑀁 𑀲𑀗𑁆𑀖𑁄’’𑀢𑀺𑀆𑀤𑀺𑀪𑁂𑀤𑁂𑀲𑀼 𑀧𑀤𑁂𑀲𑀼 𑀤𑀝𑁆𑀞𑀩𑁆𑀩𑁄.

𑀅𑀢𑁆𑀣𑀢𑁄𑀢𑀺 𑀧𑀤𑀢𑁆𑀣𑀢𑁄. 𑀢𑀁 𑀧𑀦 𑀧𑀤𑀢𑁆𑀣𑀁 𑀅𑀢𑁆𑀣𑀼𑀤𑁆𑀥𑀸𑀭𑀓𑁆𑀓𑀫𑁂𑀦 ¶ 𑀧𑀞𑀫𑀁 𑀏𑀯𑀁-𑀲𑀤𑁆𑀤𑀲𑁆𑀲 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁𑀲𑀤𑁆𑀤𑁄 𑀢𑀸𑀯𑀸’’𑀢𑀺𑀆𑀤𑀺𑀫𑀸𑀳. 𑀅𑀯𑀥𑀸𑀭𑀡𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀇𑀤𑀫𑀢𑁆𑀣𑀧𑀼𑀘𑁆𑀙𑀸𑀧𑀭𑀺𑀫𑀸𑀡𑀸𑀤𑀺𑀅𑀢𑁆𑀣𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 ‘‘𑀏𑀯𑀁𑀕𑀢𑀸𑀦𑀺, 𑀏𑀯𑀁𑀯𑀺𑀥𑁄, 𑀏𑀯𑀫𑀸𑀓𑀸𑀭𑁄’’𑀢𑀺𑀆𑀤𑀻𑀲𑀼 𑀇𑀤𑀁-𑀲𑀤𑁆𑀤𑀲𑁆𑀲 𑀅𑀢𑁆𑀣𑁂 𑀏𑀯𑀁-𑀲𑀤𑁆𑀤𑁄. 𑀕𑀢-𑀲𑀤𑁆𑀤𑁄 𑀳𑀺 𑀧𑀓𑀸𑀭𑀧𑀭𑀺𑀬𑀸𑀬𑁄, 𑀢𑀣𑀸 𑀯𑀺𑀥𑀸𑀓𑀸𑀭-𑀲𑀤𑁆𑀤𑀸 ¶ 𑀘. 𑀢𑀣𑀸 𑀳𑀺 𑀯𑀺𑀥𑀬𑀼𑀢𑁆𑀢𑀕𑀢-𑀲𑀤𑁆𑀤𑁂 𑀮𑁄𑀓𑀺𑀬𑀸 𑀧𑀓𑀸𑀭𑀢𑁆𑀣𑁂 𑀯𑀤𑀦𑁆𑀢𑀺. ‘‘𑀏𑀯𑀁 𑀦𑀼 𑀔𑁄, 𑀦 𑀦𑀼 𑀔𑁄, 𑀓𑀺𑀁 𑀦𑀼 𑀔𑁄, 𑀓𑀣𑀁 𑀦𑀼 𑀔𑁄’’𑀢𑀺, ‘‘𑀏𑀯𑀁 𑀲𑀼 𑀢𑁂 𑀲𑀼𑀦𑁆𑀳𑀸𑀢𑀸 𑀲𑀼𑀯𑀺𑀮𑀺𑀢𑁆𑀢𑀸 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼, 𑀆𑀫𑀼𑀢𑁆𑀢𑀫𑀸𑀮𑀸𑀪𑀭𑀡𑀸 𑀑𑀤𑀸𑀢𑀯𑀢𑁆𑀣𑀯𑀲𑀦𑀸 𑀧𑀜𑁆𑀘𑀳𑀺 ¶ 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀧𑀭𑀺𑀘𑀸𑀭𑁂𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀢𑁆𑀯𑀁 𑀏𑀢𑀭𑀳𑀺 𑀲𑀸𑀘𑀭𑀺𑀬𑀓𑁄𑀢𑀺? 𑀦𑁄 𑀳𑀺𑀤𑀁 𑀪𑁄 𑀕𑁄𑀢𑀫𑀸’’𑀢𑀺 𑀘 𑀆𑀤𑀻𑀲𑀼 𑀧𑀼𑀘𑁆𑀙𑀸𑀬𑀁. ‘‘𑀏𑀯𑀁 𑀮𑀳𑀼𑀧𑀭𑀺𑀯𑀢𑁆𑀢𑀁, 𑀏𑀯𑀁 𑀆𑀬𑀼𑀧𑀭𑀺𑀬𑀦𑁆𑀢𑁄’’𑀢𑀺 𑀘 𑀆𑀤𑀻𑀲𑀼 𑀧𑀭𑀺𑀫𑀸𑀡𑁂. 𑀦𑀦𑀼 𑀘 ‘‘𑀏𑀯𑀁 𑀦𑀼 𑀔𑁄, 𑀏𑀯𑀁 𑀲𑀼 𑀢𑁂, 𑀏𑀯𑀁 𑀆𑀬𑀼𑀧𑀭𑀺𑀬𑀦𑁆𑀢𑁄’’𑀢𑀺 𑀏𑀢𑁆𑀣 𑀏𑀯𑀁-𑀲𑀤𑁆𑀤𑁂𑀦 𑀧𑀼𑀘𑁆𑀙𑀦𑀸𑀓𑀸𑀭𑀧𑀭𑀺𑀫𑀸𑀡𑀸𑀓𑀸𑀭𑀸𑀦𑀁 𑀯𑀼𑀢𑁆𑀢𑀢𑁆𑀢𑀸 𑀆𑀓𑀸𑀭𑀢𑁆𑀣𑁄 𑀏𑀯 𑀏𑀯𑀁-𑀲𑀤𑁆𑀤𑁄 𑀢𑀺? 𑀦, 𑀯𑀺𑀲𑁂𑀲𑀲𑀩𑁆𑀪𑀸𑀯𑀢𑁄. 𑀆𑀓𑀸𑀭𑀫𑀢𑁆𑀢𑀯𑀸𑀘𑀓𑁄 𑀳𑁂𑀢𑁆𑀣 𑀆𑀓𑀸𑀭𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀬𑀣𑀸 ‘‘𑀏𑀯𑀁 𑀩𑁆𑀬𑀸𑀔𑁄𑀢𑀺𑀆𑀤𑀻𑀲𑀼 𑀧𑀦 𑀦 𑀆𑀓𑀸𑀭𑀯𑀺𑀲𑁂𑀲𑀯𑀸𑀘𑀓𑁄 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀏𑀯𑀁 𑀚𑀸𑀢𑁂𑀦 𑀫𑀘𑁆𑀘𑁂𑀦𑀸’’𑀢𑀺𑀆𑀤𑀻𑀦𑀺 𑀉𑀧𑀫𑀸𑀤𑀻𑀲𑀼 𑀉𑀤𑀸𑀳𑀭𑀡𑀸𑀦𑀺 𑀉𑀧𑀧𑀦𑁆𑀦𑀸𑀦𑀺 𑀳𑁄𑀦𑁆𑀢𑀺. 𑀢𑀣𑀸 𑀳𑀺 ‘‘𑀬𑀣𑀸𑀧𑀺…𑀧𑁂… 𑀩𑀳𑀼’’𑀦𑁆𑀢𑀺? 𑀏𑀢𑁆𑀣 ¶ 𑀧𑀼𑀧𑁆𑀨𑀭𑀸𑀲𑀺𑀝𑁆𑀞𑀸𑀦𑀺𑀬𑀢𑁄 𑀫𑀦𑀼𑀲𑁆𑀲𑀼𑀧𑀧𑀢𑁆𑀢𑀺𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀲𑀤𑁆𑀥𑀫𑁆𑀫𑀲𑀯𑀦𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀪𑁄𑀕𑀲𑀫𑁆𑀧𑀢𑁆𑀢𑀺𑀆𑀤𑀺𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀺𑀭𑀺𑀬𑀸𑀳𑁂𑀢𑀼𑀲𑀫𑀼𑀤𑀸𑀬𑀢𑁄 𑀲𑁄𑀪𑀸𑀲𑀼𑀕𑀦𑁆𑀥𑀢𑀸𑀤𑀺𑀕𑀼𑀡𑀬𑁄𑀕𑀢𑁄 𑀫𑀸𑀮𑀸𑀕𑀼𑀡𑀲𑀤𑀺𑀲𑀺𑀬𑁄 𑀧𑀳𑀽𑀢𑀸 𑀧𑀼𑀜𑁆𑀜𑀓𑀺𑀭𑀺𑀬𑀸 𑀫𑀭𑀺𑀢𑀩𑁆𑀩𑀲𑀪𑀸𑀯𑀢𑀸𑀬 𑀫𑀘𑁆𑀘𑁂𑀦 𑀲𑀢𑁆𑀢𑁂𑀦 𑀓𑀢𑁆𑀢𑀩𑁆𑀩𑀸𑀢𑀺 𑀚𑁄𑀤𑀺𑀢𑀢𑁆𑀢𑀸 𑀧𑀼𑀧𑁆𑀨𑀭𑀸𑀲𑀺𑀫𑀸𑀮𑀸𑀕𑀼𑀡𑀸𑀯 𑀉𑀧𑀫𑀸, 𑀢𑁂𑀲𑀁 𑀉𑀧𑀫𑀸𑀓𑀸𑀭𑁄 𑀬𑀣𑀸-𑀲𑀤𑁆𑀤𑁂𑀦 𑀅𑀦𑀺𑀬𑀫𑀢𑁄 𑀯𑀼𑀢𑁆𑀢𑁄𑀢𑀺 𑀏𑀯𑀁-𑀲𑀤𑁆𑀤𑁄 𑀉𑀧𑀫𑀸𑀓𑀸𑀭𑀦𑀺𑀕𑀫𑀦𑀢𑁆𑀣𑁄𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁. 𑀲𑁄 𑀧𑀦 𑀉𑀧𑀫𑀸𑀓𑀸𑀭𑁄 𑀦𑀺𑀬𑀫𑀺𑀬𑀫𑀸𑀦𑁄 𑀅𑀢𑁆𑀣𑀢𑁄 𑀉𑀧𑀫𑀸𑀯 𑀳𑁄𑀢𑀻𑀢𑀺 𑀆𑀳 ‘‘𑀉𑀧𑀫𑀸𑀬𑀁 𑀆𑀕𑀢𑁄’’𑀢𑀺.

𑀢𑀣𑀸 𑀏𑀯𑀁 𑀇𑀫𑀺𑀦𑀸 𑀆𑀓𑀸𑀭𑁂𑀦 ‘‘𑀅𑀪𑀺𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀉𑀧𑀤𑀺𑀲𑀺𑀬𑀫𑀸𑀦𑀸𑀬 𑀲𑀫𑀡𑀲𑀸𑀭𑀼𑀧𑁆𑀧𑀸𑀬 𑀆𑀓𑀧𑁆𑀧𑀲𑀫𑁆𑀧𑀢𑁆𑀢𑀺𑀬𑀸 𑀬𑁄 𑀢𑀢𑁆𑀣 𑀉𑀧𑀤𑀺𑀲𑀦𑀸𑀓𑀸𑀭𑁄, 𑀲𑁄 𑀅𑀢𑁆𑀣𑀢𑁄 𑀉𑀧𑀤𑁂𑀲𑁄𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀏𑀯𑀁 𑀢𑁂…𑀧𑁂… 𑀉𑀧𑀤𑁂𑀲𑁂’’𑀢𑀺. 𑀢𑀣𑀸 𑀏𑀯𑀫𑁂𑀢𑀁 𑀪𑀕𑀯𑀸, 𑀏𑀯𑀫𑁂𑀢𑀁 𑀲𑀼𑀕𑀢𑀸𑀢𑀺 𑀏𑀢𑁆𑀣 𑀘 𑀪𑀕𑀯𑀢𑀸 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀅𑀯𑀺𑀧𑀭𑀻𑀢𑀢𑁄 𑀚𑀸𑀦𑀦𑁆𑀢𑁂𑀳𑀺 𑀓𑀢𑀁 𑀢𑀢𑁆𑀣 𑀲𑀁𑀯𑀺𑀚𑁆𑀚𑀫𑀸𑀦𑀕𑀼𑀡𑀸𑀦𑀁 𑀧𑀓𑀸𑀭𑁂𑀳𑀺 𑀳𑀁𑀲𑀦𑀁 𑀉𑀤𑀕𑁆𑀕𑀢𑀸𑀓𑀭𑀡𑀁 𑀲𑀫𑁆𑀧𑀳𑀁𑀲𑀦𑀁, 𑀬𑁄 𑀢𑀢𑁆𑀣 𑀲𑀫𑁆𑀧𑀳𑀁𑀲𑀦𑀸𑀓𑀸𑀭𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀫𑁂𑀯𑀁 𑀧𑀦𑀸𑀬𑀦𑁆𑀢𑀺 𑀏𑀢𑁆𑀣 𑀕𑀭𑀳𑀡𑀸𑀓𑀸𑀭𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑁄 𑀘 𑀕𑀭𑀳𑀡𑀸𑀓𑀸𑀭𑁄 ‘‘𑀯𑀲𑀮𑀻’’𑀢𑀺𑀆𑀤𑀺 𑀔𑀼𑀁𑀲𑀦𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀢𑁄 𑀇𑀥 𑀏𑀯𑀁-𑀲𑀤𑁆𑀤𑁂𑀦 𑀧𑀓𑀸𑀲𑀺𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀬𑀣𑀸 ¶ 𑀘𑁂𑀢𑁆𑀣, 𑀏𑀯𑀁 𑀉𑀧𑀫𑀸𑀓𑀸𑀭𑀸𑀤𑀬𑁄𑀧𑀺 𑀉𑀧𑀫𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀸𑀦𑀁 𑀧𑀼𑀧𑁆𑀨𑀭𑀸𑀲𑀺𑀆𑀤𑀺𑀲𑀤𑁆𑀤𑀸𑀦𑀁 𑀲𑀦𑁆𑀦𑀺𑀥𑀸𑀦𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀘 𑀯𑀤𑁂𑀳𑀻𑀢𑀺 ‘‘𑀬𑀣𑀸𑀳𑀁 𑀯𑀤𑀸𑀫𑀺, 𑀏𑀯𑀁 𑀲𑀫𑀡𑀁 𑀆𑀦𑀦𑁆𑀤𑀁 𑀯𑀤𑁂𑀳𑀻’’𑀢𑀺 𑀯𑀤𑀦𑀸𑀓𑀸𑀭𑁄 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑁄 𑀏𑀯𑀁-𑀲𑀤𑁆𑀤𑁂𑀦 𑀦𑀺𑀤𑀲𑁆𑀲𑀻𑀬𑀢𑀻𑀢𑀺 𑀦𑀺𑀤𑀲𑁆𑀲𑀦𑀢𑁆𑀣𑁄 𑀯𑀼𑀢𑁆𑀢𑁄. 𑀏𑀯𑀁 𑀦𑁄𑀢𑀺 𑀏𑀢𑁆𑀣𑀸𑀧𑀺 𑀢𑁂𑀲𑀁 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀳𑀺𑀢𑀤𑀼𑀓𑁆𑀔𑀸𑀯𑀳𑀪𑀸𑀯𑁂 𑀲𑀦𑁆𑀦𑀺𑀝𑁆𑀞𑀸𑀦𑀚𑀦𑀦𑀢𑁆𑀣𑀁 𑀅𑀦𑀼𑀫𑀢𑀺𑀕𑁆𑀕𑀳𑀡𑀯𑀲𑁂𑀦 ‘‘𑀲𑀁𑀯𑀢𑁆𑀢𑀦𑁆𑀢𑀺, 𑀦𑁄 𑀯𑀸, 𑀓𑀣𑀁 𑀯𑀸 𑀏𑀢𑁆𑀣 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀸𑀬 𑀓𑀢𑀸𑀬 ‘‘𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀤𑀸𑀓𑀸𑀭𑀲𑀦𑁆𑀦𑀺𑀝𑁆𑀞𑀸𑀦𑀁 𑀏𑀯𑀁-𑀲𑀤𑁆𑀤𑁂𑀦 𑀯𑀺𑀪𑀸𑀯𑀺𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀲𑁄 𑀧𑀦 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 ¶ 𑀲𑀁𑀯𑀢𑁆𑀢𑀦𑀸𑀓𑀸𑀭𑁄 𑀦𑀺𑀬𑀫𑀺𑀬𑀫𑀸𑀦𑁄 𑀅𑀯𑀥𑀸𑀭𑀡𑀢𑁆𑀣𑁄 ¶ 𑀳𑁄𑀢𑀻𑀢𑀺 𑀆𑀳 ‘‘𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀻𑀢𑀺 𑀆𑀤𑀻𑀲𑀼 𑀅𑀯𑀥𑀸𑀭𑀡𑁂’’𑀢𑀺. 𑀏𑀯𑀁 𑀪𑀦𑁆𑀢𑁂𑀢𑀺 𑀧𑀦 𑀥𑀫𑁆𑀫𑀲𑁆𑀲 𑀲𑀸𑀥𑀼𑀓𑀁 𑀲𑀯𑀦𑀫𑀦𑀲𑀺𑀓𑀸𑀭𑁂 𑀲𑀦𑁆𑀦𑀺𑀬𑁄𑀚𑀺𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀅𑀢𑁆𑀢𑀦𑁄 𑀢𑀢𑁆𑀣 𑀞𑀺𑀢𑀪𑀸𑀯𑀲𑁆𑀲 𑀧𑀝𑀺𑀚𑀸𑀦𑀦𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀏𑀢𑁆𑀣 𑀏𑀯𑀁-𑀲𑀤𑁆𑀤𑁄 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑁄 𑀯𑀼𑀢𑁆𑀢𑁄, 𑀢𑁂𑀦 𑀏𑀯𑀁 𑀪𑀦𑁆𑀢𑁂, 𑀲𑀸𑀥𑀼 𑀪𑀦𑁆𑀢𑁂, 𑀲𑀼𑀝𑁆𑀞𑀼 𑀪𑀦𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀦𑀸𑀦𑀸𑀦𑀬𑀦𑀺𑀧𑀼𑀡𑀦𑁆𑀢𑀺 𑀏𑀓𑀢𑁆𑀢𑀦𑀸𑀦𑀢𑁆𑀢𑀅𑀩𑁆𑀬𑀸𑀧𑀸𑀭𑀏𑀯𑀁𑀥𑀫𑁆𑀫𑀢𑀸𑀲𑀗𑁆𑀔𑀸𑀢𑀸, 𑀦𑀦𑁆𑀤𑀺𑀬𑀸𑀯𑀝𑁆𑀝 𑀢𑀺𑀧𑀼𑀓𑁆𑀔𑀮𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀅𑀗𑁆𑀓𑀼𑀲𑀤𑀺𑀲𑀸𑀮𑁄𑀘𑀦𑀲𑀗𑁆𑀔𑀸𑀢𑀸 𑀯𑀸 𑀆𑀥𑀸𑀭𑀸𑀤𑀺𑀪𑁂𑀤𑀯𑀲𑁂𑀦 𑀦𑀸𑀦𑀸𑀯𑀺𑀥𑀸 𑀦𑀬𑀸 𑀦𑀸𑀦𑀸𑀦𑀬𑀸, 𑀦𑀬𑀸 𑀯𑀸 𑀧𑀸𑀴𑀺𑀕𑀢𑀺𑀬𑁄, 𑀢𑀸 𑀘 𑀧𑀜𑁆𑀜𑀢𑁆𑀢𑀺𑀅𑀦𑀼𑀧𑀜𑁆𑀜𑀢𑁆𑀢𑀺𑀆𑀤𑀺𑀯𑀲𑁂𑀦 𑀲𑀁𑀓𑀺𑀮𑁂𑀪𑀸𑀕𑀺𑀬𑀸𑀤𑀺𑀮𑁄𑀓𑀺𑀬𑀸𑀤𑀺𑀢𑀤𑀼𑀪𑀬𑀯𑁄𑀫𑀺𑀲𑁆𑀲𑀢𑀸𑀤𑀺𑀯𑀲𑁂𑀦 𑀓𑀼𑀲𑀮𑀸𑀤𑀺𑀯𑀲𑁂𑀦 𑀔𑀦𑁆𑀥𑀸𑀤𑀺𑀯𑀲𑁂𑀦 𑀲𑀗𑁆𑀕𑀳𑀸𑀤𑀺𑀯𑀲𑁂𑀦 𑀲𑀫𑀬𑀯𑀺𑀫𑀼𑀢𑁆𑀢𑀸𑀤𑀺𑀯𑀲𑁂𑀦 𑀞𑀧𑀦𑀸𑀤𑀺𑀯𑀲𑁂𑀦 𑀓𑀼𑀲𑀮𑀫𑀽𑀮𑀸𑀤𑀺𑀯𑀲𑁂𑀦 𑀢𑀺𑀓𑀧𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀘 𑀦𑀸𑀦𑀧𑁆𑀧𑀓𑀸𑀭𑀸𑀢𑀺 𑀦𑀸𑀦𑀸𑀦𑀬𑀸, 𑀢𑁂𑀳𑀺 𑀦𑀺𑀧𑀼𑀡𑀁 𑀲𑀡𑁆𑀳𑀲𑀼𑀔𑀼𑀫𑀦𑁆𑀢𑀺 𑀦𑀸𑀦𑀸𑀦𑀬𑀦𑀺𑀧𑀼𑀡𑀁. 𑀆𑀲𑀬𑁄𑀯 𑀅𑀚𑁆𑀛𑀸𑀲𑀬𑁄, 𑀢𑁂 𑀘 𑀲𑀲𑁆𑀲𑀢𑀸𑀤𑀺𑀪𑁂𑀤𑁂𑀦, 𑀢𑀢𑁆𑀣 𑀘 𑀅𑀧𑁆𑀧𑀭𑀚𑀓𑁆𑀔𑀢𑀸𑀤𑀺𑀯𑀲𑁂𑀦 𑀅𑀦𑁂𑀓𑀸, 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀬𑁄 𑀏𑀯 𑀯𑀸 𑀲𑀫𑀼𑀝𑁆𑀞𑀸𑀦𑀁 𑀉𑀧𑁆𑀧𑀢𑁆𑀢𑀺𑀳𑁂𑀢𑀼 𑀏𑀢𑀲𑁆𑀲𑀸𑀢𑀺 𑀅𑀦𑁂𑀓𑀚𑁆𑀛𑀸𑀲𑀬𑀲𑀫𑀼𑀝𑁆𑀞𑀸𑀦𑀁. 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀦𑁆𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀭𑀺𑀧𑀼𑀡𑁆𑀡𑀁 𑀉𑀧𑀦𑁂𑀢𑀩𑁆𑀩𑀸𑀪𑀸𑀯𑀢𑁄, 𑀲𑀗𑁆𑀓𑀸𑀲𑀦𑀧𑀓𑀸𑀲𑀦𑀯𑀺𑀯𑀭𑀡𑀯𑀺𑀪𑀚𑀦𑀉𑀢𑁆𑀢𑀸𑀦𑀻𑀓𑀭𑀡𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀙𑀳𑀺 𑀅𑀢𑁆𑀣𑀧𑀤𑁂𑀳𑀺, 𑀅𑀓𑁆𑀔𑀭𑀧𑀤𑀩𑁆𑀬𑀜𑁆𑀚𑀦𑀸𑀓𑀸𑀭𑀦𑀺𑀭𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀙𑀳𑀺 𑀩𑁆𑀬𑀜𑁆𑀚𑀦𑀧𑀤𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀯𑀺𑀯𑀺𑀥𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀏𑀢𑁆𑀣 𑀧𑀸𑀝𑀺𑀳𑀸𑀭𑀺𑀬𑀧𑀤𑀲𑁆𑀲 𑀯𑀘𑀦𑀢𑁆𑀣𑀁 ‘‘𑀧𑀝𑀺𑀧𑀓𑁆𑀔𑀳𑀭𑀡𑀢𑁄 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀧𑀦𑀬𑀦𑀢𑁄 𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀤𑀦𑁆𑀢𑀺. 𑀪𑀕𑀯𑀢𑁄 𑀧𑀦 𑀧𑀝𑀺𑀧𑀓𑁆𑀔𑀸 𑀭𑀸𑀕𑀸𑀤𑀬𑁄 𑀦 𑀲𑀦𑁆𑀢𑀺, 𑀬𑁂 𑀳𑀭𑀺𑀢𑀩𑁆𑀩𑀸. 𑀧𑀼𑀣𑀼𑀚𑁆𑀚𑀦𑀸𑀦𑀫𑁆𑀧𑀺 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 ¶ 𑀅𑀝𑁆𑀞𑀕𑀼𑀡𑀲𑀫𑀦𑁆𑀦𑀸𑀕𑀢𑁂 𑀘𑀺𑀢𑁆𑀢𑁂 𑀳𑀢𑀧𑀝𑀺𑀧𑀓𑁆𑀔𑁂 𑀇𑀤𑁆𑀥𑀺𑀯𑀺𑀥𑀁 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀧𑀯𑀢𑁆𑀢𑀯𑁄𑀳𑀸𑀭𑁂𑀦 𑀘 𑀦 𑀲𑀓𑁆𑀓𑀸 𑀇𑀥 ‘‘𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀢𑁆𑀢𑀼𑀁. 𑀲𑀘𑁂 𑀧𑀦 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀪𑀕𑀯𑀢𑁄 ¶ 𑀯𑁂𑀦𑁂𑀬𑁆𑀬𑀕𑀢𑀸 𑀘 𑀓𑀺𑀮𑁂𑀲𑀸 𑀧𑀝𑀺𑀧𑀓𑁆𑀔𑀸, 𑀢𑁂𑀲𑀁 𑀳𑀭𑀡𑀢𑁄 ‘‘𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 𑀬𑀼𑀢𑁆𑀢𑀫𑁂𑀢𑀁. 𑀅𑀣 𑀯𑀸 𑀪𑀕𑀯𑀢𑁄 𑀘 𑀲𑀸𑀲𑀦𑀲𑁆𑀲 𑀘 𑀧𑀝𑀺𑀧𑀓𑁆𑀔𑀸 𑀢𑀺𑀢𑁆𑀣𑀺𑀬𑀸, 𑀢𑁂𑀲𑀁 𑀳𑀭𑀡𑀢𑁄 𑀧𑀸𑀝𑀺𑀳𑀸𑀭𑀺𑀬𑀁. 𑀢𑁂 𑀳𑀺 𑀤𑀺𑀝𑁆𑀞𑀺𑀳𑀭𑀡𑀯𑀲𑁂𑀦, 𑀤𑀺𑀝𑁆𑀞𑀺𑀧𑁆𑀧𑀓𑀸𑀲𑀦𑁂 𑀅𑀲𑀫𑀢𑁆𑀣𑀪𑀸𑀯𑁂𑀦 𑀘 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀻𑀳𑀺 𑀳𑀭𑀺𑀢𑀸 𑀅𑀧𑀦𑀻𑀢𑀸 𑀳𑁄𑀦𑁆𑀢𑀻𑀢𑀺. ‘‘𑀧𑀝𑀻’’𑀢𑀺 𑀯𑀸 𑀅𑀬𑀁 𑀲𑀤𑁆𑀤𑁄 ‘‘𑀧𑀘𑁆𑀙𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀩𑁄𑀥𑁂𑀢𑀺 ‘‘𑀢𑀲𑁆𑀫𑀺𑀁 𑀧𑀝𑀺𑀧𑀯𑀺𑀝𑁆𑀞𑀫𑁆𑀳𑀺, 𑀅𑀜𑁆𑀜𑁄 𑀆𑀕𑀜𑁆𑀙𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀻𑀲𑀼 𑀯𑀺𑀬, 𑀢𑀲𑁆𑀫𑀸 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂, 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀘 𑀓𑀢𑀓𑀺𑀘𑁆𑀘𑁂𑀦 𑀧𑀘𑁆𑀙𑀸 𑀳𑀭𑀺𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀧𑀝𑀺𑀳𑀸𑀭𑀺𑀬𑀁, 𑀅𑀢𑁆𑀢𑀦𑁄 𑀯𑀸 𑀉𑀧𑀓𑁆𑀓𑀺𑀮𑁂𑀲𑁂𑀲𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑀕𑁆𑀕𑁂𑀳𑀺 𑀳𑀭𑀺𑀢𑁂𑀲𑀼 𑀧𑀘𑁆𑀙𑀸 𑀳𑀭𑀡𑀁 𑀧𑀝𑀺𑀳𑀸𑀭𑀺𑀬𑀁. 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀺𑀬𑁄 𑀘 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂𑀦, 𑀓𑀢𑀓𑀺𑀘𑁆𑀘𑁂𑀦 𑀘 𑀲𑀢𑁆𑀢𑀳𑀺𑀢𑀢𑁆𑀣𑀁 𑀧𑀼𑀦 𑀧𑀯𑀢𑁆𑀢𑁂𑀢𑀩𑁆𑀩𑀸, 𑀳𑀭𑀺𑀢𑁂𑀲𑀼 𑀘 𑀅𑀢𑁆𑀢𑀦𑁄 𑀉𑀧𑀓𑁆𑀓𑀺𑀮𑁂𑀲𑁂𑀲𑀼 𑀧𑀭𑀲𑀢𑁆𑀢𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑀳𑀭𑀡𑀸𑀦𑀺 ¶ 𑀳𑁄𑀦𑁆𑀢𑀻𑀢𑀺 𑀧𑀝𑀺𑀳𑀸𑀭𑀺𑀬𑀸𑀦𑀺 𑀪𑀯𑀦𑁆𑀢𑀺. 𑀧𑀝𑀺𑀳𑀸𑀭𑀺𑀬𑀫𑁂𑀯 𑀧𑀸𑀝𑀺𑀳𑀸𑀭𑀺𑀬𑀁. 𑀧𑀝𑀺𑀳𑀸𑀭𑀺𑀬𑁂 𑀯𑀸 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀻𑀲𑀫𑀼𑀤𑀸𑀬𑁂 𑀪𑀯𑀁 𑀏𑀓𑁂𑀓𑀁 ‘‘𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀝𑀺𑀳𑀸𑀭𑀺𑀬𑀁 𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀫𑀕𑁆𑀕𑁄 𑀘 𑀧𑀝𑀺𑀧𑀓𑁆𑀔𑀳𑀭𑀡𑀢𑁄, 𑀢𑀢𑁆𑀣 𑀚𑀸𑀢𑀁, 𑀢𑀲𑁆𑀫𑀺𑀁 𑀯𑀸 𑀦𑀺𑀫𑀺𑀢𑁆𑀢𑀪𑀽𑀢𑁂, 𑀢𑀢𑁄 𑀯𑀸 𑀆𑀕𑀢𑀦𑁆𑀢𑀺 𑀧𑀸𑀝𑀺𑀳𑀸𑀭𑀺𑀬𑀁. 𑀢𑀲𑁆𑀲 𑀧𑀦 𑀇𑀤𑁆𑀥𑀺𑀆𑀤𑀺𑀪𑁂𑀤𑁂𑀦 𑀯𑀺𑀲𑀬𑀪𑁂𑀤𑁂𑀦 𑀘 𑀩𑀳𑀼𑀯𑀺𑀥𑀲𑁆𑀲 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀮𑀩𑁆𑀪𑀫𑀸𑀦𑀢𑁆𑀢𑀸 𑀆𑀳 ‘‘𑀯𑀺𑀯𑀺𑀥𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺.

𑀦 𑀅𑀜𑁆𑀜𑀣𑀸𑀢𑀺 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀸𑀓𑀸𑀭𑀢𑁄 𑀦 𑀅𑀜𑁆𑀜𑀣𑀸𑀢𑀺 𑀅𑀢𑁆𑀣𑁄, 𑀦 𑀧𑀦 𑀪𑀕𑀯𑀢𑁄 𑀤𑁂𑀲𑀺𑀢𑀸𑀓𑀸𑀭𑀢𑁄. 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑀸 𑀳𑀺 𑀪𑀕𑀯𑀢𑁄 𑀤𑁂𑀲𑀦𑀸. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀓𑁄 𑀲𑀫𑀢𑁆𑀣𑁄 𑀯𑀺𑀜𑁆𑀜𑀸𑀢𑀼’’𑀦𑁆𑀢𑀺 𑀇𑀤𑀁 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀥𑀸𑀭𑀡𑀩𑀮𑀤𑀲𑁆𑀲𑀦𑀜𑁆𑀘 𑀦 𑀯𑀺𑀭𑀼𑀚𑁆𑀛𑀢𑀺 𑀲𑀼𑀢𑀸𑀓𑀸𑀭𑀸𑀯𑀺𑀭𑀚𑁆𑀛𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀦 𑀳𑁂𑀢𑁆𑀣 𑀅𑀢𑁆𑀣𑀦𑁆𑀢𑀭𑀢𑀸𑀧𑀭𑀺𑀳𑀸𑀭𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀢𑁆𑀣𑀸𑀦𑀁 𑀏𑀓𑀯𑀺𑀲𑀬𑀢𑁆𑀢𑀸, 𑀇𑀢𑀭𑀣𑀸 𑀣𑁂𑀭𑁄 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀲𑀩𑁆𑀩𑀣𑀸 𑀧𑀝𑀺𑀕𑁆𑀕𑀳𑀡𑁂 𑀲𑀫𑀢𑁆𑀣𑁄 𑀅𑀲𑀫𑀢𑁆𑀣𑁄 𑀘𑀸𑀢𑀺 𑀆𑀧𑀚𑁆𑀚𑁂𑀬𑁆𑀬𑀸𑀢𑀺.

‘‘𑀬𑁄 𑀧𑀭𑁄 𑀦 𑀳𑁄𑀢𑀺, 𑀲𑁄 𑀅𑀢𑁆𑀢𑀸’’𑀢𑀺 𑀏𑀯𑀁 ¶ 𑀯𑀼𑀢𑁆𑀢𑀸𑀬 𑀦𑀺𑀬𑀓𑀚𑁆𑀛𑀢𑁆𑀢𑀲𑀗𑁆𑀔𑀸𑀢𑀸𑀬 𑀲𑀲𑀦𑁆𑀢𑀢𑀺𑀬𑀁 𑀯𑀢𑁆𑀢𑀦𑀢𑁄 𑀢𑀺𑀯𑀺𑀥𑁄𑀧𑀺 𑀫𑁂-𑀲𑀤𑁆𑀤𑁄 𑀓𑀺𑀜𑁆𑀘𑀸𑀧𑀺 𑀏𑀓𑀲𑁆𑀫𑀺𑀁𑀬𑁂𑀯 ¶ 𑀅𑀢𑁆𑀣𑁂 𑀤𑀺𑀲𑁆𑀲𑀢𑀺, 𑀓𑀭𑀡𑀲𑀫𑁆𑀧𑀤𑀸𑀦𑀲𑀸𑀫𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀧𑀦 𑀯𑀺𑀚𑁆𑀚𑀫𑀸𑀦𑀪𑁂𑀤𑀁 𑀲𑀦𑁆𑀥𑀸𑀬𑀸𑀳 ‘‘𑀫𑁂-𑀲𑀤𑁆𑀤𑁄 𑀢𑀻𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀻’’𑀢𑀺.

𑀓𑀺𑀜𑁆𑀘𑀸𑀧𑀺 𑀉𑀧𑀲𑀕𑁆𑀕𑁄 𑀓𑀺𑀭𑀺𑀬𑀁 𑀯𑀺𑀲𑁂𑀲𑁂𑀢𑀺, 𑀚𑁄𑀢𑀓𑀪𑀸𑀯𑀢𑁄 𑀧𑀦 𑀲𑀢𑀺𑀧𑀺 𑀢𑀲𑁆𑀫𑀺𑀁 𑀲𑀼𑀢-𑀲𑀤𑁆𑀤𑁄 𑀏𑀯 𑀢𑀁 𑀢𑀫𑀢𑁆𑀣𑀁 𑀅𑀦𑀼𑀯𑀤𑀢𑀻𑀢𑀺 𑀅𑀦𑀼𑀧𑀲𑀕𑁆𑀕𑀲𑁆𑀲 𑀲𑀼𑀢-𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂 𑀲𑀉𑀧𑀲𑀕𑁆𑀕𑀲𑁆𑀲 𑀕𑀳𑀡𑀁 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀉𑀧𑀲𑀕𑁆𑀕𑁄 𑀘 𑀅𑀦𑀼𑀧𑀲𑀕𑁆𑀕𑁄 𑀘𑀸’’𑀢𑀺 𑀆𑀳. 𑀅𑀲𑁆𑀲𑀸𑀢𑀺 𑀲𑀼𑀢-𑀲𑀤𑁆𑀤𑀲𑁆𑀲. 𑀓𑀫𑁆𑀫𑀪𑀸𑀯𑀲𑀸𑀥𑀦𑀸𑀦𑀺 𑀇𑀥 𑀲𑀼𑀢-𑀲𑀤𑁆𑀤𑁂 𑀲𑀫𑁆𑀪𑀯𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀉𑀧𑀥𑀸𑀭𑀺𑀢𑀦𑁆𑀢𑀺 𑀯𑀸 𑀉𑀧𑀥𑀸𑀭𑀡𑀦𑁆𑀢𑀺 𑀯𑀸 𑀅𑀢𑁆𑀣𑁄’’𑀢𑀺. 𑀫𑀬𑀸𑀢𑀺 𑀅𑀢𑁆𑀣𑁂 𑀲𑀢𑀻𑀢𑀺 𑀬𑀤𑀸 𑀫𑁂𑀲𑀤𑁆𑀤𑀲𑁆𑀲 𑀓𑀢𑁆𑀢𑀼𑀯𑀲𑁂𑀦 𑀓𑀭𑀡𑀦𑀺𑀤𑁆𑀤𑁂𑀲𑁄, 𑀢𑀤𑀸𑀢𑀺 𑀅𑀢𑁆𑀣𑁄. 𑀫𑀫𑀸𑀢𑀺 𑀅𑀢𑁆𑀣𑁂 𑀲𑀢𑀻𑀢𑀺 𑀬𑀤𑀸 𑀲𑀫𑁆𑀩𑀦𑁆𑀥𑀯𑀲𑁂𑀦 𑀲𑀸𑀫𑀺𑀦𑀺𑀤𑁆𑀤𑁂𑀲𑁄, 𑀢𑀤𑀸.

𑀲𑀼𑀢𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂 𑀧𑀬𑀼𑀢𑁆𑀢𑁂𑀦 𑀏𑀯𑀁𑀲𑀤𑁆𑀤𑁂𑀦 𑀲𑀯𑀦𑀓𑀺𑀭𑀺𑀬𑀸𑀚𑁄𑀢𑀓𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀏𑀯𑀦𑁆𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀺𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀁 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀤𑀪𑀺𑀦𑀺𑀳𑀝𑀸𑀦𑀜𑁆𑀘 𑀫𑀦𑁄𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑁂𑀲𑀫𑁆𑀧𑀺 𑀯𑀸𑀓𑁆𑀬𑀸𑀦𑀁 𑀏𑀯𑀓𑀸𑀭𑀢𑁆𑀣𑀲𑀳𑀺𑀢𑀢𑁆𑀢𑀸 ‘‘𑀲𑀼𑀢’’𑀦𑁆𑀢𑀺 𑀏𑀢𑀲𑁆𑀲 𑀲𑀼𑀢𑀁 𑀏𑀯𑀸𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀅𑀲𑁆𑀲𑀯𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺, 𑀏𑀢𑁂𑀦 𑀅𑀯𑀥𑀸𑀭𑀡𑁂𑀦 𑀦𑀺𑀭𑀸𑀓𑀢𑀁 𑀤𑀲𑁆𑀲𑁂𑀢𑀺. 𑀬𑀣𑀸 𑀘 𑀲𑀼𑀢𑀁 𑀲𑀼𑀢𑀁 𑀏𑀯𑀸𑀢𑀺 ¶ 𑀦𑀺𑀬𑀫𑁂𑀢𑀩𑁆𑀩𑀁, 𑀢𑀁 𑀲𑀫𑁆𑀫𑀸 𑀲𑀼𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀽𑀦𑀸𑀥𑀺𑀓𑀸𑀯𑀺𑀧𑀭𑀻𑀢𑀕𑁆𑀕𑀳𑀡𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀅𑀣 𑀯𑀸 ‘‘𑀲𑀤𑁆𑀤𑀦𑁆𑀢𑀭𑀢𑁆𑀣𑀸𑀧𑁄𑀳𑀦𑀯𑀲𑁂𑀦 𑀲𑀤𑁆𑀤𑁄 𑀅𑀢𑁆𑀣𑀁 𑀯𑀤𑀢𑀻’’𑀢𑀺 𑀲𑀼𑀢𑀦𑁆𑀢𑀺 𑀅𑀲𑀼𑀢𑀁 𑀦 𑀳𑁄𑀢𑀻𑀢𑀺 𑀅𑀬𑀫𑁂𑀢𑀲𑁆𑀲 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀲𑁆𑀲𑀯𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺, 𑀇𑀫𑀺𑀦𑀸 𑀤𑀺𑀝𑁆𑀞𑀸𑀤𑀺𑀯𑀺𑀦𑀺𑀯𑀢𑁆𑀢𑀦𑀁 𑀓𑀭𑁄𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀇𑀤𑀁 𑀫𑀬𑀸 𑀤𑀺𑀝𑁆𑀞𑀁, 𑀦 𑀲𑀬𑀫𑁆𑀪𑀼𑀜𑀸𑀡𑁂𑀦 𑀲𑀘𑁆𑀙𑀺𑀓𑀢𑀁, 𑀅𑀣 𑀔𑁄 𑀲𑀼𑀢𑀁, 𑀢𑀜𑁆𑀘 𑀔𑁄 𑀲𑀫𑁆𑀫𑀤𑁂𑀯𑀸𑀢𑀺. 𑀢𑁂𑀦𑁂𑀯𑀸𑀳 ‘‘𑀅𑀦𑀽𑀦𑀸𑀥𑀺𑀓𑀸𑀯𑀺𑀧𑀭𑀻𑀢𑀕𑁆𑀕𑀳𑀡𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀅𑀯𑀥𑀸𑀭𑀡𑀢𑁆𑀣𑁂 𑀯𑀸 𑀏𑀯𑀁-𑀲𑀤𑁆𑀤𑁂 𑀅𑀬𑀁 𑀅𑀢𑁆𑀣𑀬𑁄𑀚𑀦𑀸 𑀓𑀭𑀻𑀬𑀢𑀻𑀢𑀺 𑀢𑀤𑀧𑁂𑀓𑁆𑀔𑀲𑁆𑀲 𑀲𑀼𑀢-𑀲𑀤𑁆𑀤𑀲𑁆𑀲 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 ‘‘𑀅𑀲𑁆𑀲𑀯𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺. 𑀢𑁂𑀦𑁂𑀯 𑀆𑀳 ¶ ‘‘𑀅𑀦𑀽𑀦𑀸𑀥𑀺𑀓𑀸𑀯𑀺𑀧𑀭𑀻𑀢𑀕𑁆𑀕𑀳𑀡𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀲𑀯𑀦𑀲𑀤𑁆𑀤𑁄 𑀘𑁂𑀢𑁆𑀣 𑀓𑀫𑁆𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑀲𑀼𑀬𑁆𑀬𑀢𑀻𑀢𑀺.

𑀏𑀯𑀁 𑀲𑀯𑀦𑀳𑁂𑀢𑀼𑀲𑀼𑀡𑀦𑁆𑀢𑀧𑀼𑀕𑁆𑀕𑀮𑀲𑀯𑀦𑀯𑀺𑀲𑁂𑀲𑀯𑀲𑁂𑀦 𑀧𑀤𑀢𑁆𑀢𑀬𑀲𑁆𑀲 𑀏𑀓𑁂𑀦 𑀧𑀓𑀸𑀭𑁂𑀦 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀓𑀸𑀭𑀦𑁆𑀢𑀭𑁂𑀳𑀺𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸 𑀏𑀯’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀲𑁆𑀲𑀸𑀢𑀺 𑀬𑀸 𑀲𑀸 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀥𑀫𑁆𑀫𑀲𑁆𑀲𑀯𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀫𑀦𑁄𑀤𑁆𑀯𑀸𑀭𑀯𑀺𑀜𑁆𑀜𑀸𑀡𑀯𑀻𑀣𑀺, 𑀢𑀲𑁆𑀲𑀸. 𑀲𑀸 𑀳𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 ¶ 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀢𑀼𑀁 𑀲𑀫𑀢𑁆𑀣𑀸. 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦𑀸’’𑀢𑀺. 𑀦𑀸𑀦𑀧𑁆𑀧𑀓𑀸𑀭𑁂𑀦𑀸𑀢𑀺 𑀯𑀓𑁆𑀔𑀫𑀸𑀦𑀸𑀦𑀁 𑀅𑀦𑁂𑀓𑀯𑀺𑀳𑀺𑀢𑀸𑀦𑀁 𑀩𑁆𑀬𑀜𑁆𑀚𑀦𑀢𑁆𑀣𑀕𑁆𑀕𑀳𑀡𑀸𑀦𑀸𑀦𑀸𑀓𑀸𑀭𑁂𑀦, 𑀏𑀢𑁂𑀦 𑀇𑀫𑀺𑀲𑁆𑀲𑀸 𑀬𑁄𑀚𑀦𑀸𑀬 𑀆𑀓𑀸𑀭𑀢𑁆𑀣𑁄 𑀏𑀯𑀁-𑀲𑀤𑁆𑀤𑁄 𑀕𑀳𑀺𑀢𑁄𑀢𑀺 𑀤𑀻𑀧𑁂𑀢𑀺. 𑀧𑀯𑀢𑁆𑀢𑀺𑀪𑀸𑀯𑀧𑁆𑀧𑀓𑀸𑀲𑀦𑀦𑁆𑀢𑀺 𑀧𑀯𑀢𑁆𑀢𑀺𑀬𑀸 𑀅𑀢𑁆𑀣𑀺𑀪𑀸𑀯𑀧𑁆𑀧𑀓𑀸𑀲𑀦𑀁. ‘‘𑀲𑀼𑀢𑀦𑁆𑀢𑀺 𑀥𑀫𑁆𑀫𑀧𑁆𑀧𑀓𑀸𑀲𑀦’’𑀦𑁆𑀢𑀺 𑀬𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀯𑀺𑀜𑁆𑀜𑀸𑀡𑀯𑀻𑀣𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀧𑀯𑀢𑁆𑀢𑀸, 𑀢𑀲𑁆𑀲 𑀥𑀫𑁆𑀫𑀢𑁆𑀢𑀸 𑀯𑀼𑀢𑁆𑀢𑀁, 𑀦 𑀲𑀼𑀢𑀲𑀤𑁆𑀤𑀲𑁆𑀲 𑀥𑀫𑁆𑀫𑀢𑁆𑀣𑀢𑁆𑀢𑀸. 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀸𑀓𑀝𑀻𑀓𑀭𑀡𑀁 ‘‘𑀅𑀬𑀜𑁆𑀳𑁂𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸𑀢𑀺 𑀓𑀭𑀡𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀫𑀬𑀸𑀢𑀺 𑀓𑀢𑁆𑀣𑀼𑀅𑀢𑁆𑀣𑁂.

‘‘𑀏𑀯𑀦𑁆𑀢𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀧𑁆𑀧𑀓𑀸𑀲𑀦’’𑀦𑁆𑀢𑀺 𑀦𑀺𑀤𑀲𑁆𑀲𑀦𑀢𑁆𑀣𑀁 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁 𑀦𑀺𑀤𑀲𑁆𑀲𑁂𑀢𑀩𑁆𑀩𑀲𑁆𑀲 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑁆𑀢𑀸𑀪𑀸𑀯𑀸𑀪𑀸𑀯𑀢𑁄, 𑀢𑁂𑀦 𑀏𑀯𑀁-𑀲𑀤𑁆𑀤𑁂𑀦 𑀲𑀓𑀮𑀫𑁆𑀧𑀺 𑀲𑀼𑀢𑁆𑀢𑀁 𑀧𑀘𑁆𑀘𑀸𑀫𑀝𑁆𑀞𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀼𑀢-𑀲𑀤𑁆𑀤𑀲𑁆𑀲 𑀓𑀺𑀭𑀺𑀬𑀸𑀲𑀤𑁆𑀤𑀢𑁆𑀢𑀸, 𑀲𑀯𑀦𑀓𑀺𑀭𑀺𑀬𑀸𑀬 𑀘 𑀲𑀸𑀥𑀸𑀭𑀡𑀯𑀺𑀜𑁆𑀜𑀸𑀡𑀧𑁆𑀧𑀩𑀦𑁆𑀥𑀧𑀝𑀺𑀩𑀤𑁆𑀥𑀢𑁆𑀢𑀸 𑀢𑀢𑁆𑀣 𑀘 𑀧𑀼𑀕𑁆𑀕𑀮𑀯𑁄𑀳𑀸𑀭𑁄𑀢𑀺 𑀯𑀼𑀢𑁆𑀢𑀁 ‘‘𑀲𑀼𑀢𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀧𑁆𑀧𑀓𑀸𑀲𑀦’’𑀦𑁆𑀢𑀺. 𑀦 𑀳𑀺 𑀧𑀼𑀕𑁆𑀕𑀮𑀯𑁄𑀳𑀸𑀭𑀭𑀳𑀺𑀢𑁂 𑀥𑀫𑁆𑀫𑀧𑁆𑀧𑀩𑀦𑁆𑀥𑁂 𑀲𑀯𑀦𑀓𑀺𑀭𑀺𑀬𑀸 𑀮𑀩𑁆𑀪𑀢𑀻𑀢𑀺.

‘‘𑀬𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲𑀸’’𑀢𑀺𑀆𑀤𑀺𑀧𑀺 𑀆𑀓𑀸𑀭𑀢𑁆𑀣𑀫𑁂𑀯 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀧𑀼𑀭𑀺𑀫𑀬𑁄𑀚𑀦𑀸𑀬 𑀅𑀜𑁆𑀜𑀣𑀸 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀓𑀸𑀭𑀧𑀜𑁆𑀜𑀢𑁆𑀢𑀻𑀢𑀺 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀏𑀯, 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑀼𑀧𑀸𑀤𑀸𑀦𑀯𑀲𑁂𑀦 𑀢𑀣𑀸 𑀯𑀼𑀢𑁆𑀢𑀸. ‘‘𑀲𑀼𑀢𑀦𑁆𑀢𑀺 𑀯𑀺𑀲𑀬𑀦𑀺𑀤𑁆𑀤𑁂𑀲𑁄’’𑀢𑀺 𑀲𑁄𑀢𑀩𑁆𑀩𑀪𑀽𑀢𑁄 𑀥𑀫𑁆𑀫𑁄 𑀲𑀯𑀦𑀓𑀺𑀭𑀺𑀬𑀸𑀓𑀢𑁆𑀢𑀼𑀧𑀼𑀕𑁆𑀕𑀮𑀲𑁆𑀲 𑀲𑀯𑀦𑀓𑀺𑀭𑀺𑀬𑀸𑀯𑀲𑁂𑀦 𑀧𑀯𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀲𑀦𑁆𑀢𑀸𑀦𑀯𑀺𑀦𑀺𑀫𑀼𑀢𑁆𑀢𑀲𑁆𑀲 ¶ 𑀧𑀭𑀫𑀢𑁆𑀣𑀢𑁄 ¶ 𑀓𑀲𑁆𑀲𑀘𑀺 𑀓𑀢𑁆𑀢𑀼 𑀅𑀪𑀸𑀯𑁂𑀧𑀺 𑀲𑀤𑁆𑀤𑀯𑁄𑀳𑀸𑀭𑁂𑀦 𑀩𑀼𑀤𑁆𑀥𑀺𑀧𑀭𑀺𑀓𑀧𑁆𑀧𑀺𑀢𑀪𑁂𑀤𑀯𑀘𑀦𑀺𑀘𑁆𑀙𑀸𑀬 𑀘𑀺𑀢𑁆𑀢𑀲𑀦𑁆𑀢𑀸𑀦𑀢𑁄 𑀅𑀜𑁆𑀜𑀁 𑀯𑀺𑀬 𑀢𑀁𑀲𑀫𑀗𑁆𑀕𑀺𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀦 𑀢𑀁𑀲𑀫𑀗𑁆𑀕𑀺𑀦𑁄’’𑀢𑀺. 𑀲𑀯𑀦𑀓𑀺𑀭𑀺𑀬𑀸𑀯𑀺𑀲𑀬𑁄𑀧𑀺 𑀲𑁄𑀢𑀩𑁆𑀩𑀥𑀫𑁆𑀫𑁄 𑀲𑀯𑀦𑀓𑀺𑀭𑀺𑀬𑀸𑀯𑀲𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀇𑀥 𑀧𑀭𑀫𑀢𑁆𑀣𑀢𑁄 𑀓𑀢𑁆𑀢𑀼𑀪𑀸𑀯𑀢𑁄, 𑀲𑀯𑀦𑀯𑀲𑁂𑀦 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀏𑀯 𑀯𑀸 𑀲𑀯𑀦𑀓𑀺𑀭𑀺𑀬𑀸𑀪𑀸𑀯𑀢𑁄 𑀢𑀁𑀓𑀺𑀭𑀺𑀬𑀸𑀓𑀢𑁆𑀢𑀼 𑀘 𑀯𑀺𑀲𑀬𑁄 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀢𑀁𑀲𑀫𑀗𑁆𑀕𑀺𑀦𑁄 𑀓𑀢𑁆𑀢𑀼 𑀯𑀺𑀲𑀬𑁂’’𑀢𑀺. 𑀲𑀼𑀢𑀸𑀓𑀸𑀭𑀲𑁆𑀲 𑀘 𑀣𑁂𑀭𑀲𑁆𑀲 𑀲𑀫𑁆𑀫𑀸𑀦𑀺𑀘𑁆𑀙𑀺𑀢𑀪𑀸𑀯𑀢𑁄 𑀆𑀳 ‘‘𑀕𑀳𑀡𑀲𑀦𑁆𑀦𑀺𑀝𑁆𑀞𑀸𑀦’’𑀦𑁆𑀢𑀺, 𑀏𑀢𑁂𑀦 𑀯𑀸 𑀅𑀯𑀥𑀸𑀭𑀡𑀢𑁆𑀣𑀁 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀅𑀬𑀁 𑀅𑀢𑁆𑀣𑀬𑁄𑀚𑀦𑀸 𑀓𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀼𑀩𑁆𑀩𑁂 ¶ 𑀲𑀼𑀢𑀸𑀦𑀁 𑀦𑀸𑀦𑀸𑀯𑀺𑀳𑀺𑀢𑀸𑀦𑀁 𑀲𑀼𑀢𑁆𑀢𑀲𑀗𑁆𑀔𑀸𑀢𑀸𑀦𑀁 𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀦𑀁 𑀉𑀧𑀥𑀸𑀭𑀺𑀢𑀭𑀽𑀧𑀲𑁆𑀲 𑀆𑀓𑀸𑀭𑀲𑁆𑀲 𑀦𑀺𑀤𑀲𑁆𑀲𑀦𑀲𑁆𑀲 𑀅𑀯𑀥𑀸𑀭𑀡𑀲𑁆𑀲 𑀯𑀸 𑀧𑀓𑀸𑀲𑀦𑀲𑀪𑀸𑀯𑁄 𑀏𑀯𑀁-𑀲𑀤𑁆𑀤𑁄𑀢𑀺 𑀢𑀤𑀸𑀓𑀸𑀭𑀸𑀤𑀺𑀉𑀧𑀥𑀸𑀭𑀡𑀲𑁆𑀲 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀦𑀪𑀽𑀢𑀥𑀫𑁆𑀫𑀧𑁆𑀧𑀩𑀦𑁆𑀥𑀩𑁆𑀬𑀸𑀧𑀸𑀭𑀢𑀸𑀬 𑀯𑀼𑀢𑁆𑀢𑀁 ‘‘𑀏𑀯𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄’’𑀢𑀺. 𑀲𑀯𑀦𑀓𑀺𑀭𑀺𑀬𑀸 𑀧𑀦 𑀧𑀼𑀕𑁆𑀕𑀮𑀯𑀸𑀤𑀺𑀦𑁄𑀧𑀺 𑀯𑀺𑀜𑁆𑀜𑀸𑀡𑀦𑀺𑀭𑀧𑁂𑀓𑁆𑀔𑀸 𑀦𑀢𑁆𑀣𑀻𑀢𑀺 𑀯𑀺𑀲𑁂𑀲𑀢𑁄 𑀯𑀺𑀜𑁆𑀜𑀸𑀡𑀩𑁆𑀬𑀸𑀧𑀸𑀭𑁄𑀢𑀺 𑀆𑀳 ‘‘𑀲𑀼𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄’’𑀢𑀺. 𑀫𑁂𑀢𑀺 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀬𑀸 𑀏𑀓𑀦𑁆𑀢𑁂𑀦𑁂𑀯 𑀲𑀢𑁆𑀢𑀯𑀺𑀲𑀬𑀢𑁆𑀢𑀸, 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀲𑁆𑀲 𑀘 𑀢𑀢𑁆𑀣𑁂𑀯 𑀲𑀫𑁄𑀤𑀳𑀺𑀢𑀩𑁆𑀩𑀢𑁄 ‘‘𑀫𑁂𑀢𑀺 𑀉𑀪𑀬𑀓𑀺𑀘𑁆𑀘𑀬𑀼𑀢𑁆𑀢𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑁄’’𑀢𑀺 𑀯𑀼𑀢𑁆𑀢𑀁. 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀲𑀪𑀸𑀯𑀸 𑀬𑀣𑀸𑀓𑁆𑀓𑀫𑀁 𑀏𑀯𑀁-𑀲𑀤𑁆𑀤 𑀲𑀼𑀢-𑀲𑀤𑁆𑀤𑀸𑀦𑀁 𑀅𑀢𑁆𑀣𑀸𑀢𑀺 𑀢𑁂 𑀢𑀣𑀸𑀭𑀽𑀧𑀧𑀜𑁆𑀜𑀢𑁆𑀢𑀺𑀉𑀧𑀸𑀤𑀸𑀦𑀩𑁆𑀬𑀸𑀧𑀸𑀭𑀪𑀸𑀯𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀯𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄. 𑀲𑀼𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄’’𑀢𑀺. 𑀏𑀢𑁆𑀣 𑀘 𑀓𑀭𑀡𑀓𑀺𑀭𑀺𑀬𑀸𑀓𑀢𑁆𑀢𑀼𑀓𑀫𑁆𑀫𑀯𑀺𑀲𑁂𑀲𑀧𑁆𑀧𑀓𑀸𑀲𑀦𑀯𑀲𑁂𑀦 𑀧𑀼𑀕𑁆𑀕𑀮𑀩𑁆𑀬𑀸𑀧𑀸𑀯𑀺𑀲𑀬𑀧𑀼𑀕𑁆𑀕𑀮𑀩𑁆𑀬𑀸𑀧𑀸𑀭𑀦𑀺𑀤𑀲𑁆𑀲𑀦𑀯𑀲𑁂𑀦 𑀕𑀳𑀡𑀸𑀓𑀸𑀭𑀕𑀸𑀳𑀓𑀢𑀩𑁆𑀩𑀺𑀲𑀬𑀯𑀺𑀲𑁂𑀲𑀦𑀺𑀤𑁆𑀤𑁂𑀲𑀯𑀲𑁂𑀦 𑀓𑀢𑁆𑀢𑀼𑀓𑀭𑀡 𑀩𑁆𑀬𑀸𑀧𑀸𑀭𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑀯𑀲𑁂𑀦 𑀘 𑀤𑀼𑀢𑀺𑀬𑀸𑀤𑀬𑁄 𑀘𑀢𑀲𑁆𑀲𑁄 𑀅𑀢𑁆𑀣𑀬𑁄𑀚𑀦𑀸 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀩𑁆𑀩𑀲𑁆𑀲𑀸𑀧𑀺 ¶ 𑀲𑀤𑁆𑀤𑀸𑀥𑀺𑀕𑀫𑀦𑀻𑀬𑀲𑁆𑀲 𑀅𑀢𑁆𑀣𑀲𑁆𑀲 𑀧𑀜𑁆𑀜𑀢𑁆𑀢𑀺𑀫𑀼𑀔𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸, 𑀲𑀩𑁆𑀩𑀧𑀜𑁆𑀜𑀢𑁆𑀢𑀻𑀦𑀜𑁆𑀘 𑀯𑀺𑀚𑁆𑀚𑀫𑀸𑀦𑀸𑀤𑀺𑀯𑀲𑁂𑀦 𑀙𑀲𑀼 𑀧𑀜𑁆𑀜𑀢𑁆𑀢𑀺𑀪𑁂𑀤𑁂𑀲𑀼 𑀅𑀦𑁆𑀢𑁄𑀕𑀥𑀢𑁆𑀢𑀸 𑀢𑁂𑀲𑀼 ‘‘𑀏𑀯’’𑀦𑁆𑀢𑀺𑀆𑀤𑀻𑀦𑀁 𑀧𑀜𑁆𑀜𑀢𑁆𑀢𑀻𑀦𑀁 𑀲𑀭𑀽𑀧𑀁 𑀦𑀺𑀤𑁆𑀥𑀸𑀭𑁂𑀦𑁆𑀢𑁄 𑀆𑀳 ‘‘𑀏𑀯𑀦𑁆𑀢𑀺 𑀘 𑀫𑁂𑀢𑀺 𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀏𑀯𑀦𑁆𑀢𑀺 𑀘 𑀫𑁂𑀢𑀺 𑀘 𑀯𑀼𑀘𑁆𑀘𑀫𑀸𑀦𑀲𑁆𑀲 𑀅𑀢𑁆𑀣𑀲𑁆𑀲 𑀆𑀓𑀸𑀭𑀸𑀤𑀺𑀦𑁄, 𑀥𑀫𑁆𑀫𑀸𑀦𑀜𑁆𑀘 𑀅𑀲𑀮𑁆𑀮𑀓𑁆𑀔𑀡𑀪𑀸𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑁄𑀢𑀺 𑀆𑀳 ‘‘𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺. 𑀢𑀢𑁆𑀣 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦𑀸𑀢𑀺 𑀪𑀽𑀢𑀢𑁆𑀣𑀉𑀢𑁆𑀢𑀫𑀢𑁆𑀣𑀯𑀲𑁂𑀦. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺𑀬𑁄 𑀫𑀸𑀬𑀸𑀫𑀭𑀻𑀘𑀺𑀆𑀤𑀬𑁄 𑀯𑀺𑀬 𑀅𑀪𑀽𑀢𑀢𑁆𑀣𑁄, 𑀅𑀦𑀼𑀲𑁆𑀲𑀯𑀸𑀤𑀻𑀳𑀺 𑀕𑀳𑁂𑀢𑀩𑁆𑀩𑁄 𑀯𑀺𑀬 𑀅𑀦𑀼𑀢𑁆𑀢𑀫𑀢𑁆𑀣𑁄 𑀘 𑀦 𑀳𑁄𑀢𑀺, 𑀲𑁄 𑀭𑀽𑀧𑀲𑀤𑁆𑀤𑀸𑀤𑀺𑀲𑀪𑀸𑀯𑁄 𑀭𑀼𑀧𑁆𑀧𑀦𑀸𑀦𑀼𑀪𑀯𑀦𑀸𑀤𑀺𑀲𑀪𑀸𑀯𑁄 𑀯𑀸 𑀅𑀢𑁆𑀣𑁄 ‘‘𑀲𑀘𑁆𑀘𑀺𑀓𑀝𑁆𑀞𑁄, 𑀧𑀭𑀫𑀢𑁆𑀣 𑀘𑀸’’𑀢𑀺 𑀯𑀼𑀘𑁆𑀘𑀢𑀺, 𑀦 𑀢𑀣𑀸 𑀏𑀯𑀁 𑀫𑁂𑀢𑀺 𑀧𑀤𑀸𑀦𑀫𑀢𑁆𑀣𑁄𑀢𑀺, 𑀏𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀓𑀺𑀜𑁆𑀳𑁂𑀢𑁆𑀣 𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀼𑀢𑀦𑁆𑀢𑀺 𑀧𑀦 𑀲𑀤𑁆𑀤𑀸𑀬𑀢𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺. 𑀢𑁂𑀦𑁂𑀯 𑀳𑀺 ‘‘𑀬𑀜𑁆𑀳𑀺 𑀢𑀫𑁂𑀢𑁆𑀣 𑀲𑁄𑀢𑁂𑀦 𑀉𑀧𑀮𑀤𑁆𑀥’’𑀦𑁆𑀢𑀺 𑀯𑀼𑀢𑁆𑀢𑀁 ¶ , ‘‘𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀉𑀧𑀮𑀤𑁆𑀥’’𑀦𑁆𑀢𑀺 𑀧𑀦 𑀯𑀼𑀢𑁆𑀢𑁂 𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀤𑀺𑀲𑀩𑁆𑀩𑀁 𑀮𑀩𑁆𑀪𑀢𑀺. 𑀢𑀁 𑀢𑀁 𑀉𑀧𑀸𑀤𑀸𑀬 𑀯𑀢𑁆𑀢𑀩𑁆𑀩𑀢𑁄𑀢𑀺 𑀲𑁄𑀢𑀧𑀣𑀁 𑀆𑀕𑀢𑁂 𑀥𑀫𑁆𑀫𑁂 𑀉𑀧𑀸𑀤𑀸𑀬 𑀢𑁂𑀲𑀁 𑀉𑀧𑀥𑀸𑀭𑀺𑀢𑀸𑀓𑀸𑀭𑀸𑀤𑀺𑀦𑁄 𑀧𑀘𑁆𑀘𑀸𑀫𑀲𑀦𑀯𑀲𑁂𑀦 ‘‘𑀏𑀯’’𑀦𑁆𑀢𑀺, 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁂 𑀔𑀦𑁆𑀥𑁂 𑀉𑀧𑀸𑀤𑀸𑀬 ‘‘𑀫𑁂’’𑀢𑀺 ¶ 𑀯𑀢𑁆𑀢𑀩𑁆𑀩𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀸𑀤𑀺𑀲𑀪𑀸𑀯𑀭𑀳𑀺𑀢𑁂 𑀲𑀤𑁆𑀤𑀸𑀬𑀢𑀦𑁂 𑀧𑀯𑀢𑁆𑀢𑀫𑀸𑀦𑁄𑀧𑀺 𑀲𑀼𑀢𑀯𑁄𑀳𑀸𑀭𑁄 ‘‘𑀤𑀼𑀢𑀺𑀬𑀁 𑀢𑀢𑀺𑀬’’𑀦𑁆𑀢𑀺𑀆𑀤𑀺𑀓𑁄 𑀯𑀺𑀬 𑀧𑀞𑀫𑀸𑀤𑀻𑀦𑀺 𑀤𑀺𑀝𑁆𑀞𑀫𑀼𑀢𑀯𑀺𑀜𑁆𑀜𑀸𑀢𑁂 𑀅𑀧𑁂𑀓𑁆𑀔𑀺𑀢𑁆𑀯𑀸 𑀧𑀯𑀢𑁆𑀢𑁄𑀢𑀺 𑀆𑀳 ‘‘𑀤𑀺𑀝𑁆𑀞𑀸𑀤𑀻𑀦𑀺 𑀉𑀧𑀦𑀺𑀥𑀸𑀬 𑀯𑀢𑁆𑀢𑀩𑁆𑀩𑀢𑁄’’𑀢𑀺. 𑀅𑀲𑀼𑀢𑀁 𑀦 𑀳𑁄𑀢𑀻𑀢𑀺 𑀳𑀺 ‘‘𑀲𑀼𑀢’’𑀦𑁆𑀢𑀺 𑀧𑀓𑀸𑀲𑀺𑀢𑁄 𑀬𑀫𑀢𑁆𑀣𑁄𑀢𑀺.

𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀸 𑀲𑀼𑀢𑁆𑀢𑀲𑁆𑀲 𑀧𑀓𑀸𑀭𑀯𑀺𑀲𑁂𑀲𑀸 ‘‘𑀏𑀯’’𑀦𑁆𑀢𑀺 𑀣𑁂𑀭𑁂𑀦 𑀧𑀘𑁆𑀘𑀸𑀫𑀝𑁆𑀞𑀸𑀢𑀺 𑀆𑀳 ‘‘𑀅𑀲𑀫𑁆𑀫𑁄𑀳𑀁 𑀤𑀻𑀧𑁂𑀢𑀻’’𑀢𑀺. ‘‘𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀲𑀫𑀢𑁆𑀣𑁄 𑀳𑁄𑀢𑀻’’𑀢𑀺 𑀏𑀢𑁂𑀦 𑀯𑀓𑁆𑀔𑀫𑀸𑀦𑀲𑁆𑀲 𑀲𑀼𑀢𑁆𑀢𑀲𑁆𑀲 𑀦𑀸𑀦𑀧𑁆𑀧𑀓𑀸𑀭𑀢𑀁 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀢𑀜𑁆𑀘 𑀤𑀲𑁆𑀲𑁂𑀢𑀺. ‘‘𑀲𑀼𑀢𑀲𑁆𑀲 𑀅𑀲𑀫𑁆𑀫𑁄𑀲𑀁 𑀤𑀻𑀧𑁂𑀢𑀻’’𑀢𑀺 𑀲𑀼𑀢𑀸𑀓𑀸𑀭𑀲𑁆𑀲 𑀬𑀸𑀣𑀸𑀯𑀢𑁄 𑀤𑀲𑁆𑀲𑀺𑀬𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀅𑀲𑀫𑁆𑀫𑁄𑀳𑁂𑀦𑀸𑀢𑀺 𑀲𑀫𑁆𑀫𑁄𑀳𑀸𑀪𑀸𑀯𑁂𑀦, 𑀧𑀜𑁆𑀜𑀸𑀬 𑀏𑀯 ¶ 𑀯𑀸 𑀲𑀯𑀦𑀓𑀸𑀮𑀲𑀫𑁆𑀪𑀽𑀢𑀸𑀬 𑀢𑀤𑀼𑀢𑁆𑀢𑀭𑀓𑀸𑀮𑀧𑀜𑁆𑀜𑀸𑀲𑀺𑀤𑁆𑀥𑀺, 𑀏𑀯𑀁 𑀅𑀲𑀫𑁆𑀫𑁄𑀲𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀯𑀢𑁆𑀢𑀩𑁆𑀩𑀁. 𑀩𑁆𑀬𑀜𑁆𑀚𑀦𑀸𑀦𑀁 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄 𑀆𑀓𑀸𑀭𑁄 𑀦𑀸𑀢𑀺𑀕𑀫𑁆𑀪𑀻𑀭𑁄, 𑀬𑀣𑀸𑀲𑀼𑀢𑀥𑀸𑀭𑀡𑀫𑁂𑀯 𑀢𑀢𑁆𑀣 𑀓𑀭𑀡𑀻𑀬𑀦𑁆𑀢𑀺 𑀲𑀢𑀺𑀬𑀸 𑀩𑁆𑀬𑀸𑀧𑀸𑀭𑁄 𑀅𑀥𑀺𑀓𑁄, 𑀧𑀜𑁆𑀜𑀸 𑀢𑀢𑁆𑀣 𑀕𑀼𑀡𑀻𑀪𑀽𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀸𑀬𑀸’’𑀢𑀺𑀆𑀤𑀺 𑀧𑀜𑁆𑀜𑀸𑀬 𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀓𑀢𑁆𑀯𑀸. 𑀧𑀼𑀩𑁆𑀩𑀗𑁆𑀕𑀫𑀢𑀸 𑀘𑁂𑀢𑁆𑀣 𑀧𑀥𑀸𑀦𑀪𑀸𑀯𑁄 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸’’𑀢𑀺𑀆𑀤𑀻𑀲𑀼 𑀯𑀺𑀬, 𑀧𑀼𑀩𑁆𑀩𑀗𑁆𑀕𑀫𑀢𑀸𑀬 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀆𑀯𑀚𑁆𑀚𑀦𑀸𑀤𑀻𑀦𑀁 𑀯𑀺𑀬 𑀅𑀧𑁆𑀧𑀥𑀸𑀦𑀢𑁆𑀢𑁂 𑀧𑀜𑁆𑀜𑀸 𑀧𑀼𑀩𑁆𑀩𑀗𑁆𑀕𑀫𑀸 𑀏𑀢𑀺𑀲𑁆𑀲𑀸𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺, 𑀏𑀯𑀁 ‘‘𑀲𑀢𑀺𑀧𑀼𑀩𑁆𑀩𑀗𑁆𑀕𑀫𑀸𑀬𑀸’’𑀢𑀺 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀬𑀣𑀸𑀲𑀫𑁆𑀪𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀲𑁆𑀲𑀸𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀭𑀺𑀧𑀼𑀡𑁆𑀡𑀲𑁆𑀲, 𑀲𑀗𑁆𑀓𑀸𑀲𑀦𑀧𑀓𑀸𑀲𑀦𑀯𑀺𑀯𑀭𑀡𑀯𑀺𑀪𑀚𑀦𑀉𑀢𑁆𑀢𑀸𑀦𑀻𑀓𑀭𑀡𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀙𑀳𑀺 𑀅𑀢𑁆𑀣𑀧𑀤𑁂𑀳𑀺, 𑀅𑀓𑁆𑀔𑀭𑀧𑀤𑀩𑁆𑀬𑀜𑁆𑀚𑀦𑀸𑀓𑀸𑀭𑀦𑀺𑀭𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀙𑀳𑀺 𑀩𑁆𑀬𑀜𑁆𑀚𑀦𑀧𑀤𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑀲𑁆𑀲𑀸𑀢𑀺 𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀤𑀻𑀧𑁂𑀢𑀻𑀢𑀺 𑀏𑀯𑀁-𑀲𑀤𑁆𑀤𑁂𑀦 𑀯𑀼𑀘𑁆𑀘𑀫𑀸𑀦𑀸𑀦𑀁 𑀆𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑀢𑁆𑀣𑀸𑀦𑀁 𑀅𑀯𑀺𑀧𑀭𑀻𑀢𑀲𑀤𑁆𑀥𑀫𑁆𑀫𑀯𑀺𑀲𑀬𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀯𑀺𑀓𑁆𑀔𑁂𑀧𑀁 𑀤𑀻𑀧𑁂𑀢𑀻’’𑀢𑀺 ‘‘𑀩𑁆𑀭𑀳𑁆𑀫𑀚𑀸𑀮𑀁 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺𑀆𑀤𑀺 𑀧𑀼𑀘𑁆𑀙𑀸𑀯𑀲𑁂𑀦 𑀧𑀓𑀭𑀡𑀧𑁆𑀧𑀢𑁆𑀢𑀲𑁆𑀲 𑀯𑀓𑁆𑀔𑀫𑀸𑀦𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀯𑀦𑀁 𑀲𑀫𑀸𑀥𑀸𑀦𑀫𑀦𑁆𑀢𑀭𑁂𑀦 𑀦 𑀲𑀫𑁆𑀪𑀯𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. ‘‘𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺 𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀲𑀫𑀢𑁆𑀣𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀤𑁂𑀲𑀓𑀧𑀬𑁄𑀚𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸. 𑀅𑀯𑀺𑀧𑀭𑀻𑀢𑀲𑀤𑁆𑀥𑀫𑁆𑀫𑀯𑀺𑀲𑀬𑁂𑀳𑀺 𑀯𑀺𑀬 𑀆𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑀢𑁆𑀣𑁂𑀳𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑁂𑀦 𑀯𑀺𑀬 𑀘 𑀅𑀯𑀺𑀓𑁆𑀔𑁂𑀧𑀲𑁆𑀲 𑀬𑀣𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 ¶ 𑀨𑀮𑀪𑀽𑀢𑁂𑀦 ¶ 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸𑀦𑀁 𑀲𑀺𑀤𑁆𑀥𑀺 𑀯𑀼𑀢𑁆𑀢𑀸 𑀢𑀤𑀯𑀺𑀦𑀸𑀪𑀸𑀯𑀢𑁄, 𑀏𑀯𑀁 𑀅𑀯𑀺𑀓𑁆𑀔𑁂𑀧𑁂𑀦 𑀨𑀮𑀪𑀽𑀢𑁂𑀦 𑀓𑀸𑀭𑀡𑀪𑀽𑀢𑀸𑀦𑀁 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀦𑀁 𑀲𑀺𑀤𑁆𑀥𑀺 𑀤𑀲𑁆𑀲𑁂𑀢𑀩𑁆𑀩𑀸 𑀲𑀺𑀬𑀸 𑀅𑀲𑁆𑀲𑀼𑀢𑀯𑀢𑁄, 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀭𑀳𑀺𑀢𑀲𑁆𑀲 𑀘 𑀢𑀤𑀪𑀸𑀯𑀢𑁄.

‘‘𑀦 ¶ 𑀳𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀲𑀫𑀢𑁆𑀣𑀦𑀯𑀘𑀦𑁂𑀦 𑀧𑀦 𑀅𑀯𑀺𑀓𑁆𑀔𑁂𑀧𑁂𑀦 𑀓𑀸𑀭𑀡𑀪𑀽𑀢𑁂𑀦 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁂𑀦 𑀘 𑀨𑀮𑀪𑀽𑀢𑀲𑁆𑀲 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀲𑀺𑀤𑁆𑀥𑀺 𑀤𑀲𑁆𑀲𑀺𑀢𑀸. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀬𑀼𑀢𑁆𑀢𑁄 𑀲𑀺𑀬𑀸𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸 𑀦 𑀏𑀓𑀦𑁆𑀢𑁂𑀦 𑀅𑀯𑀺𑀓𑁆𑀔𑁂𑀧𑀲𑁆𑀲 𑀓𑀸𑀭𑀡𑀁 𑀩𑀸𑀳𑀺𑀭𑀗𑁆𑀕𑀢𑁆𑀢𑀸, 𑀅𑀯𑀺𑀓𑁆𑀔𑁂𑀧𑁄 𑀧𑀦 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁄 𑀯𑀺𑀬 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀏𑀓𑀦𑁆𑀢𑀓𑀸𑀭𑀡𑀦𑁆𑀢𑀺. 𑀏𑀯𑀫𑁆𑀧𑀺 𑀅𑀯𑀺𑀓𑁆𑀔𑁂𑀧𑁂𑀦 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀲𑀺𑀤𑁆𑀥𑀺𑀚𑁄𑀢𑀦𑀸 𑀦 𑀲𑀫𑀢𑁆𑀣𑀺𑀢𑀸𑀯, 𑀦𑁄 𑀦 𑀲𑀫𑀢𑁆𑀣𑀺𑀢𑀸 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸𑀦𑀁 𑀲𑀧𑁆𑀧𑀼𑀭𑀺𑀲𑀧𑀬𑀺𑀭𑀼𑀧𑀸𑀲𑀦𑀸𑀪𑀸𑀯𑀲𑁆𑀲 𑀅𑀢𑁆𑀣𑀲𑀺𑀤𑁆𑀥𑀢𑁆𑀢𑀸. 𑀏𑀢𑁆𑀣 𑀘 𑀧𑀼𑀭𑀺𑀫𑀁 𑀨𑀮𑁂𑀦 𑀓𑀸𑀭𑀡𑀲𑁆𑀲 𑀲𑀺𑀤𑁆𑀥𑀺𑀤𑀲𑁆𑀲𑀦𑀁 𑀦𑀤𑀻𑀧𑀽𑀭𑁂𑀦 𑀯𑀺𑀬 𑀉𑀧𑀭𑀺 𑀯𑀼𑀝𑁆𑀞𑀺𑀲𑀩𑁆𑀪𑀸𑀯𑀲𑁆𑀲, 𑀤𑀼𑀢𑀺𑀬𑀁 𑀓𑀸𑀭𑀡𑁂𑀦 𑀨𑀮𑀲𑁆𑀲 𑀲𑀺𑀤𑁆𑀥𑀺𑀤𑀲𑁆𑀲𑀦𑀁 𑀤𑀝𑁆𑀞𑀩𑁆𑀩𑀁 𑀏𑀓𑀦𑁆𑀢𑁂𑀦 𑀯𑀲𑁆𑀲𑀺𑀦𑀸 𑀯𑀺𑀬 𑀫𑁂𑀖𑀯𑀼𑀝𑁆𑀞𑀸𑀦𑁂𑀦 𑀯𑀼𑀝𑁆𑀞𑀺𑀧𑁆𑀧𑀯𑀢𑁆𑀢𑀺𑀬𑀸.

𑀪𑀕𑀯𑀢𑁄 𑀯𑀘𑀦𑀲𑁆𑀲 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀪𑁂𑀤𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀓𑀮𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀑𑀕𑀸𑀳𑀦𑀸𑀓𑀸𑀭𑁄 𑀦𑀺𑀭𑀯𑀲𑁂𑀲𑀧𑀭𑀳𑀺𑀢𑀧𑀸𑀭𑀺𑀧𑀽𑀭𑀺𑀓𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀏𑀯𑀁 𑀪𑀤𑁆𑀤𑀓𑁄 𑀆𑀓𑀸𑀭𑁄’’𑀢𑀺. 𑀬𑀲𑁆𑀫𑀸 𑀦 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸𑀲𑀗𑁆𑀔𑀸𑀢𑀁 𑀕𑀼𑀡𑀤𑁆𑀯𑀬𑀁. 𑀅𑀧𑀭𑀸𑀧𑀭𑀁 𑀯𑀼𑀢𑁆𑀢𑀺𑀬𑀸 𑀘𑁂𑀢𑁆𑀣 𑀘𑀓𑁆𑀓𑀪𑀸𑀯𑁄, 𑀘𑀭𑀦𑁆𑀢𑀺 𑀏𑀢𑁂𑀳𑀺 𑀲𑀢𑁆𑀢𑀸 𑀲𑀫𑁆𑀧𑀢𑁆𑀢𑀺𑀪𑀯𑁂𑀲𑀽𑀢𑀺 𑀯𑀸. 𑀬𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺 𑀪𑀺𑀓𑁆𑀔𑀯𑁂 𑀘𑀓𑁆𑀓𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀘𑀢𑀼𑀘𑀓𑁆𑀓𑀁 𑀯𑀢𑁆𑀢𑀢𑀻’’𑀢𑀺𑀆𑀤𑀺 ¶ . 𑀧𑀼𑀭𑀺𑀫𑀧𑀘𑁆𑀙𑀺𑀫𑀪𑀸𑀯𑁄 𑀘𑁂𑀢𑁆𑀣 𑀤𑁂𑀲𑀦𑀸𑀓𑁆𑀓𑀫𑀯𑀲𑁂𑀦 𑀤𑀝𑁆𑀞𑀩𑁆𑀩𑁄. 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑀺𑀤𑁆𑀥𑀺𑀬𑀸𑀢𑀺 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑁆𑀲 𑀅𑀢𑁆𑀣𑀺𑀢𑀸𑀬. 𑀲𑀫𑁆𑀫𑀸𑀧𑀡𑀺𑀳𑀺𑀢𑀢𑁆𑀢𑁄 𑀧𑀼𑀩𑁆𑀩𑁂 𑀘 𑀓𑀢𑀧𑀼𑀜𑁆𑀜𑁄 𑀲𑀼𑀤𑁆𑀥𑀸𑀲𑀬𑁄 𑀳𑁄𑀢𑀺 𑀢𑀤𑀲𑀼𑀤𑁆𑀥𑀺𑀳𑁂𑀢𑀽𑀦𑀁 𑀓𑀺𑀮𑁂𑀲𑀸𑀦𑀁 𑀤𑀽𑀭𑀻𑀪𑀸𑀯𑀢𑁄𑀢𑀺 𑀆𑀳 ‘‘𑀆𑀲𑀬𑀲𑀼𑀤𑁆𑀥𑀺 𑀲𑀺𑀤𑁆𑀥𑀸 𑀳𑁄𑀢𑀻’’𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀲𑀫𑁆𑀫𑀸𑀧𑀡𑀺𑀳𑀺𑀢𑀁 𑀘𑀺𑀢𑁆𑀢𑀁, 𑀲𑁂𑀬𑁆𑀬𑀲𑁄 𑀦𑀁 𑀢𑀢𑁄 𑀓𑀭𑁂’’𑀢𑀺, ‘‘𑀓𑀢𑀧𑀼𑀜𑁆𑀜𑁄𑀲𑀺 𑀢𑁆𑀯𑀁 𑀆𑀦𑀦𑁆𑀤, 𑀧𑀥𑀸𑀦𑀁 𑀅𑀦𑀼𑀬𑀼𑀜𑁆𑀚 𑀔𑀺𑀧𑁆𑀧𑀁 𑀳𑁄𑀳𑀺𑀲𑀺 𑀅𑀦𑀸𑀲𑀯𑁄𑀢𑀺 𑀘. 𑀢𑁂𑀦𑁂𑀯𑀸𑀳 ‘‘𑀆𑀲𑀬𑀲𑀼𑀤𑁆𑀥𑀺𑀬𑀸 𑀅𑀥𑀺𑀕𑀫𑀩𑁆𑀬𑀢𑁆𑀢𑀺𑀲𑀺𑀤𑁆𑀥𑀻’’𑀢𑀺. 𑀧𑀬𑁄𑀕𑀲𑀼𑀤𑁆𑀥𑀺𑀬𑀸𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀼𑀩𑁆𑀩𑀗𑁆𑀕𑀫𑀲𑁆𑀲 𑀥𑀫𑁆𑀫𑀲𑁆𑀲𑀯𑀦𑀧𑀬𑁄𑀕𑀲𑁆𑀲 𑀯𑀺𑀲𑀤𑀪𑀸𑀯𑁂𑀦. 𑀢𑀣𑀸 𑀘𑀸𑀳 ‘‘𑀆𑀕𑀫𑀩𑁆𑀬𑀢𑁆𑀢𑀺𑀲𑀺𑀤𑁆𑀥𑀻’’𑀢𑀺. 𑀲𑀩𑁆𑀩𑀲𑁆𑀲 𑀯𑀸 𑀓𑀸𑀬𑀯𑀘𑀻𑀧𑀬𑁄𑀕𑀲𑁆𑀲 ¶ 𑀦𑀺𑀤𑁆𑀤𑁄𑀲𑀪𑀸𑀯𑁂𑀦. 𑀧𑀭𑀺𑀲𑀼𑀤𑁆𑀥𑀓𑀸𑀬𑀯𑀘𑀻𑀧𑀬𑁄𑀕𑁄 𑀳𑀺 𑀯𑀺𑀧𑁆𑀧𑀝𑀺𑀲𑀸𑀭𑀸𑀪𑀸𑀯𑀢𑁄 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀭𑀺𑀬𑀢𑁆𑀢𑀺𑀬𑀁 𑀯𑀺𑀲𑀸𑀭𑀤𑁄 𑀳𑁄𑀢𑀻𑀢𑀺.

‘‘𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀤𑀻𑀧𑀓𑁂𑀦𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀣𑀩𑁆𑀬𑀜𑁆𑀚𑀦𑁂𑀲𑀼 𑀣𑁂𑀭𑀲𑁆𑀲 𑀏𑀯𑀁-𑀲𑀤𑁆𑀤 𑀲𑀼𑀢-𑀲𑀤𑁆𑀤𑀸𑀦𑀁 𑀅𑀲𑀫𑁆𑀫𑁄𑀳𑀸𑀲𑀫𑁆𑀫𑁄𑀲𑀤𑀻𑀧𑀦𑀢𑁄 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀯𑀲𑁂𑀦 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 ‘‘𑀲𑁄𑀢𑀩𑁆𑀩𑀧𑁆𑀧𑀪𑁂𑀤𑀧𑀝𑀺𑀯𑁂𑀥𑀤𑀻𑀧𑀓𑁂𑀦𑀸’’𑀢𑀺 𑀏𑀢𑁂𑀦 𑀅𑀬𑀁 𑀲𑀼𑀢-𑀲𑀤𑁆𑀤𑁄 𑀏𑀯𑀁-𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀢𑁄, 𑀯𑀓𑁆𑀔𑀫𑀸𑀦𑀸𑀧𑁂𑀓𑁆𑀔𑀸𑀬 𑀯𑀸 𑀲𑀸𑀫𑀜𑁆𑀜𑁂𑀦𑁂𑀯 𑀲𑁄𑀢𑀩𑁆𑀩𑀥𑀫𑁆𑀫𑀯𑀺𑀲𑁂𑀲𑀁 𑀆𑀫𑀲𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀫𑀦𑁄𑀤𑀺𑀝𑁆𑀞𑀺𑀓𑀭𑀡𑀸𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸𑀦𑀁 𑀅𑀦𑀼𑀧𑁂𑀓𑁆𑀔𑀦𑀲𑀼𑀧𑁆𑀧𑀝𑀺𑀯𑁂𑀥𑀸 𑀯𑀺𑀲𑁂𑀲𑀢𑁄 𑀫𑀦𑀲𑀺𑀓𑀸𑀭𑀧𑀝𑀺𑀩𑀤𑁆𑀥𑀸𑀢𑀺 𑀢𑁂 𑀯𑀼𑀢𑁆𑀢𑀦𑀬𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀤𑀻𑀧𑀓𑁂𑀦 𑀏𑀯𑀁-𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸, 𑀲𑀯𑀦𑀥𑀸𑀭𑀡𑀯𑀘𑀻𑀧𑀭𑀺𑀘𑀬𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸𑀦𑀁 ¶ 𑀯𑀺𑀲𑁂𑀲𑁂𑀦 𑀲𑁄𑀢𑀸𑀯𑀥𑀸𑀦𑀧𑀝𑀺𑀩𑀤𑁆𑀥𑀸𑀢𑀺 𑀢𑁂 𑀅𑀯𑀺𑀓𑁆𑀔𑁂𑀧𑀤𑀻𑀧𑀓𑁂𑀦 𑀲𑀼𑀢-𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀬𑀸 𑀥𑀫𑁆𑀫𑀲𑁆𑀲𑀯𑀦𑁂 𑀉𑀲𑁆𑀲𑀸𑀳𑀁 𑀚𑀦𑁂𑀢𑀺. 𑀢𑀢𑁆𑀣 𑀥𑀫𑁆𑀫𑀸𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸. 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸𑀢𑀺 ‘‘𑀇𑀥 𑀲𑀻𑀮𑀁 𑀓𑀣𑀺𑀢𑀁, 𑀇𑀥 𑀲𑀫𑀸𑀥𑀺, 𑀇𑀥 𑀧𑀜𑁆𑀜𑀸, 𑀏𑀢𑁆𑀢𑀓𑀸 𑀏𑀢𑁆𑀣 𑀅𑀦𑀼𑀲𑀦𑁆𑀥𑀺𑀬𑁄’’𑀢𑀺𑀆𑀤𑀺𑀦𑀸 ¶ 𑀦𑀬𑁂𑀦 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀺𑀢𑀸. 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀢𑀺 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀪𑀽𑀢𑀸𑀬, 𑀜𑀸𑀢𑀧𑀭𑀺𑀜𑁆𑀜𑀸𑀲𑀗𑁆𑀔𑀸𑀢𑀸𑀬 𑀯𑀸 𑀤𑀺𑀝𑁆𑀞𑀺𑀬𑀸 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀭𑀽𑀧𑀸𑀭𑀽𑀧𑀥𑀫𑁆𑀫𑁂 ‘‘𑀇𑀢𑀺 𑀭𑀽𑀧𑀁, 𑀏𑀢𑁆𑀢𑀓𑀁 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀲𑀼𑀝𑁆𑀞𑀼 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀝𑀺𑀯𑀺𑀤𑁆𑀥𑀸.

‘‘𑀲𑀓𑀮𑁂𑀦 𑀯𑀘𑀦𑁂𑀦𑀸’’𑀢𑀺 𑀧𑀼𑀩𑁆𑀩𑁂 𑀢𑀻𑀳𑀺 𑀧𑀤𑁂𑀳𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀦𑁆𑀢𑀺 𑀅𑀓𑀢𑀜𑁆𑀜𑀼𑀢𑀁 ‘‘𑀇𑀥𑁂𑀓𑀘𑁆𑀘𑁄 𑀧𑀸𑀧𑀪𑀺𑀓𑁆𑀔𑀼 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀅𑀢𑁆𑀢𑀦𑁄 𑀤𑀳𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀅𑀦𑀭𑀺𑀬𑀯𑁄𑀳𑀸𑀭𑀸𑀯𑀢𑁆𑀣𑀁. 𑀲𑀸 𑀏𑀯 𑀅𑀦𑀭𑀺𑀬𑀯𑁄𑀳𑀸𑀭𑀸𑀯𑀢𑁆𑀣𑀸 𑀅𑀲𑀤𑁆𑀥𑀫𑁆𑀫𑁄. 𑀦𑀦𑀼 𑀘 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 ‘‘𑀫𑀫𑁂𑀤𑀁 𑀯𑀘𑀦’’𑀦𑁆𑀢𑀺 𑀅𑀥𑀺𑀫𑀸𑀦𑀲𑁆𑀲, 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀸𑀤𑀻𑀦𑀜𑁆𑀘 𑀢𑀤𑀸𑀲𑀗𑁆𑀓𑀸𑀬 𑀅𑀪𑀸𑀯𑀢𑁄 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀲𑀫𑀢𑀺𑀓𑁆𑀓𑀫𑀸𑀤𑀺𑀯𑀘𑀦𑀁 𑀦𑀺𑀭𑀢𑁆𑀣𑀓𑀁 𑀢𑀺? 𑀦𑀬𑀺𑀤𑀁 𑀏𑀯𑀁 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺 𑀯𑀤𑀦𑁆𑀢𑁂𑀦 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀺𑀪𑀸𑀯𑀺𑀢𑁄𑀢𑀺 𑀤𑀲𑁆𑀲𑀦𑀢𑁄. 𑀓𑁂𑀘𑀺 𑀧𑀦 ‘‘𑀤𑁂𑀯𑀢𑀸𑀦𑀁 𑀧𑀭𑀺𑀯𑀺𑀢𑀓𑁆𑀓𑀸𑀧𑁂𑀓𑁆𑀔𑀁 𑀢𑀣𑀸𑀯𑀘𑀦𑀦𑁆𑀢𑀺 𑀏𑀤𑀺𑀲𑀻 𑀘𑁄𑀤𑀦𑀸 𑀅𑀦𑀯𑀓𑀸𑀲𑀸’’𑀢𑀺 𑀯𑀤𑀦𑁆𑀢𑀺. 𑀢𑀲𑁆𑀫𑀺𑀁 𑀓𑀺𑀭 𑀔𑀡𑁂 𑀏𑀓𑀘𑁆𑀘𑀸𑀦𑀁 𑀤𑁂𑀯𑀢𑀸𑀦𑀁 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 ‘‘𑀢𑀣𑀸𑀕𑀢𑁄 𑀘 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀬𑀜𑁆𑀘 𑀆𑀬𑀲𑁆𑀫𑀸 𑀤𑁂𑀲𑀦𑀸𑀓𑀼𑀲𑀮𑁄, 𑀇𑀤𑀸𑀦𑀺 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀲𑀓𑁆𑀬𑀓𑀼𑀮𑀧𑁆𑀧𑀲𑀼𑀢𑁄 𑀢𑀣𑀸𑀕𑀢𑀲𑁆𑀲 𑀪𑀸𑀢𑀸 𑀘𑀽𑀴𑀧𑀺𑀢𑀼𑀧𑀼𑀢𑁆𑀢𑁄, 𑀓𑀺𑀁 𑀦𑀼 𑀔𑁄 𑀲𑀬𑀁 𑀲𑀘𑁆𑀙𑀺𑀓𑀢 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀉𑀤𑀸𑀳𑀼 𑀪𑀕𑀯𑀢𑁄𑀬𑁂𑀯 𑀯𑀘𑀦𑀁 𑀬𑀣𑀸𑀲𑀼𑀢’’𑀦𑁆𑀢𑀺. 𑀏𑀯𑀁 ¶ 𑀢𑀤𑀸𑀲𑀗𑁆𑀓𑀺𑀢𑀧𑁆𑀧𑀓𑀸𑀭𑀢𑁄 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀲𑀫𑁄𑀓𑁆𑀓𑀫𑀸𑀤𑀺𑀢𑁄 𑀅𑀢𑀺𑀓𑁆𑀓𑀫𑀸𑀤𑀺 𑀯𑀺𑀪𑀸𑀯𑀺𑀢𑀦𑁆𑀢𑀺. 𑀅𑀢𑁆𑀢𑀦𑁄 𑀅𑀤𑀳𑀦𑁆𑀢𑁄𑀢𑀺 ‘‘𑀫𑀫𑁂𑀢’’𑀦𑁆𑀢𑀺 𑀅𑀢𑁆𑀢𑀦𑀺 ¶ 𑀅𑀝𑁆𑀞𑀧𑁂𑀦𑁆𑀢𑁄. 𑀅𑀧𑁆𑀧𑁂𑀢𑀻𑀢𑀺 𑀦𑀺𑀤𑀲𑁆𑀲𑁂𑀢𑀺. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀲𑀼 𑀬𑀣𑀸𑀭𑀳𑀁 𑀲𑀢𑁆𑀢𑁂 𑀦𑁂𑀢𑀻𑀢𑀺 𑀦𑁂𑀢𑁆𑀢𑀺, 𑀥𑀫𑁆𑀫𑁄𑀬𑁂𑀯 𑀦𑁂𑀢𑁆𑀢𑀺 𑀥𑀫𑁆𑀫𑀦𑁂𑀢𑁆𑀢𑀺.

𑀤𑀴𑁆𑀳𑀢𑀭𑀦𑀺𑀯𑀺𑀝𑁆𑀞𑀸 𑀯𑀺𑀘𑀺𑀓𑀺𑀘𑁆𑀙𑀸 𑀓𑀗𑁆𑀔𑀸. 𑀦𑀸𑀢𑀺𑀲𑀁𑀲𑀧𑁆𑀧𑀦𑀁 𑀫𑀢𑀺𑀪𑁂𑀤𑀫𑀢𑁆𑀢𑀁 𑀯𑀺𑀫𑀢𑀺. 𑀅𑀲𑁆𑀲𑀤𑁆𑀥𑀺𑀬𑀁 𑀯𑀺𑀦𑀸𑀲𑁂𑀢𑀺 𑀪𑀕𑀯𑀢𑁄 𑀤𑁂𑀲𑀺𑀢𑀢𑁆𑀢𑀸, 𑀲𑀫𑁆𑀫𑀼𑀔𑀸 𑀘𑀲𑁆𑀲 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸, 𑀔𑀮𑀺𑀢𑀤𑀼𑀭𑀼𑀢𑁆𑀢𑀸𑀤𑀺𑀕𑁆𑀕𑀳𑀡𑀤𑁄𑀲𑀸𑀪𑀸𑀯𑀢𑁄 𑀘. 𑀏𑀢𑁆𑀣 𑀘 𑀧𑀞𑀫𑀸𑀤𑀬𑁄 𑀢𑀺𑀲𑁆𑀲𑁄 𑀅𑀢𑁆𑀣𑀬𑁄𑀚𑀦𑀸 𑀆𑀓𑀸𑀭𑀸𑀤𑀺𑀅𑀢𑁆𑀣𑁂𑀲𑀼 𑀅𑀕𑁆𑀕𑀳𑀺𑀢𑀯𑀺𑀲𑁂𑀲𑀫𑁂𑀯 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑀺𑀢𑀸, 𑀢𑀢𑁄 𑀧𑀭𑀸 𑀢𑀺𑀲𑁆𑀲𑁄 𑀆𑀓𑀸𑀭𑀢𑁆𑀣𑀫𑁂𑀯 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀯𑀺𑀪𑀸𑀯𑀺𑀢𑀸. 𑀧𑀘𑁆𑀙𑀺𑀫𑀸 𑀧𑀦 𑀢𑀺𑀲𑁆𑀲𑁄 𑀬𑀣𑀸𑀓𑁆𑀓𑀫𑀁 𑀆𑀓𑀸𑀭𑀢𑁆𑀣𑀁 𑀦𑀺𑀤𑀲𑁆𑀲𑀦𑀢𑁆𑀣𑀁 𑀅𑀯𑀥𑀸𑀭𑀡𑀢𑁆𑀣𑀜𑁆𑀘 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀬𑁄𑀚𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀓-𑀲𑀤𑁆𑀤𑁄 𑀅𑀜𑁆𑀜𑀲𑁂𑀝𑁆𑀞𑀸𑀲𑀳𑀸𑀬𑀲𑀗𑁆𑀔𑁆𑀬𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸𑀳𑁂𑀲 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘 ¶ , 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜𑀦𑁆𑀢𑀺 𑀇𑀢𑁆𑀣𑁂𑀓𑁂 𑀅𑀪𑀺𑀯𑀤𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀅𑀜𑁆𑀜𑀢𑁆𑀣𑁂 𑀤𑀺𑀲𑁆𑀲𑀢𑀺, ‘‘𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯’’𑀦𑁆𑀢𑀺𑀆𑀤𑀻𑀲𑀼 𑀲𑁂𑀝𑁆𑀞𑀢𑁆𑀣𑁂, ‘‘𑀏𑀓𑁄 𑀯𑀽𑀧𑀓𑀝𑁆𑀞𑁄’’𑀢𑀺𑀆𑀤𑀻𑀲𑀼 𑀅𑀲𑀳𑀸𑀬𑁂, ‘‘𑀏𑀓𑁄𑀯 𑀔𑁄 𑀪𑀺𑀓𑁆𑀔𑀯𑁂 𑀔𑀡𑁄 𑀘 𑀲𑀫𑀬𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬𑀸’’𑀢𑀺𑀆𑀤𑀻𑀲𑀼 𑀲𑀗𑁆𑀔𑁆𑀬𑀬𑀁, 𑀇𑀥𑀸𑀧𑀺 𑀲𑀗𑁆𑀔𑁆𑀬𑀬𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑀦𑁆𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑀦𑀺𑀤𑁆𑀤𑁂𑀲𑁄’’𑀢𑀺. 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘𑀸𑀢𑀺 𑀬𑀼𑀢𑁆𑀢𑀓𑀸𑀮𑀜𑁆𑀘 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀜𑁆𑀘. 𑀔𑀡𑁄𑀢𑀺 𑀑𑀓𑀸𑀲𑁄. 𑀢𑀣𑀸𑀕𑀢𑀼𑀧𑁆𑀧𑀸𑀤𑀸𑀤𑀺𑀓𑁄 𑀳𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀑𑀓𑀸𑀲𑁄 𑀢𑀧𑁆𑀧𑀘𑁆𑀘𑀬𑀧𑀝𑀺𑀮𑀸𑀪𑀳𑁂𑀢𑀼𑀢𑁆𑀢𑀸. 𑀔𑀡𑁄 𑀏𑀯 ¶ 𑀘 𑀲𑀫𑀬𑁄. 𑀬𑁄 ‘‘𑀔𑀡𑁄’’𑀢𑀺 𑀘 ‘‘𑀲𑀫𑀬𑁄’’𑀢𑀺 𑀘 𑀯𑀼𑀘𑁆𑀘𑀢𑀺, 𑀲𑁄 𑀏𑀓𑁄 𑀯𑀸𑀢𑀺 𑀳𑀺 𑀅𑀢𑁆𑀣𑁄. 𑀫𑀳𑀸𑀲𑀫𑀬𑁄𑀢𑀺 𑀫𑀳𑀸𑀲𑀫𑀽𑀳𑁄. 𑀲𑀫𑀬𑁄𑀧𑀺 𑀔𑁄𑀢𑀺 𑀲𑀺𑀓𑁆𑀔𑀸𑀧𑀤𑀧𑀽𑀭𑀡𑀲𑁆𑀲 𑀳𑁂𑀢𑀼𑀧𑀺. 𑀲𑀫𑀬𑀧𑁆𑀧𑀯𑀸𑀤𑀓𑁂𑀢𑀺 𑀤𑀺𑀝𑁆𑀞𑀺𑀧𑁆𑀧𑀯𑀸𑀤𑀓𑁂. 𑀢𑀢𑁆𑀣 𑀳𑀺 𑀦𑀺𑀲𑀺𑀦𑁆𑀦𑀸 𑀢𑀺𑀢𑁆𑀣𑀺𑀬𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀫𑀬𑀁 𑀧𑀯𑀤𑀦𑁆𑀢𑀻𑀢𑀺. 𑀅𑀢𑁆𑀣𑀸𑀪𑀺𑀲𑀫𑀬𑀸𑀢𑀺 𑀳𑀺𑀢𑀧𑀝𑀺𑀮𑀸𑀪𑀸. 𑀅𑀪𑀺𑀲𑀫𑁂𑀢𑀩𑁆𑀩𑁄𑀢𑀺 𑀅𑀪𑀺𑀲𑀫𑀬𑁄, 𑀅𑀪𑀺𑀲𑀫𑀬𑁄 𑀅𑀢𑁆𑀣𑁄𑀢𑀺 𑀅𑀪𑀺𑀲𑀫𑀬𑀝𑁆𑀞𑁄𑀢𑀺 𑀧𑀻𑀴𑀦 𑀆𑀤𑀻𑀦𑀺 𑀅𑀪𑀺𑀲𑀫𑁂𑀢𑀩𑁆𑀩𑀪𑀸𑀯𑁂𑀦 𑀏𑀓𑀻𑀪𑀸𑀯𑀁 𑀉𑀧𑀦𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀺. 𑀅𑀪𑀺𑀲𑀫𑀬𑀲𑁆𑀲 𑀯𑀸 𑀧𑀝𑀺𑀯𑁂𑀥𑀲𑁆𑀲 ¶ 𑀯𑀺𑀲𑀬𑀪𑀽𑀢𑀪𑀸𑀯𑁄 𑀅𑀪𑀺𑀲𑀫𑀬𑀝𑁆𑀞𑁄𑀢𑀺 𑀢𑀸𑀦𑁂𑀯 𑀢𑀣𑀸 𑀏𑀓𑀢𑁆𑀢𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀧𑀻𑀴𑀦𑀁 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀢𑀁 𑀲𑀫𑀗𑁆𑀕𑀻𑀦𑁄 𑀳𑀺𑀁𑀲𑀦𑀁 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀓𑀭𑀡𑀁. 𑀲𑀦𑁆𑀢𑀸𑀧𑁄𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀤𑀺𑀯𑀲𑁂𑀦 𑀲𑀦𑁆𑀢𑀸𑀧𑀦𑀁 𑀧𑀭𑀺𑀤𑀳𑀡𑀁.

𑀢𑀢𑁆𑀣 𑀲𑀳𑀓𑀸𑀭𑀻𑀓𑀸𑀭𑀡𑀁 𑀲𑀦𑁆𑀦𑀺𑀚𑁆𑀛 𑀲𑀫𑁂𑀢𑀺 𑀲𑀫𑀯𑁂𑀢𑀻𑀢𑀺 𑀲𑀫𑀬𑁄, 𑀲𑀫𑀯𑀸𑀬𑁄. 𑀲𑀫𑁂𑀢𑀺 𑀲𑀫𑀸𑀕𑀘𑁆𑀙𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀫𑁂𑀢𑁆𑀣 𑀢𑀤𑀸𑀥𑀸𑀭𑀧𑀼𑀕𑁆𑀕𑀮𑁂𑀳𑀻𑀢𑀺 𑀲𑀫𑀬𑁄, 𑀔𑀡𑁄. 𑀲𑀫𑁂𑀢𑀺 𑀏𑀢𑁆𑀣, 𑀏𑀢𑁂𑀦𑀯 𑀲𑀁𑀕𑀘𑁆𑀙𑀢𑀺 𑀲𑀢𑁆𑀢𑁄, 𑀲𑀪𑀸𑀯𑀥𑀫𑁆𑀫𑁄 𑀯𑀸 𑀲𑀳𑀚𑀸𑀢𑀸𑀤𑀻𑀳𑀺, 𑀉𑀧𑁆𑀧𑀸𑀤𑀸𑀤𑀻𑀳𑀺 𑀯𑀸𑀢𑀺 𑀲𑀫𑀬𑁄, 𑀓𑀸𑀮𑁄. 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀢𑀸𑀬 𑀅𑀢𑁆𑀣𑀢𑁄 𑀅𑀪𑀽𑀢𑁄𑀧𑀺 𑀳𑀺 𑀓𑀸𑀮𑁄 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀅𑀥𑀺𑀓𑀭𑀡𑀁, 𑀓𑀭𑀡𑀁 𑀯𑀺𑀬 𑀘 𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑁂𑀦 𑀭𑀽𑀧𑁂𑀦 𑀯𑁄𑀳𑀭𑀻𑀬𑀢𑀻𑀢𑀺. 𑀲𑀫𑀁, 𑀲𑀳 𑀯𑀸 𑀅𑀯𑀬𑀯𑀸𑀦𑀁 𑀅𑀬𑀦𑀁 𑀧𑀯𑀢𑁆𑀢𑀺 𑀅𑀯𑀝𑁆𑀞𑀸𑀦𑀦𑁆𑀢𑀺 𑀲𑀫𑀬𑁄, 𑀲𑀫𑀽𑀳𑁄, 𑀬𑀣𑀸 ‘‘𑀲𑀫𑀼𑀤𑀸𑀬𑁄’’𑀢𑀺. 𑀅𑀯𑀬𑀯𑀲𑀳𑀸𑀯𑀝𑁆𑀞𑀸𑀦𑀫𑁂𑀯 𑀳𑀺 𑀲𑀫𑀽𑀳𑁄𑀢𑀺. 𑀅𑀯𑀲𑁂𑀲𑀧𑀘𑁆𑀘𑀬𑀸𑀦𑀁 𑀲𑀫𑀸𑀕𑀫𑁂 𑀏𑀢𑀺 𑀨𑀮𑀁 𑀏𑀢𑀲𑁆𑀫𑀸 𑀉𑀧𑁆𑀧𑀚𑁆𑀚𑀢𑀺 𑀧𑀯𑀢𑁆𑀢𑀢𑀺 𑀘𑀸𑀢𑀺 𑀲𑀫𑀬𑁄, 𑀳𑁂𑀢𑀼 𑀬𑀣𑀸 ‘‘𑀲𑀫𑀼𑀤𑀬𑁄’’𑀢𑀺. 𑀲𑀫𑁂𑀢𑀺 𑀲𑀁𑀬𑁄𑀚𑀦𑀪𑀸𑀯𑀢𑁄 𑀲𑀫𑁆𑀩𑀦𑁆𑀥𑁄 𑀏𑀢𑀺 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀧𑀯𑀢𑁆𑀢𑀢𑀺, 𑀤𑀴𑁆𑀳𑀕𑁆𑀕𑀳𑀡𑀪𑀸𑀯𑀢𑁄 𑀯𑀸 𑀲𑀁𑀬𑀼𑀢𑁆𑀢𑀸 𑀅𑀬𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺 𑀲𑀢𑁆𑀢𑀸 𑀬𑀣𑀸𑀪𑀺𑀦𑀺𑀯𑁂𑀲𑀁 𑀏𑀢𑁂𑀦𑀸𑀢𑀺 𑀲𑀫𑀬𑁄, 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑁂𑀦 𑀳𑀺 𑀲𑀢𑁆𑀢𑀸 𑀅𑀢𑀺𑀯𑀺𑀬 𑀩𑀚𑁆𑀛𑀦𑁆𑀢𑀻𑀢𑀺. 𑀲𑀫𑀺𑀢𑀺 ¶ 𑀲𑀗𑁆𑀕𑀢𑀺 𑀲𑀫𑁄𑀥𑀸𑀦𑀦𑁆𑀢𑀺 𑀲𑀫𑀬𑁄, 𑀧𑀝𑀺𑀮𑀸𑀪𑁄. 𑀲𑀫𑀲𑁆𑀲 𑀬𑀸𑀦𑀁, 𑀲𑀫𑁆𑀫𑀸 𑀯𑀸 𑀬𑀸𑀦𑀁 𑀅𑀧𑀕𑀫𑁄𑀢𑀺 𑀲𑀫𑀬𑁄, 𑀧𑀳𑀸𑀦𑀁. 𑀅𑀪𑀺𑀫𑀼𑀔𑀁 𑀜𑀸𑀡𑁂𑀦 𑀏𑀢𑀩𑁆𑀩𑁄 𑀅𑀪𑀺𑀲𑀫𑁂𑀢𑀩𑁆𑀩𑁄𑀢𑀺 𑀅𑀪𑀺𑀲𑀫𑀬𑁄, 𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑁄 𑀲𑀪𑀸𑀯𑁄. 𑀅𑀪𑀺𑀫𑀼𑀔𑀪𑀸𑀯𑁂𑀦 𑀲𑀫𑁆𑀫𑀸 𑀏𑀢𑀺 𑀕𑀘𑁆𑀙𑀢𑀺 𑀩𑀼𑀚𑁆𑀛𑀢𑀻𑀢𑀺 𑀅𑀪𑀺𑀲𑀫𑀬𑁄, 𑀥𑀫𑁆𑀫𑀸𑀦𑀁 𑀬𑀣𑀸𑀪𑀽𑀢𑀲𑀪𑀸𑀯𑀸𑀯𑀩𑁄𑀥𑁄. 𑀏𑀯𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀫𑀬-𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀫𑀬-𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂 𑀅𑀪𑀺𑀲𑀫𑀬-𑀲𑀤𑁆𑀤𑀲𑁆𑀲 𑀉𑀤𑀸𑀳𑀭𑀡𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀲𑁆𑀲𑀸𑀢𑀺 𑀲𑀫𑀬-𑀲𑀤𑁆𑀤𑀲𑁆𑀲. 𑀓𑀸𑀮𑁄 𑀅𑀢𑁆𑀣𑁄 𑀲𑀫𑀯𑀸𑀬𑀸𑀤𑀻𑀦𑀁 𑀅𑀢𑁆𑀣𑀸𑀦𑀁 ¶ 𑀇𑀥 𑀅𑀲𑀫𑁆𑀪𑀯𑀢𑁄 𑀤𑁂𑀲𑀤𑁂𑀲𑀓𑀧𑀭𑀺𑀲𑀸𑀦𑀁 𑀯𑀺𑀬 𑀲𑀼𑀢𑁆𑀢𑀲𑁆𑀲 𑀦𑀺𑀤𑀸𑀦𑀪𑀸𑀯𑁂𑀦 𑀓𑀸𑀮𑀲𑁆𑀲 𑀅𑀧𑀤𑀺𑀲𑀺𑀢𑀩𑁆𑀩𑀢𑁄 𑀘.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀅𑀦𑀺𑀬𑀸𑀫𑀺𑀢𑀯𑀲𑁂𑀦𑁂𑀯 𑀓𑀸𑀮𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀦 𑀉𑀢𑀼𑀲𑀁𑀯𑀘𑁆𑀙𑀭𑀸𑀤𑀺𑀯𑀲𑁂𑀦 𑀦𑀺𑀬𑀫𑁂𑀢𑁆𑀯𑀸𑀢𑀺 𑀆𑀳 ‘‘𑀢𑀢𑁆𑀣 𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀉𑀢𑀼𑀲𑀁𑀯𑀘𑁆𑀙𑀭𑀸𑀤𑀺𑀯𑀲𑁂𑀦 𑀦𑀺𑀬𑀫𑀁 𑀅𑀓𑀢𑁆𑀯𑀸 𑀲𑀫𑀬-𑀲𑀤𑁆𑀤𑀲𑁆𑀲 𑀯𑀘𑀦𑁂 𑀅𑀬𑀫𑁆𑀧𑀺 𑀕𑀼𑀡𑁄 𑀮𑀤𑁆𑀥𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂 𑀯𑀸 𑀇𑀫𑁂’’𑀢𑀺𑀆𑀤𑀺𑀫𑀸𑀳. 𑀲𑀸𑀫𑀜𑁆𑀜𑀚𑁄𑀢𑀦𑀸 𑀳𑀺 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀻𑀢𑀺. 𑀢𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑀫𑀬𑁄 𑀤𑁂𑀯𑀲𑀺𑀓𑀁 ¶ 𑀛𑀸𑀦𑀲𑀫𑀸𑀧𑀢𑁆𑀢𑀻𑀳𑀺 𑀯𑀻𑀢𑀺𑀦𑀸𑀫𑀦𑀓𑀸𑀮𑁄, 𑀯𑀺𑀲𑁂𑀲𑀢𑁄 𑀲𑀢𑁆𑀢𑀲𑀢𑁆𑀢𑀸𑀳𑀸𑀦𑀺. 𑀧𑀓𑀸𑀲𑀸𑀢𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸 𑀧𑀓𑀫𑁆𑀧𑀦𑀑𑀪𑀸𑀲𑀧𑀸𑀢𑀼𑀪𑀸𑀯𑀸𑀤𑀻𑀳𑀺 𑀧𑀸𑀓𑀝𑀸. 𑀬𑀣𑀸𑀯𑀼𑀢𑁆𑀢𑀧𑁆𑀧𑀪𑁂𑀤𑁂𑀲𑀼𑀬𑁂𑀯 𑀲𑀫𑀬𑁂𑀲𑀼 𑀏𑀓𑀤𑁂𑀲𑀁 𑀧𑀓𑀸𑀭𑀦𑁆𑀢𑀭𑁂𑀳𑀺 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀘𑀸𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀣𑀸 𑀳𑀺 𑀜𑀸𑀡𑀓𑀺𑀘𑁆𑀘𑀲𑀫𑀬𑁄 𑀅𑀢𑁆𑀢𑀳𑀺𑀢𑀧𑀝𑀺𑀧𑀢𑁆𑀢𑀺𑀲𑀫𑀬𑁄 𑀘 𑀅𑀪𑀺𑀲𑀫𑁆𑀩𑁄𑀥𑀺𑀲𑀫𑀬𑁄. 𑀅𑀭𑀺𑀬𑀢𑀼𑀡𑁆𑀳𑀺𑀪𑀸𑀯𑀲𑀫𑀬𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑀫𑀬𑁄. 𑀓𑀭𑀼𑀡𑀸𑀓𑀺𑀘𑁆𑀘𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀺𑀓𑀣𑀸𑀲𑀫𑀬𑁄 𑀤𑁂𑀲𑀦𑀸𑀲𑀫𑀬𑁂𑀯.

𑀓𑀭𑀡𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄 𑀬𑀣𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀅𑀪𑀺𑀥𑀫𑁆𑀫𑀯𑀺𑀦𑀬𑁂𑀲𑀼. 𑀢𑀣𑀸𑀢𑀺 𑀪𑀼𑀫𑁆𑀫𑀓𑀭𑀡𑁂𑀳𑀺. 𑀅𑀥𑀺𑀓𑀭𑀡𑀢𑁆𑀣 𑀆𑀥𑀸𑀭𑀢𑁆𑀣𑁄. 𑀪𑀸𑀯𑁄 𑀦𑀸𑀫 𑀓𑀺𑀭𑀺𑀬𑀸, 𑀓𑀺𑀭𑀺𑀬𑀸𑀬 𑀓𑀺𑀭𑀺𑀬𑀦𑁆𑀢𑀭𑀮𑀓𑁆𑀔𑀡𑀁 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀁. 𑀢𑀢𑁆𑀣 𑀬𑀣𑀸 𑀓𑀸𑀮𑁄 𑀲𑀪𑀸𑀯𑀥𑀫𑁆𑀫𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀬𑀁 𑀧𑀭𑀫𑀢𑁆𑀣𑀢𑁄 ¶ 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀆𑀥𑀸𑀭𑀪𑀸𑀯𑁂𑀦 𑀧𑀜𑁆𑀜𑀸𑀢𑁄 𑀢𑀗𑁆𑀔𑀡𑀧𑁆𑀧𑀯𑀢𑁆𑀢𑀸𑀦𑀁 𑀢𑀢𑁄 𑀧𑀼𑀩𑁆𑀩𑁂 𑀧𑀭𑀢𑁄 𑀘 𑀅𑀪𑀸𑀯𑀢𑁄 ‘‘𑀧𑀼𑀩𑁆𑀩𑀡𑁆𑀳𑁂 𑀚𑀸𑀢𑁄, 𑀲𑀸𑀬𑀦𑁆𑀳𑁂 𑀕𑀘𑁆𑀙𑀢𑀻’’𑀢𑀺, 𑀘 𑀆𑀤𑀻𑀲𑀼, 𑀲𑀫𑀽𑀳𑁄 𑀘 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑁄 𑀅𑀯𑀬𑀯𑀸𑀦𑀁 𑀆𑀥𑀸𑀭𑀪𑀸𑀯𑁂𑀦 𑀧𑀜𑁆𑀜𑀸𑀧𑀻𑀬𑀢𑀺 ‘‘𑀭𑀼𑀓𑁆𑀔𑁂 𑀲𑀸𑀔𑀸, 𑀬𑀯𑀭𑀸𑀲𑀺𑀬𑀁 𑀲𑀫𑁆𑀪𑀽𑀢𑁄’’𑀢𑀺𑀆𑀤𑀻𑀲𑀼, 𑀏𑀯𑀁 𑀇𑀥𑀸𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀥𑀺𑀓𑀭𑀡𑀜𑁆𑀳𑀺…𑀧𑁂… 𑀥𑀫𑁆𑀫𑀸𑀦’’𑀦𑁆𑀢𑀺. 𑀬𑀲𑁆𑀫𑀺𑀁 𑀓𑀸𑀮𑁂, 𑀥𑀫𑁆𑀫𑀧𑀼𑀜𑁆𑀚𑁂 𑀯𑀸 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀓𑀸𑀮𑁂, 𑀥𑀫𑁆𑀫𑀧𑀼𑀜𑁆𑀚𑁂 𑀘 𑀨𑀲𑁆𑀲𑀸𑀤𑀬𑁄𑀧𑀺 𑀳𑁄𑀦𑁆𑀢𑀻𑀢𑀺 𑀅𑀬𑀜𑁆𑀳𑀺 𑀢𑀢𑁆𑀣 𑀅𑀢𑁆𑀣𑁄. 𑀬𑀣𑀸 𑀘 𑀕𑀸𑀯𑀻𑀲𑀼 𑀤𑀼𑀬𑁆𑀳𑀫𑀸𑀦𑀸𑀲𑀼 𑀕𑀢𑁄, 𑀤𑀼𑀤𑁆𑀥𑀸𑀲𑀼 𑀆𑀕𑀢𑁄𑀢𑀺 𑀤𑁄𑀳𑀦𑀓𑀺𑀭𑀺𑀬𑀸𑀬 𑀕𑀫𑀦𑀓𑀺𑀭𑀺𑀬𑀸 𑀮𑀓𑁆𑀔𑀻𑀬𑀢𑀺, 𑀏𑀯𑀁 𑀇𑀥𑀸𑀧𑀺 ‘‘𑀬𑀲𑁆𑀫𑀺𑀁 𑀲𑀫𑀬𑁂, 𑀢𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀘 𑀯𑀼𑀢𑁆𑀢𑁂 𑀲𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀫𑀸𑀦𑁄 𑀏𑀯 𑀳𑁄𑀢𑀺 𑀧𑀤𑀢𑁆𑀣𑀲𑁆𑀲 𑀲𑀢𑁆𑀢𑀸𑀯𑀺𑀭𑀳𑀸𑀪𑀯𑀢𑁄𑀢𑀺 𑀲𑀫𑀬𑀲𑁆𑀲 𑀲𑀢𑁆𑀢𑀸𑀓𑀺𑀭𑀺𑀬𑀸𑀬 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑀺𑀭𑀺𑀬𑀸, 𑀨𑀲𑁆𑀲𑀸𑀤𑀻𑀦𑀁 𑀪𑀯𑀦𑀓𑀺𑀭𑀺𑀬𑀸 𑀘 𑀮𑀓𑁆𑀔𑀻𑀬𑀢𑀺. 𑀬𑀲𑁆𑀫𑀺𑀁 𑀲𑀫𑀬𑁂𑀢𑀺 𑀬𑀲𑁆𑀫𑀺𑀁 𑀦𑀯𑀫𑁂 𑀔𑀡𑁂, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀳𑁂𑀢𑀼𑀫𑁆𑀳𑀺, 𑀧𑀘𑁆𑀘𑀬𑀲𑀫𑀯𑀸𑀬𑁂 𑀯𑀸 𑀲𑀢𑀺 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂, 𑀳𑁂𑀢𑀼𑀫𑁆𑀳𑀺, 𑀧𑀘𑁆𑀘𑀬𑀲𑀫𑀯𑀸𑀬𑁂 𑀘 𑀲𑀢𑀺 𑀨𑀲𑁆𑀲𑀸𑀤𑀬𑁄𑀧𑀺 𑀳𑁄𑀦𑁆𑀢𑀻𑀢𑀺 𑀉𑀪𑀬𑀢𑁆𑀣 𑀲𑀫𑀬-𑀲𑀤𑁆𑀤𑁂 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁄 𑀓𑀢𑁄 𑀮𑀓𑁆𑀔𑀡𑀪𑀽𑀢𑀪𑀸𑀯𑀬𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀔𑀡…𑀧𑁂… 𑀮𑀓𑁆𑀔𑀻𑀬𑀢𑀻’’𑀢𑀺.

𑀳𑁂𑀢𑀼𑀅𑀢𑁆𑀣𑁄 ¶ 𑀓𑀭𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀺 ‘‘𑀅𑀦𑁆𑀦𑁂𑀦 𑀯𑀲𑀢𑀺, 𑀅𑀚𑁆𑀛𑁂𑀦𑁂𑀦 𑀯𑀲𑀢𑀺, 𑀨𑀭𑀲𑀼𑀦𑀸 𑀙𑀺𑀦𑁆𑀤𑀢𑀺, 𑀓𑀼𑀤𑀸𑀮𑁂𑀦 𑀔𑀡𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀯𑀻𑀢𑀺𑀓𑁆𑀓𑀫𑀜𑁆𑀳𑀺 𑀲𑀼𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀑𑀢𑀺𑀡𑁆𑀡𑀯𑀢𑁆𑀣𑀼𑀓𑀁 𑀧𑀼𑀕𑁆𑀕𑀮𑀁 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸, 𑀯𑀺𑀕𑀭𑀳𑀺𑀢𑁆𑀯𑀸 ¶ 𑀘 𑀢𑀁 𑀢𑀁 𑀯𑀢𑁆𑀣𑀼𑀁 𑀑𑀢𑀺𑀡𑁆𑀡𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑁂𑀦𑁂𑀯 𑀓𑀸𑀮𑁂𑀦 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀧𑁂𑀦𑁆𑀢𑁄 𑀪𑀕𑀯𑀸 ¶ 𑀯𑀺𑀳𑀭𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀜𑁆𑀘 𑀅𑀧𑁂𑀓𑁆𑀔𑀫𑀸𑀦𑁄 𑀢𑀢𑀺𑀬𑀧𑀸𑀭𑀸𑀚𑀺𑀓𑀸𑀤𑀻𑀲𑀼 𑀯𑀺𑀬𑀸𑀢𑀺.

𑀅𑀘𑁆𑀘𑀦𑁆𑀢𑀫𑁂𑀯 𑀆𑀭𑀫𑁆𑀪𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑁂𑀲𑀦𑀸𑀦𑀺𑀝𑁆𑀞𑀸𑀦𑀁 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀓𑀭𑀼𑀡𑀸𑀯𑀺𑀳𑀸𑀭𑁂𑀦. 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑀚𑁄𑀢𑀦𑀢𑁆𑀣𑀁. 𑀉𑀧𑀬𑁄𑀕𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄 𑀬𑀣𑀸 ‘‘𑀫𑀸𑀲𑀁 𑀅𑀚𑁆𑀛𑁂𑀢𑀻’’𑀢𑀺.

𑀧𑁄𑀭𑀸𑀡𑀸𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸. 𑀅𑀪𑀺𑀮𑀸𑀧𑀫𑀢𑁆𑀢𑀪𑁂𑀤𑁄𑀢𑀺 𑀯𑀘𑀦𑀫𑀢𑁆𑀢𑁂𑀦 𑀯𑀺𑀲𑁂𑀲𑁄. 𑀢𑁂𑀦 𑀲𑀼𑀢𑁆𑀢𑀯𑀺𑀦𑀬𑁂𑀲𑀼 𑀯𑀺𑀪𑀢𑁆𑀢𑀺𑀩𑁆𑀬𑀢𑀬𑁄 𑀓𑀢𑁄𑀢𑀺 𑀤𑀲𑁆𑀲𑁂𑀢𑀺.

𑀲𑁂𑀝𑁆𑀞𑀦𑁆𑀢𑀺 𑀲𑁂𑀝𑁆𑀞𑀯𑀸𑀘𑀓𑀁 𑀯𑀘𑀦𑀁 𑀲𑁂𑀝𑁆𑀞𑀦𑁆𑀢𑀺 𑀯𑀼𑀢𑁆𑀢𑀁 𑀲𑁂𑀝𑁆𑀞𑀕𑀼𑀡𑀲𑀳𑀘𑀭𑀡𑀢𑁄. 𑀢𑀣𑀸 𑀉𑀢𑁆𑀢𑀫𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀕𑀸𑀭𑀯𑀬𑀼𑀢𑁆𑀢𑁄𑀢𑀺 𑀕𑀭𑀼𑀪𑀸𑀯𑀬𑀼𑀢𑁆𑀢𑁄 𑀕𑀭𑀼𑀕𑀼𑀡𑀬𑁄𑀕𑀢𑁄, 𑀕𑀭𑀼𑀓𑀭𑀡𑀸𑀭𑀳𑀢𑀸𑀬 𑀯𑀸 𑀕𑀸𑀭𑀯𑀬𑀼𑀢𑁆𑀢𑁄.

𑀯𑀼𑀢𑁆𑀢𑁄𑀬𑁂𑀯 𑀦 𑀧𑀦 𑀇𑀥 𑀯𑀢𑁆𑀢𑀩𑁆𑀩𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑁆𑀲 𑀇𑀫𑀺𑀲𑁆𑀲𑀸 𑀅𑀝𑁆𑀞𑀓𑀣𑀸𑀬 𑀏𑀓𑀤𑁂𑀲𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀧𑀺𑀘 𑀪𑀕𑁂 𑀯𑀦𑀺, 𑀯𑀫𑀻𑀢𑀺 𑀯𑀸 𑀪𑀕𑀯𑀸, 𑀪𑀕𑁂 𑀲𑀻𑀮𑀸𑀤𑀺𑀕𑀼𑀡𑁂 𑀯𑀦𑀺 𑀪𑀚𑀺 𑀲𑁂𑀯𑀺, 𑀢𑁂 𑀯𑀸 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑁂𑀲𑀼 ‘‘𑀓𑀣𑀁 𑀦𑀼 𑀔𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺 𑀯𑀦𑀺 𑀬𑀸𑀘𑀺 𑀧𑀢𑁆𑀣𑀬𑀻𑀢𑀺 𑀪𑀕𑀯𑀸, 𑀪𑀕𑀁 𑀯𑀸 𑀲𑀺𑀭𑀺𑀁, 𑀇𑀲𑁆𑀲𑀭𑀺𑀬𑀁, 𑀬𑀲𑀜𑁆𑀘 𑀯𑀫𑀺 𑀔𑁂𑀮𑀧𑀺𑀡𑁆𑀟𑀁 𑀯𑀺𑀬 𑀙𑀟𑁆𑀟𑀬𑀻𑀢𑀺 𑀪𑀕𑀯𑀸. 𑀢𑀣𑀸 𑀳𑀺 𑀪𑀕𑀯𑀸 𑀳𑀢𑁆𑀣𑀕𑀢𑀁 𑀲𑀺𑀭𑀺𑀁, 𑀘𑀢𑀼𑀤𑁆𑀤𑀻𑀧𑀺𑀲𑁆𑀲𑀭𑀺𑀬𑀁, 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀲𑀦𑁆𑀦𑀺𑀲𑁆𑀲𑀬𑀜𑁆𑀘 𑀲𑀢𑁆𑀢𑀭𑀢𑀦𑀲𑀫𑀼𑀚𑁆𑀚𑀮𑀁 𑀬𑀲𑀁 𑀅𑀦𑀧𑁂𑀓𑁆𑀔𑁄 𑀧𑀭𑀺𑀘𑁆𑀘𑀚𑀻𑀢𑀺. 𑀅𑀣 𑀯𑀸 𑀪𑀸𑀦𑀺 𑀦𑀸𑀫 𑀦𑀓𑁆𑀔𑀢𑁆𑀢𑀸𑀦𑀺, 𑀢𑁂𑀳𑀺 𑀲𑀫𑀁 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀪𑀕𑀸, 𑀲𑀺𑀦𑁂𑀭𑀼𑀬𑀼𑀕𑀦𑁆𑀥𑀭𑀸𑀤𑀺𑀕𑀢𑀸 𑀪𑀸𑀚𑀦𑀮𑁄𑀓𑀲𑁄𑀪𑀸. 𑀢𑁂 𑀪𑀕𑀯𑀸 𑀯𑀫𑀺 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀧𑀚𑀳𑀢𑀻𑀢𑀺 𑀏𑀯𑀫𑁆𑀧𑀺 𑀪𑀕𑁂 𑀯𑀫𑀻𑀢𑀺 𑀪𑀕𑀯𑀸.

‘‘𑀥𑀫𑁆𑀫𑀲𑀭𑀻𑀭𑀁 𑀧𑀘𑁆𑀘𑀓𑁆𑀔𑀁 𑀓𑀭𑁄𑀢𑀻’’𑀢𑀺 ‘‘𑀬𑁄 𑀯𑁄 𑀆𑀦𑀦𑁆𑀤 𑀫𑀬𑀸 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄, 𑀲𑁄 𑀯𑁄 𑀫𑀫𑀘𑁆𑀘𑀬𑁂𑀦 𑀲𑀢𑁆𑀣𑀸’’𑀢𑀺 𑀯𑀘𑀦𑀢𑁄 ¶ 𑀥𑀫𑁆𑀫𑀲𑁆𑀲 𑀲𑀢𑁆𑀣𑀼𑀪𑀸𑀯𑀧𑀭𑀺𑀬𑀸𑀬𑁄 𑀯𑀺𑀚𑁆𑀚𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀯𑀚𑀺𑀭𑀲𑀗𑁆𑀖𑀸𑀢𑀲𑀫𑀸𑀦𑀓𑀸𑀬𑁄 ¶ ¶ 𑀧𑀭𑁂𑀳𑀺 𑀅𑀪𑁂𑀚𑁆𑀚𑀲𑀭𑀻𑀭𑀢𑁆𑀢𑀸. 𑀦 𑀳𑀺 𑀪𑀕𑀯𑀢𑁄 𑀭𑀽𑀧𑀓𑀸𑀬𑁂 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁄 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺. 𑀤𑁂𑀲𑀦𑀸𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀯𑀓𑁆𑀔𑀫𑀸𑀦𑀲𑁆𑀲 𑀲𑀓𑀮𑀲𑀼𑀢𑁆𑀢𑀲𑁆𑀲 ‘‘𑀏𑀯’’𑀦𑁆𑀢𑀺 𑀦𑀺𑀤𑁆𑀤𑀺𑀲𑀦𑀢𑁄. 𑀲𑀸𑀯𑀓𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁂𑀦 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀪𑀕𑀯𑀢𑀸 𑀏𑀢𑀤𑀕𑁆𑀕𑁂 𑀞𑀧𑀺𑀢𑁂𑀦 𑀫𑀬𑀸 𑀫𑀳𑀸𑀲𑀸𑀯𑀓𑁂𑀦 𑀲𑀼𑀢𑀁, 𑀢𑀜𑁆𑀘 𑀔𑁄 𑀫𑀬𑀸𑀯 𑀲𑀼𑀢𑀁, 𑀦 𑀅𑀦𑀼𑀲𑁆𑀲𑀯𑀺𑀢𑀁, 𑀦 𑀧𑀭𑀫𑁆𑀧𑀭𑀸𑀪𑀢𑀦𑁆𑀢𑀺 𑀇𑀫𑀲𑁆𑀲𑀢𑁆𑀣𑀲𑁆𑀲 𑀤𑀻𑀧𑀦𑀢𑁄. 𑀓𑀸𑀮𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 ‘‘𑀪𑀕𑀯𑀸’’𑀢𑀺 𑀧𑀤𑀲𑁆𑀲 𑀲𑀦𑁆𑀦𑀺𑀥𑀸𑀦𑁂 𑀧𑀬𑀼𑀢𑁆𑀢𑀲𑁆𑀲 𑀲𑀫𑀬-𑀲𑀤𑁆𑀤𑀲𑁆𑀲 𑀓𑀸𑀮𑀲𑁆𑀲 𑀩𑀼𑀤𑁆𑀥𑀼𑀧𑁆𑀧𑀸𑀤𑀧𑀝𑀺𑀫𑀡𑁆𑀟𑀺𑀢𑀪𑀸𑀯𑀤𑀻𑀧𑀦𑀢𑁄. 𑀩𑀼𑀤𑁆𑀥𑀼𑀧𑁆𑀧𑀸𑀤𑀧𑀭𑀫𑀸 𑀳𑀺 𑀓𑀸𑀮𑀲𑀫𑁆𑀧𑀤𑀸. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀓𑀧𑁆𑀧𑀓𑀲𑀸𑀬𑁂 𑀓𑀮𑀺𑀬𑀼𑀕𑁂, 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀅𑀳𑁄 𑀫𑀳𑀘𑁆𑀙𑀭𑀺𑀬𑀁;

𑀳𑀼𑀢𑀸𑀯𑀳𑀫𑀚𑁆𑀛𑁂 𑀚𑀸𑀢𑀁, 𑀲𑀫𑀼𑀤𑀺𑀢𑀫𑀓𑀭𑀦𑁆𑀤𑀫𑀭𑀯𑀺𑀦𑁆𑀤’’𑀦𑁆𑀢𑀺.

𑀪𑀕𑀯𑀸𑀢𑀺 𑀤𑁂𑀲𑀓𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀕𑀼𑀡𑀯𑀺𑀲𑀺𑀝𑁆𑀞𑀲𑀢𑁆𑀢𑀼𑀢𑁆𑀢𑀫𑀕𑀸𑀭𑀯𑀸𑀥𑀺𑀯𑀘𑀦𑀢𑁄.

𑀯𑀺𑀚𑁆𑀚𑀦𑁆𑀢𑀭𑀺𑀓𑀸𑀬𑀸𑀢𑀺 𑀯𑀺𑀚𑁆𑀚𑀼𑀦𑀺𑀘𑁆𑀙𑀭𑀡𑀓𑁆𑀔𑀡𑁂. 𑀅𑀦𑁆𑀢𑀭𑀢𑁄𑀢𑀺 𑀳𑀤𑀬𑁂. 𑀅𑀦𑁆𑀢𑀭𑀸𑀢𑀺 𑀆𑀭𑀩𑁆𑀪 𑀦𑀺𑀧𑁆𑀨𑀢𑁆𑀢𑀻𑀦𑀁 𑀯𑁂𑀫𑀚𑁆𑀛𑁂. 𑀅𑀦𑁆𑀢𑀭𑀺𑀓𑀸𑀬𑀸𑀢𑀺 𑀅𑀦𑁆𑀢𑀭𑀸𑀴𑁂. 𑀏𑀢𑁆𑀣 𑀘 ‘‘𑀢𑀤𑀦𑁆𑀢𑀭𑀁 𑀓𑁄 𑀚𑀸𑀦𑁂𑀬𑁆𑀬, 𑀏𑀢𑁂𑀲𑀁 𑀅𑀦𑁆𑀢𑀭𑀸 𑀓𑀧𑁆𑀧𑀸, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀸, 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀁 𑀑𑀧𑀸𑀢𑁂𑀢𑀻’’𑀢𑀺 𑀘 𑀆𑀤𑀻𑀲𑀼 𑀯𑀺𑀬 𑀓𑀸𑀭𑀡𑀯𑁂𑀫𑀚𑁆𑀛𑁂𑀲𑀼 𑀯𑀢𑁆𑀢𑀫𑀸𑀦𑀸 𑀅𑀦𑁆𑀢𑀭𑀸-𑀲𑀤𑁆𑀤𑀸 𑀏𑀯 ¶ 𑀉𑀤𑀸𑀳𑀭𑀺𑀢𑀩𑁆𑀩𑀸 𑀲𑀺𑀬𑀼𑀁, 𑀦 𑀧𑀦 𑀘𑀺𑀢𑁆𑀢𑀔𑀡𑀯𑀺𑀯𑀭𑁂𑀲𑀼 𑀯𑀢𑁆𑀢𑀫𑀸𑀦𑀸 𑀅𑀦𑁆𑀢𑀭𑀦𑁆𑀢𑀭𑀺𑀓𑀸-𑀲𑀤𑁆𑀤𑀸. 𑀅𑀦𑁆𑀢𑀭𑀸-𑀲𑀤𑁆𑀤𑀲𑁆𑀲 𑀳𑀺 𑀅𑀬𑀁 𑀅𑀢𑁆𑀣𑀼𑀤𑁆𑀥𑀸𑀭𑁄𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀲𑀺𑀬𑀸 𑁋 𑀬𑁂𑀲𑀼 𑀅𑀢𑁆𑀣𑁂𑀲𑀼 𑀅𑀦𑁆𑀢𑀭𑀸-𑀲𑀤𑁆𑀤𑁄 𑀯𑀢𑁆𑀢𑀢𑀺, 𑀢𑁂𑀲𑀼 𑀅𑀦𑁆𑀢𑀭𑀲𑀤𑁆𑀤𑁄𑀧𑀺 𑀯𑀢𑁆𑀢𑀢𑀻𑀢𑀺 𑀲𑀫𑀸𑀦𑀢𑁆𑀣𑀢𑁆𑀢𑀸 𑀅𑀦𑁆𑀢𑀭𑀸-𑀲𑀤𑁆𑀤𑀢𑁆𑀣𑁂 𑀯𑀢𑁆𑀢𑀫𑀸𑀦𑁄 𑀅𑀦𑁆𑀢𑀭-𑀲𑀤𑁆𑀤𑁄 𑀉𑀤𑀸𑀳𑀝𑁄, 𑀅𑀦𑁆𑀢𑀭𑀸-𑀲𑀤𑁆𑀤𑁄 𑀏𑀯 𑀯𑀸 ‘‘𑀬𑀲𑁆𑀲𑀦𑁆𑀢𑀭𑀢𑁄’’𑀢𑀺 𑀏𑀢𑁆𑀣 𑀕𑀸𑀣𑀸𑀲𑀼𑀔𑀢𑁆𑀣𑀁 𑀭𑀲𑁆𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀦𑁆𑀢𑀭𑀸-𑀲𑀤𑁆𑀤𑁄 𑀏𑀯 𑀧𑀦 𑀇𑀓-𑀲𑀤𑁆𑀤𑁂𑀦 𑀧𑀤𑀁 𑀯𑀟𑁆𑀠𑁂𑀢𑁆𑀯𑀸 ‘‘𑀅𑀦𑁆𑀢𑀭𑀺𑀓𑀸’’𑀢𑀺 𑀯𑀼𑀢𑁆𑀢𑁄𑀢𑀺 𑀏𑀯𑀫𑁂𑀢𑁆𑀣 𑀉𑀤𑀸𑀳𑀭𑀡𑁄𑀤𑀸𑀳𑀭𑀺𑀢𑀩𑁆𑀩𑀸𑀦𑀁 𑀯𑀺𑀭𑁄𑀥𑀸𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀅𑀬𑁄𑀚𑀺𑀬𑀫𑀸𑀦𑁂 𑀉𑀧𑀬𑁄𑀕𑀯𑀘𑀦𑀁 𑀦 𑀧𑀸𑀧𑀼𑀡𑀸𑀢𑀺 𑀲𑀸𑀫𑀺𑀯𑀘𑀦𑀲𑁆𑀲 𑀧𑀲𑀗𑁆𑀕𑁂 𑀅𑀦𑁆𑀢𑀭𑀸-𑀲𑀤𑁆𑀤𑀬𑁄𑀕𑁂𑀦 𑀉𑀧𑀬𑁄𑀕𑀯𑀘𑀦𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀅𑀦𑁆𑀢𑀭𑀸𑀲𑀤𑁆𑀤𑁂𑀦 𑀬𑀼𑀢𑁆𑀢𑀢𑁆𑀢𑀸 𑀉𑀧𑀬𑁄𑀕𑀯𑀘𑀦𑀁 𑀓𑀢’’𑀦𑁆𑀢𑀺.

‘‘𑀦𑀺𑀬𑀢𑁄 ¶ 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄, 𑀅𑀝𑁆𑀞𑀸𑀦𑀫𑁂𑀢𑀁 𑀪𑀺𑀓𑁆𑀔𑀯𑁂 𑀅𑀦𑀯𑀓𑀸𑀲𑁄, 𑀬𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀲𑀜𑁆𑀘𑀺𑀘𑁆𑀘 𑀧𑀸𑀡𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬, ‘‘𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’ 𑀢𑀺𑀆𑀤𑀺𑀯𑀘𑀦𑀢𑁄 𑀤𑀺𑀝𑁆𑀞𑀺𑀲𑀻𑀮𑀸𑀦𑀁 𑀦𑀺𑀬𑀢𑀲𑀪𑀸𑀯𑀢𑁆𑀢𑀸 𑀲𑁄𑀢𑀸𑀧𑀦𑁆𑀦𑀸𑀧𑀺 𑀅𑀜𑁆𑀜𑀫𑀜𑁆𑀜𑀁 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀸, 𑀧𑀕𑁂𑀯 𑀲𑀓𑀤𑀸𑀕𑀸𑀫𑀺𑀆𑀤𑀬𑁄. ‘‘𑀢𑀣𑀸𑀭𑀽𑀧𑀸𑀬 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀺, 𑀢𑀣𑀸𑀭𑀽𑀧𑁂𑀲𑀼 𑀲𑀻𑀮𑁂𑀲𑀼 𑀲𑀻𑀮𑀲𑀸𑀫𑀜𑁆𑀜𑀕𑀢𑁄 ¶ 𑀯𑀺𑀳𑀭𑀢𑀻’’𑀢𑀺 𑀯𑀘𑀦𑀢𑁄 𑀧𑀼𑀣𑀼𑀚𑁆𑀚𑀦𑀸𑀦𑀫𑁆𑀧𑀺 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀪𑀸𑀯𑁄 𑀮𑀩𑁆𑀪𑀢𑀺𑀬𑁂𑀯.

𑀲𑀼𑀧𑁆𑀧𑀺𑀬𑁄𑀧𑀺 𑀔𑁄𑀢𑀺 𑀏𑀢𑁆𑀣 𑀔𑁄-𑀲𑀤𑁆𑀤𑁄 𑀅𑀯𑀥𑀸𑀭𑀡𑀢𑁆𑀣𑁄 ‘‘𑀅𑀲𑁆𑀲𑁄𑀲𑀺 𑀔𑁄’’𑀢𑀺𑀆𑀤𑀻𑀲𑀼 ¶ 𑀯𑀺𑀬. 𑀢𑁂𑀦 𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑁄 𑀅𑀳𑁄𑀲𑀺𑀬𑁂𑀯, 𑀦𑀸𑀲𑁆𑀲 𑀫𑀕𑁆𑀕𑀧𑀝𑀺𑀧𑀢𑁆𑀢𑀺𑀬𑀸 𑀓𑁄𑀘𑀺 𑀅𑀦𑁆𑀢𑀭𑀸𑀬𑁄 𑀅𑀳𑁄𑀲𑀻𑀢𑀺 𑀅𑀬𑀫𑀢𑁆𑀣𑁄 𑀤𑀻𑀧𑀺𑀢𑁄 𑀳𑁄𑀢𑀺. 𑀢𑀢𑁆𑀭𑀸𑀢𑀺 𑀯𑀸 𑀓𑀸𑀮𑀲𑁆𑀲 𑀧𑀝𑀺𑀦𑀺𑀤𑁆𑀤𑁂𑀲𑁄. 𑀲𑁄𑀧𑀺 𑀳𑀺 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀧𑀼𑀩𑁆𑀩𑁂 𑀅𑀥𑀺𑀓𑀢𑁄. 𑀬𑀜𑁆𑀳𑀺 𑀲𑀫𑀬𑀁 𑀪𑀕𑀯𑀸 𑀅𑀦𑁆𑀢𑀭𑀸 𑀭𑀸𑀚𑀕𑀳𑀜𑁆𑀘 𑀦𑀸𑀴𑀦𑁆𑀤𑀜𑁆𑀘 𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑁄, 𑀢𑀲𑁆𑀫𑀺𑀁𑀬𑁂𑀯 𑀲𑀫𑀬𑁂 𑀲𑀼𑀧𑁆𑀧𑀺𑀬𑁄𑀧𑀺 𑀢𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀘 𑀯𑀡𑁆𑀡𑀁 𑀪𑀸𑀲𑀢𑀻𑀢𑀺. 𑀧𑀭𑀺𑀬𑀸𑀬𑀢𑀺 𑀧𑀭𑀺𑀯𑀢𑁆𑀢𑀢𑀻𑀢𑀺 𑀧𑀭𑀺𑀬𑀸𑀬𑁄, 𑀯𑀸𑀭𑁄. 𑀧𑀭𑀺𑀬𑀸𑀬𑁂𑀢𑀺 𑀤𑁂𑀲𑁂𑀢𑀩𑁆𑀩𑀫𑀢𑁆𑀣𑀁 𑀧𑀝𑀺𑀧𑀸𑀤𑁂𑀢𑀻𑀢𑀺 𑀧𑀭𑀺𑀬𑀸𑀬𑁄, 𑀤𑁂𑀲𑀦𑀸. 𑀧𑀭𑀺𑀬𑀸𑀬𑀢𑀺 𑀅𑀢𑁆𑀢𑀦𑁄 𑀨𑀮𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀧𑀭𑀺𑀬𑀸𑀬𑁄, 𑀓𑀸𑀭𑀡𑀦𑁆𑀢𑀺 𑀏𑀯𑀁 𑀧𑀭𑀺𑀬𑀸𑀬-𑀲𑀤𑁆𑀤𑀲𑁆𑀲 𑀯𑀸𑀭𑀸𑀤𑀻𑀲𑀼 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀸𑀭𑀡𑁂𑀦𑀸𑀢𑀺 𑀓𑀸𑀭𑀡𑀧𑀢𑀺𑀭𑀽𑀧𑀓𑁂𑀦. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀅𑀓𑀸𑀭𑀡𑀫𑁂𑀯 𑀓𑀸𑀭𑀡𑀦𑁆𑀢𑀺 𑀯𑀢𑁆𑀯𑀸’’𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 ‘‘𑀅𑀯𑀡𑁆𑀡𑀁 𑀪𑀸𑀲𑀢𑀻’’𑀢𑀺, ‘‘𑀯𑀡𑁆𑀡𑀁 𑀪𑀸𑀲𑀢𑀻’’𑀢𑀺 𑀘 𑀯𑀢𑁆𑀢𑀫𑀸𑀦𑀓𑀸𑀮𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀦𑀦𑀼 𑀲𑀗𑁆𑀕𑀻𑀢𑀺𑀓𑀸𑀮𑀢𑁄 𑀲𑁄 𑀅𑀯𑀡𑁆𑀡𑀯𑀡𑁆𑀡𑀸𑀦𑀁 𑀪𑀸𑀲𑀺𑀢𑀓𑀸𑀮𑁄 𑀅𑀢𑀻𑀢𑁄𑀢𑀺? 𑀲𑀘𑁆𑀘𑀫𑁂𑀢𑀁, ‘‘𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺 𑀏𑀢𑁆𑀣 𑀳𑁄𑀢𑀺-𑀲𑀤𑁆𑀤𑁄 𑀯𑀺𑀬 𑀅𑀢𑀻𑀢𑀓𑀸𑀮𑀢𑁆𑀣𑁄 𑀪𑀸𑀲𑀢𑀺-𑀲𑀤𑁆𑀤𑁄 𑀘 𑀤𑀝𑁆𑀞𑀩𑁆𑀩𑁄. 𑀅𑀣 𑀯𑀸 𑀬𑀲𑁆𑀫𑀺𑀁 𑀓𑀸𑀮𑁂 𑀢𑁂𑀳𑀺 𑀅𑀯𑀡𑁆𑀡𑁄 𑀯𑀡𑁆𑀡𑁄 𑀘 𑀪𑀸𑀲𑀻𑀬𑀢𑀺, 𑀢𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀢𑀢𑁆𑀭𑀸𑀢𑀺 𑀓𑀸𑀮𑀲𑁆𑀲 𑀧𑀝𑀺𑀦𑀺𑀤𑁆𑀤𑁂𑀲𑁄’’𑀢𑀺 𑀇𑀤𑀜𑁆𑀘 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺.

𑀅𑀓𑀸𑀭𑀡𑀦𑁆𑀢𑀺 𑀅𑀬𑀼𑀢𑁆𑀢𑀺𑀁, 𑀅𑀦𑀼𑀧𑀧𑀢𑁆𑀢𑀺𑀦𑁆𑀢𑀺 𑀅𑀢𑁆𑀣𑁄. 𑀦 𑀳𑀺 𑀅𑀭𑀲𑀭𑀽𑀧𑀢𑀸𑀤𑀬𑁄 𑀤𑁄𑀲𑀸 𑀪𑀕𑀯𑀢𑀺 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀥𑀫𑁆𑀫𑀲𑀗𑁆𑀖𑀸𑀦𑀜𑁆𑀘 𑀤𑀼𑀭𑀓𑁆𑀔𑀸𑀢𑀤𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀤𑀬𑁄𑀢𑀺. 𑀅𑀓𑀸𑀭𑀡𑀦𑁆𑀢𑀺 𑀯𑀸 𑀬𑀼𑀢𑁆𑀢𑀓𑀸𑀭𑀡𑀭𑀳𑀺𑀢𑀁, 𑀧𑀝𑀺𑀜𑁆𑀜𑀸𑀫𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄 ¶ . 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑁂 𑀓𑀸𑀭𑀡𑀦𑁆𑀢𑀺 𑀯𑀢𑁆𑀯𑀸𑀢𑀺 𑀓𑀸𑀭𑀡𑀁 𑀯𑀸𑀢𑀺 𑀯𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀭𑀲𑀭𑀽𑀧𑀸𑀤𑀻𑀦𑀜𑁆𑀘𑁂𑀢𑁆𑀣 𑀚𑀸𑀢𑀺𑀯𑀼𑀟𑁆𑀠𑁂𑀲𑀼 𑀅𑀪𑀺𑀯𑀸𑀤𑀦𑀸𑀤𑀺𑀲𑀸𑀫𑀻𑀘𑀺𑀓𑀫𑁆𑀫𑀸𑀓𑀭𑀡𑀁 𑀓𑀸𑀭𑀡𑀁, 𑀢𑀣𑀸 ¶ 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀸𑀪𑀸𑀯𑀲𑁆𑀲 𑀲𑀼𑀦𑁆𑀤𑀭𑀺𑀓𑀸𑀫𑀕𑀼𑀡𑀸𑀤𑀺𑀦𑀯𑀩𑁄𑀥𑁄, 𑀲𑀁𑀲𑀸𑀭𑀲𑁆𑀲 𑀆𑀤𑀺𑀓𑁄𑀝𑀺𑀬𑀸 𑀅𑀧𑀜𑁆𑀜𑀸𑀬𑀦𑀧𑀝𑀺𑀜𑁆𑀜𑀸, 𑀅𑀩𑁆𑀬𑀸𑀓𑀢𑀯𑀢𑁆𑀣𑀼𑀩𑁆𑀬𑀸𑀓𑀭𑀡𑀦𑁆𑀢𑀺 𑀏𑀯𑀫𑀸𑀤𑀬𑁄, 𑀢𑀣𑀸 𑀅𑀲𑀩𑁆𑀩𑀜𑁆𑀜𑀼𑀢𑀸𑀤𑀻𑀦𑀁 𑀓𑀫𑀸𑀯𑀩𑁄𑀥𑀸𑀤𑀬𑁄 𑀬𑀣𑀸𑀭𑀳𑀁 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀢𑀣𑀸 𑀢𑀣𑀸𑀢𑀺 𑀚𑀸𑀢𑀺𑀯𑀼𑀟𑁆𑀠𑀸𑀦𑀁 𑀅𑀦𑀪𑀺𑀯𑀸𑀤𑀦𑀸𑀤𑀺𑀆𑀓𑀸𑀭𑁂𑀦.

𑀅𑀯𑀡𑁆𑀡𑀁 𑀪𑀸𑀲𑀫𑀸𑀦𑁄𑀢𑀺 𑀅𑀯𑀡𑁆𑀡𑀁𑀪𑀸𑀲𑀦𑀳𑁂𑀢𑀼. 𑀳𑁂𑀢𑀼𑀅𑀢𑁆𑀣𑁄 𑀳𑀺 𑀅𑀬𑀁 𑀫𑀸𑀦-𑀲𑀤𑁆𑀤𑁄. 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑀺𑀲𑁆𑀲𑀢𑀺 𑀏𑀓𑀦𑁆𑀢𑀫𑀳𑀸𑀲𑀸𑀯𑀚𑁆𑀚𑀢𑁆𑀢𑀸 𑀭𑀢𑀦𑀢𑁆𑀢𑀬𑁄𑀧𑀯𑀸𑀤𑀲𑁆𑀲. 𑀢𑁂𑀦𑁂𑀯𑀸𑀳 𑁋

‘‘𑀬𑁄 ¶ 𑀦𑀺𑀦𑁆𑀤𑀺𑀬𑀁 𑀧𑀲𑀁𑀲𑀢𑀺,

𑀢𑀁 𑀯𑀸 𑀦𑀺𑀦𑁆𑀤𑀢𑀺 𑀬𑁄 𑀧𑀲𑀁𑀲𑀺𑀬𑁄;

𑀯𑀺𑀘𑀺𑀦𑀸𑀢𑀺 𑀫𑀼𑀔𑁂𑀦 𑀲𑁄 𑀓𑀮𑀺𑀁,

𑀓𑀮𑀺𑀦𑀸 𑀢𑁂𑀦 𑀲𑀼𑀔𑀁 𑀦 𑀯𑀺𑀦𑁆𑀤𑀢𑀻’’𑀢𑀺.

‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄’’𑀢𑀺𑀆𑀤𑀺𑀦𑀸 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀲𑀁𑀯𑁂𑀕𑀼𑀧𑁆𑀧𑀢𑁆𑀢𑀺𑀁, 𑀅𑀢𑁆𑀢𑀦𑁄 𑀆𑀘𑀭𑀺𑀬𑁂 𑀓𑀸𑀭𑀼𑀜𑁆𑀜𑀧𑁆𑀧𑀯𑀢𑁆𑀢𑀺𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀓𑀺𑀜𑁆𑀘𑀸𑀧𑀺 𑀅𑀦𑁆𑀢𑁂𑀯𑀸𑀲𑀺𑀦𑀸 𑀆𑀘𑀭𑀺𑀬𑀲𑁆𑀲 𑀅𑀦𑀼𑀓𑀽𑀮𑁂𑀦 𑀪𑀯𑀺𑀢𑀩𑁆𑀩𑀁, 𑀅𑀬𑀁 𑀧𑀦 𑀧𑀡𑁆𑀟𑀺𑀢𑀚𑀸𑀢𑀺𑀓𑀢𑁆𑀢𑀸 𑀦 𑀏𑀤𑀺𑀲𑁂𑀲𑀼 𑀢𑀁 𑀅𑀦𑀼𑀯𑀢𑁆𑀢𑀢𑀻𑀢𑀺, 𑀇𑀤𑀸𑀦𑀺 𑀢𑀲𑁆𑀲 𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀘𑀭𑀺𑀬𑁂 𑀔𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀯𑀡𑁆𑀡𑀁 𑀪𑀸𑀲𑀺𑀢𑀼𑀁 𑀆𑀭𑀤𑁆𑀥𑁄 ‘‘𑀅𑀧𑀺𑀦𑀸𑀫𑀸𑀬𑀁 𑀏𑀢𑁆𑀢𑀓𑁂𑀦𑀸𑀧𑀺 𑀭𑀢𑀦𑀢𑁆𑀢𑀬𑀸𑀯𑀡𑁆𑀡𑀢𑁄 𑀑𑀭𑀫𑁂𑀬𑁆𑀬𑀸’’𑀢𑀺. 𑀯𑀡𑁆𑀡𑀻𑀬𑀢𑀻𑀢𑀺 𑀯𑀡𑁆𑀡𑁄, 𑀕𑀼𑀡𑁄. 𑀯𑀡𑁆𑀡𑀦𑀁 𑀕𑀼𑀡𑀲𑀗𑁆𑀓𑀺𑀢𑁆𑀢𑀦𑀦𑁆𑀢𑀺 𑀯𑀡𑁆𑀡𑁄, 𑀧𑀲𑀁𑀲𑀸. 𑀲𑀁𑀜𑁆𑀜𑀽𑀴𑁆𑀳𑀸𑀢𑀺 𑀕𑀦𑁆𑀣𑀺𑀢𑀸, 𑀦𑀺𑀩𑀦𑁆𑀥𑀺𑀢𑀸𑀢𑀺 𑀅𑀢𑁆𑀣𑁄. 𑀅𑀢𑀺𑀢𑁆𑀣𑁂𑀦 𑀧𑀓𑁆𑀔𑀦𑁆𑀤𑁄 𑀥𑀫𑁆𑀫𑀓𑀣𑀺𑀓𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄 𑀅𑀧𑀭𑀺𑀫𑀸𑀡𑀕𑀼𑀡𑀢𑁆𑀢𑀸 𑀩𑀼𑀤𑁆𑀥𑀸𑀤𑀻𑀦𑀁 ¶ , 𑀦𑀺𑀭𑀯𑀲𑁂𑀲𑀸𑀦𑀜𑁆𑀘 𑀢𑁂𑀲𑀁 𑀇𑀥 𑀧𑀓𑀸𑀲𑀦𑀁 𑀧𑀸𑀴𑀺𑀲𑀁𑀯𑀡𑁆𑀡𑀦𑀸𑀬𑁂𑀯 𑀲𑀫𑁆𑀧𑀚𑁆𑀚𑀢𑀻𑀢𑀺. 𑀅𑀦𑀼𑀲𑁆𑀲𑀯𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀢𑁆𑀢𑀦𑁄 𑀣𑀸𑀫𑁂𑀦 𑀯𑀡𑁆𑀡𑀁 𑀅𑀪𑀸𑀲𑀺, 𑀦 𑀧𑀦 𑀩𑀼𑀤𑁆𑀥𑀸𑀤𑀻𑀦𑀁 𑀕𑀼𑀡𑀸𑀦𑀼𑀭𑀽𑀧𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀲𑀗𑁆𑀔𑁆𑀬𑀬𑁆𑀬𑀸𑀧𑀭𑀺𑀫𑀺𑀢𑀧𑁆𑀧𑀪𑁂𑀤𑀸 𑀳𑀺 𑀩𑀼𑀤𑁆𑀥𑀸𑀤𑀻𑀦𑀁 𑀕𑀼𑀡𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀩𑀼𑀤𑁆𑀥𑁄𑀧𑀺 ¶ 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁,

𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄;

𑀔𑀻𑀬𑁂𑀣 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂,

𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺.

𑀇𑀥𑀸𑀧𑀺 𑀯𑀓𑁆𑀔𑀢𑀺 ‘‘𑀅𑀧𑁆𑀧𑀫𑀢𑁆𑀢𑀓𑀁 𑀔𑁄 𑀧𑀦𑁂𑀢’’𑀦𑁆𑀢𑀺𑀆𑀤𑀺.

𑀇𑀢𑀺 𑀳 𑀢𑁂𑀢𑀺 𑀏𑀢𑁆𑀣 𑀇𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀭𑀸𑀫𑀲𑀦𑀁. 𑀳-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀯𑀁 𑀢𑁂’’𑀢𑀺.

𑀇𑀭𑀺𑀬𑀸𑀧𑀣𑀸𑀦𑀼𑀩𑀦𑁆𑀥𑀦𑁂𑀦 𑀅𑀦𑀼𑀩𑀦𑁆𑀥𑀸 𑀳𑁄𑀦𑁆𑀢𑀺, 𑀦 𑀧𑀦 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀅𑀦𑀼𑀩𑀦𑁆𑀥𑀦𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀫𑀺𑀁 𑀓𑀸𑀮𑁂𑀢𑀺 𑀬𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀉𑀢𑀼𑀫𑁆𑀳𑀺 𑀫𑀸𑀲𑁂 𑀧𑀓𑁆𑀔𑁂 𑀯𑀸 𑀪𑀕𑀯𑀸 𑀢𑀁 𑀅𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄, 𑀢𑀲𑁆𑀫𑀺𑀁 𑀓𑀸𑀮𑁂. 𑀢𑁂𑀦𑁂𑀯 𑀳𑀺 𑀓𑀺𑀭𑀺𑀬𑀸𑀯𑀺𑀘𑁆𑀙𑁂𑀤𑀤𑀲𑁆𑀲𑀦𑀯𑀲𑁂𑀦 ‘‘𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀢𑀻’’𑀢𑀺 𑀯𑀢𑁆𑀢𑀫𑀸𑀦𑀓𑀸𑀮𑀦𑀺𑀤𑁆𑀤𑁂𑀲𑁄 ¶ 𑀓𑀢𑁄. 𑀲𑁄𑀢𑀺 𑀏𑀯𑀁 𑀭𑀸𑀚𑀕𑀳𑁂 𑀯𑀲𑀫𑀸𑀦𑁄 𑀪𑀕𑀯𑀸. 𑀢𑀁 𑀤𑀺𑀯𑀲𑀦𑁆𑀢𑀺 𑀬𑀁 𑀤𑀺𑀯𑀲𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑁄, 𑀢𑀁 𑀤𑀺𑀯𑀲𑀁. 𑀢𑀁 𑀅𑀤𑁆𑀥𑀸𑀦𑀁 𑀧𑀝𑀺𑀧𑀦𑁆𑀦𑁄 𑀦𑀸𑀴𑀦𑁆𑀤𑀸𑀬𑀁 𑀯𑁂𑀦𑁂𑀬𑁆𑀬𑀸𑀦𑀁 𑀯𑀺𑀯𑀺𑀥 𑀳𑀺𑀢𑀲𑀼𑀔𑀦𑀺𑀧𑁆𑀨𑀢𑁆𑀢𑀺𑀁 𑀆𑀓𑀗𑁆𑀔𑀫𑀸𑀦𑁄 𑀇𑀫𑀺𑀲𑁆𑀲𑀸 𑀘 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀢𑀺𑀯𑀺𑀥𑀲𑀻𑀮𑀸𑀮𑀗𑁆𑀓𑀢𑀁 𑀦𑀸𑀦𑀸𑀯𑀺𑀥𑀓𑀼𑀳𑀦𑀮𑀧𑀦𑀸𑀤𑀺𑀫𑀺𑀘𑁆𑀙𑀸𑀚𑀻𑀯𑀯𑀺𑀤𑁆𑀥𑀁𑀲𑀦𑀁 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀚𑀸𑀮𑀯𑀺𑀦𑀺𑀯𑁂𑀞𑀦𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀧𑀓𑀫𑁆𑀧𑀦𑀁 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀦𑁆𑀢𑀁 𑀤𑁂𑀲𑁂𑀲𑁆𑀲𑀸𑀫𑀻𑀢𑀺. 𑀏𑀢𑁆𑀢𑀸𑀯𑀢𑀸 ‘‘𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀢𑀁 𑀅𑀤𑁆𑀥𑀸𑀦𑀁 𑀧𑀝𑀺𑀧𑀦𑁆𑀦𑁄’’𑀢𑀺 𑀘𑁄𑀤𑀦𑀸 𑀯𑀺𑀲𑁄𑀥𑀺𑀢𑀸 𑀳𑁄𑀢𑀺. ‘‘𑀓𑀲𑁆𑀫𑀸 𑀘 𑀲𑀼𑀧𑁆𑀧𑀺𑀬𑁄 𑀅𑀦𑀼𑀩𑀦𑁆𑀥𑁄’’𑀢𑀺 𑀅𑀬𑀁 𑀧𑀦 𑀘𑁄𑀤𑀦𑀸 ‘‘𑀪𑀕𑀯𑀢𑁄 ¶ 𑀢𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀪𑀸𑀯𑀁 𑀅𑀚𑀸𑀦𑀦𑁆𑀢𑁄’’𑀢𑀺 𑀏𑀢𑁂𑀦 𑀯𑀺𑀲𑁄𑀥𑀺𑀢𑀸 𑀳𑁄𑀢𑀺. 𑀦 𑀳𑀺 𑀲𑁄 𑀪𑀕𑀯𑀦𑁆𑀢𑀁 𑀤𑀝𑁆𑀞𑀼𑀫𑁂𑀯 𑀇𑀘𑁆𑀙𑀢𑀻𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑀘𑁂 𑀧𑀦 𑀚𑀸𑀦𑁂𑀬𑁆𑀬, 𑀦𑀸𑀦𑀼𑀩𑀦𑁆𑀥𑁂𑀬𑁆𑀬𑀸’’𑀢𑀺.

𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀫𑀜𑁆𑀚𑀺𑀝𑁆𑀞𑀧𑀪𑀲𑁆𑀲𑀭𑀯𑀲𑁂𑀦 ‘‘𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄. ‘‘𑀲𑀫𑀦𑁆𑀢𑀸 𑀅𑀲𑀻𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑁂’’𑀢𑀺 𑀢𑀸𑀲𑀁 𑀭𑀲𑁆𑀫𑀻𑀦𑀁 𑀧𑀓𑀢𑀺𑀬𑀸 𑀧𑀯𑀢𑁆𑀢𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀁. ‘‘𑀢𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂’’𑀢𑀺 𑀘 𑀢𑀲𑁆𑀫𑀺𑀁 𑀅𑀤𑁆𑀥𑀸𑀦𑀕𑀫𑀦𑀲𑀫𑀬𑁂 𑀩𑀼𑀤𑁆𑀥𑀲𑀺𑀭𑀺𑀬𑀸 𑀅𑀦𑀺𑀕𑀽𑀳𑀺𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀦 𑀳𑀺 𑀢𑀤𑀸 𑀢𑀲𑁆𑀲𑀸 𑀦𑀺𑀕𑀽𑀳𑀦𑁂 𑀧𑀓𑁆𑀓𑀼𑀲𑀸𑀢𑀺𑀅𑀪𑀺𑀕𑀫𑀦𑀸𑀤𑀻𑀲𑀼 𑀯𑀺𑀬 𑀓𑀺𑀜𑁆𑀘𑀺𑀧𑀺 𑀓𑀸𑀭𑀡𑀁 𑀅𑀢𑁆𑀣𑀻𑀢𑀺. 𑀭𑀢𑀦𑀸𑀯𑁂𑀴𑀁 𑀭𑀢𑀦𑀯𑀝𑀁𑀲𑀓𑀁. 𑀘𑀻𑀦𑀧𑀺𑀝𑁆𑀞𑀘𑀼𑀡𑁆𑀡𑀁 𑀲𑀺𑀦𑁆𑀥𑀦𑀘𑀼𑀡𑁆𑀡𑀁.

𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑁂𑀧𑀯𑀺𑀮𑀸𑀲𑀺𑀦𑀻 ¶ 𑀘 𑀅𑀲𑁆𑀲 𑀪𑀕𑀯𑀢𑁄 𑀮𑀓𑁆𑀔𑀡𑀫𑀸𑀮𑀸𑀢𑀺 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀅𑀜𑁆𑀜𑀫𑀜𑁆𑀜𑀧𑀝𑀺𑀩𑀤𑁆𑀥𑀢𑁆𑀢𑀸 𑀏𑀯𑀫𑀸𑀳. 𑀤𑁆𑀯𑀢𑁆𑀢𑀺𑀁𑀲𑀸𑀬 𑀘𑀦𑁆𑀤𑀫𑀡𑁆𑀟𑀮𑀸𑀦𑀁 𑀫𑀸𑀮𑀸 𑀓𑁂𑀦𑀘𑀺 𑀕𑀦𑁆𑀣𑁂𑀢𑁆𑀯𑀸 𑀞𑀧𑀺𑀢𑀸 𑀬𑀤𑀺 𑀲𑀺𑀬𑀸𑀢𑀺 𑀧𑀭𑀺𑀓𑀧𑁆𑀧𑀦𑀯𑀲𑁂𑀦𑀸𑀳 ‘‘𑀕𑀦𑁆𑀣𑁂𑀢𑁆𑀯𑀸 𑀞𑀧𑀺𑀢𑀤𑁆𑀯𑀢𑁆𑀢𑀺𑀁𑀲𑀘𑀦𑁆𑀤𑀫𑀸𑀮𑀸𑀬𑀸’’𑀢𑀺. 𑀲𑀺𑀭𑀺𑀁 𑀅𑀪𑀺𑀪𑀯𑀦𑁆𑀢𑀻 𑀇𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀲 𑀦𑀬𑁄 𑀲𑀽𑀭𑀺𑀬𑀫𑀸𑀮𑀸𑀬𑀸𑀢𑀺𑀆𑀤𑀻𑀲𑀼𑀧𑀺. 𑀫𑀳𑀸𑀣𑁂𑀭𑀸𑀢𑀺 𑀫𑀳𑀸𑀲𑀸𑀯𑀓𑁂 𑀲𑀦𑁆𑀥𑀸𑀬𑀸𑀳. 𑀏𑀯𑀁 𑀕𑀘𑁆𑀙𑀦𑁆𑀢𑀁 𑀪𑀕𑀯𑀦𑁆𑀢𑀁 𑀪𑀺𑀓𑁆𑀔𑀽 𑀘 𑀤𑀺𑀲𑁆𑀯𑀸 𑀅𑀣 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀅𑀯𑀮𑁄𑀓𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑀲𑁆𑀫𑀸 𑀧𑀦𑁂𑀲𑀸’’𑀢𑀺𑀆𑀤𑀺𑀦𑀸 ‘‘𑀓𑀲𑁆𑀫𑀸 𑀘 𑀲𑁄 𑀭𑀢𑀦𑀢𑁆𑀢𑀬𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀻’’𑀢𑀺 𑀘𑁄𑀤𑀦𑀁 𑀯𑀺𑀲𑁄𑀥𑁂𑀢𑀺. 𑀇𑀢𑀻𑀢𑀺 𑀏𑀯𑀁, 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀫𑁂𑀳𑀺 𑀤𑁆𑀯𑀻𑀳𑀻𑀢𑀺 𑀮𑀸𑀪𑀧𑀭𑀺𑀯𑀸𑀭𑀳𑀸𑀦𑀺𑀁 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀢𑀺. 𑀪𑀕𑀯𑀢𑁄 𑀯𑀺𑀭𑁄𑀥𑀸𑀦𑀼𑀦𑀬𑀸𑀪𑀸𑀯𑀯𑀻𑀫𑀁𑀲𑀦𑀢𑁆𑀣𑀁 𑀏𑀢𑁂 𑀅𑀯𑀡𑁆𑀡𑀁 𑀯𑀡𑁆𑀡𑀜𑁆𑀘 𑀪𑀸𑀲𑀦𑁆𑀢𑀻𑀢𑀺 𑀅𑀧𑀭𑁂. ‘‘𑀫𑀸𑀭𑁂𑀦 𑀅𑀦𑁆𑀯𑀸𑀯𑀺𑀝𑁆𑀞𑀸 𑀏𑀯𑀁 𑀓𑀭𑁄𑀦𑁆𑀢𑀻’’𑀢𑀺 𑀘 𑀯𑀤𑀦𑁆𑀢𑀺.

𑁨. 𑀅𑀫𑁆𑀩𑀮𑀝𑁆𑀞𑀺𑀓𑀸𑀬 𑀅𑀯𑀺𑀤𑀽𑀭𑁂 𑀪𑀯𑀢𑁆𑀢𑀸 𑀉𑀬𑁆𑀬𑀸𑀦𑀁 𑀅𑀫𑁆𑀩𑀮𑀝𑁆𑀞𑀺𑀓𑀸 𑀬𑀣𑀸 ‘‘𑀯𑀭𑀼𑀡𑀸𑀦𑀕𑀭𑀁, 𑀕𑁄𑀤𑀸𑀕𑀸𑀫𑁄’’𑀢𑀺. 𑀓𑁂𑀘𑀺 𑀧𑀦 ‘‘𑀅𑀫𑁆𑀩𑀮𑀝𑁆𑀞𑀺𑀓𑀸𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑁂𑀯 𑀏𑀓𑀕𑀸𑀫𑁄’’𑀢𑀺 𑀯𑀤𑀦𑁆𑀢𑀺 ¶ . 𑀢𑁂𑀲𑀁 𑀫𑀢𑁂 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀦𑁆𑀢𑀺 𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁. 𑀭𑀸𑀚𑀸𑀕𑀸𑀭𑀓𑀁 𑀯𑁂𑀲𑁆𑀲𑀯𑀡𑀫𑀳𑀸𑀭𑀸𑀚𑀤𑁂𑀯𑀸𑀬𑀢𑀦𑀦𑁆𑀢𑀺 𑀏𑀓𑁂. 𑀩𑀳𑀼𑀧𑀭𑀺𑀲𑁆𑀲𑀬𑁄𑀢𑀺 𑀩𑀳𑀼𑀧𑀤𑁆𑀤𑀯𑁄. ‘‘𑀲𑀤𑁆𑀥𑀺𑀁 𑀅𑀦𑁆𑀢𑁂𑀯𑀸𑀲𑀺𑀦𑀸 𑀩𑁆𑀭𑀳𑁆𑀫𑀤𑀢𑁆𑀢𑁂𑀦 𑀫𑀸𑀡𑀯𑁂𑀦𑀸’’𑀢𑀺 𑀯𑀼𑀢𑁆𑀢𑀁 𑀲𑀻𑀳𑀴𑀝𑁆𑀞𑀓𑀣𑀸𑀬𑀁. 𑀢𑀜𑁆𑀘 𑀔𑁄 𑀧𑀸𑀴𑀺 𑀆𑀭𑀼𑀴𑁆𑀳𑀯𑀲𑁂𑀦𑁂𑀯, 𑀦 𑀧𑀦 𑀢𑀤𑀸 𑀲𑀼𑀧𑁆𑀧𑀺𑀬𑀲𑁆𑀲 𑀧𑀭𑀺𑀲𑀸𑀬 𑀅𑀪𑀸𑀯𑀢𑁄. 𑀓𑀲𑁆𑀫𑀸 𑀧𑀦𑁂𑀢𑁆𑀣 ¶ 𑀩𑁆𑀭𑀳𑁆𑀫𑀤𑀢𑁆𑀢𑁄𑀬𑁂𑀯 𑀧𑀸𑀴𑀺 𑀆𑀭𑀼𑀴𑁆𑀳𑁄, 𑀦 𑀲𑀼𑀧𑁆𑀧𑀺𑀬𑀲𑁆𑀲 𑀧𑀭𑀺𑀲𑀸𑀢𑀺? 𑀧𑀬𑁄𑀚𑀦𑀸𑀪𑀸𑀯𑀢𑁄. 𑀬𑀣𑀸 𑀘𑁂𑀢𑀁, 𑀏𑀯𑀁 𑀅𑀜𑁆𑀜𑀫𑁆𑀧𑀺 𑀏𑀤𑀺𑀲𑀁 𑀧𑀬𑁄𑀚𑀦𑀸𑀪𑀸𑀯𑀢𑁄 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀦 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑁂𑀘𑀺 𑀧𑀦 ‘‘𑀯𑀼𑀢𑁆𑀢𑀦𑁆𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀚𑁆𑀚𑀢𑀺 𑀧𑀸𑀴𑀺𑀆𑀭𑀼𑀴𑁆𑀳𑀯𑀲𑁂𑀦 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀆𑀧𑀚𑁆𑀚𑀦𑀢𑁄. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁩. 𑀓𑀣𑀸𑀥𑀫𑁆𑀫𑁄𑀢𑀺 𑀓𑀣𑀸𑀲𑀪𑀸𑀯𑁄, 𑀓𑀣𑀸𑀥𑀫𑁆𑀫𑁄 𑀉𑀧𑀧𑀭𑀺𑀓𑁆𑀔𑀸𑀯𑀺𑀥𑀻𑀢𑀺 𑀓𑁂𑀘𑀺. 𑀦𑀻𑀬𑀢𑀻𑀢𑀺 𑀦𑀬𑁄, 𑀅𑀢𑁆𑀣𑁄. 𑀲𑀤𑁆𑀤𑀲𑀢𑁆𑀣𑀁 𑀅𑀦𑀼𑀕𑀢𑁄 𑀦𑀬𑁄 𑀲𑀤𑁆𑀤𑀦𑀬𑁄. 𑀢𑀢𑁆𑀣 𑀳𑀺 𑀅𑀦𑀪𑀺𑀡𑁆𑀳𑀯𑀼𑀢𑁆𑀢𑀺𑀓𑁂 𑀅𑀘𑁆𑀙𑀭𑀺𑀬-𑀲𑀤𑁆𑀤𑁄 𑀇𑀘𑁆𑀙𑀺𑀢𑁄. 𑀢𑁂𑀦𑁂𑀯𑀸𑀳 ‘‘𑀅𑀦𑁆𑀥𑀲𑁆𑀲 𑀧𑀩𑁆𑀩𑀢𑀸𑀭𑁄𑀳𑀡𑀁 𑀯𑀺𑀬𑀸’’𑀢𑀺. 𑀅𑀘𑁆𑀙𑀭𑀸𑀬𑁄𑀕𑁆𑀕𑀦𑁆𑀢𑀺 𑀅𑀘𑁆𑀙𑀭𑀺𑀬𑀦𑁆𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁄 ¶ , 𑀲𑁄 𑀧𑀦 𑀬𑀲𑁆𑀫𑀸 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀁 𑀆𑀕𑀢𑁄, 𑀢𑀲𑁆𑀫𑀸 𑀆𑀳 ‘‘𑀅𑀝𑁆𑀞𑀓𑀣𑀸𑀦𑀬𑁄𑀢𑀺. 𑀬𑀸𑀯𑀜𑁆𑀘𑀺𑀤𑀁 𑀲𑀼𑀧𑁆𑀧𑀝𑀺𑀯𑀺𑀤𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀢𑀲𑁆𑀲 𑀬𑀢𑁆𑀢𑀓𑀁 𑀲𑀼𑀝𑁆𑀞𑀼 𑀧𑀝𑀺𑀯𑀺𑀤𑀺𑀢𑀸, 𑀢𑀁 𑀏𑀢𑁆𑀢𑀓𑀦𑁆𑀢𑀺 𑀦 𑀲𑀓𑁆𑀓𑀸 𑀅𑀫𑁆𑀳𑁂𑀳𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁, 𑀅𑀓𑁆𑀔𑀸𑀢𑀼𑀁 𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀢𑁂𑀦 𑀲𑀼𑀧𑁆𑀧𑀝𑀺𑀯𑀺𑀤𑀺𑀢𑀢𑀸𑀬 𑀅𑀧𑁆𑀧𑀫𑁂𑀬𑁆𑀬𑀢𑀁 𑀤𑀲𑁆𑀲𑁂𑀢𑀻’’𑀢𑀺.

𑀧𑀓𑀢𑀢𑁆𑀣𑀧𑀝𑀺𑀦𑀺𑀤𑁆𑀤𑁂𑀲𑁄 𑀢𑀁-𑀲𑀤𑁆𑀤𑁄𑀢𑀺 𑀢𑀲𑁆𑀲 ‘‘𑀪𑀕𑀯𑀢𑀸’’𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀲𑁆𑀲 𑀬𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀪𑀸𑀯𑁂𑀦 𑀪𑀕𑀯𑀸 𑀧𑀓𑀢𑁄 𑀲𑀼𑀧𑀸𑀓𑀝𑁄 𑀘 𑀳𑁄𑀢𑀺, 𑀢𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀪𑀸𑀯𑀁 𑀲𑀤𑁆𑀥𑀺𑀁 𑀆𑀕𑀫𑀦𑀧𑀝𑀺𑀧𑀤𑀸𑀬 𑀅𑀢𑁆𑀣𑀪𑀸𑀯𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀲𑁄…𑀧𑁂… 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀆𑀳. 𑀲𑀢𑀺𑀧𑀺 𑀜𑀸𑀡𑀤𑀲𑁆𑀲𑀦-𑀲𑀤𑁆𑀤𑀸𑀦𑀁 𑀇𑀥 𑀧𑀜𑁆𑀜𑀸𑀯𑁂𑀯𑀘𑀦𑀪𑀸𑀯𑁂 𑀢𑁂𑀦 𑀢𑁂𑀦 𑀯𑀺𑀲𑁂𑀲𑁂𑀦 𑀦𑁂𑀲𑀁 𑀲𑀯𑀺𑀲𑀬𑀯𑀺𑀲𑁂𑀲𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀅𑀲𑀸𑀥𑀸𑀭𑀡𑀜𑀸𑀡𑀯𑀺𑀲𑁂𑀲𑀯𑀲𑁂𑀦 ¶ 𑀯𑀺𑀚𑁆𑀚𑀢𑁆𑀢𑀬𑀯𑀲𑁂𑀦 𑀯𑀺𑀚𑁆𑀚𑀸𑀪𑀺𑀜𑁆𑀜𑀸𑀦𑀸𑀯𑀭𑀡𑀯𑀲𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑀁𑀲𑀘𑀓𑁆𑀔𑀼𑀯𑀲𑁂𑀦 𑀧𑀝𑀺𑀯𑁂𑀥𑀤𑁂𑀲𑀦𑀸𑀜𑀸𑀡𑀯𑀲𑁂𑀦 𑀘 𑀢𑀤𑀢𑁆𑀣𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀲𑀁 𑀢𑁂𑀲’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀲𑀬𑀸𑀦𑀼𑀲𑀬𑀁 𑀚𑀸𑀦𑀢𑀸𑀆𑀲𑀬𑀸𑀦𑀼𑀲𑀬𑀜𑀸𑀡𑁂𑀦. 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀁 𑀧𑀲𑁆𑀲𑀢𑀸 𑀲𑀩𑁆𑀩𑀜𑁆𑀜𑀼𑀢𑀸𑀦𑀸𑀯𑀭𑀡𑀜𑀸𑀡𑁂𑀳𑀺.

𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀤𑀻𑀳𑀻𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀲𑀯𑀓𑁆𑀔𑀬𑀜𑀸𑀡𑁂𑀳𑀺. 𑀧𑀝𑀺𑀯𑁂𑀥𑀧𑀜𑁆𑀜𑀸𑀬𑀸𑀢𑀺 𑀅𑀭𑀺𑀬𑀫𑀕𑁆𑀕𑀧𑀜𑁆𑀜𑀸𑀬. 𑀅𑀭𑀻𑀦𑀦𑁆𑀢𑀺 𑀓𑀺𑀮𑁂𑀲𑀸𑀭𑀻𑀦𑀁, 𑀧𑀜𑁆𑀘𑀯𑀺𑀥𑀫𑀸𑀭𑀸𑀦𑀁 𑀯𑀸, 𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀯𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁, 𑀢𑁂𑀲𑀁 𑀳𑀦𑀦𑀁 𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀅𑀪𑀺𑀪𑀯𑀦𑀁, 𑀅𑀧𑁆𑀧𑀝𑀺𑀪𑀸𑀦𑀢𑀸𑀓𑀭𑀡𑀁, 𑀅𑀚𑁆𑀛𑀼𑀧𑁂𑀓𑁆𑀔𑀦𑀜𑁆𑀘. 𑀓𑁂𑀲𑀺𑀯𑀺𑀦𑀬𑀲𑀼𑀢𑁆𑀢𑀜𑁆𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁.

𑀢𑀣𑀸 𑀞𑀸𑀦𑀸𑀞𑀸𑀦𑀸𑀤𑀻𑀦𑀺 𑀚𑀸𑀦𑀢𑀸, 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀲𑁆𑀲𑀢𑀸, 𑀲𑀯𑀸𑀲𑀦𑀸𑀦𑀁 𑀆𑀲𑀯𑀸𑀦𑀁 𑀔𑀻𑀡𑀢𑁆𑀢𑀸 𑀅𑀭𑀳𑀢𑀸, 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀪𑁂𑀤𑁂 𑀥𑀫𑁆𑀫𑁂 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀢𑁄 𑀅𑀯𑀺𑀧𑀭𑀻𑀢𑀸𑀯𑀩𑁄𑀥𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 ¶ . 𑀅𑀣 𑀯𑀸 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀢𑀸𑀬 𑀚𑀸𑀦𑀢𑀸, 𑀢𑀺𑀡𑁆𑀡𑀫𑁆𑀧𑀺 𑀓𑀫𑁆𑀫𑀸𑀦𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀢𑁄 𑀦𑀺𑀲𑀫𑁆𑀫𑀓𑀸𑀭𑀺𑀢𑀸𑀬 𑀧𑀲𑁆𑀲𑀢𑀸, 𑀤𑀯𑀸𑀤𑀻𑀦𑀫𑁆𑀧𑀺 𑀅𑀪𑀸𑀯𑀲𑀸𑀥𑀺𑀓𑀸𑀬 𑀧𑀳𑀸𑀦𑀲𑀫𑁆𑀧𑀤𑀸𑀬 𑀅𑀭𑀳𑀢𑀸, 𑀙𑀦𑁆𑀤𑀸𑀤𑀻𑀦𑀁 𑀅𑀳𑀸𑀦𑀺𑀳𑁂𑀢𑀼𑀪𑀽𑀢𑀸𑀬 𑀅𑀧𑀭𑀺𑀓𑁆𑀔𑀬𑀧𑀝𑀺𑀪𑀸𑀦𑀲𑀸𑀥𑀺𑀓𑀸𑀬 𑀲𑀩𑁆𑀩𑀜𑁆𑀜𑀼𑀢𑀸𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸𑀢𑀺 𑀏𑀯𑀁 𑀤𑀲𑀩𑀮𑀝𑁆𑀞𑀸𑀭𑀲𑀸𑀯𑁂𑀡𑀺𑀓𑀩𑀼𑀤𑁆𑀥𑀥𑀫𑁆𑀫𑁂𑀳𑀺𑀧𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀬𑀤𑀺𑀧𑀺 ¶ 𑀳𑀻𑀦𑀓𑀮𑁆𑀬𑀸𑀡𑀪𑁂𑀤𑁂𑀦 𑀤𑀼𑀯𑀺𑀥𑀸𑀯 𑀅𑀥𑀺𑀫𑀼𑀢𑁆𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸, 𑀧𑀯𑀢𑁆𑀢𑀺𑀆𑀓𑀸𑀭𑀯𑀲𑁂𑀦 𑀧𑀦 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀸𑀢𑀺 𑀆𑀳 ‘‘𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸’’𑀢𑀺. 𑀲𑀸 𑀧𑀦 𑀅𑀥𑀺𑀫𑀼𑀢𑁆𑀢𑀺 𑀅𑀚𑁆𑀛𑀸𑀲𑀬𑀥𑀸𑀢𑀼, 𑀢𑀤𑀧𑀺 𑀢𑀣𑀸 𑀢𑀣𑀸 𑀤𑀲𑁆𑀲𑀦𑀁 𑀔𑀫𑀦𑀁 𑀭𑁄𑀘𑀦𑀜𑁆𑀘𑀸𑀢𑀺 𑀆𑀳 ‘‘𑀦𑀸𑀦𑀸𑀚𑁆𑀛𑀸𑀲𑀬𑀢𑀸…𑀧𑁂… 𑀭𑀼𑀘𑀺𑀢𑀸’’𑀢𑀺. 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀜𑀸𑀡𑁂𑀦𑀸𑀢𑀺 𑀘𑁂𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀁 𑀅𑀥𑀺𑀧𑁆𑀧𑁂𑀢𑀁, 𑀦 𑀤𑀲𑀩𑀮𑀜𑀸𑀡𑀦𑁆𑀢𑀺 𑀆𑀳 ‘‘𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑁂𑀦𑀸’’𑀢𑀺. 𑀇𑀢𑀺 𑀳 𑀫𑁂𑀢𑀺 𑀏𑀢𑁆𑀣 𑀏𑀯𑀁-𑀲𑀤𑁆𑀤𑀢𑁆𑀣𑁄 𑀇𑀢𑀺-𑀲𑀤𑁆𑀤𑁄, 𑀳-𑀓𑀸𑀭𑁄 ¶ 𑀦𑀺𑀧𑀸𑀢𑀫𑀢𑁆𑀢𑀁 𑀲𑀭𑀮𑁄𑀧𑁄 𑀘 𑀓𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀏𑀯𑀁 𑀇𑀫𑁂’’𑀢𑀺.

𑁪. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀢𑀁 𑀓𑀢𑀁, 𑀬𑀢𑁄 ‘‘𑀦𑀢𑁆𑀣𑀺 𑀅𑀩𑁆𑀬𑀸𑀯𑀝𑀫𑀦𑁄’’𑀢𑀺 𑀩𑀼𑀤𑁆𑀥𑀥𑀫𑁆𑀫𑁂𑀲𑀼 𑀯𑀼𑀘𑁆𑀘𑀢𑀺. 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀻𑀳𑀺. 𑀦𑀺𑀯𑀸𑀲𑁂𑀢𑁆𑀯𑀸 𑀯𑀺𑀳𑀸𑀭𑀦𑀺𑀯𑀸𑀲𑀦𑀧𑀭𑀺𑀯𑀢𑁆𑀢𑀦𑀯𑀲𑁂𑀦. ‘‘𑀓𑀤𑀸𑀘𑀺 𑀏𑀓𑀓𑁄’’𑀢𑀺𑀆𑀤𑀺 𑀢𑁂𑀲𑀁 𑀢𑁂𑀲𑀁 𑀯𑀺𑀦𑁂𑀬𑁆𑀬𑀸𑀦𑀁 𑀯𑀺𑀦𑀬𑀦𑀸𑀦𑀼𑀓𑀽𑀮𑀁 𑀪𑀕𑀯𑀢𑁄 𑀉𑀧𑀲𑀗𑁆𑀓𑀫𑀤𑀲𑁆𑀲𑀦𑀁. 𑀧𑀸𑀤𑀦𑀺𑀓𑁆𑀔𑁂𑀧𑀲𑀫𑀬𑁂 𑀪𑀽𑀫𑀺𑀬𑀸 𑀲𑀫𑀪𑀸𑀯𑀸𑀧𑀢𑁆𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀸𑀬 𑀦𑀺𑀲𑁆𑀲𑀦𑁆𑀤𑀨𑀮𑀁, 𑀦 𑀇𑀤𑁆𑀥𑀺𑀦𑀺𑀫𑁆𑀫𑀸𑀦𑀁. ‘‘𑀞𑀧𑀺𑀢𑀫𑀢𑁆𑀢𑁂 𑀤𑀓𑁆𑀔𑀺𑀡𑀧𑀸𑀤𑁂’’𑀢𑀺 𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀤𑀓𑁆𑀔𑀺𑀡𑀢𑀸𑀬 𑀯𑀼𑀢𑁆𑀢𑀁. 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀤𑀼𑀮𑁆𑀮𑀪𑀸 𑀲𑀫𑁆𑀧𑀢𑁆𑀢𑀻𑀢𑀺 𑀲𑀢𑀺𑀧𑀺 𑀫𑀦𑀼𑀲𑁆𑀲𑀢𑁆𑀢𑀧𑀝𑀺𑀮𑀸𑀪𑁂 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀇𑀦𑁆𑀤𑁆𑀭𑀺𑀬𑀸𑀯𑁂𑀓𑀮𑁆𑀮𑀲𑀤𑁆𑀥𑀸𑀧𑀝𑀺𑀮𑀸𑀪𑀸𑀤𑀬𑁄 𑀕𑀼𑀡𑀸 𑀤𑀼𑀮𑁆𑀮𑀪𑀸𑀢𑀺 𑀅𑀢𑁆𑀣𑁄. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀪𑀯𑀦𑀦𑁆𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑀮𑁄𑀓𑁂 𑀲𑀼𑀜𑁆𑀜𑀯𑀺𑀫𑀸𑀦𑀸𑀦𑀺 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀢𑀸𑀯𑀢𑀺𑀁𑀲𑀪𑀯𑀦𑀸𑀤𑀻𑀲𑀼𑀧𑀺. 𑀓𑀸𑀮𑀬𑀼𑀢𑁆𑀢𑀦𑁆𑀢𑀺 𑀇𑀫𑀺𑀲𑁆𑀲𑀸 𑀯𑁂𑀮𑀸𑀬 𑀇𑀫𑀲𑁆𑀲 𑀏𑀯𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀢𑀁𑀢𑀁𑀓𑀸𑀮𑀸𑀦𑀼𑀭𑀽𑀧𑀁. 𑀲𑀫𑀬𑀬𑀼𑀢𑁆𑀢𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀅𑀦𑀼𑀭𑀽𑀧𑀁 𑀯𑀸. 𑀅𑀣 𑀯𑀸 𑀲𑀫𑀬𑀬𑀼𑀢𑁆𑀢𑀦𑁆𑀢𑀺 𑀳𑁂𑀢𑀽𑀤𑀸𑀳𑀭𑀡𑀲𑀳𑀺𑀢𑀁. 𑀓𑀸𑀮𑁂𑀦 𑀲𑀸𑀧𑀤𑁂𑀲𑀜𑁆𑀳𑀺 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀉𑀢𑀼𑀁 𑀕𑀡𑁆𑀳𑀧𑁂𑀢𑀺, 𑀦 𑀧𑀦 𑀫𑀮𑀁 𑀧𑀓𑁆𑀔𑀸𑀮𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀪𑀕𑀯𑀢𑁄 𑀓𑀸𑀬𑁂 𑀭𑀚𑁄𑀚𑀮𑁆𑀮𑀁 𑀉𑀧𑀮𑀺𑀫𑁆𑀧𑀢𑀻𑀢𑀺.

𑀓𑀺𑀮𑀸𑀲𑀼𑀪𑀸𑀯𑁄 𑀓𑀺𑀮𑀫𑀣𑁄. 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺 𑀲𑀭𑀻𑀭𑀲𑁆𑀲 𑀓𑀺𑀮𑀸𑀲𑀼𑀪𑀸𑀯𑀫𑁄𑀘𑀦𑀢𑁆𑀣𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. ‘‘𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀢𑀻’’𑀢𑀺 𑀇𑀤𑀁 𑀧𑀘𑁆𑀙𑀺𑀫𑀬𑀸𑀫𑁂 𑀪𑀕𑀯𑀢𑁄 𑀩𑀳𑀼𑀮𑀆𑀘𑀺𑀡𑁆𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀧𑁆𑀧𑁂𑀓𑀤𑀸 𑀅𑀯𑀲𑀺𑀝𑁆𑀞𑀩𑀮𑀜𑀸𑀡𑁂𑀳𑀺 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑁂𑀦 𑀘 𑀪𑀕𑀯𑀸 𑀢𑀫𑀢𑁆𑀣𑀁 𑀲𑀸𑀥𑁂𑀢𑀻𑀢𑀺. ‘‘𑀇𑀫𑁂 𑀤𑀺𑀝𑁆𑀞𑀺𑀝𑁆𑀞𑀸𑀦𑀸’’𑀢𑀺𑀆𑀤𑀺𑀤𑁂𑀲𑀦𑀸 ¶ 𑀲𑀻𑀳𑀦𑀸𑀤𑁄. 𑀢𑁂𑀲𑀁 ‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸’’ 𑀢𑀺𑀆𑀤𑀺𑀦𑀸 ¶ 𑀧𑀘𑁆𑀘𑀬𑀸𑀓𑀸𑀭𑀁 𑀲𑀫𑁄𑀥𑀸𑀦𑁂𑀢𑁆𑀯𑀸. ‘‘𑀲𑀺𑀦𑁂𑀭𑀼𑀁 ¶ 𑀉𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀦𑀪𑀁 𑀧𑀳𑀭𑀦𑁆𑀢𑁄 𑀯𑀺𑀬 𑀘𑀸’’𑀢𑀺 𑀇𑀤𑀁 𑀩𑁆𑀭𑀳𑁆𑀫𑀚𑀸𑀮𑀤𑁂𑀲𑀦𑀸𑀬 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸 𑀲𑀼𑀤𑀼𑀓𑁆𑀓𑀭𑀢𑀸𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀢𑀦𑁆𑀢𑀺 ‘‘𑀬𑁂𑀦, 𑀢𑁂𑀦𑀸’’𑀢𑀺 𑀏𑀢𑀁 𑀧𑀤𑀤𑁆𑀯𑀬𑀁. 𑀬𑁂𑀦𑀸𑀢𑀺 𑀯𑀸 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀁, 𑀬𑁂𑀦 𑀓𑀸𑀭𑀡𑁂𑀦 𑀲𑁄 𑀫𑀡𑁆𑀟𑀮𑀫𑀸𑀴𑁄 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄, 𑀢𑁂𑀦 𑀓𑀸𑀭𑀡𑁂𑀦 𑀉𑀧𑀲𑀗𑁆𑀓𑀫𑀻𑀢𑀺 𑀅𑀢𑁆𑀣𑁄, 𑀓𑀸𑀭𑀡𑀁 𑀧𑀦 ‘‘𑀇𑀫𑁂 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁𑀏𑀯. 𑀓𑀝𑁆𑀞𑀦𑁆𑀢𑀺 𑀦𑀺𑀲𑀻𑀤𑀦𑀬𑁄𑀕𑁆𑀬𑀁 𑀤𑀸𑀭𑀼𑀓𑁆𑀔𑀦𑁆𑀥𑀁.

𑀧𑀼𑀭𑀺𑀫𑁄𑀢𑀺 ‘‘𑀓𑀢𑀫𑀸𑀬 𑀦𑀼 𑀪𑀯𑀣𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁄 𑀅𑀢𑁆𑀣𑁄. 𑀓𑀸 𑀘 𑀧𑀦 𑀯𑁄𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀩𑁆𑀬𑀢𑀺𑀭𑁂𑀓𑁂. 𑀢𑁂𑀦 𑀬𑀣𑀸𑀧𑀼𑀘𑁆𑀙𑀺𑀢𑀸𑀬 𑀓𑀣𑀸𑀬 𑀯𑀓𑁆𑀔𑀫𑀸𑀦𑀁 𑀯𑀺𑀧𑁆𑀧𑀓𑀢𑀪𑀸𑀯𑀁 𑀚𑁄𑀢𑁂𑀢𑀺. 𑀧𑀦-𑀲𑀤𑁆𑀤𑁄 𑀯𑀘𑀦𑀸𑀮𑀗𑁆𑀓𑀸𑀭𑁄. 𑀬𑀸𑀬 𑀳𑀺 𑀓𑀣𑀸𑀬 𑀢𑁂 𑀪𑀺𑀓𑁆𑀔𑀽 𑀲𑀦𑁆𑀦𑀺𑀲𑀺𑀦𑁆𑀦𑀸, 𑀲𑀸 𑀏𑀯 𑀅𑀦𑁆𑀢𑀭𑀸𑀓𑀣𑀸𑀪𑀽𑀢𑀸 𑀯𑀺𑀧𑁆𑀧𑀓𑀢𑀸 𑀯𑀺𑀲𑁂𑀲𑁂𑀦 𑀧𑀼𑀦 𑀧𑀼𑀘𑁆𑀙𑀻𑀬𑀢𑀻𑀢𑀺. 𑀅𑀜𑁆𑀜𑀸𑀢𑀺 𑀅𑀦𑁆𑀢𑀭𑀸𑀲𑀤𑁆𑀤𑀲𑁆𑀲 𑀅𑀢𑁆𑀣𑀫𑀸𑀳. 𑀅𑀜𑁆𑀜𑀢𑁆𑀣𑁂 𑀳𑀺 𑀅𑀬𑀁 𑀅𑀦𑁆𑀢𑀭𑀸-𑀲𑀤𑁆𑀤𑁄 ‘‘𑀪𑀽𑀫𑀦𑁆𑀢𑀭𑀁 𑀲𑀫𑀬𑀦𑁆𑀢𑀭’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀦𑁆𑀢𑀭𑀸𑀢𑀺 𑀯𑀸 𑀯𑁂𑀫𑀚𑁆𑀛𑁂𑀢𑀺 𑀅𑀢𑁆𑀣𑁄. 𑀦𑀦𑀼 𑀘 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀸 𑀓𑀣𑀸 𑀬𑀣𑀸𑀥𑀺𑀧𑁆𑀧𑀸𑀬𑀁 ‘‘𑀇𑀢𑀺 𑀳 𑀫𑁂’’𑀢𑀺𑀆𑀤𑀺𑀦𑀸 𑀦𑀺𑀝𑁆𑀞𑀧𑀺𑀢𑀸 𑀬𑁂𑀯𑀸𑀢𑀺? 𑀦 𑀦𑀺𑀝𑁆𑀞𑀸𑀧𑀺𑀢𑀸 𑀪𑀕𑀯𑀢𑁄 𑀉𑀧𑀲𑀗𑁆𑀓𑀫𑀦𑁂𑀦 𑀉𑀧𑀘𑁆𑀙𑀺𑀦𑁆𑀦𑀢𑁆𑀢𑀸. 𑀬𑀤𑀺 𑀳𑀺 𑀪𑀕𑀯𑀸 𑀢𑀲𑁆𑀫𑀺𑀁 𑀔𑀡𑁂 𑀦 𑀉𑀧𑀲𑀗𑁆𑀓𑀫𑁂𑀬𑁆𑀬 𑀪𑀺𑀬𑁆𑀬𑁄𑀧𑀺 𑀢𑀧𑁆𑀧𑀝𑀺𑀩𑀤𑁆𑀥𑀸𑀬𑁂𑀯 𑀓𑀣𑀸 𑀧𑀯𑀢𑁆𑀢𑁂𑀬𑁆𑀬𑀼𑀁, 𑀪𑀕𑀯𑀢𑁄 𑀉𑀧𑀲𑀗𑁆𑀓𑀫𑀦𑁂𑀦 𑀧𑀦 𑀦 𑀧𑀯𑀢𑁆𑀢𑁂𑀲𑀼𑀁. 𑀢𑁂𑀦𑁂𑀯𑀸𑀳 𑀅𑀬𑀁 𑀔𑁄…𑀧𑁂… 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑁂 𑀓𑀭𑀺𑀬𑀫𑀸𑀦𑁂 𑀦𑀺𑀤𑀸𑀦𑀯𑀘𑀦𑀁, 𑀦𑀦𑀼 𑀪𑀕𑀯𑀢𑁄 𑀯𑀘𑀦𑀫𑁂𑀯 𑀲𑀗𑁆𑀕𑀳𑁂𑀢𑀩𑁆𑀩𑀦𑁆𑀢𑀺? 𑀯𑀼𑀘𑁆𑀘𑀢𑁂𑀤𑁂𑀲𑀦𑀸𑀬 𑀞𑀺𑀢𑀺𑀅𑀲𑀫𑁆𑀫𑁄𑀲𑀲𑀤𑁆𑀥𑁂𑀬𑁆𑀬𑀪𑀸𑀯𑀲𑀫𑁆𑀧𑀸𑀤𑀦𑀢𑁆𑀣𑀁. 𑀓𑀸𑀮𑀤𑁂𑀲𑀤𑁂𑀲𑀓𑀯𑀢𑁆𑀣𑀼𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀧𑀝𑀺𑀩𑀤𑁆𑀥𑀸 𑀳𑀺 𑀤𑁂𑀲𑀦𑀸 𑀘𑀺𑀭𑀝𑁆𑀞𑀺𑀢𑀺𑀓𑀸 ¶ 𑀳𑁄𑀢𑀺, 𑀅𑀲𑀫𑁆𑀫𑁄𑀲𑀥𑀫𑁆𑀫𑀸 𑀲𑀤𑁆𑀥𑁂𑀬𑁆𑀬𑀸 𑀘. 𑀤𑁂𑀲𑀓𑀸𑀮𑀓𑀢𑁆𑀢𑀼𑀲𑁄𑀢𑀼𑀦𑀺𑀫𑀺𑀢𑁆𑀢𑁂𑀳𑀺 𑀉𑀧𑀦𑀺𑀩𑀦𑁆𑀥𑁄 𑀯𑀺𑀬 𑀯𑁄𑀳𑀸𑀭𑀯𑀺𑀦𑀺𑀘𑁆𑀙𑀬𑁄, 𑀢𑁂𑀦𑁂𑀯 𑀘𑀸𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 ‘‘𑀩𑁆𑀭𑀳𑁆𑀫𑀚𑀸𑀮𑀁 𑀆𑀯𑀼𑀲𑁄 𑀆𑀦𑀦𑁆𑀤 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀤𑁂𑀲𑀸𑀤𑀺𑀧𑀼𑀘𑁆𑀙𑀸𑀲𑀼 𑀓𑀢𑀸𑀲𑀼 𑀢𑀸𑀲𑀁 𑀯𑀺𑀲𑁆𑀲𑀚𑁆𑀚𑀦𑀁 𑀓𑀭𑁄𑀦𑁆𑀢𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀦𑀺𑀤𑀸𑀦𑀁 𑀪𑀸𑀲𑀺𑀢𑀦𑁆𑀢𑀺 𑀢𑀬𑀺𑀤𑀫𑀸𑀳 ‘‘𑀓𑀸𑀮…𑀧𑁂… 𑀦𑀺𑀤𑀸𑀦𑀁 𑀪𑀸𑀲𑀺𑀢’’𑀦𑁆𑀢𑀺.

𑀅𑀧𑀺𑀘 𑀲𑀢𑁆𑀣𑀼𑀲𑀺𑀤𑁆𑀥𑀺𑀬𑀸 𑀦𑀺𑀤𑀸𑀦𑀯𑀘𑀦𑀁. 𑀢𑀣𑀸𑀕𑀢𑀲𑁆𑀲 𑀳𑀺 𑀪𑀕𑀯𑀢𑁄 𑀧𑀼𑀩𑁆𑀩𑀭𑀘𑀦𑀸𑀦𑀼𑀫𑀸𑀦𑀸𑀕𑀫𑀢𑀓𑁆𑀓𑀸𑀪𑀸𑀯𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁆𑀢𑀲𑀺𑀤𑁆𑀥𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑁂𑀦 𑀳𑀺𑀲𑁆𑀲 𑀧𑀼𑀩𑁆𑀩𑀭𑀘𑀦𑀸𑀤𑀻𑀦𑀁 𑀅𑀪𑀸𑀯𑁄 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑀢𑀸𑀬, 𑀏𑀓𑀧𑁆𑀧𑀫𑀸𑀡𑀢𑁆𑀢𑀸 ¶ 𑀘 𑀜𑁂𑀬𑁆𑀬𑀥𑀫𑁆𑀫𑁂𑀲𑀼. 𑀢𑀣𑀸 𑀆𑀘𑀭𑀺𑀬𑀫𑀼𑀝𑁆𑀞𑀺𑀥𑀫𑁆𑀫𑀫𑀘𑁆𑀙𑀭𑀺𑀬𑀲𑀢𑁆𑀣𑀼𑀲𑀸𑀯𑀓𑀸𑀦𑀼𑀭𑁄𑀥𑀸𑀪𑀸𑀯𑀢𑁄 𑀔𑀻𑀡𑀸𑀲𑀯𑀢𑁆𑀢𑀲𑀺𑀤𑁆𑀥𑀺. 𑀔𑀻𑀡𑀸 𑀲𑀯𑀢𑀸𑀬 𑀳𑀺𑀲𑁆𑀲 𑀆𑀘𑀭𑀺𑀬𑀫𑀼𑀝𑁆𑀞𑀺𑀆𑀤𑀻𑀦𑀁 𑀅𑀪𑀸𑀯𑁄, 𑀯𑀺𑀲𑀼𑀤𑁆𑀥𑀸 𑀘 𑀧𑀭𑀸𑀦𑀼𑀕𑁆𑀕𑀳𑀧𑁆𑀧𑀯𑀢𑁆𑀢𑀺. 𑀇𑀢𑀺 𑀤𑁂𑀲𑀓𑀤𑁄𑀲𑀪𑀽𑀢𑀸𑀦𑀁 𑀤𑀺𑀝𑁆𑀞𑀺𑀘𑀸𑀭𑀺𑀢𑁆𑀢𑀲𑀫𑁆𑀧𑀢𑁆𑀢𑀺𑀤𑀽𑀲𑀓𑀸𑀦𑀁 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀁 𑀅𑀪𑀸𑀯𑀲𑀽𑀘𑀓𑁂𑀳𑀺, 𑀜𑀸𑀡𑀧𑁆𑀧𑀳𑀸𑀦𑀲𑀫𑁆𑀧𑀤𑀸𑀪𑀺 𑀩𑁆𑀬𑀜𑁆𑀚𑀦𑀓𑁂𑀳𑀺 𑀘 𑀲𑀫𑁆𑀩𑀼𑀤𑁆𑀥𑀯𑀺𑀲𑀼𑀤𑁆𑀥𑀪𑀸𑀯𑁂𑀳𑀺 𑀧𑀼𑀭𑀺𑀫𑀯𑁂𑀲𑀸𑀭𑀚𑁆𑀚𑀤𑁆𑀯𑀬𑀲𑀺𑀤𑁆𑀥𑀺, 𑀢𑀢𑁄 𑀏𑀯 𑀘 𑀅𑀦𑁆𑀢𑀭𑀸𑀬𑀺𑀓𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑁂𑀲𑀼 𑀲𑀫𑁆𑀫𑁄𑀳𑀸𑀪𑀸𑀯𑀲𑀺𑀤𑁆𑀥𑀺𑀢𑁄 𑀧𑀘𑁆𑀙𑀺𑀫𑀯𑁂𑀲𑀸𑀭𑀚𑁆𑀚𑀤𑁆𑀯𑀬𑀲𑀺𑀤𑁆𑀥𑀻𑀢𑀺 𑀪𑀕𑀯𑀢𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀲𑀫𑀦𑁆𑀦𑀸𑀕𑀫𑁄 ¶ , 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺 𑀘 𑀧𑀓𑀸𑀲𑀺𑀢𑀸 𑀳𑁄𑀢𑀺 𑀦𑀺𑀤𑀸𑀦𑀯𑀘𑀦𑁂𑀦 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑁆𑀧𑀝𑀺𑀪𑀸𑀦𑁂𑀦 𑀥𑀫𑁆𑀫𑀤𑁂𑀲𑀦𑀸𑀤𑀻𑀧𑀦𑀢𑁄, ‘‘𑀚𑀸𑀦𑀢𑀸 𑀧𑀲𑁆𑀲𑀢𑀸’’𑀢𑀺𑀆𑀤𑀺 𑀯𑀘𑀦𑀢𑁄 𑀘. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀢𑁆𑀣𑀼𑀲𑀺𑀤𑁆𑀥𑀺𑀬𑀸 𑀦𑀺𑀤𑀸𑀦𑀯𑀘𑀦’’𑀦𑁆𑀢𑀺.

𑀢𑀣𑀸 𑀲𑀢𑁆𑀣𑀼𑀲𑀺𑀤𑁆𑀥𑀺𑀬𑀸 𑀦𑀺𑀤𑀸𑀦𑀯𑀘𑀦𑀁. 𑀜𑀸𑀡𑀓𑀭𑀼𑀡𑀸𑀧𑀭𑀺𑀕𑁆𑀕𑀳𑀺𑀢𑀲𑀩𑁆𑀩𑀓𑀺𑀭𑀺𑀬𑀲𑁆𑀲 ¶ 𑀳𑀺 𑀪𑀕𑀯𑀢𑁄 𑀦𑀢𑁆𑀣𑀺 𑀦𑀺𑀭𑀢𑁆𑀣𑀺𑀓𑀸 𑀧𑀯𑀢𑁆𑀢𑀺, 𑀅𑀢𑁆𑀢𑀳𑀺𑀢𑀢𑁆𑀣𑀸 𑀯𑀸, 𑀢𑀲𑁆𑀫𑀸 𑀧𑀭𑁂𑀲𑀁𑀬𑁂𑀯 𑀅𑀢𑁆𑀣𑀸𑀬 𑀧𑀯𑀢𑁆𑀢𑀲𑀩𑁆𑀩𑀓𑀺𑀭𑀺𑀬𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀓𑀮𑀫𑁆𑀧𑀺 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀁 𑀲𑀢𑁆𑀣𑀼𑀪𑀽𑀢𑀁, 𑀦 𑀓𑀩𑁆𑀬𑀭𑀘𑀦𑀸𑀤𑀺𑀲𑀸𑀲𑀦𑀪𑀽𑀢𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀢𑁆𑀣𑀼𑀲𑀺𑀤𑁆𑀥𑀺𑀬𑀸 𑀦𑀺𑀤𑀸𑀦𑀯𑀘𑀦’’𑀦𑁆𑀢𑀺. 𑀅𑀧𑀺𑀘 𑀲𑀢𑁆𑀣𑀼𑀦𑁄 𑀧𑀫𑀸𑀡𑀪𑀽𑀢𑀢𑀸𑀯𑀺𑀪𑀸𑀯𑀦𑁂𑀦 𑀲𑀸𑀲𑀦𑀲𑁆𑀲 𑀧𑀫𑀸𑀡𑀪𑀸𑀯𑀲𑀺𑀤𑁆𑀥𑀺𑀬𑀸 𑀦𑀺𑀤𑀸𑀦𑀯𑀘𑀦𑀁. ‘‘𑀪𑀕𑀯𑀢𑀸’’𑀢𑀺 𑀳𑀺 𑀇𑀫𑀺𑀦𑀸 𑀢𑀣𑀸𑀕𑀢𑀲𑁆𑀲 𑀕𑀼𑀡𑀯𑀺𑀲𑀺𑀝𑁆𑀞𑀲𑀢𑁆𑀢𑀼𑀢𑁆𑀢𑀫𑀸𑀤𑀺𑀪𑀸𑀯𑀤𑀻𑀧𑀦𑁂𑀦, ‘‘𑀚𑀸𑀦𑀢𑀸’’𑀢𑀺𑀆𑀤𑀺𑀦𑀸 𑀆𑀲𑀬𑀸𑀦𑀼𑀲𑀬𑀜𑀸𑀡𑀸𑀤𑀺𑀧𑀬𑁄𑀕𑀤𑀻𑀧𑀦𑁂𑀦 𑀘 𑀅𑀬𑀫𑀢𑁆𑀣𑁄 𑀲𑀸𑀥𑀺𑀢𑁄 𑀳𑁄𑀢𑀺. 𑀇𑀤𑀫𑁂𑀢𑁆𑀣 𑀦𑀺𑀤𑀸𑀦𑀯𑀘𑀦𑀧𑀬𑁄𑀚𑀦𑀲𑁆𑀲 𑀫𑀼𑀔𑀫𑀢𑁆𑀢𑀤𑀲𑁆𑀲𑀦𑀁. 𑀓𑁄 𑀳𑀺 𑀲𑀫𑀢𑁆𑀣𑁄 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀪𑀸𑀲𑀺𑀢𑀲𑁆𑀲 𑀦𑀺𑀤𑀸𑀦𑀲𑁆𑀲 𑀧𑀬𑁄𑀚𑀦𑀸𑀦𑀺 𑀦𑀺𑀭𑀯𑀲𑁂𑀲𑀢𑁄 𑀯𑀺𑀪𑀸𑀯𑁂𑀢𑀼𑀦𑁆𑀢𑀺.

𑀦𑀺𑀤𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀦𑀺𑀓𑁆𑀔𑀺𑀢𑁆𑀢𑀲𑁆𑀲𑀸𑀢𑀺 𑀤𑁂𑀲𑀺𑀢𑀲𑁆𑀲. 𑀤𑁂𑀲𑀦𑀸𑀧𑀺 𑀳𑀺 𑀤𑁂𑀲𑁂𑀢𑀩𑁆𑀩𑀲𑁆𑀲 𑀲𑀻𑀮𑀸𑀤𑀺𑀅𑀢𑁆𑀣𑀲𑁆𑀲 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑁂𑀲𑀼 𑀦𑀺𑀓𑁆𑀔𑀺𑀧𑀦𑀢𑁄 ‘‘𑀦𑀺𑀓𑁆𑀔𑁂𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀬𑀣𑀸 𑀅𑀦𑁂𑀓𑀲𑀢𑀅𑀦𑁂𑀓𑀲𑀳𑀲𑁆𑀲𑀪𑁂𑀤𑀸𑀦𑀺𑀧𑀺 𑀲𑀼𑀢𑁆𑀢𑀦𑁆𑀢𑀸𑀦𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀲𑀸𑀲𑀦𑀧𑁆𑀧𑀝𑁆𑀞𑀸𑀦𑀦𑀬𑁂𑀦 𑀲𑁄𑀴𑀲𑀯𑀺𑀥𑀢𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀺𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀪𑀸𑀯𑀦𑁆𑀢𑀺 𑀆𑀳 ‘‘𑀘𑀢𑁆𑀢𑀸𑀭𑁄 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸’’𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 𑀅𑀢𑁆𑀢𑀚𑁆𑀛𑀸𑀲𑀬𑀲𑁆𑀲, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 ¶ 𑀘 𑀧𑀭𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀳𑀺 ¶ 𑀲𑀤𑁆𑀥𑀺𑀁 𑀲𑀁𑀲𑀕𑁆𑀕𑀪𑁂𑀤𑁄 𑀲𑀫𑁆𑀪𑀯𑀢𑀺 𑀅𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀲𑀩𑁆𑀪𑀸𑀯𑀢𑁄, 𑀅𑀢𑁆𑀢𑀚𑁆𑀛𑀸𑀲𑀬𑀅𑀝𑁆𑀞𑀼𑀧𑁆𑀧𑀢𑁆𑀢𑀻𑀦𑀁 𑀧𑀦 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀕𑁆𑀕𑁄 𑀦𑀢𑁆𑀣𑀻𑀢𑀺 𑀦𑀬𑀺𑀥 𑀦𑀺𑀭𑀯𑀲𑁂𑀲𑁄 𑀯𑀺𑀢𑁆𑀣𑀸𑀭𑀦𑀬𑁄 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸 ‘‘𑀘𑀢𑁆𑀢𑀸𑀭𑁄 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀬𑀤𑀺𑀧𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀅𑀚𑁆𑀛𑀸𑀲𑀬𑁂𑀦 𑀲𑀺𑀬𑀸 𑀲𑀁𑀲𑀕𑁆𑀕𑀪𑁂𑀤𑁄, 𑀢𑀤𑀦𑁆𑀢𑁄𑀕𑀥𑀢𑁆𑀢𑀸 𑀧𑀦 𑀲𑁂𑀲𑀦𑀺𑀓𑁆𑀔𑁂𑀧𑀸𑀦𑀁 𑀫𑀽𑀮𑀦𑀺𑀓𑁆𑀔𑁂𑀧𑀯𑀲𑁂𑀦 𑀘𑀢𑁆𑀢𑀸𑀭𑁄𑀯 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑁄 𑀧𑀦𑀸𑀬𑀁 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄 𑀲𑀸𑀫𑀜𑁆𑀜𑀪𑀸𑀯𑀢𑁄 𑀧𑀞𑀫𑀁 𑀯𑀺𑀘𑀸𑀭𑁂𑀢𑀩𑁆𑀩𑁄, 𑀢𑀲𑁆𑀫𑀺𑀁 𑀯𑀺𑀘𑀸𑀭𑀺𑀢𑁂 𑀬𑀲𑁆𑀲𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀇𑀤𑀁 𑀲𑀼𑀢𑁆𑀢𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀲𑀸 𑀯𑀺𑀪𑀸𑀕𑀯𑀲𑁂𑀦 ‘‘𑀫𑀫𑀁 𑀯𑀸 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁫, 𑁬), ‘‘𑀅𑀧𑁆𑀧𑀫𑀢𑁆𑀢𑀓𑀁 𑀔𑁄 𑀧𑀦𑁂𑀢’’𑀦𑁆𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁭), ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁮) 𑀘 𑀧𑀯𑀢𑁆𑀢𑀸𑀦𑀁 𑀲𑀼𑀢𑁆𑀢𑀸𑀦𑀁 𑀲𑀼𑀢𑁆𑀢𑀧𑀤𑁂𑀲𑀸𑀦𑀁 𑀯𑀡𑁆𑀡𑀦𑀸 𑀯𑀼𑀘𑁆𑀘𑀫𑀸𑀦𑀸 𑀢𑀁𑀢𑀁𑀅𑀦𑀼𑀲𑀦𑁆𑀥𑀺𑀤𑀲𑁆𑀲𑀦𑀲𑀼𑀔𑀢𑀸𑀬 ¶ 𑀲𑀼𑀯𑀺𑀜𑁆𑀜𑁂𑀬𑁆𑀬𑀸 𑀳𑁄𑀢𑀻𑀢𑀺 𑀆𑀳 ‘‘𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀁 𑀯𑀺𑀘𑀸𑀭𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀸 𑀧𑀸𑀓𑀝𑀸 𑀳𑁄𑀢𑀻’’𑀢𑀺.

‘‘𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸’’𑀢𑀺𑀆𑀤𑀻𑀲𑀼 𑀦𑀺𑀓𑁆𑀔𑀺𑀧𑀦𑀁 𑀦𑀺𑀓𑁆𑀔𑁂𑀧𑁄, 𑀲𑀼𑀢𑁆𑀢𑀲𑁆𑀲 𑀦𑀺𑀓𑁆𑀔𑁂𑀧𑁄 𑀲𑀼𑀢𑁆𑀢𑀲𑁆𑀲 𑀓𑀣𑀦𑀁 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄, 𑀲𑀼𑀢𑁆𑀢𑀤𑁂𑀲𑀦𑀸𑀢𑀺 𑀅𑀢𑁆𑀣𑁄. 𑀦𑀺𑀓𑁆𑀔𑀺𑀧𑀻𑀬𑀢𑀻𑀢𑀺 𑀯𑀸 𑀦𑀺𑀓𑁆𑀔𑁂𑀧𑁄, 𑀲𑀼𑀢𑁆𑀢𑀁𑀬𑁂𑀯 𑀦𑀺𑀓𑁆𑀔𑁂𑀧𑁄 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄. 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁄 𑀅𑀢𑁆𑀢𑀚𑁆𑀛𑀸𑀲𑀬𑁄, 𑀲𑁄 𑀅𑀲𑁆𑀲 𑀅𑀢𑁆𑀣𑀺 𑀲𑀼𑀢𑁆𑀢𑀤𑁂𑀲𑀦𑀸𑀓𑀸𑀭𑀡𑀪𑀽𑀢𑁄𑀢𑀺 𑀅𑀢𑁆𑀢𑀚𑁆𑀛𑀸𑀲𑀬𑁄. 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁄 𑀏𑀢𑀲𑁆𑀲𑀸𑀢𑀺 𑀯𑀸 𑀅𑀢𑁆𑀢𑀚𑁆𑀛𑀸𑀲𑀬𑁄. 𑀧𑀭𑀚𑁆𑀛𑀸𑀲𑀬𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀘𑁆𑀙𑀸𑀬 𑀯𑀲𑁄 𑀧𑀼𑀘𑁆𑀙𑀸𑀯𑀲𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀯𑀲𑀺𑀓𑁄. 𑀅𑀭𑀡𑀻𑀬𑀢𑁄 𑀅𑀢𑁆𑀣𑁄, 𑀲𑀼𑀢𑁆𑀢𑀤𑁂𑀲𑀦𑀸𑀬 𑀯𑀢𑁆𑀣𑀼. 𑀅𑀢𑁆𑀣𑀲𑁆𑀲 𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀼𑀧𑁆𑀧𑀢𑁆𑀢𑀺, 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑁂𑀯 𑀅𑀝𑁆𑀞𑀼𑀧𑁆𑀧𑀢𑁆𑀢𑀺, 𑀲𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄. 𑀅𑀣 𑀯𑀸 𑀦𑀺𑀓𑁆𑀔𑀺𑀧𑀻𑀬𑀢𑀺 𑀲𑀼𑀢𑁆𑀢𑀁 𑀏𑀢𑁂𑀦𑀸𑀢𑀺 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄, 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀺 𑀏𑀯. 𑀏𑀢𑀲𑁆𑀫𑀺𑀁 𑀧𑀦 𑀅𑀢𑁆𑀣𑀯𑀺𑀓𑀧𑁆𑀧𑁂 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁄 𑀅𑀢𑁆𑀢𑀚𑁆𑀛𑀸𑀲𑀬𑁄, 𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑁄 𑀧𑀭𑀚𑁆𑀛𑀸𑀲𑀬𑁄, 𑀧𑀼𑀘𑁆𑀙𑀻𑀬𑀢𑀻𑀢𑀺 𑀧𑀼𑀘𑁆𑀙𑀸, 𑀧𑀼𑀘𑁆𑀙𑀺𑀢𑀩𑁆𑀩𑁄 𑀅𑀢𑁆𑀣𑁄. 𑀲𑁄𑀢𑀩𑁆𑀩𑀯𑀲𑀧𑁆𑀧𑀯𑀢𑁆𑀢𑀁 𑀥𑀫𑁆𑀫𑀧𑁆𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀯𑀘𑀦𑀁 𑀧𑀼𑀘𑁆𑀙𑀸𑀯𑀲𑀺𑀓𑀸, 𑀢𑀤𑁂𑀯 𑀦𑀺𑀓𑁆𑀔𑁂𑀧𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀘𑁆𑀙𑀸𑀯𑀲𑀺𑀓𑁄’’𑀢𑀺. 𑀢𑀣𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑁂𑀯 ‘‘𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄’’𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 𑀘 𑀧𑀭𑁂𑀲𑀁 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀸𑀤𑀺𑀓𑀸𑀭𑀡𑀦𑀺𑀭𑀧𑁂𑀓𑁆𑀔𑀢𑀸 𑀅𑀢𑁆𑀢𑀚𑁆𑀛𑀸𑀲𑀬𑀲𑁆𑀲 𑀯𑀺𑀲𑀼𑀁 𑀦𑀺𑀓𑁆𑀔𑁂𑀧𑀪𑀸𑀯𑁄 𑀬𑀼𑀢𑁆𑀢𑁄. 𑀢𑁂𑀦𑁂𑀯𑀸𑀳 ‘‘𑀓𑁂𑀯𑀮𑀁 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂𑀦𑁂𑀯 𑀓𑀣𑁂𑀢𑀻’’𑀢𑀺. 𑀧𑀭𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀯𑀲𑀺𑀓𑀸𑀦𑀁 𑀧𑀦 𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀦𑀁 ¶ ¶ 𑀤𑁂𑀲𑀦𑀸𑀦𑀺𑀫𑀺𑀢𑁆𑀢𑀪𑀽𑀢𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀁 𑀧𑀯𑀢𑁆𑀢𑀺𑀢𑀸𑀦𑀁 𑀓𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀅𑀦𑀯𑀭𑁄𑀥𑁄, 𑀧𑀼𑀘𑁆𑀙𑀸𑀯𑀲𑀺𑀓𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀸𑀦𑀁 𑀯𑀸 𑀧𑀭𑀚𑁆𑀛𑀸𑀲𑀬𑀸𑀦𑀼𑀭𑁄𑀥𑁂𑀦 𑀧𑀯𑀢𑁆𑀢𑀺𑀢𑀤𑁂𑀲𑀦𑀢𑁆𑀢𑀸 𑀓𑀣𑀁 𑀧𑀭𑀚𑁆𑀛𑀸𑀲𑀬𑁂 𑀅𑀦𑀯𑀭𑁄𑀥𑁄𑀢𑀺 𑀦 𑀘𑁄𑀤𑁂𑀢𑀩𑁆𑀩𑀫𑁂𑀢𑀁. 𑀧𑀭𑁂𑀲𑀜𑁆𑀳𑀺 𑀅𑀪𑀺𑀦𑀻𑀳𑀸𑀭𑀧𑀭𑀺𑀧𑀼𑀘𑁆𑀙𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀲𑁆𑀲𑁂𑀯 𑀲𑀼𑀢𑁆𑀢𑀤𑁂𑀲𑀦𑀸𑀓𑀸𑀭𑀡𑀼𑀧𑁆𑀧𑀸𑀤𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 𑀧𑀭𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀯𑀲𑀺𑀓𑀸𑀦𑀁 𑀯𑀺𑀲𑀼𑀁 𑀕𑀳𑀡𑀁. 𑀢𑀣𑀸 𑀳𑀺 𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀸𑀤𑀻𑀦𑀁 (𑀫. 𑀦𑀺. 𑁧.𑁨𑁯) 𑀆𑀫𑀺𑀲𑀼𑀧𑁆𑀧𑀸𑀤𑀸𑀤𑀺𑀤𑁂𑀲𑀦𑀸𑀦𑀺𑀫𑀺𑀢𑁆𑀢𑀁 ‘‘𑀅𑀝𑁆𑀞𑀼𑀧𑁆𑀧𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀭𑁂𑀲𑀁 𑀧𑀼𑀘𑁆𑀙𑀁 𑀯𑀺𑀦𑀸 𑀅𑀚𑁆𑀛𑀸𑀲𑀬𑀫𑁂𑀯 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀤𑁂𑀲𑀺𑀢𑁄 𑀧𑀭𑀚𑁆𑀛𑀸𑀲𑀬𑁄, 𑀧𑀼𑀘𑁆𑀙𑀸𑀯𑀲𑁂𑀦 𑀤𑁂𑀲𑀺𑀢𑁄 𑀧𑀼𑀘𑁆𑀙𑀸𑀯𑀲𑀺𑀓𑁄𑀢𑀺 𑀧𑀸𑀓𑀝𑁄 𑀬𑀫𑀢𑁆𑀣𑁄𑀢𑀺. 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂𑀦𑁂𑀯 𑀓𑀣𑁂𑀲𑀺 𑀥𑀫𑁆𑀫𑀢𑀦𑁆𑀢𑀺𑀞𑀧𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀫𑁆𑀫𑀧𑁆𑀧𑀥𑀸𑀦𑀲𑀼𑀢𑁆𑀢𑀦𑁆𑀢𑀳𑀸𑀭𑀓𑁄𑀢𑀺 𑀅𑀦𑀼𑀧𑀼𑀩𑁆𑀩𑁂𑀦 𑀦𑀺𑀤𑁆𑀤𑀺𑀝𑁆𑀞𑀸𑀦𑀁 𑀲𑀁𑀬𑀼𑀢𑁆𑀢𑀓𑁂 𑀲𑀫𑁆𑀫𑀧𑁆𑀧𑀥𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁 𑀲𑀼𑀢𑁆𑀢𑀸𑀦𑀁 𑀆𑀯𑀴𑀺, 𑀢𑀣𑀸 𑀇𑀤𑁆𑀥𑀺𑀧𑀸𑀤𑀳𑀸𑀭𑀓𑀸𑀤𑀺. 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀥𑀫𑁆𑀫𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀬𑁄. 𑀅𑀪𑀺𑀦𑀻𑀳𑀸𑀭𑀦𑁆𑀢𑀺 𑀧𑀡𑀺𑀥𑀸𑀦𑀁.

𑀯𑀡𑁆𑀡𑀸𑀯𑀡𑁆𑀡𑁂𑀢𑀺 𑀏𑀢𑁆𑀣 ‘‘𑀅𑀘𑁆𑀙𑀭𑀺𑀬𑀁 𑀆𑀯𑀼𑀲𑁄’’𑀢𑀺𑀆𑀤𑀺𑀦𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀯𑀼𑀢𑁆𑀢𑁄 𑀯𑀡𑁆𑀡𑁄𑀧𑀺 𑀲𑀗𑁆𑀕𑀳𑀺𑀢𑁄, 𑀢𑀁 𑀧𑀦 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂 𑀅𑀜𑁆𑀜𑁂 𑀘 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀉𑀧𑀭𑀺 𑀤𑁂𑀲𑀦𑀁 ¶ 𑀆𑀭𑀪𑀺𑀲𑁆𑀲𑀢𑀻𑀢𑀺. ‘‘𑀫𑀫𑀁 𑀯𑀸 𑀪𑀺𑀓𑁆𑀔𑀯𑁂 𑀧𑀭𑁂 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼’’𑀦𑁆𑀢𑀺 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀩𑁆𑀭𑀳𑁆𑀫𑀤𑀢𑁆𑀢𑁂𑀦 𑀯𑀼𑀢𑁆𑀢𑀯𑀡𑁆𑀡𑁄 𑀅𑀝𑁆𑀞𑀼𑀧𑁆𑀧𑀢𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀦𑁆𑀢𑁂𑀯𑀸𑀲𑀻 𑀯𑀡𑁆𑀡𑀁. 𑀇𑀢𑀺 𑀇𑀫𑀁 𑀯𑀡𑁆𑀡𑀸𑀯𑀡𑁆𑀡𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸’’𑀢𑀺. 𑀯𑀸-𑀲𑀤𑁆𑀤𑁄 𑀉𑀧𑀫𑀸𑀦𑀲𑀫𑀼𑀘𑁆𑀘𑀬𑀲𑀁𑀲𑀬𑀯𑀯𑀲𑁆𑀲𑀕𑁆𑀕𑀧𑀤𑀧𑀽𑀭𑀡𑀯𑀺𑀓𑀧𑁆𑀧𑀸𑀤𑀻𑀲𑀼 𑀩𑀳𑀽𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑁂𑀲 ‘‘𑀧𑀡𑁆𑀟𑀺𑀢𑁄 𑀯𑀸𑀧𑀺 𑀢𑁂𑀦 𑀲𑁄’’𑀢𑀺𑀆𑀤𑀻𑀲𑀼 ¶ (𑀥. 𑀧. 𑁬𑁩) 𑀉𑀧𑀫𑀸𑀦𑁂 𑀤𑀺𑀲𑁆𑀲𑀢𑀺, 𑀲𑀤𑀺𑀲𑀪𑀸𑀯𑁂𑀢𑀺 𑀅𑀢𑁆𑀣𑁄. ‘‘𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺 𑀯𑁂𑀤𑀬𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁨𑁦𑁩) 𑀲𑀫𑀼𑀘𑁆𑀘𑀬𑁂, ‘‘𑀓𑁂 𑀯𑀸 𑀇𑀫𑁂, 𑀓𑀲𑁆𑀲 𑀯𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨𑁯𑁬) 𑀲𑀁𑀲𑀬𑁂, ‘‘𑀅𑀬𑀁 𑀯𑀸 𑀇𑀫𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀩𑁆𑀩𑀩𑀸𑀮𑁄 𑀲𑀩𑁆𑀩𑀫𑀽𑀴𑁆𑀳𑁄’’𑀢𑀺𑀆𑀤𑀻𑀲𑀼 𑀯𑀯𑀲𑁆𑀲𑀕𑁆𑀕𑁂, ‘‘𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁧𑁫𑁪) 𑀧𑀤𑀧𑀽𑀭𑀡𑁂, ‘‘𑀬𑁂 𑀳𑀺 𑀓𑁂𑀘𑀺 𑀪𑀺𑀓𑁆𑀔𑀯𑁂 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁭𑁦) 𑀯𑀺𑀓𑀧𑁆𑀧𑁂, 𑀇𑀥𑀸𑀬𑀁 𑀯𑀺𑀓𑀧𑁆𑀧𑁂𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀸-𑀲𑀤𑁆𑀤𑁄 𑀯𑀺𑀓𑀧𑁆𑀧𑀦𑀢𑁆𑀣𑁄’’𑀢𑀺. 𑀧𑀭-𑀲𑀤𑁆𑀤𑁄 𑀅𑀢𑁆𑀣𑁂𑀯 𑀅𑀜𑁆𑀜𑀢𑁆𑀣𑁂 ‘‘𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁, 𑀧𑀭𑁂 𑀘 𑀫𑁂 𑀦 𑀆𑀚𑀸𑀦𑁂𑀬𑁆𑀬𑀼’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁬𑁪, 𑁬𑁫; 𑀫. 𑀦𑀺. 𑁧.𑁨𑁮𑁧; 𑀫. 𑀦𑀺. 𑁨.𑁨𑁨𑁩; 𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁪, 𑁮) 𑀅𑀢𑁆𑀣𑀺 𑀅𑀥𑀺𑀓𑁂 ¶ ‘‘𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡’’𑀦𑁆𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑀫𑀸𑀢𑀺𑀓𑀸 𑁬𑁮, 𑁧.𑁧𑁧𑁧) 𑀅𑀢𑁆𑀣𑀺 𑀧𑀘𑁆𑀙𑀸𑀪𑀸𑀕𑁂 ‘‘𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼. 𑀅𑀢𑁆𑀣𑀺 𑀧𑀘𑁆𑀘𑀦𑀻𑀓𑀪𑀸𑀯𑁂 ‘‘𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳 𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼 ¶ (𑀤𑀻. 𑀦𑀺. 𑁨.𑁧𑁬𑁮). 𑀇𑀥𑀸𑀧𑀺 𑀧𑀘𑁆𑀘𑀦𑀻𑀓𑀪𑀸𑀯𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀭𑁂𑀢𑀺 𑀧𑀝𑀺𑀯𑀺𑀭𑀼𑀤𑁆𑀥𑀸’’𑀢𑀺.

𑀈𑀤𑀺𑀲𑁂𑀲𑀼𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂, 𑀢𑁂𑀦 𑀭𑀢𑀦𑀢𑁆𑀢𑀬𑀦𑀺𑀫𑀺𑀢𑁆𑀢𑀫𑁆𑀧𑀺 𑀅𑀓𑀼𑀲𑀮𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀦 𑀓𑀸𑀢𑀩𑁆𑀩𑀸, 𑀧𑀕𑁂𑀯 𑀯𑀝𑁆𑀝𑀸𑀫𑀺𑀲𑀮𑁄𑀓𑀸𑀫𑀺𑀲𑀦𑀺𑀫𑀺𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀪𑀸𑀯𑀥𑀫𑁆𑀫𑀢𑁄 𑀅𑀜𑁆𑀜𑀲𑁆𑀲 𑀓𑀢𑁆𑀢𑀼𑀅𑀪𑀸𑀯𑀚𑁄𑀢𑀦𑀢𑁆𑀣𑀁 𑀆𑀳𑀦𑀢𑀻𑀢𑀺 𑀓𑀢𑁆𑀢𑀼𑀅𑀢𑁆𑀣𑁂 𑀆𑀖𑀸𑀢𑀲𑀤𑁆𑀤𑀁 𑀤𑀲𑁆𑀲𑁂𑀢𑀺, 𑀢𑀢𑁆𑀣 𑀆𑀳𑀦𑀢𑀻𑀢𑀺 𑀳𑀺𑀁𑀲𑀢𑀺 𑀯𑀺𑀩𑀸𑀥𑀢𑀺, 𑀉𑀧𑀢𑀸𑀧𑁂𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀆𑀳𑀦𑀢𑀺 𑀏𑀢𑁂𑀦, 𑀆𑀳𑀦𑀦𑀫𑀢𑁆𑀢𑀁 𑀯𑀸 𑀆𑀖𑀸𑀢𑁄𑀢𑀺 𑀓𑀭𑀡𑀪𑀸𑀯𑀢𑁆𑀣𑀸𑀧𑀺 𑀲𑀫𑁆𑀪𑀯𑀦𑁆𑀢𑀺𑀬𑁂𑀯. 𑀏𑀯𑀁 𑀅𑀯𑀬𑀯𑀪𑁂𑀤𑀦𑁂𑀦 𑀆𑀖𑀸𑀢-𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀢𑀢𑁆𑀣 𑀧𑀭𑀺𑀬𑀸𑀬𑁂𑀦𑀧𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑁄𑀧𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀆𑀳. 𑀅𑀬𑀜𑁆𑀘 𑀦𑀬𑁄 ‘‘𑀅𑀧𑁆𑀧𑀘𑁆𑀘𑀬𑁄 𑀅𑀦𑀪𑀺𑀭𑀤𑁆𑀥𑀻’’𑀢𑀺𑀆𑀤𑀻𑀲𑀼𑀧𑀺 𑀬𑀣𑀸𑀲𑀫𑁆𑀪𑀯𑀁 𑀯𑀢𑁆𑀢𑀩𑁆𑀩𑁄. 𑀅𑀧𑁆𑀧𑀢𑀻𑀢𑀸 𑀳𑁄𑀦𑁆𑀢𑀺 𑀢𑁂𑀦𑀸𑀢𑀺 𑀧𑀸𑀓𑀝𑀧𑀭𑀺𑀬𑀸𑀬𑁂𑀦 𑀅𑀧𑁆𑀧𑀘𑁆𑀘𑀬-𑀲𑀤𑁆𑀤𑀲𑁆𑀲 𑀅𑀢𑁆𑀣𑀤𑀲𑁆𑀲𑀦𑀁, 𑀢𑀁𑀫𑀼𑀔𑁂𑀦 𑀧𑀦 𑀦 𑀧𑀘𑁆𑀘𑁂𑀢𑀺 𑀢𑁂𑀦𑀸𑀢𑀺 𑀅𑀧𑁆𑀧𑀘𑁆𑀘𑀬𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀪𑀺𑀭𑀸𑀥𑀬𑀢𑀻𑀢𑀺 𑀲𑀸𑀥𑀬𑀢𑀺. 𑀤𑁆𑀯𑀻𑀳𑀻𑀢𑀺 𑀆𑀖𑀸𑀢𑀅𑀦𑀪𑀺𑀭𑀤𑁆𑀥𑀺𑀧𑀤𑁂𑀳𑀺. 𑀏𑀓𑁂𑀦𑀸𑀢𑀺 𑀅𑀧𑁆𑀧𑀘𑁆𑀘𑀬𑀧𑀤𑁂𑀦. 𑀲𑁂𑀲𑀸𑀦𑀦𑁆𑀢𑀺 𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀸𑀦𑀁, 𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀅𑀯𑀲𑀺𑀝𑁆𑀞𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀸𑀦𑀁 𑀯𑀸. 𑀓𑀭𑀡𑀦𑁆𑀢𑀺 𑀉𑀧𑁆𑀧𑀸𑀤𑀦𑀁. 𑀆𑀖𑀸𑀢𑀸𑀤𑀻𑀦𑀜𑁆𑀳𑀺 𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑀲𑀫𑀯𑀸𑀬𑀦𑀁 𑀇𑀥 ‘‘𑀓𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀦 𑀅𑀢𑁆𑀣𑀢𑁄 𑀉𑀧𑁆𑀧𑀸𑀤𑀦𑀫𑁂𑀯. 𑀅𑀦𑀼𑀧𑁆𑀧𑀸𑀤𑀦𑀜𑁆𑀳𑀺 𑀲𑀦𑁆𑀥𑀸𑀬 𑀪𑀕𑀯𑀢𑀸 ‘‘𑀦 𑀓𑀭𑀡𑀻𑀬𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯 𑀏𑀓𑀼𑀧𑁆𑀧𑀸𑀤𑁂𑀓𑀯𑀢𑁆𑀣𑀼𑀓𑁂𑀓𑀸𑀭𑀫𑁆𑀫𑀡𑁂𑀓𑀦𑀺𑀭𑁄𑀥𑀪𑀸𑀯𑀢𑁄.

𑀢𑀢𑁆𑀣𑀸𑀢𑀺 ¶ 𑀢𑀲𑁆𑀫𑀺𑀁 𑀫𑀦𑁄𑀧𑀤𑁄𑀲𑁂. 𑀢𑀼𑀫𑁆𑀳𑀦𑁆𑀢𑀺 ‘‘𑀢𑀼𑀫𑁆𑀳𑀸𑀓’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑁄 𑀏𑀓𑁄 𑀲𑀤𑁆𑀤𑁄 ‘‘𑀬𑀣𑀸 𑀅𑀫𑁆𑀳𑀸𑀓’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑁄 ‘‘𑀅𑀫𑁆𑀳’’𑀦𑁆𑀢𑀺 𑀅𑀬𑀁 𑀲𑀤𑁆𑀤𑁄. 𑀬𑀣𑀸𑀳, ‘‘𑀢𑀲𑁆𑀫𑀸 𑀳𑀺 𑀅𑀫𑁆𑀳𑀁 𑀤𑀳𑀭𑀸 𑀦 𑀫𑀺𑀬𑁆𑀬𑀭𑁂’’𑀢𑀺 (𑀚𑀸. 𑁧.𑁯.𑁯𑁩, 𑁯𑁯). ‘‘𑀅𑀦𑁆𑀢𑀭𑀸𑀬𑁄’’𑀢𑀺 ¶ 𑀇𑀤𑀁 𑀫𑀦𑁄𑀧𑀤𑁄𑀲𑀲𑁆𑀲 𑀅𑀓𑀭𑀡𑀻𑀬𑀢𑀸𑀬 𑀓𑀸𑀭𑀡𑀯𑀘𑀦𑀁. 𑀬𑀲𑁆𑀫𑀸 𑀢𑀼𑀫𑁆𑀳𑀸𑀓𑀁𑀬𑁂𑀯 𑀘 𑀪𑀯𑁂𑀬𑁆𑀬 𑀢𑁂𑀦 𑀓𑁄𑀧𑀸𑀤𑀺𑀦𑀸 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀅𑀦𑁆𑀢𑀭𑀸𑀬𑁄, 𑀢𑀲𑁆𑀫𑀸 𑀢𑁂 𑀓𑁄𑀧𑀸𑀤𑀺𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸 𑀆𑀖𑀸𑀢𑀸𑀤𑀬𑁄 𑀦 𑀓𑀭𑀡𑀻𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀦𑀸𑀳𑀁 ‘‘𑀲𑀩𑁆𑀩𑀜𑁆𑀜𑀽’’𑀢𑀺 𑀇𑀲𑁆𑀲𑀭𑀪𑀸𑀯𑁂𑀦 𑀢𑀼𑀫𑁆𑀳𑁂 𑀢𑀢𑁄 𑀦𑀺𑀯𑀸𑀭𑁂𑀫𑀺, 𑀅𑀣 𑀔𑁄 𑀇𑀫𑀺𑀦𑀸 𑀦𑀸𑀫 𑀓𑀸𑀭𑀡𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀁 𑀧𑀦 𑀓𑀸𑀭𑀡𑀯𑀘𑀦𑀁 ¶ 𑀬𑀲𑁆𑀫𑀸 𑀆𑀤𑀻𑀦𑀯𑀯𑀺𑀪𑀸𑀯𑀦𑀁 𑀳𑁄𑀢𑀺, 𑀢𑀲𑁆𑀫𑀸 𑀆𑀳 ‘‘𑀆𑀤𑀻𑀦𑀯𑀁 𑀤𑀲𑁆𑀲𑁂𑀦𑁆𑀢𑁄’’𑀢𑀺. ‘‘𑀅𑀧𑀺 𑀦𑀼 𑀢𑀼𑀫𑁆𑀳𑁂’’𑀢𑀺𑀆𑀤𑀺𑀦𑀸 𑀫𑀦𑁄𑀧𑀤𑁄𑀲𑁄 𑀦 𑀓𑀸𑀮𑀦𑁆𑀢𑀭𑀪𑀸𑀯𑀺𑀦𑁄𑀬𑁂𑀯 𑀳𑀺𑀢𑀲𑀼𑀔𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑁄, 𑀅𑀣 𑀔𑁄 𑀢𑀗𑁆𑀔𑀡𑀧𑁆𑀧𑀯𑀢𑁆𑀢𑀺𑀭𑀳𑀲𑁆𑀲𑀧𑀺 𑀳𑀺𑀢𑀲𑀼𑀔𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑁄𑀢𑀺 𑀫𑀦𑁄𑀧𑀤𑁄𑀲𑁂 𑀆𑀤𑀻𑀦𑀯𑀁 𑀤𑀴𑁆𑀳𑀢𑀭𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀬𑁂𑀲𑀁 𑀓𑁂𑀲𑀜𑁆𑀘𑀺 ‘‘𑀧𑀭𑁂’’𑀢𑀺𑀆𑀤𑀻𑀲𑀼 𑀯𑀺𑀬 𑀦 𑀧𑀝𑀺𑀯𑀺𑀭𑀼𑀤𑁆𑀥𑀸𑀦𑀁𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀓𑀼𑀧𑀺𑀢𑁄’’𑀢𑀺𑀆𑀤𑀺.

𑀅𑀦𑁆𑀥𑀢𑀫𑀦𑁆𑀢𑀺 𑀅𑀦𑁆𑀥𑀪𑀸𑀯𑀓𑀭𑀢𑀫𑀁. 𑀬𑀦𑁆𑀢𑀺 𑀬𑀢𑁆𑀣. 𑀪𑀼𑀫𑁆𑀫𑀢𑁆𑀣𑁂 𑀳𑀺 𑀏𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀬𑀲𑁆𑀫𑀺𑀁 𑀓𑀸𑀮𑁂 𑀓𑁄𑀥𑁄 𑀲𑀳𑀢𑁂 𑀦𑀭𑀁, 𑀅𑀦𑁆𑀥𑀢𑀫𑀁 𑀢𑀤𑀸 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀦𑁆𑀢𑀺 𑀯𑀸 𑀓𑀸𑀭𑀡𑀯𑀘𑀦𑀁, 𑀬𑀲𑁆𑀫𑀸 𑀓𑁄𑀥𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀭𑀁 𑀅𑀪𑀺𑀪𑀯𑀢𑀺, 𑀢𑀲𑁆𑀫𑀸 𑀅𑀦𑁆𑀥𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀤𑀸 𑀓𑁄𑀥𑁄𑀢𑀺 𑀅𑀢𑁆𑀣𑁄 𑀬𑀁𑀢𑀁𑀲𑀤𑁆𑀤𑀸𑀦𑀁 𑀏𑀓𑀦𑁆𑀢𑀲𑀫𑁆𑀩𑀦𑁆𑀥𑀺𑀪𑀸𑀯𑀢𑁄. 𑀅𑀣 𑀯𑀸 𑀬𑀦𑁆𑀢𑀺 𑀓𑀺𑀭𑀺𑀬𑀸𑀬 𑀧𑀭𑀸𑀫𑀲𑀦𑀁. 𑀓𑁄𑀥𑁄 𑀲𑀳𑀢𑁂𑀢𑀺 𑀬𑀤𑁂𑀢𑀁 𑀓𑁄𑀥𑀲𑁆𑀲 𑀲𑀳𑀦𑀁 𑀅𑀪𑀺𑀪𑀯𑀦𑀁, 𑀏𑀢𑀁 𑀅𑀦𑁆𑀥𑀓𑀸𑀭𑀢𑀫𑀪𑀯𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑀁 𑀦𑀭𑀁 𑀓𑁄𑀥𑁄 𑀲𑀳𑀢𑁂 𑀅𑀪𑀺𑀪𑀯𑀢𑀺, 𑀢𑀲𑁆𑀲 𑀅𑀦𑁆𑀥𑀢𑀫𑀁 𑀢𑀤𑀸 𑀳𑁄𑀢𑀺, 𑀢𑀢𑁄 𑀘 𑀓𑀼𑀤𑁆𑀥𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀓𑀼𑀤𑁆𑀥𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀻𑀢𑀺. 𑀅𑀦𑁆𑀢𑀭𑀢𑁄𑀢𑀺 𑀅𑀩𑁆𑀪𑀦𑁆𑀢𑀭𑀢𑁄, 𑀘𑀺𑀢𑁆𑀢𑀢𑁄 𑀯𑀸.

‘‘𑀇𑀤𑀜𑁆𑀘𑀺𑀤𑀜𑁆𑀘 𑀓𑀸𑀭𑀡’’𑀦𑁆𑀢𑀺 𑀇𑀫𑀺𑀦𑀸 𑀲𑀩𑁆𑀩𑀜𑁆𑀜𑀽 𑀏𑀯 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑀢𑁆𑀢𑀸, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄 𑀏𑀓𑀦𑁆𑀢𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄 𑀲𑀁𑀓𑀺𑀮𑁂𑀲𑀭𑀳𑀺𑀢𑀢𑁆𑀢𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀇𑀤𑀜𑁆𑀘𑀺𑀤𑀜𑁆𑀘 𑀓𑀸𑀭𑀡’’𑀦𑁆𑀢𑀺 𑀏𑀢𑁂𑀦 𑀘 ‘‘𑀦 ¶ 𑀲𑀩𑁆𑀩𑀜𑁆𑀜𑀽’’𑀢𑀺𑀆𑀤𑀺𑀯𑀘𑀦𑀁 𑀅𑀪𑀽𑀢𑀁 𑀅𑀢𑀘𑁆𑀙𑀦𑁆𑀢𑀺 𑀦𑀺𑀩𑁆𑀩𑁂𑀞𑀺𑀢𑀁 𑀳𑁄𑀢𑀺. 𑀤𑀼𑀢𑀺𑀬𑀁 𑀧𑀤𑀦𑁆𑀢𑀺 ‘‘𑀅𑀢𑀘𑁆𑀙’’𑀦𑁆𑀢𑀺 𑀧𑀤𑀁. 𑀧𑀞𑀫𑀲𑁆𑀲𑀸𑀢𑀺 ‘‘𑀅𑀪𑀽𑀢’’𑀦𑁆𑀢𑀺 𑀧𑀤𑀲𑁆𑀲. 𑀘𑀢𑀼𑀢𑁆𑀣𑀜𑁆𑀘𑀸𑀢𑀺 ‘‘𑀦 𑀘 𑀧𑀦𑁂𑀢𑀁 𑀅𑀫𑁆𑀳𑁂𑀲𑀼 𑀲𑀁𑀯𑀺𑀚𑁆𑀚𑀢𑀻’’𑀢𑀺 𑀧𑀤𑀁. 𑀢𑀢𑀺𑀬𑀲𑁆𑀲𑀸𑀢𑀺 ‘‘𑀦𑀢𑁆𑀣𑀺 𑀘𑁂𑀢𑀁 𑀅𑀫𑁆𑀳𑁂𑀲𑀽’’𑀢𑀺 𑀧𑀤𑀲𑁆𑀲. 𑀅𑀯𑀡𑁆𑀡𑁂𑀬𑁂𑀯𑀸𑀢𑀺 𑀓𑀸𑀭𑀡𑀧𑀢𑀺𑀭𑀽𑀧𑀓𑀁 𑀯𑀢𑁆𑀯𑀸 𑀤𑁄𑀲𑀧𑀢𑀺𑀝𑁆𑀞𑀸𑀧𑀦𑀯𑀲𑁂𑀦 𑀦𑀺𑀦𑁆𑀤𑀦𑁂 𑀏𑀯. 𑀦 𑀲𑀩𑁆𑀩𑀢𑁆𑀣𑀸𑀢𑀺 𑀓𑁂𑀯𑀮𑀁 𑀅𑀓𑁆𑀓𑁄𑀲𑀦𑀔𑀼𑀁𑀲𑀦𑀯𑀫𑁆𑀪𑀦𑀸𑀤𑀻𑀲𑀼 𑀦 𑀏𑀓𑀦𑁆𑀢𑁂𑀦 𑀦𑀺𑀩𑁆𑀩𑁂𑀞𑀦𑀁 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 ‘‘𑀬𑀤𑀺 𑀳𑀻’’𑀢𑀺𑀆𑀤𑀺𑀦𑀸 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺.

𑁬. 𑀆𑀦𑀦𑁆𑀤𑀦𑁆𑀢𑀺 𑀧𑀫𑁄𑀤𑀦𑁆𑀢𑀺 𑀏𑀢𑁂𑀦 𑀥𑀫𑁆𑀫𑁂𑀦 𑀢𑀁𑀲𑀫𑀗𑁆𑀕𑀺𑀦𑁄 𑀲𑀢𑁆𑀢𑀸𑀢𑀺 𑀆𑀦𑀦𑁆𑀤-𑀲𑀤𑁆𑀤𑀲𑁆𑀲 𑀓𑀭𑀡𑀢𑁆𑀣𑀢𑀁 𑀤𑀲𑁆𑀲𑁂𑀢𑀺 ¶ . 𑀲𑁄𑀪𑀦𑀁 𑀫𑀦𑁄 𑀅𑀲𑁆𑀲𑀸𑀢𑀺 𑀲𑀼𑀫𑀦𑁄, 𑀲𑁄𑀪𑀦𑀁 𑀯𑀸 𑀫𑀦𑁄 𑀲𑀼𑀫𑀦𑁄, 𑀢𑀲𑁆𑀲 𑀪𑀸𑀯𑁄 𑀲𑁄𑀫𑀦𑀲𑁆𑀲𑀦𑁆𑀢𑀺 𑀢𑀤𑀜𑁆𑀜𑀥𑀫𑁆𑀫𑀸𑀦𑀫𑁆𑀧𑀺 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀲𑁄𑀫𑀦𑀲𑁆𑀲𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀭𑀼𑀴𑁆𑀳𑀻𑀲𑀤𑁆𑀤𑀢𑁆𑀢𑀸 ¶ 𑀬𑀣𑀸 ‘‘𑀧𑀗𑁆𑀓𑀚’’𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀘𑁂𑀢𑀲𑀺𑀓𑀲𑀼𑀔𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀆𑀳. 𑀉𑀩𑁆𑀩𑀺𑀮𑀬𑀢𑀻𑀢𑀺 𑀉𑀩𑁆𑀩𑀺𑀮𑀁, 𑀪𑀺𑀦𑁆𑀤𑀢𑀺 𑀧𑀼𑀭𑀺𑀫𑀸𑀯𑀢𑁆𑀣𑀸𑀬 𑀯𑀺𑀲𑁂𑀲𑀁 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀉𑀩𑁆𑀩𑀺𑀮𑀫𑁂𑀯 𑀉𑀩𑁆𑀩𑀺𑀮𑀸𑀯𑀺𑀢𑀁, 𑀢𑀲𑁆𑀲 𑀪𑀸𑀯𑁄 𑀉𑀩𑁆𑀩𑀺𑀮𑀸𑀯𑀺𑀢𑀢𑁆𑀢𑀁. 𑀬𑀸𑀬 𑀉𑀧𑁆𑀧𑀦𑁆𑀦𑀸𑀬 𑀓𑀸𑀬𑀘𑀺𑀢𑁆𑀢𑀁 𑀯𑀸𑀢𑀧𑀽𑀭𑀺𑀢𑀪𑀲𑁆𑀢𑀸 𑀯𑀺𑀬 𑀉𑀤𑁆𑀥𑀼𑀫𑀸𑀬𑀦𑀸𑀓𑀸𑀭𑀧𑁆𑀧𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀲𑀸 𑀕𑁂𑀳𑀲𑁆𑀲𑀺𑀢𑀸𑀬 𑀑𑀤𑀕𑁆𑀕𑀺𑀬𑀧𑀻𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀦𑁂𑀯𑀸𑀳 ‘‘𑀉𑀤𑁆𑀥𑀘𑁆𑀘𑀸𑀯𑀳𑀸𑀬𑀸’’𑀢𑀺𑀆𑀤𑀺. 𑀇𑀥𑀸𑀧𑀺 ‘‘𑀓𑀺𑀜𑁆𑀘𑀸𑀧𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀉𑀩𑁆𑀩𑀺𑀮𑀸𑀯𑀺𑀢𑀫𑁂𑀯 𑀦𑀢𑁆𑀣𑀺, 𑀅𑀣 𑀔𑁄 𑀆𑀬𑀢𑀺𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀏𑀤𑀺𑀲𑁂𑀲𑀼𑀧𑀺 𑀞𑀸𑀦𑁂𑀲𑀼 𑀅𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 𑀥𑀫𑁆𑀫𑀦𑁂𑀢𑁆𑀢𑀺𑀁 𑀞𑀧𑁂𑀢𑀻’’𑀢𑀺, ‘‘𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀏𑀓𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀯𑀼𑀢𑁆𑀢𑁄’’𑀢𑀺 𑀏𑀢𑁆𑀣 ‘‘𑀢𑁂𑀲𑀁 𑀯𑀲𑁂𑀦 𑀲𑁂𑀲𑀸𑀦𑀫𑁆𑀧𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀓𑀭𑀡𑀁 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯𑀸’’𑀢𑀺 𑀘 𑀅𑀝𑁆𑀞𑀓𑀣𑀸𑀬𑀁, ‘‘𑀧𑀺-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂’’𑀢𑀺𑀆𑀤𑀺𑀦𑀸 𑀇𑀥 𑀘 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀬𑀣𑀸𑀲𑀫𑁆𑀪𑀯𑀁 𑀯𑁂𑀤𑀺𑀢𑀩𑁆𑀩𑁄. ‘‘𑀢𑀼𑀫𑁆𑀳𑀁𑀬𑁂𑀯𑀲𑁆𑀲 ¶ 𑀢𑁂𑀦 𑀅𑀦𑁆𑀢𑀭𑀸𑀬𑁄’’𑀢𑀺 𑀏𑀢𑁆𑀣𑀸𑀧𑀺 ‘‘𑀅𑀦𑁆𑀢𑀭𑀸𑀬𑁄𑀢𑀺 𑀇𑀤’’𑀦𑁆𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀸 𑀅𑀯𑀡𑁆𑀡𑀧𑀓𑁆𑀔𑁂 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀲𑁆𑀫𑀸 𑀧𑀦𑁂𑀢𑀦𑁆𑀢𑀺 𑀘 𑀯𑀓𑁆𑀔𑀫𑀸𑀦𑀁𑀬𑁂𑀯 𑀅𑀢𑁆𑀣𑀁 𑀫𑀦𑀲𑀺 𑀓𑀢𑁆𑀯𑀸 𑀘𑁄𑀤𑁂𑀢𑀺. 𑀆𑀘𑀭𑀺𑀬𑁄 ‘‘𑀲𑀘𑁆𑀘𑀁 𑀯𑀡𑁆𑀡𑀺𑀢’’𑀦𑁆𑀢𑀺 𑀢𑀫𑀢𑁆𑀣𑀁 𑀧𑀝𑀺𑀚𑀸𑀦𑀺𑀢𑁆𑀯𑀸 ‘‘𑀢𑀁 𑀧𑀦 𑀦𑁂𑀓𑁆𑀔𑀫𑁆𑀫𑀦𑀺𑀲𑁆𑀲𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀧𑀭𑀺𑀳𑀭𑀢𑀺. 𑀢𑀢𑁆𑀣 𑀏𑀢𑀦𑁆𑀢𑀺 𑀆𑀦𑀦𑁆𑀤𑀸𑀤𑀻𑀦𑀁 𑀅𑀓𑀭𑀡𑀻𑀬𑀢𑀸𑀯𑀘𑀦𑀁. 𑀦𑀦𑀼 𑀪𑀕𑀯𑀢𑀸 𑀯𑀡𑁆𑀡𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀲𑀺𑀡𑁂𑀦𑀸𑀢𑀺 𑀓𑀲𑀺𑀡𑀢𑀸𑀬 𑀲𑀓𑀮𑀪𑀸𑀯𑁂𑀦. 𑀓𑁂𑀘𑀺 𑀧𑀦 ‘‘𑀚𑀫𑁆𑀩𑀼𑀤𑀻𑀧𑀲𑁆𑀲𑀸𑀢𑀺 𑀓𑀭𑀡𑁂 𑀲𑀸𑀫𑀺𑀯𑀘𑀦’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀫𑀢𑁂𑀦 𑀓𑀲𑀺𑀡𑀚𑀫𑁆𑀩𑀼𑀤𑀻𑀧-𑀲𑀤𑁆𑀤𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀕𑁂𑀳𑀲𑁆𑀲𑀺𑀢𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀛𑀸𑀦𑀸𑀤𑀻𑀦𑀁 𑀅𑀦𑁆𑀢𑀭𑀸𑀬𑀓𑀭𑀁, 𑀢𑀲𑁆𑀫𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀲𑁄𑀫𑀦𑀲𑁆𑀲𑀁 𑀧𑀸𑀳𑀁 𑀤𑁂𑀯𑀸𑀦𑀁 𑀇𑀦𑁆𑀤 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻’’𑀢𑀺 (𑀤𑀻. 𑀦𑀺. 𑁨.𑁩𑁫𑁯). ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺 𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀧𑀻𑀢𑀺 𑀅𑀦𑁆𑀢𑀭𑀸𑀬𑀓𑀭𑀻, 𑀢𑀁 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀇𑀤𑀜𑁆𑀳𑀺 𑀮𑁄𑀪𑀲𑀳𑀕𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀧𑀻𑀢𑀺𑀕𑁆𑀕𑀳𑀡𑁂𑀦 𑀧𑀦 𑀲𑁄𑀫𑀦𑀲𑁆𑀲𑀫𑁆𑀧𑀺 𑀕𑀳𑀺𑀢𑀫𑁂𑀯 𑀳𑁄𑀢𑀺 𑀲𑁄𑀫𑀦𑀲𑁆𑀲𑀭𑀳𑀺𑀢𑀸𑀬 𑀧𑀻𑀢𑀺𑀬𑀸 𑀅𑀪𑀸𑀯𑀢𑁄𑀢𑀺 𑀧𑀻𑀢𑀺𑀬𑁂𑀯 𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀯𑀺𑀪𑀸𑀕𑀯𑀘𑀦𑀢𑁄 𑀲𑁄𑀫𑀦𑀲𑁆𑀲𑀲𑁆𑀲 𑀧𑀸𑀓𑀝𑁄 𑀅𑀦𑁆𑀢𑀭𑀸𑀬𑀓𑀭𑀪𑀸𑀯𑁄, 𑀦 𑀢𑀣𑀸 𑀧𑀻𑀢𑀺𑀬𑀸𑀢𑀺 𑀧𑀻𑀢𑀺𑀬𑁂𑀯 𑀮𑁄𑀪𑀲𑀳𑀕𑀢𑀢𑁆𑀢𑁂𑀦 ¶ 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀸. ‘‘𑀮𑀼𑀤𑁆𑀥𑁄 𑀅𑀢𑁆𑀣’’𑀦𑁆𑀢𑀺𑀆𑀤𑀺𑀕𑀸𑀣𑀸𑀦𑀁 ‘‘𑀓𑀼𑀤𑁆𑀥𑁄 𑀅𑀢𑁆𑀣’’𑀦𑁆𑀢𑀺𑀆𑀤𑀺 𑀕𑀸𑀣𑀸𑀲𑀼 𑀯𑀺𑀬 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

‘‘𑀫𑀫𑀁 𑀯𑀸 𑀪𑀺𑀓𑁆𑀔𑀯𑁂 𑀧𑀭𑁂 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀥𑀫𑁆𑀫𑀲𑁆𑀲 𑀯𑀸 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀲𑀗𑁆𑀖𑀲𑁆𑀲 𑀯𑀸 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀢𑀢𑁆𑀭 𑀘𑁂 𑀢𑀼𑀫𑁆𑀳𑁂 𑀅𑀲𑁆𑀲𑀣 𑀆𑀦𑀦𑁆𑀤𑀺𑀦𑁄 𑀲𑀼𑀫𑀦𑀸 𑀉𑀩𑁆𑀩𑀺𑀮𑀸𑀯𑀺𑀢𑀸, 𑀅𑀧𑀺 𑀦𑀼 𑀢𑀼𑀫𑁆𑀳𑁂 𑀧𑀭𑁂𑀲𑀁 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀁 𑀆𑀚𑀸𑀦𑁂𑀬𑁆𑀬𑀸𑀣𑀸𑀢𑀺. 𑀦𑁄 𑀳𑁂𑀢𑀁 𑀪𑀦𑁆𑀢𑁂’’𑀢𑀺 𑀅𑀬𑀁 𑀢𑀢𑀺𑀬𑀯𑀸𑀭𑁄, 𑀲𑁄 𑀤𑁂𑀲𑀦𑀸𑀓𑀸𑀮𑁂 ¶ 𑀦𑀻𑀳𑀭𑀺𑀢𑁆𑀯𑀸 𑀤𑁂𑀲𑁂𑀢𑀩𑁆𑀩𑀧𑀼𑀕𑁆𑀕𑀮𑀸𑀪𑀸𑀯𑀢𑁄 𑀤𑁂𑀲𑀦𑀸𑀬 𑀅𑀦𑀸𑀕𑀢𑁄𑀧𑀺 𑀢𑀤𑀢𑁆𑀣𑀲𑀫𑁆𑀪𑀯𑀢𑁄 𑀅𑀢𑁆𑀣𑀢𑁄 𑀆𑀕𑀢𑁄𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑁄 𑀬𑀣𑀸 𑀢𑀁 ¶ 𑀓𑀣𑀸𑀯𑀢𑁆𑀣𑀼𑀧𑀓𑀭𑀡𑀁 𑀯𑀺𑀢𑁆𑀣𑀸𑀭𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀢𑁆𑀣𑀢𑁄 𑀆𑀕𑀢𑁄 𑀬𑁂𑀯𑀸’’𑀢𑀺 𑀏𑀢𑁂𑀦 𑀲𑀁𑀯𑀡𑁆𑀡𑀦𑀸𑀓𑀸𑀮𑁂 𑀢𑀣𑀸 𑀩𑀼𑀚𑁆𑀛𑀦𑀓𑀲𑀢𑁆𑀢𑀸𑀦𑀁 𑀯𑀲𑁂𑀦 𑀲𑁄 𑀯𑀸𑀭𑁄 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀬𑀣𑁂𑀯 𑀳𑀻’’𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀲𑀫𑁆𑀪𑀯𑀁 𑀯𑀺𑀪𑀸𑀯𑁂𑀢𑀺. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀢𑀢𑁆𑀭 𑀢𑀼𑀫𑁆𑀳𑁂𑀳𑀻𑀢𑀺 𑀢𑀲𑁆𑀫𑀺𑀁 𑀯𑀡𑁆𑀡𑁂 𑀢𑀼𑀫𑁆𑀳𑁂𑀳𑀻’’𑀢𑀺𑀆𑀤𑀺𑀦𑀸, ‘‘𑀤𑀼𑀢𑀺𑀬𑀁 𑀧𑀤𑀁 𑀧𑀞𑀫𑀲𑁆𑀲 𑀧𑀤𑀲𑁆𑀲, 𑀘𑀢𑀼𑀢𑁆𑀣𑀜𑁆𑀘 𑀢𑀢𑀺𑀬𑀲𑁆𑀲 𑀯𑁂𑀯𑀘𑀦’’𑀦𑁆𑀢𑀺𑀆𑀤𑀺𑀦𑀸 𑀘 𑀯𑀼𑀢𑁆𑀢𑀦𑀬𑁂𑀦.

𑀘𑀽𑀴𑀲𑀻𑀮𑀯𑀡𑁆𑀡𑀦𑀸

𑁭. 𑀦𑀺𑀯𑀢𑁆𑀢𑁄 𑀅𑀫𑀽𑀮𑀓𑀢𑁆𑀢𑀸 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀢𑀸𑀪𑀸𑀯𑀢𑁄. 𑀅𑀦𑀼𑀯𑀢𑁆𑀢𑀢𑀺𑀬𑁂𑀯 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀢𑀸𑀬 𑀅𑀥𑀺𑀓𑀢𑀪𑀸𑀯𑀢𑁄. 𑀅𑀦𑀼𑀲𑀦𑁆𑀥𑀺𑀁 𑀤𑀲𑁆𑀲𑁂𑀲𑁆𑀲𑀢𑀺 ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸. 𑀑𑀭𑀦𑁆𑀢𑀺 𑀯𑀸 𑀅𑀧𑀭𑀪𑀸𑀕𑁄 ‘‘𑀑𑀭𑀢𑁄 𑀪𑁄𑀕𑀁, 𑀑𑀭𑀁 𑀧𑀸𑀭’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀣 𑀯𑀸 𑀳𑁂𑀝𑁆𑀞𑀸𑀅𑀢𑁆𑀣𑁄 𑀑𑀭-𑀲𑀤𑁆𑀤𑁄 ‘‘𑀑𑀭𑀁 𑀆𑀕𑀫𑀦𑀸𑀬 𑀬𑁂 𑀧𑀘𑁆𑀘𑀬𑀸, 𑀢𑁂 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀲𑀻𑀮𑀜𑁆𑀳𑀺 𑀲𑀫𑀸𑀥𑀺𑀧𑀜𑁆𑀜𑀸𑀬𑁄 𑀅𑀧𑁂𑀓𑁆𑀔𑀺𑀢𑁆𑀯𑀸 𑀅𑀧𑀭𑀪𑀸𑀕𑁄, 𑀳𑁂𑀝𑁆𑀞𑀸𑀪𑀽𑀢𑀜𑁆𑀘 𑀳𑁄𑀢𑀻𑀢𑀺. 𑀲𑀻𑀮𑀫𑀢𑁆𑀢𑀓𑀦𑁆𑀢𑀺 𑀏𑀢𑁆𑀣 𑀫𑀢𑁆𑀢-𑀲𑀤𑁆𑀤𑁄 𑀅𑀧𑁆𑀧𑀓𑀢𑁆𑀣𑁄 𑀯𑀸 ‘‘𑀪𑁂𑀲𑀚𑁆𑀚𑀫𑀢𑁆𑀢𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁪𑁪𑁭) 𑀯𑀺𑀬. 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄 𑀯𑀸 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀥𑀫𑁆𑀫𑀸 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁬), 𑀫𑀦𑁄𑀫𑀢𑁆𑀢𑀸 𑀥𑀸𑀢𑀼 𑀫𑀦𑁄𑀥𑀸𑀢𑀽’’𑀢𑀺 𑀘 𑀆𑀤𑀻𑀲𑀼 𑀯𑀺𑀬. ‘‘𑀅𑀧𑁆𑀧𑀫𑀢𑁆𑀢𑀓𑀁, 𑀑𑀭𑀫𑀢𑁆𑀢𑀓’’𑀦𑁆𑀢𑀺 𑀧𑀤𑀤𑁆𑀯𑀬𑁂𑀦 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁄𑀬𑁂𑀯 𑀳𑀺 𑀅𑀢𑁆𑀣𑁄 𑀲𑀻𑀮𑀫𑀢𑁆𑀢𑀓𑀦𑁆𑀢𑀺 𑀯𑀺𑀲𑁂𑀲𑀯𑀲𑁂𑀦 𑀯𑀼𑀢𑁆𑀢𑁄. 𑀅𑀣 𑀯𑀸 𑀲𑀻𑀮𑁂𑀦𑀧𑀺 𑀢𑀤𑁂𑀓𑀤𑁂𑀲𑀲𑁆𑀲𑁂𑀯 ¶ 𑀲𑀗𑁆𑀕𑀳𑀡𑀢𑁆𑀣𑀁 ¶ 𑀅𑀧𑁆𑀧𑀓𑀢𑁆𑀣𑀯𑀸𑀘𑀓𑁄, 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄 𑀏𑀯 𑀯𑀸 ‘‘𑀲𑀻𑀮𑀫𑀢𑁆𑀢𑀓’’𑀦𑁆𑀢𑀺 𑀏𑀢𑁆𑀣 𑀫𑀢𑁆𑀢-𑀲𑀤𑁆𑀤𑁄 𑀯𑀼𑀢𑁆𑀢𑁄. 𑀢𑀣𑀸 𑀳𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀸𑀦𑀺 𑀇𑀥 𑀤𑁂𑀲𑀦𑀁 𑀅𑀦𑀸𑀭𑀼𑀴𑁆𑀳𑀸𑀦𑀺. 𑀦 𑀳𑀺 𑀢𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀦𑀺 𑀯𑀺𑀬 𑀲𑀩𑁆𑀩𑀧𑀼𑀣𑀼𑀚𑁆𑀚𑀦𑁂𑀲𑀼 𑀧𑀸𑀓𑀝𑀸𑀦𑀻𑀢𑀺. ‘‘𑀉𑀲𑁆𑀲𑀸𑀳𑀁 𑀓𑀢𑁆𑀯𑀸’’𑀢𑀺 𑀏𑀢𑁂𑀦 ‘‘𑀯𑀤𑀫𑀸𑀦𑁄’’𑀢𑀺 𑀏𑀢𑁆𑀣 𑀲𑀢𑁆𑀢𑀺𑀅𑀢𑁆𑀣𑀁 𑀫𑀸𑀦-𑀲𑀤𑁆𑀤𑀁 𑀤𑀲𑁆𑀲𑁂𑀢𑀺.

𑀅𑀮𑀗𑁆𑀓𑀭𑀡𑀁 𑀯𑀺𑀪𑀽𑀲𑀦𑀁 𑀅𑀮𑀗𑁆𑀓𑀸𑀭𑁄, 𑀓𑀼𑀡𑁆𑀟𑀮𑀸𑀤𑀺𑀧𑀲𑀸𑀥𑀦𑀁 𑀯𑀸. 𑀊𑀦𑀝𑁆𑀞𑀸𑀦𑀧𑀽𑀭𑀡𑀁 𑀫𑀡𑁆𑀟𑀦𑀁. 𑀫𑀡𑁆𑀟𑀦𑁂𑀢𑀺 𑀫𑀡𑁆𑀟𑀦𑀳𑁂𑀢𑀼. 𑀅𑀣 𑀯𑀸 𑀫𑀡𑁆𑀟𑀢𑀻𑀢𑀺 𑀫𑀡𑁆𑀟𑀦𑁄, 𑀫𑀡𑁆𑀟𑀦𑀚𑀸𑀢𑀺𑀓𑁄 𑀧𑀼𑀭𑀺𑀲𑁄. 𑀩𑀳𑀼𑀯𑀘𑀦𑀢𑁆𑀣𑁂 𑀘 𑀇𑀤𑀁 𑀏𑀓𑀯𑀘𑀦𑀁, 𑀫𑀡𑁆𑀟𑀦𑀲𑀻𑀮𑁂𑀲𑀽𑀢𑀺 𑀅𑀢𑁆𑀣𑁄. 𑀧𑀭𑀺𑀧𑀽𑀭𑀓𑀸𑀭𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄 𑀯𑀸, 𑀢𑁂𑀦 𑀲𑀓𑀮𑀫𑁆𑀧𑀺 𑀲𑀻𑀮𑀣𑁄𑀫𑀦 𑀲𑀼𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀘𑀦𑁆𑀤𑀦𑀦𑁆𑀢𑀺 𑀘𑀦𑁆𑀤𑀦𑀲𑀳𑀘𑀭𑀡𑀢𑁄 𑀘𑀦𑁆𑀤𑀦𑀕𑀦𑁆𑀥𑁄, 𑀢𑀣𑀸 𑀢𑀕𑀭𑀸𑀤𑀻𑀲𑀼𑀧𑀺. 𑀲𑀢𑀜𑁆𑀘 𑀕𑀦𑁆𑀥𑁄𑀢𑀺 𑀏𑀢𑁆𑀣 𑀕𑀦𑁆𑀥𑁄 𑀯𑀺𑀬𑀸𑀢𑀺 𑀕𑀦𑁆𑀥𑁄𑀢𑀺 𑀯𑀼𑀢𑁆𑀢𑁄 𑀲𑀻𑀮𑀦𑀺𑀩𑀦𑁆𑀥𑀦𑁄 𑀣𑀼𑀢𑀺𑀖𑁄𑀲𑁄. 𑀲𑀻𑀮𑀜𑁆𑀳𑀺 𑀓𑀺𑀢𑁆𑀢𑀺𑀬𑀸 𑀦𑀺𑀫𑀺𑀢𑁆𑀢𑀁. 𑀬𑀣𑀸𑀳 ‘‘𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀦𑁆𑀦𑀲𑁆𑀲 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀻’’𑀢𑀺 ¶ (𑀤𑀻. 𑀦𑀺. 𑁨.𑁧𑁫𑁦; 𑀅. 𑀦𑀺. 𑁫.𑁨𑁧𑁩; 𑀫𑀳𑀸𑀯. 𑁨𑁮𑁫). 𑀧𑀯𑀸𑀬𑀢𑀻𑀢𑀺 𑀧𑀓𑀸𑀲𑀢𑀺. 𑀕𑀦𑁆𑀥𑀸𑀯 𑀕𑀦𑁆𑀥𑀚𑀸𑀢𑀸.

‘‘𑀅𑀧𑁆𑀧𑀓𑀁 𑀩𑀳𑀼𑀓’’𑀦𑁆𑀢𑀺 𑀇𑀤𑀁 𑀧𑀸𑀭𑀸𑀧𑀸𑀭𑀁 𑀯𑀺𑀬 𑀅𑀜𑁆𑀜𑀫𑀜𑁆𑀜𑀁 𑀉𑀧𑀦𑀺𑀥𑀸𑀬 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀉𑀧𑀭𑀺𑀕𑀼𑀡𑁂 𑀉𑀧𑀦𑀺𑀥𑀸𑀬𑀸’’𑀢𑀺. 𑀲𑀻𑀮𑀜𑁆𑀳𑀻𑀢𑀺 𑀏𑀢𑁆𑀣 𑀳𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄, 𑀢𑁂𑀦 𑀇𑀤𑀁 𑀤𑀲𑁆𑀲𑁂𑀢𑀺 ‘‘𑀬𑀲𑁆𑀫𑀸 𑀲𑀻𑀮𑀁 𑀓𑀺𑀜𑁆𑀘𑀸𑀧𑀺 𑀧𑀢𑀺𑀝𑁆𑀞𑀸𑀪𑀸𑀯𑁂𑀦 𑀲𑀫𑀸𑀥𑀺𑀲𑁆𑀲 𑀩𑀳𑀼𑀓𑀸𑀭𑀁, 𑀧𑀪𑀸𑀯𑀸𑀤𑀺𑀕𑀼𑀡𑀯𑀺𑀲𑁂𑀲𑁂 𑀧𑀦𑀲𑁆𑀲 𑀉𑀧𑀦𑀺𑀥𑀸𑀬 𑀓𑀮𑀫𑁆𑀧𑀺 𑀦 𑀉𑀧𑁂𑀢𑀺, 𑀢𑀣𑀸 𑀲𑀫𑀸𑀥𑀺 𑀘 𑀧𑀜𑁆𑀜𑀸𑀬𑀸’’𑀢𑀺. 𑀢𑁂𑀦𑁂𑀯𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀇𑀤𑀸𑀦𑀺 ‘‘𑀓𑀣’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀲𑀫𑀸𑀥𑀺𑀲𑁆𑀲 𑀆𑀦𑀼𑀪𑀸𑀯𑀁 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀸𑀯𑁂𑀢𑀺. ‘‘𑀅𑀪𑀺…𑀧𑁂… ¶ 𑀫𑀽𑀮𑁂’’𑀢𑀺 𑀇𑀤𑀁 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀲𑁆𑀲 𑀲𑀼𑀧𑀸𑀓𑀝𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀅𑀜𑁆𑀜𑁂𑀳𑀺 𑀩𑁄𑀥𑀺𑀫𑀽𑀮𑀜𑀸𑀢𑀺𑀲𑀫𑀸𑀕𑀫𑀸𑀤𑀻𑀲𑀼 𑀓𑀢𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀯𑀺𑀲𑁂𑀲𑀦𑀢𑁆𑀣𑀜𑁆𑀘 𑀯𑀼𑀢𑁆𑀢𑀁. 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀢𑁆𑀣𑀸𑀬 𑀳𑀺 𑀪𑀕𑀯𑀢𑁄 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀢𑀤𑀦𑀼𑀘𑁆𑀙𑀯𑀺𑀓𑀁 𑀞𑀸𑀦𑀁 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀭𑀢𑀦𑀫𑀡𑁆𑀟𑀧𑀸𑀤𑀺 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀆𑀡𑀸𑀬 𑀯𑀺𑀲𑁆𑀲𑀓𑀫𑁆𑀫𑀼𑀦𑀸 𑀦𑀺𑀫𑁆𑀫𑀺𑀢𑀦𑁆𑀢𑀺 𑀯𑀤𑀦𑁆𑀢𑀺, 𑀪𑀕𑀯𑀢𑀸𑀯 𑀦𑀺𑀫𑁆𑀫𑀺𑀢𑀦𑁆𑀢𑀺 𑀅𑀧𑀭𑁂. ‘‘𑀬𑁄 𑀓𑁄𑀘𑀺 𑀏𑀯𑀭𑀽𑀧𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄 𑀅𑀢𑁆𑀣𑀺 𑀘𑁂, 𑀆𑀕𑀘𑁆𑀙𑀢𑀽’’𑀢𑀺 𑀘𑁄𑀤𑀦𑀸𑀲𑀤𑀺𑀲𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀸𑀤𑀸𑀦𑀧𑀭𑀺𑀤𑀻𑀧𑀦’’𑀦𑁆𑀢𑀺. 𑀢𑀢𑁆𑀣 𑀅𑀢𑁆𑀢𑀸𑀤𑀸𑀦𑀁 𑀅𑀦𑀼𑀬𑁄𑀕𑁄, 𑀢𑀺𑀢𑁆𑀣𑀺𑀬𑀸𑀦𑀁 𑀢𑀣𑀸 ¶ 𑀓𑀸𑀢𑀼𑀁 𑀅𑀲𑀫𑀢𑁆𑀣𑀢𑁆𑀢𑀸, ‘‘𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀧𑀼𑀩𑁆𑀩𑁂 𑀉𑀝𑁆𑀞𑀺𑀢𑀢𑁆𑀢𑀸 𑀢𑀺𑀢𑁆𑀣𑀺𑀬𑀧𑀭𑀺𑀫𑀤𑁆𑀤𑀦𑀁.

𑀉𑀧𑀭𑀺𑀫𑀓𑀸𑀬𑀢𑁄𑀢𑀺𑀆𑀤𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑀧𑀝𑀺. 𑀫. 𑁧.𑁧𑁧𑁬).

𑀢𑀢𑁆𑀣𑀸𑀬𑀁 𑀧𑀸𑀴𑀺𑀲𑁂𑀲𑁄 𑁋

‘‘𑀳𑁂𑀝𑁆𑀞𑀺𑀫𑀓𑀸𑀬𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀉𑀧𑀭𑀺𑀫𑀓𑀸𑀬𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺. 𑀧𑀼𑀭𑀢𑁆𑀣𑀺𑀫𑀓𑀸𑀬𑀢𑁄 𑀅𑀕𑁆𑀕𑀺, 𑀧𑀘𑁆𑀙𑀺𑀫𑀓𑀸𑀬𑀢𑁄 𑀉𑀤𑀓𑀁. 𑀧𑀘𑁆𑀙𑀺𑀫𑀓𑀸𑀬𑀢𑁄 𑀅𑀕𑁆𑀕𑀺, 𑀧𑀼𑀭𑀢𑁆𑀣𑀺𑀫𑀓𑀸𑀬𑀢𑁄 𑀉𑀤𑀓𑀁. 𑀤𑀓𑁆𑀔𑀺𑀡𑀅𑀓𑁆𑀔𑀺𑀢𑁄 𑀅𑀕𑁆𑀕𑀺, 𑀯𑀸𑀫𑀅𑀓𑁆𑀔𑀺𑀢𑁄 𑀉𑀤𑀓𑀁. 𑀯𑀸𑀫𑀅𑀓𑁆𑀔𑀺𑀢𑁄 𑀅𑀕𑁆𑀕𑀺, 𑀤𑀓𑁆𑀔𑀺𑀡𑀅𑀓𑁆𑀔𑀺𑀢𑁄 𑀉𑀤𑀓𑀁. 𑀤𑀓𑁆𑀔𑀺𑀡𑀓𑀡𑁆𑀡𑀲𑁄𑀢𑀢𑁄 𑀅𑀕𑁆𑀕𑀺, 𑀯𑀸𑀫𑀓𑀡𑁆𑀡𑀲𑁄𑀢𑀢𑁄 𑀉𑀤𑀓𑀁. 𑀯𑀸𑀫𑀓𑀡𑁆𑀡𑀲𑁄𑀢𑀢𑁄 𑀅𑀕𑁆𑀕𑀺, 𑀤𑀓𑁆𑀔𑀺𑀡𑀓𑀡𑁆𑀡𑀲𑁄𑀢𑀢𑁄 𑀉𑀤𑀓𑀁. 𑀤𑀓𑁆𑀔𑀺𑀡𑀦𑀸𑀲𑀺𑀓𑀸𑀲𑁄𑀢𑀢𑁄 𑀅𑀕𑁆𑀕𑀺, 𑀯𑀸𑀫𑀦𑀸𑀲𑀺𑀓𑀸𑀲𑁄𑀢𑀢𑁄 𑀉𑀤𑀓𑀁. 𑀯𑀸𑀫𑀦𑀸𑀲𑀺𑀓𑀸𑀲𑁄𑀢𑀢𑁄 𑀅𑀕𑁆𑀕𑀺, 𑀤𑀓𑁆𑀔𑀺𑀡𑀦𑀸𑀲𑀺𑀓𑀸𑀲𑁄𑀢𑀢𑁄 𑀉𑀤𑀓𑀁. 𑀤𑀓𑁆𑀔𑀺𑀡𑀅𑀁𑀲𑀓𑀽𑀝𑀢𑁄 𑀅𑀕𑁆𑀕𑀺, 𑀯𑀸𑀫𑀅𑀁𑀲𑀓𑀽𑀝𑀢𑁄 𑀉𑀤𑀓𑀁. 𑀯𑀸𑀫𑀅𑀁𑀲𑀓𑀽𑀝𑀢𑁄 𑀅𑀕𑁆𑀕𑀺, 𑀤𑀓𑁆𑀔𑀺𑀡𑀅𑀁𑀲𑀓𑀽𑀝𑀢𑁄 𑀉𑀤𑀓𑀁. 𑀤𑀓𑁆𑀔𑀺𑀡𑀳𑀢𑁆𑀣𑀢𑁄 𑀅𑀕𑁆𑀕𑀺, 𑀯𑀸𑀫𑀳𑀢𑁆𑀣𑀢𑁄 𑀉𑀤𑀓𑀁. 𑀯𑀸𑀫𑀳𑀢𑁆𑀣𑀢𑁄 𑀅𑀕𑁆𑀕𑀺, 𑀤𑀓𑁆𑀔𑀺𑀡𑀳𑀢𑁆𑀣𑀢𑁄 𑀉𑀤𑀓𑀁. 𑀤𑀓𑁆𑀔𑀺𑀡𑀧𑀲𑁆𑀲𑀢𑁄 𑀅𑀕𑁆𑀕𑀺, 𑀯𑀸𑀫𑀧𑀲𑁆𑀲𑀢𑁄 𑀉𑀤𑀓𑀁. 𑀯𑀸𑀫𑀧𑀲𑁆𑀲𑀢𑁄 𑀅𑀕𑁆𑀕𑀺, 𑀤𑀓𑁆𑀔𑀺𑀡𑀧𑀲𑁆𑀲𑀢𑁄 𑀉𑀤𑀓𑀁. 𑀤𑀓𑁆𑀔𑀺𑀡𑀧𑀸𑀤𑀢𑁄 𑀅𑀕𑁆𑀕𑀺 ¶ , 𑀯𑀸𑀫𑀧𑀸𑀤𑀢𑁄 𑀉𑀤𑀓𑀁. 𑀯𑀸𑀫𑀧𑀸𑀤𑀢𑁄 𑀅𑀕𑁆𑀕𑀺, 𑀤𑀓𑁆𑀔𑀺𑀡𑀧𑀸𑀤𑀢𑁄 𑀉𑀤𑀓𑀁. 𑀅𑀗𑁆𑀕𑀼𑀮𑀗𑁆𑀕𑀼𑀮𑁂𑀳𑀺 𑀅𑀕𑁆𑀕𑀺, 𑀅𑀗𑁆𑀕𑀼𑀮𑀦𑁆𑀢𑀭𑀺𑀓𑀸𑀳𑀺 𑀉𑀤𑀓𑀁 ¶ . 𑀅𑀗𑁆𑀕𑀼𑀮𑀦𑁆𑀢𑀭𑀺𑀓𑀸𑀳𑀺 𑀅𑀕𑁆𑀕𑀺, 𑀅𑀗𑁆𑀕𑀼𑀮𑀗𑁆𑀕𑀼𑀮𑁂𑀳𑀺 𑀉𑀤𑀓𑀁. 𑀏𑀓𑁂𑀓𑀮𑁄𑀫𑀢𑁄 𑀅𑀕𑁆𑀕𑀺, 𑀏𑀓𑁂𑀓𑀮𑁄𑀫𑀢𑁄 𑀉𑀤𑀓𑀁. 𑀮𑁄𑀫𑀓𑀽𑀧𑀢𑁄 𑀮𑁄𑀫𑀓𑀽𑀧𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀮𑁄𑀫𑀓𑀽𑀧𑀢𑁄 𑀮𑁄𑀫𑀓𑀽𑀧𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀻’’𑀢𑀺 (𑀧𑀝𑀺. 𑀫. 𑁧.𑁧𑁧𑁬).

𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀏𑀓𑁂𑀓𑀮𑁄𑀫𑀓𑀽𑀧𑀢𑁄’’𑀢𑀺 𑀆𑀕𑀢𑀁.

‘‘𑀙𑀦𑁆𑀦𑀁 𑀯𑀡𑁆𑀡𑀸𑀦𑀦𑁆𑀢𑀺 𑀆𑀤𑀺𑀦𑀬𑀧𑁆𑀧𑀯𑀢𑁆𑀢’’𑀦𑁆𑀢𑀺 𑀏𑀢𑁆𑀣𑀸𑀧𑀺 𑀦𑀻𑀮𑀸𑀦𑀁 𑀧𑀻𑀢𑀓𑀸𑀦𑀁 𑀮𑁄𑀳𑀺𑀢𑀓𑀸𑀦𑀁 𑀑𑀤𑀸𑀢𑀸𑀦𑀁 𑀫𑀜𑁆𑀚𑀺𑀝𑁆𑀞𑀸𑀦𑀁 𑀧𑀪𑀲𑁆𑀲𑀭𑀸𑀦𑀦𑁆𑀢𑀺 𑀅𑀬𑀁 𑀧𑀸𑀴𑀺𑀲𑁂𑀲𑁄. ‘‘𑀲𑀼𑀯𑀡𑁆𑀡𑀯𑀡𑁆𑀡𑀸 𑀭𑀲𑁆𑀫𑀺𑀬𑁄’’𑀢𑀺 𑀇𑀤𑀁 𑀢𑀸𑀲𑀁 𑀬𑁂𑀪𑀼𑀬𑁆𑀬𑀢𑀸𑀬 𑀯𑀼𑀢𑁆𑀢𑀁. 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣𑀸𑀧𑀺 ¶ ‘‘𑀲𑀢𑁆𑀣𑀸 𑀢𑀺𑀝𑁆𑀞𑀢𑀺, 𑀦𑀺𑀫𑁆𑀫𑀺𑀢𑁄 𑀘𑀗𑁆𑀓𑀫𑀢𑀺 𑀯𑀸 𑀦𑀺𑀲𑀻𑀤𑀢𑀺 𑀯𑀸 𑀲𑁂𑀬𑁆𑀬𑀁 𑀯𑀸 𑀓𑀧𑁆𑀧𑁂𑀢𑀻’’𑀢𑀺𑀆𑀤𑀺𑀦𑀸 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀏𑀓𑁂𑀓𑀫𑀽𑀮𑀓𑀸 𑀲𑀢𑁆𑀣𑀼𑀯𑀲𑁂𑀦 𑀘𑀢𑁆𑀢𑀸𑀭𑁄, 𑀦𑀺𑀫𑁆𑀫𑀺𑀢𑀯𑀲𑁂𑀦 𑀘𑀢𑁆𑀢𑀸𑀭𑁄𑀢𑀺 𑀲𑀩𑁆𑀩𑁂𑀯 𑀅𑀝𑁆𑀞 𑀯𑀸𑀭𑁂 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀫𑀥𑀼𑀧𑀸𑀬𑀸𑀲𑀦𑁆𑀢𑀺 𑀫𑀥𑀼𑀲𑀺𑀢𑁆𑀢𑀁 𑀧𑀸𑀬𑀸𑀲𑀁. 𑀅𑀢𑁆𑀢𑀸 𑀫𑀺𑀢𑁆𑀢𑁄 𑀫𑀚𑁆𑀛𑀢𑁆𑀢𑁄 𑀯𑁂𑀭𑀻𑀢𑀺 𑀘𑀢𑀽𑀲𑀼 𑀲𑀻𑀫𑀲𑀫𑁆𑀪𑁂𑀤𑀯𑀲𑁂𑀦 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀫𑁂𑀢𑁆𑀢𑀸𑀓𑀫𑁆𑀫𑀝𑁆𑀞𑀸𑀦𑀁. ‘‘𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢’’𑀦𑁆𑀢𑀺 𑀇𑀤𑀁 𑀧𑀦 ‘‘𑀯𑀻𑀭𑀺𑀬𑀸𑀥𑀺𑀝𑁆𑀞𑀸𑀦’’𑀦𑁆𑀢𑀺 𑀏𑀢𑁂𑀦𑀸𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 ‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘𑀸’’𑀢𑀺𑀆𑀤𑀺𑀧𑀸𑀴𑀺 (𑀫. 𑀦𑀺. 𑁨.𑁧𑁮𑁪; 𑀲𑀁. 𑀦𑀺. 𑁨.𑁨𑁨; 𑀅. 𑀦𑀺. 𑁨.𑁫; 𑀅. 𑀦𑀺. 𑁮.𑁧𑁩; 𑀫𑀳𑀸𑀦𑀺. 𑁧𑁯𑁬) 𑀯𑀲𑁂𑀦 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. ‘‘𑀓𑀺𑀘𑁆𑀙𑀁 𑀯𑀢𑀸𑀬𑀁 𑀮𑁄𑀓𑁄 𑀆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁫𑁭; 𑀲𑀁. 𑀦𑀺. 𑁨.𑁪) 𑀚𑀭𑀸𑀫𑀭𑀡𑀫𑀼𑀔𑁂𑀦 𑀧𑀘𑁆𑀘𑀬𑀸𑀓𑀸𑀭𑁂 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸. 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 ‘‘𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡’’𑀦𑁆𑀢𑀺 𑀧𑀤𑀁 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑀁 𑀓𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀢𑀫𑁆𑀧𑀺 𑀳𑀺 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑀫𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀙𑀢𑁆𑀢𑀺𑀁𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀼𑀔𑁂𑀦 𑀫𑀳𑀸𑀯𑀚𑀺𑀭𑀜𑀸𑀡𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸. 𑀤𑁆𑀯𑀢𑁆𑀢𑀺𑀁𑀲𑀤𑁄𑀡𑀕𑀡𑁆𑀳𑀦𑀧𑁆𑀧𑀫𑀸𑀡𑀁 ¶ 𑀓𑀼𑀡𑁆𑀟𑀁 𑀓𑁄𑀮𑀫𑁆𑀩𑁄. 𑀤𑀭𑀺𑀪𑀸𑀕𑁄 𑀓𑀦𑁆𑀤𑀭𑁄. 𑀘𑀓𑁆𑀓𑀯𑀸𑀴𑀧𑀸𑀤𑁂𑀲𑀼 𑀫𑀳𑀸𑀲𑀫𑀼𑀤𑁆𑀤𑁄 𑀘𑀓𑁆𑀓𑀯𑀸𑀴𑀫𑀳𑀸𑀲𑀫𑀼𑀤𑁆𑀤𑁄.

‘‘𑀤𑀼𑀯𑁂 𑀧𑀼𑀣𑀼𑀚𑁆𑀚𑀦𑀸’’𑀢𑀺𑀆𑀤𑀺 𑀧𑀼𑀣𑀼𑀚𑁆𑀚𑀦𑁂 𑀮𑀩𑁆𑀪𑀫𑀸𑀦𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀫𑀽𑀮𑀧𑀭𑀺𑀬𑀸𑀬𑀯𑀡𑁆𑀡𑀦𑀸𑀤𑀻𑀲𑀼 𑀯𑀺𑀬 𑀧𑀼𑀣𑀼𑀚𑁆𑀚𑀦𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀢𑁆𑀣𑀁. 𑀲𑀩𑁆𑀩𑁄𑀧𑀺 𑀳𑀺 𑀧𑀼𑀣𑀼𑀚𑁆𑀚𑀦𑁄 𑀪𑀕𑀯𑀢𑁄 𑀉𑀧𑀭𑀺 𑀕𑀼𑀡𑁂 𑀯𑀺𑀪𑀸𑀯𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀺𑀝𑁆𑀞𑀢𑀼 𑀧𑀼𑀣𑀼𑀚𑁆𑀚𑀦𑁄, 𑀲𑀸𑀯𑀓𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀫𑁆𑀧𑀺 𑀅𑀯𑀺𑀲𑀬𑀸 𑀩𑀼𑀤𑁆𑀥𑀕𑀼𑀡𑀸. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀲𑁄𑀢𑀸𑀧𑀦𑁆𑀦𑀸’’𑀢𑀺𑀆𑀤𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁮). 𑀯𑀸𑀘𑀼𑀕𑁆𑀕𑀢𑀓𑀭𑀡𑀁 𑀉𑀕𑁆𑀕𑀳𑁄. 𑀅𑀢𑁆𑀣𑀧𑀭𑀺𑀧𑀼𑀘𑁆𑀙𑀦𑀁 𑀧𑀭𑀺𑀧𑀼𑀘𑁆𑀙𑀸. 𑀅𑀝𑁆𑀞𑀓𑀣𑀸𑀯𑀲𑁂𑀦 𑀅𑀢𑁆𑀣𑀲𑁆𑀲 𑀲𑀯𑀦𑀁 𑀲𑀯𑀦𑀁. 𑀩𑁆𑀬𑀜𑁆𑀚𑀦𑀢𑁆𑀣𑀸𑀦𑀁 ¶ 𑀲𑀼𑀦𑀺𑀓𑁆𑀔𑁂𑀧𑀲𑀼𑀤𑀲𑁆𑀲𑀦𑁂𑀦 𑀥𑀫𑁆𑀫𑀲𑁆𑀲 𑀧𑀭𑀺𑀳𑀭𑀡𑀁 𑀥𑀸𑀭𑀡𑀁. 𑀏𑀯𑀁 𑀲𑀼𑀢𑀥𑀸𑀢𑀧𑀭𑀺𑀘𑀺𑀢𑀸𑀦𑀁 𑀫𑀦𑀲𑀸𑀦𑀼𑀧𑁂𑀓𑁆𑀔𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀁. 𑀩𑀳𑀽𑀦𑀁 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀓𑀺𑀮𑁂𑀲𑀸𑀦𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀘 𑀅𑀯𑀺𑀳𑀢𑀢𑁆𑀢𑀸 𑀢𑀸 𑀚𑀦𑁂𑀦𑁆𑀢𑀺, 𑀢𑀸𑀳𑀺 𑀯𑀸 𑀚𑀦𑀺𑀢𑀸𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀅𑀯𑀺𑀖𑀸𑀢𑀫𑁂𑀯 𑀯𑀸 𑀚𑀦-𑀲𑀤𑁆𑀤𑁄 𑀯𑀤𑀢𑀺. 𑀧𑀼𑀣𑀼 𑀲𑀢𑁆𑀣𑀸𑀭𑀸𑀦𑀁 𑀫𑀼𑀔𑀼𑀮𑁆𑀮𑁄𑀓𑀺𑀓𑀸𑀢𑀺 𑀏𑀢𑁆𑀣 𑀧𑀼𑀣𑀽 𑀚𑀦𑀸 𑀲𑀢𑁆𑀣𑀼𑀧𑀝𑀺𑀜𑁆𑀜𑀸 𑀏𑀢𑁂𑀲𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸𑀢𑀺 𑀯𑀘𑀦𑀢𑁆𑀣𑁄. 𑀧𑀼𑀣𑀼…𑀧𑁂… 𑀅𑀯𑀼𑀝𑁆𑀞𑀺𑀢𑀸𑀢𑀺 𑀏𑀢𑁆𑀣 𑀚𑀦𑁂𑀢𑀩𑁆𑀩𑀸, 𑀚𑀸𑀬𑀦𑁆𑀢𑀺 𑀯𑀸 𑀏𑀢𑁆𑀣𑀸𑀢𑀺 𑀚𑀦𑀸, 𑀕𑀢𑀺𑀬𑁄. 𑀧𑀼𑀣𑀽 𑀚𑀦𑀸 𑀏𑀢𑁂𑀲𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀇𑀢𑁄 𑀧𑀭𑁂 𑀚𑀸𑀬𑀦𑁆𑀢𑀺 𑀏𑀢𑁂𑀳𑀻𑀢𑀺 𑀚𑀦𑀸, 𑀅𑀪𑀺𑀲𑀗𑁆𑀔𑀸𑀭𑀸𑀤𑀬𑁄. 𑀢𑁂 𑀏𑀢𑁂𑀲𑀁 𑀧𑀼𑀣𑀽 𑀯𑀺𑀚𑁆𑀚𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀅𑀪𑀺𑀲𑀗𑁆𑀔𑀭𑀡𑀸𑀤𑀺 𑀅𑀢𑁆𑀣𑁄 𑀏𑀯 𑀯𑀸 𑀚𑀦-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀓𑀸𑀫𑀭𑀸𑀕𑀪𑀯𑀭𑀸𑀕𑀤𑀺𑀝𑁆𑀞𑀺𑀅𑀯𑀺𑀚𑁆𑀚𑀸 𑀑𑀖𑀸. 𑀭𑀸𑀕𑀕𑁆𑀕𑀺𑀆𑀤𑀬𑁄 ¶ 𑀲𑀦𑁆𑀢𑀸𑀧𑀸. 𑀢𑁂𑀬𑁂𑀯, 𑀲𑀩𑁆𑀩𑁂𑀧𑀺 𑀯𑀸 𑀓𑀺𑀮𑁂𑀲𑀸 𑀧𑀭𑀺𑀴𑀸𑀳𑀸. 𑀧𑀼𑀣𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀭𑀢𑁆𑀢𑀸𑀢𑀺 𑀏𑀢𑁆𑀣 ¶ 𑀚𑀸𑀬𑀢𑀻𑀢𑀺 𑀚𑀦𑁄, 𑀭𑀸𑀕𑁄 𑀕𑁂𑀥𑁄𑀢𑀺 𑀏𑀯𑀁 𑀆𑀤𑀺𑀓𑁄. 𑀧𑀼𑀣𑀼 𑀚𑀦𑁄 𑀏𑀢𑁂𑀲𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸, 𑀧𑀼𑀣𑀽𑀲𑀼 𑀯𑀸 𑀚𑀦𑀸 𑀚𑀸𑀢𑀸 𑀭𑀢𑁆𑀢𑀸𑀢𑀺 𑀏𑀯𑀁 𑀭𑀸𑀕𑀸𑀤𑀺𑀅𑀢𑁆𑀣𑁄 𑀏𑀯 𑀯𑀸 𑀚𑀦-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀧𑀮𑀺𑀩𑀼𑀤𑁆𑀥𑀸𑀢𑀺 𑀲𑀫𑁆𑀩𑀼𑀤𑁆𑀥𑀸, 𑀉𑀧𑀤𑁆𑀤𑀼𑀢𑀸 𑀯𑀸. ‘‘𑀧𑀼𑀣𑀽𑀦𑀁 𑀕𑀡𑀦𑀧𑀣𑀫𑀢𑀻𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀣𑀽 𑀚𑀦𑀸 𑀧𑀼𑀣𑀼𑀚𑁆𑀚𑀦𑀸𑀢𑀺 𑀤𑀲𑁆𑀲𑁂𑀢𑀺.

𑀬𑁂𑀳𑀺 𑀕𑀼𑀡𑀯𑀺𑀲𑁂𑀲𑁂𑀳𑀺 𑀦𑀺𑀫𑀺𑀢𑁆𑀢𑀪𑀽𑀢𑁂𑀳𑀺 𑀪𑀕𑀯𑀢𑀺 𑀢𑀣𑀸𑀕𑀢-𑀲𑀤𑁆𑀤𑁄 𑀧𑀯𑀢𑁆𑀢𑁄, 𑀢𑀁𑀤𑀲𑁆𑀲𑀦𑀢𑁆𑀣𑀁 ‘‘𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀢𑀣𑀸𑀕𑀢𑁄’’𑀢𑀺𑀆𑀤𑀺𑀫𑀸𑀳. 𑀕𑀼𑀡𑀦𑁂𑀫𑀺𑀢𑁆𑀢𑀓𑀸𑀦𑁂𑀯 𑀳𑀺 𑀪𑀕𑀯𑀢𑁄 𑀲𑀩𑁆𑀩𑀸𑀦𑀺 𑀦𑀸𑀫𑀸𑀦𑀺. 𑀬𑀣𑀸𑀳 𑁋

‘‘𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀦𑀸𑀫𑀸𑀦𑀺, 𑀲𑀕𑀼𑀡𑁂𑀦 𑀫𑀳𑁂𑀲𑀺𑀦𑁄;

𑀕𑀼𑀡𑁂𑀦 𑀦𑀸𑀫𑀫𑀼𑀤𑁆𑀥𑁂𑀬𑁆𑀬𑀁, 𑀅𑀧𑀺 𑀦𑀸𑀫𑀲𑀳𑀲𑁆𑀲𑀢𑁄’’𑀢𑀺. (𑀥. 𑀲. 𑀅𑀝𑁆𑀞. 𑁧𑁩𑁧𑁩; 𑀉𑀤𑀸. 𑀅𑀝𑁆𑀞. 𑁫𑁩; 𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁭𑁬);

𑀢𑀣𑀸 𑀆𑀕𑀢𑁄𑀢𑀺 𑀏𑀢𑁆𑀣 𑀆𑀓𑀸𑀭𑀦𑀺𑀬𑀫𑀦𑀯𑀲𑁂𑀦 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀢𑁆𑀣𑁄 𑀢𑀣𑀸-𑀲𑀤𑁆𑀤𑁄. 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 𑀯𑀺𑀲𑁂𑀲𑀸𑀯𑀝𑁆𑀞𑀸𑀦𑀢𑁄 𑀧𑀝𑀺𑀧𑀤𑀸𑀕𑀫𑀦𑀢𑁆𑀣𑁄 𑀆𑀕𑀢-𑀲𑀤𑁆𑀤𑁄, 𑀦 𑀜𑀸𑀡𑀕𑀫𑀦𑀢𑁆𑀣𑁄 ‘‘𑀢𑀣𑀮𑀓𑁆𑀔𑀡𑀁 𑀆𑀕𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁧.𑁭; 𑀫. 𑀦𑀺. 𑀅𑀝𑁆𑀞. 𑁧.𑁧𑁨; 𑀲𑀁. 𑀦𑀺. 𑀅𑀝𑁆𑀞. 𑁨.𑁪.𑁭𑁮; 𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁭𑁦; 𑀉𑀤𑀸. 𑀅𑀝𑁆𑀞. 𑁧𑁮; 𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁩𑁭; 𑀣𑁂𑀭𑀕𑀸. 𑀅𑀝𑁆𑀞. 𑁧.𑁩; 𑀇𑀢𑀺𑀯𑀼. 𑀅𑀝𑁆𑀞. 𑁩𑁮; 𑀫𑀳𑀸𑀦𑀺. 𑀅𑀝𑁆𑀞. 𑁧𑁪) 𑀯𑀺𑀬, 𑀦𑀸𑀧𑀺 𑀓𑀸𑀬𑀕𑀫𑀦𑀸𑀤𑀺𑀅𑀢𑁆𑀣𑁄 ‘‘𑀆𑀕𑀢𑁄 𑀔𑁄 𑀫𑀳𑀸𑀲𑀫𑀡𑁄, 𑀫𑀸𑀕𑀥𑀸𑀦𑀁 𑀕𑀺𑀭𑀺𑀩𑁆𑀩𑀚’’𑀦𑁆𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁬𑁨) 𑀯𑀺𑀬. 𑀢𑀢𑁆𑀣 𑀬𑀤𑀸𑀓𑀸𑀭𑀦𑀺𑀬𑀫𑀦𑀯𑀲𑁂𑀦 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀢𑁆𑀣𑁄 𑀢𑀣𑀸-𑀲𑀤𑁆𑀤𑁄, 𑀢𑀁 𑀓𑀭𑀼𑀡𑀸𑀧𑀥𑀸𑀦𑀢𑁆𑀢𑀸 𑀫𑀳𑀸𑀓𑀭𑀼𑀡𑀸𑀫𑀼𑀔𑁂𑀦 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀁 𑀆𑀕𑀫𑀦𑀧𑀝𑀺𑀧𑀤𑀁 𑀉𑀤𑀸𑀳𑀭𑀡𑀯𑀲𑁂𑀦 𑀲𑀸𑀫𑀜𑁆𑀜𑀢𑁄 𑀤𑀲𑁆𑀲𑁂𑀦𑁆𑀢𑁄 𑀬𑀁𑀢𑀁𑀲𑀤𑁆𑀤𑀸𑀦𑀁 𑀏𑀓𑀦𑁆𑀢𑀲𑀫𑁆𑀩𑀦𑁆𑀥𑀪𑀸𑀯𑀢𑁄 ‘‘𑀬𑀣𑀸 𑀲𑀩𑁆𑀩𑀮𑁄𑀓…𑀧𑁂… 𑀆𑀕𑀢𑀸’’𑀢𑀺 𑀆𑀳. 𑀢𑀁 𑀧𑀦 ¶ 𑀧𑀝𑀺𑀧𑀤𑀁 𑀫𑀳𑀸𑀧𑀤𑀸𑀦𑀲𑀼𑀢𑁆𑀢𑀸𑀤𑀻𑀲𑀼 (𑀤𑀻. 𑀦𑀺. 𑁨.𑁪) 𑀲𑀫𑁆𑀩𑀳𑀼𑀮𑀦𑀺𑀤𑁆𑀤𑁂𑀲𑁂𑀦 𑀲𑀼𑀧𑀸𑀓𑀝𑀸𑀦𑀁 𑀆𑀲𑀦𑁆𑀦𑀸𑀦𑀜𑁆𑀘 𑀯𑀺𑀧𑀲𑁆𑀲𑀻𑀆𑀤𑀻𑀦𑀁 𑀙𑀦𑁆𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀯𑀲𑁂𑀦 𑀦𑀺𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀯𑀺𑀧𑀲𑁆𑀲𑀻 𑀪𑀕𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑁂𑀦 ¶ 𑀅𑀪𑀺𑀦𑀻𑀳𑀸𑀭𑁂𑀦𑀸𑀢𑀺 𑀫𑀦𑀼𑀲𑁆𑀲𑀢𑁆𑀢𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀲𑀢𑁆𑀣𑀸𑀭𑀤𑀲𑁆𑀲𑀦𑀧𑀩𑁆𑀩𑀚𑁆𑀚𑀸𑀅𑀪𑀺𑀜𑁆𑀜𑀸𑀤𑀺𑀕𑀼𑀡𑀲𑀫𑁆𑀧𑀢𑁆𑀢𑀺𑀅𑀥𑀺𑀓𑀸𑀭𑀙𑀦𑁆𑀤𑀸𑀦𑀁 𑀯𑀲𑁂𑀦 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀓𑀸𑀬𑀧𑁆𑀧𑀡𑀺𑀥𑀸𑀦𑀫𑀳𑀸𑀧𑀡𑀺𑀥𑀸𑀦𑁂𑀦 ¶ . 𑀲𑀩𑁆𑀩𑁂𑀲𑀜𑁆𑀳𑀺 𑀩𑀼𑀤𑁆𑀥𑀸𑀦𑀁 𑀓𑀸𑀬𑀧𑁆𑀧𑀡𑀺𑀥𑀸𑀦𑀁 𑀇𑀫𑀺𑀦𑀸𑀯 𑀅𑀪𑀺𑀦𑀻𑀳𑀸𑀭𑁂𑀦 𑀲𑀫𑀺𑀚𑁆𑀛𑀢𑀻𑀢𑀺. 𑀏𑀯𑀁 𑀫𑀳𑀸𑀪𑀺𑀦𑀻𑀳𑀸𑀭𑀯𑀲𑁂𑀦 ‘‘𑀢𑀣𑀸𑀕𑀢𑁄’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀸𑀭𑀫𑀻𑀧𑀽𑀭𑀡𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀯𑀺𑀧𑀲𑁆𑀲𑀻 𑀪𑀕𑀯𑀸…𑀧𑁂… 𑀓𑀲𑁆𑀲𑀧𑁄 𑀪𑀕𑀯𑀸 𑀤𑀸𑀦𑀧𑀸𑀭𑀫𑀺𑀁 𑀧𑀽𑀭𑁂𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳.

𑀏𑀢𑁆𑀣 𑀘 𑀲𑀼𑀢𑁆𑀢𑀦𑁆𑀢𑀺𑀓𑀸𑀦𑀁 𑀫𑀳𑀸𑀩𑁄𑀥𑀺𑀬𑀸𑀦𑀧𑀝𑀺𑀧𑀤𑀸𑀬 𑀓𑁄𑀲𑀮𑁆𑀮𑀚𑀦𑀦𑀢𑁆𑀣𑀁 𑀧𑀸𑀭𑀫𑀻𑀲𑀼 𑀅𑀬𑀁 𑀯𑀺𑀢𑁆𑀣𑀸𑀭𑀓𑀣𑀸 𑁋 𑀓𑀸 𑀧𑀦𑁂𑀢𑀸 𑀧𑀸𑀭𑀫𑀺𑀬𑁄? 𑀓𑁂𑀦𑀝𑁆𑀞𑁂𑀦 𑀧𑀸𑀭𑀫𑀺𑀬𑁄? 𑀓𑀢𑀺𑀯𑀺𑀥𑀸 𑀘𑁂𑀢𑀸? 𑀓𑁄 𑀢𑀸𑀲𑀁 𑀓𑀫𑁄? 𑀓𑀸𑀦𑀺 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀦𑀺? 𑀓𑁄 𑀧𑀘𑁆𑀘𑀬𑁄? 𑀓𑁄 𑀲𑀁𑀓𑀺𑀮𑁂𑀲𑁄? 𑀓𑀺𑀁 𑀯𑁄𑀤𑀸𑀦𑀁? 𑀓𑁄 𑀧𑀝𑀺𑀧𑀓𑁆𑀔𑁄? 𑀓𑀸 𑀧𑀝𑀺𑀧𑀢𑁆𑀢𑀺? 𑀓𑁄 𑀯𑀺𑀪𑀸𑀕𑁄? 𑀓𑁄 𑀲𑀗𑁆𑀕𑀳𑁄? 𑀓𑁄 𑀲𑀫𑁆𑀧𑀸𑀤𑀦𑀽𑀧𑀸𑀬𑁄? 𑀓𑀺𑀢𑁆𑀢𑀓𑁂𑀦 𑀓𑀸𑀮𑁂𑀦 𑀲𑀫𑁆𑀧𑀸𑀤𑀦𑀁? 𑀓𑁄 𑀆𑀦𑀺𑀲𑀁𑀲𑁄? 𑀓𑀺𑀁 𑀘𑁂𑀢𑀸𑀲𑀁 𑀨𑀮𑀦𑁆𑀢𑀺?

𑀢𑀢𑁆𑀭𑀺𑀤𑀁 𑀯𑀺𑀲𑁆𑀲𑀚𑁆𑀚𑀦𑀁 𑁋 𑀓𑀸 𑀧𑀦𑁂𑀢𑀸 𑀧𑀸𑀭𑀫𑀺𑀬𑁄𑀢𑀺. 𑀢𑀡𑁆𑀳𑀸𑀫𑀸𑀦𑀸𑀤𑀻𑀳𑀺 𑀅𑀦𑀼𑀧𑀳𑀢𑀸 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀸 𑀤𑀸𑀦𑀸𑀤𑀬𑁄 𑀕𑀼𑀡𑀸 𑀧𑀸𑀭𑀫𑀺𑀬𑁄.

𑀓𑁂𑀦𑀝𑁆𑀞𑁂𑀦 𑀧𑀸𑀭𑀫𑀺𑀬𑁄𑀢𑀺 𑀤𑀸𑀦𑀲𑀻𑀮𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑁄𑀕𑁂𑀦 ¶ 𑀲𑀢𑁆𑀢𑀼𑀢𑁆𑀢𑀫𑀢𑀸𑀬 𑀧𑀭𑀫𑀸 𑀫𑀳𑀸𑀲𑀢𑁆𑀢𑀸 𑀩𑁄𑀥𑀺𑀲𑀢𑁆𑀢𑀸, 𑀢𑁂𑀲𑀁 𑀪𑀸𑀯𑁄, 𑀓𑀫𑁆𑀫𑀁 𑀯𑀸 𑀧𑀸𑀭𑀫𑀻, 𑀤𑀸𑀦𑀸𑀤𑀺𑀓𑀺𑀭𑀺𑀬𑀸. 𑀅𑀣 𑀯𑀸 𑀧𑀭𑀢𑀻𑀢𑀺 𑀧𑀭𑀫𑁄, 𑀤𑀸𑀦𑀸𑀤𑀺𑀕𑀼𑀡𑀸𑀦𑀁 𑀧𑀽𑀭𑀓𑁄 𑀧𑀸𑀮𑀓𑁄 𑀘 𑀩𑁄𑀥𑀺𑀲𑀢𑁆𑀢𑁄. 𑀧𑀭𑀫𑀲𑁆𑀲 𑀅𑀬𑀁, 𑀧𑀭𑀫𑀲𑁆𑀲 𑀯𑀸 𑀪𑀸𑀯𑁄, 𑀓𑀫𑁆𑀫𑀁 𑀯𑀸 𑀧𑀸𑀭𑀫𑀻, 𑀤𑀸𑀦𑀸𑀤𑀺𑀓𑀺𑀭𑀺𑀬𑀸𑀯. 𑀅𑀣 𑀯𑀸 𑀧𑀭𑀁 𑀲𑀢𑁆𑀢𑀁 𑀅𑀢𑁆𑀢𑀦𑀺 𑀫𑀯𑀢𑀺 𑀩𑀦𑁆𑀥𑀢𑀺 𑀕𑀼𑀡𑀯𑀺𑀲𑁂𑀲𑀬𑁄𑀕𑁂𑀦, 𑀧𑀭𑀁 𑀯𑀸 𑀅𑀥𑀺𑀓𑀢𑀭𑀁 𑀫𑀚𑁆𑀚𑀢𑀺 𑀲𑀼𑀚𑁆𑀛𑀢𑀺 𑀲𑀁𑀓𑀺𑀮𑁂𑀲𑀫𑀮𑀢𑁄, 𑀧𑀭𑀁 𑀯𑀸 𑀲𑁂𑀝𑁆𑀞𑀁 𑀦𑀺𑀩𑁆𑀩𑀸𑀦𑀁 𑀯𑀺𑀲𑁂𑀲𑁂𑀦 𑀫𑀬𑀢𑀺 𑀕𑀘𑁆𑀙𑀢𑀺, 𑀧𑀭𑀁 𑀯𑀸 𑀮𑁄𑀓𑀁 𑀧𑀫𑀸𑀡𑀪𑀽𑀢𑁂𑀦 𑀜𑀸𑀡𑀯𑀺𑀲𑁂𑀲𑁂𑀦 𑀇𑀥𑀮𑁄𑀓𑀁 𑀯𑀺𑀬 𑀫𑀼𑀦𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀢𑀺, 𑀧𑀭𑀁 𑀯𑀸 𑀅𑀢𑀺𑀯𑀺𑀬 𑀲𑀻𑀮𑀸𑀤𑀺𑀕𑀼𑀡𑀕𑀡𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀫𑀺𑀦𑁄𑀢𑀺 𑀧𑀓𑁆𑀔𑀺𑀧𑀢𑀺, 𑀧𑀭𑀁 𑀯𑀸 𑀅𑀢𑁆𑀢𑀪𑀽𑀢𑀢𑁄 𑀥𑀫𑁆𑀫𑀓𑀸𑀬𑀢𑁄 𑀅𑀜𑁆𑀜𑀁, 𑀧𑀝𑀺𑀧𑀓𑁆𑀔𑀁 𑀯𑀸 𑀢𑀤𑀦𑀢𑁆𑀣𑀓𑀭𑀁 𑀓𑀺𑀮𑁂𑀲𑀘𑁄𑀭𑀕𑀡𑀁 𑀫𑀺𑀦𑀸𑀢𑀺 𑀳𑀺𑀁𑀲𑀢𑀻𑀢𑀺 𑀧𑀭𑀫𑁄, 𑀫𑀳𑀸𑀲𑀢𑁆𑀢𑁄. ‘‘𑀧𑀭𑀫𑀲𑁆𑀲 𑀅𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀧𑀸𑀭𑁂 𑀯𑀸 𑀦𑀺𑀩𑁆𑀩𑀸𑀦𑁂 𑀫𑀚𑁆𑀚𑀢𑀺 𑀲𑀼𑀚𑁆𑀛𑀢𑀺 𑀲𑀢𑁆𑀢𑁂 𑀘 𑀲𑁄𑀥𑁂𑀢𑀺, 𑀢𑀢𑁆𑀣 𑀯𑀸 𑀲𑀢𑁆𑀢𑁂 𑀫𑀯𑀢𑀺 𑀩𑀦𑁆𑀥𑀢𑀺 𑀬𑁄𑀚𑁂𑀢𑀺, 𑀢𑀁 𑀯𑀸 𑀫𑀬𑀢𑀺 𑀕𑀘𑁆𑀙𑀢𑀺 𑀕𑀫𑁂𑀢𑀺 𑀘, 𑀫𑀼𑀦𑀸𑀢𑀺 𑀯𑀸 𑀢𑀁 ¶ 𑀬𑀸𑀣𑀸𑀯𑀢𑁄, 𑀢𑀢𑁆𑀣 𑀯𑀸 𑀲𑀢𑁆𑀢𑁂 𑀫𑀺𑀦𑁄𑀢𑀺 𑀧𑀓𑁆𑀔𑀺𑀧𑀢𑀺, 𑀓𑀺𑀮𑁂𑀲𑀸𑀭𑀺𑀁 𑀯𑀸 𑀲𑀢𑁆𑀢𑀸𑀦𑀁 ¶ 𑀢𑀢𑁆𑀣 𑀫𑀺𑀦𑀸𑀢𑀺 𑀳𑀺𑀁𑀲𑀢𑀻𑀢𑀺 𑀧𑀸𑀭𑀫𑀻, 𑀫𑀳𑀸𑀧𑀼𑀭𑀺𑀲𑁄. 𑀢𑀲𑁆𑀲 𑀪𑀸𑀯𑁄, 𑀓𑀫𑁆𑀫𑀁 𑀯𑀸 𑀧𑀸𑀭𑀫𑀺𑀢𑀸, 𑀤𑀸𑀦𑀸𑀤𑀺𑀓𑀺𑀭𑀺𑀬𑀸𑀯. 𑀇𑀫𑀺𑀦𑀸 𑀦𑀬𑁂𑀦 𑀧𑀸𑀭𑀫𑀻𑀦𑀁 𑀲𑀤𑁆𑀤𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀢𑀺𑀯𑀺𑀥𑀸𑀢𑀺 𑀲𑀗𑁆𑀔𑁂𑀧𑀢𑁄 𑀤𑀲𑀯𑀺𑀥𑀸, 𑀢𑀸 𑀧𑀦 𑀧𑀸𑀴𑀺𑀬𑀁 𑀲𑀭𑀽𑀧𑀢𑁄 𑀆𑀕𑀢𑀸𑀬𑁂𑀯. 𑀬𑀣𑀸𑀳 𑁋

‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀧𑀞𑀫𑀁 𑀤𑀸𑀦𑀧𑀸𑀭𑀫𑀺’’𑀦𑁆𑀢𑀺𑀆𑀤𑀺 (𑀩𑀼. 𑀯𑀁. 𑁧𑁧𑁬).

𑀬𑀣𑀸 𑀘𑀸𑀳 𑁋

‘‘𑀓𑀢𑀺 ¶ 𑀦𑀼 𑀔𑁄 𑀪𑀦𑁆𑀢𑁂 𑀩𑀼𑀤𑁆𑀥𑀓𑀸𑀭𑀓𑀸 𑀥𑀫𑁆𑀫𑀸? 𑀤𑀲 𑀔𑁄 𑀲𑀸𑀭𑀺𑀧𑀼𑀢𑁆𑀢 𑀩𑀼𑀤𑁆𑀥𑀓𑀸𑀭𑀓𑀸 𑀥𑀫𑁆𑀫𑀸. 𑀓𑀢𑀫𑁂 𑀤𑀲? 𑀤𑀸𑀦𑀁 𑀔𑁄 𑀲𑀸𑀭𑀺𑀧𑀼𑀢𑁆𑀢 𑀩𑀼𑀤𑁆𑀥𑀓𑀸𑀭𑀓𑁄 𑀥𑀫𑁆𑀫𑁄, 𑀲𑀻𑀮𑀁 𑀦𑁂𑀓𑁆𑀔𑀫𑁆𑀫𑀁 𑀧𑀜𑁆𑀜𑀸 𑀯𑀻𑀭𑀺𑀬𑀁 𑀔𑀦𑁆𑀢𑀺 𑀲𑀘𑁆𑀘𑀫𑀥𑀺𑀝𑁆𑀞𑀸𑀦𑀁 𑀫𑁂𑀢𑁆𑀢𑀸 𑀉𑀧𑁂𑀓𑁆𑀔𑀸 𑀩𑀼𑀤𑁆𑀥𑀓𑀸𑀭𑀓𑁄 𑀥𑀫𑁆𑀫𑁄, 𑀇𑀫𑁂 𑀔𑁄 𑀲𑀸𑀭𑀺𑀧𑀼𑀢𑁆𑀢 𑀤𑀲 𑀩𑀼𑀤𑁆𑀥𑀓𑀸𑀭𑀓𑀸 𑀥𑀫𑁆𑀫𑀸𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸, 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘𑀤𑀸𑀦𑀁 𑀲𑀻𑀮𑀜𑁆𑀘 𑀦𑁂𑀓𑁆𑀔𑀫𑁆𑀫𑀁, 𑀧𑀜𑁆𑀜𑀸 𑀯𑀻𑀭𑀺𑀬𑁂𑀦 𑀧𑀜𑁆𑀘𑀫𑀁;

𑀔𑀦𑁆𑀢𑀺 𑀲𑀘𑁆𑀘𑀁 𑀅𑀥𑀺𑀝𑁆𑀞𑀸𑀦𑀁, 𑀫𑁂𑀢𑁆𑀢𑀼𑀧𑁂𑀓𑁆𑀔𑀸𑀢𑀺 𑀢𑁂 𑀤𑀲𑀸’𑀢𑀺’’.

𑀓𑁂𑀘𑀺 𑀧𑀦 ‘‘𑀙𑀩𑁆𑀩𑀺𑀥𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀏𑀢𑀸𑀲𑀁 𑀲𑀗𑁆𑀕𑀳𑀯𑀲𑁂𑀦 𑀯𑀼𑀢𑁆𑀢𑀁. 𑀲𑁄 𑀧𑀦 𑀲𑀗𑁆𑀕𑀳𑁄 𑀧𑀭𑀢𑁄 𑀆𑀯𑀺𑀪𑀯𑀺𑀲𑁆𑀲𑀢𑀺.

𑀓𑁄 𑀢𑀸𑀲𑀁 𑀓𑀫𑁄𑀢𑀺 𑀏𑀢𑁆𑀣 𑀓𑀫𑁄 𑀦𑀸𑀫 𑀤𑁂𑀲𑀦𑀸𑀓𑁆𑀓𑀫𑁄, 𑀲𑁄 𑀘 𑀧𑀞𑀫𑀲𑀫𑀸𑀤𑀸𑀦𑀳𑁂𑀢𑀼𑀓𑁄, 𑀲𑀫𑀸𑀤𑀸𑀦𑀁 𑀧𑀯𑀺𑀘𑀬𑀳𑁂𑀢𑀼𑀓𑀁, 𑀇𑀢𑀺 𑀬𑀣𑀸 𑀆𑀤𑀺𑀫𑁆𑀳𑀺 𑀧𑀯𑀺𑀘𑀺𑀢𑀸 𑀲𑀫𑀸𑀤𑀺𑀦𑁆𑀦𑀸 𑀘, 𑀢𑀣𑀸 𑀤𑁂𑀲𑀺𑀢𑀸. 𑀢𑀢𑁆𑀣 𑀘 𑀤𑀸𑀦𑀁 𑀲𑀻𑀮𑀲𑁆𑀲 𑀩𑀳𑀽𑀧𑀓𑀸𑀭𑀁 𑀲𑀼𑀓𑀭𑀜𑁆𑀘𑀸𑀢𑀺 𑀢𑀁 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀁. 𑀤𑀸𑀦𑀁 𑀲𑀻𑀮𑀧𑀭𑀺𑀕𑁆𑀕𑀳𑀺𑀢𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀦𑁆𑀢𑀺 𑀤𑀸𑀦𑀸𑀦𑀦𑁆𑀢𑀭𑀁 𑀲𑀻𑀮𑀁 𑀯𑀼𑀢𑁆𑀢𑀁. 𑀲𑀻𑀮𑀁 𑀦𑁂𑀓𑁆𑀔𑀫𑁆𑀫𑀧𑀭𑀺𑀕𑁆𑀕𑀳𑀺𑀢𑀁, 𑀦𑁂𑀓𑁆𑀔𑀫𑁆𑀫𑀁 𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑀺𑀢𑀁, 𑀧𑀜𑁆𑀜𑀸 𑀯𑀻𑀭𑀺𑀬𑀧𑀭𑀺𑀕𑁆𑀕𑀳𑀺𑀢𑀸, 𑀯𑀻𑀭𑀺𑀬𑀁 𑀔𑀦𑁆𑀢𑀺𑀧𑀭𑀺𑀕𑁆𑀕𑀳𑀺𑀢𑀁, 𑀔𑀦𑁆𑀢𑀺 𑀲𑀘𑁆𑀘𑀧𑀭𑀺𑀕𑁆𑀕𑀳𑀺𑀢𑀸, 𑀲𑀘𑁆𑀘𑀁 𑀅𑀥𑀺𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑀺𑀢𑀁, 𑀅𑀥𑀺𑀝𑁆𑀞𑀸𑀦𑀁 𑀫𑁂𑀢𑁆𑀢𑀸𑀧𑀭𑀺𑀕𑁆𑀕𑀳𑀺𑀢𑀁, 𑀫𑁂𑀢𑁆𑀢𑀸 𑀉𑀧𑁂𑀓𑁆𑀔𑀸𑀧𑀭𑀺𑀕𑁆𑀕𑀳𑀺𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸𑀢𑀺 𑀫𑁂𑀢𑁆𑀢𑀸𑀦𑀦𑁆𑀢𑀭𑀁 𑀉𑀧𑁂𑀓𑁆𑀔𑀸 𑀯𑀼𑀢𑁆𑀢𑀸. 𑀉𑀧𑁂𑀓𑁆𑀔𑀸 𑀧𑀦 𑀓𑀭𑀼𑀡𑀸𑀧𑀭𑀺𑀕𑁆𑀕𑀳𑀺𑀢𑀸, 𑀓𑀭𑀼𑀡𑀸 𑀘 𑀉𑀧𑁂𑀓𑁆𑀔𑀸𑀧𑀭𑀺𑀕𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁 𑀧𑀦 𑀫𑀳𑀸𑀓𑀸𑀭𑀼𑀡𑀺𑀓𑀸 𑀩𑁄𑀥𑀺𑀲𑀢𑁆𑀢𑀸 𑀲𑀢𑁆𑀢𑁂𑀲𑀼 𑀉𑀧𑁂𑀓𑁆𑀔𑀓𑀸 𑀳𑁄𑀦𑁆𑀢𑀻𑀢𑀺? 𑀉𑀧𑁂𑀓𑁆𑀔𑀺𑀢𑀩𑁆𑀩𑀬𑀼𑀢𑁆𑀢𑁂𑀲𑀼 𑀓𑀜𑁆𑀘𑀺 𑀓𑀸𑀮𑀁 𑀉𑀧𑁂𑀓𑁆𑀔𑀓𑀸 ¶ 𑀳𑁄𑀦𑁆𑀢𑀺, 𑀦 ¶ 𑀧𑀦 𑀲𑀩𑁆𑀩𑀢𑁆𑀣, 𑀲𑀩𑁆𑀩𑀤𑀸 𑀘𑀸𑀢𑀺 𑀓𑁂𑀘𑀺. 𑀅𑀧𑀭𑁂 𑀧𑀦 𑀦 𑀲𑀢𑁆𑀢𑁂𑀲𑀼 𑀉𑀧𑁂𑀓𑁆𑀔𑀓𑀸, 𑀲𑀢𑁆𑀢𑀓𑀢𑁂𑀲𑀼 𑀧𑀦 𑀯𑀺𑀧𑁆𑀧𑀓𑀸𑀭𑁂𑀲𑀼 𑀉𑀧𑁂𑀓𑁆𑀔𑀓𑀸 𑀳𑁄𑀦𑁆𑀢𑀻𑀢𑀺.

𑀅𑀧𑀭𑁄 ¶ 𑀦𑀬𑁄 𑁋 𑀧𑀘𑀼𑀭𑀚𑀦𑁂𑀲𑀼𑀧𑀺 𑀧𑀯𑀢𑁆𑀢𑀺𑀬𑀸 𑀲𑀩𑁆𑀩𑀲𑀢𑁆𑀢𑀲𑀸𑀥𑀸𑀭𑀡𑀢𑁆𑀢𑀸, 𑀅𑀧𑁆𑀧𑀨𑀮𑀢𑁆𑀢𑀸, 𑀲𑀼𑀓𑀭𑀢𑁆𑀢𑀸 𑀘 𑀆𑀤𑀺𑀫𑁆𑀳𑀺 𑀤𑀸𑀦𑀁 𑀯𑀼𑀢𑁆𑀢𑀁. 𑀲𑀻𑀮𑁂𑀦𑀤𑀸𑀬𑀓𑀧𑀝𑀺𑀕𑁆𑀕𑀸𑀳𑀓𑀲𑀼𑀤𑁆𑀥𑀺𑀢𑁄, 𑀧𑀭𑀸𑀦𑀼𑀕𑁆𑀕𑀳𑀁 𑀯𑀢𑁆𑀯𑀸 𑀧𑀭𑀧𑀻𑀴𑀸𑀦𑀺𑀯𑀢𑁆𑀢𑀺𑀯𑀘𑀦𑀢𑁄, 𑀓𑀺𑀭𑀺𑀬𑀥𑀫𑁆𑀫𑀁 𑀯𑀢𑁆𑀯𑀸 𑀅𑀓𑀺𑀭𑀺𑀬𑀥𑀫𑁆𑀫𑀯𑀘𑀦𑀢𑁄, 𑀪𑁄𑀕𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀁 𑀯𑀢𑁆𑀯𑀸 𑀪𑀯𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀯𑀘𑀦𑀢𑁄 𑀘 𑀤𑀸𑀦𑀲𑁆𑀲 𑀅𑀦𑀦𑁆𑀢𑀭𑀁 𑀲𑀻𑀮𑀁 𑀯𑀼𑀢𑁆𑀢𑀁. 𑀦𑁂𑀓𑁆𑀔𑀫𑁆𑀫𑁂𑀦 𑀲𑀻𑀮𑀲𑀫𑁆𑀧𑀢𑁆𑀢𑀺𑀲𑀺𑀤𑁆𑀥𑀺𑀢𑁄, 𑀓𑀸𑀬𑀯𑀘𑀻𑀲𑀼𑀘𑀭𑀺𑀢𑀁 𑀯𑀢𑁆𑀯𑀸 𑀫𑀦𑁄𑀲𑀼𑀘𑀭𑀺𑀢𑀯𑀘𑀦𑀢𑁄, 𑀯𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀲𑀼𑀔𑁂𑀦𑁂𑀯 𑀛𑀸𑀦𑀲𑀫𑀺𑀚𑁆𑀛𑀦𑀢𑁄, 𑀓𑀫𑁆𑀫𑀸𑀧𑀭𑀸𑀥𑀧𑁆𑀧𑀳𑀸𑀦𑁂𑀦 𑀧𑀬𑁄𑀕𑀲𑀼𑀤𑁆𑀥𑀺𑀁 𑀯𑀢𑁆𑀯𑀸 𑀓𑀺𑀮𑁂𑀲𑀸𑀧𑀭𑀸𑀥𑀧𑁆𑀧𑀳𑀸𑀦𑁂𑀦 𑀆𑀲𑀬𑀲𑀼𑀤𑁆𑀥𑀺𑀯𑀘𑀦𑀢𑁄, 𑀯𑀻𑀢𑀺𑀓𑁆𑀓𑀫𑀧𑁆𑀧𑀳𑀸𑀦𑁂𑀦 𑀘𑀺𑀢𑁆𑀢𑀲𑁆𑀲 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀯𑀘𑀦𑀢𑁄 𑀘 𑀲𑀻𑀮𑀲𑁆𑀲 𑀅𑀦𑀦𑁆𑀢𑀭𑀁 𑀦𑁂𑀓𑁆𑀔𑀫𑁆𑀫𑀁 𑀯𑀼𑀢𑁆𑀢𑀁. 𑀧𑀜𑁆𑀜𑀸𑀬 𑀦𑁂𑀓𑁆𑀔𑀫𑁆𑀫𑀲𑁆𑀲 𑀲𑀺𑀤𑁆𑀥𑀺𑀧𑀭𑀺𑀲𑀼𑀤𑁆𑀥𑀺𑀢𑁄, 𑀛𑀸𑀦𑀸𑀪𑀸𑀯𑁂 𑀧𑀜𑁆𑀜𑀸𑀪𑀸𑀯𑀯𑀘𑀦𑀢𑁄. 𑀲𑀫𑀸𑀥𑀺𑀧𑀤𑀝𑁆𑀞𑀸𑀦𑀸 𑀳𑀺 𑀧𑀜𑁆𑀜𑀸, 𑀧𑀜𑁆𑀜𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀘 𑀲𑀫𑀸𑀥𑀺. 𑀲𑀫𑀣𑀦𑀺𑀫𑀺𑀢𑁆𑀢𑀁 𑀯𑀢𑁆𑀯𑀸 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀯𑀘𑀦𑀢𑁄, 𑀧𑀭𑀳𑀺𑀢𑀚𑁆𑀛𑀸𑀦𑁂𑀦 𑀧𑀭𑀳𑀺𑀢𑀓𑀭𑀡𑀽𑀧𑀸𑀬𑀓𑁄𑀲𑀮𑁆𑀮𑀯𑀘𑀦𑀢𑁄 𑀘 𑀦𑁂𑀓𑁆𑀔𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀁 𑀧𑀜𑁆𑀜𑀸 𑀯𑀼𑀢𑁆𑀢𑀸. 𑀯𑀻𑀭𑀺𑀬𑀸𑀭𑀫𑁆𑀪𑁂𑀦 𑀧𑀜𑁆𑀜𑀸𑀓𑀺𑀘𑁆𑀘𑀲𑀺𑀤𑁆𑀥𑀺𑀢𑁄, 𑀲𑀢𑁆𑀢𑀲𑀼𑀜𑁆𑀜𑀢𑀸𑀥𑀫𑁆𑀫𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀁 𑀯𑀢𑁆𑀯𑀸 𑀲𑀢𑁆𑀢𑀳𑀺𑀢𑀸𑀬 𑀆𑀭𑀫𑁆𑀪𑀲𑁆𑀲 𑀅𑀘𑁆𑀙𑀭𑀺𑀬𑀢𑀸𑀯𑀘𑀦𑀢𑁄, 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁 𑀯𑀢𑁆𑀯𑀸 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀯𑀘𑀦𑀢𑁄, 𑀦𑀺𑀲𑀫𑁆𑀫𑀓𑀸𑀭𑀺𑀢𑀁 𑀯𑀢𑁆𑀯𑀸 𑀉𑀝𑁆𑀞𑀸𑀦𑀯𑀘𑀦𑀢𑁄 𑀘. 𑀦𑀺𑀲𑀫𑁆𑀫𑀓𑀸𑀭𑀺𑀦𑁄 𑀳𑀺 𑀉𑀝𑁆𑀞𑀸𑀦𑀁 𑀨𑀮𑀯𑀺𑀲𑁂𑀲𑀫𑀸𑀯𑀳𑀢𑀻𑀢𑀺 𑀧𑀜𑁆𑀜𑀸𑀬 𑀅𑀦𑀦𑁆𑀢𑀭𑀁 𑀯𑀻𑀭𑀺𑀬𑀁 𑀯𑀼𑀢𑁆𑀢𑀁.

𑀯𑀻𑀭𑀺𑀬𑁂𑀦 𑀢𑀺𑀢𑀺𑀓𑁆𑀔𑀸𑀲𑀺𑀤𑁆𑀥𑀺𑀢𑁄. 𑀯𑀻𑀭𑀺𑀬𑀯𑀸 𑀳𑀺 𑀆𑀭𑀤𑁆𑀥𑀯𑀻𑀭𑀺𑀬𑀢𑁆𑀢𑀸 𑀲𑀢𑁆𑀢𑀲𑀗𑁆𑀔𑀸𑀭𑁂𑀳𑀺 𑀉𑀧𑀦𑀻𑀢𑀁 𑀤𑀼𑀓𑁆𑀔𑀁 𑀅𑀪𑀺𑀪𑀼𑀬𑁆𑀬 𑀯𑀺𑀳𑀭𑀢𑀺 𑀯𑀻𑀭𑀺𑀬𑀲𑁆𑀲 𑀢𑀺𑀢𑀺𑀓𑁆𑀔𑀸𑀮𑀗𑁆𑀓𑀸𑀭𑀪𑀸𑀯𑀢𑁄. 𑀯𑀻𑀭𑀺𑀬𑀯𑀢𑁄 𑀳𑀺 𑀢𑀺𑀢𑀺𑀓𑁆𑀔𑀸 𑀲𑁄𑀪𑀢𑀺. 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀯𑀢𑁆𑀯𑀸 𑀲𑀫𑀣𑀦𑀺𑀫𑀺𑀢𑁆𑀢𑀯𑀘𑀦𑀢𑁄, 𑀅𑀘𑁆𑀘𑀸𑀭𑀫𑁆𑀪𑁂𑀦 𑀉𑀤𑁆𑀥𑀘𑁆𑀘𑀤𑁄𑀲𑀧𑁆𑀧𑀳𑀸𑀦𑀯𑀘𑀦𑀢𑁄. 𑀥𑀫𑁆𑀫𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀳𑀺 𑀉𑀤𑁆𑀥𑀘𑁆𑀘𑀤𑁄𑀲𑁄 𑀧𑀳𑀻𑀬𑀢𑀺. 𑀯𑀻𑀭𑀺𑀬𑀯𑀢𑁄 𑀲𑀸𑀢𑀘𑁆𑀘𑀓𑀭𑀡𑀯𑀘𑀦𑀢𑁄. 𑀔𑀦𑁆𑀢𑀺𑀩𑀳𑀼𑀮𑁄 𑀳𑀺 𑀅𑀦𑀼𑀤𑁆𑀥𑀢𑁄 𑀲𑀸𑀢𑀘𑁆𑀘𑀓𑀸𑀭𑀻 𑀳𑁄𑀢𑀺. 𑀅𑀧𑁆𑀧𑀫𑀸𑀤𑀯𑀢𑁄 𑀧𑀭𑀳𑀺𑀢𑀓𑀺𑀭𑀺𑀬𑀸𑀭𑀫𑁆𑀪𑁂 ¶ 𑀧𑀘𑁆𑀘𑀼𑀧𑀓𑀸𑀭𑀢𑀡𑁆𑀳𑀸𑀪𑀸𑀯𑀯𑀘𑀦𑀢𑁄. 𑀬𑀸𑀣𑀸𑀯𑀢𑁄 𑀥𑀫𑁆𑀫𑀦𑀺𑀚𑁆𑀛𑀸𑀦𑁂 𑀳𑀺 𑀲𑀢𑀺 𑀢𑀡𑁆𑀳𑀸 𑀦 𑀳𑁄𑀢𑀺. 𑀧𑀭𑀳𑀺𑀢𑀸𑀭𑀫𑁆𑀪𑁂 𑀧𑀭𑀫𑁂𑀧𑀺 𑀧𑀭𑀓𑀢𑀤𑀼𑀓𑁆𑀔𑀲𑀳𑀦𑀪𑀸𑀯𑀯𑀘𑀦𑀢𑁄 𑀘 𑀯𑀻𑀭𑀺𑀬𑀲𑁆𑀲 𑀅𑀦𑀦𑁆𑀢𑀭𑀁 𑀔𑀦𑁆𑀢𑀺 𑀯𑀼𑀢𑁆𑀢𑀸 ¶ . 𑀲𑀘𑁆𑀘𑁂𑀦 𑀔𑀦𑁆𑀢𑀺𑀬𑀸 𑀘𑀺𑀭𑀸𑀥𑀺𑀝𑁆𑀞𑀸𑀦𑀢𑁄, 𑀅𑀧𑀓𑀸𑀭𑀺𑀦𑁄 𑀅𑀧𑀓𑀸𑀭𑀔𑀦𑁆𑀢𑀺𑀁 𑀯𑀢𑁆𑀯𑀸 𑀢𑀤𑀼𑀧𑀓𑀸𑀭𑀓𑀭𑀡𑁂 𑀅𑀯𑀺𑀲𑀁𑀯𑀸𑀤𑀯𑀘𑀦𑀢𑁄, 𑀔𑀦𑁆𑀢𑀺𑀬𑀸 𑀅𑀧𑀯𑀸𑀤𑀯𑀸𑀘𑀸𑀯𑀺𑀓𑀫𑁆𑀧𑀦𑁂𑀦 𑀪𑀽𑀢𑀯𑀸𑀤𑀺𑀢𑀸𑀬 𑀅𑀯𑀺𑀚𑀳𑀦𑀯𑀘𑀦𑀢𑁄, 𑀲𑀢𑁆𑀢𑀲𑀼𑀜𑁆𑀜𑀢𑀸𑀥𑀫𑁆𑀫𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀁 𑀯𑀢𑁆𑀯𑀸 𑀢𑀤𑀼𑀧𑀩𑁆𑀭𑀽𑀳𑀺𑀢𑀜𑀸𑀡𑀲𑀘𑁆𑀘𑀯𑀘𑀦𑀢𑁄 𑀘 𑀔𑀦𑁆𑀢𑀺𑀬𑀸 𑀅𑀦𑀦𑁆𑀢𑀭𑀁 𑀲𑀘𑁆𑀘𑀁 𑀯𑀼𑀢𑁆𑀢𑀁. 𑀅𑀥𑀺𑀝𑁆𑀞𑀸𑀦𑁂𑀦 𑀲𑀘𑁆𑀘𑀲𑀺𑀤𑁆𑀥𑀺𑀢𑁄. 𑀅𑀘𑀮𑀸𑀥𑀺𑀝𑁆𑀞𑀸𑀦𑀲𑁆𑀲 𑀳𑀺 𑀯𑀺𑀭𑀢𑀺 𑀲𑀺𑀚𑁆𑀛𑀢𑀺. 𑀅𑀯𑀺𑀲𑀁𑀯𑀸𑀤𑀺𑀢𑀁 𑀯𑀢𑁆𑀯𑀸 𑀢𑀢𑁆𑀣 𑀅𑀘𑀮𑀪𑀸𑀯𑀯𑀘𑀦𑀢𑁄. 𑀲𑀘𑁆𑀘𑀲𑀦𑁆𑀥𑁄 𑀳𑀺 𑀤𑀸𑀦𑀸𑀤𑀻𑀲𑀼 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀦𑀺𑀘𑁆𑀘𑀮𑁄𑀯 ¶ 𑀧𑀯𑀢𑁆𑀢𑀢𑀺. 𑀜𑀸𑀡𑀲𑀘𑁆𑀘𑀁 𑀯𑀢𑁆𑀯𑀸 𑀲𑀫𑁆𑀪𑀸𑀭𑁂𑀲𑀼 𑀧𑀯𑀢𑁆𑀢𑀺𑀦𑀺𑀝𑁆𑀞𑀸𑀧𑀦𑀯𑀘𑀦𑀢𑁄. 𑀬𑀣𑀸𑀪𑀽𑀢𑀜𑀸𑀡𑀯𑀸 𑀳𑀺 𑀩𑁄𑀥𑀺𑀲𑀫𑁆𑀪𑀸𑀭𑁂𑀲𑀼 𑀅𑀥𑀺𑀢𑀺𑀝𑁆𑀞𑀢𑀺, 𑀢𑁂 𑀘 𑀦𑀺𑀝𑁆𑀞𑀸𑀧𑁂𑀢𑀺 𑀧𑀝𑀺𑀧𑀓𑁆𑀔𑁂𑀳𑀺 𑀅𑀓𑀫𑁆𑀧𑀺𑀬𑀪𑀸𑀯𑀢𑁄𑀢𑀺 𑀲𑀘𑁆𑀘𑀲𑁆𑀲 𑀅𑀦𑀦𑁆𑀢𑀭𑀁 𑀅𑀥𑀺𑀝𑁆𑀞𑀸𑀦𑀁 𑀯𑀼𑀢𑁆𑀢𑀁. 𑀫𑁂𑀢𑁆𑀢𑀸𑀬 𑀧𑀭𑀳𑀺𑀢𑀓𑀭𑀡𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑀲𑀺𑀤𑁆𑀥𑀺𑀢𑁄, 𑀅𑀥𑀺𑀝𑁆𑀞𑀸𑀦𑀁 𑀯𑀢𑁆𑀯𑀸 𑀳𑀺𑀢𑀽𑀧𑀲𑀁𑀳𑀸𑀭𑀯𑀘𑀦𑀢𑁄. 𑀩𑁄𑀥𑀺𑀲𑀫𑁆𑀪𑀸𑀭𑁂 𑀳𑀺 𑀅𑀥𑀺𑀢𑀺𑀝𑁆𑀞𑀫𑀸𑀦𑁄 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀳𑁄𑀢𑀺. 𑀅𑀘𑀮𑀸𑀥𑀺𑀝𑁆𑀞𑀸𑀦𑀲𑁆𑀲 𑀲𑀫𑀸𑀤𑀸𑀦𑀸𑀯𑀺𑀓𑁄𑀧𑀦𑀢𑁄, 𑀲𑀫𑀸𑀤𑀸𑀦𑀲𑀫𑁆𑀪𑀯𑀢𑁄 𑀘 𑀅𑀥𑀺𑀝𑁆𑀞𑀸𑀦𑀲𑁆𑀲 𑀅𑀦𑀦𑁆𑀢𑀭𑀁 𑀫𑁂𑀢𑁆𑀢𑀸 𑀯𑀼𑀢𑁆𑀢𑀸. 𑀉𑀧𑁂𑀓𑁆𑀔𑀸𑀬 𑀫𑁂𑀢𑁆𑀢𑀸𑀯𑀺𑀲𑀼𑀤𑁆𑀥𑀺𑀢𑁄, 𑀲𑀢𑁆𑀢𑁂𑀲𑀼 𑀳𑀺𑀢𑀽𑀧𑀲𑀁𑀳𑀸𑀭𑀁 𑀯𑀢𑁆𑀯𑀸 𑀢𑀤𑀧𑀭𑀸𑀥𑁂𑀲𑀼 𑀉𑀤𑀸𑀲𑀻𑀦𑀢𑀸𑀯𑀘𑀦𑀢𑁄, 𑀫𑁂𑀢𑁆𑀢𑀸𑀪𑀸𑀯𑀦𑀁 𑀯𑀢𑁆𑀯𑀸 𑀢𑀦𑁆𑀦𑀺𑀲𑁆𑀲𑀦𑁆𑀤𑀪𑀸𑀯𑀦𑀸𑀯𑀘𑀦𑀢𑁄, ‘‘𑀳𑀺𑀢𑀓𑀸𑀫𑀲𑀢𑁆𑀢𑁂𑀧𑀺 𑀉𑀧𑁂𑀓𑁆𑀔𑀓𑁄’’𑀢𑀺 𑀅𑀘𑁆𑀙𑀭𑀺𑀬𑀕𑀼𑀡𑀪𑀸𑀯𑀯𑀘𑀦𑀢𑁄 𑀘 𑀫𑁂𑀢𑁆𑀢𑀸𑀬 𑀅𑀦𑀦𑁆𑀢𑀭𑀁 𑀉𑀧𑁂𑀓𑁆𑀔𑀸 𑀯𑀼𑀢𑁆𑀢𑀸𑀢𑀺 𑀏𑀯𑀫𑁂𑀢𑀸𑀲𑀁 𑀓𑀫𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀸𑀦𑀺 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀦𑀻𑀢𑀺? 𑀏𑀢𑁆𑀣 ¶ 𑀅𑀯𑀺𑀲𑁂𑀲𑁂𑀦 𑀢𑀸𑀯 𑀲𑀩𑁆𑀩𑀸𑀧𑀺 𑀧𑀸𑀭𑀫𑀺𑀬𑁄 𑀧𑀭𑀸𑀦𑀼𑀕𑁆𑀕𑀳𑀮𑀓𑁆𑀔𑀡𑀸, 𑀧𑀭𑁂𑀲𑀁 𑀉𑀧𑀓𑀸𑀭𑀓𑀭𑀡𑀭𑀲𑀸, 𑀅𑀯𑀺𑀓𑀫𑁆𑀧𑀦𑀭𑀲𑀸 𑀯𑀸, 𑀳𑀺𑀢𑁂𑀲𑀺𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀩𑀼𑀤𑁆𑀥𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀫𑀳𑀸𑀓𑀭𑀼𑀡𑀸𑀧𑀤𑀝𑁆𑀞𑀸𑀦𑀸, 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀤𑀝𑁆𑀞𑀸𑀦𑀸 𑀯𑀸.

𑀯𑀺𑀲𑁂𑀲𑁂𑀦 𑀧𑀦 𑀬𑀲𑁆𑀫𑀸 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀸 𑀅𑀢𑁆𑀢𑀼𑀧𑀓𑀭𑀡𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀸 𑀤𑀸𑀦𑀧𑀸𑀭𑀫𑀺𑀢𑀸. 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀁 𑀓𑀸𑀬𑀯𑀘𑀻𑀲𑀼𑀘𑀭𑀺𑀢𑀁 𑀅𑀢𑁆𑀣𑀢𑁄 𑀅𑀓𑀢𑁆𑀢𑀩𑁆𑀩𑀯𑀺𑀭𑀢𑀺, 𑀓𑀢𑁆𑀢𑀩𑁆𑀩𑀓𑀭𑀡𑀘𑁂𑀢𑀦𑀸𑀤𑀬𑁄 𑀘 𑀲𑀻𑀮𑀧𑀸𑀭𑀫𑀺𑀢𑀸. 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑁄 𑀆𑀤𑀻𑀦𑀯𑀤𑀲𑁆𑀲𑀦𑀧𑀼𑀩𑁆𑀩𑀗𑁆𑀕𑀫𑁄 𑀓𑀸𑀫𑀪𑀯𑁂𑀳𑀺 𑀦𑀺𑀓𑁆𑀔𑀫𑀦𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀢𑀸. 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑁄 𑀥𑀫𑁆𑀫𑀸𑀦𑀁 𑀲𑀸𑀫𑀜𑁆𑀜𑀯𑀺𑀲𑁂𑀲𑀮𑀓𑁆𑀔𑀡𑀸𑀯𑀩𑁄𑀥𑁄 𑀧𑀜𑁆𑀜𑀸𑀧𑀸𑀭𑀫𑀺𑀢𑀸. 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑁄 𑀓𑀸𑀬𑀘𑀺𑀢𑁆𑀢𑁂𑀳𑀺 𑀧𑀭𑀳𑀺𑀢𑀸𑀭𑀫𑁆𑀪𑁄 𑀯𑀻𑀭𑀺𑀬𑀧𑀸𑀭𑀫𑀺𑀢𑀸. 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀁 𑀲𑀢𑁆𑀢𑀲𑀗𑁆𑀔𑀸𑀭𑀸𑀧𑀭𑀸𑀥𑀲𑀳𑀦𑀁 𑀅𑀤𑁄𑀲𑀧𑁆𑀧𑀥𑀸𑀦𑁄 𑀢𑀤𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀔𑀦𑁆𑀢𑀺𑀧𑀸𑀭𑀫𑀺𑀢𑀸 ¶ . 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀁 𑀯𑀺𑀭𑀢𑀺𑀘𑁂𑀢𑀦𑀸𑀤𑀺𑀪𑁂𑀤𑀁 𑀅𑀯𑀺𑀲𑀁𑀯𑀸𑀤𑀦𑀁 𑀲𑀘𑁆𑀘𑀧𑀸𑀭𑀫𑀺𑀢𑀸. 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀁 𑀅𑀘𑀮𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑀁 𑀢𑀤𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀢𑀸. 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑁄 𑀮𑁄𑀓𑀲𑁆𑀲 𑀳𑀺𑀢𑀽𑀧𑀲𑀁𑀳𑀸𑀭𑁄 𑀅𑀢𑁆𑀣𑀢𑁄 𑀅𑀩𑁆𑀬𑀸𑀧𑀸𑀤𑁄 𑀫𑁂𑀢𑁆𑀢𑀸𑀧𑀸𑀭𑀫𑀺𑀢𑀸. 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀸 𑀅𑀦𑀼𑀦𑀬𑀧𑀝𑀺𑀖𑀯𑀺𑀤𑁆𑀥𑀁𑀲𑀺𑀦𑀻 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀲𑀢𑁆𑀢𑀲𑀗𑁆𑀔𑀸𑀭𑁂𑀲𑀼 𑀲𑀫𑀧𑁆𑀧𑀯𑀢𑁆𑀢𑀺 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀢𑀸.

𑀢𑀲𑁆𑀫𑀸 𑀧𑀭𑀺𑀘𑁆𑀘𑀸𑀕𑀮𑀓𑁆𑀔𑀡𑀁 𑀤𑀸𑀦𑀁, 𑀤𑁂𑀬𑁆𑀬𑀥𑀫𑁆𑀫𑁂 𑀮𑁄𑀪𑀯𑀺𑀤𑁆𑀥𑀁𑀲𑀦𑀭𑀲𑀁, 𑀅𑀦𑀸𑀲𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀪𑀯𑀯𑀺𑀪𑀯𑀲𑀫𑁆𑀧𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀯𑀸, 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀁. 𑀲𑀻𑀮𑀦𑀮𑀓𑁆𑀔𑀡𑀁 𑀲𑀻𑀮𑀁, 𑀲𑀫𑀸𑀥𑀸𑀦𑀮𑀓𑁆𑀔𑀡𑀁, 𑀧𑀢𑀺𑀝𑁆𑀞𑀸𑀦𑀮𑀓𑁆𑀔𑀡𑀜𑁆𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀼𑀲𑁆𑀲𑀻𑀮𑁆𑀬𑀯𑀺𑀤𑁆𑀥𑀁𑀲𑀦𑀭𑀲𑀁, 𑀅𑀦𑀯𑀚𑁆𑀚𑀭𑀲𑀁 𑀯𑀸, 𑀲𑁄𑀘𑁂𑀬𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀳𑀺𑀭𑁄𑀢𑁆𑀢𑀧𑁆𑀧𑀧𑀤𑀝𑁆𑀞𑀸𑀦𑀁. 𑀓𑀸𑀫𑀢𑁄 𑀪𑀯𑀢𑁄 𑀘 𑀦𑀺𑀓𑁆𑀔𑀫𑀦𑀮𑀓𑁆𑀔𑀡𑀁 𑀦𑁂𑀓𑁆𑀔𑀫𑁆𑀫𑀁, 𑀢𑀤𑀸𑀤𑀻𑀦𑀯𑀯𑀺𑀪𑀸𑀯𑀦𑀭𑀲𑀁 ¶ , 𑀢𑀢𑁄 𑀏𑀯 𑀯𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀲𑀁𑀯𑁂𑀕𑀧𑀤𑀝𑁆𑀞𑀸𑀦𑀁 ¶ . 𑀬𑀣𑀸𑀲𑀪𑀸𑀯𑀧𑀝𑀺𑀯𑁂𑀥𑀮𑀓𑁆𑀔𑀡𑀸 𑀧𑀜𑁆𑀜𑀸, 𑀅𑀓𑁆𑀔𑀮𑀺𑀢𑀧𑀝𑀺𑀯𑁂𑀥𑀮𑀓𑁆𑀔𑀡𑀸 𑀯𑀸 𑀓𑀼𑀲𑀮𑀺𑀲𑁆𑀲𑀸𑀲𑀔𑀺𑀢𑁆𑀢𑀉𑀲𑀼𑀧𑀝𑀺𑀯𑁂𑀥𑁄 𑀯𑀺𑀬, 𑀯𑀺𑀲𑀬𑁄𑀪𑀸𑀲𑀦𑀭𑀲𑀸 𑀧𑀤𑀻𑀧𑁄 𑀯𑀺𑀬, 𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀅𑀭𑀜𑁆𑀜𑀕𑀢𑀲𑀼𑀤𑁂𑀲𑀓𑁄 𑀯𑀺𑀬, 𑀲𑀫𑀸𑀥𑀺𑀧𑀤𑀝𑁆𑀞𑀸𑀦𑀸, 𑀘𑀢𑀼𑀲𑀘𑁆𑀘𑀧𑀤𑀝𑁆𑀞𑀸𑀦𑀸 𑀯𑀸. 𑀉𑀲𑁆𑀲𑀸𑀳𑀮𑀓𑁆𑀔𑀡𑀁 𑀯𑀻𑀭𑀺𑀬𑀁, 𑀉𑀧𑀢𑁆𑀣𑀫𑁆𑀪𑀦𑀭𑀲𑀁, 𑀅𑀲𑀁𑀲𑀻𑀤𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀼 (𑀅. 𑀦𑀺. 𑁮.𑁮𑁦) 𑀧𑀤𑀝𑁆𑀞𑀸𑀦𑀁, 𑀲𑀁𑀯𑁂𑀕𑀧𑀤𑀝𑁆𑀞𑀸𑀦𑀁 𑀯𑀸. 𑀔𑀫𑀦𑀮𑀓𑁆𑀔𑀡𑀸 𑀔𑀦𑁆𑀢𑀺, 𑀇𑀝𑁆𑀞𑀸𑀦𑀺𑀝𑁆𑀞𑀲𑀳𑀦𑀭𑀲𑀸, 𑀅𑀥𑀺𑀯𑀸𑀲𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀯𑀺𑀭𑁄𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀬𑀣𑀸𑀪𑀽𑀢𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸. 𑀅𑀯𑀺𑀲𑀁𑀯𑀸𑀤𑀦𑀮𑀓𑁆𑀔𑀡𑀁 𑀲𑀘𑁆𑀘𑀁, 𑀬𑀸𑀣𑀸𑀯𑀯𑀺𑀪𑀸𑀯𑀦𑀭𑀲𑀁 [𑀬𑀣𑀸𑀲𑀪𑀸𑀯𑀯𑀺𑀪𑀸𑀯𑀦𑀭𑀲𑀁 (𑀘𑀭𑀺𑀬𑀸. 𑀅𑀝𑁆𑀞. 𑀧𑀓𑀺𑀡𑁆𑀡𑀓𑀓𑀣𑀸𑀬)], 𑀲𑀸𑀥𑀼𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀲𑁄𑀭𑀘𑁆𑀘𑀧𑀤𑀝𑁆𑀞𑀸𑀦𑀁. 𑀩𑁄𑀥𑀺𑀲𑀫𑁆𑀪𑀸𑀭𑁂𑀲𑀼 𑀅𑀥𑀺𑀝𑁆𑀞𑀸𑀦𑀮𑀓𑁆𑀔𑀡𑀁 𑀅𑀥𑀺𑀝𑁆𑀞𑀸𑀦𑀁, 𑀢𑁂𑀲𑀁 𑀧𑀝𑀺𑀧𑀓𑁆𑀔𑀸𑀪𑀺𑀪𑀯𑀦𑀭𑀲𑀁, 𑀢𑀢𑁆𑀣 𑀅𑀘𑀮𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀩𑁄𑀥𑀺𑀲𑀫𑁆𑀪𑀸𑀭𑀧𑀤𑀝𑁆𑀞𑀸𑀦𑀁. 𑀳𑀺𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸 𑀫𑁂𑀢𑁆𑀢𑀸, 𑀳𑀺𑀢𑀽𑀧𑀲𑀁𑀳𑀸𑀭𑀭𑀲𑀸, 𑀆𑀖𑀸𑀢𑀯𑀺𑀦𑀬𑀦𑀭𑀲𑀸 𑀯𑀸, 𑀲𑁄𑀫𑁆𑀫𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀢𑁆𑀢𑀸𑀦𑀁 𑀫𑀦𑀸𑀧𑀪𑀸𑀯𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸. 𑀫𑀚𑁆𑀛𑀢𑁆𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸 𑀉𑀧𑁂𑀓𑁆𑀔𑀸, 𑀲𑀫𑀪𑀸𑀯𑀤𑀲𑁆𑀲𑀦𑀭𑀲𑀸, 𑀧𑀝𑀺𑀖𑀸𑀦𑀼𑀦𑀬𑀯𑀽𑀧𑀲𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀫𑁆𑀫𑀲𑁆𑀲𑀓𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀧𑀤𑀝𑁆𑀞𑀸𑀦𑀸. 𑀏𑀢𑁆𑀣 𑀘 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀢𑀸 𑀤𑀸𑀦𑀸𑀤𑀻𑀦𑀁 𑀧𑀭𑀺𑀘𑁆𑀘𑀸𑀕𑀸𑀤𑀺𑀮𑀓𑁆𑀔𑀡𑀲𑁆𑀲 𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀸, 𑀬𑀢𑁄 𑀢𑀸𑀦𑀺 𑀧𑀸𑀭𑀫𑀻𑀲𑀗𑁆𑀔𑁆𑀬𑀁 𑀮𑀪𑀦𑁆𑀢𑀻𑀢𑀺.

𑀓𑁄 ¶ 𑀧𑀘𑁆𑀘𑀬𑁄𑀢𑀺 𑀅𑀪𑀺𑀦𑀻𑀳𑀸𑀭𑁄 𑀧𑀘𑁆𑀘𑀬𑁄. 𑀬𑁄 𑀳𑀺 𑀅𑀬𑀁 ‘‘𑀫𑀦𑀼𑀲𑁆𑀲𑀢𑁆𑀢𑀁 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀻’’𑀢𑀺𑀆𑀤𑀺 (𑀩𑀼. 𑀯𑀁. 𑁨.𑁫𑁯) 𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑀲𑀫𑁆𑀧𑀸𑀤𑀺𑀢𑁄 ‘‘𑀢𑀺𑀡𑁆𑀡𑁄 𑀢𑀸𑀭𑁂𑀬𑁆𑀬𑀁, 𑀫𑀼𑀢𑁆𑀢𑁄 𑀫𑁄𑀘𑁂𑀬𑁆𑀬𑀁, 𑀩𑀼𑀤𑁆𑀥𑁄 𑀩𑁄𑀥𑁂𑀬𑁆𑀬𑀁, 𑀲𑀼𑀤𑁆𑀥𑁄 𑀲𑁄𑀥𑁂𑀬𑁆𑀬𑀁, 𑀤𑀦𑁆𑀢𑁄 𑀤𑀫𑁂𑀬𑁆𑀬𑀁, 𑀲𑀦𑁆𑀢𑁄 𑀲𑀫𑁂𑀬𑁆𑀬𑀁, 𑀅𑀲𑁆𑀲𑀢𑁆𑀣𑁄 𑀅𑀲𑁆𑀲𑀸𑀲𑁂𑀬𑁆𑀬𑀁, 𑀧𑀭𑀺𑀦𑀺𑀩𑁆𑀩𑀼𑀢𑁄 𑀧𑀭𑀺𑀦𑀺𑀩𑁆𑀩𑀸𑀧𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 ¶ (𑀘𑀭𑀺𑀬𑀸. 𑀅𑀝𑁆𑀞. 𑀧𑀓𑀺𑀡𑁆𑀡𑀓𑀓𑀣𑀸𑀬) 𑀧𑀯𑀢𑁆𑀢𑁄 𑀅𑀪𑀺𑀦𑀻𑀳𑀸𑀭𑁄, 𑀲𑁄 𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑀧𑀸𑀭𑀫𑀻𑀦𑀁 𑀧𑀘𑁆𑀘𑀬𑁄. 𑀢𑀧𑁆𑀧𑀯𑀢𑁆𑀢𑀺𑀬𑀸 𑀳𑀺 𑀉𑀤𑁆𑀥𑀁 𑀧𑀸𑀭𑀫𑀻𑀦𑀁 𑀧𑀯𑀺𑀘𑀬𑀼𑀧𑀝𑁆𑀞𑀸𑀦𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑀦𑀺𑀧𑁆𑀨𑀢𑁆𑀢𑀺𑀬𑁄 𑀫𑀳𑀸𑀧𑀼𑀭𑀺𑀲𑀸𑀦𑀁 𑀲𑀫𑁆𑀪𑀯𑀦𑁆𑀢𑀺.

𑀬𑀣𑀸 𑀘 𑀅𑀪𑀺𑀦𑀻𑀳𑀸𑀭𑁄, 𑀏𑀯𑀁 𑀫𑀳𑀸𑀓𑀭𑀼𑀡𑀸, 𑀉𑀧𑀸𑀬𑀓𑁄𑀲𑀮𑁆𑀮𑀜𑁆𑀘. 𑀢𑀢𑁆𑀣 𑀉𑀧𑀸𑀬𑀓𑁄𑀲𑀮𑁆𑀮𑀁 𑀦𑀸𑀫 𑀤𑀸𑀦𑀸𑀤𑀻𑀦𑀁 𑀩𑁄𑀥𑀺𑀲𑀫𑁆𑀪𑀸𑀭𑀪𑀸𑀯𑀲𑁆𑀲 𑀦𑀺𑀫𑀺𑀢𑁆𑀢𑀪𑀽𑀢𑀸 𑀧𑀜𑁆𑀜𑀸, 𑀬𑀸𑀳𑀺 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀢𑀸𑀳𑀺 𑀫𑀳𑀸𑀧𑀼𑀭𑀺𑀲𑀸𑀦𑀁 𑀅𑀢𑁆𑀢𑀲𑀼𑀔𑀦𑀺𑀭𑀧𑁂𑀓𑁆𑀔𑀢𑀸, 𑀦𑀺𑀭𑀦𑁆𑀢𑀭𑀁 𑀧𑀭𑀳𑀺𑀢𑀓𑀭𑀡𑀧𑀲𑀼𑀢𑀢𑀸, 𑀲𑀼𑀤𑀼𑀓𑁆𑀓𑀭𑁂𑀳𑀺𑀧𑀺 𑀫𑀳𑀸𑀩𑁄𑀥𑀺𑀲𑀢𑁆𑀢𑀘𑀭𑀺𑀢𑁂𑀳𑀺 𑀯𑀺𑀲𑀸𑀤𑀸𑀪𑀸𑀯𑁄, 𑀧𑀲𑀸𑀤𑀲𑀫𑁆𑀩𑀼𑀤𑁆𑀥𑀺𑀤𑀲𑁆𑀲𑀦𑀲𑀯𑀦𑀸𑀦𑀼𑀲𑁆𑀲𑀭𑀡𑀸𑀯𑀢𑁆𑀣𑀸𑀲𑀼𑀧𑀺 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀧𑀝𑀺𑀮𑀸𑀪𑀳𑁂𑀢𑀼𑀪𑀸𑀯𑁄 𑀘 𑀲𑀫𑁆𑀧𑀚𑁆𑀚𑀢𑀺. 𑀢𑀣𑀸 𑀳𑀺 𑀧𑀜𑁆𑀜𑀸𑀬 𑀩𑀼𑀤𑁆𑀥𑀪𑀸𑀯𑀲𑀺𑀤𑁆𑀥𑀺, 𑀓𑀭𑀼𑀡𑀸𑀬 𑀩𑀼𑀤𑁆𑀥𑀓𑀫𑁆𑀫𑀲𑀺𑀤𑁆𑀥𑀺. 𑀧𑀜𑁆𑀜𑀸𑀬 𑀲𑀬𑀁 𑀢𑀭𑀢𑀺, 𑀓𑀭𑀼𑀡𑀸𑀬 𑀧𑀭𑁂 𑀢𑀸𑀭𑁂𑀢𑀺. 𑀧𑀜𑁆𑀜𑀸𑀬 𑀧𑀭𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀸𑀢𑀺, 𑀓𑀭𑀼𑀡𑀸𑀬 𑀧𑀭𑀤𑀼𑀓𑁆𑀔𑀧𑀝𑀺𑀓𑀸𑀭𑀁 𑀆𑀭𑀪𑀢𑀺. 𑀧𑀜𑁆𑀜𑀸𑀬 𑀘 𑀤𑀼𑀓𑁆𑀔𑁂 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀓𑀭𑀼𑀡𑀸𑀬 𑀤𑀼𑀓𑁆𑀔𑀁 𑀲𑀫𑁆𑀧𑀝𑀺𑀘𑁆𑀙𑀢𑀺. 𑀢𑀣𑀸 𑀧𑀜𑁆𑀜𑀸𑀬 𑀧𑀭𑀺𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑁄 𑀳𑁄𑀢𑀺, 𑀓𑀭𑀼𑀡𑀸𑀬 𑀢𑀁 𑀦 𑀧𑀸𑀧𑀼𑀡𑀸𑀢𑀺. 𑀢𑀣𑀸 𑀓𑀭𑀼𑀡𑀸𑀬 𑀲𑀁𑀲𑀸𑀭𑀸𑀪𑀺𑀫𑀼𑀔𑁄 𑀳𑁄𑀢𑀺 ¶ , 𑀧𑀜𑁆𑀜𑀸𑀬 𑀢𑀢𑁆𑀭 𑀦𑀸𑀪𑀺𑀭𑀫𑀢𑀺. 𑀧𑀜𑁆𑀜𑀸𑀬 𑀘 𑀲𑀩𑁆𑀩𑀢𑁆𑀣 𑀯𑀺𑀭𑀚𑁆𑀚𑀢𑀺, 𑀓𑀭𑀼𑀡𑀸𑀦𑀼𑀕𑀢𑀢𑁆𑀢𑀸 𑀦 𑀘 𑀦 𑀲𑀩𑁆𑀩𑁂𑀲𑀁 𑀅𑀦𑀼𑀕𑁆𑀕𑀳𑀸𑀬 𑀧𑀯𑀢𑁆𑀢𑁄, 𑀓𑀭𑀼𑀡𑀸𑀬 𑀲𑀩𑁆𑀩𑁂𑀧𑀺 𑀅𑀦𑀼𑀓𑀫𑁆𑀧𑀢𑀺, 𑀧𑀜𑁆𑀜𑀸𑀦𑀼𑀕𑀢𑀢𑁆𑀢𑀸 𑀦 𑀘 𑀦 𑀲𑀩𑁆𑀩𑀢𑁆𑀣 𑀯𑀺𑀭𑀢𑁆𑀢𑀘𑀺𑀢𑁆𑀢𑁄. 𑀧𑀜𑁆𑀜𑀸𑀬 𑀘 𑀅𑀳𑀁𑀓𑀸𑀭𑀫𑀫𑀁𑀓𑀸𑀭𑀸𑀪𑀸𑀯𑁄, 𑀓𑀭𑀼𑀡𑀸𑀬 𑀆𑀮𑀲𑀺𑀬𑀤𑀻𑀦𑀢𑀸𑀪𑀸𑀯𑁄. 𑀢𑀣𑀸 𑀧𑀜𑁆𑀜𑀸𑀓𑀭𑀼𑀡𑀸𑀳𑀺 𑀬𑀣𑀸𑀓𑁆𑀓𑀫𑀁 𑀅𑀢𑁆𑀢𑀧𑀭𑀦𑀸𑀣𑀢𑀸, 𑀥𑀻𑀭𑀯𑀻𑀭𑀪𑀸𑀯𑁄, 𑀅𑀦𑀢𑁆𑀢𑀦𑁆𑀢𑀧𑀅𑀧𑀭𑀦𑁆𑀢𑀧𑀢𑀸, 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀦𑀺𑀧𑁆𑀨𑀢𑁆𑀢𑀺, 𑀦𑀺𑀩𑁆𑀪𑀬𑀸𑀪𑀺𑀁𑀲𑀦𑀓𑀪𑀸𑀯𑁄, 𑀥𑀫𑁆𑀫𑀸𑀥𑀺𑀧𑀢𑀺𑀮𑁄𑀓𑀸𑀥𑀺𑀧𑀢𑀺𑀢𑀸, 𑀓𑀢𑀜𑁆𑀜𑀼𑀧𑀼𑀩𑁆𑀩𑀓𑀸𑀭𑀺𑀪𑀸𑀯𑁄, 𑀫𑁄𑀳𑀢𑀡𑁆𑀳𑀸𑀯𑀺𑀕𑀫𑁄, 𑀯𑀺𑀚𑁆𑀚𑀸𑀘𑀭𑀡𑀲𑀺𑀤𑁆𑀥𑀺, 𑀩𑀮𑀯𑁂𑀲𑀸𑀭𑀚𑁆𑀚𑀦𑀺𑀧𑁆𑀨𑀢𑁆𑀢𑀻𑀢𑀺 𑀲𑀩𑁆𑀩𑀲𑁆𑀲𑀸𑀧𑀺 𑀧𑀸𑀭𑀫𑀺𑀢𑀸𑀨𑀮𑀲𑁆𑀲 𑀯𑀺𑀲𑁂𑀲𑁂𑀦 𑀉𑀧𑀸𑀬𑀪𑀸𑀯𑀢𑁄 𑀧𑀜𑁆𑀜𑀸𑀓𑀭𑀼𑀡𑀸 𑀧𑀸𑀭𑀫𑀻𑀦𑀁 𑀧𑀘𑁆𑀘𑀬𑁄. 𑀇𑀤𑀜𑁆𑀘 𑀤𑁆𑀯𑀬𑀁 𑀧𑀸𑀭𑀫𑀻𑀦𑀁 𑀯𑀺𑀬 𑀧𑀡𑀺𑀥𑀸𑀦𑀲𑁆𑀲𑀸𑀧𑀺 𑀧𑀘𑁆𑀘𑀬𑁄.

𑀢𑀣𑀸 ¶ ¶ 𑀉𑀲𑁆𑀲𑀸𑀳𑀉𑀫𑁆𑀫𑀗𑁆𑀕𑀅𑀯𑀢𑁆𑀣𑀸𑀦𑀳𑀺𑀢𑀘𑀭𑀺𑀬𑀸 𑀘 𑀧𑀸𑀭𑀫𑀻𑀦𑀁 𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀬𑀸 𑀩𑀼𑀤𑁆𑀥𑀪𑀸𑀯𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑀸𑀬 ‘‘𑀩𑀼𑀤𑁆𑀥𑀪𑀽𑀫𑀺𑀬𑁄’’𑀢𑀺 𑀧𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸𑀳 𑁋

‘‘𑀓𑀢𑀺 𑀧𑀦 𑀪𑀦𑁆𑀢𑁂 𑀩𑀼𑀤𑁆𑀥𑀪𑀽𑀫𑀺𑀬𑁄? 𑀘𑀢𑀲𑁆𑀲𑁄 𑀔𑁄 𑀲𑀸𑀭𑀺𑀧𑀼𑀢𑁆𑀢 𑀩𑀼𑀤𑁆𑀥𑀪𑀽𑀫𑀺𑀬𑁄. 𑀓𑀢𑀫𑀸 𑀘𑀢𑀲𑁆𑀲𑁄? 𑀉𑀲𑁆𑀲𑀸𑀳𑁄 𑀘 𑀳𑁄𑀢𑀺 𑀯𑀻𑀭𑀺𑀬𑀁, 𑀉𑀫𑀗𑁆𑀕𑁄 𑀘 𑀳𑁄𑀢𑀺 𑀧𑀜𑁆𑀜𑀸𑀪𑀸𑀯𑀦𑀸, 𑀅𑀯𑀢𑁆𑀣𑀸𑀦𑀜𑁆𑀘 𑀳𑁄𑀢𑀺 𑀅𑀥𑀺𑀝𑁆𑀞𑀸𑀦𑀁, 𑀫𑁂𑀢𑁆𑀢𑀸𑀪𑀸𑀯𑀦𑀸 𑀘 𑀳𑁄𑀢𑀺 𑀳𑀺𑀢𑀘𑀭𑀺𑀬𑀸. 𑀇𑀫𑀸 𑀔𑁄 𑀲𑀸𑀭𑀺𑀧𑀼𑀢𑁆𑀢 𑀘𑀢𑀲𑁆𑀲𑁄 𑀩𑀼𑀤𑁆𑀥𑀪𑀽𑀫𑀺𑀬𑁄’’𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀫𑁆𑀧𑀺).

𑀢𑀣𑀸 𑀦𑁂𑀓𑁆𑀔𑀫𑁆𑀫𑀧𑀯𑀺𑀯𑁂𑀓𑀅𑀮𑁄𑀪𑀸𑀤𑁄𑀲𑀸𑀫𑁄𑀳𑀦𑀺𑀲𑁆𑀲𑀭𑀡𑀧𑁆𑀧𑀪𑁂𑀤𑀸 𑀙 𑀅𑀚𑁆𑀛𑀸𑀲𑀬𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑀸 𑀘 𑀩𑁄𑀥𑀺𑀲𑀢𑁆𑀢𑀸 𑀓𑀸𑀫𑁂 𑀤𑁄𑀲𑀤𑀲𑁆𑀲𑀸𑀯𑀺𑀦𑁄, 𑀧𑀯𑀺𑀯𑁂𑀓…𑀧𑁂… 𑀲𑀗𑁆𑀕𑀡𑀺𑀓𑀸𑀬, 𑀅𑀮𑁄𑀪…𑀧𑁂… 𑀮𑁄𑀪𑁂, 𑀅𑀤𑁄𑀲…𑀧𑁂… 𑀤𑁄𑀲𑁂, 𑀅𑀫𑁄𑀳…𑀧𑁂… 𑀫𑁄𑀳𑁂, 𑀦𑀺𑀲𑁆𑀲𑀭𑀡𑀚𑁆𑀛𑀸𑀲𑀬𑀸 𑀘 𑀩𑁄𑀥𑀺𑀲𑀢𑁆𑀢𑀸 𑀲𑀩𑁆𑀩𑀪𑀯𑁂𑀲𑀼 𑀤𑁄𑀲𑀤𑀲𑁆𑀲𑀸𑀯𑀺𑀦𑁄’’𑀢𑀺 (𑀯𑀺𑀲𑀼𑀤𑁆𑀥𑀺. 𑀅𑀝𑁆𑀞. 𑁧.𑁪𑁯 𑀯𑀸𑀓𑁆𑀬𑀔𑀦𑁆𑀥𑁂𑀧𑀺).

𑀢𑀲𑁆𑀫𑀸 𑀏𑀢𑁂 𑀩𑁄𑀥𑀺𑀲𑀢𑁆𑀢𑀸𑀦𑀁 𑀙 𑀅𑀚𑁆𑀛𑀸𑀲𑀬𑀸 𑀤𑀸𑀦𑀸𑀤𑀻𑀦𑀁 𑀧𑀘𑁆𑀘𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀦 𑀳𑀺 𑀮𑁄𑀪𑀸𑀤𑀻𑀲𑀼 𑀆𑀤𑀻𑀦𑀯𑀤𑀲𑁆𑀲𑀦𑁂𑀦, 𑀅𑀮𑁄𑀪𑀸𑀤𑀺𑀅𑀥𑀺𑀓𑀪𑀸𑀯𑁂𑀦 𑀘 𑀯𑀺𑀦𑀸 𑀤𑀸𑀦𑀸𑀤𑀺𑀧𑀸𑀭𑀫𑀺𑀬𑁄 𑀲𑀫𑁆𑀪𑀯𑀦𑁆𑀢𑀺. 𑀅𑀮𑁄𑀪𑀸𑀤𑀻𑀦𑀜𑁆𑀳𑀺 𑀅𑀥𑀺𑀓𑀪𑀸𑀯𑁂𑀦 𑀧𑀭𑀺𑀘𑁆𑀘𑀸𑀕𑀸𑀤𑀺𑀦𑀺𑀦𑁆𑀦𑀘𑀺𑀢𑁆𑀢𑀢𑀸 𑀅𑀮𑁄𑀪𑀚𑁆𑀛𑀸𑀲𑀬𑀸𑀤𑀺𑀢𑀸𑀢𑀺. 𑀬𑀣𑀸 𑀘𑁂𑀢𑁂, 𑀏𑀯𑀁 𑀤𑀸𑀦𑀚𑁆𑀛𑀸𑀲𑀬𑀢𑀸𑀤𑀬𑁄𑀧𑀺. 𑀬𑀣𑀸𑀳 𑁋

‘‘𑀓𑀢𑀺 𑀧𑀦 𑀪𑀦𑁆𑀢𑁂 𑀩𑁄𑀥𑀸𑀬 𑀘𑀭𑀦𑁆𑀢𑀸𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀚𑁆𑀛𑀸𑀲𑀬𑀸? 𑀤𑀲 𑀔𑁄 𑀲𑀸𑀭𑀺𑀧𑀼𑀢𑁆𑀢 ¶ 𑀩𑁄𑀥𑀸𑀬 𑀘𑀭𑀦𑁆𑀢𑀸𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀚𑁆𑀛𑀸𑀲𑀬𑀸. 𑀓𑀢𑀫𑁂 𑀤𑀲? 𑀤𑀸𑀦𑀚𑁆𑀛𑀸𑀲𑀬𑀸 𑀲𑀸𑀭𑀺𑀧𑀼𑀢𑁆𑀢 𑀩𑁄𑀥𑀺𑀲𑀢𑁆𑀢𑀸 𑀫𑀘𑁆𑀙𑁂𑀭𑁂 𑀤𑁄𑀲𑀤𑀲𑁆𑀲𑀸𑀯𑀺𑀦𑁄, 𑀲𑀻𑀮…𑀧𑁂… 𑀉𑀧𑁂𑀓𑁆𑀔𑀚𑁆𑀛𑀸𑀲𑀬𑀸 𑀲𑀸𑀭𑀺𑀧𑀼𑀢𑁆𑀢 𑀩𑁄𑀥𑀺𑀲𑀢𑁆𑀢𑀸 𑀲𑀼𑀔𑀤𑀼𑀓𑁆𑀔𑁂𑀲𑀼 𑀤𑁄𑀲𑀤𑀲𑁆𑀲𑀸𑀯𑀺𑀦𑁄’’𑀢𑀺.

𑀏𑀢𑁂𑀲𑀼 ¶ 𑀳𑀺 𑀫𑀘𑁆𑀙𑁂𑀭𑀅𑀲𑀁𑀯𑀭𑀓𑀸𑀫𑀯𑀺𑀘𑀺𑀓𑀺𑀘𑁆𑀙𑀸𑀓𑁄𑀲𑀚𑁆𑀚𑀅𑀓𑁆𑀔𑀦𑁆𑀢𑀺𑀯𑀺𑀲𑀁𑀯𑀸𑀤𑀅𑀦𑀥𑀺𑀝𑁆𑀞𑀸𑀦𑀩𑁆𑀬𑀸𑀧𑀸𑀤- 𑀲𑀼𑀔𑀤𑀼𑀓𑁆𑀔𑀲𑀗𑁆𑀔𑀸𑀢𑁂𑀲𑀼 𑀆𑀤𑀻𑀦𑀯𑀤𑀲𑁆𑀲𑀦𑀧𑀼𑀩𑁆𑀩𑀗𑁆𑀕𑀫𑀸 𑀤𑀸𑀦𑀸𑀤𑀺𑀦𑀺𑀦𑁆𑀦𑀘𑀺𑀢𑁆𑀢𑀢𑀸𑀲𑀗𑁆𑀔𑀸𑀢𑀸 𑀤𑀸𑀦𑀚𑁆𑀛𑀸𑀲𑀬𑀢𑀸𑀤𑀬𑁄 𑀤𑀸𑀦𑀸𑀤𑀺𑀧𑀸𑀭𑀫𑀻𑀦𑀁 𑀦𑀺𑀩𑁆𑀩𑀢𑁆𑀢𑀺𑀬𑀸 𑀓𑀸𑀭𑀡𑀦𑁆𑀢𑀺 ¶ . 𑀢𑀣𑀸 𑀅𑀧𑀭𑀺𑀘𑁆𑀘𑀸𑀕𑀧𑀭𑀺𑀘𑁆𑀘𑀸𑀕𑀸𑀤𑀻𑀲𑀼 𑀬𑀣𑀸𑀓𑁆𑀓𑀫𑀁 𑀆𑀤𑀻𑀦𑀯𑀸𑀦𑀺𑀲𑀁𑀲𑀧𑀘𑁆𑀘𑀯𑁂𑀓𑁆𑀔𑀡𑀸 𑀤𑀸𑀦𑀸𑀤𑀺𑀧𑀸𑀭𑀫𑀻𑀦𑀁 𑀧𑀘𑁆𑀘𑀬𑁄.

𑀢𑀢𑁆𑀣𑀸𑀬𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀯𑀺𑀥𑀺 𑁋 𑀔𑁂𑀢𑁆𑀢𑀯𑀢𑁆𑀣𑀼𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀕𑁄𑀫𑀳𑀺𑀁𑀲𑀤𑀸𑀲𑀺𑀤𑀸𑀲𑀧𑀼𑀢𑁆𑀢𑀤𑀸𑀭𑀸𑀤𑀺𑀧𑀭𑀺𑀕𑁆𑀕𑀳𑀩𑁆𑀬𑀸𑀲𑀢𑁆𑀢𑀘𑀺𑀢𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀔𑁂𑀢𑁆𑀢𑀸𑀤𑀻𑀦𑀁 𑀯𑀢𑁆𑀣𑀼𑀓𑀸𑀫𑀪𑀸𑀯𑁂𑀦 𑀩𑀳𑀼𑀧𑀢𑁆𑀣𑀦𑀻𑀬𑀪𑀸𑀯𑀢𑁄, 𑀭𑀸𑀚𑀘𑁄𑀭𑀸𑀤𑀺𑀲𑀸𑀥𑀸𑀭𑀡𑀪𑀸𑀯𑀢𑁄, 𑀯𑀺𑀯𑀸𑀤𑀸𑀥𑀺𑀝𑁆𑀞𑀸𑀦𑀢𑁄, 𑀲𑀧𑀢𑁆𑀢𑀓𑀭𑀡𑀢𑁄, 𑀦𑀺𑀲𑁆𑀲𑀸𑀭𑀢𑁄, 𑀧𑀝𑀺𑀮𑀸𑀪𑀧𑀭𑀺𑀧𑀸𑀮𑀦𑁂𑀲𑀼 𑀧𑀭𑀯𑀺𑀳𑁂𑀞𑀦𑀳𑁂𑀢𑀼𑀢𑁄, 𑀯𑀺𑀦𑀸𑀲𑀦𑀺𑀫𑀺𑀢𑁆𑀢𑀜𑁆𑀘 𑀲𑁄𑀓𑀸𑀤𑀺𑀅𑀦𑁂𑀓𑀯𑀺𑀳𑀺𑀢𑀩𑁆𑀬𑀲𑀦𑀸𑀯𑀳𑀢𑁄, 𑀢𑀤𑀸𑀲𑀢𑁆𑀢𑀺𑀦𑀺𑀤𑀸𑀦𑀜𑁆𑀘 𑀫𑀘𑁆𑀙𑁂𑀭𑀫𑀮𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑀸𑀦𑀁 𑀅𑀧𑀸𑀬𑀽𑀧𑀧𑀢𑁆𑀢𑀺𑀲𑀫𑁆𑀪𑀯𑀢𑁄𑀢𑀺 𑀏𑀯𑀁 𑀯𑀺𑀯𑀺𑀥𑀯𑀺𑀧𑀼𑀮𑀸𑀦𑀢𑁆𑀣𑀸𑀯𑀳𑀸 𑀏𑀢𑁂 𑀅𑀢𑁆𑀣𑀸 𑀦𑀸𑀫, 𑀢𑁂𑀲𑀁 𑀧𑀭𑀺𑀘𑁆𑀘𑀸𑀕𑁄𑀬𑁂𑀯𑁂𑀓𑁄 𑀲𑁄𑀢𑁆𑀣𑀺𑀪𑀸𑀯𑁄𑀢𑀺 𑀧𑀭𑀺𑀘𑁆𑀘𑀸𑀕𑁂 𑀅𑀧𑁆𑀧𑀫𑀸𑀤𑁄 𑀓𑀭𑀡𑀻𑀬𑁄.

𑀅𑀧𑀺𑀘 ‘‘𑀬𑀸𑀘𑀓𑁄 𑀬𑀸𑀘𑀫𑀸𑀦𑁄 𑀅𑀢𑁆𑀢𑀦𑁄 𑀕𑀼𑀬𑁆𑀳𑀲𑁆𑀲 𑀆𑀘𑀺𑀓𑁆𑀔𑀦𑀢𑁄 𑀫𑀬𑁆𑀳𑀁 𑀯𑀺𑀲𑁆𑀲𑀸𑀲𑀺𑀓𑁄’’𑀢𑀺 𑀘 ‘‘𑀧𑀳𑀸𑀬 𑀕𑀫𑀦𑀻𑀬𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀕𑀳𑁂𑀢𑁆𑀯𑀸 𑀧𑀭𑀮𑁄𑀓𑀁 𑀬𑀸𑀳𑀻𑀢𑀺 𑀫𑀬𑁆𑀳𑀁 𑀉𑀧𑀤𑁂𑀲𑀓𑁄’’𑀢𑀺 𑀘 ‘‘𑀆𑀤𑀺𑀢𑁆𑀢𑁂 𑀯𑀺𑀬 𑀅𑀕𑀸𑀭𑁂 𑀫𑀭𑀡𑀕𑁆𑀕𑀺𑀦𑀸 𑀆𑀤𑀺𑀢𑁆𑀢𑁂 𑀮𑁄𑀓𑁂 𑀢𑀢𑁄 𑀫𑀬𑁆𑀳𑀁 𑀲𑀦𑁆𑀢𑀓𑀲𑁆𑀲 𑀅𑀧𑀯𑀸𑀳𑀓𑀲𑀳𑀸𑀬𑁄’’𑀢𑀺 𑀘 ‘‘𑀅𑀧𑀯𑀸𑀳𑀺𑀢𑀲𑁆𑀲 𑀘𑀲𑁆𑀲 𑀦𑀺𑀚𑁆𑀛𑀸𑀬𑀦𑀺𑀓𑁆𑀔𑁂𑀧𑀝𑁆𑀞𑀸𑀦𑀪𑀽𑀢𑁄’’𑀢𑀺 𑀘 ‘‘𑀤𑀸𑀦𑀲𑀗𑁆𑀔𑀸𑀢𑁂 𑀓𑀮𑁆𑀬𑀸𑀡𑀓𑀫𑁆𑀫𑀲𑁆𑀫𑀺𑀁 𑀲𑀳𑀸𑀬𑀪𑀸𑀯𑀢𑁄, 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀦𑀁 𑀅𑀕𑁆𑀕𑀪𑀽𑀢𑀸𑀬 𑀧𑀭𑀫𑀤𑀼𑀮𑁆𑀮𑀪𑀸𑀬 𑀩𑀼𑀤𑁆𑀥𑀪𑀽𑀫𑀺𑀬𑀸 𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄 𑀘 𑀧𑀭𑀫𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁄’’𑀢𑀺 𑀘 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁.

𑀢𑀣𑀸 ‘‘𑀉𑀴𑀸𑀭𑁂 𑀓𑀫𑁆𑀫𑀦𑀺 𑀅𑀦𑁂𑀦𑀸𑀳𑀁 𑀲𑀫𑁆𑀪𑀸𑀯𑀺𑀢𑁄, 𑀢𑀲𑁆𑀫𑀸 𑀲𑀸 𑀲𑀫𑁆𑀪𑀸𑀯𑀦𑀸 𑀅𑀯𑀺𑀢𑀣𑀸 𑀓𑀸𑀢𑀩𑁆𑀩𑀸’’𑀢𑀺 𑀘 ‘‘𑀏𑀓𑀦𑁆𑀢𑀪𑁂𑀤𑀺𑀢𑀸𑀬 𑀚𑀻𑀯𑀺𑀢𑀲𑁆𑀲 𑀅𑀬𑀸𑀘𑀺𑀢𑁂𑀦𑀧𑀺 𑀫𑀬𑀸 𑀤𑀸𑀢𑀩𑁆𑀩𑀁, 𑀧𑀕𑁂𑀯 𑀬𑀸𑀘𑀺𑀢𑁂𑀦𑀸’’𑀢𑀺 𑀘 ‘‘𑀉𑀴𑀸𑀭𑀚𑁆𑀛𑀸𑀲𑀬𑁂𑀳𑀺 𑀕𑀯𑁂𑀲𑀺𑀢𑁆𑀯𑀸𑀧𑀺 𑀤𑀸𑀢𑀩𑁆𑀩𑁄, 𑀲𑀬𑀫𑁂𑀯𑀸𑀕𑀢𑁄 𑀫𑀫 𑀧𑀼𑀜𑁆𑀜𑁂𑀦𑀸’’𑀢𑀺 𑀘 ‘‘𑀬𑀸𑀘𑀓𑀲𑁆𑀲 𑀤𑀸𑀦𑀸𑀧𑀤𑁂𑀲𑁂𑀦 𑀫𑀬𑁆𑀳𑀫𑁂𑀯𑀸𑀬𑀫𑀦𑀼𑀕𑁆𑀕𑀳𑁄’’𑀢𑀺 ¶ 𑀘 ‘‘𑀅𑀳𑀁 𑀯𑀺𑀬 𑀅𑀬𑀁 𑀲𑀩𑁆𑀩𑁄𑀧𑀺 𑀮𑁄𑀓𑁄 𑀫𑀬𑀸 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑁄’’𑀢𑀺 𑀘 ‘‘𑀅𑀲𑀢𑀺 𑀬𑀸𑀘𑀓𑁂 𑀓𑀣𑀁 𑀫𑀬𑁆𑀳𑀁 𑀤𑀸𑀦𑀧𑀸𑀭𑀫𑀻 𑀧𑀽𑀭𑁂𑀬𑁆𑀬𑀸’’𑀢𑀺 𑀘 ‘‘𑀬𑀸𑀘𑀓𑀸𑀦𑀫𑁂𑀯𑀢𑁆𑀣𑀸𑀬 𑀫𑀬𑀸 𑀲𑀩𑁆𑀩𑁄 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄’’𑀢𑀺 𑀘 ‘‘𑀅𑀬𑀸𑀘𑀺𑀢𑁆𑀯𑀸 𑀫𑀫 𑀲𑀦𑁆𑀢𑀓𑀁 𑀬𑀸𑀘𑀓𑀸 𑀲𑀬𑀫𑁂𑀯 𑀓𑀤𑀸 𑀕𑀡𑁆𑀳𑁂𑀬𑁆𑀬𑀼’’𑀦𑁆𑀢𑀺 𑀘 ‘‘𑀓𑀣𑀫𑀳𑀁 𑀬𑀸𑀘𑀓𑀸𑀦𑀁 𑀧𑀺𑀬𑁄 𑀘𑀲𑁆𑀲𑀁 𑀫𑀦𑀸𑀧𑁄’’𑀢𑀺 𑀘 ‘‘𑀓𑀣𑀁 𑀯𑀸 𑀢𑁂 ¶ 𑀫𑀬𑁆𑀳𑀁 𑀧𑀺𑀬𑀸 𑀘𑀲𑁆𑀲𑀼 𑀫𑀦𑀸𑀧𑀸’’𑀢𑀺 𑀘 ‘‘𑀓𑀣𑀁 𑀯𑀸𑀳𑀁 ¶ 𑀤𑀤𑀫𑀸𑀦𑁄, 𑀤𑀢𑁆𑀯𑀸𑀧𑀺 𑀘 𑀅𑀢𑁆𑀢𑀫𑀦𑁄 𑀅𑀲𑁆𑀲𑀁 𑀧𑀫𑀼𑀤𑀺𑀢𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄’’𑀢𑀺 𑀘 ‘‘𑀓𑀣𑀁 𑀯𑀸 𑀫𑁂 𑀬𑀸𑀘𑀓𑀸 𑀪𑀯𑁂𑀬𑁆𑀬𑀼𑀁, 𑀉𑀴𑀸𑀭𑁄 𑀘 𑀤𑀸𑀦𑀚𑁆𑀛𑀸𑀲𑀬𑁄’’𑀢𑀺 𑀘 ‘‘𑀓𑀣𑀁 𑀯𑀸𑀳𑀫𑀬𑀸𑀘𑀺𑀢𑁄𑀬𑁂𑀯 𑀬𑀸𑀘𑀓𑀸𑀦𑀁 𑀳𑀤𑀬𑀫𑀜𑁆𑀜𑀸𑀬 𑀤𑀤𑁂𑀬𑁆𑀬’’𑀦𑁆𑀢𑀺 𑀘 ‘‘𑀲𑀢𑀺 𑀥𑀦𑁂 𑀬𑀸𑀘𑀓𑁂 𑀘 𑀅𑀧𑀭𑀺𑀘𑁆𑀘𑀸𑀕𑁄 𑀫𑀳𑀢𑀻 𑀫𑀬𑁆𑀳𑀁 𑀯𑀜𑁆𑀘𑀦𑀸’’𑀢𑀺 𑀘 ‘‘𑀓𑀣𑀁 𑀯𑀸𑀳𑀁 𑀅𑀢𑁆𑀢𑀦𑁄 𑀅𑀗𑁆𑀕𑀸𑀦𑀺 𑀚𑀻𑀯𑀺𑀢𑀁 𑀯𑀸𑀧𑀺 𑀬𑀸𑀘𑀓𑀸𑀦𑀁 𑀧𑀭𑀺𑀘𑁆𑀘𑀚𑁂𑀬𑁆𑀬’’𑀦𑁆𑀢𑀺 𑀘 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁.

𑀅𑀧𑀺𑀘 ‘‘𑀅𑀢𑁆𑀣𑁄 𑀦𑀸𑀫𑀸𑀬𑀁 𑀦𑀺𑀭𑀧𑁂𑀓𑁆𑀔𑀁 𑀤𑀸𑀬𑀓𑀁 𑀅𑀦𑀼𑀕𑀘𑁆𑀙𑀢𑀺 𑀬𑀣𑀸 𑀢𑀁 𑀦𑀺𑀭𑀧𑁂𑀓𑁆𑀔𑀁 𑀔𑁂𑀧𑀓𑀁 𑀓𑀺𑀝𑀓𑁄’’𑀢𑀺 𑀅𑀢𑁆𑀣𑁂 𑀦𑀺𑀭𑀧𑁂𑀓𑁆𑀔𑀢𑀸𑀬 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁. 𑀬𑀸𑀘𑀫𑀸𑀦𑁄 𑀧𑀦 𑀬𑀤𑀺 𑀧𑀺𑀬𑀧𑀼𑀕𑁆𑀕𑀮𑁄 𑀳𑁄𑀢𑀺, ‘‘𑀧𑀺𑀬𑁄 𑀫𑀁 𑀬𑀸𑀘𑀢𑀻’’𑀢𑀺 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁. 𑀅𑀣 𑀉𑀤𑀸𑀲𑀻𑀦𑀧𑀼𑀕𑁆𑀕𑀮𑁄 𑀳𑁄𑀢𑀺, ‘‘𑀅𑀬𑀁 𑀫𑀁 𑀬𑀸𑀘𑀫𑀸𑀦𑁄 𑀅𑀤𑁆𑀥𑀸 𑀇𑀫𑀺𑀦𑀸 𑀧𑀭𑀺𑀘𑁆𑀘𑀸𑀕𑁂𑀦 𑀫𑀺𑀢𑁆𑀢𑁄 𑀳𑁄𑀢𑀻’’𑀢𑀺 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁. 𑀤𑀤𑀦𑁆𑀢𑁄𑀧𑀺 𑀳𑀺 𑀬𑀸𑀘𑀓𑀸𑀦𑀁 𑀧𑀺𑀬𑁄 𑀳𑁄𑀢𑀻𑀢𑀺. 𑀅𑀣 𑀧𑀦 𑀯𑁂𑀭𑀻𑀧𑀼𑀕𑁆𑀕𑀮𑁄 𑀬𑀸𑀘𑀢𑀺, ‘‘𑀧𑀘𑁆𑀘𑀢𑁆𑀣𑀺𑀓𑁄 𑀫𑀁 𑀬𑀸𑀘𑀢𑀺, 𑀅𑀬𑀁 𑀫𑀁 𑀬𑀸𑀘𑀫𑀸𑀦𑁄 𑀅𑀤𑁆𑀥𑀸 𑀇𑀫𑀺𑀦𑀸 𑀧𑀭𑀺𑀘𑁆𑀘𑀸𑀕𑁂𑀦 𑀯𑁂𑀭𑀻𑀧𑀺 𑀧𑀺𑀬𑁄 𑀫𑀺𑀢𑁆𑀢𑁄 𑀳𑁄𑀢𑀻’’𑀢𑀺 𑀯𑀺𑀲𑁂𑀲𑀢𑁄 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁. 𑀏𑀯𑀁 𑀧𑀺𑀬𑀧𑀼𑀕𑁆𑀕𑀮𑁂 𑀯𑀺𑀬 𑀫𑀚𑁆𑀛𑀢𑁆𑀢𑀯𑁂𑀭𑀻𑀧𑀼𑀕𑁆𑀕𑀮𑁂𑀲𑀼𑀧𑀺 𑀫𑁂𑀢𑁆𑀢𑀸𑀧𑀼𑀩𑁆𑀩𑀗𑁆𑀕𑀫𑀁 𑀓𑀭𑀼𑀡𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀯 𑀤𑀸𑀢𑀩𑁆𑀩𑀁.

𑀲𑀘𑁂 𑀧𑀦𑀲𑁆𑀲 𑀘𑀺𑀭𑀓𑀸𑀮𑀧𑀭𑀺𑀪𑀸𑀯𑀺𑀢𑀢𑁆𑀢𑀸 𑀮𑁄𑀪𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀯𑀺𑀲𑀬𑀸 𑀮𑁄𑀪𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁂𑀦 𑀩𑁄𑀥𑀺𑀲𑀢𑁆𑀢𑀧𑀝𑀺𑀜𑁆𑀜𑁂𑀦 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 ‘‘𑀦𑀦𑀼 𑀢𑀬𑀸 𑀲𑀧𑁆𑀧𑀼𑀭𑀺𑀲 𑀲𑀫𑁆𑀩𑁄𑀥𑀸𑀬 𑀅𑀪𑀺𑀦𑀻𑀳𑀸𑀭𑀁 𑀓𑀭𑁄𑀦𑁆𑀢𑁂𑀦 𑀲𑀩𑁆𑀩𑀲𑀢𑁆𑀢𑀸𑀦𑀁 𑀉𑀧𑀓𑀸𑀭𑀢𑁆𑀣𑀸𑀬 𑀅𑀬𑀁 𑀓𑀸𑀬𑁄 𑀦𑀺𑀲𑁆𑀲𑀝𑁆𑀞𑁄, 𑀢𑀧𑁆𑀧𑀭𑀺𑀘𑁆𑀘𑀸𑀕𑀫𑀬𑀜𑁆𑀘 𑀧𑀼𑀜𑁆𑀜𑀁, 𑀢𑀢𑁆𑀣 𑀦𑀸𑀫 𑀢𑁂 𑀩𑀸𑀳𑀺𑀭𑁂𑀧𑀺 𑀯𑀢𑁆𑀣𑀼𑀲𑁆𑀫𑀺𑀁 𑀅𑀢𑀺𑀲𑀗𑁆𑀕𑀧𑁆𑀧𑀯𑀢𑁆𑀢𑀺 ¶ 𑀳𑀢𑁆𑀣𑀺𑀲𑀺𑀦𑀸𑀦𑀲𑀤𑀺𑀲𑀻 𑀳𑁄𑀢𑀺, 𑀢𑀲𑁆𑀫𑀸 𑀢𑀬𑀸 𑀦 𑀓𑀢𑁆𑀣𑀘𑀺 𑀲𑀗𑁆𑀕𑁄 𑀉𑀧𑁆𑀧𑀸𑀤𑁂𑀢𑀩𑁆𑀩𑁄. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀫𑀳𑀢𑁄 𑀪𑁂𑀲𑀚𑁆𑀚𑀭𑀼𑀓𑁆𑀔𑀲𑁆𑀲 𑀢𑀺𑀝𑁆𑀞𑀢𑁄 𑀫𑀽𑀮𑀁 𑀫𑀽𑀮𑀢𑁆𑀣𑀺𑀓𑀸 𑀳𑀭𑀦𑁆𑀢𑀺, 𑀧𑀧𑀝𑀺𑀓𑀁, 𑀢𑀘𑀁, 𑀔𑀦𑁆𑀥𑀁, 𑀯𑀺𑀝𑀧𑀁, 𑀲𑀸𑀭𑀁, 𑀲𑀸𑀔𑀁, 𑀧𑀮𑀸𑀲𑀁, 𑀧𑀼𑀧𑁆𑀨𑀁, 𑀨𑀮𑀁 𑀨𑀮𑀢𑁆𑀣𑀺𑀓𑀸 𑀳𑀭𑀦𑁆𑀢𑀺, 𑀦 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 ‘𑀫𑀬𑁆𑀳𑀁 𑀲𑀦𑁆𑀢𑀓𑀁 𑀏𑀢𑁂 𑀳𑀭𑀦𑁆𑀢𑀻’’𑀢𑀺 𑀯𑀺𑀢𑀓𑁆𑀓𑀲𑀫𑀼𑀤𑀸𑀘𑀸𑀭𑁄 𑀳𑁄𑀢𑀺, 𑀏𑀯𑀫𑁂𑀯 𑀲𑀩𑁆𑀩𑀮𑁄𑀓𑀳𑀺𑀢𑀸𑀬 𑀉𑀲𑁆𑀲𑀼𑀓𑁆𑀓𑀫𑀸𑀧𑀚𑁆𑀚𑀦𑁆𑀢𑁂𑀦 𑀫𑀬𑀸 𑀫𑀳𑀸𑀤𑀼𑀓𑁆𑀔𑁂 𑀅𑀓𑀢𑀜𑁆𑀜𑀼𑀓𑁂 𑀦𑀺𑀘𑁆𑀘𑀸𑀲𑀼𑀘𑀺𑀫𑁆𑀳𑀺 𑀓𑀸𑀬𑁂 𑀧𑀭𑁂𑀲𑀁 𑀉𑀧𑀓𑀸𑀭𑀸𑀬 𑀯𑀺𑀦𑀺𑀬𑀼𑀚𑁆𑀚𑀫𑀸𑀦𑁂 𑀅𑀡𑀼𑀫𑀢𑁆𑀢𑁄𑀧𑀺 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁄 𑀦 𑀉𑀧𑁆𑀧𑀸𑀤𑁂𑀢𑀩𑁆𑀩𑁄, 𑀓𑁄 𑀯𑀸 𑀏𑀢𑁆𑀣 𑀯𑀺𑀲𑁂𑀲𑁄 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 𑀏𑀓𑀦𑁆𑀢𑀪𑁂𑀤𑀦𑀯𑀺𑀓𑀺𑀭𑀡𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑁂𑀲𑀼, 𑀓𑁂𑀯𑀮𑀁 𑀧𑀦 𑀲𑀫𑁆𑀫𑁄𑀳𑀯𑀺𑀚𑀫𑁆𑀪𑀺𑀢𑀫𑁂𑀢𑀁, 𑀬𑀤𑀺𑀤𑀁 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀅𑀪𑀺𑀦𑀺𑀯𑁂𑀲𑁄. 𑀢𑀲𑁆𑀫𑀸 𑀩𑀸𑀳𑀺𑀭𑁂𑀲𑀼 𑀯𑀺𑀬 𑀅𑀚𑁆𑀛𑀢𑁆𑀢𑀺𑀓𑁂𑀲𑀼𑀧𑀺 𑀓𑀭𑀘𑀭𑀡𑀦𑀬𑀦𑀸𑀤𑀻𑀲𑀼 ¶ , 𑀫𑀁𑀲𑀸𑀤𑀻𑀲𑀼 𑀘 𑀅𑀦𑀧𑁂𑀓𑁆𑀔𑁂𑀦 𑀳𑀼𑀢𑁆𑀯𑀸 ‘𑀢𑀁𑀢𑀤𑀢𑁆𑀣𑀺𑀓𑀸 𑀳𑀭𑀦𑁆𑀢𑀽’𑀢𑀺 𑀦𑀺𑀲𑁆𑀲𑀝𑁆𑀞𑀘𑀺𑀢𑁆𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀏𑀯𑀁 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑁄 𑀘𑀲𑁆𑀲 𑀩𑁄𑀥𑀸𑀬 𑀧𑀳𑀺𑀢𑀢𑁆𑀢𑀲𑁆𑀲 𑀓𑀸𑀬𑀚𑀻𑀯𑀺𑀢𑁂𑀲𑀼 𑀦𑀺𑀭𑀧𑁂𑀓𑁆𑀔𑀲𑁆𑀲 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀸𑀦𑀺 𑀲𑀼𑀯𑀺𑀲𑀼𑀤𑁆𑀥𑀸𑀦𑀺 𑀳𑁄𑀦𑁆𑀢𑀺. 𑀲𑁄 𑀯𑀺𑀲𑀼𑀤𑁆𑀥𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀦𑁆𑀢𑁄 𑀯𑀺𑀲𑀼𑀤𑁆𑀥𑀸𑀚𑀻𑀯𑁄 𑀜𑀸𑀬𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑁄, 𑀆𑀬𑀸𑀧𑀸𑀬𑀼𑀧𑀸𑀬𑀓𑁄𑀲𑀮𑁆𑀮𑀲𑀫𑀦𑁆𑀦𑀸𑀕𑀫𑁂𑀦 ¶ 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑁂𑀦, 𑀅𑀪𑀬𑀤𑀸𑀦𑀲𑀤𑁆𑀥𑀫𑁆𑀫𑀤𑀸𑀦𑁂𑀳𑀺 𑀘 𑀲𑀩𑁆𑀩𑀲𑀢𑁆𑀢𑁂 𑀅𑀦𑀼𑀕𑁆𑀕𑀡𑁆𑀳𑀺𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀻𑀢𑀺. 𑀅𑀬𑀁 𑀢𑀸𑀯 𑀤𑀸𑀦𑀧𑀸𑀭𑀫𑀺𑀬𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀬𑁄.

𑀲𑀻𑀮𑀧𑀸𑀭𑀫𑀺𑀬𑀁 𑀧𑀦 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑁋 𑀇𑀤𑀜𑁆𑀳𑀺 𑀲𑀻𑀮𑀁 𑀦𑀸𑀫 𑀕𑀗𑁆𑀕𑁄𑀤𑀓𑀸𑀤𑀻𑀳𑀺 𑀯𑀺𑀲𑁄𑀥𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀲𑁆𑀲 𑀤𑁄𑀲𑀫𑀮𑀲𑁆𑀲 𑀯𑀺𑀓𑁆𑀔𑀸𑀮𑀦𑀚𑀮𑀁, 𑀳𑀭𑀺𑀘𑀦𑁆𑀤𑀦𑀸𑀤𑀻𑀳𑀺 𑀯𑀺𑀦𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀭𑀸𑀕𑀸𑀤𑀺𑀧𑀭𑀺𑀴𑀸𑀳𑀯𑀺𑀦𑀬𑀦𑀁, 𑀳𑀸𑀭𑀫𑀓𑀼𑀝𑀓𑀼𑀡𑁆𑀟𑀮𑀸𑀤𑀻𑀳𑀺 𑀧𑀘𑀼𑀭𑀚𑀦𑀸𑀮𑀗𑁆𑀓𑀸𑀭𑁂𑀳𑀺 𑀅𑀲𑀸𑀥𑀸𑀭𑀡𑁄 𑀲𑀸𑀥𑀽𑀦𑀁 ¶ 𑀅𑀮𑀗𑁆𑀓𑀸𑀭𑀯𑀺𑀲𑁂𑀲𑁄, 𑀲𑀩𑁆𑀩𑀤𑀺𑀲𑀸𑀯𑀸𑀬𑀦𑀢𑁄 𑀅𑀓𑀺𑀢𑁆𑀢𑀺𑀫𑁄, 𑀲𑀩𑁆𑀩𑀓𑀸𑀮𑀸𑀦𑀼𑀭𑀽𑀧𑁄 𑀘 𑀲𑀼𑀭𑀪𑀺𑀕𑀦𑁆𑀥𑁄, 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀤𑀻𑀳𑀺 𑀤𑁂𑀯𑀢𑀸𑀳𑀺 𑀘 𑀯𑀦𑁆𑀤𑀦𑀻𑀬𑀸𑀤𑀺𑀪𑀸𑀯𑀸𑀯𑀳𑀦𑀢𑁄 𑀧𑀭𑀫𑁄 𑀯𑀲𑀻𑀓𑀭𑀡𑀫𑀦𑁆𑀢𑁄, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀺 𑀤𑁂𑀯𑀮𑁄𑀓𑀸𑀭𑁄𑀳𑀦𑀲𑁄𑀧𑀸𑀦𑀧𑀦𑁆𑀢𑀺, 𑀛𑀸𑀦𑀸𑀪𑀺𑀜𑁆𑀜𑀸𑀦𑀁 𑀅𑀥𑀺𑀕𑀫𑀼𑀧𑀸𑀬𑁄, 𑀦𑀺𑀩𑁆𑀩𑀸𑀦𑀫𑀳𑀸𑀦𑀕𑀭𑀲𑁆𑀲 𑀲𑀫𑁆𑀧𑀸𑀧𑀓𑀫𑀕𑁆𑀕𑁄, 𑀲𑀸𑀯𑀓𑀩𑁄𑀥𑀺𑀧𑀘𑁆𑀘𑁂𑀓𑀩𑁄𑀥𑀺𑀲𑀫𑁆𑀫𑀸𑀲𑀫𑁆𑀩𑁄𑀥𑀻𑀦𑀁 𑀧𑀢𑀺𑀝𑁆𑀞𑀸𑀦𑀪𑀽𑀫𑀺, 𑀬𑀁 𑀬𑀁 𑀯𑀸 𑀧𑀦𑀺𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀁, 𑀢𑀲𑁆𑀲 𑀢𑀲𑁆𑀲 𑀲𑀫𑀺𑀚𑁆𑀛𑀦𑀽𑀧𑀸𑀬𑀪𑀸𑀯𑀢𑁄 𑀘𑀺𑀦𑁆𑀢𑀸𑀫𑀡𑀺𑀓𑀧𑁆𑀧𑀭𑀼𑀓𑁆𑀔𑀸𑀤𑀺𑀓𑁂 𑀘 𑀅𑀢𑀺𑀲𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀇𑀚𑁆𑀛𑀢𑀺 𑀪𑀺𑀓𑁆𑀔𑀯𑁂 𑀲𑀻𑀮𑀯𑀢𑁄 𑀘𑁂𑀢𑁄𑀧𑀡𑀺𑀥𑀺 𑀯𑀺𑀲𑀼𑀤𑁆𑀥𑀢𑁆𑀢𑀸’’𑀢𑀺 (𑀅. 𑀦𑀺. 𑁮.𑁩𑁫). 𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀆𑀓𑀗𑁆𑀔𑁂𑀬𑁆𑀬 𑀘𑁂 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑁄 𑀘 𑀅𑀲𑁆𑀲𑀁 𑀫𑀦𑀸𑀧𑁄 𑀘 𑀕𑀭𑀼 𑀘 𑀪𑀸𑀯𑀦𑀻𑀬𑁄 𑀘𑀸𑀢𑀺, 𑀲𑀻𑀮𑁂𑀲𑁆𑀯𑁂𑀯𑀲𑁆𑀲 𑀧𑀭𑀺𑀧𑀽𑀭𑀓𑀸𑀭𑀻’’𑀢𑀺𑀆𑀤𑀺 (𑀫. 𑀦𑀺. 𑁧.𑁬𑁧), 𑀢𑀣𑀸 ‘‘𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁆𑀣𑀸𑀦𑀺 𑀔𑁄 𑀆𑀦𑀦𑁆𑀤 𑀓𑀼𑀲𑀮𑀸𑀦𑀺 𑀲𑀻𑀮𑀸𑀦𑀻’’𑀢𑀺 (𑀅. 𑀦𑀺. 𑁧𑁦.𑁧; 𑁧𑁧.𑁧), ‘‘𑀧𑀜𑁆𑀘𑀺𑀫𑁂 𑀕𑀳𑀧𑀢𑀬𑁄 𑀆𑀦𑀺𑀲𑀁𑀲𑀸 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬𑀸’’𑀢𑀺 (𑀤𑀻. 𑀦𑀺. 𑁨.𑁧𑁫𑁦; 𑀉𑀤𑀸. 𑁭𑁬; 𑀫𑀳𑀸𑀯. 𑁧𑁮𑁫) 𑀲𑀼𑀢𑁆𑀢𑀸𑀦𑀜𑁆𑀘 𑀯𑀲𑁂𑀦 𑀲𑀻𑀮𑀲𑁆𑀲 𑀕𑀼𑀡𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸, 𑀢𑀣𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀸𑀤𑀻𑀦𑀁 (𑀅. 𑀦𑀺. 𑁭.𑁭𑁨) 𑀯𑀲𑁂𑀦 𑀲𑀻𑀮𑀯𑀺𑀭𑀳𑁂 𑀆𑀤𑀻𑀦𑀯𑀸.

𑀧𑀻𑀢𑀺𑀲𑁄𑀫𑀦𑀲𑁆𑀲𑀦𑀺𑀫𑀺𑀢𑁆𑀢𑀢𑁄, 𑀅𑀢𑁆𑀢𑀸𑀦𑀼𑀯𑀸𑀤𑀧𑀭𑀸𑀦𑀼𑀯𑀸𑀤𑀤𑀡𑁆𑀟𑀤𑀼𑀕𑁆𑀕𑀢𑀺𑀪𑀬𑀸𑀪𑀸𑀯𑀢𑁄, 𑀯𑀺𑀜𑁆𑀜𑀽𑀳𑀺 𑀧𑀸𑀲𑀁𑀲𑀪𑀸𑀯𑀢𑁄, 𑀅𑀯𑀺𑀧𑁆𑀧𑀝𑀺𑀲𑀸𑀭𑀳𑁂𑀢𑀼𑀢𑁄, 𑀲𑁄𑀢𑁆𑀣𑀺𑀝𑁆𑀞𑀸𑀦𑀢𑁄 ¶ , 𑀅𑀪𑀺𑀚𑀦𑀲𑀸𑀧𑀢𑁂𑀬𑁆𑀬𑀸𑀥𑀺𑀧𑀢𑁂𑀬𑁆𑀬𑀸𑀬𑀼𑀭𑀽𑀧𑀝𑁆𑀞𑀸𑀦𑀩𑀦𑁆𑀥𑀼𑀫𑀺𑀢𑁆𑀢𑀲𑀫𑁆𑀧𑀢𑁆𑀢𑀻𑀦𑀁 ¶ 𑀅𑀢𑀺𑀲𑀬𑀦𑀢𑁄 𑀘 𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁. 𑀲𑀻𑀮𑀯𑀢𑁄 𑀳𑀺 𑀅𑀢𑁆𑀢𑀦𑁄 𑀲𑀻𑀮𑀲𑀫𑁆𑀧𑀤𑀸𑀳𑁂𑀢𑀼 𑀫𑀳𑀦𑁆𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺 ‘‘𑀓𑀢𑀁 𑀯𑀢 𑀫𑀬𑀸 𑀓𑀼𑀲𑀮𑀁, 𑀓𑀢𑀁 𑀓𑀮𑁆𑀬𑀸𑀡𑀁, 𑀓𑀢𑀁 𑀪𑀻𑀭𑀼𑀢𑁆𑀢𑀸𑀡’’𑀦𑁆𑀢𑀺. 𑀢𑀣𑀸 𑀲𑀻𑀮𑀯𑀢𑁄 𑀅𑀢𑁆𑀢𑀸 𑀦 𑀉𑀧𑀯𑀤𑀢𑀺, 𑀦 𑀧𑀭𑁂 𑀯𑀺𑀜𑁆𑀜𑀽, 𑀤𑀡𑁆𑀟𑀤𑀼𑀕𑁆𑀕𑀢𑀺𑀪𑀬𑀸𑀦𑀁 𑀲𑀫𑁆𑀪𑀯𑁄𑀬𑁂𑀯 𑀦𑀢𑁆𑀣𑀺, ‘‘𑀲𑀻𑀮𑀯𑀸 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑀮𑁆𑀬𑀸𑀡𑀥𑀫𑁆𑀫𑁄’’𑀢𑀺 𑀯𑀺𑀜𑁆𑀜𑀽𑀦𑀁 𑀧𑀸𑀲𑀁𑀲𑁄 𑀳𑁄𑀢𑀺. 𑀢𑀣𑀸 𑀲𑀻𑀮𑀯𑀢𑁄 𑀬𑁆𑀯𑀸𑀬𑀁 ‘‘𑀓𑀢𑀁 𑀯𑀢 𑀫𑀬𑀸 𑀧𑀸𑀧𑀁, 𑀓𑀢𑀁 𑀮𑀼𑀤𑁆𑀤𑀁, 𑀓𑀢𑀁 𑀓𑀺𑀩𑁆𑀩𑀺𑀲’’𑀦𑁆𑀢𑀺 𑀤𑀼𑀲𑁆𑀲𑀻𑀮𑀲𑁆𑀲 𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀦 𑀳𑁄𑀢𑀺. 𑀲𑀻𑀮𑀜𑁆𑀘 𑀦𑀸𑀫𑁂𑀢𑀁 𑀅𑀧𑁆𑀧𑀫𑀸𑀤𑀸𑀥𑀺𑀝𑁆𑀞𑀸𑀦𑀢𑁄, 𑀪𑁄𑀕𑀩𑁆𑀬𑀲𑀦𑀸𑀤𑀺𑀧𑀭𑀺𑀳𑀸𑀭𑀫𑀼𑀔𑁂𑀦 𑀫𑀳𑀢𑁄 𑀅𑀢𑁆𑀣𑀲𑁆𑀲 𑀲𑀸𑀥𑀦𑀢𑁄, 𑀫𑀗𑁆𑀕𑀮𑀪𑀸𑀯𑀢𑁄 𑀘 𑀧𑀭𑀫𑀁 𑀲𑁄𑀢𑁆𑀣𑀺𑀝𑁆𑀞𑀸𑀦𑀁, 𑀦𑀺𑀳𑀻𑀦𑀚𑀘𑁆𑀘𑁄𑀧𑀺 ¶ 𑀲𑀻𑀮𑀯𑀸 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀤𑀻𑀦𑀁 𑀧𑀽𑀚𑀦𑀻𑀬𑁄 𑀳𑁄𑀢𑀻𑀢𑀺 𑀓𑀼𑀮𑀲𑀫𑁆𑀧𑀢𑁆𑀢𑀺𑀁 𑀅𑀢𑀺𑀲𑁂𑀢𑀺 𑀲𑀻𑀮𑀲𑀫𑁆𑀧𑀤𑀸, ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀫𑀳𑀸𑀭𑀸𑀚, 𑀇𑀥 𑀢𑁂 𑀅𑀲𑁆𑀲 𑀧𑀼𑀭𑀺𑀲𑁄 𑀤𑀸𑀲𑁄 𑀓𑀫𑁆𑀫𑀓𑀭𑁄’’𑀢𑀺𑀆𑀤𑀺 (𑀤𑀻. 𑀦𑀺. 𑁧.𑁧𑁮𑁩) 𑀯𑀘𑀦𑀜𑁆𑀘𑁂𑀢𑁆𑀣 𑀲𑀸𑀥𑀓𑀁. 𑀘𑁄𑀭𑀸𑀤𑀻𑀳𑀺 𑀅𑀲𑀸𑀥𑀸𑀭𑀡𑀢𑁄, 𑀧𑀭𑀮𑁄𑀓𑀸𑀦𑀼𑀕𑀫𑀦𑀢𑁄, 𑀫𑀳𑀧𑁆𑀨𑀮𑀪𑀸𑀯𑀢𑁄, 𑀲𑀫𑀣𑀸𑀤𑀺𑀕𑀼𑀡𑀸𑀥𑀺𑀝𑁆𑀞𑀸𑀦𑀢𑁄 𑀘 𑀩𑀸𑀳𑀺𑀭𑀥𑀦𑀁 𑀅𑀢𑀺𑀲𑁂𑀢𑀺 𑀲𑀻𑀮𑀁, 𑀧𑀭𑀫𑀲𑁆𑀲 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀔𑀢𑁆𑀢𑀺𑀬𑀸𑀤𑀻𑀦𑀁 𑀇𑀲𑁆𑀲𑀭𑀺𑀬𑀁 𑀅𑀢𑀺𑀲𑁂𑀢𑀺 𑀲𑀻𑀮𑀁. 𑀲𑀻𑀮𑀦𑀺𑀫𑀺𑀢𑁆𑀢𑀜𑁆𑀳𑀺 𑀢𑀁𑀢𑀁𑀲𑀢𑁆𑀢𑀦𑀺𑀓𑀸𑀬𑁂𑀲𑀼 𑀲𑀢𑁆𑀢𑀸𑀦𑀁 𑀇𑀲𑁆𑀲𑀭𑀺𑀬𑀁 𑀯𑀲𑁆𑀲𑀲𑀢𑀤𑀻𑀖𑀧𑁆𑀧𑀫𑀸𑀡𑀢𑁄 𑀚𑀻𑀯𑀺𑀢𑀢𑁄 𑀏𑀓𑀸𑀳𑀫𑁆𑀧𑀺 𑀲𑀻𑀮𑀯𑀢𑁄 𑀚𑀻𑀯𑀺𑀢𑀲𑁆𑀲 𑀯𑀺𑀲𑀺𑀝𑁆𑀞𑀢𑀸𑀯𑀘𑀦𑀢𑁄, 𑀲𑀢𑀺 𑀘 𑀚𑀻𑀯𑀺𑀢𑁂 𑀲𑀺𑀓𑁆𑀔𑀸𑀦𑀺𑀓𑁆𑀔𑁂𑀧𑀲𑁆𑀲 𑀫𑀭𑀡𑀢𑀸𑀯𑀘𑀦𑀢𑁄 𑀲𑀻𑀮𑀁 𑀚𑀻𑀯𑀺𑀢𑀢𑁄 𑀯𑀺𑀲𑀺𑀝𑁆𑀞𑀢𑀭𑀁. 𑀯𑁂𑀭𑀻𑀦𑀫𑁆𑀧𑀺 𑀫𑀦𑀼𑀜𑁆𑀜𑀪𑀸𑀯𑀸𑀯𑀳𑀦𑀢𑁄, 𑀚𑀭𑀸𑀭𑁄𑀕𑀯𑀺𑀧𑀢𑁆𑀢𑀻𑀳𑀺 𑀅𑀦𑀪𑀺𑀪𑀯𑀦𑀻𑀬𑀢𑁄 𑀘 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀅𑀢𑀺𑀲𑁂𑀢𑀺 𑀲𑀻𑀮𑀁. 𑀧𑀸𑀲𑀸𑀤𑀳𑀫𑁆𑀫𑀺𑀬𑀸𑀤𑀺𑀝𑁆𑀞𑀸𑀦𑀯𑀺𑀲𑁂𑀲𑁂, 𑀭𑀸𑀚𑀬𑀼𑀯𑀭𑀸𑀚𑀲𑁂𑀦𑀸𑀧𑀢𑀺𑀆𑀤𑀺𑀝𑁆𑀞𑀸𑀦𑀯𑀺𑀲𑁂𑀲𑁂 𑀘 𑀅𑀢𑀺𑀲𑁂𑀢𑀺 𑀲𑀻𑀮𑀁 𑀲𑀼𑀔𑀯𑀺𑀲𑁂𑀲𑀸𑀥𑀺𑀝𑁆𑀞𑀸𑀦𑀪𑀸𑀯𑀢𑁄 ¶ . 𑀲𑀪𑀸𑀯𑀲𑀺𑀦𑀺𑀤𑁆𑀥𑁂 𑀲𑀦𑁆𑀢𑀺𑀓𑀸𑀯𑀘𑀭𑁂𑀧𑀺 𑀩𑀦𑁆𑀥𑀼𑀚𑀦𑁂 𑀫𑀺𑀢𑁆𑀢𑀚𑀦𑁂 𑀘 𑀅𑀢𑀺𑀲𑁂𑀢𑀺 𑀏𑀓𑀦𑁆𑀢𑀳𑀺𑀢𑀲𑀫𑁆𑀧𑀸𑀤𑀦𑀢𑁄, 𑀧𑀭𑀮𑁄𑀓𑀸𑀦𑀼𑀕𑀫𑀦𑀢𑁄 𑀘. ‘‘𑀦 𑀢𑀁 𑀫𑀸𑀢𑀸 𑀧𑀺𑀢𑀸 𑀓𑀬𑀺𑀭𑀸’’𑀢𑀺𑀆𑀤𑀺 (𑀥. 𑀧. 𑁪𑁩) 𑀯𑀘𑀦𑀜𑁆𑀘𑁂𑀢𑁆𑀣 𑀲𑀸𑀥𑀓𑀁. 𑀢𑀣𑀸 𑀳𑀢𑁆𑀣𑀺𑀅𑀲𑁆𑀲𑀭𑀣𑀸𑀤𑀺𑀪𑁂𑀤𑁂𑀳𑀺, 𑀫𑀦𑁆𑀢𑀸𑀕𑀤𑀲𑁄𑀢𑁆𑀣𑀸𑀦𑀧𑁆𑀧𑀬𑁄𑀕𑁂𑀳𑀺 𑀘 𑀤𑀼𑀭𑀸𑀭𑀓𑁆𑀔𑀁 𑀅𑀢𑁆𑀢𑀸𑀦𑀁 𑀆𑀭𑀓𑁆𑀔𑀪𑀸𑀯𑁂𑀦 𑀲𑀻𑀮𑀫𑁂𑀯 𑀯𑀺𑀲𑀺𑀝𑁆𑀞𑀢𑀭𑀁 𑀅𑀢𑁆𑀢𑀸𑀥𑀻𑀦𑀢𑁄, 𑀅𑀧𑀭𑀸𑀥𑀻𑀦𑀢𑁄, 𑀫𑀳𑀸𑀯𑀺𑀲𑀬𑀢𑁄 𑀘. 𑀢𑁂𑀦𑁂𑀯𑀸𑀳 ‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺’’𑀦𑁆𑀢𑀺𑀆𑀤𑀺 (𑀚𑀸. 𑁧.𑁯.𑁧𑁦𑁨). 𑀏𑀯𑀫𑀦𑁂𑀓𑀕𑀼𑀡𑀲𑀫𑀦𑁆𑀦𑀸𑀕𑀢𑀁 𑀲𑀻𑀮𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀧𑀭𑀺𑀧𑀼𑀡𑁆𑀡𑀸 𑀘𑁂𑀯 𑀲𑀻𑀮𑀲𑀫𑁆𑀧𑀤𑀸 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺 𑀅𑀧𑀭𑀺𑀲𑀼𑀤𑁆𑀥𑀸 𑀘 𑀧𑀸𑀭𑀺𑀲𑀼𑀤𑁆𑀥𑀺𑀁.

𑀲𑀘𑁂 ¶ 𑀧𑀦𑀲𑁆𑀲 𑀤𑀻𑀖𑀭𑀢𑁆𑀢𑀁 𑀧𑀭𑀺𑀘𑀬𑁂𑀦 𑀲𑀻𑀮𑀧𑀝𑀺𑀧𑀓𑁆𑀔𑀸 𑀥𑀫𑁆𑀫𑀸 𑀤𑁄𑀲𑀸𑀤𑀬𑁄 𑀅𑀦𑁆𑀢𑀭𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁂𑀦 𑀩𑁄𑀥𑀺𑀲𑀢𑁆𑀢𑀧𑀝𑀺𑀜𑁆𑀜𑁂𑀦 𑀏𑀯𑀁 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 ‘‘𑀦𑀦𑀼 𑀢𑀬𑀸 𑀲𑀫𑁆𑀩𑁄𑀥𑀸𑀬 𑀧𑀡𑀺𑀥𑀸𑀦𑀁 𑀓𑀢𑀁, 𑀲𑀻𑀮𑀯𑀺𑀓𑀮𑁂𑀦 𑀘 𑀦 𑀲𑀓𑁆𑀓𑀸 𑀮𑁄𑀓𑀺𑀬𑀸𑀧𑀺 𑀲𑀫𑁆𑀧𑀢𑁆𑀢𑀺𑀬𑁄 𑀧𑀸𑀧𑀼𑀡𑀺𑀢𑀼𑀁, 𑀧𑀕𑁂𑀯 𑀮𑁄𑀓𑀼𑀢𑁆𑀢𑀭𑀸, 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀦𑀁 𑀧𑀦 𑀅𑀕𑁆𑀕𑀪𑀽𑀢𑀸𑀬 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀅𑀥𑀺𑀝𑁆𑀞𑀸𑀦𑀪𑀽𑀢𑁂𑀦 𑀲𑀻𑀮𑁂𑀦 𑀧𑀭𑀫𑀼𑀓𑁆𑀓𑀁𑀲𑀕𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀢𑀲𑁆𑀫𑀸 ‘𑀓𑀺𑀓𑀻𑀯 𑀅𑀡𑁆𑀟’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁧𑁯; 𑀤𑀻. 𑀦𑀺. 𑀅𑀝𑁆𑀞. 𑁧.𑁭) 𑀯𑀼𑀢𑁆𑀢𑀦𑀬𑁂𑀦 𑀲𑀫𑁆𑀫𑀸 𑀲𑀻𑀮𑀁 𑀧𑀭𑀺𑀭𑀓𑁆𑀔𑀦𑁆𑀢𑁂𑀦 𑀲𑀼𑀝𑁆𑀞𑀼 𑀢𑀬𑀸 𑀧𑁂𑀲𑀮𑁂𑀦 𑀪𑀯𑀺𑀢𑀩𑁆𑀩𑀁. 𑀅𑀧𑀺 𑀘 𑀢𑀬𑀸 𑀥𑀫𑁆𑀫𑀤𑁂𑀲𑀦𑀸𑀬 𑀬𑀸𑀦𑀢𑁆𑀢𑀬𑁂 𑀲𑀢𑁆𑀢𑀸𑀦𑀁 𑀅𑀯𑀢𑀸𑀭𑀡𑀧𑀭𑀺𑀧𑀸𑀘𑀦𑀸𑀦𑀺 𑀓𑀸𑀢𑀩𑁆𑀩𑀸𑀦𑀺, 𑀲𑀻𑀮𑀯𑀺𑀓𑀮𑀲𑁆𑀲 𑀘 𑀯𑀘𑀦𑀁 𑀦 𑀧𑀘𑁆𑀘𑁂𑀢𑀩𑁆𑀩𑀁 𑀳𑁄𑀢𑀺 𑀅𑀲𑀧𑁆𑀧𑀸𑀬𑀸𑀳𑀸𑀭𑀯𑀺𑀘𑀸𑀭𑀲𑁆𑀲 𑀯𑀺𑀬 𑀯𑁂𑀚𑁆𑀚𑀲𑁆𑀲 𑀢𑀺𑀓𑀺𑀘𑁆𑀙𑀦𑀁, 𑀢𑀲𑁆𑀫𑀸 𑀓𑀣𑀸𑀳𑀁 𑀲𑀤𑁆𑀥𑁂𑀬𑁆𑀬𑁄 𑀳𑀼𑀢𑁆𑀯𑀸 𑀲𑀢𑁆𑀢𑀸𑀦𑀁 𑀅𑀯𑀢𑀸𑀭𑀡𑀧𑀭𑀺𑀧𑀸𑀘𑀦𑀸𑀦𑀺 𑀓𑀭𑁂𑀬𑁆𑀬’’𑀦𑁆𑀢𑀺 𑀲𑀪𑀸𑀯𑀧𑀭𑀺𑀲𑀼𑀤𑁆𑀥𑀲𑀻𑀮𑁂𑀦 𑀪𑀯𑀺𑀢𑀩𑁆𑀩𑀁. 𑀓𑀺𑀜𑁆𑀘 ‘‘𑀛𑀸𑀦𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑁄𑀕𑁂𑀦 𑀫𑁂 𑀲𑀢𑁆𑀢𑀸𑀦𑀁 𑀉𑀧𑀓𑀸𑀭𑀓𑀭𑀡𑀲𑀫𑀢𑁆𑀣𑀢𑀸 ¶ , 𑀧𑀜𑁆𑀜𑀸𑀧𑀸𑀭𑀫𑀻𑀆𑀤𑀺𑀧𑀭𑀺𑀧𑀽𑀭𑀡𑀜𑁆𑀘, 𑀛𑀸𑀦𑀸𑀤𑀬𑁄 𑀘 𑀕𑀼𑀡𑀸 𑀲𑀻𑀮𑀧𑀸𑀭𑀺𑀲𑀼𑀤𑁆𑀥𑀺𑀁 𑀯𑀺𑀦𑀸 𑀦 𑀲𑀫𑁆𑀪𑀯𑀦𑁆𑀢𑀻’’𑀢𑀺 𑀲𑀫𑁆𑀫𑀤𑁂𑀯 𑀲𑀻𑀮𑀁 𑀧𑀭𑀺𑀲𑁄𑀥𑁂𑀢𑀩𑁆𑀩𑀁.

𑀢𑀣𑀸 ¶ ‘‘𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄 𑀭𑀚𑁄𑀧𑀣𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁯𑁧; 𑀫. 𑀦𑀺. 𑁧.𑁨𑁯𑁧; 𑀲𑀁. 𑀦𑀺. 𑁨.𑁧𑁫𑁪; 𑀫. 𑀦𑀺. 𑁨.𑁧𑁦) 𑀖𑀭𑀸𑀯𑀸𑀲𑁂 ‘‘𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩𑁪; 𑀧𑀸𑀘𑀺. 𑁪𑁧𑁭; 𑀫𑀳𑀸𑀦𑀺. 𑁩, 𑁬;), ‘‘𑀫𑀸𑀢𑀸𑀧𑀺 𑀧𑀼𑀢𑁆𑀢𑁂𑀦 𑀯𑀺𑀯𑀤𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁬𑁮, 𑁧𑁭𑁮) 𑀘 𑀓𑀸𑀫𑁂𑀲𑀼 ‘‘𑀲𑁂𑀬𑁆𑀬𑀣𑀸𑀧𑀺 𑀧𑀼𑀭𑀺𑀲𑁄 𑀇𑀡𑀁 𑀆𑀤𑀸𑀬 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁧𑁮) 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀲𑀼 𑀆𑀤𑀻𑀦𑀯𑀤𑀲𑁆𑀲𑀦𑀧𑀼𑀩𑁆𑀩𑀗𑁆𑀕𑀫𑀸 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 ‘‘𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧.𑁯𑁧; 𑀲𑀁. 𑀦𑀺. 𑁧.𑁧𑁫𑁪) 𑀧𑀩𑁆𑀩𑀚𑁆𑀚𑀸𑀤𑀻𑀲𑀼 𑀆𑀦𑀺𑀲𑀁𑀲𑀧𑀝𑀺𑀲𑀗𑁆𑀔𑀸𑀯𑀲𑁂𑀦 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀬𑀁 𑀧𑀘𑁆𑀘𑀯𑁂𑀓𑁆𑀔𑀡𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀤𑀼𑀓𑁆𑀔𑀓𑁆𑀔𑀦𑁆𑀥 (𑀫. 𑀦𑀺. 𑁧.𑁧𑁬𑁩) 𑀯𑀻𑀫𑀁𑀲𑀲𑀼𑀢𑁆𑀢𑀸𑀤𑀺 (𑀫. 𑀦𑀺. 𑁧.𑁪𑁮𑁭) 𑀯𑀲𑁂𑀦 𑀤𑀼𑀓𑁆𑀔𑀓𑁆𑀔𑀦𑁆𑀥𑀆𑀲𑀺𑀯𑀺𑀲𑁄𑀧𑀫𑀲𑀼𑀢𑁆𑀢𑀸𑀤𑀺𑀯𑀲𑁂𑀦 (𑀘𑀭𑀺𑀬𑀸. 𑀅𑀝𑁆𑀞. 𑀧𑀓𑀺𑀡𑁆𑀡𑀓𑀓𑀣𑀸𑀬𑀁) 𑀯𑁂𑀤𑀺𑀢𑀩𑁆𑀩𑁄.

𑀢𑀣𑀸 ‘‘𑀧𑀜𑁆𑀜𑀸𑀬 𑀯𑀺𑀦𑀸 𑀤𑀸𑀦𑀸𑀤𑀬𑁄 𑀥𑀫𑁆𑀫𑀸 𑀦 𑀯𑀺𑀲𑀼𑀚𑁆𑀛𑀦𑁆𑀢𑀺, 𑀬𑀣𑀸𑀲𑀓𑀁 𑀩𑁆𑀬𑀸𑀧𑀸𑀭𑀲𑀫𑀢𑁆𑀣𑀸 𑀘 𑀦 𑀳𑁄𑀦𑁆𑀢𑀻’’𑀢𑀺 𑀧𑀜𑁆𑀜𑀸𑀕𑀼𑀡𑀸 𑀫𑀦𑀲𑀺 𑀓𑀸𑀢𑀩𑁆𑀩𑀸. 𑀬𑀣𑁂𑀯 𑀳𑀺 𑀚𑀻𑀯𑀺𑀢𑁂𑀦 𑀯𑀺𑀦𑀸 𑀲𑀭𑀻𑀭𑀬𑀦𑁆𑀢𑀁 𑀦 𑀲𑁄𑀪𑀢𑀺, 𑀦 𑀘 𑀅𑀢𑁆𑀢𑀦𑁄 𑀓𑀺𑀭𑀺𑀬𑀸𑀲𑀼 𑀧𑀝𑀺𑀧𑀢𑁆𑀢𑀺𑀲𑀫𑀢𑁆𑀣𑀁 𑀳𑁄𑀢𑀺, 𑀬𑀣𑀸 𑀘 𑀘𑀓𑁆𑀔𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀜𑁆𑀜𑀸𑀡𑁂𑀦 𑀯𑀺𑀦𑀸 𑀬𑀣𑀸𑀲𑀓𑀁 𑀯𑀺𑀲𑀬𑁂𑀲𑀼 𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦𑀧𑁆𑀧𑀳𑁄𑀦𑁆𑀢𑀺, 𑀏𑀯𑀁 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀜𑀸𑀬 ¶ 𑀯𑀺𑀦𑀸 𑀲𑀓𑀺𑀘𑁆𑀘𑀧𑀝𑀺𑀧𑀢𑁆𑀢𑀺𑀬𑀁 𑀅𑀲𑀫𑀢𑁆𑀣𑀸𑀦𑀻𑀢𑀺 𑀧𑀭𑀺𑀘𑁆𑀘𑀸𑀕𑀸𑀤𑀺𑀧𑀝𑀺𑀧𑀢𑁆𑀢𑀺𑀬𑀁 𑀧𑀜𑁆𑀜𑀸 𑀧𑀥𑀸𑀦𑀓𑀸𑀭𑀡𑀁. 𑀉𑀫𑁆𑀫𑀻𑀮𑀺𑀢𑀧𑀜𑁆𑀜𑀸𑀘𑀓𑁆𑀔𑀼𑀓𑀸 𑀳𑀺 𑀫𑀳𑀸𑀲𑀢𑁆𑀢𑀸 𑀅𑀢𑁆𑀢𑀦𑁄 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺𑀧𑀺 𑀤𑀢𑁆𑀯𑀸 𑀅𑀦𑀢𑁆𑀢𑀼𑀓𑁆𑀓𑀁𑀲𑀓𑀸, 𑀅𑀧𑀭𑀯𑀫𑁆𑀪𑀓𑀸 𑀘 𑀳𑁄𑀦𑁆𑀢𑀺, 𑀪𑁂𑀲𑀚𑁆𑀚𑀭𑀼𑀓𑁆𑀔𑀸 𑀯𑀺𑀬 𑀯𑀺𑀓𑀧𑁆𑀧𑀭𑀳𑀺𑀢𑀸 𑀓𑀸𑀮𑀢𑁆𑀢𑀬𑁂𑀧𑀺 ¶ 𑀲𑁄𑀫𑀦𑀲𑁆𑀲𑀚𑀸𑀢𑀸. 𑀧𑀜𑁆𑀜𑀸𑀯𑀲𑁂𑀦 𑀉𑀧𑀸𑀬𑀓𑁄𑀲𑀮𑁆𑀮𑀬𑁄𑀕𑀢𑁄 𑀧𑀭𑀺𑀘𑁆𑀘𑀸𑀕𑁄 𑀧𑀭𑀳𑀺𑀢𑀧𑁆𑀧𑀯𑀢𑁆𑀢𑀺𑀬𑀸 𑀤𑀸𑀦𑀧𑀸𑀭𑀫𑀺𑀪𑀸𑀯𑀁 𑀉𑀧𑁂𑀢𑀺. 𑀅𑀢𑁆𑀢𑀢𑁆𑀣𑀜𑁆𑀳𑀺 𑀤𑀸𑀦𑀁 𑀯𑀼𑀟𑁆𑀠𑀺𑀲𑀤𑀺𑀲𑀁 𑀳𑁄𑀢𑀺.

𑀢𑀣𑀸 𑀧𑀜𑁆𑀜𑀸𑀬 𑀅𑀪𑀸𑀯𑁂𑀦 𑀢𑀡𑁆𑀳𑀸𑀤𑀺𑀲𑀁𑀓𑀺𑀮𑁂𑀲𑀸𑀯𑀺𑀬𑁄𑀕𑀢𑁄 𑀲𑀻𑀮𑀲𑁆𑀲 𑀯𑀺𑀲𑀼𑀤𑁆𑀥𑀺𑀬𑁂𑀯 𑀦 𑀲𑀫𑁆𑀪𑀯𑀢𑀺, 𑀓𑀼𑀢𑁄 𑀲𑀩𑁆𑀩𑀜𑁆𑀜𑀼𑀕𑀼𑀡𑀸𑀥𑀺𑀝𑁆𑀞𑀸𑀦𑀪𑀸𑀯𑁄. 𑀧𑀜𑁆𑀜𑀯𑀸 𑀏𑀯 𑀘 𑀖𑀭𑀸𑀯𑀸𑀲𑁂 𑀓𑀸𑀫𑀕𑀼𑀡𑁂𑀲𑀼 𑀲𑀁𑀲𑀸𑀭𑁂 𑀘 𑀆𑀤𑀻𑀦𑀯𑀁, 𑀧𑀩𑁆𑀩𑀚𑁆𑀚𑀸𑀬 𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑀁 𑀦𑀺𑀩𑁆𑀩𑀸𑀦𑁂 𑀘 𑀆𑀦𑀺𑀲𑀁𑀲𑀁 𑀲𑀼𑀝𑁆𑀞𑀼 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑁄, 𑀧𑀭𑁂 𑀘 𑀢𑀢𑁆𑀣 𑀧𑀢𑀺𑀝𑁆𑀞𑀧𑁂𑀢𑀻𑀢𑀺.

𑀯𑀻𑀭𑀺𑀬𑀜𑁆𑀘 𑀧𑀜𑁆𑀜𑀸𑀭𑀳𑀺𑀢𑀁 𑀬𑀤𑀺𑀘𑁆𑀙𑀺𑀢𑀫𑀢𑁆𑀣𑀁 𑀦 𑀲𑀸𑀥𑁂𑀢𑀺 𑀤𑀼𑀭𑀸𑀭𑀫𑁆𑀪𑀪𑀸𑀯𑀢𑁄. 𑀯𑀭𑀫𑁂𑀯 𑀳𑀺 𑀅𑀦𑀸𑀭𑀫𑁆𑀪𑁄 𑀤𑀼𑀭𑀸𑀭𑀫𑁆𑀪𑀢𑁄, 𑀧𑀜𑁆𑀜𑀸𑀲𑀳𑀺𑀢𑁂𑀦 𑀧𑀦 𑀯𑀻𑀭𑀺𑀬𑁂𑀦 𑀦 𑀓𑀺𑀜𑁆𑀘𑀺 𑀤𑀼𑀭𑀥𑀺𑀕𑀫𑀁 𑀉𑀧𑀸𑀬𑀧𑀝𑀺𑀧𑀢𑁆𑀢𑀺𑀢𑁄. 𑀢𑀣𑀸 𑀧𑀜𑁆𑀜𑀯𑀸 𑀏𑀯 𑀧𑀭𑀸𑀧𑀓𑀸𑀭𑀸𑀤𑀺𑀅𑀥𑀺𑀯𑀸𑀲𑀓𑀚𑀸𑀢𑀺𑀬𑁄 𑀳𑁄𑀢𑀺, 𑀦 𑀤𑀼𑀧𑁆𑀧𑀜𑁆𑀜𑁄. 𑀧𑀜𑁆𑀜𑀸𑀯𑀺𑀭𑀳𑀺𑀢𑀲𑁆𑀲 𑀘 𑀧𑀭𑁂𑀳𑀺 𑀉𑀧𑀦𑀻𑀢𑀸 𑀅𑀧𑀓𑀸𑀭𑀸 𑀔𑀦𑁆𑀢𑀺𑀬𑀸 𑀧𑀝𑀺𑀧𑀓𑁆𑀔𑀫𑁂𑀯 𑀅𑀦𑀼𑀩𑁆𑀭𑀽𑀳𑁂𑀦𑁆𑀢𑀺, 𑀧𑀜𑁆𑀜𑀯𑀢𑁄 𑀧𑀦 𑀢𑁂 𑀔𑀦𑁆𑀢𑀺𑀲𑀫𑁆𑀧𑀢𑁆𑀢𑀺𑀬𑀸 ¶ 𑀧𑀭𑀺𑀩𑁆𑀭𑀽𑀳𑀦𑀯𑀲𑁂𑀦 𑀅𑀲𑁆𑀲𑀸 𑀣𑀺𑀭𑀪𑀸𑀯𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀧𑀜𑁆𑀜𑀯𑀸 𑀏𑀯 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀢𑁂𑀲𑀁 𑀓𑀸𑀭𑀡𑀸𑀦𑀺 𑀧𑀝𑀺𑀧𑀓𑁆𑀔𑁂 𑀘 𑀬𑀣𑀸𑀪𑀽𑀢𑀁 𑀚𑀸𑀦𑀺𑀢𑁆𑀯𑀸 𑀧𑀭𑁂𑀲𑀁 𑀅𑀯𑀺𑀲𑀁𑀯𑀸𑀤𑀓𑁄 𑀳𑁄𑀢𑀺. 𑀢𑀣𑀸 𑀧𑀜𑁆𑀜𑀸𑀩𑀮𑁂𑀦 𑀅𑀢𑁆𑀢𑀸𑀦𑀁 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀥𑀺𑀢𑀺𑀲𑀫𑁆𑀧𑀤𑀸𑀬 𑀲𑀩𑁆𑀩𑀧𑀸𑀭𑀫𑀻𑀲𑀼 𑀅𑀘𑀮𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑁄 𑀳𑁄𑀢𑀺, 𑀧𑀜𑁆𑀜𑀯𑀸 𑀏𑀯 𑀘 𑀧𑀺𑀬𑀫𑀚𑁆𑀛𑀢𑁆𑀢𑀯𑁂𑀭𑀻𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀲𑀩𑁆𑀩𑀢𑁆𑀣 𑀳𑀺𑀢𑀽𑀧𑀲𑀁𑀳𑀸𑀭𑀓𑀼𑀲𑀮𑁄 𑀳𑁄𑀢𑀺. 𑀢𑀣𑀸 𑀧𑀜𑁆𑀜𑀸𑀯𑀲𑁂𑀦 𑀮𑀸𑀪𑀸𑀤𑀺𑀮𑁄𑀓𑀥𑀫𑁆𑀫𑀲𑀦𑁆𑀦𑀺𑀧𑀸𑀢𑁂 𑀦𑀺𑀩𑁆𑀩𑀺𑀓𑀸𑀭𑀢𑀸𑀬 𑀫𑀚𑁆𑀛𑀢𑁆𑀢𑁄 𑀳𑁄𑀢𑀺. 𑀏𑀯𑀁 𑀲𑀩𑁆𑀩𑀸𑀲𑀁 𑀧𑀸𑀭𑀫𑀻𑀦𑀁 𑀧𑀜𑁆𑀜𑀸𑀯 𑀧𑀸𑀭𑀺𑀲𑀼𑀤𑁆𑀥𑀺𑀳𑁂𑀢𑀽𑀢𑀺 𑀧𑀜𑁆𑀜𑀸𑀕𑀼𑀡𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑀅𑀧𑀺𑀘 𑀧𑀜𑁆𑀜𑀸𑀬 𑀯𑀺𑀦𑀸 𑀦 𑀤𑀲𑁆𑀲𑀦𑀲𑀫𑁆𑀧𑀢𑁆𑀢𑀺, 𑀅𑀦𑁆𑀢𑀭𑁂𑀦 𑀘 𑀤𑀺𑀝𑁆𑀞𑀺𑀲𑀫𑁆𑀧𑀤𑀁 𑀦 𑀲𑀻𑀮𑀲𑀫𑁆𑀧𑀤𑀸, 𑀲𑀻𑀮𑀤𑀺𑀝𑁆𑀞𑀺𑀲𑀫𑁆𑀧𑀤𑀸𑀭𑀳𑀺𑀢𑀲𑁆𑀲 𑀦 𑀲𑀫𑀸𑀥𑀺𑀲𑀫𑁆𑀧𑀤𑀸, 𑀅𑀲𑀫𑀸𑀳𑀺𑀢𑁂𑀦 𑀘 𑀦 𑀲𑀓𑁆𑀓𑀸 𑀅𑀢𑁆𑀢𑀳𑀺𑀢𑀫𑀢𑁆𑀢𑀫𑁆𑀧𑀺 𑀲𑀸𑀥𑁂𑀢𑀼𑀁, 𑀧𑀕𑁂𑀯 𑀉𑀓𑁆𑀓𑀁𑀲𑀕𑀢𑀁 𑀧𑀭𑀳𑀺𑀢𑀦𑁆𑀢𑀺 𑀧𑀭𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁂𑀦 ‘‘𑀦𑀦𑀼 𑀢𑀬𑀸 𑀲𑀓𑁆𑀓𑀘𑁆𑀘𑀁 𑀧𑀜𑁆𑀜𑀸𑀧𑀸𑀭𑀺𑀲𑀼𑀤𑁆𑀥𑀺𑀬𑀁 ¶ 𑀆𑀬𑁄𑀕𑁄 𑀓𑀭𑀡𑀻𑀬𑁄’’𑀢𑀺 𑀩𑁄𑀥𑀺𑀲𑀢𑁆𑀢𑁂𑀦 𑀅𑀢𑁆𑀢𑀸 𑀑𑀯𑀤𑀺𑀢𑀩𑁆𑀩𑁄. 𑀧𑀜𑁆𑀜𑀸𑀦𑀼𑀪𑀸𑀯𑁂𑀦 𑀳𑀺 𑀫𑀳𑀸𑀲𑀢𑁆𑀢𑁄 ¶ 𑀘𑀢𑀼𑀭𑀥𑀺𑀝𑁆𑀞𑀸𑀦𑀸𑀥𑀺𑀝𑁆𑀞𑀺𑀢𑁄 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 (𑀤𑀻. 𑀦𑀺. 𑁩.𑁨𑁧𑁦, 𑁩𑁧𑁩; 𑀅. 𑀦𑀺. 𑁧𑁦.𑁩𑁨) 𑀮𑁄𑀓𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀲𑀢𑁆𑀢𑁂 𑀦𑀺𑀬𑁆𑀬𑀸𑀦𑀺𑀓𑀫𑀕𑁆𑀕𑁂 𑀅𑀯𑀢𑀸𑀭𑁂𑀢𑀺, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘 𑀦𑁂𑀲𑀁 𑀧𑀭𑀺𑀧𑀸𑀘𑁂𑀢𑀺. 𑀢𑀣𑀸 𑀧𑀜𑁆𑀜𑀸𑀩𑀮𑁂𑀦 𑀔𑀦𑁆𑀥𑀸𑀬𑀢𑀦𑀸𑀤𑀻𑀲𑀼 𑀧𑀯𑀺𑀘𑀬𑀩𑀳𑀼𑀮𑁄 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀬𑁄 𑀬𑀸𑀣𑀸𑀯𑀢𑁄 𑀧𑀭𑀺𑀚𑀸𑀦𑀦𑁆𑀢𑁄 𑀤𑀸𑀦𑀸𑀤𑀬𑁄 𑀕𑀼𑀡𑁂 𑀯𑀺𑀲𑁂𑀲𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀪𑀸𑀯𑀁 𑀦𑀬𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀲𑀺𑀓𑁆𑀔𑀸𑀬 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑁂 𑀧𑀜𑁆𑀜𑀸𑀕𑀼𑀡𑁂 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀜𑁆𑀜𑀸𑀧𑀸𑀭𑀫𑀻 𑀅𑀦𑀼𑀩𑁆𑀭𑀽𑀳𑁂𑀢𑀩𑁆𑀩𑀸.

𑀢𑀣𑀸 𑀤𑀺𑀲𑁆𑀲𑀫𑀸𑀦𑀧𑀸𑀭𑀸𑀦𑀺𑀧𑀺 𑀮𑁄𑀓𑀺𑀬𑀸𑀦𑀺 𑀓𑀫𑁆𑀫𑀸𑀦𑀺 𑀦𑀺𑀳𑀻𑀦𑀯𑀻𑀭𑀺𑀬𑁂𑀦 𑀧𑀸𑀧𑀼𑀡𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸𑀦𑀺, 𑀅𑀕𑀡𑀺𑀢𑀔𑁂𑀤𑁂𑀦 𑀧𑀦 𑀆𑀭𑀤𑁆𑀥𑀯𑀻𑀭𑀺𑀬𑁂𑀦 𑀤𑀼𑀭𑀥𑀺𑀕𑀫𑀁 𑀦𑀸𑀫 𑀦𑀢𑁆𑀣𑀺. 𑀦𑀺𑀳𑀻𑀦𑀯𑀻𑀭𑀺𑀬𑁄 𑀳𑀺 ‘‘𑀲𑀁𑀲𑀸𑀭𑀫𑀳𑁄𑀖𑀢𑁄 𑀲𑀩𑁆𑀩𑀲𑀢𑁆𑀢𑁂 𑀲𑀦𑁆𑀢𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀆𑀭𑀪𑀺𑀢𑀼𑀫𑁂𑀯 𑀦 𑀲𑀓𑁆𑀓𑀼𑀡𑁄𑀢𑀺. 𑀫𑀚𑁆𑀛𑀺𑀫𑁄 𑀆𑀭𑀪𑀺𑀢𑁆𑀯𑀸 𑀅𑀦𑁆𑀢𑀭𑀸𑀯𑁄𑀲𑀸𑀦𑀫𑀸𑀧𑀚𑁆𑀚𑀢𑀺. 𑀉𑀓𑁆𑀓𑀝𑁆𑀞𑀯𑀻𑀭𑀺𑀬𑁄 𑀧𑀦 𑀅𑀢𑁆𑀢𑀲𑀼𑀔𑀦𑀺𑀭𑀧𑁂𑀓𑁆𑀔𑁄 𑀆𑀭𑀫𑁆𑀪𑀧𑀸𑀭𑀁 𑀅𑀥𑀺𑀕𑀘𑁆𑀙𑀢𑀻𑀢𑀺 𑀯𑀻𑀭𑀺𑀬𑀲𑀫𑁆𑀧𑀢𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸. 𑀅𑀧𑀺𑀘 ‘‘𑀬𑀲𑁆𑀲 𑀅𑀢𑁆𑀢𑀦𑁄𑀬𑁂𑀯 𑀲𑀁𑀲𑀸𑀭𑀧𑀗𑁆𑀓𑀢𑁄 𑀲𑀫𑀼𑀤𑁆𑀥𑀭𑀡𑀢𑁆𑀣𑀫𑀸𑀭𑀫𑁆𑀪𑁄, 𑀢𑀲𑁆𑀲𑀸𑀧𑀺 𑀯𑀻𑀭𑀺𑀬𑀲𑁆𑀲 𑀲𑀺𑀣𑀺𑀮𑀪𑀸𑀯𑁂𑀦 𑀫𑀦𑁄𑀭𑀣𑀸𑀦𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀺 𑀦 𑀲𑀓𑁆𑀓𑀸 𑀲𑀫𑁆𑀪𑀸𑀯𑁂𑀢𑀼𑀁, 𑀧𑀕𑁂𑀯 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀫𑀼𑀤𑁆𑀥𑀭𑀡𑀢𑁆𑀣𑀁 𑀓𑀢𑀸𑀪𑀺𑀦𑀻𑀳𑀸𑀭𑁂𑀦𑀸’’𑀢𑀺 𑀘 ‘‘𑀭𑀸𑀕𑀸𑀤𑀻𑀦𑀁 𑀤𑁄𑀲𑀕𑀡𑀸𑀦𑀁 𑀫𑀢𑁆𑀢𑀫𑀳𑀸𑀕𑀚𑀸𑀦𑀁 𑀯𑀺𑀬 𑀤𑀼𑀦𑁆𑀦𑀺𑀯𑀸𑀭𑀬𑀪𑀸𑀯𑀢𑁄, 𑀢𑀦𑁆𑀦𑀺𑀤𑀸𑀦𑀸𑀦𑀜𑁆𑀘 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀁 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀯𑀥𑀓𑀲𑀤𑀺𑀲𑀪𑀸𑀯𑀢𑁄, 𑀢𑀦𑁆𑀦𑀺𑀫𑀺𑀢𑁆𑀢𑀸𑀦𑀜𑁆𑀘 𑀤𑀼𑀕𑁆𑀕𑀢𑀻𑀦𑀁 𑀲𑀩𑁆𑀩𑀤𑀸 𑀯𑀺𑀯𑀝𑀫𑀼𑀔𑀪𑀸𑀯𑀢𑁄, 𑀢𑀢𑁆𑀣 𑀦𑀺𑀬𑁄𑀚𑀓𑀸𑀦𑀜𑁆𑀘 𑀧𑀸𑀧𑀫𑀺𑀢𑁆𑀢𑀸𑀦𑀁 𑀲𑀤𑀸 𑀲𑀦𑁆𑀦𑀺𑀳𑀺𑀢𑀪𑀸𑀯𑀢𑁄, 𑀢𑀤𑁄𑀯𑀸𑀤𑀓𑀸𑀭𑀺𑀢𑀸𑀬 𑀘 𑀩𑀸𑀮𑀲𑁆𑀲 𑀧𑀼𑀣𑀼𑀚𑁆𑀚𑀦𑀪𑀸𑀯𑀲𑁆𑀲 𑀲𑀢𑀺 𑀲𑀫𑁆𑀪𑀯𑁂 𑀬𑀼𑀢𑁆𑀢𑀁 𑀲𑀬𑀫𑁂𑀯 𑀲𑀁𑀲𑀸𑀭𑀤𑀼𑀓𑁆𑀔𑀢𑁄 𑀦𑀺𑀲𑁆𑀲𑀭𑀺𑀢𑀼’’𑀦𑁆𑀢𑀺 𑀘 ‘‘𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸 𑀯𑀻𑀭𑀺𑀬𑀸𑀦𑀼𑀪𑀸𑀯𑁂𑀦 𑀤𑀽𑀭𑀻 𑀪𑀯𑀦𑁆𑀢𑀻’’𑀢𑀺 𑀘 ‘‘𑀬𑀤𑀺 𑀧𑀦 𑀲𑀫𑁆𑀩𑁄𑀥𑀺 𑀅𑀢𑁆𑀢𑀸𑀥𑀻𑀦𑁂𑀦 𑀯𑀻𑀭𑀺𑀬𑁂𑀦 ¶ 𑀲𑀓𑁆𑀓𑀸 𑀲𑀫𑀥𑀺𑀕𑀦𑁆𑀢𑀼𑀁 ¶ , 𑀓𑀺𑀫𑁂𑀢𑁆𑀣 𑀤𑀼𑀓𑁆𑀓𑀭’’𑀦𑁆𑀢𑀺 𑀘 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀯𑀻𑀭𑀺𑀬𑀲𑁆𑀲 𑀕𑀼𑀡𑀸𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑀢𑀣𑀸 ‘‘𑀔𑀦𑁆𑀢𑀺 𑀦𑀸𑀫𑀸𑀬𑀁 𑀦𑀺𑀭𑀯𑀲𑁂𑀲𑀕𑀼𑀡𑀧𑀝𑀺𑀧𑀓𑁆𑀔𑀲𑁆𑀲 𑀓𑁄𑀥𑀲𑁆𑀲 𑀯𑀺𑀥𑀫𑀦𑀢𑁄 𑀕𑀼𑀡𑀲𑀫𑁆𑀧𑀸𑀤𑀦𑁂 𑀲𑀸𑀥𑀽𑀦𑀫𑀧𑁆𑀧𑀝𑀺𑀳𑀢𑀫𑀸𑀬𑀼𑀥𑀁, 𑀧𑀭𑀸𑀪𑀺𑀪𑀯𑀦𑁂 𑀲𑀫𑀢𑁆𑀣𑀸𑀦𑀁 𑀅𑀮𑀗𑁆𑀓𑀸𑀭𑁄, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀩𑀮𑀲𑀫𑁆𑀧𑀤𑀸, 𑀓𑁄𑀥𑀕𑁆𑀕𑀺𑀯𑀺𑀦𑀬𑀦𑀻 𑀉𑀤𑀓𑀥𑀸𑀭𑀸, 𑀓𑀮𑁆𑀬𑀸𑀡𑀲𑁆𑀲 𑀓𑀺𑀢𑁆𑀢𑀺𑀲𑀤𑁆𑀤𑀲𑁆𑀲 𑀲𑀜𑁆𑀚𑀸𑀢𑀺𑀤𑁂𑀲𑁄, 𑀧𑀸𑀧𑀧𑀼𑀕𑁆𑀕𑀮𑀸𑀦𑀁 𑀯𑀘𑀻𑀯𑀺𑀲𑀯𑀽𑀧𑀲𑀫𑀓𑀭𑁄 𑀫𑀦𑁆𑀢𑀸𑀕𑀤𑁄, 𑀲𑀁𑀯𑀭𑁂 𑀞𑀺𑀢𑀸𑀦𑀁 𑀧𑀭𑀫𑀸 𑀥𑀻𑀭𑀧𑀓𑀢𑀺, 𑀕𑀫𑁆𑀪𑀻𑀭𑀸𑀲𑀬𑀢𑀸𑀬 𑀲𑀸𑀕𑀭𑁄, 𑀤𑁄𑀲𑀫𑀳𑀸𑀲𑀸𑀕𑀭𑀲𑁆𑀲 𑀯𑁂𑀮𑀸, 𑀅𑀧𑀸𑀬𑀤𑁆𑀯𑀸𑀭𑀲𑁆𑀲 𑀧𑀺𑀥𑀸𑀦𑀓𑀯𑀸𑀝𑀁, 𑀤𑁂𑀯𑀩𑁆𑀭𑀳𑁆𑀫𑀮𑁄𑀓𑀸𑀦𑀁 ¶ 𑀆𑀭𑁄𑀳𑀡𑀲𑁄𑀧𑀸𑀦𑀁, 𑀲𑀩𑁆𑀩𑀕𑀼𑀡𑀸𑀦𑀁 𑀅𑀥𑀺𑀯𑀸𑀲𑀦𑀪𑀽𑀫𑀺, 𑀉𑀢𑁆𑀢𑀫𑀸 𑀓𑀸𑀬𑀯𑀘𑀻𑀫𑀦𑁄𑀯𑀺𑀲𑀼𑀤𑁆𑀥𑀻’’𑀢𑀺 𑀫𑀦𑀲𑀺 𑀓𑀸𑀢𑀩𑁆𑀩𑀁. 𑀅𑀧𑀺 𑀘 ‘‘𑀏𑀢𑁂 𑀲𑀢𑁆𑀢𑀸 𑀔𑀦𑁆𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀇𑀥 𑀘𑁂𑀯 𑀢𑀧𑀦𑁆𑀢𑀺, 𑀧𑀭𑀮𑁄𑀓𑁂 𑀘 𑀢𑀧𑀦𑀻𑀬𑀥𑀫𑁆𑀫𑀸𑀦𑀼𑀬𑁄𑀕𑀢𑁄’’𑀢𑀺 𑀘 ‘‘𑀬𑀤𑀺𑀧𑀺 𑀧𑀭𑀸𑀧𑀓𑀸𑀭𑀦𑀺𑀫𑀺𑀢𑁆𑀢𑀁 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀧𑀦 𑀤𑀼𑀓𑁆𑀔𑀲𑁆𑀲 𑀔𑁂𑀢𑁆𑀢𑀪𑀽𑀢𑁄 𑀅𑀢𑁆𑀢𑀪𑀸𑀯𑁄, 𑀩𑀻𑀚𑀪𑀽𑀢𑀜𑁆𑀘 𑀓𑀫𑁆𑀫𑀁 𑀫𑀬𑀸𑀯 𑀅𑀪𑀺𑀲𑀗𑁆𑀔𑀢’’𑀦𑁆𑀢𑀺 𑀘 ‘‘𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀆𑀡𑀡𑁆𑀬𑀓𑀸𑀭𑀡𑀫𑁂𑀢’’𑀦𑁆𑀢𑀺 𑀘 ‘‘𑀅𑀧𑀓𑀸𑀭𑀓𑁂 𑀅𑀲𑀢𑀺 𑀓𑀣𑀁 𑀫𑀬𑁆𑀳𑀁 𑀔𑀦𑁆𑀢𑀺𑀲𑀫𑁆𑀧𑀤𑀸 𑀲𑀫𑁆𑀪𑀯𑀢𑀻’’𑀢𑀺 𑀘 ‘‘𑀬𑀤𑀺𑀧𑀸𑀬𑀁 𑀏𑀢𑀭𑀳𑀺 𑀅𑀧𑀓𑀸𑀭𑀓𑁄, 𑀅𑀬𑀁 𑀦𑀸𑀫 𑀧𑀼𑀩𑁆𑀩𑁂 𑀅𑀦𑁂𑀦 𑀫𑀬𑁆𑀳𑀁 𑀉𑀧𑀓𑀸𑀭𑁄 𑀓𑀢𑁄’’𑀢𑀺 𑀘 ‘‘𑀅𑀧𑀓𑀸𑀭𑁄 𑀏𑀯 𑀯𑀸 𑀔𑀦𑁆𑀢𑀺𑀦𑀺𑀫𑀺𑀢𑁆𑀢𑀢𑀸𑀬 𑀉𑀧𑀓𑀸𑀭𑁄’’𑀢𑀺 𑀘 ‘‘𑀲𑀩𑁆𑀩𑁂𑀧𑀺𑀫𑁂 𑀲𑀢𑁆𑀢𑀸 𑀫𑀬𑁆𑀳𑀁 𑀧𑀼𑀢𑁆𑀢𑀲𑀤𑀺𑀲𑀸, 𑀧𑀼𑀢𑁆𑀢𑀓𑀢𑀸𑀧𑀭𑀸𑀥𑁂𑀲𑀼 𑀘 𑀓𑁄 𑀓𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀘 ‘‘𑀬𑁂𑀦 𑀓𑁄𑀥𑀪𑀽𑀢𑀸𑀯𑁂𑀲𑁂𑀦 𑀅𑀬𑀁 𑀫𑀬𑁆𑀳𑀁 𑀅𑀧𑀭𑀚𑁆𑀛𑀢𑀺, 𑀲𑁄 𑀓𑁄𑀥𑀪𑀽𑀢𑀸𑀯𑁂𑀲𑁄 𑀫𑀬𑀸 𑀯𑀺𑀦𑁂𑀢𑀩𑁆𑀩𑁄’’𑀢𑀺 𑀘 ‘‘𑀬𑁂𑀦 𑀅𑀧𑀓𑀸𑀭𑁂𑀦 𑀇𑀤𑀁 𑀫𑀬𑁆𑀳𑀁 𑀤𑀼𑀓𑁆𑀔𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀅𑀳𑀫𑁆𑀧𑀺 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀘 ‘‘𑀬𑁂𑀳𑀺 𑀥𑀫𑁆𑀫𑁂𑀳𑀺 𑀅𑀧𑀭𑀸𑀥𑁄 𑀓𑀢𑁄, 𑀬𑀢𑁆𑀣 𑀘 𑀓𑀢𑁄, 𑀲𑀩𑁆𑀩𑁂𑀧𑀺 𑀢𑁂 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀦𑀺𑀭𑀼𑀤𑁆𑀥𑀸, 𑀓𑀲𑁆𑀲𑀺𑀤𑀸𑀦𑀺 𑀓𑁂𑀦 𑀓𑁄𑀥𑁄 𑀓𑀸𑀢𑀩𑁆𑀩𑁄’’𑀢𑀺 𑀘 ‘‘𑀅𑀦𑀢𑁆𑀢𑀢𑀸𑀬 𑀲𑀩𑁆𑀩𑀥𑀫𑁆𑀫𑀸𑀦𑀁 𑀓𑁄 𑀓𑀲𑁆𑀲 𑀅𑀧𑀭𑀚𑁆𑀛𑀢𑀻’’𑀢𑀺 𑀘 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁂𑀦 𑀔𑀦𑁆𑀢𑀺𑀲𑀫𑁆𑀧𑀤𑀸 𑀩𑁆𑀭𑀽𑀳𑁂𑀢𑀩𑁆𑀩𑀸.

𑀬𑀤𑀺 ¶ 𑀧𑀦𑀲𑁆𑀲 𑀤𑀻𑀖𑀭𑀢𑁆𑀢𑀁 𑀧𑀭𑀺𑀘𑀬𑁂𑀦 𑀧𑀭𑀸𑀧𑀓𑀸𑀭𑀦𑀺𑀫𑀺𑀢𑁆𑀢𑀓𑁄 𑀓𑁄𑀥𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑁂𑀬𑁆𑀬, 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 ‘‘𑀔𑀦𑁆𑀢𑀺 𑀦𑀸𑀫𑁂𑀲𑀸 𑀧𑀭𑀸𑀧𑀓𑀸𑀭𑀲𑁆𑀲 𑀧𑀝𑀺𑀧𑀓𑁆𑀔𑀧𑀝𑀺𑀧𑀢𑁆𑀢𑀻𑀦𑀁 𑀧𑀘𑁆𑀘𑀼𑀧𑀓𑀸𑀭𑀓𑀸𑀭𑀡’’𑀦𑁆𑀢𑀺 𑀘 ‘‘𑀅𑀧𑀓𑀸𑀭𑁄 𑀘 𑀫𑀬𑁆𑀳𑀁 𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑁂𑀦 𑀤𑀼𑀓𑁆𑀔𑀼𑀧𑀦𑀺𑀲𑀸𑀬 𑀲𑀤𑁆𑀥𑀸𑀬, 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀺𑀲𑀜𑁆𑀜𑀸𑀬 𑀘 𑀧𑀘𑁆𑀘𑀬𑁄’’𑀢𑀺 𑀘 ‘‘𑀇𑀦𑁆𑀤𑁆𑀭𑀺𑀬𑀧𑀓𑀢𑀺𑀭𑁂𑀲𑀸, 𑀬𑀤𑀺𑀤𑀁 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀲𑀬𑀲𑀫𑀸𑀬𑁄𑀕𑁄, 𑀢𑀢𑁆𑀣 𑀅𑀦𑀺𑀝𑁆𑀞𑀯𑀺𑀲𑀬𑀲𑀫𑀸𑀬𑁄𑀕𑁄 𑀫𑀬𑁆𑀳𑀁 𑀦 𑀲𑀺𑀬𑀸𑀢𑀺 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸’’𑀢𑀺 𑀘 ‘‘𑀓𑁄𑀥𑀯𑀲𑀺𑀓𑁄 𑀲𑀢𑁆𑀢𑁄 𑀓𑁄𑀥𑁂𑀦 𑀉𑀫𑁆𑀫𑀢𑁆𑀢𑁄 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄, 𑀢𑀢𑁆𑀣 𑀓𑀺𑀁 𑀧𑀘𑁆𑀘𑀧𑀓𑀸𑀭𑁂𑀦𑀸’’𑀢𑀺 𑀘 ‘‘𑀲𑀩𑁆𑀩𑁂 𑀧𑀺𑀫𑁂 𑀲𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀑𑀭𑀲𑀧𑀼𑀢𑁆𑀢𑀸 𑀯𑀺𑀬 𑀧𑀭𑀺𑀧𑀸𑀮𑀺𑀢𑀸, 𑀢𑀲𑁆𑀫𑀸 𑀦 𑀢𑀢𑁆𑀣 𑀫𑀬𑀸 𑀘𑀺𑀢𑁆𑀢𑀓𑁄𑀧𑁄𑀧𑀺 𑀓𑀸𑀢𑀩𑁆𑀩𑁄’’𑀢𑀺 𑀘 ‘‘𑀅𑀧𑀭𑀸𑀥𑀓𑁂 𑀘 𑀲𑀢𑀺 𑀕𑀼𑀡𑁂 𑀕𑀼𑀡𑀯𑀢𑀺 𑀫𑀬𑀸 𑀦 𑀓𑁄𑀧𑁄 𑀓𑀸𑀢𑀩𑁆𑀩𑁄’’𑀢𑀺 𑀘 ‘‘𑀅𑀲𑀢𑀺 𑀕𑀼𑀡𑁂 𑀯𑀺𑀲𑁂𑀲𑁂𑀦 𑀓𑀭𑀼𑀡𑀸𑀬𑀺𑀢𑀩𑁆𑀩𑁄’’𑀢𑀺 𑀘 ‘‘𑀓𑁄𑀧𑁂𑀦 𑀘 𑀫𑀬𑁆𑀳𑀁 𑀕𑀼𑀡𑀬𑀲𑀸 ¶ 𑀦𑀺𑀳𑀻𑀬𑀦𑁆𑀢𑀻’’𑀢𑀺 𑀘 ‘‘𑀓𑀼𑀚𑁆𑀛𑀦𑁂𑀦 𑀫𑀬𑁆𑀳𑀁 𑀤𑀼𑀩𑁆𑀩𑀡𑁆𑀡𑀤𑀼𑀓𑁆𑀔𑀲𑁂𑀬𑁆𑀬𑀸𑀤𑀬𑁄 𑀲𑀧𑀢𑁆𑀢𑀓𑀦𑁆𑀢𑀸 𑀆𑀕𑀘𑁆𑀙𑀦𑁆𑀢𑀻’’𑀢𑀺 𑀘 ‘‘𑀓𑁄𑀥𑁄 𑀘 𑀦𑀸𑀫𑀸𑀬𑀁 𑀲𑀩𑁆𑀩𑀸𑀳𑀺𑀢𑀓𑀸𑀭𑀓𑁄 ¶ 𑀲𑀩𑁆𑀩𑀳𑀺𑀢𑀯𑀺𑀦𑀸𑀲𑀓𑁄 𑀩𑀮𑀯𑀸 𑀧𑀘𑁆𑀘𑀢𑁆𑀣𑀺𑀓𑁄’’𑀢𑀺 𑀘 ‘‘𑀲𑀢𑀺 𑀘 𑀔𑀦𑁆𑀢𑀺𑀬𑀸 𑀦 𑀓𑁄𑀘𑀺 𑀧𑀘𑁆𑀘𑀢𑁆𑀣𑀺𑀓𑁄’’𑀢𑀺 𑀘 ‘‘𑀅𑀧𑀭𑀸𑀥𑀓𑁂𑀦 𑀅𑀧𑀭𑀸𑀥𑀦𑀺𑀫𑀺𑀢𑁆𑀢𑀁 𑀬𑀁 𑀆𑀬𑀢𑀺𑀁 𑀮𑀤𑁆𑀥𑀩𑁆𑀩𑀁 𑀤𑀼𑀓𑁆𑀔𑀁, 𑀲𑀢𑀺 𑀘 𑀔𑀦𑁆𑀢𑀺𑀬𑀸 𑀫𑀬𑁆𑀳𑀁 𑀢𑀤𑀪𑀸𑀯𑁄’’𑀢𑀺 𑀘 ‘‘𑀘𑀺𑀦𑁆𑀢𑀦𑁂𑀦 𑀓𑀼𑀚𑁆𑀛𑀦𑁆𑀢𑁂𑀦 𑀘 𑀫𑀬𑀸 𑀧𑀘𑁆𑀘𑀢𑁆𑀣𑀺𑀓𑁄𑀬𑁂𑀯 𑀅𑀦𑀼𑀯𑀢𑁆𑀢𑀺𑀢𑁄 𑀳𑁄𑀢𑀻’’𑀢𑀺 𑀘 ‘‘𑀓𑁄𑀥𑁂 𑀘 𑀫𑀬𑀸 𑀔𑀦𑁆𑀢𑀺𑀬𑀸 𑀅𑀪𑀺𑀪𑀽𑀢𑁂 𑀢𑀲𑁆𑀲 𑀤𑀸𑀲𑀪𑀽𑀢𑁄 𑀧𑀘𑁆𑀘𑀢𑁆𑀣𑀺𑀓𑁄 𑀲𑀫𑁆𑀫𑀤𑁂𑀯 𑀅𑀪𑀺𑀪𑀽𑀢𑁄 𑀳𑁄𑀢𑀻’’𑀢𑀺 𑀘 ‘‘𑀓𑁄𑀥𑀦𑀺𑀫𑀺𑀢𑁆𑀢𑀁 𑀔𑀦𑁆𑀢𑀺𑀕𑀼𑀡𑀧𑀭𑀺𑀘𑁆𑀘𑀸𑀕𑁄 𑀫𑀬𑁆𑀳𑀁 𑀦 𑀬𑀼𑀢𑁆𑀢𑁄’’𑀢𑀺 𑀘 ‘‘𑀲𑀢𑀺 𑀘 𑀓𑁄𑀥𑁂 𑀕𑀼𑀡𑀯𑀺𑀭𑁄𑀥𑀺𑀦𑀺 (𑀕𑀼𑀡𑀯𑀺𑀭𑁄𑀥𑀧𑀘𑁆𑀘𑀦𑀻𑀥𑀫𑁆𑀫𑁂 𑀘𑀭𑀺𑀬𑀸. 𑀅𑀝𑁆𑀞. 𑀧𑀓𑀺𑀡𑁆𑀡𑀓𑀓𑀣𑀸𑀬𑀁) 𑀓𑀺𑀁 𑀫𑁂 𑀲𑀻𑀮𑀸𑀤𑀺𑀥𑀫𑁆𑀫𑀸 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑁂𑀬𑁆𑀬𑀼𑀁, 𑀅𑀲𑀢𑀺 𑀘 𑀢𑁂𑀲𑀼 𑀓𑀣𑀸𑀳𑀁 𑀲𑀢𑁆𑀢𑀸𑀦𑀁 𑀉𑀧𑀓𑀸𑀭𑀩𑀳𑀼𑀮𑁄 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀉𑀢𑁆𑀢𑀫𑀁 𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀘 ‘‘𑀔𑀦𑁆𑀢𑀺𑀬𑀸 𑀘 𑀲𑀢𑀺 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀸𑀪𑀸𑀯𑀢𑁄 𑀲𑀫𑀸𑀳𑀺𑀢𑀲𑁆𑀲 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀢𑁄 𑀦𑀺𑀩𑁆𑀩𑀸𑀦𑀜𑁆𑀘 𑀅𑀲𑀗𑁆𑀔𑀢𑀸𑀫𑀢𑀲𑀦𑁆𑀢𑀧𑀡𑀻𑀢𑀸𑀤𑀺𑀪𑀸𑀯𑀢𑁄 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀺 ¶ ‘𑀩𑀼𑀤𑁆𑀥𑀥𑀫𑁆𑀫𑀸 𑀘 𑀅𑀘𑀺𑀦𑁆𑀢𑁂𑀬𑁆𑀬𑀸𑀧𑀭𑀺𑀫𑁂𑀬𑁆𑀬𑀧𑀪𑀸𑀯𑀸’𑀢𑀺’’, 𑀢𑀢𑁄 𑀘 ‘‘𑀅𑀦𑀼𑀮𑁄𑀫𑀺𑀬𑀁 𑀔𑀦𑁆𑀢𑀺𑀬𑀁 𑀞𑀺𑀢𑁄 ‘𑀓𑁂𑀯𑀮𑀸 𑀇𑀫𑁂 𑀘 𑀅𑀢𑁆𑀢𑀢𑁆𑀢𑀦𑀺𑀬𑀪𑀸𑀯𑀭𑀳𑀺𑀢𑀸 𑀥𑀫𑁆𑀫𑀫𑀢𑁆𑀢𑀸 𑀬𑀣𑀸𑀲𑀓𑀁 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑀯𑀬𑀦𑁆𑀢𑀺, 𑀦 𑀓𑀼𑀢𑁄𑀘𑀺 𑀆𑀕𑀘𑁆𑀙𑀦𑁆𑀢𑀺, 𑀦 𑀓𑀼𑀳𑀺𑀜𑁆𑀘𑀺 𑀕𑀘𑁆𑀙𑀦𑁆𑀢𑀺, 𑀦 𑀘 𑀓𑀢𑁆𑀣𑀘𑀺 𑀧𑀢𑀺𑀝𑁆𑀞𑀺𑀢𑀸, 𑀦 𑀘𑁂𑀢𑁆𑀣 𑀓𑁄𑀘𑀺 𑀓𑀲𑁆𑀲𑀘𑀺 𑀩𑁆𑀬𑀸𑀧𑀸𑀭𑁄’𑀢𑀺 𑀅𑀳𑀁𑀓𑀸𑀭𑀫𑀫𑀁𑀓𑀸𑀭𑀸𑀦𑀥𑀺𑀝𑁆𑀞𑀸𑀦𑀢𑀸 𑀦𑀺𑀚𑁆𑀛𑀸𑀦𑀁 𑀔𑀫𑀢𑀺, 𑀬𑁂𑀦 𑀩𑁄𑀥𑀺𑀲𑀢𑁆𑀢𑁄 𑀩𑁄𑀥𑀺𑀬𑀸 𑀦𑀺𑀬𑀢𑁄 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀳𑁄𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀔𑀦𑁆𑀢𑀺𑀧𑀸𑀭𑀫𑀺𑀬𑀁 𑀧𑀘𑁆𑀘𑀯𑁂𑀓𑁆𑀔𑀡𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀣𑀸 ‘‘𑀲𑀘𑁆𑀘𑁂𑀦 𑀯𑀺𑀦𑀸 𑀲𑀻𑀮𑀸𑀤𑀻𑀦𑀁 𑀅𑀲𑀫𑁆𑀪𑀯𑀢𑁄, 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀧𑀝𑀺𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀘 𑀲𑀘𑁆𑀘𑀥𑀫𑁆𑀫𑀸𑀢𑀺𑀓𑁆𑀓𑀫𑁂 𑀘 𑀲𑀩𑁆𑀩𑀧𑀸𑀧𑀥𑀫𑁆𑀫𑀸𑀦𑀁 𑀲𑀫𑁄𑀲𑀭𑀡𑀢𑁄, 𑀅𑀲𑀘𑁆𑀘𑀲𑀦𑁆𑀥𑀲𑁆𑀲 𑀅𑀧𑁆𑀧𑀘𑁆𑀘𑀬𑀺𑀓𑀪𑀸𑀯𑀢𑁄, 𑀆𑀬𑀢𑀺𑀜𑁆𑀘 𑀅𑀦𑀸𑀤𑁂𑀬𑁆𑀬𑀯𑀘𑀦𑀢𑀸𑀯𑀳𑀦𑀢𑁄, 𑀲𑀫𑁆𑀧𑀦𑁆𑀦𑀲𑀘𑁆𑀘𑀲𑁆𑀲 𑀘 𑀲𑀩𑁆𑀩𑀕𑀼𑀡𑀸𑀥𑀺𑀝𑁆𑀞𑀸𑀦𑀪𑀸𑀯𑀢𑁄, 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑁂𑀦 𑀲𑀩𑁆𑀩𑀩𑁄𑀥𑀺𑀲𑀫𑁆𑀪𑀸𑀭𑀸𑀦𑀁 𑀧𑀸𑀭𑀺𑀲𑀼𑀤𑁆𑀥𑀺𑀧𑀸𑀭𑀺𑀧𑀽𑀭𑀺𑀲𑀫𑀦𑁆𑀯𑀸𑀬𑀢𑁄, 𑀲𑀪𑀸𑀯𑀥𑀫𑁆𑀫𑀸𑀯𑀺𑀲𑀁𑀯𑀸𑀤𑀦𑁂𑀦 𑀲𑀩𑁆𑀩𑀩𑁄𑀥𑀺𑀲𑀫𑁆𑀪𑀸𑀭𑀓𑀺𑀘𑁆𑀘𑀓𑀭𑀡𑀢𑁄, 𑀩𑁄𑀥𑀺𑀲𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀘 𑀧𑀭𑀺𑀦𑀺𑀧𑁆𑀨𑀢𑁆𑀢𑀺𑀢𑁄’’𑀢𑀺𑀆𑀤𑀺𑀦𑀸 𑀲𑀘𑁆𑀘𑀧𑀸𑀭𑀫𑀺𑀬𑀸 𑀲𑀫𑁆𑀧𑀢𑁆𑀢𑀺𑀬𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑀢𑀣𑀸 ‘‘𑀤𑀸𑀦𑀸𑀤𑀻𑀲𑀼 𑀤𑀴𑁆𑀳𑀲𑀫𑀸𑀤𑀸𑀦𑀁, 𑀢𑀫𑁆𑀧𑀝𑀺𑀧𑀓𑁆𑀔𑀲𑀦𑁆𑀦𑀺𑀧𑀸𑀢𑁂 𑀘 𑀦𑁂𑀲𑀁 𑀅𑀘𑀮𑀸𑀯𑀢𑁆𑀣𑀸𑀦𑀁, 𑀢𑀢𑁆𑀣 𑀘 𑀣𑀺𑀭𑀪𑀸𑀯𑀁 𑀯𑀺𑀦𑀸 𑀦 𑀤𑀸𑀦𑀸𑀤𑀺𑀲𑀫𑁆𑀪𑀸𑀭𑀸 𑀲𑀫𑁆𑀩𑁄𑀥𑀺𑀦𑀺𑀫𑀺𑀢𑁆𑀢𑀸 𑀲𑀫𑁆𑀪𑀯𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀅𑀥𑀺𑀝𑁆𑀞𑀸𑀦𑁂 𑀕𑀼𑀡𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑀢𑀣𑀸 ¶ ‘‘𑀅𑀢𑁆𑀢𑀳𑀺𑀢𑀫𑀢𑁆𑀢𑁂 𑀅𑀯𑀢𑀺𑀝𑁆𑀞𑀦𑁆𑀢𑁂𑀦𑀸𑀧𑀺 𑀲𑀢𑁆𑀢𑁂𑀲𑀼 𑀳𑀺𑀢𑀘𑀺𑀢𑁆𑀢𑀢𑀁 𑀯𑀺𑀦𑀸 𑀦 𑀲𑀓𑁆𑀓𑀸 𑀇𑀥𑀮𑁄𑀓𑀧𑀭𑀮𑁄𑀓𑀲𑀫𑁆𑀧𑀢𑁆𑀢𑀺𑀬𑁄 ¶ 𑀧𑀸𑀧𑀼𑀡𑀺𑀢𑀼𑀁, 𑀧𑀕𑁂𑀯 𑀲𑀩𑁆𑀩𑀲𑀢𑁆𑀢𑁂 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑁂𑀦𑀸’’𑀢𑀺 𑀘 ‘‘𑀧𑀘𑁆𑀙𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀮𑁄𑀓𑀼𑀢𑁆𑀢𑀭𑀲𑀫𑁆𑀧𑀢𑁆𑀢𑀺𑀁 𑀆𑀓𑀗𑁆𑀔𑀦𑁆𑀢𑁂𑀦 𑀇𑀤𑀸𑀦𑀺 𑀮𑁄𑀓𑀺𑀬𑀲𑀫𑁆𑀧𑀢𑁆𑀢𑀺𑀁 𑀆𑀓𑀗𑁆𑀔𑀸 𑀬𑀼𑀢𑁆𑀢𑀭𑀽𑀧𑀸’’𑀢𑀺 𑀘 ‘‘𑀇𑀤𑀸𑀦𑀺 𑀆𑀲𑀬𑀫𑀢𑁆𑀢𑁂𑀦 𑀧𑀭𑁂𑀲𑀁 𑀳𑀺𑀢𑀲𑀼𑀔𑀽𑀧𑀲𑀁𑀳𑀸𑀭𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑀤𑀸 𑀧𑀬𑁄𑀕𑁂𑀦 𑀢𑀁 𑀲𑀸𑀥𑁂𑀲𑁆𑀲𑀸𑀫𑀻’’𑀢𑀺 𑀘 ‘‘𑀇𑀤𑀸𑀦𑀺 𑀫𑀬𑀸 𑀳𑀺𑀢𑀲𑀼𑀔𑀽𑀧𑀲𑀁𑀳𑀸𑀭𑁂𑀦 𑀲𑀁𑀯𑀤𑁆𑀥𑀺𑀢𑀸 𑀧𑀘𑁆𑀙𑀸 𑀥𑀫𑁆𑀫𑀲𑀁𑀯𑀺𑀪𑀸𑀕𑀲𑀳𑀸𑀬𑀸 ¶ 𑀫𑀬𑁆𑀳𑀁 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀘 ‘‘𑀏𑀢𑁂𑀳𑀺 𑀯𑀺𑀦𑀸 𑀦 𑀫𑀬𑁆𑀳𑀁 𑀩𑁄𑀥𑀺𑀲𑀫𑁆𑀪𑀸𑀭𑀸 𑀲𑀫𑁆𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑀯𑀺𑀪𑀽𑀢𑀺𑀦𑀺𑀧𑁆𑀨𑀢𑁆𑀢𑀺𑀓𑀸𑀭𑀡𑀢𑁆𑀢𑀸 𑀫𑀬𑁆𑀳𑀁 𑀏𑀢𑁂 𑀧𑀭𑀫𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀅𑀦𑀼𑀢𑁆𑀢𑀭𑀁 𑀓𑀼𑀲𑀮𑀸𑀬𑀢𑀦𑀁 𑀉𑀢𑁆𑀢𑀫𑀁 𑀕𑀸𑀭𑀯𑀝𑁆𑀞𑀸𑀦’’𑀦𑁆𑀢𑀺 𑀘 ‘‘𑀲𑀯𑀺𑀲𑁂𑀲𑀁 𑀲𑀢𑁆𑀢𑁂𑀲𑀼 𑀲𑀩𑁆𑀩𑁂𑀲𑀼 𑀳𑀺𑀢𑀚𑁆𑀛𑀸𑀲𑀬𑀢𑀸 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀩𑁆𑀩𑀸, 𑀓𑀺𑀜𑁆𑀘 𑀓𑀭𑀼𑀡𑀸𑀥𑀺𑀝𑁆𑀞𑀸𑀦𑀢𑁄𑀧𑀺 𑀲𑀩𑁆𑀩𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸 𑀅𑀦𑀼𑀩𑁆𑀭𑀽𑀳𑁂𑀢𑀩𑁆𑀩𑀸. 𑀯𑀺𑀫𑀭𑀺𑀬𑀸𑀤𑀻𑀓𑀢𑁂𑀦 𑀳𑀺 𑀘𑁂𑀢𑀲𑀸 𑀲𑀢𑁆𑀢𑁂𑀲𑀼 𑀳𑀺𑀢𑀲𑀼𑀔𑀽𑀧𑀲𑀁𑀳𑀸𑀭𑀦𑀺𑀭𑀢𑀲𑁆𑀲 𑀢𑁂𑀲𑀁 𑀅𑀳𑀺𑀢𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸 𑀩𑀮𑀯𑀢𑀻 𑀉𑀧𑁆𑀧𑀚𑁆𑀚𑀢𑀺 𑀤𑀴𑁆𑀳𑀫𑀽𑀮𑀸, 𑀓𑀭𑀼𑀡𑀸 𑀘 𑀲𑀩𑁆𑀩𑁂𑀲𑀁 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑀸𑀦𑀫𑀸𑀤𑀺 𑀘𑀭𑀡𑀁 𑀧𑀢𑀺𑀝𑁆𑀞𑀸 𑀫𑀽𑀮𑀁 𑀫𑀼𑀔𑀁 𑀧𑀫𑀼𑀔’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀫𑁂𑀢𑁆𑀢𑀸𑀬 𑀕𑀼𑀡𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑀢𑀣𑀸 ‘‘𑀉𑀧𑁂𑀓𑁆𑀔𑀸𑀬 𑀅𑀪𑀸𑀯𑁂 𑀲𑀢𑁆𑀢𑁂𑀳𑀺 𑀓𑀢𑀸 𑀯𑀺𑀧𑁆𑀧𑀓𑀸𑀭𑀸 𑀘𑀺𑀢𑁆𑀢𑀲𑁆𑀲 𑀯𑀺𑀓𑀸𑀭𑀁 𑀉𑀧𑁆𑀧𑀸𑀤𑁂𑀬𑁆𑀬𑀼𑀁, 𑀲𑀢𑀺 𑀘 𑀘𑀺𑀢𑁆𑀢𑀯𑀺𑀓𑀸𑀭𑁂 𑀤𑀸𑀦𑀸𑀤𑀺𑀲𑀫𑁆𑀪𑀸𑀭𑀸𑀦𑀁 𑀲𑀫𑁆𑀪𑀯𑁄𑀬𑁂𑀯 𑀦𑀢𑁆𑀣𑀻’’𑀢𑀺 𑀘 ‘‘𑀫𑁂𑀢𑁆𑀢𑀸𑀲𑀺𑀦𑁂𑀳𑁂𑀦 𑀲𑀺𑀦𑁂𑀳𑀺𑀢𑁂 𑀘𑀺𑀢𑁆𑀢𑁂 𑀉𑀧𑁂𑀓𑁆𑀔𑀸𑀬 𑀯𑀺𑀦𑀸 𑀲𑀫𑁆𑀪𑀸𑀭𑀸𑀦𑀁 𑀧𑀸𑀭𑀺𑀲𑀼𑀤𑁆𑀥𑀺 𑀦 𑀳𑁄𑀢𑀻’’𑀢𑀺 𑀘 ‘‘𑀅𑀦𑀼𑀧𑁂𑀓𑁆𑀔𑀓𑁄 𑀲𑀫𑁆𑀪𑀸𑀭𑁂𑀲𑀼 𑀧𑀼𑀜𑁆𑀜𑀲𑀫𑁆𑀪𑀸𑀭𑀁 𑀢𑀩𑁆𑀩𑀺𑀧𑀸𑀓𑀜𑁆𑀘 𑀲𑀢𑁆𑀢𑀳𑀺𑀢𑀢𑁆𑀣𑀁 𑀧𑀭𑀺𑀡𑀸𑀫𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺 𑀘 ‘‘𑀉𑀧𑁂𑀓𑁆𑀔𑀸𑀬 𑀅𑀪𑀸𑀯𑁂 𑀤𑁂𑀬𑁆𑀬𑀧𑀝𑀺𑀕𑁆𑀕𑀸𑀳𑀓𑁂𑀲𑀼 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀧𑀭𑀺𑀘𑁆𑀘𑀚𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺 𑀘 ‘‘𑀉𑀧𑁂𑀓𑁆𑀔𑀸𑀭𑀳𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸𑀦𑀁 𑀚𑀻𑀯𑀺𑀢𑀲𑁆𑀲 𑀘 𑀅𑀦𑁆𑀢𑀭𑀸𑀬𑀁 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀲𑀁𑀯𑀭𑀯𑀺𑀲𑁄𑀥𑀦𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀘 ‘‘𑀉𑀧𑁂𑀓𑁆𑀔𑀸𑀯𑀲𑁂𑀦 𑀅𑀭𑀢𑀺𑀭𑀢𑀺𑀲𑀳𑀲𑁆𑀲𑁂𑀯 𑀦𑁂𑀓𑁆𑀔𑀫𑁆𑀫𑀩𑀮𑀲𑀺𑀤𑁆𑀥𑀺𑀢𑁄, 𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀦𑀯𑀲𑁂𑀦𑁂𑀯 𑀲𑀩𑁆𑀩𑀲𑀫𑁆𑀪𑀸𑀭𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀢𑁄, 𑀅𑀘𑁆𑀘𑀸𑀭𑀤𑁆𑀥𑀲𑁆𑀲 𑀯𑀻𑀭𑀺𑀬𑀲𑁆𑀲 𑀅𑀦𑀼𑀧𑁂𑀓𑁆𑀔𑀦𑁂 𑀧𑀥𑀸𑀦𑀓𑀺𑀘𑁆𑀘𑀸𑀓𑀭𑀡𑀢𑁄, 𑀉𑀧𑁂𑀓𑁆𑀔𑀢𑁄𑀬𑁂𑀯 𑀢𑀺𑀢𑀺𑀓𑁆𑀔𑀸𑀦𑀺𑀚𑁆𑀛𑀸𑀦𑀲𑀫𑁆𑀪𑀯𑀢𑁄, 𑀉𑀧𑁂𑀓𑁆𑀔𑀸𑀯𑀲𑁂𑀦 𑀲𑀢𑁆𑀢𑀲𑀗𑁆𑀔𑀸𑀭𑀸𑀦𑀁 𑀅𑀯𑀺𑀲𑀁𑀯𑀸𑀤𑀦𑀢𑁄, 𑀮𑁄𑀓𑀥𑀫𑁆𑀫𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀦𑁂𑀦 𑀲𑀫𑀸𑀤𑀺𑀦𑁆𑀦𑀥𑀫𑁆𑀫𑁂𑀲𑀼 𑀅𑀘𑀮𑀸𑀥𑀺𑀝𑁆𑀞𑀸𑀦𑀲𑀺𑀤𑁆𑀥𑀺𑀢𑁄, 𑀧𑀭𑀸𑀧𑀓𑀸𑀭𑀸𑀤𑀻𑀲𑀼 𑀅𑀦𑀸𑀪𑁄𑀕𑀯𑀲𑁂𑀦𑁂𑀯 𑀫𑁂𑀢𑁆𑀢𑀸𑀯𑀺𑀳𑀸𑀭𑀦𑀺𑀧𑁆𑀨𑀢𑁆𑀢𑀺𑀢𑁄𑀢𑀺 𑀲𑀩𑁆𑀩𑀩𑁄𑀥𑀺𑀲𑀫𑁆𑀪𑀸𑀭𑀸𑀦𑀁 𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑀧𑀸𑀭𑀺𑀧𑀽𑀭𑀺𑀦𑀺𑀧𑁆𑀨𑀢𑁆𑀢𑀺𑀬𑁄 ¶ 𑀉𑀧𑁂𑀓𑁆𑀔𑀸𑀦𑀼𑀪𑀸𑀯𑁂𑀦 𑀲𑀫𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀏𑀯𑀁 𑀆𑀤𑀺𑀦𑀸 𑀦𑀬𑁂𑀦 𑀉𑀧𑁂𑀓𑁆𑀔𑀸𑀧𑀸𑀭𑀫𑀻 ¶ 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸. 𑀏𑀯𑀁 𑀅𑀧𑀭𑀺𑀘𑁆𑀘𑀸𑀕𑀧𑀭𑀺𑀘𑁆𑀘𑀸𑀕𑀸𑀤𑀻𑀲𑀼 𑀬𑀣𑀸𑀓𑁆𑀓𑀫𑀁 𑀆𑀤𑀻𑀦𑀯𑀸𑀦𑀺𑀲𑀁𑀲𑀧𑀘𑁆𑀘𑀯𑁂𑀓𑁆𑀔𑀡𑀸 𑀤𑀸𑀦𑀸𑀤𑀺𑀧𑀸𑀭𑀫𑀻𑀦𑀁 𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀣𑀸 𑀲𑀧𑀭𑀺𑀓𑁆𑀔𑀸𑀭𑀸 𑀧𑀜𑁆𑀘𑀤𑀲 𑀘𑀭𑀡𑀥𑀫𑁆𑀫𑀸 𑀧𑀜𑁆𑀘 𑀘 𑀅𑀪𑀺𑀜𑁆𑀜𑀸𑀬𑁄. 𑀢𑀢𑁆𑀣 𑀘𑀭𑀡𑀥𑀫𑁆𑀫𑀸 𑀦𑀸𑀫 𑀲𑀻𑀮𑀲𑀁𑀯𑀭𑁄, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄, 𑀲𑀢𑁆𑀢 𑀲𑀤𑁆𑀥𑀫𑁆𑀫𑀸, 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀘. 𑀢𑁂𑀲𑀼 𑀲𑀻𑀮𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀢𑁂𑀭𑀲𑀧𑀺 𑀥𑀼𑀢𑀥𑀫𑁆𑀫𑀸, 𑀅𑀧𑁆𑀧𑀺𑀘𑁆𑀙𑀢𑀸𑀤𑀬𑁄 𑀘 𑀧𑀭𑀺𑀓𑁆𑀔𑀸𑀭𑁄 ¶ . 𑀲𑀤𑁆𑀥𑀫𑁆𑀫𑁂𑀲𑀼 𑀲𑀤𑁆𑀥𑀸𑀬 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀲𑀻𑀮𑀘𑀸𑀕𑀤𑁂𑀯𑀢𑀽𑀧𑀲𑀫𑀸𑀦𑀼𑀲𑁆𑀲𑀢𑀺- 𑀮𑀽𑀔𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀲𑀺𑀦𑀺𑀤𑁆𑀥𑀧𑀼𑀕𑁆𑀕𑀮𑀲𑁂𑀯𑀦𑀧𑀲𑀸𑀤𑀦𑀻𑀬- 𑀥𑀫𑁆𑀫𑀧𑀘𑁆𑀘𑀯𑁂𑀓𑁆𑀔𑀡𑀢𑀤𑀥𑀺𑀫𑀼𑀢𑁆𑀢𑀢𑀸 𑀧𑀭𑀺𑀓𑁆𑀔𑀸𑀭𑁄, 𑀳𑀺𑀭𑁄𑀢𑁆𑀢𑀧𑁆𑀧𑀸𑀦𑀁 𑀅𑀓𑀼𑀲𑀮𑀸𑀤𑀻𑀦𑀯𑀧𑀘𑁆𑀘𑀯𑁂𑀓𑁆𑀔𑀡𑀅𑀧𑀸𑀬𑀸𑀤𑀻𑀦𑀯𑀧𑀘𑁆𑀘𑀯𑁂𑀓𑁆𑀔𑀡𑀓𑀼𑀲𑀮𑀥𑀫𑁆𑀫𑀼𑀧𑀢𑁆𑀣𑀫𑁆𑀪𑀦- 𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑀳𑀺𑀭𑁄𑀢𑁆𑀢𑀧𑁆𑀧 𑀭𑀳𑀺𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑀧𑀼𑀕𑁆𑀕𑀮𑀲𑁂𑀯𑀦𑀢𑀤𑀥𑀺𑀫𑀼𑀢𑁆𑀢𑀢𑀸, 𑀩𑀸𑀳𑀼𑀲𑀘𑁆𑀘𑀲𑁆𑀲 𑀧𑀼𑀩𑁆𑀩𑀬𑁄𑀕𑀧𑀭𑀺𑀧𑀼𑀘𑁆𑀙𑀓𑀪𑀸𑀯𑀲𑀤𑁆𑀥𑀫𑁆𑀫𑀸𑀪𑀺𑀬𑁄𑀕𑀅𑀦𑀯𑀚𑁆𑀚𑀯𑀺𑀚𑁆𑀚𑀸𑀝𑁆𑀞𑀸𑀦𑀸𑀤𑀺- 𑀧𑀭𑀺𑀘𑀬𑀧𑀭𑀺𑀧𑀓𑁆𑀓𑀺𑀦𑁆𑀤𑁆𑀭𑀺𑀬𑀢𑀸𑀓𑀺𑀮𑁂𑀲𑀤𑀽𑀭𑀻𑀪𑀸𑀯𑀅𑀧𑁆𑀧𑀲𑁆𑀲𑀼𑀢𑀧𑀭𑀺𑀯𑀚𑁆𑀚𑀦𑀩𑀳𑀼𑀲𑁆𑀲𑀼𑀢𑀲𑁂𑀯𑀦𑀢𑀤𑀥𑀺𑀫𑀼𑀢𑁆𑀢𑀢𑀸, 𑀯𑀻𑀭𑀺𑀬𑀲𑁆𑀲 𑀅𑀧𑀸𑀬𑀪𑀬𑀧𑀘𑁆𑀘𑀯𑁂𑀓𑁆𑀔𑀡𑀕𑀫𑀦𑀯𑀻𑀣𑀺𑀧𑀘𑁆𑀘𑀯𑁂𑀓𑁆𑀔𑀡𑀥𑀫𑁆𑀫𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡- 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀓𑀼𑀲𑀻𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀆𑀭𑀤𑁆𑀥𑀯𑀻𑀭𑀺𑀬𑀧𑀼𑀕𑁆𑀕𑀮- 𑀲𑁂𑀯𑀦𑀲𑀫𑁆𑀫𑀧𑁆𑀧𑀥𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀢𑀤𑀥𑀺𑀫𑀼𑀢𑁆𑀢𑀢𑀸, 𑀲𑀢𑀺𑀬𑀸 𑀲𑀢𑀺𑀲𑀫𑁆𑀧𑀚𑀜𑁆𑀜𑀫𑀼𑀝𑁆𑀞𑀲𑁆𑀲𑀢𑀺𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀧𑀼𑀕𑁆𑀕𑀮𑀲𑁂𑀯𑀦𑀢𑀤𑀥𑀺𑀫𑀼𑀢𑁆𑀢𑀢𑀸, 𑀧𑀜𑁆𑀜𑀸𑀬 𑀧𑀭𑀺𑀧𑀼𑀘𑁆𑀙𑀓𑀪𑀸𑀯𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀤𑀼𑀧𑁆𑀧𑀜𑁆𑀜- 𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀧𑀜𑁆𑀜𑀯𑀦𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀧𑀘𑁆𑀘- 𑀯𑁂𑀓𑁆𑀔𑀡𑀢𑀤𑀥𑀺𑀫𑀼𑀢𑁆𑀢𑀢𑀸, 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀲𑀻𑀮𑀸𑀤𑀺𑀘𑀢𑀼𑀓𑁆𑀓𑀁 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 ¶ 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸, 𑀆𑀯𑀚𑁆𑀚𑀦𑀸𑀤𑀺𑀯𑀲𑀻𑀪𑀸𑀯𑀓𑀭𑀡𑀜𑁆𑀘 𑀧𑀭𑀺𑀓𑁆𑀔𑀸𑀭𑁄. 𑀢𑀢𑁆𑀣 𑀲𑀻𑀮𑀸𑀤𑀻𑀳𑀺 𑀧𑀬𑁄𑀕𑀲𑀼𑀤𑁆𑀥𑀺𑀬𑀸 𑀲𑀢𑁆𑀢𑀸𑀦𑀁 𑀅𑀪𑀬𑀤𑀸𑀦𑁂, 𑀆𑀲𑀬𑀲𑀼𑀤𑁆𑀥𑀺𑀬𑀸 𑀆𑀫𑀺𑀲𑀤𑀸𑀦𑁂, 𑀉𑀪𑀬𑀲𑀼𑀤𑁆𑀥𑀺𑀬𑀸 𑀘 𑀥𑀫𑁆𑀫𑀤𑀸𑀦𑁂 𑀲𑀫𑀢𑁆𑀣𑁄 𑀳𑁄𑀢𑀻𑀢𑀺𑀆𑀤𑀺𑀦𑀸 𑀘𑀭𑀡𑀸𑀤𑀻𑀦𑀁 𑀤𑀸𑀦𑀸𑀤𑀺𑀲𑀫𑁆𑀪𑀸𑀭𑀸𑀦𑀁 𑀧𑀘𑁆𑀘𑀬𑀪𑀸𑀯𑁄 𑀬𑀣𑀸𑀭𑀳𑀁 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑁄, 𑀅𑀢𑀺𑀯𑀺𑀢𑁆𑀣𑀸𑀭𑀪𑀬𑁂𑀦 𑀦 𑀦𑀺𑀤𑁆𑀥𑀸𑀭𑀬𑀺𑀫𑁆𑀳. 𑀏𑀯𑀁 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀸𑀤𑀬𑁄𑀧𑀺 𑀤𑀸𑀦𑀸𑀤𑀻𑀦𑀁 𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑁄 𑀲𑀁𑀓𑀺𑀮𑁂𑀲𑁄𑀢𑀺 𑀅𑀯𑀺𑀲𑁂𑀲𑁂𑀦 𑀢𑀡𑁆𑀳𑀸𑀤𑀻𑀳𑀺 𑀧𑀭𑀸𑀫𑀝𑁆𑀞𑀪𑀸𑀯𑁄 𑀧𑀸𑀭𑀫𑀻𑀦𑀁 𑀲𑀁𑀓𑀺𑀮𑁂𑀲𑁄, 𑀯𑀺𑀲𑁂𑀲𑁂𑀦 𑀤𑁂𑀬𑁆𑀬𑀧𑀝𑀺𑀕𑁆𑀕𑀸𑀳𑀓𑀯𑀺𑀓𑀧𑁆𑀧𑀸 𑀤𑀸𑀦𑀧𑀸𑀭𑀫𑀺𑀬𑀸 𑀲𑀁𑀓𑀺𑀮𑁂𑀲𑁄, 𑀲𑀢𑁆𑀢𑀓𑀸𑀮𑀯𑀺𑀓𑀧𑁆𑀧𑀸 𑀲𑀻𑀮𑀧𑀸𑀭𑀫𑀺𑀬𑀸, 𑀓𑀸𑀫𑀪𑀯𑀢𑀤𑀼𑀧𑀲𑀫𑁂𑀲𑀼 𑀅𑀪𑀺𑀭𑀢𑀺𑀅𑀦𑀪𑀺𑀭𑀢𑀺𑀯𑀺𑀓𑀧𑁆𑀧𑀸 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀬𑀸, ‘‘𑀅𑀳𑀁 𑀫𑀫𑀸’’𑀢𑀺 𑀯𑀺𑀓𑀧𑁆𑀧𑀸 𑀧𑀜𑁆𑀜𑀸𑀧𑀸𑀭𑀫𑀺𑀬𑀸, 𑀮𑀻𑀦𑀼𑀤𑁆𑀥𑀘𑁆𑀘𑀯𑀺𑀓𑀧𑁆𑀧𑀸 𑀯𑀻𑀭𑀺𑀬𑀧𑀸𑀭𑀫𑀺𑀬𑀸, 𑀅𑀢𑁆𑀢𑀧𑀭𑀯𑀺𑀓𑀧𑁆𑀧𑀸 𑀔𑀦𑁆𑀢𑀺𑀧𑀸𑀭𑀫𑀺𑀬𑀸, 𑀅𑀤𑀺𑀝𑁆𑀞𑀸𑀤𑀻𑀲𑀼 𑀤𑀺𑀝𑁆𑀞𑀸𑀤𑀺𑀯𑀺𑀓𑀧𑁆𑀧𑀸 𑀲𑀘𑁆𑀘𑀧𑀸𑀭𑀫𑀺𑀬𑀸, 𑀩𑁄𑀥𑀺𑀲𑀫𑁆𑀪𑀸𑀭𑀢𑀩𑁆𑀩𑀺𑀧𑀓𑁆𑀔𑁂𑀲𑀼 𑀤𑁄𑀲𑀕𑀼𑀡𑀯𑀺𑀓𑀧𑁆𑀧𑀸 ¶ 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀬𑀸, 𑀳𑀺𑀢𑀸𑀳𑀺𑀢𑀯𑀺𑀓𑀧𑁆𑀧𑀸 𑀫𑁂𑀢𑁆𑀢𑀸𑀧𑀸𑀭𑀫𑀺𑀬𑀸, 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀓𑀧𑁆𑀧𑀸 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀬𑀸 𑀲𑀁𑀓𑀺𑀮𑁂𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀓𑀺𑀁 𑀯𑁄𑀤𑀸𑀦𑀦𑁆𑀢𑀺 𑀢𑀡𑁆𑀳𑀸𑀤𑀻𑀳𑀺 𑀅𑀦𑀼𑀧𑀖𑀸𑀢𑁄, 𑀬𑀣𑀸𑀯𑀼𑀢𑁆𑀢𑀯𑀺𑀓𑀧𑁆𑀧𑀯𑀺𑀭𑀳𑁄 𑀘 𑀏𑀢𑀸𑀲𑀁 𑀯𑁄𑀤𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀦𑀼𑀧𑀳𑀢𑀸 𑀳𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀓𑁄𑀥𑀽𑀧𑀦𑀸𑀳𑀫𑀓𑁆𑀔𑀧𑀮𑀸𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀫𑀸𑀬𑀸𑀲𑀸𑀞𑁂𑀬𑁆𑀬𑀣𑀫𑁆𑀪𑀲𑀸𑀭𑀫𑁆𑀪- 𑀫𑀤𑀧𑀫𑀸𑀤𑀸𑀤𑀻𑀳𑀺 𑀓𑀺𑀮𑁂𑀲𑁂𑀳𑀺 𑀤𑁂𑀬𑁆𑀬𑀧𑀝𑀺𑀕𑁆𑀕𑀸𑀳𑀓𑀯𑀺𑀓𑀧𑁆𑀧𑀸𑀤𑀺𑀭𑀳𑀺𑀢𑀸 𑀘 𑀤𑀸𑀦𑀸𑀤𑀺𑀧𑀸𑀭𑀫𑀺𑀬𑁄 𑀧𑀭𑀺𑀲𑀼𑀤𑁆𑀥𑀸 𑀧𑀪𑀲𑁆𑀲𑀭𑀸 𑀪𑀯𑀦𑁆𑀢𑀻𑀢𑀺.

𑀓𑁄 ¶ 𑀧𑀝𑀺𑀧𑀓𑁆𑀔𑁄𑀢𑀺 𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑁂𑀧𑀺 𑀓𑀺𑀮𑁂𑀲𑀸 𑀲𑀩𑁆𑀩𑁂𑀧𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀏𑀢𑀸𑀲𑀁 𑀧𑀝𑀺𑀧𑀓𑁆𑀔𑁄, 𑀯𑀺𑀲𑁂𑀲𑁂𑀦 𑀧𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸 𑀫𑀘𑁆𑀙𑁂𑀭𑀸𑀤𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀺𑀘 𑀤𑁂𑀬𑁆𑀬𑀧𑀝𑀺𑀕𑁆𑀕𑀸𑀳𑀓𑀤𑀸𑀦𑀨𑀮𑁂𑀲𑀼 𑀅𑀮𑁄𑀪𑀸𑀤𑁄𑀲𑀸𑀫𑁄𑀳𑀕𑀼𑀡𑀬𑁄𑀕𑀢𑁄 𑀮𑁄𑀪𑀤𑁄𑀲𑀫𑁄𑀳𑀧𑀝𑀺𑀧𑀓𑁆𑀔𑀁 𑀤𑀸𑀦𑀁, 𑀓𑀸𑀬𑀸𑀤𑀺𑀤𑁄𑀲𑀯𑀗𑁆𑀓𑀸𑀧𑀕𑀫𑀦𑀢𑁄 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀁 𑀲𑀻𑀮𑀁 ¶ , 𑀓𑀸𑀫𑀲𑀼𑀔𑀧𑀭𑀽𑀧𑀖𑀸𑀢𑀅𑀢𑁆𑀢𑀓𑀺𑀮𑀫𑀣𑀧𑀭𑀺𑀯𑀚𑁆𑀚𑀦𑀢𑁄 𑀤𑁄𑀲𑀢𑁆𑀢𑀬𑀧𑀝𑀺𑀧𑀓𑁆𑀔𑀁 𑀦𑁂𑀓𑁆𑀔𑀫𑁆𑀫𑀁, 𑀮𑁄𑀪𑀸𑀤𑀻𑀦𑀁 𑀅𑀦𑁆𑀥𑀻𑀓𑀭𑀡𑀢𑁄, 𑀜𑀸𑀡𑀲𑁆𑀲 𑀘 𑀅𑀦𑀦𑁆𑀥𑀻𑀓𑀭𑀡𑀢𑁄 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀸 𑀧𑀜𑁆𑀜𑀸, 𑀅𑀮𑀻𑀦𑀸𑀦𑀼𑀤𑁆𑀥𑀢𑀜𑀸𑀬𑀸𑀭𑀫𑁆𑀪𑀯𑀲𑁂𑀦 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀁 𑀯𑀻𑀭𑀺𑀬𑀁, 𑀇𑀝𑁆𑀞𑀸𑀦𑀺𑀝𑁆𑀞𑀲𑀼𑀜𑁆𑀜𑀢𑀸𑀦𑀁 𑀔𑀫𑀦𑀢𑁄 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀸 𑀔𑀦𑁆𑀢𑀺, 𑀲𑀢𑀺𑀧𑀺 𑀧𑀭𑁂𑀲𑀁 𑀉𑀧𑀓𑀸𑀭𑁂 𑀅𑀧𑀓𑀸𑀭𑁂 𑀘 𑀬𑀣𑀸𑀪𑀽𑀢𑀧𑁆𑀧𑀯𑀢𑁆𑀢𑀺𑀬𑀸 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀁 𑀲𑀘𑁆𑀘𑀁, 𑀮𑁄𑀓𑀥𑀫𑁆𑀫𑁂 𑀅𑀪𑀺𑀪𑀼𑀬𑁆𑀬 𑀬𑀣𑀸𑀲𑀫𑀸𑀤𑀺𑀦𑁆𑀦𑁂𑀲𑀼 𑀲𑀫𑁆𑀪𑀸𑀭𑁂𑀲𑀼 𑀅𑀘𑀮𑀦𑀢𑁄 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀁 𑀅𑀥𑀺𑀝𑁆𑀞𑀸𑀦𑀁, 𑀦𑀻𑀯𑀭𑀡𑀯𑀺𑀯𑁂𑀓𑀢𑁄 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀸 𑀫𑁂𑀢𑁆𑀢𑀸, 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀅𑀦𑀼𑀦𑀬𑀧𑀝𑀺𑀖𑀯𑀺𑀤𑁆𑀥𑀁𑀲𑀦𑀢𑁄, 𑀲𑀫𑀧𑁆𑀧𑀯𑀢𑁆𑀢𑀺𑀢𑁄 𑀘 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀸 𑀉𑀧𑁂𑀓𑁆𑀔𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀓𑀸 𑀧𑀝𑀺𑀧𑀢𑁆𑀢𑀻𑀢𑀺 𑀲𑀼𑀔𑀽𑀧𑀓𑀭𑀡𑀲𑀭𑀻𑀭𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑁂𑀦 𑀪𑀬𑀸𑀧𑀦𑀽𑀤𑀦𑁂𑀦 𑀥𑀫𑁆𑀫𑁄𑀧𑀤𑁂𑀲𑁂𑀦 𑀘 𑀩𑀳𑀼𑀥𑀸 𑀲𑀢𑁆𑀢𑀸𑀦𑀁 𑀅𑀦𑀼𑀕𑁆𑀕𑀳𑀓𑀭𑀡𑀁 𑀤𑀸𑀦𑁂 𑀧𑀝𑀺𑀧𑀢𑁆𑀢𑀺. 𑀢𑀢𑁆𑀣𑀸𑀬𑀁 𑀯𑀺𑀢𑁆𑀣𑀸𑀭𑀦𑀬𑁄 𑁋 ‘‘𑀇𑀫𑀺𑀦𑀸𑀳𑀁 𑀤𑀸𑀦𑁂𑀦 𑀲𑀢𑁆𑀢𑀸𑀦𑀁 𑀆𑀬𑀼𑀯𑀡𑁆𑀡𑀲𑀼𑀔𑀩𑀮𑀧𑀝𑀺𑀪𑀸𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀁 𑀭𑀫𑀡𑀻𑀬𑀁 𑀅𑀕𑁆𑀕𑀨𑀮𑀲𑀫𑁆𑀧𑀢𑁆𑀢𑀺𑀁 𑀦𑀺𑀧𑁆𑀨𑀸𑀤𑁂𑀬𑁆𑀬’’𑀦𑁆𑀢𑀺 𑀅𑀦𑁆𑀦𑀤𑀸𑀦𑀁 𑀤𑁂𑀢𑀺, 𑀢𑀣𑀸 𑀲𑀢𑁆𑀢𑀸𑀦𑀁 𑀓𑀫𑁆𑀫𑀓𑀺𑀮𑁂𑀲𑀧𑀺𑀧𑀸𑀲𑀯𑀽𑀧𑀲𑀫𑀸𑀬 𑀧𑀸𑀦𑀁 𑀤𑁂𑀢𑀺, 𑀢𑀣𑀸 𑀲𑀼𑀯𑀡𑁆𑀡𑀯𑀡𑁆𑀡𑀢𑀸𑀬, 𑀳𑀺𑀭𑁄𑀢𑁆𑀢𑀧𑁆𑀧𑀸𑀮𑀗𑁆𑀓𑀸𑀭𑀲𑁆𑀲 𑀘 𑀦𑀺𑀧𑁆𑀨𑀢𑁆𑀢𑀺𑀬𑀸 𑀯𑀢𑁆𑀣𑀸𑀦𑀺 𑀤𑁂𑀢𑀺, 𑀢𑀣𑀸 𑀇𑀤𑁆𑀥𑀺𑀯𑀺𑀥𑀲𑁆𑀲 𑀘𑁂𑀯 𑀦𑀺𑀩𑁆𑀩𑀸𑀦𑀲𑀼𑀔𑀲𑁆𑀲 𑀘 𑀦𑀺𑀧𑁆𑀨𑀢𑁆𑀢𑀺𑀬𑀸 𑀬𑀸𑀦𑀁 𑀤𑁂𑀢𑀺, 𑀢𑀣𑀸 𑀲𑀻𑀮𑀕𑀦𑁆𑀥𑀦𑀺𑀧𑁆𑀨𑀢𑁆𑀢𑀺𑀬𑀸 𑀕𑀦𑁆𑀥𑀁, 𑀩𑀼𑀤𑁆𑀥𑀕𑀼𑀡𑀲𑁄𑀪𑀸𑀦𑀺𑀧𑁆𑀨𑀢𑁆𑀢𑀺𑀬𑀸 𑀫𑀸𑀮𑀸𑀯𑀺𑀮𑁂𑀧𑀦𑀁, 𑀩𑁄𑀥𑀺𑀫𑀡𑁆𑀟𑀸𑀲𑀦𑀦𑀺𑀧𑁆𑀨𑀢𑁆𑀢𑀺𑀬𑀸 𑀆𑀲𑀦𑀁 ¶ , 𑀢𑀣𑀸𑀕𑀢𑀲𑁂𑀬𑁆𑀬𑀸𑀦𑀺𑀧𑁆𑀨𑀢𑁆𑀢𑀺𑀬𑀸 𑀲𑁂𑀬𑁆𑀬𑀁, 𑀲𑀭𑀡𑀪𑀸𑀯𑀦𑀺𑀧𑁆𑀨𑀢𑁆𑀢𑀺𑀬𑀸 𑀆𑀯𑀲𑀣𑀁, 𑀧𑀜𑁆𑀘𑀘𑀓𑁆𑀔𑀼𑀧𑀝𑀺𑀮𑀸𑀪𑀸𑀬 𑀧𑀤𑀻𑀧𑁂𑀬𑁆𑀬𑀁 𑀤𑁂𑀢𑀺. 𑀩𑁆𑀬𑀸𑀫𑀧𑁆𑀧𑀪𑀸𑀦𑀺𑀧𑁆𑀨𑀢𑁆𑀢𑀺𑀬𑀸 𑀭𑀽𑀧𑀤𑀸𑀦𑀁, 𑀩𑁆𑀭𑀳𑁆𑀫𑀲𑁆𑀲𑀭𑀦𑀺𑀧𑁆𑀨𑀢𑁆𑀢𑀺𑀬𑀸 𑀲𑀤𑁆𑀤𑀤𑀸𑀦𑀁, 𑀲𑀩𑁆𑀩𑀮𑁄𑀓𑀲𑁆𑀲 𑀧𑀺𑀬𑀪𑀸𑀯𑀸𑀬 𑀭𑀲𑀤𑀸𑀦𑀁, 𑀩𑀼𑀤𑁆𑀥𑀲𑀼𑀔𑀼𑀫𑀸𑀮𑀪𑀸𑀯𑀸𑀬 𑀨𑁄𑀝𑁆𑀞𑀩𑁆𑀩𑀤𑀸𑀦𑀁, 𑀅𑀚𑀭𑀸𑀫𑀭𑀡𑀪𑀸𑀯𑀸𑀬 𑀪𑁂𑀲𑀚𑁆𑀚𑀤𑀸𑀦𑀁, 𑀓𑀺𑀮𑁂𑀲𑀤𑀸𑀲𑀩𑁆𑀬𑀯𑀺𑀫𑁄𑀘𑀦𑀢𑁆𑀣𑀁 ¶ 𑀤𑀸𑀲𑀸𑀦𑀁 𑀪𑀼𑀚𑀺𑀲𑁆𑀲𑀢𑀸𑀤𑀸𑀦𑀁, 𑀲𑀤𑁆𑀥𑀫𑁆𑀫𑀸𑀪𑀺𑀭𑀢𑀺𑀬𑀸 𑀅𑀦𑀯𑀚𑁆𑀚𑀔𑀺𑀟𑁆𑀟𑀸𑀭𑀢𑀺𑀳𑁂𑀢𑀼𑀤𑀸𑀦𑀁, 𑀲𑀩𑁆𑀩𑁂𑀧𑀺 𑀲𑀢𑁆𑀢𑁂 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀪𑀸𑀯𑀽𑀧𑀦𑀬𑀦𑀸𑀬 𑀧𑀼𑀢𑁆𑀢𑀤𑀸𑀦𑀁, 𑀲𑀓𑀮𑀲𑁆𑀲 𑀮𑁄𑀓𑀲𑁆𑀲 𑀧𑀢𑀺𑀪𑀸𑀯𑀽𑀧𑀕𑀫𑀦𑀸𑀬 𑀤𑀸𑀭𑀤𑀸𑀦𑀁, 𑀲𑀼𑀪𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀬𑀸 𑀲𑀼𑀯𑀡𑁆𑀡𑀫𑀡𑀺𑀫𑀼𑀢𑁆𑀢𑀸𑀧𑀯𑀸𑀴𑀸𑀤𑀺𑀤𑀸𑀦𑀁, 𑀅𑀦𑀼𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀦𑀸𑀦𑀸𑀯𑀺𑀥𑀯𑀺𑀪𑀽𑀲𑀦𑀤𑀸𑀦𑀁, 𑀲𑀤𑁆𑀥𑀫𑁆𑀫𑀓𑁄𑀲𑀸𑀥𑀺𑀕𑀫𑀸𑀬 𑀯𑀺𑀢𑁆𑀢𑀓𑁄𑀲𑀤𑀸𑀦𑀁, 𑀥𑀫𑁆𑀫𑀭𑀸𑀚𑀪𑀸𑀯𑀸𑀬 𑀭𑀚𑁆𑀚𑀤𑀸𑀦𑀁, 𑀛𑀸𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀆𑀭𑀸𑀫𑀼𑀬𑁆𑀬𑀸𑀦𑀸𑀤𑀺𑀯𑀦𑀤𑀸𑀦𑀁, 𑀘𑀓𑁆𑀓𑀗𑁆𑀓𑀺𑀢𑁂𑀳𑀺 𑀧𑀸𑀤𑁂𑀳𑀺 𑀩𑁄𑀥𑀺𑀫𑀡𑁆𑀟𑀽𑀧𑀲𑀗𑁆𑀓𑀫𑀦𑀸𑀬 𑀘𑀭𑀡𑀤𑀸𑀦𑀁, 𑀘𑀢𑀼𑀭𑁄𑀖𑀦𑀺𑀢𑁆𑀣𑀭𑀡𑀸𑀬 𑀲𑀢𑁆𑀢𑀸𑀦𑀁 𑀲𑀤𑁆𑀥𑀫𑁆𑀫𑀳𑀢𑁆𑀣𑀤𑀸𑀦𑀢𑁆𑀣𑀁 𑀳𑀢𑁆𑀣𑀤𑀸𑀦𑀁, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀧𑀝𑀺𑀮𑀸𑀪𑀸𑀬 𑀓𑀡𑁆𑀡𑀦𑀸𑀲𑀸𑀤𑀺𑀤𑀸𑀦𑀁, 𑀲𑀫𑀦𑁆𑀢𑀘𑀓𑁆𑀔𑀼𑀧𑀝𑀺𑀮𑀸𑀪𑀸𑀬 𑀘𑀓𑁆𑀔𑀼𑀤𑀸𑀦𑀁, ‘‘𑀤𑀲𑁆𑀲𑀦𑀲𑀯𑀦𑀸𑀦𑀼𑀲𑁆𑀲𑀭𑀡𑀧𑀸𑀭𑀺𑀘𑀭𑀺𑀬𑀸𑀤𑀻𑀲𑀼 𑀲𑀩𑁆𑀩𑀓𑀸𑀮𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀸𑀯𑀳𑁄, 𑀲𑀩𑁆𑀩𑀮𑁄𑀓𑁂𑀦 𑀘 𑀉𑀧𑀚𑀻𑀯𑀺𑀢𑀩𑁆𑀩𑁄 𑀫𑁂 𑀓𑀸𑀬𑁄 𑀪𑀯𑁂𑀬𑁆𑀬𑀸’’𑀢𑀺 𑀫𑀁𑀲𑀮𑁄𑀳𑀺𑀢𑀸𑀤𑀺𑀤𑀸𑀦𑀁, ‘‘𑀲𑀩𑁆𑀩𑀮𑁄𑀓𑀼𑀢𑁆𑀢𑀫𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀉𑀢𑁆𑀢𑀫𑀗𑁆𑀕𑀤𑀸𑀦𑀁 𑀤𑁂𑀢𑀺.

𑀏𑀯𑀁 ¶ 𑀤𑀤𑀦𑁆𑀢𑁄 𑀘 𑀦 𑀅𑀦𑁂𑀲𑀦𑀸𑀬 𑀤𑁂𑀢𑀺, 𑀦 𑀧𑀭𑁄𑀧𑀖𑀸𑀢𑁂𑀦, 𑀦 𑀪𑀬𑁂𑀦, 𑀦 𑀮𑀚𑁆𑀚𑀸𑀬, 𑀦 𑀤𑀓𑁆𑀔𑀺𑀡𑁂𑀬𑁆𑀬𑀭𑁄𑀲𑀦𑁂𑀦, 𑀦 𑀧𑀡𑀻𑀢𑁂 𑀲𑀢𑀺 𑀮𑀽𑀔𑀁, 𑀦 𑀅𑀢𑁆𑀢𑀼𑀓𑁆𑀓𑀁𑀲𑀦𑁂𑀦, 𑀦 𑀧𑀭𑀯𑀫𑁆𑀪𑀦𑁂𑀦, 𑀦 𑀨𑀮𑀸𑀪𑀺𑀓𑀗𑁆𑀔𑀸𑀬, 𑀦 𑀬𑀸𑀘𑀓𑀚𑀺𑀕𑀼𑀘𑁆𑀙𑀸𑀬, 𑀦 𑀅𑀘𑀺𑀢𑁆𑀢𑀻𑀓𑀸𑀭𑁂𑀦 𑀤𑁂𑀢𑀺, 𑀅𑀣 𑀔𑁄 𑀲𑀓𑁆𑀓𑀘𑁆𑀘𑀁 𑀤𑁂𑀢𑀺, 𑀲𑀳𑀢𑁆𑀣𑁂𑀦 𑀤𑁂𑀢𑀺, 𑀓𑀸𑀮𑁂𑀦 𑀤𑁂𑀢𑀺, 𑀘𑀺𑀢𑁆𑀢𑀺𑀁 𑀓𑀢𑁆𑀯𑀸 𑀤𑁂𑀢𑀺, 𑀅𑀯𑀺𑀪𑀸𑀕𑁂𑀦 𑀤𑁂𑀢𑀺, 𑀢𑀻𑀲𑀼 𑀓𑀸𑀮𑁂𑀲𑀼 𑀲𑁄𑀫𑀦𑀲𑁆𑀲𑀺𑀢𑁄 𑀤𑁂𑀢𑀺. 𑀢𑀢𑁄𑀬𑁂𑀯 𑀤𑀢𑁆𑀯𑀸 𑀦 𑀧𑀘𑁆𑀙𑀸𑀦𑀼𑀢𑀸𑀧𑀻 𑀳𑁄𑀢𑀺, 𑀦 𑀧𑀝𑀺𑀕𑁆𑀕𑀸𑀳𑀓𑀯𑀲𑁂𑀦 𑀫𑀸𑀦𑀸𑀯𑀫𑀸𑀦𑀁 𑀓𑀭𑁄𑀢𑀺, 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀧𑀺𑀬𑀲𑀫𑀼𑀤𑀸𑀘𑀸𑀭𑁄 𑀳𑁄𑀢𑀺 𑀯𑀤𑀜𑁆𑀜𑀽 𑀬𑀸𑀘𑀬𑁄𑀕𑁄 𑀲𑀧𑀭𑀺𑀯𑀸𑀭𑀤𑀸𑀬𑀻. 𑀢𑀜𑁆𑀘 𑀤𑀸𑀦𑀲𑀫𑁆𑀧𑀢𑁆𑀢𑀺𑀁 𑀲𑀓𑀮𑀮𑁄𑀓𑀳𑀺𑀢𑀲𑀼𑀔𑀸𑀬 𑀧𑀭𑀺𑀡𑀸𑀫𑁂𑀢𑀺, 𑀅𑀢𑁆𑀢𑀦𑁄 𑀘 𑀅𑀓𑀼𑀧𑁆𑀧𑀸𑀬 𑀯𑀺𑀫𑀼𑀢𑁆𑀢𑀺𑀬𑀸, 𑀅𑀧𑀭𑀺𑀓𑁆𑀔𑀬𑀲𑁆𑀲 𑀙𑀦𑁆𑀤𑀲𑁆𑀲, 𑀅𑀧𑀭𑀺𑀓𑁆𑀔𑀬𑀲𑁆𑀲 𑀯𑀻𑀭𑀺𑀬𑀲𑁆𑀲, 𑀅𑀧𑀭𑀺𑀓𑁆𑀔𑀬𑀲𑁆𑀲 𑀲𑀫𑀸𑀥𑀸𑀦𑀲𑁆𑀲, 𑀅𑀧𑀭𑀺𑀓𑁆𑀔𑀬𑀲𑁆𑀲 𑀜𑀸𑀡𑀲𑁆𑀲, 𑀅𑀧𑀭𑀺𑀓𑁆𑀔𑀬𑀸𑀬 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 ¶ 𑀧𑀭𑀺𑀡𑀸𑀫𑁂𑀢𑀺. 𑀇𑀫𑀜𑁆𑀘 𑀤𑀸𑀦𑀧𑀸𑀭𑀫𑀺𑀁 𑀧𑀝𑀺𑀧𑀚𑁆𑀚𑀦𑁆𑀢𑁂𑀦 𑀫𑀳𑀸𑀲𑀢𑁆𑀢𑁂𑀦 𑀚𑀻𑀯𑀺𑀢𑁂, 𑀪𑁄𑀕𑁂𑀲𑀼 ¶ 𑀘 𑀅𑀦𑀺𑀘𑁆𑀘𑀲𑀜𑁆𑀜𑀸 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀩𑁆𑀩𑀸, 𑀲𑀢𑁆𑀢𑁂𑀲𑀼 𑀘 𑀫𑀳𑀸𑀓𑀭𑀼𑀡𑀸. 𑀏𑀯𑀜𑁆𑀳𑀺 𑀪𑁄𑀕𑁂 𑀕𑀳𑁂𑀢𑀩𑁆𑀩𑀲𑀸𑀭𑀁 𑀕𑀡𑁆𑀳𑀦𑁆𑀢𑁄 𑀆𑀤𑀺𑀢𑁆𑀢𑀲𑁆𑀫𑀸 𑀯𑀺𑀬 𑀅𑀕𑀸𑀭𑀲𑁆𑀫𑀸 𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀁, 𑀅𑀢𑁆𑀢𑀸𑀦𑀜𑁆𑀘 𑀩𑀳𑀺 𑀦𑀻𑀳𑀭𑀦𑁆𑀢𑁄 𑀦 𑀓𑀺𑀜𑁆𑀘𑀺 𑀲𑁂𑀲𑁂𑀢𑀺, 𑀦𑀺𑀭𑀯𑀲𑁂𑀲𑀢𑁄 𑀦𑀺𑀲𑁆𑀲𑀚𑁆𑀚𑀢𑀺𑀬𑁂𑀯. 𑀅𑀬𑀁 𑀢𑀸𑀯 𑀤𑀸𑀦𑀧𑀸𑀭𑀫𑀺𑀬𑀸 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄.

𑀲𑀻𑀮𑀧𑀸𑀭𑀫𑀺𑀬𑀸 𑀧𑀦 𑀬𑀲𑁆𑀫𑀸 𑀲𑀩𑁆𑀩𑀜𑁆𑀜𑀼𑀲𑀻𑀮𑀸𑀮𑀗𑁆𑀓𑀸𑀭𑁂𑀳𑀺 𑀲𑀢𑁆𑀢𑁂 𑀅𑀮𑀗𑁆𑀓𑀭𑀺𑀢𑀼𑀓𑀸𑀫𑁂𑀦 𑀅𑀢𑁆𑀢𑀦𑁄𑀬𑁂𑀯 𑀢𑀸𑀯 𑀲𑀻𑀮𑀁 𑀯𑀺𑀲𑁄𑀥𑁂𑀢𑀩𑁆𑀩𑀁, 𑀢𑀲𑁆𑀫𑀸 𑀲𑀢𑁆𑀢𑁂𑀲𑀼 𑀢𑀣𑀸 𑀤𑀬𑀸𑀧𑀦𑁆𑀦𑀘𑀺𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀬𑀣𑀸 𑀲𑀼𑀧𑀺𑀦𑀦𑁆𑀢𑁂𑀦𑀧𑀺 𑀦 𑀆𑀖𑀸𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀧𑀭𑀽𑀧𑀓𑀸𑀭𑀦𑀺𑀭𑀢𑀢𑀸𑀬 𑀧𑀭𑀲𑀦𑁆𑀢𑀓𑁄 𑀅𑀮𑀕𑀤𑁆𑀤𑁄 𑀯𑀺𑀬 𑀦 𑀧𑀭𑀸𑀫𑀲𑀺𑀢𑀩𑁆𑀩𑁄. 𑀅𑀩𑁆𑀭𑀳𑁆𑀫𑀘𑀭𑀺𑀬𑀢𑁄𑀧𑀺 𑀆𑀭𑀸𑀘𑀸𑀭𑀻, 𑀲𑀢𑁆𑀢𑀯𑀺𑀥𑀫𑁂𑀣𑀼𑀦 𑀲𑀁𑀬𑁄𑀕𑀯𑀺𑀭𑀢𑁄, 𑀧𑀕𑁂𑀯 𑀧𑀭𑀤𑀸𑀭𑀕𑀫𑀦𑀢𑁄. 𑀲𑀘𑁆𑀘𑀁 𑀳𑀺𑀢𑀁 𑀧𑀺𑀬𑀁 𑀧𑀭𑀺𑀫𑀺𑀢𑀫𑁂𑀯 𑀘 𑀓𑀸𑀮𑁂𑀦 𑀥𑀫𑁆𑀫𑀺𑀁 𑀓𑀣𑀁 𑀪𑀸𑀲𑀺𑀢𑀸 𑀳𑁄𑀢𑀺, 𑀅𑀦𑀪𑀺𑀚𑁆𑀛𑀸𑀮𑀼 𑀅𑀩𑁆𑀬𑀸𑀧𑀦𑁆𑀦𑁄 𑀅𑀯𑀺𑀧𑀭𑀻𑀢𑀤𑀲𑁆𑀲𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀦𑀺𑀯𑀺𑀝𑁆𑀞𑀲𑀤𑁆𑀥𑁄 𑀦𑀺𑀯𑀺𑀝𑁆𑀞𑀧𑁂𑀫𑁄. 𑀇𑀢𑀺 𑀘𑀢𑀼𑀭𑀸𑀧𑀸𑀬𑀯𑀝𑁆𑀝𑀤𑀼𑀓𑁆𑀔𑀧𑀣𑁂𑀳𑀺 𑀅𑀓𑀼𑀲𑀮𑀓𑀫𑁆𑀫𑀧𑀣𑁂𑀳𑀺, 𑀅𑀓𑀼𑀲𑀮𑀥𑀫𑁆𑀫𑁂𑀳𑀺 𑀘 𑀑𑀭𑀫𑀺𑀢𑁆𑀯𑀸 𑀲𑀕𑁆𑀕𑀫𑁄𑀓𑁆𑀔𑀧𑀣𑁂𑀲𑀼 𑀓𑀼𑀲𑀮𑀓𑀫𑁆𑀫𑀧𑀣𑁂𑀲𑀼 𑀧𑀢𑀺𑀝𑁆𑀞𑀺𑀢𑀲𑁆𑀲 𑀲𑀼𑀤𑁆𑀥𑀸𑀲𑀬𑀧𑀬𑁄𑀕𑀢𑀸𑀬 𑀬𑀣𑀸𑀪𑀺𑀧𑀢𑁆𑀣𑀺𑀢𑀸 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀽𑀧𑀲𑀜𑁆𑀳𑀺𑀢𑀸 𑀫𑀦𑁄𑀭𑀣𑀸 𑀲𑀻𑀖𑀁 𑀅𑀪𑀺𑀦𑀺𑀧𑁆𑀨𑀚𑁆𑀚𑀦𑁆𑀢𑀺.

𑀢𑀢𑁆𑀣 𑀳𑀺𑀁𑀲𑀸𑀦𑀺𑀯𑀢𑁆𑀢𑀺𑀬𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀪𑀬𑀤𑀸𑀦𑀁 𑀤𑁂𑀢𑀺, 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀫𑁂𑀢𑁆𑀢𑀸𑀪𑀸𑀯𑀦𑀁 𑀲𑀫𑁆𑀧𑀸𑀤𑁂𑀢𑀺, 𑀏𑀓𑀸𑀤𑀲 𑀫𑁂𑀢𑁆𑀢𑀸𑀦𑀺𑀲𑀁𑀲𑁂 𑀅𑀥𑀺𑀕𑀘𑁆𑀙𑀢𑀺, 𑀅𑀧𑁆𑀧𑀸𑀩𑀸𑀥𑁄 𑀳𑁄𑀢𑀺 𑀅𑀧𑁆𑀧𑀸𑀢𑀗𑁆𑀓𑁄 𑀤𑀻𑀖𑀸𑀬𑀼𑀓𑁄 𑀲𑀼𑀔𑀩𑀳𑀼𑀮𑁄, 𑀮𑀓𑁆𑀔𑀡𑀯𑀺𑀲𑁂𑀲𑁂 𑀧𑀸𑀧𑀼𑀡𑀸𑀢𑀺, 𑀤𑁄𑀲𑀯𑀸𑀲𑀦𑀜𑁆𑀘 𑀲𑀫𑀼𑀘𑁆𑀙𑀺𑀦𑁆𑀤𑀢𑀺. 𑀢𑀣𑀸 𑀅𑀤𑀺𑀦𑁆𑀦𑀸𑀤𑀸𑀦𑀦𑀺𑀯𑀢𑁆𑀢𑀺𑀬𑀸 𑀘𑁄𑀭𑀸𑀤𑀺𑀅𑀲𑀸𑀥𑀸𑀭𑀡𑁂 𑀉𑀴𑀸𑀭𑁂 𑀪𑁄𑀕𑁂 𑀅𑀥𑀺𑀕𑀘𑁆𑀙𑀢𑀺, 𑀅𑀦𑀸𑀲𑀗𑁆𑀓𑀦𑀻𑀬𑁄 𑀧𑀺𑀬𑁄 𑀫𑀦𑀸𑀧𑁄 𑀯𑀺𑀲𑁆𑀲𑀲𑀦𑀻𑀬𑁄, 𑀯𑀺𑀪𑀯𑀲𑀫𑁆𑀧𑀢𑁆𑀢𑀻𑀲𑀼 𑀅𑀮𑀕𑁆𑀕𑀘𑀺𑀢𑁆𑀢𑁄 𑀧𑀭𑀺𑀘𑁆𑀘𑀸𑀕𑀲𑀻𑀮𑁄 ¶ , 𑀮𑁄𑀪𑀯𑀸𑀲𑀦𑀜𑁆𑀘 𑀲𑀫𑀼𑀘𑁆𑀙𑀺𑀦𑁆𑀤𑀢𑀺. 𑀅𑀩𑁆𑀭𑀳𑁆𑀫𑀘𑀭𑀺𑀬𑀦𑀺𑀯𑀢𑁆𑀢𑀺𑀬𑀸 𑀅𑀮𑁄𑀪𑁄 𑀳𑁄𑀢𑀺 𑀲𑀦𑁆𑀢𑀓𑀸𑀬𑀘𑀺𑀢𑁆𑀢𑁄, 𑀲𑀢𑁆𑀢𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄 ¶ 𑀅𑀧𑀭𑀺𑀲𑀗𑁆𑀓𑀦𑀻𑀬𑁄, 𑀓𑀮𑁆𑀬𑀸𑀡𑁄 𑀘𑀲𑁆𑀲 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺, 𑀅𑀮𑀕𑁆𑀕𑀘𑀺𑀢𑁆𑀢𑁄 𑀳𑁄𑀢𑀺 𑀫𑀸𑀢𑀼𑀕𑀸𑀫𑁂𑀲𑀼 𑀅𑀮𑀼𑀤𑁆𑀥𑀸𑀲𑀬𑁄, 𑀦𑁂𑀓𑁆𑀔𑀫𑁆𑀫𑀩𑀳𑀼𑀮𑁄, 𑀮𑀓𑁆𑀔𑀡𑀯𑀺𑀲𑁂𑀲𑁂 𑀅𑀥𑀺𑀕𑀘𑁆𑀙𑀢𑀺, 𑀮𑁄𑀪𑀯𑀸𑀲𑀦𑀜𑁆𑀘 𑀲𑀫𑀼𑀘𑁆𑀙𑀺𑀦𑁆𑀤𑀢𑀺.

𑀫𑀼𑀲𑀸𑀯𑀸𑀤𑀦𑀺𑀯𑀢𑁆𑀢𑀺𑀬𑀸 𑀲𑀢𑁆𑀢𑀸𑀦𑀁 𑀧𑀫𑀸𑀡𑀪𑀽𑀢𑁄 𑀳𑁄𑀢𑀺 𑀧𑀘𑁆𑀘𑀬𑀺𑀓𑁄 𑀣𑁂𑀢𑁄 𑀆𑀤𑁂𑀬𑁆𑀬𑀯𑀘𑀦𑁄 𑀤𑁂𑀯𑀢𑀸𑀦𑀁 𑀧𑀺𑀬𑁄 𑀫𑀦𑀸𑀧𑁄 𑀲𑀼𑀭𑀪𑀺𑀕𑀦𑁆𑀥𑀫𑀼𑀔𑁄 𑀆𑀭𑀓𑁆𑀔𑀺𑀬𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑁄 ¶ , 𑀮𑀓𑁆𑀔𑀡𑀯𑀺𑀲𑁂𑀲𑁂 𑀘 𑀅𑀥𑀺𑀕𑀘𑁆𑀙𑀢𑀺, 𑀓𑀺𑀮𑁂𑀲𑀯𑀸𑀲𑀦𑀜𑁆𑀘 𑀲𑀫𑀼𑀘𑁆𑀙𑀺𑀦𑁆𑀤𑀢𑀺. 𑀧𑁂𑀲𑀼𑀜𑁆𑀜𑀦𑀺𑀯𑀢𑁆𑀢𑀺𑀬𑀸 𑀧𑀭𑀽𑀧𑀓𑁆𑀓𑀫𑁂𑀳𑀺 𑀅𑀪𑁂𑀚𑁆𑀚𑀓𑀸𑀬𑁄 𑀳𑁄𑀢𑀺 𑀅𑀪𑁂𑀚𑁆𑀚𑀧𑀭𑀺𑀯𑀸𑀭𑁄, 𑀲𑀤𑁆𑀥𑀫𑁆𑀫𑁂 𑀘 𑀅𑀪𑀺𑀚𑁆𑀚𑀦𑀓𑀲𑀤𑁆𑀥𑁄, 𑀤𑀴𑁆𑀳𑀫𑀺𑀢𑁆𑀢𑁄 𑀪𑀯𑀦𑁆𑀢𑀭𑀧𑀭𑀺𑀘𑀺𑀢𑀸𑀦𑀫𑁆𑀧𑀺 𑀲𑀢𑁆𑀢𑀸𑀦𑀁 𑀏𑀓𑀦𑁆𑀢𑀧𑀺𑀬𑁄, 𑀅𑀲𑀁𑀓𑀺𑀮𑁂𑀲𑀩𑀳𑀼𑀮𑁄. 𑀨𑀭𑀼𑀲𑀯𑀸𑀘𑀸𑀦𑀺𑀯𑀢𑁆𑀢𑀺𑀬𑀸 𑀲𑀢𑁆𑀢𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄 𑀲𑀼𑀔𑀲𑀻𑀮𑁄 𑀫𑀥𑀼𑀭𑀯𑀘𑀦𑁄 𑀲𑀫𑁆𑀪𑀸𑀯𑀦𑀻𑀬𑁄, 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀘𑀲𑁆𑀲 𑀲𑀭𑁄 (𑀫. 𑀦𑀺. 𑁨.𑁩𑁮𑁭) 𑀦𑀺𑀩𑁆𑀩𑀢𑁆𑀢𑀢𑀺. 𑀲𑀫𑁆𑀨𑀧𑁆𑀧𑀮𑀸𑀧𑀦𑀺𑀯𑀢𑁆𑀢𑀺𑀬𑀸 𑀘 𑀲𑀢𑁆𑀢𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄 𑀕𑀭𑀼𑀪𑀸𑀯𑀦𑀻𑀬𑁄 𑀘 𑀆𑀤𑁂𑀬𑁆𑀬𑀯𑀘𑀦𑁄 𑀘 𑀧𑀭𑀺𑀫𑀺𑀢𑀸𑀮𑀸𑀧𑁄, 𑀫𑀳𑁂𑀲𑀓𑁆𑀔𑁄 𑀘 𑀳𑁄𑀢𑀺 𑀫𑀳𑀸𑀦𑀼𑀪𑀸𑀯𑁄, 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑁂𑀦 𑀧𑀝𑀺𑀪𑀸𑀦𑁂𑀦 𑀧𑀜𑁆𑀳𑀸𑀦𑀁 𑀩𑁆𑀬𑀸𑀓𑀭𑀡𑀓𑀼𑀲𑀮𑁄, 𑀩𑀼𑀤𑁆𑀥𑀪𑀽𑀫𑀺𑀬𑀜𑁆𑀘 𑀏𑀓𑀸𑀬 𑀏𑀯 𑀯𑀸𑀘𑀸𑀬 𑀅𑀦𑁂𑀓𑀪𑀸𑀲𑀸𑀦𑀁 𑀲𑀢𑁆𑀢𑀸𑀦𑀁 𑀅𑀦𑁂𑀓𑁂𑀲𑀁 𑀧𑀜𑁆𑀳𑀸𑀦𑀁 𑀩𑁆𑀬𑀸𑀓𑀭𑀡𑀲𑀫𑀢𑁆𑀣𑁄 𑀳𑁄𑀢𑀺.

𑀅𑀦𑀪𑀺𑀚𑁆𑀛𑀸𑀮𑀼𑀢𑀸𑀬 𑀇𑀘𑁆𑀙𑀺𑀢𑀮𑀸𑀪𑀻 𑀳𑁄𑀢𑀺, 𑀉𑀴𑀸𑀭𑁂𑀲𑀼 𑀘 𑀪𑁄𑀕𑁂𑀲𑀼 𑀭𑀼𑀘𑀺𑀁 𑀧𑀝𑀺𑀮𑀪𑀢𑀺, 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀤𑀻𑀦𑀁 𑀲𑀫𑁆𑀫𑀢𑁄 𑀳𑁄𑀢𑀺, 𑀧𑀘𑁆𑀘𑀢𑁆𑀣𑀺𑀓𑁂𑀳𑀺 𑀅𑀦𑀪𑀺𑀪𑀯𑀦𑀻𑀬𑁄, 𑀇𑀦𑁆𑀤𑁆𑀭𑀺𑀬𑀯𑁂𑀓𑀮𑁆𑀮𑀁 𑀦 𑀧𑀸𑀧𑀼𑀡𑀸𑀢𑀺, 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄 𑀘 𑀳𑁄𑀢𑀺. 𑀅𑀩𑁆𑀬𑀸𑀧𑀸𑀤𑁂𑀦 𑀧𑀺𑀬𑀤𑀲𑁆𑀲𑀦𑁄 𑀳𑁄𑀢𑀺 𑀲𑀢𑁆𑀢𑀸𑀦𑀁 𑀲𑀫𑁆𑀪𑀸𑀯𑀦𑀻𑀬𑁄, 𑀧𑀭𑀳𑀺𑀢𑀸𑀪𑀺𑀦𑀦𑁆𑀤𑀺𑀢𑀸𑀬 𑀘 𑀲𑀢𑁆𑀢𑁂 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀧𑀲𑀸𑀤𑁂𑀢𑀺, 𑀅𑀮𑀽𑀔𑀲𑀪𑀸𑀯𑁄 𑀘 𑀳𑁄𑀢𑀺 𑀫𑁂𑀢𑁆𑀢𑀸𑀯𑀺𑀳𑀸𑀭𑀻, 𑀫𑀳𑁂𑀲𑀓𑁆𑀔𑁄 𑀘 𑀳𑁄𑀢𑀺 𑀫𑀳𑀸𑀦𑀼𑀪𑀸𑀯𑁄. 𑀫𑀺𑀘𑁆𑀙𑀸𑀤𑀲𑁆𑀲𑀦𑀸𑀪𑀸𑀯𑁂𑀦 𑀓𑀮𑁆𑀬𑀸𑀡𑁂 𑀲𑀳𑀸𑀬𑁂 𑀧𑀝𑀺𑀮𑀪𑀢𑀺, 𑀲𑀻𑀲𑀘𑁆𑀙𑁂𑀤𑀫𑁆𑀧𑀺 𑀧𑀸𑀧𑀼𑀡𑀦𑁆𑀢𑁄 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀓𑀫𑁆𑀫𑀲𑁆𑀲𑀓𑀢𑀸𑀤𑀲𑁆𑀲𑀦𑀢𑁄 𑀅𑀓𑁄𑀢𑀽𑀳𑀮𑀫𑀗𑁆𑀕𑀮𑀺𑀓𑁄 𑀘 𑀳𑁄𑀢𑀺, 𑀲𑀤𑁆𑀥𑀫𑁆𑀫𑁂 𑀘𑀲𑁆𑀲 𑀲𑀤𑁆𑀥𑀸 𑀧𑀢𑀺𑀝𑁆𑀞𑀺𑀢𑀸 𑀳𑁄𑀢𑀺 𑀫𑀽𑀮𑀚𑀸𑀢𑀸, 𑀲𑀤𑁆𑀤𑀳𑀢𑀺 𑀘 𑀢𑀣𑀸𑀕𑀢𑀸𑀦𑀁 𑀩𑁄𑀥𑀺𑀁 ¶ , 𑀲𑀫𑀬𑀦𑁆𑀢𑀭𑁂𑀲𑀼 𑀦𑀸𑀪𑀺𑀭𑀫𑀢𑀺 𑀉𑀓𑁆𑀓𑀸𑀭𑀝𑁆𑀞𑀸𑀦𑁂 𑀯𑀺𑀬 𑀭𑀸𑀚𑀳𑀁𑀲𑁄, 𑀮𑀓𑁆𑀔𑀡𑀢𑁆𑀢𑀬𑀧𑀭𑀺𑀚𑀸𑀦𑀦𑀓𑀼𑀲𑀮𑁄 𑀳𑁄𑀢𑀺, 𑀅𑀦𑁆𑀢𑁂 𑀘 𑀅𑀦𑀸𑀯𑀭𑀡𑀜𑀸𑀡𑀮𑀸𑀪𑀻, 𑀬𑀸𑀯 𑀩𑁄𑀥𑀺𑀁 𑀦 𑀧𑀸𑀧𑀼𑀡𑀸𑀢𑀺, 𑀢𑀸𑀯 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀢𑁆𑀢𑀦𑀺𑀓𑀸𑀬𑁂 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑁄 𑀘 𑀳𑁄𑀢𑀺, 𑀉𑀴𑀸𑀭𑀼𑀴𑀸𑀭𑀲𑀫𑁆𑀧𑀢𑁆𑀢𑀺𑀬𑁄 𑀧𑀸𑀧𑀼𑀡𑀸𑀢𑀺.

‘‘𑀇𑀢𑀺 𑀳𑀺𑀤𑀁 𑀲𑀻𑀮𑀁 𑀦𑀸𑀫 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀦𑀁 𑀅𑀥𑀺𑀝𑁆𑀞𑀸𑀦𑀁, 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑀸𑀦𑀁 𑀧𑀪𑀯𑀪𑀽𑀫𑀺, 𑀲𑀩𑁆𑀩𑀩𑀼𑀤𑁆𑀥𑀓𑀭𑀥𑀫𑁆𑀫𑀸𑀦𑀫𑀸𑀤𑀺 𑀘𑀭𑀡𑀁 𑀫𑀼𑀔𑀁 𑀧𑀫𑀼𑀔’’𑀦𑁆𑀢𑀺 𑀩𑀳𑀼𑀫𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀸𑀬𑀯𑀘𑀻𑀲𑀁𑀬𑀫𑁂, 𑀇𑀦𑁆𑀤𑁆𑀭𑀺𑀬𑀤𑀫𑀦𑁂, 𑀆𑀚𑀻𑀯𑀲𑀫𑁆𑀧𑀤𑀸𑀬, 𑀧𑀘𑁆𑀘𑀬𑀧𑀭𑀺𑀪𑁄𑀕𑁂 𑀘 𑀲𑀢𑀺𑀲𑀫𑁆𑀧𑀚𑀜𑁆𑀜𑀩𑀮𑁂𑀦 𑀅𑀧𑁆𑀧𑀫𑀢𑁆𑀢𑁂𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀫𑀺𑀢𑁆𑀢𑀫𑀼𑀔𑀧𑀘𑁆𑀘𑀢𑁆𑀣𑀺𑀓𑀁 𑀯𑀺𑀬 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀓𑀺𑀓𑀻𑀯 𑀅𑀡𑁆𑀟’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁧𑁯; 𑀤𑀻. 𑀦𑀺. 𑀅𑀝𑁆𑀞. 𑁧.𑁭) 𑀯𑀼𑀢𑁆𑀢𑀦𑀬𑁂𑀦 ¶ 𑀲𑀓𑁆𑀓𑀘𑁆𑀘𑀁 𑀲𑀻𑀮𑀁 𑀲𑀫𑁆𑀧𑀸𑀤𑁂𑀢𑀩𑁆𑀩𑀁 ¶ . 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁬) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀢𑀜𑁆𑀘 𑀧𑀦𑁂𑀢𑀁 𑀲𑀻𑀮𑀁 𑀦 𑀅𑀢𑁆𑀢𑀦𑁄 𑀤𑀼𑀕𑁆𑀕𑀢𑀺𑀧𑀭𑀺𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀺𑀬𑀸, 𑀲𑀼𑀕𑀢𑀺𑀬𑀫𑁆𑀧𑀺, 𑀦 𑀭𑀚𑁆𑀚𑀲𑀫𑁆𑀧𑀢𑁆𑀢𑀺𑀬𑀸, 𑀦𑀘𑀓𑁆𑀓𑀯𑀢𑁆𑀢𑀺-𑀦𑀤𑁂𑀯-𑀦𑀲𑀓𑁆𑀓-𑀦𑀫𑀸𑀭-𑀦𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀬𑀸, 𑀦𑀸𑀧𑀺 𑀅𑀢𑁆𑀢𑀦𑁄 𑀢𑁂𑀯𑀺𑀚𑁆𑀚𑀢𑀸𑀤𑀺𑀳𑁂𑀢𑀼, 𑀦 𑀧𑀘𑁆𑀘𑁂𑀓𑀩𑁄𑀥𑀺𑀬𑀸, 𑀅𑀣 𑀔𑁄 𑀲𑀩𑁆𑀩𑀜𑁆𑀜𑀼𑀪𑀸𑀯𑁂𑀦 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀦𑀼𑀢𑁆𑀢𑀭𑀲𑀻𑀮𑀸𑀮𑀗𑁆𑀓𑀸𑀭𑀲𑀫𑁆𑀧𑀸𑀤𑀦𑀢𑁆𑀣𑀫𑁂𑀯𑀸𑀢𑀺 𑀧𑀭𑀺𑀡𑀸𑀫𑁂𑀢𑀩𑁆𑀩𑀁.

𑀢𑀣𑀸 𑀲𑀓𑀮𑀲𑀁𑀓𑀺𑀮𑁂𑀲𑀦𑀺𑀯𑀸𑀲𑀝𑁆𑀞𑀸𑀦𑀢𑀸𑀬, 𑀧𑀼𑀢𑁆𑀢𑀤𑀸𑀭𑀸𑀤𑀻𑀳𑀺 𑀫𑀳𑀸𑀲𑀫𑁆𑀩𑀸𑀥𑀢𑀸𑀬, 𑀓𑀲𑀺𑀯𑀡𑀺𑀚𑁆𑀚𑀸𑀤𑀺𑀦𑀸𑀦𑀸𑀯𑀺𑀥𑀓𑀫𑁆𑀫𑀦𑁆𑀢𑀸𑀥𑀺𑀝𑁆𑀞𑀸𑀦𑀩𑁆𑀬𑀸𑀓𑀼𑀮𑀢𑀸𑀬 𑀘 𑀖𑀭𑀸𑀯𑀸𑀲𑀲𑁆𑀲 𑀦𑁂𑀓𑁆𑀔𑀫𑁆𑀫𑀲𑀼𑀔𑀸𑀤𑀻𑀦𑀁 𑀅𑀦𑁄𑀓𑀸𑀲𑀢𑀁, 𑀓𑀸𑀫𑀸𑀦𑀜𑁆𑀘 ‘‘𑀲𑀢𑁆𑀣𑀥𑀸𑀭𑀸𑀮𑀕𑁆𑀕𑀫𑀥𑀼𑀩𑀺𑀦𑁆𑀤𑀼 𑀯𑀺𑀬 𑀘 𑀅𑀯𑀮𑁂𑀬𑁆𑀳𑀫𑀸𑀦𑀸 𑀧𑀭𑀺𑀢𑁆𑀢𑀲𑁆𑀲𑀸𑀤𑀸 𑀯𑀺𑀧𑀼𑀮𑀸𑀦𑀢𑁆𑀣𑀸𑀦𑀼𑀩𑀦𑁆𑀥𑀸’’𑀢𑀺 𑀘 ‘‘𑀯𑀺𑀚𑁆𑀚𑀼𑀮𑀢𑁄𑀪𑀸𑀲𑁂𑀦 𑀕𑀳𑁂𑀢𑀩𑁆𑀩𑀁 𑀦𑀘𑁆𑀘𑀁 𑀯𑀺𑀬 𑀧𑀭𑀺𑀢𑁆𑀢𑀓𑀸𑀮𑁄𑀧𑀮𑀩𑁆𑀪𑀸, 𑀉𑀫𑁆𑀫𑀢𑁆𑀢𑀓𑀸𑀮𑀗𑁆𑀓𑀸𑀭𑁄 𑀯𑀺𑀬 𑀯𑀺𑀧𑀭𑀻𑀢𑀲𑀜𑁆𑀜𑀸𑀬 𑀅𑀦𑀼𑀪𑀯𑀺𑀢𑀩𑁆𑀩𑀸 ¶ , 𑀓𑀭𑀻𑀲𑀸𑀯𑀘𑁆𑀙𑀸𑀤𑀦𑀲𑀼𑀔𑀁 𑀯𑀺𑀬 𑀧𑀝𑀺𑀓𑀸𑀭𑀪𑀽𑀢𑀸, 𑀉𑀤𑀓𑀢𑁂𑀫𑀺𑀢𑀗𑁆𑀕𑀼𑀮𑀺𑀬𑀸 𑀉𑀲𑁆𑀲𑀸𑀯𑀓𑁄𑀤𑀓𑀧𑀸𑀦𑀁 𑀯𑀺𑀬 𑀅𑀢𑀺𑀢𑁆𑀢𑀺𑀓𑀭𑀸, 𑀙𑀸𑀢𑀚𑁆𑀛𑀢𑁆𑀢𑀪𑁄𑀚𑀦𑀁 𑀯𑀺𑀬 𑀲𑀸𑀩𑀸𑀥𑀸, 𑀩𑀮𑀺𑀲𑀸𑀫𑀺𑀲𑀁 𑀯𑀺𑀬 𑀩𑁆𑀬𑀲𑀦𑀲𑀦𑁆𑀦𑀺𑀧𑀸𑀢𑀓𑀸𑀭𑀡𑀸, 𑀅𑀕𑁆𑀕𑀺𑀲𑀦𑁆𑀢𑀸𑀧𑁄 𑀯𑀺𑀬 𑀓𑀸𑀮𑀢𑁆𑀢𑀬𑁂𑀧𑀺 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀸, 𑀫𑀓𑁆𑀓𑀝𑀸𑀮𑁂𑀧𑁄 𑀯𑀺𑀬 𑀩𑀦𑁆𑀥𑀦𑀺𑀫𑀺𑀢𑁆𑀢𑀸 𑀖𑀸𑀢𑀓𑀸𑀯𑀘𑁆𑀙𑀸𑀤𑀦𑀓𑀺𑀫𑀺𑀮𑀬𑁄 𑀯𑀺𑀬 𑀅𑀦𑀢𑁆𑀣𑀘𑁆𑀙𑀸𑀤𑀦𑀸, 𑀲𑀧𑀢𑁆𑀢𑀕𑀸𑀫𑀯𑀸𑀲𑁄 𑀯𑀺𑀬 𑀪𑀬𑀝𑁆𑀞𑀸𑀦𑀪𑀽𑀢𑀸, 𑀧𑀘𑁆𑀘𑀢𑁆𑀣𑀺𑀓𑀧𑁄𑀲𑀓𑁄 𑀯𑀺𑀬 𑀓𑀺𑀮𑁂𑀲𑀫𑀸𑀭𑀸𑀤𑀻𑀦𑀁 𑀆𑀫𑀺𑀲𑀪𑀽𑀢𑀸, 𑀙𑀡𑀲𑀫𑁆𑀧𑀢𑁆𑀢𑀺𑀬𑁄 𑀯𑀺𑀬 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀸, 𑀓𑁄𑀝𑀭𑀕𑁆𑀕𑀺 𑀯𑀺𑀬 𑀅𑀦𑁆𑀢𑁄𑀤𑀸𑀳𑀓𑀸, 𑀧𑀼𑀭𑀸𑀡𑀓𑀽𑀧𑀸𑀯𑀮𑀫𑁆𑀩𑀩𑀻𑀭𑀡𑀫𑀥𑀼𑀧𑀺𑀡𑁆𑀟𑀁 𑀯𑀺𑀬 𑀅𑀦𑁂𑀓𑀸𑀤𑀻𑀦𑀯𑀸, 𑀮𑁄𑀡𑀽𑀤𑀓𑀧𑀸𑀦𑀁 𑀯𑀺𑀬 𑀧𑀺𑀧𑀸𑀲𑀳𑁂𑀢𑀼𑀪𑀽𑀢𑀸, 𑀲𑀼𑀭𑀸𑀫𑁂𑀭𑀬𑀁 𑀯𑀺𑀬 𑀦𑀻𑀘𑀚𑀦𑀲𑁂𑀯𑀺𑀢𑀸, 𑀅𑀧𑁆𑀧𑀲𑁆𑀲𑀸𑀤𑀢𑀸𑀬 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸’’𑀢𑀺𑀆𑀤𑀺𑀦𑀸 𑀘 𑀦𑀬𑁂𑀦 𑀆𑀤𑀻𑀦𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀲𑁆𑀲𑀦𑁆𑀢𑁂𑀦 𑀦𑁂𑀓𑁆𑀔𑀫𑁆𑀫𑀧𑀯𑀺𑀯𑁂𑀓𑀉𑀧𑀲𑀫𑀲𑀼𑀔𑀸𑀤𑀻𑀲𑀼 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑁂𑀦 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻 𑀧𑀽𑀭𑁂𑀢𑀩𑁆𑀩𑀸.

𑀢𑀣𑀸 𑀬𑀲𑁆𑀫𑀸 𑀧𑀜𑁆𑀜𑀸 𑀆𑀮𑁄𑀓𑁄 𑀯𑀺𑀬 𑀅𑀦𑁆𑀥𑀓𑀸𑀭𑁂𑀦, 𑀫𑁄𑀳𑁂𑀦 𑀲𑀳 𑀦 𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀫𑁄𑀳𑀓𑀸𑀭𑀡𑀸𑀦𑀺 𑀢𑀸𑀯 𑀩𑁄𑀥𑀺𑀲𑀢𑁆𑀢𑁂𑀦 𑀧𑀭𑀺𑀯𑀚𑁆𑀚𑀺𑀢𑀩𑁆𑀩𑀸𑀦𑀺. 𑀢𑀢𑁆𑀣𑀺𑀫𑀸𑀦𑀺 𑀫𑁄𑀳𑀓𑀸𑀭𑀡𑀸𑀦𑀺 𑁋 𑀅𑀭𑀢𑀺 𑀢𑀦𑁆𑀤𑀻 𑀯𑀺𑀚𑀫𑁆𑀪𑀺𑀢𑀸 𑀆𑀮𑀲𑀺𑀬𑀁 𑀕𑀡𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸 𑀦𑀺𑀤𑁆𑀤𑀸𑀲𑀻𑀮𑀢𑀸 𑀅𑀦𑀺𑀘𑁆𑀙𑀬𑀲𑀻𑀮𑀢𑀸 𑀜𑀸𑀡𑀲𑁆𑀫𑀺𑀁 𑀅𑀓𑀼𑀢𑀽𑀳𑀮𑀢𑀸 𑀫𑀺𑀘𑁆𑀙𑀸𑀥𑀺𑀫𑀸𑀦𑁄 𑀅𑀧𑀭𑀺𑀧𑀼𑀘𑁆𑀙𑀓𑀢𑀸 𑀓𑀸𑀬𑀲𑁆𑀲 𑀦 𑀲𑀫𑁆𑀫𑀸𑀧𑀭𑀺𑀳𑀸𑀭𑁄 𑀅𑀲𑀫𑀸𑀳𑀺𑀢𑀘𑀺𑀢𑁆𑀢𑀢𑀸 ¶ 𑀤𑀼𑀧𑁆𑀧𑀜𑁆𑀜𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑁂𑀯𑀦𑀸 𑀧𑀜𑁆𑀜𑀯𑀦𑁆𑀢𑀸𑀦𑀁 𑀅𑀧𑀬𑀺𑀭𑀼𑀧𑀸𑀲𑀦𑀸 𑀅𑀢𑁆𑀢𑀧𑀭𑀺𑀪𑀯𑁄 𑀫𑀺𑀘𑁆𑀙𑀸𑀯𑀺𑀓𑀧𑁆𑀧𑁄 ¶ 𑀯𑀺𑀧𑀭𑀻𑀢𑀸𑀪𑀺𑀦𑀺𑀯𑁂𑀲𑁄 𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑀢𑀸 𑀅𑀲𑀁𑀯𑁂𑀕𑀲𑀻𑀮𑀢𑀸 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺. 𑀲𑀗𑁆𑀔𑁂𑀧𑀢𑁄 𑀬𑁂 𑀯𑀸 𑀧𑀦 𑀥𑀫𑁆𑀫𑁂 𑀆𑀲𑁂𑀯𑀢𑁄 𑀅𑀦𑀼𑀧𑁆𑀧𑀦𑁆𑀦𑀸 𑀧𑀜𑁆𑀜𑀸 𑀦 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀸 𑀧𑀭𑀺𑀳𑀸𑀬𑀢𑀺, 𑀇𑀢𑀺 𑀇𑀫𑀸𑀦𑀺 𑀲𑀫𑁆𑀫𑁄𑀳𑀓𑀸𑀭𑀡𑀸𑀦𑀺 𑀧𑀭𑀺𑀯𑀚𑁆𑀚𑀦𑁆𑀢𑁂𑀦 𑀩𑀸𑀳𑀼𑀲𑀘𑁆𑀘𑁂 𑀛𑀸𑀦𑀸𑀤𑀻𑀲𑀼 𑀘 𑀬𑁄𑀕𑁄 𑀓𑀭𑀡𑀻𑀬𑁄.

𑀢𑀢𑁆𑀣𑀸𑀬𑀁 ¶ 𑀩𑀸𑀳𑀼𑀲𑀘𑁆𑀘𑀲𑁆𑀲 𑀯𑀺𑀲𑀬𑀯𑀺𑀪𑀸𑀕𑁄 𑁋 𑀧𑀜𑁆𑀘 𑀔𑀦𑁆𑀥𑀸 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺, 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀤𑁆𑀯𑀸𑀤𑀲𑀧𑀤𑀺𑀓𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄, 𑀢𑀣𑀸 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀓𑀼𑀲𑀮𑀸𑀤𑀺𑀥𑀫𑁆𑀫𑀧𑁆𑀧𑀓𑀸𑀭𑀪𑁂𑀤𑀸 𑀘. 𑀬𑀸𑀦𑀺 𑀘 𑀮𑁄𑀓𑁂 𑀅𑀦𑀯𑀚𑁆𑀚𑀸𑀦𑀺 𑀯𑀺𑀚𑁆𑀚𑀝𑁆𑀞𑀸𑀦𑀸𑀦𑀺, 𑀬𑁂 𑀘 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀯𑀺𑀥𑀸𑀦𑀬𑁄𑀕𑁆𑀬𑀸 𑀩𑁆𑀬𑀸𑀓𑀭𑀡𑀯𑀺𑀲𑁂𑀲𑀸. 𑀇𑀢𑀺 𑀏𑀯𑀁 𑀧𑀓𑀸𑀭𑀁 𑀲𑀓𑀮𑀫𑁂𑀯 𑀲𑀼𑀢𑀯𑀺𑀲𑀬𑀁 𑀉𑀧𑀸𑀬𑀓𑁄𑀲𑀮𑁆𑀮𑀧𑀼𑀩𑁆𑀩𑀗𑁆𑀕𑀫𑀸𑀬 𑀧𑀜𑁆𑀜𑀸𑀬 𑀲𑀢𑀺𑀯𑀻𑀭𑀺𑀬𑀼𑀧𑀢𑁆𑀣𑀫𑁆𑀪𑀓𑀸𑀭𑀡𑀸𑀬 𑀲𑀸𑀥𑀼𑀓𑀁 𑀉𑀕𑁆𑀕𑀳𑀡𑀲𑀯𑀦𑀥𑀸𑀭𑀡𑀧𑀭𑀺𑀘𑀬𑀧𑀭𑀺𑀧𑀼𑀘𑁆𑀙𑀸𑀳𑀺 𑀑𑀕𑀸𑀳𑁂𑀢𑁆𑀯𑀸 𑀢𑀢𑁆𑀣 𑀘 𑀧𑀭𑁂𑀲𑀁 𑀧𑀢𑀺𑀝𑁆𑀞𑀧𑀦𑁂𑀦 𑀲𑀼𑀢𑀫𑀬𑀸 𑀧𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀸, 𑀢𑀣𑀸 𑀔𑀦𑁆𑀥𑀸𑀤𑀻𑀦𑀁 𑀲𑀪𑀸𑀯𑀥𑀫𑁆𑀫𑀸𑀦𑀁 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀦𑀫𑀼𑀔𑁂𑀦 𑀢𑁂 𑀦𑀺𑀚𑁆𑀛𑀸𑀦𑀁 𑀔𑀫𑀸𑀧𑁂𑀦𑁆𑀢𑁂𑀦 𑀘𑀺𑀦𑁆𑀢𑀸𑀫𑀬𑀸, 𑀔𑀦𑁆𑀥𑀸𑀤𑀻𑀦𑀁𑀬𑁂𑀯 𑀧𑀦 𑀲𑀮𑀓𑁆𑀔𑀡𑀲𑀸𑀫𑀜𑁆𑀜𑀮𑀓𑁆𑀔𑀡𑀧𑀭𑀺𑀕𑁆𑀕𑀳𑀯𑀲𑁂𑀦 𑀮𑁄𑀓𑀺𑀬𑀁 𑀧𑀭𑀺𑀜𑁆𑀜𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁂𑀦 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀧𑀜𑁆𑀜𑀸 𑀲𑀫𑁆𑀧𑀸𑀤𑁂𑀢𑀩𑁆𑀩𑀸. 𑀏𑀯𑀜𑁆𑀳𑀺 ‘‘𑀦𑀸𑀫𑀭𑀽𑀧𑀫𑀢𑁆𑀢𑀫𑀺𑀤𑀁 𑀬𑀣𑀸𑀭𑀳𑀁 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀦𑀺𑀭𑀼𑀚𑁆𑀛𑀢𑀺 𑀘, 𑀦 𑀏𑀢𑁆𑀣 𑀓𑁄𑀘𑀺 𑀓𑀢𑁆𑀢𑀸 𑀯𑀸 𑀓𑀸𑀭𑁂𑀢𑀸 𑀯𑀸, 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀁, 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀦𑀝𑁆𑀞𑁂𑀦 𑀤𑀼𑀓𑁆𑀔𑀁, 𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦 𑀅𑀦𑀢𑁆𑀢𑀸’’𑀢𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂 𑀥𑀫𑁆𑀫𑁂 𑀦𑀺𑀩𑁆𑀩𑀺𑀲𑁂𑀲𑀁 𑀧𑀭𑀺𑀚𑀸𑀦𑀦𑁆𑀢𑁄 𑀢𑀢𑁆𑀣 𑀆𑀲𑀗𑁆𑀕𑀁 𑀧𑀚𑀳𑀺𑀢𑁆𑀯𑀸, 𑀧𑀭𑁂 𑀘 𑀢𑀢𑁆𑀣 𑀢𑀁 𑀚𑀳𑀸𑀧𑁂𑀢𑁆𑀯𑀸 𑀓𑁂𑀯𑀮𑀁 𑀓𑀭𑀼𑀡𑀸𑀯𑀲𑁂𑀦𑁂𑀯 𑀬𑀸𑀯 𑀦 𑀩𑀼𑀤𑁆𑀥𑀕𑀼𑀡𑀸 𑀳𑀢𑁆𑀣𑀢𑀮𑀁 𑀆𑀕𑀘𑁆𑀙𑀦𑁆𑀢𑀺, 𑀢𑀸𑀯 𑀬𑀸𑀦𑀢𑁆𑀢𑀬𑁂 𑀲𑀢𑁆𑀢𑁂 𑀅𑀯𑀢𑀸𑀭𑀡𑀧𑀭𑀺𑀧𑀸𑀘𑀦𑁂𑀳𑀺 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁄, 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀺𑀬𑁄 𑀘 𑀯𑀲𑀻𑀪𑀸𑀯𑀁 𑀧𑀸𑀧𑁂𑀦𑁆𑀢𑁄 𑀧𑀜𑁆𑀜𑀸𑀬 𑀅𑀢𑀺𑀯𑀺𑀬 𑀫𑀢𑁆𑀣𑀓𑀁 𑀧𑀸𑀧𑀼𑀡𑀸𑀢𑀻𑀢𑀺.

𑀢𑀣𑀸 ¶ 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀓𑀢𑀸𑀪𑀺𑀦𑀻𑀳𑀸𑀭𑁂𑀦 𑀫𑀳𑀸𑀲𑀢𑁆𑀢𑁂𑀦 ‘‘𑀓𑁄 𑀦𑀼 𑀅𑀚𑁆𑀚 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑁄 𑀉𑀧𑀘𑀺𑀢𑁄, 𑀓𑀺𑀜𑁆𑀘 𑀫𑀬𑀸 𑀓𑀢𑀁 𑀧𑀭𑀳𑀺𑀢’’𑀦𑁆𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁂𑀦 𑀲𑀢𑁆𑀢𑀳𑀺𑀢𑀢𑁆𑀣𑀁 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄, 𑀲𑀩𑁆𑀩𑁂𑀲𑀫𑁆𑀧𑀺 𑀲𑀢𑁆𑀢𑀸𑀦𑀁 𑀉𑀧𑀓𑀸𑀭𑀸𑀬 𑀅𑀢𑁆𑀢𑀦𑁄 𑀓𑀸𑀬𑀁 𑀚𑀻𑀯𑀺𑀢𑀜𑁆𑀘 𑀑𑀲𑁆𑀲𑀚𑁆𑀚𑀺𑀢𑀩𑁆𑀩𑀁, 𑀲𑀩𑁆𑀩𑁂𑀧𑀺 𑀲𑀢𑁆𑀢𑀸 𑀅𑀦𑁄𑀥𑀺𑀲𑁄 𑀫𑁂𑀢𑁆𑀢𑀸𑀬 𑀓𑀭𑀼𑀡𑀸𑀬 𑀘 𑀨𑀭𑀺𑀢𑀩𑁆𑀩𑀸, 𑀬𑀸 𑀓𑀸𑀘𑀺 ¶ 𑀲𑀢𑁆𑀢𑀸𑀦𑀁 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺, 𑀲𑀩𑁆𑀩𑀸 𑀲𑀸 𑀅𑀢𑁆𑀢𑀦𑀺 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸, 𑀲𑀩𑁆𑀩𑁂𑀲𑀜𑁆𑀘 𑀲𑀢𑁆𑀢𑀸𑀦𑀁 𑀧𑀼𑀜𑁆𑀜𑀁 𑀅𑀩𑁆𑀪𑀦𑀼𑀫𑁄𑀤𑀺𑀢𑀩𑁆𑀩𑀁, 𑀩𑀼𑀤𑁆𑀥𑀫𑀳𑀦𑁆𑀢𑀢𑀸 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸, 𑀬𑀜𑁆𑀘 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀭𑁄𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀯𑀸, 𑀢𑀁 𑀲𑀩𑁆𑀩𑀁 𑀩𑁄𑀥𑀺𑀦𑀺𑀦𑁆𑀦𑀘𑀺𑀢𑁆𑀢𑀧𑀼𑀩𑁆𑀩𑀗𑁆𑀕𑀫𑀁 𑀓𑀸𑀢𑀩𑁆𑀩𑀁. 𑀇𑀫𑀺𑀦𑀸 𑀳𑀺 𑀉𑀧𑀸𑀬𑁂𑀦 𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀧𑀭𑀺𑀫𑁂𑀬𑁆𑀬𑁄 𑀧𑀼𑀜𑁆𑀜𑀪𑀸𑀕𑁄 𑀉𑀧𑀘𑀻𑀬𑀢𑀺. 𑀅𑀧𑀺𑀘 𑀲𑀢𑁆𑀢𑀸𑀦𑀁 𑀧𑀭𑀺𑀪𑁄𑀕𑀢𑁆𑀣𑀁 𑀧𑀭𑀺𑀧𑀸𑀮𑀦𑀢𑁆𑀣𑀜𑁆𑀘 𑀅𑀢𑁆𑀢𑀦𑁄 𑀲𑀭𑀻𑀭𑀁 𑀚𑀻𑀯𑀺𑀢𑀜𑁆𑀘 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀔𑀼𑀧𑁆𑀧𑀺𑀧𑀸𑀲𑀸𑀲𑀻𑀢𑀼𑀡𑁆𑀳𑀯𑀸𑀢𑀸𑀢𑀧𑀸𑀤𑀺𑀤𑀼𑀓𑁆𑀔𑀧𑀝𑀺𑀓𑀸𑀭𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄. 𑀬𑀜𑁆𑀘 𑀬𑀣𑀸𑀯𑀼𑀢𑁆𑀢𑀤𑀼𑀓𑁆𑀔𑀧𑀝𑀺𑀓𑀸𑀭𑀚𑀁 𑀲𑀼𑀔𑀁 𑀅𑀢𑁆𑀢𑀦𑀸 𑀧𑀝𑀺𑀮𑀪𑀢𑀺, 𑀢𑀣𑀸 𑀭𑀫𑀡𑀻𑀬𑁂𑀲𑀼 𑀆𑀭𑀸𑀫𑀼𑀬𑁆𑀬𑀸𑀦𑀧𑀸𑀲𑀸𑀤𑀢𑀮𑀸𑀤𑀻𑀲𑀼, 𑀅𑀭𑀜𑁆𑀜𑀸𑀬𑀢𑀦𑁂𑀲𑀼 𑀘 𑀓𑀸𑀬𑀘𑀺𑀢𑁆𑀢𑀲𑀦𑁆𑀢𑀸𑀧𑀸𑀪𑀸𑀯𑁂𑀦 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑀸 𑀲𑀼𑀔𑀁 𑀯𑀺𑀦𑁆𑀤𑀢𑀺, 𑀬𑀜𑁆𑀘 𑀲𑀼𑀡𑀸𑀢𑀺 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑁄𑀥𑀺𑀲𑀢𑁆𑀢𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀪𑀽𑀢𑀁 𑀛𑀸𑀦𑀲𑀫𑀸𑀧𑀢𑁆𑀢𑀺𑀲𑀼𑀔𑀁, 𑀢𑀁 𑀲𑀩𑁆𑀩𑀁 𑀲𑀢𑁆𑀢𑁂𑀲𑀼 𑀅𑀦𑁄𑀥𑀺𑀲𑁄 𑀉𑀧𑀲𑀁𑀳𑀭𑀢𑀺. 𑀅𑀬𑀁 𑀢𑀸𑀯 𑀅𑀲𑀫𑀸𑀳𑀺𑀢𑀪𑀽𑀫𑀺𑀬𑀁 𑀦𑀬𑁄.

𑀲𑀫𑀸𑀳𑀺𑀢𑁄 ¶ 𑀧𑀦 𑀅𑀢𑁆𑀢𑀦𑀸 𑀬𑀣𑀸𑀦𑀼𑀪𑀽𑀢𑀁 𑀯𑀺𑀲𑁂𑀲𑀸𑀥𑀺𑀕𑀫𑀦𑀺𑀩𑁆𑀩𑀢𑁆𑀢𑀁 𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀲𑀼𑀔𑀁 𑀲𑀩𑁆𑀩𑀲𑀢𑁆𑀢𑁂𑀲𑀼 𑀅𑀥𑀺𑀫𑀼𑀘𑁆𑀘𑀢𑀺, 𑀢𑀣𑀸 𑀫𑀳𑀢𑀺 𑀲𑀁𑀲𑀸𑀭𑀤𑀼𑀓𑁆𑀔𑁂, 𑀢𑀦𑁆𑀦𑀺𑀫𑀺𑀢𑁆𑀢𑀪𑀽𑀢𑁂 𑀘 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀤𑀼𑀓𑁆𑀔𑁂 𑀦𑀺𑀫𑀼𑀕𑁆𑀕𑀁 𑀲𑀢𑁆𑀢𑀦𑀺𑀓𑀸𑀬𑀁 𑀤𑀺𑀲𑁆𑀯𑀸 𑀢𑀢𑁆𑀣𑀧𑀺 𑀙𑁂𑀤𑀦𑀪𑁂𑀤𑀦𑀨𑀸𑀮𑀦𑀧𑀺𑀲𑀦𑀕𑁆𑀕𑀺𑀲𑀦𑁆𑀢𑀸𑀧𑀸𑀤𑀺𑀚𑀦𑀺𑀢𑀸 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀦𑀺𑀭𑀦𑁆𑀢𑀭𑀁 𑀘𑀺𑀭𑀓𑀸𑀮𑀁 𑀯𑁂𑀤𑀺𑀬𑀦𑁆𑀢𑁂 𑀦𑀸𑀭𑀓𑁂, 𑀅𑀜𑁆𑀜𑀫𑀜𑁆𑀜𑀁 𑀓𑀼𑀚𑁆𑀛𑀦𑀲𑀦𑁆𑀢𑀸𑀧𑀦𑀯𑀺𑀳𑁂𑀞𑀦𑀳𑀺𑀁𑀲𑀦𑀧𑀭𑀸𑀥𑀻𑀦𑀢𑀸𑀤𑀻𑀳𑀺 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑁂 𑀢𑀺𑀭𑀘𑁆𑀙𑀸𑀦𑁂, 𑀚𑁄𑀢𑀺𑀫𑀸𑀮𑀸’𑀓𑀼𑀮𑀲𑀭𑀻𑀭𑁂 𑀉𑀤𑁆𑀥𑀩𑀸𑀳𑀼𑀯𑀺𑀭𑀯𑀦𑁆𑀢𑁂 ¶ 𑀉𑀓𑁆𑀓𑀸𑀫𑀼𑀔𑁂 𑀔𑀼𑀧𑁆𑀧𑀺𑀧𑀸𑀲𑀸𑀤𑀻𑀳𑀺 𑀟𑀬𑁆𑀳𑀫𑀸𑀦𑁂 𑀘 𑀯𑀦𑁆𑀢𑀔𑁂𑀴𑀸𑀤𑀺𑀆𑀳𑀸𑀭𑁂 𑀘 𑀫𑀳𑀸𑀤𑀼𑀓𑁆𑀔𑀁 𑀯𑁂𑀤𑀬𑀫𑀸𑀦𑁂 𑀧𑁂𑀢𑁂 𑀘 𑀧𑀭𑀺𑀬𑁂𑀝𑁆𑀞𑀺𑀫𑀽𑀮𑀓𑀁 𑀫𑀳𑀦𑁆𑀢𑀁 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑀦𑁆𑀢𑁂 𑀳𑀢𑁆𑀣𑀘𑁆𑀙𑁂𑀤𑀸𑀤𑀺𑀓𑀸𑀭𑀡𑀬𑁄𑀕𑁂𑀦 𑀤𑀼𑀩𑁆𑀩𑀡𑁆𑀡𑀤𑀼𑀤𑁆𑀤𑀲𑀺𑀓𑀤𑀮𑀺𑀤𑁆𑀤𑀢𑀸𑀤𑀺𑀪𑀸𑀯𑁂𑀦 𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀬𑁄𑀕𑁂𑀦 𑀩𑀮𑀯𑀦𑁆𑀢𑁂𑀳𑀺 𑀅𑀪𑀺𑀪𑀯𑀦𑀻𑀬𑀢𑁄, 𑀧𑀭𑁂𑀲𑀁 𑀯𑀳𑀦𑀢𑁄, 𑀧𑀭𑀸𑀥𑀻𑀦𑀢𑁄 𑀘 𑀦𑀸𑀭𑀓𑁂 𑀧𑁂𑀢𑁂 𑀢𑀺𑀭𑀘𑁆𑀙𑀸𑀦𑁂 𑀘 𑀅𑀢𑀺𑀲𑀬𑀦𑁆𑀢𑁂 𑀅𑀧𑀸𑀬𑀤𑀼𑀓𑁆𑀔𑀦𑀺𑀩𑁆𑀩𑀺𑀲𑁂𑀲𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑁂 𑀫𑀦𑀼𑀲𑁆𑀲𑁂 𑀘 𑀢𑀣𑀸 𑀯𑀺𑀲𑀬𑀯𑀺𑀲𑀧𑀭𑀺𑀪𑁄𑀕𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀢𑀸𑀬 𑀭𑀸𑀕𑀸𑀤𑀺𑀧𑀭𑀺𑀬𑀼𑀝𑁆𑀞𑀸𑀦𑁂𑀦 𑀟𑀬𑁆𑀳𑀫𑀸𑀦𑁂 𑀯𑀸𑀬𑀼𑀯𑁂𑀕𑀲𑀫𑀼𑀝𑁆𑀞𑀺𑀢𑀚𑀸𑀮𑀸𑀲𑀫𑀺𑀤𑁆𑀥𑀲𑀼𑀓𑁆𑀔𑀓𑀝𑁆𑀞𑀲𑀦𑁆𑀦𑀺𑀧𑀸𑀢𑁂 𑀅𑀕𑁆𑀕𑀺𑀓𑁆𑀔𑀦𑁆𑀥𑁂 𑀯𑀺𑀬 𑀅𑀦𑀼𑀧𑀲𑀦𑁆𑀢𑀧𑀭𑀺𑀴𑀸𑀳𑀯𑀼𑀢𑁆𑀢𑀺𑀓𑁂 𑀅𑀦𑀺𑀳𑀢𑀧𑀭𑀸𑀥𑀻𑀦𑁂 𑀓𑀸𑀫𑀸𑀯𑀘𑀭𑀤𑁂𑀯𑁂 𑀘 𑀫𑀳𑀢𑀸 𑀯𑀸𑀬𑀸𑀫𑁂𑀦 𑀯𑀺𑀤𑀽𑀭𑀫𑀸𑀓𑀸𑀲𑀁 𑀯𑀺𑀕𑀸𑀳𑀺𑀢𑀲𑀓𑀼𑀦𑁆𑀢𑀸 𑀯𑀺𑀬, 𑀩𑀮𑀯𑀦𑁆𑀢𑁂𑀳𑀺 𑀔𑀺𑀢𑁆𑀢𑀲𑀭𑀸 𑀯𑀺𑀬 𑀘 ‘‘𑀲𑀢𑀺𑀧𑀺 𑀘𑀺𑀭𑀧𑁆𑀧𑀯𑀢𑁆𑀢𑀺𑀬𑀁 𑀅𑀦𑀘𑁆𑀘𑀦𑁆𑀢𑀺𑀓𑀢𑀸𑀬 𑀧𑀸𑀢𑀧𑀭𑀺𑀬𑁄𑀲𑀸𑀦𑀸 𑀅𑀦𑀢𑀺𑀓𑁆𑀓𑀦𑁆𑀢𑀚𑀸𑀢𑀺𑀚𑀭𑀸𑀫𑀭𑀡𑀸 𑀏𑀯𑀸’’𑀢𑀺 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀤𑁂𑀯𑁂 𑀘 ¶ 𑀧𑀲𑁆𑀲𑀦𑁆𑀢𑁂𑀦 𑀫𑁂𑀢𑁆𑀢𑀸𑀬 𑀓𑀭𑀼𑀡𑀸𑀬 𑀘 𑀅𑀦𑁄𑀥𑀺𑀲𑁄 𑀲𑀢𑁆𑀢𑀸 𑀨𑀭𑀺𑀢𑀩𑁆𑀩𑀸. 𑀏𑀯𑀁 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸 𑀘 𑀩𑁄𑀥𑀺𑀲𑀫𑁆𑀪𑀸𑀭𑁂 𑀦𑀺𑀭𑀦𑁆𑀢𑀭𑀁 𑀉𑀧𑀘𑀺𑀦𑀦𑁆𑀢𑁂𑀦 𑀉𑀲𑁆𑀲𑀸𑀳𑁄 𑀧𑀯𑀢𑁆𑀢𑁂𑀢𑀩𑁆𑀩𑁄.

𑀅𑀧𑀺𑀘 ‘‘𑀅𑀘𑀺𑀦𑁆𑀢𑁂𑀬𑁆𑀬𑀸𑀧𑀭𑀺𑀫𑀺𑀢𑀯𑀺𑀧𑀼𑀮𑁄𑀴𑀸𑀭𑀯𑀺𑀫𑀮𑀦𑀺𑀭𑀼𑀧𑀫𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀕𑀼𑀡𑀦𑀺𑀘𑀬𑀦𑀺𑀤𑀸𑀦𑀪𑀽𑀢𑀲𑁆𑀲 𑀩𑀼𑀤𑁆𑀥𑀪𑀸𑀯𑀲𑁆𑀲 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀲𑀫𑁆𑀧𑀳𑀁𑀲𑀦𑀬𑁄𑀕𑁆𑀬𑀁 𑀯𑀻𑀭𑀺𑀬𑀁 𑀦𑀸𑀫 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑀫𑁂𑀯. 𑀬𑀁 𑀦 𑀧𑀘𑀼𑀭𑀚𑀦𑀸 𑀲𑁄𑀢𑀼𑀫𑁆𑀧𑀺 𑀲𑀓𑁆𑀓𑀼𑀡𑀦𑁆𑀢𑀺, 𑀧𑀕𑁂𑀯 𑀧𑀝𑀺𑀧𑀚𑁆𑀚𑀺𑀢𑀼𑀁. 𑀢𑀣𑀸 𑀳𑀺 𑀢𑀺𑀯𑀺𑀥𑀸 𑀅𑀪𑀺𑀦𑀻𑀳𑀸𑀭𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺, 𑀘𑀢𑀲𑁆𑀲𑁄 𑀩𑀼𑀤𑁆𑀥𑀪𑀽𑀫𑀺𑀬𑁄, 𑀘𑀢𑁆𑀢𑀸𑀭𑀺 𑀲𑀗𑁆𑀕𑀳𑀯𑀢𑁆𑀣𑀽𑀦𑀺 (𑀤𑀻. 𑀦𑀺. 𑁩.𑁨𑁧𑁦, 𑁩𑁧𑁩; 𑀅. 𑀦𑀺. 𑁪.𑁩𑁨), 𑀓𑀭𑀼𑀡𑁄𑀓𑀸𑀲𑀢𑀸, 𑀩𑀼𑀤𑁆𑀥𑀥𑀫𑁆𑀫𑁂𑀲𑀼 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺, 𑀲𑀩𑁆𑀩𑀥𑀫𑁆𑀫𑁂𑀲𑀼 𑀦𑀺𑀭𑀼𑀧𑀮𑁂𑀧𑁄, 𑀲𑀩𑁆𑀩𑀲𑀢𑁆𑀢𑁂𑀲𑀼 𑀧𑀼𑀢𑁆𑀢𑀲𑀜𑁆𑀜𑀸, 𑀲𑀁𑀲𑀸𑀭𑀤𑀼𑀓𑁆𑀔𑁂𑀳𑀺 𑀅𑀧𑀭𑀺𑀔𑁂𑀤𑁄, 𑀲𑀩𑁆𑀩𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑁄, 𑀢𑁂𑀦 𑀘 𑀦𑀺𑀭𑀢𑀺𑀫𑀸𑀦𑀢𑀸, 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀺𑀅𑀥𑀺𑀝𑁆𑀞𑀸𑀦𑀁, 𑀢𑀢𑁆𑀣 ¶ 𑀘 𑀅𑀘𑀮𑀢𑀸, 𑀓𑀼𑀲𑀮𑀓𑀺𑀭𑀺𑀬𑀸𑀲𑀼 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀯𑀺𑀯𑁂𑀓𑀦𑀺𑀦𑁆𑀦𑀘𑀺𑀢𑁆𑀢𑀢𑀸, 𑀛𑀸𑀦𑀸𑀦𑀼𑀬𑁄𑀕𑁄, 𑀅𑀦𑀯𑀚𑁆𑀚𑀲𑀼𑀢𑁂𑀦 𑀅𑀢𑀺𑀢𑁆𑀢𑀺, 𑀬𑀣𑀸𑀲𑀼𑀢𑀲𑁆𑀲 𑀥𑀫𑁆𑀫𑀲𑁆𑀲 𑀧𑀭𑁂𑀲𑀁 𑀳𑀺𑀢𑀚𑁆𑀛𑀸𑀲𑀬𑁂𑀦 𑀤𑁂𑀲𑀦𑀸, 𑀲𑀢𑁆𑀢𑀸𑀦𑀁 𑀜𑀸𑀬𑁂 𑀦𑀺𑀯𑁂𑀲𑀦𑀁, 𑀆𑀭𑀫𑁆𑀪𑀤𑀴𑁆𑀳𑀢𑀸, 𑀥𑀻𑀭𑀯𑀻𑀭𑀪𑀸𑀯𑁄, 𑀧𑀭𑀸𑀧𑀯𑀸𑀤𑀧𑀭𑀸𑀧𑀓𑀸𑀭𑁂𑀲𑀼 𑀯𑀺𑀓𑀸𑀭𑀸𑀪𑀸𑀯𑁄, 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁, 𑀲𑀫𑀸𑀧𑀢𑁆𑀢𑀻𑀲𑀼 𑀯𑀲𑀻𑀪𑀸𑀯𑁄, 𑀅𑀪𑀺𑀜𑁆𑀜𑀸𑀲𑀼 𑀩𑀮𑀧𑁆𑀧𑀢𑁆𑀢𑀺, 𑀮𑀓𑁆𑀔𑀡𑀢𑁆𑀢𑀬𑀸𑀯𑀩𑁄𑀥𑁄, 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀲𑀼 𑀅𑀪𑀺𑀬𑁄𑀕𑁂𑀦 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀁, 𑀦𑀯𑀮𑁄𑀓𑀼𑀢𑁆𑀢𑀭𑀸𑀯𑀓𑁆𑀓𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀓𑀸 𑀲𑀩𑁆𑀩𑀸 𑀩𑁄𑀥𑀺𑀲𑀫𑁆𑀪𑀸𑀭𑀧𑀝𑀺𑀧𑀢𑁆𑀢𑀺 𑀯𑀻𑀭𑀺𑀬𑀸𑀦𑀼𑀪𑀸𑀯𑁂𑀦𑁂𑀯 𑀲𑀫𑀺𑀚𑁆𑀛𑀢𑀻𑀢𑀺 ¶ 𑀅𑀪𑀺𑀦𑀻𑀳𑀸𑀭𑀢𑁄 𑀬𑀸𑀯 𑀫𑀳𑀸𑀩𑁄𑀥𑀺 𑀅𑀦𑁄𑀲𑁆𑀲𑀚𑁆𑀚𑀦𑁆𑀢𑁂𑀦 𑀲𑀓𑁆𑀓𑀘𑁆𑀘𑀁 𑀦𑀺𑀭𑀦𑁆𑀢𑀭𑀁 𑀯𑀻𑀭𑀺𑀬𑀁 𑀲𑀫𑁆𑀧𑀸𑀤𑁂𑀢𑀩𑁆𑀩𑀁. 𑀲𑀫𑁆𑀧𑀚𑁆𑀚𑀫𑀸𑀦𑁂 𑀘 𑀯𑀻𑀭𑀺𑀬𑁂 𑀔𑀦𑁆𑀢𑀺𑀆𑀤𑀬𑁄 𑀤𑀸𑀦𑀸𑀤𑀬𑁄 𑀘 𑀲𑀩𑁆𑀩𑁂𑀧𑀺 𑀩𑁄𑀥𑀺𑀲𑀫𑁆𑀪𑀸𑀭𑀸 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀲𑀫𑁆𑀧𑀦𑁆𑀦𑀸 𑀏𑀯 𑀳𑁄𑀦𑁆𑀢𑀻𑀢𑀺. 𑀔𑀦𑁆𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀧𑀝𑀺𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀢𑀺 𑀲𑀢𑁆𑀢𑀸𑀦𑀁 𑀲𑀼𑀔𑀽𑀧𑀓𑀭𑀡𑀧𑀭𑀺𑀘𑁆𑀘𑀸𑀕𑁂𑀦 𑀩𑀳𑀼𑀥𑀸 𑀅𑀦𑀼𑀕𑁆𑀕𑀳𑀓𑀭𑀡𑀁 𑀤𑀸𑀦𑁂𑀦 𑀧𑀝𑀺𑀧𑀢𑁆𑀢𑀺, 𑀲𑀻𑀮𑁂𑀦 𑀢𑁂𑀲𑀁 𑀚𑀻𑀯𑀺𑀢𑀲𑀸𑀧𑀢𑁂𑀬𑁆𑀬𑀤𑀸𑀭𑀭𑀓𑁆𑀔𑀅𑀪𑁂𑀤𑀧𑀺𑀬𑀳𑀺𑀢𑀯𑀘𑀦𑀸𑀯𑀺𑀳𑀺𑀁𑀲𑀸𑀤𑀺𑀓𑀭𑀡𑀸𑀦𑀺, 𑀦𑁂𑀓𑁆𑀔𑀫𑁆𑀫𑁂𑀦 𑀦𑁂𑀲𑀁 𑀆𑀫𑀺𑀲𑀧𑀝𑀺𑀕𑁆𑀕𑀳𑀡𑀥𑀫𑁆𑀫𑀤𑀸𑀦𑀸𑀤𑀺𑀦𑀸 𑀅𑀦𑁂𑀓𑀥𑀸 𑀳𑀺𑀢𑀘𑀭𑀺𑀬𑀸, 𑀧𑀜𑁆𑀜𑀸𑀬 𑀢𑁂𑀲𑀁 𑀳𑀺𑀢𑀓𑀭𑀡𑀽𑀧𑀸𑀬𑀓𑁄𑀲𑀮𑁆𑀮𑀁, 𑀯𑀻𑀭𑀺𑀬𑁂𑀦 𑀢𑀢𑁆𑀣 𑀉𑀲𑁆𑀲𑀸𑀳𑀸𑀭𑀫𑁆𑀪𑀅𑀲𑀁𑀳𑀻𑀭𑀸𑀦𑀺, 𑀔𑀦𑁆𑀢𑀺𑀬𑀸 𑀢𑀤𑀧𑀭𑀸𑀥𑀲𑀳𑀦𑀁, 𑀲𑀘𑁆𑀘𑁂𑀦 𑀢𑁂𑀲𑀁 ¶ 𑀅𑀯𑀜𑁆𑀘𑀦𑀢𑀤𑀼𑀧𑀓𑀸𑀭𑀓𑀺𑀭𑀺𑀬𑀸𑀲𑀫𑀸𑀤𑀸𑀦𑀸𑀯𑀺𑀲𑀁𑀯𑀸𑀤𑀦𑀸𑀤𑀺, 𑀅𑀥𑀺𑀝𑁆𑀞𑀸𑀦𑁂𑀦 𑀢𑀤𑀼𑀧𑀓𑀸𑀭𑀓𑀭𑀡𑁂 𑀅𑀦𑀢𑁆𑀣𑀲𑀫𑁆𑀧𑀸𑀢𑁂𑀧𑀺 𑀅𑀘𑀮𑀦𑀁, 𑀫𑁂𑀢𑁆𑀢𑀸𑀬 𑀢𑁂𑀲𑀁 𑀳𑀺𑀢𑀲𑀼𑀔𑀸𑀦𑀼𑀘𑀺𑀦𑁆𑀢𑀦𑀁, 𑀉𑀧𑁂𑀓𑁆𑀔𑀸𑀬 𑀢𑁂𑀲𑀁 𑀉𑀧𑀓𑀸𑀭𑀸𑀧𑀓𑀸𑀭𑁂𑀲𑀼 𑀯𑀺𑀓𑀸𑀭𑀸𑀦𑀸𑀧𑀢𑁆𑀢𑀻𑀢𑀺 𑀏𑀯𑀁 𑀅𑀧𑀭𑀺𑀫𑀸𑀡𑁂 𑀲𑀢𑁆𑀢𑁂 𑀆𑀭𑀩𑁆𑀪 𑀅𑀦𑀼𑀓𑀫𑁆𑀧𑀺𑀢𑀲𑀩𑁆𑀩𑀲𑀢𑁆𑀢𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀼𑀣𑀼𑀚𑁆𑀚𑀦𑁂𑀳𑀺 𑀅𑀲𑀸𑀥𑀸𑀭𑀡𑁄 𑀅𑀧𑀭𑀺𑀫𑀸𑀡𑁄 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑀽𑀧𑀘𑀬𑁄 𑀏𑀢𑁆𑀣 𑀧𑀝𑀺𑀧𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑁄 𑀘𑁂𑀢𑀸𑀲𑀁 𑀧𑀘𑁆𑀘𑀬𑁄 𑀯𑀼𑀢𑁆𑀢𑁄, 𑀢𑀲𑁆𑀲 𑀘 𑀲𑀓𑁆𑀓𑀘𑁆𑀘𑀁 𑀲𑀫𑁆𑀧𑀸𑀤𑀦𑀁.

𑀓𑁄 𑀯𑀺𑀪𑀸𑀕𑁄𑀢𑀺 𑀤𑀲 ¶ 𑀧𑀸𑀭𑀫𑀺𑀬𑁄, 𑀤𑀲 𑀉𑀧𑀧𑀸𑀭𑀫𑀺𑀬𑁄, 𑀤𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄𑀢𑀺 𑀲𑀫𑀢𑁆𑀢𑀺𑀁𑀲 𑀧𑀸𑀭𑀫𑀺𑀬𑁄. 𑀢𑀢𑁆𑀣 𑀓𑀢𑀸𑀪𑀺𑀦𑀻𑀳𑀸𑀭𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀭𑀳𑀺𑀢𑀓𑀭𑀡𑀸𑀪𑀺𑀦𑀺𑀦𑁆𑀦𑀆𑀲𑀬𑀧𑁆𑀧𑀬𑁄𑀕𑀲𑁆𑀲 𑀓𑀡𑁆𑀳𑀥𑀫𑁆𑀫𑀯𑁄𑀓𑀺𑀡𑁆𑀡𑀸 𑀲𑀼𑀓𑁆𑀓𑀥𑀫𑁆𑀫𑀸 𑀧𑀸𑀭𑀫𑀺𑀬𑁄, 𑀢𑁂𑀳𑀺 𑀅𑀯𑁄𑀓𑀺𑀡𑁆𑀡𑀸 𑀲𑀼𑀓𑁆𑀓𑀸 𑀥𑀫𑁆𑀫𑀸 𑀉𑀧𑀧𑀸𑀭𑀫𑀺𑀬𑁄, 𑀅𑀓𑀡𑁆𑀳𑀸 𑀅𑀲𑀼𑀓𑁆𑀓𑀸 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄𑀢𑀺 𑀓𑁂𑀘𑀺. 𑀲𑀫𑀼𑀤𑀸𑀕𑀫𑀦𑀓𑀸𑀮𑁂𑀲𑀼 𑀧𑀽𑀭𑀺𑀬𑀫𑀸𑀦𑀸 𑀧𑀸𑀭𑀫𑀺𑀬𑁄, 𑀩𑁄𑀥𑀺𑀲𑀢𑁆𑀢𑀪𑀽𑀫𑀺𑀬𑀁 𑀧𑀼𑀡𑁆𑀡𑀸 𑀉𑀧𑀧𑀸𑀭𑀫𑀺𑀬𑁄, 𑀩𑀼𑀤𑁆𑀥𑀪𑀽𑀫𑀺𑀬𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀼𑀡𑁆𑀡𑀸 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄. 𑀩𑁄𑀥𑀺𑀲𑀢𑁆𑀢𑀪𑀽𑀫𑀺𑀬𑀁 𑀯𑀸 𑀧𑀭𑀳𑀺𑀢𑀓𑀭𑀡𑀢𑁄 𑀧𑀸𑀭𑀫𑀺𑀬𑁄, 𑀅𑀢𑁆𑀢𑀳𑀺𑀢𑀓𑀭𑀡𑀢𑁄 𑀉𑀧𑀧𑀸𑀭𑀫𑀺𑀬𑁄, 𑀩𑀼𑀤𑁆𑀥𑀪𑀽𑀫𑀺𑀬𑀁 𑀩𑀮𑀯𑁂𑀲𑀸𑀭𑀚𑁆𑀚𑀲𑀫𑀥𑀺𑀕𑀫𑁂𑀦 𑀉𑀪𑀬𑀳𑀺𑀢𑀧𑀭𑀺𑀧𑀽𑀭𑀡𑀢𑁄 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄𑀢𑀺 𑀏𑀯𑀁 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀧𑀡𑀺𑀥𑀸𑀦𑀸𑀭𑀫𑁆𑀪𑀧𑀭𑀺𑀦𑀺𑀝𑁆𑀞𑀸𑀦𑁂𑀲𑀼 𑀢𑁂𑀲𑀁 𑀯𑀺𑀪𑀸𑀕𑁄𑀢𑀺 𑀅𑀧𑀭𑁂. 𑀤𑁄𑀲𑀼𑀧𑀲𑀫𑀓𑀭𑀼𑀡𑀸𑀧𑀓𑀢𑀺𑀓𑀸𑀦𑀁 𑀪𑀯𑀲𑀼𑀔𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀭𑀫𑀲𑀼𑀔𑀧𑁆𑀧𑀢𑁆𑀢𑀸𑀦𑀁 𑀧𑀼𑀜𑁆𑀜𑀽𑀧𑀘𑀬𑀪𑁂𑀤𑀢𑁄 𑀢𑀩𑁆𑀩𑀺𑀪𑀸𑀕𑁄𑀢𑀺 𑀅𑀜𑁆𑀜𑁂.

𑀮𑀚𑁆𑀚𑀸𑀲𑀢𑀺𑀫𑀸𑀦𑀸𑀧𑀲𑁆𑀲𑀬𑀸𑀦𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀥𑀺𑀧𑀢𑀻𑀦𑀁 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀕𑀭𑀼𑀓𑀸𑀦𑀁 𑀢𑀸𑀭𑀺𑀢𑀢𑀭𑀺𑀢𑀢𑀸𑀭𑀬𑀺𑀢𑀽𑀦𑀁 𑀅𑀦𑀼𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀧𑀸𑀭𑀫𑀻, 𑀉𑀧𑀧𑀸𑀭𑀫𑀻, 𑀧𑀭𑀫𑀢𑁆𑀣𑀧𑀸𑀭𑀫𑀻𑀢𑀺 𑀩𑁄𑀥𑀺𑀢𑁆𑀢𑀬𑀧𑁆𑀧𑀢𑁆𑀢𑀺𑀢𑁄 𑀬𑀣𑀸𑀯𑀼𑀢𑁆𑀢𑀯𑀺𑀪𑀸𑀕𑁄𑀢𑀺 𑀓𑁂𑀘𑀺. 𑀘𑀺𑀢𑁆𑀢𑀧𑀡𑀺𑀥𑀺𑀢𑁄 𑀬𑀸𑀯 𑀯𑀘𑀻𑀧𑀡𑀺𑀥𑀺, 𑀢𑀸𑀯 𑀧𑀯𑀢𑁆𑀢𑀸 𑀲𑀫𑁆𑀪𑀸𑀭𑀸 𑀧𑀸𑀭𑀫𑀺𑀬𑁄, 𑀯𑀘𑀻𑀧𑀡𑀺𑀥𑀺𑀢𑁄 𑀬𑀸𑀯 𑀓𑀸𑀬𑀧𑀡𑀺𑀥𑀺, 𑀢𑀸𑀯 𑀧𑀯𑀢𑁆𑀢𑀸 𑀉𑀧𑀧𑀸𑀭𑀫𑀺𑀬𑁄, 𑀓𑀸𑀬𑀧𑀡𑀺𑀥𑀺𑀢𑁄 𑀧𑀪𑀼𑀢𑀺 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄𑀢𑀺 𑀅𑀧𑀭𑁂. 𑀅𑀜𑁆𑀜𑁂 𑀧𑀦 ‘‘𑀧𑀭𑀧𑀼𑀜𑁆𑀜𑀸𑀦𑀼𑀫𑁄𑀤𑀦𑀯𑀲𑁂𑀦 𑀧𑀯𑀢𑁆𑀢𑀸 𑀲𑀫𑁆𑀪𑀸𑀭𑀸 𑀧𑀸𑀭𑀫𑀺𑀬𑁄, 𑀧𑀭𑁂𑀲𑀁 𑀓𑀸𑀭𑀸𑀧𑀦𑀯𑀲𑁂𑀦 𑀧𑀯𑀢𑁆𑀢𑀸 𑀉𑀧𑀧𑀸𑀭𑀫𑀺𑀬𑁄, 𑀲𑀬𑀁 𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀸 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄’’𑀢𑀺 ¶ 𑀯𑀤𑀦𑁆𑀢𑀺. 𑀢𑀣𑀸 𑀪𑀯𑀲𑀼𑀔𑀸𑀯𑀳𑁄 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑁄 𑀧𑀸𑀭𑀫𑀻, 𑀅𑀢𑁆𑀢𑀦𑁄 𑀦𑀺𑀩𑁆𑀩𑀸𑀦𑀲𑀼𑀔𑀸𑀯𑀳𑁄 𑀉𑀧𑀧𑀸𑀭𑀫𑀻, 𑀧𑀭𑁂𑀲𑀁 𑀢𑀤𑀼𑀪𑀬𑀲𑀼𑀔𑀸𑀯𑀳𑁄 𑀧𑀭𑀫𑀢𑁆𑀣𑀧𑀸𑀭𑀫𑀻𑀢𑀺 𑀏𑀓𑁂.

𑀧𑀼𑀢𑁆𑀢𑀤𑀸𑀭𑀥𑀦𑀸𑀤𑀺𑀉𑀧𑀓𑀭𑀡𑀧𑀭𑀺𑀘𑁆𑀘𑀸𑀕𑁄 ¶ 𑀧𑀦 𑀤𑀸𑀦𑀧𑀸𑀭𑀫𑀻, 𑀅𑀢𑁆𑀢𑀦𑁄 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑁄 𑀤𑀸𑀦𑀉𑀧𑀧𑀸𑀭𑀫𑀻, 𑀅𑀢𑁆𑀢𑀦𑁄 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑁄 ¶ 𑀤𑀸𑀦𑀧𑀭𑀫𑀢𑁆𑀣𑀧𑀸𑀭𑀫𑀻. 𑀢𑀣𑀸 𑀧𑀼𑀢𑁆𑀢𑀤𑀸𑀭𑀸𑀤𑀺𑀓𑀲𑁆𑀲 𑀢𑀺𑀯𑀺𑀥𑀲𑁆𑀲𑀧𑀺 𑀳𑁂𑀢𑀼 𑀅𑀯𑀻𑀢𑀺𑀓𑁆𑀓𑀫𑀦𑀯𑀲𑁂𑀦 𑀢𑀺𑀲𑁆𑀲𑁄 𑀲𑀻𑀮𑀧𑀸𑀭𑀫𑀺𑀬𑁄, 𑀢𑁂𑀲𑀼 𑀏𑀯 𑀢𑀺𑀯𑀺𑀥𑁂𑀲𑀼 𑀯𑀢𑁆𑀣𑀽𑀲𑀼 𑀆𑀮𑀬𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑀯𑀲𑁂𑀦 𑀢𑀺𑀲𑁆𑀲𑁄 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀬𑁄, 𑀉𑀧𑀓𑀭𑀡𑀗𑁆𑀕𑀚𑀻𑀯𑀺𑀢𑀢𑀡𑁆𑀳𑀁 𑀲𑀫𑀽𑀳𑀦𑀺𑀢𑁆𑀯𑀸 𑀲𑀢𑁆𑀢𑀸𑀦𑀁 𑀳𑀺𑀢𑀸𑀳𑀺𑀢𑀯𑀺𑀦𑀺𑀘𑁆𑀙𑀬𑀓𑀭𑀡𑀯𑀲𑁂𑀦 𑀢𑀺𑀲𑁆𑀲𑁄 𑀧𑀜𑁆𑀜𑀸𑀧𑀸𑀭𑀫𑀺𑀬𑁄, 𑀬𑀣𑀸𑀯𑀼𑀢𑁆𑀢𑀪𑁂𑀤𑀸𑀦𑀁 𑀧𑀭𑀺𑀘𑁆𑀘𑀸𑀕𑀸𑀤𑀻𑀦𑀁 𑀯𑀸𑀬𑀫𑀦𑀯𑀲𑁂𑀦 𑀢𑀺𑀲𑁆𑀲𑁄 𑀯𑀻𑀭𑀺𑀬𑀧𑀸𑀭𑀫𑀺𑀬𑁄, 𑀉𑀧𑀓𑀭𑀡𑀗𑁆𑀕𑀚𑀻𑀯𑀺𑀢𑀦𑁆𑀢𑀭𑀸𑀬𑀓𑀭𑀸𑀦𑀁 𑀔𑀫𑀦𑀯𑀲𑁂𑀦 𑀢𑀺𑀲𑁆𑀲𑁄 𑀔𑀦𑁆𑀢𑀺𑀧𑀸𑀭𑀫𑀺𑀬𑁄, 𑀉𑀧𑀓𑀭𑀡𑀗𑁆𑀕𑀚𑀻𑀯𑀺𑀢𑀳𑁂𑀢𑀼 𑀲𑀘𑁆𑀘𑀸𑀧𑀭𑀺𑀘𑁆𑀘𑀸𑀕𑀯𑀲𑁂𑀦 𑀢𑀺𑀲𑁆𑀲𑁄 𑀲𑀘𑁆𑀘𑀧𑀸𑀭𑀫𑀺𑀬𑁄, 𑀤𑀸𑀦𑀸𑀤𑀺𑀧𑀸𑀭𑀫𑀺𑀬𑁄 𑀅𑀓𑀼𑀧𑁆𑀧𑀸𑀥𑀺𑀝𑁆𑀞𑀸𑀦𑀯𑀲𑁂𑀦𑁂𑀯 𑀲𑀫𑀺𑀚𑁆𑀛𑀦𑁆𑀢𑀻𑀢𑀺 𑀉𑀧𑀓𑀭𑀡𑀸𑀤𑀺𑀯𑀺𑀦𑀸𑀲𑁂𑀧𑀺 𑀅𑀘𑀮𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀢𑀺𑀲𑁆𑀲𑁄 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀬𑁄, 𑀉𑀧𑀓𑀭𑀡𑀸𑀤𑀺𑀉𑀧𑀖𑀸𑀢𑀓𑁂𑀲𑀼𑀧𑀺 𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀬 𑀅𑀯𑀺𑀚𑀳𑀦𑀯𑀲𑁂𑀦 𑀢𑀺𑀲𑁆𑀲𑁄 𑀫𑁂𑀢𑁆𑀢𑀸𑀧𑀸𑀭𑀫𑀺𑀬𑁄, 𑀬𑀣𑀸𑀯𑀼𑀢𑁆𑀢𑀯𑀢𑁆𑀣𑀼𑀢𑁆𑀢𑀬𑀲𑁆𑀲 𑀉𑀧𑀓𑀸𑀭𑀸𑀧𑀓𑀸𑀭𑁂𑀲𑀼 𑀲𑀢𑁆𑀢𑀲𑀗𑁆𑀔𑀸𑀭𑁂𑀲𑀼 𑀫𑀚𑁆𑀛𑀢𑁆𑀢𑀢𑀸𑀧𑀝𑀺𑀮𑀸𑀪𑀯𑀲𑁂𑀦 𑀢𑀺𑀲𑁆𑀲𑁄 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀬𑁄𑀢𑀺 𑀏𑀯𑀫𑀸𑀤𑀺𑀦𑀸 𑀏𑀢𑀸𑀲𑀁 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄.

𑀓𑁄 𑀲𑀗𑁆𑀕𑀳𑁄𑀢𑀺 𑀏𑀢𑁆𑀣 𑀧𑀦 𑀬𑀣𑀸 𑀏𑀢𑀸 𑀯𑀺𑀪𑀸𑀕𑀢𑁄 𑀢𑀺𑀁𑀲𑀯𑀺𑀥𑀸𑀧𑀺 𑀤𑀸𑀦𑀧𑀸𑀭𑀫𑀻𑀆𑀤𑀺𑀪𑀸𑀯𑀢𑁄 𑀤𑀲𑀯𑀺𑀥𑀸, 𑀏𑀯𑀁 𑀤𑀸𑀦𑀲𑀻𑀮𑀔𑀦𑁆𑀢𑀺𑀯𑀻𑀭𑀺𑀬𑀛𑀸𑀦𑀧𑀜𑁆𑀜𑀸𑀲𑀪𑀸𑀯𑁂𑀦 𑀙𑀩𑁆𑀩𑀺𑀥𑀸. 𑀏𑀢𑀸𑀲𑀼 𑀳𑀺 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻 𑀲𑀻𑀮𑀧𑀸𑀭𑀫𑀺𑀬𑀸 𑀲𑀗𑁆𑀕𑀳𑀺𑀢𑀸 𑀢𑀲𑁆𑀲𑀸 𑀧𑀩𑁆𑀩𑀚𑁆𑀚𑀸𑀪𑀸𑀯𑁂, 𑀦𑀻𑀯𑀭𑀡𑀯𑀺𑀯𑁂𑀓𑀪𑀸𑀯𑁂 𑀧𑀦 𑀛𑀸𑀦𑀧𑀸𑀭𑀫𑀺𑀬𑀸, 𑀓𑀼𑀲𑀮𑀥𑀫𑁆𑀫𑀪𑀸𑀯𑁂 𑀙𑀳𑀺𑀧𑀺 𑀲𑀗𑁆𑀕𑀳𑀺𑀢𑀸. 𑀲𑀘𑁆𑀘𑀧𑀸𑀭𑀫𑀻 𑀲𑀻𑀮𑀧𑀸𑀭𑀫𑀺𑀬𑀸 𑀏𑀓𑀤𑁂𑀲𑁄𑀬𑁂𑀯 𑀯𑀘𑀻𑀲𑀘𑁆𑀘𑀯𑀺𑀭𑀢𑀺𑀲𑀘𑁆𑀘𑀧𑀓𑁆𑀔𑁂, 𑀜𑀸𑀡𑀲𑀘𑁆𑀘𑀧𑀓𑁆𑀔𑁂 𑀧𑀦 𑀧𑀜𑁆𑀜𑀸𑀧𑀸𑀭𑀫𑀺𑀬𑀸 𑀲𑀗𑁆𑀕𑀳𑀺𑀢𑀸. 𑀫𑁂𑀢𑁆𑀢𑀸𑀧𑀸𑀭𑀫𑀻 𑀛𑀸𑀦𑀧𑀸𑀭𑀫𑀺𑀬𑀸 𑀏𑀯, 𑀉𑀧𑁂𑀓𑁆𑀔𑀸𑀧𑀸𑀭𑀫𑀻 𑀛𑀸𑀦𑀧𑀜𑁆𑀜𑀸𑀧𑀸𑀭𑀫𑀻𑀳𑀺, 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀻 𑀲𑀩𑁆𑀩𑀸𑀳𑀺𑀧𑀺 𑀲𑀗𑁆𑀕𑀳𑀺𑀢𑀸𑀢𑀺.

𑀏𑀢𑁂𑀲𑀜𑁆𑀘 𑀤𑀸𑀦𑀸𑀤𑀻𑀦𑀁 𑀙𑀦𑁆𑀦𑀁 𑀕𑀼𑀡𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀩𑀦𑁆𑀥𑀸𑀦𑀁 𑀧𑀜𑁆𑀘𑀤𑀲𑀬𑀼𑀕𑀴𑀸𑀤𑀻𑀦𑀺 𑀧𑀜𑁆𑀘𑀤𑀲𑀬𑀼𑀕𑀴𑀸𑀤𑀺𑀲𑀸𑀥𑀓𑀸𑀦𑀺 𑀳𑁄𑀦𑁆𑀢𑀺 𑁋 𑀲𑁂𑀬𑁆𑀬𑀣𑀺𑀤𑀁? 𑀤𑀸𑀦𑀲𑀻𑀮𑀬𑀼𑀕𑀴𑁂𑀦 𑀧𑀭𑀳𑀺𑀢𑀸𑀳𑀺𑀢𑀸𑀦𑀁 𑀓𑀭𑀡𑀸𑀓𑀭𑀡𑀬𑀼𑀕𑀴𑀲𑀺𑀤𑁆𑀥𑀺, 𑀤𑀸𑀦𑀔𑀦𑁆𑀢𑀺𑀬𑀼𑀕𑀴𑁂𑀦 ¶ 𑀅𑀮𑁄𑀪𑀸𑀤𑁄𑀲𑀬𑀼𑀕𑀴𑀲𑀺𑀤𑁆𑀥𑀺, 𑀤𑀸𑀦𑀯𑀻𑀭𑀺𑀬𑀬𑀼𑀕𑀴𑁂𑀦 𑀘𑀸𑀕𑀲𑀼𑀢𑀬𑀼𑀕𑀴𑀲𑀺𑀤𑁆𑀥𑀺, 𑀤𑀸𑀦𑀛𑀸𑀦𑀬𑀼𑀕𑀴𑁂𑀦 𑀓𑀸𑀫𑀤𑁄𑀲𑀧𑁆𑀧𑀳𑀸𑀦𑀬𑀼𑀕𑀴𑀲𑀺𑀤𑁆𑀥𑀺, 𑀤𑀸𑀦𑀧𑀜𑁆𑀜𑀸𑀬𑀼𑀕𑀴𑁂𑀦 𑀅𑀭𑀺𑀬𑀬𑀸𑀦𑀥𑀼𑀭𑀬𑀼𑀕𑀴𑀲𑀺𑀤𑁆𑀥𑀺, 𑀲𑀻𑀮𑀔𑀦𑁆𑀢𑀺𑀤𑁆𑀯𑀬𑁂𑀦 𑀧𑀬𑁄𑀕𑀸𑀲𑀬𑀲𑀼𑀤𑁆𑀥𑀺𑀤𑁆𑀯𑀬𑀲𑀺𑀤𑁆𑀥𑀺, 𑀲𑀻𑀮𑀯𑀻𑀭𑀺𑀬𑀤𑁆𑀯𑀬𑁂𑀦 𑀪𑀸𑀯𑀦𑀸𑀤𑁆𑀯𑀬𑀲𑀺𑀤𑁆𑀥𑀺, 𑀲𑀻𑀮𑀛𑀸𑀦𑀤𑁆𑀯𑀬𑁂𑀦 𑀤𑀼𑀲𑁆𑀲𑀻𑀮𑁆𑀬𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀤𑁆𑀯𑀬𑀲𑀺𑀤𑁆𑀥𑀺, 𑀲𑀻𑀮𑀧𑀜𑁆𑀜𑀸𑀤𑁆𑀯𑀬𑁂𑀦 𑀤𑀸𑀦𑀤𑁆𑀯𑀬𑀲𑀺𑀤𑁆𑀥𑀺, 𑀔𑀦𑁆𑀢𑀺𑀯𑀻𑀭𑀺𑀬𑀬𑀼𑀕𑀴𑁂𑀦 𑀔𑀫𑀸𑀢𑁂𑀚𑀤𑁆𑀯𑀬𑀲𑀺𑀤𑁆𑀥𑀺, 𑀔𑀦𑁆𑀢𑀺𑀛𑀸𑀦𑀬𑀼𑀕𑀴𑁂𑀦 ¶ 𑀯𑀺𑀭𑁄𑀥𑀸𑀦𑀼𑀭𑁄𑀥𑀧𑁆𑀧𑀳𑀸𑀦𑀬𑀼𑀕𑀴𑀲𑀺𑀤𑁆𑀥𑀺 ¶ , 𑀔𑀦𑁆𑀢𑀺𑀧𑀜𑁆𑀜𑀸𑀬𑀼𑀕𑀴𑁂𑀦 𑀲𑀼𑀜𑁆𑀜𑀢𑀸𑀔𑀦𑁆𑀢𑀺𑀧𑀝𑀺𑀯𑁂𑀥𑀤𑀼𑀓𑀲𑀺𑀤𑁆𑀥𑀺, 𑀯𑀻𑀭𑀺𑀬𑀛𑀸𑀦𑀤𑀼𑀓𑁂𑀦 𑀧𑀕𑁆𑀕𑀸𑀳𑀸𑀯𑀺𑀓𑁆𑀔𑁂𑀧𑀤𑀼𑀓𑀲𑀺𑀤𑁆𑀥𑀺, 𑀯𑀻𑀭𑀺𑀬𑀧𑀜𑁆𑀜𑀸𑀤𑀼𑀓𑁂𑀦 𑀲𑀭𑀡𑀤𑀼𑀓𑀲𑀺𑀤𑁆𑀥𑀺, 𑀛𑀸𑀦𑀧𑀜𑁆𑀜𑀸𑀤𑀼𑀓𑁂𑀦 𑀬𑀸𑀦𑀤𑀼𑀓𑀲𑀺𑀤𑁆𑀥𑀺. 𑀤𑀸𑀦𑀲𑀻𑀮𑀔𑀦𑁆𑀢𑀺𑀢𑁆𑀢𑀺𑀓𑁂𑀦 𑀮𑁄𑀪𑀤𑁄𑀲𑀫𑁄𑀳𑀧𑁆𑀧𑀳𑀸𑀦𑀢𑁆𑀢𑀺𑀓𑀲𑀺𑀤𑁆𑀥𑀺, 𑀤𑀸𑀦𑀲𑀻𑀮𑀯𑀻𑀭𑀺𑀬𑀢𑁆𑀢𑀺𑀓𑁂𑀦 𑀪𑁄𑀕𑀚𑀻𑀯𑀺𑀢𑀓𑀸𑀬𑀲𑀸𑀭𑀸𑀤𑀸𑀦𑀢𑁆𑀢𑀺𑀓𑀲𑀺𑀤𑁆𑀥𑀺, 𑀤𑀸𑀦𑀲𑀻𑀮𑀛𑀸𑀦𑀢𑁆𑀢𑀺𑀓𑁂𑀦 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀢𑁆𑀢𑀺𑀓𑀲𑀺𑀤𑁆𑀥𑀺, 𑀤𑀸𑀦𑀲𑀻𑀮𑀧𑀜𑁆𑀜𑀸𑀢𑀺𑀓𑁂𑀦 𑀆𑀫𑀺𑀲𑀸𑀪𑀬𑀥𑀫𑁆𑀫𑀤𑀸𑀦𑀢𑁆𑀢𑀺𑀓𑀲𑀺𑀤𑁆𑀥𑀻𑀢𑀺 𑀏𑀯𑀁 𑀇𑀢𑀭𑁂𑀳𑀺𑀧𑀺 𑀢𑀺𑀓𑁂𑀳𑀺 𑀘𑀢𑀼𑀓𑁆𑀓𑀸𑀤𑀻𑀳𑀺 𑀘 𑀬𑀣𑀸𑀲𑀫𑁆𑀪𑀯𑀁 𑀢𑀺𑀓𑀸𑀦𑀺 𑀘𑀢𑀼𑀓𑁆𑀓𑀸𑀤𑀻𑀦𑀺 𑀘 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀏𑀯𑀁 𑀙𑀩𑁆𑀩𑀺𑀥𑀸𑀦𑀫𑁆𑀧𑀺 𑀧𑀦 𑀇𑀫𑀸𑀲𑀁 𑀧𑀸𑀭𑀫𑀻𑀦𑀁 𑀘𑀢𑀽𑀳𑀺 𑀅𑀥𑀺𑀝𑁆𑀞𑀸𑀦𑁂𑀳𑀺 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑀧𑀸𑀭𑀫𑀻𑀦𑀁 𑀲𑀫𑀽𑀳𑀲𑀗𑁆𑀕𑀳𑀢𑁄 𑀳𑀺 𑀘𑀢𑁆𑀢𑀸𑀭𑀺 𑀅𑀥𑀺𑀝𑁆𑀞𑀸𑀦𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁, 𑀘𑀸𑀕𑀸𑀥𑀺𑀝𑁆𑀞𑀸𑀦𑀁, 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁, 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀦𑁆𑀢𑀺. 𑀢𑀢𑁆𑀣 𑀅𑀥𑀺𑀢𑀺𑀝𑁆𑀞𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸 𑀅𑀥𑀺𑀢𑀺𑀝𑁆𑀞𑀢𑀺, 𑀅𑀥𑀺𑀝𑁆𑀞𑀸𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀅𑀥𑀺𑀝𑁆𑀞𑀸𑀦𑀁. 𑀲𑀘𑁆𑀘𑀜𑁆𑀘 𑀢𑀁 𑀅𑀥𑀺𑀝𑁆𑀞𑀸𑀦𑀜𑁆𑀘, 𑀲𑀘𑁆𑀘𑀲𑁆𑀲 𑀯𑀸 𑀅𑀥𑀺𑀝𑁆𑀞𑀸𑀦𑀁, 𑀲𑀘𑁆𑀘𑀁 𑀅𑀥𑀺𑀝𑁆𑀞𑀸𑀦𑀁 𑀏𑀢𑀲𑁆𑀲𑀸𑀢𑀺 𑀯𑀸 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀢𑀢𑁆𑀣 𑀅𑀯𑀺𑀲𑁂𑀲𑀢𑁄 𑀢𑀸𑀯 𑀮𑁄𑀓𑀼𑀢𑁆𑀢𑀭𑀕𑀼𑀡𑁂 𑀓𑀢𑀸𑀪𑀺𑀦𑀻𑀳𑀸𑀭𑀲𑁆𑀲 𑀅𑀦𑀼𑀓𑀫𑁆𑀧𑀺𑀢𑀲𑀩𑁆𑀩𑀲𑀢𑁆𑀢𑀲𑁆𑀲 𑀫𑀳𑀸𑀲𑀢𑁆𑀢𑀲𑁆𑀲 𑀧𑀭𑀺𑀜𑁆𑀜𑀸𑀦𑀼𑀭𑀽𑀧𑀁 𑀲𑀩𑁆𑀩𑀧𑀸𑀭𑀫𑀺𑀧𑀭𑀺𑀕𑁆𑀕𑀳𑀢𑁄 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁, 𑀢𑁂𑀲𑀁 𑀧𑀝𑀺𑀧𑀓𑁆𑀔𑀧𑀭𑀺𑀘𑁆𑀘𑀸𑀕𑀢𑁄 𑀘𑀸𑀕𑀸𑀥𑀺𑀝𑁆𑀞𑀸𑀦𑀁, 𑀲𑀩𑁆𑀩𑀧𑀸𑀭𑀫𑀺𑀢𑀸𑀕𑀼𑀡𑁂𑀳𑀺 𑀉𑀧𑀲𑀫𑀢𑁄 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁 ¶ , 𑀢𑁂𑀳𑀺𑀬𑁂𑀯 𑀧𑀭𑀳𑀺𑀢𑁄𑀧𑀸𑀬𑀓𑁄𑀲𑀮𑁆𑀮𑀢𑁄 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁. 𑀯𑀺𑀲𑁂𑀲𑀢𑁄 𑀧𑀦 ‘‘𑀅𑀢𑁆𑀣𑀺𑀓𑀚𑀦𑀁 𑀅𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀚𑀸𑀦𑀢𑁄, 𑀧𑀝𑀺𑀜𑁆𑀜𑀁 𑀅𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀤𑀸𑀦𑀢𑁄, 𑀤𑀸𑀦𑀁 𑀅𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀅𑀦𑀼𑀫𑁄𑀤𑀦𑀢𑁄, 𑀫𑀘𑁆𑀙𑀭𑀺𑀬𑀸𑀤𑀺𑀧𑀝𑀺𑀧𑀓𑁆𑀔𑀧𑀭𑀺𑀘𑁆𑀘𑀸𑀕𑀢𑁄, 𑀤𑁂𑀬𑁆𑀬𑀧𑀝𑀺𑀕𑁆𑀕𑀸𑀳𑀓𑀤𑀸𑀦𑀤𑁂𑀬𑁆𑀬𑀥𑀫𑁆𑀫𑀓𑁆𑀔𑀬𑁂𑀲𑀼 𑀮𑁄𑀪𑀤𑁄𑀲𑀫𑁄𑀳𑀪𑀬𑀯𑀽𑀧𑀲𑀫𑀢𑁄, 𑀬𑀣𑀸𑀭𑀳𑀁 𑀬𑀣𑀸𑀓𑀸𑀮𑀁 𑀬𑀣𑀸𑀯𑀺𑀥𑀸𑀦𑀜𑁆𑀘 𑀤𑀸𑀦𑀢𑁄, 𑀧𑀜𑁆𑀜𑀼𑀢𑁆𑀢𑀭𑀢𑁄 𑀘 𑀓𑀼𑀲𑀮𑀥𑀫𑁆𑀫𑀸𑀦𑀁 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀁 𑀤𑀸𑀦𑀁. 𑀢𑀣𑀸 𑀲𑀁𑀯𑀭𑀲𑀫𑀸𑀤𑀸𑀦𑀲𑁆𑀲 𑀅𑀯𑀻𑀢𑀺𑀓𑁆𑀓𑀫𑀢𑁄, 𑀤𑀼𑀲𑁆𑀲𑀻𑀮𑁆𑀬𑀧𑀭𑀺𑀘𑁆𑀘𑀸𑀕𑀢𑁄, 𑀤𑀼𑀘𑁆𑀘𑀭𑀺𑀢𑀯𑀽𑀧𑀲𑀫𑀢𑁄, 𑀧𑀜𑁆𑀜𑀼𑀢𑁆𑀢𑀭𑀢𑁄 𑀘 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀁 𑀲𑀻𑀮𑀁. 𑀬𑀣𑀸𑀧𑀝𑀺𑀜𑁆𑀜𑀁 𑀔𑀫𑀦𑀢𑁄, 𑀧𑀭𑀸𑀧𑀭𑀸𑀥𑀯𑀺𑀓𑀧𑁆𑀧𑀧𑀭𑀺𑀘𑁆𑀘𑀸𑀕𑀢𑁄, 𑀓𑁄𑀥𑀧𑀭𑀺𑀬𑀼𑀝𑁆𑀞𑀸𑀦𑀯𑀽𑀧𑀲𑀫𑀢𑁄, 𑀧𑀜𑁆𑀜𑀼𑀢𑁆𑀢𑀭𑀢𑁄 𑀘 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸 𑀔𑀦𑁆𑀢𑀺. 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀧𑀭𑀳𑀺𑀢𑀓𑀭𑀡𑀢𑁄, 𑀯𑀺𑀲𑀸𑀤𑀧𑀭𑀺𑀘𑁆𑀘𑀸𑀕𑀢𑁄, 𑀅𑀓𑀼𑀲𑀮𑀥𑀫𑁆𑀫𑀸𑀦𑀁 𑀯𑀽𑀧𑀲𑀫𑀢𑁄, 𑀧𑀜𑁆𑀜𑀼𑀢𑁆𑀢𑀭𑀢𑁄 𑀘 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀁 𑀯𑀻𑀭𑀺𑀬𑀁. 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀮𑁄𑀓𑀳𑀺𑀢𑀸𑀦𑀼𑀘𑀺𑀦𑁆𑀢𑀦𑀢𑁄, 𑀦𑀻𑀯𑀭𑀡𑀧𑀭𑀺𑀘𑁆𑀘𑀸𑀕𑀢𑁄, 𑀘𑀺𑀢𑁆𑀢𑀯𑀽𑀧𑀲𑀫𑀢𑁄, 𑀧𑀜𑁆𑀜𑀼𑀢𑁆𑀢𑀭𑀢𑁄 𑀘 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀁 𑀛𑀸𑀦𑀁. 𑀬𑀣𑀸𑀧𑀝𑀺𑀜𑁆𑀜𑀁 𑀧𑀭𑀳𑀺𑀢𑀽𑀧𑀸𑀬𑀓𑁄𑀲𑀮𑁆𑀮𑀢𑁄, 𑀅𑀦𑀼𑀧𑀸𑀬𑀓𑀺𑀭𑀺𑀬𑀸𑀧𑀭𑀺𑀘𑁆𑀘𑀸𑀕𑀢𑁄 ¶ , 𑀫𑁄𑀳𑀚𑀧𑀭𑀺𑀴𑀸𑀳𑀯𑀽𑀧𑀲𑀫𑀢𑁄, 𑀲𑀩𑁆𑀩𑀜𑁆𑀜𑀼𑀢𑀸𑀧𑀝𑀺𑀮𑀸𑀪𑀢𑁄 𑀘 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸 𑀧𑀜𑁆𑀜𑀸.

𑀢𑀢𑁆𑀣 𑀜𑁂𑀬𑁆𑀬𑀧𑀝𑀺𑀜𑁆𑀜𑀸𑀦𑀼𑀯𑀺𑀥𑀸𑀦𑁂𑀳𑀺 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁, 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀧𑀭𑀺𑀘𑁆𑀘𑀸𑀕𑁂𑀳𑀺 𑀘𑀸𑀕𑀸𑀥𑀺𑀝𑁆𑀞𑀸𑀦𑀁, 𑀤𑁄𑀲𑀤𑀼𑀓𑁆𑀔𑀯𑀽𑀧𑀲𑀫𑁂𑀳𑀺 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁, 𑀅𑀦𑀼𑀩𑁄𑀥𑀧𑀝𑀺𑀯𑁂𑀥𑁂𑀳𑀺 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁. 𑀢𑀺𑀯𑀺𑀥𑀲𑀘𑁆𑀘𑀧𑀭𑀺𑀕𑁆𑀕𑀳𑀺𑀢𑀁 ¶ 𑀤𑁄𑀲𑀢𑁆𑀢𑀬𑀯𑀺𑀭𑁄𑀥𑀺 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁, 𑀢𑀺𑀯𑀺𑀥𑀘𑀸𑀕𑀧𑀭𑀺𑀕𑁆𑀕𑀳𑀺𑀢𑀁 𑀤𑁄𑀲𑀢𑁆𑀢𑀬𑀯𑀺𑀭𑁄𑀥𑀺 𑀘𑀸𑀕𑀸𑀥𑀺𑀝𑁆𑀞𑀸𑀦𑀁, 𑀢𑀺𑀯𑀺𑀥𑀯𑀽𑀧𑀲𑀫𑀧𑀭𑀺𑀕𑁆𑀕𑀳𑀺𑀢𑀁 𑀤𑁄𑀲𑀢𑁆𑀢𑀬𑀯𑀺𑀭𑁄𑀥𑀺 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁, 𑀢𑀺𑀯𑀺𑀥𑀜𑀸𑀡𑀧𑀭𑀺𑀕𑁆𑀕𑀳𑀺𑀢𑀁 𑀤𑁄𑀲𑀢𑁆𑀢𑀬𑀯𑀺𑀭𑁄𑀥𑀺 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁. 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀘𑀸𑀕𑀽𑀧𑀲𑀫𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀸𑀦𑀺 𑀅𑀯𑀺𑀲𑀁𑀯𑀸𑀤𑀦𑀢𑁄 ¶ , 𑀧𑀝𑀺𑀜𑁆𑀜𑀸𑀦𑀼𑀯𑀺𑀥𑀸𑀦𑀢𑁄 𑀘. 𑀘𑀸𑀕𑀸𑀥𑀺𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀲𑀘𑁆𑀘𑀽𑀧𑀲𑀫𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀸𑀦𑀺 𑀧𑀝𑀺𑀧𑀓𑁆𑀔𑀧𑀭𑀺𑀘𑁆𑀘𑀸𑀕𑀢𑁄, 𑀲𑀩𑁆𑀩𑀧𑀭𑀺𑀘𑁆𑀘𑀸𑀕𑀨𑀮𑀢𑁆𑀢𑀸 𑀘. 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀲𑀘𑁆𑀘𑀘𑀸𑀕𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀸𑀦𑀺 𑀓𑀺𑀮𑁂𑀲𑀧𑀭𑀺𑀴𑀸𑀳𑀽𑀧𑀲𑀫𑀢𑁄, 𑀓𑀸𑀫𑀽𑀧𑀲𑀫𑀢𑁄, 𑀓𑀸𑀫𑀧𑀭𑀺𑀴𑀸𑀳𑀽𑀧𑀲𑀫𑀢𑁄 𑀘. 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀲𑀘𑁆𑀘𑀘𑀸𑀕𑀽𑀧𑀲𑀫𑀸𑀥𑀺𑀝𑁆𑀞𑀸𑀦𑀸𑀦𑀺 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀢𑁄, 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀦𑀢𑁄 𑀘𑀸𑀢𑀺 𑀏𑀯𑀁 𑀲𑀩𑁆𑀩𑀸𑀧𑀺 𑀧𑀸𑀭𑀫𑀺𑀬𑁄 𑀲𑀘𑁆𑀘𑀧𑁆𑀧𑀪𑀸𑀯𑀺𑀢𑀸 𑀘𑀸𑀕𑀧𑀭𑀺𑀩𑁆𑀬𑀜𑁆𑀚𑀺𑀢𑀸 𑀉𑀧𑀲𑀫𑁄𑀧𑀩𑁆𑀭𑀽𑀳𑀺𑀢𑀸 𑀧𑀜𑁆𑀜𑀸𑀧𑀭𑀺𑀲𑀼𑀤𑁆𑀥𑀸. 𑀲𑀘𑁆𑀘𑀜𑁆𑀳𑀺 𑀏𑀢𑀸𑀲𑀁 𑀚𑀦𑀓𑀳𑁂𑀢𑀼, 𑀘𑀸𑀕𑁄 𑀧𑀭𑀺𑀕𑁆𑀕𑀸𑀳𑀓𑀳𑁂𑀢𑀼, 𑀉𑀧𑀲𑀫𑁄 𑀧𑀭𑀺𑀯𑀼𑀟𑁆𑀠𑀺𑀳𑁂𑀢𑀼, 𑀧𑀜𑁆𑀜𑀸 𑀧𑀸𑀭𑀺𑀲𑀼𑀤𑁆𑀥𑀺𑀳𑁂𑀢𑀼. 𑀢𑀣𑀸 𑀆𑀤𑀺𑀫𑁆𑀳𑀺 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀧𑀝𑀺𑀜𑁆𑀜𑀢𑁆𑀢𑀸, 𑀫𑀚𑁆𑀛𑁂 𑀘𑀸𑀕𑀸𑀥𑀺𑀝𑁆𑀞𑀸𑀦𑀁 𑀓𑀢𑀧𑀡𑀺𑀥𑀸𑀦𑀲𑁆𑀲 𑀧𑀭𑀳𑀺𑀢𑀸𑀬 𑀅𑀢𑁆𑀢𑀧𑀭𑀺𑀘𑁆𑀘𑀸𑀕𑀢𑁄, 𑀅𑀦𑁆𑀢𑁂 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁 𑀲𑀩𑁆𑀩𑀽𑀧𑀲𑀫𑀧𑀭𑀺𑀬𑁄𑀲𑀸𑀦𑀢𑁆𑀢𑀸, 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁 𑀢𑀲𑁆𑀫𑀺𑀁 𑀲𑀢𑀺 𑀲𑀫𑁆𑀪𑀯𑀢𑁄, 𑀅𑀲𑀢𑀺 𑀅𑀪𑀸𑀯𑀢𑁄, 𑀬𑀣𑀸𑀧𑀝𑀺𑀜𑁆𑀜𑀜𑁆𑀘 𑀪𑀸𑀯𑀢𑁄.

𑀢𑀢𑁆𑀣 𑀫𑀳𑀸𑀧𑀼𑀭𑀺𑀲𑀸 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀓𑀭𑁂𑀳𑀺 𑀕𑀭𑀼𑀧𑀺𑀬𑀪𑀸𑀯𑀓𑀭𑁂𑀳𑀺 𑀲𑀘𑁆𑀘𑀘𑀸𑀕𑀸𑀥𑀺𑀝𑁆𑀞𑀸𑀦𑁂𑀳𑀺 𑀕𑀺𑀳𑀺𑀪𑀽𑀢𑀸 𑀆𑀫𑀺𑀲𑀤𑀸𑀦𑁂𑀦 𑀧𑀭𑁂 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀺. 𑀢𑀣𑀸 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀓𑀭𑁂𑀳𑀺 𑀕𑀭𑀼𑀧𑀺𑀬𑀪𑀸𑀯𑀓𑀭𑁂𑀳𑀺 𑀉𑀧𑀲𑀫𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑁂𑀳𑀺 𑀘 𑀧𑀩𑁆𑀩𑀚𑀺𑀢𑀪𑀽𑀢𑀸 𑀥𑀫𑁆𑀫𑀤𑀸𑀦𑁂𑀦 𑀧𑀭𑁂 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀺.

𑀢𑀢𑁆𑀣 𑀅𑀦𑁆𑀢𑀺𑀫𑀪𑀯𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀁. 𑀧𑀭𑀺𑀧𑀼𑀡𑁆𑀡𑀘𑀢𑀼𑀭𑀥𑀺𑀝𑁆𑀞𑀸𑀦𑀲𑁆𑀲 𑀳𑀺 𑀘𑀭𑀺𑀫𑀓𑀪𑀯𑀽𑀧𑀧𑀢𑁆𑀢𑀻𑀢𑀺 𑀏𑀓𑁂. 𑀢𑀢𑁆𑀭 𑀳𑀺 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀞𑀺𑀢𑀺𑀅𑀪𑀺𑀦𑀺𑀓𑁆𑀔𑀫𑀦𑁂𑀲𑀼 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀧𑀸𑀭𑀺𑀧𑀽𑀭𑀺𑀬𑀸 𑀲𑀫𑁆𑀧𑀢𑀺𑀚𑀸𑀢𑁄 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀦𑁆𑀢𑁆𑀯𑀸 𑀲𑀩𑁆𑀩𑀸 𑀤𑀺𑀲𑀸 𑀑𑀮𑁄𑀓𑁂𑀢𑁆𑀯𑀸 𑀲𑀘𑁆𑀘𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑀸 𑀯𑀘𑀲𑀸 ‘‘𑀅𑀕𑁆𑀕𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀚𑁂𑀝𑁆𑀞𑁄…𑀧𑁂… 𑀲𑁂𑀝𑁆𑀞𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲𑀸’’𑀢𑀺 (𑀤𑀻. 𑀦𑀺. 𑁨.𑁩𑁧; 𑀫. 𑀦𑀺. 𑁩.𑁨𑁦𑁭) 𑀢𑀺𑀓𑁆𑀔𑀢𑁆𑀢𑀼𑀁 ¶ ¶ 𑀲𑀻𑀳𑀦𑀸𑀤𑀁 𑀦𑀤𑀺, 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀚𑀺𑀡𑁆𑀡𑀸𑀢𑀼𑀭𑀫𑀢𑀧𑀩𑁆𑀩𑀚𑀺𑀢𑀤𑀲𑁆𑀲𑀸𑀯𑀺𑀦𑁄 𑀘𑀢𑀼𑀥𑀫𑁆𑀫𑀧𑀤𑁂𑀲𑀓𑁄𑀯𑀺𑀤𑀲𑁆𑀲 𑀬𑁄𑀩𑁆𑀩𑀦𑀸𑀭𑁄𑀕𑁆𑀬𑀚𑀻𑀯𑀺𑀢𑀲𑀫𑁆𑀧𑀢𑁆𑀢𑀺𑀫𑀤𑀸𑀦𑀁 𑀉𑀧𑀲𑀫𑁄, 𑀘𑀸𑀕𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀫𑀳𑀢𑁄 𑀜𑀸𑀢𑀺𑀧𑀭𑀺𑀯𑀝𑁆𑀝𑀲𑁆𑀲 𑀳𑀢𑁆𑀣𑀕𑀢𑀲𑁆𑀲 𑀘 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀲𑁆𑀲 𑀅𑀦𑀧𑁂𑀓𑁆𑀔𑀧𑀭𑀺𑀘𑁆𑀘𑀸𑀕𑁄𑀢𑀺.

𑀤𑀼𑀢𑀺𑀬𑁂 𑀞𑀸𑀦𑁂 𑀅𑀪𑀺𑀲𑀫𑁆𑀩𑁄𑀥𑀺𑀬𑀁 𑀘𑀢𑀼𑀭𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀓𑁂𑀘𑀺. 𑀢𑀢𑁆𑀣 𑀳𑀺 𑀬𑀣𑀸𑀧𑀝𑀺𑀜𑁆𑀜𑀁 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀅𑀪𑀺𑀲𑀫𑀬𑁄, 𑀢𑀢𑁄 𑀳𑀺 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁. 𑀘𑀸𑀕𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 ¶ 𑀲𑀩𑁆𑀩𑀓𑀺𑀮𑁂𑀲𑁄𑀧𑀓𑁆𑀓𑀺𑀮𑁂𑀲𑀧𑀭𑀺𑀘𑁆𑀘𑀸𑀕𑁄, 𑀢𑀢𑁄 𑀳𑀺 𑀘𑀸𑀕𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁. 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀧𑀭𑀫𑀽𑀧𑀲𑀫𑀲𑀫𑁆𑀧𑀢𑁆𑀢𑀺, 𑀢𑀢𑁄 𑀳𑀺 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁. 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀅𑀦𑀸𑀯𑀭𑀡𑀜𑀸𑀡𑀧𑀝𑀺𑀮𑀸𑀪𑁄, 𑀢𑀢𑁄 𑀳𑀺 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀦𑁆𑀢𑀺, 𑀢𑀁 𑀅𑀲𑀺𑀤𑁆𑀥𑀁 𑀅𑀪𑀺𑀲𑀫𑁆𑀩𑁄𑀥𑀺𑀬𑀸𑀧𑀺 𑀧𑀭𑀫𑀢𑁆𑀣𑀪𑀸𑀯𑀢𑁄.

𑀢𑀢𑀺𑀬𑁂 𑀞𑀸𑀦𑁂 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁩; 𑀧𑀝𑀺. 𑀫. 𑁨.𑁩𑁦) 𑀘𑀢𑀼𑀭𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀜𑁆𑀜𑁂. 𑀢𑀢𑁆𑀣 𑀳𑀺 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀤𑁆𑀯𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀅𑀭𑀺𑀬𑀲𑀘𑁆𑀘𑀤𑁂𑀲𑀦𑀸𑀬 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁, 𑀘𑀸𑀕𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀲𑀤𑁆𑀥𑀫𑁆𑀫𑀫𑀳𑀸𑀬𑀸𑀕𑀓𑀭𑀡𑁂𑀦 𑀘𑀸𑀕𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁. 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀲𑀬𑀁 𑀉𑀧𑀲𑀦𑁆𑀢𑀲𑁆𑀲 𑀧𑀭𑁂𑀲𑀁 𑀉𑀧𑀲𑀫𑀦𑁂𑀦 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁, 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀯𑀺𑀦𑁂𑀬𑁆𑀬𑀸𑀦𑀁 𑀆𑀲𑀬𑀸𑀤𑀺𑀧𑀭𑀺𑀚𑀸𑀦𑀦𑁂𑀦 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀦𑁆𑀢𑀺, 𑀢𑀤𑀧𑀺 𑀅𑀲𑀺𑀤𑁆𑀥𑀁 𑀅𑀧𑀭𑀺𑀬𑁄𑀲𑀺𑀢𑀢𑁆𑀢𑀸 𑀩𑀼𑀤𑁆𑀥𑀓𑀺𑀘𑁆𑀘𑀲𑁆𑀲.

𑀘𑀢𑀼𑀢𑁆𑀣𑁂 𑀞𑀸𑀦𑁂 𑀧𑀭𑀺𑀦𑀺𑀩𑁆𑀩𑀸𑀦𑁂 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀧𑀭𑁂. 𑀢𑀢𑁆𑀭 𑀳𑀺 𑀧𑀭𑀺𑀦𑀺𑀩𑁆𑀩𑀼𑀢𑀢𑁆𑀢𑀸 𑀧𑀭𑀫𑀢𑁆𑀣𑀲𑀘𑁆𑀘𑀲𑀫𑁆𑀧𑀢𑁆𑀢𑀺𑀬𑀸 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀁, 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁂𑀦 𑀘𑀸𑀕𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀁, 𑀲𑀩𑁆𑀩𑀲𑀗𑁆𑀔𑀸𑀭𑀽𑀧𑀲𑀫𑁂𑀦 ¶ 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀁, 𑀧𑀜𑁆𑀜𑀸𑀧𑀬𑁄𑀚𑀦𑀧𑀭𑀺𑀦𑀺𑀝𑁆𑀞𑀸𑀦𑁂𑀦 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀦𑁆𑀢𑀺.

𑀢𑀢𑁆𑀭 𑀫𑀳𑀸𑀧𑀼𑀭𑀺𑀲𑀲𑁆𑀲 𑀯𑀺𑀲𑁂𑀲𑁂𑀦 𑀫𑁂𑀢𑁆𑀢𑀸𑀔𑁂𑀢𑁆𑀢𑁂 𑀅𑀪𑀺𑀚𑀸𑀢𑀺𑀬𑀁 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀫𑀪𑀺𑀩𑁆𑀬𑀢𑁆𑀢𑀁, 𑀯𑀺𑀲𑁂𑀲𑁂𑀦 𑀓𑀭𑀼𑀡𑀸𑀔𑁂𑀢𑁆𑀢𑁂 𑀅𑀪𑀺𑀲𑀫𑁆𑀩𑁄𑀥𑀺𑀬𑀁 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀫𑀪𑀺𑀩𑁆𑀬𑀢𑁆𑀢𑀁, 𑀯𑀺𑀲𑁂𑀲𑁂𑀦 𑀫𑀼𑀤𑀺𑀢𑀸𑀔𑁂𑀢𑁆𑀢𑁂 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁩; 𑀧𑀝𑀺. 𑀫. 𑁨.𑁩𑁦) 𑀘𑀸𑀕𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀘𑀸𑀕𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀫𑀪𑀺𑀩𑁆𑀬𑀢𑁆𑀢𑀁, 𑀯𑀺𑀲𑁂𑀲𑁂𑀦 𑀉𑀧𑁂𑀓𑁆𑀔𑀸𑀔𑁂𑀢𑁆𑀢𑁂 𑀧𑀭𑀺𑀦𑀺𑀩𑁆𑀩𑀸𑀦𑁂 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀫𑀪𑀺𑀩𑁆𑀬𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀢𑁆𑀭𑀧𑀺 ¶ 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀲𑀁𑀯𑀸𑀲𑁂𑀦 𑀲𑀻𑀮𑀁 𑀯𑁂𑀤𑀺𑀢𑀩𑁆𑀩𑀁, 𑀘𑀸𑀕𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀲𑀁𑀯𑁄𑀳𑀸𑀭𑁂𑀦 𑀲𑁄𑀘𑁂𑀬𑁆𑀬𑀁 𑀯𑁂𑀤𑀺𑀢𑀩𑁆𑀩𑀁, 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀆𑀧𑀤𑀸𑀲𑀼 𑀣𑀸𑀫𑁄 𑀯𑁂𑀤𑀺𑀢𑀩𑁆𑀩𑁄, 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀲𑀸𑀓𑀘𑁆𑀙𑀸𑀬 𑀧𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀲𑀻𑀮𑀸𑀚𑀻𑀯𑀘𑀺𑀢𑁆𑀢𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀬𑁄 𑀯𑁂𑀤𑀺𑀢𑀩𑁆𑀩𑀸.

𑀢𑀣𑀸 ¶ 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀤𑁄𑀲𑀸 𑀅𑀕𑀢𑀺𑀁 𑀦 𑀕𑀘𑁆𑀙𑀢𑀺 𑀅𑀯𑀺𑀲𑀁𑀯𑀸𑀤𑀦𑀢𑁄, 𑀘𑀸𑀕𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀮𑁄𑀪𑀸 𑀅𑀕𑀢𑀺𑀁 𑀦 𑀕𑀘𑁆𑀙𑀢𑀺 𑀅𑀦𑀪𑀺𑀲𑀗𑁆𑀕𑀢𑁄, 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀪𑀬𑀸 𑀅𑀕𑀢𑀺𑀁 𑀦 𑀕𑀘𑁆𑀙𑀢𑀺 𑀅𑀦𑀧𑀭𑀸𑀥𑀢𑁄, 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀫𑁄𑀳𑀸 𑀅𑀕𑀢𑀺𑀁 𑀦 𑀕𑀘𑁆𑀙𑀢𑀺 𑀬𑀣𑀸𑀪𑀽𑀢𑀸𑀯𑀩𑁄𑀥𑀢𑁄.

𑀢𑀣𑀸 𑀧𑀞𑀫𑁂𑀦 𑀅𑀤𑀼𑀝𑁆𑀞𑁄 𑀅𑀥𑀺𑀯𑀸𑀲𑁂𑀢𑀺, 𑀤𑀼𑀢𑀺𑀬𑁂𑀦 𑀅𑀮𑀼𑀤𑁆𑀥𑁄 𑀧𑀝𑀺𑀲𑁂𑀯𑀢𑀺, 𑀢𑀢𑀺𑀬𑁂𑀦 𑀅𑀪𑀻𑀢𑁄 𑀧𑀭𑀺𑀯𑀚𑁆𑀚𑁂𑀢𑀺, 𑀘𑀢𑀼𑀢𑁆𑀣𑁂𑀦 𑀅𑀲𑀫𑁆𑀫𑀽𑀴𑁆𑀳𑁄 𑀯𑀺𑀦𑁄𑀤𑁂𑀢𑀺. 𑀧𑀞𑀫𑁂𑀦 𑀦𑁂𑀓𑁆𑀔𑀫𑁆𑀫𑀲𑀼𑀔𑀧𑁆𑀧𑀢𑁆𑀢𑀺, 𑀇𑀢𑀭𑁂𑀳𑀺 𑀧𑀯𑀺𑀯𑁂𑀓𑀉𑀧𑀲𑀫𑀲𑀫𑁆𑀩𑁄𑀥𑀺𑀲𑀼𑀔𑀧𑁆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀣𑀸 𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀲𑀫𑀸𑀥𑀺𑀚𑀧𑀻𑀢𑀺𑀲𑀼𑀔𑀅𑀧𑁆𑀧𑀻𑀢𑀺𑀚𑀓𑀸𑀬𑀲𑀼𑀔𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀚𑀉𑀧𑁂𑀓𑁆𑀔𑀸𑀲𑀼𑀔𑀧𑁆𑀧𑀢𑁆𑀢𑀺𑀬𑁄 𑀏𑀢𑁂𑀳𑀺 𑀘𑀢𑀽𑀳𑀺 𑀬𑀣𑀸𑀓𑁆𑀓𑀫𑀁 𑀳𑁄𑀦𑁆𑀢𑀻𑀢𑀺. 𑀏𑀯𑀫𑀦𑁂𑀓𑀕𑀼𑀡𑀸𑀦𑀼𑀩𑀦𑁆𑀥𑁂𑀳𑀺 𑀘𑀢𑀽𑀳𑀺 𑀅𑀥𑀺𑀝𑁆𑀞𑀸𑀦𑁂𑀳𑀺 𑀲𑀩𑁆𑀩𑀧𑀸𑀭𑀫𑀺𑀲𑀫𑀽𑀳𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘 𑀘𑀢𑀽𑀳𑀺 𑀅𑀥𑀺𑀝𑁆𑀞𑀸𑀦𑁂𑀳𑀺 𑀲𑀩𑁆𑀩𑀧𑀸𑀭𑀫𑀺𑀲𑀗𑁆𑀕𑀳𑁄, 𑀏𑀯𑀁 𑀓𑀭𑀼𑀡𑀸𑀧𑀜𑁆𑀜𑀸𑀳𑀺𑀧𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑁄𑀧𑀺 ¶ 𑀳𑀺 𑀩𑁄𑀥𑀺𑀲𑀫𑁆𑀪𑀸𑀭𑁄 𑀓𑀭𑀼𑀡𑀸𑀧𑀜𑁆𑀜𑀸𑀳𑀺 𑀲𑀗𑁆𑀕𑀳𑀺𑀢𑁄. 𑀓𑀭𑀼𑀡𑀸𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑀺𑀢𑀸 𑀳𑀺 𑀤𑀸𑀦𑀸𑀤𑀺𑀕𑀼𑀡𑀸 𑀫𑀳𑀸𑀩𑁄𑀥𑀺𑀲𑀫𑁆𑀪𑀸𑀭𑀸 𑀪𑀯𑀦𑁆𑀢𑀺 𑀩𑀼𑀤𑁆𑀥𑀢𑁆𑀢𑀲𑀺𑀤𑁆𑀥𑀺𑀧𑀭𑀺𑀬𑁄𑀲𑀸𑀦𑀸𑀢𑀺 𑀏𑀯𑀫𑁂𑀢𑀸𑀲𑀁 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑀓𑁄 𑀲𑀫𑁆𑀧𑀸𑀤𑀦𑀽𑀧𑀸𑀬𑁄𑀢𑀺 𑀲𑀓𑀮𑀲𑁆𑀲𑀸𑀧𑀺 𑀧𑀼𑀜𑁆𑀜𑀸𑀤𑀺𑀲𑀫𑁆𑀪𑀸𑀭𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁, 𑀉𑀤𑁆𑀤𑀺𑀲𑁆𑀲 𑀅𑀦𑀯𑀲𑁂𑀲𑀲𑀫𑁆𑀪𑀭𑀡𑀁 𑀅𑀯𑁂𑀓𑀮𑁆𑀮𑀓𑀸𑀭𑀺𑀢𑀸𑀬𑁄𑀕𑁂𑀦, 𑀢𑀢𑁆𑀣 𑀘 𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸 𑀆𑀤𑀭𑀩𑀳𑀼𑀫𑀸𑀦𑀬𑁄𑀕𑁂𑀦, 𑀲𑀸𑀢𑀘𑁆𑀘𑀓𑀸𑀭𑀺𑀢𑀸 𑀦𑀺𑀭𑀦𑁆𑀢𑀭𑀧𑀬𑁄𑀕𑁂𑀦, 𑀘𑀺𑀭𑀓𑀸𑀮𑀸𑀤𑀺𑀬𑁄𑀕𑁄 𑀘 𑀅𑀦𑁆𑀢𑀭𑀸 𑀅𑀯𑁄𑀲𑀸𑀦𑀸𑀧𑀚𑁆𑀚𑀦𑁂𑀦𑀸𑀢𑀺 𑀘𑀢𑀼𑀭𑀗𑁆𑀕𑀬𑁄𑀕𑁄 𑀏𑀢𑀸𑀲𑀁 𑀲𑀫𑁆𑀧𑀸𑀤𑀦𑀽𑀧𑀸𑀬𑁄. 𑀅𑀧𑀺𑀘 𑀲𑀫𑀸𑀲𑀢𑁄 𑀓𑀢𑀸𑀪𑀺𑀦𑀻𑀳𑀸𑀭𑀲𑁆𑀲 𑀅𑀢𑁆𑀢𑀦𑀺 𑀲𑀺𑀦𑁂𑀳𑀲𑁆𑀲 𑀧𑀭𑀺𑀬𑀸𑀤𑀸𑀦𑀁, 𑀧𑀭𑁂𑀲𑀼 𑀘 𑀲𑀺𑀦𑁂𑀳𑀲𑁆𑀲 𑀧𑀭𑀺𑀯𑀟𑁆𑀠𑀦𑀁 𑀏𑀢𑀸𑀲𑀁 𑀲𑀫𑁆𑀧𑀸𑀤𑀦𑀽𑀧𑀸𑀬𑁄. 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀲𑀫𑀥𑀺𑀕𑀫𑀸𑀬 𑀳𑀺 𑀓𑀢𑀫𑀳𑀸𑀧𑀡𑀺𑀥𑀸𑀦𑀲𑁆𑀲 𑀫𑀳𑀸𑀲𑀢𑁆𑀢𑀲𑁆𑀲 𑀬𑀸𑀣𑀸𑀯𑀢𑁄 𑀧𑀭𑀺𑀚𑀸𑀦𑀦𑁂𑀦 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑀼𑀧𑀮𑀺𑀢𑁆𑀢𑀲𑁆𑀲 𑀅𑀢𑁆𑀢𑀦𑀺 𑀲𑀺𑀦𑁂𑀳𑁄 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀺, 𑀫𑀳𑀸𑀓𑀭𑀼𑀡𑀸𑀲𑀫𑀸𑀬𑁄𑀕𑀯𑀲𑁂𑀦 𑀧𑀦 𑀧𑀺𑀬𑁂 𑀧𑀼𑀢𑁆𑀢𑁂 𑀯𑀺𑀬 𑀲𑀩𑁆𑀩𑀲𑀢𑁆𑀢𑁂 𑀲𑀫𑁆𑀧𑀲𑁆𑀲𑀫𑀸𑀦𑀲𑁆𑀲 𑀢𑁂𑀲𑀼 𑀫𑁂𑀢𑁆𑀢𑀸𑀲𑀺𑀦𑁂𑀳𑁄 𑀧𑀭𑀺𑀯𑀟𑁆𑀠𑀢𑀺. 𑀢𑀢𑁄 𑀘 𑀢𑀁𑀢𑀤𑀸𑀯𑀢𑁆𑀣𑀸𑀦𑀼𑀭𑀽𑀧𑀫𑀢𑁆𑀢𑀧𑀭𑀲𑀦𑁆𑀢𑀸𑀦𑁂𑀲𑀼 ¶ 𑀮𑁄𑀪𑀤𑁄𑀲𑀫𑁄𑀳𑀯𑀺𑀕𑀫𑁂𑀦 𑀯𑀺𑀤𑀽𑀭𑀻𑀓𑀢𑀫𑀘𑁆𑀙𑀭𑀺𑀬𑀸𑀤𑀺𑀩𑁄𑀥𑀺𑀲𑀫𑁆𑀪𑀸𑀭𑀧𑀝𑀺𑀧𑀓𑁆𑀔𑁄 𑀫𑀳𑀸𑀧𑀼𑀭𑀺𑀲𑁄 𑀤𑀸𑀦𑀧𑀺𑀬𑀯𑀘𑀦𑀅𑀢𑁆𑀣𑀘𑀭𑀺𑀬𑀸𑀲𑀫𑀸𑀦𑀢𑁆𑀢𑀢𑀸𑀲𑀗𑁆𑀔𑀸𑀢𑁂𑀳𑀺 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 (𑀤𑀻. 𑀦𑀺. 𑁩.𑁨𑁧𑁦; 𑀅. 𑀦𑀺. 𑁪.𑁩𑁨) 𑀘𑀢𑀼𑀭𑀥𑀺𑀝𑁆𑀞𑀸𑀦𑀸𑀦𑀼𑀕𑀢𑁂𑀳𑀺 𑀅𑀘𑁆𑀘𑀦𑁆𑀢𑀁 𑀚𑀦𑀲𑁆𑀲 𑀲𑀗𑁆𑀕𑀳𑀓𑀭𑀡𑀯𑀲𑁂𑀦 𑀉𑀧𑀭𑀺 𑀬𑀸𑀦𑀢𑁆𑀢𑀬𑁂 𑀅𑀯𑀢𑀸𑀭𑀡𑀁 𑀧𑀭𑀺𑀧𑀸𑀘𑀦𑀜𑁆𑀘 𑀓𑀭𑁄𑀢𑀺. 𑀫𑀳𑀸𑀲𑀢𑁆𑀢𑀸𑀦𑀜𑁆𑀳𑀺 𑀫𑀳𑀸𑀧𑀜𑁆𑀜𑀸 𑀫𑀳𑀸𑀓𑀭𑀼𑀡𑀸 𑀘 𑀤𑀸𑀦𑁂𑀦 𑀅𑀮𑀗𑁆𑀓𑀢𑀸; 𑀤𑀸𑀦𑀁 𑀧𑀺𑀬𑀯𑀘𑀦𑁂𑀦; 𑀧𑀺𑀬𑀯𑀘𑀦𑀁 𑀅𑀢𑁆𑀣𑀘𑀭𑀺𑀬𑀸𑀬; 𑀅𑀢𑁆𑀣𑀘𑀭𑀺𑀬𑀸 𑀲𑀫𑀸𑀦𑀢𑁆𑀢𑀢𑀸𑀬 𑀅𑀮𑀗𑁆𑀓𑀢𑀸 𑀲𑀗𑁆𑀕𑀳𑀺𑀢𑀸 𑀘. 𑀲𑀩𑁆𑀩𑀪𑀽𑀢𑀢𑁆𑀢𑀪𑀽𑀢𑀲𑁆𑀲 𑀳𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀩𑁆𑀩𑀢𑁆𑀣 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑀢𑀸𑀬 𑀲𑀫𑀸𑀦𑀢𑁆𑀢𑀢𑀸𑀲𑀺𑀤𑁆𑀥𑀺. 𑀩𑀼𑀤𑁆𑀥𑀪𑀽𑀢𑁄 𑀧𑀦 𑀢𑁂𑀳𑁂𑀯 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀺𑀢𑀸𑀪𑀺𑀩𑀼𑀤𑁆𑀥𑁂𑀳𑀺 𑀚𑀦𑀲𑁆𑀲 𑀅𑀘𑁆𑀘𑀦𑁆𑀢𑀺𑀓𑀲𑀗𑁆𑀕𑀳𑀓𑀭𑀡𑁂𑀦 𑀅𑀪𑀺𑀯𑀺𑀦𑀬𑀦𑀁 𑀓𑀭𑁄𑀢𑀺. 𑀤𑀸𑀦𑀜𑁆𑀳𑀺 ¶ 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀘𑀸𑀕𑀸𑀥𑀺𑀝𑁆𑀞𑀸𑀦𑁂𑀦 𑀧𑀭𑀺𑀧𑀽𑀭𑀺𑀢𑀸𑀪𑀺𑀩𑀼𑀤𑁆𑀥𑀁 ¶ ; 𑀧𑀺𑀬𑀯𑀘𑀦𑀁 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑁂𑀦; 𑀅𑀢𑁆𑀣𑀘𑀭𑀺𑀬𑀸 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑁂𑀦; 𑀲𑀫𑀸𑀦𑀢𑁆𑀢𑀢𑀸 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑁂𑀦 𑀧𑀭𑀺𑀧𑀽𑀭𑀺𑀢𑀸𑀪𑀺𑀩𑀼𑀤𑁆𑀥𑀸. 𑀢𑀣𑀸𑀕𑀢𑀸𑀦𑀜𑁆𑀳𑀺 𑀲𑀩𑁆𑀩𑀲𑀸𑀯𑀓𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺 𑀲𑀫𑀸𑀦𑀢𑁆𑀢𑀢𑀸 𑀧𑀭𑀺𑀦𑀺𑀩𑁆𑀩𑀸𑀦𑁂. 𑀢𑀢𑁆𑀭 𑀳𑀺 𑀢𑁂𑀲𑀁 𑀅𑀯𑀺𑀲𑁂𑀲𑀢𑁄 𑀏𑀓𑀻𑀪𑀸𑀯𑁄. 𑀢𑁂𑀦𑁂𑀯𑀸𑀳 ‘‘𑀦𑀢𑁆𑀣𑀺 𑀯𑀺𑀫𑀼𑀢𑁆𑀢𑀺𑀬𑀸 𑀦𑀸𑀦𑀢𑁆𑀢’’𑀦𑁆𑀢𑀺.

𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀲𑀘𑁆𑀘𑁄 𑀘𑀸𑀕𑀻 𑀉𑀧𑀲𑀦𑁆𑀢𑁄, 𑀧𑀜𑁆𑀜𑀯𑀸 𑀅𑀦𑀼𑀓𑀫𑁆𑀧𑀓𑁄,

𑀲𑀫𑁆𑀪𑀢𑀲𑀩𑁆𑀩𑀲𑀫𑁆𑀪𑀸𑀭𑁄, 𑀓𑀁 𑀦𑀸𑀫𑀢𑁆𑀣𑀁 𑀦 𑀲𑀸𑀥𑀬𑁂.

𑀫𑀳𑀸𑀓𑀸𑀭𑀼𑀡𑀺𑀓𑁄 𑀲𑀢𑁆𑀣𑀸, 𑀳𑀺𑀢𑁂𑀲𑀻 𑀘 𑀉𑀧𑁂𑀓𑁆𑀔𑀓𑁄,

𑀦𑀺𑀭𑀧𑁂𑀓𑁆𑀔𑁄 𑀘 𑀲𑀩𑁆𑀩𑀢𑁆𑀣, 𑀅𑀳𑁄 𑀅𑀘𑁆𑀙𑀭𑀺𑀬𑁄 𑀚𑀺𑀦𑁄.

𑀯𑀺𑀭𑀢𑁆𑀢𑁄 𑀲𑀩𑁆𑀩𑀥𑀫𑁆𑀫𑁂𑀲𑀼, 𑀲𑀢𑁆𑀢𑁂𑀲𑀼 𑀘 𑀉𑀧𑁂𑀓𑁆𑀔𑀓𑁄,

𑀲𑀤𑀸 𑀲𑀢𑁆𑀢𑀳𑀺𑀢𑁂 𑀬𑀼𑀢𑁆𑀢𑁄, 𑀅𑀳𑁄 𑀅𑀘𑁆𑀙𑀭𑀺𑀬𑁄 𑀚𑀺𑀦𑁄.

𑀲𑀩𑁆𑀩𑀤𑀸 𑀲𑀩𑁆𑀩𑀲𑀢𑁆𑀢𑀸𑀦𑀁, 𑀳𑀺𑀢𑀸𑀬 𑀘 𑀲𑀼𑀔𑀸𑀬 𑀘,

𑀉𑀬𑁆𑀬𑀼𑀢𑁆𑀢𑁄 𑀅𑀓𑀺𑀮𑀸𑀲𑀽 𑀘, 𑀅𑀳𑁄 𑀅𑀘𑁆𑀙𑀭𑀺𑀬𑁄 𑀚𑀺𑀦𑁄’’𑀢𑀺. (𑀘𑀭𑀺𑀬𑀸. 𑀅𑀝𑁆𑀞. 𑁩𑁨𑁦 𑀧𑀓𑀺𑀡𑁆𑀡𑀓𑀓𑀣𑀸);

𑀓𑀺𑀢𑁆𑀢𑀓𑁂𑀦 𑀓𑀸𑀮𑁂𑀦 𑀲𑀫𑁆𑀧𑀸𑀤𑀦𑀦𑁆𑀢𑀺 𑀳𑁂𑀝𑁆𑀞𑀺𑀫𑁂𑀦 𑀢𑀸𑀯 𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘, 𑀫𑀚𑁆𑀛𑀺𑀫𑁂𑀦 𑀅𑀝𑁆𑀞𑀸𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘, 𑀉𑀧𑀭𑀺𑀫𑁂𑀦 𑀲𑁄𑀴𑀲𑀸𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘, 𑀏𑀢𑁂 𑀘 ¶ 𑀪𑁂𑀤𑀸 𑀬𑀣𑀸𑀓𑁆𑀓𑀫𑀁 𑀧𑀜𑁆𑀜𑀸𑀥𑀺𑀓𑀲𑀤𑁆𑀥𑀸𑀥𑀺𑀓𑀯𑀻𑀭𑀺𑀬𑀸𑀥𑀺𑀓𑀯𑀲𑁂𑀦 𑀜𑀸𑀢𑀩𑁆𑀩𑀸. 𑀧𑀜𑁆𑀜𑀸𑀥𑀺𑀓𑀸𑀦𑀜𑁆𑀳𑀺 𑀲𑀤𑁆𑀥𑀸 𑀫𑀦𑁆𑀤𑀸 𑀳𑁄𑀢𑀺, 𑀧𑀜𑁆𑀜𑀸 𑀢𑀺𑀓𑁆𑀔𑀸. 𑀲𑀤𑁆𑀥𑀸𑀥𑀺𑀓𑀸𑀦𑀁 𑀧𑀜𑁆𑀜𑀸 𑀫𑀚𑁆𑀛𑀺𑀫𑀸 𑀳𑁄𑀢𑀺, 𑀯𑀻𑀭𑀺𑀬𑀸𑀥𑀺𑀓𑀸𑀦𑀁 𑀧𑀜𑁆𑀜𑀸 𑀫𑀦𑁆𑀤𑀸. 𑀧𑀜𑁆𑀜𑀸𑀦𑀼𑀪𑀸𑀯𑁂𑀦 𑀘 𑀲𑀫𑁆𑀫𑀸𑀲𑀫𑁆𑀩𑁄𑀥𑀺 𑀅𑀪𑀺𑀕𑀦𑁆𑀢𑀩𑁆𑀩𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀅𑀯𑀺𑀲𑁂𑀲𑁂𑀦 𑀧𑀦 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀢𑀺𑀓𑁆𑀔𑀫𑀚𑁆𑀛𑀺𑀫𑀫𑀼𑀤𑀼𑀪𑀸𑀯𑁂𑀦 𑀢𑀬𑁄𑀧𑁂𑀢𑁂 𑀪𑁂𑀤𑀸 𑀬𑀼𑀢𑁆𑀢𑀸𑀢𑀺 𑀯𑀤𑀦𑁆𑀢𑀺. 𑀢𑀺𑀯𑀺𑀥𑀸 𑀳𑀺 𑀩𑁄𑀥𑀺𑀲𑀢𑁆𑀢𑀸 𑀅𑀪𑀺𑀦𑀻𑀳𑀸𑀭𑀓𑁆𑀔𑀡𑁂 ¶ 𑀪𑀯𑀦𑁆𑀢𑀺 𑀉𑀕𑁆𑀖𑀝𑀺𑀢𑀜𑁆𑀜𑀽𑀯𑀺𑀧𑀜𑁆𑀘𑀺𑀢𑀜𑁆𑀜𑀽𑀦𑁂𑀬𑁆𑀬𑀪𑁂𑀤𑁂𑀦. 𑀢𑁂𑀲𑀼 𑀉𑀕𑁆𑀖𑀝𑀺𑀢𑀜𑁆𑀜𑀽 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀫𑁆𑀫𑀼𑀔𑀸 𑀘𑀢𑀼𑀧𑁆𑀧𑀤𑀺𑀓𑀁 𑀕𑀸𑀣𑀁 𑀲𑀼𑀡𑀦𑁆𑀢𑁄 𑀢𑀢𑀺𑀬𑀧𑀤𑁂 𑀅𑀧𑀭𑀺𑀬𑁄𑀲𑀺𑀢𑁂𑀬𑁂𑀯 𑀙𑀅𑀪𑀺𑀜𑁆𑀜𑀸𑀳𑀺 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀲𑀫𑀢𑁆𑀣𑀼𑀧𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀤𑀼𑀢𑀺𑀬𑁄 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀘𑀢𑀼𑀧𑁆𑀧𑀤𑀺𑀓𑀁 𑀕𑀸𑀣𑀁 𑀲𑀼𑀡𑀦𑁆𑀢𑁄 𑀅𑀧𑀭𑀺𑀬𑁄𑀲𑀺𑀢𑁂𑀬𑁂𑀯 𑀘𑀢𑀼𑀢𑁆𑀣𑀧𑀤𑁂 𑀙𑀳𑀺 𑀅𑀪𑀺𑀜𑁆𑀜𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀲𑀫𑀢𑁆𑀣𑀼𑀧𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀇𑀢𑀭𑁄 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀘𑀢𑀼𑀧𑁆𑀧𑀤𑀺𑀓𑀁 𑀕𑀸𑀣𑀁 ¶ 𑀲𑀼𑀢𑁆𑀯𑀸 𑀧𑀭𑀺𑀬𑁄𑀲𑀺𑀢𑀸𑀬 𑀕𑀸𑀣𑀸𑀬 𑀙𑀳𑀺 𑀅𑀪𑀺𑀜𑁆𑀜𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀲𑀫𑀢𑁆𑀣𑀼𑀧𑀦𑀺𑀲𑁆𑀲𑀬𑁄 𑀪𑀯𑀢𑀺. 𑀢𑀬𑁄𑀧𑁂𑀢𑁂 𑀯𑀺𑀦𑀸 𑀓𑀸𑀮𑀪𑁂𑀤𑁂𑀦 𑀓𑀢𑀸𑀪𑀺𑀦𑀻𑀳𑀸𑀭𑀮𑀤𑁆𑀥𑀩𑁆𑀬𑀸𑀓𑀭𑀡𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑀸 𑀬𑀣𑀸𑀓𑁆𑀓𑀫𑀁 𑀬𑀣𑀸𑀯𑀼𑀢𑁆𑀢𑀪𑁂𑀤𑁂𑀦 𑀓𑀸𑀮𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀦𑁆𑀢𑀺. 𑀢𑁂𑀲𑀼 𑀢𑁂𑀲𑀼 𑀧𑀦 𑀓𑀸𑀮𑀪𑁂𑀤𑁂𑀲𑀼 𑀅𑀧𑀭𑀺𑀧𑀼𑀡𑁆𑀡𑁂𑀲𑀼 𑀢𑁂 𑀢𑁂 𑀫𑀳𑀸𑀲𑀢𑁆𑀢𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀯𑁂𑀲𑁆𑀲𑀦𑁆𑀢𑀭𑀤𑀸𑀦𑀲𑀤𑀺𑀲𑀁 𑀤𑀸𑀦𑀁 𑀤𑁂𑀦𑁆𑀢𑀸𑀧𑀺 𑀢𑀤𑀦𑀼𑀭𑀽𑀧𑁂 𑀲𑀻𑀮𑀸𑀤𑀺𑀲𑀩𑁆𑀩𑀧𑀸𑀭𑀫𑀺𑀥𑀫𑁆𑀫𑁂 𑀆𑀘𑀺𑀦𑀦𑁆𑀢𑀸𑀧𑀺 𑀅𑀦𑁆𑀢𑀭𑀸 𑀩𑀼𑀤𑁆𑀥𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀅𑀓𑀸𑀭𑀡𑀫𑁂𑀢𑀁. 𑀓𑀲𑁆𑀫𑀸? 𑀜𑀸𑀡𑀲𑁆𑀲 𑀅𑀧𑀭𑀺𑀧𑀘𑁆𑀘𑀦𑀢𑁄. 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀦𑀺𑀧𑁆𑀨𑀸𑀤𑀺𑀢𑀁 𑀯𑀺𑀬 𑀳𑀺 𑀲𑀲𑁆𑀲𑀁 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑁂 𑀧𑀭𑀺𑀦𑀺𑀧𑁆𑀨𑀸𑀤𑀺𑀢𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺. 𑀢𑀤𑀦𑁆𑀢𑀭𑀸 𑀧𑀦 𑀲𑀩𑁆𑀩𑀼𑀲𑁆𑀲𑀸𑀳𑁂𑀦 𑀯𑀸𑀬𑀫𑀦𑁆𑀢𑁂𑀦𑀸𑀧𑀺 𑀦 𑀲𑀓𑁆𑀓𑀸 𑀧𑀸𑀧𑀼𑀡𑀺𑀢𑀼𑀦𑁆𑀢𑀺 𑀧𑀸𑀭𑀫𑀺𑀧𑀸𑀭𑀺𑀧𑀽𑀭𑀻 𑀬𑀣𑀸𑀯𑀼𑀢𑁆𑀢𑀓𑀸𑀮𑀯𑀺𑀲𑁂𑀲𑀁 𑀯𑀺𑀦𑀸 𑀦 𑀲𑀫𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑁄 𑀆𑀦𑀺𑀲𑀁𑀲𑁄𑀢𑀺 𑀬𑁂 𑀢𑁂 𑀓𑀢𑀸𑀪𑀺𑀦𑀻𑀳𑀸𑀭𑀸𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑁋

‘‘𑀏𑀯𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀸, 𑀩𑁄𑀥𑀺𑀬𑀸 𑀦𑀺𑀬𑀢𑀸 𑀦𑀭𑀸;

𑀲𑀁𑀲𑀭𑀁 𑀤𑀻𑀖𑀫𑀤𑁆𑀥𑀸𑀦𑀁, 𑀓𑀧𑁆𑀧𑀓𑁄𑀝𑀺𑀲𑀢𑁂𑀳𑀺𑀧𑀺;

𑀅𑀯𑀻𑀘𑀺𑀫𑁆𑀳𑀺 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀢𑀣𑀸 𑀮𑁄𑀓𑀦𑁆𑀢𑀭𑁂𑀲𑀼 𑀘𑀸’’𑀢𑀺. 𑀆𑀤𑀺𑀦𑀸 (𑀅𑀪𑀺. 𑀅𑀝𑁆𑀞. 𑁧.𑀦𑀺𑀤𑀸𑀦𑀓𑀣𑀸; 𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀩𑀼. 𑀯𑀁. 𑀅𑀝𑁆𑀞. 𑁨𑁭.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀘𑀭𑀺𑀬𑀸. 𑀅𑀝𑁆𑀞. 𑀧𑀓𑀺𑀡𑁆𑀡𑀓𑀓𑀣𑀸) 𑁋

𑀅𑀝𑁆𑀞𑀸𑀭𑀲 𑀅𑀪𑀩𑁆𑀩𑀝𑁆𑀞𑀸𑀦𑀸𑀦𑀼𑀧𑀕𑀫𑀦𑀧𑁆𑀧𑀓𑀸𑀭𑀸 𑀆𑀦𑀺𑀲𑀁𑀲𑀸 𑀲𑀁𑀯𑀡𑁆𑀡𑀺𑀢𑀸. 𑀬𑁂 𑀘 ‘‘𑀲𑀢𑁄 ¶ 𑀲𑀫𑁆𑀧𑀚𑀸𑀦𑁄 𑀆𑀦𑀦𑁆𑀤 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑀸𑀓𑀸𑀬𑀸 𑀘𑀯𑀺𑀢𑁆𑀯𑀸 ¶ 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁧𑁯𑁯) 𑀲𑁄𑀴𑀲 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀥𑀫𑁆𑀫𑀧𑁆𑀧𑀓𑀸𑀭𑀸, 𑀬𑁂 𑀘 ‘‘𑀲𑀻𑀢𑀁 𑀩𑁆𑀬𑀧𑀕𑀢𑀁 𑀳𑁄𑀢𑀺, 𑀉𑀡𑁆𑀳𑀜𑁆𑀘 𑀉𑀧𑀲𑀫𑁆𑀫𑀢𑀻’’𑀢𑀺𑀆𑀤𑀺𑀦𑀸 (𑀩𑀼. 𑀯𑀁. 𑁮𑁩), ‘‘𑀚𑀸𑀬𑀫𑀸𑀦𑁂 𑀔𑁄 𑀲𑀸𑀭𑀺𑀧𑀼𑀢𑁆𑀢 𑀩𑁄𑀥𑀺𑀲𑀢𑁆𑀢𑁂 𑀅𑀬𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀻’’𑀢𑀺𑀆𑀤𑀺𑀦𑀸 𑀘 𑀤𑁆𑀯𑀢𑁆𑀢𑀺𑀁𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀧𑁆𑀧𑀓𑀸𑀭𑀸, 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 ‘‘𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀥𑀺𑀧𑁆𑀧𑀸𑀬𑀲𑀫𑀺𑀚𑁆𑀛𑀦𑀁 𑀓𑀫𑁆𑀫𑀸𑀤𑀻𑀲𑀼 𑀯𑀲𑀻𑀪𑀸𑀯𑁄’’𑀢𑀺 𑀏𑀯𑀫𑀸𑀤𑀬𑁄 𑀢𑀢𑁆𑀣 𑀢𑀢𑁆𑀣 𑀚𑀸𑀢𑀓𑀩𑀼𑀤𑁆𑀥𑀯𑀁𑀲𑀸𑀤𑀻𑀲𑀼 𑀤𑀲𑁆𑀲𑀺𑀢𑀧𑁆𑀧𑀓𑀸𑀭𑀸 𑀆𑀦𑀺𑀲𑀁𑀲𑀸, 𑀢𑁂 𑀲𑀩𑁆𑀩𑁂𑀧𑀺 𑀏𑀢𑀸𑀲𑀁 𑀆𑀦𑀺𑀲𑀁𑀲𑀸, 𑀢𑀣𑀸 𑀬𑀣𑀸𑀦𑀺𑀤𑀲𑁆𑀲𑀺𑀢𑀪𑁂𑀤𑀸 𑀅𑀮𑁄𑀪𑀸𑀤𑁄𑀲𑀸𑀤𑀺𑀕𑀼𑀡𑀬𑀼𑀕𑀴𑀸𑀤𑀬𑁄 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀺𑀁 ¶ 𑀨𑀮𑀦𑁆𑀢𑀺 𑀲𑀫𑀸𑀲𑀢𑁄 𑀢𑀸𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑁄 𑀏𑀢𑀸𑀲𑀁 𑀨𑀮𑀁, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡- (𑀤𑀻. 𑀦𑀺. 𑁨.𑁨𑁪 𑀆𑀤𑀬𑁄; 𑁩.𑁧𑁬𑁮 𑀆𑀤𑀬𑁄; 𑀫. 𑀦𑀺. 𑁨.𑁩𑁮𑁫) 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸𑀤𑀺𑀅𑀦𑁂𑀓𑀕𑀼𑀡𑀕𑀡𑀲𑀫𑀼𑀚𑁆𑀚𑀮𑀭𑀽𑀧𑀓𑀸𑀬𑀲𑀫𑁆𑀧𑀢𑁆𑀢𑀺𑀅𑀥𑀺𑀝𑁆𑀞𑀸𑀦𑀸 𑀤𑀲𑀩𑀮𑀘𑀢𑀼𑀯𑁂𑀲𑀸𑀭𑀚𑁆𑀚𑀙𑀅𑀲𑀸𑀥𑀸𑀭𑀡𑀜𑀸𑀡𑀅𑀝𑁆𑀞𑀸𑀭𑀲𑀸𑀯𑁂𑀡𑀺𑀓𑀩𑀼𑀤𑁆𑀥𑀥𑀫𑁆𑀫- (𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁦𑁫; 𑀫𑀽𑀮𑀝𑀻. 𑁨.𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀡𑁆𑀡𑀦𑀸) -𑀧𑀪𑀼𑀢𑀺𑀅𑀦𑁂𑀓𑀲𑀢𑀲𑀳𑀲𑁆𑀲𑀕𑀼𑀡𑀲𑀫𑀼𑀤𑀬𑁄𑀧𑀲𑁄𑀪𑀺𑀦𑀻 𑀥𑀫𑁆𑀫𑀓𑀸𑀬𑀲𑀺𑀭𑀻, 𑀬𑀸𑀯𑀢𑀸 𑀧𑀦 𑀩𑀼𑀤𑁆𑀥𑀕𑀼𑀡𑀸 𑀬𑁂 𑀅𑀦𑁂𑀓𑁂𑀳𑀺𑀧𑀺 𑀓𑀧𑁆𑀧𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸𑀧𑀺 𑀯𑀸𑀘𑀸𑀬 𑀧𑀭𑀺𑀬𑁄𑀲𑀸𑀧𑁂𑀢𑀼𑀁 𑀦 𑀲𑀓𑁆𑀓𑀸, 𑀇𑀤𑀁 𑀏𑀢𑀸𑀲𑀁 𑀨𑀮𑀦𑁆𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀩𑀼𑀤𑁆𑀥𑀯𑀁𑀲𑀘𑀭𑀺𑀬𑀸𑀧𑀺𑀝𑀓𑀚𑀸𑀢𑀓𑀫𑀳𑀸𑀧𑀤𑀸𑀦𑀲𑀼𑀢𑁆𑀢𑀸𑀤𑀻𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀬𑀣𑀸𑀯𑀼𑀢𑁆𑀢𑀸𑀬 𑀧𑀝𑀺𑀧𑀤𑀸𑀬 𑀬𑀣𑀸𑀯𑀼𑀢𑁆𑀢𑀯𑀺𑀪𑀸𑀕𑀸𑀦𑀁 𑀧𑀸𑀭𑀫𑀻𑀦𑀁 𑀧𑀽𑀭𑀺𑀢𑀪𑀸𑀯𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸’’𑀢𑀺. 𑀲𑀢𑀺𑀧𑀺 𑀫𑀳𑀸𑀧𑀭𑀺𑀘𑁆𑀘𑀸𑀕𑀸𑀦𑀁 𑀤𑀸𑀦𑀧𑀸𑀭𑀫𑀺𑀪𑀸𑀯𑁂 𑀧𑀭𑀺𑀘𑁆𑀘𑀸𑀕𑀯𑀺𑀲𑁂𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀯 𑀲𑀼𑀤𑀼𑀓𑁆𑀓𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘 ¶ ‘‘𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂’’𑀢𑀺 𑀯𑀺𑀲𑀼𑀁 𑀕𑀳𑀡𑀁, 𑀢𑀢𑁄𑀬𑁂𑀯 𑀘 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑀢𑁄 𑀯𑀺𑀲𑀼𑀁 𑀦𑀬𑀦𑀧𑀭𑀺𑀘𑁆𑀘𑀸𑀕𑀕𑁆𑀕𑀳𑀡𑀁, 𑀧𑀭𑀺𑀕𑁆𑀕𑀳𑀧𑀭𑀺𑀘𑁆𑀘𑀸𑀕𑀪𑀸𑀯𑀲𑀸𑀫𑀜𑁆𑀜𑁂𑀧𑀺 𑀥𑀦𑀭𑀚𑁆𑀚𑀧𑀭𑀺𑀘𑁆𑀘𑀸𑀕𑀢𑁄 𑀧𑀼𑀢𑁆𑀢𑀤𑀸𑀭𑀧𑀭𑀺𑀘𑁆𑀘𑀸𑀕𑀕𑁆𑀕𑀳𑀡𑀜𑁆𑀘 𑀓𑀢𑀁. 𑀕𑀢𑀧𑀘𑁆𑀘𑀸𑀕𑀢𑀺𑀓𑀯𑀢𑁆𑀢𑀲𑀗𑁆𑀔𑀸𑀢𑀸𑀬 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀲𑀤𑁆𑀥𑀺𑀁 𑀅𑀪𑀺𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀁 𑀧𑀼𑀩𑁆𑀩𑀬𑁄𑀕𑁄. 𑀤𑀸𑀦𑀸𑀤𑀻𑀲𑀼𑀬𑁂𑀯 𑀲𑀸𑀢𑀺𑀲𑀬𑀧𑀝𑀺𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀁 𑀧𑀼𑀩𑁆𑀩𑀘𑀭𑀺𑀬𑀸, 𑀬𑀸 𑀘𑀭𑀺𑀬𑀸𑀧𑀺𑀝𑀓𑀲𑀗𑁆𑀕𑀳𑀺𑀢𑀸. 𑀅𑀪𑀺𑀦𑀻𑀳𑀸𑀭𑁄 𑀧𑀼𑀩𑁆𑀩𑀬𑁄𑀕𑁄, 𑀤𑀸𑀦𑀸𑀤𑀺𑀧𑀝𑀺𑀧𑀢𑁆𑀢𑀺, 𑀓𑀸𑀬𑀯𑀺𑀯𑁂𑀓𑀯𑀲𑁂𑀦 𑀏𑀓𑀘𑀭𑀺𑀬𑀸 𑀯𑀸 𑀧𑀼𑀩𑁆𑀩𑀘𑀭𑀺𑀬𑀸𑀢𑀺 𑀓𑁂𑀘𑀺. 𑀤𑀸𑀦𑀸𑀤𑀻𑀦𑀜𑁆𑀘𑁂𑀯 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀜𑁆𑀘 𑀲𑀁𑀲𑀸𑀭𑀦𑀺𑀩𑁆𑀩𑀸𑀦𑁂𑀲𑀼 ¶ 𑀆𑀤𑀻𑀦𑀯𑀸𑀦𑀺𑀲𑀁𑀲𑀸𑀤𑀻𑀦𑀜𑁆𑀘 𑀯𑀺𑀪𑀸𑀯𑀦𑀯𑀲𑁂𑀦 𑀲𑀢𑁆𑀢𑀸𑀦𑀁 𑀩𑁄𑀥𑀺𑀢𑁆𑀢𑀬𑁂 𑀧𑀢𑀺𑀝𑁆𑀞𑀸𑀧𑀦𑀧𑀭𑀺𑀧𑀸𑀘𑀦𑀯𑀲𑁂𑀦 𑀧𑀯𑀢𑁆𑀢𑀸 𑀓𑀣𑀸 𑀥𑀫𑁆𑀫𑀓𑁆𑀔𑀸𑀦𑀁. 𑀜𑀸𑀢𑀻𑀦𑀁 𑀅𑀢𑁆𑀣𑀘𑀭𑀺𑀬𑀸 𑀜𑀸𑀢𑀢𑁆𑀣𑀘𑀭𑀺𑀬𑀸, 𑀲𑀸𑀧𑀺 𑀓𑀭𑀼𑀡𑀸𑀬𑀦𑀯𑀲𑁂𑀦𑁂𑀯. 𑀆𑀤𑀺-𑀲𑀤𑁆𑀤𑁂𑀦 𑀮𑁄𑀓𑀢𑁆𑀣𑀘𑀭𑀺𑀬𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀯𑀲𑁂𑀦, 𑀅𑀦𑀯𑀚𑁆𑀚𑀓𑀫𑁆𑀫𑀸𑀬𑀢𑀦𑀯𑀺𑀚𑁆𑀚𑀸𑀝𑁆𑀞𑀸𑀦𑀧𑀭𑀺𑀘𑀬𑀯𑀲𑁂𑀦, 𑀔𑀦𑁆𑀥𑀸𑀬𑀢𑀦𑀸𑀤𑀺𑀧𑀭𑀺𑀘𑀬𑀯𑀲𑁂𑀦, 𑀮𑀓𑁆𑀔𑀡𑀢𑁆𑀢𑀬𑀢𑀻𑀭𑀡𑀯𑀲𑁂𑀦 𑀘 𑀜𑀸𑀡𑀘𑀸𑀭𑁄 𑀩𑀼𑀤𑁆𑀥𑀺𑀘𑀭𑀺𑀬𑀸, 𑀲𑀸 𑀧𑀦 𑀅𑀢𑁆𑀣𑀢𑁄 𑀧𑀜𑁆𑀜𑀸𑀧𑀸𑀭𑀫𑀻𑀬𑁂𑀯, 𑀜𑀸𑀡𑀲𑀫𑁆𑀪𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀺𑀲𑀼𑀁 𑀕𑀳𑀡𑀁. 𑀓𑁄𑀝𑀺𑀦𑁆𑀢𑀺 𑀧𑀭𑀺𑀬𑀦𑁆𑀢𑁄, 𑀉𑀓𑁆𑀓𑀁𑀲𑁄𑀢𑀺 𑀅𑀢𑁆𑀣𑁄. 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀽𑀳𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀪𑀸𑀯𑁂𑀢𑁆𑀯𑀸𑀢𑀺 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀩𑁆𑀭𑀽𑀳𑁂𑀢𑁆𑀯𑀸𑀢𑀺 𑀯𑀟𑁆𑀠𑁂𑀢𑁆𑀯𑀸. 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀕𑁆𑀕𑀳𑀡𑁂𑀦 𑀆𑀕𑀫𑀦𑀧𑀝𑀺𑀧𑀤𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀢𑀺, 𑀯𑀺𑀧𑀲𑁆𑀲𑀦𑀸𑀲𑀳𑀕𑀢𑀸 𑀏𑀯 𑀯𑀸 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀤𑀝𑁆𑀞𑀩𑁆𑀩𑀸. 𑀏𑀢𑁆𑀣 𑀘 ‘‘𑀬𑁂𑀦 𑀅𑀪𑀺𑀦𑀻𑀳𑀸𑀭𑁂𑀦𑀸’’𑀢𑀺𑀆𑀤𑀺𑀦𑀸 𑀆𑀕𑀫𑀦𑀧𑀝𑀺𑀧𑀤𑀸𑀬 𑀆𑀤𑀺𑀁 𑀤𑀲𑁆𑀲𑁂𑀢𑀺, ‘‘𑀤𑀸𑀦𑀧𑀸𑀭𑀫𑀻’’𑀢𑀺𑀆𑀤𑀺𑀦𑀸 𑀫𑀚𑁆𑀛𑀁, ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂’’𑀢𑀺𑀆𑀤𑀺𑀦𑀸 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀫𑁆𑀧𑀢𑀺𑀚𑀸𑀢𑁄𑀢𑀺 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀫𑀼𑀳𑀼𑀢𑁆𑀢𑀚𑀸𑀢𑁄, 𑀦 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁄. 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑀜𑁆𑀳𑀺 ¶ 𑀫𑀳𑀸𑀲𑀢𑁆𑀢𑀁 𑀧𑀞𑀫𑀁 𑀩𑁆𑀭𑀳𑁆𑀫𑀸𑀦𑁄 𑀲𑀼𑀯𑀡𑁆𑀡𑀚𑀸𑀮𑁂𑀦 𑀧𑀝𑀺𑀕𑁆𑀕𑀡𑁆𑀳𑀺𑀁𑀲𑀼, 𑀢𑁂𑀲𑀁 𑀳𑀢𑁆𑀣𑀢𑁄 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀅𑀚𑀺𑀦𑀧𑁆𑀧𑀯𑁂𑀡𑀺𑀬𑀸, 𑀢𑁂𑀲𑀁 𑀳𑀢𑁆𑀣𑀢𑁄 𑀫𑀦𑀼𑀲𑁆𑀲𑀸 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂𑀦 𑀧𑀝𑀺𑀕𑁆𑀕𑀡𑁆𑀳𑀺𑀁𑀲𑀼, 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀫𑀼𑀜𑁆𑀘𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑁄𑀢𑀺 𑀬𑀣𑀸𑀳 ¶ 𑀪𑀕𑀯𑀸 𑀫𑀳𑀸𑀧𑀤𑀸𑀦𑀤𑁂𑀲𑀦𑀸𑀬𑀁. 𑀲𑁂𑀢𑀫𑁆𑀳𑀺 𑀙𑀢𑁆𑀢𑁂𑀢𑀺 𑀤𑀺𑀩𑁆𑀩𑀲𑁂𑀢𑀘𑁆𑀙𑀢𑁆𑀢𑁂. 𑀅𑀦𑀼𑀳𑀻𑀭𑀫𑀸𑀦𑁂𑀢𑀺 𑀥𑀸𑀭𑀺𑀬𑀫𑀸𑀦𑁂. 𑀏𑀢𑁆𑀣 𑀘 𑀙𑀢𑁆𑀢𑀕𑁆𑀕𑀳𑀡𑁂𑀦𑁂𑀯 𑀔𑀕𑁆𑀕𑀸𑀤𑀻𑀦𑀺 𑀧𑀜𑁆𑀘 𑀓𑀓𑀼𑀥𑀪𑀡𑁆𑀟𑀸𑀦𑀺𑀧𑀺 (𑀚𑀸. 𑁨.𑁧𑁯.𑁭𑁨) 𑀯𑀼𑀢𑁆𑀢𑀸𑀦𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀔𑀕𑁆𑀕𑀢𑀸𑀮𑀯𑀡𑁆𑀝𑀫𑁄𑀭𑀳𑀢𑁆𑀣𑀓𑀯𑀸𑀴𑀩𑀻𑀚𑀦𑀻𑀉𑀡𑁆𑀳𑀻𑀲𑀧𑀝𑁆𑀝𑀸𑀧𑀺 𑀳𑀺 𑀙𑀢𑁆𑀢𑁂𑀦 𑀲𑀳 𑀢𑀤𑀸 𑀉𑀧𑀝𑁆𑀞𑀺𑀢𑀸 𑀅𑀳𑁂𑀲𑀼𑀁. 𑀙𑀢𑁆𑀢𑀸𑀤𑀻𑀦𑀺𑀬𑁂𑀯 𑀘 𑀢𑀤𑀸 𑀧𑀜𑁆𑀜𑀸𑀬𑀺𑀁𑀲𑀼, 𑀦 𑀙𑀢𑁆𑀢𑀸𑀤𑀺𑀕𑀸𑀳𑀓𑀸. 𑀲𑀩𑁆𑀩𑀸 𑀘 𑀤𑀺𑀲𑀸𑀢𑀺 𑀤𑀲𑀧𑀺 𑀤𑀺𑀲𑀸. 𑀦𑀬𑀺𑀤𑀁 𑀲𑀩𑁆𑀩𑀤𑀺𑀲𑀸𑀯𑀺𑀮𑁄𑀓𑀦𑀁 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑀼𑀢𑁆𑀢𑀭𑀓𑀸𑀮𑀁 𑀤𑀝𑁆𑀞𑀩𑁆𑀩𑀁. 𑀫𑀳𑀸𑀲𑀢𑁆𑀢𑁄 𑀳𑀺 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀤𑀺𑀲𑀁 𑀑𑀮𑁄𑀓𑁂𑀲𑀺, 𑀢𑀢𑁆𑀣 𑀤𑁂𑀯𑀫𑀦𑀼𑀲𑁆𑀲𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑀸 ‘‘𑀫𑀳𑀸𑀧𑀼𑀭𑀺𑀲 𑀇𑀥 𑀢𑀼𑀫𑁆𑀳𑁂𑀳𑀺 𑀲𑀤𑀺𑀲𑁄𑀧𑀺 𑀦𑀢𑁆𑀣𑀺, 𑀓𑀼𑀢𑁄 𑀉𑀢𑁆𑀢𑀭𑀺𑀢𑀭𑁄’’𑀢𑀺 𑀆𑀳𑀁𑀲𑀼. 𑀏𑀯𑀁 𑀘𑀢𑀲𑁆𑀲𑁄 𑀤𑀺𑀲𑀸, 𑀘𑀢𑀲𑁆𑀲𑁄 𑀅𑀦𑀼𑀤𑀺𑀲𑀸, 𑀳𑁂𑀝𑁆𑀞𑀸, 𑀉𑀧𑀭𑀻𑀢𑀺 𑀲𑀩𑁆𑀩𑀸 𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀲𑀩𑁆𑀩𑀢𑁆𑀣 𑀅𑀢𑁆𑀢𑀦𑀸 𑀲𑀤𑀺𑀲𑀁 𑀅𑀤𑀺𑀲𑁆𑀯𑀸 ‘‘𑀅𑀬𑀁 𑀉𑀢𑁆𑀢𑀭𑀸 𑀤𑀺𑀲𑀸’’𑀢𑀺 𑀢𑀢𑁆𑀣 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 ¶ 𑀅𑀕𑀫𑀸𑀲𑀺. 𑀆𑀲𑀪𑀺𑀦𑁆𑀢𑀺 𑀉𑀢𑁆𑀢𑀫𑀁. 𑀅𑀕𑁆𑀕𑁄𑀢𑀺 𑀲𑀩𑁆𑀩𑀧𑀞𑀫𑁄. 𑀚𑁂𑀝𑁆𑀞𑁄 𑀲𑁂𑀝𑁆𑀞𑁄𑀢𑀺 𑀘 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀧𑀢𑁆𑀢𑀩𑁆𑀩𑀁 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀸𑀲𑀺.

‘‘𑀅𑀦𑁂𑀓𑁂𑀲𑀁 𑀯𑀺𑀲𑁂𑀲𑀸𑀥𑀺𑀕𑀫𑀸𑀦𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀸𑀯𑁂𑀦𑀸’’𑀢𑀺 𑀲𑀗𑁆𑀔𑀺𑀢𑁆𑀢𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 ‘‘𑀬𑀜𑁆𑀳𑀻’’𑀢𑀺𑀆𑀤𑀺𑀦𑀸 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀏𑀢𑁆𑀣𑀸𑀢𑀺 𑁋

‘‘𑀅𑀦𑁂𑀓𑀲𑀸𑀔𑀜𑁆𑀘 𑀲𑀳𑀲𑁆𑀲𑀫𑀡𑁆𑀟𑀮𑀁,

𑀙𑀢𑁆𑀢𑀁 𑀫𑀭𑀽 𑀥𑀸𑀭𑀬𑀼𑀫𑀦𑁆𑀢𑀮𑀺𑀓𑁆𑀔𑁂;

𑀲𑀼𑀯𑀡𑁆𑀡𑀤𑀡𑁆𑀟𑀸 𑀯𑀻𑀢𑀺𑀧𑀢𑀦𑁆𑀢𑀺 𑀘𑀸𑀫𑀭𑀸,

𑀦 𑀤𑀺𑀲𑁆𑀲𑀭𑁂 𑀘𑀸𑀫𑀭𑀙𑀢𑁆𑀢𑀕𑀸𑀳𑀓𑀸’’𑀢𑀺. (𑀲𑀼. 𑀦𑀺. 𑁬𑁯𑁩);

𑀇𑀫𑀺𑀲𑁆𑀲𑀸 𑀕𑀸𑀣𑀸𑀬. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀘𑀸𑀭𑀢𑀸𑀬 𑀅𑀦𑀸𑀯𑀭𑀡𑀜𑀸𑀡𑀦𑁆𑀢𑀺 𑀆𑀳 ‘‘𑀲𑀩𑁆𑀩𑀜𑁆𑀜𑀼𑀢𑀸𑀦𑀸𑀯𑀭𑀡𑀜𑀸𑀡𑀧𑀝𑀺𑀮𑀸𑀪𑀲𑁆𑀲𑀸’’𑀢𑀺. ‘‘𑀢𑀣𑀸 𑀅𑀬𑀁 𑀪𑀕𑀯𑀸𑀧𑀺 𑀕𑀢𑁄…𑀧𑁂… 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀸𑀯𑁂𑀦𑀸’’𑀢𑀺 𑀏𑀢𑁂𑀦 𑀅𑀪𑀺𑀚𑀸𑀢𑀺𑀬𑀁 𑀥𑀫𑁆𑀫𑀢𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀯𑀺𑀲𑁂𑀲𑀸 ¶ 𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀸𑀭𑀫𑀺𑀢𑀸𑀦𑀺𑀲𑁆𑀲𑀦𑁆𑀤𑀸 𑀳𑀺 𑀢𑁂𑀢𑀺.

𑀯𑀺𑀓𑁆𑀓𑀫𑀻𑀢𑀺 𑀅𑀕𑀫𑀸𑀲𑀺. 𑀫𑀭𑀽𑀢𑀺 𑀤𑁂𑀯𑀸. 𑀲𑀫𑀸𑀢𑀺 𑀯𑀺𑀮𑁄𑀓𑀦𑀲𑀫𑀢𑀸𑀬 𑀲𑀫𑀸 𑀲𑀤𑀺𑀲𑀺𑀬𑁄. 𑀫𑀳𑀸𑀧𑀼𑀭𑀺𑀲𑁄 𑀳𑀺 𑀬𑀣𑀸 𑀏𑀓𑀁 𑀤𑀺𑀲𑀁 𑀯𑀺𑀮𑁄𑀓𑁂𑀲𑀺, 𑀏𑀯𑀁 𑀲𑁂𑀲𑀸 𑀤𑀺𑀲𑀸𑀧𑀺, 𑀦 𑀓𑀢𑁆𑀣𑀘𑀺 𑀯𑀺𑀮𑁄𑀓𑀦𑁂 𑀯𑀺𑀩𑀦𑁆𑀥𑁄 ¶ 𑀢𑀲𑁆𑀲 𑀅𑀳𑁄𑀲𑀻𑀢𑀺. 𑀲𑀫𑀸𑀢𑀺 𑀯𑀸 𑀯𑀺𑀮𑁄𑀓𑁂𑀢𑀼𑀁 𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀦 𑀳𑀺 𑀢𑀤𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀺𑀭𑀽𑀧𑀩𑀻𑀪𑀘𑁆𑀙𑀯𑀺𑀲𑀫𑀭𑀽𑀧𑀸𑀦𑀺 𑀯𑀺𑀮𑁄𑀓𑁂𑀢𑀼𑀁 𑀅𑀬𑀼𑀢𑁆𑀢𑀸𑀦𑀺 𑀤𑀺𑀲𑀸𑀲𑀼 𑀉𑀧𑀝𑁆𑀞𑀳𑀦𑁆𑀢𑀻𑀢𑀺.

‘‘𑀏𑀯𑀁 𑀢𑀣𑀸𑀕𑀢𑁄’’𑀢𑀺 𑀓𑀸𑀬𑀕𑀫𑀦𑀝𑁆𑀞𑁂𑀦 𑀕𑀢-𑀲𑀤𑁆𑀤𑁂𑀦 𑀢𑀣𑀸𑀕𑀢-𑀲𑀤𑁆𑀤𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀜𑀸𑀡𑀕𑀫𑀦𑀝𑁆𑀞𑁂𑀦 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑁂𑀓𑁆𑀔𑀫𑁆𑀫𑁂𑀦𑀸𑀢𑀺 𑀅𑀮𑁄𑀪𑀧𑁆𑀧𑀥𑀸𑀦𑁂𑀦 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦. 𑀓𑀼𑀲𑀮𑀸 𑀳𑀺 𑀥𑀫𑁆𑀫𑀸 𑀇𑀥 𑀦𑁂𑀓𑁆𑀔𑀫𑁆𑀫𑀁, 𑀦 𑀧𑀩𑁆𑀩𑀚𑁆𑀚𑀸𑀤𑀬𑁄, ‘‘𑀧𑀞𑀫𑀚𑁆𑀛𑀸𑀦𑁂𑀦𑀸’’𑀢𑀺 𑀘 𑀯𑀤𑀦𑁆𑀢𑀺. 𑀧𑀳𑀸𑀬𑀸𑀢𑀺 𑀧𑀚𑀳𑀺𑀢𑁆𑀯𑀸. 𑀕𑀢𑁄 𑀅𑀥𑀺𑀕𑀢𑁄, 𑀧𑀝𑀺𑀧𑀦𑁆𑀦𑁄 𑀉𑀢𑁆𑀢𑀭𑀺𑀯𑀺𑀲𑁂𑀲𑀦𑁆𑀢𑀺 𑀅𑀢𑁆𑀣𑁄. 𑀧𑀳𑀸𑀬𑀸𑀢𑀺 𑀯𑀸 𑀧𑀳𑀸𑀦𑀳𑁂𑀢𑀼, 𑀧𑀳𑀸𑀦𑀮𑀓𑁆𑀔𑀡𑀁 𑀯𑀸. 𑀳𑁂𑀢𑀼𑀮𑀓𑁆𑀔𑀡𑀢𑁆𑀣𑁄 𑀳𑀺 𑀅𑀬𑀁 𑀧𑀳𑀸𑀬-𑀲𑀤𑁆𑀤𑁄. ‘‘𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀧𑁆𑀧𑀳𑀸𑀦𑀳𑁂𑀢𑀼𑀓𑀁 𑀕𑀢𑁄’’𑀢𑀺 𑀳𑁂𑀢𑁆𑀣 𑀯𑀼𑀢𑁆𑀢𑀁 𑀕𑀫𑀦𑀁 𑀅𑀯𑀩𑁄𑀥𑁄, 𑀧𑀝𑀺𑀧𑀢𑁆𑀢𑀺 𑀏𑀯 𑀯𑀸. 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀧𑁆𑀧𑀳𑀸𑀦𑁂𑀦 𑀘 𑀢𑀁 𑀮𑀓𑁆𑀔𑀻𑀬𑀢𑀺. 𑀏𑀲 𑀦𑀬𑁄 ‘‘𑀧𑀤𑀸𑀮𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼𑀧𑀺. 𑀅𑀩𑁆𑀬𑀸𑀧𑀸𑀤𑁂𑀦𑀸𑀢𑀺 𑀫𑁂𑀢𑁆𑀢𑀸𑀬. 𑀆𑀮𑁄𑀓𑀲𑀜𑁆𑀜𑀸𑀬𑀸𑀢𑀺 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀫𑀦𑀲𑀺𑀓𑀭𑀡𑁂𑀦 𑀉𑀧𑀝𑁆𑀞𑀺𑀢𑀆𑀮𑁄𑀓𑀲𑀜𑁆𑀚𑀸𑀦𑀦𑁂𑀦 ¶ . 𑀅𑀯𑀺𑀓𑁆𑀔𑁂𑀧𑁂𑀦𑀸𑀢𑀺 𑀲𑀫𑀸𑀥𑀺𑀦𑀸. 𑀥𑀫𑁆𑀫𑀯𑀯𑀢𑁆𑀣𑀸𑀦𑁂𑀦𑀸𑀢𑀺 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀬𑀸𑀣𑀸𑀯𑀯𑀺𑀦𑀺𑀘𑁆𑀙𑀬𑁂𑀦, ‘‘𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑁂𑀦𑀸’’𑀢𑀺𑀧𑀺 𑀯𑀤𑀦𑁆𑀢𑀺.

𑀏𑀯𑀁 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀦𑀻𑀯𑀭𑀡𑀧𑁆𑀧𑀳𑀸𑀦𑁂𑀦 ‘‘𑀅𑀪𑀺𑀚𑁆𑀛𑀁 𑀮𑁄𑀓𑁂 𑀧𑀳𑀸𑀬𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁦𑁮) 𑀯𑀼𑀢𑁆𑀢𑀸𑀬 𑀧𑀞𑀫𑀚𑁆𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀪𑀕𑀯𑀢𑁄 𑀢𑀣𑀸𑀕𑀢𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀳 𑀉𑀧𑀸𑀬𑁂𑀦 𑀅𑀝𑁆𑀞𑀳𑀺 𑀲𑀫𑀸𑀧𑀢𑁆𑀢𑀻𑀳𑀺, 𑀅𑀝𑁆𑀞𑀸𑀭𑀲𑀳𑀺 𑀘 𑀫𑀳𑀸𑀯𑀺𑀧𑀲𑁆𑀲𑀦𑀸𑀳𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀜𑀸𑀡𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑀓𑀗𑁆𑀔𑀸𑀯𑀺𑀢𑀭𑀡𑀸𑀦𑀜𑁆𑀳𑀺 𑀯𑀺𑀩𑀦𑁆𑀥𑀪𑀽𑀢𑀲𑁆𑀲 𑀫𑁄𑀳𑀲𑁆𑀲 𑀤𑀽𑀭𑀻𑀓𑀭𑀡𑁂𑀦 𑀜𑀸𑀢𑀧𑀭𑀺𑀜𑁆𑀜𑀸𑀬𑀁 ¶ 𑀞𑀺𑀢𑀲𑁆𑀲 𑀅𑀦𑀺𑀘𑁆𑀘𑀲𑀜𑁆𑀜𑀸𑀤𑀬𑁄 𑀲𑀺𑀚𑁆𑀛𑀦𑁆𑀢𑀺, 𑀢𑀣𑀸 𑀛𑀸𑀦𑀲𑀫𑀸𑀧𑀢𑁆𑀢𑀻𑀲𑀼 𑀅𑀪𑀺𑀭𑀢𑀺𑀦𑀺𑀫𑀺𑀢𑁆𑀢𑁂𑀦 𑀧𑀸𑀫𑁄𑀚𑁆𑀚𑁂𑀦, 𑀢𑀢𑁆𑀣 𑀅𑀦𑀪𑀺𑀭𑀢𑀺𑀬𑀸 𑀯𑀺𑀦𑁄𑀤𑀺𑀢𑀸𑀬 𑀛𑀸𑀦𑀸𑀤𑀺 𑀲𑀫𑀥𑀺𑀕𑀫𑁄𑀢𑀺 𑀲𑀫𑀸𑀧𑀢𑁆𑀢𑀺𑀯𑀺𑀧𑀲𑁆𑀲𑀦𑀸𑀦𑀁 𑀅𑀭𑀢𑀺𑀯𑀺𑀦𑁄𑀤𑀦𑀅𑀯𑀺𑀚𑁆𑀚𑀸𑀧𑀤𑀸𑀮𑀦𑀸𑀤𑀺 𑀉𑀧𑀸𑀬𑁄, 𑀉𑀧𑁆𑀧𑀝𑀺𑀧𑀸𑀝𑀺𑀦𑀺𑀤𑁆𑀤𑁂𑀲𑁄 𑀧𑀦 𑀦𑀻𑀯𑀭𑀡𑀲𑀪𑀸𑀯𑀸𑀬 𑀅𑀯𑀺𑀚𑁆𑀚𑀸𑀬 𑀳𑁂𑀝𑁆𑀞𑀸 𑀦𑀻𑀯𑀭𑀡𑁂𑀲𑀼𑀧𑀺 𑀲𑀗𑁆𑀕𑀳𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀧𑁆𑀧𑀯𑁂𑀲𑀯𑀺𑀩𑀦𑁆𑀥𑀦𑁂𑀦 𑀦𑀻𑀯𑀭𑀡𑀸𑀦𑀺 𑀓𑀯𑀸𑀝𑀲𑀤𑀺𑀲𑀸𑀦𑀻𑀢𑀺 𑀆𑀳 ‘‘𑀦𑀻𑀯𑀭𑀡𑀓𑀯𑀸𑀝𑀁 𑀉𑀕𑁆𑀖𑀸𑀝𑁂𑀢𑁆𑀯𑀸’’𑀢𑀺. ‘‘𑀭𑀢𑁆𑀢𑀺𑀁 𑀯𑀺𑀢𑀓𑁆𑀓𑁂𑀢𑁆𑀯𑀸 𑀯𑀺𑀘𑀸𑀭𑁂𑀢𑁆𑀯𑀸 𑀤𑀺𑀯𑀸 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀢𑀻’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀯𑀺𑀬 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀥𑀽𑀫𑀸𑀬𑀦𑀸𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀥𑀽𑀫’’𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 𑀧𑀞𑀫𑀚𑁆𑀛𑀸𑀦𑀽𑀧𑀘𑀸𑀭𑁂𑀬𑁂𑀯 𑀘 𑀤𑀼𑀓𑁆𑀔𑀁, 𑀘𑀢𑀼𑀢𑁆𑀣𑀚𑁆𑀛𑀸𑀦𑀽𑀧𑀘𑀸𑀭𑁂𑀬𑁂𑀯 𑀲𑀼𑀔𑀁 𑀧𑀳𑀻𑀬𑀢𑀺, 𑀅𑀢𑀺𑀲𑀬𑀧𑁆𑀧𑀳𑀸𑀦𑀁 𑀧𑀦 𑀲𑀦𑁆𑀥𑀸𑀬𑀸𑀳 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀦 𑀲𑀼𑀔𑀤𑀼𑀓𑁆𑀔𑀁 𑀧𑀳𑀸𑀬𑀸’’𑀢𑀺.

𑀅𑀦𑀺𑀘𑁆𑀘𑀲𑁆𑀲, 𑀅𑀦𑀺𑀘𑁆𑀘𑀦𑁆𑀢𑀺 𑀅𑀦𑀼𑀧𑀲𑁆𑀲𑀦𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸, 𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀁 𑀅𑀦𑀺𑀘𑁆𑀘𑀢𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸𑀬 𑀯𑀺𑀧𑀲𑁆𑀲𑀦𑀸𑀬𑁂𑀢𑀁 𑀦𑀸𑀫𑀁. 𑀦𑀺𑀘𑁆𑀘𑀲𑀜𑁆𑀜𑀦𑁆𑀢𑀺 𑀲𑀗𑁆𑀔𑀢𑀥𑀫𑁆𑀫𑁂 ‘‘𑀦𑀺𑀘𑁆𑀘𑀸, 𑀲𑀲𑁆𑀲𑀢𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀫𑀺𑀘𑁆𑀙𑀸𑀲𑀜𑁆𑀜𑀁 ¶ , 𑀲𑀜𑁆𑀜𑀸𑀲𑀻𑀲𑁂𑀦 𑀤𑀺𑀝𑁆𑀞𑀺𑀘𑀺𑀢𑁆𑀢𑀸𑀦𑀫𑁆𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀚𑁆𑀚𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸𑀬 𑀅𑀦𑀼𑀧𑀲𑁆𑀲𑀦𑀸𑀬. 𑀦𑀦𑁆𑀤𑀺𑀦𑁆𑀢𑀺 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀁. 𑀢𑀣𑀸 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀯𑀺𑀭𑀚𑁆𑀚𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸𑀬 𑀅𑀦𑀼𑀧𑀲𑁆𑀲𑀦𑀸𑀬. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑀲𑁆𑀲 𑀅𑀦𑀼𑀧𑀲𑁆𑀲𑀦𑀸𑀬. ‘‘𑀢𑁂 𑀲𑀗𑁆𑀔𑀸𑀭𑀸 𑀦𑀺𑀭𑀼𑀚𑁆𑀛𑀦𑁆𑀢𑀺𑀬𑁂𑀯, 𑀆𑀬𑀢𑀺𑀁 𑀲𑀫𑀼𑀤𑀬𑀯𑀲𑁂𑀦 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀏𑀯𑀁 𑀯𑀸 𑀅𑀦𑀼𑀧𑀲𑁆𑀲𑀦𑀸 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸. 𑀢𑁂𑀦𑁂𑀯𑀸𑀳 ‘‘𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀭𑁄𑀥𑁂𑀢𑀺, 𑀦𑁄 𑀲𑀫𑀼𑀤𑁂𑀢𑀻’’𑀢𑀺. 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸 𑀳𑀺 𑀅𑀬𑀁 𑀩𑀮𑀧𑁆𑀧𑀢𑁆𑀢𑀸𑀢𑀺. 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀸𑀓𑀸𑀭𑁂𑀦 ¶ 𑀧𑀯𑀢𑁆𑀢𑀸 𑀅𑀦𑀼𑀧𑀲𑁆𑀲𑀦𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸 ¶ . 𑀧𑀝𑀺𑀲𑀗𑁆𑀔𑀸 𑀲𑀦𑁆𑀢𑀺𑀝𑁆𑀞𑀦𑀸 𑀳𑀺 𑀅𑀬𑀁. 𑀆𑀤𑀸𑀦𑀦𑁆𑀢𑀺 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀳𑀡𑀁. 𑀲𑀦𑁆𑀢𑀢𑀺𑀲𑀫𑀽𑀳𑀓𑀺𑀘𑁆𑀘𑀸𑀭𑀫𑁆𑀫𑀡𑀸𑀦𑀁 𑀯𑀲𑁂𑀦 𑀏𑀓𑀢𑁆𑀢𑀕𑁆𑀕𑀳𑀡𑀁 𑀖𑀦𑀲𑀜𑁆𑀜𑀸. 𑀆𑀬𑀽𑀳𑀦𑀁 𑀅𑀪𑀺𑀲𑀗𑁆𑀔𑀭𑀡𑀁. 𑀅𑀯𑀢𑁆𑀣𑀸𑀯𑀺𑀲𑁂𑀲𑀸𑀧𑀢𑁆𑀢𑀺 𑀯𑀺𑀧𑀭𑀺𑀡𑀸𑀫𑁄. 𑀥𑀼𑀯𑀲𑀜𑁆𑀜𑀦𑁆𑀢𑀺 𑀣𑀺𑀭𑀪𑀸𑀯𑀕𑁆𑀕𑀳𑀡𑀁. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀫𑀽𑀳𑀸𑀤𑀺𑀖𑀦𑀯𑀲𑁂𑀦, 𑀲𑀓𑀺𑀘𑁆𑀘𑀧𑀭𑀺𑀘𑁆𑀙𑁂𑀤𑀢𑀸𑀬 𑀘 𑀲𑀗𑁆𑀔𑀸𑀭𑀸𑀦𑀁 𑀲𑀯𑀺𑀕𑁆𑀕𑀳𑀕𑁆𑀕𑀳𑀡𑀁. 𑀧𑀡𑀺𑀥𑀺𑀦𑁆𑀢𑀺 𑀭𑀸𑀕𑀸𑀤𑀺𑀧𑀡𑀺𑀥𑀺𑀁, 𑀲𑀸 𑀧𑀦𑀢𑁆𑀣𑀢𑁄 𑀢𑀡𑁆𑀳𑀸𑀦𑀁 𑀯𑀲𑁂𑀦 𑀲𑀗𑁆𑀔𑀸𑀭𑁂𑀲𑀼 𑀦𑀺𑀦𑁆𑀦𑀢𑀸.

𑀅𑀪𑀺𑀦𑀺𑀯𑁂𑀲𑀦𑁆𑀢𑀺 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁. 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀤𑀺𑀯𑀲𑁂𑀦 𑀲𑀩𑁆𑀩𑀥𑀫𑁆𑀫𑀢𑀻𑀭𑀡𑀁 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸. 𑀲𑀸𑀭𑀸𑀤𑀸𑀦𑀸𑀪𑀺𑀦𑀺𑀯𑁂𑀲𑀦𑁆𑀢𑀺 𑀅𑀲𑀸𑀭𑁂 𑀲𑀸𑀭𑀕𑁆𑀕𑀳𑀡𑀯𑀺𑀧𑀮𑁆𑀮𑀸𑀲𑀁. ‘‘𑀇𑀲𑁆𑀲𑀭𑀓𑀼𑀢𑁆𑀢𑀸𑀤𑀺𑀯𑀲𑁂𑀦 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄’’𑀢𑀺 𑀅𑀪𑀺𑀦𑀺𑀯𑁂𑀲𑁄 𑀲𑀫𑁆𑀫𑁄𑀳𑀸𑀪𑀺𑀦𑀺𑀯𑁂𑀲𑁄. 𑀓𑁂𑀘𑀺 𑀧𑀦 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀫𑀢𑀻𑀢𑀫𑀤𑁆𑀥𑀸𑀦𑀦𑁆𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀲𑀁𑀲𑀬𑀸𑀧𑀢𑁆𑀢𑀺 𑀲𑀫𑁆𑀫𑁄𑀳𑀸𑀪𑀺𑀦𑀺𑀯𑁂𑀲𑁄’’𑀢𑀺 𑀯𑀤𑀦𑁆𑀢𑀺. 𑀲𑀗𑁆𑀔𑀸𑀭𑁂𑀲𑀼 𑀮𑁂𑀡𑀢𑀸𑀡𑀪𑀸𑀯𑀕𑁆𑀕𑀳𑀡𑀁 𑀆𑀮𑀬𑀸𑀪𑀺𑀦𑀺𑀯𑁂𑀲𑁄. ‘‘𑀆𑀮𑀬𑀭𑀢𑀸 𑀆𑀮𑀬𑀲𑀫𑀼𑀤𑀺𑀢𑀸’’𑀢𑀺 𑀯𑀘𑀦𑀢𑁄 𑀆𑀮𑀬𑁄 𑀢𑀡𑁆𑀳𑀸, 𑀲𑀸𑀬𑁂𑀯 𑀘𑀓𑁆𑀔𑀸𑀤𑀻𑀲𑀼 𑀭𑀽𑀧𑀸𑀤𑀻𑀲𑀼 𑀘 𑀅𑀪𑀺𑀦𑀺𑀯𑀺𑀲𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀆𑀮𑀬𑀸𑀪𑀺𑀦𑀺𑀯𑁂𑀲𑁄𑀢𑀺 𑀓𑁂𑀘𑀺. ‘‘𑀏𑀯𑀁𑀯𑀺𑀥𑀸 𑀲𑀗𑁆𑀔𑀸𑀭𑀸 𑀧𑀝𑀺𑀦𑀺𑀲𑁆𑀲𑀚𑁆𑀚𑀻𑀬𑀦𑁆𑀢𑀻’’𑀢𑀺 𑀧𑀯𑀢𑁆𑀢𑀁 𑀜𑀸𑀡𑀁 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸. 𑀯𑀝𑁆𑀝𑀢𑁄 𑀯𑀺𑀕𑀢𑀢𑁆𑀢𑀸 𑀯𑀺𑀯𑀝𑁆𑀝𑀁 𑀦𑀺𑀩𑁆𑀩𑀸𑀦𑀁, 𑀢𑀢𑁆𑀣 𑀆𑀭𑀫𑁆𑀫𑀡𑀓𑀭𑀡𑀲𑀗𑁆𑀔𑀸𑀢𑁂𑀦 𑀅𑀦𑀼𑀧𑀲𑁆𑀲𑀦𑁂𑀦 𑀧𑀯𑀢𑁆𑀢𑀺𑀬𑀸 𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀸 𑀕𑁄𑀢𑁆𑀭𑀪𑀼. 𑀲𑀁𑀬𑁄𑀕𑀸𑀪𑀺𑀦𑀺𑀯𑁂𑀲𑀦𑁆𑀢𑀺 𑀲𑀁𑀬𑀼𑀚𑁆𑀚𑀦𑀯𑀲𑁂𑀦 𑀲𑀗𑁆𑀔𑀸𑀭𑁂𑀲𑀼 𑀅𑀪𑀺𑀦𑀺𑀯𑀺𑀲𑀦𑀁. 𑀤𑀺𑀝𑁆𑀞𑁂𑀓𑀝𑁆𑀞𑁂𑀢𑀺 𑀤𑀺𑀝𑁆𑀞𑀺𑀬𑀸 𑀲𑀳𑀚𑀸𑀢𑁂𑀓𑀝𑁆𑀞𑁂, 𑀧𑀳𑀸𑀦𑁂𑀓𑀝𑁆𑀞𑁂 𑀘. ‘‘𑀑𑀴𑀸𑀭𑀺𑀓𑁂’’𑀢𑀺 𑀉𑀧𑀭𑀺𑀫𑀕𑁆𑀕𑀯𑀚𑁆𑀛𑁂 𑀓𑀺𑀮𑁂𑀲𑁂 𑀅𑀧𑁂𑀓𑁆𑀔𑀺𑀢𑁆𑀯𑀸 ¶ 𑀯𑀼𑀢𑁆𑀢𑀁, 𑀅𑀜𑁆𑀜𑀣𑀸 𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑀸𑀧𑀺 𑀤𑀼𑀢𑀺𑀬𑀫𑀕𑁆𑀕𑀯𑀚𑁆𑀛𑁂𑀳𑀺 𑀑𑀴𑀸𑀭𑀺𑀓𑀸𑀢𑀺. 𑀅𑀡𑀼𑀲𑀳𑀕𑀢𑁂𑀢𑀺 𑀅𑀡𑀼𑀪𑀽𑀢𑁂, 𑀇𑀤𑀁 𑀳𑁂𑀝𑁆𑀞𑀺𑀫𑀫𑀕𑁆𑀕𑀯𑀚𑁆𑀛𑁂 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀩𑁆𑀩𑀓𑀺𑀮𑁂𑀲𑁂𑀢𑀺 𑀅𑀯𑀲𑀺𑀝𑁆𑀞𑀲𑀩𑁆𑀩𑀓𑀺𑀮𑁂𑀲𑁂. 𑀦 𑀳𑀺 𑀧𑀞𑀫𑀸𑀤𑀺𑀫𑀕𑁆𑀕𑁂𑀳𑀺 𑀧𑀳𑀻𑀦𑀸 𑀓𑀺𑀮𑁂𑀲𑀸 𑀧𑀼𑀦 𑀧𑀳𑀻𑀬𑀦𑁆𑀢𑀻𑀢𑀺.

𑀓𑀓𑁆𑀔𑀴𑀢𑁆𑀢𑀁 𑀓𑀞𑀺𑀦𑀪𑀸𑀯𑁄. 𑀧𑀕𑁆𑀖𑀭𑀡𑀁 𑀤𑁆𑀭𑀯𑀪𑀸𑀯𑁄. 𑀮𑁄𑀓𑀺𑀬𑀯𑀸𑀬𑀼𑀦𑀸 𑀪𑀲𑁆𑀢𑀲𑁆𑀲 𑀯𑀺𑀬 𑀬𑁂𑀦 𑀢𑀁𑀢𑀁𑀓𑀮𑀸𑀧𑀲𑁆𑀲 𑀉𑀤𑁆𑀥𑀼𑀫𑀸𑀬𑀦𑀁, 𑀣𑀫𑁆𑀪𑀪𑀸𑀯𑁄 𑀯𑀸, 𑀢𑀁 𑀯𑀺𑀢𑁆𑀣𑀫𑁆𑀪𑀦𑀁. 𑀯𑀺𑀚𑁆𑀚𑀫𑀸𑀦𑁂𑀧𑀺 𑀓𑀮𑀸𑀧𑀦𑁆𑀢𑀭𑀪𑀽𑀢𑀸𑀦𑀁 𑀓𑀮𑀸𑀧𑀦𑁆𑀢𑀭𑀪𑀽𑀢𑁂𑀳𑀺 𑀅𑀲𑀫𑁆𑀨𑀼𑀝𑁆𑀞𑀪𑀸𑀯𑁂, 𑀢𑀁𑀢𑀁𑀪𑀽𑀢𑀯𑀺𑀯𑀺𑀢𑁆𑀢𑀢𑀸 𑀭𑀽𑀧𑀧𑀭𑀺𑀬𑀦𑁆𑀢𑁄 𑀆𑀓𑀸𑀲𑁄𑀢𑀺 𑀬𑁂𑀲𑀁 𑀬𑁄 𑀧𑀭𑀺𑀘𑁆𑀙𑁂𑀤𑁄, 𑀢𑁂𑀳𑀺 𑀲𑁄 𑀅𑀲𑀫𑁆𑀨𑀼𑀝𑁆𑀞𑁄𑀯, 𑀅𑀜𑁆𑀜𑀣𑀸 𑀪𑀽𑀢𑀸𑀦𑀁 𑀧𑀭𑀺𑀘𑁆𑀙𑁂𑀤𑀲𑀪𑀸𑀯𑁄 𑀦 𑀲𑀺𑀬𑀸 𑀩𑁆𑀬𑀸𑀧𑀻𑀪𑀸𑀯𑀸𑀧𑀢𑁆𑀢𑀺𑀢𑁄 ¶ . 𑀅𑀩𑁆𑀬𑀸𑀧𑀺𑀢𑀸 𑀳𑀺 𑀅𑀲𑀫𑁆𑀨𑀼𑀝𑁆𑀞𑀢𑀸𑀢𑀺. 𑀬𑀲𑁆𑀫𑀺𑀁 ¶ 𑀓𑀮𑀸𑀧𑁂 𑀪𑀽𑀢𑀸𑀦𑀁 𑀧𑀭𑀺𑀘𑁆𑀙𑁂𑀤𑁄, 𑀢𑁂𑀳𑀺 𑀅𑀲𑀫𑁆𑀨𑀼𑀝𑁆𑀞𑀪𑀸𑀯𑁄 𑀅𑀲𑀫𑁆𑀨𑀼𑀝𑁆𑀞𑀮𑀓𑁆𑀔𑀡𑀁. 𑀢𑁂𑀦𑀸𑀳 𑀪𑀕𑀯𑀸 𑀆𑀓𑀸𑀲𑀥𑀸𑀢𑀼𑀦𑀺𑀤𑁆𑀤𑁂𑀲𑁂 ‘‘𑀅𑀲𑀫𑁆𑀨𑀼𑀝𑁆𑀞𑀁 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀻’’𑀢𑀺 (𑀥. 𑀲. 𑁬𑁩𑁭).

𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀦𑁆𑀦𑀺𑀧𑀸𑀢𑁂 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺 𑀭𑀼𑀧𑁆𑀧𑀦𑀁. 𑀘𑁂𑀢𑀦𑀸𑀧𑀥𑀸𑀦𑀢𑁆𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀦𑀁 𑀘𑁂𑀢𑀦𑀸𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁 ‘‘𑀲𑀗𑁆𑀔𑀸𑀭𑀸𑀦𑀁 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡’’𑀦𑁆𑀢𑀺. 𑀢𑀣𑀸 𑀳𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀯𑀺𑀪𑀗𑁆𑀕𑁂 ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁯𑁨) 𑀘𑁂𑀢𑀦𑀸𑀯 𑀯𑀺𑀪𑀢𑁆𑀢𑀸, 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡𑀸 𑀘 𑀘𑁂𑀢𑀦𑀸. 𑀬𑀣𑀸𑀳 ‘‘𑀢𑀢𑁆𑀣 𑀓𑀢𑀫𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄? 𑀓𑀼𑀲𑀮𑀸 𑀘𑁂𑀢𑀦𑀸 𑀓𑀸𑀫𑀸𑀯𑀘𑀭𑀸’’𑀢𑀺𑀆𑀤𑀺 ¶ (𑀯𑀺𑀪. 𑁨𑁨𑁬). 𑀨𑀭𑀡𑀁 𑀲𑀯𑀺𑀧𑁆𑀨𑀸𑀭𑀺𑀓𑀢𑀸. 𑀅𑀲𑁆𑀲𑀤𑁆𑀥𑀺𑀬𑁂𑀢𑀺 𑀅𑀲𑁆𑀲𑀤𑁆𑀥𑀺𑀬𑀳𑁂𑀢𑀼, 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁. 𑀏𑀲 𑀦𑀬𑁄 ‘‘𑀓𑁄𑀲𑀚𑁆𑀚𑁂’’𑀢𑀺𑀆𑀤𑀻𑀲𑀼. 𑀯𑀽𑀧𑀲𑀫𑀮𑀓𑁆𑀔𑀡𑀦𑁆𑀢𑀺 𑀓𑀸𑀬𑀘𑀺𑀢𑁆𑀢𑀧𑀭𑀺𑀴𑀸𑀳𑀽𑀧𑀲𑀫𑀮𑀓𑁆𑀔𑀡𑀁. 𑀮𑀻𑀦𑀼𑀤𑁆𑀥𑀘𑁆𑀘𑀭𑀳𑀺𑀢𑁂 𑀅𑀥𑀺𑀘𑀺𑀢𑁆𑀢𑁂 𑀧𑀯𑀢𑁆𑀢𑀫𑀸𑀦𑁂 𑀧𑀕𑁆𑀕𑀳𑀦𑀺𑀕𑁆𑀕𑀳𑀲𑀫𑁆𑀧𑀳𑀁𑀲𑀦𑁂𑀲𑀼 𑀅𑀩𑁆𑀬𑀸𑀯𑀝𑀢𑀸𑀬 𑀅𑀚𑁆𑀛𑀼𑀧𑁂𑀓𑁆𑀔𑀦𑀁 𑀧𑀝𑀺𑀲𑀗𑁆𑀔𑀸𑀦𑀁 𑀧𑀓𑁆𑀔𑀧𑀸𑀢𑀼𑀧𑀘𑁆𑀙𑁂𑀤𑀢𑁄.

𑀫𑀼𑀲𑀸𑀯𑀸𑀤𑀸𑀤𑀻𑀦𑀁 𑀯𑀺𑀲𑀁𑀯𑀸𑀤𑀦𑀸𑀤𑀺𑀓𑀺𑀘𑁆𑀘𑀢𑀸𑀬 𑀮𑀽𑀔𑀸𑀦𑀁 𑀅𑀧𑀭𑀺𑀕𑁆𑀕𑀸𑀳𑀓𑀸𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀫𑁆𑀫𑀸𑀯𑀸𑀘𑀸 𑀲𑀺𑀦𑀺𑀤𑁆𑀥𑀪𑀸𑀯𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂, 𑀲𑀫𑁆𑀫𑀸𑀯𑀸𑀘𑀸𑀧𑀘𑁆𑀘𑀬𑀲𑀼𑀪𑀸𑀲𑀺𑀢𑀸𑀦𑀁 𑀲𑁄𑀢𑀸𑀭𑀜𑁆𑀘 𑀧𑀼𑀕𑁆𑀕𑀮𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀲𑀸 𑀧𑀭𑀺𑀕𑁆𑀕𑀳𑀮𑀓𑁆𑀔𑀡𑀸 𑀲𑀫𑁆𑀫𑀸𑀯𑀸𑀘𑀸. 𑀓𑀸𑀬𑀺𑀓𑀓𑀺𑀭𑀺𑀬𑀸 𑀓𑀺𑀜𑁆𑀘𑀺 𑀓𑀢𑁆𑀢𑀩𑁆𑀩𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀲𑀬𑀜𑁆𑀘 𑀲𑀫𑀼𑀝𑁆𑀞𑀳𑀦𑀁 𑀖𑀝𑀦𑀁 𑀳𑁄𑀢𑀻𑀢𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑀗𑁆𑀔𑀸𑀢𑀸 𑀯𑀺𑀭𑀢𑀺 𑀲𑀫𑀼𑀝𑁆𑀞𑀸𑀦𑀮𑀓𑁆𑀔𑀡𑀸 𑀤𑀝𑁆𑀞𑀩𑁆𑀩𑀸, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀸 𑀉𑀓𑁆𑀔𑀺𑀧𑀦𑀁 𑀲𑀫𑀼𑀝𑁆𑀞𑀸𑀧𑀦𑀁 𑀓𑀸𑀬𑀺𑀓𑀓𑀺𑀭𑀺𑀬𑀸𑀬 𑀪𑀸𑀭𑀼𑀓𑁆𑀔𑀺𑀧𑀦𑀁 𑀯𑀺𑀬. 𑀚𑀻𑀯𑀫𑀸𑀦𑀲𑁆𑀲 𑀲𑀢𑁆𑀢𑀲𑁆𑀲, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀯𑀼𑀢𑁆𑀢𑀺𑀬𑀸, 𑀆𑀚𑀻𑀯𑀲𑁆𑀲𑁂𑀯 𑀯𑀸 𑀲𑀼𑀤𑁆𑀥𑀺 𑀯𑁄𑀤𑀸𑀦𑀁. 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀲𑀫𑁆𑀫𑀤𑁂𑀯 𑀧𑀕𑁆𑀕𑀡𑁆𑀳𑀦𑀁 𑀧𑀕𑁆𑀕𑀳𑁄.

‘‘𑀲𑀗𑁆𑀔𑀸𑀭𑀸’’𑀢𑀺 𑀇𑀥 𑀘𑁂𑀢𑀦𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀗𑁆𑀔𑀸𑀭𑀸𑀦𑀁 𑀘𑁂𑀢𑀦𑀸𑀮𑀓𑁆𑀔𑀡’’𑀦𑁆𑀢𑀺. 𑀦𑀫𑀦𑀁 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀪𑀸𑀯𑁄. 𑀆𑀬𑀢𑀦𑀁𑀧𑀯𑀢𑁆𑀢𑀦𑀁. 𑀆𑀬𑀢𑀦𑀸𑀦𑀁 𑀯𑀲𑁂𑀦 𑀳𑀺 𑀆𑀬𑀲𑀗𑁆𑀔𑀸𑀢𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀯𑀢𑁆𑀢𑀺. 𑀢𑀡𑁆𑀳𑀸𑀬 𑀳𑁂𑀢𑀼𑀮𑀓𑁆𑀔𑀡𑀦𑁆𑀢𑀺 𑀯𑀝𑁆𑀝𑀲𑁆𑀲 𑀚𑀦𑀓𑀳𑁂𑀢𑀼𑀪𑀸𑀯𑁄, 𑀫𑀕𑁆𑀕𑀲𑁆𑀲 𑀧𑀦 𑀦𑀺𑀩𑁆𑀩𑀸𑀦𑀲𑀫𑁆𑀧𑀸𑀧𑀓𑀢𑁆𑀢𑀦𑁆𑀢𑀺 𑀅𑀬𑀫𑁂𑀯 𑀢𑁂𑀲𑀁 𑀯𑀺𑀲𑁂𑀲𑁄.

𑀢𑀣𑀮𑀓𑁆𑀔𑀡𑀁 ¶ 𑀅𑀯𑀺𑀧𑀭𑀻𑀢𑀲𑀪𑀸𑀯𑁄. 𑀏𑀓𑀭𑀲𑁄 𑀅𑀜𑁆𑀜𑀫𑀜𑁆𑀜𑀸𑀦𑀢𑀺𑀯𑀢𑁆𑀢𑀦𑀁 𑀅𑀦𑀽𑀦𑀸𑀥𑀺𑀓𑀪𑀸𑀯𑁄. 𑀬𑀼𑀕𑀦𑀤𑁆𑀥𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀯, ‘‘𑀲𑀤𑁆𑀥𑀸𑀧𑀜𑁆𑀜𑀸 𑀧𑀕𑁆𑀕𑀳𑀸𑀯𑀺𑀓𑁆𑀔𑁂𑀧𑀸’’𑀢𑀺𑀧𑀺 𑀯𑀤𑀦𑁆𑀢𑀺.

𑀔𑀺𑀡𑁄𑀢𑀺 ¶ 𑀓𑀺𑀮𑁂𑀲𑁂𑀢𑀺 𑀔𑀬𑁄, 𑀫𑀕𑁆𑀕𑁄. 𑀅𑀦𑀼𑀧𑁆𑀧𑀸𑀤𑀧𑀭𑀺𑀬𑁄𑀲𑀸𑀦𑀢𑀸𑀬 𑀅𑀦𑀼𑀧𑁆𑀧𑀸𑀤𑁄, 𑀨𑀮𑀁. 𑀧𑀲𑁆𑀲𑀤𑁆𑀥𑀺 𑀓𑀺𑀮𑁂𑀲𑀯𑀽𑀧𑀲𑀫𑁄.

𑀙𑀦𑁆𑀤𑀲𑁆𑀲𑀸𑀢𑀺 ¶ 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑀲𑁆𑀲. 𑀫𑀽𑀮𑀮𑀓𑁆𑀔𑀡𑀁 𑀧𑀢𑀺𑀝𑁆𑀞𑀸𑀪𑀸𑀯𑁄. 𑀲𑀫𑀼𑀝𑁆𑀞𑀸𑀧𑀦𑀮𑀓𑁆𑀔𑀡𑀁 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑀸. 𑀲𑀫𑁄𑀥𑀸𑀦𑀁 𑀯𑀺𑀲𑀬𑀸𑀤𑀺𑀲𑀦𑁆𑀦𑀺𑀧𑀸𑀢𑁂𑀦 𑀕𑀳𑁂𑀢𑀩𑁆𑀩𑀸𑀓𑀸𑀭𑁄, 𑀬𑀸 ‘‘𑀲𑀗𑁆𑀕𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀁 𑀲𑀳 𑀑𑀤𑀳𑀦𑁆𑀢𑀺 𑀅𑀦𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀢𑀺 𑀯𑀸 𑀲𑀫𑁄𑀥𑀸𑀦𑀁, 𑀨𑀲𑁆𑀲𑁄. 𑀲𑀫𑁄𑀲𑀭𑀦𑁆𑀢𑀺 𑀲𑀦𑁆𑀦𑀺𑀧𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀫𑁄𑀲𑀭𑀡𑀁. 𑀯𑁂𑀤𑀦𑀸𑀬 𑀯𑀺𑀦𑀸 𑀅𑀧𑁆𑀧𑀯𑀢𑁆𑀢𑀫𑀸𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀯𑁂𑀤𑀦𑀸𑀦𑀼𑀪𑀯𑀦𑀦𑀺𑀫𑀺𑀢𑁆𑀢𑀁 𑀲𑀫𑁄𑀲𑀝𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀕𑁄𑀧𑀸𑀦𑀲𑀻𑀦𑀁 𑀓𑀽𑀝𑀁 𑀯𑀺𑀬 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀧𑀸𑀫𑁄𑀓𑁆𑀔𑀪𑀸𑀯𑁄 𑀧𑀫𑀼𑀔𑀮𑀓𑁆𑀔𑀡𑀁. 𑀢𑀢𑁄, 𑀢𑁂𑀲𑀁 𑀯𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀉𑀢𑁆𑀢𑀭𑀺 𑀧𑀥𑀸𑀦𑀦𑁆𑀢𑀺 𑀢𑀤𑀼𑀢𑁆𑀢𑀭𑀺. 𑀧𑀜𑁆𑀜𑀼𑀢𑁆𑀢𑀭𑀸 𑀳𑀺 𑀓𑀼𑀲𑀮𑀸 𑀥𑀫𑁆𑀫𑀸. 𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀨𑀮𑀲𑁆𑀲. 𑀢𑀜𑁆𑀳𑀺 𑀲𑀻𑀮𑀸𑀤𑀺𑀕𑀼𑀡𑀲𑀸𑀭𑀲𑁆𑀲 𑀧𑀭𑀫𑀼𑀓𑁆𑀓𑀁𑀲𑀪𑀸𑀯𑁂𑀦 𑀲𑀸𑀭𑀁. 𑀅𑀬𑀜𑁆𑀘 𑀮𑀓𑁆𑀔𑀡𑀯𑀺𑀪𑀸𑀕𑁄 𑀙𑀥𑀸𑀢𑀼𑀧𑀜𑁆𑀘𑀛𑀸𑀦𑀗𑁆𑀕𑀸𑀤𑀺𑀯𑀲𑁂𑀦 𑀢𑀁𑀢𑀁𑀲𑀼𑀢𑁆𑀢𑀧𑀤𑀸𑀦𑀼𑀲𑀸𑀭𑁂𑀦, 𑀧𑁄𑀭𑀸𑀡𑀝𑁆𑀞𑀓𑀣𑀸𑀬 𑀆𑀕𑀢𑀦𑀬𑁂𑀦 𑀘 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑁄𑀧𑀺 𑀓𑁄𑀘𑀺 𑀥𑀫𑁆𑀫𑁄 𑀧𑀭𑀺𑀬𑀸𑀬𑀦𑁆𑀢𑀭𑀧𑁆𑀧𑀓𑀸𑀲𑀦𑀢𑁆𑀣𑀁 𑀧𑀼𑀦 𑀤𑀲𑁆𑀲𑀺𑀢𑁄, 𑀢𑀢𑁄 𑀏𑀯 𑀘 ‘‘𑀙𑀦𑁆𑀤𑀫𑀽𑀮𑀓𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀫𑀦𑀲𑀺𑀓𑀸𑀭𑀲𑀫𑀼𑀝𑁆𑀞𑀸𑀦𑀸, 𑀨𑀲𑁆𑀲𑀲𑀫𑁄𑀥𑀸𑀦𑀸, 𑀯𑁂𑀤𑀦𑀸𑀲𑀫𑁄𑀲𑀭𑀡𑀸’’𑀢𑀺, ‘‘𑀧𑀜𑁆𑀜𑀼𑀢𑁆𑀢𑀭𑀸 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺, ‘‘𑀯𑀺𑀫𑀼𑀢𑁆𑀢𑀺𑀲𑀸𑀭𑀫𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺, ‘‘𑀦𑀺𑀩𑁆𑀩𑀸𑀦𑁄𑀕𑀥𑀜𑁆𑀳𑀺 𑀆𑀯𑀼𑀲𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺 𑀘 𑀲𑀼𑀢𑁆𑀢𑀧𑀤𑀸𑀦𑀁 𑀯𑀲𑁂𑀦 ‘‘𑀙𑀦𑁆𑀤𑀲𑁆𑀲 𑀫𑀽𑀮𑀮𑀓𑁆𑀔𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀣𑀥𑀫𑁆𑀫𑀸 ¶ 𑀦𑀸𑀫 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀅𑀯𑀺𑀧𑀭𑀻𑀢𑀲𑀪𑀸𑀯𑀢𑁆𑀢𑀸. 𑀢𑀣𑀸𑀦𑀺 𑀢𑀁𑀲𑀪𑀸𑀯𑀢𑁆𑀢𑀸. 𑀅𑀯𑀺𑀢𑀣𑀸𑀦𑀺 𑀅𑀫𑀼𑀲𑀸𑀲𑀪𑀸𑀯𑀢𑁆𑀢𑀸. 𑀅𑀦𑀜𑁆𑀜𑀣𑀸𑀦𑀺 𑀅𑀜𑁆𑀜𑀸𑀓𑀸𑀭𑀭𑀳𑀺𑀢𑀢𑁆𑀢𑀸.

𑀚𑀸𑀢𑀺𑀧𑀘𑁆𑀘𑀬𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄𑀢𑀺 𑀚𑀸𑀢𑀺𑀧𑀘𑁆𑀘𑀬𑀸 𑀲𑀫𑁆𑀪𑀽𑀢𑀁 𑀳𑀼𑀢𑁆𑀯𑀸 𑀲𑀳𑀺𑀢𑀲𑁆𑀲 𑀅𑀢𑁆𑀢𑀦𑁄 𑀧𑀘𑁆𑀘𑀬𑀸𑀦𑀼𑀭𑀽𑀧𑀲𑁆𑀲 𑀉𑀤𑁆𑀥𑀁 𑀉𑀤𑁆𑀥𑀁 𑀆𑀕𑀢𑀪𑀸𑀯𑁄, 𑀅𑀦𑀼𑀧𑀯𑀢𑁆𑀢𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀫𑁆𑀪𑀽𑀢𑀝𑁆𑀞𑁄 𑀘 𑀲𑀫𑀼𑀤𑀸𑀕𑀢𑀝𑁆𑀞𑁄 𑀘 𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄, 𑀦 𑀚𑀸𑀢𑀺𑀢𑁄 𑀚𑀭𑀸𑀫𑀭𑀡𑀁 𑀦 𑀳𑁄𑀢𑀺, 𑀦 𑀘 𑀚𑀸𑀢𑀺𑀁 𑀯𑀺𑀦𑀸 𑀅𑀜𑁆𑀜𑀢𑁄 𑀳𑁄𑀢𑀻𑀢𑀺 𑀚𑀸𑀢𑀺𑀧𑀘𑁆𑀘𑀬𑀲𑀫𑁆𑀪𑀽𑀢𑀝𑁆𑀞𑁄. 𑀇𑀢𑁆𑀣𑀜𑁆𑀘 𑀚𑀸𑀢𑀺𑀢𑁄 𑀲𑀫𑀼𑀤𑀸𑀕𑀘𑁆𑀙𑀢𑀻𑀢𑀺 ¶ 𑀚𑀸𑀢𑀺𑀧𑀘𑁆𑀘𑀬𑀲𑀫𑀼𑀤𑀸𑀕𑀢𑀝𑁆𑀞𑁄. 𑀬𑀸 𑀬𑀸 𑀚𑀸𑀢𑀺 𑀬𑀣𑀸 𑀬𑀣𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀤𑀦𑀼𑀭𑀽𑀧𑀁 𑀧𑀸𑀢𑀼𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀝𑁆𑀞𑁄𑀢𑀺 𑀏𑀢𑁆𑀣𑀸𑀧𑀺 𑀦 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀦 𑀘 𑀅𑀯𑀺𑀚𑁆𑀚𑀁 𑀯𑀺𑀦𑀸 𑀲𑀗𑁆𑀔𑀸𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀬𑀸 𑀬𑀸 𑀅𑀯𑀺𑀚𑁆𑀚𑀸 𑀬𑁂𑀲𑀁 𑀬𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀬𑀣𑀸 𑀬𑀣𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀬𑀁 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀝𑁆𑀞𑁄, 𑀧𑀘𑁆𑀘𑀬𑀪𑀸𑀯𑁄𑀢𑀺 𑀅𑀢𑁆𑀣𑁄.

𑀪𑀕𑀯𑀸 ¶ 𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦𑀸𑀢𑀺 𑀪𑀕𑀯𑀢𑀸. 𑀢𑀁 𑀯𑀺𑀪𑀚𑁆𑀚𑀫𑀸𑀦𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀦𑁆𑀢𑀺 𑀭𑀽𑀧𑀸𑀬𑀢𑀦𑀁. 𑀇𑀝𑁆𑀞𑀸𑀦𑀺𑀝𑁆𑀞𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀚𑁆𑀛𑀢𑁆𑀢𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀢𑀣𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀭𑀺𑀢𑁆𑀢𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀢𑀤𑀼𑀪𑀬𑀸𑀤𑀺𑀪𑁂𑀤𑀁. 𑀮𑀩𑁆𑀪𑀫𑀸𑀦𑀓𑀧𑀤𑀯𑀲𑁂𑀦𑀸𑀢𑀺 ‘‘𑀭𑀽𑀧𑀸𑀬𑀢𑀦𑀁 𑀤𑀺𑀝𑁆𑀞𑀁 𑀲𑀤𑁆𑀤𑀸𑀬𑀢𑀦𑀁 𑀲𑀼𑀢𑀁 𑀕𑀦𑁆𑀥𑀸𑀬𑀢𑀦𑀁 𑀭𑀲𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀫𑀼𑀢𑀁, 𑀲𑀩𑁆𑀩𑀁 𑀭𑀽𑀧𑀁 𑀫𑀦𑀲𑀸 𑀯𑀺𑀜𑁆𑀜𑀸𑀢’’𑀦𑁆𑀢𑀺 (𑀥. 𑀲. 𑁯𑁬𑁬) 𑀯𑀘𑀦𑀢𑁄 𑀤𑀺𑀝𑁆𑀞𑀧𑀤𑀜𑁆𑀘 𑀯𑀺𑀜𑁆𑀜𑀸𑀢𑀧𑀤𑀜𑁆𑀘 𑀭𑀽𑀧𑀸𑀭𑀫𑁆𑀫𑀡𑁂 𑀮𑀩𑁆𑀪𑀢𑀺. ‘‘𑀭𑀽𑀧𑀸𑀭𑀫𑁆𑀫𑀡𑀁 𑀇𑀝𑁆𑀞𑀁 𑀅𑀦𑀺𑀝𑁆𑀞𑀁 𑀫𑀚𑁆𑀛𑀢𑁆𑀢𑀁 𑀧𑀭𑀺𑀢𑁆𑀢𑀁 𑀅𑀢𑀻𑀢𑀁 𑀅𑀦𑀸𑀕𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀤𑀺𑀝𑁆𑀞𑀁 𑀯𑀺𑀜𑁆𑀜𑀸𑀢𑀁 𑀭𑀽𑀧𑀁 𑀭𑀽𑀧𑀸𑀬𑀢𑀦𑀁 𑀭𑀽𑀧𑀥𑀸𑀢𑀼 𑀯𑀡𑁆𑀡𑀦𑀺𑀪𑀸 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀦𑀻𑀮𑀁 𑀧𑀻𑀢𑀓’’𑀦𑁆𑀢𑀺 𑀏𑀯𑀫𑀸𑀤𑀻𑀳𑀺 𑀅𑀦𑁂𑀓𑁂𑀳𑀺 𑀦𑀸𑀫𑁂𑀳𑀺. ‘‘𑀢𑁂𑀭𑀲𑀳𑀺 𑀯𑀸𑀭𑁂𑀳𑀻’’𑀢𑀺 𑀭𑀽𑀧𑀓𑀡𑁆𑀟𑁂 (𑀥. 𑀲. 𑁬𑁧𑁪 𑀆𑀤𑀬𑁄) 𑀆𑀕𑀢𑁂 𑀢𑁂𑀭𑀲 𑀦𑀺𑀤𑁆𑀤𑁂𑀲𑀯𑀸𑀭𑁂 𑀲𑀦𑁆𑀥𑀸𑀬𑀸𑀳. 𑀏𑀓𑁂𑀓𑀲𑁆𑀫𑀺𑀜𑁆𑀘 𑀯𑀸𑀭𑁂 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀯𑀯𑀢𑁆𑀣𑀸𑀧𑀦𑀦𑀬𑀸𑀦𑀁 𑀯𑀲𑁂𑀦 ‘‘𑀤𑁆𑀯𑀺𑀧𑀜𑁆𑀜𑀸𑀲𑀸𑀬 ¶ 𑀦𑀬𑁂𑀳𑀻’’𑀢𑀺 𑀆𑀳. 𑀢𑀣𑀫𑁂𑀯 𑀅𑀯𑀺𑀧𑀭𑀻𑀢𑀤𑀲𑁆𑀲𑀺𑀢𑀸𑀬, 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀤𑁂𑀲𑀦𑀢𑀸𑀬 𑀘. 𑀚𑀸𑀦𑀸𑀫𑀺 𑀅𑀩𑁆𑀪𑀜𑁆𑀜𑀸𑀲𑀺𑀦𑁆𑀢𑀺 𑀯𑀢𑁆𑀢𑀫𑀸𑀦𑀸𑀢𑀻𑀢𑀓𑀸𑀮𑁂𑀲𑀼 𑀜𑀸𑀡𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑁂𑀦 𑀅𑀦𑀸𑀕𑀢𑁂𑀧𑀺 𑀜𑀸𑀡𑀧𑁆𑀧𑀯𑀢𑁆𑀢𑀺 𑀯𑀼𑀢𑁆𑀢𑀸𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀺𑀤𑀺𑀢-𑀲𑀤𑁆𑀤𑁄 𑀅𑀦𑀸𑀫𑀝𑁆𑀞𑀓𑀸𑀮𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄, ‘‘𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢’’𑀦𑁆𑀢𑀺𑀆𑀤𑀻𑀲𑀼 (𑀥. 𑀲. 𑁯𑁬𑁬) 𑀯𑀺𑀬. 𑀦 𑀉𑀧𑀝𑁆𑀞𑀸𑀲𑀻𑀢𑀺 𑀅𑀢𑁆𑀢𑀢𑁆𑀢𑀦𑀺𑀬𑀯𑀲𑁂𑀦 𑀦 𑀉𑀧𑀕𑀘𑁆𑀙𑀺. 𑀬𑀣𑀸 𑀭𑀽𑀧𑀸𑀭𑀫𑁆𑀫𑀡𑀸𑀤𑀬𑁄 𑀥𑀫𑁆𑀫𑀸 𑀬𑀁𑀲𑀪𑀸𑀯𑀸 𑀬𑀁𑀧𑀓𑀸𑀭𑀸 𑀘, 𑀢𑀣𑀸 𑀦𑁂 𑀧𑀲𑁆𑀲𑀢𑀺 𑀚𑀸𑀦𑀸𑀢𑀺 𑀕𑀘𑁆𑀙𑀢𑀻𑀢𑀺 𑀢𑀣𑀸𑀕𑀢𑁄𑀢𑀺 𑀏𑀯𑀁 𑀧𑀤𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀘𑀺 𑀧𑀦 ‘‘𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑀺𑀲𑁄𑀤𑀭𑀸𑀤𑀺𑀧𑀓𑁆𑀔𑁂𑀧𑁂𑀦 𑀯𑀸 𑀤𑀲𑁆𑀲𑀻-𑀲𑀤𑁆𑀤𑀲𑁆𑀲 𑀮𑁄𑀧𑀁, 𑀆𑀕𑀢-𑀲𑀤𑁆𑀤𑀲𑁆𑀲 𑀘𑀸𑀕𑀫𑀁 𑀓𑀢𑁆𑀯𑀸 𑀢𑀣𑀸𑀕𑀢𑁄’’𑀢𑀺 𑀯𑀡𑁆𑀡𑁂𑀦𑁆𑀢𑀺.

𑀦𑀺𑀤𑁆𑀤𑁄𑀲𑀢𑀸𑀬 𑀅𑀦𑀼𑀧𑀯𑀚𑁆𑀚𑀁. 𑀧𑀓𑁆𑀔𑀺𑀧𑀺𑀢𑀩𑁆𑀩𑀸𑀪𑀸𑀯𑁂𑀦 𑀅𑀦𑀽𑀦𑀁. 𑀅𑀧𑀦𑁂𑀢𑀩𑁆𑀩𑀸𑀪𑀸𑀯𑁂𑀦 𑀅𑀦𑀥𑀺𑀓𑀁. 𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀼𑀡𑁆𑀡𑀁. 𑀦𑁄 𑀅𑀜𑁆𑀜𑀣𑀸𑀢𑀺 ‘‘𑀢𑀣𑁂𑀯𑀸’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑁂𑀦 𑀲𑀫𑁆𑀧𑀸𑀤𑁂𑀢𑀺. 𑀢𑁂𑀦 𑀬𑀤𑀢𑁆𑀣𑀁 ¶ 𑀪𑀸𑀲𑀺𑀢𑀁, 𑀏𑀓𑀦𑁆𑀢𑁂𑀦 𑀢𑀤𑀢𑁆𑀣𑀦𑀺𑀧𑁆𑀨𑀸𑀤𑀦𑀢𑁄 𑀬𑀣𑀸 𑀪𑀸𑀲𑀺𑀢𑀁 𑀪𑀕𑀯𑀢𑀸, 𑀢𑀣𑁂𑀯𑀸𑀢𑀺 𑀅𑀯𑀺𑀧𑀭𑀻𑀢𑀤𑁂𑀲𑀦𑀢𑀁 𑀤𑀲𑁆𑀲𑁂𑀢𑀺. ‘‘𑀕𑀤𑀢𑁆𑀣𑁄’’𑀢𑀺 𑀏𑀢𑁂𑀦 𑀢𑀣𑀁 𑀕𑀤𑀢𑀻𑀢𑀺 𑀢𑀣𑀸𑀕𑀢𑁄𑀢𑀺 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑁄 𑀓𑀢𑁄 𑀦𑀺𑀭𑀼𑀢𑁆𑀢𑀺𑀦𑀬𑁂𑀦𑀸𑀢𑀺 𑀤𑀲𑁆𑀲𑁂𑀢𑀺.

𑀢𑀣𑀸 𑀕𑀢𑀫𑀲𑁆𑀲𑀸𑀢𑀺 𑀢𑀣𑀸𑀕𑀢𑁄, 𑀕𑀢𑀦𑁆𑀢𑀺 𑀘 𑀓𑀸𑀬𑀲𑁆𑀲 𑀯𑀸𑀘𑀸𑀬 𑀯𑀸 𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸𑀢𑀺 𑀘 𑀯𑀼𑀢𑁆𑀢𑁂 𑀬𑀁𑀢𑀁-𑀲𑀤𑁆𑀤𑀸𑀦𑀁 𑀅𑀩𑁆𑀬𑀪𑀺𑀘𑀸𑀭𑀺𑀲𑀫𑁆𑀩𑀦𑁆𑀥𑀺𑀢𑀸𑀬 ‘‘𑀬𑀣𑀸’’𑀢𑀺 𑀅𑀬𑀫𑀢𑁆𑀣𑁄 𑀉𑀧𑀝𑁆𑀞𑀺𑀢𑁄𑀬𑁂𑀯 𑀳𑁄𑀢𑀺. 𑀓𑀸𑀬𑀯𑀘𑀻𑀓𑀺𑀭𑀺𑀬𑀸𑀦𑀜𑁆𑀘 𑀅𑀜𑁆𑀜𑀫𑀜𑁆𑀜𑀸𑀦𑀼𑀮𑁄𑀫𑁂𑀦 𑀯𑀘𑀦𑀺𑀘𑁆𑀙𑀸𑀬𑀁, 𑀓𑀸𑀬𑀲𑁆𑀲 𑀯𑀸𑀘𑀸, 𑀯𑀸𑀘𑀸𑀬 𑀘 𑀓𑀸𑀬𑁄 𑀲𑀫𑁆𑀩𑀦𑁆𑀥𑀻𑀪𑀸𑀯𑁂𑀦 𑀉𑀧𑀢𑀺𑀝𑁆𑀞𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀕𑀯𑀢𑁄 𑀳𑀻’’𑀢𑀺𑀆𑀤𑀺. 𑀇𑀫𑀲𑁆𑀫𑀺𑀁 𑀧𑀦 𑀅𑀢𑁆𑀣𑁂 𑀢𑀣𑀸𑀯𑀸𑀤𑀺𑀢𑀸𑀬 𑀢𑀣𑀸𑀕𑀢𑁄𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀲𑁄 𑀧𑀦 𑀧𑀼𑀩𑁆𑀩𑁂 𑀧𑀓𑀸𑀭𑀦𑁆𑀢𑀭𑁂𑀦 𑀤𑀲𑁆𑀲𑀺𑀢𑁄𑀢𑀺 𑀆𑀳 ‘‘𑀏𑀯𑀁 𑀢𑀣𑀸𑀓𑀸𑀭𑀺𑀢𑀸𑀬 𑀢𑀣𑀸𑀕𑀢𑁄’’𑀢𑀺.

‘‘𑀢𑀺𑀭𑀺𑀬𑀁 ¶ 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀽’’𑀢𑀺 𑀏𑀢𑁂𑀦 𑀬𑀤𑁂𑀓𑁂 ‘‘𑀢𑀺𑀭𑀺𑀬𑀁 ¶ 𑀯𑀺𑀬 𑀉𑀧𑀭𑀺 𑀅𑀥𑁄 𑀘 𑀲𑀦𑁆𑀢𑀺 𑀮𑁄𑀓𑀥𑀸𑀢𑀼𑀬𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀧𑀝𑀺𑀲𑁂𑀥𑁂𑀢𑀺. 𑀤𑁂𑀲𑀦𑀸𑀯𑀺𑀮𑀸𑀲𑁄𑀬𑁂𑀯 𑀤𑁂𑀲𑀦𑀸𑀯𑀺𑀮𑀸𑀲𑀫𑀬𑁄 𑀬𑀣𑀸 ‘‘𑀧𑀼𑀜𑁆𑀜𑀫𑀬𑀁, 𑀤𑀸𑀦𑀫𑀬’’𑀦𑁆𑀢𑀺𑀆𑀤𑀻𑀲𑀼.

𑀉𑀧𑀲𑀕𑁆𑀕𑀦𑀺𑀧𑀸𑀢𑀸𑀦𑀁 𑀯𑀸𑀘𑀓𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂 𑀢𑀤𑀢𑁆𑀣𑀚𑁄𑀢𑀦𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄 𑀕𑀢-𑀲𑀤𑁆𑀤𑁄𑀬𑁂𑀯 𑀅𑀯𑀕𑀢𑀢𑁆𑀣𑀁 𑀅𑀢𑀻𑀢𑀢𑁆𑀣𑀜𑁆𑀘 𑀯𑀤𑀢𑀻𑀢𑀺 𑀆𑀳 ‘‘𑀕𑀢𑁄𑀢𑀺 𑀅𑀯𑀕𑀢𑁄 𑀅𑀢𑀻𑀢𑁄’’𑀢𑀺. 𑀅𑀣 𑀯𑀸 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀫𑁆𑀩𑁄𑀥𑀺, 𑀏𑀢𑁆𑀣𑀦𑁆𑀢𑀭𑁂 𑀫𑀳𑀸𑀩𑁄𑀥𑀺𑀬𑀸𑀦𑀧𑀝𑀺𑀧𑀢𑁆𑀢𑀺𑀬𑀸 𑀳𑀸𑀦𑀞𑀸𑀦𑀲𑀁𑀓𑀺𑀮𑁂𑀲𑀦𑀺𑀯𑀢𑁆𑀢𑀻𑀦𑀁 𑀅𑀪𑀸𑀯𑀢𑁄 𑀬𑀣𑀸 𑀧𑀡𑀺𑀥𑀸𑀦𑀁, 𑀢𑀣𑀸 𑀕𑀢𑁄 𑀅𑀪𑀺𑀦𑀻𑀳𑀸𑀭𑀸𑀦𑀼𑀭𑀽𑀧𑀁 𑀧𑀝𑀺𑀧𑀦𑁆𑀦𑁄𑀢𑀺 𑀢𑀣𑀸𑀕𑀢𑁄. 𑀅𑀣 𑀯𑀸 𑀫𑀳𑀺𑀤𑁆𑀥𑀺𑀓𑀢𑀸𑀬, 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀉𑀓𑁆𑀓𑀁𑀲𑀸𑀥𑀺𑀕𑀫𑁂𑀦 𑀅𑀦𑀸𑀯𑀭𑀡𑀢𑀸𑀬 𑀘 𑀓𑀢𑁆𑀣𑀘𑀺 𑀧𑀝𑀺𑀖𑀸𑀢𑀸𑀪𑀸𑀯𑀢𑁄 𑀬𑀣𑀸 𑀭𑀼𑀘𑀺, 𑀢𑀣𑀸 𑀓𑀸𑀬𑀯𑀘𑀻𑀘𑀺𑀢𑁆𑀢𑀸𑀦𑀁 𑀕𑀢𑀸𑀦𑀺 𑀕𑀫𑀦𑀸𑀦𑀺 𑀧𑀯𑀢𑁆𑀢𑀺𑀬𑁄 𑀏𑀢𑀲𑁆𑀲𑀸𑀢𑀺 𑀢𑀣𑀸𑀕𑀢𑁄. 𑀬𑀲𑁆𑀫𑀸 𑀘 𑀮𑁄𑀓𑁂 𑀯𑀺𑀥𑀬𑀼𑀢𑁆𑀢𑀕𑀢𑀧𑀓𑀸𑀭-𑀲𑀤𑁆𑀤𑀸 𑀲𑀫𑀸𑀦𑀢𑁆𑀣𑀸 𑀤𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀬𑀣𑀸 𑀯𑀺𑀥𑀸 𑀯𑀺𑀧𑀲𑁆𑀲𑀻𑀆𑀤𑀬𑁄 𑀪𑀕𑀯𑀦𑁆𑀢𑁄, 𑀅𑀬𑀫𑁆𑀧𑀺 𑀪𑀕𑀯𑀸 𑀢𑀣𑀸 𑀯𑀺𑀥𑁄𑀢𑀺 𑀢𑀣𑀸𑀕𑀢𑁄. 𑀬𑀣𑀸 𑀬𑀼𑀢𑁆𑀢𑀸 𑀘 𑀢𑁂 𑀪𑀕𑀯𑀦𑁆𑀢𑁄 𑀅𑀬𑀫𑁆𑀧𑀺 𑀪𑀕𑀯𑀸 𑀢𑀣𑀸 𑀬𑀼𑀢𑁆𑀢𑁄𑀢𑀺 𑀢𑀣𑀸𑀕𑀢𑁄. 𑀅𑀣 𑀯𑀸 𑀬𑀲𑁆𑀫𑀸 𑀲𑀘𑁆𑀘𑀁 𑀢𑀘𑁆𑀙𑀁 𑀢𑀣𑀦𑁆𑀢𑀺 𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀲𑁆𑀫𑀸 𑀢𑀣𑁂𑀦 𑀜𑀸𑀡𑁂𑀦 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄𑀢𑀺. 𑀏𑀯𑀫𑁆𑀧𑀺 𑀢𑀣𑀸𑀕𑀢-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋

‘‘𑀧𑀳𑀸𑀬 ¶ 𑀓𑀸𑀫𑀸𑀤𑀺𑀫𑀮𑁂 𑀬𑀣𑀸 𑀕𑀢𑀸,

𑀲𑀫𑀸𑀥𑀺𑀜𑀸𑀡𑁂𑀳𑀺 𑀯𑀺𑀧𑀲𑁆𑀲𑀺𑀆𑀤𑀬𑁄;

𑀫𑀳𑁂𑀲𑀺𑀦𑁄 𑀲𑀓𑁆𑀬𑀫𑀼𑀦𑀻 𑀚𑀼𑀢𑀺𑀦𑁆𑀥𑀭𑁄,

𑀢𑀣𑀸𑀕𑀢𑁄 𑀢𑁂𑀦 𑀢𑀣𑀸𑀕𑀢𑁄 𑀫𑀢𑁄.

𑀢𑀣𑀜𑁆𑀘 𑀥𑀸𑀢𑀸𑀬𑀢𑀦𑀸𑀤𑀺𑀮𑀓𑁆𑀔𑀡𑀁,

𑀲𑀪𑀸𑀯𑀲𑀸𑀫𑀜𑁆𑀜𑀯𑀺𑀪𑀸𑀕𑀪𑁂𑀤𑀢𑁄;

𑀲𑀬𑀫𑁆𑀪𑀼𑀜𑀸𑀡𑁂𑀦 𑀚𑀺𑀦𑁄 𑀲𑀫𑀸𑀕𑀢𑁄,

𑀢𑀣𑀸𑀕𑀢𑁄 𑀯𑀼𑀘𑁆𑀘𑀢𑀺 𑀲𑀓𑁆𑀬𑀧𑀼𑀗𑁆𑀕𑀯𑁄.

𑀢𑀣𑀸𑀦𑀺 ¶ 𑀲𑀘𑁆𑀘𑀸𑀦𑀺 𑀲𑀫𑀦𑁆𑀢𑀘𑀓𑁆𑀔𑀼𑀦𑀸,

𑀢𑀣𑀸 𑀇𑀤𑀧𑁆𑀧𑀘𑁆𑀘𑀬𑀢𑀸 𑀘 𑀲𑀩𑁆𑀩𑀲𑁄;

𑀅𑀦𑀜𑁆𑀜𑀦𑁂𑀬𑁆𑀬𑁂𑀦 𑀬𑀢𑁄 𑀯𑀺𑀪𑀸𑀯𑀺𑀢𑀸,

𑀬𑀸𑀣𑀸𑀯𑀢𑁄 𑀢𑁂𑀦 𑀚𑀺𑀦𑁄 𑀢𑀣𑀸𑀕𑀢𑁄.

𑀅𑀦𑁂𑀓𑀪𑁂𑀤𑀸𑀲𑀼𑀧𑀺 ¶ 𑀮𑁄𑀓𑀥𑀸𑀢𑀼𑀲𑀼,

𑀚𑀺𑀦𑀲𑁆𑀲 𑀭𑀽𑀧𑀸𑀬𑀢𑀦𑀸𑀤𑀺𑀕𑁄𑀘𑀭𑁂;

𑀯𑀺𑀘𑀺𑀢𑁆𑀢𑀪𑁂𑀤𑀁 𑀢𑀣𑀫𑁂𑀯 𑀤𑀲𑁆𑀲𑀦𑀁,

𑀢𑀣𑀸𑀕𑀢𑁄 𑀢𑁂𑀦 𑀲𑀫𑀦𑁆𑀢𑀮𑁄𑀘𑀦𑁄.

𑀬𑀢𑁄 𑀘 𑀥𑀫𑁆𑀫𑀁 𑀢𑀣𑀫𑁂𑀯 𑀪𑀸𑀲𑀢𑀺,

𑀓𑀭𑁄𑀢𑀺 𑀯𑀸𑀘𑀸𑀬𑀦𑀼𑀮𑁄𑀫 𑀫𑀢𑁆𑀢𑀦𑁄;

𑀕𑀼𑀡𑁂𑀳𑀺 𑀮𑁄𑀓𑀁 𑀅𑀪𑀺𑀪𑀼𑀬𑁆𑀬 𑀇𑀭𑀺𑀬𑀢𑀺,

𑀢𑀣𑀸𑀕𑀢𑁄 𑀢𑁂𑀦𑀧𑀺 𑀮𑁄𑀓𑀦𑀸𑀬𑀓𑁄.

𑀬𑀣𑀸𑀪𑀺𑀦𑀻𑀳𑀸𑀭𑀫𑀢𑁄 𑀬𑀣𑀸𑀭𑀼𑀘𑀺,

𑀧𑀯𑀢𑁆𑀢𑀯𑀸𑀘𑀸𑀢𑀦𑀼𑀘𑀺𑀢𑁆𑀢𑀪𑀸𑀯𑀢𑁄;

𑀬𑀣𑀸𑀯𑀺𑀥𑀸 𑀬𑁂𑀦 𑀧𑀼𑀭𑀸 𑀫𑀳𑁂𑀲𑀺𑀦𑁄,

𑀢𑀣𑀸𑀯𑀺𑀥𑁄 𑀢𑁂𑀦 𑀚𑀺𑀦𑁄 𑀢𑀣𑀸𑀕𑀢𑁄’’𑀢𑀺. (𑀇𑀢𑀺𑀯𑀼. 𑀅𑀝𑁆𑀞. 𑁩𑁮);

𑀲𑀗𑁆𑀕𑀳𑀕𑀸𑀣𑀸 𑀫𑀼𑀔𑀫𑀢𑁆𑀢𑀫𑁂𑀯. 𑀓𑀲𑁆𑀫𑀸? 𑀅𑀧𑁆𑀧𑀫𑀸𑀤𑀧𑀤𑀁 𑀯𑀺𑀬 𑀲𑀓𑀮𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀸 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑀸𑀦𑀁 𑀲𑀗𑁆𑀕𑀸𑀳𑀓𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀲𑀩𑁆𑀩𑀸𑀓𑀸𑀭𑁂𑀦𑀸’’𑀢𑀺𑀆𑀤𑀺.

‘‘𑀢𑀁 ¶ 𑀓𑀢𑀫𑀦𑁆𑀢𑀺 𑀧𑀼𑀘𑁆𑀙𑀢𑀻’’𑀢𑀺 𑀏𑀢𑁂𑀦 ‘‘𑀓𑀢𑀫𑀜𑁆𑀘 𑀢𑀁 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀯𑀘𑀦𑀲𑁆𑀲 𑀲𑀸𑀫𑀜𑁆𑀜𑀢𑁄 𑀧𑀼𑀘𑁆𑀙𑀸𑀪𑀸𑀯𑁄 𑀤𑀲𑁆𑀲𑀺𑀢𑁄 𑀅𑀯𑀺𑀲𑁂𑀲𑀢𑁄 𑀳𑀺 𑀢𑀲𑁆𑀲 𑀧𑀼𑀘𑁆𑀙𑀸𑀯𑀺𑀲𑁂𑀲𑀪𑀸𑀯𑀜𑀸𑀧𑀦𑀢𑁆𑀣𑀁 𑀫𑀳𑀸𑀦𑀺𑀤𑁆𑀤𑁂𑀲𑁂 𑀆𑀕𑀢𑀸 𑀲𑀩𑁆𑀩𑀸𑀯 𑀧𑀼𑀘𑁆𑀙𑀸 𑀅𑀢𑁆𑀣𑀼𑀤𑁆𑀥𑀸𑀭𑀦𑀬𑁂𑀦 𑀤𑀲𑁆𑀲𑁂𑀢𑀺 ‘‘𑀢𑀢𑁆𑀣 𑀧𑀼𑀘𑁆𑀙𑀸 𑀦𑀸𑀫𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀢𑀢𑁆𑀣𑀸𑀢𑀺 ‘‘𑀢𑀁 𑀓𑀢𑀫𑀦𑁆𑀢𑀺 𑀧𑀼𑀘𑁆𑀙𑀢𑀻’’𑀢𑀺 𑀏𑀢𑁆𑀣 𑀬𑀤𑁂𑀢𑀁 𑀲𑀸𑀫𑀜𑁆𑀜𑀢𑁄 𑀧𑀼𑀘𑁆𑀙𑀸𑀯𑀘𑀦𑀁, 𑀢𑀲𑁆𑀫𑀺𑀁.

𑀮𑀓𑁆𑀔𑀡𑀦𑁆𑀢𑀺 𑀜𑀸𑀢𑀼𑀁 𑀇𑀘𑁆𑀙𑀺𑀢𑁄 𑀬𑁄 𑀓𑁄𑀘𑀺 𑀲𑀪𑀸𑀯𑁄. ‘‘𑀅𑀜𑁆𑀜𑀸𑀢’’𑀦𑁆𑀢𑀺 𑀬𑁂𑀦 𑀓𑁂𑀦𑀘𑀺 𑀜𑀸𑀡𑁂𑀦 𑀅𑀜𑁆𑀜𑀸𑀢𑀪𑀸𑀯𑀫𑀸𑀳, ‘‘𑀅𑀤𑀺𑀝𑁆𑀞’’𑀦𑁆𑀢𑀺 𑀤𑀲𑁆𑀲𑀦𑀪𑀽𑀢𑁂𑀦 𑀜𑀸𑀡𑁂𑀦 𑀧𑀘𑁆𑀘𑀓𑁆𑀔𑀁 𑀯𑀺𑀬 𑀅𑀤𑀺𑀝𑁆𑀞𑀢𑀁. ‘‘𑀅𑀢𑀼𑀮𑀺𑀢’’𑀦𑁆𑀢𑀺 ¶ ‘‘𑀏𑀢𑁆𑀢𑀓𑀫𑁂𑀢’’𑀦𑁆𑀢𑀺 𑀢𑀼𑀮𑀦𑀪𑀽𑀢𑁂𑀦 𑀅𑀢𑀽𑀮𑀺𑀢𑀢𑀁, ‘‘𑀅𑀢𑀻𑀭𑀺𑀢’’𑀦𑁆𑀢𑀺 𑀢𑀻𑀭𑀡𑀪𑀽𑀢𑁂𑀦 𑀅𑀓𑀢𑀜𑀸𑀡𑀓𑀺𑀭𑀺𑀬𑀸𑀲𑀫𑀸𑀧𑀦𑀢𑀁, ‘‘𑀅𑀯𑀺𑀪𑀽𑀢’’𑀦𑁆𑀢𑀺 𑀜𑀸𑀡𑀲𑁆𑀲 𑀅𑀧𑀸𑀓𑀝𑀪𑀸𑀯𑀁, ‘‘𑀅𑀯𑀺𑀪𑀸𑀯𑀺𑀢’’𑀦𑁆𑀢𑀺 𑀜𑀸𑀡𑁂𑀦 𑀅𑀧𑀸𑀓𑀝𑀻𑀓𑀢𑀪𑀸𑀯𑀁. 𑀅𑀤𑀺𑀝𑁆𑀞𑀁 𑀚𑁄𑀢𑀻𑀬𑀢𑀺 𑀏𑀢𑀸𑀬𑀸𑀢𑀺 𑀅𑀤𑀺𑀝𑁆𑀞𑀚𑁄𑀢𑀦𑀸. 𑀤𑀺𑀝𑁆𑀞𑀁 𑀲𑀁𑀲𑀦𑁆𑀤𑀻𑀬𑀢𑀺 𑀏𑀢𑀸𑀬𑀸𑀢𑀺 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸, 𑀲𑀸𑀓𑀘𑁆𑀙𑀸𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑀓𑀭𑀡𑀁. 𑀯𑀺𑀫𑀢𑀺 𑀙𑀺𑀚𑁆𑀚𑀢𑀺 𑀏𑀢𑀸𑀬𑀸𑀢𑀺 𑀯𑀺𑀫𑀢𑀺𑀘𑁆𑀙𑁂𑀤𑀦𑀸. 𑀅𑀦𑀼𑀫𑀢𑀺𑀬𑀸 𑀧𑀼𑀘𑁆𑀙𑀸 𑀅𑀦𑀼𑀫𑀢𑀺𑀧𑀼𑀘𑁆𑀙𑀸. ‘‘𑀢𑀁 𑀓𑀺𑀁 𑀫𑀜𑁆𑀜𑀣 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺 𑀧𑀼𑀘𑁆𑀙𑀸𑀬 ¶ 𑀳𑀺 ‘‘𑀓𑀸 𑀢𑀼𑀫𑁆𑀳𑀸𑀓𑀁 𑀅𑀦𑀼𑀫𑀢𑀻’’𑀢𑀺 𑀅𑀦𑀼𑀫𑀢𑀺 𑀧𑀼𑀘𑁆𑀙𑀺𑀢𑀸 𑀳𑁄𑀢𑀺. 𑀓𑀣𑁂𑀢𑀼𑀓𑀫𑁆𑀬𑀢𑀸𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀬.

𑁮. 𑀲𑀭𑀲𑁂𑀦𑁂𑀯 𑀧𑀢𑀦𑀲𑀪𑀸𑀯𑀲𑁆𑀲 𑀅𑀦𑁆𑀢𑀭𑀸 𑀏𑀯 𑀅𑀢𑀻𑀯 𑀧𑀸𑀢𑀦𑀁 𑀅𑀢𑀺𑀧𑀸𑀢𑁄, 𑀲𑀡𑀺𑀓𑀁 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀲𑀻𑀖𑀁 𑀧𑀸𑀢𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀢𑀺𑀓𑁆𑀓𑀫𑁆𑀫 𑀯𑀸 𑀲𑀢𑁆𑀣𑀸𑀤𑀻𑀳𑀺 𑀅𑀪𑀺𑀪𑀯𑀺𑀢𑁆𑀯𑀸 𑀧𑀸𑀢𑀦𑀁 𑀅𑀢𑀺𑀧𑀸𑀢𑁄. 𑀲𑀢𑁆𑀢𑁄𑀢𑀺 𑀔𑀦𑁆𑀥𑀲𑀦𑁆𑀢𑀸𑀦𑁄. 𑀢𑀢𑁆𑀣 𑀳𑀺 𑀲𑀢𑁆𑀢𑀧𑀜𑁆𑀜𑀢𑁆𑀢𑀺. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀭𑀽𑀧𑀸𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂 𑀳𑀺 𑀯𑀺𑀓𑁄𑀧𑀺𑀢𑁂 𑀇𑀢𑀭𑀫𑁆𑀧𑀺 𑀢𑀁𑀲𑀫𑁆𑀩𑀦𑁆𑀥𑀢𑀸𑀬 𑀯𑀺𑀦𑀲𑁆𑀲𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 ‘‘𑀧𑀸𑀡𑀲𑁆𑀲 𑀅𑀢𑀺𑀧𑀸𑀢𑁄, 𑀧𑀸𑀡𑁄𑀢𑀺 𑀘𑁂𑀢𑁆𑀣 𑀯𑁄𑀳𑀸𑀭𑀢𑁄 𑀲𑀢𑁆𑀢𑁄’’𑀢𑀺 𑀘 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀦𑀦𑀼 𑀦𑀺𑀭𑀯𑀲𑁂𑀲𑀸𑀦𑀁 𑀧𑀸𑀡𑀸𑀦𑀁 𑀅𑀢𑀺𑀧𑀸𑀢𑀢𑁄 𑀯𑀺𑀭𑀢𑀺 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻𑀢𑀺 𑀲𑀩𑁆𑀩𑁂 𑀧𑀸𑀡𑀪𑀽𑀢𑁂’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑀅𑀝𑁆𑀞. 𑁧.𑀘𑀽𑀴𑀲𑀻𑀮𑀯𑀡𑁆𑀡𑀦𑀸) 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑀦𑁆𑀢𑀺? 𑀲𑀘𑁆𑀘𑀫𑁂𑀢𑀁, 𑀧𑀸𑀡𑀪𑀸𑀯𑀲𑀸𑀫𑀜𑁆𑀜𑀯𑀲𑁂𑀦 𑀧𑀦𑁂𑀢𑁆𑀣 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀲𑀩𑁆𑀩𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂𑀦 𑀢𑀢𑁆𑀣 𑀧𑀼𑀣𑀼𑀢𑁆𑀢𑀁 𑀯𑀺𑀜𑁆𑀜𑀸𑀬𑀫𑀸𑀦𑀫𑁂𑀯𑀸𑀢𑀺 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑀁 𑀅𑀓𑀢𑁆𑀯𑀸 𑀪𑁂𑀤𑀯𑀘𑀦𑀺𑀘𑁆𑀙𑀸𑀯𑀲𑁂𑀦 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 ¶ . 𑀓𑀺𑀜𑁆𑀘 𑀪𑀺𑀬𑁆𑀬𑁄𑀲𑀸𑀫𑀜𑁆𑀜𑀢𑁄 𑀲𑀁𑀯𑀭𑀲𑀫𑀸𑀤𑀸𑀦𑀁, 𑀢𑀩𑁆𑀩𑀺𑀲𑁂𑀲𑀢𑁄 𑀲𑀁𑀯𑀭𑀪𑁂𑀤𑁄𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀜𑀸𑀧𑀦𑀢𑁆𑀣𑀁 𑀅𑀬𑀁 𑀯𑀘𑀦𑀪𑁂𑀤𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀸𑀬 𑀘𑁂𑀢𑀦𑀸𑀬 𑀯𑀢𑁆𑀢𑀫𑀸𑀦𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 ¶ 𑀉𑀧𑀓𑁆𑀓𑀫𑀓𑀭𑀡𑀳𑁂𑀢𑀼 𑀢𑀁 𑀫𑀳𑀸𑀪𑀽𑀢𑀧𑁆𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀫𑀳𑀸𑀪𑀽𑀢𑀸 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀲𑀸 𑀢𑀸𑀤𑀺𑀲𑀧𑁆𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀧𑀸𑀡𑀸𑀢𑀺𑀧𑀸𑀢𑁄. 𑀮𑀤𑁆𑀥𑀼𑀧𑀓𑁆𑀓𑀫𑀸𑀦𑀺 𑀳𑀺 𑀪𑀽𑀢𑀸𑀦𑀺 𑀇𑀢𑀭𑀪𑀽𑀢𑀸𑀦𑀺 𑀯𑀺𑀬 𑀦 𑀯𑀺𑀲𑀤𑀸𑀦𑀻𑀢𑀺 𑀲𑀫𑀸𑀦𑀚𑀸𑀢𑀺𑀬𑀸𑀦𑀁 𑀓𑀸𑀭𑀡𑀁 𑀦 𑀳𑁄𑀦𑁆𑀢𑀻𑀢𑀺. ‘‘𑀓𑀸𑀬𑀯𑀘𑀻𑀤𑁆𑀯𑀸𑀭𑀸𑀦’’𑀦𑁆𑀢𑀺 𑀏𑀢𑁂𑀦 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀸𑀬 𑀯𑀥𑀓𑀘𑁂𑀢𑀦𑀸𑀬 𑀧𑀸𑀡𑀸𑀢𑀺𑀧𑀸𑀢𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺.

𑀧𑀬𑁄𑀕𑀯𑀢𑁆𑀣𑀼𑀫𑀳𑀦𑁆𑀢𑀢𑀸𑀤𑀻𑀳𑀺 𑀫𑀳𑀸𑀲𑀸𑀯𑀚𑁆𑀚𑀢𑀸 𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀘𑁂𑀢𑀦𑀸𑀬 𑀩𑀮𑀯𑀪𑀸𑀯𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀳𑀺 𑀧𑀬𑁄𑀕𑀲𑁆𑀲 𑀲𑀳𑀲𑀸 𑀦𑀺𑀧𑁆𑀨𑀸𑀤𑀦𑀯𑀲𑁂𑀦 𑀓𑀺𑀘𑁆𑀘𑀲𑀸𑀥𑀺𑀓𑀸𑀬 𑀩𑀳𑀼𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀚𑀯𑀦𑁂𑀳𑀺 𑀮𑀤𑁆𑀥𑀸𑀲𑁂𑀯𑀦𑀸𑀬 𑀘 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀬 𑀯𑀲𑁂𑀦 𑀧𑀬𑁄𑀕𑀲𑁆𑀲 𑀫𑀳𑀦𑁆𑀢𑀪𑀸𑀯𑁄. 𑀲𑀢𑀺𑀧𑀺 𑀓𑀤𑀸𑀘𑀺 𑀔𑀼𑀤𑁆𑀤𑀓𑁂 𑀘𑁂𑀯 𑀫𑀳𑀦𑁆𑀢𑁂 𑀘 𑀧𑀸𑀡𑁂 𑀧𑀬𑁄𑀕𑀲𑁆𑀲 𑀲𑀫𑀪𑀸𑀯𑁂 𑀫𑀳𑀦𑁆𑀢𑀁 𑀳𑀦𑀦𑁆𑀢𑀲𑁆𑀲 𑀘𑁂𑀢𑀦𑀸 𑀢𑀺𑀩𑁆𑀩𑀢𑀭𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀢𑁆𑀣𑀼𑀲𑁆𑀲 𑀫𑀳𑀦𑁆𑀢𑀪𑀸𑀯𑁄. 𑀇𑀢𑀺 𑀉𑀪𑀬𑀁 𑀧𑁂𑀢𑀁 𑀘𑁂𑀢𑀦𑀸𑀬 𑀩𑀮𑀯𑀪𑀸𑀯𑁂𑀦𑁂𑀯 𑀳𑁄𑀢𑀺. 𑀢𑀣𑀸 𑀳𑀺 𑀳𑀦𑁆𑀢𑀩𑁆𑀩𑀲𑁆𑀲 𑀫𑀳𑀸𑀕𑀼𑀡𑀪𑀸𑀯𑁂𑀦 𑀢𑀢𑁆𑀣 𑀧𑀯𑀢𑁆𑀢𑀉𑀧𑀓𑀸𑀭𑀘𑁂𑀢𑀦𑀸 𑀯𑀺𑀬 𑀔𑁂𑀢𑁆𑀢𑀯𑀺𑀲𑁂𑀲𑀦𑀺𑀩𑁆𑀩𑀢𑁆𑀢𑀺𑀬𑀸 𑀅𑀧𑀓𑀸𑀭𑀘𑁂𑀢𑀦𑀸𑀧𑀺 𑀩𑀮𑀯𑀢𑀻, 𑀢𑀺𑀩𑁆𑀩𑀢𑀭𑀸 𑀘 𑀉𑀧𑁆𑀧𑀚𑁆𑀚𑀢𑀻𑀢𑀺 𑀢𑀲𑁆𑀲𑀸 𑀫𑀳𑀸𑀲𑀸𑀯𑀚𑁆𑀚𑀢𑀸 𑀤𑀝𑁆𑀞𑀩𑁆𑀩𑀸. 𑀢𑀲𑁆𑀫𑀸 𑀧𑀬𑁄𑀕𑀯𑀢𑁆𑀣𑀼𑀆𑀤𑀺𑀧𑀘𑁆𑀘𑀬𑀸𑀦𑀁 𑀅𑀫𑀳𑀢𑁆𑀢𑁂𑀧𑀺 𑀫𑀳𑀸𑀕𑀼𑀡𑀢𑀸𑀤𑀺𑀧𑀘𑁆𑀘𑀬𑁂𑀳𑀺 𑀘𑁂𑀢𑀦𑀸𑀬 𑀩𑀮𑀯𑀪𑀸𑀯𑀸𑀤𑀺𑀯𑀲𑁂𑀦𑁂𑀯 𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀫𑁆𑀪𑀭𑀻𑀬𑀦𑁆𑀢𑀺 ¶ 𑀏𑀢𑁂𑀳𑀻𑀢𑀺 𑀲𑀫𑁆𑀪𑀸𑀭𑀸, 𑀅𑀗𑁆𑀕𑀸𑀦𑀺. 𑀢𑁂𑀲𑀼 𑀧𑀸𑀡𑀲𑀜𑁆𑀜𑀺𑀢𑀸𑀯𑀥𑀓𑀘𑀺𑀢𑁆𑀢𑀸𑀦𑀺 𑀧𑀼𑀩𑁆𑀩𑀪𑀸𑀕𑀺𑀬𑀸𑀦𑀺𑀧𑀺 𑀳𑁄𑀦𑁆𑀢𑀺. 𑀉𑀧𑀓𑁆𑀓𑀫𑁄 𑀯𑀥𑀓𑀘𑁂𑀢𑀦𑀸𑀲𑀫𑀼𑀝𑁆𑀞𑀸𑀧𑀺𑀢𑁄. 𑀧𑀜𑁆𑀘𑀲𑀫𑁆𑀪𑀸𑀭𑀯𑀢𑀻 𑀧𑀸𑀡𑀸𑀢𑀺𑀧𑀸𑀢𑀘𑁂𑀢𑀦𑀸𑀢𑀺 𑀲𑀸 𑀧𑀜𑁆𑀘𑀲𑀫𑁆𑀪𑀸𑀭𑀯𑀺𑀦𑀺𑀫𑀼𑀢𑁆𑀢𑀸 𑀤𑀝𑁆𑀞𑀩𑁆𑀩𑀸. 𑀯𑀺𑀚𑁆𑀚𑀸𑀫𑀬𑁄 𑀫𑀦𑁆𑀢𑀧𑀭𑀺𑀚𑀧𑁆𑀧𑀦𑀧𑀬𑁄𑀕𑁄 𑀆𑀣𑀩𑁆𑀩𑀡𑀺𑀓𑀸𑀤𑀻𑀦𑀁 𑀯𑀺𑀬. 𑀇𑀤𑁆𑀥𑀺𑀫𑀬𑁄 𑀓𑀫𑁆𑀫𑀯𑀺𑀧𑀸𑀓𑀚𑀺𑀤𑁆𑀥𑀺𑀫𑀬𑁄 𑀤𑀸𑀞𑀸𑀓𑁄𑀝𑀓𑀸𑀤𑀻𑀦𑀁 𑀯𑀺𑀬. 𑀅𑀢𑀺𑀯𑀺𑀬 𑀧𑀧𑀜𑁆𑀘𑁄𑀢𑀺 𑀅𑀢𑀺𑀫𑀳𑀸𑀯𑀺𑀢𑁆𑀣𑀸𑀭𑁄.

𑀏𑀢𑁆𑀣𑀸𑀳 𑁋 𑀔𑀡𑁂 𑀔𑀡𑁂 𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀓𑁄 𑀳𑀦𑁆𑀢𑀺, 𑀓𑁄 𑀯𑀸 𑀳𑀜𑁆𑀜𑀢𑀺, 𑀬𑀤𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀲𑀦𑁆𑀢𑀸𑀦𑁄, 𑀲𑁄 𑀅𑀭𑀽𑀧𑀢𑀸𑀬 𑀦 𑀙𑁂𑀤𑀦𑀪𑁂𑀤𑀦𑀸𑀤𑀺𑀯𑀲𑁂𑀦 ¶ 𑀯𑀺𑀓𑁄𑀧𑀦𑀲𑀫𑀢𑁆𑀣𑁄, 𑀦𑀸𑀧𑀺 ¶ 𑀯𑀺𑀓𑁄𑀧𑀦𑀻𑀬𑁄, 𑀅𑀣 𑀭𑀽𑀧𑀲𑀦𑁆𑀢𑀸𑀦𑁄, 𑀲𑁄 𑀅𑀘𑁂𑀢𑀦𑀢𑀸𑀬 𑀓𑀝𑁆𑀞𑀓𑀮𑀺𑀗𑁆𑀕𑀭𑀽𑀧𑀫𑁄𑀢𑀺 𑀦 𑀢𑀢𑁆𑀣 𑀙𑁂𑀤𑀦𑀸𑀤𑀺𑀦𑀸 𑀧𑀸𑀡𑀸𑀢𑀺𑀧𑀸𑀢𑁄 𑀮𑀩𑁆𑀪𑀢𑀺 𑀬𑀣𑀸 𑀫𑀢𑀲𑀭𑀻𑀭𑁂, 𑀧𑀬𑁄𑀕𑁄𑀧𑀺 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀳𑀭𑀡𑀧𑁆𑀧𑀓𑀸𑀭𑀸𑀤𑀺 𑀅𑀢𑀻𑀢𑁂𑀲𑀼 𑀯𑀸 𑀲𑀗𑁆𑀔𑀸𑀭𑁂𑀲𑀼 𑀪𑀯𑁂𑀬𑁆𑀬 𑀅𑀦𑀸𑀕𑀢𑁂𑀲𑀼 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀯𑀸, 𑀢𑀢𑁆𑀣 𑀦 𑀢𑀸𑀯 𑀅𑀢𑀻𑀢𑀸𑀦𑀸𑀕𑀢𑁂𑀲𑀼 𑀲𑀫𑁆𑀪𑀯𑀢𑀺 𑀢𑁂𑀲𑀁 𑀅𑀪𑀸𑀯𑀢𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀘 𑀲𑀗𑁆𑀔𑀸𑀭𑀸𑀦𑀁 𑀔𑀡𑀺𑀓𑀢𑁆𑀢𑀸 𑀲𑀭𑀲𑁂𑀦𑁂𑀯 𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑀢𑀸𑀬 𑀯𑀺𑀦𑀸𑀲𑀸𑀪𑀺𑀫𑀼𑀔𑁂𑀲𑀼 𑀦𑀺𑀧𑁆𑀧𑀬𑁄𑀚𑀦𑁄 𑀧𑀬𑁄𑀕𑁄 𑀲𑀺𑀬𑀸, 𑀯𑀺𑀦𑀸𑀲𑀲𑁆𑀲 𑀘 𑀓𑀸𑀭𑀡𑀭𑀳𑀺𑀢𑀢𑁆𑀢𑀸 𑀦 𑀧𑀳𑀭𑀡𑀧𑁆𑀧𑀓𑀸𑀭𑀸𑀤𑀺𑀧𑀬𑁄𑀕𑀳𑁂𑀢𑀼𑀓𑀁 𑀫𑀭𑀡𑀁, 𑀦𑀺𑀭𑀻𑀳𑀓𑀢𑀸𑀬 𑀘 𑀲𑀗𑁆𑀔𑀸𑀭𑀸𑀦𑀁 𑀓𑀲𑁆𑀲 𑀲𑁄 𑀧𑀬𑁄𑀕𑁄, 𑀔𑀡𑀺𑀓𑀢𑁆𑀢𑀸 𑀯𑀥𑀸𑀥𑀺𑀧𑁆𑀧𑀸𑀬𑀲𑀫𑀓𑀸𑀮𑀪𑀺𑀚𑁆𑀚𑀦𑀓𑀲𑁆𑀲 𑀓𑀺𑀭𑀺𑀬𑀸𑀧𑀭𑀺𑀬𑁄𑀲𑀸𑀦𑀓𑀸𑀮𑀸𑀦𑀯𑀝𑁆𑀞𑀸𑀦𑀢𑁄 𑀓𑀲𑁆𑀲 𑀯𑀸 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀩𑀤𑁆𑀥𑁄𑀢𑀺.

𑀯𑀼𑀘𑁆𑀘𑀢𑁂 𑁋 𑀬𑀣𑀸𑀯𑀼𑀢𑁆𑀢𑀯𑀥𑀓𑀘𑁂𑀢𑀦𑀸𑀲𑀳𑀺𑀢𑁄 𑀲𑀗𑁆𑀔𑀸𑀭𑀸𑀦𑀁 𑀧𑀼𑀜𑁆𑀚𑁄 𑀲𑀢𑁆𑀢𑀲𑀗𑁆𑀔𑀸𑀢𑁄 𑀳𑀦𑁆𑀢𑀸, 𑀢𑁂𑀦 𑀧𑀯𑀢𑁆𑀢𑀺𑀢𑀯𑀥𑀓𑀧𑀬𑁄𑀕𑀦𑀺𑀫𑀺𑀢𑁆𑀢𑀁 𑀅𑀧𑀕𑀢𑀼𑀲𑁆𑀫𑀸𑀯𑀺𑀜𑁆𑀜𑀸𑀡𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁄 𑀫𑀢𑀯𑁄𑀳𑀸𑀭𑀧𑁆𑀧𑀯𑀢𑁆𑀢𑀺𑀦𑀺𑀩𑀦𑁆𑀥𑁄 𑀬𑀣𑀸𑀯𑀼𑀢𑁆𑀢𑀯𑀥𑀧𑁆𑀧𑀬𑁄𑀕𑀸𑀓𑀭𑀡𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑁄 𑀭𑀽𑀧𑀸𑀭𑀽𑀧𑀥𑀫𑁆𑀫𑀲𑀫𑀽𑀳𑁄 𑀳𑀜𑁆𑀜𑀢𑀺, 𑀓𑁂𑀯𑀮𑁄 𑀯𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀲𑀦𑁆𑀢𑀸𑀦𑁄. 𑀯𑀥𑀧𑁆𑀧𑀬𑁄𑀕𑀸𑀯𑀺𑀲𑀬𑀪𑀸𑀯𑁂𑀧𑀺 𑀢𑀲𑁆𑀲 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀭𑀽𑀧𑀲𑀦𑁆𑀢𑀸𑀦𑀸𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀭𑀽𑀧𑀲𑀦𑁆𑀢𑀸𑀦𑁂 𑀧𑀭𑁂𑀦 𑀧𑀬𑁄𑀚𑀺𑀢𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀧𑀬𑁄𑀕𑀯𑀲𑁂𑀦 𑀢𑀦𑁆𑀦𑀺𑀩𑁆𑀩𑀢𑁆𑀢𑀺𑀯𑀺𑀩𑀦𑁆𑀥𑀓𑀯𑀺𑀲𑀤𑀺𑀲𑀭𑀽𑀧𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀳𑀢𑁂 𑀯𑀺𑀘𑁆𑀙𑁂𑀤𑁄 𑀳𑁄𑀢𑀻𑀢𑀺 𑀦 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀅𑀲𑀫𑁆𑀪𑀯𑁄, 𑀦𑀸𑀧𑀺 𑀅𑀳𑁂𑀢𑀼𑀓𑁄 𑀧𑀸𑀡𑀸𑀢𑀺𑀧𑀸𑀢𑁄, 𑀦 𑀘 𑀧𑀬𑁄𑀕𑁄 𑀦𑀺𑀧𑁆𑀧𑀬𑁄𑀚𑀦𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀓𑀢𑀧𑀬𑁄𑀕𑀯𑀲𑁂𑀦 𑀢𑀤𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀦𑀸𑀭𑀳𑀲𑁆𑀲 𑀲𑀗𑁆𑀔𑀸𑀭𑀓𑀮𑀸𑀧𑀲𑁆𑀲 𑀢𑀣𑀸 𑀅𑀦𑀼𑀧𑁆𑀧𑀢𑁆𑀢𑀺𑀢𑁄, 𑀔𑀡𑀺𑀓𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀔𑀡𑀺𑀓𑀫𑀭𑀡𑀲𑁆𑀲 𑀇𑀥 𑀫𑀭𑀡𑀪𑀸𑀯𑁂𑀦 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸, 𑀲𑀦𑁆𑀢𑀢𑀺𑀫𑀭𑀡𑀲𑁆𑀲 𑀘 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀲𑀳𑁂𑀢𑀼𑀓𑀪𑀸𑀯𑀢𑁄 𑀦 𑀅𑀳𑁂𑀢𑀼𑀓𑀁 𑀫𑀭𑀡𑀁, 𑀦 𑀘 𑀓𑀢𑁆𑀢𑀼𑀭𑀳𑀺𑀢𑁄 𑀧𑀸𑀡𑀸𑀢𑀺𑀧𑀸𑀢𑀧𑁆𑀧𑀬𑁄𑀕𑁄 𑀦𑀺𑀭𑀻𑀳𑀓𑁂𑀲𑀼𑀧𑀺 𑀲𑀗𑁆𑀔𑀸𑀭𑁂𑀲𑀼 𑀲𑀦𑁆𑀦𑀺𑀳𑀺𑀢𑀢𑀸𑀫𑀢𑁆𑀢𑁂𑀦 𑀉𑀧𑀓𑀸𑀭𑀓𑁂𑀲𑀼 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀨𑀮𑀼𑀧𑁆𑀧𑀸𑀤𑀦𑀦𑀺𑀬𑀢𑁂𑀲𑀼 ¶ 𑀓𑀸𑀭𑀡𑁂𑀲𑀼 𑀓𑀢𑁆𑀢𑀼𑀯𑁄𑀳𑀸𑀭𑀲𑀺𑀤𑁆𑀥𑀺𑀢𑁄 𑀬𑀣𑀸 ‘‘𑀧𑀤𑀻𑀧𑁄 𑀧𑀓𑀸𑀲𑁂𑀢𑀺 𑀦𑀺𑀲𑀸𑀓𑀭𑁄 𑀘𑀦𑁆𑀤𑀺𑀫𑀸’’𑀢𑀺 𑀘, 𑀦 𑀘 𑀓𑁂𑀯𑀮𑀲𑁆𑀲 𑀯𑀥𑀸𑀥𑀺𑀧𑁆𑀧𑀸𑀬𑀲𑀳𑀪𑀼𑀦𑁄 𑀘𑀺𑀢𑁆𑀢𑀘𑁂𑀢𑀲𑀺𑀓𑀓𑀮𑀸𑀧𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑁄 𑀇𑀘𑁆𑀙𑀺𑀢𑁄 𑀲𑀦𑁆𑀢𑀸𑀦𑀯𑀲𑁂𑀦 𑀅𑀯𑀝𑁆𑀞𑀺𑀢𑀲𑁆𑀲𑁂𑀯 𑀧𑀝𑀺𑀚𑀸𑀦𑀦𑀢𑁄, 𑀲𑀦𑁆𑀢𑀸𑀦𑀯𑀲𑁂𑀦 ¶ 𑀧𑀯𑀢𑁆𑀢𑀫𑀸𑀦𑀸𑀦𑀜𑁆𑀘 𑀧𑀤𑀻𑀧𑀸𑀤𑀻𑀦𑀁 𑀅𑀢𑁆𑀣𑀓𑀺𑀭𑀺𑀬𑀸𑀲𑀺𑀤𑁆𑀥𑀺 𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁂𑀯 𑀧𑀸𑀡𑀸𑀢𑀺𑀧𑀸𑀢𑁂𑀦 𑀓𑀫𑁆𑀫𑀩𑀤𑁆𑀥𑁄. 𑀅𑀬𑀜𑁆𑀘 𑀯𑀺𑀘𑀸𑀭𑁄 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼𑀧𑀺 𑀬𑀣𑀸𑀲𑀫𑁆𑀪𑀯𑀁 𑀯𑀺𑀪𑀸𑀯𑁂𑀢𑀩𑁆𑀩𑁄.

‘‘𑀧𑀳𑀻𑀦𑀓𑀸𑀮𑀢𑁄 ¶ 𑀧𑀝𑁆𑀞𑀸𑀬 𑀯𑀺𑀭𑀢𑁄𑀯𑀸’’𑀢𑀺 𑀏𑀢𑁂𑀦 𑀧𑀳𑀸𑀦𑀳𑁂𑀢𑀼𑀓𑀸 𑀇𑀥𑀸𑀥𑀺𑀧𑁆𑀧𑁂𑀢𑀸 𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀫𑁆𑀫𑀓𑁆𑀔𑀬𑀜𑀸𑀡𑁂𑀦 𑀳𑀺 𑀧𑀸𑀡𑀸𑀢𑀺𑀧𑀸𑀢𑀤𑀼𑀲𑁆𑀲𑀻𑀮𑁆𑀬𑀲𑁆𑀲 𑀧𑀳𑀻𑀦𑀢𑁆𑀢𑀸 𑀪𑀕𑀯𑀸 𑀅𑀘𑁆𑀘𑀦𑁆𑀢𑀫𑁂𑀯 𑀢𑀢𑁄 𑀧𑀝𑀺𑀯𑀺𑀭𑀢𑁄𑀢𑀺 𑀯𑀼𑀘𑁆𑀘𑀢𑀺 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀳𑀸𑀦𑀯𑀺𑀭𑀢𑀻𑀦𑀁 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀧𑀳𑀸𑀦𑀯𑀺𑀭𑀫𑀡𑀸𑀦𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑀸𑀮𑀢𑀸 𑀦𑀢𑁆𑀣𑀺, 𑀫𑀕𑁆𑀕𑀥𑀫𑁆𑀫𑀸𑀦𑀁 𑀧𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀲𑀫𑁆𑀫𑀸𑀯𑀸𑀘𑀸𑀤𑀻𑀦𑀜𑁆𑀘 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂 𑀅𑀧𑁂𑀓𑁆𑀔𑀺𑀢𑁂 𑀲𑀳𑀚𑀸𑀢𑀸𑀦𑀫𑁆𑀧𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀕𑀳𑀡𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀪𑀸𑀯𑁂𑀦𑁂𑀯 𑀳𑁄𑀢𑀻𑀢𑀺 𑀕𑀳𑀡𑀧𑁆𑀧𑀯𑀢𑁆𑀢𑀺𑀆𑀓𑀸𑀭𑀯𑀲𑁂𑀦 𑀧𑀘𑁆𑀘𑀬𑀪𑀽𑀢𑁂𑀲𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀲𑀼 𑀧𑀳𑀸𑀬𑀓𑀥𑀫𑁆𑀫𑁂𑀲𑀼 𑀧𑀳𑀸𑀦𑀓𑀺𑀭𑀺𑀬𑀸𑀬 𑀧𑀼𑀭𑀺𑀫𑀓𑀸𑀮𑀯𑁄𑀳𑀸𑀭𑁄, 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀲𑀼 𑀘 𑀯𑀺𑀭𑀢𑀻𑀲𑀼 𑀯𑀺𑀭𑀫𑀡𑀓𑀺𑀭𑀺𑀬𑀸𑀬 𑀅𑀧𑀭𑀓𑀸𑀮𑀯𑁄𑀳𑀸𑀭𑁄 𑀘 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀧𑀳𑀸𑀦𑀁 𑀯𑀸 𑀲𑀫𑀼𑀘𑁆𑀙𑁂𑀤𑀯𑀲𑁂𑀦, 𑀯𑀺𑀭𑀢𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸. 𑀅𑀣 𑀯𑀸 𑀧𑀸𑀡𑁄 𑀅𑀢𑀺𑀧𑀸𑀢𑀻𑀬𑀢𑀺 𑀏𑀢𑁂𑀦𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑁄, 𑀧𑀸𑀡𑀖𑀸𑀢𑀳𑁂𑀢𑀼𑀪𑀽𑀢𑁄 𑀥𑀫𑁆𑀫𑀲𑀫𑀽𑀳𑁄. 𑀓𑁄 𑀧𑀦𑁂𑀲𑁄? 𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀤𑁄𑀲𑀫𑁄𑀳𑀯𑀺𑀳𑀺𑀁𑀲𑀸𑀤𑀬𑁄 𑀓𑀺𑀮𑁂𑀲𑀸. 𑀢𑁂 𑀳𑀺 𑀪𑀕𑀯𑀸 𑀅𑀭𑀺𑀬𑀫𑀕𑁆𑀕𑁂𑀦 𑀧𑀳𑀸𑀬 𑀲𑀫𑀼𑀕𑁆𑀖𑀸𑀝𑁂𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀤𑀼𑀲𑁆𑀲𑀻𑀮𑁆𑀬𑀢𑁄 𑀅𑀘𑁆𑀘𑀦𑁆𑀢𑀫𑁂𑀯 𑀧𑀝𑀺𑀯𑀺𑀭𑀢𑁄𑀢𑀺 𑀯𑀼𑀘𑁆𑀘𑀢𑀺 𑀓𑀺𑀮𑁂𑀲𑁂𑀲𑀼 𑀧𑀳𑀻𑀦𑁂𑀲𑀼 𑀓𑀺𑀮𑁂𑀲𑀦𑀺𑀫𑀺𑀢𑁆𑀢𑀲𑁆𑀲 𑀓𑀫𑁆𑀫𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. ‘‘𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬𑀸’’𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀭𑀢𑁄𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀢𑀲𑁆𑀲𑀸 𑀯𑀺𑀭𑀢𑀺𑀬𑀸 𑀓𑀸𑀮𑀸𑀤𑀺𑀯𑀲𑁂𑀦 𑀅𑀧𑀭𑀺𑀬𑀦𑁆𑀢𑀢𑀁 𑀤𑀲𑁆𑀲𑁂𑀢𑀺. 𑀬𑀣𑀸 𑀳𑀺 𑀅𑀜𑁆𑀜𑁂 𑀲𑀫𑀸𑀤𑀺𑀦𑁆𑀦𑀯𑀺𑀭𑀢𑀺𑀓𑀸𑀧𑀺 ¶ 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀢𑀸𑀬 𑀮𑀸𑀪𑀚𑀻𑀯𑀺𑀢𑀸𑀤𑀺𑀳𑁂𑀢𑀼 𑀲𑀫𑀸𑀤𑀸𑀦𑀁 𑀪𑀺𑀦𑁆𑀤𑀦𑁆𑀢𑀺, 𑀦 𑀏𑀯𑀁 𑀪𑀕𑀯𑀸. 𑀪𑀕𑀯𑀸 𑀧𑀦 𑀲𑀩𑁆𑀩𑀲𑁄 𑀧𑀳𑀻𑀦𑀧𑀸𑀡𑀸𑀢𑀺𑀧𑀸𑀢𑀢𑁆𑀢𑀸 𑀅𑀘𑁆𑀘𑀦𑁆𑀢𑀯𑀺𑀭𑀢𑁄 𑀏𑀯𑀸𑀢𑀺. 𑀯𑀻𑀢𑀺𑀓𑁆𑀓𑀫𑀺𑀲𑁆𑀲𑀸𑀫𑀻𑀢𑀺 𑀅𑀦𑀯𑀚𑁆𑀚𑀥𑀫𑁆𑀫𑁂𑀳𑀺 𑀯𑁄𑀓𑀺𑀡𑁆𑀡𑀸 𑀅𑀦𑁆𑀢𑀭𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀦𑀓𑀸 𑀤𑀼𑀩𑁆𑀩𑀮𑀸𑀓𑀼𑀲𑀮𑀸. 𑀬𑀲𑁆𑀫𑀸 𑀧𑀦 𑀓𑀸𑀬𑀯𑀘𑀻𑀧𑀬𑁄𑀕𑀁 𑀉𑀧𑀮𑀪𑀺𑀢𑁆𑀯𑀸 ‘‘𑀇𑀫𑀲𑁆𑀲 𑀓𑀺𑀮𑁂𑀲𑀸 𑀉𑀧𑁆𑀧𑀦𑁆𑀦𑀸’’𑀢𑀺 𑀯𑀺𑀜𑁆𑀜𑀼𑀦𑀸 𑀲𑀓𑁆𑀓𑀸 𑀜𑀸𑀢𑀼𑀁, 𑀢𑀲𑁆𑀫𑀸 𑀢𑁂 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 ‘‘𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀓𑀸𑀬𑀺𑀓𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀦𑀺𑀧𑁆𑀨𑀸𑀤𑀓𑁂 𑀩𑀮𑀯𑀸𑀓𑀼𑀲𑀮𑁂 𑀲𑀦𑁆𑀥𑀸𑀬𑀸𑀳.

𑀕𑁄𑀢𑁆𑀢𑀯𑀲𑁂𑀦 𑀮𑀤𑁆𑀥𑀯𑁄𑀳𑀸𑀭𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀻𑀧𑁂𑀢𑀼𑀁 𑀯𑀝𑁆𑀝𑀢𑀺 𑀩𑁆𑀭𑀳𑁆𑀫𑀤𑀢𑁆𑀢𑁂𑀦 𑀪𑀸𑀲𑀺𑀢𑀯𑀡𑁆𑀡𑀲𑁆𑀲 𑀅𑀦𑀼𑀲𑀦𑁆𑀥𑀺𑀤𑀲𑁆𑀲𑀦𑀯𑀲𑁂𑀦 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀆𑀭𑀤𑁆𑀥𑀢𑁆𑀢𑀸. 𑀢𑀢𑁆𑀣𑀸𑀬𑀁 𑀤𑀻𑀧𑀦𑀸 𑁋 ‘‘𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑀲𑀗𑁆𑀖𑁄 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄’’𑀢𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀦𑀦𑀼 𑀘 𑀥𑀫𑁆𑀫𑀲𑁆𑀲𑀸𑀧𑀺 𑀯𑀡𑁆𑀡𑁄 ¶ 𑀩𑁆𑀭𑀳𑁆𑀫𑀤𑀢𑁆𑀢𑁂𑀦 𑀪𑀸𑀲𑀺𑀢𑁄? 𑀲𑀘𑁆𑀘𑀁 𑀪𑀸𑀲𑀺𑀢𑁄, 𑀲𑁄 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀪𑀯𑀢𑁆𑀢𑀸, 𑀅𑀭𑀺𑀬𑀲𑀗𑁆𑀖𑀸𑀥𑀸𑀭𑀢𑁆𑀢𑀸 𑀘 𑀥𑀫𑁆𑀫𑀲𑁆𑀲 𑀥𑀫𑁆𑀫𑀸𑀦𑀼𑀪𑀸𑀯𑀲𑀺𑀤𑁆𑀥𑀢𑁆𑀢𑀸 𑀘 𑀢𑁂𑀲𑀁 𑀢𑀤𑀼𑀪𑀬𑀤𑀻𑀧𑀦𑁂𑀦𑁂𑀯 𑀤𑀻𑀧𑀺𑀢𑁄 𑀳𑁄𑀢𑀻𑀢𑀺 𑀯𑀺𑀲𑀼𑀁 𑀦 𑀉𑀤𑁆𑀥𑀝𑁄. 𑀲𑀤𑁆𑀥𑀫𑁆𑀫𑀸𑀦𑀼𑀪𑀸𑀯𑁂𑀦𑁂𑀯 𑀳𑀺 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑁄 ¶ 𑀘 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑁆𑀧𑀳𑀸𑀦𑀲𑀫𑀢𑁆𑀣𑁄 𑀅𑀳𑁄𑀲𑀺, 𑀤𑁂𑀲𑀦𑀸 𑀧𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀏𑀯𑀁 𑀆𑀕𑀢𑀸𑀢𑀺.

𑀏𑀢𑁆𑀣𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂 𑀅𑀜𑁆𑀜𑁂 𑀘 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑁂 𑀩𑀼𑀤𑁆𑀥𑀕𑀼𑀡𑁂 𑀆𑀭𑀩𑁆𑀪 𑀉𑀧𑀭𑀺 𑀤𑁂𑀲𑀦𑀁 𑀯𑀟𑁆𑀠𑁂𑀢𑀼𑀓𑀸𑀫𑁄 𑀪𑀕𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 ‘‘𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 𑀩𑀼𑀤𑁆𑀥𑀕𑀼𑀡𑀯𑀲𑁂𑀦𑁂𑀯 𑀤𑁂𑀲𑀦𑀁 𑀆𑀭𑀪𑀺, 𑀦 𑀪𑀺𑀓𑁆𑀔𑀼𑀲𑀗𑁆𑀖𑀯𑀲𑁂𑀦𑀸𑀢𑀺. 𑀏𑀲𑀸 𑀳𑀺 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀧𑀓𑀢𑀺, 𑀬𑀁 𑀏𑀓𑀭𑀲𑁂𑀦𑁂𑀯 𑀤𑁂𑀲𑀦𑀁 𑀤𑀲𑁆𑀲𑁂𑀢𑀼𑀁 𑀮𑀩𑁆𑀪𑀫𑀸𑀦𑀲𑁆𑀲𑀸𑀧𑀺 𑀓𑀲𑁆𑀲𑀘𑀺 𑀅𑀕𑁆𑀕𑀳𑀡𑀁. 𑀢𑀣𑀸 𑀳𑀺 𑀭𑀽𑀧𑀓𑀡𑁆𑀟𑁂 𑀤𑀼𑀓𑀸𑀤𑀻𑀲𑀼 𑀢𑀦𑁆𑀦𑀺𑀤𑁆𑀤𑁂𑀲𑁂𑀲𑀼 𑀘 𑀳𑀤𑀬𑀯𑀢𑁆𑀣𑀼 𑀦 𑀕𑀳𑀺𑀢𑀁. 𑀇𑀢𑀭𑀯𑀢𑁆𑀣𑀽𑀳𑀺 𑀅𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀤𑁂𑀲𑀦𑀸𑀪𑁂𑀤𑁄 𑀳𑁄𑀢𑀻𑀢𑀺. 𑀬𑀣𑀸 𑀳𑀺 ¶ 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀏𑀓𑀦𑁆𑀢𑀢𑁄 𑀘𑀓𑁆𑀔𑀸𑀤𑀺𑀦𑀺𑀲𑁆𑀲𑀬𑀸𑀦𑀺, 𑀦 𑀏𑀯𑀁 𑀫𑀦𑁄𑀯𑀺𑀜𑁆𑀜𑀸𑀡𑀁 𑀏𑀓𑀦𑁆𑀢𑁂𑀦 𑀳𑀤𑀬𑀯𑀢𑁆𑀣𑀼𑀦𑀺𑀲𑁆𑀲𑀬𑀁, 𑀦𑀺𑀲𑁆𑀲𑀺𑀢𑀯𑀲𑁂𑀦 𑀘 𑀯𑀢𑁆𑀣𑀼𑀤𑀼𑀓𑀸𑀤𑀺𑀤𑁂𑀲𑀦𑀸 𑀧𑀯𑀢𑁆𑀢𑀸 ‘‘𑀅𑀢𑁆𑀣𑀺 𑀭𑀽𑀧𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀼, 𑀅𑀢𑁆𑀣𑀺 𑀭𑀽𑀧𑀁 𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀽’’𑀢𑀺𑀆𑀤𑀺𑀦𑀸. 𑀬𑀫𑁆𑀧𑀺 𑀏𑀓𑀦𑁆𑀢𑀢𑁄 𑀳𑀤𑀬𑀯𑀢𑁆𑀣𑀼𑀦𑀺𑀲𑁆𑀲𑀬𑀁, 𑀢𑀲𑁆𑀲 𑀯𑀲𑁂𑀦 ‘‘𑀅𑀢𑁆𑀣𑀺 𑀭𑀽𑀧𑀁 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀽’’𑀢𑀺𑀆𑀤𑀺𑀦𑀸 𑀤𑀼𑀓𑀸𑀤𑀻𑀲𑀼 𑀯𑀼𑀘𑁆𑀘𑀫𑀸𑀦𑁂𑀲𑀼𑀧𑀺 𑀦 𑀢𑀤𑀦𑀼𑀭𑀽𑀧𑀸 𑀆𑀭𑀫𑁆𑀫𑀡𑀤𑀼𑀓𑀸𑀤𑀬𑁄 𑀲𑀫𑁆𑀪𑀯𑀦𑁆𑀢𑀺. 𑀦 𑀳𑀺 ‘‘𑀅𑀢𑁆𑀣𑀺 𑀭𑀽𑀧𑀁 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁, 𑀅𑀢𑁆𑀣𑀺 𑀭𑀽𑀧𑀁 𑀦 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡’’𑀦𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀯𑀢𑁆𑀣𑀸𑀭𑀫𑁆𑀫𑀡𑀤𑀼𑀓𑀸 𑀪𑀺𑀦𑁆𑀦𑀕𑀢𑀺𑀓𑀸 𑀲𑀺𑀬𑀼𑀦𑁆𑀢𑀺 𑀦 𑀏𑀓𑀭𑀲𑀸 𑀤𑁂𑀲𑀦𑀸 𑀪𑀯𑁂𑀬𑁆𑀬𑀸𑀢𑀺. 𑀢𑀣𑀸 𑀦𑀺𑀓𑁆𑀔𑁂𑀧𑀓𑀡𑁆𑀟𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀺𑀪𑀸𑀕𑁂𑀦 𑀅𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀧𑀤𑀯𑀺𑀲𑁆𑀲𑀚𑁆𑀚𑀦𑁂 ‘‘𑀯𑀺𑀘𑀸𑀭𑁄 𑀘𑀸’’𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀧𑀤𑀯𑀺𑀲𑁆𑀲𑀚𑁆𑀚𑀦𑁂 𑀮𑀩𑁆𑀪𑀫𑀸𑀦𑁄𑀧𑀺 𑀯𑀺𑀢𑀓𑁆𑀓𑁄 𑀦 𑀉𑀤𑁆𑀥𑀝𑁄, 𑀅𑀜𑁆𑀜𑀣𑀸 ‘‘𑀯𑀺𑀢𑀓𑁆𑀓𑁄 𑀘𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸.

𑀤𑀡𑁆𑀟𑀦𑀲𑀗𑁆𑀔𑀸𑀢𑀲𑁆𑀲 𑀤𑀡𑁆𑀟𑀲𑁆𑀲 𑀧𑀭𑀯𑀺𑀳𑁂𑀞𑀦𑀲𑁆𑀲 𑀯𑀺𑀯𑀚𑁆𑀚𑀺𑀢𑀪𑀸𑀯𑀤𑀻𑀧𑀦𑀢𑁆𑀣𑀁 𑀤𑀡𑁆𑀟𑀲𑀢𑁆𑀣𑀸𑀦𑀁 𑀦𑀺𑀓𑁆𑀔𑁂𑀧𑀯𑀘𑀦𑀦𑁆𑀢𑀺 𑀆𑀳 ‘‘𑀧𑀭𑀽𑀧𑀖𑀸𑀢𑀢𑁆𑀣𑀸𑀬𑀸’’𑀢𑀺𑀆𑀤𑀺. 𑀯𑀺𑀳𑁂𑀞𑀦𑀪𑀸𑀯𑀢𑁄𑀢𑀺 𑀯𑀺𑀳𑀺𑀁𑀲𑀦𑀪𑀸𑀯𑀢𑁄. ‘‘𑀪𑀺𑀓𑁆𑀔𑀼𑀲𑀗𑁆𑀖𑀯𑀲𑁂𑀦𑀸𑀧𑀺 𑀤𑀻𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀫𑁆𑀧𑀺 𑀏𑀓𑀤𑁂𑀲𑁂𑀦 𑀤𑀻𑀧𑁂𑀦𑁆𑀢𑁄 ‘‘𑀬𑀁 𑀧𑀦 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀫𑀸𑀳.

𑀮𑀚𑁆𑀚𑀻𑀢𑀺 ¶ 𑀏𑀢𑁆𑀣 𑀯𑀼𑀢𑁆𑀢𑀮𑀚𑁆𑀚𑀸𑀬 𑀑𑀢𑁆𑀢𑀧𑁆𑀧𑀫𑁆𑀧𑀺 𑀯𑀼𑀢𑁆𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀧𑀸𑀧𑀚𑀺𑀕𑀼𑀘𑁆𑀙𑀦𑀁 𑀧𑀸𑀧𑀼𑀢𑁆𑀢𑀸𑀲𑀦𑀭𑀳𑀺𑀢𑀁, 𑀧𑀸𑀧𑀪𑀬𑀁 𑀯𑀸 𑀅𑀮𑀚𑁆𑀚𑀦𑀁 𑀅𑀢𑁆𑀣𑀻𑀢𑀺. 𑀥𑀫𑁆𑀫𑀕𑀭𑀼𑀢𑀸𑀬 𑀯𑀸 𑀩𑀼𑀤𑁆𑀥𑀸𑀦𑀁, 𑀥𑀫𑁆𑀫𑀲𑁆𑀲 𑀘 𑀅𑀢𑁆𑀢𑀸𑀥𑀻𑀦𑀢𑁆𑀢𑀸 𑀅𑀢𑁆𑀢𑀸𑀥𑀺𑀧𑀢𑀺𑀪𑀽𑀢𑀸 𑀮𑀚𑁆𑀚𑀸𑀯 𑀯𑀼𑀢𑁆𑀢𑀸, 𑀦 𑀧𑀦 𑀮𑁄𑀓𑀸𑀥𑀺𑀧𑀢𑀺 𑀑𑀢𑁆𑀢𑀧𑁆𑀧𑀁. ‘‘𑀤𑀬𑀁 𑀫𑁂𑀢𑁆𑀢𑀘𑀺𑀢𑁆𑀢𑀢𑀁 𑀆𑀧𑀦𑁆𑀦𑁄’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀤𑀬𑀸-𑀲𑀤𑁆𑀤𑁄 ‘‘𑀤𑀬𑀸𑀧𑀦𑁆𑀦𑁄’’𑀢𑀺𑀆𑀤𑀻𑀲𑀼 𑀓𑀭𑀼𑀡𑀸𑀬 𑀧𑀯𑀢𑁆𑀢𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁 ¶ , 𑀅𑀬𑀁 𑀧𑀦 𑀤𑀬𑀸-𑀲𑀤𑁆𑀤𑁄 𑀅𑀦𑀼𑀭𑀓𑁆𑀔𑀡𑀫𑀢𑁆𑀣𑀁 𑀅𑀦𑁆𑀢𑁄𑀦𑀻𑀢𑀁 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁄 𑀫𑁂𑀢𑁆𑀢𑀸𑀬 ¶ 𑀓𑀭𑀼𑀡𑀸𑀬 𑀘 𑀧𑀯𑀢𑁆𑀢𑀢𑀻𑀢𑀺 𑀇𑀥 𑀫𑁂𑀢𑁆𑀢𑀸𑀬 𑀧𑀯𑀢𑁆𑀢𑀫𑀸𑀦𑁄 𑀯𑀼𑀢𑁆𑀢𑁄. 𑀫𑀺𑀤𑀢𑀺 𑀲𑀺𑀦𑀺𑀬𑁆𑀳𑀢𑀻𑀢𑀺 𑀫𑁂𑀢𑁆𑀢𑀸, 𑀫𑁂𑀢𑁆𑀢𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑁂𑀢𑁆𑀢𑀁, 𑀫𑁂𑀢𑁆𑀢𑀁 𑀘𑀺𑀢𑁆𑀢𑀁 𑀏𑀢𑀲𑁆𑀲𑀸𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑁄, 𑀢𑀲𑁆𑀲 𑀪𑀸𑀯𑁄 𑀫𑁂𑀢𑁆𑀢𑀘𑀺𑀢𑁆𑀢𑀢𑀸, 𑀫𑁂𑀢𑁆𑀢𑀸 𑀇𑀘𑁆𑀘𑁂𑀯 𑀅𑀢𑁆𑀣𑁄. ‘‘𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻’’𑀢𑀺 𑀏𑀢𑁂𑀦 𑀢𑀲𑁆𑀲𑀸 𑀯𑀺𑀭𑀢𑀺𑀬𑀸 𑀲𑀢𑁆𑀢𑀯𑀲𑁂𑀦 𑀅𑀧𑀭𑀺𑀬𑀦𑁆𑀢𑀢𑀁 𑀤𑀲𑁆𑀲𑁂𑀢𑀺. 𑀧𑀸𑀡𑀪𑀽𑀢𑁂𑀢𑀺 𑀧𑀸𑀡𑀚𑀸𑀢𑁂. 𑀅𑀦𑀼𑀓𑀫𑁆𑀧𑀓𑁄𑀢𑀺 𑀓𑀭𑀼𑀡𑀸𑀬𑀦𑀓𑁄. 𑀬𑀲𑁆𑀫𑀸 𑀧𑀦 𑀫𑁂𑀢𑁆𑀢𑀸 𑀓𑀭𑀼𑀡𑀸𑀬 𑀯𑀺𑀲𑁂𑀲𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑀸𑀬 𑀏𑀯 𑀤𑀬𑀸𑀧𑀦𑁆𑀦𑀢𑀸𑀬𑀸’’𑀢𑀺. 𑀏𑀯𑀁 𑀬𑁂𑀳𑀺 𑀥𑀫𑁆𑀫𑁂𑀳𑀺 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀺 𑀲𑀫𑁆𑀧𑀚𑁆𑀚𑀢𑀺, 𑀢𑁂𑀳𑀺 𑀮𑀚𑁆𑀚𑀸𑀫𑁂𑀢𑁆𑀢𑀸𑀓𑀭𑀼𑀡𑀸𑀳𑀺 𑀲𑀫𑀗𑁆𑀕𑀻𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀯𑀺𑀳𑀭𑀢𑀻𑀢𑀺 𑀏𑀯𑀁𑀪𑀽𑀢𑁄 𑀳𑀼𑀢𑁆𑀯𑀸 𑀏𑀓𑀲𑁆𑀫𑀺𑀁 𑀇𑀭𑀺𑀬𑀸𑀧𑀣𑁂 𑀉𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀅𑀜𑁆𑀜𑁂𑀦 𑀇𑀭𑀺𑀬𑀸𑀧𑀣𑁂𑀦 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀳𑀭𑀢𑀺 𑀧𑀯𑀢𑁆𑀢𑁂𑀢𑀺, 𑀅𑀢𑁆𑀢𑀪𑀸𑀯𑀁 𑀯𑀸 𑀬𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀇𑀭𑀺𑀬𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺 𑀧𑀸𑀮𑁂𑀢𑀻’’𑀢𑀺.

𑀆𑀘𑀸𑀭𑀲𑀻𑀮𑀫𑀢𑁆𑀢𑀓𑀦𑁆𑀢𑀺 𑀲𑀸𑀥𑀼𑀚𑀦𑀸𑀘𑀸𑀭𑀲𑀻𑀮𑀫𑀢𑁆𑀢𑀓𑀁, 𑀢𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀺𑀕𑀼𑀡𑁂𑀳𑀺𑀧𑀺 𑀮𑁄𑀓𑀺𑀬𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀧𑀘𑁆𑀘𑀬𑀧𑀭𑀺𑀪𑁄𑀕𑀲𑀻𑀮𑀸𑀦𑀺 𑀇𑀥 𑀲𑀻𑀮𑀓𑀣𑀸𑀬𑀁 𑀦 𑀯𑀺𑀪𑀢𑁆𑀢𑀸𑀦𑀺.

𑀧𑀭𑀲𑀁𑀳𑀭𑀡𑀦𑁆𑀢𑀺 𑀧𑀭𑀲𑁆𑀲 𑀲𑀦𑁆𑀢𑀓𑀳𑀭𑀡𑀁. 𑀣𑁂𑀦𑁄 𑀯𑀼𑀘𑁆𑀘𑀢𑀺 𑀘𑁄𑀭𑁄, 𑀢𑀲𑁆𑀲 𑀪𑀸𑀯𑁄 𑀣𑁂𑀬𑁆𑀬𑀁. 𑀇𑀥𑀸𑀧𑀺 𑀔𑀼𑀤𑁆𑀤𑀓𑁂 𑀧𑀭𑀲𑀦𑁆𑀢𑀓𑁂 𑀅𑀧𑁆𑀧𑀲𑀸𑀯𑀚𑁆𑀚𑀁, 𑀫𑀳𑀦𑁆𑀢𑁂 𑀫𑀳𑀸𑀲𑀸𑀯𑀚𑁆𑀚𑀁. 𑀓𑀲𑁆𑀫𑀸? 𑀧𑀬𑁄𑀕𑀫𑀳𑀦𑁆𑀢𑀢𑀸𑀬, 𑀯𑀢𑁆𑀣𑀼𑀕𑀼𑀡𑀸𑀦𑀁 𑀧𑀦 𑀲𑀫𑀪𑀸𑀯𑁂 𑀲𑀢𑀺 𑀓𑀺𑀮𑁂𑀲𑀸𑀦𑀁 𑀉𑀧𑀓𑁆𑀓𑀫𑀸𑀦𑀜𑁆𑀘 𑀫𑀼𑀤𑀼𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑀁, 𑀢𑀺𑀩𑁆𑀩𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑀦𑁆𑀢𑀺 𑀅𑀬𑀫𑁆𑀧𑀺 𑀦𑀬𑁄 𑀬𑁄𑀚𑁂𑀢𑀩𑁆𑀩𑁄.

𑀲𑀸𑀳𑀢𑁆𑀣𑀺𑀓𑀸𑀤𑀬𑁄𑀢𑀺 𑀏𑀢𑁆𑀣 𑀫𑀦𑁆𑀢𑀧𑀭𑀺𑀚𑀧𑁆𑀧𑀦𑁂𑀦 𑀧𑀭𑀲𑀦𑁆𑀢𑀓𑀳𑀭𑀡𑀁 𑀯𑀺𑀚𑁆𑀚𑀸𑀫𑀬𑁄, 𑀯𑀺𑀦𑀸 𑀫𑀦𑁆𑀢𑁂𑀦 𑀓𑀸𑀬𑀯𑀘𑀻𑀧𑀬𑁄𑀕𑁂𑀦 𑀧𑀭𑀲𑀦𑁆𑀢𑀓𑀲𑁆𑀲 𑀆𑀓𑀟𑁆𑀠𑀦𑀁 𑀢𑀸𑀤𑀺𑀲𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀇𑀤𑁆𑀥𑀺𑀫𑀬𑁄 𑀧𑀬𑁄𑀕𑁄.

𑀲𑁂𑀲𑀦𑁆𑀢𑀺 ¶ ‘‘𑀧𑀳𑀸𑀬 𑀧𑀝𑀺𑀯𑀺𑀭𑀢𑁄’’𑀢𑀺 𑀏𑀯𑀫𑀸𑀤𑀺𑀓𑀁. 𑀢𑀜𑁆𑀳𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀁. 𑀓𑀺𑀜𑁆𑀘𑀸𑀧𑀺 𑀦𑀬𑀺𑀥 𑀲𑀺𑀓𑁆𑀔𑀸𑀧𑀤𑀯𑁄𑀳𑀸𑀭𑁂𑀦 𑀯𑀺𑀭𑀢𑀺 𑀯𑀼𑀢𑁆𑀢𑀸, 𑀇𑀢𑁄 𑀅𑀜𑁆𑀜𑁂𑀲𑀼 𑀧𑀦 𑀲𑀼𑀢𑁆𑀢𑀧𑀤𑁂𑀲𑁂𑀲𑀼 𑀯𑀺𑀦𑀬𑀸𑀪𑀺𑀥𑀫𑁆𑀫𑁂𑀲𑀼 𑀘 𑀧𑀯𑀢𑁆𑀢𑀯𑁄𑀳𑀸𑀭𑁂𑀦 𑀯𑀺𑀭𑀢𑀺𑀬𑁄 𑀘𑁂𑀢𑀦𑀸 𑀘 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀻𑀦𑀁 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄, 𑀢𑁂𑀲𑀼 𑀅𑀜𑁆𑀜𑀢𑀭𑀓𑁄𑀝𑁆𑀞𑀸𑀲𑀪𑀸𑀯𑀢𑁄 ¶ 𑀘 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀆𑀳 ‘‘𑀧𑀞𑀫𑀲𑀺𑀓𑁆𑀔𑀸𑀧𑀤𑁂’’𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 ‘‘𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄’’𑀢𑀺 𑀦 𑀯𑀼𑀢𑁆𑀢𑀁, 𑀅𑀥𑀺𑀓𑀸𑀭𑀯𑀲𑁂𑀦 𑀧𑀦 𑀅𑀢𑁆𑀣𑀢𑁄 𑀯𑀸 𑀯𑀼𑀢𑁆𑀢𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀳𑀺 𑀮𑀚𑁆𑀚𑀸𑀤𑀬𑁄 𑀧𑀸𑀡𑀸𑀢𑀺𑀧𑀸𑀢𑀧𑁆𑀧𑀳𑀸𑀦𑀲𑁆𑀲 𑀯𑀺𑀲𑁂𑀲𑀧𑁆𑀧𑀘𑁆𑀘𑀬𑁄, 𑀏𑀯𑀁 𑀅𑀤𑀺𑀦𑁆𑀦𑀸𑀤𑀸𑀦𑀧𑁆𑀧𑀳𑀸𑀦𑀲𑁆𑀲𑀸𑀧𑀻𑀢𑀺, 𑀢𑀲𑁆𑀫𑀸 𑀲𑀸𑀧𑀺 𑀧𑀸𑀴𑀺 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀸. 𑀏𑀲𑁂𑀯 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺. 𑀅𑀣 𑀯𑀸 ‘‘𑀲𑀼𑀘𑀺𑀪𑀽𑀢𑁂𑀦𑀸’’𑀢𑀺 𑀏𑀢𑁂𑀦 ¶ 𑀳𑀺𑀭𑁄𑀢𑁆𑀢𑀧𑁆𑀧𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀫𑁄, 𑀅𑀳𑀺𑀭𑀺𑀓𑀸𑀤𑀻𑀦𑀜𑁆𑀘 𑀧𑀳𑀸𑀦𑀁 𑀯𑀼𑀢𑁆𑀢𑀫𑁂𑀯𑀸𑀢𑀺 ‘‘𑀮𑀚𑁆𑀚𑀻’’𑀢𑀺𑀆𑀤𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀲𑁂𑀝𑁆𑀞𑀘𑀭𑀺𑀬𑀦𑁆𑀢𑀺 𑀅𑀲𑁂𑀝𑁆𑀞𑀸𑀦𑀁 𑀳𑀻𑀦𑀸𑀦𑀁, 𑀅𑀲𑁂𑀝𑁆𑀞𑀁 𑀯𑀸 𑀮𑀸𑀫𑀓𑀁 𑀦𑀺𑀳𑀻𑀦𑀁 𑀯𑀼𑀢𑁆𑀢𑀺𑀁, 𑀫𑁂𑀣𑀼𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀩𑁆𑀭𑀳𑁆𑀫𑀁 𑀲𑁂𑀝𑁆𑀞𑀁 𑀆𑀘𑀸𑀭’’𑀦𑁆𑀢𑀺 𑀫𑁂𑀣𑀼𑀦𑀯𑀺𑀭𑀢𑀺𑀫𑀸𑀳. ‘‘𑀆𑀭𑀸𑀘𑀸𑀭𑀻 𑀫𑁂𑀣𑀼𑀦𑀸’’𑀢𑀺 𑀏𑀢𑁂𑀦 ‘‘𑀇𑀥 𑀩𑁆𑀭𑀸𑀳𑁆𑀫𑀡 𑀏𑀓𑀘𑁆𑀘𑁄…𑀧𑁂… 𑀦 𑀳𑁂𑀯 𑀔𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀅𑀧𑀺𑀘 𑀔𑁄 𑀫𑀸𑀢𑀼𑀕𑀸𑀫𑀲𑁆𑀲 𑀉𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀦𑁆𑀳𑀸𑀧𑀦𑀲𑀫𑁆𑀩𑀸𑀳𑀦𑀁 𑀲𑀸𑀤𑀺𑀬𑀢𑀺, 𑀲𑁄 𑀢𑀁 𑀅𑀲𑁆𑀲𑀸𑀤𑁂𑀢𑀺, 𑀢𑀁 𑀦𑀺𑀓𑀸𑀫𑁂𑀢𑀺, 𑀢𑁂𑀦 𑀘 𑀯𑀺𑀢𑁆𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁭.𑁫𑁦) 𑀯𑀼𑀢𑁆𑀢𑀸 𑀲𑀢𑁆𑀢𑀯𑀺𑀥𑀫𑁂𑀣𑀼𑀦𑀲𑀁𑀬𑁄𑀕𑀸𑀧𑀺 𑀧𑀝𑀺𑀯𑀺𑀭𑀢𑀺 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀇𑀥𑀸𑀧𑀺 𑀅𑀲𑀤𑁆𑀥𑀫𑁆𑀫𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁂𑀦 𑀓𑀸𑀬𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀫𑀕𑁆𑀕𑁂𑀦𑀫𑀕𑁆𑀕𑀧𑀝𑀺𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀅𑀩𑁆𑀭𑀳𑁆𑀫𑀘𑀭𑀺𑀬𑀁, 𑀫𑀺𑀘𑁆𑀙𑀸𑀘𑀸𑀭𑁂 𑀧𑀦 𑀅𑀕𑀫𑀦𑀻𑀬𑀝𑁆𑀞𑀸𑀦𑀯𑀻𑀢𑀺𑀓𑁆𑀓𑀫𑀘𑁂𑀢𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀅𑀕𑀫𑀦𑀻𑀬𑀝𑁆𑀞𑀸𑀦𑀁 𑀦𑀸𑀫 𑀧𑀼𑀭𑀺𑀲𑀸𑀦𑀁 𑀫𑀸𑀢𑀼𑀭𑀓𑁆𑀔𑀺𑀢𑀸𑀤𑀬𑁄 𑀤𑀲, 𑀥𑀦𑀓𑁆𑀓𑀻𑀢𑀸𑀤𑀬𑁄 𑀤𑀲𑀸𑀢𑀺 𑀯𑀻𑀲𑀢𑀺 𑀇𑀢𑁆𑀣𑀺𑀬𑁄. 𑀇𑀢𑁆𑀣𑀻𑀲𑀼 𑀧𑀦 𑀤𑀲𑀦𑁆𑀦𑀁 𑀥𑀦𑀓𑁆𑀓𑀺𑀢𑀸𑀤𑀻𑀦𑀁 𑀲𑀸𑀭𑀓𑁆𑀔𑀲𑀧𑀭𑀺𑀤𑀡𑁆𑀟𑀸𑀦𑀜𑁆𑀘 𑀯𑀲𑁂𑀦 𑀤𑁆𑀯𑀸𑀤𑀲𑀦𑁆𑀦𑀁 𑀅𑀜𑁆𑀜𑁂 𑀧𑀼𑀭𑀺𑀲𑀸. 𑀕𑀼𑀡𑀯𑀺𑀭𑀳𑀺𑀢𑁂 𑀯𑀺𑀧𑁆𑀧𑀝𑀺𑀧𑀢𑁆𑀢𑀺 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀫𑀳𑀸𑀕𑀼𑀡𑁂 𑀫𑀳𑀸𑀲𑀸𑀯𑀚𑁆𑀚𑀸. 𑀕𑀼𑀡𑀭𑀳𑀺𑀢𑁂𑀧𑀺 𑀘 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀺 𑀫𑀳𑀸𑀲𑀸𑀯𑀚𑁆𑀚𑀸, 𑀉𑀪𑀺𑀦𑁆𑀦𑀁 𑀲𑀫𑀸𑀦𑀘𑁆𑀙𑀦𑁆𑀤𑀪𑀸𑀯𑁂𑀧𑀺 𑀓𑀺𑀮𑁂𑀲𑀸𑀦𑀁 𑀉𑀧𑀓𑁆𑀓𑀫𑀸𑀦𑀜𑁆𑀘 𑀫𑀼𑀤𑀼𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀢𑀺𑀩𑁆𑀩𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑀸𑀢𑀺 ¶ 𑀯𑁂𑀤𑀺𑀢𑀩𑁆𑀩𑀸. 𑀢𑀲𑁆𑀲 𑀤𑁆𑀯𑁂 𑀲𑀫𑁆𑀪𑀸𑀭𑀸 𑀲𑁂𑀯𑁂𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑀁, 𑀫𑀕𑁆𑀕𑁂𑀦𑀫𑀕𑁆𑀕𑀧𑀝𑀺𑀧𑀢𑁆𑀢𑀻𑀢𑀺. 𑀫𑀺𑀘𑁆𑀙𑀸𑀘𑀸𑀭𑁂 𑀧𑀦 𑀅𑀕𑀫𑀦𑀻𑀬𑀝𑁆𑀞𑀸𑀦𑀢𑀸, 𑀲𑁂𑀯𑀦𑀸𑀘𑀺𑀢𑁆𑀢𑀁 𑀫𑀕𑁆𑀕𑁂𑀦𑀫𑀕𑁆𑀕𑀧𑀝𑀺𑀧𑀢𑁆𑀢𑀺, 𑀲𑀸𑀤𑀺𑀬𑀦𑀜𑁆𑀘𑀸𑀢𑀺 𑀘𑀢𑁆𑀢𑀸𑀭𑁄. ‘‘𑀅𑀪𑀺𑀪𑀯𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀦𑁂 𑀫𑀕𑁆𑀕𑁂𑀦𑀫𑀕𑁆𑀕𑀧𑀝𑀺𑀧𑀢𑁆𑀢𑀺𑀅𑀥𑀺𑀯𑀸𑀲𑀦𑁂 𑀲𑀢𑀺𑀧𑀺 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀲𑁂𑀯𑀦𑀸𑀪𑀺𑀲𑀦𑁆𑀥𑀺𑀧𑀬𑁄𑀕𑀸𑀪𑀸𑀯𑀢𑁄 ¶ 𑀅𑀪𑀺𑀪𑀼𑀬𑁆𑀬𑀫𑀸𑀦𑀲𑁆𑀲 𑀫𑀺𑀘𑁆𑀙𑀸𑀘𑀸𑀭𑁄 𑀦 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺. 𑀲𑁂𑀯𑀦𑀸𑀘𑀺𑀢𑁆𑀢𑁂 𑀲𑀢𑀺 𑀧𑀬𑁄𑀕𑀸𑀪𑀸𑀯𑁄 𑀦 𑀧𑀫𑀸𑀡𑀁 𑀇𑀢𑁆𑀣𑀺𑀬𑀸 𑀲𑁂𑀯𑀦𑀸𑀧𑀬𑁄𑀕𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀅𑀪𑀸𑀯𑀢𑁄, 𑀇𑀢𑁆𑀣𑀺𑀬𑀸 𑀧𑀼𑀭𑁂𑀢𑀭𑀁 𑀉𑀧𑀝𑁆𑀞𑀸𑀧𑀺𑀢𑀲𑁂𑀯𑀦𑀸𑀘𑀺𑀢𑁆𑀢𑀸𑀬𑀧𑀺 𑀫𑀺𑀘𑁆𑀙𑀸𑀘𑀸𑀭𑁄 𑀦 𑀲𑀺𑀬𑀸𑀢𑀺 𑀆𑀧𑀚𑁆𑀚𑀢𑀺 𑀧𑀬𑁄𑀕𑀸𑀪𑀸𑀯𑀢𑁄. 𑀢𑀲𑁆𑀫𑀸 𑀧𑀼𑀭𑀺𑀲𑀲𑁆𑀲 𑀯𑀲𑁂𑀦 𑀉𑀓𑁆𑀓𑀁𑀲𑀢𑁄 𑀘𑀢𑁆𑀢𑀸𑀭𑁄 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁, 𑀅𑀜𑁆𑀜𑀣𑀸 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀓𑀺𑀘𑁆𑀘𑀓𑀭𑀡𑀓𑀸𑀮𑁂 𑀧𑀼𑀭𑀺𑀲𑀲𑁆𑀲𑀧𑀺 𑀲𑁂𑀯𑀦𑀸𑀧𑀬𑁄𑀕𑀸𑀪𑀸𑀯𑀢𑁄 𑀫𑀺𑀘𑁆𑀙𑀸𑀘𑀸𑀭𑁄 𑀦 𑀲𑀺𑀬𑀸𑀢𑀺 𑀏𑀓𑁂. 𑀇𑀤𑀁 𑀧𑀦𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁 𑁋 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀧𑀯𑀢𑁆𑀢𑀺𑀢𑀲𑁆𑀲 𑀢𑀬𑁄, 𑀩𑀮𑀓𑁆𑀓𑀸𑀭𑁂𑀦 𑀧𑀯𑀢𑁆𑀢𑀺𑀢𑀲𑁆𑀲 𑀢𑀬𑁄, 𑀅𑀦𑀯𑀲𑁂𑀲𑀕𑁆𑀕𑀳𑀡𑁂𑀦 𑀧𑀦 𑀘𑀢𑁆𑀢𑀸𑀭𑁄𑀢𑀺. 𑀏𑀓𑁄 𑀧𑀬𑁄𑀕𑁄 𑀲𑀸𑀳𑀢𑁆𑀣𑀺𑀓𑁄𑀯.

𑁯. 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀣𑀪𑀜𑁆𑀚𑀦𑀓𑁄’’𑀢𑀺 𑀯𑀼𑀢𑁆𑀢𑀁. 𑀯𑀘𑀻𑀧𑀬𑁄𑀕𑁄 𑀓𑀸𑀬𑀧𑀬𑁄𑀕𑁄 𑀯𑀸𑀢𑀺 𑀫𑀼𑀲𑀸-𑀲𑀤𑁆𑀤𑀲𑁆𑀲 𑀓𑀺𑀭𑀺𑀬𑀸𑀧𑀥𑀸𑀦𑀢𑀁 𑀤𑀲𑁆𑀲𑁂𑀢𑀺. 𑀯𑀺𑀲𑀁𑀯𑀸𑀤𑀦𑀸𑀥𑀺𑀧𑁆𑀧𑀸𑀬𑁄 𑀧𑀼𑀩𑁆𑀩𑀪𑀸𑀕𑀓𑁆𑀔𑀡𑁂 𑀢𑀗𑁆𑀔𑀡𑁂 𑀘. 𑀯𑀼𑀢𑁆𑀢𑀜𑁆𑀳𑀺 ‘‘𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 ‘𑀫𑀼𑀲𑀸 𑀪𑀡𑀺𑀲𑁆𑀲’𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 ‘𑀫𑀼𑀲𑀸 𑀪𑀡𑀸𑀫𑀻’𑀢𑀺’’ (𑀧𑀸𑀭𑀸. 𑁨𑁦𑁫). 𑀏𑀢𑀜𑁆𑀳𑀺 𑀤𑁆𑀯𑀬𑀁 𑀅𑀗𑁆𑀕𑀪𑀽𑀢𑀁, 𑀇𑀢𑀭𑀁 𑀧𑀦 𑀳𑁄𑀢𑀼 𑀯𑀸 𑀫𑀸 𑀯𑀸, 𑀅𑀓𑀸𑀭𑀡𑀫𑁂𑀢𑀁. 𑀅𑀲𑁆𑀲𑀸𑀢𑀺 𑀯𑀺𑀲𑀁𑀯𑀸𑀤𑀓𑀲𑁆𑀲 ¶ . 𑀬𑀣𑀸𑀯𑀼𑀢𑁆𑀢𑀁 𑀧𑀬𑁄𑀕𑀪𑀽𑀢𑀁 𑀫𑀼𑀲𑀸 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺, 𑀲𑀫𑀼𑀝𑁆𑀞𑀸𑀧𑁂𑀢𑀺 𑀯𑀸 𑀏𑀢𑀸𑀬𑀸𑀢𑀺 𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑁄.

𑀧𑀼𑀭𑀺𑀫𑀦𑀬𑁂 𑀮𑀓𑁆𑀔𑀡𑀲𑁆𑀲 𑀅𑀩𑁆𑀬𑀸𑀧𑀺𑀢𑀢𑀸𑀬, 𑀫𑀼𑀲𑀸-𑀲𑀤𑁆𑀤𑀲𑁆𑀲 𑀘 𑀯𑀺𑀲𑀁𑀯𑀤𑀺𑀢𑀩𑁆𑀩𑀢𑁆𑀣𑀯𑀸𑀘𑀓𑀢𑁆𑀢𑀲𑀫𑁆𑀪𑀯𑀢𑁄 ¶ 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀫𑀼𑀲𑀸𑀯𑀸𑀤𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀼𑀲𑀸𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀯𑀢𑁆𑀣𑀽’’𑀢𑀺𑀆𑀤𑀺𑀦𑀸 𑀤𑀼𑀢𑀺𑀬𑀦𑀬𑁄 𑀆𑀭𑀤𑁆𑀥𑁄. 𑀇𑀫𑀲𑁆𑀫𑀺𑀜𑁆𑀘 𑀦𑀬𑁂 𑀫𑀼𑀲𑀸 𑀯𑀤𑀻𑀬𑀢𑀺 𑀯𑀼𑀘𑁆𑀘𑀢𑀺 𑀏𑀢𑀸𑀬𑀸𑀢𑀺 𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑁄. ‘‘𑀬𑀫𑀢𑁆𑀣𑀁 𑀪𑀜𑁆𑀚𑀢𑀻’’𑀢𑀺 𑀯𑀢𑁆𑀣𑀼𑀯𑀲𑁂𑀦 𑀫𑀼𑀲𑀸𑀯𑀸𑀤𑀲𑁆𑀲 𑀅𑀧𑁆𑀧𑀲𑀸𑀯𑀚𑁆𑀚𑀫𑀳𑀸𑀲𑀸𑀯𑀚𑁆𑀚𑀢𑀫𑀸𑀳. 𑀬𑀲𑁆𑀲 𑀅𑀢𑁆𑀣𑀁 𑀪𑀜𑁆𑀚𑀢𑀺, 𑀢𑀲𑁆𑀲 𑀅𑀧𑁆𑀧𑀕𑀼𑀡𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀫𑀳𑀸𑀕𑀼𑀡𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑁄𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑁂 𑀯𑀺𑀬 𑀕𑀼𑀡𑀯𑀲𑁂𑀦𑀸𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀓𑀺𑀮𑁂𑀲𑀸𑀦𑀁 𑀫𑀼𑀤𑀼𑀢𑀺𑀩𑁆𑀩𑀢𑀸𑀯𑀲𑁂𑀦𑀸𑀧𑀺 𑀅𑀧𑁆𑀧𑀲𑀸𑀯𑀚𑁆𑀚𑀫𑀳𑀸𑀲𑀸𑀯𑀚𑁆𑀚𑀢𑀸 𑀮𑀩𑁆𑀪𑀢𑀺𑀬𑁂𑀯.

𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀅𑀤𑀸𑀢𑀼𑀓𑀸𑀫𑀢𑀸𑀬, 𑀧𑀽𑀭𑀡𑀓𑀣𑀸𑀦𑀬𑁂𑀦 𑀘 𑀯𑀺𑀲𑀁𑀯𑀸𑀤𑀦𑀧𑀼𑀭𑁂𑀓𑁆𑀔𑀸𑀭𑀲𑁆𑀲𑁂𑀯 𑀫𑀼𑀲𑀸𑀯𑀸𑀤𑁄. 𑀢𑀢𑁆𑀣 𑀧𑀦 𑀘𑁂𑀢𑀦𑀸 𑀩𑀮𑀯𑀢𑀻 𑀦 𑀳𑁄𑀢𑀻𑀢𑀺 𑀅𑀧𑁆𑀧𑀲𑀸𑀯𑀚𑁆𑀚𑀢𑀸 ¶ 𑀯𑀼𑀢𑁆𑀢𑀸. 𑀅𑀧𑁆𑀧𑀢𑀸𑀬 𑀊𑀦𑀲𑁆𑀲 𑀅𑀢𑁆𑀣𑀲𑁆𑀲 𑀧𑀽𑀭𑀡𑀯𑀲𑁂𑀦 𑀧𑀯𑀢𑁆𑀢𑀸 𑀓𑀣𑀸 𑀧𑀽𑀭𑀡𑀓𑀣𑀸.

𑀢𑀚𑁆𑀚𑁄𑀢𑀺 𑀢𑀲𑁆𑀲𑀸𑀭𑀼𑀧𑁆𑀧𑁄, 𑀯𑀺𑀲𑀁𑀯𑀸𑀤𑀦𑀸𑀦𑀼𑀭𑀽𑀧𑁄𑀢𑀺 𑀅𑀢𑁆𑀣𑁄. ‘‘𑀯𑀸𑀬𑀸𑀫𑁄’’𑀢𑀺 𑀯𑀸𑀬𑀸𑀫𑀲𑀻𑀲𑁂𑀦 𑀧𑀬𑁄𑀕𑀫𑀸𑀳. 𑀯𑀺𑀲𑀁𑀯𑀸𑀤𑀦𑀸𑀥𑀺𑀧𑁆𑀧𑀸𑀬𑁂𑀦 𑀧𑀬𑁄𑀕𑁂 𑀓𑀢𑁂𑀧𑀺 𑀧𑀭𑁂𑀦 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀅𑀯𑀺𑀜𑁆𑀜𑀸𑀢𑁂 𑀯𑀺𑀲𑀁𑀯𑀸𑀤𑀦𑀲𑁆𑀲 𑀅𑀲𑀺𑀚𑁆𑀛𑀦𑀢𑁄 𑀧𑀭𑀲𑁆𑀲 𑀢𑀤𑀢𑁆𑀣𑀯𑀺𑀚𑀸𑀦𑀦𑀁 𑀏𑀓𑁄 𑀲𑀫𑁆𑀪𑀸𑀭𑁄 𑀯𑀼𑀢𑁆𑀢𑁄. 𑀓𑁂𑀘𑀺 𑀧𑀦 ‘‘𑀅𑀪𑀽𑀢𑀯𑀘𑀦𑀁 𑀯𑀺𑀲𑀁𑀯𑀸𑀤𑀦𑀘𑀺𑀢𑁆𑀢𑀁 𑀧𑀭𑀲𑁆𑀲 𑀢𑀤𑀢𑁆𑀣𑀯𑀺𑀚𑀸𑀦𑀦𑀦𑁆𑀢𑀺 𑀢𑀬𑁄 𑀲𑀫𑁆𑀪𑀸𑀭𑀸’’𑀢𑀺 𑀯𑀤𑀦𑁆𑀢𑀺. 𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀸𑀧𑀓𑀘𑁂𑀢𑀦𑀸𑀓𑁆𑀔𑀡𑁂𑀬𑁂𑀯 𑀫𑀼𑀲𑀸𑀯𑀸𑀤𑀓𑀓𑀫𑁆𑀫𑀼𑀦𑀸 𑀩𑀚𑁆𑀛𑀢𑀺 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀬 𑀦𑀺𑀩𑁆𑀩𑀢𑁆𑀢𑀢𑁆𑀢𑀸, 𑀲𑀘𑁂𑀧𑀺 𑀤𑀦𑁆𑀥𑀢𑀸𑀬 𑀯𑀺𑀘𑀸𑀭𑁂𑀢𑁆𑀯𑀸 𑀧𑀭𑁄 𑀢𑀫𑀢𑁆𑀣𑀁 𑀚𑀸𑀦𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀲𑀘𑁆𑀘𑀢𑁄 𑀣𑁂𑀢𑀢𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁯) 𑀯𑀺𑀬 𑀣𑁂𑀢-𑀲𑀤𑁆𑀤𑁄 𑀣𑀺𑀭𑀧𑀭𑀺𑀬𑀸𑀬𑁄, 𑀣𑀺𑀭𑀪𑀸𑀯𑁄 𑀘 𑀲𑀘𑁆𑀘𑀯𑀸𑀤𑀺𑀢𑀸𑀬 𑀅𑀥𑀺𑀓𑀢𑀢𑁆𑀢𑀸 𑀓𑀣𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀣𑀺𑀭𑀓𑀣𑁄𑀢𑀺 𑀅𑀢𑁆𑀣𑁄’’𑀢𑀺. 𑀦𑀣𑀺𑀭𑀓𑀣𑁄𑀢𑀺 𑀬𑀣𑀸 𑀳𑀮𑀺𑀤𑁆𑀤𑀺𑀭𑀸𑀕𑀸𑀤𑀬𑁄 ¶ 𑀅𑀦𑀯𑀝𑁆𑀞𑀺𑀢𑀲𑀪𑀸𑀯𑀢𑀸𑀬 𑀦 𑀣𑀺𑀭𑀸, 𑀏𑀯𑀁 𑀦 𑀣𑀺𑀭𑀸 𑀓𑀣𑀸 𑀬𑀲𑁆𑀲 𑀲𑁄 𑀦 𑀣𑀺𑀭𑀓𑀣𑁄𑀢𑀺 𑀳𑀮𑀺𑀤𑁆𑀤𑀺𑀭𑀸𑀕𑀸𑀤𑀬𑁄 𑀬𑀣𑀸 𑀓𑀣𑀸𑀬 𑀉𑀧𑀫𑀸 𑀳𑁄𑀦𑁆𑀢𑀺, 𑀏𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀏𑀲 𑀦𑀬𑁄 ‘‘𑀧𑀸𑀲𑀸𑀡𑀮𑁂𑀔𑀸 𑀯𑀺𑀬𑀸’’𑀢𑀺𑀆𑀤𑀻𑀲𑀼𑀧𑀺.

𑀲𑀤𑁆𑀥𑀸 𑀅𑀬𑀢𑀺 𑀧𑀯𑀢𑁆𑀢𑀢𑀺 𑀏𑀢𑁆𑀣𑀸𑀢𑀺 𑀲𑀤𑁆𑀥𑀸𑀬𑁄, 𑀲𑀤𑁆𑀥𑀸𑀬𑁄 𑀏𑀯 𑀲𑀤𑁆𑀥𑀸𑀬𑀺𑀓𑁄 𑀬𑀣𑀸 ‘‘𑀯𑁂𑀦𑀬𑀺𑀓𑁄’’𑀢𑀺 ¶ (𑀅. 𑀦𑀺. 𑁮.𑁧𑁧; 𑀧𑀸𑀭𑀸. 𑁮). 𑀲𑀤𑁆𑀥𑀸𑀬 𑀯𑀸 𑀅𑀬𑀺𑀢𑀩𑁆𑀩𑁄 𑀲𑀤𑁆𑀥𑀸𑀬𑀺𑀓𑁄, 𑀲𑀤𑁆𑀥𑁂𑀬𑁆𑀬𑁄𑀢𑀺 𑀅𑀢𑁆𑀣𑁄. 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺 𑀯𑀺𑀲𑀁𑀯𑀸𑀤𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀼𑀜𑁆𑀜𑀪𑀸𑀯𑀦𑁆𑀢𑀺 𑀧𑀻𑀢𑀺𑀯𑀺𑀭𑀳𑀺𑀢𑀢𑀸𑀬 𑀭𑀺𑀢𑁆𑀢𑀢𑀁. 𑀲𑀸 𑀧𑀺𑀲𑀼𑀡𑀯𑀸𑀘𑀸𑀢𑀺 𑀬𑀸𑀬𑀁 𑀬𑀣𑀸𑀯𑀼𑀢𑁆𑀢𑀸 𑀲𑀤𑁆𑀤𑀲𑀪𑀸𑀯𑀸 𑀯𑀸𑀘𑀸, 𑀲𑀸 𑀧𑀺𑀬𑀲𑀼𑀜𑁆𑀜𑀓𑀭𑀡𑀢𑁄 𑀧𑀺𑀲𑀼𑀡𑀯𑀸𑀘𑀸𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀅𑀢𑁆𑀣𑀫𑀸𑀳. 𑀧𑀺𑀲𑀢𑀻𑀢𑀺 𑀯𑀸 𑀧𑀺𑀲𑀼𑀡𑀸, 𑀲𑀫𑀕𑁆𑀕𑁂 𑀲𑀢𑁆𑀢𑁂 𑀅𑀯𑀬𑀯𑀪𑀽𑀢𑁂 𑀯𑀕𑁆𑀕𑁂 𑀪𑀺𑀦𑁆𑀦𑁂 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑀨𑀭𑀼𑀲𑀦𑁆𑀢𑀺 𑀲𑀺𑀦𑁂𑀳𑀸𑀪𑀸𑀯𑁂𑀦 𑀮𑀽𑀔𑀁. 𑀲𑀬𑀫𑁆𑀧𑀺 𑀨𑀭𑀼𑀲𑀸𑀢𑀺 𑀤𑁄𑀫𑀦𑀲𑁆𑀲𑀲𑀫𑀼𑀝𑁆𑀞𑀺𑀢𑀢𑁆𑀢𑀸 𑀲𑀪𑀸𑀯𑁂𑀦𑀧𑀺 𑀓𑀓𑁆𑀓𑀲𑀸. 𑀏𑀢𑁆𑀣 𑀘 𑀨𑀭𑀼𑀲𑀁 𑀓𑀭𑁄𑀢𑀻𑀢𑀺 𑀨𑀮𑀽𑀧𑀘𑀸𑀭𑁂𑀦, 𑀨𑀭𑀼𑀲𑀬𑀢𑀻𑀢𑀺 𑀯𑀸 𑀯𑀸𑀘𑀸𑀬 𑀨𑀭𑀼𑀲-𑀲𑀤𑁆𑀤𑀧𑁆𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀬𑀫𑁆𑀧𑀺 𑀨𑀭𑀼𑀲𑀸𑀢𑀺 𑀧𑀭𑁂𑀲𑀁 𑀫𑀫𑁆𑀫𑀘𑁆𑀙𑁂𑀤𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀏𑀓𑀦𑁆𑀢𑀦𑀺𑀝𑁆𑀞𑀼𑀭𑀢𑀸𑀬 𑀲𑀪𑀸𑀯𑁂𑀦, 𑀓𑀸𑀭𑀡𑀯𑁄𑀳𑀸𑀭𑁂𑀦 ¶ 𑀘 𑀯𑀸𑀘𑀸𑀬 𑀨𑀭𑀼𑀲-𑀲𑀤𑁆𑀤𑀧𑁆𑀧𑀯𑀢𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀢𑁄𑀬𑁂𑀯 𑀘 𑀦𑁂𑀯 𑀓𑀡𑁆𑀡𑀲𑀼𑀔𑀸. 𑀅𑀢𑁆𑀣𑀯𑀺𑀧𑀦𑁆𑀦𑀢𑀸𑀬 𑀦 𑀳𑀤𑀬𑀗𑁆𑀕𑀫𑀸.

𑀬𑁂𑀦 𑀲𑀫𑁆𑀨𑀁 𑀧𑀮𑀧𑀢𑀻𑀢𑀺 𑀬𑁂𑀦 𑀧𑀮𑀸𑀧𑀲𑀗𑁆𑀔𑀸𑀢𑁂𑀦 𑀦𑀺𑀭𑀢𑁆𑀣𑀓𑀯𑀘𑀦𑁂𑀦 𑀲𑀼𑀔𑀁 𑀳𑀺𑀢𑀜𑁆𑀘 𑀨𑀮𑀢𑀺 𑀯𑀺𑀤𑀭𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 ‘‘𑀲𑀫𑁆𑀨’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀅𑀦𑀼𑀧𑀓𑀸𑀭𑀓𑀁 𑀬𑀁 𑀓𑀺𑀜𑁆𑀘𑀺 𑀧𑀮𑀧𑀢𑀺.

𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀲𑁆𑀲𑀸𑀢𑀺 𑀮𑁄𑀪𑁂𑀦 𑀤𑁄𑀲𑁂𑀦 𑀯𑀸 𑀯𑀺𑀩𑀸𑀥𑀺𑀢𑀘𑀺𑀢𑁆𑀢𑀲𑁆𑀲, 𑀉𑀧𑀢𑀸𑀧𑀺𑀢𑀘𑀺𑀢𑁆𑀢𑀲𑁆𑀲 𑀯𑀸, 𑀤𑀽𑀲𑀺𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀘𑁂𑀢𑀦𑀸 𑀧𑀺𑀲𑀼𑀡𑀯𑀸𑀘𑀸 𑀧𑀺𑀲𑀼𑀡𑀁 𑀯𑀤𑀦𑁆𑀢𑀺 𑀏𑀢𑀸𑀬𑀸𑀢𑀺. 𑀬𑀲𑁆𑀲 𑀬𑀢𑁄 𑀪𑁂𑀤𑀁 𑀓𑀭𑁄𑀢𑀺, 𑀢𑁂𑀲𑀼 𑀅𑀪𑀺𑀦𑁆𑀦𑁂𑀲𑀼 𑀅𑀧𑁆𑀧𑀲𑀸𑀯𑀚𑁆𑀚𑀁, 𑀪𑀺𑀦𑁆𑀦𑁂𑀲𑀼 𑀫𑀳𑀸𑀲𑀸𑀯𑀚𑁆𑀚𑀁, 𑀢𑀣𑀸 𑀓𑀺𑀮𑁂𑀲𑀸𑀦𑀁 𑀫𑀼𑀤𑀼𑀢𑀺𑀩𑁆𑀩𑀢𑀸𑀯𑀺𑀲𑁂𑀲𑁂𑀲𑀼.

𑀬𑀲𑁆𑀲 𑀧𑁂𑀲𑀼𑀜𑁆𑀜𑀁 ¶ 𑀉𑀧𑀲𑀁𑀳𑀭𑀢𑀺, 𑀲𑁄 𑀪𑀺𑀚𑁆𑀚𑀢𑀼 𑀯𑀸 𑀫𑀸 𑀯𑀸, 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀧𑀦𑀫𑁂𑀯 𑀧𑀫𑀸𑀡𑀦𑁆𑀢𑀺 𑀆𑀳 ‘‘𑀢𑀤𑀢𑁆𑀣𑀯𑀺𑀚𑀸𑀦𑀦’’𑀦𑁆𑀢𑀺, 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀺 𑀧𑀦 𑀪𑀺𑀦𑁆𑀦𑁂 𑀏𑀯.

𑀅𑀦𑀼𑀧𑁆𑀧𑀤𑀸𑀢𑀸𑀢𑀺 𑀅𑀦𑀼𑀩𑀮𑀧𑁆𑀧𑀤𑀸𑀢𑀸, 𑀅𑀦𑀼𑀯𑀢𑁆𑀢𑀦𑀯𑀲𑁂𑀦 𑀯𑀸 𑀧𑀤𑀸𑀢𑀸. 𑀓𑀲𑁆𑀲 𑀧𑀦 𑀅𑀦𑀼𑀯𑀢𑁆𑀢𑀦𑀁 𑀧𑀤𑀸𑀦𑀜𑁆𑀘? ‘‘𑀲𑀳𑀺𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀦𑁆𑀥𑀸𑀦𑀲𑁆𑀲𑀸’’𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑀦𑁆𑀥𑀸𑀦𑀸𑀦𑀼𑀧𑁆𑀧𑀤𑀸𑀢𑀸’’𑀢𑀺. 𑀬𑀲𑁆𑀫𑀸 𑀧𑀦 𑀅𑀦𑀼𑀯𑀢𑁆𑀢𑀦𑀯𑀲𑁂𑀦 𑀲𑀦𑁆𑀥𑀸𑀦𑀲𑁆𑀲 𑀧𑀤𑀸𑀦𑀁 𑀆𑀥𑀸𑀦𑀁, 𑀭𑀓𑁆𑀔𑀡𑀁 𑀯𑀸 𑀤𑀴𑁆𑀳𑀻𑀓𑀭𑀡𑀁 𑀳𑁄𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀴𑁆𑀳𑀻𑀓𑀫𑁆𑀫𑀁 𑀓𑀢𑁆𑀢𑀸𑀢𑀺 𑀅𑀢𑁆𑀣𑁄’’𑀢𑀺. 𑀆𑀭𑀫𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀭𑀸𑀫𑁄, 𑀭𑀫𑀺𑀢𑀩𑁆𑀩𑀝𑁆𑀞𑀸𑀦𑀁 ¶ . 𑀬𑀲𑁆𑀫𑀸 𑀧𑀦 𑀆𑀓𑀸𑀭𑁂𑀦 𑀯𑀺𑀦𑀸𑀧𑀺 𑀅𑀬𑀫𑁂𑀯𑀢𑁆𑀣𑁄 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀫𑀕𑁆𑀕𑀭𑀸𑀫𑁄𑀢𑀺𑀧𑀺 𑀧𑀸𑀴𑀺, 𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄’’𑀢𑀺.

𑀫𑀫𑁆𑀫𑀸𑀦𑀺 𑀯𑀺𑀬 𑀫𑀫𑁆𑀫𑀸𑀦𑀺, 𑀬𑁂𑀲𑀼 𑀨𑀭𑀼𑀲𑀯𑀸𑀘𑀸𑀬 𑀙𑀼𑀧𑀺𑀢𑀫𑀢𑁆𑀢𑁂𑀲𑀼 𑀤𑀼𑀝𑁆𑀞𑀸𑀭𑀽𑀲𑀼 𑀯𑀺𑀬 𑀖𑀝𑁆𑀝𑀺𑀢𑁂𑀲𑀼 𑀘𑀺𑀢𑁆𑀢𑀁 𑀅𑀥𑀺𑀫𑀢𑁆𑀢𑀁 𑀤𑀼𑀓𑁆𑀔𑀧𑁆𑀧𑀢𑁆𑀢𑀁 𑀳𑁄𑀢𑀺. 𑀓𑀸𑀦𑀺 𑀧𑀦 𑀢𑀸𑀦𑀺? 𑀚𑀸𑀢𑀺𑀆𑀤𑀻𑀦𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀦𑀺. 𑀢𑀸𑀦𑀺 𑀙𑀺𑀚𑁆𑀚𑀦𑁆𑀢𑀺, 𑀪𑀺𑀚𑁆𑀚𑀦𑁆𑀢𑀺 𑀯𑀸 𑀬𑁂𑀦 𑀓𑀸𑀬𑀯𑀘𑀻𑀧𑀬𑁄𑀕𑁂𑀦, 𑀲𑁄 𑀫𑀫𑁆𑀫𑀘𑁆𑀙𑁂𑀤𑀓𑁄. 𑀏𑀓𑀦𑁆𑀢𑁂𑀦 𑀨𑀭𑀼𑀲𑀘𑁂𑀢𑀦𑀸 𑀨𑀭𑀼𑀲𑀯𑀸𑀘𑀸 𑀨𑀭𑀼𑀲𑀁 𑀯𑀤𑀢𑀺 𑀏𑀢𑀸𑀬𑀸𑀢𑀺. 𑀓𑀣𑀁 𑀧𑀦 𑀏𑀓𑀦𑁆𑀢𑀨𑀭𑀼𑀲𑀘𑁂𑀢𑀦𑀸 𑀳𑁄𑀢𑀺? 𑀤𑀼𑀝𑁆𑀞𑀘𑀺𑀢𑁆𑀢𑀢𑀸𑀬. 𑀢𑀲𑁆𑀲𑀸𑀢𑀺 𑀏𑀓𑀦𑁆𑀢𑀨𑀭𑀼𑀲𑀘𑁂𑀢𑀦𑀸𑀬 𑀏𑀯 𑀨𑀭𑀼𑀲𑀯𑀸𑀘𑀸𑀪𑀸𑀯𑀲𑁆𑀲. 𑀫𑀫𑁆𑀫𑀘𑁆𑀙𑁂𑀤𑀓𑁄 𑀲𑀯𑀦𑀨𑀭𑀼𑀲𑀢𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀺𑀢𑁆𑀢𑀲𑀡𑁆𑀳𑀢𑀸𑀬 𑀨𑀭𑀼𑀲𑀯𑀸𑀘𑀸 𑀦 𑀳𑁄𑀢𑀺 𑀓𑀫𑁆𑀫𑀧𑀣’𑀧𑁆𑀧𑀢𑁆𑀢𑀢𑁆𑀢𑀸, 𑀓𑀫𑁆𑀫𑀪𑀸𑀯𑀁 𑀧𑀦 𑀦 𑀲𑀓𑁆𑀓𑀸 𑀯𑀸𑀭𑁂𑀢𑀼𑀦𑁆𑀢𑀺. 𑀏𑀯𑀁 𑀅𑀦𑁆𑀯𑀬𑀯𑀲𑁂𑀦 𑀘𑁂𑀢𑀦𑀸𑀨𑀭𑀼𑀲𑀢𑀸𑀬 𑀨𑀭𑀼𑀲𑀯𑀸𑀘𑀁 𑀲𑀸𑀥𑁂𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀧𑀝𑀺𑀧𑀓𑁆𑀔𑀦𑀬𑁂𑀦 𑀲𑀸𑀥𑁂𑀢𑀼𑀁 ‘‘𑀯𑀘𑀦𑀲𑀡𑁆𑀳𑀢𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀸 𑀨𑀭𑀼𑀲𑀯𑀸𑀘𑀸 ¶ . 𑀬𑀦𑁆𑀢𑀺 𑀬𑀁 𑀧𑀼𑀕𑁆𑀕𑀮𑀁. 𑀏𑀢𑁆𑀣𑀸𑀧𑀺 𑀓𑀫𑁆𑀫𑀧𑀣𑀪𑀸𑀯𑀁 𑀅𑀧𑁆𑀧𑀢𑁆𑀢𑀸 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀇𑀢𑀭𑀸 𑀫𑀳𑀸𑀲𑀸𑀯𑀚𑁆𑀚𑀸, 𑀢𑀣𑀸 𑀓𑀺𑀮𑁂𑀲𑀸𑀦𑀁 𑀫𑀼𑀤𑀼𑀢𑀺𑀩𑁆𑀩𑀢𑀸𑀪𑀸𑀯𑁂. 𑀓𑁂𑀘𑀺 𑀧𑀦 ‘‘𑀬𑀁 𑀉𑀤𑁆𑀤𑀺𑀲𑁆𑀲 𑀨𑀭𑀼𑀲𑀯𑀸𑀘𑀸 𑀧𑀬𑀼𑀚𑁆𑀚𑀦𑁆𑀢𑀺, 𑀢𑀲𑁆𑀲 𑀲𑀫𑁆𑀫𑀼𑀔𑀸𑀯 𑀲𑀻𑀲𑀁 𑀏𑀢𑀻’’𑀢𑀺, 𑀏𑀓𑁂 ‘‘𑀧𑀭𑀫𑁆𑀫𑀼𑀔𑀸𑀧𑀺 𑀨𑀭𑀼𑀲𑀯𑀸𑀘𑀸 𑀳𑁄𑀢𑀺𑀬𑁂𑀯𑀸’’𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 𑀬𑀼𑀢𑁆𑀢𑁄 𑀲𑀺𑀬𑀸 𑁋 𑀲𑀫𑁆𑀫𑀼𑀔𑀸 𑀧𑀬𑁄𑀕𑁂 𑀅𑀕𑀸𑀭𑀯𑀸𑀤𑀻𑀦𑀁 𑀩𑀮𑀯𑀪𑀸𑀯𑀢𑁄 𑀲𑀺𑀬𑀸 𑀘𑁂𑀢𑀦𑀸 ¶ 𑀩𑀮𑀯𑀢𑀻, 𑀧𑀭𑀲𑁆𑀲 𑀘 𑀢𑀤𑀢𑁆𑀣𑀚𑀸𑀦𑀦𑀁, 𑀦 𑀢𑀣𑀸 𑀅𑀲𑀫𑁆𑀫𑀼𑀔𑀸𑀢𑀺. 𑀬𑀣𑀸 𑀧𑀦 𑀅𑀓𑁆𑀓𑁄𑀲𑀺𑀢𑁂 𑀫𑀢𑁂 𑀆𑀴𑀳𑀦𑁂 𑀓𑀢𑀸 𑀔𑀫𑀦𑀸 𑀉𑀧𑀯𑀸𑀤𑀦𑁆𑀢𑀭𑀸𑀬𑀁 𑀦𑀺𑀯𑀢𑁆𑀢𑁂𑀢𑀺, 𑀏𑀯𑀁 ‘‘𑀧𑀭𑀫𑁆𑀫𑀼𑀔𑀸 𑀧𑀬𑀼𑀢𑁆𑀢𑀸𑀧𑀺 𑀨𑀭𑀼𑀲𑀯𑀸𑀘𑀸 𑀳𑁄𑀢𑀺𑀬𑁂𑀯𑀸’’𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺. 𑀓𑀼𑀧𑀺𑀢𑀘𑀺𑀢𑁆𑀢𑀦𑁆𑀢𑀺 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑁂𑀦𑁂𑀯 𑀓𑀼𑀧𑀺𑀢𑀘𑀺𑀢𑁆𑀢𑀁, 𑀦 𑀫𑀭𑀡𑀸𑀥𑀺𑀧𑁆𑀧𑀸𑀬𑁂𑀦. 𑀫𑀭𑀡𑀸𑀥𑀺𑀧𑁆𑀧𑀸𑀬𑁂𑀦 𑀳𑀺 𑀘𑀺𑀢𑁆𑀢𑀓𑁄𑀧𑁂 𑀲𑀢𑀺 𑀩𑁆𑀬𑀸𑀧𑀸𑀤𑁄𑀬𑁂𑀯 𑀳𑁄𑀢𑀻𑀢𑀺. 𑀏𑀢𑁆𑀣𑀸𑀢𑀺 𑁋

‘‘𑀦𑁂𑀮𑀗𑁆𑀕𑁄 𑀲𑁂𑀢𑀧𑀘𑁆𑀙𑀸𑀤𑁄, 𑀏𑀓𑀸𑀭𑁄 𑀯𑀢𑁆𑀢𑀢𑀻 𑀭𑀣𑁄;

𑀅𑀦𑀻𑀖𑀁 𑀧𑀲𑁆𑀲 𑀆𑀬𑀦𑁆𑀢𑀁, 𑀙𑀺𑀦𑁆𑀦𑀲𑁄𑀢𑀁 𑀅𑀩𑀦𑁆𑀥𑀦’’𑀦𑁆𑀢𑀺. (𑀲𑀁. 𑀦𑀺. 𑁪.𑁩𑁪𑁭; 𑀉𑀤𑀸. 𑁬𑁫);

𑀇𑀫𑀺𑀲𑁆𑀲𑀸 𑀕𑀸𑀣𑀸𑀬. 𑀲𑀻𑀮𑀜𑁆𑀳𑁂𑀢𑁆𑀣 ‘‘𑀦𑁂𑀮𑀗𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 𑀘𑀺𑀢𑁆𑀢𑁄 𑀕𑀳𑀧𑀢𑀺 ‘‘𑀦𑁂𑀮𑀗𑁆𑀕𑀦𑁆𑀢𑀺 𑀔𑁄 𑀪𑀦𑁆𑀢𑁂 𑀲𑀻𑀮𑀸𑀦𑀫𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀲𑀁. 𑀦𑀺. 𑁪.𑁩𑁪𑁭). 𑀲𑀼𑀓𑀼𑀫𑀸𑀭𑀸𑀢𑀺 𑀅𑀨𑀭𑀼𑀲𑀢𑀸𑀬 𑀫𑀼𑀤𑀼𑀓𑀸. 𑀧𑀼𑀭𑀲𑁆𑀲𑀸𑀢𑀺 𑀏𑀢𑁆𑀣 𑀧𑀼𑀭-𑀲𑀤𑁆𑀤𑁄 𑀢𑀦𑁆𑀦𑀺𑀯𑀸𑀲𑀻𑀯𑀸𑀘𑀓𑁄 𑀤𑀝𑁆𑀞𑀩𑁆𑀩𑁄 ‘‘𑀕𑀸𑀫𑁄 𑀆𑀕𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀢𑁂𑀦𑁂𑀯𑀸𑀳 ‘‘𑀦𑀕𑀭𑀯𑀸𑀲𑀻𑀦’’𑀦𑁆𑀢𑀺. 𑀫𑀦𑀁 𑀅𑀧𑁆𑀧𑀸𑀬𑀢𑀺 𑀯𑀟𑁆𑀠𑁂𑀢𑀻𑀢𑀺 𑀫𑀦𑀸𑀧𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀯𑀼𑀟𑁆𑀠𑀺𑀓𑀭𑀸’’𑀢𑀺. 𑀆𑀲𑁂𑀯𑀦𑀁 𑀪𑀸𑀯𑀦𑀁 𑀩𑀳𑀼𑀮𑀻𑀓𑀭𑀡𑀁. 𑀬𑀁 𑀕𑀸𑀳𑀬𑀺𑀢𑀼𑀁 𑀧𑀯𑀢𑁆𑀢𑀺𑀢𑁄, 𑀢𑁂𑀦 𑀅𑀕𑁆𑀕𑀳𑀺𑀢𑁂 𑀅𑀧𑁆𑀧𑀲𑀸𑀯𑀚𑁆𑀚𑁄 ¶ 𑀕𑀳𑀺𑀢𑁂 𑀫𑀳𑀸𑀲𑀸𑀯𑀚𑁆𑀚𑁄𑀢𑀺, 𑀇𑀥𑀸𑀧𑀺 𑀓𑀺𑀮𑁂𑀲𑀸𑀦𑀁 𑀫𑀼𑀤𑀼𑀢𑀺𑀩𑁆𑀩𑀢𑀸𑀯𑀲𑁂𑀦𑀸𑀧𑀺 𑀅𑀧𑁆𑀧𑀲𑀸𑀯𑀚𑁆𑀚𑀫𑀳𑀸𑀲𑀸𑀯𑀚𑁆𑀚𑀢𑀸 𑀮𑀩𑁆𑀪𑀢𑀺𑀬𑁂𑀯.

‘‘𑀓𑀸𑀮𑀯𑀸𑀤𑀻’’𑀢𑀺𑀆𑀤𑀺 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑀲𑁆𑀲 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀁. 𑀬𑀣𑀸 𑀳𑀺 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄’’𑀢𑀺𑀆𑀤𑀺 𑀧𑀸𑀡𑀸𑀢𑀺𑀧𑀸𑀢𑀧𑁆𑀧𑀳𑀸𑀦𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀁. ‘‘𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀯𑀺𑀳𑀭𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑁂 𑀓𑀣𑀁 𑀧𑀸𑀡𑀸𑀢𑀺𑀧𑀸𑀢𑀧𑁆𑀧𑀳𑀸𑀦𑀁 𑀳𑁄𑀢𑀻𑀢𑀺? 𑀅𑀧𑁂𑀓𑁆𑀔𑀸𑀲𑀩𑁆𑀪𑀸𑀯𑀢𑁄 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀲𑀸 𑀧𑀦 𑀯𑀺𑀭𑀢𑀺 𑀓𑀣𑀦𑁆𑀢𑀺 ¶ 𑀆𑀳 ‘‘𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄’’𑀢𑀺, 𑀢𑀜𑁆𑀘 𑀤𑀡𑁆𑀟𑀲𑀢𑁆𑀣𑀦𑀺𑀥𑀸𑀦𑀁 𑀓𑀣𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀮𑀚𑁆𑀚𑀻’’𑀢𑀺𑀆𑀤𑀺, 𑀏𑀯𑀁 𑀉𑀢𑁆𑀢𑀭𑀼𑀢𑁆𑀢𑀭𑀁 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀉𑀧𑀸𑀬𑀲𑀦𑁆𑀤𑀲𑁆𑀲𑀦𑀁, 𑀢𑀣𑀸 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼 ¶ 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀸𑀮𑀯𑀸𑀤𑀻𑀢𑀺𑀆𑀤𑀺 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑀲𑁆𑀲 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦’’𑀦𑁆𑀢𑀺. 𑀅𑀢𑁆𑀣𑀲𑀜𑁆𑀳𑀺𑀢𑀸𑀧𑀺 𑀳𑀺 𑀯𑀸𑀘𑀸 𑀅𑀬𑀼𑀢𑁆𑀢𑀓𑀸𑀮𑀧𑁆𑀧𑀬𑁄𑀕𑁂𑀦 𑀅𑀢𑁆𑀣𑀸𑀯𑀳𑀸 𑀦 𑀲𑀺𑀬𑀸𑀢𑀺 𑀅𑀦𑀢𑁆𑀣𑀯𑀺𑀜𑁆𑀜𑀸𑀧𑀦𑀯𑀸𑀘𑀁 𑀅𑀦𑀼𑀮𑁄𑀫𑁂𑀢𑀺, 𑀢𑀲𑁆𑀫𑀸 𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀚𑀳𑀦𑁆𑀢𑁂𑀦 𑀅𑀓𑀸𑀮𑀯𑀸𑀤𑀺𑀢𑀸 𑀧𑀭𑀺𑀯𑀚𑁆𑀚𑁂𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 ‘‘𑀓𑀸𑀮𑀯𑀸𑀤𑀻’’𑀢𑀺. 𑀓𑀸𑀮𑁂𑀦 𑀯𑀤𑀦𑁆𑀢𑁂𑀦𑀸𑀧𑀺 𑀉𑀪𑀬𑀸𑀦𑀢𑁆𑀣𑀲𑀸𑀥𑀦𑀢𑁄 𑀅𑀪𑀽𑀢𑀁 𑀧𑀭𑀺𑀯𑀚𑁆𑀚𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀪𑀽𑀢𑀯𑀸𑀤𑀻’’𑀢𑀺. 𑀪𑀽𑀢𑀜𑁆𑀘 𑀯𑀤𑀦𑁆𑀢𑁂𑀦 𑀬𑀁 𑀇𑀥𑀮𑁄𑀓𑀧𑀭𑀮𑁄𑀓𑀳𑀺𑀢𑀲𑀫𑁆𑀧𑀸𑀤𑀓𑀁, 𑀢𑀤𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀣𑀯𑀸𑀤𑀻’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀁 𑀯𑀤𑀦𑁆𑀢𑁂𑀦𑀸𑀧𑀺 𑀦 𑀮𑁄𑀓𑀺𑀬𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀫𑁂𑀯 𑀯𑀢𑁆𑀢𑀩𑁆𑀩𑀁, 𑀅𑀣 𑀔𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀁 𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀥𑀫𑁆𑀫𑀯𑀸𑀤𑀻’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀘 𑀅𑀢𑁆𑀣𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑀦𑀢𑁆𑀣𑀁 ‘‘𑀯𑀺𑀦𑀬𑀯𑀸𑀤𑀻’’𑀢𑀺 𑀯𑀼𑀢𑁆𑀢𑀁. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄 𑀲𑀢𑀺𑀲𑀁𑀯𑀭𑁄 𑀜𑀸𑀡𑀲𑀁𑀯𑀭𑁄 𑀔𑀦𑁆𑀢𑀺𑀲𑀁𑀯𑀭𑁄 𑀯𑀻𑀭𑀺𑀬𑀲𑀁𑀯𑀭𑁄𑀢𑀺 𑀳𑀺 𑀧𑀜𑁆𑀘𑀦𑁆𑀦𑀁 𑀲𑀁𑀯𑀭𑀸𑀦𑀁, 𑀢𑀤𑀗𑁆𑀕𑀯𑀺𑀦𑀬𑁄 𑀯𑀺𑀓𑁆𑀔𑀫𑁆𑀪𑀦𑀯𑀺𑀦𑀬𑁄 𑀲𑀫𑀼𑀘𑁆𑀙𑁂𑀤𑀯𑀺𑀦𑀬𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀦𑀬𑁄 𑀦𑀺𑀲𑁆𑀲𑀭𑀡𑀯𑀺𑀦𑀬𑁄𑀢𑀺 𑀧𑀜𑁆𑀘𑀦𑁆𑀦𑀁 𑀯𑀺𑀦𑀬𑀸𑀦𑀜𑁆𑀘 𑀯𑀲𑁂𑀦 𑀯𑀼𑀘𑁆𑀘𑀫𑀸𑀦𑁄 𑀅𑀢𑁆𑀣𑁄 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀳𑁂𑀢𑀼𑀪𑀸𑀯𑀢𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑁄 𑀳𑁄𑀢𑀻𑀢𑀺.

𑀏𑀯𑀁 𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑁄 𑀘 𑀅𑀢𑁆𑀣𑁄 𑀯𑀼𑀘𑁆𑀘𑀫𑀸𑀦𑁄 𑀤𑁂𑀲𑀦𑀸𑀓𑁄𑀲𑀮𑁆𑀮𑁂 𑀲𑀢𑀺 𑀲𑁄𑀪𑀢𑀺, 𑀓𑀺𑀘𑁆𑀘𑀓𑀭𑁄 𑀘 𑀳𑁄𑀢𑀺, 𑀦𑀸𑀜𑁆𑀜𑀣𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀢𑀁 𑀤𑁂𑀲𑀦𑀸𑀓𑁄𑀲𑀮𑁆𑀮𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀓𑀸𑀮𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀅𑀚𑁆𑀛𑀸𑀲𑀬𑀝𑁆𑀞𑀼𑀧𑁆𑀧𑀢𑁆𑀢𑀻𑀦𑀁 𑀧𑀼𑀘𑁆𑀙𑀸𑀬 𑀘 𑀯𑀲𑁂𑀦 𑀑𑀢𑀺𑀡𑁆𑀡𑁂 𑀤𑁂𑀲𑀦𑀸𑀯𑀺𑀲𑀬𑁂 𑀏𑀓𑀁𑀲𑀸𑀤𑀺𑀩𑁆𑀬𑀸𑀓𑀭𑀡𑀯𑀺𑀪𑀸𑀕𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀞𑀧𑀦𑀸𑀳𑁂𑀢𑀼𑀤𑀸𑀳𑀭𑀡𑀲𑀁𑀲𑀦𑁆𑀤𑀦𑀸𑀦𑀺 𑀢𑀁𑀢𑀁𑀓𑀸𑀮𑀸𑀦𑀼𑀭𑀽𑀧𑀁 𑀯𑀺𑀪𑀸𑀯𑁂𑀦𑁆𑀢𑀺𑀬𑀸 𑀧𑀭𑀺𑀫𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑀸𑀬 𑀯𑀺𑀧𑀼𑀮𑀢𑀭𑀕𑀫𑁆𑀪𑀻𑀭𑀼𑀤𑀸𑀭𑀧𑀳𑀽𑀢𑀢𑁆𑀣𑀯𑀺𑀢𑁆𑀣𑀸𑀭𑀲𑀗𑁆𑀕𑀸𑀳𑀓𑀸𑀬 ¶ 𑀤𑁂𑀲𑀦𑀸𑀬 𑀧𑀭𑁂 𑀬𑀣𑀸𑀚𑁆𑀛𑀸𑀲𑀬𑀁 𑀧𑀭𑀫𑀢𑁆𑀣𑀲𑀺𑀤𑁆𑀥𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁄 ‘‘𑀤𑁂𑀲𑀦𑀸𑀓𑀼𑀲𑀮𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁧𑁦. 𑀏𑀯𑀁 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀫𑀽𑀮𑀲𑀺𑀓𑁆𑀔𑀸𑀧𑀤𑀸𑀦𑀺 𑀯𑀺𑀪𑀚𑀺𑀢𑁆𑀯𑀸 𑀲𑀢𑀺𑀧𑀺 𑀅𑀪𑀺𑀚𑁆𑀛𑀸𑀤𑀺𑀧𑁆𑀧𑀳𑀸𑀦𑀲𑁆𑀲 ¶ 𑀲𑀁𑀯𑀭𑀲𑀻𑀮𑀲𑀺𑀓𑁆𑀔𑀸𑀲𑀗𑁆𑀕𑀳𑁂 𑀉𑀧𑀭𑀺𑀕𑀼𑀡𑀲𑀗𑁆𑀕𑀳𑀢𑁄, 𑀮𑁄𑀓𑀺𑀬𑀧𑀼𑀣𑀼𑀚𑁆𑀚𑀦𑀸𑀯𑀺𑀲𑀬𑀢𑁄 𑀘 𑀉𑀢𑁆𑀢𑀭𑀤𑁂𑀲𑀦𑀸𑀬 𑀲𑀗𑁆𑀕𑀡𑁆𑀳𑀺𑀢𑀼𑀁 𑀢𑀁 𑀧𑀭𑀺𑀳𑀭𑀺𑀢𑁆𑀯𑀸 𑀧𑀘𑀼𑀭𑀚𑀦𑀧𑀸𑀓𑀝𑀁 𑀆𑀘𑀸𑀭𑀲𑀻𑀮𑀫𑁂𑀯 𑀯𑀺𑀪𑀚𑀦𑁆𑀢𑁄 𑀪𑀕𑀯𑀸 ‘‘𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀕𑀸𑀫𑁄𑀢𑀺 𑀲𑀫𑀽𑀳𑁄. 𑀦𑀦𑀼 𑀘 𑀭𑀼𑀓𑁆𑀔𑀸𑀤𑀬𑁄 𑀘𑀺𑀢𑁆𑀢𑀭𑀳𑀺𑀢𑀢𑀸𑀬 𑀦 𑀚𑀻𑀯𑀸, 𑀘𑀺𑀢𑁆𑀢𑀭𑀳𑀺𑀢𑀢𑀸 𑀘 𑀧𑀭𑀺𑀧𑁆𑀨𑀦𑁆𑀤𑀸𑀪𑀸𑀯𑀢𑁄 ¶ , 𑀙𑀺𑀦𑁆𑀦𑁂 𑀯𑀺𑀭𑀼𑀳𑀦𑀢𑁄, 𑀯𑀺𑀲𑀤𑀺𑀲𑀚𑀸𑀢𑀺𑀓𑀪𑀸𑀯𑀢𑁄, 𑀘𑀢𑀼𑀬𑁄𑀦𑀺𑀅𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑁄 𑀘 𑀯𑁂𑀤𑀺𑀢𑀩𑁆𑀩𑀸, 𑀯𑀼𑀟𑁆𑀠𑀺 𑀧𑀦 𑀧𑀯𑀸𑀴𑀲𑀺𑀮𑀸𑀮𑀯𑀡𑀸𑀦𑀫𑁆𑀧𑀺 𑀯𑀺𑀚𑁆𑀚𑀢𑀻𑀢𑀺 𑀦 𑀢𑁂𑀲𑀁 𑀚𑀻𑀯𑀪𑀸𑀯𑁂 𑀓𑀸𑀭𑀡𑀁, 𑀯𑀺𑀲𑀬𑀕𑁆𑀕𑀳𑀡𑀜𑁆𑀘 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑀁 𑀲𑀼𑀧𑀦𑀁 𑀯𑀺𑀬 𑀘𑀺𑀜𑁆𑀘𑀸𑀤𑀻𑀦𑀁, 𑀢𑀣𑀸 𑀤𑁄𑀳𑀴𑀸𑀤𑀬𑁄, 𑀢𑀢𑁆𑀣 𑀓𑀲𑁆𑀫𑀸 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸 𑀧𑀝𑀺𑀯𑀺𑀭𑀢𑀺 𑀇𑀘𑁆𑀙𑀺𑀢𑀸𑀢𑀺? 𑀲𑀫𑀡𑀲𑀸𑀭𑀼𑀧𑁆𑀧𑀢𑁄, 𑀲𑀦𑁆𑀦𑀺𑀲𑁆𑀲𑀺𑀢𑀲𑀢𑁆𑀢𑀸𑀦𑀼𑀭𑀓𑁆𑀔𑀡𑀢𑁄 𑀘. 𑀢𑁂𑀦𑁂𑀯𑀸𑀳 ‘‘𑀚𑀻𑀯𑀲𑀜𑁆𑀜𑀺𑀦𑁄 𑀳𑀺 𑀫𑁄𑀖𑀧𑀼𑀭𑀺𑀲𑀸 𑀫𑀦𑀼𑀲𑁆𑀲𑀸 𑀭𑀼𑀓𑁆𑀔𑀲𑁆𑀫𑀺’’𑀦𑁆𑀢𑀺𑀆𑀤𑀺 (𑀧𑀸𑀘𑀺. 𑁮𑁯). 𑀦𑀻𑀮𑀢𑀺𑀡𑀭𑀼𑀓𑁆𑀔𑀸𑀤𑀺𑀓𑀲𑁆𑀲𑀸𑀢𑀺 𑀅𑀮𑁆𑀮𑀢𑀺𑀡𑀲𑁆𑀲 𑀘𑁂𑀯 𑀅𑀮𑁆𑀮𑀭𑀼𑀓𑁆𑀔𑀸𑀤𑀺𑀓𑀲𑁆𑀲 𑀘. 𑀆𑀤𑀺-𑀲𑀤𑁆𑀤𑁂𑀦 𑀑𑀲𑀥𑀺𑀕𑀘𑁆𑀙𑀮𑀢𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸.

𑀏𑀓𑀁 𑀪𑀢𑁆𑀢𑀁 𑀏𑀓𑀪𑀢𑁆𑀢𑀁, 𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀏𑀓𑀪𑀢𑁆𑀢𑀺𑀓𑁄, 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀏𑀓𑀯𑀸𑀭𑀫𑁂𑀯 𑀪𑀼𑀜𑁆𑀚𑀦𑀓𑁄. 𑀢𑀬𑀺𑀤𑀁 𑀭𑀢𑁆𑀢𑀺𑀪𑁄𑀚𑀦𑁄𑀧𑀺 𑀲𑀺𑀬𑀸𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀫𑀸𑀳 ‘‘𑀭𑀢𑁆𑀢𑀽𑀧𑀭𑀢𑁄’’𑀢𑀺. 𑀏𑀯𑀫𑁆𑀧𑀺 𑀅𑀧𑀭𑀡𑁆𑀳𑀪𑁄𑀚𑀻𑀧𑀺 𑀲𑀺𑀬𑀸 𑀏𑀓𑀪𑀢𑁆𑀢𑀺𑀓𑁄𑀢𑀺 𑀢𑀤𑀸𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀯𑀺𑀭𑀢𑁄 𑀯𑀺𑀓𑀸𑀮𑀪𑁄𑀚𑀦𑀸’’𑀢𑀺 𑀯𑀼𑀢𑁆𑀢𑀁. 𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 ¶ 𑀫𑀚𑁆𑀛𑀦𑁆𑀳𑀺𑀓𑀸, 𑀅𑀬𑀁 𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑁄 𑀪𑁄𑀚𑀦𑀲𑁆𑀲 𑀓𑀸𑀮𑁄 𑀦𑀸𑀫, 𑀢𑀤𑀜𑁆𑀜𑁄 𑀯𑀺𑀓𑀸𑀮𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀤𑀼𑀢𑀺𑀬𑀧𑀤𑁂𑀦 𑀭𑀢𑁆𑀢𑀺𑀪𑁄𑀚𑀦𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀅𑀧𑀭𑀡𑁆𑀳𑁄 ‘‘𑀯𑀺𑀓𑀸𑀮𑁄’’𑀢𑀺 𑀯𑀼𑀢𑁆𑀢𑁄.

𑀲𑀗𑁆𑀔𑁂𑀧𑀢𑁄 ‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡’’𑀦𑁆𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁯𑁦; 𑀥. 𑀧. 𑁧𑁮𑁩; 𑀦𑁂𑀢𑁆𑀢𑀺. 𑁩𑁦, 𑁫𑁦, 𑁧𑁧𑁬, 𑁧𑁨𑁪) 𑀦𑀬𑀧𑁆𑀧𑀯𑀢𑁆𑀢𑀁 𑀪𑀕𑀯𑀢𑁄 𑀲𑀸𑀲𑀦𑀁 𑀅𑀘𑁆𑀘𑀦𑁆𑀢𑀙𑀦𑁆𑀤𑀭𑀸𑀕𑀧𑁆𑀧𑀯𑀢𑁆𑀢𑀺𑀢𑁄 𑀦𑀘𑁆𑀘𑀸𑀤𑀻𑀦𑀁 𑀤𑀲𑁆𑀲𑀦𑀁 𑀦 𑀅𑀦𑀼𑀮𑁄𑀫𑁂𑀢𑀻𑀢𑀺 𑀆𑀳 ‘‘𑀲𑀸𑀲𑀦𑀲𑁆𑀲 𑀅𑀦𑀦𑀼𑀮𑁄𑀫𑀢𑁆𑀢𑀸’’𑀢𑀺. 𑀅𑀢𑁆𑀢𑀦𑀸 𑀧𑀬𑁄𑀚𑀺𑀬𑀫𑀸𑀦𑀁, 𑀧𑀭𑁂𑀳𑀺 𑀧𑀬𑁄𑀚𑀸𑀧𑀺𑀬𑀫𑀸𑀦𑀜𑁆𑀘 𑀦𑀘𑁆𑀘𑀁 𑀦𑀘𑁆𑀘𑀪𑀸𑀯𑀲𑀸𑀫𑀜𑁆𑀜𑀢𑁄 𑀧𑀸𑀴𑀺𑀬𑀁 𑀏𑀓𑁂𑀦𑁂𑀯 𑀦𑀘𑁆𑀘-𑀲𑀤𑁆𑀤𑁂𑀦 𑀕𑀳𑀺𑀢𑀁, 𑀢𑀣𑀸 𑀕𑀻𑀢𑀯𑀸𑀤𑀺𑀢-𑀲𑀤𑁆𑀤𑁂𑀦 𑀘𑀸𑀢𑀺 𑀆𑀳 ‘‘𑀦𑀘𑁆𑀘𑀦𑀦𑀘𑁆𑀘𑀸𑀧𑀦𑀸𑀤𑀺𑀯𑀲𑁂𑀦𑀸’’𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀕𑀸𑀬𑀦𑀕𑀸𑀬𑀸𑀧𑀦𑀯𑀸𑀤𑀦𑀯𑀸𑀤𑀸𑀧𑀦𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀤𑀲𑁆𑀲𑀦𑁂𑀦 𑀘𑁂𑀢𑁆𑀣 𑀲𑀯𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀁 𑀯𑀺𑀭𑀽𑀧𑁂𑀓𑀲𑁂𑀲𑀦𑀬𑁂𑀦. 𑀆𑀮𑁄𑀘𑀦𑀲𑀪𑀸𑀯𑀢𑀸𑀬 𑀯𑀸 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀲𑀯𑀦𑀓𑀺𑀭𑀺𑀬𑀸𑀬𑀧𑀺 𑀤𑀲𑁆𑀲𑀦𑀲𑀗𑁆𑀔𑁂𑀧𑀲𑀩𑁆𑀪𑀸𑀯𑀢𑁄 ‘‘𑀤𑀲𑁆𑀲𑀦𑀸’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀅𑀯𑀺𑀲𑀽𑀓𑀪𑀽𑀢𑀲𑁆𑀲 𑀕𑀻𑀢𑀲𑁆𑀲 𑀲𑀯𑀦𑀁 𑀓𑀤𑀸𑀘𑀺 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀯𑀺𑀲𑀽𑀓𑀪𑀽𑀢𑀸 𑀤𑀲𑁆𑀲𑀦𑀸’’𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓𑀧𑀸𑀞𑀝𑁆𑀞𑀓𑀣𑀸𑀬 (𑀔𑀼. 𑀧𑀸. 𑀅𑀝𑁆𑀞. 𑀧𑀘𑁆𑀙𑀺𑀫𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀥𑀫𑁆𑀫𑀽𑀧𑀲𑀁𑀳𑀺𑀢𑀫𑁆𑀧𑀺 𑀘𑁂𑀢𑁆𑀣 𑀕𑀻𑀢𑀁 𑀯𑀝𑁆𑀝𑀢𑀺, 𑀕𑀻𑀢𑀽𑀧𑀲𑀁𑀳𑀺𑀢𑁄 𑀥𑀫𑁆𑀫𑁄 𑀦 𑀯𑀝𑁆𑀝𑀢𑀻’’𑀢𑀺.

𑀉𑀘𑁆𑀘𑀸𑀢𑀺 ¶ ¶ 𑀉𑀘𑁆𑀘𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀁 𑀏𑀓𑀁 𑀲𑀤𑁆𑀤𑀦𑁆𑀢𑀭𑀁, 𑀲𑁂𑀢𑀺 𑀏𑀢𑁆𑀣𑀸𑀢𑀺 𑀲𑀬𑀦𑀁. 𑀉𑀘𑁆𑀘𑀸𑀲𑀬𑀦𑀁 𑀫𑀳𑀸𑀲𑀬𑀦𑀜𑁆𑀘 𑀲𑀫𑀡𑀲𑀸𑀭𑀼𑀧𑁆𑀧𑀭𑀳𑀺𑀢𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁, 𑀅𑀓𑀧𑁆𑀧𑀺𑀬𑀢𑁆𑀣𑀭𑀡’’𑀦𑁆𑀢𑀺 ¶ . 𑀆𑀲𑀦𑁆𑀤𑀸𑀤𑀺𑀆𑀲𑀦𑀜𑁆𑀘𑁂𑀢𑁆𑀣 𑀲𑀬𑀦𑁂𑀦 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀲𑁆𑀫𑀸 𑀧𑀦 𑀆𑀥𑀸𑀭𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀢𑀤𑀸𑀥𑀸𑀭𑀓𑀺𑀭𑀺𑀬𑀸 𑀧𑀝𑀺𑀓𑁆𑀔𑀺𑀢𑁆𑀢𑀸𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀅𑀢𑁆𑀣𑀢𑁄 𑀧𑀦 𑀢𑀤𑀼𑀧𑀪𑁄𑀕𑀪𑀽𑀢 𑀦𑀺𑀲𑀚𑁆𑀚𑀸𑀦𑀺𑀧𑀚𑁆𑀚𑀦𑁂𑀳𑀺 𑀯𑀺𑀭𑀢𑀺 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀉𑀘𑁆𑀘𑀸𑀲𑀬𑀦𑀲𑀬𑀦𑀫𑀳𑀸𑀲𑀬𑀦𑀲𑀬𑀦𑀸𑀢𑀺 𑀯𑀸 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀏𑀓𑀲𑁂𑀲𑀦𑀬𑁂𑀦 𑀅𑀬𑀁 𑀦𑀺𑀤𑁆𑀤𑁂𑀲𑁄 𑀓𑀢𑁄 𑀬𑀣𑀸 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺 (𑀫. 𑀦𑀺. 𑁩.𑁧𑁨𑁬; 𑀲𑀁. 𑀦𑀺. 𑁨.𑁧; 𑀉𑀤𑀸. 𑁧). 𑀆𑀲𑀦𑀓𑀺𑀭𑀺𑀬𑀸𑀧𑀼𑀩𑁆𑀩𑀓𑀢𑁆𑀢𑀸 𑀲𑀬𑀦𑀓𑀺𑀭𑀺𑀬𑀸𑀬 𑀲𑀬𑀦𑀕𑁆𑀕𑀳𑀡𑁂𑀦𑁂𑀯 𑀆𑀲𑀦𑀁 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀜𑁆𑀜𑁂𑀳𑀺 𑀕𑀸𑀳𑀸𑀧𑀦𑁂 𑀉𑀧𑀦𑀺𑀓𑁆𑀔𑀺𑀢𑁆𑀢𑀲𑀸𑀤𑀺𑀬𑀦𑁂 𑀘 𑀧𑀝𑀺𑀕𑁆𑀕𑀳𑀡𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀦 𑀉𑀕𑁆𑀕𑀡𑁆𑀳𑀸𑀧𑁂𑀢𑀺, 𑀦 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀲𑀸𑀤𑀻𑀬𑀢𑀻’’𑀢𑀺. 𑀅𑀣 𑀯𑀸 𑀢𑀺𑀯𑀺𑀥𑀁 𑀧𑀝𑀺𑀕𑁆𑀕𑀳𑀡𑀁 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸. 𑀢𑀢𑁆𑀣 𑀓𑀸𑀬𑁂𑀦 𑀧𑀝𑀺𑀕𑁆𑀕𑀳𑀡𑀁 𑀉𑀕𑁆𑀕𑀡𑁆𑀳𑀦𑀁, 𑀯𑀸𑀘𑀸𑀬 𑀧𑀝𑀺𑀕𑁆𑀕𑀳𑀡𑀁 𑀉𑀕𑁆𑀕𑀳𑀸𑀧𑀦𑀁, 𑀫𑀦𑀲𑀸 𑀧𑀝𑀺𑀕𑁆𑀕𑀳𑀡𑀁 𑀲𑀸𑀤𑀺𑀬𑀦𑀦𑁆𑀢𑀺 𑀢𑀺𑀯𑀺𑀥𑀫𑁆𑀧𑀺 𑀧𑀝𑀺𑀕𑁆𑀕𑀳𑀡𑀁 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, 𑀏𑀓𑀲𑁂𑀲𑀦𑀬𑁂𑀦 𑀯𑀸 𑀕𑀳𑁂𑀢𑁆𑀯𑀸 ‘‘𑀧𑀝𑀺𑀕𑁆𑀕𑀳𑀡𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀦𑁂𑀯 𑀦𑀁 𑀉𑀕𑁆𑀕𑀡𑁆𑀳𑀸𑀢𑀻’’𑀢𑀺𑀆𑀤𑀺. 𑀏𑀲 𑀦𑀬𑁄 ‘‘𑀆𑀫𑀓𑀥𑀜𑁆𑀜𑀧𑀝𑀺𑀕𑁆𑀕𑀳𑀡𑀸’’𑀢𑀺𑀆𑀤𑀻𑀲𑀼𑀧𑀺. 𑀦𑀻𑀯𑀸𑀭𑀸𑀤𑀺𑀉𑀧𑀥𑀜𑁆𑀜𑀲𑁆𑀲 𑀲𑀸𑀮𑀺𑀬𑀸𑀤𑀺𑀫𑀽𑀮𑀥𑀜𑁆𑀜𑀦𑁆𑀢𑁄𑀕𑀥𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀢𑁆𑀢𑀯𑀺𑀥𑀲𑁆𑀲𑀸’’𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀧𑀜𑁆𑀘 𑀯𑀲𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀅𑀘𑁆𑀙𑀯𑀲𑀁 𑀫𑀘𑁆𑀙𑀯𑀲𑀁 𑀲𑀼𑀲𑀼𑀓𑀸𑀯𑀲𑀁 𑀲𑀽𑀓𑀭𑀯𑀲𑀁 𑀕𑀤𑁆𑀭𑀪𑀯𑀲’’𑀦𑁆𑀢𑀺 (𑀫𑀳𑀸𑀯. 𑁨𑁬𑁨) 𑀯𑀼𑀢𑁆𑀢𑀢𑁆𑀢𑀸 𑀇𑀤𑀁 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀁 𑀦𑀸𑀫, 𑀢𑀲𑁆𑀲 𑀧𑀦 ‘‘𑀓𑀸𑀮𑁂 𑀧𑀝𑀺𑀕𑁆𑀕𑀳𑀺𑀢’’𑀦𑁆𑀢𑀺 (𑀫𑀳𑀸𑀯. 𑁨𑁬𑁨) 𑀯𑀼𑀢𑁆𑀢𑀢𑁆𑀢𑀸 𑀧𑀝𑀺𑀕𑁆𑀕𑀳𑀡𑀁 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀅𑀜𑁆𑀜𑀢𑁆𑀭 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀸’’𑀢𑀺.

𑀅𑀓𑁆𑀓𑀫𑀢𑀻𑀢𑀺 𑀦𑀺𑀧𑁆𑀧𑀻𑀴𑁂𑀢𑀺. 𑀧𑀼𑀩𑁆𑀩𑀪𑀸𑀕𑁂 𑀅𑀓𑁆𑀓𑀫𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀳𑀤𑀬𑀦𑁆𑀢𑀺 𑀦𑀸𑀴𑀺𑀆𑀤𑀺𑀫𑀸𑀦𑀪𑀸𑀚𑀦𑀸𑀦𑀁 𑀅𑀩𑁆𑀪𑀦𑁆𑀢𑀭𑀁. 𑀢𑀺𑀮𑀸𑀤𑀻𑀦𑀁 ¶ 𑀦𑀸𑀴𑀺𑀆𑀤𑀻𑀳𑀺 𑀫𑀺𑀦𑀦𑀓𑀸𑀮𑁂 𑀉𑀲𑁆𑀲𑀸𑀧𑀺𑀢𑀲𑀺𑀔𑀸𑀬𑁂𑀯 𑀲𑀺𑀔𑀸, 𑀢𑀲𑁆𑀲𑀸 𑀪𑁂𑀤𑁄 𑀳𑀸𑀧𑀦𑀁. 𑀓𑁂𑀘𑀻𑀢𑀺 𑀲𑀸𑀭𑀲𑀫𑀸𑀲𑀸𑀘𑀭𑀺𑀬𑀸, 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄 𑀘.

𑀯𑀥𑁄𑀢𑀺 𑀫𑀼𑀝𑁆𑀞𑀺𑀧𑁆𑀧𑀳𑀸𑀭𑀓𑀲𑀸𑀢𑀸𑀴𑀦𑀸𑀤𑀻𑀳𑀺 𑀳𑀺𑀁𑀲𑀦𑀁, 𑀯𑀺𑀳𑁂𑀞𑀦𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀳𑁂𑀞𑀦𑀢𑁆𑀣𑁄𑀧𑀺 𑀳𑀺 𑀯𑀥𑀲𑀤𑁆𑀤𑁄 𑀤𑀺𑀲𑁆𑀲𑀢𑀺 ‘‘𑀅𑀢𑁆𑀢𑀸𑀦𑀁 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁮𑁮𑁦). 𑀬𑀣𑀸 𑀳𑀺 𑀅𑀧𑁆𑀧𑀝𑀺𑀕𑁆𑀕𑀳𑀪𑀸𑀯𑀲𑀸𑀫𑀜𑁆𑀜𑁂 𑀲𑀢𑀺𑀧𑀺 𑀧𑀩𑁆𑀩𑀚𑀺𑀢𑁂𑀳𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀩𑁆𑀩𑀯𑀢𑁆𑀣𑀼𑀯𑀺𑀲𑁂𑀲𑀪𑀸𑀯𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀇𑀢𑁆𑀣𑀺𑀓𑀼𑀫𑀸𑀭𑀺𑀤𑀸𑀲𑀺𑀤𑀸𑀲𑀸𑀤𑀬𑁄 𑀯𑀺𑀪𑀸𑀕𑁂𑀦 𑀯𑀼𑀢𑁆𑀢𑀸 ¶ , 𑀏𑀯𑀁 𑀧𑀭𑀲𑁆𑀲𑀳𑀭𑀡𑀪𑀸𑀯𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑀪𑀸𑀯𑀲𑀸𑀫𑀜𑁆𑀜𑁂 𑀲𑀢𑀺𑀧𑀺 𑀢𑀼𑀮𑀸𑀓𑀽𑀝𑀸𑀤𑀬𑁄 𑀅𑀤𑀺𑀦𑁆𑀦𑀸𑀤𑀸𑀦𑀯𑀺𑀲𑁂𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀺𑀪𑀸𑀕𑁂𑀦 𑀯𑀼𑀢𑁆𑀢𑀸, 𑀦 𑀏𑀯𑀁 𑀧𑀸𑀡𑀸𑀢𑀺𑀧𑀸𑀢𑀧𑀭𑀺𑀬𑀸𑀬𑀲𑁆𑀲 𑀯𑀥𑀲𑁆𑀲 𑀧𑀼𑀦𑀕𑁆𑀕𑀳𑀡𑁂 𑀧𑀬𑁄𑀚𑀦𑀁 𑀅𑀢𑁆𑀣𑀺. ‘‘𑀢𑀢𑁆𑀣 𑀲𑀬𑀗𑁆𑀓𑀸𑀭𑁄, 𑀇𑀥 𑀧𑀭𑀁𑀓𑀸𑀭𑁄’’𑀢𑀺 𑀘 ¶ 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀙𑀧𑁆𑀧𑀬𑁄𑀕𑀸’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁄𑀬𑁂𑀯 𑀅𑀢𑁆𑀣𑁄 𑀲𑀼𑀦𑁆𑀤𑀭𑀢𑀭𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀯𑀥𑁄𑀢𑀺 𑀫𑀸𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀧𑁄𑀣𑀦𑀫𑁂𑀯 𑀲𑀦𑁆𑀥𑀸𑀬𑀸𑀢𑀺 𑀘 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁 𑀫𑀸𑀭𑀡-𑀲𑀤𑁆𑀤𑀲𑁆𑀲 𑀯𑀺𑀳𑀺𑀁𑀲𑀦𑁂𑀧𑀺 𑀤𑀺𑀲𑁆𑀲𑀦𑀢𑁄.

𑀏𑀢𑁆𑀢𑀸𑀯𑀢𑀸𑀢𑀺 ‘‘𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬𑀸’’𑀢𑀺𑀆𑀤𑀺𑀦𑀸 ‘‘𑀙𑁂𑀤𑀦…𑀧𑁂… 𑀲𑀳𑀲𑀸𑀓𑀸𑀭𑀸 𑀧𑀝𑀺𑀯𑀺𑀭𑀢𑁄’’𑀢𑀺 𑀏𑀢𑀧𑀭𑀺𑀫𑀸𑀡𑁂𑀦 𑀧𑀸𑀞𑁂𑀦. 𑀅𑀦𑁆𑀢𑀭𑀸𑀪𑁂𑀤𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀸𑀴𑀺𑀬𑀁 𑀆𑀕𑀢𑀦𑀬𑁂𑀦 𑀙𑀩𑁆𑀩𑀻𑀲𑀢𑀺𑀲𑀺𑀓𑁆𑀔𑀸𑀧𑀤𑀲𑀗𑁆𑀕𑀳𑀁 𑀬𑁂𑀪𑀼𑀬𑁆𑀬𑁂𑀦 𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀯𑀺𑀪𑀢𑁆𑀢𑀢𑁆𑀢𑀸 𑀘𑀽𑀴𑀲𑀻𑀮𑀁 𑀦𑀸𑀫. 𑀤𑁂𑀲𑀦𑀸𑀯𑀲𑁂𑀦 𑀳𑀺 𑀇𑀥 𑀘𑀽𑀴𑀫𑀚𑁆𑀛𑀺𑀫𑀸𑀤𑀺𑀪𑀸𑀯𑁄 𑀅𑀥𑀺𑀧𑁆𑀧𑁂𑀢𑁄, 𑀦 𑀥𑀫𑁆𑀫𑀯𑀲𑁂𑀦. 𑀢𑀣𑀸 𑀳𑀺 𑀇𑀥 𑀲𑀗𑁆𑀔𑀺𑀢𑁆𑀢𑁂𑀦 𑀉𑀤𑁆𑀤𑀺𑀝𑁆𑀞𑀸𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀯𑀺𑀪𑀢𑁆𑀢𑀸𑀦𑀁 𑀯𑀺𑀪𑀚𑀦𑀯𑀲𑁂𑀦 ¶ 𑀫𑀚𑁆𑀛𑀺𑀫𑀲𑀻𑀮𑀤𑁂𑀲𑀦𑀸 𑀧𑀯𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀫𑀚𑁆𑀛𑀺𑀫𑀲𑀻𑀮𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄’’𑀢𑀺.

𑀘𑀽𑀴𑀲𑀻𑀮𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀚𑁆𑀛𑀺𑀫𑀲𑀻𑀮𑀯𑀡𑁆𑀡𑀦𑀸

𑁧𑁧. 𑀢𑀢𑁆𑀣 𑀬𑀣𑀸𑀢𑀺 𑀑𑀧𑀫𑁆𑀫𑀢𑁆𑀣𑁂 𑀦𑀺𑀧𑀸𑀢𑁄. 𑀯𑀸𑀢𑀺 𑀯𑀺𑀓𑀧𑁆𑀧𑀦𑀢𑁆𑀣𑁂. 𑀧𑀦𑀸𑀢𑀺 𑀯𑀘𑀦𑀸𑀮𑀗𑁆𑀓𑀸𑀭𑁂. 𑀏𑀓𑁂𑀢𑀺 𑀅𑀜𑁆𑀜𑁂. 𑀪𑁄𑀦𑁆𑀢𑁄𑀢𑀺 𑀲𑀸𑀥𑀽𑀦𑀁 𑀧𑀺𑀬𑀲𑀫𑀼𑀤𑀸𑀳𑀸𑀭𑁄. 𑀲𑀸𑀥𑀯𑁄 𑀳𑀺 𑀧𑀭𑁂 ‘‘𑀪𑁄𑀦𑁆𑀢𑁄’’𑀢𑀺 𑀯𑀸, ‘‘𑀤𑁂𑀯𑀸𑀦𑀁 𑀧𑀺𑀬𑀸’’𑀢𑀺 𑀯𑀸 ‘‘𑀆𑀬𑀲𑁆𑀫𑀦𑁆𑀢𑁄’’𑀢𑀺 𑀯𑀸 𑀲𑀫𑀸𑀮𑀧𑀦𑁆𑀢𑀺. 𑀬𑀁 𑀓𑀺𑀜𑁆𑀘𑀺 𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑀸 𑀲𑀫𑀡𑀸. 𑀚𑀸𑀢𑀺𑀫𑀢𑁆𑀢𑁂𑀦 𑀩𑁆𑀭𑀸𑀳𑁆𑀫𑀡𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀉𑀲𑁆𑀲𑀸𑀳𑀁 𑀓𑀢𑁆𑀯𑀸 𑀫𑀫 𑀯𑀡𑁆𑀡𑀁 𑀯𑀤𑀫𑀸𑀦𑁄𑀧𑀺 𑀧𑀼𑀣𑀼𑀚𑁆𑀚𑀦𑁄 ‘‘𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄’’𑀢𑀺𑀆𑀤𑀺𑀦𑀸 𑀧𑀭𑀸𑀦𑀼𑀤𑁆𑀤𑁂𑀲𑀺𑀓𑀦𑀬𑁂𑀦 𑀯𑀸 𑀬𑀣𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀪𑀸𑀯𑀁 𑀧𑀝𑀺𑀚𑀸𑀦𑀫𑀸𑀦𑀸, 𑀧𑀭𑁂𑀳𑀺 𑀘 𑀢𑀣𑀸𑀲𑀫𑁆𑀪𑀸𑀯𑀺𑀬𑀫𑀸𑀦𑀸 𑀢𑀤𑀦𑀼𑀭𑀽𑀧𑀧𑀝𑀺𑀧𑀢𑁆𑀢𑀺𑀁 𑀅𑀚𑀸𑀦𑀦𑀢𑁄, 𑀅𑀲𑀫𑀢𑁆𑀣𑀢𑁄 𑀘 𑀦 𑀅𑀪𑀺𑀲𑀫𑁆𑀪𑀼𑀡𑀦𑁆𑀢𑀺, 𑀦 𑀏𑀯𑀫𑀬𑀁, 𑀅𑀬𑀁 𑀧𑀦 𑀲𑀫𑀡𑁄 𑀕𑁄𑀢𑀫𑁄 𑀲𑀩𑁆𑀩𑀣𑀸𑀧𑀺 𑀲𑀫𑀡𑀲𑀸𑀭𑀼𑀧𑁆𑀧𑀧𑀝𑀺𑀧𑀤𑀁 𑀧𑀽𑀭𑁂𑀲𑀺𑀬𑁂𑀯𑀸𑀢𑀺 𑀏𑀯𑀁 𑀅𑀜𑁆𑀜𑀼𑀤𑁆𑀤𑁂𑀲𑀺𑀓𑀦𑀬𑁂𑀦 𑀯𑀸 𑀲𑀩𑁆𑀩𑀣𑀸𑀧𑀺 𑀆𑀘𑀸𑀭𑀲𑀻𑀮𑀫𑀢𑁆𑀢𑀫𑁂𑀯 𑀯𑀤𑁂𑀬𑁆𑀬𑀼𑀁, 𑀦 𑀢𑀤𑀼𑀢𑁆𑀢𑀭𑀺𑀦𑁆𑀢𑀺.

𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀧𑀤𑁂 ¶ 𑀲𑀤𑁆𑀤𑀓𑁆𑀓𑀫𑁂𑀦 𑀅𑀧𑁆𑀧𑀥𑀸𑀦𑀪𑀽𑀢𑁄𑀧𑀺 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑁄 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑀸𑀬 𑀧𑀥𑀸𑀦𑀪𑀸𑀯𑀁 𑀧𑀝𑀺𑀮𑀪𑀢𑀺. 𑀅𑀜𑁆𑀜𑁄 𑀳𑀺 𑀲𑀤𑁆𑀤𑀓𑁆𑀓𑀫𑁄 𑀅𑀜𑁆𑀜𑁄 𑀅𑀢𑁆𑀣𑀓𑁆𑀓𑀫𑁄𑀢𑀺 𑀆𑀳 ‘‘𑀓𑀢𑀫𑁄 𑀲𑁄 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑁄’’𑀢𑀺. 𑀢𑀲𑁆𑀫𑀺𑀜𑁆𑀳𑀺 𑀯𑀺𑀪𑀢𑁆𑀢𑁂 𑀢𑀩𑁆𑀩𑀺𑀲𑀬𑀢𑀸𑀬 𑀲𑀫𑀸𑀭𑀫𑁆𑀪𑁄𑀧𑀺 𑀯𑀺𑀪𑀢𑁆𑀢𑁄𑀯 𑀳𑁄𑀢𑀻𑀢𑀺 ¶ . 𑀢𑁂𑀦𑁂𑀯𑀸𑀳 𑀪𑀕𑀯𑀸 ‘‘𑀫𑀽𑀮𑀩𑀻𑀚’’𑀦𑁆𑀢𑀺𑀆𑀤𑀺. 𑀫𑀽𑀮𑀫𑁂𑀯 𑀩𑀻𑀚𑀁 𑀫𑀽𑀮𑀩𑀻𑀚𑀁, 𑀫𑀽𑀮𑀁 𑀩𑀻𑀚𑀁 𑀏𑀢𑀲𑁆𑀲𑀸𑀢𑀺𑀧𑀺 𑀫𑀽𑀮𑀩𑀻𑀚𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀨𑀴𑀼𑀩𑀻𑀚𑀦𑁆𑀢𑀺 𑀧𑀩𑁆𑀩𑀩𑀻𑀚𑀁. 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂 𑀲𑀤𑀺𑀲𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑁂𑀲𑀓𑀸𑀭𑀡𑀪𑀸𑀯𑀢𑁄 𑀯𑀺𑀭𑀼𑀳𑀡𑀲𑀫𑀢𑁆𑀣𑁂 𑀲𑀸𑀭𑀨𑀮𑁂 𑀦𑀺𑀭𑀼𑀴𑁆𑀳𑁄 𑀩𑀻𑀚-𑀲𑀤𑁆𑀤𑁄 𑀢𑀤𑀢𑁆𑀣𑀲𑀁𑀲𑀺𑀤𑁆𑀥𑀺𑀬𑀸 𑀫𑀽𑀮𑀸𑀤𑀻𑀲𑀼𑀧𑀺 𑀓𑁂𑀲𑀼𑀘𑀺 𑀧𑀯𑀢𑁆𑀢𑀢𑀻𑀢𑀺 𑀫𑀽𑀮𑀸𑀤𑀺𑀢𑁄 𑀦𑀺𑀯𑀢𑁆𑀢𑀦𑀢𑁆𑀣𑀁 𑀏𑀓𑁂𑀦 𑀩𑀻𑀚-𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀩𑀻𑀚𑀩𑀻𑀚’’𑀦𑁆𑀢𑀺. ‘‘𑀭𑀽𑀧𑀭𑀽𑀧𑀁 ¶ , 𑀤𑀼𑀓𑁆𑀔𑀤𑀼𑀓𑁆𑀔’’𑀦𑁆𑀢𑀺 (𑀲𑀁. 𑀦𑀺. 𑁪.𑁩𑁨𑁭) 𑀘 𑀬𑀣𑀸. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀁 𑀧𑀼𑀘𑁆𑀙𑀺𑀢𑁆𑀯𑀸 𑀩𑀻𑀚𑀕𑀸𑀫𑁄 𑀏𑀯 𑀯𑀺𑀪𑀢𑁆𑀢𑁄𑀢𑀺? 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀦𑀦𑀼 𑀅𑀯𑁄𑀘𑀼𑀫𑁆𑀳 ‘‘𑀫𑀽𑀮𑀫𑁂𑀯 𑀩𑀻𑀚𑀁 𑀫𑀽𑀮𑀩𑀻𑀚𑀁, 𑀫𑀽𑀮𑀁 𑀩𑀻𑀚𑀁 𑀏𑀢𑀲𑁆𑀲𑀸𑀢𑀺𑀧𑀺 𑀫𑀽𑀮𑀩𑀻𑀚𑀦𑁆𑀢𑀺’’. 𑀢𑀢𑁆𑀣 𑀧𑀼𑀭𑀺𑀫𑁂𑀦 𑀩𑀻𑀚𑀕𑀸𑀫𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀤𑀼𑀢𑀺𑀬𑁂𑀦 𑀪𑀽𑀢𑀕𑀸𑀫𑁄, 𑀤𑀼𑀯𑀺𑀥𑁄𑀧𑁂𑀲 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, 𑀫𑀽𑀮𑀩𑀻𑀚𑀜𑁆𑀘 𑀫𑀽𑀮𑀩𑀻𑀚𑀜𑁆𑀘 𑀫𑀽𑀮𑀩𑀻𑀚𑀦𑁆𑀢𑀺 𑀏𑀓𑀲𑁂𑀲𑀦𑀬𑁂𑀦 𑀯𑀸 𑀧𑀸𑀴𑀺𑀬𑀁 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑁂𑀯𑀸𑀳 ‘‘𑀲𑀩𑁆𑀩𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺.

𑁧𑁨. ‘‘𑀲𑀦𑁆𑀦𑀺𑀥𑀺𑀓𑀢𑀲𑁆𑀲𑀸’’𑀢𑀺 𑀏𑀢𑁂𑀦 ‘‘𑀲𑀦𑁆𑀦𑀺𑀥𑀺𑀓𑀸𑀭𑀧𑀭𑀺𑀪𑁄𑀕’’𑀦𑁆𑀢𑀺 𑀏𑀢𑁆𑀣 𑀓𑀸𑀭-𑀲𑀤𑁆𑀤𑀲𑁆𑀲 𑀓𑀫𑁆𑀫𑀢𑁆𑀣𑀢𑀁 𑀤𑀲𑁆𑀲𑁂𑀢𑀺. 𑀬𑀣𑀸 𑀯𑀸 ‘‘𑀆𑀘𑀬𑀁𑀕𑀫𑀺𑀦𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀅𑀦𑀼𑀦𑀸𑀲𑀺𑀓𑀮𑁄𑀧𑁂𑀦 ‘‘𑀆𑀘𑀬𑀕𑀸𑀫𑀺𑀦𑁄’’𑀢𑀺 (𑀥. 𑀲. 𑁧𑁦) 𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀏𑀯𑀁 ‘‘𑀲𑀦𑁆𑀦𑀺𑀥𑀺𑀓𑀸𑀭𑀁 𑀧𑀭𑀺𑀪𑁄𑀕’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀅𑀦𑀼𑀦𑀸𑀲𑀺𑀓𑀮𑁄𑀧𑁂𑀦 ‘‘𑀲𑀦𑁆𑀦𑀺𑀥𑀺𑀓𑀸𑀭𑀧𑀭𑀺𑀪𑁄𑀕’’𑀦𑁆𑀢𑀺 𑀯𑀼𑀢𑁆𑀢𑀁, 𑀲𑀦𑁆𑀦𑀺𑀥𑀺𑀁 𑀓𑀢𑁆𑀯𑀸 𑀧𑀭𑀺𑀪𑁄𑀕𑀦𑁆𑀢𑀺 𑀅𑀢𑁆𑀣𑁄.

𑀲𑀫𑁆𑀫𑀸 𑀓𑀺𑀮𑁂𑀲𑁂 𑀮𑀺𑀔𑀢𑀻𑀢𑀺 𑀲𑀮𑁆𑀮𑁂𑀔𑁄, 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀧𑀝𑀺𑀧𑀢𑁆𑀢𑀺. 𑀧𑀭𑀺𑀬𑀸𑀬𑀢𑀺 𑀓𑀧𑁆𑀧𑀻𑀬𑀢𑀻𑀢𑀺 𑀧𑀭𑀺𑀬𑀸𑀬𑁄, 𑀓𑀧𑁆𑀧𑀺𑀬𑀯𑀸𑀘𑀸𑀦𑀼𑀲𑀸𑀭𑁂𑀦 𑀧𑀝𑀺𑀧𑀢𑁆𑀢𑀺. 𑀓𑀺𑀮𑁂𑀲𑁂𑀳𑀺 𑀆𑀫𑀲𑀺𑀢𑀩𑁆𑀩𑀢𑁄 𑀆𑀫𑀺𑀲𑀁, 𑀬𑀁 𑀓𑀺𑀜𑁆𑀘𑀺 𑀉𑀧𑀪𑁄𑀕𑀸𑀭𑀳𑀁 𑀯𑀢𑁆𑀣𑀼. 𑀢𑁂𑀦𑁂𑀯𑀸𑀳 ‘‘𑀆𑀫𑀺𑀲𑀦𑁆𑀢𑀺 𑀯𑀼𑀢𑁆𑀢𑀸𑀯𑀲𑁂𑀲’’𑀦𑁆𑀢𑀺. 𑀦𑀬𑀤𑀲𑁆𑀲𑀦𑀜𑁆𑀳𑁂𑀢𑀁 𑀲𑀦𑁆𑀦𑀺𑀥𑀺𑀯𑀢𑁆𑀣𑀽𑀦𑀁. 𑀉𑀤𑀓𑀓𑀤𑁆𑀤𑀫𑁂𑀢𑀺 𑀉𑀤𑀓𑁂 𑀘 𑀓𑀤𑁆𑀤𑀫𑁂 𑀘. 𑀅𑀘𑁆𑀙𑀣𑀸𑀢𑀺 𑀦𑀺𑀲𑀻𑀤𑀣. 𑀕𑀻𑀯𑀸𑀬𑀸𑀫𑀓𑀦𑁆𑀢𑀺 𑀕𑀻𑀯𑀁 𑀆𑀬𑀫𑀺𑀢𑁆𑀯𑀸, 𑀬𑀣𑀸 𑀘 𑀪𑀼𑀢𑁆𑀢𑁂 𑀅𑀢𑀺𑀪𑀼𑀢𑁆𑀢𑀢𑀸𑀬 𑀕𑀻𑀯𑀸 𑀆𑀬𑀫𑀺𑀢𑀩𑁆𑀩𑀸𑀯 𑀳𑁄𑀢𑀺, 𑀏𑀯𑀦𑁆𑀢𑀺 𑀅𑀢𑁆𑀣𑁄. 𑀘𑀢𑀼𑀪𑀸𑀕𑀫𑀢𑁆𑀢𑀦𑁆𑀢𑀺 𑀓𑀼𑀟𑀼𑀩𑀫𑀢𑁆𑀢𑀁. ‘‘𑀓𑀧𑁆𑀧𑀺𑀬𑀓𑀼𑀝𑀺𑀬’’𑀦𑁆𑀢𑀺𑀆𑀤𑀺 𑀯𑀺𑀦𑀬𑀯𑀲𑁂𑀦 𑀯𑀼𑀢𑁆𑀢𑀁.

𑁧𑁩. 𑀏𑀢𑁆𑀢𑀓𑀫𑁆𑀧𑀻𑀢𑀺 ¶ 𑀯𑀺𑀦𑀺𑀘𑁆𑀙𑀬𑀯𑀺𑀘𑀸𑀭𑀡𑀸𑀯𑀢𑁆𑀣𑀼𑀓𑀺𑀢𑁆𑀢𑀦𑀫𑁆𑀧𑀺 ¶ . 𑀧𑀬𑁄𑀚𑀦𑀫𑀢𑁆𑀢𑀫𑁂𑀯𑀸𑀢𑀺 𑀧𑀤𑀢𑁆𑀣𑀬𑁄𑀚𑀦𑀫𑀢𑁆𑀢𑀫𑁂𑀯. 𑀬𑀲𑁆𑀲 𑀧𑀦 𑀧𑀤𑀲𑁆𑀲 𑀯𑀺𑀢𑁆𑀣𑀸𑀭𑀓𑀣𑀁 𑀯𑀺𑀦𑀸 𑀦 𑀲𑀓𑁆𑀓𑀸 𑀅𑀢𑁆𑀣𑁄 𑀯𑀺𑀜𑁆𑀜𑀸𑀢𑀼𑀁, 𑀢𑀢𑁆𑀣 𑀯𑀺𑀢𑁆𑀣𑀸𑀭𑀓𑀣𑀸𑀧𑀺 𑀧𑀤𑀢𑁆𑀣𑀲𑀗𑁆𑀕𑀳𑀫𑁂𑀯 𑀕𑀘𑁆𑀙𑀢𑀺. 𑀓𑀼𑀢𑀽𑀳𑀮𑀯𑀲𑁂𑀦 𑀧𑁂𑀓𑁆𑀔𑀺𑀢𑀩𑁆𑀩𑀢𑁄 𑀧𑁂𑀓𑁆𑀔𑀸, 𑀦𑀝𑀲𑀢𑁆𑀣𑀯𑀺𑀥𑀺𑀦𑀸 𑀦𑀝𑀸𑀦𑀜𑁆𑀘 𑀧𑀬𑁄𑀕𑁄. 𑀦𑀝𑀲𑀫𑀽𑀳𑁂𑀦 𑀧𑀦 𑀚𑀦𑀲𑀫𑀽𑀳𑁂 𑀓𑀭𑀡𑀯𑀲𑁂𑀦 ‘‘𑀦𑀝𑀲𑀫𑀚𑁆𑀚’’𑀦𑁆𑀢𑀺 𑀯𑀼𑀢𑁆𑀢𑀁, 𑀲𑀸𑀭𑀲𑀫𑀸𑀲𑁂 ‘‘𑀧𑁂𑀓𑁆𑀔𑀸 𑀫𑀳’’𑀦𑁆𑀢𑀺 𑀯𑀼𑀢𑁆𑀢𑀁. 𑀖𑀦𑀢𑀸𑀴𑀁 𑀦𑀸𑀫 𑀤𑀡𑁆𑀟𑀫𑀬𑀢𑀸𑀴𑀁, 𑀲𑀺𑀮𑀸𑀲𑀮𑀸𑀓𑀢𑀸𑀴𑀁 𑀯𑀸. 𑀏𑀓𑁂𑀢𑀺 𑀲𑀸𑀭𑀲𑀫𑀸𑀲𑀸𑀘𑀭𑀺𑀬𑀸, 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄 𑀘. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀇𑀢𑁄 𑀧𑀭𑁂𑀲𑀼𑀧𑀺 ‘‘𑀏𑀓𑁂’’𑀢𑀺 𑀆𑀕𑀢𑀝𑁆𑀞𑀸𑀦𑁂𑀲𑀼. 𑀘𑀢𑀼𑀭𑀲𑁆𑀲𑀅𑀫𑁆𑀩𑀡𑀓𑀢𑀸𑀴𑀁 𑀦𑀸𑀫 𑀭𑀼𑀓𑁆𑀔𑀲𑀸𑀭𑀤𑀡𑁆𑀟𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀘𑀢𑀼𑀭𑀲𑁆𑀲𑀅𑀫𑁆𑀩𑀡𑀓𑀁 𑀓𑀢𑁆𑀯𑀸 ¶ 𑀘𑀢𑀽𑀲𑀼 𑀧𑀲𑁆𑀲𑁂𑀲𑀼 𑀘𑀫𑁆𑀫𑁂𑀦 𑀑𑀦𑀦𑁆𑀥𑀺𑀢𑁆𑀯𑀸 𑀓𑀢𑀯𑀸𑀤𑀺𑀢𑀁. 𑀅𑀩𑁆𑀪𑁄𑀓𑁆𑀓𑀺𑀭𑀡𑀁 𑀭𑀗𑁆𑀕𑀩𑀮𑀻𑀓𑀭𑀡𑀁, 𑀬𑀸 ‘‘𑀦𑀦𑁆𑀤𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑁄𑀪𑀦𑀓𑀭𑀦𑁆𑀢𑀺 𑀲𑁄𑀪𑀦𑀓𑀭𑀡𑀁, ‘‘𑀲𑁄𑀪𑀦𑀖𑀭𑀓’’𑀦𑁆𑀢𑀺 𑀲𑀸𑀭𑀲𑀫𑀸𑀲𑁂 𑀯𑀼𑀢𑁆𑀢𑀁. 𑀘𑀡𑁆𑀟𑀸𑀮𑀸𑀦𑀫𑀺𑀤𑀦𑁆𑀢𑀺 𑀘𑀡𑁆𑀟𑀸𑀮𑀁. 𑀲𑀸𑀡𑁂 𑀉𑀤𑀓𑁂𑀦 𑀢𑁂𑀫𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀆𑀓𑁄𑀝𑀦𑀓𑀻𑀴𑀸 𑀲𑀸𑀡𑀥𑁄𑀯𑀦𑀁. 𑀇𑀦𑁆𑀤𑀚𑀸𑀮𑁂𑀦𑀸𑀢𑀺 𑀅𑀝𑁆𑀞𑀺𑀥𑁄𑀯𑀦𑀫𑀦𑁆𑀢𑀁 𑀧𑀭𑀺𑀚𑀧𑁆𑀧𑀺𑀢𑁆𑀯𑀸 𑀬𑀣𑀸 𑀧𑀭𑁂 𑀅𑀝𑁆𑀞𑀻𑀦𑀺𑀬𑁂𑀯 𑀧𑀲𑁆𑀲𑀦𑁆𑀢𑀺, 𑀏𑀯𑀁 𑀢𑀘𑀸𑀤𑀻𑀦𑀁 𑀅𑀦𑁆𑀢𑀭𑀥𑀸𑀧𑀦𑀫𑀸𑀬𑀸𑀬. 𑀲𑀓𑀝𑀩𑁆𑀬𑀽𑀳𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀘𑀓𑁆𑀓𑀧𑀤𑀼𑀫𑀓𑀴𑀻𑀭𑀩𑁆𑀬𑀽𑀳𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑁧𑁪. 𑀧𑀤𑀸𑀦𑀻𑀢𑀺 ¶ 𑀲𑀸𑀭𑀻𑀦𑀁 𑀧𑀢𑀺𑀝𑁆𑀞𑀸𑀦𑀝𑁆𑀞𑀸𑀦𑀸𑀦𑀺. 𑀤𑀲𑀧𑀤𑀁 𑀦𑀸𑀫 𑀤𑁆𑀯𑀻𑀳𑀺 𑀧𑀦𑁆𑀢𑀻𑀳𑀺 𑀯𑀻𑀲𑀢𑀺𑀬𑀸 𑀧𑀤𑁂𑀳𑀺 𑀓𑀻𑀴𑀦𑀚𑀽𑀢𑀁. 𑀧𑀸𑀲𑀓𑀁 𑀯𑀼𑀘𑁆𑀘𑀢𑀺 𑀙𑀲𑀼 𑀧𑀲𑁆𑀲𑁂𑀲𑀼 𑀏𑀓𑁂𑀓𑀁 𑀬𑀸𑀯 𑀙𑀓𑁆𑀓𑀁 𑀤𑀲𑁆𑀲𑁂𑀢𑁆𑀯𑀸 𑀓𑀢𑀓𑀻𑀴𑀦𑀓𑀁, 𑀢𑀁 𑀯𑀟𑁆𑀠𑁂𑀢𑁆𑀯𑀸 𑀬𑀣𑀸𑀮𑀤𑁆𑀥𑀁 𑀏𑀓𑀓𑀸𑀤𑀺𑀯𑀲𑁂𑀦 𑀲𑀸𑀭𑀺𑀬𑁄 𑀅𑀧𑀦𑁂𑀦𑁆𑀢𑀸 𑀉𑀧𑀦𑁂𑀦𑁆𑀢𑀸 𑀘 𑀓𑀻𑀴𑀦𑁆𑀢𑀺. 𑀖𑀝𑁂𑀦 𑀓𑀻𑀴𑀸 𑀖𑀝𑀺𑀓𑀸𑀢𑀺 𑀏𑀓𑁂. 𑀩𑀳𑀽𑀲𑀼 𑀲𑀮𑀸𑀓𑀸𑀲𑀼 𑀯𑀺𑀲𑁂𑀲𑀭𑀳𑀺𑀢𑀁 𑀏𑀓𑀁 𑀲𑀮𑀸𑀓𑀁 𑀕𑀳𑁂𑀢𑁆𑀯𑀸 𑀢𑀸𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀢𑀲𑁆𑀲𑁂𑀯 𑀉𑀤𑁆𑀥𑀭𑀡𑀁 𑀲𑀮𑀸𑀓𑀳𑀢𑁆𑀣𑀦𑁆𑀢𑀺 𑀏𑀓𑁂. 𑀧𑀡𑁆𑀡𑁂𑀦 𑀯𑀁𑀲𑀸𑀓𑀸𑀭𑁂𑀦 𑀓𑀢𑀸 𑀦𑀸𑀴𑀺𑀓𑀸. 𑀢𑁂𑀦𑁂𑀯𑀸𑀳 ‘‘𑀢𑀁 𑀥𑀫𑀦𑁆𑀢𑀸’’𑀢𑀺. ‘‘𑀧𑀼𑀘𑁆𑀙𑀦𑁆𑀢𑀲𑁆𑀲 𑀫𑀼𑀔𑀸𑀕𑀢𑀁 𑀅𑀓𑁆𑀔𑀭𑀁 𑀕𑀳𑁂𑀢𑁆𑀯𑀸 𑀦𑀝𑁆𑀞𑀫𑀼𑀢𑁆𑀢𑀺 𑀮𑀸𑀪𑀸𑀮𑀸𑀪𑀸𑀤𑀺𑀚𑀸𑀦𑀦𑀓𑀻𑀴𑀸 𑀅𑀓𑁆𑀔𑀭𑀺𑀓𑀸’’𑀢𑀺𑀧𑀺 𑀯𑀤𑀦𑁆𑀢𑀺. ‘‘𑀯𑀸𑀤𑀺𑀢𑀸𑀦𑀼𑀭𑀽𑀧𑀁 𑀦𑀘𑁆𑀘𑀦𑀁 𑀕𑀸𑀬𑀦𑀁 𑀯𑀸 𑀬𑀣𑀸𑀯𑀚𑁆𑀚𑀁’’ 𑀢𑀺𑀧𑀺 𑀯𑀤𑀦𑁆𑀢𑀺. ‘‘𑀏𑀯𑀁 𑀓𑀢𑁂 𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀅𑀜𑁆𑀜𑀣𑀸 𑀧𑀭𑀸𑀚𑀬𑁄’’𑀢𑀺 𑀚𑀬𑀧𑀭𑀸𑀚𑀬𑁂 𑀧𑀼𑀭𑀓𑁆𑀔𑀢𑁆𑀯𑀸 𑀧𑀬𑁄𑀕𑀓𑀭𑀡𑀯𑀲𑁂𑀦 𑀧𑀭𑀺𑀳𑀸𑀭𑀧𑀣𑀸𑀤𑀻𑀦𑀫𑁆𑀧𑀺 𑀚𑀽𑀢𑀧𑀫𑀸𑀤𑀝𑁆𑀞𑀸𑀦𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀗𑁆𑀕𑀘𑀻𑀭𑀸𑀤𑀻𑀳𑀺𑀧𑀺 𑀯𑀁𑀲𑀸𑀤𑀻𑀳𑀺 𑀓𑀸𑀢𑀩𑁆𑀩𑀓𑀺𑀘𑁆𑀘𑀲𑀺𑀤𑁆𑀥𑀺𑀅𑀲𑀺𑀤𑁆𑀥𑀺𑀚𑀬𑀧𑀭𑀸𑀚𑀬𑀸𑀯𑀳𑁄 𑀧𑀬𑁄𑀕𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀬𑀣𑀸𑀯𑀚𑁆𑀚’’𑀦𑁆𑀢𑀺 𑀘 ¶ 𑀓𑀸𑀡𑀸𑀤𑀻𑀳𑀺 𑀲𑀤𑀺𑀲𑀢𑀸𑀓𑀸𑀭𑀤𑀲𑁆𑀲𑀦𑁂𑀳𑀺 𑀚𑀬𑀧𑀭𑀸𑀚𑀬𑀯𑀲𑁂𑀦 𑀚𑀽𑀢𑀓𑀻𑀴𑀺𑀢𑀪𑀸𑀯𑁂𑀦 𑀯𑀼𑀢𑁆𑀢𑀁.

𑁧𑁫. 𑀯𑀸𑀴𑀭𑀽𑀧𑀸𑀦𑀻𑀢𑀺 𑀆𑀳𑀭𑀺𑀫𑀸𑀦𑀺 𑀯𑀸𑀴𑀭𑀽𑀧𑀸𑀦𑀺. ‘‘𑀅𑀓𑀧𑁆𑀧𑀺𑀬𑀫𑀜𑁆𑀘𑁄𑀯 𑀧𑀮𑁆𑀮𑀗𑁆𑀓𑁄’’𑀢𑀺 𑀲𑀸𑀭𑀲𑀫𑀸𑀲𑁂. 𑀯𑀸𑀦𑀯𑀺𑀘𑀺𑀢𑁆𑀢𑀦𑁆𑀢𑀺 𑀪𑀺𑀢𑁆𑀢𑀺𑀘𑁆𑀙𑀤𑀸𑀤𑀺𑀯𑀲𑁂𑀦 𑀯𑀸𑀦𑁂𑀦 𑀯𑀺𑀘𑀺𑀢𑁆𑀭𑀁. 𑀭𑀼𑀓𑁆𑀔𑀢𑀽𑀮𑀮𑀢𑀸𑀢𑀽𑀮𑀧𑁄𑀝𑀓𑀻𑀢𑀽𑀮𑀸𑀦𑀁 𑀯𑀲𑁂𑀦 𑀢𑀺𑀡𑁆𑀡𑀁 𑀢𑀽𑀮𑀸𑀦𑀁. 𑀉𑀤𑁆𑀤𑀮𑁄𑀫𑀺𑀬𑀁 𑀓𑁂𑀘𑀻𑀢𑀺 𑀲𑀸𑀭𑀲𑀫𑀸𑀲𑀸𑀘𑀭𑀺𑀬𑀸, 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄 𑀘. 𑀢𑀣𑀸 𑀏𑀓𑀦𑁆𑀢𑀮𑁄𑀫𑀺𑀬𑀁. 𑀓𑁄𑀲𑁂𑀬𑁆𑀬𑀓𑀝𑁆𑀝𑀺𑀲𑁆𑀲𑀫𑀬𑀦𑁆𑀢𑀺 𑀓𑁄𑀲𑁂𑀬𑁆𑀬𑀓𑀲𑁆𑀲𑀝𑀫𑀬𑀁. 𑀲𑀼𑀤𑁆𑀥𑀓𑁄𑀲𑁂𑀬𑁆𑀬𑀦𑁆𑀢𑀺 ¶ 𑀭𑀢𑀦𑀧𑀭𑀺𑀲𑀺𑀩𑁆𑀩𑀦𑀭𑀳𑀺𑀢𑀁. ‘‘𑀞𑀧𑁂𑀢𑁆𑀯𑀸 𑀢𑀽𑀮𑀺𑀓’’𑀦𑁆𑀢𑀺 𑀏𑀢𑁂𑀦 𑀭𑀢𑀦𑀧𑀭𑀺𑀲𑀺𑀩𑁆𑀩𑀦𑀭𑀳𑀺𑀢𑀸𑀧𑀺 𑀢𑀽𑀮𑀺𑀓𑀸 𑀦 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. ‘‘𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀸𑀦𑀻’’𑀢𑀺 𑀇𑀫𑀺𑀦𑀸 𑀬𑀸𑀦𑀺 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀸𑀦𑀺, 𑀢𑀸𑀦𑀺 𑀪𑀽𑀫𑀢𑁆𑀣𑀭𑀡𑀯𑀲𑁂𑀦, 𑀬𑀣𑀸𑀦𑀼𑀭𑀽𑀧𑀁 𑀫𑀜𑁆𑀘𑀧𑀻𑀞𑀸𑀤𑀻𑀲𑀼 𑀘 𑀉𑀧𑀦𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀅𑀚𑀺𑀦𑀘𑀫𑁆𑀫𑁂𑀳𑀻𑀢𑀺 𑀅𑀚𑀺𑀦𑀫𑀺𑀕𑀘𑀫𑁆𑀫𑁂𑀳𑀺. 𑀢𑀸𑀦𑀺 𑀓𑀺𑀭 𑀘𑀫𑁆𑀫𑀸𑀦𑀺 𑀲𑀼𑀔𑀼𑀫𑀸𑀦𑀺, 𑀢𑀲𑁆𑀫𑀸 𑀤𑀼𑀧𑀝𑁆𑀝𑀢𑀺𑀧𑀝𑁆𑀝𑀸𑀦𑀺 𑀓𑀢𑁆𑀯𑀸 𑀲𑀺𑀩𑁆𑀩𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀚𑀺𑀦𑀧𑁆𑀧𑀯𑁂𑀡𑀻’’𑀢𑀺. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀯𑀺𑀦𑀬𑁂 𑀯𑀼𑀢𑁆𑀢𑀦𑀬𑁂𑀦.

𑁧𑁬. 𑀅𑀮𑀗𑁆𑀓𑀸𑀭𑀜𑁆𑀚𑀦𑀫𑁂𑀯 𑀦 𑀪𑁂𑀲𑀚𑁆𑀚𑀁 𑀫𑀡𑁆𑀟𑀦𑀸𑀦𑀼𑀬𑁄𑀕𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀫𑀸𑀮𑀸-𑀲𑀤𑁆𑀤𑁄 𑀲𑀸𑀲𑀦𑁂 𑀲𑀼𑀤𑁆𑀥𑀧𑀼𑀧𑁆𑀨𑁂𑀲𑀼𑀧𑀺 ¶ 𑀦𑀺𑀭𑀼𑀴𑁆𑀳𑁄𑀢𑀺 𑀆𑀳 ‘‘𑀩𑀤𑁆𑀥𑀫𑀸𑀮𑀸 𑀯𑀸’’𑀢𑀺. 𑀫𑀢𑁆𑀢𑀺𑀓𑀓𑀓𑁆𑀓𑀦𑁆𑀢𑀺 𑀑𑀲𑀥𑁂𑀳𑀺 𑀅𑀪𑀺𑀲𑀗𑁆𑀔𑀢𑀁 𑀬𑁄𑀕𑀫𑀢𑁆𑀢𑀺𑀓𑀓𑀓𑁆𑀓𑀁. 𑀘𑀮𑀺𑀢𑁂𑀢𑀺 𑀓𑀼𑀧𑀺𑀢𑁂. 𑀮𑁄𑀳𑀺𑀢𑁂 𑀲𑀦𑁆𑀦𑀺𑀲𑀺𑀦𑁆𑀦𑁂𑀢𑀺 𑀤𑀼𑀝𑁆𑀞𑀮𑁄𑀳𑀺𑀢𑁂 𑀔𑀻𑀡𑁂.

𑁧𑁭. 𑀤𑀼𑀕𑁆𑀕𑀢𑀺𑀢𑁄 𑀲𑀁𑀲𑀸𑀭𑀢𑁄 𑀘 𑀦𑀺𑀬𑁆𑀬𑀸𑀢𑀺 𑀏𑀢𑁂𑀦𑀸𑀢𑀺 𑀦𑀺𑀬𑁆𑀬𑀸𑀦𑀁, 𑀲𑀕𑁆𑀕𑀫𑀕𑁆𑀕𑁄 𑀫𑁄𑀓𑁆𑀔𑀫𑀕𑁆𑀕𑁄 𑀘. 𑀢𑀁 𑀦𑀺𑀬𑁆𑀬𑀸𑀦𑀁 𑀅𑀭𑀳𑀢𑀺, 𑀦𑀺𑀬𑁆𑀬𑀸𑀦𑁂 𑀯𑀸 𑀦𑀺𑀬𑀼𑀢𑁆𑀢𑀸, 𑀦𑀺𑀬𑁆𑀬𑀸𑀦𑀁 𑀯𑀸 𑀨𑀮𑀪𑀽𑀢𑀁 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀦𑀺𑀬𑁆𑀬𑀸𑀦𑀺𑀓𑀸, 𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀢𑁄 𑀦𑀺𑀬𑁆𑀬𑀸𑀢𑀻𑀢𑀺 𑀯𑀸 𑀈-𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁, 𑀬-𑀓𑀸𑀭𑀲𑁆𑀲 𑀘 𑀓-𑀓𑀸𑀭𑀁 𑀓𑀢𑁆𑀯𑀸 𑀦𑀺𑀬𑁆𑀬𑀸𑀦𑀺𑀓𑀸, 𑀘𑁂𑀢𑀦𑀸𑀬 𑀲𑀤𑁆𑀥𑀺𑀁 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀺. 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀦𑀺𑀬𑁆𑀬𑀸𑀦𑀺𑀓𑀸, 𑀢𑀲𑁆𑀲𑀸 𑀪𑀸𑀯𑁄 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀁, 𑀢𑀲𑁆𑀫𑀸 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸. 𑀢𑀺𑀭𑀘𑁆𑀙𑀸𑀦𑀪𑀽𑀢𑀸𑀢𑀺 𑀢𑀺𑀭𑁄𑀓𑀭𑀡𑀪𑀽𑀢𑀸. 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑁂𑀢𑀺 𑀅𑀦𑀺𑀘𑁆𑀘𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑁂. 𑀲𑀳 𑀅𑀢𑁆𑀣𑁂𑀦𑀸𑀢𑀺 𑀲𑀸𑀢𑁆𑀣𑀓𑀁, 𑀳𑀺𑀢𑀧𑀝𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀲𑀺𑀔𑀸𑀢𑀺 𑀖𑀭𑀲𑀦𑁆𑀦𑀺𑀯𑁂𑀲𑁄, 𑀯𑀺𑀲𑀺𑀔𑀸𑀕𑀳𑀡𑁂𑀦 𑀘 𑀢𑀦𑁆𑀦𑀺𑀯𑀸𑀲𑀺𑀦𑁄 𑀕𑀳𑀺𑀢𑀸 ‘‘𑀕𑀸𑀫𑁄 𑀆𑀕𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀢𑁂𑀦𑁂𑀯𑀸𑀳 ‘‘𑀲𑀽𑀭𑀸 𑀲𑀫𑀢𑁆𑀣𑀸’’𑀢𑀺, ‘‘𑀲𑀤𑁆𑀥𑀸 𑀧𑀲𑀦𑁆𑀦𑀸’’𑀢𑀺 𑀘. 𑀓𑀼𑀫𑁆𑀪𑀝𑁆𑀞𑀸𑀦𑀸𑀧𑀤𑁂𑀲𑁂𑀦 ¶ ¶ 𑀓𑀼𑀫𑁆𑀪𑀤𑀸𑀲𑀺𑀬𑁄 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀓𑀼𑀫𑁆𑀪𑀤𑀸𑀲𑀻𑀓𑀣𑀸 𑀯𑀸’’𑀢𑀺. 𑀉𑀧𑁆𑀧𑀢𑁆𑀢𑀺𑀞𑀺𑀢𑀺𑀲𑀫𑁆𑀪𑀸𑀭𑀸𑀤𑀺𑀯𑀲𑁂𑀦 𑀮𑁄𑀓𑀁 𑀅𑀓𑁆𑀔𑀸𑀬𑀢𑀻𑀢𑀺 𑀮𑁄𑀓𑀓𑁆𑀔𑀸𑀬𑀺𑀓𑀸.

𑁧𑁮. 𑀲𑀳𑀺𑀢𑀦𑁆𑀢𑀺 𑀧𑀼𑀩𑁆𑀩𑀸𑀧𑀭𑀸𑀯𑀺𑀭𑀼𑀤𑁆𑀥𑀁.

𑁧𑁯. 𑀤𑀽𑀢𑀲𑁆𑀲 𑀓𑀫𑁆𑀫𑀁 𑀤𑀽𑀢𑁂𑀬𑁆𑀬𑀁, 𑀢𑀲𑁆𑀲 𑀓𑀣𑀸 𑀤𑀽𑀢𑁂𑀬𑁆𑀬𑀓𑀣𑀸.

𑁨𑁦. 𑀢𑀺𑀯𑀺𑀥𑁂𑀦𑀸𑀢𑀺 𑀲𑀸𑀫𑀦𑁆𑀢𑀚𑀧𑁆𑀧𑀦𑀇𑀭𑀺𑀬𑀸𑀧𑀣𑀲𑀦𑁆𑀦𑀺𑀲𑁆𑀲𑀺𑀢𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀪𑁂𑀤𑀢𑁄 𑀢𑀺𑀧𑁆𑀧𑀓𑀸𑀭𑁂𑀦. 𑀯𑀺𑀫𑁆𑀳𑀸𑀧𑀬𑀦𑁆𑀢𑀻𑀢𑀺 ‘‘𑀅𑀳𑁄 𑀅𑀘𑁆𑀙𑀭𑀺𑀬𑀧𑀼𑀭𑀺𑀲𑁄’’𑀢𑀺 𑀅𑀢𑁆𑀢𑀦𑀺 𑀧𑀭𑁂𑀲𑀁 𑀯𑀺𑀫𑁆𑀳𑀬𑀁 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀮𑀧𑀦𑁆𑀢𑀻𑀢𑀺 𑀅𑀢𑁆𑀢𑀸𑀦𑀁, 𑀤𑀸𑀬𑀓𑀁 𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀬𑀣𑀸 𑀲𑁄 𑀓𑀺𑀜𑁆𑀘𑀺 𑀤𑀤𑀸𑀢𑀺, 𑀏𑀯𑀁 𑀉𑀓𑁆𑀓𑀸𑀘𑁂𑀢𑁆𑀯𑀸 𑀓𑀣𑁂𑀦𑁆𑀢𑀺. 𑀦𑀺𑀫𑀺𑀢𑁆𑀢𑁂𑀦 𑀘𑀭𑀦𑁆𑀢𑀺, 𑀦𑀺𑀫𑀺𑀢𑁆𑀢𑀁 𑀯𑀸 𑀓𑀭𑁄𑀦𑁆𑀢𑀻𑀢𑀺 𑀦𑁂𑀫𑀺𑀢𑁆𑀢𑀺𑀓𑀸 𑀦𑀺𑀫𑀺𑀢𑁆𑀢𑀦𑁆𑀢𑀺 𑀘 𑀧𑀭𑁂𑀲𑀁 𑀧𑀘𑁆𑀘𑀬 𑀤𑀸𑀦𑀲𑀜𑁆𑀜𑀼𑀧𑁆𑀧𑀸𑀤𑀓𑀁 𑀓𑀸𑀬𑀯𑀘𑀻𑀓𑀫𑁆𑀫𑀁 𑀯𑀼𑀘𑁆𑀘𑀢𑀺. 𑀦𑀺𑀧𑁆𑀧𑀺𑀁𑀲𑀦𑁆𑀢𑀻𑀢𑀺 𑀦𑀺𑀧𑁆𑀧𑁂𑀲𑀸, 𑀦𑀺𑀧𑁆𑀧𑁂𑀲𑀸𑀬𑁂𑀯 𑀦𑀺𑀧𑁆𑀧𑁂𑀲𑀺𑀓𑀸, 𑀦𑀺𑀧𑁆𑀧𑁂𑀲𑁄𑀢𑀺 𑀘 𑀲𑀞𑀧𑀼𑀭𑀺𑀲𑁄 𑀯𑀺𑀬 𑀮𑀸𑀪𑀲𑀓𑁆𑀓𑀸𑀭𑀢𑁆𑀣𑀁 𑀅𑀓𑁆𑀓𑁄𑀲𑀔𑀼𑀁𑀲𑀦𑀼𑀧𑁆𑀧𑀡𑁆𑀟𑀦𑀧𑀭𑀧𑀺𑀝𑁆𑀞𑀺𑀫𑀁𑀲𑀺𑀓𑀢𑀸𑀤𑀺.

𑀫𑀚𑁆𑀛𑀺𑀫𑀲𑀻𑀮𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀲𑀻𑀮𑀯𑀡𑁆𑀡𑀦𑀸

𑁨𑁧. 𑀅𑀗𑁆𑀕𑀸𑀦𑀺 ¶ 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸 𑀅𑀗𑁆𑀕𑀲𑀳𑀘𑀭𑀺𑀢𑀁 𑀲𑀢𑁆𑀣𑀁 ‘‘𑀅𑀗𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀁. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀓𑁂𑀘𑀺 𑀧𑀦 ‘‘𑀅𑀗𑁆𑀕𑀦𑁆𑀢𑀺 𑀅𑀗𑁆𑀕𑀯𑀺𑀓𑀸𑀭’’𑀦𑁆𑀢𑀺 𑀯𑀤𑀦𑁆𑀢𑀺, 𑀧𑀭𑁂𑀲𑀁 𑀅𑀗𑁆𑀕𑀯𑀺𑀓𑀸𑀭𑀤𑀲𑁆𑀲𑀦𑁂𑀦𑀸𑀧𑀺 𑀮𑀸𑀪𑀸𑀮𑀸𑀪𑀸𑀤𑀺𑀯𑀺𑀚𑁆𑀚𑀸𑀢𑀺. 𑀧𑀡𑁆𑀟𑀼𑀭𑀸𑀚𑀸𑀢𑀺 𑀤𑀓𑁆𑀔𑀺𑀡𑀸𑀫𑀥𑀼𑀭𑀸𑀥𑀺𑀧𑀢𑀺. ‘‘𑀫𑀳𑀦𑁆𑀢𑀸𑀦’’𑀦𑁆𑀢𑀺 𑀏𑀢𑁂𑀦 𑀅𑀧𑁆𑀧𑀓𑀁 𑀦𑀺𑀫𑀺𑀢𑁆𑀢𑀁, 𑀫𑀳𑀦𑁆𑀢𑀁 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀸𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀁 𑀦𑀸𑀫 𑀧𑀲𑁆𑀲𑀢𑀻𑀢𑀺 𑀬𑁄 𑀯𑀲𑀪𑀁 𑀓𑀼𑀜𑁆𑀚𑀭𑀁 𑀧𑀸𑀲𑀸𑀤𑀁 𑀧𑀩𑁆𑀩𑀢𑀁 𑀯𑀸 𑀆𑀭𑀼𑀴𑁆𑀳𑀁 𑀲𑀼𑀧𑀺𑀦𑁂 𑀅𑀢𑁆𑀢𑀸𑀦𑀁 𑀧𑀲𑁆𑀲𑀢𑀺, 𑀢𑀲𑁆𑀲 𑀇𑀤𑀁 𑀦𑀸𑀫 𑀨𑀮𑀁 𑀳𑁄𑀢𑀻𑀢𑀺. 𑀲𑀼𑀧𑀺𑀦𑀓𑀦𑁆𑀢𑀺 𑀲𑀼𑀧𑀺𑀦𑀲𑀢𑁆𑀣𑀁. 𑀅𑀗𑁆𑀕𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀤𑀲𑁆𑀲𑀦𑀫𑀢𑁆𑀢𑁂𑀦 ¶ 𑀆𑀤𑀺𑀲𑀦𑀁 𑀯𑀼𑀢𑁆𑀢𑀁 ‘‘𑀅𑀗𑁆𑀕’’𑀦𑁆𑀢𑀺 𑀇𑀫𑀺𑀦𑀸, ‘‘𑀮𑀓𑁆𑀔𑀡’’𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀫𑀳𑀸𑀦𑀼𑀪𑀸𑀯𑀢𑀸𑀦𑀺𑀧𑁆𑀨𑀸𑀤𑀓𑀅𑀗𑁆𑀕𑀮𑀓𑁆𑀔𑀡𑀯𑀺𑀲𑁂𑀲𑀤𑀲𑁆𑀲𑀦𑁂𑀦𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄𑀢𑀺. 𑀅𑀳𑀢𑁂𑀢𑀺 𑀦𑀯𑁂. 𑀇𑀢𑁄 𑀧𑀝𑁆𑀞𑀸𑀬𑀸𑀢𑀺 𑀤𑁂𑀯𑀭𑀓𑁆𑀔𑀲𑀫𑀦𑀼𑀲𑁆𑀲𑀸𑀤𑀺𑀪𑁂𑀤𑁂𑀦 𑀯𑀺𑀯𑀺𑀥𑀯𑀢𑁆𑀣𑀪𑀸𑀕𑁂 𑀇𑀢𑁄 𑀯𑀸 𑀏𑀢𑁆𑀢𑁄 𑀯𑀸 𑀲𑀜𑁆𑀙𑀺𑀦𑁆𑀦𑁂 𑀇𑀤𑀁 𑀦𑀸𑀫 𑀪𑁄𑀕𑀸𑀤𑀺 𑀳𑁄𑀢𑀻𑀢𑀺. 𑀤𑀩𑁆𑀩𑀺𑀳𑁄𑀫𑀤𑀻𑀦𑀺 ¶ 𑀳𑁄𑀫𑀲𑁆𑀲𑀼𑀧𑀓𑀭𑀡𑀸𑀤𑀺𑀯𑀺𑀲𑁂𑀲𑁂𑀳𑀺 𑀨𑀮𑀯𑀺𑀲𑁂𑀲𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀸𑀦𑀺. 𑀅𑀕𑁆𑀕𑀺𑀳𑁄𑀫𑀁 𑀯𑀼𑀢𑁆𑀢𑀸𑀯𑀲𑁂𑀲𑀲𑀸𑀥𑀦𑀯𑀲𑁂𑀦 𑀧𑀯𑀢𑁆𑀢𑀁 𑀳𑁄𑀫𑀁. 𑀅𑀗𑁆𑀕𑀮𑀝𑁆𑀞𑀺𑀦𑁆𑀢𑀺 𑀲𑀭𑀻𑀭𑀁. 𑀅𑀩𑁆𑀪𑀺𑀦𑁄 𑀲𑀢𑁆𑀣𑀁 𑀅𑀩𑁆𑀪𑁂𑀬𑁆𑀬𑀁, 𑀫𑀸𑀲𑀼𑀭𑀓𑁆𑀔𑁂𑀦 𑀓𑀢𑁄 𑀕𑀦𑁆𑀣𑁄 𑀫𑀸𑀲𑀼𑀭𑀓𑁆𑀔𑁄. 𑀪𑀽𑀭𑀺𑀯𑀺𑀚𑁆𑀚𑀸 𑀲𑀲𑁆𑀲𑀩𑀼𑀤𑁆𑀥𑀺𑀓𑀭𑀡𑀯𑀺𑀚𑁆𑀚𑀸𑀢𑀺 𑀲𑀸𑀭𑀲𑀫𑀸𑀲𑁂. 𑀲𑀧𑀓𑁆𑀔𑀓…𑀧𑁂… 𑀘𑀢𑀼𑀧𑁆𑀧𑀤𑀸𑀦𑀦𑁆𑀢𑀺 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸𑀤𑀺𑀲𑀧𑀓𑁆𑀔𑀓 𑀖𑀭𑀕𑁄𑀮𑀺𑀓𑀸𑀤𑀺𑀅𑀧𑀓𑁆𑀔𑀓𑀤𑁂𑀯𑀫𑀦𑀼𑀲𑁆𑀲𑀓𑁄𑀜𑁆𑀘𑀸𑀤𑀺𑀤𑁆𑀯𑀺𑀧𑀤𑀓𑀓𑀡𑁆𑀝𑀓𑀚𑀫𑁆𑀩𑀼𑀓𑀸𑀤𑀺𑀘𑀢𑀼𑀧𑁆𑀧𑀤𑀸𑀦𑀁.

𑁨𑁩. ‘‘𑀅𑀲𑀼𑀓𑀤𑀺𑀯𑀲𑁂’’𑀢𑀺 ‘‘𑀧𑀓𑁆𑀔𑀲𑁆𑀲 𑀤𑀼𑀢𑀺𑀬𑁂 𑀢𑀢𑀺𑀬𑁂’’𑀢𑀺𑀆𑀤𑀺 𑀢𑀺𑀣𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀲𑀼𑀓𑀦𑀓𑁆𑀔𑀢𑁆𑀢𑁂𑀦𑀸𑀢𑀺 𑀭𑁄𑀳𑀺𑀡𑀻𑀆𑀤𑀺𑀦𑀓𑁆𑀔𑀢𑁆𑀢𑀬𑁄𑀕𑀯𑀲𑁂𑀦.

𑁨𑁪. 𑀉𑀓𑁆𑀓𑀸𑀦𑀁 𑀧𑀢𑀦𑀦𑁆𑀢𑀺 𑀉𑀓𑁆𑀓𑁄𑀪𑀸𑀲𑀸𑀦𑀁 𑀧𑀢𑀦𑀁. 𑀯𑀸𑀢𑀲𑀗𑁆𑀖𑀸𑀢𑁂𑀲𑀼 𑀳𑀺 𑀯𑁂𑀕𑁂𑀦 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀲𑀼 𑀤𑀻𑀧𑀓𑁄𑀪𑀸𑀲𑁄 𑀯𑀺𑀬 𑀑𑀪𑀸𑀲𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀆𑀓𑀸𑀲𑀢𑁄 𑀧𑀢𑀢𑀺, 𑀢𑀢𑁆𑀣𑀸𑀬𑀁 𑀉𑀓𑁆𑀓𑀸𑀧𑀸𑀢𑀯𑁄𑀳𑀸𑀭𑁄. 𑀅𑀯𑀺𑀲𑀼𑀤𑁆𑀥𑀢𑀸 𑀅𑀩𑁆𑀪𑀫𑀳𑀺𑀓𑀸𑀤𑀻𑀳𑀺.

𑁨𑁫. 𑀥𑀸𑀭𑀸𑀦𑀼𑀧𑀯𑁂𑀘𑁆𑀙𑀦𑀁 𑀯𑀲𑁆𑀲𑀦𑀁. 𑀳𑀢𑁆𑀣𑁂𑀦 𑀅𑀥𑀺𑀧𑁆𑀧𑁂𑀢𑀯𑀺𑀜𑁆𑀜𑀸𑀧𑀦𑀁 𑀳𑀢𑁆𑀣𑀫𑀼𑀤𑁆𑀤𑀸, 𑀢𑀁 𑀧𑀦 𑀅𑀗𑁆𑀕𑀼𑀮𑀺𑀲𑀗𑁆𑀓𑁄𑀘𑀦𑁂𑀦 ¶ 𑀕𑀡𑀦𑀸𑀬𑁂𑀯. 𑀧𑀸𑀭𑀲𑀺𑀓 𑀫𑀺𑀮𑀓𑁆𑀔𑀓𑀸𑀤𑀬𑁄 𑀯𑀺𑀬 𑀦𑀯𑀦𑁆𑀢𑀯𑀲𑁂𑀦 𑀕𑀡𑀦𑀸 𑀅𑀘𑁆𑀙𑀺𑀤𑁆𑀤𑀓𑀕𑀡𑀦𑀸. 𑀲𑀝𑀼𑀧𑁆𑀧𑀸𑀤𑀦𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑁄𑀓𑀮𑀦𑀪𑀸𑀕𑀳𑀸𑀭𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀘𑀺𑀦𑁆𑀢𑀸𑀯𑀲𑁂𑀦𑀸𑀢𑀺 𑀯𑀢𑁆𑀣𑀼𑀁 𑀅𑀦𑀼𑀲𑀦𑁆𑀥𑀺𑀜𑁆𑀘 𑀲𑀬𑀫𑁂𑀯 𑀘𑀺𑀭𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 𑀓𑀭𑀡𑀯𑀲𑁂𑀦 𑀘𑀺𑀦𑁆𑀢𑀸𑀓𑀯𑀺 𑀯𑁂𑀤𑀺𑀢𑀩𑁆𑀩𑁄, 𑀓𑀺𑀜𑁆𑀘𑀺 𑀲𑀼𑀢𑁆𑀯𑀸 𑀲𑀼𑀢𑁂𑀦 𑀅𑀲𑁆𑀲𑀼𑀢𑀁 𑀅𑀦𑀼𑀲𑀦𑁆𑀥𑁂𑀢𑁆𑀯𑀸 𑀓𑀭𑀡𑀯𑀲𑁂𑀦 𑀲𑀼𑀢𑀓𑀯𑀺, 𑀓𑀜𑁆𑀘𑀺 𑀅𑀢𑁆𑀣𑀁 𑀉𑀧𑀥𑀸𑀭𑁂𑀢𑁆𑀯𑀸 𑀢𑀲𑁆𑀲 ¶ 𑀲𑀗𑁆𑀔𑀺𑀧𑀦𑀯𑀺𑀢𑁆𑀣𑀸𑀭𑀡𑀸𑀤𑀺𑀯𑀲𑁂𑀦 𑀅𑀢𑁆𑀣𑀓𑀯𑀺, 𑀬𑀁 𑀓𑀺𑀜𑁆𑀘𑀺 𑀧𑀭𑁂𑀦 𑀓𑀢𑀁 𑀓𑀩𑁆𑀩𑀁 𑀦𑀸𑀝𑀓𑀁 𑀯𑀸 𑀤𑀺𑀲𑁆𑀯𑀸 𑀢𑀁 𑀲𑀤𑀺𑀲𑀫𑁂𑀯 𑀅𑀜𑁆𑀜𑀁 𑀅𑀢𑁆𑀢𑀦𑁄 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀝𑀺𑀪𑀸𑀦𑁂𑀦 𑀓𑀭𑀡𑀯𑀲𑁂𑀦 𑀧𑀝𑀺𑀪𑀸𑀦𑀓𑀯𑀺 𑀯𑁂𑀤𑀺𑀢𑀩𑁆𑀩𑁄.

𑁨𑁬. 𑀧𑀭𑀺𑀕𑁆𑀕𑀳𑀪𑀸𑀯𑁂𑀦 𑀤𑀸𑀭𑀺𑀓𑀸𑀬 𑀕𑀡𑁆𑀳𑀸𑀧𑀦𑀁 𑀆𑀯𑀸𑀳𑀦𑀁. 𑀢𑀣𑀸 𑀤𑀸𑀧𑀦𑀁 𑀯𑀺𑀯𑀸𑀳𑀦𑀁. 𑀤𑁂𑀲𑀦𑁆𑀢𑀭𑁂 𑀤𑀺𑀕𑀼𑀡𑀢𑀺𑀕𑀼𑀡𑀸𑀤𑀺𑀕𑀳𑀡𑀯𑀲𑁂𑀦 𑀪𑀡𑁆𑀟𑀧𑁆𑀧𑀬𑁄𑀚𑀦𑀁 𑀧𑀬𑁄𑀕𑁄. 𑀢𑀢𑁆𑀣 𑀯𑀸 𑀅𑀜𑁆𑀜𑀢𑁆𑀣 𑀯𑀸 𑀬𑀣𑀸𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀯𑀟𑁆𑀠𑀺𑀕𑀳𑀡𑀯𑀲𑁂𑀦 𑀧𑀬𑁄𑀚𑀦𑀁 𑀉𑀤𑁆𑀥𑀸𑀭𑁄. ‘‘𑀪𑀡𑁆𑀟𑀫𑀽𑀮𑀭𑀳𑀺𑀢𑀸𑀦𑀁 𑀯𑀸𑀡𑀺𑀚𑁆𑀚𑀁 𑀓𑀢𑁆𑀯𑀸 𑀏𑀢𑁆𑀢𑀓𑁂𑀦𑀼𑀤𑀬𑁂𑀦 𑀲𑀳 𑀫𑀽𑀮𑀁 𑀤𑁂𑀣𑀸𑀢𑀺 𑀥𑀦𑀤𑀸𑀦𑀁 𑀧𑀬𑁄𑀕𑁄, 𑀢𑀸𑀯𑀓𑀸𑀮𑀺𑀓𑀤𑀸𑀦𑀁 𑀉𑀤𑁆𑀥𑀸𑀭𑁄’’𑀢𑀺 𑀘 𑀯𑀤𑀦𑁆𑀢𑀺. 𑀢𑀻𑀳𑀺 𑀓𑀸𑀭𑀡𑁂𑀳𑀻𑀢𑀺 𑀏𑀢𑁆𑀣 𑀯𑀸𑀢𑁂𑀦, 𑀧𑀸𑀡𑀓𑁂𑀳𑀺 𑀯𑀸 𑀕𑀩𑁆𑀪𑁂 𑀯𑀺𑀦𑀲𑁆𑀲𑀦𑁆𑀢𑁂 𑀦 𑀧𑀼𑀭𑀺𑀫𑀓𑀫𑁆𑀫𑀼𑀦𑀸 𑀑𑀓𑀸𑀲𑁄 𑀓𑀢𑁄, 𑀢𑀧𑁆𑀧𑀘𑁆𑀘𑀬𑀸 𑀓𑀫𑁆𑀫𑀁 𑀯𑀺𑀧𑀘𑁆𑀘𑀢𑀺. 𑀲𑀬𑀫𑁂𑀯 ¶ 𑀧𑀦 𑀓𑀫𑁆𑀫𑀼𑀦𑀸 𑀑𑀓𑀸𑀲𑁂 𑀓𑀢𑁂 𑀦 𑀏𑀓𑀦𑁆𑀢𑁂𑀦 𑀯𑀸𑀢𑁄 𑀧𑀸𑀡𑀓𑀸 𑀯𑀸 𑀅𑀧𑁂𑀓𑁆𑀔𑀺𑀢𑀩𑁆𑀩𑀸𑀢𑀺 𑀓𑀫𑁆𑀫𑀲𑁆𑀲 𑀯𑀺𑀲𑀼𑀁 𑀓𑀸𑀭𑀡𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀺𑀩𑁆𑀩𑀸𑀧𑀦𑀻𑀬𑀦𑁆𑀢𑀺 𑀉𑀧𑀲𑀫𑀓𑀭𑀁. 𑀧𑀝𑀺𑀓𑀫𑁆𑀫𑀦𑁆𑀢𑀺 𑀬𑀣𑀸 𑀢𑁂 𑀦 𑀔𑀸𑀤𑀦𑁆𑀢𑀺, 𑀢𑀣𑀸 𑀧𑀝𑀺𑀓𑀭𑀡𑀁. 𑀧𑀭𑀺𑀯𑀢𑁆𑀢𑀦𑀢𑁆𑀣𑀦𑁆𑀢𑀺 𑀆𑀯𑀼𑀥𑀸𑀤𑀺𑀦𑀸 𑀲𑀳 𑀉𑀓𑁆𑀔𑀺𑀢𑁆𑀢𑀳𑀢𑁆𑀣𑀲𑁆𑀲 𑀉𑀓𑁆𑀔𑀺𑀧𑀦𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀢𑁆𑀣𑀁. 𑀇𑀘𑁆𑀙𑀺𑀢𑀢𑁆𑀣𑀲𑁆𑀲 𑀤𑁂𑀯𑀢𑀸𑀬 𑀓𑀡𑁆𑀡𑁂 𑀓𑀣𑀦𑀯𑀲𑁂𑀦 𑀚𑀧𑁆𑀧𑀦𑀁 𑀓𑀡𑁆𑀡𑀚𑀧𑁆𑀧𑀦𑀦𑁆𑀢𑀺. 𑀆𑀤𑀺𑀘𑁆𑀘𑀧𑀸𑀭𑀺𑀘𑀭𑀺𑀬𑀸𑀢𑀺 ¶ 𑀓𑀭𑀯𑀻𑀭𑀫𑀸𑀮𑀸𑀳𑀺 𑀧𑀽𑀚𑀁 𑀓𑀢𑁆𑀯𑀸 𑀲𑀓𑀮𑀤𑀺𑀯𑀲𑀁 𑀆𑀤𑀺𑀘𑁆𑀘𑀸𑀪𑀺𑀫𑀼𑀔𑀸𑀯𑀝𑁆𑀞𑀸𑀦𑁂𑀦 𑀆𑀤𑀺𑀘𑁆𑀘𑀲𑁆𑀲 𑀧𑀭𑀺𑀘𑀭𑀡𑀁. ‘‘𑀲𑀺𑀭𑀯𑁆𑀳𑀸𑀬𑀦’’𑀦𑁆𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺, 𑀢𑀲𑁆𑀲𑀢𑁆𑀣𑁄𑀫𑀦𑁆𑀢𑀁 𑀧𑀭𑀺𑀚𑀧𑁆𑀧𑀺𑀢𑁆𑀯𑀸 𑀲𑀺𑀭𑀲𑀸 𑀇𑀘𑁆𑀙𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀯𑁆𑀳𑀸𑀬𑀦𑀦𑁆𑀢𑀺.

𑁨𑁭. 𑀲𑀫𑀺𑀤𑁆𑀥𑀺𑀓𑀸𑀮𑁂𑀢𑀺 𑀆𑀬𑀸𑀘𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀺𑀤𑁆𑀥𑀺𑀓𑀸𑀮𑁂. 𑀲𑀦𑁆𑀢𑀺𑀧𑀝𑀺𑀲𑁆𑀲𑀯𑀓𑀫𑁆𑀫𑀦𑁆𑀢𑀺 𑀤𑁂𑀯𑀢𑀸𑀬𑀸𑀘𑀦𑀸𑀬 𑀬𑀸 𑀲𑀦𑁆𑀢𑀺 𑀧𑀝𑀺𑀓𑀢𑁆𑀢𑀩𑁆𑀩𑀸, 𑀢𑀲𑁆𑀲𑀸 𑀧𑀝𑀺𑀜𑁆𑀜𑀸𑀧𑀝𑀺𑀲𑁆𑀲𑀯𑀓𑀫𑁆𑀫𑀓𑀭𑀡𑀁, 𑀲𑀦𑁆𑀢𑀺𑀬𑀸 𑀆𑀬𑀸𑀘𑀦𑀧𑁆𑀧𑀬𑁄𑀕𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀺𑀦𑁆𑀢𑀺 𑀧𑀝𑀺𑀲𑁆𑀲𑀯𑀨𑀮𑀪𑀽𑀢𑁂 𑀬𑀣𑀸𑀪𑀺𑀧𑀢𑁆𑀣𑀺𑀢𑀓𑀫𑁆𑀫𑀲𑁆𑀫𑀺𑀁, 𑀬𑀁 ‘‘𑀲𑀘𑁂 𑀫𑁂 𑀇𑀤𑀁 𑀦𑀸𑀫 𑀲𑀫𑀺𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀸𑀢𑀺 𑀲𑀦𑁆𑀢𑀺𑀧𑀝𑀺𑀲𑁆𑀲𑀯𑀲𑁆𑀲, 𑀬𑁄 ‘‘𑀧𑀡𑀺𑀥𑀻’’𑀢𑀺 𑀘 𑀯𑀼𑀢𑁆𑀢𑁄. 𑀬𑀣𑀸𑀧𑀝𑀺𑀲𑁆𑀲𑀯𑀜𑁆𑀳𑀺 𑀉𑀧𑀳𑀸𑀭𑁂 𑀓𑀢𑁂 𑀧𑀡𑀺𑀥𑀺 𑀆𑀬𑀸𑀘𑀦𑀸 𑀓𑀢𑀸 𑀦𑀺𑀬𑁆𑀬𑀸𑀢𑀺𑀢𑀸 𑀳𑁄𑀢𑀻𑀢𑀺. 𑀅𑀘𑁆𑀙𑀦𑁆𑀤𑀺𑀓𑀪𑀸𑀯𑀫𑀢𑁆𑀢𑀦𑁆𑀢𑀺 𑀇𑀢𑁆𑀣𑀺𑀬𑀸 𑀅𑀓𑀸𑀫𑀓𑀪𑀸𑀯𑀫𑀢𑁆𑀢𑀁. 𑀮𑀺𑀗𑁆𑀕𑀦𑁆𑀢𑀺 𑀧𑀼𑀭𑀺𑀲𑀮𑀺𑀗𑁆𑀕𑀁. 𑀩𑀮𑀺𑀓𑀫𑁆𑀫𑀓𑀭𑀡𑀁 𑀉𑀧𑀤𑁆𑀤𑀯𑀧𑀝𑀺𑀩𑀸𑀳𑀦𑀢𑁆𑀣𑀜𑁆𑀘𑁂𑀯 𑀯𑀟𑁆𑀠𑀺𑀆𑀯𑀳𑀦𑀢𑁆𑀣𑀜𑁆𑀘. 𑀤𑁄𑀲𑀸𑀦𑀦𑁆𑀢𑀺 𑀧𑀺𑀢𑁆𑀢𑀸𑀤𑀺𑀤𑁄𑀲𑀸𑀦𑀁. 𑀏𑀢𑁆𑀣 𑀘 𑀯𑀫𑀦𑀦𑁆𑀢𑀺 𑀧𑀘𑁆𑀙𑀝𑁆𑀝𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀉𑀤𑁆𑀥𑀁𑀯𑀺𑀭𑁂𑀘𑀦𑀦𑁆𑀢𑀺 𑀯𑀫𑀦𑀁 ‘‘𑀉𑀤𑁆𑀥𑀁 𑀤𑁄𑀲𑀸𑀦𑀁 𑀦𑀻𑀳𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀢𑀣𑀸 𑀯𑀺𑀭𑁂𑀘𑀦𑀦𑁆𑀢𑀺 𑀯𑀺𑀭𑁂𑀘𑀦𑀫𑁂𑀯. 𑀅𑀥𑁄𑀯𑀺𑀭𑁂𑀘𑀦𑀦𑁆𑀢𑀺 𑀧𑀦 𑀲𑀼𑀤𑁆𑀥𑀺𑀯𑀢𑁆𑀣𑀺𑀓𑀲𑀸𑀯𑀢𑁆𑀣𑀺𑀆𑀤𑀺 𑀯𑀢𑁆𑀣𑀺𑀓𑀺𑀭𑀺𑀬𑀸𑀧𑀺 𑀅𑀥𑀺𑀧𑁆𑀧𑁂𑀢𑀸 ‘‘𑀅𑀥𑁄 𑀤𑁄𑀲𑀸𑀦𑀁 𑀦𑀻𑀳𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀲𑀻𑀲𑀯𑀺𑀭𑁂𑀘𑀦𑀁 𑀲𑁂𑀫𑁆𑀳𑀦𑀻𑀳𑀭𑀡𑀸𑀤𑀺. 𑀧𑀝𑀮𑀸𑀦𑀻𑀢𑀺 𑀅𑀓𑁆𑀔𑀺𑀧𑀝𑀮𑀸𑀦𑀺. 𑀲𑀮𑀸𑀓𑀯𑁂𑀚𑁆𑀚𑀓𑀫𑁆𑀫𑀦𑁆𑀢𑀺 𑀅𑀓𑁆𑀔𑀺𑀯𑁂𑀚𑁆𑀚𑀓𑀫𑁆𑀫𑀁, 𑀇𑀤𑀁 𑀯𑀼𑀢𑁆𑀢𑀸𑀯𑀲𑁂𑀲𑀲𑀸𑀮𑀸𑀓𑀺𑀬𑀲𑀗𑁆𑀕𑀳𑀡𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀦𑁆𑀢𑀺. 𑀢𑀧𑁆𑀧𑀦𑀸𑀤𑀬𑁄𑀧𑀺 𑀳𑀺 𑀲𑀸𑀮𑀸𑀓𑀺𑀬𑀸𑀦𑁂𑀯𑀸𑀢𑀺. 𑀫𑀽𑀮𑀸𑀦𑀺 ¶ 𑀧𑀥𑀸𑀦𑀸𑀦𑀺 𑀭𑁄𑀕𑀽𑀧𑀲𑀫𑁂 𑀲𑀫𑀢𑁆𑀣𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀫𑀽𑀮𑀪𑁂𑀲𑀚𑁆𑀚𑀸𑀦𑀺, 𑀫𑀽𑀮𑀸𑀦𑀁 𑀯𑀸 𑀩𑁆𑀬𑀸𑀥𑀻𑀦𑀁 𑀪𑁂𑀲𑀚𑁆𑀚𑀸𑀦𑀺 𑀫𑀽𑀮𑀪𑁂𑀲𑀚𑁆𑀚𑀸𑀦𑀺. 𑀫𑀽𑀮𑀸𑀦𑀼𑀩𑀦𑁆𑀥𑀯𑀲𑁂𑀦 𑀳𑀺 𑀤𑀼𑀯𑀺𑀥𑁄 𑀩𑁆𑀬𑀸𑀥𑀺. 𑀫𑀽𑀮𑀭𑁄𑀕𑁂 𑀘 𑀢𑀺𑀓𑀺𑀘𑁆𑀙𑀺𑀢𑁂 𑀬𑁂𑀪𑀼𑀬𑁆𑀬𑁂𑀦 𑀇𑀢𑀭𑀁 𑀯𑀽𑀧𑀲𑀫𑀢𑀻𑀢𑀺. ‘‘𑀓𑀸𑀬𑀢𑀺𑀓𑀺𑀘𑁆𑀙𑀦𑀁 ¶ 𑀤𑀲𑁆𑀲𑁂𑀢𑀻’’𑀢𑀺 𑀇𑀤𑀁 𑀓𑁄𑀫𑀸𑀭𑀪𑀘𑁆𑀘𑀲𑀮𑁆𑀮𑀓𑀢𑁆𑀢𑀲𑀸𑀮𑀸𑀓𑀺𑀬𑀸𑀤𑀺𑀓𑀭𑀡𑀯𑀺𑀲𑁂𑀲𑀪𑀽𑀢𑀢𑀦𑁆𑀢𑀻𑀦𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀢𑁆𑀢𑀸 𑀧𑀸𑀭𑀺𑀲𑁂𑀲𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀤𑀯𑀲𑁂𑀲𑀸𑀬 𑀢𑀦𑁆𑀢𑀺𑀬𑀸𑀧𑀺 𑀇𑀥 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀩𑁆𑀩𑀸𑀦𑀺 𑀘𑁂𑀢𑀸𑀦𑀺 𑀆𑀚𑀻𑀯𑀳𑁂𑀢𑀼𑀓𑀸𑀦𑀺𑀬𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀸𑀦𑀺 ‘‘𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ¶ . 𑀬𑀁 𑀧𑀦 𑀢𑀢𑁆𑀣 𑀢𑀢𑁆𑀣 𑀧𑀸𑀴𑀺𑀬𑀁 ‘‘𑀇𑀢𑀺 𑀯𑀸’’𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀇𑀢𑀻𑀢𑀺 𑀧𑀓𑀸𑀭𑀢𑁆𑀣𑁂 𑀦𑀺𑀧𑀸𑀢𑁄, 𑀯𑀸-𑀇𑀢𑀺 𑀯𑀺𑀓𑀧𑁆𑀧𑀦𑀢𑁆𑀣𑁂. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑀇𑀫𑀺𑀦𑀸 𑀧𑀓𑀸𑀭𑁂𑀦, 𑀇𑀢𑁄 𑀅𑀜𑁆𑀜𑁂 𑀦 𑀯𑀸𑀢𑀺. 𑀢𑁂𑀦 𑀬𑀸𑀦𑀺 𑀇𑀢𑁄 𑀩𑀸𑀳𑀺𑀭𑀓𑀧𑀩𑁆𑀩𑀚𑀺𑀢𑀸 𑀲𑀺𑀧𑁆𑀧𑀸𑀬𑀢𑀦𑀯𑀺𑀚𑁆𑀚𑀸𑀝𑁆𑀞𑀸𑀦𑀸𑀤𑀻𑀦𑀺 𑀚𑀻𑀯𑀺𑀓𑁄𑀧𑀸𑀬𑀪𑀽𑀢𑀸𑀦𑀺 𑀆𑀚𑀻𑀯𑀧𑀓𑀢𑀸 𑀉𑀧𑀚𑀻𑀯𑀦𑁆𑀢𑀺, 𑀢𑁂𑀲𑀁 𑀧𑀭𑀺𑀕𑁆𑀕𑀳𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀫𑀳𑀸𑀲𑀻𑀮𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀲𑀲𑁆𑀲𑀢𑀯𑀸𑀤𑀯𑀡𑁆𑀡𑀦𑀸

𑁨𑁮. 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀯𑀼𑀢𑁆𑀢𑀯𑀡𑁆𑀡𑁄 𑀦𑀸𑀫 ‘‘𑀬𑀸𑀯𑀜𑁆𑀘𑀺𑀤𑀁 𑀢𑁂𑀦 𑀪𑀕𑀯𑀢𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑀡𑁆𑀡𑁄. 𑀏𑀢𑁆𑀣𑀸𑀬𑀁 𑀲𑀫𑁆𑀩𑀦𑁆𑀥𑁄 𑁋 𑀦 𑀪𑀺𑀓𑁆𑀔𑀯𑁂 𑀏𑀢𑁆𑀢𑀓𑀸 𑀏𑀯 𑀩𑀼𑀤𑁆𑀥𑀕𑀼𑀡𑀸, 𑀬𑁂 𑀢𑀼𑀫𑁆𑀳𑀸𑀓𑀁 𑀧𑀸𑀓𑀝𑀸, 𑀅𑀧𑀸𑀓𑀝𑀸 𑀧𑀦 ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂 𑀅𑀜𑁆𑀜𑁂 𑀥𑀫𑁆𑀫𑀸’’𑀢𑀺 𑀯𑀺𑀢𑁆𑀣𑀸𑀭𑁄. 𑀢𑀢𑁆𑀣 ‘‘𑀇𑀫𑁂 𑀤𑀺𑀝𑁆𑀞𑀺𑀝𑁆𑀞𑀸𑀦𑀸 𑀏𑀯𑀁 𑀕𑀳𑀺𑀢𑀸’’𑀢𑀺𑀆𑀤𑀺𑀦𑀸 𑀲𑀲𑁆𑀲𑀢𑀸𑀤𑀺𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀦𑀁 𑀬𑀣𑀸𑀕𑀳𑀺𑀢𑀸𑀓𑀸𑀭𑀲𑀼𑀜𑁆𑀜𑀢𑀪𑀸𑀯𑀧𑁆𑀧𑀓𑀸𑀲𑀦𑀢𑁄, ‘‘𑀢𑀜𑁆𑀘 𑀧𑀚𑀸𑀦𑀦𑀁 𑀦 𑀧𑀭𑀸𑀫𑀲𑀢𑀻’’𑀢𑀺 𑀲𑀻𑀮𑀸𑀤𑀻𑀦𑀜𑁆𑀘 𑀅𑀧𑀭𑀸𑀫𑀸𑀲𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀤𑀻𑀧𑀦𑁂𑀦 𑀦𑀺𑀘𑁆𑀘𑀲𑀸𑀭𑀸𑀤𑀺𑀯𑀺𑀭𑀳𑀧𑁆𑀧𑀓𑀸𑀲𑀦𑀢𑁄, 𑀬𑀸𑀲𑀼 𑀯𑁂𑀤𑀦𑀸𑀲𑀼 𑀅𑀯𑀻𑀢𑀭𑀸𑀕𑀢𑀸𑀬 𑀩𑀸𑀳𑀺𑀭𑀓𑀸𑀦𑀁 𑀏𑀢𑀸𑀦𑀺 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀺 𑀲𑀫𑁆𑀪𑀯𑀦𑁆𑀢𑀺, 𑀢𑁂𑀲𑀁 𑀧𑀘𑁆𑀘𑀬𑀪𑀽𑀢𑀸𑀦𑀜𑁆𑀘 𑀲𑀫𑁆𑀫𑁄𑀳𑀸𑀤𑀻𑀦𑀁 𑀯𑁂𑀤𑀓𑀓𑀸𑀭𑀓𑀲𑀪𑀸𑀯𑀸𑀪𑀸𑀯𑀤𑀲𑁆𑀲𑀦𑀫𑀼𑀔𑁂𑀦 ¶ 𑀲𑀩𑁆𑀩𑀥𑀫𑁆𑀫𑀸𑀦𑀁 𑀅𑀢𑁆𑀢𑀢𑁆𑀢𑀦𑀺𑀬𑀢𑀸𑀯𑀺𑀭𑀳𑀤𑀻𑀧𑀦𑀢𑁄, 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀤𑀻𑀧𑀦𑀢𑁄 𑀘 𑀅𑀬𑀁 𑀤𑁂𑀲𑀦𑀸 𑀲𑀼𑀜𑁆𑀜𑀢𑀸𑀯𑀺𑀪𑀸𑀯𑀦𑀧𑁆𑀧𑀥𑀸𑀦𑀸𑀢𑀺 𑀆𑀳 ‘‘𑀲𑀼𑀜𑁆𑀜𑀢𑀸𑀧𑀓𑀸𑀲𑀦𑀁 𑀆𑀭𑀪𑀻’’𑀢𑀺. 𑀧𑀭𑀺𑀬𑀢𑁆𑀢𑀻𑀢𑀺 𑀯𑀺𑀦𑀬𑀸𑀤𑀺𑀪𑁂𑀤𑀪𑀺𑀦𑁆𑀦𑀸 𑀢𑀦𑁆𑀢𑀺. 𑀤𑁂𑀲𑀦𑀸𑀢𑀺 𑀢𑀲𑁆𑀲𑀸 𑀢𑀦𑁆𑀢𑀺𑀬𑀸 𑀫𑀦𑀲𑀸𑀯𑀯𑀢𑁆𑀣𑀸𑀧𑀺𑀢𑀸𑀬 𑀯𑀺𑀪𑀸𑀯𑀦𑀸, 𑀬𑀣𑀸𑀥𑀫𑁆𑀫𑀁 𑀥𑀫𑁆𑀫𑀸𑀪𑀺𑀮𑀸𑀧𑀪𑀽𑀢𑀸 𑀯𑀸 𑀧𑀜𑁆𑀜𑀸𑀧𑀦𑀸, 𑀅𑀦𑀼𑀮𑁄𑀫𑀸𑀤𑀺𑀯𑀲𑁂𑀦 𑀯𑀸 𑀓𑀣𑀦𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀤𑁂𑀲𑀦𑀸𑀦𑀁 𑀯𑀺𑀲𑁂𑀲𑁄 𑀧𑀼𑀩𑁆𑀩𑁂𑀬𑁂𑀯 𑀯𑀯𑀢𑁆𑀣𑀸𑀧𑀺𑀢𑁄𑀢𑀺 𑀆𑀳 ‘‘𑀤𑁂𑀲𑀦𑀸𑀬𑀁 𑀧𑀭𑀺𑀬𑀢𑁆𑀢𑀺𑀬’’𑀦𑁆𑀢𑀺. 𑀏𑀯𑀁 𑀆𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀲𑀘𑁆𑀘𑀲𑀪𑀸𑀯𑀲𑀫𑀸𑀥𑀺𑀧𑀜𑁆𑀜𑀸𑀧𑀓𑀢𑀺𑀧𑀼𑀜𑁆𑀜𑀆𑀧𑀢𑁆𑀢𑀺𑀜𑁂𑀬𑁆𑀬𑀸𑀤𑀬𑁄 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀢𑀣𑀸 𑀳𑀺 𑀅𑀬𑀁 𑀥𑀫𑁆𑀫-𑀲𑀤𑁆𑀤𑁄 ‘‘𑀘𑀢𑀼𑀦𑁆𑀦𑀁 𑀪𑀺𑀓𑁆𑀔𑀯𑁂 𑀥𑀫𑁆𑀫𑀸𑀦𑀁 𑀅𑀦𑀦𑀼𑀩𑁄𑀥𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁧𑁮𑁬; 𑀅. 𑀦𑀺. 𑁪.𑁧) 𑀲𑀘𑁆𑀘𑁂 𑀯𑀢𑁆𑀢𑀢𑀺, ‘‘𑀓𑀼𑀲𑀮𑀸 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁧) 𑀲𑀪𑀸𑀯𑁂, ‘‘𑀏𑀯𑀁𑀥𑀫𑁆𑀫𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁩𑁭𑁮) 𑀲𑀫𑀸𑀥𑀺𑀫𑁆𑀳𑀺, ‘‘𑀲𑀘𑁆𑀘𑀁 𑀥𑀫𑁆𑀫𑁄 ¶ 𑀥𑀺𑀢𑀺 𑀘𑀸𑀕𑁄, 𑀲 𑀯𑁂 𑀧𑁂𑀘𑁆𑀘 𑀦 𑀲𑁄𑀘𑀢𑀻’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁧𑁯𑁦) 𑀧𑀜𑁆𑀜𑀸𑀬, ‘‘𑀚𑀸𑀢𑀺𑀥𑀫𑁆𑀫𑀸𑀦𑀁 ¶ 𑀪𑀺𑀓𑁆𑀔𑀯𑁂 𑀲𑀢𑁆𑀢𑀸𑀦𑀁 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁩𑁭𑁩; 𑀧𑀝𑀺. 𑀫. 𑁧.𑁩𑁩) 𑀧𑀓𑀢𑀺𑀬𑀁, ‘‘𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀲𑀼𑀔𑀫𑀸𑀯𑀳𑀸𑀢𑀻’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁧𑁮𑁪; 𑀣𑁂𑀭𑀕𑀸. 𑁩𑁦𑁩; 𑀚𑀸. 𑁧.𑁧𑁦.𑁧𑁦𑁨) 𑀧𑀼𑀜𑁆𑀜𑁂, ‘‘𑀘𑀢𑁆𑀢𑀸𑀭𑁄 ¶ 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨𑁩𑁩) 𑀆𑀧𑀢𑁆𑀢𑀺𑀬𑀁, ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑀼𑀔𑁂 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫𑀳𑀸𑀦𑀺. 𑁧𑁫𑁬; 𑀘𑀽𑀴𑀦𑀺. 𑁮𑁫; 𑀧𑀝𑀺. 𑀫. 𑁩.𑁬) 𑀜𑁂𑀬𑁆𑀬𑁂 𑀯𑀢𑁆𑀢𑀢𑀺 (𑀫. 𑀦𑀺. 𑀅𑀝𑁆𑀞. 𑁧.𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀯𑀡𑁆𑀡𑀦𑀸; 𑀅𑀪𑀺. 𑀅𑀝𑁆𑀞. 𑁧.𑀢𑀺𑀓𑀫𑀸𑀢𑀺𑀓𑀸𑀧𑀤𑀯𑀡𑁆𑀡𑀦𑀸; 𑀩𑀼. 𑀯𑀁. 𑀅𑀝𑁆𑀞. 𑀭𑀢𑀦𑀘𑀗𑁆𑀓𑀫𑀦𑀓𑀡𑁆𑀟𑀯𑀡𑁆𑀡𑀦𑀸). 𑀥𑀫𑁆𑀫𑀸 𑀳𑁄𑀦𑁆𑀢𑀻𑀢𑀺 𑀲𑀼𑀜𑁆𑀜𑀸 𑀥𑀫𑁆𑀫𑀫𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

‘‘𑀤𑀼𑀤𑁆𑀤𑀲𑀸’’𑀢𑀺 𑀏𑀢𑁂𑀦𑁂𑀯 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀤𑀼𑀓𑁆𑀔𑁄𑀕𑀸𑀳𑀢𑀸 𑀧𑀓𑀸𑀲𑀺𑀢𑀸 𑀳𑁄𑀢𑀺. 𑀲𑀘𑁂 𑀧𑀦 𑀓𑁄𑀘𑀺 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀅𑀚𑀸𑀦𑀦𑁆𑀢𑁄 𑀜𑀸𑀡𑁂𑀦 𑀢𑁂 𑀥𑀫𑁆𑀫𑁂 𑀑𑀕𑀸𑀳𑀺𑀢𑀼𑀁 𑀉𑀲𑁆𑀲𑀸𑀳𑀁 𑀓𑀭𑁂𑀬𑁆𑀬, 𑀢𑀲𑁆𑀲 𑀢𑀁 𑀜𑀸𑀡𑀁 𑀅𑀧𑁆𑀧𑀢𑀺𑀝𑁆𑀞𑀫𑁂𑀯 𑀫𑀓𑀲𑀢𑀼𑀡𑁆𑀟𑀲𑀽𑀘𑀺 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑁂𑀢𑀺 𑀆𑀳 ‘‘𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀸’’𑀢𑀺. 𑀅𑀮𑀩𑁆𑀪𑀦𑁂𑀬𑁆𑀬𑀸 𑀧𑀢𑀺𑀝𑁆𑀞𑀸 𑀏𑀢𑁆𑀣𑀸𑀢𑀺 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀸𑀢𑀺 𑀧𑀤𑀯𑀺𑀕𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀸𑀦𑀁 𑀑𑀕𑀸𑀳𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 ‘‘𑀏𑀢𑁆𑀢𑀓𑀸 𑀏𑀢𑁂 𑀈𑀤𑀺𑀲𑀸 𑀘𑀸’’𑀢𑀺 𑀧𑀲𑁆𑀲𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀯𑀼𑀢𑁆𑀢𑀁 ‘‘𑀕𑀫𑁆𑀪𑀻𑀭𑀢𑁆𑀢𑀸 𑀏𑀯 𑀤𑀼𑀤𑁆𑀤𑀲𑀸’’𑀢𑀺. 𑀬𑁂 𑀧𑀦 𑀤𑀝𑁆𑀞𑀼𑀫𑁂𑀯 𑀦 𑀲𑀓𑁆𑀓𑀸, 𑀢𑁂𑀲𑀁 𑀑𑀕𑀸𑀳𑀺𑀢𑁆𑀯𑀸 𑀅𑀦𑀼𑀩𑀼𑀚𑁆𑀛𑀦𑁂 𑀓𑀣𑀸 𑀏𑀯 𑀦𑀢𑁆𑀣𑀻𑀢𑀺 𑀆𑀳 ‘‘𑀤𑀼𑀤𑁆𑀤𑀲𑀢𑁆𑀢𑀸 𑀏𑀯 𑀤𑀼𑀭𑀦𑀼𑀩𑁄𑀥𑀸’’𑀢𑀺. 𑀲𑀩𑁆𑀩𑀧𑀭𑀺𑀴𑀸𑀳𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀫𑀢𑁆𑀣𑀓𑁂 𑀲𑀫𑀼𑀧𑁆𑀧𑀦𑁆𑀦𑀢𑁆𑀢𑀸, 𑀦𑀺𑀩𑁆𑀩𑀼𑀢𑀲𑀩𑁆𑀩𑀧𑀭𑀺𑀴𑀸𑀳𑀲𑀫𑀸𑀧𑀢𑁆𑀢𑀺𑀲𑀫𑁄𑀓𑀺𑀡𑁆𑀡𑀢𑁆𑀢𑀸 𑀘 𑀦𑀺𑀩𑁆𑀩𑀼𑀢𑀲𑀩𑁆𑀩𑀧𑀭𑀺𑀴𑀸𑀳𑀸. 𑀲𑀦𑁆𑀢𑀸𑀭𑀫𑁆𑀫𑀡𑀸𑀦𑀺 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀅𑀦𑀼𑀧𑀲𑀦𑁆𑀢𑀲𑀪𑀸𑀯𑀸𑀦𑀁 𑀓𑀺𑀮𑁂𑀲𑀸𑀦𑀁 𑀲𑀗𑁆𑀔𑀸𑀭𑀸𑀦𑀜𑁆𑀘 𑀅𑀪𑀸𑀯𑀢𑁄. 𑀅𑀣 𑀯𑀸 𑀲𑀫𑀽𑀳𑀢𑀯𑀺𑀓𑁆𑀔𑁂𑀧𑀢𑀸𑀬 𑀦𑀺𑀘𑁆𑀘𑀲𑀫𑀸𑀳𑀺𑀢𑀲𑁆𑀲 𑀫𑀦𑀲𑀺𑀓𑀸𑀭𑀲𑁆𑀲 𑀯𑀲𑁂𑀦 𑀢𑀤𑀸𑀭𑀫𑁆𑀫𑀡𑀥𑀫𑁆𑀫𑀸𑀦𑀁 𑀲𑀦𑁆𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀢𑀩𑁆𑀩𑀺𑀲𑀬𑀯𑀺𑀜𑁆𑀜𑀸𑀡𑀸𑀦𑀁 𑀅𑀦𑀦𑁆𑀢𑀪𑀸𑀯𑁄 𑀯𑀺𑀬. 𑀅𑀯𑀺𑀭𑀚𑁆𑀛𑀺𑀢𑁆𑀯𑀸 𑀦𑀺𑀫𑀺𑀢𑁆𑀢𑀧𑀝𑀺𑀯𑁂𑀥𑁄 𑀯𑀺𑀬 𑀇𑀲𑁆𑀲𑀸𑀲𑀸𑀦𑀁 𑀅𑀯𑀺𑀭𑀚𑁆𑀛𑀺𑀢𑁆𑀯𑀸 𑀥𑀫𑁆𑀫𑀸𑀦𑀁 𑀬𑀣𑀸𑀪𑀽𑀢𑀲𑀪𑀸𑀯𑀩𑁄𑀥𑁄 𑀲𑀸𑀤𑀼𑀭𑀲𑁄 𑀫𑀳𑀸𑀭𑀲𑁄 𑀘 𑀳𑁄𑀢𑀻𑀢𑀺 𑀆𑀳 𑀅𑀢𑀺𑀢𑁆𑀢𑀺𑀓𑀭𑀡𑀝𑁆𑀞𑁂𑀦𑀸𑀢𑀺. 𑀧𑀝𑀺𑀯𑁂𑀥𑀧𑁆𑀧𑀢𑁆𑀢𑀸𑀦𑀁, 𑀢𑁂𑀲𑀼 𑀘 𑀩𑀼𑀤𑁆𑀥𑀸𑀦𑀁𑀬𑁂𑀯 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀬𑀪𑀸𑀯𑀽𑀧𑀕𑀫𑀦𑀢𑁄 𑀦 𑀢𑀓𑁆𑀓𑀩𑀼𑀤𑁆𑀥𑀺𑀬𑀸 𑀕𑁄𑀘𑀭𑀸𑀢𑀺 𑀆𑀳 ‘‘𑀉𑀢𑁆𑀢𑀫𑀜𑀸𑀡𑀯𑀺𑀲𑀬𑀢𑁆𑀢𑀸’’𑀢𑀺𑀆𑀤𑀺. ‘‘𑀦𑀺𑀧𑀼𑀡𑀸’’𑀢𑀺 𑀜𑁂𑀬𑁆𑀬𑁂𑀲𑀼 𑀢𑀺𑀓𑁆𑀔𑀯𑀺𑀲𑀤𑀯𑀼𑀢𑁆𑀢𑀺𑀬𑀸 𑀙𑁂𑀓𑀸. 𑀬𑀲𑁆𑀫𑀸 𑀧𑀦 𑀲𑁄 𑀙𑁂𑀓𑀪𑀸𑀯𑁄 𑀆𑀭𑀫𑁆𑀫𑀡𑁂 𑀅𑀧𑁆𑀧𑀝𑀺𑀳𑀢𑀯𑀼𑀢𑁆𑀢𑀺𑀢𑀸𑀬 𑀲𑀼𑀔𑀼𑀫𑀜𑁂𑀬𑁆𑀬𑀕𑀳𑀡𑀲𑀫𑀢𑁆𑀣𑀢𑀸𑀬 𑀲𑀼𑀧𑀸𑀓𑀝𑁄 𑀳𑁄𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀡𑁆𑀳𑀲𑀼𑀔𑀼𑀫𑀲𑀪𑀸𑀯𑀢𑁆𑀢𑀸’’𑀢𑀺.

𑀅𑀧𑀭𑁄 𑀦𑀬𑁄 ¶ ¶ 𑁋 𑀯𑀺𑀦𑀬𑀧𑀡𑁆𑀡𑀢𑁆𑀢𑀺𑀆𑀤𑀺𑀕𑀫𑁆𑀪𑀻𑀭𑀦𑁂𑀬𑁆𑀬𑀯𑀺𑀪𑀸𑀯𑀦𑀢𑁄 𑀕𑀫𑁆𑀪𑀻𑀭𑀸. 𑀓𑀤𑀸𑀘𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀫𑀳𑀸𑀓𑀧𑁆𑀧𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀧𑀺 𑀤𑀼𑀮𑁆𑀮𑀪𑀤𑀲𑁆𑀲𑀦𑀢𑀸𑀬 𑀤𑀼𑀤𑁆𑀤𑀲𑀸. 𑀤𑀲𑁆𑀲𑀦𑀜𑁆𑀘𑁂𑀢𑁆𑀣 𑀧𑀜𑁆𑀜𑀸𑀘𑀓𑁆𑀔𑀼𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑀦𑁆𑀯𑀬𑀲𑀗𑁆𑀔𑀸𑀢𑀲𑁆𑀲 𑀅𑀦𑀼𑀩𑁄𑀥𑀲𑁆𑀲 𑀓𑀲𑁆𑀲𑀘𑀺𑀤𑁂𑀯 𑀲𑀫𑁆𑀪𑀯𑀢𑁄 𑀤𑀼𑀭𑀦𑀼𑀩𑁄𑀥𑀸 ¶ . 𑀲𑀦𑁆𑀢𑀲𑀪𑀸𑀯𑀢𑁄, 𑀯𑁂𑀦𑁂𑀬𑁆𑀬𑀸𑀦𑀜𑁆𑀘 𑀕𑀼𑀡𑀲𑀫𑁆𑀧𑀤𑀸𑀦𑀁 𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀲𑀦𑁆𑀢𑀸. 𑀅𑀢𑁆𑀢𑀦𑁄 𑀘 𑀧𑀘𑁆𑀘𑀬𑁂𑀳𑀺 𑀧𑀥𑀸𑀦𑀪𑀸𑀯𑀁 𑀦𑀻𑀢𑀢𑀸𑀬 𑀧𑀡𑀻𑀢𑀸. 𑀲𑀫𑀥𑀺𑀕𑀢𑀲𑀘𑁆𑀘𑀮𑀓𑁆𑀔𑀡𑀢𑀸𑀬 𑀅𑀢𑀓𑁆𑀓𑁂𑀳𑀺, 𑀅𑀢𑀓𑁆𑀓𑁂𑀦 𑀯𑀸 𑀜𑀸𑀡𑁂𑀦 𑀅𑀯𑀘𑀭𑀺𑀢𑀩𑁆𑀩𑀢𑀸𑀬 𑀅𑀢𑀓𑁆𑀓𑀸𑀯𑀘𑀭𑀸. 𑀦𑀺𑀧𑀼𑀡𑀁, 𑀦𑀺𑀧𑀼𑀡𑁂 𑀯𑀸 𑀅𑀢𑁆𑀣𑁂 𑀲𑀘𑁆𑀘𑀧𑁆𑀧𑀘𑁆𑀘𑀬𑀸𑀓𑀸𑀭𑀸𑀤𑀺𑀯𑀲𑁂𑀦 𑀯𑀺𑀪𑀸𑀯𑀦𑀢𑁄 𑀦𑀺𑀧𑀼𑀡𑀸. 𑀮𑁄𑀓𑁂 𑀅𑀕𑁆𑀕𑀧𑀡𑁆𑀟𑀺𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀯𑁂𑀤𑀻𑀬𑀦𑁆𑀢𑀺 𑀧𑀓𑀸𑀲𑀻𑀬𑀦𑁆𑀢𑀻𑀢𑀺 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀸. 𑀅𑀦𑀸𑀯𑀭𑀡𑀜𑀸𑀡𑀧𑀝𑀺𑀮𑀸𑀪𑀢𑁄 𑀳𑀺 𑀪𑀕𑀯𑀸 ‘‘𑀲𑀩𑁆𑀩𑀯𑀺𑀤𑀽 𑀳𑀁 𑀅𑀲𑁆𑀫𑀺, (𑀥. 𑀧. 𑁩𑁫𑁩; 𑀫𑀳𑀸𑀯. 𑁧𑁧; 𑀓𑀣𑀸. 𑁪𑁦𑁫) 𑀤𑀲𑀩𑀮𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀯𑁂 𑀢𑀣𑀸𑀕𑀢𑁄’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁨𑁧) 𑀅𑀢𑁆𑀢𑀦𑁄 𑀲𑀩𑁆𑀩𑀜𑁆𑀜𑀼𑀢𑀸𑀤𑀺𑀕𑀼𑀡𑁂 𑀧𑀓𑀸𑀲𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀻’’𑀢𑀺.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀯𑀺𑀬 𑀲𑀘𑁆𑀙𑀺𑀓𑀸𑀢𑀩𑁆𑀩𑀲𑀪𑀸𑀯𑀁 𑀦 𑀳𑁄𑀢𑀺, 𑀆𑀲𑀯𑀓𑁆𑀔𑀬𑀜𑀸𑀡𑁂 𑀧𑀦 𑀅𑀥𑀺𑀕𑀢𑁂 𑀅𑀥𑀺𑀕𑀢𑀫𑁂𑀯 𑀳𑁄𑀢𑀻𑀢𑀺 𑀢𑀲𑁆𑀲 𑀧𑀘𑁆𑀘𑀓𑁆𑀔𑀓𑀭𑀡𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀢𑀺 𑀆𑀳 ‘‘𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸’’𑀢𑀺. 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦𑀸𑀢𑀺 𑀘 𑀳𑁂𑀢𑀼𑀅𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀅𑀪𑀺𑀯𑀺𑀲𑀺𑀝𑁆𑀞𑀜𑀸𑀡𑀸𑀥𑀺𑀕𑀫𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀅𑀪𑀺𑀯𑀺𑀲𑀺𑀝𑁆𑀞𑀜𑀸𑀡𑀦𑁆𑀢𑀺 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂 𑀅𑀥𑀺𑀧𑁆𑀧𑁂𑀢𑁂 𑀓𑀭𑀡𑀯𑀘𑀦𑀫𑁆𑀧𑀺 𑀬𑀼𑀚𑁆𑀚𑀢𑀺𑀬𑁂𑀯. 𑀧𑀯𑁂𑀤𑀦𑀜𑁆𑀘𑁂𑀢𑁆𑀣 𑀅𑀜𑁆𑀜𑀸𑀯𑀺𑀲𑀬𑀸𑀦𑀁 𑀲𑀘𑁆𑀘𑀸𑀤𑀻𑀦𑀁 𑀤𑁂𑀲𑀦𑀸𑀓𑀺𑀘𑁆𑀘𑀲𑀸𑀥𑀦𑀢𑁄, ‘‘𑀏𑀓𑁄𑀫𑁆𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁧; 𑀓𑀣𑀸. 𑁪𑁦𑁫) 𑀧𑀝𑀺𑀚𑀸𑀦𑀦𑀢𑁄 𑀘 𑀯𑁂𑀤𑀺𑀢𑀩𑁆𑀩𑀁. 𑀯𑀤𑀫𑀸𑀦𑀸𑀢𑀺 ¶ 𑀏𑀢𑁆𑀣 𑀲𑀢𑁆𑀢𑀺𑀅𑀢𑁆𑀣𑁄 𑀫𑀸𑀦-𑀲𑀤𑁆𑀤𑁄, 𑀯𑀢𑁆𑀢𑀼𑀁 𑀉𑀲𑁆𑀲𑀸𑀳𑀁 𑀓𑀭𑁄𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀏𑀯𑀁𑀪𑀽𑀢𑀸 𑀘 𑀯𑀢𑁆𑀢𑀼𑀓𑀸𑀫𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀯𑀡𑁆𑀡𑀁 𑀯𑀢𑁆𑀢𑀼𑀓𑀸𑀫𑀸’’𑀢𑀺. 𑀲𑀸𑀯𑀲𑁂𑀲𑀁 𑀯𑀤𑀦𑁆𑀢𑁄𑀧𑀺 𑀯𑀺𑀧𑀭𑀻𑀢𑀁 𑀯𑀤𑀦𑁆𑀢𑁄 𑀯𑀺𑀬 ‘‘𑀲𑀫𑁆𑀫𑀸 𑀯𑀤𑀢𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑁄𑀢𑀺 𑀆𑀳 ‘‘𑀅𑀳𑀸𑀧𑁂𑀢𑁆𑀯𑀸’’𑀢𑀺, 𑀢𑁂𑀦 𑀅𑀦𑀯𑀲𑁂𑀲𑀢𑁆𑀣𑁄 𑀇𑀥 𑀲𑀫𑁆𑀫𑀸-𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀯𑀢𑁆𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀼’’𑀦𑁆𑀢𑀺 𑀇𑀫𑀺𑀦𑀸 ‘‘𑀯𑀤𑁂𑀬𑁆𑀬𑀼’’𑀦𑁆𑀢𑀺 𑀲𑀓𑀢𑁆𑀣𑀤𑀻𑀧𑀦𑀪𑀸𑀯𑀫𑀸𑀳. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀪𑀕𑀯𑀢𑁄 𑀤𑀲𑀩𑀮𑀸𑀤𑀺𑀜𑀸𑀡𑀸𑀦𑀺𑀧𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀸𑀦𑀺, 𑀲𑀧𑁆𑀧𑀤𑁂𑀲𑀯𑀺𑀲𑀬𑀢𑁆𑀢𑀸 𑀧𑀦 𑀢𑁂𑀲𑀁 𑀜𑀸𑀡𑀸𑀦𑀁 𑀦 𑀢𑁂𑀳𑀺 𑀩𑀼𑀤𑁆𑀥𑀕𑀼𑀡𑀸 𑀅𑀳𑀸𑀧𑁂𑀢𑁆𑀯𑀸 𑀕𑀳𑀺𑀢𑀸 𑀦𑀸𑀫 𑀳𑁄𑀦𑁆𑀢𑀺, 𑀦𑀺𑀧𑁆𑀧𑀤𑁂𑀲𑀯𑀺𑀲𑀬𑀢𑁆𑀢𑀸 𑀧𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 ¶ 𑀢𑀲𑁆𑀫𑀺𑀁 𑀕𑀳𑀺𑀢𑁂 𑀲𑀩𑁆𑀩𑁂𑀧𑀺 𑀩𑀼𑀤𑁆𑀥𑀕𑀼𑀡𑀸 𑀕𑀳𑀺𑀢𑀸 𑀏𑀯 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀬𑁂𑀳𑀺…𑀧𑁂… 𑀯𑀤𑁂𑀬𑁆𑀬𑀼’’𑀦𑁆𑀢𑀺. 𑀧𑀼𑀣𑀽𑀦𑀺 𑀆𑀭𑀫𑁆𑀫𑀡𑀸𑀦𑀺 𑀏𑀢𑀲𑁆𑀲𑀸𑀢𑀺 𑀧𑀼𑀣𑀼𑀆𑀭𑀫𑁆𑀫𑀡𑀁, 𑀲𑀩𑁆𑀩𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀯𑀸 𑀧𑀼𑀣𑀼𑀆𑀭𑀫𑁆𑀫𑀡𑀸𑀭𑀫𑁆𑀫𑀡𑀢𑁄𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀧𑀼𑀣𑀼𑀆𑀭𑀫𑁆𑀫𑀡𑀢𑁄’’𑀢𑀺 𑀯𑀼𑀢𑁆𑀢𑀁, 𑀏𑀓𑀲𑁆𑀲 𑀆𑀭𑀫𑁆𑀫𑀡-𑀲𑀤𑁆𑀤𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 ‘‘𑀑𑀝𑁆𑀞𑀫𑀼𑀔𑁄 𑀓𑀸𑀫𑀸𑀯𑀘𑀭’’𑀦𑁆𑀢𑀺 𑀆𑀤𑀻𑀲𑀼 𑀯𑀺𑀬, 𑀢𑁂𑀦𑀲𑁆𑀲 𑀧𑀼𑀣𑀼𑀜𑀸𑀡𑀓𑀺𑀘𑁆𑀘𑀲𑀸𑀥𑀓𑀢𑀁 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑁂𑀢𑀁 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀁, 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁, 𑀧𑀜𑁆𑀘𑀕𑀢𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁, 𑀙𑀲𑀼 𑀅𑀲𑀸𑀥𑀸𑀭𑀡𑀜𑀸𑀡𑁂𑀲𑀼 𑀲𑁂𑀲𑀸𑀲𑀸𑀥𑀸𑀭𑀡𑀜𑀸𑀡𑀸𑀦𑀺, 𑀲𑀢𑁆𑀢𑀅𑀭𑀺𑀬𑀧𑀼𑀕𑁆𑀕𑀮𑀯𑀺𑀪𑀸𑀯𑀓𑀜𑀸𑀡𑀁, 𑀅𑀝𑁆𑀞𑀲𑀼𑀧𑀺 𑀧𑀭𑀺𑀲𑀸𑀲𑀼 𑀅𑀓𑀫𑁆𑀧𑀦𑀜𑀸𑀡𑀁, 𑀦𑀯𑀲𑀢𑁆𑀢𑀸𑀯𑀸𑀲𑀧𑀭𑀺𑀚𑀸𑀦𑀦𑀜𑀸𑀡𑀁, 𑀤𑀲𑀩𑀮𑀜𑀸𑀡𑀦𑁆𑀢𑀺 𑀏𑀯𑀫𑀸𑀤𑀻𑀦𑀁 𑀅𑀦𑁂𑀓𑀲𑀢𑀲𑀳𑀲𑁆𑀲𑀪𑁂𑀤𑀸𑀦𑀁 𑀜𑀸𑀡𑀸𑀦𑀁 𑀬𑀣𑀸𑀲𑀫𑁆𑀪𑀯𑀁 𑀓𑀺𑀘𑁆𑀘𑀁 𑀲𑀸𑀥𑁂𑀢𑀻𑀢𑀺. ‘‘𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀢𑁆𑀢𑀺𑀯𑀲𑁂𑀦𑀸’’𑀢𑀺 𑀏𑀢𑁂𑀦 ¶ 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀓𑀫𑀯𑀼𑀢𑁆𑀢𑀺𑀢𑀁 𑀤𑀲𑁆𑀲𑁂𑀢𑀺. 𑀓𑀫𑁂𑀦𑀸𑀧𑀺 𑀳𑀺 𑀢𑀁 𑀯𑀺𑀲𑀬𑁂𑀲𑀼 𑀧𑀯𑀢𑁆𑀢𑀢𑀺, 𑀦 𑀲𑀓𑀺𑀁𑀬𑁂𑀯 𑀬𑀣𑀸 𑀩𑀸𑀳𑀺𑀭𑀓𑀸 𑀯𑀤𑀦𑁆𑀢𑀺 ‘‘𑀲𑀓𑀺𑀁𑀬𑁂𑀯 𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀁 𑀚𑀸𑀦𑀸𑀢𑀺, 𑀦 𑀓𑀫𑁂𑀦𑀸’’𑀢𑀺.

𑀬𑀤𑀺 𑀏𑀯𑀁 𑀅𑀘𑀺𑀦𑁆𑀢𑁂𑀬𑁆𑀬𑀸𑀧𑀭𑀺𑀫𑁂𑀬𑁆𑀬𑀪𑁂𑀤𑀲𑁆𑀲 𑀜𑁂𑀬𑁆𑀬𑀲𑁆𑀲 𑀧𑀭𑀺𑀘𑁆𑀙𑁂𑀤𑀯𑀢𑀸 𑀏𑀓𑁂𑀦 𑀜𑀸𑀡𑁂𑀦 𑀦𑀺𑀭𑀯𑀲𑁂𑀲𑀢𑁄 𑀓𑀣𑀁 𑀧𑀝𑀺𑀯𑁂𑀥𑁄𑀢𑀺, 𑀓𑁄 ¶ 𑀯𑀸 𑀏𑀯𑀫𑀸𑀳 ‘‘𑀧𑀭𑀺𑀘𑁆𑀙𑁂𑀤𑀯𑀦𑁆𑀢𑀁 𑀩𑀼𑀤𑁆𑀥𑀜𑀸𑀡’’𑀦𑁆𑀢𑀺. 𑀅𑀦𑀦𑁆𑀢𑀜𑁆𑀳𑀺 𑀢𑀁 𑀜𑀸𑀡𑀁 𑀜𑁂𑀬𑁆𑀬𑀁 𑀯𑀺𑀬. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑀸𑀯𑀢𑀓𑀁 𑀜𑁂𑀬𑁆𑀬𑀁 𑀢𑀸𑀯𑀢𑀓𑀁 𑀜𑀸𑀡𑀁. 𑀬𑀸𑀯𑀢𑀓𑀁 𑀜𑀸𑀡𑀁, 𑀢𑀸𑀯𑀢𑀓𑀁 𑀜𑁂𑀬𑁆𑀬’’𑀦𑁆𑀢𑀺 (𑀫𑀳𑀸𑀦𑀺. 𑁧𑁫𑁬; 𑀘𑀽𑀴𑀦𑀺. 𑁮𑁫; 𑀧𑀝𑀺. 𑀫. 𑁩.𑁫). 𑀏𑀯𑀫𑁆𑀧𑀺 𑀚𑀸𑀢𑀺𑀪𑀽𑀫𑀺𑀲𑀪𑀸𑀯𑀸𑀤𑀺𑀯𑀲𑁂𑀦 𑀤𑀺𑀲𑀸𑀤𑁂𑀲𑀓𑀸𑀮𑀸𑀤𑀺𑀯𑀲𑁂𑀦 𑀘 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑁂 𑀜𑁂𑀬𑁆𑀬𑁂 𑀓𑀫𑁂𑀦 𑀕𑀬𑁆𑀳𑀫𑀸𑀦𑁂 𑀅𑀦𑀯𑀲𑁂𑀲𑀧𑀝𑀺𑀯𑁂𑀥𑁄 𑀦 𑀲𑀫𑁆𑀪𑀯𑀢𑀺 𑀬𑁂𑀯𑀸𑀢𑀺, 𑀦𑀬𑀺𑀤𑀫𑁂𑀯𑀁. 𑀓𑀲𑁆𑀫𑀸? 𑀬𑀁 𑀓𑀺𑀜𑁆𑀘𑀺 𑀪𑀕𑀯𑀢𑀸 𑀜𑀸𑀢𑀼𑀁 𑀇𑀘𑁆𑀙𑀺𑀢𑀁 𑀲𑀓𑀮𑀁 𑀏𑀓𑀤𑁂𑀲𑁄 𑀯𑀸. 𑀢𑀢𑁆𑀣 𑀅𑀧𑁆𑀧𑀝𑀺𑀳𑀢𑀘𑀸𑀭𑀢𑀸𑀬 𑀧𑀘𑁆𑀘𑀓𑁆𑀔𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀯𑀺𑀓𑁆𑀔𑁂𑀧𑀸𑀪𑀸𑀯𑀢𑁄 𑀘 𑀪𑀕𑀯𑀸 𑀲𑀩𑁆𑀩𑀓𑀸𑀮𑀁 𑀲𑀫𑀸𑀳𑀺𑀢𑁄𑀯 𑀜𑀸𑀢𑀼𑀁, 𑀇𑀘𑁆𑀙𑀺𑀢𑀲𑁆𑀲 𑀧𑀘𑁆𑀘𑀓𑁆𑀔𑀪𑀸𑀯𑁄 𑀦 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁 ‘‘𑀆𑀓𑀗𑁆𑀔𑀸𑀧𑀝𑀺𑀩𑀤𑁆𑀥𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡’’𑀦𑁆𑀢𑀺𑀆𑀤𑀺 (𑀫𑀳𑀸𑀦𑀺. 𑁧𑁫𑁬; 𑀘𑀽𑀴𑀦𑀺. 𑁮𑁫; 𑀧𑀝𑀺. 𑀫. 𑁩.𑁫) 𑀯𑀘𑀦𑀢𑁄, 𑀦 𑀘𑁂𑀢𑁆𑀣 𑀤𑀽𑀭𑀢𑁄 𑀘𑀺𑀢𑁆𑀢𑀧𑀝𑀁 𑀧𑀲𑁆𑀲𑀦𑁆𑀢𑀸𑀦𑀁 𑀯𑀺𑀬, ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀯𑀺𑀧𑀲𑁆𑀲𑀦𑁆𑀢𑀸𑀦𑀁 𑀯𑀺𑀬 𑀘 𑀅𑀦𑁂𑀓𑀥𑀫𑁆𑀫𑀸𑀯𑀩𑁄𑀥𑀓𑀸𑀮𑁂 𑀅𑀦𑀺𑀭𑀽𑀧𑀺𑀢𑀭𑀽𑀧𑁂𑀦 𑀪𑀕𑀯𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀕𑀳𑁂𑀢𑀩𑁆𑀩𑀁 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑀢𑀸𑀬 𑀩𑀼𑀤𑁆𑀥𑀜𑀸𑀡𑀲𑁆𑀲. 𑀢𑁂𑀦𑁂𑀯𑀸𑀳 ‘‘𑀩𑀼𑀤𑁆𑀥𑀯𑀺𑀲𑀬𑁄 𑀅𑀘𑀺𑀦𑁆𑀢𑁂𑀬𑁆𑀬𑁄’’𑀢𑀺 ¶ (𑀅. 𑀦𑀺. 𑁪.𑁭𑁭). 𑀇𑀤𑀁 𑀧𑀦𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁𑀲𑀩𑁆𑀩𑀸𑀓𑀸𑀭𑁂𑀦 𑀲𑀩𑁆𑀩𑀥𑀫𑁆𑀫𑀸𑀯𑀩𑁄𑀥𑀦𑀲𑀫𑀢𑁆𑀣𑀲𑁆𑀲 𑀆𑀓𑀗𑁆𑀔𑀸𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀦𑁄 𑀅𑀦𑀸𑀯𑀭𑀡𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑁂𑀦 𑀪𑀕𑀯𑀸 𑀲𑀦𑁆𑀢𑀸𑀦𑁂𑀦 𑀲𑀩𑁆𑀩𑀥𑀫𑁆𑀫𑀧𑀝𑀺𑀯𑁂𑀥𑀲𑀫𑀢𑁆𑀣𑁄 𑀅𑀳𑁄𑀲𑀺 𑀲𑀩𑁆𑀩𑀦𑁂𑀬𑁆𑀬𑀸𑀯𑀭𑀡𑀲𑁆𑀲 𑀧𑀳𑀸𑀦𑀢𑁄, 𑀢𑀲𑁆𑀫𑀸 𑀲𑀩𑁆𑀩𑀜𑁆𑀜𑀽, 𑀦 𑀲𑀓𑀺𑀁𑀬𑁂𑀯 𑀲𑀩𑁆𑀩𑀥𑀫𑁆𑀫𑀸𑀯𑀩𑁄𑀥𑀢𑁄 ¶ , 𑀬𑀣𑀸 𑀲𑀦𑁆𑀢𑀸𑀦𑁂𑀦 𑀲𑀩𑁆𑀩𑀇𑀦𑁆𑀥𑀦𑀲𑁆𑀲 𑀤𑀳𑀦𑀲𑀫𑀢𑁆𑀣𑀢𑀸𑀬 𑀧𑀸𑀯𑀓𑁄 ‘‘𑀲𑀩𑁆𑀩𑀪𑀽’’𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀯𑀯𑀢𑁆𑀣𑀸𑀧𑀦𑀯𑀘𑀦𑀦𑁆𑀢𑀺 𑀲𑀦𑁆𑀦𑀺𑀝𑁆𑀞𑀸𑀧𑀦𑀯𑀘𑀦𑀁, 𑀅𑀯𑀥𑀸𑀭𑀡𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀜𑁆𑀜𑁂 𑀯𑀸𑀢𑀺 𑀏𑀢𑁆𑀣 𑀅𑀯𑀥𑀸𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀁 𑀤𑀲𑁆𑀲𑁂𑀢𑀺 ‘‘𑀦 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀆𑀤𑀬𑁄’’𑀢𑀺, 𑀅𑀬𑀜𑁆𑀘 𑀏𑀯-𑀲𑀤𑁆𑀤𑁄 𑀅𑀦𑀺𑀬𑀢𑀤𑁂𑀲𑀢𑀸𑀬 𑀘-𑀲𑀤𑁆𑀤𑁄 𑀯𑀺𑀬 𑀬𑀢𑁆𑀣 𑀯𑀼𑀢𑁆𑀢𑁄, 𑀢𑀢𑁄 𑀅𑀜𑁆𑀜𑀢𑁆𑀣𑀸𑀧𑀺 𑀯𑀘𑀦𑀺𑀘𑁆𑀙𑀸𑀯𑀲𑁂𑀦 𑀉𑀧𑀢𑀺𑀝𑁆𑀞𑀢𑀻𑀢𑀺 𑀆𑀳 ‘‘𑀕𑀫𑁆𑀪𑀻𑀭𑀸 𑀯𑀸’’𑀢𑀺𑀆𑀤𑀺. 𑀲𑀩𑁆𑀩𑀧𑀤𑁂𑀳𑀻𑀢𑀺 𑀬𑀸𑀯 ‘‘𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀸’’𑀢𑀺 𑀇𑀤𑀁 𑀧𑀤𑀁, 𑀢𑀸𑀯 𑀲𑀩𑁆𑀩𑀧𑀤𑁂𑀳𑀺. 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀦𑁆𑀢𑀺 𑀲𑀸𑀯𑀓𑀸𑀦𑀁 𑀤𑀸𑀦𑀸𑀤𑀺𑀧𑀸𑀭𑀺𑀧𑀽𑀭𑀺𑀬𑀸 𑀦𑀺𑀧𑁆𑀨𑀦𑁆𑀦𑀁 𑀯𑀺𑀚𑁆𑀚𑀢𑁆𑀢𑀬𑀙𑀴𑀪𑀺𑀜𑁆𑀜𑀸𑀘𑀢𑀼𑀧𑁆𑀧𑀝𑀺𑀲𑀫𑁆𑀪𑀺𑀤𑀸𑀤𑀺𑀪𑁂𑀤𑀁 𑀜𑀸𑀡𑀁. 𑀢𑀢𑁄𑀢𑀺 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀢𑁄. 𑀢𑀢𑁆𑀣𑀸𑀢𑀺 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑁂. 𑀢𑀢𑁄𑀧𑀻𑀢𑀺 𑀅𑀦𑀦𑁆𑀢𑀭𑀦𑀺𑀤𑁆𑀤𑀺𑀝𑁆𑀞𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀜𑀸𑀡𑀢𑁄𑀧𑀺, 𑀓𑁄 𑀧𑀦 𑀯𑀸𑀤𑁄 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣𑀸𑀬𑀁 𑀅𑀢𑁆𑀣𑀬𑁄𑀚𑀦𑀸 𑁋 𑀓𑀺𑀜𑁆𑀘𑀸𑀧𑀺 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁 𑀳𑁂𑀝𑁆𑀞𑀺𑀫𑀲𑁂𑀓𑁆𑀔𑀜𑀸𑀡𑀁 𑀧𑀼𑀣𑀼𑀚𑁆𑀚𑀦𑀜𑀸𑀡𑀜𑁆𑀘 𑀉𑀧𑀸𑀤𑀸𑀬 𑀕𑀫𑁆𑀪𑀻𑀭𑀁, 𑀧𑀘𑁆𑀘𑁂𑀓𑀩𑀼𑀤𑁆𑀥𑀜𑀸𑀡𑀁 𑀉𑀧𑀸𑀤𑀸𑀬 𑀦 𑀢𑀣𑀸 𑀕𑀫𑁆𑀪𑀻𑀭𑀦𑁆𑀢𑀺 ¶ ‘‘𑀕𑀫𑁆𑀪𑀻𑀭𑀫𑁂𑀯𑀸’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑀣𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀜𑀸𑀡𑀫𑁆𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀉𑀧𑀸𑀤𑀸𑀬𑀸𑀢𑀺 𑀢𑀢𑁆𑀣 𑀯𑀯𑀢𑁆𑀣𑀸𑀦𑀁 𑀦 𑀮𑀩𑁆𑀪𑀢𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀥𑀫𑁆𑀫𑀸 𑀧𑀦 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀸𑀤𑀻𑀦𑀁 𑀯𑀺𑀬 𑀓𑀺𑀜𑁆𑀘𑀺 𑀉𑀧𑀸𑀤𑀸𑀬 𑀅𑀕𑀫𑁆𑀪𑀻𑀭𑀪𑀸𑀯𑀸𑀪𑀸𑀯𑀢𑁄 𑀕𑀫𑁆𑀪𑀻𑀭𑀸 𑀯𑀸𑀢𑀺. 𑀬𑀣𑀸 𑀘𑁂𑀢𑁆𑀣 𑀯𑀯𑀢𑁆𑀣𑀸𑀦𑀁 𑀤𑀲𑁆𑀲𑀺𑀢𑀁, 𑀏𑀯𑀁 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁 𑀤𑀼𑀤𑁆𑀤𑀲𑀁, 𑀧𑀘𑁆𑀘𑁂𑀓𑀩𑀼𑀤𑁆𑀥𑀜𑀸𑀡𑀁 𑀧𑀦 𑀢𑀢𑁄 𑀤𑀼𑀤𑁆𑀤𑀲𑀢𑀭𑀦𑁆𑀢𑀺 𑀢𑀢𑁆𑀣 𑀯𑀯𑀢𑁆𑀣𑀸𑀦𑀁 𑀦𑀢𑁆𑀣𑀻𑀢𑀺𑀆𑀤𑀺𑀦𑀸 𑀯𑀯𑀢𑁆𑀣𑀸𑀦𑀲𑀩𑁆𑀪𑀸𑀯𑁄 𑀦𑁂𑀢𑀩𑁆𑀩𑁄. 𑀢𑁂𑀦𑁂𑀯𑀸𑀳 ‘‘𑀢𑀣𑀸 𑀤𑀼𑀤𑁆𑀤𑀲𑀸𑀯…𑀧𑁂… 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺.

𑀓𑀲𑁆𑀫𑀸 𑀧𑀦𑁂𑀢𑀁 𑀏𑀯𑀁 𑀆𑀭𑀤𑁆𑀥𑀁𑀢𑀺 𑀏𑀢𑁆𑀣𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀪𑀯𑀢𑀼 𑀢𑀸𑀯 𑀦𑀺𑀭𑀯𑀲𑁂𑀲𑀩𑀼𑀤𑁆𑀥𑀕𑀼𑀡𑀯𑀺𑀪𑀸𑀯𑀦𑀽𑀧𑀸𑀬𑀪𑀸𑀯𑀢𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀏𑀓𑀫𑁆𑀧𑀺 𑀧𑀼𑀣𑀼𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀜𑀸𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸 ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂 𑀅𑀜𑁆𑀜𑁂𑀯 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀩𑀳𑀼𑀯𑀘𑀦𑁂𑀦 𑀉𑀤𑁆𑀤𑀺𑀝𑁆𑀞𑀁, 𑀢𑀲𑁆𑀲 𑀧𑀦 𑀯𑀺𑀲𑁆𑀲𑀚𑁆𑀚𑀦𑀁 𑀲𑀘𑁆𑀘𑀧𑀘𑁆𑀘𑀬𑀸𑀓𑀸𑀭𑀸𑀤𑀺𑀯𑀺𑀲𑁂𑀲𑀯𑀲𑁂𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀦 𑀯𑀺𑀪𑀚𑀦𑀦𑀬𑁂𑀦 𑀅𑀦𑀸𑀭𑀪𑀺𑀢𑁆𑀯𑀸 𑀲𑀦𑀺𑀲𑁆𑀲𑀬𑀸𑀦𑀁 ¶ 𑀤𑀺𑀝𑁆𑀞𑀻𑀦𑀁 𑀯𑀺𑀪𑀚𑀦𑀯𑀲𑁂𑀦 𑀓𑀲𑁆𑀫𑀸 𑀆𑀭𑀤𑁆𑀥𑀦𑁆𑀢𑀺. 𑀢𑀢𑁆𑀣 𑀬𑀣𑀸 𑀲𑀘𑁆𑀘𑀧𑀘𑁆𑀘𑀬𑀸𑀓𑀸𑀭𑀸𑀤𑀻𑀦𑀁 ¶ 𑀯𑀺𑀪𑀚𑀦𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀁, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑁂𑀯 𑀯𑀺𑀲𑀬𑁄, 𑀏𑀯𑀁 𑀦𑀺𑀭𑀯𑀲𑁂𑀲𑁂𑀦 𑀤𑀺𑀝𑁆𑀞𑀺𑀕𑀢𑀯𑀺𑀪𑀚𑀦𑀫𑁆𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀩𑀼𑀤𑁆𑀥𑀸𑀦𑀜𑁆𑀳𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀞𑀸𑀦𑀸𑀦𑀻𑀢𑀺 𑀓𑀸𑀭𑀡𑀸𑀦𑀺. 𑀕𑀚𑁆𑀚𑀺𑀢𑀁 𑀫𑀳𑀦𑁆𑀢𑀁 𑀳𑁄𑀢𑀻𑀢𑀺 𑀤𑁂𑀲𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀅𑀦𑁂𑀓𑀯𑀺𑀥𑀢𑀸𑀬, 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑀸𑀬 𑀘 𑀦𑀸𑀦𑀸𑀦𑀬𑁂𑀳𑀺 𑀧𑀯𑀢𑁆𑀢𑀫𑀸𑀦𑀁 𑀤𑁂𑀲𑀦𑀸𑀕𑀚𑁆𑀚𑀺𑀢𑀁 𑀫𑀳𑀦𑁆𑀢𑀁 𑀯𑀺𑀧𑀼𑀮𑀁, 𑀩𑀳𑀼𑀪𑁂𑀤𑀜𑁆𑀘 𑀳𑁄𑀢𑀺. 𑀜𑀸𑀡𑀁 𑀅𑀦𑀼𑀧𑀯𑀺𑀲𑀢𑀻𑀢𑀺 𑀢𑀢𑁄 𑀏𑀯 𑀘 𑀤𑁂𑀲𑀦𑀸𑀜𑀸𑀡𑀁 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑁂 𑀯𑀺𑀪𑀸𑀕𑀲𑁄 𑀓𑀼𑀭𑀼𑀫𑀸𑀦𑀁 𑀅𑀦𑀼𑀧𑀯𑀺𑀲𑀢𑀺, 𑀢𑁂 𑀅𑀦𑀼𑀧𑀯𑀺𑀲𑁆𑀲 𑀞𑀺𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀩𑀼𑀤𑁆𑀥𑀜𑀸𑀡𑀲𑁆𑀲 𑀫𑀳𑀦𑁆𑀢𑀪𑀸𑀯𑁄 𑀧𑀜𑁆𑀜𑀸𑀬𑀢𑀻𑀢𑀺 𑀏𑀯𑀁𑀯𑀺𑀥𑀲𑁆𑀲 𑀦𑀸𑀫 𑀥𑀫𑁆𑀫𑀲𑁆𑀲 𑀤𑁂𑀲𑀓𑀁 𑀧𑀝𑀺𑀯𑁂𑀥𑀓𑀜𑁆𑀘𑀸𑀢𑀺 𑀩𑀼𑀤𑁆𑀥𑀸𑀦𑀁 𑀤𑁂𑀲𑀦𑀸𑀜𑀸𑀡𑀲𑁆𑀲 𑀧𑀝𑀺𑀯𑁂𑀥𑀜𑀸𑀡𑀲𑁆𑀲 𑀘 𑀉𑀴𑀸𑀭𑀪𑀸𑀯𑁄 𑀧𑀸𑀓𑀝𑁄 𑀳𑁄𑀢𑀺. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 ‘‘𑀲𑀩𑁆𑀩𑀁 𑀯𑀘𑀻𑀓𑀫𑁆𑀫𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀻’’𑀢𑀺 (𑀫𑀳𑀸𑀦𑀺. 𑁬𑁯; 𑀘𑀽𑀴𑀦𑀺. 𑁮𑁫; 𑀧𑀝𑀺. 𑀫. 𑁩.𑁫; 𑀦𑁂𑀢𑁆𑀢𑀺. 𑁧𑁪) 𑀯𑀘𑀦𑀢𑁄 𑀲𑀩𑁆𑀩𑀸𑀧𑀺 𑀪𑀕𑀯𑀢𑁄 𑀤𑁂𑀲𑀦𑀸 𑀜𑀸𑀡𑀭𑀳𑀺𑀢𑀸 𑀦𑀢𑁆𑀣𑀺, 𑀲𑀻𑀳𑀲𑀫𑀸𑀦𑀯𑀼𑀢𑁆𑀢𑀺𑀢𑀸𑀬 𑀘 𑀲𑀩𑁆𑀩𑀢𑁆𑀣 𑀲𑀫𑀸𑀦𑀼𑀲𑁆𑀲𑀸𑀳𑀧𑁆𑀧𑀯𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀯𑀲𑁂𑀦 𑀧𑀦 𑀤𑁂𑀲𑀦𑀸 𑀯𑀺𑀲𑁂𑀲𑀢𑁄 𑀜𑀸𑀡𑁂𑀦 𑀅𑀦𑀼𑀧𑀯𑀺𑀝𑁆𑀞𑀸 𑀕𑀫𑁆𑀪𑀻𑀭𑀢𑀭𑀸 𑀘 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀣𑀁 𑀧𑀦 𑀯𑀺𑀦𑀬𑀧𑀡𑁆𑀡𑀢𑁆𑀢𑀺𑀁 𑀧𑀢𑁆𑀯𑀸 𑀤𑁂𑀲𑀦𑀸 𑀢𑀺𑀮𑀓𑁆𑀔𑀡𑀸𑀳𑀢𑀸 𑀲𑀼𑀜𑁆𑀜𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀸 𑀳𑁄𑀢𑀻𑀢𑀺? 𑀢𑀢𑁆𑀣𑀸𑀧𑀺 𑀘 𑀲𑀦𑁆𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀧𑀯𑀢𑁆𑀢𑀫𑀸𑀦𑀸 𑀤𑁂𑀲𑀦𑀸 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀢𑀸𑀤𑀺𑀯𑀺𑀪𑀸𑀯𑀦𑀻, 𑀲𑀩𑁆𑀩𑀥𑀫𑁆𑀫𑀸𑀦𑀁 𑀅𑀢𑁆𑀢𑀢𑁆𑀢𑀦𑀺𑀬𑀢𑀸𑀪𑀸𑀯𑀧𑁆𑀧𑀓𑀸𑀲𑀦𑀻 𑀘 𑀳𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸’’𑀢𑀺𑀆𑀤𑀺.

𑀪𑀽𑀫𑀦𑁆𑀢𑀭𑀦𑁆𑀢𑀺 𑀥𑀫𑁆𑀫𑀸𑀦𑀁 𑀅𑀯𑀢𑁆𑀣𑀸𑀯𑀺𑀲𑁂𑀲𑀜𑁆𑀘 𑀞𑀸𑀦𑀯𑀺𑀲𑁂𑀲𑀜𑁆𑀘. 𑀢𑀢𑁆𑀣 𑀅𑀯𑀢𑁆𑀣𑀸𑀯𑀺𑀲𑁂𑀲𑁄𑀲𑀢𑀺𑀆𑀤𑀺𑀥𑀫𑁆𑀫𑀸𑀦𑀁 ¶ 𑀲𑀢𑀺𑀧𑀝𑁆𑀞𑀸𑀦𑀺𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀸𑀤𑀺𑀪𑁂𑀤𑁄. 𑀞𑀸𑀦𑀯𑀺𑀲𑁂𑀲𑁄 ¶ 𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑁄. 𑀧𑀘𑁆𑀘𑀬𑀸𑀓𑀸𑀭𑀧𑀤𑀲𑁆𑀲 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀲𑀫𑀬𑀦𑁆𑀢𑀭𑀦𑁆𑀢𑀺 𑀤𑀺𑀝𑁆𑀞𑀺𑀯𑀺𑀲𑁂𑀲𑀸, 𑀦𑀸𑀦𑀸𑀯𑀺𑀳𑀺𑀢𑀸 𑀤𑀺𑀝𑁆𑀞𑀺𑀬𑁄𑀢𑀺 𑀅𑀢𑁆𑀣𑁄, 𑀅𑀜𑁆𑀜𑀲𑀫𑀬𑀁 𑀯𑀸. 𑀏𑀯𑀁 𑀑𑀢𑀺𑀡𑁆𑀡𑁂 𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀏𑀯𑀁 𑀮𑀳𑀼𑀓𑀕𑀭𑀼𑀓𑀸𑀤𑀺𑀯𑀲𑁂𑀦 𑀢𑀤𑀦𑀼𑀭𑀽𑀧𑁂 𑀑𑀢𑀺𑀡𑁆𑀡𑁂 𑀯𑀢𑁆𑀣𑀼𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀁.

𑀬𑀤𑀺𑀧𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂𑀧𑀺 (𑀤𑀻. 𑀦𑀺. 𑁨.𑁩𑁭𑁪; 𑀫. 𑀦𑀺. 𑁧.𑁧𑁦𑁭) 𑀯𑀺𑀪𑀢𑁆𑀢𑀸, 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀸𑀤𑀺𑀯𑀲𑁂𑀦 𑀧𑀦 𑀅𑀪𑀺𑀥𑀫𑁆𑀫𑁂𑀬𑁂𑀯 𑀢𑁂 𑀲𑀯𑀺𑀲𑁂𑀲𑀁 𑀯𑀺𑀪𑀢𑁆𑀢𑀸𑀢𑀺 𑀆𑀳 ‘‘𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸…𑀧𑁂… 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀯𑀺𑀪𑀚𑀺𑀢𑁆𑀯𑀸’’𑀢𑀺. 𑀢𑀢𑁆𑀣 ‘‘𑀲𑀢𑁆𑀢 𑀨𑀲𑁆𑀲𑀸’’𑀢𑀺 𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀧𑀬𑁄𑀕𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀣𑀸 ‘‘𑀲𑀢𑁆𑀢 𑀯𑁂𑀤𑀦𑀸’’𑀢𑀺𑀆𑀤𑀻𑀲𑀼𑀧𑀺. 𑀮𑁄𑀓𑀼𑀢𑁆𑀢𑀭𑀸 𑀥𑀫𑁆𑀫𑀸 𑀦𑀸𑀫𑀸𑀢𑀺 ¶ 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄 𑀯𑀸, 𑀢𑁂𑀦 𑀯𑀼𑀢𑁆𑀢𑀸𑀯𑀲𑁂𑀲𑀁 𑀅𑀪𑀺𑀥𑀫𑁆𑀫𑁂 𑀆𑀕𑀢𑀁 𑀥𑀫𑁆𑀫𑀸𑀦𑀁 𑀯𑀺𑀪𑀚𑀺𑀢𑀩𑁆𑀩𑀸𑀓𑀸𑀭𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀘𑀢𑀼𑀯𑀻𑀲𑀢𑀺 𑀲𑀫𑀦𑁆𑀢𑀧𑀝𑁆𑀞𑀸𑀦𑀸𑀦𑀺 𑀏𑀢𑁆𑀣𑀸𑀢𑀺 𑀘𑀢𑀼𑀯𑀻𑀲𑀢𑀺𑀲𑀫𑀦𑁆𑀢𑀧𑀝𑁆𑀞𑀸𑀦𑀁, 𑀅𑀪𑀺𑀥𑀫𑁆𑀫𑀧𑀺𑀝𑀓𑀁. 𑀏𑀢𑁆𑀣 𑀧𑀘𑁆𑀘𑀬𑀦𑀬𑀁 𑀅𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀯𑀲𑁂𑀦𑁂𑀯 𑀲𑀫𑀦𑁆𑀢𑀧𑀝𑁆𑀞𑀸𑀦𑀲𑁆𑀲 𑀘𑀢𑀼𑀯𑀻𑀲𑀢𑀺𑀯𑀺𑀥𑀢𑀸 𑀯𑀼𑀢𑁆𑀢𑀸. 𑀬𑀣𑀸𑀳 𑁋

‘‘𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭𑀁 𑀤𑀼𑀓𑀼𑀢𑁆𑀢𑀫𑀁,

𑀤𑀼𑀓𑀢𑀺𑀓𑀜𑁆𑀘𑁂𑀯 𑀢𑀺𑀓𑀤𑀼𑀓𑀜𑁆𑀘;

𑀢𑀺𑀓𑀢𑀺𑀓𑀜𑁆𑀘𑁂𑀯 𑀤𑀼𑀓𑀤𑀼𑀓𑀜𑁆𑀘,

𑀙 𑀅𑀦𑀼𑀮𑁄𑀫𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸. (𑀧𑀝𑁆𑀞𑀸. 𑁧.𑀧𑀘𑁆𑀘𑀬𑀦𑀺𑀤𑁆𑀤𑁂𑀲 𑁪𑁧, 𑁪𑁪, 𑁪𑁮, 𑁫𑁨);

𑀢𑀣𑀸 𑁋

𑀢𑀺𑀓𑀜𑁆𑀘…𑀧𑁂… 𑀙 𑀧𑀘𑁆𑀘𑀦𑀻𑀬𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸;

𑀢𑀺𑀓𑀜𑁆𑀘…𑀧𑁂… 𑀙 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸;

𑀢𑀺𑀓𑀜𑁆𑀘…𑀧𑁂… 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸’’𑀢𑀺. (𑀧𑀝𑁆𑀞𑀸. 𑁧.𑀧𑀘𑁆𑀘𑀬𑀦𑀺𑀤𑁆𑀤𑁂𑀲 𑁪𑁪, 𑁫𑁨);

𑀏𑀯𑀁 𑀥𑀫𑁆𑀫𑀯𑀲𑁂𑀦 𑀘𑀢𑀼𑀯𑀻𑀲𑀢𑀺𑀪𑁂𑀤𑁂𑀲𑀼 𑀢𑀺𑀓𑀧𑀝𑁆𑀞𑀸𑀦𑀸𑀤𑀻𑀲𑀼 𑀏𑀓𑁂𑀓𑀁 𑀧𑀘𑁆𑀘𑀬𑀦𑀬𑁂𑀦 𑀅𑀦𑀼𑀮𑁄𑀫𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀻𑀢𑀺 𑀙𑀦𑁆𑀦𑀯𑀼𑀢𑀺 𑀲𑀫𑀦𑁆𑀢𑀧𑀝𑁆𑀞𑀸𑀦𑀸𑀦𑀺. 𑀢𑀢𑁆𑀣 𑀧𑀦 𑀥𑀫𑁆𑀫𑀸𑀦𑀼𑀮𑁄𑀫𑁂 𑀢𑀺𑀓𑀧𑀝𑁆𑀞𑀸𑀦𑁂 𑀓𑀼𑀲𑀮𑀢𑁆𑀢𑀺𑀓𑁂 𑀧𑀝𑀺𑀘𑁆𑀘𑀯𑀸𑀭𑁂 𑀧𑀘𑁆𑀘𑀬𑀸𑀦𑀼𑀮𑁄𑀫𑁂 ¶ 𑀳𑁂𑀢𑀼𑀫𑀽𑀮𑀓𑁂 𑀳𑁂𑀢𑀼𑀧𑀘𑁆𑀘𑀬𑀯𑀲𑁂𑀦 𑀏𑀓𑀽𑀦𑀧𑀜𑁆𑀜𑀸𑀲 𑀧𑀼𑀘𑁆𑀙𑀸𑀦𑀬𑀸 𑀲𑀢𑁆𑀢 𑀯𑀺𑀲𑁆𑀲𑀚𑁆𑀚𑀦𑀦𑀬𑀸𑀢𑀺 ¶ 𑀆𑀤𑀺𑀦𑀸 𑀤𑀲𑁆𑀲𑀺𑀬𑀫𑀸𑀦𑀸 𑀅𑀦𑀦𑁆𑀢𑀪𑁂𑀤𑀸 𑀦𑀬𑀸𑀢𑀺 𑀆𑀳 ‘‘𑀅𑀦𑀦𑁆𑀢𑀦𑀬’’𑀦𑁆𑀢𑀺. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀧𑀝𑁆𑀞𑀸𑀦𑀁 𑀦𑀸𑀫 𑀧𑀘𑁆𑀘𑁂𑀓𑀁 𑀥𑀫𑁆𑀫𑀸𑀦𑀁 𑀅𑀦𑀼𑀮𑁄𑀫𑀸𑀤𑀺𑀫𑁆𑀳𑀺 𑀢𑀺𑀓𑀤𑀼𑀓𑀸𑀤𑀻𑀲𑀼 𑀬𑀸 𑀧𑀘𑁆𑀘𑀬𑀫𑀽𑀮𑀯𑀺𑀲𑀺𑀝𑁆𑀞𑀸 𑀘𑀢𑀼𑀦𑀬𑀢𑁄 𑀲𑀢𑁆𑀢𑀥𑀸 𑀕𑀢𑀻’’𑀢𑀺.

𑀦𑀯𑀳𑀸𑀓𑀸𑀭𑁂𑀳𑀻𑀢𑀺 𑀉𑀧𑁆𑀧𑀸𑀤𑀸𑀤𑀻𑀳𑀺 𑀦𑀯𑀳𑀺 𑀧𑀘𑁆𑀘𑀬𑀸𑀓𑀸𑀭𑁂𑀳𑀺. 𑀢𑀢𑁆𑀣 𑀉𑀧𑁆𑀧𑀚𑁆𑀚𑀢𑀺 𑀏𑀢𑀲𑁆𑀫𑀸 𑀨𑀮𑀦𑁆𑀢𑀺 𑀉𑀧𑁆𑀧𑀸𑀤𑁄, 𑀉𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀪𑀸𑀯𑁄. 𑀲𑀢𑀺 𑀘 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀅𑀲𑀢𑀺, 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀉𑀧𑁆𑀧𑀸𑀤𑁄 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀣𑀸 𑀅𑀯𑀺𑀚𑁆𑀚𑀸𑀬 𑀲𑀢𑀺 𑀲𑀗𑁆𑀔𑀸𑀭𑀸 𑀧𑀯𑀢𑁆𑀢𑀦𑁆𑀢𑀺 𑀥𑀭𑀦𑁆𑀢𑀺, 𑀦𑀺𑀯𑀺𑀲𑀦𑁆𑀢𑀺 𑀘, 𑀢𑁂 𑀅𑀯𑀺𑀚𑁆𑀚𑀸𑀬 𑀲𑀢𑀺 𑀨𑀮𑀁 𑀪𑀯𑀸𑀤𑀻𑀲𑀼 𑀔𑀺𑀧𑀦𑁆𑀢𑀺, 𑀆𑀬𑀽𑀳𑀦𑁆𑀢𑀺 𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀖𑀝𑀦𑁆𑀢𑀺, 𑀲𑀁𑀬𑀼𑀚𑁆𑀚𑀦𑁆𑀢𑀺 𑀅𑀢𑁆𑀢𑀦𑁄 𑀨𑀮𑁂𑀦, 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀲𑀬𑀜𑁆𑀘 𑀉𑀧𑁆𑀧𑀦𑁆𑀦𑀸, 𑀢𑀁 𑀧𑀮𑀺𑀩𑀼𑀦𑁆𑀥𑀦𑁆𑀢𑀺, 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂 𑀉𑀤𑀬𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀳𑀺𑀦𑁄𑀢𑀺 𑀘 𑀲𑀗𑁆𑀔𑀸𑀭𑀸𑀦𑀁 𑀓𑀸𑀭𑀡𑀪𑀸𑀯𑀁 𑀕𑀘𑁆𑀙𑀢𑀺, 𑀧𑀝𑀺𑀘𑁆𑀘 𑀅𑀯𑀺𑀚𑁆𑀚𑀁 𑀲𑀗𑁆𑀔𑀸𑀭𑀸 𑀅𑀬𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀏𑀯𑀁 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸𑀦𑀁 ¶ 𑀓𑀸𑀭𑀡𑀪𑀸𑀯𑀽𑀧𑀕𑀫𑀦𑀯𑀺𑀲𑁂𑀲𑀸 𑀉𑀧𑁆𑀧𑀸𑀤𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀲𑀗𑁆𑀔𑀸𑀭𑀸𑀤𑀻𑀦𑀁 𑀯𑀺𑀜𑁆𑀜𑀸𑀡𑀸𑀤𑀻𑀲𑀼.

𑀉𑀧𑁆𑀧𑀸𑀤𑀝𑁆𑀞𑀺𑀢𑀻𑀢𑀺𑀆𑀤𑀻𑀲𑀼 𑀘 𑀢𑀺𑀝𑁆𑀞𑀢𑀺 𑀏𑀢𑁂𑀦𑀸𑀢𑀺 𑀞𑀺𑀢𑀺, 𑀓𑀸𑀭𑀡𑀁. 𑀉𑀧𑁆𑀧𑀸𑀤𑁄 𑀏𑀯 𑀞𑀺𑀢𑀺 𑀉𑀧𑁆𑀧𑀸𑀤𑀝𑁆𑀞𑀺𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀬𑀲𑁆𑀫𑀸 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄, ‘‘𑀆𑀲𑀯𑀲𑀫𑀼𑀤𑀬𑀸 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁄’’𑀢𑀺 (𑀫. 𑀦𑀺. 𑁧.𑁧𑁦𑁩) 𑀯𑀘𑀦𑀢𑁄 𑀆𑀲𑀯𑀸 𑀘 𑀅𑀯𑀺𑀚𑁆𑀚𑀸𑀬 𑀧𑀘𑁆𑀘𑀬𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸’’𑀢𑀺. 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸𑀢𑀺 𑀲𑀗𑁆𑀔𑀸𑀭𑀸𑀦𑀁 𑀅𑀯𑀺𑀚𑁆𑀚𑀸𑀬 𑀘 𑀉𑀧𑁆𑀧𑀸𑀤𑀸𑀤𑀺𑀓𑁂 𑀧𑀘𑁆𑀘𑀬𑀸𑀓𑀸𑀭𑁂 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀡𑀯𑀲𑁂𑀦 𑀧𑀯𑀢𑁆𑀢𑀸 𑀧𑀜𑁆𑀜𑀸. 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀦𑁆𑀢𑀺 𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀧𑀘𑁆𑀘𑀬𑀪𑀸𑀯𑀢𑁄 𑀥𑀫𑁆𑀫𑀝𑁆𑀞𑀺𑀢𑀺𑀲𑀗𑁆𑀔𑀸𑀢𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀜𑀸𑀡𑀁. 𑀧𑀘𑁆𑀘𑀬𑀥𑀫𑁆𑀫𑀸 𑀳𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 ‘‘𑀤𑁆𑀯𑀸𑀤𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸’’𑀢𑀺 𑀯𑀘𑀦𑀢𑁄 ¶ 𑀤𑁆𑀯𑀸𑀤𑀲 𑀧𑀘𑁆𑀘𑀬𑀸. 𑀅𑀬𑀜𑁆𑀘 𑀦𑀬𑁄 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀏𑀯, 𑀅𑀣 𑀔𑁄 𑀅𑀢𑀻𑀢𑀸𑀦𑀸𑀕𑀢𑀓𑀸𑀮𑁂𑀧𑀺, 𑀦 𑀘 𑀅𑀯𑀺𑀚𑁆𑀚𑀸𑀬 𑀏𑀯 𑀲𑀗𑁆𑀔𑀸𑀭𑁂𑀲𑀼, 𑀅𑀣 𑀔𑁄 𑀲𑀗𑁆𑀔𑀸𑀭𑀸𑀤𑀻𑀦𑀫𑁆𑀧𑀺 𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀮𑀩𑁆𑀪𑀢𑀻𑀢𑀺 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀧𑀘𑁆𑀘𑀬𑀸𑀓𑀸𑀭𑀲𑁆𑀲 𑀯𑀺𑀪𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺 𑀧𑀸𑀴𑀺𑀁 𑀆𑀭𑀪𑀺. 𑀧𑀝𑁆𑀞𑀸𑀦𑁂 (𑀧𑀝𑁆𑀞𑀸. 𑁧.𑀧𑀘𑁆𑀘𑀬𑀦𑀺𑀤𑁆𑀤𑁂𑀲 𑁧) 𑀤𑀲𑁆𑀲𑀺𑀢𑀸 𑀳𑁂𑀢𑀸𑀤𑀺𑀧𑀘𑁆𑀘𑀬𑀸 𑀏𑀯𑁂𑀢𑁆𑀣 𑀉𑀧𑁆𑀧𑀸𑀤𑀸𑀤𑀺𑀧𑀘𑁆𑀘𑀬𑀸𑀓𑀸𑀭𑁂𑀳𑀺 𑀕𑀳𑀺𑀢𑀸𑀢𑀺 𑀢𑁂 𑀬𑀣𑀸𑀲𑀫𑁆𑀪𑀯𑀁 𑀦𑀻𑀳𑀭𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀸, 𑀅𑀢𑀺𑀯𑀺𑀢𑁆𑀣𑀸𑀭𑀪𑀬𑁂𑀦 𑀧𑀦 𑀦 𑀬𑁄𑀚𑀬𑀺𑀫𑁆𑀳.

𑀢𑀲𑁆𑀲 𑀢𑀲𑁆𑀲 𑀥𑀫𑁆𑀫𑀲𑁆𑀲𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀲𑀗𑁆𑀔𑀸𑀭𑀸𑀤𑀺𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀲𑁆𑀲. 𑀢𑀣𑀸 𑀢𑀣𑀸 𑀧𑀘𑁆𑀘𑀬𑀪𑀸𑀯𑁂𑀦𑀸𑀢𑀺 𑀉𑀧𑁆𑀧𑀸𑀤𑀸𑀤𑀺𑀳𑁂𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑁂𑀦. 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀯𑀲𑁂𑀦 𑀢𑀬𑁄 𑀅𑀤𑁆𑀥𑀸 𑀓𑀸𑀮𑀸 𑀏𑀢𑀲𑁆𑀲𑀸𑀢𑀺 ¶ 𑀢𑀺𑀬𑀤𑁆𑀥𑀁. 𑀳𑁂𑀢𑀼𑀨𑀮𑀨𑀮𑀳𑁂𑀢𑀼𑀳𑁂𑀢𑀼𑀨𑀮𑀯𑀲𑁂𑀦 𑀢𑀬𑁄 𑀲𑀦𑁆𑀥𑀻 𑀏𑀢𑀲𑁆𑀲𑀸𑀢𑀺 𑀢𑀺𑀲𑀦𑁆𑀥𑀺𑀁. 𑀲𑀗𑁆𑀔𑀺𑀧𑁆𑀧𑀦𑁆𑀢𑀺 𑀏𑀢𑁆𑀣 𑀅𑀯𑀺𑀚𑁆𑀚𑀸𑀤𑀬𑁄 𑀯𑀺𑀜𑁆𑀜𑀸𑀡𑀸𑀤𑀬𑁄 𑀘𑀸𑀢𑀺 𑀲𑀗𑁆𑀔𑁂𑀧𑁄, 𑀓𑀫𑁆𑀫𑀁 𑀯𑀺𑀧𑀸𑀓𑁄 𑀘. 𑀲𑀗𑁆𑀔𑀺𑀧𑁆𑀧𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀲𑀗𑁆𑀔𑁂𑀧𑁄, 𑀅𑀯𑀺𑀚𑁆𑀚𑀸𑀤𑀬𑁄 𑀯𑀺𑀜𑁆𑀜𑀸𑀡𑀸𑀤𑀬𑁄 𑀘. 𑀓𑁄𑀝𑁆𑀞𑀸𑀲𑀧𑀭𑀺𑀬𑀸𑀬𑁄 𑀯𑀸 𑀲𑀗𑁆𑀔𑁂𑀧-𑀲𑀤𑁆𑀤𑁄. 𑀅𑀢𑀻𑀢𑁂 𑀓𑀫𑁆𑀫𑀲𑀗𑁆𑀔𑁂𑀧𑀸𑀤𑀺𑀯𑀲𑁂𑀦 𑀘𑀢𑁆𑀢𑀸𑀭𑁄 𑀲𑀗𑁆𑀔𑁂𑀧𑀸 𑀏𑀢𑀲𑁆𑀲𑀸𑀢𑀺 𑀘𑀢𑀼𑀲𑀗𑁆𑀔𑁂𑀧𑀁. 𑀲𑀭𑀽𑀧𑀢𑁄 𑀅𑀯𑀼𑀢𑁆𑀢𑀸𑀧𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀗𑁆𑀔𑁂𑀧𑁂 𑀆𑀓𑀺𑀭𑀻𑀬𑀦𑁆𑀢𑀺 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀺𑀕𑁆𑀕𑀳𑀡𑁂𑀳𑀺 𑀧𑀓𑀸𑀲𑀻𑀬𑀦𑁆𑀢𑀻𑀢𑀺 𑀆𑀓𑀸𑀭𑀸, 𑀅𑀢𑀻𑀢𑁂 𑀳𑁂𑀢𑀼𑀆𑀤𑀻𑀦𑀁 𑀯𑀸 𑀧𑀓𑀸𑀭𑀸 𑀆𑀓𑀸𑀭𑀸, 𑀢𑁂 𑀲𑀗𑁆𑀔𑁂𑀧𑁂 𑀧𑀜𑁆𑀘 𑀧𑀜𑁆𑀘 𑀓𑀢𑁆𑀯𑀸 𑀯𑀻𑀲𑀢𑀺𑀆𑀓𑀸𑀭𑀸 𑀏𑀢𑀲𑁆𑀲𑀸𑀢𑀺 𑀯𑀻𑀲𑀢𑀸𑀓𑀸𑀭𑀁.

𑀔𑀢𑁆𑀢𑀺𑀬𑀸𑀤𑀺𑀪𑁂𑀤𑁂𑀦 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀸𑀧𑀺 𑀲𑀲𑁆𑀲𑀢𑀯𑀸𑀤𑀺𑀦𑁄 𑀚𑀸𑀢𑀺𑀲𑀢𑀲𑀳𑀲𑁆𑀲𑀸𑀦𑀼𑀲𑁆𑀲𑀭𑀡𑀸𑀤𑀺𑀦𑁄 𑀅𑀪𑀺𑀦𑀺𑀯𑁂𑀲𑀳𑁂𑀢𑀼𑀦𑁄 𑀯𑀲𑁂𑀦 𑀘𑀢𑁆𑀢𑀸𑀭𑁄𑀯 𑀳𑁄𑀦𑁆𑀢𑀺 ¶ , 𑀦 𑀢𑀢𑁄 𑀉𑀤𑁆𑀥𑀁 𑀅𑀥𑁄𑀢𑀺 𑀲𑀲𑁆𑀲𑀢𑀯𑀸𑀤𑀸𑀤𑀻𑀦𑀁 𑀧𑀭𑀺𑀫𑀸𑀡𑀧𑀭𑀺𑀘𑁆𑀙𑁂𑀤𑀲𑁆𑀲 𑀅𑀦𑀜𑁆𑀜𑀯𑀺𑀲𑀬𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀢𑁆𑀢𑀸𑀭𑁄 𑀚𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀚𑀦𑀸𑀢𑀺 𑀘𑀢𑁆𑀢𑀸𑀭𑁄 𑀚𑀦𑀲𑀫𑀽𑀳𑀸. 𑀇𑀤𑀁 𑀦𑀺𑀲𑁆𑀲𑀸𑀬𑀸𑀢𑀺 𑀇𑀤𑀁 𑀇𑀤𑀧𑁆𑀧𑀘𑁆𑀘𑀬𑀢𑀸𑀬 𑀲𑀫𑁆𑀫𑀸 𑀅𑀕𑁆𑀕𑀳𑀡𑀁, 𑀢𑀢𑁆𑀣𑀸𑀧𑀺 𑀘 𑀳𑁂𑀢𑀼𑀨𑀮𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑀸𑀦𑀁 ¶ 𑀲𑀦𑁆𑀢𑀢𑀺𑀖𑀦𑀲𑁆𑀲 𑀅𑀪𑁂𑀤𑀺𑀢𑀢𑁆𑀢𑀸 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀪𑁂𑀤𑀦𑀺𑀩𑀦𑁆𑀥𑀦𑀁 𑀦𑀸𑀦𑀢𑁆𑀢𑀦𑀬𑀁 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀕𑀳𑀺𑀢𑀁 𑀏𑀓𑀢𑁆𑀢𑀕𑁆𑀕𑀳𑀡𑀁 𑀦𑀺𑀲𑁆𑀲𑀸𑀬. 𑀇𑀤𑀁 𑀕𑀡𑁆𑀳𑀦𑁆𑀢𑀻𑀢𑀺 𑀇𑀤𑀁 𑀲𑀲𑁆𑀲𑀢𑀕𑁆𑀕𑀳𑀡𑀁 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀦𑁆𑀢𑀺, 𑀇𑀫𑀺𑀦𑀸 𑀦𑀬𑁂𑀦 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀸𑀤𑀬𑁄𑀧𑁂𑀢𑁆𑀣 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀸. 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 ‘‘𑀆𑀢𑀧𑁆𑀧𑀫𑀦𑁆𑀯𑀸𑀬𑀸’’𑀢𑀺𑀆𑀤𑀺𑀦𑀸 𑀯𑀺𑀪𑀚𑀺𑀢𑁆𑀯𑀸 ‘‘𑀢𑀬𑀺𑀤𑀁 𑀪𑀺𑀓𑁆𑀔𑀯𑁂 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀯𑀺𑀫𑀤𑁆𑀤𑀺𑀢𑁆𑀯𑀸 𑀦𑀺𑀚𑁆𑀚𑀝𑀁 𑀦𑀺𑀕𑀼𑀫𑁆𑀩𑀁 𑀓𑀢𑁆𑀯𑀸 𑀤𑀺𑀝𑁆𑀞𑀺𑀚𑀝𑀸𑀯𑀺𑀚𑀝𑀦𑁂𑀦 𑀤𑀺𑀝𑁆𑀞𑀺𑀕𑀼𑀫𑁆𑀩𑀯𑀺𑀯𑀭𑀡𑁂𑀦 𑀘.

‘‘𑀢𑀲𑁆𑀫𑀸’’𑀢𑀺𑀆𑀤𑀺𑀦𑀸 𑀩𑀼𑀤𑁆𑀥𑀕𑀼𑀡𑁂 𑀆𑀭𑀩𑁆𑀪 𑀤𑁂𑀲𑀦𑀸𑀬 𑀲𑀫𑀼𑀝𑁆𑀞𑀺𑀢𑀢𑁆𑀢𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑁂𑀲𑀦𑀸𑀓𑀼𑀲𑀮𑁄 𑀪𑀕𑀯𑀸 𑀲𑀫𑀬𑀦𑁆𑀢𑀭𑀯𑀺𑀕𑁆𑀕𑀸𑀳𑀡𑀯𑀲𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀲𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀢𑁂𑀲𑀁 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀯𑀺𑀚𑁆𑀚𑀫𑀸𑀦𑀢𑀸𑀬 𑀅𑀯𑀺𑀘𑁆𑀙𑀺𑀦𑁆𑀦𑀢𑀁, 𑀢𑀢𑁄 𑀘 𑀦𑁂𑀲𑀁 𑀫𑀺𑀘𑁆𑀙𑀸𑀕𑀸𑀳𑀢𑁄 𑀲𑀺𑀣𑀺𑀮𑀓𑀭𑀡𑀯𑀺𑀯𑁂𑀘𑀦𑁂𑀳𑀺 𑀅𑀢𑁆𑀢𑀦𑁄 𑀤𑁂𑀲𑀦𑀸𑀬 𑀓𑀺𑀘𑁆𑀘𑀓𑀸𑀭𑀺𑀢𑀁, 𑀅𑀯𑀺𑀢𑀣𑀢𑀜𑁆𑀘 𑀤𑀻𑀧𑁂𑀢𑀺 𑀥𑀫𑁆𑀫𑀭𑀸𑀚𑀸.

𑁨𑁯. 𑀅𑀢𑁆𑀣𑀻𑀢𑀺 ‘‘𑀲𑀁𑀯𑀺𑀚𑁆𑀚𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑁄 𑀧𑀼𑀣𑀼𑀯𑀘𑀦𑀯𑀺𑀲𑀬𑁄 𑀏𑀓𑁄 𑀦𑀺𑀧𑀸𑀢𑁄 ‘‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁭𑁭; 𑀫. 𑀦𑀺. 𑁧.𑁧𑁧𑁦; 𑀫. 𑀦𑀺. 𑁩.𑁧𑁫𑁪; 𑀲𑀁. 𑀦𑀺. 𑁪.𑁧𑁨𑁭; 𑀔𑀼. 𑀧𑀸. 𑁩.𑁧) 𑀯𑀺𑀬. 𑀲𑀲𑁆𑀲𑀢𑀸𑀤𑀺𑀯𑀲𑁂𑀦 𑀧𑀼𑀩𑁆𑀩𑀦𑁆𑀢𑀁 𑀓𑀧𑁆𑀧𑁂𑀦𑁆𑀢𑀻𑀢𑀺 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸. 𑀬𑀲𑁆𑀫𑀸 𑀧𑀦 𑀢𑁂 𑀢𑀁 𑀧𑀼𑀩𑁆𑀩𑀦𑁆𑀢𑀁 𑀧𑀼𑀭𑀺𑀫𑀲𑀺𑀤𑁆𑀥𑁂𑀳𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀓𑀧𑁆𑀧𑁂𑀳𑀺 𑀓𑀧𑁆𑀧𑁂𑀢𑁆𑀯𑀸, 𑀆𑀲𑁂𑀯𑀦𑀩𑀮𑀯𑀢𑀸𑀬 𑀯𑀺𑀘𑀺𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀘 𑀯𑀺𑀓𑀧𑁆𑀧𑁂𑀢𑁆𑀯𑀸 𑀅𑀧𑀭𑀪𑀸𑀕𑀲𑀺𑀤𑁆𑀥𑁂𑀳𑀺 𑀅𑀪𑀺𑀦𑀺𑀯𑁂𑀲𑀪𑀽𑀢𑁂𑀳𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀕𑁆𑀕𑀸𑀳𑁂𑀳𑀺 𑀕𑀡𑁆𑀳𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀼𑀩𑁆𑀩𑀦𑁆𑀢𑀁 ¶ 𑀓𑀧𑁆𑀧𑁂𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀻’’𑀢𑀺. 𑀢𑀡𑁆𑀳𑀼𑀧𑀸𑀤𑀸𑀦𑀯𑀲𑁂𑀦 𑀯𑀸 𑀓𑀧𑁆𑀧𑀦𑀕𑁆𑀕𑀳𑀡𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀡𑁆𑀳𑀸𑀧𑀘𑁆𑀘𑀬𑀸 𑀳𑀺 𑀉𑀧𑀸𑀤𑀸𑀦𑀁. 𑀓𑁄𑀝𑁆𑀞𑀸𑀲𑁂𑀲𑀽𑀢𑀺 ¶ 𑀏𑀢𑁆𑀣 𑀓𑁄𑀝𑁆𑀞𑀸𑀲𑀸𑀤𑀻𑀲𑀽𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀤𑀧𑀽𑀭𑀡𑀲𑀫𑀻𑀧𑀉𑀫𑁆𑀫𑀕𑁆𑀕𑀸𑀤𑀻𑀲𑀼𑀧𑀺 𑀳𑀺 𑀅𑀦𑁆𑀢-𑀲𑀤𑁆𑀤𑁄 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺 ‘‘𑀇𑀗𑁆𑀖 𑀢𑁆𑀯𑀁 𑀲𑀼𑀢𑁆𑀢𑀦𑁆𑀢𑁂 𑀯𑀸 𑀕𑀸𑀣𑀸𑀬𑁄 𑀯𑀸 𑀅𑀪𑀺𑀥𑀫𑁆𑀫𑀁 𑀯𑀸 𑀧𑀭𑀺𑀬𑀸𑀧𑀼𑀡𑀲𑁆𑀲𑀼 (𑀧𑀸𑀘𑀺. 𑁪𑁪𑁨), 𑀲𑀼𑀢𑁆𑀢𑀦𑁆𑀢𑁂 𑀑𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸’’𑀢𑀺 (𑀧𑀸𑀘𑀺. 𑁧𑁨𑁨𑁧) 𑀘 𑀆𑀤𑀻𑀲𑀼 𑀧𑀤𑀧𑀽𑀭𑀡𑁂 𑀅𑀦𑁆𑀢-𑀲𑀤𑁆𑀤𑁄 𑀯𑀢𑁆𑀢𑀢𑀺, 𑀕𑀸𑀫𑀦𑁆𑀢𑀁 𑀑𑀲𑀭𑁂𑀬𑁆𑀬, (𑀧𑀸𑀭𑀸. 𑁪𑁦𑁯; 𑀘𑀽𑀴𑀯. 𑁩𑁪𑁩) 𑀕𑀸𑀫𑀦𑁆𑀢𑀲𑁂𑀦𑀸𑀲𑀦’’𑀦𑁆𑀢𑀺𑀆𑀤𑀻𑀲𑀼 𑀲𑀫𑀻𑀧𑁂 ¶ , ‘‘𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄 𑀏𑀓𑁄 𑀅𑀦𑁆𑀢𑁄, 𑀅𑀢𑁆𑀣𑀻𑀢𑀺 𑀔𑁄 𑀓𑀘𑁆𑀘𑀸𑀦 𑀅𑀬𑀫𑁂𑀓𑁄 𑀅𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁧𑁫; 𑁩.𑁯𑁦) 𑀉𑀫𑁆𑀫𑀕𑁆𑀕𑁂𑀢𑀺.

𑀓𑀧𑁆𑀧-𑀲𑀤𑁆𑀤𑁄 𑀫𑀳𑀸𑀓𑀧𑁆𑀧𑀲𑀫𑀦𑁆𑀢𑀪𑀸𑀯𑀓𑀺𑀮𑁂𑀲𑀓𑀸𑀫𑀯𑀺𑀢𑀓𑁆𑀓𑀓𑀸𑀮𑀧𑀜𑁆𑀜𑀢𑁆𑀢𑀺𑀲𑀤𑀺𑀲𑀪𑀸𑀯𑀸𑀤𑀻𑀲𑀼 𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀲𑀫𑁆𑀩𑀳𑀼𑀮𑁂𑀲𑀼 𑀅𑀢𑁆𑀣𑁂𑀲𑀼 𑀯𑀢𑁆𑀢𑀢𑀻’’𑀢𑀺. 𑀢𑀣𑀸 𑀳𑁂𑀲 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺 𑀪𑀺𑀓𑁆𑀔𑀯𑁂 𑀓𑀧𑁆𑀧𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁫𑁬) 𑀫𑀳𑀸𑀓𑀧𑁆𑀧𑁂 𑀯𑀢𑁆𑀢𑀢𑀺, ‘‘𑀓𑁂𑀯𑀮𑀓𑀧𑁆𑀧𑀁 𑀯𑁂𑀴𑀼𑀯𑀦𑀁 𑀑𑀪𑀸𑀲𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁯𑁪) 𑀲𑀫𑀦𑁆𑀢𑀪𑀸𑀯𑁂, ‘‘𑀲𑀗𑁆𑀓𑀧𑁆𑀧𑁄 𑀓𑀸𑀫𑁄, 𑀭𑀸𑀕𑁄 𑀓𑀸𑀫𑁄, 𑀲𑀗𑁆𑀓𑀧𑁆𑀧𑀭𑀸𑀕𑁄 𑀓𑀸𑀫𑁄’’𑀢𑀺𑀆𑀤𑀻𑀲𑀼 (𑀫𑀳𑀸𑀦𑀺. 𑁧; 𑀘𑀽𑀴𑀦𑀺. 𑁮) 𑀓𑀺𑀮𑁂𑀲𑀓𑀸𑀫𑁂, ‘‘𑀢𑀓𑁆𑀓𑁄 𑀯𑀺𑀢𑀓𑁆𑀓𑁄 𑀲𑀗𑁆𑀓𑀧𑁆𑀧𑁄’’𑀢𑀺𑀆𑀤𑀻𑀲𑀼 (𑀥. 𑀲. 𑁭) 𑀯𑀺𑀢𑀓𑁆𑀓𑁂, ‘‘𑀬𑁂𑀦 ¶ 𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁮𑁭) 𑀓𑀸𑀮𑁂, ‘‘𑀇𑀘𑁆𑀘𑀸𑀬𑀲𑁆𑀫𑀸 𑀓𑀧𑁆𑀧𑁄’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁧𑁦𑁯𑁦; 𑀘𑀽𑀴𑀦𑀺. 𑁧𑁧𑁩) 𑀧𑀜𑁆𑀜𑀢𑁆𑀢𑀺𑀬𑀁, ‘‘𑀲𑀢𑁆𑀣𑀼𑀓𑀧𑁆𑀧𑁂𑀦 𑀯𑀢 𑀓𑀺𑀭 𑀪𑁄 𑀲𑀸𑀯𑀓𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑀬𑀫𑀸𑀦𑀸 𑀦 𑀚𑀸𑀦𑀺𑀫𑁆𑀳𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁬𑁦) 𑀲𑀤𑀺𑀲𑀪𑀸𑀯𑁂 𑀯𑀢𑁆𑀢𑀢𑀻𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀦𑁆𑀢𑀺 𑀫𑀳𑀸𑀦𑀺𑀤𑁆𑀤𑁂𑀲𑀁 (𑀫𑀳𑀸𑀦𑀺. 𑁨𑁮) 𑀲𑀦𑁆𑀥𑀸𑀬𑀸𑀳. 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦𑀸𑀢𑀺 𑀤𑀺𑀝𑁆𑀞𑀺𑀬𑀸 𑀉𑀧𑀦𑀺𑀲𑁆𑀲𑀬𑀪𑀽𑀢𑀸𑀬 𑀲𑀳𑀚𑀸𑀢𑀸𑀬 𑀅𑀪𑀺𑀦𑀦𑁆𑀤𑀦𑀪𑀽𑀢𑀸𑀬 𑀘 𑀢𑀡𑁆𑀳𑀸𑀬, 𑀲𑀲𑁆𑀲𑀢𑀸𑀤𑀺𑀆𑀓𑀸𑀭𑁂𑀦 𑀅𑀪𑀺𑀦𑀺𑀯𑀺𑀲𑀦𑁆𑀢𑀲𑁆𑀲 𑀫𑀺𑀘𑁆𑀙𑀸𑀕𑀸𑀳𑀲𑁆𑀲 𑀘 𑀯𑀲𑁂𑀦. 𑀧𑀼𑀩𑁆𑀩𑁂𑀦𑀺𑀯𑀼𑀢𑁆𑀣𑀥𑀫𑁆𑀫𑀯𑀺𑀲𑀬𑀸𑀬 𑀓𑀧𑁆𑀧𑀦𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀅𑀢𑀻𑀢𑀓𑀸𑀮𑀯𑀸𑀘𑀓𑁄 𑀇𑀥 𑀧𑀼𑀩𑁆𑀩-𑀲𑀤𑁆𑀤𑁄, 𑀭𑀽𑀧𑀸𑀤𑀺𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀓𑀧𑁆𑀧𑀦𑀸𑀯𑀢𑁆𑀣𑀼𑀦𑁄 𑀅𑀪𑀸𑀯𑀸 𑀅𑀦𑁆𑀢-𑀲𑀤𑁆𑀤𑁄 𑀘 𑀪𑀸𑀕𑀯𑀸𑀘𑀓𑁄𑀢𑀺 𑀆𑀳 ‘‘𑀅𑀢𑀻𑀢𑀁 𑀔𑀦𑁆𑀥𑀓𑁄𑀝𑁆𑀞𑀸𑀲’’𑀦𑁆𑀢𑀺. ‘‘𑀓𑀧𑁆𑀧𑁂𑀢𑁆𑀯𑀸’’𑀢𑀺 𑀘 𑀢𑀲𑁆𑀫𑀺𑀁 𑀧𑀼𑀩𑁆𑀩𑀦𑁆𑀢𑁂 𑀢𑀡𑁆𑀳𑀸𑀬𑀦𑀸𑀪𑀺𑀦𑀺𑀯𑁂𑀲𑀸𑀦𑀁 𑀲𑀫𑀢𑁆𑀣𑀦𑀁 𑀧𑀭𑀺𑀦𑀺𑀝𑁆𑀞𑀸𑀧𑀦𑀫𑀸𑀳. 𑀞𑀺𑀢𑀸𑀢𑀺 𑀢𑀲𑁆𑀲𑀸 𑀮𑀤𑁆𑀥𑀺𑀬𑀸 𑀅𑀯𑀺𑀚𑀳𑀦𑀁. 𑀆𑀭𑀩𑁆𑀪𑀸𑀢𑀺 𑀆𑀮𑀫𑁆𑀩𑀺𑀢𑁆𑀯𑀸. 𑀯𑀺𑀲𑀬𑁄 𑀳𑀺 𑀢𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀧𑀼𑀩𑁆𑀩𑀦𑁆𑀢𑁄. 𑀯𑀺𑀲𑀬𑀪𑀸𑀯𑀢𑁄 𑀏𑀯 𑀳𑀺 𑀲𑁄 𑀢𑀲𑁆𑀲𑀸 𑀆𑀕𑀫𑀦𑀝𑁆𑀞𑀸𑀦𑀁, 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀘𑀸𑀢𑀺 𑀯𑀼𑀢𑁆𑀢𑀁 ‘‘𑀆𑀕𑀫𑁆𑀫 𑀧𑀝𑀺𑀘𑁆𑀘𑀸’’𑀢𑀺.

𑀅𑀥𑀺𑀯𑀘𑀦𑀧𑀤𑀸𑀦𑀻𑀢𑀺 𑀧𑀜𑁆𑀜𑀢𑁆𑀢𑀺𑀧𑀤𑀸𑀦𑀺. 𑀤𑀸𑀲𑀸𑀤𑀻𑀲𑀼 𑀲𑀺𑀭𑀺𑀯𑀟𑁆𑀠𑀓𑀸𑀤𑀺-𑀲𑀤𑁆𑀤𑀸 𑀯𑀺𑀬 𑀯𑀘𑀦𑀫𑀢𑁆𑀢𑀫𑁂𑀯 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀬𑀸 𑀅𑀥𑀺𑀯𑀘𑀦𑀁 𑀧𑀜𑁆𑀜𑀢𑁆𑀢𑀺. 𑀅𑀣 𑀯𑀸 𑀅𑀥𑀺-𑀲𑀤𑁆𑀤𑁄 𑀉𑀧𑀭𑀺𑀪𑀸𑀯𑁂, 𑀯𑀼𑀘𑁆𑀘𑀢𑀻𑀢𑀺 𑀯𑀘𑀦𑀁, 𑀉𑀧𑀭𑀺 𑀯𑀘𑀦𑀁 𑀅𑀥𑀺𑀯𑀘𑀦𑀁, 𑀉𑀧𑀸𑀤𑀸𑀪𑀽𑀢𑀭𑀽𑀧𑀸𑀤𑀻𑀦𑀁 𑀉𑀧𑀭𑀺 𑀧𑀜𑁆𑀜𑀸𑀧𑀺𑀬𑀫𑀸𑀦𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀻𑀢𑀺 𑀅𑀢𑁆𑀣𑁄 ¶ , 𑀢𑀲𑁆𑀫𑀸 𑀧𑀜𑁆𑀜𑀢𑁆𑀢𑀺𑀤𑀻𑀧𑀓𑀧𑀤𑀸𑀦𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀜𑁆𑀳𑁂𑀢𑀁 𑀯𑀼𑀘𑁆𑀘𑀢𑀺, 𑀬𑀤𑀺𑀤𑀁 ‘‘𑀅𑀢𑁆𑀢𑀸, 𑀮𑁄𑀓𑁄’’𑀢𑀺 𑀘, 𑀦 𑀭𑀽𑀧𑀯𑁂𑀤𑀦𑀸𑀤𑀬𑁄 𑀯𑀺𑀬 𑀧𑀭𑀫𑀢𑁆𑀣𑁄. 𑀅𑀥𑀺𑀓𑀯𑀼𑀢𑁆𑀢𑀺𑀢𑀸𑀬 𑀯𑀸 𑀅𑀥𑀺𑀯𑀼𑀢𑁆𑀢𑀺𑀬𑁄𑀢𑀺 𑀤𑀺𑀝𑁆𑀞𑀺𑀬𑁄 𑀯𑀼𑀘𑁆𑀘𑀦𑁆𑀢𑀺. 𑀅𑀥𑀺𑀓𑀜𑁆𑀳𑀺 ¶ 𑀲𑀪𑀸𑀯𑀥𑀫𑁆𑀫𑁂𑀲𑀼 𑀲𑀲𑁆𑀲𑀢𑀸𑀤𑀺𑀁 ¶ 𑀧𑀓𑀢𑀺𑀆𑀤𑀺𑀤𑀩𑁆𑀩𑀸𑀤𑀺𑀁 𑀚𑀻𑀯𑀸𑀤𑀺𑀁 𑀓𑀸𑀬𑀸𑀤𑀺𑀜𑁆𑀘 𑀅𑀪𑀽𑀢𑀫𑀢𑁆𑀣𑀁 𑀅𑀚𑁆𑀛𑀸𑀭𑁄𑀧𑁂𑀢𑁆𑀯𑀸 𑀤𑀺𑀝𑁆𑀞𑀺𑀬𑁄 𑀧𑀯𑀢𑁆𑀢𑀦𑁆𑀢𑀻𑀢𑀺.

𑁩𑁦. 𑀅𑀪𑀺𑀯𑀤𑀦𑁆𑀢𑀻𑀢𑀺 ‘‘𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺 (𑀫. 𑀦𑀺. 𑁨.𑁧𑁮𑁭, 𑁨𑁦𑁩, 𑁪𑁨𑁭; 𑀫. 𑀦𑀺. 𑁩.𑁨𑁭, 𑁨𑁯) 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀯𑀤𑀦𑁆𑀢𑀺 ‘‘𑀅𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀯𑀺𑀯𑀤𑀦𑁆𑀢𑀺. 𑀅𑀪𑀺𑀯𑀤𑀦𑀓𑀺𑀭𑀺𑀬𑀸𑀬 𑀅𑀚𑁆𑀚𑀸𑀧𑀺 𑀅𑀯𑀺𑀘𑁆𑀙𑁂𑀤𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀢𑁆𑀢𑀫𑀸𑀦𑀓𑀸𑀮𑀯𑀘𑀦𑀁. 𑀤𑀺𑀝𑁆𑀞𑀺 𑀏𑀯 𑀤𑀺𑀝𑁆𑀞𑀺𑀕𑀢𑀁 ‘‘𑀫𑀼𑀢𑁆𑀢𑀕𑀢𑀁, (𑀫. 𑀦𑀺. 𑁨.𑁧𑁧𑁯; 𑀅. 𑀦𑀺. 𑁯.𑁧𑁧) 𑀲𑀗𑁆𑀔𑀸𑀭𑀕𑀢’’𑀦𑁆𑀢𑀺𑀆𑀤𑀻𑀲𑀼 (𑀫𑀳𑀸𑀦𑀺. 𑁪𑁧) 𑀯𑀺𑀬. 𑀕𑀦𑁆𑀢𑀩𑁆𑀩𑀸𑀪𑀸𑀯𑀢𑁄 𑀯𑀸 𑀤𑀺𑀝𑁆𑀞𑀺𑀬𑀸 𑀕𑀢𑀫𑀢𑁆𑀢𑀁, 𑀤𑀺𑀝𑁆𑀞𑀺𑀬𑀸 𑀕𑀳𑀡𑀫𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀺𑀧𑁆𑀧𑀓𑀸𑀭𑁄 𑀯𑀸 𑀤𑀺𑀝𑁆𑀞𑀺𑀕𑀢𑀁. 𑀮𑁄𑀓𑀺𑀬𑀸 𑀳𑀺 𑀯𑀺𑀥𑀬𑀼𑀢𑁆𑀢𑀕𑀢𑀧𑀓𑀸𑀭-𑀲𑀤𑁆𑀤𑁂 𑀲𑀫𑀸𑀦𑀢𑁆𑀣𑁂 𑀇𑀘𑁆𑀙𑀦𑁆𑀢𑀺. 𑀏𑀓𑁂𑀓𑀲𑁆𑀫𑀺𑀜𑁆𑀘 ‘‘𑀅𑀢𑁆𑀢𑀸’’𑀢𑀺, ‘‘𑀮𑁄𑀓𑁄’’𑀢𑀺 𑀘 𑀕𑀳𑀡𑀯𑀺𑀲𑁂𑀲𑀁 𑀉𑀧𑀸𑀤𑀸𑀬 𑀧𑀜𑁆𑀜𑀸𑀧𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀭𑀽𑀧𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺 𑀕𑀳𑁂𑀢𑁆𑀯𑀸’’𑀢𑀺. 𑀅𑀫𑀭𑀁 𑀦𑀺𑀘𑁆𑀘𑀁 𑀥𑀼𑀯𑀦𑁆𑀢𑀺 𑀲𑀲𑁆𑀲𑀢𑀯𑁂𑀯𑀘𑀦𑀸𑀦𑀺. 𑀫𑀭𑀡𑀸𑀪𑀸𑀯𑁂𑀦 𑀯𑀸 𑀅𑀫𑀭𑀁, 𑀉𑀧𑁆𑀧𑀸𑀤𑀸𑀪𑀸𑀯𑁂𑀦 𑀲𑀩𑁆𑀩𑀣𑀸𑀧𑀺 𑀅𑀢𑁆𑀣𑀺𑀢𑀸𑀬 𑀦𑀺𑀘𑁆𑀘𑀁, 𑀣𑀺𑀭𑀝𑁆𑀞𑁂𑀦 𑀯𑀺𑀓𑀸𑀭𑀸𑀪𑀸𑀯𑁂𑀦 𑀥𑀼𑀯𑀁. ‘‘𑀬𑀣𑀸𑀳𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀦𑀺𑀤𑁆𑀤𑁂𑀲𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀴𑀻𑀳𑀺 𑀯𑀺𑀪𑀸𑀯𑁂𑀢𑀺. 𑀅𑀬𑀜𑁆𑀘 𑀅𑀢𑁆𑀣𑁄 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀯𑁂𑀤𑀦𑀁, 𑀲𑀜𑁆𑀜𑀁, 𑀲𑀗𑁆𑀔𑀸𑀭𑁂, 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 𑀇𑀫𑀺𑀲𑁆𑀲𑀸 𑀧𑀜𑁆𑀘𑀯𑀺𑀥𑀸𑀬 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀯𑀲𑁂𑀦 𑀯𑀼𑀢𑁆𑀢𑁄. ‘‘𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦’’𑀦𑁆𑀢𑀺𑀆𑀤𑀺𑀓𑀸𑀬 𑀧𑀦 𑀧𑀜𑁆𑀘𑀤𑀲𑀯𑀺𑀥𑀸𑀬 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀯𑀲𑁂𑀦 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀔𑀦𑁆𑀥𑁂 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀢𑀤𑀜𑁆𑀜𑀁 ‘‘𑀮𑁄𑀓𑁄’’𑀢𑀺 𑀧𑀜𑁆𑀜𑀧𑁂𑀦𑁆𑀢𑀻𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀮𑀩𑁆𑀪𑀢𑀺. 𑀢𑀣𑀸 𑀏𑀓𑀁 𑀔𑀦𑁆𑀥𑀁 ¶ ’’𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀢𑀤𑀜𑁆𑀜𑁂 𑀅𑀢𑁆𑀢𑀦𑁄 𑀉𑀧𑀪𑁄𑀕𑀪𑀽𑀢𑁄 𑀮𑁄𑀓𑁄𑀢𑀺, 𑀲𑀲𑀦𑁆𑀢𑀢𑀺𑀧𑀢𑀺𑀢𑁂 𑀯𑀸 𑀔𑀦𑁆𑀥𑁂 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀢𑀤𑀜𑁆𑀜𑁂 ‘‘𑀮𑁄𑀓𑁄’’𑀢𑀺 𑀧𑀜𑁆𑀜𑀧𑁂𑀦𑁆𑀢𑀻𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀣𑀸𑀳 𑁋 𑀲𑀲𑁆𑀲𑀢𑁄 𑀯𑀸𑀤𑁄 𑀏𑀢𑁂𑀲𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀢𑁂𑀲𑀁 𑀅𑀢𑁆𑀢𑀸 𑀮𑁄𑀓𑁄 𑀘 𑀲𑀲𑁆𑀲𑀢𑁄𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀦 𑀯𑀸𑀤𑁄 𑀢𑀺? 𑀲𑀘𑁆𑀘𑀫𑁂𑀢𑀁, 𑀲𑀲𑁆𑀲𑀢𑀲𑀳𑀘𑀭𑀺𑀢𑀢𑀸𑀬 𑀧𑀦 ‘‘𑀯𑀸𑀤𑁄 𑀲𑀲𑁆𑀲𑀢𑁄’’𑀢𑀺 𑀯𑀼𑀢𑁆𑀢𑀁 𑀬𑀣𑀸 ‘‘𑀓𑀼𑀦𑁆𑀢𑀸 𑀧𑀘𑀭𑀦𑁆𑀢𑀻’’𑀢𑀺. 𑀲𑀲𑁆𑀲𑀢𑁄 𑀇𑀢𑀺 𑀯𑀸𑀤𑁄 𑀏𑀢𑁂𑀲𑀦𑁆𑀢𑀺 𑀯𑀸 𑀇𑀢𑀺-𑀲𑀤𑁆𑀤𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀅𑀣 𑀯𑀸 𑀲𑀲𑁆𑀲𑀢𑀁 𑀯𑀤𑀦𑁆𑀢𑀺 ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀦𑁆𑀢𑀻𑀢𑀺 𑀲𑀲𑁆𑀲𑀢𑀯𑀸𑀤𑀸, 𑀲𑀲𑁆𑀲𑀢𑀤𑀺𑀝𑁆𑀞𑀺𑀦𑁄𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁩𑁧. 𑀆𑀢𑀸𑀧𑀦𑀁 ¶ 𑀓𑀺𑀮𑁂𑀲𑀸𑀦𑀁 𑀯𑀺𑀩𑀸𑀥𑀦𑀁 𑀧𑀳𑀸𑀦𑀁. 𑀧𑀤𑀳𑀦𑀁 𑀓𑁄𑀲𑀚𑁆𑀚𑀧𑀓𑁆𑀔𑁂 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀉𑀲𑁆𑀲𑀳𑀦𑀁. 𑀅𑀦𑀼𑀬𑁄𑀕𑁄 𑀬𑀣𑀸 𑀲𑀫𑀸𑀥𑀺 𑀯𑀺𑀲𑁂𑀲𑀪𑀸𑀕𑀺𑀬𑀢𑀁 𑀧𑀸𑀧𑀼𑀡𑀸𑀢𑀺, 𑀏𑀯𑀁 𑀯𑀻𑀭𑀺𑀬𑀲𑁆𑀲 𑀩𑀳𑀼𑀮𑀻𑀓𑀭𑀡𑀁. 𑀇𑀥 𑀉𑀧𑀘𑀸𑀭𑀧𑁆𑀧𑀦𑀸𑀘𑀺𑀢𑁆𑀢𑀧𑀭𑀺𑀤𑀫𑀦𑀯𑀻𑀭𑀺𑀬𑀸𑀦𑀁 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀆𑀳 ‘‘𑀢𑀺𑀧𑁆𑀧𑀪𑁂𑀤𑀁 𑀯𑀻𑀭𑀺𑀬’’𑀦𑁆𑀢𑀺 ¶ . 𑀦𑀧𑁆𑀧𑀫𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀅𑀧𑁆𑀧𑀫𑀸𑀤𑁄, 𑀅𑀲𑀫𑁆𑀫𑁄𑀲𑁄. 𑀲𑀫𑁆𑀫𑀸 𑀉𑀧𑀸𑀬𑁂𑀦 𑀫𑀦𑀲𑀺 𑀓𑀭𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀏𑀢𑁂𑀦𑀸𑀢𑀺 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑁄 𑀜𑀸𑀡𑀦𑁆𑀢𑀺 𑀆𑀳 ‘‘𑀯𑀻𑀭𑀺𑀬𑀜𑁆𑀘 𑀲𑀢𑀺𑀜𑁆𑀘 𑀜𑀸𑀡𑀜𑁆𑀘𑀸’’𑀢𑀺. 𑀏𑀢𑁆𑀣𑀸𑀢𑀺 ‘‘𑀆𑀢𑀧𑁆𑀧…𑀧𑁂… 𑀫𑀦𑀲𑀺𑀓𑀸𑀭𑀁 𑀅𑀦𑁆𑀯𑀸𑀬𑀸’’𑀢𑀺 𑀇𑀫𑀲𑁆𑀫𑀺𑀁 𑀧𑀸𑀞𑁂. 𑀲𑀻𑀮𑀯𑀺𑀲𑀼𑀤𑁆𑀥𑀺𑀬𑀸 𑀲𑀤𑁆𑀥𑀺𑀁 𑀘𑀢𑀼𑀦𑁆𑀦𑀁 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁 𑀅𑀥𑀺𑀕𑀫𑀦𑀧𑀝𑀺𑀧𑀤𑀸 𑀯𑀢𑁆𑀢𑀩𑁆𑀩𑀸, 𑀲𑀸 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀲𑀗𑁆𑀔𑁂𑀧𑀢𑁆𑀣𑁄’’𑀢𑀺. ‘‘𑀢𑀣𑀸𑀭𑀽𑀧’’𑀦𑁆𑀢𑀺 𑀘𑀼𑀤𑁆𑀤𑀲𑀯𑀺𑀥𑁂𑀳𑀺 𑀘𑀺𑀢𑁆𑀢𑀤𑀫𑀦𑁂𑀳𑀺 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀤𑀫𑀺𑀢𑀢𑀁 𑀯𑀤𑀢𑀺.

𑀲𑀫𑀸𑀥𑀸𑀦𑀸𑀤𑀺𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀬𑁄𑀕𑀺𑀦𑁄 𑀲𑀫𑀸𑀥𑀺𑀯𑀺𑀚𑀫𑁆𑀪𑀦𑀪𑀽𑀢𑀸 𑀮𑁄𑀓𑀺𑀬𑀸𑀪𑀺𑀜𑁆𑀜𑀸 𑀛𑀸𑀦𑀸𑀦𑀼𑀪𑀸𑀯𑁄. ‘‘𑀛𑀸𑀦𑀸𑀤𑀻𑀦’’𑀦𑁆𑀢𑀺 𑀇𑀤𑀁 𑀛𑀸𑀦𑀮𑀸𑀪𑀺𑀲𑁆𑀲 𑀯𑀺𑀲𑁂𑀲𑁂𑀦 𑀛𑀸𑀦𑀥𑀫𑁆𑀫𑀸 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀢𑀁𑀫𑀼𑀔𑁂𑀦 𑀲𑁂𑀲𑀥𑀫𑁆𑀫𑀸𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀚𑀦𑀓𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀢𑀺 𑀳𑀺 𑀚𑀦𑀓𑀪𑀸𑀯𑁂 𑀭𑀽𑀧𑀸𑀤𑀺𑀥𑀫𑁆𑀫𑀸𑀦𑀁 𑀯𑀺𑀬 𑀲𑀼𑀔𑀸𑀤𑀺𑀥𑀫𑁆𑀫𑀸𑀦𑀁 𑀯𑀺𑀬, 𑀘 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀉𑀧𑁆𑀧𑀸𑀤𑀯𑀦𑁆𑀢𑀢𑀸 ¶ 𑀯𑀺𑀜𑁆𑀜𑀸𑀬𑀢𑀺, 𑀉𑀧𑁆𑀧𑀸𑀤𑁂 𑀘 𑀲𑀢𑀺 𑀅𑀯𑀲𑁆𑀲𑀫𑁆𑀪𑀸𑀯𑀻 𑀦𑀺𑀭𑁄𑀥𑁄𑀢𑀺 𑀅𑀦𑀯𑀓𑀸𑀲𑀸𑀯 𑀦𑀺𑀘𑁆𑀘𑀢𑀸 𑀲𑀺𑀬𑀸𑀢𑀺. 𑀓𑀽𑀝𑀝𑁆𑀞-𑀲𑀤𑁆𑀤𑁄 𑀯𑀸 𑀮𑁄𑀓𑁂 𑀅𑀘𑁆𑀘𑀦𑁆𑀢𑀦𑀺𑀘𑁆𑀘𑁂 𑀦𑀺𑀭𑀼𑀴𑁆𑀳𑁄 𑀤𑀝𑁆𑀞𑀩𑁆𑀩𑁄. ‘‘𑀏𑀲𑀺𑀓𑀝𑁆𑀞𑀸𑀬𑀺𑀝𑁆𑀞𑀺𑀢𑁄’’𑀢𑀺 𑀏𑀢𑁂𑀦 𑀬𑀣𑀸 𑀏𑀲𑀺𑀓𑀸 𑀯𑀸𑀢𑀧𑁆𑀧𑀳𑀸𑀭𑀸𑀤𑀻𑀳𑀺 𑀦 𑀘𑀮𑀢𑀺, 𑀏𑀯𑀁 𑀦 𑀓𑁂𑀦𑀘𑀺 𑀯𑀺𑀓𑀸𑀭𑀁 𑀆𑀧𑀚𑁆𑀚𑀢𑀻𑀢𑀺 𑀯𑀺𑀓𑀸𑀭𑀸𑀪𑀸𑀯𑀫𑀸𑀳, ‘‘𑀓𑀽𑀝𑀝𑁆𑀞𑁄’’𑀢𑀺 𑀇𑀫𑀺𑀦𑀸 𑀧𑀦 𑀅𑀦𑀺𑀘𑁆𑀘𑀢𑀸𑀪𑀸𑀯𑀁. 𑀯𑀺𑀓𑀸𑀭𑁄𑀧𑀺 𑀯𑀺𑀦𑀸𑀲𑁄𑀬𑁂𑀯𑀸𑀢𑀺 𑀆𑀳, ‘‘𑀉𑀪𑀬𑁂𑀦𑀧𑀺 𑀮𑁄𑀓𑀲𑁆𑀲 𑀯𑀺𑀦𑀸𑀲𑀸𑀪𑀸𑀯𑀁 𑀤𑀻𑀧𑁂𑀢𑀻’’𑀢𑀺. ‘‘𑀯𑀺𑀚𑁆𑀚𑀫𑀸𑀦𑀫𑁂𑀯𑀸’’𑀢𑀺 𑀏𑀢𑁂𑀦 𑀓𑀸𑀭𑀡𑁂 𑀨𑀮𑀲𑁆𑀲 𑀅𑀢𑁆𑀣𑀺𑀪𑀸𑀯𑀤𑀲𑁆𑀲𑀦𑁂𑀦 𑀅𑀪𑀺𑀩𑁆𑀬𑀢𑁆𑀢𑀺𑀯𑀸𑀤𑀁 𑀤𑀻𑀧𑁂𑀢𑀺. 𑀦𑀺𑀓𑁆𑀔𑀫𑀢𑀻𑀢𑀺 𑀘 𑀅𑀪𑀺𑀩𑁆𑀬𑀢𑁆𑀢𑀺𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀓𑀣𑀁 𑀧𑀦 𑀯𑀺𑀚𑁆𑀚𑀫𑀸𑀦𑁄𑀬𑁂𑀯 𑀧𑀼𑀩𑁆𑀩𑁂 𑀅𑀦𑀪𑀺𑀩𑁆𑀬𑀢𑁆𑀢𑁄 𑀅𑀪𑀺𑀩𑁆𑀬𑀢𑁆𑀢𑀺𑀁 𑀕𑀘𑁆𑀙𑀢𑀻𑀢𑀺? 𑀬𑀣𑀸 𑀅𑀦𑁆𑀥𑀓𑀸𑀭𑁂𑀦 𑀧𑀝𑀺𑀘𑁆𑀙𑀦𑁆𑀦𑁄 𑀖𑀝𑁄 𑀆𑀮𑁄𑀓𑁂𑀦 𑀅𑀪𑀺𑀩𑁆𑀬𑀢𑁆𑀢𑀺𑀁 𑀕𑀘𑁆𑀙𑀢𑀺.

𑀇𑀤𑀫𑁂𑀢𑁆𑀣 𑀯𑀺𑀘𑀸𑀭𑁂𑀢𑀩𑁆𑀩𑀁 𑁋 𑀓𑀺𑀁 𑀓𑀭𑁄𑀦𑁆𑀢𑁄 𑀆𑀮𑁄𑀓𑁄 𑀖𑀝𑀁 𑀧𑀓𑀸𑀲𑁂𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀬𑀤𑀺 𑀖𑀝𑀯𑀺𑀲𑀬𑀁 𑀩𑀼𑀤𑁆𑀥𑀺𑀁 𑀓𑀭𑁄𑀦𑁆𑀢𑁄, 𑀩𑀼𑀤𑁆𑀥𑀺𑀬𑀸 𑀅𑀦𑀼𑀧𑁆𑀧𑀦𑁆𑀦𑀸𑀬 𑀉𑀧𑁆𑀧𑀢𑁆𑀢𑀺𑀤𑀻𑀧𑀦𑀢𑁄 𑀅𑀪𑀺𑀩𑁆𑀬𑀢𑁆𑀢𑀺𑀯𑀸𑀤𑁄 𑀳𑀸𑀬𑀢𑀺. 𑀅𑀣 𑀖𑀝𑀩𑀼𑀤𑁆𑀥𑀺𑀬𑀸 𑀆𑀯𑀭𑀡𑀪𑀽𑀢𑀁 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀦𑁆𑀢𑁄, 𑀏𑀯𑀫𑁆𑀧𑀺 𑀅𑀪𑀺𑀩𑁆𑀬𑀢𑁆𑀢𑀺𑀯𑀸𑀤𑁄 𑀳𑀸𑀬𑀢𑀺𑀬𑁂𑀯. 𑀲𑀢𑀺 𑀳𑀺 𑀖𑀝𑀩𑀼𑀤𑁆𑀥𑀺𑀬𑀸 𑀅𑀦𑁆𑀥𑀓𑀸𑀭𑁄 𑀓𑀣𑀁 𑀢𑀲𑁆𑀲𑀸 𑀆𑀯𑀭𑀡𑀁 𑀳𑁄𑀢𑀻𑀢𑀺, 𑀬𑀣𑀸 𑀖𑀝𑀲𑁆𑀲 ¶ 𑀅𑀪𑀺𑀩𑁆𑀬𑀢𑁆𑀢𑀺 𑀦 𑀬𑀼𑀚𑁆𑀚𑀢𑀺, 𑀏𑀯𑀁 𑀅𑀢𑁆𑀢𑀦𑁄𑀧𑀺. 𑀢𑀢𑁆𑀣𑀸𑀧𑀺 𑀳𑀺 𑀬𑀤𑀺 𑀇𑀦𑁆𑀤𑁆𑀭𑀺𑀬𑀯𑀺𑀲𑀬𑀸𑀤𑀺𑀲𑀦𑁆𑀦𑀺𑀧𑀸𑀢𑁂𑀦 𑀅𑀦𑀼𑀧𑁆𑀧𑀦𑁆𑀦𑀸𑀬 𑀩𑀼𑀤𑁆𑀥𑀺𑀬𑀸 𑀉𑀧𑁆𑀧𑀢𑁆𑀢𑀺, 𑀉𑀧𑁆𑀧𑀢𑁆𑀢𑀺𑀯𑀘𑀦𑁂𑀦𑁂𑀯 𑀅𑀪𑀺𑀩𑁆𑀬𑀢𑁆𑀢𑀺𑀯𑀸𑀤𑁄 𑀳𑀸𑀬𑀢𑀺, 𑀢𑀣𑀸 𑀲𑀲𑁆𑀲𑀢𑀯𑀸𑀤𑁄. 𑀅𑀣 𑀩𑀼𑀤𑁆𑀥𑀺𑀧𑁆𑀧𑀯𑀢𑁆𑀢𑀺𑀬𑀸 𑀆𑀯𑀭𑀡𑀪𑀽𑀢𑀲𑁆𑀲 𑀅𑀦𑁆𑀥𑀓𑀸𑀭𑀝𑁆𑀞𑀸𑀦𑀺𑀬𑀲𑁆𑀲 𑀫𑁄𑀳𑀲𑁆𑀲 𑀯𑀺𑀥𑀫𑀦𑁂𑀦. 𑀲𑀢𑀺 𑀩𑀼𑀤𑁆𑀥𑀺𑀬𑀸 𑀓𑀣𑀁 𑀫𑁄𑀳𑁄 𑀆𑀯𑀭𑀡𑀦𑁆𑀢𑀺, 𑀓𑀺𑀜𑁆𑀘𑀺 𑀪𑁂𑀤𑀲𑀫𑁆𑀪𑀯𑀢𑁄. 𑀦 𑀳𑀺 𑀅𑀪𑀺𑀩𑁆𑀬𑀜𑁆𑀚𑀦𑀓𑀸𑀦𑀁 𑀘𑀦𑁆𑀤𑀲𑀽𑀭𑀺𑀬𑀫𑀡𑀺𑀧𑀤𑀻𑀧𑀸𑀤𑀻𑀦𑀁 𑀪𑁂𑀤𑁂𑀦 𑀅𑀪𑀺𑀩𑁆𑀬𑀜𑁆𑀚𑀺𑀢𑀩𑁆𑀩𑀸𑀦𑀁 𑀖𑀝𑀸𑀤𑀻𑀦𑀁 𑀪𑁂𑀤𑁄 𑀳𑁄𑀢𑀺, 𑀳𑁄𑀢𑀺 𑀘 𑀯𑀺𑀲𑀬𑀪𑁂𑀤𑁂𑀦 𑀩𑀼𑀤𑁆𑀥𑀺𑀪𑁂𑀤𑁄𑀢𑀺 𑀪𑀺𑀬𑁆𑀬𑁄𑀧𑀺 𑀅𑀪𑀺𑀩𑁆𑀬𑀢𑁆𑀢𑀺 𑀦 𑀬𑀼𑀚𑁆𑀚𑀢𑀺𑀬𑁂𑀯, 𑀦 𑀘𑁂𑀢𑁆𑀣 𑀯𑀼𑀢𑁆𑀢𑀺𑀓𑀧𑁆𑀧𑀦𑀸 𑀬𑀼𑀢𑁆𑀢𑀸 𑀯𑀼𑀢𑁆𑀢𑀺𑀬𑀸 𑀯𑀼𑀢𑁆𑀢𑀺𑀫𑀢𑁄 𑀘 𑀅𑀦𑀜𑁆𑀜𑀣𑀸𑀦𑀼𑀚𑀸𑀦𑀦𑀢𑁄𑀢𑀺 ¶ . 𑀢𑁂 ¶ 𑀘 𑀲𑀢𑁆𑀢𑀸 𑀲𑀦𑁆𑀥𑀸𑀯𑀦𑁆𑀢𑀻𑀢𑀺 𑀬𑁂 𑀇𑀥 𑀫𑀦𑀼𑀲𑁆𑀲𑀪𑀸𑀯𑁂𑀦 𑀅𑀯𑀝𑁆𑀞𑀺𑀢𑀸, 𑀢𑁂𑀬𑁂𑀯 𑀤𑁂𑀯𑀪𑀸𑀯𑀸𑀤𑀺𑀉𑀧𑀕𑀫𑀦𑁂𑀦 𑀇𑀢𑁄 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑀺, 𑀅𑀜𑁆𑀜𑀣𑀸 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀦𑀸𑀲𑁄, 𑀅𑀓𑀢𑀲𑁆𑀲 𑀘 𑀅𑀩𑁆𑀪𑀸𑀕𑀫𑁄 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀧𑀭𑀸𑀧𑀭𑀦𑁆𑀢𑀺 𑀅𑀧𑀭𑀲𑁆𑀫𑀸 𑀪𑀯𑀸 𑀅𑀧𑀭𑀁 𑀪𑀯𑀁. 𑀏𑀯𑀁 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀦𑀺𑀘𑁆𑀘𑀲𑀪𑀸𑀯𑀢𑁆𑀢𑀸 𑀦 𑀘𑀼𑀢𑀽𑀧𑀧𑀢𑁆𑀢𑀺𑀬𑁄, 𑀲𑀩𑁆𑀩𑀩𑁆𑀬𑀸𑀧𑀺𑀢𑀸𑀬 𑀦𑀸𑀧𑀺 𑀲𑀦𑁆𑀥𑀸𑀯𑀦𑀲𑀁𑀲𑀭𑀡𑀸𑀦𑀺, 𑀥𑀫𑁆𑀫𑀸𑀦𑀁𑀬𑁂𑀯 𑀧𑀦 𑀧𑀯𑀢𑁆𑀢𑀺𑀯𑀺𑀲𑁂𑀲𑁂𑀦 𑀏𑀯𑀁 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺, 𑀏𑀯𑀁 𑀯𑁄𑀳𑀭𑀻𑀬𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁂𑀦 𑀅𑀯𑀝𑁆𑀞𑀺𑀢𑀲𑀪𑀸𑀯𑀲𑁆𑀲 𑀅𑀢𑁆𑀢𑀦𑁄, 𑀥𑀫𑁆𑀫𑀺𑀦𑁄 𑀘 𑀥𑀫𑁆𑀫𑀫𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀯𑀺𑀦𑀲𑁆𑀲𑀢𑀺 𑀘𑀸𑀢𑀺 𑀇𑀫𑀁 𑀯𑀺𑀧𑀭𑀺𑀡𑀸𑀫𑀯𑀸𑀤𑀁 𑀤𑀲𑁆𑀲𑁂𑀢𑀺. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀯𑀓𑁆𑀔𑀸𑀫. 𑀅𑀢𑁆𑀢𑀦𑁄 𑀯𑀸𑀤𑀁 𑀪𑀺𑀦𑁆𑀤𑀢𑀻𑀢𑀺 𑀲𑀦𑁆𑀥𑀸𑀯𑀦𑀸𑀤𑀺𑀯𑀘𑀦𑀲𑀺𑀤𑁆𑀥𑀸𑀬 𑀅𑀦𑀺𑀘𑁆𑀘𑀢𑀸𑀬 𑀧𑀼𑀩𑁆𑀩𑁂 𑀧𑀝𑀺𑀜𑁆𑀜𑀸𑀢𑀁 𑀲𑀲𑁆𑀲𑀢𑀯𑀸𑀤𑀁 𑀪𑀺𑀦𑁆𑀤𑀢𑀺, 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀲𑁆𑀲𑀢𑀺𑀲𑀫𑀦𑁆𑀢𑀺 𑀯𑀸 𑀏𑀢𑀲𑁆𑀲 𑀲𑀲𑁆𑀲𑀢𑀁 𑀣𑀸𑀯𑀭𑀁 𑀦𑀺𑀘𑁆𑀘𑀓𑀸𑀮𑀦𑁆𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀳𑁂𑀢𑀼𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀬𑁂𑀲𑀁 ‘‘𑀲𑀲𑁆𑀲𑀢𑁄’’𑀢𑀺 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀢𑀺 𑀅𑀬𑀁 𑀤𑀺𑀝𑁆𑀞𑀺𑀕𑀢𑀺𑀓𑁄, 𑀢𑁂𑀲𑀁 𑀳𑁂𑀢𑀼𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀦 𑀳𑀺 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀬𑀸 𑀧𑀘𑁆𑀘𑀓𑁆𑀔𑀓𑀢𑀫𑀢𑁆𑀣𑀁 𑀅𑀢𑁆𑀢𑀦𑁄𑀬𑁂𑀯 𑀲𑀸𑀥𑁂𑀢𑀺, 𑀅𑀢𑁆𑀢𑀦𑁄 𑀧𑀦 𑀧𑀘𑁆𑀘𑀓𑁆𑀔𑀓𑀢𑁂𑀦 𑀅𑀢𑁆𑀣𑁂𑀦 𑀅𑀢𑁆𑀢𑀦𑁄 𑀅𑀧𑁆𑀧𑀘𑁆𑀘𑀓𑁆𑀔𑀪𑀽𑀢𑀫𑁆𑀧𑀺 𑀅𑀢𑁆𑀣𑀁 𑀲𑀸𑀥𑁂𑀢𑀺. 𑀅𑀢𑁆𑀢𑀦𑀸 𑀳𑀺 𑀬𑀣𑀸𑀦𑀺𑀘𑁆𑀙𑀺𑀢𑀁 𑀧𑀭𑁂𑀳𑀺 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀅𑀦𑀺𑀘𑁆𑀙𑀺𑀢𑀁. ‘‘𑀳𑁂𑀢𑀼𑀁 𑀤𑀲𑁆𑀲𑁂𑀦𑁆𑀢𑁄’’𑀢𑀺 𑀏𑀢𑁆𑀣 𑀇𑀤𑀁 𑀳𑁂𑀢𑀼𑀤𑀲𑁆𑀲𑀦𑀁 𑁋 𑀏𑀢𑁂𑀲𑀼 𑀅𑀦𑁂𑀓𑁂𑀲𑀼 𑀚𑀸𑀢𑀺𑀲𑀢𑀲𑀳𑀲𑁆𑀲𑁂𑀲𑀼 𑀏𑀓𑁄𑀯𑀸𑀬𑀁 𑀫𑁂 𑀅𑀢𑁆𑀢𑀸, 𑀮𑁄𑀓𑁄 𑀘 𑀅𑀦𑀼𑀲𑁆𑀲𑀭𑀡𑀲𑀩𑁆𑀪𑀸𑀯𑀢𑁄. 𑀬𑁄 𑀳𑀺 𑀬𑀫𑀢𑁆𑀣𑀁 𑀅𑀦𑀼𑀪𑀯𑀢𑀺, 𑀲𑁄 𑀏𑀯 𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀦 𑀅𑀜𑁆𑀜𑁄. 𑀦 𑀳𑀺 𑀅𑀜𑁆𑀜𑁂𑀦 𑀅𑀦𑀼𑀪𑀽𑀢𑀫𑀢𑁆𑀣𑀁 𑀅𑀜𑁆𑀜𑁄 𑀅𑀦𑀼𑀲𑁆𑀲𑀭𑀺𑀢𑀼𑀁 𑀲𑀓𑁆𑀓𑁄𑀢𑀺 𑀬𑀣𑀸 𑀢𑀁 𑀩𑀼𑀤𑁆𑀥𑀭𑀓𑁆𑀔𑀺𑀢𑁂𑀦 𑀅𑀦𑀼𑀪𑀽𑀢𑀁 𑀥𑀫𑁆𑀫𑀭𑀓𑁆𑀔𑀺𑀢𑁄. 𑀬𑀣𑀸 𑀘𑁂𑀢𑀸𑀲𑀼, 𑀏𑀯𑀁 𑀇𑀢𑁄 𑀧𑀼𑀭𑀺𑀫𑀢𑀭𑀸𑀲𑀼𑀧𑀺 𑀚𑀸𑀢𑀻𑀲𑀽𑀢𑀺. 𑀓𑀲𑁆𑀫𑀸 𑀲𑀲𑁆𑀲𑀢𑁄 𑀫𑁂 𑀅𑀢𑁆𑀢𑀸 𑀘 𑀮𑁄𑀓𑁄 ¶ 𑀘. 𑀬𑀣𑀸 𑀘 𑀫𑁂, 𑀏𑀯𑀁 𑀅𑀜𑁆𑀜𑁂𑀲𑀫𑁆𑀧𑀺 𑀲𑀢𑁆𑀢𑀸𑀦𑀁 𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺? 𑀲𑀲𑁆𑀲𑀢𑀯𑀲𑁂𑀦 𑀤𑀺𑀝𑁆𑀞𑀺𑀕𑀳𑀦𑀁 𑀧𑀓𑁆𑀔𑀦𑁆𑀤𑁄 ¶ 𑀤𑀺𑀝𑁆𑀞𑀺𑀕𑀢𑀺𑀓𑁄 𑀧𑀭𑁂𑀧𑀺 𑀢𑀢𑁆𑀣 𑀧𑀢𑀺𑀝𑁆𑀞𑀧𑁂𑀢𑀺, 𑀧𑀸𑀴𑀺𑀬𑀁 𑀧𑀦 ‘‘𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀯𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺. 𑀲𑁄 𑀏𑀯𑀁 𑀆𑀳𑀸’’𑀢𑀺 𑀘 𑀯𑀘𑀦𑀢𑁄 𑀧𑀭𑀸𑀦𑀼𑀫𑀸𑀦𑀯𑀲𑁂𑀦 𑀇𑀥 𑀳𑁂𑀢𑀼𑀤𑀲𑁆𑀲𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀓𑀸𑀭𑀡𑀦𑁆𑀢𑀺 𑀢𑀺𑀯𑀺𑀥𑀁 𑀓𑀸𑀭𑀡𑀁 𑀲𑀫𑁆𑀧𑀸𑀧𑀓𑀁 𑀦𑀺𑀩𑁆𑀩𑀢𑁆𑀢𑀓𑀁 𑀜𑀸𑀧𑀓𑀦𑁆𑀢𑀺. 𑀢𑀢𑁆𑀣 𑀅𑀭𑀺𑀬𑀫𑀕𑁆𑀕𑁄 𑀦𑀺𑀩𑁆𑀩𑀸𑀦𑀲𑁆𑀲 𑀲𑀫𑁆𑀧𑀸𑀧𑀓𑀁 𑀓𑀸𑀭𑀡𑀁, 𑀩𑀻𑀚𑀁 𑀅𑀗𑁆𑀓𑀼𑀭𑀲𑁆𑀲 𑀦𑀺𑀩𑁆𑀩𑀢𑁆𑀢𑀓𑀁 𑀓𑀸𑀭𑀡𑀁, 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸𑀤𑀬𑁄 𑀅𑀦𑀺𑀘𑁆𑀘𑀢𑀸𑀤𑀻𑀦𑀁 𑀜𑀸𑀧𑀓𑀁 𑀓𑀸𑀭𑀡𑀁, 𑀇𑀥𑀸𑀧𑀺 𑀜𑀸𑀧𑀓𑀓𑀸𑀭𑀡𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀜𑀸𑀧𑀓𑁄 𑀳𑀺 𑀜𑀸𑀧𑁂𑀢𑀩𑁆𑀩𑀢𑁆𑀣𑀯𑀺𑀲𑀬𑀲𑁆𑀲 𑀜𑀸𑀡𑀲𑁆𑀲 𑀳𑁂𑀢𑀼𑀪𑀸𑀯𑀢𑁄 𑀓𑀸𑀭𑀡𑀦𑁆𑀢𑀺. 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀢𑀁 𑀜𑀸𑀡𑀁 𑀢𑀺𑀝𑁆𑀞𑀢𑀺 𑀢𑀢𑁆𑀣𑀸𑀢𑀺 ‘‘𑀞𑀸𑀦’’𑀦𑁆𑀢𑀺, 𑀯𑀲𑀢𑀺 𑀢𑀢𑁆𑀣 𑀧𑀯𑀢𑁆𑀢𑀢𑀻𑀢𑀺 ‘‘𑀯𑀢𑁆𑀣𑀽’’𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑀣𑀸 𑀳𑀺 𑀪𑀕𑀯𑀢𑀸 𑀯𑀢𑁆𑀣𑀼-𑀲𑀤𑁆𑀤𑁂𑀦 𑀉𑀤𑁆𑀤𑀺𑀲𑀺𑀢𑁆𑀯𑀸𑀧𑀺 𑀞𑀸𑀦𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺.

𑁩𑁨-𑁩𑁩. 𑀤𑀼𑀢𑀺𑀬𑀢𑀢𑀺𑀬𑀯𑀸𑀤𑀸𑀦𑀁 ¶ 𑀧𑀞𑀫𑀯𑀸𑀤𑀢𑁄 𑀦𑀢𑁆𑀣𑀺 𑀯𑀺𑀲𑁂𑀲𑁄 𑀞𑀧𑁂𑀢𑁆𑀯𑀸 𑀓𑀸𑀮𑀯𑀺𑀲𑁂𑀲𑀦𑁆𑀢𑀺 𑀆𑀳 ‘‘𑀉𑀧𑀭𑀺 𑀯𑀸𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄’’𑀢𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀲𑀲𑁆𑀲𑀢𑀯𑀸𑀤𑁄 𑀘𑀢𑀼𑀥𑀸 𑀯𑀺𑀪𑀢𑁆𑀢𑁄, 𑀦𑀦𑀼 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀯𑀸𑀤𑁄 𑀯𑀺𑀬 𑀤𑀼𑀯𑀺𑀥𑁂𑀦𑁂𑀯 𑀯𑀺𑀪𑀚𑀺𑀢𑀩𑁆𑀩𑁄 𑀲𑀺𑀬𑀸𑀢𑀺 𑀆𑀳 ‘‘𑀫𑀦𑁆𑀤𑀧𑀜𑁆𑀜𑁄 𑀳𑀺 𑀢𑀺𑀢𑁆𑀣𑀺𑀬𑁄’’𑀢𑀺𑀆𑀤𑀺.

𑁩𑁪. 𑀢𑀓𑁆𑀓𑀬𑀢𑀻𑀢𑀺 𑀊𑀳𑀬𑀢𑀺, 𑀲𑀲𑁆𑀲𑀢𑀸𑀤𑀺𑀆𑀓𑀸𑀭𑁂𑀦 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀅𑀪𑀺𑀦𑀺𑀭𑁄𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀓𑁆𑀓𑁄𑀢𑀺 𑀆𑀓𑁄𑀝𑀦𑀮𑀓𑁆𑀔𑀡𑁄 𑀯𑀺𑀦𑀺𑀘𑁆𑀙𑀬𑀮𑀓𑁆𑀔𑀡𑁄 𑀯𑀸 𑀤𑀺𑀝𑁆𑀞𑀺𑀝𑁆𑀞𑀸𑀦𑀪𑀽𑀢𑁄 𑀯𑀺𑀢𑀓𑁆𑀓𑁄. 𑀯𑀻𑀫𑀁𑀲𑀸 𑀦𑀸𑀫 𑀯𑀺𑀘𑀸𑀭𑀡𑀸, 𑀲𑀸 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀧𑀜𑁆𑀜𑀸𑀧𑀢𑀺𑀭𑀽𑀧𑀓𑁄 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄, 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁄 𑀯𑀸 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄, 𑀧𑀼𑀩𑁆𑀩𑀪𑀸𑀕𑁂 𑀯𑀸 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀢𑁂𑀦𑁂𑀯𑀸𑀳 ‘‘𑀢𑀼𑀮𑀦𑀸 𑀭𑀼𑀘𑁆𑀘𑀦𑀸 𑀔𑀫𑀦𑀸’’𑀢𑀺. 𑀧𑀭𑀺𑀬𑀸𑀳𑀦𑀦𑀁 𑀯𑀺𑀢𑀓𑁆𑀓𑀲𑁆𑀲 𑀆𑀭𑀫𑁆𑀫𑀡𑀊𑀳𑀦𑀁 𑀏𑀯𑀸𑀢𑀺 𑀆𑀳 ‘‘𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀢𑀓𑁆𑀓𑁂𑀢𑁆𑀯𑀸’’𑀢𑀺. 𑀅𑀦𑀼𑀯𑀺𑀘𑀭𑀺𑀢𑀦𑁆𑀢𑀺 ¶ 𑀯𑀻𑀫𑀁𑀲𑀸𑀬 𑀅𑀦𑀼𑀧𑀯𑀢𑁆𑀢𑀺𑀢𑀁, 𑀯𑀻𑀫𑀁𑀲𑀸𑀦𑀼𑀕𑀢𑁂𑀦 𑀯𑀸 𑀯𑀺𑀘𑀸𑀭𑁂𑀦 𑀅𑀦𑀼𑀫𑀚𑁆𑀚𑀺𑀢𑀁. 𑀧𑀝𑀺 𑀧𑀝𑀺 𑀪𑀸𑀢𑀻𑀢𑀺 𑀧𑀝𑀺𑀪𑀸𑀦𑀁, 𑀬𑀣𑀸𑀲𑀫𑀺𑀳𑀺𑀢𑀸𑀓𑀸𑀭𑀯𑀺𑀲𑁂𑀲𑀯𑀺𑀪𑀸𑀯𑀓𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀧𑀝𑀺𑀪𑀸𑀦𑀢𑁄 𑀚𑀸𑀢𑀁 𑀧𑀝𑀺𑀪𑀸𑀦𑀁, 𑀲𑀬𑀁 𑀅𑀢𑁆𑀢𑀦𑁄 𑀧𑀝𑀺𑀪𑀸𑀦𑀁 𑀲𑀬𑀁 𑀧𑀝𑀺𑀪𑀸𑀦𑀁. 𑀢𑁂𑀦𑁂𑀯𑀸𑀳 ‘‘𑀅𑀢𑁆𑀢𑀦𑁄 𑀧𑀝𑀺𑀪𑀸𑀦𑀫𑀢𑁆𑀢𑀲𑀜𑁆𑀚𑀸𑀢’’𑀦𑁆𑀢𑀺. 𑀫𑀢𑁆𑀢-𑀲𑀤𑁆𑀤𑁂𑀦 𑀯𑀺𑀲𑁂𑀲𑀸𑀥𑀺𑀕𑀫𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑀺.

‘‘𑀅𑀦𑀸𑀕𑀢𑁂𑀧𑀺 ¶ 𑀏𑀯𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀇𑀤𑀁 𑀦 𑀇𑀥𑀸𑀥𑀺𑀧𑁆𑀧𑁂𑀢𑀢𑀓𑁆𑀓𑀻𑀯𑀲𑁂𑀦𑁂𑀯 𑀯𑀼𑀢𑁆𑀢𑀁, 𑀮𑀸𑀪𑀻𑀢𑀓𑁆𑀓𑀺𑀦𑁄 𑀏𑀯𑀫𑁆𑀧𑀺 𑀲𑀫𑁆𑀪𑀯𑀢𑀻𑀢𑀺 𑀲𑀫𑁆𑀪𑀯𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀁 𑀓𑀺𑀜𑁆𑀘𑀺 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀁 𑀭𑀽𑀧𑀸𑀤𑀺 𑀲𑀼𑀔𑀸𑀤𑀺 𑀘 𑀇𑀥 𑀮𑀩𑁆𑀪𑀢𑀻𑀢𑀺 𑀮𑀸𑀪𑁄, 𑀦 𑀛𑀸𑀦𑀸𑀤𑀺𑀯𑀺𑀲𑁂𑀲𑁄. ‘‘𑀏𑀯𑀁 𑀲𑀢𑀺 𑀇𑀤𑀁 𑀳𑁄𑀢𑀻’’𑀢𑀺 𑀅𑀦𑀺𑀘𑁆𑀘𑁂𑀲𑀼 𑀪𑀸𑀯𑁂𑀲𑀼 𑀅𑀜𑁆𑀜𑁄 𑀓𑀭𑁄𑀢𑀺, 𑀅𑀜𑁆𑀜𑁄 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀆𑀧𑀚𑁆𑀚𑀢𑀺, 𑀢𑀣𑀸 𑀘 𑀲𑀢𑀺 𑀓𑀢𑀲𑁆𑀲 𑀯𑀺𑀦𑀸𑀲𑁄, 𑀅𑀓𑀢𑀲𑁆𑀲 𑀘 𑀅𑀩𑁆𑀪𑀸𑀕𑀫𑁄 𑀲𑀺𑀬𑀸. 𑀦𑀺𑀘𑁆𑀘𑁂𑀲𑀼 𑀧𑀦 𑀪𑀸𑀯𑁂𑀲𑀼 𑀬𑁄 𑀓𑀭𑁄𑀢𑀺, 𑀲𑁄 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀦 𑀤𑁄𑀲𑁄 𑀆𑀧𑀚𑁆𑀚𑀢𑀻𑀢𑀺 𑀢𑀓𑁆𑀓𑀺𑀓𑀲𑁆𑀲 𑀬𑀼𑀢𑁆𑀢𑀺𑀕𑀯𑁂𑀲𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀺.

𑀢𑀓𑁆𑀓𑀫𑀢𑁆𑀢𑁂𑀦𑁂𑀯𑀸𑀢𑀺 𑀆𑀕𑀫𑀸𑀥𑀺𑀕𑀫𑀸𑀤𑀻𑀦𑀁 𑀅𑀦𑀼𑀲𑁆𑀲𑀯𑀸𑀤𑀻𑀦𑀜𑁆𑀘 𑀅𑀪𑀸𑀯𑀸 𑀲𑀼𑀤𑁆𑀥𑀢𑀓𑁆𑀓𑁂𑀦𑁂𑀯. 𑀦𑀦𑀼 𑀘 𑀯𑀺𑀲𑁂𑀲𑀮𑀸𑀪𑀺𑀦𑁄𑀧𑀺 𑀲𑀲𑁆𑀲𑀢𑀯𑀸𑀤𑀺𑀦𑁄 𑀅𑀢𑁆𑀢𑀦𑁄 𑀯𑀺𑀲𑁂𑀲𑀸𑀥𑀺𑀕𑀫𑀳𑁂𑀢𑀼 𑀅𑀦𑁂𑀓𑁂𑀲𑀼 𑀚𑀸𑀢𑀺𑀲𑀢𑀲𑀳𑀲𑁆𑀲𑁂𑀲𑀼 𑀤𑀲𑀲𑀼 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑁂𑀲𑀼 𑀘𑀢𑁆𑀢𑀸𑀮𑀻𑀲𑀸𑀬 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑁂𑀲𑀼 𑀬𑀣𑀸𑀦𑀼𑀪𑀽𑀢𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀁 𑀢𑀧𑁆𑀧𑀝𑀺𑀩𑀤𑁆𑀥𑀜𑁆𑀘 ‘‘𑀅𑀢𑁆𑀢𑀸, 𑀮𑁄𑀓𑁄’’𑀢𑀺 𑀘 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀢𑀢𑁄 𑀧𑀼𑀭𑀺𑀫𑀧𑀼𑀭𑀺𑀫𑀢𑀭𑀸𑀲𑀼𑀧𑀺 𑀚𑀸𑀢𑀻𑀲𑀼 𑀢𑀣𑀸𑀪𑀽𑀢𑀲𑁆𑀲 𑀅𑀢𑁆𑀣𑀺𑀢𑀸𑀦𑀼𑀯𑀺𑀢𑀓𑁆𑀓𑀦𑀫𑀼𑀔𑁂𑀦 𑀲𑀩𑁆𑀩𑁂𑀲𑀫𑁆𑀧𑀺 𑀲𑀢𑁆𑀢𑀸𑀦𑀁 𑀢𑀣𑀸𑀪𑀸𑀯𑀸𑀦𑀼𑀯𑀺𑀢𑀓𑁆𑀓𑀦𑀯𑀲𑁂𑀦𑁂𑀯 𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑀺𑀦𑁄 𑀚𑀸𑀢𑀸, 𑀏𑀯𑀜𑁆𑀘 𑀲𑀢𑀺 𑀲𑀩𑁆𑀩𑁄𑀧𑀺 𑀲𑀲𑁆𑀲𑀢𑀯𑀸𑀤𑀻 𑀅𑀦𑀼𑀲𑁆𑀲𑀼𑀢𑀺𑀚𑀸𑀢𑀺𑀲𑁆𑀲𑀭𑀢𑀓𑁆𑀓𑀺𑀓𑀸 𑀯𑀺𑀬 𑀅𑀢𑁆𑀢𑀦𑁄 𑀉𑀧𑀮𑀤𑁆𑀥𑀯𑀢𑁆𑀣𑀼𑀦𑀺𑀩𑀦𑁆𑀥𑀦𑁂𑀦 𑀢𑀓𑁆𑀓𑀦𑁂𑀦 𑀧𑀯𑀢𑁆𑀢𑀯𑀸𑀤𑀢𑁆𑀢𑀸 𑀢𑀓𑁆𑀓𑀻𑀧𑀓𑁆𑀔𑁂𑀬𑁂𑀯 𑀢𑀺𑀝𑁆𑀞𑁂𑀬𑁆𑀬, 𑀅𑀯𑀲𑁆𑀲𑀜𑁆𑀘 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀢𑀓𑁆𑀓𑀦𑀫𑀺𑀘𑁆𑀙𑀺𑀢𑀩𑁆𑀩𑀁 ¶ , 𑀅𑀜𑁆𑀜𑀣𑀸 𑀯𑀺𑀲𑁂𑀲𑀮𑀸𑀪𑀻 𑀲𑀲𑁆𑀲𑀢𑀯𑀸𑀤𑀻 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀧𑀓𑁆𑀔𑀁, 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀧𑀓𑁆𑀔𑀁 𑀯𑀸 𑀪𑀚𑁂𑀬𑁆𑀬𑀸𑀢𑀺 ¶ ? 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁, 𑀬𑀲𑁆𑀫𑀸 𑀯𑀺𑀲𑁂𑀲𑀮𑀸𑀪𑀻𑀦𑀁 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀤𑀻𑀖𑀤𑀻𑀖𑀢𑀭𑀤𑀻𑀖𑀢𑀫𑀓𑀸𑀮𑀸𑀦𑀼𑀲𑁆𑀲𑀭𑀡𑀁 𑀲𑀲𑁆𑀲𑀢𑀕𑁆𑀕𑀸𑀳𑀲𑁆𑀲 𑀅𑀲𑀸𑀥𑀸𑀭𑀡𑀓𑀸𑀭𑀡𑀁. 𑀢𑀣𑀸 𑀳𑀺 ‘‘𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀸𑀫𑀺. 𑀇𑀫𑀺𑀦𑀸𑀫𑀳𑀫𑁂𑀢𑀁 𑀚𑀸𑀦𑀸𑀫𑀻’’𑀢𑀺 𑀅𑀦𑀼𑀲𑁆𑀲𑀭𑀡𑀫𑁂𑀯 𑀧𑀥𑀸𑀦𑀓𑀸𑀭𑀡𑀪𑀸𑀯𑁂𑀦 𑀤𑀲𑁆𑀲𑀺𑀢𑀁. 𑀬𑀁 𑀧𑀦 𑀢𑀲𑁆𑀲 ‘‘𑀇𑀫𑀺𑀦𑀸𑀫𑀳𑀫𑁂𑀢𑀁 𑀚𑀸𑀦𑀸𑀫𑀻’’𑀢𑀺 𑀧𑀯𑀢𑁆𑀢𑀁 𑀢𑀓𑁆𑀓𑀦𑀁, 𑀦 𑀢𑀁 𑀇𑀥 𑀧𑀥𑀸𑀦𑀁 𑀅𑀦𑀼𑀲𑁆𑀲𑀭𑀡𑀁 𑀧𑀢𑀺 𑀢𑀲𑁆𑀲 𑀅𑀧𑁆𑀧𑀥𑀸𑀦𑀪𑀽𑀢𑀢𑁆𑀢𑀸. 𑀬𑀤𑀺 𑀏𑀯𑀁 𑀅𑀦𑀼𑀲𑁆𑀲𑀯𑀸𑀤𑀻𑀦𑀫𑁆𑀧𑀺 𑀧𑀥𑀸𑀦𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀘𑁂? 𑀦, 𑀢𑁂𑀲𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀅𑀪𑀸𑀯𑁂𑀦 𑀢𑀓𑁆𑀓𑀧𑀥𑀸𑀦𑀢𑁆𑀢𑀸, 𑀧𑀥𑀸𑀦𑀓𑀸𑀭𑀡𑁂𑀦 𑀘 𑀦𑀺𑀤𑁆𑀤𑁂𑀲𑁄 𑀦𑀺𑀭𑀼𑀴𑁆𑀳𑁄 𑀲𑀸𑀲𑀦𑁂 𑀮𑁄𑀓𑁂 𑀘 𑀬𑀣𑀸 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀬𑀯𑀗𑁆𑀓𑀼𑀭𑁄’’𑀢𑀺 𑀘.

𑀅𑀣 𑀯𑀸 𑀯𑀺𑀲𑁂𑀲𑀸𑀥𑀺𑀕𑀫𑀦𑀺𑀩𑀦𑁆𑀥𑀦𑀭𑀳𑀺𑀢𑀲𑁆𑀲 𑀢𑀓𑁆𑀓𑀦𑀲𑁆𑀲 𑀯𑀺𑀲𑀼𑀁 𑀲𑀲𑁆𑀲𑀢𑀕𑁆𑀕𑀸𑀳𑁂 𑀓𑀸𑀭𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀺𑀲𑁂𑀲𑀸𑀥𑀺𑀕𑀫𑁄 𑀯𑀺𑀲𑀼𑀁 𑀲𑀲𑁆𑀲𑀢𑀕𑁆𑀕𑀸𑀳𑀓𑀸𑀭𑀡𑀁 𑀯𑀢𑁆𑀢𑀩𑁆𑀩𑁄 ¶ , 𑀲𑁄 𑀘 𑀫𑀦𑁆𑀤𑀫𑀚𑁆𑀛𑀢𑀺𑀓𑁆𑀔𑀧𑀜𑁆𑀜𑀸𑀯𑀲𑁂𑀦 𑀢𑀺𑀯𑀺𑀥𑁄𑀢𑀺 𑀪𑀕𑀯𑀢𑀸 𑀲𑀩𑁆𑀩𑀢𑀓𑁆𑀓𑀺𑀦𑁄 𑀢𑀓𑁆𑀓𑀻𑀪𑀸𑀯𑀲𑀸𑀫𑀜𑁆𑀜𑁂𑀦 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀘𑀢𑀼𑀥𑀸 𑀯𑀯𑀢𑁆𑀣𑀸𑀧𑀺𑀢𑁄 𑀲𑀲𑁆𑀲𑀢𑀯𑀸𑀤𑁄. 𑀬𑀤𑀺𑀧𑀺 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀢𑀓𑁆𑀓𑀺𑀓𑀸𑀦𑀁 𑀯𑀺𑀬 𑀫𑀦𑁆𑀤𑀧𑀜𑁆𑀜𑀸𑀤𑀻𑀦𑀫𑁆𑀧𑀺 𑀳𑀻𑀦𑀸𑀤𑀺𑀯𑀲𑁂𑀦 𑀅𑀦𑁂𑀓𑀪𑁂𑀤𑀲𑀩𑁆𑀪𑀸𑀯𑀢𑁄 𑀯𑀺𑀲𑁂𑀲𑀮𑀸𑀪𑀻𑀦𑀫𑁆𑀧𑀺 𑀩𑀳𑀼𑀥𑀸 𑀪𑁂𑀤𑁄 𑀲𑀫𑁆𑀪𑀯𑀢𑀺, 𑀲𑀩𑁆𑀩𑁂 𑀧𑀦 𑀯𑀺𑀲𑁂𑀲𑀮𑀸𑀪𑀺𑀦𑁄 𑀫𑀦𑁆𑀤𑀧𑀜𑁆𑀜𑀸𑀤𑀺𑀯𑀲𑁂𑀦 𑀢𑀬𑁄 𑀭𑀸𑀲𑀻 𑀓𑀢𑁆𑀯𑀸 𑀢𑀢𑁆𑀣 𑀉𑀓𑁆𑀓𑀝𑁆𑀞𑀯𑀲𑁂𑀦 𑀅𑀦𑁂𑀓𑀚𑀸𑀢𑀺𑀲𑀢𑀲𑀳𑀲𑁆𑀲𑀤𑀲𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀘𑀢𑁆𑀢𑀸𑀭𑀻𑀲𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸𑀦𑀼𑀲𑁆𑀲𑀭𑀡𑁂𑀦 𑀅𑀬𑀁 𑀯𑀺𑀪𑀸𑀕𑁄 𑀯𑀼𑀢𑁆𑀢𑁄. 𑀢𑀻𑀲𑀼𑀧𑀺 𑀭𑀸𑀲𑀻𑀲𑀼 𑀬𑁂 𑀳𑀻𑀦𑀫𑀚𑁆𑀛𑀧𑀜𑁆𑀜𑀸, 𑀢𑁂 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀢𑁄 𑀊𑀦𑀓𑀫𑁂𑀯 𑀅𑀦𑀼𑀲𑁆𑀲𑀭𑀦𑁆𑀢𑀺. 𑀬𑁂 𑀧𑀦 𑀢𑀢𑁆𑀣 𑀉𑀓𑁆𑀓𑀝𑁆𑀞𑀧𑀜𑁆𑀜𑀸, 𑀢𑁂 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀸𑀦𑀼𑀲𑁆𑀲𑀭𑀦𑁆𑀢𑀻𑀢𑀺 𑀏𑀯𑀁 𑀧𑀦𑀸𑀬𑀁 𑀤𑁂𑀲𑀦𑀸. 𑀢𑀲𑁆𑀫𑀸 𑀅𑀜𑁆𑀜𑀢𑀭𑀪𑁂𑀤𑀲𑀗𑁆𑀕𑀳𑀯𑀲𑁂𑀦𑁂𑀯 ¶ 𑀪𑀕𑀯𑀢𑀸 𑀘𑀢𑁆𑀢𑀸𑀭𑀺𑀝𑁆𑀞𑀸𑀦𑀸𑀦𑀺 𑀯𑀺𑀪𑀢𑁆𑀢𑀸𑀦𑀻𑀢𑀺 𑀯𑀯𑀢𑁆𑀣𑀺𑀢𑀸 𑀲𑀲𑁆𑀲𑀢𑀯𑀸𑀤𑀻𑀦𑀁 𑀘𑀢𑀼𑀩𑁆𑀩𑀺𑀥𑀢𑀸. 𑀦 𑀳𑀺 𑀇𑀥 𑀲𑀸𑀯𑀲𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀥𑀫𑁆𑀫𑀭𑀸𑀚𑀸.

𑁩𑁫. ‘‘𑀅𑀜𑁆𑀜𑀢𑀭𑁂𑀦𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀓𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀯𑀸-𑀲𑀤𑁆𑀤𑀲𑁆𑀲 𑀧𑀦 𑀅𑀦𑀺𑀬𑀫𑀢𑁆𑀣𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀤𑁆𑀯𑀻𑀳𑀺 𑀯𑀸 𑀢𑀻𑀳𑀺 𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀬𑀣𑀸𑀭𑀳𑀁 𑀏𑀓𑀘𑁆𑀘𑀁 𑀏𑀓𑀘𑁆𑀘𑀲𑁆𑀲 𑀧𑀜𑁆𑀜𑀸𑀧𑀦𑁂 𑀲𑀳𑀓𑀸𑀭𑀻𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀁 𑀧𑀦𑁂𑀢𑀸𑀦𑀺 𑀯𑀢𑁆𑀣𑀽𑀦𑀺 𑀅𑀪𑀺𑀦𑀺𑀯𑁂𑀲𑀲𑁆𑀲 𑀳𑁂𑀢𑀼, 𑀉𑀤𑀸𑀳𑀼 𑀧𑀢𑀺𑀝𑁆𑀞𑀸𑀧𑀦𑀲𑁆𑀲. 𑀓𑀺𑀜𑁆𑀘𑁂𑀢𑁆𑀣 𑀬𑀤𑀺 𑀢𑀸𑀯 𑀅𑀪𑀺𑀦𑀺𑀯𑁂𑀲𑀲𑁆𑀲, 𑀓𑀲𑁆𑀫𑀸 𑀅𑀦𑀼𑀲𑁆𑀲𑀭𑀡𑀢𑀓𑁆𑀓𑀦𑀸𑀦𑀺𑀬𑁂𑀯 𑀕𑀳𑀺𑀢𑀸𑀦𑀺, 𑀦 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀸𑀤𑀬𑁄. 𑀢𑀣𑀸𑀳𑀺 𑀯𑀺𑀧𑀭𑀻𑀢𑀲𑀜𑁆𑀜𑀸 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀅𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀸𑀤𑀻𑀦𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀧𑀯𑀢𑁆𑀢𑀦𑀝𑁆𑀞𑀸𑀦𑀸𑀦𑀺. 𑀅𑀣 𑀧𑀢𑀺𑀝𑁆𑀞𑀸𑀧𑀦𑀲𑁆𑀲 𑀅𑀥𑀺𑀕𑀫𑀬𑀼𑀢𑁆𑀢𑀺𑀬𑁄 𑀯𑀺𑀬 𑀆𑀕𑀫𑁄𑀧𑀺 𑀯𑀢𑁆𑀣𑀼𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑁄, 𑀉𑀪𑀬𑀢𑁆𑀣𑀸𑀧𑀺 ‘‘𑀦𑀢𑁆𑀣𑀺 𑀇𑀢𑁄 𑀩𑀳𑀺𑀤𑁆𑀥𑀸’’𑀢𑀺 𑀯𑀘𑀦𑀁 𑀦 𑀬𑀼𑀚𑁆𑀚𑀢𑀻𑀢𑀺? 𑀦. 𑀓𑀲𑁆𑀫𑀸? 𑀅𑀪𑀺𑀦𑀺𑀯𑁂𑀲𑀧𑀓𑁆𑀔𑁂 𑀢𑀸𑀯 𑀅𑀬𑀁 𑀤𑀺𑀝𑁆𑀞𑀺𑀕𑀢𑀺𑀓𑁄 ¶ 𑀅𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑁂𑀳𑀺 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀯𑀺𑀧𑀮𑁆𑀮𑀸𑀲𑀲𑀜𑁆𑀜𑁄 𑀭𑀽𑀧𑀸𑀤𑀺𑀥𑀫𑁆𑀫𑀸𑀦𑀁 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀦𑀲𑀪𑀸𑀯𑀲𑁆𑀲 𑀅𑀦𑀯𑀩𑁄𑀥𑀢𑁄 𑀥𑀫𑁆𑀫𑀬𑀼𑀢𑁆𑀢𑀺𑀁 𑀅𑀢𑀺𑀥𑀸𑀯𑀦𑁆𑀢𑁄 𑀏𑀓𑀢𑁆𑀢𑀦𑀬𑀁 𑀫𑀺𑀘𑁆𑀙𑀸 𑀕𑀳𑁂𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀸𑀦𑀼𑀲𑁆𑀲𑀭𑀡𑀢𑀓𑁆𑀓𑁂𑀳𑀺 𑀔𑀦𑁆𑀥𑁂𑀲𑀼 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 (𑀤𑀻. 𑀦𑀺. 𑁧.𑁩𑁧) 𑀅𑀪𑀺𑀦𑀺𑀯𑁂𑀲𑀁 𑀚𑀦𑁂𑀲𑀺. 𑀇𑀢𑀺 𑀆𑀲𑀦𑁆𑀦𑀓𑀸𑀭𑀡𑀢𑁆𑀢𑀸, 𑀧𑀥𑀸𑀦𑀓𑀸𑀭𑀡𑀢𑁆𑀢𑀸, 𑀢𑀕𑁆𑀕𑀳𑀡𑁂𑀦𑁂𑀯 𑀘 𑀇𑀢𑀭𑁂𑀲𑀫𑁆𑀧𑀺 𑀕𑀳𑀺𑀢𑀢𑁆𑀢𑀸 𑀅𑀦𑀼𑀲𑁆𑀲𑀭𑀡𑀢𑀓𑁆𑀓𑀦𑀸𑀦𑀺𑀬𑁂𑀯 𑀇𑀥 𑀕𑀳𑀺𑀢𑀸𑀦𑀺. 𑀧𑀢𑀺𑀝𑁆𑀞𑀸𑀧𑀦𑀧𑀓𑁆𑀔𑁂 𑀧𑀦 𑀆𑀕𑀫𑁄𑀧𑀺 𑀬𑀼𑀢𑁆𑀢𑀺𑀧𑀓𑁆𑀔𑁂𑀬𑁂𑀯 𑀞𑀺𑀢𑁄 𑀯𑀺𑀲𑁂𑀲𑀢𑁄 𑀩𑀸𑀳𑀺𑀭𑀓𑀸𑀦𑀁 𑀢𑀓𑁆𑀓𑀕𑀸𑀳𑀺𑀪𑀸𑀯𑀢𑁄𑀢𑀺 𑀅𑀦𑀼𑀲𑁆𑀲𑀭𑀡𑀢𑀓𑁆𑀓𑀦𑀸𑀦𑀺𑀬𑁂𑀯 ¶ 𑀤𑀺𑀝𑁆𑀞𑀺𑀬𑀸 𑀯𑀢𑁆𑀣𑀼𑀪𑀸𑀯𑁂𑀦 𑀕𑀳𑀺𑀢𑀸𑀦𑀺. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀤𑀼𑀯𑀺𑀥𑀁 𑀮𑀓𑁆𑀔𑀡𑀁 𑀧𑀭𑀫𑀢𑁆𑀣𑀥𑀫𑁆𑀫𑀸𑀦𑀁 𑀲𑀪𑀸𑀯𑀮𑀓𑁆𑀔𑀡𑀁 𑀲𑀸𑀫𑀜𑁆𑀜𑀮𑀓𑁆𑀔𑀡𑀜𑁆𑀘𑀸𑀢𑀺. 𑀢𑀢𑁆𑀣 𑀲𑀪𑀸𑀯𑀮𑀓𑁆𑀔𑀡𑀸𑀯𑀩𑁄𑀥𑁄 𑀧𑀘𑁆𑀘𑀓𑁆𑀔𑀜𑀸𑀡𑀁, 𑀲𑀸𑀫𑀜𑁆𑀜𑀮𑀓𑁆𑀔𑀡𑀸𑀯𑀩𑁄𑀥𑁄 ¶ 𑀅𑀦𑀼𑀫𑀸𑀦𑀜𑀸𑀡𑀁, 𑀆𑀕𑀫𑁄 𑀘 𑀲𑀼𑀢𑀫𑀬𑀸𑀬 𑀧𑀜𑁆𑀜𑀸𑀬 𑀲𑀸𑀥𑀦𑀢𑁄 𑀅𑀦𑀼𑀫𑀸𑀦𑀜𑀸𑀡𑀫𑁂𑀯 𑀆𑀯𑀳𑀢𑀺, 𑀲𑀼𑀢𑀸𑀦𑀁 𑀧𑀦 𑀥𑀫𑁆𑀫𑀸𑀦𑀁 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀦𑁂𑀦 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀁 𑀞𑀺𑀢𑁄 𑀘𑀺𑀦𑁆𑀢𑀸𑀫𑀬𑀁 𑀧𑀜𑁆𑀜𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀪𑀸𑀯𑀦𑀸𑀬 𑀧𑀘𑁆𑀘𑀓𑁆𑀔𑀜𑀸𑀡𑀁 𑀅𑀥𑀺𑀕𑀘𑁆𑀙𑀢𑀻𑀢𑀺 𑀏𑀯𑀁 𑀆𑀕𑀫𑁄𑀧𑀺 𑀢𑀓𑁆𑀓𑀯𑀺𑀲𑀬𑀁 𑀦𑀸𑀢𑀺𑀓𑁆𑀓𑀫𑀢𑀻𑀢𑀺 𑀢𑀕𑁆𑀕𑀳𑀡𑁂𑀦 𑀕𑀳𑀺𑀢𑁄𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀅𑀝𑁆𑀞𑀓𑀣𑀸𑀬𑀁 𑀅𑀦𑀼𑀲𑁆𑀲𑀼𑀢𑀺𑀢𑀓𑁆𑀓𑀕𑁆𑀕𑀳𑀡𑁂𑀦 𑀯𑀺𑀪𑀸𑀯𑀺𑀢𑁄𑀢𑀺 𑀬𑀼𑀢𑁆𑀢𑀁 𑀏𑀯𑀺𑀤𑀁 ‘‘𑀦𑀢𑁆𑀣𑀺 𑀇𑀢𑁄 𑀩𑀳𑀺𑀤𑁆𑀥𑀸’’𑀢𑀺. ‘‘𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀯𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺, 𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑁧.𑁩𑁦) 𑀘 𑀯𑀘𑀦𑀢𑁄 𑀧𑀢𑀺𑀝𑁆𑀞𑀸𑀧𑀦𑀯𑀢𑁆𑀣𑀽𑀦𑀺 𑀇𑀥𑀸𑀥𑀺𑀧𑁆𑀧𑁂𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁩𑁬. 𑀤𑀺𑀝𑁆𑀞𑀺𑀬𑁂𑀯 𑀤𑀺𑀝𑁆𑀞𑀺𑀝𑁆𑀞𑀸𑀦𑀁 𑀧𑀭𑀫𑀯𑀚𑁆𑀚𑀢𑀸𑀬 𑀅𑀦𑁂𑀓𑀯𑀺𑀳𑀺𑀢𑀸𑀦𑀁 𑀅𑀦𑀢𑁆𑀣𑀸𑀦𑀁 𑀳𑁂𑀢𑀼𑀪𑀸𑀯𑀢𑁄. 𑀬𑀣𑀸𑀳 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸𑀳𑀁 𑀪𑀺𑀓𑁆𑀔𑀯𑁂 𑀯𑀚𑁆𑀚𑀁 𑀯𑀤𑀸𑀫𑀻’’𑀢𑀺 (𑀅. 𑀦𑀺. 𑁧.𑁩𑁧𑁦) ‘‘𑀬𑀣𑀸𑀳𑀸’’𑀢𑀺𑀆𑀤𑀺𑀦𑀸 𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀴𑀺𑀬𑀸 (𑀧𑀝𑀺. 𑀫. 𑁧.𑁧𑁨𑁪) 𑀤𑀺𑀝𑁆𑀞𑀺𑀬𑀸 𑀞𑀸𑀦𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀔𑀦𑁆𑀥𑀸𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁 𑀆𑀭𑀫𑁆𑀫𑀡𑀝𑁆𑀞𑁂𑀦 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁩.𑁮𑁧, 𑁩𑁪𑁫) 𑀯𑀘𑀦𑀢𑁄. 𑀅𑀯𑀺𑀚𑁆𑀚𑀸𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁 𑀉𑀧𑀦𑀺𑀲𑁆𑀲𑀬𑀸𑀤𑀺𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄. 𑀬𑀣𑀸𑀳 ‘‘𑀅𑀲𑁆𑀲𑀼𑀢𑀯𑀸 𑀪𑀺𑀓𑁆𑀔𑀯𑁂 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄’’𑀢𑀺𑀆𑀤𑀺 (𑀫. 𑀦𑀺. 𑁧.𑁨; 𑀧𑀝𑀺. 𑀫. 𑁧.𑁧𑁩𑁦). 𑀨𑀲𑁆𑀲𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀬𑀣𑀸 𑀘𑀸𑀳 ‘‘𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸, (𑀤𑀻. 𑀦𑀺. 𑁧.𑁧𑁧𑁮 𑀆𑀤𑀬𑁄) 𑀨𑀼𑀲𑁆𑀲 𑀨𑀼𑀲𑁆𑀲 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑁧.𑁧𑁪𑁪) 𑀘 ¶ . 𑀲𑀜𑁆𑀜𑀸𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀯𑀼𑀢𑁆𑀢𑀜𑁆𑀘𑁂𑀢𑀁 ‘‘𑀲𑀜𑁆𑀜𑀸𑀦𑀺𑀤𑀸𑀦𑀸 𑀳𑀺 𑀧𑀧𑀜𑁆𑀘𑀲𑀗𑁆𑀔𑀸, (𑀲𑀼. 𑀦𑀺. 𑁮𑁮𑁦; 𑀫𑀳𑀸𑀦𑀺. 𑁧𑁦𑁯) 𑀧𑀣𑀯𑀺𑀢𑁄 𑀲𑀜𑁆𑀜𑀢𑁆𑀯𑀸’’𑀢𑀺 (𑀫. 𑀦𑀺. 𑁧.𑁨) 𑀘 𑀆𑀤𑀺. 𑀯𑀺𑀢𑀓𑁆𑀓𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀢𑀓𑁆𑀓𑀜𑁆𑀘 𑀤𑀺𑀝𑁆𑀞𑀻𑀲𑀼 𑀧𑀓𑀧𑁆𑀧𑀬𑀺𑀢𑁆𑀯𑀸, 𑀲𑀘𑁆𑀘𑀁 𑀫𑀼𑀲𑀸𑀢𑀺 𑀤𑁆𑀯𑀬𑀥𑀫𑁆𑀫𑀫𑀸𑀳𑀽’’𑀢𑀺 (𑀲𑀼. 𑀦𑀺. 𑁮𑁯𑁨) ‘‘𑀢𑀓𑁆𑀓𑀻 𑀳𑁄𑀢𑀺 𑀯𑀻𑀫𑀁𑀲𑀻’’𑀢𑀺 (𑀤𑀻. 𑀦𑀺. 𑁧.𑁩𑁪) 𑀘 𑀆𑀤𑀺. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁. 𑀢𑁂𑀦𑀸𑀳 𑀪𑀕𑀯𑀸 ‘‘𑀢𑀲𑁆𑀲 𑀏𑀯𑀁 𑀅𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑁄 𑀙𑀦𑁆𑀦𑀁 𑀤𑀺𑀝𑁆𑀞𑀻𑀦𑀁 𑀅𑀜𑁆𑀜𑀢𑀭𑀸 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺. ‘𑀅𑀢𑁆𑀣𑀺 𑀫𑁂 𑀅𑀢𑁆𑀢𑀸’𑀢𑀺 𑀯𑀸 𑀅𑀲𑁆𑀲 𑀲𑀘𑁆𑀘𑀢𑁄 𑀣𑁂𑀢𑀢𑁄 ¶ 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺 (𑀫. 𑀦𑀺. 𑁧.𑁧𑁯). 𑀲𑀫𑀼𑀝𑁆𑀞𑀸𑀢𑀺 𑀏𑀢𑁂𑀦𑀸𑀢𑀺 𑀲𑀫𑀼𑀝𑁆𑀞𑀸𑀦𑀁 𑀲𑀫𑀼𑀝𑁆𑀞𑀸𑀦𑀪𑀸𑀯𑁄 𑀲𑀫𑀼𑀝𑁆𑀞𑀸𑀦𑀝𑁆𑀞𑁄. 𑀧𑀯𑀢𑁆𑀢𑀺𑀢𑀸𑀢𑀺 𑀧𑀭𑀲𑀦𑁆𑀢𑀸𑀦𑁂𑀲𑀼 𑀉𑀧𑁆𑀧𑀸𑀤𑀺𑀢𑀸. 𑀧𑀭𑀺𑀦𑀺𑀝𑁆𑀞𑀸𑀧𑀺𑀢𑀸𑀢𑀺 𑀅𑀪𑀺𑀦𑀺𑀯𑁂𑀲𑀲𑁆𑀲 𑀧𑀭𑀺𑀬𑁄𑀲𑀸𑀦𑀁 ¶ 𑀫𑀢𑁆𑀣𑀓𑀁 𑀧𑀸𑀧𑀺𑀢𑀸𑀢𑀺 𑀅𑀢𑁆𑀣𑁄. ‘‘𑀆𑀭𑀫𑁆𑀫𑀡𑀯𑀲𑁂𑀦𑀸’’𑀢𑀺 𑀅𑀝𑁆𑀞𑀲𑀼 𑀤𑀺𑀝𑁆𑀞𑀺𑀝𑁆𑀞𑀸𑀦𑁂𑀲𑀼 𑀔𑀦𑁆𑀥𑁂 𑀲𑀦𑁆𑀥𑀸𑀬𑀸𑀳. 𑀧𑀯𑀢𑁆𑀢𑀦𑀯𑀲𑁂𑀦𑀸𑀢𑀺 𑀅𑀯𑀺𑀚𑁆𑀚𑀸𑀤𑀬𑁄. 𑀆𑀲𑁂𑀯𑀦𑀯𑀲𑁂𑀦𑀸𑀢𑀺 𑀧𑀸𑀧𑀫𑀺𑀢𑁆𑀢𑀧𑀭𑀢𑁄𑀖𑁄𑀲𑀸𑀤𑀻𑀦𑀫𑁆𑀧𑀺 𑀲𑁂𑀯𑀦𑀁 𑀮𑀩𑁆𑀪𑀢𑀺𑀬𑁂𑀯. 𑀅𑀣 𑀯𑀸 𑀏𑀯𑀁𑀕𑀢𑀺𑀓𑀸𑀢𑀺 𑀏𑀯𑀁𑀕𑀫𑀦𑀸, 𑀏𑀯𑀁𑀦𑀺𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀫𑁂 𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀸 𑀤𑀺𑀝𑁆𑀞𑀺𑀝𑁆𑀞𑀸𑀦𑀸 𑀏𑀯𑀁 𑀧𑀭𑀫𑀢𑁆𑀣𑀢𑁄 𑀅𑀲𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀲𑁆𑀲𑀢𑀪𑀸𑀯𑀜𑁆𑀘𑀲𑁆𑀲 𑀅𑀚𑁆𑀛𑀸𑀭𑁄𑀧𑁂𑀢𑁆𑀯𑀸 𑀕𑀳𑀺𑀢𑀸, 𑀧𑀭𑀸𑀫𑀝𑁆𑀞𑀸 𑀘 𑀩𑀸𑀮𑀮𑀧𑀦𑀸 𑀬𑀸𑀯 𑀧𑀡𑁆𑀟𑀺𑀢𑀸 𑀦 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀺, 𑀢𑀸𑀯 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺. 𑀧𑀡𑁆𑀟𑀺𑀢𑁂𑀳𑀺 𑀲𑀫𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑀸 𑀧𑀦 𑀅𑀦𑀯𑀝𑁆𑀞𑀺𑀢𑀯𑀢𑁆𑀣𑀼𑀓𑀸 𑀅𑀯𑀺𑀫𑀤𑁆𑀤𑀓𑁆𑀔𑀫𑀸 𑀲𑀽𑀭𑀺𑀬𑀼𑀕𑁆𑀕𑀫𑀦𑁂 𑀉𑀲𑁆𑀲𑀸𑀯𑀩𑀺𑀦𑁆𑀤𑀽 ¶ 𑀯𑀺𑀬 𑀔𑀚𑁆𑀚𑁄𑀧𑀦𑀓𑀸 𑀯𑀺𑀬 𑀘 𑀪𑀺𑀚𑁆𑀚𑀦𑁆𑀢𑀺 𑀯𑀺𑀦𑀲𑁆𑀲𑀦𑁆𑀢𑀺 𑀘𑀸𑀢𑀺.

𑀢𑀢𑁆𑀣𑀸𑀬𑀁 𑀅𑀦𑀼𑀬𑀼𑀜𑁆𑀚𑀦𑁂 𑀲𑀗𑁆𑀔𑁂𑀧𑀓𑀣𑀸 𑁋 𑀬𑀤𑀺 𑀳𑀺 𑀧𑀭𑁂𑀦 𑀧𑀭𑀺𑀓𑀧𑁆𑀧𑀺𑀢𑁄 𑀅𑀢𑁆𑀢𑀸 𑀮𑁄𑀓𑁄 𑀯𑀸 𑀲𑀲𑁆𑀲𑀢𑁄 𑀲𑀺𑀬𑀸, 𑀢𑀲𑁆𑀲 𑀦𑀺𑀩𑁆𑀩𑀺𑀓𑀸𑀭𑀢𑀸𑀬 𑀧𑀼𑀭𑀺𑀫𑀭𑀽𑀧𑀸𑀯𑀺𑀚𑀳𑀦𑀢𑁄 𑀓𑀲𑁆𑀲𑀘𑀺 𑀯𑀺𑀲𑁂𑀲𑀸𑀥𑀸𑀦𑀲𑁆𑀲 𑀓𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀳𑀺𑀢𑀢𑁄 𑀦𑀺𑀯𑀢𑁆𑀢𑀦𑀢𑁆𑀣𑀁, 𑀳𑀺𑀢𑁂 𑀘 𑀧𑀝𑀺𑀧𑀢𑁆𑀢𑀺𑀅𑀢𑁆𑀣𑀁 𑀉𑀧𑀤𑁂𑀲𑁄 𑀏𑀯 𑀦𑀺𑀧𑁆𑀧𑀬𑁄𑀚𑀦𑁄 𑀲𑀺𑀬𑀸 𑀲𑀲𑁆𑀲𑀢𑀯𑀸𑀤𑀺𑀦𑁄, 𑀓𑀣𑀁 𑀯𑀸 𑀲𑁄 𑀉𑀧𑀤𑁂𑀲𑁄 𑀧𑀯𑀢𑁆𑀢𑀻𑀬𑀢𑀺 𑀯𑀺𑀓𑀸𑀭𑀸𑀪𑀸𑀯𑀢𑁄, 𑀏𑀯𑀜𑁆𑀘 𑀅𑀢𑁆𑀢𑀦𑁄 𑀅𑀚𑀝𑀸𑀓𑀸𑀲𑀲𑁆𑀲 𑀯𑀺𑀬 𑀤𑀸𑀦𑀸𑀤𑀺𑀓𑀺𑀭𑀺𑀬𑀸 𑀳𑀺𑀁𑀲𑀸𑀤𑀺𑀓𑀺𑀭𑀺𑀬𑀸 𑀘 𑀦 𑀲𑀫𑁆𑀪𑀯𑀢𑀺. 𑀢𑀣𑀸 𑀲𑀼𑀔𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀦𑀼𑀪𑀯𑀦𑀦𑀺𑀩𑀦𑁆𑀥𑁄 𑀏𑀯 𑀲𑀲𑁆𑀲𑀢𑀯𑀸𑀤𑀺𑀦𑁄 𑀦 𑀬𑀼𑀚𑁆𑀚𑀢𑀺 𑀓𑀫𑁆𑀫𑀩𑀤𑁆𑀥𑀸𑀪𑀸𑀯𑀢𑁄, 𑀚𑀸𑀢𑀺𑀆𑀤𑀻𑀦𑀜𑁆𑀘 𑀅𑀲𑀫𑁆𑀪𑀯𑀢𑁄 𑀓𑀼𑀢𑁄 𑀯𑀺𑀫𑁄𑀓𑁆𑀔𑁄, 𑀅𑀣 𑀧𑀦 𑀥𑀫𑁆𑀫𑀫𑀢𑁆𑀢𑀁 𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀯𑀺𑀦𑀲𑁆𑀲𑀢𑀺 𑀘, 𑀬𑀲𑁆𑀲 𑀯𑀲𑁂𑀦𑀸𑀬𑀁 𑀓𑀺𑀭𑀺𑀬𑀸𑀤𑀺𑀯𑁄𑀳𑀸𑀭𑁄𑀢𑀺 𑀯𑀤𑁂𑀬𑁆𑀬, 𑀏𑀯𑀫𑁆𑀧𑀺 𑀧𑀼𑀭𑀺𑀫𑀭𑀽𑀧𑀸𑀯𑀺𑀚𑀳𑀦𑁂𑀦 𑀅𑀯𑀝𑁆𑀞𑀺𑀢𑀲𑁆𑀲 𑀅𑀢𑁆𑀢𑀦𑁄 𑀥𑀫𑁆𑀫𑀫𑀢𑁆𑀢𑀦𑁆𑀢𑀺 𑀦 𑀲𑀓𑁆𑀓𑀸 𑀲𑀫𑁆𑀪𑀸𑀯𑁂𑀢𑀼𑀁, 𑀢𑁂 𑀯𑀸 𑀧𑀦𑀲𑁆𑀲 𑀥𑀫𑁆𑀫𑀸 𑀅𑀯𑀢𑁆𑀣𑀸𑀪𑀽𑀢𑀸 𑀅𑀜𑁆𑀜𑁂 𑀯𑀸 𑀲𑀺𑀬𑀼𑀁 𑀅𑀦𑀜𑁆𑀜𑁂 𑀯𑀸. 𑀬𑀤𑀺 𑀅𑀜𑁆𑀜𑁂, 𑀦 𑀢𑀸𑀳𑀺 𑀢𑀲𑁆𑀲 𑀉𑀧𑁆𑀧𑀦𑁆𑀦𑀸𑀳𑀺𑀧𑀺 𑀓𑁄𑀘𑀺 𑀯𑀺𑀲𑁂𑀲𑁄 𑀅𑀢𑁆𑀣𑀺. 𑀬𑀸𑀳𑀺 𑀓𑀭𑁄𑀢𑀺 𑀧𑀝𑀺𑀲𑀁𑀯𑁂𑀤𑁂𑀢𑀺 𑀘𑀯𑀢𑀺 𑀉𑀧𑀧𑀚𑁆𑀚𑀢𑀺 𑀘𑀸𑀢𑀺 𑀇𑀘𑁆𑀙𑀺𑀢𑀁, 𑀢𑀲𑁆𑀫𑀸 𑀢𑀤𑀯𑀢𑁆𑀣𑁄 𑀏𑀯 𑀬𑀣𑀸𑀯𑀼𑀢𑁆𑀢𑀤𑁄𑀲𑁄. 𑀓𑀺𑀜𑁆𑀘 𑀥𑀫𑁆𑀫𑀓𑀧𑁆𑀧𑀦𑀸𑀧𑀺 𑀦𑀺𑀭𑀢𑁆𑀣𑀺𑀓𑀸 𑀲𑀺𑀬𑀸, 𑀅𑀣𑀸𑀦𑀜𑁆𑀜𑁂 𑀉𑀧𑁆𑀧𑀸𑀤𑀯𑀺𑀦𑀸𑀲𑀯𑀦𑁆𑀢𑀻𑀳𑀺 𑀅𑀯𑀢𑁆𑀣𑀸𑀳𑀺 𑀅𑀦𑀜𑁆𑀜𑀲𑁆𑀲 𑀅𑀢𑁆𑀢𑀦𑁄 𑀢𑀸𑀲𑀁 𑀯𑀺𑀬 𑀉𑀧𑁆𑀧𑀸𑀤𑀯𑀺𑀦𑀸𑀲𑀲𑀩𑁆𑀪𑀸𑀯𑀢𑁄 𑀓𑀼𑀢𑁄 𑀦𑀺𑀘𑁆𑀘𑀢𑀸𑀯𑀓𑀸𑀲𑁄, 𑀢𑀸𑀲𑀫𑁆𑀧𑀺 𑀯𑀸 𑀅𑀢𑁆𑀢𑀦𑁄 𑀯𑀺𑀬 𑀦𑀺𑀘𑁆𑀘𑀢𑀸𑀢𑀺 𑀩𑀦𑁆𑀥𑀯𑀺𑀫𑁄𑀓𑁆𑀔𑀸𑀦𑀁 𑀅𑀲𑀫𑁆𑀪𑀯𑁄 𑀏𑀯𑀸𑀢𑀺 𑀦 𑀬𑀼𑀚𑁆𑀚𑀢𑀺𑀬𑁂𑀯 𑀲𑀲𑁆𑀲𑀢𑀯𑀸𑀤𑁄. 𑀦 𑀘𑁂𑀢𑁆𑀣 𑀓𑁄𑀘𑀺 𑀯𑀸𑀤𑀻 𑀥𑀫𑁆𑀫𑀸𑀦𑀁 𑀲𑀲𑁆𑀲𑀢𑀪𑀸𑀯𑁂 𑀧𑀭𑀺𑀲𑀼𑀤𑁆𑀥𑀁 𑀬𑀼𑀢𑁆𑀢𑀺𑀁 𑀯𑀢𑁆𑀢𑀼𑀁 𑀲𑀫𑀢𑁆𑀣𑁄, 𑀬𑀼𑀢𑁆𑀢𑀺𑀭𑀳𑀺𑀢𑀜𑁆𑀘 𑀯𑀘𑀦𑀁 ¶ 𑀦 𑀧𑀡𑁆𑀟𑀺𑀢𑀸𑀦𑀁 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀸𑀯 𑀧𑀡𑁆𑀟𑀺𑀢𑀸 𑀦 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀺, 𑀢𑀸𑀯 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻’’𑀢𑀺. 𑀓𑀫𑁆𑀫𑀯𑀲𑁂𑀦 𑀅𑀪𑀺𑀫𑀼𑀔𑁄 𑀲𑀫𑁆𑀧𑀭𑁂𑀢𑀺 𑀏𑀢𑁆𑀣𑀸𑀢𑀺 𑀅𑀪𑀺𑀲𑀫𑁆𑀧𑀭𑀸𑀬𑁄, 𑀧𑀭𑁄𑀮𑁄𑀓𑁄.

‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘𑀸’’𑀢𑀺 ¶ 𑀇𑀤𑀁 𑀇𑀥 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀯𑀺𑀪𑀚𑀺𑀬𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁, 𑀢𑀲𑁆𑀫𑀺𑀁 𑀯𑀸 ¶ 𑀯𑀼𑀢𑁆𑀢𑁂 𑀢𑀤𑀥𑀺𑀝𑁆𑀞𑀸𑀦𑀢𑁄 𑀆𑀲𑀯𑀓𑁆𑀔𑀬𑀜𑀸𑀡𑀁, 𑀢𑀤𑀯𑀺𑀦𑀸𑀪𑀸𑀯𑀢𑁄 𑀲𑀩𑁆𑀩𑀫𑁆𑀧𑀺 𑀯𑀸 𑀪𑀕𑀯𑀢𑁄 𑀤𑀲𑀩𑀮𑀸𑀤𑀺𑀜𑀸𑀡𑀁 𑀕𑀳𑀺𑀢𑀫𑁂𑀯 𑀳𑁄𑀢𑀻𑀢𑀺 𑀓𑀢𑁆𑀯𑀸. 𑀧𑀚𑀸𑀦𑀦𑁆𑀢𑁄𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂, 𑀢𑁂𑀦 ‘‘𑀢𑀜𑁆𑀘𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀘-𑀲𑀤𑁆𑀤𑀢𑁆𑀣𑀫𑀸𑀳. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀁 𑀤𑀺𑀝𑁆𑀞𑀺𑀕𑀢𑀢𑁄 𑀉𑀢𑁆𑀢𑀭𑀺𑀢𑀭𑀁 𑀲𑀸𑀭𑀪𑀽𑀢𑀁 𑀲𑀻𑀮𑀸𑀤𑀺𑀕𑀼𑀡𑀯𑀺𑀲𑁂𑀲𑀫𑁆𑀧𑀺 𑀢𑀣𑀸𑀕𑀢𑁄 𑀦𑀸𑀪𑀺𑀦𑀺𑀯𑀺𑀲𑀢𑀺, 𑀓𑁄 𑀧𑀦 𑀯𑀸𑀤𑁄 𑀯𑀝𑁆𑀝𑀸𑀫𑀺𑀲𑁂𑀢𑀺. ‘‘𑀅𑀳’’𑀦𑁆𑀢𑀺 𑀤𑀺𑀝𑁆𑀞𑀺𑀯𑀲𑁂𑀦 𑀯𑀸 𑀢𑀁 𑀧𑀭𑀸𑀫𑀲𑀦𑀸𑀓𑀸𑀭𑀫𑀸𑀳. 𑀧𑀚𑀸𑀦𑀸𑀫𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀧𑀓𑀸𑀭𑀢𑁆𑀣𑁄, 𑀢𑁂𑀦 ‘‘𑀫𑀫’’𑀦𑁆𑀢𑀺 𑀢𑀡𑁆𑀳𑀸𑀯𑀲𑁂𑀦 𑀧𑀭𑀸𑀫𑀲𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀥𑀫𑁆𑀫𑀲𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀢𑁄 𑀆𑀫𑀲𑀦𑀁 𑀧𑀭𑀸𑀫𑀸𑀲𑁄. 𑀦 𑀳𑀺 𑀢𑀁 𑀅𑀢𑁆𑀣𑀺, 𑀔𑀦𑁆𑀥𑁂𑀲𑀼 𑀬𑀁 ‘‘𑀅𑀳’’𑀦𑁆𑀢𑀺 𑀯𑀸, ‘‘𑀫𑀫’’𑀦𑁆𑀢𑀺 𑀯𑀸 𑀕𑀳𑁂𑀢𑀩𑁆𑀩𑀁 𑀲𑀺𑀬𑀸. 𑀬𑁄 𑀧𑀦 𑀧𑀭𑀸𑀫𑀸𑀲𑁄 𑀢𑀡𑁆𑀳𑀸𑀤𑀬𑁄𑀯, 𑀢𑁂 𑀘 𑀪𑀕𑀯𑀢𑁄 𑀩𑁄𑀥𑀺𑀫𑀽𑀮𑁂𑀬𑁂𑀯 𑀧𑀳𑀻𑀦𑀸𑀢𑀺 𑀆𑀳 ‘‘𑀧𑀭𑀸𑀫𑀸𑀲𑀓𑀺𑀮𑁂𑀲𑀸𑀦’’𑀦𑁆𑀢𑀺𑀆𑀤𑀺. 𑀅𑀧𑀭𑀸𑀫𑀸𑀲𑀢𑁄𑀢𑀺 𑀯𑀸 𑀦𑀺𑀩𑁆𑀩𑀼𑀢𑀺𑀯𑁂𑀤𑀦𑀲𑁆𑀲 𑀳𑁂𑀢𑀼𑀯𑀘𑀦𑀁, ‘‘𑀯𑀺𑀤𑀺𑀢𑀸’’𑀢𑀺 𑀇𑀤𑀁 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀓𑀢𑁆𑀢𑀭𑀺 𑀲𑀸𑀫𑀺𑀯𑀘𑀦𑀁, 𑀅𑀧𑀭𑀸𑀫𑀲𑀦𑀳𑁂𑀢𑀼 𑀧𑀭𑀸𑀫𑀸𑀲𑀭𑀳𑀺𑀢𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀢𑀣𑀸𑀕𑀢𑁂𑀦 𑀲𑀬𑀫𑁂𑀯 𑀅𑀲𑀗𑁆𑀔𑀢𑀥𑀸𑀢𑀼 𑀅𑀥𑀺𑀕𑀢𑀸𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

‘‘𑀬𑀸𑀲𑀼 𑀯𑁂𑀤𑀦𑀸𑀲𑀽’’𑀢𑀺𑀆𑀤𑀺𑀦𑀸 𑀪𑀕𑀯𑀢𑁄 𑀤𑁂𑀲𑀦𑀸𑀯𑀺𑀮𑀸𑀲𑀁 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺 𑀔𑀦𑁆𑀥𑀸𑀬𑀢𑀦𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑀸𑀲𑀼 𑀘𑀢𑀼𑀲𑀘𑁆𑀘𑀤𑁂𑀲𑀦𑀸𑀲𑀼 𑀲𑀫𑁆𑀪𑀯𑀦𑁆𑀢𑀻𑀲𑀼𑀧𑀺 𑀅𑀬𑀁 𑀢𑀣𑀸𑀕𑀢𑀸𑀦𑀁 𑀤𑁂𑀲𑀦𑀸𑀲𑀼 𑀧𑀝𑀺𑀧𑀢𑁆𑀢𑀺, 𑀬𑀁 𑀤𑀺𑀝𑁆𑀞𑀺𑀕𑀢𑀺𑀓𑀸 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀺𑀕𑀳𑀦𑀁 𑀧𑀓𑁆𑀔𑀦𑁆𑀤𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑁂𑀤𑀦𑀸𑀬𑁂𑀯 𑀧𑀭𑀺𑀜𑁆𑀜𑀸𑀬 𑀪𑀽𑀫𑀺𑀤𑀲𑁆𑀲𑀦𑀢𑁆𑀣𑀁 ¶ 𑀉𑀤𑁆𑀥𑀝𑀸. 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀁. 𑀬𑀣𑀸𑀪𑀽𑀢𑀁 𑀯𑀺𑀤𑀺𑀢𑁆𑀯𑀸𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀯𑁂𑀤𑀦𑀸𑀬 𑀲𑀫𑀼𑀤𑀬𑀸𑀤𑀻𑀦𑀺 𑀆𑀭𑀫𑁆𑀫𑀡𑀧𑀝𑀺𑀯𑁂𑀥𑀯𑀲𑁂𑀦 𑀫𑀕𑁆𑀕𑀧𑀜𑁆𑀜𑀸𑀬 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑀯𑀲𑁂𑀦 𑀚𑀸𑀦𑀺𑀢𑁆𑀯𑀸, 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦𑀸𑀢𑀺 ‘‘𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺, 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀫. 𑀦𑀺. 𑁧.𑁪𑁦𑁪; 𑀲𑀁. 𑀦𑀺. 𑁨.𑁨𑁧; 𑀉𑀤𑀸. 𑁧) 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀉𑀧𑁆𑀧𑀸𑀤𑁂𑀦 𑀘𑁂𑀯 𑀫𑀕𑁆𑀕𑁂𑀦 𑀅𑀲𑀫𑀼𑀕𑁆𑀖𑀸𑀢𑁂𑀦 𑀘. 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀦𑁆𑀢𑀺 𑀉𑀧𑁆𑀧𑀸𑀤𑀮𑀓𑁆𑀔𑀡𑀁, 𑀚𑀸𑀢𑀺𑀦𑁆𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀦𑁆𑀦𑀁 𑀮𑀓𑁆𑀔𑀡𑀸𑀦𑀦𑁆𑀢𑀺 𑀏𑀢𑁆𑀣 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀫𑁆𑀧𑀺 𑀉𑀧𑁆𑀧𑀸𑀤𑀮𑀓𑁆𑀔𑀡𑀫𑁂𑀯 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, 𑀬𑀲𑁆𑀫𑀸 𑀧𑀘𑁆𑀘𑀬𑀮𑀓𑁆𑀔𑀡𑀫𑁆𑀧𑀺 𑀮𑀩𑁆𑀪𑀢𑀺𑀬𑁂𑀯, 𑀢𑀣𑀸 𑀘𑁂𑀯 𑀲𑀁𑀯𑀡𑁆𑀡𑀺𑀢𑀁. 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀦𑁆𑀢𑀺 𑀬𑀲𑁆𑀫𑀸, 𑀬𑀁 𑀯𑀸 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁. 𑀧𑀝𑀺𑀘𑁆𑀘𑀸𑀢𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀺𑀪𑀽𑀢𑀁 ¶ 𑀯𑁂𑀤𑀦𑀁 𑀮𑀪𑀺𑀢𑁆𑀯𑀸. 𑀅𑀬𑀦𑁆𑀢𑀺 𑀲𑀼𑀔𑀲𑁄𑀫𑀦𑀲𑁆𑀲𑀸𑀦𑀁 𑀧𑀘𑁆𑀘𑀬𑀪𑀸𑀯𑁄, 𑀲𑀼𑀔𑀲𑁄𑀫𑀦𑀲𑁆𑀲𑀫𑁂𑀯 𑀯𑀸, ‘‘𑀅𑀲𑁆𑀲𑀸𑀤𑁄’’𑀢𑀺 𑀧𑀤𑀁 𑀧𑀦 𑀅𑀧𑁂𑀓𑁆𑀔𑀺𑀢𑁆𑀯𑀸 𑀧𑀼𑀮𑁆𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀁 𑀯𑁂𑀤𑀦𑀁 𑀆𑀭𑀩𑁆𑀪 𑀲𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺𑀬𑀁 𑀬𑁄 𑀧𑀼𑀭𑀺𑀫𑀯𑁂𑀤𑀦𑀸𑀬 𑀅𑀲𑁆𑀲𑀸𑀤𑁂𑀢𑀩𑁆𑀩𑀸𑀓𑀸𑀭𑁄 𑀲𑁄𑀫𑀦𑀲𑁆𑀲𑀲𑁆𑀲𑀸𑀤𑀦𑀸𑀓𑀸𑀭𑁄, 𑀅𑀬𑀁 𑀅𑀲𑁆𑀲𑀸𑀤𑁄𑀢𑀺. 𑀓𑀣𑀁 𑀧𑀦 𑀯𑁂𑀤𑀦𑀁 𑀆𑀭𑀩𑁆𑀪 𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀘𑁂𑀢𑀲𑀺𑀓𑀲𑀼𑀔𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀦𑀸𑀬𑀁 𑀤𑁄𑀲𑁄. 𑀯𑀺𑀲𑁂𑀲𑀦𑀁 𑀳𑁂𑀢𑁆𑀣 𑀲𑁄𑀫𑀦𑀲𑁆𑀲𑀕𑁆𑀕𑀳𑀡𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲𑀦𑁆𑀢𑀺 ‘‘𑀭𑀼𑀓𑁆𑀔𑁄 𑀲𑀺𑀁𑀲𑀧𑀸’’𑀢𑀺 𑀬𑀣𑀸.

‘‘𑀅𑀦𑀺𑀘𑁆𑀘𑀸’’𑀢𑀺 ¶ 𑀇𑀫𑀺𑀦𑀸 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀯𑀲𑁂𑀦 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀬, 𑀲𑀩𑁆𑀩𑀯𑁂𑀤𑀦𑀸𑀲𑀼𑀬𑁂𑀯 𑀯𑀸 𑀆𑀤𑀻𑀦𑀯𑀫𑀸𑀳, 𑀇𑀢𑀭𑁂𑀳𑀺 𑀇𑀢𑀭𑀤𑀼𑀓𑁆𑀔𑀢𑀸𑀯𑀲𑁂𑀦 𑀬𑀣𑀸𑀓𑁆𑀓𑀫𑀁 𑀤𑀼𑀓𑁆𑀔𑀲𑀼𑀔𑀯𑁂𑀤𑀦𑀸𑀦𑀁, 𑀅𑀯𑀺𑀲𑁂𑀲𑁂𑀦 𑀯𑀸 𑀢𑀻𑀡𑀺𑀧𑀺 𑀧𑀤𑀸𑀦𑀺 𑀲𑀩𑁆𑀩𑀸𑀲𑀫𑁆𑀧𑀺 𑀯𑁂𑀤𑀦𑀸𑀦𑀁 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀅𑀬𑀦𑁆𑀢𑀺 𑀬𑁄 𑀯𑁂𑀤𑀦𑀸𑀬 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 ¶ 𑀅𑀦𑀺𑀘𑁆𑀘𑀪𑀸𑀯𑁄, 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀦𑀝𑁆𑀞𑁂𑀦 𑀤𑀼𑀓𑁆𑀔𑀪𑀸𑀯𑁄, 𑀚𑀭𑀸𑀬 𑀫𑀭𑀡𑁂𑀦 𑀘𑀸𑀢𑀺 𑀤𑁆𑀯𑁂𑀥𑀸 𑀯𑀺𑀧𑀭𑀺𑀡𑀸𑀫𑁂𑀢𑀩𑁆𑀩𑀪𑀸𑀯𑁄 𑀘, 𑀅𑀬𑀁 𑀯𑁂𑀤𑀦𑀸𑀬 𑀆𑀤𑀻𑀦𑀯𑁄, 𑀬𑀢𑁄 𑀯𑀸 𑀆𑀤𑀻𑀦𑀁 𑀧𑀭𑀫𑀓𑀸𑀭𑀼𑀜𑁆𑀜𑀁 𑀯𑀸𑀢𑀺 𑀧𑀯𑀢𑁆𑀢𑀢𑀻𑀢𑀺. 𑀯𑁂𑀤𑀦𑀸𑀬 𑀦𑀺𑀲𑁆𑀲𑀭𑀡𑀦𑁆𑀢𑀺 𑀏𑀢𑁆𑀣 𑀯𑁂𑀤𑀦𑀸𑀬𑀸𑀢𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁, 𑀬𑀸𑀯 𑀯𑁂𑀤𑀦𑀸𑀧𑀝𑀺𑀩𑀤𑁆𑀥𑀁 𑀙𑀦𑁆𑀤𑀭𑀸𑀕𑀁 𑀦 𑀧𑀚𑀳𑀢𑀺, 𑀢𑀸𑀯𑀸𑀬𑀁 𑀧𑀼𑀭𑀺𑀲𑁄 𑀯𑁂𑀤𑀦𑀁 𑀅𑀮𑁆𑀮𑀻𑀦𑁄𑀬𑁂𑀯 𑀳𑁄𑀢𑀺. 𑀬𑀤𑀸 𑀧𑀦 𑀢𑀁 𑀙𑀦𑁆𑀤𑀭𑀸𑀕𑀁 𑀧𑀚𑀳𑀢𑀺, 𑀢𑀤𑀸𑀬𑀁 𑀧𑀼𑀭𑀺𑀲𑁄 𑀯𑁂𑀤𑀦𑀸𑀬 𑀦𑀺𑀲𑁆𑀲𑀝𑁄 𑀯𑀺𑀲𑀁𑀬𑀼𑀢𑁆𑀢𑁄 𑀳𑁄𑀢𑀻𑀢𑀺 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁 𑀯𑁂𑀤𑀦𑀸𑀬 𑀦𑀺𑀲𑁆𑀲𑀭𑀡𑀁 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀯𑁂𑀤𑀦𑀸𑀕𑁆𑀕𑀳𑀡𑁂𑀦 𑀯𑁂𑀤𑀦𑀸𑀬 𑀲𑀳𑀚𑀸𑀢𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀪𑀽𑀢𑀸 𑀘 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀧𑀜𑁆𑀘𑀦𑁆𑀦𑀫𑁆𑀧𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀯𑁂𑀤𑀦𑀸𑀲𑀻𑀲𑁂𑀦 𑀧𑀦 𑀤𑁂𑀲𑀦𑀸 𑀆𑀕𑀢𑀸, 𑀢𑀢𑁆𑀣 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯, 𑀮𑀓𑁆𑀔𑀡𑀳𑀸𑀭𑀦𑀬𑁂𑀦 𑀯𑀸 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀢𑀢𑁆𑀣 𑀯𑁂𑀤𑀦𑀸𑀕𑁆𑀕𑀳𑀡𑁂𑀦 𑀕𑀳𑀺𑀢𑀸 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀲𑀘𑁆𑀘𑀁, 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑀕𑁆𑀕𑀳𑀡𑁂𑀦 𑀕𑀳𑀺𑀢𑀸 𑀅𑀯𑀺𑀚𑁆𑀚𑀸𑀤𑀬𑁄 𑀲𑀫𑀼𑀤𑀬𑀲𑀘𑁆𑀘𑀁, 𑀅𑀢𑁆𑀣𑀗𑁆𑀕𑀫𑀦𑀺𑀲𑁆𑀲𑀭𑀡𑀧𑀭𑀺𑀬𑀸𑀬𑁂𑀳𑀺 𑀦𑀺𑀭𑁄𑀥𑀲𑀘𑁆𑀘𑀁, ‘‘𑀬𑀣𑀸𑀪𑀽𑀢𑀁 𑀯𑀺𑀤𑀺𑀢𑁆𑀯𑀸’’𑀢𑀺 𑀏𑀢𑁂𑀦 𑀫𑀕𑁆𑀕𑀲𑀘𑁆𑀘𑀦𑁆𑀢𑀺 𑀏𑀯𑀫𑁂𑀢𑁆𑀣 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀓𑀸𑀫𑀼𑀧𑀸𑀤𑀸𑀦𑀫𑀽𑀮𑀓𑀢𑁆𑀢𑀸 𑀲𑁂𑀲𑀼𑀧𑀸𑀤𑀸𑀦𑀸𑀦𑀁, 𑀧𑀳𑀻𑀦𑁂 𑀘 𑀓𑀸𑀫𑀼𑀧𑀸𑀤𑀸𑀦𑁂 𑀉𑀧𑀸𑀤𑀸𑀦𑀲𑁂𑀲𑀸𑀪𑀸𑀯𑀢𑁄 ‘‘𑀯𑀺𑀕𑀢𑀙𑀦𑁆𑀤𑀭𑀸𑀕𑀢𑀸𑀬 𑀅𑀦𑀼𑀧𑀸𑀤𑀸𑀦𑁄’’𑀢𑀺 𑀯𑀼𑀢𑁆𑀢𑀁. 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑁄𑀢𑀺 𑀅𑀢𑁆𑀢𑀦𑁄 𑀫𑀕𑁆𑀕𑀨𑀮𑀧𑁆𑀧𑀢𑁆𑀢𑀺𑀁 𑀪𑀕𑀯𑀸 𑀤𑀲𑁆𑀲𑁂𑀢𑀺. ‘‘𑀯𑁂𑀤𑀦𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀳𑀺 𑀬𑀲𑁆𑀲𑀸 𑀥𑀫𑁆𑀫𑀥𑀸𑀢𑀼𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀇𑀫𑀁 𑀤𑀺𑀝𑁆𑀞𑀺𑀕𑀢𑀁 𑀲𑀓𑀸𑀭𑀡𑀁 𑀲𑀕𑀢𑀺𑀓𑀁 𑀧𑀪𑁂𑀤𑀢𑁄 𑀯𑀺𑀪𑀚𑀺𑀢𑀼𑀁 𑀲𑀫𑀢𑁆𑀣𑁄 𑀅𑀳𑁄𑀲𑀺 ¶ , 𑀢𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀲𑀤𑁆𑀥𑀺𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀉𑀧𑁆𑀧𑀢𑁆𑀢𑀺𑀪𑀽𑀫𑀺𑀁 𑀤𑀲𑁆𑀲𑁂𑀢𑀺 𑀥𑀫𑁆𑀫𑀭𑀸𑀚𑀸.

𑀧𑀞𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀯𑀡𑁆𑀡𑀦𑀸

𑁩𑁮. 𑀲𑀢𑁆𑀢𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀘 𑀏𑀓𑀘𑁆𑀘𑀁 𑀲𑀲𑁆𑀲𑀢𑀁 𑀏𑀢𑀲𑁆𑀲𑀸𑀢𑀺 𑀏𑀓𑀘𑁆𑀘𑀲𑀲𑁆𑀲𑀢𑁄, 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑁄. 𑀲𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸 ¶ . 𑀢𑁂 𑀧𑀦 𑀬𑀲𑁆𑀫𑀸 𑀏𑀓𑀘𑁆𑀘𑀲𑀲𑁆𑀲𑀢𑁄 𑀯𑀸𑀤𑁄 𑀤𑀺𑀝𑁆𑀞𑀺 𑀏𑀢𑁂𑀲𑀦𑁆𑀢𑀺 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀸’’𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀏𑀓𑀘𑁆𑀘𑀅𑀲𑀲𑁆𑀲𑀢𑀺𑀓𑀸 𑀤𑀺𑀧𑀤𑀲𑁆𑀲𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀦𑀼 ¶ 𑀘 ‘‘𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸’’𑀢𑀺 𑀯𑀼𑀢𑁆𑀢𑁂 𑀢𑀤𑀜𑁆𑀜𑀲𑁆𑀲 𑀏𑀓𑀘𑁆𑀘𑀲𑁆𑀲 𑀅𑀲𑀲𑁆𑀲𑀢𑀢𑀸𑀲𑀦𑁆𑀦𑀺𑀝𑁆𑀞𑀸𑀦𑀁 𑀲𑀺𑀤𑁆𑀥𑀫𑁂𑀯 𑀳𑁄𑀢𑀻𑀢𑀺? 𑀲𑀘𑁆𑀘𑀁 𑀲𑀺𑀤𑁆𑀥𑀫𑁂𑀯 𑀳𑁄𑀢𑀺 𑀅𑀢𑁆𑀣𑀢𑁄, 𑀦 𑀧𑀦 𑀲𑀤𑁆𑀤𑀢𑁄. 𑀢𑀲𑁆𑀫𑀸 𑀲𑀼𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀘𑁆𑀘𑀅𑀲𑀲𑁆𑀲𑀢𑀺𑀓𑀸’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀇𑀥 𑀲𑀸𑀯𑀲𑁂𑀲𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀥𑀫𑁆𑀫𑀲𑁆𑀲𑀸𑀫𑀻. 𑀇𑀥𑀸𑀢𑀺 ‘‘𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸’’𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂. 𑀕𑀳𑀺𑀢𑀸𑀢𑀺 𑀯𑀼𑀢𑁆𑀢𑀸, 𑀢𑀣𑀸 𑀘𑁂𑀯 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀇𑀥𑀸𑀢𑀺 𑀯𑀸 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬. 𑀢𑀣𑀸 𑀳𑀺 𑀧𑀼𑀭𑀺𑀫𑀓𑀸 𑀢𑀬𑁄 𑀯𑀸𑀤𑀸 𑀲𑀢𑁆𑀢𑀯𑀲𑁂𑀦, 𑀘𑀢𑀼𑀢𑁆𑀣𑁄 𑀲𑀗𑁆𑀔𑀸𑀭𑀯𑀲𑁂𑀦 𑀯𑀺𑀪𑀢𑁆𑀢𑁄. ‘‘𑀲𑀗𑁆𑀔𑀸𑀭𑁂𑀓𑀘𑁆𑀘𑀲𑀲𑁆𑀲𑀢𑀺𑀓𑀸’’𑀢𑀺 𑀇𑀤𑀁 𑀢𑁂𑀳𑀺 𑀲𑀲𑁆𑀲𑀢𑀪𑀸𑀯𑁂𑀦 𑀕𑀬𑁆𑀳𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀬𑀸𑀣𑀸𑀯𑀲𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀧𑀦𑁂𑀓𑀘𑁆𑀘𑀲𑀲𑁆𑀲𑀢𑀺𑀓𑀫𑀢𑀤𑀲𑁆𑀲𑀦𑀯𑀲𑁂𑀦. 𑀢𑀲𑁆𑀲 𑀳𑀺 𑀲𑀲𑁆𑀲𑀢𑀸𑀪𑀺𑀫𑀢𑀁 𑀅𑀲𑀗𑁆𑀔𑀢𑀫𑁂𑀯𑀸𑀢𑀺 𑀮𑀤𑁆𑀥𑀺. 𑀢𑁂𑀦𑁂𑀯𑀸𑀳 ‘‘𑀘𑀺𑀢𑁆𑀢𑀦𑁆𑀢𑀺 𑀯𑀸…𑀧𑁂… 𑀞𑀲𑁆𑀲𑀢𑀻’’𑀢𑀺. 𑀦 𑀳𑀺 𑀬𑀲𑁆𑀲 𑀪𑀸𑀯𑀲𑁆𑀲 𑀧𑀘𑁆𑀘𑀬𑁂𑀳𑀺 𑀅𑀪𑀺𑀲𑀗𑁆𑀔𑀢𑀪𑀸𑀯𑀁 𑀧𑀝𑀺𑀚𑀸𑀦𑀸𑀢𑀺, 𑀢𑀲𑁆𑀲𑁂𑀯 𑀦𑀺𑀘𑁆𑀘𑀥𑀼𑀯𑀸𑀤𑀺𑀪𑀸𑀯𑁄 𑀅𑀦𑀼𑀫𑁆𑀫𑀢𑁆𑀢𑀓𑁂𑀦 𑀲𑀓𑁆𑀓𑀸 𑀧𑀝𑀺𑀜𑁆𑀜𑀸𑀢𑀼𑀁. 𑀏𑀢𑁂𑀦 ‘‘𑀉𑀧𑁆𑀧𑀸𑀤𑀯𑀬𑀥𑀼𑀯𑀢𑀸𑀬𑀼𑀢𑁆𑀢𑀪𑀸𑀯𑀸 𑀲𑀺𑀬𑀸 𑀦𑀺𑀘𑁆𑀘𑀸, 𑀲𑀺𑀬𑀸 𑀅𑀦𑀺𑀘𑁆𑀘𑀸 𑀲𑀺𑀬𑀸 𑀦 𑀯𑀢𑁆𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀲𑁆𑀲 𑀲𑀢𑁆𑀢𑀪𑀗𑁆𑀕𑀯𑀸𑀤𑀲𑁆𑀲 𑀅𑀬𑀼𑀢𑁆𑀢𑀢𑀸 𑀯𑀺𑀪𑀸𑀯𑀺𑀢𑀸 𑀳𑁄𑀢𑀺.

𑀢𑀢𑁆𑀣𑀸𑀬𑀁 𑀅𑀬𑀼𑀢𑁆𑀢𑀢𑀸𑀯𑀺𑀪𑀸𑀯𑀦𑀸 𑁋 𑀬𑀤𑀺 ‘‘𑀬𑁂𑀦 𑀲𑀪𑀸𑀯𑁂𑀦 𑀬𑁄 𑀥𑀫𑁆𑀫𑁄 𑀅𑀢𑁆𑀣𑀻𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀦𑁂𑀯 𑀲𑀪𑀸𑀯𑁂𑀦 𑀲𑁄 𑀥𑀫𑁆𑀫𑁄 𑀦𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀯𑀼𑀘𑁆𑀘𑁂𑀬𑁆𑀬, 𑀲𑀺𑀬𑀸 𑀅𑀦𑁂𑀓𑀦𑁆𑀢𑀯𑀸𑀤𑁄. 𑀅𑀣 𑀅𑀜𑁆𑀜𑁂𑀦, 𑀲𑀺𑀬𑀸 𑀦 𑀅𑀦𑁂𑀓𑀦𑁆𑀢𑀯𑀸𑀤𑁄. 𑀦 𑀘𑁂𑀢𑁆𑀣 𑀤𑁂𑀲𑀦𑁆𑀢𑀭𑀸𑀤𑀺𑀲𑀫𑁆𑀩𑀦𑁆𑀥𑀪𑀸𑀯𑁄 𑀬𑀼𑀢𑁆𑀢𑁄 𑀯𑀢𑁆𑀢𑀼𑀁 𑀢𑀲𑁆𑀲 𑀲𑀩𑁆𑀩𑀮𑁄𑀓𑀲𑀺𑀤𑁆𑀥𑀢𑁆𑀢𑀸, 𑀯𑀺𑀯𑀸𑀤𑀸𑀪𑀸𑀯𑀢𑁄 ¶ . 𑀬𑁂 𑀧𑀦 𑀯𑀤𑀦𑁆𑀢𑀺 ‘‘𑀬𑀣𑀸 𑀲𑀼𑀯𑀡𑁆𑀡𑀖𑀝𑁂𑀦 𑀫𑀓𑀼𑀝𑁂 𑀓𑀢𑁂 𑀖𑀝𑀪𑀸𑀯𑁄 𑀦𑀲𑁆𑀲𑀢𑀺, 𑀫𑀓𑀼𑀝𑀪𑀸𑀯𑁄 ¶ 𑀉𑀧𑁆𑀧𑀚𑁆𑀚𑀢𑀺, 𑀲𑀼𑀯𑀡𑁆𑀡𑀪𑀸𑀯𑁄 𑀢𑀺𑀝𑁆𑀞𑀢𑀺𑀬𑁂𑀯, 𑀏𑀯𑀁 𑀲𑀩𑁆𑀩𑀪𑀸𑀯𑀸𑀦𑀁 𑀓𑁄𑀘𑀺 𑀥𑀫𑁆𑀫𑁄 𑀦𑀲𑁆𑀲𑀢𑀺, 𑀓𑁄𑀘𑀺 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺, 𑀲𑀪𑀸𑀯𑁄 𑀧𑀦 𑀢𑀺𑀝𑁆𑀞𑀢𑀻’’𑀢𑀺. 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀓𑀺𑀁 𑀢𑀁 𑀲𑀼𑀯𑀡𑁆𑀡𑀁, 𑀬𑀁 𑀖𑀝𑁂 𑀫𑀓𑀼𑀝𑁂 𑀘 𑀅𑀯𑀝𑁆𑀞𑀺𑀢𑀁, 𑀬𑀤𑀺 𑀭𑀽𑀧𑀸𑀤𑀺, 𑀲𑁄 𑀲𑀤𑁆𑀤𑁄 𑀯𑀺𑀬 𑀅𑀦𑀺𑀘𑁆𑀘𑁄. 𑀅𑀣 𑀭𑀽𑀧𑀸𑀤𑀺 𑀲𑀫𑀽𑀳𑁄, 𑀲𑀫𑀽𑀳𑁄 𑀦𑀸𑀫 𑀲𑀫𑁆𑀫𑀼𑀢𑀺𑀫𑀢𑁆𑀢𑀁. 𑀦 𑀢𑀲𑁆𑀲 𑀅𑀢𑁆𑀣𑀺𑀢𑀸 𑀦𑀢𑁆𑀣𑀺𑀢𑀸 𑀦𑀺𑀘𑁆𑀘𑀢𑀸 𑀯𑀸 𑀮𑀩𑁆𑀪𑀢𑀻’’𑀢𑀺 𑀅𑀦𑁂𑀓𑀦𑁆𑀢𑀯𑀸𑀤𑁄 𑀦 𑀲𑀺𑀬𑀸. 𑀥𑀫𑁆𑀫𑀸𑀦𑀜𑁆𑀘 𑀥𑀫𑁆𑀫𑀺𑀦𑁄 𑀅𑀜𑁆𑀜𑀣𑀸𑀦𑀜𑁆𑀜𑀣𑀸𑀲𑀼 𑀤𑁄𑀲𑁄 𑀯𑀼𑀢𑁆𑀢𑁄𑀬𑁂𑀯 𑀲𑀲𑁆𑀲𑀢𑀯𑀸𑀤𑀯𑀺𑀘𑀸𑀭𑀡𑀸𑀬𑀁. 𑀢𑀲𑁆𑀫𑀸 𑀲𑁄 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘 𑀦𑀺𑀘𑁆𑀘𑀸𑀦𑀺𑀘𑁆𑀘𑀦𑀯𑀢𑁆𑀢𑀩𑁆𑀩𑀭𑀽𑀧𑁄 𑀅𑀢𑁆𑀢𑀸 𑀮𑁄𑀓𑁄 𑀘 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀢𑀸𑀧𑀝𑀺𑀚𑀸𑀦𑀦𑀢𑁄 𑀬𑀣𑀸 𑀦𑀺𑀘𑁆𑀘𑀸𑀤𑀻𑀦𑀁 𑀅𑀜𑁆𑀜𑀢𑀭𑀁 𑀭𑀽𑀧𑀁, 𑀬𑀣𑀸 𑀯𑀸 𑀤𑀻𑀧𑀸𑀤𑀬𑁄. 𑀦 𑀳𑀺 𑀤𑀻𑀧𑀸𑀤𑀻𑀦𑀁 𑀉𑀤𑀬𑀩𑁆𑀩𑀬𑀲𑀪𑀸𑀯𑀸𑀦𑀁 𑀦𑀺𑀘𑁆𑀘𑀸𑀦𑀺𑀘𑁆𑀘𑀦𑀯𑀢𑁆𑀢𑀩𑁆𑀩𑀲𑀪𑀸𑀯𑀢𑀸 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁, 𑀚𑀻𑀯𑀲𑁆𑀲 𑀦𑀺𑀘𑁆𑀘𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀭𑀽𑀧𑀁 𑀯𑀺𑀬𑀸𑀢𑀺 𑀏𑀯𑀁 𑀲𑀢𑁆𑀢𑀪𑀗𑁆𑀕𑀲𑁆𑀲 𑀯𑀺𑀬 𑀲𑁂𑀲𑀪𑀗𑁆𑀕𑀸𑀦𑀫𑁆𑀧𑀺 𑀅𑀲𑀫𑁆𑀪𑀯𑁄𑀬𑁂𑀯𑀸𑀢𑀺 𑀲𑀢𑁆𑀢𑀪𑀗𑁆𑀕𑀯𑀸𑀤𑀲𑁆𑀲 𑀅𑀬𑀼𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀏𑀢𑁆𑀣 𑀘 ‘‘𑀇𑀲𑁆𑀲𑀭𑁄 𑀦𑀺𑀘𑁆𑀘𑁄, 𑀅𑀜𑁆𑀜𑁂 𑀲𑀢𑁆𑀢𑀸 𑀅𑀦𑀺𑀘𑁆𑀘𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀯𑀸𑀤𑀸 𑀲𑀢𑁆𑀢𑁂𑀓𑀘𑁆𑀘𑀲𑀲𑁆𑀲𑀢𑀺𑀓𑀸 𑀲𑁂𑀬𑁆𑀬𑀣𑀸𑀧𑀺 𑀇𑀲𑁆𑀲𑀭𑀯𑀸𑀤𑀸. ‘‘𑀧𑀭𑀫𑀸𑀡𑀯𑁄 𑀦𑀺𑀘𑁆𑀘𑀸 𑀥𑀼𑀯𑀸, 𑀅𑀡𑀼𑀓𑀸𑀤𑀬𑁄 𑀅𑀦𑀺𑀘𑁆𑀘𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀯𑀸𑀤𑀸 𑀲𑀗𑁆𑀔𑀸𑀭𑁂𑀓𑀘𑁆𑀘𑀲𑀲𑁆𑀲𑀢𑀺𑀓𑀸 𑀲𑁂𑀬𑁆𑀬𑀣𑀸𑀧𑀺 𑀓𑀸𑀡𑀸𑀤𑀸. 𑀦𑀦𑀼 ‘‘𑀏𑀓𑀘𑁆𑀘𑁂 𑀥𑀫𑁆𑀫𑀸 ¶ 𑀲𑀲𑁆𑀲𑀢𑀸, 𑀏𑀓𑀘𑁆𑀘𑁂 𑀅𑀲𑀲𑁆𑀲𑀢𑀸’’𑀢𑀺 𑀏𑀢𑀲𑁆𑀫𑀺𑀁 𑀯𑀸𑀤𑁂 𑀘𑀓𑁆𑀔𑀸𑀤𑀻𑀦𑀁 𑀅𑀲𑀲𑁆𑀲𑀢𑀢𑀸𑀲𑀦𑁆𑀦𑀺𑀝𑁆𑀞𑀸𑀦𑀁 𑀬𑀣𑀸𑀲𑀪𑀸𑀯𑀸𑀯𑀩𑁄𑀥𑁄 𑀏𑀯, 𑀢𑀬𑀺𑀤𑀁 𑀓𑀣𑀁 𑀫𑀺𑀘𑁆𑀙𑀸𑀤𑀲𑁆𑀲𑀦𑀦𑁆𑀢𑀺, 𑀓𑁄 𑀯𑀸 𑀏𑀯𑀫𑀸𑀳 ‘‘𑀘𑀓𑁆𑀔𑀸𑀤𑀻𑀦𑀁 𑀅𑀲𑀲𑁆𑀲𑀢𑀪𑀸𑀯𑀲𑀦𑁆𑀦𑀺𑀝𑁆𑀞𑀸𑀦𑀁 𑀫𑀺𑀘𑁆𑀙𑀸𑀤𑀲𑁆𑀲𑀦’’𑀦𑁆𑀢𑀺? 𑀅𑀲𑀲𑁆𑀲𑀢𑁂𑀲𑀼𑀬𑁂𑀯 𑀧𑀦 𑀓𑁂𑀲𑀜𑁆𑀘𑀺 𑀥𑀫𑁆𑀫𑀸𑀦𑀁 𑀲𑀲𑁆𑀲𑀢𑀪𑀸𑀯𑀸𑀪𑀺𑀦𑀺𑀯𑁂𑀲𑁄 𑀇𑀥 𑀫𑀺𑀘𑁆𑀙𑀸𑀤𑀲𑁆𑀲𑀦𑀁. 𑀢𑁂𑀦 𑀧𑀦 𑀏𑀓𑀯𑀸𑀭𑁂 𑀧𑀯𑀢𑁆𑀢𑀫𑀸𑀦𑁂𑀦 𑀘𑀓𑁆𑀔𑀸𑀤𑀻𑀦𑀁 𑀅𑀲𑀲𑁆𑀲𑀢𑀪𑀸𑀯𑀸𑀯𑀩𑁄𑀥𑁄 ¶ 𑀯𑀺𑀤𑀽𑀲𑀺𑀢𑁄 𑀲𑀁𑀲𑀝𑁆𑀞𑀪𑀸𑀯𑀢𑁄 𑀯𑀺𑀲𑀲𑀁𑀲𑀝𑁆𑀞𑁄 𑀯𑀺𑀬 𑀲𑀧𑁆𑀧𑀺𑀫𑀡𑁆𑀟𑁄 𑀲𑀓𑀺𑀘𑁆𑀘𑀓𑀭𑀡𑀸𑀲𑀫𑀢𑁆𑀣𑀢𑀸𑀬 𑀲𑀫𑁆𑀫𑀸𑀤𑀲𑁆𑀲𑀦𑀧𑀓𑁆𑀔𑁂 𑀞𑀧𑁂𑀢𑀩𑁆𑀩𑀢𑀁 𑀦𑀸𑀭𑀳𑀢𑀻𑀢𑀺. 𑀅𑀲𑀲𑁆𑀲𑀢𑀪𑀸𑀯𑁂𑀦 𑀦𑀺𑀘𑁆𑀙𑀺𑀢𑀸𑀧𑀺 𑀯𑀸 𑀘𑀓𑁆𑀔𑀼𑀆𑀤𑀬𑁄 𑀲𑀫𑀸𑀭𑁄𑀧𑀺𑀢𑀚𑀻𑀯𑀲𑀪𑀸𑀯𑀸 𑀏𑀯 𑀤𑀺𑀝𑁆𑀞𑀺𑀕𑀢𑀺𑀓𑁂𑀳𑀺 𑀕𑀬𑁆𑀳𑀦𑁆𑀢𑀻𑀢𑀺 𑀢𑀤𑀯𑀩𑁄𑀥𑀲𑁆𑀲 𑀫𑀺𑀘𑁆𑀙𑀸𑀤𑀲𑁆𑀲𑀦𑀪𑀸𑀯𑁄 𑀦 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁. 𑀢𑁂𑀦𑁂𑀯𑀸𑀳 ‘‘𑀘𑀓𑁆𑀔𑀼𑀁 𑀇𑀢𑀺𑀧𑀺…𑀧𑁂… 𑀓𑀸𑀬𑁄 𑀇𑀢𑀺𑀧𑀺 𑀅𑀬𑀁 𑀫𑁂 𑀅𑀢𑁆𑀢𑀸’’𑀢𑀺𑀆𑀤𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀲𑀗𑁆𑀔𑀢𑀸𑀬 𑀲𑀗𑁆𑀔𑀢𑀸𑀬 𑀘 𑀥𑀸𑀢𑀼𑀬𑀸 𑀯𑀲𑁂𑀦 𑀬𑀣𑀸𑀓𑁆𑀓𑀫𑀁 ‘‘𑀏𑀓𑀘𑁆𑀘𑁂 𑀥𑀫𑁆𑀫𑀸 𑀲𑀲𑁆𑀲𑀢𑀸, 𑀏𑀓𑀘𑁆𑀘𑁂 𑀅𑀲𑀲𑁆𑀲𑀢𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑁄 ¶ 𑀯𑀺𑀪𑀚𑁆𑀚𑀯𑀸𑀤𑁄𑀧𑀺 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑁄 𑀆𑀧𑀚𑁆𑀚𑀢𑀻𑀢𑀺 𑀏𑀯𑀁𑀧𑀓𑀸𑀭𑀸 𑀘𑁄𑀤𑀦𑀸 𑀅𑀦𑀯𑀓𑀸𑀲𑀸 𑀳𑁄𑀢𑀺 𑀅𑀯𑀺𑀧𑀭𑀻𑀢𑀥𑀫𑁆𑀫𑀲𑀪𑀸𑀯𑀲𑀫𑁆𑀧𑀝𑀺𑀧𑀢𑁆𑀢𑀺𑀪𑀸𑀯𑀢𑁄.

𑀓𑀸𑀫𑀜𑁆𑀘𑁂𑀢𑁆𑀣 𑀧𑀼𑀭𑀺𑀫𑀯𑀸𑀤𑁂𑀧𑀺 𑀅𑀲𑀲𑁆𑀲𑀢𑀸𑀦𑀁 𑀥𑀫𑁆𑀫𑀸𑀦𑀁 ‘‘𑀲𑀲𑁆𑀲𑀢𑀸’’𑀢𑀺 𑀕𑀳𑀡𑀁 𑀯𑀺𑀲𑁂𑀲𑀢𑁄 𑀫𑀺𑀘𑁆𑀙𑀸𑀤𑀲𑁆𑀲𑀦𑀁, 𑀲𑀲𑁆𑀲𑀢𑀸𑀦𑀁 𑀧𑀦 ‘‘𑀲𑀲𑁆𑀲𑀢𑀸’’𑀢𑀺 𑀕𑀸𑀳𑁄 𑀦 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀬𑀣𑀸𑀲𑀪𑀸𑀯𑀕𑁆𑀕𑀳𑀡𑀪𑀸𑀯𑀢𑁄. 𑀅𑀲𑀲𑁆𑀲𑀢𑁂𑀲𑀼𑀬𑁂𑀯 𑀧𑀦 ‘‘𑀓𑁂𑀘𑀺𑀤𑁂𑀯 𑀥𑀫𑁆𑀫𑀸 𑀲𑀲𑁆𑀲𑀢𑀸, 𑀓𑁂𑀘𑀺 𑀅𑀲𑀲𑁆𑀲𑀢𑀸’’𑀢𑀺 𑀕𑀳𑁂𑀢𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀪𑀸𑀕𑀧𑁆𑀧𑀯𑀢𑁆𑀢𑀺𑀬𑀸 𑀇𑀫𑀲𑁆𑀲 𑀯𑀸𑀤𑀲𑁆𑀲 𑀯𑀸𑀤𑀦𑁆𑀢𑀭𑀢𑀸 𑀯𑀼𑀢𑁆𑀢𑀸, 𑀦 𑀘𑁂𑀢𑁆𑀣 ‘‘𑀲𑀫𑀼𑀤𑀸𑀬𑀦𑁆𑀢𑁄𑀕𑀥𑀢𑁆𑀢𑀸 𑀏𑀓𑀤𑁂𑀲𑀲𑁆𑀲 𑀲𑀧𑁆𑀧𑀤𑁂𑀲𑀲𑀲𑁆𑀲𑀢𑀕𑁆𑀕𑀸𑀳𑁄 𑀦𑀺𑀧𑁆𑀧𑀤𑁂𑀲𑀲𑀲𑁆𑀲𑀢𑀕𑁆𑀕𑀸𑀳𑁂 𑀲𑀫𑁄𑀥𑀸𑀦𑀁 𑀕𑀘𑁆𑀙𑀢𑀻’’𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀯𑀸𑀤𑀻 𑀢𑀩𑁆𑀩𑀺𑀲𑀬𑀯𑀺𑀲𑁂𑀲𑀯𑀲𑁂𑀦 𑀯𑀸𑀤𑀤𑁆𑀯𑀬𑀲𑁆𑀲 𑀧𑀯𑀢𑁆𑀢𑀢𑁆𑀢𑀸. 𑀅𑀜𑁆𑀜𑁂 𑀏𑀯 𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑀸 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀲𑀲𑁆𑀲𑀢𑀸’’𑀢𑀺 𑀅𑀪𑀺𑀦𑀺𑀯𑀺𑀝𑁆𑀞𑀸, 𑀅𑀜𑁆𑀜𑁂 ‘‘𑀏𑀓𑀘𑁆𑀘𑀲𑀲𑁆𑀲𑀢𑀸’’𑀢𑀺. 𑀲𑀗𑁆𑀔𑀸𑀭𑀸𑀦𑀁 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁, 𑀏𑀓𑀤𑁂𑀲𑀧𑀭𑀺𑀕𑁆𑀕𑀳𑁄 𑀘 𑀯𑀸𑀤𑀤𑁆𑀯𑀬𑀲𑁆𑀲 𑀧𑀭𑀺𑀩𑁆𑀬𑀢𑁆𑀢𑁄𑀬𑁂𑀯. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀅𑀦𑁂𑀓𑀯𑀺𑀥𑀲𑀫𑀼𑀲𑁆𑀲𑀬𑁂 𑀏𑀓𑀯𑀺𑀥𑀲𑀫𑀼𑀲𑁆𑀲𑀬𑁂 𑀘 𑀔𑀦𑁆𑀥𑀧𑀩𑀦𑁆𑀥𑁂 𑀅𑀪𑀺𑀦𑀺𑀯𑁂𑀲𑀪𑀸𑀯𑀢𑁄. 𑀘𑀢𑀼𑀩𑁆𑀩𑀺𑀥𑁄𑀧𑀺 𑀳𑀺 𑀲𑀲𑁆𑀲𑀢𑀯𑀸𑀤𑀻 𑀚𑀸𑀢𑀺𑀯𑀺𑀲𑁂𑀲𑀯𑀲𑁂𑀦 𑀦𑀸𑀦𑀸𑀯𑀺𑀥𑀭𑀽𑀧𑀓𑀸𑀬𑀲𑀦𑁆𑀦𑀺𑀲𑁆𑀲𑀬𑁂 𑀏𑀯 𑀅𑀭𑀽𑀧𑀥𑀫𑁆𑀫𑀧𑀼𑀜𑁆𑀚𑁂 𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑀻 𑀚𑀸𑀢𑁄 𑀅𑀪𑀺𑀜𑁆𑀜𑀸𑀡𑁂𑀦 𑀅𑀦𑀼𑀲𑁆𑀲𑀯𑀸𑀤𑀻𑀳𑀺 𑀘 𑀭𑀽𑀧𑀓𑀸𑀬𑀪𑁂𑀤𑀕𑁆𑀕𑀳𑀡𑀢𑁄. 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺’’𑀦𑁆𑀢𑀺 (𑀤𑀻. 𑀦𑀺. 𑁧.𑁩𑁨) ‘‘𑀘𑀯𑀦𑁆𑀢𑀺 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺 𑀘 𑀆𑀤𑀺. 𑀯𑀺𑀲𑁂𑀲𑀮𑀸𑀪𑀻 ¶ 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑁄 𑀅𑀦𑀼𑀧𑀥𑀸𑀭𑀺𑀢𑀪𑁂𑀤𑀲𑀫𑀼𑀲𑁆𑀲𑀬𑁂𑀯 𑀥𑀫𑁆𑀫𑀧𑀩𑀦𑁆𑀥𑁂 𑀲𑀲𑁆𑀲𑀢𑀸𑀓𑀸𑀭𑀕𑁆𑀕𑀳𑀡𑁂𑀦 𑀅𑀪𑀺𑀦𑀺𑀯𑀺𑀲𑀦𑀁 𑀚𑀦𑁂𑀲𑀺 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀔𑀦𑁆𑀥𑀲𑀦𑁆𑀢𑀸𑀦𑀯𑀺𑀲𑀬𑀢𑁆𑀢𑀸 𑀢𑀤𑀪𑀺𑀦𑀺𑀯𑁂𑀲𑀲𑁆𑀲. 𑀢𑀣𑀸 𑀘 𑀢𑀻𑀲𑀼𑀧𑀺 𑀯𑀸𑀤𑁂𑀲𑀼 ‘‘𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀢𑀢𑁄 𑀧𑀭𑀁 𑀦𑀸𑀦𑀼𑀲𑁆𑀲𑀭𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀢𑀓𑁆𑀓𑀻𑀦𑀁 𑀧𑀦 𑀲𑀲𑁆𑀲𑀢𑁂𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀻𑀦𑀁 𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑀯𑀺𑀲𑁂𑀲𑁄 𑀭𑀽𑀧𑀸𑀭𑀽𑀧𑀥𑀫𑁆𑀫𑀯𑀺𑀲𑀬𑀢𑀸𑀬 𑀲𑀼𑀧𑀸𑀓𑀝𑁄𑀬𑁂𑀯𑀸𑀢𑀺.

𑁩𑁯. 𑀤𑀻𑀖𑀲𑁆𑀲 ¶ 𑀓𑀸𑀮𑀲𑁆𑀲 𑀅𑀢𑀺𑀓𑁆𑀓𑀫𑁂𑀦𑀸𑀢𑀺 𑀯𑀺𑀯𑀝𑁆𑀝𑀯𑀺𑀯𑀝𑁆𑀝𑀝𑁆𑀞𑀸𑀬𑀻𑀦𑀁 𑀅𑀧𑀕𑀫𑁂𑀦. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀁 𑀲𑀁-𑀲𑀤𑁆𑀤𑁂𑀦 𑀬𑀼𑀢𑁆𑀢𑁄 𑀯𑀝𑁆𑀝-𑀲𑀤𑁆𑀤𑁄 𑀯𑀺𑀦𑀸𑀲𑀯𑀸𑀘𑀻𑀢𑀺 𑀆𑀳 ‘‘𑀯𑀺𑀦𑀲𑁆𑀲𑀢𑀻’’𑀢𑀺, 𑀲𑀗𑁆𑀔𑀬𑀯𑀲𑁂𑀦 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀧𑀢𑁆𑀢𑀺𑀓𑀭𑀫𑀳𑀸𑀫𑁂𑀖𑀲𑀫𑀼𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀳𑀺 𑀬𑀸𑀯 𑀅𑀡𑀼𑀲𑀳𑀕𑀢𑁄𑀧𑀺 𑀲𑀗𑁆𑀔𑀸𑀭𑁄 𑀦 𑀳𑁄𑀢𑀺, 𑀢𑀸𑀯 𑀮𑁄𑀓𑁄 𑀲𑀁𑀯𑀝𑁆𑀝𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀮𑁄𑀓𑁄𑀢𑀺 𑀘𑁂𑀢𑁆𑀣 𑀧𑀣𑀯𑀻𑀆𑀤𑀺𑀪𑀸𑀚𑀦𑀮𑁄𑀓𑁄 𑀅𑀥𑀺𑀧𑁆𑀧𑁂𑀢𑁄. 𑀉𑀧𑀭𑀺𑀩𑁆𑀭𑀳𑁆𑀫𑀮𑁄𑀓𑁂𑀲𑀽𑀢𑀺 𑀧𑀭𑀺𑀢𑁆𑀢𑀲𑀼𑀪𑀸𑀤𑀻𑀲𑀼 ¶ 𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑁂𑀲𑀼. 𑀅𑀕𑁆𑀕𑀺𑀦𑀸 𑀳𑀺 𑀓𑀧𑁆𑀧𑀯𑀼𑀝𑁆𑀞𑀸𑀦𑀁 𑀇𑀥𑀸𑀥𑀺𑀧𑁆𑀧𑁂𑀢𑀁 𑀩𑀳𑀼𑀮𑀁 𑀧𑀯𑀢𑁆𑀢𑀦𑀢𑁄. 𑀢𑁂𑀦𑁂𑀯𑀸𑀳 𑀪𑀕𑀯𑀸 ‘‘𑀆𑀪𑀲𑁆𑀲𑀭𑀲𑀁𑀯𑀢𑁆𑀢𑀦𑀺𑀓𑀸 𑀳𑁄𑀦𑁆𑀢𑀻’’𑀢𑀺. 𑀅𑀭𑀽𑀧𑁂𑀲𑀼 𑀯𑀸𑀢𑀺 𑀯𑀸-𑀲𑀤𑁆𑀤𑁂𑀦 𑀲𑀁𑀯𑀝𑁆𑀝𑀫𑀸𑀦𑀮𑁄𑀓𑀥𑀸𑀢𑀽𑀳𑀺 𑀅𑀜𑁆𑀜𑀮𑁄𑀓𑀥𑀸𑀢𑀽𑀲𑀼 𑀯𑀸𑀢𑀺 𑀯𑀺𑀓𑀧𑁆𑀧𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 ‘‘𑀲𑀩𑁆𑀩𑁂 𑀅𑀧𑀸𑀬𑀲𑀢𑁆𑀢𑀸 𑀢𑀤𑀸 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁 𑀅𑀧𑀸𑀬𑁂𑀲𑀼 𑀤𑀻𑀖𑀢𑀫𑀸𑀬𑀼𑀓𑀸𑀦𑀁 𑀫𑀦𑀼𑀲𑁆𑀲𑀮𑁄𑀓𑀽𑀧𑀢𑁆𑀢𑀺𑀬𑀸 𑀅𑀲𑀫𑁆𑀪𑀯𑀢𑁄. 𑀲𑀢𑀺𑀧𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀪𑀺𑀲𑀗𑁆𑀔𑀸𑀭𑀫𑀦𑀲𑀸 𑀦𑀺𑀩𑁆𑀩𑀢𑁆𑀢𑀪𑀸𑀯𑁂 𑀩𑀸𑀳𑀺𑀭𑀧𑀘𑁆𑀘𑀬𑁂𑀳𑀺 𑀯𑀺𑀦𑀸 𑀫𑀦𑀲𑀸𑀯 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 ‘‘𑀫𑀦𑁄𑀫𑀬𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺 𑀭𑀽𑀧𑀸𑀯𑀘𑀭𑀲𑀢𑁆𑀢𑀸. 𑀬𑀤𑀺 𑀏𑀯𑀁 𑀓𑀸𑀫𑀪𑀯𑁂 𑀑𑀧𑀧𑀸𑀢𑀺𑀓𑀲𑀢𑁆𑀢𑀸𑀦𑀫𑁆𑀧𑀺 𑀫𑀦𑁄𑀫𑀬𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀅𑀥𑀺𑀘𑀺𑀢𑁆𑀢𑀪𑀽𑀢𑁂𑀦 𑀅𑀢𑀺𑀲𑀬𑀫𑀦𑀲𑀸 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑁂𑀲𑀼 𑀫𑀦𑁄𑀫𑀬𑀯𑁄𑀳𑀸𑀭𑀢𑁄𑀢𑀺 𑀤𑀲𑁆𑀲𑀦𑁆𑀢𑁄 𑀆𑀳 ‘‘𑀛𑀸𑀦𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀫𑀦𑁄𑀫𑀬𑀸’’𑀢𑀺. 𑀏𑀯𑀁 𑀅𑀭𑀽𑀧𑀸𑀯𑀘𑀭𑀲𑀢𑁆𑀢𑀸𑀦𑀫𑁆𑀧𑀺 𑀫𑀦𑁄𑀫𑀬𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀘𑁂? 𑀦, 𑀢𑀢𑁆𑀣 ¶ 𑀩𑀸𑀳𑀺𑀭𑀧𑀘𑁆𑀘𑀬𑁂𑀳𑀺 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀢𑀸𑀲𑀗𑁆𑀓𑀸𑀬 𑀏𑀯 𑀅𑀪𑀸𑀯𑀢𑁄, ‘‘𑀫𑀦𑀲𑀸𑀯 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀅𑀯𑀥𑀸𑀭𑀡𑀸𑀲𑀫𑁆𑀪𑀯𑀢𑁄. 𑀦𑀺𑀭𑀼𑀴𑁆𑀳𑁄 𑀯𑀸𑀬𑀁 𑀮𑁄𑀓𑁂 𑀫𑀦𑁄𑀫𑀬𑀯𑁄𑀳𑀸𑀭𑁄 𑀭𑀽𑀧𑀸𑀯𑀘𑀭𑀲𑀢𑁆𑀢𑁂𑀲𑀼. 𑀢𑀣𑀸 𑀳𑀺 ‘‘𑀅𑀦𑁆𑀦𑀫𑀬𑁄 𑀧𑀸𑀦𑀫𑀬𑁄 𑀫𑀦𑁄𑀫𑀬𑁄 𑀆𑀦𑀦𑁆𑀤𑀫𑀬𑁄 𑀯𑀺𑀜𑁆𑀜𑀸𑀡𑀫𑀬𑁄’’𑀢𑀺 𑀧𑀜𑁆𑀘𑀥𑀸 𑀅𑀢𑁆𑀢𑀸𑀦𑀁 𑀯𑁂𑀤𑀯𑀸𑀤𑀺𑀦𑁄 𑀯𑀤𑀦𑁆𑀢𑀺. 𑀉𑀘𑁆𑀙𑁂𑀤𑀯𑀸𑀤𑁂𑀧𑀺 𑀯𑀓𑁆𑀔𑀢𑀺 ‘‘𑀤𑀺𑀩𑁆𑀩𑁄 𑀭𑀽𑀧𑀻 𑀫𑀦𑁄𑀫𑀬𑁄’’𑀢𑀺 (𑀤𑀻. 𑀦𑀺. 𑁧.𑁮𑁬). 𑀲𑁄𑀪𑀦𑀸 𑀧𑀪𑀸 𑀏𑀢𑁂𑀲𑀼 𑀲𑀦𑁆𑀢𑀻𑀢𑀺 𑀲𑀼𑀪𑀸. ‘‘𑀉𑀓𑁆𑀓𑀁𑀲𑁂𑀦𑀸’’𑀢𑀺 𑀆𑀪𑀲𑁆𑀲𑀭𑀤𑁂𑀯𑁂 𑀲𑀦𑁆𑀥𑀸𑀬𑀸𑀳, 𑀧𑀭𑀺𑀢𑁆𑀢𑀸𑀪𑀸 𑀅𑀧𑁆𑀧𑀫𑀸𑀡𑀸𑀪𑀸 𑀧𑀦 𑀤𑁆𑀯𑁂 𑀘𑀢𑁆𑀢𑀸𑀭𑁄 𑀘 𑀓𑀧𑁆𑀧𑁂 𑀢𑀺𑀝𑁆𑀞𑀦𑁆𑀢𑀺. 𑀅𑀝𑁆𑀞𑀓𑀧𑁆𑀧𑁂𑀢𑀺 𑀅𑀝𑁆𑀞 𑀫𑀳𑀸𑀓𑀧𑁆𑀧𑁂.

𑁪𑁦. 𑀲𑀡𑁆𑀞𑀸𑀢𑀻𑀢𑀺 𑀲𑀫𑁆𑀧𑀢𑁆𑀢𑀺𑀓𑀭𑀫𑀳𑀸𑀫𑁂𑀖𑀲𑀫𑀼𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀧𑀣𑀯𑀻𑀲𑀦𑁆𑀥𑀸𑀭𑀓𑀼𑀤𑀓𑀢𑀁𑀲𑀦𑁆𑀥𑀸𑀭𑀓𑀯𑀸𑀬𑀼𑀫𑀳𑀸𑀧𑀣𑀯𑀻𑀆𑀤𑀻𑀦𑀁 𑀲𑀫𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀞𑀸𑀢𑀺, ‘‘𑀲𑀫𑁆𑀪𑀯𑀢𑀺’’ 𑀇𑀘𑁆𑀘𑁂𑀯 𑀯𑀸 𑀅𑀢𑁆𑀣𑁄 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀁. 𑀧𑀓𑀢𑀺𑀬𑀸𑀢𑀺 𑀲𑀪𑀸𑀯𑁂𑀦, 𑀢𑀲𑁆𑀲 ‘‘𑀲𑀼𑀜𑁆𑀜’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀁 𑀦𑀢𑁆𑀣𑀺𑀢𑀸𑀬𑀸’’𑀢𑀺, 𑀅𑀦𑀼𑀧𑁆𑀧𑀦𑁆𑀦𑀢𑁆𑀢𑀸𑀢𑀺 𑀅𑀢𑁆𑀣𑁄, 𑀢𑁂𑀦 𑀬𑀣𑀸 𑀏𑀓𑀘𑁆𑀘𑀸𑀦𑀺 𑀯𑀺𑀫𑀸𑀦𑀸𑀦𑀺 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀁 𑀘𑀼𑀢𑀢𑁆𑀢𑀸 𑀲𑀼𑀜𑁆𑀜𑀸𑀦𑀺 𑀳𑁄𑀦𑁆𑀢𑀺, 𑀦 𑀏𑀯𑀫𑀺𑀤𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀩𑁆𑀭𑀳𑁆𑀫𑀓𑀸𑀬𑀺𑀓𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀪𑀽𑀫𑀺𑀧𑀺 ‘‘𑀩𑁆𑀭𑀳𑁆𑀫𑀓𑀸𑀬𑀺𑀓𑀸’’𑀢𑀺 𑀯𑀼𑀢𑁆𑀢𑀸. 𑀓𑀫𑁆𑀫𑀁 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀧𑀘𑁆𑀘𑀬𑁄 𑀏𑀢𑀺𑀲𑁆𑀲𑀸𑀢𑀺 𑀓𑀫𑁆𑀫𑀧𑀘𑁆𑀘𑀬𑀸. 𑀅𑀣 𑀯𑀸 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀁 𑀯𑀺𑀧𑀘𑁆𑀘𑀦𑀓𑀓𑀫𑁆𑀫𑀲𑁆𑀲 𑀲𑀳𑀓𑀸𑀭𑀻𑀧𑀘𑁆𑀘𑀬𑀪𑀸𑀯𑀢𑁄, 𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑀸𑀢𑀺 𑀓𑀫𑁆𑀫𑀧𑀘𑁆𑀘𑀬𑀸 ¶ . 𑀉𑀢𑀼 𑀲𑀫𑀼𑀝𑁆𑀞𑀸𑀦𑀁 𑀏𑀢𑀺𑀲𑁆𑀲𑀸𑀢𑀺 𑀉𑀢𑀼𑀲𑀫𑀼𑀝𑁆𑀞𑀸𑀦𑀸. ‘‘𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀸’’𑀢𑀺 𑀯𑀸 𑀧𑀸𑀞𑁄, 𑀓𑀫𑁆𑀫𑀲𑀳𑀸𑀬𑁄 𑀧𑀘𑁆𑀘𑀬𑁄, 𑀓𑀫𑁆𑀫𑀲𑁆𑀲 𑀯𑀸 𑀲𑀳𑀸𑀬𑀪𑀽𑀢𑁄 𑀧𑀘𑁆𑀘𑀬𑁄 𑀓𑀫𑁆𑀫𑀧𑀘𑁆𑀘𑀬𑁄 ¶ , 𑀲𑁄𑀯 𑀉𑀢𑀼 𑀓𑀫𑁆𑀫𑀧𑀘𑁆𑀘𑀬𑀉𑀢𑀼, 𑀲𑁄 𑀲𑀫𑀼𑀝𑁆𑀞𑀸𑀦𑀁 𑀏𑀢𑀺𑀲𑁆𑀲𑀸𑀢𑀺 ¶ 𑀬𑁄𑀚𑁂𑀢𑀩𑁆𑀩𑀁. 𑀏𑀢𑁆𑀣𑀸𑀢𑀺 ‘‘𑀩𑁆𑀭𑀳𑁆𑀫𑀯𑀺𑀫𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀸𑀬 𑀩𑁆𑀭𑀳𑁆𑀫𑀓𑀸𑀬𑀺𑀓𑀪𑀽𑀫𑀺𑀬𑀸. 𑀓𑀣𑀁 𑀧𑀡𑀻𑀢𑀸𑀬 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀬𑀁 𑀞𑀺𑀢𑀸𑀦𑀁 𑀳𑀻𑀦𑀸𑀬 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀸 𑀉𑀧𑀧𑀢𑁆𑀢𑀺 𑀳𑁄𑀢𑀻𑀢𑀺 𑀆𑀳 ‘‘𑀅𑀣 𑀲𑀢𑁆𑀢𑀸𑀦’’𑀦𑁆𑀢𑀺𑀆𑀤𑀺. 𑀑𑀢𑀭𑀦𑁆𑀢𑀻𑀢𑀺 𑀉𑀧𑀧𑀚𑁆𑀚𑀦𑀯𑀲𑁂𑀦 𑀳𑁂𑀝𑁆𑀞𑀸𑀪𑀽𑀫𑀺𑀁 𑀕𑀘𑁆𑀙𑀦𑁆𑀢𑀺.

𑀅𑀧𑁆𑀧𑀸𑀬𑀼𑀓𑁂𑀢𑀺 𑀬𑀁 𑀉𑀴𑀸𑀭𑀁 𑀧𑀼𑀜𑁆𑀜𑀓𑀫𑁆𑀫𑀁 𑀓𑀢𑀁, 𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀸𑀭𑀳𑀯𑀺𑀧𑀸𑀓𑀧𑀩𑀦𑁆𑀥𑀢𑁄 𑀅𑀧𑁆𑀧𑀧𑀭𑀺𑀫𑀸𑀡𑀸𑀬𑀼𑀓𑁂. 𑀆𑀬𑀼𑀧𑁆𑀧𑀫𑀸𑀡𑁂𑀦𑁂𑀯𑀸𑀢𑀺 𑀧𑀭𑀫𑀸𑀬𑀼𑀧𑁆𑀧𑀫𑀸𑀡𑁂𑀦𑁂𑀯. 𑀓𑀺𑀁 𑀧𑀦𑁂𑀢𑀁 𑀧𑀭𑀫𑀸𑀬𑀼 𑀦𑀸𑀫, 𑀓𑀣𑀁 𑀯𑀸 𑀢𑀁 𑀧𑀭𑀺𑀘𑁆𑀙𑀺𑀦𑁆𑀦𑀧𑀫𑀸𑀡𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀬𑁄 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑀯𑀺𑀲𑁂𑀲𑁂 𑀧𑀼𑀭𑀺𑀫𑀲𑀺𑀤𑁆𑀥𑀪𑀯𑀧𑀢𑁆𑀣𑀦𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀲𑀭𑀻𑀭𑀸𑀯𑀬𑀯𑀯𑀡𑁆𑀡𑀲𑀡𑁆𑀞𑀸𑀦𑀧𑀫𑀸𑀡𑀸𑀤𑀺𑀯𑀺𑀲𑁂𑀲𑀸 𑀯𑀺𑀬 𑀢𑀁𑀢𑀁𑀕𑀢𑀺𑀦𑀺𑀓𑀸𑀬𑀸𑀤𑀻𑀲𑀼 𑀬𑁂𑀪𑀼𑀬𑁆𑀬𑁂𑀦 𑀦𑀺𑀬𑀢𑀧𑀭𑀺𑀘𑁆𑀙𑁂𑀤𑁄 𑀕𑀩𑁆𑀪𑀲𑁂𑀬𑁆𑀬𑀓𑀓𑀸𑀫𑀸𑀯𑀘𑀭𑀤𑁂𑀯𑀭𑀽𑀧𑀸𑀯𑀘𑀭𑀲𑀢𑁆𑀢𑀸𑀦𑀁 𑀲𑀼𑀓𑁆𑀓𑀲𑁄𑀡𑀺𑀢𑀉𑀢𑀼𑀪𑁄𑀚𑀦𑀸𑀤𑀺 𑀉𑀢𑀼𑀆𑀤𑀺𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀽𑀧𑀢𑁆𑀣𑀫𑁆𑀪𑀺𑀢𑁄 𑀯𑀺𑀧𑀸𑀓𑀧𑀩𑀦𑁆𑀥𑀲𑁆𑀲 𑀞𑀺𑀢𑀺𑀓𑀸𑀮𑀦𑀺𑀬𑀫𑁄, 𑀲𑁄 𑀬𑀣𑀸𑀲𑀓𑀁 𑀔𑀡𑀫𑀢𑁆𑀢𑀸𑀯𑀝𑁆𑀞𑀸𑀬𑀻𑀦𑀫𑁆𑀧𑀺 𑀅𑀢𑁆𑀢𑀦𑁄 𑀲𑀳𑀚𑀸𑀢𑀸𑀦𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀞𑀧𑀦𑀸𑀓𑀸𑀭𑀯𑀼𑀢𑁆𑀢𑀺𑀢𑀸𑀬 𑀧𑀯𑀢𑁆𑀢𑀓𑀸𑀦𑀺 𑀭𑀽𑀧𑀸𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀬𑀲𑁆𑀫𑀸 𑀦 𑀓𑁂𑀯𑀮𑀁 𑀦𑁂𑀲𑀁 𑀔𑀡𑀞𑀺𑀢𑀺𑀬𑀸 𑀏𑀯 𑀓𑀸𑀭𑀡𑀪𑀸𑀯𑁂𑀦 𑀅𑀦𑀼𑀧𑀸𑀮𑀓𑀸𑀦𑀺, 𑀅𑀣 𑀔𑁄 𑀬𑀸𑀯 𑀪𑀯𑀗𑁆𑀕𑀼𑀧𑀘𑁆𑀙𑁂𑀤𑀸 𑀅𑀦𑀼𑀧𑀩𑀦𑁆𑀥𑀲𑁆𑀲 𑀅𑀯𑀺𑀘𑁆𑀙𑁂𑀤𑀳𑁂𑀢𑀼𑀪𑀸𑀯𑁂𑀦𑀸𑀧𑀺, 𑀢𑀲𑁆𑀫𑀸 𑀆𑀬𑀼𑀳𑁂𑀢𑀼𑀓𑀢𑁆𑀢𑀸 𑀓𑀸𑀭𑀡𑀽𑀧𑀘𑀸𑀭𑁂𑀦 𑀆𑀬𑀼, 𑀉𑀓𑁆𑀓𑀁𑀲𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀧𑀭𑀫𑀸𑀬𑀽𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑀁 𑀧𑀦 𑀤𑁂𑀯𑀸𑀦𑀁 𑀦𑁂𑀭𑀬𑀺𑀓𑀸𑀦𑀁 𑀉𑀢𑁆𑀢𑀭𑀓𑀼𑀭𑀼𑀓𑀸𑀦𑀜𑁆𑀘 𑀦𑀺𑀬𑀢𑀧𑀭𑀺𑀘𑁆𑀙𑁂𑀤𑀁, 𑀉𑀢𑁆𑀢𑀭𑀓𑀼𑀭𑀼𑀓𑀸𑀦𑀁 𑀧𑀦 𑀏𑀓𑀦𑁆𑀢𑀦𑀺𑀬𑀢𑀧𑀭𑀺𑀘𑁆𑀙𑁂𑀤𑀫𑁂𑀯, 𑀅𑀯𑀲𑀺𑀝𑁆𑀞𑀫𑀦𑀼𑀲𑁆𑀲𑀧𑁂𑀢𑀢𑀺𑀭𑀘𑁆𑀙𑀸𑀦𑀸𑀦𑀁 𑀧𑀦 𑀘𑀺𑀭𑀝𑁆𑀞𑀺𑀢𑀺𑀲𑀁𑀯𑀢𑁆𑀢𑀦𑀺𑀓𑀓𑀫𑁆𑀫𑀩𑀳𑀼𑀮𑁂 𑀓𑀸𑀮𑁂 𑀢𑀁𑀓𑀫𑁆𑀫𑀲𑀳𑀺𑀢𑀲𑀦𑁆𑀢𑀸𑀦𑀚𑀦𑀺𑀢𑀲𑀼𑀓𑁆𑀓𑀲𑁄𑀡𑀺𑀢𑀧𑁆𑀧𑀘𑁆𑀘𑀬𑀸𑀦𑀁 𑀢𑀁𑀫𑀽𑀮𑀓𑀸𑀦𑀜𑁆𑀘 𑀘𑀦𑁆𑀤𑀲𑀽𑀭𑀺𑀬𑀲𑀫𑀯𑀺𑀲𑀫𑀧𑀭𑀺𑀯𑀢𑁆𑀢𑀦𑀸𑀤𑀺𑀚𑀦𑀺𑀢𑀉𑀢𑀼𑀆𑀳𑀸𑀭𑀸𑀤𑀺𑀲𑀫𑀯𑀺𑀲𑀫 𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 ¶ 𑀘𑀺𑀭𑀸𑀘𑀺𑀭𑀓𑀸𑀮𑀢𑁄 𑀅𑀦𑀺𑀬𑀢𑀧𑀭𑀺𑀘𑁆𑀙𑁂𑀤𑀁, 𑀢𑀲𑁆𑀲 𑀘 𑀬𑀣𑀸 𑀧𑀼𑀭𑀺𑀫𑀲𑀺𑀤𑁆𑀥𑀪𑀯𑀧𑀢𑁆𑀣𑀦𑀸𑀯𑀲𑁂𑀦 𑀢𑀁𑀢𑀁𑀕𑀢𑀺𑀦𑀺𑀓𑀸𑀬𑀸𑀤𑀻𑀲𑀼 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀺𑀲𑁂𑀲𑀦𑀺𑀬𑀫𑁄 𑀲𑀺𑀤𑁆𑀥𑁄 𑀤𑀲𑁆𑀲𑀦𑀸𑀦𑀼𑀲𑁆𑀲𑀯𑀸𑀤𑀻𑀳𑀺, 𑀢𑀣𑀸 𑀆𑀤𑀺𑀢𑁄 𑀕𑀳𑀡𑀲𑀺𑀤𑁆𑀥𑀺𑀬𑀸. 𑀏𑀯𑀁 𑀢𑀸𑀲𑀼 𑀢𑀸𑀲𑀼 𑀉𑀧𑀧𑀢𑁆𑀢𑀻𑀲𑀼 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀲𑀫𑀧𑁆𑀧𑀫𑀸𑀡𑀝𑁆𑀞𑀺𑀢𑀺𑀓𑀸𑀮𑀁 𑀤𑀲𑁆𑀲𑀦𑀸𑀦𑀼𑀲𑁆𑀲𑀯𑁂𑀳𑀺 𑀮𑀪𑀺𑀢𑁆𑀯𑀸 𑀢𑀁 𑀧𑀭𑀫𑀢𑀁 𑀅𑀚𑁆𑀛𑁄𑀲𑀸𑀬 𑀧𑀯𑀢𑁆𑀢𑀺𑀢𑀪𑀯𑀧𑀢𑁆𑀣𑀦𑀸𑀯𑀲𑁂𑀦 𑀆𑀤𑀺𑀢𑁄 𑀧𑀭𑀺𑀘𑁆𑀙𑁂𑀤𑀦𑀺𑀬𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀧𑀦 𑀓𑀫𑁆𑀫𑀁 𑀢𑀸𑀲𑀼 ¶ 𑀢𑀸𑀲𑀼 𑀉𑀧𑀧𑀢𑁆𑀢𑀻𑀲𑀼 𑀬𑀣𑀸 𑀢𑀁𑀢𑀁𑀉𑀧𑀧𑀢𑁆𑀢𑀺𑀦𑀺𑀬𑀢𑀯𑀡𑁆𑀡𑀸𑀤𑀺𑀦𑀺𑀩𑁆𑀩𑀢𑁆𑀢𑀦𑁂 𑀲𑀫𑀢𑁆𑀣𑀁, 𑀏𑀯𑀁 𑀦𑀺𑀬𑀢𑀸𑀬𑀼𑀧𑀭𑀺𑀘𑁆𑀙𑁂𑀤𑀸𑀲𑀼 𑀉𑀧𑀧𑀢𑁆𑀢𑀻𑀲𑀼 𑀧𑀭𑀺𑀘𑁆𑀙𑁂𑀤𑀸𑀢𑀺𑀓𑁆𑀓𑀫𑁂𑀦 𑀯𑀺𑀧𑀸𑀓𑀦𑀺𑀩𑁆𑀩𑀢𑁆𑀢𑀦𑁂 𑀲𑀫𑀢𑁆𑀣𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀆𑀬𑀼𑀧𑁆𑀧𑀫𑀸𑀡𑁂𑀦𑁂𑀯 𑀘𑀯𑀦𑁆𑀢𑀻’’𑀢𑀺. 𑀬𑀲𑁆𑀫𑀸 𑀧𑀦 𑀉𑀧𑀢𑁆𑀣𑀫𑁆𑀪𑀓𑀲𑀳𑀸𑀬𑁂𑀳𑀺 𑀅𑀦𑀼𑀧𑀸𑀮𑀓𑀧𑁆𑀧𑀘𑁆𑀘𑀬𑁂𑀳𑀺 𑀉𑀧𑀸𑀤𑀺𑀦𑁆𑀦𑀓𑀓𑁆𑀔𑀦𑁆𑀥𑀸𑀦𑀁 𑀧𑀯𑀢𑁆𑀢𑁂𑀢𑀩𑁆𑀩𑀸𑀓𑀸𑀭𑁄 𑀅𑀢𑁆𑀣𑀢𑁄 𑀧𑀭𑀫𑀸𑀬𑀼, 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀸𑀦𑀢𑀺𑀓𑁆𑀓𑀫𑀦𑀢𑁄 𑀲𑀢𑀺𑀧𑀺 𑀓𑀫𑁆𑀫𑀸𑀯𑀲𑁂𑀲𑁂 𑀞𑀸𑀦𑀁 𑀦 𑀲𑀫𑁆𑀪𑀯𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀦𑁄 𑀧𑀼𑀜𑁆𑀜𑀩𑀮𑁂𑀦𑁂𑀯 𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺. 𑀓𑀧𑁆𑀧𑀁 𑀯𑀸𑀢𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀁 𑀯𑀸 𑀢𑀲𑁆𑀲 𑀉𑀧𑀟𑁆𑀠𑀁 𑀯𑀸 𑀉𑀧𑀟𑁆𑀠𑀓𑀧𑁆𑀧𑀢𑁄 𑀊𑀦𑀫𑀥𑀺𑀓𑀁 𑀯𑀸𑀢𑀺 𑀯𑀺𑀓𑀧𑁆𑀧𑀦𑀢𑁆𑀣𑁄 𑀯𑀸-𑀲𑀤𑁆𑀤𑁄.

𑁪𑁧. 𑀅𑀦𑀪𑀺𑀭𑀢𑀻𑀢𑀺 ¶ 𑀏𑀓𑀯𑀺𑀳𑀸𑀭𑁂𑀦 𑀅𑀦𑀪𑀺𑀭𑀢𑀺. 𑀲𑀸 𑀧𑀦 𑀬𑀲𑁆𑀫𑀸 𑀅𑀜𑁆𑀜𑁂𑀳𑀺 𑀲𑀫𑀸𑀕𑀫𑀺𑀘𑁆𑀙𑀸 𑀳𑁄𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀧𑀭𑀲𑁆𑀲𑀸𑀧𑀺 𑀲𑀢𑁆𑀢𑀲𑁆𑀲 𑀆𑀕𑀫𑀦𑀧𑀢𑁆𑀣𑀦𑀸’’𑀢𑀺. 𑀧𑀺𑀬𑀯𑀢𑁆𑀣𑀼𑀯𑀺𑀭𑀳𑁂𑀦 𑀧𑀺𑀬𑀯𑀢𑁆𑀣𑀼𑀅𑀮𑀸𑀪𑁂𑀦 𑀯𑀸 𑀘𑀺𑀢𑁆𑀢𑀯𑀺𑀖𑀸𑀢𑁄 𑀉𑀓𑁆𑀓𑀡𑁆𑀞𑀺𑀢𑀸, 𑀲𑀸 𑀅𑀢𑁆𑀣𑀢𑁄 𑀤𑁄𑀫𑀦𑀲𑁆𑀲𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀬𑁂𑀯𑀸𑀢𑀺 𑀆𑀳 ‘‘𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺. 𑀤𑀻𑀖𑀭𑀢𑁆𑀢𑀁 𑀛𑀸𑀦𑀭𑀢𑀺𑀬𑀸 𑀭𑀫𑀫𑀸𑀦𑀲𑁆𑀲 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀅𑀦𑀪𑀺𑀭𑀢𑀺𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀸 ‘‘𑀫𑀫’’𑀦𑁆𑀢𑀺 𑀘 ‘‘𑀅𑀳’’𑀦𑁆𑀢𑀺 𑀘 𑀕𑀳𑀡𑀲𑁆𑀲 𑀓𑀸𑀭𑀡𑀪𑀽𑀢𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄 𑀇𑀥 𑀧𑀭𑀺𑀢𑀲𑁆𑀲𑀦𑀸. 𑀢𑀸 𑀧𑀦 𑀘𑀺𑀢𑁆𑀢𑀲𑁆𑀲 𑀧𑀼𑀭𑀺𑀫𑀸𑀯𑀢𑁆𑀣𑀸𑀬 𑀘𑀮𑀦𑀁 𑀓𑀫𑁆𑀧𑀦𑀦𑁆𑀢𑀺 ¶ 𑀆𑀳 ‘‘𑀉𑀩𑁆𑀩𑀺𑀚𑁆𑀚𑀦𑀸 𑀨𑀦𑁆𑀤𑀦𑀸’’𑀢𑀺. 𑀢𑁂𑀦𑁂𑀯𑀸𑀳 ‘‘𑀢𑀡𑁆𑀳𑀸𑀢𑀲𑁆𑀲𑀦𑀸𑀧𑀺 𑀤𑀺𑀝𑁆𑀞𑀺𑀢𑀲𑁆𑀲𑀦𑀸𑀧𑀺 𑀯𑀝𑁆𑀝𑀢𑀻’’𑀢𑀺. 𑀬𑀁 𑀧𑀦 𑀅𑀢𑁆𑀣𑀼𑀤𑁆𑀥𑀸𑀭𑁂 ‘‘𑀅𑀳𑁄 𑀯𑀢 𑀅𑀜𑁆𑀜𑁂𑀧𑀺 𑀲𑀢𑁆𑀢𑀸 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑁂𑀬𑁆𑀬𑀼𑀦𑁆𑀢𑀺 𑀅𑀬𑀁 𑀢𑀡𑁆𑀳𑀸𑀢𑀲𑁆𑀲𑀦𑀸 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀤𑀺𑀝𑁆𑀞𑀺𑀢𑀲𑁆𑀲𑀦𑀸𑀬 𑀯𑀺𑀲𑀼𑀁 𑀉𑀤𑀸𑀳𑀭𑀡𑀁 𑀤𑀲𑁆𑀲𑁂𑀦𑁆𑀢𑁂𑀦 𑀢𑀡𑁆𑀳𑀸𑀢𑀲𑁆𑀲𑀦𑀁𑀬𑁂𑀯 𑀢𑀢𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀦 𑀧𑀦 𑀢𑀢𑁆𑀣 𑀤𑀺𑀝𑁆𑀞𑀺𑀢𑀲𑁆𑀲𑀦𑀸𑀬 𑀅𑀪𑀸𑀯𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀸𑀲𑀢𑀲𑁆𑀲𑀦𑀸 𑀘𑀺𑀢𑁆𑀢𑀼𑀢𑁆𑀭𑀸𑀲𑁄. 𑀪𑀬𑀸𑀦𑀓𑀦𑁆𑀢𑀺 𑀪𑁂𑀭𑀯𑀸𑀭𑀫𑁆𑀫𑀡𑀦𑀺𑀫𑀺𑀢𑁆𑀢𑀁 𑀩𑀮𑀯𑀪𑀬𑀁. 𑀢𑁂𑀦 𑀲𑀭𑀻𑀭𑀲𑁆𑀲 𑀣𑀤𑁆𑀥𑀪𑀸𑀯𑁄 𑀙𑀫𑁆𑀪𑀺𑀢𑀢𑁆𑀢𑀁 𑀪𑀬𑀁 𑀲𑀁𑀯𑁂𑀕𑀦𑁆𑀢𑀺 𑀏𑀢𑁆𑀣 𑀪𑀬𑀦𑁆𑀢𑀺 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀬 𑀘𑀺𑀡𑁆𑀡𑀦𑁆𑀢𑁂 𑀲𑀩𑁆𑀩𑀲𑀗𑁆𑀔𑀸𑀭𑀢𑁄 𑀪𑀸𑀬𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀪𑀬𑀜𑀸𑀡𑀁. 𑀲𑀁𑀯𑁂𑀕𑀦𑁆𑀢𑀺 𑀲𑀳𑁄𑀢𑁆𑀢𑀧𑁆𑀧𑀜𑀸𑀡𑀁, 𑀑𑀢𑁆𑀢𑀧𑁆𑀧𑀫𑁂𑀯 𑀯𑀸. 𑀲𑀦𑁆𑀢𑀸𑀲𑀦𑁆𑀢𑀺 𑀆𑀤𑀻𑀦𑀯𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀳𑀺 𑀲𑀗𑁆𑀔𑀸𑀭𑁂𑀳𑀺 𑀲𑀦𑁆𑀢𑀲𑁆𑀲𑀦𑀜𑀸𑀡𑀁. 𑀲𑀳 𑀩𑁆𑀬𑀸𑀬𑀢𑀺 𑀧𑀯𑀢𑁆𑀢𑀢𑀺, 𑀤𑁄𑀲𑀁 𑀯𑀸 𑀙𑀸𑀤𑁂𑀢𑀻𑀢𑀺 𑀲𑀳𑀩𑁆𑀬𑁄, 𑀲𑀳𑀸𑀬𑁄, 𑀢𑀲𑁆𑀲 𑀪𑀸𑀯𑀁 𑀲𑀳𑀩𑁆𑀬𑀢𑀁.

𑁪𑁨. 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑁄 𑀇𑀫𑁂 𑀲𑀢𑁆𑀢𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀫𑀸 𑀧𑀦 𑀲𑁄 𑀧𑀸𑀲𑀁𑀲𑀪𑀸𑀯𑁂𑀦 𑀉𑀢𑁆𑀢𑀫𑀪𑀸𑀯𑁂𑀦 𑀘 ‘‘𑀢𑁂 𑀲𑀢𑁆𑀢𑁂 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑁄’’𑀢𑀺 𑀅𑀢𑁆𑀢𑀸𑀦𑀁 𑀫𑀜𑁆𑀜𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀚𑁂𑀝𑁆𑀞𑀓𑁄𑀳𑀫𑀲𑁆𑀫𑀻’’𑀢𑀺. 𑀅𑀜𑁆𑀜𑀤𑀢𑁆𑀣𑀼 𑀤𑀲𑁄𑀢𑀺 ¶ 𑀤𑀲𑁆𑀲𑀦𑁂 𑀅𑀦𑁆𑀢𑀭𑀸𑀬𑀸𑀪𑀸𑀯𑀯𑀘𑀦𑁂𑀦, 𑀜𑁂𑀬𑁆𑀬𑀯𑀺𑀲𑁂𑀲𑀧𑀭𑀺𑀕𑁆𑀕𑀸𑀳𑀺𑀓𑀪𑀸𑀯𑁂𑀦 𑀘 𑀅𑀦𑀸𑀯𑀭𑀡𑀤𑀲𑁆𑀲𑀸𑀯𑀺𑀢𑀁 𑀧𑀝𑀺𑀚𑀸𑀦𑀸𑀢𑀻𑀢𑀺 𑀆𑀳 ‘‘𑀲𑀩𑁆𑀩𑀁 𑀧𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄’’𑀢𑀺. 𑀪𑀽𑀢𑀪𑀩𑁆𑀬𑀸𑀦𑀦𑁆𑀢𑀺 𑀅𑀳𑁂𑀲𑀼𑀦𑁆𑀢𑀺 𑀪𑀽𑀢𑀸, 𑀪𑀯𑀦𑁆𑀢𑀺 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀪𑀩𑁆𑀬𑀸, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀢𑁆𑀢𑀫𑀸𑀦𑀓𑀸𑀮𑀯𑀲𑁂𑀦𑁂𑀯 𑀪𑀩𑁆𑀬-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀧𑀞𑀫𑀘𑀺𑀢𑁆𑀢𑀓𑁆𑀔𑀡𑁂𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀓𑁆𑀔𑀡𑁂. 𑀓𑀺𑀜𑁆𑀘𑀸𑀧𑀺 𑀲𑁄 𑀩𑁆𑀭𑀳𑁆𑀫𑀸 𑀅𑀦𑀯𑀝𑁆𑀞𑀺𑀢𑀤𑀲𑁆𑀲𑀦𑀢𑁆𑀢𑀸 𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀼𑀭𑀺𑀫𑀢𑀭𑀚𑀸𑀢𑀺𑀧𑀭𑀺𑀘𑀺𑀢𑀫𑁆𑀧𑀺 𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀯𑀲𑁂𑀦 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀫𑀢𑁆𑀢𑀧𑀝𑀺𑀩𑀤𑁆𑀥𑁂𑀦 ¶ 𑀲𑀢𑁆𑀢𑀦𑀺𑀫𑁆𑀫𑀸𑀦𑁂𑀦 𑀯𑀺𑀧𑀮𑁆𑀮𑀝𑁆𑀞𑁄 ‘‘𑀅𑀳𑀁 𑀇𑀲𑁆𑀲𑀭𑁄 𑀓𑀢𑁆𑀢𑀸 𑀦𑀺𑀫𑁆𑀫𑀸𑀢𑀸’’𑀢𑀺𑀆𑀤𑀺𑀦𑀸 𑀇𑀲𑁆𑀲𑀭𑀓𑀼𑀢𑁆𑀢𑀤𑀲𑁆𑀲𑀦𑀁 𑀧𑀓𑁆𑀔𑀦𑁆𑀤𑀫𑀸𑀦𑁄 𑀅𑀪𑀺𑀦𑀺𑀯𑀺𑀲𑀦𑀯𑀲𑁂𑀦𑁂𑀯 𑀧𑀢𑀺𑀝𑁆𑀞𑀺𑀢𑁄, 𑀦 𑀧𑀢𑀺𑀝𑁆𑀞𑀸𑀧𑀦𑀯𑀲𑁂𑀦 ‘‘𑀢𑀲𑁆𑀲 𑀏𑀯𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀧𑀢𑀺𑀝𑁆𑀞𑀸𑀧𑀦𑀓𑁆𑀓𑀫𑁂𑀦𑁂𑀯 𑀧𑀦 𑀢𑀲𑁆𑀲 𑀲𑁄 𑀅𑀪𑀺𑀦𑀺𑀯𑁂𑀲𑁄 𑀚𑀸𑀢𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀓𑀸𑀭𑀡𑀢𑁄 𑀲𑀸𑀥𑁂𑀢𑀼𑀓𑀸𑀫𑁄’’𑀢𑀺, ‘‘𑀧𑀝𑀺𑀜𑁆𑀜𑀁 𑀓𑀢𑁆𑀯𑀸’’𑀢𑀺 𑀘 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑀪𑀕𑀯𑀸 ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀽’’𑀢𑀺𑀆𑀤𑀺. 𑀢𑀢𑁆𑀣 𑀫𑀦𑁄𑀧𑀡𑀺𑀥𑀻𑀢𑀺 𑀫𑀦𑀲𑀸 𑀏𑀯 𑀧𑀢𑁆𑀣𑀦𑀸, 𑀢𑀣𑀸 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀫𑁂𑀯𑀸𑀢𑀺 𑀅𑀢𑁆𑀣𑁄, 𑀇𑀢𑁆𑀣𑀪𑀸𑀯𑀦𑁆𑀢𑀺 𑀇𑀤𑀧𑁆𑀧𑀓𑀸𑀭𑀢𑀁. 𑀬𑀲𑁆𑀫𑀸 𑀧𑀦 𑀇𑀢𑁆𑀣𑀦𑁆𑀢𑀺 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑁄 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀢𑀲𑁆𑀫𑀸 ‘‘𑀩𑁆𑀭𑀳𑁆𑀫𑀪𑀸𑀯𑀦𑁆𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀦𑀦𑀼 𑀘 𑀤𑁂𑀯𑀸𑀦𑀁 𑀉𑀧𑀧𑀢𑁆𑀢𑀺𑀲𑀫𑀦𑀦𑁆𑀢𑀭𑀁 ‘‘𑀇𑀫𑀺𑀲𑁆𑀲𑀸 𑀦𑀸𑀫 𑀕𑀢𑀺𑀬𑀸 𑀘𑀯𑀺𑀢𑁆𑀯𑀸 𑀇𑀫𑀺𑀦𑀸 𑀦𑀸𑀫 𑀓𑀫𑁆𑀫𑀼𑀦𑀸 ¶ 𑀇𑀥𑀽𑀧𑀧𑀦𑁆𑀦𑀸’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸 𑀳𑁄𑀢𑀻𑀢𑀺? 𑀲𑀘𑁆𑀘𑀁 𑀳𑁄𑀢𑀺, 𑀲𑀸 𑀧𑀦 𑀧𑀼𑀭𑀺𑀫𑀚𑀸𑀢𑀻𑀲𑀼 𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡𑁂 𑀲𑀫𑁆𑀫𑀤𑁂𑀯 𑀦𑀺𑀯𑀺𑀝𑁆𑀞𑀚𑁆𑀛𑀸𑀲𑀬𑀸𑀦𑀁. 𑀇𑀫𑁂 𑀧𑀦 𑀲𑀢𑁆𑀢𑀸 𑀧𑀼𑀭𑀺𑀫𑀸𑀲𑀼𑀧𑀺 𑀚𑀸𑀢𑀻𑀲𑀼 𑀇𑀲𑁆𑀲𑀭𑀓𑀼𑀢𑁆𑀢𑀤𑀲𑁆𑀲𑀦𑀯𑀲𑁂𑀦 𑀯𑀺𑀦𑀺𑀩𑀦𑁆𑀥𑀸𑀪𑀺𑀦𑀺𑀯𑁂𑀲𑀸 𑀅𑀳𑁂𑀲𑀼𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀫𑀺𑀦𑀸 𑀫𑀬’’𑀦𑁆𑀢𑀺𑀆𑀤𑀺.

𑁪𑁩. 𑀈𑀲𑀢𑀻𑀢𑀺 𑀈𑀲𑁄, 𑀅𑀪𑀺𑀪𑀽𑀢𑀺 𑀅𑀢𑁆𑀣𑁄. 𑀫𑀳𑀸 𑀈𑀲𑁄 𑀫𑀳𑁂𑀲𑁄, 𑀲𑀼𑀧𑁆𑀧𑀢𑀺𑀝𑁆𑀞𑀫𑀳𑁂𑀲𑀢𑀸𑀬 𑀧𑀦 𑀧𑀭𑁂𑀳𑀺 ‘‘𑀫𑀳𑁂𑀲𑁄’’𑀢𑀺 𑀅𑀓𑁆𑀔𑀸𑀢𑀩𑁆𑀩𑀢𑀸𑀬 𑀫𑀳𑁂𑀲𑀓𑁆𑀔𑁄, 𑀅𑀢𑀺𑀲𑀬𑁂𑀦 𑀫𑀳𑁂𑀲𑀓𑁆𑀔𑁄 𑀫𑀳𑁂𑀲𑀓𑁆𑀔𑀢𑀭𑁄𑀢𑀺 𑀯𑀘𑀦𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀲𑁆𑀫𑀸 𑀧𑀦 𑀲𑁄 𑀫𑀳𑁂𑀲𑀓𑁆𑀔𑀪𑀸𑀯𑁄 𑀆𑀥𑀺𑀧𑀢𑁂𑀬𑁆𑀬𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 ‘‘𑀇𑀲𑁆𑀲𑀭𑀺𑀬𑀧𑀭𑀺𑀯𑀸𑀭𑀯𑀲𑁂𑀦 𑀫𑀳𑀸𑀬𑀲𑀢𑀭𑁄’’𑀢𑀺 𑀯𑀼𑀢𑁆𑀢𑀁.

𑁪𑁪. 𑀇𑀥𑁂𑀯 𑀆𑀕𑀘𑁆𑀙𑀢𑀻𑀢𑀺 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀮𑁄𑀓𑁂 𑀏𑀯 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀆𑀕𑀘𑁆𑀙𑀢𑀺. 𑀬𑀁 𑀅𑀜𑁆𑀜𑀢𑀭𑁄 𑀲𑀢𑁆𑀢𑁄𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀓𑀭𑀡𑁂 𑀯𑀸 𑀧𑀘𑁆𑀘𑀢𑁆𑀢𑀦𑀺𑀤𑁆𑀤𑁂𑀲𑁄, 𑀬𑁂𑀦 𑀞𑀸𑀦𑁂𑀦𑀸𑀢𑀺 𑀅𑀢𑁆𑀣𑁄, 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁 𑀯𑀸. 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀢𑀻𑀢𑀺 𑀏𑀢𑁆𑀣 𑀬𑀤𑁂𑀢𑀁 𑀇𑀢𑁆𑀣𑀢𑁆𑀢𑀲𑁆𑀲 𑀆𑀕𑀫𑀦𑀁, 𑀏𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺 ¶ 𑀅𑀢𑁆𑀣𑁄. 𑀏𑀲 𑀦𑀬𑁄 ‘‘𑀧𑀩𑁆𑀩𑀚𑀢𑀺, 𑀘𑁂𑀢𑁄𑀲𑀫𑀸𑀥𑀺𑀁 𑀨𑀼𑀲𑀢𑀺, 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀻’’𑀢𑀺 𑀏𑀢𑁂𑀲𑀼𑀧𑀺 𑀧𑀤𑁂𑀲𑀼. ‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀪𑀺𑀓𑁆𑀔𑀯𑁂 ¶ 𑀯𑀺𑀚𑁆𑀚𑀢𑀺, 𑀬𑀁 𑀅𑀜𑁆𑀜𑀢𑀭𑁄 𑀲𑀢𑁆𑀢𑁄’’𑀢𑀺 𑀇𑀫𑀜𑁆𑀳𑀺 𑀧𑀤𑀁 ‘‘𑀧𑀩𑁆𑀩𑀚𑀢𑀻’’𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀦𑁆𑀢𑀺.

𑁪𑁫. 𑀔𑀺𑀟𑁆𑀟𑀸𑀬 𑀧𑀤𑀼𑀲𑁆𑀲𑀦𑁆𑀢𑀻𑀢𑀺 𑀔𑀺𑀟𑁆𑀟𑀸𑀧𑀤𑁄𑀲𑀺𑀦𑁄, 𑀔𑀺𑀟𑁆𑀟𑀸𑀧𑀤𑁄𑀲𑀺𑀦𑁄 𑀏𑀯 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸, 𑀔𑀺𑀟𑁆𑀟𑀸𑀧𑀤𑁄𑀲𑁄 𑀯𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸. 𑀅𑀢𑀺𑀓𑁆𑀓𑀦𑁆𑀢𑀯𑁂𑀮𑀁 𑀅𑀢𑀺𑀯𑁂𑀮𑀁, 𑀆𑀳𑀸𑀭𑀽𑀧𑀪𑁄𑀕𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀫𑁂𑀣𑀼𑀦𑀲𑀫𑁆𑀧𑀬𑁄𑀕𑁂𑀦 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀁 𑀓𑁂𑀴𑀺𑀳𑀲𑁆𑀲𑀲𑀼𑀔𑀁 𑀭𑀢𑀺𑀥𑀫𑁆𑀫𑁄 𑀭𑀢𑀺𑀲𑀪𑀸𑀯𑁄. 𑀆𑀳𑀸𑀭𑀦𑁆𑀢𑀺 𑀏𑀢𑁆𑀣 𑀓𑁄 𑀤𑁂𑀯𑀸𑀦𑀁 𑀆𑀳𑀸𑀭𑁄, 𑀓𑀸 𑀆𑀳𑀸𑀭𑀯𑁂𑀮𑀸𑀢𑀺? 𑀲𑀩𑁆𑀩𑁂𑀲𑀫𑁆𑀧𑀺 𑀓𑀸𑀫𑀸𑀯𑀘𑀭𑀤𑁂𑀯𑀸𑀦𑀁 𑀲𑀼𑀥𑀸 𑀆𑀳𑀸𑀭𑁄, 𑀲𑀸 𑀳𑁂𑀝𑁆𑀞𑀺𑀫𑁂𑀳𑀺 𑀉𑀧𑀭𑀺𑀫𑀸𑀦𑀁 𑀧𑀡𑀻𑀢𑀢𑀫𑀸 𑀳𑁄𑀢𑀺, 𑀢𑀁 𑀬𑀣𑀸𑀲𑀓𑀁 𑀤𑀺𑀯𑀲𑀯𑀲𑁂𑀦 𑀤𑀺𑀯𑀲𑁂 𑀤𑀺𑀯𑀲𑁂 𑀪𑀼𑀜𑁆𑀚𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀩𑀺𑀴𑀸𑀭𑀧𑀤𑀧𑁆𑀧𑀫𑀸𑀡𑀁 𑀲𑀼𑀥𑀸𑀳𑀸𑀭𑀁 𑀪𑀼𑀜𑁆𑀚𑀦𑁆𑀢𑀺, 𑀲𑁄 𑀚𑀺𑀯𑁆𑀳𑀸𑀬 𑀞𑀧𑀺𑀢𑀫𑀢𑁆𑀢𑁄 𑀬𑀸𑀯 𑀓𑁂𑀲𑀕𑁆𑀕𑀦𑀔𑀕𑁆𑀕𑀸 𑀓𑀸𑀬𑀁 𑀨𑀭𑀢𑀺, 𑀢𑁂𑀲𑀁𑀬𑁂𑀯 𑀤𑀺𑀯𑀲𑀯𑀲𑁂𑀦 𑀲𑀢𑁆𑀢𑀤𑀺𑀯𑀲𑁂 𑀬𑀸𑀧𑀦𑀲𑀫𑀢𑁆𑀣𑁄 𑀘 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀦𑀺𑀭𑀦𑁆𑀢𑀭𑀁 𑀔𑀸𑀤𑀦𑁆𑀢𑀸 𑀧𑀺𑀯𑀦𑁆𑀢𑀸’’𑀢𑀺 𑀇𑀤𑀁 𑀧𑀭𑀺𑀓𑀧𑁆𑀧𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀓𑀫𑁆𑀫𑀚𑀢𑁂𑀚𑀲𑁆𑀲 𑀩𑀮𑀯𑀪𑀸𑀯𑁄 𑀉𑀴𑀸𑀭𑀧𑀼𑀜𑁆𑀜𑀦𑀺𑀩𑁆𑀩𑀢𑁆𑀢𑀢𑁆𑀢𑀸, 𑀉𑀴𑀸𑀭𑀕𑀭𑀼𑀲𑀺𑀦𑀺𑀤𑁆𑀥𑀲𑀼𑀥𑀸𑀳𑀸𑀭𑀚𑀻𑀭𑀡𑀢𑁄 𑀘. 𑀓𑀭𑀚𑀓𑀸𑀬𑀲𑁆𑀲 𑀫𑀦𑁆𑀤𑀪𑀸𑀯𑁄 𑀫𑀼𑀤𑀼𑀲𑀼𑀔𑀼𑀫𑀸𑀮𑀪𑀸𑀯𑀢𑁄. 𑀢𑁂𑀦𑁂𑀯 𑀳𑀺 𑀪𑀕𑀯𑀸 𑀇𑀦𑁆𑀤𑀲𑀸𑀮𑀕𑀼𑀳𑀸𑀬𑀁 𑀧𑀓𑀢𑀺𑀧𑀣𑀯𑀺𑀬𑀁 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 ‘‘𑀑𑀴𑀸𑀭𑀺𑀓𑀁 𑀓𑀸𑀬𑀁 𑀅𑀥𑀺𑀝𑁆𑀞𑁂𑀳𑀻’’𑀢𑀺 𑀆𑀳. 𑀢𑁂𑀲𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁. 𑀯𑀢𑁆𑀣𑀼𑀦𑁆𑀢𑀺 𑀓𑀭𑀚𑀓𑀸𑀬𑀁. 𑀓𑁂𑀘𑀻𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄.

𑁪𑁭. 𑀫𑀦𑁂𑀦𑀸𑀢𑀺 ¶ ¶ 𑀇𑀲𑁆𑀲𑀸𑀧𑀓𑀢𑀢𑁆𑀢𑀸 𑀧𑀤𑀼𑀝𑁆𑀞𑁂𑀦 𑀫𑀦𑀲𑀸. 𑀉𑀲𑀽𑀬𑀸𑀯𑀲𑁂𑀦 𑀫𑀦𑀲𑁄𑀯 𑀧𑀤𑁄𑀲𑁄 𑀫𑀦𑁄𑀧𑀤𑁄𑀲𑁄, 𑀲𑁄 𑀏𑀢𑁂𑀲𑀁 𑀅𑀢𑁆𑀣𑀺 𑀯𑀺𑀦𑀸𑀲𑀳𑁂𑀢𑀼𑀪𑀽𑀢𑁄𑀢𑀺 𑀫𑀦𑁄𑀧𑀤𑁄𑀲𑀺𑀓𑀸𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀓𑀼𑀤𑁆𑀥𑁄 𑀭𑀓𑁆𑀔𑀢𑀻𑀢𑀺 𑀓𑀼𑀤𑁆𑀥𑀲𑁆𑀲 𑀲𑁄 𑀓𑁄𑀥𑁄 𑀇𑀢𑀭𑀲𑁆𑀫𑀺𑀁 𑀅𑀓𑀼𑀚𑁆𑀛𑀦𑁆𑀢𑁂 𑀅𑀦𑀼𑀧𑀸𑀤𑀸𑀦𑁄 𑀏𑀓𑀯𑀸𑀭𑀫𑁂𑀯 𑀉𑀧𑁆𑀧𑀢𑁆𑀢𑀺𑀬𑀸 𑀅𑀦𑀸𑀲𑁂𑀯𑀦𑁄 𑀘𑀸𑀯𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀉𑀤𑀓𑀦𑁆𑀢𑀁 𑀧𑀢𑁆𑀯𑀸 𑀅𑀕𑁆𑀕𑀺 𑀯𑀺𑀬 𑀦𑀺𑀩𑁆𑀩𑀸𑀬𑀢𑀺, 𑀢𑀲𑁆𑀫𑀸 𑀅𑀓𑀼𑀤𑁆𑀥𑁄 𑀢𑀁 𑀘𑀯𑀦𑀢𑁄 𑀭𑀓𑁆𑀔𑀢𑀺, 𑀉𑀪𑁄𑀲𑀼 𑀧𑀦 𑀓𑀼𑀤𑁆𑀥𑁂𑀲𑀼 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀅𑀜𑁆𑀜𑀫𑀜𑁆𑀜𑀫𑁆𑀳𑀺 𑀧𑀭𑀺𑀯𑀟𑁆𑀠𑀦𑀯𑀲𑁂𑀦 𑀢𑀺𑀔𑀺𑀡𑀲𑀫𑀼𑀤𑀸𑀘𑀸𑀭𑁄 𑀦𑀺𑀲𑁆𑀲𑀬𑀤𑀳𑀦𑀭𑀲𑁄 𑀓𑁄𑀥𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀳𑀤𑀬𑀯𑀢𑁆𑀣𑀼𑀁 𑀦𑀺𑀤𑀳𑀦𑁆𑀢𑁄 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀸𑀮𑀓𑀭𑀚𑀓𑀸𑀬𑀁 𑀯𑀺𑀦𑀸𑀲𑁂𑀢𑀺, 𑀢𑀢𑁄 𑀲𑀓𑀮𑁄𑀧𑀺 𑀅𑀢𑁆𑀢𑀪𑀸𑀯𑁄 𑀅𑀦𑁆𑀢𑀭𑀥𑀸𑀬𑀢𑀺. 𑀢𑁂𑀦𑀸𑀳 ‘‘𑀉𑀪𑁄𑀲𑀼 𑀧𑀦𑀸’’𑀢𑀺𑀆𑀤𑀺 ¶ . 𑀢𑀣𑀸 𑀘𑀸𑀳 𑀪𑀕𑀯𑀸 ‘‘𑀅𑀜𑁆𑀜𑀫𑀜𑁆𑀜𑀁 𑀧𑀤𑀼𑀝𑁆𑀞𑀘𑀺𑀢𑁆𑀢𑀸 𑀓𑀺𑀮𑀦𑁆𑀢𑀓𑀸𑀬𑀸…𑀧𑁂… 𑀘𑀯𑀦𑁆𑀢𑀻’’𑀢𑀺. 𑀥𑀫𑁆𑀫𑀢𑀸𑀢𑀺 𑀥𑀫𑁆𑀫𑀦𑀺𑀬𑀸𑀫𑁄. 𑀲𑁄 𑀘 𑀢𑁂𑀲𑀁 𑀓𑀭𑀚𑀓𑀸𑀬𑀲𑁆𑀲 𑀫𑀦𑁆𑀤𑀢𑀸𑀬, 𑀢𑀣𑀸𑀉𑀧𑁆𑀧𑀚𑁆𑀚𑀦𑀓𑀓𑁄𑀥𑀲𑁆𑀲 𑀘 𑀩𑀮𑀯𑀢𑀸𑀬 𑀞𑀸𑀦𑀲𑁄 𑀘𑀯𑀦𑀁, 𑀢𑁂𑀲𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀲𑀪𑀸𑀯𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁯. 𑀘𑀓𑁆𑀔𑀸𑀤𑀻𑀦𑀁 𑀪𑁂𑀤𑀁 𑀧𑀲𑁆𑀲𑀢𑀻𑀢𑀺 𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀦𑁆𑀦𑀺𑀧𑀸𑀢𑁂 𑀯𑀺𑀓𑀸𑀭𑀸𑀧𑀢𑁆𑀢𑀺𑀤𑀲𑁆𑀲𑀦𑀢𑁄, 𑀅𑀦𑁆𑀢𑁂 𑀘 𑀅𑀤𑀲𑁆𑀲𑀦𑀽𑀧𑀕𑀫𑀦𑀢𑁄 𑀯𑀺𑀦𑀸𑀲𑀁 𑀧𑀲𑁆𑀲𑀢𑀺 𑀑𑀴𑀸𑀭𑀺𑀓𑀢𑁆𑀢𑀸 𑀭𑀽𑀧𑀥𑀫𑁆𑀫𑀪𑁂𑀤𑀲𑁆𑀲. 𑀧𑀘𑁆𑀘𑀬𑀁 𑀤𑀢𑁆𑀯𑀸𑀢𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑁄 𑀳𑀼𑀢𑁆𑀯𑀸. ‘‘𑀩𑀮𑀯𑀢𑀭’’𑀦𑁆𑀢𑀺 𑀘𑀺𑀢𑁆𑀢𑀲𑁆𑀲 𑀮𑀳𑀼𑀢𑀭𑀁 𑀪𑁂𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀏𑀓𑀲𑁆𑀫𑀺𑀁 𑀭𑀽𑀧𑁂 𑀥𑀭𑀦𑁆𑀢𑁂𑀬𑁂𑀯 𑀲𑁄𑀴𑀲 𑀘𑀺𑀢𑁆𑀢𑀸𑀦𑀺 𑀪𑀺𑀚𑁆𑀚𑀦𑁆𑀢𑀺. 𑀪𑁂𑀤𑀁 𑀦 𑀧𑀲𑁆𑀲𑀢𑀻𑀢𑀺 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀦𑁆𑀢𑀫𑁆𑀧𑀺 𑀘𑀺𑀢𑁆𑀢𑀁 𑀧𑀭𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁂𑀦𑁂𑀯 𑀪𑀺𑀚𑁆𑀚𑀢𑀻𑀢𑀺 𑀧𑀼𑀭𑀺𑀫𑀘𑀺𑀢𑁆𑀢𑀲𑁆𑀲 𑀅𑀪𑀸𑀯𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀬 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀢𑁄 𑀪𑀸𑀯𑀧𑀓𑁆𑀔𑁄 𑀩𑀮𑀯𑀢𑀭𑁄 𑀧𑀸𑀓𑀝𑁄 𑀘 𑀳𑁄𑀢𑀺, 𑀦 𑀅𑀪𑀸𑀯𑀧𑀓𑁆𑀔𑁄𑀢𑀺 𑀘𑀺𑀢𑁆𑀢𑀲𑁆𑀲 𑀯𑀺𑀦𑀸𑀲𑀁 𑀦 𑀧𑀲𑁆𑀲𑀢𑀺, 𑀅𑀬𑀜𑁆𑀘 𑀅𑀢𑁆𑀣𑁄 𑀅𑀮𑀸𑀢𑀘𑀓𑁆𑀓𑀤𑀲𑁆𑀲𑀦𑁂𑀦 𑀲𑀼𑀧𑀸𑀓𑀝𑁄 𑀯𑀺𑀜𑁆𑀜𑀸𑀬𑀢𑀺. 𑀬𑀲𑁆𑀫𑀸 ¶ 𑀧𑀦 𑀢𑀓𑁆𑀓𑀻𑀯𑀸𑀤𑀻 𑀦𑀸𑀦𑀢𑁆𑀢𑀦𑀬𑀲𑁆𑀲 𑀤𑀽𑀭𑀢𑀭𑀢𑀸𑀬 𑀏𑀓𑀢𑁆𑀢𑀦𑀬𑀲𑁆𑀲𑀧𑀺 𑀫𑀺𑀘𑁆𑀙𑀸𑀕𑀳𑀺𑀢𑀢𑁆𑀢𑀸 ‘‘𑀬𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁 𑀲𑀩𑁆𑀩𑀤𑀸𑀧𑀺 𑀏𑀓𑀭𑀽𑀧𑁂𑀦 𑀧𑀯𑀢𑁆𑀢𑀢𑀺, 𑀅𑀬𑀫𑁂𑀯 𑀅𑀢𑁆𑀢𑀸 𑀦𑀺𑀘𑁆𑀘𑁄’’𑀢𑀺𑀆𑀤𑀺𑀦𑀸 𑀅𑀪𑀺𑀦𑀺𑀯𑁂𑀲𑀁 𑀚𑀦𑁂𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑁄 𑀢𑀁 𑀅𑀧𑀲𑁆𑀲𑀦𑁆𑀢𑁄’’𑀢𑀺𑀆𑀤𑀺.

𑀅𑀦𑁆𑀢𑀸𑀦𑀦𑁆𑀢𑀯𑀸𑀤𑀯𑀡𑁆𑀡𑀦𑀸

𑁫𑁩. 𑀅𑀦𑁆𑀢𑀸𑀦𑀦𑁆𑀢𑀺𑀓𑀸𑀢𑀺 𑀏𑀢𑁆𑀣 𑀅𑀫𑀢𑀺 𑀕𑀘𑁆𑀙𑀢𑀺 𑀏𑀢𑁆𑀣 𑀲𑀪𑀸𑀯𑁄 𑀑𑀲𑀸𑀦𑀦𑁆𑀢𑀺 𑀅𑀦𑁆𑀢𑁄, 𑀫𑀭𑀺𑀬𑀸𑀤𑀸. 𑀢𑀧𑁆𑀧𑀝𑀺𑀲𑁂𑀥𑁂𑀦 𑀅𑀦𑀦𑁆𑀢𑁄, 𑀅𑀦𑁆𑀢𑁄 𑀘 𑀅𑀦𑀦𑁆𑀢𑁄 𑀘 𑀅𑀦𑁆𑀢𑀸𑀦𑀦𑁆𑀢𑁄 𑀘 𑀦𑁂𑀯𑀦𑁆𑀢𑀸𑀦𑀸𑀦𑀦𑁆𑀢𑁄 𑀘 𑀅𑀦𑁆𑀢𑀸𑀦𑀦𑁆𑀢𑀸 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, 𑀏𑀓𑀲𑁂𑀲𑁂𑀦 𑀯𑀸 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁭𑁬; 𑀲𑀁. 𑀦𑀺. 𑁨.𑁧; 𑀉𑀤𑀸. 𑁧) 𑀯𑀺𑀬. 𑀓𑀲𑁆𑀲 𑀧𑀦 𑀅𑀦𑁆𑀢𑀸𑀦𑀦𑁆𑀢𑁄𑀢𑀺? 𑀮𑁄𑀓𑀻𑀬𑀢𑀺 𑀲𑀁𑀲𑀸𑀭𑀦𑀺𑀲𑁆𑀲𑀭𑀡𑀢𑁆𑀣𑀺𑀓𑁂𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑁂𑀳𑀺, 𑀮𑁄𑀓𑀻𑀬𑀦𑁆𑀢𑀺 𑀯𑀸 𑀏𑀢𑁆𑀣 𑀢𑁂𑀳𑀺 𑀧𑀼𑀜𑁆𑀜𑀸𑀧𑀼𑀜𑁆𑀜𑀁 𑀢𑀩𑁆𑀩𑀺𑀧𑀸𑀓𑁄 ¶ 𑀘𑀸𑀢𑀺 𑀮𑁄𑀓𑁄𑀢𑀺 𑀲𑀗𑁆𑀔𑁆𑀬𑀁 𑀕𑀢𑀲𑁆𑀲 𑀅𑀢𑁆𑀢𑀦𑁄. 𑀢𑁂𑀦𑀸𑀳 𑀪𑀕𑀯𑀸 ‘‘𑀅𑀦𑁆𑀢𑀸𑀦𑀦𑁆𑀢𑀁 𑀮𑁄𑀓𑀲𑁆𑀲 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺. 𑀓𑁄 𑀧𑀦 𑀏𑀲𑁄 𑀅𑀢𑁆𑀢𑀸𑀢𑀺? 𑀛𑀸𑀦𑀯𑀺𑀲𑀬𑀪𑀽𑀢𑀓𑀲𑀺𑀡𑀦𑀺𑀫𑀺𑀢𑁆𑀢𑀁. 𑀢𑀢𑁆𑀣 𑀳𑀺 𑀅𑀬𑀁 𑀤𑀺𑀝𑁆𑀞𑀺𑀕𑀢𑀺𑀓𑁄 𑀮𑁄𑀓𑀲𑀜𑁆𑀜𑀻. 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀢𑀁 𑀮𑁄𑀓𑁄𑀢𑀺 𑀕𑀳𑁂𑀢𑁆𑀯𑀸’’𑀢𑀺. 𑀓𑁂𑀘𑀺 𑀧𑀦 ‘‘𑀛𑀸𑀦𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀘 𑀇𑀥 ‘𑀅𑀢𑁆𑀢𑀸 ¶ , 𑀮𑁄𑀓𑁄’𑀢𑀺 𑀘 𑀕𑀳𑀺𑀢𑀸’’𑀢𑀺 𑀯𑀤𑀦𑁆𑀢𑀺. 𑀅𑀦𑁆𑀢𑀸𑀦𑀦𑁆𑀢𑀲𑀳𑀘𑀭𑀺𑀢𑀯𑀸𑀤𑁄 𑀅𑀦𑁆𑀢𑀸𑀦𑀦𑁆𑀢𑁄, 𑀬𑀣𑀸 ‘‘𑀓𑀼𑀦𑁆𑀢𑀸 𑀧𑀘𑀭𑀦𑁆𑀢𑀻’’𑀢𑀺 𑀅𑀦𑁆𑀢𑀸𑀦𑀦𑁆𑀢𑀲𑀦𑁆𑀦𑀺𑀲𑁆𑀲𑀬𑁄 𑀯𑀸 𑀬𑀣𑀸 ‘‘𑀫𑀜𑁆𑀘𑀸 𑀖𑁄𑀲𑀦𑁆𑀢𑀻’’𑀢𑀺. 𑀲𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀅𑀦𑁆𑀢𑀸𑀦𑀦𑁆𑀢𑀺𑀓𑀸. 𑀢𑁂 𑀧𑀦 𑀬𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀅𑀦𑁆𑀢𑀸𑀦𑀦𑁆𑀢𑁄 𑀯𑀸𑀤𑁄 𑀤𑀺𑀝𑁆𑀞𑀺 𑀏𑀢𑁂𑀲𑀦𑁆𑀢𑀺 ‘‘𑀅𑀦𑁆𑀢𑀸𑀦𑀦𑁆𑀢𑀯𑀸𑀤𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀦𑁆𑀢𑀸𑀦𑀦𑁆𑀢𑀯𑀸𑀤𑀸’’𑀢𑀺 𑀯𑀢𑁆𑀯𑀸 ‘‘𑀅𑀦𑁆𑀢𑀁 𑀯𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀯𑀺𑀪𑀢𑁆𑀢𑁄.

𑀏𑀢𑁆𑀣𑀸𑀳 𑁋 𑀬𑀼𑀢𑁆𑀢𑀁 𑀢𑀸𑀯 𑀧𑀼𑀭𑀺𑀫𑀸𑀦𑀁 𑀢𑀺𑀡𑁆𑀡𑀁 𑀯𑀸𑀤𑀻𑀦𑀁 ¶ 𑀅𑀦𑁆𑀢𑀢𑁆𑀢𑀜𑁆𑀘 𑀅𑀦𑀦𑁆𑀢𑀢𑁆𑀢𑀜𑁆𑀘 𑀅𑀦𑁆𑀢𑀸𑀦𑀦𑁆𑀢𑀢𑁆𑀢𑀜𑁆𑀘 𑀆𑀭𑀩𑁆𑀪 𑀧𑀯𑀢𑁆𑀢𑀯𑀸𑀤𑀢𑁆𑀢𑀸 𑀅𑀦𑁆𑀢𑀸𑀦𑀦𑁆𑀢𑀺𑀓𑀢𑁆𑀢𑀁, 𑀧𑀘𑁆𑀙𑀺𑀫𑀲𑁆𑀲 𑀧𑀦 𑀢𑀤𑀼𑀪𑀬𑀧𑀝𑀺𑀲𑁂𑀥𑀦𑀯𑀲𑁂𑀦 𑀧𑀯𑀢𑁆𑀢𑀯𑀸𑀤𑀢𑁆𑀢𑀸 𑀓𑀣 𑀅𑀦𑁆𑀢𑀸𑀦𑀦𑁆𑀢𑀺𑀓𑀢𑁆𑀢𑀦𑁆𑀢𑀺? 𑀢𑀤𑀼𑀪𑀬𑀧𑀝𑀺𑀲𑁂𑀥𑀦𑀯𑀲𑁂𑀦 𑀧𑀯𑀢𑁆𑀢𑀯𑀸𑀤𑀢𑁆𑀢𑀸 𑀏𑀯. 𑀬𑀲𑁆𑀫𑀸 𑀅𑀦𑁆𑀢𑀸𑀦𑀦𑁆𑀢𑀧𑀝𑀺𑀲𑁂𑀥𑀯𑀸𑀤𑁄𑀧𑀺 𑀅𑀦𑁆𑀢𑀸𑀦𑀦𑁆𑀢𑀯𑀺𑀲𑀬𑁄 𑀏𑀯 𑀢𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸. 𑀏𑀢𑀤𑀢𑁆𑀣𑀁𑀬𑁂𑀯 𑀳𑀺 𑀲𑀦𑁆𑀥𑀸𑀬 𑀅𑀝𑁆𑀞𑀓𑀣𑀸𑀬𑀁 ‘‘𑀆𑀭𑀩𑁆𑀪 𑀧𑀯𑀢𑁆𑀢𑀯𑀸𑀤𑀸’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀬𑀣𑀸 𑀢𑀢𑀺𑀬𑀯𑀸𑀤𑁂 𑀤𑁂𑀲𑀪𑁂𑀤𑀯𑀲𑁂𑀦 𑀏𑀓𑀲𑁆𑀲𑁂𑀯 𑀅𑀦𑁆𑀢𑀯𑀦𑁆𑀢𑀢𑀸 𑀅𑀦𑀦𑁆𑀢𑀢𑀸 𑀘 𑀲𑀫𑁆𑀪𑀯𑀢𑀺, 𑀏𑀯𑀁 𑀢𑀓𑁆𑀓𑀻𑀯𑀸𑀤𑁂𑀧𑀺 𑀓𑀸𑀮𑀪𑁂𑀤𑀯𑀲𑁂𑀦 𑀉𑀪𑀬𑀲𑀫𑁆𑀪𑀯𑀢𑁄 𑀅𑀜𑁆𑀜𑀫𑀜𑁆𑀜𑀧𑀝𑀺𑀲𑁂𑀥𑁂𑀦 𑀉𑀪𑀬𑀜𑁆𑀜𑁂𑀯 𑀯𑀼𑀘𑁆𑀘𑀢𑀺. 𑀓𑀣𑀁? 𑀅𑀦𑁆𑀢𑀯𑀦𑁆𑀢𑀢𑀸𑀧𑀝𑀺𑀲𑁂𑀥𑁂𑀦 𑀳𑀺 𑀅𑀦𑀦𑁆𑀢𑀢𑀸 𑀯𑀼𑀘𑁆𑀘𑀢𑀺, 𑀅𑀦𑀦𑁆𑀢𑀢𑀸𑀧𑀝𑀺𑀲𑁂𑀥𑁂𑀦 𑀘 𑀅𑀦𑁆𑀢𑀯𑀦𑁆𑀢𑀢𑀸, 𑀅𑀦𑁆𑀢𑀸𑀦𑀦𑁆𑀢𑀸𑀦𑀜𑁆𑀘 𑀦 𑀢𑀢𑀺𑀬𑀯𑀸𑀤𑀪𑀸𑀯𑁄 𑀓𑀸𑀮𑀪𑁂𑀤𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀸 𑀅𑀬𑀁 𑀮𑁄𑀓𑀲𑀜𑁆𑀜𑀺𑀢𑁄 𑀅𑀢𑁆𑀢𑀸 𑀅𑀥𑀺𑀕𑀢𑀯𑀺𑀲𑁂𑀲𑁂𑀳𑀺 𑀫𑀳𑁂𑀲𑀻𑀳𑀺 𑀅𑀦𑀦𑁆𑀢𑁄 𑀓𑀤𑀸𑀘𑀺 𑀲𑀓𑁆𑀔𑀺𑀤𑀺𑀝𑁆𑀞𑁄𑀢𑀺 𑀅𑀦𑀼𑀲𑀼𑀬𑁆𑀬𑀢𑀺, 𑀢𑀲𑁆𑀫𑀸 𑀦𑁂𑀯𑀦𑁆𑀢𑀯𑀸. 𑀬𑀲𑁆𑀫𑀸 𑀧𑀦 𑀢𑁂𑀳𑀺𑀬𑁂𑀯 𑀓𑀤𑀸𑀘𑀺 𑀅𑀦𑁆𑀢𑀯𑀸 𑀲𑀓𑁆𑀔𑀺𑀤𑀺𑀝𑁆𑀞𑁄𑀢𑀺 𑀅𑀦𑀼𑀲𑀼𑀬𑁆𑀬𑀢𑀺, 𑀢𑀲𑁆𑀫𑀸 𑀦 𑀧𑀦 𑀅𑀦𑀦𑁆𑀢𑁄𑀢𑀺. 𑀬𑀣𑀸 𑀘 𑀅𑀦𑀼𑀲𑁆𑀲𑀼𑀢𑀺𑀢𑀓𑁆𑀓𑀻𑀯𑀲𑁂𑀦, 𑀏𑀯𑀁 𑀚𑀸𑀢𑀺𑀲𑁆𑀲𑀭𑀢𑀓𑁆𑀓𑀻 𑀆𑀤𑀻𑀦𑀜𑁆𑀘 𑀯𑀲𑁂𑀦 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀅𑀬𑀜𑁆𑀳𑀺 𑀢𑀓𑁆𑀓𑀺𑀓𑁄 𑀅𑀯𑀟𑁆𑀠𑀺𑀢𑀪𑀸𑀯𑀧𑀼𑀩𑁆𑀩𑀓𑀢𑁆𑀢𑀸 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀦𑀁 𑀯𑀟𑁆𑀠𑀺𑀢𑀪𑀸𑀯𑀲𑁆𑀲 𑀯𑀟𑁆𑀠𑀺𑀢𑀓𑀸𑀮𑀯𑀲𑁂𑀦 𑀅𑀧𑁆𑀧𑀘𑁆𑀘𑀓𑁆𑀔𑀓𑀸𑀭𑀺𑀢𑀸𑀬 𑀅𑀦𑀼𑀲𑁆𑀲𑀯𑀸𑀤𑀺𑀫𑀢𑁆𑀢𑁂 𑀞𑀢𑁆𑀯𑀸 ‘‘𑀦𑁂𑀯𑀦𑁆𑀢𑀯𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀯𑀟𑁆𑀠𑀺𑀢𑀓𑀸𑀮𑀯𑀲𑁂𑀦 𑀧𑀦 ‘‘𑀦 𑀧𑀦𑀸𑀦𑀦𑁆𑀢𑁄’’𑀢𑀺, 𑀦 𑀧𑀦 𑀅𑀦𑁆𑀢𑀢𑀸𑀦𑀦𑁆𑀢𑀢𑀸𑀦𑀁 𑀅𑀘𑁆𑀘𑀦𑁆𑀢𑀫𑀪𑀸𑀯𑁂𑀦 𑀬𑀣𑀸 𑀢𑀁 ‘‘𑀦𑁂𑀯𑀲𑀜𑁆𑀜𑀺𑀦𑀸𑀲𑀜𑁆𑀜𑀻’’𑀢𑀺. 𑀧𑀼𑀭𑀺𑀫𑀯𑀸𑀤𑀢𑁆𑀢𑀬𑀧𑀝𑀺𑀓𑁆𑀔𑁂𑀧𑁄 𑀘 𑀅𑀢𑁆𑀢𑀦𑀸 𑀬𑀣𑀸𑀥𑀺𑀧𑁆𑀧𑁂𑀢𑀧𑁆𑀧𑀓𑀸𑀭𑀯𑀺𑀮𑀓𑁆𑀔𑀡𑀢𑀸𑀬 𑀢𑁂𑀲𑀁, 𑀅𑀯𑀲𑁆𑀲𑀜𑁆𑀘𑁂𑀢𑀁 𑀏𑀯𑀁 𑀯𑀺𑀜𑁆𑀜𑀸𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀯𑀺𑀓𑁆𑀔𑁂𑀧𑀧𑀓𑁆𑀔𑀁𑀬𑁂𑀯 𑀪𑀚𑁂𑀬𑁆𑀬 𑀘𑀢𑀼𑀢𑁆𑀣𑀯𑀸𑀤𑁄. 𑀦 𑀳𑀺 𑀅𑀦𑁆𑀢𑀢𑀸𑀅𑀦𑀦𑁆𑀢𑀢𑀸𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑁄 ¶ 𑀅𑀢𑁆𑀢𑀦𑁄 𑀧𑀓𑀸𑀭𑁄 𑀅𑀢𑁆𑀣𑀺, 𑀢𑀓𑁆𑀓𑀻𑀯𑀸𑀤𑀻 𑀘 𑀬𑀼𑀢𑁆𑀢𑀺𑀫𑀕𑁆𑀕𑀓𑁄, 𑀓𑀸𑀮𑀪𑁂𑀤𑀯𑀲𑁂𑀦 𑀘 𑀢𑀤𑀼𑀪𑀬𑀁 𑀏𑀓𑀲𑁆𑀫𑀺𑀫𑁆𑀧𑀺 𑀦 𑀦 𑀬𑀼𑀚𑁆𑀚𑀢𑀻𑀢𑀺.

𑀓𑁂𑀘𑀺 ¶ ¶ 𑀧𑀦 𑀬𑀤𑀺 𑀧𑀦𑀸𑀬𑀁 𑀅𑀢𑁆𑀢𑀸 𑀅𑀦𑁆𑀢𑀯𑀸 𑀲𑀺𑀬𑀸, 𑀤𑀽𑀭𑀤𑁂𑀲𑁂 𑀉𑀧𑀧𑀚𑁆𑀚𑀦𑀸𑀦𑀼𑀲𑁆𑀲𑀭𑀡𑀸𑀤𑀺 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺 𑀦 𑀲𑀺𑀬𑀸. 𑀅𑀣 𑀅𑀦𑀦𑁆𑀢𑁄, 𑀇𑀥 𑀞𑀺𑀢𑀲𑁆𑀲 𑀤𑁂𑀯𑀮𑁄𑀓𑀦𑀺𑀭𑀬𑀸𑀤𑀻𑀲𑀼 𑀲𑀼𑀔𑀤𑀼𑀓𑁆𑀔𑀸𑀦𑀼𑀪𑀯𑀦𑀫𑁆𑀧𑀺 𑀲𑀺𑀬𑀸. 𑀲𑀘𑁂 𑀧𑀦 𑀅𑀦𑁆𑀢𑀯𑀸 𑀘 𑀅𑀦𑀦𑁆𑀢𑁄 𑀘, 𑀢𑀤𑀼𑀪𑀬𑀤𑁄𑀲𑀲𑀫𑀸𑀬𑁄𑀕𑁄. 𑀢𑀲𑁆𑀫𑀸 ‘‘𑀅𑀦𑁆𑀢𑀯𑀸, 𑀅𑀦𑀦𑁆𑀢𑁄’’𑀢𑀺 𑀘 𑀅𑀩𑁆𑀬𑀸𑀓𑀭𑀡𑀻𑀬𑁄 𑀅𑀢𑁆𑀢𑀸𑀢𑀺 𑀏𑀯𑀁 𑀢𑀓𑁆𑀓𑀦𑀯𑀲𑁂𑀦 𑀘𑀢𑀼𑀢𑁆𑀣𑀯𑀸𑀤𑀧𑁆𑀧𑀯𑀢𑁆𑀢𑀺𑀁 𑀯𑀡𑁆𑀡𑁂𑀦𑁆𑀢𑀺. 𑀏𑀯𑀫𑁆𑀧𑀺 𑀬𑀼𑀢𑁆𑀢𑀁 𑀢𑀸𑀯 𑀧𑀘𑁆𑀙𑀺𑀫𑀯𑀸𑀤𑀻𑀤𑁆𑀯𑀬𑀲𑁆𑀲 𑀅𑀦𑁆𑀢𑀸𑀦𑀦𑁆𑀢𑀺𑀓𑀢𑁆𑀢𑀁 𑀅𑀦𑁆𑀢𑀸𑀦𑀦𑁆𑀢𑀸𑀦𑀁 𑀯𑀲𑁂𑀦 𑀉𑀪𑀬𑀯𑀺𑀲𑀬𑀢𑁆𑀢𑀸 𑀢𑁂𑀲𑀁 𑀯𑀸𑀤𑀲𑁆𑀲. 𑀧𑀼𑀭𑀺𑀫𑀯𑀸𑀤𑀻𑀤𑁆𑀯𑀬𑀲𑁆𑀲 𑀧𑀦 𑀓𑀣𑀁 𑀯𑀺𑀲𑀼𑀁 𑀅𑀦𑁆𑀢𑀸𑀦𑀦𑁆𑀢𑀺𑀓𑀢𑁆𑀢𑀦𑁆𑀢𑀺? 𑀉𑀧𑀘𑀸𑀭𑀯𑀼𑀢𑁆𑀢𑀺𑀬𑀸. 𑀲𑀫𑀼𑀤𑀺𑀢𑁂𑀲𑀼 𑀳𑀺 𑀅𑀦𑁆𑀢𑀸𑀦𑀦𑁆𑀢𑀯𑀸𑀤𑀻𑀲𑀼 𑀧𑀯𑀢𑁆𑀢𑀫𑀸𑀦𑁄 𑀅𑀦𑁆𑀢𑀸𑀦𑀦𑁆𑀢𑀺𑀓-𑀲𑀤𑁆𑀤𑁄 𑀢𑀢𑁆𑀣 𑀦𑀺𑀭𑀼𑀴𑁆𑀳𑀢𑀸𑀬 𑀧𑀘𑁆𑀘𑁂𑀓𑀫𑁆𑀧𑀺 𑀅𑀦𑁆𑀢𑀸𑀦𑀦𑁆𑀢𑀺𑀓𑀯𑀸𑀤𑀻𑀲𑀼 𑀧𑀯𑀢𑁆𑀢𑀢𑀺, 𑀬𑀣𑀸 𑀅𑀭𑀽𑀧𑀚𑁆𑀛𑀸𑀦𑁂𑀲𑀼 𑀧𑀘𑁆𑀘𑁂𑀓𑀁 𑀅𑀝𑁆𑀞𑀯𑀺𑀫𑁄𑀓𑁆𑀔𑀧𑀭𑀺𑀬𑀸𑀬𑁄, 𑀬𑀣𑀸 𑀘 𑀮𑁄𑀓𑁂 𑀲𑀢𑁆𑀢𑀸𑀲𑀬𑁄𑀢𑀺. 𑀅𑀣 𑀯𑀸 𑀅𑀪𑀺𑀦𑀺𑀯𑁂𑀲𑀢𑁄 𑀧𑀼𑀭𑀺𑀫𑀓𑀸𑀮𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀅𑀬𑀁 𑀢𑀢𑁆𑀣 𑀯𑁄𑀳𑀸𑀭𑁄 𑀓𑀢𑁄. 𑀢𑁂𑀲𑀜𑁆𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀢𑀣𑀸𑀭𑀽𑀧𑀘𑁂𑀢𑁄𑀲𑀫𑀸𑀥𑀺𑀲𑀫𑀥𑀺𑀕𑀫𑀢𑁄 𑀧𑀼𑀩𑁆𑀩𑀓𑀸𑀮𑀁 ‘‘𑀅𑀦𑁆𑀢𑀯𑀸 𑀦𑀼 𑀅𑀬𑀁 𑀮𑁄𑀓𑁄, 𑀅𑀦𑀦𑁆𑀢𑁄 𑀦𑀽’’𑀢𑀺 𑀉𑀪𑀬𑀸𑀓𑀸𑀭𑀸𑀯𑀮𑀫𑁆𑀩𑀺𑀦𑁄 𑀧𑀭𑀺𑀯𑀺𑀢𑀓𑁆𑀓𑀲𑁆𑀲 𑀯𑀲𑁂𑀦 𑀦𑀺𑀭𑀼𑀴𑁆𑀳𑁄 𑀅𑀦𑁆𑀢𑀸𑀦𑀦𑁆𑀢𑀺𑀓𑀪𑀸𑀯𑁄 𑀯𑀺𑀲𑁂𑀲𑀮𑀸𑀪𑁂𑀦 𑀢𑀢𑁆𑀣 𑀉𑀧𑁆𑀧𑀦𑁆𑀦𑁂𑀧𑀺 𑀏𑀓𑀁𑀲𑀕𑁆𑀕𑀸𑀳𑁂 𑀧𑀼𑀭𑀺𑀫𑀲𑀺𑀤𑁆𑀥𑀭𑀼𑀴𑁆𑀳𑀺𑀬𑀸 𑀯𑁄𑀳𑀭𑀻𑀬𑀢𑀻𑀢𑀺.

𑁫𑁪-𑁬𑁦. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀢𑀓𑁆𑀓𑀬𑀢𑀻𑀢𑀺 𑀢𑀓𑁆𑀓𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁪) 𑀲𑀤𑁆𑀤𑀢𑁄, ‘‘𑀘𑀢𑀼𑀩𑁆𑀩𑀺𑀥𑁄 𑀢𑀓𑁆𑀓𑀻’’𑀢𑀺𑀆𑀤𑀺𑀦𑀸 ¶ (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁪) 𑀅𑀢𑁆𑀣𑀢𑁄 𑀘 𑀲𑀲𑁆𑀲𑀢𑀯𑀸𑀤𑁂 𑀯𑀼𑀢𑁆𑀢𑀯𑀺𑀥𑀺𑀦𑀸. 𑀤𑀺𑀝𑁆𑀞𑀧𑀼𑀩𑁆𑀩𑀸𑀦𑀼𑀲𑀸𑀭𑁂𑀦𑀸𑀢𑀺 𑀤𑀲𑁆𑀲𑀦𑀪𑀽𑀢𑁂𑀦 𑀯𑀺𑀜𑁆𑀜𑀸𑀡𑁂𑀦 𑀉𑀧𑀮𑀤𑁆𑀥𑀧𑀼𑀩𑁆𑀩𑀲𑁆𑀲 𑀅𑀦𑁆𑀢𑀯𑀦𑁆𑀢𑀸𑀤𑀺𑀦𑁄 𑀅𑀦𑀼𑀲𑁆𑀲𑀭𑀡𑁂𑀦. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀦𑀼𑀲𑁆𑀲𑀼𑀢𑀺𑀢𑀓𑁆𑀓𑀻𑀲𑀼𑀤𑁆𑀥𑀢𑀓𑁆𑀓𑀻𑀦𑀫𑁆𑀧𑀺 𑀇𑀥 𑀲𑀗𑁆𑀕𑀳𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀅𑀣 𑀯𑀸 𑀤𑀺𑀝𑁆𑀞𑀕𑁆𑀕𑀳𑀡𑁂𑀦𑁂𑀯 ‘‘𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧𑁦, 𑁧𑁯𑁪) 𑀯𑀺𑀬 𑀲𑀼𑀢𑀸𑀤𑀻𑀦𑀫𑁆𑀧𑀺 𑀕𑀳𑀺𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. ‘‘𑀅𑀦𑁆𑀢𑀯𑀸’’𑀢𑀺𑀆𑀤𑀺𑀦𑀸 𑀇𑀘𑁆𑀙𑀺𑀢𑀲𑁆𑀲 𑀅𑀢𑁆𑀢𑀦𑁄 𑀲𑀩𑁆𑀩𑀤𑀸 𑀪𑀸𑀯𑀧𑀭𑀸𑀫𑀲𑀦𑀯𑀲𑁂𑀦𑁂𑀯 𑀇𑀫𑁂𑀲𑀁 𑀯𑀸𑀤𑀸𑀦𑀁 𑀧𑀯𑀢𑁆𑀢𑀦𑀢𑁄 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀲𑁂𑀲𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑁄’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁯𑁭-𑁯𑁮).

𑀅𑀫𑀭𑀸𑀯𑀺𑀓𑁆𑀔𑁂𑀧𑀯𑀸𑀤𑀯𑀡𑁆𑀡𑀦𑀸

𑁬𑁧. 𑀦 𑀫𑀭𑀢𑀻𑀢𑀺 𑀦 𑀉𑀘𑁆𑀙𑀺𑀚𑁆𑀚𑀢𑀺. ‘‘𑀏𑀯𑀫𑁆𑀧𑀺 𑀫𑁂 𑀦𑁄’’𑀢𑀺𑀆𑀤𑀺𑀦𑀸 𑀯𑀺𑀯𑀺𑀥𑁄 𑀦𑀸𑀦𑀧𑁆𑀧𑀓𑀸𑀭𑁄 𑀔𑁂𑀧𑁄 𑀧𑀭𑁂𑀦 𑀧𑀭𑀯𑀸𑀤𑀻𑀦𑀁 𑀔𑀺𑀧𑀦𑀁 𑀯𑀺𑀓𑁆𑀔𑁂𑀧𑁄. 𑀅𑀫𑀭𑀸𑀬 𑀤𑀺𑀝𑁆𑀞𑀺𑀬𑀸 ¶ 𑀯𑀸𑀘𑀸𑀬 𑀘 𑀯𑀺𑀓𑁆𑀔𑀺𑀧𑀦𑁆𑀢𑀻𑀢𑀺 𑀯𑀸 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀦𑁄. 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀦𑁄 𑀏𑀯 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸. 𑀇𑀢𑁄 𑀘𑀺𑀢𑁄 𑀘 𑀲𑀦𑁆𑀥𑀸𑀯𑀢𑀺 𑀏𑀓𑀲𑁆𑀫𑀺𑀁 𑀲𑀪𑀸𑀯𑁂 𑀅𑀦𑀯𑀝𑁆𑀞𑀸𑀦𑀢𑁄. 𑀅𑀫𑀭𑀸 𑀯𑀺𑀬 𑀯𑀺𑀓𑁆𑀔𑀺𑀧𑀦𑁆𑀢𑀻𑀢𑀺 𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀤𑁆𑀤𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁬𑁨. 𑀯𑀺𑀓𑁆𑀔𑁂𑀧𑀯𑀸𑀤𑀺𑀦𑁄 ¶ 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂, 𑀅𑀓𑀼𑀲𑀮𑀥𑀫𑁆𑀫𑁂𑀧𑀺 𑀲𑀪𑀸𑀯𑀪𑁂𑀤𑀯𑀲𑁂𑀦𑁂𑀯 𑀜𑀸𑀢𑀼𑀁 𑀜𑀸𑀡𑀩𑀮𑀁 𑀦𑀢𑁆𑀣𑀻𑀢𑀺 𑀓𑀼𑀲𑀮𑀸𑀓𑀼𑀲𑀮𑀧𑀤𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦𑁂𑀯 𑀅𑀢𑁆𑀣𑁄. 𑀧𑀞𑀫𑀦𑀬𑀯𑀲𑁂𑀦𑁂𑀯 𑀅𑀧𑀭𑀺𑀬𑀦𑁆𑀢𑀯𑀺𑀓𑁆𑀔𑁂𑀧𑀢𑀸𑀬 𑀅𑀫𑀭𑀸𑀯𑀺𑀓𑁆𑀔𑁂𑀧𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄𑀢𑀺 𑀅𑀦𑀺𑀬𑀫𑀺𑀢𑀯𑀺𑀓𑁆𑀔𑁂𑀧𑁄’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀦𑀺𑀬𑀫𑀺𑀢𑀯𑀺𑀓𑁆𑀔𑁂𑀧𑁄𑀢𑀺 𑀲𑀲𑁆𑀲𑀢𑀸𑀤𑀻𑀲𑀼 𑀏𑀓𑀲𑁆𑀫𑀺𑀫𑁆𑀧𑀺 𑀧𑀓𑀸𑀭𑁂 𑀅𑀝𑁆𑀞𑀢𑁆𑀯𑀸 𑀯𑀺𑀓𑁆𑀔𑁂𑀧𑀓𑀭𑀡𑀁, 𑀧𑀭𑀯𑀸𑀤𑀺𑀦𑀸 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀧𑀼𑀘𑁆𑀙𑀺𑀢𑁂 𑀧𑀓𑀸𑀭𑁂 𑀢𑀲𑁆𑀲 𑀧𑀝𑀺𑀓𑁆𑀔𑁂𑀧𑁄𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑀦𑀬𑀯𑀲𑁂𑀦 𑀅𑀫𑀭𑀸𑀲𑀤𑀺𑀲𑀸𑀬 𑀅𑀫𑀭𑀸𑀬 𑀯𑀺𑀓𑁆𑀔𑁂𑀧𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀁 𑀓𑀼𑀲𑀮𑀦𑁆𑀢𑀺 𑀯𑀸 𑀧𑀼𑀝𑁆𑀞𑁄’’𑀢𑀺𑀆𑀤𑀺𑀫𑀸𑀳. 𑀅𑀣 𑀯𑀸 ‘‘𑀏𑀯𑀦𑁆𑀢𑀺𑀧𑀺 ¶ 𑀫𑁂 𑀦𑁄’’𑀢𑀺𑀆𑀤𑀺𑀦𑀸 𑀅𑀦𑀺𑀬𑀫𑀢𑁄𑀯 𑀲𑀲𑁆𑀲𑀢𑁂𑀓𑀘𑁆𑀘𑀲𑀲𑁆𑀲𑀢𑀼𑀘𑁆𑀙𑁂𑀤𑀢𑀓𑁆𑀓𑀻𑀯𑀸𑀤𑀸𑀦𑀁 𑀧𑀝𑀺𑀲𑁂𑀥𑀦𑁂𑀦 𑀢𑀁 𑀢𑀁 𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀢𑁂𑀯 𑀅𑀧𑀭𑀺𑀬𑀦𑁆𑀢𑀯𑀺𑀓𑁆𑀔𑁂𑀧𑀯𑀸𑀤𑀢𑁆𑀢𑀸 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀦𑁄. 𑀅𑀢𑁆𑀢𑀦𑀸 𑀧𑀦 𑀅𑀦𑀯𑀝𑁆𑀞𑀺𑀢𑀯𑀸𑀤𑀢𑁆𑀢𑀸 𑀦 𑀓𑀺𑀲𑁆𑀫𑀺𑀜𑁆𑀘𑀺 𑀧𑀓𑁆𑀔𑁂 𑀅𑀯𑀢𑀺𑀝𑁆𑀞𑀢𑀻𑀢𑀺 𑀆𑀳 ‘‘𑀲𑀬𑀁 𑀧𑀦…𑀧𑁂… 𑀩𑁆𑀬𑀸𑀓𑀭𑁄𑀢𑀻’’𑀢𑀺. 𑀇𑀤𑀸𑀦𑀺 𑀓𑀼𑀲𑀮𑀸𑀤𑀻𑀦𑀁 𑀅𑀩𑁆𑀬𑀸𑀓𑀭𑀡𑁂𑀦 𑀢𑀫𑁂𑀯 𑀅𑀦𑀯𑀝𑁆𑀞𑀸𑀦𑀁 𑀯𑀺𑀪𑀸𑀯𑁂𑀢𑀺 ‘‘𑀇𑀤𑀁 𑀓𑀼𑀲𑀮𑀦𑁆𑀢𑀺 𑀯𑀸 𑀧𑀼𑀝𑁆𑀞𑁄’’𑀢𑀺𑀆𑀤𑀺𑀦𑀸. 𑀢𑁂𑀦𑁂𑀯𑀸𑀳 ‘‘𑀏𑀓𑀲𑁆𑀫𑀺𑀫𑁆𑀧𑀺 𑀧𑀓𑁆𑀔𑁂 𑀦 𑀢𑀺𑀝𑁆𑀞𑀢𑀻’’𑀢𑀺.

𑁬𑁩. 𑀓𑀼𑀲𑀮𑀸𑀓𑀼𑀲𑀮𑀁 𑀬𑀣𑀸𑀪𑀽𑀢𑀁 𑀅𑀧𑁆𑀧𑀚𑀸𑀦𑀦𑁆𑀢𑁄𑀧𑀺 𑀬𑁂𑀲𑀫𑀳𑀁 𑀲𑀫𑀬𑁂𑀦 𑀓𑀼𑀲𑀮𑀫𑁂𑀯 ‘‘𑀓𑀼𑀲𑀮’’𑀦𑁆𑀢𑀺, 𑀅𑀓𑀼𑀲𑀮𑀫𑁂𑀯 𑀘 ‘‘𑀅𑀓𑀼𑀲𑀮’’𑀦𑁆𑀢𑀺 𑀩𑁆𑀬𑀸𑀓𑀭𑁂𑀬𑁆𑀬𑀁, 𑀢𑁂𑀲𑀼 𑀢𑀣𑀸 𑀩𑁆𑀬𑀸𑀓𑀭𑀡𑀳𑁂𑀢𑀼 ‘‘𑀅𑀳𑁄 𑀯𑀢 𑀭𑁂 𑀧𑀡𑁆𑀟𑀺𑀢𑁄’’𑀢𑀺 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀭𑁄𑀦𑁆𑀢𑁂𑀲𑀼 𑀫𑀫 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀅𑀲𑁆𑀲𑀸𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀤𑁄𑀲𑁄 𑀯𑀸 𑀧𑀝𑀺𑀖𑁄 𑀯𑀸𑀢𑀺 𑀏𑀢𑁆𑀣 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀢𑁆𑀢𑀦𑁄 𑀧𑀡𑁆𑀟𑀺𑀢𑀪𑀸𑀯𑀯𑀺𑀲𑀬𑀸𑀦𑀁 𑀭𑀸𑀕𑀸𑀤𑀻𑀦𑀁 𑀯𑀲𑁂𑀦 𑀬𑁄𑀚𑀦𑀸 𑀓𑀢𑀸. ‘‘𑀙𑀦𑁆𑀤𑀭𑀸𑀕𑀤𑁆𑀯𑀬𑀁 𑀉𑀧𑀸𑀤𑀸𑀦’’𑀦𑁆𑀢𑀺 𑀅𑀪𑀺𑀥𑀫𑁆𑀫𑀦𑀬𑁂𑀦 𑀯𑀼𑀢𑁆𑀢𑀁. 𑀅𑀪𑀺𑀥𑀫𑁆𑀫𑁂 𑀳𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄𑀯 ‘‘𑀉𑀧𑀸𑀤𑀸𑀦’’𑀦𑁆𑀢𑀺 𑀆𑀕𑀢𑀸, 𑀲𑀼𑀢𑁆𑀢𑀦𑁆𑀢𑁂 𑀧𑀦 𑀤𑁄𑀲𑁄𑀧𑀺 ‘‘𑀉𑀧𑀸𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑁄 ‘‘𑀓𑁄𑀥𑀼𑀧𑀸𑀤𑀸𑀦𑀯𑀺𑀦𑀺𑀩𑀦𑁆𑀥𑀸 𑀯𑀺𑀖𑀸𑀢𑀁 𑀆𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀻𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀪𑀬𑀫𑁆𑀧𑀺 𑀯𑀸 𑀤𑀴𑁆𑀳𑀕𑁆𑀕𑀳𑀡𑀯𑀲𑁂𑀦 𑀉𑀧𑀸𑀤𑀸𑀦’’𑀦𑁆𑀢𑀺 ¶ . 𑀤𑀴𑁆𑀳𑀕𑁆𑀕𑀳𑀡𑀁 𑀅𑀫𑀼𑀜𑁆𑀘𑀦𑀁. 𑀧𑀝𑀺𑀖𑁄𑀧𑀺 𑀳𑀺 𑀉𑀧𑀦𑀸𑀳𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑁄 𑀆𑀭𑀫𑁆𑀫𑀡𑀁 𑀦 𑀫𑀼𑀜𑁆𑀘𑀢𑀺. 𑀯𑀺𑀳𑀦𑀦𑀁 𑀳𑀺𑀁𑀲𑀦𑀁 𑀯𑀺𑀩𑀸𑀥𑀦𑀁. 𑀭𑀸𑀕𑁄𑀧𑀺 𑀳𑀺 𑀧𑀭𑀺𑀴𑀸𑀳𑀯𑀲𑁂𑀦 𑀲𑀸𑀭𑀤𑁆𑀥𑀯𑀼𑀢𑁆𑀢𑀺𑀢𑀸𑀬 𑀦𑀺𑀲𑁆𑀲𑀬𑀁 𑀯𑀺𑀩𑀸𑀥𑀢𑀻𑀢𑀺. 𑀯𑀺𑀦𑀸𑀲𑁂𑀢𑀼𑀓𑀸𑀫𑀢𑀸𑀬 𑀆𑀭𑀫𑁆𑀫𑀡𑀁 𑀕𑀡𑁆𑀳𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁬𑁪. 𑀧𑀡𑁆𑀟𑀺𑀘𑁆𑀘𑁂𑀦𑀸𑀢𑀺 𑀧𑀜𑁆𑀜𑀸𑀬. 𑀬𑁂𑀦 𑀳𑀺 𑀥𑀫𑁆𑀫𑁂𑀦 𑀬𑀼𑀢𑁆𑀢𑁄 ‘‘𑀧𑀡𑁆𑀟𑀺𑀢𑁄’’𑀢𑀺 ¶ 𑀯𑀼𑀘𑁆𑀘𑀢𑀺, 𑀲𑁄 𑀥𑀫𑁆𑀫𑁄 𑀧𑀡𑁆𑀟𑀺𑀘𑁆𑀘𑀁, 𑀢𑁂𑀦 𑀲𑀼𑀢𑀘𑀺𑀦𑁆𑀢𑀸𑀫𑀬𑀁 𑀧𑀜𑁆𑀜𑀁 𑀤𑀲𑁆𑀲𑁂𑀢𑀺, 𑀦 𑀧𑀸𑀓𑀢𑀺𑀓𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀁 𑀲𑀸𑀪𑀸𑀯𑀺𑀓𑀧𑀜𑁆𑀜𑀁. 𑀓𑀢-𑀲𑀤𑁆𑀤𑀲𑁆𑀲 𑀓𑀺𑀭𑀺𑀬𑀸𑀲𑀸𑀫𑀜𑁆𑀜𑀯𑀸𑀘𑀓𑀢𑁆𑀢𑀸 ‘‘𑀓𑀢𑀯𑀺𑀚𑁆𑀚𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀓𑀢-𑀲𑀤𑁆𑀤𑁄 𑀜𑀸𑀡𑀸𑀦𑀼𑀬𑀼𑀢𑁆𑀢𑀢𑀁 𑀯𑀤𑀢𑀻𑀢𑀺 𑀆𑀳 ‘‘𑀯𑀺𑀜𑁆𑀜𑀸𑀢𑀧𑀭𑀧𑁆𑀧𑀯𑀸𑀤𑀸’’𑀢𑀺. 𑀲𑀢𑁆𑀢𑀥𑀸 𑀪𑀺𑀦𑁆𑀦𑀲𑁆𑀲 𑀯𑀸𑀮𑀕𑁆𑀕𑀲𑁆𑀲 𑀅𑀁𑀲𑀼𑀓𑁄𑀝𑀺𑀯𑁂𑀥𑀓𑁄 ‘‘𑀯𑀸𑀮𑀯𑁂𑀥𑀻’’𑀢𑀺 𑀅𑀥𑀺𑀧𑁆𑀧𑁂𑀢𑁄.

𑁬𑁫-𑁬. 𑀏𑀢𑁆𑀣 ¶ 𑀘 𑀓𑀺𑀜𑁆𑀘𑀸𑀧𑀺 𑀧𑀼𑀭𑀺𑀫𑀸𑀦𑀫𑁆𑀧𑀺 𑀢𑀺𑀡𑁆𑀡𑀁 𑀓𑀼𑀲𑀮𑀸𑀤𑀺𑀥𑀫𑁆𑀫𑀲𑀪𑀸𑀯𑀸𑀦𑀯𑀩𑁄𑀥𑀢𑁄 𑀅𑀢𑁆𑀣𑁂𑀯 𑀫𑀦𑁆𑀤𑀪𑀸𑀯𑁄, 𑀢𑁂𑀲𑀁 𑀧𑀦 𑀅𑀢𑁆𑀢𑀦𑁄 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀯𑀩𑁄𑀥𑀲𑁆𑀲 𑀅𑀯𑀩𑁄𑀥𑀯𑀺𑀲𑁂𑀲𑁄 𑀅𑀢𑁆𑀣𑀺, 𑀢𑀤𑀪𑀸𑀯𑀸 𑀧𑀘𑁆𑀙𑀺𑀫𑁄𑀬𑁂𑀯 𑀫𑀦𑁆𑀤𑀫𑁄𑀫𑀽𑀳𑀪𑀸𑀯𑁂𑀦 𑀯𑀼𑀢𑁆𑀢𑁄. 𑀦𑀦𑀼 𑀘 𑀧𑀘𑁆𑀙𑀺𑀫𑀲𑁆𑀲𑀸𑀧𑀺 ‘‘𑀅𑀢𑁆𑀣𑀺 𑀧𑀭𑁄𑀮𑁄𑀓𑁄’𑀢𑀺 𑀇𑀢𑀺 𑀘𑁂 𑀫𑁂 𑀅𑀲𑁆𑀲, ‘𑀅𑀢𑁆𑀣𑀺 𑀧𑀭𑁄𑀮𑁄𑀓𑁄’𑀢𑀺 𑀇𑀢𑀺 𑀢𑁂 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀁, 𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄’’𑀢𑀺𑀆𑀤𑀺 (𑀤𑀻. 𑀦𑀺. 𑁧.𑁬𑁫) 𑀯𑀘𑀦𑀢𑁄 𑀅𑀢𑁆𑀢𑀦𑁄 𑀥𑀫𑁆𑀫𑀸𑀦𑀯𑀩𑁄𑀥𑀲𑁆𑀲 𑀅𑀯𑀩𑁄𑀥𑁄 𑀅𑀢𑁆𑀣𑀺𑀬𑁂𑀯𑀸𑀢𑀺? 𑀓𑀺𑀜𑁆𑀘𑀸𑀧𑀺 𑀅𑀢𑁆𑀣𑀺, 𑀦 𑀢𑀲𑁆𑀲 𑀧𑀼𑀭𑀺𑀫𑀸𑀦𑀁 𑀯𑀺𑀬 𑀅𑀧𑀭𑀺𑀜𑁆𑀜𑀸𑀢𑀥𑀫𑁆𑀫𑀩𑁆𑀬𑀸𑀓𑀭𑀡𑀦𑀺𑀩𑀦𑁆𑀥𑀦𑀫𑀼𑀲𑀸𑀯𑀸𑀤𑀸𑀤𑀺𑀪𑀬𑀧𑀭𑀺𑀚𑀺𑀕𑀼𑀘𑁆𑀙𑀦𑀓𑀸𑀭𑁄 𑀅𑀢𑁆𑀣𑀺, 𑀅𑀣 𑀔𑁄 𑀫𑀳𑀸𑀫𑀽𑀴𑁆𑀳𑁄𑀬𑁂𑀯. 𑀅𑀣 𑀯𑀸 ‘‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄’’𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀸𑀬 𑀯𑀺𑀓𑁆𑀔𑁂𑀧𑀓𑀭𑀡𑀢𑁆𑀣𑀁 ‘‘𑀅𑀢𑁆𑀣𑀺 𑀧𑀭𑁄𑀮𑁄𑀓𑁄’𑀢𑀺 𑀇𑀢𑀺 𑀘𑁂 𑀫𑀁 𑀧𑀼𑀘𑁆𑀙𑀲𑀻’’𑀢𑀺 𑀧𑀼𑀘𑁆𑀙𑀸𑀞𑀧𑀦𑀫𑁂𑀯 𑀢𑁂𑀦 𑀤𑀲𑁆𑀲𑀻𑀬𑀢𑀺, 𑀦 𑀅𑀢𑁆𑀢𑀦𑁄 𑀥𑀫𑁆𑀫𑀸𑀦𑀯𑀩𑁄𑀥𑁄𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁂𑀦 ‘‘𑀫𑀦𑁆𑀤𑁄 𑀘𑁂𑀯 𑀫𑁄𑀫𑀽𑀳𑁄 𑀘𑀸’’𑀢𑀺 𑀯𑀼𑀢𑁆𑀢𑁄. 𑀢𑁂𑀦𑁂𑀯 𑀳𑀺 𑀢𑀣𑀸𑀯𑀸𑀤𑀺𑀦𑀁 𑀲𑀜𑁆𑀚𑀬𑀁 𑀩𑁂𑀮𑀝𑁆𑀞𑀧𑀼𑀢𑁆𑀢𑀁 𑀆𑀭𑀩𑁆𑀪 ‘‘𑀅𑀬𑀁 𑀯𑀸 𑀇𑀫𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀩𑁆𑀩𑀫𑀦𑁆𑀤𑁄 𑀲𑀩𑁆𑀩𑀫𑀽𑀴𑁆𑀳𑁄’’𑀢𑀺 (𑀤𑀻. 𑀦𑀺. 𑁧.𑁧𑁮𑁧) 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀅𑀢𑁆𑀣𑀺 𑀧𑀭𑁄𑀮𑁄𑀓𑁄’’𑀢𑀺 𑀲𑀲𑁆𑀲𑀢𑀤𑀲𑁆𑀲𑀦𑀯𑀲𑁂𑀦 ¶ 𑀲𑀫𑁆𑀫𑀸𑀤𑀺𑀝𑁆𑀞𑀺𑀯𑀲𑁂𑀦 𑀯𑀸 𑀧𑀼𑀘𑁆𑀙𑀸. ‘‘𑀦𑀢𑁆𑀣𑀺 𑀧𑀭𑁄𑀮𑁄𑀓𑁄’’𑀢𑀺 𑀦𑀢𑁆𑀣𑀺𑀓𑀤𑀲𑁆𑀲𑀦𑀯𑀲𑁂𑀦 𑀲𑀫𑁆𑀫𑀸𑀤𑀲𑁆𑀲𑀦𑀯𑀲𑁂𑀦 𑀯𑀸 𑀧𑀼𑀘𑁆𑀙𑀸. ‘‘𑀅𑀢𑁆𑀣𑀺 𑀘 𑀦𑀢𑁆𑀣𑀺 𑀘 𑀧𑀭𑁄𑀮𑁄𑀓𑁄’’𑀢𑀺 𑀉𑀘𑁆𑀙𑁂𑀤𑀤𑀲𑁆𑀲𑀦𑀯𑀲𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀯𑀲𑁂𑀦 𑀏𑀯 𑀯𑀸 𑀧𑀼𑀘𑁆𑀙𑀸. ‘‘𑀦𑁂𑀯 𑀅𑀢𑁆𑀣𑀺 𑀦 𑀦𑀢𑁆𑀣𑀺 𑀧𑀭𑁄𑀮𑁄𑀓𑁄’’𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁆𑀢𑀬𑀧𑀝𑀺𑀓𑁆𑀔𑁂𑀧𑁂 𑀲𑀢𑀺 𑀧𑀓𑀸𑀭𑀦𑁆𑀢𑀭𑀲𑁆𑀲 𑀅𑀲𑀫𑁆𑀪𑀯𑀢𑁄 𑀅𑀢𑁆𑀣𑀺𑀢𑀸𑀦𑀢𑁆𑀣𑀺𑀢𑀸𑀳𑀺 𑀦𑀯𑀢𑁆𑀢𑀩𑁆𑀩𑀸𑀓𑀸𑀭𑁄 𑀧𑀭𑁄𑀮𑁄𑀓𑁄𑀢𑀺 ¶ 𑀯𑀺𑀓𑁆𑀔𑁂𑀧𑀜𑁆𑀜𑁂𑀯 𑀧𑀼𑀭𑁂𑀓𑁆𑀔𑀸𑀭𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀯𑀲𑁂𑀦 𑀯𑀸 𑀧𑀼𑀘𑁆𑀙𑀸. 𑀲𑁂𑀲𑀘𑀢𑀼𑀓𑁆𑀓𑀢𑁆𑀢𑀬𑁂𑀧𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀜𑁆𑀜𑀲𑀗𑁆𑀔𑀸𑀭𑀢𑁆𑀢𑀺𑀓𑁄 𑀯𑀺𑀬 𑀳𑀺 𑀓𑀸𑀬𑀲𑀗𑁆𑀔𑀸𑀭𑀢𑁆𑀢𑀺𑀓𑁂𑀦 𑀧𑀼𑀭𑀺𑀫𑀘𑀢𑀼𑀓𑁆𑀓𑀲𑀗𑁆𑀕𑀳𑀺𑀢𑁄 𑀏𑀯 𑀅𑀢𑁆𑀣𑁄. 𑀲𑁂𑀲𑀘𑀢𑀼𑀓𑁆𑀓𑀢𑁆𑀢𑀬𑁂𑀦 𑀅𑀢𑁆𑀢𑀧𑀭𑀸𑀫𑀸𑀲𑀧𑀼𑀜𑁆𑀜𑀸𑀤𑀺 𑀨𑀮𑀢𑀸𑀘𑁄𑀤𑀦𑀸𑀦𑀬𑁂𑀦 𑀲𑀗𑁆𑀕𑀳𑀺𑀢𑁄𑀢𑀺.

𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑁄 𑀲𑀲𑁆𑀲𑀢𑀸𑀤𑀻𑀦𑀁 𑀅𑀢𑁆𑀢𑀦𑁄 𑀅𑀭𑀼𑀘𑁆𑀘𑀦𑀢𑀸𑀬 𑀲𑀩𑁆𑀩𑀢𑁆𑀣 ‘‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄’’𑀢𑀺𑀆𑀤𑀺𑀦𑀸 𑀯𑀺𑀓𑁆𑀔𑁂𑀧𑀜𑁆𑀜𑁂𑀯 𑀓𑀭𑁄𑀢𑀺. 𑀢𑀢𑁆𑀣 ‘‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄’’𑀢𑀺𑀆𑀤𑀺 𑀢𑀢𑁆𑀣 𑀢𑀢𑁆𑀣 𑀧𑀼𑀘𑁆𑀙𑀺𑀢𑀸𑀓𑀸𑀭𑀧𑀝𑀺𑀲𑁂𑀥𑀦𑀯𑀲𑁂𑀦 𑀯𑀺𑀓𑁆𑀔𑀺𑀧𑀦𑀸𑀓𑀸𑀭𑀤𑀲𑁆𑀲𑀦𑀁. 𑀦𑀦𑀼 𑀘 𑀯𑀺𑀓𑁆𑀔𑁂𑀧𑀯𑀸𑀤𑀺𑀦𑁄 𑀯𑀺𑀓𑁆𑀔𑁂𑀧𑀧𑀓𑁆𑀔𑀲𑁆𑀲 𑀅𑀦𑀼𑀚𑀸𑀦𑀦𑀁 𑀯𑀺𑀓𑁆𑀔𑁂𑀧𑀧𑀓𑁆𑀔𑁂 𑀅𑀯𑀝𑁆𑀞𑀸𑀦𑀁 𑀬𑀼𑀢𑁆𑀢𑀭𑀽𑀧𑀦𑁆𑀢𑀺? 𑀦, 𑀢𑀢𑁆𑀣𑀸𑀧𑀺 𑀢𑀲𑁆𑀲 𑀲𑀫𑁆𑀫𑀽𑀴𑁆𑀳𑀢𑁆𑀢𑀸, 𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑁂𑀯 𑀘 𑀯𑀺𑀓𑁆𑀔𑁂𑀧𑀯𑀸𑀤𑀲𑁆𑀲 𑀧𑀯𑀢𑁆𑀢𑀦𑀢𑁄. 𑀢𑀣𑀸 𑀳𑀺 𑀲𑀜𑁆𑀘𑀬𑁄 𑀩𑁂𑀮𑀝𑁆𑀞𑀧𑀼𑀢𑁆𑀢𑁄 𑀭𑀜𑁆𑀜𑀸 𑀅𑀚𑀸𑀢𑀲𑀢𑁆𑀢𑀼𑀦𑀸 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀧𑀭𑀮𑁄𑀓𑀢𑁆𑀢𑀺𑀓𑀸𑀤𑀻𑀦𑀁 𑀧𑀝𑀺𑀲𑁂𑀥𑀦𑀫𑀼𑀔𑁂𑀦 𑀯𑀺𑀓𑁆𑀔𑁂𑀧𑀁 𑀩𑁆𑀬𑀸𑀓𑀸𑀲𑀺.

𑀏𑀢𑁆𑀣𑀸𑀳 𑁋 𑀦𑀦𑀼 𑀘𑀸𑀬𑀁 𑀲𑀩𑁆𑀩𑁄𑀧𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑁄 𑀓𑀼𑀲𑀮𑀸𑀤𑀬𑁄 𑀥𑀫𑁆𑀫𑁂, 𑀧𑀭𑀮𑁄𑀓𑀢𑁆𑀢𑀺𑀓𑀸𑀤𑀻𑀦𑀺 𑀘 𑀬𑀣𑀸𑀪𑀽𑀢𑀁 𑀅𑀦𑀯𑀩𑀼𑀚𑁆𑀛𑀫𑀸𑀦𑁄 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀧𑀼𑀘𑁆𑀙𑀸𑀬 𑀯𑀺𑀓𑁆𑀔𑁂𑀧𑀦𑀫𑀢𑁆𑀢𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀲 𑀓𑀣𑀁 ¶ 𑀤𑀺𑀝𑁆𑀞𑀺𑀕𑀢𑀺𑀓𑀪𑀸𑀯𑁄. 𑀦 𑀳𑀺 𑀅𑀯𑀢𑁆𑀢𑀼𑀓𑀸𑀫𑀲𑁆𑀲 𑀯𑀺𑀬 𑀧𑀼𑀘𑁆𑀙𑀺𑀢𑀫𑀢𑁆𑀣𑀫𑀚𑀸𑀦𑀦𑁆𑀢𑀲𑁆𑀲 𑀯𑀺𑀓𑁆𑀔𑁂𑀧𑀓𑀭𑀡𑀫𑀢𑁆𑀢𑁂𑀦 𑀤𑀺𑀝𑁆𑀞𑀺𑀕𑀢𑀺𑀓𑀢𑀸 ¶ 𑀬𑀼𑀢𑁆𑀢𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀦 𑀳𑁂𑀯 𑀔𑁄 𑀧𑀼𑀘𑁆𑀙𑀸𑀬 𑀯𑀺𑀓𑁆𑀔𑁂𑀧𑀓𑀭𑀡𑀫𑀢𑁆𑀢𑁂𑀦 𑀢𑀲𑁆𑀲 𑀤𑀺𑀝𑁆𑀞𑀺𑀕𑀢𑀺𑀓𑀢𑀸, 𑀅𑀣 𑀔𑁄 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀯𑀲𑁂𑀦. 𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑁂𑀦 𑀫𑀺𑀘𑁆𑀙𑀸𑀪𑀺𑀦𑀺𑀯𑀺𑀝𑁆𑀞𑁄𑀬𑁂𑀯 𑀳𑀺 𑀧𑀼𑀕𑁆𑀕𑀮𑁄 𑀫𑀦𑁆𑀤𑀩𑀼𑀤𑁆𑀥𑀺𑀢𑀸𑀬 𑀓𑀼𑀲𑀮𑀸𑀤𑀺𑀥𑀫𑁆𑀫𑁂 𑀧𑀭𑀮𑁄𑀓𑀢𑁆𑀢𑀺𑀓𑀸𑀤𑀻𑀦𑀺 𑀘 𑀬𑀸𑀣𑀸𑀯𑀢𑁄 𑀅𑀧𑁆𑀧𑀝𑀺𑀧𑀚𑁆𑀚𑀫𑀸𑀦𑁄 𑀅𑀢𑁆𑀢𑀦𑀸 𑀅𑀯𑀺𑀜𑁆𑀜𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀭𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀫𑀼𑀲𑀸𑀯𑀸𑀤𑀸𑀤𑀺𑀪𑀬𑁂𑀦 𑀘 𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀢𑀻𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀬𑀸𑀲𑀁 𑀲𑀢𑁆𑀢𑁂𑀯 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄, 𑀲𑁂𑀲𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑁄’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁯𑁭-𑁯𑁮) 𑀅𑀣 𑀯𑀸 𑀧𑀼𑀜𑁆𑀜𑀧𑀸𑀧𑀸𑀦𑀁 𑀢𑀩𑁆𑀩𑀺𑀧𑀸𑀓𑀸𑀦𑀜𑁆𑀘 𑀅𑀦𑀯𑀩𑁄𑀥𑁂𑀦 𑀅𑀲𑀤𑁆𑀤𑀳𑀦𑁂𑀦 𑀘 𑀢𑀩𑁆𑀩𑀺𑀲𑀬𑀸𑀬 𑀧𑀼𑀘𑁆𑀙𑀸𑀬 𑀯𑀺𑀓𑁆𑀔𑁂𑀧𑀓𑀭𑀡𑀁𑀬𑁂𑀯 𑀲𑀼𑀦𑁆𑀤𑀭𑀦𑁆𑀢𑀺 𑀔𑀦𑁆𑀢𑀺𑀁 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀯𑀺𑀲𑀼𑀁𑀬𑁂𑀯𑁂𑀲𑀸 𑀏𑀓𑀸 𑀤𑀺𑀝𑁆𑀞𑀺 𑀲𑀢𑁆𑀢𑀪𑀗𑁆𑀕𑀤𑀺𑀝𑁆𑀞𑀺 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀧𑀭𑀺𑀬𑀦𑁆𑀢𑀭𑀳𑀺𑀢𑀸 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀤𑀺𑀝𑁆𑀞𑀺 𑀘𑁂𑀯 𑀯𑀸𑀘𑀸 𑀘𑀸’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁬𑁧). 𑀓𑀣𑀁 𑀧𑀦𑀲𑁆𑀲𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀗𑁆𑀕𑀳𑁄? 𑀉𑀘𑁆𑀙𑁂𑀤𑀯𑀲𑁂𑀦 𑀅𑀦𑀪𑀺𑀦𑀺𑀯𑁂𑀲𑀢𑁄. 𑀦𑀢𑁆𑀣𑀺 𑀓𑁄𑀘𑀺 𑀥𑀫𑁆𑀫𑀸𑀦𑀁 𑀬𑀣𑀸𑀪𑀽𑀢𑀯𑁂𑀤𑀻 𑀯𑀺𑀯𑀸𑀤𑀩𑀳𑀼𑀮𑀢𑁆𑀢𑀸 ¶ 𑀮𑁄𑀓𑀲𑁆𑀲, ‘‘𑀏𑀯𑀫𑁂𑀯’’𑀦𑁆𑀢𑀺 𑀧𑀦 𑀲𑀤𑁆𑀤𑀦𑁆𑀢𑀭𑁂𑀦 ‘‘𑀥𑀫𑁆𑀫𑀦𑀺𑀚𑁆𑀛𑀸𑀦𑀦𑀸 𑀅𑀦𑀸𑀤𑀺𑀓𑀸𑀮𑀺𑀓𑀸 𑀮𑁄𑀓𑁂’’𑀢𑀺 𑀕𑀸𑀳𑀯𑀲𑁂𑀦 𑀲𑀲𑁆𑀲𑀢𑀮𑁂𑀲𑁄𑀧𑁂𑀢𑁆𑀣 𑀮𑀩𑁆𑀪𑀢𑀺𑀬𑁂𑀯.

𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀯𑀸𑀤𑀯𑀡𑁆𑀡𑀦𑀸

𑁬𑁭. 𑀅𑀥𑀺𑀘𑁆𑀘 𑀬𑀤𑀺𑀘𑁆𑀙𑀓𑀁 𑀬𑀁 𑀓𑀺𑀜𑁆𑀘𑀺 𑀓𑀸𑀭𑀡𑀁, 𑀓𑀲𑁆𑀲𑀘𑀺 𑀯𑀼𑀤𑁆𑀥𑀺𑀧𑀼𑀩𑁆𑀩𑀁 𑀯𑀸 𑀯𑀺𑀦𑀸 𑀲𑀫𑀼𑀧𑁆𑀧𑀦𑁆𑀦𑁄𑀢𑀺 𑀅𑀢𑁆𑀢𑀮𑁄𑀓𑀲𑀜𑁆𑀜𑀺𑀢𑀸𑀦𑀁 𑀔𑀦𑁆𑀥𑀸𑀦𑀁 𑀅𑀥𑀺𑀘𑁆𑀘𑀼𑀧𑁆𑀧𑀢𑁆𑀢𑀺𑀆𑀓𑀸𑀭𑀸𑀭𑀫𑁆𑀫𑀡𑀁 𑀤𑀲𑁆𑀲𑀦𑀁 𑀢𑀤𑀸𑀓𑀸𑀭𑀲𑀦𑁆𑀦𑀺𑀲𑁆𑀲𑀬𑁂𑀦 𑀧𑀯𑀢𑁆𑀢𑀺𑀢𑁄, 𑀢𑀤𑀸𑀓𑀸𑀭𑀲𑀳𑀘𑀭𑀺𑀢𑀢𑀸𑀬 𑀘 ‘‘𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀬𑀣𑀸 ‘‘𑀫𑀜𑁆𑀘𑀸 𑀖𑁄𑀲𑀦𑁆𑀢𑀺, 𑀓𑀼𑀦𑁆𑀢𑀸 𑀧𑀘𑀭𑀦𑁆𑀢𑀻’’𑀢𑀺 𑀘 ¶ 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺 𑀤𑀲𑁆𑀲𑀦𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦’’𑀦𑁆𑀢𑀺.

𑁬𑁮-𑁭𑁩. 𑀤𑁂𑀲𑀦𑀸𑀲𑀻𑀲𑀦𑁆𑀢𑀺 𑀤𑁂𑀲𑀦𑀸𑀬 𑀚𑁂𑀝𑁆𑀞𑀓𑀪𑀸𑀯𑁂𑀦 𑀕𑀳𑀡𑀁, 𑀢𑁂𑀦 𑀲𑀜𑁆𑀜𑀁𑀬𑁂𑀯 𑀥𑀼𑀭𑀁 𑀓𑀢𑁆𑀯𑀸 𑀪𑀕𑀯𑀢𑀸 𑀅𑀬𑀁 𑀤𑁂𑀲𑀦𑀸 𑀓𑀢𑀸, 𑀦 𑀧𑀦 𑀢𑀢𑁆𑀣 𑀅𑀜𑁆𑀜𑁂𑀲𑀁 𑀅𑀭𑀽𑀧𑀥𑀫𑁆𑀫𑀸𑀦𑀁 𑀅𑀢𑁆𑀣𑀺𑀪𑀸𑀯𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀅𑀘𑀺𑀢𑁆𑀢𑀼𑀧𑁆𑀧𑀸𑀤𑀸’’𑀢𑀺𑀆𑀤𑀺. 𑀪𑀕𑀯𑀸 𑀳𑀺 𑀬𑀣𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀲𑀫𑀸𑀥𑀺𑀁 𑀧𑀜𑁆𑀜𑀁 𑀯𑀸 𑀥𑀼𑀭𑀁 𑀓𑀭𑁄𑀢𑀺, 𑀏𑀯𑀁 𑀮𑁄𑀓𑀺𑀬𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀘𑀺𑀢𑁆𑀢𑀁 𑀲𑀜𑁆𑀜𑀁 𑀯𑀸 𑀥𑀼𑀭𑀁 𑀓𑀭𑁄𑀢𑀺. 𑀢𑀢𑁆𑀣 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀮𑁄𑀓𑀼𑀢𑁆𑀢𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺 (𑀥. 𑀲. 𑁨𑁭𑁭) 𑀧𑀜𑁆𑀘𑀗𑁆𑀕𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀺 [𑀤𑀻. 𑀦𑀺. 𑁩.𑁩𑁫𑁫 (𑀔)] 𑀧𑀜𑁆𑀘𑀜𑀸𑀡𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀺, [𑀤𑀻. 𑀦𑀺. 𑁩.𑁩𑁫𑁫 (𑀚); 𑀯𑀺𑀪. 𑁨.𑁮𑁦𑁪] 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻’’𑀢𑀺 (𑀫. 𑀦𑀺. 𑁧.𑁨𑁭𑁧) 𑀢𑀣𑀸 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 ¶ 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, (𑀥. 𑀲. 𑁧) 𑀓𑀺𑀁𑀘𑀺𑀢𑁆𑀢𑁄 𑀢𑁆𑀯𑀁 𑀪𑀺𑀓𑁆𑀔𑀼 (𑀧𑀸𑀭𑀸. 𑁧𑁪𑁬, 𑁧𑁮𑁦) 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, (𑀥. 𑀧. 𑁧, 𑁨; 𑀦𑁂𑀢𑁆𑀢𑀺. 𑁯𑁦; 𑀧𑁂𑀝𑀓𑁄. 𑁮𑁩) 𑀲𑀦𑁆𑀢𑀺 𑀪𑀺𑀓𑁆𑀔𑀯𑁂 𑀲𑀢𑁆𑀢𑀸 𑀦𑀸𑀦𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄, (𑀤𑀻. 𑀦𑀺. 𑁩.𑁩𑁩𑁨, 𑁩𑁪𑁨, 𑁩𑁫𑁭; 𑀅. 𑀦𑀺. 𑁯.𑁨𑁪; 𑀘𑀽𑀴𑀦𑀺. 𑁮𑁩) 𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦’’𑀦𑁆𑀢𑀺𑀆𑀤𑀻𑀦𑀺 𑀲𑀼𑀢𑁆𑀢𑀸𑀦𑀺 (𑀤𑀻. 𑀦𑀺. 𑁩.𑁩𑁫𑁮) 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀓𑀸𑀦𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀢𑀺𑀢𑁆𑀣𑀸𑀬𑀢𑀦𑁂𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀫𑀬𑁂. 𑀢𑀺𑀢𑁆𑀣𑀺𑀬𑀸 𑀳𑀺 𑀉𑀧𑀧𑀢𑁆𑀢𑀺𑀯𑀺𑀲𑁂𑀲𑁂 𑀯𑀺𑀫𑀼𑀢𑁆𑀢𑀺𑀲𑀜𑁆𑀜𑀺𑀦𑁄, 𑀲𑀜𑁆𑀜𑀸𑀯𑀺𑀭𑀸𑀕𑀸𑀯𑀺𑀭𑀸𑀕𑁂𑀲𑀼 𑀆𑀤𑀻𑀦𑀯𑀸𑀦𑀺𑀲𑀁𑀲𑀤𑀲𑁆𑀲𑀺𑀦𑁄 𑀯𑀸 𑀳𑀼𑀢𑁆𑀯𑀸 𑀅𑀲𑀜𑁆𑀜𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀓𑁆𑀔𑀡𑀪𑀽𑀫𑀺𑀬𑀁 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀲𑀸𑀲𑀦𑀺𑀓𑀸. 𑀯𑀸𑀬𑁄𑀓𑀲𑀺𑀡𑁂 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 𑀯𑀸𑀬𑁄𑀓𑀲𑀺𑀡𑁂 𑀧𑀞𑀫𑀸𑀤𑀻𑀦𑀺 𑀢𑀻𑀡𑀺 𑀛𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀢𑀺𑀬𑀚𑁆𑀛𑀸𑀦𑁂 𑀘𑀺𑀡𑁆𑀡𑀯𑀲𑀻 𑀳𑀼𑀢𑁆𑀯𑀸 ¶ 𑀢𑀢𑁄 𑀯𑀼𑀝𑁆𑀞𑀸𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀥𑀺𑀕𑀫𑀸𑀬 ¶ 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸. 𑀢𑁂𑀦𑁂𑀯𑀸𑀳 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸’’𑀢𑀺.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀯𑀸𑀬𑁄𑀓𑀲𑀺𑀡𑁂𑀬𑁂𑀯 𑀧𑀭𑀺𑀓𑀫𑁆𑀫𑀁 𑀯𑀼𑀢𑁆𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀬𑀣𑁂𑀯 𑀳𑀺 𑀭𑀽𑀧𑀧𑀝𑀺𑀪𑀸𑀕𑀪𑀽𑀢𑁂𑀲𑀼 𑀓𑀲𑀺𑀡𑀯𑀺𑀲𑁂𑀲𑁂𑀲𑀼 𑀭𑀽𑀧𑀯𑀺𑀪𑀸𑀯𑀦𑁂𑀦 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀲𑀗𑁆𑀔𑀸𑀢𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀯𑀺𑀲𑁂𑀲𑁄 𑀲𑀘𑁆𑀙𑀺𑀓𑀭𑀻𑀬𑀢𑀺, 𑀏𑀯𑀁 𑀅𑀧𑀭𑀺𑀩𑁆𑀬𑀢𑁆𑀢𑀯𑀺𑀕𑁆𑀕𑀳𑀢𑀸𑀬 𑀅𑀭𑀽𑀧𑀧𑀝𑀺𑀪𑀸𑀕𑀪𑀽𑀢𑁂 𑀓𑀲𑀺𑀡𑀯𑀺𑀲𑁂𑀲𑁂 𑀅𑀭𑀽𑀧𑀯𑀺𑀪𑀸𑀯𑀦𑁂𑀦 𑀅𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀲𑀗𑁆𑀔𑀸𑀢𑁄 𑀭𑀽𑀧𑀲𑀫𑀸𑀧𑀢𑁆𑀢𑀺𑀯𑀺𑀲𑁂𑀲𑁄 𑀅𑀥𑀺𑀕𑀫𑀻𑀬𑀢𑀻𑀢𑀺 𑀏𑀢𑁆𑀣 ‘‘𑀲𑀜𑁆𑀜𑀸 𑀭𑁄𑀕𑁄 𑀲𑀜𑁆𑀜𑀸 𑀕𑀡𑁆𑀟𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁨𑁪) ‘‘𑀥𑀺 𑀘𑀺𑀢𑁆𑀢𑀁, 𑀥𑀺𑀩𑁆𑀩𑀢𑁂 𑀢𑀁 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀘 𑀦𑀬𑁂𑀦 𑀅𑀭𑀽𑀧𑀧𑁆𑀧𑀯𑀢𑁆𑀢𑀺𑀬𑀸 𑀆𑀤𑀻𑀦𑀯𑀤𑀲𑁆𑀲𑀦𑁂𑀦, 𑀢𑀤𑀪𑀸𑀯𑁂 𑀘 𑀲𑀦𑁆𑀢𑀧𑀡𑀻𑀢𑀪𑀸𑀯𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀸 𑀅𑀪𑀺𑀲𑀗𑁆𑀔𑀭𑀡𑀁, 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸 𑀧𑀦 𑀲𑀤𑁆𑀥𑀺𑀁 𑀉𑀧𑀘𑀸𑀭𑁂𑀦 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄, 𑀢𑀢𑁆𑀣𑀸𑀧𑀺 𑀯𑀺𑀲𑁂𑀲𑁂𑀦 𑀧𑀞𑀫𑀸𑀭𑀼𑀧𑁆𑀧𑀚𑁆𑀛𑀸𑀦𑀁. 𑀬𑀤𑀺 𑀏𑀯𑀁 ‘‘𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑀓𑀲𑀺𑀡𑁂𑀧𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀢𑀲𑁆𑀲𑀸𑀧𑀺 𑀳𑀺 𑀅𑀭𑀽𑀧𑀧𑀝𑀺𑀪𑀸𑀕𑀢𑀸 𑀮𑀩𑁆𑀪𑀢𑀻𑀢𑀺? 𑀇𑀘𑁆𑀙𑀺𑀢𑀫𑁂𑀯𑁂𑀢𑀁 𑀓𑁂𑀲𑀜𑁆𑀘𑀺 𑀅𑀯𑀘𑀦𑀁 𑀧𑀦𑁂𑀢𑁆𑀣 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀅𑀕𑁆𑀕𑀳𑀺𑀢𑀪𑀸𑀯𑁂𑀦. 𑀬𑀣𑀸 𑀳𑀺 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸 𑀯𑀺𑀭𑀚𑁆𑀚𑀦𑀻𑀬𑀥𑀫𑁆𑀫𑀪𑀸𑀯𑀫𑀢𑁆𑀢𑁂𑀦 𑀧𑀭𑀺𑀦𑀺𑀧𑁆𑀨𑀦𑁆𑀦𑀸, 𑀯𑀺𑀭𑀚𑁆𑀚𑀦𑀻𑀬𑀥𑀫𑁆𑀫𑀧𑀝𑀺𑀪𑀸𑀕𑀪𑀽𑀢𑁂 𑀘 𑀯𑀺𑀲𑀬𑀯𑀺𑀲𑁂𑀲𑁂 𑀧𑀸𑀢𑀼𑀪𑀯𑀢𑀺, 𑀏𑀯𑀁 𑀅𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀧𑀻𑀢𑀺 𑀯𑀼𑀘𑁆𑀘𑀫𑀸𑀦𑁂 𑀦 𑀓𑁄𑀘𑀺 𑀯𑀺𑀭𑁄𑀥𑁄, 𑀢𑀺𑀢𑁆𑀣𑀺𑀬𑁂𑀳𑁂𑀯 𑀧𑀦 𑀢𑀲𑁆𑀲𑀸 𑀲𑀫𑀸𑀧𑀢𑁆𑀢𑀺𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑀸𑀬, 𑀢𑁂𑀲𑀜𑁆𑀘 𑀯𑀺𑀲𑀬𑀧𑀣𑁂𑀲𑀼𑀧𑀦𑀺𑀩𑀦𑁆𑀥𑀦𑀲𑁆𑀲𑁂𑀯 𑀢𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀢𑁆𑀢𑀺𑀢𑁄 𑀤𑀺𑀝𑁆𑀞𑀺𑀯𑀦𑁆𑀢𑁂𑀳𑀺 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀘𑀢𑀼𑀢𑁆𑀣𑁂𑀬𑁂𑀯 𑀪𑀽𑀢𑀓𑀲𑀺𑀡𑁂 𑀅𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀧𑀭𑀺𑀓𑀫𑁆𑀫𑀁 ¶ 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀺𑀜𑁆𑀘 𑀯𑀡𑁆𑀡𑀓𑀲𑀺𑀡𑁂𑀲𑀼 𑀯𑀺𑀬 𑀧𑀼𑀭𑀺𑀫𑀪𑀽𑀢𑀓𑀲𑀺𑀡𑀢𑁆𑀢𑀬𑁂𑀧𑀺 𑀯𑀡𑁆𑀡𑀧𑀝𑀺𑀘𑁆𑀙𑀸𑀬𑀸𑀯 𑀧𑀡𑁆𑀡𑀢𑁆𑀢𑀺 𑀆𑀭𑀫𑁆𑀫𑀡𑀁 𑀛𑀸𑀦𑀲𑁆𑀲 𑀮𑁄𑀓𑀯𑁄𑀳𑀸𑀭𑀸𑀦𑀼𑀭𑁄𑀥𑁂𑀦𑁂𑀯 𑀧𑀯𑀢𑁆𑀢𑀺𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁫𑁭) 𑀧𑀣𑀯𑀻𑀓𑀲𑀺𑀡𑀲𑁆𑀲 𑀆𑀤𑀸𑀲𑀘𑀦𑁆𑀤𑀫𑀡𑁆𑀟𑀮𑀽𑀧𑀫𑀸𑀯𑀘𑀦𑀜𑁆𑀘 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺, 𑀘𑀢𑀼𑀢𑁆𑀣𑀁 𑀧𑀦 𑀪𑀽𑀢𑀓𑀲𑀺𑀡𑀁 𑀪𑀽𑀢𑀧𑁆𑀧𑀝𑀺𑀘𑁆𑀙𑀸𑀬𑀫𑁂𑀯 𑀛𑀸𑀦𑀲𑁆𑀲 ¶ 𑀕𑁄𑀘𑀭𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀢𑀲𑁆𑀲𑁂𑀯 𑀅𑀭𑀽𑀧𑀧𑀝𑀺𑀪𑀸𑀕𑀢𑀸 𑀬𑀼𑀢𑁆𑀢𑀸𑀢𑀺 𑀯𑀸𑀬𑁄𑀓𑀲𑀺𑀡𑁂𑀬𑁂𑀯 𑀧𑀭𑀺𑀓𑀫𑁆𑀫𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀥𑁂𑀯𑀸𑀢𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀬𑁂𑀯. 𑀢𑀢𑁆𑀣𑀸𑀢𑀺 𑀅𑀲𑀜𑁆𑀜𑀪𑀯𑁂. 𑀬𑀤𑀺 𑀭𑀽𑀧𑀓𑁆𑀔𑀦𑁆𑀥𑀫𑀢𑁆𑀢𑀫𑁂𑀯 𑀅𑀲𑀜𑁆𑀜𑀪𑀯𑁂 𑀧𑀸𑀢𑀼𑀪𑀯𑀢𑀺, 𑀓𑀣𑀫𑀭𑀽𑀧𑀲𑀦𑁆𑀦𑀺𑀲𑁆𑀲𑀬𑁂𑀦 𑀯𑀺𑀦𑀸 𑀢𑀢𑁆𑀣 𑀭𑀽𑀧𑀁 𑀧𑀯𑀢𑁆𑀢𑀢𑀺, 𑀓𑀣𑀁 𑀧𑀦 𑀭𑀽𑀧𑀲𑀦𑁆𑀦𑀺𑀲𑁆𑀲𑀬𑁂𑀦 𑀯𑀺𑀦𑀸 𑀅𑀭𑀽𑀧𑀥𑀸𑀢𑀼𑀬𑀁 𑀅𑀭𑀽𑀧𑀁 𑀧𑀯𑀢𑁆𑀢𑀢𑀺, 𑀇𑀤𑀫𑁆𑀧𑀺 𑀢𑁂𑀦 𑀲𑀫𑀸𑀦𑀚𑀸𑀢𑀺𑀬𑀫𑁂𑀯. 𑀓𑀲𑁆𑀫𑀸? 𑀇𑀥𑁂𑀯 𑀅𑀤𑀲𑁆𑀲𑀦𑀢𑁄. 𑀬𑀤𑀺 𑀏𑀯𑀁 𑀓𑀩𑀴𑀻𑀓𑀸𑀭𑀸𑀳𑀸𑀭𑁂𑀦 𑀯𑀺𑀦𑀸 𑀭𑀽𑀧𑀥𑀸𑀢𑀼𑀬𑀁 𑀭𑀽𑀧𑁂𑀦 𑀦 𑀧𑀯𑀢𑁆𑀢𑀺𑀢𑀩𑁆𑀩𑀁, 𑀓𑀺𑀁 𑀓𑀸𑀭𑀡𑀁 ¶ ? 𑀇𑀥𑁂𑀯 𑀅𑀤𑀲𑁆𑀲𑀦𑀢𑁄. 𑀅𑀧𑀺 𑀘 𑀬𑀣𑀸 𑀬𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀓𑀸𑀭𑀡𑀁 𑀭𑀽𑀧𑁂 𑀅𑀯𑀺𑀕𑀢𑀢𑀡𑁆𑀳𑀁, 𑀢𑀲𑁆𑀲 𑀲𑀳 𑀭𑀽𑀧𑁂𑀦 𑀲𑀫𑁆𑀪𑀯𑀢𑁄 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀺, 𑀬𑀲𑁆𑀲 𑀧𑀦 𑀦𑀺𑀩𑁆𑀩𑀢𑁆𑀢𑀺𑀓𑀸𑀭𑀡𑀁 𑀭𑀽𑀧𑁂 𑀯𑀺𑀕𑀢𑀢𑀡𑁆𑀳𑀁, 𑀢𑀲𑁆𑀲 𑀯𑀺𑀦𑀸 𑀭𑀽𑀧𑁂𑀦 𑀭𑀽𑀧𑀦𑀺𑀭𑀧𑁂𑀓𑁆𑀔𑀢𑀸𑀬 𑀓𑀸𑀭𑀡𑀲𑁆𑀲, 𑀏𑀯𑀁 𑀬𑀲𑁆𑀲 𑀭𑀽𑀧𑀧𑁆𑀧𑀩𑀦𑁆𑀥𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀓𑀸𑀭𑀡𑀁 𑀯𑀺𑀕𑀢𑀢𑀡𑁆𑀳𑀁 𑀅𑀭𑀽𑀧𑁂, 𑀢𑀲𑁆𑀲 𑀯𑀺𑀦𑀸 𑀅𑀭𑀽𑀧𑁂𑀦 𑀧𑀯𑀢𑁆𑀢𑀺 𑀳𑁄𑀢𑀻𑀢𑀺 𑀅𑀲𑀜𑁆𑀜𑀪𑀯𑁂 𑀭𑀽𑀧𑀓𑁆𑀔𑀦𑁆𑀥𑀫𑀢𑁆𑀢𑀫𑁂𑀯 𑀦𑀺𑀩𑁆𑀩𑀢𑁆𑀢𑀢𑀺. 𑀓𑀣𑀁 𑀧𑀦 𑀢𑀢𑁆𑀣 𑀓𑁂𑀯𑀮𑁄 𑀭𑀽𑀧𑀧𑁆𑀧𑀩𑀦𑁆𑀥𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀭𑀳𑀺𑀢𑁄 𑀘𑀺𑀭𑀓𑀸𑀮𑀁 𑀧𑀯𑀢𑁆𑀢𑀢𑀻𑀢𑀺 𑀧𑀘𑁆𑀘𑁂𑀢𑀩𑁆𑀩𑀁, 𑀓𑀺𑀢𑁆𑀢𑀓𑀁 𑀯𑀸 𑀓𑀸𑀮𑀁 𑀧𑀯𑀢𑁆𑀢𑀢𑀻𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀬𑀣𑀸 𑀦𑀸𑀫 𑀚𑀺𑀬𑀸𑀯𑁂𑀕𑀼𑀓𑁆𑀔𑀺𑀢𑁆𑀢𑁄 𑀲𑀭𑁄’’𑀢𑀺𑀆𑀤𑀺, 𑀢𑁂𑀦 𑀦 𑀓𑁂𑀯𑀮𑀫𑀸𑀕𑀫𑁄𑀬𑁂𑀯 𑀅𑀬𑀫𑁂𑀢𑁆𑀣 𑀬𑀼𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀢𑀓𑀫𑁂𑀯 𑀓𑀸𑀮𑀦𑁆𑀢𑀺 𑀉𑀓𑁆𑀓𑀁𑀲𑀢𑁄 𑀧𑀜𑁆𑀘 𑀫𑀳𑀸𑀓𑀧𑁆𑀧𑀲𑀢𑀸𑀦𑀺𑀧𑀺 𑀢𑀺𑀝𑁆𑀞𑀦𑁆𑀢𑀺 𑀅𑀲𑀜𑁆𑀜𑀲𑀢𑁆𑀢𑀸. 𑀛𑀸𑀦𑀯𑁂𑀕𑁂𑀢𑀺 𑀅𑀲𑀜𑁆𑀜𑀲𑀫𑀸𑀧𑀢𑁆𑀢𑀺𑀧𑀭𑀺𑀓𑁆𑀔𑀢𑁂 𑀓𑀫𑁆𑀫𑀯𑁂𑀕𑁂. 𑀅𑀦𑁆𑀢𑀭𑀥𑀸𑀬𑀢𑀻𑀢𑀺 ¶ 𑀧𑀘𑁆𑀘𑀬𑀦𑀺𑀭𑁄𑀥𑁂𑀦 𑀦𑀺𑀭𑀼𑀚𑁆𑀛𑀢𑀺 𑀦𑀧𑁆𑀧𑀯𑀢𑁆𑀢𑀢𑀺.

𑀇𑀥𑀸𑀢𑀺 𑀓𑀸𑀫𑀪𑀯𑁂. 𑀓𑀣𑀁 𑀧𑀦 𑀅𑀦𑁂𑀓𑀓𑀧𑁆𑀧𑀲𑀢𑀲𑀫𑀢𑀺𑀓𑁆𑀓𑀫𑁂𑀦 𑀘𑀺𑀭𑀦𑀺𑀭𑀼𑀤𑁆𑀥𑀢𑁄 𑀯𑀺𑀜𑁆𑀜𑀸𑀡𑀢𑁄 𑀇𑀥 𑀯𑀺𑀜𑁆𑀜𑀸𑀡𑀁 𑀲𑀫𑀼𑀧𑁆𑀧𑀚𑁆𑀚𑀢𑀺. 𑀦 𑀳𑀺 𑀦𑀺𑀭𑀼𑀤𑁆𑀥𑁂 𑀘𑀓𑁆𑀔𑀼𑀫𑁆𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀫𑀼𑀧𑁆𑀧𑀚𑁆𑀚𑀫𑀸𑀦𑀁 𑀤𑀺𑀝𑁆𑀞𑀦𑁆𑀢𑀺? 𑀦𑀬𑀺𑀤𑀫𑁂𑀓𑀦𑁆𑀢𑀢𑁄 𑀤𑀝𑁆𑀞𑀩𑁆𑀩𑀁. 𑀘𑀺𑀭𑀦𑀺𑀭𑀼𑀤𑁆𑀥𑀫𑁆𑀧𑀺 𑀳𑀺 𑀘𑀺𑀢𑁆𑀢𑀁 𑀲𑀫𑀸𑀦𑀚𑀸𑀢𑀺𑀓𑀲𑁆𑀲 𑀅𑀦𑁆𑀢𑀭𑀸𑀦𑀼𑀧𑁆𑀧𑀚𑁆𑀚𑀦𑀢𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑀫𑀢𑁆𑀢𑀁 𑀳𑁄𑀢𑀺𑀬𑁂𑀯, 𑀦 𑀩𑀻𑀚𑀁, 𑀩𑀻𑀚𑀁 𑀧𑀦 𑀓𑀫𑁆𑀫𑀁. 𑀢𑀲𑁆𑀫𑀸 𑀓𑀫𑁆𑀫𑀢𑁄 𑀩𑀻𑀚𑀪𑀽𑀢𑀢𑁄 𑀆𑀭𑀫𑁆𑀫𑀡𑀸𑀤𑀻𑀳𑀺 𑀧𑀘𑁆𑀘𑀬𑁂𑀳𑀺 𑀅𑀲𑀜𑁆𑀜𑀪𑀯𑀢𑁄 𑀘𑀼𑀢𑀸𑀦𑀁 𑀓𑀸𑀫𑀥𑀸𑀢𑀼𑀬𑀸 𑀉𑀧𑀧𑀢𑁆𑀢𑀺𑀯𑀺𑀜𑁆𑀜𑀸𑀡𑀁 𑀳𑁄𑀢𑀺𑀬𑁂𑀯. 𑀢𑁂𑀦𑀸𑀳 ‘‘𑀇𑀥 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀏𑀢𑁆𑀣 𑀘 𑀬𑀣𑀸 𑀦𑀸𑀫 𑀉𑀢𑀼𑀦𑀺𑀬𑀸𑀫𑁂𑀦 𑀧𑀼𑀧𑁆𑀨𑀕𑁆𑀕𑀳𑀡𑁂 𑀦𑀺𑀬𑀢𑀓𑀸𑀮𑀸𑀦𑀁 𑀭𑀼𑀓𑁆𑀔𑀸𑀦𑀁 𑀯𑁂𑀔𑁂 𑀤𑀺𑀦𑁆𑀦𑁂 𑀯𑁂𑀔𑀩𑀮𑁂𑀦 𑀦 𑀬𑀣𑀸 𑀦𑀺𑀬𑀸𑀫𑀢𑀸 𑀳𑁄𑀢𑀺 𑀧𑀼𑀧𑁆𑀨𑀕𑁆𑀕𑀳𑀡𑀲𑁆𑀲, 𑀏𑀯𑀫𑁂𑀯 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀅𑀯𑀺𑀧𑁆𑀧𑀬𑁄𑀕𑁂𑀦 𑀯𑀢𑁆𑀢𑀫𑀸𑀦𑁂𑀲𑀼 𑀭𑀽𑀧𑀸𑀭𑀽𑀧𑀥𑀫𑁆𑀫𑁂𑀲𑀼 𑀭𑀽𑀧𑀸𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀯𑁂𑀔𑁂 𑀤𑀺𑀦𑁆𑀦𑁂 𑀢𑀲𑁆𑀲 𑀲𑀫𑀸𑀧𑀢𑁆𑀢𑀺𑀯𑁂𑀔𑀩𑀮𑀲𑁆𑀲 𑀅𑀦𑀼𑀭𑀽𑀧𑀢𑁄 𑀅𑀭𑀽𑀧𑀪𑀯𑁂 𑀅𑀲𑀜𑁆𑀜𑀸𑀪𑀯𑁂 𑀘 𑀬𑀣𑀸𑀓𑁆𑀓𑀫𑀁 𑀭𑀽𑀧𑀭𑀳𑀺𑀢𑀸 𑀅𑀭𑀽𑀧𑀭𑀳𑀺𑀢𑀸 𑀘 𑀔𑀦𑁆𑀥𑀸𑀦𑀁 𑀧𑀯𑀢𑁆𑀢𑀺 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦𑀦𑀼 𑀏𑀢𑁆𑀣 𑀚𑀸𑀢𑀺𑀲𑀢𑀲𑀳𑀲𑁆𑀲𑀤𑀲𑀲𑀁𑀯𑀝𑁆𑀝𑀸𑀤𑀻𑀦𑀁 𑀫𑀢𑁆𑀣𑀓𑁂, 𑀅𑀩𑁆𑀪𑀦𑁆𑀢𑀭𑀢𑁄 𑀯𑀸 𑀧𑀯𑀢𑁆𑀢𑀸𑀬 𑀅𑀲𑀜𑁆𑀜𑀽𑀧𑀯𑀢𑁆𑀢𑀺𑀬𑀸 𑀯𑀲𑁂𑀦 𑀮𑀸𑀪𑀻𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀯𑀸𑀤𑁄 𑀮𑀸𑀪𑀻𑀲𑀲𑁆𑀲𑀢𑀯𑀸𑀤𑁄 𑀯𑀺𑀬 𑀅𑀦𑁂𑀓𑀪𑁂𑀤𑁄 𑀲𑀫𑁆𑀪𑀯𑀢𑀻𑀢𑀺? 𑀲𑀘𑁆𑀘𑀁 𑀲𑀫𑁆𑀪𑀯𑀢𑀺, 𑀅𑀦𑀦𑁆𑀢𑀭𑀢𑁆𑀢𑀸 𑀧𑀦 𑀆𑀧𑀦𑁆𑀦𑀸𑀬 ¶ 𑀅𑀲𑀜𑁆𑀜𑀽𑀧𑀧𑀢𑁆𑀢𑀺𑀬𑀸 𑀯𑀲𑁂𑀦 𑀮𑀸𑀪𑀻𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀯𑀸𑀤𑁄 𑀦𑀬𑀤𑀲𑁆𑀲𑀦𑀯𑀲𑁂𑀦 𑀏𑀓𑁄𑀯 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀗𑁆𑀕𑀳𑀢𑁄 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀯𑀸𑀤𑀲𑁆𑀲 𑀲𑀲𑁆𑀲𑀢𑀯𑀸𑀤𑁂 𑀆𑀕𑀢𑁄 𑀲𑀩𑁆𑀩𑁄 𑀤𑁂𑀲𑀦𑀸𑀦𑀬𑁄 𑀬𑀣𑀸𑀲𑀫𑁆𑀪𑀯𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀯𑀸𑀤𑁂𑀧𑀺 ¶ 𑀕𑀳𑁂𑀢𑀩𑁆𑀩𑁄𑀢𑀺 ¶ 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀪𑀕𑀯𑀢𑀸 𑀮𑀸𑀪𑀻𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀯𑀸𑀤𑁄 𑀅𑀯𑀺𑀪𑀚𑀺𑀢𑁆𑀯𑀸 𑀤𑁂𑀲𑀺𑀢𑁄. 𑀅𑀯𑀲𑁆𑀲𑀜𑁆𑀘 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀗𑁆𑀕𑀳𑁄 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀯𑀸𑀤𑀲𑁆𑀲 𑀇𑀘𑁆𑀙𑀺𑀢𑀩𑁆𑀩𑁄 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀲𑀢𑁆𑀢𑀸𑀦𑀁 𑀅𑀚𑁆𑀛𑀸𑀲𑀬𑀲𑁆𑀲 𑀤𑀼𑀯𑀺𑀥𑀢𑁆𑀢𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺 𑀘𑀸’’𑀢𑀺. 𑀢𑀣𑀸 𑀘 𑀯𑀓𑁆𑀔𑀢𑀺 ‘‘𑀬𑀸𑀲𑀁 𑀲𑀢𑁆𑀢𑁂𑀯 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄, 𑀲𑁂𑀲𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑁄’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁯𑁭-𑁯𑁮).

𑀦𑀦𑀼 𑀘 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀯𑀸𑀤𑀲𑁆𑀲 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀗𑁆𑀕𑀳𑁄 𑀦 𑀬𑀼𑀢𑁆𑀢𑁄. ‘‘𑀅𑀳𑀜𑁆𑀳𑀺 𑀧𑀼𑀩𑁆𑀩𑁂 𑀦𑀸𑀳𑁄𑀲𑀺’’𑀦𑁆𑀢𑀺𑀆𑀤𑀺𑀯𑀲𑁂𑀦 𑀧𑀯𑀢𑁆𑀢𑀦𑀢𑁄, 𑀅𑀧𑀼𑀩𑁆𑀩𑀲𑀢𑁆𑀢𑀧𑀸𑀢𑀼𑀪𑀸𑀯𑀕𑁆𑀕𑀸𑀳𑀢𑁆𑀢𑀸, 𑀅𑀢𑁆𑀢𑀦𑁄 𑀮𑁄𑀓𑀲𑁆𑀲 𑀘 𑀲𑀤𑀸𑀪𑀸𑀯𑀕𑀸𑀳𑀺𑀦𑀻 𑀘 𑀲𑀲𑁆𑀲𑀢𑀤𑀺𑀝𑁆𑀞𑀺 ‘‘𑀅𑀢𑁆𑀣𑀺𑀢𑁆𑀯𑁂𑀯 𑀲𑀲𑁆𑀲𑀢𑀺𑀲𑀫’’𑀦𑁆𑀢𑀺 𑀧𑀯𑀢𑁆𑀢𑀦𑀢𑁄? 𑀦𑁄 𑀦 𑀬𑀼𑀢𑁆𑀢𑁄 𑀅𑀦𑀸𑀕𑀢𑁂 𑀓𑁄𑀝𑀺𑀅𑀤𑀲𑁆𑀲𑀦𑀢𑁄. 𑀬𑀤𑀺𑀧𑀺 𑀳𑀺 𑀅𑀬𑀁 𑀯𑀸𑀤𑁄 ‘‘𑀲𑁄𑀫𑁆𑀳𑀺 𑀏𑀢𑀭𑀳𑀺 𑀅𑀳𑀼𑀢𑁆𑀯𑀸 𑀲𑀦𑁆𑀢𑀢𑀸𑀬 𑀧𑀭𑀺𑀡𑀢𑁄’’𑀢𑀺 (𑀤𑀻. 𑀦𑀺. 𑁧.𑁬𑁮) 𑀅𑀢𑁆𑀢𑀦𑁄 𑀮𑁄𑀓𑀲𑁆𑀲 𑀘 𑀅𑀢𑀻𑀢𑀓𑁄𑀝𑀺𑀧𑀭𑀸𑀫𑀲𑀦𑀯𑀲𑁂𑀦 𑀧𑀯𑀢𑁆𑀢𑁄, 𑀢𑀣𑀸𑀧𑀺 𑀯𑀢𑁆𑀢𑀫𑀸𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀢𑁂𑀲𑀁 𑀓𑀢𑁆𑀣𑀘𑀺 𑀅𑀦𑀸𑀕𑀢𑁂 𑀧𑀭𑀺𑀬𑀦𑁆𑀢𑀁 𑀧𑀲𑁆𑀲𑀢𑀺, 𑀯𑀺𑀲𑁂𑀲𑁂𑀦 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀓𑀸𑀮𑁂𑀲𑀼 𑀧𑀭𑀺𑀬𑀦𑁆𑀢𑀸𑀤𑀲𑁆𑀲𑀦𑀧𑀪𑀸𑀯𑀺𑀢𑁄 𑀲𑀲𑁆𑀲𑀢𑀯𑀸𑀤𑁄. 𑀬𑀣𑀸𑀳 ‘‘𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀢𑀻’’𑀢𑀺. 𑀬𑀤𑀺 𑀏𑀯𑀁 𑀇𑀫𑀲𑁆𑀲 𑀯𑀸𑀤𑀲𑁆𑀲, 𑀲𑀲𑁆𑀲𑀢𑀯𑀸𑀤𑀸𑀤𑀻𑀦𑀜𑁆𑀘 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑁂𑀲𑀼 𑀲𑀗𑁆𑀕𑀳𑁄 𑀦 𑀬𑀼𑀢𑁆𑀢𑁄 𑀅𑀦𑀸𑀕𑀢𑀓𑀸𑀮𑀧𑀭𑀸𑀫𑀲𑀦𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸𑀢𑀺? 𑀦, 𑀲𑀫𑀼𑀤𑀸𑀕𑀫𑀲𑁆𑀲 𑀅𑀢𑀻𑀢𑀓𑁄𑀝𑁆𑀞𑀸𑀲𑀺𑀓𑀢𑁆𑀢𑀸. 𑀢𑀣𑀸 𑀳𑀺 𑀦𑁂𑀲𑀁 𑀲𑀫𑀼𑀧𑁆𑀧𑀢𑁆𑀢𑀺 𑀅𑀢𑀻𑀢𑀁𑀲𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀳𑀺, 𑀢𑀧𑁆𑀧𑀝𑀺𑀭𑀽𑀧𑀓𑀸𑀦𑀼𑀲𑁆𑀲𑀯𑀸𑀤𑀺𑀧𑁆𑀧𑀪𑀸𑀯𑀺𑀢𑀢𑀓𑁆𑀓𑀦𑁂𑀳𑀺 𑀘 𑀲𑀗𑁆𑀕𑀳𑀺𑀢𑀸𑀢𑀺, 𑀢𑀣𑀸 𑀘𑁂𑀯 𑀲𑀁𑀯𑀡𑁆𑀡𑀺𑀢𑀁. 𑀅𑀣 𑀯𑀸 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑁂𑀦 𑀯𑀸𑀤𑀺𑀯𑀭𑁂𑀦 𑀥𑀫𑁆𑀫𑀲𑁆𑀲𑀸𑀫𑀺𑀦𑀸 𑀦𑀺𑀭𑀯𑀲𑁂𑀲𑀢𑁄 𑀅𑀕𑀢𑀺𑀜𑁆𑀘 𑀕𑀢𑀺𑀜𑁆𑀘 𑀬𑀣𑀸𑀪𑀽𑀢𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑀺𑀢𑀸 𑀏𑀢𑀸 𑀤𑀺𑀝𑁆𑀞𑀺𑀬𑁄, 𑀢𑀲𑁆𑀫𑀸 𑀬𑀸𑀯𑀢𑀺𑀓𑀸 𑀤𑀺𑀝𑁆𑀞𑀺𑀬𑁄 𑀪𑀕𑀯𑀢𑀸 𑀤𑁂𑀲𑀺𑀢𑀸, 𑀬𑀣𑀸 𑀘 𑀤𑁂𑀲𑀺𑀢𑀸, 𑀢𑀣𑀸 𑀢𑀣𑀸𑀯 ¶ 𑀲𑀦𑁆𑀦𑀺𑀝𑁆𑀞𑀸𑀦𑀢𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀸, 𑀦 𑀏𑀢𑁆𑀣 𑀬𑀼𑀢𑁆𑀢𑀺𑀯𑀺𑀘𑀸𑀭𑀡𑀸 𑀓𑀸𑀢𑀩𑁆𑀩𑀸 𑀩𑀼𑀤𑁆𑀥𑀯𑀺𑀲𑀬𑀢𑁆𑀢𑀸. 𑀅𑀘𑀺𑀦𑁆𑀢𑁂𑀬𑁆𑀬𑁄 𑀳𑀺 𑀩𑀼𑀤𑁆𑀥𑀯𑀺𑀲𑀬𑁄𑀢𑀺.

𑀤𑀼𑀢𑀺𑀬𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀯𑀸𑀤𑀯𑀡𑁆𑀡𑀦𑀸

𑁭𑁪. ‘‘𑀅𑀧𑀭𑀦𑁆𑀢𑁂 ¶ ¶ 𑀜𑀸𑀡𑀁, 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀅𑀧𑀭-𑀲𑀤𑁆𑀤𑁄 𑀇𑀥 𑀅𑀦𑀸𑀕𑀢𑀓𑀸𑀮𑀯𑀸𑀘𑀓𑁄𑀢𑀺 𑀆𑀳 ‘‘𑀅𑀦𑀸𑀕𑀢𑀓𑁄𑀝𑁆𑀞𑀸𑀲𑀲𑀗𑁆𑀔𑀸𑀢’’𑀦𑁆𑀢𑀺. 𑀅𑀧𑀭𑀦𑁆𑀢𑀁 𑀓𑀧𑁆𑀧𑁂𑀢𑁆𑀯𑀸𑀢𑀺𑀆𑀤𑀻𑀲𑀼 ‘‘𑀧𑀼𑀩𑁆𑀩𑀦𑁆𑀢𑀁 𑀓𑀧𑁆𑀧𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀯𑀓𑁆𑀔𑀸𑀫.

𑀲𑀜𑁆𑀜𑀻𑀯𑀸𑀤𑀯𑀡𑁆𑀡𑀦𑀸

𑁭𑁫. 𑀉𑀤𑁆𑀥𑀫𑀸𑀖𑀸𑀢𑀦𑀸𑀢𑀺 𑀧𑀯𑀢𑁆𑀢𑁄 𑀯𑀸𑀤𑁄 𑀉𑀤𑁆𑀥𑀫𑀸𑀖𑀸𑀢𑀦𑁄, 𑀲𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸. 𑀬𑀲𑁆𑀫𑀸 𑀧𑀦 𑀢𑁂 𑀤𑀺𑀝𑁆𑀞𑀺𑀕𑀢𑀺𑀓𑀸 ‘‘𑀉𑀤𑁆𑀥𑀁 𑀫𑀭𑀡𑀸 𑀅𑀢𑁆𑀢𑀸 𑀦𑀺𑀩𑁆𑀩𑀺𑀓𑀸𑀭𑁄’’𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀫𑀸 ‘‘𑀉𑀤𑁆𑀥𑀫𑀸𑀖𑀸𑀢𑀦𑀸 𑀅𑀢𑁆𑀢𑀸𑀦𑀁 𑀯𑀤𑀦𑁆𑀢𑀻𑀢𑀺 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸’’𑀢𑀺 𑀯𑀼𑀢𑁆𑀢𑀁. 𑀲𑀜𑁆𑀜𑀻𑀯𑀸𑀤𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀲𑀜𑁆𑀜𑀻𑀯𑀸𑀤𑀸 ‘‘𑀩𑀼𑀤𑁆𑀥𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀩𑀼𑀤𑁆𑀥𑁄’’𑀢𑀺 𑀬𑀣𑀸. 𑀅𑀣 𑀯𑀸 𑀲𑀜𑁆𑀜𑀻𑀢𑀺 𑀧𑀯𑀢𑁆𑀢𑁄 𑀯𑀸𑀤𑁄 𑀲𑀜𑁆𑀜𑀻 𑀲𑀳𑀘𑀭𑀡𑀦𑀬𑁂𑀦, 𑀲𑀜𑁆𑀜𑀻 𑀯𑀸𑀤𑁄 𑀏𑀢𑁂𑀲𑀦𑁆𑀢𑀺 𑀲𑀜𑁆𑀜𑀻𑀯𑀸𑀤𑀸.

𑁭𑁬-𑁭𑁭. 𑀭𑀽𑀧𑀻 𑀅𑀢𑁆𑀢𑀸𑀢𑀺 𑀏𑀢𑁆𑀣 𑀦𑀦𑀼 𑀭𑀽𑀧𑀯𑀺𑀦𑀺𑀫𑀼𑀢𑁆𑀢𑁂𑀦 𑀅𑀢𑁆𑀢𑀦𑀸 𑀪𑀯𑀺𑀢𑀩𑁆𑀩𑀁 𑀲𑀜𑁆𑀜𑀸𑀬 𑀯𑀺𑀬 𑀭𑀽𑀧𑀲𑁆𑀲𑀧𑀺 𑀅𑀢𑁆𑀢𑀦𑀺𑀬𑀢𑁆𑀢𑀸. 𑀦 𑀳𑀺 ‘‘𑀲𑀜𑁆𑀜𑀻 𑀅𑀢𑁆𑀢𑀸’’𑀢𑀺 𑀏𑀢𑁆𑀣 𑀲𑀜𑁆𑀜𑀸 𑀅𑀢𑁆𑀢𑀸. 𑀢𑁂𑀦𑁂𑀯 𑀳𑀺 ‘‘𑀢𑀢𑁆𑀣 𑀧𑀯𑀢𑁆𑀢𑀲𑀜𑁆𑀜𑀜𑁆𑀘𑀲𑁆𑀲 𑀲𑀜𑁆𑀜𑀸𑀢𑀺 𑀕𑀳𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀢𑀺 𑀓𑀲𑁆𑀫𑀸 𑀓𑀲𑀺𑀡𑀭𑀽𑀧𑀁 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺? 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁 ‘‘𑀭𑀽𑀧𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀭𑀽𑀧𑀻’’𑀢𑀺, 𑀅𑀣 𑀔𑁄 ‘‘𑀭𑀼𑀧𑁆𑀧𑀦𑀲𑀻𑀮𑁄 𑀭𑀽𑀧𑀻’’𑀢𑀺. 𑀭𑀼𑀧𑁆𑀧𑀦𑀜𑁆𑀘𑁂𑀢𑁆𑀣 𑀭𑀽𑀧𑀲𑀭𑀺𑀓𑁆𑀔𑀢𑀸𑀬 𑀓𑀲𑀺𑀡𑀭𑀽𑀧𑀲𑁆𑀲 𑀯𑀟𑁆𑀠𑀺𑀢𑀸𑀯𑀟𑁆𑀠𑀺𑀢𑀓𑀸𑀮𑀯𑀲𑁂𑀦 𑀯𑀺𑀲𑁂𑀲𑀸𑀧𑀢𑁆𑀢𑀺, 𑀲𑀸 𑀘 ‘‘𑀦𑀢𑁆𑀣𑀻’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀧𑀭𑀺𑀢𑁆𑀢𑀯𑀺𑀧𑀼𑀮𑀢𑀸𑀤𑀺𑀯𑀺𑀲𑁂𑀲𑀲𑀩𑁆𑀪𑀸𑀯𑀢𑁄. 𑀬𑀤𑀺 𑀏𑀯𑀁 𑀇𑀫𑀲𑁆𑀲 𑀯𑀸𑀤𑀲𑁆𑀲 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀗𑁆𑀕𑀳𑁄 𑀦 𑀬𑀼𑀚𑁆𑀚𑀢𑀻𑀢𑀺? 𑀦𑁄 𑀦 𑀬𑀼𑀚𑁆𑀚𑀢𑀺 𑀓𑀸𑀬𑀪𑁂𑀤𑀢𑁄 𑀉𑀤𑁆𑀥𑀁 𑀅𑀢𑁆𑀢𑀦𑁄 𑀦𑀺𑀩𑁆𑀩𑀺𑀓𑀸𑀭𑀢𑀸𑀬 𑀢𑁂𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀅𑀭𑁄𑀕𑁄 ¶ 𑀧𑀭𑀁 𑀫𑀭𑀡𑀸’’𑀢𑀺. 𑀅𑀣 𑀯𑀸 ‘‘𑀭𑀽𑀧𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀭𑀽𑀧𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁂𑀧𑀺 𑀦 𑀤𑁄𑀲𑁄. 𑀓𑀧𑁆𑀧𑀦𑀸𑀲𑀺𑀤𑁆𑀥𑁂𑀦𑀧𑀺 𑀳𑀺 𑀪𑁂𑀤𑁂𑀦 𑀅𑀪𑁂𑀤𑀲𑁆𑀲𑀸𑀧𑀺 𑀦𑀺𑀤𑁆𑀤𑁂𑀲𑀤𑀲𑁆𑀲𑀦𑀢𑁄, 𑀬𑀣𑀸 ‘‘𑀲𑀺𑀮𑀸𑀧𑀼𑀢𑁆𑀢𑀓𑀲𑁆𑀲 𑀲𑀭𑀻𑀭’’𑀦𑁆𑀢𑀺. 𑀭𑀼𑀧𑁆𑀧𑀦𑀁 𑀯𑀸 𑀭𑀽𑀧𑀲𑀪𑀸𑀯𑁄 𑀭𑀽𑀧𑀁, 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀭𑀽𑀧𑀻, 𑀅𑀢𑁆𑀢𑀸 ‘‘𑀭𑀽𑀧𑀺𑀦𑁄 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁧𑁧) 𑀯𑀺𑀬. 𑀏𑀯𑀜𑁆𑀘 𑀓𑀢𑁆𑀯𑀸 𑀭𑀽𑀧𑀲𑀪𑀸𑀯𑀢𑁆𑀢𑀸 𑀅𑀢𑁆𑀢𑀦𑁄 ‘‘𑀭𑀽𑀧𑀻 𑀅𑀢𑁆𑀢𑀸’’𑀢𑀺 𑀯𑀘𑀦𑀁 𑀜𑀸𑀬𑀸𑀕𑀢𑀫𑁂𑀯𑀸𑀢𑀺 ‘‘𑀓𑀲𑀺𑀡𑀭𑀽𑀧𑀁 ‘𑀅𑀢𑁆𑀢𑀸’𑀢𑀺 𑀕𑀳𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀦𑀺𑀬𑀢𑀯𑀸𑀤𑀺𑀢𑀸𑀬 𑀓𑀫𑁆𑀫𑀨𑀮𑀧𑀝𑀺𑀓𑁆𑀔𑁂𑀧𑀢𑁄 𑀦𑀢𑁆𑀣𑀺 𑀆𑀚𑀻𑀯𑀓𑁂𑀲𑀼 𑀛𑀸𑀦𑀲𑀫𑀸𑀧𑀢𑁆𑀢𑀺𑀮𑀸𑀪𑁄𑀢𑀺 ¶ 𑀆𑀳 ‘‘𑀆𑀚𑀻𑀯𑀓𑀸𑀤𑀬𑁄 𑀯𑀺𑀬 𑀢𑀓𑁆𑀓𑀫𑀢𑁆𑀢𑁂𑀦𑁂𑀯 𑀯𑀸 𑀭𑀽𑀧𑀻 𑀅𑀢𑁆𑀢𑀸’’𑀢𑀺. 𑀢𑀣𑀸 𑀳𑀺 𑀓𑀡𑁆𑀳𑀸𑀪𑀺𑀚𑀸𑀢𑀺𑀆𑀤𑀻𑀲𑀼 𑀙𑀴𑀸𑀪𑀺𑀚𑀸𑀢𑀻𑀲𑀼 𑀅𑀜𑁆𑀜𑀢𑀭𑀁 𑀅𑀢𑁆𑀢𑀸𑀦𑀁 𑀏𑀓𑀘𑁆𑀘𑁂 𑀆𑀚𑀻𑀯𑀓𑀸 𑀧𑀝𑀺𑀚𑀸𑀦𑀦𑁆𑀢𑀺. 𑀦𑀢𑁆𑀣𑀺 𑀏𑀢𑀲𑁆𑀲 𑀭𑁄𑀕𑁄 𑀪𑀗𑁆𑀕𑁄𑀢𑀺 𑀅𑀭𑁄𑀕𑁄𑀢𑀺 𑀅𑀭𑁄𑀕-𑀲𑀤𑁆𑀤𑀲𑁆𑀲 𑀦𑀺𑀘𑁆𑀘𑀧𑀭𑀺𑀬𑀸𑀬𑀢𑀸 ¶ 𑀯𑁂𑀤𑀺𑀢𑀩𑁆𑀩𑀸, 𑀭𑁄𑀕𑀭𑀳𑀺𑀢𑀢𑀸𑀲𑀻𑀲𑁂𑀦 𑀯𑀸 𑀦𑀺𑀩𑁆𑀩𑀺𑀓𑀸𑀭𑀢𑀸𑀬 𑀦𑀺𑀘𑁆𑀘𑀢𑀁 𑀧𑀝𑀺𑀚𑀸𑀦𑀸𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑁄𑀢𑀺 𑀆𑀳 ‘‘𑀅𑀭𑁄𑀕𑁄𑀢𑀺 𑀦𑀺𑀘𑁆𑀘𑁄’’𑀢𑀺.

𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀦𑀢𑁆𑀣𑀺𑀪𑀸𑀯𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀸𑀦𑀺 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀦𑀺𑀫𑁆𑀩𑀧𑀡𑁆𑀡𑁂 𑀢𑀺𑀢𑁆𑀢𑀓𑀭𑀲𑁄 𑀯𑀺𑀬 𑀲𑀭𑀻𑀭𑀧𑀭𑀺𑀫𑀸𑀡𑁄 𑀅𑀭𑀽𑀧𑀻 𑀅𑀢𑁆𑀢𑀸 𑀢𑀢𑁆𑀣 𑀢𑀺𑀝𑁆𑀞𑀢𑀻𑀢𑀺 𑀦𑀺𑀕𑀡𑁆𑀞𑀸𑀢𑀺 𑀆𑀳 ‘‘𑀦𑀺𑀕𑀡𑁆𑀞𑀸𑀤𑀬𑁄 𑀯𑀺𑀬𑀸’’𑀢𑀺. 𑀫𑀺𑀲𑁆𑀲𑀓𑀕𑀸𑀳𑀯𑀲𑁂𑀦𑀸𑀢𑀺 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀁 𑀦𑀺𑀫𑀺𑀢𑁆𑀢𑀸𑀦𑀺 𑀏𑀓𑀚𑁆𑀛𑀁 𑀓𑀢𑁆𑀯𑀸 ‘‘𑀏𑀓𑁄 𑀅𑀢𑁆𑀢𑀸’’𑀢𑀺, 𑀢𑀢𑁆𑀣 𑀧𑀯𑀢𑁆𑀢𑀲𑀜𑁆𑀜𑀜𑁆𑀘𑀲𑁆𑀲 ‘‘𑀲𑀜𑁆𑀜𑀸’’𑀢𑀺 𑀕𑀳𑀡𑀯𑀲𑁂𑀦. 𑀅𑀬𑀜𑁆𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑁄 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀢𑀸𑀬 𑀢𑀦𑁆𑀦𑀺𑀫𑀺𑀢𑁆𑀢𑀁 𑀭𑀽𑀧𑀪𑀸𑀯𑁂𑀦 𑀅𑀭𑀽𑀧𑀪𑀸𑀯𑁂𑀦 𑀘 𑀅𑀢𑁆𑀢𑀸 𑀉𑀧𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 ‘‘𑀭𑀽𑀧𑀻 𑀘 𑀅𑀭𑀽𑀧𑀻 𑀘𑀸’’𑀢𑀺 𑀅𑀪𑀺𑀦𑀺𑀯𑁂𑀲𑀁 𑀚𑀦𑁂𑀲𑀺 𑀅𑀚𑁆𑀛𑀢𑁆𑀢𑀯𑀸𑀤𑀺𑀦𑁄 𑀯𑀺𑀬, 𑀢𑀓𑁆𑀓𑀫𑀢𑁆𑀢𑁂𑀦𑁂𑀯 𑀯𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀫𑀺𑀲𑁆𑀲𑀓𑀕𑁆𑀕𑀳𑀡𑀯𑀲𑁂𑀦 ‘‘𑀭𑀽𑀧𑀻 𑀅𑀭𑀽𑀧𑀻 𑀘 𑀅𑀢𑁆𑀢𑀸 𑀳𑁄𑀢𑀻’’𑀢𑀺.

𑀢𑀓𑁆𑀓𑀕𑀸𑀳𑁂𑀦𑁂𑀯𑀸𑀢𑀺 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀥𑀫𑁆𑀫𑀸 ¶ 𑀯𑀺𑀬 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀲𑀓𑀺𑀘𑁆𑀘𑀲𑀸𑀥𑀦𑀸𑀲𑀫𑀢𑁆𑀣𑀢𑀸𑀬 𑀣𑀫𑁆𑀪𑀓𑀼𑀝𑁆𑀝𑀳𑀢𑁆𑀣𑀧𑀸𑀤𑀸𑀤𑀺𑀲𑀗𑁆𑀖𑀸𑀢𑁄 𑀯𑀺𑀬 𑀦𑁂𑀯 𑀭𑀽𑀧𑀻, 𑀭𑀽𑀧𑀲𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄 𑀦 𑀅𑀭𑀽𑀧𑀻𑀢𑀺 𑀏𑀯𑀁 𑀧𑀯𑀢𑁆𑀢𑀢𑀓𑁆𑀓𑀕𑀸𑀳𑁂𑀦. 𑀅𑀣 𑀯𑀸 𑀅𑀦𑁆𑀢𑀸𑀦𑀦𑁆𑀢𑀺𑀓𑀘𑀢𑀼𑀓𑁆𑀓𑀯𑀸𑀤𑁂 𑀯𑀺𑀬 𑀅𑀜𑁆𑀜𑀫𑀜𑁆𑀜𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀯𑀮𑀁 𑀧𑀦 𑀢𑀢𑁆𑀣 𑀤𑁂𑀲𑀓𑀸𑀮𑀪𑁂𑀤𑀯𑀲𑁂𑀦 𑀢𑀢𑀺𑀬𑀘𑀢𑀼𑀢𑁆𑀣𑀯𑀸𑀤𑀸 𑀤𑀲𑁆𑀲𑀺𑀢𑀸, 𑀇𑀥 𑀓𑀸𑀮𑀯𑀢𑁆𑀣𑀼𑀪𑁂𑀤𑀯𑀲𑁂𑀦𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄𑀢𑀺. 𑀓𑀸𑀮𑀪𑁂𑀤𑀯𑀲𑁂𑀦 𑀘𑁂𑀢𑁆𑀣 𑀢𑀢𑀺𑀬𑀯𑀸𑀤𑀲𑁆𑀲 𑀧𑀯𑀢𑁆𑀢𑀺 𑀭𑀽𑀧𑀸𑀭𑀽𑀧𑀦𑀺𑀫𑀺𑀢𑁆𑀢𑀸𑀦𑀁 𑀲𑀳 𑀅𑀦𑀼𑀧𑀝𑁆𑀞𑀸𑀦𑀢𑁄. 𑀘𑀢𑀼𑀢𑁆𑀣𑀯𑀸𑀤𑀲𑁆𑀲 𑀧𑀦 𑀯𑀢𑁆𑀣𑀼𑀪𑁂𑀤𑀯𑀲𑁂𑀦 𑀧𑀯𑀢𑁆𑀢𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀲𑀫𑀽𑀳𑀢𑁄 ‘‘𑀏𑀓𑁄 𑀅𑀢𑁆𑀢𑀸’’𑀢𑀺 𑀢𑀓𑁆𑀓𑀦𑀯𑀲𑁂𑀦𑀸𑀢𑀺 𑀢𑀢𑁆𑀣 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀤𑀼𑀢𑀺𑀬𑀘𑀢𑀼𑀓𑁆𑀓𑁂 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 ‘‘𑀅𑀫𑀢𑀺 𑀕𑀘𑁆𑀙𑀢𑀺 𑀏𑀢𑁆𑀣 𑀪𑀸𑀯𑁄 𑀑𑀲𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀅𑀦𑁆𑀢𑀸𑀦𑀦𑁆𑀢𑀺𑀓𑀯𑀸𑀤𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀬𑀤𑀺𑀧𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀯𑀲𑁂𑀦 𑀲𑀫𑀸𑀧𑀢𑁆𑀢𑀺𑀪𑁂𑀤𑁂𑀦 𑀲𑀜𑁆𑀜𑀸𑀪𑁂𑀤𑀲𑀫𑁆𑀪𑀯𑀢𑁄 ‘‘𑀦𑀸𑀦𑀢𑁆𑀢𑀲𑀜𑁆𑀜𑀻 𑀅𑀢𑁆𑀢𑀸’’𑀢𑀺 𑀅𑀬𑀫𑁆𑀧𑀺 𑀯𑀸𑀤𑁄 𑀲𑀫𑀸𑀧𑀦𑁆𑀦𑀓𑀯𑀲𑁂𑀦 ¶ 𑀮𑀩𑁆𑀪𑀢𑀺. 𑀢𑀣𑀸𑀧𑀺 𑀲𑀫𑀸𑀧𑀢𑁆𑀢𑀺𑀬𑀁 𑀏𑀓𑀭𑀽𑀧𑁂𑀦𑁂𑀯 𑀲𑀜𑁆𑀜𑀸𑀬 𑀉𑀧𑀝𑁆𑀞𑀸𑀦𑀢𑁄 𑀲𑀫𑀸𑀧𑀦𑁆𑀦𑀓𑀯𑀲𑁂𑀦 ‘‘𑀏𑀓𑀢𑁆𑀢𑀲𑀜𑁆𑀜𑀻’’𑀢𑀺 𑀆𑀳. 𑀢𑁂𑀦𑁂𑀯𑁂𑀢𑁆𑀣 𑀲𑀫𑀸𑀧𑀦𑁆𑀦𑀓𑀕𑁆𑀕𑀳𑀡𑀁 𑀓𑀢𑀁. 𑀏𑀓𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀏𑀯 𑀯𑀸 𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀫𑀸𑀧𑀢𑁆𑀢𑀺𑀪𑁂𑀤𑁂𑀦 𑀲𑀜𑁆𑀜𑀸𑀪𑁂𑀤𑀲𑀫𑁆𑀪𑀯𑁂𑀧𑀺 𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂 𑀲𑀜𑁆𑀜𑀸𑀦𑀸𑀦𑀢𑁆𑀢𑁂𑀦 𑀑𑀴𑀸𑀭𑀺𑀓𑁂𑀦 𑀦𑀸𑀦𑀢𑁆𑀢𑀲𑀜𑁆𑀜𑀺𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀫𑀸𑀧𑀦𑁆𑀦𑀓𑀯𑀲𑁂𑀦 𑀦𑀸𑀦𑀢𑁆𑀢𑀲𑀜𑁆𑀜𑀻’’𑀢𑀺 𑀯𑀼𑀢𑁆𑀢𑀁. ‘‘𑀧𑀭𑀺𑀢𑁆𑀢𑀓𑀲𑀺𑀡𑀯𑀲𑁂𑀦 𑀧𑀭𑀺𑀢𑁆𑀢𑀲𑀜𑁆𑀜𑀻’’𑀢𑀺 𑀇𑀫𑀺𑀦𑀸 𑀲𑀢𑀺𑀧𑀺 𑀲𑀜𑁆𑀜𑀸𑀯𑀺𑀦𑀺𑀫𑀼𑀢𑁆𑀢𑁂 𑀥𑀫𑁆𑀫𑁂 ‘‘𑀲𑀜𑁆𑀜𑀸𑀬𑁂𑀯 𑀅𑀢𑁆𑀢𑀸’’𑀢𑀺 𑀯𑀤𑀢𑀻𑀢𑀺 𑀤𑀲𑁆𑀲𑀺𑀢𑀁 ¶ 𑀳𑁄𑀢𑀺. 𑀓𑀲𑀺𑀡𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀲𑀜𑁆𑀜𑀸𑀬 𑀯𑀺𑀲𑀬𑀤𑀲𑁆𑀲𑀦𑀁, 𑀏𑀯𑀁 𑀯𑀺𑀧𑀼𑀮𑀓𑀲𑀺𑀡𑀯𑀲𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀦𑁆𑀢𑀸𑀦𑀦𑁆𑀢𑀺𑀓𑀯𑀸𑀤𑁂 ¶ , 𑀇𑀥 𑀘 𑀅𑀦𑁆𑀢𑀸𑀦𑀦𑁆𑀢𑀺𑀓𑀘𑀢𑀼𑀓𑁆𑀓𑁂 𑀧𑀞𑀫𑀤𑀼𑀢𑀺𑀬𑀯𑀸𑀤𑁂𑀳𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀸𑀤𑀸𑀦𑀁 𑀯𑀺𑀲𑁂𑀲𑁄 𑀲𑀺𑀤𑁆𑀥𑁄 𑀳𑁄𑀢𑀺, 𑀅𑀜𑁆𑀜𑀣𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀲𑀼 𑀯𑀸𑀤𑁂𑀲𑀼 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀓𑀧𑁆𑀧𑀦𑀪𑁂𑀤𑁂𑀦 𑀲𑀢𑀺𑀧𑀺 𑀓𑁂𑀳𑀺𑀘𑀺 𑀯𑀺𑀲𑁂𑀲𑁂 𑀓𑁂𑀳𑀺𑀘𑀺 𑀦𑀢𑁆𑀣𑀺 𑀬𑁂𑀯𑀸𑀢𑀺. 𑀅𑀣 𑀯𑀸 ‘‘𑀅𑀗𑁆𑀕𑀼𑀝𑁆𑀞𑀧𑁆𑀧𑀫𑀸𑀡𑁄 𑀅𑀢𑁆𑀢𑀸, 𑀬𑀯𑀧𑁆𑀧𑀫𑀸𑀡𑁄, 𑀅𑀡𑀼𑀫𑀢𑁆𑀢𑁄 𑀯𑀸 𑀅𑀢𑁆𑀢𑀸’’𑀢𑀺 𑀆𑀤𑀺𑀤𑀲𑁆𑀲𑀦𑀯𑀲𑁂𑀦 𑀧𑀭𑀺𑀢𑁆𑀢𑁄 𑀲𑀜𑁆𑀜𑀻 𑀘𑀸𑀢𑀺 𑀧𑀭𑀺𑀢𑁆𑀢𑀲𑀜𑁆𑀜𑀻, 𑀓𑀧𑀺𑀮𑀓𑀡𑀸𑀤𑀸𑀤𑀬𑁄 𑀯𑀺𑀬 𑀅𑀢𑁆𑀢𑀦𑁄 𑀲𑀩𑁆𑀩𑀕𑀢𑀪𑀸𑀯𑀧𑀝𑀺𑀚𑀸𑀦𑀦𑀯𑀲𑁂𑀦 𑀅𑀧𑁆𑀧𑀫𑀸𑀡𑁄 𑀲𑀜𑁆𑀜𑀻 𑀘𑀸𑀢𑀺 𑀅𑀧𑁆𑀧𑀫𑀸𑀡𑀲𑀜𑁆𑀜𑀻𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀤𑀺𑀩𑁆𑀩𑀘𑀓𑁆𑀔𑀼𑀧𑀭𑀺𑀪𑀡𑁆𑀟𑀢𑀸𑀬 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲 𑀤𑀺𑀩𑁆𑀩𑀘𑀓𑁆𑀔𑀼𑀧𑀪𑀸𑀯𑀚𑀦𑀺𑀢𑁂𑀦 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑁂𑀦 𑀤𑀺𑀲𑁆𑀲𑀫𑀸𑀦𑀸𑀧𑀺 𑀲𑀢𑁆𑀢𑀸𑀦𑀁 𑀲𑀼𑀔𑀸𑀤𑀺𑀲𑀫𑀗𑁆𑀕𑀺𑀢𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀯 𑀤𑀺𑀝𑁆𑀞𑀸 𑀳𑁄𑀢𑀻𑀢𑀺 𑀆𑀳 ‘‘𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸’’𑀢𑀺𑀆𑀤𑀺. 𑀦𑀦𑀼 𑀘 ‘‘𑀏𑀓𑀦𑁆𑀢𑀲𑀼𑀔𑀻 𑀅𑀢𑁆𑀢𑀸’’𑀢𑀺𑀆𑀤𑀺𑀯𑀸𑀤𑀸𑀦𑀁 𑀅𑀧𑀭𑀦𑁆𑀢𑀤𑀺𑀝𑁆𑀞𑀺𑀪𑀸𑀯𑀢𑁄 ‘‘𑀦𑀺𑀩𑁆𑀩𑀢𑁆𑀢𑀫𑀸𑀦𑀁 𑀤𑀺𑀲𑁆𑀯𑀸’’𑀢𑀺 𑀯𑀘𑀦𑀁 𑀅𑀦𑀼𑀧𑀦𑁆𑀦𑀦𑁆𑀢𑀺? 𑀦𑀸𑀦𑀼𑀧𑀧𑀦𑁆𑀦𑀁, 𑀅𑀦𑀸𑀕𑀢𑀲𑁆𑀲 𑀏𑀓𑀦𑁆𑀢𑀲𑀼𑀔𑀺𑀪𑀸𑀯𑀸𑀤𑀺𑀓𑀲𑁆𑀲 𑀧𑀓𑀧𑁆𑀧𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀬 𑀦𑀺𑀩𑁆𑀩𑀢𑁆𑀢𑀺𑀬𑀸 𑀤𑀲𑁆𑀲𑀦𑁂𑀦 𑀅𑀥𑀺𑀧𑁆𑀧𑁂𑀢𑀦𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀦𑀺𑀩𑁆𑀩𑀢𑁆𑀢𑀫𑀸𑀦𑀁 𑀤𑀺𑀲𑁆𑀯𑀸 ‘𑀏𑀓𑀦𑁆𑀢𑀲𑀼𑀔𑀻’𑀢𑀺 𑀕𑀡𑁆𑀳𑀸𑀢𑀻’’𑀢𑀺. 𑀏𑀢𑁆𑀣 𑀘 𑀢𑀲𑁆𑀲𑀁 𑀢𑀲𑁆𑀲𑀁 𑀪𑀽𑀫𑀺𑀬𑀁 𑀩𑀳𑀼𑀮𑀁 𑀲𑀼𑀔𑀸𑀤𑀺𑀲𑀳𑀺𑀢𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑁂𑀦 𑀢𑁂𑀲𑀁 ‘‘𑀏𑀓𑀦𑁆𑀢𑀲𑀼𑀔𑀻’’𑀢𑀺 𑀕𑀸𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀣 𑀯𑀸 𑀳𑀢𑁆𑀣𑀺𑀤𑀲𑁆𑀲𑀓𑀅𑀦𑁆𑀥𑀸 𑀯𑀺𑀬 𑀤𑀺𑀝𑁆𑀞𑀺𑀕𑀢𑀺𑀓𑀸 𑀬𑀁 𑀬𑀤𑁂𑀯 𑀧𑀲𑁆𑀲𑀦𑁆𑀢𑀺, 𑀢𑀁 𑀢𑀤𑁂𑀯 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀦𑁆𑀢𑀻𑀢𑀺 𑀦 𑀏𑀢𑁆𑀣 𑀬𑀼𑀢𑁆𑀢𑀺 𑀫𑀕𑁆𑀕𑀺𑀢𑀩𑁆𑀩𑀸.

𑀅𑀲𑀜𑁆𑀜𑀻 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀯𑀡𑁆𑀡𑀦𑀸

𑁭𑁮-𑁮𑁩. 𑀅𑀲𑀜𑁆𑀜𑀻𑀯𑀸𑀤𑁂 𑀅𑀲𑀜𑁆𑀜𑀪𑀯𑁂 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀯𑀲𑁂𑀦 𑀧𑀞𑀫𑀯𑀸𑀤𑁄, ‘‘𑀲𑀜𑁆𑀜𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀲𑀜𑁆𑀜𑀁𑀬𑁂𑀯 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀓𑀺𑀜𑁆𑀘𑀦𑀪𑀸𑀯𑁂𑀦 𑀞𑀺𑀢𑀸𑀬 𑀅𑀜𑁆𑀜𑀸𑀬 ¶ 𑀲𑀜𑁆𑀜𑀸𑀬 𑀅𑀪𑀸𑀯𑀢𑁄 ‘‘𑀅𑀲𑀜𑁆𑀜𑀻’’𑀢𑀺 ¶ 𑀧𑀯𑀢𑁆𑀢𑁄 𑀤𑀼𑀢𑀺𑀬𑀯𑀸𑀤𑁄, 𑀢𑀣𑀸 𑀲𑀜𑁆𑀜𑀸𑀬 𑀲𑀳 𑀭𑀽𑀧𑀥𑀫𑁆𑀫𑁂, 𑀲𑀩𑁆𑀩𑁂 𑀏𑀯 𑀯𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑁄 𑀢𑀢𑀺𑀬𑀯𑀸𑀤𑁄, 𑀢𑀓𑁆𑀓𑀕𑀸𑀳𑀯𑀲𑁂𑀦𑁂𑀯 𑀘𑀢𑀼𑀢𑁆𑀣𑀯𑀸𑀤𑁄 𑀧𑀯𑀢𑁆𑀢𑁄. 𑀢𑀲𑁆𑀲 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀢𑀺𑀬𑀘𑀢𑀼𑀓𑁆𑀓𑁂𑀧𑀺 𑀓𑀲𑀺𑀡𑀭𑀽𑀧𑀲𑁆𑀲 𑀅𑀲𑀜𑁆𑀚𑀸𑀦𑀦𑀲𑀪𑀸𑀯𑀢𑀸𑀬 𑀅𑀲𑀜𑁆𑀜𑀻𑀢𑀺 𑀓𑀢𑁆𑀯𑀸 𑀅𑀦𑁆𑀢𑀸𑀦𑀦𑁆𑀢𑀺𑀓𑀯𑀸𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑀢𑁆𑀢𑀸𑀭𑁄𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑁂𑀧𑀺 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀪𑀯𑁂 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀲𑁆𑀲𑁂𑀯 𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀲𑀼, 𑀲𑀩𑁆𑀩𑀢𑁆𑀣 𑀯𑀸 𑀧𑀝𑀼𑀲𑀜𑁆𑀜𑀸𑀓𑀺𑀘𑁆𑀘𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀸𑀬 𑀲𑀼𑀔𑀼𑀫𑀸𑀬 𑀲𑀜𑁆𑀜𑀸𑀬 𑀅𑀢𑁆𑀣𑀺𑀪𑀸𑀯𑀧𑀝𑀺𑀚𑀸𑀦𑀦𑀯𑀲𑁂𑀦 𑀧𑀞𑀫𑀯𑀸𑀤𑁄, 𑀅𑀲𑀜𑁆𑀜𑀻𑀯𑀸𑀤𑁂 𑀯𑀼𑀢𑁆𑀢𑀦𑀬𑁂𑀦 𑀲𑀼𑀔𑀼𑀫𑀸𑀬 𑀲𑀜𑁆𑀜𑀸𑀬 𑀯𑀲𑁂𑀦, 𑀲𑀜𑁆𑀚𑀸𑀦𑀦𑀲𑀪𑀸𑀯𑀢𑀸𑀧𑀝𑀺𑀚𑀸𑀦𑁂𑀦 𑀘 𑀤𑀼𑀢𑀺𑀬𑀯𑀸𑀤𑀸𑀤𑀬𑁄 𑀧𑀯𑀢𑁆𑀢𑀸𑀢𑀺 𑀏𑀯𑀁 𑀏𑀓𑁂𑀦 𑀧𑀓𑀸𑀭𑁂𑀦 𑀲𑀢𑀺𑀧𑀺 ¶ 𑀓𑀸𑀭𑀡𑀧𑀭𑀺𑀬𑁂𑀲𑀦𑀲𑁆𑀲 𑀲𑀫𑁆𑀪𑀯𑁂 𑀤𑀺𑀝𑁆𑀞𑀺𑀕𑀢𑀺𑀓𑀯𑀸𑀤𑀸𑀦𑀁 𑀅𑀦𑀸𑀤𑀭𑀡𑀻𑀬𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀢𑀢𑁆𑀣 𑀦 𑀏𑀓𑀦𑁆𑀢𑁂𑀦 𑀓𑀸𑀭𑀡𑀁 𑀧𑀭𑀺𑀬𑁂𑀲𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁂𑀲𑀜𑁆𑀘 𑀲𑀜𑁆𑀜𑀻𑀅𑀲𑀜𑁆𑀜𑀻𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸𑀦𑀁 ‘‘𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸’’𑀢𑀺 𑀯𑀘𑀦𑀢𑁄 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀗𑁆𑀕𑀳𑁄 𑀧𑀸𑀓𑀝𑁄𑀬𑁂𑀯.

𑀉𑀘𑁆𑀙𑁂𑀤𑀯𑀸𑀤𑀯𑀡𑁆𑀡𑀦𑀸

𑁮𑁪. 𑀅𑀲𑀢𑁄 𑀯𑀺𑀦𑀸𑀲𑀸𑀲𑀫𑁆𑀪𑀯𑀢𑁄 𑀅𑀢𑁆𑀣𑀺𑀪𑀸𑀯𑀦𑀺𑀩𑀦𑁆𑀥𑀦𑁄 𑀉𑀘𑁆𑀙𑁂𑀤𑁄𑀢𑀺 𑀯𑀼𑀢𑁆𑀢𑀁 ‘‘𑀲𑀢𑁄’’𑀢𑀺. 𑀬𑀣𑀸 𑀳𑁂𑀢𑀼𑀨𑀮𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀲𑀪𑀸𑀯𑀥𑀫𑁆𑀫𑀸𑀦𑀁 𑀲𑀢𑀺𑀧𑀺 𑀏𑀓𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀪𑀺𑀦𑁆𑀦𑀲𑀦𑁆𑀢𑀢𑀺𑀧𑀢𑀺𑀢𑁂𑀳𑀺 𑀯𑀺𑀲𑁂𑀲𑁂 𑀳𑁂𑀢𑀼𑀨𑀮𑀸𑀦𑀁 𑀧𑀭𑀫𑀢𑁆𑀣𑀢𑁄 𑀪𑀺𑀦𑁆𑀦𑀲𑀪𑀸𑀯𑀢𑁆𑀢𑀸 𑀪𑀺𑀦𑁆𑀦𑀲𑀦𑁆𑀢𑀸𑀦𑀧𑀢𑀺𑀢𑀸𑀦𑀁 𑀯𑀺𑀬 𑀅𑀘𑁆𑀘𑀦𑁆𑀢𑀪𑁂𑀤𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀦𑀸𑀦𑀢𑁆𑀢𑀦𑀬𑀲𑁆𑀲 𑀫𑀺𑀘𑁆𑀙𑀸𑀕𑀳𑀡𑀁 𑀉𑀘𑁆𑀙𑁂𑀤𑀸𑀪𑀺𑀦𑀺𑀯𑁂𑀲𑀲𑁆𑀲 𑀓𑀸𑀭𑀡𑀁, 𑀏𑀯𑀁 𑀳𑁂𑀢𑀼𑀨𑀮𑀪𑀽𑀢𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀚𑁆𑀚𑀫𑀸𑀦𑁂𑀧𑀺 𑀲𑀪𑀸𑀯𑀪𑁂𑀤𑁂 𑀏𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀏𑀓𑀢𑁆𑀢𑀦𑀬𑁂𑀦 𑀅𑀘𑁆𑀘𑀦𑁆𑀢𑀫𑀪𑁂𑀤𑀕𑁆𑀕𑀳𑀡𑀫𑁆𑀧𑀺 𑀓𑀸𑀭𑀡𑀁 𑀏𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀢𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁 𑀧𑀸𑀴𑀺𑀬𑀁. 𑀲𑀦𑁆𑀢𑀸𑀦𑀯𑀲𑁂𑀦 𑀳𑀺 𑀯𑀢𑁆𑀢𑀫𑀸𑀦𑁂𑀲𑀼 𑀔𑀦𑁆𑀥𑁂𑀲𑀼 𑀖𑀦𑀯𑀺𑀦𑀺𑀩𑁆𑀪𑁄𑀕𑀸𑀪𑀸𑀯𑁂𑀦 𑀲𑀢𑁆𑀢𑀕𑀸𑀳𑁄, 𑀲𑀢𑁆𑀢𑀲𑁆𑀲 𑀘 𑀅𑀢𑁆𑀣𑀺𑀪𑀸𑀯𑀕𑀸𑀳𑀦𑀺𑀩𑀦𑁆𑀥𑀦𑁄 𑀉𑀘𑁆𑀙𑁂𑀤𑀕𑀸𑀳𑁄 𑀬𑀸𑀯𑀸𑀬𑀁 𑀅𑀢𑁆𑀢𑀸 𑀦 𑀉𑀘𑁆𑀙𑀺𑀚𑁆𑀚𑀢𑀺, 𑀢𑀸𑀯𑀸𑀬𑀁 𑀯𑀺𑀚𑁆𑀚𑀢𑀺𑀬𑁂𑀯𑀸𑀢𑀺 𑀕𑀳𑀡𑀢𑁄, 𑀦𑀺𑀭𑀼𑀤𑀬𑀯𑀺𑀦𑀸𑀲𑁄 𑀯𑀸 𑀇𑀥 𑀉𑀘𑁆𑀙𑁂𑀤𑁄𑀢𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀉𑀧𑀘𑁆𑀙𑁂𑀤’’𑀦𑁆𑀢𑀺. 𑀯𑀺𑀲𑁂𑀲𑁂𑀦 ¶ 𑀦𑀸𑀲𑁄 𑀯𑀺𑀦𑀸𑀲𑁄, 𑀅𑀪𑀸𑀯𑁄. 𑀲𑁄 𑀧𑀦 𑀫𑀁𑀲𑀘𑀓𑁆𑀔𑀼𑀧𑀜𑁆𑀜𑀸𑀘𑀓𑁆𑀔𑀽𑀦𑀁 𑀤𑀲𑁆𑀲𑀦𑀧𑀣𑀸𑀢𑀺𑀓𑁆𑀓𑀫𑁄𑀬𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀅𑀤𑀲𑁆𑀲𑀦’’𑀦𑁆𑀢𑀺. 𑀅𑀤𑀲𑁆𑀲𑀦𑁂 𑀳𑀺 𑀦𑀸𑀲-𑀲𑀤𑁆𑀤𑁄 𑀮𑁄𑀓𑁂 𑀦𑀺𑀭𑀼𑀴𑁆𑀳𑁄𑀢𑀺. 𑀪𑀸𑀯𑀯𑀺𑀕𑀫𑀦𑁆𑀢𑀺 𑀲𑀪𑀸𑀯𑀸𑀧𑀕𑀫𑀁. 𑀬𑁄 𑀳𑀺 𑀦𑀺𑀭𑀼𑀤𑀬𑀯𑀺𑀦𑀸𑀲𑀯𑀲𑁂𑀦 𑀉𑀘𑁆𑀙𑀺𑀚𑁆𑀚𑀢𑀺, 𑀦 𑀲𑁄 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀢𑀺𑀝𑁆𑀞𑀢𑀻𑀢𑀺. 𑀮𑀸𑀪𑀻𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀮𑀸𑀪𑀻. 𑀘𑀼𑀢𑀺𑀫𑀢𑁆𑀢𑀫𑁂𑀯𑀸𑀢𑀺 ¶ 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀫𑁆𑀧𑀺 𑀘𑀼𑀢𑀺𑀫𑀢𑁆𑀢𑀫𑁂𑀯. 𑀦 𑀉𑀧𑀧𑀸𑀢𑀦𑁆𑀢𑀺 𑀧𑀼𑀩𑁆𑀩𑀬𑁄𑀕𑀸𑀪𑀸𑀯𑁂𑀦, 𑀧𑀭𑀺𑀓𑀫𑁆𑀫𑀸𑀓𑀭𑀡𑁂𑀦 𑀯𑀸 𑀉𑀧𑀧𑀸𑀢𑀁 𑀤𑀝𑁆𑀞𑀼𑀁 𑀦 𑀲𑀓𑁆𑀓𑁄𑀢𑀺. ‘‘𑀅𑀮𑀸𑀪𑀻 𑀘 𑀓𑁄 𑀧𑀭𑀮𑁄𑀓𑀁 𑀦 𑀚𑀸𑀦𑀸𑀢𑀻’’𑀢𑀺 𑀦𑀢𑁆𑀣𑀺𑀓𑀯𑀸𑀤𑀯𑀲𑁂𑀦, 𑀫𑀳𑀸𑀫𑀽𑀴𑁆𑀳𑀪𑀸𑀯𑁂𑀦𑁂𑀯 𑀯𑀸 ‘‘𑀇𑀢𑁄 𑀅𑀜𑁆𑀜𑁄 𑀧𑀭𑀮𑁄𑀓𑁄 𑀅𑀢𑁆𑀣𑀻’’𑀢𑀺 𑀅𑀦𑀯𑀩𑁄𑀥𑀫𑀸𑀳. 𑀏𑀢𑁆𑀢𑀓𑁄𑀬𑁂𑀯 𑀯𑀺𑀲𑀬𑁄, 𑀬𑁄 𑀬𑀁 𑀇𑀦𑁆𑀤𑁆𑀭𑀺𑀬𑀕𑁄𑀘𑀭𑁄𑀢𑀺. 𑀅𑀢𑁆𑀢𑀦𑁄 𑀥𑀻𑀢𑀼𑀬𑀸 𑀳𑀢𑁆𑀣𑀕𑀡𑁆𑀳𑀦𑀓𑀭𑀸𑀚𑀸𑀤𑀺 𑀯𑀺𑀬 𑀓𑀸𑀫𑀲𑀼𑀔𑀕𑀺𑀤𑁆𑀥𑀢𑀸𑀬 𑀯𑀸. ‘‘𑀦 𑀧𑀼𑀦 𑀯𑀺𑀭𑀼𑀳𑀦𑁆𑀢𑀻’’𑀢𑀺 𑀧𑀢𑀺𑀢𑀧𑀡𑁆𑀡𑀸𑀦𑀁 𑀯𑀡𑁆𑀝𑁂𑀦 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀪𑀸𑀯𑀫𑀸𑀳. 𑀏𑀯𑀫𑁂𑀯 𑀲𑀢𑁆𑀢𑀸𑀢𑀺 𑀬𑀣𑀸 𑀧𑀡𑁆𑀟𑀼𑀧𑀮𑀸𑀲𑁄 𑀩𑀦𑁆𑀥𑀦𑀸 𑀧𑀯𑀼𑀢𑁆𑀢𑁄 𑀦 𑀧𑀝𑀺𑀲𑀦𑁆𑀥𑀺𑀬𑀢𑀺, 𑀏𑀯𑀁 𑀲𑀩𑁆𑀩𑁂 𑀲𑀢𑁆𑀢𑀸 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀫𑀭𑀡𑀫𑁂𑀯 𑀦𑀺𑀕𑀘𑁆𑀙𑀦𑁆𑀢𑀻𑀢𑀺. 𑀚𑀮𑀧𑀼𑀩𑁆𑀩𑀽𑀴𑀓𑀽𑀧𑀫𑀸 𑀳𑀺 𑀲𑀢𑁆𑀢𑀸𑀢𑀺 𑀢𑀲𑁆𑀲 𑀮𑀤𑁆𑀥𑀺. 𑀢𑀣𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀮𑀸𑀪𑀺𑀦𑁄𑀧𑀺 𑀘𑀼𑀢𑀺𑀢𑁄 𑀉𑀤𑁆𑀥𑀁 𑀅𑀤𑀲𑁆𑀲𑀦𑁂𑀦𑁂𑀯 𑀇𑀫𑀸 𑀤𑀺𑀝𑁆𑀞𑀺𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀆𑀳 ‘‘𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀸’’𑀢𑀺.

𑀏𑀢𑁆𑀣𑀸𑀳 𑁋 𑀬𑀣𑀸 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀯𑀸𑀤𑀸 𑀏𑀓𑀦𑁆𑀢𑀅𑀮𑀸𑀪𑀻𑀯𑀲𑁂𑀦𑁂𑀯 𑀤𑀲𑁆𑀲𑀺𑀢𑀸, 𑀬𑀣𑀸 𑀘 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀲𑀜𑁆𑀜𑀻𑀯𑀸𑀤𑀘𑀢𑀼𑀓𑁆𑀓𑁄 ¶ 𑀏𑀓𑀦𑁆𑀢𑀮𑀸𑀪𑀻𑀯𑀲𑁂𑀦𑁂𑀯, 𑀦 𑀏𑀯𑀫𑀬𑀁. 𑀅𑀬𑀁 𑀧𑀦 𑀲𑀲𑁆𑀲𑀢𑁂𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀸𑀤𑀬𑁄 𑀯𑀺𑀬 𑀮𑀸𑀪𑀻𑀅𑀮𑀸𑀪𑀻𑀯𑀲𑁂𑀦 𑀧𑀯𑀢𑁆𑀢𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀢𑀢𑁆𑀣 𑀤𑁆𑀯𑁂 𑀚𑀦𑀸’’𑀢𑀺𑀆𑀤𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀲𑀲𑁆𑀲𑀢𑀯𑀸𑀤𑀸𑀤𑀺𑀤𑁂𑀲𑀦𑀸𑀳𑀺 𑀇𑀥 𑀅𑀜𑁆𑀜𑀣𑀸 𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑀺𑀢𑁄. 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄, 𑀢𑁂 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 ¶ 𑀯𑀺𑀯𑀺𑀥𑁂𑀦𑀸𑀓𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀅𑀜𑁆𑀜𑀣𑀸 𑀇𑀥𑀸𑀧𑀺 𑀘 𑀏𑀯𑀁 𑀪𑀕𑀯𑀸 𑀤𑁂𑀲𑁂𑀬𑁆𑀬 ‘‘𑀇𑀥 𑀪𑀺𑀓𑁆𑀔𑀯𑁂 𑀏𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀆𑀢𑀧𑁆𑀧𑀫𑀦𑁆𑀯𑀸𑀬…𑀧𑁂… 𑀬𑀣𑀸𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺, 𑀲𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀅𑀭𑀳𑀢𑁄 𑀘𑀼𑀢𑀺𑀘𑀺𑀢𑁆𑀢𑀁 𑀧𑀲𑁆𑀲𑀢𑀺, 𑀧𑀼𑀣𑀽𑀦𑀁 𑀯𑀸 𑀧𑀭𑀲𑀢𑁆𑀢𑀸𑀦𑀁, 𑀦 𑀳𑁂𑀯 𑀔𑁄 𑀢𑀤𑀼𑀤𑁆𑀥𑀁 𑀉𑀧𑀧𑀢𑁆𑀢𑀺𑀁, 𑀲𑁄 𑀏𑀯𑀫𑀸𑀳 ‘𑀬𑀣𑀸 𑀔𑁄 𑀪𑁄 𑀅𑀬𑀁 𑀅𑀢𑁆𑀢𑀸’’’ 𑀢𑀺𑀆𑀤𑀺𑀦𑀸 𑀯𑀺𑀲𑁂𑀲𑀮𑀸𑀪𑀺𑀦𑁄, 𑀢𑀓𑁆𑀓𑀺𑀦𑁄 𑀘 𑀯𑀺𑀲𑀼𑀁 𑀓𑀢𑁆𑀯𑀸, 𑀢𑀲𑁆𑀫𑀸 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀲𑀲𑁆𑀲𑀢𑀯𑀸𑀤𑀸𑀤𑀺𑀤𑁂𑀲𑀦𑀸𑀳𑀺 𑀅𑀜𑁆𑀜𑀣𑀸𑀬𑀁 𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀣 𑀯𑀸 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀸𑀤𑀻𑀲𑀼 𑀯𑀺𑀬 𑀦 𑀇𑀥 𑀢𑀓𑁆𑀓𑀻𑀯𑀸𑀤𑀺𑀢𑁄 𑀯𑀺𑀲𑁂𑀲𑀮𑀸𑀪𑀻𑀯𑀸𑀤𑁄 𑀪𑀺𑀦𑁆𑀦𑀸𑀓𑀸𑀭𑁄, 𑀅𑀣 𑀔𑁄 𑀲𑀫𑀸𑀦𑀪𑁂𑀤𑀢𑀸𑀬 𑀲𑀫𑀸𑀦𑀸𑀓𑀸𑀭𑁄𑀬𑁂𑀯𑀸𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀧𑀓𑀸𑀲𑀦𑀢𑁆𑀣𑀁 𑀪𑀕𑀯𑀢𑀸 𑀅𑀬𑀫𑀼𑀘𑁆𑀙𑁂𑀤𑀯𑀸𑀤𑁄 𑀧𑀼𑀭𑀺𑀫𑀯𑀸𑀤𑁂𑀳𑀺 𑀯𑀺𑀲𑀺𑀝𑁆𑀞𑀸𑀓𑀸𑀭𑁄 𑀤𑁂𑀲𑀺𑀢𑁄. 𑀲𑀫𑁆𑀪𑀯𑀢𑀺 𑀳𑀺 𑀢𑀓𑁆𑀓𑀺𑀦𑁄𑀧𑀺 ¶ 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀅𑀥𑀺𑀕𑀫𑀯𑀢𑁄 𑀯𑀺𑀬 𑀇𑀥 𑀅𑀪𑀺𑀦𑀺𑀯𑁂𑀲𑁄. 𑀅𑀣 𑀯𑀸 𑀦 𑀇𑀫𑀸 𑀤𑀺𑀝𑁆𑀞𑀺𑀬𑁄 𑀪𑀕𑀯𑀢𑀸 𑀅𑀦𑀸𑀕𑀢𑁂 𑀏𑀯𑀁 𑀪𑀸𑀯𑀻𑀯𑀲𑁂𑀦 𑀤𑁂𑀲𑀺𑀢𑀸, 𑀦𑀸𑀧𑀺 𑀧𑀭𑀺𑀓𑀧𑁆𑀧𑀯𑀲𑁂𑀦, 𑀅𑀣 𑀔𑁄 𑀬𑀣𑀸 𑀬𑀣𑀸 𑀤𑀺𑀝𑁆𑀞𑀺𑀕𑀢𑀺𑀓𑁂𑀳𑀺 ‘‘𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀧𑀜𑁆𑀜𑀢𑁆𑀢𑀸, 𑀢𑀣𑀸 𑀢𑀣𑀸 𑀬𑀣𑀸𑀪𑀼𑀘𑁆𑀘𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀓𑀸𑀲𑀺𑀢𑀸. 𑀬𑁂𑀳𑀺 𑀕𑀫𑁆𑀪𑀻𑀭𑀸𑀤𑀺𑀧𑁆𑀧𑀓𑀸𑀭𑀸 𑀅𑀧𑀼𑀣𑀼𑀚𑁆𑀚𑀦𑀕𑁄𑀘𑀭𑀸 𑀩𑀼𑀤𑁆𑀥𑀥𑀫𑁆𑀫𑀸 𑀧𑀓𑀸𑀲𑀦𑁆𑀢𑀺, 𑀬𑁂𑀲𑀜𑁆𑀘 𑀧𑀭𑀺𑀓𑀺𑀢𑁆𑀢𑀦𑁂𑀦 𑀢𑀣𑀸𑀕𑀢𑀸 𑀲𑀫𑁆𑀫𑀤𑁂𑀯 𑀣𑁄𑀫𑀺𑀢𑀸 𑀳𑁄𑀦𑁆𑀢𑀺. 𑀉𑀘𑁆𑀙𑁂𑀤𑀯𑀸𑀤𑀻𑀳𑀺 𑀘 𑀤𑀺𑀝𑁆𑀞𑀺𑀕𑀢𑀺𑀓𑁂𑀳𑀺 𑀬𑀣𑀸 𑀉𑀢𑁆𑀢𑀭𑀼𑀢𑁆𑀢𑀭𑀪𑀯𑀤𑀲𑁆𑀲𑀻𑀳𑀺 𑀅𑀧𑀭𑀪𑀯𑀤𑀲𑁆𑀲𑀻𑀦𑀁 𑀢𑁂𑀲𑀁 𑀯𑀸𑀤𑀧𑀝𑀺𑀲𑁂𑀥𑀯𑀲𑁂𑀦 𑀲𑀓𑀲𑀓𑀯𑀸𑀤𑀸 𑀧𑀢𑀺𑀝𑁆𑀞𑀸𑀧𑀺𑀢𑀸, 𑀢𑀣𑀸𑀬𑀁 𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺 𑀧𑀼𑀭𑀺𑀫𑀤𑁂𑀲𑀦𑀸𑀳𑀺 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀧𑀯𑀢𑁆𑀢𑀺𑀪𑁂𑀤𑁄 𑀦 𑀘𑁄𑀤𑁂𑀢𑀩𑁆𑀩𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀭𑀽𑀧𑀪𑀯𑀪𑁂𑀤𑀯𑀲𑁂𑀦 𑀯𑀺𑀬 𑀓𑀸𑀫𑀭𑀽𑀧𑀪𑀯𑀪𑁂𑀤𑀯𑀲𑁂𑀦𑀸𑀧𑀺 𑀉𑀘𑁆𑀙𑁂𑀤𑀯𑀸𑀤𑁄 𑀯𑀺𑀪𑀚𑀺𑀢𑁆𑀯𑀸 𑀤𑀝𑁆𑀞𑀩𑁆𑀩𑁄. 𑀅𑀣 𑀯𑀸 𑀧𑀘𑁆𑀘𑁂𑀓𑀁 𑀓𑀸𑀫𑀭𑀽𑀧𑀪𑀯𑀪𑁂𑀤𑀯𑀲𑁂𑀦 𑀯𑀺𑀬 𑀅𑀭𑀽𑀧𑀪𑀯𑀯𑀲𑁂𑀦𑀸𑀧𑀺 𑀦 𑀯𑀺𑀪𑀚𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑁄, 𑀏𑀯𑀜𑁆𑀘 𑀲𑀢𑀺 𑀪𑀕𑀯𑀢𑀸 ¶ 𑀯𑀼𑀢𑁆𑀢𑀲𑀢𑁆𑀢𑀓𑀢𑁄 𑀩𑀳𑀼𑀢𑀭𑀪𑁂𑀤𑁄, 𑀅𑀧𑁆𑀧𑀢𑀭𑀪𑁂𑀤𑁄 𑀯𑀸 𑀉𑀘𑁆𑀙𑁂𑀤𑀯𑀸𑀤𑁄 𑀆𑀧𑀚𑁆𑀚𑀢𑀻𑀢𑀺 𑀏𑀯𑀁 𑀧𑀓𑀸𑀭𑀸𑀧𑀺 𑀘𑁄𑀤𑀦𑀸 𑀅𑀦𑀯𑀓𑀸𑀲𑀸𑀯𑀸𑀢𑀺.

𑀏𑀢𑁆𑀣𑀸𑀳 𑁋 𑀬𑀼𑀢𑁆𑀢𑀁 𑀢𑀸𑀯 𑀧𑀼𑀭𑀺𑀫𑁂𑀲𑀼 𑀢𑀻𑀲𑀼 𑀯𑀸𑀤𑁂𑀲𑀼 ‘‘𑀓𑀸𑀬𑀲𑁆𑀲 𑀪𑁂𑀤𑀸’’𑀢𑀺 𑀯𑀼𑀢𑁆𑀢𑀁 𑀧𑀜𑁆𑀘𑀯𑁄𑀓𑀸𑀭𑀪𑀯𑀧𑀭𑀺𑀬𑀸𑀧𑀦𑁆𑀦𑀁 𑀅𑀢𑁆𑀢𑀪𑀸𑀯𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸 𑀢𑁂𑀲𑀁 𑀯𑀸𑀤𑀸𑀦𑀁, 𑀘𑀢𑀼𑀯𑁄𑀓𑀸𑀭𑀪𑀯𑀧𑀭𑀺𑀬𑀸𑀧𑀦𑁆𑀦𑀁 𑀧𑀦 𑀅𑀢𑁆𑀢𑀪𑀸𑀯𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑁂𑀲𑀼 𑀘𑀢𑀼𑀢𑁆𑀣𑀸𑀤𑀻𑀲𑀼 𑀘𑀢𑀽𑀲𑀼 𑀯𑀸𑀤𑁂𑀲𑀼 𑀓𑀲𑁆𑀫𑀸 ‘‘𑀓𑀸𑀬𑀲𑁆𑀲 𑀪𑁂𑀤𑀸’’𑀢𑀺 𑀯𑀼𑀢𑁆𑀢𑀁 ¶ . 𑀦 𑀳𑀺 𑀅𑀭𑀽𑀧𑀻𑀦𑀁 𑀓𑀸𑀬𑁄 𑀯𑀺𑀚𑁆𑀚𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀭𑀽𑀧𑀢𑁆𑀢𑀪𑀸𑀯𑁂 𑀧𑀯𑀢𑁆𑀢𑀯𑁄𑀳𑀸𑀭𑁂𑀦𑁂𑀯 𑀧𑀦 𑀤𑀺𑀝𑁆𑀞𑀺𑀕𑀢𑀺𑀓𑁄 𑀅𑀭𑀽𑀧𑀢𑁆𑀢𑀪𑀸𑀯𑁂𑀧𑀺 𑀓𑀸𑀬𑀯𑁄𑀳𑀸𑀭𑀁 𑀆𑀭𑁄𑀧𑁂𑀢𑁆𑀯𑀸 𑀆𑀳 ‘‘𑀓𑀸𑀬𑀲𑁆𑀲 𑀪𑁂𑀤𑀸’’𑀢𑀺. 𑀬𑀣𑀸 𑀘 𑀤𑀺𑀝𑁆𑀞𑀺𑀕𑀢𑀺𑀓𑀸 𑀤𑀺𑀝𑁆𑀞𑀺𑀬𑁄 𑀧𑀜𑁆𑀜𑀸𑀧𑁂𑀦𑁆𑀢𑀺, 𑀢𑀣𑀸 𑀘 𑀪𑀕𑀯𑀸 𑀤𑀲𑁆𑀲𑁂𑀢𑀻𑀢𑀺, 𑀅𑀭𑀽𑀧𑀓𑀸𑀬𑀪𑀸𑀯𑀢𑁄 𑀯𑀸 𑀨𑀲𑁆𑀲𑀸𑀤𑀺𑀥𑀫𑁆𑀫𑀲𑀫𑀽𑀳𑀪𑀽𑀢𑁂 𑀅𑀭𑀽𑀧𑀢𑁆𑀢𑀪𑀸𑀯𑁂 𑀓𑀸𑀬𑀦𑀺𑀤𑁆𑀤𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀣 𑀘 𑀓𑀸𑀫𑀤𑁂𑀯𑀢𑁆𑀢𑀪𑀸𑀯𑀸𑀤𑀺𑀦𑀺𑀭𑀯𑀲𑁂𑀲𑀯𑀺𑀪𑀯𑀧𑀢𑀺𑀝𑁆𑀞𑀸𑀧𑀓𑀸𑀦𑀁 𑀤𑀼𑀢𑀺𑀬𑀯𑀸𑀤𑀸𑀤𑀻𑀦𑀁 𑀬𑀼𑀢𑁆𑀢𑁄 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀪𑀸𑀯𑁄 𑀅𑀦𑀸𑀕𑀢𑀤𑁆𑀥𑀯𑀺𑀲𑀬𑀢𑁆𑀢𑀸 𑀢𑁂𑀲𑀁 𑀯𑀸𑀤𑀸𑀦𑀁, 𑀦 𑀧𑀦 𑀤𑀺𑀝𑁆𑀞𑀺𑀕𑀢𑀺𑀓𑀧𑀘𑁆𑀘𑀓𑁆𑀔𑀪𑀽𑀢𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀲𑀫𑀼𑀘𑁆𑀙𑁂𑀤𑀧𑀢𑀺𑀝𑁆𑀞𑀸𑀧𑀓𑀲𑁆𑀲 𑀧𑀞𑀫𑀯𑀸𑀤𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀺𑀲𑀬𑀢𑁆𑀢𑀸. 𑀤𑀼𑀢𑀺𑀬𑀯𑀸𑀤𑀸𑀤𑀻𑀦𑀜𑁆𑀳𑀺 𑀧𑀼𑀭𑀺𑀫𑀧𑀼𑀭𑀺𑀫𑀯𑀸𑀤𑀲𑀗𑁆𑀕𑀳𑀺𑀢𑀲𑁆𑀲𑁂𑀯 𑀅𑀢𑁆𑀢𑀦𑁄 𑀢𑀤𑀼𑀢𑁆𑀢𑀭𑀼𑀢𑁆𑀢𑀭𑀺𑀪𑀯𑁄𑀧𑀧𑀦𑁆𑀦𑀲𑁆𑀲 𑀲𑀫𑀼𑀘𑁆𑀙𑁂𑀤𑀢𑁄 𑀬𑀼𑀚𑁆𑀚𑀢𑀺 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀢𑀸, 𑀢𑀣𑀸 𑀘 ‘‘𑀦𑁄 𑀘 𑀔𑁄 ¶ 𑀪𑁄 𑀅𑀬𑀁 𑀅𑀢𑁆𑀢𑀸 𑀏𑀢𑁆𑀢𑀸𑀯𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀬𑀁 𑀧𑀦 𑀢𑀢𑁆𑀣 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀺 𑀔𑁄 𑀪𑁄 𑀅𑀜𑁆𑀜𑁄 𑀅𑀢𑁆𑀢𑀸’’𑀢𑀺, 𑀢𑀁 𑀫𑀦𑀼𑀲𑁆𑀲𑀓𑀸𑀬𑀯𑀺𑀲𑁂𑀲𑀸𑀧𑁂𑀓𑁆𑀔𑀸𑀬 𑀯𑀼𑀢𑁆𑀢𑀁, 𑀦 𑀲𑀩𑁆𑀩𑀣𑀸 𑀅𑀜𑁆𑀜𑀪𑀸𑀯𑀢𑁄𑀢𑀺? 𑀦𑁄 𑀦 𑀬𑀼𑀢𑁆𑀢𑁄, 𑀇𑀥𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑁂𑀧𑀺 𑀘 𑀧𑀞𑀫𑀯𑀸𑀤𑀯𑀺𑀲𑀬𑀲𑁆𑀲 𑀅𑀦𑀸𑀕𑀢𑀓𑀸𑀮𑀲𑁆𑀲𑁂𑀯 𑀢𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀧𑀞𑀫𑀯𑀸𑀤𑀺𑀦𑁄𑀧𑀺 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀢𑀸𑀬 𑀦 𑀓𑁄𑀘𑀺 𑀯𑀺𑀭𑁄𑀥𑁄𑀢𑀺.

𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀯𑀡𑁆𑀡𑀦𑀸

𑁯𑁩. 𑀤𑀺𑀝𑁆𑀞𑀥𑀫𑁆𑀫𑁄𑀢𑀺 ¶ 𑀤𑀲𑁆𑀲𑀦𑀪𑀽𑀢𑁂𑀦 𑀜𑀸𑀡𑁂𑀦 𑀉𑀧𑀮𑀤𑁆𑀥𑀥𑀫𑁆𑀫𑁄. 𑀢𑀢𑁆𑀣 𑀬𑁄 𑀅𑀦𑀺𑀦𑁆𑀤𑁆𑀭𑀺𑀬𑀯𑀺𑀲𑀬𑁄, 𑀲𑁄𑀧𑀺 𑀲𑀼𑀧𑀸𑀓𑀝𑀪𑀸𑀯𑁂𑀦 𑀇𑀦𑁆𑀤𑁆𑀭𑀺𑀬𑀯𑀺𑀲𑀬𑁄 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀤𑀺𑀝𑁆𑀞𑀥𑀫𑁆𑀫𑁄𑀢𑀺 𑀧𑀘𑁆𑀘𑀓𑁆𑀔𑀥𑀫𑁆𑀫𑁄 𑀯𑀼𑀘𑁆𑀘𑀢𑀻’’𑀢𑀺. 𑀢𑁂𑀦𑁂𑀯 𑀘 ‘‘𑀢𑀢𑁆𑀣 𑀢𑀢𑁆𑀣 𑀧𑀝𑀺𑀮𑀤𑁆𑀥𑀢𑁆𑀢𑀪𑀸𑀯𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑁯𑁫. 𑀅𑀦𑁆𑀢𑁄𑀦𑀺𑀚𑁆𑀛𑀸𑀬𑀦𑀮𑀓𑁆𑀔𑀡𑁄𑀢𑀺 𑀜𑀸𑀢𑀺𑀪𑁄𑀕𑀭𑁄𑀕𑀲𑀻𑀮𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀳𑀺 𑀨𑀼𑀝𑁆𑀞𑀲𑁆𑀲 𑀘𑁂𑀢𑀲𑁄 𑀅𑀦𑁆𑀢𑁄 𑀅𑀩𑁆𑀪𑀦𑁆𑀢𑀭𑀁 𑀦𑀺𑀚𑁆𑀛𑀸𑀬𑀦𑀁 𑀲𑁄𑀘𑀦𑀁 𑀅𑀦𑁆𑀢𑁄𑀦𑀺𑀚𑁆𑀛𑀸𑀬𑀦𑀁, 𑀢𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀅𑀦𑁆𑀢𑁄𑀦𑀺𑀚𑁆𑀛𑀸𑀬𑀦𑀮𑀓𑁆𑀔𑀡𑁄. 𑀢𑀦𑁆𑀦𑀺𑀲𑁆𑀲𑀺𑀢𑀮𑀸𑀮𑀧𑁆𑀧𑀦𑀮𑀓𑁆𑀔𑀡𑁄𑀢𑀺 𑀢𑀁 𑀲𑁄𑀓𑀁 𑀲𑀫𑀼𑀝𑁆𑀞𑀸𑀦𑀳𑁂𑀢𑀼𑀁 𑀦𑀺𑀲𑁆𑀲𑀺𑀢𑀁 𑀢𑀦𑁆𑀦𑀺𑀲𑁆𑀲𑀺𑀢𑀁, 𑀪𑀼𑀲𑀁 𑀯𑀺𑀮𑀸𑀧𑀦𑀁 𑀮𑀸𑀮𑀧𑁆𑀧𑀦𑀁, 𑀢𑀦𑁆𑀦𑀺𑀲𑁆𑀲𑀺𑀢𑀜𑁆𑀘 𑀮𑀸𑀮𑀧𑁆𑀧𑀦𑀜𑁆𑀘 𑀢𑀦𑁆𑀦𑀺𑀲𑁆𑀲𑀺𑀢𑀮𑀸𑀮𑀧𑁆𑀧𑀦𑀁, 𑀢𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀢𑀦𑁆𑀦𑀺𑀲𑁆𑀲𑀺𑀢𑀮𑀸𑀮𑀧𑁆𑀧𑀦𑀮𑀓𑁆𑀔𑀡𑁄. 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀦𑀸 𑀨𑀼𑀝𑁆𑀞𑀲𑁆𑀲 𑀧𑀭𑀺𑀤𑁂𑀯𑁂𑀦𑀸𑀧𑀺 𑀅𑀲𑀓𑁆𑀓𑀼𑀡𑀦𑁆𑀢𑀲𑁆𑀲 𑀅𑀦𑁆𑀢𑁄𑀕𑀢𑀲𑁄𑀓𑀲𑀫𑀼𑀝𑁆𑀞𑀺𑀢𑁄 𑀪𑀼𑀲𑁄 𑀆𑀬𑀸𑀲𑁄 𑀉𑀧𑀸𑀬𑀸𑀲𑁄. 𑀲𑁄 𑀧𑀦 𑀬𑀲𑁆𑀫𑀸 𑀘𑁂𑀢𑀲𑁄 𑀅𑀧𑁆𑀧𑀲𑀦𑁆𑀦𑀸𑀓𑀸𑀭𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀯𑀺𑀲𑀸𑀤𑀮𑀓𑁆𑀔𑀡𑁄’’𑀢𑀺 𑀯𑀼𑀢𑁆𑀢𑁄.

𑁯𑁬. 𑀯𑀺𑀢𑀓𑁆𑀓𑀦𑀁 𑀯𑀺𑀢𑀓𑁆𑀓𑀺𑀢𑀁, 𑀢𑀁 𑀧𑀦 𑀅𑀪𑀺𑀦𑀺𑀭𑁄𑀧𑀦𑀲𑀪𑀸𑀯𑁄 𑀯𑀺𑀢𑀓𑁆𑀓𑁄𑀬𑁂𑀯𑀸𑀢𑀺 𑀆𑀳 ‘‘𑀅𑀪𑀺…𑀧𑁂… 𑀯𑀺𑀢𑀓𑁆𑀓𑁄’’𑀢𑀺. 𑀏𑀲 𑀦𑀬𑁄 𑀯𑀺𑀘𑀸𑀭𑀺𑀢𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀔𑁄𑀪𑀓𑀭𑀲𑀪𑀸𑀯𑀢𑁆𑀢𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 ¶ 𑀢𑀁𑀲𑀳𑀺𑀢𑀁 𑀛𑀸𑀦𑀁 𑀲𑀉𑀩𑁆𑀩𑀺𑀮𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀓𑀡𑁆𑀟𑀓𑀁 𑀯𑀺𑀬 𑀔𑀸𑀬𑀢𑀻’’𑀢𑀺.

𑁯𑁭. 𑀬𑀸𑀬 𑀉𑀩𑁆𑀩𑀺𑀮𑀸𑀧𑀦𑀧𑀻𑀢𑀺𑀬𑀸 𑀉𑀧𑁆𑀧𑀦𑁆𑀦𑀸𑀬 𑀘𑀺𑀢𑁆𑀢𑀁 ‘‘𑀉𑀩𑁆𑀩𑀺𑀮𑀸𑀯𑀺𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀲𑀸 𑀧𑀻𑀢𑀺 𑀉𑀩𑁆𑀩𑀺𑀮𑀸𑀯𑀺𑀢𑀢𑁆𑀢𑀁 𑀬𑀲𑁆𑀫𑀸 𑀧𑀦 𑀘𑀺𑀢𑁆𑀢𑀲𑁆𑀲 𑀉𑀩𑁆𑀩𑀺𑀮𑀪𑀸𑀯𑁄 𑀢𑀲𑁆𑀲𑀸 𑀧𑀻𑀢𑀺𑀬𑀸 𑀲𑀢𑀺 𑀳𑁄𑀢𑀺, 𑀦𑀸𑀲𑀢𑀺, 𑀢𑀲𑁆𑀫𑀸 𑀲𑀸 ‘‘𑀉𑀩𑁆𑀩𑀺𑀮𑀪𑀸𑀯𑀓𑀸𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀸.

𑁯𑁮. 𑀆𑀪𑁄𑀕𑁄𑀢𑀺 ¶ 𑀯𑀸 𑀘𑀺𑀢𑁆𑀢𑀲𑁆𑀲 𑀆𑀪𑀼𑀕𑁆𑀕𑀪𑀸𑀯𑁄, 𑀆𑀭𑀫𑁆𑀫𑀡𑁂 𑀑𑀡𑀢𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀲𑀼𑀔𑁂𑀦 𑀳𑀺 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑁂 𑀅𑀪𑀺𑀦𑀢𑀁 𑀳𑁄𑀢𑀺, 𑀦 𑀤𑀼𑀓𑁆𑀔𑁂𑀦 𑀯𑀺𑀬 𑀅𑀧𑀦𑀢𑀁, 𑀦𑀸𑀧𑀺 𑀅𑀤𑀼𑀓𑁆𑀔𑀫𑀲𑀼𑀔𑁂𑀦 ¶ 𑀯𑀺𑀬 𑀅𑀦𑀪𑀺𑀦𑀢𑀁 𑀅𑀦𑀧𑀦𑀢𑀜𑁆𑀘. 𑀢𑀢𑁆𑀣 ‘‘𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀅𑀪𑀺𑀪𑀽𑀢𑀲𑁆𑀲 𑀯𑀺𑀬 𑀫𑀦𑀼𑀜𑁆𑀜𑀪𑁄𑀚𑀦𑀸𑀤𑀻𑀲𑀼 𑀓𑀸𑀫𑁂𑀳𑀺 𑀯𑀺𑀯𑁂𑀘𑀺𑀬𑀫𑀸𑀦𑀲𑁆𑀲𑀼𑀧𑀸𑀤𑀸𑀭𑀫𑁆𑀫𑀡𑀧𑀢𑁆𑀣𑀦𑀸 𑀯𑀺𑀲𑁂𑀲𑀢𑁄 𑀅𑀪𑀺𑀯𑀟𑁆𑀠𑀢𑀺, 𑀉𑀴𑀸𑀭𑀲𑁆𑀲 𑀧𑀦 𑀓𑀸𑀫𑀭𑀲𑀲𑁆𑀲 𑀬𑀸𑀯𑀤𑀢𑁆𑀣𑀁 𑀢𑀺𑀢𑁆𑀢𑀲𑁆𑀲 𑀫𑀦𑀼𑀜𑁆𑀜𑀭𑀲𑀪𑁄𑀚𑀦𑀁 𑀪𑀼𑀢𑁆𑀢𑀸𑀯𑀺𑀦𑁄 𑀯𑀺𑀬 𑀲𑀼𑀳𑀺𑀢𑀲𑁆𑀲 𑀪𑁄𑀢𑁆𑀢𑀼𑀓𑀸𑀫𑀢𑀸 𑀓𑀸𑀫𑁂𑀲𑀼 𑀧𑀸𑀢𑀩𑁆𑀬𑀢𑀸 𑀦 𑀳𑁄𑀢𑀺, 𑀯𑀺𑀲𑀬𑀲𑁆𑀲𑀸𑀕𑀺𑀤𑁆𑀥𑀢𑀸𑀬 𑀯𑀺𑀲𑀬𑁂𑀳𑀺 𑀤𑀼𑀫𑁆𑀫𑁄𑀘𑀺𑀬𑁂𑀳𑀺𑀧𑀺 𑀚𑀮𑀽𑀓𑀸 𑀯𑀺𑀬 𑀲𑀬𑀫𑁂𑀯 𑀫𑀼𑀜𑁆𑀘𑀢𑀻’’𑀢𑀺 𑀘 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀓𑀸𑀫𑀕𑀼𑀡𑀲𑀦𑁆𑀢𑀧𑁆𑀧𑀺𑀢𑀢𑀸𑀬 𑀲𑀁𑀲𑀸𑀭𑀤𑀼𑀓𑁆𑀔𑀯𑀽𑀧𑀲𑀫𑀁 𑀩𑁆𑀬𑀸𑀓𑀸𑀲𑀺 𑀧𑀞𑀫𑀯𑀸𑀤𑀻. 𑀓𑀸𑀫𑀸𑀤𑀻𑀦𑀁 𑀆𑀤𑀻𑀦𑀯𑀤𑀲𑁆𑀲𑀺𑀢𑀸𑀬, 𑀧𑀞𑀫𑀸𑀤𑀺𑀚𑁆𑀛𑀸𑀦𑀲𑀼𑀔𑀲𑁆𑀲 𑀲𑀦𑁆𑀢𑀪𑀸𑀯𑀤𑀲𑁆𑀲𑀺𑀢𑀸𑀬 𑀘 𑀧𑀞𑀫𑀸𑀤𑀺𑀚𑁆𑀛𑀸𑀦𑀲𑀼𑀔𑀢𑀺𑀢𑁆𑀢𑀺𑀬𑀸 𑀲𑀁𑀲𑀸𑀭𑀤𑀼𑀓𑁆𑀔𑀼𑀧𑀘𑁆𑀙𑁂𑀤𑀁 𑀩𑁆𑀬𑀸𑀓𑀁𑀲𑀼 𑀤𑀼𑀢𑀺𑀬𑀸𑀤𑀺𑀯𑀸𑀤𑀺𑀦𑁄, 𑀇𑀥𑀸𑀧𑀺 𑀉𑀘𑁆𑀙𑁂𑀤𑀯𑀸𑀤𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀯𑀺𑀘𑀸𑀭𑁄 𑀬𑀣𑀸𑀲𑀫𑁆𑀪𑀯𑀁 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑁄. 𑀅𑀬𑀁 𑀧𑀦𑁂𑀢𑁆𑀣 𑀯𑀺𑀲𑁂𑀲𑁄 𑁋 𑀏𑀓𑀲𑁆𑀫𑀺𑀜𑁆𑀳𑀺 𑀅𑀢𑁆𑀢𑀪𑀸𑀯𑁂 𑀧𑀜𑁆𑀘 𑀯𑀸𑀤𑀸 𑀮𑀩𑁆𑀪𑀦𑁆𑀢𑀺. 𑀢𑁂𑀦𑁂𑀯 𑀳𑀺 𑀧𑀸𑀴𑀺𑀬𑀁 ‘‘𑀅𑀜𑁆𑀜𑁄 𑀅𑀢𑁆𑀢𑀸’’𑀢𑀺 𑀅𑀜𑁆𑀜𑀕𑁆𑀕𑀳𑀡𑀁 𑀦 𑀓𑀢𑀁. 𑀓𑀣𑀁 𑀧𑀦𑁂𑀢𑁆𑀣 𑀅𑀘𑁆𑀘𑀦𑁆𑀢𑀦𑀺𑀩𑁆𑀩𑀸𑀦𑀧𑀜𑁆𑀜𑀸𑀧𑀓𑀲𑁆𑀲 𑀅𑀢𑁆𑀢𑀦𑁄 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀲𑁆𑀲 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀲𑀗𑁆𑀕𑀳𑁄, 𑀦 𑀧𑀦 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸𑀢𑀺? 𑀢𑀁𑀢𑀁𑀲𑀼𑀔𑀯𑀺𑀲𑁂𑀲𑀲𑀫𑀗𑁆𑀕𑀺𑀢𑀸𑀧𑀝𑀺𑀮𑀤𑁆𑀥𑁂𑀦 𑀩𑀦𑁆𑀥𑀯𑀺𑀫𑁄𑀓𑁆𑀔𑁂𑀦 𑀲𑀼𑀤𑁆𑀥𑀲𑁆𑀲 𑀅𑀢𑁆𑀢𑀦𑁄 𑀲𑀓𑀭𑀽𑀧𑁂 𑀅𑀯𑀝𑁆𑀞𑀸𑀦𑀤𑀻𑀧𑀦𑀢𑁄.

𑀲𑁂𑀲𑀸𑀢𑀺 𑀲𑁂𑀲𑀸 𑀧𑀜𑁆𑀘𑀧𑀜𑁆𑀜𑀸𑀲 𑀤𑀺𑀝𑁆𑀞𑀺𑀬𑁄. 𑀢𑀸𑀲𑀼 𑀅𑀦𑁆𑀢𑀸𑀦𑀦𑁆𑀢𑀺𑀓𑀯𑀸𑀤𑀸𑀤𑀻𑀦𑀁 𑀲𑀲𑁆𑀲𑀢𑀤𑀺𑀝𑁆𑀞𑀺𑀪𑀸𑀯𑁄 𑀢𑀢𑁆𑀣 𑀢𑀢𑁆𑀣 𑀧𑀓𑀸𑀲𑀺𑀢𑁄𑀬𑁂𑀯.

𑁧𑁦𑁧-𑁩. 𑀓𑀺𑀁 𑀧𑀦 𑀓𑀸𑀭𑀡𑀁 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀸 𑀏𑀯 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀲𑁆𑀲 𑀯𑀺𑀲𑀬𑀪𑀸𑀯𑁂𑀦 𑀤𑀲𑁆𑀲𑀺𑀢𑀸, 𑀦 𑀧𑀦 𑀢𑀤𑀼𑀪𑀬𑀫𑁂𑀓𑀚𑁆𑀛𑀦𑁆𑀢𑀺? 𑀅𑀲𑀫𑁆𑀪𑀯𑀢𑁄. 𑀦 𑀳𑀺 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂𑀲𑀼 𑀯𑀺𑀬 𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑁂 𑀫𑀚𑁆𑀛𑀦𑁆𑀢𑁂 𑀤𑀺𑀝𑁆𑀞𑀺𑀓𑀧𑁆𑀧𑀦𑀸 𑀲𑀫𑁆𑀪𑀯𑀢𑀺 𑀇𑀢𑁆𑀢𑀭𑀓𑀸𑀮𑀢𑁆𑀢𑀸, 𑀅𑀣 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑁄 𑀢𑀤𑀼𑀪𑀬𑀯𑁂𑀫𑀚𑁆𑀛𑀁, 𑀏𑀯𑀁 𑀲𑀢𑀺 𑀤𑀺𑀝𑁆𑀞𑀺𑀓𑀧𑁆𑀧𑀦𑀓𑁆𑀔𑀫𑁄 𑀢𑀲𑁆𑀲 ¶ 𑀉𑀪𑀬𑀲𑀪𑀸𑀯𑁄 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂𑀲𑀼𑀬𑁂𑀯 𑀅𑀦𑁆𑀢𑁄𑀕𑀥𑁄𑀢𑀺 𑀓𑀣𑀫𑀤𑀲𑁆𑀲𑀺𑀢𑀁. 𑀅𑀣 𑀯𑀸 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀯𑀦𑁆𑀢𑀢𑀸𑀬 ‘‘𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁄’’𑀢𑀺 𑀫𑀚𑁆𑀛𑀦𑁆𑀢𑁄 𑀯𑀼𑀘𑁆𑀘𑀢𑀺 ¶ , 𑀲𑁄 𑀘 ‘‘𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀓𑀧𑁆𑀧𑀺𑀓𑀸 𑀯𑀸 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄’’𑀢𑀺 𑀯𑀤𑀦𑁆𑀢𑁂𑀦 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂𑀳𑀺 𑀯𑀺𑀲𑀼𑀁 𑀓𑀢𑁆𑀯𑀸 𑀯𑀼𑀢𑁆𑀢𑁄𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀲𑀩𑁆𑀩𑁂𑀧𑀺 𑀢𑁂 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑁂 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀓𑀧𑁆𑀧𑀺𑀓𑁂’’𑀢𑀺 𑀏𑀢𑁂𑀦 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, 𑀏𑀓𑀲𑁂𑀲𑁂𑀦 𑀯𑀸 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁, 𑀅𑀜𑁆𑀜𑀣𑀸 ¶ 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀯𑀼𑀢𑁆𑀢𑀯𑀘𑀦𑀲𑁆𑀲 𑀅𑀦𑀢𑁆𑀣𑀓𑀢𑀸 𑀆𑀧𑀚𑁆𑀚𑁂𑀬𑁆𑀬𑀸𑀢𑀺. 𑀓𑁂 𑀧𑀦 𑀢𑁂 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀓𑀧𑁆𑀧𑀺𑀓𑀸? 𑀬𑁂 𑀅𑀦𑁆𑀢𑀸𑀦𑀦𑁆𑀢𑀺𑀓𑀸 𑀳𑀼𑀢𑁆𑀯𑀸 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸𑀢𑀺 𑀏𑀯𑀁 𑀧𑀓𑀸𑀭𑀸 𑀯𑁂𑀤𑀺𑀢𑀩𑁆𑀩𑀸.

𑀏𑀢𑁆𑀣 𑀘 ‘‘𑀲𑀩𑁆𑀩𑁂 𑀢𑁂 𑀇𑀫𑁂𑀳𑁂𑀯 𑀤𑁆𑀯𑀸𑀲𑀝𑁆𑀞𑀺𑀬𑀸 𑀯𑀢𑁆𑀣𑀽𑀳𑀺, 𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭𑁂𑀦, 𑀦𑀢𑁆𑀣𑀺 𑀇𑀢𑁄 𑀩𑀳𑀺𑀤𑁆𑀥𑀸’’𑀢𑀺 𑀯𑀘𑀦𑀢𑁄, 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸𑀤𑀺𑀢𑁆𑀢𑀬𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀘 𑀓𑀲𑁆𑀲𑀘𑀺 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀅𑀪𑀸𑀯𑀢𑁄 𑀬𑀸𑀦𑀺 𑀢𑀸𑀦𑀺 𑀲𑀸𑀫𑀜𑁆𑀜𑀨𑀮𑀸𑀤𑀺 (𑀤𑀻. 𑀦𑀺. 𑁧.𑁧𑁬𑁬) 𑀲𑀼𑀢𑁆𑀢𑀦𑁆𑀢𑀭𑁂𑀲𑀼 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀺 𑀅𑀓𑀺𑀭𑀺𑀬𑀸𑀳𑁂𑀢𑀼𑀓𑀦𑀢𑁆𑀣𑀺𑀓𑀯𑀸𑀤𑀸𑀤𑀻𑀦𑀺, 𑀬𑀸𑀦𑀺 𑀘 𑀇𑀲𑁆𑀲𑀭𑀧𑀚𑀸𑀧𑀢𑀺𑀧𑀼𑀭𑀺𑀲𑀓𑀸𑀮𑀲𑀪𑀸𑀯𑀦𑀺𑀬𑀢𑀺𑀬𑀤𑀺𑀘𑁆𑀙𑀸𑀯𑀸𑀤𑀸𑀤𑀺𑀧𑁆𑀧𑀪𑁂𑀤𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 (𑀯𑀺𑀲𑀼𑀤𑁆𑀥𑀺. 𑀝𑀻. 𑁨.𑁫𑁬𑁩; 𑀯𑀺𑀪. 𑀅𑀦𑀼𑀝𑀻. 𑁧𑁮𑁯 𑀧𑀲𑁆𑀲𑀺𑀢𑀩𑁆𑀩𑀁) 𑀩𑀳𑀺𑀤𑁆𑀥𑀸𑀧𑀺 𑀤𑀺𑀲𑁆𑀲𑀫𑀸𑀦𑀸𑀦𑀺, 𑀢𑁂𑀲𑀁 𑀏𑀢𑁆𑀣𑁂𑀯 𑀲𑀗𑁆𑀕𑀳𑁄, 𑀅𑀦𑁆𑀢𑁄𑀕𑀥𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁? 𑀅𑀓𑀺𑀭𑀺𑀬𑀯𑀸𑀤𑁄 𑀢𑀸𑀯 ‘‘𑀯𑀜𑁆𑀛𑁄 𑀓𑀽𑀝𑀝𑁆𑀞𑁄’’𑀢𑀺𑀆𑀤𑀺𑀦𑀸 𑀓𑀺𑀭𑀺𑀬𑀸𑀪𑀸𑀯𑀤𑀻𑀧𑀦𑀢𑁄 𑀲𑀲𑁆𑀲𑀢𑀯𑀸𑀤𑁂 𑀅𑀦𑁆𑀢𑁄𑀕𑀥𑁄, 𑀢𑀣𑀸 ‘‘𑀲𑀢𑁆𑀢𑀺𑀫𑁂 𑀓𑀸𑀬𑀸’’𑀢𑀺𑀆𑀤𑀺 ¶ (𑀤𑀻. 𑀦𑀺. 𑁧.𑁧𑁭𑁪) 𑀦𑀬𑀧𑁆𑀧𑀯𑀢𑁆𑀢𑁄 𑀧𑀓𑀼𑀥𑀯𑀸𑀤𑁄, ‘‘𑀦𑀢𑁆𑀣𑀺 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬𑀸’’𑀢𑀺𑀆𑀤𑀺 (𑀤𑀻. 𑀦𑀺. 𑁧.𑁧𑁬𑁮) 𑀯𑀘𑀦𑀢𑁄 𑀅𑀳𑁂𑀢𑀼𑀓𑀯𑀸𑀤𑁄 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀯𑀸𑀤𑁂 𑀅𑀦𑁆𑀢𑁄𑀕𑀥𑁄. ‘‘𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄’’𑀢𑀺𑀆𑀤𑀺 (𑀤𑀻. 𑀦𑀺. 𑁧.𑁧𑁭𑁧) 𑀯𑀘𑀦𑀢𑁄 𑀦𑀢𑁆𑀣𑀺𑀓𑀯𑀸𑀤𑁄 𑀉𑀘𑁆𑀙𑁂𑀤𑀯𑀸𑀤𑁂 𑀅𑀦𑁆𑀢𑁄𑀕𑀥𑁄. 𑀢𑀣𑀸 𑀳𑀺 𑀢𑀢𑁆𑀣 ‘‘𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑁧.𑁮𑁬) 𑀯𑀼𑀢𑁆𑀢𑀁. 𑀧𑀞𑀫𑁂𑀦 𑀆𑀤𑀺-𑀲𑀤𑁆𑀤𑁂𑀦 𑀦𑀺𑀕𑀡𑁆𑀞𑀯𑀸𑀤𑀸𑀤𑀬𑁄 𑀲𑀗𑁆𑀕𑀳𑀺𑀢𑀸.

𑀬𑀤𑀺𑀧𑀺 𑀧𑀸𑀴𑀺𑀬𑀁 𑀦𑀸𑀝𑀧𑀼𑀢𑁆𑀢𑀯𑀸𑀤 (𑀤𑀻. 𑀦𑀺. 𑁧.𑁧𑁭𑁮) 𑀪𑀸𑀯𑁂𑀦 𑀘𑀸𑀢𑀼𑀬𑀸𑀫𑀲𑀁𑀯𑀭𑁄 𑀆𑀕𑀢𑁄, 𑀢𑀣𑀸𑀧𑀺 𑀲𑀢𑁆𑀢𑀯𑀢𑀸𑀢𑀺𑀓𑁆𑀓𑀫𑁂𑀦 𑀯𑀺𑀓𑁆𑀔𑁂𑀧𑀯𑀸𑀤𑀺𑀢𑀸𑀬 𑀦𑀸𑀝𑀧𑀼𑀢𑁆𑀢𑀯𑀸𑀤𑁄𑀧𑀺 𑀲𑀜𑁆𑀘𑀬𑀯𑀸𑀤𑁄 𑀯𑀺𑀬 𑀅𑀫𑀭𑀸𑀯𑀺𑀓𑁆𑀔𑁂𑀧𑀯𑀸𑀤𑁂𑀲𑀼 𑀅𑀦𑁆𑀢𑁄𑀕𑀥𑁄. ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀁, 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’𑀦𑁆𑀢𑀺 (𑀤𑀻. 𑀦𑀺. 𑁧.𑁩𑁭𑁭; 𑀫. 𑀦𑀺. 𑁨.𑁧𑁨𑁨; 𑀲𑀁. 𑀦𑀺. 𑁨.𑁩𑁫) 𑀏𑀯𑀁 𑀧𑀓𑀸𑀭𑀸 𑀯𑀸𑀤𑀸 ‘‘𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸’’𑀢𑀺𑀆𑀤𑀺𑀯𑀸𑀤𑁂𑀲𑀼 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺, ‘‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, ‘‘𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸’’𑀢𑀺 𑀏𑀯𑀁 𑀧𑀓𑀸𑀭𑀸 𑀲𑀲𑁆𑀲𑀢𑀯𑀸𑀤𑁂. ‘‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸’’𑀢𑀺 𑀏𑀯𑀁 𑀧𑀓𑀸𑀭𑀸 𑀉𑀘𑁆𑀙𑁂𑀤𑀯𑀸𑀤𑁂𑀦 𑀲𑀗𑁆𑀕𑀳𑀺𑀢𑀸. ‘‘𑀳𑁄𑀢𑀺 𑀘 𑀦 𑀳𑁄𑀢𑀺 𑀘 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀅𑀢𑁆𑀣𑀺 𑀘 𑀦𑀢𑁆𑀣𑀺 𑀘 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸’’𑀢𑀺 𑀏𑀯𑀁 𑀧𑀓𑀸𑀭𑀸 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑁂 𑀅𑀦𑁆𑀢𑁄𑀕𑀥𑀸. ‘‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸, 𑀦𑁂𑀯𑀢𑁆𑀣𑀺 𑀦 𑀦𑀢𑁆𑀣𑀺 ¶ 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸’’𑀢𑀺 𑀘 ¶ 𑀏𑀯𑀁 𑀧𑀓𑀸𑀭𑀸 𑀅𑀫𑀭𑀸𑀯𑀺𑀓𑁆𑀔𑁂𑀧𑀯𑀸𑀤𑁂 ¶ 𑀅𑀦𑁆𑀢𑁄𑀕𑀥𑀸. 𑀇𑀲𑁆𑀲𑀭𑀧𑀚𑀸𑀧𑀢𑀺𑀧𑀼𑀭𑀺𑀲𑀓𑀸𑀮𑀯𑀸𑀤𑀸 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑁂 𑀅𑀦𑁆𑀢𑁄𑀕𑀥𑀸, 𑀢𑀣𑀸 𑀓𑀡𑀸𑀤𑀯𑀸𑀤𑁄. 𑀲𑀪𑀸𑀯𑀦𑀺𑀬𑀢𑀺𑀬𑀤𑀺𑀘𑁆𑀙𑀸𑀯𑀸𑀤𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀯𑀸𑀤𑁂𑀦 𑀲𑀗𑁆𑀕𑀳𑀺𑀢𑀸. 𑀇𑀫𑀺𑀦𑀸 𑀦𑀬𑁂𑀦 𑀲𑀼𑀢𑁆𑀢𑀦𑁆𑀢𑀭𑁂𑀲𑀼, 𑀩𑀳𑀺𑀤𑁆𑀥𑀸 𑀘 𑀤𑀺𑀲𑁆𑀲𑀫𑀸𑀦𑀸𑀦𑀁 𑀤𑀺𑀝𑁆𑀞𑀺𑀕𑀢𑀸𑀦𑀁 𑀇𑀫𑀸𑀲𑀼 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀻𑀲𑀼 𑀅𑀦𑁆𑀢𑁄𑀕𑀥𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀚𑁆𑀛𑀸𑀲𑀬𑀦𑁆𑀢𑀺 𑀤𑀺𑀝𑁆𑀞𑀺𑀚𑁆𑀛𑀸𑀲𑀬𑀁. 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀯𑀲𑁂𑀦 𑀳𑀺 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀤𑀼𑀯𑀺𑀥𑁄 𑀅𑀚𑁆𑀛𑀸𑀲𑀬𑁄, 𑀢𑀜𑁆𑀘 𑀪𑀕𑀯𑀸 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀅𑀧𑀭𑀺𑀫𑀸𑀡𑁂 𑀏𑀯 𑀜𑁂𑀬𑁆𑀬𑀯𑀺𑀲𑁂𑀲𑁂 𑀉𑀧𑁆𑀧𑀚𑁆𑀚𑀦𑀯𑀲𑁂𑀦 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀸𑀦𑀫𑁆𑀧𑀺 ‘‘𑀘𑀢𑁆𑀢𑀸𑀭𑁄 𑀚𑀦𑀸 𑀲𑀲𑁆𑀲𑀢𑀯𑀸𑀤𑀸’’𑀢𑀺𑀆𑀤𑀺𑀦𑀸 𑀤𑁆𑀯𑀸𑀲𑀝𑁆𑀞𑀺𑀬𑀸 𑀧𑀪𑁂𑀤𑁂𑀳𑀺 𑀲𑀗𑁆𑀕𑀡𑁆𑀳𑀦𑀯𑀲𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀧𑀫𑀸𑀡𑀪𑀽𑀢𑀸𑀬 𑀢𑀼𑀮𑀸𑀬 𑀥𑀸𑀭𑀬𑀫𑀸𑀦𑁄 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀢𑀼𑀮𑀸𑀬 𑀢𑀼𑀮𑀬𑀦𑁆𑀢𑁄 𑀯𑀺𑀬𑀸’’𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀅𑀦𑁆𑀢𑁄 𑀚𑀸𑀮𑀻𑀓𑀢𑀸’’𑀢𑀺𑀆𑀤𑀺 (𑀤𑀻. 𑀦𑀺. 𑁧.𑁧𑁪𑁬). ‘‘𑀲𑀺𑀦𑁂𑀭𑀼𑀧𑀸𑀤𑀢𑁄 𑀯𑀸𑀮𑀼𑀓𑀁 𑀉𑀤𑁆𑀥𑀭𑀦𑁆𑀢𑁄 𑀯𑀺𑀬𑀸’’𑀢𑀺 𑀏𑀢𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀢𑁄 𑀅𑀜𑁆𑀜𑀲𑁆𑀲 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀁 𑀤𑀲𑁆𑀲𑁂𑀢𑀺.

𑀅𑀦𑀼𑀲𑀦𑁆𑀥𑀸𑀦𑀁 𑀅𑀦𑀼𑀲𑀦𑁆𑀥𑀺, 𑀧𑀼𑀘𑁆𑀙𑀸𑀬 𑀓𑀢𑁄 𑀅𑀦𑀼𑀲𑀦𑁆𑀥𑀺 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺. 𑀅𑀣 𑀯𑀸 𑀅𑀦𑀼𑀲𑀦𑁆𑀥𑀬𑀢𑀻𑀢𑀺 𑀅𑀦𑀼𑀲𑀦𑁆𑀥𑀺, 𑀧𑀼𑀘𑁆𑀙𑀸 𑀅𑀦𑀼𑀲𑀦𑁆𑀥𑀺 𑀏𑀢𑀲𑁆𑀲𑀸𑀢𑀺 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺. 𑀧𑀼𑀘𑁆𑀙𑀸𑀬 𑀅𑀦𑀼𑀲𑀦𑁆𑀥𑀺𑀬𑀢𑀻𑀢𑀺 𑀯𑀸 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺. 𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺𑀫𑁆𑀳𑀺𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸𑀦𑀼𑀲𑀦𑁆𑀥𑀻𑀢𑀺 𑀏𑀢𑁆𑀣 𑀧𑀦 𑀅𑀦𑀼𑀲𑀦𑁆𑀥𑀻𑀬𑀢𑀻𑀢𑀺 𑀅𑀦𑀼𑀲𑀦𑁆𑀥𑀺, 𑀬𑀸 𑀬𑀸 𑀅𑀦𑀼𑀲𑀦𑁆𑀥𑀺 𑀬𑀣𑀸𑀦𑀼𑀲𑀦𑁆𑀥𑀺, 𑀅𑀦𑀼𑀲𑀦𑁆𑀥𑀺𑀅𑀦𑀼𑀭𑀽𑀧𑀁 𑀯𑀸 𑀬𑀣𑀸𑀦𑀼𑀲𑀦𑁆𑀥𑀻𑀢𑀺 𑀲𑀤𑁆𑀤𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀲𑁄 ‘‘𑀬𑁂𑀦 𑀧𑀦 𑀥𑀫𑁆𑀫𑁂𑀦 𑀆𑀤𑀺𑀫𑁆𑀳𑀺 𑀤𑁂𑀲𑀦𑀸 𑀉𑀝𑁆𑀞𑀺𑀢𑀸, 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀼𑀭𑀽𑀧𑀥𑀫𑁆𑀫𑀯𑀲𑁂𑀦 𑀯𑀸 𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑀸 𑀬𑁂𑀲𑀼 𑀲𑀼𑀢𑁆𑀢𑁂𑀲𑀼 𑀉𑀧𑀭𑀺 𑀤𑁂𑀲𑀦𑀸 𑀆𑀕𑀘𑁆𑀙𑀢𑀺, 𑀢𑁂𑀲𑀁 ¶ 𑀯𑀲𑁂𑀦 𑀬𑀣𑀸𑀦𑀼𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀬𑁆𑀬𑀣𑀺𑀤𑀁? 𑀆𑀓𑀗𑁆𑀔𑁂𑀬𑁆𑀬𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁬𑁪-𑁬𑁯) 𑀳𑁂𑀝𑁆𑀞𑀸 𑀲𑀻𑀮𑁂𑀦 𑀤𑁂𑀲𑀦𑀸 𑀉𑀝𑁆𑀞𑀺𑀢𑀸, 𑀉𑀧𑀭𑀺 𑀙 𑀅𑀪𑀺𑀜𑁆𑀜𑀸 𑀆𑀕𑀢𑀸…𑀧𑁂… 𑀓𑀓𑀘𑀽𑀧𑀫𑁂 (𑀫. 𑀦𑀺. 𑁧.𑁨𑁨𑁨) 𑀳𑁂𑀝𑁆𑀞𑀸 𑀅𑀓𑁆𑀔𑀦𑁆𑀢𑀺𑀬𑀸 𑀉𑀝𑁆𑀞𑀺𑀢𑀸, 𑀉𑀧𑀭𑀺 𑀓𑀓𑀘𑀽𑀧𑀫𑀸 𑀆𑀕𑀢𑀸’’𑀢𑀺𑀆𑀤𑀺𑀦𑀸 𑀅𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁦𑁦-𑁧𑁦𑁪) 𑀯𑀼𑀢𑁆𑀢𑁄.

𑀇𑀢𑀺 𑀓𑀺𑀭𑀸𑀢𑀺 𑀪𑀕𑀯𑀢𑁄 𑀬𑀣𑀸𑀤𑁂𑀲𑀺𑀢𑀸𑀬 𑀅𑀢𑁆𑀢𑀲𑀼𑀜𑁆𑀜𑀢𑀸𑀬 𑀅𑀢𑁆𑀢𑀦𑁄 𑀅𑀭𑀼𑀘𑁆𑀘𑀦𑀪𑀸𑀯𑀤𑀻𑀧𑀦𑀁. 𑀪𑁄𑀢𑀺 𑀥𑀫𑁆𑀫𑀸𑀮𑀧𑀦𑀁. 𑀅𑀦𑀢𑁆𑀢𑀓𑀢𑀸𑀦𑀻𑀢𑀺 𑀅𑀢𑁆𑀢𑀦𑀸 𑀦 𑀓𑀢𑀸𑀦𑀺, 𑀅𑀦𑀢𑁆𑀢𑀓𑁂𑀳𑀺 𑀯𑀸 𑀔𑀦𑁆𑀥𑁂𑀳𑀺 𑀓𑀢𑀸𑀦𑀺. 𑀓𑀫𑀢𑁆𑀢𑀸𑀦𑀁 𑀨𑀼𑀲𑀺𑀲𑁆𑀲𑀦𑁆𑀢𑀻𑀢𑀺 𑀅𑀲𑀢𑀺 𑀅𑀢𑁆𑀢𑀦𑀺 ¶ 𑀔𑀦𑁆𑀥𑀸𑀦𑀜𑁆𑀘 𑀔𑀡𑀺𑀓𑀢𑁆𑀢𑀸 𑀓𑀫𑁆𑀫𑀸𑀦𑀺 𑀓𑀁 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑁄 𑀨𑀮𑁂𑀦 𑀨𑀼𑀲𑀺𑀲𑁆𑀲𑀦𑁆𑀢𑀺, 𑀓𑁄 𑀓𑀫𑁆𑀫𑀨𑀮𑀁 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀯𑀺𑀤𑁆𑀯𑀸𑀢𑀺 𑀲𑀼𑀢𑀸𑀤𑀺𑀯𑀺𑀭𑀳𑁂𑀦 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑀢𑀸𑀬 𑀦 𑀯𑀺𑀤𑁆𑀯𑀸. 𑀅𑀯𑀺𑀚𑁆𑀚𑀸𑀕𑀢𑁄𑀢𑀺 𑀅𑀯𑀺𑀚𑁆𑀚𑀸𑀬 𑀉𑀧𑀕𑀢𑁄, 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑀢𑀸𑀬 𑀅𑀧𑁆𑀧𑀳𑀻𑀦𑀸𑀯𑀺𑀚𑁆𑀚𑁄𑀢𑀺 𑀅𑀢𑁆𑀣𑁄. 𑀢𑀡𑁆𑀳𑀸𑀥𑀺𑀧𑀢𑁂𑀬𑁆𑀬𑁂𑀦 𑀘𑁂𑀢𑀲𑀸𑀢𑀺 ‘‘𑀬𑀤𑀺 𑀅𑀳𑀁 𑀦𑀸𑀫 𑀓𑁄𑀘𑀺 𑀦𑀢𑁆𑀣𑀺 ¶ , 𑀫𑀬𑀸 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑁄 𑀨𑀮𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀲𑀢𑀺 𑀧𑀦 𑀢𑀲𑁆𑀫𑀺𑀁 𑀲𑀺𑀬𑀸 𑀨𑀮𑀽𑀧𑀪𑁄𑀕𑁄’’𑀢𑀺 𑀢𑀡𑁆𑀳𑀸𑀥𑀺𑀧𑀢𑀺𑀢𑁄 𑀆𑀕𑀢𑁄 𑀢𑀡𑁆𑀳𑀸𑀥𑀺𑀧𑀢𑁂𑀬𑁆𑀬𑁄, 𑀢𑁂𑀦. 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀲𑀳𑀕𑀢 𑀘𑁂𑀢𑀲𑀸. 𑀅𑀢𑀺𑀥𑀸𑀯𑀺𑀢𑀩𑁆𑀩𑀦𑁆𑀢𑀺 𑀔𑀡𑀺𑀓𑀢𑁆𑀢𑁂𑀧𑀺 𑀲𑀗𑁆𑀔𑀸𑀭𑀸𑀦𑀁 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀓𑀫𑁆𑀫𑀁 𑀓𑀢𑀁, 𑀢𑀢𑁆𑀣𑁂𑀯 𑀨𑀮𑀼𑀧𑁆𑀧𑀢𑁆𑀢𑀺𑀢𑁄 𑀥𑀫𑁆𑀫𑀧𑀼𑀜𑁆𑀚𑀫𑀢𑁆𑀢𑀲𑁆𑀲𑁂𑀯 𑀘 𑀲𑀺𑀤𑁆𑀥𑁂 𑀓𑀫𑁆𑀫𑀨𑀮𑀲𑀫𑁆𑀩𑀦𑁆𑀥𑁂 𑀏𑀓𑀢𑁆𑀢𑀦𑀬𑀁 𑀫𑀺𑀘𑁆𑀙𑀸 𑀕𑀳𑁂𑀢𑁆𑀯𑀸 𑀏𑀓𑁂𑀦 𑀓𑀸𑀭𑀓𑀯𑁂𑀤𑀓𑀪𑀽𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 ‘‘𑀓𑀫𑁆𑀫𑀨𑀮𑀸𑀦𑀁 𑀲𑀫𑁆𑀩𑀦𑁆𑀥𑁄 𑀦 𑀲𑀺𑀬𑀸’’𑀢𑀺 𑀅𑀢𑁆𑀢𑀢𑁆𑀢𑀦𑀺𑀬𑀲𑀼𑀜𑁆𑀜𑀢𑀸𑀧𑀓𑀸𑀲𑀦𑀁 𑀲𑀢𑁆𑀣𑀼𑀲𑀸𑀲𑀦𑀁 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

‘‘𑀉𑀧𑀭𑀺 𑀙 𑀅𑀪𑀺𑀜𑁆𑀜𑀸 𑀆𑀕𑀢𑀸’’𑀢𑀺 𑀅𑀦𑀼𑀭𑀽𑀧𑀥𑀫𑁆𑀫𑀯𑀲𑁂𑀦 𑀬𑀣𑀸𑀦𑀼𑀲𑀦𑁆𑀥𑀺𑀁 𑀤𑀲𑁆𑀲𑁂𑀢𑀺, 𑀇𑀢𑀭𑁂𑀳𑀺 𑀧𑀝𑀺𑀧𑀓𑁆𑀔𑀯𑀲𑁂𑀦. 𑀓𑀺𑀮𑁂𑀲𑁂𑀦𑀸𑀢𑀺 ‘‘𑀮𑁄𑀪𑁄 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄’’𑀢𑀺𑀆𑀤𑀺𑀦𑀸 𑀓𑀺𑀮𑁂𑀲𑀯𑀲𑁂𑀦. 𑀇𑀫𑀲𑁆𑀫𑀺𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀬𑀣𑀸 𑀯𑀼𑀢𑁆𑀢𑀲𑀼𑀢𑁆𑀢𑀸𑀤𑀻𑀲𑀼 𑀧𑀝𑀺𑀧𑀓𑁆𑀔𑀯𑀲𑁂𑀦 𑀬𑀣𑀸𑀦𑀼𑀲𑀦𑁆𑀥𑀺, 𑀏𑀯𑀁 𑀇𑀫𑀲𑁆𑀫𑀺𑀫𑁆𑀧𑀺 ¶ 𑀲𑀼𑀢𑁆𑀢𑁂𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺 𑀦𑀺𑀘𑁆𑀘𑀲𑀸𑀭𑀸𑀤𑀺𑀧𑀜𑁆𑀜𑀸𑀧𑀓𑀸𑀦𑀁 𑀤𑀺𑀝𑁆𑀞𑀺𑀕𑀢𑀸𑀦𑀁 𑀯𑀲𑁂𑀦 𑀉𑀝𑁆𑀞𑀺𑀢𑀸 𑀅𑀬𑀁 𑀤𑁂𑀲𑀦𑀸 𑀦𑀺𑀘𑁆𑀘𑀲𑀸𑀭𑀸𑀤𑀺𑀲𑀼𑀜𑁆𑀜𑀢𑀸𑀧𑀓𑀸𑀲𑀦𑁂𑀦 𑀦𑀺𑀝𑁆𑀞𑀸𑀧𑀺𑀢𑀸𑀢𑀺.

𑀧𑀭𑀺𑀢𑀲𑁆𑀲𑀺𑀢𑀯𑀺𑀧𑁆𑀨𑀦𑁆𑀤𑀺𑀢𑀯𑀸𑀭𑀯𑀡𑁆𑀡𑀦𑀸

𑁧𑁦𑁫-𑁧𑁧𑁭. 𑀫𑀭𑀺𑀬𑀸𑀤𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀲𑀲𑁆𑀲𑀢𑀸𑀤𑀺𑀤𑀺𑀝𑁆𑀞𑀺𑀤𑀲𑁆𑀲𑀦𑀲𑁆𑀲 𑀲𑀫𑁆𑀫𑀸𑀤𑀲𑁆𑀲𑀦𑁂𑀦 𑀲𑀗𑁆𑀓𑀭𑀸𑀪𑀸𑀯𑀯𑀺𑀪𑀸𑀯𑀦𑀢𑁆𑀣𑀁. 𑀢𑀤𑀧𑀺 𑀯𑁂𑀤𑀬𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀚𑀸𑀦𑀢𑀁 𑀅𑀧𑀲𑁆𑀲𑀢𑀦𑁆𑀢𑀺 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 ‘‘𑀇𑀤𑀁 𑀤𑀺𑀝𑁆𑀞𑀺𑀝𑁆𑀞𑀸𑀦𑀁 𑀏𑀯𑀁𑀕𑀳𑀺𑀓𑀁 𑀏𑀯𑀁𑀧𑀭𑀸𑀫𑀝𑁆𑀞𑀁 𑀏𑀯𑀁𑀕𑀳𑀺𑀢𑀁 𑀳𑁄𑀢𑀺 𑀏𑀯𑀁𑀅𑀪𑀺𑀲𑀫𑁆𑀧𑀭𑀸𑀬’’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀅𑀚𑀸𑀦𑀦𑁆𑀢𑀸𑀦𑀁 𑀅𑀧𑀲𑁆𑀲𑀦𑁆𑀢𑀸𑀦𑀁. 𑀢𑀣𑀸 𑀬𑀲𑁆𑀫𑀺𑀁 𑀯𑁂𑀤𑀬𑀺𑀢𑁂 𑀅𑀯𑀻𑀢𑀢𑀡𑁆𑀳𑀢𑀸𑀬 𑀏𑀯𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑀸𑀤𑀺𑀬𑀦𑁆𑀢𑀺, 𑀢𑀁 𑀯𑁂𑀤𑀬𑀺𑀢𑀁 𑀲𑀫𑀼𑀤𑀬𑀸𑀤𑀺𑀢𑁄 𑀬𑀣𑀸𑀪𑀽𑀢𑀁 𑀅𑀚𑀸𑀦𑀦𑁆𑀢𑀸𑀦𑀁 𑀅𑀧𑀲𑁆𑀲𑀦𑁆𑀢𑀸𑀦𑀁, 𑀏𑀢𑁂𑀦 𑀅𑀦𑀸𑀯𑀭𑀡𑀜𑀸𑀡𑀲𑀫𑀦𑁆𑀢𑀘𑀓𑁆𑀔𑀽𑀳𑀺 𑀬𑀣𑀸 𑀢𑀣𑀸𑀕𑀢𑀸𑀦𑀁 𑀬𑀣𑀸𑀪𑀽𑀢𑀫𑁂𑀢𑁆𑀣 𑀜𑀸𑀡𑀤𑀲𑁆𑀲𑀦𑀁, 𑀦 𑀏𑀯𑀁 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁, 𑀅𑀣 𑀔𑁄 𑀢𑀡𑁆𑀳𑀸𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑁄𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯 𑀘𑀸𑀬𑀁 𑀤𑁂𑀲𑀦𑀸 𑀫𑀭𑀺𑀬𑀸𑀤𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀸 𑀚𑀸𑀢𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀬𑀣𑀸𑀪𑀽𑀢𑀁 𑀥𑀫𑁆𑀫𑀸𑀦𑀁 ¶ 𑀲𑀪𑀸𑀯𑀁 𑀅𑀚𑀸𑀦𑀦𑁆𑀢𑀸𑀦𑀁 𑀅𑀧𑀲𑁆𑀲𑀦𑁆𑀢𑀸𑀦’’𑀦𑁆𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁. 𑀦 𑀳𑀺 𑀲𑀗𑁆𑀔𑀢𑀥𑀫𑁆𑀫𑀲𑀪𑀸𑀯𑀁 𑀅𑀚𑀸𑀦𑀦𑀫𑀢𑁆𑀢𑁂𑀦 𑀫𑀺𑀘𑁆𑀙𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑀻𑀢𑀺. 𑀲𑀸𑀫𑀜𑁆𑀜𑀚𑁄𑀢𑀦𑀸 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀻𑀢𑀺 𑀅𑀬𑀁 𑀯𑀺𑀲𑁂𑀲𑀬𑁄𑀚𑀦𑀸 𑀓𑀢𑀸. 𑀯𑁂𑀤𑀬𑀺𑀢𑀦𑁆𑀢𑀺 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀤𑀺𑀝𑁆𑀞𑀺𑀧𑀜𑁆𑀜𑀸𑀧𑀦𑀯𑀲𑁂𑀦 𑀧𑀯𑀢𑁆𑀢𑀁 𑀤𑀺𑀝𑁆𑀞𑀺𑀬𑀸 𑀅𑀦𑀼𑀪𑀽𑀢𑀁 𑀅𑀦𑀼𑀪𑀯𑀦𑀁. 𑀢𑀡𑁆𑀳𑀸𑀕𑀢𑀸𑀦𑀦𑁆𑀢𑀺 𑀢𑀡𑁆𑀳𑀸𑀬 𑀕𑀢𑀸𑀦𑀁 𑀉𑀧𑀕𑀢𑀸𑀦𑀁, 𑀧𑀯𑀢𑁆𑀢𑀸𑀦𑀁 𑀯𑀸. 𑀢𑀜𑁆𑀘 𑀔𑁄 𑀧𑀦𑁂𑀢𑀦𑁆𑀢𑀺 𑀘 𑀬𑀣𑀸𑀯𑀼𑀢𑁆𑀢𑀁 𑀯𑁂𑀤𑀬𑀺𑀢𑀁 𑀧𑀘𑁆𑀘𑀸𑀫𑀲𑀢𑀺. 𑀢𑀜𑁆𑀳𑀺 𑀯𑀝𑁆𑀝𑀸𑀫𑀺𑀲𑀪𑀽𑀢𑀁 𑀤𑀺𑀝𑁆𑀞𑀺𑀢𑀡𑁆𑀳𑀸𑀲𑀮𑁆𑀮𑀸𑀦𑀼𑀯𑀺𑀤𑁆𑀥𑀢𑀸𑀬 𑀲𑀉𑀩𑁆𑀩𑀺𑀮𑀢𑁆𑀢𑀸 𑀘𑀜𑁆𑀘𑀮𑀁, 𑀦 𑀫𑀕𑁆𑀕𑀨𑀮𑀲𑀼𑀔𑀁 𑀯𑀺𑀬 𑀏𑀓𑀭𑀽𑀧𑁂𑀦 𑀅𑀯𑀢𑀺𑀝𑁆𑀞𑀢𑀻𑀢𑀺. 𑀢𑁂𑀦𑁂𑀯𑀸𑀳 ‘‘𑀧𑀭𑀺𑀢𑀲𑁆𑀲𑀺𑀢𑁂𑀦𑀸’’𑀢𑀺𑀆𑀤𑀺.

𑀅𑀣 ¶ 𑀯𑀸 𑀏𑀯𑀁 𑀯𑀺𑀲𑁂𑀲𑀓𑀸𑀭𑀡𑀢𑁄 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀅𑀯𑀺𑀲𑁂𑀲𑀓𑀸𑀭𑀡𑀢𑁄 𑀢𑀸𑀦𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀭 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀓𑀸 𑀤𑁂𑀲𑀦𑀸 𑀆𑀭𑀤𑁆𑀥𑀸. 𑀲𑀩𑁆𑀩𑁂𑀲𑀜𑁆𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀯𑁂𑀤𑀦𑀸 𑀅𑀯𑀺𑀚𑁆𑀚𑀸 𑀢𑀡𑁆𑀳𑀸 𑀘 𑀅𑀯𑀺𑀲𑀺𑀝𑁆𑀞𑀓𑀸𑀭𑀦𑁆𑀢𑀺. 𑀢𑀢𑁆𑀣 𑀢𑀤𑀧𑀻𑀢𑀺 ‘‘𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀺’’𑀢𑀺 𑀏𑀢𑁆𑀣 𑀬𑀤𑁂𑀢𑀁 ¶ ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀧𑀜𑁆𑀜𑀸𑀧𑀦𑀁, 𑀢𑀤𑀧𑀺. 𑀲𑀼𑀔𑀸𑀤𑀺𑀪𑁂𑀤𑀁 𑀢𑀺𑀯𑀺𑀥𑀯𑁂𑀤𑀬𑀺𑀢𑀁 𑀬𑀣𑀸𑀓𑁆𑀓𑀫𑀁 𑀤𑀼𑀓𑁆𑀔𑀲𑀮𑁆𑀮𑀸𑀦𑀺𑀘𑁆𑀘𑀢𑁄, 𑀅𑀯𑀺𑀲𑁂𑀲𑁂𑀦 𑀲𑀫𑀼𑀤𑀬𑀢𑁆𑀣𑀗𑁆𑀕𑀫𑀲𑁆𑀲𑀸𑀤𑀸𑀤𑀻𑀦𑀯𑀦𑀺𑀲𑁆𑀲𑀭𑀡𑀢𑁄 𑀯𑀸 𑀬𑀣𑀸𑀪𑀽𑀢𑀁 𑀅𑀚𑀸𑀦𑀦𑁆𑀢𑀸𑀦𑀁 𑀅𑀧𑀲𑁆𑀲𑀦𑁆𑀢𑀸𑀦𑀁, 𑀢𑀢𑁄 𑀏𑀯 𑀘 𑀲𑀼𑀔𑀸𑀤𑀺𑀧𑀢𑁆𑀣𑀦𑀸𑀲𑀫𑁆𑀪𑀯𑀢𑁄 𑀢𑀡𑁆𑀳𑀸𑀬 𑀉𑀧𑀕𑀢𑀢𑁆𑀢𑀸 𑀢𑀡𑁆𑀳𑀸𑀕𑀢𑀸𑀦𑀁 𑀢𑀡𑁆𑀳𑀸𑀧𑀭𑀺𑀢𑀲𑁆𑀲𑀺𑀢𑁂𑀦 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀫𑁂𑀯 𑀤𑀺𑀝𑁆𑀞𑀺𑀘𑀮𑀦𑀫𑁂𑀯, ‘‘𑀅𑀲𑀢𑀺 𑀅𑀢𑁆𑀢𑀦𑀺 𑀓𑁄 𑀯𑁂𑀤𑀦𑀁 𑀅𑀦𑀼𑀪𑀯𑀢𑀻’’𑀢𑀺 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀤𑀺𑀝𑁆𑀞𑀺𑀬𑀸 𑀘𑁄𑀧𑀦𑀧𑁆𑀧𑀢𑁆𑀢𑀺𑀫𑀢𑁆𑀢𑀫𑁂𑀯 𑀯𑀸, 𑀦 𑀧𑀦 𑀤𑀺𑀝𑁆𑀞𑀺𑀬𑀸 𑀧𑀜𑁆𑀜𑀸𑀧𑁂𑀢𑀩𑁆𑀩𑁄 𑀲𑀲𑁆𑀲𑀢𑁄 𑀓𑁄𑀘𑀺 𑀥𑀫𑁆𑀫𑁄 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀨𑀲𑁆𑀲𑀧𑀘𑁆𑀘𑀬𑀯𑀸𑀭𑀯𑀡𑁆𑀡𑀦𑀸

𑁧𑁧𑁮. 𑀬𑁂𑀦 𑀢𑀡𑁆𑀳𑀸𑀧𑀭𑀺𑀢𑀲𑁆𑀲𑀺𑀢𑁂𑀦 𑀏𑀢𑀸𑀦𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀲 𑀯𑁂𑀤𑀬𑀺𑀢𑀁 𑀧𑀘𑁆𑀘𑀬𑁄, 𑀯𑁂𑀤𑀬𑀺𑀢𑀲𑁆𑀲𑀸𑀧𑀺 𑀨𑀲𑁆𑀲𑁄 𑀧𑀘𑁆𑀘𑀬𑁄𑀢𑀺 𑀤𑁂𑀲𑀦𑀸 𑀤𑀺𑀝𑁆𑀞𑀺𑀬𑀸 𑀧𑀘𑁆𑀘𑀬𑀧𑀭𑀫𑁆𑀧𑀭𑀦𑀺𑀤𑁆𑀥𑀸𑀭𑀡𑀦𑁆𑀢𑀺 𑀆𑀳 ‘‘𑀧𑀭𑀫𑁆𑀧𑀭𑀧𑀘𑁆𑀘𑀬𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺, 𑀢𑁂𑀦 𑀬𑀣𑀸 𑀧𑀜𑁆𑀜𑀸𑀧𑀦𑀥𑀫𑁆𑀫𑁄 𑀤𑀺𑀝𑁆𑀞𑀺, 𑀢𑀧𑁆𑀧𑀘𑁆𑀘𑀬𑀥𑀫𑁆𑀫𑀸 𑀘 𑀬𑀣𑀸𑀲𑀓𑀁 𑀧𑀘𑁆𑀘𑀬𑀯𑀲𑁂𑀦𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀧𑀘𑁆𑀘𑀬𑁂𑀳𑀺 𑀯𑀺𑀦𑀸, 𑀏𑀯𑀁 𑀧𑀜𑁆𑀜𑀸𑀧𑁂𑀢𑀩𑁆𑀩𑀸 𑀥𑀫𑁆𑀫𑀸𑀧𑀺 𑀭𑀽𑀧𑀯𑁂𑀤𑀦𑀸𑀤𑀬𑁄, 𑀦 𑀏𑀢𑁆𑀣 𑀓𑁄𑀘𑀺 𑀅𑀢𑁆𑀢𑀸 𑀯𑀸 𑀮𑁄𑀓𑁄 𑀯𑀸 𑀲𑀲𑁆𑀲𑀢𑁄𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀦𑁂𑀢𑀁𑀞𑀸𑀦𑀁𑀯𑀺𑀚𑁆𑀚𑀢𑀺𑀯𑀸𑀭𑀯𑀡𑁆𑀡𑀦𑀸

𑁧𑁩𑁧. 𑀢𑀲𑁆𑀲 ¶ 𑀧𑀘𑁆𑀘𑀬𑀲𑁆𑀲𑀸𑀢𑀺 𑀨𑀲𑁆𑀲𑀧𑀘𑁆𑀘𑀬𑀲𑁆𑀲 𑀤𑀺𑀝𑁆𑀞𑀺𑀯𑁂𑀤𑀬𑀺𑀢𑁂𑀢𑀺 𑀤𑀺𑀝𑁆𑀞𑀺𑀬𑀸 𑀧𑀘𑁆𑀘𑀬𑀪𑀽𑀢𑁂 𑀯𑁂𑀤𑀬𑀺𑀢𑁂, 𑀨𑀲𑁆𑀲𑀧𑀥𑀸𑀦𑁂𑀳𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂𑀢𑀺 𑀅𑀢𑁆𑀣𑁄. 𑀯𑀺𑀦𑀸𑀧𑀺 𑀘𑀓𑁆𑀔𑀸𑀤𑀺𑀯𑀢𑁆𑀣𑀽𑀳𑀺, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺 𑀘 𑀓𑁂𑀳𑀺𑀘𑀺 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀦 𑀧𑀦 𑀓𑀤𑀸𑀘𑀺 𑀨𑀲𑁆𑀲𑁂𑀦 𑀯𑀺𑀦𑀸𑀢𑀺 𑀨𑀲𑁆𑀲𑁄 𑀯𑁂𑀤𑀦𑀸𑀬 𑀩𑀮𑀯𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀩𑀮𑀯𑀪𑀸𑀯𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺. 𑀲𑀦𑁆𑀦𑀺𑀳𑀺𑀢𑁄𑀧𑀺 𑀳𑀺 𑀯𑀺𑀲𑀬𑁄 𑀲𑀘𑁂 𑀨𑀼𑀲𑀦𑀸𑀓𑀸𑀭𑀭𑀳𑀺𑀢𑁄 𑀳𑁄𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄, 𑀦 𑀢𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀨𑀲𑁆𑀲𑁄𑀯 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑀧𑀘𑁆𑀘𑀬𑁄. 𑀢𑀣𑀸 𑀳𑀺 𑀪𑀕𑀯𑀢𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀁 𑀯𑀺𑀪𑀚𑀦𑁆𑀢𑁂𑀦 𑀨𑀲𑁆𑀲𑁄𑀬𑁂𑀯 𑀧𑀞𑀫𑀁 𑀉𑀤𑁆𑀥𑀝𑁄, 𑀯𑁂𑀤𑀦𑀸𑀬 𑀧𑀦 𑀅𑀥𑀺𑀝𑁆𑀞𑀸𑀦𑀫𑁂𑀯.

𑀤𑀺𑀝𑁆𑀞𑀺𑀕𑀢𑀺𑀓𑀸𑀥𑀺𑀝𑁆𑀞𑀸𑀦𑀯𑀝𑁆𑀝𑀓𑀣𑀸𑀯𑀡𑁆𑀡𑀦𑀸

𑁧𑁪𑁪. 𑀳𑁂𑀝𑁆𑀞𑀸 ¶ 𑀢𑀻𑀲𑀼𑀧𑀺 𑀯𑀸𑀭𑁂𑀲𑀼 𑀅𑀥𑀺𑀓𑀢𑀢𑁆𑀢𑀸, 𑀉𑀧𑀭𑀺 𑀘 ‘‘𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀻’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀯𑁂𑀤𑀬𑀺𑀢𑀫𑁂𑀢𑁆𑀣 𑀧𑀥𑀸𑀦𑀦𑁆𑀢𑀺 𑀆𑀳 ‘‘𑀲𑀩𑁆𑀩𑀤𑀺𑀝𑁆𑀞𑀺𑀯𑁂𑀤𑀬𑀺𑀢𑀸𑀦𑀺 𑀲𑀫𑁆𑀧𑀺𑀡𑁆𑀟𑁂𑀢𑀻’’𑀢𑀺. 𑀲𑀫𑁆𑀧𑀺𑀡𑁆𑀟𑁂𑀢𑀻𑀢𑀺 𑀘 ‘‘𑀬𑁂𑀧𑀺 𑀢𑁂’’𑀢𑀺 𑀢𑀢𑁆𑀣 𑀢𑀢𑁆𑀣 𑀆𑀕𑀢𑀲𑁆𑀲 𑀧𑀺-𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀯𑁂𑀤𑀬𑀺𑀢𑀲𑁆𑀲 𑀨𑀲𑁆𑀲𑁂 𑀧𑀓𑁆𑀔𑀺𑀧𑀦𑀁 𑀨𑀲𑁆𑀲𑀧𑀘𑁆𑀘𑀬𑀢𑀸𑀤𑀲𑁆𑀲𑀦𑀫𑁂𑀯 ‘‘𑀙𑀳𑀺 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑁂𑀳𑀺 ¶ 𑀙𑀴𑀸𑀭𑀫𑁆𑀫𑀡𑀧𑀝𑀺𑀲𑀁𑀯𑁂𑀤𑀦𑀁 𑀏𑀓𑀦𑁆𑀢𑀢𑁄 𑀙𑀨𑀲𑁆𑀲𑀳𑁂𑀢𑀼𑀓𑀫𑁂𑀯𑀸’’𑀢𑀺. 𑀲𑀜𑁆𑀚𑀸𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀅𑀥𑀺𑀓𑀭𑀡𑀢𑁆𑀣𑁄 𑀲𑀜𑁆𑀚𑀸𑀢𑀺-𑀲𑀤𑁆𑀤𑁄𑀢𑀺 𑀆𑀳 ‘‘𑀲𑀜𑁆𑀚𑀸𑀢𑀺𑀝𑁆𑀞𑀸𑀦𑁂’’𑀢𑀺. 𑀏𑀯𑀁 𑀲𑀫𑁄𑀲𑀭𑀡𑀲𑀤𑁆𑀤𑁄𑀧𑀺 𑀤𑀝𑁆𑀞𑀩𑁆𑀩𑁄. 𑀆𑀬𑀢𑀢𑀺 𑀏𑀢𑁆𑀣 𑀨𑀮𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬, 𑀆𑀬𑀪𑀽𑀢𑀁 𑀯𑀸 𑀅𑀢𑁆𑀢𑀦𑁄 𑀨𑀮𑀁 𑀢𑀦𑁄𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀆𑀬𑀢𑀦𑀁, 𑀓𑀸𑀭𑀡𑀁. 𑀭𑀼𑀓𑁆𑀔𑀕𑀘𑁆𑀙𑀲𑀫𑀽𑀳𑁂 𑀅𑀭𑀜𑁆𑀜𑀯𑁄𑀳𑀸𑀭𑁄 𑀅𑀭𑀜𑁆𑀜𑀫𑁂𑀯 𑀅𑀭𑀜𑁆𑀜𑀸𑀬𑀢𑀦𑀦𑁆𑀢𑀺 𑀆𑀳 ‘‘𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑁂’’𑀢𑀺. 𑀅𑀢𑁆𑀣𑀢𑁆𑀢𑀬𑁂𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀅𑀯𑀼𑀢𑁆𑀢𑀢𑁆𑀣𑀲𑀫𑁆𑀧𑀺𑀡𑁆𑀟𑀦𑀁 𑀤𑀝𑁆𑀞𑀩𑁆𑀩𑀁, 𑀢𑁂𑀦 𑀆𑀓𑀸𑀭𑀦𑀺𑀯𑀸𑀲𑀸𑀥𑀺𑀝𑁆𑀞𑀸𑀦𑀢𑁆𑀣𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀳𑀺𑀭𑀜𑁆𑀜𑀸𑀬𑀢𑀦𑀁 𑀲𑀼𑀯𑀡𑁆𑀡𑀸𑀬𑀢𑀦𑀁, 𑀯𑀸𑀲𑀼𑀤𑁂𑀯𑀸𑀬𑀢𑀦𑀁 𑀓𑀫𑁆𑀫𑀸𑀬𑀢𑀦𑀦𑁆𑀢𑀺 𑀆𑀤𑀻𑀲𑀼 𑀆𑀓𑀭𑀦𑀺𑀯𑀸𑀲𑀸𑀥𑀺𑀝𑁆𑀞𑀸𑀦𑁂𑀲𑀼 𑀆𑀬𑀢𑀦𑀲𑀤𑁆𑀤𑁄. 𑀘𑀓𑁆𑀔𑀸𑀤𑀻𑀲𑀼 𑀘 𑀨𑀲𑁆𑀲𑀸𑀤𑀬𑁄 𑀆𑀓𑀺𑀡𑁆𑀡𑀸, 𑀢𑀸𑀦𑀺 𑀘 𑀦𑁂𑀲𑀁 𑀦𑀺𑀯𑀸𑀲𑁄, 𑀅𑀥𑀺𑀝𑁆𑀞𑀸𑀦𑀜𑁆𑀘 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑀢𑁄𑀢𑀺. 𑀢𑀺𑀡𑁆𑀡𑀫𑁆𑀧𑀺 𑀯𑀺𑀲𑀬𑀺𑀦𑁆𑀤𑁆𑀭𑀺𑀬𑀯𑀺𑀜𑁆𑀜𑀸𑀡𑀸𑀦𑀁 𑀲𑀗𑁆𑀕𑀢𑀺𑀪𑀸𑀯𑁂𑀦 𑀕𑀳𑁂𑀢𑀩𑁆𑀩𑁄 𑀨𑀲𑁆𑀲𑁄𑀢𑀺 ‘‘𑀲𑀗𑁆𑀕𑀢𑀻’’𑀢𑀺 𑀯𑀼𑀢𑁆𑀢𑁄. 𑀢𑀣𑀸 𑀳𑀺 𑀲𑁄 ‘‘𑀲𑀦𑁆𑀦𑀺𑀧𑀸𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑁄’’𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀺𑀦𑀸 𑀦𑀬𑁂𑀦𑀸𑀢𑀺 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀅𑀜𑁆𑀜𑁂𑀲𑀼 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀬𑀣𑀸 ‘‘𑀘𑀓𑁆𑀔𑀼𑀜𑁆𑀘…𑀧𑁂… 𑀨𑀲𑁆𑀲𑁄’’𑀢𑀺 ¶ (𑀫. 𑀦𑀺. 𑁧.𑁨𑁦𑁪; 𑀫. 𑀦𑀺. 𑁩.𑁪𑁨𑁧, 𑁪𑁨𑁫, 𑁪𑁨𑁬; 𑀲𑀁. 𑀦𑀺. 𑁨.𑁪𑁩-𑁪𑁫; 𑀲𑀁. 𑀦𑀺. 𑁪.𑁬𑁦; 𑀓𑀣𑀸. 𑁪𑁬𑁫) 𑀏𑀢𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑁂𑀤𑀦𑀸𑀬 𑀧𑀥𑀸𑀦𑀓𑀸𑀭𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀨𑀲𑁆𑀲𑀲𑀻𑀲𑁂𑀦 𑀤𑁂𑀲𑀦𑀸 𑀓𑀢𑀸, 𑀏𑀯𑀫𑀺𑀥𑀸𑀧𑀺 𑀩𑁆𑀭𑀳𑁆𑀫𑀚𑀸𑀮𑁂 ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺𑀆𑀤𑀺𑀦𑀸 𑀨𑀲𑁆𑀲𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀧𑀭𑀦𑁆𑀢𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑀻𑀧𑀦𑁂𑀦 𑀧𑀘𑁆𑀘𑀬𑀧𑀭𑀫𑁆𑀧𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀨𑀲𑁆𑀲𑀸𑀬𑀢𑀦𑁂𑀳𑀺 𑀨𑀼𑀲𑁆𑀲 𑀨𑀼𑀲𑁆𑀲𑀸’’𑀢𑀺 𑀨𑀲𑁆𑀲𑀫𑀼𑀔𑁂𑀦 𑀯𑀼𑀢𑁆𑀢𑀁.

𑀨𑀲𑁆𑀲𑁄 𑀅𑀭𑀽𑀧𑀥𑀫𑁆𑀫𑁄𑀧𑀺 𑀲𑀫𑀸𑀦𑁄 𑀏𑀓𑀤𑁂𑀲𑁂𑀦 𑀆𑀭𑀫𑁆𑀫𑀡𑁂 𑀅𑀦𑀮𑁆𑀮𑀻𑀬𑀫𑀸𑀦𑁄𑀧𑀺 𑀨𑀼𑀲𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀢𑀺 𑀨𑀼𑀲𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀨𑀲𑁆𑀲𑁄𑀯 𑀢𑀁 𑀢𑀁 𑀆𑀭𑀫𑁆𑀫𑀡𑀁 𑀨𑀼𑀲𑀢𑀻’’𑀢𑀺, 𑀬𑁂𑀦 𑀲𑁄 ‘‘𑀨𑀼𑀲𑀦𑀮𑀓𑁆𑀔𑀡𑁄, 𑀲𑀗𑁆𑀖𑀝𑁆𑀝𑀦𑀭𑀲𑁄’’𑀢𑀺 𑀘 ¶ 𑀯𑀼𑀘𑁆𑀘𑀢𑀺. ‘‘𑀨𑀲𑁆𑀲𑀸𑀬𑀢𑀦𑁂𑀳𑀺 𑀨𑀼𑀲𑁆𑀲 𑀨𑀼𑀲𑁆𑀲𑀸’’𑀢𑀺 𑀅𑀨𑀼𑀲𑀦𑀓𑀺𑀘𑁆𑀘𑀸𑀦𑀺𑀧𑀺 𑀆𑀬𑀢𑀦𑀸𑀦𑀺 ‘‘𑀫𑀜𑁆𑀘𑀸 𑀖𑁄𑀲𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀦𑀺𑀲𑁆𑀲𑀺𑀢𑀯𑁄𑀳𑀸𑀭𑁂𑀦 𑀨𑀼𑀲𑀦𑀓𑀺𑀘𑁆𑀘𑀸𑀦𑀺 𑀓𑀢𑁆𑀯𑀸 𑀤𑀲𑁆𑀲𑀺𑀢𑀸𑀦𑀻𑀢𑀺 𑀆𑀳 ‘‘𑀨𑀲𑁆𑀲𑁂 𑀉𑀧𑀦𑀺𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺, 𑀨𑀲𑁆𑀲𑀕𑀢𑀺𑀓𑀸𑀦𑀺 𑀓𑀢𑁆𑀯𑀸 𑀨𑀲𑁆𑀲𑀽𑀧𑀘𑀸𑀭𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀉𑀧𑀘𑀸𑀭𑁄 𑀳𑀺 𑀦𑀸𑀫 𑀯𑁄𑀳𑀸𑀭𑀫𑀢𑁆𑀢𑀁, 𑀦 𑀢𑁂𑀦 𑀅𑀢𑁆𑀣𑀲𑀺𑀤𑁆𑀥𑀺 𑀳𑁄𑀢𑀻𑀢𑀺 𑀆𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺.

𑀅𑀢𑁆𑀢𑀦𑁄 ¶ 𑀧𑀘𑁆𑀘𑀬𑀪𑀽𑀢𑀸𑀦𑀁 𑀙𑀦𑁆𑀦𑀁 𑀨𑀲𑁆𑀲𑀸𑀦𑀁 𑀯𑀲𑁂𑀦 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀬𑀸𑀯 𑀫𑀦𑁄𑀲𑀫𑁆𑀨𑀲𑁆𑀲𑀚𑀸𑀢𑀺 𑀲𑀗𑁆𑀔𑁂𑀧𑀢𑁄 𑀙𑀩𑁆𑀩𑀺𑀥𑀸 𑀯𑁂𑀤𑀦𑀸, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀅𑀝𑁆𑀞𑀲𑀢𑀧𑀭𑀺𑀬𑀸𑀬𑁂𑀦 𑀅𑀝𑁆𑀞𑀲𑀢𑀪𑁂𑀤𑀸. 𑀭𑀽𑀧𑀢𑀡𑁆𑀳𑀸𑀤𑀺𑀪𑁂𑀤𑀸𑀬𑀸𑀢𑀺 𑀭𑀽𑀧𑀢𑀡𑁆𑀳𑀸 𑀬𑀸𑀯 𑀥𑀫𑁆𑀫𑀢𑀡𑁆𑀳𑀸𑀢𑀺 𑀲𑀗𑁆𑀔𑁂𑀧𑀢𑁄 𑀙𑀧𑁆𑀧𑀪𑁂𑀤𑀸𑀬, 𑀯𑀺𑀢𑁆𑀣𑀸𑀭𑀢𑁄 𑀅𑀝𑁆𑀞𑀲𑀢𑀪𑁂𑀤𑀸𑀬. 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸𑀢𑀺 𑀉𑀧𑀦𑀺𑀲𑁆𑀲𑀬𑀲𑀻𑀲𑁂𑀦. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀯 𑀉𑀤𑁆𑀥𑀝𑁄, 𑀦𑀦𑀼 𑀲𑀼𑀔𑀸 𑀯𑁂𑀤𑀦𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀘 𑀢𑀡𑁆𑀳𑀸𑀬 𑀆𑀭𑀫𑁆𑀫𑀡𑀫𑀢𑁆𑀢𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀧𑀓𑀢𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀘𑀢𑀼𑀥𑀸 𑀧𑀘𑁆𑀘𑀬𑁄, 𑀤𑀼𑀓𑁆𑀔𑀸 𑀘 𑀆𑀭𑀫𑁆𑀫𑀡𑀫𑀢𑁆𑀢𑀧𑀓𑀢𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀤𑁆𑀯𑀺𑀥𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀉𑀧𑀦𑀺𑀲𑁆𑀲𑀬𑁂 𑀏𑀯 𑀧𑀦 𑀢𑀁 𑀲𑀩𑁆𑀩𑀁 𑀅𑀦𑁆𑀢𑁄𑀕𑀥𑀁. 𑀬𑀼𑀢𑁆𑀢𑀁 𑀢𑀸𑀯 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀸𑀫𑀜𑁆𑀜𑀢𑁄 𑀉𑀧𑀦𑀺𑀲𑁆𑀲𑀬𑁂𑀦 𑀲𑀗𑁆𑀕𑀳𑁄, 𑀆𑀭𑀫𑁆𑀫𑀡𑀫𑀢𑁆𑀢𑀆𑀭𑀫𑁆𑀫𑀡𑀸𑀥𑀺𑀧𑀢𑀻𑀦𑀁 𑀧𑀦 𑀓𑀣𑀦𑁆𑀢𑀺? 𑀢𑁂𑀲𑀫𑁆𑀧𑀺 𑀆𑀭𑀫𑁆𑀫𑀡𑀲𑀸𑀫𑀜𑁆𑀜𑀢𑁄 𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁂𑀦 𑀲𑀗𑁆𑀕𑀳𑁄𑀯 𑀓𑀢𑁄, 𑀦 𑀧𑀓𑀢𑀽𑀧𑀦𑀺𑀲𑁆𑀲𑀬𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑀤𑀢𑁆𑀣𑀫𑁂𑀯𑁂𑀢𑁆𑀣 ‘‘𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸’’𑀢𑀺 𑀯𑀼𑀢𑁆𑀢𑀁, 𑀦 ‘‘𑀉𑀧𑀦𑀺𑀲𑁆𑀲𑀬𑁂𑀦𑀸’’𑀢𑀺.

𑀘𑀢𑀼𑀩𑁆𑀩𑀺𑀥𑀲𑁆𑀲𑀸𑀢𑀺 𑀓𑀸𑀫𑀼𑀧𑀸𑀤𑀸𑀦𑀁 𑀬𑀸𑀯 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀲𑁆𑀲. 𑀦𑀦𑀼 𑀘 𑀢𑀡𑁆𑀳𑀸𑀯 𑀓𑀸𑀫𑀼𑀧𑀸𑀤𑀸𑀦𑀦𑁆𑀢𑀺? 𑀲𑀘𑁆𑀘𑀫𑁂𑀢𑀁. 𑀢𑀢𑁆𑀣 𑀤𑀼𑀩𑁆𑀩𑀮𑀸 ¶ 𑀢𑀡𑁆𑀳𑀸 𑀢𑀡𑁆𑀳𑀸𑀯, 𑀩𑀮𑀯𑀢𑀻 ¶ 𑀢𑀡𑁆𑀳𑀸 𑀓𑀸𑀫𑀼𑀧𑀸𑀤𑀸𑀦𑀁. 𑀅𑀣 𑀯𑀸 𑀅𑀧𑁆𑀧𑀢𑁆𑀢𑀯𑀺𑀲𑀬𑀧𑀢𑁆𑀣𑀦𑀸 𑀢𑀡𑁆𑀳𑀸 𑀢𑀫𑀲𑀺 𑀘𑁄𑀭𑀸𑀦𑀁 𑀓𑀭𑀧𑀲𑀸𑀭𑀡𑀁 𑀯𑀺𑀬. 𑀲𑀫𑁆𑀧𑀢𑁆𑀢𑀯𑀺𑀲𑀬𑀕𑁆𑀕𑀳𑀡𑀁 𑀉𑀧𑀸𑀤𑀸𑀦𑀁, 𑀘𑁄𑀭𑀸𑀦𑀁 𑀓𑀭𑀧𑁆𑀧𑀢𑁆𑀢𑀥𑀦𑀕𑁆𑀕𑀳𑀡𑀁 𑀯𑀺𑀬. 𑀅𑀧𑁆𑀧𑀺𑀘𑁆𑀙𑀢𑀸𑀧𑀝𑀺𑀧𑀓𑁆𑀔𑀸 𑀢𑀡𑁆𑀳𑀸, 𑀲𑀦𑁆𑀢𑁄𑀲𑀧𑀝𑀺𑀧𑀓𑁆𑀔𑀸 𑀉𑀧𑀸𑀤𑀸𑀦𑀁. 𑀧𑀭𑀺𑀬𑁂𑀲𑀦𑀤𑀼𑀓𑁆𑀔𑀫𑀽𑀮𑀁 𑀢𑀡𑁆𑀳𑀸, 𑀆𑀭𑀓𑁆𑀔𑀤𑀼𑀓𑁆𑀔𑀫𑀽𑀮𑀁 𑀉𑀧𑀸𑀤𑀸𑀦𑀦𑁆𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀉𑀧𑀸𑀤𑀸𑀦𑀲𑁆𑀲𑀸𑀢𑀺 𑀅𑀲𑀳𑀚𑀸𑀢𑀲𑁆𑀲 𑀉𑀧𑀸𑀤𑀸𑀦𑀲𑁆𑀲 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸, 𑀇𑀢𑀭𑀲𑁆𑀲 𑀲𑀳𑀚𑀸𑀢𑀓𑁄𑀝𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀅𑀦𑀦𑁆𑀢𑀭𑀲𑁆𑀲 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀦𑀢𑁆𑀣𑀺𑀯𑀺𑀕𑀢𑀸𑀲𑁂𑀯𑀦𑀧𑀘𑁆𑀘𑀬𑁂𑀳𑀺, 𑀅𑀦𑀸𑀦𑀦𑁆𑀢𑀭𑀲𑁆𑀲 𑀉𑀧𑀦𑀺𑀲𑁆𑀲𑀬𑁂𑀦, 𑀆𑀭𑀫𑁆𑀫𑀡𑀪𑀽𑀢𑀸 𑀧𑀦 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀆𑀭𑀫𑁆𑀫𑀡𑀽𑀧𑀦𑀺𑀲𑁆𑀲𑀬𑁂𑀳𑀺, 𑀆𑀭𑀫𑁆𑀫𑀡𑀫𑀢𑁆𑀢𑁂𑀦𑁂𑀯 𑀯𑀸𑀢𑀺 𑀢𑀁 𑀲𑀩𑁆𑀩𑀁 𑀉𑀧𑀦𑀺𑀲𑁆𑀲𑀬𑁂𑀦𑁂𑀯 𑀕𑀳𑁂𑀢𑁆𑀯𑀸 ‘‘𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀘 𑀢𑀡𑁆𑀳𑀸𑀬 𑀭𑀽𑀧𑀸𑀤𑀻𑀦𑀺 𑀅𑀲𑁆𑀲𑀸𑀤𑁂𑀢𑁆𑀯𑀸 𑀓𑀸𑀫𑁂𑀲𑀼 𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀡𑁆𑀳𑀸 𑀓𑀸𑀫𑀼𑀧𑀸𑀤𑀸𑀦𑀲𑁆𑀲 𑀉𑀧𑀦𑀺𑀲𑁆𑀲𑀬𑁄. 𑀢𑀣𑀸 𑀭𑀽𑀧𑀸𑀤𑀺𑀪𑁂𑀤𑁂𑀯 𑀲𑀫𑁆𑀫𑀽𑀴𑁆𑀳𑁄 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁭𑁧; 𑀫. 𑀦𑀺. 𑁧.𑁪𑁪𑁫; 𑀫. 𑀦𑀺. 𑁨.𑁯𑁪, 𑁯𑁫, 𑁨𑁨𑁫; 𑀫. 𑀦𑀺. 𑁩.𑁯𑁧, 𑁧𑁧𑁬, 𑁧𑁩𑁬; 𑀲𑀁. 𑀦𑀺. 𑁩.𑁨𑁧𑁦; 𑀥. 𑀲. 𑁧𑁨𑁨𑁧; 𑀯𑀺𑀪. 𑁯𑁩𑁮) 𑀫𑀺𑀘𑁆𑀙𑀸𑀤𑀲𑁆𑀲𑀦𑀁, 𑀲𑀁𑀲𑀸𑀭𑀢𑁄 𑀫𑀼𑀘𑁆𑀘𑀺𑀢𑀼𑀓𑀸𑀫𑁄 𑀅𑀲𑀼𑀤𑁆𑀥𑀺𑀫𑀕𑁆𑀕𑁂 𑀲𑀼𑀤𑁆𑀥𑀺𑀫𑀕𑁆𑀕𑀧𑀭𑀸𑀫𑀲𑀦𑀁, 𑀔𑀦𑁆𑀥𑁂𑀲𑀼 𑀅𑀢𑁆𑀢𑀢𑁆𑀢𑀦𑀺𑀬𑀕𑀸𑀳𑀪𑀽𑀢𑀁 𑀲𑀓𑁆𑀓𑀸𑀬𑀤𑀲𑁆𑀲𑀦𑀁 𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 𑀇𑀢𑀭𑁂𑀲𑀫𑁆𑀧𑀺 𑀢𑀡𑁆𑀳𑀸 𑀉𑀧𑀦𑀺𑀲𑁆𑀲𑀬𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀳𑀚𑀸𑀢𑀲𑁆𑀲 𑀧𑀦 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀳𑁂𑀢𑀼𑀯𑀲𑁂𑀦 𑀢𑀡𑁆𑀳𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀁 𑀲𑀩𑁆𑀩𑀁 𑀲𑀦𑁆𑀥𑀸𑀬 ‘‘𑀲𑀳𑀚𑀸𑀢𑀓𑁄𑀝𑀺𑀬𑀸’’𑀢𑀺 𑀯𑀼𑀢𑁆𑀢𑀁.

𑀢𑀣𑀸𑀢𑀺 ¶ 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀘𑁂𑀯 𑀲𑀳𑀚𑀸𑀢𑀓𑁄𑀝𑀺𑀬𑀸 𑀘𑀸𑀢𑀺 𑀅𑀢𑁆𑀣𑁄. 𑀪𑀯𑀲𑁆𑀲𑀸𑀢𑀺 𑀓𑀫𑁆𑀫𑀪𑀯𑀲𑁆𑀲 𑀘𑁂𑀯 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀘. 𑀢𑀢𑁆𑀣 𑀘𑁂𑀢𑀦𑀸𑀤𑀺𑀲𑀗𑁆𑀔𑀸 𑀢𑀁 𑀲𑀩𑁆𑀩𑀁 𑀪𑀯𑀕𑀸𑀫𑀺𑀓𑀫𑁆𑀫𑀁 𑀓𑀫𑁆𑀫𑀪𑀯𑁄, 𑀓𑀸𑀫𑀪𑀯𑀸𑀤𑀺𑀓𑁄 𑀦𑀯𑀯𑀺𑀥𑁄 𑀉𑀧𑀧𑀢𑁆𑀢𑀺𑀪𑀯𑁄, 𑀢𑁂𑀲𑀁 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀉𑀧𑀸𑀤𑀸𑀦𑀁 𑀉𑀧𑀧𑀢𑁆𑀢𑀺𑀪𑀯𑀓𑀸𑀭𑀡𑀓𑀫𑁆𑀫𑀪𑀯𑀓𑀸𑀭𑀡𑀪𑀸𑀯𑀢𑁄 ¶ , 𑀢𑀲𑁆𑀲 𑀘 𑀲𑀳𑀸𑀬𑀪𑀸𑀯𑀽𑀧𑀕𑀫𑀦𑀢𑁄 𑀧𑀓𑀢𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀫𑁆𑀫𑀸𑀭𑀫𑁆𑀫𑀡𑀓𑀭𑀡𑀓𑀸𑀮𑁂 𑀧𑀦 𑀓𑀫𑁆𑀫𑀲𑀳𑀚𑀸𑀢𑀓𑀸𑀫𑀼𑀧𑀸𑀤𑀸𑀦𑀁 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀓𑀫𑁆𑀫𑀪𑀯𑀲𑁆𑀲 𑀧𑀦 𑀲𑀳𑀚𑀸𑀢𑀲𑁆𑀲 𑀲𑀳𑀚𑀸𑀢𑀁 𑀉𑀧𑀸𑀤𑀸𑀦𑀁 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀯𑀲𑁂𑀦 𑀘𑁂𑀯 𑀳𑁂𑀢𑀼𑀫𑀕𑁆𑀕𑀯𑀲𑁂𑀦 𑀘 𑀅𑀦𑁂𑀓𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀲𑀳𑀚𑀸𑀢𑀲𑁆𑀲 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀦𑀢𑁆𑀣𑀺𑀯𑀺𑀕𑀢𑀸𑀲𑁂𑀯𑀦𑀯𑀲𑁂𑀦, 𑀇𑀢𑀭𑀲𑁆𑀲 𑀧𑀓𑀢𑀽𑀧𑀦𑀺𑀲𑁆𑀲𑀬𑀯𑀲𑁂𑀦, 𑀲𑀫𑁆𑀫𑀲𑀦𑀸𑀤𑀺𑀓𑀸𑀮𑁂𑀲𑀼 𑀆𑀭𑀫𑁆𑀫𑀡𑀯𑀲𑁂𑀦 𑀘 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀢𑁆𑀣 𑀅𑀦𑀦𑁆𑀢𑀭𑀸𑀤𑀺𑀓𑁂 ¶ 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂, 𑀲𑀳𑀚𑀸𑀢𑀸𑀤𑀺𑀓𑁂 𑀲𑀳𑀚𑀸𑀢𑀧𑀘𑁆𑀘𑀬𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀘𑁂𑀯 𑀲𑀳𑀚𑀸𑀢𑀓𑁄𑀝𑀺𑀬𑀸 𑀘𑀸’’𑀢𑀺.

𑀪𑀯𑁄 𑀚𑀸𑀢𑀺𑀬𑀸𑀢𑀺 𑀏𑀢𑁆𑀣 𑀪𑀯𑁄𑀢𑀺 𑀓𑀫𑁆𑀫𑀪𑀯𑁄 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀳𑀺 𑀚𑀸𑀢𑀺𑀬𑀸 𑀧𑀘𑁆𑀘𑀬𑁄, 𑀦 𑀉𑀧𑀧𑀢𑁆𑀢𑀺𑀪𑀯𑁄. 𑀉𑀧𑀧𑀢𑁆𑀢𑀺𑀪𑀯𑁄 𑀳𑀺 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸 𑀔𑀦𑁆𑀥𑀸 𑀚𑀸𑀢𑀺𑀬𑁂𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀚𑀸𑀢𑀻𑀢𑀺 𑀧𑀦𑁂𑀢𑁆𑀣 𑀲𑀯𑀺𑀓𑀸𑀭𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑀝𑁆𑀞𑀩𑁆𑀩𑀸’’𑀢𑀺. 𑀲𑀯𑀺𑀓𑀸𑀭𑀸𑀢𑀺 𑀘 𑀦𑀺𑀩𑁆𑀩𑀢𑁆𑀢𑀺𑀯𑀺𑀓𑀸𑀭𑁂𑀦 𑀲𑀯𑀺𑀓𑀸𑀭𑀸, 𑀢𑁂 𑀘 𑀅𑀢𑁆𑀣𑀢𑁄 𑀉𑀧𑀧𑀢𑁆𑀢𑀺𑀪𑀯𑁄𑀬𑁂𑀯. 𑀦 𑀳𑀺 𑀢𑀤𑁂𑀯 𑀢𑀲𑁆𑀲 𑀓𑀸𑀭𑀡𑀁 𑀪𑀯𑀺𑀢𑀼𑀁 𑀬𑀼𑀢𑁆𑀢𑀦𑁆𑀢𑀺. 𑀓𑀫𑁆𑀫𑀪𑀯𑁄 𑀘 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀓𑀫𑁆𑀫𑀧𑀘𑁆𑀘𑀬𑁂𑀦 𑀘𑁂𑀯 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀘 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀆𑀳 ‘‘𑀪𑀯𑁄 𑀚𑀸𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀧𑀘𑁆𑀘𑀬𑁄’’𑀢𑀺.

𑀬𑀲𑁆𑀫𑀸 𑀘 𑀲𑀢𑀺 𑀚𑀸𑀢𑀺𑀬𑀸 𑀚𑀭𑀸𑀫𑀭𑀡𑀁, 𑀚𑀭𑀸𑀫𑀭𑀡𑀸𑀤𑀺𑀦𑀸 𑀨𑀼𑀝𑁆𑀞𑀲𑁆𑀲 𑀩𑀸𑀮𑀲𑁆𑀲 𑀲𑁄𑀓𑀸𑀤𑀬𑁄 𑀘 𑀲𑀫𑁆𑀪𑀯𑀦𑁆𑀢𑀺, 𑀦𑀸𑀲𑀢𑀺, 𑀢𑀲𑁆𑀫𑀸 ‘‘𑀚𑀸𑀢𑀺…𑀧𑁂… 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀳𑀚𑀸𑀢𑀽𑀧𑀦𑀺𑀲𑁆𑀲𑀬𑀲𑀻𑀲𑁂𑀦 𑀧𑀘𑁆𑀘𑀬𑀯𑀺𑀘𑀸𑀭𑀡𑀸𑀬 𑀤𑀲𑁆𑀲𑀺𑀢𑀢𑁆𑀢𑀸, 𑀅𑀗𑁆𑀕𑀯𑀺𑀘𑀸𑀭𑀡𑀸𑀬 𑀘 𑀅𑀦𑀸𑀫𑀝𑁆𑀞𑀢𑁆𑀢𑀸 𑀆𑀳 ‘‘𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄’’𑀢𑀺. 𑀫𑀳𑀸𑀯𑀺𑀲𑀬𑀢𑁆𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀘𑀸𑀭𑀡𑀸𑀬 𑀲𑀸 𑀦𑀺𑀭𑀯𑀲𑁂𑀲𑀸 𑀓𑀼𑀢𑁄 𑀮𑀤𑁆𑀥𑀩𑁆𑀩𑀸𑀢𑀺 𑀆𑀳 ‘‘𑀯𑀺𑀢𑁆𑀣𑀸𑀭𑀢𑁄’’𑀢𑀺𑀆𑀤𑀺. 𑀏𑀓𑀤𑁂𑀲𑁂𑀦 𑀘𑁂𑀢𑁆𑀣 𑀓𑀣𑀺𑀢𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀢𑀣𑀸 𑀓𑀣𑀦𑁂 𑀲𑀤𑁆𑀥𑀺𑀁 𑀉𑀤𑀸𑀳𑀭𑀡𑁂𑀦 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀕𑀯𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀅𑀲𑀼𑀓𑀲𑁆𑀲 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲, 𑀘𑀓𑁆𑀓𑀯𑀢𑁆𑀢𑀺𑀦𑁄 𑀯𑀸 𑀓𑀸𑀮𑁂 𑀅𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸, 𑀦 𑀢𑀢𑁄 𑀧𑀼𑀩𑁆𑀩𑁂𑀢𑀺 𑀅𑀯𑀺𑀚𑁆𑀚𑀸𑀬 𑀆𑀤𑀺𑀫𑀭𑀺𑀬𑀸𑀤𑀸 𑀅𑀧𑁆𑀧𑀝𑀺𑀳𑀢𑀲𑁆𑀲 𑀫𑀫 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑀸𑀧𑀺 𑀦 𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀘𑁆𑀘𑀬𑁄 𑀇𑀤𑀧𑁆𑀧𑀘𑁆𑀘𑀬𑁄, 𑀢𑀲𑁆𑀫𑀸 𑀇𑀤𑀧𑁆𑀧𑀘𑁆𑀘𑀬𑀸, 𑀇𑀫𑀲𑁆𑀫𑀸 𑀓𑀸𑀭𑀡𑀸 ¶ 𑀆𑀲𑀯𑀧𑀘𑁆𑀘𑀬𑀸𑀢𑀺 𑀅𑀢𑁆𑀣𑁄. 𑀪𑀯𑀢𑀡𑁆𑀳𑀸𑀬𑀸𑀢𑀺 𑀪𑀯𑀲𑀁𑀬𑁄𑀚𑀦𑀪𑀽𑀢𑀸𑀬 𑀢𑀡𑁆𑀳𑀸𑀬. 𑀪𑀯𑀤𑀺𑀝𑁆𑀞𑀺𑀬𑀸𑀢𑀺 ¶ 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸. ‘‘𑀇𑀢𑁄 𑀏𑀢𑁆𑀣 𑀏𑀢𑁆𑀢𑁄 𑀇𑀥𑀸’’𑀢𑀺 𑀅𑀧𑀭𑀺𑀬𑀦𑁆𑀢𑀁 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺.

𑀯𑀺𑀯𑀝𑁆𑀝𑀓𑀣𑀸𑀤𑀺𑀯𑀡𑁆𑀡𑀦𑀸

𑁧𑁪𑁫. ‘‘𑀯𑁂𑀤𑀦𑀸𑀦𑀁 𑀲𑀫𑀼𑀤𑀬’’𑀦𑁆𑀢𑀺𑀆𑀤𑀺𑀧𑀸𑀴𑀺 𑀯𑁂𑀤𑀦𑀸𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀢𑀦𑁆𑀢𑀺 ‘‘𑀨𑀲𑁆𑀲𑀲𑀫𑀼𑀤𑀬𑀸 𑀨𑀲𑁆𑀲𑀦𑀺𑀭𑁄𑀥𑀸’’𑀢𑀺 𑀯𑀼𑀢𑁆𑀢𑀨𑀲𑁆𑀲𑀝𑁆𑀞𑀸𑀦𑀁. 𑀆𑀳𑀸𑀭𑁄𑀢𑀺 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀳𑀺 ‘‘𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀇𑀫𑀲𑁆𑀲 ¶ 𑀓𑀸𑀬𑀲𑁆𑀲 𑀆𑀳𑀸𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑀧𑀘𑁆𑀘𑀬𑀦𑀺𑀤𑁆𑀤𑁂𑀲 𑁪𑁨𑁯) 𑀯𑀘𑀦𑀢𑁄 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀦𑀫𑁆𑀧𑀺 𑀉𑀧𑀢𑁆𑀣𑀫𑁆𑀪𑀓𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯. 𑀬𑀤𑀺𑀧𑀺 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑁆𑀢𑀺, 𑀉𑀓𑁆𑀓𑀁𑀲𑀕𑀢𑀺𑀯𑀺𑀚𑀸𑀦𑀦𑀯𑀲𑁂𑀦 𑀧𑀦 𑀤𑁂𑀲𑀦𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀦𑀺𑀝𑁆𑀞𑀸𑀧𑀺𑀢𑀸. 𑀏𑀢𑁆𑀣 𑀘 ‘‘𑀬𑀢𑁄 𑀔𑁄 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼…𑀧𑁂… 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺 𑀏𑀢𑁂𑀦 𑀥𑀫𑁆𑀫𑀲𑁆𑀲 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑁂𑀦 𑀲𑀤𑁆𑀥𑀺𑀁 𑀲𑀗𑁆𑀖𑀲𑁆𑀲 𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯 𑀳𑀺 𑀅𑀝𑁆𑀞𑀓𑀣𑀸𑀬𑀫𑁂𑀢𑁆𑀣 ‘‘𑀓𑁄 𑀏𑀯𑀁 𑀚𑀸𑀦𑀸𑀢𑀻𑀢𑀺? 𑀔𑀻𑀡𑀸𑀲𑀯𑁄 𑀚𑀸𑀦𑀸𑀢𑀺, 𑀬𑀸𑀯 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄 𑀚𑀸𑀦𑀸𑀢𑀻’’𑀢𑀺 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑁄 𑀤𑀲𑁆𑀲𑀺𑀢𑁄, 𑀢𑁂𑀦 𑀬𑀁 𑀯𑀼𑀢𑁆𑀢𑀁 ‘‘𑀪𑀺𑀓𑁆𑀔𑀼𑀲𑀗𑁆𑀖𑀯𑀲𑁂𑀦𑀧𑀺 𑀤𑀻𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺, (𑀤𑀻. 𑀦𑀺. 𑀅𑀝𑁆𑀞. 𑁧.𑁮) 𑀢𑀁 𑀬𑀣𑀸𑀭𑀼𑀢𑀯𑀲𑁂𑀦𑁂𑀯 𑀤𑀻𑀧𑀺𑀢𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁪𑁬. 𑀅𑀦𑁆𑀢𑁄 𑀚𑀸𑀮𑀲𑁆𑀲𑀸𑀢𑀺 𑀅𑀦𑁆𑀢𑁄𑀚𑀸𑀮𑀁, 𑀅𑀦𑁆𑀢𑁄𑀚𑀸𑀮𑁂 𑀓𑀢𑀸𑀢𑀺 𑀅𑀦𑁆𑀢𑁄𑀚𑀸𑀮𑀻𑀓𑀢𑀸. 𑀅𑀧𑀸𑀬𑀽𑀧𑀧𑀢𑁆𑀢𑀺𑀯𑀲𑁂𑀦 𑀅𑀥𑁄 𑀑𑀲𑀻𑀤𑀦𑀁, 𑀲𑀫𑁆𑀧𑀢𑁆𑀢𑀺𑀪𑀯𑀯𑀲𑁂𑀦 𑀉𑀤𑁆𑀥𑀁 𑀉𑀕𑁆𑀕𑀫𑀦𑀁. 𑀢𑀣𑀸 𑀧𑀭𑀺𑀢𑁆𑀢𑀪𑀽𑀫𑀺𑀫𑀳𑀕𑁆𑀕𑀢𑀪𑀽𑀫𑀺𑀯𑀲𑁂𑀦, 𑀑𑀮𑀻𑀦𑀢𑀸’𑀢𑀺𑀥𑀸𑀯𑀦𑀯𑀲𑁂𑀦, 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀯𑀲𑁂𑀦 𑀘 𑀬𑀣𑀸𑀓𑁆𑀓𑀫𑀁 𑀅𑀥𑁄 𑀑𑀲𑀻𑀤𑀦𑀁 𑀉𑀤𑁆𑀥𑀁 𑀉𑀕𑁆𑀕𑀫𑀦𑀁 𑀬𑁄𑀚𑁂𑀢𑀩𑁆𑀩𑀁. ‘‘𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀽’’𑀢𑀺 ¶ 𑀚𑀸𑀢𑀺𑀔𑁂𑀢𑁆𑀢𑀁 𑀲𑀦𑁆𑀥𑀸𑀬𑀸𑀳.

𑁧𑁪𑁭. 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀦𑁆𑀢𑀺 𑀥𑀭𑀫𑀸𑀦𑀓𑀧𑀡𑁆𑀡𑀢𑁆𑀢𑀺𑀬𑀸 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀁. 𑀅𑀢𑀻𑀢𑀪𑀸𑀯𑁂𑀦 𑀧𑀦 𑀢𑀣𑀸 𑀧𑀡𑁆𑀡𑀢𑁆𑀢𑀺 𑀬𑀸𑀯 𑀲𑀸𑀲𑀦𑀦𑁆𑀢𑀭𑀥𑀸𑀦𑀸, 𑀢𑀢𑁄 𑀉𑀤𑁆𑀥𑀫𑁆𑀧𑀺 𑀅𑀜𑁆𑀜𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀲𑀼 𑀯𑀢𑁆𑀢𑀢𑀺 𑀏𑀯. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀯𑁄𑀳𑀸𑀭𑀫𑀢𑁆𑀢𑀫𑁂𑀯 𑀪𑀯𑀺𑀲𑁆𑀲𑀢𑀻’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁪𑁭). 𑀓𑀸𑀬𑁄𑀢𑀺 𑀅𑀢𑁆𑀢𑀪𑀸𑀯𑁄, 𑀬𑁄 𑀭𑀽𑀧𑀸𑀭𑀽𑀧𑀥𑀫𑁆𑀫𑀲𑀫𑀽𑀳𑁄. 𑀏𑀯𑀁 𑀳𑀺𑀲𑁆𑀲 𑀅𑀫𑁆𑀩𑀭𑀼𑀓𑁆𑀔𑀲𑀤𑀺𑀲𑀢𑀸, 𑀢𑀤𑀯𑀬𑀯𑀸𑀦𑀜𑁆𑀘 𑀭𑀽𑀧𑀓𑁆𑀔𑀦𑁆𑀥𑀘𑀓𑁆𑀔𑀸𑀤𑀻𑀦𑀁 𑀅𑀫𑁆𑀩𑀧𑀓𑁆𑀓𑀲𑀤𑀺𑀲𑀢𑀸 𑀬𑀼𑀚𑁆𑀚𑀢𑀻𑀢𑀺. 𑀏𑀢𑁆𑀣 𑀘 𑀯𑀡𑁆𑀝𑀘𑁆𑀙𑁂𑀤𑁂 𑀯𑀡𑁆𑀝𑀽𑀧𑀦𑀺𑀩𑀦𑁆𑀥𑀸𑀦𑀁 𑀅𑀫𑁆𑀩𑀧𑀓𑁆𑀓𑀸𑀦𑀁 𑀅𑀫𑁆𑀩𑀭𑀼𑀓𑁆𑀔𑀢𑁄 𑀯𑀺𑀘𑁆𑀙𑁂𑀤𑁄 𑀯𑀺𑀬 𑀪𑀯𑀦𑁂𑀢𑁆𑀢𑀺𑀙𑁂𑀤𑁂 𑀢𑀤𑀼𑀧𑀦𑀺𑀩𑀦𑁆𑀥𑀸𑀦𑀁 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀁 𑀲𑀦𑁆𑀢𑀸𑀦𑀢𑁄 𑀯𑀺𑀘𑁆𑀙𑁂𑀤𑁄𑀢𑀺 𑀏𑀢𑁆𑀢𑀸𑀯𑀢𑀸 𑀑𑀧𑀫𑁆𑀫𑀁 𑀤𑀝𑁆𑀞𑀩𑁆𑀩𑀁.

𑁧𑁪𑁮. 𑀥𑀫𑁆𑀫𑀧𑀭𑀺𑀬𑀸𑀬𑁂𑀢𑀺 ¶ 𑀧𑀸𑀴𑀺𑀬𑀁. 𑀇𑀥𑀢𑁆𑀣𑁄𑀢𑀺 𑀤𑀺𑀝𑁆𑀞𑀥𑀫𑁆𑀫𑀳𑀺𑀢𑀁. 𑀧𑀭𑀢𑁆𑀣𑁄𑀢𑀺 𑀲𑀫𑁆𑀧𑀭𑀸𑀬𑀳𑀺𑀢𑀁. 𑀲𑀗𑁆𑀕𑀸𑀫𑀁 𑀯𑀺𑀚𑀺𑀦𑀸𑀢𑀺 𑀏𑀢𑁂𑀦𑀸𑀢𑀺 𑀲𑀗𑁆𑀕𑀸𑀫𑀯𑀺𑀚𑀬𑁄. 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀅𑀢𑁆𑀣𑀚𑀸𑀮𑀁. 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸, 𑀲𑀻𑀮𑀸𑀤𑀺𑀅𑀦𑀯𑀚𑁆𑀚𑀥𑀫𑁆𑀫𑀦𑀺𑀤𑁆𑀤𑁂𑀲𑀢𑁄 𑀘 𑀥𑀫𑁆𑀫𑀚𑀸𑀮𑀁. 𑀲𑁂𑀝𑁆𑀞𑀝𑁆𑀞𑁂𑀦 𑀩𑁆𑀭𑀳𑁆𑀫𑀪𑀽𑀢𑀸𑀦𑀁 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀁 𑀯𑀺𑀪𑀢𑁆𑀢𑀢𑁆𑀢𑀸 𑀩𑁆𑀭𑀳𑁆𑀫𑀚𑀸𑀮𑀁. 𑀤𑀺𑀝𑁆𑀞𑀺𑀯𑀺𑀯𑁂𑀘𑀦𑀫𑀼𑀔𑁂𑀦 𑀲𑀼𑀜𑁆𑀜𑀢𑀸𑀧𑀓𑀸𑀲𑀦𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀯𑀺𑀪𑀸𑀯𑀺𑀢𑀢𑁆𑀢𑀸 𑀤𑀺𑀝𑁆𑀞𑀺𑀚𑀸𑀮𑀁. 𑀢𑀺𑀢𑁆𑀣𑀺𑀬𑀯𑀸𑀤𑀦𑀺𑀫𑁆𑀫𑀤𑁆𑀤𑀦𑀽𑀧𑀸𑀬𑀢𑁆𑀢𑀸 𑀅𑀦𑀼𑀢𑁆𑀢𑀭𑁄 𑀲𑀗𑁆𑀕𑀸𑀫𑀯𑀺𑀚𑀬𑁄𑀢𑀺 𑀏𑀯𑀫𑁆𑀧𑁂𑀢𑁆𑀣 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁧𑁪𑁯. 𑀅𑀢𑁆𑀢𑀫𑀦𑀸𑀢𑀺 ¶ 𑀧𑀻𑀢𑀺𑀬𑀸 𑀕𑀳𑀺𑀢𑀘𑀺𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀩𑀼𑀤𑁆𑀥𑀕𑀢𑀸𑀬𑀸’’𑀢𑀺𑀆𑀤𑀺. 𑀬𑀣𑀸 𑀧𑀦 𑀅𑀦𑀢𑁆𑀢𑀫𑀦𑀸 𑀅𑀢𑁆𑀢𑀦𑁄 𑀅𑀦𑀢𑁆𑀣𑀘𑀭𑀢𑀸𑀬 𑀧𑀭𑀫𑀦𑀸 𑀯𑁂𑀭𑀺𑀫𑀦𑀸 𑀦𑀸𑀫 𑀳𑁄𑀦𑁆𑀢𑀺. 𑀬𑀣𑀸𑀳 ‘‘𑀤𑀺𑀲𑁄 𑀤𑀺𑀲’’𑀦𑁆𑀢𑀺 (𑀥. 𑀧. 𑁪𑁨; 𑀉𑀤𑀸. 𑁩𑁩) 𑀕𑀸𑀣𑀸, 𑀦 𑀏𑀯𑀁 𑀅𑀢𑁆𑀢𑀫𑀦𑀸. 𑀇𑀫𑁂 𑀧𑀦 𑀅𑀢𑁆𑀢𑀦𑁄 𑀅𑀢𑁆𑀣𑀘𑀭𑀢𑀸𑀬 ¶ 𑀲𑀓𑀫𑀦𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀅𑀢𑁆𑀢𑀫𑀦𑀸𑀢𑀺 𑀲𑀓𑀫𑀦𑀸’’𑀢𑀺. 𑀅𑀣 𑀯𑀸 𑀅𑀢𑁆𑀢𑀫𑀦𑀸𑀢𑀺 𑀲𑀫𑀢𑁆𑀢𑀫𑀦𑀸, 𑀇𑀫𑀸𑀬 𑀤𑁂𑀲𑀦𑀸𑀬 𑀧𑀭𑀺𑀧𑀼𑀡𑁆𑀡𑀫𑀦𑀲𑀗𑁆𑀓𑀧𑁆𑀧𑀸𑀢𑀺 𑀅𑀢𑁆𑀣𑁄. 𑀅𑀪𑀺𑀦𑀦𑁆𑀤𑀢𑀻𑀢𑀺 𑀢𑀡𑁆𑀳𑀸𑀬𑀢𑀻𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀢𑀡𑁆𑀳𑀸𑀬𑀫𑁆𑀧𑀺 𑀆𑀕𑀢𑁄’’𑀢𑀺. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀁 𑀅𑀪𑀺𑀦𑀦𑁆𑀤𑀦𑁆𑀢𑀻𑀢𑀺 𑀉𑀧𑀕𑀘𑁆𑀙𑀦𑁆𑀢𑀺 𑀲𑁂𑀯𑀦𑁆𑀢𑀻𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀉𑀧𑀕𑀫𑀦𑁂𑀧𑀺 𑀆𑀕𑀢𑁄’’𑀢𑀺. 𑀢𑀣𑀸 𑀅𑀪𑀺𑀦𑀦𑁆𑀤𑀦𑁆𑀢𑀻𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀲𑀫𑁆𑀧𑀝𑀺𑀘𑁆𑀙𑀦𑁂𑀧𑀺 𑀆𑀕𑀢𑁄’’𑀢𑀺. ‘‘𑀅𑀪𑀺𑀦𑀦𑁆𑀤𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀯𑀼𑀢𑁆𑀢𑁄𑀬𑁂𑀯 𑀅𑀢𑁆𑀣𑁄 ‘‘𑀅𑀦𑀼𑀫𑁄𑀤𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀧𑀓𑀸𑀲𑀻𑀬𑀢𑀻𑀢𑀺 𑀅𑀪𑀺𑀦𑀦𑁆𑀤𑀦𑀲𑀤𑁆𑀤𑁄 𑀇𑀥 𑀅𑀦𑀼𑀫𑁄𑀤𑀦𑀲𑀤𑁆𑀤𑀢𑁆𑀣𑁄𑀢𑀺 𑀆𑀳 ‘‘𑀅𑀦𑀼𑀫𑁄𑀤𑀦𑁂𑀧𑀺 𑀆𑀕𑀢𑁄’’𑀢𑀺. ‘‘𑀓𑀢𑀫𑀜𑁆𑀘 𑀢𑀁 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁭) 𑀢𑀢𑁆𑀣 𑀢𑀢𑁆𑀣 𑀧𑀯𑀢𑁆𑀢𑀸𑀬 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀬 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀇𑀤𑀁 𑀲𑀼𑀢𑁆𑀢𑀁 𑀯𑁂𑀬𑁆𑀬𑀸𑀓𑀭𑀡𑀁 𑀳𑁄𑀢𑀺. 𑀬𑀲𑁆𑀫𑀸 𑀧𑀦 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀫𑁆𑀧𑀺 𑀲𑀕𑀸𑀣𑀓𑀁 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀦𑀸𑀫 𑀳𑁄𑀢𑀺, 𑀦𑀺𑀕𑁆𑀕𑀸𑀣𑀓𑀢𑁆𑀢𑀫𑁂𑀯 𑀧𑀦 𑀅𑀗𑁆𑀕𑀦𑁆𑀢𑀺 𑀕𑀸𑀣𑀸𑀭𑀳𑀺𑀢𑀁 𑀯𑁂𑀬𑁆𑀬𑀸𑀓𑀭𑀡𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦𑀺𑀕𑁆𑀕𑀸𑀣𑀓𑀢𑁆𑀢𑀸 𑀳𑀺 𑀇𑀤𑀁 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺.

𑀅𑀧𑀭𑁂𑀲𑀼𑀧𑀻𑀢𑀺 𑀏𑀢𑁆𑀣 𑀧𑀺𑀲𑀤𑁆𑀤𑁂𑀦 𑀧𑀸𑀭𑀫𑀺𑀧𑀭𑀺𑀘𑀬𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀩𑀼𑀤𑁆𑀥𑀯𑀁𑀲𑁂 𑁋

‘‘𑀇𑀫𑁂 𑀥𑀫𑁆𑀫𑁂 𑀲𑀫𑁆𑀫𑀲𑀢𑁄, 𑀲𑀪𑀸𑀯𑀲𑀭𑀲𑀮𑀓𑁆𑀔𑀡𑁂;

𑀥𑀫𑁆𑀫𑀢𑁂𑀚𑁂𑀦 𑀯𑀲𑀼𑀥𑀸, 𑀤𑀲𑀲𑀳𑀲𑁆𑀲𑀻 𑀧𑀓𑀫𑁆𑀧𑀣𑀸’’𑀢𑀺. (𑀩𑀼. 𑀯𑀁. 𑁨.𑁧𑁬𑁬);

𑀯𑀻𑀭𑀺𑀬𑀩𑀮𑁂𑀦𑀸𑀢𑀺 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑁂 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀧𑀭𑀺𑀘𑁆𑀘𑀸𑀕𑀳𑁂𑀢𑀼𑀪𑀽𑀢𑀯𑀻𑀭𑀺𑀬𑀧𑁆𑀧𑀪𑀸𑀯𑁂𑀦, 𑀩𑁄𑀥𑀺𑀫𑀡𑁆𑀟𑀽𑀧𑀲𑀗𑁆𑀓𑀫𑀦𑁂 ‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘, 𑀅𑀝𑁆𑀞𑀺 𑀘 𑀅𑀯𑀲𑀺𑀲𑁆𑀲𑀢𑀽’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁨.𑁧𑁮𑁪; 𑀲𑀁. 𑀦𑀺. 𑁨.𑁨𑁨; 𑀫𑀳𑀸𑀦𑀺. 𑁧𑁯𑁬) 𑀯𑀼𑀢𑁆𑀢𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀯𑀻𑀭𑀺𑀬𑀸𑀦𑀼𑀪𑀸𑀯𑁂𑀦. 𑀅𑀘𑁆𑀙𑀭𑀺𑀬𑀯𑁂𑀕𑀸𑀪𑀺𑀳𑀢𑀸𑀢𑀺 𑀯𑀺𑀫𑁆𑀳𑀬𑀸𑀯𑀳𑀓𑀺𑀭𑀺𑀬𑀸𑀦𑀼𑀪𑀸𑀯𑀖𑀝𑁆𑀝𑀺𑀢𑀸 ¶ . 𑀧𑀁𑀲𑀼𑀓𑀽𑀮𑀥𑁄𑀯𑀦𑁂 𑀓𑁂𑀘𑀺 ‘‘𑀧𑀼𑀜𑁆𑀜𑀢𑁂𑀚𑁂𑀦𑀸’’𑀢𑀺 𑀯𑀤𑀦𑁆𑀢𑀺 ¶ , 𑀅𑀘𑁆𑀙𑀭𑀺𑀬𑀯𑁂𑀕𑀸𑀪𑀺𑀳𑀢𑀸𑀢𑀺 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑁂 𑀧𑀸𑀭𑀫𑀺𑀧𑀭𑀺𑀧𑀽𑀭𑀡𑀧𑀼𑀜𑁆𑀜𑀢𑁂𑀚𑁂𑀦 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀓𑀫𑁆𑀧𑀺𑀢𑀢𑁆𑀢𑀸 ‘‘𑀅𑀓𑀸𑀮𑀓𑀫𑁆𑀧𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑀸𑀥𑀼𑀓𑀸𑀭𑀤𑀸𑀦𑀯𑀲𑁂𑀦 𑀅𑀓𑀫𑁆𑀧𑀺𑀢𑁆𑀣 ¶ 𑀬𑀣𑀸 𑀢𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁩; 𑀧𑀝𑀺. 𑀫. 𑁨.𑁩𑁦). 𑀲𑀗𑁆𑀕𑀻𑀢𑀺𑀓𑀸𑀮𑀸𑀤𑀻𑀲𑀼𑀧𑀺 𑀲𑀸𑀥𑀼𑀓𑀸𑀭𑀤𑀸𑀦𑀯𑀲𑁂𑀦 𑀅𑀓𑀫𑁆𑀧𑀺𑀢𑁆𑀣𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀢𑀸𑀯𑁂𑀢𑁆𑀣 𑀅𑀝𑁆𑀞𑀓𑀣𑀸𑀬 𑀮𑀻𑀦𑀢𑁆𑀣𑀯𑀡𑁆𑀡𑀦𑀸.

𑀧𑀓𑀭𑀡𑀦𑀬𑀯𑀡𑁆𑀡𑀦𑀸

𑀅𑀬𑀁 𑀧𑀦 𑀧𑀓𑀭𑀡𑀦𑀬𑁂𑀦 𑀧𑀸𑀴𑀺𑀬𑀸 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀲𑀸 𑀧𑀦𑀸𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑀬𑀲𑁆𑀫𑀸 𑀤𑁂𑀲𑀦𑀸𑀬 𑀲𑀫𑀼𑀝𑁆𑀞𑀸𑀦𑀧𑁆𑀧𑀬𑁄𑀚𑀦𑀪𑀸𑀚𑀦𑁂𑀲𑀼 𑀧𑀺𑀡𑁆𑀟𑀢𑁆𑀣𑁂𑀲𑀼 𑀘 𑀦𑀺𑀤𑁆𑀥𑀸𑀭𑀺𑀢𑁂𑀲𑀼 𑀲𑀼𑀓𑀭𑀸 𑀳𑁄𑀢𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸 𑀘, 𑀢𑀲𑁆𑀫𑀸 𑀲𑀼𑀢𑁆𑀢𑀤𑁂𑀲𑀦𑀸𑀬 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀞𑀫𑀁 𑀦𑀺𑀤𑁆𑀥𑀸𑀭𑀬𑀺𑀲𑁆𑀲𑀸𑀫. 𑀢𑀢𑁆𑀣 𑀲𑀫𑀼𑀝𑁆𑀞𑀸𑀦𑀁 𑀢𑀸𑀯 𑀯𑀼𑀢𑁆𑀢𑀁 ‘‘𑀯𑀡𑁆𑀡𑀸𑀯𑀡𑁆𑀡𑀪𑀡𑀦’’𑀦𑁆𑀢𑀺. 𑀅𑀧𑀺𑀘 𑀦𑀺𑀦𑁆𑀤𑀸𑀧𑀲𑀁𑀲𑀸𑀲𑀼 𑀯𑀺𑀦𑁂𑀬𑁆𑀬𑀸𑀖𑀸𑀢𑀸𑀦𑀦𑁆𑀤𑀸𑀤𑀺𑀪𑀸𑀯𑀸𑀦𑀸𑀧𑀢𑁆𑀢𑀺, 𑀢𑀢𑁆𑀣 𑀘 𑀆𑀤𑀻𑀦𑀯𑀤𑀲𑁆𑀲𑀦𑀁 𑀲𑀫𑀼𑀝𑁆𑀞𑀸𑀦𑀁. 𑀢𑀣𑀸 𑀦𑀺𑀦𑁆𑀤𑀸𑀧𑀲𑀁𑀲𑀸𑀲𑀼 𑀧𑀝𑀺𑀧𑀚𑁆𑀚𑀦𑀓𑁆𑀓𑀫𑀲𑁆𑀲, 𑀧𑀲𑀁𑀲𑀸𑀯𑀺𑀲𑀬𑀲𑁆𑀲 𑀔𑀼𑀤𑁆𑀤𑀓𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑀲𑁆𑀲 𑀲𑀻𑀮𑀲𑁆𑀲, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀲𑀲𑁆𑀲𑀢𑀸𑀤𑀺𑀤𑀺𑀝𑁆𑀞𑀺𑀝𑁆𑀞𑀸𑀦𑁂𑀲𑀼 𑀢𑀢𑀼𑀢𑁆𑀢𑀭𑀺 𑀘 𑀅𑀧𑁆𑀧𑀝𑀺𑀳𑀢𑀘𑀸𑀭𑀢𑀸𑀬, 𑀢𑀣𑀸𑀕𑀢𑀲𑁆𑀲 𑀘 𑀓𑀢𑁆𑀣𑀘𑀺 𑀅𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀅𑀦𑀯𑀩𑁄𑀥𑁄 𑀲𑀫𑀼𑀝𑁆𑀞𑀸𑀦𑀁.

𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀧𑀬𑁄𑀚𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀦𑁂𑀬𑁆𑀬𑀸𑀖𑀸𑀢𑀸𑀦𑀦𑁆𑀤𑀸𑀤𑀺𑀪𑀸𑀯𑀸𑀧𑀢𑁆𑀢𑀺 𑀆𑀤𑀺𑀓𑀜𑁆𑀳𑀺 𑀇𑀫𑀁 𑀤𑁂𑀲𑀦𑀁 𑀧𑀬𑁄𑀚𑁂𑀢𑀻𑀢𑀺. 𑀢𑀣𑀸 𑀓𑀼𑀳𑀦𑀮𑀧𑀦𑀸𑀤𑀺𑀦𑀸𑀦𑀸𑀯𑀺𑀥𑀫𑀺𑀘𑁆𑀙𑀸𑀚𑀻𑀯𑀯𑀺𑀤𑁆𑀥𑀁𑀲𑀦𑀁, 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀚𑀸𑀮𑀯𑀺𑀦𑀺𑀯𑁂𑀞𑀦𑀁, 𑀤𑀺𑀝𑁆𑀞𑀺𑀲𑀻𑀲𑁂𑀦 𑀧𑀘𑁆𑀘𑀬𑀸𑀓𑀸𑀭𑀯𑀺𑀪𑀸𑀯𑀦𑀁, 𑀙𑀨𑀲𑁆𑀲𑀸𑀬𑀢𑀦𑀯𑀲𑁂𑀦 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀦𑀺𑀤𑁆𑀤𑁂𑀲𑁄, 𑀲𑀩𑁆𑀩𑀤𑀺𑀝𑁆𑀞𑀺𑀕𑀢𑀸𑀦𑀁 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁, 𑀅𑀢𑁆𑀢𑀦𑁄 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀤𑀻𑀧𑀦𑀜𑁆𑀘 𑀧𑀬𑁄𑀚𑀦𑀸𑀦𑀺.

𑀯𑀡𑁆𑀡𑀸𑀯𑀡𑁆𑀡𑀦𑀺𑀫𑀺𑀢𑁆𑀢𑀁 𑀅𑀦𑀼𑀭𑁄𑀥𑀯𑀺𑀭𑁄𑀥𑀯𑀦𑁆𑀢𑀘𑀺𑀢𑁆𑀢𑀸 𑀓𑀼𑀳𑀦𑀸𑀤𑀺𑀯𑀺𑀯𑀺𑀥𑀫𑀺𑀘𑁆𑀙𑀸𑀚𑀻𑀯𑀦𑀺𑀭𑀢𑀸 𑀲𑀲𑁆𑀲𑀢𑀸𑀤𑀺𑀤𑀺𑀝𑁆𑀞𑀺𑀧𑀗𑁆𑀓𑀁 𑀦𑀺𑀫𑀼𑀕𑁆𑀕𑀸, 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀲𑀼 𑀅𑀧𑀭𑀺𑀧𑀽𑀭𑀓𑀸𑀭𑀺𑀢𑀸𑀬 𑀅𑀦𑀯𑀩𑀼𑀤𑁆𑀥𑀕𑀼𑀡𑀯𑀺𑀲𑁂𑀲𑀜𑀸𑀡𑀸 𑀯𑀺𑀦𑁂𑀬𑁆𑀬𑀸 𑀇𑀫𑀺𑀲𑁆𑀲𑀸 𑀥𑀫𑁆𑀫𑀤𑁂𑀲𑀦𑀸𑀬 𑀪𑀸𑀚𑀦𑀁.

𑀧𑀺𑀡𑁆𑀟𑀢𑁆𑀣𑀸 ¶ 𑀧𑀦 𑀆𑀖𑀸𑀢𑀸𑀤𑀻𑀦𑀁 𑀅𑀓𑀭𑀡𑀻𑀬𑀢𑀸𑀯𑀘𑀦𑁂𑀦 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀲𑀫𑀡𑀲𑀜𑁆𑀜𑀸𑀬 𑀦𑀺𑀬𑁄𑀚𑀦𑀁, 𑀔𑀦𑁆𑀢𑀺𑀲𑁄𑀭𑀘𑁆𑀘𑀸𑀦𑀼𑀝𑁆𑀞𑀸𑀦𑀁, 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀸𑀦𑀼𑀬𑁄𑀕𑁄, 𑀲𑀤𑁆𑀥𑀸𑀧𑀜𑁆𑀜𑀸𑀲𑀫𑀸𑀬𑁄𑀕𑁄, 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀥𑀺𑀝𑁆𑀞𑀸𑀦𑀁, 𑀧𑀝𑀺𑀲𑀗𑁆𑀔𑀸𑀦𑀪𑀸𑀯𑀦𑀸𑀩𑀮𑀲𑀺𑀤𑁆𑀥𑀺, 𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀼𑀲𑀬𑀧𑁆𑀧𑀳𑀸𑀦𑀁, 𑀉𑀪𑀬𑀳𑀺𑀢𑀧𑀝𑀺𑀧𑀢𑁆𑀢𑀺, 𑀮𑁄𑀓𑀥𑀫𑁆𑀫𑁂𑀳𑀺 𑀅𑀦𑀼𑀧𑀮𑁂𑀧𑁄 𑀘 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀢𑀣𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀧𑀝𑀺𑀯𑀺𑀭𑀢𑀺𑀯𑀘𑀦𑁂𑀦 𑀲𑀻𑀮𑀯𑀺𑀲𑀼𑀤𑁆𑀥𑀺 ¶ 𑀤𑀲𑁆𑀲𑀺𑀢𑀸, 𑀢𑀸𑀬 𑀘 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀢𑁆𑀢𑀺, 𑀫𑁂𑀢𑁆𑀢𑀸𑀓𑀭𑀼𑀡𑀸𑀲𑀫𑀗𑁆𑀕𑀺𑀢𑀸 ¶ , 𑀯𑀻𑀢𑀺𑀓𑁆𑀓𑀫𑀧𑁆𑀧𑀳𑀸𑀦𑀁, 𑀢𑀤𑀗𑁆𑀕𑀧𑀳𑀸𑀦𑀁, 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀁, 𑀯𑀺𑀭𑀢𑀺𑀢𑁆𑀢𑀬𑀲𑀺𑀤𑁆𑀥𑀺, 𑀧𑀺𑀬𑀫𑀦𑀸𑀧𑀕𑀭𑀼𑀪𑀸𑀯𑀦𑀻𑀬𑀢𑀸𑀦𑀺𑀧𑁆𑀨𑀢𑁆𑀢𑀺, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀫𑀼𑀤𑀸𑀕𑀫𑁄, 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀅𑀥𑀺𑀝𑁆𑀞𑀸𑀦𑀪𑀸𑀯𑁄, 𑀅𑀓𑀼𑀲𑀮𑀫𑀽𑀮𑀢𑀦𑀼𑀓𑀭𑀡𑀁, 𑀓𑀼𑀲𑀮𑀫𑀽𑀮𑀭𑁄𑀧𑀦𑀁, 𑀉𑀪𑀬𑀸𑀦𑀢𑁆𑀣𑀤𑀽𑀭𑀻𑀓𑀭𑀡𑀁, 𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑀢𑀸, 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑁄,𑀧𑀭𑁂𑀳𑀺 𑀤𑀼𑀧𑁆𑀧𑀥𑀁𑀲𑀺𑀬𑀢𑀸, 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀲𑀫𑀗𑁆𑀕𑀺𑀢𑀸 𑀘 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺.

‘‘𑀕𑀫𑁆𑀪𑀻𑀭𑀸’’𑀢𑀺𑀆𑀤𑀺𑀯𑀘𑀦𑁂𑀳𑀺 𑀕𑀫𑁆𑀪𑀻𑀭𑀥𑀫𑁆𑀫𑀯𑀺𑀪𑀸𑀯𑀦𑀁, 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀢𑀸, 𑀓𑀧𑁆𑀧𑀸𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀦𑀸𑀧𑀺 𑀤𑀼𑀮𑁆𑀮𑀪𑀧𑀸𑀢𑀼𑀪𑀸𑀯𑀢𑀸, 𑀲𑀼𑀔𑀼𑀫𑁂𑀦𑀧𑀺 𑀜𑀸𑀡𑁂𑀦 𑀧𑀘𑁆𑀘𑀓𑁆𑀔𑀢𑁄 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸, 𑀥𑀫𑁆𑀫𑀦𑁆𑀯𑀬𑀲𑀗𑁆𑀔𑀸𑀢𑁂𑀦 𑀅𑀦𑀼𑀫𑀸𑀦𑀜𑀸𑀡𑁂𑀦𑀸𑀧𑀺 𑀤𑀼𑀭𑀥𑀺𑀕𑀫𑀦𑀻𑀬𑀢𑀸, 𑀧𑀲𑁆𑀲𑀤𑁆𑀥𑀲𑀩𑁆𑀩𑀤𑀭𑀣𑀢𑀸, 𑀲𑀦𑁆𑀢𑀥𑀫𑁆𑀫𑀯𑀺𑀪𑀸𑀯𑀦𑀁, 𑀲𑁄𑀪𑀦𑀧𑀭𑀺𑀬𑁄𑀲𑀸𑀦𑀢𑀸, 𑀅𑀢𑀺𑀢𑁆𑀢𑀺𑀓𑀭𑀪𑀸𑀯𑁄, 𑀧𑀥𑀸𑀦𑀪𑀸𑀯𑀧𑁆𑀧𑀢𑁆𑀢𑀺, 𑀬𑀣𑀸𑀪𑀽𑀢𑀜𑀸𑀡𑀕𑁄𑀘𑀭𑀢𑀸, 𑀲𑀼𑀔𑀼𑀫𑀲𑀪𑀸𑀯𑀢𑀸, 𑀫𑀳𑀸𑀧𑀜𑁆𑀜𑀸𑀯𑀺𑀪𑀸𑀯𑀦𑀸 𑀘 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀤𑀺𑀝𑁆𑀞𑀺𑀤𑀻𑀧𑀓𑀧𑀤𑁂𑀳𑀺 𑀲𑀫𑀸𑀲𑀢𑁄 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄 𑀧𑀓𑀸𑀲𑀺𑀢𑀸𑀢𑀺 𑀑𑀮𑀻𑀦𑀢𑀸𑀢𑀺𑀥𑀸𑀯𑀦𑀯𑀺𑀪𑀸𑀯𑀦𑀁, 𑀉𑀧𑀸𑀬𑀯𑀺𑀦𑀺𑀩𑀤𑁆𑀥𑀦𑀺𑀤𑁆𑀤𑁂𑀲𑁄, 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀓𑀺𑀢𑁆𑀢𑀦𑀁, 𑀓𑀼𑀫𑁆𑀫𑀕𑁆𑀕𑀧𑀝𑀺𑀧𑀢𑁆𑀢𑀺𑀬𑀸 𑀧𑀓𑀸𑀲𑀦𑀸, 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑀧𑀜𑁆𑀜𑀸𑀧𑀦𑀁, 𑀧𑀭𑀸𑀫𑀸𑀲𑀧𑀭𑀺𑀕𑁆𑀕𑀳𑁄, 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀧𑀢𑀺𑀝𑁆𑀞𑀸𑀧𑀦𑀁, 𑀪𑀯𑀯𑀺𑀪𑀯𑀤𑀺𑀝𑁆𑀞𑀺𑀯𑀺𑀪𑀸𑀕𑁄, 𑀢𑀡𑁆𑀳𑀸𑀯𑀺𑀚𑁆𑀚𑀸𑀧𑀯𑀢𑁆𑀢𑀺, 𑀅𑀦𑁆𑀢𑀯𑀸𑀦𑀦𑁆𑀢𑀯𑀸𑀤𑀺𑀝𑁆𑀞𑀺𑀦𑀺𑀤𑁆𑀤𑁂𑀲𑁄, 𑀅𑀦𑁆𑀢𑀤𑁆𑀯𑀬𑀸𑀯𑀢𑀸𑀭𑀡𑀁, 𑀆𑀲𑀯𑁄𑀖𑀬𑁄𑀕𑀓𑀺𑀮𑁂𑀲𑀕𑀦𑁆𑀣𑀲𑀁𑀬𑁄𑀚𑀦𑀽𑀧𑀸𑀤𑀸𑀦𑀯𑀺𑀲𑁂𑀲𑀯𑀺𑀪𑀚𑁆𑀚𑀦𑀜𑁆𑀘 𑀤𑀲𑁆𑀲𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀣𑀸 ‘‘𑀯𑁂𑀤𑀦𑀸𑀦𑀁 𑀲𑀫𑀼𑀤𑀬’’𑀦𑁆𑀢𑀺𑀆𑀤𑀺𑀯𑀘𑀦𑁂𑀳𑀺 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀅𑀦𑀼𑀩𑁄𑀥𑀧𑀝𑀺𑀯𑁂𑀥𑀲𑀺𑀤𑁆𑀥𑀺, 𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁 ¶ , 𑀢𑀡𑁆𑀳𑀸𑀯𑀺𑀚𑁆𑀚𑀸𑀯𑀺𑀕𑀫𑁄, 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀦𑀺𑀫𑀺𑀢𑁆𑀢𑀧𑀭𑀺𑀕𑁆𑀕𑀳𑁄, 𑀆𑀕𑀫𑀸𑀥𑀺𑀕𑀫𑀲𑀫𑁆𑀧𑀢𑁆𑀢𑀺, 𑀉𑀪𑀬𑀳𑀺𑀢𑀧𑀝𑀺𑀧𑀢𑁆𑀢𑀺, 𑀢𑀺𑀯𑀺𑀥𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑁄, 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀦𑀼𑀝𑁆𑀞𑀸𑀦𑀁, 𑀲𑀤𑁆𑀥𑀸𑀧𑀜𑁆𑀜𑀸𑀲𑀫𑀸𑀬𑁄𑀕𑁄, 𑀲𑀫𑁆𑀫𑀸𑀯𑀻𑀭𑀺𑀬𑀲𑀫𑀣𑀸𑀦𑀼𑀬𑁄𑀚𑀦𑀁, 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀺𑀧𑁆𑀨𑀢𑁆𑀢𑀺 𑀘 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺.

‘‘𑀅𑀚𑀸𑀦𑀢𑀁 𑀅𑀧𑀲𑁆𑀲𑀢’’𑀦𑁆𑀢𑀺 𑀅𑀯𑀺𑀚𑁆𑀚𑀸𑀲𑀺𑀤𑁆𑀥𑀺, ‘‘𑀢𑀡𑁆𑀳𑀸𑀕𑀢𑀸𑀦𑀁 𑀧𑀭𑀺𑀢𑀲𑁆𑀲𑀺𑀢𑀯𑀺𑀧𑁆𑀨𑀦𑁆𑀤𑀺𑀢𑀦𑁆𑀢𑀺 𑀢𑀡𑁆𑀳𑀸𑀲𑀺𑀤𑁆𑀥𑀺, 𑀢𑀤𑀼𑀪𑀬𑁂𑀦 𑀘 𑀦𑀻𑀯𑀭𑀡𑀲𑀁𑀬𑁄𑀚𑀦𑀤𑁆𑀯𑀬𑀲𑀺𑀤𑁆𑀥𑀺, 𑀅𑀦𑀫𑀢𑀕𑁆𑀕𑀲𑀁𑀲𑀸𑀭𑀯𑀝𑁆𑀝𑀸𑀦𑀼𑀘𑁆𑀙𑁂𑀤𑁄, 𑀧𑀼𑀩𑁆𑀩𑀦𑁆𑀢𑀸𑀳𑀭𑀡𑀅𑀧𑀭𑀦𑁆𑀢𑀧𑀝𑀺𑀲𑀦𑁆𑀥𑀸𑀦𑀸𑀦𑀺, 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀯𑀲𑁂𑀦 𑀳𑁂𑀢𑀼𑀯𑀺𑀪𑀸𑀕𑁄, 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀁 𑀅𑀜𑁆𑀜𑀫𑀜𑁆𑀜𑀸𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀅𑀜𑁆𑀜𑀫𑀜𑁆𑀜𑀽𑀧𑀓𑀸𑀭𑀺𑀢𑀸, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀦𑀁 𑀧𑀝𑀺𑀧𑀓𑁆𑀔𑀦𑀺𑀤𑁆𑀤𑁂𑀲𑁄 𑀘 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. ‘‘𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸’’𑀢𑀺 𑀲𑀲𑁆𑀲𑀢𑀸𑀤𑀺𑀧𑀜𑁆𑀜𑀸𑀧𑀦𑀲𑁆𑀲 𑀧𑀘𑁆𑀘𑀬𑀸𑀥𑀻𑀦𑀯𑀼𑀢𑁆𑀢𑀺𑀢𑀸𑀓𑀣𑀦𑁂𑀦 ¶ 𑀥𑀫𑁆𑀫𑀸𑀦𑀁 𑀦𑀺𑀘𑁆𑀘𑀢𑀸𑀧𑀝𑀺𑀲𑁂𑀥𑁄, 𑀅𑀦𑀺𑀘𑁆𑀘𑀢𑀸𑀧𑀢𑀺𑀝𑁆𑀞𑀸𑀧𑀦𑀁, 𑀧𑀭𑀫𑀢𑁆𑀣𑀢𑁄 𑀓𑀸𑀭𑀓𑀸𑀤𑀺𑀧𑀝𑀺𑀓𑁆𑀔𑁂𑀧𑁄, 𑀏𑀯𑀁𑀥𑀫𑁆𑀫𑀢𑀸𑀤𑀺𑀦𑀺𑀤𑁆𑀤𑁂𑀲𑁄, 𑀲𑀼𑀜𑁆𑀜𑀢𑀸𑀧𑀓𑀸𑀲𑀦𑀁, 𑀲𑀫𑀢𑁆𑀢𑀦𑀺𑀬𑀸𑀫𑀧𑀘𑁆𑀘𑀬𑀮𑀓𑁆𑀔𑀡𑀯𑀺𑀪𑀸𑀯𑀦𑀜𑁆𑀘 𑀤𑀲𑁆𑀲𑀺𑀢𑀸𑀦𑀺 𑀳𑁄𑀦𑁆𑀢𑀺.

‘‘𑀉𑀘𑁆𑀙𑀺𑀦𑁆𑀦𑀪𑀯𑀦𑁂𑀢𑁆𑀢𑀺𑀓𑁄’’𑀢𑀺𑀆𑀤𑀺𑀦𑀸 ¶ 𑀪𑀕𑀯𑀢𑁄 𑀧𑀳𑀸𑀦𑀲𑀫𑁆𑀧𑀢𑁆𑀢𑀺, 𑀯𑀺𑀚𑁆𑀚𑀸𑀥𑀺𑀫𑀼𑀢𑁆𑀢𑀺, 𑀯𑀲𑀻𑀪𑀸𑀯𑁄, 𑀲𑀺𑀓𑁆𑀔𑀢𑁆𑀢𑀬𑀦𑀺𑀧𑁆𑀨𑀢𑁆𑀢𑀺, 𑀦𑀺𑀩𑁆𑀩𑀸𑀦𑀥𑀸𑀢𑀼𑀤𑁆𑀯𑀬𑀯𑀺𑀪𑀸𑀕𑁄, 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀁, 𑀪𑀯𑀬𑁄𑀦𑀺𑀆𑀤𑀻𑀲𑀼 𑀅𑀧𑀭𑀺𑀬𑀸𑀧𑀦𑁆𑀦𑀢𑀸 𑀘 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀲𑀓𑀮𑁂𑀦 𑀧𑀦 𑀲𑀼𑀢𑁆𑀢𑀧𑀤𑁂𑀦 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀪𑀕𑀯𑀢𑁄 𑀢𑀸𑀤𑀺𑀪𑀸𑀯𑁄, 𑀢𑀢𑁆𑀣 𑀘 𑀧𑀭𑁂𑀲𑀁 𑀧𑀢𑀺𑀝𑁆𑀞𑀸𑀧𑀦𑀁, 𑀓𑀼𑀲𑀮𑀥𑀫𑁆𑀫𑀸𑀦𑀁 𑀆𑀤𑀺𑀪𑀽𑀢𑀥𑀫𑁆𑀫𑀤𑁆𑀯𑀬𑀲𑁆𑀲 𑀦𑀺𑀤𑁆𑀤𑁂𑀲𑁄, 𑀲𑀺𑀓𑁆𑀔𑀢𑁆𑀢𑀬𑀽𑀧𑀤𑁂𑀲𑁄, 𑀅𑀢𑁆𑀢𑀦𑁆𑀢𑀧𑀸𑀤𑀺𑀧𑀼𑀕𑁆𑀕𑀮𑀘𑀢𑀼𑀓𑁆𑀓𑀲𑀺𑀤𑁆𑀥𑀺, 𑀓𑀡𑁆𑀳𑀸𑀓𑀡𑁆𑀳𑀯𑀺𑀧𑀸𑀓𑀸𑀤𑀺𑀓𑀫𑁆𑀫𑀘𑀢𑀼𑀓𑁆𑀓𑀯𑀺𑀪𑀸𑀕𑁄, 𑀘𑀢𑀼𑀭𑀧𑁆𑀧𑀫𑀜𑁆𑀜𑀸𑀯𑀺𑀲𑀬𑀦𑀺𑀤𑁆𑀤𑁂𑀲𑁄, 𑀲𑀫𑀼𑀤𑀬𑀸𑀤𑀺𑀧𑀜𑁆𑀘𑀓𑀲𑁆𑀲 𑀬𑀣𑀸𑀪𑀽𑀢𑀸𑀯𑀩𑁄𑀥𑁄, 𑀙𑀲𑀸𑀭𑀡𑀻𑀬𑀥𑀫𑁆𑀫𑀯𑀺𑀪𑀸𑀯𑀦𑀸 ¶ , 𑀤𑀲𑀦𑀸𑀣𑀓𑀭𑀥𑀫𑁆𑀫𑀧𑀢𑀺𑀝𑁆𑀞𑀸𑀧𑀦𑁆𑀢𑀺 𑀏𑀯𑀫𑀸𑀤𑀬𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸.

𑀲𑁄𑀴𑀲𑀳𑀸𑀭𑀯𑀡𑁆𑀡𑀦𑀸

𑀤𑁂𑀲𑀦𑀸𑀳𑀸𑀭𑀯𑀡𑁆𑀡𑀦𑀸

𑀢𑀢𑁆𑀣 ‘‘𑀅𑀢𑁆𑀢𑀸, 𑀮𑁄𑀓𑁄’’𑀢𑀺 𑀘 𑀤𑀺𑀝𑁆𑀞𑀺𑀬𑀸 𑀅𑀥𑀺𑀝𑁆𑀞𑀸𑀦𑀪𑀸𑀯𑁂𑀦, 𑀯𑁂𑀤𑀦𑀸𑀨𑀲𑁆𑀲𑀸𑀬𑀢𑀦𑀸𑀤𑀺𑀫𑀼𑀔𑁂𑀦 𑀘 𑀕𑀳𑀺𑀢𑁂𑀲𑀼 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀢𑀡𑁆𑀳𑀸𑀯𑀚𑁆𑀚𑀸 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀲𑀘𑁆𑀘𑀁. 𑀢𑀡𑁆𑀳𑀸 𑀲𑀫𑀼𑀤𑀬𑀲𑀘𑁆𑀘𑀁. 𑀲𑀸 𑀧𑀦 𑀧𑀭𑀺𑀢𑀲𑁆𑀲𑀦𑀸𑀕𑁆𑀕𑀳𑀡𑁂𑀦 ‘‘𑀢𑀡𑁆𑀳𑀸𑀕𑀢𑀸𑀦’’𑀦𑁆𑀢𑀺, ‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸’’𑀢𑀺 𑀘 𑀲𑀭𑀽𑀧𑁂𑀦𑁂𑀯 𑀲𑀫𑀼𑀤𑀬𑀕𑁆𑀕𑀳𑀡𑁂𑀦, 𑀪𑀯𑀦𑁂𑀢𑁆𑀢𑀺𑀕𑁆𑀕𑀳𑀡𑁂𑀦 𑀘 𑀧𑀸𑀴𑀺𑀬𑀁 𑀕𑀳𑀺𑀢𑀸𑀯. 𑀅𑀬𑀁 𑀢𑀸𑀯 𑀲𑀼𑀢𑁆𑀢𑀦𑁆𑀢𑀦𑀬𑁄. 𑀅𑀪𑀺𑀥𑀫𑁆𑀫𑀦𑀬𑁂𑀦 𑀧𑀦 𑀆𑀖𑀸𑀢𑀸𑀦𑀦𑁆𑀤𑀸𑀤𑀺𑀯𑀘𑀦𑁂𑀳𑀺, 𑀆𑀢𑀧𑁆𑀧𑀸𑀤𑀺𑀧𑀤𑁂𑀳𑀺, 𑀘𑀺𑀢𑁆𑀢𑀧𑁆𑀧𑀤𑁄𑀲𑀯𑀘𑀦𑁂𑀦, 𑀲𑀩𑁆𑀩𑀤𑀺𑀝𑁆𑀞𑀺𑀤𑀻𑀧𑀓𑀧𑀤𑁂𑀳𑀺, 𑀓𑀼𑀲𑀮𑀸𑀓𑀼𑀲𑀮𑀕𑁆𑀕𑀳𑀡𑁂𑀦, 𑀪𑀯𑀕𑁆𑀕𑀳𑀡𑁂𑀦, 𑀲𑁄𑀓𑀸𑀤𑀺𑀕𑁆𑀕𑀳𑀡𑁂𑀦, 𑀢𑀢𑁆𑀣 𑀢𑀢𑁆𑀣 𑀲𑀫𑀼𑀤𑀬𑀕𑁆𑀕𑀳𑀡𑁂𑀦 𑀘𑀸𑀢𑀺 𑀲𑀗𑁆𑀔𑁂𑀧𑀢𑁄 𑀲𑀩𑁆𑀩𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀥𑀫𑁆𑀫𑀯𑀺𑀪𑀸𑀯𑀦𑀧𑀤𑁂𑀳𑀺 𑀕𑀳𑀺𑀢𑀸 𑀓𑀫𑁆𑀫𑀓𑀺𑀮𑁂𑀲𑀸 𑀲𑀫𑀼𑀤𑀬𑀲𑀘𑁆𑀘𑀁. 𑀉𑀪𑀺𑀦𑁆𑀦𑀁 𑀅𑀧𑁆𑀧𑀯𑀢𑁆𑀢𑀺 𑀦𑀺𑀭𑁄𑀥𑀲𑀘𑁆𑀘𑀁. 𑀢𑀲𑁆𑀲 𑀢𑀢𑁆𑀣 𑀢𑀢𑁆𑀣 𑀯𑁂𑀤𑀦𑀸𑀦𑀁 𑀅𑀢𑁆𑀣𑀗𑁆𑀕𑀫𑀦𑀺𑀲𑁆𑀲𑀭𑀡𑀧𑀭𑀺𑀬𑀸𑀬𑁂𑀳𑀺, 𑀧𑀘𑁆𑀘𑀢𑁆𑀢𑀁 𑀦𑀺𑀩𑁆𑀩𑀼𑀢𑀺𑀯𑀘𑀦𑁂𑀦, 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑀺𑀯𑀘𑀦𑁂𑀦 𑀘 𑀧𑀸𑀴𑀺𑀬𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀦𑀺𑀭𑁄𑀥𑀧𑀚𑀸𑀦𑀦𑀸 𑀧𑀝𑀺𑀧𑀤𑀸 𑀫𑀕𑁆𑀕𑀲𑀘𑁆𑀘𑀁. 𑀢𑀲𑁆𑀲𑀸𑀧𑀺 𑀢𑀢𑁆𑀣 𑀢𑀢𑁆𑀣 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑀸𑀤𑀺𑀬𑀣𑀸𑀪𑀽𑀢𑀯𑁂𑀤𑀦𑀸𑀧𑀤𑁂𑀲𑁂𑀦, 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀲𑀫𑀼𑀤𑀬𑀸𑀤𑀺𑀬𑀣𑀸𑀪𑀽𑀢𑀧𑀚𑀸𑀦𑀦𑀧𑀭𑀺𑀬𑀸𑀬𑁂𑀦, 𑀪𑀯𑀦𑁂𑀢𑁆𑀢𑀺𑀬𑀸 𑀉𑀘𑁆𑀙𑁂𑀤𑀧𑀭𑀺𑀬𑀸𑀬𑁂𑀦 𑀘 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀲𑀫𑀼𑀤𑀬𑁂𑀦 𑀅𑀲𑁆𑀲𑀸𑀤𑁄, 𑀤𑀼𑀓𑁆𑀔𑁂𑀦 𑀆𑀤𑀻𑀦𑀯𑁄, 𑀫𑀕𑁆𑀕𑀦𑀺𑀭𑁄𑀥𑁂𑀳𑀺 ¶ 𑀦𑀺𑀲𑁆𑀲𑀭𑀡𑀦𑁆𑀢𑀺 𑀏𑀯𑀁 𑀘𑀢𑀼𑀲𑀘𑁆𑀘𑀯𑀲𑁂𑀦, 𑀬𑀸𑀦𑀺 𑀧𑀸𑀴𑀺𑀬𑀁 (𑀦𑁂𑀢𑁆𑀢𑀺. 𑁯) 𑀲𑀭𑀽𑀧𑁂𑀦𑁂𑀯 𑀆𑀕𑀢𑀸𑀦𑀺 𑀅𑀲𑁆𑀲𑀸𑀤𑀸𑀤𑀻𑀦𑀯𑀦𑀺𑀲𑁆𑀲𑀭𑀡𑀸𑀦𑀺, 𑀢𑁂𑀲𑀜𑁆𑀘 𑀯𑀲𑁂𑀦 𑀇𑀥 𑀅𑀲𑁆𑀲𑀸𑀤𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀦𑁂𑀬𑁆𑀬𑀸𑀦𑀦𑁆𑀢𑀸𑀤𑀺𑀪𑀸𑀯𑀸𑀧𑀢𑁆𑀢𑀺𑀆𑀤𑀺𑀓𑀁 𑀬𑀣𑀸𑀯𑀼𑀢𑁆𑀢𑀯𑀺𑀪𑀸𑀕𑀁 𑀧𑀬𑁄𑀚𑀦𑀫𑁂𑀯 𑀨𑀮𑀁. 𑀆𑀖𑀸𑀢𑀸𑀤𑀻𑀦𑀁 𑀅𑀓𑀭𑀡𑀻𑀬𑀢𑀸, 𑀆𑀖𑀸𑀢𑀸𑀤𑀺𑀨𑀮𑀲𑁆𑀲 𑀘 𑀅𑀦𑀜𑁆𑀜𑀲𑀦𑁆𑀢𑀸𑀦𑀪𑀸𑀯𑀺𑀢𑀸, 𑀦𑀺𑀦𑁆𑀤𑀸𑀧𑀲𑀁𑀲𑀸𑀲𑀼 𑀬𑀣𑀸𑀲𑀪𑀸𑀯𑀧𑀝𑀺𑀚𑀸𑀦𑀦𑀦𑀺𑀩𑁆𑀩𑁂𑀞𑀦𑀸𑀢𑀺 𑀏𑀯𑀁 𑀢𑀁𑀢𑀁𑀧𑀬𑁄𑀚𑀦𑀸𑀥𑀺𑀕𑀫𑀳𑁂𑀢𑀼 𑀉𑀧𑀸𑀬𑁄. 𑀆𑀖𑀸𑀢𑀸𑀤𑀻𑀦𑀁 ¶ 𑀓𑀭𑀡𑀧𑀝𑀺𑀲𑁂𑀥𑀦𑀸𑀤𑀺𑀅𑀧𑀤𑁂𑀲𑁂𑀦 𑀥𑀫𑁆𑀫𑀭𑀸𑀚𑀲𑁆𑀲 𑀆𑀡𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀬𑀁 𑀤𑁂𑀲𑀦𑀸𑀳𑀸𑀭𑁄.

𑀯𑀺𑀘𑀬𑀳𑀸𑀭𑀯𑀡𑁆𑀡𑀦𑀸

𑀓𑀧𑁆𑀧𑀦𑀸𑀪𑀸𑀯𑁂𑀧𑀺 ¶ 𑀯𑁄𑀳𑀸𑀭𑀯𑀲𑁂𑀦, 𑀅𑀦𑀼𑀯𑀸𑀤𑀯𑀲𑁂𑀦 𑀘 ‘‘𑀫𑀫’’𑀦𑁆𑀢𑀺 𑀯𑀼𑀢𑁆𑀢𑀁, 𑀦𑀺𑀬𑀫𑀸𑀪𑀸𑀯𑀢𑁄 𑀯𑀺𑀓𑀧𑁆𑀧𑀦𑀢𑁆𑀣𑀁 𑀯𑀸𑀕𑁆𑀕𑀳𑀡𑀁 𑀓𑀢𑀁, 𑀕𑀼𑀡𑀲𑀫𑀗𑁆𑀕𑀺𑀢𑀸𑀬, 𑀅𑀪𑀺𑀫𑀼𑀔𑀻𑀓𑀭𑀡𑀸𑀬 𑀘 ‘‘𑀪𑀺𑀓𑁆𑀔𑀯𑁂’’𑀢𑀺 𑀆𑀫𑀦𑁆𑀢𑀦𑀁. 𑀅𑀜𑁆𑀜𑀪𑀸𑀯𑀢𑁄, 𑀧𑀝𑀺𑀯𑀺𑀭𑀼𑀤𑁆𑀥𑀪𑀸𑀯𑀢𑁄 𑀘 ‘‘𑀧𑀭𑁂’’𑀢𑀺 𑀯𑀼𑀢𑁆𑀢𑀁, 𑀯𑀡𑁆𑀡𑀧𑀝𑀺𑀧𑀓𑁆𑀔𑀢𑁄, 𑀅𑀯𑀡𑁆𑀡𑀦𑀻𑀬𑀢𑁄 𑀘 ‘‘𑀅𑀯𑀡𑁆𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀩𑁆𑀬𑀢𑁆𑀢𑀺𑀯𑀲𑁂𑀦, 𑀯𑀺𑀢𑁆𑀣𑀸𑀭𑀯𑀲𑁂𑀦 𑀘 ‘‘𑀪𑀸𑀲𑁂𑀬𑁆𑀬𑀼’’𑀦𑁆𑀢𑀺 𑀯𑀼𑀢𑁆𑀢𑀁, 𑀥𑀸𑀭𑀡𑀪𑀸𑀯𑀢𑁄, 𑀅𑀥𑀫𑁆𑀫𑀧𑀝𑀺𑀧𑀓𑁆𑀔𑀢𑁄 𑀘 ‘‘𑀥𑀫𑁆𑀫𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀤𑀺𑀝𑁆𑀞𑀺𑀲𑀻𑀮𑁂𑀳𑀺 𑀲𑀁𑀳𑀢𑀪𑀸𑀯𑀢𑁄, 𑀓𑀺𑀮𑁂𑀲𑀸𑀦𑀁 𑀲𑀗𑁆𑀖𑀸𑀢𑀓𑀭𑀡𑀢𑁄 𑀘 ‘‘𑀲𑀗𑁆𑀖𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀧𑀝𑀺𑀦𑀺𑀤𑁆𑀤𑁂𑀲𑀢𑁄, 𑀯𑀘𑀦𑀼𑀧𑀦𑁆𑀬𑀸𑀲𑀦𑀢𑁄 𑀘 ‘‘𑀢𑀢𑁆𑀭𑀸’’𑀢𑀺 𑀯𑀼𑀢𑁆𑀢𑀁, 𑀲𑀫𑁆𑀫𑀼𑀔𑀪𑀸𑀯𑀢𑁄, 𑀧𑀼𑀣𑀼𑀪𑀸𑀯𑀢𑁄 𑀘 ‘‘𑀢𑀼𑀫𑁆𑀳𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀲𑁆𑀲 𑀳𑀦𑀦𑀢𑁄, 𑀆𑀭𑀫𑁆𑀫𑀡𑀸𑀪𑀺𑀖𑀸𑀢𑀢𑁄 𑀘 ‘‘𑀆𑀖𑀸𑀢𑁄’’𑀢𑀺 𑀯𑀼𑀢𑁆𑀢𑀁, 𑀆𑀭𑀫𑁆𑀫𑀡𑁂 𑀲𑀗𑁆𑀓𑁄𑀘𑀯𑀼𑀢𑁆𑀢𑀺𑀬𑀸, 𑀅𑀢𑀼𑀝𑁆𑀞𑀸𑀓𑀸𑀭𑀢𑀸𑀬 𑀘 ‘‘𑀅𑀧𑁆𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀁, 𑀆𑀭𑀫𑁆𑀫𑀡𑀘𑀺𑀦𑁆𑀢𑀦𑀢𑁄, 𑀦𑀺𑀲𑁆𑀲𑀬𑀢𑁄 𑀘 ‘‘𑀘𑁂𑀢𑀲𑁄’’𑀢𑀺 𑀯𑀼𑀢𑁆𑀢𑀁, 𑀅𑀢𑁆𑀣𑀸𑀲𑀸𑀥𑀦𑀢𑁄, 𑀅𑀦𑀼 𑀅𑀦𑀼 ‘‘𑀅𑀦𑀢𑁆𑀣𑀲𑀸𑀥𑀦𑀢𑁄’’ 𑀘 ‘‘𑀅𑀦𑀪𑀺𑀭𑀤𑁆𑀥𑀻’’𑀢𑀺 𑀯𑀼𑀢𑁆𑀢𑀁, 𑀓𑀸𑀭𑀡𑀸𑀦𑀭𑀳𑀢𑁆𑀢𑀸, 𑀲𑀢𑁆𑀣𑀼𑀲𑀸𑀲𑀦𑁂 𑀞𑀺𑀢𑁂𑀳𑀺 𑀓𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀘 ‘‘𑀦 𑀓𑀭𑀡𑀻𑀬𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀯𑀺𑀦𑀺𑀘𑁆𑀙𑀬𑁄 𑀓𑀸𑀢𑀩𑁆𑀩𑁄. 𑀇𑀢𑀺 𑀅𑀦𑀼𑀧𑀤𑀯𑀺𑀘𑀬𑀢𑁄 𑀯𑀺𑀘𑀬𑁄 𑀳𑀸𑀭𑁄 𑀅𑀢𑀺𑀯𑀺𑀢𑁆𑀣𑀸𑀭𑀪𑀬𑁂𑀦, 𑀲𑀓𑁆𑀓𑀸 𑀘 𑀅𑀝𑁆𑀞𑀓𑀣𑀁 𑀢𑀲𑁆𑀲𑀸 𑀮𑀻𑀦𑀢𑁆𑀣𑀯𑀡𑁆𑀡𑀦𑀜𑁆𑀘 𑀅𑀦𑀼𑀕𑀦𑁆𑀢𑁆𑀯𑀸 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀼𑀦𑀸 𑀯𑀺𑀪𑀸𑀯𑁂𑀢𑀼𑀦𑁆𑀢𑀺 𑀦 𑀯𑀺𑀢𑁆𑀣𑀸𑀭𑀬𑀺𑀫𑁆𑀳.

𑀬𑀼𑀢𑁆𑀢𑀺𑀳𑀸𑀭𑀯𑀡𑁆𑀡𑀦𑀸

𑀲𑀩𑁆𑀩𑁂𑀦 ¶ 𑀲𑀩𑁆𑀩𑀁 𑀆𑀖𑀸𑀢𑀸𑀤𑀻𑀦𑀁 𑀅𑀓𑀭𑀡𑀁 𑀢𑀸𑀤𑀺𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀬𑀼𑀚𑁆𑀚𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀲𑀫𑀧𑁆𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄. 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀆𑀖𑀸𑀢𑀸𑀤𑀬𑁄 𑀉𑀧𑁆𑀧𑀦𑁆𑀦𑀸, 𑀢𑀦𑁆𑀦𑀺𑀫𑀺𑀢𑁆𑀢𑀓𑁄 𑀅𑀦𑁆𑀢𑀭𑀸𑀬𑁄 𑀢𑀲𑁆𑀲𑁂𑀯 𑀲𑀫𑁆𑀧𑀢𑁆𑀢𑀺𑀯𑀺𑀩𑀦𑁆𑀥𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 ¶ 𑀬𑀼𑀚𑁆𑀚𑀢𑀺. 𑀓𑀲𑁆𑀫𑀸? 𑀲𑀦𑁆𑀢𑀸𑀦𑀦𑁆𑀢𑀭𑁂𑀲𑀼 𑀅𑀲𑀗𑁆𑀓𑀫𑀦𑀢𑁄. 𑀘𑀺𑀢𑁆𑀢𑀁 𑀅𑀪𑀺𑀪𑀯𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀸 𑀆𑀖𑀸𑀢𑀸𑀤𑀬𑁄 𑀲𑀼𑀪𑀸𑀲𑀺𑀢𑀸𑀤𑀺𑀲𑀮𑁆𑀮𑀓𑁆𑀔𑀡𑁂𑀧𑀺 𑀅𑀲𑀫𑀢𑁆𑀣𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀲𑀓𑁄𑀥𑀮𑁄𑀪𑀸𑀦𑀁 𑀅𑀦𑁆𑀥𑀢𑀫𑀲𑀩𑁆𑀪𑀸𑀯𑀢𑁄. 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀤𑀼𑀲𑁆𑀲𑀻𑀮𑁆𑀬𑀢𑁄 𑀯𑁂𑀭𑀫𑀡𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀸𑀫𑁄𑀚𑁆𑀚𑀧𑀸𑀲𑀁𑀲𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀳𑀺 𑀫𑀳𑀢𑁄 𑀓𑀺𑀢𑁆𑀢𑀺𑀲𑀤𑁆𑀤𑀲𑁆𑀲 𑀅𑀩𑁆𑀪𑀼𑀕𑁆𑀕𑀫𑁄 𑀳𑁄𑀢𑀻𑀢𑀺. 𑀕𑀫𑁆𑀪𑀻𑀭𑀢𑀸𑀤𑀺𑀯𑀺𑀲𑁂𑀲𑀬𑀼𑀢𑁆𑀢𑁂𑀦 𑀕𑀼𑀡𑁂𑀦 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀦𑀸 𑀏𑀓𑀤𑁂𑀲𑀪𑀽𑀢𑀸𑀧𑀺 𑀲𑀓𑀮𑀲𑀩𑁆𑀩𑀜𑁆𑀜𑀼𑀕𑀼𑀡𑀕𑁆𑀕𑀳𑀡𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀬𑀼𑀚𑁆𑀚𑀢𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸. 𑀢𑀚𑁆𑀚𑀸𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀭𑀺𑀓𑁆𑀔𑀢𑀸𑀦𑀺 𑀅𑀥𑀺𑀕𑀫𑀢𑀓𑁆𑀓𑀦𑀸𑀦𑀺 𑀲𑀲𑁆𑀲𑀢𑀯𑀸𑀤𑀸𑀤𑀺𑀅𑀪𑀺𑀦𑀺𑀯𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀓𑀧𑁆𑀧𑀦𑀸𑀚𑀸𑀮𑀲𑁆𑀲 𑀅𑀲𑀫𑀼𑀕𑁆𑀖𑀸𑀝𑀺𑀢𑀢𑁆𑀢𑀸. 𑀯𑁂𑀤𑀦𑀸𑀤𑀻𑀦𑀯𑀸𑀦𑀯𑀩𑁄𑀥𑁂𑀦 𑀯𑁂𑀤𑀦𑀸𑀬 𑀢𑀡𑁆𑀳𑀸 𑀧𑀯𑀟𑁆𑀠𑀢𑀻𑀢𑀺 𑀬𑀼𑀚𑁆𑀚𑀢𑀺 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀦𑀸𑀲𑀩𑁆𑀪𑀸𑀯𑀢𑁄. 𑀲𑀢𑀺 𑀘 𑀯𑁂𑀤𑀬𑀺𑀢𑀭𑀸𑀕𑁂 𑀢𑀢𑁆𑀣 𑀅𑀢𑁆𑀢𑀢𑁆𑀢𑀦𑀺𑀬𑀕𑀸𑀳𑁄, 𑀲𑀲𑁆𑀲𑀢𑀸𑀤𑀺𑀕𑀸𑀳𑁄 𑀘 𑀯𑀺𑀧𑀭𑀺𑀨𑀦𑁆𑀤𑀢𑀻𑀢𑀺 𑀬𑀼𑀚𑁆𑀚𑀢𑀺 𑀓𑀸𑀭𑀡𑀲𑁆𑀲 𑀲𑀦𑁆𑀦𑀺𑀳𑀺𑀢𑀢𑁆𑀢𑀸. 𑀢𑀡𑁆𑀳𑀸𑀧𑀘𑁆𑀘𑀬𑀸 𑀳𑀺 𑀉𑀧𑀸𑀤𑀸𑀦𑀁 𑀲𑀲𑁆𑀲𑀢𑀸𑀤𑀺𑀯𑀸𑀤𑁂 𑀧𑀜𑁆𑀜𑀧𑁂𑀦𑁆𑀢𑀸𑀦𑀁 ¶ , 𑀢𑀤𑀦𑀼𑀘𑁆𑀙𑀯𑀺𑀓𑀁 𑀯𑀸 𑀯𑁂𑀤𑀦𑀁 𑀯𑁂𑀤𑀬𑀦𑁆𑀢𑀸𑀦𑀁 𑀨𑀲𑁆𑀲𑁄 𑀳𑁂𑀢𑀽𑀢𑀺 𑀬𑀼𑀚𑁆𑀚𑀢𑀺 𑀯𑀺𑀲𑀬𑀺𑀦𑁆𑀤𑁆𑀭𑀺𑀬𑀯𑀺𑀜𑁆𑀜𑀸𑀡𑀲𑀗𑁆𑀕𑀢𑀺𑀬𑀸 𑀯𑀺𑀦𑀸 𑀢𑀤𑀪𑀸𑀯𑀢𑁄. 𑀙𑀨𑀲𑁆𑀲𑀸𑀬𑀢𑀦𑀦𑀺𑀫𑀺𑀢𑁆𑀢𑀯𑀝𑁆𑀝𑀲𑁆𑀲 𑀅𑀦𑀼𑀧𑀘𑁆𑀙𑁂𑀤𑁄𑀢𑀺 𑀬𑀼𑀚𑁆𑀚𑀢𑀺 𑀢𑀢𑁆𑀣 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸. 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀲𑀫𑀼𑀤𑀬𑀸𑀤𑀺𑀧𑀚𑀸𑀦𑀦𑀸 𑀲𑀩𑁆𑀩𑀤𑀺𑀝𑁆𑀞𑀺𑀕𑀢𑀺𑀓𑀲𑀜𑁆𑀜𑀁 𑀅𑀢𑀺𑀘𑁆𑀘 𑀢𑀺𑀝𑁆𑀞𑀢𑀻𑀢𑀺 𑀬𑀼𑀚𑁆𑀚𑀢𑀺 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀪𑀸𑀯𑀢𑁄. 𑀇𑀫𑀸𑀳𑁂𑀯 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀻𑀳𑀺 𑀲𑀩𑁆𑀩𑀤𑀺𑀝𑁆𑀞𑀺𑀕𑀢𑀸𑀦𑀁 𑀅𑀦𑁆𑀢𑁄𑀚𑀸𑀮𑀻𑀓𑀢𑀪𑀸𑀯𑁄𑀢𑀺 𑀬𑀼𑀚𑁆𑀚𑀢𑀺 𑀅𑀓𑀺𑀭𑀺𑀬𑀯𑀸𑀤𑀸𑀤𑀻𑀦𑀁 𑀇𑀲𑁆𑀲𑀭𑀯𑀸𑀤𑀸𑀤𑀻𑀦𑀜𑁆𑀘 𑀢𑀤𑀦𑁆𑀢𑁄𑀕𑀥𑀢𑁆𑀢𑀸. 𑀢𑀣𑀸 𑀘𑁂𑀯 𑀲𑀁𑀯𑀡𑁆𑀡𑀺𑀢𑀁. 𑀉𑀘𑁆𑀙𑀺𑀦𑁆𑀦𑀪𑀯𑀦𑁂𑀢𑁆𑀢𑀺𑀓𑁄 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄𑀢𑀺 𑀬𑀼𑀚𑁆𑀚𑀢𑀺, 𑀬𑀲𑁆𑀫𑀸 𑀪𑀕𑀯𑀸 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑁄 ¶ 𑀲𑀢𑁆𑀢𑀩𑁄𑀚𑁆𑀛𑀗𑁆𑀕𑁂𑀬𑁂𑀯 𑀬𑀣𑀸𑀪𑀽𑀢𑀁 𑀪𑀸𑀯𑁂𑀲𑀺. 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀺𑀦𑀺𑀩𑁆𑀩𑀼𑀢𑀁 𑀦 𑀤𑀓𑁆𑀔𑀦𑁆𑀢𑀻𑀢𑀺 𑀬𑀼𑀚𑁆𑀚𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀁 𑀭𑀽𑀧𑀸𑀤𑀻𑀲𑀼 𑀓𑀲𑁆𑀲𑀘𑀺𑀧𑀺 𑀅𑀦𑀯𑀲𑁂𑀲𑀢𑁄𑀢𑀺 𑀅𑀬𑀁 𑀬𑀼𑀢𑁆𑀢𑀺𑀳𑀸𑀭𑁄.

𑀧𑀤𑀝𑁆𑀞𑀸𑀦𑀳𑀸𑀭𑀯𑀡𑁆𑀡𑀦𑀸

𑀅𑀯𑀡𑁆𑀡𑀸𑀭𑀳𑀅𑀯𑀡𑁆𑀡𑀸𑀦𑀼𑀭𑀽𑀧𑀲𑀫𑁆𑀧𑀢𑁆𑀢𑀸𑀦𑀸𑀤𑁂𑀬𑁆𑀬𑀯𑀘𑀦𑀢𑀸𑀤𑀺𑀯𑀺𑀧𑀢𑁆𑀢𑀻𑀦𑀁 ¶ 𑀧𑀤𑀝𑁆𑀞𑀸𑀦𑀁. 𑀯𑀡𑁆𑀡𑀸𑀭𑀳𑀯𑀡𑁆𑀡𑀸𑀦𑀼𑀭𑀽𑀲𑀫𑁆𑀧𑀢𑁆𑀢𑀲𑀤𑁆𑀥𑁂𑀬𑁆𑀬𑀯𑀘𑀦𑀢𑀸𑀤𑀺𑀲𑀫𑁆𑀧𑀢𑁆𑀢𑀻𑀦𑀁 𑀧𑀤𑀝𑁆𑀞𑀸𑀦𑀁. 𑀢𑀣𑀸 𑀆𑀖𑀸𑀢𑀸𑀤𑀬𑁄 𑀦𑀺𑀭𑀬𑀸𑀤𑀺𑀤𑀼𑀓𑁆𑀔𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀆𑀖𑀸𑀢𑀸𑀤𑀻𑀦𑀁 𑀅𑀓𑀭𑀡𑀁 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀆𑀤𑀺𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀦𑀁 𑀧𑀤𑀝𑁆𑀞𑀸𑀦𑀁. 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀧𑀝𑀺𑀯𑀺𑀭𑀢𑀺 𑀅𑀭𑀺𑀬𑀲𑁆𑀲 𑀲𑀻𑀮𑀓𑁆𑀔𑀦𑁆𑀥𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀭𑀺𑀬𑁄 𑀲𑀻𑀮𑀓𑁆𑀔𑀦𑁆𑀥𑁄 𑀅𑀭𑀺𑀬𑀲𑁆𑀲 𑀲𑀫𑀸𑀥𑀺𑀓𑁆𑀔𑀦𑁆𑀥𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀭𑀺𑀬𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀅𑀭𑀺𑀬𑀲𑁆𑀲 𑀧𑀜𑁆𑀜𑀸𑀓𑁆𑀔𑀦𑁆𑀥𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀕𑀫𑁆𑀪𑀻𑀭𑀢𑀸𑀤𑀺𑀯𑀺𑀲𑁂𑀲𑀬𑀼𑀢𑁆𑀢𑀁 𑀪𑀕𑀯𑀢𑁄 𑀧𑀝𑀺𑀯𑁂𑀥𑀧𑁆𑀧𑀓𑀸𑀭𑀜𑀸𑀡𑀁 𑀤𑁂𑀲𑀦𑀸𑀜𑀸𑀡𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀤𑁂𑀲𑀦𑀸𑀜𑀸𑀡𑀁 𑀯𑀺𑀦𑁂𑀬𑁆𑀬𑀸𑀦𑀁 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀲𑀩𑁆𑀩𑀸𑀧𑀺 𑀤𑀺𑀝𑁆𑀞𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑁆𑀢𑀺 𑀲𑀸 𑀬𑀣𑀸𑀭𑀳𑀁 𑀦𑀯𑀯𑀺𑀥𑀲𑁆𑀲𑀸𑀧𑀺 𑀪𑀯𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀪𑀯𑁄 𑀚𑀸𑀢𑀺𑀬𑀸, 𑀚𑀸𑀢𑀺 𑀚𑀭𑀸𑀫𑀭𑀡𑀲𑁆𑀲, 𑀲𑁄𑀓𑀸𑀤𑀻𑀦𑀜𑁆𑀘 𑀧𑀤𑀝𑁆𑀞𑀸𑀦𑀁. 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑀸𑀤𑀺𑀬𑀣𑀸𑀪𑀽𑀢𑀯𑁂𑀤𑀦𑀁 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀅𑀦𑀼𑀩𑁄𑀥𑀧𑀝𑀺𑀯𑁂𑀥𑁄. 𑀢𑀢𑁆𑀣 𑀅𑀦𑀼𑀩𑁄𑀥𑁄 𑀧𑀝𑀺𑀯𑁂𑀥𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀧𑀝𑀺𑀯𑁂𑀥𑁄 𑀘𑀢𑀼𑀩𑁆𑀩𑀺𑀥𑀲𑁆𑀲 𑀲𑀸𑀫𑀜𑁆𑀜𑀨𑀮𑀲𑁆𑀲 𑀧𑀤𑀝𑁆𑀞𑀸𑀦𑀁. ‘‘𑀅𑀚𑀸𑀦𑀢𑀁 𑀅𑀧𑀲𑁆𑀲𑀢’’𑀦𑁆𑀢𑀺 𑀅𑀯𑀺𑀚𑁆𑀚𑀸𑀕𑀳𑀡𑀁, 𑀢𑀢𑁆𑀣 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀤𑀝𑁆𑀞𑀸𑀦𑁆𑀢𑀺 𑀬𑀸𑀯 𑀯𑁂𑀤𑀦𑀸 𑀢𑀡𑁆𑀳𑀸𑀬 𑀧𑀤𑀝𑁆𑀞𑀸𑀦𑁆𑀢𑀺 𑀦𑁂𑀢𑀩𑁆𑀩𑀁. ‘‘𑀢𑀡𑁆𑀳𑀸𑀕𑀢𑀸𑀦𑀁 𑀧𑀭𑀺𑀢𑀲𑁆𑀲𑀺𑀢𑀯𑀺𑀧𑁆𑀨𑀦𑁆𑀤𑀺𑀢’’𑀦𑁆𑀢𑀺 𑀏𑀢𑁆𑀣 𑀢𑀡𑁆𑀳𑀸 𑀉𑀧𑀸𑀤𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. ‘‘𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸’’𑀢𑀺 𑀏𑀢𑁆𑀣 𑀲𑀲𑁆𑀲𑀢𑀸𑀤𑀺𑀧𑀜𑁆𑀜𑀸𑀧𑀦𑀁 𑀧𑀭𑁂𑀲𑀁 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁄 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀼𑀭𑀺𑀲𑀽𑀧𑀲𑁆𑀲𑀬𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀻𑀳𑀺 𑀯𑀺𑀫𑀼𑀔𑀢𑀸𑀬, 𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀸𑀤𑀻𑀦𑀜𑁆𑀘 𑀧𑀤𑀝𑁆𑀞𑀸𑀦𑀁, ‘‘𑀅𑀜𑁆𑀜𑀢𑁆𑀭 𑀨𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀨𑀲𑁆𑀲𑁄 𑀯𑁂𑀤𑀦𑀸𑀬 𑀧𑀤𑀝𑁆𑀞𑀸𑀦𑀁, 𑀙 𑀨𑀲𑁆𑀲𑀸𑀬𑀢𑀦𑀸𑀦𑀺 𑀨𑀲𑁆𑀲𑀲𑁆𑀲, 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀘 𑀧𑀤𑀝𑁆𑀞𑀸𑀦𑀁, 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 ¶ 𑀲𑀫𑀼𑀤𑀬𑀸𑀤𑀺𑀬𑀣𑀸𑀪𑀽𑀢𑀧𑁆𑀧𑀚𑀸𑀦𑀦𑀁 𑀦𑀺𑀩𑁆𑀩𑀺𑀤𑀸𑀬 𑀧𑀤𑀝𑁆𑀞𑀸𑀦𑀁, 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀲𑁆𑀲𑀸𑀢𑀺 𑀬𑀸𑀯 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀦𑁂𑀢𑀩𑁆𑀩𑀁. 𑀪𑀕𑀯𑀢𑁄 𑀪𑀯𑀦𑁂𑀢𑁆𑀢𑀺𑀲𑀫𑀼𑀘𑁆𑀙𑁂𑀤𑁄 𑀲𑀩𑁆𑀩𑀜𑁆𑀜𑀼𑀢𑀸𑀬 𑀧𑀤𑀝𑁆𑀞𑀸𑀦𑀁. 𑀢𑀣𑀸 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲𑀸𑀢𑀺 𑀅𑀬𑀁 𑀧𑀤𑀝𑁆𑀞𑀸𑀦𑀳𑀸𑀭𑁄.

𑀮𑀓𑁆𑀔𑀡𑀳𑀸𑀭𑀯𑀡𑁆𑀡𑀦𑀸

𑀆𑀖𑀸𑀢𑀸𑀤𑀺𑀕𑁆𑀕𑀳𑀡𑁂𑀦 ¶ 𑀓𑁄𑀥𑀼𑀧𑀦𑀸𑀳𑀫𑀓𑁆𑀔𑀧𑀮𑀸𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀲𑀸𑀭𑀫𑁆𑀪𑀧𑀭𑀯𑀫𑁆𑀪𑀦𑀸𑀤𑀻𑀦𑀁 𑀲𑀗𑁆𑀕𑀳𑁄 𑀧𑀝𑀺𑀖𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀆𑀦𑀦𑁆𑀤𑀸𑀤𑀺𑀕𑁆𑀕𑀳𑀡𑁂𑀦 𑀅𑀪𑀺𑀚𑁆𑀛𑀸𑀯𑀺𑀲𑀫𑀮𑁄𑀪𑀫𑀸𑀦𑀸𑀢𑀺𑀫𑀸𑀦𑀫𑀤𑀧𑁆𑀧𑀫𑀸𑀤𑀸𑀤𑀻𑀦𑀁 𑀲𑀗𑁆𑀕𑀳𑁄 𑀮𑁄𑀪𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀲𑀫𑀸𑀦𑀮𑀓𑁆𑀔𑀡𑀢𑁆𑀢𑀸. 𑀢𑀣𑀸 ¶ 𑀆𑀖𑀸𑀢𑀕𑁆𑀕𑀳𑀡𑁂𑀦 𑀅𑀯𑀲𑀺𑀝𑁆𑀞𑀕𑀦𑁆𑀣𑀦𑀻𑀯𑀭𑀡𑀸𑀦𑀁 𑀲𑀗𑁆𑀕𑀳𑁄 𑀓𑀸𑀬𑀕𑀦𑁆𑀣𑀦𑀻𑀯𑀭𑀡𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀆𑀦𑀦𑁆𑀤𑀕𑁆𑀕𑀳𑀡𑁂𑀦 𑀨𑀲𑁆𑀲𑀸𑀤𑀻𑀦𑀁 𑀲𑀗𑁆𑀕𑀳𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀲𑀻𑀮𑀕𑁆𑀕𑀳𑀡𑁂𑀦 𑀅𑀥𑀺𑀘𑀺𑀢𑁆𑀢𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀦𑀫𑁆𑀧𑀺 𑀲𑀗𑁆𑀕𑀳𑁄 𑀲𑀺𑀓𑁆𑀔𑀸𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀇𑀥 𑀧𑀦 𑀲𑀻𑀮𑀲𑁆𑀲𑁂𑀯 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀺𑀓𑀲𑁆𑀲 𑀤𑀝𑁆𑀞𑀩𑁆𑀩𑀁. 𑀤𑀺𑀝𑁆𑀞𑀺𑀕𑁆𑀕𑀳𑀡𑁂𑀦 𑀅𑀯𑀲𑀺𑀝𑁆𑀞𑀉𑀧𑀸𑀤𑀸𑀦𑀸𑀦𑀫𑁆𑀧𑀺 𑀲𑀗𑁆𑀕𑀳𑁄 𑀉𑀧𑀸𑀤𑀸𑀦𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. ‘‘𑀯𑁂𑀤𑀦𑀸𑀦’’𑀦𑁆𑀢𑀺 𑀏𑀢𑁆𑀣 𑀯𑁂𑀤𑀦𑀸𑀕𑁆𑀕𑀳𑀡𑁂𑀦 𑀅𑀯𑀲𑀺𑀝𑁆𑀞𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀫𑁆𑀧𑀺 𑀲𑀗𑁆𑀕𑀳𑁄 𑀔𑀦𑁆𑀥𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀢𑀣𑀸 𑀯𑁂𑀤𑀦𑀸𑀬 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀲𑀫𑁆𑀫𑀲𑀦𑀽𑀧𑀕𑀸𑀦𑀁 𑀲𑀩𑁆𑀩𑁂𑀲𑀁 𑀆𑀬𑀢𑀦𑀸𑀦𑀁 𑀥𑀸𑀢𑀽𑀦𑀜𑁆𑀘 𑀲𑀗𑁆𑀕𑀳𑁄 𑀆𑀬𑀢𑀦𑀮𑀓𑁆𑀔𑀡𑁂𑀦, 𑀥𑀸𑀢𑀼𑀮𑀓𑁆𑀔𑀡𑁂𑀦 𑀘 𑀏𑀓𑀮𑀓𑁆𑀔𑀡𑀢𑁆𑀢𑀸. ‘‘𑀅𑀚𑀸𑀦𑀢𑀁 𑀅𑀧𑀲𑁆𑀲𑀢’’𑀦𑁆𑀢𑀺 𑀏𑀢𑁆𑀣 𑀅𑀯𑀺𑀚𑁆𑀚𑀸𑀕𑁆𑀕𑀳𑀡𑁂𑀦 𑀳𑁂𑀢𑀼𑀆𑀲𑀯𑁄𑀖𑀬𑁄𑀕𑀦𑀻𑀯𑀭𑀡𑀸𑀤𑀺𑀲𑀗𑁆𑀕𑀳𑁄 𑀳𑁂𑀢𑀸𑀤𑀺𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸 𑀅𑀯𑀺𑀚𑁆𑀚𑀸𑀬, 𑀢𑀣𑀸 ‘‘𑀢𑀡𑁆𑀳𑀸𑀕𑀢𑀸𑀦𑀁 𑀧𑀭𑀺𑀢𑀲𑁆𑀲𑀺𑀢𑀯𑀺𑀧𑁆𑀨𑀦𑁆𑀤𑀺𑀢’’𑀦𑁆𑀢𑀺 𑀏𑀢𑁆𑀣 𑀢𑀡𑁆𑀳𑀸𑀕𑁆𑀕𑀳𑀡𑁂𑀦𑀸𑀧𑀺. ‘‘𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸’’𑀢𑀺 𑀏𑀢𑁆𑀣 𑀨𑀲𑁆𑀲𑀕𑁆𑀕𑀳𑀡𑁂𑀦 𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀸𑀦𑀁 𑀲𑀗𑁆𑀕𑀳𑁄 𑀯𑀺𑀧𑀮𑁆𑀮𑀸𑀲𑀳𑁂𑀢𑀼𑀪𑀸𑀯𑁂𑀦, 𑀔𑀦𑁆𑀥𑀮𑀓𑁆𑀔𑀡𑁂𑀦 𑀘 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀙𑀨𑀲𑁆𑀲𑀸𑀬𑀢𑀦𑀕𑁆𑀕𑀳𑀡𑁂𑀦 𑀔𑀦𑁆𑀥𑀺𑀦𑁆𑀤𑁆𑀭𑀺𑀬𑀥𑀸𑀢𑀸𑀤𑀻𑀦𑀁 𑀲𑀗𑁆𑀕𑀳𑁄 𑀨𑀲𑁆𑀲𑀼𑀧𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑀸𑀬, 𑀲𑀫𑁆𑀫𑀲𑀦𑀲𑀪𑀸𑀯𑁂𑀦 𑀘 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀪𑀯𑀦𑁂𑀢𑁆𑀢𑀺𑀕𑁆𑀕𑀳𑀡𑁂𑀦 𑀅𑀯𑀺𑀚𑁆𑀚𑀸𑀤𑀻𑀦𑀫𑁆𑀧𑀺 ¶ 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀲𑀗𑁆𑀕𑀳𑁄 𑀯𑀝𑁆𑀝𑀳𑁂𑀢𑀼𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸𑀢𑀺 𑀅𑀬𑀁 𑀮𑀓𑁆𑀔𑀡𑀳𑀸𑀭𑁄.

𑀘𑀢𑀼𑀩𑁆𑀬𑀽𑀳𑀳𑀸𑀭𑀯𑀡𑁆𑀡𑀦𑀸

𑀦𑀺𑀦𑁆𑀤𑀸𑀧𑀲𑀁𑀲𑀸𑀳𑀺 𑀲𑀫𑁆𑀫𑀸𑀓𑀫𑁆𑀧𑀺𑀢𑀘𑁂𑀢𑀲𑀸 𑀫𑀺𑀘𑁆𑀙𑀸𑀚𑀻𑀯𑀢𑁄 𑀅𑀦𑁄𑀭𑀢𑀸 𑀲𑀲𑁆𑀲𑀢𑀸𑀤𑀺𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀺𑀦𑁄 𑀲𑀻𑀮𑀸𑀤𑀺𑀥𑀫𑁆𑀫𑀓𑁆𑀔𑀦𑁆𑀥𑁂𑀲𑀼 𑀅𑀧𑁆𑀧𑀢𑀺𑀝𑁆𑀞𑀺𑀢𑀢𑀸𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀕𑀼𑀡𑀭𑀲𑀲𑁆𑀲𑀸𑀤𑀯𑀺𑀫𑀼𑀔𑀸 𑀯𑁂𑀦𑁂𑀬𑁆𑀬𑀸 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀦𑀺𑀤𑀸𑀦𑀁. 𑀢𑁂 𑀬𑀣𑀸𑀯𑀼𑀢𑁆𑀢𑀤𑁄𑀲𑀯𑀺𑀦𑀺𑀫𑀼𑀢𑁆𑀢𑀸 𑀓𑀣𑀁 𑀦𑀼 𑀔𑁄 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀉𑀪𑀬𑀳𑀺𑀢𑀧𑀭𑀸 𑀪𑀯𑁂𑀬𑁆𑀬𑀼𑀦𑁆𑀢𑀺 𑀅𑀬𑀫𑁂𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄. 𑀧𑀤𑀦𑀺𑀩𑁆𑀩𑀘𑀦𑀁 𑀦𑀺𑀭𑀼𑀢𑁆𑀢𑀺. 𑀢𑀁 ‘‘𑀏𑀯’’𑀦𑁆𑀢𑀺𑀆𑀤𑀺𑀦𑀺𑀤𑀸𑀦𑀧𑀤𑀸𑀦𑀁, ‘‘𑀫𑀫’’𑀦𑁆𑀢𑀺𑀆𑀤𑀺𑀧𑀸𑀴𑀺𑀧𑀤𑀸𑀦𑀜𑁆𑀘 𑀅𑀝𑁆𑀞𑀓𑀣𑀸𑀯𑀲𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀅𑀢𑀺𑀯𑀺𑀢𑁆𑀣𑀸𑀭𑀪𑀬𑁂𑀦 𑀦 𑀯𑀺𑀢𑁆𑀣𑀸𑀭𑀬𑀺𑀫𑁆𑀳. 𑀧𑀤𑀧𑀤𑀢𑁆𑀣𑀦𑀺𑀤𑁆𑀤𑁂𑀲𑀦𑀺𑀓𑁆𑀔𑁂𑀧𑀲𑀼𑀢𑁆𑀢𑀤𑁂𑀲𑀦𑀸𑀲𑀦𑁆𑀥𑀺𑀯𑀲𑁂𑀦 𑀙𑀩𑁆𑀩𑀺𑀥𑀸 𑀲𑀦𑁆𑀥𑀺. 𑀢𑀢𑁆𑀣 𑀧𑀤𑀲𑁆𑀲 𑀧𑀤𑀦𑁆𑀢𑀭𑁂𑀦 𑀲𑀫𑁆𑀩𑀦𑁆𑀥𑁄 𑀧𑀤𑀲𑀦𑁆𑀥𑀺. 𑀢𑀣𑀸 𑀧𑀤𑀢𑁆𑀣𑀲𑁆𑀲 𑀧𑀤𑀢𑁆𑀣𑀦𑁆𑀢𑀭𑁂𑀦 𑀲𑀫𑁆𑀩𑀦𑁆𑀥𑁄 𑀧𑀤𑀢𑁆𑀣𑀲𑀦𑁆𑀥𑀺 ¶ . 𑀦𑀸𑀦𑀸𑀦𑀼𑀲𑀦𑁆𑀥𑀺𑀓𑀲𑁆𑀲 𑀲𑀼𑀢𑁆𑀢𑀲𑁆𑀲 𑀢𑀁𑀢𑀁𑀅𑀦𑀼𑀲𑀦𑁆𑀥𑀻𑀳𑀺 𑀲𑀫𑁆𑀩𑀦𑁆𑀥𑁄, 𑀏𑀓𑀸𑀦𑀼𑀲𑀦𑁆𑀥𑀺𑀓𑀲𑁆𑀲 𑀘 𑀧𑀼𑀩𑁆𑀩𑀸𑀧𑀭𑀲𑀫𑁆𑀩𑀦𑁆𑀥𑁄 𑀦𑀺𑀤𑁆𑀤𑁂𑀲𑀲𑀦𑁆𑀥𑀺 ¶ , 𑀬𑀸 𑀅𑀝𑁆𑀞𑀓𑀣𑀸𑀬𑀁 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺𑀬𑀣𑀸𑀦𑀼𑀲𑀦𑁆𑀥𑀺𑀯𑀲𑁂𑀦 𑀢𑀺𑀯𑀺𑀥𑀸 𑀯𑀺𑀪𑀢𑁆𑀢𑀸, 𑀢𑀸 𑀧𑀦𑁂𑀢𑀸 𑀢𑀺𑀲𑁆𑀲𑁄𑀧𑀺 𑀲𑀦𑁆𑀥𑀺𑀬𑁄 𑀅𑀝𑁆𑀞𑀓𑀣𑀸𑀬𑀁 𑀯𑀺𑀘𑀸𑀭𑀺𑀢𑀸 𑀏𑀯. 𑀲𑀼𑀢𑁆𑀢𑀲𑀦𑁆𑀥𑀺 𑀘 𑀧𑀞𑀫𑀁 𑀦𑀺𑀓𑁆𑀔𑁂𑀧𑀯𑀲𑁂𑀦 𑀅𑀫𑁆𑀳𑁂𑀳𑀺 𑀧𑀼𑀩𑁆𑀩𑁂 𑀤𑀲𑁆𑀲𑀺𑀢𑀸𑀬𑁂𑀯. 𑀏𑀓𑀺𑀲𑁆𑀲𑀸 𑀤𑁂𑀲𑀦𑀸𑀬 𑀤𑁂𑀲𑀦𑀸𑀦𑁆𑀢𑀭𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑀁 𑀤𑁂𑀲𑀦𑀸𑀲𑀦𑁆𑀥𑀺, 𑀲𑀸 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 ‘‘𑀫𑀫𑀁 𑀯𑀸 𑀪𑀺𑀓𑁆𑀔𑀯𑁂…𑀧𑁂… 𑀦 𑀘𑁂𑀢𑀲𑁄 𑀅𑀦𑀪𑀺𑀭𑀤𑁆𑀥𑀺 𑀓𑀭𑀡𑀻𑀬𑀸’’𑀢𑀺 𑀅𑀬𑀁 𑀤𑁂𑀲𑀦𑀸 ‘‘𑀉𑀪𑀢𑁄𑀤𑀡𑁆𑀟𑀓𑁂𑀦 𑀘𑁂𑀧𑀺 𑀪𑀺𑀓𑁆𑀔𑀯𑁂 𑀓𑀓𑀘𑁂𑀦 𑀘𑁄𑀭𑀸 𑀑𑀘𑀭𑀓𑀸 𑀅𑀗𑁆𑀕𑀫𑀗𑁆𑀕𑀸𑀦𑀺 𑀑𑀓𑁆𑀓𑀦𑁆𑀢𑁂𑀬𑁆𑀬𑀼𑀁, 𑀢𑀢𑁆𑀭𑀧𑀺 𑀬𑁄 𑀫𑀦𑁄 𑀧𑀤𑀽𑀲𑁂𑀬𑁆𑀬, 𑀦 𑀫𑁂 𑀲𑁄 𑀢𑁂𑀦 𑀲𑀸𑀲𑀦𑀓𑀭𑁄’’𑀢𑀺 (𑀫. 𑀦𑀺. 𑁧.𑁨𑁩𑁨) 𑀇𑀫𑀸𑀬 ¶ 𑀤𑁂𑀲𑀦𑀸𑀬 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀢𑀺. ‘‘𑀢𑀼𑀫𑁆𑀳𑀁 𑀬𑁂𑀯𑀲𑁆𑀲 𑀢𑁂𑀦 𑀅𑀦𑁆𑀢𑀭𑀸𑀬𑁄’’𑀢𑀺 ‘‘𑀓𑀫𑁆𑀫𑀲𑁆𑀲𑀓𑀸 𑀫𑀸𑀡𑀯 𑀲𑀢𑁆𑀢𑀸…𑀧𑁂… 𑀤𑀸𑀬𑀸𑀤𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 (𑀅. 𑀦𑀺. 𑁧𑁦.𑁨𑁧𑁬) 𑀇𑀫𑀸𑀬 𑀤𑁂𑀲𑀦𑀸𑀬 𑀲𑀁𑀲𑀦𑁆𑀤𑀢𑀺. ‘‘𑀅𑀧𑀺 𑀢𑀼𑀫𑁆𑀳𑁂…𑀧𑁂… 𑀆𑀚𑀸𑀦𑁂𑀬𑁆𑀬𑀸𑀣𑀸’’𑀢𑀺 ‘‘𑀓𑀼𑀤𑁆𑀥𑁄 𑀅𑀢𑁆𑀣𑀁…𑀧𑁂… 𑀲𑀳𑀢𑁂 𑀦𑀭’’𑀦𑁆𑀢𑀺 (𑀅. 𑀦𑀺. 𑁭.𑁬𑁪; 𑀫𑀳𑀸𑀦𑀺. 𑁫, 𑁧𑁫𑁬, 𑁧𑁯𑁫) 𑀇𑀫𑀸𑀬 𑀤𑁂𑀲𑀦𑀸𑀬 𑀲𑀁𑀲𑀦𑁆𑀤𑀢𑀺.

‘‘𑀫𑀫𑀁 𑀯𑀸 𑀪𑀺𑀓𑁆𑀔𑀯𑁂 𑀧𑀭𑁂 𑀯𑀡𑁆𑀡𑀁…𑀧𑁂… 𑀦 𑀘𑁂𑀢𑀲𑁄 𑀉𑀩𑁆𑀩𑀺𑀮𑁆𑀮𑀸𑀯𑀺𑀢𑀢𑁆𑀢𑀁 𑀓𑀭𑀡𑀻𑀬’’𑀦𑁆𑀢𑀺 ‘‘𑀥𑀫𑁆𑀫𑀸𑀧𑀺 𑀯𑁄 𑀪𑀺𑀓𑁆𑀔𑀯𑁂 𑀧𑀳𑀸𑀢𑀩𑁆𑀩𑀸, 𑀧𑀕𑁂𑀯 𑀅𑀥𑀫𑁆𑀫𑀸 (𑀫. 𑀦𑀺. 𑁧.𑁨𑁪𑁦). 𑀓𑀼𑀮𑁆𑀮𑀽𑀧𑀫𑀁 𑀯𑁄 𑀪𑀺𑀓𑁆𑀔𑀯𑁂 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀦𑀺𑀢𑁆𑀣𑀭𑀡𑀢𑁆𑀣𑀸𑀬, 𑀦𑁄 𑀕𑀳𑀡𑀢𑁆𑀣𑀸𑀬𑀸’’𑀢𑀺 (𑀫. 𑀦𑀺. 𑁧.𑁨𑁪𑁦) 𑀇𑀫𑀸𑀬 𑀤𑁂𑀲𑀦𑀸𑀬 𑀲𑀁𑀲𑀦𑁆𑀤𑀢𑀺. ‘‘𑀢𑀢𑁆𑀭 𑀘𑁂 𑀢𑀼𑀫𑁆𑀳𑁂𑀳𑀺…𑀧𑁂… 𑀉𑀩𑁆𑀩𑀺𑀮𑀸𑀯𑀺𑀢𑀸, 𑀢𑀼𑀫𑁆𑀳𑀁 𑀬𑁂𑀯𑀲𑁆𑀲 𑀢𑁂𑀦 𑀅𑀦𑁆𑀢𑀭𑀸𑀬𑁄’’𑀢𑀺 ‘‘𑀮𑀼𑀤𑁆𑀥𑁄𑀅𑀢𑁆𑀣𑀁…𑀧𑁂… 𑀲𑀳𑀢𑁂 𑀦𑀭’’𑀦𑁆𑀢𑀺 (𑀇𑀢𑀺𑀯𑀼. 𑁮𑁮; 𑀫𑀳𑀸𑀦𑀺. 𑁫.𑁧𑁫𑁬, 𑁧𑁯𑁫; 𑀘𑀽𑀴𑀦𑀺. 𑁧𑁨𑁮) ‘‘𑀓𑀸𑀫𑀦𑁆𑀥𑀸 𑀚𑀸𑀮𑀲𑀜𑁆𑀙𑀦𑁆𑀦𑀸, 𑀢𑀡𑁆𑀳𑀸𑀙𑀤𑀦𑀙𑀸𑀤𑀺𑀢𑀸’’𑀢𑀺 (𑀉𑀤𑀸. 𑁬𑁪; 𑀦𑁂𑀢𑁆𑀢𑀺. 𑁨𑁭, 𑁯𑁦; 𑀧𑁂𑀝𑀓𑁄. 𑁧𑁪) 𑀇𑀫𑀸𑀳𑀺 𑀤𑁂𑀲𑀦𑀸𑀳𑀺 𑀲𑀁𑀲𑀦𑁆𑀤𑀢𑀺.

‘‘𑀅𑀧𑁆𑀧𑀫𑀢𑁆𑀢𑀓𑀁…𑀧𑁂… 𑀲𑀻𑀮𑀫𑀢𑁆𑀢𑀓’’𑀦𑁆𑀢𑀺 ‘‘𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀔𑁄 𑀩𑁆𑀭𑀸𑀳𑁆𑀫𑀡 𑀬𑀜𑁆𑀜𑁄 𑀧𑀼𑀭𑀺𑀫𑁂𑀳𑀺 𑀬𑀜𑁆𑀜𑁂𑀳𑀺 𑀅𑀧𑁆𑀧𑀝𑁆𑀞𑀢𑀭𑁄 𑀘 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑁄 𑀘 𑀫𑀳𑀧𑁆𑀨𑀮𑀢𑀭𑁄 𑀘 𑀫𑀳𑀸𑀦𑀺𑀲𑀁𑀲𑀢𑀭𑁄 𑀘𑀸’’𑀢𑀺𑀆𑀤𑀺𑀓𑀸𑀬 ¶ (𑀤𑀻. 𑀦𑀺. 𑁧.𑁩𑁫𑁩) 𑀤𑁂𑀲𑀦𑀸𑀬 𑀲𑀁𑀲𑀦𑁆𑀤𑀢𑀺, 𑀧𑀞𑀫𑀚𑁆𑀛𑀸𑀦𑀲𑁆𑀲 𑀲𑀻𑀮𑀢𑁄 𑀫𑀳𑀧𑁆𑀨𑀮𑀫𑀳𑀸𑀦𑀺𑀲𑀁𑀲𑀢𑀭𑀪𑀸𑀯𑀯𑀘𑀦𑁂𑀦 𑀛𑀸𑀦𑀢𑁄 𑀲𑀻𑀮𑀲𑁆𑀲 𑀅𑀧𑁆𑀧𑀪𑀸𑀯𑀤𑀻𑀧𑀦𑀢𑁄.

‘‘𑀧𑀸𑀡𑀸𑀢𑀺𑀧𑀸𑀢𑀁 ¶ 𑀧𑀳𑀸𑀬𑀸’’𑀢𑀺𑀆𑀤𑀺 ‘‘𑀲𑀫𑀡𑁄 𑀔𑀮𑀼 𑀪𑁄 𑀕𑁄𑀢𑀫𑁄 𑀲𑀻𑀮𑀯𑀸…𑀧𑁂… 𑀓𑀼𑀲𑀮𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺𑀆𑀤𑀺𑀓𑀸𑀳𑀺 (𑀤𑀻. 𑀦𑀺. 𑁧.𑁩𑁦𑁪) 𑀤𑁂𑀲𑀦𑀸𑀳𑀺 𑀲𑀁𑀲𑀦𑁆𑀤𑀢𑀺.

‘‘𑀅𑀜𑁆𑀜𑁂𑀯 𑀥𑀫𑁆𑀫𑀸 𑀕𑀫𑁆𑀪𑀻𑀭𑀸’’𑀢𑀺𑀆𑀤𑀺 ‘‘𑀅𑀥𑀺𑀕𑀢𑁄 𑀔𑁄 𑀫𑁆𑀬𑀸𑀬𑀁 𑀥𑀫𑁆𑀫𑁄 𑀕𑀫𑁆𑀪𑀻𑀭𑁄’’𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁬𑁭; 𑀫. 𑀦𑀺. 𑁧.𑁨𑁮𑁧; 𑁨.𑁩𑁩𑁭; 𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁭, 𑁮) 𑀧𑀸𑀴𑀺𑀬𑀸 ¶ 𑀲𑀁𑀲𑀦𑁆𑀤𑀢𑀺. 𑀕𑀫𑁆𑀪𑀻𑀭𑀢𑀸𑀤𑀺𑀯𑀺𑀲𑁂𑀲𑀬𑀼𑀢𑁆𑀢𑀥𑀫𑁆𑀫𑀧𑀝𑀺𑀯𑁂𑀥𑁂𑀦 𑀳𑀺 𑀜𑀸𑀡𑀲𑁆𑀲 𑀕𑀫𑁆𑀪𑀻𑀭𑀸𑀤𑀺𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀻𑀢𑀺.

‘‘𑀲𑀦𑁆𑀢𑀺 𑀪𑀺𑀓𑁆𑀔𑀯𑁂 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺 ‘‘𑀲𑀦𑁆𑀢𑀺 𑀪𑀺𑀓𑁆𑀔𑀯𑁂 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸…𑀧𑁂… 𑀅𑀪𑀺𑀯𑀤𑀦𑁆𑀢𑀺, 𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘, 𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜𑀦𑁆𑀢𑀺 𑀇𑀢𑁆𑀣𑁂𑀓𑁂 𑀅𑀪𑀺𑀯𑀤𑀦𑁆𑀢𑀺, 𑀅𑀲𑀲𑁆𑀲𑀢𑁄, 𑀲𑀲𑁆𑀲𑀢𑁄 𑀘 𑀅𑀲𑀲𑁆𑀲𑀢𑁄 𑀘, 𑀦𑁂𑀯 𑀲𑀲𑁆𑀲𑀢𑁄 𑀘 𑀦𑀸𑀲𑀲𑁆𑀲𑀢𑁄 𑀘, 𑀅𑀦𑁆𑀢𑀯𑀸, 𑀅𑀦𑀦𑁆𑀢𑀯𑀸, 𑀅𑀦𑁆𑀢𑀯𑀸 𑀘 𑀅𑀦𑀦𑁆𑀢𑀯𑀸 𑀘, 𑀦𑁂𑀯𑀦𑁆𑀢𑀯𑀸 𑀦𑀸𑀦𑀦𑁆𑀢𑀯𑀸 𑀘 𑀅𑀢𑁆𑀢𑀸 𑀘 𑀮𑁄𑀓𑁄 𑀘 𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜𑀦𑁆𑀢𑀺 𑀇𑀢𑁆𑀣𑁂𑀓𑁂 𑀅𑀪𑀺𑀯𑀤𑀦𑁆𑀢𑀻’’𑀢𑀺𑀆𑀤𑀺𑀓𑀸𑀳𑀺 (𑀫. 𑀦𑀺. 𑁩.𑁨𑁭) 𑀤𑁂𑀲𑀦𑀸𑀳𑀺 𑀲𑀁𑀲𑀦𑁆𑀤𑀢𑀺.

‘‘𑀲𑀦𑁆𑀢𑀺 𑀪𑀺𑀓𑁆𑀔𑀯𑁂 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀸’’𑀢𑀺𑀆𑀤𑀺 ‘‘𑀲𑀦𑁆𑀢𑀺 𑀪𑀺𑀓𑁆𑀔𑀯𑁂 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀸…𑀧𑁂… 𑀅𑀪𑀺𑀯𑀤𑀦𑁆𑀢𑀺, 𑀲𑀜𑁆𑀜𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸. 𑀇𑀢𑁆𑀣𑁂𑀓𑁂 𑀅𑀪𑀺𑀯𑀤𑀦𑁆𑀢𑀺 𑀅𑀲𑀜𑁆𑀜𑀻, 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻 𑀘 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸. 𑀇𑀢𑁆𑀣𑁂𑀓𑁂 𑀅𑀪𑀺𑀯𑀤𑀦𑁆𑀢𑀺 𑀲𑀢𑁄 𑀯𑀸 𑀧𑀦 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀯𑀸 𑀧𑀦𑁂𑀓𑁂 𑀅𑀪𑀺𑀯𑀤𑀦𑁆𑀢𑀻’’𑀢𑀺𑀆𑀤𑀺𑀓𑀸𑀳𑀺 (𑀫. 𑀦𑀺. 𑁩.𑁨𑁧) 𑀤𑁂𑀲𑀦𑀸𑀳𑀺 𑀲𑀁𑀲𑀦𑁆𑀤𑀢𑀺. ‘‘𑀯𑁂𑀤𑀦𑀸𑀦𑀁…𑀧𑁂… 𑀢𑀣𑀸𑀕𑀢𑁄’’𑀢𑀺 ‘‘𑀢𑀬𑀺𑀤𑀁 ¶ 𑀲𑀗𑁆𑀔𑀢𑀁 𑀑𑀴𑀸𑀭𑀺𑀓𑀁, 𑀅𑀢𑁆𑀣𑀺 𑀔𑁄 𑀧𑀦 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑁄, 𑀅𑀢𑁆𑀣𑁂𑀢𑀦𑁆𑀢𑀺 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀢𑀲𑁆𑀲 𑀦𑀺𑀲𑁆𑀲𑀭𑀡𑀤𑀲𑁆𑀲𑀸𑀯𑀻 𑀢𑀣𑀸𑀕𑀢𑁄 𑀢𑀤𑀼𑀧𑀸𑀢𑀺𑀯𑀢𑁆𑀢𑁄’’𑀢𑀺𑀆𑀤𑀺𑀓𑀸𑀳𑀺 (𑀫. 𑀦𑀺. 𑁩.𑁨𑁮) 𑀤𑁂𑀲𑀦𑀸𑀳𑀺 𑀲𑀁𑀲𑀦𑁆𑀤𑀢𑀺.

‘‘𑀢𑀤𑀧𑀺 𑀢𑁂𑀲𑀁…𑀧𑁂… 𑀯𑀺𑀧𑁆𑀨𑀦𑁆𑀤𑀺𑀢𑀫𑁂𑀯𑀸’’𑀢𑀺 𑀇𑀤𑀁 ‘‘𑀢𑁂𑀲𑀁 𑀪𑀯𑀢𑀁 𑀅𑀜𑁆𑀜𑀢𑁆𑀭𑁂𑀯 𑀙𑀦𑁆𑀤𑀸𑀬 𑀅𑀜𑁆𑀜𑀢𑁆𑀭 𑀭𑀼𑀘𑀺𑀬𑀸 𑀅𑀜𑁆𑀜𑀢𑁆𑀭 𑀅𑀦𑀼𑀲𑁆𑀲𑀯𑀸 𑀅𑀜𑁆𑀜𑀢𑁆𑀭 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀧𑀘𑁆𑀘𑀢𑁆𑀢𑀁𑀬𑁂𑀯 𑀜𑀸𑀡𑀁 𑀪𑀯𑀺𑀲𑁆𑀲𑀢𑀺 𑀧𑀭𑀺𑀲𑀼𑀤𑁆𑀥𑀁 𑀧𑀭𑀺𑀬𑁄𑀤𑀸𑀢𑀦𑁆𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀧𑀘𑁆𑀘𑀢𑁆𑀢𑀁 𑀔𑁄 𑀧𑀦 𑀪𑀺𑀓𑁆𑀔𑀯𑁂 𑀜𑀸𑀡𑁂 𑀅𑀲𑀢𑀺 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂 𑀬𑀤𑀧𑀺 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀢𑀢𑁆𑀣 𑀜𑀸𑀡𑀪𑀸𑀕𑀫𑀢𑁆𑀢𑀫𑁂𑀯 ¶ 𑀧𑀭𑀺𑀬𑁄𑀤𑀸𑀧𑁂𑀦𑁆𑀢𑀺, 𑀢𑀤𑀧𑀺 𑀢𑁂𑀲𑀁 𑀪𑀯𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀉𑀧𑀸𑀤𑀸𑀦𑀫𑀓𑁆𑀔𑀸𑀬𑀢𑀻’’𑀢𑀺𑀆𑀤𑀺𑀓𑀸𑀳𑀺 (𑀫. 𑀦𑀺. 𑁩.𑁨𑁯) 𑀤𑁂𑀲𑀦𑀸𑀳𑀺 𑀲𑀁𑀲𑀦𑁆𑀤𑀢𑀺.

‘‘𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸’’𑀢𑀺 𑀇𑀤𑀜𑁆𑀘 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’’𑀦𑁆𑀢𑀺, (𑀲𑀁. 𑀦𑀺. 𑁨.𑁪𑁪) ‘‘𑀙𑀦𑁆𑀤𑀫𑀽𑀮𑀓𑀸 𑀇𑀫𑁂 𑀆𑀯𑀼𑀲𑁄 𑀥𑀫𑁆𑀫𑀸 𑀫𑀦𑀲𑀺𑀓𑀸𑀭𑀲𑀫𑀼𑀝𑁆𑀞𑀸𑀦𑀸 ¶ 𑀨𑀲𑁆𑀲𑀲𑀫𑁄𑀥𑀸𑀦𑀸 𑀯𑁂𑀤𑀦𑀸𑀲𑀫𑁄𑀲𑀭𑀡𑀸’’𑀢𑀺 (𑀅. 𑀦𑀺. 𑁮.𑁮𑁩) 𑀘 𑀆𑀤𑀺𑀓𑀸𑀳𑀺 𑀤𑁂𑀲𑀦𑀸𑀳𑀺 𑀲𑀁𑀲𑀦𑁆𑀤𑀢𑀺.

‘‘𑀬𑀢𑁄 𑀔𑁄 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦’’𑀦𑁆𑀢𑀺𑀆𑀤𑀺 ‘‘𑀬𑀢𑁄 𑀔𑁄 𑀆𑀦𑀦𑁆𑀤 𑀪𑀺𑀓𑁆𑀔𑀼 𑀦𑁂𑀯 𑀯𑁂𑀤𑀦𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀲𑀜𑁆𑀜𑀁, 𑀦 𑀲𑀗𑁆𑀔𑀸𑀭𑁂, 𑀦 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀲𑁄 𑀏𑀯𑀁 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀦 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺, 𑀅𑀦𑀼𑀧𑀸𑀤𑀺𑀬𑀁 𑀦 𑀧𑀭𑀺𑀢𑀲𑁆𑀲𑀢𑀺, 𑀅𑀧𑀭𑀺𑀢𑀲𑁆𑀲𑀁 𑀧𑀘𑁆𑀘𑀢𑁆𑀢𑀁𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀻’’𑀢𑀺𑀆𑀤𑀺𑀓𑀸𑀳𑀺 𑀤𑁂𑀲𑀦𑀸𑀳𑀺 𑀲𑀁𑀲𑀦𑁆𑀤𑀢𑀺.

‘‘𑀲𑀩𑁆𑀩𑁂 𑀢𑁂 𑀇𑀫𑁂𑀳𑁂𑀯 𑀤𑁆𑀯𑀸𑀲𑀝𑁆𑀞𑀺𑀬𑀸 𑀯𑀢𑁆𑀣𑀽𑀳𑀺 𑀅𑀦𑁆𑀢𑁄𑀚𑀸𑀮𑀻𑀓𑀢𑀸’’𑀢𑀺𑀆𑀤𑀺 ‘‘𑀬𑁂 ¶ 𑀳𑀺 𑀓𑁂𑀘𑀺 𑀪𑀺𑀓𑁆𑀔𑀯𑁂…𑀧𑁂… 𑀅𑀪𑀺𑀯𑀤𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑀸𑀦𑁂𑀯 𑀧𑀜𑁆𑀘 𑀓𑀸𑀬𑀸𑀦𑀺 𑀅𑀪𑀺𑀯𑀤𑀦𑁆𑀢𑀺 𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭’’𑀦𑁆𑀢𑀺𑀆𑀤𑀺𑀓𑀸𑀳𑀺 (𑀫. 𑀦𑀺. 𑁩.𑁨𑁬) 𑀤𑁂𑀲𑀦𑀸𑀳𑀺 𑀲𑀁𑀲𑀦𑁆𑀤𑀢𑀺. ‘‘𑀓𑀸𑀬𑀲𑁆𑀲 𑀪𑁂𑀤𑀸…𑀧𑁂… 𑀤𑁂𑀯𑀫𑀦𑀼𑀲𑁆𑀲𑀸’’𑀢𑀺 𑁋

‘‘𑀅𑀘𑁆𑀘𑀻 𑀬𑀣𑀸 𑀯𑀸𑀢𑀯𑁂𑀕𑁂𑀦 𑀔𑀺𑀢𑁆𑀢𑀸, (𑀉𑀧𑀲𑀺𑀯𑀸𑀢𑀺 𑀪𑀕𑀯𑀸)

𑀅𑀢𑁆𑀣𑀁 𑀧𑀮𑁂𑀢𑀺 𑀦 𑀉𑀧𑁂𑀢𑀺 𑀲𑀗𑁆𑀔𑀁;

𑀏𑀯𑀁 𑀫𑀼𑀦𑀻 𑀦𑀸𑀫𑀓𑀸𑀬𑀸 𑀯𑀺𑀫𑀼𑀢𑁆𑀢𑁄,

𑀅𑀢𑁆𑀣𑀁 𑀧𑀮𑁂𑀢𑀺 𑀦 𑀉𑀧𑁂𑀢𑀺 𑀲𑀗𑁆𑀔’’𑀦𑁆𑀢𑀺. (𑀲𑀼. 𑀦𑀺. 𑁧𑁦𑁮𑁦; 𑀘𑀽𑀴𑀦𑀺. 𑁪𑁩);

𑀆𑀤𑀺𑀓𑀸𑀳𑀺 𑀤𑁂𑀲𑀦𑀸𑀳𑀺 𑀲𑀁𑀲𑀦𑁆𑀤𑀢𑀻𑀢𑀺 𑀅𑀬𑀁 𑀘𑀸𑀢𑀼𑀩𑁆𑀬𑀽𑀳𑁄 𑀳𑀸𑀭𑁄.

𑀆𑀯𑀢𑁆𑀢𑀳𑀸𑀭𑀯𑀡𑁆𑀡𑀦𑀸

𑀆𑀖𑀸𑀢𑀸𑀤𑀻𑀦𑀁 𑀅𑀓𑀭𑀡𑀻𑀬𑀢𑀸𑀯𑀘𑀦𑁂𑀦 𑀔𑀦𑁆𑀢𑀺𑀲𑁄𑀭𑀘𑁆𑀘𑀸𑀦𑀼𑀝𑁆𑀞𑀸𑀦𑀁. 𑀢𑀢𑁆𑀣 𑀔𑀦𑁆𑀢𑀺𑀬𑀸 𑀲𑀤𑁆𑀥𑀸𑀧𑀜𑁆𑀜𑀸𑀧𑀭𑀸𑀧𑀓𑀸𑀭𑀤𑀼𑀓𑁆𑀔𑀲𑀳𑀕𑀢𑀸𑀦𑀁 𑀲𑀗𑁆𑀕𑀳𑁄, 𑀲𑁄𑀭𑀘𑁆𑀘𑁂𑀦 𑀲𑀻𑀮𑀲𑁆𑀲. 𑀲𑀤𑁆𑀥𑀸𑀤𑀺𑀕𑁆𑀕𑀳𑀡𑁂𑀦 𑀘 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀲𑀓𑀮𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀆𑀯𑀢𑁆𑀢𑀦𑁆𑀢𑀺. 𑀲𑀻𑀮𑀕𑁆𑀕𑀳𑀡𑁂𑀦 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀬𑁄 𑀲𑀩𑁆𑀩𑁂𑀧𑀺 𑀲𑀻𑀮𑀸𑀦𑀺𑀲𑀁𑀲𑀥𑀫𑁆𑀫𑀸 𑀆𑀯𑀢𑁆𑀢𑀦𑁆𑀢𑀺. 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀧𑀝𑀺𑀯𑀺𑀭𑀢𑀺𑀯𑀘𑀦𑁂𑀦 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑁄, 𑀢𑁂𑀦 ¶ 𑀲𑀓𑀮𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀆𑀯𑀢𑁆𑀢𑀢𑀺. 𑀕𑀫𑁆𑀪𑀻𑀭𑀢𑀸𑀤𑀺𑀯𑀺𑀲𑁂𑀲𑀬𑀼𑀢𑁆𑀢𑀥𑀫𑁆𑀫𑀕𑁆𑀕𑀳𑀡𑁂𑀦 𑀫𑀳𑀸𑀩𑁄𑀥𑀺𑀧𑀓𑀺𑀢𑁆𑀢𑀦𑀁. 𑀅𑀦𑀸𑀯𑀭𑀡𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀳𑀺 𑀆𑀲𑀯𑀓𑁆𑀔𑀬𑀜𑀸𑀡𑀁, 𑀆𑀲𑀯𑀓𑁆𑀔𑀬𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀘 𑀅𑀦𑀸𑀯𑀭𑀡𑀜𑀸𑀡𑀁 𑀫𑀳𑀸𑀩𑁄𑀥𑀺, 𑀢𑁂𑀦 𑀤𑀲𑀩𑀮𑀸𑀤𑀬𑁄 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸 𑀆𑀯𑀢𑁆𑀢𑀦𑁆𑀢𑀺. 𑀲𑀲𑁆𑀲𑀢𑀸𑀤𑀺𑀤𑀺𑀝𑁆𑀞𑀺𑀕𑁆𑀕𑀳𑀡𑁂𑀦 𑀢𑀡𑁆𑀳𑀸𑀯𑀺𑀚𑁆𑀚𑀸𑀬 ¶ 𑀲𑀗𑁆𑀕𑀳𑁄, 𑀢𑀸𑀳𑀺 𑀅𑀦𑀫𑀢𑀕𑁆𑀕𑀲𑀁𑀲𑀸𑀭𑀯𑀝𑁆𑀝𑀁 𑀆𑀯𑀢𑁆𑀢𑀢𑀺. 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑀸𑀤𑀺𑀬𑀣𑀸𑀪𑀽𑀢𑀯𑁂𑀤𑀦𑁂𑀦 𑀪𑀕𑀯𑀢𑁄 𑀧𑀭𑀺𑀜𑁆𑀜𑀸𑀢𑁆𑀢𑀬𑀯𑀺𑀲𑀼𑀤𑁆𑀥𑀺, 𑀢𑀸𑀬 𑀧𑀜𑁆𑀜𑀸𑀧𑀸𑀭𑀫𑀺𑀫𑀼𑀔𑁂𑀦 𑀲𑀩𑁆𑀩𑀧𑀸𑀭𑀫𑀺𑀬𑁄 𑀆𑀯𑀢𑁆𑀢𑀦𑁆𑀢𑀺. ‘‘𑀅𑀚𑀸𑀦𑀢𑀁 𑀅𑀧𑀲𑁆𑀲𑀢’’𑀦𑁆𑀢𑀺 𑀅𑀯𑀺𑀚𑁆𑀚𑀸𑀕𑁆𑀕𑀳𑀡𑁂𑀦 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀭𑀺𑀕𑁆𑀕𑀳𑁄, 𑀢𑁂𑀦 𑀘 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀫𑀽𑀮𑀓𑀸 𑀥𑀫𑁆𑀫𑀸 𑀆𑀯𑀢𑁆𑀢𑀦𑁆𑀢𑀺. ‘‘𑀢𑀡𑁆𑀳𑀸𑀕𑀢𑀸𑀦𑀁 𑀧𑀭𑀺𑀢𑀲𑁆𑀲𑀺𑀢𑀯𑀺𑀧𑁆𑀨𑀦𑁆𑀤𑀺𑀢’’𑀦𑁆𑀢𑀺 𑀢𑀡𑁆𑀳𑀸𑀕𑁆𑀕𑀳𑀡𑁂𑀦 𑀦𑀯 𑀢𑀡𑁆𑀳𑀸𑀫𑀽𑀮𑀓𑀸 𑀥𑀫𑁆𑀫𑀸 𑀆𑀯𑀢𑁆𑀢𑀦𑁆𑀢𑀺, ‘‘𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸’’𑀢𑀺𑀆𑀤𑀺 𑀲𑀲𑁆𑀲𑀢𑀸𑀤𑀺𑀧𑀜𑁆𑀜𑀸𑀧𑀦𑀲𑁆𑀲 ¶ 𑀧𑀘𑁆𑀘𑀬𑀸𑀥𑀻𑀦𑀯𑀼𑀢𑁆𑀢𑀺𑀤𑀲𑁆𑀲𑀦𑀁, 𑀢𑁂𑀦 𑀅𑀦𑀺𑀘𑁆𑀘𑀢𑀸𑀤𑀺𑀮𑀓𑁆𑀔𑀡𑀢𑁆𑀢𑀬𑀁 𑀆𑀯𑀢𑁆𑀢𑀢𑀺. 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑁂𑀦 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀤𑀸𑀦𑀺𑀤𑁆𑀤𑁂𑀲𑁄, 𑀢𑁂𑀦 𑀲𑀢𑁆𑀢𑀧𑀺 𑀯𑀺𑀲𑀼𑀤𑁆𑀥𑀺𑀬𑁄 𑀆𑀯𑀢𑁆𑀢𑀦𑁆𑀢𑀺. ‘‘𑀉𑀘𑁆𑀙𑀺𑀦𑁆𑀦𑀪𑀯𑀦𑁂𑀢𑁆𑀢𑀺𑀓𑁄 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄’’𑀢𑀺 𑀢𑀡𑁆𑀳𑀸𑀧𑀳𑀸𑀦𑀁, 𑀢𑁂𑀦 𑀪𑀕𑀯𑀢𑁄 𑀲𑀓𑀮𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀆𑀯𑀢𑁆𑀢𑀢𑀻𑀢𑀺 𑀅𑀬𑀁 𑀆𑀯𑀢𑁆𑀢𑁄 𑀳𑀸𑀭𑁄.

𑀯𑀺𑀪𑀢𑁆𑀢𑀺𑀳𑀸𑀭𑀯𑀡𑁆𑀡𑀦𑀸

𑀆𑀖𑀸𑀢𑀸𑀦𑀦𑁆𑀤𑀸𑀤𑀬𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀢𑁂𑀲𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺 𑀧𑀤𑀝𑁆𑀞𑀸𑀦𑀁. 𑀬𑁂𑀳𑀺 𑀧𑀦 𑀥𑀫𑁆𑀫𑁂𑀳𑀺 𑀆𑀖𑀸𑀢𑀸𑀦𑀦𑁆𑀤𑀸𑀤𑀻𑀦𑀁 𑀅𑀓𑀭𑀡𑀁 𑀅𑀧𑁆𑀧𑀯𑀢𑁆𑀢𑀺, 𑀢𑁂 𑀅𑀩𑁆𑀬𑀸𑀧𑀸𑀤𑀸𑀤𑀬𑁄 𑀓𑀼𑀲𑀮𑀸 𑀥𑀫𑁆𑀫𑀸, 𑀢𑁂𑀲𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺 𑀧𑀤𑀝𑁆𑀞𑀸𑀦𑀁. 𑀢𑁂𑀲𑀼 𑀆𑀖𑀸𑀢𑀸𑀤𑀬𑁄 𑀓𑀸𑀫𑀸𑀯𑀘𑀭𑀸𑀯, 𑀅𑀩𑁆𑀬𑀸𑀧𑀸𑀤𑀸𑀤𑀬𑁄 𑀘𑀢𑀼𑀪𑀽𑀫𑀓𑀸. 𑀢𑀣𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀧𑀝𑀺𑀯𑀺𑀭𑀢𑀺 𑀓𑀼𑀲𑀮𑀸 𑀯𑀸 𑀅𑀩𑁆𑀬𑀸𑀓𑀢𑀸 𑀯𑀸, 𑀢𑀲𑁆𑀲𑀸 𑀳𑀺𑀭𑁄𑀢𑁆𑀢𑀧𑁆𑀧𑀸𑀤𑀬𑁄 𑀥𑀫𑁆𑀫𑀸 𑀧𑀤𑀝𑁆𑀞𑀸𑀦𑀁. 𑀢𑀢𑁆𑀣 𑀓𑀼𑀲𑀮𑀸 𑀲𑀺𑀬𑀸 𑀓𑀸𑀫𑀸𑀯𑀘𑀭𑀸, 𑀲𑀺𑀬𑀸 𑀮𑁄𑀓𑀼𑀢𑁆𑀢𑀭𑀸, 𑀅𑀩𑁆𑀬𑀸𑀓𑀢𑀸 𑀮𑁄𑀓𑀼𑀢𑁆𑀢𑀭𑀸𑀯. ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂 𑀅𑀜𑁆𑀜𑁂𑀯 𑀥𑀫𑁆𑀫𑀸 𑀕𑀫𑁆𑀪𑀻𑀭𑀸’’𑀢𑀺 𑀯𑀼𑀢𑁆𑀢𑀥𑀫𑁆𑀫𑀸 𑀲𑀺𑀬𑀸 𑀓𑀼𑀲𑀮𑀸, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸, 𑀢𑀢𑁆𑀣 𑀓𑀼𑀲𑀮𑀸𑀦𑀁 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸 𑀧𑀤𑀝𑁆𑀞𑀸𑀦𑀁. 𑀅𑀩𑁆𑀬𑀸𑀓𑀢𑀸𑀦𑀁 𑀫𑀕𑁆𑀕𑀥𑀫𑁆𑀫𑀸, 𑀯𑀺𑀧𑀲𑁆𑀲𑀦𑀸, 𑀆𑀯𑀚𑁆𑀚𑀦𑀸 𑀯𑀸 𑀧𑀤𑀝𑁆𑀞𑀸𑀦𑀁. 𑀢𑁂𑀲𑀼 𑀓𑀼𑀲𑀮𑀸 𑀮𑁄𑀓𑀼𑀢𑁆𑀢𑀭𑀸, 𑀅𑀩𑁆𑀬𑀸𑀓𑀢𑀸 𑀲𑀺𑀬𑀸 𑀓𑀸𑀫𑀸𑀯𑀘𑀭𑀸, 𑀲𑀺𑀬𑀸 𑀮𑁄𑀓𑀼𑀢𑁆𑀢𑀭𑀸, 𑀲𑀩𑁆𑀩𑀸𑀧𑀺 𑀤𑀺𑀝𑁆𑀞𑀺𑀬𑁄 𑀅𑀓𑀼𑀲𑀮𑀸𑀯 𑀓𑀸𑀫𑀸𑀯𑀘𑀭𑀸𑀯, 𑀢𑀸𑀲𑀁 𑀅𑀯𑀺𑀲𑁂𑀲𑁂𑀦 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀧𑀤𑀝𑁆𑀞𑀸𑀦𑀁. 𑀯𑀺𑀲𑁂𑀲𑀢𑁄 𑀧𑀦 𑀲𑀦𑁆𑀢𑀢𑀺𑀖𑀦𑀯𑀺𑀦𑀺𑀩𑁆𑀪𑁄𑀕𑀸𑀪𑀸𑀯𑀢𑁄 𑀏𑀓𑀢𑁆𑀢𑀦𑀬𑀲𑁆𑀲 𑀫𑀺𑀘𑁆𑀙𑀸𑀕𑀸𑀳𑁄 ¶ 𑀅𑀢𑀻𑀢𑀚𑀸𑀢𑀺𑀅𑀦𑀼𑀲𑁆𑀲𑀭𑀡𑀢𑀓𑁆𑀓𑀲𑀳𑀺𑀢𑁄 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀳𑁂𑀢𑀼𑀨𑀮𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑀪𑀸𑀯𑀲𑁆𑀲 𑀅𑀕𑁆𑀕𑀳𑀡𑀢𑁄 𑀦𑀸𑀦𑀢𑁆𑀢𑀦𑀬𑀲𑁆𑀲 𑀫𑀺𑀘𑁆𑀙𑀸𑀕𑀸𑀳𑁄 𑀢𑀚𑁆𑀚𑀸𑀲𑀫𑀦𑁆𑀦𑀸𑀳𑀸𑀭𑀲𑀳𑀺𑀢𑁄 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀏𑀯𑀁 𑀲𑁂𑀲𑀤𑀺𑀝𑁆𑀞𑀻𑀦𑀫𑁆𑀧𑀺 𑀬𑀣𑀸𑀲𑀫𑁆𑀪𑀯𑀁 𑀯𑀢𑁆𑀢𑀩𑁆𑀩𑀁. ‘‘𑀯𑁂𑀤𑀦𑀸𑀦’’𑀦𑁆𑀢𑀺 𑀏𑀢𑁆𑀣 𑀯𑁂𑀤𑀦𑀸 𑀲𑀺𑀬𑀸 𑀓𑀼𑀲𑀮𑀸, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀸, 𑀲𑀺𑀬𑀸 𑀓𑀸𑀫𑀸𑀯𑀘𑀭𑀸, 𑀲𑀺𑀬𑀸 𑀭𑀽𑀧𑀸𑀯𑀘𑀭𑀸, 𑀲𑀺𑀬𑀸 𑀅𑀭𑀽𑀧𑀸𑀯𑀘𑀭𑀸, 𑀨𑀲𑁆𑀲𑁄 𑀢𑀸𑀲𑀁 𑀧𑀤𑀝𑁆𑀞𑀸𑀦𑀁. 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑀸𑀤𑀺𑀬𑀣𑀸𑀪𑀽𑀢𑀯𑁂𑀤𑀦𑀁 𑀫𑀕𑁆𑀕𑀜𑀸𑀡𑀁, 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑀺 𑀨𑀮𑀁 ¶ , 𑀢𑁂𑀲𑀁 ‘‘𑀅𑀜𑁆𑀜𑁂𑀯 𑀥𑀫𑁆𑀫𑀸 𑀕𑀫𑁆𑀪𑀻𑀭𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀥𑀫𑁆𑀫𑀸𑀤𑀺𑀯𑀺𑀪𑀸𑀕𑁄 𑀦𑁂𑀢𑀩𑁆𑀩𑁄. ‘‘𑀅𑀚𑀸𑀦𑀢𑀁 𑀅𑀧𑀲𑁆𑀲𑀢’’𑀦𑁆𑀢𑀺𑀆𑀤𑀻𑀲𑀼 𑀅𑀯𑀺𑀚𑁆𑀚𑀸 𑀢𑀡𑁆𑀳𑀸 𑀅𑀓𑀼𑀲𑀮𑀸 𑀓𑀸𑀫𑀸𑀯𑀘𑀭𑀸, 𑀢𑀸𑀲𑀼 𑀅𑀯𑀺𑀚𑁆𑀚𑀸𑀬 𑀆𑀲𑀯𑀸, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀏𑀯 𑀯𑀸 𑀧𑀤𑀝𑁆𑀞𑀸𑀦𑀁. 𑀢𑀡𑁆𑀳𑀸𑀬 𑀲𑀁𑀬𑁄𑀚𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀤𑀲𑁆𑀲𑀦𑀁 ¶ 𑀧𑀤𑀝𑁆𑀞𑀸𑀦𑀁. ‘‘𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸’’𑀢𑀺 𑀏𑀢𑁆𑀣 𑀨𑀲𑁆𑀲𑀲𑁆𑀲 𑀯𑁂𑀤𑀦𑀸𑀬 𑀯𑀺𑀬 𑀥𑀫𑁆𑀫𑀸𑀤𑀺𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀦𑀸 𑀦𑀬𑁂𑀦 𑀨𑀲𑁆𑀲𑀸𑀬𑀢𑀦𑀸𑀤𑀻𑀦𑀫𑁆𑀧𑀺 𑀬𑀣𑀸𑀭𑀳𑀁 𑀥𑀫𑁆𑀫𑀸𑀤𑀺𑀯𑀺𑀪𑀸𑀕𑁄 𑀦𑁂𑀢𑀩𑁆𑀩𑁄𑀢𑀺 𑀅𑀬𑀁 𑀯𑀺𑀪𑀢𑁆𑀢𑀺𑀳𑀸𑀭𑁄.

𑀧𑀭𑀺𑀯𑀢𑁆𑀢𑀳𑀸𑀭𑀯𑀡𑁆𑀡𑀦𑀸

𑀆𑀖𑀸𑀢𑀸𑀤𑀻𑀦𑀁 𑀅𑀓𑀭𑀡𑀁 𑀔𑀦𑁆𑀢𑀺𑀲𑁄𑀭𑀘𑁆𑀘𑀸𑀦𑀺 𑀅𑀦𑀼𑀩𑁆𑀭𑀽𑀳𑁂𑀢𑁆𑀯𑀸 𑀧𑀝𑀺𑀲𑀗𑁆𑀔𑀸𑀦𑀪𑀸𑀯𑀦𑀸𑀩𑀮𑀲𑀺𑀤𑁆𑀥𑀺𑀬𑀸 𑀉𑀪𑀬𑀳𑀺𑀢𑀧𑀝𑀺𑀧𑀢𑁆𑀢𑀺𑀁 𑀆𑀯𑀳𑀢𑀺. 𑀆𑀖𑀸𑀢𑀸𑀤𑀬𑁄 𑀧𑀦 𑀧𑀯𑀢𑁆𑀢𑀺𑀬𑀫𑀸𑀦𑀸 𑀤𑀼𑀩𑁆𑀩𑀡𑁆𑀡𑀢𑀁 𑀤𑀼𑀓𑁆𑀔𑀲𑁂𑀬𑁆𑀬𑀁 𑀪𑁄𑀕𑀳𑀸𑀦𑀺𑀁 𑀅𑀓𑀺𑀢𑁆𑀢𑀺𑀁 𑀧𑀭𑁂𑀳𑀺 𑀤𑀼𑀭𑀼𑀧𑀲𑀗𑁆𑀓𑀫𑀦𑀢𑀜𑁆𑀘 𑀦𑀺𑀧𑁆𑀨𑀸𑀤𑁂𑀦𑁆𑀢𑀸 𑀦𑀺𑀭𑀬𑀸𑀤𑀻𑀲𑀼 𑀫𑀳𑀸𑀤𑀼𑀓𑁆𑀔𑀁 𑀆𑀯𑀳𑀦𑁆𑀢𑀺. 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀧𑀝𑀺𑀯𑀺𑀭𑀢𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀓𑀮𑁆𑀬𑀸𑀡𑀁 𑀧𑀭𑀫𑁆𑀧𑀭𑀁 𑀆𑀯𑀳𑀢𑀺. 𑀧𑀸𑀡𑀸𑀢𑀺𑀧𑀸𑀢𑀸𑀤𑀺 𑀧𑀦 𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀅𑀓𑀮𑁆𑀬𑀸𑀡𑀁 𑀧𑀭𑀫𑁆𑀧𑀭𑀁, 𑀕𑀫𑁆𑀪𑀻𑀭𑀢𑀸𑀤𑀺𑀯𑀺𑀲𑁂𑀲𑀬𑀼𑀢𑁆𑀢𑀁 𑀜𑀸𑀡𑀁 𑀯𑀺𑀦𑁂𑀬𑁆𑀬𑀸𑀦𑀁 𑀬𑀣𑀸𑀭𑀳𑀁 𑀯𑀺𑀚𑁆𑀚𑀸𑀪𑀺𑀜𑁆𑀜𑀸𑀤𑀺𑀕𑀼𑀡𑀯𑀺𑀲𑁂𑀲𑀁 𑀆𑀯𑀳𑀢𑀺 𑀲𑀩𑁆𑀩𑀜𑁂𑀬𑁆𑀬𑀁 𑀬𑀣𑀸𑀲𑀪𑀸𑀯𑀸𑀯𑀩𑁄𑀥𑀢𑁄. 𑀢𑀣𑀸 𑀕𑀫𑁆𑀪𑀻𑀭𑀢𑀸𑀤𑀺𑀯𑀺𑀲𑁂𑀲𑀭𑀳𑀺𑀢𑀁 𑀧𑀦 𑀜𑀸𑀡𑀁 𑀜𑁂𑀬𑁆𑀬𑁂𑀲𑀼 𑀲𑀸𑀯𑀭𑀡𑀢𑁄 𑀬𑀣𑀸𑀯𑀼𑀢𑁆𑀢𑀕𑀼𑀡𑀯𑀺𑀲𑁂𑀲𑀁 𑀦𑀸𑀯𑀳𑀢𑀺. 𑀲𑀩𑁆𑀩𑀸𑀧𑀺 𑀘𑁂𑀢𑀸 𑀤𑀺𑀝𑁆𑀞𑀺𑀬𑁄 𑀬𑀣𑀸𑀭𑀳𑀁 𑀲𑀲𑁆𑀲𑀢𑀼𑀘𑁆𑀙𑁂𑀤𑀪𑀸𑀯𑀢𑁄 𑀅𑀦𑁆𑀢𑀤𑁆𑀯𑀬𑀪𑀽𑀢𑀸 𑀲𑀓𑁆𑀓𑀸𑀬𑀢𑀻𑀭𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺 𑀅𑀦𑀺𑀬𑁆𑀬𑀸𑀦𑀺𑀓𑀲𑀪𑀸𑀯𑀢𑁆𑀢𑀸. 𑀦𑀺𑀬𑁆𑀬𑀸𑀦𑀺𑀓𑀲𑀪𑀸𑀯𑀢𑁆𑀢𑀸 𑀧𑀦 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀧𑀭𑀺𑀓𑁆𑀔𑀸𑀭𑀸 𑀫𑀚𑁆𑀛𑀺𑀫𑀧𑀝𑀺𑀧𑀤𑀸𑀪𑀽𑀢𑀸 𑀅𑀢𑀺𑀓𑁆𑀓𑀫𑁆𑀫 𑀲𑀓𑁆𑀓𑀸𑀬𑀢𑀻𑀭𑀁 𑀧𑀸𑀭𑀁 𑀆𑀕𑀘𑁆𑀙𑀢𑀺. 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑀸𑀤𑀺𑀬𑀣𑀸𑀪𑀽𑀢𑀯𑁂𑀤𑀦𑀁 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑀺𑀁 𑀆𑀯𑀳𑀢𑀺 𑀫𑀕𑁆𑀕𑀪𑀸𑀯𑀢𑁄. 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑀸𑀤𑀺𑀅𑀲𑀫𑁆𑀧𑀝𑀺𑀯𑁂𑀥𑁄 𑀲𑀁𑀲𑀸𑀭𑀘𑀸𑀭𑀓𑀸𑀯𑀭𑁄𑀥𑀁 𑀆𑀯𑀳𑀢𑀺 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀪𑀸𑀯𑀢𑁄. 𑀯𑁂𑀤𑀬𑀺𑀢𑀲𑀪𑀸𑀯𑀧𑀝𑀺𑀘𑁆𑀙𑀸𑀤𑀓𑁄 𑀲𑀫𑁆𑀫𑁄𑀳𑁄 𑀢𑀤𑀪𑀺𑀦𑀦𑁆𑀤𑀦𑀁 𑀆𑀯𑀳𑀢𑀺 ¶ . 𑀬𑀣𑀸𑀪𑀽𑀢𑀸𑀯𑀩𑁄𑀥𑁄 𑀧𑀦 𑀢𑀢𑁆𑀣 𑀦𑀺𑀩𑁆𑀩𑁂𑀤𑀁 𑀯𑀺𑀭𑀸𑀕𑀜𑁆𑀘 𑀆𑀯𑀳𑀢𑀺. 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀳𑀺𑀢𑀸 𑀢𑀡𑁆𑀳𑀸 ¶ 𑀅𑀦𑁂𑀓𑀯𑀺𑀳𑀺𑀢𑀁 𑀤𑀺𑀝𑁆𑀞𑀺𑀚𑀸𑀮𑀁 𑀧𑀲𑀸𑀭𑁂𑀢𑀺. 𑀬𑀣𑀸𑀯𑀼𑀢𑁆𑀢𑀢𑀡𑁆𑀳𑀸𑀲𑀫𑀼𑀘𑁆𑀙𑁂𑀤𑁄 𑀧𑀞𑀫𑀫𑀕𑁆𑀕𑁄 𑀢𑀁 𑀤𑀺𑀝𑁆𑀞𑀺𑀚𑀸𑀮𑀁 𑀲𑀗𑁆𑀓𑁄𑀘𑁂𑀢𑀺. 𑀲𑀲𑁆𑀲𑀢𑀯𑀸𑀤𑀸𑀤𑀺𑀧𑀜𑁆𑀜𑀸𑀧𑀦𑀲𑁆𑀲 𑀨𑀲𑁆𑀲𑁄 𑀧𑀘𑁆𑀘𑀬𑁄 𑀳𑁄𑀢𑀺 𑀅𑀲𑀢𑀺 𑀨𑀲𑁆𑀲𑁂 𑀢𑀤𑀪𑀸𑀯𑀢𑁄. 𑀤𑀺𑀝𑁆𑀞𑀺𑀩𑀦𑁆𑀥𑀦𑀩𑀦𑁆𑀥𑀸𑀦𑀁 𑀨𑀲𑁆𑀲𑀸𑀬𑀢𑀦𑀸𑀤𑀻𑀦𑀁 𑀅𑀦𑀺𑀭𑁄𑀥𑁂𑀦 𑀨𑀲𑁆𑀲𑀸𑀤𑀺𑀅𑀦𑀺𑀭𑁄𑀥𑁄 𑀲𑀁𑀲𑀸𑀭𑀤𑀼𑀓𑁆𑀔𑀲𑁆𑀲 𑀅𑀦𑀺𑀯𑀢𑁆𑀢𑀺𑀬𑁂𑀯, 𑀬𑀸𑀣𑀸𑀯𑀢𑁄 𑀨𑀲𑁆𑀲𑀸𑀬𑀢𑀦𑀸𑀤𑀺𑀧𑀭𑀺𑀜𑁆𑀜𑀸 𑀲𑀩𑁆𑀩𑀤𑀺𑀝𑁆𑀞𑀺𑀤𑀲𑁆𑀲𑀦𑀸𑀦𑀺 𑀅𑀢𑀺𑀯𑀢𑁆𑀢𑀢𑀺, 𑀨𑀲𑁆𑀲𑀸𑀬𑀢𑀦𑀸𑀤𑀺𑀅𑀧𑀭𑀺𑀜𑁆𑀜𑀸 𑀢𑀁𑀤𑀺𑀝𑁆𑀞𑀺𑀕𑀳𑀦𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀪𑀯𑀦𑁂𑀢𑁆𑀢𑀺𑀲𑀫𑀼𑀘𑁆𑀙𑁂𑀤𑁄 𑀆𑀬𑀢𑀺𑀁 𑀅𑀢𑁆𑀢𑀪𑀸𑀯𑀲𑁆𑀲 𑀅𑀦𑀺𑀩𑁆𑀩𑀢𑁆𑀢𑀺𑀬𑀸 𑀲𑀁𑀯𑀢𑁆𑀢𑀢𑀺, 𑀅𑀲𑀫𑀼𑀘𑁆𑀙𑀺𑀦𑁆𑀦𑀸𑀬 𑀪𑀯𑀦𑁂𑀢𑁆𑀢𑀺𑀬𑀸 𑀅𑀦𑀸𑀕𑀢𑁂 𑀪𑀯𑀧𑁆𑀧𑀩𑀦𑁆𑀥𑁄 𑀧𑀭𑀺𑀯𑀢𑁆𑀢𑀢𑀺𑀬𑁂𑀯𑀸𑀢𑀺 𑀅𑀬𑀁 𑀧𑀭𑀺𑀯𑀢𑁆𑀢𑁄 𑀳𑀸𑀭𑁄.

𑀯𑁂𑀯𑀘𑀦𑀳𑀸𑀭𑀯𑀡𑁆𑀡𑀦𑀸

‘‘𑀫𑀫 𑀫𑀬𑁆𑀳𑀁 𑀫𑁂’’𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. ‘‘𑀪𑀺𑀓𑁆𑀔𑀯𑁂 𑀲𑀫𑀡𑀸 𑀢𑀧𑀲𑁆𑀲𑀺𑀦𑁄’’𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. ‘‘𑀧𑀭𑁂 ¶ 𑀅𑀜𑁆𑀜𑁂 𑀧𑀝𑀺𑀯𑀺𑀭𑀼𑀤𑁆𑀥𑀸’’𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. ‘‘𑀅𑀯𑀡𑁆𑀡𑀁 𑀅𑀓𑀺𑀢𑁆𑀢𑀺𑀁 𑀦𑀺𑀦𑁆𑀤’’𑀦𑁆𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. ‘‘𑀪𑀸𑀲𑁂𑀬𑁆𑀬𑀼𑀁 𑀪𑀡𑁂𑀬𑁆𑀬𑀼𑀁 𑀓𑀭𑁂𑀬𑁆𑀬𑀼’’𑀦𑁆𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. ‘‘𑀥𑀫𑁆𑀫𑀲𑁆𑀲 𑀯𑀺𑀦𑀬𑀲𑁆𑀲 𑀲𑀢𑁆𑀣𑀼𑀲𑀸𑀲𑀦𑀲𑁆𑀲𑀸’’𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. ‘‘𑀲𑀗𑁆𑀖𑀲𑁆𑀲 𑀲𑀫𑀽𑀳𑀲𑁆𑀲 𑀕𑀡𑀲𑁆𑀲𑀸’’𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. ‘‘𑀢𑀢𑁆𑀭 𑀢𑀢𑁆𑀣 𑀢𑁂𑀲𑀽’’𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. ‘‘𑀢𑀼𑀫𑁆𑀳𑁂𑀳𑀺 𑀯𑁄 𑀪𑀯𑀦𑁆𑀢𑁂𑀳𑀻’’𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. ‘‘𑀆𑀖𑀸𑀢𑁄 𑀤𑁄𑀲𑁄 𑀩𑁆𑀬𑀸𑀧𑀸𑀤𑁄’’𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. ‘‘𑀅𑀧𑁆𑀧𑀘𑁆𑀘𑀬𑁄 𑀤𑁄𑀫𑀦𑀲𑁆𑀲𑀁 𑀘𑁂𑀢𑀲𑀺𑀓𑀤𑀼𑀓𑁆𑀔’’𑀦𑁆𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. ‘‘𑀘𑁂𑀢𑀲𑁄 𑀅𑀦𑀪𑀺𑀭𑀤𑁆𑀥𑀺 𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀢𑁆𑀢𑀺 𑀫𑀦𑁄𑀧𑀤𑁄𑀲𑁄’’𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. ‘‘𑀦 𑀓𑀭𑀡𑀻𑀬𑀸 𑀦 𑀉𑀧𑁆𑀧𑀸𑀤𑁂𑀢𑀩𑁆𑀩𑀸 𑀦 𑀧𑀯𑀢𑁆𑀢𑁂𑀢𑀩𑁆𑀩𑀸’’𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀇𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀯𑁂𑀯𑀘𑀦𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀬𑀁 𑀯𑁂𑀯𑀘𑀦𑁄 𑀳𑀸𑀭𑁄.

𑀧𑀜𑁆𑀜𑀢𑁆𑀢𑀺𑀳𑀸𑀭𑀯𑀡𑁆𑀡𑀦𑀸

𑀆𑀖𑀸𑀢𑁄 𑀯𑀢𑁆𑀣𑀼𑀯𑀲𑁂𑀦 𑀤𑀲𑀯𑀺𑀥𑁂𑀦 𑀏𑀓𑀽𑀦𑀯𑀻𑀲𑀢𑀺𑀯𑀺𑀥𑁂𑀦 𑀯𑀸 𑀧𑀜𑁆𑀜𑀢𑁆𑀢𑁄. 𑀅𑀧𑁆𑀧𑀘𑁆𑀘𑀬𑁄 𑀉𑀧𑀯𑀺𑀘𑀸𑀭𑀯𑀲𑁂𑀦 𑀙𑀥𑀸 𑀧𑀜𑁆𑀜𑀢𑁆𑀢𑁄. 𑀆𑀦𑀦𑁆𑀤𑁄𑀧𑀻𑀢𑀺𑀆𑀤𑀺𑀯𑀲𑁂𑀦 𑀦𑀯𑀥𑀸 𑀧𑀜𑁆𑀜𑀢𑁆𑀢𑁄. 𑀧𑀻𑀢𑀺 𑀲𑀸𑀫𑀜𑁆𑀜𑀢𑁄 𑀔𑀼𑀤𑁆𑀤𑀺𑀓𑀸𑀤𑀺𑀯𑀲𑁂𑀦 𑀧𑀜𑁆𑀘𑀥𑀸 𑀧𑀜𑁆𑀜𑀢𑁆𑀢𑀸. 𑀲𑁄𑀫𑀦𑀲𑁆𑀲𑀁 𑀉𑀧𑀯𑀺𑀘𑀸𑀭𑀯𑀲𑁂𑀦 𑀙𑀥𑀸 𑀧𑀜𑁆𑀜𑀢𑁆𑀢𑀁. 𑀲𑀻𑀮𑀁 𑀯𑀸𑀭𑀺𑀢𑁆𑀢𑀘𑀸𑀭𑀺𑀢𑁆𑀢𑀸𑀤𑀺𑀯𑀲𑁂𑀦 𑀅𑀦𑁂𑀓𑀥𑀸 𑀧𑀜𑁆𑀜𑀢𑁆𑀢𑀁. 𑀕𑀫𑁆𑀪𑀻𑀭𑀢𑀸𑀤𑀺𑀯𑀺𑀲𑁂𑀲𑀬𑀼𑀢𑁆𑀢𑀁 𑀜𑀸𑀡𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀘𑀢𑀼𑀥𑀸, 𑀤𑁆𑀯𑀸𑀤𑀲𑀯𑀺𑀥𑁂𑀦 𑀯𑀸, 𑀯𑀺𑀲𑀬𑀪𑁂𑀤𑀢𑁄 𑀅𑀦𑁂𑀓𑀥𑀸 𑀘 𑀧𑀜𑁆𑀜𑀢𑁆𑀢𑀁. 𑀤𑀺𑀝𑁆𑀞𑀺𑀲𑀲𑁆𑀲𑀢𑀸𑀤𑀺𑀯𑀲𑁂𑀦 ¶ ¶ 𑀤𑁆𑀯𑀸𑀲𑀝𑁆𑀞𑀺𑀬𑀸 𑀪𑁂𑀤𑁂𑀳𑀺, 𑀢𑀤𑀦𑁆𑀢𑁄𑀕𑀥𑀯𑀺𑀪𑀸𑀕𑁂𑀦 𑀅𑀦𑁂𑀓𑀥𑀸 𑀘 𑀧𑀜𑁆𑀜𑀢𑁆𑀢𑀸. 𑀯𑁂𑀤𑀦𑀸 𑀙𑀥𑀸 𑀅𑀝𑁆𑀞𑀲𑀢𑀥𑀸 𑀅𑀦𑁂𑀓𑀥𑀸 𑀘 𑀧𑀜𑁆𑀜𑀢𑁆𑀢𑀸. 𑀢𑀲𑁆𑀲𑀸 𑀲𑀫𑀼𑀤𑀬𑁄 𑀧𑀜𑁆𑀘𑀥𑀸 𑀧𑀜𑁆𑀜𑀢𑁆𑀢𑁄, 𑀢𑀣𑀸 𑀅𑀢𑁆𑀣𑀗𑁆𑀕𑀫𑁄. 𑀅𑀲𑁆𑀲𑀸𑀤𑁄 𑀤𑀼𑀯𑀺𑀥𑁂𑀦 𑀧𑀜𑁆𑀜𑀢𑁆𑀢𑁄. 𑀆𑀤𑀻𑀦𑀯𑁄 𑀢𑀺𑀯𑀺𑀥𑁂𑀦 𑀧𑀜𑁆𑀜𑀢𑁆𑀢𑁄. 𑀦𑀺𑀲𑁆𑀲𑀭𑀡𑀁 𑀏𑀓𑀥𑀸 𑀘𑀢𑀼𑀥𑀸 𑀘 𑀧𑀜𑁆𑀜𑀢𑁆𑀢𑀁…𑀧𑁂… 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑀺 𑀤𑀼𑀯𑀺𑀥𑁂𑀦 𑀧𑀜𑁆𑀜𑀢𑁆𑀢𑀸.

‘‘𑀅𑀚𑀸𑀦𑀢𑀁 𑀅𑀧𑀲𑁆𑀲𑀢’’𑀦𑁆𑀢𑀺 𑀯𑀼𑀢𑁆𑀢𑀸 𑀅𑀯𑀺𑀚𑁆𑀚𑀸 𑀯𑀺𑀲𑀬𑀪𑁂𑀤𑁂𑀦 𑀘𑀢𑀼𑀥𑀸 𑀅𑀝𑁆𑀞𑀥𑀸 𑀘 𑀧𑀜𑁆𑀜𑀢𑁆𑀢𑀸. ‘‘𑀢𑀡𑁆𑀳𑀸𑀕𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸 𑀢𑀡𑁆𑀳𑀸 𑀙𑀥𑀸 𑀅𑀝𑁆𑀞𑀲𑀢𑀥𑀸 𑀅𑀦𑁂𑀓𑀥𑀸 𑀘 𑀧𑀜𑁆𑀜𑀢𑁆𑀢𑀸. 𑀨𑀲𑁆𑀲𑁄 𑀦𑀺𑀲𑁆𑀲𑀬𑀯𑀲𑁂𑀦 𑀙𑀥𑀸 𑀧𑀜𑁆𑀜𑀢𑁆𑀢𑁄. 𑀉𑀧𑀸𑀤𑀸𑀦𑀁 𑀘𑀢𑀼𑀥𑀸 𑀧𑀜𑁆𑀜𑀢𑁆𑀢𑀁. 𑀪𑀯𑁄 𑀤𑁆𑀯𑀺𑀥𑀸 𑀅𑀦𑁂𑀓𑀥𑀸 𑀘 𑀧𑀜𑁆𑀜𑀢𑁆𑀢𑁄. 𑀚𑀸𑀢𑀺 𑀯𑁂𑀯𑀘𑀦𑀯𑀲𑁂𑀦 𑀙𑀥𑀸 𑀧𑀜𑁆𑀜𑀢𑁆𑀢𑀸. 𑀢𑀣𑀸 𑀚𑀭𑀸 𑀲𑀢𑁆𑀢𑀥𑀸 𑀧𑀜𑁆𑀜𑀢𑁆𑀢𑀸. 𑀫𑀭𑀡𑀁 𑀅𑀝𑁆𑀞𑀥𑀸 𑀦𑀯𑀥𑀸 𑀘 𑀧𑀜𑁆𑀜𑀢𑁆𑀢𑀁. 𑀲𑁄𑀓𑁄 𑀧𑀜𑁆𑀘𑀥𑀸 𑀧𑀜𑁆𑀜𑀢𑁆𑀢𑁄. 𑀧𑀭𑀺𑀤𑁂𑀯𑁄 𑀙𑀥𑀸 𑀧𑀜𑁆𑀜𑀢𑁆𑀢𑁄. 𑀤𑀼𑀓𑁆𑀔𑀁 𑀘𑀢𑀼𑀥𑀸 𑀧𑀜𑁆𑀜𑀢𑁆𑀢𑀁, 𑀢𑀣𑀸 𑀤𑁄𑀫𑀦𑀲𑁆𑀲𑀁. 𑀉𑀧𑀸𑀬𑀸𑀲𑁄 𑀘𑀢𑀼𑀥𑀸 𑀧𑀜𑁆𑀜𑀢𑁆𑀢𑁄. ‘‘𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺 𑀧𑀪𑀯𑀧𑀜𑁆𑀜𑀢𑁆𑀢𑀺, ‘‘𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺 𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀧𑀜𑁆𑀜𑀢𑁆𑀢𑀺, 𑀲𑀫𑀼𑀤𑀬𑀲𑁆𑀲 𑀧𑀳𑀸𑀦𑀧𑀜𑁆𑀜𑀢𑁆𑀢𑀺, 𑀦𑀺𑀭𑁄𑀥𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀜𑁆𑀜𑀢𑁆𑀢𑀺, 𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀧𑀜𑁆𑀜𑀢𑁆𑀢𑀺.

‘‘𑀅𑀦𑁆𑀢𑁄𑀚𑀸𑀮𑀻𑀓𑀢𑀸’’𑀢𑀺𑀆𑀤𑀺 ¶ 𑀲𑀩𑁆𑀩𑀤𑀺𑀝𑁆𑀞𑀻𑀦𑀁 𑀲𑀗𑁆𑀕𑀳𑀧𑀜𑁆𑀜𑀢𑁆𑀢𑀺. ‘‘𑀉𑀘𑁆𑀙𑀺𑀦𑁆𑀦𑀪𑀯𑀦𑁂𑀢𑁆𑀢𑀺𑀓𑁄’’𑀢𑀺𑀆𑀤𑀺 𑀤𑀼𑀯𑀺𑀥𑁂𑀦 𑀧𑀭𑀺𑀦𑀺𑀩𑁆𑀩𑀸𑀦𑀧𑀜𑁆𑀜𑀢𑁆𑀢𑀺. 𑀏𑀯𑀁 𑀆𑀖𑀸𑀢𑀸𑀤𑀻𑀦𑀁 𑀅𑀓𑀼𑀲𑀮𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀬𑀣𑀸𑀧𑀪𑀯𑀧𑀜𑁆𑀜𑀢𑁆𑀢𑀺𑀆𑀤𑀺𑀯𑀲𑁂𑀦, 𑀢𑀣𑀸 ‘‘𑀆𑀖𑀸𑀢𑁄’’𑀢𑀺 𑀩𑁆𑀬𑀸𑀧𑀸𑀤𑀲𑁆𑀲 𑀯𑁂𑀯𑀘𑀦𑀧𑀜𑁆𑀜𑀢𑁆𑀢𑀺, ‘‘𑀅𑀧𑁆𑀧𑀘𑁆𑀘𑀬𑁄’’𑀢𑀺 𑀤𑁄𑀫𑀦𑀲𑁆𑀲𑀲𑁆𑀲 𑀯𑁂𑀯𑀘𑀦𑀧𑀜𑁆𑀜𑀢𑁆𑀢𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀜𑁆𑀜𑀢𑁆𑀢𑀺𑀪𑁂𑀤𑁄 𑀯𑀺𑀪𑀚𑀺𑀢𑀩𑁆𑀩𑁄𑀢𑀺 𑀅𑀬𑀁 𑀧𑀜𑁆𑀜𑀢𑁆𑀢𑀺𑀳𑀸𑀭𑁄.

𑀑𑀢𑀭𑀡𑀳𑀸𑀭𑀯𑀡𑁆𑀡𑀦𑀸

𑀆𑀖𑀸𑀢𑀕𑁆𑀕𑀳𑀡𑁂𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀗𑁆𑀕𑀳𑁄, 𑀢𑀣𑀸 𑀅𑀦𑀪𑀺𑀭𑀤𑁆𑀥𑀺𑀕𑀳𑀡𑁂𑀦. 𑀅𑀧𑁆𑀧𑀘𑁆𑀘𑀬𑀕𑁆𑀕𑀳𑀡𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑀲𑀗𑁆𑀕𑀳𑁄𑀢𑀺 𑀇𑀤𑀁 𑀔𑀦𑁆𑀥𑀫𑀼𑀔𑁂𑀦 𑀑𑀢𑀭𑀡𑀁. 𑀢𑀣𑀸 𑀆𑀖𑀸𑀢𑀸𑀤𑀺𑀕𑁆𑀕𑀳𑀡𑁂𑀦 𑀥𑀫𑁆𑀫𑀸𑀬𑀢𑀦𑀁 𑀥𑀫𑁆𑀫𑀥𑀸𑀢𑀼 𑀤𑀼𑀓𑁆𑀔𑀲𑀘𑁆𑀘𑀁 𑀲𑀫𑀼𑀤𑀬𑀲𑀘𑁆𑀘𑀁 𑀯𑀸 𑀕𑀳𑀺𑀢𑀦𑁆𑀢𑀺 𑀇𑀤𑀁 𑀆𑀬𑀢𑀦𑀫𑀼𑀔𑁂𑀦 𑀥𑀸𑀢𑀼𑀫𑀼𑀔𑁂𑀦 𑀲𑀘𑁆𑀘𑀫𑀼𑀔𑁂𑀦 𑀘 𑀑𑀢𑀭𑀡𑀁. 𑀢𑀣𑀸 𑀆𑀖𑀸𑀢𑀸𑀤𑀻𑀦𑀁 ¶ 𑀲𑀳𑀚𑀸𑀢𑀸 𑀅𑀯𑀺𑀚𑁆𑀚𑀸 𑀳𑁂𑀢𑀼𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀲𑀳𑀚𑀸𑀢𑀸 𑀧𑀦 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀦𑀢𑁆𑀣𑀺𑀯𑀺𑀕𑀢𑀸𑀲𑁂𑀯𑀦𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀦𑀦𑁆𑀢𑀭𑀸 𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺 ¶ . 𑀢𑀡𑁆𑀳𑀸𑀉𑀧𑀸𑀤𑀸𑀦𑀸𑀤𑀻𑀦𑀁, 𑀨𑀲𑁆𑀲𑀸𑀤𑀻𑀦𑀫𑁆𑀧𑀺 𑀢𑁂𑀲𑀁 𑀲𑀳𑀚𑀸𑀢𑀸𑀦𑀁 𑀅𑀲𑀳𑀚𑀸𑀢𑀸𑀦𑀜𑁆𑀘 𑀬𑀣𑀸𑀭𑀳𑀁 𑀧𑀘𑁆𑀘𑀬𑀪𑀸𑀯𑁄 𑀯𑀢𑁆𑀢𑀩𑁆𑀩𑁄. 𑀓𑁄𑀘𑀺 𑀧𑀦𑁂𑀢𑁆𑀣 𑀅𑀥𑀺𑀧𑀢𑀺𑀯𑀲𑁂𑀦, 𑀓𑁄𑀘𑀺 𑀓𑀫𑁆𑀫𑀯𑀲𑁂𑀦, 𑀓𑁄𑀘𑀺 𑀆𑀳𑀸𑀭𑀯𑀲𑁂𑀦, 𑀓𑁄𑀘𑀺 𑀇𑀦𑁆𑀤𑁆𑀭𑀺𑀬𑀯𑀲𑁂𑀦, 𑀓𑁄𑀘𑀺 𑀛𑀸𑀦𑀯𑀲𑁂𑀦, 𑀓𑁄𑀘𑀺 𑀫𑀕𑁆𑀕𑀯𑀲𑁂𑀦𑀧𑀺 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺. 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀇𑀤𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀫𑀼𑀔𑁂𑀦 𑀑𑀢𑀭𑀡𑀁. 𑀆𑀦𑀦𑁆𑀤𑀸𑀤𑀻𑀦𑀫𑁆𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀔𑀦𑁆𑀥𑀸𑀤𑀺𑀫𑀼𑀔𑁂𑀦 𑀑𑀢𑀭𑀡𑀁 𑀯𑀺𑀪𑀸𑀯𑁂𑀢𑀩𑁆𑀩𑀁.

𑀢𑀣𑀸 𑀲𑀻𑀮𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀺𑀭𑀢𑀺𑀘𑁂𑀢𑀦𑀸, 𑀅𑀩𑁆𑀬𑀸𑀧𑀸𑀤𑀸𑀤𑀺𑀘𑁂𑀢𑀲𑀺𑀓𑀥𑀫𑁆𑀫𑀸 𑀘, 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀘𑁂𑀢𑀦𑀸𑀯, 𑀢𑁂𑀲𑀁 𑀢𑀤𑀼𑀧𑀓𑀸𑀭𑀓𑀥𑀫𑁆𑀫𑀸𑀦𑀜𑁆𑀘 𑀮𑀚𑁆𑀚𑀸𑀤𑀬𑀸𑀤𑀻𑀦𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀬𑀢𑀦𑀸𑀤𑀺𑀲𑀗𑁆𑀕𑀳𑁄, 𑀧𑀼𑀭𑀺𑀫𑀦𑀬𑁂𑀦𑁂𑀯 𑀔𑀦𑁆𑀥𑀸𑀤𑀺𑀫𑀼𑀔𑁂𑀦 𑀘 𑀑𑀢𑀭𑀡𑀁 𑀯𑀺𑀪𑀸𑀯𑁂𑀢𑀩𑁆𑀩𑀁. 𑀏𑀲 𑀦𑀬𑁄 𑀜𑀸𑀡𑀤𑀺𑀝𑁆𑀞𑀺𑀯𑁂𑀤𑀦𑀸𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀤𑀺𑀕𑁆𑀕𑀳𑀡𑁂𑀲𑀼. 𑀦𑀺𑀲𑁆𑀲𑀭𑀡𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑀺𑀕𑀳𑀡𑁂𑀲𑀼 𑀅𑀲𑀗𑁆𑀔𑀢𑀥𑀸𑀢𑀼𑀯𑀲𑁂𑀦𑀧𑀺 𑀥𑀸𑀢𑀼𑀫𑀼𑀔𑁂𑀦 𑀑𑀢𑀭𑀡𑀁 𑀯𑀺𑀪𑀸𑀯𑁂𑀢𑀩𑁆𑀩𑀁. 𑀢𑀣𑀸 ‘‘𑀯𑁂𑀤𑀦𑀸𑀦𑀁…𑀧𑁂… 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑁄’’𑀢𑀺 𑀏𑀢𑁂𑀦 𑀪𑀕𑀯𑀢𑁄 𑀲𑀻𑀮𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀓𑁆𑀔𑀦𑁆𑀥𑀸, 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀘 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀧𑀓𑀸𑀲𑀺𑀢𑀸 𑀳𑁄𑀦𑁆𑀢𑀻𑀢𑀺 𑀢𑀁 𑀫𑀼𑀔𑁂𑀦𑀧𑀺 𑀑𑀢𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸’’𑀢𑀺 𑀤𑀺𑀝𑁆𑀞𑀺𑀧𑀜𑁆𑀜𑀸𑀧𑀦𑀲𑁆𑀲 𑀧𑀘𑁆𑀘𑀬𑀸𑀥𑀻𑀦𑀯𑀼𑀢𑁆𑀢𑀺𑀢𑀸𑀤𑀻𑀧𑀦𑁂𑀦 𑀅𑀦𑀺𑀘𑁆𑀘𑀢𑀸𑀫𑀼𑀔𑁂𑀦 𑀑𑀢𑀭𑀡𑀁, 𑀢𑀣𑀸 𑀏𑀯𑀁𑀥𑀫𑁆𑀫𑀢𑀸𑀬 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀫𑀼𑀔𑁂𑀦 𑀑𑀢𑀭𑀡𑀁, 𑀅𑀦𑀺𑀘𑁆𑀘𑀲𑁆𑀲 𑀤𑀼𑀓𑁆𑀔𑀸𑀦𑀢𑁆𑀢𑀪𑀸𑀯𑀢𑁄 𑀅𑀧𑁆𑀧𑀡𑀺𑀳𑀺𑀢𑀫𑀼𑀔𑁂𑀦 𑀲𑀼𑀜𑁆𑀜𑀢𑀸𑀫𑀼𑀔𑁂𑀦 𑀘 𑀑𑀢𑀭𑀡𑀁. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀅𑀬𑀁 𑀑𑀢𑀭𑀡𑁄 𑀳𑀸𑀭𑁄.

𑀲𑁄𑀥𑀦𑀳𑀸𑀭𑀯𑀡𑁆𑀡𑀦𑀸

‘‘𑀫𑀫𑀁 ¶ 𑀯𑀸…𑀧𑁂… 𑀪𑀸𑀲𑁂𑀬𑁆𑀬𑀼’’𑀦𑁆𑀢𑀺 𑀆𑀭𑀫𑁆𑀪𑁄. ‘‘𑀥𑀫𑁆𑀫𑀲𑁆𑀲…𑀧𑁂… 𑀲𑀗𑁆𑀖𑀲𑁆𑀲…𑀧𑁂… 𑀪𑀸𑀲𑁂𑀬𑁆𑀬𑀼’’𑀦𑁆𑀢𑀺 𑀧𑀤𑀲𑀼𑀤𑁆𑀥𑀺, 𑀦𑁄 𑀆𑀭𑀫𑁆𑀪𑀲𑀼𑀤𑁆𑀥𑀺. ‘‘𑀢𑀢𑁆𑀭 𑀢𑀼𑀫𑁆𑀳𑁂𑀳𑀺…𑀧𑁂… 𑀓𑀭𑀡𑀻𑀬𑀸’’𑀢𑀺 𑀧𑀤𑀲𑀼𑀤𑁆𑀥𑀺 𑀘𑁂𑀯 𑀆𑀭𑀫𑁆𑀪𑀲𑀼𑀤𑁆𑀥𑀺 𑀘. 𑀤𑀼𑀢𑀺𑀬𑀦𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄 ¶ . 𑀢𑀣𑀸 ‘‘𑀅𑀧𑁆𑀧𑀫𑀢𑁆𑀢𑀓𑀁 𑀔𑁄 𑀧𑀦𑁂𑀢’’𑀦𑁆𑀢𑀺𑀆𑀤𑀺 𑀆𑀭𑀫𑁆𑀪𑁄. ‘‘𑀓𑀢𑀫’’𑀦𑁆𑀢𑀺𑀆𑀤𑀺 𑀧𑀼𑀘𑁆𑀙𑀸. ‘‘𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬𑀸’’𑀢𑀺𑀆𑀤𑀺 𑀧𑀤𑀲𑀼𑀤𑁆𑀥𑀺, 𑀦𑁄 𑀆𑀭𑀫𑁆𑀪𑀲𑀼𑀤𑁆𑀥𑀺, 𑀦𑁄 𑀘 𑀧𑀼𑀘𑁆𑀙𑀸𑀲𑀼𑀤𑁆𑀥𑀺. ‘‘𑀇𑀤𑀁 𑀔𑁄’’𑀢𑀺𑀆𑀤𑀺 𑀧𑀼𑀘𑁆𑀙𑀸𑀲𑀼𑀤𑁆𑀥𑀺 𑀘𑁂𑀯 𑀧𑀤𑀲𑀼𑀤𑁆𑀥𑀺 𑀘 𑀆𑀭𑀫𑁆𑀪𑀲𑀼𑀤𑁆𑀥𑀺 𑀘.

𑀢𑀣𑀸 ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺 𑀆𑀭𑀫𑁆𑀪𑁄. ‘‘𑀓𑀢𑀫𑁂 𑀘 𑀢𑁂’’𑀢𑀺𑀆𑀤𑀺 𑀧𑀼𑀘𑁆𑀙𑀸. ‘‘𑀲𑀦𑁆𑀢𑀺 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺 𑀆𑀭𑀫𑁆𑀪𑁄. ‘‘𑀓𑀺’’𑀦𑁆𑀢𑀺𑀆𑀤𑀺 𑀆𑀭𑀫𑁆𑀪 𑀧𑀼𑀘𑁆𑀙𑀸. ‘‘𑀬𑀣𑀸𑀲𑀫𑀸𑀳𑀺𑀢𑁂’’𑀢𑀺𑀆𑀤𑀺 ¶ 𑀧𑀤𑀲𑀼𑀤𑁆𑀥𑀺, 𑀦𑁄 𑀆𑀭𑀫𑁆𑀪𑀲𑀼𑀤𑁆𑀥𑀺 𑀦𑁄 𑀘 𑀧𑀼𑀘𑁆𑀙𑀸𑀲𑀼𑀤𑁆𑀥𑀺. ‘‘𑀇𑀫𑁂 𑀔𑁄 𑀢𑁂’’𑀢𑀺𑀆𑀤𑀺 𑀧𑀤𑀲𑀼𑀤𑁆𑀥𑀺 𑀘𑁂𑀯 𑀧𑀼𑀘𑁆𑀙𑀸𑀲𑀼𑀤𑁆𑀥𑀺 𑀘 𑀆𑀭𑀫𑁆𑀪𑀲𑀼𑀤𑁆𑀥𑀺 𑀘. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀆𑀭𑀫𑁆𑀪𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀅𑀬𑀁 𑀲𑁄𑀥𑀦𑁄 𑀳𑀸𑀭𑁄.

𑀅𑀥𑀺𑀝𑁆𑀞𑀸𑀦𑀳𑀸𑀭𑀯𑀡𑁆𑀡𑀦𑀸

‘‘𑀅𑀯𑀡𑁆𑀡’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀅𑀥𑀺𑀝𑁆𑀞𑀸𑀦𑀁 𑀢𑀁, 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀺𑀲𑁂𑀲𑀯𑀘𑀦𑀁 ‘‘𑀫𑀫𑀁 𑀯𑀸 𑀥𑀫𑁆𑀫𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸’’𑀢𑀺. 𑀲𑀼𑀓𑁆𑀓𑀧𑀓𑁆𑀔𑁂𑀧𑀺 𑀏𑀲𑁂𑀯 𑀦𑀬𑁄.

𑀢𑀣𑀸 ‘‘𑀲𑀻𑀮’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀅𑀥𑀺𑀝𑁆𑀞𑀸𑀦𑀁, 𑀢𑀁 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀺𑀲𑁂𑀲𑀯𑀘𑀦𑀁 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄’’𑀢𑀺𑀆𑀤𑀺.

‘‘𑀅𑀜𑁆𑀜𑁂𑀯 𑀥𑀫𑁆𑀫𑀸’’𑀢𑀺𑀆𑀤𑀺 𑀲𑀸𑀫𑀜𑁆𑀜𑀢𑁄 𑀅𑀥𑀺𑀝𑁆𑀞𑀸𑀦𑀁, 𑀢𑀁 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀺𑀲𑁂𑀲𑀯𑀘𑀦𑀁 ‘‘𑀢𑀬𑀺𑀤𑀁 𑀪𑀺𑀓𑁆𑀔𑀯𑁂 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺.

𑀢𑀣𑀸 ‘‘𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸’’𑀢𑀺𑀆𑀤𑀺 𑀲𑀸𑀫𑀜𑁆𑀜𑀢𑁄 𑀅𑀥𑀺𑀝𑁆𑀞𑀸𑀦𑀁, 𑀢𑀁 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀺𑀲𑁂𑀲𑀯𑀘𑀦𑀁 ‘‘𑀲𑀲𑁆𑀲𑀢𑀯𑀸𑀤𑀸’’𑀢𑀺𑀆𑀤𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀲𑀸𑀫𑀜𑁆𑀜𑀯𑀺𑀲𑁂𑀲𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑁄𑀢𑀺 𑀅𑀬𑀁 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑁄.

𑀧𑀭𑀺𑀓𑁆𑀔𑀸𑀭𑀳𑀸𑀭𑀯𑀡𑁆𑀡𑀦𑀸

𑀆𑀖𑀸𑀢𑀸𑀤𑀻𑀦𑀁 ¶ ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑀺𑀆𑀤𑀻𑀦𑀺 (𑀥. 𑀲. 𑁧𑁨𑁩𑁭; 𑀯𑀺𑀪. 𑁯𑁦𑁯) 𑀘 𑀏𑀓𑀽𑀦𑀯𑀻𑀲𑀢𑀺 𑀆𑀖𑀸𑀢𑀯𑀢𑁆𑀣𑀽𑀦𑀺 𑀳𑁂𑀢𑀼. 𑀆𑀦𑀦𑁆𑀤𑀸𑀤𑀻𑀦𑀁 𑀆𑀭𑀫𑁆𑀫𑀡𑁂 𑀅𑀪𑀺𑀲𑀺𑀦𑁂𑀳𑁄 𑀳𑁂𑀢𑀼. 𑀲𑀻𑀮𑀲𑁆𑀲 𑀳𑀺𑀭𑀺𑀑𑀢𑁆𑀢𑀧𑁆𑀧𑀁 𑀅𑀧𑁆𑀧𑀺𑀘𑁆𑀙𑀢𑀸𑀤𑀬𑁄 𑀘 𑀳𑁂𑀢𑀼. ‘‘𑀕𑀫𑁆𑀪𑀻𑀭𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀥𑀫𑁆𑀫𑀲𑁆𑀲 𑀲𑀩𑁆𑀩𑀸𑀧𑀺 𑀧𑀸𑀭𑀫𑀺𑀬𑁄 𑀳𑁂𑀢𑀼, 𑀯𑀺𑀲𑁂𑀲𑁂𑀦 𑀧𑀜𑁆𑀜𑀸𑀧𑀸𑀭𑀫𑀻. 𑀤𑀺𑀝𑁆𑀞𑀻𑀦𑀁 𑀅𑀲𑀧𑁆𑀧𑀼𑀭𑀺𑀲𑀽𑀧𑀲𑁆𑀲𑀬𑁄, 𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁, 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁂𑀦 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀘 𑀅𑀯𑀺𑀲𑁂𑀲𑁂𑀦 ¶ 𑀳𑁂𑀢𑀼, 𑀯𑀺𑀲𑁂𑀲𑁂𑀦 𑀧𑀦 𑀲𑀲𑁆𑀲𑀢𑀯𑀸𑀤𑀸𑀤𑀻𑀦𑀁 𑀅𑀢𑀻𑀢𑀚𑀸𑀢𑀺𑀅𑀦𑀼𑀲𑁆𑀲𑀭𑀡𑀸𑀤𑀺 𑀳𑁂𑀢𑀼. 𑀯𑁂𑀤𑀦𑀸𑀦𑀁 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀓𑀫𑁆𑀫𑀸𑀦𑀺 𑀨𑀲𑁆𑀲𑁄 𑀘 𑀳𑁂𑀢𑀼. 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑀺𑀬𑀸 𑀅𑀭𑀺𑀬𑀫𑀕𑁆𑀕𑁄 𑀳𑁂𑀢𑀼. 𑀧𑀜𑁆𑀜𑀸𑀧𑀦𑀲𑁆𑀲 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀳𑁂𑀢𑀼. 𑀢𑀡𑁆𑀳𑀸𑀬 𑀲𑀁𑀬𑁄𑀚𑀦𑀺𑀬𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀦𑀸 𑀳𑁂𑀢𑀼. 𑀨𑀲𑁆𑀲𑀲𑁆𑀲 𑀙𑀴𑀸𑀬𑀢𑀦𑀸𑀦𑀺, 𑀙𑀴𑀸𑀬𑀢𑀦𑀲𑁆𑀲 𑀦𑀸𑀫𑀭𑀽𑀧𑀁 𑀳𑁂𑀢𑀼. 𑀪𑀯𑀦𑁂𑀢𑁆𑀢𑀺𑀲𑀫𑀼𑀘𑁆𑀙𑁂𑀤𑀲𑁆𑀲 𑀯𑀺𑀲𑀼𑀤𑁆𑀥𑀺𑀪𑀸𑀯𑀦𑀸 𑀳𑁂𑀢𑀽𑀢𑀺 𑀅𑀬𑀁 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑁄.

𑀲𑀫𑀸𑀭𑁄𑀧𑀦𑀳𑀸𑀭𑀯𑀡𑁆𑀡𑀦𑀸

𑀆𑀖𑀸𑀢𑀸𑀤𑀻𑀦𑀁 ¶ 𑀅𑀓𑀭𑀡𑀻𑀬𑀢𑀸𑀯𑀘𑀦𑁂𑀦 𑀔𑀦𑁆𑀢𑀺𑀲𑀫𑁆𑀧𑀤𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺. ‘‘𑀅𑀧𑁆𑀧𑀫𑀢𑁆𑀢𑀓𑀁 𑀔𑁄 𑀧𑀦𑁂𑀢’’𑀦𑁆𑀢𑀺𑀆𑀤𑀺𑀦𑀸 𑀲𑁄𑀭𑀘𑁆𑀘𑀲𑀫𑁆𑀧𑀤𑀸, ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 𑀜𑀸𑀡𑀲𑀫𑁆𑀧𑀤𑀸, ‘‘𑀅𑀧𑀭𑀸𑀫𑀲𑀢𑁄 𑀘𑀲𑁆𑀲 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀦𑀺𑀩𑁆𑀩𑀼𑀢𑀺 𑀯𑀺𑀤𑀺𑀢𑀸’’𑀢𑀺, ‘‘𑀯𑁂𑀤𑀦𑀸𑀦𑀁…𑀧𑁂… 𑀬𑀣𑀸𑀪𑀽𑀢𑀁 𑀯𑀺𑀤𑀺𑀢𑁆𑀯𑀸 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑁄’’𑀢𑀺 𑀏𑀢𑁂𑀳𑀺 𑀲𑀫𑀸𑀥𑀺𑀲𑀫𑁆𑀧𑀤𑀸𑀬 𑀲𑀤𑁆𑀥𑀺𑀁 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀯𑀲𑀻𑀪𑀸𑀯𑀲𑀫𑁆𑀧𑀤𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀢𑀢𑁆𑀣 𑀔𑀦𑁆𑀢𑀺𑀲𑀫𑁆𑀧𑀤𑀸 𑀧𑀝𑀺𑀲𑀗𑁆𑀔𑀸𑀦𑀩𑀮𑀲𑀺𑀤𑁆𑀥𑀺𑀢𑁄 𑀲𑁄𑀭𑀘𑁆𑀘𑀲𑀫𑁆𑀧𑀤𑀸𑀬 𑀧𑀤𑀝𑁆𑀞𑀸𑀦𑀁. 𑀲𑁄𑀭𑀘𑁆𑀘𑀲𑀫𑁆𑀧𑀤𑀸 𑀧𑀦 𑀅𑀢𑁆𑀣𑀢𑁄 𑀲𑀻𑀮𑀫𑁂𑀯, 𑀢𑀣𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀧𑀝𑀺𑀯𑀺𑀭𑀢𑀺𑀯𑀘𑀦𑀁 𑀲𑀻𑀮𑀲𑁆𑀲 𑀧𑀭𑀺𑀬𑀸𑀬𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀁. 𑀢𑀢𑁆𑀣 𑀲𑀻𑀮𑀁 𑀲𑀫𑀸𑀥𑀺𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀲𑀫𑀸𑀥𑀺 𑀧𑀜𑁆𑀜𑀸𑀬 𑀧𑀤𑀝𑁆𑀞𑀸𑀦𑀁. 𑀢𑁂𑀲𑀼 𑀲𑀻𑀮𑁂𑀦 𑀯𑀻𑀢𑀺𑀓𑁆𑀓𑀫𑀧𑁆𑀧𑀳𑀸𑀦𑀁 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀜𑁆𑀘 𑀲𑀺𑀚𑁆𑀛𑀢𑀺, 𑀲𑀫𑀸𑀥𑀺𑀦𑀸 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀁, 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁, 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀜𑁆𑀘 𑀲𑀺𑀚𑁆𑀛𑀢𑀺. 𑀧𑀜𑁆𑀜𑀸𑀬 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀁, 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁, 𑀅𑀦𑀼𑀲𑀬𑀧𑁆𑀧𑀳𑀸𑀦𑀜𑁆𑀘 𑀲𑀺𑀚𑁆𑀛𑀢𑀻𑀢𑀺 𑀲𑀻𑀮𑀸𑀤𑀻𑀳𑀺 𑀢𑀻𑀳𑀺 𑀥𑀫𑁆𑀫𑀓𑁆𑀔𑀦𑁆𑀥𑁂𑀳𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀻, 𑀧𑀳𑀸𑀦𑀢𑁆𑀢𑀬𑀲𑀺𑀤𑁆𑀥𑀺 𑀘𑀸𑀢𑀺 𑀅𑀬𑀁 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄.

𑀲𑁄𑀴𑀲𑀳𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀯𑀺𑀥𑀦𑀬𑀯𑀡𑁆𑀡𑀦𑀸

𑀦𑀦𑁆𑀤𑀺𑀬𑀸𑀯𑀝𑁆𑀝𑀦𑀬𑀯𑀡𑁆𑀡𑀦𑀸

𑀆𑀖𑀸𑀢𑀸𑀤𑀻𑀦𑀁 ¶ 𑀅𑀓𑀭𑀡𑀯𑀘𑀦𑁂𑀦 𑀢𑀡𑁆𑀳𑀸𑀯𑀺𑀚𑁆𑀚𑀸𑀲𑀗𑁆𑀓𑁄𑀘𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀲𑀢𑀺 𑀳𑀺 𑀅𑀢𑁆𑀢𑀢𑁆𑀢𑀦𑀺𑀬𑀯𑀢𑁆𑀣𑀽𑀲𑀼 𑀲𑀺𑀦𑁂𑀳𑁂 𑀲𑀫𑁆𑀫𑁄𑀲𑁂 𑀘 ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁨𑁩𑁭, 𑀯𑀺𑀪. 𑁯𑁦𑁯) 𑀆𑀖𑀸𑀢𑁄 𑀚𑀸𑀬𑀢𑀻𑀢𑀺, 𑀢𑀣𑀸 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄’’𑀢𑀺𑀆𑀤𑀺𑀯𑀘𑀦𑁂𑀳𑀺 ¶ , ‘‘𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀦𑀺𑀩𑁆𑀩𑀼𑀢𑀺 𑀯𑀺𑀤𑀺𑀢𑀸, 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑁄, 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁…𑀧𑁂… 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀻𑀳𑀺 𑀯𑀘𑀦𑁂𑀳𑀺 𑀘 𑀢𑀡𑁆𑀳𑀸𑀯𑀺𑀚𑁆𑀚𑀸𑀦𑀁 𑀅𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑀸𑀲𑀁 𑀧𑀦 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸𑀤𑀺𑀧𑀤𑁂𑀳𑀺 ‘‘𑀅𑀚𑀸𑀦𑀢𑀁 𑀅𑀧𑀲𑁆𑀲𑀢’’𑀦𑁆𑀢𑀺𑀆𑀤𑀺𑀧𑀤𑁂𑀳𑀺 𑀘 𑀲𑀭𑀽𑀧𑀢𑁄 𑀤𑀲𑁆𑀲𑀺𑀢𑀸𑀦𑀁 𑀢𑀡𑁆𑀳𑀸𑀯𑀺𑀚𑁆𑀚𑀸𑀦𑀁 𑀭𑀽𑀧𑀥𑀫𑁆𑀫𑀸 𑀅𑀭𑀽𑀧𑀥𑀫𑁆𑀫𑀸 𑀘 𑀅𑀥𑀺𑀝𑁆𑀞𑀸𑀦𑀁. 𑀬𑀣𑀸𑀓𑁆𑀓𑀫𑀁 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘 𑀧𑀝𑀺𑀧𑀓𑁆𑀔𑁄. 𑀢𑁂𑀲𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀘 𑀨𑀮𑀁. 𑀢𑀢𑁆𑀣 ¶ 𑀢𑀡𑁆𑀳𑀸, 𑀢𑀡𑁆𑀳𑀸𑀯𑀺𑀚𑁆𑀚𑀸 𑀯𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀢𑀤𑀥𑀺𑀝𑁆𑀞𑀸𑀦𑀪𑀽𑀢𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀤𑀼𑀓𑁆𑀔𑀲𑀘𑁆𑀘𑀁, 𑀢𑁂𑀲𑀁 𑀅𑀧𑁆𑀧𑀯𑀢𑁆𑀢𑀺 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑀚𑀸𑀦𑀦𑀸 𑀲𑀫𑀣𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑀲𑀘𑁆𑀘𑀦𑁆𑀢𑀺 𑀏𑀯𑀁 𑀘𑀢𑀼𑀲𑀘𑁆𑀘𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀡𑁆𑀳𑀸𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀫𑀸𑀬𑀸𑀲𑀸𑀞𑁂𑀬𑁆𑀬𑀫𑀸𑀦𑀸𑀢𑀺𑀫𑀸𑀦𑀫𑀤𑀧𑁆𑀧𑀫𑀸𑀤𑀧𑀸𑀧𑀺𑀘𑁆𑀙𑀢𑀸𑀧𑀸𑀧𑀫𑀺𑀢𑁆𑀢𑀢𑀸𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀸𑀤𑀺𑀯𑀲𑁂𑀦 𑀲𑀩𑁆𑀩𑁄 𑀅𑀓𑀼𑀲𑀮𑀧𑀓𑁆𑀔𑁄 𑀦𑁂𑀢𑀩𑁆𑀩𑁄. 𑀢𑀣𑀸 𑀅𑀯𑀺𑀚𑁆𑀚𑀸𑀕𑁆𑀕𑀳𑀡𑁂𑀦 𑀯𑀺𑀧𑀭𑀻𑀢𑀫𑀦𑀲𑀺𑀓𑀸𑀭𑀓𑁄𑀥𑀼𑀧𑀦𑀸𑀳𑀫𑀓𑁆𑀔𑀧𑀮𑀸𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀲𑀸𑀭𑀫𑁆𑀪𑀤𑁄𑀯𑀘𑀲𑁆𑀲𑀢𑀸- 𑀪𑀯𑀤𑀺𑀝𑁆𑀞𑀺𑀯𑀺𑀪𑀯𑀤𑀺𑀝𑁆𑀞𑀸𑀤𑀺𑀯𑀲𑁂𑀦 𑀅𑀓𑀼𑀲𑀮𑀧𑀓𑁆𑀔𑁄 𑀦𑁂𑀢𑀩𑁆𑀩𑁄. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀫𑀸𑀬𑀸𑀅𑀲𑀸𑀞𑁂𑀬𑁆𑀬𑀸𑀤𑀺𑀅𑀯𑀺𑀧𑀭𑀻𑀢𑀫𑀦𑀲𑀺𑀓𑀸𑀭𑀸𑀤𑀺𑀯𑀲𑁂𑀦, 𑀢𑀣𑀸 𑀲𑀫𑀣𑀧𑀓𑁆𑀔𑀺𑀬𑀸𑀦𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁, 𑀯𑀺𑀧𑀲𑁆𑀲𑀦𑀸𑀧𑀓𑁆𑀔𑀺𑀬𑀸𑀦𑀜𑁆𑀘 𑀅𑀦𑀺𑀘𑁆𑀘𑀲𑀜𑁆𑀜𑀸𑀤𑀻𑀦𑀁 𑀯𑀲𑁂𑀦 𑀓𑀼𑀲𑀮𑀧𑀓𑁆𑀔𑁄 𑀦𑁂𑀢𑀩𑁆𑀩𑁄𑀢𑀺. 𑀅𑀬𑀁 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺.

𑀢𑀺𑀧𑀼𑀓𑁆𑀔𑀮𑀦𑀬𑀯𑀡𑁆𑀡𑀦𑀸

𑀆𑀖𑀸𑀢𑀸𑀤𑀻𑀦𑀁 𑀅𑀓𑀭𑀡𑀯𑀘𑀦𑁂𑀦 𑀅𑀤𑁄𑀲𑀲𑀺𑀤𑁆𑀥𑀺, 𑀢𑀣𑀸 𑀧𑀸𑀡𑀸𑀢𑀺𑀧𑀸𑀢𑀨𑀭𑀼𑀲𑀯𑀸𑀘𑀸𑀳𑀺 𑀧𑀝𑀺𑀯𑀺𑀭𑀢𑀺𑀯𑀘𑀦𑁂𑀦. 𑀆𑀦𑀦𑁆𑀤𑀸𑀤𑀻𑀦𑀁 𑀅𑀓𑀭𑀡𑀯𑀘𑀦𑁂𑀦 𑀅𑀮𑁄𑀪𑀲𑀺𑀤𑁆𑀥𑀺, 𑀢𑀣𑀸 𑀅𑀩𑁆𑀭𑀳𑁆𑀫𑀘𑀭𑀺𑀬𑀢𑁄 𑀧𑀝𑀺𑀯𑀺𑀭𑀢𑀺𑀯𑀘𑀦𑁂𑀦. 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀳𑀺 𑀧𑀦 𑀧𑀝𑀺𑀯𑀺𑀭𑀢𑀺𑀯𑀘𑀦𑁂𑀦 𑀉𑀪𑀬𑀲𑀺𑀤𑁆𑀥𑀺. ‘‘𑀢𑀬𑀺𑀤𑀁 𑀪𑀺𑀓𑁆𑀔𑀯𑁂 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀅𑀫𑁄𑀳𑀲𑀺𑀤𑁆𑀥𑀺. 𑀇𑀢𑀺 𑀢𑀻𑀳𑀺 𑀅𑀓𑀼𑀲𑀮𑀫𑀽𑀮𑁂𑀳𑀺 𑀕𑀳𑀺𑀢𑁂𑀳𑀺 𑀢𑀧𑁆𑀧𑀝𑀺𑀧𑀓𑁆𑀔𑀢𑁄, 𑀆𑀖𑀸𑀢𑀸𑀤𑀺𑀅𑀓𑀭𑀡𑀯𑀘𑀦𑁂𑀦 𑀘 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑀲𑀺𑀤𑁆𑀥𑀸𑀦𑀺𑀬𑁂𑀯 𑀳𑁄𑀦𑁆𑀢𑀺. 𑀢𑀢𑁆𑀣 𑀢𑀻𑀳𑀺 𑀅𑀓𑀼𑀲𑀮𑀫𑀽𑀮𑁂𑀳𑀺 ¶ 𑀢𑀺𑀯𑀺𑀥𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀫𑀮𑀯𑀺𑀲𑀫𑀸𑀓𑀼𑀲𑀮𑀲𑀜𑁆𑀜𑀸𑀯𑀺𑀢𑀓𑁆𑀓𑀸𑀲𑀤𑁆𑀥𑀫𑁆𑀫𑀸𑀤𑀺𑀯𑀲𑁂𑀦 𑀲𑀩𑁆𑀩𑁄 𑀅𑀓𑀼𑀲𑀮𑀧𑀓𑁆𑀔𑁄 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑁄. 𑀢𑀣𑀸 𑀢𑀻𑀳𑀺 𑀓𑀼𑀲𑀮𑀫𑀽𑀮𑁂𑀳𑀺 𑀢𑀺𑀯𑀺𑀥𑀲𑀼𑀘𑀭𑀺𑀢𑀯𑁄𑀤𑀸𑀦𑀲𑀫𑀓𑀼𑀲𑀮𑀲𑀜𑁆𑀜𑀸𑀯𑀺𑀢𑀓𑁆𑀓𑀧𑀜𑁆𑀜𑀸𑀲𑀤𑁆𑀥𑀫𑁆𑀫𑀲𑀫𑀸𑀥𑀺- 𑀯𑀺𑀫𑁄𑀓𑁆𑀔𑀫𑀼𑀔𑀯𑀺𑀫𑁄𑀓𑁆𑀔𑀸𑀤𑀺𑀯𑀲𑁂𑀦 ¶ 𑀲𑀩𑁆𑀩𑁄 𑀓𑀼𑀲𑀮𑀧𑀓𑁆𑀔𑁄 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀏𑀢𑁆𑀣𑀸𑀧𑀺 𑀘 𑀲𑀘𑁆𑀘𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁? 𑀮𑁄𑀪𑁄 𑀲𑀩𑁆𑀩𑀸𑀦𑀺 𑀯𑀸 𑀓𑀼𑀲𑀮𑀸𑀓𑀼𑀲𑀮𑀫𑀽𑀮𑀸𑀦𑀺 𑀲𑀫𑀼𑀤𑀬𑀲𑀘𑁆𑀘𑀁, 𑀢𑁂𑀳𑀺 𑀧𑀦 𑀦𑀺𑀩𑁆𑀩𑀢𑁆𑀢𑀸 𑀢𑁂𑀲𑀁 𑀅𑀥𑀺𑀝𑁆𑀞𑀸𑀦𑀕𑁄𑀘𑀭𑀪𑀽𑀢𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀘𑁆𑀘𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀬𑀁 𑀢𑀺𑀧𑀼𑀓𑁆𑀔𑀮𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺.

𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑀯𑀯𑀡𑁆𑀡𑀦𑀸

𑀆𑀖𑀸𑀢𑀸𑀦𑀦𑁆𑀤𑀦𑀸𑀤𑀻𑀦𑀁 𑀅𑀓𑀭𑀡𑀯𑀘𑀦𑁂𑀦 𑀲𑀢𑀺𑀲𑀺𑀤𑁆𑀥𑀺. 𑀲𑀢𑀺𑀬𑀸 𑀳𑀺 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑁂, 𑀢𑀢𑁆𑀣 𑀘 𑀆𑀤𑀻𑀦𑀯𑀸𑀦𑀺𑀲𑀁𑀲𑁂 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀸𑀯𑀚𑁆𑀚𑀁 𑀧𑀳𑀸𑀬 𑀅𑀦𑀯𑀚𑁆𑀚𑀁 ¶ 𑀲𑀫𑀸𑀤𑀸𑀬 𑀯𑀢𑁆𑀢𑀢𑀻𑀢𑀺. 𑀢𑀣𑀸 𑀫𑀺𑀘𑁆𑀙𑀸𑀚𑀻𑀯𑀸 𑀧𑀝𑀺𑀯𑀺𑀭𑀢𑀺𑀯𑀘𑀦𑁂𑀦 𑀯𑀻𑀭𑀺𑀬𑀲𑀺𑀤𑁆𑀥𑀺. 𑀯𑀻𑀭𑀺𑀬𑁂𑀦 𑀳𑀺 𑀓𑀸𑀫𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁂 𑀯𑀺𑀦𑁄𑀤𑁂𑀢𑀺, 𑀯𑀻𑀭𑀺𑀬𑀲𑀸𑀥𑀦𑀜𑁆𑀘 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀦𑁆𑀢𑀺. 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀧𑀝𑀺𑀯𑀺𑀭𑀢𑀺𑀯𑀘𑀦𑁂𑀦 𑀲𑀢𑀺𑀲𑀺𑀤𑁆𑀥𑀺. 𑀲𑀢𑀺𑀬𑀸 𑀳𑀺 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑁂, 𑀢𑀢𑁆𑀣 𑀘 𑀆𑀤𑀻𑀦𑀯𑀸𑀦𑀺𑀲𑀁𑀲𑁂 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀸𑀯𑀚𑁆𑀚𑀁 𑀧𑀳𑀸𑀬 𑀅𑀦𑀯𑀚𑁆𑀚𑀁 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺. 𑀢𑀣𑀸 𑀳𑀺 𑀲𑀸 ‘‘𑀯𑀺𑀲𑀬𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸’’𑀢𑀺 𑀘 𑀯𑀼𑀘𑁆𑀘𑀢𑀺. ‘‘𑀢𑀬𑀺𑀤𑀁 𑀪𑀺𑀓𑁆𑀔𑀯𑁂 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀲𑀫𑀸𑀥𑀺𑀧𑀜𑁆𑀜𑀸𑀲𑀺𑀤𑁆𑀥𑀺. 𑀧𑀜𑁆𑀜𑀸𑀬 𑀳𑀺 𑀬𑀣𑀸𑀪𑀽𑀢𑀸𑀯𑀩𑁄𑀥𑁄, 𑀲𑀫𑀸𑀳𑀺𑀢𑁄 𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺. 𑀢𑀣𑀸 ‘‘𑀦𑀺𑀘𑁆𑀘𑁄 𑀥𑀼𑀯𑁄’’𑀢𑀺𑀆𑀤𑀺𑀦𑀸 𑀅𑀦𑀺𑀘𑁆𑀘𑁂 ‘‘𑀦𑀺𑀘𑁆𑀘’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄, ‘‘𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸, 𑀏𑀓𑀦𑁆𑀢𑀲𑀼𑀔𑀻 𑀅𑀢𑁆𑀢𑀸 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄’’𑀢𑀺 𑀘 𑀏𑀯𑀫𑀸𑀤𑀻𑀳𑀺 𑀅𑀲𑀼𑀔𑁂 ‘‘𑀲𑀼𑀔’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄, ‘‘𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄’’𑀢𑀺𑀆𑀤𑀺𑀦𑀸 𑀅𑀲𑀼𑀪𑁂 ‘‘𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄, 𑀲𑀩𑁆𑀩𑁂𑀳𑁂𑀯 𑀘 𑀤𑀺𑀝𑁆𑀞𑀺𑀤𑀻𑀧𑀓𑀧𑀤𑁂𑀳𑀺 𑀅𑀦𑀢𑁆𑀢𑀦𑀺 ‘‘𑀅𑀢𑁆𑀢𑀸’’𑀢𑀺 𑀯𑀺𑀧𑀮𑁆𑀮𑀸𑀲𑁄𑀢𑀺 𑀏𑀯𑀫𑁂𑀢𑁆𑀣 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸 𑀲𑀺𑀤𑁆𑀥𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀧𑀝𑀺𑀧𑀓𑁆𑀔𑀢𑁄 𑀘𑀢𑁆𑀢𑀸𑀭𑀺 𑀲𑀢𑀺𑀧𑀝𑁆𑀞𑀸𑀦𑀸𑀦𑀺 𑀲𑀺𑀤𑁆𑀥𑀸𑀦𑁂𑀯 𑀳𑁄𑀦𑁆𑀢𑀺. 𑀢𑀢𑁆𑀣 𑀘𑀢𑀽𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸.

𑀓𑀣𑀁? 𑀤𑀼𑀯𑀺𑀥𑁄 𑀳𑀺 𑀢𑀡𑁆𑀳𑀸𑀘𑀭𑀺𑀢𑁄 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀘 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄 𑀘𑀸𑀢𑀺, 𑀢𑀣𑀸 𑀤𑀺𑀝𑁆𑀞𑀺𑀘𑀭𑀺𑀢𑁄. 𑀢𑁂𑀲𑀼 𑀧𑀞𑀫𑁄 𑀅𑀲𑀼𑀪𑁂 ‘‘𑀲𑀼𑀪’’𑀦𑁆𑀢𑀺 𑀯𑀺𑀧𑀮𑁆𑀮𑀢𑁆𑀢𑀤𑀺𑀝𑁆𑀞𑀺 𑀲𑀢𑀺𑀩𑀮𑁂𑀦 𑀬𑀣𑀸𑀪𑀽𑀢𑀁 𑀓𑀸𑀬𑀲𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀤𑀼𑀢𑀺𑀬𑁄 𑀅𑀲𑀼𑀔𑁂 ‘‘𑀲𑀼𑀔’’𑀦𑁆𑀢𑀺 𑀯𑀺𑀧𑀮𑁆𑀮𑀢𑁆𑀢𑀤𑀺𑀝𑁆𑀞𑀺 ‘‘𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀻’’𑀢𑀺𑀆𑀤𑀺𑀦𑀸 ¶ (𑀫. 𑀦𑀺. 𑁧.𑁨𑁬; 𑀅. 𑀦𑀺. 𑁪.𑁧𑁪; 𑁬.𑁫𑁮) 𑀯𑀼𑀢𑁆𑀢𑁂𑀦 𑀯𑀻𑀭𑀺𑀬𑀲𑀁𑀯𑀭𑀲𑀗𑁆𑀔𑀸𑀢𑁂𑀦 𑀯𑀻𑀭𑀺𑀬𑀩𑀮𑁂𑀦 𑀢𑀁 𑀯𑀺𑀧𑀮𑁆𑀮𑀸𑀲𑀁 𑀯𑀺𑀥𑀫𑀢𑀺. 𑀢𑀢𑀺𑀬𑁄 𑀅𑀦𑀺𑀘𑁆𑀘𑁂 ‘‘𑀦𑀺𑀘𑁆𑀘’’𑀦𑁆𑀢𑀺 𑀅𑀬𑀸𑀣𑀸𑀯𑀕𑀸𑀳𑀻 𑀲𑀫𑀣𑀩𑀮𑁂𑀦 𑀲𑀫𑀸𑀳𑀺𑀢𑀪𑀸𑀯𑀢𑁄 𑀲𑀗𑁆𑀔𑀸𑀭𑀸𑀦𑀁 𑀔𑀡𑀺𑀓𑀪𑀸𑀯𑀁 𑀬𑀣𑀸𑀪𑀽𑀢𑀁 𑀧𑀝𑀺𑀯𑀺𑀚𑁆𑀛𑀢𑀺. 𑀘𑀢𑀼𑀢𑁆𑀣𑁄 𑀲𑀦𑁆𑀢𑀢𑀺𑀲𑀫𑀽𑀳𑀓𑀺𑀘𑁆𑀘𑀸𑀭𑀫𑁆𑀫𑀡𑀖𑀦𑀯𑀺𑀘𑀺𑀢𑁆𑀢𑀢𑁆𑀢𑀸 𑀨𑀲𑁆𑀲𑀸𑀤𑀺𑀥𑀫𑁆𑀫𑀧𑀼𑀜𑁆𑀚𑀫𑀢𑁆𑀢𑁂 𑀅𑀦𑀢𑁆𑀢𑀦𑀺 ‘‘𑀅𑀢𑁆𑀢𑀸’’𑀢𑀺 ¶ 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀻 𑀘𑀢𑀼𑀓𑁄𑀝𑀺𑀓𑀲𑀼𑀜𑁆𑀜𑀢𑀸𑀫𑀦𑀲𑀺𑀓𑀸𑀭𑁂𑀦 𑀢𑀁 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀁 𑀯𑀺𑀤𑁆𑀥𑀁𑀲𑁂𑀢𑀺. 𑀘𑀢𑀽𑀳𑀺 𑀘𑁂𑀢𑁆𑀣 𑀯𑀺𑀧𑀮𑁆𑀮𑀸𑀲𑁂𑀳𑀺 𑀘𑀢𑀼𑀭𑀸𑀲𑀯𑁄𑀖𑀬𑁄𑀕𑀓𑀸𑀬𑀕𑀦𑁆𑀣𑀅𑀕𑀢𑀺𑀢𑀡𑁆𑀳𑀼𑀧𑁆𑀧𑀸𑀤𑀼𑀧𑀸𑀤𑀸𑀦𑀲𑀢𑁆𑀢𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀅𑀧𑀭𑀺𑀜𑁆𑀜𑀸𑀤𑀺𑀯𑀲𑁂𑀦 𑀲𑀩𑁆𑀩𑁄 𑀅𑀓𑀼𑀲𑀮𑀧𑀓𑁆𑀔𑁄 𑀦𑁂𑀢𑀩𑁆𑀩𑁄. 𑀢𑀣𑀸 𑀘𑀢𑀽𑀳𑀺 𑀲𑀢𑀺𑀧𑀝𑁆𑀞𑀸𑀦𑁂𑀳𑀺 𑀘𑀢𑀼𑀩𑁆𑀩𑀺𑀥𑀛𑀸𑀦𑀯𑀺𑀳𑀸𑀭𑀸𑀥𑀺𑀝𑁆𑀞𑀸𑀦𑀲𑀼𑀔𑀪𑀸𑀕𑀺𑀬𑀥𑀫𑁆𑀫𑀅𑀧𑁆𑀧𑀫𑀜𑁆𑀜𑀸𑀲𑀫𑁆𑀫𑀧𑁆𑀧𑀥𑀸𑀦𑀇𑀤𑁆𑀥𑀺𑀧𑀸𑀤𑀸𑀤𑀺𑀯𑀲𑁂𑀦 𑀲𑀩𑁆𑀩𑁄 𑀯𑁄𑀤𑀸𑀦𑀧𑀓𑁆𑀔𑁄 𑀦𑁂𑀢𑀩𑁆𑀩𑁄𑀢𑀺 𑀅𑀬𑀁 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺. 𑀇𑀥𑀸𑀧𑀺 𑀲𑀼𑀪𑀲𑀜𑁆𑀜𑀸𑀲𑀼𑀔𑀲𑀜𑁆𑀜𑀸𑀳𑀺, 𑀘𑀢𑀽𑀳𑀺𑀧𑀺 𑀯𑀸 𑀯𑀺𑀧𑀮𑁆𑀮𑀸𑀲𑁂𑀳𑀺 𑀲𑀫𑀼𑀤𑀬𑀲𑀘𑁆𑀘𑀁 ¶ , 𑀢𑁂𑀲𑀁 𑀅𑀥𑀺𑀝𑁆𑀞𑀸𑀦𑀸𑀭𑀫𑁆𑀫𑀡𑀪𑀽𑀢𑀸 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀲𑀘𑁆𑀘𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀤𑀺𑀲𑀸𑀮𑁄𑀘𑀦𑀅𑀗𑁆𑀓𑀼𑀲𑀦𑀬𑀤𑁆𑀯𑀬𑀯𑀡𑁆𑀡𑀦𑀸

𑀇𑀢𑀺 𑀢𑀺𑀡𑁆𑀡𑀁 𑀅𑀢𑁆𑀣𑀦𑀬𑀸𑀦𑀁 𑀲𑀺𑀤𑁆𑀥𑀺𑀬𑀸 𑀯𑁄𑀳𑀸𑀭𑀦𑀬𑀤𑁆𑀯𑀬𑀫𑁆𑀧𑀺 𑀲𑀺𑀤𑁆𑀥𑀫𑁂𑀯 𑀳𑁄𑀢𑀺. 𑀢𑀣𑀸 𑀳𑀺 𑀅𑀢𑁆𑀣𑀦𑀬𑀤𑀺𑀲𑀸𑀪𑀽𑀢𑀥𑀫𑁆𑀫𑀸𑀦𑀁 𑀲𑀫𑀸𑀮𑁄𑀘𑀦𑀁 𑀤𑀺𑀲𑀸𑀮𑁄𑀘𑀦𑀁, 𑀢𑁂𑀲𑀁 𑀲𑀫𑀸𑀦𑀬𑀦𑀁 𑀅𑀗𑁆𑀓𑀼𑀲𑁄𑀢𑀺 𑀦𑀺𑀬𑀼𑀢𑁆𑀢𑀸 𑀧𑀜𑁆𑀘 𑀦𑀬𑀸.

𑀧𑀜𑁆𑀘𑀯𑀺𑀥𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀲𑀦𑀧𑀝𑁆𑀞𑀸𑀦𑀯𑀡𑁆𑀡𑀦𑀸

𑀇𑀤𑀁 𑀲𑀼𑀢𑁆𑀢𑀁 𑀲𑁄𑀴𑀲𑀯𑀺𑀥𑁂 𑀲𑀼𑀢𑁆𑀢𑀦𑁆𑀢𑀧𑀝𑁆𑀞𑀸𑀦𑁂 𑀲𑀁𑀓𑀺𑀮𑁂𑀲𑀯𑀸𑀲𑀦𑀸𑀲𑁂𑀓𑁆𑀔𑀪𑀸𑀕𑀺𑀬𑀁, 𑀲𑀁𑀓𑀺𑀮𑁂𑀲𑀦𑀺𑀩𑁆𑀩𑁂𑀥𑀸𑀲𑁂𑀓𑁆𑀔𑀪𑀸𑀕𑀺𑀬𑀫𑁂𑀯 𑀯𑀸. 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑁂 𑀧𑀦 𑀲𑀼𑀢𑁆𑀢𑀦𑁆𑀢𑀧𑀝𑁆𑀞𑀸𑀦𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀁 𑀲𑀢𑁆𑀢𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁 𑀜𑀸𑀡𑀜𑁂𑀬𑁆𑀬𑀤𑀲𑁆𑀲𑀦𑀪𑀸𑀯𑀦𑀁 𑀲𑀓𑀯𑀘𑀦𑀧𑀭𑀯𑀘𑀦𑀁 𑀯𑀺𑀲𑁆𑀲𑀚𑁆𑀚𑀦𑀻𑀬𑀸𑀯𑀺𑀲𑁆𑀲𑀚𑁆𑀚𑀦𑀻𑀬𑀁 𑀓𑀼𑀲𑀮𑀸𑀓𑀼𑀲𑀮𑀁 𑀅𑀦𑀼𑀜𑁆𑀜𑀸𑀢𑀧𑀝𑀺𑀓𑁆𑀔𑀺𑀢𑁆𑀢𑀜𑁆𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀓𑀭𑀡𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑀭𑀸𑀚𑀸𑀫𑀘𑁆𑀘𑀓𑀣𑀸𑀯𑀡𑁆𑀡𑀦𑀸

𑁧𑁫𑁦. 𑀭𑀸𑀚𑀕𑀳𑁂𑀢𑀺 ¶ ¶ ¶ 𑀏𑀢𑁆𑀣 𑀤𑀼𑀕𑁆𑀕𑀚𑀦𑀧𑀤𑀝𑁆𑀞𑀸𑀦𑀯𑀺𑀲𑁂𑀲𑀲𑀫𑁆𑀧𑀤𑀸𑀤𑀺𑀬𑁄𑀕𑀢𑁄 𑀧𑀥𑀸𑀦𑀪𑀸𑀯𑁂𑀦 𑀭𑀸𑀚𑀽𑀳𑀺 𑀕𑀳𑀺𑀢𑀦𑁆𑀢𑀺 𑀭𑀸𑀚𑀕𑀳𑀦𑁆𑀢𑀺 𑀆𑀳 ‘‘𑀫𑀦𑁆𑀥𑀸𑀢𑀼…𑀧𑁂… 𑀯𑀼𑀘𑁆𑀘𑀢𑀻’’𑀢𑀺. 𑀢𑀢𑁆𑀣 𑀫𑀳𑀸𑀕𑁄𑀯𑀺𑀦𑁆𑀤𑁂𑀦 𑀫𑀳𑀸𑀲𑀢𑁆𑀢𑁂𑀦 𑀧𑀭𑀺𑀕𑁆𑀕𑀳𑀺𑀢𑀁 𑀭𑁂𑀡𑀼𑀆𑀤𑀻𑀳𑀺 𑀭𑀸𑀚𑀽𑀳𑀺 𑀧𑀭𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀻𑀢𑀺 𑀫𑀳𑀸𑀕𑁄𑀯𑀺𑀦𑁆𑀤𑀕𑁆𑀕𑀳𑀡𑀁. 𑀫𑀳𑀸𑀕𑁄𑀯𑀺𑀦𑁆𑀤𑁄𑀢𑀺 𑀫𑀳𑀸𑀦𑀼𑀪𑀸𑀯𑁄 𑀏𑀓𑁄 𑀧𑀼𑀭𑀸𑀢𑀦𑁄 𑀭𑀸𑀚𑀸𑀢𑀺 𑀓𑁂𑀘𑀺. 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸𑀢𑀺 𑀭𑀸𑀚𑀥𑀸𑀦𑀻𑀪𑀸𑀯𑁂𑀦 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸. 𑀧𑀓𑀸𑀭𑁂𑀢𑀺 𑀦𑀕𑀭𑀫𑀸𑀧𑀦𑁂𑀦 𑀭𑀜𑁆𑀜𑀸 𑀓𑀸𑀭𑀺𑀢𑀲𑀩𑁆𑀩𑀕𑁂𑀳𑀢𑁆𑀢𑀸 𑀭𑀸𑀚𑀕𑀳𑀁, 𑀕𑀺𑀚𑁆𑀛𑀓𑀽𑀝𑀸𑀤𑀻𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀧𑀩𑁆𑀩𑀢𑀭𑀸𑀚𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀕𑁂𑀳𑀲𑀤𑀺𑀲𑀦𑁆𑀢𑀺𑀧𑀺 𑀭𑀸𑀚𑀕𑀳𑀁, 𑀲𑀫𑁆𑀧𑀦𑁆𑀦𑀪𑀯𑀦𑀢𑀸𑀬 𑀭𑀸𑀚𑀫𑀸𑀦𑀁 𑀕𑁂𑀳𑀦𑁆𑀢𑀺 𑀧𑀺 𑀭𑀸𑀚𑀕𑀳𑀁, 𑀲𑀁𑀯𑀺𑀳𑀺𑀢𑀸𑀭𑀓𑁆𑀔𑀢𑀸𑀬 𑀅𑀦𑀢𑁆𑀣𑀸𑀯𑀳𑀪𑀸𑀯𑁂𑀦 𑀉𑀧𑀕𑀢𑀸𑀦𑀁 𑀧𑀝𑀺𑀭𑀸𑀚𑀽𑀦𑀁 𑀕𑀳𑀁 𑀕𑁂𑀳𑀪𑀽𑀢𑀦𑁆𑀢𑀺𑀧𑀺 𑀭𑀸𑀚𑀕𑀳𑀁, 𑀭𑀸𑀚𑀽𑀳𑀺 𑀤𑀺𑀲𑁆𑀯𑀸 𑀲𑀫𑁆𑀫𑀸 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸 𑀢𑁂𑀲𑀁 𑀕𑀳𑀁 𑀕𑁂𑀳𑀪𑀽𑀢𑀦𑁆𑀢𑀺𑀧𑀺 𑀭𑀸𑀚𑀕𑀳𑀁, 𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀓𑀸𑀤𑀻𑀳𑀺 𑀭𑀸𑀚𑀢𑁂, 𑀦𑀺𑀯𑀸𑀲𑀲𑀼𑀔𑀢𑀸𑀤𑀺𑀦𑀸 𑀲𑀢𑁆𑀢𑁂𑀳𑀺 𑀫𑀫𑀢𑁆𑀢𑀯𑀲𑁂𑀦 𑀕𑀬𑁆𑀳𑀢𑀺, 𑀧𑀭𑀺𑀕𑁆𑀕𑀬𑁆𑀳𑀢𑀻𑀢𑀺 𑀯𑀸 𑀭𑀸𑀚𑀕𑀳𑀦𑁆𑀢𑀺 𑀏𑀤𑀺𑀲𑁂 𑀧𑀓𑀸𑀭𑁂 𑀲𑁄 𑀧𑀤𑁂𑀲𑁄 𑀞𑀸𑀦𑀯𑀺𑀲𑁂𑀲𑀪𑀸𑀯𑁂𑀦 𑀉𑀴𑀸𑀭𑀲𑀢𑁆𑀢𑀧𑀭𑀺𑀪𑁄𑀕𑁄𑀢𑀺 𑀆𑀳 ‘‘𑀢𑀁 𑀧𑀦𑁂𑀢’’𑀦𑁆𑀢𑀺𑀆𑀤𑀺. 𑀢𑁂𑀲𑀦𑁆𑀢𑀺 𑀬𑀓𑁆𑀔𑀸𑀦𑀁. 𑀯𑀲𑀦𑀯𑀦𑀦𑁆𑀢𑀺 𑀆𑀧𑀸𑀦𑀪𑀽𑀫𑀺𑀪𑀽𑀢𑀁 𑀉𑀧𑀯𑀦𑀁.

𑀅𑀯𑀺𑀲𑁂𑀲𑁂𑀦𑀸𑀢𑀺 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺’’ (𑀫. 𑀦𑀺. 𑁧.𑁬𑁯; 𑁩.𑁭𑁫; 𑀯𑀺𑀪. 𑁫𑁦𑁮), ‘‘𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, (𑀤𑀻. 𑀦𑀺. 𑁧.𑁨𑁨𑁬; 𑀲𑀁. 𑀦𑀺. 𑁨.𑁧𑁫𑁨; 𑀅. 𑀦𑀺. 𑁪.𑁧𑁨𑁩; 𑀧𑀸𑀭𑀸. 𑁧𑁧) ‘‘𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺’’, (𑀤𑀻. 𑀦𑀺. 𑁧.𑁫𑁫𑁬; 𑁩.𑁩𑁦𑁮; 𑀫. 𑀦𑀺. 𑁧.𑁭𑁭, 𑁪𑁫𑁯, 𑁫𑁦𑁯; 𑁨.𑁩𑁦𑁯, 𑁩𑁧𑁫, 𑁪𑁫𑁧, 𑁪𑁭𑁧; 𑁩.𑁨𑁩𑁦; 𑀯𑀺𑀪. 𑁬𑁪𑁨) ‘‘𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 ¶ 𑀅𑀫𑀦𑀲𑀺𑀓𑀸𑀭𑀸 𑀅𑀦𑀺𑀫𑀺𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁪𑁫𑁯) 𑀯𑀺𑀬 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀲𑀺𑀤𑁆𑀥𑁂𑀦 𑀯𑀺𑀲𑁂𑀲𑀧𑀭𑀸𑀫𑀲𑀦𑁂𑀦 𑀯𑀺𑀦𑀸. 𑀇𑀭𑀺𑀬𑀸𑀬 𑀓𑀸𑀬𑀺𑀓𑀓𑀺𑀭𑀺𑀬𑀸𑀬 𑀧𑀯𑀢𑁆𑀢𑀦𑀽𑀧𑀸𑀬𑀪𑀸𑀯𑀢𑁄 ¶ 𑀧𑀣𑁄𑀢𑀺 𑀇𑀭𑀺𑀬𑀸𑀧𑀣𑁄. 𑀞𑀸𑀦𑀸𑀤𑀻𑀦𑀜𑁆𑀳𑀺 𑀕𑀢𑀺𑀦𑀺𑀯𑀢𑁆𑀢𑀺 𑀆𑀤𑀺𑀅𑀯𑀢𑁆𑀣𑀸𑀳𑀺 𑀯𑀺𑀦𑀸 𑀦 𑀓𑀜𑁆𑀘𑀺 𑀓𑀸𑀬𑀺𑀓𑀓𑀺𑀭𑀺𑀬𑀁 𑀧𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑀸. 𑀯𑀺𑀳𑀭𑀢𑀺 𑀧𑀯𑀢𑁆𑀢𑀢𑀺 𑀏𑀢𑁂𑀦, 𑀯𑀺𑀳𑀭𑀡𑀜𑁆𑀘𑀸𑀢𑀺 𑀯𑀺𑀳𑀸𑀭𑁄, 𑀤𑀺𑀩𑁆𑀩𑀪𑀸𑀯𑀸𑀯𑀳𑁄 𑀯𑀺𑀳𑀸𑀭𑁄 𑀤𑀺𑀩𑁆𑀩𑀯𑀺𑀳𑀸𑀭𑁄, 𑀫𑀳𑀕𑁆𑀕𑀢𑀚𑁆𑀛𑀸𑀦𑀸𑀦𑀺. 𑀦𑁂𑀢𑁆𑀢𑀺𑀬𑀁 𑀧𑀦 ‘‘𑀘𑀢𑀲𑁆𑀲𑁄 𑀆𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺𑀬𑁄 𑀆𑀦𑁂𑀜𑁆𑀚𑀸 𑀯𑀺𑀳𑀸𑀭𑀸’’𑀢𑀺 𑀯𑀼𑀢𑁆𑀢𑀁 ¶ . 𑀢𑀁 𑀢𑀸𑀲𑀁 𑀫𑁂𑀢𑁆𑀢𑀸𑀛𑀸𑀦𑀸𑀤𑀻𑀦𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀢𑀸 𑀯𑀺𑀬 𑀪𑀸𑀯𑀦𑀸𑀯𑀺𑀲𑁂𑀲𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀤𑀺𑀩𑁆𑀩𑀪𑀸𑀯𑀸𑀯𑀳𑀲𑀸𑀫𑀜𑁆𑀜𑀢𑁄 𑀢𑀸𑀧𑀺 ‘‘𑀤𑀺𑀩𑁆𑀩𑀯𑀺𑀳𑀸𑀭𑀸’’ 𑀢𑁆𑀯𑁂𑀯 𑀯𑀼𑀢𑁆𑀢𑀸. 𑀳𑀺𑀢𑀽𑀧𑀲𑀁𑀳𑀸𑀭𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀩𑁆𑀭𑀳𑁆𑀫𑀪𑀽𑀢𑀸 𑀲𑁂𑀝𑁆𑀞𑀪𑀽𑀢𑀸 𑀯𑀺𑀳𑀸𑀭𑀸𑀢𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀸, 𑀫𑁂𑀢𑁆𑀢𑀸𑀛𑀸𑀦𑀸𑀤𑀺𑀓𑀸. 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸 𑀅𑀭𑀺𑀬𑀸𑀦𑀁 𑀯𑀺𑀳𑀸𑀭𑀸𑀢𑀺 𑀅𑀭𑀺𑀬𑀯𑀺𑀳𑀸𑀭𑀸, 𑀘𑀢𑀲𑁆𑀲𑁄𑀧𑀺 𑀨𑀮𑀲𑀫𑀸𑀧𑀢𑁆𑀢𑀺𑀬𑁄. 𑀲𑀫𑀗𑁆𑀕𑀻𑀧𑀭𑀺𑀤𑀻𑀧𑀦𑀦𑁆𑀢𑀺 𑀲𑀫𑀗𑁆𑀕𑀺𑀪𑀸𑀯𑀧𑀭𑀺𑀤𑀻𑀧𑀦𑀁. 𑀇𑀭𑀺𑀬𑀸𑀧𑀣𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀁 𑀇𑀢𑀭𑀯𑀺𑀳𑀸𑀭𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀲𑁆𑀲 𑀯𑀺𑀲𑁂𑀲𑀯𑀘𑀦𑀲𑁆𑀲 𑀅𑀪𑀸𑀯𑀢𑁄, 𑀇𑀭𑀺𑀬𑀸𑀧𑀣𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀲𑁆𑀲 𑀘 𑀅𑀢𑁆𑀣𑀲𑀺𑀤𑁆𑀥𑀢𑁆𑀢𑀸. 𑀯𑀺𑀳𑀭𑀢𑀻𑀢𑀺 𑀏𑀢𑁆𑀣 𑀯𑀺-𑀲𑀤𑁆𑀤𑁄 𑀯𑀺𑀘𑁆𑀙𑁂𑀤𑀢𑁆𑀣𑀚𑁄𑀢𑀦𑁄, 𑀳𑀭𑀢𑀻𑀢𑀺 𑀦𑁂𑀢𑀺, 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀓𑀲𑁆𑀲 𑀓𑁂𑀦 𑀯𑀺𑀘𑁆𑀙𑀺𑀦𑁆𑀤𑀦𑀁, 𑀓𑀣𑀁 𑀓𑀲𑁆𑀲 𑀧𑀯𑀢𑁆𑀢𑀦𑀦𑁆𑀢𑀺 𑀅𑀦𑁆𑀢𑁄𑀮𑀻𑀦𑀁 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀲𑁄 𑀳𑀻’’𑀢𑀺𑀆𑀤𑀺.

𑀕𑁄𑀘𑀭𑀕𑀸𑀫𑀤𑀲𑁆𑀲𑀦𑀢𑁆𑀣𑀁 ‘‘𑀭𑀸𑀚𑀕𑀳𑁂’’𑀢𑀺 𑀯𑀢𑁆𑀯𑀸 𑀩𑀼𑀤𑁆𑀥𑀸𑀦𑀁 𑀅𑀦𑀼𑀭𑀽𑀧𑀦𑀺𑀯𑀸𑀲𑀦𑀝𑁆𑀞𑀸𑀦𑀤𑀲𑁆𑀲𑀦𑀢𑁆𑀣𑀁 ‘‘𑀅𑀫𑁆𑀩𑀯𑀦𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀇𑀤𑀫𑀲𑁆𑀲𑀸’’𑀢𑀺𑀆𑀤𑀺. 𑀏𑀢𑀦𑁆𑀢𑀺 𑀏𑀢𑀁 ‘‘𑀭𑀸𑀚𑀕𑀳𑁂’’𑀢𑀺 𑀪𑀼𑀫𑁆𑀫𑀯𑀘𑀦𑀁 𑀲𑀫𑀻𑀧𑀢𑁆𑀣𑁂 ‘‘𑀕𑀗𑁆𑀕𑀸𑀬 𑀕𑀸𑀯𑁄 𑀘𑀭𑀦𑁆𑀢𑀺, 𑀓𑀽𑀧𑁂 𑀕𑀕𑁆𑀕𑀓𑀼𑀮’’𑀦𑁆𑀢𑀺 𑀘 𑀬𑀣𑀸. 𑀓𑀼𑀫𑀸𑀭𑁂𑀦 ¶ 𑀪𑀢𑁄𑀢𑀺 𑀓𑀼𑀫𑀸𑀭𑀪𑀢𑁄, 𑀲𑁄 𑀏𑀯 𑀓𑁄𑀫𑀸𑀭𑀪𑀘𑁆𑀘𑁄 𑀬𑀣𑀸 𑀪𑀺𑀲𑀕𑁆𑀕𑀫𑁂𑀯 𑀪𑁂𑀲𑀚𑁆𑀚𑀁. 𑀤𑁄𑀲𑀸𑀪𑀺𑀲𑀦𑁆𑀦𑀦𑁆𑀢𑀺 𑀯𑀸𑀢𑀧𑀺𑀢𑁆𑀢𑀸𑀤𑀺𑀯𑀲𑁂𑀦 𑀉𑀲𑁆𑀲𑀦𑁆𑀦𑀤𑁄𑀲𑀁. 𑀯𑀺𑀭𑁂𑀘𑁂𑀢𑁆𑀯𑀸𑀢𑀺 𑀤𑁄𑀲𑀧𑀓𑁄𑀧𑀢𑁄 𑀯𑀺𑀯𑁂𑀘𑁂𑀢𑁆𑀯𑀸.

𑀅𑀟𑁆𑀠𑀢𑁂𑀴𑀲𑀳𑀻𑀢𑀺 𑀅𑀟𑁆𑀠𑁂𑀦 𑀢𑁂𑀭𑀲𑀳𑀺 𑀅𑀟𑁆𑀠𑀢𑁂𑀭𑀲𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀢𑀸𑀦𑀺 𑀧𑀦 𑀧𑀜𑁆𑀜𑀸𑀲𑀸𑀬 𑀊𑀦𑀸𑀦𑀺 𑀢𑁂𑀭𑀲𑀪𑀺𑀓𑁆𑀔𑀼𑀲𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀅𑀟𑁆𑀠𑀲𑀢𑁂𑀦𑀸’’𑀢𑀺𑀆𑀤𑀺.

𑀭𑀸𑀚𑀢𑀻𑀢𑀺 𑀤𑀺𑀩𑁆𑀩𑀢𑀺, 𑀲𑁄𑀪𑀢𑀻𑀢𑀺 𑀅𑀢𑁆𑀣𑁄. 𑀭𑀜𑁆𑀚𑁂𑀢𑀻𑀢𑀺 𑀭𑀫𑁂𑀢𑀺. 𑀭𑀜𑁆𑀜𑁄𑀢𑀺 𑀧𑀺𑀢𑀼 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄. 𑀲𑀸𑀲𑀦𑀝𑁆𑀞𑁂𑀦 𑀳𑀺𑀁𑀲𑀦𑀝𑁆𑀞𑁂𑀦 𑀲𑀢𑁆𑀢𑀼.

𑀪𑀸𑀭𑀺𑀬𑁂𑀢𑀺 𑀕𑀭𑀼𑀓𑁂 𑀅𑀜𑁆𑀜𑁂𑀲𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁂 𑀯𑀸. 𑀲𑀼𑀯𑀡𑁆𑀡𑀲𑀢𑁆𑀣𑀓𑁂𑀦𑀸𑀢𑀺 𑀲𑀼𑀯𑀡𑁆𑀡𑀫𑀬𑁂𑀦 𑀲𑀢𑁆𑀣𑀓𑁂𑀦. 𑀅𑀬𑁄𑀫𑀬𑀜𑁆𑀳𑀺 𑀭𑀜𑁆𑀜𑁄 𑀲𑀭𑀻𑀭𑀁 𑀉𑀧𑀦𑁂𑀢𑀼𑀁 𑀅𑀬𑀼𑀢𑁆𑀢𑀦𑁆𑀢𑀺 𑀯𑀤𑀢𑀺. 𑀲𑀼𑀯𑀡𑁆𑀡𑀲𑀢𑁆𑀣𑀓𑁂𑀦𑀸𑀢𑀺 𑀯𑀸 𑀲𑀼𑀯𑀡𑁆𑀡𑀧𑀭𑀺𑀓𑁆𑀔𑀢𑁂𑀦 𑀲𑀢𑁆𑀣𑀓𑁂𑀦 𑀩𑀸𑀳𑀼𑀁 𑀨𑀸𑀮𑀸𑀧𑁂𑀢𑁆𑀯𑀸𑀢𑀺 𑀲𑀺𑀭𑀸𑀯𑁂𑀥𑀯𑀲𑁂𑀦 𑀩𑀸𑀳𑀼𑀁 𑀨𑀮𑀸𑀧𑁂𑀢𑁆𑀯𑀸 𑀉𑀤𑀓𑁂𑀦 𑀲𑀫𑁆𑀪𑀺𑀦𑁆𑀤𑀺𑀢𑁆𑀯𑀸 𑀧𑀸𑀬𑁂𑀲𑀺 𑀓𑁂𑀯𑀮𑀲𑁆𑀲 𑀮𑁄𑀳𑀺𑀢𑀲𑁆𑀲 𑀕𑀩𑁆𑀪𑀺𑀦𑀺𑀢𑁆𑀣𑀺𑀬𑀸 𑀤𑀼𑀚𑁆𑀚𑀻𑀭𑀪𑀸𑀯𑀢𑁄. 𑀥𑀼𑀭𑀸𑀢𑀺 𑀥𑀼𑀭𑀪𑀽𑀢𑀸, 𑀕𑀡𑀲𑁆𑀲 ¶ , 𑀥𑁄𑀭𑀬𑁆𑀳𑀸𑀢𑀺 𑀅𑀢𑁆𑀣𑁄. 𑀥𑀼𑀭𑀁 𑀦𑀻𑀳𑀭𑀸𑀫𑀻𑀢𑀺 𑀕𑀡𑀥𑀼𑀭𑀁 𑀕𑀡𑀩𑀦𑁆𑀥𑀺𑀬𑀁 𑀦𑀺𑀩𑁆𑀩𑀢𑁆𑀢𑁂𑀫𑀺. ‘‘𑀧𑀼𑀩𑁆𑀩𑁂 𑀔𑁄’’𑀢𑀺𑀆𑀤𑀺 𑀔𑀦𑁆𑀥𑀓𑀧𑀸𑀴𑀺 𑀏𑀯.

𑀧𑁄𑀢𑁆𑀣𑀦𑀺𑀬𑀦𑁆𑀢𑀺 ¶ 𑀙𑀼𑀭𑀺𑀓𑀁, 𑀬𑀁 ‘‘𑀦𑀔𑀭’’𑀦𑁆𑀢𑀺𑀧𑀺 [𑀧𑁄𑀣𑀦𑀺𑀓𑀦𑁆𑀢𑀺 𑀙𑀼𑀭𑀺𑀓𑀁, 𑀬𑀁 𑀔𑀭𑀦𑁆𑀢𑀺𑀧𑀺 (𑀲𑀸𑀭𑀢𑁆𑀣. 𑀝𑀻. 𑁩.𑁩𑁩𑁯) 𑀧𑁄𑀣𑀦𑀺𑀓𑀦𑁆𑀢𑀺 𑀙𑀼𑀭𑀺𑀓𑀁, 𑀔𑀭𑀦𑁆𑀢𑀺𑀧𑀺 (𑀯𑀺. 𑀯𑀺. 𑀝𑀻. 𑁨.𑀘𑀽𑀴𑀯𑀕𑁆𑀕𑀯𑀡𑁆𑀡𑀦𑀸 𑁩𑁩𑁯)] 𑀯𑀼𑀘𑁆𑀘𑀢𑀺. 𑀤𑀺𑀯𑀸 𑀤𑀺𑀯𑀲𑁆𑀲𑀸𑀢𑀺 𑀤𑀺𑀯𑀲𑁆𑀲𑀧𑀺 𑀤𑀺𑀯𑀸, 𑀫𑀚𑁆𑀛𑀦𑁆𑀳𑀺𑀓𑀯𑁂𑀮𑀸𑀬𑀦𑁆𑀢𑀺 𑀅𑀢𑁆𑀣𑁄.

𑀢𑀲𑁆𑀲𑀸 𑀲𑀭𑀻𑀭𑀁 𑀮𑁂𑀳𑀺𑀢𑁆𑀯𑀸 𑀬𑀸𑀧𑁂𑀢𑀺 𑀅𑀢𑁆𑀢𑀽𑀧𑀓𑁆𑀓𑀫𑁂𑀦 𑀫𑀭𑀡𑀁 𑀦 𑀬𑀼𑀢𑁆𑀢𑀦𑁆𑀢𑀺. 𑀦 𑀳𑀺 𑀅𑀭𑀺𑀬𑀲𑀸𑀯𑀓𑀸 𑀅𑀢𑁆𑀢𑀸𑀦𑀁 𑀯𑀺𑀦𑀺𑀧𑀸𑀢𑁂𑀦𑁆𑀢𑀻𑀢𑀺. 𑀫𑀕𑁆𑀕𑀨𑀮𑀲𑀼𑀔𑁂𑀦𑀸𑀢𑀺 𑀫𑀕𑁆𑀕𑀨𑀮𑀲𑀼𑀔𑀸𑀯𑀳𑁂𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀨𑀮𑀲𑀼𑀔𑀽𑀧𑀲𑀜𑁆𑀳𑀺𑀢𑁂𑀦 𑀘𑀗𑁆𑀓𑀫𑁂𑀦 𑀬𑀸𑀧𑁂𑀢𑀺. 𑀘𑁂𑀢𑀺𑀬𑀗𑁆𑀕𑀡𑁂𑀢𑀺 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑀦𑀝𑁆𑀞𑀸𑀦𑀪𑀽𑀢𑁂 𑀘𑁂𑀢𑀺𑀬𑀗𑁆𑀕𑀡𑁂 ¶ . 𑀦𑀺𑀲𑀚𑁆𑀚𑀦𑀢𑁆𑀣𑀸𑀬𑀸𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀦𑀺𑀲𑀻𑀤𑀦𑀢𑁆𑀣𑀸𑀬. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑀮𑁄𑀓𑁂…𑀧𑁂… 𑀬𑀓𑁆𑀔𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺 𑀢𑀢𑁆𑀣 𑀩𑀳𑀼𑀮𑀁 𑀦𑀺𑀩𑁆𑀩𑀢𑁆𑀢𑀧𑀼𑀩𑁆𑀩𑀢𑀸𑀬 𑀘𑀺𑀭𑀧𑀭𑀺𑀘𑀺𑀢𑀦𑀺𑀓𑀦𑁆𑀢𑀺𑀯𑀲𑁂𑀦.

𑀔𑁄𑀪𑁂𑀢𑁆𑀯𑀸𑀢𑀺 𑀧𑀼𑀢𑁆𑀢𑀲𑀺𑀦𑁂𑀳𑀲𑁆𑀲 𑀩𑀮𑀯𑀪𑀸𑀯𑀢𑁄, 𑀲𑀳𑀚𑀸𑀢𑀧𑀻𑀢𑀺𑀯𑁂𑀕𑀲𑁆𑀲 𑀘 𑀲𑀯𑀺𑀧𑁆𑀨𑀸𑀭𑀢𑀸𑀬 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀥𑀫𑁆𑀫𑁂𑀳𑀺 𑀨𑀭𑀡𑀯𑀲𑁂𑀦 𑀲𑀓𑀮𑀲𑀭𑀻𑀭𑀁 𑀆𑀮𑁄𑀴𑁂𑀢𑁆𑀯𑀸. 𑀢𑁂𑀦𑀸𑀳 ‘‘𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀅𑀝𑁆𑀞𑀸𑀲𑀻’’𑀢𑀺. 𑀧𑀺𑀢𑀼𑀕𑀼𑀡𑀦𑁆𑀢𑀺 𑀧𑀺𑀢𑀼 𑀅𑀢𑁆𑀢𑀦𑀺 𑀲𑀺𑀦𑁂𑀳𑀕𑀼𑀡𑀁. 𑀫𑀼𑀜𑁆𑀘𑀸𑀧𑁂𑀢𑁆𑀯𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀧𑀓𑀸𑀭𑀢𑁆𑀣𑁄, 𑀢𑁂𑀦 ‘‘𑀅𑀪𑀺𑀫𑀸𑀭𑀓𑀧𑀼𑀭𑀺𑀲𑀧𑁂𑀲𑀦𑀸𑀤𑀺𑀧𑁆𑀧𑀓𑀸𑀭𑁂𑀦𑀸’’𑀢𑀺 𑀯𑀼𑀢𑁆𑀢𑁂 𑀏𑀯 𑀧𑀓𑀸𑀭𑁂 𑀧𑀘𑁆𑀘𑀸𑀫𑀲𑀢𑀺. 𑀯𑀺𑀢𑁆𑀣𑀸𑀭𑀓𑀣𑀸𑀦𑀬𑁄𑀢𑀺 𑀅𑀚𑀸𑀢𑀲𑀢𑁆𑀢𑀼𑀧𑀲𑀸𑀤𑀦𑀸𑀤𑀺𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀯𑀢𑁆𑀢𑀩𑁆𑀩𑀸𑀬 𑀓𑀣𑀸𑀬 𑀦𑀬𑀫𑀢𑁆𑀢𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀯𑀺𑀢𑁆𑀣𑀸𑀭𑀦𑀬𑀸 𑀓𑀣𑀸 𑀦 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀆𑀕𑀢𑀢𑁆𑀢𑀸 𑀧𑀦 𑀲𑀩𑁆𑀩𑀁 𑀦 𑀯𑀼𑀢𑁆𑀢’’𑀦𑁆𑀢𑀺.

𑀓𑁄𑀲𑀮𑀭𑀜𑁆𑀜𑁄𑀢𑀺 𑀫𑀳𑀸𑀓𑁄𑀲𑀮𑀭𑀜𑁆𑀜𑁄. 𑀧𑀡𑁆𑀟𑀺𑀢𑀸𑀥𑀺𑀯𑀘𑀦𑀦𑁆𑀢𑀺 𑀧𑀡𑁆𑀟𑀺𑀢𑀯𑁂𑀯𑀘𑀦𑀁. 𑀯𑀺𑀤𑀦𑁆𑀢𑀻𑀢𑀺 𑀚𑀸𑀦𑀦𑁆𑀢𑀺. 𑀯𑁂𑀤𑁂𑀦 𑀜𑀸𑀡𑁂𑀦 𑀓𑀭𑀡𑀪𑀽𑀢𑁂𑀦 𑀈𑀳𑀢𑀺 𑀧𑀯𑀢𑁆𑀢𑀢𑀻𑀢𑀺 𑀯𑁂𑀤𑁂𑀳𑀺.

𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀤𑀺𑀯𑀲𑁂. 𑀅𑀦𑀲𑀦𑁂𑀦 𑀯𑀸𑀢𑀺 𑀯𑀸-𑀲𑀤𑁆𑀤𑁄 𑀅𑀦𑀺𑀬𑀫𑀢𑁆𑀣𑁄, 𑀢𑁂𑀦 𑀏𑀓𑀘𑁆𑀘𑀫𑀦𑁄𑀤𑀼𑀘𑁆𑀘𑀭𑀺𑀢𑀤𑀼𑀲𑁆𑀲𑀻𑀮𑁆𑀬𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀣𑀸 𑀳𑀺 𑀕𑁄𑀧𑀸𑀮𑀓𑀽𑀧𑁄𑀲𑀣𑁄 𑀅𑀪𑀺𑀚𑁆𑀛𑀸𑀲𑀳𑀕𑀢𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑁄, 𑀦𑀺𑀕𑀡𑁆𑀞𑀼𑀧𑁄𑀲𑀣𑁄 𑀫𑁄𑀲𑀯𑀚𑁆𑀚𑀸𑀤𑀺𑀯𑀲𑁂𑀦. 𑀬𑀣𑀸𑀳 ‘‘𑀲𑁄 𑀢𑁂𑀦 𑀅𑀪𑀺𑀚𑁆𑀛𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀤𑀺𑀯𑀲𑀁 𑀅𑀢𑀺𑀦𑀸𑀫𑁂𑀢𑀻’’𑀢𑀺 (𑀅. 𑀦𑀺. 𑁧.𑁭𑁧), ‘‘𑀇𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀲𑀘𑁆𑀘𑁂 𑀲𑀫𑀸𑀤𑀧𑁂𑀢𑀩𑁆𑀩𑀸, 𑀫𑀼𑀲𑀸𑀯𑀸𑀤𑁂 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀫𑀸𑀤𑀧𑁂𑀦𑁆𑀢𑀻’’𑀢𑀺 (𑀅. 𑀦𑀺. 𑁧.𑁭𑁧) 𑀘 𑀆𑀤𑀺. 𑀏𑀢𑁆𑀣𑀸𑀢𑀺 𑀉𑀧𑁄𑀲𑀣𑀲𑀤𑁆𑀤𑁂. 𑀅𑀢𑁆𑀣𑀼𑀤𑁆𑀥𑀸𑀭𑁄𑀢𑀺 𑀯𑀢𑁆𑀢𑀩𑁆𑀩𑀅𑀢𑁆𑀣𑀸𑀦𑀁 𑀉𑀤𑁆𑀥𑀸𑀭𑀡𑀁.

𑀦𑀦𑀼 ¶ ¶ 𑀘 𑀅𑀢𑁆𑀣𑀫𑀢𑁆𑀢𑀁 𑀧𑀢𑀺 ¶ 𑀲𑀤𑁆𑀤𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑀻𑀢𑀺 𑀦 𑀏𑀓𑁂𑀦 𑀲𑀤𑁆𑀤𑁂𑀦 𑀅𑀦𑁂𑀓𑁂 𑀅𑀢𑁆𑀣𑀸 𑀅𑀪𑀺𑀥𑀻𑀬𑀦𑁆𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁 𑀲𑀤𑁆𑀤𑀯𑀺𑀲𑁂𑀲𑁂 𑀅𑀧𑁂𑀓𑁆𑀔𑀺𑀢𑁂, 𑀢𑁂𑀲𑀁 𑀧𑀦 𑀅𑀢𑁆𑀣𑀸𑀦𑀁 𑀉𑀧𑁄𑀲𑀣𑀲𑀤𑁆𑀤𑀯𑀘𑀦𑀻𑀬𑀢𑀸 𑀲𑀸𑀫𑀜𑁆𑀜𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀫𑀸𑀦𑁄 𑀅𑀬𑀁 𑀯𑀺𑀘𑀸𑀭𑁄 𑀉𑀧𑁄𑀲𑀣𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁄𑀢𑀺 𑀯𑀼𑀢𑁆𑀢𑁄. 𑀳𑁂𑀝𑁆𑀞𑀸 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀻𑀲𑀼 𑀆𑀕𑀢𑁂 𑀅𑀢𑁆𑀣𑀼𑀤𑁆𑀥𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀸𑀫𑀜𑁆𑀘 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀤𑀺𑀯𑀺𑀲𑀬𑁄𑀧𑀺 𑀉𑀧𑁄𑀲𑀣𑀲𑀤𑁆𑀤𑁄 𑀲𑀸𑀫𑀜𑁆𑀜𑀭𑀽𑀧𑁄 𑀏𑀯 𑀯𑀺𑀲𑁂𑀲𑀲𑀤𑁆𑀤𑀲𑁆𑀲 𑀅𑀯𑀸𑀘𑀓𑀪𑀸𑀯𑀢𑁄, 𑀢𑀸𑀤𑀺𑀲𑀁 𑀧𑀦 𑀲𑀸𑀫𑀜𑁆𑀜𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀻𑀮𑀲𑀼𑀤𑁆𑀥𑀺𑀯𑀲𑁂𑀦 𑀉𑀧𑁂𑀢𑁂𑀳𑀺 𑀲𑀫𑀕𑁆𑀕𑁂𑀳𑀺 𑀯𑀲𑀻𑀬𑀢𑀺 𑀅𑀦𑀼𑀝𑁆𑀞𑀻𑀬𑀢𑀻𑀢𑀺 𑀉𑀧𑁄𑀲𑀣𑁄, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄. 𑀲𑀫𑀸𑀤𑀸𑀦𑀯𑀲𑁂𑀦 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀯𑀸 𑀉𑀧𑁂𑀘𑁆𑀘 𑀅𑀭𑀺𑀬𑀯𑀸𑀲𑀸𑀤𑀺𑀅𑀢𑁆𑀣𑀁 𑀯𑀲𑀺𑀢𑀩𑁆𑀩𑀢𑁄 𑀉𑀧𑁄𑀲𑀣𑁄, 𑀲𑀻𑀮𑀁. 𑀅𑀦𑀲𑀦𑀸𑀤𑀺𑀯𑀲𑁂𑀦 𑀉𑀧𑁂𑀘𑁆𑀘 𑀯𑀲𑀺𑀢𑀩𑁆𑀩𑀢𑁄 𑀅𑀦𑀼𑀯𑀲𑀺𑀢𑀩𑁆𑀩𑀢𑁄 𑀉𑀧𑁄𑀲𑀣𑁄. 𑀉𑀧𑀯𑀸𑀲𑁄𑀢𑀺 𑀲𑀫𑀸𑀤𑀸𑀦𑀁. 𑀉𑀧𑁄𑀲𑀣𑀓𑀼𑀮𑀪𑀽𑀢𑀢𑀸𑀬 𑀦𑀯𑀫𑀳𑀢𑁆𑀣𑀺𑀦𑀺𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑁂 𑀳𑀢𑁆𑀣𑀺𑀦𑀸𑀕𑁂 𑀓𑀺𑀜𑁆𑀘𑀺 𑀓𑀺𑀭𑀺𑀬𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀭𑀽𑀴𑁆𑀳𑀺𑀯𑀲𑁂𑀦 𑀲𑀫𑀜𑁆𑀜𑀸𑀫𑀢𑁆𑀢𑀁 𑀉𑀧𑁄𑀲𑀣𑁄𑀢𑀺 𑀆𑀳 ‘‘𑀉𑀧𑁄𑀲𑀣𑁄 𑀦𑀸𑀕𑀭𑀸𑀚𑀸𑀢𑀺𑀆𑀤𑀻𑀲𑀼 𑀧𑀜𑁆𑀜𑀢𑁆𑀢𑀻’’𑀢𑀺. 𑀤𑀺𑀯𑀲𑁂 𑀧𑀦 𑀉𑀧𑁄𑀲𑀣𑀲𑀤𑁆𑀤𑀧𑁆𑀧𑀯𑀢𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸 𑀏𑀯. 𑀲𑀼𑀤𑁆𑀥𑀲𑁆𑀲 𑀯𑁂 𑀲𑀤𑀸 𑀨𑀕𑁆𑀕𑀽𑀢𑀺 𑀏𑀢𑁆𑀣 𑀧𑀦 𑀲𑀼𑀤𑁆𑀥𑀲𑁆𑀲𑀸𑀢𑀺 𑀲𑀩𑁆𑀩𑀲𑁄 𑀓𑀺𑀮𑁂𑀲𑀫𑀮𑀸𑀪𑀸𑀯𑁂𑀦 𑀲𑀼𑀤𑁆𑀥𑀲𑁆𑀲. 𑀯𑁂𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀯𑁂𑀢𑀺 𑀯𑀸 𑀩𑁆𑀬𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀤𑀸 𑀨𑀕𑁆𑀕𑀽𑀢𑀺 𑀦𑀺𑀘𑁆𑀘𑀓𑀸𑀮𑀫𑁆𑀧𑀺 𑀨𑀕𑁆𑀕𑀼𑀡𑀦𑀓𑁆𑀔𑀢𑁆𑀢𑀫𑁂𑀯. 𑀬𑀲𑁆𑀲 𑀳𑀺 𑀨𑀕𑁆𑀕𑀼𑀡𑀫𑀸𑀲𑁂 𑀉𑀢𑁆𑀢𑀭𑀨𑀕𑁆𑀕𑀼𑀡𑀤𑀺𑀯𑀲𑁂 𑀢𑀺𑀢𑁆𑀣𑀦𑁆𑀳𑀸𑀦𑀁 𑀓𑀭𑁄𑀦𑁆𑀢𑀲𑁆𑀲 𑀲𑀁𑀯𑀘𑁆𑀙𑀭𑀺𑀓𑀧𑀸𑀧𑀧𑀯𑀸𑀳𑀦𑀁 𑀳𑁄𑀢𑀻𑀢𑀺 𑀮𑀤𑁆𑀥𑀺, 𑀢𑀁 𑀢𑀢𑁄 𑀯𑀺𑀯𑁂𑀘𑁂𑀢𑀼𑀁 𑀇𑀤𑀁 𑀪𑀕𑀯𑀢𑀸 𑀯𑀼𑀢𑁆𑀢𑀁. 𑀲𑀼𑀤𑁆𑀥𑀲𑁆𑀲𑀼𑀧𑁄𑀲𑀣𑁄 𑀲𑀤𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑀼𑀤𑁆𑀥𑀺𑀬𑀸 𑀲𑀼𑀤𑁆𑀥𑀲𑁆𑀲 𑀉𑀧𑁄𑀲𑀣𑀗𑁆𑀕𑀸𑀦𑀺 𑀯𑀢𑀲𑀫𑀸𑀤𑀸𑀦𑀸𑀦𑀺 𑀘 𑀅𑀲𑀫𑀸𑀤𑀺𑀬𑀢𑁄𑀧𑀺 𑀦𑀺𑀘𑁆𑀘𑀁 𑀉𑀧𑁄𑀲𑀣𑁄, 𑀉𑀧𑁄𑀲𑀣𑀯𑀸𑀲𑁄 𑀏𑀯𑀸𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀤𑀲𑀦𑁆𑀦𑀁 𑀢𑀺𑀣𑀻𑀦𑀁 𑀧𑀽𑀭𑀡𑀯𑀲𑁂𑀦 𑀧𑀦𑁆𑀦𑀭𑀲𑁄.

𑀩𑀳𑀼𑀲𑁄 ¶ , 𑀅𑀢𑀺𑀲𑀬𑀢𑁄 𑀯𑀸 𑀓𑀼𑀫𑀼𑀤𑀸𑀦𑀺 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀓𑀼𑀫𑀼𑀤𑀯𑀢𑀻, 𑀢𑀺𑀲𑁆𑀲𑀁 𑀓𑀼𑀫𑀼𑀤𑀯𑀢𑀺𑀬𑀸. 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀧𑀸𑀭𑀺𑀧𑀽𑀭𑀺𑀪𑀽𑀢𑀸𑀢𑀺 𑀘𑀸𑀢𑀼𑀫𑀸𑀲𑀻. 𑀲𑀸 𑀏𑀯 𑀧𑀸𑀴𑀺𑀬𑀁 𑀘𑀸𑀢𑀼𑀫𑀸𑀲𑀺𑀦𑀻𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀇𑀥 𑀧𑀦 𑀘𑀸𑀢𑀼𑀫𑀸𑀲𑀺𑀦𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀢𑀤𑀸 𑀓𑀢𑁆𑀢𑀺𑀓𑀫𑀸𑀲𑀲𑁆𑀲 𑀧𑀼𑀡𑁆𑀡𑀢𑀸𑀬 𑀫𑀸𑀲𑀧𑀼𑀡𑁆𑀡𑀢𑀸. 𑀯𑀲𑁆𑀲𑀸𑀦𑀲𑁆𑀲 𑀉𑀢𑀼𑀦𑁄 𑀧𑀼𑀡𑁆𑀡𑀢𑀸𑀬 𑀉𑀢𑀼𑀧𑀼𑀡𑁆𑀡𑀢𑀸. 𑀓𑀢𑁆𑀢𑀺𑀓𑀫𑀸𑀲𑀮𑀓𑁆𑀔𑀺𑀢𑀲𑁆𑀲 𑀲𑀁𑀯𑀘𑁆𑀙𑀭𑀲𑁆𑀲 𑀧𑀼𑀡𑁆𑀡𑀢𑀸𑀬 𑀲𑀁𑀯𑀘𑁆𑀙𑀭𑀧𑀼𑀡𑁆𑀡𑀢𑀸. ‘‘𑀫𑀸’’ 𑀇𑀢𑀺 𑀘𑀦𑁆𑀤𑁄 𑀯𑀼𑀘𑁆𑀘𑀢𑀺 𑀢𑀲𑁆𑀲 𑀕𑀢𑀺𑀬𑀸 𑀤𑀺𑀯𑀲𑀲𑁆𑀲 𑀫𑀺𑀦𑀺𑀢𑀩𑁆𑀩𑀢𑁄. 𑀏𑀢𑁆𑀣 𑀧𑀼𑀡𑁆𑀡𑁄𑀢𑀺 𑀏𑀢𑀺𑀲𑁆𑀲𑀸 𑀭𑀢𑁆𑀢𑀺𑀬𑀸 𑀲𑀩𑁆𑀩𑀓𑀮𑀸𑀧𑀸𑀭𑀺𑀧𑀽𑀭𑀺𑀬𑀸 𑀧𑀼𑀡𑁆𑀡𑁄. 𑀢𑀤𑀸 𑀳𑀺 𑀘𑀦𑁆𑀤𑁄 𑀲𑀩𑁆𑀩𑀲𑁄 𑀧𑀭𑀺𑀧𑀼𑀡𑁆𑀡𑁄 𑀳𑀼𑀢𑁆𑀯𑀸 𑀤𑀺𑀲𑁆𑀲𑀢𑀺. 𑀏𑀢𑁆𑀣 𑀘 ‘‘𑀢𑀤𑀳𑀼𑀧𑁄𑀲𑀣𑁂 ¶ 𑀧𑀦𑁆𑀦𑀭𑀲𑁂’’𑀢𑀺 𑀧𑀤𑀸𑀦𑀺 𑀤𑀺𑀯𑀲𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, ‘‘𑀓𑁄𑀫𑀼𑀤𑀺𑀬𑀸’’𑀢𑀺𑀆𑀤𑀻𑀦𑀺 𑀭𑀢𑁆𑀢𑀺𑀯𑀲𑁂𑀦.

𑀭𑀸𑀚𑀸𑀫𑀘𑁆𑀘𑀧𑀭𑀺𑀯𑀼𑀢𑁄𑀢𑀺 𑀭𑀸𑀚𑀓𑀼𑀮𑀲𑀫𑀼𑀤𑀸𑀕𑀢𑁂𑀳𑀺 𑀅𑀫𑀘𑁆𑀘𑁂𑀳𑀺 𑀧𑀭𑀺𑀯𑀼𑀢𑁄. 𑀅𑀣 𑀯𑀸 𑀅𑀦𑀼𑀬𑀼𑀢𑁆𑀢𑀓𑀭𑀸𑀚𑀽𑀳𑀺 ¶ 𑀘𑁂𑀯 𑀅𑀫𑀘𑁆𑀘𑁂𑀳𑀺 𑀘 𑀧𑀭𑀺𑀯𑀼𑀢𑁄. 𑀘𑀢𑀼𑀭𑀼𑀧𑀓𑁆𑀓𑀺𑀮𑁂𑀲𑀸𑀢𑀺 𑀅𑀩𑁆𑀪𑀸 𑀫𑀳𑀺𑀓𑀸 𑀥𑀽𑀫𑀭𑀚𑁄 𑀭𑀸𑀳𑀽𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺. 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑀁 𑀅𑀝𑁆𑀞𑀓𑀣𑀸𑀬𑀁.

𑀧𑀻𑀢𑀺𑀯𑀘𑀦𑀦𑁆𑀢𑀺 𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑀁 𑀯𑀘𑀦𑀁. 𑀬𑀜𑁆𑀳𑀺 𑀯𑀘𑀦𑀁 𑀧𑀝𑀺𑀕𑁆𑀕𑀸𑀳𑀓𑀦𑀺𑀭𑀧𑁂𑀓𑁆𑀔𑀁 𑀓𑁂𑀯𑀮𑀁 𑀉𑀴𑀸𑀭𑀸𑀬 𑀧𑀻𑀢𑀺𑀬𑀸 𑀯𑀲𑁂𑀦 𑀲𑀭𑀲𑀢𑁄 𑀲𑀳𑀲𑀸𑀯 𑀫𑀼𑀔𑀢𑁄 𑀦𑀺𑀘𑁆𑀙𑀭𑀢𑀺, 𑀢𑀁 𑀇𑀥 ‘‘𑀉𑀤𑀸𑀦’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦𑀸𑀳 ‘‘𑀬𑀁 𑀧𑀻𑀢𑀺𑀯𑀘𑀦𑀁 𑀳𑀤𑀬𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺𑀆𑀤𑀺.

𑀤𑁄𑀲𑁂𑀳𑀺 𑀇𑀢𑀸 𑀕𑀢𑀸 𑀅𑀧𑀕𑀢𑀸𑀢𑀺 𑀤𑁄𑀲𑀺𑀦𑀸 𑀢-𑀓𑀸𑀭𑀲𑁆𑀲 𑀦-𑀓𑀸𑀭𑀁 𑀓𑀢𑁆𑀯𑀸 𑀬𑀣𑀸 ‘‘𑀓𑀺𑀮𑁂𑀲𑁂 𑀚𑀺𑀢𑁄 𑀯𑀺𑀚𑀺𑀢𑀸𑀯𑀻𑀢𑀺 𑀚𑀺𑀦𑁄’’𑀢𑀺. 𑀅𑀦𑀻𑀬-𑀲𑀤𑁆𑀤𑁄 𑀓𑀢𑁆𑀢𑀼𑀅𑀢𑁆𑀣𑁂 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀫𑀦𑀁 𑀭𑀫𑀬𑀢𑀻’’𑀢𑀺 ‘‘𑀭𑀫𑀡𑀻𑀬𑀸’’𑀢𑀺 𑀬𑀣𑀸 ‘‘𑀦𑀺𑀬𑁆𑀬𑀸𑀦𑀺𑀓𑀸 𑀥𑀫𑁆𑀫𑀸’’𑀢𑀺. 𑀚𑀼𑀡𑁆𑀳𑀯𑀲𑁂𑀦 𑀭𑀢𑁆𑀢𑀺𑀬𑀸 𑀲𑀼𑀭𑀽𑀧𑀢𑀸𑀢𑀺 𑀆𑀳 ‘‘𑀯𑀼𑀢𑁆𑀢𑀤𑁄𑀲𑀯𑀺𑀫𑀼𑀢𑁆𑀢𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 ¶ 𑀅𑀩𑁆𑀪𑀸𑀤𑀬𑁄 𑀯𑀼𑀢𑁆𑀢𑀤𑁄𑀲𑀸, 𑀢𑀩𑁆𑀩𑀺𑀕𑀫𑁂𑀦𑁂𑀯 𑀘𑀲𑁆𑀲𑀸 𑀤𑀲𑁆𑀲𑀦𑀻𑀬𑀢𑀸, 𑀢𑁂𑀦, 𑀉𑀢𑀼𑀲𑀫𑁆𑀧𑀢𑁆𑀢𑀺𑀬𑀸 𑀘 𑀧𑀸𑀲𑀸𑀤𑀺𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀮𑀓𑁆𑀔𑀡𑀁 𑀪𑀯𑀺𑀢𑀼𑀁 𑀬𑀼𑀢𑁆𑀢𑀸𑀢𑀺 𑀏𑀢𑀺𑀲𑁆𑀲𑀸 𑀭𑀢𑁆𑀢𑀺𑀬𑀸 𑀬𑀼𑀢𑁆𑀢𑁄 𑀤𑀺𑀯𑀲𑁄 𑀫𑀸𑀲𑁄 𑀉𑀢𑀼 𑀲𑀁𑀯𑀘𑁆𑀙𑀭𑁄𑀢𑀺 𑀏𑀯𑀁 𑀤𑀺𑀯𑀲𑀫𑀸𑀲𑀉𑀢𑀼𑀲𑀁𑀯𑀘𑁆𑀙𑀭𑀸𑀦𑀁 𑀲𑀮𑁆𑀮𑀓𑁆𑀔𑀡𑀁 𑀪𑀯𑀺𑀢𑀼𑀁 𑀬𑀼𑀢𑁆𑀢𑀸 𑀮𑀓𑁆𑀔𑀜𑁆𑀜𑀸, 𑀮𑀓𑁆𑀔𑀡𑀻𑀬𑀸𑀢𑀺 𑀅𑀢𑁆𑀣𑁄.

‘‘𑀬𑀁 𑀦𑁄 𑀧𑀬𑀺𑀭𑀼𑀧𑀸𑀲𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸’’𑀢𑀺 𑀏𑀢𑁆𑀣 𑀧𑀭𑀫𑀢𑁆𑀣𑀲𑀫𑀡𑁄 𑀘 𑀧𑀭𑀫𑀢𑁆𑀣𑀩𑁆𑀭𑀸𑀳𑁆𑀫𑀡𑁄 𑀘 𑀅𑀥𑀺𑀧𑁆𑀧𑁂𑀢𑁄, 𑀦 𑀧𑀩𑁆𑀩𑀚𑁆𑀚𑀸𑀫𑀢𑁆𑀢𑀲𑀫𑀡𑁄, 𑀦 𑀚𑀸𑀢𑀺𑀫𑀢𑁆𑀢𑀩𑁆𑀭𑀸𑀳𑁆𑀫𑀡𑁄 𑀘𑀸𑀢𑀺 𑀆𑀳 ‘‘𑀲𑀫𑀺𑀢𑀧𑀸𑀧𑀢𑀸𑀬 𑀲𑀫𑀡𑀁. 𑀩𑀸𑀳𑀺𑀢𑀧𑀸𑀧𑀢𑀸𑀬 𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺. 𑀩𑀳𑀼𑀯𑀘𑀦𑁂 𑀯𑀢𑁆𑀢𑀩𑁆𑀩𑁂 𑀏𑀓𑀯𑀘𑀦𑀁, 𑀏𑀓𑀯𑀘𑀦𑁂 𑀯𑀸 𑀯𑀢𑁆𑀢𑀩𑁆𑀩𑁂 𑀩𑀳𑀼𑀯𑀘𑀦𑀁 𑀯𑀘𑀦𑀩𑁆𑀬𑀢𑀬𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀏𑀓𑀯𑀘𑀦𑀯𑀲𑁂𑀦𑁂𑀯 𑀩𑁆𑀬𑀢𑀬𑁄 𑀤𑀲𑁆𑀲𑀺𑀢𑁄. 𑀅𑀢𑁆𑀢𑀦𑀺, 𑀕𑀭𑀼𑀝𑁆𑀞𑀸𑀦𑀺𑀬𑁂 𑀘 𑀏𑀓𑀲𑁆𑀫𑀺𑀫𑁆𑀧𑀺 𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑁄 𑀦𑀺𑀭𑀽𑀴𑁆𑀳𑁄𑀢𑀺. 𑀲𑀩𑁆𑀩𑁂𑀦𑀧𑀻𑀢𑀺 ‘‘𑀭𑀫𑀡𑀻𑀬𑀸 𑀯𑀢𑀸’’𑀢𑀺𑀆𑀤𑀺𑀦𑀸 𑀲𑀩𑁆𑀩𑁂𑀦 𑀯𑀘𑀦𑁂𑀦. 𑀑𑀪𑀸𑀲𑀦𑀺𑀫𑀺𑀢𑁆𑀢𑀓𑀫𑁆𑀫𑀦𑁆𑀢𑀺 𑀑𑀪𑀸𑀲𑀪𑀽𑀢𑀦𑀺𑀫𑀺𑀢𑁆𑀢𑀓𑀫𑁆𑀫𑀁 𑀧𑀭𑀺𑀩𑁆𑀬𑀢𑁆𑀢𑀁 𑀦𑀺𑀫𑀺𑀢𑁆𑀢𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀤𑁂𑀯𑀤𑀢𑁆𑀢𑁄 𑀘𑀸𑀢𑀺. 𑀘-𑀲𑀤𑁆𑀤𑁄 𑀅𑀢𑁆𑀢𑀽𑀧𑀦𑀬𑀦𑁂, 𑀢𑁂𑀦 𑀬𑀣𑀸 𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼 𑀅𑀢𑁆𑀢𑀦𑁄 𑀧𑀺𑀢𑀼 𑀅𑀭𑀺𑀬𑀲𑀸𑀯𑀓𑀲𑁆𑀲 𑀲𑀢𑁆𑀣𑀼𑀉𑀧𑀝𑁆𑀞𑀸𑀓𑀲𑁆𑀲 𑀖𑀸𑀢𑀦𑁂𑀦 𑀫𑀳𑀸𑀧𑀭𑀸𑀥𑁄 ¶ , 𑀏𑀯𑀁 𑀪𑀕𑀯𑀢𑁄 𑀫𑀳𑀸𑀅𑀦𑀢𑁆𑀣𑀓𑀭𑀲𑁆𑀲 𑀤𑁂𑀯𑀤𑀢𑁆𑀢𑀲𑁆𑀲 𑀅𑀯𑀲𑁆𑀲𑀬𑀪𑀸𑀯𑁂𑀦 𑀧𑀻𑀢𑀺 𑀇𑀫𑀫𑀢𑁆𑀣𑀁 𑀉𑀧𑀦𑁂𑀢𑀺. 𑀢𑀲𑁆𑀲 𑀧𑀺𑀝𑁆𑀞𑀺𑀙𑀸𑀬𑀸𑀬𑀸𑀢𑀺 𑀢𑀲𑁆𑀲 𑀚𑀻𑀯𑀓𑀲𑁆𑀲 𑀧𑀺𑀝𑁆𑀞𑀺𑀅𑀧𑀲𑁆𑀲𑀬𑁂𑀦, 𑀢𑀁 𑀧𑀫𑀼𑀔𑀁 𑀓𑀢𑁆𑀯𑀸 𑀢𑀁 𑀅𑀧𑀲𑁆𑀲𑀸𑀬𑀸𑀢𑀺 𑀅𑀢𑁆𑀣𑁄. 𑀯𑀺𑀓𑁆𑀔𑁂𑀧𑀧𑀘𑁆𑀙𑁂𑀤𑀦𑀢𑁆𑀣𑀦𑁆𑀢𑀺 𑀪𑀸𑀯𑀺𑀦𑀺𑀬𑀸 𑀅𑀢𑁆𑀢𑀦𑁄 𑀓𑀣𑀸𑀬 𑀉𑀧𑁆𑀧𑀚𑁆𑀚𑀦𑀓𑀯𑀺𑀓𑁆𑀔𑁂𑀧𑀦𑀲𑁆𑀲 𑀧𑀘𑁆𑀙𑀺𑀦𑁆𑀤𑀦𑀢𑁆𑀣𑀁, 𑀅𑀦𑀼𑀧𑁆𑀧𑀢𑁆𑀢𑀺𑀅𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀢𑀲𑁆𑀲𑀁 𑀳𑀻’’𑀢𑀺𑀆𑀤𑀺.

𑁧𑁫𑁧. ‘‘𑀲𑁄 𑀓𑀺𑀭𑀸’’𑀢𑀺𑀆𑀤𑀺 𑀧𑁄𑀭𑀸𑀡𑀝𑁆𑀞𑀓𑀣𑀸𑀬 𑀆𑀕𑀢𑀦𑀬𑁄. 𑀏𑀲𑁂𑀯 𑀦𑀬𑁄 𑀧𑀭𑀢𑁄 𑀫𑀓𑁆𑀔𑀮𑀺𑀧𑀤𑀦𑀺𑀩𑁆𑀩𑀘𑀦𑁂𑀧𑀺 ¶ . 𑀉𑀧𑀲𑀗𑁆𑀓𑀫𑀦𑁆𑀢𑀻𑀢𑀺 𑀉𑀧𑀕𑀢𑀸. 𑀢𑀤𑁂𑀯 𑀧𑀩𑁆𑀩𑀚𑁆𑀚𑀁 𑀅𑀕𑁆𑀕𑀳𑁂𑀲𑀻𑀢𑀺 𑀢𑀤𑁂𑀯 𑀦𑀕𑁆𑀕𑀭𑀽𑀧𑀁 𑀧𑀩𑁆𑀩𑀚𑁆𑀚𑀁 𑀓𑀢𑁆𑀯𑀸 𑀕𑀡𑁆𑀳𑀺.

𑀧𑀩𑁆𑀩𑀚𑀺𑀢𑀲𑀫𑀽𑀳𑀲𑀗𑁆𑀔𑀸𑀢𑁄 ¶ 𑀲𑀗𑁆𑀖𑁄𑀢𑀺 𑀧𑀩𑁆𑀩𑀚𑀺𑀢𑀲𑀫𑀽𑀳𑀢𑀸𑀫𑀢𑁆𑀢𑁂𑀦 𑀲𑀗𑁆𑀖𑁄, 𑀦 𑀦𑀺𑀬𑁆𑀬𑀸𑀦𑀺𑀓𑀤𑀺𑀝𑁆𑀞𑀺𑀲𑀼𑀯𑀺𑀲𑀼𑀤𑁆𑀥𑀲𑀻𑀮𑀲𑀸𑀫𑀜𑁆𑀜𑀯𑀲𑁂𑀦 𑀲𑀁𑀳𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀅𑀲𑁆𑀲 𑀲𑀢𑁆𑀣𑀼𑀧𑀝𑀺𑀜𑁆𑀜𑀲𑁆𑀲 𑀧𑀭𑀺𑀯𑀸𑀭𑀪𑀽𑀢𑁄 𑀅𑀢𑁆𑀣𑀺. 𑀲𑁆𑀯𑁂𑀯𑀸𑀢𑀺 𑀧𑀩𑁆𑀩𑀚𑀺𑀢𑀲𑀫𑀽𑀳𑀲𑀗𑁆𑀔𑀸𑀢𑁄𑀯. 𑀓𑁂𑀘𑀺 𑀧𑀦 ‘‘𑀧𑀩𑁆𑀩𑀚𑀺𑀢𑀲𑀫𑀽𑀳𑀯𑀲𑁂𑀦 𑀲𑀗𑁆𑀖𑀻, 𑀕𑀳𑀝𑁆𑀞𑀲𑀫𑀽𑀳𑀯𑀲𑁂𑀦 𑀕𑀡𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 𑀕𑀡𑁂 𑀏𑀯 𑀮𑁄𑀓𑁂 𑀲𑀗𑁆𑀖-𑀲𑀤𑁆𑀤𑀲𑁆𑀲 𑀦𑀺𑀭𑀽𑀴𑁆𑀳𑀢𑁆𑀢𑀸. 𑀆𑀘𑀸𑀭𑀲𑀺𑀓𑁆𑀔𑀸𑀧𑀦𑀯𑀲𑁂𑀦𑀸𑀢𑀺 𑀅𑀘𑁂𑀮𑀓 𑀯𑀢𑀘𑀭𑀺𑀬𑀸𑀤𑀺𑀆𑀘𑀸𑀭𑀲𑀺𑀓𑁆𑀔𑀸𑀧𑀦𑀯𑀲𑁂𑀦. 𑀧𑀸𑀓𑀝𑁄𑀢𑀺 𑀲𑀗𑁆𑀖𑀻𑀆𑀤𑀺𑀪𑀸𑀯𑁂𑀦 𑀧𑀓𑀸𑀲𑀺𑀢𑁄. ‘‘𑀅𑀧𑁆𑀧𑀺𑀘𑁆𑀙𑁄’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀮𑀩𑁆𑀪𑀫𑀸𑀦𑀁 𑀅𑀧𑁆𑀧𑀺𑀘𑁆𑀙𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑁆𑀧𑀺𑀘𑁆𑀙𑀢𑀸𑀬 𑀯𑀢𑁆𑀣𑀫𑁆𑀧𑀺 𑀦 𑀦𑀺𑀯𑀸𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀢𑀲𑁆𑀫𑀺𑀁 𑀲𑀸𑀲𑀦𑀺𑀓𑁂 𑀯𑀺𑀬 𑀲𑀦𑁆𑀢𑀕𑀼𑀡𑀦𑀺𑀕𑀽𑀳𑀡𑀮𑀓𑁆𑀔𑀡𑀸 𑀅𑀧𑁆𑀧𑀺𑀘𑁆𑀙𑀢𑀸 𑀮𑀩𑁆𑀪𑀢𑀻𑀢𑀺. 𑀬𑀲𑁄𑀢𑀺 𑀓𑀺𑀢𑁆𑀢𑀺𑀲𑀤𑁆𑀤𑁄. ‘‘𑀢𑀭𑀦𑁆𑀢𑀺 𑀏𑀢𑁂𑀦 𑀲𑀁𑀲𑀸𑀭𑁄𑀖’’𑀦𑁆𑀢𑀺 𑀏𑀯𑀁 𑀲𑀫𑁆𑀫𑀢𑀢𑁆𑀢𑀸 𑀢𑀺𑀢𑁆𑀣𑀁 𑀯𑀼𑀘𑁆𑀘𑀢𑀺 𑀮𑀤𑁆𑀥𑀻𑀢𑀺 𑀆𑀳 ‘‘𑀢𑀺𑀢𑁆𑀣𑀓𑀭𑁄𑀢𑀺 𑀮𑀤𑁆𑀥𑀺𑀓𑀭𑁄’’𑀢𑀺. 𑀲𑀸𑀥𑀼𑀲𑀫𑁆𑀫𑀢𑁄𑀢𑀺 ‘‘𑀲𑀸𑀥𑀽’’𑀢𑀺 𑀲𑀫𑁆𑀫𑀢𑁄, 𑀦 𑀲𑀸𑀥𑀽𑀳𑀺 𑀲𑀫𑁆𑀫𑀢𑁄𑀢𑀺 𑀆𑀳 ‘‘𑀅𑀬𑀁 𑀲𑀸𑀥𑀽’’𑀢𑀺𑀆𑀤𑀺. ‘‘𑀇𑀫𑀸𑀦𑀺 𑀫𑁂 𑀯𑀢𑀲𑀫𑀸𑀤𑀸𑀦𑀸𑀦𑀺 𑀏𑀢𑁆𑀢𑀓𑀁 𑀓𑀸𑀮𑀁 𑀲𑀼𑀘𑀺𑀡𑀸𑀦𑀻’’𑀢𑀺 𑀧𑀩𑁆𑀩𑀚𑀺𑀢𑀢𑁄 𑀧𑀝𑁆𑀞𑀸𑀬 𑀅𑀢𑀺𑀓𑁆𑀓𑀦𑁆𑀢𑀸 𑀩𑀳𑀽 𑀭𑀢𑁆𑀢𑀺𑀬𑁄 𑀚𑀸𑀦𑀸𑀢𑀻𑀢𑀺 𑀭𑀢𑁆𑀢𑀜𑁆𑀜𑀽. 𑀢𑀸 𑀧𑀦𑀲𑁆𑀲 𑀭𑀢𑁆𑀢𑀺𑀬𑁄 𑀘𑀺𑀭𑀓𑀸𑀮𑀪𑀽𑀢𑀸𑀢𑀺 𑀓𑀢𑁆𑀯𑀸 𑀘𑀺𑀭𑀁 𑀧𑀩𑁆𑀩𑀚𑀺𑀢𑀲𑁆𑀲 𑀅𑀲𑁆𑀲𑀸𑀢𑀺 𑀘𑀺𑀭𑀧𑀩𑁆𑀩𑀚𑀺𑀢𑁄. 𑀢𑀢𑁆𑀣 𑀘𑀺𑀭𑀧𑀩𑁆𑀩𑀚𑀺𑀢𑀢𑀸𑀕𑀳𑀡𑁂𑀦 𑀩𑀼𑀤𑁆𑀥𑀺𑀲𑀻𑀮𑀢𑀁 𑀤𑀲𑁆𑀲𑁂𑀢𑀺, 𑀭𑀢𑁆𑀢𑀜𑁆𑀜𑀼𑀢𑀸𑀕𑀳𑀡𑁂𑀦 𑀢𑀢𑁆𑀣 𑀲𑀫𑁆𑀧𑀚𑀸𑀦𑀢𑀁. 𑀅𑀤𑁆𑀥𑀸𑀦𑀦𑁆𑀢𑀺 𑀤𑀻𑀖𑀓𑀸𑀮𑀁. 𑀓𑀺𑀢𑁆𑀢𑀓𑁄 𑀧𑀦 𑀲𑁄𑀢𑀺 𑀆𑀳 ‘‘𑀤𑁆𑀯𑁂 𑀢𑀬𑁄 𑀭𑀸𑀚𑀧𑀭𑀺𑀯𑀝𑁆𑀝𑁂’’𑀢𑀺, 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀭𑀸𑀚𑀽𑀦𑀁 𑀭𑀚𑁆𑀚𑀁 𑀅𑀦𑀼𑀲𑀸𑀲𑀦𑀧𑀝𑀺𑀧𑀸𑀝𑀺𑀬𑁄𑀢𑀺 𑀅𑀢𑁆𑀣𑁄. ‘‘𑀅𑀤𑁆𑀥𑀕𑀢𑁄’’𑀢𑀺 𑀯𑀢𑁆𑀯𑀸 𑀓𑀢𑀁 𑀯𑀬𑁄𑀕𑀳𑀡𑀁 𑀑𑀲𑀸𑀦𑀯𑀬𑀸𑀧𑁂𑀓𑁆𑀔𑀦𑁆𑀢𑀺 𑀆𑀳 ‘‘𑀧𑀘𑁆𑀙𑀺𑀫𑀯𑀬𑀁 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺. 𑀉𑀪𑀬𑀦𑁆𑀢𑀺 ‘‘𑀅𑀤𑁆𑀥𑀕𑀢𑁄, 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺 𑀧𑀤𑀤𑁆𑀯𑀬𑀁.

𑀧𑀼𑀩𑁆𑀩𑁂 ¶ ¶ 𑀧𑀺𑀢𑀭𑀸 𑀲𑀤𑁆𑀥𑀺𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀤𑁂𑀲𑀦𑀸𑀬 𑀲𑀼𑀢𑀧𑀼𑀩𑁆𑀩𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀛𑀸𑀦𑀸𑀪𑀺𑀜𑁆𑀜𑀸𑀤𑀺…𑀧𑁂… 𑀲𑁄𑀢𑀼𑀓𑀸𑀫𑁄’’𑀢𑀺. 𑀤𑀲𑁆𑀲𑀦𑁂𑀦𑀸𑀢𑀺 𑀦 𑀤𑀲𑁆𑀲𑀦𑀫𑀢𑁆𑀢𑀁, 𑀤𑀺𑀲𑁆𑀯𑀸 𑀧𑀦 𑀢𑁂𑀦 𑀲𑀤𑁆𑀥𑀺𑀁 𑀆𑀮𑀸𑀧𑀲𑀮𑁆𑀮𑀸𑀧𑀁 𑀓𑀢𑁆𑀯𑀸 𑀢𑀢𑁄 𑀅𑀓𑀺𑀭𑀺𑀬𑀯𑀸𑀤𑀁 𑀲𑀼𑀢𑁆𑀯𑀸 𑀢𑁂𑀲𑀁 𑀅𑀦𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀕𑀼𑀡𑀓𑀣𑀸𑀬𑀸𑀢𑀺 𑀅𑀪𑀽𑀢𑀕𑀼𑀡𑀓𑀣𑀸𑀬. 𑀢𑁂𑀦𑀸𑀳 ‘‘𑀲𑀼𑀝𑁆𑀞𑀼𑀢𑀭𑀁 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸’’𑀢𑀺. 𑀬𑀤𑀺 𑀅𑀦𑀢𑁆𑀢𑀫𑀦𑁄, 𑀓𑀲𑁆𑀫𑀸 𑀢𑀼𑀡𑁆𑀳𑀻 𑀅𑀳𑁄𑀲𑀻𑀢𑀺 𑀆𑀳 ‘‘𑀅𑀦𑀢𑁆𑀢𑀫𑀦𑁄 𑀲𑀫𑀸𑀦𑁄𑀧𑀻’’𑀢𑀺𑀆𑀤𑀺.

𑁧𑁫𑁨. 𑀕𑁄𑀲𑀸𑀮𑀸𑀬𑀸𑀢𑀺 𑀏𑀯𑀁 𑀦𑀸𑀫𑀓𑁂 𑀕𑀸𑀫𑁂. 𑀯𑀲𑁆𑀲𑀸𑀦𑀓𑀸𑀮𑁂 𑀕𑀼𑀦𑁆𑀦𑀁 𑀢𑀺𑀝𑁆𑀞𑀦𑀲𑀸𑀮𑀸𑀢𑀺 𑀏𑀓𑁂.

𑁧𑁫𑁩. 𑀧𑀝𑀺𑀓𑀺𑀝𑁆𑀞𑀢𑀭𑀦𑁆𑀢𑀺 ¶ 𑀦𑀺𑀳𑀻𑀦𑀢𑀭𑀁. 𑀢𑀦𑁆𑀢𑀸𑀯𑀼𑀢𑀸𑀦𑀻𑀢𑀺 𑀢𑀦𑁆𑀢𑁂 𑀧𑀲𑀸𑀭𑁂𑀢𑁆𑀯𑀸 𑀯𑀻𑀢𑀸𑀦𑀺. ‘‘𑀲𑀻𑀢𑁂 𑀲𑀻𑀢𑁄’’𑀢𑀺𑀆𑀤𑀺𑀦𑀸 𑀙𑀳𑀸𑀓𑀸𑀭𑁂𑀳𑀺 𑀢𑀲𑁆𑀲 𑀦𑀺𑀳𑀻𑀦𑀲𑁆𑀲 𑀦𑀺𑀳𑀻𑀦𑀢𑀭𑀢𑀁 𑀤𑀲𑁆𑀲𑁂𑀢𑀺.

𑁧𑁫𑁪. 𑀯𑀘𑁆𑀘𑀁 𑀓𑀢𑁆𑀯𑀸𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸𑀧𑀺 𑀓𑁂𑀦𑀘𑀺 𑀅𑀲𑀼𑀘𑀺𑀦𑀸 𑀫𑀓𑁆𑀔𑀺𑀢𑁄 𑀧𑀻𑀢𑀺 𑀇𑀫𑀫𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀯𑀸𑀮𑀺𑀓𑀣𑀽𑀧𑀁 𑀓𑀢𑁆𑀯𑀸𑀢𑀺 𑀯𑀢𑁆𑀢𑀯𑀲𑁂𑀦 𑀯𑀸𑀮𑀺𑀓𑀸𑀬 𑀣𑀽𑀧𑀁 𑀓𑀢𑁆𑀯𑀸.

𑁧𑁫𑁬. 𑀧𑀮𑀺𑀩𑀼𑀤𑁆𑀥𑀦𑀓𑀺𑀮𑁂𑀲𑁄𑀢𑀺 𑀲𑀁𑀲𑀸𑀭𑁂 𑀧𑀮𑀺𑀩𑀼𑀤𑁆𑀥𑀦𑀓𑀺𑀘𑁆𑀘𑁄 𑀭𑀸𑀕𑀸𑀤𑀺𑀓𑀺𑀮𑁂𑀲𑁄 𑀔𑁂𑀢𑁆𑀢𑀯𑀢𑁆𑀣𑀼𑀧𑀼𑀢𑁆𑀢𑀤𑀸𑀭𑀸𑀤𑀺𑀯𑀺𑀲𑀬𑁄.

𑀓𑁄𑀫𑀸𑀭𑀪𑀘𑁆𑀘𑀚𑀻𑀯𑀓𑀓𑀣𑀸𑀯𑀡𑁆𑀡𑀦𑀸

𑁧𑁫𑁭. 𑀦 𑀬𑀣𑀸𑀥𑀺𑀧𑁆𑀧𑀸𑀬𑀁 𑀯𑀢𑁆𑀢𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀦𑀢𑁆𑀣𑁄 𑀯𑀢 𑀫𑁂’’𑀢𑀺. 𑀚𑀻𑀯𑀓𑀲𑁆𑀲 𑀢𑀼𑀡𑁆𑀳𑀻𑀪𑀸𑀯𑁄 𑀫𑀫 𑀅𑀥𑀺𑀧𑁆𑀧𑀸𑀬𑀲𑁆𑀲 𑀫𑀤𑁆𑀤𑀦𑀲𑀤𑀺𑀲𑁄, 𑀢𑀲𑁆𑀫𑀸 𑀢𑀁 𑀧𑀼𑀘𑁆𑀙𑀺𑀢𑁆𑀯𑀸 𑀓𑀣𑀸𑀧𑀦𑁂𑀦 𑀫𑀫 𑀅𑀥𑀺𑀧𑁆𑀧𑀸𑀬𑁄 𑀧𑀽𑀭𑁂𑀢𑀩𑁆𑀩𑁄𑀢𑀺 𑀅𑀬𑀫𑁂𑀢𑁆𑀣 𑀭𑀜𑁆𑀜𑁄 𑀅𑀚𑁆𑀛𑀸𑀲𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀳𑀢𑁆𑀣𑀺𑀫𑁆𑀳𑀺 𑀦𑀼 𑀔𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀓𑀺𑀁 𑀢𑀼𑀡𑁆𑀳𑀻𑀢𑀺 𑀓𑀺𑀁 𑀓𑀸𑀭𑀡𑀸 𑀢𑀼𑀡𑁆𑀳𑀻, 𑀓𑀺𑀁 𑀢𑀁 𑀓𑀸𑀭𑀡𑀁, 𑀬𑁂𑀦 𑀢𑀼𑀯𑀁 𑀢𑀼𑀡𑁆𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀓𑁂𑀦 𑀓𑀸𑀭𑀡𑁂𑀦 𑀢𑀼𑀡𑁆𑀳𑀻’’𑀢𑀺.

𑀓𑀸𑀫𑀁 𑀲𑀩𑁆𑀩𑀸𑀧𑀺 𑀢𑀣𑀸𑀕𑀢𑀲𑁆𑀲 𑀧𑀝𑀺𑀧𑀢𑁆𑀢𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀭𑀽𑀧𑀸 𑀘, 𑀢𑀣𑀸𑀧𑀺 𑀕𑀩𑁆𑀪𑁄𑀓𑁆𑀓𑀦𑁆𑀢𑀺- ¶ 𑀅𑀪𑀺𑀚𑀸𑀢𑀺𑀅𑀪𑀺𑀦𑀺𑀓𑁆𑀔𑀫𑀦𑀅𑀪𑀺𑀲𑀫𑁆𑀩𑁄𑀥𑀺𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦- 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀤𑁂𑀯𑁄𑀭𑁄𑀳𑀡𑀸𑀦𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀢𑀺𑀯𑀺𑀬 ¶ 𑀲𑀼𑀧𑀸𑀓𑀝𑀸𑀦𑀺, 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀧𑀝𑀺𑀩𑀸𑀳𑀺𑀢𑀼𑀦𑁆𑀢𑀺 𑀢𑀸𑀦𑀺𑀬𑁂𑀯𑁂𑀢𑁆𑀣 𑀉𑀤𑁆𑀥𑀝𑀸𑀦𑀺. 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁂𑀢𑀺 𑀇𑀢𑁆𑀣𑀁 𑀏𑀯𑀁 𑀧𑀓𑀸𑀭𑁄 𑀪𑀽𑀢𑁄 𑀚𑀸𑀢𑁄𑀢𑀺 𑀏𑀯𑀁 𑀓𑀣𑀦𑀢𑁆𑀣𑁂. 𑀉𑀧𑀬𑁄𑀕𑀯𑀘𑀦𑀦𑁆𑀢𑀺. ‘‘𑀅𑀩𑁆𑀪𑀼𑀕𑁆𑀕𑀢𑁄’’𑀢𑀺 𑀏𑀢𑁆𑀣 𑀅𑀪𑀻𑀢𑀺 𑀉𑀧𑀲𑀕𑁆𑀕𑁄 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑀚𑁄𑀢𑀓𑁄, 𑀢𑁂𑀦 𑀬𑁄𑀕𑀢𑁄 ‘‘𑀢𑀁 𑀔𑁄 𑀧𑀦 𑀪𑀕𑀯𑀦𑁆𑀢’’𑀦𑁆𑀢𑀺 𑀇𑀤𑀁 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀢𑁂𑀦𑀸𑀳 ‘‘𑀢𑀲𑁆𑀲 𑀔𑁄 𑀧𑀦 𑀪𑀕𑀯𑀢𑁄𑀢𑀺 𑀅𑀢𑁆𑀣𑁄’’𑀢𑀺. 𑀓𑀮𑁆𑀬𑀸𑀡𑀕𑀼𑀡𑀲𑀫𑀦𑁆𑀦𑀸𑀕𑀢𑁄𑀢𑀺 𑀓𑀮𑁆𑀬𑀸𑀡𑁂𑀳𑀺 𑀕𑀼𑀡𑁂𑀳𑀺 𑀬𑀼𑀢𑁆𑀢𑁄, 𑀢𑀁 𑀦𑀺𑀲𑁆𑀲𑀺𑀢𑁄 𑀢𑀩𑁆𑀩𑀺𑀲𑀬𑀢𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀝𑁆𑀞𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀓𑀺𑀢𑁆𑀢𑁂𑀢𑀩𑁆𑀩𑀢𑁄 𑀓𑀺𑀢𑁆𑀢𑀺, 𑀲𑀸 𑀏𑀯 𑀲𑀤𑁆𑀤𑀦𑀻𑀬𑀢𑁄 𑀲𑀤𑁆𑀤𑁄𑀢𑀺 𑀆𑀳 ‘‘𑀓𑀺𑀢𑁆𑀢𑀺𑀲𑀤𑁆𑀤𑁄𑀢𑀺 𑀓𑀺𑀢𑁆𑀢𑀺𑀬𑁂𑀯𑀸’’𑀢𑀺. 𑀅𑀪𑀺𑀢𑁆𑀣𑀯𑀦𑀯𑀲𑁂𑀦 𑀧𑀯𑀢𑁆𑀢𑁄 𑀲𑀤𑁆𑀤𑁄 𑀣𑀼𑀢𑀺𑀖𑁄𑀲𑁄. 𑀅𑀦𑀜𑁆𑀜𑀲𑀸𑀥𑀸𑀭𑀡𑀕𑀼𑀡𑁂 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸 𑀲𑀤𑁂𑀯𑀓𑀁 𑀮𑁄𑀓𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀉𑀕𑁆𑀕𑀢𑁄.

𑀲𑁄 𑀪𑀕𑀯𑀸𑀢𑀺 𑀬𑁄 𑀲𑁄 𑀲𑀫𑀢𑀺𑀁 𑀲𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀓𑀺𑀮𑁂𑀲𑁂 𑀪𑀜𑁆𑀚𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 ¶ 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀤𑁂𑀯𑀸𑀦𑀁 𑀅𑀢𑀺𑀤𑁂𑀯𑁄 𑀲𑀓𑁆𑀓𑀸𑀦𑀁 𑀅𑀢𑀺𑀲𑀓𑁆𑀓𑁄 𑀩𑁆𑀭𑀳𑁆𑀫𑀸𑀦𑀁 𑀅𑀢𑀺𑀩𑁆𑀭𑀳𑁆𑀫𑀸 𑀮𑁄𑀓𑀦𑀸𑀣𑁄 𑀪𑀸𑀕𑁆𑀬𑀯𑀦𑁆𑀢𑀢𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀲𑀤𑁂𑀯𑀓𑁂 𑀮𑁄𑀓𑁂 ‘‘𑀪𑀕𑀯𑀸’’𑀢𑀺 𑀲𑀩𑁆𑀩𑀢𑁆𑀣 𑀧𑀢𑁆𑀣𑀝𑀓𑀺𑀢𑁆𑀢𑀺𑀲𑀤𑁆𑀤𑁄, 𑀲𑁄 𑀪𑀕𑀯𑀸. ‘‘𑀪𑀕𑀯𑀸’’𑀢𑀺 𑀘 𑀇𑀤𑀁 𑀲𑀢𑁆𑀣𑀼 𑀦𑀸𑀫𑀓𑀺𑀢𑁆𑀢𑀦𑀁. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 ‘‘𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢’’𑀦𑁆𑀢𑀺𑀆𑀤𑀺 (𑀫𑀳𑀸𑀦𑀺. 𑁮𑁪). 𑀧𑀭𑀢𑁄 𑀧𑀦 𑀪𑀕𑀯𑀸𑀢𑀺 𑀕𑀼𑀡𑀓𑀺𑀢𑁆𑀢𑀦𑀁.

𑀬𑀣𑀸 𑀓𑀫𑁆𑀫𑀝𑁆𑀞𑀸𑀦𑀺𑀓𑁂𑀦 ‘‘𑀅𑀭𑀳’’𑀦𑁆𑀢𑀺𑀆𑀤𑀻𑀲𑀼 𑀦𑀯𑀝𑁆𑀞𑀸𑀦𑁂𑀲𑀼 𑀧𑀘𑁆𑀘𑁂𑀓𑀁 𑀇𑀢𑀺-𑀲𑀤𑁆𑀤𑀁 𑀬𑁄𑀚𑁂𑀢𑁆𑀯𑀸 𑀩𑀼𑀤𑁆𑀥𑀕𑀼𑀡𑀸 𑀅𑀦𑀼𑀲𑁆𑀲𑀭𑀻𑀬𑀦𑁆𑀢𑀺, 𑀏𑀯𑀁 𑀩𑀼𑀤𑁆𑀥𑀕𑀼𑀡𑀲𑀗𑁆𑀓𑀺𑀢𑁆𑀢𑀓𑁂𑀦𑀸𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑀺𑀧𑀺 𑀅𑀭𑀳𑀁, 𑀇𑀢𑀺𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… 𑀇𑀢𑀺𑀧𑀺 𑀪𑀕𑀯𑀸’’𑀢𑀺 𑀆𑀳. ‘‘𑀇𑀢𑀺𑀧𑁂𑀢𑀁 ¶ 𑀅𑀪𑀽𑀢𑀁, 𑀇𑀢𑀺𑀧𑁂𑀢𑀁 𑀅𑀢𑀘𑁆𑀙’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁫) 𑀯𑀺𑀬 𑀇𑀥 𑀇𑀢𑀺-𑀲𑀤𑁆𑀤𑁄 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀓𑀭𑀡𑀢𑁆𑀣𑁄, 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑁂𑀦 𑀘 𑀢𑁂𑀲𑀁 𑀕𑀼𑀡𑀸𑀦𑀁 𑀩𑀳𑀼𑀪𑀸𑀯𑁄 𑀤𑀻𑀧𑀺𑀢𑁄. 𑀢𑀸𑀦𑀺 𑀘 𑀲𑀗𑁆𑀓𑀺𑀢𑁆𑀢𑁂𑀦𑁆𑀢𑁂𑀦 𑀯𑀺𑀜𑁆𑀜𑀼𑀦𑀸 𑀘𑀺𑀢𑁆𑀢𑀲𑁆𑀲 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑁂𑀯 𑀓𑀢𑁆𑀯𑀸 𑀲𑀗𑁆𑀓𑀺𑀢𑁆𑀢𑁂𑀢𑀩𑁆𑀩𑀸𑀦𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀆𑀳. 𑀏𑀯𑀜𑁆𑀳𑀺 𑀦𑀺𑀭𑀽𑀧𑁂𑀢𑁆𑀯𑀸 𑀓𑀺𑀢𑁆𑀢𑁂𑀦𑁆𑀢𑁂 𑀬𑀲𑁆𑀲 𑀲𑀗𑁆𑀓𑀺𑀢𑁆𑀢𑁂𑀢𑀺, 𑀢𑀲𑁆𑀲 𑀪𑀕𑀯𑀢𑀺 𑀅𑀢𑀺𑀯𑀺𑀬 𑀅𑀪𑀺𑀧𑁆𑀧𑀲𑀸𑀤𑁄 𑀳𑁄𑀢𑀺. 𑀆𑀭𑀓𑀢𑁆𑀢𑀸𑀢𑀺 𑀲𑀼𑀯𑀺𑀤𑀽𑀭𑀢𑁆𑀢𑀸. 𑀅𑀭𑀻𑀦𑀦𑁆𑀢𑀺 𑀓𑀺𑀮𑁂𑀲𑀸𑀭𑀻𑀦𑀁. 𑀅𑀭𑀸𑀦𑀦𑁆𑀢𑀺 𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀅𑀭𑀸𑀦𑀁. 𑀳𑀢𑀢𑁆𑀢𑀸𑀢𑀺 𑀯𑀺𑀳𑀢𑀢𑁆𑀢𑀸. 𑀧𑀘𑁆𑀘𑀬𑀸𑀤𑀻𑀦𑀦𑁆𑀢𑀺 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀸𑀦𑀜𑁆𑀘𑁂𑀯 ¶ 𑀧𑀽𑀚𑀸𑀯𑀺𑀲𑁂𑀲𑀸𑀦𑀜𑁆𑀘. 𑀢𑀢𑁄𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄. 𑀬𑀣𑀸 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄, 𑀏𑀯𑀁 𑀢𑀁𑀲𑀁𑀯𑀡𑁆𑀡𑀦𑀢𑁄𑀧𑀺 𑀦𑁂𑀲𑀁 𑀯𑀺𑀢𑁆𑀣𑀸𑀭𑁄 𑀕𑀳𑁂𑀢𑀩𑁆𑀩𑁄.

𑀬𑀲𑁆𑀫𑀸 𑀚𑀻𑀯𑀓𑁄 𑀩𑀳𑀼𑀲𑁄 𑀲𑀢𑁆𑀣𑀼𑀲𑀦𑁆𑀢𑀺𑀓𑁂 𑀩𑀼𑀤𑁆𑀥𑀕𑀼𑀡𑁂 𑀲𑀼𑀢𑁆𑀯𑀸 𑀞𑀺𑀢𑁄, 𑀤𑀺𑀝𑁆𑀞𑀲𑀘𑁆𑀘𑀢𑀸𑀬 𑀘 𑀲𑀢𑁆𑀣𑀼𑀲𑀸𑀲𑀦𑁂 𑀯𑀺𑀕𑀢𑀓𑀣𑀁𑀓𑀣𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄, 𑀢𑀲𑁆𑀫𑀸 𑀆𑀳 ‘‘𑀚𑀻𑀯𑀓𑁄 𑀧𑀦𑀸’’𑀢𑀺𑀆𑀤𑀺. 𑀧𑀜𑁆𑀘𑀯𑀡𑁆𑀡𑀸𑀬𑀸𑀢𑀺 𑀔𑀼𑀤𑁆𑀤𑀺𑀓𑀸𑀤𑀺𑀯𑀲𑁂𑀦 𑀧𑀜𑁆𑀘𑀧𑁆𑀧𑀓𑀸𑀭𑀸𑀬. 𑀦𑀺𑀭𑀦𑁆𑀢𑀭𑀁 𑀨𑀼𑀝𑀁 𑀅𑀳𑁄𑀲𑀺 𑀓𑀢𑀸𑀥𑀺𑀓𑀸𑀭𑀪𑀸𑀯𑀢𑁄. 𑀓𑀫𑁆𑀫𑀦𑁆𑀢𑀭𑀸𑀬𑀯𑀲𑁂𑀦 𑀳𑀺𑀲𑁆𑀲 𑀭𑀜𑁆𑀜𑁄 𑀕𑀼𑀡𑀲𑀭𑀻𑀭𑀁 𑀔𑀢𑀼𑀧𑀳𑀢𑀁 𑀅𑀳𑁄𑀲𑀺.

𑁧𑁫𑁮. ‘‘𑀉𑀢𑁆𑀢𑀫’’𑀦𑁆𑀢𑀺 𑀯𑀢𑁆𑀯𑀸 𑀦 𑀓𑁂𑀯𑀮𑀁 𑀲𑁂𑀝𑁆𑀞𑀪𑀸𑀯𑁄 𑀏𑀯𑁂𑀢𑁆𑀣 𑀓𑀸𑀭𑀡𑀁, 𑀅𑀣 𑀔𑁄 𑀅𑀧𑁆𑀧𑀲𑀤𑁆𑀤𑀢𑀸𑀧𑀺 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀲𑁆𑀲𑀬𑀸𑀦𑀭𑀣𑀬𑀸𑀦𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀳𑀢𑁆𑀣𑀺𑀬𑀸𑀦𑁂𑀲𑀼 𑀦𑀺𑀩𑁆𑀩𑀺𑀲𑁂𑀯𑀦𑀫𑁂𑀯 𑀕𑀡𑁆𑀳𑀦𑁆𑀢𑁄 𑀳𑀢𑁆𑀣𑀺𑀦𑀺𑀬𑁄𑀯 𑀓𑀧𑁆𑀧𑀸𑀧𑁂𑀲𑀺. 𑀭𑀜𑁆𑀜𑁄 𑀆𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 𑀆𑀲𑀦𑁆𑀦𑀘𑀸𑀭𑀻𑀪𑀸𑀯𑁂𑀦 𑀢𑀢𑁆𑀣 𑀇𑀢𑁆𑀣𑀺𑀬𑁄𑀯 𑀦𑀺𑀲𑀚𑁆𑀚𑀸𑀧𑀺𑀢𑀸. 𑀭𑀜𑁆𑀜𑁄 𑀧𑀭𑁂𑀲𑀁 𑀤𑀼𑀭𑀼𑀧𑀲𑀗𑁆𑀓𑀫𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ¶ 𑀢𑀸 𑀧𑀼𑀭𑀺𑀲𑀯𑁂𑀲𑀁 𑀕𑀸𑀳𑀸𑀧𑁂𑀢𑁆𑀯𑀸 𑀆𑀯𑀼𑀥𑀳𑀢𑁆𑀣𑀸 𑀓𑀸𑀭𑀺𑀢𑀸. 𑀧𑀝𑀺𑀯𑁂𑀤𑁂𑀲𑀻𑀢𑀺 𑀜𑀸𑀧𑁂𑀲𑀺. 𑀢𑀤𑁂𑀯𑀸𑀢𑀺 𑀕𑀫𑀦𑀁, 𑀅𑀕𑀫𑀦𑀫𑁂𑀯 𑀯𑀸.

𑁧𑁫𑁯. 𑀫𑀳𑀜𑁆𑀘𑀸𑀢𑀺 𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀫𑀳𑀢𑀸𑀘𑀸’’𑀢𑀺. 𑀫𑀳𑀘𑁆𑀘𑀸𑀢𑀺 𑀫𑀳𑀢𑀺𑀬𑀸 ¶ , 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑀼𑀢𑁆𑀢𑀁, 𑀫𑀳𑀦𑁆𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀭𑀸𑀚𑀸𑀦𑀼𑀪𑀸𑀯𑁂𑀦𑀸’’𑀢𑀺 ‘‘𑀤𑁆𑀯𑀺𑀦𑁆𑀦𑀁 𑀫𑀳𑀸𑀭𑀝𑁆𑀞𑀸𑀦𑀁 𑀇𑀲𑁆𑀲𑀭𑀺𑀬𑀲𑀺𑀭𑀻’’𑀢𑀺 𑀅𑀗𑁆𑀕𑀫𑀕𑀥𑀭𑀝𑁆𑀞𑀸𑀦𑀁 𑀆𑀥𑀺𑀧𑀘𑁆𑀘𑀫𑀸𑀳. 𑀆𑀲𑀢𑁆𑀢𑀔𑀕𑁆𑀕𑀸𑀦𑀻𑀢𑀺 𑀅𑀁𑀲𑁂 𑀑𑀮𑀫𑁆𑀩𑀦𑀯𑀲𑁂𑀦 𑀲𑀦𑁆𑀦𑀤𑁆𑀥𑀅𑀲𑀻𑀦𑀺. 𑀓𑀼𑀮𑀪𑁄𑀕𑀇𑀲𑁆𑀲𑀭𑀺𑀬𑀸𑀤𑀺𑀯𑀲𑁂𑀦 𑀫𑀳𑀢𑀻 𑀫𑀢𑁆𑀢𑀸 𑀏𑀢𑁂𑀲𑀦𑁆𑀢𑀺 𑀫𑀳𑀸𑀫𑀢𑁆𑀢𑀸, 𑀫𑀳𑀸𑀦𑀼𑀪𑀸𑀯𑀸 𑀭𑀸𑀚𑀧𑀼𑀭𑀺𑀲𑀸. 𑀯𑀺𑀚𑁆𑀚𑀸𑀥𑀭𑀢𑀭𑀼𑀡𑀸 𑀯𑀺𑀬𑀸𑀢𑀺 𑀯𑀺𑀚𑁆𑀚𑀸𑀥𑀭𑀓𑀼𑀫𑀸𑀭𑀸 𑀯𑀺𑀬. 𑀭𑀝𑁆𑀞𑀺𑀬𑀧𑀼𑀢𑁆𑀢𑀸𑀢𑀺 𑀪𑁄𑀚𑀧𑀼𑀢𑁆𑀢𑀸. 𑀳𑀢𑁆𑀣𑀺𑀖𑀝𑀸𑀢𑀺 𑀳𑀢𑁆𑀣𑀺𑀲𑀫𑀽𑀳𑀸. 𑀅𑀜𑁆𑀜𑀫𑀜𑁆𑀜𑀲𑀗𑁆𑀖𑀝𑁆𑀝𑀦𑀸𑀢𑀺 𑀅𑀯𑀺𑀘𑁆𑀙𑁂𑀤𑀯𑀲𑁂𑀦 𑀕𑀫𑀦𑁂𑀦 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀸.

𑀘𑀺𑀢𑁆𑀢𑀼𑀢𑁆𑀭𑀸𑀲𑁄 𑀲𑀬𑀁 𑀪𑀸𑀬𑀦𑀝𑁆𑀞𑁂𑀦 𑀪𑀬𑀁 𑀬𑀣𑀸 𑀢𑀣𑀸 𑀪𑀸𑀬𑀢𑀻𑀢𑀺 𑀓𑀢𑁆𑀯𑀸. 𑀜𑀸𑀡𑀁 𑀪𑀸𑀬𑀺𑀢𑀩𑁆𑀩𑁂 𑀏𑀯 𑀯𑀢𑁆𑀣𑀼𑀲𑁆𑀫𑀺𑀁 𑀪𑀬𑀢𑁄 𑀉𑀧𑀝𑁆𑀞𑀺𑀢𑁂 ‘‘𑀪𑀸𑀬𑀺𑀢𑀩𑁆𑀩𑀫𑀺𑀤’’𑀦𑁆𑀢𑀺 𑀪𑀬𑀢𑁄 𑀢𑀻𑀭𑀡𑀢𑁄 𑀪𑀬𑀁. 𑀢𑁂𑀦𑁂𑀯𑀸𑀳 ‘‘𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁 𑀧𑀦 𑀪𑀸𑀬𑀢𑀺 𑀦𑀪𑀸𑀬𑀢𑀻𑀢𑀺? 𑀦 𑀪𑀸𑀬𑀢𑀺. 𑀢𑀜𑁆𑀳𑀺 𑀅𑀢𑀻𑀢𑀸 𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀅𑀦𑀸𑀕𑀢𑀸 𑀦𑀺𑀭𑀼𑀚𑁆𑀛𑀺𑀲𑁆𑀲𑀦𑁆𑀢𑀻𑀢𑀺 𑀢𑀻𑀭𑀡𑀫𑀢𑁆𑀢𑀫𑁂𑀯 𑀳𑁄𑀢𑀻’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁭𑁫𑁧). 𑀆𑀭𑀫𑁆𑀫𑀡𑀁 ¶ 𑀪𑀸𑀬𑀢𑀺 𑀏𑀢𑀲𑁆𑀫𑀸𑀢𑀺 𑀪𑀬𑀁. 𑀑𑀢𑀧𑁆𑀧𑀁 𑀧𑀸𑀧𑀢𑁄 𑀪𑀸𑀬𑀢𑀺 𑀏𑀢𑁂𑀦𑀸𑀢𑀺 𑀪𑀬𑀁. 𑀪𑀬𑀸𑀦𑀓𑀦𑁆𑀢𑀺 𑀪𑀸𑀬𑀦𑀸𑀓𑀸𑀭𑁄. 𑀪𑀬𑀦𑁆𑀢𑀺 𑀜𑀸𑀡𑀪𑀬𑀁. 𑀲𑀁𑀯𑁂𑀕𑀦𑁆𑀢𑀺 𑀲𑀳𑁄𑀢𑁆𑀢𑀧𑁆𑀧𑀜𑀸𑀡𑀁 𑀲𑀦𑁆𑀢𑀸𑀲𑀦𑁆𑀢𑀺 𑀲𑀩𑁆𑀩𑀲𑁄 𑀉𑀩𑁆𑀩𑀺𑀚𑁆𑀚𑀦𑀁. 𑀪𑀸𑀬𑀺𑀢𑀩𑁆𑀩𑀝𑁆𑀞𑁂𑀦 𑀪𑀬𑀁 𑀪𑀻𑀫𑀪𑀸𑀯𑁂𑀦 𑀪𑁂𑀭𑀯𑀦𑁆𑀢𑀺 𑀪𑀬𑀪𑁂𑀭𑀯𑀁, 𑀪𑀻𑀢𑀩𑁆𑀩𑀯𑀢𑁆𑀣𑀼. 𑀢𑁂𑀦𑀸𑀳 ‘‘𑀆𑀕𑀘𑁆𑀙𑀢𑀻’’𑀢𑀺.

𑀪𑀻𑀭𑀼𑀁 ¶ 𑀧𑀲𑀁𑀲𑀦𑁆𑀢𑀻𑀢𑀺 𑀧𑀸𑀧𑀢𑁄 𑀪𑀸𑀬𑀦𑀢𑁄 𑀉𑀢𑁆𑀢𑀲𑀦𑀢𑁄 𑀪𑀻𑀭𑀼𑀁 𑀧𑀲𑀁𑀲𑀦𑁆𑀢𑀺 𑀧𑀡𑁆𑀟𑀺𑀢𑀸. 𑀦 𑀳𑀺 𑀢𑀢𑁆𑀣 𑀲𑀽𑀭𑀦𑁆𑀢𑀺 𑀢𑀲𑁆𑀫𑀺𑀁 𑀧𑀸𑀧𑀓𑀭𑀡𑁂 𑀲𑀽𑀭𑀁 𑀧𑀕𑀩𑁆𑀪𑀥𑀁𑀲𑀺𑀦𑀁 𑀦 𑀳𑀺 𑀧𑀲𑀁𑀲𑀦𑁆𑀢𑀺. 𑀢𑁂𑀦𑀸𑀳 ‘‘𑀪𑀬𑀸 𑀳𑀺 𑀲𑀦𑁆𑀢𑁄 𑀦 𑀓𑀭𑁄𑀦𑁆𑀢𑀺 𑀧𑀸𑀧’’𑀦𑁆𑀢𑀺. 𑀢𑀢𑁆𑀣 𑀪𑀬𑀸𑀢𑀺 𑀧𑀸𑀧𑀼𑀢𑁆𑀭𑀸𑀲𑀢𑁄, 𑀑𑀢𑁆𑀢𑀧𑁆𑀧𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀲𑀭𑀻𑀭𑀘𑀮𑀦𑀦𑁆𑀢𑀺 𑀪𑀬𑀯𑀲𑁂𑀦𑀲𑀭𑀻𑀭𑀲𑀁𑀓𑀫𑁆𑀧𑁄. 𑀏𑀓𑁂𑀢𑀺 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄. ‘‘𑀭𑀸𑀚𑀕𑀳𑁂’’𑀢𑀺𑀆𑀤𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑀯𑀺𑀯𑀭𑀡𑀁. 𑀓𑀸𑀫𑀁 𑀯𑀬𑀢𑀼𑀮𑁆𑀬𑁄 ‘‘𑀯𑀬𑀲𑁆𑀲𑁄’’𑀢𑀺 𑀯𑀼𑀘𑁆𑀘𑀢𑀺, 𑀭𑀽𑀴𑁆𑀳𑀺𑀭𑁂𑀲𑁄, 𑀬𑁄 𑀓𑁄𑀘𑀺 𑀧𑀦 𑀲𑀳𑀸𑀬𑁄 𑀯𑀬𑀲𑁆𑀲𑁄, 𑀢𑀲𑁆𑀫𑀸 𑀯𑀬𑀲𑁆𑀲𑀸𑀪𑀺𑀮𑀸𑀧𑁄𑀢𑀺 𑀲𑀳𑀸𑀬𑀸𑀪𑀺𑀮𑀸𑀧𑁄. 𑀦 𑀯𑀺𑀧𑁆𑀧𑀮𑀫𑁆𑀪𑁂𑀲𑀻𑀢𑀺 𑀦 𑀯𑀺𑀲𑀁𑀯𑀸𑀤𑁂𑀲𑀺. 𑀯𑀺𑀦𑀲𑁆𑀲𑁂𑀬𑁆𑀬𑀸𑀢𑀺 𑀘𑀺𑀢𑁆𑀢𑀯𑀺𑀖𑀸𑀢𑁂𑀦 𑀯𑀺𑀳𑀜𑁆𑀜𑁂𑀬𑁆𑀬.

𑀲𑀸𑀫𑀜𑁆𑀜𑀨𑀮𑀧𑀼𑀘𑁆𑀙𑀸𑀯𑀡𑁆𑀡𑀦𑀸

𑁧𑁬𑁦. 𑀪𑀕𑀯𑀢𑁄 𑀢𑁂𑀚𑁄𑀢𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑁄. 𑀭𑀜𑁆𑀜𑁄 𑀲𑀭𑀻𑀭𑀁 𑀨𑀭𑀺 𑀬𑀣𑀸 𑀢𑀁 𑀲𑁄𑀡𑀤𑀡𑁆𑀟𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑁆𑀢𑁄𑀯𑀦𑀲𑀡𑁆𑀟𑀕𑀢𑀲𑁆𑀲. 𑀏𑀓𑁂𑀢𑀺 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄.

𑁧𑁬𑁧. 𑀬𑁂𑀦, 𑀢𑁂𑀦𑀸𑀢𑀺 𑀘 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀦𑁆𑀢𑀺 𑀆𑀳 ‘‘𑀬𑀢𑁆𑀣 𑀪𑀕𑀯𑀸, 𑀢𑀢𑁆𑀣 𑀕𑀢𑁄’’𑀢𑀺. 𑀢𑀤𑀸 ¶ 𑀢𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀢𑀼𑀡𑁆𑀳𑀻𑀪𑀸𑀯𑀲𑁆𑀲 𑀅𑀦𑀯𑀲𑁂𑀲𑀢𑁄 𑀩𑁆𑀬𑀸𑀧𑀺𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀼𑀡𑁆𑀳𑀻𑀪𑀽𑀢𑀁 𑀢𑀼𑀡𑁆𑀳𑀻𑀪𑀽𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀢𑁄 𑀬𑀢𑁄…𑀧𑁂… 𑀫𑁂𑀯𑀸𑀢𑀺 𑀅𑀢𑁆𑀣𑁄’’𑀢𑀺. 𑀳𑀢𑁆𑀣𑀲𑁆𑀲 𑀓𑀼𑀓𑀢𑀢𑁆𑀢𑀸 𑀅𑀲𑀁𑀬𑀫𑁄 𑀅𑀲𑀫𑁆𑀧𑀚𑀜𑁆𑀜𑀓𑀺𑀭𑀺𑀬𑀸 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀸-𑀲𑀤𑁆𑀤𑁄 𑀅𑀯𑀼𑀢𑁆𑀢𑀯𑀺𑀓𑀧𑁆𑀧𑀢𑁆𑀣𑁄, 𑀢𑁂𑀦 𑀢𑀤𑀜𑁆𑀜𑁄 𑀅𑀲𑀁𑀬𑀫𑀪𑀸𑀯𑁄 𑀯𑀺𑀪𑀸𑀯𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀧𑀦 𑀘𑀓𑁆𑀔𑀼𑀅𑀲𑀁𑀬𑀫𑁄 𑀲𑀩𑁆𑀩𑀧𑀞𑀫𑁄, 𑀤𑀼𑀦𑁆𑀦𑀺𑀯𑀸𑀭𑁄 𑀘𑀸𑀢𑀺 𑀢𑀤𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ¶ ‘‘𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀉𑀧𑀲𑀫𑁂𑀦 𑀮𑀤𑁆𑀥𑁂𑀦 𑀇𑀢𑀭𑁄𑀧𑀺 𑀅𑀦𑀼𑀫𑀸𑀦𑀢𑁄 𑀮𑀤𑁆𑀥𑁄 𑀏𑀯 𑀳𑁄𑀢𑀻𑀢𑀺 𑀆𑀳 ‘‘𑀫𑀸𑀦𑀲𑀺𑀓𑁂𑀦 𑀘𑀸’’𑀢𑀺. 𑀉𑀧𑀲𑀫𑀦𑁆𑀢𑀺 𑀲𑀁𑀬𑀫𑀁, 𑀆𑀘𑀸𑀭𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀧𑀭𑀺𑀯𑀝𑁆𑀝𑁂𑀢𑀺 𑀧𑀜𑁆𑀘𑀧𑀼𑀭𑀺𑀲𑀧𑀭𑀺𑀯𑀝𑁆𑀝𑁂. 𑀧𑀜𑁆𑀘𑀳𑀸𑀓𑀸𑀭𑁂𑀳𑀻𑀢𑀺 ‘‘𑀇𑀝𑁆𑀞𑀸𑀦𑀺𑀝𑁆𑀞𑁂 ¶ 𑀢𑀸𑀤𑀻’’𑀢𑀺 (𑀫𑀳𑀸𑀦𑀺. 𑁩𑁮, 𑁧𑁯𑁨) 𑀏𑀯𑀁 𑀆𑀤𑀺𑀦𑀸 𑀆𑀕𑀢𑁂𑀳𑀺, 𑀧𑀜𑁆𑀘𑀯𑀺𑀥𑀅𑀭𑀺𑀬𑀺𑀤𑁆𑀥𑀺𑀲𑀺𑀤𑁆𑀥𑁂𑀳𑀺 𑀘 𑀧𑀜𑁆𑀘𑀳𑀺 𑀧𑀓𑀸𑀭𑁂𑀳𑀺. 𑀢𑀸𑀤𑀺𑀮𑀓𑁆𑀔𑀡𑁂𑀢𑀺 𑀢𑀸𑀤𑀺𑀪𑀸𑀯𑁂.

𑁧𑁬𑁨. 𑀦 𑀫𑁂 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂 𑀪𑀸𑀭𑁄 𑀅𑀢𑁆𑀣𑀻𑀢𑀺 𑀲𑀢𑁆𑀣𑀼 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑀢𑀸𑀤𑀲𑁆𑀲𑀦𑀁. 𑀬𑀤𑀸𑀓𑀗𑁆𑀔𑀲𑀻𑀢𑀺 𑀦 𑀯𑀤𑀦𑁆𑀢𑀺, 𑀓𑀣𑀁 𑀧𑀦 𑀯𑀤𑀦𑁆𑀢𑀻𑀢𑀺 𑀆𑀳 ‘‘𑀲𑀼𑀢𑁆𑀯𑀸 𑀯𑁂𑀤𑀺𑀲𑁆𑀲𑀸𑀫𑀸’’𑀢𑀺 𑀧𑀤𑁂𑀲𑀜𑀸𑀡𑁂 𑀞𑀺𑀢𑀢𑁆𑀢𑀸. 𑀩𑀼𑀤𑁆𑀥𑀸 𑀧𑀦 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑀓𑁆𑀔𑀦𑀭𑀺𑀦𑁆𑀤𑀤𑁂𑀯𑀲𑀫𑀡𑀩𑁆𑀭𑀸𑀳𑁆𑀫𑀡𑀧𑀭𑀺𑀩𑁆𑀩𑀸𑀚𑀓𑀸𑀦’’𑀦𑁆𑀢𑀺 𑀇𑀤𑀁 ‘‘𑀧𑀼𑀘𑁆𑀙𑀸𑀯𑀼𑀲𑁄 𑀬𑀤𑀸𑀓𑀗𑁆𑀔𑀲𑀻’’𑀢𑀺𑀆𑀤𑀻𑀦𑀺 (𑀲𑀁. 𑀦𑀺. 𑁧.𑁨𑁩𑁭, 𑁨𑁪𑁬; 𑀲𑀼. 𑀦𑀺. 𑀆𑀴𑀯𑀓𑀲𑀼𑀢𑁆𑀢𑁂) 𑀲𑀼𑀢𑁆𑀢𑀧𑀤𑀸𑀦𑀺 𑀧𑀼𑀘𑁆𑀙𑀦𑁆𑀢𑀸𑀦𑀁 𑀬𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦 𑀆𑀕𑀢𑀸𑀦𑀺, 𑀢𑀁 𑀤𑀲𑁆𑀲𑀦𑀢𑁆𑀣𑀁. ‘‘𑀧𑀼𑀘𑁆𑀙𑀸𑀯𑀼𑀲𑁄 𑀬𑀤𑀸𑀓𑀗𑁆𑀔𑀲𑀻’’𑀢𑀺 𑀇𑀤𑀁 𑀆𑀴𑀯𑀓𑀲𑁆𑀲 𑀬𑀓𑁆𑀔𑀲𑁆𑀲 𑀑𑀓𑀸𑀲𑀓𑀭𑀡𑀁, 𑀲𑁂𑀲𑀸𑀦𑀺 𑀦𑀭𑀺𑀦𑁆𑀤𑀸𑀤𑀻𑀦𑀁. 𑀫𑀦𑀲𑀺𑀘𑁆𑀙𑀲𑀻𑀢𑀺 𑀫𑀦𑀲𑀸 𑀇𑀘𑁆𑀙𑀲𑀺. 𑀧𑀼𑀘𑁆𑀙𑀯𑁆𑀳𑁄, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀣𑀸𑀢𑀺 𑀩𑀸𑀯𑀭𑀺𑀲𑁆𑀲 𑀲𑀁𑀲𑀬𑀁 𑀫𑀦𑀲𑀸 𑀧𑀼𑀘𑁆𑀙𑀯𑁆𑀳𑁄. 𑀢𑀼𑀫𑁆𑀳𑀸𑀓𑀁 𑀧𑀦 𑀲𑀩𑁆𑀩𑁂𑀲𑀁 𑀬𑀁 𑀓𑀺𑀜𑁆𑀘𑀺 𑀲𑀩𑁆𑀩𑀲𑀁𑀲𑀬𑀁 𑀫𑀦𑀲𑀸, 𑀅𑀜𑁆𑀜𑀣𑀸 𑀘, 𑀬𑀣𑀸 𑀇𑀘𑁆𑀙𑀣, 𑀢𑀣𑀸 𑀧𑀼𑀘𑁆𑀙𑀯𑁆𑀳𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀸𑀥𑀼𑀭𑀽𑀧𑀸𑀢𑀺 𑀲𑀸𑀥𑀼𑀲𑀪𑀸𑀯𑀸. 𑀥𑀫𑁆𑀫𑁄𑀢𑀺 𑀧𑀯𑁂𑀡𑀻𑀥𑀫𑁆𑀫𑁄. 𑀯𑀼𑀤𑁆𑀥𑀦𑁆𑀢𑀺 𑀲𑀻𑀮𑀸𑀤𑀻𑀳𑀺 𑀩𑀼𑀤𑁆𑀥𑀺𑀧𑁆𑀧𑀢𑁆𑀢𑀁, 𑀕𑀭𑀼𑀦𑁆𑀢𑀺 𑀅𑀢𑁆𑀣𑁄. 𑀏𑀲 𑀪𑀸𑀭𑁄𑀢𑀺 𑀏𑀲 𑀲𑀁𑀲𑀬𑀽𑀧𑀘𑁆𑀙𑁂𑀤𑀦𑀲𑀗𑁆𑀔𑀸𑀢𑁄 𑀪𑀸𑀭𑁄, 𑀆𑀕𑀢𑁄 𑀪𑀸𑀭𑁄 𑀅𑀯𑀲𑁆𑀲𑀁 𑀆𑀯𑀳𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀜𑀢𑁆𑀯𑀸 𑀲𑀬𑀦𑁆𑀢𑀺 𑀧𑀭𑀽𑀧𑀤𑁂𑀲𑁂𑀦 𑀯𑀺𑀦𑀸 𑀲𑀬𑀫𑁂𑀯 𑀜𑀢𑁆𑀯𑀸.

𑀲𑀼𑀘𑀺𑀭𑀢𑁂𑀦𑀸𑀢𑀺 𑀏𑀯𑀁 𑀦𑀸𑀫𑀓𑁂𑀦 𑀩𑁆𑀭𑀸𑀳𑁆𑀫𑀡𑁂𑀦. 𑀢𑀕𑁆𑀖𑀸𑀢𑀺 ¶ 𑀏𑀓𑀁𑀲𑁂𑀦. 𑀬𑀣𑀸𑀧𑀺 𑀓𑀼𑀲𑀮𑁄 𑀢𑀣𑀸𑀢𑀺 𑀬𑀣𑀸 𑀲𑀩𑁆𑀩𑀥𑀫𑁆𑀫𑀓𑀼𑀲𑀮𑁄 𑀲𑀩𑁆𑀩𑀯𑀺𑀤𑀽 𑀚𑀸𑀦𑀸𑀢𑀺 𑀓𑀣𑁂𑀢𑀺, 𑀢𑀣𑀸 𑀅𑀳𑀫𑀓𑁆𑀔𑀺𑀲𑁆𑀲𑀁. 𑀭𑀸𑀚𑀸 𑀘 𑀔𑁄 𑀢𑀁 𑀬𑀤𑀺 𑀓𑀸𑀳𑀢𑀺 𑀯𑀸 𑀦 𑀯𑀸𑀢𑀺 𑀬𑁄 𑀢𑀁 𑀇𑀥 𑀧𑀼𑀘𑁆𑀙𑀺𑀢𑀼𑀁 𑀧𑁂𑀲𑁂𑀲𑀺, 𑀲𑁄 𑀭𑀸𑀚𑀸𑀦𑀁 𑀢𑀬𑀸 𑀧𑀼𑀘𑁆𑀙𑀺𑀢𑀁 𑀓𑀭𑁄𑀢𑀼 𑀯𑀸 𑀫𑀸 𑀯𑀸, 𑀅𑀳𑀁 𑀧𑀦 𑀢𑁂 𑀅𑀓𑁆𑀔𑀺𑀲𑁆𑀲𑀁 𑀅𑀓𑁆𑀔𑀺𑀲𑁆𑀲𑀸𑀫𑀺, 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑁧𑁬𑁩. 𑀲𑀺𑀧𑁆𑀧𑀦𑀝𑁆𑀞𑁂𑀦 𑀲𑀺𑀓𑁆𑀔𑀺𑀢𑀩𑁆𑀩𑀢𑀸𑀬 𑀘 𑀲𑀺𑀧𑁆𑀧𑀫𑁂𑀯 𑀲𑀺𑀧𑁆𑀧𑀸𑀬𑀢𑀦𑀁 𑀚𑀻𑀯𑀺𑀓𑀸𑀬 𑀓𑀸𑀭𑀡𑀪𑀸𑀯𑀢𑁄 ¶ . 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀢𑀲𑁆𑀲 𑀢𑁂 𑀓𑀢𑀫𑁂𑀢𑀺 𑀅𑀢𑁆𑀣𑁄. 𑀧𑀼𑀣𑀼 𑀲𑀺𑀧𑁆𑀧𑀸𑀬𑀢𑀦𑀸𑀦𑀻𑀢𑀺 𑀳𑀺 𑀲𑀸𑀥𑀸𑀭𑀡𑀢𑁄 𑀲𑀺𑀧𑁆𑀧𑀸𑀦𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀉𑀧𑀭𑀺 𑀢𑀁𑀢𑀁𑀲𑀺𑀧𑁆𑀧𑀽𑀧𑀚𑀻𑀯𑀺𑀦𑁄 𑀦𑀺𑀤𑁆𑀤𑀺𑀝𑁆𑀞𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀓𑀣𑀸𑀬 𑀧𑀧𑀜𑁆𑀘𑀁 𑀧𑀭𑀺𑀳𑀭𑀺𑀢𑀼𑀁. 𑀅𑀜𑁆𑀜𑀣𑀸 𑀬𑀣𑀸𑀥𑀺𑀧𑁆𑀧𑁂𑀢𑀸𑀦𑀺 𑀢𑀸𑀯 𑀲𑀺𑀧𑁆𑀧𑀸𑀬𑀢𑀦𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀢𑀁𑀢𑀁𑀲𑀺𑀧𑁆𑀧𑀽𑀧𑀚𑀻𑀯𑀻𑀲𑀼 𑀤𑀲𑁆𑀲𑀺𑀬𑀫𑀸𑀦𑁂𑀲𑀼 𑀧𑀧𑀜𑁆𑀘𑁄 𑀲𑀺𑀬𑀸𑀢𑀺. 𑀢𑁂𑀦𑀸𑀳 ‘‘𑀳𑀢𑁆𑀣𑀸𑀭𑁄𑀳𑀸’’𑀢𑀺𑀆𑀤𑀺.

𑀳𑀢𑁆𑀣𑀺𑀁 ¶ 𑀆𑀭𑁄𑀳𑀦𑁆𑀢𑀺, 𑀆𑀭𑁄𑀳𑀸𑀧𑀬𑀦𑁆𑀢𑀺 𑀘𑀸𑀢𑀺 𑀳𑀢𑁆𑀣𑀸𑀭𑁄𑀳𑀸. 𑀬𑁂𑀳𑀺 𑀧𑀬𑁄𑀕𑁂𑀳𑀺 𑀧𑀼𑀭𑀺𑀲𑁄 𑀳𑀢𑁆𑀣𑀺𑀦𑁄 𑀆𑀭𑁄𑀳𑀦𑀬𑁄𑀕𑁆𑀕𑁄 𑀳𑁄𑀢𑀺, 𑀳𑀢𑁆𑀣𑀺𑀲𑁆𑀲 𑀢𑀁 𑀧𑀬𑁄𑀕𑀁 𑀯𑀺𑀥𑀸𑀬𑀢𑀁 𑀲𑀩𑁆𑀩𑁂𑀲𑀁 𑀧𑁂𑀢𑁂𑀲𑀁 𑀕𑀳𑀡𑀁. 𑀢𑁂𑀦𑀸𑀳 ‘‘𑀲𑀩𑁆𑀩𑁂𑀧𑀻’’𑀢𑀺𑀆𑀤𑀺. 𑀢𑀢𑁆𑀣 𑀳𑀢𑁆𑀣𑀸𑀘𑀭𑀺𑀬𑀸 𑀦𑀸𑀫 𑀬𑁂 𑀳𑀢𑁆𑀣𑀺𑀦𑁄 𑀳𑀢𑁆𑀣𑀸𑀭𑁄𑀳𑀓𑀸𑀦𑀜𑁆𑀘 𑀲𑀺𑀓𑁆𑀔𑀧𑀓𑀸. 𑀳𑀢𑁆𑀣𑀺𑀯𑁂𑀚𑁆𑀚𑀸 𑀦𑀸𑀫 𑀳𑀢𑁆𑀣𑀺𑀪𑀺𑀲𑀓𑁆𑀓𑀸. 𑀳𑀢𑁆𑀣𑀺𑀫𑁂𑀡𑁆𑀟𑀸 𑀦𑀸𑀫 𑀳𑀢𑁆𑀣𑀻𑀦𑀁 𑀧𑀸𑀤𑀭𑀓𑁆𑀔𑀓𑀸. 𑀆𑀤𑀺-𑀲𑀤𑁆𑀤𑁂𑀦 𑀳𑀢𑁆𑀣𑀻𑀦𑀁 𑀬𑀯𑀲𑀤𑀸𑀬𑀓𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀲𑁆𑀲𑀸𑀭𑁄𑀳𑀸 𑀭𑀣𑀺𑀓𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀭𑀣𑁂 𑀦𑀺𑀬𑀼𑀢𑁆𑀢𑀸 𑀭𑀣𑀺𑀓𑀸. 𑀭𑀣𑀭𑀓𑁆𑀔𑀸 𑀦𑀸𑀫 𑀭𑀣𑀲𑁆𑀲 𑀆𑀡𑀺𑀭𑀓𑁆𑀔𑀓𑀸. 𑀥𑀦𑀼𑀁 𑀕𑀡𑁆𑀳𑀦𑁆𑀢𑀺, 𑀕𑀡𑁆𑀳𑀸𑀧𑁂𑀦𑁆𑀢𑀺 𑀘𑀸𑀢𑀺 𑀥𑀦𑀼𑀕𑁆𑀕𑀳𑀸, 𑀇𑀲𑁆𑀲𑀸𑀲𑀸 ¶ 𑀥𑀦𑀼𑀲𑀺𑀧𑁆𑀧𑀲𑁆𑀲 𑀲𑀺𑀓𑁆𑀔𑀸𑀧𑀓𑀸 𑀘. 𑀢𑁂𑀦𑀸𑀳 ‘‘𑀥𑀦𑀼𑀆𑀘𑀭𑀺𑀬𑀸 𑀇𑀲𑁆𑀲𑀸𑀲𑀸’’𑀢𑀺. 𑀘𑁂𑀮𑁂𑀦 𑀘𑁂𑀮𑀧𑀝𑀸𑀓𑀸𑀬 𑀬𑀼𑀤𑁆𑀥𑁂 𑀅𑀓𑀦𑁆𑀢𑀺 𑀕𑀘𑁆𑀙𑀦𑁆𑀢𑀻𑀢𑀺 𑀘𑁂𑀮𑀓𑀸𑀢𑀺 𑀆𑀳 ‘‘𑀬𑁂 𑀬𑀼𑀤𑁆𑀥𑁂 𑀚𑀬𑀥𑀚𑀁 𑀕𑀳𑁂𑀢𑁆𑀯𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀻’’𑀢𑀺. 𑀬𑀣𑀸 𑀢𑀣𑀸 𑀞𑀺𑀢𑁂 𑀲𑁂𑀦𑀺𑀓𑁂 𑀩𑁆𑀬𑀽𑀳𑀓𑀭𑀡𑀯𑀲𑁂𑀦 𑀢𑀢𑁄 𑀘𑀮𑀬𑀦𑁆𑀢𑀺 𑀉𑀘𑁆𑀘𑀸𑀮𑁂𑀦𑁆𑀢𑀻𑀢𑀺 𑀘𑀮𑀓𑀸. 𑀲𑀓𑀼𑀡𑀕𑁆𑀖𑀺𑀆𑀤𑀬𑁄 𑀯𑀺𑀬 𑀫𑀁𑀲𑀧𑀺𑀡𑁆𑀟𑀁 𑀧𑀭𑀲𑁂𑀦𑀸𑀲𑀫𑀽𑀳𑀁 𑀲𑀸𑀳𑀲𑀺𑀓𑀫𑀳𑀸𑀬𑁄𑀥𑀢𑀸𑀬 𑀙𑁂𑀢𑁆𑀯𑀸 𑀙𑁂𑀢𑁆𑀯𑀸 𑀤𑀬𑀦𑁆𑀢𑀺 𑀉𑀧𑁆𑀧𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀻𑀢𑀺 𑀧𑀺𑀡𑁆𑀟𑀤𑀸𑀬𑀓𑀸. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀺𑀡𑁆𑀟𑁂 𑀤𑀬𑀦𑁆𑀢𑀺 𑀚𑀦𑀲𑀫𑁆𑀫𑀤𑁆𑀤𑁂 𑀉𑀧𑁆𑀧𑀢𑀦𑁆𑀢𑀸 𑀯𑀺𑀬 𑀕𑀘𑁆𑀙𑀦𑁆𑀢𑀻𑀢𑀺 𑀧𑀺𑀡𑁆𑀟𑀤𑀸𑀬𑀓𑀸𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀕𑁆𑀕𑀢𑀼𑀕𑁆𑀕𑀢𑀸𑀢𑀺 𑀣𑀸𑀫𑀚𑀯𑀧𑀭𑀓𑁆𑀓𑀫𑀸𑀤𑀺𑀯𑀲𑁂𑀦 𑀅𑀢𑀺𑀯𑀺𑀬 𑀉𑀕𑁆𑀕𑀢𑀸 𑀉𑀕𑁆𑀕𑀸𑀢𑀺 𑀅𑀢𑁆𑀣𑁄. 𑀧𑀓𑁆𑀔𑀦𑁆𑀤𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀯𑀻𑀭𑀲𑀽𑀭𑀪𑀸𑀯𑁂𑀦 𑀅𑀲𑀚𑁆𑀚𑀫𑀸𑀦𑀸 𑀧𑀭𑀲𑁂𑀦𑀁 𑀅𑀦𑀼𑀧𑀯𑀺𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀣𑀸𑀫𑀚𑀯𑀩𑀮𑀧𑀭𑀓𑁆𑀓𑀫𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀫𑀳𑀸𑀦𑀸𑀕𑀸 𑀯𑀺𑀬 𑀫𑀳𑀸𑀦𑀸𑀕𑀸. 𑀏𑀓𑀦𑁆𑀢𑀲𑀽𑀭𑀸𑀢𑀺 𑀏𑀓𑀸𑀓𑀺𑀲𑀽𑀭𑀸 𑀅𑀢𑁆𑀢𑀦𑁄 𑀲𑀽𑀭𑀪𑀸𑀯𑁂𑀦𑁂𑀯 𑀏𑀓𑀸𑀓𑀺𑀦𑁄 𑀳𑀼𑀢𑁆𑀯𑀸 𑀬𑀼𑀚𑁆𑀛𑀦𑀓𑀸. 𑀲𑀚𑀸𑀮𑀺𑀓𑀸𑀢𑀺 𑀲𑀯𑀫𑁆𑀫𑀺𑀓𑀸. 𑀲𑀭𑀧𑀭𑀺𑀢𑁆𑀢𑀸𑀡𑀘𑀫𑁆𑀫𑀦𑁆𑀢𑀺 𑀘𑀫𑁆𑀫𑀧𑀭𑀺𑀲𑀺𑀩𑁆𑀩𑀺𑀢𑀁 𑀔𑁂𑀝𑀓𑀁, 𑀘𑀫𑁆𑀫𑀫𑀬𑀁 𑀯𑀸 𑀨𑀮𑀓𑀁. 𑀖𑀭𑀤𑀸𑀲𑀬𑁄𑀥𑀸𑀢𑀺 𑀅𑀦𑁆𑀢𑁄𑀚𑀸𑀢𑀬𑁄𑀥𑀸.

𑀆𑀴𑀸𑀭𑀁 𑀯𑀼𑀘𑁆𑀘𑀢𑀺 𑀫𑀳𑀸𑀦𑀲𑀁, 𑀢𑀢𑁆𑀣 𑀦𑀺𑀬𑀼𑀢𑁆𑀢𑀸𑀢𑀺 𑀆𑀴𑀸𑀭𑀺𑀓𑀸, 𑀪𑀢𑁆𑀢𑀓𑀸𑀭𑀸. 𑀧𑀽𑀯𑀺𑀓𑀸𑀢𑀺 𑀧𑀽𑀯𑀲𑀫𑁆𑀧𑀸𑀤𑀓𑀸, 𑀬𑁂 𑀧𑀽𑀯𑀫𑁂𑀯 𑀦𑀸𑀦𑀧𑁆𑀧𑀓𑀸𑀭𑀢𑁄 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑁆𑀢𑀸 𑀚𑀻𑀯𑀦𑁆𑀢𑀺. 𑀓𑁂𑀲𑀦𑀔𑀮𑀺𑀔𑀦𑀸𑀤𑀺𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀅𑀮𑀗𑁆𑀓𑀸𑀭𑀯𑀺𑀥𑀺𑀁 𑀓𑀧𑁆𑀧𑁂𑀦𑁆𑀢𑀺 𑀲𑀁𑀯𑀺𑀤𑀳𑀦𑁆𑀢𑀻𑀢𑀺 𑀓𑀧𑁆𑀧𑀓𑀸. 𑀦𑁆𑀳𑀸𑀧𑀓𑀸𑀢𑀺 𑀘𑀼𑀡𑁆𑀡𑀯𑀺𑀮𑁂𑀧𑀦𑀸𑀤𑀻𑀳𑀺 ¶ 𑀫𑀮𑀳𑀭𑀡𑀯𑀡𑁆𑀡𑀲𑀫𑁆𑀧𑀸𑀤𑀦𑀯𑀺𑀥𑀺𑀦𑀸 𑀦𑁆𑀳𑀸𑀧𑁂𑀦𑁆𑀢𑀻𑀢𑀺 𑀦𑁆𑀳𑀸𑀧𑀓𑀸. 𑀦𑀯𑀦𑁆𑀢𑀸𑀤𑀺𑀯𑀺𑀥𑀺𑀦𑀸 𑀧𑀯𑀢𑁆𑀢𑁄 𑀕𑀡𑀦𑀕𑀦𑁆𑀣𑁄 𑀅𑀦𑁆𑀢𑀭𑀸 𑀙𑀺𑀤𑁆𑀤𑀸𑀪𑀸𑀯𑁂𑀦 𑀅𑀘𑁆𑀙𑀺𑀤𑁆𑀤𑀓𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀕𑀡𑀦𑀁 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑀸 𑀅𑀘𑁆𑀙𑀺𑀤𑁆𑀤𑀓𑀧𑀸𑀞𑀓𑀸. 𑀳𑀢𑁆𑀣𑁂𑀦 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀁 𑀳𑀢𑁆𑀣𑀫𑀼𑀤𑁆𑀤𑀸 ¶ 𑀳𑀢𑁆𑀣-𑀲𑀤𑁆𑀤𑁄 𑀘𑁂𑀢𑁆𑀣 𑀢𑀤𑁂𑀓𑀤𑁂𑀲𑁂𑀲𑀼 𑀅𑀗𑁆𑀕𑀼𑀮𑀻𑀲𑀼 𑀤𑀝𑁆𑀞𑀩𑁆𑀩𑁄. ‘‘𑀦 𑀪𑀼𑀜𑁆𑀚𑀫𑀸𑀦𑁄 𑀲𑀩𑁆𑀩𑀁 𑀳𑀢𑁆𑀣𑀁 𑀫𑀼𑀔𑁂 𑀧𑀓𑁆𑀔𑀺𑀧𑀺𑀲𑁆𑀲𑀸𑀫𑀻’’𑀢𑀺𑀆𑀤𑀻𑀲𑀼 𑀯𑀺𑀬, 𑀢𑀲𑁆𑀫𑀸 𑀅𑀗𑁆𑀕𑀼𑀮𑀺𑀲𑀗𑁆𑀓𑁄𑀘𑀦𑀸𑀤𑀺𑀦𑀸 ¶ 𑀕𑀡𑀦𑀸 𑀳𑀢𑁆𑀣𑀫𑀼𑀤𑁆𑀤𑀸𑀬 𑀕𑀡𑀦𑀸. 𑀘𑀺𑀢𑁆𑀢𑀓𑀸𑀭𑀸𑀤𑀻𑀦𑀻𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀪𑀫𑀓𑀸𑀭𑀓𑁄𑀝𑁆𑀝𑀓𑀮𑁂𑀔𑀓 𑀯𑀺𑀮𑀻𑀯𑀓𑀸𑀭𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂. 𑀲𑀦𑁆𑀤𑀺𑀝𑁆𑀞𑀺𑀓𑀫𑁂𑀯𑀸𑀢𑀺 𑀅𑀲𑀫𑁆𑀧𑀭𑀸𑀬𑀺𑀓𑀢𑀸𑀬 𑀲𑀸𑀫𑀁 𑀤𑀝𑁆𑀞𑀩𑁆𑀩𑀁, 𑀲𑀬𑀁 𑀅𑀦𑀼𑀪𑀯𑀺𑀢𑀩𑁆𑀩𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀔𑀺𑀢𑀦𑁆𑀢𑀺 𑀲𑀼𑀔𑀧𑁆𑀧𑀢𑁆𑀢𑀁. 𑀉𑀧𑀭𑀻𑀢𑀺 𑀤𑁂𑀯𑀮𑁄𑀓𑁂. 𑀲𑁄 𑀳𑀺 𑀫𑀦𑀼𑀲𑁆𑀲𑀮𑁄𑀓𑀢𑁄 𑀉𑀧𑀭𑀺𑀫𑁄. 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀦𑀢𑁄 𑀢𑀲𑁆𑀲 𑀨𑀮𑀁 𑀢𑀲𑁆𑀲 𑀅𑀕𑁆𑀕𑀺𑀲𑀺𑀔𑀸 𑀯𑀺𑀬 𑀳𑁄𑀢𑀺, 𑀢𑀜𑁆𑀘 𑀉𑀤𑁆𑀥𑀁 𑀤𑁂𑀯𑀮𑁄𑀓𑁂𑀢𑀺 𑀆𑀳 ‘‘𑀉𑀤𑁆𑀥𑀁 𑀅𑀕𑁆𑀕𑀁 𑀅𑀲𑁆𑀲𑀸 𑀅𑀢𑁆𑀣𑀻𑀢𑀺 𑀉𑀤𑁆𑀥𑀕𑁆𑀕𑀺𑀓𑀸’’𑀢𑀺. 𑀲𑀕𑁆𑀕𑀁 𑀅𑀭𑀳𑀢𑀻𑀢𑀺 𑀅𑀢𑁆𑀢𑀦𑁄 𑀨𑀮𑀪𑀽𑀢𑀁 𑀲𑀕𑁆𑀕𑀁 𑀅𑀭𑀳𑀢𑀺, 𑀢𑀢𑁆𑀣 𑀲𑀸 𑀦𑀺𑀩𑁆𑀩𑀢𑁆𑀢𑀦𑀸𑀭𑀳𑁄𑀢𑀺 𑀅𑀢𑁆𑀣𑁄. 𑀲𑀼𑀔𑀯𑀺𑀧𑀸𑀓𑀸𑀢𑀺 𑀇𑀝𑁆𑀞𑀯𑀺𑀧𑀸𑀓𑀯𑀺𑀧𑀘𑁆𑀘𑀦𑀻𑀓𑀸. 𑀲𑀼𑀝𑁆𑀞𑀼 𑀅𑀕𑁆𑀕𑁂𑀢𑀺 𑀅𑀢𑀺𑀯𑀺𑀬 𑀉𑀢𑁆𑀢𑀫𑁂 𑀉𑀴𑀸𑀭𑁂. 𑀤𑀓𑁆𑀔𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀏𑀢𑀸𑀬𑀸𑀢𑀺 𑀤𑀓𑁆𑀔𑀺𑀡𑀸, 𑀧𑀭𑀺𑀘𑁆𑀘𑀸𑀕𑀫𑀬𑀁 𑀧𑀼𑀜𑁆𑀜𑀦𑁆𑀢𑀺 𑀆𑀳 ‘‘𑀤𑀓𑁆𑀔𑀺𑀡𑀁 𑀤𑀸𑀦’’𑀦𑁆𑀢𑀺.

𑀫𑀕𑁆𑀕𑁄 ¶ 𑀲𑀸𑀫𑀜𑁆𑀜𑀁 𑀲𑀫𑀺𑀢𑀧𑀸𑀧𑀲𑀫𑀡𑀪𑀸𑀯𑁄𑀢𑀺 𑀓𑀢𑁆𑀯𑀸. 𑀬𑀲𑁆𑀫𑀸 𑀅𑀬𑀁 𑀭𑀸𑀚𑀸 𑀧𑀩𑁆𑀩𑀚𑀺𑀢𑀸𑀦𑀁 𑀤𑀸𑀲𑀓𑀲𑁆𑀲𑀓𑀸𑀤𑀻𑀦𑀁 𑀮𑁄𑀓𑀢𑁄 𑀅𑀪𑀺𑀯𑀸𑀤𑀦𑀸𑀤𑀺𑀮𑀸𑀪𑁄 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑁄𑀘𑀺 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀈𑀤𑀺𑀲𑀫𑀢𑁆𑀣𑀁 𑀚𑀸𑀦𑀦𑁆𑀢𑁄’’𑀢𑀺 𑀯𑀻𑀫𑀁𑀲𑀦𑁆𑀢𑁄 𑀧𑀽𑀭𑀡𑀸𑀤𑀺𑀓𑁂 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀲𑀁 𑀓𑀣𑀸𑀬 𑀅𑀦𑀸𑀭𑀸𑀥𑀺𑀢𑀘𑀺𑀢𑁆𑀢𑁄 𑀪𑀕𑀯𑀦𑁆𑀢𑀫𑁆𑀧𑀺 𑀢𑀫𑀢𑁆𑀣𑀁 𑀧𑀼𑀘𑁆𑀙𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀉𑀧𑀭𑀺 𑀆𑀕𑀢𑀁 𑀧𑀦 𑀤𑀸𑀲𑀓𑀲𑁆𑀲𑀓𑁄𑀧𑀫𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀢𑀻’’𑀢𑀺.

𑀓𑀡𑁆𑀳𑀧𑀓𑁆𑀔𑀦𑁆𑀢𑀺 𑀬𑀣𑀸𑀧𑀼𑀘𑁆𑀙𑀺𑀢𑁂 𑀅𑀢𑁆𑀣𑁂 𑀮𑀩𑁆𑀪𑀫𑀸𑀦𑀁 𑀤𑀺𑀝𑁆𑀞𑀺𑀕𑀢𑀽𑀧𑀲𑀜𑁆𑀳𑀺𑀢𑀁 𑀲𑀁𑀓𑀺𑀮𑁂𑀲𑀧𑀓𑁆𑀔𑀁. 𑀲𑀼𑀓𑁆𑀓𑀧𑀓𑁆𑀔𑀦𑁆𑀢𑀺 𑀢𑀩𑁆𑀩𑀺𑀥𑀼𑀭𑀁 𑀉𑀧𑀭𑀺𑀲𑀼𑀢𑁆𑀢𑀸𑀕𑀢𑀁 𑀯𑁄𑀤𑀸𑀦𑀧𑀓𑁆𑀔𑀁. 𑀲𑀫𑀡𑀓𑁄𑀮𑀸𑀳𑀮𑀦𑁆𑀢𑀺 𑀲𑀫𑀡𑀓𑁄𑀢𑀽𑀳𑀮𑀁 𑀢𑀁𑀢𑀁𑀲𑀫𑀡𑀯𑀸𑀤𑀸𑀦𑀁 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑀁. 𑀲𑀫𑀡𑀪𑀡𑁆𑀟𑀦𑀦𑁆𑀢𑀺 𑀢𑁂𑀦𑁂𑀯 𑀯𑀺𑀭𑁄𑀥𑁂𑀦 ‘‘𑀏𑀯𑀁𑀯𑀸𑀤𑀻𑀦𑀁 𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀬𑀁 𑀤𑁄𑀲𑁄, 𑀏𑀯𑀁𑀯𑀸𑀤𑀻𑀦𑀁 𑀅𑀬𑀁 𑀤𑁄𑀲𑁄’’𑀢𑀺 𑀏𑀯𑀁 𑀢𑀁𑀢𑀁𑀯𑀸𑀤𑀲𑁆𑀲 𑀧𑀭𑀺𑀪𑀸𑀲𑀦𑀁. 𑀭𑀜𑁆𑀜𑁄 𑀪𑀸𑀭𑀁 𑀓𑀭𑁄𑀦𑁆𑀢𑁄 𑀅𑀢𑁆𑀢𑀦𑁄 𑀤𑁂𑀲𑀦𑀸𑀓𑁄𑀲𑀮𑁆𑀮𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁬𑁪. 𑀧𑀡𑁆𑀟𑀺𑀢𑀧𑀢𑀺𑀭𑀽𑀧𑀓𑀸𑀦𑀦𑁆𑀢𑀺 𑀆𑀫𑀁 𑀯𑀺𑀬 𑀧𑀓𑁆𑀓𑀸𑀦𑀁 𑀧𑀡𑁆𑀟𑀺𑀢𑀸𑀪𑀸𑀲𑀸𑀦𑀁.

𑀧𑀽𑀭𑀡𑀓𑀲𑁆𑀲𑀧𑀯𑀸𑀤𑀯𑀡𑁆𑀡𑀦𑀸

𑁧𑁬𑁫. 𑀏𑀓𑀁 ¶ 𑀇𑀤𑀸𑀳𑀦𑁆𑀢𑀺 𑀏𑀓𑀸𑀳𑀁. 𑀇𑀥-𑀲𑀤𑁆𑀤𑁄 𑀘𑁂𑀢𑁆𑀣 𑀦𑀺𑀧𑀸𑀢𑀫𑀢𑁆𑀢𑀁, 𑀏𑀓𑀸𑀳𑀁 𑀲𑀫𑀬𑀁 𑀢𑀺𑀘𑁆𑀘𑁂𑀯 𑀅𑀢𑁆𑀣𑁄. 𑀲𑀭𑀺𑀢𑀩𑁆𑀩𑀬𑀼𑀢𑁆𑀢𑀦𑁆𑀢𑀺 𑀅𑀦𑀼𑀲𑁆𑀲𑀭𑀡𑀸𑀦𑀼𑀘𑁆𑀙𑀯𑀺𑀓𑀁.

𑁧𑁬𑁬. 𑀲𑀳𑀢𑁆𑀣𑀸 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀲𑀳𑀢𑁆𑀣𑁂𑀦𑁂𑀯 𑀓𑀭𑁄𑀦𑁆𑀢𑀲𑁆𑀲. 𑀦𑀺𑀲𑁆𑀲𑀕𑁆𑀕𑀺𑀬𑀣𑀸𑀯𑀭𑀸𑀤𑀬𑁄𑀧𑀺 𑀇𑀥 𑀲𑀳𑀢𑁆𑀣𑀓𑀭𑀡𑁂𑀦𑁂𑀯 ¶ 𑀲𑀗𑁆𑀕𑀳𑀺𑀢𑀸. 𑀳𑀢𑁆𑀣𑀸𑀤𑀻𑀦𑀻𑀢𑀺 𑀳𑀢𑁆𑀣𑀧𑀸𑀤𑀓𑀡𑁆𑀡𑀦𑀸𑀲𑀸𑀤𑀻𑀦𑀺. 𑀧𑀘𑀦𑀁 𑀤𑀳𑀦𑀁 𑀯𑀺𑀩𑀸𑀥𑀦𑀦𑁆𑀢𑀺 𑀆𑀳 ‘‘𑀤𑀡𑁆𑀟𑁂𑀦 𑀉𑀧𑁆𑀧𑀻𑀴𑁂𑀦𑁆𑀢𑀲𑁆𑀲𑀸’’𑀢𑀺. 𑀧𑀧𑀜𑁆𑀘𑀲𑀽𑀤𑀦𑀺𑀬𑀁 ‘‘𑀢𑀚𑁆𑀚𑁂𑀦𑁆𑀢𑀲𑁆𑀲 𑀯𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀇𑀥 𑀧𑀦 𑀢𑀚𑁆𑀚𑀦𑀁 𑀧𑀭𑀺𑀪𑀸𑀲𑀦𑀁 𑀤𑀡𑁆𑀟𑁂𑀦𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 ‘‘𑀤𑀡𑁆𑀟𑁂𑀦 𑀉𑀧𑁆𑀧𑀻𑀴𑁂𑀦𑁆𑀢𑀲𑁆𑀲’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀲𑁄𑀓𑀁 𑀲𑀬𑀁 ¶ 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀧𑀭𑀲𑁆𑀲 𑀲𑁄𑀓𑀓𑀸𑀭𑀡𑀁 𑀲𑀬𑀁 𑀓𑀭𑁄𑀦𑁆𑀢𑀲𑁆𑀲, 𑀲𑁄𑀓𑀁 𑀯𑀸 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲. 𑀧𑀭𑁂𑀳𑀻𑀢𑀺 𑀅𑀢𑁆𑀢𑀦𑁄 𑀯𑀘𑀦𑀓𑀭𑁂𑀳𑀺. 𑀲𑀬𑀫𑁆𑀧𑀺 𑀨𑀦𑁆𑀤𑀢𑁄𑀢𑀺 𑀧𑀭𑀲𑁆𑀲 𑀯𑀺𑀩𑀸𑀥𑀦𑀧𑀬𑁄𑀕𑁂𑀦 𑀲𑀬𑀫𑁆𑀧𑀺 𑀨𑀦𑁆𑀤𑀢𑁄. ‘‘𑀅𑀢𑀺𑀧𑀸𑀢𑀸𑀧𑀬𑀢𑁄’’𑀢𑀺 𑀧𑀤𑀁 𑀲𑀼𑀤𑁆𑀥𑀓𑀢𑁆𑀢𑀼𑀅𑀢𑁆𑀣𑁂 𑀳𑁂𑀢𑀼𑀓𑀢𑁆𑀢𑀼𑀅𑀢𑁆𑀣𑁂 𑀘 𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀳𑀦𑀦𑁆𑀢𑀲𑁆𑀲𑀸𑀧𑀺 𑀳𑀦𑀸𑀧𑁂𑀦𑁆𑀢𑀲𑁆𑀲𑀸𑀧𑀻’’𑀢𑀺. 𑀓𑀸𑀭𑀡𑀯𑀲𑁂𑀦𑀸𑀢𑀺 𑀓𑀸𑀭𑀸𑀧𑀦𑀯𑀲𑁂𑀦.

𑀖𑀭𑀲𑁆𑀲 𑀪𑀺𑀢𑁆𑀢𑀺 𑀅𑀦𑁆𑀢𑁄 𑀩𑀳𑀺 𑀘 𑀲𑀦𑁆𑀥𑀺𑀢𑀸 𑀳𑀼𑀢𑁆𑀯𑀸 𑀞𑀺𑀢𑀸 𑀖𑀭𑀲𑀦𑁆𑀥𑀺. 𑀓𑀺𑀜𑁆𑀘𑀺𑀧𑀺 𑀅𑀲𑁂𑀲𑁂𑀢𑁆𑀯𑀸 𑀦𑀺𑀭𑀯𑀲𑁂𑀲𑁄 𑀮𑁄𑀧𑁄 𑀦𑀺𑀮𑁆𑀮𑁄𑀧𑁄. 𑀏𑀓𑀸𑀕𑀸𑀭𑁂 𑀦𑀺𑀬𑀼𑀢𑁆𑀢𑁄 𑀯𑀺𑀮𑁄𑀧𑁄 𑀏𑀓𑀸𑀕𑀸𑀭𑀺𑀓𑁄. 𑀧𑀭𑀺𑀢𑁄 𑀲𑀩𑁆𑀩𑀲𑁄 𑀧𑀦𑁆𑀣𑁂 𑀳𑀦𑀦𑀁 𑀧𑀭𑀺𑀧𑀦𑁆𑀣𑁄. 𑀧𑀸𑀧𑀁 𑀦 𑀓𑀭𑀻𑀬𑀢𑀺 𑀧𑀼𑀩𑁆𑀩𑁂 𑀅𑀲𑀜𑁆𑀜𑀢𑁄 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸, 𑀢𑀲𑁆𑀫𑀸 𑀦𑀢𑁆𑀣𑀺 𑀧𑀸𑀧𑀁. 𑀬𑀤𑀺 𑀏𑀯𑀁 𑀓𑀣𑀁 𑀲𑀢𑁆𑀢𑀸 𑀧𑀸𑀧𑁂 𑀧𑀝𑀺𑀧𑀚𑁆𑀚𑀦𑁆𑀢𑀻𑀢𑀺 𑀆𑀳 ‘‘𑀲𑀢𑁆𑀢𑀸 𑀧𑀦 𑀧𑀸𑀧𑀁 𑀓𑀭𑁄𑀫𑀸𑀢𑀺 𑀏𑀯𑀁 𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀻’’𑀢𑀺. 𑀏𑀯𑀁 𑀓𑀺𑀭𑀲𑁆𑀲 𑀳𑁄𑀢𑀺 𑁋 𑀇𑀫𑁂𑀲𑀜𑁆𑀳𑀺 𑀲𑀢𑁆𑀢𑀸𑀦𑀁 𑀳𑀺𑀁𑀲𑀸𑀤𑀺𑀓𑀺𑀭𑀺𑀬𑀸 𑀦 𑀅𑀢𑁆𑀢𑀸𑀦𑀁 𑀨𑀼𑀲𑀢𑀺 𑀢𑀲𑁆𑀲 𑀦𑀺𑀘𑁆𑀘𑀢𑀸𑀬 𑀦𑀺𑀩𑁆𑀩𑀺𑀓𑀸𑀭𑀢𑁆𑀢𑀸 𑀲𑀭𑀻𑀭𑀁 𑀧𑀦 𑀅𑀘𑁂𑀢𑀦𑀁 𑀓𑀝𑁆𑀞𑀓𑀮𑀺𑀗𑁆𑀕𑀭𑀽𑀧𑀫𑀁, 𑀢𑀲𑁆𑀫𑀺𑀁 𑀯𑀺𑀓𑁄𑀧𑀺𑀢𑁂𑀧𑀺 𑀦 𑀓𑀺𑀜𑁆𑀘𑀺 𑀧𑀸𑀧𑀦𑁆𑀢𑀺. 𑀔𑀼𑀭𑀦𑁂𑀫𑀺𑀦𑀸𑀢𑀺 𑀦𑀺𑀲𑀺𑀢𑀔𑀼𑀭𑀫𑀬𑀦𑁂𑀫𑀺𑀦𑀸.

𑀕𑀗𑁆𑀕𑀸𑀬 𑀤𑀓𑁆𑀔𑀺𑀡𑀸 𑀤𑀺𑀲𑀸 𑀅𑀧𑁆𑀧𑀢𑀺𑀭𑀽𑀧𑀤𑁂𑀲𑁄, 𑀉𑀢𑁆𑀢𑀭𑀸 𑀤𑀺𑀲𑀸 𑀧𑀢𑀺𑀭𑀽𑀧𑀤𑁂𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦‘‘𑀤𑀓𑁆𑀔𑀺𑀡𑀜𑁆𑀘’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀤𑀓𑁆𑀔𑀺𑀡𑀢𑀻𑀭𑁂 𑀫𑀦𑀼𑀲𑁆𑀲𑀸 𑀓𑀓𑁆𑀔𑀴𑀸’’𑀢𑀺𑀆𑀤𑀺. 𑀫𑀳𑀸𑀬𑀸𑀕𑀦𑁆𑀢𑀺 𑀫𑀳𑀸𑀯𑀺𑀚𑀺𑀢𑀬𑀜𑁆𑀜𑀲𑀤𑀺𑀲𑀁 𑀫𑀳𑀸𑀬𑀸𑀕𑀁. 𑀉𑀧𑁄𑀲𑀣𑀓𑀫𑁆𑀫𑁂𑀦 𑀯𑀸𑀢𑀺 𑀉𑀧𑁄𑀲𑀣𑀓𑀫𑁆𑀫𑁂𑀦 𑀘. 𑀤𑀫-𑀲𑀤𑁆𑀤𑁄 𑀳𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑁆𑀲 𑀉𑀧𑁄𑀲𑀣𑀲𑀻𑀮𑀲𑁆𑀲 𑀘 𑀯𑀸𑀘𑀓𑁄 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀓𑁂𑀘𑀺 𑀧𑀦 ‘‘𑀉𑀧𑁄𑀲𑀣𑀓𑀫𑁆𑀫𑁂𑀦𑀸𑀢𑀺 𑀇𑀤𑀁 𑀇𑀦𑁆𑀤𑁆𑀭𑀺𑀬𑀤𑀫𑀦𑀲𑁆𑀲 𑀯𑀺𑀲𑁂𑀲𑀦𑀁, 𑀢𑀲𑁆𑀫𑀸 ‘𑀉𑀧𑁄𑀲𑀣𑀓𑀫𑁆𑀫𑀪𑀽𑀢𑁂𑀦 𑀇𑀦𑁆𑀤𑁆𑀭𑀺𑀬𑀤𑀫𑀦𑁂𑀦𑀸’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺 ¶ . 𑀲𑀻𑀮𑀲𑀁𑀬𑀫𑁂𑀦𑀸𑀢𑀺 𑀓𑀸𑀬𑀺𑀓𑀯𑀸𑀘𑀲𑀺𑀓𑀲𑀁𑀯𑀭𑁂𑀦 ¶ . 𑀲𑀘𑁆𑀘𑀯𑀚𑁆𑀚𑁂𑀦𑀸𑀢𑀺 𑀲𑀘𑁆𑀘𑀯𑀸𑀘𑀸𑀬, 𑀢𑀲𑁆𑀲𑀸 𑀯𑀺𑀲𑀼𑀁 𑀯𑀘𑀦𑀁 𑀮𑁄𑀓𑁂 𑀕𑀭𑀼𑀢𑀭𑀧𑀼𑀜𑁆𑀜𑀲𑀫𑁆𑀫𑀢𑀪𑀸𑀯𑀢𑁄. 𑀬𑀣𑀸 𑀳𑀺 𑀧𑀸𑀧𑀥𑀫𑁆𑀫𑁂𑀲𑀼 𑀫𑀼𑀲𑀸𑀯𑀸𑀤𑁄 𑀕𑀭𑀼, 𑀏𑀯𑀁 𑀧𑀼𑀜𑁆𑀜𑀥𑀫𑁆𑀫𑁂𑀲𑀼 𑀲𑀘𑁆𑀘𑀯𑀸𑀘𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀏𑀓𑀁 𑀥𑀫𑁆𑀫𑀁 𑀅𑀢𑀻𑀢𑀲𑁆𑀲𑀸’’𑀢𑀺𑀆𑀤𑀺. 𑀧𑀯𑀢𑁆𑀢𑀻𑀢𑀺 𑀬𑁄 ‘‘𑀓𑀭𑁄𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀲𑀦𑁆𑀢𑀸𑀦𑁂 𑀨𑀮𑀼𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑀪𑀸𑀯𑁂𑀦 𑀉𑀧𑁆𑀧𑀢𑁆𑀢𑀺. 𑀲𑀩𑁆𑀩𑀣𑀸𑀢𑀺 ‘‘𑀓𑀭𑁄𑀢𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀲𑀩𑁆𑀩𑀧𑁆𑀧𑀓𑀸𑀭𑁂𑀦. 𑀓𑀺𑀭𑀺𑀬𑀫𑁂𑀯 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀭𑀜𑁆𑀜𑀸 𑀧𑀼𑀝𑁆𑀞𑀁 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀩𑁆𑀬𑀸𑀓𑀭𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀁 𑀅𑀯𑀥𑀸𑀭𑀡𑀁 𑀯𑀺𑀧𑀸𑀓𑀧𑀝𑀺𑀓𑁆𑀔𑁂𑀧𑀦𑀺𑀯𑀢𑁆𑀢𑀦𑀢𑁆𑀣𑀁. 𑀬𑁄 𑀳𑀺 𑀓𑀫𑁆𑀫𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀢𑁂𑀦 𑀅𑀢𑁆𑀣𑀢𑁄 𑀯𑀺𑀧𑀸𑀓𑁄𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑁄 𑀏𑀯 𑀦𑀸𑀫 𑀳𑁄𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀓𑀫𑁆𑀫𑀁 𑀧𑀝𑀺𑀩𑀸𑀳𑀦𑁆𑀢𑁂𑀦𑀸𑀧𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁭𑁦-𑁧𑁭𑁨).

𑀧𑀝𑀺𑀭𑀸𑀚𑀽𑀳𑀺 ¶ 𑀅𑀦𑀪𑀺𑀪𑀯𑀦𑀻𑀬𑀪𑀸𑀯𑁂𑀦 𑀯𑀺𑀲𑁂𑀲𑀢𑁄 𑀚𑀺𑀢𑀦𑁆𑀢𑀺 𑀯𑀺𑀚𑀺𑀢𑀁, 𑀆𑀡𑀸𑀧𑀯𑀢𑁆𑀢𑀺𑀤𑁂𑀲𑁄. ‘‘𑀫𑀸 𑀫𑀬𑁆𑀳𑀁 𑀯𑀺𑀚𑀺𑀢𑁂 𑀯𑀲𑀣𑀸’’𑀢𑀺 𑀅𑀧𑀲𑀸𑀤𑀦𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀺𑀳𑁂𑀞𑀦𑀸 𑀧𑀩𑁆𑀩𑀸𑀚𑀦𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀧𑀲𑀸𑀤𑁂𑀢𑀩𑁆𑀩𑀦𑁆𑀢𑀺 𑀯𑀺𑀳𑁂𑀞𑁂𑀢𑀩𑁆𑀩’’𑀦𑁆𑀢𑀺. 𑀉𑀕𑁆𑀕𑀡𑁆𑀳𑀦𑀁 𑀢𑁂𑀦 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 ‘‘𑀏𑀯𑀫𑁂𑀢’’𑀦𑁆𑀢𑀺 𑀉𑀧𑀥𑀸𑀭𑀡𑀁 𑀲𑀮𑁆𑀮𑀓𑁆𑀔𑀡𑀁, 𑀦𑀺𑀓𑀼𑀚𑁆𑀚𑀦𑀁 𑀢𑀲𑁆𑀲 𑀅𑀤𑁆𑀥𑀦𑀺𑀬𑀪𑀸𑀯𑀸𑀧𑀸𑀤𑀦𑀯𑀲𑁂𑀦 𑀘𑀺𑀢𑁆𑀢𑁂𑀦 𑀲𑀦𑁆𑀥𑀸𑀭𑀡𑀁. 𑀢𑀤𑀼𑀪𑀬𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀆𑀳 ‘‘𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀅𑀦𑀺𑀓𑀼𑀚𑁆𑀚𑀦𑁆𑀢𑁄’’𑀢𑀺. 𑀢𑁂𑀦𑀸𑀳 ‘‘𑀲𑀸𑀭𑀯𑀲𑁂𑀦 𑀅𑀕𑁆𑀕𑀡𑁆𑀳𑀦𑁆𑀢𑁄’’𑀢𑀺𑀆𑀤𑀺.

𑀫𑀓𑁆𑀔𑀮𑀺𑀕𑁄𑀲𑀸𑀮𑀯𑀸𑀤𑀯𑀡𑁆𑀡𑀦𑀸

𑁧𑁬𑁮. 𑀉𑀪𑀬𑁂𑀦𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑀧𑀝𑀺𑀲𑁂𑀥𑀦𑀯𑀘𑀦𑁂𑀦. 𑀲𑀁𑀓𑀺𑀮𑁂𑀲𑀧𑀘𑁆𑀘𑀬𑀦𑁆𑀢𑀺 𑀲𑀁𑀓𑀺𑀮𑀺𑀲𑁆𑀲𑀦𑀲𑁆𑀲 𑀫𑀮𑀻𑀦𑀪𑀸𑀯𑀲𑁆𑀲 𑀓𑀸𑀭𑀡𑀁. 𑀯𑀺𑀲𑀼𑀤𑁆𑀥𑀺𑀧𑀘𑁆𑀘𑀬𑀦𑁆𑀢𑀺 𑀲𑀗𑁆𑀓𑀺𑀓𑀺𑀮𑁂𑀲𑀢𑁄 𑀯𑀺𑀲𑀼𑀤𑁆𑀥𑀺𑀬𑀸 𑀯𑁄𑀤𑀸𑀦𑀲𑁆𑀲 𑀓𑀸𑀭𑀡𑀁. 𑀅𑀢𑁆𑀢𑀓𑀸𑀭𑁄𑀢𑀺 ¶ 𑀢𑁂𑀦 𑀢𑁂𑀦 𑀲𑀢𑁆𑀢𑁂𑀦 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀓𑀫𑁆𑀫𑀁 𑀅𑀢𑁆𑀢𑀦𑀸 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀧𑀬𑁄𑀕𑁄. 𑀧𑀭𑀓𑀸𑀭𑀦𑁆𑀢𑀺 𑀧𑀭𑀲𑁆𑀲 𑀯𑀸𑀳𑀲𑀸 𑀇𑀚𑁆𑀛𑀦𑀓𑀧𑀬𑁄𑀚𑀦𑀁. 𑀢𑁂𑀦𑀸𑀳 ‘‘𑀬𑁂𑀦𑀸’’𑀢𑀺𑀆𑀤𑀺. 𑀫𑀳𑀸𑀲𑀢𑁆𑀢𑀦𑁆𑀢𑀺 𑀅𑀦𑁆𑀢𑀺𑀫𑀪𑀯𑀺𑀓𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑀁, 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀲𑁆𑀲𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀦𑀼𑀲𑁆𑀲𑀲𑁄𑀪𑀕𑁆𑀬𑀢𑀦𑁆𑀢𑀺 𑀫𑀦𑀼𑀲𑁆𑀲𑁂𑀲𑀼 𑀲𑀼𑀪𑀕𑀪𑀸𑀯𑀁. 𑀏𑀯𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀓𑀫𑁆𑀫𑀯𑀸𑀤𑀲𑁆𑀲 𑀓𑀺𑀭𑀺𑀬𑀯𑀸𑀤𑀲𑁆𑀲 𑀧𑀝𑀺𑀓𑁆𑀔𑀺𑀧𑀦𑁂𑀦 ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓’’𑀦𑁆𑀢𑀺𑀆𑀤𑀺 (𑀅. 𑀦𑀺. 𑁪.𑁨𑁩𑁨) 𑀦𑀬𑀧𑁆𑀧𑀯𑀢𑁆𑀢𑁂 𑀚𑀺𑀦𑀘𑀓𑁆𑀓𑁂 𑀧𑀳𑀸𑀭𑀁 𑀤𑁂𑀢𑀺 𑀦𑀸𑀫. 𑀦𑀢𑁆𑀣𑀺 𑀧𑀼𑀭𑀺𑀲𑀓𑀸𑀭𑁂𑀢𑀺 𑀬𑀣𑀸𑀯𑀼𑀢𑁆𑀢𑀅𑀢𑁆𑀢𑀓𑀸𑀭𑀧𑀭𑀓𑀸𑀭𑀸𑀪𑀸𑀯𑀢𑁄 𑀏𑀯 𑀲𑀢𑁆𑀢𑀸𑀦𑀁 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁄 𑀦𑀸𑀫 𑀓𑁄𑀘𑀺 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀬𑁂𑀦𑀸’’𑀢𑀺𑀆𑀤𑀺. 𑀦𑀢𑁆𑀣𑀺 𑀩𑀮𑀦𑁆𑀢𑀺 𑀲𑀢𑁆𑀢𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀆𑀯𑀳𑀁 𑀩𑀮𑀁 𑀦𑀸𑀫 𑀓𑀺𑀜𑁆𑀘𑀺 𑀦𑀢𑁆𑀣𑀺. 𑀢𑁂𑀦𑀸𑀳 ¶ ‘‘𑀬𑀫𑁆𑀳𑀻’’𑀢𑀺𑀆𑀤𑀺. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁, 𑀲𑀁𑀓𑀺𑀮𑁂𑀲𑀺𑀓𑀫𑁆𑀧𑀺 𑀘𑀸𑀬𑀁 𑀩𑀮𑀁 𑀧𑀝𑀺𑀓𑁆𑀔𑀺𑀧𑀢𑁂𑀯. 𑀬𑀤𑀺 𑀯𑀻𑀭𑀺𑀬𑀸𑀤𑀻𑀦𑀺 𑀧𑀼𑀭𑀺𑀲𑀓𑀸𑀭𑀯𑁂𑀯𑀘𑀦𑀸𑀦𑀺, 𑀓𑀲𑁆𑀫𑀸 𑀯𑀺𑀲𑀼𑀁 𑀕𑀳𑀡𑀦𑁆𑀢𑀺 𑀆𑀳 ‘‘𑀇𑀤𑀁 𑀦𑁄 𑀯𑀻𑀭𑀺𑀬𑁂𑀦𑀸’’𑀢𑀺𑀆𑀤𑀺. 𑀲𑀤𑁆𑀤𑀢𑁆𑀣𑀢𑁄 𑀧𑀦 𑀢𑀲𑁆𑀲𑀸 𑀢𑀲𑁆𑀲𑀸 𑀓𑀺𑀭𑀺𑀬𑀸𑀬 𑀉𑀲𑁆𑀲𑀦𑁆𑀦𑀝𑁆𑀞𑁂𑀦 𑀩𑀮𑀁. 𑀲𑀽𑀭𑀯𑀻𑀭𑀪𑀸𑀯𑀸𑀯𑀳𑀝𑁆𑀞𑁂𑀦 𑀯𑀻𑀭𑀺𑀬𑀁. 𑀢𑀤𑁂𑀯 𑀤𑀴𑁆𑀳𑀪𑀸𑀯𑀢𑁄, 𑀧𑁄𑀭𑀺𑀲𑀥𑀼𑀭𑀁 𑀯𑀳𑀦𑁆𑀢𑁂𑀦 𑀧𑀯𑀢𑁆𑀢𑁂𑀢𑀩𑁆𑀩𑀢𑁄 𑀘 𑀧𑀼𑀭𑀺𑀲𑀣𑀸𑀫𑁄. 𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀦𑀧𑁆𑀧𑀯𑀢𑁆𑀢𑀺𑀬𑀸 𑀧𑀼𑀭𑀺𑀲𑀧𑀭𑀓𑁆𑀓𑀫𑁄𑀢𑀺 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀢𑁆𑀢𑀬𑁄𑀕𑀢𑁄 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀯𑀺𑀲𑀢𑁆𑀢𑀢𑀸𑀬 𑀲𑀢𑁆𑀢𑀸. 𑀧𑀸𑀡𑀦𑀢𑁄 𑀅𑀲𑁆𑀲𑀲𑀦𑀧𑀲𑁆𑀲𑀲𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀧𑀸𑀡𑀸. 𑀢𑁂 𑀧𑀦 𑀲𑁄 𑀏𑀓𑀺𑀦𑁆𑀤𑁆𑀭𑀺𑀬𑀸𑀤𑀺𑀯𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀯𑀤𑀢𑀻𑀢𑀺 𑀆𑀳 ‘‘𑀏𑀓𑀺𑀦𑁆𑀤𑁆𑀭𑀺𑀬𑁄’’𑀢𑀺𑀆𑀤𑀺. 𑀅𑀡𑁆𑀟𑀓𑁄𑀲𑀸𑀤𑀻𑀲𑀼 𑀪𑀯𑀦𑀢𑁄 ‘‘𑀪𑀽𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀳 ‘‘𑀅𑀡𑁆𑀟𑀓𑁄𑀲…𑀧𑁂… 𑀯𑀤𑀢𑀻’’𑀢𑀺 ¶ . 𑀚𑀻𑀯𑀦𑀢𑁄 𑀧𑀸𑀡𑀁 𑀥𑀸𑀭𑁂𑀦𑁆𑀢𑀸 𑀯𑀺𑀬 𑀯𑀟𑁆𑀠𑀦𑀢𑁄 𑀚𑀻𑀯𑀸. 𑀢𑁂𑀦𑀸𑀳 ‘‘𑀲𑀸𑀮𑀺𑀬𑀯𑀸’’𑀢𑀺𑀆𑀤𑀺. 𑀦𑀢𑁆𑀣𑀺 𑀏𑀢𑁂𑀲𑀁 𑀲𑀁𑀓𑀺𑀮𑁂𑀲𑀯𑀺𑀲𑀼𑀤𑁆𑀥𑀻𑀲𑀼 𑀯𑀲𑁄𑀢𑀺 𑀅𑀯𑀲𑀸. 𑀦𑀢𑁆𑀣𑀺 𑀦𑁂𑀲𑀁 𑀩𑀮𑀁 𑀯𑀻𑀭𑀺𑀬𑀁 ¶ 𑀘𑀸𑀢𑀺 𑀅𑀩𑀮𑀸 𑀅𑀯𑀻𑀭𑀺𑀬𑀸. 𑀦𑀺𑀬𑀢𑀸𑀢𑀺 𑀅𑀘𑁆𑀙𑁂𑀚𑁆𑀚𑀲𑀼𑀢𑁆𑀢𑀸𑀯𑀼𑀢𑀸𑀪𑁂𑀚𑁆𑀚𑀫𑀡𑀺𑀦𑁄 𑀯𑀺𑀬 𑀦𑀺𑀬𑀢𑀧𑁆𑀧𑀯𑀢𑁆𑀢𑀺𑀢𑀸𑀬 𑀕𑀢𑀺𑀚𑀸𑀢𑀺𑀩𑀦𑁆𑀥𑀸𑀧𑀯𑀕𑁆𑀕𑀯𑀲𑁂𑀦 𑀦𑀺𑀬𑀸𑀫𑁄. 𑀢𑀢𑁆𑀣 𑀢𑀢𑁆𑀣 𑀕𑀫𑀦𑀦𑁆𑀢𑀺 𑀙𑀦𑁆𑀦𑀁 𑀅𑀪𑀺𑀚𑀸𑀢𑀻𑀦𑀁 𑀢𑀸𑀲𑀼 𑀢𑀸𑀲𑀼 𑀕𑀢𑀻𑀲𑀼 𑀉𑀧𑀕𑀫𑀦𑀁 𑀲𑀫𑀯𑀸𑀬𑁂𑀦 𑀲𑀫𑀸𑀕𑀫𑁄. 𑀲𑀪𑀸𑀯𑁄𑀬𑁂𑀯𑀸𑀢𑀺 𑀬𑀣𑀸 𑀓𑀡𑁆𑀝𑀓𑀲𑁆𑀲 𑀢𑀺𑀔𑀺𑀡𑀢𑀸, 𑀓𑀧𑀺𑀢𑁆𑀣𑀨𑀮𑀸𑀦𑀁 𑀧𑀭𑀺𑀫𑀡𑁆𑀟𑀮𑀢𑀸, 𑀫𑀺𑀕𑀧𑀓𑁆𑀔𑀻𑀦𑀁 𑀯𑀺𑀘𑀺𑀢𑁆𑀢𑀸𑀓𑀸𑀭𑀢𑀸, 𑀏𑀯𑀁 𑀲𑀩𑁆𑀩𑀲𑁆𑀲𑀸𑀧𑀺 𑀮𑁄𑀓𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀯𑀺𑀦𑀸 𑀢𑀣𑀸 𑀢𑀣𑀸 𑀧𑀭𑀺𑀡𑀸𑀫𑁄 𑀅𑀬𑀁 𑀲𑀪𑀸𑀯𑁄 𑀏𑀯 𑀅𑀓𑀺𑀢𑁆𑀢𑀺𑀫𑁄𑀬𑁂𑀯. 𑀢𑁂𑀦𑀸𑀳 ‘‘𑀬𑁂𑀦 𑀳𑀻’’𑀢𑀺𑀆𑀤𑀺. 𑀙𑀴𑀸𑀪𑀺𑀚𑀸𑀢𑀺𑀬𑁄 𑀧𑀭𑀢𑁄 𑀯𑀺𑀢𑁆𑀣𑀸𑀭𑀻𑀬𑀦𑁆𑀢𑀺. ‘‘𑀲𑀼𑀔𑀜𑁆𑀘 𑀤𑀼𑀓𑁆𑀔𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀻’’𑀢𑀺 𑀯𑀤𑀦𑁆𑀢𑁄 𑀅𑀤𑀼𑀓𑁆𑀔𑀫𑀲𑀼𑀔𑀪𑀽𑀫𑀺𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦 𑀚𑀸𑀦𑀸𑀢𑀻𑀢𑀺 𑀉𑀮𑁆𑀮𑀺𑀗𑁆𑀕𑀦𑁆𑀢𑁄 ‘‘𑀅𑀜𑁆𑀜𑀸 𑀅𑀤𑀼𑀓𑁆𑀔𑀫𑀲𑀼𑀔𑀪𑀽𑀫𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀻’’𑀢𑀺 𑀆𑀳.

𑀧𑀫𑀼𑀔𑀬𑁄𑀦𑀻𑀦𑀦𑁆𑀢𑀺 𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀸𑀤𑀻𑀲𑀼 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸𑀤𑀺𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀯𑀲𑁂𑀦 𑀧𑀥𑀸𑀦𑀬𑁄𑀦𑀻𑀦𑀁. 𑀲𑀝𑁆𑀞𑀺𑀲𑀢𑀸𑀦𑀻𑀢𑀺 𑀙𑀲𑀳𑀲𑁆𑀲𑀸𑀦𑀺. ‘‘𑀧𑀜𑁆𑀘 𑀘 𑀓𑀫𑁆𑀫𑀼𑀦𑁄 𑀲𑀢𑀸𑀦𑀻’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀤𑀲𑁆𑀲𑀦𑀁 ‘‘𑀧𑀜𑁆𑀘𑀓𑀫𑁆𑀫𑀲𑀢𑀸𑀦𑀺 𑀘𑀸’’𑀢𑀺. ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 ‘‘𑀓𑁂𑀯𑀮𑀁 𑀢𑀓𑁆𑀓𑀫𑀢𑁆𑀢𑀓𑁂𑀦 𑀦𑀺𑀭𑀢𑁆𑀣𑀓𑀁 𑀤𑀺𑀝𑁆𑀞𑀺𑀁 𑀤𑀻𑀧𑁂𑀢𑀻’’𑀢𑀺 𑀇𑀫𑀫𑁂𑀯𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀏𑀢𑁆𑀣 𑀘 ‘‘𑀢𑀓𑁆𑀓𑀫𑀢𑁆𑀢𑀓𑁂𑀦𑀸’’𑀢𑀺 𑀇𑀫𑀺𑀦𑀸 𑀬𑀲𑁆𑀫𑀸 𑀢𑀓𑁆𑀓𑀺𑀓𑀸 𑀦𑀺𑀭𑀗𑁆𑀓𑀼𑀲𑀢𑀸𑀬 𑀧𑀭𑀺𑀓𑀧𑁆𑀧𑀦𑀲𑁆𑀲 𑀬𑀁 𑀓𑀺𑀜𑁆𑀘𑀺 𑀅𑀢𑁆𑀢𑀦𑁄 𑀧𑀭𑀺𑀓𑀧𑁆𑀧𑀺𑀢𑀁 𑀲𑀸𑀭𑀢𑁄 ¶ 𑀫𑀜𑁆𑀜𑀫𑀸𑀦𑀸 𑀢𑀣𑁂𑀯 𑀅𑀪𑀺𑀦𑀺𑀯𑀺𑀲𑁆𑀲 𑀢𑀓𑁆𑀓𑀤𑀺𑀝𑁆𑀞𑀺𑀕𑀸𑀳𑀁 𑀕𑀡𑁆𑀳𑀦𑁆𑀢𑀺, 𑀢𑀲𑁆𑀫𑀸 𑀦 𑀢𑁂𑀲𑀁 𑀤𑀺𑀝𑁆𑀞𑀺𑀯𑀢𑁆𑀣𑀼𑀲𑁆𑀫𑀺𑀁 𑀯𑀺𑀜𑁆𑀜𑀽𑀳𑀺 𑀯𑀺𑀘𑀸𑀭𑀡𑀸 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀓𑁂𑀘𑀻𑀢𑀺 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄. 𑀢𑁂 𑀳𑀺 ‘‘𑀧𑀜𑁆𑀘 𑀓𑀫𑁆𑀫𑀸𑀦𑀻𑀢𑀺 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸 𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 ‘𑀧𑀜𑁆𑀘 𑀓𑀫𑁆𑀫𑀸𑀦𑀻’𑀢𑀺 𑀧𑀜𑁆𑀜𑀸𑀧𑁂𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀓𑀫𑁆𑀫𑀦𑁆𑀢𑀺 𑀮𑀤𑁆𑀥𑀻𑀢𑀺 𑀑𑀴𑀸𑀭𑀺𑀓𑀪𑀸𑀯𑀢𑁄 𑀧𑀭𑀺𑀧𑀼𑀡𑁆𑀡𑀓𑀫𑁆𑀫𑀦𑁆𑀢𑀺 𑀮𑀤𑁆𑀥𑀺. 𑀫𑀦𑁄𑀓𑀫𑁆𑀫𑀁 ¶ 𑀅𑀦𑁄𑀴𑀸𑀭𑀺𑀓𑀢𑁆𑀢𑀸 𑀉𑀧𑀟𑁆𑀠𑀓𑀫𑁆𑀫𑀦𑁆𑀢𑀺 𑀮𑀤𑁆𑀥𑀻𑀢𑀺 𑀬𑁄𑀚𑀦𑀸. 𑀤𑁆𑀯𑀝𑁆𑀞𑀺𑀧𑀝𑀺𑀧𑀤𑀸𑀢𑀺 ‘‘𑀤𑁆𑀯𑀸𑀲𑀝𑁆𑀞𑀺 𑀧𑀝𑀺𑀧𑀤𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑁄 ‘‘𑀤𑁆𑀯𑀝𑁆𑀞𑀺𑀧𑀝𑀺𑀧𑀤𑀸’’𑀢𑀺 𑀯𑀤𑀢𑀺. 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂𑀢𑀺 𑀏𑀓𑀲𑁆𑀫𑀺𑀁 𑀫𑀳𑀸𑀓𑀧𑁆𑀧𑁂, 𑀢𑀢𑁆𑀣𑀸𑀧𑀺 𑀘 𑀯𑀺𑀯𑀝𑁆𑀝𑀝𑁆𑀞𑀸𑀬𑀻𑀲𑀜𑁆𑀜𑀺𑀢𑁂 𑀏𑀓𑀲𑁆𑀫𑀺𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀓𑀧𑁆𑀧𑁂.

𑀉𑀭𑀩𑁆𑀪𑁂 𑀳𑀦𑀦𑁆𑀢𑀻𑀢𑀺 𑀑𑀭𑀩𑁆𑀪𑀺𑀓𑀸. 𑀏𑀯𑀁 𑀲𑀽𑀓𑀭𑀺𑀓𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀮𑀼𑀤𑁆𑀤𑀸𑀢𑀺 𑀅𑀜𑁆𑀜𑁂𑀧𑀺 𑀬𑁂 𑀓𑁂𑀘𑀺 𑀫𑀸𑀕𑀯𑀺𑀓𑀦𑁂𑀲𑀸𑀤𑀸. 𑀢𑁂 𑀧𑀸𑀧𑀓𑀫𑁆𑀫𑀧𑀲𑀼𑀢𑀢𑀸𑀬 ‘‘𑀓𑀡𑁆𑀳𑀸𑀪𑀺𑀚𑀸𑀢𑀻𑀢𑀺 𑀯𑀤𑀢𑀺. 𑀪𑀺𑀓𑁆𑀔𑀽’’𑀢𑀺 𑀩𑀼𑀤𑁆𑀥𑀲𑀸𑀲𑀦𑁂 𑀪𑀺𑀓𑁆𑀔𑀽. 𑀢𑁂 𑀓𑀺𑀭 ‘‘𑀲𑀙𑀦𑁆𑀤𑀭𑀸𑀕𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀓𑀡𑁆𑀝𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀔𑀸𑀤𑀦𑁆𑀢𑀻’’𑀢𑀺 𑀯𑀤𑀢𑀺. 𑀓𑀲𑁆𑀫𑀸𑀢𑀺 𑀘𑁂? 𑀬𑀲𑁆𑀫𑀸 ‘‘𑀢𑁂 𑀧𑀡𑀻𑀢𑀧𑀡𑀻𑀢𑁂 𑀧𑀘𑁆𑀘𑀬𑁂 𑀧𑀝𑀺𑀲𑁂𑀯𑀦𑁆𑀢𑀻’’𑀢𑀺 𑀢𑀲𑁆𑀲 𑀫𑀺𑀘𑁆𑀙𑀸𑀕𑀸𑀳𑁄, 𑀢𑀲𑁆𑀫𑀸 𑀜𑀸𑀬𑀮𑀤𑁆𑀥𑁂𑀧𑀺 𑀧𑀘𑁆𑀘𑀬𑁂 𑀪𑀼𑀜𑁆𑀚𑀫𑀸𑀦𑀸 𑀆𑀚𑀻𑀯𑀓𑀲𑀫𑀬𑀲𑁆𑀲 𑀯𑀺𑀮𑁄𑀫𑀕𑀸𑀳𑀺𑀢𑀸𑀬 𑀧𑀘𑁆𑀘𑀬𑁂𑀲𑀼 𑀓𑀡𑁆𑀝𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀔𑀸𑀤𑀦𑁆𑀢𑀺 𑀦𑀸𑀫𑀸𑀢𑀺 𑀯𑀤𑀢𑀻𑀢𑀺 𑀅𑀧𑀭𑁂. 𑀏𑀓𑁂 𑀧𑀩𑁆𑀩𑀚𑀺𑀢𑀸, 𑀬𑁂 𑀲𑀯𑀺𑀲𑁂𑀲𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀸. 𑀢𑀣𑀸 𑀳𑀺 𑀢𑁂 𑀓𑀡𑁆𑀝𑀓𑁂 𑀯𑀢𑁆𑀢𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 ‘‘𑀓𑀡𑁆𑀝𑀓𑀯𑀼𑀢𑁆𑀢𑀺𑀓𑀸’’𑀢𑀺 𑀯𑀼𑀢𑁆𑀢𑀸. 𑀞𑀢𑁆𑀯𑀸 𑀪𑀼𑀜𑁆𑀚𑀦𑀦𑀳𑀸𑀦𑀧𑀝𑀺𑀓𑁆𑀔𑁂𑀧𑀸𑀤𑀺𑀯𑀢𑀲𑀫𑀸𑀬𑁄𑀕𑁂𑀦 𑀧𑀡𑁆𑀟𑀭𑀢𑀭𑀸 ¶ . ‘‘𑀅𑀘𑁂𑀮𑀓𑀲𑀸𑀯𑀓𑀸’’𑀢𑀺 𑀆𑀚𑀻𑀯𑀓𑀲𑀸𑀯𑀓𑁂 𑀯𑀤𑀢𑀺. 𑀢𑁂 𑀓𑀺𑀭 𑀆𑀚𑀻𑀯𑀓𑀮𑀤𑁆𑀥𑀺𑀬𑀸 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀢𑀸𑀬 𑀦𑀺𑀕𑀡𑁆𑀞𑁂𑀳𑀺𑀧𑀺 𑀧𑀡𑁆𑀟𑀭𑀢𑀭𑀸. 𑀦𑀦𑁆𑀤𑀸𑀤𑀬𑁄 𑀳𑀺 𑀢𑀣𑀸𑀭𑀽𑀧𑀁 𑀆𑀚𑀻𑀯𑀓𑀧𑀝𑀺𑀧𑀢𑁆𑀢𑀺𑀁 𑀉𑀓𑁆𑀓𑀁𑀲𑀁 𑀧𑀸𑀧𑁂𑀢𑁆𑀯𑀸 𑀞𑀺𑀢𑀸. 𑀢𑀲𑁆𑀫𑀸 𑀦𑀺𑀕𑀡𑁆𑀞𑁂𑀳𑀺 𑀆𑀚𑀻𑀯𑀓𑀲𑀸𑀯𑀓𑁂𑀳𑀺 𑀘 𑀧𑀡𑁆𑀟𑀭𑀢𑀭𑀸 𑀧𑀭𑀫𑀲𑀼𑀓𑁆𑀓𑀸𑀪𑀺𑀚𑀸𑀢𑀻𑀢𑀺 𑀅𑀬𑀁 𑀢𑀲𑁆𑀲 𑀮𑀤𑁆𑀥𑀺.

𑀧𑀼𑀭𑀺𑀲𑀪𑀽𑀫𑀺𑀬𑁄𑀢𑀺 𑀧𑀥𑀸𑀦𑀧𑀼𑀕𑁆𑀕𑀮𑁂𑀦 𑀦𑀺𑀤𑁆𑀤𑁂𑀲𑁄. 𑀇𑀢𑁆𑀣𑀻𑀦𑀫𑁆𑀧𑀺 𑀢𑀸 𑀪𑀽𑀫𑀺𑀬𑁄 𑀇𑀘𑁆𑀙𑀦𑁆𑀢𑁂𑀯. ‘‘𑀪𑀺𑀓𑁆𑀔𑀼 𑀘 𑀧𑀦𑁆𑀦𑀓𑁄’’𑀢𑀺𑀆𑀤𑀺 𑀢𑁂𑀲𑀁 𑀧𑀸𑀴𑀺𑀬𑁂𑀯. 𑀢𑀢𑁆𑀣 𑀧𑀦𑁆𑀦𑀓𑁄𑀢𑀺 𑀪𑀺𑀓𑁆𑀔𑀸𑀬 𑀯𑀺𑀘𑀭𑀡𑀓𑁄, 𑀢𑁂𑀲𑀁 𑀯𑀸 𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑀺𑀧𑀦𑁆𑀦𑀓𑁄. 𑀚𑀺𑀦𑁄𑀢𑀺 𑀚𑀺𑀡𑁆𑀡𑁄 𑀚𑀭𑀸𑀯𑀲𑁂𑀦 𑀳𑀻𑀦𑀥𑀸𑀢𑀼𑀓𑁄, 𑀅𑀢𑁆𑀢𑀦𑁄 ¶ 𑀯𑀸 𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑀺𑀧𑀓𑁆𑀔𑀁 𑀚𑀺𑀦𑀺𑀢𑁆𑀯𑀸 𑀞𑀺𑀢𑁄. 𑀲𑁄 𑀓𑀺𑀭 𑀢𑀣𑀸𑀪𑀽𑀢𑁄 𑀥𑀫𑁆𑀫𑀫𑁆𑀧𑀺 𑀓𑀲𑁆𑀲𑀘𑀺 𑀦 𑀓𑀣𑁂𑀲𑀺. 𑀢𑁂𑀦𑀸𑀳 ‘‘𑀦 𑀓𑀺𑀜𑁆𑀘𑀺 𑀆𑀳𑀸’’𑀢𑀺. 𑀑𑀝𑁆𑀞𑀯𑀤𑀦𑀸𑀤𑀺𑀯𑀺𑀧𑁆𑀧𑀓𑀸𑀭𑁂 𑀓𑀢𑁂𑀧𑀺 𑀔𑀫𑀦𑀯𑀲𑁂𑀦 𑀦 𑀓𑀺𑀜𑁆𑀘𑀺 𑀯𑀤𑀢𑀻𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀮𑀸𑀪𑀺𑀦𑁆𑀢𑀺 ‘‘𑀲𑁄 𑀦 𑀓𑀼𑀫𑁆𑀪𑀺𑀫𑀼𑀔𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺𑀆𑀤𑀺𑀦𑀸 ¶ (𑀤𑀻. 𑀦𑀺. 𑁧.𑁩𑁯𑁪) 𑀦𑀬𑁂𑀦 𑀯𑀼𑀢𑁆𑀢𑀅𑀮𑀸𑀪𑀳𑁂𑀢𑀼𑀲𑀫𑀸𑀬𑁄𑀕𑁂𑀦 𑀅𑀮𑀸𑀪𑀺𑀁, 𑀢𑀢𑁄𑀬𑁂𑀯 𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑀧𑀭𑁂𑀢𑀢𑀸𑀬 𑀲𑀬𑀦𑀧𑀭𑀸𑀬𑀦𑀁 ‘‘𑀲𑀫𑀡𑀁 𑀧𑀦𑁆𑀦𑀪𑀽𑀫𑀻’’𑀢𑀺 𑀯𑀤𑀢𑀺.

𑀆𑀚𑀻𑀯𑀯𑀼𑀢𑁆𑀢𑀺𑀲𑀢𑀸𑀦𑀻𑀢𑀺 𑀲𑀢𑁆𑀢𑀸𑀦𑀁 𑀆𑀚𑀻𑀯𑀪𑀽𑀢𑀸𑀦𑀺 𑀚𑀻𑀯𑀺𑀓𑀸𑀯𑀼𑀢𑁆𑀢𑀺𑀲𑀢𑀸𑀦𑀺. 𑀧𑀲𑀼𑀕𑁆𑀕𑀳𑀡𑁂𑀦 𑀏𑀴𑀓𑀚𑀸𑀢𑀺 𑀕𑀳𑀺𑀢𑀸, 𑀫𑀺𑀕𑀕𑁆𑀕𑀳𑀡𑁂𑀦 𑀭𑀼𑀭𑀼𑀕𑀯𑀬𑀸𑀤𑀺𑀲𑀩𑁆𑀩𑀫𑀺𑀕𑀚𑀸𑀢𑀺. 𑀩𑀳𑀽 𑀤𑁂𑀯𑀸𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀺𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀯𑀲𑁂𑀦, 𑀢𑁂𑀲𑀁 𑀅𑀦𑁆𑀢𑀭𑀪𑁂𑀤𑀯𑀲𑁂𑀦 𑀩𑀳𑀽 𑀤𑁂𑀯𑀸. 𑀢𑀢𑁆𑀣 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀏𑀓𑀘𑁆𑀘𑀪𑁂𑀤𑁄 𑀫𑀳𑀸𑀲𑀫𑀬𑀲𑀼𑀢𑁆𑀢𑀯𑀲𑁂𑀦 (𑀤𑀻. 𑀦𑀺. 𑁨.𑁩𑁩𑁧) 𑀤𑀻𑀧𑁂𑀢𑀩𑁆𑀩𑁄. 𑀫𑀦𑀼𑀲𑁆𑀲𑀸𑀧𑀺 𑀅𑀦𑀦𑁆𑀢𑀸𑀢𑀺 𑀤𑀻𑀧𑀤𑁂𑀲𑀓𑀼𑀮𑀯𑀁𑀲𑀸𑀚𑀻𑀯𑀸𑀤𑀺𑀯𑀺𑀪𑀸𑀕𑀯𑀲𑁂𑀦 𑀫𑀦𑀼𑀲𑁆𑀲𑀸𑀧𑀺 𑀅𑀦𑀦𑁆𑀢𑀪𑁂𑀤𑀸. 𑀧𑀺𑀲𑀸𑀘𑀸 𑀏𑀯 𑀧𑁂𑀲𑀸𑀘𑀸. 𑀢𑁂 𑀅𑀧𑀭𑀧𑁂𑀢𑀸𑀤𑀬𑁄 𑀫𑀳𑀦𑁆𑀢𑀫𑀳𑀦𑁆𑀢𑀸. 𑀙𑀤𑁆𑀤𑀦𑁆𑀢𑀤𑀳𑀫𑀦𑁆𑀤𑀸𑀓𑀺𑀦𑀺𑀬𑁄 𑀓𑀼𑀯𑀸𑀴𑀺𑀬𑀫𑀼𑀘𑀮𑀺𑀦𑁆𑀤𑀦𑀸𑀫𑁂𑀦 𑀯𑀤𑀢𑀺.

𑀧𑀯𑀼𑀝𑀸𑀢𑀺 𑀧𑀩𑁆𑀩𑀕𑀡𑁆𑀞𑀺𑀓𑀸. 𑀧𑀡𑁆𑀟𑀺𑀢𑁄𑀧𑀺 ¶ …𑀧𑁂… 𑀉𑀤𑁆𑀥𑀁 𑀦 𑀕𑀘𑁆𑀙𑀢𑀺, 𑀓𑀲𑁆𑀫𑀸? 𑀲𑀢𑁆𑀢𑀸𑀦𑀁 𑀲𑀁𑀲𑀭𑀡𑀓𑀸𑀮𑀲𑁆𑀲 𑀦𑀺𑀬𑀢𑀪𑀸𑀯𑀢𑁄. 𑀅𑀧𑀭𑀺𑀧𑀓𑁆𑀓𑀁 𑀲𑀁𑀲𑀭𑀡𑀦𑀺𑀫𑀺𑀢𑁆𑀢𑀁 𑀲𑀻𑀮𑀸𑀤𑀺𑀦𑀸 𑀧𑀭𑀺𑀧𑀸𑀘𑁂𑀢𑀺 𑀦𑀸𑀫 𑀲𑀻𑀖𑀁𑀬𑁂𑀯 𑀯𑀺𑀲𑀼𑀤𑁆𑀥𑀺𑀧𑁆𑀧𑀢𑁆𑀢𑀺𑀬𑀸. 𑀧𑀭𑀺𑀧𑀓𑁆𑀓𑀁 𑀓𑀫𑁆𑀫𑀁 𑀨𑀼𑀲𑁆𑀲 𑀨𑀼𑀲𑁆𑀲 𑀧𑀢𑁆𑀯𑀸 𑀧𑀢𑁆𑀯𑀸 𑀓𑀸𑀮𑁂𑀦 𑀧𑀭𑀺𑀧𑀓𑁆𑀓𑀪𑀸𑀯𑀸𑀦𑀸𑀧𑀸𑀤𑀦𑁂𑀦 𑀩𑁆𑀬𑀦𑁆𑀢𑀺𑀁 𑀓𑀭𑁄𑀢𑀺 𑀦𑀸𑀫.

𑀲𑀼𑀢𑁆𑀢𑀕𑀼𑀴𑁂𑀢𑀺 𑀲𑀼𑀢𑁆𑀢𑀯𑀝𑁆𑀝𑀺𑀬𑀁. ‘‘𑀦𑀺𑀩𑁆𑀩𑁂𑀞𑀺𑀬𑀫𑀸𑀦𑀫𑁂𑀯 𑀧𑀮𑁂𑀢𑀻’’𑀢𑀺 𑀉𑀧𑀫𑀸𑀬 𑀲𑀢𑁆𑀢𑀸𑀦𑀁 𑀲𑀁𑀲𑀸𑀭𑁄 𑀅𑀦𑀼𑀓𑁆𑀓𑀫𑁂𑀦 𑀔𑀻𑀬𑀢𑁂𑀯, 𑀦 𑀢𑀲𑁆𑀲 𑀯𑀟𑁆𑀠𑀢𑀻𑀢𑀺 𑀤𑀲𑁆𑀲𑁂𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑀢𑁆𑀢𑀸.

𑀅𑀚𑀺𑀢𑀓𑁂𑀲𑀓𑀫𑁆𑀩𑀮𑀯𑀸𑀤𑀯𑀡𑁆𑀡𑀦𑀸

𑁧𑁭𑁧. 𑀤𑀺𑀦𑁆𑀦𑀦𑁆𑀢𑀺 ¶ 𑀤𑁂𑀬𑁆𑀬𑀥𑀫𑁆𑀫𑀲𑀻𑀲𑁂𑀦 𑀤𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀤𑀺𑀦𑁆𑀦𑀲𑁆𑀲 𑀨𑀮𑀸𑀪𑀸𑀯𑀁 𑀯𑀤𑀢𑀻’’𑀢𑀺, 𑀤𑀺𑀦𑁆𑀦𑀁 𑀧𑀦 𑀅𑀦𑁆𑀦𑀸𑀤𑀺𑀯𑀢𑁆𑀣𑀼𑀁 𑀓𑀣𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀏𑀲𑁂𑀯 𑀦𑀬𑁄 𑀬𑀺𑀝𑁆𑀞𑀁 𑀳𑀼𑀢𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀫𑀳𑀸𑀬𑀸𑀕𑁄𑀢𑀺 𑀲𑀩𑁆𑀩𑀲𑀸𑀥𑀸𑀭𑀡𑀁 𑀫𑀳𑀸𑀤𑀸𑀦𑀁. 𑀧𑀸𑀳𑀼𑀦𑀓𑀲𑀓𑁆𑀓𑀸𑀭𑁄𑀢𑀺 𑀧𑀸𑀳𑀼𑀦𑀪𑀸𑀯𑁂𑀦 𑀓𑀸𑀢𑀩𑁆𑀩𑀲𑀓𑁆𑀓𑀸𑀭𑁄. 𑀨𑀮𑀦𑁆𑀢𑀺 𑀆𑀦𑀺𑀲𑀁𑀲𑀨𑀮𑀁, 𑀦𑀺𑀲𑁆𑀲𑀦𑁆𑀤𑀨𑀮𑀜𑁆𑀘. 𑀯𑀺𑀧𑀸𑀓𑁄𑀢𑀺 𑀲𑀤𑀺𑀲𑀨𑀮𑀁. 𑀧𑀭𑀮𑁄𑀓𑁂 𑀞𑀺𑀢𑀲𑁆𑀲 𑀅𑀬𑀁 𑀮𑁄𑀓𑁄 𑀦𑀢𑁆𑀣𑀻𑀢𑀺 𑀧𑀭𑀮𑁄𑀓𑁂 𑀞𑀺𑀢𑀲𑁆𑀲 𑀓𑀫𑁆𑀫𑀼𑀦𑀸 𑀮𑀤𑁆𑀥𑀩𑁆𑀩𑁄 𑀅𑀬𑀁 𑀮𑁄𑀓𑁄 𑀦 𑀳𑁄𑀢𑀺. 𑀇𑀥𑀮𑁄𑀓𑁂 𑀞𑀺𑀢𑀲𑁆𑀲𑀸𑀧𑀺 𑀧𑀭𑀮𑁄𑀓𑁄 𑀦𑀢𑁆𑀣𑀻𑀢𑀺 𑀇𑀥𑀮𑁄𑀓𑁂 𑀞𑀺𑀢𑀲𑁆𑀲 𑀓𑀫𑁆𑀫𑀼𑀦𑀸 𑀮𑀤𑁆𑀥𑀩𑁆𑀩𑁄 𑀧𑀭𑀮𑁄𑀓𑁄 𑀦 𑀳𑁄𑀢𑀺. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀲𑀩𑁆𑀩𑁂 ¶ 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑁆𑀢𑀻’’𑀢𑀺. 𑀇𑀫𑁂 𑀲𑀢𑁆𑀢𑀸 𑀬𑀢𑁆𑀣 𑀬𑀢𑁆𑀣 𑀪𑀯𑁂, 𑀬𑁄𑀦𑀺𑀆𑀤𑀻𑀲𑀼 𑀘 𑀞𑀺𑀢𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑁆𑀢𑀺 𑀦𑀺𑀭𑀼𑀤𑀬𑀯𑀺𑀦𑀸𑀲𑀯𑀲𑁂𑀦 𑀯𑀺𑀦𑀲𑁆𑀲𑀦𑁆𑀢𑀺. 𑀨𑀮𑀸𑀪𑀸𑀯𑀯𑀲𑁂𑀦𑀸𑀢𑀺 𑀫𑀸𑀢𑀸𑀧𑀺𑀢𑀽𑀲𑀼 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀻𑀦𑀁 𑀨𑀮𑀲𑁆𑀲 𑀅𑀪𑀸𑀯𑀯𑀲𑁂𑀦 ‘‘𑀦𑀢𑁆𑀣𑀺 𑀫𑀸𑀢𑀸, 𑀦𑀢𑁆𑀣𑀺 𑀧𑀺𑀢𑀸’’𑀢𑀺 𑀯𑀤𑀢𑀺, 𑀦 𑀫𑀸𑀢𑀸𑀧𑀺𑀢𑀽𑀦𑀁, 𑀦𑀸𑀧𑀺 𑀢𑁂𑀲𑀼 𑀇𑀤𑀸𑀦𑀺 𑀓𑀬𑀺𑀭𑀫𑀸𑀦𑀲𑀓𑁆𑀓𑀸𑀭𑀸𑀲𑀓𑁆𑀓𑀸𑀭𑀸𑀦𑀁 𑀅𑀪𑀸𑀯𑀯𑀲𑁂𑀦 𑀢𑁂𑀲𑀁 𑀮𑁄𑀓𑀧𑀘𑁆𑀘𑀓𑁆𑀔𑀢𑁆𑀢𑀸. 𑀧𑀼𑀩𑁆𑀩𑀼𑀴𑀓𑀲𑁆𑀲 𑀯𑀺𑀬 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀉𑀧𑁆𑀧𑀸𑀤𑁄 𑀦𑀸𑀫 𑀓𑁂𑀯𑀮𑁄, 𑀦 𑀘𑀯𑀺𑀢𑁆𑀯𑀸 𑀆𑀕𑀫𑀦𑀧𑀼𑀩𑁆𑀩𑀓𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀘𑀯𑀺𑀢𑁆𑀯𑀸 𑀉𑀧𑀧𑀚𑁆𑀚𑀦𑀓𑀲𑀢𑁆𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀯𑀤𑀢𑀻’’𑀢𑀺. 𑀲𑀫𑀡𑁂𑀦 𑀦𑀸𑀫 𑀬𑀸𑀣𑀸𑀯𑀢𑁄 ¶ 𑀚𑀸𑀦𑀦𑁆𑀢𑁂𑀦 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀅𑀓𑀣𑁂𑀢𑁆𑀯𑀸 𑀲𑀜𑁆𑀜𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀆𑀳𑁄𑀧𑀼𑀭𑀺𑀲𑀺𑀓𑀸 𑀦𑀸𑀫 𑀲𑀺𑀬𑀸. 𑀓𑀺𑀜𑁆𑀳𑀺 𑀧𑀭𑁄 𑀧𑀭𑀲𑁆𑀲 𑀓𑀭𑀺𑀲𑁆𑀲𑀢𑀺? 𑀢𑀣𑀸 𑀘 𑀅𑀢𑁆𑀢𑀦𑁄 𑀲𑀫𑁆𑀧𑀸𑀤𑀦𑀲𑁆𑀲 𑀓𑀲𑁆𑀲𑀘𑀺 𑀅𑀯𑀲𑁆𑀲𑀬𑁄 𑀏𑀯 𑀦 𑀲𑀺𑀬𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑀢𑁄𑀢𑀺 𑀆𑀳 ‘‘𑀬𑁂 𑀇𑀫𑀜𑁆𑀘…𑀧𑁂… 𑀧𑀯𑁂𑀤𑁂𑀦𑁆𑀢𑀻’’𑀢𑀺.

𑀘𑀢𑀽𑀲𑀼 𑀫𑀳𑀸𑀪𑀽𑀢𑁂𑀲𑀼 𑀦𑀺𑀬𑀼𑀢𑁆𑀢𑁄𑀢𑀺 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄. 𑀬𑀣𑀸 𑀧𑀦 𑀫𑀢𑁆𑀢𑀺𑀓𑀸𑀬 𑀦𑀺𑀩𑁆𑀩𑀢𑁆𑀢𑀁 𑀪𑀸𑀚𑀦𑀁 𑀫𑀢𑁆𑀢𑀺𑀓𑀸𑀫𑀬𑀁, 𑀏𑀯𑀁 𑀅𑀬𑀁 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀺 𑀦𑀺𑀩𑁆𑀩𑀢𑁆𑀢𑁄𑀢𑀺 𑀆𑀳 ‘‘𑀘𑀢𑀼𑀫𑀳𑀸𑀪𑀽𑀢𑀫𑀬𑁄’’𑀢𑀺. 𑀅𑀚𑁆𑀛𑀢𑁆𑀢𑀺𑀓𑀧𑀣𑀯𑀻𑀥𑀸𑀢𑀽𑀢𑀺 𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑀸 𑀧𑀣𑀯𑀻𑀥𑀸𑀢𑀼. 𑀩𑀸𑀳𑀺𑀭𑀧𑀣𑀯𑀻𑀥𑀸𑀢𑀼𑀦𑁆𑀢𑀺 𑀩𑀳𑀺𑀤𑁆𑀥𑀸 𑀫𑀳𑀸𑀧𑀣𑀯𑀺𑀁. 𑀉𑀧𑀕𑀘𑁆𑀙𑀢𑀻𑀢𑀺 𑀩𑀸𑀳𑀺𑀭𑀧𑀣𑀯𑀺𑀓𑀸𑀬𑀢𑁄 𑀢𑀤𑁂𑀓𑀤𑁂𑀲𑀪𑀽𑀢𑀸 𑀧𑀣𑀯𑀻 𑀆𑀕𑀦𑁆𑀢𑁆𑀯𑀸 𑀅𑀚𑁆𑀛𑀢𑁆𑀢𑀺𑀓𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀲𑀢𑁆𑀢𑀪𑀸𑀯𑁂𑀦 𑀲𑀡𑁆𑀞𑀺𑀢𑀸 𑀇𑀤𑀸𑀦𑀺 𑀖𑀝𑀸𑀤𑀺𑀕𑀢𑀧𑀣𑀯𑀻 𑀯𑀺𑀬 𑀢𑀫𑁂𑀯 𑀩𑀸𑀳𑀺𑀭𑀧𑀣𑀯𑀺𑀓𑀸𑀬𑀁 𑀉𑀧𑁂𑀢𑀺 𑀉𑀧𑀕𑀘𑁆𑀙𑀢𑀺 𑀲𑀩𑁆𑀩𑀲𑁄 𑀢𑁂𑀦 𑀦𑀺𑀩𑁆𑀩𑀺𑀲𑁂𑀲𑀢𑀁 𑀏𑀓𑀻𑀪𑀸𑀯𑀫𑁂𑀯 𑀕𑀘𑁆𑀙𑀢𑀺. 𑀆𑀧𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀏𑀢𑁆𑀣 𑀧𑀚𑁆𑀚𑀼𑀦𑁆𑀦𑁂𑀦 𑀫𑀳𑀸𑀲𑀫𑀼𑀤𑁆𑀤𑀢𑁄 𑀕𑀳𑀺𑀢𑀆𑀧𑁄 𑀯𑀺𑀬 𑀯𑀲𑁆𑀲𑁄𑀤𑀓𑀪𑀸𑀯𑁂𑀦 𑀧𑀼𑀦𑀧𑀺 𑀫𑀳𑀸𑀲𑀫𑀼𑀤𑁆𑀤𑀫𑁂𑀯, 𑀲𑀽𑀭𑀺𑀬𑀭𑀲𑁆𑀫𑀺𑀢𑁄 𑀕𑀳𑀺𑀢𑀁 𑀇𑀦𑁆𑀤𑀕𑁆𑀕𑀺𑀲𑀗𑁆𑀔𑀸𑀢𑀢𑁂𑀚𑁄 𑀯𑀺𑀬 𑀧𑀼𑀦 𑀲𑀽𑀭𑀺𑀬𑀭𑀲𑁆𑀫𑀺𑀁, 𑀫𑀳𑀸𑀯𑀸𑀬𑀼𑀔𑀦𑁆𑀥𑀢𑁄 𑀦𑀺𑀕𑁆𑀕𑀢𑀫𑀳𑀸𑀯𑀸𑀢𑁄 𑀯𑀺𑀬 𑀢𑀫𑁂𑀯 𑀯𑀸𑀬𑀼𑀔𑀦𑁆𑀥𑀁 𑀉𑀧𑁂𑀢𑀺 𑀉𑀧𑀕𑀘𑁆𑀙𑀢𑀻𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀫𑀦𑀘𑁆𑀙𑀝𑁆𑀞𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀦𑁆𑀢𑀺 𑀢𑁂𑀲𑀁 𑀯𑀺𑀲𑀬𑀸𑀪𑀸𑀯𑀸𑀢𑀺 𑀯𑀤𑀦𑁆𑀢𑀺. 𑀯𑀺𑀲𑀬𑀺𑀕𑀳𑀡𑁂𑀦 𑀳𑀺 𑀯𑀺𑀲𑀬𑀸𑀧𑀺 𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺. 𑀕𑀼𑀡𑀸𑀕𑀼𑀡𑀧𑀤𑀸𑀦𑀻𑀢𑀺 𑀕𑀼𑀡𑀤𑁄𑀲𑀓𑁄𑀝𑁆𑀞𑀸𑀲𑀸. 𑀲𑀭𑀻𑀭𑀫𑁂𑀯 𑀧𑀤𑀸𑀦𑀻𑀢𑀺 𑀅𑀥𑀺𑀧𑁆𑀧𑁂𑀢𑀁 𑀲𑀭𑀻𑀭𑁂𑀦 𑀢𑀁𑀢𑀁𑀓𑀺𑀭𑀺𑀬𑀸𑀬 ¶ 𑀧𑀚𑁆𑀚𑀺𑀢𑀩𑁆𑀩𑀢𑁄. 𑀤𑀩𑁆𑀩𑀦𑁆𑀢𑀺 𑀫𑀼𑀬𑁆𑀳𑀦𑁆𑀢𑀻𑀢𑀺 𑀤𑀢𑁆𑀢𑀽, 𑀫𑀽𑀴𑁆𑀳𑀧𑀼𑀕𑁆𑀕𑀮𑀸. 𑀢𑁂𑀳𑀺 𑀤𑀢𑁆𑀢𑀽𑀳𑀺 ¶ 𑀩𑀸𑀮𑀫𑀦𑀼𑀲𑁆𑀲𑁂𑀳𑀺. ‘‘𑀧𑀭𑀮𑁄𑀓𑁄 𑀅𑀢𑁆𑀣𑀻’’𑀢𑀺 𑀫𑀢𑀺 𑀬𑁂𑀲𑀁, 𑀢𑁂 𑀅𑀢𑁆𑀣𑀺𑀓𑀸, 𑀢𑁂𑀲𑀁 𑀯𑀸𑀤𑁄𑀢𑀺 𑀅𑀢𑁆𑀣𑀺𑀓𑀯𑀸𑀤𑁄, 𑀢𑀁 𑀅𑀢𑁆𑀣𑀺𑀓𑀯𑀸𑀤𑀁.

𑀓𑀫𑁆𑀫𑀁 ¶ 𑀧𑀝𑀺𑀩𑀸𑀳𑀢𑀺 𑀅𑀓𑀺𑀭𑀺𑀬𑀯𑀸𑀤𑀺𑀪𑀸𑀯𑀢𑁄. 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀆𑀬𑀢𑀺𑀁 𑀉𑀧𑀧𑀢𑁆𑀢𑀺𑀬𑀸 𑀧𑀝𑀺𑀓𑁆𑀔𑀺𑀧𑀦𑀢𑁄. 𑀉𑀪𑀬𑀁 𑀧𑀝𑀺𑀩𑀸𑀳𑀢𑀺 𑀲𑀩𑁆𑀩𑀲𑁄 𑀳𑁂𑀢𑀼𑀧𑀝𑀺𑀩𑀸𑀳𑀦𑁂𑀦𑁂𑀯 𑀨𑀮𑀲𑁆𑀲𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸. 𑀉𑀪𑀬𑀦𑁆𑀢𑀺 𑀳𑀺 𑀓𑀫𑁆𑀫𑀁 𑀯𑀺𑀧𑀸𑀓𑀜𑁆𑀘𑀸𑀢𑀺 𑀉𑀪𑀬𑀁. 𑀲𑁄 𑀳𑀺 ‘‘𑀅𑀳𑁂𑀢𑀽 𑀅𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺, 𑀯𑀺𑀲𑀼𑀚𑁆𑀛𑀦𑁆𑀢𑀺 𑀘𑀸’’𑀢𑀺 (𑀤𑀻. 𑀦𑀺. 𑁧.𑁧𑁬𑁮; 𑀫. 𑀦𑀺. 𑁨.𑁧𑁦𑁦, 𑁨𑁨𑁭; 𑀲𑀁. 𑀦𑀺. 𑁩.𑁨𑁧𑁨) 𑀯𑀤𑀦𑁆𑀢𑁄 𑀓𑀫𑁆𑀫𑀲𑁆𑀲 𑀯𑀺𑀬 𑀯𑀺𑀧𑀸𑀓𑀲𑁆𑀲𑀸𑀧𑀺 𑀲𑀁𑀓𑀺𑀮𑁂𑀲𑀯𑀺𑀲𑀼𑀤𑁆𑀥𑀻𑀦𑀁 𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀯𑀘𑀦𑀢𑁄 𑀢𑀤𑀼𑀪𑀬𑀁 𑀧𑀝𑀺𑀩𑀸𑀳𑀢𑀺 𑀦𑀸𑀫. 𑀯𑀺𑀧𑀸𑀓𑁄 𑀧𑀝𑀺𑀩𑀸𑀳𑀺𑀢𑁄 𑀳𑁄𑀢𑀺 𑀅𑀲𑀢𑀺 𑀓𑀫𑁆𑀫𑁂 𑀯𑀺𑀧𑀸𑀓𑀸𑀪𑀸𑀯𑀢𑁄. 𑀓𑀫𑁆𑀫𑀁 𑀧𑀝𑀺𑀩𑀸𑀳𑀺𑀢𑀁 𑀳𑁄𑀢𑀺 𑀅𑀲𑀢𑀺 𑀯𑀺𑀧𑀸𑀓𑁂 𑀓𑀫𑁆𑀫𑀲𑁆𑀲 𑀦𑀺𑀭𑀢𑁆𑀣𑀓𑀪𑀸𑀯𑀸𑀧𑀢𑁆𑀢𑀺𑀢𑁄. 𑀅𑀢𑁆𑀣𑀢𑁄𑀢𑀺 𑀲𑀭𑀽𑀧𑁂𑀦. 𑀉𑀪𑀬𑀧𑁆𑀧𑀝𑀺𑀩𑀸𑀳𑀓𑀸𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀢𑀁𑀢𑀁𑀤𑀺𑀝𑁆𑀞𑀺𑀤𑀻𑀧𑀓𑀪𑀸𑀯𑁂𑀦 𑀧𑀸𑀴𑀺𑀬𑀁 𑀆𑀕𑀢𑀸𑀧𑀺 𑀧𑀘𑁆𑀘𑁂𑀓𑀁 𑀢𑀺𑀯𑀺𑀥𑀤𑀺𑀝𑁆𑀞𑀺𑀓𑀸 𑀏𑀯 𑀉𑀪𑀬𑀧𑀝𑀺𑀩𑀸𑀳𑀓𑀢𑁆𑀢𑀸. 𑀉𑀪𑀬𑀧𑁆𑀧𑀝𑀺𑀩𑀸𑀳𑀓𑀸𑀢𑀺 𑀳𑀺 𑀳𑁂𑀢𑀼𑀯𑀘𑀦𑀁. ‘‘𑀅𑀳𑁂𑀢𑀼𑀓𑀯𑀸𑀤𑀸 𑀘𑁂𑀯𑀸’’𑀢𑀺𑀆𑀤𑀺 𑀧𑀝𑀺𑀜𑁆𑀜𑀸𑀯𑀘𑀦𑀁. 𑀬𑁄 𑀳𑀺 𑀯𑀺𑀧𑀸𑀓𑀧𑀝𑀺𑀩𑀸𑀳𑀦𑁂𑀦 𑀦𑀢𑁆𑀣𑀺𑀓𑀤𑀺𑀝𑁆𑀞𑀺𑀓𑁄 𑀉𑀘𑁆𑀙𑁂𑀤𑀯𑀸𑀤𑀻, 𑀲𑁄 𑀅𑀢𑁆𑀣𑀢𑁄 𑀓𑀫𑁆𑀫𑀧𑀝𑀺𑀩𑀸𑀳𑀦𑁂𑀦 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀓𑁄, 𑀉𑀪𑀬𑀧𑀝𑀺𑀩𑀸𑀳𑀦𑁂𑀦 𑀅𑀳𑁂𑀢𑀼𑀓𑀤𑀺𑀝𑁆𑀞𑀺𑀓𑁄 𑀘 𑀳𑁄𑀢𑀺. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑀲𑀚𑁆𑀛𑀸𑀬𑀦𑁆𑀢𑀻𑀢𑀺 𑀢𑀁 𑀤𑀺𑀝𑁆𑀞𑀺𑀤𑀻𑀧𑀓𑀁 𑀕𑀦𑁆𑀣𑀁 𑀉𑀕𑁆𑀕𑀳𑁂𑀢𑁆𑀯𑀸 𑀧𑀞𑀦𑁆𑀢𑀺. 𑀯𑀻𑀫𑀁𑀲𑀦𑁆𑀢𑀻𑀢𑀺 𑀢𑀲𑁆𑀲 𑀅𑀢𑁆𑀣𑀁 𑀯𑀺𑀘𑀸𑀭𑁂𑀦𑁆𑀢𑀺. ‘‘𑀢𑁂𑀲’’𑀦𑁆𑀢𑀺𑀆𑀤𑀺 𑀯𑀻𑀫𑀁𑀲𑀦𑀸𑀓𑀸𑀭𑀤𑀲𑁆𑀲𑀦𑀁. 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂𑀢𑀺 𑀬𑀣𑀸𑀧𑀭𑀺𑀓𑀧𑁆𑀧𑀺𑀢𑀓𑀫𑁆𑀫𑀨𑀮𑀸𑀪𑀸𑀯𑀸𑀤𑀺𑀓𑁂 ‘‘𑀓𑀭𑁄𑀢𑁄 𑀦 𑀓𑀭𑀻𑀬𑀢𑀺 𑀧𑀸𑀧’’𑀦𑁆𑀢𑀺 𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀬 𑀮𑀤𑁆𑀥𑀺𑀬𑀸 𑀆𑀭𑀫𑁆𑀫𑀡𑁂. 𑀫𑀺𑀘𑁆𑀙𑀸𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 ‘‘𑀓𑀭𑁄𑀢𑁄 𑀦 𑀓𑀭𑀻𑀬𑀢𑀺 𑀧𑀸𑀧’’𑀦𑁆𑀢𑀺𑀆𑀤𑀺𑀯𑀲𑁂𑀦 𑀅𑀦𑀼𑀲𑁆𑀲𑀯𑀽𑀧𑀮𑀤𑁆𑀥𑁂 𑀅𑀢𑁆𑀣𑁂 𑀢𑀤𑀸𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀦𑁂𑀳𑀺 𑀲𑀯𑀺𑀕𑁆𑀕𑀳𑁂 𑀯𑀺𑀬 𑀲𑀭𑀽𑀧𑀢𑁄 𑀘𑀺𑀢𑁆𑀢𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀘𑀺𑀭𑀓𑀸𑀮𑀧𑀭𑀺𑀘𑀬𑁂𑀦 𑀏𑀯𑀫𑁂𑀢𑀦𑁆𑀢𑀺 𑀦𑀺𑀚𑁆𑀛𑀸𑀦𑀓𑁆𑀔𑀫𑀪𑀸𑀯𑀽𑀧𑀕𑀫𑀦𑁂𑀦 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 ¶ 𑀢𑀣𑀸𑀕𑀳𑀺𑀢𑁂 𑀧𑀼𑀦𑀧𑁆𑀧𑀼𑀦𑀁 𑀢𑀣𑁂𑀯 𑀆𑀲𑁂𑀯𑀦𑁆𑀢𑀲𑁆𑀲 𑀩𑀳𑀼𑀮𑀻𑀓𑀭𑁄𑀦𑁆𑀢𑀲𑁆𑀲 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁂𑀦 𑀲𑀫𑀸𑀤𑀺𑀬𑀫𑀸𑀦𑀸 𑀫𑀺𑀘𑁆𑀙𑀸𑀯𑀸𑀬𑀸𑀫𑀽𑀧𑀢𑁆𑀣𑀫𑁆𑀪𑀺𑀢𑀸 𑀅𑀢𑀁𑀲𑀪𑀸𑀯𑀁 ‘‘𑀢𑀁𑀲𑀪𑀸𑀯’’𑀦𑁆𑀢𑀺 𑀕𑀡𑁆𑀳𑀦𑁆𑀢𑀻 𑀫𑀺𑀘𑁆𑀙𑀸𑀲𑀢𑀻𑀢𑀺 𑀮𑀤𑁆𑀥𑀦𑀸𑀫𑀸 𑀢𑀁𑀮𑀤𑁆𑀥𑀺𑀲𑀳𑀕𑀢𑀸 𑀢𑀡𑁆𑀳𑀸 𑀲𑀦𑁆𑀢𑀺𑀝𑁆𑀞𑀢𑀺. 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀻𑀢𑀺 𑀬𑀣𑀸𑀲𑀓𑀁 𑀯𑀺𑀢𑀓𑁆𑀓𑀸𑀤𑀺𑀧𑀘𑁆𑀘𑀬𑀮𑀸𑀪𑁂𑀦 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀅𑀯𑀝𑁆𑀞𑀺𑀢𑀢𑀸𑀬 𑀅𑀦𑁂𑀓𑀕𑁆𑀕𑀢𑀁 𑀧𑀳𑀸𑀬 𑀏𑀓𑀕𑁆𑀕𑀁 𑀅𑀧𑁆𑀧𑀺𑀢𑀁 𑀯𑀺𑀬 𑀳𑁄𑀢𑀺. 𑀘𑀺𑀢𑁆𑀢𑀲𑀻𑀲𑁂𑀦 𑀫𑀺𑀘𑁆𑀙𑀸𑀲𑀫𑀸𑀥𑀺 𑀏𑀯 𑀯𑀼𑀢𑁆𑀢𑁄. 𑀲𑁄𑀧𑀺 𑀳𑀺 𑀧𑀘𑁆𑀘𑀬𑀯𑀺𑀲𑁂𑀲𑁂𑀳𑀺 𑀮𑀤𑁆𑀥𑀪𑀸𑀯𑀦𑀸𑀩𑀮𑁄 𑀈𑀤𑀺𑀲𑁂 𑀞𑀸𑀦𑁂 𑀲𑀫𑀸𑀥𑀸𑀦𑀧𑀢𑀺𑀭𑀽𑀧𑀓𑀺𑀘𑁆𑀘𑀓𑀭𑁄𑀬𑁂𑀯, 𑀯𑀸𑀴𑀯𑀺𑀚𑁆𑀛𑀦𑀸𑀤𑀻𑀲𑀼 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀚𑀯𑀦𑀸𑀦𑀺 𑀚𑀯𑀦𑁆𑀢𑀻𑀢𑀺 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀢𑁂𑀦𑀸𑀓𑀸𑀭𑁂𑀦 𑀧𑀼𑀩𑁆𑀩𑀪𑀸𑀕𑀺𑀬𑁂𑀲𑀼 𑀚𑀯𑀦𑀯𑀸𑀭𑁂𑀲𑀼 𑀧𑀯𑀢𑁆𑀢𑁂𑀲𑀼 ¶ 𑀲𑀩𑁆𑀩𑀧𑀘𑁆𑀙𑀺𑀫𑁂 𑀚𑀯𑀦𑀯𑀸𑀭𑁂 𑀲𑀢𑁆𑀢 𑀚𑀯𑀦𑀸𑀦𑀺 ¶ 𑀚𑀯𑀦𑁆𑀢𑀺. 𑀧𑀞𑀫𑁂 𑀚𑀯𑀦𑁂 𑀲𑀢𑁂𑀓𑀺𑀘𑁆𑀙𑀸 𑀳𑁄𑀦𑁆𑀢𑀺. 𑀢𑀣𑀸 𑀤𑀼𑀢𑀺𑀬𑀸𑀤𑀻𑀲𑀽𑀢𑀺 𑀥𑀫𑁆𑀫𑀲𑀪𑀸𑀯𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁, 𑀦 𑀧𑀦 𑀢𑀲𑁆𑀫𑀺𑀁 𑀔𑀡𑁂 𑀢𑁂𑀲𑀁 𑀢𑀺𑀓𑀺𑀘𑁆𑀙𑀸 𑀓𑁂𑀦𑀘𑀺 𑀲𑀓𑁆𑀓𑀸 𑀓𑀸𑀢𑀼𑀁.

𑀢𑀢𑁆𑀣𑀸𑀢𑀺 𑀢𑁂𑀲𑀼 𑀢𑀻𑀲𑀼 𑀫𑀺𑀘𑁆𑀙𑀸𑀤𑀲𑁆𑀲𑀦𑁂𑀲𑀼. 𑀓𑁄𑀘𑀺 𑀏𑀓𑀁 𑀤𑀲𑁆𑀲𑀦𑀁 𑀑𑀓𑁆𑀓𑀫𑀢𑀻𑀢𑀺 𑀬𑀲𑁆𑀲 𑀏𑀓𑀲𑁆𑀫𑀺𑀁𑀬𑁂𑀯 𑀅𑀪𑀺𑀦𑀺𑀯𑁂𑀲𑁄 𑀆𑀲𑁂𑀯𑀦𑀸 𑀘 𑀧𑀯𑀢𑁆𑀢𑀸, 𑀲𑁄 𑀏𑀓𑀫𑁂𑀯 𑀤𑀲𑁆𑀲𑀦𑀁 𑀑𑀓𑁆𑀓𑀫𑀢𑀺. 𑀬𑀲𑁆𑀲 𑀧𑀦 𑀤𑁆𑀯𑀻𑀲𑀼 𑀢𑀻𑀲𑀼𑀧𑀺 𑀯𑀸 𑀅𑀪𑀺𑀦𑀺𑀯𑁂𑀲𑁄 𑀆𑀲𑁂𑀯𑀦𑀸 𑀘 𑀧𑀯𑀢𑁆𑀢𑀸, 𑀲𑁄 𑀤𑁆𑀯𑁂 𑀢𑀻𑀡𑀺𑀧𑀺 𑀑𑀓𑁆𑀓𑀫𑀢𑀺, 𑀏𑀢𑁂𑀦 𑀬𑀸 𑀧𑀼𑀩𑁆𑀩𑁂 𑀉𑀪𑀬𑀧𑀝𑀺𑀩𑀸𑀳𑀓𑀢𑀸𑀫𑀼𑀔𑁂𑀦 𑀤𑀻𑀧𑀺𑀢𑀸 𑀅𑀢𑁆𑀣𑀲𑀺𑀤𑁆𑀥𑀸 𑀲𑀩𑁆𑀩𑀤𑀺𑀝𑁆𑀞𑀺𑀓𑀢𑀸, 𑀲𑀸 𑀧𑀼𑀩𑁆𑀩𑀪𑀸𑀕𑀺𑀬𑀸. 𑀬𑀸 𑀧𑀦 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑁄𑀓𑁆𑀓𑀦𑁆𑀢𑀺𑀪𑀽𑀢𑀸, 𑀲𑀸 𑀬𑀣𑀸𑀲𑀓𑀁 𑀧𑀘𑁆𑀘𑀬𑀲𑀫𑀼𑀤𑀸𑀕𑀫𑀲𑀺𑀤𑁆𑀥𑀺𑀢𑁄 𑀪𑀺𑀦𑁆𑀦𑀸𑀭𑀫𑁆𑀫𑀡𑀸𑀦𑀁 𑀯𑀺𑀬 𑀯𑀺𑀲𑁂𑀲𑀸𑀥𑀺𑀕𑀫𑀸𑀦𑀁 𑀏𑀓𑀚𑁆𑀛𑀁 𑀅𑀦𑀼𑀧𑁆𑀧𑀢𑁆𑀢𑀺𑀬𑀸 𑀅𑀲𑀗𑁆𑀓𑀺𑀡𑁆𑀡𑀸 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀏𑀓𑀲𑁆𑀫𑀺𑀁 𑀑𑀓𑁆𑀓𑀦𑁆𑀢𑁂𑀧𑀻’’𑀢𑀺𑀆𑀤𑀺𑀦𑀸 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀤𑀺𑀝𑁆𑀞𑀻𑀦𑀁 𑀲𑀫𑀸𑀦𑀩𑀮𑀢𑀁 𑀲𑀫𑀸𑀦𑀨𑀮𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀸 𑀢𑀺𑀲𑁆𑀲𑁄𑀧𑀺 𑀘𑁂𑀢𑀸 𑀏𑀓𑀲𑁆𑀲 𑀉𑀧𑁆𑀧𑀦𑁆𑀦𑀸 𑀅𑀩𑁆𑀩𑁄𑀓𑀺𑀡𑁆𑀡𑀸 𑀏𑀯, 𑀏𑀓𑀸𑀬 𑀯𑀺𑀧𑀸𑀓𑁂 𑀤𑀺𑀦𑁆𑀦𑁂 ¶ 𑀇𑀢𑀭𑀸 𑀅𑀦𑀼𑀩𑀮𑀧𑁆𑀧𑀤𑀸𑀬𑀺𑀓𑀸𑀬𑁄 𑀳𑁄𑀦𑁆𑀢𑀺. ‘‘𑀯𑀝𑁆𑀝𑀔𑀸𑀡𑀼 𑀦𑀸𑀫𑁂𑀲𑀸’’𑀢𑀺 𑀇𑀤𑀁 𑀯𑀘𑀦𑀁 𑀦𑁂𑀬𑁆𑀬𑀢𑁆𑀣𑀁, 𑀦 𑀦𑀻𑀢𑀢𑁆𑀣𑀁. 𑀢𑀣𑀸 𑀳𑀺 𑀧𑀧𑀜𑁆𑀘𑀲𑀽𑀤𑀦𑀺𑀬𑀁 ‘‘𑀓𑀺𑀁 𑀧𑀦𑁂𑀲 𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀦𑀺𑀬𑀢𑁄 𑀳𑁄𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀲𑁆𑀫𑀺𑀁 𑀧𑀻𑀢𑀺? 𑀏𑀓𑀲𑁆𑀫𑀺𑀁𑀬𑁂𑀯 𑀦𑀺𑀬𑀢𑁄, 𑀆𑀲𑁂𑀯𑀦𑀯𑀲𑁂𑀦 𑀧𑀦 𑀪𑀯𑀦𑁆𑀢𑀭𑁂𑀧𑀺 𑀢𑀁 𑀢𑀁 𑀤𑀺𑀝𑁆𑀞𑀺𑀁 𑀭𑁄𑀘𑁂𑀢𑀺 𑀬𑁂𑀯𑀸’’𑀢𑀺 (𑀫. 𑀦𑀺. 𑀅𑀝𑁆𑀞. 𑁩.𑁧𑁨𑁯) 𑀯𑀼𑀢𑁆𑀢𑀁. 𑀅𑀓𑀼𑀲𑀮𑀜𑁆𑀳𑀺 𑀦𑀸𑀫𑁂𑀢𑀁 𑀅𑀩𑀮𑀁 𑀤𑀼𑀩𑁆𑀩𑀮𑀁, 𑀦 𑀓𑀼𑀲𑀮𑀁 𑀯𑀺𑀬 𑀲𑀩𑀮𑀁 𑀫𑀳𑀸𑀩𑀮𑀁. 𑀢𑀲𑁆𑀫𑀸 ‘‘𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀦𑀺𑀬𑀢𑁄’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄 𑀯𑀺𑀬 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑁄𑀧𑀺 𑀅𑀘𑁆𑀘𑀦𑁆𑀢𑀺𑀓𑁄 𑀲𑀺𑀬𑀸, 𑀦 𑀘 𑀅𑀘𑁆𑀘𑀦𑁆𑀢𑀺𑀓𑁄. 𑀬𑀤𑀺 𑀏𑀯𑀁 𑀯𑀝𑁆𑀝𑀔𑀸𑀡𑀼𑀚𑁄𑀢𑀦𑀸 𑀓𑀣𑀦𑁆𑀢𑀺 𑀆𑀳 ‘‘𑀆𑀲𑁂𑀯𑀦𑀯𑀲𑁂𑀦 𑀧𑀦𑀸’’𑀢𑀺𑀆𑀤𑀺. 𑀢𑀲𑁆𑀫𑀸 𑀬𑀣𑀸 ‘‘𑀲𑀓𑀺𑀁 𑀦𑀺𑀫𑀼𑀕𑁆𑀕𑁄𑀧𑀺 𑀦𑀺𑀫𑀼𑀕𑁆𑀕𑁄 𑀏𑀯 𑀩𑀸𑀮𑁄’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀯𑀝𑁆𑀝𑀔𑀸𑀡𑀼𑀚𑁄𑀢𑀦𑀸. 𑀬𑀸𑀤𑀺𑀲𑁂 𑀳𑀺 𑀧𑀘𑁆𑀘𑀬𑁂 𑀧𑀝𑀺𑀘𑁆𑀘 𑀅𑀬𑀁 𑀢𑀁 𑀢𑀁 𑀤𑀲𑁆𑀲𑀦𑀁 𑀑𑀓𑁆𑀓𑀦𑁆𑀢𑁄 𑀧𑀼𑀦 𑀓𑀤𑀸𑀘𑀺 𑀢𑀧𑁆𑀧𑀝𑀺𑀧𑀓𑁆𑀔𑁂 𑀧𑀘𑁆𑀘𑀬𑁂 𑀧𑀝𑀺𑀘𑁆𑀘 𑀢𑀢𑁄 𑀲𑀻𑀲𑀼𑀓𑁆𑀔𑀺𑀧𑀦𑀫𑀲𑁆𑀲 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀢𑀲𑁆𑀫𑀸 ‘‘𑀬𑁂𑀪𑀼𑀬𑁆𑀬𑁂𑀦 𑀳𑀺 𑀏𑀯𑀭𑀽𑀧𑀲𑁆𑀲 𑀪𑀯𑀢𑁄 𑀯𑀼𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀯𑀁 𑀲𑀁𑀲𑀸𑀭𑀔𑀸𑀡𑀼𑀪𑀸𑀯𑀲𑁆𑀲𑀧𑀺 𑀧𑀘𑁆𑀘𑀬𑁄 𑀅𑀧𑀡𑁆𑀡𑀓𑀚𑀸𑀢𑁄, 𑀢𑀲𑁆𑀫𑀸. 𑀪𑀽𑀢𑀺𑀓𑀸𑀫𑁄𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀸𑀦𑀁 𑀯𑀲𑁂𑀦 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀯𑀟𑁆𑀠𑀺𑀓𑀸𑀫𑁄.

𑀧𑀓𑀼𑀥𑀓𑀘𑁆𑀘𑀸𑀬𑀦𑀯𑀸𑀤𑀯𑀡𑁆𑀡𑀦𑀸

𑁧𑁭𑁪. 𑀅𑀓𑀢𑀸𑀢𑀺 ¶ 𑀲𑀫𑁂𑀦 𑀯𑀺𑀲𑀫𑁂𑀦 𑀯𑀸 𑀓𑁂𑀦𑀘𑀺 𑀳𑁂𑀢𑀼𑀦𑀸 𑀦 𑀓𑀢𑀸 𑀦 𑀯𑀺𑀳𑀺𑀢𑀸. 𑀓𑀢𑀯𑀺𑀥𑁄 𑀓𑀭𑀡𑀯𑀺𑀥𑀺 𑀦𑀢𑁆𑀣𑀺 𑀏𑀢𑁂𑀲𑀦𑁆𑀢𑀺 𑀅𑀓𑀢𑀯𑀺𑀥𑀸𑀦𑀸 ¶ . 𑀧𑀤𑀤𑁆𑀯𑀬𑁂𑀦𑀸𑀧𑀺 𑀮𑁄𑀓𑁂 𑀓𑁂𑀦𑀘𑀺 𑀳𑁂𑀢𑀼𑀧𑀘𑁆𑀘𑀬𑁂𑀦 𑀦𑁂𑀲𑀁 𑀅𑀦𑀺𑀩𑁆𑀩𑀢𑁆𑀢𑀦𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀇𑀤𑁆𑀥𑀺𑀬𑀸𑀧𑀺 𑀦 𑀦𑀺𑀫𑁆𑀫𑀺𑀢𑀸𑀢𑀺 𑀓𑀲𑁆𑀲𑀘𑀺 𑀇𑀤𑁆𑀥𑀺𑀫𑀢𑁄 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑀲𑁆𑀲 𑀤𑁂𑀯𑀲𑁆𑀲 ¶ , 𑀇𑀲𑁆𑀲𑀭𑀸𑀤𑀺𑀦𑁄 𑀯𑀸 𑀇𑀤𑁆𑀥𑀺𑀬𑀸𑀧𑀺 𑀦 𑀦𑀺𑀫𑁆𑀫𑀺𑀢𑀸. 𑀅𑀦𑀺𑀫𑁆𑀫𑀸𑀧𑀺𑀢𑀸 𑀓𑀲𑁆𑀲𑀘𑀺 𑀅𑀦𑀺𑀫𑁆𑀫𑀸𑀧𑀺𑀢𑀸. 𑀯𑀼𑀢𑁆𑀢𑀢𑁆𑀣𑀫𑁂𑀯𑀸𑀢𑀺 𑀩𑁆𑀭𑀳𑁆𑀫𑀚𑀸𑀮𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁦) 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀯𑀜𑁆𑀛𑀸𑀢𑀺 𑀯𑀜𑁆𑀛𑀧𑀲𑀼𑀯𑀜𑁆𑀛𑀢𑀸𑀮𑀸𑀤𑀬𑁄 𑀯𑀺𑀬 𑀅𑀨𑀮𑀸, 𑀓𑀲𑁆𑀲𑀘𑀺 𑀅𑀚𑀦𑀓𑀸𑀢𑀺 𑀅𑀢𑁆𑀣𑁄, 𑀏𑀢𑁂𑀦 𑀧𑀣𑀯𑀺𑀓𑀸𑀬𑀸𑀤𑀻𑀦𑀁 𑀭𑀽𑀧𑀸𑀤𑀺𑀚𑀦𑀓𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀭𑀽𑀧𑀲𑀤𑁆𑀤𑀸𑀤𑀬𑁄 𑀳𑀺 𑀧𑀣𑀯𑀺𑀓𑀸𑀬𑀸𑀤𑀻𑀳𑀺 𑀅𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀓𑀸𑀢𑀺 𑀢𑀲𑁆𑀲 𑀮𑀤𑁆𑀥𑀺. 𑀧𑀩𑁆𑀩𑀢𑀓𑀽𑀝𑀁 𑀯𑀺𑀬 𑀞𑀺𑀢𑀸𑀢𑀺 𑀓𑀽𑀝𑀝𑁆𑀞𑀸, 𑀬𑀣𑀸 𑀧𑀩𑁆𑀩𑀢𑀓𑀽𑀝𑀁 𑀓𑁂𑀦𑀘𑀺 𑀅𑀦𑀺𑀩𑁆𑀩𑀢𑁆𑀢𑀺𑀢𑀁, 𑀓𑀲𑁆𑀲𑀘𑀺 𑀘 𑀅𑀦𑀺𑀩𑁆𑀩𑀢𑁆𑀢𑀓𑀁, 𑀏𑀯𑀫𑁂𑀢𑁂 𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀫𑀺𑀤𑀁 ‘‘𑀩𑀻𑀚𑀢𑁄 𑀅𑀗𑁆𑀓𑀼𑀭𑀸𑀤𑀺 𑀚𑀸𑀬𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀯𑀺𑀚𑁆𑀚𑀫𑀸𑀦𑀫𑁂𑀯 𑀢𑀢𑁄 𑀦𑀺𑀓𑁆𑀔𑀫𑀢𑀺, 𑀦 𑀅𑀯𑀺𑀚𑁆𑀚𑀫𑀸𑀦𑀁, 𑀅𑀜𑁆𑀜𑀣𑀸 𑀅𑀜𑁆𑀜𑀢𑁄𑀧𑀺 𑀅𑀜𑁆𑀜𑀲𑁆𑀲 𑀉𑀧𑀮𑀤𑁆𑀥𑀺 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀞𑀺𑀢𑀢𑁆𑀢𑀸𑀢𑀺 𑀦𑀺𑀩𑁆𑀩𑀺𑀓𑀸𑀭𑀸𑀪𑀸𑀯𑁂𑀦 𑀞𑀺𑀢𑀢𑁆𑀢𑀸. 𑀦 𑀘𑀮𑀦𑁆𑀢𑀻𑀢𑀺 𑀯𑀺𑀓𑀸𑀭𑀁 𑀦𑀸𑀧𑀚𑁆𑀚𑀦𑁆𑀢𑀺. 𑀯𑀺𑀓𑀸𑀭𑀸𑀪𑀸𑀯𑀢𑁄 𑀳𑀺 𑀢𑁂𑀲𑀁 𑀲𑀢𑁆𑀢𑀦𑁆𑀦𑀁 𑀓𑀸𑀬𑀸𑀦𑀁 𑀏𑀲𑀺𑀓𑀝𑁆𑀞𑀸𑀬𑀺𑀝𑁆𑀞𑀺𑀢𑀢𑀸. 𑀅𑀦𑀺𑀜𑁆𑀚𑀦𑀜𑁆𑀘 𑀅𑀢𑁆𑀢𑀦𑁄 𑀧𑀓𑀢𑀺𑀬𑀸 𑀅𑀯𑀝𑁆𑀞𑀸𑀦𑀫𑁂𑀯. 𑀢𑁂𑀦𑀸𑀳 ‘‘𑀦 𑀯𑀺𑀧𑀭𑀺𑀡𑀫𑀦𑁆𑀢𑀻’’𑀢𑀺. 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑁆𑀢𑀸 𑀏𑀯 𑀳𑀺 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀦 𑀩𑁆𑀬𑀸𑀩𑀸𑀥𑁂𑀦𑁆𑀢𑀺. 𑀲𑀢𑀺 𑀳𑀺 𑀯𑀺𑀓𑀸𑀭𑀁 𑀆𑀧𑀸𑀤𑁂𑀢𑀩𑁆𑀩𑀢𑀸𑀬 𑀩𑁆𑀬𑀸𑀩𑀸𑀥𑀓𑀢𑀸𑀧𑀺 𑀲𑀺𑀬𑀸, 𑀢𑀣𑀸 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑀢𑀸𑀬 𑀅𑀦𑀼𑀕𑁆𑀕𑀸𑀳𑀓𑀢𑀸𑀢𑀺 𑀢𑀤𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 𑀦𑀸𑀮𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀣𑀯𑀻 𑀏𑀯 𑀓𑀸𑀬𑁂𑀓𑀤𑁂𑀲𑀢𑁆𑀢𑀸 𑀧𑀣𑀯𑀺𑀓𑀸𑀬𑁄. 𑀚𑀻𑀯𑀲𑀢𑁆𑀢𑀫𑀸𑀦𑀁 𑀓𑀸𑀬𑀸𑀦𑀁 𑀦𑀺𑀘𑁆𑀘𑀢𑀸𑀬 𑀦𑀺𑀩𑁆𑀩𑀺𑀓𑀸𑀭𑀪𑀸𑀯𑀢𑁄 𑀦 ¶ 𑀳𑀦𑁆𑀢𑀩𑁆𑀩𑀢𑀸, 𑀦 𑀖𑀸𑀢𑁂𑀢𑀩𑁆𑀩𑀢𑀸 𑀘𑀸𑀢𑀺 𑀦𑁂𑀯 𑀓𑁄𑀘𑀺 𑀳𑀦𑁆𑀢𑀸 𑀯𑀸 𑀖𑀸𑀢𑁂𑀢𑀸 𑀯𑀸, 𑀢𑁂𑀦𑁂𑀯𑀸𑀳 ‘‘𑀲𑀢𑁆𑀢𑀦𑁆𑀦𑀁 𑀢𑁆𑀯𑁂𑀯 𑀓𑀸𑀬𑀸𑀦’’𑀦𑁆𑀢𑀺𑀆𑀤𑀺. 𑀬𑀤𑀺 𑀓𑁄𑀘𑀺 𑀳𑀦𑁆𑀢𑀸 𑀦𑀢𑁆𑀣𑀺, 𑀓𑀣𑀁 𑀲𑀢𑁆𑀣𑀧𑁆𑀧𑀳𑀸𑀭𑁄𑀢𑀺 𑀆𑀳 ‘‘𑀬𑀣𑀸 𑀫𑀼𑀕𑁆𑀕𑀭𑀸𑀲𑀺 𑀆𑀤𑀻𑀲𑀽’’𑀢𑀺𑀆𑀤𑀺. 𑀓𑁂𑀯𑀮𑀁 𑀲𑀜𑁆𑀜𑀸𑀫𑀢𑁆𑀢𑀫𑁂𑀯 𑀳𑁄𑀢𑀺. 𑀳𑀦𑀦𑀖𑀸𑀢𑀦𑀸𑀤𑀺 𑀧𑀦 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑁂𑀯 𑀓𑀸𑀬𑀸𑀦𑀁 𑀅𑀯𑀺𑀓𑁄𑀧𑀦𑀻𑀬𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑀺𑀕𑀡𑁆𑀞𑀦𑀸𑀝𑀧𑀼𑀢𑁆𑀢𑀯𑀸𑀤𑀯𑀡𑁆𑀡𑀦𑀸

𑁧𑁭𑁭. 𑀘𑀢𑁆𑀢𑀸𑀭𑁄 𑀬𑀸𑀫𑀸 𑀪𑀸𑀕𑀸 𑀘𑀢𑀼𑀬𑀸𑀫𑀸, 𑀘𑀢𑀼𑀬𑀸𑀫𑀸 𑀏𑀯 𑀘𑀸𑀢𑀼𑀬𑀸𑀫𑀸, 𑀪𑀸𑀕𑀢𑁆𑀣𑁄 𑀳𑀺 𑀇𑀥 𑀬𑀸𑀫-𑀲𑀤𑁆𑀤𑁄 𑀬𑀣𑀸 ‘‘𑀭𑀢𑁆𑀢𑀺𑀬𑀸 𑀧𑀞𑀫𑁄 𑀬𑀸𑀫𑁄’’𑀢𑀺 ¶ . 𑀲𑁄 𑀧𑀦𑁂𑀢𑁆𑀣 𑀪𑀸𑀕𑁄 𑀲𑀁𑀯𑀭𑀮𑀓𑁆𑀔𑀡𑁄𑀢𑀺 𑀆𑀳 ‘‘𑀘𑀸𑀢𑀼𑀬𑀸𑀫𑀲𑀁𑀯𑀼𑀢𑁄𑀢𑀺 𑀘𑀢𑀼𑀓𑁄𑀝𑁆𑀞𑀸𑀲𑁂𑀦 𑀲𑀁𑀯𑀭𑁂𑀦 𑀲𑀁𑀯𑀼𑀢𑁄’’𑀢𑀺. 𑀧𑀝𑀺𑀓𑁆𑀔𑀺𑀢𑁆𑀢𑀲𑀩𑁆𑀩𑀲𑀻𑀢𑁄𑀤𑀓𑁄𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀲𑀩𑁆𑀩𑀲𑀻𑀢𑁄𑀤𑀓𑀧𑀭𑀺𑀪𑁄𑀕𑁄. 𑀲𑀩𑁆𑀩𑁂𑀦 𑀧𑀸𑀧𑀯𑀸𑀭𑀡𑁂𑀦 𑀬𑀼𑀢𑁆𑀢𑁄𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀲𑀁𑀯𑀭𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀥𑀼𑀢𑀧𑀸𑀧𑁄𑀢𑀺 𑀲𑀩𑁆𑀩𑁂𑀦 𑀦𑀺𑀚𑁆𑀚𑀭𑀮𑀓𑁆𑀔𑀡𑁂𑀦 𑀧𑀸𑀧𑀯𑀸𑀭𑀡𑁂𑀦 𑀯𑀺𑀥𑀼𑀢𑀧𑀸𑀧𑁄. 𑀨𑀼𑀝𑁆𑀞𑁄𑀢𑀺 𑀅𑀝𑁆𑀞𑀦𑁆𑀦𑀫𑁆𑀧𑀺 𑀓𑀫𑁆𑀫𑀸𑀦𑀁 𑀔𑁂𑀧𑀦𑁂𑀦 𑀫𑁄𑀓𑁆𑀔𑀧𑁆𑀧𑀢𑁆𑀢𑀺𑀬𑀸 𑀓𑀫𑁆𑀫𑀓𑁆𑀔𑀬𑀮𑀓𑁆𑀔𑀡𑁂𑀦 𑀲𑀩𑁆𑀩𑁂𑀦 𑀧𑀸𑀧𑀯𑀸𑀭𑀡𑁂𑀦 𑀨𑀼𑀝𑁆𑀞𑁄 𑀢𑀁 𑀧𑀢𑁆𑀯𑀸 𑀞𑀺𑀢𑁄. 𑀓𑁄𑀝𑀺𑀧𑁆𑀧𑀢𑁆𑀢𑀘𑀺𑀢𑁆𑀢𑁄𑀢𑀺 𑀫𑁄𑀓𑁆𑀔𑀸𑀥𑀺𑀕𑀫𑁂𑀦𑁂𑀯 𑀉𑀢𑁆𑀢𑀫𑀫𑀭𑀺𑀬𑀸𑀤𑀧𑁆𑀧𑀢𑁆𑀢𑀘𑀺𑀢𑁆𑀢𑁄. 𑀬𑀢𑀢𑁆𑀢𑁄𑀢𑀺 𑀓𑀸𑀬𑀸𑀤𑀻𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀁𑀬𑀫𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 𑀲𑀁𑀬𑀢𑀘𑀺𑀢𑁆𑀢𑁄. 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑁄𑀢𑀺 𑀦𑀺𑀲𑁆𑀲𑁂𑀲𑀢𑁄 𑀲𑀼𑀝𑁆𑀞𑀼 𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑁄. 𑀲𑀸𑀲𑀦𑀸𑀦𑀼𑀮𑁄𑀫𑀁 𑀦𑀸𑀫 𑀧𑀸𑀧𑀯𑀸𑀭𑀡𑁂𑀦 𑀬𑀼𑀢𑁆𑀢𑀢𑀸. 𑀢𑁂𑀦𑀸𑀳 ‘‘𑀥𑀼𑀢𑀧𑀸𑀧𑁄’’𑀢𑀺𑀆𑀤𑀺. 𑀅𑀲𑀼𑀤𑁆𑀥𑀮𑀤𑁆𑀥𑀺𑀢𑀸𑀬𑀸𑀢𑀺 ‘‘𑀅𑀢𑁆𑀣𑀺 𑀚𑀻𑀯𑁄, 𑀲𑁄 𑀘 𑀲𑀺𑀬𑀸 𑀦𑀺𑀘𑁆𑀘𑁄, 𑀲𑀺𑀬𑀸 𑀅𑀦𑀺𑀘𑁆𑀘𑁄’’𑀢𑀺 𑀏𑀯𑀫𑀸𑀤𑀺𑀅𑀲𑀼𑀤𑁆𑀥𑀮𑀤𑁆𑀥𑀺𑀢𑀸𑀬 ¶ . 𑀲𑀩𑁆𑀩𑀸𑀢𑀺 𑀓𑀫𑁆𑀫𑀧𑀓𑀢𑀺𑀯𑀺𑀪𑀸𑀕𑀸𑀤𑀺𑀯𑀺𑀲𑀬𑀸 𑀲𑀩𑁆𑀩𑀸 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑁄. 𑀤𑀺𑀝𑁆𑀞𑀺𑀬𑁂 𑀯𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑁄 𑀏𑀯 𑀚𑀸𑀢𑀸.

𑀲𑀜𑁆𑀘𑀬𑀩𑁂𑀮𑀝𑁆𑀞𑀧𑀼𑀢𑁆𑀢𑀯𑀸𑀤𑀯𑀡𑁆𑀡𑀦𑀸

𑁧𑁭𑁯-𑁧𑁮𑁧. 𑀅𑀫𑀭𑀸𑀯𑀺𑀓𑁆𑀔𑁂𑀧𑁂 ¶ 𑀯𑀼𑀢𑁆𑀢𑀦𑀬𑁄 𑀏𑀯𑀸𑀢𑀺 𑀩𑁆𑀭𑀳𑁆𑀫𑀚𑀸𑀮𑁂 𑀅𑀫𑀭𑀸𑀯𑀺𑀓𑁆𑀔𑁂𑀧𑀯𑀸𑀤𑀲𑀁𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁬𑁧-𑁬𑁩) 𑀯𑀼𑀢𑁆𑀢𑀦𑀬𑁄 𑀏𑀯 𑀯𑀺𑀓𑁆𑀔𑁂𑀧𑀩𑁆𑀬𑀸𑀓𑀭𑀡𑀪𑀸𑀯𑀢𑁄, 𑀢𑀣𑁂𑀯 𑀘𑁂𑀢𑁆𑀣 𑀯𑀺𑀓𑁆𑀔𑁂𑀧𑀯𑀸𑀤𑀲𑁆𑀲 𑀆𑀕𑀢𑀢𑁆𑀢𑀸.

𑀧𑀞𑀫𑀲𑀦𑁆𑀤𑀺𑀝𑁆𑀞𑀺𑀓𑀲𑀸𑀫𑀜𑁆𑀜𑀨𑀮𑀯𑀡𑁆𑀡𑀦𑀸

𑁧𑁮𑁩. 𑀬𑀣𑀸 𑀢𑁂 𑀭𑀼𑀘𑁆𑀘𑁂𑀬𑁆𑀬𑀸𑀢𑀺 𑀇𑀤𑀸𑀦𑀺 𑀫𑀬𑀸 𑀧𑀼𑀘𑁆𑀙𑀺𑀬𑀫𑀸𑀦𑁄 𑀅𑀢𑁆𑀣𑁄 𑀬𑀣𑀸 𑀢𑀯 𑀘𑀺𑀢𑁆𑀢𑁂 𑀭𑁄𑀘𑁂𑀬𑁆𑀬. 𑀖𑀭𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀚𑀸𑀢𑁄 𑀅𑀦𑁆𑀢𑁄𑀚𑀸𑀢𑁄. 𑀥𑀦𑁂𑀦 𑀓𑀻𑀢𑁄 𑀥𑀦𑀓𑁆𑀓𑀻𑀢𑁄. 𑀩𑀦𑁆𑀥𑀕𑁆𑀕𑀸𑀳𑀕𑀳𑀺𑀢𑁄 𑀓𑀭𑀫𑀭𑀸𑀦𑀻𑀢𑁄. 𑀲𑀸𑀫𑀦𑁆𑀢𑀺 𑀲𑀬𑀫𑁂𑀯. 𑀤𑀸𑀲𑀩𑁆𑀬𑀦𑁆𑀢𑀺 𑀤𑀸𑀲𑀪𑀸𑀯𑀁. 𑀓𑁄𑀘𑀺 𑀤𑀸𑀲𑁄𑀧𑀺 𑀲𑀫𑀸𑀦𑁄 𑀅𑀮𑀲𑁄 𑀓𑀫𑁆𑀫𑀁 𑀅𑀓𑀭𑁄𑀦𑁆𑀢𑁄 ‘‘𑀓𑀫𑁆𑀫𑀓𑀸𑀭𑁄’’𑀢𑀺 𑀦 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀅𑀦𑀮𑀲𑁄 𑀓𑀫𑁆𑀫𑀓𑀭𑀡𑀲𑀻𑀮𑁄𑀬𑁂𑀯𑀸’’𑀢𑀺. 𑀧𑀞𑀫𑀫𑁂𑀯𑀸𑀢𑀺 𑀆𑀲𑀦𑁆𑀦𑀢𑀭𑀝𑁆𑀞𑀸𑀦𑀽𑀧𑀲𑀗𑁆𑀓𑀫𑀦𑀢𑁄 𑀧𑀕𑁂𑀯 𑀧𑀼𑀭𑁂𑀢𑀭𑀫𑁂𑀯. 𑀧𑀘𑁆𑀙𑀸𑀢𑀺 𑀲𑀸𑀫𑀺𑀓𑀲𑁆𑀲 𑀦𑀺𑀧𑀚𑁆𑀚𑀸𑀬 𑀧𑀘𑁆𑀙𑀸. 𑀲𑀬𑀦𑀢𑁄 𑀅𑀯𑀼𑀝𑁆𑀞𑀺𑀢𑁂𑀢𑀺 𑀭𑀢𑁆𑀢𑀺𑀬𑀸 𑀯𑀺𑀪𑀸𑀬𑀦𑀯𑁂𑀮𑀸𑀬 𑀲𑁂𑀬𑁆𑀬𑀢𑁄 𑀅𑀯𑀼𑀝𑁆𑀞𑀺𑀢𑁂. 𑀧𑀘𑁆𑀘𑀽𑀲𑀓𑀸𑀮𑀢𑁄 𑀧𑀝𑁆𑀞𑀸𑀬𑀸𑀢𑀺 𑀅𑀢𑀻𑀢𑀸𑀬 ¶ 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀓𑀸𑀮𑀢𑁄 𑀧𑀝𑁆𑀞𑀸𑀬. 𑀬𑀸𑀯 𑀲𑀸𑀫𑀺𑀦𑁄 𑀭𑀢𑁆𑀢𑀺𑀁 𑀦𑀺𑀤𑁆𑀤𑁄𑀓𑁆𑀓𑀫𑀦𑀦𑁆𑀢𑀺 𑀅𑀧𑀭𑀸𑀬 𑀧𑀤𑁄𑀲𑀯𑁂𑀮𑀸𑀬𑀁 𑀬𑀸𑀯 𑀦𑀺𑀤𑁆𑀤𑁄𑀓𑁆𑀓𑀫𑀦𑀁. 𑀓𑀺𑀁 𑀓𑀸𑀭𑀦𑁆𑀢𑀺 𑀓𑀺𑀁 𑀓𑀭𑀡𑀻𑀬𑀁, 𑀓𑀺𑀁𑀓𑀸𑀭𑀪𑀸𑀯𑀢𑁄 𑀧𑀼𑀘𑁆𑀙𑀺𑀢𑁆𑀯𑀸 𑀓𑀸𑀢𑀩𑁆𑀩𑀯𑁂𑀬𑁆𑀬𑀸𑀯𑀘𑁆𑀘𑀦𑁆𑀢𑀺 𑀅𑀢𑁆𑀣𑁄.

𑀤𑁂𑀯𑁄 𑀯𑀺𑀬𑀸𑀢𑀺 𑀆𑀥𑀺𑀧𑀘𑁆𑀘𑀧𑀭𑀺𑀯𑀸𑀭𑀸𑀤𑀺𑀲𑀫𑁆𑀧𑀢𑁆𑀢𑀺𑀲𑀫𑀦𑁆𑀦𑀸𑀕𑀢𑁄 𑀧𑀥𑀸𑀦𑀤𑁂𑀯𑁄 𑀯𑀺𑀬. 𑀲𑁄 𑀯𑀢𑀲𑁆𑀲𑀸𑀳𑀦𑁆𑀢𑀺 𑀲𑁄 𑀯𑀢 𑀅𑀲𑁆𑀲𑀁 𑀅𑀳𑀁. 𑀲𑁄 𑀭𑀸𑀚𑀸 𑀯𑀺𑀬 𑀅𑀳𑀫𑁆𑀧𑀺 𑀪𑀯𑁂𑀬𑁆𑀬𑀁, 𑀓𑀣𑀁 𑀧𑀼𑀜𑁆𑀜𑀸𑀦𑀺 𑀓𑀭𑁂𑀬𑁆𑀬𑀁, 𑀬𑀤𑀺 𑀧𑀼𑀜𑁆𑀜𑀸𑀦𑀺 𑀉𑀴𑀸𑀭𑀸𑀦𑀺 𑀓𑀭𑁂𑀬𑁆𑀬𑀦𑁆𑀢𑀺 𑀬𑁄𑀚𑀦𑀸. ‘‘𑀲𑁄 𑀯𑀢𑀲𑁆𑀲’𑀲𑁆𑀲’’𑀦𑁆𑀢𑀺 𑀧𑀸𑀞𑁂 𑀲𑁄 𑀭𑀸𑀚𑀸 𑀅𑀲𑁆𑀲 𑀅𑀳𑀁 𑀅𑀲𑁆𑀲𑀁 𑀯𑀢, 𑀬𑀤𑀺 𑀧𑀼𑀜𑁆𑀜𑀸𑀦𑀺 𑀓𑀭𑁂𑀬𑁆𑀬𑀦𑁆𑀢𑀺 𑀬𑁄𑀚𑀦𑀸. 𑀢𑁂𑀦𑀸𑀳 ‘‘𑀅𑀬𑀫𑁂𑀯𑀢𑁆𑀣𑁄’’𑀢𑀺. 𑀅𑀲𑁆𑀲𑀦𑁆𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑀧𑁆𑀧𑀬𑁄𑀕𑁂 𑀅𑀳𑀁-𑀲𑀤𑁆𑀤𑁄 𑀅𑀧𑁆𑀧𑀬𑀼𑀢𑁆𑀢𑁄𑀧𑀺 𑀧𑀬𑀼𑀢𑁆𑀢𑁄 𑀏𑀯 𑀳𑁄𑀢𑀺. 𑀬𑀸𑀯𑀚𑀻𑀯𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺 𑀤𑀸𑀢𑀼𑀦𑁆𑀢𑀺 𑀬𑀸𑀯𑀚𑀻𑀯𑀁 𑀤𑀸𑀦𑀢𑁆𑀣𑀸𑀬 𑀉𑀲𑁆𑀲𑀸𑀳𑀁 𑀓𑀭𑁄𑀦𑁆𑀢𑁄𑀧𑀺 𑀬𑀁 𑀭𑀸𑀚𑀸 𑀏𑀓𑀁 𑀤𑀺𑀯𑀲𑀁 𑀤𑁂𑀢𑀺 ¶ , 𑀢𑀢𑁄 𑀲𑀢𑀪𑀸𑀕𑀫𑁆𑀧𑀺 𑀤𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺. 𑀢𑀲𑁆𑀫𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻𑀢𑀺 𑀧𑀩𑁆𑀩𑀚𑁆𑀚𑀸𑀬𑀁 𑀉𑀲𑁆𑀲𑀸𑀳𑀁 𑀓𑀢𑁆𑀯𑀸𑀢𑀺 𑀬𑁄𑀚𑀦𑀸.

𑀓𑀸𑀬𑁂𑀦 ¶ 𑀲𑀁𑀯𑀼𑀢𑁄𑀢𑀺 𑀓𑀸𑀬𑁂𑀦 𑀲𑀁𑀯𑀭𑀺𑀢𑀩𑁆𑀩𑀁 𑀓𑀸𑀬𑀤𑁆𑀯𑀸𑀭𑁂𑀦 𑀧𑀯𑀢𑁆𑀢𑀦𑀓𑀁 𑀧𑀸𑀧𑀥𑀫𑁆𑀫𑀁 𑀲𑀁𑀯𑀭𑀺𑀢𑁆𑀯𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀓𑀸𑀬𑁂𑀦 𑀧𑀺𑀳𑀺𑀢𑁄 𑀳𑀼𑀢𑁆𑀯𑀸’’𑀢𑀺𑀆𑀤𑀺. 𑀖𑀸𑀲𑀘𑁆𑀙𑀸𑀤𑀦𑁂𑀦 𑀧𑀭𑀫𑀢𑀸𑀬𑀸𑀢𑀺 𑀖𑀸𑀲𑀘𑁆𑀙𑀸𑀤𑀦𑀧𑀭𑀺𑀬𑁂𑀲𑀦𑁂 𑀲𑀮𑁆𑀮𑁂𑀔𑀯𑀲𑁂𑀦 𑀧𑀭𑀫𑀢𑀸𑀬, 𑀉𑀓𑁆𑀓𑀝𑁆𑀞𑀪𑀸𑀯𑁂 𑀲𑀡𑁆𑀞𑀺𑀢𑁄 𑀖𑀸𑀲𑀘𑁆𑀙𑀸𑀤𑀦𑀫𑁂𑀯 𑀯𑀸 𑀧𑀭𑀫𑀁 𑀧𑀭𑀸 𑀓𑁄𑀝𑀺 𑀏𑀢𑀲𑁆𑀲, 𑀦 𑀢𑀢𑁄 𑀧𑀭𑀁 𑀓𑀺𑀜𑁆𑀘𑀺 𑀆𑀫𑀺𑀲𑀚𑀸𑀢𑀁 𑀧𑀭𑀺𑀬𑁂𑀲𑀢𑀺 𑀧𑀘𑁆𑀘𑀸𑀲𑀺𑀲𑀢𑀺 𑀘𑀸𑀢𑀺 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑁄, 𑀢𑀩𑁆𑀪𑀸𑀯𑁄 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑀢𑀸, 𑀢𑀲𑁆𑀲𑀸 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑀢𑀸𑀬. 𑀯𑀺𑀯𑁂𑀓𑀝𑁆𑀞𑀓𑀸𑀬𑀸𑀦𑀦𑁆𑀢𑀺 𑀕𑀡𑀲𑀗𑁆𑀕𑀡𑀺𑀓𑀢𑁄 𑀧𑀯𑀺𑀯𑀺𑀢𑁆𑀢𑁂 𑀞𑀺𑀢𑀓𑀸𑀬𑀸𑀦𑀁. 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀸𑀦𑀦𑁆𑀢𑀺 𑀛𑀸𑀦𑀸𑀪𑀺𑀭𑀢𑀸𑀦𑀁. 𑀢𑀸𑀬 𑀏𑀯 𑀛𑀸𑀦𑀸𑀪𑀺𑀭𑀢𑀺𑀬𑀸 𑀧𑀭𑀫𑀁 𑀉𑀢𑁆𑀢𑀫𑀁 𑀯𑁄𑀤𑀸𑀦𑀁 𑀯𑀺𑀲𑀼𑀤𑁆𑀥𑀺𑀁 𑀧𑀢𑁆𑀢𑀢𑀸𑀬 𑀧𑀭𑀫𑀯𑁄𑀤𑀸𑀦𑀧𑁆𑀧𑀢𑁆𑀢𑀸𑀦𑀁. 𑀓𑀺𑀮𑁂𑀲𑀽𑀧𑀥𑀺𑀅𑀪𑀺𑀲𑀗𑁆𑀔𑀸𑀭𑀽𑀧𑀥𑀻𑀦𑀁 𑀅𑀘𑁆𑀘𑀦𑁆𑀢𑀯𑀺𑀕𑀫𑁂𑀦 𑀦𑀺𑀭𑀼𑀧𑀥𑀻𑀦𑀁. 𑀯𑀺𑀲𑀗𑁆𑀔𑀸𑀭𑀕𑀢𑀸𑀦𑀦𑁆𑀢𑀺 𑀅𑀥𑀺𑀕𑀢𑀦𑀺𑀩𑁆𑀩𑀸𑀦𑀸𑀦𑀁. 𑀏𑀢𑁆𑀣 𑀘 𑀧𑀞𑀫𑁄 𑀯𑀺𑀯𑁂𑀓𑁄 𑀇𑀢𑀭𑁂𑀳𑀺 𑀤𑁆𑀯𑀻𑀳𑀺 𑀯𑀺𑀯𑁂𑀓𑁂𑀳𑀺 𑀲𑀳𑀸𑀧𑀺 𑀧𑀢𑁆𑀢𑀩𑁆𑀩𑁄 𑀯𑀺𑀦𑀸𑀧𑀺, 𑀢𑀣𑀸 𑀤𑀼𑀢𑀺𑀬𑁄. 𑀢𑀢𑀺𑀬𑁄 𑀧𑀦 𑀇𑀢𑀭𑁂𑀳𑀺 𑀤𑁆𑀯𑀻𑀳𑀺 𑀲𑀳𑁂𑀯 𑀧𑀢𑁆𑀢𑀩𑁆𑀩𑁄, 𑀦 𑀯𑀺𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀕𑀡𑁂 𑀚𑀦𑀲𑀫𑀸𑀕𑀫𑁂 𑀲𑀦𑁆𑀦𑀺𑀧𑀢𑀦𑀁 𑀕𑀡𑀲𑀗𑁆𑀕𑀡𑀺𑀓𑀸, 𑀢𑀁 𑀧𑀳𑀸𑀬 𑀏𑀓𑁄 𑀯𑀺𑀳𑀭𑀢𑀺 𑀘𑀭𑀢𑀺 𑀧𑀼𑀕𑁆𑀕𑀮𑀯𑀲𑁂𑀦 𑀅𑀲𑀳𑀸𑀬𑀢𑁆𑀢𑀸. 𑀘𑀺𑀢𑁆𑀢𑁂 𑀓𑀺𑀮𑁂𑀲𑀸𑀦𑀁 𑀲𑀦𑁆𑀦𑀺𑀧𑀢𑀦𑀁 𑀘𑀺𑀢𑁆𑀢𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀸, 𑀢𑀁 𑀧𑀳𑀸𑀬 𑀏𑀓𑁄 𑀯𑀺𑀳𑀭𑀢𑀺 𑀓𑀺𑀮𑁂𑀲𑀯𑀲𑁂𑀦 𑀅𑀲𑀳𑀸𑀬𑀢𑁆𑀢𑀸. 𑀫𑀕𑁆𑀕𑀲𑁆𑀲 ¶ 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑁆𑀢𑀸, 𑀕𑁄𑀢𑁆𑀭𑀪𑀼𑀆𑀤𑀻𑀦𑀜𑁆𑀘 𑀆𑀭𑀫𑁆𑀫𑀡𑀫𑀢𑁆𑀢𑀢𑁆𑀢𑀸 𑀦 𑀢𑁂𑀲𑀁 𑀯𑀲𑁂𑀦 𑀲𑀸𑀢𑀺𑀲𑀬𑀸 𑀦𑀺𑀩𑁆𑀩𑀼𑀢𑀺𑀲𑀼𑀔𑀲𑀫𑁆𑀨𑀼𑀲𑀦𑀸, 𑀨𑀮𑀲𑀫𑀸𑀧𑀢𑁆𑀢𑀺𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀲𑀸𑀢𑀺𑀲𑀬𑀸𑀢𑀺 𑀆𑀳 ‘‘𑀨𑀮𑀲𑀫𑀸𑀧𑀢𑁆𑀢𑀺𑀁 𑀯𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀯𑀸 𑀧𑀯𑀺𑀲𑀺𑀢𑁆𑀯𑀸’’𑀢𑀺. 𑀨𑀮𑀧𑀭𑀺𑀬𑁄𑀲𑀸𑀦𑁄 𑀳𑀺 𑀦𑀺𑀭𑁄𑀥𑁄𑀢𑀺.

𑁧𑁮𑁪. 𑀅𑀪𑀺𑀳𑀭𑀺𑀢𑁆𑀯𑀸𑀢𑀺 𑀅𑀪𑀺𑀫𑀼𑀔𑀻𑀪𑀸𑀯𑁂𑀦 𑀦𑁂𑀢𑁆𑀯𑀸. ‘‘𑀅𑀳𑀁 𑀘𑀻𑀯𑀭𑀸𑀤𑀻𑀳𑀺 𑀧𑀬𑁄𑀚𑀦𑀁 𑀲𑀸𑀥𑁂𑀲𑁆𑀲𑀸𑀫𑀻’’𑀢𑀺 𑀯𑀘𑀦𑀲𑁂𑀲𑁄. 𑀲𑀧𑁆𑀧𑀸𑀬𑀦𑁆𑀢𑀺 ¶ 𑀲𑀩𑁆𑀩𑀕𑁂𑀮𑀜𑁆𑀜𑀧𑀳𑀭𑀡𑀯𑀲𑁂𑀦 𑀉𑀧𑀓𑀸𑀭𑀸𑀯𑀳𑀁. 𑀪𑀸𑀯𑀺𑀦𑀸 𑀅𑀦𑀢𑁆𑀣𑀢𑁄 𑀧𑀭𑀺𑀧𑀸𑀮𑀦𑀯𑀲𑁂𑀦 𑀕𑁄𑀧𑀦𑀸 𑀭𑀓𑁆𑀔𑀸𑀕𑀼𑀢𑁆𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀦𑀺𑀲𑁂𑀥𑀯𑀲𑁂𑀦 𑀆𑀯𑀭𑀡𑀕𑀼𑀢𑁆𑀢𑀺.

𑀤𑀼𑀢𑀺𑀬𑀲𑀦𑁆𑀤𑀺𑀝𑁆𑀞𑀺𑀓𑀲𑀸𑀫𑀜𑁆𑀜𑀨𑀮𑀯𑀡𑁆𑀡𑀦𑀸

𑁧𑁮𑁬. 𑀓𑀲𑀢𑀻𑀢𑀺 𑀓𑀲𑀺𑀁 𑀓𑀭𑁄𑀢𑀺. 𑀕𑀳𑀧𑀢𑀺𑀓𑁄𑀢𑀺 𑀏𑀢𑁆𑀣 𑀓-𑀲𑀤𑁆𑀤𑁄 𑀅𑀧𑁆𑀧𑀢𑁆𑀣𑁄𑀢𑀺 𑀆𑀳 ‘‘𑀏𑀓𑀕𑁂𑀳𑀫𑀢𑁆𑀢𑁂 𑀚𑁂𑀝𑁆𑀞𑀓𑁄’’𑀢𑀺, 𑀢𑁂𑀦 𑀅𑀦𑁂𑀓𑀓𑀼𑀮𑀚𑁂𑀝𑁆𑀞𑀓𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀓𑀭𑀁 𑀓𑀭𑁄𑀢𑀻𑀢𑀺 𑀓𑀭𑀁 𑀲𑀫𑁆𑀧𑀸𑀤𑁂𑀢𑀺. 𑀯𑀟𑁆𑀠𑁂𑀢𑀻𑀢𑀺 𑀉𑀧𑀭𑀽𑀧𑀭𑀺 𑀲𑀫𑁆𑀧𑀸𑀤𑀦𑁂𑀦 𑀯𑀟𑁆𑀠𑁂𑀢𑀺. 𑀏𑀯𑀁 𑀅𑀧𑁆𑀧𑀫𑁆𑀧𑀺 𑀧𑀳𑀸𑀬 𑀧𑀩𑁆𑀩𑀚𑀺𑀢𑀼𑀁 𑀤𑀼𑀓𑁆𑀓𑀭𑀦𑁆𑀢𑀺 𑀅𑀬𑀫𑀢𑁆𑀣𑁄 𑀮𑀝𑀼𑀓𑀺𑀓𑁄𑀧𑀫𑀲𑀼𑀢𑁆𑀢𑁂𑀦 (𑀫. 𑀦𑀺. 𑁨.𑁧𑁫𑁧, 𑁧𑁫𑁨) 𑀤𑀻𑀧𑁂𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀲𑁂𑀬𑁆𑀬𑀣𑀸𑀧𑀺, 𑀉𑀤𑀸𑀬𑀺, 𑀧𑀼𑀭𑀺𑀲𑁄 𑀤𑀮𑀺𑀤𑁆𑀤𑁄 𑀅𑀲𑁆𑀲𑀓𑁄 𑀅𑀦𑀸𑀴𑁆𑀳𑀺𑀬𑁄, 𑀢𑀲𑁆𑀲𑀲𑁆𑀲 𑀏𑀓𑀁 𑀅𑀕𑀸𑀭𑀓𑀁 𑀑𑀮𑀼𑀕𑁆𑀕𑀯𑀺𑀮𑀼𑀕𑁆𑀕𑀁 𑀓𑀸𑀓𑀸𑀢𑀺𑀤𑀸𑀬𑀺𑀁 𑀦𑀧𑀭𑀫𑀭𑀽𑀧’’𑀦𑁆𑀢𑀺 𑀯𑀺𑀢𑁆𑀣𑀸𑀭𑁄. 𑀬𑀤𑀺 𑀅𑀧𑁆𑀧𑀫𑁆𑀧𑀺 𑀪𑁄𑀕𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑀼𑀁 𑀤𑀼𑀓𑁆𑀓𑀭𑀁, 𑀓𑀲𑁆𑀫𑀸 𑀤𑀸𑀲𑀯𑀸𑀭𑁂 𑀪𑁄𑀕𑀕𑁆𑀕𑀳𑀡𑀁 𑀦 𑀓𑀢𑀦𑁆𑀢𑀺 𑀆𑀳 ‘‘𑀤𑀸𑀲𑀯𑀸𑀭𑁂 𑀧𑀦𑀸’’𑀢𑀺𑀆𑀤𑀺. 𑀬𑀣𑀸 ¶ 𑀘 𑀤𑀸𑀲𑀲𑁆𑀲 𑀪𑁄𑀕𑀸𑀧𑀺 𑀅𑀪𑁄𑀕𑀸 𑀧𑀭𑀸𑀬𑀢𑁆𑀢𑀪𑀸𑀯𑀢𑁄, 𑀏𑀯𑀁 𑀜𑀸𑀢𑀬𑁄 𑀧𑀻𑀢𑀺 𑀤𑀸𑀲𑀯𑀸𑀭𑁂 𑀜𑀸𑀢𑀺𑀧𑀭𑀺𑀯𑀝𑁆𑀝𑀕𑁆𑀕𑀳𑀡𑀫𑁆𑀧𑀺 𑀦 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀡𑀻𑀢𑀢𑀭𑀲𑀸𑀫𑀜𑁆𑀜𑀨𑀮𑀯𑀡𑁆𑀡𑀦𑀸

𑁧𑁮𑁯. 𑀏𑀯𑀭𑀽𑀧𑀸𑀳𑀻𑀢𑀺 𑀬𑀣𑀸𑀯𑀼𑀢𑁆𑀢𑀤𑀸𑀲𑀓𑀲𑁆𑀲𑀓𑀽𑀧𑀫𑀸𑀲𑀤𑀺𑀲𑀸𑀳𑀺 𑀉𑀧𑀫𑀸𑀳𑀺 𑀲𑀸𑀫𑀜𑁆𑀜𑀨𑀮𑀁 𑀤𑀻𑀧𑁂𑀢𑀼𑀁 𑀧𑀳𑁄𑀢𑀺 𑀪𑀕𑀯𑀸 𑀲𑀓𑀮𑀫𑁆𑀧𑀺 𑀭𑀢𑁆𑀢𑀺𑀦𑁆𑀤𑀺𑀯𑀁 𑀢𑀢𑁄 𑀪𑀺𑀬𑁆𑀬𑁄𑀧𑀺 𑀅𑀦𑀦𑁆𑀢𑀧𑀝𑀺𑀪𑀸𑀦𑀢𑀸𑀬 𑀯𑀺𑀘𑀺𑀢𑁆𑀢𑀦𑀬𑀤𑁂𑀲𑀦𑀪𑀸𑀯𑀢𑁄. 𑀢𑀣𑀸𑀧𑀻𑀢𑀺 𑀲𑀢𑀺𑀧𑀺 𑀤𑁂𑀲𑀦𑀸𑀬 𑀉𑀢𑁆𑀢𑀭𑀼𑀢𑁆𑀢𑀭𑀸𑀥𑀺𑀓𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀪𑀸𑀯𑁂.

𑀏𑀓𑀢𑁆𑀣𑀫𑁂𑀢𑀁 𑀧𑀤𑀁 𑀲𑀸𑀥𑀼𑀲𑀤𑁆𑀤𑀲𑁆𑀲𑁂𑀯 𑀓-𑀓𑀸𑀭𑁂𑀦 𑀯𑀟𑁆𑀠𑀺𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸, 𑀢𑁂𑀦𑁂𑀯 𑀲𑀸𑀥𑀼𑀓-𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀤𑀦𑁆𑀢𑁂𑀦 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀲𑀸𑀥𑀼-𑀲𑀤𑁆𑀤𑁄 𑀉𑀤𑀸𑀳𑀝𑁄. 𑀆𑀬𑀸𑀘𑀦𑁂𑀢𑀺 𑀅𑀪𑀺𑀫𑀼𑀔𑀬𑀸𑀘𑀦𑁂, 𑀅𑀪𑀺𑀧𑀢𑁆𑀣𑀦𑀸𑀬𑀦𑁆𑀢𑀺 𑀅𑀢𑁆𑀣𑁄 ¶ . 𑀲𑀫𑁆𑀧𑀝𑀺𑀘𑁆𑀙𑀦𑁂𑀢𑀺 𑀧𑀝𑀺𑀕𑁆𑀕𑀡𑁆𑀳𑀦𑁂 ¶ . 𑀲𑀫𑁆𑀧𑀳𑀁𑀲𑀦𑁂𑀢𑀺 𑀲𑀁𑀯𑀺𑀚𑁆𑀚𑀫𑀸𑀦𑀕𑀼𑀡𑀯𑀲𑁂𑀦 𑀳𑀁𑀲𑀦𑁂 𑀢𑁄𑀲𑀦𑁂, 𑀉𑀤𑀕𑁆𑀕𑀢𑀸𑀓𑀭𑀡𑁂𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀭𑀼𑀘𑀻𑀢𑀺 𑀧𑀼𑀜𑁆𑀜𑀓𑀸𑀫𑁄. 𑀧𑀜𑁆𑀜𑀸𑀡𑀯𑀸𑀢𑀺 𑀧𑀜𑁆𑀜𑀯𑀸. 𑀅𑀤𑁆𑀤𑀼𑀩𑁆𑀪𑁄𑀢𑀺 𑀅𑀤𑀽𑀲𑀓𑁄, 𑀅𑀦𑀼𑀧𑀖𑀸𑀢𑀓𑁄𑀢𑀺 𑀅𑀢𑁆𑀣𑁄. 𑀇𑀥𑀸𑀧𑀻𑀢𑀺 𑀇𑀫𑀲𑁆𑀫𑀺𑀁 𑀲𑀸𑀫𑀜𑁆𑀜𑀨𑀮𑁂𑀧𑀺. 𑀅𑀬𑀁 𑀲𑀸𑀥𑀼-𑀲𑀤𑁆𑀤𑁄. 𑀤𑀴𑁆𑀳𑀻𑀓𑀫𑁆𑀫𑁂𑀢𑀺 𑀲𑀓𑁆𑀓𑀘𑁆𑀘 𑀓𑀺𑀭𑀺𑀬𑀸𑀬𑀁. 𑀆𑀡𑀢𑁆𑀢𑀺𑀬𑀦𑁆𑀢𑀺 𑀆𑀡𑀸𑀧𑀦𑁂. ‘‘𑀲𑀼𑀡𑁄𑀳𑀺 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀻’’𑀢𑀺 𑀳𑀺 𑀯𑀼𑀢𑁆𑀢𑁂 𑀲𑀸𑀥𑀼𑀓-𑀲𑀤𑁆𑀤𑁂𑀦 𑀲𑀯𑀦𑀫𑀦𑀲𑀺𑀓𑀸𑀭𑀸𑀦𑀁 𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸 𑀯𑀺𑀬 𑀢𑀤𑀸𑀡𑀸𑀧𑀦𑀫𑁆𑀧𑀺 𑀚𑁄𑀢𑀺𑀢𑀁 𑀳𑁄𑀢𑀺, 𑀆𑀬𑀸𑀘𑀦𑀢𑁆𑀣𑀢𑀸 𑀯𑀺𑀬 𑀘𑀲𑁆𑀲 𑀆𑀡𑀸𑀧𑀦𑀢𑁆𑀣𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀦𑁆𑀤𑀭𑁂𑀧𑀻𑀢𑀺 𑀲𑀼𑀦𑁆𑀤𑀭𑀢𑁆𑀣𑁂𑀧𑀺. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑁂𑀦 𑀲𑀸𑀥𑀼𑀓-𑀲𑀤𑁆𑀤𑀲𑁆𑀲 𑀅𑀢𑁆𑀣𑀢𑁆𑀢𑀬𑁂𑀦 𑀧𑀓𑀸𑀲𑀺𑀢𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀴𑁆𑀳𑀻𑀓𑀫𑁆𑀫𑀢𑁆𑀣𑁂𑀦 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀫𑀦𑀲𑀺 𑀓𑀭𑁄𑀳𑀻𑀢𑀺 𑀏𑀢𑁆𑀣 𑀫𑀦𑀲𑀺𑀓𑀸𑀭𑁄 𑀦 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀦𑀮𑀓𑁆𑀔𑀡𑁄, 𑀅𑀣 𑀔𑁄 𑀯𑀻𑀣𑀺𑀧𑀝𑀺𑀧𑀸𑀤𑀦𑀚𑀯𑀦𑀧𑀝𑀺𑀧𑀸𑀤𑀦𑀫𑀦𑀲𑀺𑀓𑀸𑀭𑀧𑀼𑀩𑁆𑀩𑀓𑀁 𑀘𑀺𑀢𑁆𑀢𑁂 𑀞𑀧𑀦𑀮𑀓𑁆𑀔𑀡𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀯𑀚𑁆𑀚𑀸’’𑀢𑀺𑀆𑀤𑀺𑀫𑀸𑀳. 𑀲𑁄𑀢𑀺𑀦𑁆𑀤𑁆𑀭𑀺𑀬𑀯𑀺𑀓𑁆𑀔𑁂𑀧𑀯𑀸𑀭𑀡𑀁 𑀲𑀯𑀦𑁂 𑀦𑀺𑀬𑁄𑀚𑀦𑀯𑀲𑁂𑀦 𑀓𑀺𑀭𑀺𑀬𑀦𑁆𑀢𑀭𑀧𑀝𑀺𑀲𑁂𑀥𑀦𑀪𑀸𑀯𑀢𑁄, 𑀲𑁄𑀢𑀁 𑀑𑀤𑀳𑀸𑀢𑀺 𑀅𑀢𑁆𑀣𑁄. 𑀫𑀦𑀺𑀦𑁆𑀤𑁆𑀭𑀺𑀬𑀯𑀺𑀓𑁆𑀔𑁂𑀧𑀯𑀸𑀭𑀡𑀁 𑀅𑀜𑁆𑀜𑀘𑀺𑀦𑁆𑀢𑀸𑀧𑀝𑀺𑀲𑁂𑀥𑀦𑀢𑁄. 𑀩𑁆𑀬𑀜𑁆𑀚𑀦𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑀯𑀸𑀭𑀡𑀁 ‘‘𑀲𑀸𑀥𑀼𑀓’’𑀦𑁆𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸. 𑀧𑀘𑁆𑀙𑀺𑀫𑀲𑁆𑀲 𑀅𑀢𑁆𑀣𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑀯𑀸𑀭𑀡𑁂𑀧𑀺 𑀏𑀲𑁂𑀯 𑀦𑀬𑁄. 𑀥𑀸𑀭𑀡𑀽𑀧𑀧𑀭𑀺𑀓𑁆𑀔𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀢𑀼𑀮𑀦𑀢𑀻𑀭𑀡𑀸𑀤𑀺𑀓𑁂, 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀥𑁂 𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀩𑁆𑀬𑀜𑁆𑀚𑀦𑁄𑀢𑀺 𑀏𑀢𑁆𑀣 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀩𑁆𑀬𑀜𑁆𑀚𑀬𑀢𑀻𑀢𑀺 𑀩𑁆𑀬𑀜𑁆𑀚𑀦𑀁, 𑀲𑀪𑀸𑀯𑀦𑀺𑀭𑀼𑀢𑁆𑀢𑀺. 𑀲𑀳 𑀩𑁆𑀬𑀜𑁆𑀚𑀦𑁂𑀦𑀸𑀢𑀺 𑀲𑀩𑁆𑀬𑀜𑁆𑀚𑀦𑁄, 𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀲𑀸𑀢𑁆𑀣𑁄𑀢𑀺 𑀅𑀭𑀡𑀻𑀬𑀢𑁄 𑀉𑀧𑀕𑀦𑁆𑀢𑀩𑁆𑀩𑀢𑁄 𑀅𑀦𑀼𑀥𑀸𑀢𑀩𑁆𑀩𑀢𑁄 𑀅𑀢𑁆𑀣𑁄, 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀤𑀺𑀓𑁄 ¶ . 𑀢𑁂𑀦 𑀲𑀳 𑀅𑀢𑁆𑀣𑁂𑀦𑀸𑀢𑀺 𑀲𑀸𑀢𑁆𑀣𑁄, 𑀅𑀢𑁆𑀣𑀲𑀫𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀕𑀫𑁆𑀪𑀻𑀭𑁄𑀢𑀺𑀆𑀤𑀻𑀲𑀼 𑀥𑀫𑁆𑀫𑁄 𑀦𑀸𑀫 𑀢𑀦𑁆𑀢𑀺. 𑀤𑁂𑀲𑀦𑀸 ¶ 𑀦𑀸𑀫 𑀢𑀲𑁆𑀲𑀸 𑀫𑀦𑀲𑀸 𑀯𑀯𑀢𑁆𑀣𑀸𑀧𑀺𑀢𑀸𑀬 𑀢𑀦𑁆𑀢𑀺𑀬𑀸 𑀤𑁂𑀲𑀦𑀸. 𑀅𑀢𑁆𑀣𑁄 𑀦𑀸𑀫 𑀢𑀦𑁆𑀢𑀺𑀬𑀸 𑀅𑀢𑁆𑀣𑁄. 𑀧𑀝𑀺𑀯𑁂𑀥𑁄 𑀦𑀸𑀫 𑀢𑀦𑁆𑀢𑀺𑀬𑀸, 𑀢𑀦𑁆𑀢𑀺𑀅𑀢𑁆𑀣𑀲𑁆𑀲 𑀘 𑀬𑀣𑀸𑀪𑀽𑀢𑀸𑀯𑀩𑁄𑀥𑁄. 𑀬𑀲𑁆𑀫𑀸 𑀘𑁂𑀢𑁂 𑀥𑀫𑁆𑀫𑀤𑁂𑀲𑀦𑀸 𑀅𑀢𑁆𑀣𑀧𑁆𑀧𑀝𑀺𑀯𑁂𑀥𑀸 𑀲𑀲𑀸𑀤𑀻𑀳𑀺 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑁄 𑀫𑀦𑁆𑀤𑀩𑀼𑀤𑁆𑀥𑀻𑀳𑀺 𑀤𑀼𑀓𑁆𑀔𑁄𑀕𑀸𑀳𑀸, 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀸 𑀘, 𑀢𑀲𑁆𑀫𑀸 𑀕𑀫𑁆𑀪𑀻𑀭𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀲𑁆𑀫𑀸 𑀅𑀬𑀁 𑀥𑀫𑁆𑀫𑁄…𑀧𑁂… 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀻’’𑀢𑀺. 𑀏𑀢𑁆𑀣 𑀘 𑀧𑀝𑀺𑀯𑁂𑀥𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄 𑀥𑀫𑁆𑀫𑀢𑁆𑀣𑀸𑀦𑀁, 𑀤𑁂𑀲𑀦𑀸𑀜𑀸𑀡𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄 𑀤𑁂𑀲𑀦𑀸𑀬 𑀤𑀼𑀓𑁆𑀔𑁄𑀕𑀸𑀳𑀢𑀸, 𑀧𑀝𑀺𑀯𑁂𑀥𑀲𑁆𑀲 𑀧𑀦 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬, 𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀘 𑀤𑀼𑀓𑁆𑀓𑀭𑀪𑀸𑀯𑀢𑁄 𑀤𑀼𑀓𑁆𑀔𑁄𑀕𑀸𑀳𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀤𑁂𑀲𑀦𑀁 𑀦𑀸𑀫 ¶ 𑀉𑀤𑁆𑀤𑀺𑀲𑀦𑀁, 𑀢𑀲𑁆𑀲 𑀦𑀺𑀤𑁆𑀤𑀺𑀲𑀦𑀁 𑀪𑀸𑀲𑀦𑀦𑁆𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀯𑀺𑀢𑁆𑀣𑀸𑀭𑀢𑁄 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. 𑀧𑀭𑀺𑀩𑁆𑀬𑀢𑁆𑀢𑀁 𑀓𑀣𑀦𑀜𑁆𑀳𑀺 𑀪𑀸𑀲𑀦𑀁, 𑀢𑁂𑀦𑀸𑀳 ‘‘𑀤𑁂𑀲𑁂𑀲𑁆𑀲𑀸𑀫𑀻𑀢𑀺…𑀧𑁂… 𑀯𑀺𑀢𑁆𑀣𑀸𑀭𑀤𑀻𑀧𑀦’’𑀦𑁆𑀢𑀺.

𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀲𑀼𑀢𑁆𑀢𑀧𑀤𑁂𑀦 𑀲𑀫𑀢𑁆𑀣𑁂𑀢𑀼𑀁 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀸𑀴𑀺𑀓𑀸𑀬𑀺𑀯 𑀦𑀺𑀕𑁆𑀖𑁄𑀲𑁄𑀢𑀺 𑀲𑀸𑀴𑀺𑀓𑀸𑀬 𑀆𑀮𑀸𑀧𑁄 𑀯𑀺𑀬 𑀫𑀥𑀼𑀭𑁄 𑀓𑀡𑁆𑀡𑀲𑀼𑀔𑁄 𑀧𑁂𑀫𑀦𑀻𑀬𑁄. 𑀧𑀝𑀺𑀪𑀸𑀦𑀦𑁆𑀢𑀺 𑀲𑀤𑁆𑀤𑁄. 𑀉𑀤𑀻𑀭𑀬𑀻𑀢𑀺 𑀉𑀘𑁆𑀘𑀸𑀭𑀻𑀬𑀢𑀺, 𑀯𑀼𑀘𑁆𑀘𑀢𑀺 𑀯𑀸.

𑀏𑀯𑀁 𑀯𑀼𑀢𑁆𑀢𑁂 𑀉𑀲𑁆𑀲𑀸𑀳𑀚𑀸𑀢𑁄𑀢𑀺 𑀏𑀯𑀁 ‘‘𑀲𑀼𑀡𑁄𑀳𑀺 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀦 𑀓𑀺𑀭 𑀪𑀕𑀯𑀸 𑀲𑀗𑁆𑀔𑁂𑀧𑁂𑀦𑁂𑀯 𑀤𑁂𑀲𑁂𑀲𑁆𑀲𑀢𑀺, 𑀯𑀺𑀢𑁆𑀣𑀸𑀭𑁂𑀦𑀧𑀺 𑀪𑀸𑀲𑀺𑀲𑁆𑀲𑀢𑀻’’𑀢𑀺 𑀲𑀜𑁆𑀚𑀸𑀢𑀼𑀲𑁆𑀲𑀸𑀳𑁄 𑀳𑀝𑁆𑀞𑀢𑀼𑀝𑁆𑀞𑁄 𑀳𑀼𑀢𑁆𑀯𑀸.

𑁧𑁯𑁦. ‘‘𑀇𑀥𑀸’’𑀢𑀺 𑀇𑀫𑀺𑀦𑀸 𑀯𑀼𑀘𑁆𑀘𑀫𑀸𑀦𑀁 𑀅𑀥𑀺𑀓𑀭𑀡𑀁 𑀢𑀣𑀸𑀕𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀤𑁂𑀲𑀸𑀧𑀤𑁂𑀲𑁂 𑀦𑀺𑀧𑀸𑀢𑁄’’𑀢𑀺. ‘‘𑀲𑁆𑀯𑀸𑀬’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀇𑀥𑀲𑀤𑁆𑀤𑀫𑀢𑁆𑀢𑀁 𑀕𑀡𑁆𑀳𑀸𑀢𑀺, 𑀦 𑀬𑀣𑀸𑀯𑀺𑀲𑁂𑀲𑀺𑀢𑀩𑁆𑀩𑀁 𑀇𑀥-𑀲𑀤𑁆𑀤𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀓𑀢𑁆𑀣𑀘𑀺 𑀧𑀤𑀧𑀽𑀭𑀡𑀫𑀢𑁆𑀢𑀫𑁂𑀯𑀸’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁯𑁦). 𑀮𑁄𑀓𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺 𑀮𑁄𑀓-𑀲𑀤𑁆𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸 ¶ . 𑀲𑁂𑀲𑀧𑀤𑀤𑁆𑀯𑀬𑁂 𑀧𑀦 𑀧𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀫𑀢𑁆𑀢𑁂𑀦 𑀢𑀁 𑀢𑀁 𑀉𑀧𑀸𑀤𑀸𑀬 𑀯𑀼𑀢𑁆𑀢𑀢𑀸 𑀤𑀝𑁆𑀞𑀩𑁆𑀩𑀸. 𑀇𑀥 𑀢𑀣𑀸𑀕𑀢𑁄 𑀮𑁄𑀓𑁂𑀢𑀺 𑀳𑀺 𑀚𑀸𑀢𑀺𑀔𑁂𑀢𑁆𑀢𑀁, 𑀢𑀢𑁆𑀣𑀸𑀧𑀺 𑀅𑀬𑀁 𑀘𑀓𑁆𑀓𑀯𑀸𑀴𑁄 ‘‘𑀮𑁄𑀓𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀲𑀫𑀡𑁄𑀢𑀺 𑀲𑁄𑀢𑀸𑀧𑀦𑁆𑀦𑁄. 𑀤𑀼𑀢𑀺𑀬𑁄 𑀲𑀫𑀡𑁄𑀢𑀺 𑀲𑀓𑀤𑀸𑀕𑀸𑀫𑀻. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀓𑀢𑀫𑁄 𑀘 𑀪𑀺𑀓𑁆𑀔𑀯𑁂 𑀲𑀫𑀡𑁄? 𑀇𑀥 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁪.𑁨𑁪𑁧). ‘‘𑀓𑀢𑀫𑁄 𑀘 𑀪𑀺𑀓𑁆𑀔𑀯𑁂 𑀤𑀼𑀢𑀺𑀬𑁄 𑀲𑀫𑀡𑁄? 𑀇𑀥 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸’’𑀢𑀺𑀆𑀤𑀺 (𑀅. 𑀦𑀺. 𑁪.𑁨𑁪𑁧). 𑀑𑀓𑀸𑀲𑀦𑁆𑀢𑀺 𑀓𑀜𑁆𑀘𑀺 𑀧𑀤𑁂𑀲𑀁. 𑀇𑀥𑁂𑀯 𑀢𑀺𑀝𑁆𑀞𑀫𑀸𑀦𑀲𑁆𑀲𑀸𑀢𑀺 𑀇𑀫𑀺𑀲𑁆𑀲𑀸 𑀏𑀯 𑀇𑀦𑁆𑀤𑀲𑀸𑀮𑀕𑀼𑀳𑀸𑀬𑀁 𑀢𑀺𑀝𑁆𑀞𑀫𑀸𑀦𑀲𑁆𑀲.

𑀧𑀤𑀧𑀽𑀭𑀡𑀫𑀢𑁆𑀢𑀫𑁂𑀯 ¶ 𑀑𑀓𑀸𑀲𑀸𑀧𑀤𑀺𑀲𑀦𑀲𑁆𑀲𑀸𑀧𑀺 𑀅𑀲𑀫𑁆𑀪𑀯𑀢𑁄 𑀅𑀢𑁆𑀣𑀦𑁆𑀢𑀭𑀲𑁆𑀲 𑀅𑀩𑁄𑀥𑀦𑀢𑁄. 𑀅𑀭𑀳𑀦𑁆𑀢𑀺 𑀆𑀤𑀬𑁄 𑀲𑀤𑁆𑀤𑀸 𑀯𑀺𑀢𑁆𑀣𑀸𑀭𑀺𑀢𑀸𑀢𑀺 𑀬𑁄𑀚𑀦𑀸. 𑀅𑀢𑁆𑀣𑀢𑁄 𑀯𑀺𑀢𑁆𑀣𑀸𑀭𑀡𑀁 𑀲𑀤𑁆𑀤𑀫𑀼𑀔𑁂𑀦𑁂𑀯 𑀳𑁄𑀢𑀻𑀢𑀺 𑀲𑀤𑁆𑀤𑀕𑁆𑀕𑀳𑀡𑀁. 𑀬𑀲𑁆𑀫𑀸. ‘‘𑀅𑀧𑀭𑁂𑀳𑀺𑀧𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀢𑀣𑀸𑀕𑀢𑁄’’𑀢𑀺𑀆𑀤𑀺𑀦𑀸 𑀉𑀤𑀸𑀦𑀝𑁆𑀞𑀓𑀣𑀸𑀤𑀻𑀲𑀼, (𑀉𑀤𑀸. 𑀅𑀝𑁆𑀞. 𑁧𑁮; 𑀇𑀢𑀺𑀯𑀼. 𑀅𑀝𑁆𑀞. 𑁩𑁮) 𑀅𑀭𑀳𑀦𑁆𑀢𑀺 𑀆𑀤𑀬𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀝𑀻𑀓𑀸𑀬𑀁 𑀅𑀧𑀭𑁂𑀳𑀺 𑀧𑀓𑀸𑀭𑁂𑀳𑀺 𑀯𑀺𑀢𑁆𑀣𑀸𑀭𑀺𑀢𑀸 ¶ , 𑀢𑀲𑁆𑀫𑀸𑀢𑁂𑀲𑀼 𑀯𑀼𑀢𑁆𑀢𑀸𑀦𑀬𑁂𑀦𑀧𑀺 𑀲𑁄 (𑀯𑀺𑀲𑀼𑀤𑁆𑀥𑀺. 𑀝𑀻. 𑁧.𑁧𑁨𑁯, 𑁧𑁩𑁦) 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸𑀕𑀢𑀲𑁆𑀲 𑀲𑀢𑁆𑀢𑀦𑀺𑀓𑀸𑀬𑀦𑁆𑀢𑁄𑀕𑀥𑀢𑀸𑀬 ‘‘𑀇𑀥 𑀧𑀦 𑀲𑀢𑁆𑀢𑀮𑁄𑀓𑁄 𑀅𑀥𑀺𑀧𑁆𑀧𑁂𑀢𑁄’’𑀢𑀺 𑀯𑀢𑁆𑀯𑀸 𑀢𑀢𑁆𑀣𑀸𑀬𑀁 𑀬𑀲𑁆𑀫𑀺𑀁 𑀲𑀢𑁆𑀢𑀦𑀺𑀓𑀸𑀬𑁂 𑀬𑀲𑁆𑀫𑀺𑀜𑁆𑀘 𑀑𑀓𑀸𑀲𑁂 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀢𑁆𑀢𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀢𑀣𑀸𑀕𑀢𑁄 𑀦 𑀤𑁂𑀯𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺. 𑀲𑀸𑀭𑀧𑁆𑀧𑀢𑁆𑀢𑀸𑀢𑀺 𑀓𑀼𑀮𑀪𑁄𑀕𑀺𑀲𑁆𑀲𑀭𑀺𑀬𑀸𑀤𑀺𑀯𑀲𑁂𑀦 𑀲𑀸𑀭𑀪𑀽𑀢𑀸. 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀢𑀺 𑀩𑁆𑀭𑀳𑁆𑀫𑀸𑀬𑀼𑀧𑁄𑀓𑁆𑀔𑀭𑀲𑀸𑀢𑀺𑀆𑀤𑀺𑀩𑁆𑀭𑀸𑀳𑁆𑀫𑀡𑀸 ¶ 𑀘𑁂𑀯 𑀅𑀦𑀸𑀣𑀧𑀺𑀡𑁆𑀟𑀺𑀓𑀸𑀤𑀺𑀕𑀳𑀧𑀢𑀺𑀓𑀸 𑀘.

‘‘𑀲𑀼𑀚𑀸𑀢𑀸𑀬𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀯𑀺𑀓𑀧𑁆𑀧𑁂𑀲𑀼 𑀧𑀞𑀫𑁄 𑀯𑀺𑀓𑀧𑁆𑀧𑁄 𑀩𑀼𑀤𑁆𑀥𑀪𑀸𑀯𑀸𑀬 𑀆𑀲𑀦𑁆𑀦𑀢𑀭𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑁄. 𑀆𑀲𑀦𑁆𑀦𑀢𑀭𑀸𑀬 𑀳𑀺 𑀧𑀝𑀺𑀧𑀢𑁆𑀢𑀺𑀬𑀸 𑀞𑀺𑀢𑁄 ‘‘𑀉𑀧𑁆𑀧𑀚𑁆𑀚𑀢𑀻𑀢𑀺’’ 𑀯𑀼𑀘𑁆𑀘𑀢𑀺 𑀉𑀧𑁆𑀧𑀸𑀤𑀲𑁆𑀲 𑀏𑀓𑀦𑁆𑀢𑀺𑀓𑀢𑁆𑀢𑀸, 𑀧𑀕𑁂𑀯 𑀧𑀝𑀺𑀧𑀢𑁆𑀢𑀺𑀬𑀸 𑀫𑀢𑁆𑀣𑀓𑁂 𑀞𑀺𑀢𑁄. 𑀤𑀼𑀢𑀺𑀬𑁄 𑀩𑀼𑀤𑁆𑀥𑀪𑀸𑀯𑀸𑀯𑀳𑀧𑀩𑁆𑀩𑀚𑁆𑀚𑀢𑁄 𑀧𑀝𑁆𑀞𑀸𑀬 𑀆𑀲𑀦𑁆𑀦𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦, 𑀢𑀢𑀺𑀬𑁄 𑀩𑀼𑀤𑁆𑀥𑀓𑀭𑀥𑀫𑁆𑀫 𑀧𑀸𑀭𑀺𑀧𑀽𑀭𑀺𑀢𑁄 𑀧𑀝𑁆𑀞𑀸𑀬 𑀩𑀼𑀤𑁆𑀥𑀪𑀸𑀯𑀸𑀬 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦. 𑀦 𑀳𑀺 𑀫𑀳𑀸𑀲𑀢𑁆𑀢𑀸𑀦𑀁 𑀉𑀧𑁆𑀧𑀢𑀺𑀪𑀯𑀽𑀧𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀁 𑀦𑀸𑀫 𑀅𑀢𑁆𑀣𑀺. 𑀘𑀢𑀼𑀢𑁆𑀣𑁄 𑀩𑀼𑀤𑁆𑀥𑀓𑀭𑀥𑀫𑁆𑀫𑀲𑀫𑀸𑀭𑀫𑁆𑀪𑀢𑁄 𑀧𑀝𑁆𑀞𑀸𑀬. 𑀩𑁄𑀥𑀺𑀬𑀸 𑀦𑀺𑀬𑀢𑀪𑀸𑀯𑀧𑁆𑀧𑀢𑁆𑀢𑀺𑀢𑁄 𑀧𑀪𑀼𑀢𑀺 𑀳𑀺 𑀯𑀺𑀜𑁆𑀜𑀽𑀳𑀺 ‘‘𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀢𑁆𑀢𑀼𑀁 𑀲𑀓𑁆𑀓𑀸 𑀉𑀧𑁆𑀧𑀸𑀤𑀲𑁆𑀲 𑀏𑀓𑀦𑁆𑀢𑀺𑀓𑀢𑁆𑀢𑀸. 𑀬𑀣𑀸 𑀧𑀦 𑀲𑀦𑁆𑀤𑀦𑁆𑀢𑀺 𑀦𑀤𑀺𑀬𑁄𑀢𑀺 𑀲𑀦𑁆𑀤𑀦𑀓𑀺𑀭𑀺𑀬𑀸𑀬 𑀅𑀯𑀺𑀘𑁆𑀙𑁂𑀤𑀫𑀼𑀧𑀸𑀤𑀸𑀬 𑀯𑀢𑁆𑀢𑀫𑀸𑀦𑀧𑁆𑀧𑀬𑁄𑀕𑁄, 𑀏𑀯𑀁 𑀉𑀧𑁆𑀧𑀸𑀤𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀦𑀓𑀺𑀭𑀺𑀬𑀸𑀬 𑀅𑀯𑀺𑀘𑁆𑀙𑁂𑀤𑀫𑀼𑀧𑀸𑀤𑀸𑀬 𑀘𑀢𑀽𑀲𑀼 𑀯𑀺𑀓𑀧𑁆𑀧𑁂𑀲𑀼 ‘‘𑀉𑀧𑁆𑀧𑀚𑁆𑀚𑀢𑀺 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀧𑀞𑀫𑀁 𑀉𑀧𑁆𑀧𑀦𑁆𑀦𑀪𑀸𑀯𑀦𑁆𑀢𑀺 𑀘𑀢𑀽𑀲𑀼 𑀯𑀺𑀓𑀧𑁆𑀧𑁂𑀲𑀼 𑀲𑀩𑁆𑀩𑀧𑀞𑀫𑀁 𑀯𑀼𑀢𑁆𑀢𑀁 𑀢𑀣𑀸𑀕𑀢𑀲𑁆𑀲 𑀉𑀧𑁆𑀧𑀦𑁆𑀦𑀢𑀸𑀲𑀗𑁆𑀔𑀸𑀢𑀁 𑀅𑀢𑁆𑀣𑀺𑀪𑀸𑀯𑀁. 𑀢𑁂𑀦𑀸𑀳 ‘‘𑀉𑀧𑁆𑀧𑀦𑁆𑀦𑁄 𑀳𑁄𑀢𑀻𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄’’𑀢𑀺.

𑀲𑁄 𑀪𑀕𑀯𑀸𑀢𑀺 𑀬𑁄 ‘‘𑀢𑀣𑀸𑀕𑀢𑁄 𑀅𑀭𑀳’’𑀦𑁆𑀢𑀺𑀆𑀤𑀺𑀦𑀸 𑀓𑀺𑀢𑁆𑀢𑀺𑀢𑀕𑀼𑀡𑁄, 𑀲𑁄 𑀪𑀕𑀯𑀸. ‘‘𑀇𑀫𑀁 𑀮𑁄𑀓’’𑀦𑁆𑀢𑀺 𑀦𑀬𑀺𑀤𑀁 𑀫𑀳𑀸𑀚𑀦𑀲𑁆𑀲 𑀲𑀫𑁆𑀫𑀼𑀔𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀣 𑀔𑁄 𑀅𑀦𑀯𑀲𑁂𑀲𑀁 𑀧𑀭𑀺𑀬𑀸𑀤𑀸𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀤𑁂𑀯𑀓’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑁂𑀦𑀸𑀳 ‘‘𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀦𑀺𑀤𑀲𑁆𑀲𑁂𑀢𑀻’’𑀢𑀺. 𑀧𑀚𑀸𑀢𑀢𑁆𑀢𑀸𑀢𑀺 𑀬𑀣𑀸𑀲𑀓𑀁 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀦𑀺𑀩𑁆𑀩𑀢𑁆𑀢𑀢𑁆𑀢𑀸. 𑀧𑀜𑁆𑀘𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁 𑀧𑀸𑀭𑀺𑀲𑁂𑀲𑀜𑀸𑀬𑁂𑀦 𑀇𑀢𑀭𑁂𑀲𑀁 𑀧𑀤𑀦𑁆𑀢𑀭𑁂𑀳𑀺 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀲𑀤𑁂𑀯𑀓𑀦𑁆𑀢𑀺 𑀘 𑀅𑀯𑀬𑀯𑁂𑀦 𑀯𑀺𑀕𑁆𑀕𑀳𑁄 𑀲𑀫𑀼𑀤𑀸𑀬𑁄 𑀲𑀫𑀸𑀲𑀢𑁆𑀣𑁄. 𑀙𑀝𑁆𑀞𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁 𑀧𑀘𑁆𑀘𑀸𑀲𑀢𑁆𑀢𑀺𑀜𑀸𑀬𑁂𑀦. 𑀢𑀢𑁆𑀣 𑀳𑀺 𑀲𑁄 𑀚𑀸𑀢𑁄, 𑀢𑀁𑀦𑀺𑀯𑀸𑀲𑀻 𑀘. 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀩𑁆𑀭𑀳𑁆𑀫𑀕𑁆𑀕𑀳𑀡𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 ¶ 𑀦𑀬𑁄. 𑀧𑀘𑁆𑀘𑀢𑁆𑀣𑀺𑀓 ¶ …𑀧𑁂… 𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀦𑁆𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁 𑀅𑀧𑀘𑁆𑀘𑀢𑁆𑀣𑀺𑀓𑀸𑀦𑀁, 𑀅𑀲𑀫𑀺𑀢𑀸𑀩𑀸𑀳𑀺𑀢𑀧𑀸𑀧𑀸𑀦𑀜𑁆𑀘 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻𑀯𑀘𑀦𑁂𑀦 𑀕𑀳𑀺𑀢𑀢𑁆𑀢𑀸. 𑀓𑀸𑀫𑀁 ‘‘𑀲𑀤𑁂𑀯𑀓’’𑀦𑁆𑀢𑀺𑀆𑀤𑀺 ¶ 𑀯𑀺𑀲𑁂𑀲𑀦𑀸𑀦𑀁 𑀯𑀲𑁂𑀦 𑀲𑀢𑁆𑀢𑀯𑀺𑀲𑀬𑁄 𑀮𑁄𑀓𑀲𑀤𑁆𑀤𑁄𑀢𑀺 𑀯𑀺𑀜𑁆𑀜𑀸𑀬𑀢𑀺 𑀢𑀼𑀮𑁆𑀬𑀬𑁄𑀕𑀯𑀺𑀲𑀬𑀢𑁆𑀢𑀸 𑀢𑁂𑀲𑀁, ‘‘𑀲𑀮𑁄𑀫𑀓𑁄 𑀲𑀧𑀓𑁆𑀔𑀓𑁄’’𑀢𑀺𑀆𑀤𑀻𑀲𑀼 𑀧𑀦 𑀅𑀢𑀼𑀮𑁆𑀬𑀬𑁄𑀕𑁂𑀧𑀺 𑀅𑀬𑀁 𑀲𑀫𑀸𑀲𑁄 𑀮𑀩𑁆𑀪𑀢𑀻𑀢𑀺 𑀩𑁆𑀬𑀪𑀺𑀘𑀸𑀭𑀤𑀲𑁆𑀲𑀦𑀢𑁄 𑀧𑀚𑀸𑀕𑀳𑀡𑀦𑁆𑀢𑀺 𑀆𑀳 ‘‘𑀧𑀚𑀸𑀯𑀘𑀦𑁂𑀦 𑀲𑀢𑁆𑀢𑀮𑁄𑀓𑀕𑁆𑀕𑀳𑀡’’𑀦𑁆𑀢𑀺.

𑀅𑀭𑀽𑀧𑀺𑀦𑁄 𑀲𑀢𑁆𑀢𑀸 𑀅𑀢𑁆𑀢𑀦𑁄 𑀆𑀦𑁂𑀜𑁆𑀚𑀯𑀺𑀳𑀸𑀭𑁂𑀦 𑀯𑀺𑀳𑀭𑀦𑁆𑀢𑀸 𑀤𑀺𑀩𑁆𑀩𑀦𑁆𑀢𑀻𑀢𑀺 𑀤𑁂𑀯𑀸𑀢𑀺 𑀇𑀫𑀁 𑀦𑀺𑀩𑁆𑀩𑀘𑀦𑀁 𑀮𑀪𑀦𑁆𑀢𑀻𑀢𑀺 𑀆𑀳 ‘‘𑀲𑀤𑁂𑀯𑀓𑀕𑁆𑀕𑀳𑀡𑁂𑀦 𑀅𑀭𑀽𑀧𑀸𑀯𑀘𑀭𑀮𑁄𑀓𑁄 𑀕𑀳𑀺𑀢𑁄’’𑀢𑀺. 𑀢𑁂𑀦𑀸𑀳 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢’’𑀦𑁆𑀢𑀺 (𑀅. 𑀦𑀺. 𑁩.𑁧𑁧𑁭). 𑀲𑀫𑀸𑀭𑀓𑀕𑁆𑀕𑀳𑀡𑁂𑀦 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁄 𑀕𑀳𑀺𑀢𑁄 𑀢𑀲𑁆𑀲 𑀲𑀯𑀺𑀲𑁂𑀲𑀁 𑀫𑀸𑀭𑀲𑁆𑀲 𑀯𑀲𑁂 𑀯𑀢𑁆𑀢𑀦𑀢𑁄. 𑀭𑀽𑀧𑀻 𑀩𑁆𑀭𑀳𑁆𑀫𑀮𑁄𑀓𑁄 𑀕𑀳𑀺𑀢𑁄 𑀅𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑀲𑁆𑀲 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸. 𑀘𑀢𑀼𑀧𑀭𑀺𑀲𑀯𑀲𑁂𑀦𑀸𑀢𑀺 𑀔𑀢𑁆𑀢𑀺𑀬𑀸𑀤𑀺𑀘𑀢𑀼𑀧𑀭𑀺𑀲𑀯𑀲𑁂𑀦, 𑀇𑀢𑀭𑀸 𑀧𑀦 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀲𑀫𑀸𑀭𑀓𑀸𑀤𑀺𑀕𑁆𑀕𑀳𑀡𑁂𑀦 𑀕𑀳𑀺𑀢𑀸 𑀏𑀯𑀸𑀢𑀺. 𑀅𑀯𑀲𑁂𑀲𑀲𑀩𑁆𑀩𑀲𑀢𑁆𑀢𑀮𑁄𑀓𑁄 𑀦𑀸𑀕𑀕𑀭𑀼𑀴𑀸𑀤𑀺𑀪𑁂𑀤𑁄.

𑀏𑀢𑁆𑀢𑀸𑀯𑀢𑀸 𑀘 𑀪𑀸𑀕𑀲𑁄 𑀮𑁄𑀓𑀁 𑀕𑀳𑁂𑀢𑁆𑀯𑀸 𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀦 𑀢𑁂𑀦 𑀯𑀺𑀲𑁂𑀲𑁂𑀦 𑀅𑀪𑀸𑀕𑀲𑁄 𑀮𑁄𑀓𑀁 𑀕𑀳𑁂𑀢𑁆𑀯𑀸 𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺 𑀘𑁂𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀢𑁄𑀢𑀺 𑀉𑀓𑁆𑀓𑀁𑀲𑀕𑀢𑀺𑀯𑀺𑀚𑀸𑀦𑀦𑁂𑀦. 𑀧𑀜𑁆𑀘𑀲𑀼 𑀳𑀺 𑀕𑀢𑀻𑀲𑀼 𑀤𑁂𑀯𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀸𑀯 𑀲𑁂𑀝𑁆𑀞𑀸, 𑀢𑀢𑁆𑀣𑀸𑀧𑀺 𑀅𑀭𑀽𑀧𑀺𑀦𑁄 𑀤𑀽𑀭𑀲𑀫𑀼𑀲𑁆𑀲𑀸𑀭𑀺𑀢𑀓𑀺𑀮𑁂𑀲𑀤𑀼𑀓𑁆𑀔𑀢𑀸𑀬, 𑀲𑀦𑁆𑀢𑀧𑀡𑀻𑀢𑀆𑀦𑁂𑀜𑁆𑀚𑀯𑀺𑀳𑀸𑀭𑀲𑀫𑀗𑁆𑀕𑀺𑀢𑀸𑀬, 𑀅𑀢𑀺𑀤𑀻𑀖𑀸𑀬𑀼𑀓𑀢𑀸𑀬𑀸𑀢𑀺 𑀏𑀯𑀫𑀸𑀤𑀻𑀳𑀺 𑀯𑀺𑀲𑁂𑀲𑁂𑀳𑀺 𑀅𑀢𑀺𑀯𑀺𑀬 𑀉𑀓𑁆𑀓𑀝𑁆𑀞𑀸. ‘‘𑀩𑁆𑀭𑀳𑁆𑀫𑀸 𑀫𑀳𑀸𑀦𑀼𑀪𑀸𑀯𑁄’’𑀢𑀺𑀆𑀤𑀺 𑀤𑀲𑀲𑀳𑀲𑁆𑀲𑀺𑀬𑀁 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀯𑀲𑁂𑀦 𑀯𑀤𑀢𑀺. ‘‘𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀢𑁄’’𑀢𑀺 ¶ 𑀳𑀺 𑀯𑀼𑀢𑁆𑀢𑀁. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀲𑁂𑀝𑁆𑀞𑀁 𑀦𑀯 𑀮𑁄𑀓𑀼𑀢𑁆𑀢𑀭𑀁. 𑀪𑀸𑀯𑀸𑀦𑀼𑀓𑁆𑀓𑀫𑁄𑀢𑀺 𑀪𑀸𑀯𑀯𑀲𑁂𑀦 𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 ‘‘𑀲𑀤𑁂𑀯𑀓’’𑀦𑁆𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀅𑀦𑀼𑀓𑁆𑀓𑀫𑁄.

𑀢𑀻𑀳𑀸𑀓𑀸𑀭𑁂𑀳𑀻𑀢𑀺 𑀤𑁂𑀯𑀫𑀸𑀭𑀩𑁆𑀭𑀳𑁆𑀫𑀲𑀳𑀺𑀢𑀢𑀸𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀧𑀓𑀸𑀭𑁂𑀳𑀺. 𑀢𑀻𑀲𑀼 𑀧𑀤𑁂𑀲𑀽𑀢𑀺 ‘‘𑀲𑀤𑁂𑀯𑀓’’𑀦𑁆𑀢𑀺𑀆𑀤𑀻𑀲𑀼 𑀢𑀻𑀲𑀼 𑀧𑀤𑁂𑀲𑀼. 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦𑀸𑀢𑀺 𑀲𑀤𑁂𑀯𑀓𑀢𑁆𑀢𑀸𑀤𑀺𑀦𑀸 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦. 𑀢𑁂𑀥𑀸𑀢𑀼𑀓𑀫𑁂𑀯 𑀧𑀭𑀺𑀬𑀸𑀤𑀺𑀦𑁆𑀦𑀦𑁆𑀢𑀺 𑀧𑁄𑀭𑀸𑀡𑀸 𑀧𑀦𑀸𑀳𑀽𑀢𑀺 𑀬𑁄𑀚𑀦𑀸.

𑀅𑀪𑀺𑀜𑁆𑀜𑀸𑀢𑀺 ¶ 𑀬-𑀓𑀸𑀭𑀮𑁄𑀧𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄, 𑀅𑀪𑀺𑀚𑀸𑀦𑀺𑀢𑁆𑀯𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀅𑀪𑀺𑀜𑁆𑀜𑀸𑀬 𑀅𑀥𑀺𑀓𑁂𑀦 𑀜𑀸𑀡𑁂𑀦 𑀜𑀢𑁆𑀯𑀸’’𑀢𑀺. 𑀅𑀦𑀼𑀫𑀸𑀦𑀸𑀤𑀺𑀧𑀝𑀺𑀓𑁆𑀔𑁂𑀧𑁄𑀢𑀺 𑀅𑀦𑀼𑀫𑀸𑀦𑀉𑀧𑀫𑀸𑀦𑀅𑀢𑁆𑀣𑀸𑀧𑀢𑁆𑀢𑀺𑀆𑀤𑀺𑀧𑀝𑀺𑀓𑁆𑀔𑁂𑀧𑁄 𑀏𑀓𑀧𑁆𑀧𑀫𑀸𑀡𑀢𑁆𑀢𑀸. 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑀢𑀸𑀬 𑀳𑀺 𑀲𑀩𑁆𑀩𑀧𑀘𑁆𑀘𑀓𑁆𑀔𑀸 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄.

𑀅𑀦𑀼𑀢𑁆𑀢𑀭𑀁 ¶ 𑀯𑀺𑀯𑁂𑀓𑀲𑀼𑀔𑀦𑁆𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀁, 𑀢𑁂𑀦 𑀞𑀺𑀢𑀺𑀫𑀺𑀲𑁆𑀲𑀸𑀧𑀺 [𑀯𑀻𑀣𑀺𑀫𑀺𑀲𑁆𑀲𑀸𑀧𑀺 (𑀲𑀸𑀭𑀢𑁆𑀣. 𑀝𑀻. 𑁧.𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸𑀬𑀁) 𑀥𑀺𑀢𑀺𑀫𑀺𑀲𑁆𑀲𑀸𑀧𑀺 (𑀓)] 𑀓𑀤𑀸𑀘𑀺 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸 𑀳𑁄𑀢𑀻𑀢𑀺 𑀳𑀺𑀢𑁆𑀯𑀸𑀧𑀻𑀢𑀺 𑀧𑀺-𑀲𑀤𑁆𑀤𑀕𑁆𑀕𑀳𑀡𑀁. 𑀪𑀕𑀯𑀸 𑀳𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀬𑀲𑁆𑀫𑀺𑀁 𑀔𑀡𑁂 𑀧𑀭𑀺𑀲𑀸 𑀲𑀸𑀥𑀼𑀓𑀸𑀭𑀁 𑀯𑀸 𑀤𑁂𑀢𑀺, 𑀬𑀣𑀸𑀲𑀼𑀢𑀁 𑀯𑀸 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀢𑀁 𑀔𑀡𑀁 𑀧𑀼𑀩𑁆𑀩𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀬𑀣𑀸𑀧𑀭𑀺𑀘𑁆𑀙𑁂𑀤𑀜𑁆𑀘 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀞𑀺𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀯𑀲𑁂𑀦 𑀅𑀧𑁆𑀧𑀁 𑀯𑀸 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀲𑁆𑀲, 𑀦𑁂𑀬𑁆𑀬𑀲𑁆𑀲 𑀯𑀸 𑀯𑀲𑁂𑀦 𑀩𑀳𑀼𑀁 𑀯𑀸 𑀤𑁂𑀲𑁂𑀦𑁆𑀢𑁄. 𑀥𑀫𑁆𑀫𑀲𑁆𑀲 𑀓𑀮𑁆𑀬𑀸𑀡𑀢𑀸 𑀦𑀺𑀬𑁆𑀬𑀸𑀦𑀺𑀓𑀢𑀸𑀬, 𑀦𑀺𑀬𑁆𑀬𑀸𑀦𑀺𑀓𑀢𑀸 𑀘 𑀲𑀩𑁆𑀩𑀲𑁄 𑀅𑀦𑀯𑀚𑁆𑀚𑀪𑀸𑀯𑁂𑀦𑁂𑀯𑀸𑀢𑀺 𑀆𑀳 ‘‘𑀅𑀦𑀯𑀚𑁆𑀚𑀫𑁂𑀯 𑀓𑀢𑁆𑀯𑀸’’𑀢𑀺. 𑀤𑁂𑀲𑀓𑀸𑀬𑀢𑁆𑀢𑁂𑀦 𑀆𑀡𑀸𑀤𑀺𑀯𑀺𑀥𑀺𑀦𑀸 𑀅𑀪𑀺𑀲𑀚𑁆𑀚𑀦𑀁 𑀧𑀩𑁄𑀥𑀦𑀁 𑀤𑁂𑀲𑀦𑀸𑀢𑀺 𑀲𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀤𑁂𑀲𑀦𑀸𑀬 𑀢𑀸𑀯 𑀘𑀢𑀼𑀧𑁆𑀧𑀤𑀺𑀓𑀸𑀬𑀧𑀺 𑀕𑀸𑀣𑀸𑀬𑀸’’𑀢𑀺𑀆𑀤𑀺. 𑀦𑀺𑀤𑀸𑀦𑀦𑀺𑀕𑀫𑀦𑀸𑀦𑀺𑀧𑀺 𑀲𑀢𑁆𑀣𑀼𑀦𑁄 𑀤𑁂𑀲𑀦𑀸𑀬 𑀅𑀦𑀼𑀯𑀺𑀥𑀸𑀦𑀢𑁄 𑀢𑀤𑀦𑁆𑀢𑁄𑀕𑀥𑀸𑀦𑀺 𑀏𑀯𑀸𑀢𑀺 𑀆𑀳 ‘‘𑀦𑀺𑀤𑀸𑀦𑀫𑀸𑀤𑀺, 𑀇𑀤𑀁 𑀏𑀯𑁄𑀘𑀸𑀢𑀺 𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺.

𑀲𑀸𑀲𑀺𑀢𑀩𑁆𑀩𑀧𑀼𑀕𑁆𑀕𑀮𑀕𑀢𑁂𑀦 𑀬𑀣𑀸𑀧𑀭𑀸𑀥𑀸𑀤𑀺𑀲𑀸𑀲𑀺𑀢𑀩𑁆𑀩𑀪𑀸𑀯𑁂𑀦 ¶ 𑀅𑀦𑀼𑀲𑀸𑀲𑀦𑀁 𑀢𑀤𑀗𑁆𑀕𑀯𑀺𑀦𑀬𑀸𑀤𑀺𑀯𑀲𑁂𑀦 𑀯𑀺𑀦𑀬𑀦𑀁 𑀲𑀸𑀲𑀦𑀦𑁆𑀢𑀺 𑀢𑀁 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀲𑀻𑀮𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸’’𑀢𑀺𑀆𑀤𑀺. 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀅𑀦𑀯𑀚𑁆𑀚𑀥𑀫𑁆𑀫𑀸𑀦𑀁 𑀲𑀻𑀮𑀲𑁆𑀲, 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀜𑁆𑀘 𑀲𑀻𑀮𑀤𑀺𑀝𑁆𑀞𑀻𑀦𑀁 𑀆𑀤𑀺𑀪𑀸𑀯𑁄 𑀢𑀁 𑀫𑀽𑀮𑀓𑀢𑁆𑀢𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀦𑀁. 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀦𑁆𑀢𑀤𑁆𑀯𑀬𑀯𑀺𑀕𑀫𑁂𑀦 𑀫𑀚𑁆𑀛𑀺𑀫𑀧𑀝𑀺𑀧𑀤𑀸𑀪𑀸𑀯𑁄 𑀯𑀺𑀬, 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀆𑀭𑀩𑁆𑀪𑀦𑀺𑀧𑁆𑀨𑀢𑁆𑀢𑀻𑀦𑀁 𑀯𑁂𑀫𑀚𑁆𑀛𑀢𑁆𑀢𑀸𑀧𑀺 𑀫𑀚𑁆𑀛𑀪𑀸𑀯𑁄𑀢𑀺 𑀯𑀼𑀢𑁆𑀢𑀁. ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂…𑀧𑁂… 𑀫𑀚𑁆𑀛𑀁 𑀦𑀸𑀫𑀸’’𑀢𑀺. 𑀨𑀮𑀁 𑀧𑀭𑀺𑀬𑁄𑀲𑀸𑀦𑀁 𑀦𑀸𑀫 𑀲𑀉𑀧𑀸𑀤𑀺𑀲𑁂𑀲𑀢𑀸𑀯𑀲𑁂𑀦, 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀁 𑀦𑀸𑀫 𑀅𑀦𑀼𑀧𑀸𑀤𑀺𑀲𑁂𑀲𑀢𑀸𑀯𑀲𑁂𑀦. 𑀇𑀤𑀸𑀦𑀺 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀸𑀲𑀦𑀲𑁆𑀲 𑀧𑀭𑀺𑀬𑁄𑀲𑀸𑀦𑀢𑀁 𑀆𑀕𑀫𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀏𑀢𑀤𑀢𑁆𑀣𑀫𑀺𑀤’’𑀦𑁆𑀢𑀺𑀆𑀤𑀺 𑀆𑀳. 𑀇𑀥 𑀤𑁂𑀲𑀦𑀸𑀬 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀅𑀥𑀺𑀧𑁆𑀧𑁂𑀢𑀁 ‘‘𑀲𑀩𑁆𑀬𑀜𑁆𑀚𑀦’’𑀦𑁆𑀢𑀺𑀆𑀤𑀺 𑀯𑀘𑀦𑀢𑁄. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀓𑀢𑀸𑀯𑀥𑀺𑀲𑀤𑁆𑀤𑀧𑁆𑀧𑀩𑀦𑁆𑀥𑁄 𑀕𑀸𑀣𑀸𑀯𑀲𑁂𑀦, 𑀲𑀼𑀢𑁆𑀢𑀯𑀲𑁂𑀦 𑀘 𑀯𑀯𑀢𑁆𑀣𑀺𑀢𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄, 𑀬𑁄 ¶ 𑀇𑀥 ‘‘𑀤𑁂𑀲𑀦𑀸’’𑀢𑀺 𑀯𑀼𑀢𑁆𑀢𑁄, 𑀢𑀲𑁆𑀲 𑀧𑀦 𑀅𑀢𑁆𑀣𑁄 𑀯𑀺𑀲𑁂𑀲𑀢𑁄 𑀲𑀻𑀮𑀸𑀤𑀺 𑀏𑀯𑀸𑀢𑀺 𑀆𑀳 ‘‘𑀪𑀕𑀯𑀸 𑀳𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄…𑀧𑁂… 𑀤𑀲𑁆𑀲𑁂𑀢𑀻’’𑀢𑀺. 𑀢𑀢𑁆𑀣 𑀲𑀻𑀮𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀲𑀻𑀮𑀕𑁆𑀕𑀳𑀡𑁂𑀦 𑀲𑀲𑀫𑁆𑀪𑀸𑀭𑀁 𑀲𑀻𑀮𑀁 𑀕𑀳𑀺𑀢𑀁, 𑀢𑀣𑀸 𑀫𑀕𑁆𑀕𑀕𑁆𑀕𑀳𑀡𑁂𑀦 𑀲𑀲𑀫𑁆𑀪𑀸𑀭𑁄 𑀫𑀕𑁆𑀕𑁄𑀢𑀺 𑀢𑀤𑀼𑀪𑀬𑀯𑀲𑁂𑀦 𑀅𑀦𑀯𑀲𑁂𑀲𑀢𑁄 𑀧𑀭𑀺𑀬𑀢𑁆𑀢𑀺 𑀅𑀢𑁆𑀣𑀁 𑀧𑀭𑀺𑀬𑀸𑀤𑀺𑀬𑀢𑀺. 𑀢𑁂𑀦𑀸𑀢𑀺 𑀲𑀻𑀮𑀸𑀤𑀺𑀤𑀲𑁆𑀲𑀦𑁂𑀦. 𑀅𑀢𑁆𑀣𑀯𑀲𑁂𑀦 𑀳𑀺 𑀇𑀥 𑀤𑁂𑀲𑀦𑀸𑀬 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀪𑀸𑀯𑁄 𑀅𑀥𑀺𑀧𑁆𑀧𑁂𑀢𑁄. 𑀓𑀣𑀺𑀓𑀲𑀡𑁆𑀞𑀺𑀢𑀻𑀢𑀺 𑀓𑀣𑀺𑀓𑀲𑁆𑀲 𑀲𑀡𑁆𑀞𑀸𑀦𑀁 𑀓𑀣𑀦𑀯𑀲𑁂𑀦 𑀲𑀫𑀯𑀝𑁆𑀞𑀸𑀦𑀁.

𑀦 𑀲𑁄 𑀲𑀸𑀢𑁆𑀣𑀁 𑀤𑁂𑀲𑁂𑀢𑀺 𑀦𑀺𑀬𑁆𑀬𑀸𑀦𑀢𑁆𑀣𑀯𑀺𑀭𑀳𑀢𑁄 𑀢𑀲𑁆𑀲𑀸 𑀤𑁂𑀲𑀦𑀸𑀬. 𑀏𑀓𑀩𑁆𑀬𑀜𑁆𑀚𑀦𑀸𑀤𑀺𑀬𑀼𑀢𑁆𑀢𑀸 𑀯𑀸𑀢𑀺 𑀲𑀺𑀣𑀺𑀮𑀸𑀤𑀺𑀪𑁂𑀤𑁂𑀲𑀼 𑀩𑁆𑀬𑀜𑁆𑀚𑀦𑁂𑀲𑀼 𑀏𑀓𑀧𑁆𑀧𑀓𑀸𑀭𑁂𑀫𑁂𑀯, 𑀤𑁆𑀯𑀺𑀧𑀓𑀸𑀭𑁂𑀫𑁂𑀯 𑀯𑀸 𑀩𑁆𑀬𑀜𑁆𑀚𑀦𑁂𑀦 𑀬𑀼𑀢𑁆𑀢𑀸 𑀯𑀸 𑀤𑀫𑀺𑀴𑀪𑀸𑀲𑀸 𑀯𑀺𑀬 ¶ . 𑀯𑀺𑀯𑀝𑀓𑀭𑀡𑀢𑀸𑀬 𑀑𑀝𑁆𑀞𑁂 𑀅𑀨𑀼𑀲𑀸𑀧𑁂𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀢𑁄 𑀲𑀩𑁆𑀩𑀦𑀺𑀭𑁄𑀝𑁆𑀞𑀩𑁆𑀬𑀜𑁆𑀚𑀦𑀸 𑀯𑀸 𑀓𑀺𑀭𑀸𑀢𑀪𑀸𑀲𑀸 ¶ 𑀯𑀺𑀬. 𑀲𑀩𑁆𑀩𑀲𑁆𑀲𑁂𑀯 [𑀲𑀩𑁆𑀩𑀢𑁆𑀣𑁂𑀯 (𑀲𑀸𑀭𑀢𑁆𑀣. 𑀝𑀻. 𑁧.𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸𑀬𑀁 𑁧)] 𑀯𑀺𑀲𑁆𑀲𑀚𑁆𑀚𑀦𑀻𑀬𑀬𑀼𑀢𑁆𑀢𑀢𑀸𑀬 𑀲𑀩𑁆𑀩𑀯𑀺𑀲𑁆𑀲𑀝𑁆𑀞𑀩𑁆𑀬𑀜𑁆𑀚𑀦𑀸 𑀯𑀸 𑀲𑀯𑀭𑀪𑀸𑀲𑀸 [𑀬𑀯𑀦𑀪𑀸𑀲𑀸 (𑀲𑀸𑀭𑀢𑁆𑀣. 𑀝𑀻. 𑁧.𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸𑀬𑀁)] 𑀯𑀺𑀬. 𑀲𑀩𑁆𑀩𑀲𑁆𑀲𑁂𑀯 [𑀲𑀩𑁆𑀩𑀢𑁆𑀣𑁂𑀯 (𑀲𑀸𑀭𑀢𑁆𑀣. 𑀝𑀻. 𑁧.𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸𑀬𑀁)] 𑀲𑀸𑀦𑀼𑀲𑀸𑀭𑀢𑀸𑀬 𑀲𑀩𑁆𑀩𑀦𑀺𑀕𑁆𑀕𑀳𑀺𑀢𑀩𑁆𑀬𑀜𑁆𑀚𑀦𑀸 𑀯𑀸 𑀧𑀸𑀭𑀲𑀺𑀓𑀸𑀤𑀺𑀫𑀺𑀮𑀓𑁆𑀔𑀼𑀪𑀸𑀲𑀸 𑀯𑀺𑀬. 𑀲𑀩𑁆𑀩𑀸𑀧𑁂𑀲𑀸 𑀩𑁆𑀬𑀜𑁆𑀚𑀦𑁂𑀓𑀤𑁂𑀲𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀅𑀧𑀭𑀺𑀧𑀼𑀡𑁆𑀡𑀩𑁆𑀬𑀜𑁆𑀚𑀦𑀸𑀢𑀺 𑀓𑀢𑁆𑀯𑀸 ‘‘𑀅𑀩𑁆𑀬𑀜𑁆𑀚𑀦𑀸’’𑀢𑀺 𑀯𑀼𑀢𑁆𑀢𑀸.

𑀞𑀸𑀦𑀓𑀭𑀡𑀸𑀦𑀺 𑀲𑀺𑀣𑀺𑀮𑀸𑀦𑀺 𑀓𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀅𑀓𑁆𑀔𑀭𑀁 𑀧𑀜𑁆𑀘𑀲𑀼 𑀯𑀕𑁆𑀕𑁂𑀲𑀼 𑀧𑀞𑀫𑀢𑀢𑀺𑀬𑀦𑁆𑀢𑀺 𑀏𑀯𑀫𑀸𑀤𑀺 𑀲𑀺𑀣𑀺𑀮𑀁. 𑀢𑀸𑀦𑀺 𑀅𑀲𑀺𑀣𑀺𑀮𑀸𑀦𑀺 𑀓𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀅𑀓𑁆𑀔𑀭𑀁 𑀯𑀕𑁆𑀕𑁂𑀲𑀼 𑀤𑀼𑀢𑀺𑀬𑀘𑀢𑀼𑀢𑁆𑀣𑀦𑁆𑀢𑀺 𑀏𑀯𑀫𑀸𑀤𑀺 𑀥𑀦𑀺𑀢𑀁. 𑀤𑁆𑀯𑀺𑀫𑀢𑁆𑀢𑀓𑀸𑀮𑀁 𑀤𑀻𑀖𑀁. 𑀏𑀓𑀫𑀢𑁆𑀢𑀓𑀸𑀮𑀁 𑀭𑀲𑁆𑀲𑀁 𑀢𑀤𑁂𑀯 𑀮𑀳𑀼𑀓𑀁. 𑀮𑀳𑀼𑀓𑀫𑁂𑀯 𑀲𑀁𑀬𑁄𑀕𑀧𑀭𑀁, 𑀤𑀻𑀖𑀜𑁆𑀘 𑀕𑀭𑀼𑀓𑀁. 𑀞𑀸𑀦𑀓𑀭𑀡𑀸𑀦𑀺 𑀦𑀺𑀕𑁆𑀕𑀳𑁂𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀦𑀺𑀕𑁆𑀕𑀳𑀺𑀢𑀁. 𑀧𑀭𑁂𑀦 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀲𑀫𑁆𑀩𑀦𑁆𑀥𑀁. 𑀢𑀣𑀸 𑀦𑀲𑀫𑁆𑀩𑀦𑁆𑀥𑀁 𑀯𑀯𑀢𑁆𑀣𑀺𑀢𑀁. 𑀞𑀸𑀦𑀓𑀭𑀡𑀸𑀦𑀺 𑀦𑀺𑀲𑁆𑀲𑀝𑁆𑀞𑀸𑀦𑀺 𑀓𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀯𑀺𑀫𑀼𑀢𑁆𑀢𑀁. 𑀤𑀲𑀥𑀸𑀢𑀺 𑀏𑀯𑀁 𑀲𑀺𑀣𑀺𑀮𑀸𑀤𑀺𑀯𑀲𑁂𑀦 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸 𑀅𑀓𑁆𑀔𑀭𑀼𑀧𑁆𑀧𑀸𑀤𑀓𑀘𑀺𑀢𑁆𑀢𑀲𑁆𑀲 𑀲𑀩𑁆𑀩𑀸𑀓𑀸𑀭𑁂𑀦 𑀧𑀪𑁂𑀤𑁄. 𑀲𑀩𑁆𑀩𑀸𑀦𑀺 𑀳𑀺 𑀅𑀓𑁆𑀔𑀭𑀸𑀦𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀁 𑀩𑁆𑀬𑀜𑁆𑀚𑀦𑀢𑁄 𑀩𑁆𑀬𑀜𑁆𑀚𑀦𑀸𑀦𑀺 𑀘𑀸𑀢𑀺.

𑀅𑀫𑀓𑁆𑀔𑁂𑀢𑁆𑀯𑀸𑀢𑀺 𑀅𑀫𑀺𑀮𑁂𑀘𑁆𑀙𑁂𑀢𑁆𑀯𑀸, 𑀅𑀯𑀺𑀦𑀸𑀲𑁂𑀢𑁆𑀯𑀸, 𑀅𑀳𑀸𑀧𑁂𑀢𑁆𑀯𑀸𑀢𑀺 𑀯𑀸 𑀅𑀢𑁆𑀣𑁄. 𑀪𑀕𑀯𑀸 𑀬𑀫𑀢𑁆𑀣𑀁 𑀜𑀸𑀧𑁂𑀢𑀼𑀁 𑀏𑀓𑀁 𑀕𑀸𑀣𑀁, 𑀏𑀓𑀁 𑀯𑀸𑀓𑁆𑀬𑀁 𑀯𑀸 𑀤𑁂𑀲𑁂𑀢𑀺, 𑀢𑀫𑀢𑁆𑀣𑀁 𑀢𑀸𑀬 𑀤𑁂𑀲𑀦𑀸𑀬 𑀧𑀭𑀺𑀫𑀡𑁆𑀟𑀮𑀧𑀤𑀩𑁆𑀬𑀜𑁆𑀚𑀦𑀸𑀬 𑀏𑀯 𑀤𑁂𑀲𑁂𑀢𑀻𑀢𑀺 𑀆𑀳 ‘‘𑀧𑀭𑀺𑀧𑀼𑀡𑁆𑀡𑀩𑁆𑀬𑀜𑁆𑀚𑀦𑀫𑁂𑀯 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺. 𑀇𑀥 𑀓𑁂𑀯𑀮𑀲𑀤𑁆𑀤𑁄 𑀅𑀦𑀯𑀲𑁂𑀲𑀯𑀸𑀘𑀓𑁄, 𑀦 𑀅𑀯𑁄𑀫𑀺𑀲𑁆𑀲𑀓𑀸𑀤𑀺𑀯𑀸𑀘𑀓𑁄𑀢𑀺 𑀆𑀳 ‘‘𑀲𑀓𑀮𑀸𑀥𑀺𑀯𑀘𑀦’’𑀦𑁆𑀢𑀺. 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀲𑀩𑁆𑀩𑀲𑁄 𑀧𑀼𑀡𑁆𑀡𑀁, 𑀢𑀁 𑀧𑀦 𑀓𑁂𑀦𑀘𑀺 𑀊𑀦𑀁, 𑀅𑀥𑀺𑀓𑀁 𑀯𑀸 𑀦 𑀳𑁄𑀢𑀻𑀢𑀺 ¶ ‘‘𑀅𑀦𑀽𑀦𑀸𑀥𑀺𑀓𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀤𑀢𑁆𑀣𑀁 ¶ 𑀤𑁂𑀲𑀺𑀢𑁄, 𑀢𑀲𑁆𑀲 𑀲𑀸𑀥𑀓𑀢𑁆𑀢𑀸 𑀅𑀦𑀽𑀦𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀢𑀩𑁆𑀩𑀺𑀥𑀼𑀭𑀲𑁆𑀲 𑀧𑀦 𑀅𑀲𑀸𑀥𑀓𑀢𑁆𑀢𑀸 𑀅𑀦𑀥𑀺𑀓𑀢𑀸. 𑀲𑀓𑀮𑀦𑁆𑀢𑀺 𑀲𑀩𑁆𑀩𑀪𑀸𑀕𑀯𑀦𑁆𑀢𑀁. 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀲𑀩𑁆𑀩𑀲𑁄 𑀧𑀭𑀺𑀧𑀼𑀡𑁆𑀡𑀫𑁂𑀯, 𑀢𑁂𑀦𑀸𑀳 ‘‘𑀏𑀓𑀤𑁂𑀲𑀦𑀸𑀧𑀺 𑀅𑀧𑀭𑀺𑀧𑀼𑀡𑁆𑀡𑀸 𑀦𑀢𑁆𑀣𑀻’’𑀢𑀺. 𑀅𑀧𑀭𑀺𑀲𑀼𑀤𑁆𑀥𑀸 𑀤𑁂𑀲𑀦𑀸 𑀳𑁄𑀢𑀺 𑀢𑀡𑁆𑀳𑀸𑀬 𑀲𑀁𑀓𑀺𑀮𑀺𑀝𑁆𑀞𑀢𑁆𑀢𑀸. 𑀮𑁄𑀓𑀸𑀫𑀺𑀲𑀁 𑀘𑀻𑀯𑀭𑀸𑀤𑀬𑁄 𑀧𑀘𑁆𑀘𑀬𑀸 𑀢𑀢𑁆𑀣 𑀅𑀕𑀥𑀺𑀢𑀘𑀺𑀢𑁆𑀢𑀢𑀸𑀬 𑀮𑁄𑀓𑀸𑀫𑀺𑀲𑀦𑀺𑀭𑀧𑁂𑀓𑁆𑀔𑁄. 𑀳𑀺𑀢𑀨𑀭𑀡𑁂𑀦𑀸𑀢𑀺 𑀳𑀺𑀢𑀽𑀧𑀲𑀁𑀳𑀸𑀭𑁂𑀦. 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀓𑀭𑀡𑀪𑀽𑀢𑀸𑀬 𑀫𑀼𑀤𑀼𑀳𑀤𑀬𑁄. 𑀉𑀮𑁆𑀮𑀼𑀫𑁆𑀧𑀦𑀲𑀪𑀸𑀯𑀲𑀡𑁆𑀞𑀺𑀢𑁂𑀦𑀸𑀢𑀺 𑀲𑀓𑀮𑀲𑀁𑀓𑀺𑀮𑁂𑀲𑀢𑁄, 𑀯𑀝𑁆𑀝𑀤𑀼𑀓𑁆𑀔𑀢𑁄 𑀘 𑀉𑀤𑁆𑀥𑀭𑀡𑀸𑀓𑀸𑀭𑀸𑀯𑀝𑁆𑀞𑀺𑀢𑁂𑀦 𑀘𑀺𑀢𑁆𑀢𑁂𑀦, 𑀓𑀸𑀭𑀼𑀡𑀸𑀥𑀺𑀧𑁆𑀧𑀸𑀬𑁂𑀦𑀸𑀢𑀺 𑀅𑀢𑁆𑀣𑁄.

‘‘𑀇𑀢𑁄 𑀧𑀝𑁆𑀞𑀸𑀬 𑀤𑀲𑁆𑀲𑀸𑀫𑁂𑀯, 𑀏𑀯𑀜𑁆𑀘 𑀤𑀲𑁆𑀲𑀸𑀫𑀻’’𑀢𑀺 𑀲𑀫𑀸𑀤𑀸𑀢𑀩𑁆𑀩𑀝𑁆𑀞𑁂𑀦 𑀯𑀢𑀁. 𑀧𑀡𑁆𑀟𑀺𑀢𑀧𑀜𑁆𑀜𑀢𑁆𑀢𑀢𑀸𑀬 ¶ 𑀲𑁂𑀝𑁆𑀞𑀝𑁆𑀞𑁂𑀦 𑀩𑁆𑀭𑀳𑁆𑀫𑀁 𑀩𑁆𑀭𑀳𑁆𑀫𑀸𑀦𑀁 𑀯𑀸 𑀘𑀭𑀺𑀬𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀤𑀸𑀦𑀁. 𑀫𑀘𑁆𑀙𑀭𑀺𑀬𑀮𑁄𑀪𑀸𑀤𑀺𑀦𑀺𑀕𑁆𑀕𑀡𑁆𑀳𑀦𑁂𑀦 𑀲𑀼𑀘𑀺𑀡𑁆𑀡𑀲𑁆𑀲. 𑀇𑀤𑁆𑀥𑀻𑀢𑀺 𑀤𑁂𑀯𑀺𑀤𑁆𑀥𑀺. 𑀚𑀼𑀢𑀻𑀢𑀺 𑀧𑀪𑀸, 𑀆𑀦𑀼𑀪𑀸𑀯𑁄 𑀯𑀸. 𑀩𑀮𑀯𑀻𑀭𑀺𑀬𑀽𑀧𑀧𑀢𑁆𑀢𑀻𑀢𑀺 𑀏𑀯𑀁 𑀫𑀳𑀢𑀸 𑀩𑀮𑁂𑀦 𑀘 𑀯𑀻𑀭𑀺𑀬𑁂𑀦 𑀘 𑀲𑀫𑀦𑁆𑀦𑀸𑀕𑀫𑁄. 𑀧𑀼𑀜𑁆𑀜𑀦𑁆𑀢𑀺 𑀧𑀼𑀜𑁆𑀜𑀨𑀮𑀁. 𑀯𑁂𑀬𑁆𑀬𑀸𑀯𑀘𑁆𑀘𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑁂𑀝𑁆𑀞𑀸 𑀘𑀭𑀺𑀬𑀸𑀢𑀺 𑀓𑀢𑁆𑀯𑀸. 𑀏𑀲 𑀦𑀬𑁄 𑀲𑁂𑀲𑁂𑀧𑀺.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀲𑀓𑀮𑀁 𑀲𑀸𑀲𑀦𑀁 𑀇𑀥 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁 𑀢𑀲𑁆𑀫𑀸. ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑀸𑀦𑀸𑀥𑀺𑀓𑀭𑀡𑀸𑀦𑀺 𑀲𑀩𑁆𑀩𑀧𑀤𑀸𑀦𑀺 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺…𑀧𑁂… 𑀧𑀓𑀸𑀲𑁂𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺 𑀆𑀳.

𑁧𑁯𑁧. 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑀫𑁆𑀧𑀤𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀆𑀤𑀺𑀓𑀮𑁆𑀬𑀸𑀡𑀢𑀸𑀤𑀺𑀕𑀼𑀡𑀲𑀫𑁆𑀧𑀤𑀁, 𑀤𑀽𑀭𑀲𑀫𑀼𑀲𑁆𑀲𑀸𑀭𑀺𑀢𑀫𑀸𑀦𑀲𑁆𑀲𑁂𑀯 𑀲𑀸𑀲𑀦𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀲𑀫𑁆𑀪𑀯𑀢𑀺, 𑀦 𑀫𑀸𑀦𑀚𑀸𑀢𑀺𑀓𑀲𑁆𑀲𑀸𑀢𑀺 𑀆𑀳 ‘‘𑀦𑀺𑀳𑀢𑀫𑀸𑀦𑀢𑁆𑀢𑀸’’𑀢𑀺. 𑀉𑀲𑁆𑀲𑀦𑁆𑀦𑀢𑁆𑀢𑀸𑀢𑀺 𑀩𑀳𑀼𑀮𑀪𑀸𑀯𑀢𑁄. 𑀪𑁄𑀕𑀸𑀭𑁄𑀕𑁆𑀬𑀸𑀤𑀺𑀯𑀢𑁆𑀣𑀼𑀓𑀸 𑀫𑀤𑀸 𑀲𑀼𑀧𑁆𑀧𑀳𑁂𑀬𑁆𑀬𑀸 𑀳𑁄𑀦𑁆𑀢𑀺 𑀦𑀺𑀫𑀺𑀢𑁆𑀢𑀲𑁆𑀲 𑀅𑀦𑀯𑀢𑁆𑀣𑀸𑀦𑀢𑁄, 𑀦 𑀢𑀣𑀸 𑀓𑀼𑀮𑀯𑀺𑀚𑁆𑀚𑀸𑀫𑀤𑀸, 𑀢𑀲𑁆𑀫𑀸 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀓𑀼𑀮𑀸𑀦𑀁 𑀧𑀩𑁆𑀩𑀚𑀺𑀢𑀸𑀦𑀫𑁆𑀧𑀺 ¶ 𑀚𑀸𑀢𑀺𑀯𑀺𑀚𑁆𑀚𑀸 𑀦𑀺𑀲𑁆𑀲𑀸𑀬 𑀫𑀸𑀦𑀚𑀧𑁆𑀧𑀦𑀁 𑀤𑀼𑀧𑁆𑀧𑀚𑀳𑀦𑁆𑀢𑀺 𑀆𑀳 ‘‘𑀬𑁂𑀪𑀼𑀬𑁆𑀬𑁂𑀦 𑀳𑀺…𑀧𑁂… 𑀫𑀸𑀦𑀁 𑀓𑀭𑁄𑀦𑁆𑀢𑀻’’𑀢𑀺. 𑀯𑀺𑀚𑀸𑀢𑀺𑀢𑀸𑀬𑀸𑀢𑀺 𑀦𑀺𑀳𑀻𑀦𑀚𑀸𑀢𑀺𑀢𑀸𑀬. 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀲𑀼𑀯𑀺𑀲𑀼𑀤𑁆𑀥𑀁 𑀓𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀲𑀻𑀮𑀯𑀲𑁂𑀦 𑀳𑀺 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸, 𑀧𑀢𑀺𑀝𑁆𑀞𑀸𑀢𑀼𑀦𑁆𑀢𑀺 𑀯𑀸 𑀲𑀘𑁆𑀘𑀧𑀝𑀺𑀯𑁂𑀥𑁂𑀦 𑀮𑁄𑀓𑀼𑀢𑁆𑀢𑀭𑀸𑀬 𑀧𑀢𑀺𑀝𑁆𑀞𑀸𑀬 𑀧𑀢𑀺𑀝𑁆𑀞𑀸𑀢𑀼𑀁. 𑀲𑀸 𑀳𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸 𑀦𑀸𑀫, 𑀬𑁂𑀪𑀼𑀬𑁆𑀬𑁂𑀦 𑀘 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸 𑀲𑀼𑀚𑀸𑀢𑀸 𑀏𑀯 𑀳𑁄𑀦𑁆𑀢𑀺, 𑀦 𑀤𑀼𑀚𑁆𑀚𑀸𑀢𑀸.

𑀧𑀭𑀺𑀲𑀼𑀤𑁆𑀥𑀦𑁆𑀢𑀺 ¶ 𑀭𑀸𑀕𑀸𑀤𑀻𑀦𑀁 𑀅𑀘𑁆𑀘𑀦𑁆𑀢𑀫𑁂𑀯 𑀧𑀳𑀸𑀦𑀤𑀻𑀧𑀦𑀢𑁄 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑀸𑀬 𑀲𑀩𑁆𑀩𑀲𑁄 𑀧𑀭𑀺𑀲𑀼𑀤𑁆𑀥𑀁. 𑀲𑀤𑁆𑀥𑀁 𑀧𑀝𑀺𑀮𑀪𑀢𑀻𑀢𑀺 𑀧𑁄𑀣𑀼𑀚𑁆𑀚𑀦𑀺𑀓𑀲𑀤𑁆𑀥𑀸𑀯𑀲𑁂𑀦 𑀲𑀤𑁆𑀤𑀳𑀢𑀺. 𑀯𑀺𑀜𑁆𑀜𑀽𑀚𑀸𑀢𑀺𑀓𑀸𑀦𑀜𑁆𑀳𑀺 𑀥𑀫𑁆𑀫𑀲𑀫𑁆𑀧𑀢𑁆𑀢𑀺𑀕𑁆𑀕𑀳𑀡𑀧𑀼𑀩𑁆𑀩𑀺𑀓𑀸 𑀲𑀤𑁆𑀥𑀸 𑀲𑀺𑀤𑁆𑀥𑀺 𑀥𑀫𑁆𑀫𑀧𑁆𑀧𑀫𑀸𑀡𑀥𑀫𑁆𑀫𑀧𑁆𑀧𑀲𑀦𑁆𑀦𑀪𑀸𑀯𑀢𑁄. ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸, 𑀬𑁄 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑀥𑀫𑁆𑀫𑁄’’𑀢𑀺 𑀲𑀤𑁆𑀥𑀁 𑀧𑀝𑀺𑀮𑀪𑀢𑀺. 𑀚𑀸𑀬𑀫𑁆𑀧𑀢𑀺𑀓𑀸𑀢𑀺 𑀖𑀭𑀡𑀻𑀧𑀢𑀺𑀓𑀸. 𑀓𑀸𑀫𑀁 ‘‘𑀚𑀸𑀬𑀫𑁆𑀧𑀢𑀺𑀓𑀸’’𑀢𑀺 𑀯𑀼𑀢𑁆𑀢𑁂 𑀖𑀭𑀲𑀸𑀫𑀺𑀓𑀖𑀭𑀲𑀸𑀫𑀺𑀦𑀻𑀯𑀲𑁂𑀦 𑀤𑁆𑀯𑀺𑀦𑁆𑀦𑀁𑀬𑁂𑀯 𑀕𑀳𑀡𑀁 𑀯𑀺𑀜𑁆𑀜𑀸𑀬𑀢𑀺. 𑀬𑀲𑁆𑀲 𑀧𑀦 𑀧𑀼𑀭𑀺𑀲𑀲𑁆𑀲 𑀅𑀦𑁂𑀓𑀸 𑀧𑀚𑀸𑀧𑀢𑀺𑀬𑁄, 𑀢𑀢𑁆𑀣 𑀓𑀺𑀁 𑀯𑀢𑁆𑀢𑀩𑁆𑀩𑀁, 𑀏𑀓𑀸𑀬𑀸𑀧𑀺 𑀲𑀁𑀯𑀸𑀲𑁄 𑀲𑀫𑁆𑀩𑀸𑀥𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀤𑁆𑀯𑁂’’𑀢𑀺 𑀯𑀼𑀢𑁆𑀢𑀁. 𑀭𑀸𑀕𑀸𑀤𑀺𑀦𑀸 𑀲𑀓𑀺𑀜𑁆𑀘𑀦𑀝𑁆𑀞𑁂𑀦, 𑀔𑁂𑀢𑁆𑀢𑀯𑀢𑁆𑀣𑀼 𑀆𑀤𑀺𑀦𑀸 𑀲𑀧𑀮𑀺𑀩𑁄𑀥𑀝𑁆𑀞𑁂𑀦 𑀭𑀸𑀕𑀭𑀚𑀸𑀤𑀻𑀦𑀁 𑀆𑀕𑀫𑀦𑀧𑀣𑀢𑀸𑀧𑀺 𑀉𑀝𑁆𑀞𑀸𑀦𑀝𑁆𑀞𑀸𑀦𑀢𑀸 𑀏𑀯𑀸𑀢𑀺 𑀤𑁆𑀯𑁂𑀧𑀺 𑀯𑀡𑁆𑀡𑀦𑀸 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀅𑀮𑀕𑁆𑀕𑀦𑀝𑁆𑀞𑁂𑀦𑀸𑀢𑀺 𑀅𑀲𑁆𑀲𑀚𑁆𑀚𑀦𑀝𑁆𑀞𑁂𑀦 𑀅𑀧𑁆𑀧𑀝𑀺𑀩𑀤𑁆𑀥𑀪𑀸𑀯𑁂𑀦. 𑀏𑀯𑀁 𑀅𑀓𑀼𑀲𑀮𑀓𑀼𑀲𑀮𑀧𑁆𑀧𑀯𑀢𑁆𑀢𑀻𑀦𑀁 𑀞𑀸𑀦𑀪𑀸𑀯𑁂𑀦 𑀖𑀭𑀸𑀯𑀸𑀲𑀧𑀩𑁆𑀩𑀚𑁆𑀚𑀸𑀦𑀁 𑀲𑀫𑁆𑀩𑀸𑀥𑀩𑁆𑀪𑁄𑀓𑀸𑀲𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀬𑀸 𑀏𑀯 𑀅𑀝𑁆𑀞𑀸𑀦𑀝𑁆𑀞𑀸𑀦𑀪𑀸𑀯𑁂𑀦 𑀢𑁂𑀲𑀁 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀗𑁆𑀔𑁂𑀧𑀓𑀣𑀸𑀢𑀺 ¶ 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀤𑀼𑀤𑁆𑀥𑀸𑀭𑀁 𑀅𑀓𑀢𑁆𑀯𑀸 𑀲𑀫𑀸𑀲𑀢𑁄 𑀅𑀢𑁆𑀣𑀯𑀡𑁆𑀡𑀦𑀸. 𑀏𑀓𑀫𑁆𑀧𑀺 𑀤𑀺𑀯𑀲𑀦𑁆𑀢𑀺 𑀏𑀓𑀤𑀺𑀯𑀲𑀫𑀢𑁆𑀢𑀫𑁆𑀧𑀺. 𑀅𑀔𑀡𑁆𑀟𑀁 𑀓𑀢𑁆𑀯𑀸𑀢𑀺 𑀤𑀼𑀓𑁆𑀓𑀝𑀫𑀢𑁆𑀢𑀲𑁆𑀲𑀧𑀺 𑀅𑀦𑀸𑀧𑀚𑁆𑀚𑀦𑁂𑀦 𑀅𑀔𑀡𑁆𑀟𑀺𑀢𑀁 𑀓𑀢𑁆𑀯𑀸. 𑀓𑀺𑀮𑁂𑀲𑀫𑀮𑁂𑀦 𑀅𑀫𑀮𑀻𑀦𑀦𑁆𑀢𑀺 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀸𑀤𑀺𑀦𑀸 𑀅𑀲𑀁𑀓𑀺𑀮𑀺𑀝𑁆𑀞𑀁 𑀓𑀢𑁆𑀯𑀸. 𑀧𑀭𑀺𑀬𑁄𑀤𑀸𑀢𑀝𑁆𑀞𑁂𑀦 𑀦𑀺𑀫𑁆𑀫𑀮𑀪𑀸𑀯𑁂𑀦 𑀲𑀗𑁆𑀔𑀁 𑀯𑀺𑀬 𑀮𑀺𑀔𑀺𑀢𑀁 𑀥𑁄𑀢𑀦𑁆𑀢𑀺 𑀲𑀗𑁆𑀔𑀮𑀺𑀔𑀺𑀢𑀦𑁆𑀢𑀺 ¶ 𑀆𑀳 ‘‘𑀥𑁄𑀢𑀲𑀗𑁆𑀔𑀲𑀧𑁆𑀧𑀝𑀺𑀪𑀸𑀕’’𑀦𑁆𑀢𑀺. ‘‘𑀅𑀚𑁆𑀛𑀸𑀯𑀲𑀢𑀸’’𑀢𑀺 𑀧𑀤𑀧𑁆𑀧𑀬𑁄𑀕𑁂𑀦 ‘‘𑀅𑀕𑀸𑀭’’𑀦𑁆𑀢𑀺 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀕𑀸𑀭𑀫𑀚𑁆𑀛𑁂’’𑀢𑀺. 𑀓𑀲𑀸𑀬𑁂𑀦 𑀭𑀢𑁆𑀢𑀸𑀦𑀺 𑀯𑀢𑁆𑀣𑀸𑀦𑀺 𑀓𑀸𑀲𑀸𑀬𑀸𑀦𑀻𑀢𑀺 𑀆𑀳 ‘‘𑀓𑀲𑀸𑀬𑀭𑀲𑀧𑀻𑀢𑀢𑀸𑀬𑀸’’𑀢𑀺. 𑀧𑀭𑀺𑀤𑀳𑀺𑀢𑁆𑀯𑀸𑀢𑀺 𑀦𑀺𑀯𑀸𑀲𑁂𑀢𑁆𑀯𑀸 𑀘𑁂𑀯 𑀧𑀸𑀭𑀼𑀧𑀺𑀢𑁆𑀯𑀸 𑀘. 𑀅𑀕𑀸𑀭𑀯𑀸𑀲𑁄 𑀅𑀕𑀸𑀭𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀢𑀲𑁆𑀲 𑀯𑀟𑁆𑀠𑀺𑀆𑀯𑀳𑀁 𑀅𑀕𑀸𑀭𑀲𑁆𑀲 𑀳𑀺𑀢𑀁.

𑁧𑁯𑁨. 𑀪𑁄𑀕𑀓𑁆𑀔𑀦𑁆𑀥𑁄𑀢𑀺 𑀪𑁄𑀕𑀲𑀫𑀼𑀤𑀸𑀬𑁄. 𑀆𑀩𑀦𑁆𑀥𑀦𑀝𑁆𑀞𑁂𑀦𑀸𑀢𑀺 ‘‘𑀧𑀼𑀢𑁆𑀢𑁄 𑀦𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀧𑁂𑀫𑀯𑀲𑁂𑀦 𑀲𑀧𑀭𑀺𑀘𑁆𑀙𑁂𑀤𑀁 𑀩𑀦𑁆𑀥𑀦𑀝𑁆𑀞𑁂𑀦. ‘‘𑀅𑀫𑁆𑀳𑀸𑀓𑀫𑁂𑀢𑁂’’𑀢𑀺 𑀜𑀸𑀬𑀦𑁆𑀢𑀻𑀢𑀺 𑀜𑀸𑀢𑀻. 𑀧𑀺𑀢𑀸𑀫𑀳𑀧𑀺𑀢𑀼𑀧𑀼𑀢𑁆𑀢𑀸𑀤𑀺𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀝𑁆𑀞𑁂𑀦 𑀧𑀭𑀺𑀯𑀝𑁆𑀝𑁄.

𑁧𑁯𑁩. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀧𑀺𑀳𑀺𑀢𑀓𑀸𑀬𑀯𑀘𑀻𑀤𑁆𑀯𑀸𑀭𑁄, 𑀢𑀣𑀸𑀪𑀽𑀢𑁄 𑀘 𑀬𑀲𑁆𑀫𑀸 𑀢𑁂𑀦 𑀲𑀁𑀯𑀭𑁂𑀦 𑀉𑀧𑁂𑀢𑁄 𑀦𑀸𑀫 𑀳𑁄𑀢𑀺 ¶ , 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺. ‘‘𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄’’𑀢𑀺𑀆𑀤𑀺 𑀢𑀲𑁆𑀲𑁂𑀯 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀫𑀦𑁆𑀦𑀸𑀕𑀫𑀲𑁆𑀲 𑀧𑀘𑁆𑀘𑀬𑀤𑀲𑁆𑀲𑀦𑀁. 𑀅𑀧𑁆𑀧𑀫𑀢𑁆𑀢𑀓𑁂𑀲𑀽𑀢𑀺 𑀅𑀲𑀜𑁆𑀘𑀺𑀘𑁆𑀘 𑀆𑀧𑀦𑁆𑀦𑀅𑀦𑀼𑀔𑀼𑀤𑁆𑀤𑀓𑁂𑀲𑀼 𑀘𑁂𑀯 𑀲𑀳𑀲𑀸 𑀉𑀧𑁆𑀧𑀦𑁆𑀦𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀘. 𑀪𑀬𑀤𑀲𑁆𑀲𑀸𑀯𑀻𑀢𑀺 𑀪𑀬𑀤𑀲𑁆𑀲𑀦𑀲𑀻𑀮𑁄. 𑀲𑀫𑁆𑀫𑀸 𑀆𑀤𑀺𑀬𑀺𑀢𑁆𑀯𑀸𑀢𑀺 𑀲𑀓𑁆𑀓𑀘𑁆𑀘𑀁 𑀬𑀸𑀯𑀚𑀻𑀯𑀁 𑀅𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀆𑀤𑀺𑀬𑀺𑀢𑁆𑀯𑀸. 𑀢𑀁 𑀢𑀁 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀢𑀁 𑀢𑀁 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑀁. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄’’𑀢𑀺 𑀧𑀸𑀞𑁂. 𑀲𑀗𑁆𑀔𑁂𑀧𑁄𑀢𑀺 𑀲𑀗𑁆𑀔𑁂𑀧𑀯𑀡𑁆𑀡𑀦𑀸. 𑀯𑀺𑀢𑁆𑀣𑀸𑀭𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁪) 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀲𑁄 𑀢𑀢𑁆𑀣, 𑀢𑀁𑀲𑀁𑀯𑀡𑁆𑀡𑀦𑀸𑀬 (𑀯𑀺𑀲𑀼𑀤𑁆𑀥𑀺. 𑀝𑀻. 𑁧.𑁧𑁪) 𑀘 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀆𑀘𑀸𑀭𑀕𑁄𑀘𑀭𑀕𑁆𑀕𑀳𑀡𑁂𑀦𑁂𑀯𑀸𑀢𑀺 ‘‘𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄’’𑀢𑀺 𑀯𑀘𑀦𑁂𑀦𑁂𑀯. 𑀢𑁂𑀦𑀸𑀳 ‘‘𑀓𑀼𑀲𑀮𑁂 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑁂 𑀕𑀳𑀺𑀢𑁂𑀧𑀻’’𑀢𑀺. 𑀅𑀥𑀺𑀓𑀯𑀘𑀦𑀁 𑀅𑀜𑁆𑀜𑀫𑀢𑁆𑀣𑀁 𑀩𑁄𑀥𑁂𑀢𑀻𑀢𑀺 𑀓𑀢𑁆𑀯𑀸 𑀢𑀲𑁆𑀲 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀲𑁆𑀲 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀤𑀲𑁆𑀲𑀦𑀢𑁆𑀣𑀁…𑀧𑁂… 𑀓𑀼𑀲𑀮𑁂𑀦𑀸𑀢𑀺 𑀯𑀼𑀢𑁆𑀢𑀁, 𑀲𑀩𑁆𑀩𑀲𑁄 𑀅𑀦𑁂𑀲𑀦𑀧𑁆𑀧𑀳𑀸𑀦𑁂𑀦 𑀅𑀦𑀯𑀚𑁆𑀚𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 ‘‘𑀓𑀢𑀫𑁂 ¶ 𑀘 𑀣𑀧𑀢𑀺 𑀓𑀼𑀲𑀮𑀸 𑀲𑀻𑀮𑀸 𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀓𑀼𑀲𑀮𑀁 𑀯𑀘𑀻𑀓𑀫𑁆𑀫’’𑀦𑁆𑀢𑀺 (𑀫. 𑀦𑀺. 𑁨.𑁨𑁬𑁫) 𑀲𑀻𑀮𑀲𑁆𑀲 𑀓𑀼𑀲𑀮𑀓𑀸𑀬𑀯𑀘𑀻𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀆𑀚𑀻𑀯𑀧𑀭𑀺𑀲𑀼𑀤𑁆𑀥𑀫𑁆𑀧𑀺 𑀔𑁄 𑀅𑀳𑀁 𑀣𑀧𑀢𑀺 𑀲𑀻𑀮𑀲𑁆𑀫𑀺𑀁 𑀯𑀤𑀸𑀫𑀻’’𑀢𑀺 (𑀫. 𑀦𑀺. 𑁨.𑁨𑁬𑁫) 𑀏𑀯𑀁 𑀧𑀯𑀢𑁆𑀢𑀸𑀬 𑀫𑀼𑀡𑁆𑀟𑀺𑀓𑀲𑀼𑀢𑁆𑀢𑀤𑁂𑀲𑀦𑀸𑀬 ‘‘𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑀼𑀲𑀮𑁂𑀦, 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄’’𑀢𑀺 ¶ 𑀅𑀬𑀁 𑀤𑁂𑀲𑀦𑀸 𑀏𑀓𑀲𑀗𑁆𑀕𑀳𑀸 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀼𑀡𑁆𑀟𑀺𑀓𑀲𑀼𑀢𑁆𑀢𑀯𑀲𑁂𑀦 𑀯𑀸 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺. 𑀲𑀻𑀮𑀲𑁆𑀫𑀺𑀁 𑀯𑀤𑀸𑀫𑀻𑀢𑀺 ‘‘𑀲𑀻𑀮’’𑀦𑁆𑀢𑀺 𑀯𑀤𑀸𑀫𑀺, ‘‘𑀲𑀻𑀮𑀲𑁆𑀫𑀺𑀁 𑀅𑀦𑁆𑀢𑁄𑀕𑀥𑀁 𑀧𑀭𑀺𑀬𑀸𑀧𑀦𑁆𑀦’’𑀦𑁆𑀢𑀺 𑀯𑀤𑀸𑀫𑀻𑀢𑀺 𑀯𑀸 𑀅𑀢𑁆𑀣𑁄. 𑀧𑀭𑀺𑀬𑀸𑀤𑀸𑀦𑀢𑁆𑀣𑀦𑁆𑀢𑀺 𑀧𑀭𑀺𑀕𑁆𑀕𑀳𑀢𑁆𑀣𑀁.

𑀢𑀺𑀯𑀺𑀥𑁂𑀦 𑀲𑀻𑀮𑁂𑀦𑀸𑀢𑀺 𑀘𑀽𑀴𑀲𑀻𑀮𑀁 𑀫𑀚𑁆𑀛𑀺𑀫𑀲𑀻𑀮𑀁 𑀫𑀳𑀸𑀲𑀻𑀮𑀦𑁆𑀢𑀺 𑀏𑀯𑀁 𑀢𑀺𑀯𑀺𑀥𑁂𑀦 𑀲𑀻𑀮𑁂𑀦. 𑀫𑀦𑀘𑁆𑀙𑀝𑁆𑀞𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼, 𑀦 𑀓𑀸𑀬𑀧𑀜𑁆𑀘𑀫𑁂𑀲𑀼. 𑀬𑀣𑀸𑀮𑀸𑀪𑀬𑀣𑀸𑀩𑀮𑀬𑀣𑀸𑀲𑀸𑀭𑀼𑀧𑁆𑀧𑀧𑁆𑀧𑀓𑀸𑀭𑀯𑀲𑁂𑀦 𑀢𑀺𑀯𑀺𑀥𑁂𑀦 𑀲𑀦𑁆𑀢𑁄𑀲𑁂𑀦.

𑀘𑀽𑀴𑀫𑀚𑁆𑀛𑀺𑀫𑀫𑀳𑀸𑀲𑀻𑀮𑀯𑀡𑁆𑀡𑀦𑀸

𑁧𑁯𑁪-𑁨𑁧𑁧. ‘‘𑀲𑀻𑀮𑀲𑁆𑀫𑀺’’𑀦𑁆𑀢𑀺 𑀇𑀤𑀁 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀦𑁆𑀢𑀺 𑀆𑀳 ‘‘𑀏𑀓𑀁 𑀲𑀻𑀮𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄’’𑀢𑀺. 𑀅𑀬𑀫𑁂𑀯 𑀅𑀢𑁆𑀣𑁄𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀢𑁆𑀣𑁄 𑀏𑀯. 𑀩𑁆𑀭𑀳𑁆𑀫𑀚𑀸𑀮𑁂𑀢𑀺 𑀩𑁆𑀭𑀳𑁆𑀫𑀚𑀸𑀮𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁭).

𑁨𑁧𑁨. 𑀅𑀢𑁆𑀢𑀸𑀦𑀼𑀯𑀸𑀤𑀧𑀭𑀸𑀦𑀼𑀯𑀸𑀤𑀤𑀡𑁆𑀟𑀪𑀬𑀸𑀤𑀻𑀦𑀺 ¶ 𑀅𑀲𑀁𑀯𑀭𑀫𑀽𑀮𑀓𑀸𑀦𑀺. 𑀲𑀻𑀮𑀲𑁆𑀲𑀸𑀲𑀁𑀯𑀭𑀢𑁄𑀢𑀺 𑀲𑀻𑀮𑀲𑁆𑀲 𑀅𑀲𑀁𑀯𑀭𑀡𑀢𑁄, 𑀲𑀻𑀮𑀲𑀁𑀯𑀭𑀸𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀪𑀯𑁂𑀬𑁆𑀬𑀸𑀢𑀺 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀬𑀣𑀸𑀯𑀺𑀥𑀸𑀦𑀯𑀺𑀳𑀺𑀢𑁂𑀦𑀸𑀢𑀺 𑀬𑀣𑀸𑀯𑀺𑀥𑀸𑀦𑀲𑀫𑁆𑀧𑀸𑀤𑀺𑀢𑁂𑀦. 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀦𑀺𑀫𑀺𑀢𑁆𑀢𑀁 ¶ 𑀉𑀧𑁆𑀧𑀦𑁆𑀦𑀘𑁂𑀢𑀲𑀺𑀓𑀲𑀼𑀔𑀲𑀫𑀼𑀝𑁆𑀞𑀸𑀦𑁂𑀳𑀺 𑀧𑀡𑀻𑀢𑀭𑀽𑀧𑁂𑀳𑀺 𑀨𑀼𑀝𑁆𑀞𑀲𑀭𑀻𑀭𑀲𑁆𑀲 𑀉𑀴𑀸𑀭𑀁 𑀓𑀸𑀬𑀺𑀓𑀁 𑀲𑀼𑀔𑀁 𑀪𑀯𑀢𑀻𑀢𑀺 𑀆𑀳 ‘‘𑀅𑀯𑀺𑀧𑁆𑀧𑀝𑀺𑀲𑀸𑀭…𑀧𑁂… 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺.

𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀓𑀣𑀸𑀯𑀡𑁆𑀡𑀦𑀸

𑁨𑁧𑁩. 𑀯𑀺𑀲𑁂𑀲𑁄 𑀓𑀫𑁆𑀫𑀢𑁆𑀣𑀸𑀧𑁂𑀓𑁆𑀔𑀢𑀸𑀬 𑀲𑀸𑀫𑀜𑁆𑀜𑀲𑁆𑀲 𑀦 𑀢𑁂𑀳𑀺 𑀧𑀭𑀺𑀘𑀢𑁆𑀢𑁄𑀢𑀺 𑀆𑀳 ‘‘𑀘𑀓𑁆𑀔𑀼-𑀲𑀤𑁆𑀤𑁄 𑀓𑀢𑁆𑀣𑀘𑀺 𑀩𑀼𑀤𑁆𑀥𑀘𑀓𑁆𑀔𑀼𑀫𑁆𑀳𑀺 𑀯𑀢𑁆𑀢𑀢𑀻’’𑀢𑀺. 𑀯𑀺𑀚𑁆𑀚𑀫𑀸𑀦𑀫𑁂𑀯 𑀳𑀺 𑀅𑀪𑀺𑀥𑁂𑀬𑁆𑀬𑁂 𑀯𑀺𑀲𑁂𑀲𑀢𑁆𑀣𑀁 𑀯𑀺𑀲𑁂𑀲𑀦𑁆𑀢𑀭𑀦𑀺𑀯𑀢𑁆𑀢𑀦𑀯𑀲𑁂𑀦 𑀯𑀺𑀲𑁂𑀲𑀲𑀤𑁆𑀤𑁄 𑀯𑀺𑀪𑀸𑀯𑁂𑀢𑀺, 𑀦 𑀅𑀯𑀺𑀚𑁆𑀚𑀫𑀸𑀦𑀁. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 𑀩𑀼𑀤𑁆𑀥𑀸𑀦𑀁𑀬𑁂𑀯 𑀘𑀓𑁆𑀔𑀼𑀤𑀲𑁆𑀲𑀦𑀦𑁆𑀢𑀺 𑀩𑀼𑀤𑁆𑀥𑀘𑀓𑁆𑀔𑀼, 𑀆𑀲𑀬𑀸𑀦𑀼𑀲𑀬𑀜𑀸𑀡𑀁, 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀜𑁆𑀘. 𑀲𑀫𑀦𑁆𑀢𑀢𑁄 𑀲𑀩𑁆𑀩𑀲𑁄 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑀦𑁆𑀢𑀘𑀓𑁆𑀔𑀼, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. 𑀅𑀭𑀺𑀬𑀫𑀕𑁆𑀕𑀢𑁆𑀢𑀬𑀧𑀜𑁆𑀜𑀸𑀢𑀺 𑀳𑁂𑀝𑁆𑀞𑀺𑀫𑁂 𑀅𑀭𑀺𑀬𑀫𑀕𑁆𑀕𑀢𑁆𑀢𑀬𑁂 𑀧𑀜𑁆𑀜𑀸. 𑀇𑀥𑀸𑀢𑀺 ‘‘𑀘𑀓𑁆𑀔𑀼𑀦𑀸 𑀭𑀽𑀧’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀸𑀞𑁂. 𑀅𑀬𑀁 𑀘𑀓𑁆𑀔𑀼-𑀲𑀤𑁆𑀤𑁄 𑀧𑀲𑀸𑀤…𑀧𑁂… 𑀯𑀢𑁆𑀢𑀢𑀺 𑀦𑀺𑀲𑁆𑀲𑀬𑀯𑁄𑀳𑀸𑀭𑁂 𑀦𑀺𑀲𑁆𑀲𑀺𑀢𑀲𑁆𑀲 𑀯𑀢𑁆𑀢𑀩𑁆𑀩𑀢𑁄 𑀬𑀣𑀸. ‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻’’𑀢𑀺. 𑀅𑀲𑀫𑁆𑀫𑀺𑀲𑁆𑀲𑀦𑁆𑀢𑀺 𑀓𑀺𑀮𑁂𑀲𑀤𑀼𑀓𑁆𑀔𑁂𑀦 𑀅𑀯𑁄𑀫𑀺𑀲𑁆𑀲𑀁. 𑀢𑁂𑀦𑀸𑀳 ‘‘𑀧𑀭𑀺𑀲𑀼𑀤𑁆𑀥’’𑀦𑁆𑀢𑀺 ¶ . 𑀲𑀢𑀺 𑀳𑀺 𑀲𑀼𑀯𑀺𑀲𑀼𑀤𑁆𑀥𑁂 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂, 𑀧𑀥𑀸𑀦𑀪𑀽𑀢𑀧𑀸𑀧𑀥𑀫𑁆𑀫𑀯𑀺𑀕𑀫𑁂𑀦 𑀅𑀥𑀺𑀘𑀺𑀢𑁆𑀢𑀸𑀦𑀼𑀬𑁄𑀕𑁄 𑀳𑀢𑁆𑀣𑀕𑀢𑁄 𑀏𑀯𑀁 𑀳𑁄𑀢𑀻𑀢𑀺 𑀆𑀳 ‘‘𑀅𑀥𑀺𑀘𑀺𑀢𑁆𑀢𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺.

𑀲𑀢𑀺𑀲𑀫𑁆𑀧𑀚𑀜𑁆𑀜𑀓𑀣𑀸𑀯𑀡𑁆𑀡𑀦𑀸

𑁨𑁧𑁪. 𑀲𑀫𑀦𑁆𑀢𑀢𑁄, 𑀧𑀓𑀝𑁆𑀞𑀁 𑀯𑀸 𑀲𑀯𑀺𑀲𑁂𑀲𑀁 𑀚𑀸𑀦𑀸𑀢𑀻𑀢𑀺 𑀲𑀫𑁆𑀧𑀚𑀸𑀦𑁄, 𑀲𑀫𑁆𑀧𑀚𑀸𑀦𑀲𑁆𑀲 𑀪𑀸𑀯𑁄 𑀲𑀫𑁆𑀧𑀚𑀜𑁆𑀜𑀁, 𑀢𑀣𑀸𑀧𑀯𑀢𑁆𑀢𑀜𑀸𑀡𑀁. 𑀢𑀲𑁆𑀲 𑀯𑀺𑀪𑀚𑀦𑀁 𑀲𑀫𑁆𑀧𑀚𑀜𑁆𑀜𑀪𑀸𑀚𑀦𑀻𑀬𑀁, 𑀢𑀲𑁆𑀫𑀺𑀁 𑀲𑀫𑁆𑀧𑀚𑀜𑁆𑀜𑀪𑀸𑀚𑀦𑀻𑀬𑀫𑁆𑀳𑀺. 𑀅𑀪𑀺𑀓𑁆𑀓𑀫𑀦𑀁 𑀅𑀪𑀺𑀓𑁆𑀓𑀦𑁆𑀢𑀦𑁆𑀢𑀺 𑀆𑀳 ‘‘𑀅𑀪𑀺𑀓𑁆𑀓𑀦𑁆𑀢𑀁 𑀯𑀼𑀘𑁆𑀘𑀢𑀺 𑀕𑀫𑀦’’𑀦𑁆𑀢𑀺. 𑀢𑀣𑀸 𑀧𑀝𑀺𑀓𑁆𑀓𑀫𑀦𑀁 ¶ 𑀧𑀝𑀺𑀓𑁆𑀓𑀦𑁆𑀢𑀦𑁆𑀢𑀺 𑀆𑀳 ‘‘𑀧𑀝𑀺𑀓𑁆𑀓𑀦𑁆𑀢𑀁 𑀦𑀺𑀯𑀢𑁆𑀢𑀦’’𑀦𑁆𑀢𑀺. 𑀦𑀺𑀯𑀢𑁆𑀢𑀦𑀦𑁆𑀢𑀺 𑀘 𑀦𑀺𑀯𑀢𑁆𑀢𑀺𑀫𑀢𑁆𑀢𑀁. 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀦 𑀕𑀫𑀦𑀁 𑀕𑀫𑀦𑀫𑁂𑀯. 𑀅𑀪𑀺𑀳𑀭𑀦𑁆𑀢𑁄𑀢𑀺 𑀕𑀫𑀦𑀯𑀲𑁂𑀦 𑀓𑀸𑀬𑀁 𑀉𑀧𑀦𑁂𑀦𑁆𑀢𑁄. 𑀞𑀸𑀦𑀦𑀺𑀲𑀚𑁆𑀚𑀸𑀲𑀬𑀦𑁂𑀲𑀼 𑀬𑁄 𑀕𑀫𑀦𑀯𑀺𑀥𑀼𑀭𑁄 𑀓𑀸𑀬𑀲𑁆𑀲 𑀧𑀼𑀭𑀢𑁄 𑀅𑀪𑀺𑀳𑀸𑀭𑁄, 𑀲𑁄 𑀅𑀪𑀺𑀓𑁆𑀓𑀫𑁄, 𑀧𑀘𑁆𑀙𑀢𑁄 𑀅𑀧𑀳𑀭𑀡𑀁 𑀧𑀝𑀺𑀓𑁆𑀓𑀫𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀞𑀸𑀦𑁂𑀧𑀻’’𑀢𑀺𑀆𑀤𑀺𑀫𑀸𑀳. 𑀆𑀲𑀦𑀲𑁆𑀲𑀸𑀢𑀺 ¶ 𑀧𑀻𑀞𑀓𑀸𑀤𑀺𑀆𑀲𑀦𑀲𑁆𑀲. 𑀧𑀼𑀭𑀺𑀫𑀅𑀗𑁆𑀕𑀸𑀪𑀺𑀫𑀼𑀔𑁄𑀢𑀺 𑀅𑀝𑀦𑀺𑀓𑀸𑀤𑀺𑀧𑀼𑀭𑀺𑀫𑀸𑀯𑀬𑀯𑀸𑀪𑀺𑀫𑀼𑀔𑁄. 𑀲𑀁𑀲𑀭𑀦𑁆𑀢𑁄𑀢𑀺 𑀲𑀁𑀲𑀧𑁆𑀧𑀦𑁆𑀢𑁄. 𑀧𑀘𑁆𑀘𑀸𑀲𑀁𑀲𑀭𑀦𑁆𑀢𑁄𑀢𑀺 𑀧𑀝𑀺𑀆𑀲𑀧𑁆𑀧𑀦𑁆𑀢𑁄. ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀦𑀺𑀧𑀦𑁆𑀦𑀲𑁆𑀲𑁂𑀯 𑀅𑀪𑀺𑀫𑀼𑀔𑀲𑀁𑀲𑀧𑁆𑀧𑀦𑀧𑀝𑀺𑀆𑀲𑀧𑁆𑀧𑀦𑀸𑀦𑀺 𑀦𑀺𑀤𑀲𑁆𑀲𑁂𑀢𑀺.

𑀲𑀫𑁆𑀫𑀸 𑀧𑀚𑀸𑀦𑀦𑀁 𑀲𑀫𑁆𑀧𑀚𑀸𑀦𑀁, 𑀢𑁂𑀦 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀓𑀭𑀡𑀲𑀻𑀮𑁄 𑀲𑀫𑁆𑀧𑀚𑀸𑀦𑀓𑀸𑀭𑀻𑀢𑀺 𑀆𑀳 ‘‘𑀲𑀫𑁆𑀧𑀚𑀜𑁆𑀜𑁂𑀦 𑀲𑀩𑁆𑀩𑀓𑀺𑀘𑁆𑀘𑀓𑀸𑀭𑀻’’𑀢𑀺. 𑀲𑀫𑁆𑀧𑀚𑀸𑀦𑀲𑀤𑁆𑀤𑀲𑁆𑀲 𑀲𑀫𑁆𑀧𑀚𑀜𑁆𑀜𑀧𑀭𑀺𑀬𑀸𑀬𑀢𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸 𑀏𑀯. 𑀲𑀫𑁆𑀧𑀚𑀜𑁆𑀜𑀁 𑀓𑀭𑁄𑀢𑁂𑀯𑀸𑀢𑀺 𑀅𑀪𑀺𑀓𑁆𑀓𑀦𑁆𑀢𑀸𑀤𑀻𑀲𑀼 𑀅𑀲𑀫𑁆𑀫𑁄𑀳𑀁 𑀉𑀧𑁆𑀧𑀸𑀤𑁂𑀢𑀺 𑀏𑀯. 𑀲𑀫𑁆𑀧𑀚𑀜𑁆𑀜𑀲𑁆𑀲 𑀯𑀸 𑀓𑀸𑀭𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀫𑁆𑀧𑀚𑀸𑀦𑀓𑀸𑀭𑀻. 𑀥𑀫𑁆𑀫𑀢𑁄 𑀯𑀟𑁆𑀠𑀺𑀲𑀗𑁆𑀔𑀸𑀢𑁂𑀦 𑀲𑀳 𑀅𑀢𑁆𑀣𑁂𑀦 𑀯𑀢𑁆𑀢𑀢𑀻𑀢𑀺 𑀲𑀸𑀢𑁆𑀣𑀓𑀁, 𑀅𑀪𑀺𑀓𑁆𑀓𑀦𑁆𑀢𑀸𑀤𑀺. 𑀲𑀸𑀢𑁆𑀣𑀓𑀲𑁆𑀲 𑀲𑀫𑁆𑀧𑀚𑀸𑀦𑀦𑀁 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁. 𑀲𑀧𑁆𑀧𑀸𑀬𑀲𑁆𑀲 𑀅𑀢𑁆𑀢𑀦𑁄 𑀳𑀺𑀢𑀲𑁆𑀲 𑀲𑀫𑁆𑀧𑀚𑀸𑀦𑀦𑀁 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁. 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀪𑀺𑀓𑁆𑀔𑀸𑀘𑀸𑀭𑀕𑁄𑀘𑀭𑁂, 𑀅𑀜𑁆𑀜𑀢𑁆𑀣𑀸𑀧𑀺 𑀘 𑀧𑀯𑀢𑁆𑀢𑁂𑀲𑀼 𑀅𑀯𑀺𑀚𑀳𑀺𑀢𑁂 𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀔𑀸𑀢𑁂 𑀕𑁄𑀘𑀭𑁂 𑀲𑀫𑁆𑀧𑀚𑀜𑁆𑀜𑀁 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁. 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀅𑀲𑀫𑁆𑀫𑀼𑀬𑁆𑀳𑀦𑀫𑁂𑀯 𑀲𑀫𑁆𑀧𑀚𑀜𑁆𑀜𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁. 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀢𑀽𑀮𑁂𑀢𑁆𑀯𑀸 𑀢𑀻𑀭𑁂𑀢𑁆𑀯𑀸 𑀧𑀝𑀺𑀲𑀗𑁆𑀔𑀸𑀬𑀸𑀢𑀺, 𑀅𑀢𑁆𑀣𑁄. 𑀲𑀗𑁆𑀖𑀤𑀲𑁆𑀲𑀦𑁂𑀦𑁂𑀯 𑀉𑀧𑁄𑀲𑀣𑀧𑀯𑀸𑀭𑀡𑀸𑀤𑀺𑀅𑀢𑁆𑀣𑀁 𑀕𑀫𑀦𑀁 𑀲𑀗𑁆𑀕𑀳𑀺𑀢𑀁. 𑀅𑀲𑀼𑀪𑀤𑀲𑁆𑀲𑀦𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀲𑀺𑀡𑀧𑀭𑀺𑀓𑀫𑁆𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄 ¶ . 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀘𑁂𑀢𑀺𑀬𑀁 𑀯𑀸 𑀩𑁄𑀥𑀺𑀁 𑀯𑀸 𑀤𑀺𑀲𑁆𑀯𑀸𑀧𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀻𑀢𑀺 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄 𑀏𑀲𑁄. 𑀲𑀫𑀣𑀯𑀺𑀧𑀲𑁆𑀲𑀦𑀼𑀧𑁆𑀧𑀸𑀤𑀦𑀫𑁆𑀧𑀺 𑀳𑀺 𑀪𑀺𑀓𑁆𑀔𑀼𑀦𑁄 𑀯𑀟𑁆𑀠𑀺𑀬𑁂𑀯. 𑀓𑁂𑀘𑀻𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄.

𑀢𑀲𑁆𑀫𑀺𑀁 𑀧𑀦𑀸𑀢𑀺 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀯𑀲𑁂𑀦 𑀧𑀭𑀺𑀕𑁆𑀕𑀳𑀺𑀢𑀅𑀢𑁆𑀣𑁂. ‘‘𑀅𑀢𑁆𑀣𑁄𑀢𑀺 𑀥𑀫𑁆𑀫𑀢𑁄 𑀯𑀟𑁆𑀠𑀻’’𑀢𑀺 𑀬𑀁 𑀲𑀸𑀢𑁆𑀣𑀓𑀦𑁆𑀢𑀺 ¶ 𑀅𑀥𑀺𑀧𑁆𑀧𑁂𑀢𑀁, 𑀢𑀁 𑀲𑀧𑁆𑀧𑀸𑀬𑀁 𑀏𑀯𑀸𑀢𑀺 𑀲𑀺𑀬𑀸 𑀓𑀲𑁆𑀲𑀘𑀺 𑀆𑀲𑀗𑁆𑀓𑀸𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀘𑁂𑀢𑀺𑀬𑀤𑀲𑁆𑀲𑀦𑀁 𑀢𑀸𑀯𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀘𑀺𑀢𑁆𑀢𑀓𑀫𑁆𑀫𑀭𑀽𑀧𑀓𑀸𑀦𑀺 𑀯𑀺𑀬𑀸𑀢𑀺 𑀘𑀺𑀢𑁆𑀢𑀓𑀫𑁆𑀫𑀓𑀢𑀸 𑀧𑀝𑀺𑀫𑀸𑀬𑁄 𑀯𑀺𑀬, 𑀬𑀦𑁆𑀢𑀧𑀬𑁄𑀕𑁂𑀦 𑀯𑀸 𑀯𑀺𑀘𑀺𑀢𑁆𑀢𑀓𑀫𑁆𑀫𑀸 𑀧𑀝𑀺𑀫𑀸𑀬𑁄 𑀯𑀺𑀬. 𑀅𑀲𑀫𑀧𑁂𑀓𑁆𑀔𑀦𑀁 𑀕𑁂𑀳𑀲𑁆𑀲𑀺𑀢 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸𑀯𑀲𑁂𑀦 𑀆𑀭𑀫𑁆𑀫𑀡𑀲𑁆𑀲 𑀅𑀬𑁄𑀦𑀺𑀲𑁄 𑀕𑀳𑀡𑀁. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀉𑀧𑁂𑀓𑁆𑀔𑀸 𑀩𑀸𑀮𑀲𑁆𑀲 𑀫𑀽𑀴𑁆𑀳𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲𑀸’’𑀢𑀺𑀆𑀤𑀺 (𑀫. 𑀦𑀺. 𑁩.𑁩𑁦𑁮). 𑀳𑀢𑁆𑀣𑀺𑀆𑀤𑀺𑀲𑀫𑁆𑀫𑀤𑁆𑀤𑁂𑀦 𑀚𑀻𑀯𑀺𑀢𑀦𑁆𑀢𑀭𑀸𑀬𑁄. 𑀯𑀺𑀲𑀪𑀸𑀕𑀭𑀽𑀧𑀤𑀲𑁆𑀲𑀦𑀸𑀤𑀺𑀦𑀸 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄.

𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 ¶ 𑀧𑀝𑁆𑀞𑀸𑀬 𑀪𑀺𑀓𑁆𑀔𑀽𑀦𑀁 𑀅𑀦𑀼𑀯𑀢𑁆𑀢𑀦𑀓𑀣𑀸 𑀆𑀘𑀺𑀡𑁆𑀡𑀸, 𑀅𑀦𑀦𑀼𑀯𑀢𑁆𑀢𑀦𑀓𑀣𑀸 𑀧𑀦 𑀢𑀲𑁆𑀲𑀸 𑀤𑀼𑀢𑀺𑀬𑀸 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀤𑁆𑀯𑁂 𑀓𑀣𑀸 𑀦𑀸𑀫 𑀦 𑀓𑀣𑀺𑀢𑀧𑀼𑀩𑁆𑀩𑀸’’𑀢𑀺. 𑀏𑀯𑀦𑁆𑀢𑀺 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺𑀓𑀁 𑀲𑀩𑁆𑀩𑀫𑁆𑀧𑀺 𑀯𑀼𑀢𑁆𑀢𑀸𑀓𑀸𑀭𑀁 𑀧𑀘𑁆𑀘𑀸𑀫𑀲𑀢𑀺, 𑀦 ‘‘𑀧𑀼𑀭𑀺𑀲𑀲𑁆𑀲 𑀫𑀸𑀢𑀼𑀕𑀸𑀫𑀸𑀲𑀼𑀪’’𑀦𑁆𑀢𑀺𑀆𑀤𑀺𑀓𑀁 𑀯𑀼𑀘𑁆𑀘𑀫𑀸𑀦𑀁.

𑀬𑁄𑀕𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀪𑀸𑀯𑀦𑀸𑀬 𑀆𑀭𑀫𑁆𑀫𑀡𑀁 ‘‘𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀔𑀸𑀢𑀁 𑀕𑁄𑀘𑀭’’𑀦𑁆𑀢𑀺. 𑀉𑀕𑁆𑀕𑀳𑁂𑀢𑁆𑀯𑀸𑀢𑀺 𑀬𑀣𑀸 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀉𑀕𑁆𑀕𑀳𑀓𑁄𑀲𑀮𑁆𑀮𑀲𑁆𑀲 𑀲𑀫𑁆𑀧𑀸𑀤𑀦𑀯𑀲𑁂𑀦 𑀉𑀕𑁆𑀕𑀳𑁂𑀢𑁆𑀯𑀸 ¶ .

𑀳𑀭𑀢𑀻𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀧𑀯𑀢𑁆𑀢𑁂𑀢𑀺, 𑀬𑀸𑀯 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀫𑀸 𑀅𑀦𑀼𑀬𑀼𑀜𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀦 𑀧𑀘𑁆𑀘𑀸𑀳𑀭𑀢𑀻𑀢𑀺 𑀆𑀳𑀸𑀭𑀽𑀧𑀬𑁄𑀕𑀢𑁄 𑀬𑀸𑀯 𑀤𑀺𑀯𑀸𑀞𑀸𑀦𑀼𑀧𑀲𑀗𑁆𑀓𑀫𑀦𑀸 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀧𑀝𑀺𑀦𑁂𑀢𑀺. 𑀲𑀭𑀻𑀭𑀧𑀭𑀺𑀓𑀫𑁆𑀫𑀦𑁆𑀢𑀺 𑀫𑀼𑀔𑀥𑁄𑀯𑀦𑀸𑀤𑀺𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁. 𑀤𑁆𑀯𑁂 𑀢𑀬𑁄 𑀧𑀮𑁆𑀮𑀗𑁆𑀓𑁂𑀢𑀺 𑀤𑁆𑀯𑁂 𑀢𑀬𑁄 𑀦𑀺𑀲𑀚𑁆𑀚𑀸𑀯𑀸𑀭𑁂 𑀤𑁆𑀯𑁂 𑀢𑀻𑀡𑀺 𑀉𑀡𑁆𑀳𑀸𑀲𑀦𑀸𑀦𑀺. 𑀢𑁂𑀦𑀸𑀳 ‘‘𑀉𑀲𑀼𑀫𑀁 𑀕𑀸𑀳𑀸𑀧𑁂𑀦𑁆𑀢𑁄’’𑀢𑀺. 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀫𑀼𑀔𑁂𑀦𑁂𑀯 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀚𑀳𑀦𑁆𑀢𑁄 𑀏𑀯, 𑀢𑁂𑀦 ‘‘𑀧𑀢𑁆𑀢𑁄𑀧𑀺 𑀅𑀘𑁂𑀢𑀦𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁧𑁪) 𑀯𑀓𑁆𑀔𑀫𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀁, 𑀬𑀣𑀸𑀧𑀭𑀺𑀳𑀭𑀺𑀬𑀫𑀸𑀦𑀁 𑀯𑀸 𑀅𑀯𑀺𑀚𑀳𑀺𑀢𑁆𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀣𑁂𑀯𑀸𑀢𑀺 𑀢𑀺𑀓𑁆𑀔𑀢𑁆𑀢𑀼𑀫𑁂𑀯. 𑀧𑀭𑀺𑀪𑁄𑀕𑀘𑁂𑀢𑀺𑀬𑀢𑁄 𑀲𑀸𑀭𑀻𑀭𑀺𑀓𑀘𑁂𑀢𑀺𑀬𑀁 𑀕𑀭𑀼𑀢𑀭𑀦𑁆𑀢𑀺 𑀓𑀢𑁆𑀯𑀸 ‘‘𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸’’𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀬 𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀘𑁂𑀢𑀺𑀬𑀁 𑀩𑀸𑀥𑀬𑀫𑀸𑀦𑀸 𑀩𑁄𑀥𑀺𑀲𑀸𑀔𑀸 𑀳𑀭𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀸. 𑀩𑀼𑀤𑁆𑀥𑀕𑀼𑀡𑀸𑀦𑀼𑀲𑁆𑀲𑀭𑀡𑀯𑀲𑁂𑀦𑁂𑀯 𑀩𑁄𑀥𑀺𑀬𑀁 𑀧𑀡𑀺𑀧𑀸𑀢𑀓𑀭𑀡𑀦𑁆𑀢𑀺 𑀆𑀳 ‘‘𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀯𑀺𑀬 𑀦𑀺𑀧𑀘𑁆𑀘𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸’’𑀢𑀺. 𑀕𑀸𑀫𑀲𑀫𑀻𑀧𑁂𑀢𑀺 𑀕𑀸𑀫𑀲𑁆𑀲 𑀉𑀧𑀘𑀸𑀭𑀝𑁆𑀞𑀸𑀦𑁂. 𑀚𑀦𑀲𑀗𑁆𑀕𑀳𑀢𑁆𑀣𑀦𑁆𑀢𑀺 ‘‘𑀫𑀬𑀺 𑀅𑀓𑀣𑁂𑀦𑁆𑀢𑁂 𑀏𑀢𑁂𑀲𑀁 𑀓𑁄 𑀓𑀣𑁂𑀲𑁆𑀲𑀢𑀻’’𑀢𑀺 𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦 𑀚𑀦𑀲𑀗𑁆𑀕𑀳𑀢𑁆𑀣𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 ‘‘𑀥𑀫𑁆𑀫𑀓𑀣𑀸 𑀦𑀸𑀫 𑀓𑀣𑁂𑀢𑀩𑁆𑀩𑀸 𑀏𑀯𑀸’’𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀯𑀤𑀦𑁆𑀢𑀺, 𑀬𑀲𑁆𑀫𑀸 𑀘 𑀥𑀫𑁆𑀫𑀓𑀣𑀸 𑀓𑀫𑁆𑀫𑀝𑁆𑀞𑀸𑀦𑀯𑀺𑀦𑀺𑀫𑀼𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸. 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯𑀸𑀢𑀺 𑀅𑀢𑁆𑀢𑀦𑀸 𑀧𑀭𑀺𑀳𑀭𑀺𑀬𑀫𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀚𑀳𑀦𑁆𑀢𑁄 ¶ 𑀢𑀤𑀦𑀼𑀕𑀼𑀡𑀁𑀬𑁂𑀯 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸. 𑀅𑀦𑀼𑀫𑁄𑀤𑀦𑀁 𑀯𑀢𑁆𑀯𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯𑀸’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑀲𑀫𑁆𑀧𑀢𑁆𑀢𑀧𑀭𑀺𑀘𑁆𑀙𑁂𑀤𑁂𑀦𑁂𑀯𑀸𑀢𑀺 ‘‘𑀧𑀭𑀺𑀘𑀺𑀢𑁄 𑀅𑀧𑀭𑀺𑀘𑀺𑀢𑁄’’𑀢𑀺𑀆𑀤𑀺 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀓𑁄𑀝𑀺𑀬𑀸 𑀏𑀯, 𑀲𑀫𑀸𑀕𑀫𑀫𑀢𑁆𑀢𑁂𑀦𑁂𑀯𑀸𑀢𑀺 𑀅𑀢𑁆𑀣𑁄. 𑀪𑀬𑁂𑀢𑀺 𑀧𑀭𑀘𑀓𑁆𑀓𑀸𑀤𑀺𑀪𑀬𑁂.

‘‘𑀓𑀫𑁆𑀫𑀚𑀢𑁂𑀚𑁄’’𑀢𑀺 ¶ ¶ 𑀕𑀳𑀡𑀺𑀁 𑀲𑀦𑁆𑀥𑀸𑀬𑀸𑀳. 𑀓𑀫𑁆𑀫𑀝𑁆𑀞𑀸𑀦𑀁 𑀯𑀻𑀣𑀺𑀁 𑀦𑀸𑀭𑁄𑀳𑀢𑀺 𑀔𑀼𑀤𑀸𑀧𑀭𑀺𑀲𑁆𑀲𑀫𑁂𑀦 𑀓𑀺𑀮𑀦𑁆𑀢𑀓𑀸𑀬𑀢𑁆𑀢𑀸 𑀲𑀫𑀸𑀥𑀸𑀦𑀸𑀪𑀸𑀯𑀢𑁄. 𑀅𑀯𑀲𑁂𑀲𑀝𑁆𑀞𑀸𑀦𑁂𑀢𑀺 𑀬𑀸𑀕𑀼𑀬𑀸 𑀅𑀕𑁆𑀕𑀳𑀺𑀢𑀝𑁆𑀞𑀸𑀦𑁂. 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀼𑀧𑀝𑁆𑀞𑀸𑀦𑀲𑁆𑀲 𑀅𑀯𑀺𑀘𑁆𑀙𑁂𑀤𑀤𑀲𑁆𑀲𑀦𑀫𑁂𑀢𑀁, 𑀬𑀣𑀸 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀁 𑀧𑀯𑀢𑁆𑀢𑀸𑀬 𑀲𑀭𑀧𑀝𑀺𑀧𑀸𑀢𑀺𑀬𑀸 𑀅𑀦𑀯𑀺𑀘𑁆𑀙𑁂𑀤𑁄, 𑀏𑀯𑀫𑁂𑀢𑀲𑁆𑀲𑀧𑀻𑀢𑀺.

𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀪𑀸𑀯𑀦𑀸𑀦𑀼𑀬𑁄𑀕𑁂. 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀅𑀧𑀽𑀭𑀡𑁂𑀦 𑀲𑀩𑁆𑀩𑀯𑀢𑁆𑀢𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸. ‘‘𑀓𑀸𑀫𑁂𑀲𑀼 𑀅𑀯𑀻𑀢𑀭𑀸𑀕𑁄 𑀳𑁄𑀢𑀺, 𑀓𑀸𑀬𑁂 𑀅𑀯𑀻𑀢𑀭𑀸𑀕𑁄, 𑀭𑀽𑀧𑁂 𑀅𑀯𑀻𑀢𑀭𑀸𑀕𑁄, 𑀬𑀸𑀯𑀤𑀢𑁆𑀣𑀁 𑀉𑀤𑀭𑀸𑀯𑀤𑁂𑀳𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺, 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀧𑀡𑀺𑀥𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁦; 𑀫. 𑀦𑀺. 𑁧.𑁧𑁮𑁬) 𑀏𑀯𑀁 𑀯𑀼𑀢𑁆𑀢𑀧𑀜𑁆𑀘𑀯𑀺𑀥𑀘𑁂𑀢𑁄𑀔𑀺𑀮𑀯𑀺𑀦𑀺𑀩𑀦𑁆𑀥𑀘𑀺𑀢𑁆𑀢𑁄. 𑀘𑀭𑀺𑀢𑁆𑀯𑀸𑀢𑀺 𑀧𑀯𑀢𑁆𑀢𑀺𑀢𑁆𑀯𑀸.

𑀕𑀢𑀧𑀘𑁆𑀘𑀸𑀕𑀢𑀺𑀓𑀯𑀢𑁆𑀢𑀯𑀲𑁂𑀦𑀸𑀢𑀺 𑀪𑀸𑀯𑀦𑀸𑀲𑀳𑀺𑀢𑀁𑀬𑁂𑀯 𑀪𑀺𑀓𑁆𑀔𑀸𑀬 𑀕𑀢𑀧𑀘𑁆𑀘𑀸𑀕𑀢𑀁 𑀕𑀫𑀦𑀧𑀘𑁆𑀘𑀸𑀕𑀫𑀦𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀕𑀢𑀧𑀘𑁆𑀘𑀸𑀕𑀢𑀺𑀓𑀁, 𑀢𑀤𑁂𑀯 𑀯𑀢𑁆𑀢𑀁, 𑀢𑀲𑁆𑀲 𑀯𑀲𑁂𑀦. 𑀅𑀢𑁆𑀢𑀓𑀸𑀫𑀸𑀢𑀺 𑀅𑀢𑁆𑀢𑀦𑁄 𑀳𑀺𑀢𑀲𑀼𑀔𑀁 𑀇𑀘𑁆𑀙𑀦𑁆𑀢𑀸, 𑀥𑀫𑁆𑀫𑀘𑁆𑀙𑀦𑁆𑀤𑀯𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁄 𑀳𑀺 𑀳𑀺𑀢𑀁 𑀢𑀦𑁆𑀦𑀺𑀫𑀺𑀢𑁆𑀢𑀓𑀜𑁆𑀘 𑀲𑀼𑀔𑀦𑁆𑀢𑀺. 𑀅𑀣 𑀯𑀸 𑀯𑀺𑀜𑁆𑀜𑀽𑀦𑀁 𑀦𑀺𑀩𑁆𑀩𑀺𑀲𑁂𑀲𑀢𑁆𑀢𑀸, 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀘 𑀅𑀢𑁆𑀢𑀸 𑀦𑀸𑀫 𑀥𑀫𑁆𑀫𑁄, 𑀢𑀁 𑀓𑀸𑀫𑁂𑀦𑁆𑀢𑀺 𑀇𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀢𑀓𑀸𑀫𑀸.

𑀉𑀲𑀪𑀁 𑀦𑀸𑀫 𑀯𑀻𑀲𑀢𑀺 𑀬𑀝𑁆𑀞𑀺𑀬𑁄. 𑀢𑀸𑀬 𑀲𑀜𑁆𑀜𑀸𑀬𑀸𑀢𑀺 𑀢𑀸𑀬 𑀧𑀸𑀲𑀸𑀡𑀲𑀜𑁆𑀜𑀸𑀬, 𑀏𑀢𑁆𑀢𑀓𑀁 𑀞𑀸𑀦𑀁 𑀆𑀕𑀢𑀸𑀢𑀺 𑀚𑀸𑀦𑀦𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁄𑀬𑁂𑀯 𑀦𑀬𑁄𑀢𑀺 ‘‘𑀅𑀬𑀁 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀓𑁄 𑀬𑁄 𑀞𑀸𑀦𑁂 𑀯𑀼𑀢𑁆𑀢𑁄, 𑀲𑁄 𑀏𑀯 𑀦𑀺𑀲𑀚𑁆𑀚𑀸𑀬𑀧𑀺 𑀦𑀬𑁄. 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀸𑀦𑀁 𑀙𑀺𑀦𑁆𑀦𑀪𑀢𑁆𑀢𑀪𑀸𑀯𑀪𑀬𑁂𑀦𑀧𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀧𑀭𑀺𑀩𑁆𑀭𑀽𑀳𑁂𑀢𑀺. 𑀫𑀤𑁆𑀤𑀦𑁆𑀢𑀸𑀢𑀺 ¶ 𑀥𑀜𑁆𑀜𑀓𑀭𑀡𑀝𑁆𑀞𑀸𑀦𑁂 𑀲𑀸𑀮𑀺𑀲𑀻𑀲𑀸𑀦𑀺 𑀫𑀤𑁆𑀤𑀦𑁆𑀢𑀸.

𑀫𑀳𑀸𑀧𑀥𑀸𑀦𑀁 𑀧𑀽𑀚𑁂𑀲𑁆𑀲𑀸𑀫𑀻𑀢𑀺 𑀅𑀫𑁆𑀳𑀸𑀓𑀁 𑀅𑀢𑁆𑀣𑀸𑀬 𑀮𑁄𑀓𑀦𑀸𑀣𑁂𑀦 𑀙𑀯𑀲𑁆𑀲𑀸𑀦𑀺 𑀓𑀢𑀁 𑀤𑀼𑀓𑁆𑀓𑀭𑀘𑀭𑀺𑀬𑀫𑁂𑀯𑀸𑀳𑀁 𑀬𑀣𑀸𑀲𑀢𑁆𑀢𑀺 𑀧𑀽𑀚𑁂𑀲𑁆𑀲𑀸𑀫𑀻𑀢𑀺. 𑀧𑀝𑀺𑀧𑀢𑁆𑀢𑀺𑀧𑀽𑀚𑀸 𑀳𑀺 𑀲𑀢𑁆𑀣𑀼𑀧𑀽𑀚𑀸, 𑀦 𑀆𑀫𑀺𑀲𑀧𑀽𑀚𑀸𑀢𑀺. ‘‘𑀞𑀸𑀦𑀘𑀗𑁆𑀓𑀫𑀫𑁂𑀯𑀸’’𑀢𑀺 ¶ 𑀅𑀥𑀺𑀝𑁆𑀞𑀸𑀢𑀩𑁆𑀩𑀇𑀭𑀺𑀬𑀸𑀧𑀣𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀪𑁄𑀚𑀦𑀸𑀤𑀺𑀓𑀸𑀮𑁂𑀲𑀼 𑀅𑀯𑀲𑁆𑀲𑀁 𑀓𑀢𑁆𑀢𑀩𑁆𑀩𑀦𑀺𑀲𑀚𑁆𑀚𑀸𑀬 𑀧𑀝𑀺𑀓𑁆𑀔𑁂𑀧𑀯𑀲𑁂𑀦.

𑀯𑀻𑀣𑀺𑀁 𑀑𑀢𑀭𑀺𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀅𑀦𑁄𑀮𑁄𑀓𑁂𑀢𑁆𑀯𑀸 𑀧𑀞𑀫𑀫𑁂𑀯 𑀯𑀻𑀣𑀺𑀬𑁄 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸𑀢𑀺 𑀆𑀳 ‘‘𑀯𑀻𑀣𑀺𑀬𑁄 𑀲𑀮𑁆𑀮𑀓𑁆𑀔𑁂𑀢𑁆𑀯𑀸’’𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀘𑁆𑀘𑀢𑀺 ¶ ‘‘𑀧𑀸𑀲𑀸𑀤𑀺𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑁂𑀦𑀸’’𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀁 𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺. 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀦𑁆𑀢𑀺 ‘‘𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩; 𑀅. 𑀦𑀺. 𑁬.𑁫𑁮; 𑀫𑀳𑀸𑀦𑀺. 𑁨𑁦𑁬) 𑀯𑀼𑀢𑁆𑀢𑁂𑀳𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀓𑀢𑁆𑀯𑀸. ‘‘𑀦𑁂𑀯 𑀤𑀯𑀸𑀬𑀸’’𑀢𑀺𑀆𑀤𑀺 𑀧𑀝𑀺𑀓𑁆𑀔𑁂𑀧𑀤𑀲𑁆𑀲𑀦𑀁.

𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀬𑀤𑀺 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀲𑀩𑁆𑀩𑀢𑁆𑀣 𑀇𑀢𑁄 𑀧𑀭𑁂𑀲𑀼𑀧𑀺. 𑀢𑀢𑁆𑀣 𑀧𑀘𑁆𑀘𑁂𑀓𑀩𑁄𑀥𑀺𑀬𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀤𑀸 𑀓𑀧𑁆𑀧𑀸𑀦𑀁 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺, 𑀲𑀢𑀲𑀳𑀲𑁆𑀲𑀜𑁆𑀘 𑀢𑀚𑁆𑀚𑀸𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀭𑀡𑀁. 𑀲𑀸𑀯𑀓𑀩𑁄𑀥𑀺𑀬𑀸 𑀅𑀕𑁆𑀕𑀲𑀸𑀯𑀓𑀸𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁, 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘, 𑀫𑀳𑀸𑀲𑀸𑀯𑀓𑀸𑀦𑀁 (𑀣𑁂𑀭𑀕𑀸. 𑀅𑀝𑁆𑀞. 𑁨.𑁧𑁨𑁮𑁮) 𑀲𑀢𑀲𑀳𑀲𑁆𑀲𑀫𑁂𑀯 𑀢𑀚𑁆𑀚𑀸𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀭𑀡𑀁. 𑀇𑀢𑀭𑁂𑀲𑀁 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀼 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀬𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀓𑀼𑀲𑀮𑀁. 𑀩𑀸𑀳𑀺𑀬𑁄 𑀤𑀸𑀭𑀼𑀘𑀻𑀭𑀺𑀬𑁄𑀢𑀺 𑀩𑀸𑀳𑀺𑀬𑀯𑀺𑀲𑀬𑁂 𑀲𑀜𑁆𑀚𑀸𑀢𑀲𑀁𑀯𑀟𑁆𑀠𑀢𑀸𑀬 𑀩𑀸𑀳𑀺𑀬𑁄, 𑀤𑀸𑀭𑀼𑀘𑀻𑀭𑀧𑀭𑀺𑀳𑀭𑀡𑁂𑀦 𑀤𑀸𑀭𑀼𑀘𑀻𑀭𑀺𑀬𑁄𑀢𑀺 𑀘 𑀲𑀫𑀜𑁆𑀜𑀸𑀢𑁄. 𑀲𑁄 𑀳𑀺 𑀆𑀬𑀲𑁆𑀫𑀸 ‘‘𑀢𑀲𑁆𑀫𑀸𑀢𑀺𑀳 ¶ 𑀢𑁂, 𑀩𑀸𑀳𑀺𑀬, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀲𑀼𑀢𑁂, 𑀫𑀼𑀢𑁂, 𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’𑀢𑀺, 𑀏𑀯𑀜𑁆𑀳𑀺 𑀢𑁂 𑀩𑀸𑀳𑀺𑀬 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀬𑀢𑁄 𑀔𑁄 𑀢𑁂 𑀩𑀸𑀳𑀺𑀬 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀲𑀼𑀢𑁂, 𑀫𑀼𑀢𑁂, 𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀢𑀢𑁄 𑀢𑁆𑀯𑀁, 𑀩𑀸𑀳𑀺𑀬, 𑀦 𑀢𑁂𑀦. 𑀬𑀢𑁄 𑀢𑁆𑀯𑀁, 𑀩𑀸𑀳𑀺𑀬, 𑀦 𑀢𑁂𑀦, 𑀢𑀢𑁄 𑀢𑁆𑀯𑀁, 𑀩𑀸𑀳𑀺𑀬, 𑀦 𑀢𑀢𑁆𑀣. 𑀬𑀢𑁄 𑀢𑁆𑀯𑀁, 𑀩𑀸𑀳𑀺𑀬, 𑀦 𑀢𑀢𑁆𑀣, 𑀢𑀢𑁄 𑀢𑁆𑀯𑀁, 𑀩𑀸𑀳𑀺𑀬, 𑀦𑁂𑀯𑀺𑀥 𑀦 𑀳𑀼𑀭𑀁 𑀦 𑀉𑀪𑀬𑀫𑀦𑁆𑀢𑀭𑁂𑀦. 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸’’𑀢𑀺 (𑀉𑀤𑀸. 𑁧𑁦) 𑀏𑀢𑁆𑀢𑀓𑀸𑀬 𑀤𑁂𑀲𑀦𑀸𑀬 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺. 𑀏𑀯𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀸𑀤𑀻𑀦𑀁 𑀫𑀳𑀸𑀧𑀜𑁆𑀜𑀢𑀸𑀤𑀺𑀤𑀻𑀧𑀦𑀸𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀢𑀦𑁆𑀢𑀺 𑀅𑀲𑀫𑁆𑀫𑀼𑀬𑁆𑀳𑀦𑀁 𑀏𑀯𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀫𑀸𑀓𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. ‘‘𑀅𑀢𑁆𑀢𑀸 𑀅𑀪𑀺𑀓𑁆𑀓𑀫𑀢𑀻’’𑀢𑀺 𑀇𑀫𑀺𑀦𑀸 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀲𑁆𑀲 𑀤𑀺𑀝𑁆𑀞𑀺𑀕𑀸𑀳𑀯𑀲𑁂𑀦 𑀅𑀪𑀺𑀓𑁆𑀓𑀫𑁂 𑀲𑀫𑁆𑀫𑀼𑀬𑁆𑀳𑀦𑀁 𑀤𑀲𑁆𑀲𑁂𑀢𑀺, ‘‘𑀅𑀳𑀁 𑀅𑀪𑀺𑀓𑁆𑀓𑀫𑀸𑀫𑀻’’𑀢𑀺 𑀧𑀦 𑀇𑀫𑀺𑀦𑀸 𑀫𑀸𑀦𑀕𑀸𑀳𑀯𑀲𑁂𑀦. 𑀢𑀤𑀼𑀪𑀬𑀁 𑀧𑀦 𑀢𑀡𑁆𑀳𑀸𑀬 𑀯𑀺𑀦𑀸 𑀦 𑀳𑁄𑀢𑀻𑀢𑀺 𑀢𑀡𑁆𑀳𑀕𑀸𑀳𑀯𑀲𑁂𑀦𑀧𑀺 𑀲𑀫𑁆𑀫𑀼𑀬𑁆𑀳𑀦𑀁 𑀤𑀲𑁆𑀲𑀺𑀢𑀫𑁂𑀯 𑀳𑁄𑀢𑀺. ‘‘𑀢𑀣𑀸 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁄’’𑀢𑀺 𑀯𑀢𑁆𑀯𑀸 𑀢𑀁 𑀅𑀲𑀫𑁆𑀫𑀼𑀬𑁆𑀳𑀦𑀁 𑀬𑁂𑀦 𑀖𑀦𑀯𑀺𑀦𑀺𑀩𑁆𑀪𑁄𑀕𑁂𑀦 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀪𑀺𑀓𑁆𑀓𑀫𑀸𑀫𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ¶ 𑀬𑀲𑁆𑀫𑀸 ¶ 𑀯𑀸𑀬𑁄𑀥𑀸𑀢𑀼𑀬𑀸 𑀅𑀦𑀼𑀕𑀢𑀸 𑀢𑁂𑀚𑁄𑀥𑀸𑀢𑀼 𑀉𑀤𑁆𑀥𑀭𑀡𑀲𑁆𑀲 𑀧𑀘𑁆𑀘𑀬𑁄. 𑀉𑀤𑁆𑀥𑀭𑀡𑀕𑀢𑀺𑀓𑀸 𑀳𑀺 𑀢𑁂𑀚𑁄𑀥𑀸𑀢𑀽𑀢𑀺. 𑀉𑀤𑁆𑀥𑀭𑀡𑁂 𑀯𑀸𑀬𑁄𑀥𑀸𑀢𑀼𑀬𑀸 𑀢𑀲𑁆𑀲𑀸 𑀅𑀦𑀼𑀕𑀢𑀪𑀸𑀯𑁄, 𑀢𑀲𑁆𑀫𑀸 𑀇𑀫𑀸𑀲𑀁 𑀤𑁆𑀯𑀺𑀦𑁆𑀦𑀫𑁂𑀢𑁆𑀣 𑀲𑀸𑀫𑀢𑁆𑀣𑀺𑀬𑀢𑁄 𑀅𑀥𑀺𑀫𑀢𑁆𑀢𑀢𑀸, 𑀇𑀢𑀭𑀸𑀲𑀜𑁆𑀘 𑀑𑀫𑀢𑁆𑀢𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑁂𑀓𑀧𑀸𑀤𑀼𑀤𑁆𑀥𑀭𑀡𑁂…𑀧𑁂… 𑀩𑀮𑀯𑀢𑀺𑀬𑁄𑀢𑀺 𑀆𑀳. 𑀬𑀲𑁆𑀫𑀸 𑀧𑀦 𑀢𑁂𑀚𑁄𑀥𑀸𑀢𑀼𑀬𑀸 𑀅𑀦𑀼𑀕𑀢𑀸 𑀯𑀸𑀬𑁄𑀥𑀸𑀢𑀼 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑀸𑀦𑀁 𑀧𑀘𑁆𑀘𑀬𑁄. 𑀢𑀺𑀭𑀺𑀬𑀕𑀢𑀺𑀓𑀸𑀬 𑀳𑀺 𑀯𑀸𑀬𑁄𑀥𑀸𑀢𑀼𑀬𑀸 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑁂𑀲𑀼 𑀲𑀸𑀢𑀺𑀲𑀬𑁄 𑀩𑁆𑀬𑀸𑀧𑀸𑀭𑁄𑀢𑀺. 𑀢𑁂𑀚𑁄𑀥𑀸𑀢𑀼𑀬𑀸 𑀢𑀲𑁆𑀲𑀸 𑀅𑀦𑀼𑀕𑀢𑀪𑀸𑀯𑁄, 𑀢𑀲𑁆𑀫𑀸 𑀇𑀫𑀸𑀲𑀁 𑀤𑁆𑀯𑀺𑀦𑁆𑀦𑀫𑁂𑀢𑁆𑀣 𑀲𑀸𑀫𑀢𑁆𑀣𑀺𑀬𑀢𑁄 𑀅𑀥𑀺𑀫𑀢𑁆𑀢𑀢𑀸, 𑀇𑀢𑀭𑀸𑀲𑀜𑁆𑀘 𑀑𑀫𑀢𑁆𑀢𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ¶ ‘‘𑀢𑀣𑀸 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑁂𑀲𑀽’’𑀢𑀺 𑀆𑀳. 𑀲𑀢𑀺𑀧𑀺 𑀅𑀦𑀼𑀕𑀫𑀓𑀅𑀦𑀼𑀕𑀦𑁆𑀢𑀩𑁆𑀩𑀢𑀸𑀯𑀺𑀲𑁂𑀲𑁂 𑀢𑁂𑀚𑁄𑀥𑀸𑀢𑀼𑀯𑀸𑀬𑁄𑀥𑀸𑀢𑀼𑀪𑀸𑀯𑀫𑀢𑁆𑀢𑀁 𑀲𑀦𑁆𑀥𑀸𑀬 𑀢𑀣𑀸-𑀲𑀤𑁆𑀤𑀕𑁆𑀕𑀳𑀡𑀁,. 𑀢𑀢𑁆𑀣 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑀢𑁄 𑀧𑀸𑀤𑀲𑁆𑀲 𑀉𑀓𑁆𑀔𑀺𑀧𑀦𑀁 𑀉𑀤𑁆𑀥𑀭𑀡𑀁. 𑀞𑀺𑀢𑀝𑁆𑀞𑀸𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀼𑀭𑀢𑁄 𑀳𑀭𑀡𑀁 𑀅𑀢𑀺𑀳𑀭𑀡𑀁, 𑀔𑀸𑀡𑀼𑀆𑀤𑀺𑀧𑀭𑀺𑀳𑀭𑀡𑀢𑁆𑀣𑀁, 𑀧𑀢𑀺𑀝𑁆𑀞𑀺𑀢𑀧𑀸𑀤𑀖𑀝𑁆𑀝𑀦𑀧𑀭𑀺𑀳𑀭𑀡𑀢𑁆𑀣𑀁 𑀯𑀸 𑀧𑀲𑁆𑀲𑁂𑀦 𑀳𑀭𑀡𑀁 𑀯𑀻𑀢𑀺𑀳𑀭𑀡𑀁. 𑀬𑀸𑀯 𑀧𑀢𑀺𑀝𑁆𑀞𑀺𑀢𑀧𑀸𑀤𑁄, 𑀢𑀸𑀯 𑀆𑀳𑀭𑀡𑀁 𑀅𑀢𑀺𑀳𑀭𑀡𑀁, 𑀢𑀢𑁄 𑀧𑀭𑀁 𑀳𑀭𑀡𑀁 𑀯𑀻𑀢𑀺𑀳𑀭𑀡𑀦𑁆𑀢𑀺 𑀅𑀬𑀁 𑀯𑀸 𑀏𑀢𑁂𑀲𑀁 𑀯𑀺𑀲𑁂𑀲𑁄.

𑀬𑀲𑁆𑀫𑀸 𑀧𑀣𑀯𑀻𑀥𑀸𑀢𑀼𑀬𑀸 𑀅𑀦𑀼𑀕𑀢𑀸 𑀆𑀧𑁄𑀥𑀸𑀢𑀼 𑀯𑁄𑀲𑁆𑀲𑀚𑁆𑀚𑀦𑀲𑁆𑀲 𑀧𑀘𑁆𑀘𑀬𑁄. 𑀕𑀭𑀼𑀢𑀭𑀲𑀪𑀸𑀯𑀸 𑀳𑀺 𑀆𑀧𑁄𑀥𑀸𑀢𑀽𑀢𑀺. 𑀯𑁄𑀲𑁆𑀲𑀚𑁆𑀚𑀦𑁂 𑀧𑀣𑀯𑀻𑀥𑀸𑀢𑀼𑀬𑀸 𑀢𑀲𑁆𑀲𑀸 𑀅𑀦𑀼𑀕𑀢𑀪𑀸𑀯𑁄, 𑀢𑀲𑁆𑀫𑀸 𑀢𑀸𑀲𑀁 𑀤𑁆𑀯𑀺𑀦𑁆𑀦𑀫𑁂𑀢𑁆𑀣 𑀲𑀸𑀫𑀢𑁆𑀣𑀺𑀬𑀢𑁄 𑀅𑀥𑀺𑀫𑀢𑁆𑀢𑀢𑀸, 𑀇𑀢𑀭𑀸𑀲𑀜𑁆𑀘 𑀑𑀫𑀢𑁆𑀢𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑁄𑀲𑁆𑀲𑀚𑁆𑀚𑀦𑁂…𑀧𑁂… 𑀩𑀮𑀯𑀢𑀺𑀬𑁄’’𑀢𑀺. 𑀬𑀲𑁆𑀫𑀸 𑀧𑀦 𑀆𑀧𑁄𑀥𑀸𑀢𑀼𑀬𑀸 𑀅𑀦𑀼𑀕𑀢𑀸 𑀧𑀣𑀯𑀻𑀥𑀸𑀢𑀼 𑀲𑀦𑁆𑀦𑀺𑀓𑁆𑀔𑁂𑀧𑀦𑀲𑁆𑀲 𑀧𑀘𑁆𑀘𑀬𑁄, 𑀧𑀢𑀺𑀝𑁆𑀞𑀸𑀪𑀸𑀯𑁂 𑀯𑀺𑀬 𑀧𑀢𑀺𑀝𑁆𑀞𑀸𑀧𑀦𑁂𑀧𑀺 𑀢𑀲𑁆𑀲𑀸 𑀲𑀸𑀢𑀺𑀲𑀬𑀓𑀺𑀘𑁆𑀘𑀢𑁆𑀢𑀸 𑀆𑀧𑁄𑀥𑀸𑀢𑀼𑀬𑀸 𑀢𑀲𑁆𑀲𑀸 𑀅𑀦𑀼𑀕𑀢𑀪𑀸𑀯𑁄, 𑀢𑀣𑀸 𑀖𑀝𑁆𑀝𑀦𑀓𑀺𑀭𑀺𑀬𑀸𑀬 𑀧𑀣𑀯𑀻𑀥𑀸𑀢𑀼𑀬𑀸 𑀯𑀲𑁂𑀦 𑀲𑀦𑁆𑀦𑀺𑀭𑀼𑀚𑁆𑀛𑀦𑀲𑁆𑀲 𑀲𑀺𑀚𑁆𑀛𑀦𑀢𑁄 𑀢𑀢𑁆𑀣𑀸𑀧𑀺 𑀧𑀣𑀯𑀻𑀥𑀸𑀢𑀼𑀬𑀸 𑀆𑀧𑁄𑀥𑀸𑀢𑀼𑀅𑀦𑀼𑀕𑀢𑀪𑀸𑀯𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑀣𑀸 𑀲𑀦𑁆𑀦𑀺𑀓𑁆𑀔𑁂𑀧𑀦𑀲𑀦𑁆𑀦𑀺𑀭𑀼𑀚𑁆𑀛𑀦𑁂𑀲𑀽’’𑀢𑀺.

𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀅𑀪𑀺𑀓𑁆𑀓𑀫𑀦𑁂, 𑀢𑁂𑀲𑀼 𑀯𑀸 𑀯𑀼𑀢𑁆𑀢𑁂𑀲𑀼 𑀉𑀤𑁆𑀤𑀭𑀡𑀸𑀤𑀻𑀲𑀼 𑀓𑁄𑀝𑁆𑀞𑀸𑀲𑁂𑀲𑀼. 𑀉𑀤𑁆𑀥𑀭𑀡𑁂𑀢𑀺 𑀉𑀤𑁆𑀥𑀭𑀡𑀓𑁆𑀔𑀡𑁂. 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀢𑀺 𑀉𑀤𑁆𑀥𑀭𑀡𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀭𑀽𑀧𑀥𑀫𑁆𑀫𑀸, 𑀢𑀁𑀲𑀫𑀼𑀝𑁆𑀞𑀸𑀧𑀓𑀸 𑀅𑀭𑀽𑀧𑀥𑀫𑁆𑀫𑀸 𑀘. 𑀅𑀢𑀺𑀳𑀭𑀡𑀁 ¶ 𑀦 𑀧𑀸𑀧𑀼𑀡𑀦𑁆𑀢𑀺 𑀔𑀡𑀫𑀢𑁆𑀢𑀸𑀯𑀝𑁆𑀞𑀸𑀦𑀢𑁄. 𑀢𑀢𑁆𑀣 𑀢𑀢𑁆𑀣𑁂𑀯𑀸𑀢𑀺 𑀬𑀢𑁆𑀣 𑀬𑀢𑁆𑀣 𑀉𑀧𑁆𑀧𑀦𑁆𑀦𑀸, 𑀢𑀢𑁆𑀣 𑀢𑀢𑁆𑀣𑁂𑀯. 𑀦 𑀳𑀺 𑀥𑀫𑁆𑀫𑀸𑀦𑀁 𑀤𑁂𑀲𑀦𑁆𑀢𑀭𑀲𑀗𑁆𑀓𑀫𑀦𑀁 𑀅𑀢𑁆𑀣𑀺. ‘‘𑀧𑀩𑁆𑀩𑀁 𑀧𑀩𑁆𑀩’’𑀢𑀺𑀆𑀤𑀺 𑀉𑀤𑁆𑀥𑀭𑀡𑀸𑀤𑀺𑀓𑁄𑀝𑁆𑀞𑀸𑀲𑁂 𑀲𑀦𑁆𑀥𑀸𑀬 𑀲𑀪𑀸𑀕𑀲𑀦𑁆𑀢𑀢𑀺𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀢𑀺𑀇𑀢𑁆𑀢𑀭𑁄 𑀳𑀺 𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 ¶ 𑀧𑀯𑀢𑁆𑀢𑀺𑀓𑁆𑀔𑀡𑁄, 𑀕𑀫𑀦𑀲𑁆𑀲𑀸𑀤𑀻𑀦𑀁, 𑀤𑁂𑀯𑀧𑀼𑀢𑁆𑀢𑀸𑀦𑀁 𑀳𑁂𑀝𑁆𑀞𑀼𑀧𑀭𑀺𑀬𑁂𑀦 𑀧𑀝𑀺𑀫𑀼𑀔𑀁 𑀥𑀸𑀯𑀦𑁆𑀢𑀸𑀦𑀁 𑀲𑀺𑀭𑀲𑀺 𑀧𑀸𑀤𑁂 𑀘 𑀩𑀦𑁆𑀥𑀔𑀼𑀭𑀥𑀸𑀭𑀸 𑀲𑀫𑀸𑀕𑀫𑀢𑁄𑀧𑀺 𑀲𑀻𑀖𑀢𑀭𑁄. 𑀬𑀣𑀸 𑀢𑀺𑀮𑀸𑀦𑀁 𑀪𑀚𑁆𑀚𑀺𑀬𑀫𑀸𑀦𑀸𑀦𑀁 𑀧𑀝𑀧𑀝𑀸𑀬𑀦𑁂𑀦 𑀪𑁂𑀤𑁄 𑀮𑀓𑁆𑀔𑀻𑀬𑀢𑀺, 𑀏𑀯𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑁂𑀦𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀧𑀝𑀧𑀝𑀸𑀬𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀉𑀧𑁆𑀧𑀦𑁆𑀦𑀸 𑀳𑀺 𑀏𑀓𑀦𑁆𑀢𑀢𑁄 𑀪𑀺𑀚𑁆𑀚𑀦𑁆𑀢𑀻𑀢𑀺. ‘‘𑀲𑀤𑁆𑀥𑀺𑀁 𑀭𑀽𑀧𑁂𑀦𑀸’’𑀢𑀺 𑀇𑀤𑀁 𑀢𑀲𑁆𑀲 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀦𑀺𑀭𑁄𑀥𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀦𑀓𑀭𑀽𑀧𑀥𑀫𑁆𑀫𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀬𑀁 𑀢𑀢𑁄 𑀲𑀢𑁆𑀢𑀭𑀲𑀫𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁. 𑀅𑀜𑁆𑀜𑀣𑀸 𑀬𑀤𑀺 ¶ 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀲𑀫𑀸𑀦𑀓𑁆𑀔𑀡𑀸 𑀲𑀺𑀬𑀼𑀁, ‘‘𑀭𑀽𑀧𑀁 𑀕𑀭𑀼𑀧𑀭𑀺𑀡𑀸𑀫𑀁 𑀤𑀦𑁆𑀥𑀦𑀺𑀭𑁄𑀥’’𑀦𑁆𑀢𑀺𑀆𑀤𑀺𑀯𑀘𑀦𑁂𑀳𑀺 𑀯𑀺𑀭𑁄𑀥𑁄 𑀲𑀺𑀬𑀸, 𑀢𑀣𑀸 ‘‘𑀦𑀸𑀳𑀁 𑀪𑀺𑀓𑁆𑀔𑀯𑁂 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀮𑀳𑀼𑀧𑀭𑀺𑀯𑀢𑁆𑀢𑀁, 𑀬𑀣𑀬𑀺𑀤𑀁 𑀘𑀺𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧.𑁪𑁮) 𑀏𑀯𑀁 𑀆𑀤𑀺𑀧𑀸𑀴𑀺𑀬𑀸. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀳𑀺 𑀲𑀸𑀭𑀫𑁆𑀫𑀡𑀲𑀪𑀸𑀯𑀸 𑀬𑀣𑀸𑀩𑀮𑀁 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀢𑁂𑀲𑀁 𑀢𑀁𑀲𑀪𑀸𑀯𑀦𑀺𑀧𑁆𑀨𑀢𑁆𑀢𑀺𑀅𑀦𑀦𑁆𑀢𑀭𑀁 𑀦𑀺𑀭𑁄𑀥𑁄. 𑀭𑀽𑀧𑀥𑀫𑁆𑀫𑀸 𑀧𑀦 𑀅𑀦𑀸𑀭𑀫𑁆𑀫𑀡𑀸 𑀧𑀓𑀸𑀲𑁂𑀢𑀩𑁆𑀩𑀸, 𑀏𑀯𑀁 𑀢𑁂𑀲𑀁 𑀧𑀓𑀸𑀲𑁂𑀢𑀩𑁆𑀩𑀪𑀸𑀯𑀦𑀺𑀧𑁆𑀨𑀢𑁆𑀢𑀺 𑀲𑁄𑀴𑀲𑀳𑀺 𑀘𑀺𑀢𑁆𑀢𑁂𑀳𑀺 𑀳𑁄𑀢𑀻𑀢𑀺 𑀢𑀗𑁆𑀔𑀡𑀸𑀬𑀼𑀓𑀢𑀸 𑀢𑁂𑀲𑀁 𑀇𑀘𑁆𑀙𑀺𑀢𑀸, 𑀮𑀳𑀼𑀯𑀺𑀜𑁆𑀜𑀸𑀡𑀯𑀺𑀲𑀬𑀲𑀗𑁆𑀕𑀢𑀺𑀫𑀢𑁆𑀢𑀧𑁆𑀧𑀘𑁆𑀘𑀬𑀢𑀸𑀬 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁, 𑀯𑀺𑀲𑀬𑀲𑀗𑁆𑀕𑀢𑀺𑀫𑀢𑁆𑀢𑀢𑀸𑀬 𑀘 𑀯𑀺𑀜𑁆𑀜𑀸𑀡𑀲𑁆𑀲 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸, 𑀤𑀦𑁆𑀥𑀫𑀳𑀸𑀪𑀽𑀢𑀧𑁆𑀧𑀘𑁆𑀘𑀬𑀢𑀸𑀬 𑀭𑀽𑀧𑀥𑀫𑁆𑀫𑀸𑀦𑀁 𑀤𑀦𑁆𑀥𑀧𑀭𑀺𑀯𑀢𑁆𑀢𑀺𑀢𑀸. 𑀦𑀸𑀦𑀸𑀥𑀸𑀢𑀼𑀬𑀸 𑀬𑀣𑀸𑀪𑀽𑀢𑀜𑀸𑀡𑀁 𑀔𑁄 𑀧𑀦 𑀢𑀣𑀸𑀕𑀢𑀲𑁆𑀲𑁂𑀯, 𑀢𑁂𑀦 𑀘 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀭𑀽𑀧𑀥𑀫𑁆𑀫𑁄𑀯 𑀯𑀼𑀢𑁆𑀢𑁄, 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀘 𑀢𑀣𑁂𑀯𑀸𑀢𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀲𑀫𑀸𑀦𑀓𑁆𑀔𑀡𑀢𑀸 𑀦 𑀬𑀼𑀚𑁆𑀚𑀢𑁂𑀯. 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀜𑁆𑀜𑀁 ¶ 𑀉𑀧𑁆𑀧𑀚𑁆𑀚𑀢𑁂 𑀘𑀺𑀢𑁆𑀢𑀁, 𑀅𑀜𑁆𑀜𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀬𑀁 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀁, 𑀢𑀁 𑀅𑀜𑁆𑀜𑀁, 𑀢𑀁 𑀧𑀦 𑀦𑀺𑀭𑀼𑀚𑁆𑀛𑀦𑁆𑀢𑀁 𑀅𑀧𑀭𑀲𑁆𑀲 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀪𑀸𑀯𑁂𑀦𑁂𑀯 𑀦𑀺𑀭𑀼𑀚𑁆𑀛𑀢𑀻𑀢𑀺 𑀢𑀣𑀸𑀮𑀤𑁆𑀥𑀧𑀘𑁆𑀘𑀬𑀁 𑀅𑀜𑁆𑀜𑀁 𑀉𑀧𑁆𑀧𑀚𑁆𑀚𑀢𑁂 𑀘𑀺𑀢𑁆𑀢𑀁. 𑀬𑀤𑀺 𑀏𑀯𑀁 𑀢𑁂𑀲𑀁 𑀅𑀦𑁆𑀢𑀭𑁄 𑀮𑀩𑁆𑀪𑁂𑀬𑁆𑀬𑀸𑀢𑀺? 𑀦𑁄𑀢𑀺 𑀆𑀳 ‘‘𑀅𑀯𑀻𑀘𑀺 𑀫𑀦𑀼𑀧𑁆𑀧𑀩𑀦𑁆𑀥𑁄’’𑀢𑀺, 𑀬𑀣𑀸 𑀯𑀻𑀘𑀺 𑀅𑀦𑁆𑀢𑀭𑁄 𑀦 𑀮𑀩𑁆𑀪𑀢𑀺, ‘‘𑀢𑀤𑁂𑀯𑁂𑀢’’𑀦𑁆𑀢𑀺 𑀅𑀯𑀺𑀲𑁂𑀲𑀯𑀺𑀤𑀽 𑀫𑀜𑁆𑀜𑀦𑁆𑀢𑀺, 𑀏𑀯𑀁 𑀅𑀦𑀼 𑀅𑀦𑀼 𑀧𑀩𑀦𑁆𑀥𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑁄 𑀭𑀽𑀧𑀲𑀦𑁆𑀢𑀸𑀦𑁄 𑀘 𑀦𑀤𑀻𑀲𑁄𑀢𑁄𑀯 𑀦𑀤𑀺𑀬𑀁 𑀉𑀤𑀓𑀧𑁆𑀧𑀯𑀸𑀳𑁄 𑀯𑀺𑀬 𑀯𑀢𑁆𑀢𑀢𑀺.

𑀅𑀪𑀺𑀫𑀼𑀔𑀁 ¶ 𑀮𑁄𑀓𑀺𑀢𑀁 𑀆𑀮𑁄𑀓𑀺𑀢𑀦𑁆𑀢𑀺 𑀆𑀳 ‘‘𑀧𑀼𑀭𑀢𑁄 𑀧𑁂𑀓𑁆𑀔𑀦’’𑀦𑁆𑀢𑀺. 𑀬𑀲𑁆𑀫𑀸 𑀬𑀁𑀤𑀺𑀲𑀸𑀪𑀺𑀫𑀼𑀔𑁄 𑀕𑀘𑁆𑀙𑀢𑀺, 𑀢𑀺𑀝𑁆𑀞𑀢𑀺, 𑀦𑀺𑀲𑀻𑀤𑀢𑀺 𑀯𑀸 𑀢𑀤𑀪𑀺𑀫𑀼𑀔𑀁 𑀧𑁂𑀓𑁆𑀔𑀦𑀁 𑀆𑀮𑁄𑀓𑀺𑀢𑀁, 𑀢𑀲𑁆𑀫𑀸 𑀢𑀤𑀦𑀼𑀕𑀢𑀯𑀺𑀤𑀺𑀲𑀸𑀮𑁄𑀓𑀦𑀁 𑀯𑀺𑀮𑁄𑀓𑀺𑀢𑀦𑁆𑀢𑀺 𑀆𑀳 ‘‘𑀯𑀺𑀮𑁄𑀓𑀺𑀢𑀁 𑀦𑀸𑀫 𑀅𑀦𑀼𑀤𑀺𑀲𑀸𑀧𑁂𑀓𑁆𑀔𑀦’’𑀦𑁆𑀢𑀺. 𑀲𑀫𑁆𑀫𑀚𑁆𑀚𑀦𑀧𑀭𑀺𑀪𑀡𑁆𑀟𑀸𑀤𑀺𑀓𑀭𑀡𑁂 𑀑𑀮𑁄𑀓𑀺𑀢𑀲𑁆𑀲, 𑀉𑀮𑁆𑀮𑁄𑀓𑀳𑀭𑀡𑀸𑀤𑀻𑀲𑀼 𑀉𑀮𑁆𑀮𑁄𑀓𑀺𑀢𑀲𑁆𑀲, 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀧𑀭𑀺𑀲𑁆𑀲𑀬𑀲𑁆𑀲 𑀧𑀭𑀺𑀯𑀚𑁆𑀚𑀦𑀸𑀤𑀻𑀲𑀼 𑀅𑀧𑀮𑁄𑀓𑀺𑀢𑀲𑁆𑀲 𑀲𑀺𑀬𑀸 𑀲𑀫𑁆𑀪𑀯𑁄𑀢𑀺 𑀆𑀳 ‘‘𑀇𑀫𑀺𑀦𑀸 𑀯𑀸 𑀫𑀼𑀔𑁂𑀦 𑀲𑀩𑁆𑀩𑀸𑀦𑀺𑀧𑀺 𑀢𑀸𑀦𑀺 𑀕𑀳𑀺𑀢𑀸𑀦𑁂𑀯𑀸’’𑀢𑀺.

𑀓𑀸𑀬𑀲𑀓𑁆𑀔𑀺𑀦𑁆𑀢𑀺 𑀓𑀸𑀬𑁂𑀦 𑀲𑀘𑁆𑀙𑀺𑀓𑀢𑀯𑀦𑁆𑀢𑀁, 𑀧𑀘𑁆𑀘𑀓𑁆𑀔𑀓𑀸𑀭𑀺𑀦𑀦𑁆𑀢𑀺 𑀅𑀢𑁆𑀣𑁄. 𑀲𑁄 𑀳𑀺 𑀆𑀬𑀲𑁆𑀫𑀸 𑀯𑀺𑀧𑀲𑁆𑀲𑀦𑀸𑀓𑀸𑀮𑁂 ‘‘𑀬𑀫𑁂𑀯𑀸𑀳𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀁 𑀦𑀺𑀲𑁆𑀲𑀸𑀬 𑀲𑀸𑀲𑀦𑁂 𑀅𑀦𑀪𑀺𑀭𑀢𑀺𑀆𑀤𑀺𑀯𑀺𑀧𑁆𑀧𑀓𑀸𑀭𑀁 𑀧𑀢𑁆𑀢𑁄, 𑀢𑀫𑁂𑀯 𑀲𑀼𑀝𑁆𑀞𑀼 𑀦𑀺𑀕𑁆𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀉𑀲𑁆𑀲𑀸𑀳𑀚𑀸𑀢𑁄 𑀩𑀮𑀯𑀳𑀺𑀭𑁄𑀢𑁆𑀢𑀧𑁆𑀧𑁄, 𑀢𑀢𑁆𑀣 𑀘 𑀓𑀢𑀸𑀥𑀺𑀓𑀸𑀭𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑁄, 𑀢𑁂𑀦𑁂𑀯 𑀦𑀁 𑀲𑀢𑁆𑀣𑀸 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀁, 𑀬𑀤𑀺𑀤𑀁 𑀦𑀦𑁆𑀤𑁄’’𑀢𑀺 (𑀅. 𑀦𑀺. 𑁧.𑁨𑁩𑁫) 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺.

𑀲𑀸𑀢𑁆𑀣𑀓𑀢𑀸 ¶ 𑀘 𑀲𑀧𑁆𑀧𑀸𑀬𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀲𑁆𑀲𑀸𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀯𑀺𑀚𑀳𑀦𑀲𑁆𑀲𑁂𑀯 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀳𑁂𑀢𑀼𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀢𑀺. 𑀅𑀢𑁆𑀢𑀦𑁄 ¶ 𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦𑁂𑀯 𑀆𑀮𑁄𑀓𑀦𑀯𑀺𑀮𑁄𑀓𑀦𑀁 𑀓𑀸𑀢𑀩𑁆𑀩𑀁, 𑀔𑀦𑁆𑀥𑀸𑀤𑀺𑀓𑀫𑁆𑀫𑀝𑁆𑀞𑀸𑀦𑀸 𑀅𑀜𑁆𑀜𑁄 𑀉𑀧𑀸𑀬𑁄 𑀦 𑀕𑀯𑁂𑀲𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀮𑁄𑀓𑀺𑀢𑀸𑀤𑀺𑀲𑀫𑀜𑁆𑀜𑀸𑀧𑀺 𑀬𑀲𑁆𑀫𑀸 𑀥𑀫𑁆𑀫𑀫𑀢𑁆𑀢𑀲𑁆𑀲𑁂𑀯 𑀧𑀯𑀢𑁆𑀢𑀺𑀯𑀺𑀲𑁂𑀲𑁄, 𑀢𑀲𑁆𑀫𑀸 𑀢𑀲𑁆𑀲 𑀬𑀸𑀣𑀸𑀯𑀢𑁄 𑀧𑀚𑀸𑀦𑀦𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀩𑁆𑀪𑀦𑁆𑀢𑀭𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑀯𑀲𑁂𑀦𑀸𑀢𑀺 𑀓𑀺𑀭𑀺𑀬𑀫𑀬𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀬 𑀯𑀸𑀬𑁄𑀥𑀸𑀢𑀼𑀬𑀸 𑀘𑀮𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀯𑀲𑁂𑀦. 𑀅𑀥𑁄 𑀲𑀻𑀤𑀢𑀻𑀢𑀺 𑀅𑀥𑁄 𑀕𑀘𑁆𑀙𑀢𑀺. 𑀉𑀤𑁆𑀥𑀁 𑀮𑀗𑁆𑀖𑁂𑀢𑀻𑀢𑀺 𑀮𑀗𑁆𑀖𑀁 𑀯𑀺𑀬 𑀉𑀧𑀭𑀺 𑀕𑀘𑁆𑀙𑀢𑀺.

𑀅𑀗𑁆𑀕𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀦𑁆𑀢𑀺 𑀧𑀥𑀸𑀦𑀪𑀽𑀢𑀅𑀗𑁆𑀕𑀓𑀺𑀘𑁆𑀘𑀁 𑀦𑀺𑀧𑁆𑀨𑀸𑀤𑁂𑀦𑁆𑀢𑀁 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀧𑀞𑀫𑀚𑀯𑀦𑁂𑀧𑀺…𑀧𑁂… 𑀦 𑀳𑁄𑀢𑀻’’𑀢𑀺 𑀇𑀤𑀁 𑀧𑀜𑁆𑀘𑀤𑁆𑀯𑀸𑀭𑀯𑀻𑀣𑀺𑀬𑀁 ‘‘𑀇𑀢𑁆𑀣𑀻 𑀧𑀼𑀭𑀺𑀲𑁄’’𑀢𑀺 𑀭𑀚𑁆𑀚𑀦𑀸𑀤𑀻𑀦𑀁 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀆𑀯𑀚𑁆𑀚𑀦 𑀯𑁄𑀝𑁆𑀞𑀩𑁆𑀩𑀧𑀦𑀸𑀦𑀁 𑀅𑀬𑁄𑀦𑀺𑀲𑁄 𑀆𑀯𑀚𑁆𑀚𑀦𑀯𑁄𑀝𑁆𑀞𑀩𑁆𑀩𑀦𑀯𑀲𑁂𑀦 𑀇𑀝𑁆𑀞𑁂 𑀇𑀢𑁆𑀣𑀺𑀭𑀽𑀧𑀸𑀤𑀺𑀫𑁆𑀳𑀺 𑀮𑁄𑀪𑀫𑀢𑁆𑀢𑀁, 𑀅𑀦𑀺𑀝𑁆𑀞𑁂 ¶ 𑀘 𑀧𑀝𑀺𑀖𑀫𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀫𑀦𑁄𑀤𑁆𑀯𑀸𑀭𑁂 𑀧𑀦 ‘‘𑀇𑀢𑁆𑀣𑀻 𑀧𑀼𑀭𑀺𑀲𑁄’’𑀢𑀺 𑀭𑀚𑁆𑀚𑀦𑀸𑀤𑀺 𑀳𑁄𑀢𑀺. 𑀢𑀲𑁆𑀲 𑀧𑀜𑁆𑀘𑀤𑁆𑀯𑀸𑀭𑀚𑀯𑀦𑀁 𑀫𑀽𑀮𑀁, 𑀬𑀣𑀸𑀯𑀼𑀢𑁆𑀢𑀁 𑀯𑀸 𑀲𑀩𑁆𑀩𑀁 𑀪𑀯𑀗𑁆𑀕𑀸𑀤𑀺. 𑀏𑀯𑀁 𑀫𑀦𑁄𑀤𑁆𑀯𑀸𑀭𑀚𑀯𑀦𑀲𑁆𑀲 𑀫𑀽𑀮𑀯𑀲𑁂𑀦 𑀫𑀽𑀮𑀧𑀭𑀺𑀜𑁆𑀜𑀸 𑀯𑀼𑀢𑁆𑀢𑀸. 𑀆𑀕𑀦𑁆𑀢𑀼𑀓𑀢𑀸𑀯𑀓𑀸𑀮𑀺𑀓𑀢𑀸 𑀧𑀦 𑀧𑀜𑁆𑀘𑀤𑁆𑀯𑀸𑀭𑀚𑀯𑀦𑀲𑁆𑀲𑁂𑀯 𑀅𑀧𑀼𑀩𑁆𑀩𑀪𑀸𑀯𑀯𑀲𑁂𑀦, 𑀇𑀢𑁆𑀢𑀭𑀪𑀸𑀯𑀯𑀲𑁂𑀦 𑀘 𑀯𑀼𑀢𑁆𑀢𑀸. ‘‘𑀳𑁂𑀝𑁆𑀞𑀼𑀧𑀭𑀺𑀬𑀯𑀲𑁂𑀦 𑀪𑀺𑀚𑁆𑀚𑀺𑀢𑁆𑀯𑀸 𑀧𑀢𑀺𑀢𑁂𑀲𑀽’’𑀢𑀺 𑀳𑁂𑀝𑁆𑀞𑀺𑀫𑀲𑁆𑀲 𑀉𑀧𑀭𑀺𑀫𑀲𑁆𑀲 𑀘 𑀅𑀧𑀭𑀸𑀧𑀭𑀁 𑀪𑀗𑁆𑀕𑀧𑁆𑀧𑀢𑁆𑀢𑀺𑀫𑀸𑀳.

𑀢𑀦𑁆𑀢𑀺 𑀚𑀯𑀦𑀁, 𑀢𑀲𑁆𑀲 𑀅𑀬𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀕𑀦𑁆𑀢𑀼𑀓𑁄 𑀅𑀩𑁆𑀪𑀸𑀕𑀢𑁄.

𑀉𑀤𑀬𑀩𑁆𑀩𑀬𑀧𑀭𑀺𑀘𑁆𑀙𑀺𑀦𑁆𑀦𑁄 𑀢𑀸𑀯𑀢𑀓𑁄 𑀓𑀸𑀮𑁄 𑀏𑀢𑁂𑀲𑀦𑁆𑀢𑀺 𑀢𑀸𑀯𑀓𑀸𑀮𑀺𑀓𑀸𑀦𑀺.

𑀏𑀢𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁. 𑀲𑀫𑀯𑀸𑀬𑁂𑀢𑀺 𑀲𑀸𑀫𑀕𑁆𑀕𑀺𑀬𑀁 ¶ . 𑀢𑀢𑁆𑀣𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀯𑀲𑁂𑀦 𑀆𑀮𑁄𑀓𑀦𑀯𑀺𑀮𑁄𑀓𑀦𑁂 𑀧𑀜𑁆𑀜𑀸𑀬𑀫𑀸𑀦𑁂 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑁄 𑀓𑁄 𑀏𑀓𑁄 𑀆𑀮𑁄𑀓𑁂𑀢𑀺, 𑀓𑁄 𑀯𑀺𑀮𑁄𑀓𑁂𑀢𑀺.

‘‘𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄’’𑀢𑀺 𑀇𑀤𑀁 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀧𑀭𑀺𑀬𑀸𑀬𑀢𑁄 𑀯𑀼𑀢𑁆𑀢𑀁. 𑀲𑀳𑀚𑀸𑀢𑀧𑀘𑁆𑀘𑀬𑁄𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁 𑀅𑀜𑁆𑀜𑀫𑀜𑁆𑀜𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀤𑀺𑀧𑀘𑁆𑀘𑀬𑀸𑀦𑀫𑁆𑀧𑀺 𑀮𑀩𑁆𑀪𑀦𑀢𑁄.

𑀓𑀸𑀮𑁂 𑀲𑀫𑀜𑁆𑀙𑀺𑀢𑀼𑀁 𑀬𑀼𑀢𑁆𑀢𑀓𑀸𑀮𑁂 𑀲𑀫𑀜𑁆𑀙𑀦𑁆𑀢𑀲𑁆𑀲. 𑀢𑀣𑀸 𑀧𑀲𑀸𑀭𑁂𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣𑀸𑀧𑀺. 𑀫𑀡𑀺𑀲𑀧𑁆𑀧𑁄 𑀦𑀸𑀫 𑀏𑀓𑀸 𑀲𑀧𑁆𑀧𑀚𑀸𑀢𑀻𑀢𑀺 𑀯𑀤𑀦𑁆𑀢𑀺. 𑀮𑀴𑀦𑀦𑁆𑀢𑀺 𑀓𑀫𑁆𑀧𑀦𑀁, 𑀮𑀻𑀴𑀸𑀓𑀭𑀡𑀁 𑀯𑀸.

𑀉𑀡𑁆𑀳𑀧𑀓𑀢𑀺𑀓𑁄 ¶ 𑀧𑀭𑀺𑀴𑀸𑀳𑀩𑀳𑀼𑀮𑀓𑀸𑀬𑁄. 𑀲𑀻𑀮𑀯𑀺𑀤𑀽𑀲𑀦𑁂𑀦 𑀅𑀳𑀺𑀢𑀸𑀯𑀳𑀢𑁆𑀢𑀸 𑀫𑀺𑀘𑁆𑀙𑀸𑀚𑀻𑀯𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀅𑀲𑀧𑁆𑀧𑀸𑀬𑀁. ‘‘𑀘𑀻𑀯𑀭𑀫𑁆𑀧𑀺 𑀅𑀘𑁂𑀢𑀦’’𑀦𑁆𑀢𑀺𑀆𑀤𑀺𑀦𑀸 𑀘𑀻𑀯𑀭𑀲𑁆𑀲 𑀯𑀺𑀬 𑀓𑀸𑀬𑁄𑀧𑀺 𑀅𑀘𑁂𑀢𑀦𑁄𑀢𑀺 𑀓𑀸𑀬𑀲𑁆𑀲 𑀅𑀢𑁆𑀢𑀲𑀼𑀜𑁆𑀜𑀢𑀸𑀯𑀺𑀪𑀸𑀯𑀦𑁂𑀦 ‘‘𑀅𑀩𑁆𑀪𑀦𑁆𑀢𑀭𑁂’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀭𑀺𑀤𑀻𑀧𑁂𑀦𑁆𑀢𑁄 𑀇𑀢𑀭𑀻𑀢𑀭𑀲𑀦𑁆𑀢𑁄𑀲𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺, 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺.

𑀘𑀢𑀼𑀧𑀜𑁆𑀘𑀕𑀡𑁆𑀞𑀺𑀓𑀸𑀳𑀢𑁄𑀢𑀺 𑀆𑀳𑀢𑀘𑀢𑀼𑀧𑀜𑁆𑀘𑀕𑀡𑁆𑀞𑀺𑀓𑁄, 𑀘𑀢𑀼𑀧𑀜𑁆𑀘𑀕𑀡𑁆𑀞𑀺𑀓𑀸𑀳𑀺 𑀯𑀸 𑀆𑀳𑀢𑁄 𑀢𑀣𑀸.

𑀅𑀝𑁆𑀞𑀯𑀺𑀥𑁄𑀧𑀺 ¶ 𑀅𑀢𑁆𑀣𑁄𑀢𑀺 𑀅𑀝𑁆𑀞𑀯𑀺𑀥𑁄𑀧𑀺 𑀧𑀬𑁄𑀚𑀦𑀯𑀺𑀲𑁂𑀲𑁄 𑀫𑀳𑀸𑀲𑀺𑀯𑀢𑁆𑀣𑁂𑀭𑀯𑀸𑀤𑀯𑀲𑁂𑀦 ‘‘𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩, 𑁪𑁨𑁨; 𑀫. 𑀦𑀺. 𑁨.𑁩𑁮𑁭; 𑀅. 𑀦𑀺. 𑁨.𑁩𑁪𑁧; 𑁮.𑁯; 𑀥. 𑀲. 𑁧𑁩𑁫𑁫; 𑀯𑀺𑀪. 𑁫𑁧𑁮; 𑀫𑀳𑀸𑀦𑀺. 𑁨𑁦𑁬) 𑀦𑀬𑁂𑀦 𑀯𑀼𑀢𑁆𑀢𑁄 𑀤𑀝𑁆𑀞𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 ‘‘𑀦𑁂𑀯 𑀤𑀯𑀸𑀬𑀸𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩, 𑁪𑁨𑁨; 𑀫. 𑀦𑀺. 𑁨.𑁩𑁮𑁭; 𑀅. 𑀦𑀺. 𑁮.𑁯; 𑀥. 𑀲. 𑁧𑁩𑁫𑁫; 𑀯𑀺𑀪. 𑁫𑁧𑁮; 𑀫𑀳𑀸𑀦𑀺. 𑁨𑁦𑁬) 𑀦𑀬𑁂𑀦𑀸’’𑀢𑀺 𑀧𑀦 𑀧𑀝𑀺𑀓𑁆𑀔𑁂𑀧𑀗𑁆𑀕𑀤𑀲𑁆𑀲𑀦𑀫𑀼𑀔𑁂𑀦 𑀤𑁂𑀲𑀦𑀸𑀬 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀣𑀯𑀺𑀲𑀦𑁆𑀥𑀸𑀭𑀓𑀚𑀮𑀲𑁆𑀲 𑀢𑀁𑀲𑀦𑁆𑀥𑀸𑀭𑀓𑀯𑀸𑀬𑀼𑀦𑀸 𑀯𑀺𑀬 𑀧𑀭𑀺𑀪𑀼𑀢𑁆𑀢𑀲𑁆𑀲 𑀆𑀳𑀸𑀭𑀲𑁆𑀲 𑀯𑀸𑀬𑁄𑀥𑀸𑀢𑀼𑀬𑀸𑀯 𑀆𑀲𑀬𑁂 𑀅𑀯𑀝𑁆𑀞𑀸𑀦𑀦𑁆𑀢𑀺 𑀆𑀳 ‘‘𑀯𑀸𑀬𑁄𑀥𑀸𑀢𑀼𑀯𑀲𑁂𑀦𑁂𑀯 𑀢𑀺𑀝𑁆𑀞𑀢𑀻’’𑀢𑀺. 𑀅𑀢𑀺𑀳𑀭𑀢𑀻𑀢𑀺 𑀬𑀸𑀯 𑀫𑀼𑀔𑀸 𑀅𑀪𑀺𑀳𑀭𑀢𑀺. 𑀯𑀻𑀢𑀺𑀳𑀭𑀢𑀻𑀢𑀺 𑀢𑀢𑁄 𑀓𑀼𑀘𑁆𑀙𑀺𑀬𑀁 𑀯𑀻𑀫𑀺𑀲𑁆𑀲𑀁 𑀓𑀭𑁄𑀦𑁆𑀢𑁄 ¶ 𑀳𑀭𑀢𑀺. 𑀅𑀢𑀺𑀳𑀭𑀢𑀻𑀢𑀺 𑀯𑀸 𑀫𑀼𑀔𑀤𑁆𑀯𑀸𑀭𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑁄 𑀳𑀭𑀢𑀺. 𑀯𑀻𑀢𑀺𑀳𑀭𑀢𑀻𑀢𑀺 𑀓𑀼𑀘𑁆𑀙𑀺𑀕𑀢𑀁 𑀧𑀲𑁆𑀲𑀢𑁄 𑀳𑀭𑀢𑀺, 𑀧𑀭𑀺𑀯𑀢𑁆𑀢𑁂𑀢𑀻𑀢𑀺 𑀅𑀧𑀭𑀸𑀧𑀭𑀁 𑀘𑀸𑀭𑁂𑀢𑀺. 𑀏𑀢𑁆𑀣 𑀘 𑀆𑀳𑀸𑀭𑀲𑁆𑀲 𑀥𑀸𑀭𑀡𑀧𑀭𑀺𑀯𑀢𑁆𑀢𑀦𑀲𑀜𑁆𑀘𑀼𑀡𑁆𑀡𑀦𑀯𑀺𑀲𑁄𑀲𑀦𑀸𑀦𑀺 𑀧𑀣𑀯𑀻𑀥𑀸𑀢𑀼𑀲𑀳𑀺𑀢𑀸 𑀏𑀯 𑀯𑀸𑀬𑁄𑀥𑀸𑀢𑀼 𑀓𑀭𑁄𑀢𑀺, 𑀦 𑀓𑁂𑀯𑀮𑀸𑀢𑀺 𑀢𑀸𑀦𑀺 𑀧𑀣𑀯𑀻𑀥𑀸𑀢𑀼𑀬𑀸𑀧𑀺 𑀓𑀺𑀘𑁆𑀘𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀺. 𑀅𑀮𑁆𑀮𑀢𑁆𑀢𑀜𑁆𑀘 𑀅𑀦𑀼𑀧𑀸𑀮𑁂𑀢𑀻𑀢𑀺 𑀬𑀣𑀸 𑀯𑀸𑀬𑁄𑀥𑀸𑀢𑀼 𑀆𑀤𑀻𑀳𑀺 𑀅𑀜𑁆𑀜𑁂𑀳𑀺 𑀯𑀺𑀲𑁄𑀲𑀦𑀁 𑀦 𑀳𑁄𑀢𑀺, 𑀢𑀣𑀸 𑀅𑀮𑁆𑀮𑀢𑁆𑀢𑀜𑁆𑀘 𑀅𑀦𑀼𑀧𑀸𑀮𑁂𑀢𑀺. 𑀢𑁂𑀚𑁄𑀥𑀸𑀢𑀽𑀢𑀺 𑀕𑀳𑀡𑀻𑀲𑀗𑁆𑀔𑀸𑀢𑀸 𑀢𑁂𑀚𑁄𑀥𑀸𑀢𑀼. 𑀲𑀸 𑀳𑀺 𑀅𑀦𑁆𑀢𑁄𑀧𑀯𑀺𑀝𑁆𑀞𑀁 𑀆𑀳𑀸𑀭𑀁 𑀧𑀭𑀺𑀧𑀸𑀘𑁂𑀢𑀺. 𑀅𑀜𑁆𑀚𑀲𑁄 𑀳𑁄𑀢𑀻𑀢𑀺 𑀆𑀳𑀸𑀭𑀲𑁆𑀲 𑀧𑀯𑁂𑀲𑀦𑀸𑀤𑀻𑀦𑀁 𑀫𑀕𑁆𑀕𑁄 𑀳𑁄𑀢𑀺. 𑀆𑀪𑀼𑀚𑀢𑀻𑀢𑀺 𑀧𑀭𑀺𑀬𑁂𑀲𑀦𑀯𑀲𑁂𑀦, 𑀅𑀚𑁆𑀛𑁄𑀳𑀭𑀡𑀚𑀺𑀡𑁆𑀡𑀸𑀚𑀺𑀡𑁆𑀡𑀢𑀸𑀤𑀺𑀧𑀝𑀺𑀲𑀁𑀯𑁂𑀤𑀦𑀯𑀲𑁂𑀦 𑀘 𑀆𑀯𑀚𑁆𑀚𑁂𑀢𑀺, 𑀯𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀢𑀁𑀢𑀁𑀯𑀺𑀚𑀸𑀦𑀦𑀲𑁆𑀲 𑀧𑀘𑁆𑀘𑀬𑀪𑀽𑀢𑁄𑀬𑁂𑀯 𑀳𑀺 𑀧𑀬𑁄𑀕𑁄 ‘‘𑀲𑀫𑁆𑀫𑀸𑀧𑀬𑁄𑀕𑁄’’𑀢𑀺 𑀯𑀼𑀢𑁆𑀢𑁄. 𑀬𑁂𑀦 𑀳𑀺 𑀧𑀬𑁄𑀕𑁂𑀦 𑀧𑀭𑀺𑀬𑁂𑀲𑀦𑀸𑀤𑀺 𑀦𑀺𑀧𑁆𑀨𑀚𑁆𑀚𑀢𑀺, 𑀲𑁄 𑀢𑀩𑁆𑀩𑀺𑀲𑀬𑀯𑀺𑀚𑀸𑀦𑀦𑀫𑁆𑀧𑀺 𑀦𑀺𑀧𑁆𑀨𑀸𑀤𑁂𑀢𑀺 𑀦𑀸𑀫 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀅𑀣 𑀯𑀸 𑀲𑀫𑁆𑀫𑀸𑀧𑀬𑁄𑀕𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀫𑀦𑁆𑀯𑀸𑀬 𑀆𑀕𑀫𑁆𑀫 𑀆𑀪𑀼𑀚𑀢𑀺 𑀲𑀫𑀦𑁆𑀦𑀸𑀳𑀭𑀢𑀺. 𑀆𑀪𑁄𑀕𑀧𑀼𑀩𑁆𑀩𑀓𑁄 𑀳𑀺 𑀲𑀩𑁆𑀩𑁄𑀧𑀺 𑀯𑀺𑀜𑁆𑀜𑀸𑀡𑀩𑁆𑀬𑀸𑀧𑀸𑀭𑁄𑀢𑀺 𑀢𑀣𑀸 𑀯𑀼𑀢𑁆𑀢𑀁.

𑀕𑀫𑀦𑀢𑁄𑀢𑀺 𑀪𑀺𑀓𑁆𑀔𑀸𑀘𑀸𑀭𑀯𑀲𑁂𑀦 𑀕𑁄𑀘𑀭𑀕𑀸𑀫𑀁 𑀉𑀤𑁆𑀤𑀺𑀲𑁆𑀲 𑀕𑀫𑀦𑀢𑁄. 𑀧𑀭𑀺𑀬𑁂𑀲𑀦𑀢𑁄𑀢𑀺 𑀕𑁄𑀘𑀭𑀕𑀸𑀫𑁂 𑀪𑀺𑀓𑁆𑀔𑀢𑁆𑀣𑀁 ¶ 𑀆𑀳𑀺𑀡𑁆𑀟𑀦𑀢𑁄. 𑀧𑀭𑀺𑀪𑁄𑀕𑀢𑁄𑀢𑀺 𑀆𑀳𑀸𑀭𑀲𑁆𑀲 𑀧𑀭𑀺𑀪𑀼𑀜𑁆𑀚𑀦𑀢𑁄. 𑀆𑀲𑀬𑀢𑁄𑀢𑀺 𑀧𑀺𑀢𑁆𑀢𑀸𑀤𑀺𑀆𑀲𑀬𑀢𑁄. 𑀆𑀲𑀬𑀢𑀺 𑀏𑀢𑁆𑀣 𑀏𑀓𑀚𑁆𑀛𑀁 𑀧𑀯𑀢𑁆𑀢𑀫𑀸𑀦𑁄𑀧𑀺 𑀓𑀫𑁆𑀫𑀨𑀮𑀯𑀯𑀢𑁆𑀣𑀺𑀢𑁄 𑀳𑀼𑀢𑁆𑀯𑀸 𑀫𑀭𑀺𑀬𑀸𑀤𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀅𑀲𑀗𑁆𑀓𑀭𑀢𑁄 𑀲𑀬𑀢𑀺 𑀢𑀺𑀝𑁆𑀞𑀢𑀺 𑀧𑀯𑀢𑁆𑀢𑀢𑀻𑀢𑀺 𑀆𑀲𑀬𑁄 ¶ , 𑀆𑀫𑀸𑀲𑀬𑀲𑁆𑀲 𑀉𑀧𑀭𑀺 𑀢𑀺𑀝𑁆𑀞𑀦𑀓𑁄 𑀧𑀺𑀢𑁆𑀢𑀸𑀤𑀺𑀓𑁄. 𑀫𑀭𑀺𑀬𑀸𑀤𑀢𑁆𑀣𑁄 𑀳𑀺 𑀅𑀬𑀫𑀸𑀓𑀸𑀭𑁄. 𑀦𑀺𑀥𑀸𑀦𑀦𑁆𑀢𑀺 𑀬𑀣𑀸𑀪𑀼𑀢𑁆𑀢𑁄 𑀆𑀳𑀸𑀭𑁄 ¶ 𑀦𑀺𑀘𑀺𑀢𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀦𑀺𑀥𑀸𑀦𑀁, 𑀆𑀫𑀸𑀲𑀬𑁄. 𑀢𑀢𑁄 𑀦𑀺𑀥𑀸𑀦𑀢𑁄. 𑀅𑀧𑀭𑀺𑀧𑀓𑁆𑀓𑀢𑁄𑀢𑀺 𑀕𑀳𑀡𑀻𑀲𑀗𑁆𑀔𑀸𑀢𑁂𑀦 𑀓𑀫𑁆𑀫𑀚𑀢𑁂𑀚𑁂𑀦 𑀅𑀯𑀺𑀧𑀓𑁆𑀓𑀢𑁄. 𑀧𑀭𑀺𑀧𑀓𑁆𑀓𑀢𑁄𑀢𑀺 𑀬𑀣𑀸𑀪𑀼𑀢𑁆𑀢𑀲𑁆𑀲 𑀆𑀳𑀸𑀭𑀲 𑀯𑀺𑀧𑀓𑁆𑀓𑀪𑀸𑀯𑀢𑁄. 𑀨𑀮𑀢𑁄𑀢𑀺 𑀦𑀺𑀧𑁆𑀨𑀢𑁆𑀢𑀺𑀢𑁄. 𑀦𑀺𑀲𑁆𑀲𑀦𑁆𑀤𑀢𑁄𑀢𑀺 𑀇𑀢𑁄 𑀘𑀺𑀢𑁄 𑀘 𑀦𑀺𑀲𑁆𑀲𑀦𑁆𑀤𑀦𑀢𑁄. 𑀲𑀫𑁆𑀫𑀓𑁆𑀔𑀦𑀢𑁄𑀢𑀺 𑀲𑀩𑁆𑀩𑀲𑁄 𑀫𑀓𑁆𑀔𑀦𑀢𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀬 (𑀯𑀺𑀲𑀼𑀤𑁆𑀥𑀺. 𑀝𑀻. 𑁧.𑁨𑁯𑁪) 𑀕𑀳𑁂𑀢𑀩𑁆𑀩𑁄.

𑀲𑀭𑀻𑀭𑀢𑁄 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀻𑀢𑀺 𑀯𑁂𑀕𑀲𑀁𑀥𑀸𑀭𑀡𑁂𑀦 𑀉𑀧𑁆𑀧𑀦𑁆𑀦𑀧𑀭𑀺𑀴𑀸𑀳𑀢𑁄 𑀲𑀭𑀻𑀭𑀢𑁄 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺. 𑀅𑀜𑁆𑀜𑁂 𑀘 𑀭𑁄𑀕𑀸 𑀓𑀡𑁆𑀡𑀲𑀽𑀮𑀪𑀕𑀦𑁆𑀤𑀭𑀸𑀤𑀬𑁄. 𑀅𑀝𑁆𑀞𑀸𑀦𑁂𑀢𑀺 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑁂 𑀅𑀬𑀼𑀢𑁆𑀢𑀝𑁆𑀞𑀸𑀦𑁂 𑀔𑁂𑀢𑁆𑀢𑀤𑁂𑀯𑀸𑀬𑀢𑀦𑀸𑀤𑀺𑀓𑁂. 𑀓𑀼𑀤𑁆𑀥𑀸 𑀳𑀺 𑀅𑀫𑀦𑀼𑀲𑁆𑀲𑀸, 𑀫𑀦𑀼𑀲𑁆𑀲𑀸𑀧𑀺 𑀯𑀸 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑁂𑀦𑁆𑀢𑀺. 𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀦𑁂𑀯 𑀅𑀢𑁆𑀢𑀦𑁄, 𑀓𑀲𑁆𑀲𑀘𑀺 𑀅𑀦𑀺𑀲𑁆𑀲𑀚𑁆𑀚𑀺𑀢𑀢𑁆𑀢𑀸, 𑀚𑀺𑀕𑀼𑀘𑁆𑀙𑀦𑀻𑀬𑀢𑁆𑀢𑀸 𑀘 𑀦 𑀧𑀭𑀲𑁆𑀲. 𑀉𑀤𑀓𑀢𑀼𑀫𑁆𑀩𑀢𑁄𑀢𑀺 𑀯𑁂𑀴𑀼𑀦𑀸𑀴𑀺𑀆𑀤𑀺𑀉𑀤𑀓𑀪𑀸𑀚𑀦𑀢𑁄. 𑀢𑀦𑁆𑀢𑀺 𑀙𑀟𑁆𑀟𑀺𑀢𑀉𑀤𑀓𑀁.

𑀅𑀤𑁆𑀥𑀸𑀦𑀇𑀭𑀺𑀬𑀸𑀧𑀣𑀸 𑀘𑀺𑀭𑀢𑀭𑀧𑁆𑀧𑀯𑀢𑁆𑀢𑀺𑀓𑀸 𑀤𑀻𑀖𑀓𑀸𑀮𑀺𑀓𑀸 𑀇𑀭𑀺𑀬𑀸𑀧𑀣𑀸. 𑀫𑀚𑁆𑀛𑀺𑀫𑀸 𑀪𑀺𑀓𑁆𑀔𑀸𑀘𑀭𑀡𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸. 𑀘𑀼𑀡𑁆𑀡𑀺𑀬𑀇𑀭𑀺𑀬𑀸𑀧𑀣𑀸 𑀯𑀺𑀳𑀸𑀭𑁂, 𑀅𑀜𑁆𑀜𑀢𑁆𑀣𑀸𑀧𑀺 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀯𑀢𑁆𑀢𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸𑀢𑀺 𑀯𑀤𑀦𑁆𑀢𑀺. ‘‘𑀕𑀢𑁂𑀢𑀺 𑀕𑀫𑀦𑁂’’𑀢𑀺 𑀧𑀼𑀩𑁆𑀩𑁂 𑀅𑀪𑀺𑀓𑁆𑀓𑀫𑀧𑀝𑀺𑀓𑁆𑀓𑀫𑀕𑁆𑀕𑀳𑀡𑁂𑀦 𑀕𑀫𑀦𑁂𑀦𑀧𑀺 𑀧𑀼𑀭𑀢𑁄 𑀧𑀘𑁆𑀙𑀢𑁄 𑀘 𑀓𑀸𑀬𑀲𑁆𑀲 𑀅𑀪𑀺𑀳𑀭𑀡𑀁 𑀯𑀼𑀢𑁆𑀢𑀦𑁆𑀢𑀺 𑀇𑀥 𑀕𑀫𑀦𑀫𑁂𑀯 𑀕𑀳𑀺𑀢𑀦𑁆𑀢𑀺 𑀓𑁂𑀘𑀺.

𑀬𑀲𑁆𑀫𑀸 𑀫𑀳𑀸𑀲𑀺𑀯𑀢𑁆𑀣𑁂𑀭𑀯𑀸𑀤𑁂 𑀅𑀦𑀦𑁆𑀢𑀭𑁂 𑀅𑀦𑀦𑁆𑀢𑀭𑁂 𑀇𑀭𑀺𑀬𑀸𑀧𑀣𑁂 𑀧𑀯𑀢𑁆𑀢𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀢𑀢𑁆𑀣 𑀢𑀢𑁆𑀣𑁂𑀯 𑀦𑀺𑀭𑁄𑀥𑀤𑀲𑁆𑀲𑀦𑀯𑀲𑁂𑀦 𑀲𑀫𑁆𑀧𑀚𑀸𑀦𑀓𑀸𑀭𑀺𑀢𑀸 𑀕𑀳𑀺𑀢𑀸𑀢𑀺 𑀢𑀁 𑀲𑀫𑁆𑀧𑀚𑀜𑁆𑀜𑀯𑀺𑀧𑀲𑁆𑀲𑀦𑀸𑀘𑀸𑀭𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀬𑀺𑀤𑀁 𑀫𑀳𑀸𑀲𑀺𑀯𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁 𑀅𑀲𑀫𑁆𑀫𑁄𑀳𑀥𑀼𑀭𑀁 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑁂 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀲𑀸𑀫𑀜𑁆𑀜𑀨𑀮𑁂 𑀲𑀩𑁆𑀩𑀫𑁆𑀧𑀺 ¶ 𑀘𑀢𑀼𑀩𑁆𑀩𑀺𑀥𑀁 𑀲𑀫𑁆𑀧𑀚𑀜𑁆𑀜𑀁 𑀮𑀩𑁆𑀪𑀢𑀺 𑀬𑀸𑀯𑀤𑁂𑀯 𑀲𑀸𑀫𑀜𑁆𑀜𑀨𑀮𑀯𑀺𑀲𑁂𑀲𑀤𑀲𑁆𑀲𑀦𑀧𑀭𑀢𑁆𑀢𑀸 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬. ‘‘𑀲𑀢𑀺𑀲𑀫𑁆𑀧𑀬𑀼𑀢𑁆𑀢𑀲𑁆𑀲𑁂𑀯𑀸’’𑀢𑀺 𑀇𑀤𑀁 𑀬𑀣𑀸 𑀲𑀫𑁆𑀧𑀚𑀜𑁆𑀜𑀲𑁆𑀲 𑀓𑀺𑀘𑁆𑀘𑀢𑁄 𑀧𑀥𑀸𑀦𑀢𑀸 𑀕𑀳𑀺𑀢𑀸, 𑀏𑀯𑀁 𑀲𑀢𑀺𑀬𑀸 𑀧𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀲𑀢𑀺𑀬𑀸 𑀲𑀩𑁆𑀪𑀸𑀯𑀫𑀢𑁆𑀢𑀤𑀲𑁆𑀲𑀦𑀢𑁆𑀣𑀁. 𑀦 𑀳𑀺 𑀓𑀤𑀸𑀘𑀺 𑀲𑀢𑀺𑀭𑀳𑀺𑀢𑀸 𑀜𑀸𑀡𑀧𑁆𑀧𑀯𑀢𑁆𑀢𑀺 𑀅𑀢𑁆𑀣𑀺. ‘‘𑀏𑀢𑀲𑁆𑀲 𑀳𑀺 𑀧𑀤𑀲𑁆𑀲 𑀅𑀬𑀁 𑀯𑀺𑀢𑁆𑀣𑀸𑀭𑁄’’𑀢𑀺 𑀇𑀫𑀺𑀦𑀸 𑀲𑀢𑀺𑀬𑀸 𑀜𑀸𑀡𑁂𑀦 𑀲𑀫𑀥𑀼𑀭𑀢𑀁𑀬𑁂𑀯 𑀯𑀺𑀪𑀸𑀯𑁂𑀢𑀺. 𑀏𑀢𑀸𑀦𑀺 ¶ 𑀧𑀤𑀸𑀦𑀻𑀢𑀺 ‘‘𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀻’’𑀢𑀺𑀆𑀤𑀻𑀦𑀺 ¶ 𑀧𑀤𑀸𑀦𑀺. 𑀯𑀺𑀪𑀢𑁆𑀢𑀸𑀦𑁂𑀯𑀸𑀢𑀺 𑀯𑀺𑀲𑀼𑀁 𑀓𑀢𑁆𑀯𑀸 𑀯𑀺𑀪𑀢𑁆𑀢𑀸𑀦𑀺𑀬𑁂𑀯, 𑀇𑀫𑀺𑀦𑀸𑀧𑀺 𑀲𑀫𑁆𑀧𑀚𑀜𑁆𑀜𑀲𑁆𑀲 𑀯𑀺𑀬 𑀲𑀢𑀺𑀬𑀸𑀧𑁂𑀢𑁆𑀣 𑀧𑀥𑀸𑀦𑀢𑀫𑁂𑀯 𑀯𑀺𑀪𑀸𑀯𑁂𑀢𑀺.

𑀫𑀚𑁆𑀛𑀺𑀫𑀪𑀸𑀡𑀓𑀸 𑀧𑀦 𑀪𑀡𑀦𑁆𑀢𑀺 𑁋 𑀏𑀓𑁄 𑀪𑀺𑀓𑁆𑀔𑀼 𑀕𑀘𑁆𑀙𑀦𑁆𑀢𑁄 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑁄 𑀅𑀜𑁆𑀜𑀁 𑀯𑀺𑀢𑀓𑁆𑀓𑁂𑀦𑁆𑀢𑁄 𑀕𑀘𑁆𑀙𑀢𑀺, 𑀏𑀓𑁄 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀕𑀘𑁆𑀙𑀢𑀺. 𑀢𑀣𑀸 𑀏𑀓𑁄 𑀢𑀺𑀝𑁆𑀞𑀦𑁆𑀢𑁄…𑀧𑁂… 𑀦𑀺𑀲𑀻𑀤𑀦𑁆𑀢𑁄…𑀧𑁂… 𑀲𑀬𑀦𑁆𑀢𑁄 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑁄 𑀅𑀜𑁆𑀜𑀁 𑀯𑀺𑀢𑀓𑁆𑀓𑁂𑀦𑁆𑀢𑁄 𑀲𑀬𑀢𑀺, 𑀏𑀓𑁄 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀲𑀬𑀢𑀺, 𑀏𑀢𑁆𑀢𑀓𑁂𑀦 𑀧𑀦 𑀦 𑀧𑀸𑀓𑀝𑀁 𑀳𑁄𑀢𑀻𑀢𑀺 𑀘𑀗𑁆𑀓𑀫𑀦𑁂𑀦 𑀤𑀻𑀧𑁂𑀦𑁆𑀢𑀺. 𑀬𑁄 𑀳𑀺 𑀪𑀺𑀓𑁆𑀔𑀼 𑀘𑀗𑁆𑀓𑀫𑀁 𑀑𑀢𑀭𑀺𑀢𑁆𑀯𑀸 𑀘 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀞𑀺𑀢𑁄 𑀧𑀭𑀺𑀕𑁆𑀕𑀡𑁆𑀳𑀸𑀢𑀺 ‘‘𑀧𑀸𑀘𑀻𑀦𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀧𑀯𑀢𑁆𑀢𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀧𑀘𑁆𑀙𑀺𑀫𑀘𑀗𑁆𑀓𑀫𑀦𑀓𑁄𑀝𑀺𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸, 𑀧𑀘𑁆𑀙𑀺𑀫𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀧𑀯𑀢𑁆𑀢𑀸𑀧𑀺 𑀧𑀸𑀘𑀻𑀦𑀘𑀗𑁆𑀓𑀫𑀦𑀓𑁄𑀝𑀺𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸, 𑀘𑀗𑁆𑀓𑀫𑀦𑀫𑀚𑁆𑀛𑁂 𑀧𑀯𑀢𑁆𑀢𑀸 𑀉𑀪𑁄 𑀓𑁄𑀝𑀺𑀬𑁄 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸, 𑀘𑀗𑁆𑀓𑀫𑀦𑁂 𑀧𑀯𑀢𑁆𑀢𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀞𑀸𑀦𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸, 𑀞𑀸𑀦𑁂 𑀧𑀯𑀢𑁆𑀢𑀸 𑀦𑀺𑀲𑀚𑁆𑀚𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸, 𑀦𑀺𑀲𑀚𑁆𑀚𑀸𑀬 𑀧𑀯𑀢𑁆𑀢𑀸 𑀲𑀬𑀦𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸’’𑀢𑀺 𑀏𑀯𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄𑀬𑁂𑀯 𑀪𑀯𑀗𑁆𑀕𑀁 𑀑𑀢𑀭𑀢𑀺. 𑀉𑀝𑁆𑀞𑀳𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸𑀯 𑀉𑀝𑁆𑀞𑀳𑀢𑀺, 𑀅𑀬𑀁 𑀪𑀺𑀓𑁆𑀔𑀼 𑀕𑀢𑀸𑀤𑀻𑀲𑀼 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫 𑀳𑁄𑀢𑀻𑀢𑀺 ¶ . 𑀏𑀯𑀫𑁆𑀧𑀺 𑀦 𑀲𑁄𑀢𑁆𑀢𑁂 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀪𑀽𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀪𑀺𑀓𑁆𑀔𑀼 𑀬𑀸𑀯 𑀲𑀓𑁆𑀓𑁄𑀢𑀺, 𑀢𑀸𑀯 𑀘𑀗𑁆𑀓𑀫𑀺𑀢𑁆𑀯𑀸 𑀞𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀲𑀬𑀫𑀸𑀦𑁄 𑀏𑀯𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀬𑀢𑀺 ‘‘𑀓𑀸𑀬𑁄 𑀅𑀘𑁂𑀢𑀦𑁄, 𑀫𑀜𑁆𑀘𑁄 𑀅𑀘𑁂𑀢𑀦𑁄, 𑀓𑀸𑀬𑁄 𑀦 𑀚𑀸𑀦𑀸𑀢𑀺 ‘𑀅𑀳𑀁 𑀫𑀜𑁆𑀘𑁂 𑀲𑀬𑀺𑀢𑁄’𑀢𑀺, 𑀫𑀜𑁆𑀘𑁄 𑀦 𑀚𑀸𑀦𑀸𑀢𑀺 ‘𑀫𑀬𑀺 𑀓𑀸𑀬𑁄 𑀲𑀬𑀺𑀢𑁄’𑀢𑀺, 𑀅𑀘𑁂𑀢𑀦𑁄 𑀓𑀸𑀬𑁄 𑀅𑀘𑁂𑀢𑀦𑁂 𑀫𑀜𑁆𑀘𑁂 𑀲𑀬𑀺𑀢𑁄’’𑀢𑀺 𑀏𑀯𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀏𑀯 𑀘𑀺𑀢𑁆𑀢𑀁 𑀪𑀯𑀗𑁆𑀕𑁂 𑀑𑀢𑀸𑀭𑁂𑀢𑀺. 𑀧𑀩𑀼𑀚𑁆𑀛𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸𑀯 𑀧𑀩𑀼𑀚𑁆𑀛𑀢𑀺, 𑀅𑀬𑀁 𑀲𑁄𑀢𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫 𑀳𑁄𑀢𑀺. 𑀓𑀸𑀬𑀸𑀤𑀻𑀓𑀺𑀭𑀺𑀬𑀸𑀦𑀺𑀩𑁆𑀩𑀢𑁆𑀢𑀦𑁂𑀦 𑀢𑀫𑁆𑀫𑀬𑀢𑁆𑀢𑀸, 𑀆𑀯𑀚𑁆𑀚𑀦𑀓𑀺𑀭𑀺𑀬𑀸 𑀲𑀫𑀼𑀝𑁆𑀞𑀺𑀢𑀢𑁆𑀢𑀸 𑀘 𑀚𑀯𑀦𑀁 𑀲𑀩𑁆𑀩𑀫𑁆𑀧𑀺 𑀯𑀸 𑀙𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀁 𑀓𑀺𑀭𑀺𑀬𑀫𑀬𑀧𑀯𑀢𑁆𑀢𑀁 𑀦𑀸𑀫. 𑀢𑀲𑁆𑀫𑀺𑀁 𑀲𑀢𑀺 𑀚𑀸𑀕𑀭𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀚𑀸𑀕𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫. 𑀅𑀧𑀺 𑀘 𑀭𑀢𑁆𑀢𑀺𑀦𑁆𑀤𑀺𑀯𑀁 𑀙 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀧𑀜𑁆𑀘 𑀓𑁄𑀝𑁆𑀞𑀸𑀲𑁂 𑀚𑀕𑁆𑀕𑀦𑁆𑀢𑁄𑀧𑀺 𑀚𑀸𑀕𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫 𑀳𑁄𑀢𑀺. 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄𑀧𑀺 𑀩𑀢𑁆𑀢𑀺𑀁𑀲𑀢𑀺𑀭𑀘𑁆𑀙𑀸𑀦𑀓𑀣𑀁 𑀧𑀳𑀸𑀬 𑀤𑀲𑀓𑀣𑀸𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀁 𑀓𑀣𑁂𑀦𑁆𑀢𑁄𑀧𑀺 𑀪𑀸𑀲𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫. 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀘𑀺𑀢𑁆𑀢𑀭𑀼𑀘𑀺𑀬𑀁 𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑁂𑀦𑁆𑀢𑁄𑀧𑀺 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑁄𑀧𑀺 ¶ 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫. 𑀤𑀼𑀢𑀺𑀬𑀜𑁆𑀳𑀺 𑀛𑀸𑀦𑀁 𑀯𑀘𑀻𑀲𑀗𑁆𑀔𑀸𑀭𑀯𑀺𑀭𑀳𑀢𑁄 𑀯𑀺𑀲𑁂𑀲𑀢𑁄 𑀢𑀼𑀡𑁆𑀳𑀻𑀪𑀸𑀯𑁄 𑀦𑀸𑀫𑀸𑀢𑀺. 𑀏𑀯𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦, 𑀲𑀢𑁆𑀢𑀲𑀼𑀧𑀺 𑀞𑀸𑀦𑁂𑀲𑀼 𑀘𑀢𑀼𑀥𑀸𑀢𑀺 𑀅𑀢𑁆𑀣𑁄.

𑀲𑀦𑁆𑀢𑁄𑀲𑀓𑀣𑀸𑀯𑀡𑁆𑀡𑀦𑀸

𑁨𑁧𑁫. 𑀬𑀲𑁆𑀲 ¶ 𑀲𑀦𑁆𑀢𑁄𑀲𑀲𑁆𑀲 𑀅𑀢𑁆𑀢𑀦𑀺 𑀅𑀢𑁆𑀣𑀺𑀢𑀸𑀬 𑀪𑀺𑀓𑁆𑀔𑀼 ‘‘𑀲𑀦𑁆𑀢𑀼𑀝𑁆𑀞𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑀭𑀻𑀢𑀭𑀧𑀘𑁆𑀘𑀬𑀲𑀦𑁆𑀢𑁄𑀲𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀆𑀳. 𑀘𑀻𑀯𑀭𑀸𑀤𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀘𑁆𑀘𑀬𑁂 ¶ 𑀲𑀦𑁆𑀢𑀼𑀲𑁆𑀲𑀦𑁂𑀦 𑀲𑀫𑀗𑁆𑀕𑀻𑀪𑀽𑀢𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀇𑀢𑀭𑀁 𑀯𑀼𑀘𑁆𑀘𑀢𑀺 𑀳𑀻𑀦𑀁 𑀧𑀡𑀻𑀢𑀢𑁄 𑀅𑀜𑁆𑀜𑀢𑁆𑀢𑀸, 𑀢𑀣𑀸 𑀧𑀡𑀻𑀢𑀁 𑀇𑀢𑀭𑀁 𑀳𑀻𑀦𑀢𑁄 𑀅𑀜𑁆𑀜𑀢𑁆𑀢𑀸. 𑀅𑀧𑁂𑀓𑁆𑀔𑀸𑀲𑀺𑀤𑁆𑀥𑀸 𑀳𑀺 𑀇𑀢𑀭𑀢𑀸𑀢𑀺. 𑀇𑀢𑀺 𑀬𑁂𑀦 𑀥𑀫𑁆𑀫𑁂𑀦 𑀳𑀻𑀦𑁂𑀦 𑀯𑀸 𑀧𑀡𑀻𑀢𑁂𑀦 𑀯𑀸 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑁂𑀦 𑀲𑀦𑁆𑀢𑀼𑀲𑁆𑀲𑀢𑀺, 𑀲𑁄 𑀢𑀣𑀸 𑀧𑀯𑀢𑁆𑀢𑁄 𑀅𑀮𑁄𑀪𑁄 𑀇𑀢𑀭𑀻𑀢𑀭𑀧𑀘𑁆𑀘𑀬𑀲𑀦𑁆𑀢𑁄𑀲𑁄, 𑀢𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀬𑀣𑀸𑀮𑀸𑀪𑀁 𑀅𑀢𑁆𑀢𑀦𑁄 𑀮𑀸𑀪𑀸𑀦𑀼𑀭𑀽𑀧𑀁 𑀲𑀦𑁆𑀢𑁄𑀲𑁄 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀮𑀩𑁆𑀪𑀢𑀻𑀢𑀺 𑀯𑀸 𑀮𑀸𑀪𑁄, 𑀬𑁄 𑀬𑁄 𑀮𑀸𑀪𑁄 𑀬𑀣𑀸𑀮𑀸𑀪𑀁, 𑀢𑁂𑀦 𑀲𑀦𑁆𑀢𑁄𑀲𑁄 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀩𑀮𑀦𑁆𑀢𑀺 𑀓𑀸𑀬𑀩𑀮𑀁. 𑀲𑀸𑀭𑀼𑀧𑁆𑀧𑀦𑁆𑀢𑀺 𑀧𑀓𑀢𑀺𑀤𑀼𑀩𑁆𑀩𑀮𑀸𑀤𑀻𑀦𑀁 𑀅𑀦𑀼𑀘𑁆𑀙𑀯𑀺𑀓𑀢𑀸.

𑀬𑀣𑀸𑀮𑀤𑁆𑀥𑀢𑁄 𑀅𑀜𑁆𑀜𑀲𑁆𑀲 𑀅𑀧𑀢𑁆𑀣𑀦𑀸 𑀦𑀸𑀫 𑀲𑀺𑀬𑀸 𑀅𑀧𑁆𑀧𑀺𑀘𑁆𑀙𑀢𑀸𑀬𑀧𑀺 𑀧𑀯𑀢𑁆𑀢𑀺𑀆𑀓𑀸𑀭𑁄𑀢𑀺 𑀢𑀢𑁄 𑀯𑀺𑀦𑀺𑀯𑀢𑁆𑀢𑀺𑀢𑀫𑁂𑀯 𑀲𑀦𑁆𑀢𑁄𑀲𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀻’’𑀢𑀺 𑀆𑀳. 𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀧𑀓𑀢𑀺𑀤𑀼𑀩𑁆𑀩𑀮𑀸𑀤𑀻𑀦𑀁 𑀕𑀭𑀼𑀘𑀻𑀯𑀭𑀁 𑀦 𑀨𑀸𑀲𑀼𑀪𑀸𑀯𑀸𑀯𑀳𑀁, 𑀲𑀭𑀻𑀭𑀔𑁂𑀤𑀸𑀯𑀳𑀜𑁆𑀘 𑀳𑁄𑀢𑀻𑀢𑀺 𑀧𑀬𑁄𑀚𑀦𑀯𑀲𑁂𑀦, 𑀦 𑀅𑀢𑁆𑀭𑀺𑀘𑁆𑀙𑀢𑀸𑀤𑀺𑀯𑀲𑁂𑀦 𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸. 𑀮𑀳𑀼𑀓𑀘𑀻𑀯𑀭𑀧𑀭𑀺𑀪𑁄𑀕𑁄 𑀦 𑀲𑀦𑁆𑀢𑁄𑀲𑀯𑀺𑀭𑁄𑀥𑀻𑀢𑀺 𑀆𑀳 ‘‘𑀮𑀳𑀼𑀓𑁂𑀦 𑀬𑀸𑀧𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀻’’𑀢𑀺. 𑀫𑀳𑀕𑁆𑀖𑀁 𑀘𑀻𑀯𑀭𑀁 𑀩𑀳𑀽𑀦𑀺 𑀯𑀸 𑀘𑀻𑀯𑀭𑀸𑀦𑀺 𑀮𑀪𑀺𑀢𑁆𑀯𑀸𑀧𑀺 𑀢𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀤𑀜𑁆𑀜𑀲𑁆𑀲 𑀕𑀳𑀡𑀁 𑀬𑀣𑀸𑀲𑀸𑀭𑀼𑀧𑁆𑀧𑀦𑀬𑁂 𑀞𑀺𑀢𑀢𑁆𑀢𑀸 𑀦 𑀲𑀦𑁆𑀢𑁄𑀲𑀯𑀺𑀭𑁄𑀥𑀻𑀢𑀺 𑀆𑀳 ‘‘𑀢𑁂𑀲𑀁…𑀧𑁂… 𑀥𑀸𑀭𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀻’’𑀢𑀺. 𑀏𑀯𑀁 𑀲𑁂𑀲𑀧𑀘𑁆𑀘𑀬𑁂𑀧𑀺 𑀬𑀣𑀸𑀩𑀮𑀬𑀣𑀸𑀲𑀸𑀭𑀼𑀧𑁆𑀧𑀦𑀺𑀤𑁆𑀤𑁂𑀲𑁂𑀲𑀼 𑀅𑀧𑀺-𑀲𑀤𑁆𑀤𑀕𑁆𑀕𑀳𑀡𑁂 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀫𑀼𑀢𑁆𑀢𑀳𑀭𑀻𑀢𑀓𑀦𑁆𑀢𑀺 𑀕𑁄𑀫𑀼𑀢𑁆𑀢𑀧𑀭𑀺𑀪𑀸𑀯𑀺𑀢𑀁, 𑀧𑀽𑀢𑀺𑀪𑀸𑀯𑁂𑀦 𑀯𑀸 𑀙𑀟𑁆𑀟𑀺𑀢𑀁 𑀳𑀭𑀻𑀢𑀓𑀁. 𑀩𑀼𑀤𑁆𑀥𑀸𑀤𑀻𑀳𑀺 𑀯𑀡𑁆𑀡𑀺𑀢𑀦𑁆𑀢𑀺 ‘‘𑀧𑀽𑀢𑀺𑀫𑀼𑀢𑁆𑀢𑀪𑁂𑀲𑀚𑁆𑀚𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁭𑁩, 𑁧𑁨𑁮) 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀤𑀻𑀳𑀺 ¶ 𑀧𑀲𑀢𑁆𑀣𑀁. 𑀅𑀧𑁆𑀧𑀺𑀘𑁆𑀙𑀢𑀸𑀲𑀦𑁆𑀢𑀼𑀝𑁆𑀞𑀻𑀲𑀼 ¶ 𑀪𑀺𑀓𑁆𑀔𑀽 𑀦𑀺𑀬𑁄𑀚𑁂𑀦𑁆𑀢𑁄 𑀧𑀭𑀫𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺 𑀧𑀭𑀫𑁂𑀦 𑀉𑀓𑁆𑀓𑀁𑀲𑀕𑀢𑁂𑀦 𑀲𑀦𑁆𑀢𑁄𑀲𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸.

𑀓𑀸𑀬𑀁 𑀧𑀭𑀺𑀳𑀭𑀦𑁆𑀢𑀺 𑀧𑁄𑀲𑁂𑀦𑁆𑀢𑀻𑀢𑀺 𑀓𑀸𑀬𑀧𑀭𑀺𑀳𑀸𑀭𑀺𑀓𑀸. 𑀢𑀣𑀸 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑀢𑀸 𑀘 𑀅𑀚𑁆𑀛𑁄𑀳𑀭𑀡𑁂𑀦 𑀲𑀭𑀻𑀭𑀲𑁆𑀲 𑀞𑀺𑀢𑀺𑀬𑀸 𑀉𑀧𑀓𑀸𑀭𑀓𑀢𑀸𑀯𑀲𑁂𑀦 𑀇𑀘𑁆𑀙𑀺𑀢𑀸𑀢𑀺 𑀩𑀳𑀺𑀤𑁆𑀥𑀸𑀯 𑀓𑀸𑀬𑀲𑁆𑀲 𑀉𑀧𑀓𑀸𑀭𑀓𑀢𑀸𑀯𑀲𑁂𑀦 𑀓𑀸𑀬𑀧𑀭𑀺𑀳𑀸𑀭𑀺𑀓𑀢𑀸 𑀤𑀝𑁆𑀞𑀩𑁆𑀩𑀸.

𑀧𑀭𑀺𑀓𑁆𑀔𑀸𑀭𑀫𑀢𑁆𑀢𑀸𑀢𑀺 𑀧𑀭𑀺𑀓𑁆𑀔𑀸𑀭𑀕𑁆𑀕𑀳𑀡𑀁. 𑀢𑀢𑁆𑀭𑀝𑁆𑀞𑀓𑀧𑀘𑁆𑀘𑀢𑁆𑀣𑀭𑀡𑀦𑁆𑀢𑀺 𑀅𑀢𑁆𑀢𑀦𑀸 𑀅𑀦𑀥𑀺𑀝𑁆𑀞𑀳𑀺𑀢𑁆𑀯𑀸 𑀢𑀢𑁆𑀣𑁂𑀯 𑀢𑀺𑀝𑁆𑀞𑀦𑀓𑀧𑀘𑁆𑀘𑀢𑁆𑀣𑀭𑀡𑀁 ¶ . 𑀧𑀘𑁆𑀘𑀢𑁆𑀣𑀭𑀡𑀸𑀤𑀻𑀦𑀜𑁆𑀘𑁂𑀢𑁆𑀣 𑀦𑀯𑀫𑀸𑀤𑀺𑀪𑀸𑀯𑁄 𑀬𑀣𑀸𑀯𑀼𑀢𑁆𑀢𑀧𑀝𑀺𑀧𑀸𑀝𑀺𑀬𑀸 𑀤𑀝𑁆𑀞𑀩𑁆𑀩𑁄, 𑀦 𑀢𑁂𑀲𑀁 𑀢𑀣𑀸 𑀧𑀢𑀺𑀦𑀺𑀬𑀢𑀪𑀸𑀯𑀢𑁄. 𑀓𑀲𑁆𑀫𑀸? 𑀢𑀣𑀸 𑀦𑀥𑀸𑀭𑀡𑀢𑁄. 𑀤𑀼𑀧𑁆𑀧𑁄𑀲𑀪𑀸𑀯𑁂𑀦 𑀫𑀳𑀸𑀕𑀚𑀸 𑀯𑀺𑀬𑀸𑀢𑀺 𑀫𑀳𑀸𑀕𑀚𑀸. 𑀬𑀤𑀺 𑀇𑀢𑀭𑁂𑀧𑀺 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀲𑀪𑀸𑀯𑀸, 𑀓𑀺𑀁 𑀢𑁂𑀲𑀫𑁆𑀧𑀺 𑀯𑀲𑁂𑀦 𑀅𑀬𑀁 𑀤𑁂𑀲𑀦𑀸 𑀇𑀘𑁆𑀙𑀺𑀢𑀸𑀢𑀺? 𑀦𑁄𑀢𑀺 𑀆𑀳 ‘‘𑀪𑀕𑀯𑀸 𑀧𑀦𑀸’’𑀢𑀺𑀆𑀤𑀺. 𑀓𑀸𑀬𑀧𑀭𑀺𑀳𑀸𑀭𑁄 𑀧𑀬𑁄𑀚𑀦𑀁 𑀏𑀢𑁂𑀦𑀸𑀢𑀺 𑀓𑀸𑀬𑀧𑀭𑀺𑀳𑀸𑀭𑀺𑀓𑀁. 𑀢𑁂𑀦𑀸𑀳 ‘‘𑀓𑀸𑀬𑀁 𑀧𑀭𑀺𑀳𑀭𑀡𑀫𑀢𑁆𑀢𑀓𑁂𑀦𑀸’’𑀢𑀺.

𑀘𑀢𑀽𑀲𑀼 𑀤𑀺𑀲𑀸𑀲𑀼 𑀲𑀼𑀔𑀯𑀺𑀳𑀸𑀭𑀢𑀸𑀬 𑀲𑀼𑀔𑀯𑀺𑀳𑀸𑀭𑀝𑁆𑀞𑀸𑀦𑀪𑀽𑀢𑀸 𑀘𑀢𑀲𑁆𑀲𑁄 𑀤𑀺𑀲𑀸 𑀏𑀢𑀲𑁆𑀲𑀸𑀢𑀺 𑀘𑀢𑀼𑀤𑁆𑀤𑀺𑀲𑁄 𑀘𑀢𑀼𑀤𑁆𑀤𑀺𑀲𑁄 𑀏𑀯 𑀘𑀸𑀢𑀼𑀤𑁆𑀤𑀺𑀲𑁄. 𑀢𑀸𑀲𑀼 𑀏𑀯 𑀓𑀢𑁆𑀣𑀘𑀺 𑀲𑀢𑁆𑀢𑁂 𑀯𑀸 𑀲𑀗𑁆𑀔𑀸𑀭𑁂 𑀯𑀸 𑀪𑀬𑁂𑀦 𑀦 𑀧𑀝𑀺𑀳𑀦𑀢𑀺, 𑀲𑀬𑀁 𑀯𑀸 𑀢𑁂𑀦 𑀦 𑀧𑀝𑀺𑀳𑀜𑁆𑀜𑀢𑀻𑀢𑀺 𑀅𑀧𑁆𑀧𑀝𑀺𑀖𑁄. 𑀲𑀦𑁆𑀢𑀼𑀲𑁆𑀲𑀫𑀸𑀦𑁄 𑀇𑀢𑀭𑀻𑀢𑀭𑁂𑀦𑀸𑀢𑀺 𑀉𑀘𑁆𑀘𑀸𑀯𑀘𑁂𑀦 𑀧𑀘𑁆𑀘𑀬𑁂𑀦 𑀲𑀓𑁂𑀦, 𑀲𑀦𑁆𑀢𑁂𑀦, 𑀲𑀫𑀫𑁂𑀯 𑀘 𑀢𑀼𑀲𑁆𑀲𑀦𑀓𑁄. 𑀧𑀭𑀺𑀘𑁆𑀘 𑀲𑀬𑀦𑁆𑀢𑀺, 𑀓𑀸𑀬𑀘𑀺𑀢𑁆𑀢𑀸𑀦𑀺 𑀧𑀭𑀺𑀲𑀬𑀦𑁆𑀢𑀺 𑀅𑀪𑀺𑀪𑀯𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸, 𑀲𑀻𑀳𑀩𑁆𑀬𑀕𑁆𑀖𑀸𑀤𑀬𑁄, 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄 𑀘, 𑀢𑁂 𑀧𑀭𑀺𑀲𑁆𑀲𑀬𑁂 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀬𑀸 𑀯𑀺𑀦𑀬𑀸𑀤𑀻𑀳𑀺 𑀘 𑀲𑀳𑀺𑀢𑀸 𑀔𑀦𑁆𑀢𑀸, 𑀅𑀪𑀺𑀪𑀯𑀺𑀢𑀸 𑀘. 𑀣𑀤𑁆𑀥𑀪𑀸𑀯𑀓𑀭𑀪𑀬𑀸𑀪𑀸𑀯𑁂𑀦 𑀅𑀙𑀫𑁆𑀪𑀻. 𑀏𑀓𑁄 𑀘𑀭𑁂𑀢𑀺 𑀏𑀓𑀸𑀓𑀻 𑀳𑀼𑀢𑁆𑀯𑀸 𑀘𑀭𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬. 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺 𑀢𑀸𑀬 𑀏𑀯 𑀏𑀓𑀯𑀺𑀳𑀸𑀭𑀺𑀢𑀸𑀬 𑀔𑀕𑁆𑀕𑀫𑀺𑀕𑀲𑀺𑀗𑁆𑀕𑀲𑀫𑁄.

𑀅𑀲𑀜𑁆𑀚𑀸𑀢𑀯𑀸𑀢𑀸𑀪𑀺𑀖𑀸𑀢𑁂𑀳𑀺 ¶ 𑀲𑀺𑀬𑀸 𑀲𑀓𑀼𑀡𑁄 𑀅𑀧𑀓𑁆𑀔𑀓𑁄𑀢𑀺 ‘‘𑀧𑀓𑁆𑀔𑀻 𑀲𑀓𑀼𑀡𑁄’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑁄.

𑀦𑀻𑀯𑀭𑀡𑀧𑁆𑀧𑀳𑀸𑀦𑀓𑀣𑀸𑀯𑀡𑁆𑀡𑀦𑀸

𑁨𑁧𑁬. 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀻𑀢𑀺 ‘‘𑀅𑀲𑀼𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀭𑀜𑁆𑀜𑁂 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀯𑀺𑀬, 𑀯𑀦𑀘𑀭𑀓𑀸𑀦𑀁 𑀯𑀺𑀬 𑀘 𑀦𑀺𑀯𑀸𑀲𑀫𑀢𑁆𑀢𑀫𑁂𑀯, 𑀦 𑀧𑀦 𑀅𑀭𑀜𑁆𑀜𑀯𑀸𑀲𑀸𑀦𑀼𑀘𑁆𑀙𑀯𑀺𑀓𑀸 ¶ 𑀓𑀸𑀘𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀻’’𑀢𑀺 𑀅𑀧𑀯𑀸𑀤𑀯𑀲𑁂𑀦 𑀯𑀢𑁆𑀢𑀩𑁆𑀩𑀢𑀁, 𑀆𑀭𑀜𑁆𑀜𑀓𑁂𑀳𑀺 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑁂𑀳𑀺, 𑀯𑀦𑀘𑀭𑀯𑀺𑀲𑀪𑀸𑀕𑀚𑀦𑁂𑀳𑀺 𑀯𑀸 𑀲𑀤𑁆𑀥𑀺𑀁 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀯𑀲𑁂𑀦 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺. 𑀓𑀸𑀴𑀓𑀲𑀤𑀺𑀲𑀢𑁆𑀢𑀸 𑀓𑀸𑀴𑀓𑀁, 𑀣𑀼𑀮𑁆𑀮𑀯𑀚𑁆𑀚𑀁. 𑀢𑀺𑀮𑀓𑀲𑀤𑀺𑀲𑀢𑁆𑀢𑀸 𑀢𑀺𑀮𑀓𑀁, 𑀅𑀡𑀼𑀫𑀢𑁆𑀢𑀯𑀚𑁆𑀚𑀁.

𑀯𑀺𑀯𑀺𑀢𑁆𑀢𑀦𑁆𑀢𑀺 𑀚𑀦𑀯𑀺𑀯𑀺𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑀼𑀜𑁆𑀜’’𑀦𑁆𑀢𑀺. 𑀢𑀁 𑀧𑀦 𑀚𑀦𑀲𑀤𑁆𑀤𑀖𑁄𑀲𑀸𑀪𑀸𑀯𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁 𑀲𑀤𑁆𑀤𑀓𑀡𑁆𑀝𑀓𑀢𑁆𑀢𑀸 𑀛𑀸𑀦𑀲𑁆𑀲𑀸𑀢𑀺 𑀆𑀳 ‘‘𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀏𑀢𑀤𑁂𑀯𑀸𑀢𑀺 𑀦𑀺𑀲𑁆𑀲𑀤𑁆𑀤𑀢𑀁𑀬𑁂𑀯. 𑀯𑀺𑀳𑀸𑀭𑁄 𑀧𑀸𑀓𑀸𑀭𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀓𑀮𑁄 𑀆𑀯𑀸𑀲𑁄. 𑀅𑀟𑁆𑀠𑀬𑁄𑀕𑁄𑀢𑀺 𑀤𑀻𑀖𑀧𑀸𑀲𑀸𑀤𑁄, ‘‘𑀕𑀭𑀼𑀴𑀲𑀡𑁆𑀞𑀸𑀦𑀧𑀸𑀲𑀸𑀤𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀧𑀸𑀲𑀸𑀤𑁄𑀢𑀺 𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑁄. 𑀳𑀫𑁆𑀫𑀺𑀬𑀁 𑀫𑀼𑀡𑁆𑀟𑀘𑁆𑀙𑀤𑀦𑀧𑀸𑀲𑀸𑀤𑁄 ¶ . 𑀅𑀝𑁆𑀝𑁄 𑀧𑀝𑀺𑀭𑀸𑀚𑀽𑀦𑀁 𑀧𑀝𑀺𑀩𑀸𑀳𑀦𑀬𑁄𑀕𑁆𑀕𑁄 𑀘𑀢𑀼𑀧𑀜𑁆𑀘𑀪𑀽𑀫𑀓𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄. 𑀫𑀸𑀴𑁄 𑀏𑀓𑀓𑀽𑀝𑀲𑀗𑁆𑀕𑀳𑀺𑀢𑁄 𑀅𑀦𑁂𑀓𑀓𑁄𑀡𑀯𑀦𑁆𑀢𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄. 𑀅𑀧𑀭𑁄 𑀦𑀬𑁄 𑀯𑀺𑀳𑀸𑀭𑁄 𑀦𑀸𑀫 𑀤𑀻𑀖𑀫𑀼𑀔𑀧𑀸𑀲𑀸𑀤𑁄. 𑀅𑀟𑁆𑀠𑀬𑁄𑀕𑁄 𑀏𑀓𑀧𑀲𑁆𑀲𑀘𑁆𑀙𑀤𑀦𑀓𑀲𑁂𑀦𑀸𑀲𑀦𑀁. 𑀢𑀲𑁆𑀲 𑀓𑀺𑀭 𑀏𑀓𑀧𑀲𑁆𑀲𑁂 𑀪𑀺𑀢𑁆𑀢𑀺 𑀉𑀘𑁆𑀘𑀢𑀭𑀸 𑀳𑁄𑀢𑀺, 𑀇𑀢𑀭𑀧𑀲𑁆𑀲𑁂 𑀦𑀻𑀘𑀸, 𑀢𑁂𑀦 𑀢𑀁 𑀏𑀓𑀧𑀲𑁆𑀲𑀙𑀤𑀦𑀓𑀁 𑀳𑁄𑀢𑀺. 𑀧𑀸𑀲𑀸𑀤𑁄 𑀦𑀸𑀫 𑀆𑀬𑀢𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑁄. 𑀳𑀫𑁆𑀫𑀺𑀬𑀁 𑀫𑀼𑀡𑁆𑀟𑀘𑁆𑀙𑀤𑀦𑀓𑀁 𑀘𑀦𑁆𑀤𑀺𑀓𑀗𑁆𑀕𑀡𑀬𑀼𑀢𑁆𑀢𑀁. 𑀕𑀼𑀳𑀸 𑀦𑀸𑀫 𑀓𑁂𑀯𑀮𑀸 𑀧𑀩𑁆𑀩𑀢𑀕𑀼𑀳𑀸. 𑀮𑁂𑀡𑀁 𑀤𑁆𑀯𑀸𑀭𑀩𑀤𑁆𑀥𑀁 𑀧𑀩𑁆𑀪𑀸𑀭𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀫𑀡𑁆𑀟𑀧𑁄𑀢𑀺 𑀲𑀸𑀔𑀸𑀫𑀡𑁆𑀟𑀧𑁄.

𑀯𑀺𑀳𑀸𑀭𑀲𑁂𑀦𑀸𑀲𑀦𑀦𑁆𑀢𑀺 𑀧𑀢𑀺𑀲𑁆𑀲𑀬𑀪𑀽𑀢𑀁 𑀲𑁂𑀦𑀸𑀲𑀦𑀁. 𑀫𑀜𑁆𑀘𑀧𑀻𑀞𑀲𑁂𑀦𑀸𑀲𑀦𑀦𑁆𑀢𑀺 𑀫𑀜𑁆𑀘𑀧𑀻𑀞𑀜𑁆𑀘𑁂𑀯 𑀫𑀜𑁆𑀘𑀧𑀻𑀞𑀲𑀫𑁆𑀩𑀦𑁆𑀥𑀲𑁂𑀦𑀸𑀲𑀦𑀜𑁆𑀘. 𑀘𑀺𑀫𑀺𑀮𑀺𑀓𑀸𑀤𑀺 𑀲𑀦𑁆𑀣𑀭𑀺𑀢𑀩𑁆𑀩𑀢𑁄 𑀲𑀦𑁆𑀣𑀢𑀲𑁂𑀦𑀸𑀲𑀦𑀁. 𑀅𑀪𑀺𑀲𑀗𑁆𑀔𑀭𑀡𑀸𑀪𑀸𑀯𑀢𑁄 ¶ 𑀲𑀬𑀦𑀲𑁆𑀲 𑀦𑀺𑀲𑀚𑁆𑀚𑀸𑀬 𑀘 𑀓𑁂𑀯𑀮𑀁 𑀑𑀓𑀸𑀲𑀪𑀽𑀢𑀁 𑀲𑁂𑀦𑀸𑀲𑀦𑀁. ‘‘𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦’’𑀦𑁆𑀢𑀺 𑀇𑀫𑀺𑀦𑀸 𑀲𑁂𑀦𑀸𑀲𑀦𑀕𑁆𑀕𑀳𑀡𑁂𑀦 𑀲𑀗𑁆𑀕𑀳𑀺𑀢𑀫𑁂𑀯 𑀲𑀸𑀫𑀜𑁆𑀜𑀚𑁄𑀢𑀦𑀸𑀪𑀸𑀯𑀢𑁄.

𑀬𑀤𑀺 𑀏𑀯𑀁 𑀓𑀲𑁆𑀫𑀸 ‘‘𑀅𑀭𑀜𑁆𑀜’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀇𑀫 𑀧𑀦𑀸’’𑀢𑀺𑀆𑀤𑀺. ‘‘𑀪𑀺𑀓𑁆𑀔𑀼𑀦𑀻𑀦𑀁 𑀯𑀲𑁂𑀦 𑀆𑀕𑀢’’𑀦𑁆𑀢𑀺 𑀇𑀤𑀁 𑀯𑀺𑀦𑀬𑁂 𑀢𑀣𑀸 𑀆𑀕𑀢𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀪𑀺𑀥𑀫𑁆𑀫𑁂𑀧𑀺 𑀧𑀦 ‘‘𑀅𑀭𑀜𑁆𑀜𑀦𑁆𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸, 𑀲𑀩𑁆𑀩𑀫𑁂𑀢𑀁 𑀅𑀭𑀜𑁆𑀜’’𑀦𑁆𑀢𑀺 (𑀯𑀺𑀪. 𑁫𑁨𑁯) 𑀆𑀕𑀢𑀫𑁂𑀯. 𑀢𑀢𑁆𑀣 𑀳𑀺 𑀬𑀁 𑀦 𑀕𑀸𑀫𑀧𑀤𑁂𑀲𑀦𑁆𑀢𑁄𑀕𑀥𑀁, 𑀢𑀁 ‘‘𑀅𑀭𑀜𑁆𑀜’’𑀦𑁆𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀯𑀲𑁂𑀦 𑀢𑀣𑀸 𑀯𑀼𑀢𑁆𑀢𑀁. 𑀥𑀼𑀢𑀗𑁆𑀕𑀦𑀺𑀤𑁆𑀤𑁂𑀲𑁂 (𑀯𑀺𑀲𑀼𑀤𑁆𑀥𑀺. 𑁧.𑁩𑁧) 𑀬𑀁 𑀯𑀼𑀢𑁆𑀢𑀁, 𑀢𑀁 𑀬𑀼𑀢𑁆𑀢𑀁,𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀭𑀼𑀓𑁆𑀔𑀫𑀽𑀮𑀦𑁆𑀢𑀺 𑀭𑀼𑀓𑁆𑀔𑀲𑀫𑀻𑀧𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑀸𑀯𑀢𑀸 ¶ 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂 𑀲𑀫𑀦𑁆𑀢𑀸 𑀙𑀸𑀬𑀸 𑀨𑀭𑀢𑀺, 𑀦𑀺𑀯𑀸𑀢𑁂 𑀧𑀡𑁆𑀡𑀸𑀦𑀺 𑀦𑀺𑀧𑀢𑀦𑁆𑀢𑀺, 𑀏𑀢𑁆𑀢𑀸𑀯𑀢𑀸 𑀭𑀼𑀓𑁆𑀔𑀫𑀽𑀮’’𑀦𑁆𑀢𑀺. 𑀲𑁂𑀮-𑀲𑀤𑁆𑀤𑁄 𑀅𑀯𑀺𑀲𑁂𑀲𑀢𑁄 𑀧𑀩𑁆𑀩𑀢𑀧𑀭𑀺𑀬𑀸𑀬𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀧𑀩𑁆𑀩𑀢𑀦𑁆𑀢𑀺 𑀲𑁂𑀮’’𑀦𑁆𑀢𑀺, 𑀦 𑀲𑀺𑀮𑀸𑀫𑀬𑀫𑁂𑀯, 𑀧𑀁𑀲𑀼𑀫𑀬𑀸𑀤𑀺𑀓𑁄 𑀢𑀺𑀯𑀺𑀥𑁄𑀧𑀺 𑀧𑀩𑁆𑀩𑀢𑁄 𑀏𑀯𑀸𑀢𑀺. 𑀯𑀺𑀯𑀭𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀧𑀩𑁆𑀩𑀢𑀸𑀦𑀁 𑀫𑀺𑀣𑁄 𑀆𑀲𑀦𑁆𑀦𑀢𑀭𑁂 𑀞𑀺𑀢𑀸𑀦𑀁 𑀑𑀯𑀭𑀓𑀸𑀤𑀺𑀲𑀤𑀺𑀲𑀁 𑀯𑀺𑀯𑀭𑀁, 𑀏𑀓𑀲𑁆𑀫𑀺𑀁𑀬𑁂𑀯 𑀯𑀸 𑀧𑀩𑁆𑀩𑀢𑁂. 𑀉𑀫𑀗𑁆𑀕𑀲𑀤𑀺𑀲𑀦𑁆𑀢𑀺 𑀲𑀼𑀤𑀼𑀗𑁆𑀕𑀸𑀲𑀤𑀺𑀲𑀁. 𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀧𑀘𑀸𑀭𑀝𑁆𑀞𑀸𑀦𑀦𑁆𑀢𑀺 𑀧𑀓𑀢𑀺𑀲𑀜𑁆𑀘𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑁂𑀳𑀺 𑀦 𑀲𑀜𑁆𑀘𑀭𑀺𑀢𑀩𑁆𑀩𑀝𑁆𑀞𑀸𑀦𑀁. 𑀆𑀤𑀺-𑀲𑀤𑁆𑀤𑁂𑀦 ‘‘𑀯𑀦𑀧𑀢𑁆𑀣𑀦𑁆𑀢𑀺 ¶ 𑀯𑀦𑀲𑀡𑁆𑀞𑀸𑀦𑀫𑁂𑀢𑀁 𑀲𑁂𑀦𑀸𑀲𑀦𑀸𑀦𑀁 𑀅𑀥𑀺𑀯𑀘𑀦𑀁, 𑀯𑀦𑀧𑀢𑁆𑀣𑀦𑁆𑀢𑀺 𑀪𑀻𑀲𑀦𑀓𑀸𑀦𑀫𑁂𑀢𑀁, 𑀯𑀦𑀧𑀢𑁆𑀣𑀦𑁆𑀢𑀺 𑀲𑀮𑁄𑀫𑀳𑀁𑀲𑀸𑀦𑀫𑁂𑀢𑀁, 𑀯𑀦𑀧𑀢𑁆𑀣𑀦𑁆𑀢𑀺 𑀧𑀭𑀺𑀬𑀦𑁆𑀢𑀸𑀦𑀫𑁂𑀢𑀁, 𑀯𑀦𑀧𑀢𑁆𑀣𑀦𑁆𑀢𑀺 𑀦 𑀫𑀦𑀼𑀲𑁆𑀲𑀽𑀧𑀘𑀸𑀭𑀸𑀦𑀫𑁂𑀢𑀁, 𑀯𑀦𑀧𑀢𑁆𑀣𑀦𑁆𑀢𑀺 𑀤𑀼𑀭𑀪𑀺𑀲𑀫𑁆𑀪𑀯𑀸𑀦𑀫𑁂𑀢𑀁 𑀲𑁂𑀦𑀸𑀲𑀦𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀯𑀺𑀪. 𑁫𑁩𑁧) 𑀇𑀫𑀁 𑀧𑀸𑀴𑀺𑀲𑁂𑀲𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀘𑁆𑀙𑀦𑁆𑀦𑀦𑁆𑀢𑀺 𑀓𑁂𑀦𑀘𑀺 𑀙𑀤𑀦𑁂𑀦 𑀅𑀦𑁆𑀢𑀫𑀲𑁄 𑀭𑀼𑀓𑁆𑀔𑀲𑀸𑀔𑀸𑀬𑀧𑀺 𑀦 𑀙𑀸𑀤𑀺𑀢𑀁. 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸𑀢𑀺 𑀦𑀻𑀳𑀭𑀺𑀢𑁆𑀯𑀸. 𑀧𑀩𑁆𑀪𑀸𑀭𑀮𑁂𑀡𑀲𑀤𑀺𑀲𑁂𑀢𑀺 𑀧𑀩𑁆𑀪𑀸𑀭𑀲𑀤𑀺𑀲𑁂 𑀮𑁂𑀡𑀲𑀤𑀺𑀲𑁂 𑀘.

𑀧𑀺𑀡𑁆𑀟𑀧𑀸𑀢𑀧𑀭𑀺𑀬𑁂𑀲𑀦𑀁 𑀧𑀺𑀡𑁆𑀟𑀧𑀸𑀢𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦𑀸𑀢𑀺 𑀆𑀳 ‘‘𑀧𑀺𑀡𑁆𑀟𑀧𑀸𑀢𑀧𑀭𑀺𑀬𑁂𑀲𑀦𑀢𑁄 𑀧𑀝𑀺𑀓𑁆𑀓𑀦𑁆𑀢𑁄’’𑀢𑀺 ¶ . 𑀧𑀮𑁆𑀮𑀗𑁆𑀓𑀦𑁆𑀢𑀺 𑀏𑀢𑁆𑀣 𑀧𑀭𑀺𑀲𑀤𑁆𑀤𑁄 ‘‘𑀲𑀫𑀦𑁆𑀢𑀢𑁄’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑁂, 𑀢𑀲𑁆𑀫𑀸 𑀯𑀸𑀫𑁄𑀭𑀼𑀜𑁆𑀘 𑀤𑀓𑁆𑀔𑀺𑀡𑁄𑀭𑀼𑀜𑁆𑀘 𑀲𑀫𑀁 𑀞𑀧𑁂𑀢𑁆𑀯𑀸 𑀉𑀪𑁄 𑀧𑀸𑀤𑁂 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀦𑀺𑀲𑀚𑁆𑀚𑀸 𑀧𑀮𑁆𑀮𑀗𑁆𑀓𑀦𑁆𑀢𑀺 𑀆𑀳 ‘‘𑀲𑀫𑀦𑁆𑀢𑀢𑁄 𑀊𑀭𑀼𑀩𑀤𑁆𑀥𑀸𑀲𑀦’’𑀦𑁆𑀢𑀺. 𑀊𑀭𑀽𑀦𑀁 𑀩𑀦𑁆𑀥𑀦𑀯𑀲𑁂𑀦 𑀦𑀺𑀲𑀚𑁆𑀚𑀸 𑀧𑀮𑁆𑀮𑀗𑁆𑀓𑀁. 𑀆𑀪𑀼𑀚𑀺𑀢𑁆𑀯𑀸𑀢𑀺 𑀘 𑀬𑀣𑀸 𑀧𑀮𑁆𑀮𑀗𑁆𑀓𑀯𑀲𑁂𑀦 𑀦𑀺𑀲𑀚𑁆𑀚𑀸 𑀳𑁄𑀢𑀺, 𑀏𑀯𑀁 𑀉𑀪𑁄 𑀧𑀸𑀤𑁂 𑀆𑀪𑀼𑀕𑁆𑀕𑁂 𑀪𑀜𑁆𑀚𑀺𑀢𑁂 𑀓𑀢𑁆𑀯𑀸, 𑀢𑀁 𑀧𑀦 𑀉𑀪𑀺𑀦𑁆𑀦𑀁 𑀧𑀸𑀤𑀸𑀦𑀁 𑀢𑀣𑀸 𑀲𑀫𑁆𑀩𑀦𑁆𑀥𑀢𑀸𑀓𑀭𑀡𑀦𑁆𑀢𑀺 𑀆𑀳 ‘‘𑀩𑀦𑁆𑀥𑀺𑀢𑁆𑀯𑀸’’𑀢𑀺.

𑀳𑁂𑀝𑁆𑀞𑀺𑀫𑀓𑀸𑀬𑀲𑁆𑀲 𑀘 𑀅𑀦𑀼𑀚𑀼𑀓𑀁 𑀞𑀧𑀦𑀁 𑀦𑀺𑀲𑀚𑁆𑀚𑀸𑀯𑀘𑀦𑁂𑀦𑁂𑀯 𑀩𑁄𑀥𑀺𑀢𑀦𑁆𑀢𑀺 ‘‘𑀉𑀚𑀼𑀁 𑀓𑀸𑀬’’𑀦𑁆𑀢𑀺 𑀏𑀢𑁆𑀣 𑀓𑀸𑀬-𑀲𑀤𑁆𑀤𑁄 𑀉𑀧𑀭𑀺𑀫𑀓𑀸𑀬𑀯𑀺𑀲𑀬𑁄𑀢𑀺 𑀆𑀳 ‘‘𑀉𑀧𑀭𑀺𑀫𑀁 𑀲𑀭𑀻𑀭𑀁 𑀉𑀚𑀼𑀁 𑀞𑀧𑁂𑀢𑁆𑀯𑀸’’𑀢𑀺. 𑀢𑀁 𑀧𑀦 𑀉𑀚𑀼𑀓𑀞𑀧𑀦𑀁 𑀲𑀭𑀽𑀧𑀢𑁄, 𑀧𑀬𑁄𑀚𑀦𑀢𑁄 𑀘 𑀤𑀲𑁆𑀲𑁂𑀢𑀼𑀁 ‘‘𑀅𑀝𑁆𑀞𑀸𑀭𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀧𑀡𑀫𑀦𑁆𑀢𑀻𑀢𑀺 𑀦 𑀑𑀦𑀫𑀦𑁆𑀢𑀺. 𑀦 𑀧𑀭𑀺𑀧𑀢𑀢𑀻𑀢𑀺 𑀦 𑀯𑀺𑀕𑀘𑁆𑀙𑀢𑀺 𑀯𑀻𑀣𑀺𑀁 𑀦 𑀮𑀗𑁆𑀖𑁂𑀢𑀺. 𑀢𑀢𑁄 𑀏𑀯 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀧𑁆𑀧𑀢𑁆𑀢𑀺𑀬𑀸 𑀓𑀫𑁆𑀫𑀝𑁆𑀞𑀸𑀦𑀁 𑀯𑀼𑀟𑁆𑀠𑀺𑀁 𑀨𑀸𑀢𑀺𑀁 𑀯𑁂𑀧𑀼𑀮𑁆𑀮𑀁 𑀉𑀧𑀕𑀘𑁆𑀙𑀢𑀺. 𑀧𑀭𑀺𑀫𑀼𑀔𑀦𑁆𑀢𑀺 𑀏𑀢𑁆𑀣 𑀧𑀭𑀺𑀲𑀤𑁆𑀤𑁄 𑀅𑀪𑀺-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄𑀢𑀺 ¶ 𑀆𑀳 ‘‘𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀫𑀼𑀔’’𑀦𑁆𑀢𑀺, 𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑀢𑁄 𑀦𑀺𑀯𑀸𑀭𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁𑀬𑁂𑀯 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀫𑀻𑀧𑀢𑁆𑀣𑁄 𑀯𑀸 𑀧𑀭𑀺𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀼𑀔𑀲𑀫𑀻𑀧𑁂 𑀯𑀸 𑀓𑀢𑁆𑀯𑀸’’𑀢𑀺 𑀆𑀳. 𑀏𑀢𑁆𑀣 𑀘 𑀬𑀣𑀸 ‘‘𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀻’’𑀢𑀺𑀆𑀤𑀺𑀦𑀸 ¶ 𑀪𑀸𑀯𑀦𑀸𑀦𑀼𑀭𑀽𑀧𑀁 𑀲𑁂𑀦𑀸𑀲𑀦𑀁 𑀤𑀲𑁆𑀲𑀺𑀢𑀁, 𑀏𑀯𑀁 ‘‘𑀦𑀺𑀲𑀻𑀤𑀢𑀻’’𑀢𑀺 𑀇𑀫𑀺𑀦𑀸 𑀅𑀮𑀻𑀦𑀸𑀦𑀼𑀤𑁆𑀥𑀘𑁆𑀘𑀧𑀓𑁆𑀔𑀺𑀬𑁄 𑀲𑀦𑁆𑀢𑁄 𑀇𑀭𑀺𑀬𑀸𑀧𑀣𑁄 𑀤𑀲𑁆𑀲𑀺𑀢𑁄. ‘‘𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀦𑀺𑀲𑀚𑁆𑀚𑀸𑀬 𑀤𑀴𑁆𑀳𑀪𑀸𑀯𑁄, ‘‘𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀆𑀭𑀫𑁆𑀫𑀡𑀧𑀭𑀺𑀕𑁆𑀕𑀳𑀽𑀧𑀸𑀬𑁄. 𑀧𑀭𑀻𑀢𑀺 𑀧𑀭𑀺𑀕𑁆𑀕𑀳𑀝𑁆𑀞𑁄 ‘‘𑀧𑀭𑀺𑀡𑀸𑀬𑀺𑀓𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀫𑀼𑀔𑀦𑁆𑀢𑀺 𑀦𑀺𑀬𑁆𑀬𑀸𑀦𑀝𑁆𑀞𑁄 ‘‘𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀫𑀼𑀔’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀧𑀝𑀺𑀧𑀓𑁆𑀔𑀢𑁄 𑀦𑀺𑀕𑁆𑀕𑀫𑀦𑀝𑁆𑀞𑁄 𑀳𑀺 𑀦𑀺𑀬𑁆𑀬𑀸𑀦𑀝𑁆𑀞𑁄, 𑀢𑀲𑁆𑀫𑀸 𑀧𑀭𑀺𑀕𑁆𑀕𑀳𑀺𑀢𑀦𑀺𑀬𑁆𑀬𑀸𑀦𑀦𑁆𑀢𑀺 𑀲𑀩𑁆𑀩𑀣𑀸 𑀕𑀳𑀺𑀢𑀸𑀲𑀫𑁆𑀫𑁄𑀲𑀁 𑀧𑀭𑀺𑀘𑀢𑁆𑀢𑀲𑀫𑁆𑀫𑁄𑀲𑀁 𑀲𑀢𑀺𑀁 𑀓𑀢𑁆𑀯𑀸, 𑀧𑀭𑀫𑀁 𑀲𑀢𑀺𑀦𑁂𑀧𑀓𑁆𑀓𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁨𑁧𑁭. 𑀅𑀪𑀺𑀚𑁆𑀛𑀸𑀬𑀢𑀺 𑀕𑀺𑀚𑁆𑀛𑀢𑀺 𑀅𑀪𑀺𑀓𑀗𑁆𑀔𑀢𑀺 𑀏𑀢𑀸𑀬𑀸𑀢𑀺 𑀅𑀪𑀺𑀚𑁆𑀛𑀸, 𑀮𑁄𑀪𑁄. 𑀮𑀼𑀚𑁆𑀚𑀦𑀝𑁆𑀞𑁂𑀦𑀸𑀢𑀺 𑀪𑀺𑀚𑁆𑀚𑀦𑀝𑁆𑀞𑁂𑀦, 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀦𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦𑀸𑀢𑀺 𑀏𑀢𑁆𑀣 𑀯𑀺𑀓𑁆𑀔𑀫𑁆𑀪𑀦𑀁 𑀅𑀦𑀼𑀧𑁆𑀧𑀸𑀤𑀦𑀁 𑀅𑀧𑁆𑀧𑀯𑀢𑁆𑀢𑀦𑀁, 𑀦 𑀧𑀝𑀺𑀧𑀓𑁆𑀔𑀸𑀦𑀁 𑀲𑀼𑀧𑁆𑀧𑀳𑀻𑀦𑀢𑀸. ‘‘𑀧𑀳𑀻𑀦𑀢𑁆𑀢𑀸’’𑀢𑀺 𑀘 𑀧𑀳𑀻𑀦𑀲𑀤𑀺𑀲𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀛𑀸𑀦𑀲𑁆𑀲 𑀅𑀦𑀥𑀺𑀕𑀢𑀢𑁆𑀢𑀸. 𑀢𑀣𑀸𑀧𑀺 𑀦𑀬𑀺𑀤𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀯𑀺𑀬 𑀲𑀪𑀸𑀯𑀢𑁄 𑀯𑀺𑀕𑀢𑀸𑀪𑀺𑀚𑁆𑀛𑀁, 𑀅𑀣 𑀔𑁄 𑀪𑀸𑀯𑀦𑀸𑀯𑀲𑁂𑀦, 𑀢𑁂𑀦𑀸𑀳 ‘‘𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀤𑀺𑀲𑁂𑀦𑀸’’𑀢𑀺. 𑀏𑀲𑁂𑀯 𑀦𑀬𑁄𑀢𑀺 𑀬𑀣𑀸 𑀇𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀪𑀸𑀯𑀦𑀸𑀬 𑀧𑀭𑀺𑀪𑀸𑀯𑀺𑀢𑀢𑁆𑀢𑀸 𑀯𑀺𑀕𑀢𑀸𑀪𑀺𑀚𑁆𑀛𑀢𑀸, 𑀏𑀯𑀁 𑀅𑀩𑁆𑀬𑀸𑀧𑀦𑁆𑀦𑀁 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑀁 𑀅𑀦𑀼𑀤𑁆𑀥𑀢𑀁 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀧𑀓𑀢𑀺𑀦𑁆𑀢𑀺 𑀧𑀭𑀺𑀲𑀼𑀤𑁆𑀥𑀧𑀡𑁆𑀟𑀭𑀲𑀪𑀸𑀯𑀁. ‘‘𑀬𑀸 ¶ 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀬𑀢𑀸𑀢𑀺’’𑀆𑀤𑀺𑀦𑀸 (𑀥. 𑀲. 𑁧𑁧𑁬𑁨; 𑀯𑀺𑀪. 𑁫𑁪𑁬) 𑀣𑀺𑀦𑀲𑁆𑀲, ‘‘𑀬𑀸 𑀓𑀸𑀬𑀲𑁆𑀲 𑀅𑀓𑀮𑁆𑀬𑀢𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁧𑁬𑁩; 𑀯𑀺𑀪. 𑁫𑁪𑁬) 𑀘 𑀫𑀺𑀤𑁆𑀥𑀲𑁆𑀲 𑀅𑀪𑀺𑀥𑀫𑁆𑀫𑁂 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 ¶ 𑀯𑀼𑀢𑁆𑀢𑀁 ‘‘𑀣𑀺𑀦𑀁 𑀘𑀺𑀢𑁆𑀢𑀕𑁂𑀮𑀜𑁆𑀜𑀁, 𑀫𑀺𑀤𑁆𑀥𑀁 𑀘𑁂𑀢𑀲𑀺𑀓𑀕𑁂𑀮𑀜𑁆𑀜’’𑀦𑁆𑀢𑀺. 𑀲𑀢𑀺𑀧𑀺 𑀅𑀜𑁆𑀜𑀫𑀜𑁆𑀜𑀁 𑀅𑀯𑀺𑀧𑁆𑀧𑀬𑁄𑀕𑁂 𑀘𑀺𑀢𑁆𑀢𑀓𑀸𑀬𑀮𑀳𑀼𑀢𑀸𑀤𑀻𑀦𑀁 𑀯𑀺𑀬 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀬𑀣𑀸𑀓𑀫𑁆𑀫𑀁 𑀢𑀁 𑀢𑀁 𑀯𑀺𑀲𑁂𑀲𑀲𑁆𑀲 𑀬𑀸 𑀢𑁂𑀲𑀁 𑀅𑀓𑀮𑁆𑀬𑀢𑀸𑀤𑀻𑀦𑀁 𑀯𑀺𑀲𑁂𑀲𑀧𑁆𑀧𑀘𑁆𑀘𑀬𑀢𑀸, 𑀅𑀬𑀫𑁂𑀢𑁂𑀲𑀁 𑀲𑀪𑀸𑀯𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀮𑁄𑀓𑀲𑀜𑁆𑀜𑀻𑀢𑀺 𑀏𑀢𑁆𑀣 𑀅𑀢𑀺𑀲𑀬𑀢𑁆𑀣𑀯𑀺𑀲𑀺𑀝𑁆𑀞𑀅𑀢𑁆𑀣𑀺 𑀅𑀢𑁆𑀣𑀸𑀯𑀩𑁄𑀥𑀓𑁄 𑀅𑀬𑀫𑀻𑀓𑀸𑀭𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀭𑀢𑁆𑀢𑀺𑀫𑁆𑀧𑀺…𑀧𑁂… 𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀇𑀤𑀁 𑀉𑀪𑀬𑀦𑁆𑀢𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑀫𑀸𑀳. 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀚𑀳𑀺𑀢𑁆𑀯𑀸. ‘‘𑀓𑀣𑀫𑀺𑀤’’𑀦𑁆𑀢𑀺 𑀧𑀯𑀢𑁆𑀢𑀺𑀬𑀸 𑀓𑀣𑀗𑁆𑀓𑀣𑀸, 𑀯𑀺𑀘𑀺𑀓𑀺𑀘𑁆𑀙𑀸. 𑀲𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀓𑀣𑀗𑁆𑀓𑀣𑀻, 𑀦 𑀓𑀣𑀗𑁆𑀓𑀣𑀻𑀢𑀺 𑀅𑀓𑀣𑀁𑀓𑀣𑀻, 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑁄. 𑀮𑀓𑁆𑀔𑀡𑀸𑀤𑀺𑀪𑁂𑀤𑀢𑁄𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀧𑀘𑁆𑀘𑀬𑀧𑀳𑀸𑀦𑀧𑀳𑀸𑀬𑀓𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀧𑀺 𑀳𑀺 𑀪𑁂𑀤𑀢𑁄 𑀯𑀢𑁆𑀢𑀩𑁆𑀩𑀸𑀢𑀺.

𑁨𑁧𑁮. 𑀢𑁂𑀲𑀦𑁆𑀢𑀺 ¶ 𑀇𑀡𑀯𑀲𑁂𑀦 𑀕𑀳𑀺𑀢𑀥𑀦𑀸𑀦𑀁. 𑀧𑀭𑀺𑀬𑀦𑁆𑀢𑁄𑀢𑀺 𑀤𑀸𑀢𑀩𑁆𑀩𑀲𑁂𑀲𑁄. 𑀲𑁄 𑀩𑀮𑀯𑀧𑀸𑀫𑁄𑀚𑁆𑀚𑀁 𑀮𑀪𑀢𑀺 ‘‘𑀇𑀡𑀧𑀮𑀺𑀩𑁄𑀥𑀢𑁄 𑀫𑀼𑀢𑁆𑀢𑁄𑀫𑁆𑀳𑀻’’𑀢𑀺. 𑀲𑁄𑀫𑀦𑀲𑁆𑀲𑀁 𑀅𑀥𑀺𑀕𑀘𑁆𑀙𑀢𑀺 ‘‘𑀚𑀻𑀯𑀺𑀓𑀸𑀦𑀺𑀫𑀺𑀢𑁆𑀢𑀁 𑀅𑀢𑁆𑀣𑀻’’𑀢𑀺.

𑁨𑁧𑁯. 𑀯𑀺𑀲𑀪𑀸𑀕𑀯𑁂𑀤𑀦𑀼𑀧𑁆𑀧𑀢𑁆𑀢𑀺𑀬𑀸𑀢𑀺 𑀤𑀼𑀓𑁆𑀔𑀯𑁂𑀤𑀦𑀼𑀧𑁆𑀧𑀢𑁆𑀢𑀺𑀬𑀸. 𑀤𑀼𑀓𑁆𑀔𑀯𑁂𑀤𑀦𑀸 𑀳𑀺 𑀲𑀼𑀔𑀯𑁂𑀤𑀦𑀸𑀬 𑀓𑀼𑀲𑀮𑀯𑀺𑀧𑀸𑀓𑀲𑀦𑁆𑀢𑀸𑀦𑀲𑁆𑀲 𑀯𑀺𑀭𑁄𑀥𑀺𑀢𑀸𑀬 𑀯𑀺𑀲𑀪𑀸𑀕𑀸. 𑀘𑀢𑀼𑀇𑀭𑀺𑀬𑀸𑀧𑀣𑀁 𑀙𑀺𑀦𑁆𑀤𑀦𑁆𑀢𑁄𑀢𑀺 ¶ 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀇𑀭𑀺𑀬𑀸𑀧𑀣𑀧𑁆𑀧𑀯𑀢𑁆𑀢𑀺𑀁 𑀧𑀘𑁆𑀙𑀺𑀦𑁆𑀤𑀦𑁆𑀢𑁄. 𑀩𑁆𑀬𑀸𑀥𑀺𑀓𑁄 𑀳𑀺 𑀬𑀣𑀸 𑀞𑀸𑀦𑀕𑀫𑀦𑁂𑀲𑀼 𑀅𑀲𑀫𑀢𑁆𑀣𑁄, 𑀏𑀯𑀁 𑀦𑀺𑀲𑀚𑁆𑀚𑀸𑀤𑀻𑀲𑀼𑀧𑀺 𑀅𑀲𑀫𑀢𑁆𑀣𑁄 𑀳𑁄𑀢𑀺. 𑀆𑀩𑀸𑀥𑁂𑀢𑀻𑀢𑀺 𑀧𑀻𑀴𑁂𑀢𑀺. 𑀯𑀸𑀢𑀸𑀤𑀻𑀦𑀁 𑀯𑀺𑀓𑀸𑀭𑁄 𑀯𑀺𑀲𑀫𑀸𑀯𑀢𑁆𑀣𑀸 𑀩𑁆𑀬𑀸𑀥𑀻𑀢𑀺 𑀆𑀳 ‘‘𑀢𑀁𑀲𑀫𑀼𑀝𑁆𑀞𑀸𑀦𑁂𑀦 𑀤𑀼𑀓𑁆𑀔𑁂𑀦 𑀤𑀼𑀓𑁆𑀔𑀺𑀢𑁄’’𑀢𑀺. 𑀤𑀼𑀓𑁆𑀔𑀯𑁂𑀤𑀦𑀸𑀬 𑀧𑀦 𑀩𑁆𑀬𑀸𑀥𑀺𑀪𑀸𑀯𑁂 𑀫𑀽𑀮𑀩𑁆𑀬𑀸𑀥𑀺𑀦𑀸 𑀆𑀩𑀸𑀥𑀺𑀓𑁄 𑀆𑀤𑀺𑀢𑁄 𑀩𑀸𑀥𑀢𑀻𑀢𑀺 𑀓𑀢𑁆𑀯𑀸. 𑀅𑀦𑀼𑀩𑀦𑁆𑀥𑀩𑁆𑀬𑀸𑀥𑀺𑀦𑀸 𑀤𑀼𑀓𑁆𑀔𑀺𑀢𑁄 𑀅𑀧𑀭𑀸𑀧𑀭𑀁 𑀲𑀜𑁆𑀚𑀸𑀢𑀤𑀼𑀓𑁆𑀔𑁄𑀢𑀺 𑀓𑀢𑁆𑀯𑀸. 𑀕𑀺𑀮𑀸𑀦𑁄𑀢𑀺 𑀥𑀸𑀢𑀼𑀲𑀗𑁆𑀔𑀬𑁂𑀦 𑀧𑀭𑀺𑀓𑁆𑀔𑀻𑀡𑀲𑀭𑀻𑀭𑁄. 𑀅𑀧𑁆𑀧𑀫𑀢𑁆𑀢𑀓𑀁 𑀯𑀸 𑀩𑀮𑀁 𑀩𑀮𑀫𑀢𑁆𑀢𑀸. 𑀢𑀤𑀼𑀪𑀬𑀦𑁆𑀢𑀺 𑀧𑀸𑀫𑁄𑀚𑁆𑀚𑀁, 𑀲𑁄𑀫𑀦𑀲𑁆𑀲𑀜𑁆𑀘. 𑀢𑀢𑁆𑀣 𑀮𑀪𑁂𑀣 𑀧𑀸𑀫𑁄𑀚𑁆𑀚𑀁 ‘‘𑀭𑁄𑀕𑀢𑁄 𑀫𑀼𑀢𑁆𑀢𑁄𑀫𑁆𑀳𑀻’’𑀢𑀺. 𑀅𑀥𑀺𑀕𑀘𑁆𑀙𑁂𑀬𑁆𑀬 𑀲𑁄𑀫𑀦𑀲𑁆𑀲𑀁 ‘‘𑀅𑀢𑁆𑀣𑀺 𑀫𑁂 𑀓𑀸𑀬𑁂 𑀩𑀮’’𑀦𑁆𑀢𑀺.

𑁨𑁨𑁦. 𑀲𑁂𑀲𑀦𑁆𑀢𑀺 ‘‘𑀢𑀲𑁆𑀲 𑀳𑀺 ‘𑀩𑀦𑁆𑀥𑀦𑀸 𑀫𑀼𑀢𑁆𑀢𑁄𑀫𑁆𑀳𑀻’𑀢𑀺 𑀆𑀯𑀚𑁆𑀚𑀬𑀢𑁄 𑀢𑀤𑀼𑀪𑀬𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀏𑀯𑀫𑀸𑀤𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀧𑀞𑀫𑀤𑀼𑀢𑀺𑀬𑀧𑀤𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀲𑀩𑁆𑀩𑀧𑀤𑁂𑀲𑀽𑀢𑀺 𑀅𑀯𑀲𑀺𑀝𑁆𑀞𑀧𑀤𑁂𑀲𑀼 𑀢𑀢𑀺𑀬𑀸𑀤𑀻𑀲𑀼 𑀓𑁄𑀝𑁆𑀞𑀸𑀲𑁂𑀲𑀼.

𑁨𑁨𑁧-𑁨𑁨𑁨. 𑀦 𑀅𑀢𑁆𑀢𑀦𑀺 𑀅𑀥𑀻𑀦𑁄𑀢𑀺 𑀦 𑀅𑀢𑁆𑀢𑀸𑀬𑀢𑁆𑀢𑁄. 𑀧𑀭𑀸𑀥𑀻𑀦𑁄𑀢𑀺 𑀧𑀭𑀸𑀬𑀢𑁆𑀢𑁄. 𑀅𑀧𑀭𑀸𑀥𑀻𑀦𑀢𑀸𑀬 𑀪𑀼𑀚𑁄 𑀯𑀺𑀬 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂 𑀏𑀲𑀺𑀢𑀩𑁆𑀩𑁄𑀢𑀺 𑀪𑀼𑀚𑀺𑀲𑁆𑀲𑁄. 𑀲𑀯𑀲𑁄𑀢𑀺 𑀆𑀳 ‘‘𑀅𑀢𑁆𑀢𑀦𑁄 𑀲𑀦𑁆𑀢𑀓𑁄’’𑀢𑀺. 𑀅𑀦𑀼𑀤𑀓𑀢𑀸𑀬 𑀓𑀁 𑀧𑀸𑀦𑀻𑀬𑀁 𑀢𑀸𑀭𑁂𑀦𑁆𑀢𑀺 𑀏𑀢𑁆𑀣𑀸𑀢𑀺 𑀓𑀦𑁆𑀢𑀸𑀭𑁄𑀢𑀺 𑀆𑀳 ‘‘𑀦𑀺𑀭𑀼𑀤𑀓𑀁 𑀤𑀻𑀖𑀫𑀕𑁆𑀕’’𑀦𑁆𑀢𑀺.

𑁨𑁨𑁩. 𑀢𑀢𑁆𑀭𑀸𑀢𑀺 ¶ 𑀢𑀲𑁆𑀫𑀺𑀁 𑀤𑀲𑁆𑀲𑀦𑁂. 𑀅𑀬𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸 𑀲𑀤𑀺𑀲𑀢𑀸. 𑀬𑁂𑀦 𑀇𑀡𑀸𑀤𑀻𑀦𑀁 𑀉𑀧𑀫𑀸𑀪𑀸𑀯𑁄, 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀜𑁆𑀘 𑀉𑀧𑀫𑁂𑀬𑁆𑀬𑀪𑀸𑀯𑁄 𑀳𑁄𑀢𑀺, 𑀲𑁄 𑀦𑁂𑀲𑀁 𑀉𑀧𑀫𑁄𑀧𑀫𑁂𑀬𑁆𑀬𑀲𑀫𑁆𑀩𑀦𑁆𑀥𑁄 ¶ 𑀲𑀤𑀺𑀲𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑁄 𑀬𑀫𑁆𑀳𑀺 𑀓𑀸𑀫𑀘𑁆𑀙𑀦𑁆𑀤𑁂𑀦 𑀭𑀚𑁆𑀚𑀢𑀻𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀬𑀫𑁆𑀳𑀺 𑀓𑀸𑀫𑀭𑀸𑀕𑀲𑁆𑀲 𑀯𑀢𑁆𑀣𑀼𑀪𑀽𑀢𑁂 𑀧𑀼𑀕𑁆𑀕𑀮𑁂 𑀓𑀸𑀫𑀘𑁆𑀙𑀦𑁆𑀤𑀯𑀲𑁂𑀦 𑀭𑀢𑁆𑀢𑁄 𑀳𑁄𑀢𑀺. 𑀢𑀁 𑀯𑀢𑁆𑀣𑀼𑀁 𑀕𑀡𑁆𑀳𑀸𑀢𑀻𑀢𑀺 𑀢𑀁 𑀢𑀡𑁆𑀳𑀸𑀯𑀢𑁆𑀣𑀼𑀁 ‘‘𑀫𑀫𑁂𑀢’’𑀦𑁆𑀢𑀺 𑀕𑀡𑁆𑀳𑀸𑀢𑀺.

𑀉𑀧𑀤𑁆𑀤𑀯𑁂𑀣𑀸𑀢𑀺 ¶ 𑀉𑀧𑀤𑁆𑀤𑀯𑀁 𑀓𑀭𑁄𑀣.

𑀦𑀓𑁆𑀔𑀢𑁆𑀢𑀲𑁆𑀲𑀸𑀢𑀺 𑀫𑀳𑀲𑁆𑀲. 𑀫𑀼𑀢𑁆𑀢𑁄𑀢𑀺 𑀩𑀦𑁆𑀥𑀦𑀢𑁄 𑀫𑀼𑀢𑁆𑀢𑁄.

𑀯𑀺𑀦𑀬𑁂 𑀅𑀧𑀓𑀢𑀜𑁆𑀜𑀼𑀦𑀸𑀢𑀺 𑀯𑀺𑀦𑀬𑀓𑁆𑀓𑀫𑁂 𑀅𑀓𑀼𑀲𑀮𑁂𑀦. 𑀲𑁄 𑀳𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀬𑀸𑀣𑀸𑀯𑀢𑁄 𑀦 𑀚𑀸𑀦𑀸𑀢𑀺. 𑀢𑁂𑀦𑀸𑀳 ‘‘𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯𑀸’’𑀢𑀺𑀆𑀤𑀺.

𑀕𑀘𑁆𑀙𑀢𑀺𑀧𑀻𑀢𑀺 𑀣𑁄𑀓𑀁 𑀣𑁄𑀓𑀁 𑀕𑀘𑁆𑀙𑀢𑀺𑀧𑀺. 𑀕𑀘𑁆𑀙𑀦𑁆𑀢𑁄 𑀧𑀦 𑀢𑀸𑀬 𑀏𑀯 𑀉𑀲𑁆𑀲𑀗𑁆𑀓𑀺𑀢𑀧𑀭𑀺𑀲𑀗𑁆𑀓𑀺𑀢𑀢𑀸𑀬 𑀢𑀢𑁆𑀣 𑀢𑀢𑁆𑀣 𑀢𑀺𑀝𑁆𑀞𑀢𑀺𑀧𑀺. 𑀈𑀤𑀺𑀲𑁂 𑀓𑀦𑁆𑀢𑀸𑀭𑁂 𑀕𑀢𑁄 ‘‘𑀓𑁄 𑀚𑀸𑀦𑀸𑀢𑀺 𑀓𑀺𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀺𑀯𑀢𑁆𑀢𑀢𑀺𑀧𑀺, 𑀢𑀲𑁆𑀫𑀸 𑀕𑀢𑀝𑁆𑀞𑀸𑀦𑀢𑁄 𑀅𑀕𑀢𑀝𑁆𑀞𑀸𑀦𑀫𑁂𑀯 𑀩𑀳𑀼𑀢𑀭𑀁 𑀳𑁄𑀢𑀺. 𑀲𑀤𑁆𑀥𑀸𑀬 𑀕𑀡𑁆𑀳𑀺𑀢𑀼𑀁 𑀲𑀤𑁆𑀥𑁂𑀬𑁆𑀬𑀁 𑀯𑀢𑁆𑀣𑀼𑀁 ‘‘𑀇𑀤𑀫𑁂𑀯’’𑀦𑁆𑀢𑀺 𑀲𑀤𑁆𑀤𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀢𑁆𑀣𑀺 𑀦𑀢𑁆𑀣𑀻𑀢𑀺 ‘‘𑀅𑀢𑁆𑀣𑀺 𑀦𑀼 𑀔𑁄, 𑀦𑀢𑁆𑀣𑀺 𑀦𑀼 𑀔𑁄’’𑀢𑀺. 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑀲𑁆𑀲 𑀆𑀤𑀺𑀫𑁆𑀳𑀺 𑀏𑀯 𑀲𑀧𑁆𑀧𑀦𑀁 𑀆𑀲𑀧𑁆𑀧𑀦𑀁. 𑀧𑀭𑀺 𑀧𑀭𑀺𑀢𑁄, 𑀉𑀧𑀭𑀽𑀧𑀭𑀺 𑀯𑀸 𑀲𑀧𑁆𑀧𑀦𑀁 𑀧𑀭𑀺𑀲𑀧𑁆𑀧𑀦𑀁. 𑀉𑀪𑀬𑁂𑀦𑀧𑀺 𑀢𑀢𑁆𑀣𑁂𑀯 𑀧𑀭𑀺𑀩𑁆𑀪𑀫𑀦𑀁 𑀯𑀤𑀢𑀺. 𑀢𑁂𑀦𑀸𑀳 ‘‘𑀅𑀧𑀭𑀺𑀬𑁄𑀕𑀸𑀳𑀦’’𑀦𑁆𑀢𑀺. 𑀙𑀫𑁆𑀪𑀺𑀢𑀢𑁆𑀢𑀦𑁆𑀢𑀺 𑀅𑀭𑀜𑁆𑀜𑀲𑀜𑁆𑀜𑀸𑀬 𑀉𑀧𑁆𑀧𑀦𑁆𑀦𑀁 𑀙𑀫𑁆𑀪𑀺𑀢𑀪𑀸𑀯𑀁, 𑀉𑀢𑁆𑀭𑀸𑀲𑀦𑁆𑀢𑀺 𑀅𑀢𑁆𑀣𑁄.

𑁨𑁨𑁪. 𑀢𑀢𑁆𑀭𑀸𑀬𑀁 𑀲𑀤𑀺𑀲𑀢𑀸𑀢𑀺 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀤𑀕𑁆𑀕𑁂𑀦 𑀳𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄 𑀇𑀡𑀸𑀤𑀺𑀲𑀤𑀺𑀲𑀸, 𑀢𑀤𑀕𑁆𑀕𑁂𑀦 𑀢𑁂𑀲𑀁 𑀧𑀳𑀸𑀦𑀁 𑀆𑀡𑀡𑁆𑀬𑀸𑀤𑀺𑀲𑀤𑀺𑀲𑀁 𑀅𑀪𑀸𑀯𑁄𑀢𑀺 𑀓𑀢𑁆𑀯𑀸. 𑀙 𑀥𑀫𑁆𑀫𑁂𑀢𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑁄, 𑀅𑀲𑀼𑀪𑀪𑀸𑀯𑀦𑀸𑀦𑀼𑀬𑁄𑀕𑁄, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺 𑀇𑀫𑁂 𑀙 𑀥𑀫𑁆𑀫𑁂. 𑀪𑀸𑀯𑁂𑀢𑁆𑀯𑀸𑀢𑀺 𑀩𑁆𑀭𑀽𑀳𑁂𑀢𑁆𑀯𑀸. 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂 (𑀤𑀻. 𑀦𑀺. 𑁨.𑁩𑁭𑁨-𑁩𑁭𑁪) 𑀯𑀡𑁆𑀡𑀬𑀺𑀲𑁆𑀲𑀸𑀫 𑀢𑀢𑁆𑀣𑀲𑁆𑀲 𑀅𑀦𑀼𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀸𑀤𑀦𑀉𑀧𑁆𑀧𑀦𑁆𑀦𑀧𑀳𑀸𑀦𑀸𑀤𑀺𑀯𑀺𑀪𑀸𑀯𑀦𑀯𑀲𑁂𑀦 𑀲𑀯𑀺𑀲𑁂𑀲𑀁 𑀧𑀸𑀴𑀺𑀬𑀸 𑀆𑀕𑀢𑀢𑁆𑀢𑀸. 𑀏𑀲 𑀦𑀬𑁄 ¶ 𑀩𑁆𑀬𑀸𑀧𑀸𑀤𑀸𑀤𑀺𑀧𑁆𑀧𑀳𑀸𑀦𑀓𑀪𑀸𑀯𑁂𑀧𑀺. 𑀧𑀭𑀯𑀢𑁆𑀣𑀼𑀫𑁆𑀳𑀻𑀢𑀺 𑀆𑀭𑀫𑁆𑀫𑀡𑀪𑀽𑀢𑁂 𑀧𑀭𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁.

𑀅𑀦𑀢𑁆𑀣𑀓𑀭𑁄𑀢𑀺 𑀅𑀢𑁆𑀢𑀦𑁄 𑀧𑀭𑀲𑁆𑀲 𑀘 𑀅𑀦𑀢𑁆𑀣𑀸𑀯𑀳𑁄. 𑀙 𑀥𑀫𑁆𑀫𑁂𑀢𑀺 𑀫𑁂𑀢𑁆𑀢𑀸𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑁄, 𑀫𑁂𑀢𑁆𑀢𑀸𑀪𑀸𑀯𑀦𑀸𑀦𑀼𑀬𑁄𑀕𑁄 ¶ , 𑀓𑀫𑁆𑀫𑀲𑁆𑀲𑀓𑀢𑀸, 𑀧𑀝𑀺𑀲𑀗𑁆𑀔𑀸𑀦𑀩𑀳𑀼𑀮𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺 𑀇𑀫𑁂 𑀙 𑀥𑀫𑁆𑀫𑁂. 𑀢𑀢𑁆𑀣𑁂𑀯𑀸𑀢𑀺 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂𑀬𑁂𑀯 (𑀤𑀻. 𑀦𑀺. 𑁨.𑁩𑁭𑁨-𑁩𑁭𑁪). 𑀘𑀸𑀭𑀺𑀢𑁆𑀢𑀲𑀻𑀮𑀁 𑀉𑀤𑁆𑀤𑀺𑀲𑁆𑀲 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀁 𑀆𑀘𑀸𑀭𑀧𑀡𑁆𑀡𑀢𑁆𑀢𑀺.

𑀩𑀦𑁆𑀥𑀦𑀸𑀕𑀸𑀭𑀁 ¶ 𑀧𑀯𑁂𑀲𑀺𑀢𑀢𑁆𑀢𑀸 𑀅𑀮𑀤𑁆𑀥𑀦𑀓𑁆𑀔𑀢𑁆𑀢𑀸𑀦𑀼𑀪𑀯𑁄 𑀧𑀼𑀭𑀺𑀲𑁄 ‘‘𑀦𑀓𑁆𑀔𑀢𑁆𑀢𑀤𑀺𑀯𑀲𑁂 𑀩𑀦𑁆𑀥𑀦𑀸𑀕𑀸𑀭𑀁 𑀧𑀯𑁂𑀲𑀺𑀢𑁄 𑀧𑀼𑀭𑀺𑀲𑁄’’𑀢𑀺 𑀯𑀼𑀢𑁆𑀢𑁄, 𑀦𑀓𑁆𑀔𑀢𑁆𑀢𑀤𑀺𑀯𑀲𑁂 𑀏𑀯 𑀯𑀸 𑀢𑀤𑀦𑀦𑀼𑀪𑀯𑀦𑀢𑁆𑀣𑀁 𑀢𑀣𑀸 𑀓𑀢𑁄. 𑀫𑀳𑀸𑀅𑀦𑀢𑁆𑀣𑀓𑀭𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀢𑁆𑀣𑀳𑀸𑀧𑀦𑀫𑀼𑀔𑁂𑀦 𑀫𑀳𑀢𑁄 𑀅𑀦𑀢𑁆𑀣𑀲𑁆𑀲 𑀓𑀸𑀭𑀓𑀁. 𑀙 𑀥𑀫𑁆𑀫𑁂𑀢𑀺 𑀅𑀢𑀺𑀪𑁄𑀚𑀦𑁂 𑀦𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄, 𑀇𑀭𑀺𑀬𑀸𑀧𑀣𑀲𑀫𑁆𑀧𑀭𑀺𑀯𑀢𑁆𑀢𑀦𑀢𑀸, 𑀆𑀮𑁄𑀓𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑁄, 𑀅𑀩𑁆𑀪𑁄𑀓𑀸𑀲𑀯𑀸𑀲𑁄, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺 𑀇𑀫𑁂 𑀙 𑀥𑀫𑁆𑀫𑁂.

𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑁂 𑀫𑀳𑀸𑀅𑀦𑀢𑁆𑀣𑀓𑀭𑀦𑁆𑀢𑀺 𑀧𑀭𑀸𑀬𑀢𑁆𑀢𑀢𑀸𑀧𑀸𑀤𑀦𑀢𑁄 𑀯𑀼𑀢𑁆𑀢𑀦𑀬𑁂𑀦 𑀫𑀳𑀢𑁄 𑀅𑀦𑀢𑁆𑀣𑀲𑁆𑀲 𑀓𑀸𑀭𑀓𑀦𑁆𑀢𑀺. 𑀅𑀢𑁆𑀣𑁄 𑀙 𑀥𑀫𑁆𑀫𑁂𑀢𑀺 𑀩𑀳𑀼𑀲𑁆𑀲𑀼𑀢𑀢𑀸, 𑀧𑀭𑀺𑀧𑀼𑀘𑁆𑀙𑀓𑀢𑀸, 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀸, 𑀯𑀼𑀟𑁆𑀠𑀲𑁂𑀯𑀺𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺 𑀇𑀫𑁂 𑀙 𑀥𑀫𑁆𑀫𑁂.

𑀩𑀮𑀯𑀸𑀢𑀺 𑀧𑀘𑁆𑀘𑀢𑁆𑀣𑀺𑀓𑀯𑀺𑀥𑀫𑀦𑀲𑀫𑀢𑁆𑀣𑁂𑀦 𑀩𑀮𑁂𑀦 𑀩𑀮𑀯𑀸. 𑀲𑀚𑁆𑀚𑀸𑀯𑀼𑀥𑁄𑀢𑀺 𑀲𑀦𑁆𑀦𑀤𑁆𑀥𑀥𑀦𑀼𑀆𑀤𑀺𑀆𑀯𑀼𑀥𑁄. 𑀲𑀽𑀭𑀯𑀻𑀭𑀲𑁂𑀯𑀓𑀚𑀦𑀯𑀲𑁂𑀦 𑀲𑀧𑀭𑀺𑀯𑀸𑀭𑁄. 𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀧𑀼𑀭𑀺𑀲𑀁. 𑀩𑀮𑀯𑀦𑁆𑀢𑀢𑀸𑀬, 𑀲𑀚𑁆𑀚𑀸𑀯𑀼𑀥𑀢𑀸𑀬, 𑀲𑀧𑀭𑀺𑀯𑀸𑀭𑀢𑀸𑀬 𑀘 𑀘𑁄𑀭𑀸 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 𑀧𑀮𑀸𑀬𑁂𑀬𑁆𑀬𑀼𑀁. 𑀅𑀦𑀢𑁆𑀣𑀓𑀸𑀭𑀺𑀓𑀸𑀢𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀩𑀦𑁆𑀥𑀓𑀭𑀡𑀢𑁄 𑀯𑀼𑀢𑁆𑀢𑀦𑀬𑁂𑀦 𑀅𑀦𑀢𑁆𑀣𑀓𑀸𑀭𑀺𑀓𑀸. 𑀙 𑀥𑀫𑁆𑀫𑁂𑀢𑀺 𑀩𑀳𑀼𑀲𑁆𑀲𑀼𑀢𑀢𑀸, 𑀧𑀭𑀺𑀧𑀼𑀘𑁆𑀙𑀓𑀢𑀸, 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀸, 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺 ¶ 𑀇𑀫𑁂 𑀙 𑀥𑀫𑁆𑀫𑁂. 𑀬𑀣𑀸 𑀩𑀸𑀳𑀼𑀲𑀘𑁆𑀘𑀸𑀤𑀻𑀦𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀻𑀢𑀺 𑀇𑀥𑀸𑀧𑀺 𑀩𑀳𑀼𑀲𑁆𑀲𑀼𑀢𑀢𑀸𑀤𑀬𑁄 𑀕𑀳𑀺𑀢𑀸. 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀲𑀧𑁆𑀧𑀸𑀬𑀓𑀣𑀸 𑀯𑀺𑀬 𑀧𑀜𑁆𑀘𑀦𑁆𑀦𑀁, 𑀢𑀲𑁆𑀫𑀸 𑀢𑀲𑁆𑀲 𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀲𑁂𑀯𑀦𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑀸𑀫𑀼𑀔𑁂𑀦 𑀯𑀺𑀘𑀺𑀓𑀺𑀘𑁆𑀙𑀸 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀫𑁂𑀯 𑀧𑀭𑀺𑀩𑁆𑀭𑀽𑀳𑁂𑀢𑀻𑀢𑀺 𑀢𑀲𑁆𑀲𑀸 𑀧𑀳𑀸𑀦𑀁 𑀤𑀼𑀘𑁆𑀘𑀭𑀺𑀢𑀯𑀺𑀥𑀽𑀦𑀦𑀽𑀧𑀸𑀬𑁄𑀢𑀺 𑀆𑀳 ‘‘𑀤𑀼𑀘𑁆𑀘𑀭𑀺𑀢𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀭𑀺𑀢𑁆𑀯𑀸’’𑀢𑀺𑀆𑀤𑀺.

𑁨𑁨𑁫. 𑀧𑀸𑀫𑁄𑀚𑁆𑀚𑀁 𑀦𑀸𑀫 𑀢𑀭𑀼𑀡𑀧𑀻𑀢𑀺, 𑀲𑀸 𑀓𑀣𑀜𑁆𑀘𑀺𑀧𑀺 𑀢𑀼𑀝𑁆𑀞𑀸𑀯𑀢𑁆𑀣𑀸𑀢𑀺 𑀆𑀳 ‘‘𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀻𑀢𑀺 𑀢𑀼𑀝𑁆𑀞𑀸𑀓𑀸𑀭𑁄 𑀚𑀸𑀬𑀢𑀻’’𑀢𑀺. 𑀢𑀼𑀝𑁆𑀞𑀲𑁆𑀲𑀸𑀢𑀺 𑀑𑀓𑁆𑀓𑀦𑁆𑀢𑀺𑀓𑀪𑀸𑀯𑀧𑁆𑀧𑀢𑁆𑀢𑀸𑀬 𑀧𑀻𑀢𑀺𑀬𑀸 𑀯𑀲𑁂𑀦 𑀢𑀼𑀝𑁆𑀞𑀲𑁆𑀲. 𑀅𑀢𑁆𑀢𑀦𑁄 𑀲𑀯𑀺𑀧𑁆𑀨𑀸𑀭𑀺𑀓𑀢𑀸𑀬, 𑀅𑀢𑁆𑀢𑀲𑀫𑀼𑀝𑁆𑀞𑀸𑀦𑀧𑀡𑀻𑀢𑀭𑀽𑀧𑀼𑀧𑁆𑀧𑀢𑁆𑀢𑀺𑀬𑀸 𑀘 𑀲𑀓𑀮𑀲𑀭𑀻𑀭𑀁 𑀔𑁄𑀪𑀬𑀫𑀸𑀦𑀸 𑀨𑀭𑀡𑀮𑀓𑁆𑀔𑀡𑀸 𑀧𑀻𑀢𑀺 𑀚𑀸𑀬𑀢𑀺. 𑀧𑀻𑀢𑀺𑀲𑀳𑀺𑀢𑀁 𑀧𑀻𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀓𑀺𑀁 𑀧𑀦 𑀢𑀁 ¶ ? 𑀫𑀦𑁄. 𑀧𑀻𑀢𑀺 𑀫𑀦𑁄 𑀏𑀢𑀲𑁆𑀲𑀸𑀢𑀺 𑀧𑀻𑀢𑀺𑀫𑀦𑁄, 𑀢𑀲𑁆𑀲 𑀧𑀻𑀢𑀺𑀫𑀦𑀲𑁆𑀲. 𑀢𑀬𑀺𑀤𑀁 𑀅𑀢𑁆𑀣𑀫𑀢𑁆𑀢𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀻𑀢𑀺𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺 ¶ 𑀆𑀳. 𑀓𑀸𑀬𑁄𑀢𑀺 𑀇𑀥 𑀅𑀭𑀽𑀧𑀓𑀮𑀸𑀧𑁄 𑀅𑀥𑀺𑀧𑁆𑀧𑁂𑀢𑁄, 𑀦 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀫𑁂𑀯𑀸𑀢𑀺 𑀆𑀳 ‘‘𑀦𑀸𑀫𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀻’’𑀢𑀺, 𑀧𑀲𑁆𑀲𑀤𑁆𑀥𑀺𑀤𑁆𑀯𑀬𑀲𑁆𑀲 𑀧𑀻𑀢𑀺𑀯𑀲𑁂𑀦𑁂𑀢𑁆𑀣 𑀧𑀲𑁆𑀲𑀫𑁆𑀪𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀯𑀺𑀕𑀢𑀤𑀭𑀣𑁄𑀢𑀺 𑀧𑀳𑀻𑀦𑀉𑀤𑁆𑀥𑀘𑁆𑀘𑀸𑀤𑀺𑀓𑀺𑀮𑁂𑀲𑀤𑀭𑀣𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀬 𑀯𑀲𑁂𑀦 𑀘𑁂𑀢𑀲𑀺𑀓𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑁄𑀬𑁂𑀯 𑀢𑀁𑀲𑀫𑀼𑀝𑁆𑀞𑀸𑀦𑀧𑀡𑀻𑀢𑀭𑀽𑀧𑀨𑀼𑀝𑁆𑀞𑀲𑀭𑀻𑀭𑀢𑀸𑀬 𑀓𑀸𑀬𑀺𑀓𑀫𑁆𑀧𑀺 𑀲𑀼𑀔𑀁 𑀯𑁂𑀤𑁂𑀢𑀻𑀢𑀺 𑀆𑀳 ‘‘𑀓𑀸𑀬𑀺𑀓𑀫𑁆𑀧𑀺 𑀘𑁂𑀢𑀲𑀺𑀓𑀫𑁆𑀧𑀺 𑀲𑀼𑀔𑀁 𑀯𑁂𑀤𑀬𑀢𑀻’’𑀢𑀺. 𑀇𑀫𑀺𑀦𑀸𑀢𑀺 ‘‘𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀦. 𑀲𑀁𑀓𑀺𑀮𑁂𑀲𑀧𑀓𑁆𑀔𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸, 𑀧𑀞𑀫𑀚𑁆𑀛𑀸𑀦𑀧𑀓𑁆𑀔𑀺𑀓𑀢𑁆𑀢𑀸 𑀘 𑀦𑁂𑀓𑁆𑀔𑀫𑁆𑀫𑀲𑀼𑀔𑁂𑀦. 𑀲𑀼𑀔𑀺𑀢𑀲𑁆𑀲𑀸𑀢𑀺 𑀲𑀼𑀔𑀺𑀦𑁄.

𑀧𑀞𑀫𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑁨𑁨𑁬. ‘‘𑀘𑀺𑀢𑁆𑀢𑀁 ¶ 𑀲𑀫𑀸𑀥𑀺𑀬𑀢𑀻’’𑀢𑀺 𑀏𑀢𑁂𑀦 𑀉𑀧𑀘𑀸𑀭𑀯𑀲𑁂𑀦𑀧𑀺 𑀅𑀧𑁆𑀧𑀦𑀸𑀯𑀲𑁂𑀦𑀧𑀺 𑀘𑀺𑀢𑁆𑀢𑀲𑁆𑀲 𑀲𑀫𑀸𑀥𑀸𑀦𑀁 𑀓𑀣𑀺𑀢𑀁. 𑀏𑀯𑀁 𑀲𑀦𑁆𑀢𑁂 ‘‘𑀲𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺𑀆𑀤𑀺𑀓𑀸 𑀤𑁂𑀲𑀦𑀸 𑀓𑀺𑀫𑀢𑁆𑀣𑀺𑀬𑀸𑀢𑀺 𑀆𑀳 ‘‘𑀲𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀯𑀼𑀢𑁆𑀢’’𑀦𑁆𑀢𑀺. 𑀢𑀢𑁆𑀣 𑀉𑀧𑀭𑀺𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀺𑀉𑀧𑀭𑀺𑀯𑀢𑁆𑀢𑀩𑁆𑀩𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁. 𑀦 𑀳𑀺 𑀉𑀧𑀘𑀸𑀭𑀲𑀫𑀸𑀥𑀺𑀲𑀫𑀥𑀺𑀕𑀫𑁂𑀦 𑀯𑀺𑀦𑀸 𑀧𑀞𑀫𑀚𑁆𑀛𑀸𑀦𑀸𑀤𑀺𑀯𑀺𑀲𑁂𑀲𑁄 𑀲𑀫𑀥𑀺𑀕𑀦𑁆𑀢𑀼𑀁 𑀲𑀓𑁆𑀓𑀸. 𑀧𑀸𑀫𑁄𑀚𑁆𑀚𑀼𑀧𑁆𑀧𑀸𑀤𑀸𑀤𑀻𑀳𑀺 𑀓𑀸𑀭𑀡𑀧𑀭𑀫𑁆𑀧𑀭𑀸 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀲𑀫𑀥𑀺𑀕𑀫𑁂𑀧𑀺 𑀇𑀘𑁆𑀙𑀺𑀢𑀩𑁆𑀩𑀸𑀯 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀯𑀺𑀬 𑀤𑀼𑀢𑀺𑀬𑀫𑀕𑁆𑀕𑀸𑀤𑀺𑀲𑀫𑀥𑀺𑀕𑀫𑁂𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀲𑁆𑀲 𑀲𑀫𑀸𑀥𑀺𑀦𑁄𑀢𑀺 ‘‘𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻’’𑀢𑀺 𑀏𑀯𑀁 𑀲𑀸𑀥𑀸𑀭𑀡𑀯𑀲𑁂𑀦 𑀯𑀼𑀢𑁆𑀢𑁄 𑀬𑁄 𑀅𑀧𑁆𑀧𑀦𑀸𑀮𑀓𑁆𑀔𑀡𑁄, 𑀢𑀲𑁆𑀲 𑀲𑀫𑀸𑀥𑀺𑀦𑁄. 𑀧𑀪𑁂𑀤𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀯𑀺𑀪𑀸𑀕𑀲𑁆𑀲 𑀘𑁂𑀯 𑀅𑀪𑀺𑀜𑁆𑀜𑀸𑀤𑀺𑀯𑀺𑀪𑀸𑀕𑀲𑁆𑀲 𑀘 𑀧𑀪𑁂𑀤𑀤𑀲𑁆𑀲𑀦𑀢𑁆𑀣𑀁. 𑀓𑀭𑁄 𑀯𑀼𑀘𑁆𑀘𑀢𑀺 𑀧𑀼𑀧𑁆𑀨𑀲𑀫𑁆𑀪𑀯𑀁 𑀕𑀩𑁆𑀪𑀸𑀲𑀬𑁂 𑀓𑀭𑀻𑀬𑀢𑀻𑀢𑀺 𑀓𑀢𑁆𑀯𑀸, 𑀓𑀭𑀢𑁄 𑀚𑀸𑀢𑁄 𑀓𑀸𑀬𑁄 𑀓𑀭𑀚𑀓𑀸𑀬𑁄, 𑀢𑀤𑀼𑀧𑀲𑀦𑀺𑀲𑁆𑀲𑀬𑁄 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀲𑀫𑀼𑀤𑀸𑀬𑁄. 𑀓𑀸𑀫𑀁 𑀦𑀸𑀫𑀓𑀸𑀬𑁄𑀧𑀺 𑀯𑀺𑀯𑁂𑀓𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀢𑀣𑀸𑀮𑀤𑁆𑀥𑀼𑀧𑀓𑀸𑀭𑁄, ‘‘𑀅𑀪𑀺𑀲𑀦𑁆𑀤𑁂𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 𑀧𑀦 𑀭𑀽𑀧𑀓𑀸𑀬𑁄 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀇𑀫𑀁 𑀓𑀭𑀚𑀓𑀸𑀬’’𑀦𑁆𑀢𑀺. 𑀅𑀪𑀺𑀲𑀦𑁆𑀤𑁂𑀢𑀻𑀢𑀺 𑀅𑀪𑀺𑀲𑀦𑁆𑀤𑀦𑀁 𑀓𑀭𑁄𑀢𑀺. 𑀢𑀁 𑀧𑀦 𑀛𑀸𑀦𑀫𑀬𑁂𑀦 𑀧𑀻𑀢𑀺𑀲𑀼𑀔𑁂𑀦 𑀓𑀭𑀚𑀓𑀸𑀬𑀲𑁆𑀲 𑀢𑀺𑀦𑁆𑀢𑀪𑀸𑀯𑀸𑀧𑀸𑀤𑀦𑀁, 𑀲𑀩𑁆𑀩𑀢𑁆𑀣𑀓𑀫𑁂𑀯 𑀮𑀽𑀔𑀪𑀸𑀯𑀸𑀧𑀦𑀬𑀦𑀦𑁆𑀢𑀺 𑀆𑀳 ‘‘𑀢𑁂𑀫𑁂𑀢𑀻’’𑀢𑀺𑀆𑀤𑀺, 𑀢𑀬𑀺𑀤𑀁 𑀅𑀪𑀺𑀲𑀦𑁆𑀤𑀦𑀁 𑀅𑀢𑁆𑀣𑀢𑁄 𑀬𑀣𑀸𑀯𑀼𑀢𑁆𑀢𑀧𑀻𑀢𑀺𑀲𑀼𑀔𑀲𑀫𑀼𑀝𑁆𑀞𑀸𑀦𑁂𑀳𑀺 𑀧𑀡𑀻𑀢𑀭𑀽𑀧𑁂𑀳𑀺 𑀓𑀸𑀬𑀲𑁆𑀲 𑀧𑀭𑀺𑀧𑁆𑀨𑀭𑀡𑀁 𑀤𑀝𑁆𑀞𑀩𑁆𑀩𑀁. ‘‘𑀧𑀭𑀺𑀲𑀦𑁆𑀤𑁂𑀢𑀻’’𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀩𑁆𑀩𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀩𑁆𑀩𑀯𑀸, 𑀢𑀲𑁆𑀲 𑀲𑀩𑁆𑀩𑀸𑀯𑀢𑁄. 𑀅𑀯𑀬𑀯𑀸𑀯𑀬𑀯𑀺𑀲𑀫𑁆𑀩𑀦𑁆𑀥𑁂 𑀅𑀯𑀬𑀯𑀺𑀦𑀺 𑀲𑀸𑀫𑀺𑀯𑀘𑀦𑀦𑁆𑀢𑀺 ¶ 𑀅𑀯𑀬𑀯𑀻𑀯𑀺𑀲𑀬𑁄 𑀲𑀩𑁆𑀩-𑀲𑀤𑁆𑀤𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀓𑁄𑀝𑁆𑀞𑀸𑀲𑀯𑀢𑁄’’𑀢𑀺. 𑀅𑀨𑀼𑀝𑀁 ¶ 𑀦𑀸𑀫 𑀦 𑀳𑁄𑀢𑀺 𑀬𑀢𑁆𑀣 𑀬𑀢𑁆𑀣 𑀓𑀫𑁆𑀫𑀚𑀭𑀽𑀧𑀁, 𑀢𑀢𑁆𑀣 𑀢𑀢𑁆𑀣 𑀘𑀺𑀢𑁆𑀢𑀚𑀭𑀽𑀧𑀲𑁆𑀲 𑀅𑀪𑀺𑀩𑁆𑀬𑀸𑀧𑀦𑀢𑁄. 𑀢𑁂𑀦𑀸𑀳 ‘‘𑀉𑀧𑀸𑀤𑀺𑀦𑁆𑀦𑀓𑀲𑀦𑁆𑀢𑀢𑀻’’𑀢𑀺𑀆𑀤𑀺.

𑁨𑁨𑁭. 𑀙𑁂𑀓𑁄𑀢𑀺 ¶ 𑀓𑀼𑀲𑀮𑁄. 𑀢𑀁 𑀧𑀦𑀲𑁆𑀲 𑀓𑁄𑀲𑀮𑁆𑀮𑀁 𑀦𑁆𑀳𑀸𑀦𑀺𑀬𑀘𑀼𑀡𑁆𑀡𑀸𑀦𑀁 𑀲𑀦𑁆𑀦𑀦𑁂 𑀧𑀺𑀡𑁆𑀟𑀻𑀓𑀭𑀡𑁂 𑀘 𑀲𑀫𑀢𑁆𑀣𑀢𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀧𑀝𑀺𑀩𑀮𑁄’’𑀢𑀺𑀆𑀤𑀺. 𑀓𑀁𑀲-𑀲𑀤𑁆𑀤𑁄 ‘‘𑀫𑀳𑀢𑀺𑀬𑀸 𑀓𑀁𑀲𑀧𑀸𑀢𑀺𑀬𑀸’’𑀢𑀺𑀆𑀤𑀻𑀲𑀼 𑀲𑀼𑀯𑀡𑁆𑀡𑁂 𑀆𑀕𑀢𑁄.

‘‘𑀓𑀁𑀲𑁄 𑀉𑀧𑀳𑀢𑁄 𑀬𑀣𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁧𑁩𑁪) 𑀓𑀺𑀢𑁆𑀢𑀺𑀫𑀮𑁄𑀳𑁂, 𑀓𑀢𑁆𑀣𑀘𑀺 𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑁂 ‘‘𑀉𑀧𑀓𑀁𑀲𑁄 𑀦𑀸𑀫 𑀭𑀸𑀚𑀸𑀧𑀺 𑀫𑀳𑀸𑀓𑀁𑀲𑀲𑁆𑀲 𑀅𑀢𑁆𑀭𑀚𑁄’’𑀢𑀺𑀆𑀤𑀺, [𑀚𑀸. 𑀅𑀝𑁆𑀞. 𑁪.𑁧𑁦 𑀖𑀝𑀧𑀡𑁆𑀟𑀺𑀢𑀚𑀸𑀢𑀓𑀯𑀡𑁆𑀡𑀦𑀸𑀬𑀁 (𑀅𑀢𑁆𑀣𑀢𑁄 𑀲𑀫𑀸𑀦𑀁)] 𑀇𑀥 𑀧𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀮𑁄𑀳𑁂𑀢𑀺 𑀆𑀳 ‘‘𑀬𑁂𑀦 𑀓𑁂𑀦𑀘𑀺 𑀮𑁄𑀳𑁂𑀦 𑀓𑀢𑀪𑀸𑀚𑀦𑁂’’𑀢𑀺. 𑀲𑁆𑀦𑁂𑀳𑀸𑀦𑀼𑀕𑀢𑀸𑀢𑀺 𑀉𑀤𑀓𑀲𑀺𑀦𑁂𑀳𑁂𑀦 𑀅𑀦𑀼𑀧𑀯𑀺𑀲𑀦𑀯𑀲𑁂𑀦 𑀕𑀢𑀸 𑀉𑀧𑀕𑀢𑀸. 𑀲𑁆𑀦𑁂𑀳𑀧𑀭𑁂𑀢𑀸𑀢𑀺 𑀉𑀤𑀓𑀲𑀺𑀦𑁂𑀳𑁂𑀦 𑀧𑀭𑀺𑀢𑁄 𑀕𑀢𑀸 𑀲𑀫𑀦𑁆𑀢𑀢𑁄 𑀨𑀼𑀝𑁆𑀞𑀸, 𑀢𑀢𑁄 𑀏𑀯 𑀲𑀦𑁆𑀢𑀭𑀩𑀸𑀳𑀺𑀭𑀸 𑀨𑀼𑀝𑁆𑀞𑀸 𑀲𑀺𑀦𑁂𑀳𑁂𑀦, 𑀏𑀢𑁂𑀦 𑀲𑀩𑁆𑀩𑀲𑁄 𑀉𑀤𑀓𑁂𑀦 𑀢𑁂𑀫𑀺𑀢𑀪𑀸𑀯𑀫𑀸𑀳. ‘‘𑀦 𑀘 𑀧𑀕𑁆𑀖𑀭𑀡𑀻’’𑀢𑀺 𑀏𑀢𑁂𑀦 𑀢𑀺𑀦𑁆𑀢𑀲𑁆𑀲𑀧𑀺 𑀢𑀲𑁆𑀲 𑀖𑀦𑀣𑀤𑁆𑀥𑀪𑀸𑀯𑀁 𑀯𑀤𑀢𑀺. 𑀢𑁂𑀦𑀸𑀳 ‘‘𑀦 𑀘 𑀩𑀺𑀦𑁆𑀤𑀼𑀁 𑀩𑀺𑀦𑁆𑀤𑀼’’𑀦𑁆𑀢𑀺𑀆𑀤𑀺.

𑀤𑀼𑀢𑀺𑀬𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑁨𑁨𑁯. 𑀢𑀸𑀳𑀺 𑀢𑀸𑀳𑀺 𑀉𑀤𑀓𑀲𑀺𑀭𑀸𑀳𑀺 𑀉𑀩𑁆𑀪𑀺𑀚𑁆𑀚𑀢𑀻𑀢𑀺 𑀉𑀩𑁆𑀪𑀺𑀤𑀁, 𑀉𑀩𑁆𑀪𑀺𑀤𑀁 𑀉𑀤𑀓𑀁 𑀏𑀢𑀲𑁆𑀲𑀸𑀢𑀺 𑀉𑀩𑁆𑀪𑀺𑀤𑁄𑀤𑀓𑁄. 𑀉𑀩𑁆𑀪𑀺𑀦𑁆𑀦𑀉𑀤𑀓𑁄𑀢𑀺 𑀦𑀤𑀻𑀢𑀻𑀭𑁂 𑀔𑀢𑀓𑀽𑀧𑀓𑁄 𑀯𑀺𑀬 𑀉𑀩𑁆𑀪𑀺𑀚𑁆𑀚𑀦𑀓𑀉𑀤𑀓𑁄. 𑀉𑀕𑁆𑀕𑀘𑁆𑀙𑀦𑀓𑀉𑀤𑀓𑁄𑀢𑀺 𑀥𑀸𑀭𑀸𑀯𑀲𑁂𑀦 𑀉𑀝𑁆𑀞𑀳𑀦𑀉𑀤𑀓𑁄. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀉𑀩𑁆𑀪𑀺𑀤𑁄𑀤𑀓𑁄𑀯 𑀭𑀳𑀤𑁄 𑀕𑀳𑀺𑀢𑁄, 𑀦 𑀇𑀢𑀭𑁄𑀢𑀺 𑀆𑀳 ‘‘𑀳𑁂𑀝𑁆𑀞𑀸 𑀉𑀕𑁆𑀕𑀘𑁆𑀙𑀦𑀉𑀤𑀓𑀜𑁆𑀳𑀻’’𑀢𑀺𑀆𑀤𑀺. 𑀥𑀸𑀭𑀸𑀦𑀺𑀧𑀸𑀢𑀧𑀼𑀩𑁆𑀩𑀼𑀴𑀓𑁂𑀳𑀻𑀢𑀺 ¶ 𑀥𑀸𑀭𑀸𑀦𑀺𑀧𑀸𑀢𑁂𑀳𑀺 𑀉𑀤𑀓𑀧𑀼𑀩𑁆𑀩𑀼𑀴𑀓𑁂𑀳𑀺 𑀘, ‘‘𑀨𑁂𑀡𑀧𑀝𑀮𑁂𑀳𑀺 𑀘𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀦𑁆𑀦𑀺𑀲𑀺𑀦𑁆𑀦𑀫𑁂𑀯𑀸𑀢𑀺 𑀅𑀧𑀭𑀺𑀓𑁆𑀔𑁄𑀪𑀢𑀸𑀬 𑀦𑀺𑀘𑁆𑀘𑀮𑀫𑁂𑀯, 𑀲𑀼𑀧𑁆𑀧𑀲𑀦𑁆𑀦𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀲𑀦𑁆𑀢𑀺 ‘‘𑀅𑀪𑀺𑀲𑀦𑁆𑀤𑁂𑀢𑀻’’𑀢𑀺𑀆𑀤𑀺𑀓𑀁.

𑀢𑀢𑀺𑀬𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑁨𑁩𑁧. 𑀉𑀧𑁆𑀧𑀮𑀸𑀦𑀻𑀢𑀺 𑀉𑀧𑁆𑀧𑀮𑀕𑀘𑁆𑀙𑀸𑀦𑀺. 𑀲𑁂𑀢𑀭𑀢𑁆𑀢𑀦𑀻𑀮𑁂𑀲𑀽𑀢𑀺 𑀉𑀧𑁆𑀧𑀮𑁂𑀲𑀼, 𑀲𑁂𑀢𑀼𑀧𑁆𑀧𑀮𑀭𑀢𑁆𑀢𑀼𑀧𑁆𑀧𑀮𑀦𑀻𑀮𑀼𑀧𑁆𑀧𑀮𑁂𑀲𑀽𑀢𑀺 𑀅𑀢𑁆𑀣𑁄. 𑀬𑀁 𑀓𑀺𑀜𑁆𑀘𑀺 𑀉𑀧𑁆𑀧𑀮𑀁 𑀉𑀧𑁆𑀧𑀮𑀫𑁂𑀯 𑀲𑀸𑀫𑀜𑁆𑀜𑀕𑀳𑀡𑀢𑁄 ¶ . 𑀲𑀢𑀧𑀢𑁆𑀢𑀦𑁆𑀢𑀺 𑀏𑀢𑁆𑀣 𑀲𑀢-𑀲𑀤𑁆𑀤𑁄 𑀩𑀳𑀼𑀧𑀭𑀺𑀬𑀸𑀬𑁄 ‘‘𑀲𑀢𑀕𑁆𑀖𑀻’’𑀢𑀺𑀆𑀤𑀻𑀲𑀼 𑀯𑀺𑀬, 𑀢𑁂𑀦 𑀅𑀦𑁂𑀓𑀲𑀢𑀧𑀢𑁆𑀢𑀲𑁆𑀲𑀧𑀺 𑀲𑀗𑁆𑀕𑀳𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀮𑁄𑀓𑁂 𑀧𑀦 ‘‘𑀭𑀢𑁆𑀢𑀁 𑀧𑀤𑀼𑀫𑀁, 𑀲𑁂𑀢𑀁 𑀧𑀼𑀡𑁆𑀟𑀭𑀻𑀓’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀬𑀸𑀯 𑀅𑀕𑁆𑀕𑀸, 𑀬𑀸𑀯 𑀘 𑀫𑀽𑀮𑀸 𑀉𑀤𑀓𑁂𑀦 𑀅𑀪𑀺𑀲𑀦𑁆𑀤𑀦𑀸𑀤𑀺𑀲𑀫𑁆𑀪𑀯𑀤𑀲𑁆𑀲𑀦𑀢𑁆𑀣𑀁 𑀉𑀤𑀓𑀸𑀦𑀼𑀕𑁆𑀕𑀢𑀕𑁆𑀕𑀳𑀡𑀁. 𑀇𑀥 𑀉𑀧𑁆𑀧𑀮𑀸𑀤𑀻𑀦𑀺 𑀯𑀺𑀬 𑀓𑀭𑀚𑀓𑀸𑀬𑁄, 𑀉𑀤𑀓𑀁 𑀯𑀺𑀬 𑀢𑀢𑀺𑀬𑀚𑁆𑀛𑀸𑀦𑀲𑀼𑀔𑀁.

𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑁨𑁩𑁩. 𑀬𑀲𑁆𑀫𑀸 ¶ ‘‘𑀧𑀭𑀺𑀲𑀼𑀤𑁆𑀥𑁂𑀦 𑀘𑁂𑀢𑀲𑀸’’𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀫𑀸𑀳, 𑀢𑀜𑁆𑀘 𑀭𑀸𑀕𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀸𑀧𑀕𑀫𑀦𑀢𑁄 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁 𑀦𑀺𑀫𑁆𑀫𑀮𑀁, 𑀢𑀲𑁆𑀫𑀸 𑀆𑀳 ‘‘𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀝𑁆𑀞𑁂𑀦 𑀧𑀭𑀺𑀲𑀼𑀤𑁆𑀥’’𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀏𑀯 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀧𑀯𑀢𑁆𑀢𑀺𑀯𑀺𑀲𑁂𑀲𑁄 𑀧𑀭𑀺𑀬𑁄𑀤𑀸𑀢𑀢𑀸 𑀲𑀼𑀯𑀡𑁆𑀡𑀲𑁆𑀲 𑀦𑀺𑀖𑀁𑀲𑀦𑁂𑀦 𑀧𑀪𑀲𑁆𑀲𑀭𑀢𑀸 𑀯𑀺𑀬, 𑀢𑀲𑁆𑀫𑀸 𑀆𑀳 ‘‘𑀧𑀪𑀲𑁆𑀲𑀭𑀝𑁆𑀞𑁂𑀦 𑀧𑀭𑀺𑀬𑁄𑀤𑀸𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺. 𑀇𑀤𑀦𑁆𑀢𑀺 𑀑𑀤𑀸𑀢𑀯𑀘𑀦𑀁. 𑀉𑀢𑀼𑀨𑀭𑀡𑀢𑁆𑀣𑀦𑁆𑀢𑀺 𑀉𑀡𑁆𑀳𑀉𑀢𑀼𑀦𑁄 𑀨𑀭𑀡𑀤𑀲𑁆𑀲𑀦𑀢𑁆𑀣𑀁. 𑀉𑀢𑀼𑀨𑀭𑀡𑀁 𑀦 𑀳𑁄𑀢𑀺 𑀲𑀯𑀺𑀲𑁂𑀲𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑁂𑀦𑀸𑀳 ‘‘𑀢𑀗𑁆𑀔𑀡…𑀧𑁂… 𑀩𑀮𑀯𑀁 𑀳𑁄𑀢𑀻’’𑀢𑀺. 𑀯𑀢𑁆𑀣𑀁 𑀯𑀺𑀬 𑀓𑀭𑀚𑀓𑀸𑀬𑁄𑀢𑀺 𑀬𑁄𑀕𑀺𑀦𑁄 𑀓𑀭𑀚𑀓𑀸𑀬𑁄 𑀯𑀢𑁆𑀣𑀁 𑀯𑀺𑀬 𑀤𑀝𑁆𑀞𑀩𑁆𑀩𑁄 𑀉𑀢𑀼𑀨𑀭𑀡𑀲𑀤𑀺𑀲𑁂𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀼𑀔𑁂𑀦 𑀨𑀭𑀺𑀢𑀩𑁆𑀩𑀢𑁆𑀢𑀸. 𑀧𑀼𑀭𑀺𑀲𑀲𑁆𑀲 𑀲𑀭𑀻𑀭𑀁 𑀯𑀺𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀤𑀝𑁆𑀞𑀩𑁆𑀩𑀁 𑀉𑀢𑀼𑀨𑀭𑀡𑀝𑁆𑀞𑀸𑀦𑀺𑀬𑀲𑁆𑀲 𑀲𑀼𑀔𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑀢𑁄, 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀏𑀢𑁆𑀣 𑀘 ‘‘𑀧𑀭𑀺𑀲𑀼𑀤𑁆𑀥𑁂𑀦 𑀘𑁂𑀢𑀲𑀸’’𑀢𑀺 𑀘𑁂𑀢𑁄 𑀕𑀳𑀡𑁂𑀦 𑀛𑀸𑀦𑀲𑀼𑀔𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀢𑁂𑀦𑀸𑀳 ‘‘𑀉𑀢𑀼𑀨𑀭𑀡𑀁 𑀯𑀺𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀼𑀔’’𑀦𑁆𑀢𑀺. 𑀦𑀦𑀼 𑀘 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀲𑀼𑀔𑀫𑁂𑀯 𑀦𑀢𑁆𑀣𑀻𑀢𑀺? 𑀲𑀘𑁆𑀘𑀁 𑀦𑀢𑁆𑀣𑀺 𑀲𑀸𑀢𑀮𑀓𑁆𑀔𑀡𑀲𑀦𑁆𑀢𑀲𑀪𑀸𑀯𑀢𑁆𑀢𑀸 𑀧𑀦𑁂𑀢𑁆𑀣 ¶ 𑀉𑀧𑁂𑀓𑁆𑀔𑀸 ‘‘𑀲𑀼𑀔’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 ‘‘𑀉𑀧𑁂𑀓𑁆𑀔𑀸 𑀧𑀦 𑀲𑀦𑁆𑀢𑀢𑁆𑀢𑀸, 𑀲𑀼𑀔𑀫𑀺𑀘𑁆𑀘𑁂𑀯 𑀪𑀸𑀲𑀺𑀢𑀸’’𑀢𑀺. (𑀯𑀺𑀪. 𑀅𑀝𑁆𑀞. 𑁨𑁩𑁨; 𑀯𑀺𑀲𑀼𑀤𑁆𑀥𑀺. 𑁨.𑁬𑁪𑁪; 𑀧𑀝𑀺. 𑀫. 𑁧𑁦𑁫, 𑀫𑀳𑀸𑀦𑀺. 𑀅𑀝𑁆𑀞. 𑁨𑁭)

𑀦 𑀅𑀭𑀽𑀧𑀚𑁆𑀛𑀸𑀦𑀮𑀸𑀪𑀻𑀢𑀺 𑀦 𑀯𑁂𑀤𑀺𑀢𑀩𑁆𑀩𑁄 𑀅𑀯𑀺𑀦𑀸𑀪𑀸𑀯𑀢𑁄, 𑀢𑁂𑀦𑀸𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀘𑀼𑀤𑁆𑀤𑀲𑀳𑀸𑀓𑀸𑀭𑁂𑀳𑀻𑀢𑀺 𑀓𑀲𑀺𑀡𑀸𑀦𑀼𑀮𑁄𑀫𑀢𑁄, 𑀓𑀲𑀺𑀡𑀧𑀝𑀺𑀮𑁄𑀫𑀢𑁄, 𑀓𑀲𑀺𑀡𑀸𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄, 𑀛𑀸𑀦𑀸𑀦𑀼𑀮𑁄𑀫𑀢𑁄, 𑀛𑀸𑀦𑀧𑀝𑀺𑀮𑁄𑀫𑀢𑁄, 𑀛𑀸𑀦𑀸𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄, 𑀛𑀸𑀦𑀼𑀓𑁆𑀓𑀦𑁆𑀢𑀺𑀓𑀢𑁄, 𑀓𑀲𑀺𑀡𑀼𑀓𑁆𑀓𑀦𑁆𑀢𑀺𑀓𑀢𑁄, 𑀛𑀸𑀦𑀓𑀲𑀺𑀡𑀼𑀓𑁆𑀓𑀦𑁆𑀢𑀺𑀓𑀢𑁄, 𑀅𑀗𑁆𑀕𑀲𑀗𑁆𑀓𑀦𑁆𑀢𑀺𑀢𑁄, 𑀆𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺𑀢𑁄, 𑀅𑀗𑁆𑀕𑀸𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺𑀢𑁄, 𑀅𑀗𑁆𑀕𑀯𑀯𑀢𑁆𑀣𑀸𑀦𑀢𑁄 ¶ , 𑀆𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀢𑁄𑀢𑀺 𑀇𑀫𑁂𑀳𑀺 𑀘𑀼𑀤𑁆𑀤𑀲𑀳𑀸𑀓𑀸𑀭𑁂𑀳𑀺. 𑀲𑀢𑀺𑀧𑀺 𑀛𑀸𑀦𑁂𑀲𑀼 𑀆𑀯𑀚𑁆𑀚𑀦𑀸𑀤𑀺𑀯𑀲𑀻𑀪𑀸𑀯𑁂 𑀅𑀬𑀁 𑀯𑀲𑀻𑀪𑀸𑀯𑁄 𑀅𑀪𑀺𑀜𑁆𑀜𑀸𑀦𑀺𑀩𑁆𑀩𑀢𑁆𑀢𑀦𑁂 𑀏𑀓𑀦𑁆𑀢𑁂𑀦 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀳𑀺…𑀧𑁂… 𑀳𑁄𑀢𑀻’’𑀢𑀺. 𑀲𑁆𑀯𑀸𑀬𑀁 𑀦𑀬𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀳𑀺 𑀯𑀺𑀦𑀸 𑀦 𑀇𑀚𑁆𑀛𑀢𑀻𑀢𑀺 𑀢𑀸𑀬𑀧𑁂𑀢𑁆𑀣 𑀅𑀯𑀺𑀦𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀧𑀸𑀴𑀺𑀬𑀁 𑀦 𑀆𑀭𑀼𑀧𑁆𑀧𑀚𑁆𑀛𑀸𑀦𑀸𑀦𑀺 𑀆𑀕𑀢𑀸𑀦𑀻𑀢𑀺? 𑀯𑀺𑀲𑁂𑀲𑀢𑁄 𑀘 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀸𑀤𑀓𑀢𑁆𑀢𑀸 𑀲𑀩𑁆𑀩𑀸𑀪𑀺𑀜𑁆𑀜𑀸𑀦𑀁 𑀢𑀤𑀦𑁆𑀢𑁄𑀕𑀥𑀸 𑀓𑀢𑁆𑀯𑀸 𑀢𑀸𑀬 𑀤𑁂𑀲𑀺𑀢𑀸, 𑀦 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁 𑀇𑀥 𑀅𑀦𑀼𑀧𑀬𑁄𑀕𑀢𑁄, 𑀢𑁂𑀦𑀸𑀳 ‘‘𑀅𑀭𑀽𑀧𑀚𑁆𑀛𑀸𑀦𑀸𑀦𑀺 𑀆𑀳𑀭𑀺𑀢𑁆𑀯𑀸 𑀓𑀣𑁂𑀢𑀩𑁆𑀩𑀸𑀦𑀻’’𑀢𑀺.

𑀯𑀺𑀧𑀲𑁆𑀲𑀦𑀸𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁨𑁩𑁪. 𑀲𑁂𑀲𑀦𑁆𑀢𑀺 ¶ ‘‘𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂’’𑀢𑀺𑀆𑀤𑀻𑀲𑀼 𑀯𑀢𑁆𑀢𑀩𑁆𑀩𑀁. 𑀜𑁂𑀬𑁆𑀬𑀁 𑀚𑀸𑀦𑀸𑀢𑀻𑀢𑀺 𑀜𑀸𑀡𑀁, 𑀢𑀁 𑀧𑀦 𑀜𑁂𑀬𑁆𑀬𑀁 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀧𑀲𑁆𑀲𑀢𑀻𑀢𑀺 𑀤𑀲𑁆𑀲𑀦𑀁, 𑀜𑀸𑀡𑀫𑁂𑀯 𑀤𑀲𑁆𑀲𑀦𑀦𑁆𑀢𑀺 𑀜𑀸𑀡𑀤𑀲𑁆𑀲𑀦𑀁. 𑀢𑀬𑀺𑀤𑀁 𑀜𑀸𑀡𑀤𑀲𑁆𑀲𑀦𑀧𑀤𑀁 𑀲𑀸𑀲𑀦𑁂 𑀅𑀜𑁆𑀜𑀢𑁆𑀣 𑀜𑀸𑀡𑀯𑀺𑀲𑁂𑀲𑁂 𑀦𑀺𑀭𑀽𑀴𑁆𑀳𑀁, 𑀢𑀁 𑀲𑀩𑁆𑀩𑀁 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀫𑀕𑁆𑀕𑀜𑀸𑀡𑀫𑁆𑀧𑀺 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺𑀫𑀸𑀳. 𑀬𑀲𑁆𑀫𑀸 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀸𑀤𑀺𑀢𑁄 𑀚𑀸𑀦𑀸𑀢𑀺, 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀢𑁄 𑀧𑀝𑁆𑀞𑀸𑀬 𑀧𑀘𑁆𑀘𑀓𑁆𑀔𑀢𑁄 𑀘 𑀢𑁂 𑀧𑀲𑁆𑀲𑀢𑀺 𑀢𑀲𑁆𑀫𑀸 𑀆𑀳 ‘‘𑀇𑀥 𑀧𑀦…𑀧𑁂… 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺.

𑀅𑀪𑀺𑀦𑀻𑀳𑀭𑀢𑀻𑀢𑀺 ¶ 𑀯𑀼𑀢𑁆𑀢𑀦𑀬𑁂𑀦 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀢𑀲𑁆𑀫𑀺𑀁 𑀘𑀺𑀢𑁆𑀢𑁂 𑀯𑀺𑀧𑀲𑁆𑀲𑀦𑀸𑀓𑁆𑀓𑀫𑁂𑀦 𑀚𑀸𑀢𑁂 𑀯𑀺𑀧𑀲𑁆𑀲𑀦𑀸𑀪𑀺𑀫𑀼𑀔𑀁 𑀧𑁂𑀲𑁂𑀢𑀺, 𑀢𑁂𑀦𑀸𑀳 ‘‘𑀯𑀺𑀧𑀲𑁆𑀲𑀦𑀸…𑀧𑁂… 𑀓𑀭𑁄𑀢𑀻’’𑀢𑀺. 𑀢𑀤𑀪𑀺𑀫𑀼𑀔𑀪𑀸𑀯𑁄 𑀏𑀯 𑀳𑀺𑀲𑁆𑀲 𑀢𑀦𑁆𑀦𑀺𑀦𑁆𑀦𑀢𑀸𑀤𑀺𑀓𑀭𑀢𑀸. 𑀯𑀼𑀢𑁆𑀢𑁄𑀬𑁂𑀯 𑀩𑁆𑀭𑀳𑁆𑀫𑀚𑀸𑀮𑁂. 𑀑𑀤𑀦𑀓𑀼𑀫𑁆𑀫𑀸𑀲𑁂𑀳𑀺 𑀉𑀧𑀘𑀻𑀬𑀢𑀻𑀢𑀺 𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑁄. 𑀅𑀦𑀺𑀘𑁆𑀘𑀥𑀫𑁆𑀫𑁄𑀢𑀺 𑀧𑀪𑀗𑁆𑀕𑀼𑀢𑀸𑀬 𑀅𑀤𑁆𑀥𑀼𑀯𑀲𑀪𑀸𑀯𑁄. 𑀤𑀼𑀕𑁆𑀕𑀦𑁆𑀥𑀯𑀺𑀖𑀸𑀢𑀢𑁆𑀣𑀸𑀬𑀸𑀢𑀺 𑀲𑀭𑀻𑀭𑁂 𑀤𑀼𑀕𑁆𑀕𑀦𑁆𑀥𑀲𑁆𑀲 𑀯𑀺𑀕𑀫𑀸𑀬. 𑀉𑀘𑁆𑀙𑀸𑀤𑀦𑀥𑀫𑁆𑀫𑁄𑀢𑀺 𑀉𑀘𑁆𑀙𑀸𑀤𑁂𑀢𑀩𑁆𑀩𑀢𑀸𑀲𑀪𑀸𑀯𑁄. 𑀉𑀘𑁆𑀙𑀸𑀤𑀦𑁂𑀦 𑀳𑀺 𑀲𑀭𑀻𑀭𑁂 𑀲𑁂𑀤𑀕𑀽𑀣𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀺𑀥𑀸𑀢𑀼𑀓𑁆𑀔𑁄𑀪𑀕𑀭𑀼𑀪𑀸𑀯𑀤𑀼𑀕𑁆𑀕𑀦𑁆𑀥𑀸𑀦𑀁 𑀅𑀧𑀕𑀫𑁄 𑀳𑁄𑀢𑀺. 𑀫𑀳𑀸𑀲𑀫𑁆𑀩𑀸𑀳𑀦𑀁 𑀫𑀮𑁆𑀮𑀸𑀤𑀻𑀦𑀁 𑀩𑀸𑀳𑀼𑀯𑀟𑁆𑀠𑀦𑀸𑀤𑀺𑀅𑀢𑁆𑀣𑀁 𑀳𑁄𑀢𑀻𑀢𑀺 ‘‘𑀔𑀼𑀤𑁆𑀤𑀓𑀲𑀫𑁆𑀩𑀸𑀳𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀫𑀤𑁆𑀤𑀦𑀥𑀫𑁆𑀫𑁄𑀢𑀺 𑀧𑀭𑀺𑀫𑀤𑁆𑀤𑀺𑀢𑀩𑁆𑀩𑀢𑀸𑀲𑀪𑀸𑀯𑁄. 𑀪𑀺𑀚𑁆𑀚𑀢𑀺 𑀘𑁂𑀯 𑀯𑀺𑀓𑀺𑀭𑀢𑀺 𑀘𑀸𑀢𑀺 𑀅𑀦𑀺𑀘𑁆𑀘𑀢𑀸𑀯𑀲𑁂𑀦 𑀪𑀺𑀚𑁆𑀚𑀢𑀺 𑀘 𑀪𑀺𑀦𑁆𑀦𑀜𑁆𑀘 𑀓𑀺𑀜𑁆𑀘𑀺 𑀧𑀬𑁄𑀚𑀦𑀁 𑀅𑀲𑀸𑀥𑁂𑀦𑁆𑀢𑀁 𑀯𑀺𑀧𑁆𑀧𑀓𑀺𑀡𑁆𑀡𑀜𑁆𑀘 𑀳𑁄𑀢𑀺. 𑀭𑀽𑀧𑀻𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑀪𑀽𑀢𑁂𑀦 𑀉𑀢𑀼𑀆𑀳𑀸𑀭𑀮𑀓𑁆𑀔𑀡𑁂𑀦 𑀭𑀽𑀧𑀯𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀇𑀘𑁆𑀙𑀺𑀢𑁄𑀢𑀺 𑀆𑀳 ‘‘𑀙𑀳𑀺 𑀧𑀤𑁂𑀳𑀺 𑀲𑀫𑀼𑀤𑀬𑁄 𑀓𑀣𑀺𑀢𑁄’’𑀢𑀺. 𑀲𑀁𑀲𑀕𑁆𑀕𑁂 𑀳𑀺 𑀅𑀬𑀫𑀻𑀓𑀸𑀭𑁄. 𑀲𑀡𑁆𑀞𑀸𑀦𑀲𑀫𑁆𑀧𑀸𑀤𑀦𑀫𑁆𑀧𑀺 𑀢𑀣𑀸𑀭𑀽𑀧𑀭𑀽𑀧𑀼𑀧𑁆𑀧𑀸𑀤𑀦𑁂𑀦𑁂𑀯 𑀳𑁄𑀢𑀻𑀢𑀺 𑀉𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀧𑀤𑁂𑀳𑀺𑀧𑀺 ¶ 𑀲𑀫𑀼𑀤𑀬𑁄 𑀓𑀣𑀺𑀢𑁄𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀦𑀯𑀳𑀺 𑀬𑀣𑀸𑀭𑀳𑀁 𑀓𑀸𑀬𑁂 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀺𑀢𑀸 𑀤𑀲𑁆𑀲𑀺𑀢𑀸. 𑀦𑀺𑀲𑁆𑀲𑀺𑀢𑀜𑁆𑀘 𑀙𑀝𑁆𑀞𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀢𑁆𑀢𑀸 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲. 𑀧𑀝𑀺𑀩𑀤𑁆𑀥𑀜𑁆𑀘 𑀢𑁂𑀦 𑀯𑀺𑀦𑀸 𑀅𑀧𑁆𑀧𑀯𑀢𑁆𑀢𑀦𑀢𑁄, 𑀓𑀸𑀬𑀲𑀜𑁆𑀜𑀺𑀢𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀢𑁄 𑀘.

𑁨𑁩𑁫. 𑀲𑀼𑀝𑁆𑀞𑀼 𑀪𑀸𑀢𑀺 𑀑𑀪𑀸𑀲𑀢𑀻𑀢𑀺 𑀲𑀼𑀪𑁄, 𑀧𑀪𑀸𑀲𑀫𑁆𑀧𑀢𑁆𑀢𑀺𑀬𑀸𑀧𑀺 𑀫𑀡𑀺𑀦𑁄 𑀪𑀤𑁆𑀤𑀢𑀸𑀢𑀺 𑀆𑀳 ‘‘𑀲𑀼𑀪𑁄𑀢𑀺 𑀲𑀼𑀦𑁆𑀤𑀭𑁄’’𑀢𑀺. 𑀓𑀼𑀭𑀼𑀯𑀺𑀦𑁆𑀤𑀚𑀸𑀢𑀺 𑀆𑀤𑀺𑀚𑀸𑀢𑀺𑀯𑀺𑀲𑁂𑀲𑁄𑀧𑀺 𑀫𑀡𑀺𑀦𑁄 𑀆𑀓𑀭𑀧𑀭𑀺𑀲𑀼𑀤𑁆𑀥𑀺𑀫𑀽𑀮𑀓𑁄 𑀏𑀯𑀸𑀢𑀺 𑀆𑀳 ‘‘𑀧𑀭𑀺𑀲𑀼𑀤𑁆𑀥𑀸𑀓𑀭𑀲𑀫𑀼𑀝𑁆𑀞𑀺𑀢𑁄’’𑀢𑀺 𑀤𑁄𑀲𑀦𑀻𑀳𑀭𑀡𑀯𑀲𑁂𑀦 𑀧𑀭𑀺𑀓𑀫𑁆𑀫𑀦𑀺𑀧𑁆𑀨𑀢𑁆𑀢𑀻𑀢𑀺 𑀆𑀳 ‘‘𑀲𑀼𑀝𑁆𑀞𑀼 𑀓𑀢𑀧𑀭𑀺𑀓𑀫𑁆𑀫𑁄 𑀅𑀧𑀦𑀻𑀢𑀧𑀸𑀲𑀸𑀡𑀲𑀓𑁆𑀔𑀭𑁄’’𑀢𑀺. 𑀙𑀯𑀺𑀬𑀸 𑀲𑀡𑁆𑀳𑀪𑀸𑀯𑁂𑀦𑀲𑁆𑀲 𑀅𑀘𑁆𑀙𑀢𑀸, 𑀦 𑀲𑀗𑁆𑀖𑀸𑀢𑀲𑁆𑀲𑀸𑀢𑀺 𑀆𑀳 ‘‘𑀅𑀘𑁆𑀙𑁄𑀢𑀺 𑀢𑀦𑀼𑀘𑁆𑀙𑀯𑀻’’𑀢𑀺, 𑀢𑁂𑀦𑀸𑀳 ¶ ‘‘𑀯𑀺𑀧𑁆𑀧𑀲𑀦𑁆𑀦𑁄’’𑀢𑀺. 𑀥𑁄𑀯𑀦𑀯𑁂𑀥𑀦𑀸𑀤𑀻𑀳𑀻𑀢𑀺 𑀘𑀢𑀽𑀲𑀼 𑀧𑀸𑀲𑀸𑀡𑁂𑀲𑀼 𑀥𑁄𑀯𑀦𑁂𑀦 𑀘𑁂𑀯 𑀓𑀸𑀴𑀓𑀸𑀤𑀺𑀅𑀧𑀳𑀭𑀡𑀢𑁆𑀣𑀸𑀬 𑀲𑀼𑀢𑁆𑀢𑁂𑀦 𑀆𑀯𑀼𑀦𑀦𑀢𑁆𑀣𑀸𑀬 𑀘 𑀯𑀺𑀚𑁆𑀛𑀦𑁂𑀦. 𑀢𑀸𑀧𑀲𑀡𑁆𑀳𑀓𑀭𑀡𑀸𑀤𑀻𑀦𑀁 ¶ 𑀲𑀗𑁆𑀕𑀳𑁄 𑀆𑀤𑀺-𑀲𑀤𑁆𑀤𑁂𑀦. 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀲𑀼𑀢𑁆𑀢𑀲𑁆𑀲 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀁. 𑀫𑀡𑀺 𑀯𑀺𑀬 𑀓𑀭𑀚𑀓𑀸𑀬𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀢𑁄. 𑀆𑀯𑀼𑀢𑀲𑀼𑀢𑁆𑀢𑀁 𑀯𑀺𑀬 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑀢𑁆𑀢𑀸. 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀯𑀺𑀬 𑀯𑀺𑀧𑀲𑁆𑀲𑀦𑀸𑀮𑀸𑀪𑀻 𑀪𑀺𑀓𑁆𑀔𑀼 𑀲𑀫𑁆𑀫𑀤𑁂𑀯 𑀤𑀲𑁆𑀲𑀦𑀢𑁄. 𑀢𑀤𑀸𑀭𑀫𑁆𑀫𑀡𑀸𑀦𑀦𑁆𑀢𑀺 𑀭𑀽𑀧𑀥𑀫𑁆𑀫𑀸𑀭𑀫𑁆𑀫𑀡𑀸𑀦𑀁. 𑀨𑀲𑁆𑀲𑀧𑀜𑁆𑀘𑀫𑀓𑀘𑀺𑀢𑁆𑀢𑀘𑁂𑀢𑀲𑀺𑀓𑀕𑁆𑀕𑀳𑀡𑁂𑀦 𑀕𑀳𑀺𑀢𑀥𑀫𑁆𑀫𑀸𑀧𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀸 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀢𑁂𑀲𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀕𑀢𑀺𑀓𑀢𑁆𑀢𑀸 ‘‘𑀆𑀯𑀼𑀢𑀲𑀼𑀢𑁆𑀢𑀁 𑀯𑀺𑀬 𑀯𑀺𑀧𑀲𑁆𑀲𑀦𑀸𑀜𑀸𑀡’’𑀦𑁆𑀢𑀺 𑀯𑀘𑀦𑀁 𑀅𑀯𑀺𑀭𑁄𑀥𑀺𑀢𑀁 𑀳𑁄𑀢𑀺. 𑀓𑀺𑀁 𑀧𑀦𑁂𑀢𑁂 𑀜𑀸𑀡𑀲𑁆𑀲 𑀆𑀯𑀺 𑀪𑀯𑀦𑁆𑀢𑀺, 𑀉𑀤𑀸𑀳𑀼 𑀧𑀼𑀕𑁆𑀕𑀮𑀲𑁆𑀲𑀸𑀢𑀺? 𑀜𑀸𑀡𑀲𑁆𑀲. 𑀢𑀲𑁆𑀲 𑀧𑀦 𑀆𑀯𑀺𑀪𑀸𑀯𑀢𑁆𑀢𑀸 𑀧𑀼𑀕𑁆𑀕𑀮𑀲𑁆𑀲 𑀆𑀯𑀺𑀪𑀽𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀜𑀸𑀡𑀲𑁆𑀲𑀸𑀢𑀺 𑀘 𑀧𑀘𑁆𑀘𑀯𑁂𑀓𑁆𑀔𑀡𑀸𑀜𑀸𑀡𑀲𑁆𑀲.

𑀫𑀕𑁆𑀕𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀁, 𑀢𑀲𑁆𑀫𑀸 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀦𑀁 𑀧𑀭𑀢𑁄 𑀙𑀝𑁆𑀞𑀸𑀪𑀺𑀜𑁆𑀜𑀸𑀬 𑀧𑀼𑀭𑀢𑁄 𑀯𑀢𑁆𑀢𑀩𑁆𑀩𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. 𑀏𑀯𑀁 𑀲𑀦𑁆𑀢𑁂𑀧𑀻𑀢𑀺 𑀬𑀤𑀺𑀧𑀸𑀬𑀁 𑀜𑀸𑀡𑀸𑀦𑀼𑀧𑀼𑀩𑁆𑀩𑀻, 𑀏𑀯𑀁 𑀲𑀦𑁆𑀢𑁂𑀧𑀺. 𑀏𑀢𑀲𑁆𑀲 𑀅𑀦𑁆𑀢𑀭𑀸𑀯𑀸𑀭𑁄 𑀦𑀢𑁆𑀣𑀻𑀢𑀺 𑀧𑀜𑁆𑀘𑀲𑀼 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀲𑀼 𑀓𑀣𑀺𑀢𑀸𑀲𑀼 𑀆𑀓𑀗𑁆𑀔𑁂𑀬𑁆𑀬𑀲𑀼𑀢𑁆𑀢𑀸𑀤𑀻𑀲𑀼 (𑀫. 𑀦𑀺. 𑁧.𑁬𑁫) 𑀯𑀺𑀬 𑀙𑀝𑁆𑀞𑀸𑀪𑀺𑀜𑁆𑀜𑀸 𑀓𑀣𑁂𑀢𑀩𑁆𑀩𑀸𑀢𑀺 𑀏𑀢𑀲𑁆𑀲 𑀅𑀦𑀪𑀺𑀜𑁆𑀜𑀸𑀮𑀓𑁆𑀔𑀡𑀲𑁆𑀲 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀢𑀸𑀲𑀁 𑀅𑀦𑁆𑀢𑀭𑀸𑀯𑀸𑀭𑁄 𑀦 𑀳𑁄𑀢𑀺. 𑀢𑀲𑁆𑀫𑀸 𑀢𑀢𑁆𑀣 𑀅𑀯𑀲𑀭𑀸𑀪𑀸𑀯𑀢𑁄 𑀇𑀥𑁂𑀯 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀦𑀦𑁆𑀢𑀭𑀫𑁂𑀯 ¶ 𑀤𑀲𑁆𑀲𑀺𑀢𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. 𑀬𑀲𑁆𑀫𑀸 𑀘𑀸𑀢𑀺 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄, 𑀢𑁂𑀦 𑀦 𑀓𑁂𑀯𑀮𑀁 𑀢𑀤𑁂𑀯, 𑀅𑀣 𑀔𑁄 𑀇𑀤𑀫𑁆𑀧𑀺 𑀓𑀸𑀭𑀡𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀇𑀥𑁂𑀯 𑀤𑀲𑁆𑀲𑀦𑁂𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺. 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀪𑁂𑀭𑀯𑀫𑁆𑀧𑀺 𑀭𑀽𑀧𑀁 𑀧𑀲𑁆𑀲𑀢𑁄𑀢𑀺 𑀏𑀢𑁆𑀣 ‘‘𑀇𑀤𑁆𑀥𑀺𑀯𑀺𑀥𑀜𑀸𑀡𑁂𑀦 𑀪𑁂𑀭𑀯𑀁 𑀭𑀽𑀧𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑁄’’𑀢𑀺𑀧𑀺 𑀯𑀢𑁆𑀢𑀩𑁆𑀩𑀁, 𑀏𑀯𑀫𑁆𑀧𑀺 𑀅𑀪𑀺𑀜𑁆𑀜𑀸𑀮𑀸𑀪𑀺𑀦𑁄 𑀅𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀲𑁆𑀲 𑀪𑀬𑀁 𑀲𑀦𑁆𑀢𑀸𑀲𑁄 𑀉𑀧𑁆𑀧𑀚𑁆𑀚𑀢𑀺. 𑀉𑀘𑁆𑀘𑀸𑀯𑀸𑀮𑀺𑀓𑀯𑀸𑀲𑀺 𑀫𑀳𑀸𑀦𑀸𑀕𑀢𑁆𑀣𑁂𑀭𑀲𑁆𑀲 𑀯𑀺𑀬. 𑀧𑀸𑀝𑀺𑀬𑁂𑀓𑁆𑀓𑀁 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀢𑁄 ¶ 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢’’𑀦𑁆𑀢𑀺𑀆𑀤𑀺. (𑀥. 𑀧. 𑁩𑁭𑁪);

𑀫𑀦𑁄𑀫𑀬𑀺𑀤𑁆𑀥𑀺𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁨𑁩𑁬-𑁭. 𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀦𑁆𑀢𑀺 𑀅𑀪𑀺𑀜𑁆𑀜𑀸𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀁. 𑀳𑀢𑁆𑀣𑀧𑀸𑀤𑀸𑀤𑀺 𑀅𑀗𑁆𑀕𑁂𑀳𑀺 𑀘 𑀓𑀧𑁆𑀧𑀭𑀚𑀡𑁆𑀡𑀼𑀆𑀤𑀺 𑀧𑀘𑁆𑀘𑀗𑁆𑀕𑁂𑀳𑀺 𑀘. 𑀲𑀡𑁆𑀞𑀸𑀦𑀯𑀲𑁂𑀦𑀸𑀢𑀺 𑀓𑀫𑀮𑀤𑀮𑀸𑀤𑀺𑀲𑀤𑀺𑀲𑀲𑀡𑁆𑀞𑀸𑀦𑀫𑀢𑁆𑀢𑀯𑀲𑁂𑀦, 𑀦 𑀭𑀽𑀧𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀧𑁆𑀧𑀲𑀸𑀤𑀺𑀇𑀦𑁆𑀤𑁆𑀭𑀺𑀬𑀯𑀲𑁂𑀦. 𑀲𑀩𑁆𑀩𑀸𑀓𑀸𑀭𑁂𑀳𑀻𑀢𑀺 𑀯𑀡𑁆𑀡𑀲𑀡𑁆𑀞𑀸𑀦𑀅𑀯𑀬𑀯𑀯𑀺𑀲𑁂𑀲𑀸𑀤𑀺𑀲𑀩𑁆𑀩𑀸𑀓𑀸𑀭𑁂𑀳𑀺. 𑀢𑁂𑀦 𑀇𑀤𑁆𑀥𑀺𑀫𑀢𑀸. 𑀲𑀤𑀺𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀫𑁂𑀯𑀸𑀢𑀺 𑀲𑀡𑁆𑀞𑀸𑀦𑀢𑁄𑀧𑀺 𑀯𑀡𑁆𑀡𑀢𑁄𑀧𑀺 𑀅𑀯𑀬𑀯𑀯𑀺𑀲𑁂𑀲𑀢𑁄𑀧𑀺 𑀲𑀤𑀺𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀫𑁂𑀯. 𑀲𑀚𑀸𑀢𑀺𑀬𑀁 𑀞𑀺𑀢𑁄, 𑀦 𑀦𑀸𑀕𑀺𑀤𑁆𑀥𑀺𑀬𑀸 𑀅𑀜𑁆𑀜𑀚𑀸𑀢𑀺𑀭𑀽𑀧𑁄.

𑀇𑀤𑁆𑀥𑀺𑀯𑀺𑀥𑀜𑀸𑀡𑀸𑀤𑀺𑀓𑀓𑀣𑀸𑀯𑀡𑁆𑀡𑀦𑀸

𑁨𑁩𑁯. 𑀲𑀼𑀧𑀭𑀺𑀓𑀫𑁆𑀫𑀓𑀢𑀫𑀢𑁆𑀢𑀺𑀓𑀸𑀤𑀬𑁄 ¶ 𑀯𑀺𑀬 𑀇𑀤𑁆𑀥𑀺𑀯𑀺𑀥𑀜𑀸𑀡𑀁 𑀯𑀺𑀓𑀼𑀩𑁆𑀩𑀦𑀓𑀺𑀭𑀺𑀬𑀸𑀬 𑀦𑀺𑀲𑁆𑀲𑀬𑀪𑀸𑀯𑀢𑁄.

𑁨𑁪𑁧. 𑀲𑀼𑀔𑀦𑁆𑀢𑀺 𑀅𑀓𑀺𑀘𑁆𑀙𑁂𑀦, 𑀅𑀓𑀲𑀺𑀭𑁂𑀦𑀸𑀢𑀺 𑀅𑀢𑁆𑀣𑁄.

𑁨𑁪𑁩. 𑀫𑀦𑁆𑀤𑁄 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑀤𑀸𑀭𑀓𑁄𑀧𑀺 ‘‘𑀤𑀳𑀭𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀬𑀼𑀯𑀸’’𑀢𑀺 𑀯𑀼𑀢𑁆𑀢𑀁. 𑀬𑀼𑀯𑀸𑀧𑀺 𑀓𑁄𑀘𑀺 𑀅𑀦𑀺𑀘𑁆𑀙𑀦𑀓𑁄 𑀅𑀫𑀡𑁆𑀟𑀦𑀚𑀸𑀢𑀺𑀓𑁄 𑀳𑁄𑀢𑀻𑀢𑀺 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀫𑀡𑁆𑀟𑀦𑀓𑀚𑀸𑀢𑀺𑀓𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑁂𑀦𑀸𑀳 ‘‘𑀬𑀼𑀯𑀸𑀧𑀻𑀢𑀺’’𑀆𑀤𑀺. 𑀓𑀸𑀴𑀢𑀺𑀮𑀧𑁆𑀧𑀫𑀸𑀡𑀸 𑀩𑀺𑀦𑁆𑀤𑀯𑁄 𑀓𑀸𑀴𑀢𑀺𑀮𑀓𑀸𑀦𑀺 𑀓𑀸𑀴𑀸 𑀯𑀸 𑀓𑀫𑁆𑀫𑀸𑀲𑀸, 𑀢𑀺𑀮𑀧𑁆𑀧𑀫𑀸𑀡𑀸 𑀩𑀺𑀦𑁆𑀤𑀯𑁄 𑀢𑀺𑀮𑀓𑀸𑀦𑀺. 𑀯𑀗𑁆𑀕𑀁 𑀦𑀸𑀫 𑀯𑀺𑀬𑀗𑁆𑀕𑀁. 𑀬𑁄𑀩𑁆𑀩𑀦𑀧𑀻𑀴𑀓𑀸𑀤𑀬𑁄 𑀫𑀼𑀔𑀤𑀽𑀲𑀺𑀧𑀻𑀴𑀓𑀸. 𑀫𑀼𑀔𑀕𑀢𑁄 ¶ 𑀤𑁄𑀲𑁄 𑀫𑀼𑀔𑀤𑁄𑀲𑁄, 𑀮𑀓𑁆𑀔𑀡𑀯𑀘𑀦𑀜𑁆𑀘𑁂𑀢𑀁 𑀫𑀼𑀔𑁂 𑀅𑀤𑁄𑀲𑀲𑁆𑀲𑀸𑀧𑀺 𑀧𑀸𑀓𑀝𑀪𑀸𑀯𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀬𑀣𑀸 𑀯𑀸 𑀫𑀼𑀔𑁂 𑀤𑁄𑀲𑁄, 𑀏𑀯𑀁 𑀫𑀼𑀔𑁂 𑀅𑀤𑁄𑀲𑁄𑀧𑀺 𑀫𑀼𑀔𑀤𑁄𑀲𑁄 𑀲𑀭𑀮𑁄𑀧𑁂𑀦. 𑀫𑀼𑀔𑀤𑁄𑀲𑁄 𑀘 𑀫𑀼𑀔𑀤𑁄𑀲𑁄 𑀘 𑀫𑀼𑀔𑀤𑁄𑀲𑁄𑀢𑀺 𑀏𑀓𑀲𑁂𑀲𑀦𑀬𑁂𑀦𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀜𑁆𑀳𑀺 ‘‘𑀧𑀭𑁂𑀲𑀁 𑀲𑁄𑀴𑀲𑀯𑀺𑀥𑀁 𑀘𑀺𑀢𑁆𑀢𑀁 𑀧𑀸𑀓𑀝𑀁 𑀳𑁄𑀢𑀻’’𑀢𑀺 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺.

𑁨𑁪𑁫. 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀽𑀧𑀫𑀸𑀬𑀦𑁆𑀢𑀺 ¶ 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀲𑁆𑀲 𑀤𑀲𑁆𑀲𑀺𑀢𑀉𑀧𑀫𑀸𑀬𑀁. 𑀢𑀁 𑀤𑀺𑀯𑀲𑀁 𑀓𑀢𑀓𑀺𑀭𑀺𑀬𑀸 𑀦𑀸𑀫 𑀧𑀸𑀓𑀢𑀺𑀓𑀲𑀢𑁆𑀢𑀲𑁆𑀲𑀧𑀺 𑀬𑁂𑀪𑀼𑀬𑁆𑀬𑁂𑀦 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀁𑀤𑀺𑀯𑀲-𑀕𑁆𑀕𑀳𑀡𑀁 𑀓𑀢𑀁. 𑀢𑀁𑀤𑀺𑀯𑀲𑀕𑀢𑀕𑀸𑀫𑀢𑁆𑀢𑀬-𑀕𑁆𑀕𑀳𑀡𑁂𑀦𑁂𑀯 𑀫𑀳𑀸𑀪𑀺𑀦𑀻𑀳𑀸𑀭𑁂𑀳𑀺 𑀅𑀜𑁆𑀜𑁂𑀲𑀫𑁆𑀧𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀮𑀸𑀪𑀻𑀦𑀁 𑀢𑀻𑀲𑀼 𑀪𑀯𑁂𑀲𑀼 𑀓𑀢𑀓𑀺𑀭𑀺𑀬𑀸 𑀬𑁂𑀪𑀼𑀬𑁆𑀬𑁂𑀦 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀤𑀻𑀧𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁨𑁪𑁭. 𑀅𑀧𑀭𑀸𑀧𑀭𑀁 𑀲𑀜𑁆𑀘𑀭𑀦𑁆𑀢𑁂𑀢𑀺 𑀢𑀁𑀢𑀁𑀓𑀺𑀘𑁆𑀘𑀯𑀲𑁂𑀦 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀭𑀦𑁆𑀢𑁂. 𑀬𑀣𑀸𑀯𑀼𑀢𑁆𑀢𑀧𑀸𑀲𑀸𑀤𑁄𑀯𑀺𑀬 𑀪𑀺𑀓𑁆𑀔𑀼𑀦𑁄 𑀓𑀭𑀚𑀓𑀸𑀬𑁄 𑀤𑀝𑁆𑀞𑀩𑁆𑀩𑁄 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑀲𑁆𑀲 𑀤𑀝𑁆𑀞𑀩𑁆𑀩𑀤𑀲𑁆𑀲𑀦𑀲𑀺𑀤𑁆𑀥𑀺𑀢𑁄. 𑀘𑀓𑁆𑀔𑀼𑀫𑀢𑁄 𑀳𑀺 𑀤𑀺𑀩𑁆𑀩𑀘𑀓𑁆𑀔𑀼𑀲𑀫𑀥𑀺𑀕𑀫𑁄. 𑀬𑀣𑀸𑀳 ‘‘𑀫𑀁𑀲𑀘𑀓𑁆𑀔𑀼𑀲𑁆𑀲 𑀉𑀧𑁆𑀧𑀸𑀤𑁄, 𑀫𑀕𑁆𑀕𑁄 𑀤𑀺𑀩𑁆𑀩𑀲𑁆𑀲 𑀘𑀓𑁆𑀔𑀼𑀦𑁄’’𑀢𑀺 (𑀇𑀢𑀺𑀯𑀼. 𑁬𑁧). 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀯𑀺𑀬 𑀅𑀬𑀫𑁂𑀯 𑀤𑀺𑀩𑁆𑀩𑀘𑀓𑁆𑀔𑀼𑀁 𑀧𑀢𑁆𑀯𑀸 𑀞𑀺𑀢𑁄 𑀪𑀺𑀓𑁆𑀔𑀼 𑀤𑀝𑁆𑀞𑀩𑁆𑀩𑀲𑁆𑀲 𑀤𑀲𑁆𑀲𑀦𑀢𑁄. 𑀕𑁂𑀳𑀁 𑀧𑀯𑀺𑀲𑀦𑁆𑀢𑀸 𑀯𑀺𑀬 𑀏𑀢𑀁 𑀅𑀢𑁆𑀢𑀪𑀸𑀯𑀕𑁂𑀳𑀁 𑀑𑀓𑁆𑀓𑀫𑀦𑁆𑀢𑀸, 𑀉𑀧𑀧𑀚𑁆𑀚𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀕𑁂𑀳𑀸 𑀦𑀺𑀓𑁆𑀔𑀫𑀦𑁆𑀢𑀸 𑀯𑀺𑀬 𑀏𑀢𑀲𑁆𑀫𑀸 𑀅𑀢𑁆𑀢𑀪𑀸𑀯𑀕𑁂𑀳𑀢𑁄 𑀧𑀓𑁆𑀓𑀦𑁆𑀢𑀸, 𑀘𑀯𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀧𑀭𑀸𑀧𑀭𑀁 𑀲𑀜𑁆𑀘𑀭𑀡𑀓𑀲𑀢𑁆𑀢𑀸𑀢𑀺 𑀧𑀦 𑀧𑀼𑀦𑀧𑁆𑀧𑀼𑀦𑀁 𑀲𑀁𑀲𑀸𑀭𑁂 𑀧𑀭𑀺𑀩𑁆𑀪𑀫𑀦𑁆𑀢𑀸 𑀲𑀢𑁆𑀢𑀸. ‘‘𑀢𑀢𑁆𑀣 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸’’𑀢𑀺 𑀧𑀦 𑀇𑀫𑀺𑀦𑀸 𑀢𑀲𑁆𑀫𑀺𑀁 𑀪𑀯𑁂 𑀚𑀸𑀢𑀲𑀁𑀯𑀤𑁆𑀥𑁂 𑀲𑀢𑁆𑀢𑁂 𑀯𑀤𑀢𑀺. 𑀦𑀦𑀼 𑀘𑀸𑀬𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀓𑀣𑀸, 𑀏𑀢𑁆𑀣 𑀓𑀲𑁆𑀫𑀸 ‘‘𑀢𑀻𑀲𑀼 𑀪𑀯𑁂𑀲𑀽’’𑀢𑀺 𑀘𑀢𑀼𑀯𑁄𑀓𑀸𑀭𑀪𑀯𑀲𑁆𑀲𑀸𑀧𑀺 𑀲𑀗𑁆𑀕𑀳𑁄 𑀓𑀢𑁄𑀢𑀺 𑀆𑀳 ¶ ‘‘𑀇𑀤𑀜𑁆𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀇𑀤𑀦𑁆𑀢𑀺 ‘‘𑀢𑀻𑀲𑀼 𑀪𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦’’𑀦𑁆𑀢𑀺 𑀇𑀤𑀁 𑀯𑀘𑀦𑀁. 𑀤𑁂𑀲𑀦𑀸𑀲𑀼𑀔𑀢𑁆𑀣𑀫𑁂𑀯𑀸𑀢𑀺 𑀓𑁂𑀯𑀮𑀁 𑀤𑁂𑀲𑀦𑀸𑀲𑀼𑀔𑀢𑁆𑀣𑀁, 𑀦 𑀘𑀢𑀼𑀯𑁄𑀓𑀸𑀭𑀪𑀯𑁂 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀦𑁄 𑀆𑀯𑀺𑀪𑀸𑀯𑀲𑀩𑁆𑀪𑀸𑀯𑀢𑁄. 𑀦 𑀳𑀺 ‘‘𑀞𑀧𑁂𑀢𑁆𑀯𑀸 𑀅𑀭𑀽𑀧𑀪𑀯’’𑀦𑁆𑀢𑀺 𑀯𑀸 ‘‘𑀤𑁆𑀯𑀻𑀲𑀼 ¶ 𑀪𑀯𑁂𑀲𑀽’’𑀢𑀺 𑀯𑀸 𑀯𑀼𑀘𑁆𑀘𑀫𑀸𑀦𑁂 𑀤𑁂𑀲𑀦𑀸 𑀲𑀼𑀔𑀸𑀯𑀩𑁄𑀥𑀸 𑀘 𑀳𑁄𑀢𑀻𑀢𑀺.

𑀆𑀲𑀯𑀓𑁆𑀔𑀬𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁨𑁪𑁮. 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀦𑁆𑀢𑀺 ¶ 𑀯𑀺𑀧𑀲𑁆𑀲𑀦𑀸𑀬 𑀧𑀤𑀝𑁆𑀞𑀸𑀦𑀪𑀽𑀢𑀁. 𑀯𑀺𑀧𑀲𑁆𑀲𑀦𑀸 𑀘 𑀢𑀺𑀯𑀺𑀥𑀸 𑀯𑀺𑀧𑀲𑁆𑀲𑀓𑀧𑀼𑀕𑁆𑀕𑀮𑀪𑁂𑀤𑁂𑀦. 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀳𑀺 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀘 𑀯𑀺𑀧𑀲𑁆𑀲𑀦𑀸 𑀘𑀺𑀦𑁆𑀢𑀸𑀫𑀬𑀜𑀸𑀡𑀲𑀁𑀯𑀤𑁆𑀥𑀺𑀢𑀸 𑀲𑀬𑀫𑁆𑀪𑀼𑀜𑀸𑀡𑀪𑀽𑀢𑀸, 𑀇𑀢𑀭𑁂𑀲𑀁 𑀲𑀼𑀢𑀫𑀬𑀜𑀸𑀡𑀲𑀁𑀯𑀤𑁆𑀥𑀺𑀢𑀸 𑀧𑀭𑁄𑀧𑀤𑁂𑀲𑀲𑀫𑁆𑀪𑀽𑀢𑀸 𑀦𑀸𑀫. 𑀲𑀸 ‘‘𑀞𑀧𑁂𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀅𑀯𑀲𑁂𑀲𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑀸𑀦𑀁 𑀅𑀜𑁆𑀜𑀢𑀭𑀢𑁄 𑀯𑀼𑀝𑁆𑀞𑀸𑀬𑀸’’𑀢𑀺𑀆𑀤𑀺𑀦𑀸 𑀅𑀦𑁂𑀓𑀥𑀸, 𑀅𑀭𑀽𑀧𑀫𑀼𑀔𑀯𑀲𑁂𑀦 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑁂 𑀯𑀼𑀢𑁆𑀢𑀸𑀦𑀁 𑀢𑁂𑀲𑀁 𑀢𑁂𑀲𑀁 𑀥𑀸𑀢𑀼𑀧𑀭𑀺𑀕𑁆𑀕𑀳𑀫𑀼𑀔𑀸𑀦𑀜𑁆𑀘 𑀅𑀜𑁆𑀜𑀢𑀭𑀫𑀼𑀔𑀯𑀲𑁂𑀦 𑀅𑀦𑁂𑀓𑀥𑀸 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀦𑀸𑀦𑀸𑀦𑀬𑀢𑁄 𑀯𑀺𑀪𑀸𑀯𑀺𑀢𑀸. 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀦 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀼𑀔𑁂𑀦 𑀧𑀪𑁂𑀤𑀕𑀫𑀦𑀢𑁄 𑀦𑀸𑀦𑀸𑀦𑀬𑀁 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀲𑀦𑁆𑀦𑀺𑀲𑁆𑀲𑀬𑀲𑁆𑀲 𑀅𑀭𑀺𑀬𑀫𑀕𑁆𑀕𑀜𑀸𑀡𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀽𑀢𑀁 𑀧𑀼𑀩𑁆𑀩𑀪𑀸𑀕𑀜𑀸𑀡𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀦𑁆𑀢𑀁 𑀧𑀭𑀺𑀡𑀢𑀁 𑀕𑀘𑁆𑀙𑀦𑁆𑀢𑀁 𑀧𑀭𑀫𑀕𑀫𑁆𑀪𑀻𑀭𑀁 𑀲𑀡𑁆𑀳𑀲𑀼𑀔𑀼𑀫𑀢𑀭𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀳𑁄𑀢𑀺, 𑀬𑀁 𑀅𑀝𑁆𑀞𑀓𑀣𑀸𑀲𑀼 ‘‘𑀫𑀳𑀸𑀯𑀚𑀺𑀭𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀲 𑀘 𑀧𑀯𑀢𑁆𑀢𑀺𑀯𑀺𑀪𑀸𑀕𑁂𑀦 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀧𑁆𑀧𑀪𑁂𑀤𑀲𑁆𑀲 𑀧𑀸𑀤𑀓𑀪𑀸𑀯𑁂𑀦 𑀲𑀫𑀸𑀧𑀚𑁆𑀚𑀺𑀬𑀫𑀸𑀦𑀸 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀸 𑀤𑁂𑀯𑀲𑀺𑀓𑀁 𑀲𑀢𑁆𑀣𑀼 𑀯𑀴𑀜𑁆𑀚𑀦𑀓𑀲𑀫𑀸𑀧𑀢𑁆𑀢𑀺𑀬𑁄 𑀯𑀼𑀘𑁆𑀘𑀦𑁆𑀢𑀺, 𑀲𑁆𑀯𑀸𑀬𑀁 𑀩𑀼𑀤𑁆𑀥𑀸𑀦𑀁 𑀯𑀺𑀧𑀲𑁆𑀲𑀦𑀸𑀘𑀸𑀭𑁄 𑀧𑀭𑀫𑀢𑁆𑀣𑀫𑀜𑁆𑀚𑀼𑀲𑀸𑀬𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑀝𑀻. 𑁧.𑁨𑁧𑁬) 𑀉𑀤𑁆𑀤𑁂𑀲𑀢𑁄 𑀤𑀲𑁆𑀲𑀺𑀢𑁄. 𑀅𑀢𑁆𑀣𑀺𑀓𑁂𑀳𑀺 𑀢𑀢𑁄 𑀕𑀳𑁂𑀢𑀩𑁆𑀩𑁄, 𑀇𑀥 𑀧𑀦 𑀲𑀸𑀯𑀓𑀸𑀦𑀁 𑀯𑀺𑀧𑀲𑁆𑀲𑀦𑀸 𑀅𑀥𑀺𑀧𑁆𑀧𑁂𑀢𑀸.

𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬𑀸𑀢𑀺 𑀆𑀲𑀯𑀸𑀦𑀁 𑀔𑁂𑀧𑀦𑀢𑁄 𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄 𑀆𑀲𑀯𑀓𑁆𑀔𑀬𑁄, 𑀅𑀭𑀺𑀬𑀫𑀕𑁆𑀕𑁄, 𑀢𑀢𑁆𑀣 𑀜𑀸𑀡𑀁 𑀆𑀲𑀯𑀸𑀦𑀁 𑀔𑀬𑀜𑀸𑀡𑀁, 𑀢𑀤𑀢𑁆𑀣𑀁 𑀢𑁂𑀦𑀸𑀳 ‘‘𑀆𑀲𑀯𑀸𑀦𑀁 𑀔𑀬𑀜𑀸𑀡𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀸𑀬𑀸’’𑀢𑀺. 𑀆𑀲𑀯𑀸 𑀏𑀢𑁆𑀣 𑀔𑀻𑀬𑀦𑁆𑀢𑀻𑀢𑀺 𑀆𑀲𑀯𑀸𑀦𑀁 𑀔𑀬𑁄 𑀦𑀺𑀩𑁆𑀩𑀸𑀦𑀁. 𑀔𑁂𑀧𑁂𑀢𑀺 𑀧𑀸𑀧𑀥𑀫𑁆𑀫𑁂𑀢𑀺 𑀔𑀬𑁄, 𑀫𑀕𑁆𑀕𑁄. 𑀲𑁄 𑀧𑀦 𑀧𑀸𑀧𑀓𑁆𑀔𑀬𑁄 𑀆𑀲𑀯𑀓𑁆𑀔𑀬𑁂𑀦 𑀯𑀺𑀦𑀸 𑀦𑀢𑁆𑀣𑀻𑀢𑀺 ‘‘𑀔𑀬𑁂 𑀜𑀸𑀡’’𑀦𑁆𑀢𑀺 𑀏𑀢𑁆𑀣 𑀔𑀬𑀕𑁆𑀕𑀳𑀡𑁂𑀦 ¶ 𑀆𑀲𑀯𑀓𑁆𑀔𑀬𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀔𑀬𑁂 𑀜𑀸𑀡’’𑀦𑁆𑀢𑀺𑀆𑀤𑀺. 𑀲𑀫𑀺𑀢𑀧𑀸𑀧𑁄 𑀲𑀫𑀡𑁄𑀢𑀺 𑀓𑀢𑁆𑀯𑀸 𑀆𑀲𑀯𑀸𑀦𑀁 𑀔𑀻𑀡𑀢𑁆𑀢𑀸 𑀲𑀫𑀡𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀆𑀲𑀯𑀸𑀦𑀁 𑀔𑀬𑀸 𑀲𑀫𑀡𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀨𑀮’’𑀦𑁆𑀢𑀺. 𑀆𑀲𑀯𑀯𑀟𑁆𑀠𑀺𑀬𑀸 𑀲𑀗𑁆𑀔𑀸𑀭𑁂 𑀯𑀟𑁆𑀠𑁂𑀦𑁆𑀢𑁄 𑀯𑀺𑀲𑀗𑁆𑀔𑀸𑀭𑀢𑁄 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑁄𑀢𑀺 ‘‘𑀆𑀭𑀸 𑀲𑁄 𑀆𑀲𑀯𑀓𑁆𑀔𑀬𑀸’’𑀢𑀺 𑀏𑀢𑁆𑀣 𑀆𑀲𑀯𑀓𑁆𑀔𑀬𑀧𑀤𑀁 𑀯𑀺𑀲𑀗𑁆𑀔𑀸𑀭𑀸𑀥𑀺𑀯𑀘𑀦𑀦𑁆𑀢𑀺 𑀆𑀳 ¶ ‘‘𑀆𑀲𑀯𑀓𑁆𑀔𑀬𑀸𑀢𑀺 𑀏𑀢𑁆𑀣 𑀦𑀺𑀩𑁆𑀩𑀸𑀦𑀁 𑀯𑀼𑀢𑁆𑀢’’𑀦𑁆𑀢𑀺. 𑀪𑀗𑁆𑀕𑁄𑀢𑀺 ¶ 𑀆𑀲𑀯𑀸𑀦𑀁 𑀔𑀡𑀦𑀺𑀭𑁄𑀥𑁄 ‘‘𑀆𑀲𑀯𑀸𑀦𑀁 𑀔𑀬𑁄’’𑀢𑀺 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸.

‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀤𑀼𑀓𑁆𑀔𑀲𑁆𑀲 𑀅𑀭𑀺𑀬𑀲𑀘𑁆𑀘𑀲𑁆𑀲 𑀢𑀤𑀸 𑀪𑀺𑀓𑁆𑀔𑀼𑀦𑁄 𑀧𑀘𑁆𑀘𑀓𑁆𑀔𑀢𑁄 𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑀁. ‘‘𑀏𑀢𑁆𑀢𑀓𑀁 𑀤𑀼𑀓𑁆𑀔’’𑀦𑁆𑀢𑀺 𑀢𑀲𑁆𑀲 𑀧𑀭𑀺𑀘𑁆𑀙𑀺𑀚𑁆𑀚𑀕𑁆𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑀁. ‘‘𑀦 𑀇𑀢𑁄 𑀪𑀺𑀬𑁆𑀬𑁄’’𑀢𑀺 𑀢𑀲𑁆𑀲 𑀅𑀦𑀯𑀲𑁂𑀲𑁂𑀢𑁆𑀯𑀸 𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑀁. 𑀢𑁂𑀦𑀸𑀳 ‘‘𑀲𑀩𑁆𑀩𑀫𑁆𑀧𑀺 𑀤𑀼𑀓𑁆𑀔𑀲𑀘𑁆𑀘’’𑀦𑁆𑀢𑀺𑀆𑀤𑀺. 𑀲𑀭𑀲𑀮𑀓𑁆𑀔𑀡𑀧𑀝𑀺𑀯𑁂𑀥𑁂𑀦𑀸𑀢𑀺 𑀲𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀮𑀓𑁆𑀔𑀡𑀲𑁆𑀲 𑀅𑀲𑀫𑁆𑀫𑁄𑀳𑀢𑁄 𑀧𑀝𑀺𑀯𑀺𑀚𑁆𑀛𑀦𑁂𑀦, 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑁄𑀢𑀺 𑀘. 𑀬𑀣𑀸 𑀢𑀲𑁆𑀫𑀺𑀁 𑀜𑀸𑀡𑁂 𑀧𑀯𑀢𑁆𑀢𑁂 𑀧𑀘𑁆𑀙𑀸 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀲𑀭𑀽𑀧𑀸𑀤𑀺𑀧𑀭𑀺𑀘𑁆𑀙𑁂𑀤𑁂 𑀲𑀫𑁆𑀫𑁄𑀳𑁄 𑀦 𑀳𑁄𑀢𑀺, 𑀢𑀣𑀸 𑀧𑀯𑀢𑁆𑀢𑀺, 𑀢𑁂𑀦𑀸𑀳 ‘‘𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺. 𑀤𑀼𑀓𑁆𑀔𑀁 𑀲𑀫𑀼𑀤𑁂𑀢𑀺 𑀏𑀢𑀲𑁆𑀫𑀸𑀢𑀺 𑀤𑀼𑀓𑁆𑀔𑀲𑀫𑀼𑀤𑀬𑁄, 𑀢𑀡𑁆𑀳𑀸𑀢𑀺 𑀆𑀳 ‘‘𑀢𑀲𑁆𑀲 𑀘𑀸’’𑀢𑀺𑀆𑀤𑀺. 𑀬𑀁 𑀞𑀸𑀦𑀁 𑀧𑀢𑁆𑀯𑀸𑀢𑀺 𑀬𑀁 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀝𑁆𑀞𑁂𑀦 𑀓𑀸𑀭𑀡𑀪𑀽𑀢𑀁 𑀆𑀕𑀫𑁆𑀫, ‘‘𑀧𑀢𑁆𑀯𑀸’’𑀢𑀺 𑀘 𑀢𑀤𑀼𑀪𑀬𑀯𑀢𑁄 𑀧𑀼𑀕𑁆𑀕𑀮𑀲𑁆𑀲 𑀧𑀢𑁆𑀢𑀺 𑀢𑀤𑀼𑀪𑀬𑀲𑁆𑀲 𑀧𑀢𑁆𑀢𑀺 𑀯𑀺𑀬𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀧𑀢𑁆𑀯𑀸𑀢𑀺 𑀯𑀸 𑀧𑀸𑀧𑀼𑀡𑀦𑀳𑁂𑀢𑀼. 𑀅𑀧𑁆𑀧𑀯𑀢𑁆𑀢𑀻𑀢𑀺 𑀅𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁, 𑀢𑁂 𑀯𑀸 𑀦𑀧𑁆𑀧𑀯𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀅𑀧𑁆𑀧𑀯𑀢𑁆𑀢𑀺, 𑀦𑀺𑀩𑁆𑀩𑀸𑀦𑀁. 𑀢𑀲𑁆𑀲𑀸𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑀲𑁆𑀲. 𑀲𑀫𑁆𑀧𑀸𑀧𑀓𑀦𑁆𑀢𑀺 𑀲𑀘𑁆𑀙𑀺𑀓𑀭𑀡𑀯𑀲𑁂𑀦 𑀲𑀫𑁆𑀫𑀤𑁂𑀯 𑀧𑀸𑀧𑀓𑀁.

𑀓𑀺𑀮𑁂𑀲𑀯𑀲𑁂𑀦𑀸𑀢𑀺 𑀆𑀲𑀯𑀲𑀗𑁆𑀔𑀸𑀢𑀓𑀺𑀮𑁂𑀲𑀯𑀲𑁂𑀦. 𑀬𑀲𑁆𑀫𑀸 𑀆𑀲𑀯𑀸𑀦𑀁 𑀤𑀼𑀓𑁆𑀔𑀲𑀘𑁆𑀘𑀧𑀭𑀺𑀬𑀸𑀬𑁄 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸, 𑀲𑁂𑀲𑀲𑀘𑁆𑀘𑀸𑀦𑀜𑁆𑀘 𑀢𑀁𑀲𑀫𑀼𑀤𑀬𑀸𑀤𑀺𑀧𑀭𑀺𑀬𑀸𑀬𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀭𑀺𑀬𑀸𑀬𑀢𑁄’’𑀢𑀺. 𑀤𑀲𑁆𑀲𑁂𑀦𑁆𑀢𑁄 𑀲𑀘𑁆𑀘𑀸𑀦𑀻𑀢𑀺 𑀬𑁄𑀚𑀦𑀸. 𑀆𑀲𑀯𑀸𑀦𑀁𑀬𑁂𑀯 𑀘𑁂𑀢𑁆𑀣 𑀕𑀳𑀡𑀁 ‘‘𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬𑀸’’𑀢𑀺 𑀆𑀭𑀤𑁆𑀥𑀢𑁆𑀢𑀸. 𑀢𑀣𑀸 𑀳𑀺 ‘‘𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀻’’𑀢𑀺𑀆𑀤𑀺𑀦𑀸 ¶ (𑀤𑀻. 𑀦𑀺. 𑁧.𑁨𑁪𑁮; 𑀫. 𑀦𑀺. 𑁧.𑁪𑁩𑁩; 𑀫. 𑀦𑀺. 𑁩.𑁧𑁯) 𑀆𑀲𑀯𑀯𑀺𑀫𑀼𑀢𑁆𑀢𑀺𑀲𑀻𑀲𑁂𑀦𑁂𑀯 𑀲𑀩𑁆𑀩𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀺 𑀯𑀼𑀢𑁆𑀢𑀸. ‘‘𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀫𑀺𑀲𑁆𑀲𑀓𑀫𑀕𑁆𑀕𑁄 𑀇𑀥 𑀓𑀣𑀺𑀢𑁄𑀢𑀺 ‘‘𑀲𑀳 𑀯𑀺𑀧𑀲𑁆𑀲𑀦𑀸𑀬 𑀓𑁄𑀝𑀺𑀧𑁆𑀧𑀢𑁆𑀢𑀁 𑀫𑀕𑁆𑀕𑀁 𑀓𑀣𑁂𑀲𑀻’’𑀢𑀺 𑀯𑀼𑀢𑁆𑀢𑀁. ‘‘𑀚𑀸𑀦𑀢𑁄 𑀧𑀲𑁆𑀲𑀢𑁄’’𑀢𑀺 𑀇𑀫𑀺𑀦𑀸 𑀧𑀭𑀺𑀜𑁆𑀜𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸𑀪𑀺𑀲𑀫𑀬𑀸 𑀯𑀼𑀢𑁆𑀢𑀸. ‘‘𑀯𑀺𑀫𑀼𑀘𑁆𑀘𑀢𑀻’’𑀢𑀺 𑀇𑀫𑀺𑀦𑀸 𑀧𑀳𑀸𑀦𑀸𑀪𑀺𑀲𑀫𑀬𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀇𑀫𑀺𑀦𑀸 𑀫𑀕𑁆𑀕𑀓𑁆𑀔𑀡𑀁 𑀤𑀲𑁆𑀲𑁂𑀢𑀻’’𑀢𑀺. ‘‘𑀚𑀸𑀦𑀢𑁄 𑀧𑀲𑁆𑀲𑀢𑁄’’𑀢𑀺 𑀯𑀸 𑀳𑁂𑀢𑀼𑀦𑀺𑀤𑁆𑀤𑁂𑀲𑁄𑀬𑀁. 𑀚𑀸𑀦𑀦𑀳𑁂𑀢𑀼 𑀤𑀲𑁆𑀲𑀦𑀳𑁂𑀢𑀼 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸. 𑀥𑀫𑁆𑀫𑀸𑀦𑀜𑁆𑀳𑀺 𑀲𑀫𑀸𑀦𑀓𑀸𑀮𑀺𑀓𑀸𑀦𑀫𑁆𑀧𑀺 𑀧𑀘𑁆𑀘𑀬𑀧𑁆𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸 𑀲𑀳𑀚𑀸𑀢𑀓𑁄𑀝𑀺𑀬𑀸 𑀮𑀩𑁆𑀪𑀢𑀻𑀢𑀺. 𑀪𑀯𑀸𑀲𑀯𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀪𑀯𑀭𑀸𑀕𑀲𑁆𑀲 𑀯𑀺𑀬 𑀪𑀯𑀤𑀺𑀝𑁆𑀞𑀺𑀬𑀸𑀧𑀺 𑀲𑀫𑀯𑀭𑁄𑀥𑁄𑀢𑀺 𑀤𑀺𑀝𑁆𑀞𑀸𑀲𑀯𑀲𑁆𑀲𑀸𑀧𑀺 ¶ 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀔𑀻𑀡𑀸 𑀚𑀸𑀢𑀻𑀢𑀺𑀆𑀤𑀻𑀳𑀺 𑀧𑀤𑁂𑀳𑀺. 𑀢𑀲𑁆𑀲𑀸𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀜𑀸𑀡𑀲𑁆𑀲. 𑀪𑀽𑀫𑀺𑀦𑁆𑀢𑀺 𑀧𑀯𑀢𑁆𑀢𑀺𑀝𑁆𑀞𑀸𑀦𑀁.

𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 ‘‘𑀓𑀢𑀫𑀸 𑀧𑀦𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀘𑁄𑀤𑀦𑀸 𑀓𑀢𑀸, 𑀢𑀁 𑀯𑀺𑀯𑀭𑀦𑁆𑀢𑁄 ‘‘𑀦 𑀢𑀸𑀯𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳 ¶ . 𑀢𑀢𑁆𑀣 𑀦 𑀢𑀸𑀯𑀲𑁆𑀲 𑀅𑀢𑀻𑀢𑀸 𑀚𑀸𑀢𑀺 𑀔𑀻𑀡𑀸 𑀫𑀕𑁆𑀕𑀪𑀸𑀯𑀦𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀧𑀼𑀩𑁆𑀩𑁂𑀯 𑀔𑀻𑀡𑀢𑁆𑀢𑀸’’𑀢𑀺. 𑀦 𑀅𑀦𑀸𑀕𑀢𑀸 𑀅𑀲𑁆𑀲 𑀚𑀸𑀢𑀺 𑀔𑀻𑀡𑀸𑀢𑀺 𑀬𑁄𑀚𑀦𑀸. 𑀦 𑀅𑀦𑀸𑀕𑀢𑀸𑀢𑀺 𑀘 𑀅𑀦𑀸𑀕𑀢𑀪𑀸𑀯𑀲𑀸𑀫𑀜𑁆𑀜𑀁 𑀕𑀳𑁂𑀢𑁆𑀯𑀸 𑀮𑁂𑀲𑁂𑀦 𑀘𑁄𑀤𑁂𑀢𑀺, 𑀢𑁂𑀦𑀸𑀳 ‘‘𑀅𑀦𑀸𑀕𑀢𑁂 𑀯𑀸𑀬𑀸𑀫𑀸𑀪𑀸𑀯𑀢𑁄’’𑀢𑀺. 𑀅𑀦𑀸𑀕𑀢𑀯𑀺𑀲𑁂𑀲𑁄 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀲 𑀘 𑀔𑁂𑀧𑀦𑁂 𑀯𑀸𑀬𑀸𑀫𑁄𑀧𑀺 𑀮𑀩𑁆𑀪𑀢𑁂𑀯, 𑀢𑁂𑀦𑀸𑀳 ‘‘𑀬𑀸 𑀧𑀦 𑀫𑀕𑁆𑀕𑀲𑁆𑀲𑀸’’𑀢𑀺𑀆𑀤𑀺. 𑀏𑀓𑀘𑀢𑀼𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀲𑀽𑀢𑀺 𑀪𑀯𑀢𑁆𑀢𑀬𑀕𑁆𑀕𑀳𑀡𑀁 𑀯𑀼𑀢𑁆𑀢𑀦𑀬𑁂𑀦 𑀅𑀦𑀯𑀲𑁂𑀲𑀢𑁄 𑀚𑀸𑀢𑀺𑀬𑀸 𑀔𑀻𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀚𑀸𑀢𑀺𑀁. 𑀲𑁄𑀢𑀺 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼.

𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦𑀸𑀫 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀁 𑀏𑀯𑀸𑀢𑀺 𑀆𑀳 ‘‘𑀧𑀭𑀺𑀯𑀼𑀢𑁆𑀣’’𑀦𑁆𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀬 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀻𑀦𑀫𑁆𑀧𑀺 𑀤𑀼𑀓𑁆𑀔𑀲𑀘𑁆𑀘𑁂 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀦𑀼𑀕𑀼𑀡𑀸 𑀧𑀯𑀢𑁆𑀢𑀺, 𑀇𑀢𑀭𑀲𑀘𑁆𑀘𑁂𑀲𑀼 𑀘 ¶ 𑀦𑁂𑀲𑀁 𑀧𑀳𑀸𑀦𑀸𑀪𑀺𑀲𑀫𑀬𑀸𑀤𑀺𑀧𑀯𑀢𑁆𑀢𑀺 𑀧𑀸𑀓𑀝𑀸 𑀏𑀯, 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸𑀯𑀲𑁂𑀦𑀸’’𑀢𑀺. 𑀤𑀼𑀓𑁆𑀔𑀦𑀺𑀭𑁄𑀥𑀫𑀕𑁆𑀕𑁂𑀲𑀼 𑀧𑀭𑀺𑀜𑁆𑀜𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸 𑀬𑀸𑀯𑀤𑁂𑀯 𑀲𑀫𑀼𑀤𑀬𑀧𑁆𑀧𑀳𑀸𑀦𑀢𑁆𑀣𑀸𑀬𑀸𑀢𑀺 𑀆𑀳 ‘‘𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀧𑀳𑀸𑀢𑀩𑁆𑀩𑀓𑀺𑀮𑁂𑀲𑀸 𑀧𑀳𑀻𑀦𑀸’’𑀢𑀺. 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀇𑀫𑁂 𑀧𑀓𑀸𑀭𑀸 𑀇𑀢𑁆𑀣𑀁, 𑀢𑀩𑁆𑀪𑀸𑀯𑁄 𑀇𑀢𑁆𑀣𑀢𑁆𑀢𑀁, 𑀢𑀤𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂 𑀧𑀦 𑀧𑀓𑀸𑀭𑀸 𑀅𑀭𑀺𑀬𑀫𑀕𑁆𑀕𑀩𑁆𑀬𑀸𑀧𑀸𑀭𑀪𑀽𑀢𑀸 𑀧𑀭𑀺𑀜𑁆𑀜𑀸𑀤𑀬𑁄 𑀇𑀥𑀸𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀏𑀯𑀁 𑀲𑁄𑀴𑀲𑀓𑀺𑀘𑁆𑀘𑀪𑀸𑀯𑀸𑀬𑀸’’𑀢𑀺. 𑀢𑁂 𑀳𑀺 𑀫𑀕𑁆𑀕𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀫𑀕𑁆𑀕𑀸𑀦𑀼𑀪𑀸𑀯𑁂𑀦 𑀧𑀸𑀓𑀝𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀧𑀭𑀺𑀜𑁆𑀜𑀸𑀤𑀻𑀲𑀼 𑀘 𑀧𑀳𑀸𑀦𑀫𑁂𑀯 𑀧𑀥𑀸𑀦𑀁 𑀢𑀤𑀢𑁆𑀣𑀢𑁆𑀢𑀸 𑀇𑀢𑀭𑁂𑀲𑀦𑁆𑀢𑀺 𑀆𑀳 ‘‘𑀓𑀺𑀮𑁂𑀲𑀓𑁆𑀔𑀬𑀪𑀸𑀯𑀸𑀬 𑀯𑀸’’𑀢𑀺. 𑀧𑀳𑀻𑀦𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀯𑀸 𑀏𑀯𑀁 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀦𑀺𑀲𑁆𑀲𑀓𑁆𑀓𑁂 𑀲𑀫𑁆𑀧𑀤𑀸𑀦𑀯𑀘𑀦𑀦𑁆𑀢𑀺 𑀆𑀳 ‘‘𑀇𑀢𑁆𑀣𑀪𑀸𑀯𑀢𑁄’’𑀢𑀺. 𑀅𑀧𑀭𑀦𑁆𑀢𑀺 𑀅𑀦𑀸𑀕𑀢𑀁. 𑀇𑀫𑁂 𑀧𑀦 𑀘𑀭𑀺𑀫𑀓𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀜𑁆𑀜𑀸𑀢𑀸 𑀢𑀺𑀝𑁆𑀞𑀦𑁆𑀢𑀺, 𑀏𑀢𑁂𑀦 𑀢𑁂𑀲𑀁 𑀅𑀧𑁆𑀧𑀢𑀺𑀝𑁆𑀞𑀢𑀁 𑀤𑀲𑁆𑀲𑁂𑀢𑀺. 𑀅𑀧𑀭𑀺𑀜𑁆𑀜𑀸𑀫𑀽𑀮𑀺𑀓𑀸 𑀳𑀺 𑀧𑀢𑀺𑀝𑁆𑀞𑀸. 𑀬𑀣𑀸𑀳 ‘‘𑀓𑀩𑀴𑀻𑀓𑀸𑀭𑁂 𑀘𑁂 𑀪𑀺𑀓𑁆𑀔𑀯𑁂 𑀆𑀳𑀸𑀭𑁂 𑀅𑀢𑁆𑀣𑀺 𑀭𑀸𑀕𑁄 𑀅𑀢𑁆𑀣𑀺 𑀦𑀦𑁆𑀤𑀻 𑀅𑀢𑁆𑀣𑀺 ¶ 𑀢𑀡𑁆𑀳𑀸, 𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀯𑀺𑀭𑀽𑀴𑁆𑀳’’𑀦𑁆𑀢𑀺𑀆𑀤𑀺. (𑀲𑀁. 𑀦𑀺. 𑁨.𑁬𑁪; 𑀓𑀣𑀸. 𑁨𑁯𑁬; 𑀫𑀳𑀸𑀦𑀺. 𑁭) 𑀢𑁂𑀦𑁂𑀯𑀸𑀳 ‘‘𑀙𑀺𑀦𑁆𑀦𑀫𑀽𑀮𑀓𑀸 𑀭𑀼𑀓𑁆𑀔𑀸 𑀯𑀺𑀬𑀸’’𑀢𑀺𑀆𑀤𑀺.

𑁨𑁪𑁯. 𑀧𑀩𑁆𑀩𑀢𑀫𑀢𑁆𑀣𑀓𑁂𑀢𑀺 𑀧𑀩𑁆𑀩𑀢𑀲𑀺𑀔𑀭𑁂. 𑀢𑀜𑁆𑀳𑀺 𑀬𑁂𑀪𑀼𑀬𑁆𑀬𑁂𑀦 𑀲𑀗𑁆𑀔𑀺𑀢𑁆𑀢𑀁 𑀲𑀗𑁆𑀓𑀼𑀘𑀺𑀢𑀁 𑀳𑁄𑀢𑀻𑀢𑀺 𑀧𑀸𑀴𑀺𑀬𑀁 ‘‘𑀧𑀩𑁆𑀩𑀢𑀲𑀗𑁆𑀔𑁂𑀧𑁂’’𑀢𑀺 𑀯𑀼𑀢𑁆𑀢𑀁. 𑀧𑀩𑁆𑀩𑀢𑀧𑀭𑀺𑀬𑀸𑀧𑀦𑁆𑀦𑁄 𑀯𑀸 𑀧𑀤𑁂𑀲𑁄 𑀧𑀩𑁆𑀩𑀢𑀲𑀗𑁆𑀔𑁂𑀧𑁄 ¶ . 𑀅𑀦𑀸𑀯𑀺𑀮𑁄𑀢𑀺 𑀅𑀓𑀸𑀮𑀼𑀲𑀺𑀬𑁄, 𑀲𑀸 𑀘𑀲𑁆𑀲 𑀅𑀦𑀸𑀯𑀺𑀮𑀢𑀸 𑀓𑀤𑁆𑀤𑀫𑀸𑀪𑀸𑀯𑁂𑀦 𑀳𑁄𑀢𑀻𑀢𑀺 𑀆𑀳 ‘‘𑀦𑀺𑀓𑁆𑀓𑀤𑁆𑀤𑀫𑁄’’𑀢𑀺. 𑀲𑀺𑀧𑁆𑀧𑀺𑀬𑁄𑀢𑀺 𑀲𑀼𑀢𑁆𑀢𑀺𑀬𑁄. 𑀲𑀫𑁆𑀩𑀼𑀓𑀸𑀢𑀺 𑀲𑀗𑁆𑀔𑀮𑀺𑀓𑀸. 𑀞𑀺𑀢𑀸𑀲𑀼𑀧𑀺 𑀦𑀺𑀲𑀺𑀦𑁆𑀦𑀸𑀲𑀼𑀧𑀺 𑀕𑀸𑀯𑀻𑀲𑀼. 𑀯𑀺𑀚𑁆𑀚𑀫𑀸𑀦𑀸𑀲𑀽𑀢𑀺 𑀮𑀩𑁆𑀪𑀫𑀸𑀦𑀸𑀲𑀼, 𑀇𑀢𑀭𑀸 𑀞𑀺𑀢𑀸𑀧𑀺 𑀦𑀺𑀲𑀺𑀦𑁆𑀦𑀸𑀧𑀺 ‘‘𑀘𑀭𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺 𑀲𑀳𑀘𑀭𑀡𑀦𑀬𑁂𑀦. 𑀢𑀺𑀝𑁆𑀞𑀦𑁆𑀢𑀫𑁂𑀯, 𑀦 𑀧𑀦 𑀓𑀤𑀸𑀘𑀺𑀧𑀺 𑀘𑀭𑀦𑁆𑀢𑀁. 𑀤𑁆𑀯𑀬𑀦𑁆𑀢𑀺 𑀲𑀺𑀧𑁆𑀧𑀺𑀲𑀫𑁆𑀩𑀼𑀓𑀁, 𑀫𑀘𑁆𑀙𑀕𑀼𑀫𑁆𑀩𑀦𑁆𑀢𑀺 𑀇𑀤𑀁 𑀉𑀪𑀬𑀁. 𑀢𑀺𑀝𑁆𑀞𑀦𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀘𑀭𑀦𑁆𑀢𑀁 ¶ 𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀇𑀢𑀭𑀜𑁆𑀘 𑀤𑁆𑀯𑀬’’𑀦𑁆𑀢𑀺 𑀘 𑀬𑀣𑀸𑀯𑀼𑀢𑁆𑀢𑀫𑁂𑀯 𑀲𑀺𑀧𑁆𑀧𑀺𑀲𑀫𑁆𑀩𑀼𑀓𑀸𑀤𑀺𑀤𑁆𑀯𑀬𑀁 𑀯𑀤𑀢𑀺. 𑀢𑀜𑁆𑀳𑀺 𑀘𑀭𑀢𑀻𑀢𑀺. 𑀓𑀺𑀁 𑀯𑀸 𑀇𑀫𑀸𑀬 𑀲𑀳𑀘𑀭𑀺𑀬𑀸𑀬, 𑀬𑀣𑀸𑀮𑀸𑀪𑀕𑁆𑀕𑀳𑀡𑀁 𑀧𑀦𑁂𑀢𑁆𑀣 𑀤𑀝𑁆𑀞𑀩𑁆𑀩𑀁. 𑀲𑀓𑁆𑀔𑀭𑀓𑀣𑀮𑀲𑁆𑀲 𑀳𑀺 𑀯𑀲𑁂𑀦 𑀢𑀺𑀝𑁆𑀞𑀦𑁆𑀢𑀦𑁆𑀢𑀺. 𑀲𑀺𑀧𑁆𑀧𑀺𑀲𑀫𑁆𑀩𑀼𑀓𑀲𑁆𑀲 𑀫𑀘𑁆𑀙𑀕𑀼𑀫𑁆𑀩𑀲𑁆𑀲 𑀘 𑀯𑀲𑁂𑀦 𑀢𑀺𑀝𑁆𑀞𑀦𑁆𑀢𑀫𑁆𑀧𑀺 𑀘𑀭𑀦𑁆𑀢𑀁 𑀧𑀻𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀢𑁂𑀲𑀁 𑀤𑀲𑀦𑁆𑀦𑀁 𑀜𑀸𑀡𑀸𑀦𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑀯𑀺𑀪𑀸𑀕𑁂, 𑀢𑁂𑀲𑀼 𑀯𑀸 𑀜𑀸𑀡𑁂𑀲𑀼. 𑀪𑀽𑀫𑀺𑀪𑁂𑀤𑀢𑁄, 𑀓𑀸𑀮𑀪𑁂𑀤𑀢𑁄, 𑀲𑀦𑁆𑀢𑀸𑀦𑀪𑁂𑀤𑀢𑁄 𑀘𑀸𑀢𑀺 𑀲𑀢𑁆𑀢𑀯𑀺𑀥𑀸𑀭𑀫𑁆𑀫𑀡𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. ‘‘𑀭𑀽𑀧𑀸𑀬𑀢𑀦𑀫𑀢𑁆𑀢𑀫𑁂𑀯𑀸’’𑀢𑀺 𑀇𑀤𑀁 𑀢𑀲𑁆𑀲 𑀜𑀸𑀡𑀲𑁆𑀲 𑀅𑀪𑀺𑀦𑀺𑀫𑁆𑀫𑀺𑀬𑀫𑀸𑀦𑁂 𑀫𑀦𑁄𑀫𑀬𑁂 𑀓𑀸𑀬𑁂 𑀭𑀽𑀧𑀸𑀬𑀢𑀦𑀫𑁂𑀯𑀸𑀭𑀩𑁆𑀪 𑀧𑀯𑀢𑁆𑀢𑀦𑀢𑁄 𑀯𑀼𑀢𑁆𑀢𑀁, 𑀦 𑀢𑀢𑁆𑀣 𑀕𑀦𑁆𑀥𑀸𑀬𑀢𑀁 𑀆𑀤𑀻𑀦𑀁 𑀅𑀪𑀸𑀯𑀢𑁄. 𑀦 𑀳𑀺 𑀭𑀽𑀧𑀓𑀮𑀸𑀧𑁄 𑀕𑀦𑁆𑀥𑀸𑀬𑀢𑀁 𑀆𑀤𑀺𑀭𑀳𑀺𑀢𑁄 𑀅𑀢𑁆𑀣𑀺. 𑀧𑀭𑀺𑀦𑀺𑀧𑁆𑀨𑀦𑁆𑀦𑀫𑁂𑀯 𑀦𑀺𑀫𑁆𑀫𑀺𑀢𑀭𑀽𑀧𑀁, 𑀢𑁂𑀦𑀸𑀳 ‘‘𑀧𑀭𑀺𑀢𑁆𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀩𑀳𑀺𑀤𑁆𑀥𑀸𑀭𑀫𑁆𑀫𑀡’’𑀦𑁆𑀢𑀺. 𑀆𑀲𑀯𑀓𑁆𑀔𑀬𑀜𑀸𑀡𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀫𑁂𑀯 𑀲𑀫𑀸𑀦𑀁 𑀧𑀭𑀺𑀢𑁆𑀢𑀢𑁆𑀢𑀺𑀓𑀯𑀲𑁂𑀦 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀁, 𑀅𑀚𑁆𑀛𑀢𑁆𑀢𑀢𑁆𑀢𑀺𑀓𑀯𑀲𑁂𑀦 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁, 𑀅𑀢𑀻𑀢𑀢𑁆𑀢𑀺𑀓𑀯𑀲𑁂𑀦 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀜𑁆𑀘 𑀳𑁄𑀢𑀻𑀢𑀺 𑀆𑀳 ‘‘𑀅𑀧𑁆𑀧𑀫𑀸𑀡𑀩𑀳𑀺𑀤𑁆𑀥𑀸𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡’’𑀦𑁆𑀢𑀺. 𑀓𑀽𑀝𑁄 ¶ 𑀯𑀺𑀬 𑀓𑀽𑀝𑀸𑀕𑀸𑀭𑀲𑁆𑀲 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀅𑀭𑀳𑀢𑁆𑀢𑀁 𑀉𑀢𑁆𑀢𑀫𑀗𑁆𑀕𑀪𑀽𑀢𑀦𑁆𑀢𑀺 𑀆𑀳 ‘‘𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑀸’’𑀢𑀺. 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀻𑀢𑀺 𑀢𑀺𑀢𑁆𑀣𑀓𑀭𑀫𑀢𑀳𑀭𑀯𑀺𑀪𑀸𑀯𑀺𑀦𑀺𑀁 𑀦𑀸𑀦𑀸𑀯𑀺𑀥𑀓𑀼𑀳𑀦𑀮𑀧𑀦𑀸𑀤𑀺𑀫𑀺𑀘𑁆𑀙𑀸𑀚𑀻𑀯𑀯𑀺𑀤𑁆𑀥𑀁𑀲𑀺𑀦𑀺𑀁 𑀢𑀺𑀯𑀺𑀥𑀲𑀻𑀮𑀸𑀮𑀗𑁆𑀓𑀢𑀁 𑀧𑀭𑀫𑀲𑀮𑁆𑀮𑁂𑀔𑀧𑀝𑀺𑀧𑀢𑁆𑀢𑀺𑀤𑀻𑀧𑀦𑀺𑀁 𑀛𑀸𑀦𑀸𑀪𑀺𑀜𑁆𑀜𑀸𑀤𑀺𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀯𑀺𑀪𑀽𑀲𑀺𑀢𑀁 𑀘𑀼𑀤𑁆𑀤𑀲𑀯𑀺𑀥𑀫𑀳𑀸𑀲𑀸𑀫𑀜𑁆𑀜𑀨𑀮𑀧𑀝𑀺𑀫𑀡𑁆𑀟𑀺𑀢𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑀅𑀚𑀸𑀢𑀲𑀢𑁆𑀢𑀼𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸𑀓𑀣𑀸𑀯𑀡𑁆𑀡𑀦𑀸

𑁨𑁫𑁦. 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀦𑁆𑀢𑀺 ¶ 𑀆𑀤𑀺𑀜𑁆𑀘 𑀫𑀚𑁆𑀛𑀜𑁆𑀘 𑀧𑀭𑀺𑀬𑁄𑀲𑀸𑀦𑀜𑁆𑀘. 𑀲𑀓𑁆𑀓𑀘𑁆𑀘𑀁 𑀲𑀕𑀸𑀭𑀯𑀁. 𑀆𑀭𑀤𑁆𑀥𑀁 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺.

𑀅𑀪𑀺𑀓𑁆𑀓𑀦𑁆𑀢𑀸 𑀯𑀺𑀕𑀢𑀸𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀔𑀬𑁂 𑀤𑀺𑀲𑁆𑀲𑀢𑀻’’𑀢𑀺. 𑀢𑀣𑀸 𑀳𑀺 ‘‘𑀦𑀺𑀓𑁆𑀔𑀦𑁆𑀢𑁄 𑀧𑀞𑀫𑁄 𑀬𑀸𑀫𑁄’’𑀢𑀺 𑀉𑀧𑀭𑀺 𑀯𑀼𑀢𑁆𑀢𑀁. 𑀅𑀪𑀺𑀓𑁆𑀓𑀦𑁆𑀢𑀢𑀭𑁄𑀢𑀺 𑀅𑀢𑀺𑀯𑀺𑀬 𑀓𑀦𑁆𑀢𑀢𑀭𑁄 𑀫𑀦𑁄𑀭𑀫𑁄, 𑀢𑀸𑀤𑀺𑀲𑁄 𑀘 𑀲𑀼𑀦𑁆𑀤𑀭𑁄 𑀪𑀤𑁆𑀤𑀓𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀲𑀼𑀦𑁆𑀤𑀭𑁂 𑀤𑀺𑀲𑁆𑀲𑀢𑀻’’𑀢𑀺. 𑀓𑁄𑀢𑀺 𑀤𑁂𑀯𑀦𑀸𑀕𑀬𑀓𑁆𑀔𑀕𑀦𑁆𑀥𑀩𑁆𑀩𑀸𑀤𑀻𑀲𑀼 𑀓𑁄 𑀓𑀢𑀫𑁄. 𑀫𑁂𑀢𑀺 𑀫𑀫. 𑀧𑀸𑀤𑀸𑀦𑀻𑀢𑀺 𑀧𑀸𑀤𑁂. 𑀇𑀤𑁆𑀥𑀺𑀬𑀸𑀢𑀺 𑀇𑀫𑀸𑀬 𑀏𑀯𑀭𑀽𑀧𑀸𑀬 𑀤𑁂𑀯𑀺𑀤𑁆𑀥𑀺𑀬𑀸. 𑀬𑀲𑀲𑀸𑀢𑀺 𑀇𑀫𑀺𑀦𑀸 𑀏𑀤𑀺𑀲𑁂𑀦 𑀧𑀭𑀺𑀯𑀸𑀭𑁂𑀦, 𑀧𑀭𑀺𑀚𑀦𑁂𑀦 𑀘. 𑀚𑀮𑀦𑁆𑀢𑀺 𑀯𑀺𑀚𑁆𑀚𑁄𑀢𑀫𑀸𑀦𑁄. 𑀅𑀪𑀺𑀓𑁆𑀓𑀦𑁆𑀢𑁂𑀦𑀸𑀢𑀺 𑀅𑀢𑀺𑀯𑀺𑀬 𑀓𑀦𑁆𑀢𑁂𑀦 𑀓𑀫𑀦𑀻𑀬𑁂𑀦 𑀅𑀪𑀺𑀭𑀽𑀧𑁂𑀦. 𑀯𑀡𑁆𑀡𑁂𑀦𑀸𑀢𑀺 𑀙𑀯𑀺𑀯𑀡𑁆𑀡𑁂𑀦 𑀲𑀭𑀻𑀭𑀯𑀡𑁆𑀡𑀦𑀺𑀪𑀸𑀬 ¶ . 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸𑀢𑀺 𑀤𑀲𑀧𑀺 𑀤𑀺𑀲𑀸 𑀧𑀪𑀸𑀲𑁂𑀦𑁆𑀢𑁄 𑀘𑀦𑁆𑀤𑁄 𑀯𑀺𑀬, 𑀲𑀽𑀭𑀺𑀬𑁄 𑀯𑀺𑀬 𑀘 𑀏𑀓𑁄𑀪𑀸𑀲𑀁 𑀏𑀓𑀸𑀮𑁄𑀓𑀁 𑀓𑀭𑁄𑀦𑁆𑀢𑁄𑀢𑀺 𑀕𑀸𑀣𑀸𑀬 𑀅𑀢𑁆𑀣𑁄. 𑀅𑀪𑀺𑀭𑀽𑀧𑁂𑀢𑀺 𑀉𑀴𑀸𑀭𑀭𑀽𑀧𑁂 𑀲𑀫𑁆𑀧𑀦𑁆𑀦𑀭𑀽𑀧𑁂.

‘‘𑀘𑁄𑀭𑁄 𑀘𑁄𑀭𑁄, 𑀲𑀧𑁆𑀧𑁄 𑀲𑀧𑁆𑀧𑁄’’𑀢𑀺𑀆𑀤𑀻𑀲𑀼 𑀪𑀬𑁂 𑀆𑀫𑁂𑀟𑀺𑀢𑀁, ‘‘𑀯𑀺𑀚𑁆𑀛 𑀯𑀺𑀚𑁆𑀛, 𑀧𑀳𑀭 𑀧𑀳𑀭𑀸’’𑀢𑀺𑀆𑀤𑀻𑀲𑀼 𑀓𑁄𑀥𑁂, ‘‘𑀲𑀸𑀥𑀼 𑀲𑀸𑀥𑀽𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁨𑁭; 𑀲𑀁. 𑀦𑀺. 𑁨.𑁧𑁨𑁭; 𑁩.𑁩𑁫; 𑁫.𑁧𑁦𑁦𑁫) 𑀧𑀲𑀁𑀲𑀸𑀬𑀁, ‘‘𑀕𑀘𑁆𑀙 𑀕𑀘𑁆𑀙, 𑀮𑀼𑀦𑀸𑀳𑀺 𑀮𑀼𑀦𑀸𑀳𑀻’’𑀢𑀺𑀆𑀤𑀻𑀲𑀼 𑀢𑀼𑀭𑀺𑀢𑁂, ‘‘𑀆𑀕𑀘𑁆𑀙 𑀆𑀕𑀘𑁆𑀙𑀸’’𑀢𑀺𑀆𑀤𑀻𑀲𑀼 𑀓𑁄𑀢𑀽𑀳𑀮𑁂, ‘‘𑀩𑀼𑀤𑁆𑀥𑁄 𑀩𑀼𑀤𑁆𑀥𑁄𑀢𑀺 𑀘𑀺𑀦𑁆𑀢𑁂𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀩𑀼. 𑀯𑀁. 𑁪𑁪) 𑀅𑀘𑁆𑀙𑀭𑁂 ¶ , ‘‘𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄 𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁨𑁦; 𑀅. 𑀦𑀺. 𑁯.𑁧𑁧) 𑀳𑀸𑀲𑁂, ‘‘𑀓𑀳𑀁 𑀏𑀓𑀧𑀼𑀢𑁆𑀢𑀓 𑀓𑀳𑀁 𑀏𑀓𑀧𑀼𑀢𑁆𑀢𑀓𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁬𑁩) 𑀲𑁄𑀓𑁂, ‘‘𑀅𑀳𑁄 𑀲𑀼𑀔𑀁 𑀅𑀳𑁄 𑀲𑀼𑀔’’𑀦𑁆𑀢𑀺𑀆𑀤𑀻𑀲𑀼 (𑀉𑀤𑀸. 𑁨𑁦; 𑀤𑀻. 𑀦𑀺. 𑁩.𑁩𑁦𑁫; 𑀘𑀽𑀴𑀯. 𑁩𑁩𑁨) 𑀧𑀲𑀸𑀤𑁂. 𑀘-𑀲𑀤𑁆𑀤𑁄 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄, 𑀢𑁂𑀦 𑀕𑀭𑀳𑀸𑀅𑀲𑀫𑁆𑀫𑀸𑀦𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣 ‘‘𑀧𑀸𑀧𑁄 𑀧𑀸𑀧𑁄’’𑀢𑀺𑀆𑀤𑀻𑀲𑀼 𑀕𑀭𑀳𑀸𑀬𑀁, ‘‘𑀅𑀪𑀺𑀭𑀽𑀧𑀓 𑀅𑀪𑀺𑀭𑀽𑀧𑀓𑀸’’𑀢𑀺𑀆𑀤𑀻𑀲𑀼 𑀅𑀲𑀫𑁆𑀫𑀸𑀦𑁂 𑀤𑀝𑁆𑀞𑀩𑁆𑀩𑀁.

𑀦𑀬𑀺𑀤𑀁 𑀆𑀫𑁂𑀟𑀺𑀢𑀯𑀲𑁂𑀦 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑀁, 𑀅𑀣 𑀔𑁄 𑀅𑀢𑁆𑀣𑀤𑁆𑀯𑀬𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳 ‘‘𑀅𑀪𑀺𑀓𑁆𑀓𑀦𑁆𑀢’’𑀦𑁆𑀢𑀺 𑀯𑀘𑀦𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀁 𑀧𑀦 𑀪𑀕𑀯𑀢𑁄 𑀯𑀘𑀦𑀁 𑀥𑀫𑁆𑀫𑀲𑁆𑀲 𑀤𑁂𑀲𑀦𑀸𑀢𑀺 𑀓𑀢𑁆𑀯𑀸 ¶ 𑀢𑀣𑀸 𑀯𑀼𑀢𑁆𑀢𑀁. 𑀅𑀢𑁆𑀣𑀫𑀢𑁆𑀢𑀤𑀲𑁆𑀲𑀦𑀁 𑀯𑀸 𑀏𑀢𑀁, 𑀢𑀲𑁆𑀫𑀸 𑀅𑀢𑁆𑀣𑀯𑀲𑁂𑀦𑁂𑀢𑁆𑀣 𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀧𑀭𑀺𑀡𑀸𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀤𑁄𑀲𑀦𑀸𑀲𑀦𑀢𑁄𑀢𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀯𑀺𑀥𑀫𑀦𑀢𑁄. 𑀕𑀼𑀡𑀸𑀥𑀺𑀕𑀫𑀦𑀢𑁄𑀢𑀺 𑀲𑀻𑀮𑀸𑀤𑀺𑀕𑀼𑀡𑀸𑀦𑀁 𑀲𑀫𑁆𑀧𑀸𑀤𑀦𑀢𑁄. 𑀬𑁂 𑀕𑀼𑀡𑁂 𑀤𑁂𑀲𑀦𑀸 𑀅𑀥𑀺𑀕𑀫𑁂𑀢𑀺, 𑀢𑁂𑀲𑀼 𑀧𑀥𑀸𑀦𑀪𑀽𑀢𑀸 𑀤𑀲𑁆𑀲𑁂𑀢𑀩𑁆𑀩𑀸𑀢𑀺 𑀢𑁂 𑀧𑀥𑀸𑀦𑀪𑀽𑀢𑁂 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀲𑀤𑁆𑀥𑀸𑀚𑀦𑀦𑀢𑁄 𑀧𑀜𑁆𑀜𑀸𑀚𑀦𑀦𑀢𑁄’’𑀢𑀺 𑀯𑀼𑀢𑁆𑀢𑀁. 𑀲𑀤𑁆𑀥𑀸𑀧𑀫𑀼𑀔𑀸 𑀳𑀺 𑀮𑁄𑀓𑀺𑀬𑀸 𑀕𑀼𑀡𑀸 𑀧𑀜𑁆𑀜𑀸𑀧𑀫𑀼𑀔𑀸 𑀮𑁄𑀓𑀼𑀢𑁆𑀢𑀭𑀸. 𑀲𑀻𑀮𑀸𑀤𑀺𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀲𑀸𑀢𑁆𑀣𑀢𑁄. 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀬𑀜𑁆𑀚𑀦𑀢𑁄. 𑀲𑀼𑀯𑀺𑀜𑁆𑀜𑁂𑀬𑁆𑀬𑀲𑀤𑁆𑀤𑀧𑀬𑁄𑀕𑀢𑀸𑀬 𑀉𑀢𑁆𑀢𑀸𑀦𑀧𑀤𑀢𑁄. 𑀲𑀡𑁆𑀳𑀲𑀼𑀔𑀼𑀫𑀪𑀸𑀯𑁂𑀦 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀢𑁆𑀣𑀢𑀸𑀬 𑀕𑀫𑁆𑀪𑀻𑀭𑀢𑁆𑀣𑀢𑁄. 𑀲𑀺𑀦𑀺𑀤𑁆𑀥𑀫𑀼𑀤𑀼𑀫𑀥𑀼𑀭𑀲𑀤𑁆𑀤𑀧𑀬𑁄𑀕𑀢𑀸𑀬 𑀓𑀡𑁆𑀡𑀲𑀼𑀔𑀢𑁄. 𑀯𑀺𑀧𑀼𑀮𑀯𑀺𑀲𑀼𑀤𑁆𑀥𑀧𑁂𑀫𑀦𑀻𑀬𑀢𑁆𑀣𑀢𑀸𑀬 𑀳𑀤𑀬𑀗𑁆𑀕𑀫𑀢𑁄. 𑀫𑀸𑀦𑀸𑀢𑀺𑀫𑀸𑀦𑀯𑀺𑀥𑀫𑀦𑁂𑀦 𑀅𑀦𑀢𑁆𑀢𑀼𑀓𑁆𑀓𑀁𑀲𑀦𑀢𑁄. 𑀣𑀫𑁆𑀪𑀲𑀸𑀭𑀫𑁆𑀪𑀦𑀺𑀫𑁆𑀫𑀤𑁆𑀤𑀦𑁂𑀦 𑀅𑀧𑀭𑀯𑀫𑁆𑀪𑀦𑀢𑁄. 𑀳𑀺𑀢𑀸𑀥𑀺𑀧𑁆𑀧𑀸𑀬𑀧𑁆𑀧𑀯𑀢𑁆𑀢𑀺𑀬𑀸, 𑀧𑀭𑁂𑀲𑀁 𑀭𑀸𑀕𑀧𑀭𑀺𑀴𑀸𑀳𑀸𑀤𑀺𑀯𑀽𑀧𑀕𑀫𑀦𑁂𑀦 ¶ 𑀘 𑀓𑀭𑀼𑀡𑀸𑀲𑀻𑀢𑀮𑀢𑁄. 𑀓𑀺𑀮𑁂𑀲𑀦𑁆𑀥𑀓𑀸𑀭𑀯𑀺𑀥𑀫𑀦𑁂𑀦 𑀧𑀜𑁆𑀜𑀸𑀯𑀤𑀸𑀢𑀢𑁄. 𑀓𑀭𑀯𑀻𑀓𑀭𑀼𑀢𑀫𑀜𑁆𑀚𑀼𑀢𑀸𑀬 𑀆𑀧𑀸𑀣𑀭𑀫𑀡𑀻𑀬𑀢𑁄. 𑀧𑀼𑀩𑁆𑀩𑀸𑀧𑀭𑀸𑀯𑀺𑀭𑀼𑀤𑁆𑀥𑀲𑀼𑀯𑀺𑀲𑀼𑀤𑁆𑀥𑀢𑀸𑀬 𑀯𑀺𑀫𑀤𑁆𑀤𑀓𑁆𑀔𑀫𑀢𑁄. 𑀆𑀧𑀸𑀣𑀭𑀫𑀡𑀻𑀬𑀢𑀸𑀬 𑀏𑀯 𑀲𑀼𑀬𑁆𑀬𑀫𑀸𑀦𑀲𑀼𑀔𑀢𑁄. 𑀯𑀺𑀫𑀤𑁆𑀤𑀓𑁆𑀔𑀫𑀢𑀸𑀬, 𑀳𑀺𑀢𑀚𑁆𑀛𑀸𑀲𑀬𑀧𑁆𑀧𑀯𑀢𑁆𑀢𑀺𑀢𑀸𑀬 𑀘 𑀯𑀻𑀫𑀁𑀲𑀺𑀬𑀫𑀸𑀦𑀳𑀺𑀢𑀢𑁄. 𑀏𑀯𑀫𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀁𑀲𑀸𑀭𑀘𑀓𑁆𑀓𑀦𑀺𑀯𑀢𑁆𑀢𑀦𑀢𑁄 𑀲𑀤𑁆𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀢𑁄, 𑀫𑀺𑀘𑁆𑀙𑀸𑀯𑀸𑀤𑀯𑀺𑀤𑁆𑀥𑀁𑀲𑀦𑀢𑁄 𑀲𑀫𑁆𑀫𑀸𑀯𑀸𑀤𑀧𑀢𑀺𑀝𑁆𑀞𑀸𑀧𑀦𑀢𑁄, 𑀅𑀓𑀼𑀲𑀮𑀫𑀽𑀮𑀲𑀫𑀼𑀤𑁆𑀥𑀭𑀡𑀢𑁄 ¶ 𑀓𑀼𑀲𑀮𑀫𑀽𑀮𑀲𑀁𑀭𑁄𑀧𑀦𑀢𑁄, 𑀅𑀧𑀸𑀬𑀤𑁆𑀯𑀸𑀭𑀧𑀺𑀥𑀸𑀦𑀢𑁄 𑀲𑀕𑁆𑀕𑀫𑀕𑁆𑀕𑀤𑁆𑀯𑀸𑀭𑀯𑀺𑀯𑀭𑀡𑀢𑁄, 𑀧𑀭𑀺𑀬𑀼𑀝𑁆𑀞𑀸𑀦𑀯𑀽𑀧𑀲𑀫𑀦𑀢𑁄 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀝𑀦𑀢𑁄𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀅𑀥𑁄𑀫𑀼𑀔𑀝𑁆𑀞𑀧𑀺𑀢𑀦𑁆𑀢𑀺 𑀓𑁂𑀦𑀘𑀺 𑀅𑀥𑁄𑀫𑀼𑀔𑀁 𑀞𑀧𑀺𑀢𑀁. 𑀳𑁂𑀝𑁆𑀞𑀸𑀫𑀼𑀔𑀚𑀸𑀢𑀦𑁆𑀢𑀺 𑀲𑀪𑀸𑀯𑁂𑀦𑁂𑀯 𑀳𑁂𑀝𑁆𑀞𑀸𑀫𑀼𑀔𑀁 𑀚𑀸𑀢𑀁. 𑀉𑀕𑁆𑀖𑀸𑀝𑁂𑀬𑁆𑀬𑀸𑀢𑀺 𑀯𑀺𑀯𑀝𑀁 𑀓𑀭𑁂𑀬𑁆𑀬. 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 ‘‘𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄, 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀯𑀸 𑀕𑀘𑁆𑀙𑀸’’𑀢𑀺𑀆𑀤𑀻𑀦𑀺 𑀅𑀯𑀢𑁆𑀯𑀸 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀦𑀺𑀲𑁆𑀲𑀦𑁆𑀤𑁂𑀳𑀁 𑀓𑀢𑁆𑀯𑀸. ‘‘𑀏𑀲 𑀫𑀕𑁆𑀕𑁄, 𑀏𑀯𑀁 𑀕𑀘𑁆𑀙𑀸’’𑀢𑀺 𑀤𑀲𑁆𑀲𑁂𑀬𑁆𑀬. 𑀓𑀸𑀴𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀻𑀢𑀺 𑀓𑀸𑀴𑀧𑀓𑁆𑀔𑁂 𑀘𑀸𑀢𑀼𑀤𑁆𑀤𑀲𑀻. 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀆𑀥𑁂𑀬𑁆𑀬𑀲𑁆𑀲 𑀅𑀦𑀸𑀥𑀸𑀭𑀪𑀽𑀢𑀁 𑀪𑀸𑀚𑀦𑀁 𑀆𑀥𑀸𑀭𑀪𑀸𑀯𑀸𑀧𑀸𑀤𑀦𑀯𑀲𑁂𑀦 𑀉𑀓𑁆𑀓𑀼𑀚𑁆𑀚𑁂𑀬𑁆𑀬. 𑀅𑀜𑁆𑀜𑀸𑀡𑀲𑁆𑀲 𑀅𑀪𑀺𑀫𑀼𑀔𑀢𑁆𑀢𑀸 𑀳𑁂𑀝𑁆𑀞𑀸𑀫𑀼𑀔𑀚𑀸𑀢𑀢𑀸𑀬 𑀲𑀤𑁆𑀥𑀫𑁆𑀫𑀯𑀺𑀫𑀼𑀔𑀁 𑀅𑀥𑁄𑀫𑀼𑀔𑀝𑁆𑀞𑀧𑀺𑀢𑀢𑀸𑀬 𑀅𑀲𑀤𑁆𑀥𑀫𑁆𑀫𑁂 𑀧𑀢𑀺𑀢𑀦𑁆𑀢𑀺 𑀏𑀯𑀁 𑀧𑀤𑀤𑁆𑀯𑀬𑀁 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀁, 𑀦 𑀬𑀣𑀸𑀲𑀗𑁆𑀔𑁆𑀬𑀁. 𑀓𑀸𑀫𑀁 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄 𑀧𑀝𑀺𑀘𑁆𑀙𑀸𑀤𑀓𑀸 𑀦𑀻𑀯𑀭𑀡𑀪𑀸𑀯𑀢𑁄, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀦 𑀲𑀯𑀺𑀲𑁂𑀲𑀁 𑀧𑀝𑀺𑀘𑁆𑀙𑀸𑀤𑀺𑀓𑀸 𑀲𑀢𑁆𑀢𑁂 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀦𑀯𑀲𑁂𑀦𑀸𑀢𑀺 𑀆𑀳 ¶ ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑀳𑀦𑀧𑀝𑀺𑀘𑁆𑀙𑀦𑁆𑀦’’𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸𑀳𑀁 ¶ 𑀪𑀺𑀓𑁆𑀔𑀯𑁂 𑀯𑀚𑁆𑀚𑀁 𑀯𑀤𑀸𑀫𑀻’’𑀢𑀺. 𑀲𑀩𑁆𑀩𑁄 𑀅𑀧𑀸𑀬𑀕𑀸𑀫𑀺𑀫𑀕𑁆𑀕𑁄 𑀓𑀼𑀫𑁆𑀫𑀕𑁆𑀕𑁄 𑀓𑀼𑀘𑁆𑀙𑀺𑀢𑁄 𑀫𑀕𑁆𑀕𑁄𑀢𑀺 𑀓𑀢𑁆𑀯𑀸. 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀉𑀚𑀼𑀧𑀝𑀺𑀧𑀓𑁆𑀔𑀢𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀬𑁄 𑀅𑀝𑁆𑀞 𑀫𑀺𑀘𑁆𑀙𑀢𑁆𑀢𑀥𑀫𑁆𑀫𑀸 𑀫𑀺𑀘𑁆𑀙𑀸𑀫𑀕𑁆𑀕𑀸. 𑀢𑁂𑀦𑁂𑀯 𑀳𑀺 𑀢𑀤𑀼𑀪𑀬𑀧𑀝𑀺𑀧𑀓𑁆𑀔𑀢𑀁 𑀲𑀦𑁆𑀥𑀸𑀬 ‘‘𑀲𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑀁 𑀆𑀯𑀺𑀓𑀭𑁄𑀦𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑀧𑁆𑀧𑀺𑀆𑀤𑀺𑀲𑀦𑁆𑀦𑀺𑀲𑁆𑀲𑀬𑁄 𑀧𑀤𑀻𑀧𑁄 𑀦 𑀢𑀣𑀸 𑀉𑀚𑁆𑀚𑀮𑁄, 𑀬𑀣𑀸 𑀢𑁂𑀮𑀲𑀦𑁆𑀦𑀺𑀲𑁆𑀲𑀬𑁄𑀢𑀺 𑀢𑁂𑀮𑀧𑀚𑁆𑀚𑁄𑀢-𑀕𑁆𑀕𑀳𑀡𑀁. 𑀏𑀢𑁂𑀳𑀺 𑀧𑀭𑀺𑀬𑀸𑀬𑁂𑀳𑀻𑀢𑀺 𑀏𑀢𑁂𑀳𑀺 𑀦𑀺𑀓𑁆𑀓𑀼𑀚𑁆𑀚𑀺𑀢𑀼𑀓𑁆𑀓𑀼𑀚𑁆𑀚𑀦𑀧𑀝𑀺𑀘𑁆𑀙𑀦𑁆𑀦𑀯𑀺𑀯𑀭𑀡𑀸𑀤𑀺𑀉𑀧𑀫𑁄𑀧𑀫𑀺𑀢𑀩𑁆𑀩𑀧𑁆𑀧𑀓𑀸𑀭𑁂𑀳𑀺, 𑀏𑀢𑁂𑀳𑀺 𑀯𑀸 𑀬𑀣𑀸𑀯𑀼𑀢𑁆𑀢𑁂𑀳𑀺 𑀦𑀸𑀦𑀸𑀯𑀺𑀥𑀓𑀼𑀳𑀦𑀮𑀧𑀦𑀸𑀤𑀺𑀫𑀺𑀘𑁆𑀙𑀸𑀚𑀻𑀯𑀯𑀺𑀯𑀺𑀥𑀫𑀦𑀸𑀤𑀺𑀯𑀺𑀪𑀸𑀯𑀦𑀧𑀭𑀺𑀬𑀸𑀬𑁂𑀳𑀺. 𑀢𑁂𑀦𑀸𑀳 ‘‘𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄’’𑀢𑀺.

𑀧𑀲𑀦𑁆𑀦𑀓𑀸𑀭𑀦𑁆𑀢𑀺 𑀧𑀲𑀦𑁆𑀦𑁂𑀳𑀺 𑀓𑀸𑀢𑀩𑁆𑀩𑀁 𑀲𑀓𑁆𑀓𑀸𑀭𑀁. 𑀲𑀭𑀡𑀦𑁆𑀢𑀺 𑀧𑀝𑀺𑀲𑀭𑀡𑀁, 𑀢𑁂𑀦𑀸𑀳 ‘‘𑀧𑀭𑀸𑀬𑀡’’𑀦𑁆𑀢𑀺. 𑀧𑀭𑀸𑀬𑀡𑀪𑀸𑀯𑁄 𑀘 𑀅𑀦𑀢𑁆𑀣𑀦𑀺𑀲𑁂𑀥𑀦𑁂𑀦, 𑀅𑀢𑁆𑀣𑀲𑀫𑁆𑀧𑀝𑀺𑀧𑀸𑀤𑀦𑁂𑀦 𑀘 𑀳𑁄𑀢𑀻𑀢𑀺 𑀆𑀳 ‘‘𑀅𑀖𑀲𑁆𑀲 𑀢𑀸𑀢𑀸, 𑀳𑀺𑀢𑀲𑁆𑀲 𑀘 𑀯𑀺𑀥𑀸𑀢𑀸’’𑀢𑀺. 𑀅𑀖𑀲𑁆𑀲𑀸𑀢𑀺 𑀤𑀼𑀓𑁆𑀔𑀢𑁄𑀢𑀺 𑀯𑀤𑀦𑁆𑀢𑀺, 𑀧𑀸𑀧𑀢𑁄𑀢𑀺 𑀧𑀦 𑀅𑀢𑁆𑀣𑁄 𑀬𑀼𑀢𑁆𑀢𑁄, 𑀦𑀺𑀲𑁆𑀲𑀓𑁆𑀓𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀏𑀢𑁆𑀣 𑀘 𑀦𑀸𑀬𑀁 𑀕𑀫𑀼-𑀲𑀤𑁆𑀤𑁄 𑀦𑀻-𑀲𑀤𑁆𑀤𑀸𑀤𑀬𑁄 𑀯𑀺𑀬 𑀤𑁆𑀯𑀺𑀓𑀫𑁆𑀫𑀓𑁄, 𑀢𑀲𑁆𑀫𑀸 𑀬𑀣𑀸 ‘‘𑀅𑀚𑀁 𑀕𑀸𑀫𑀁 𑀦𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 ‘‘𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸, ‘‘𑀲𑀭𑀡𑀦𑁆𑀢𑀺 𑀕𑀘𑁆𑀙𑀸𑀫𑀻’’𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁. 𑀇𑀢𑀺-𑀲𑀤𑁆𑀤𑁄 𑀘𑁂𑀢𑁆𑀣 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. 𑀢𑀲𑁆𑀲 𑀘𑀸𑀬𑀫𑀢𑁆𑀣𑁄. 𑀕𑀫𑀦𑀜𑁆𑀘 𑀢𑀤𑀥𑀺𑀧𑁆𑀧𑀸𑀬𑁂𑀦 𑀪𑀚𑀦𑀁 𑀚𑀸𑀦𑀦𑀁 𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀪𑀚𑀸𑀫𑀻’’𑀢𑀺𑀆𑀤𑀻𑀲𑀼 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀅𑀢𑁆𑀣𑀯𑀘𑀦𑀁, 𑀪𑀚𑀦𑀁 𑀯𑀸 𑀲𑀭𑀡𑀸𑀥𑀺𑀧𑁆𑀧𑀸𑀬𑁂𑀦 𑀉𑀧𑀲𑀗𑁆𑀓𑀫𑀦𑀁, 𑀲𑁂𑀯𑀦𑀁 𑀲𑀦𑁆𑀢𑀺𑀓𑀸𑀯𑀘𑀭𑀢𑀸, 𑀧𑀬𑀺𑀭𑀼𑀧𑀸𑀲𑀦𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀓𑀭𑀡𑁂𑀦 𑀉𑀧𑀝𑁆𑀞𑀸𑀦𑀦𑁆𑀢𑀺 ¶ 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀅𑀦𑀜𑁆𑀜𑀲𑀭𑀡𑀢𑀁𑀬𑁂𑀯 𑀤𑀻𑀧𑁂𑀢𑀺. ‘‘𑀕𑀘𑁆𑀙𑀸𑀫𑀻’’𑀢𑀺 ¶ 𑀧𑀤𑀲𑁆𑀲 𑀩𑀼𑀚𑁆𑀛𑀸𑀫𑀻𑀢𑀺 𑀅𑀬𑀫𑀢𑁆𑀣𑁄 𑀓𑀣𑀁 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀬𑁂𑀲𑀜𑁆𑀳𑀻’’𑀢𑀺𑀆𑀤𑀺.

‘‘𑀅𑀥𑀺𑀕𑀢𑀫𑀕𑁆𑀕𑁂 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁂’’𑀢𑀺 𑀧𑀤𑀤𑁆𑀯𑀬𑁂𑀦𑀸𑀧𑀺 𑀨𑀮𑀝𑁆𑀞𑀸 𑀏𑀯 𑀤𑀲𑁆𑀲𑀺𑀢𑀸, 𑀦 𑀫𑀕𑁆𑀕𑀝𑁆𑀞𑀸𑀢𑀺 𑀢𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀘𑀸’’𑀢𑀺𑀆𑀤𑀺𑀫𑀸𑀳. 𑀦𑀦𑀼 𑀘 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁄𑀧𑀺 ‘‘𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀢𑀻’’𑀢𑀺 𑀯𑀼𑀘𑁆𑀘𑀢𑀻𑀢𑀺? 𑀓𑀺𑀜𑁆𑀘𑀸𑀧𑀺 𑀯𑀼𑀘𑁆𑀘𑀢𑀺, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀫𑀕𑁆𑀕𑀝𑁆𑀞𑀸 𑀏𑀯 𑀢𑀣𑀸 𑀯𑀢𑁆𑀢𑀩𑁆𑀩𑀸, 𑀦 𑀇𑀢𑀭𑁄 𑀦𑀺𑀬𑀸𑀫𑁄𑀓𑁆𑀓𑀫𑀦𑀸𑀪𑀸𑀯𑀢𑁄. 𑀢𑀣𑀸 𑀳𑀺 𑀢𑁂 𑀏𑀯 𑀯𑀼𑀢𑁆𑀢𑀸 ‘‘𑀅𑀧𑀸𑀬𑁂𑀲𑀼 𑀅𑀧𑀢𑀫𑀸𑀦𑁂 𑀥𑀸𑀭𑁂𑀢𑀻’’𑀢𑀺. 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄𑀓𑁆𑀓𑀫𑀦𑁂𑀦 𑀳𑀺 𑀅𑀧𑀸𑀬𑀯𑀺𑀦𑀺𑀫𑀼𑀢𑁆𑀢𑀲𑀫𑁆𑀪𑀯𑁄 ¶ . 𑀅𑀓𑁆𑀔𑀸𑀬𑀢𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄 𑀯𑀸, 𑀢𑁂𑀦 ‘‘𑀬𑀸𑀯𑀢𑀸 𑀪𑀺𑀓𑁆𑀔𑀯𑁂 𑀥𑀫𑁆𑀫𑀸 𑀲𑀗𑁆𑀔𑀢𑀸 𑀯𑀸 𑀅𑀲𑀗𑁆𑀔𑀢𑀸 𑀯𑀸, 𑀯𑀺𑀭𑀸𑀕𑁄 𑀢𑁂𑀲𑀁 𑀅𑀕𑁆𑀕𑀁 𑀅𑀓𑁆𑀔𑀸𑀬𑀢𑀻’’𑀢𑀺 (𑀇𑀢𑀺𑀯𑀼. 𑁯𑁦; 𑀅. 𑀦𑀺. 𑁪.𑁩𑁪) 𑀲𑀼𑀢𑁆𑀢𑀧𑀤𑀁 𑀲𑀗𑁆𑀕𑀡𑁆𑀳𑀸𑀢𑀺, ‘‘𑀯𑀺𑀢𑁆𑀣𑀸𑀭𑁄’’𑀢𑀺 𑀯𑀸 𑀇𑀫𑀺𑀦𑀸. 𑀏𑀢𑁆𑀣 𑀘 𑀅𑀭𑀺𑀬𑀫𑀕𑁆𑀕𑁄 𑀦𑀺𑀬𑁆𑀬𑀸𑀦𑀺𑀓𑀢𑀸𑀬, 𑀦𑀺𑀩𑁆𑀩𑀸𑀦𑀁 𑀢𑀲𑁆𑀲 𑀢𑀤𑀢𑁆𑀣𑀲𑀺𑀤𑁆𑀥𑀺𑀳𑁂𑀢𑀼𑀢𑀸𑀬𑀸𑀢𑀺 𑀉𑀪𑀬𑀫𑁂𑀯 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 ‘‘𑀥𑀫𑁆𑀫𑁄’’𑀢𑀺 𑀯𑀼𑀢𑁆𑀢𑁄. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀁 𑀮𑀪𑀺𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀲𑁆𑀲 𑀢𑀤𑀢𑁆𑀣𑀲𑀺𑀤𑁆𑀥𑀺. 𑀢𑀣𑀸𑀧𑀺 𑀬𑀲𑁆𑀫𑀸 𑀅𑀭𑀺𑀬𑀨𑀮𑀸𑀦𑀁 ‘‘𑀢𑀸𑀬 𑀲𑀤𑁆𑀥𑀸𑀬 𑀅𑀯𑀽𑀧𑀲𑀦𑁆𑀢𑀸𑀬𑀸’’𑀢𑀺𑀆𑀤𑀺 𑀯𑀘𑀦𑀢𑁄 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀓𑀺𑀘𑁆𑀘𑀢𑀸𑀬, 𑀦𑀺𑀬𑁆𑀬𑀸𑀦𑀸𑀦𑀼𑀕𑀼𑀡𑀢𑀸𑀬, 𑀦𑀺𑀬𑁆𑀬𑀸𑀦𑀧𑀭𑀺𑀬𑁄𑀲𑀸𑀦𑀢𑀸𑀬 𑀘, 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 𑀧𑀦 ‘‘𑀦𑀺𑀬𑁆𑀬𑀸𑀦𑀥𑀫𑁆𑀫𑀲𑁆𑀲 𑀲𑀫𑀥𑀺𑀕𑀫𑀦𑀳𑁂𑀢𑀼𑀢𑀸𑀬𑀸’’𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀦𑀬𑁂𑀦 𑀥𑀫𑁆𑀫𑀪𑀸𑀯𑁄 𑀮𑀩𑁆𑀪𑀢𑀺 𑀏𑀯. 𑀲𑁆𑀯𑀸𑀬𑀫𑀢𑁆𑀣𑁄 𑀧𑀸𑀞𑀸𑀭𑀽𑀴𑁆𑀳𑁄 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺𑀫𑀸𑀳.

‘‘𑀓𑀸𑀫𑀭𑀸𑀕𑁄 𑀪𑀯𑀭𑀸𑀕𑁄’’𑀢𑀺 𑀏𑀯𑀫𑀸𑀤𑀺 𑀪𑁂𑀤𑁄 𑀲𑀩𑁆𑀩𑁄𑀧𑀺 𑀭𑀸𑀕𑁄 𑀯𑀺𑀭𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀭𑀸𑀕𑀯𑀺𑀭𑀸𑀕𑁄𑀢𑀺 𑀫𑀕𑁆𑀕𑁄 𑀓𑀣𑀺𑀢𑁄. 𑀏𑀚𑀸𑀲𑀗𑁆𑀔𑀸𑀢𑀸𑀬 ¶ 𑀢𑀡𑁆𑀳𑀸𑀬, 𑀅𑀦𑁆𑀢𑁄𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑀲𑁆𑀲 𑀲𑁄𑀓𑀲𑁆𑀲 𑀘 𑀢𑀤𑀼𑀧𑁆𑀧𑀢𑁆𑀢𑀺𑀬𑀁 𑀲𑀩𑁆𑀩𑀲𑁄 𑀧𑀭𑀺𑀓𑁆𑀔𑀻𑀡𑀢𑁆𑀢𑀸 𑀅𑀦𑁂𑀚𑀁 𑀅𑀲𑁄𑀓𑀦𑁆𑀢𑀺 𑀨𑀮𑀁 𑀓𑀣𑀺𑀢𑀁. 𑀅𑀧𑁆𑀧𑀝𑀺𑀓𑀽𑀮𑀦𑁆𑀢𑀺 𑀅𑀯𑀺𑀭𑁄𑀥𑀤𑀻𑀧𑀦𑀢𑁄 𑀓𑁂𑀦𑀘𑀺 𑀅𑀯𑀺𑀭𑀼𑀤𑁆𑀥𑀁, 𑀇𑀝𑁆𑀞𑀁 𑀧𑀡𑀻𑀢𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀧𑀕𑀼𑀡𑀭𑀽𑀧𑁂𑀦 𑀧𑀯𑀢𑁆𑀢𑀺𑀢𑀢𑁆𑀢𑀸, 𑀧𑀓𑀝𑁆𑀞𑀕𑀼𑀡𑀯𑀺𑀪𑀸𑀯𑀦𑀢𑁄 𑀯𑀸 𑀧𑀕𑀼𑀡𑀁. 𑀬𑀣𑀸𑀳 ‘‘𑀯𑀺𑀳𑀺𑀁𑀲𑀲𑀜𑁆𑀜𑀻 𑀧𑀕𑀼𑀡𑀁 𑀦 𑀪𑀸𑀲𑀺𑀁, 𑀥𑀫𑁆𑀫𑀁 𑀧𑀡𑀻𑀢𑀁 𑀫𑀦𑀼𑀚𑁂𑀲𑀼 𑀩𑁆𑀭𑀳𑁆𑀫𑁂’’𑀢𑀺. (𑀫. 𑀦𑀺. 𑁧.𑁨𑁮𑁩; 𑀫. 𑀦𑀺. 𑁨.𑁩𑁩𑁯; 𑀫𑀳𑀸𑀯. 𑁯) 𑀲𑀩𑁆𑀩𑀥𑀫𑁆𑀫𑀓𑁆𑀔𑀦𑁆𑀥𑀸 𑀓𑀣𑀺𑀢𑀸𑀢𑀺 𑀬𑁄𑀚𑀦𑀸.

𑀤𑀺𑀝𑁆𑀞𑀺𑀲𑀻𑀮𑀲𑀗𑁆𑀖𑀸𑀢𑁂𑀦𑀸𑀢𑀺 ‘‘𑀬𑀸𑀬𑀁 𑀤𑀺𑀝𑁆𑀞𑀺 𑀅𑀭𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀸 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬, 𑀢𑀣𑀸𑀭𑀽𑀧𑀸𑀬 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁪; 𑀫. 𑀦𑀺. 𑁪.𑁯𑁨; 𑁩.𑁫𑁪) 𑀏𑀯𑀁 𑀯𑀼𑀢𑁆𑀢𑀸𑀬 𑀤𑀺𑀝𑁆𑀞𑀺𑀬𑀸, ‘‘𑀬𑀸𑀦𑀺 𑀢𑀸𑀦𑀺 𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀪𑀼𑀚𑀺𑀲𑁆𑀲𑀸𑀦𑀺 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 𑀅𑀧𑀭𑀸𑀫𑀝𑁆𑀞𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺 ¶ , 𑀢𑀣𑀸𑀭𑀽𑀧𑁂𑀳𑀺 𑀲𑀻𑀮𑁂𑀳𑀺 𑀲𑀻𑀮𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁩; 𑀫. 𑀦𑀺. 𑁧.𑁪𑁯𑁨; 𑁩.𑁫𑁪; 𑀅. 𑀦𑀺. 𑁬.𑁧𑁧; 𑀧𑀭𑀺. 𑁨𑁭𑁪) 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀲𑀻𑀮𑀸𑀦𑀜𑁆𑀘 𑀲𑀁𑀳𑀢𑀪𑀸𑀯𑁂𑀦, 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀁𑀳𑀢𑁄𑀢𑀺 𑀖𑀝𑀺𑀢𑁄, 𑀲𑀫𑁂𑀢𑁄𑀢𑀺 𑀅𑀢𑁆𑀣𑁄. 𑀅𑀭𑀺𑀬𑀧𑀼𑀕𑁆𑀕𑀮𑀸 𑀳𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀤𑀽𑀭𑁂 𑀞𑀺𑀢𑀸𑀧𑀺 𑀅𑀢𑁆𑀢𑀦𑁄 𑀕𑀼𑀡𑀲𑀸𑀫𑀕𑁆𑀕𑀺𑀬𑀸 𑀲𑀁𑀳𑀢𑀸 𑀏𑀯 ¶ . 𑀅𑀝𑁆𑀞 𑀘 𑀧𑀼𑀕𑁆𑀕𑀮𑀥𑀫𑁆𑀫𑀤𑀲𑀸 𑀢𑁂𑀢𑀺 𑀢𑁂 𑀧𑀼𑀭𑀺𑀲𑀬𑀼𑀕𑀯𑀲𑁂𑀦 𑀘𑀢𑁆𑀢𑀸𑀭𑁄𑀧𑀺 𑀧𑀼𑀕𑁆𑀕𑀮𑀯𑀲𑁂𑀦 𑀅𑀝𑁆𑀞𑁂𑀯 𑀅𑀭𑀺𑀬𑀥𑀫𑁆𑀫𑀲𑁆𑀲 𑀧𑀘𑁆𑀘𑀓𑁆𑀔𑀤𑀲𑁆𑀲𑀸𑀯𑀺𑀢𑀸𑀬 𑀥𑀫𑁆𑀫𑀤𑀲𑀸. 𑀢𑀻𑀡𑀺 𑀯𑀢𑁆𑀣𑀽𑀦𑀺 ‘‘𑀲𑀭𑀡’’𑀦𑁆𑀢𑀺 𑀕𑀫𑀦𑁂𑀦, 𑀢𑀺𑀓𑁆𑀔𑀢𑁆𑀢𑀼𑀁 𑀕𑀫𑀦𑁂𑀦 𑀘 𑀢𑀻𑀡𑀺 𑀲𑀭𑀡𑀕𑀫𑀦𑀸𑀦𑀺. 𑀧𑀝𑀺𑀯𑁂𑀤𑁂𑀲𑀻𑀢𑀺 𑀅𑀢𑁆𑀢𑀦𑁄 𑀳𑀤𑀬𑀕𑀢𑀁 𑀯𑀸𑀘𑀸𑀬 𑀧𑀯𑁂𑀤𑁂𑀲𑀺.

𑀲𑀭𑀡𑀕𑀫𑀦𑀓𑀣𑀸𑀯𑀡𑁆𑀡𑀦𑀸

𑀲𑀭𑀡𑀕𑀫𑀦𑀲𑁆𑀲 𑀯𑀺𑀲𑀬𑀧𑁆𑀧𑀪𑁂𑀤𑀨𑀮𑀲𑀁𑀓𑀺𑀮𑁂𑀲𑀪𑁂𑀤𑀸𑀦𑀁 ¶ 𑀯𑀺𑀬 𑀓𑀢𑁆𑀢𑀼 𑀘 𑀯𑀺𑀪𑀸𑀯𑀦𑀸 𑀢𑀢𑁆𑀣 𑀓𑁄𑀲𑀮𑁆𑀮𑀸𑀬 𑀳𑁄𑀢𑀻𑀢𑀺 ‘‘𑀲𑀭𑀡𑀕𑀫𑀦𑁂𑀲𑀼 𑀓𑁄𑀲𑀮𑁆𑀮𑀢𑁆𑀣𑀁 𑀲𑀭𑀡𑀁…𑀧𑁂… 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁 𑀢𑁂𑀦 𑀯𑀺𑀦𑀸 𑀲𑀭𑀡𑀕𑀫𑀦𑀲𑁆𑀲𑁂𑀯 𑀅𑀲𑀫𑁆𑀪𑀯𑀢𑁄. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀯𑁄𑀤𑀸𑀦𑀁 𑀦 𑀕𑀳𑀺𑀢𑀁, 𑀦𑀦𑀼 𑀯𑁄𑀤𑀸𑀦𑀯𑀺𑀪𑀸𑀯𑀦𑀸𑀧𑀺 𑀢𑀢𑁆𑀣 𑀓𑁄𑀲𑀮𑁆𑀮𑀸𑀯𑀳𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑀁 𑀧𑀦 𑀲𑀁𑀓𑀺𑀮𑁂𑀲𑀕𑁆𑀕𑀳𑀡𑁂𑀦𑁂𑀯 𑀅𑀢𑁆𑀣𑀢𑁄 𑀤𑀻𑀧𑀺𑀢𑀁 𑀳𑁄𑀢𑀻𑀢𑀺 𑀦 𑀕𑀳𑀺𑀢𑀁. 𑀬𑀸𑀦𑀺 𑀳𑀺 𑀦𑁂𑀲𑀁 𑀲𑀁𑀓𑀺𑀮𑁂𑀲𑀓𑀸𑀭𑀡𑀸𑀦𑀺 𑀅𑀜𑁆𑀜𑀸𑀡𑀸𑀤𑀻𑀦𑀺, 𑀢𑁂𑀲𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑁂𑀦, 𑀉𑀧𑁆𑀧𑀦𑁆𑀦𑀸𑀦𑀜𑁆𑀘 𑀧𑀳𑀸𑀦𑁂𑀦 𑀯𑁄𑀤𑀸𑀦𑀁 𑀳𑁄𑀢𑀻𑀢𑀺. 𑀳𑀺𑀁𑀲𑀢𑁆𑀣𑀲𑁆𑀲 𑀲𑀭-𑀲𑀤𑁆𑀤𑀲𑁆𑀲 𑀯𑀲𑁂𑀦𑁂𑀢𑀁 𑀧𑀤𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 ‘‘𑀳𑀺𑀁𑀲𑀢𑀻𑀢𑀺 𑀲𑀭𑀡’’𑀦𑁆𑀢𑀺 𑀯𑀢𑁆𑀯𑀸 𑀢𑀁 𑀧𑀦 𑀳𑀺𑀁𑀲𑀦𑀁 𑀓𑁂𑀲𑀁 𑀓𑀣𑀁 𑀓𑀲𑁆𑀲 𑀯𑀸𑀢𑀺 𑀘𑁄𑀤𑀦𑀁 𑀲𑁄𑀥𑁂𑀦𑁆𑀢𑁄 ‘‘𑀲𑀭𑀡𑀕𑀢𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀬𑀦𑁆𑀢𑀺 𑀯𑀝𑁆𑀝𑀪𑀬𑀁. 𑀲𑀦𑁆𑀢𑀸𑀲𑀦𑁆𑀢𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑀁 𑀢𑁂𑀦𑁂𑀯 𑀘𑁂𑀢𑀲𑀺𑀓𑀤𑀼𑀓𑁆𑀔𑀲𑁆𑀲 𑀕𑀳𑀺𑀢𑀢𑁆𑀢𑀸. 𑀤𑀼𑀓𑁆𑀔𑀦𑁆𑀢𑀺 𑀓𑀸𑀬𑀺𑀓𑀤𑀼𑀓𑁆𑀔𑀁. 𑀤𑀼𑀕𑁆𑀕𑀢𑀺𑀧𑀭𑀺𑀓𑀺𑀮𑁂𑀲𑀦𑁆𑀢𑀺 𑀤𑀼𑀕𑁆𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀁 𑀲𑀩𑁆𑀩𑀫𑁆𑀧𑀺 𑀤𑀼𑀓𑁆𑀔𑀁, 𑀢𑀬𑀺𑀤𑀁 𑀲𑀩𑁆𑀩𑀁 𑀧𑀭𑀢𑁄 𑀨𑀮𑀓𑀣𑀸𑀬𑀁 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀏𑀢𑀦𑁆𑀢𑀺 ‘‘𑀲𑀭𑀡’’𑀦𑁆𑀢𑀺 𑀧𑀤𑀁.

𑀏𑀯𑀁 𑀅𑀯𑀺𑀲𑁂𑀲𑀢𑁄 𑀲𑀭𑀡-𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀲𑁂𑀲𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀳𑀺𑀢𑁂 𑀧𑀯𑀢𑁆𑀢𑀦𑁂𑀦𑀸𑀢𑀺 ‘‘𑀲𑀫𑁆𑀧𑀦𑁆𑀦𑀲𑀻𑀮𑀸 𑀪𑀺𑀓𑁆𑀔𑀯𑁂 𑀯𑀺𑀳𑀭𑀣𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁬𑁪, 𑁬𑁯) 𑀅𑀢𑁆𑀣𑁂 𑀦𑀺𑀬𑁄𑀚𑀦𑁂𑀦. 𑀅𑀳𑀺𑀢𑀸 𑀘 𑀦𑀺𑀯𑀢𑁆𑀢𑀦𑁂𑀦𑀸𑀢𑀺. ‘‘𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄, 𑀧𑀸𑀧𑀓𑀁 𑀅𑀪𑀺𑀲𑀫𑁆𑀧𑀭𑀸𑀬’’𑀦𑁆𑀢𑀺𑀆𑀤𑀺𑀦𑀸 𑀆𑀤𑀻𑀦𑀯𑀤𑀲𑁆𑀲𑀦𑀸𑀤𑀺𑀫𑀼𑀔𑁂𑀦 𑀅𑀦𑀢𑁆𑀣𑀢𑁄 𑀦𑀺𑀯𑀢𑁆𑀢𑀦𑁂𑀦. 𑀪𑀬𑀁 𑀳𑀺𑀁𑀲𑀢𑀻𑀢𑀺 𑀳𑀺𑀢𑀸𑀳𑀺𑀢𑁂𑀲𑀼 𑀅𑀧𑁆𑀧𑀯𑀢𑁆𑀢𑀺𑀧𑀯𑀢𑁆𑀢𑀺𑀳𑁂𑀢𑀼𑀓𑀁 𑀩𑁆𑀬𑀲𑀦𑀁 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀯𑀺𑀦𑀸𑀲𑁂𑀢𑀺. 𑀪𑀯𑀓𑀦𑁆𑀢𑀸𑀭𑀸 𑀉𑀢𑁆𑀢𑀸𑀭𑀡𑁂𑀦 𑀫𑀕𑁆𑀕𑀲𑀗𑁆𑀔𑀸𑀢𑁄 𑀥𑀫𑁆𑀫𑁄, 𑀇𑀢𑀭𑁄 𑀅𑀲𑁆𑀲𑀸𑀲𑀤𑀸𑀦𑁂𑀦 𑀲𑀢𑁆𑀢𑀸𑀦𑀁 ¶ 𑀪𑀬𑀁 𑀳𑀺𑀁𑀲𑀢𑀻𑀢𑀺 𑀬𑁄𑀚𑀦𑀸. 𑀓𑀸𑀭𑀸𑀦𑀦𑁆𑀢𑀺 𑀤𑀸𑀦𑀯𑀲𑁂𑀦 𑀧𑀽𑀚𑀸𑀯𑀲𑁂𑀦 𑀘 𑀉𑀧𑀦𑀻𑀢𑀸𑀦𑀁 𑀲𑀓𑁆𑀓𑀸𑀭𑀸𑀦𑀁. 𑀯𑀺𑀧𑀼𑀮𑀨𑀮𑀧𑀝𑀺𑀮𑀸𑀪𑀓𑀭𑀡𑁂𑀦 𑀲𑀢𑁆𑀢𑀸𑀦𑀁 𑀪𑀬𑀁 𑀳𑀺𑀁𑀲𑀢𑀻𑀢𑀺 𑀬𑁄𑀚𑀦𑀸, 𑀅𑀦𑀼𑀢𑁆𑀢𑀭𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀢𑁄𑀢𑀺 ¶ 𑀅𑀥𑀺𑀧𑁆𑀧𑀸𑀬𑁄. 𑀇𑀫𑀺𑀦𑀸𑀧𑀺 𑀧𑀭𑀺𑀬𑀸𑀬𑁂𑀦𑀸𑀢𑀺 𑀇𑀫𑀺𑀦𑀸𑀧𑀺 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑁂𑀦 𑀓𑀸𑀭𑀡𑁂𑀦.

‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 ¶ 𑀪𑀕𑀯𑀸, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀢𑀢𑁆𑀣 𑀭𑀢𑀦𑀢𑁆𑀢𑀬𑁂 𑀧𑀲𑀸𑀤𑁄 𑀢𑀧𑁆𑀧𑀲𑀸𑀤𑁄, 𑀢𑀤𑁂𑀯 𑀭𑀢𑀦𑀢𑁆𑀢𑀬𑀁 𑀕𑀭𑀼 𑀏𑀢𑀲𑁆𑀲𑀸𑀢𑀺 𑀢𑀕𑁆𑀕𑀭𑀼 𑀢𑀩𑁆𑀪𑀸𑀯𑁄 𑀢𑀕𑁆𑀕𑀭𑀼𑀢𑀸, 𑀢𑀧𑁆𑀧𑀲𑀸𑀤𑁄 𑀘 𑀢𑀕𑁆𑀕𑀭𑀼𑀢𑀸 𑀘 𑀢𑀧𑁆𑀧𑀲𑀸𑀤𑀢𑀕𑁆𑀕𑀭𑀼𑀢𑀸, 𑀢𑀸𑀳𑀺 𑀢𑀧𑁆𑀧𑀲𑀸𑀤𑀢𑀕𑁆𑀕𑀭𑀼𑀢𑀸𑀳𑀺. 𑀯𑀺𑀥𑀽𑀢𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀫𑁄𑀳𑀅𑀲𑁆𑀲𑀤𑁆𑀥𑀺𑀬𑀸𑀤𑀺𑀢𑀸𑀬 𑀯𑀺𑀳𑀢𑀓𑀺𑀮𑁂𑀲𑁄. 𑀢𑀤𑁂𑀯 𑀭𑀢𑀦𑀢𑁆𑀢𑀬𑀁 𑀧𑀭𑀸𑀬𑀡𑀁 𑀧𑀭𑀸𑀕𑀢𑀺 𑀢𑀸𑀡𑀁 𑀮𑁂𑀡𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀺𑀬𑀸 𑀢𑀧𑁆𑀧𑀭𑀸𑀬𑀡𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀭𑀡𑀕𑀫𑀦𑀁 𑀲𑀭𑀡𑀁 𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺. 𑀢𑀁𑀲𑀫𑀗𑁆𑀕𑀻𑀢𑀺 𑀢𑁂𑀦 𑀬𑀣𑀸𑀯𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀏𑀯𑀁 𑀉𑀧𑁂𑀢𑀻𑀢𑀺 𑀪𑀚𑀢𑀺 𑀲𑁂𑀯𑀢𑀺 𑀧𑀬𑀺𑀭𑀼𑀧𑀸𑀲𑀢𑀺, 𑀏𑀯𑀁 𑀯𑀸 𑀚𑀸𑀦𑀸𑀢𑀺 𑀩𑀼𑀚𑁆𑀛𑀢𑀻𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀧𑀲𑀸𑀤-𑀕𑁆𑀕𑀳𑀡𑁂𑀦 𑀮𑁄𑀓𑀺𑀬𑀲𑀭𑀡𑀕𑀫𑀦𑀫𑀸𑀳. 𑀢𑀜𑁆𑀳𑀺 𑀧𑀲𑀸𑀤𑀧𑁆𑀧𑀥𑀸𑀦𑀁. 𑀕𑀭𑀼𑀢𑀸𑀕𑀳𑀡𑁂𑀦 𑀮𑁄𑀓𑀼𑀢𑁆𑀢𑀭𑀁. 𑀅𑀭𑀺𑀬𑀸 𑀳𑀺 𑀭𑀢𑀦𑀢𑁆𑀢𑀬𑀁 𑀕𑀼𑀡𑀸𑀪𑀺𑀜𑁆𑀜𑀢𑀸𑀬 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀕𑀭𑀼𑀁 𑀓𑀢𑁆𑀯𑀸 𑀧𑀲𑁆𑀲𑀦𑁆𑀢𑀺. 𑀢𑀲𑁆𑀫𑀸 𑀢𑀧𑁆𑀧𑀲𑀸𑀤𑁂𑀦 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀯𑀺𑀕𑀢𑀓𑀺𑀮𑁂𑀲𑁄, 𑀢𑀕𑁆𑀕𑀭𑀼𑀢𑀸𑀬 𑀲𑀫𑀼𑀘𑁆𑀙𑁂𑀤𑀯𑀲𑁂𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁 𑀅𑀕𑀸𑀭𑀯𑀓𑀭𑀡𑀳𑁂𑀢𑀽𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄. 𑀢𑀧𑁆𑀧𑀭𑀸𑀬𑀡𑀢𑀸 𑀧𑀦𑁂𑀢𑁆𑀣 𑀢𑀕𑁆𑀕𑀢𑀺𑀓𑀢𑀸𑀢𑀺 𑀢𑀸𑀬 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀯𑀓𑁆𑀔𑀫𑀸𑀦𑀁 𑀲𑀭𑀡𑀕𑀫𑀦𑀁 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀯𑀺𑀲𑁂𑀲𑁂𑀦 ¶ 𑀯𑀸 𑀧𑀲𑀸𑀤𑀕𑀭𑀼𑀢𑀸 𑀚𑁄𑀢𑀺𑀢𑀸𑀢𑀺 𑀧𑀲𑀸𑀤𑀕𑁆𑀕𑀳𑀡𑁂𑀦 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀲𑁆𑀲 𑀇𑀢𑀭𑀲𑁆𑀲 𑀘 𑀕𑀳𑀡𑀁, 𑀢𑀣𑀸 𑀕𑀭𑀼𑀢𑀸𑀕𑀳𑀡𑁂𑀦𑀸𑀢𑀺 𑀉𑀪𑀬𑁂𑀦𑀸𑀧𑀺 𑀉𑀪𑀬𑀁 𑀲𑀭𑀡𑀕𑀫𑀦𑀁 𑀬𑁄𑀚𑁂𑀢𑀩𑁆𑀩𑀁.

𑀫𑀕𑁆𑀕𑀓𑁆𑀔𑀡𑁂 𑀇𑀚𑁆𑀛𑀢𑀻𑀢𑀺 𑀬𑁄𑀚𑀦𑀸. ‘‘𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸’’𑀢𑀺 𑀏𑀢𑁂𑀦 𑀅𑀢𑁆𑀣𑀢𑁄 𑀘𑀢𑀼𑀲𑀘𑁆𑀘𑀸𑀥𑀺𑀕𑀫𑁄 𑀏𑀯 𑀮𑁄𑀓𑀼𑀢𑁆𑀢𑀭𑀲𑀭𑀡𑀕𑀫𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀳𑀺 𑀦𑀺𑀩𑁆𑀩𑀸𑀦𑀥𑀫𑁆𑀫𑁄 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦, 𑀫𑀕𑁆𑀕𑀥𑀫𑁆𑀫𑁄 𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀧𑀝𑀺𑀯𑀺𑀚𑁆𑀛𑀺𑀬𑀫𑀸𑀦𑁄𑀬𑁂𑀯 𑀲𑀭𑀡𑀕𑀫𑀦𑀢𑁆𑀣𑀁 𑀲𑀸𑀥𑁂𑀢𑀺. 𑀩𑀼𑀤𑁆𑀥𑀕𑀼𑀡𑀸 𑀧𑀦 𑀲𑀸𑀯𑀓𑀕𑁄𑀘𑀭𑀪𑀽𑀢𑀸 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦, 𑀢𑀣𑀸 𑀅𑀭𑀺𑀬𑀲𑀗𑁆𑀖𑀕𑀼𑀡𑀸, 𑀢𑁂𑀦𑀸𑀳 ‘‘𑀓𑀺𑀘𑁆𑀘𑀢𑁄 𑀲𑀓𑀮𑁂𑀧𑀺 𑀭𑀢𑀦𑀢𑁆𑀢𑀬𑁂 𑀇𑀚𑁆𑀛𑀢𑀻’’𑀢𑀺. 𑀇𑀚𑁆𑀛𑀦𑁆𑀢𑀜𑁆𑀘 𑀲𑀳𑁂𑀯 𑀇𑀚𑁆𑀛𑀢𑀺, 𑀦 𑀮𑁄𑀓𑀺𑀬𑀁 𑀯𑀺𑀬 𑀧𑀢𑀺𑀧𑀸𑀝𑀺𑀬𑀸 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀤𑁆𑀥𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑁂 𑀧𑀦 𑀯𑀤𑀦𑁆𑀢𑀺 ‘‘𑀦 𑀲𑀭𑀡𑀕𑀫𑀦𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀫𑀕𑁆𑀕𑀲𑁆𑀲 𑀅𑀥𑀺𑀕𑀢𑀢𑁆𑀢𑀸 𑀧𑀦 𑀅𑀥𑀺𑀕𑀢𑀫𑁂𑀯 𑀳𑁄𑀢𑀺 𑀏𑀓𑀘𑁆𑀘𑀸𑀦𑀁 𑀢𑁂𑀯𑀺𑀚𑁆𑀚𑀸𑀤𑀻𑀦𑀁 𑀮𑁄𑀓𑀺𑀬𑀯𑀺𑀚𑁆𑀚𑀸𑀤𑀬𑁄 𑀯𑀺𑀬𑀸’’𑀢𑀺, 𑀢𑁂𑀲𑀁 𑀮𑁄𑀓𑀺𑀬𑀫𑁂𑀯 𑀲𑀭𑀡𑀕𑀫𑀦𑀁 𑀲𑀺𑀬𑀸, 𑀦 𑀮𑁄𑀓𑀼𑀢𑁆𑀢𑀭𑀁, 𑀢𑀜𑁆𑀘 𑀅𑀬𑀼𑀢𑁆𑀢𑀁 𑀤𑀼𑀯𑀺𑀥𑀲𑁆𑀲𑀸𑀧𑀺 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸.

𑀢𑀦𑁆𑀢𑀺 ¶ 𑀮𑁄𑀓𑀺𑀬𑀁 𑀲𑀭𑀡𑀕𑀫𑀦𑀁. 𑀲𑀤𑁆𑀥𑀸𑀧𑀝𑀺𑀮𑀸𑀪𑁄 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸. 𑀲𑀤𑁆𑀥𑀸𑀫𑀽𑀮𑀺𑀓𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑀤𑁆𑀥𑀸𑀧𑀼𑀩𑁆𑀩𑀗𑁆𑀕𑀫𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀢𑀺 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀁, 𑀥𑀫𑁆𑀫𑀲𑀼𑀥𑀫𑁆𑀫𑀢𑀁, 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀜𑁆𑀘 𑀮𑁄𑀓𑀺𑀬𑀸𑀯𑀩𑁄𑀥𑀯𑀲𑁂𑀦𑁂𑀯 𑀲𑀫𑁆𑀫𑀸 𑀜𑀸𑀬𑁂𑀦 𑀤𑀲𑁆𑀲𑀦𑀢𑁄. ‘‘𑀲𑀤𑁆𑀥𑀸𑀫𑀽𑀮𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺 𑀏𑀢𑁂𑀦 𑀲𑀤𑁆𑀥𑀽𑀧𑀦𑀺𑀲𑁆𑀲𑀬𑀸 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀸 𑀧𑀜𑁆𑀜𑀸 𑀮𑁄𑀓𑀺𑀬𑀲𑀭𑀡𑀕𑀫𑀦𑀦𑁆𑀢𑀺 𑀤𑀲𑁆𑀲𑁂𑀢𑀺, 𑀢𑁂𑀦𑀸𑀳 ‘‘𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀤𑀺𑀝𑁆𑀞𑀺 𑀏𑀯 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀉𑀚𑀼 𑀓𑀭𑀻𑀬𑀢𑀻𑀢𑀺 𑀓𑀢𑁆𑀯𑀸 𑀤𑀺𑀝𑁆𑀞𑀺 𑀯𑀸 𑀉𑀚𑀼 𑀓𑀭𑀻𑀬𑀢𑀺 𑀏𑀢𑁂𑀦𑀸𑀢𑀺 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀁, 𑀢𑀣𑀸 𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀢𑀧𑁆𑀧𑀭𑀸𑀬𑀡𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑁄 ¶ 𑀘𑀺𑀢𑁆𑀢𑀼𑀧𑁆𑀧𑀸𑀤𑁄’’𑀢𑀺 𑀇𑀤𑀁 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀲𑀤𑁆𑀥𑀸𑀧𑀼𑀩𑁆𑀩𑀗𑁆𑀕𑀫𑀲𑀫𑁆𑀫𑀸𑀤𑀺𑀝𑁆𑀞𑀺𑀕𑁆𑀕𑀳𑀡𑀁 𑀧𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 ¶ 𑀢𑀧𑁆𑀧𑀥𑀸𑀦𑀢𑀸𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀲𑀤𑁆𑀥𑀸𑀧𑀝𑀺𑀮𑀸𑀪𑁄’’𑀢𑀺 𑀇𑀫𑀺𑀦𑀸 𑀫𑀸𑀢𑀸𑀤𑀻𑀳𑀺 𑀉𑀲𑁆𑀲𑀸𑀳𑀺𑀢𑀤𑀸𑀭𑀓𑀸𑀤𑀻𑀦𑀁 𑀯𑀺𑀬 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀁 𑀲𑀭𑀡𑀕𑀫𑀦𑀁 𑀤𑀲𑁆𑀲𑁂𑀢𑀺, ‘‘𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺 𑀇𑀫𑀺𑀦𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀲𑀭𑀡𑀕𑀫𑀦𑀁. 𑀢𑀬𑀺𑀤𑀁 𑀮𑁄𑀓𑀺𑀬𑀁 𑀲𑀭𑀡𑀕𑀫𑀦𑀁. 𑀅𑀢𑁆𑀢𑀸 𑀲𑀦𑁆𑀦𑀺𑀬𑁆𑀬𑀸𑀢𑀻𑀬𑀢𑀺 𑀅𑀧𑁆𑀧𑀻𑀬𑀢𑀺 𑀧𑀭𑀺𑀘𑁆𑀘𑀚𑀻𑀬𑀢𑀺 𑀏𑀢𑁂𑀦𑀸𑀢𑀺 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀁, 𑀬𑀣𑀸𑀯𑀼𑀢𑁆𑀢𑀁 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀁. 𑀢𑀁 𑀭𑀢𑀦𑀢𑁆𑀢𑀬𑀁 𑀧𑀭𑀸𑀬𑀡𑀁 𑀧𑀝𑀺𑀲𑀭𑀡𑀁 𑀏𑀢𑀲𑁆𑀲𑀸𑀢𑀺 𑀢𑀧𑁆𑀧𑀭𑀸𑀬𑀡𑁄, 𑀧𑀼𑀕𑁆𑀕𑀮𑁄, 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀯𑀸. 𑀢𑀲𑁆𑀲 𑀪𑀸𑀯𑁄 𑀢𑀧𑁆𑀧𑀭𑀸𑀬𑀡𑀢𑀸, 𑀬𑀣𑀸𑀯𑀼𑀢𑁆𑀢𑀁 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀫𑁂𑀯. ‘‘𑀲𑀭𑀡’’𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀲𑀺𑀲𑁆𑀲𑀪𑀸𑀯𑀁 𑀅𑀦𑁆𑀢𑁂𑀯𑀸𑀲𑀺𑀓𑀪𑀸𑀯𑀁 𑀉𑀧𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀲𑀺𑀲𑁆𑀲𑀪𑀸𑀯𑀽𑀧𑀕𑀫𑀦𑀁. 𑀲𑀭𑀡𑀕𑀫𑀦𑀸𑀥𑀺𑀧𑁆𑀧𑀸𑀬𑁂𑀦𑁂𑀯 𑀧𑀡𑀺𑀧𑀢𑀢𑀺 𑀏𑀢𑁂𑀦𑀸𑀢𑀺 𑀧𑀡𑀺𑀧𑀸𑀢𑁄. 𑀲𑀩𑁆𑀩𑀢𑁆𑀣 𑀬𑀣𑀸𑀯𑀼𑀢𑁆𑀢𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀯𑀲𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀢𑁆𑀢𑀧𑀭𑀺𑀘𑁆𑀘𑀚𑀦𑀦𑁆𑀢𑀺 𑀲𑀁𑀲𑀸𑀭𑀤𑀼𑀓𑁆𑀔𑀦𑀺𑀢𑁆𑀣𑀭𑀡𑀢𑁆𑀣𑀁 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑀲𑁆𑀲 𑀧𑀭𑀺𑀘𑁆𑀘𑀚𑀦𑀁. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀩𑀼𑀤𑁆𑀥𑀸𑀤𑀻𑀦𑀁 𑀬𑁂𑀯𑀸𑀢𑀺 𑀅𑀯𑀥𑀸𑀭𑀡𑀁 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀸𑀤𑀻𑀲𑀼𑀧𑀺 𑀢𑀢𑁆𑀣 𑀢𑀢𑁆𑀣 𑀯𑀢𑁆𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀢𑀤𑀜𑁆𑀜𑀦𑀺𑀯𑀢𑁆𑀢𑀦𑀁 𑀓𑀢𑀁 𑀳𑁄𑀢𑀺.

𑀏𑀯𑀁 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀸𑀤𑀻𑀦𑀺 𑀏𑀓𑁂𑀦 𑀧𑀓𑀸𑀭𑁂𑀦 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀧𑀭𑁂𑀳𑀺𑀧𑀺 𑀧𑀓𑀸𑀭𑁂𑀳𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁, 𑀢𑁂𑀦 𑀧𑀭𑀺𑀬𑀸𑀬𑀦𑁆𑀢𑀭𑁂𑀳𑀺𑀧𑀺 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀸𑀤𑀺 𑀓𑀢𑀫𑁂𑀯 𑀳𑁄𑀢𑀺 𑀅𑀢𑁆𑀣𑀲𑁆𑀲 𑀅𑀪𑀺𑀦𑁆𑀦𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀆𑀴𑀯𑀓𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀸𑀢𑀸𑀕𑀺𑀭𑀳𑁂𑀫𑀯𑀢𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀦𑀦𑀼 𑀘𑁂𑀢𑁂 𑀆𑀴𑀯𑀓𑀸𑀤𑀬𑁄 𑀫𑀕𑁆𑀕𑁂𑀦𑁂𑀯 𑀆𑀕𑀢𑀲𑀭𑀡𑀕𑀫𑀦𑀸, 𑀓𑀣𑀁 𑀢𑁂𑀲𑀁 𑀢𑀧𑁆𑀧𑀭𑀸𑀬𑀡𑀢𑀸𑀲𑀭𑀡𑀕𑀫𑀦𑀁 𑀯𑀼𑀢𑁆𑀢𑀦𑁆𑀢𑀺? 𑀫𑀕𑁆𑀕𑁂𑀦𑀸𑀕𑀢𑀲𑀭𑀡𑀕𑀫𑀦𑁂𑀳𑀺𑀧𑀺. ‘‘𑀲𑁄 𑀅𑀳𑀁 𑀯𑀺𑀘𑀭𑀺𑀲𑁆𑀲𑀸𑀫𑀺…𑀧𑁂… 𑀲𑀼𑀥𑀫𑁆𑀫𑀢𑀁’’ (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁯𑁪) ‘‘𑀢𑁂 𑀫𑀬𑀁 𑀯𑀺𑀘𑀭𑀺𑀲𑁆𑀲𑀸𑀫 ¶ , 𑀕𑀸𑀫𑀸 𑀕𑀸𑀫𑀁 𑀦𑀕𑀸 𑀦𑀕𑀁…𑀧𑁂… 𑀲𑀼𑀥𑀫𑁆𑀫𑀢’’𑀦𑁆𑀢𑀺, (𑀲𑀼. 𑀦𑀺. 𑁧𑁮𑁨) 𑀢𑁂𑀳𑀺 ¶ 𑀢𑀧𑁆𑀧𑀭𑀸𑀬𑀡𑀢𑀸𑀓𑀸𑀭𑀲𑁆𑀲 𑀧𑀯𑁂𑀤𑀺𑀢𑀢𑁆𑀢𑀸 𑀢𑀣𑀸 𑀯𑀼𑀢𑁆𑀢𑀁.

𑀲𑁄 𑀧𑀦𑁂𑀲 𑀜𑀸𑀢𑀺…𑀧𑁂… 𑀯𑀲𑁂𑀦𑀸𑀢𑀺 𑀏𑀢𑁆𑀣 𑀜𑀸𑀢𑀺𑀯𑀲𑁂𑀦, 𑀪𑀬𑀯𑀲𑁂𑀦, 𑀆𑀘𑀭𑀺𑀬𑀯𑀲𑁂𑀦, 𑀤𑀓𑁆𑀔𑀺𑀡𑁂𑀬𑁆𑀬𑀯𑀲𑁂𑀦𑀸𑀢𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀜𑀸𑀢𑀺𑀯𑀲𑁂𑀦𑀸𑀢𑀺 𑀜𑀸𑀢𑀺𑀪𑀸𑀯𑀯𑀲𑁂𑀦. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀤𑀓𑁆𑀔𑀺𑀡𑁂𑀬𑁆𑀬𑀧𑀡𑀺𑀧𑀸𑀢𑁂𑀦𑀸𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑀢𑀸𑀳𑁂𑀢𑀼𑀓𑁂𑀦 𑀧𑀡𑀺𑀧𑀸𑀢𑁂𑀦. 𑀇𑀢𑀭𑁂𑀳𑀻𑀢𑀺 𑀜𑀸𑀢𑀺𑀪𑀸𑀯𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑁂𑀳𑀺 𑀢𑀻𑀳𑀺 𑀧𑀡𑀺𑀧𑀸𑀢𑁂𑀳𑀺. ‘‘𑀇𑀢𑀭𑁂𑀳𑀻’’𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀦𑁆𑀤𑀢𑀻𑀢𑀺 𑀧𑀡𑀺𑀧𑀸𑀢𑀲𑁆𑀲 𑀮𑀓𑁆𑀔𑀡𑀯𑀘𑀦𑀁. 𑀏𑀯𑀭𑀽𑀧𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀫𑁆𑀧𑀭𑀸𑀬𑀺𑀓𑀜𑁆𑀳𑀺 𑀦𑀺𑀬𑁆𑀬𑀸𑀦𑀺𑀓𑀁 𑀯𑀸 𑀅𑀦𑀼𑀲𑀸𑀲𑀦𑀺𑀁 𑀧𑀘𑁆𑀘𑀸𑀲𑀺𑀲𑀦𑁆𑀢𑁄 𑀤𑀓𑁆𑀔𑀺𑀡𑁂𑀬𑁆𑀬𑀧𑀡𑀺𑀧𑀸𑀢𑀫𑁂𑀯 𑀓𑀭𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀭𑀡𑀕𑀫𑀦𑀧𑁆𑀧𑀪𑁂𑀤𑁄𑀢𑀺 ¶ 𑀲𑀭𑀡𑀕𑀫𑀦𑀯𑀺𑀪𑀸𑀕𑁄.

𑀅𑀭𑀺𑀬𑀫𑀕𑁆𑀕𑁄 𑀏𑀯 𑀮𑁄𑀓𑀼𑀢𑁆𑀢𑀭𑀁 𑀲𑀭𑀡𑀕𑀫𑀦𑀦𑁆𑀢𑀺 ‘‘𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀯𑀺𑀧𑀸𑀓𑀨𑀮’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑁄𑀢𑀺 𑀲𑀓𑀮𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄. 𑀏𑀢𑀦𑁆𑀢𑀺 ‘‘𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀅𑀭𑀺𑀬𑀲𑀘𑁆𑀘𑀲𑁆𑀲 𑀤𑀲𑁆𑀲𑀦𑀁.

𑀦𑀺𑀘𑁆𑀘𑀸𑀤𑀺𑀢𑁄 𑀅𑀦𑀼𑀧𑀕𑀫𑀦𑀸𑀤𑀺𑀯𑀲𑁂𑀦𑀸𑀢𑀺 ‘‘𑀦𑀺𑀘𑁆𑀘’’𑀦𑁆𑀢𑀺 𑀅𑀕𑁆𑀕𑀳𑀡𑀸𑀤𑀺𑀯𑀲𑁂𑀦. 𑀅𑀝𑁆𑀞𑀸𑀦𑀦𑁆𑀢𑀺 𑀳𑁂𑀢𑀼𑀧𑀝𑀺𑀓𑁆𑀔𑁂𑀧𑁄. 𑀅𑀦𑀯𑀓𑀸𑀲𑁄𑀢𑀺 𑀧𑀘𑁆𑀘𑀬𑀧𑀝𑀺𑀓𑁆𑀔𑁂𑀧𑁄. 𑀉𑀪𑀬𑁂𑀦𑀸𑀧𑀺 𑀓𑀸𑀭𑀡𑀫𑁂𑀯 𑀧𑀝𑀺𑀓𑁆𑀔𑀺𑀧𑀢𑀺. 𑀬𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦. 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄𑀢𑀺 𑀫𑀕𑁆𑀕𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀲𑁄𑀢𑀸𑀧𑀦𑁆𑀦𑁄. 𑀓𑀜𑁆𑀘𑀺 𑀲𑀗𑁆𑀔𑀸𑀭𑀦𑁆𑀢𑀺 𑀘𑀢𑀼𑀪𑀽𑀫𑀓𑁂𑀲𑀼 𑀲𑀗𑁆𑀔𑀢𑀲𑀗𑁆𑀔𑀸𑀭𑁂𑀲𑀼 𑀏𑀓𑀲𑀗𑁆𑀔𑀸𑀭𑀫𑁆𑀧𑀺. 𑀦𑀺𑀘𑁆𑀘𑀢𑁄 𑀉𑀧𑀕𑀘𑁆𑀙𑁂𑀬𑁆𑀬𑀸𑀢𑀺 ‘‘𑀦𑀺𑀘𑁆𑀘𑁄’’𑀢𑀺 𑀕𑀡𑁆𑀳𑁂𑀬𑁆𑀬. ‘‘𑀲𑀼𑀔𑀢𑁄 𑀉𑀧𑀕𑀘𑁆𑀙𑁂𑀬𑁆𑀬𑀸’’𑀢𑀺. ‘‘𑀏𑀓𑀦𑁆𑀢𑀲𑀼𑀔𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸’’𑀢𑀺 (𑀤𑀻. 𑀦𑀺. 𑁧.𑁭𑁬) 𑀏𑀯𑀁 𑀅𑀢𑁆𑀢𑀤𑀺𑀝𑁆𑀞𑀺𑀯𑀲𑁂𑀦 𑀲𑀼𑀔𑀢𑁄 𑀕𑀸𑀳𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 ¶ . 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀧𑀦 𑀅𑀭𑀺𑀬𑀲𑀸𑀯𑀓𑁄 𑀧𑀭𑀺𑀴𑀸𑀳𑀯𑀽𑀧𑀲𑀫𑀦𑀢𑁆𑀣𑀁 𑀫𑀢𑁆𑀢𑀳𑀢𑁆𑀣𑀺𑀧𑀭𑀺𑀢𑁆𑀢𑀸𑀲𑀺𑀢𑁄 𑀯𑀺𑀬 𑀘𑁄𑀓𑁆𑀔𑀩𑁆𑀭𑀸𑀳𑁆𑀫𑀡𑁄 𑀉𑀓𑁆𑀓𑀸𑀭𑀪𑀽𑀫𑀺𑀁 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀲𑀼𑀔𑀢𑁄 𑀉𑀧𑀕𑀘𑁆𑀙𑀢𑀺. 𑀅𑀢𑁆𑀢𑀯𑀸𑀭𑁂 𑀓𑀲𑀺𑀡𑀸𑀤𑀺𑀧𑀜𑁆𑀜𑀢𑁆𑀢𑀺𑀲𑀗𑁆𑀕𑀳𑀢𑁆𑀣𑀁 ‘‘𑀲𑀗𑁆𑀔𑀸𑀭’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀓𑀜𑁆𑀘𑀺 𑀥𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀫𑁂𑀲𑀼𑀧𑀺 𑀯𑀸𑀭𑁂𑀲𑀼 𑀘𑀢𑀼𑀪𑀽𑀫𑀓𑀯𑀲𑁂𑀦𑁂𑀯 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄, 𑀢𑁂𑀪𑀽𑀫𑀓𑀯𑀲𑁂𑀦𑁂𑀯 𑀯𑀸. 𑀬𑀁 𑀬𑀜𑁆𑀳𑀺 𑀧𑀼𑀣𑀼𑀚𑁆𑀚𑀦𑁄 𑀕𑀸𑀳𑀯𑀲𑁂𑀦 𑀕𑀡𑁆𑀳𑀸𑀢𑀺, 𑀢𑀢𑁄 𑀢𑀢𑁄 𑀅𑀭𑀺𑀬𑀲𑀸𑀯𑀓𑁄 𑀕𑀸𑀳𑀁 𑀯𑀺𑀦𑀺𑀯𑁂𑀞𑁂𑀢𑀺.

‘‘𑀫𑀸𑀢𑀭’’𑀦𑁆𑀢𑀺𑀆𑀤𑀻𑀲𑀼 ¶ 𑀚𑀦𑀺𑀓𑀸 𑀫𑀸𑀢𑀸, 𑀚𑀦𑀓𑁄 𑀧𑀺𑀢𑀸, 𑀫𑀦𑀼𑀲𑁆𑀲𑀪𑀽𑀢𑁄 𑀔𑀻𑀡𑀸𑀲𑀯𑁄 𑀅𑀭𑀳𑀸𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀓𑀺𑀁 𑀧𑀦 𑀅𑀭𑀺𑀬𑀲𑀸𑀯𑀓𑁄 𑀅𑀜𑁆𑀜𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸𑀢𑀺? 𑀏𑀢𑀫𑁆𑀧𑀺 𑀅𑀝𑁆𑀞𑀸𑀦𑀁, 𑀧𑀼𑀣𑀼𑀚𑁆𑀚𑀦𑀪𑀸𑀯𑀲𑁆𑀲 𑀧𑀦 𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀅𑀭𑀺𑀬𑀲𑀸𑀯𑀓𑀲𑁆𑀲 𑀘 𑀨𑀮𑀤𑀲𑁆𑀲𑀦𑀢𑁆𑀣𑀁 𑀏𑀯𑀁 𑀯𑀼𑀢𑁆𑀢𑀁. 𑀤𑀼𑀝𑁆𑀞𑀘𑀺𑀢𑁆𑀢𑁄𑀢𑀺 𑀯𑀥𑀓𑀘𑀺𑀢𑁆𑀢𑁂𑀦 𑀧𑀤𑀼𑀝𑁆𑀞𑀘𑀺𑀢𑁆𑀢𑁄. 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀬𑁆𑀬𑀸𑀢𑀺 𑀚𑀻𑀯𑀫𑀸𑀦𑀓𑀲𑀭𑀻𑀭𑁂 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀬 𑀧𑀺𑀯𑀦𑀫𑀢𑁆𑀢𑀫𑁆𑀧𑀺 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀬𑁆𑀬. 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬𑀸𑀢𑀺 𑀲𑀫𑀸𑀦𑀲𑀁𑀯𑀸𑀲𑀓𑀁 𑀲𑀫𑀸𑀦𑀲𑀻𑀫𑀸𑀬𑀁 𑀞𑀺𑀢𑀁 𑀲𑀗𑁆𑀖𑀁. ‘‘𑀓𑀫𑁆𑀫𑁂𑀦, 𑀉𑀤𑁆𑀤𑁂𑀲𑁂𑀦, 𑀯𑁄𑀳𑀭𑀦𑁆𑀢𑁄, 𑀅𑀦𑀼𑀲𑁆𑀲𑀸𑀯𑀦𑁂𑀦, 𑀲𑀮𑀸𑀓𑀕𑁆𑀕𑀸𑀳𑁂𑀦𑀸’’𑀢𑀺 (𑀧𑀭𑀺. 𑁪𑁫𑁮) 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀪𑀺𑀦𑁆𑀤𑁂𑀬𑁆𑀬. 𑀅𑀜𑁆𑀜𑀁 𑀲𑀢𑁆𑀣𑀸𑀭𑀦𑁆𑀢𑀺 𑀅𑀜𑁆𑀜𑀁 𑀢𑀺𑀢𑁆𑀣𑀓𑀭𑀁 ‘‘𑀅𑀬𑀁 𑀫𑁂 𑀲𑀢𑁆𑀣𑀸’’𑀢𑀺 𑀏𑀯𑀁 𑀕𑀡𑁆𑀳𑁂𑀬𑁆𑀬, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀦 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺 𑀅𑀧𑀸𑀬𑀪𑀽𑀫𑀺𑀦𑁆𑀢𑀺 𑀢𑁂 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸 𑀢𑀁𑀦𑀺𑀫𑀺𑀢𑁆𑀢𑀁 𑀅𑀧𑀸𑀬𑀁 𑀦 𑀕𑀫𑀺𑀲𑁆𑀲𑀦𑁆𑀢𑀺, 𑀤𑁂𑀯𑀓𑀸𑀬𑀁 𑀧𑀦 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀤𑀲𑀳𑀺 𑀞𑀸𑀦𑁂𑀳𑀻𑀢𑀺 𑀤𑀲𑀳𑀺 𑀓𑀸𑀭𑀡𑁂𑀳𑀺. 𑀅𑀥𑀺𑀕𑀡𑁆𑀳𑀦𑁆𑀢𑀻𑀢𑀺 𑀅𑀪𑀺𑀪𑀯𑀦𑁆𑀢𑀺. 𑀯𑁂𑀮𑀸𑀫𑀲𑀼𑀢𑁆𑀢𑀸𑀤𑀺𑀯𑀲𑁂𑀦𑀸𑀧𑀻𑀢𑀺 𑀏𑀢𑁆𑀣 𑀓𑀭𑀻𑀲𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀧𑁆𑀧𑀫𑀸𑀡𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀲𑀗𑁆𑀔𑁆𑀬𑀸𑀦𑀁 𑀲𑀼𑀯𑀡𑁆𑀡𑀧𑀸𑀢𑀺𑀭𑀽𑀧𑀺𑀬𑀧𑀸𑀢𑀺𑀓𑀁𑀲𑀧𑀸𑀢𑀻𑀦𑀁 ¶ 𑀬𑀣𑀸𑀓𑁆𑀓𑀫𑀁 𑀭𑀽𑀧𑀺𑀬𑀲𑀼𑀯𑀡𑁆𑀡𑀳𑀺𑀭𑀜𑁆𑀜𑀧𑀽𑀭𑀸𑀦𑀁, 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀬𑀸 ¶ 𑀳𑀢𑁆𑀣𑀺𑀲𑀳𑀲𑁆𑀲𑀸𑀦𑀁, 𑀘𑀢𑀼𑀭𑀸𑀲𑀻𑀢𑀺𑀬𑀸 𑀅𑀲𑁆𑀲𑀲𑀳𑀲𑁆𑀲𑀸𑀦𑀁, 𑀘𑀢𑀼𑀭𑀸𑀲𑀻𑀢𑀺𑀬𑀸 𑀭𑀣𑀲𑀳𑀲𑁆𑀲𑀸𑀦𑀁, 𑀘𑀢𑀼𑀭𑀸𑀲𑀻𑀢𑀺𑀬𑀸 𑀥𑁂𑀦𑀼𑀲𑀳𑀲𑁆𑀲𑀸𑀦𑀁, 𑀘𑀢𑀼𑀭𑀸𑀲𑀻𑀢𑀺𑀬𑀸 𑀓𑀜𑁆𑀜𑀸𑀲𑀳𑀲𑁆𑀲𑀸𑀦𑀁, 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀮𑁆𑀮𑀗𑁆𑀓𑀲𑀳𑀲𑁆𑀲𑀸𑀦𑀁, 𑀘𑀢𑀼𑀭𑀸𑀲𑀻𑀢𑀺𑀬𑀸 𑀯𑀢𑁆𑀣𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀅𑀧𑀭𑀺𑀫𑀸𑀡𑀲𑁆𑀲 𑀘 𑀔𑀚𑁆𑀚𑀪𑁄𑀚𑁆𑀚𑀸𑀤𑀺𑀪𑁂𑀤𑀲𑁆𑀲 𑀆𑀳𑀸𑀭𑀲𑁆𑀲 𑀧𑀭𑀺𑀘𑁆𑀘𑀚𑀦𑀯𑀲𑁂𑀦 𑀲𑀢𑁆𑀢𑀫𑀸𑀲𑀸𑀥𑀺𑀓𑀸𑀦𑀺 𑀲𑀢𑁆𑀢𑀲𑀁𑀯𑀘𑁆𑀙𑀭𑀸𑀦𑀺 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀯𑁂𑀮𑀸𑀫𑀫𑀳𑀸𑀤𑀸𑀦𑀢𑁄 𑀏𑀓𑀲𑁆𑀲 𑀲𑁄𑀢𑀸𑀧𑀦𑁆𑀦𑀲𑁆𑀲 𑀤𑀺𑀦𑁆𑀦𑀤𑀸𑀦𑀁 𑀫𑀳𑀧𑁆𑀨𑀮𑀢𑀭𑀁, 𑀢𑀢𑁄 𑀲𑀢𑀁 𑀲𑁄𑀢𑀸𑀧𑀦𑁆𑀦𑀸𑀦𑀁 𑀤𑀺𑀦𑁆𑀦𑀤𑀸𑀦𑀢𑁄 𑀏𑀓𑀲𑁆𑀲 𑀲𑀓𑀤𑀸𑀕𑀸𑀫𑀺𑀦𑁄, 𑀢𑀢𑁄 𑀏𑀓𑀲𑁆𑀲 𑀅𑀦𑀸𑀕𑀸𑀫𑀺𑀦𑁄, 𑀢𑀢𑁄 𑀏𑀓𑀲𑁆𑀲 𑀅𑀭𑀳𑀢𑁄, 𑀢𑀢𑁄 𑀏𑀓𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲, 𑀢𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲, 𑀢𑀢𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀤𑀸𑀦𑀁 𑀫𑀳𑀧𑁆𑀨𑀮𑀢𑀭𑀁, 𑀢𑀢𑁄 𑀘𑀸𑀢𑀼𑀤𑁆𑀤𑀺𑀲𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀸𑀭𑀓𑀭𑀡𑀁, 𑀢𑀢𑁄 𑀲𑀭𑀡𑀕𑀫𑀦𑀁 𑀫𑀳𑀧𑁆𑀨𑀮𑀢𑀭𑀦𑁆𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑀲𑁆𑀲 𑀯𑁂𑀮𑀸𑀫𑀲𑀼𑀢𑁆𑀢𑀲𑁆𑀲 (𑀅. 𑀦𑀺. 𑁯.𑁨𑁦) 𑀯𑀲𑁂𑀦. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑀁 𑀕𑀳𑀧𑀢𑀺 𑀯𑁂𑀮𑀸𑀫𑁄 𑀩𑁆𑀭𑀸𑀳𑁆𑀫𑀡𑁄 𑀤𑀸𑀦𑀁 𑀅𑀤𑀸𑀲𑀺 𑀫𑀳𑀸𑀤𑀸𑀦𑀁, 𑀬𑁄 𑀘𑁂𑀓𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀁 𑀪𑁄𑀚𑁂𑀬𑁆𑀬, 𑀇𑀤𑀁 𑀢𑀢𑁄 𑀫𑀳𑀧𑁆𑀨𑀮𑀢𑀭’’𑀦𑁆𑀢𑀺𑀆𑀤𑀺 ¶ (𑀅. 𑀦𑀺. 𑁯.𑁨𑁦). 𑀯𑁂𑀮𑀸𑀫𑀲𑀼𑀢𑁆𑀢𑀸𑀤𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀅𑀕𑁆𑀕𑀧𑁆𑀧𑀲𑀸𑀤𑀲𑀼𑀢𑁆𑀢𑀸𑀤𑀻𑀦𑀁 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦) 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀅𑀜𑁆𑀜𑀸𑀡𑀁 𑀯𑀢𑁆𑀣𑀼𑀢𑁆𑀢𑀬𑀲𑁆𑀲 𑀕𑀼𑀡𑀸𑀦𑀁 𑀅𑀚𑀸𑀦𑀦𑀁, 𑀢𑀢𑁆𑀣 𑀲𑀫𑁆𑀫𑁄𑀳𑁄. ‘‘𑀩𑀼𑀤𑁆𑀥𑁄 𑀦𑀼 𑀔𑁄, 𑀦 𑀦𑀼 𑀔𑁄’’𑀢𑀺𑀆𑀤𑀺𑀦𑀸 𑀯𑀺𑀘𑀺𑀓𑀺𑀘𑁆𑀙𑀸 𑀲𑀁𑀲𑀬𑁄. 𑀫𑀺𑀘𑁆𑀙𑀸𑀜𑀸𑀡𑀁 𑀢𑀲𑁆𑀲 𑀕𑀼𑀡𑀸𑀦𑀁 𑀅𑀕𑀼𑀡𑀪𑀸𑀯𑀧𑀭𑀺𑀓𑀧𑁆𑀧𑀦𑁂𑀦 𑀯𑀺𑀧𑀭𑀻𑀢𑀕𑁆𑀕𑀸𑀳𑁄. 𑀆𑀤𑀺-𑀲𑀤𑁆𑀤𑁂𑀦 𑀅𑀦𑀸𑀤𑀭𑀸𑀕𑀸𑀭𑀯𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀦 𑀫𑀳𑀸𑀚𑀼𑀢𑀺𑀓𑀦𑁆𑀢𑀺 𑀦 𑀉𑀚𑁆𑀚𑀮𑀁, 𑀅𑀧𑀭𑀺𑀲𑀼𑀤𑁆𑀥𑀁 𑀅𑀧𑀭𑀺𑀬𑁄𑀤𑀸𑀢𑀦𑁆𑀢𑀺 𑀅𑀢𑁆𑀣𑁄. 𑀦 𑀫𑀳𑀸𑀯𑀺𑀧𑁆𑀨𑀸𑀭𑀦𑁆𑀢𑀺 𑀅𑀦𑀼𑀴𑀸𑀭𑀁. 𑀲𑀸𑀯𑀚𑁆𑀚𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀸𑀤𑀺𑀯𑀲𑁂𑀦 𑀲𑀤𑁄𑀲𑁄, 𑀮𑁄𑀓𑀺𑀬𑀲𑀭𑀡𑀕𑀫𑀦𑀁 𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀁 𑀯𑀺𑀬 𑀅𑀕𑁆𑀕𑀳𑀺𑀢𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀔𑀦𑁆𑀥𑀪𑁂𑀤𑁂𑀦 𑀪𑁂𑀤𑁄𑀢𑀺 𑀆𑀳 ‘‘𑀅𑀦𑀯𑀚𑁆𑀚𑁄 𑀓𑀸𑀮𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑁄𑀢𑀺 𑀅𑀦𑀯𑀚𑁆𑀚𑁄 𑀲𑀭𑀡𑀕𑀫𑀦𑀪𑁂𑀤𑁄. 𑀲𑀢𑀺𑀧𑀺 𑀅𑀦𑀯𑀚𑁆𑀚𑀢𑁆𑀢𑁂 𑀇𑀝𑁆𑀞𑀨𑀮𑁄𑀧𑀺 𑀦 ¶ 𑀳𑁄𑀢𑀻𑀢𑀺 𑀆𑀳 ‘‘𑀅𑀨𑀮𑁄’’𑀢𑀺. 𑀓𑀲𑁆𑀫𑀸? 𑀅𑀯𑀺𑀧𑀸𑀓𑀢𑁆𑀢𑀸. 𑀦 𑀳𑀺 𑀢𑀁 𑀅𑀓𑀼𑀲𑀮𑀦𑁆𑀢𑀺.

𑀓𑁄 𑀉𑀧𑀸𑀲𑀓𑁄𑀢𑀺 𑀲𑀭𑀽𑀧𑀧𑀼𑀘𑁆𑀙𑀸, 𑀓𑀺𑀁𑀮𑀓𑁆𑀔𑀡𑁄 𑀉𑀧𑀸𑀲𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀲𑁆𑀫𑀸𑀢𑀺 𑀳𑁂𑀢𑀼𑀧𑀼𑀘𑁆𑀙𑀸, 𑀢𑁂𑀦 𑀓𑁂𑀦 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑁂𑀦 𑀉𑀧𑀸𑀲𑀓-𑀲𑀤𑁆𑀤𑁄 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀦𑀺𑀭𑀽𑀴𑁆𑀳𑁄𑀢𑀺 𑀤𑀲𑁆𑀲𑁂𑀢𑀺, 𑀢𑁂𑀦𑀸𑀳 ‘‘𑀓𑀲𑁆𑀫𑀸 𑀉𑀧𑀸𑀲𑀓𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀲𑀤𑁆𑀤𑀲𑁆𑀲 𑀅𑀪𑀺𑀥𑁂𑀬𑁆𑀬𑁂 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀢𑀤𑀢𑁆𑀣𑀲𑁆𑀲 𑀢𑀩𑁆𑀪𑀸𑀯𑀓𑀸𑀭𑀡𑀁. 𑀓𑀺𑀫𑀲𑁆𑀲 𑀲𑀻𑀮𑀦𑁆𑀢𑀺 𑀓𑀻𑀤𑀺𑀲𑀁 𑀅𑀲𑁆𑀲 𑀉𑀧𑀸𑀲𑀓𑀲𑁆𑀲 𑀲𑀻𑀮𑀁, 𑀓𑀺𑀢𑁆𑀢𑀓𑁂𑀦 𑀲𑀻𑀮𑁂𑀦𑀸𑀬𑀁 𑀲𑀻𑀮𑀲𑀫𑁆𑀧𑀦𑁆𑀦𑁄 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑁄 𑀆𑀚𑀻𑀯𑁄𑀢𑀺 𑀓𑁄 𑀅𑀲𑁆𑀲 𑀲𑀫𑁆𑀫𑀸𑀆𑀚𑀻𑀯𑁄, 𑀲𑁄 𑀧𑀦 𑀫𑀺𑀘𑁆𑀙𑀸𑀚𑀻𑀯𑀲𑁆𑀲 𑀧𑀭𑀺𑀯𑀚𑁆𑀚𑀦𑁂𑀦 𑀳𑁄𑀢𑀻𑀢𑀺 𑀲𑁄𑀧𑀺 𑀯𑀺𑀪𑀚𑀻𑀬𑀢𑀺. 𑀓𑀸 𑀯𑀺𑀧𑀢𑁆𑀢𑀻𑀢𑀺 𑀓𑀸 𑀅𑀲𑁆𑀲 𑀲𑀻𑀮𑀲𑁆𑀲, 𑀆𑀚𑀻𑀯𑀲𑁆𑀲 ¶ 𑀯𑀸 𑀯𑀺𑀧𑀢𑁆𑀢𑀺. 𑀅𑀦𑀦𑁆𑀢𑀭𑀲𑁆𑀲 𑀳𑀺 𑀯𑀺𑀥𑀺 𑀯𑀸 𑀧𑀝𑀺𑀲𑁂𑀥𑁄 𑀯𑀸. 𑀲𑀫𑁆𑀧𑀢𑁆𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀬𑁄 𑀓𑁄𑀘𑀻𑀢𑀺 𑀔𑀢𑁆𑀢𑀺𑀬𑀸𑀤𑀻𑀲𑀼 𑀬𑁄 𑀓𑁄𑀘𑀺, 𑀢𑁂𑀦 𑀲𑀭𑀡𑀕𑀫𑀦𑀁 𑀏𑀯𑀁 𑀓𑀸𑀭𑀡𑀁, 𑀦 𑀚𑀸𑀢𑀺 𑀆𑀤𑀺𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀢𑀺.

𑀉𑀧𑀸𑀲𑀦𑀢𑁄𑀢𑀺 𑀢𑁂𑀦𑁂𑀯 𑀲𑀭𑀡𑀕𑀫𑀦𑁂𑀦, 𑀢𑀢𑁆𑀣 𑀘 𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸𑀬 𑀆𑀤𑀭 𑀕𑀸𑀭𑀯𑀩𑀳𑀼𑀫𑀸𑀦𑀸𑀤𑀺𑀬𑁄𑀕𑁂𑀦 𑀧𑀬𑀺𑀭𑀼𑀧𑀸𑀲𑀦𑀢𑁄.

𑀯𑁂𑀭𑀫𑀡𑀺𑀬𑁄𑀢𑀺 ¶ 𑀯𑁂𑀭𑀁 𑀯𑀼𑀘𑁆𑀘𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀤𑀼𑀲𑁆𑀲𑀻𑀮𑁆𑀬𑀁, 𑀢𑀲𑁆𑀲 𑀫𑀡𑀦𑀢𑁄 𑀳𑀦𑀦𑀢𑁄 𑀯𑀺𑀦𑀸𑀲𑀦𑀢𑁄 𑀯𑁂𑀭𑀫𑀡𑀺𑀬𑁄, 𑀧𑀜𑁆𑀘 𑀯𑀺𑀭𑀢𑀺𑀬𑁄 𑀯𑀺𑀭𑀢𑀺𑀧𑀥𑀸𑀦𑀢𑁆𑀢𑀸 𑀢𑀲𑁆𑀲 𑀲𑀻𑀮𑀲𑁆𑀲, 𑀢𑁂𑀦𑁂𑀯𑀸𑀳 ‘‘𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺.

𑀫𑀺𑀘𑁆𑀙𑀸𑀯𑀡𑀺𑀚𑁆𑀚𑀸𑀢𑀺 𑀦 𑀲𑀫𑁆𑀫𑀸𑀯𑀡𑀺𑀚𑁆𑀚𑀸 𑀅𑀬𑀼𑀢𑁆𑀢𑀯𑀡𑀺𑀚𑁆𑀚𑀸 𑀅𑀲𑀸𑀭𑀼𑀧𑁆𑀧𑀯𑀡𑀺𑀚𑁆𑀚𑀸. 𑀧𑀳𑀸𑀬𑀸𑀢𑀺 𑀅𑀓𑀭𑀡𑁂𑀦𑁂𑀯 𑀧𑀚𑀳𑀺𑀢𑁆𑀯𑀸. 𑀥𑀫𑁆𑀫𑁂𑀦𑀸𑀢𑀺 𑀥𑀫𑁆𑀫𑀢𑁄 𑀅𑀦𑀧𑁂𑀢𑁂𑀦, 𑀢𑁂𑀦 𑀅𑀜𑁆𑀜𑀫𑁆𑀧𑀺 𑀅𑀥𑀫𑁆𑀫𑀺𑀓𑀁 𑀚𑀻𑀯𑀺𑀓𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀫𑁂𑀦𑀸𑀢𑀺 𑀅𑀯𑀺𑀲𑀫𑁂𑀦, 𑀢𑁂𑀦 𑀓𑀸𑀬𑀯𑀺𑀲𑀁 𑀆𑀤𑀺𑀤𑀼𑀘𑁆𑀘𑀭𑀺𑀢𑀁 𑀯𑀚𑁆𑀚𑁂𑀢𑁆𑀯𑀸 𑀓𑀸𑀬𑀲𑀫𑀸𑀤𑀺𑀦𑀸 𑀲𑀼𑀘𑀭𑀺𑀢𑁂𑀦 𑀚𑀻𑀯𑀺𑀓𑀁 𑀤𑀲𑁆𑀲𑁂𑀢𑀺. 𑀲𑀢𑁆𑀣𑀯𑀡𑀺𑀚𑁆𑀚𑀸𑀢𑀺 𑀆𑀯𑀼𑀥𑀪𑀡𑁆𑀟𑀁 𑀓𑀢𑁆𑀯𑀸 ¶ 𑀯𑀸 𑀓𑀸𑀭𑁂𑀢𑁆𑀯𑀸 𑀯𑀸 𑀬𑀣𑀸𑀓𑀢𑀁 𑀯𑀸 𑀧𑀝𑀺𑀮𑀪𑀺𑀢𑁆𑀯𑀸 𑀢𑀲𑁆𑀲 𑀯𑀺𑀓𑁆𑀓𑀬𑁄. 𑀲𑀢𑁆𑀢𑀯𑀡𑀺𑀚𑁆𑀚𑀸𑀢𑀺 𑀫𑀦𑀼𑀲𑁆𑀲𑀯𑀺𑀓𑁆𑀓𑀬𑁄. 𑀫𑀁𑀲𑀯𑀡𑀺𑀚𑁆𑀚𑀸𑀢𑀺 𑀲𑀽𑀦𑀓𑀸𑀭𑀸𑀤𑀬𑁄 𑀯𑀺𑀬 𑀫𑀺𑀕𑀲𑀽𑀓𑀭𑀸𑀤𑀺𑀓𑁂 𑀧𑁄𑀲𑁂𑀢𑁆𑀯𑀸 𑀫𑀁𑀲𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀺𑀓𑁆𑀓𑀬𑁄. 𑀫𑀚𑁆𑀚𑀯𑀡𑀺𑀚𑁆𑀚𑀸𑀢𑀺 𑀬𑀁 𑀓𑀺𑀜𑁆𑀘𑀺 𑀫𑀚𑁆𑀚𑀁 𑀬𑁄𑀚𑁂𑀢𑁆𑀯𑀸 𑀢𑀲𑁆𑀲 𑀯𑀺𑀓𑁆𑀓𑀬𑁄. 𑀯𑀺𑀲𑀯𑀡𑀺𑀚𑁆𑀚𑀸𑀢𑀺 𑀯𑀺𑀲𑀁 𑀬𑁄𑀚𑁂𑀢𑁆𑀯𑀸 𑀯𑀸 𑀯𑀺𑀲𑀁 𑀕𑀳𑁂𑀢𑁆𑀯𑀸 𑀯𑀸 𑀢𑀲𑁆𑀲 𑀯𑀺𑀓𑁆𑀓𑀬𑁄. 𑀢𑀢𑁆𑀣 𑀲𑀢𑁆𑀣𑀯𑀡𑀺𑀚𑁆𑀚𑀸 𑀧𑀭𑁄𑀧𑀭𑁄𑀥𑀦𑀺𑀫𑀺𑀢𑁆𑀢𑀢𑀸𑀬 𑀅𑀓𑀭𑀡𑀻𑀬𑀸 𑀯𑀼𑀢𑁆𑀢𑀸 𑀲𑀢𑁆𑀢𑀯𑀡𑀺𑀚𑁆𑀚𑀸 𑀅𑀪𑀼𑀚𑀺𑀲𑁆𑀲𑀪𑀸𑀯𑀓𑀭𑀡𑀢𑁄, 𑀫𑀁𑀲𑀯𑀡𑀺𑀚𑁆𑀚𑀸 𑀯𑀥𑀳𑁂𑀢𑀼𑀢𑁄, 𑀫𑀚𑁆𑀚𑀯𑀡𑀺𑀚𑁆𑀚𑀸 𑀧𑀫𑀸𑀤𑀝𑁆𑀞𑀸𑀦𑀢𑁄.

𑀢𑀲𑁆𑀲𑁂𑀯𑀸𑀢𑀺 𑀧𑀜𑁆𑀘𑀯𑁂𑀭𑀫𑀡𑀺𑀮𑀓𑁆𑀔𑀡𑀲𑁆𑀲 𑀲𑀻𑀮𑀲𑁆𑀲 𑀘𑁂𑀯 𑀧𑀜𑁆𑀘𑀫𑀺𑀘𑁆𑀙𑀸𑀯𑀡𑀺𑀚𑁆𑀚𑀸𑀮𑀓𑁆𑀔𑀡𑀲𑁆𑀲 𑀆𑀚𑀻𑀯𑀲𑁆𑀲 𑀘. 𑀯𑀺𑀧𑀢𑁆𑀢𑀻𑀢𑀺 𑀪𑁂𑀤𑁄, 𑀧𑀓𑁄𑀧𑁄 𑀘. 𑀬𑀸𑀬𑀸𑀢𑀺 𑀬𑀸𑀬 𑀧𑀝𑀺𑀧𑀢𑁆𑀢𑀺𑀬𑀸. 𑀘𑀡𑁆𑀟𑀸𑀮𑁄𑀢𑀺 𑀉𑀧𑀸𑀲𑀓𑀘𑀡𑁆𑀟𑀸𑀮𑁄. 𑀫𑀮𑀦𑁆𑀢𑀺 𑀉𑀧𑀸𑀲𑀓𑀫𑀮𑀁. 𑀧𑀝𑀺𑀓𑀺𑀝𑁆𑀞𑁄𑀢𑀺 𑀉𑀧𑀸𑀲𑀓𑀦𑀺𑀳𑀻𑀦𑁄. 𑀩𑀼𑀤𑁆𑀥𑀸𑀤𑀻𑀲𑀼 𑀓𑀫𑁆𑀫𑀓𑀫𑁆𑀫𑀨𑀮𑁂𑀲𑀼 𑀘 𑀲𑀤𑁆𑀥𑀸𑀯𑀺𑀧𑀭𑀺𑀬𑀸𑀬𑁄 𑀅𑀲𑁆𑀲𑀤𑁆𑀥𑀺𑀬𑀁 𑀫𑀺𑀘𑁆𑀙𑀸𑀥𑀺𑀫𑁄𑀓𑁆𑀔𑁄, 𑀬𑀣𑀸𑀯𑀼𑀢𑁆𑀢𑁂𑀦 𑀅𑀲𑁆𑀲𑀤𑁆𑀥𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲𑀤𑁆𑀥𑁄. 𑀬𑀣𑀸𑀯𑀼𑀢𑁆𑀢𑀲𑀻𑀮𑀯𑀺𑀧𑀢𑁆𑀢𑀺𑀆𑀚𑀻𑀯𑀯𑀺𑀧𑀢𑁆𑀢𑀺𑀯𑀲𑁂𑀦 𑀤𑀼𑀲𑁆𑀲𑀻𑀮𑁄. ‘‘𑀇𑀫𑀺𑀦𑀸 𑀤𑀺𑀝𑁆𑀞𑀸𑀤𑀺𑀦𑀸 𑀇𑀤𑀁 𑀦𑀸𑀫 𑀫𑀗𑁆𑀕𑀮𑀁 𑀳𑁄𑀢𑀻’’𑀢𑀺 𑀏𑀯𑀁 𑀩𑀸𑀮𑀚𑀦𑀧𑀭𑀺𑀓𑀧𑁆𑀧𑀺𑀢𑀓𑁄𑀢𑀽𑀳𑀮𑀲𑀗𑁆𑀔𑀸𑀢𑁂𑀦 𑀤𑀺𑀝𑁆𑀞𑀲𑀼𑀢𑀫𑀼𑀢𑀫𑀗𑁆𑀕𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑁄𑀢𑀽𑀳𑀮𑀫𑀗𑁆𑀕𑀮𑀺𑀓𑁄. 𑀫𑀗𑁆𑀕𑀮𑀁 𑀧𑀘𑁆𑀘𑁂𑀢𑀻𑀢𑀺 𑀤𑀺𑀝𑁆𑀞𑀫𑀗𑁆𑀕𑀮𑀸𑀤𑀺𑀪𑁂𑀤𑀁 𑀫𑀗𑁆𑀕𑀮𑀫𑁂𑀯 𑀧𑀢𑁆𑀢𑀺𑀬𑀸𑀬𑀢𑀺. 𑀦𑁄 𑀓𑀫𑁆𑀫𑀦𑁆𑀢𑀺 ¶ 𑀓𑀫𑁆𑀫𑀲𑁆𑀲𑀓𑀢𑀁 𑀦𑁄 𑀧𑀢𑁆𑀢𑀺𑀬𑀸𑀬𑀢𑀺. 𑀇𑀢𑁄 𑀘 𑀩𑀳𑀺𑀤𑁆𑀥𑀸𑀢𑀺 𑀇𑀢𑁄 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑀸𑀲𑀦𑀢𑁄 𑀩𑀳𑀺𑀤𑁆𑀥𑀸 𑀩𑀸𑀳𑀺𑀭𑀓𑀲𑀫𑀬𑁂. 𑀤𑀓𑁆𑀔𑀺𑀡𑁂𑀬𑁆𑀬𑀁 𑀧𑀭𑀺𑀬𑁂𑀲𑀢𑀻𑀢𑀺 𑀤𑀼𑀧𑁆𑀧𑀝𑀺𑀧𑀦𑁆𑀦𑀁 𑀤𑀓𑁆𑀔𑀺𑀡𑀸𑀭𑀳𑀲𑀜𑁆𑀜𑀻 𑀕𑀯𑁂𑀲𑀢𑀺. 𑀧𑀼𑀩𑁆𑀩𑀓𑀸𑀭𑀁 𑀓𑀭𑁄𑀢𑀻𑀢𑀺 𑀤𑀸𑀦𑀫𑀸𑀦𑀁 𑀆𑀤𑀺𑀓𑀁 𑀓𑀼𑀲𑀮𑀓𑀺𑀭𑀺𑀬𑀁 𑀧𑀞𑀫𑀢𑀭𑀁 𑀓𑀭𑁄𑀢𑀺. 𑀏𑀢𑁆𑀣 𑀘 𑀤𑀓𑁆𑀔𑀺𑀡𑁂𑀬𑁆𑀬𑀧𑀭𑀺𑀬𑁂𑀲𑀦𑀧𑀼𑀩𑁆𑀩𑀓𑀸𑀭𑁂 𑀏𑀓𑀁 𑀓𑀢𑁆𑀯𑀸 𑀧𑀜𑁆𑀘 𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸.

𑀯𑀺𑀧𑀢𑁆𑀢𑀺𑀬𑀁 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀲𑀫𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀘𑀢𑀼𑀦𑁆𑀦𑀫𑁆𑀧𑀺 𑀧𑀭𑀺𑀲𑀸𑀦𑀁 𑀭𑀢𑀺𑀚𑀦𑀦𑀝𑁆𑀞𑁂𑀦 𑀉𑀧𑀸𑀲𑀓𑁄𑀯 𑀭𑀢𑀦𑀁 𑀉𑀧𑀸𑀲𑀓𑀭𑀢𑀦𑀁. 𑀕𑀼𑀡𑀲𑁄𑀪𑀸𑀓𑀺𑀢𑁆𑀢𑀺𑀲𑀤𑁆𑀤𑀲𑀼𑀕𑀦𑁆𑀥𑀢𑀸𑀬 ¶ ¶ 𑀉𑀧𑀸𑀲𑀓𑁄𑀯 𑀧𑀤𑀼𑀫𑀁 𑀉𑀧𑀸𑀲𑀓𑀧𑀤𑀼𑀫𑀁. 𑀢𑀣𑀸 𑀉𑀧𑀸𑀲𑀓𑀧𑀼𑀡𑁆𑀟𑀭𑀻𑀓𑀁.

𑀆𑀤𑀺𑀫𑁆𑀳𑀻𑀢𑀺𑀆𑀤𑀺𑀅𑀢𑁆𑀣𑁂. 𑀓𑁄𑀝𑀺𑀬𑀦𑁆𑀢𑀺 𑀧𑀭𑀺𑀬𑀦𑁆𑀢𑀓𑁄𑀝𑀺𑀬𑀁. 𑀯𑀺𑀳𑀸𑀭𑀕𑁆𑀕𑁂𑀦𑀸𑀢𑀺 𑀑𑀯𑀭𑀓𑀓𑁄𑀝𑁆𑀞𑀸𑀲𑁂𑀦, ‘‘𑀇𑀫𑀲𑁆𑀫𑀺𑀁 𑀕𑀩𑁆𑀪𑁂 𑀯𑀲𑀦𑁆𑀢𑀸𑀦𑀫𑀺𑀤𑀁 𑀦𑀸𑀫 𑀧𑀦𑀲𑀨𑀮𑀁 𑀧𑀸𑀧𑀼𑀡𑀸𑀢𑀻’’𑀢𑀺𑀆𑀤𑀺𑀦𑀸 𑀢𑀁 𑀢𑀁𑀯𑀲𑀦𑀝𑁆𑀞𑀸𑀦𑀓𑁄𑀝𑁆𑀞𑀸𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀚𑁆𑀚𑀢𑀕𑁆𑀕𑀦𑁆𑀢𑀺 𑀯𑀸 𑀅𑀚𑁆𑀚𑀤𑀕𑁆𑀕𑀦𑁆𑀢𑀺 𑀯𑀸 𑀅𑀚𑁆𑀚 𑀇𑀘𑁆𑀘𑁂𑀯 𑀅𑀢𑁆𑀣𑁄.

‘‘𑀧𑀸𑀡𑁂𑀳𑀺 𑀉𑀧𑁂𑀢’’𑀦𑁆𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀲𑀭𑀡𑀕𑀫𑀦𑀲𑁆𑀲 𑀆𑀧𑀸𑀡𑀓𑁄𑀝𑀺𑀓𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀸𑀯 𑀫𑁂 𑀚𑀻𑀯𑀺𑀢𑀁 𑀧𑀯𑀢𑁆𑀢𑀢𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀧𑀼𑀦 𑀚𑀻𑀯𑀺𑀢𑁂𑀦𑀸𑀧𑀺 𑀢𑀁 𑀯𑀢𑁆𑀣𑀼𑀢𑁆𑀢𑀬𑀁 𑀧𑀝𑀺𑀧𑀽𑀚𑁂𑀦𑁆𑀢𑁄 ‘‘𑀲𑀭𑀡𑀕𑀫𑀦𑀁 𑀭𑀓𑁆𑀔𑀸𑀫𑀻’’𑀢𑀺 𑀉𑀧𑁆𑀧𑀦𑁆𑀦𑀁 𑀢𑀲𑁆𑀲 𑀭𑀜𑁆𑀜𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀅𑀳𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀧𑀸𑀡𑁂𑀳𑀺 𑀉𑀧𑁂𑀢𑀦𑁆𑀢𑀺 𑀳𑀺 𑀬𑀸𑀯 𑀫𑁂 𑀧𑀸𑀡𑀸 𑀥𑀭𑀦𑁆𑀢𑀺, 𑀢𑀸𑀯 𑀲𑀭𑀡𑀁 𑀉𑀧𑁂𑀢𑀁, 𑀉𑀧𑁂𑀦𑁆𑀢𑁄 𑀘 𑀦 𑀯𑀸𑀘𑀸𑀫𑀢𑁆𑀢𑁂𑀦, 𑀦 𑀏𑀓𑀯𑀸𑀭𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦, 𑀅𑀣 𑀔𑁄 𑀧𑀸𑀡𑀸𑀦𑀁 𑀧𑀭𑀺𑀘𑁆𑀘𑀚𑀦𑀯𑀲𑁂𑀦 𑀬𑀸𑀯𑀚𑀻𑀯𑀁 𑀉𑀧𑁂𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀘𑁆𑀘𑀬𑀦𑀁 𑀲𑀸𑀥𑀼𑀫𑀭𑀺𑀬𑀸𑀤𑀁 𑀫𑀤𑁆𑀤𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀦𑀁 𑀅𑀘𑁆𑀘𑀬𑁄𑀢𑀺 𑀆𑀳 ‘‘𑀅𑀧𑀭𑀸𑀥𑁄’’𑀢𑀺. 𑀅𑀘𑁆𑀘𑁂𑀢𑀺 𑀅𑀢𑀺𑀓𑁆𑀓𑀫𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀅𑀘𑁆𑀘𑀬𑁄, 𑀯𑀻𑀢𑀺𑀓𑁆𑀓𑀫𑀲𑁆𑀲 𑀧𑀯𑀢𑁆𑀢𑀦𑀓𑁄 𑀅𑀓𑀼𑀲𑀮𑀥𑀫𑁆𑀫𑁄. 𑀲𑁄 𑀏𑀯 𑀅𑀧𑀭𑀚𑁆𑀛𑀢𑀺 𑀏𑀢𑁂𑀦𑀸𑀢𑀺 𑀅𑀧𑀭𑀸𑀥𑁄. 𑀲𑁄 𑀳𑀺 𑀅𑀧𑀭𑀚𑁆𑀛𑀦𑁆𑀢𑀁 𑀧𑀼𑀭𑀺𑀲𑀁 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀢𑁂𑀦𑀸𑀳 ‘‘𑀅𑀢𑀺𑀓𑁆𑀓𑀫𑁆𑀫 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑁄’’𑀢𑀺. 𑀘𑀭𑀢𑀻𑀢𑀺 𑀆𑀘𑀭𑀢𑀺 𑀓𑀭𑁄𑀢𑀺. 𑀥𑀫𑁆𑀫𑁂𑀦𑁂𑀯𑀸𑀢𑀺 𑀥𑀫𑁆𑀫𑀢𑁄 𑀅𑀦𑀧𑁂𑀢𑁂𑀦 𑀧𑀬𑁄𑀕𑁂𑀦. 𑀧𑀝𑀺𑀕𑁆𑀕𑀡𑁆𑀳𑀸𑀢𑀽𑀢𑀺 𑀅𑀥𑀺𑀯𑀸𑀲𑀦𑀯𑀲𑁂𑀦 𑀲𑀫𑁆𑀧𑀝𑀺𑀘𑁆𑀙𑀢𑀽𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀔𑀫𑀢𑀽’’𑀢𑀺.

𑁨𑁫𑁧. 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 ‘‘𑀲𑀭𑀡’’𑀦𑁆𑀢𑀺 𑀅𑀭𑀡𑀻𑀬𑀢𑁄 𑀅𑀭𑀺𑀬𑁄, 𑀢𑀣𑀸𑀕𑀢𑁄𑀢𑀺 𑀆𑀳 ‘‘𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂’’𑀢𑀺. 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑁄𑀢𑀺 𑀓𑀸𑀫𑀁 ‘‘𑀯𑀼𑀤𑁆𑀥𑀺 𑀳𑁂𑀲𑀸’’𑀢𑀺 ¶ 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀯𑀸𑀓𑁆𑀬𑀁 𑀆𑀭𑀤𑁆𑀥𑀁, 𑀢𑀣𑀸𑀧𑀺 𑀤𑁂𑀲𑀦𑀁 ¶ 𑀧𑀦 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑁄 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻𑀢𑀺 𑀆𑀳𑀸𑀢𑀺 𑀬𑁄𑀚𑀦𑀸.

𑁨𑁫𑁩. 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀦𑀺𑀧𑁆𑀧𑀚𑁆𑀚𑀦𑀓𑀸𑀦𑀁 𑀅𑀢𑁆𑀢𑀦𑁄 𑀓𑀼𑀲𑀮𑀫𑀽𑀮𑀸𑀦𑀁 𑀔𑀡𑀦𑁂𑀦 𑀔𑀢𑁄, 𑀢𑁂𑀲𑀁𑀬𑁂𑀯 𑀉𑀧𑀳𑀦𑀦𑁂𑀦 𑀉𑀧𑀳𑀢𑁄. 𑀉𑀪𑀬𑁂𑀦𑀸𑀧𑀺 𑀢𑀲𑁆𑀲 𑀓𑀫𑁆𑀫𑀸𑀧𑀭𑀸𑀥𑀫𑁂𑀯 𑀯𑀤𑀢𑀺. 𑀧𑀢𑀺𑀝𑁆𑀞𑀸𑀢𑀺 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄𑀓𑁆𑀓𑀫𑀦𑀁 𑀏𑀢𑀸𑀬𑀸𑀢𑀺 ¶ 𑀧𑀢𑀺𑀝𑁆𑀞𑀸, 𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀤𑀸. 𑀲𑀸 𑀓𑀺𑀭𑀺𑀬𑀸𑀧𑀭𑀸𑀥𑁂𑀦 𑀪𑀺𑀦𑁆𑀦𑀸 𑀯𑀺𑀦𑀸𑀲𑀺𑀢𑀸 𑀏𑀢𑁂𑀦𑀸𑀢𑀺 𑀪𑀺𑀦𑁆𑀦𑀧𑀢𑀺𑀝𑁆𑀞𑁄, 𑀢𑁂𑀦𑀸𑀳 ‘‘𑀢𑀣𑀸’’𑀢𑀺𑀆𑀤𑀺. 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀦𑁆𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁂𑀲𑀼 𑀢𑁂𑀲𑀁 𑀤𑀲𑁆𑀲𑀦𑀝𑁆𑀞𑁂𑀦 𑀘𑀓𑁆𑀔𑀼. 𑀅𑀜𑁆𑀜𑁂𑀲𑀼 𑀞𑀸𑀦𑁂𑀲𑀽𑀢𑀺 𑀅𑀜𑁆𑀜𑁂𑀲𑀼 𑀲𑀼𑀢𑁆𑀢𑀧𑀤𑁂𑀲𑀼. 𑀫𑀼𑀘𑁆𑀘𑀺𑀲𑁆𑀲𑀢𑀻𑀢𑀺 𑀲𑀝𑁆𑀞𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀧𑀘𑁆𑀘𑀺𑀢𑁆𑀯𑀸 𑀮𑁄𑀳𑀓𑀼𑀫𑁆𑀪𑀻 𑀦𑀭𑀓𑀢𑁄 𑀫𑀼𑀘𑁆𑀘𑀺𑀲𑁆𑀲𑀢𑀺.

𑀬𑀤𑀺 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀦𑀭𑀓𑁂 𑀧𑀘𑁆𑀘𑀢𑀺, 𑀇𑀫𑀁 𑀧𑀦 𑀲𑀼𑀢𑁆𑀢𑀁 𑀲𑀼𑀢𑁆𑀯𑀸 𑀭𑀜𑁆𑀜𑁄 𑀓𑁄 𑀆𑀦𑀺𑀲𑀁𑀲𑁄 𑀮𑀤𑁆𑀥𑁄𑀢𑀺 𑀆𑀳 ‘‘𑀫𑀳𑀸𑀦𑀺𑀲𑀁𑀲𑁄’’𑀢𑀺𑀆𑀤𑀺. 𑀲𑁄 𑀧𑀦 𑀆𑀦𑀺𑀲𑀁𑀲𑁄 𑀦𑀺𑀤𑁆𑀤𑀸𑀮𑀸𑀪𑀲𑀻𑀲𑁂𑀦 𑀯𑀼𑀢𑁆𑀢𑁄 𑀢𑀤𑀸 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀸𑀧𑀕𑀫𑁄, 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀫𑀳𑀸𑀲𑀓𑁆𑀓𑀸𑀭𑀓𑀺𑀭𑀺𑀬𑀸, 𑀲𑀸𑀢𑀺𑀲𑀬𑁄 𑀧𑁄𑀣𑀼𑀚𑁆𑀚𑀦𑀺𑀓𑀲𑀤𑁆𑀥𑀸𑀧𑀝𑀺𑀮𑀸𑀪𑁄𑀢𑀺 𑀏𑀯𑀁𑀧𑀓𑀸𑀭𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑁄, 𑀲𑀫𑁆𑀧𑀭𑀸𑀬𑀺𑀓𑁄 𑀧𑀦 𑀅𑀧𑀭𑀸𑀧𑀭𑁂𑀲𑀼𑀧𑀺 𑀪𑀯𑁂𑀲𑀼 𑀅𑀧𑀭𑀺𑀫𑀸𑀡𑁄 𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣𑀸𑀳 𑁋 𑀬𑀤𑀺 𑀭𑀜𑁆𑀜𑁄 𑀓𑀫𑁆𑀫𑀦𑁆𑀢𑀭𑀸𑀬𑀸𑀪𑀸𑀯𑁂 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀥𑀫𑁆𑀫𑀘𑀓𑁆𑀔𑀼 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀓𑀣𑀁 𑀅𑀦𑀸𑀕𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺. 𑀅𑀣 ¶ 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺, 𑀓𑀣𑀁 𑀢𑀤𑀸 𑀥𑀫𑁆𑀫𑀘𑀓𑁆𑀔𑀼𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀦𑀦𑀼 𑀇𑀫𑁂 𑀲𑀸𑀯𑀓𑀩𑁄𑀥𑀺𑀧𑀘𑁆𑀘𑁂𑀓𑀩𑁄𑀥𑀺𑀉𑀧𑀦𑀺𑀲𑁆𑀲𑀬𑀸 𑀪𑀺𑀦𑁆𑀦𑀦𑀺𑀲𑁆𑀲𑀬𑀸𑀢𑀺? 𑀦𑀸𑀬𑀁 𑀯𑀺𑀭𑁄𑀥𑁄 𑀇𑀢𑁄 𑀧𑀭𑀢𑁄 𑀏𑀯𑀲𑁆𑀲 𑀧𑀘𑁆𑀘𑁂𑀓𑀩𑁄𑀥𑀺𑀲𑀫𑁆𑀪𑀸𑀭𑀸𑀦𑀁 𑀲𑀫𑁆𑀪𑀭𑀡𑀻𑀬𑀢𑁄. 𑀲𑀸𑀯𑀓𑀩𑁄𑀥𑀺𑀬𑀸 𑀩𑀼𑀚𑁆𑀛𑀦𑀓𑀲𑀢𑁆𑀢𑀸𑀧𑀺 𑀳𑀺 𑀅𑀲𑀢𑀺 𑀢𑀲𑁆𑀲𑀸 𑀲𑀫𑀯𑀸𑀬𑁂 𑀓𑀸𑀮𑀦𑁆𑀢𑀭𑁂 𑀧𑀘𑁆𑀘𑁂𑀓𑀩𑁄𑀥𑀺𑀬𑀸 𑀩𑀼𑀚𑁆𑀛𑀺𑀲𑁆𑀲𑀦𑁆𑀢𑀺 𑀓𑀢𑀸𑀪𑀺𑀦𑀻𑀳𑀸𑀭𑀲𑀫𑁆𑀪𑀯𑀢𑁄. 𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 ‘‘𑀧𑀘𑁆𑀘𑁂𑀓𑀩𑁄𑀥𑀺𑀬𑀸 𑀬𑁂𑀯𑀸𑀬𑀁 𑀓𑀢𑀸𑀪𑀺𑀦𑀻𑀳𑀸𑀭𑁄. 𑀓𑀢𑀸𑀪𑀺𑀦𑀻𑀳𑀸𑀭𑀸𑀧𑀺 𑀳𑀺 𑀢𑀢𑁆𑀣 𑀦𑀺𑀬𑀢𑀺𑀁 𑀅𑀧𑁆𑀧𑀢𑁆𑀢𑀸 𑀢𑀲𑁆𑀲 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀁 𑀅𑀦𑀼𑀧𑀕𑀢𑀢𑁆𑀢𑀸 𑀲𑀢𑁆𑀣𑀼 𑀲𑀫𑁆𑀫𑀼𑀔𑀻𑀪𑀸𑀯𑁂 𑀲𑀸𑀯𑀓𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀻𑀢𑀺 𑀪𑀕𑀯𑀸 ‘𑀲𑀘𑀸𑀬𑀁 𑀪𑀺𑀓𑁆𑀔𑀯𑁂 𑀭𑀸𑀚𑀸’𑀢𑀺𑀆𑀤𑀺𑀫𑀸𑀳. 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀫𑁂𑀯 𑀘 𑀆𑀦𑀦𑁆𑀢𑀭𑀺𑀬𑀧𑀭𑀺𑀫𑀼𑀢𑁆𑀢𑀺, 𑀦 𑀇𑀢𑀭𑀩𑁄𑀥𑀺𑀲𑀢𑁆𑀢𑀸𑀦𑀁. 𑀢𑀣𑀸 𑀳𑀺 𑀧𑀘𑁆𑀘𑁂𑀓𑀩𑁄𑀥𑀺𑀬𑀁 𑀦𑀺𑀬𑀢𑁄 𑀲𑀫𑀸𑀦𑁄 𑀤𑁂𑀯𑀤𑀢𑁆𑀢𑁄 𑀘𑀺𑀭𑀓𑀸𑀮𑀲𑀫𑁆𑀪𑀽𑀢𑁂𑀦 𑀮𑁄𑀓𑀦𑀸𑀣𑁂 𑀆𑀖𑀸𑀢𑁂𑀦 𑀕𑀭𑀼𑀢𑀭𑀸𑀦𑀺 𑀆𑀦𑀦𑁆𑀢𑀭𑀺𑀬𑀸𑀦𑀺 𑀧𑀲𑀯𑀺, 𑀢𑀲𑁆𑀫𑀸 𑀓𑀫𑁆𑀫𑀦𑁆𑀢𑀭𑀸𑀬𑁂𑀦𑀸𑀬𑀁 𑀇𑀤𑀸𑀦𑀺 𑀅𑀲𑀫𑀯𑁂𑀢𑀤𑀲𑁆𑀲𑀦𑀸𑀪𑀺𑀲𑀫𑀬𑁄 𑀭𑀸𑀚𑀸 𑀧𑀘𑁆𑀘𑁂𑀓𑀩𑁄𑀥𑀺𑀦𑀺𑀬𑀸𑀫𑁂𑀦 𑀅𑀦𑀸𑀕𑀢𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’’𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.

𑁩. 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸

𑀅𑀤𑁆𑀥𑀸𑀦𑀕𑀫𑀦𑀯𑀡𑁆𑀡𑀦𑀸

𑁨𑁫𑁪. 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸𑀢𑀺 ¶ ¶ ¶ 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀳𑁂𑀝𑁆𑀞𑀸 𑀅𑀕𑁆𑀕𑀳𑀺𑀢𑀢𑀸𑀬 𑀅𑀧𑀼𑀩𑁆𑀩𑀲𑁆𑀲 𑀧𑀤𑀲𑁆𑀲 𑀯𑀡𑁆𑀡𑀦𑀸 𑀅𑀢𑁆𑀣𑀯𑀺𑀪𑀚𑀦𑀸. ‘‘𑀳𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀸𑀕𑀢𑀫𑀢𑁆𑀣’’𑀦𑁆𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀳𑀺 𑀯𑀼𑀢𑁆𑀢𑀁. 𑀚𑀦𑀧𑀤𑀺𑀦𑁄𑀢𑀺 𑀚𑀦𑀧𑀤𑀯𑀦𑁆𑀢𑁄, 𑀚𑀦𑀧𑀤𑀲𑁆𑀲 𑀯𑀸 𑀇𑀲𑁆𑀲𑀭𑀸 𑀭𑀸𑀚𑀓𑀼𑀫𑀸𑀭𑀸 𑀕𑁄𑀢𑁆𑀢𑀯𑀲𑁂𑀦 𑀓𑁄𑀲𑀮𑀸 𑀦𑀸𑀫. 𑀬𑀤𑀺 𑀏𑀓𑁄 𑀚𑀦𑀧𑀤𑁄, 𑀓𑀣𑀁 𑀩𑀳𑀼𑀯𑀘𑀦𑀦𑁆𑀢𑀺 𑀆𑀳 ‘‘𑀭𑀽𑀴𑁆𑀳𑀺𑀲𑀤𑁆𑀤𑁂𑀦𑀸’’𑀢𑀺. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀳𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀬𑀼𑀢𑁆𑀢𑁂 𑀯𑀺𑀬 𑀈𑀤𑀺𑀲𑀮𑀺𑀗𑁆𑀕𑀯𑀘𑀦𑀸𑀦𑀺 𑀇𑀘𑁆𑀙𑀦𑁆𑀢𑀺, 𑀅𑀬𑀫𑁂𑀢𑁆𑀣 𑀭𑀽𑀴𑁆𑀳𑀺 𑀬𑀣𑀸 𑀅𑀜𑁆𑀜𑀢𑁆𑀣𑀧𑀺 ‘‘𑀓𑀼𑀭𑀽𑀲𑀼 𑀯𑀺𑀳𑀭𑀢𑀺, 𑀅𑀗𑁆𑀕𑁂𑀲𑀼 𑀯𑀺𑀳𑀭𑀢𑀻’’𑀢𑀺 𑀘. 𑀢𑀩𑁆𑀩𑀺𑀲𑁂𑀲𑀦𑁂𑀧𑀺 𑀚𑀦𑀧𑀤-𑀲𑀤𑁆𑀤𑁂 𑀚𑀸𑀢𑀺-𑀲𑀤𑁆𑀤𑁂 𑀏𑀓𑀯𑀘𑀦𑀫𑁂𑀯. 𑀧𑁄𑀭𑀸𑀡𑀸 𑀧𑀦𑀸𑀢𑀺 𑀧𑀦-𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀚𑁄𑀢𑀦𑁄, 𑀢𑁂𑀦 𑀧𑀼𑀣𑀼𑀅𑀢𑁆𑀣𑀯𑀺𑀲𑀬𑀢𑀸𑀬 𑀏𑀯𑀜𑁆𑀘𑁂𑀢𑀁 𑀧𑀼𑀣𑀼𑀯𑀘𑀦𑀦𑁆𑀢𑀺 𑀯𑀓𑁆𑀔𑀫𑀸𑀦𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀩𑀳𑀼𑀧𑁆𑀧𑀪𑁂𑀤𑁄 𑀳𑀺 𑀲𑁄 𑀧𑀤𑁂𑀲𑁄 𑀢𑀺𑀬𑁄𑀚𑀦𑀲𑀢𑀧𑀭𑀺𑀫𑀸𑀡𑀢𑀸𑀬. 𑀦𑀗𑁆𑀕𑀮𑀸𑀦𑀺𑀧𑀺 𑀙𑀟𑁆𑀟𑁂𑀢𑁆𑀯𑀸𑀢𑀺 𑀓𑀫𑁆𑀫𑀧𑁆𑀧𑀳𑀸𑀦𑀯𑀲𑁂𑀦 𑀦𑀗𑁆𑀕𑀮𑀸𑀦𑀺𑀧𑀺 𑀧𑀳𑀸𑀬, 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁. 𑀦 𑀓𑁂𑀯𑀮𑀁 𑀓𑀲𑁆𑀲𑀓𑀸 𑀏𑀯, 𑀅𑀣 𑀔𑁄 𑀅𑀜𑁆𑀜𑁂𑀧𑀺 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀧𑀳𑀸𑀬 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀁𑀲𑀼. ‘‘𑀲𑁄 𑀧𑀤𑁂𑀲𑁄’’𑀢𑀺 𑀧𑀤𑁂𑀲𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁, 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 𑀯𑀸, 𑀢𑁂 𑀧𑀤𑁂𑀲𑀸𑀢𑀺 𑀅𑀢𑁆𑀣𑁄. 𑀓𑁄𑀲𑀮𑀸𑀢𑀺 𑀯𑀼𑀘𑁆𑀘𑀢𑀺 𑀓𑀼𑀲𑀮𑀸 𑀏𑀯 𑀓𑁄𑀲𑀮𑀸𑀢𑀺 𑀓𑀢𑁆𑀯𑀸.

𑀘𑀸𑀭𑀺𑀓𑀦𑁆𑀢𑀺 𑀘𑀭𑀡𑀁, 𑀘𑀭𑀡𑀁 𑀯𑀸 𑀘𑀸𑀭𑁄, 𑀲𑁄 𑀏𑀯 𑀘𑀸𑀭𑀺𑀓𑀸. 𑀢𑀬𑀺𑀤𑀁 𑀫𑀕𑁆𑀕𑀕𑀫𑀦𑀁 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀦 𑀘𑀼𑀡𑁆𑀡𑀺𑀓𑀕𑀫𑀦𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀤𑁆𑀥𑀸𑀦𑀕𑀫𑀦𑀁 𑀕𑀘𑁆𑀙𑀦𑁆𑀢𑁄’’𑀢𑀺. 𑀢𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀘𑀸𑀭𑀺𑀓𑀸 𑀘 𑀦𑀸𑀫𑁂𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀽𑀭𑁂𑀧𑀻𑀢𑀺 𑀦𑀸𑀢𑀺𑀤𑀽𑀭𑁂𑀧𑀺. 𑀲𑀳𑀲𑀸 𑀕𑀫𑀦𑀦𑁆𑀢𑀺 ¶ 𑀲𑀻𑀖𑀕𑀫𑀦𑀁. 𑀫𑀳𑀸𑀓𑀲𑁆𑀲𑀧𑀧𑀘𑁆𑀘𑀼𑀕𑁆𑀕𑀫𑀦𑀸𑀤𑀺𑀁 𑀏𑀓𑀤𑁂𑀲𑁂𑀦 𑀯𑀢𑁆𑀯𑀸 𑀯𑀦𑀯𑀸𑀲𑀻𑀢𑀺𑀲𑁆𑀲𑀲𑀸𑀫𑀡𑁂𑀭𑀲𑁆𑀲 𑀯𑀢𑁆𑀣𑀼𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀚𑀦𑀧𑀤𑀘𑀸𑀭𑀺𑀓𑀁 𑀓𑀣𑁂𑀢𑀼𑀁 ‘‘𑀪𑀕𑀯𑀸 𑀳𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀆𑀓𑀸𑀲𑀕𑀸𑀫𑀻𑀳𑀺 𑀏𑀯 𑀲𑀤𑁆𑀥𑀺𑀁 𑀕𑀦𑁆𑀢𑀼𑀓𑀸𑀫𑁄 ‘‘𑀙𑀴𑀪𑀺𑀜𑁆𑀜𑀸𑀦𑀁 𑀆𑀭𑁄𑀘𑁂𑀳𑀻’’𑀢𑀺 𑀆𑀳.

𑀲𑀗𑁆𑀖𑀓𑀫𑁆𑀫𑀯𑀲𑁂𑀦 ¶ ¶ 𑀲𑀺𑀚𑁆𑀛𑀫𑀸𑀦𑀸𑀧𑀺 𑀉𑀧𑀲𑀫𑁆𑀧𑀤𑀸 𑀲𑀢𑁆𑀣𑀼 𑀆𑀡𑀸𑀯𑀲𑁂𑀦𑁂𑀯 𑀲𑀺𑀚𑁆𑀛𑀦𑀢𑁄 ‘‘𑀩𑀼𑀤𑁆𑀥𑀤𑀸𑀬𑀚𑁆𑀚𑀁 𑀢𑁂 𑀤𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 𑀧𑀦 𑀅𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑀲𑁆𑀲𑁂𑀯 𑀢𑀲𑁆𑀲 𑀉𑀧𑀲𑀫𑁆𑀧𑀤𑀁 𑀅𑀦𑀼𑀚𑀸𑀦𑀦𑁆𑀢𑁄 ‘‘𑀤𑀲𑁆𑀲𑀸𑀫𑀻’’𑀢𑀺 𑀅𑀯𑁄𑀘𑀸𑀢𑀺 𑀯𑀤𑀦𑁆𑀢𑀺. 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸𑀢𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀉𑀧𑀚𑁆𑀛𑀸𑀬𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸.

𑀦𑀯𑀬𑁄𑀚𑀦𑀲𑀢𑀺𑀓𑀫𑁆𑀧𑀺 𑀞𑀸𑀦𑀁 𑀫𑀚𑁆𑀛𑀺𑀫𑀤𑁂𑀲𑀧𑀭𑀺𑀬𑀸𑀧𑀦𑁆𑀦𑀫𑁂𑀯, 𑀢𑀢𑁄 𑀧𑀭𑀁 𑀦𑀸𑀥𑀺𑀧𑁆𑀧𑁂𑀢𑀁 𑀢𑀼𑀭𑀺𑀢𑀘𑀸𑀭𑀺𑀓𑀸𑀯𑀲𑁂𑀦 𑀅𑀕𑀫𑀦𑀢𑁄. 𑀲𑀫𑀦𑁆𑀢𑀸𑀢𑀺 𑀕𑀢𑀕𑀢𑀝𑁆𑀞𑀸𑀦𑀲𑁆𑀲 𑀘𑀢𑀽𑀲𑀼 𑀧𑀲𑁆𑀲𑁂𑀲𑀼 𑀲𑀫𑀦𑁆𑀢𑀢𑁄. 𑀅𑀜𑁆𑀜𑁂𑀦𑀧𑀺 𑀓𑀸𑀭𑀡𑁂𑀦𑀸𑀢𑀺 𑀪𑀺𑀓𑁆𑀔𑀽𑀦𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀢𑀭𑀼𑀡𑀪𑀸𑀯𑀢𑁄 𑀅𑀜𑁆𑀜𑁂𑀦𑀧𑀺 𑀫𑀚𑁆𑀛𑀺𑀫𑀫𑀡𑁆𑀟𑀮𑁂 𑀯𑁂𑀦𑁂𑀬𑁆𑀬𑀸𑀦𑀁 𑀜𑀸𑀡𑀧𑀭𑀺𑀧𑀸𑀓𑀸𑀤𑀺𑀓𑀸𑀭𑀡𑁂𑀦 𑀫𑀚𑁆𑀛𑀺𑀫𑀫𑀡𑁆𑀟𑀮𑀁 𑀑𑀲𑀭𑀢𑀺. ‘‘𑀲𑀢𑁆𑀢𑀳𑀺 𑀯𑀸’’𑀢𑀺𑀆𑀤𑀺 ‘‘𑀏𑀓𑀫𑀸𑀲𑀁 𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀦𑀼𑀓𑁆𑀓𑀫𑁂𑀦 𑀬𑁄𑀚𑁂𑀢𑀩𑁆𑀩𑀁.

𑀲𑀭𑀻𑀭𑀨𑀸𑀲𑀼𑀓𑀢𑁆𑀣𑀸𑀬𑀸𑀢𑀺 𑀏𑀓𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀦𑀺𑀩𑀤𑁆𑀥𑀯𑀸𑀲𑀯𑀲𑁂𑀦 𑀉𑀲𑁆𑀲𑀦𑁆𑀦𑀥𑀸𑀢𑀼𑀓𑀲𑁆𑀲 𑀲𑀭𑀻𑀭𑀲𑁆𑀲 𑀯𑀺𑀘𑀭𑀡𑁂𑀦 𑀨𑀸𑀲𑀼𑀓𑀢𑁆𑀣𑀸𑀬. 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀸𑀮𑀸𑀪𑀺𑀓𑀗𑁆𑀔𑀦𑀢𑁆𑀣𑀸𑀬𑀸𑀢𑀺 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢 (𑀅. 𑀦𑀺. 𑁭.𑁭𑁨) 𑀫𑀖𑀤𑁂𑀯𑀚𑀸𑀢𑀓𑀸𑀤𑀺 (𑀚𑀸. 𑁧.𑁧.𑁯) 𑀤𑁂𑀲𑀦𑀸𑀦𑀁 𑀯𑀺𑀬 𑀥𑀫𑁆𑀫𑀤𑁂𑀲𑀦𑀸𑀬 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀸𑀮𑀁 𑀆𑀓𑀗𑁆𑀔𑀫𑀸𑀦𑁂𑀦. 𑀲𑀼𑀭𑀸𑀧𑀸𑀦𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑁂 (𑀧𑀸𑀘𑀺. 𑁩𑁨𑁮) 𑀯𑀺𑀬 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀢𑁆𑀣𑀸𑀬. 𑀩𑁄𑀥𑀦𑁂𑀬𑁆𑀬𑀲𑀢𑁆𑀢𑁂 𑀅𑀗𑁆𑀕𑀼𑀮𑀺𑀫𑀸𑀮𑀸𑀤𑀺𑀓𑁂 (𑀫. 𑀦𑀺. 𑁨.𑁩𑁪𑁭) 𑀩𑁄𑀥𑀦𑀢𑁆𑀣𑀸𑀬. 𑀓𑀜𑁆𑀘𑀺, 𑀓𑀢𑀺𑀧𑀬𑁂 𑀯𑀸 𑀧𑀼𑀕𑁆𑀕𑀮𑁂 𑀉𑀤𑁆𑀤𑀺𑀲𑁆𑀲 𑀘𑀸𑀭𑀺𑀓𑀸 𑀦𑀺𑀩𑀤𑁆𑀥𑀘𑀸𑀭𑀺𑀓𑀸. 𑀢𑀤𑀜𑁆𑀜𑀸 𑀅𑀦𑀺𑀩𑀤𑁆𑀥𑀘𑀸𑀭𑀺𑀓𑀸.

𑀤𑀲𑀲𑀳𑀲𑁆𑀲𑀺 𑀮𑁄𑀓𑀥𑀸𑀢𑀼𑀬𑀸𑀢𑀺 ¶ 𑀚𑀸𑀢𑀺𑀔𑁂𑀢𑁆𑀢𑀪𑀽𑀢𑁂 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂. 𑀢𑀢𑁆𑀣 𑀳𑀺 𑀲𑀢𑁆𑀢𑁂 𑀧𑀭𑀺𑀧𑀓𑁆𑀓𑀺𑀦𑁆𑀤𑁆𑀭𑀺𑀬𑁂 𑀧𑀲𑁆𑀲𑀺𑀢𑀼𑀁 𑀩𑀼𑀤𑁆𑀥𑀜𑀸𑀡𑀁 𑀅𑀪𑀺𑀦𑀻𑀳𑀭𑀺𑀢𑁆𑀯𑀸 𑀞𑀺𑀢𑁄 𑀪𑀕𑀯𑀸 𑀜𑀸𑀡𑀚𑀸𑀮𑀁 𑀧𑀢𑁆𑀣𑀭𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑁄𑀢𑀺 𑀢𑀲𑁆𑀲 𑀜𑀸𑀡𑀲𑁆𑀲 𑀕𑁄𑀘𑀭𑀪𑀸𑀯𑀁 𑀉𑀧𑀕𑀢𑁄. 𑀪𑀕𑀯𑀸 𑀓𑀺𑀭 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 ‘‘𑀬𑁂 𑀲𑀢𑁆𑀢𑀸 𑀪𑀩𑁆𑀩𑀸 𑀧𑀭𑀺𑀧𑀸𑀓𑀜𑀸𑀡𑀸 𑀅𑀚𑁆𑀚 𑀫𑀬𑀸 𑀯𑀺𑀦𑁂𑀢𑀩𑁆𑀩𑀸, 𑀢𑁂 𑀫𑀬𑁆𑀳𑀁 𑀜𑀸𑀡𑀲𑁆𑀲 𑀉𑀧𑀝𑁆𑀞𑀳𑀦𑁆𑀢𑀽’’𑀢𑀺 𑀘𑀺𑀢𑁆𑀢𑀁 𑀅𑀥𑀺𑀝𑁆𑀞𑀸𑀬 𑀲𑀫𑀦𑁆𑀦𑀸𑀳𑀭𑀢𑀺. 𑀢𑀲𑁆𑀲 𑀲𑀳 𑀲𑀫𑀦𑁆𑀦𑀸𑀳𑀸𑀭𑀸 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀩𑀳𑀽 𑀯𑀸 𑀢𑀤𑀸 𑀯𑀺𑀦𑀬𑀽𑀧𑀕𑀸 𑀯𑁂𑀦𑁂𑀬𑁆𑀬𑀸 𑀜𑀸𑀡𑀲𑁆𑀲 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀺 𑀅𑀬𑀫𑁂𑀢𑁆𑀣 𑀩𑀼𑀤𑁆𑀥𑀸𑀦𑀼𑀪𑀸𑀯𑁄. 𑀏𑀯𑀫𑁆𑀧𑀺 𑀆𑀧𑀸𑀣𑀫𑀸𑀕𑀢𑀸𑀦𑀁 𑀧𑀦 𑀦𑁂𑀲𑀁 𑀉𑀧𑀦𑀺𑀲𑁆𑀲𑀬𑀁 𑀧𑀼𑀩𑁆𑀩𑀘𑀭𑀺𑀬𑀁 𑀧𑀼𑀩𑁆𑀩𑀳𑁂𑀢𑀼𑀁 𑀲𑀫𑁆𑀧𑀢𑀺 𑀯𑀢𑁆𑀢𑀫𑀸𑀦𑀜𑁆𑀘 𑀧𑀝𑀺𑀧𑀢𑁆𑀢𑀺𑀁 ¶ 𑀑𑀮𑁄𑀓𑁂𑀢𑀺, 𑀢𑁂𑀦𑀸𑀳 ‘‘𑀅𑀣 𑀪𑀕𑀯𑀸’’𑀢𑀺𑀆𑀤𑀺. 𑀯𑀸𑀤𑀧𑀝𑀺𑀯𑀸𑀤𑀁 𑀓𑀢𑁆𑀯𑀸𑀢𑀺 ‘‘𑀏𑀯𑀁 𑀦𑀼 𑀢𑁂 𑀅𑀫𑁆𑀩𑀝𑁆𑀞𑀸’’𑀢𑀺𑀆𑀤𑀺𑀦𑀸 𑀫𑀬𑀸 𑀯𑀼𑀢𑁆𑀢𑀯𑀘𑀦𑀲𑁆𑀲 ‘‘𑀬𑁂 𑀘 𑀔𑁄 𑀢𑁂 𑀪𑁄 𑀕𑁄𑀢𑀫 𑀫𑀼𑀡𑁆𑀟𑀓𑀸 𑀲𑀫𑀡𑀓𑀸’’𑀢𑀺𑀆𑀤𑀺𑀦𑀸 𑀧𑀝𑀺𑀯𑀘𑀦𑀁 𑀓𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀇𑀩𑁆𑀪𑀯𑀸𑀤𑀦𑀺𑀧𑀸𑀢𑀦𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀁 𑀅𑀲𑀫𑁆𑀪𑀺𑀯𑀸𑀓𑁆𑀬𑀁 𑀲𑀸𑀥𑀼𑀲𑀪𑀸𑀯𑀸𑀬 𑀯𑀸𑀘𑀸𑀬 𑀯𑀢𑁆𑀢𑀼𑀁 𑀅𑀬𑀼𑀢𑁆𑀢𑀯𑀘𑀦𑀁 𑀯𑀓𑁆𑀔𑀢𑀺. 𑀦𑀺𑀩𑁆𑀩𑀺𑀲𑁂𑀯𑀦𑀦𑁆𑀢𑀺 𑀯𑀺𑀕𑀢𑀢𑀼𑀤𑀦𑀁, 𑀫𑀸𑀦𑀤𑀩𑁆𑀩𑀯𑀲𑁂𑀦 𑀅𑀧𑀕𑀢𑀧𑀭𑀺𑀧𑁆𑀨𑀦𑁆𑀤𑀦𑀦𑁆𑀢𑀺 𑀅𑀢𑁆𑀣𑁄.

𑀅𑀯𑀲𑀭𑀺𑀢𑀩𑁆𑀩𑀦𑁆𑀢𑀺 ¶ 𑀉𑀧𑀕𑀦𑁆𑀢𑀩𑁆𑀩𑀁. 𑀇𑀘𑁆𑀙𑀸𑀦𑀗𑁆𑀕𑀮𑁂𑀢𑀺 𑀇𑀤𑀁 𑀢𑀤𑀸 𑀪𑀕𑀯𑀢𑁄 𑀕𑁄𑀘𑀭𑀕𑀸𑀫𑀦𑀺𑀤𑀲𑁆𑀲𑀦𑀁 𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀦𑁆𑀢𑀺 𑀓𑀢𑁆𑀯𑀸. ‘‘𑀇𑀘𑁆𑀙𑀸𑀦𑀗𑁆𑀕𑀮𑀯𑀦𑀲𑀡𑁆𑀟𑁂’’𑀢𑀺 𑀦𑀺𑀯𑀸𑀲𑀦𑀝𑁆𑀞𑀸𑀦𑀤𑀲𑁆𑀲𑀦𑀁 𑀅𑀥𑀺𑀓𑀭𑀡𑁂 𑀪𑀼𑀫𑁆𑀫𑀦𑁆𑀢𑀺. 𑀢𑀤𑀼𑀪𑀬𑀁 𑀯𑀺𑀯𑀭𑀦𑁆𑀢𑁄 ‘‘𑀇𑀘𑁆𑀙𑀸𑀦𑀗𑁆𑀕𑀮𑀁 𑀉𑀧𑀦𑀺𑀲𑁆𑀲𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀥𑀫𑁆𑀫𑀭𑀸𑀚𑀲𑁆𑀲 𑀪𑀕𑀯𑀢𑁄 𑀲𑀩𑁆𑀩𑀲𑁄 𑀅𑀥𑀫𑁆𑀫𑀦𑀺𑀕𑁆𑀕𑀡𑁆𑀳𑀦𑀧𑀭𑀸 𑀧𑀝𑀺𑀧𑀢𑁆𑀢𑀺, 𑀲𑀸 𑀘 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀲𑁂𑀦𑀸𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀮𑀔𑀦𑁆𑀥𑀸𑀯𑀸𑀭’’𑀦𑁆𑀢𑀺𑀆𑀤𑀺 ¶ 𑀯𑀼𑀢𑁆𑀢𑀁. 𑀬𑀣𑀸𑀪𑀺𑀭𑀼𑀘𑀺𑀢𑁂𑀦𑀸𑀢𑀺 𑀤𑀺𑀩𑁆𑀩𑀯𑀺𑀳𑀸𑀭𑀸𑀤𑀻𑀲𑀼 𑀬𑁂𑀦 𑀬𑁂𑀦 𑀅𑀢𑁆𑀢𑀦𑁄 𑀅𑀪𑀺𑀭𑀼𑀘𑀺𑀢𑁂𑀦 𑀯𑀺𑀳𑀸𑀭𑁂𑀦.

𑀧𑁄𑀓𑁆𑀔𑀭𑀲𑀸𑀢𑀺𑀯𑀢𑁆𑀣𑀼𑀯𑀡𑁆𑀡𑀦𑀸

𑁨𑁫𑁫. 𑀫𑀦𑁆𑀢𑁂𑀢𑀺 𑀇𑀭𑀼𑀩𑁆𑀩𑁂𑀤𑀸𑀤𑀺𑀫𑀦𑁆𑀢𑀲𑀢𑁆𑀣𑁂. 𑀧𑁄𑀓𑁆𑀔𑀭𑁂 𑀓𑀫𑀮𑁂 𑀲𑀬𑀫𑀸𑀦𑁄 𑀦𑀺𑀲𑀻𑀤𑀻𑀢𑀺 𑀧𑁄𑀓𑁆𑀔𑀭𑀲𑀸𑀢𑀻. 𑀲𑀸𑀢𑀺 𑀯𑀼𑀘𑁆𑀘𑀢𑀺 𑀲𑀫𑀲𑀡𑁆𑀞𑀸𑀦𑀁, 𑀧𑁄𑀓𑁆𑀔𑀭𑁂 𑀲𑀡𑁆𑀞𑀸𑀦𑀸𑀯𑀬𑀯𑁂 𑀚𑀸𑀢𑁄𑀢𑀺 ‘‘𑀧𑁄𑀓𑁆𑀔𑀭𑀲𑀸𑀢𑀻’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀲𑁂𑀢𑀧𑁄𑀓𑁆𑀔𑀭𑀲𑀤𑀺𑀲𑁄𑀢𑀺 𑀲𑁂𑀢𑀧𑀤𑀼𑀫𑀯𑀡𑁆𑀡𑁄. 𑀲𑀼𑀯𑀝𑁆𑀝𑀺𑀢𑀸𑀢𑀺 𑀯𑀝𑁆𑀝𑀪𑀸𑀯𑀲𑁆𑀲 𑀬𑀼𑀢𑁆𑀢𑀝𑁆𑀞𑀸𑀦𑁂 𑀲𑀼𑀝𑁆𑀞𑀼 𑀯𑀝𑁆𑀝𑀼𑀮𑀸. 𑀓𑀸𑀴𑀯𑀗𑁆𑀕𑀢𑀺𑀮𑀓𑀸𑀤𑀻𑀦𑀁 𑀅𑀪𑀸𑀯𑁂𑀦 𑀲𑀼𑀧𑀭𑀺𑀲𑀼𑀤𑁆𑀥𑀸.

𑀇𑀫𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀻𑀤𑀺𑀲𑁄 𑀧𑀼𑀩𑁆𑀩𑀬𑁄𑀕𑁄, 𑀬𑁂𑀦 𑀦𑀁 𑀪𑀕𑀯𑀸 𑀅𑀦𑀼𑀕𑁆𑀕𑀡𑁆𑀳𑀺𑀢𑀼𑀁 𑀢𑀁 𑀞𑀸𑀦𑀁 𑀉𑀧𑀕𑀢𑁄𑀢𑀺 𑀆𑀳 ‘‘𑀅𑀬𑀁 𑀧𑀦𑀸’’𑀢𑀺𑀆𑀤𑀺. 𑀧𑀤𑀼𑀫𑀕𑀩𑁆𑀪𑁂 𑀦𑀺𑀩𑁆𑀩𑀢𑁆𑀢𑀺 𑀢𑁂𑀦𑀸𑀬𑀁 𑀲𑀁𑀲𑁂𑀤𑀚𑁄 𑀚𑀸𑀢𑁄. 𑀦 𑀧𑀼𑀧𑁆𑀨𑀢𑀻𑀢𑀺 𑀦 𑀯𑀺𑀓𑀲𑀢𑀺. 𑀭𑀚𑀢𑀩𑀺𑀫𑁆𑀩𑀓𑀦𑁆𑀢𑀺 𑀭𑀽𑀧𑀺𑀬𑀫𑀬𑀁 𑀭𑀽𑀧𑀓𑀁.

𑀅𑀚𑁆𑀛𑀸𑀯𑀲𑀢𑀻𑀢𑀺 𑀏𑀢𑁆𑀣 𑀅𑀥𑀺-𑀲𑀤𑁆𑀤𑁄 𑀇𑀲𑁆𑀲𑀭𑀺𑀬𑀢𑁆𑀣𑀤𑀻𑀧𑀦𑁄, 𑀆𑀲𑀤𑁆𑀤𑁄 𑀫𑀭𑀺𑀬𑀸𑀤𑀢𑁆𑀣𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀪𑀺𑀪𑀯𑀺𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀳𑀺 𑀬𑀼𑀢𑁆𑀢𑀢𑁆𑀢𑀸 𑀳𑀺 𑀉𑀓𑁆𑀓𑀝𑁆𑀞𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀁, 𑀢𑁂𑀦𑀸𑀳 ‘‘𑀉𑀧𑀲𑀕𑁆𑀕𑀯𑀲𑁂𑀦𑀸’’𑀢𑀺𑀆𑀤𑀺. 𑀬𑀸𑀬 𑀫𑀭𑀺𑀬𑀸𑀤𑀸𑀬𑀸𑀢𑀺 𑀬𑀸𑀬 𑀅𑀯𑀢𑁆𑀣𑀸𑀬. 𑀦𑀕𑀭𑀲𑁆𑀲 𑀯𑀢𑁆𑀣𑀼𑀦𑁆𑀢𑀺 ‘‘𑀅𑀬𑀁 𑀔𑀡𑁄, 𑀲𑀼𑀫𑀼𑀳𑀼𑀢𑁆𑀢𑀁 𑀫𑀸 𑀅𑀢𑀺𑀓𑁆𑀓𑀫𑀻’’𑀢𑀺 𑀭𑀢𑁆𑀢𑀺𑀯𑀺𑀪𑀸𑀬𑀦𑀁 𑀅𑀦𑀼𑀭𑀓𑁆𑀔𑀦𑁆𑀢𑀸 𑀭𑀢𑁆𑀢𑀺𑀬𑀁 𑀉𑀓𑁆𑀓𑀸 ¶ 𑀞𑀧𑁂𑀢𑁆𑀯𑀸 𑀉𑀓𑁆𑀓𑀸𑀲𑀼 𑀚𑀮𑀫𑀸𑀦𑀸𑀲𑀼 𑀦𑀕𑀭𑀲𑁆𑀲 𑀯𑀢𑁆𑀣𑀼𑀁 𑀅𑀕𑁆𑀕𑀳𑁂𑀲𑀼𑀁, 𑀢𑀲𑁆𑀫𑀸 𑀉𑀓𑁆𑀓𑀸𑀲𑀼 𑀞𑀺𑀢𑀸𑀢𑀺 𑀉𑀓𑁆𑀓𑀝𑁆𑀞𑀸, 𑀉𑀓𑁆𑀓𑀸𑀲𑀼 𑀯𑀺𑀚𑁆𑀚𑁄𑀢𑀬𑀦𑁆𑀢𑀻𑀲𑀼 𑀞𑀺𑀢𑀸 𑀧𑀢𑀺𑀝𑁆𑀞𑀺𑀢𑀸𑀢𑀺 𑀫𑀽𑀮𑀯𑀺𑀪𑀼𑀚𑀸𑀤𑀺𑀧𑀓𑁆𑀔𑁂𑀧𑁂𑀦 𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸, 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀯𑀸 𑀉𑀓𑁆𑀓𑀸𑀲𑀼 𑀞𑀺𑀢𑀸𑀲𑀼 𑀞𑀺𑀢𑀸 𑀆𑀲𑀻𑀢𑀺 𑀉𑀓𑁆𑀓𑀝𑁆𑀞𑀸. 𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 ‘‘𑀪𑀽𑀫𑀺𑀪𑀸𑀕𑀲𑀫𑁆𑀧𑀢𑁆𑀢𑀺𑀬𑀸, 𑀉𑀧𑀓𑀭𑀡𑀲𑀫𑁆𑀧𑀢𑁆𑀢𑀺𑀬𑀸, 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑀸 𑀘 𑀢𑀁 𑀦𑀕𑀭𑀁 𑀉𑀓𑁆𑀓𑀝𑁆𑀞𑀕𑀼𑀡𑀬𑁄𑀕𑀢𑁄 𑀉𑀓𑁆𑀓𑀝𑁆𑀞𑀸𑀢𑀺 𑀦𑀸𑀫𑀁 𑀮𑀪𑀻’’𑀢𑀺 ¶ . 𑀢𑀲𑁆𑀲𑀸𑀢𑀺 ‘‘𑀉𑀓𑁆𑀓𑀝𑁆𑀞’’𑀦𑁆𑀢𑀺 𑀉𑀧𑀬𑁄𑀕𑀯𑀲𑁂𑀦 𑀯𑀼𑀢𑁆𑀢𑀧𑀤𑀲𑁆𑀲. 𑀅𑀦𑀼𑀧𑀬𑁄𑀕𑀢𑁆𑀢𑀸𑀢𑀺 𑀯𑀺𑀲𑁂𑀲𑀦𑀪𑀸𑀯𑁂𑀦 𑀅𑀦𑀼𑀧𑀬𑀼𑀢𑁆𑀢𑀢𑁆𑀢𑀸. 𑀲𑁂𑀲𑀧𑀤𑁂𑀲𑀽𑀢𑀺 ‘‘𑀲𑀢𑁆𑀢𑀼𑀲𑁆𑀲𑀤’’𑀦𑁆𑀢𑀺𑀆𑀤𑀺𑀧𑀤𑁂𑀲𑀼. 𑀬𑀣𑀸𑀯𑀺𑀥𑀺 𑀳𑀺 𑀅𑀦𑀼𑀧𑀬𑁄𑀕𑁄 𑀧𑀼𑀭𑀺𑀫𑀲𑁆𑀫𑀺𑀁. 𑀢𑀢𑁆𑀣𑀸𑀢𑀺 ‘‘𑀉𑀧𑀲𑀕𑁆𑀕𑀯𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑀺𑀥𑀸𑀦𑁂. ‘‘𑀲𑀤𑁆𑀤𑀲𑀢𑁆𑀣𑀢𑁄 𑀧𑀭𑀺𑀬𑁂𑀲𑀺𑀢𑀩𑁆𑀩’’𑀦𑁆𑀢𑀺 𑀏𑀢𑁂𑀦 𑀲𑀤𑁆𑀤𑀮𑀓𑁆𑀔𑀡𑀸𑀦𑀼𑀕𑀢𑁄 ¶ 𑀯𑀸𑀬𑀁 𑀲𑀤𑁆𑀤𑀧𑁆𑀧𑀬𑁄𑀕𑁄𑀢𑀺 𑀤𑀲𑁆𑀲𑁂𑀢𑀺. 𑀉𑀧𑀅𑀦𑀼𑀅𑀥𑀺𑀆𑀇𑀢𑀺𑀏𑀯𑀁𑀧𑀼𑀩𑁆𑀩𑀓𑁂 𑀯𑀲𑀦𑀓𑀺𑀭𑀺𑀬𑀸𑀞𑀸𑀦𑁂 𑀉𑀧𑀬𑁄𑀕𑀯𑀘𑀦𑀫𑁂𑀯 𑀧𑀸𑀧𑀼𑀡𑀸𑀢𑀻𑀢𑀺 𑀲𑀤𑁆𑀤𑀯𑀺𑀤𑀽 𑀇𑀘𑁆𑀙𑀦𑁆𑀢𑀺.

𑀉𑀲𑁆𑀲𑀤𑀢𑀸 𑀦𑀸𑀫𑁂𑀢𑁆𑀣 𑀩𑀳𑀼𑀮𑀢𑀸𑀢𑀺, 𑀢𑀁 𑀩𑀳𑀼𑀮𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀩𑀳𑀼𑀚𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑀳𑁂𑀢𑁆𑀯𑀸 𑀧𑁄𑀲𑁂𑀢𑀩𑁆𑀩𑀁 𑀧𑁄𑀲𑀸𑀯𑀦𑀺𑀬𑀁. 𑀆𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸.

𑀭𑀜𑁆𑀜𑀸 𑀯𑀺𑀬 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀯𑀸 𑀭𑀸𑀚𑀪𑁄𑀕𑁆𑀕𑀁. 𑀭𑀜𑁆𑀜𑁄 𑀤𑀸𑀬𑀪𑀽𑀢𑀦𑁆𑀢𑀺 𑀓𑀼𑀮𑀧𑀭𑀫𑁆𑀧𑀭𑀸𑀬 𑀬𑁄𑀕𑁆𑀬𑀪𑀸𑀯𑁂𑀦 𑀭𑀸𑀚𑀢𑁄 𑀮𑀤𑁆𑀥𑀤𑀸𑀬𑀪𑀽𑀢𑀁. 𑀢𑁂𑀦𑀸𑀳 ‘‘𑀤𑀸𑀬𑀚𑁆𑀚𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀭𑀸𑀚𑀦𑀻𑀳𑀸𑀭𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀉𑀤𑁆𑀥𑀁 𑀧𑀭𑀺𑀪𑁄𑀕𑀮𑀸𑀪𑀲𑁆𑀲 𑀲𑁂𑀝𑁆𑀞𑀤𑁂𑀬𑁆𑀬𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀆𑀳 ‘‘𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀭𑀸𑀚𑀲𑀗𑁆𑀔𑁂𑀧𑁂𑀦 𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺. ‘‘𑀲𑀩𑁆𑀩𑀁 𑀙𑁂𑀚𑁆𑀚𑀪𑁂𑀚𑁆𑀚’’𑀦𑁆𑀢𑀺 𑀲𑀭𑀻𑀭𑀤𑀡𑁆𑀟𑀥𑀦𑀤𑀡𑁆𑀟𑀸𑀤𑀺 𑀪𑁂𑀤𑀁 𑀲𑀩𑁆𑀩𑀁 𑀤𑀡𑁆𑀟𑀫𑀸𑀳. 𑀦𑀤𑀻𑀢𑀺𑀢𑁆𑀣𑀧𑀩𑁆𑀩𑀢𑀸𑀤𑀻𑀲𑀽𑀢𑀺 𑀦𑀤𑀻𑀢𑀺𑀢𑁆𑀣𑀧𑀩𑁆𑀩𑀢𑀧𑀸𑀤𑀕𑀸𑀫𑀤𑁆𑀯𑀸𑀭𑀅𑀝𑀯𑀺𑀫𑀼𑀔𑀸𑀤𑀻𑀲𑀼. ‘‘𑀭𑀸𑀚𑀤𑀸𑀬’’𑀦𑁆𑀢𑀺 𑀇𑀫𑀺𑀦𑀸𑀯 𑀭𑀜𑁆𑀜𑁄 𑀤𑀺𑀦𑁆𑀦𑀪𑀸𑀯𑁂 𑀲𑀺𑀤𑁆𑀥𑁂 ‘‘𑀭𑀜𑁆𑀜𑀸 𑀧𑀲𑁂𑀦𑀤𑀺𑀦𑀸 𑀓𑁄𑀲𑀮𑁂𑀦 𑀤𑀺𑀦𑁆𑀦’’𑀦𑁆𑀢𑀺 𑀯𑀘𑀦𑀁 𑀓𑀺𑀫𑀢𑁆𑀣𑀺𑀬𑀦𑁆𑀢𑀺 𑀆𑀳 ‘‘𑀤𑀸𑀬𑀓𑀭𑀸𑀚𑀤𑀻𑀧𑀦𑀢𑁆𑀣’’𑀦𑁆𑀢𑀺𑀆𑀤𑀺 ¶ . 𑀦𑀺𑀲𑁆𑀲𑀝𑁆𑀞𑀧𑀭𑀺𑀘𑁆𑀘𑀢𑁆𑀢𑀦𑁆𑀢𑀺 𑀫𑀼𑀢𑁆𑀢𑀘𑀸𑀕𑀯𑀲𑁂𑀦 𑀧𑀭𑀺𑀘𑁆𑀘𑀢𑁆𑀢𑀁 𑀓𑀢𑁆𑀯𑀸. 𑀏𑀯𑀜𑁆𑀳𑀺 𑀢𑀁 𑀲𑁂𑀝𑁆𑀞𑀤𑁂𑀬𑁆𑀬𑀁 𑀉𑀢𑁆𑀢𑀫𑀤𑁂𑀬𑁆𑀬𑀁 𑀚𑀸𑀢𑀁.

𑀉𑀧𑀮𑀪𑀻𑀢𑀺 𑀲𑀯𑀦𑀯𑀲𑁂𑀦 𑀉𑀧𑀮𑀪𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄𑀢𑀤𑁆𑀯𑀸𑀭…𑀧𑁂… 𑀅𑀜𑁆𑀜𑀸𑀲𑀻’’𑀢𑀺 𑀆𑀳. 𑀅𑀯𑀥𑀸𑀭𑀡𑀨𑀮𑀢𑁆𑀢𑀸 𑀲𑀩𑁆𑀩𑀫𑁆𑀧𑀺 𑀯𑀸𑀓𑁆𑀬𑀁 𑀅𑀦𑁆𑀢𑁄𑀕𑀥𑀸𑀯𑀥𑀸𑀭𑀡𑀦𑁆𑀢𑀺 𑀆𑀳 ‘‘𑀧𑀤𑀧𑀽𑀭𑀡𑀫𑀢𑁆𑀢𑁂 𑀦𑀺𑀧𑀸𑀢𑁄’’𑀢𑀺. ‘‘𑀅𑀯𑀥𑀸𑀭𑀡𑀢𑁆𑀣𑁂’’𑀢𑀺 𑀧𑀦 𑀇𑀫𑀺𑀦𑀸 𑀇𑀝𑁆𑀞𑀢𑁄𑀯𑀥𑀸𑀭𑀡𑀢𑁆𑀣𑀁 𑀔𑁄-𑀲𑀤𑁆𑀤𑀕𑁆𑀕𑀳𑀡𑀦𑁆𑀢𑀺 𑀤𑀲𑁆𑀲𑁂𑀢𑀺 ¶ . ‘‘𑀅𑀲𑁆𑀲𑁄𑀲𑀻’’𑀢𑀺 𑀧𑀤𑀁 𑀔𑁄-𑀲𑀤𑁆𑀤𑁂 𑀕𑀳𑀺𑀢𑁂 𑀢𑁂𑀦 𑀨𑀼𑀮𑁆𑀮𑀺𑀢𑀫𑀡𑁆𑀟𑀺𑀢𑀁 𑀯𑀺𑀬 𑀳𑁄𑀦𑁆𑀢𑀁 𑀧𑀽𑀭𑀺𑀢𑀁 𑀦𑀸𑀫 𑀳𑁄𑀢𑀺, 𑀢𑁂𑀦 𑀘 𑀧𑀼𑀭𑀺𑀫𑀧𑀘𑁆𑀙𑀺𑀫𑀧𑀤𑀸𑀦𑀺 𑀲𑀺𑀮𑀺𑀝𑁆𑀞𑀸𑀦𑀺 𑀳𑁄𑀦𑁆𑀢𑀺, 𑀦 𑀢𑀲𑁆𑀫𑀺𑀁 𑀅𑀕𑁆𑀕𑀳𑀺𑀢𑁂𑀢𑀺 𑀆𑀳 ‘‘𑀧𑀤𑀧𑀽𑀭𑀡𑁂𑀦 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀫𑀢𑁆𑀢𑀫𑁂𑀯𑀸’’𑀢𑀺. 𑀫𑀢𑁆𑀢-𑀲𑀤𑁆𑀤𑁄 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄, 𑀢𑁂𑀦𑀲𑁆𑀲 𑀅𑀦𑀢𑁆𑀣𑀦𑁆𑀢𑀭𑀤𑀻𑀧𑀦𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺, 𑀏𑀯-𑀲𑀤𑁆𑀤𑁂𑀦 𑀧𑀦 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀬 𑀏𑀓𑀦𑁆𑀢𑀺𑀓𑀢𑀸.

𑀲𑀫𑀺𑀢𑀧𑀸𑀧𑀢𑁆𑀢𑀸𑀢𑀺 𑀅𑀘𑁆𑀘𑀦𑁆𑀢𑀁 𑀅𑀦𑀯𑀲𑁂𑀲𑀢𑁄 𑀲𑀯𑀸𑀲𑀦𑀁 𑀲𑀫𑀺𑀢𑀧𑀸𑀧𑀢𑁆𑀢𑀸. 𑀏𑀯𑀜𑁆𑀳𑀺 𑀩𑀸𑀳𑀺𑀭𑀓𑀯𑀺𑀭𑀸𑀕𑀲𑁂𑀓𑁆𑀔𑀸𑀲𑁂𑀓𑁆𑀔𑀧𑀸𑀧𑀲𑀫𑀦𑀢𑁄 𑀪𑀕𑀯𑀢𑁄 𑀧𑀸𑀧𑀲𑀫𑀦𑀁 𑀯𑀺𑀲𑁂𑀲𑀺𑀢𑀁 𑀳𑁄𑀢𑀺, 𑀢𑁂𑀦𑀸𑀳 𑀯𑀼𑀢𑁆𑀢𑀜𑁆𑀳𑁂𑀢𑀦𑁆𑀢𑀺𑀆𑀤𑀺. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀦𑀺𑀧𑀸𑀢𑀸𑀦𑀁 𑀇𑀥 𑀅𑀦𑀼𑀲𑁆𑀲𑀯𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀔𑀮𑀽𑀢𑀺 𑀅𑀦𑀼𑀲𑁆𑀲𑀯𑀢𑁆𑀣𑁂 𑀦𑀺𑀧𑀸𑀢𑁄’’𑀢𑀺. 𑀆𑀮𑀧𑀦𑀫𑀢𑁆𑀢𑀦𑁆𑀢𑀺 𑀧𑀺𑀬𑀸𑀮𑀸𑀧𑀯𑀘𑀦𑀫𑀢𑁆𑀢𑀁. 𑀧𑀺𑀬𑀲𑀫𑀼𑀤𑀸𑀳𑀸𑀭𑁄 𑀳𑁂𑀢𑁂 ‘‘𑀪𑁄’’𑀢𑀺 𑀯𑀸 ‘‘𑀆𑀯𑀼𑀲𑁄’’𑀢𑀺 𑀯𑀸 ‘‘𑀤𑁂𑀯𑀸𑀦𑀁 𑀧𑀺𑀬𑀸’’𑀢𑀺 𑀯𑀸. 𑀕𑁄𑀢𑁆𑀢𑀯𑀲𑁂𑀦𑀸𑀢𑀺 𑀏𑀢𑁆𑀣 𑀕𑀁 𑀢𑀸𑀬𑀢𑀻𑀢𑀺 𑀕𑁄𑀢𑁆𑀢𑀁. 𑀕𑁄𑀢𑀫𑁄𑀢𑀺 𑀳𑀺 𑀧𑀯𑀢𑁆𑀢𑀫𑀸𑀦𑀁 𑀯𑀘𑀦𑀁, 𑀩𑀼𑀤𑁆𑀥𑀺𑀜𑁆𑀘 𑀢𑀸𑀬𑀢𑀺 𑀏𑀓𑀁𑀲𑀺𑀓𑀯𑀺𑀲𑀬𑀢𑀸𑀬 𑀭𑀓𑁆𑀔𑀢𑀻𑀢𑀺 𑀕𑁄𑀢𑁆𑀢𑀁. 𑀬𑀣𑀸 𑀳𑀺 𑀩𑀼𑀤𑁆𑀥𑀺 𑀆𑀭𑀫𑁆𑀫𑀡𑀪𑀽𑀢𑁂𑀦 ¶ 𑀅𑀢𑁆𑀣𑁂𑀦 𑀯𑀺𑀦𑀸 𑀦 𑀯𑀢𑁆𑀢𑀢𑀺, 𑀏𑀯𑀁 𑀅𑀪𑀺𑀥𑀸𑀦𑀁 𑀅𑀪𑀺𑀥𑁂𑀬𑁆𑀬𑀪𑀽𑀢𑁂𑀦, 𑀢𑀲𑁆𑀫𑀸 ¶ 𑀲𑁄 𑀕𑁄𑀢𑁆𑀢𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀢𑀸𑀦𑀺 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀓𑁄 𑀧𑀦 𑀲𑁄𑀢𑀺? 𑀅𑀜𑁆𑀜𑀓𑀼𑀮𑀧𑀭𑀫𑁆𑀧𑀭𑀸𑀲𑀸𑀥𑀸𑀭𑀡𑀁 𑀢𑀲𑁆𑀲 𑀓𑀼𑀮𑀲𑁆𑀲 𑀆𑀤𑀺𑀧𑀼𑀭𑀺𑀲𑀲𑀫𑀼𑀤𑀸𑀕𑀢𑀁 𑀢𑀁𑀓𑀼𑀮𑀧𑀭𑀺𑀬𑀸𑀧𑀦𑁆𑀦𑀲𑀸𑀥𑀸𑀭𑀡𑀁 𑀲𑀸𑀫𑀜𑁆𑀜𑀭𑀽𑀧𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 ‘‘𑀲𑀫𑀡𑁄’’𑀢𑀺 𑀇𑀫𑀺𑀦𑀸 𑀲𑀭𑀺𑀓𑁆𑀔𑀓𑀚𑀦𑁂𑀳𑀺 𑀪𑀕𑀯𑀢𑁄 𑀩𑀳𑀼𑀫𑀢𑀪𑀸𑀯𑁄 𑀤𑀲𑁆𑀲𑀺𑀢𑁄 𑀲𑀫𑀺𑀢𑀧𑀸𑀧𑀢𑀸𑀓𑀺𑀢𑁆𑀢𑀦𑀢𑁄. ‘‘𑀕𑁄𑀢𑀫𑁄’’𑀢𑀺 𑀇𑀫𑀺𑀦𑀸 𑀮𑁄𑀓𑀺𑀬𑀚𑀦𑁂𑀳𑀺 𑀉𑀴𑀸𑀭𑀓𑀼𑀮𑀲𑀫𑁆𑀪𑀽𑀢𑀢𑀸𑀤𑀻𑀧𑀦𑀢𑁄.

𑀉𑀘𑁆𑀘𑀸𑀓𑀼𑀮𑀧𑀭𑀺𑀤𑀻𑀧𑀦𑀁 𑀉𑀤𑀺𑀢𑁄𑀤𑀺𑀢𑀯𑀺𑀧𑀼𑀮𑀔𑀢𑁆𑀢𑀺𑀬𑀓𑀼𑀮𑀯𑀺𑀪𑀸𑀯𑀦𑀢𑁄. 𑀲𑀩𑁆𑀩𑀔𑀢𑁆𑀢𑀺𑀬𑀸𑀦𑀜𑁆𑀳𑀺 𑀆𑀤𑀺𑀪𑀽𑀢𑀫𑀳𑀸𑀲𑀫𑁆𑀫𑀢𑀫𑀳𑀸𑀭𑀸𑀚𑀢𑁄 𑀧𑀝𑁆𑀞𑀸𑀬 𑀅𑀲𑀫𑁆𑀪𑀺𑀦𑁆𑀦𑀁 𑀉𑀴𑀸𑀭𑀢𑀫𑀁 𑀲𑀓𑁆𑀬𑀭𑀸𑀚𑀓𑀼𑀮𑀁. 𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦𑀸𑀢𑀺 𑀜𑀸𑀢𑀺𑀧𑀸𑀭𑀺𑀚𑀼𑀜𑁆𑀜𑀪𑁄𑀕𑀧𑀸𑀭𑀺𑀚𑀼𑀜𑁆𑀜𑀸𑀤𑀺𑀦𑀸 𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦 𑀧𑀸𑀭𑀺𑀳𑀸𑀦𑀺𑀬𑀸. 𑀅𑀦𑀪𑀺𑀪𑀽𑀢𑁄 𑀅𑀦𑀚𑁆𑀛𑁄𑀢𑁆𑀣𑀢𑁄. 𑀢𑀣𑀸 𑀳𑀺 𑀢𑀲𑁆𑀲 𑀓𑀼𑀮𑀲𑁆𑀲 𑀦 𑀓𑀺𑀜𑁆𑀘𑀺 𑀧𑀸𑀭𑀺𑀚𑀼𑀜𑁆𑀜𑀁 𑀮𑁄𑀓𑀦𑀸𑀣𑀲𑁆𑀲 𑀅𑀪𑀺𑀚𑀸𑀢𑀺𑀬𑀁, 𑀅𑀣 𑀔𑁄 𑀯𑀟𑁆𑀠𑀺𑀬𑁂𑀯. 𑀅𑀪𑀺𑀦𑀺𑀓𑁆𑀔𑀫𑀦𑁂 𑀘 𑀢𑀢𑁄𑀧𑀺 𑀲𑀫𑀺𑀤𑁆𑀥𑀢𑀫𑀪𑀸𑀯𑁄 𑀮𑁄𑀓𑁂 𑀧𑀸𑀓𑀝𑁄 𑀧𑀜𑁆𑀜𑀸𑀢𑁄. 𑀇𑀢𑀺 ‘‘𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄’’𑀢𑀺 𑀇𑀤𑀁 𑀯𑀘𑀦𑀁 𑀪𑀕𑀯𑀢𑁄 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀪𑀸𑀯𑀤𑀻𑀧𑀦𑀁 𑀯𑀼𑀢𑁆𑀢𑀁 𑀫𑀳𑀦𑁆𑀢𑀁 𑀜𑀸𑀢𑀺𑀧𑀭𑀺𑀯𑀝𑁆𑀝𑀁, 𑀫𑀳𑀦𑁆𑀢𑀜𑁆𑀘 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑀪𑀸𑀯𑀲𑀺𑀤𑁆𑀥𑀺𑀢𑁄. 𑀲𑀼𑀦𑁆𑀤𑀭𑀦𑁆𑀢𑀺 𑀪𑀤𑁆𑀤𑀓𑀁. 𑀪𑀤𑁆𑀤𑀓𑀢𑀸 𑀘 𑀧𑀲𑁆𑀲𑀦𑁆𑀢𑀲𑁆𑀲 𑀳𑀺𑀢𑀲𑀼𑀔𑀸𑀯𑀳𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀳 ¶ 𑀅𑀢𑁆𑀣𑀸𑀯𑀳𑀁 𑀲𑀼𑀔𑀸𑀯𑀳𑀦𑁆𑀢𑀺. 𑀢𑀢𑁆𑀣 𑀅𑀢𑁆𑀣𑀸𑀯𑀳𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀲𑀁𑀳𑀺𑀢𑀳𑀺𑀢𑀸𑀯𑀳𑀁. 𑀲𑀼𑀔𑀸𑀯𑀳𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀢𑀺𑀯𑀺𑀥𑀲𑀼𑀔𑀸𑀯𑀳𑀁. 𑀢𑀣𑀸𑀭𑀽𑀧𑀸𑀦𑀦𑁆𑀢𑀺 𑀢𑀸𑀤𑀺𑀲𑀸𑀦𑀁. 𑀬𑀸𑀤𑀺𑀲𑁂𑀳𑀺 𑀧𑀦 𑀕𑀼𑀡𑁂𑀳𑀺 𑀪𑀕𑀯𑀸 𑀲𑀫𑀦𑁆𑀦𑀸𑀕𑀢𑁄, 𑀢𑁂𑀳𑀺 𑀘𑀢𑀼𑀧𑁆𑀧𑀫𑀸𑀡𑀺𑀓𑀲𑁆𑀲 𑀮𑁄𑀓𑀲𑁆𑀲 𑀲𑀩𑁆𑀩𑀣𑀸𑀧𑀺 𑀅𑀘𑁆𑀘𑀦𑁆𑀢𑀸𑀬 𑀲𑀤𑁆𑀥𑀸𑀬 𑀧𑀲𑀸𑀤𑀦𑀻𑀬𑁄 𑀢𑁂𑀲𑀁 𑀬𑀣𑀸𑀪𑀽𑀢𑀲𑀪𑀸𑀯𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀬𑀣𑀸𑀭𑀽𑀧𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸𑀪𑀽𑀢𑀁…𑀧𑁂… ¶ 𑀅𑀭𑀳𑀢𑀦𑁆𑀢𑀺 𑀇𑀫𑀺𑀦𑀸 𑀥𑀫𑁆𑀫𑀧𑁆𑀧𑀫𑀸𑀡𑀸𑀦𑀁, 𑀮𑀽𑀔𑀧𑁆𑀧𑀫𑀸𑀡𑀸𑀦𑀜𑁆𑀘 𑀲𑀢𑁆𑀢𑀸𑀦𑀁 𑀪𑀕𑀯𑀢𑁄 𑀧𑀲𑀸𑀤𑀸𑀯𑀳𑀢𑀁 𑀤𑀲𑁆𑀲𑁂𑀢𑀺. 𑀢𑀁 𑀤𑀲𑁆𑀲𑀦𑁂𑀦𑁂𑀯 𑀘 𑀇𑀢𑀭𑁂𑀲𑀫𑁆𑀧𑀺 𑀅𑀢𑁆𑀣𑀢𑁄 𑀧𑀲𑀸𑀤𑀸𑀯𑀳𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀤𑀲𑁆𑀲𑀦𑀫𑀢𑁆𑀢𑀫𑁆𑀧𑀺 𑀲𑀸𑀥𑀼 𑀳𑁄𑀢𑀻𑀢𑀺 𑀏𑀢𑁆𑀣 𑀓𑁄𑀲𑀺𑀬𑀲𑀓𑀼𑀡𑀯𑀢𑁆𑀣𑀼𑀁 (𑀫. 𑀦𑀺. 𑀅𑀝𑁆𑀞. 𑁧.𑁧𑁪𑁪; 𑀔𑀼. 𑀧𑀸. 𑀅𑀝𑁆𑀞. 𑁧𑁦) 𑀓𑀣𑁂𑀢𑀩𑁆𑀩𑀁.

𑀅𑀫𑁆𑀩𑀝𑁆𑀞𑀫𑀸𑀡𑀯𑀓𑀣𑀸𑀯𑀡𑁆𑀡𑀦𑀸

𑁨𑁫𑁬. 𑀫𑀦𑁆𑀢𑁂 𑀧𑀭𑀺𑀯𑀢𑁆𑀢𑁂𑀢𑀻𑀢𑀺 𑀯𑁂𑀤𑁂 𑀲𑀚𑁆𑀛𑀸𑀬𑀢𑀺, 𑀧𑀭𑀺𑀬𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄. 𑀫𑀦𑁆𑀢𑁂 𑀥𑀸𑀭𑁂𑀢𑀻𑀢𑀺 𑀬𑀣𑀸𑀅𑀥𑀻𑀢𑁂 𑀫𑀦𑁆𑀢𑁂 𑀅𑀲𑀫𑁆𑀫𑀼𑀝𑁆𑀞𑁂 𑀓𑀢𑁆𑀯𑀸 𑀳𑀤𑀬𑁂 𑀞𑀧𑁂𑀢𑀺 𑀑𑀝𑁆𑀞𑀧𑀳𑀢𑀓𑀭𑀡𑀯𑀲𑁂𑀦, 𑀦 𑀅𑀢𑁆𑀣𑀯𑀺𑀪𑀸𑀯𑀦𑀯𑀲𑁂𑀦.

𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸𑀦𑀦𑁆𑀢𑀺 𑀏𑀢𑁆𑀣 𑀯𑀘𑀦𑀻𑀬𑀯𑀸𑀘𑀓𑀪𑀸𑀯𑁂𑀦 𑀅𑀢𑁆𑀣𑀁 𑀲𑀤𑁆𑀤𑀜𑁆𑀘 𑀦𑀺𑀔𑀟𑀢𑀺 𑀪𑀺𑀦𑁆𑀤𑀢𑀺 𑀯𑀺𑀪𑀚𑁆𑀚 𑀤𑀲𑁆𑀲𑁂𑀢𑀻𑀢𑀺 𑀦𑀺𑀔𑀡𑁆𑀟𑀼, 𑀲𑀸 𑀏𑀯 𑀇𑀥 𑀔-𑀓𑀸𑀭𑀲𑁆𑀲 𑀖-𑀓𑀸𑀭𑀁 𑀓𑀢𑁆𑀯𑀸 ‘‘𑀦𑀺𑀖𑀡𑁆𑀟𑀽’’𑀢𑀺 𑀯𑀼𑀢𑁆𑀢𑁄. 𑀓𑀺𑀝𑀬𑀢𑀺 ¶ 𑀕𑀫𑁂𑀢𑀺 𑀜𑀸𑀧𑁂𑀢𑀺 𑀓𑀺𑀭𑀺𑀬𑀸𑀤𑀺𑀯𑀺𑀪𑀸𑀕𑀁, 𑀢𑀁 𑀯𑀸 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀢𑁄 𑀕𑀫𑁂𑀦𑁆𑀢𑁄 𑀧𑀽𑀭𑁂𑀢𑀻𑀢𑀺 𑀓𑁂𑀝𑀼𑀪𑀁. 𑀯𑁂𑀯𑀘𑀦𑀧𑁆𑀧𑀓𑀸𑀲𑀓𑀦𑁆𑀢𑀺 𑀧𑀭𑀺𑀬𑀸𑀬𑀲𑀤𑁆𑀤𑀤𑀻𑀧𑀓𑀁, 𑀏𑀓𑁂𑀓𑀲𑁆𑀲 𑀅𑀢𑁆𑀣𑀲𑁆𑀲 𑀅𑀦𑁂𑀓𑀧𑀭𑀺𑀬𑀸𑀬𑀯𑀘𑀦𑀯𑀺𑀪𑀸𑀯𑀓𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁 𑀅𑀦𑁂𑀓𑁂𑀲𑀫𑁆𑀧𑀺 𑀅𑀢𑁆𑀣𑀸𑀦𑀁 𑀏𑀓𑀲𑀤𑁆𑀤𑀯𑀘𑀦𑀻𑀬𑀢𑀸𑀯𑀺𑀪𑀸𑀯𑀦𑀯𑀲𑁂𑀦𑀧𑀺 𑀢𑀲𑁆𑀲 𑀕𑀦𑁆𑀣𑀲𑁆𑀲 𑀧𑀯𑀢𑁆𑀢𑀢𑁆𑀢𑀸. 𑀯𑀘𑀻𑀪𑁂𑀤𑀸𑀤𑀺𑀮𑀓𑁆𑀔𑀡𑀸 𑀓𑀺𑀭𑀺𑀬𑀸 𑀓𑀧𑁆𑀧𑀻𑀬𑀢𑀺 𑀏𑀢𑁂𑀦𑀸𑀢𑀺 𑀓𑀺𑀭𑀺𑀬𑀸𑀓𑀧𑁆𑀧𑁄, 𑀲𑁄 𑀧𑀦 𑀯𑀡𑁆𑀡𑀧𑀤𑀲𑀫𑁆𑀩𑀦𑁆𑀥𑀧𑀤𑀢𑁆𑀣𑀸𑀤𑀺𑀯𑀺𑀪𑀸𑀕𑀢𑁄 𑀩𑀳𑀼𑀯𑀺𑀓𑀧𑁆𑀧𑁄𑀢𑀺 𑀆𑀳 ‘‘𑀓𑀺𑀭𑀺𑀬𑀸𑀓𑀧𑁆𑀧𑀯𑀺𑀓𑀧𑁆𑀧𑁄’’𑀢𑀺. 𑀇𑀤𑀜𑁆𑀘 𑀫𑀽𑀮𑀓𑀺𑀭𑀺𑀬𑀸𑀓𑀧𑁆𑀧𑀕𑀦𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁄 𑀳𑀺 𑀲𑀢𑀲𑀳𑀲𑁆𑀲𑀧𑀭𑀺𑀫𑀸𑀡𑁄 𑀦𑀬𑀘𑀭𑀺𑀬𑀸𑀤𑀺𑀧𑀓𑀭𑀡𑀁. 𑀞𑀸𑀦𑀓𑀭𑀡𑀸𑀤𑀺𑀯𑀺𑀪𑀸𑀕𑀢𑁄 ¶ , 𑀦𑀺𑀩𑁆𑀩𑀘𑀦𑀯𑀺𑀪𑀸𑀕𑀢𑁄 𑀘 𑀅𑀓𑁆𑀔𑀭𑀸 𑀧𑀪𑁂𑀤𑀻𑀬𑀦𑁆𑀢𑀺 𑀏𑀢𑁂𑀳𑀻𑀢𑀺 𑀅𑀓𑁆𑀔𑀭𑀧𑁆𑀧𑀪𑁂𑀤𑀸, 𑀲𑀺𑀓𑁆𑀔𑀸𑀦𑀺𑀭𑀼𑀢𑁆𑀢𑀺𑀬𑁄. 𑀏𑀢𑁂𑀲𑀦𑁆𑀢𑀺 𑀯𑁂𑀤𑀸𑀦𑀁.

𑀢𑁂 ¶ 𑀏𑀯 𑀯𑁂𑀤𑁂 𑀧𑀤𑀲𑁄 𑀓𑀸𑀬𑀢𑀻𑀢𑀺 𑀧𑀤𑀓𑁄. 𑀢𑀁 𑀢𑀁 𑀲𑀤𑁆𑀤𑀁 𑀢𑀤𑀢𑁆𑀣𑀜𑁆𑀘 𑀩𑁆𑀬𑀸𑀓𑀭𑁄𑀢𑀺 𑀩𑁆𑀬𑀸𑀘𑀺𑀓𑁆𑀔𑀢𑀺 𑀏𑀢𑁂𑀦𑀸𑀢𑀺 𑀩𑁆𑀬𑀸𑀓𑀭𑀡𑀁, 𑀲𑀤𑁆𑀤𑀲𑀢𑁆𑀣𑀁. 𑀆𑀬𑀢𑀺𑀁 𑀳𑀺𑀢𑀁 𑀢𑁂𑀦 𑀮𑁄𑀓𑁄 𑀦 𑀬𑀢𑀢𑀺 𑀦 𑀈𑀳𑀢𑀻𑀢𑀺 𑀮𑁄𑀓𑀸𑀬𑀢𑀁. 𑀢𑀜𑁆𑀳𑀺 𑀕𑀦𑁆𑀣𑀁 𑀦𑀺𑀲𑁆𑀲𑀸𑀬 𑀲𑀢𑁆𑀢𑀸 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀦𑁆𑀢𑀺.

𑀯𑀬𑀢𑀻𑀢𑀺 𑀯𑀬𑁄, 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀓𑀢𑁆𑀣𑀘𑀺 𑀅𑀧𑀭𑀺𑀓𑀺𑀮𑀫𑀦𑁆𑀢𑁄 𑀅𑀯𑀺𑀢𑁆𑀣𑀸𑀬𑀦𑁆𑀢𑁄 𑀢𑁂 𑀕𑀦𑁆𑀣𑁂 𑀲𑀦𑁆𑀥𑀸𑀭𑁂𑀢𑀺 𑀧𑀽𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀤𑁆𑀯𑁂 𑀧𑀝𑀺𑀲𑁂𑀥𑀸 𑀧𑀓𑀢𑀺𑀁 𑀕𑀫𑁂𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀯𑀬𑁄 𑀦 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀅𑀯𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀬𑁄 𑀦𑀸𑀫…𑀧𑁂… 𑀦 𑀲𑀓𑁆𑀓𑁄𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀅𑀦𑀼𑀜𑁆𑀜𑀸𑀢𑁄’’𑀢𑀺 𑀧𑀤𑀲𑁆𑀲 𑀓𑀫𑁆𑀫𑀲𑀸𑀥𑀦𑀯𑀲𑁂𑀦, ‘‘𑀧𑀝𑀺𑀜𑁆𑀜𑀸𑀢𑁄’’𑀢𑀺 𑀧𑀦 𑀧𑀤𑀲𑁆𑀲 𑀓𑀢𑁆𑀢𑀼𑀲𑀸𑀥𑀦𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀘𑀭𑀺𑀬𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀪𑀢𑀁 𑀆𑀘𑀭𑀺𑀬𑀓𑀁. 𑀕𑀭𑀽𑀢𑀺 𑀪𑀸𑀭𑀺𑀬𑀁 𑀅𑀢𑁆𑀢𑀸𑀦𑀁 𑀢𑀢𑁄 𑀫𑁄𑀘𑁂𑀢𑁆𑀯𑀸 𑀕𑀫𑀦𑀁 𑀤𑀼𑀓𑁆𑀓𑀭𑀁 𑀳𑁄𑀢𑀺. 𑀅𑀦𑀢𑁆𑀣𑁄𑀧𑀺 𑀉𑀧𑁆𑀧𑀚𑁆𑀚𑀢𑀺 𑀦𑀺𑀦𑁆𑀤𑀸𑀩𑁆𑀬𑀸𑀭𑁄𑀲𑀉𑀧𑀸𑀭𑀫𑁆𑀪𑀸𑀤𑀺.

𑁨𑁫𑁭. ‘‘𑀅𑀩𑁆𑀪𑀼𑀕𑁆𑀕𑀢𑁄’’𑀢𑀺 𑀏𑀢𑁆𑀣 𑀅𑀪𑀺𑀲𑀤𑁆𑀤𑀬𑁄𑀕𑁂𑀦 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑀯𑀲𑁂𑀦𑁂𑀯 𑀉𑀧𑀬𑁄𑀕𑀯𑀘𑀦𑀁.

𑁨𑁫𑁮. 𑀮𑀓𑁆𑀔𑀡𑀸𑀦𑀻𑀢𑀺 𑀮𑀓𑁆𑀔𑀡𑀤𑀻𑀧𑀦𑀸𑀦𑀺 𑀫𑀦𑁆𑀢𑀧𑀤𑀸𑀦𑀺. 𑀅𑀦𑁆𑀢𑀭𑀥𑀸𑀬𑀦𑁆𑀢𑀻𑀢𑀺 𑀦 𑀓𑁂𑀯𑀮𑀁 𑀮𑀓𑁆𑀔𑀡𑀫𑀦𑁆𑀢𑀸𑀦𑀺𑀬𑁂𑀯, 𑀅𑀣 𑀔𑁄 𑀅𑀜𑁆𑀜𑀸𑀦𑀺𑀧𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀜𑀸𑀡𑀩𑀮𑀸𑀪𑀸𑀯𑁂𑀦 𑀅𑀦𑀼𑀓𑁆𑀓𑀫𑁂𑀦 𑀅𑀦𑁆𑀢𑀭𑀥𑀸𑀬𑀦𑁆𑀢𑀺. 𑀢𑀣𑀸 𑀳𑀺 𑀯𑀤𑀦𑁆𑀢𑀺 ‘‘𑀏𑀓𑀲𑀢𑀁 𑀅𑀤𑁆𑀥𑀭𑀺𑀬𑀁 𑀲𑀸𑀔𑀸 𑀲𑀳𑀲𑁆𑀲𑀯𑀢𑁆𑀢𑀓𑁄 𑀲𑀸𑀫𑀸’’𑀢𑀺𑀆𑀤𑀺. 𑀧𑀡𑀺𑀥𑀺 ¶ …𑀧𑁂… 𑀫𑀳𑀢𑁄𑀢𑀺 𑀏𑀢𑁆𑀣 𑀧𑀡𑀺𑀥𑀺𑀫𑀳𑀢𑁄 𑀲𑀫𑀸𑀤𑀸𑀦𑀫𑀳𑀢𑁄𑀢𑀺 𑀆𑀤𑀺𑀦𑀸 𑀧𑀘𑁆𑀘𑁂𑀓𑀁 𑀫𑀳𑀦𑁆𑀢-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀧𑀡𑀺𑀥𑀺𑀫𑀳𑀦𑁆𑀢𑀢𑀸𑀤𑀺 𑀘𑀲𑁆𑀲 𑀩𑀼𑀤𑁆𑀥𑀯𑀁𑀲𑀘𑀭𑀺𑀬𑀸𑀧𑀺𑀝𑀓𑀯𑀡𑁆𑀡𑀦𑀸𑀤𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀦𑀺𑀝𑁆𑀞𑀸𑀢𑀺 𑀦𑀺𑀧𑁆𑀨𑀢𑁆𑀢𑀺𑀬𑁄. 𑀪𑀯𑀪𑁂𑀤𑁂𑀢𑀺 𑀪𑀯𑀯𑀺𑀲𑁂𑀲𑁂. 𑀇𑀢𑁄 𑀘 𑀏𑀢𑁆𑀢𑁄 𑀘 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑀢𑀸 𑀯𑀺𑀲𑀝𑀪𑀸𑀯𑁄.

𑀚𑀸𑀢𑀺𑀲𑀸𑀫𑀜𑁆𑀜𑀢𑁄𑀢𑀺 𑀮𑀓𑁆𑀔𑀡𑀚𑀸𑀢𑀺𑀬𑀸 𑀮𑀓𑁆𑀔𑀡𑀪𑀸𑀯𑀫𑀢𑁆𑀢𑁂𑀦 𑀲𑀫𑀸𑀦𑀪𑀸𑀯𑀢𑁄. 𑀬𑀣𑀸 𑀳𑀺 𑀩𑀼𑀤𑁆𑀥𑀸𑀦𑀁 𑀮𑀓𑁆𑀔𑀡𑀸𑀦𑀺 ¶ 𑀲𑀼𑀯𑀺𑀲𑀤𑀸𑀦𑀺, 𑀲𑀼𑀧𑀭𑀺𑀩𑁆𑀬𑀢𑁆𑀢𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀘 𑀳𑁄𑀦𑁆𑀢𑀺, 𑀦 𑀏𑀯𑀁 𑀘𑀓𑁆𑀓𑀯𑀢𑁆𑀢𑀻𑀦𑀁, 𑀢𑁂𑀦𑀸𑀳 ‘‘𑀦 𑀢𑁂𑀳𑁂𑀯 𑀩𑀼𑀤𑁆𑀥𑁄 𑀳𑁄𑀢𑀻’’𑀢𑀺. 𑀅𑀪𑀺𑀭𑀽𑀧𑀢𑀸, 𑀤𑀻𑀖𑀸𑀬𑀼𑀓𑀢𑀸, 𑀅𑀧𑁆𑀧𑀸𑀢𑀗𑁆𑀓𑀢𑀸, 𑀩𑁆𑀭𑀸𑀳𑁆𑀫𑀡𑀸𑀤𑀻𑀦𑀁 𑀧𑀺𑀬𑀫𑀦𑀸𑀧𑀢𑀸𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀅𑀘𑁆𑀙𑀭𑀺𑀬𑀲𑀪𑀸𑀯𑁂𑀳𑀺. 𑀤𑀸𑀦𑀁, 𑀧𑀺𑀬𑀯𑀘𑀦𑀁, 𑀅𑀢𑁆𑀣𑀘𑀭𑀺𑀬𑀸, 𑀲𑀫𑀸𑀦𑀢𑁆𑀢𑀢𑀸𑀢𑀺 ¶ 𑀇𑀫𑁂𑀳𑀺 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺. 𑀭𑀜𑁆𑀚𑀦𑀢𑁄𑀢𑀺 𑀧𑀻𑀢𑀺𑀚𑀦𑀦𑀢𑁄. 𑀘𑀓𑁆𑀓𑀁 𑀘𑀓𑁆𑀓𑀭𑀢𑀦𑀁 𑀯𑀢𑁆𑀢𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀘𑀓𑁆𑀓𑀯𑀢𑁆𑀢𑀻. 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑁂𑀳𑀺 𑀲𑀬𑀁 𑀯𑀢𑁆𑀢𑀢𑀺, 𑀢𑁂𑀳𑀺 𑀘 𑀧𑀭𑀁 𑀲𑀢𑁆𑀢𑀦𑀺𑀓𑀸𑀬𑀁 𑀯𑀢𑁆𑀢𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀘𑀓𑁆𑀓𑀯𑀢𑁆𑀢𑀻. 𑀧𑀭𑀳𑀺𑀢𑀸𑀯𑀳𑁄 𑀇𑀭𑀺𑀬𑀸𑀧𑀣𑀘𑀓𑁆𑀓𑀸𑀦𑀁 𑀯𑀢𑁆𑀢𑁄 𑀯𑀢𑁆𑀢𑀦𑀁 𑀏𑀢𑀲𑁆𑀲, 𑀏𑀢𑁆𑀣𑀸𑀢𑀺 𑀯𑀸 𑀘𑀓𑁆𑀓𑀯𑀢𑁆𑀢𑀻. 𑀅𑀧𑁆𑀧𑀝𑀺𑀳𑀢𑀁 𑀯𑀸 𑀆𑀡𑀸𑀲𑀗𑁆𑀔𑀸𑀢𑀁 𑀘𑀓𑁆𑀓𑀁 𑀯𑀢𑁆𑀢𑁂𑀢𑀻𑀢𑀺 𑀘𑀓𑁆𑀓𑀯𑀢𑁆𑀢𑀻. 𑀔𑀢𑁆𑀢𑀺𑀬𑀫𑀡𑁆𑀟𑀮𑀸𑀤𑀺𑀲𑀜𑁆𑀜𑀺𑀢𑀁 𑀘𑀓𑁆𑀓𑀁 𑀲𑀫𑀽𑀳𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀻𑀢𑀺 𑀘𑀓𑁆𑀓𑀯𑀢𑁆𑀢𑀻 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀲𑀗𑁆𑀔𑀸𑀢𑀁 𑀥𑀫𑁆𑀫𑀁 𑀘𑀭𑀢𑀺, 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀲𑀗𑁆𑀔𑀸𑀢𑁄 𑀥𑀫𑁆𑀫𑁄 𑀏𑀢𑀲𑁆𑀫𑀺𑀁 𑀅𑀢𑁆𑀣𑀻𑀢𑀺 𑀯𑀸 𑀥𑀫𑁆𑀫𑀺𑀓𑁄. 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 𑀥𑀫𑁆𑀫𑁄 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀚𑀸𑀢𑀺 𑀥𑀫𑁆𑀫𑀭𑀸𑀚𑀸. ‘‘𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀘𑀸𑀢𑀼𑀭𑀦𑁆𑀢𑁄’’𑀢𑀺 𑀧𑀤𑀁 𑀘𑀢𑀼𑀤𑀻𑀧𑀺𑀲𑁆𑀲𑀭𑀢𑀁 𑀯𑀺𑀪𑀸𑀯𑁂𑀢𑀻𑀢𑀺 𑀆𑀳 ‘‘𑀘𑀢𑀼𑀲𑀫𑀼𑀤𑁆𑀤𑀅𑀦𑁆𑀢𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀘𑀢𑀼𑀤𑁆𑀤𑀻𑀧𑀯𑀺𑀪𑀽𑀲𑀺𑀢𑀸𑀬𑀸’’𑀢𑀺 𑀅𑀯𑀢𑁆𑀯𑀸 ‘‘𑀘𑀢𑀼𑀩𑁆𑀩𑀺𑀥𑀸’’𑀢𑀺 𑀯𑀺𑀥𑀕𑁆𑀕𑀳𑀡𑀁 𑀢𑀁𑀢𑀁𑀧𑀭𑀺𑀢𑁆𑀢𑀤𑀻𑀧𑀸𑀦𑀫𑁆𑀧𑀺 𑀲𑀗𑁆𑀕𑀳𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑁄𑀧𑀸𑀤𑀻𑀢𑀺 ¶ 𑀆𑀤𑀺-𑀲𑀤𑁆𑀤𑁂𑀦 𑀓𑀸𑀫𑀫𑁄𑀳𑀫𑀸𑀦𑀫𑀤𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀺𑀚𑀺𑀢𑀸𑀯𑀻𑀢𑀺 𑀯𑀺𑀚𑀺𑀢𑀯𑀸. 𑀓𑁂𑀦𑀘𑀺 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀚𑀦𑀧𑀤𑁂 𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄, 𑀤𑀴𑁆𑀳𑀪𑀢𑁆𑀢𑀺𑀪𑀸𑀯𑀢𑁄 𑀯𑀸, 𑀚𑀦𑀧𑀤𑁄 𑀣𑀸𑀯𑀭𑀺𑀬𑀁 𑀧𑀢𑁆𑀢𑁄 𑀏𑀢𑁆𑀣𑀸𑀢𑀺 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄.

𑀘𑀺𑀢𑁆𑀢𑀻𑀓𑀢𑀪𑀸𑀯𑀸𑀤𑀺𑀦𑀸𑀧𑀺 (𑀔𑀼. 𑀧𑀸. 𑀅𑀝𑁆𑀞. 𑁩; 𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩; 𑀲𑀼. 𑀦𑀺. 𑀅𑀝𑁆𑀞. 𑁧.𑁨𑁨𑁬; 𑀫𑀳𑀸𑀦𑀺. 𑀅𑀝𑁆𑀞. 𑁫𑁦) 𑀘𑀓𑁆𑀓𑀲𑁆𑀲 𑀭𑀢𑀦𑀝𑁆𑀞𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀭𑀢𑀺𑀦𑀺𑀫𑀺𑀢𑁆𑀢𑀢𑀸𑀬 𑀯𑀸 𑀘𑀺𑀢𑁆𑀢𑀻𑀓𑀢𑀸𑀤𑀺𑀪𑀸𑀯𑀲𑁆𑀲 𑀭𑀢𑀺𑀚𑀦𑀦𑀝𑁆𑀞𑁂𑀦 𑀏𑀓𑀲𑀗𑁆𑀕𑀳𑀢𑀸𑀬 𑀯𑀺𑀲𑀼𑀁 𑀅𑀕𑁆𑀕𑀳𑀡𑀁. 𑀇𑀫𑁂𑀳𑀺 𑀧𑀦 𑀭𑀢𑀦𑁂𑀳𑀺 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀬𑀁 𑀬𑀫𑀢𑁆𑀣𑀁 𑀧𑀘𑁆𑀘𑀦𑀼𑀪𑁄𑀢𑀺, 𑀢𑀁 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑁂𑀲𑀼 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀚𑀺𑀢𑀁 𑀚𑀺𑀦𑀸𑀢𑀺 𑀫𑀳𑁂𑀲𑀓𑁆𑀔𑀢𑀸𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀦𑀺𑀲𑁆𑀲𑀦𑁆𑀤𑀪𑀸𑀯𑀢𑁄. 𑀯𑀺𑀚𑀺𑀢𑁂 𑀬𑀣𑀸𑀲𑀼𑀔𑀁 𑀅𑀦𑀼𑀯𑀺𑀘𑀭𑀢𑀺 𑀳𑀢𑁆𑀣𑀺𑀭𑀢𑀦𑀁 𑀅𑀲𑁆𑀲𑀭𑀢𑀦𑀜𑁆𑀘 𑀅𑀪𑀺𑀭𑀼𑀳𑀺𑀢𑁆𑀯𑀸 𑀢𑁂𑀲𑀁 𑀆𑀦𑀼𑀪𑀸𑀯𑁂𑀦 𑀅𑀦𑁆𑀢𑁄𑀧𑀸𑀢𑀭𑀸𑀲𑁂𑀬𑁂𑀯 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀧𑀣𑀯𑀺𑀁 𑀅𑀦𑀼𑀲𑀁𑀬𑀸𑀬𑀺𑀢𑁆𑀯𑀸 𑀭𑀸𑀚𑀥𑀸𑀦𑀺𑀫𑁂𑀯 𑀧𑀘𑁆𑀘𑀸𑀕𑀫𑀦𑀢𑁄. 𑀧𑀭𑀺𑀡𑀸𑀬𑀓𑀭𑀢𑀦𑁂𑀦 𑀯𑀺𑀚𑀺𑀢𑀫𑀦𑀼𑀭𑀓𑁆𑀔𑀢𑀺 𑀢𑁂𑀦 𑀢𑀢𑁆𑀣 𑀢𑀢𑁆𑀣 𑀓𑀸𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀲𑀁𑀯𑀺𑀥𑀸𑀦𑀢𑁄. 𑀅𑀯𑀲𑁂𑀲𑁂𑀳𑀻𑀢𑀺 𑀫𑀡𑀺𑀭𑀢𑀦𑀇𑀢𑁆𑀣𑀺𑀭𑀢𑀦𑀕𑀳𑀧𑀢𑀺𑀭𑀢𑀦𑁂𑀳𑀺. 𑀢𑀢𑁆𑀣 𑀫𑀡𑀺𑀭𑀢𑀦𑁂𑀦 𑀬𑁄𑀚𑀦𑀧𑁆𑀧𑀫𑀸𑀡𑁂 𑀧𑀤𑁂𑀲𑁂 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀆𑀮𑁄𑀓𑀤𑀲𑁆𑀲𑀦𑀸𑀤𑀺𑀦𑀸 𑀲𑀼𑀔𑀫𑀦𑀼𑀪𑀯𑀢𑀺, 𑀇𑀢𑁆𑀣𑀺𑀭𑀢𑀦𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑀭𑀽𑀧𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀸𑀤𑀺𑀯𑀲𑁂𑀦, 𑀕𑀳𑀧𑀢𑀺𑀭𑀢𑀦𑁂𑀦 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀫𑀡𑀺𑀓𑀦𑀓𑀭𑀚𑀢𑀸𑀤𑀺𑀥𑀦𑀧𑀝𑀺𑀮𑀸𑀪𑀯𑀲𑁂𑀦.

𑀉𑀲𑁆𑀲𑀸𑀳𑀲𑀢𑁆𑀢𑀺𑀬𑁄𑀕𑁄 ¶ 𑀢𑁂𑀦 𑀓𑁂𑀦𑀘𑀺 𑀅𑀧𑁆𑀧𑀝𑀺𑀳𑀢𑀸𑀡𑀸𑀘𑀓𑁆𑀓𑀪𑀸𑀯𑀲𑀺𑀤𑁆𑀥𑀺𑀢𑁄 𑀧𑀘𑁆𑀙𑀺𑀫𑁂𑀦𑀸𑀢𑀺 𑀧𑀭𑀺𑀡𑀸𑀬𑀓𑀭𑀢𑀦𑁂𑀦. 𑀢𑀜𑁆𑀳𑀺 𑀲𑀩𑁆𑀩𑀭𑀸𑀚𑀓𑀺𑀘𑁆𑀘𑁂𑀲𑀼 𑀓𑀼𑀲𑀮𑀁 𑀅𑀯𑀺𑀭𑀚𑁆𑀛𑀦𑀬𑁄𑀕𑀁, 𑀢𑁂𑀦𑀸𑀳 ‘‘𑀫𑀦𑁆𑀢𑀲𑀢𑁆𑀢𑀺𑀬𑁄𑀕𑁄’’𑀢𑀺 ¶ . 𑀳𑀢𑁆𑀣𑀺𑀅𑀲𑁆𑀲𑀭𑀢𑀦𑀸𑀦𑀁 𑀫𑀳𑀸𑀦𑀼𑀪𑀸𑀯𑀢𑀸𑀬 𑀓𑁄𑀲𑀲𑀫𑁆𑀧𑀢𑁆𑀢𑀺𑀬𑀸𑀧𑀺 𑀧𑀪𑀸𑀯𑀲𑀫𑁆𑀧𑀢𑁆𑀢𑀺𑀲𑀺𑀤𑁆𑀥𑀺𑀢𑁄 ¶ ‘‘𑀳𑀢𑁆𑀣𑀺…𑀧𑁂… 𑀬𑁄𑀕𑁄’’𑀢𑀺 𑀯𑀼𑀢𑁆𑀢𑀁. (𑀓𑁄𑀲𑁄 𑀳𑀺 𑀦𑀸𑀫 𑀲𑀢𑀺 𑀉𑀲𑁆𑀲𑀸𑀳𑀲𑀫𑁆𑀧𑀢𑁆𑀢𑀺𑀬𑀁 𑀤𑀼𑀕𑁆𑀕𑀁 𑀢𑁂𑀚𑀁 𑀓𑀼𑀲𑀼𑀫𑁄𑀭𑀁 𑀧𑀭𑀓𑁆𑀓𑀫𑀁 𑀧𑀩𑁆𑀩𑀢𑁄𑀫𑀼𑀔𑀁 𑀅𑀫𑁄𑀲𑀧𑀳𑀭𑀡𑀁) 𑀢𑀺𑀯𑀺𑀥𑀲𑀢𑁆𑀢𑀺𑀬𑁄𑀕𑀨𑀮𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑁂𑀳𑀻𑀢𑀺 𑀲𑁂𑀲𑁂𑀳𑀺 𑀧𑀜𑁆𑀘𑀳𑀺 𑀭𑀢𑀦𑁂𑀳𑀺.

𑀅𑀤𑁄𑀲𑀓𑀼𑀲𑀮𑀫𑀽𑀮𑀚𑀦𑀺𑀢𑀓𑀫𑁆𑀫𑀸𑀦𑀼𑀪𑀸𑀯𑁂𑀦𑀸𑀢𑀺 𑀅𑀤𑁄𑀲𑀲𑀗𑁆𑀔𑀸𑀢𑁂𑀦 𑀓𑀼𑀲𑀮𑀫𑀽𑀮𑁂𑀦 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀉𑀧𑁆𑀧𑀸𑀤𑀺𑀢𑀓𑀫𑁆𑀫𑀲𑁆𑀲 𑀆𑀦𑀼𑀪𑀸𑀯𑁂𑀦 𑀲𑀫𑁆𑀧𑀚𑁆𑀚𑀦𑁆𑀢𑀺 𑀲𑁄𑀫𑁆𑀫𑀢𑀭𑀭𑀢𑀦𑀚𑀸𑀢𑀺𑀓𑀢𑁆𑀢𑀸. 𑀫𑀚𑁆𑀛𑀺𑀫𑀸𑀦𑀺 𑀫𑀡𑀺𑀇𑀢𑁆𑀣𑀺𑀕𑀳𑀧𑀢𑀺𑀭𑀢𑀦𑀸𑀦𑀺. 𑀅𑀮𑁄𑀪…𑀧𑁂… 𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀲𑀫𑁆𑀧𑀚𑁆𑀚𑀦𑁆𑀢𑀺 𑀉𑀴𑀸𑀭𑀲𑁆𑀲 𑀥𑀦𑀲𑁆𑀲, 𑀉𑀴𑀸𑀭𑀥𑀦𑀧𑀝𑀺𑀮𑀸𑀪𑀓𑀸𑀭𑀡𑀲𑁆𑀲 𑀘 𑀧𑀭𑀺𑀘𑁆𑀘𑀸𑀕𑀲𑀫𑁆𑀧𑀤𑀸𑀳𑁂𑀢𑀼𑀓𑀢𑁆𑀢𑀸. 𑀧𑀘𑁆𑀙𑀺𑀫𑀦𑁆𑀢𑀺 𑀧𑀭𑀺𑀡𑀸𑀬𑀓𑀭𑀢𑀦𑀁. 𑀢𑀜𑁆𑀳𑀺 𑀅𑀫𑁄𑀳…𑀧𑁂… 𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀲𑀫𑁆𑀧𑀚𑁆𑀚𑀢𑀺 𑀫𑀳𑀸𑀧𑀜𑁆𑀜𑁂𑀦𑁂𑀯 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀓𑀺𑀘𑁆𑀘𑀲𑁆𑀲 𑀧𑀭𑀺𑀡𑁂𑀢𑀩𑁆𑀩𑀢𑁆𑀢𑀸. 𑀉𑀧𑀤𑁂𑀲𑁄 𑀦𑀸𑀫 𑀲𑀯𑀺𑀲𑁂𑀲𑀁 𑀲𑀢𑁆𑀢𑀦𑁆𑀦𑀁 𑀭𑀢𑀦𑀸𑀦𑀁 𑀯𑀺𑀘𑀸𑀭𑀡𑀯𑀲𑁂𑀦 𑀧𑀯𑀢𑁆𑀢𑁄 𑀓𑀣𑀸𑀩𑀦𑁆𑀥𑁄.

𑀲𑀭𑀡𑀢𑁄 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀢𑁄 𑀲𑀽𑀭𑀸, 𑀢𑁂𑀦𑀸𑀳 ‘‘𑀅𑀪𑀻𑀭𑀼𑀓𑀚𑀸𑀢𑀺𑀓𑀸’’𑀢𑀺. 𑀅𑀲𑀼𑀭𑁂 𑀯𑀺𑀚𑀺𑀦𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀯𑀻𑀭𑁄, 𑀲𑀓𑁆𑀓𑁄 𑀤𑁂𑀯𑀸𑀦𑀁 𑀇𑀦𑁆𑀤𑁄. 𑀢𑀲𑁆𑀲 𑀅𑀗𑁆𑀕𑀁 𑀤𑁂𑀯𑀧𑀼𑀢𑁆𑀢𑁄 𑀲𑁂𑀦𑀗𑁆𑀕𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀯𑀻𑀭𑀗𑁆𑀕𑀭𑀽𑀧𑀸𑀢𑀺 𑀤𑁂𑀯𑀧𑀼𑀢𑁆𑀢𑀲𑀤𑀺𑀲𑀓𑀸𑀬𑀸’’𑀢𑀺. ‘‘𑀏𑀓𑁂’’𑀢𑀺 𑀲𑀸𑀭𑀲𑀫𑀸𑀲𑀸𑀘𑀭𑀺𑀬𑀫𑀸𑀳. 𑀲𑀪𑀸𑀯𑁄𑀢𑀺 𑀲𑀪𑀸𑀯𑀪𑀽𑀢𑁄 𑀅𑀢𑁆𑀣𑁄. 𑀯𑀻𑀭𑀓𑀸𑀭𑀡𑀦𑁆𑀢𑀺 𑀯𑀻𑀭𑀪𑀸𑀯𑀓𑀸𑀭𑀡𑀁. 𑀯𑀻𑀭𑀺𑀬𑀫𑀬𑀲𑀭𑀻𑀭𑀸 𑀯𑀺𑀬𑀸𑀢𑀺 𑀲𑀯𑀺𑀕𑁆𑀕𑀳𑀯𑀻𑀭𑀺𑀬𑀲𑀤𑀺𑀲𑀸, 𑀲𑀯𑀺𑀕𑁆𑀕𑀳𑀁 𑀘𑁂 𑀯𑀻𑀭𑀺𑀬𑀁 𑀲𑀺𑀬𑀸 𑀢𑀁𑀲𑀤𑀺𑀲𑀸𑀢𑀺 𑀅𑀢𑁆𑀣𑁄. 𑀦𑀦𑀼 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀝𑀺𑀲𑁂𑀦𑀸 𑀦𑀸𑀫 𑀦𑀢𑁆𑀣𑀺, 𑀬’𑀫𑀲𑁆𑀲 𑀧𑀼𑀢𑁆𑀢𑀸 𑀧𑀫𑀤𑁆𑀤𑁂𑀬𑁆𑀬𑀼𑀁, 𑀅𑀣 𑀓𑀲𑁆𑀫𑀸 𑀧𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 𑀲𑀘𑁂𑀢𑀺𑀆𑀤𑀺, 𑀢𑁂𑀦 𑀧𑀭𑀲𑁂𑀦𑀸 𑀳𑁄𑀢𑀼 𑀯𑀸 𑀫𑀸 𑀯𑀸 𑀢𑁂 𑀧𑀦 𑀏𑀯𑀁 𑀫𑀳𑀸𑀦𑀼𑀪𑀸𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀥𑀫𑁆𑀫𑁂𑀦𑀸𑀢𑀺 𑀓𑀢𑀼𑀧𑀘𑀺𑀢𑁂𑀦 𑀅𑀢𑁆𑀢𑀦𑁄 𑀧𑀼𑀜𑁆𑀜𑀥𑀫𑁆𑀫𑁂𑀦. 𑀢𑁂𑀦 ¶ 𑀳𑀺 𑀲𑀜𑁆𑀘𑁄𑀤𑀺𑀢𑀸 𑀧𑀣𑀯𑀺𑀬𑀁 𑀲𑀩𑁆𑀩𑀭𑀸𑀚𑀸𑀦𑁄 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 ‘‘𑀲𑁆𑀯𑀸𑀕𑀢𑀁 𑀢𑁂 𑀫𑀳𑀸𑀭𑀸𑀚𑀸’’𑀢𑀺 𑀆𑀤𑀺𑀁 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀭𑀚𑁆𑀚𑀁 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀦𑀺𑀬𑁆𑀬𑀸𑀢𑁂𑀦𑁆𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑁄 𑀇𑀫𑀁…𑀧𑁂… 𑀅𑀚𑁆𑀛𑀸𑀯𑀲𑀢𑀻’’𑀢𑀺. 𑀅𑀝𑁆𑀞𑀓𑀣𑀸𑀬𑀁 ¶ 𑀧𑀦 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀥𑀫𑁆𑀫𑀲𑁆𑀲 𑀘𑀺𑀭𑀢𑀭𑀁 𑀯𑀺𑀧𑀘𑁆𑀘𑀺𑀢𑀼𑀁 𑀧𑀘𑁆𑀘𑀬𑀪𑀽𑀢𑀁 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀲𑀫𑀼𑀤𑀸𑀕𑀢𑀁 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀥𑀫𑁆𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄𑀢𑀺𑀆𑀤𑀺𑀦𑀸 𑀧𑀜𑁆𑀘𑀲𑀻𑀮𑀥𑀫𑁆𑀫𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 ‘‘𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦𑀸’’𑀢𑀺 𑀇𑀤𑀁 𑀯𑀘𑀦𑀁 𑀲𑀼𑀝𑁆𑀞𑀼𑀢𑀭𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀻𑀢𑀺. 𑀬𑀲𑁆𑀫𑀸 𑀭𑀸𑀕𑀸𑀤𑀬𑁄 𑀧𑀸𑀧𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀢𑁆𑀢𑀲𑀦𑁆𑀢𑀸𑀦𑀁 𑀙𑀸𑀤𑁂𑀢𑁆𑀯𑀸 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀁 𑀦𑀺𑀯𑀸𑀭𑁂𑀦𑁆𑀢𑀺, 𑀢𑀲𑁆𑀫𑀸 𑀢𑁂 ‘‘𑀙𑀤𑀦𑀸, 𑀙𑀤𑀸’’𑀢𑀺 𑀘 𑀯𑀼𑀢𑁆𑀢𑀸. 𑀯𑀺𑀯𑀝𑁂𑀢𑁆𑀯𑀸𑀢𑀺 𑀯𑀺𑀕𑀫𑁂𑀢𑁆𑀯𑀸. 𑀧𑀽𑀚𑀸𑀭𑀳𑀢𑀸 𑀯𑀼𑀢𑁆𑀢𑀸 ‘‘𑀅𑀭𑀳𑀢𑀻𑀢𑀺 𑀅𑀭𑀳’’𑀦𑁆𑀢𑀺. 𑀢𑀲𑁆𑀲𑀸 𑀧𑀽𑀚𑀸𑀭𑀳𑀢𑀸𑀬. 𑀬𑀲𑁆𑀫𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀫𑀸 𑀅𑀭𑀳𑀦𑁆𑀢𑀺. 𑀩𑀼𑀤𑁆𑀥𑀢𑁆𑀢𑀳𑁂𑀢𑀼𑀪𑀽𑀢𑀸 𑀯𑀺𑀯𑀝𑁆𑀝𑀘𑁆𑀙𑀤𑀢𑀸 𑀯𑀼𑀢𑁆𑀢𑀸 𑀲𑀯𑀸𑀲𑀦𑀲𑀩𑁆𑀩𑀓𑀺𑀮𑁂𑀲𑀧𑁆𑀧𑀳𑀸𑀦𑀧𑀼𑀩𑁆𑀩𑀓𑀢𑁆𑀢𑀸 𑀩𑀼𑀤𑁆𑀥𑀪𑀸𑀯𑀲𑁆𑀲.

𑀅𑀭𑀳𑀁 ¶ 𑀯𑀝𑁆𑀝𑀸𑀪𑀸𑀯𑁂𑀦𑀸𑀢𑀺 𑀨𑀮𑁂𑀦 𑀳𑁂𑀢𑀼𑀅𑀦𑀼𑀫𑀸𑀦𑀤𑀲𑁆𑀲𑀦𑀁. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀙𑀤𑀦𑀸𑀪𑀸𑀯𑁂𑀦𑀸𑀢𑀺 𑀳𑁂𑀢𑀼𑀦𑀸 𑀨𑀮𑀸𑀦𑀼𑀫𑀸𑀦𑀤𑀲𑁆𑀲𑀦𑀁. 𑀳𑁂𑀢𑀼𑀤𑁆𑀯𑀬𑀁 𑀯𑀼𑀢𑁆𑀢𑀁 ‘‘𑀯𑀺𑀯𑀝𑁆𑀝𑁄 𑀯𑀺𑀘𑁆𑀙𑀤𑁄 𑀘𑀸’’𑀢𑀺. 𑀤𑀼𑀢𑀺𑀬𑁂𑀦 𑀯𑁂𑀲𑀸𑀭𑀚𑁆𑀚𑁂𑀦𑀸𑀢𑀺 ‘‘𑀔𑀻𑀡𑀸𑀲𑀯𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀯𑁂𑀲𑀸𑀭𑀚𑁆𑀚𑁂𑀦. 𑀧𑀼𑀭𑀺𑀫𑀲𑀺𑀤𑁆𑀥𑀻𑀢𑀺 𑀧𑀼𑀭𑀺𑀫𑀲𑁆𑀲 𑀧𑀤𑀲𑁆𑀲 𑀅𑀢𑁆𑀣𑀲𑀺𑀤𑁆𑀥𑀻𑀢𑀺 𑀅𑀢𑁆𑀣𑁄. 𑀧𑀞𑀫𑁂𑀦𑀸𑀢𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 ¶ 𑀢𑁂 𑀧𑀝𑀺𑀚𑀸𑀦𑀢𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁫𑁦; 𑀅. 𑀦𑀺. 𑁪.𑁮) 𑀯𑀼𑀢𑁆𑀢𑁂𑀦 𑀯𑁂𑀲𑀸𑀭𑀚𑁆𑀚𑁂𑀦. 𑀤𑀼𑀢𑀺𑀬𑀲𑀺𑀤𑁆𑀥𑀻𑀢𑀺 𑀤𑀼𑀢𑀺𑀬𑀲𑁆𑀲 𑀧𑀤𑀲𑁆𑀲 𑀅𑀢𑁆𑀣𑀲𑀺𑀤𑁆𑀥𑀺, 𑀩𑀼𑀤𑁆𑀥𑀢𑁆𑀣𑀲𑀺𑀤𑁆𑀥𑀻𑀢𑀺 𑀅𑀢𑁆𑀣𑁄. 𑀢𑀢𑀺𑀬𑀘𑀢𑀼𑀢𑁆𑀣𑁂𑀳𑀻𑀢𑀺 ‘‘𑀬𑁂 𑀔𑁄 𑀧𑀦 𑀢𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸, (𑀫. 𑀦𑀺. 𑁧.𑁧𑁫𑁦; 𑀅. 𑀦𑀺. 𑁪.𑁮) ‘‘𑀬𑀲𑁆𑀲 𑀔𑁄 𑀧𑀦 𑀢𑁂 𑀅𑀢𑁆𑀣𑀸𑀬𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁫𑁦; 𑀅. 𑀦𑀺. 𑁪.𑁮) 𑀘 𑀯𑀼𑀢𑁆𑀢𑁂𑀳𑀺 𑀢𑀢𑀺𑀬𑀘𑀢𑀼𑀢𑁆𑀣𑁂𑀳𑀺 𑀯𑁂𑀲𑀸𑀭𑀚𑁆𑀚𑁂𑀳𑀺. 𑀢𑀢𑀺𑀬𑀲𑀺𑀤𑁆𑀥𑀻𑀢𑀺 𑀯𑀺𑀯𑀝𑁆𑀝𑀘𑁆𑀙𑀤𑀦𑀢𑀸𑀲𑀺𑀤𑁆𑀥𑀺 𑀬𑀸𑀣𑀸𑀯𑀢𑁄 𑀅𑀦𑁆𑀢𑀭𑀸𑀬𑀺𑀓𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀸𑀧𑀤𑁂𑀲𑁂𑀦 𑀳𑀺 𑀲𑀢𑁆𑀣𑀼 𑀯𑀺𑀯𑀝𑁆𑀝𑀘𑁆𑀙𑀤𑀦𑀪𑀸𑀯𑁄 𑀮𑁄𑀓𑁂 𑀧𑀸𑀓𑀝𑁄 𑀅𑀳𑁄𑀲𑀺. 𑀧𑀼𑀭𑀺𑀫𑀁 𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀧𑀼𑀭𑀺𑀫𑀧𑀤𑀁 𑀪𑀕𑀯𑀢𑁄 𑀥𑀫𑁆𑀫𑀘𑀓𑁆𑀔𑀼𑀁 𑀲𑀸𑀥𑁂𑀢𑀺 𑀓𑀺𑀮𑁂𑀲𑀸𑀭𑀻𑀦𑀁, 𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀘 𑀅𑀭𑀸𑀦𑀁 𑀳𑀢𑀪𑀸𑀯𑀤𑀻𑀧𑀦𑀢𑁄. 𑀤𑀼𑀢𑀺𑀬𑀁 𑀧𑀤𑀁 𑀩𑀼𑀤𑁆𑀥𑀘𑀓𑁆𑀔𑀼𑀁 𑀲𑀸𑀥𑁂𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑁂𑀯 𑀢𑀁𑀲𑀩𑁆𑀪𑀸𑀯𑀢𑁄. 𑀢𑀢𑀺𑀬𑀁 𑀧𑀤𑀁 𑀲𑀫𑀦𑁆𑀢𑀘𑀓𑁆𑀔𑀼𑀁 𑀲𑀸𑀥𑁂𑀢𑀺 𑀲𑀯𑀸𑀲𑀦𑀲𑀩𑁆𑀩𑀓𑀺𑀮𑁂𑀲𑀧𑁆𑀧𑀳𑀸𑀦𑀤𑀻𑀧𑀦𑀢𑁄. ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀳𑀺 𑀯𑀢𑁆𑀯𑀸 ‘‘𑀯𑀺𑀯𑀝𑁆𑀝𑀘𑁆𑀙𑀤𑁄’’𑀢𑀺 𑀯𑀘𑀦𑀁 𑀩𑀼𑀤𑁆𑀥𑀪𑀸𑀯𑀸𑀯𑀳𑀫𑁂𑀯 𑀲𑀩𑁆𑀩𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀯𑀺𑀪𑀸𑀯𑁂𑀢𑀺. ‘‘𑀲𑀽𑀭𑀪𑀸𑀯’’𑀦𑁆𑀢𑀺 𑀮𑀓𑁆𑀔𑀡𑀯𑀺𑀪𑀸𑀯𑀦𑁂 𑀯𑀺𑀲𑀤𑀜𑀸𑀡𑀢𑀁.

𑁨𑁫𑁯. 𑀏𑀯𑀁 ¶ 𑀪𑁄𑀢𑀺 𑀏𑀢𑁆𑀣 𑀏𑀯𑀦𑁆𑀢𑀺 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑁂 𑀦𑀺𑀧𑀸𑀢𑁄. 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀜𑁆𑀘𑁂𑀢𑁆𑀣 ‘‘𑀢𑀣𑀸 𑀫𑀬𑀁 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀯𑁂𑀤𑀺𑀲𑁆𑀲𑀸𑀫, 𑀢𑁆𑀯𑀁 𑀫𑀦𑁆𑀢𑀸𑀦𑀁 𑀧𑀝𑀺𑀕𑁆𑀕𑀳𑁂𑀢𑀸’’𑀢𑀺 𑀘 𑀏𑀯𑀁 𑀧𑀯𑀢𑁆𑀢𑀲𑁆𑀲 𑀧𑁄𑀓𑁆𑀔𑀭𑀲𑀸𑀢𑀺𑀦𑁄 𑀯𑀘𑀦𑀲𑁆𑀲 𑀲𑀫𑁆𑀧𑀝𑀺𑀕𑁆𑀕𑀳𑁄𑀢𑀺 𑀆𑀳. ‘‘𑀲𑁄𑀧𑀺 𑀢𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀸𑀬𑀸𑀢𑀺 𑀢𑀸𑀬 𑀬𑀣𑀸𑀯𑀼𑀢𑁆𑀢𑀸𑀬 𑀲𑀫𑀼𑀢𑁆𑀢𑁂𑀚𑀦𑀸𑀬. 𑀅𑀬𑀸𑀦𑀪𑀽𑀫𑀺𑀦𑁆𑀢𑀺 ¶ 𑀬𑀸𑀦𑀲𑁆𑀲 𑀅𑀪𑀽𑀫𑀺𑀁. 𑀤𑀺𑀯𑀸𑀧𑀥𑀸𑀦𑀺𑀓𑀸𑀢𑀺 𑀤𑀺𑀯𑀸𑀧𑀥𑀸𑀦𑀸𑀦𑀼𑀬𑀼𑀜𑁆𑀚𑀦𑀓𑀸.

𑁨𑁬𑁦. 𑀬𑀤𑀺𑀧𑀺 𑀧𑀼𑀩𑁆𑀩𑁂 𑀅𑀫𑁆𑀩𑀝𑁆𑀞𑀓𑀼𑀮𑀁 𑀅𑀧𑁆𑀧𑀜𑁆𑀜𑀸𑀢𑀁, 𑀢𑀤𑀸 𑀧𑀦 𑀧𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀢𑀤𑀸 𑀓𑀺𑀭𑀸’’𑀢𑀺𑀆𑀤𑀺. 𑀅𑀢𑀼𑀭𑀺𑀢𑁄𑀢𑀺 𑀅𑀯𑁂𑀕𑀸𑀬𑀦𑁆𑀢𑁄.

𑁨𑁬𑁧. 𑀬𑀣𑀸 𑀔𑀫𑀦𑀻𑀬𑀸𑀤𑀻𑀦𑀺 𑀧𑀼𑀘𑁆𑀙𑀦𑁆𑀢𑁄𑀢𑀺 𑀬𑀣𑀸 𑀪𑀕𑀯𑀸 ‘‘𑀓𑀘𑁆𑀘𑀺 𑀯𑁄 𑀫𑀸𑀡𑀯𑀸 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬’’𑀦𑁆𑀢𑀺𑀆𑀤𑀺𑀦𑀸 𑀔𑀫𑀦𑀻𑀬𑀸𑀤𑀻𑀦𑀺 𑀧𑀼𑀘𑁆𑀙𑀦𑁆𑀢𑁄 𑀢𑁂𑀳𑀺 𑀫𑀸𑀡𑀯𑁂𑀳𑀺 𑀲𑀤𑁆𑀥𑀺𑀁 𑀧𑀞𑀫𑀁 𑀧𑀯𑀢𑁆𑀢𑀫𑁄𑀤𑁄 𑀅𑀳𑁄𑀲𑀺 𑀧𑀼𑀩𑁆𑀩𑀪𑀸𑀲𑀺𑀢𑀸𑀬 𑀢𑀤𑀦𑀼𑀓𑀭𑀡𑁂𑀦 𑀏𑀯𑀁 𑀢𑁂𑀧𑀺 𑀫𑀸𑀡𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑀸 𑀅𑀳𑁂𑀲𑀼𑀦𑁆𑀢𑀺 𑀬𑁄𑀚𑀦𑀸. 𑀢𑀁 𑀧𑀦 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑀢𑀁 𑀉𑀧𑀫𑀸𑀬 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀢𑁄𑀤𑀓𑀁 𑀯𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀫𑁆𑀫𑁄𑀤𑀺𑀢𑀦𑁆𑀢𑀺 𑀲𑀁𑀲𑀦𑁆𑀤𑀺𑀢𑀁. 𑀏𑀓𑀻𑀪𑀸𑀯𑀦𑁆𑀢𑀺 𑀲𑀫𑁆𑀫𑁄𑀤𑀦𑀓𑀺𑀭𑀺𑀬𑀸𑀬 𑀲𑀫𑀸𑀦𑀢𑀁 ¶ . 𑀔𑀫𑀦𑀻𑀬𑀦𑁆𑀢𑀺 ‘‘𑀇𑀤𑀁 𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭𑀁 𑀲𑀭𑀻𑀭𑀬𑀦𑁆𑀢𑀁 𑀤𑀼𑀓𑁆𑀔𑀩𑀳𑀼𑀮𑀢𑀸𑀬 𑀲𑀪𑀸𑀯𑀢𑁄 𑀤𑀼𑀲𑁆𑀲𑀳𑀁 𑀓𑀘𑁆𑀘𑀺 𑀔𑀫𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬’’𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑀺, 𑀬𑀸𑀧𑀦𑀻𑀬𑀦𑁆𑀢𑀺 𑀆𑀳𑀸𑀭𑀸𑀤𑀺𑀧𑀘𑁆𑀘𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀓𑀁 𑀘𑀺𑀭𑀧𑁆𑀧𑀩𑀦𑁆𑀥𑀲𑀗𑁆𑀔𑀸𑀢𑀸𑀬 𑀬𑀸𑀧𑀦𑀸𑀬 𑀓𑀘𑁆𑀘𑀺 𑀬𑀸𑀧𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀁. 𑀲𑀻𑀲𑀭𑁄𑀕𑀸𑀤𑀺𑀆𑀩𑀸𑀥𑀸𑀪𑀸𑀯𑁂𑀦 𑀓𑀘𑁆𑀘𑀺 𑀅𑀧𑁆𑀧𑀸𑀩𑀸𑀥𑀁, 𑀤𑀼𑀓𑁆𑀔𑀚𑀻𑀯𑀺𑀓𑀸𑀪𑀸𑀯𑁂𑀦 𑀓𑀘𑁆𑀘𑀺 𑀅𑀧𑁆𑀧𑀸𑀢𑀗𑁆𑀓𑀁, 𑀢𑀁𑀢𑀁𑀓𑀺𑀘𑁆𑀘𑀓𑀭𑀡𑁂 𑀉𑀝𑁆𑀞𑀸𑀦𑀲𑀼𑀔𑀢𑀸𑀬 𑀓𑀘𑁆𑀘𑀺 𑀮𑀳𑀼𑀝𑁆𑀞𑀸𑀦𑀁, 𑀢𑀤𑀦𑀼𑀭𑀽𑀧𑀩𑀮𑀬𑁄𑀕𑀢𑁄 𑀓𑀘𑁆𑀘𑀺 𑀩𑀮𑀁, 𑀲𑀼𑀔𑀯𑀺𑀳𑀸𑀭𑀲𑀩𑁆𑀪𑀸𑀯𑁂𑀦 𑀓𑀘𑁆𑀘𑀺 𑀨𑀸𑀲𑀼𑀯𑀺𑀳𑀸𑀭𑁄 𑀅𑀢𑁆𑀣𑀻𑀢𑀺 𑀲𑀩𑁆𑀩𑀢𑁆𑀣 𑀓𑀘𑁆𑀘𑀺-𑀲𑀤𑁆𑀤𑀁 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀩𑀮𑀧𑁆𑀧𑀢𑁆𑀢𑀸 𑀧𑀻𑀢𑀺 𑀧𑀻𑀢𑀺𑀬𑁂𑀯. 𑀢𑀭𑀼𑀡𑀧𑀻𑀢𑀺 𑀧𑀸𑀫𑁄𑀚𑁆𑀚𑀁. 𑀲𑀫𑁆𑀫𑁄𑀤𑀦𑀁 𑀚𑀦𑁂𑀢𑀺 𑀓𑀭𑁄𑀢𑀻𑀢𑀺 𑀲𑀫𑁆𑀫𑁄𑀤𑀦𑀺𑀓𑀁 𑀢𑀤𑁂𑀯 𑀲𑀫𑁆𑀫𑁄𑀤𑀦𑀻𑀬𑀁. 𑀲𑀫𑁆𑀫𑁄𑀤𑀺𑀢𑀩𑁆𑀩𑀢𑁄 𑀲𑀫𑁆𑀫𑁄𑀤𑀦𑀻𑀬𑀦𑁆𑀢𑀺 𑀇𑀤𑀁 𑀧𑀦 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀲𑀫𑁆𑀫𑁄𑀤𑀺𑀢𑀼𑀁 𑀬𑀼𑀢𑁆𑀢𑀪𑀸𑀯𑀢𑁄’’𑀢𑀺. 𑀲𑀭𑀺𑀢𑀩𑁆𑀩𑀪𑀸𑀯𑀢𑁄 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀪𑀸𑀯𑀢𑁄 ‘‘𑀲𑀭𑀡𑀻𑀬’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀸𑀭𑀡𑀻𑀬’’𑀦𑁆𑀢𑀺 𑀤𑀻𑀖𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. ‘‘𑀲𑀼𑀬𑁆𑀬𑀫𑀸𑀦𑀲𑀼𑀔𑀢𑁄’’𑀢𑀺 𑀆𑀧𑀸𑀣𑀫𑀥𑀼𑀭𑀢𑀫𑀸𑀳, ‘‘𑀅𑀦𑀼𑀲𑁆𑀲𑀭𑀺𑀬𑀫𑀸𑀦𑀲𑀼𑀔𑀢𑁄’’𑀢𑀺 𑀯𑀺𑀫𑀤𑁆𑀤𑀭𑀫𑀡𑀻𑀬𑀢𑀁. ‘‘𑀩𑁆𑀬𑀜𑁆𑀚𑀦𑀧𑀭𑀺𑀲𑀼𑀤𑁆𑀥𑀢𑀸𑀬𑀸’’𑀢𑀺 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀸𑀯𑁂𑀦 ¶ 𑀢𑀲𑁆𑀲𑀸 𑀓𑀣𑀸𑀬 𑀯𑀘𑀦𑀘𑀸𑀢𑀼𑀭𑀺𑀬𑀫𑀸𑀳, ‘‘𑀅𑀢𑁆𑀣𑀧𑀭𑀺𑀲𑀼𑀤𑁆𑀥𑀢𑀸𑀬𑀸’’𑀢𑀺 𑀅𑀢𑁆𑀣𑀲𑁆𑀲 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑀁. 𑀅𑀦𑁂𑀓𑁂𑀳𑀺 𑀧𑀭𑀺𑀬𑀸𑀬𑁂𑀳𑀻𑀢𑀺 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺.

𑀅𑀧𑀲𑀸𑀤𑁂𑀲𑁆𑀲𑀸𑀫𑀻𑀢𑀺 ¶ 𑀫𑀗𑁆𑀓𑀼𑀁 𑀓𑀭𑀺𑀲𑁆𑀲𑀸𑀫𑀺. 𑀓𑀡𑁆𑀞𑁂 𑀑𑀮𑀫𑁆𑀩𑁂𑀢𑁆𑀯𑀸𑀢𑀺 𑀉𑀪𑁄𑀲𑀼 𑀔𑀦𑁆𑀥𑁂𑀲𑀼 𑀲𑀸𑀝𑀓𑀁 𑀆𑀲𑀚𑁆𑀚𑁂𑀢𑁆𑀯𑀸 𑀓𑀡𑁆𑀞𑁂 𑀑𑀮𑀫𑁆𑀩𑀺𑀢𑁆𑀯𑀸. 𑀤𑀼𑀲𑁆𑀲𑀓𑀡𑁆𑀡𑀁 𑀕𑀳𑁂𑀢𑁆𑀯𑀸𑀢𑀺 𑀦𑀺𑀯𑀢𑁆𑀣𑀲𑀸𑀝𑀓𑀲𑁆𑀲 𑀤𑀲𑀸𑀓𑁄𑀝𑀺𑀁 𑀏𑀓𑁂𑀦 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸. 𑀘𑀗𑁆𑀓𑀫𑀁 𑀅𑀪𑀺𑀭𑀼𑀳𑀺𑀢𑁆𑀯𑀸𑀢𑀺 𑀘𑀗𑁆𑀓𑀫𑀺𑀢𑀼𑀁 𑀆𑀭𑀪𑀺𑀢𑁆𑀯𑀸. 𑀥𑀸𑀢𑀼𑀲𑀫𑀢𑀸𑀢𑀺 𑀭𑀲𑀸𑀤𑀺𑀥𑀸𑀢𑀽𑀦𑀁 𑀲𑀫𑀸𑀯𑀢𑁆𑀣𑀢𑀸, 𑀅𑀭𑁄𑀕𑀢𑀸𑀢𑀺 𑀅𑀢𑁆𑀣𑁄. 𑀅𑀦𑀸𑀘𑀸𑀭𑀪𑀸𑀯𑀲𑀸𑀭𑀡𑀻𑀬𑀦𑁆𑀢𑀺 𑀅𑀦𑀸𑀘𑀸𑀭𑀪𑀸𑀯𑁂𑀦 𑀲𑀭𑀡𑀻𑀬𑀁. ‘‘𑀅𑀦𑀸𑀘𑀸𑀭𑁄 𑀯𑀢𑀸𑀬’’𑀦𑁆𑀢𑀺 𑀲𑀭𑀺𑀢𑀩𑁆𑀩𑀓𑀁.

𑁨𑁬𑁨. ‘‘𑀪𑀯𑀕𑁆𑀕𑀁 𑀕𑀳𑁂𑀢𑀼𑀓𑀸𑀫𑁄 𑀯𑀺𑀬𑀸’’𑀢𑀺𑀆𑀤𑀺 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀤𑀼𑀓𑁆𑀓𑀭𑀁 𑀓𑀺𑀘𑁆𑀘𑀁 𑀆𑀭𑀪𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀅𑀲𑀓𑁆𑀓𑀼𑀡𑁂𑀬𑁆𑀬𑀜𑁆𑀳𑁂𑀢𑀁 𑀲𑀤𑁂𑀯𑀓𑁂𑀦𑀸𑀧𑀺 𑀮𑁄𑀓𑁂𑀦, 𑀬𑀤𑀺𑀤𑀁 𑀪𑀕𑀯𑀢𑁄 𑀅𑀧𑀲𑀸𑀤𑀦𑀁, 𑀢𑁂𑀦𑀸𑀳 ‘‘𑀅𑀝𑁆𑀞𑀸𑀦𑁂 𑀯𑀸𑀬𑀫𑀢𑀻’’𑀢𑀺. 𑀅𑀬𑀁 𑀩𑀸𑀮𑁄 ‘‘𑀫𑀬𑀺 𑀓𑀺𑀜𑁆𑀘𑀺 𑀅𑀓𑀣𑁂𑀦𑁆𑀢𑁂 𑀫𑀬𑀸 𑀲𑀤𑁆𑀥𑀺𑀁 𑀓𑀣𑁂𑀢𑀼𑀫𑁆𑀧𑀺 𑀦 𑀯𑀺𑀲𑀳𑀢𑀻’’𑀢𑀺 𑀫𑀸𑀦𑀫𑁂𑀯 𑀧𑀕𑁆𑀕𑀡𑁆𑀳𑀺𑀲𑁆𑀲𑀢𑀺, 𑀓𑀣𑁂𑀦𑁆𑀢𑁂 𑀧𑀦 𑀓𑀣𑀸𑀧𑀲𑀗𑁆𑀕𑁂𑀦𑀲𑁆𑀲 𑀚𑀸𑀢𑀺𑀕𑁄𑀢𑁆𑀢𑁂 𑀯𑀺𑀪𑀸𑀯𑀺𑀢𑁂 𑀫𑀸𑀦𑀦𑀺𑀕𑁆𑀕𑀳𑁄 𑀪𑀯𑀺𑀲𑁆𑀲𑀢𑀻𑀢𑀺 𑀪𑀕𑀯𑀸 ‘‘𑀏𑀯𑀁 𑀦𑀼 𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀣 𑀔𑁄 𑀪𑀕𑀯𑀸’’𑀢𑀺𑀆𑀤𑀺. 𑀆𑀘𑀸𑀭𑀲𑀫𑀸𑀘𑀸𑀭𑀲𑀺𑀓𑁆𑀔𑀸𑀧𑀦𑁂𑀦 𑀆𑀘𑀭𑀺𑀬𑀸, 𑀢𑁂𑀲𑀁 𑀧𑀦 𑀆𑀘𑀭𑀺𑀬𑀸𑀦𑀁 𑀧𑀓𑀝𑁆𑀞𑀸 𑀆𑀘𑀭𑀺𑀬𑀸𑀢𑀺 𑀧𑀸𑀘𑀭𑀺𑀬𑀸 𑀬𑀣𑀸 𑀧𑀧𑀺𑀢𑀸𑀫𑀳𑁄𑀢𑀺, 𑀢𑁂𑀦𑀸𑀳 ‘‘𑀆𑀘𑀭𑀺𑀬𑁂𑀳𑀺 𑀘 𑀢𑁂𑀲𑀁 𑀧𑀸𑀘𑀭𑀺𑀬𑁂𑀳𑀺 𑀘𑀸’’𑀢𑀺.

𑀧𑀞𑀫𑀇𑀩𑁆𑀪𑀯𑀸𑀤𑀯𑀡𑁆𑀡𑀦𑀸

𑁨𑁬𑁩. 𑀢𑀻𑀲𑀼 𑀇𑀭𑀺𑀬𑀸𑀧𑀣𑁂𑀲𑀽𑀢𑀺 𑀞𑀸𑀦𑀕𑀫𑀦𑀦𑀺𑀲𑀚𑁆𑀚𑀸𑀲𑀼. 𑀓𑀣𑀸𑀧𑀴𑀸𑀲𑀦𑁆𑀢𑀺 ¶ 𑀓𑀣𑀸𑀯𑀲𑁂𑀦 𑀬𑀼𑀕𑀕𑁆𑀕𑀸𑀳𑀁. 𑀲𑀬𑀸𑀦𑁂𑀦 ¶ 𑀆𑀘𑀭𑀺𑀬𑁂𑀦 𑀲𑀤𑁆𑀥𑀺𑀁 𑀲𑀬𑀸𑀦𑀲𑁆𑀲 𑀓𑀣𑀸 𑀦𑀸𑀫 𑀆𑀘𑀸𑀭𑁄 𑀦 𑀳𑁄𑀢𑀺, 𑀢𑀁 𑀇𑀢𑀭𑁂𑀳𑀺 𑀲𑀤𑀺𑀲𑀁 𑀓𑀢𑁆𑀯𑀸 𑀓𑀣𑀦𑀁 𑀇𑀥 𑀓𑀣𑀸𑀧𑀴𑀸𑀲𑁄.

𑀢𑀲𑁆𑀲 𑀧𑀦 𑀬𑀁 𑀅𑀦𑀸𑀘𑀸𑀭𑀪𑀸𑀯𑀯𑀺𑀪𑀸𑀯𑀦𑀁 𑀲𑀢𑁆𑀣𑀸𑀭𑀸 𑀅𑀫𑁆𑀩𑀝𑁆𑀞𑁂𑀦 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁂𑀦 𑀓𑀢𑀁, 𑀢𑀁 𑀲𑀗𑁆𑀕𑀻𑀢𑀺𑀅𑀦𑀸𑀭𑀼𑀴𑁆𑀳𑀁 𑀧𑀭𑀫𑁆𑀧𑀭𑀸𑀪𑀢𑀦𑁆𑀢𑀺 𑀉𑀧𑀭𑀺 𑀧𑀸𑀴𑀺𑀬𑀸 𑀲𑀫𑁆𑀩𑀦𑁆𑀥𑀪𑀸𑀯𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁄 𑀓𑀺𑀭𑀸’’𑀢𑀺𑀆𑀤𑀺𑀫𑀸𑀳. 𑀫𑀼𑀡𑁆𑀟𑀓𑀸 𑀲𑀫𑀡𑀓𑀸𑀢𑀺 𑀘 𑀕𑀭𑀳𑀸𑀬𑀁 𑀓-𑀲𑀤𑁆𑀤𑁄, 𑀢𑁂𑀦𑀸𑀳 ‘‘𑀳𑀻𑀴𑁂𑀦𑁆𑀢𑁄’’𑀢𑀺. 𑀇𑀪𑀲𑁆𑀲 𑀧𑀬𑁄𑀕𑁄 𑀇𑀪𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀢𑀁 𑀇𑀪𑀁 𑀅𑀭𑀳𑀦𑁆𑀢𑀻𑀢𑀺 𑀇𑀩𑁆𑀪𑀸. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀣𑀸 𑀇𑀪𑁄 𑀳𑀢𑁆𑀣𑀺𑀯𑀸𑀳𑀦𑀪𑀽𑀢𑁄 𑀧𑀭𑀲𑁆𑀲 𑀯𑀲𑁂𑀦 𑀯𑀢𑁆𑀢𑀢𑀺, 𑀦 𑀅𑀢𑁆𑀢𑀦𑁄, 𑀏𑀯𑀁 𑀏𑀢𑁂𑀧𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀼𑀲𑁆𑀲𑀼𑀲𑀓𑀸 𑀲𑀼𑀤𑁆𑀤𑀸 𑀧𑀭𑀲𑁆𑀲 𑀯𑀲𑁂𑀦 ¶ 𑀯𑀢𑁆𑀢𑀦𑁆𑀢𑀺, 𑀦 𑀅𑀢𑁆𑀢𑀦𑁄, 𑀢𑀲𑁆𑀫𑀸 𑀇𑀪𑀲𑀤𑀺𑀲𑀧𑀬𑁄𑀕𑀢𑀸𑀬 𑀇𑀩𑁆𑀪𑀸𑀢𑀺. 𑀢𑁂 𑀧𑀦 𑀓𑀼𑀝𑀼𑀫𑁆𑀩𑀺𑀓𑀢𑀸𑀬 𑀖𑀭𑀯𑀸𑀲𑀺𑀦𑁄 𑀖𑀭𑀲𑁆𑀲𑀸𑀫𑀺𑀓𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀕𑀳𑀧𑀢𑀺𑀓𑀸’’𑀢𑀺. 𑀓𑀡𑁆𑀳𑀸𑀢𑀺 𑀓𑀡𑁆𑀳𑀚𑀸𑀢𑀺𑀓𑀸. 𑀤𑀺𑀚𑀸 𑀏𑀯 𑀳𑀺 𑀲𑀼𑀤𑁆𑀥𑀚𑀸𑀢𑀺𑀓𑀸, 𑀦 𑀇𑀢𑀭𑁂𑀢𑀺 𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑁄, 𑀢𑁂𑀦𑀸𑀳 ‘‘𑀓𑀸𑀴𑀓𑀸’’𑀢𑀺. 𑀫𑀼𑀔𑀢𑁄 𑀦𑀺𑀓𑁆𑀔𑀦𑁆𑀢𑀸𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀩𑁆𑀩𑀧𑀼𑀭𑀺𑀲𑀸 𑀩𑁆𑀭𑀳𑁆𑀫𑀼𑀦𑁄 𑀫𑀼𑀔𑀢𑁄 𑀦𑀺𑀓𑁆𑀔𑀦𑁆𑀢𑀸, 𑀅𑀬𑀁 𑀢𑁂𑀲𑀁 𑀧𑀞𑀫𑀼𑀧𑁆𑀧𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. ‘‘𑀲𑀫𑀡𑀸 𑀧𑀺𑀝𑁆𑀞𑀺𑀧𑀸𑀤𑀢𑁄’’𑀢𑀺 𑀇𑀤𑀁 𑀧𑀦𑀲𑁆𑀲 ‘‘𑀫𑀼𑀔𑀢𑁄 𑀦𑀺𑀓𑁆𑀔𑀦𑁆𑀢𑀸’’𑀢𑀺𑀆𑀤𑀺𑀯𑀘𑀦𑀢𑁄𑀧𑀺 𑀅𑀢𑀺𑀯𑀺𑀬 𑀅𑀲𑀫𑀯𑁂𑀓𑁆𑀔𑀺𑀢𑀯𑀘𑀦𑀁 𑀘𑀢𑀼𑀯𑀡𑁆𑀡𑀧𑀭𑀺𑀬𑀸𑀧𑀦𑁆𑀦𑀲𑁆𑀲𑁂𑀯 𑀲𑀫𑀡𑀪𑀸𑀯𑀲𑀫𑁆𑀪𑀯𑀢𑁄. 𑀅𑀦𑀺𑀬𑀫𑁂𑀢𑁆𑀯𑀸𑀢𑀺 𑀅𑀯𑀺𑀲𑁂𑀲𑁂𑀢𑁆𑀯𑀸, 𑀅𑀦𑀼𑀤𑁆𑀤𑁂𑀲𑀺𑀓𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄.

𑀫𑀸𑀦𑀼𑀲𑁆𑀲𑀬𑀯𑀲𑁂𑀦 𑀓𑀣𑁂𑀢𑀻𑀢𑀺 𑀫𑀸𑀦𑀼𑀲𑁆𑀲𑀬𑀁 𑀅𑀯𑀲𑁆𑀲𑀸𑀬 𑀅𑀢𑁆𑀢𑀸𑀦𑀁 𑀉𑀓𑁆𑀓𑀁𑀲𑁂𑀦𑁆𑀢𑁄, 𑀧𑀭𑁂 𑀘 𑀯𑀫𑁆𑀪𑁂𑀦𑁆𑀢𑁄 ‘‘𑀫𑀼𑀡𑁆𑀟𑀓𑀸’’𑀢𑀺 𑀆𑀤𑀺𑀁 𑀓𑀣𑁂𑀢𑀺. 𑀚𑀸𑀦𑀸𑀧𑁂𑀫𑀻𑀢𑀺 𑀚𑀸𑀢𑀺𑀕𑁄𑀢𑁆𑀢𑀲𑁆𑀲 𑀧𑀫𑀸𑀡𑀁 ¶ 𑀬𑀸𑀣𑀸𑀯𑀢𑁄 𑀯𑀺𑀪𑀸𑀯𑀦𑁂𑀦 𑀧𑀫𑀸𑀡𑀁 𑀚𑀸𑀦𑀸𑀧𑁂𑀫𑀻𑀢𑀺. 𑀅𑀢𑁆𑀣𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀢𑁆𑀣𑀺𑀓𑀁 𑀤𑀡𑁆𑀟𑀺𑀓𑀜𑀸𑀬𑁂𑀦.

‘‘𑀬𑀸𑀬𑁂𑀯 𑀔𑁄 𑀧𑀦𑀢𑁆𑀣𑀸𑀬𑀸’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀧𑀭𑀢𑁄 ‘‘𑀧𑀼𑀭𑀺𑀲𑀮𑀺𑀗𑁆𑀕𑀯𑀲𑁂𑀦𑁂𑀯𑀸’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀬𑀼𑀢𑁆𑀢𑀁. 𑀬𑀸𑀬 𑀅𑀢𑁆𑀣𑀸𑀬𑀸𑀢𑀺 𑀯𑀸 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦𑁂𑀯 𑀢𑀤𑀢𑁆𑀣𑁂 𑀲𑀫𑁆𑀧𑀤𑀸𑀦𑀯𑀘𑀦𑀁, 𑀬𑀲𑁆𑀲 𑀅𑀢𑁆𑀣𑀲𑁆𑀲 𑀅𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀲𑁆𑀲𑀸𑀢𑀺 𑀅𑀫𑁆𑀩𑀝𑁆𑀞𑀲𑁆𑀲 𑀤𑀲𑁆𑀲𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑁂𑀲𑀦𑁆𑀢𑀺 𑀅𑀜𑁆𑀜𑁂𑀲𑀁 𑀲𑀸𑀥𑀼𑀭𑀽𑀧𑀸𑀦𑀁. 𑀲𑀦𑁆𑀢𑀺𑀓𑀁 𑀆𑀕𑀢𑀸𑀦𑀦𑁆𑀢𑀺 𑀕𑀼𑀭𑀼𑀝𑁆𑀞𑀸𑀦𑀺𑀬𑀸𑀦𑀁 𑀲𑀦𑁆𑀢𑀺𑀓𑀁 𑀉𑀧𑀕𑀢𑀸𑀦𑀁. 𑀯𑀢𑁆𑀢𑀦𑁆𑀢𑀺 𑀢𑁂𑀳𑀺 𑀘𑀭𑀺𑀢𑀩𑁆𑀩𑀆𑀘𑀸𑀭𑀁. 𑀅𑀲𑀺𑀓𑁆𑀔𑀺𑀢𑁄𑀢𑀺 𑀆𑀘𑀸𑀭𑀁 𑀅𑀲𑀺𑀓𑁆𑀔𑀺𑀢𑁄. 𑀢𑀢𑁄 𑀏𑀯 𑀅𑀧𑁆𑀧𑀲𑁆𑀲𑀼𑀢𑁄. 𑀩𑀸𑀳𑀼𑀲𑀘𑁆𑀘𑀜𑁆𑀳𑀺 𑀦𑀸𑀫 𑀬𑀸𑀯𑀤𑁂𑀯 𑀉𑀧𑀲𑀫𑀢𑁆𑀣𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀢𑀤𑀪𑀸𑀯𑀢𑁄 𑀅𑀫𑁆𑀩𑀝𑁆𑀞𑁄 𑀅𑀧𑁆𑀧𑀲𑁆𑀲𑀼𑀢𑁄 𑀅𑀲𑀺𑀓𑁆𑀔𑀺𑀢𑁄 ‘‘𑀅𑀯𑀼𑀲𑀺𑀢𑁄’’𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀢𑁂𑀦𑀸𑀳 ‘‘𑀏𑀢𑀲𑁆𑀲 𑀳𑀻’’𑀢𑀺𑀆𑀤𑀺.

𑁨𑁬𑁪. 𑀓𑁄𑀥𑀯𑀲𑀘𑀺𑀢𑁆𑀢𑀢𑀸𑀬 𑀅𑀲𑀓𑀫𑀦𑁄. 𑀫𑀸𑀦𑀦𑀺𑀫𑁆𑀫𑀤𑀦𑀢𑁆𑀣𑀦𑁆𑀢𑀺 𑀫𑀸𑀦𑀲𑁆𑀲 𑀦𑀺𑀫𑁆𑀫𑀤𑀦𑀢𑁆𑀣𑀁. 𑀉𑀕𑁆𑀕𑀺𑀮𑁂𑀢𑁆𑀯𑀸𑀢𑀺 ¶ 𑀲𑀺𑀦𑁂𑀳𑀧𑀸𑀦𑁂𑀦 𑀓𑀺𑀮𑀺𑀦𑁆𑀦𑀁 𑀉𑀩𑁆𑀩𑀫𑀦𑀁 𑀓𑀢𑁆𑀯𑀸. 𑀕𑁄𑀢𑁆𑀢𑁂𑀦 𑀕𑁄𑀢𑁆𑀢𑀦𑁆𑀢𑀺 𑀢𑁂𑀦 𑀯𑀼𑀢𑁆𑀢𑁂𑀦 𑀧𑀼𑀭𑀸𑀢𑀦𑀕𑁄𑀢𑁆𑀢𑁂𑀦 𑀇𑀤𑀸𑀦𑀺 𑀢𑀁 𑀢𑀁 𑀅𑀦𑀯𑀚𑁆𑀚𑀲𑀜𑁆𑀜𑀺𑀢𑀁 𑀕𑁄𑀢𑁆𑀢𑀁 𑀲𑀸𑀯𑀚𑁆𑀚𑀢𑁄 𑀉𑀝𑁆𑀞𑀸𑀧𑁂𑀢𑁆𑀯𑀸 𑀉𑀤𑁆𑀥𑀭𑀺𑀢𑁆𑀯𑀸. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀕𑁄𑀢𑁆𑀢𑀁 𑀆𑀤𑀺𑀧𑀼𑀭𑀺𑀲𑀯𑀲𑁂𑀦, 𑀓𑀼𑀮𑀸𑀧𑀤𑁄𑀲𑁄, 𑀢𑀤𑀦𑁆𑀯𑀬𑁂 𑀉𑀧𑁆𑀧𑀦𑁆𑀦𑀅𑀪𑀺𑀜𑁆𑀜𑀸𑀢𑀧𑀼𑀭𑀺𑀲𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄 𑀬𑀣𑀸 ‘‘𑀆𑀤𑀺𑀘𑁆𑀘𑁄, 𑀫𑀖𑀤𑁂𑀯𑁄’’𑀢𑀺. 𑀕𑁄𑀢𑁆𑀢𑀫𑀽𑀮𑀲𑁆𑀲 𑀕𑀸𑀭𑀬𑁆𑀳𑀢𑀸𑀬 𑀅𑀫𑀸𑀦𑀯𑀢𑁆𑀣𑀼𑀪𑀸𑀯𑀧𑀯𑁂𑀤𑀦𑀢𑁄 ‘‘𑀫𑀸𑀦𑀤𑁆𑀥𑀚𑀁 𑀫𑀽𑀮𑁂 𑀙𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀖𑀝𑁆𑀝𑁂𑀦𑁆𑀢𑁄𑀢𑀺 ¶ 𑀑𑀫𑀲𑀦𑁆𑀢𑁄.

𑀬𑀲𑁆𑀫𑀺𑀁 ¶ 𑀫𑀸𑀦𑀼𑀲𑁆𑀲𑀬𑀓𑁄𑀥𑀼𑀲𑁆𑀲𑀬𑀸 𑀅𑀜𑁆𑀜𑀫𑀜𑁆𑀜𑀽𑀧𑀢𑁆𑀣𑀤𑁆𑀥𑀸, 𑀲𑁄 ‘‘𑀘𑀡𑁆𑀟𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀘𑀡𑁆𑀟𑀸𑀢𑀺 𑀫𑀸𑀦𑀦𑀺𑀲𑁆𑀲𑀺𑀢𑀓𑁄𑀥𑀬𑀼𑀢𑁆𑀢𑀸’’𑀢𑀺. 𑀔𑀭𑀸𑀢𑀺 𑀘𑀺𑀢𑁆𑀢𑁂𑀦, 𑀯𑀸𑀘𑀸𑀬 𑀘 𑀓𑀓𑁆𑀔𑀴𑀸. 𑀮𑀳𑀼𑀓𑀸𑀢𑀺 𑀢𑀭𑀼𑀡𑀸. 𑀪𑀲𑁆𑀲𑀸𑀢𑀺 ‘‘𑀲𑀸𑀳𑀲𑀺𑀓𑀸’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, ‘‘𑀲𑀸𑀭𑀫𑁆𑀪𑀓𑀸’’𑀢𑀺 𑀅𑀧𑀭𑁂. 𑀲𑀫𑀸𑀦𑀸𑀢𑀺 𑀳𑁄𑀦𑁆𑀢𑀸, 𑀪𑀯𑀫𑀸𑀦𑀸𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀲𑀦𑁆𑀢𑀸𑀢𑀺 𑀧𑀼𑀭𑀺𑀫𑀧𑀤𑀲𑁆𑀲𑁂𑀯 𑀯𑁂𑀯𑀘𑀦’’𑀦𑁆𑀢𑀺. 𑀦 𑀲𑀓𑁆𑀓𑀭𑁄𑀦𑁆𑀢𑀻𑀢𑀺 𑀲𑀓𑁆𑀓𑀸𑀭𑀁 𑀦 𑀓𑀭𑁄𑀦𑁆𑀢𑀺. 𑀅𑀧𑀘𑀺𑀢𑀺𑀓𑀫𑁆𑀫𑀦𑁆𑀢𑀺 𑀧𑀡𑀺𑀧𑀸𑀢𑀓𑀫𑁆𑀫 𑀦𑀸𑀦𑀼𑀮𑁄𑀫𑀦𑁆𑀢𑀺 𑀅𑀢𑁆𑀢𑀦𑁄 𑀚𑀸𑀢𑀺𑀬𑀸 𑀦 𑀅𑀦𑀼𑀘𑁆𑀙𑀯𑀺𑀓𑀦𑁆𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀇𑀩𑁆𑀪𑀯𑀸𑀤𑀯𑀡𑁆𑀡𑀦𑀸

𑁨𑁬𑁫. 𑀓𑀸𑀫𑀁 𑀲𑀓𑁆𑀬𑀭𑀸𑀚𑀓𑀼𑀮𑁂 𑀬𑁄 𑀲𑀩𑁆𑀩𑁂𑀲𑀁 𑀩𑀼𑀤𑁆𑀥𑀢𑀭𑁄 𑀲𑀫𑀢𑁆𑀣𑁄 𑀘, 𑀲𑁄 𑀏𑀯 𑀅𑀪𑀺𑀲𑁂𑀓𑀁 𑀮𑀪𑀢𑀺, 𑀏𑀓𑀘𑁆𑀘𑁄 𑀧𑀦 𑀅𑀪𑀺𑀲𑀺𑀢𑁆𑀢𑁄 𑀲𑀫𑀸𑀦𑁄 ‘‘𑀇𑀤𑀁 𑀭𑀚𑁆𑀚𑀁 𑀦𑀸𑀫 𑀩𑀳𑀼𑀓𑀺𑀘𑁆𑀘𑀁 𑀩𑀳𑀼𑀩𑁆𑀬𑀸𑀧𑀸𑀭’’𑀦𑁆𑀢𑀺 𑀢𑀢𑁄 𑀦𑀺𑀩𑁆𑀩𑀺𑀚𑁆𑀚 𑀭𑀚𑁆𑀚𑀁 𑀯𑀬𑀲𑀸 𑀅𑀦𑀦𑁆𑀢𑀭𑀲𑁆𑀲 𑀦𑀺𑀬𑁆𑀬𑀸𑀢𑁂𑀢𑀺, 𑀓𑀤𑀸𑀘𑀺 𑀲𑁄𑀧𑀺 𑀅𑀜𑁆𑀜𑀲𑁆𑀲𑀸𑀢𑀺 𑀢𑀸𑀤𑀺𑀲𑁂 𑀲𑀦𑁆𑀥𑀸𑀬𑀸𑀳 ‘‘𑀲𑀓𑁆𑀬𑀸𑀢𑀺 𑀅𑀪𑀺𑀲𑀺𑀢𑁆𑀢𑀭𑀸𑀚𑀸𑀦𑁄’’𑀢𑀺. 𑀓𑀼𑀮𑀯𑀁𑀲𑀁 𑀚𑀸𑀦𑀦𑁆𑀢𑀻𑀢𑀺 𑀓𑀡𑁆𑀳𑀸𑀬𑀦𑀢𑁄 𑀧𑀝𑁆𑀞𑀸𑀬 𑀧𑀭𑀫𑁆𑀧𑀭𑀸𑀕𑀢𑀁 𑀅𑀦𑀼𑀲𑁆𑀲𑀯𑀯𑀲𑁂𑀦 𑀚𑀸𑀦𑀦𑁆𑀢𑀺. 𑀓𑀼𑀮𑀸𑀪𑀺𑀫𑀸𑀦𑀺𑀦𑁄 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀧𑀭𑁂𑀲𑀁 𑀉𑀘𑁆𑀘𑀸𑀯𑀘𑀁 𑀓𑀼𑀮𑀁 𑀢𑀣𑀸 𑀢𑀣𑀸 𑀉𑀤𑀸𑀳𑀭𑀦𑁆𑀢𑀺, 𑀅𑀢𑁆𑀢𑀦𑁄 𑀘 𑀓𑀼𑀮𑀯𑀁𑀲𑀁 𑀚𑀸𑀦𑀦𑁆𑀢𑀺, 𑀏𑀯𑀁 𑀅𑀫𑁆𑀩𑀝𑁆𑀞𑁄𑀧𑀺. 𑀢𑀣𑀸 𑀳𑀺 𑀲𑁄 𑀧𑀭𑀢𑁄 𑀪𑀕𑀯𑀢𑀸 𑀧𑀼𑀘𑁆𑀙𑀺𑀢𑁄 𑀯𑀚𑀺𑀭𑀧𑀸𑀡𑀺𑀪𑀬𑁂𑀦 𑀬𑀸𑀣𑀸𑀯𑀢𑁄 𑀓𑀣𑁂𑀲𑀺.

𑀢𑀢𑀺𑀬𑀇𑀩𑁆𑀪𑀯𑀸𑀤𑀯𑀡𑁆𑀡𑀦𑀸

𑁨𑁬𑁬. 𑀔𑁂𑀢𑁆𑀢𑀮𑁂𑀟𑁆𑀟𑀽𑀦𑀦𑁆𑀢𑀺 𑀔𑁂𑀢𑁆𑀢𑁂 𑀓𑀲𑀦𑀯𑀲𑁂𑀦 𑀦𑀗𑁆𑀕𑀮𑁂𑀦 𑀉𑀝𑁆𑀞𑀸𑀧𑀺𑀢𑀮𑁂𑀟𑁆𑀟𑀽𑀦𑀁. ‘‘𑀮𑀝𑀼𑀓𑀺𑀓𑀸’’ 𑀇𑀘𑁆𑀘𑁂𑀯 𑀧𑀜𑁆𑀜𑀸𑀢𑀸 𑀔𑀼𑀤𑁆𑀤𑀓𑀲𑀓𑀼𑀡𑀺𑀓𑀸 𑀮𑀝𑀼𑀓𑀺𑀓𑁄𑀧𑀫𑀯𑀡𑁆𑀡𑀦𑀸𑀬𑀁 ‘‘𑀘𑀸𑀢𑀓𑀲𑀓𑀼𑀡𑀺𑀓𑀸’’𑀢𑀺 (𑀫. 𑀦𑀺. 𑀅𑀝𑁆𑀞. 𑁩.𑁧𑁫𑁦) 𑀯𑀼𑀢𑁆𑀢𑀸. 𑀓𑁄𑀥𑀯𑀲𑁂𑀦 𑀮𑀕𑁆𑀕𑀺𑀢𑀼𑀦𑁆𑀢𑀺 𑀉𑀧𑀦𑀬𑁆𑀳𑀺𑀢𑀼𑀁, 𑀆𑀖𑀸𑀢𑀁 𑀩𑀦𑁆𑀥𑀺𑀢𑀼𑀦𑁆𑀢𑀺 ¶ 𑀅𑀢𑁆𑀣𑁄. ‘‘𑀅𑀫𑁆𑀳𑁂 𑀳𑀁𑀲𑀓𑁄𑀜𑁆𑀘𑀫𑁄𑀭𑀲𑀫𑁂 𑀓𑀭𑁄𑀢𑀻’’𑀢𑀺 𑀇𑀫𑀺𑀦𑀸 ‘‘𑀦 𑀢𑀁 𑀓𑁄𑀘𑀺 𑀳𑀁𑀲𑁄 𑀯𑀸’’𑀢𑀺𑀆𑀤𑀺𑀯𑀘𑀦𑀁 𑀲𑀗𑁆𑀕𑀻𑀢𑀺𑀁 𑀅𑀦𑀸𑀭𑀼𑀴𑁆𑀳𑀁 𑀢𑀤𑀸 𑀪𑀕𑀯𑀢𑀸 𑀯𑀼𑀢𑁆𑀢𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀏𑀯𑀁 𑀦𑀼 𑀢𑁂’’𑀢𑀺𑀆𑀤𑀺𑀯𑀘𑀦𑀁, ‘‘𑀅𑀯𑀼𑀲𑀺𑀢𑀯𑀸𑀬𑁂𑀯𑀸’’𑀢𑀺𑀆𑀤𑀺𑀯𑀘𑀦𑀜𑁆𑀘 ¶ 𑀫𑀸𑀦𑀯𑀲𑁂𑀦 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀯𑀼𑀢𑁆𑀢𑀦𑁆𑀢𑀺 𑀫𑀜𑁆𑀜𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀦𑀺𑀫𑁆𑀫𑀸𑀦𑁄 𑀤𑀸𑀦𑀺 𑀚𑀸𑀢𑁄𑀢𑀺 𑀫𑀜𑁆𑀜𑀫𑀸𑀦𑁄’’𑀢𑀺.

𑀤𑀸𑀲𑀺𑀧𑀼𑀢𑁆𑀢𑀯𑀸𑀤𑀯𑀡𑁆𑀡𑀦𑀸

𑁨𑁬𑁭. 𑀦𑀺𑀫𑁆𑀫𑀸𑀤𑁂𑀢𑀻𑀢𑀺 ¶ 𑀅-𑀓𑀸𑀭𑀲𑁆𑀲 𑀆-𑀓𑀸𑀭𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀦𑀺𑀫𑁆𑀫𑀤𑁂𑀢𑀻’’𑀢𑀺. 𑀓𑀸𑀫𑀁 𑀕𑁄𑀢𑁆𑀢𑀁 𑀦𑀸𑀫𑁂𑀢𑀁 𑀧𑀺𑀢𑀺𑀢𑁄 𑀮𑀤𑁆𑀥𑀩𑁆𑀩𑀁, 𑀦 𑀫𑀸𑀢𑀺𑀢𑁄 𑀦 𑀳𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀕𑁄𑀢𑁆𑀢𑀸𑀬 𑀆𑀯𑀸𑀳𑀯𑀺𑀯𑀸𑀳𑁄 𑀇𑀘𑁆𑀙𑀺𑀢𑁄, 𑀕𑁄𑀢𑁆𑀢𑀦𑀸𑀫𑀁 𑀧𑀦 𑀬𑀲𑁆𑀫𑀸 𑀚𑀸𑀢𑀺𑀲𑀺𑀤𑁆𑀥𑀁, 𑀦 𑀓𑀺𑀢𑁆𑀢𑀺𑀫𑀁, 𑀚𑀸𑀢𑀺 𑀘 𑀉𑀪𑀬𑀲𑀫𑁆𑀩𑀦𑁆𑀥𑀺𑀦𑀻, 𑀢𑀲𑁆𑀫𑀸 ‘‘𑀫𑀸𑀢𑀸𑀧𑁂𑀢𑁆𑀢𑀺𑀓𑀦𑁆𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀦𑀸𑀫𑀕𑁄𑀢𑁆𑀢𑀦𑁆𑀢𑀺 𑀕𑁄𑀢𑁆𑀢𑀦𑀸𑀫𑀁, 𑀦 𑀓𑀺𑀢𑁆𑀢𑀺𑀫𑀦𑀸𑀫𑀁, 𑀦 𑀕𑀼𑀡𑀦𑀸𑀫𑀁 𑀯𑀸. 𑀢𑀢𑁆𑀣 ‘‘𑀓𑀡𑁆𑀳𑀸𑀬𑀦𑁄’’𑀢𑀺 𑀦𑀺𑀭𑀼𑀴𑁆𑀳𑀸 𑀬𑀸 𑀦𑀸𑀫𑀧𑀡𑁆𑀡𑀢𑁆𑀢𑀺, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀡𑁆𑀡𑀢𑁆𑀢𑀺𑀯𑀲𑁂𑀦 𑀦𑀸𑀫𑀦𑁆𑀢𑀺. 𑀢𑀁 𑀧𑀦 𑀓𑀡𑁆𑀳𑀇𑀲𑀺𑀢𑁄 𑀧𑀝𑁆𑀞𑀸𑀬 𑀢𑀲𑁆𑀫𑀺𑀁 𑀓𑀼𑀮𑀧𑀭𑀫𑁆𑀧𑀭𑀸𑀯𑀲𑁂𑀦 𑀆𑀕𑀢𑀁, 𑀦 𑀏𑀢𑀲𑁆𑀫𑀺𑀁𑀬𑁂𑀯 𑀦𑀺𑀭𑀼𑀴𑁆𑀳𑀁, 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀯𑁂𑀡𑀻𑀯𑀲𑁂𑀦 𑀕𑁄𑀢𑁆𑀢’’𑀦𑁆𑀢𑀺. 𑀕𑁄𑀢𑁆𑀢-𑀧𑀤𑀲𑁆𑀲 𑀧𑀦 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀅𑀦𑀼𑀲𑁆𑀲𑀭𑀢𑁄𑀢𑀺 𑀏𑀢𑁆𑀣 𑀦 𑀓𑁂𑀯𑀮𑀁 𑀅𑀦𑀼𑀲𑁆𑀲𑀭𑀡𑀁 𑀅𑀥𑀺𑀧𑁆𑀧𑁂𑀢𑀁, 𑀅𑀣 𑀔𑁄 𑀓𑀼𑀮𑀲𑀼𑀤𑁆𑀥𑀺𑀯𑀻𑀫𑀁𑀲𑀦𑀯𑀲𑁂𑀦𑀸𑀢𑀺 𑀆𑀳 ‘‘𑀓𑀼𑀮𑀓𑁄𑀝𑀺𑀁 𑀲𑁄𑀥𑁂𑀦𑁆𑀢𑀲𑁆𑀲𑀸’’𑀢𑀺. 𑀅𑀬𑁆𑀬𑀧𑀼𑀢𑁆𑀢𑀸𑀢𑀺 𑀅𑀬𑁆𑀬𑀺𑀓𑀧𑀼𑀢𑁆𑀢𑀸𑀢𑀺 𑀆𑀳 ‘‘𑀲𑀸𑀫𑀺𑀦𑁄 𑀧𑀼𑀢𑁆𑀢𑀸’’𑀢𑀺. 𑀤𑀺𑀲𑀸 𑀑𑀓𑁆𑀓𑀸𑀓𑀭𑀜𑁆𑀜𑁄 𑀅𑀦𑁆𑀢𑁄𑀚𑀸𑀢𑀸 𑀤𑀸𑀲𑀻𑀢𑀺 𑀆𑀳 ‘‘𑀖𑀭𑀤𑀸𑀲𑀺𑀬𑀸 𑀧𑀼𑀢𑁆𑀢𑁄’’𑀢𑀺. 𑀏𑀢𑁆𑀣 𑀘 𑀬𑀲𑁆𑀫𑀸 𑀅𑀫𑁆𑀩𑀝𑁆𑀞𑁄 𑀚𑀸𑀢𑀺𑀁 𑀦𑀺𑀲𑁆𑀲𑀸𑀬 𑀫𑀸𑀦𑀢𑁆𑀣𑀤𑁆𑀥𑁄, 𑀦 𑀘𑀲𑁆𑀲 𑀬𑀸𑀣𑀸𑀯𑀢𑁄 𑀚𑀸𑀢𑀺𑀬𑀸 𑀅𑀯𑀺𑀪𑀸𑀯𑀺𑀢𑀸𑀬 𑀫𑀸𑀦𑀦𑀺𑀕𑁆𑀕𑀳𑁄 𑀳𑁄𑀢𑀺, 𑀫𑀸𑀦𑀦𑀺𑀕𑁆𑀕𑀳𑁂 𑀘 𑀓𑀢𑁂 𑀅𑀧𑀭𑀪𑀸𑀕𑁂 𑀭𑀢𑀦𑀢𑁆𑀢𑀬𑁂 𑀧𑀲𑀻𑀤𑀺𑀲𑁆𑀲𑀢𑀺 ¶ , 𑀦 ‘‘𑀤𑀸𑀲𑀻’’𑀢𑀺 𑀯𑀸𑀘𑀸 𑀨𑀭𑀼𑀲𑀯𑀸𑀘𑀸 𑀦𑀸𑀫 𑀳𑁄𑀢𑀺 𑀘𑀺𑀢𑁆𑀢𑀲𑁆𑀲 𑀲𑀡𑁆𑀳𑀪𑀸𑀯𑀢𑁄. 𑀅𑀪𑀬𑀲𑀼𑀢𑁆𑀢𑀜𑁆𑀘𑁂𑀢𑁆𑀣 (𑀫. 𑀦𑀺. 𑁨.𑁮𑁩; 𑀅. 𑀦𑀺. 𑁪.𑁧𑁮𑁪) 𑀦𑀺𑀤𑀲𑁆𑀲𑀦𑀁. 𑀓𑁂𑀘𑀺 𑀘 𑀲𑀢𑁆𑀢𑀸 𑀅𑀕𑁆𑀕𑀺𑀦𑀸 𑀯𑀺𑀬 𑀮𑁄𑀳𑀸𑀤𑀬𑁄 𑀓𑀓𑁆𑀔𑀴𑀸𑀬 𑀯𑀸𑀘𑀸𑀬 𑀫𑀼𑀤𑀼𑀪𑀸𑀯𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀪𑀕𑀯𑀸 𑀅𑀫𑁆𑀩𑀝𑁆𑀞𑀁 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀸𑀢𑀼𑀓𑀸𑀫𑁄 ‘‘𑀅𑀬𑁆𑀬𑀧𑀼𑀢𑁆𑀢𑀸 𑀲𑀓𑁆𑀬𑀸 𑀪𑀯𑀦𑁆𑀢𑀺, 𑀤𑀸𑀲𑀺𑀧𑀼𑀢𑁆𑀢𑁄 𑀢𑁆𑀯𑀫𑀲𑀺 𑀲𑀓𑁆𑀬𑀸𑀦’’𑀦𑁆𑀢𑀺 𑀅𑀯𑁄𑀘.

𑀞𑀧𑁂𑀦𑁆𑀢𑀻𑀢𑀺 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂𑀦𑀸𑀳 ‘‘𑀑𑀓𑁆𑀓𑀸𑀓𑁄’’𑀢𑀺𑀆𑀤𑀺. 𑀧𑀪𑀸 𑀦𑀺𑀘𑁆𑀙𑀭𑀢𑀺 𑀤𑀦𑁆𑀢𑀸𑀦𑀁 𑀅𑀢𑀺𑀯𑀺𑀬 𑀧𑀪𑀲𑁆𑀲𑀭𑀪𑀸𑀯𑀢𑁄.

𑀧𑀞𑀫𑀓𑀧𑁆𑀧𑀺𑀓𑀸𑀦𑀦𑁆𑀢𑀺 𑀧𑀞𑀫𑀓𑀧𑁆𑀧𑀲𑁆𑀲 𑀆𑀤𑀺𑀓𑀸𑀮𑁂 𑀦𑀺𑀩𑁆𑀩𑀢𑁆𑀢𑀸𑀦𑀁. 𑀓𑀺𑀭-𑀲𑀤𑁆𑀤𑁄 𑀅𑀦𑀼𑀲𑁆𑀲𑀯𑀢𑁆𑀣𑁂, 𑀢𑁂𑀦 𑀬𑁄 𑀯𑀼𑀘𑁆𑀘𑀫𑀸𑀦𑀸𑀬 𑀭𑀸𑀚𑀧𑀭𑀫𑁆𑀧𑀭𑀸𑀬 𑀓𑁂𑀲𑀜𑁆𑀘𑀺 𑀫𑀢𑀺𑀪𑁂𑀤𑁄, 𑀢𑀁 𑀉𑀮𑁆𑀮𑀺𑀗𑁆𑀕𑁂𑀢𑀺. 𑀫𑀳𑀸𑀲𑀫𑁆𑀫𑀢𑀲𑁆𑀲𑀸𑀢𑀺 ‘‘𑀅𑀬𑀁 𑀦𑁄 𑀭𑀸𑀚𑀸’’𑀢𑀺 𑀫𑀳𑀸𑀚𑀦𑁂𑀦 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀞𑀧𑀺𑀢𑀢𑁆𑀢𑀸 ‘‘𑀫𑀳𑀸𑀲𑀫𑁆𑀫𑀢𑁄’’𑀢𑀺 𑀏𑀯𑀁 𑀲𑀫𑁆𑀫𑀢𑀲𑁆𑀲. 𑀬𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺 𑁋

‘‘𑀆𑀤𑀺𑀘𑁆𑀘𑀓𑀼𑀮𑀲𑀫𑁆𑀪𑀽𑀢𑁄 ¶ ¶ , 𑀲𑀼𑀯𑀺𑀲𑀼𑀤𑁆𑀥𑀕𑀼𑀡𑀸𑀓𑀭𑁄;

𑀫𑀳𑀸𑀦𑀼𑀪𑀸𑀯𑁄 𑀭𑀸𑀚𑀸𑀲𑀺, 𑀫𑀳𑀸𑀲𑀫𑁆𑀫𑀢𑀦𑀸𑀫𑀓𑁄.

𑀬𑁄 𑀘𑀓𑁆𑀔𑀼𑀪𑀽𑀢𑁄 𑀮𑁄𑀓𑀲𑁆𑀲, 𑀕𑀼𑀡𑀭𑀁𑀲𑀺𑀲𑀫𑀼𑀚𑁆𑀚𑀮𑁄;

𑀢𑀫𑁄𑀦𑀼𑀤𑁄 𑀯𑀺𑀭𑁄𑀘𑀺𑀢𑁆𑀣, 𑀤𑀼𑀢𑀺𑀬𑁄 𑀯𑀺𑀬 𑀪𑀸𑀡𑀼𑀫𑀸.

𑀞𑀧𑀺𑀢𑀸 𑀬𑁂𑀦 𑀫𑀭𑀺𑀬𑀸𑀤𑀸, 𑀮𑁄𑀓𑁂 𑀮𑁄𑀓𑀳𑀺𑀢𑁂𑀲𑀺𑀦𑀸;

𑀯𑀯𑀢𑁆𑀣𑀺𑀢𑀸 𑀲𑀓𑁆𑀓𑀼𑀡𑀦𑁆𑀢𑀺, 𑀦 𑀯𑀺𑀮𑀗𑁆𑀖𑀬𑀺𑀢𑀼𑀁 𑀚𑀦𑀸.

𑀬𑀲𑀲𑁆𑀲𑀺𑀦𑀁 𑀢𑁂𑀚𑀲𑁆𑀲𑀺𑀦𑀁, 𑀮𑁄𑀓𑀲𑀻𑀫𑀸𑀦𑀼𑀭𑀓𑁆𑀔𑀓𑀁;

𑀆𑀤𑀺𑀪𑀽𑀢𑀁 𑀫𑀳𑀸𑀯𑀻𑀭𑀁, 𑀓𑀣𑀬𑀦𑁆𑀢𑀺 ‘𑀫𑀦𑀽’𑀢𑀺 𑀬’’𑀦𑁆𑀢𑀺.

𑀢𑀲𑁆𑀲 𑀘 𑀧𑀼𑀢𑁆𑀢𑀧𑀧𑀼𑀢𑁆𑀢𑀧𑀭𑀫𑁆𑀧𑀭𑀁 𑀲𑀦𑁆𑀥𑀸𑀬 𑁋

‘‘𑀢𑀲𑁆𑀲 𑀧𑀼𑀢𑁆𑀢𑁄 𑀫𑀳𑀸𑀢𑁂𑀚𑁄, 𑀭𑁄𑀚𑁄 𑀦𑀸𑀫 𑀫𑀳𑀻𑀧𑀢𑀺;

𑀢𑀲𑁆𑀲 𑀧𑀼𑀢𑁆𑀢𑁄 𑀯𑀭𑀭𑁄𑀚𑁄, 𑀧𑀯𑀭𑁄 𑀭𑀸𑀚𑀫𑀡𑁆𑀟𑀮𑁂.

𑀢𑀲𑁆𑀲𑀸𑀲𑀺 ¶ 𑀓𑀮𑁆𑀬𑀸𑀡𑀕𑀼𑀡𑁄, 𑀓𑀮𑁆𑀬𑀸𑀡𑁄 𑀦𑀸𑀫 𑀅𑀢𑁆𑀭𑀚𑁄;

𑀭𑀸𑀚𑀸 𑀢𑀲𑁆𑀲𑀸𑀲𑀺 𑀢𑀦𑀬𑁄, 𑀯𑀭𑀓𑀮𑁆𑀬𑀸𑀡𑀦𑀸𑀫𑀓𑁄.

𑀢𑀲𑁆𑀲 𑀧𑀼𑀢𑁆𑀢𑁄 𑀫𑀳𑀸𑀯𑀻𑀭𑁄, 𑀫𑀦𑁆𑀥𑀸𑀢𑀸 𑀓𑀸𑀫𑀪𑁄𑀕𑀺𑀦𑀁;

𑀅𑀕𑁆𑀕𑀪𑀽𑀢𑁄 𑀫𑀳𑀺𑀦𑁆𑀤𑁂𑀦, 𑀅𑀟𑁆𑀠𑀭𑀚𑁆𑀚𑁂𑀦 𑀧𑀽𑀚𑀺𑀢𑁄.

𑀢𑀲𑁆𑀲 𑀲𑀽𑀦𑀼 𑀫𑀳𑀸𑀢𑁂𑀚𑁄, 𑀯𑀭𑀫𑀦𑁆𑀥𑀸𑀢𑀼𑀦𑀸𑀫𑀓𑁄;

‘𑀉𑀧𑁄𑀲𑀣𑁄’𑀢𑀺 𑀦𑀸𑀫𑁂𑀦, 𑀢𑀲𑁆𑀲 𑀧𑀼𑀢𑁆𑀢𑁄 𑀫𑀳𑀸𑀬𑀲𑁄.

𑀯𑀭𑁄 𑀦𑀸𑀫 𑀫𑀳𑀸𑀢𑁂𑀚𑁄, 𑀢𑀲𑁆𑀲 𑀧𑀼𑀢𑁆𑀢𑁄 𑀫𑀳𑀸𑀯𑀭𑁄;

𑀢𑀲𑁆𑀲𑀸𑀲𑀺 𑀉𑀧𑀯𑀭𑁄𑀢𑀺, 𑀧𑀼𑀢𑁆𑀢𑁄 𑀭𑀸𑀚𑀸 𑀫𑀳𑀸𑀩𑀮𑁄.

𑀢𑀲𑁆𑀲 ¶ 𑀧𑀼𑀢𑁆𑀢𑁄 𑀫𑀖𑀤𑁂𑀯𑁄, 𑀤𑁂𑀯𑀢𑀼𑀮𑁆𑀬𑁄 𑀫𑀳𑀻𑀧𑀢𑀺;

𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀢𑀲𑁆𑀲 𑀧𑀼𑀢𑁆𑀢𑀧𑀭𑀫𑁆𑀧𑀭𑀸.

𑀢𑁂𑀲𑀁 𑀧𑀘𑁆𑀙𑀺𑀫𑀓𑁄 𑀭𑀸𑀚𑀸, ‘𑀑𑀓𑁆𑀓𑀸𑀓𑁄’ 𑀇𑀢𑀺 𑀯𑀺𑀲𑁆𑀲𑀼𑀢𑁄;

𑀫𑀳𑀸𑀬𑀲𑁄 𑀫𑀳𑀸𑀢𑁂𑀚𑁄, 𑀅𑀔𑀼𑀤𑁆𑀤𑁄 𑀭𑀸𑀚𑀫𑀡𑁆𑀟𑀮𑁂’’𑀢𑀺.

𑀆𑀤𑀺 𑀢𑁂𑀲𑀁 𑀧𑀘𑁆𑀙𑀢𑁄𑀢𑀺 𑀢𑁂𑀲𑀁 𑀫𑀖𑀤𑁂𑀯 𑀧𑀭𑀫𑁆𑀧𑀭𑀪𑀽𑀢𑀸𑀦𑀁 𑀓𑀴𑀸𑀭𑀚𑀦𑀓𑀧𑀭𑀺𑀬𑁄𑀲𑀸𑀦𑀸𑀦𑀁 𑀅𑀦𑁂𑀓𑀲𑀢𑀲𑀳𑀲𑁆𑀲𑀸𑀦𑀁 𑀭𑀸𑀚𑀽𑀦𑀁 𑀅𑀧𑀭𑀪𑀸𑀕𑁂 𑀑𑀓𑁆𑀓𑀸𑀓𑁄 𑀦𑀸𑀫 ¶ 𑀭𑀸𑀚𑀸 𑀅𑀳𑁄𑀲𑀺, 𑀢𑀲𑁆𑀲 𑀧𑀭𑀫𑁆𑀧𑀭𑀸𑀪𑀽𑀢𑀸𑀦𑀁 𑀅𑀦𑁂𑀓𑀲𑀢𑀲𑀳𑀲𑁆𑀲𑀸𑀦𑀁 𑀭𑀸𑀚𑀽𑀦𑀁 𑀅𑀧𑀭𑀪𑀸𑀕𑁂 𑀅𑀧𑀭𑁄 𑀑𑀓𑁆𑀓𑀸𑀓𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺, 𑀢𑀲𑁆𑀲 𑀧𑀭𑀫𑁆𑀧𑀭𑀪𑀽𑀢𑀸𑀦𑀁 𑀅𑀦𑁂𑀓𑀲𑀢𑀲𑀳𑀲𑁆𑀲𑀸𑀦𑀁 𑀭𑀸𑀚𑀽𑀦𑀁 𑀅𑀧𑀭𑀪𑀸𑀕𑁂 𑀧𑀼𑀦𑀸𑀧𑀭𑁄 𑀑𑀓𑁆𑀓𑀸𑀓𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀬𑁄 𑀑𑀓𑁆𑀓𑀸𑀓𑀯𑀁𑀲𑀸 𑀅𑀳𑁂𑀲𑀼𑀁. 𑀢𑁂𑀲𑀼 𑀢𑀢𑀺𑀬𑀑𑀓𑁆𑀓𑀸𑀓𑀲𑁆𑀲𑀸’’𑀢𑀺𑀆𑀤𑀺.

𑀲𑀳𑀲𑀸 𑀯𑀭𑀁 𑀅𑀤𑀸𑀲𑀺𑀦𑁆𑀢𑀺 𑀧𑀼𑀢𑁆𑀢𑀤𑀲𑁆𑀲𑀦𑁂𑀦 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀲𑀳𑀲𑀸 𑀅𑀯𑀻𑀫𑀁𑀲𑀺𑀢𑁆𑀯𑀸 𑀢𑀼𑀝𑁆𑀞𑀺𑀬𑀸 𑀯𑀲𑁂𑀦 𑀯𑀭𑀁 𑀅𑀤𑀸𑀲𑀺𑀁, ‘‘𑀬𑀁 𑀇𑀘𑁆𑀙𑀲𑀺, 𑀢𑀁 𑀕𑀡𑁆𑀳𑀸’’𑀢𑀺. 𑀭𑀚𑁆𑀚𑀁 𑀧𑀭𑀺𑀡𑀸𑀫𑁂𑀢𑀼𑀁 𑀇𑀘𑁆𑀙𑀢𑀻𑀢𑀺 𑀲𑀸 𑀚𑀦𑁆𑀢𑀼𑀓𑀼𑀫𑀸𑀭𑀲𑁆𑀲 𑀫𑀸𑀢𑀸 𑀫𑀫 𑀢𑀁 𑀯𑀭𑀤𑀸𑀦𑀁 𑀅𑀦𑁆𑀢𑀭𑀁 𑀓𑀢𑁆𑀯𑀸 𑀇𑀫𑀁 𑀭𑀚𑁆𑀚𑀁 𑀧𑀭𑀺𑀡𑀸𑀫𑁂𑀢𑀼𑀁 𑀇𑀘𑁆𑀙𑀢𑀻𑀢𑀺.

𑀦𑀧𑁆𑀧𑀲𑀳𑁂𑀬𑁆𑀬𑀸𑀢𑀺 ¶ 𑀦 𑀧𑀭𑀺𑀬𑀢𑁆𑀢𑁄 𑀪𑀯𑁂𑀬𑁆𑀬.

𑀦𑀺𑀓𑁆𑀔𑀫𑁆𑀫𑀸𑀢𑀺 𑀖𑀭𑀸𑀯𑀸𑀲𑀢𑁄, 𑀓𑀸𑀫𑁂𑀳𑀺 𑀘 𑀦𑀺𑀓𑁆𑀔𑀫𑀺𑀢𑁆𑀯𑀸. 𑀳𑁂𑀝𑁆𑀞𑀸 𑀘𑀸𑀢𑀺 𑀘-𑀲𑀤𑁆𑀤𑁂𑀦 ‘‘𑀅𑀲𑀻𑀢𑀺𑀳𑀢𑁆𑀣𑁂’’𑀢𑀺 𑀇𑀤𑀁 𑀅𑀦𑀼𑀓𑀟𑁆𑀠𑀢𑀺. 𑀢𑁂𑀳𑀻𑀢𑀺 𑀫𑀺𑀕𑀲𑀽𑀓𑀭𑁂𑀳𑀺, 𑀫𑀡𑁆𑀟𑀽𑀓𑀫𑀽𑀲𑀺𑀓𑁂𑀳𑀺 𑀘. 𑀢𑁂𑀢𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀬𑁄, 𑀲𑀧𑁆𑀧𑀩𑀺𑀴𑀸𑀭𑀸 𑀘.

𑀅𑀯𑀲𑁂𑀲𑀸𑀳𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀦𑀺𑀝𑁆𑀞𑀸𑀳𑀺.

𑀯𑀟𑁆𑀠𑀫𑀸𑀦𑀸𑀦𑀦𑁆𑀢𑀺 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁. 𑀓𑀼𑀝𑁆𑀞𑀭𑁄𑀕𑁄 𑀦𑀸𑀫 𑀲𑀸𑀲𑀫𑀲𑀽𑀭𑀻𑀭𑁄𑀕𑀸 𑀯𑀺𑀬 𑀬𑁂𑀪𑀼𑀬𑁆𑀬𑁂𑀦 𑀲𑀗𑁆𑀓𑀫𑀦𑀲𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀬𑀁 𑀭𑁄𑀕𑁄 𑀲𑀗𑁆𑀓𑀫𑀢𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸’’𑀢𑀺.

𑀫𑀺𑀕𑀲𑀽𑀓𑀭𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑀦𑀘𑀭𑀲𑁄𑀡𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺.

𑀢𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀔𑀢𑁆𑀢𑀺𑀬𑀫𑀸𑀬𑀸𑀭𑁄𑀘𑀦𑁂𑀦 𑀅𑀢𑁆𑀢𑀦𑁄 𑀔𑀢𑁆𑀢𑀺𑀬𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸.

𑀦𑀕𑀭𑀁 ¶ 𑀫𑀸𑀧𑁂𑀳𑀻𑀢𑀺 𑀲𑀸𑀳𑀸𑀭𑀁 𑀦𑀕𑀭𑀁 𑀫𑀸𑀧𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑁂𑀲𑀕𑁆𑀕𑀳𑀡𑀦𑁆𑀢𑀺 𑀓𑁂𑀲𑀯𑁂𑀡𑀺𑀩𑀦𑁆𑀥𑀦𑀁. 𑀤𑀼𑀲𑁆𑀲𑀕𑁆𑀕𑀳𑀡𑀦𑁆𑀢𑀺 𑀯𑀢𑁆𑀣𑀲𑁆𑀲 𑀦𑀺𑀯𑀸𑀲𑀦𑀸𑀓𑀸𑀭𑁄.

𑁨𑁬𑁮. 𑀅𑀢𑁆𑀢𑀦𑁄 𑀉𑀧𑀸𑀭𑀫𑁆𑀪𑀫𑁄𑀘𑀦𑀢𑁆𑀣𑀸𑀬𑀸𑀢𑀺 𑀆𑀘𑀭𑀺𑀬𑁂𑀦 𑀅𑀫𑁆𑀩𑀝𑁆𑀞𑁂𑀦 𑀘 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀉𑀧𑀭𑀺 𑀧𑀸𑀧𑁂𑀢𑀩𑁆𑀩𑀉𑀧𑀯𑀸𑀤𑀲𑁆𑀲 𑀅𑀧𑀦𑀬𑀦𑀢𑁆𑀣𑀁. 𑀅𑀲𑁆𑀫𑀺𑀁 𑀯𑀘𑀦𑁂𑀢𑀺 ‘‘𑀘𑀢𑁆𑀢𑀸𑀭𑁄𑀫𑁂 𑀪𑁄 𑀕𑁄𑀢𑀫 𑀯𑀡𑁆𑀡𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑀸 𑀯𑀼𑀢𑁆𑀢𑁂, 𑀪𑁄𑀢𑀸 𑀘 𑀕𑁄𑀢𑀫𑁂𑀦 𑀯𑀼𑀢𑁆𑀢𑁂 ‘‘𑀚𑀸𑀢𑀺𑀯𑀸𑀤𑁂’’𑀢𑀺 𑀇𑀫𑀲𑁆𑀫𑀺𑀁 𑀬𑀣𑀸𑀥𑀺𑀓𑀢𑁂 𑀯𑀘𑀦𑁂. 𑀢𑀢𑁆𑀣 𑀧𑀦 𑀬𑀲𑁆𑀫𑀸 𑀯𑁂𑀤𑁂 𑀯𑀼𑀢𑁆𑀢𑀯𑀺𑀥𑀺𑀦𑀸𑀯 𑀢𑁂𑀦 𑀧𑀝𑀺𑀫𑀦𑁆𑀢𑁂𑀢𑀩𑁆𑀩𑀁 𑀳𑁄𑀢𑀺 ¶ , 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀯𑁂𑀤𑀢𑁆𑀢𑀬𑀯𑀘𑀦𑁂’’𑀢𑀺, ‘‘𑀏𑀢𑀲𑁆𑀫𑀺𑀁 𑀯𑀸 𑀤𑀸𑀲𑀺𑀧𑀼𑀢𑁆𑀢𑀯𑀘𑀦𑁂’’𑀢𑀺 𑀘.

𑁨𑁭𑁦. 𑀥𑀫𑁆𑀫𑁄 𑀦𑀸𑀫 𑀓𑀸𑀭𑀡𑀁 ‘‘𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁭𑁧𑁮) 𑀯𑀺𑀬, 𑀲𑀳 𑀥𑀫𑁆𑀫𑁂𑀦𑀸𑀢𑀺 𑀲𑀳𑀥𑀫𑁆𑀫𑁄, 𑀲𑀳𑀥𑀫𑁆𑀫𑁄 ¶ 𑀏𑀯 𑀲𑀳𑀥𑀫𑁆𑀫𑀺𑀓𑁄𑀢𑀺 𑀆𑀳 ‘‘𑀲𑀳𑁂𑀢𑀼𑀓𑁄’’𑀢𑀺.

𑁨𑁭𑁧. 𑀢𑀲𑁆𑀫𑀸 𑀢𑀤𑀸 𑀧𑀝𑀺𑀜𑁆𑀜𑀸𑀢𑀢𑁆𑀢𑀸. 𑀢𑀸𑀲𑁂𑀢𑁆𑀯𑀸 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑁆𑀲𑀸𑀫𑀻𑀢𑀺 𑀆𑀕𑀢𑁄 𑀬𑀣𑀸 𑀢𑀁 𑀲𑀘𑁆𑀘𑀓𑀲𑀫𑀸𑀕𑀫𑁂. ‘‘𑀪𑀕𑀯𑀸 𑀘𑁂𑀯 𑀧𑀲𑁆𑀲𑀢𑀺 𑀅𑀫𑁆𑀩𑀝𑁆𑀞𑁄 𑀘𑀸’’𑀢𑀺 𑀏𑀢𑁆𑀣 𑀇𑀢𑀭𑁂𑀲𑀁 𑀅𑀤𑀲𑁆𑀲𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀤𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀯𑀸𑀳𑁂𑀢𑁆𑀯𑀸𑀢𑀺 𑀫𑀦𑁆𑀢𑀩𑀮𑁂𑀦 𑀆𑀦𑁂𑀢𑁆𑀯𑀸. 𑀢𑀲𑁆𑀲𑀸𑀢𑀺 𑀅𑀫𑁆𑀩𑀝𑁆𑀞𑀲𑁆𑀲. 𑀯𑀸𑀤𑀲𑀗𑁆𑀖𑀝𑁆𑀝𑁂𑀢𑀺 𑀯𑀸𑀘𑀸𑀲𑀗𑁆𑀖𑀝𑁆𑀝𑁂.

𑁨𑁭𑁨. 𑀢𑀸𑀡𑀦𑁆𑀢𑀺 𑀕𑀯𑁂𑀲𑀫𑀸𑀦𑁄𑀢𑀺, ‘‘𑀅𑀬𑀫𑁂𑀯 𑀲𑀫𑀡𑁄 𑀕𑁄𑀢𑀫𑁄 𑀇𑀢𑁄 𑀪𑀬𑀢𑁄 𑀫𑀫 𑀢𑀸𑀬𑀓𑁄’’𑀢𑀺 𑀪𑀕𑀯𑀦𑁆𑀢𑀁𑀬𑁂𑀯 ‘‘𑀢𑀸𑀡’’𑀦𑁆𑀢𑀺 𑀧𑀭𑀺𑀬𑁂𑀲𑀦𑁆𑀢𑁄 𑀉𑀧𑀕𑀘𑁆𑀙𑀦𑁆𑀢𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀸𑀬𑀢𑀻𑀢𑀺 𑀬𑀣𑀸𑀉𑀧𑀝𑁆𑀞𑀺𑀢𑀪𑀬𑀢𑁄 𑀧𑀸𑀮𑁂𑀢𑀺, 𑀢𑁂𑀦𑀸𑀳 ‘‘𑀭𑀓𑁆𑀔𑀢𑀻’’𑀢𑀺, 𑀏𑀢𑁂𑀦 𑀢𑀸𑀡-𑀲𑀤𑁆𑀤𑀲𑁆𑀲 𑀓𑀢𑁆𑀢𑀼𑀲𑀸𑀥𑀦𑀢𑀫𑀸𑀳. 𑀬𑀣𑀼𑀧𑀝𑁆𑀞𑀺𑀢𑁂𑀦 𑀪𑀬𑁂𑀦 𑀉𑀧𑀤𑁆𑀤𑀼𑀢𑁄 𑀦𑀺𑀮𑀻𑀬𑀢𑀺 𑀏𑀢𑁆𑀣𑀸𑀢𑀺 𑀮𑁂𑀡𑀁, 𑀉𑀧𑀮𑀬𑀦𑀁, 𑀏𑀢𑁂𑀦 𑀮𑁂𑀡-𑀲𑀤𑁆𑀤𑀲𑁆𑀲 𑀅𑀥𑀺𑀓𑀭𑀡𑀲𑀸𑀥𑀦𑀢𑀫𑀸𑀳. ‘‘𑀲𑀭𑀢𑀻’’𑀢𑀺 𑀏𑀢𑁂𑀦 𑀲𑀭𑀡-𑀲𑀤𑁆𑀤𑀲𑁆𑀲 𑀓𑀢𑁆𑀢𑀼𑀲𑀸𑀥𑀦𑀢𑀫𑀸𑀳.

𑀅𑀫𑁆𑀩𑀝𑁆𑀞𑀯𑀁𑀲𑀓𑀣𑀸𑀯𑀡𑁆𑀡𑀦𑀸

𑁨𑁭𑁪. 𑀕𑀗𑁆𑀕𑀸𑀬 𑀤𑀓𑁆𑀔𑀺𑀡𑀢𑁄𑀢𑀺 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀤𑀓𑁆𑀔𑀺𑀡𑀤𑀺𑀲𑀸𑀬. 𑀆𑀯𑀼𑀥𑀁 𑀦 𑀧𑀭𑀺𑀯𑀢𑁆𑀢𑀢𑀻𑀢𑀺 𑀲𑀭𑀁 𑀯𑀸𑀲𑀢𑁆𑀢𑀺𑀆𑀤𑀺𑀁 𑀯𑀸 𑀧𑀭𑀲𑁆𑀲 𑀉𑀧𑀭𑀺 𑀔𑀺𑀧𑀺𑀢𑀼𑀓𑀸𑀫𑀲𑁆𑀲 𑀳𑀢𑁆𑀣𑀁 𑀦 𑀧𑀭𑀺𑀯𑀢𑁆𑀢𑀢𑀺, 𑀳𑀢𑁆𑀣𑁂 𑀧𑀦 𑀅𑀧𑀭𑀺𑀯𑀢𑁆𑀢𑁂𑀦𑁆𑀢𑁂 𑀓𑀼𑀢𑁄 𑀆𑀯𑀼𑀥𑀧𑀭𑀺𑀯𑀢𑁆𑀢𑀦𑀦𑁆𑀢𑀺 𑀆𑀳 ‘‘𑀆𑀯𑀼𑀥𑀁 𑀦 𑀧𑀭𑀺𑀯𑀢𑁆𑀢𑀢𑀻’’𑀢𑀺. 𑀲𑁄 𑀓𑀺𑀭 ‘‘𑀓𑀣𑀁 𑀦𑀸𑀫𑀸𑀳𑀁 𑀤𑀺𑀲𑀸𑀬 𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀢𑀁 𑀳𑀻𑀦𑀁 𑀚𑀸𑀢𑀺𑀁 𑀚𑀺𑀕𑀼𑀘𑁆𑀙𑀦𑁆𑀢𑁄 ‘‘𑀳𑀦𑁆𑀤𑀸𑀳𑀁 𑀬𑀣𑀸 𑀢𑀣𑀸 ¶ 𑀇𑀫𑀁 𑀚𑀸𑀢𑀺𑀁 𑀲𑁄𑀥𑁂𑀲𑁆𑀲𑀸𑀫𑀻’’𑀢𑀺 𑀦𑀺𑀕𑁆𑀕𑀢𑁄, 𑀢𑁂𑀦𑀸𑀳 ‘‘𑀇𑀤𑀸𑀦𑀺 𑀫𑁂 𑀫𑀦𑁄𑀭𑀣𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺𑀆𑀤𑀺. 𑀯𑀺𑀚𑁆𑀚𑀸𑀩𑀮𑁂𑀦 𑀭𑀸𑀚𑀸𑀦𑀁 𑀢𑀸𑀲𑁂𑀢𑁆𑀯𑀸 𑀢𑀲𑁆𑀲 𑀥𑀻𑀢𑀼𑀬𑀸 𑀮𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑁆𑀬𑀸𑀬𑀁 𑀚𑀸𑀢𑀺𑀲𑁄𑀥𑀺𑀢𑀸 ¶ 𑀪𑀯𑀺𑀲𑁆𑀲𑀢𑀻𑀢𑀺 𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀅𑀫𑁆𑀩𑀝𑁆𑀞𑀁 𑀦𑀸𑀫 𑀯𑀺𑀚𑁆𑀚𑀦𑁆𑀢𑀺 𑀲𑀢𑁆𑀢𑀸𑀦𑀁 𑀲𑀭𑀻𑀭𑁂 𑀅𑀩𑁆𑀪𑀗𑁆𑀕𑀁 𑀞𑀧𑁂𑀢𑀻𑀢𑀺 𑀅𑀫𑁆𑀩𑀝𑁆𑀞𑀸𑀢𑀺 𑀏𑀯𑀁 ¶ 𑀮𑀤𑁆𑀥𑀦𑀸𑀫𑀁 𑀯𑀺𑀚𑁆𑀚𑀁, 𑀫𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀬𑀢𑁄 𑀅𑀫𑁆𑀩𑀝𑁆𑀞𑀸 𑀏𑀢𑀲𑁆𑀫𑀺𑀁 𑀅𑀢𑁆𑀣𑀻𑀢𑀺 𑀅𑀫𑁆𑀩𑀝𑁆𑀞𑁄𑀢𑀺 𑀓𑀡𑁆𑀳𑁄 𑀇𑀲𑀺 𑀧𑀜𑁆𑀜𑀸𑀬𑀺𑀢𑁆𑀣, 𑀢𑀁𑀩𑀁𑀲𑀚𑀸𑀢𑀢𑀸𑀬 𑀅𑀬𑀁 𑀫𑀸𑀡𑀯𑁄 ‘‘𑀅𑀫𑁆𑀩𑀝𑁆𑀞𑁄’’𑀢𑀺 𑀯𑁄𑀳𑀭𑀻𑀬𑀢𑀺.

𑀲𑁂𑀝𑁆𑀞𑀫𑀦𑁆𑀢𑁂 𑀯𑁂𑀤𑀫𑀦𑁆𑀢𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀦𑁆𑀢𑀸𑀦𑀼𑀪𑀸𑀯𑁂𑀦 𑀭𑀜𑁆𑀜𑁄 𑀩𑀸𑀳𑀼𑀓𑁆𑀔𑀫𑁆𑀪𑀫𑀢𑁆𑀢𑀁 𑀚𑀸𑀢𑀁 𑀢𑁂𑀦 𑀧𑀦𑀲𑁆𑀲 𑀩𑀸𑀳𑀼𑀓𑁆𑀔𑀫𑁆𑀪𑁂𑀦 𑀭𑀸𑀚𑀸, ‘‘𑀓𑁄 𑀚𑀸𑀦𑀸𑀢𑀺, 𑀓𑀺𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀪𑀻𑀢𑁄 𑀉𑀲𑁆𑀲𑀗𑁆𑀓𑀻 𑀉𑀢𑁆𑀭𑀸𑀲𑁄 𑀅𑀳𑁄𑀲𑀺, 𑀢𑁂𑀦𑀸𑀳 ‘‘𑀪𑀬𑁂𑀦 𑀯𑁂𑀥𑀫𑀸𑀦𑁄 𑀅𑀝𑁆𑀞𑀸𑀲𑀻’’𑀢𑀺. 𑀲𑁄𑀢𑁆𑀣𑀺 𑀪𑀤𑁆𑀤𑀦𑁆𑀢𑁂𑀢𑀺 𑀆𑀤𑀺𑀯𑀘𑀦𑀁 𑀅𑀯𑁄𑀘𑀼𑀁. ‘‘𑀅𑀬𑀁 𑀫𑀳𑀸𑀦𑀼𑀪𑀸𑀯𑁄 𑀇𑀲𑀻’’𑀢𑀺 𑀫𑀜𑁆𑀜𑀫𑀸𑀦𑀸.

𑀉𑀦𑁆𑀤𑁆𑀭𑀺𑀬𑀺𑀲𑁆𑀲𑀢𑀻𑀢𑀺 𑀯𑀺𑀧𑁆𑀧𑀓𑀺𑀭𑀺𑀬𑀺𑀲𑁆𑀲𑀢𑀺, 𑀢𑁂𑀦𑀸𑀳 ‘‘𑀪𑀺𑀚𑁆𑀚𑀺𑀲𑁆𑀲𑀢𑀻’’𑀢𑀺. 𑀫𑀦𑁆𑀢𑁂 𑀧𑀭𑀺𑀯𑀢𑁆𑀢𑀺𑀢𑁂𑀢𑀺 𑀩𑀸𑀳𑀼𑀓𑁆𑀔𑀫𑁆𑀪𑀓𑀫𑀦𑁆𑀢𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀓𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑁂 𑀫𑀦𑁆𑀢𑁂 ‘‘𑀲𑀭𑁄 𑀑𑀢𑀭𑀢𑀽’’𑀢𑀺 𑀧𑀭𑀺𑀯𑀢𑁆𑀢𑀺𑀢𑁂. 𑀏𑀯𑀭𑀽𑀧𑀸𑀦𑀜𑁆𑀳𑀺 𑀫𑀦𑁆𑀢𑀸𑀦𑀁 𑀏𑀓𑀁𑀲𑁂𑀦𑁂𑀯 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀓𑀯𑀺𑀚𑁆𑀚𑀸 𑀳𑁄𑀦𑁆𑀢𑀺𑀬𑁂𑀯 𑀬𑀣𑀸 𑀢𑀁 𑀓𑀼𑀲𑀼𑀫𑀸𑀭𑀓𑀯𑀺𑀚𑁆𑀚𑀸𑀦𑀁. 𑀅𑀢𑁆𑀢𑀦𑁄 𑀥𑀻𑀢𑀼 𑀅𑀧𑀯𑀸𑀤𑀫𑁄𑀘𑀦𑀢𑁆𑀣𑀁 𑀢𑀲𑁆𑀲 𑀪𑀼𑀚𑀺𑀲𑁆𑀲𑀓𑀭𑀡𑀁. 𑀢𑀲𑁆𑀲𑀸𑀦𑀼𑀭𑀽𑀧𑁂 𑀇𑀲𑁆𑀲𑀭𑀺𑀬𑁂 𑀞𑀧𑀦𑀢𑁆𑀣𑀁 𑀉𑀴𑀸𑀭𑁂 𑀘 𑀦𑀁 𑀞𑀸𑀦𑁂 𑀞𑀧𑁂𑀲𑀺.

𑀔𑀢𑁆𑀢𑀺𑀬𑀲𑁂𑀝𑁆𑀞𑀪𑀸𑀯𑀯𑀡𑁆𑀡𑀦𑀸

𑁨𑁭𑁫. 𑀲𑀫𑀲𑁆𑀲𑀸𑀲𑀦𑀢𑁆𑀣𑀫𑀸𑀳 𑀓𑀭𑀼𑀡𑀸𑀬𑀦𑁆𑀢𑁄, 𑀦 𑀓𑀼𑀮𑀻𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀢𑁂𑀦𑀸𑀳 ‘‘𑀅𑀣 𑀔𑁄 𑀪𑀕𑀯𑀸’’𑀢𑀺𑀆𑀤𑀺. 𑀩𑁆𑀭𑀸𑀳𑁆𑀫𑀡𑁂𑀲𑀽𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀫𑀻𑀧𑁂, 𑀢𑀢𑁄 𑀩𑁆𑀭𑀸𑀳𑁆𑀫𑀡𑁂𑀳𑀺 𑀮𑀤𑁆𑀥𑀩𑁆𑀩𑀁 𑀆𑀲𑀦𑀸𑀤𑀺𑀁 𑀲𑀦𑁆𑀥𑀸𑀬 ‘‘𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀦𑁆𑀢𑀭𑁂’’𑀢𑀺 𑀯𑀼𑀢𑁆𑀢𑀁. 𑀓𑁂𑀯𑀮𑀁 ¶ 𑀲𑀤𑁆𑀥𑀸𑀬 𑀓𑀸𑀢𑀩𑁆𑀩𑀁 𑀲𑀤𑁆𑀥𑀁, 𑀧𑀭𑀮𑁄𑀓𑀕𑀢𑁂 𑀲𑀦𑁆𑀥𑀸𑀬 𑀦 𑀢𑀢𑁄 𑀓𑀺𑀜𑁆𑀘𑀺 𑀅𑀧𑀢𑁆𑀣𑁂𑀦𑁆𑀢𑁂𑀦 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄, 𑀢𑁂𑀦𑀸𑀳 ‘‘𑀫𑀢𑀓𑁂 𑀉𑀤𑁆𑀤𑀺𑀲𑁆𑀲 𑀓𑀢𑀪𑀢𑁆𑀢𑁂’’𑀢𑀺. 𑀫𑀗𑁆𑀕𑀮𑀸𑀤𑀺𑀪𑀢𑁆𑀢𑁂𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀉𑀲𑁆𑀲𑀯𑀤𑁂𑀯𑀢𑀸𑀭𑀸𑀥𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀜𑁆𑀜𑀪𑀢𑁆𑀢𑁂𑀢𑀺 𑀧𑀸𑀧𑀲𑀜𑁆𑀜𑀫𑀸𑀤𑀺𑀯𑀲𑁂𑀦 𑀓𑀢𑀪𑀢𑁆𑀢𑁂. 𑀧𑀸𑀳𑀼𑀦𑀓𑀸𑀦𑀦𑁆𑀢𑀺 𑀅𑀢𑀺𑀣𑀻𑀦𑀁. 𑀔𑀢𑁆𑀢𑀺𑀬𑀪𑀸𑀯𑀁 𑀅𑀧𑁆𑀧𑀢𑁆𑀢𑁄 𑀉𑀪𑀢𑁄 𑀲𑀼𑀚𑀸𑀢𑀢𑀸𑀪𑀸𑀯𑀢𑁄, 𑀢𑁂𑀦𑀸𑀳 ‘‘𑀅𑀧𑀭𑀺𑀲𑀼𑀤𑁆𑀥𑁄𑀢𑀺 𑀅𑀢𑁆𑀣𑁄’’𑀢𑀺.

𑁨𑁭𑁬. 𑀇𑀢𑁆𑀣𑀺𑀁 𑀓𑀭𑀺𑀢𑁆𑀯𑀸𑀢𑀺 𑀏𑀢𑁆𑀣 𑀓𑀭𑀡𑀁 𑀓𑀺𑀭𑀺𑀬𑀸𑀲𑀸𑀫𑀜𑁆𑀜𑀯𑀺𑀲𑀬𑀦𑁆𑀢𑀺 𑀆𑀳 ‘‘𑀇𑀢𑁆𑀣𑀺𑀁 𑀧𑀭𑀺𑀬𑁂𑀲𑀺𑀢𑁆𑀯𑀸’’𑀢𑀺. 𑀩𑁆𑀭𑀸𑀳𑁆𑀫𑀡𑀓𑀜𑁆𑀜𑀁 𑀇𑀢𑁆𑀣𑀺𑀁 𑀔𑀢𑁆𑀢𑀺𑀬𑀓𑀼𑀫𑀸𑀭𑀲𑁆𑀲 𑀪𑀭𑀺𑀬𑀸𑀪𑀽𑀢𑀁 ¶ 𑀕𑀳𑁂𑀢𑁆𑀯𑀸𑀧𑀺 𑀔𑀢𑁆𑀢𑀺𑀬𑀸𑀯 𑀲𑁂𑀝𑁆𑀞𑀸, 𑀳𑀻𑀦𑀸 𑀩𑁆𑀭𑀸𑀳𑁆𑀫𑀡𑀸𑀢𑀺 𑀬𑁄𑀚𑀦𑀸. 𑀧𑀼𑀭𑀺𑀲𑁂𑀦 𑀯𑀸 𑀧𑀼𑀭𑀺𑀲𑀁 𑀓𑀭𑀺𑀢𑁆𑀯𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀧𑀓𑀭𑀡𑁂𑀢𑀺 𑀭𑀸𑀕𑀸𑀤𑀺𑀯𑀲𑁂𑀦 ¶ 𑀧𑀤𑀼𑀝𑁆𑀞𑁂 𑀧𑀓𑁆𑀔𑀮𑀺𑀢𑁂 𑀓𑀸𑀭𑀡𑁂, 𑀢𑁂𑀦𑀸𑀳 ‘‘𑀤𑁄𑀲𑁂’’𑀢𑀺. 𑀪𑀲𑁆𑀲𑀢𑀺 𑀦𑀺𑀭𑀢𑁆𑀣𑀓𑀪𑀸𑀯𑁂𑀦 𑀔𑀺𑀧𑀻𑀬𑀢𑀻𑀢𑀺 𑀪𑀲𑁆𑀲𑀁, 𑀙𑀸𑀭𑀺𑀓𑀸.

𑁨𑁭𑁭. 𑀚𑀦𑀺𑀢𑀲𑁆𑀫𑀺𑀦𑁆𑀢𑀺 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀦𑀺𑀩𑁆𑀩𑀢𑁆𑀢𑁂. 𑀚𑀦𑁂 𑀏𑀢𑀲𑁆𑀫𑀺𑀦𑁆𑀢𑀺 𑀯𑀸 𑀚𑀦𑁂𑀢𑀲𑁆𑀫𑀺𑀁, 𑀫𑀦𑀼𑀲𑁆𑀲𑁂𑀲𑀽𑀢𑀺 𑀅𑀢𑁆𑀣𑁄, 𑀢𑁂𑀦𑀸𑀳 ‘‘𑀕𑁄𑀢𑁆𑀢𑀧𑀝𑀺𑀲𑀸𑀭𑀺𑀦𑁄’’𑀢𑀺. 𑀲𑀁𑀲𑀦𑁆𑀤𑀺𑀢𑁆𑀯𑀸𑀢𑀺 𑀖𑀝𑁂𑀢𑁆𑀯𑀸, 𑀅𑀯𑀺𑀭𑀼𑀤𑁆𑀥𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀧𑀞𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀚𑁆𑀚𑀸𑀘𑀭𑀡𑀓𑀣𑀸𑀯𑀡𑁆𑀡𑀦𑀸

𑁨𑁭𑁮. 𑀇𑀤𑀁 𑀯𑀝𑁆𑀝𑀢𑀻𑀢𑀺 𑀇𑀤𑀁 𑀅𑀚𑁆𑀛𑁂𑀦𑀸𑀤𑀺 𑀓𑀢𑁆𑀢𑀼𑀁 𑀮𑀩𑁆𑀪𑀢𑀺. 𑀚𑀸𑀢𑀺𑀯𑀸𑀤𑀯𑀺𑀦𑀺𑀩𑀤𑁆𑀥𑀸𑀢𑀺 𑀚𑀸𑀢𑀺𑀲𑀦𑁆𑀦𑀺𑀲𑁆𑀲𑀺𑀢𑀯𑀸𑀤𑁂 𑀯𑀺𑀦𑀺𑀩𑀤𑁆𑀥𑀸. 𑀩𑁆𑀭𑀸𑀳𑁆𑀫𑀡𑀲𑁆𑀲𑁂𑀯 𑀅𑀚𑁆𑀛𑁂𑀦𑀚𑁆𑀛𑀸𑀧𑀦𑀬𑀚𑀦𑀬𑀸𑀚𑀦𑀸𑀤𑀬𑁄𑀢𑀺 ¶ 𑀏𑀯𑀁 𑀬𑁂 𑀅𑀢𑁆𑀢𑀼𑀓𑁆𑀓𑀁𑀲𑀦𑀧𑀭𑀯𑀫𑁆𑀪𑀦𑀯𑀲𑁂𑀦 𑀧𑀯𑀢𑁆𑀢𑀸, 𑀢𑀢𑁄 𑀏𑀯 𑀢𑁂 𑀫𑀸𑀦𑀯𑀸𑀤𑀧𑀝𑀺𑀩𑀤𑁆𑀥𑀸 𑀘 𑀳𑁄𑀦𑁆𑀢𑀺. 𑀬𑁂 𑀧𑀦 𑀆𑀯𑀸𑀳𑀯𑀺𑀯𑀸𑀳𑀯𑀺𑀦𑀺𑀩𑀤𑁆𑀥𑀸, 𑀢𑁂 𑀏𑀯 𑀲𑀫𑁆𑀩𑀦𑁆𑀥𑀢𑁆𑀢𑀬𑀯𑀲𑁂𑀦 ‘‘𑀅𑀭𑀳𑀲𑀺 𑀯𑀸 𑀫𑀁 𑀢𑁆𑀯𑀁, 𑀦 𑀯𑀸 𑀫𑀁 𑀢𑁆𑀯𑀁 𑀅𑀭𑀳𑀲𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀦𑀓𑀸.

𑀬𑀢𑁆𑀣𑀸𑀢𑀺 𑀬𑀲𑁆𑀲𑀁 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀢𑁆𑀢𑀺𑀬𑀁. 𑀮𑀕𑁆𑀕𑀺𑀲𑁆𑀲𑀸𑀫𑀸𑀢𑀺 𑀑𑀮𑀕𑁆𑀕𑀸 𑀅𑀦𑁆𑀢𑁄𑀕𑀥𑀸 𑀪𑀯𑀺𑀲𑁆𑀲𑀸𑀫𑀸𑀢𑀺 𑀘𑀺𑀦𑁆𑀢𑀬𑀺𑀫𑁆𑀳. 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀸𑀘𑀭𑀡𑀸𑀦𑀺𑀬𑁂𑀯 ‘‘𑀯𑀺𑀚𑁆𑀚𑀸𑀘𑀭𑀡𑀸𑀦𑀻’’𑀢𑀺 𑀕𑀳𑁂𑀢𑁆𑀯𑀸 𑀞𑀺𑀢𑁄 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀸𑀘𑀭𑀡𑁂𑀲𑀼 𑀯𑀺𑀪𑀚𑀺𑀬𑀫𑀸𑀦𑁂𑀲𑀼 𑀲𑁄 𑀢𑀢𑁄 𑀤𑀽𑀭𑀢𑁄 𑀅𑀧𑀦𑀻𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀤𑀽𑀭𑀫𑁂𑀯 𑀅𑀯𑀓𑁆𑀔𑀺𑀧𑀻’’𑀢𑀺. 𑀲𑀫𑀼𑀤𑀸𑀕𑀫𑀢𑁄 𑀧𑀪𑀼𑀢𑀻𑀢𑀺𑀆𑀤𑀺𑀲𑀫𑀼𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬.

𑁨𑁭𑁯. 𑀢𑀺𑀯𑀺𑀥𑀁 𑀲𑀻𑀮𑀦𑁆𑀢𑀺 𑀔𑀼𑀤𑁆𑀤𑀓𑀸𑀤𑀺𑀪𑁂𑀤𑀁 𑀢𑀺𑀯𑀺𑀥𑀁 𑀲𑀻𑀮𑀁. 𑀲𑀻𑀮𑀯𑀲𑁂𑀦𑁂𑀯𑀸𑀢𑀺 𑀲𑀻𑀮𑀧𑀭𑀺𑀬𑀸𑀬𑁂𑀦𑁂𑀯. 𑀓𑀺𑀜𑁆𑀘𑀺 𑀓𑀺𑀜𑁆𑀘𑀻𑀢𑀺 𑀅𑀳𑀺𑀁𑀲𑀦𑀸𑀤𑀺𑀬𑀫𑀦𑀺𑀬𑀫𑀮𑀓𑁆𑀔𑀡𑀁 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀲𑀻𑀮𑀁 𑀅𑀢𑁆𑀣𑀺. 𑀢𑀢𑁆𑀣 𑀢𑀢𑁆𑀣𑁂𑀯 𑀮𑀕𑁆𑀕𑁂𑀬𑁆𑀬𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁𑀬𑁂𑀯 𑀩𑁆𑀭𑀸𑀳𑁆𑀫𑀡𑀲𑀫𑀬𑀲𑀺𑀤𑁆𑀥𑁂 𑀲𑀻𑀮𑀫𑀢𑁆𑀢𑁂 ‘‘𑀘𑀭𑀡’’𑀦𑁆𑀢𑀺 𑀮𑀕𑁆𑀕𑁂𑀬𑁆𑀬. 𑀅𑀝𑁆𑀞𑀧𑀺 𑀲𑀫𑀸𑀧𑀢𑁆𑀢𑀺𑀬𑁄 𑀘𑀭𑀡𑀦𑁆𑀢𑀺 𑀦𑀺𑀬𑁆𑀬𑀸𑀢𑀺𑀢𑀸 𑀳𑁄𑀦𑁆𑀢𑀺 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀦𑀺𑀤𑁆𑀤𑁂𑀲𑁂𑀦𑁂𑀯 𑀅𑀭𑀽𑀧𑀚𑁆𑀛𑀸𑀦𑀸𑀦𑀫𑁆𑀧𑀺 𑀦𑀺𑀤𑁆𑀤𑀺𑀝𑁆𑀞𑀪𑀸𑀯𑀸𑀧𑀢𑁆𑀢𑀺𑀢𑁄 𑀦𑀺𑀬𑁆𑀬𑀸𑀢𑀺𑀢𑀸 𑀦𑀺𑀤𑀲𑁆𑀲𑀺𑀢𑀸.

𑀘𑀢𑀼𑀅𑀧𑀸𑀬𑀫𑀼𑀔𑀓𑀣𑀸𑀯𑀡𑁆𑀡𑀦𑀸

𑁨𑁮𑁦. 𑀅𑀲𑀫𑁆𑀧𑀸𑀧𑀼𑀡𑀦𑁆𑀢𑁄𑀢𑀺 ¶ ¶ 𑀆𑀭𑀪𑀺𑀢𑁆𑀯𑀸 𑀲𑀫𑁆𑀧𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄. 𑀅𑀯𑀺𑀲𑀳𑀫𑀸𑀦𑁄𑀢𑀺 𑀆𑀭𑀪𑀺𑀢𑀼𑀫𑁂𑀯 𑀅𑀲𑀓𑁆𑀓𑁄𑀦𑁆𑀢𑁄. 𑀔𑀸𑀭𑀺𑀦𑁆𑀢𑀺 𑀧𑀭𑀺𑀓𑁆𑀔𑀸𑀭𑀁. 𑀢𑀁 𑀧𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀭𑀡𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀭𑀡𑀻𑀢𑀺 𑀅𑀕𑁆𑀕𑀺𑀥𑀫𑀦𑀓𑀁 𑀅𑀭𑀡𑀻𑀤𑁆𑀯𑀬𑀁. 𑀲𑀼𑀚𑀸𑀢𑀺 𑀤𑀩𑁆𑀩𑀺. 𑀆𑀤𑀺-𑀲𑀤𑁆𑀤𑁂𑀦 𑀢𑀺𑀤𑀡𑁆𑀟𑀢𑀺𑀖𑀝𑀺𑀓𑀸𑀤𑀺𑀁 ¶ 𑀲𑀗𑁆𑀕𑀡𑁆𑀳𑀸𑀢𑀺 𑀔𑀸𑀭𑀺𑀪𑀭𑀺𑀢𑀦𑁆𑀢𑀺 𑀔𑀸𑀭𑀻𑀳𑀺 𑀧𑀼𑀡𑁆𑀡𑀁. 𑀦𑀦𑀼 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀸𑀲𑀦𑀺𑀓𑁄𑀧𑀺 𑀬𑁄 𑀓𑁄𑀘𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀅𑀢𑁆𑀣𑀢𑁄 𑀧𑀭𑀺𑀘𑀸𑀭𑀓𑁄𑀯, 𑀓𑀺𑀁 𑀅𑀗𑁆𑀕𑀁 𑀧𑀦 𑀩𑀸𑀳𑀺𑀭𑀓𑀧𑀩𑁆𑀩𑀚𑀺𑀢𑁂𑀢𑀺 𑀢𑀢𑁆𑀣 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀫𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀓𑀧𑁆𑀧𑀺𑀬𑀓𑀭𑀡…𑀧𑁂… 𑀯𑀢𑁆𑀢𑀓𑀭𑀡𑀯𑀲𑁂𑀦𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀦 𑀦𑀬𑁂𑀦. 𑀧𑀭𑀺𑀘𑀸𑀭𑀓𑁄 𑀳𑁄𑀢𑀺 𑀉𑀧𑀲𑀫𑁆𑀧𑀦𑁆𑀦𑀪𑀸𑀯𑀲𑁆𑀲 𑀯𑀺𑀲𑀺𑀝𑁆𑀞𑀪𑀸𑀯𑀢𑁄. ‘‘𑀦𑀯𑀓𑁄𑀝𑀺𑀲𑀳𑀲𑁆𑀲𑀸𑀦𑀻’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁨𑁦; 𑀧𑀝𑀺. 𑀫. 𑀅𑀝𑁆𑀞. 𑁩𑁭) 𑀯𑀼𑀢𑁆𑀢𑀧𑁆𑀧𑀪𑁂𑀤𑀸𑀦𑀁 𑀅𑀦𑁂𑀓𑀲𑀳𑀲𑁆𑀲𑀸𑀦𑀁 𑀲𑀁𑀯𑀭𑀯𑀺𑀦𑀬𑀸𑀦𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀯𑀢𑁆𑀢𑀦𑁂𑀦 𑀉𑀧𑀭𑀺𑀪𑀽𑀢𑀸 𑀅𑀕𑁆𑀕𑀪𑀽𑀢𑀸 𑀲𑀫𑁆𑀧𑀤𑀸𑀢𑀺 𑀳𑀺 ‘‘𑀉𑀧𑀲𑀫𑁆𑀧𑀤𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀕𑀼𑀡𑀸𑀥𑀺𑀓𑁄𑀧𑀻𑀢𑀺 𑀕𑀼𑀡𑁂𑀳𑀺 𑀉𑀓𑁆𑀓𑀝𑁆𑀞𑁄𑀧𑀺. 𑀅𑀬𑀁 𑀧𑀦𑀸𑀢𑀺 𑀯𑀼𑀢𑁆𑀢𑀮𑀓𑁆𑀔𑀡𑁄 𑀢𑀸𑀧𑀲𑁄.

𑀢𑀸𑀧𑀲𑀸 𑀦𑀸𑀫 𑀓𑀫𑁆𑀫𑀯𑀸𑀤𑀺𑀓𑀺𑀭𑀺𑀬𑀸𑀯𑀸𑀤𑀺𑀦𑁄, 𑀦 𑀲𑀸𑀲𑀦𑀲𑁆𑀲 𑀧𑀝𑀸𑀡𑀻𑀪𑀽𑀢𑀸, 𑀬𑀢𑁄 𑀦𑁂𑀲𑀁 𑀧𑀩𑁆𑀩𑀚𑀺𑀢𑀼𑀁 𑀆𑀕𑀢𑀸𑀦𑀁 𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑁂𑀦 𑀯𑀺𑀦𑀸𑀯 𑀧𑀩𑁆𑀩𑀚𑁆𑀚𑀸 𑀅𑀦𑀼𑀜𑁆𑀜𑀸𑀢𑀸𑀢𑀺 𑀓𑀢𑁆𑀯𑀸 ‘‘𑀓𑀲𑁆𑀫𑀸 𑀧𑀦𑀸’’𑀢𑀺 𑀘𑁄𑀤𑀦𑀁 𑀲𑀫𑀼𑀝𑁆𑀞𑀧𑁂𑀢𑀺 𑀘𑁄𑀤𑀓𑁄. 𑀆𑀘𑀭𑀺𑀬𑁄 ‘‘𑀬𑀲𑁆𑀫𑀸’’𑀢𑀺𑀆𑀤𑀺𑀦𑀸 𑀘𑁄𑀤𑀦𑀁 𑀧𑀭𑀺𑀳𑀭𑀢𑀺. ‘‘𑀑𑀲𑀓𑁆𑀓𑀺𑀲𑁆𑀲𑀢𑀻’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀇𑀫𑀲𑁆𑀫𑀺𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀔𑀼𑀭𑀥𑀸𑀭𑀽𑀧𑀫𑀦𑁆𑀢𑀺 𑀔𑀼𑀭𑀥𑀸𑀭𑀸𑀦𑀁 𑀫𑀢𑁆𑀣𑀓𑁂𑀦𑁂𑀯 𑀅𑀓𑁆𑀓𑀫𑀺𑀢𑁆𑀯𑀸 𑀕𑀫𑀦𑀽𑀧𑀫𑀁. 𑀅𑀜𑁆𑀜𑁂𑀢𑀺 𑀅𑀜𑁆𑀜𑁂 𑀪𑀺𑀓𑁆𑀔𑀽. 𑀅𑀕𑁆𑀕𑀺𑀲𑀸𑀮𑀦𑁆𑀢𑀺 𑀅𑀕𑁆𑀕𑀺𑀳𑀼𑀢𑁆𑀢𑀲𑀸𑀮𑀁. 𑀦𑀸𑀦𑀸𑀤𑀸𑀭𑀽𑀳𑀻𑀢𑀺 𑀧𑀮𑀸𑀲𑀤𑀡𑁆𑀟𑀸𑀤𑀺𑀦𑀸𑀦𑀸𑀯𑀺𑀥𑀲𑀫𑀺𑀥𑀸𑀤𑀸𑀭𑀽𑀳𑀺.

𑀇𑀤𑀦𑁆𑀢𑀺 ‘‘𑀘𑀢𑀼𑀤𑁆𑀯𑀸𑀭𑀁 𑀆𑀕𑀸𑀭𑀁 𑀓𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁. 𑀅𑀲𑁆𑀲𑀸𑀢𑀺 𑀅𑀲𑁆𑀲 𑀘𑀢𑀼𑀢𑁆𑀣𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀧𑀝𑀺𑀧𑀢𑁆𑀢𑀺𑀫𑀼𑀔𑀦𑁆𑀢𑀺 𑀓𑁄𑀳𑀜𑁆𑀜𑀧𑀝𑀺𑀧𑀢𑁆𑀢𑀺𑀬𑀸 𑀫𑀼𑀔𑀫𑀢𑁆𑀢𑀁. 𑀲𑁄 𑀳𑀺 𑀦𑀸𑀦𑀸𑀯𑀺𑀥𑁂𑀦 𑀓𑁄𑀳𑀜𑁆𑀜𑁂𑀦 𑀮𑁄𑀓𑀁 𑀯𑀺𑀫𑁆𑀳𑀸𑀧𑁂𑀦𑁆𑀢𑁄 𑀢𑀢𑁆𑀣 𑀅𑀘𑁆𑀙𑀢𑀺, 𑀢𑁂𑀦𑀸𑀳 ‘‘𑀇𑀫𑀺𑀦𑀸 𑀳𑀺 𑀫𑀼𑀔𑁂𑀦 𑀲𑁄 𑀏𑀯𑀁 𑀧𑀝𑀺𑀧𑀚𑁆𑀚𑀢𑀻’’𑀢𑀺.

𑀔𑀮𑀸𑀤𑀻𑀲𑀼 ¶ 𑀫𑀦𑀼𑀲𑁆𑀲𑀸𑀦𑀁 𑀲𑀦𑁆𑀢𑀺𑀓𑁂 𑀉𑀧𑀢𑀺𑀝𑁆𑀞𑀺𑀢𑁆𑀯𑀸 𑀯𑀻𑀳𑀺𑀫𑀼𑀕𑁆𑀕𑀢𑀺𑀮𑀫𑀸𑀲𑀸𑀤𑀻𑀦𑀺 𑀪𑀺𑀓𑁆𑀔𑀸𑀘𑀭𑀺𑀬𑀸𑀦𑀺𑀬𑀸𑀫𑁂𑀦 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀉𑀜𑁆𑀙𑀦𑀁 𑀉𑀜𑁆𑀙𑀸, 𑀲𑀸 𑀏𑀯 𑀘𑀭𑀺𑀬𑀸 𑀯𑀼𑀢𑁆𑀢𑀺 𑀏𑀢𑁂𑀲𑀦𑁆𑀢𑀺 𑀉𑀜𑁆𑀙𑀸𑀘𑀭𑀺𑀬𑀸. 𑀅𑀕𑁆𑀕𑀺𑀧𑀓𑁆𑀓𑁂𑀦 𑀚𑀻𑀯𑀦𑁆𑀢𑀻𑀢𑀺 𑀅𑀕𑁆𑀕𑀺𑀧𑀓𑁆𑀓𑀺𑀓𑀸, 𑀦 𑀅𑀕𑁆𑀕𑀺𑀧𑀓𑁆𑀓𑀺𑀓𑀸 𑀅𑀦𑀕𑁆𑀕𑀺𑀧𑀓𑁆𑀓𑀺𑀓𑀸 ¶ . 𑀉𑀜𑁆𑀙𑀸𑀘𑀭𑀺𑀬𑀸 𑀳𑀺 𑀔𑀮𑁂𑀲𑀼 𑀕𑀦𑁆𑀢𑁆𑀯𑀸 𑀔𑀮𑀕𑁆𑀕𑀁 𑀦𑀸𑀫 𑀫𑀦𑀼𑀲𑁆𑀲𑁂𑀳𑀺 𑀤𑀺𑀬𑁆𑀬𑀫𑀸𑀦𑀁 𑀥𑀜𑁆𑀜𑀁 𑀕𑀡𑁆𑀳𑀦𑁆𑀢𑀺, 𑀢𑀁 𑀇𑀫𑁂 𑀦 𑀕𑀡𑁆𑀳𑀦𑁆𑀢𑀻𑀢𑀺 𑀅𑀦𑀕𑁆𑀕𑀺𑀧𑀓𑁆𑀓𑀺𑀓𑀸 𑀦𑀸𑀫 𑀚𑀸𑀢𑀸. 𑀅𑀲𑀸𑀫𑀧𑀸𑀓𑀸𑀢𑀺 𑀅𑀲𑀬𑀁𑀧𑀸𑀘𑀓𑀸. 𑀅𑀲𑁆𑀫𑀫𑀼𑀝𑁆𑀞𑀺𑀦𑀸 𑀫𑀼𑀝𑁆𑀞𑀺𑀧𑀸𑀲𑀸𑀡𑁂𑀦 ¶ 𑀯𑀢𑁆𑀢𑀦𑁆𑀢𑀻𑀢𑀺 𑀅𑀲𑁆𑀫𑀫𑀼𑀝𑁆𑀞𑀺𑀓𑀸. 𑀤𑀦𑁆𑀢𑁂𑀦 𑀉𑀧𑁆𑀧𑀸𑀝𑀺𑀢𑀁 𑀯𑀓𑁆𑀓𑀮𑀁 𑀭𑀼𑀓𑁆𑀔𑀢𑁆𑀢𑀘𑁄 𑀤𑀦𑁆𑀢𑀯𑀓𑁆𑀓𑀮𑀁, 𑀢𑁂𑀦 𑀯𑀢𑁆𑀢𑀦𑁆𑀢𑀻𑀢𑀺 𑀤𑀦𑁆𑀢𑀯𑀓𑁆𑀓𑀮𑀺𑀓𑀸. 𑀧𑀯𑀢𑁆𑀢𑀁 𑀭𑀼𑀓𑁆𑀔𑀸𑀤𑀺𑀢𑁄 𑀧𑀸𑀢𑀺𑀢𑀁 𑀨𑀮𑀁 𑀪𑀼𑀜𑁆𑀚𑀦𑁆𑀢𑀻𑀢𑀺 𑀧𑀯𑀢𑁆𑀢𑀨𑀮𑀪𑁄𑀚𑀺𑀦𑁄. 𑀚𑀺𑀡𑁆𑀡𑀧𑀓𑁆𑀓𑀢𑀸𑀬 𑀧𑀡𑁆𑀟𑀼𑀪𑀽𑀢𑀁 𑀧𑀮𑀸𑀲𑀁, 𑀢𑀁𑀲𑀤𑀺𑀲𑀜𑁆𑀘 𑀧𑀡𑁆𑀟𑀼𑀧𑀮𑀸𑀲𑀁, 𑀢𑁂𑀦 𑀯𑀢𑁆𑀢𑀦𑁆𑀢𑀻𑀢𑀺 𑀧𑀡𑁆𑀟𑀼𑀧𑀮𑀸𑀲𑀺𑀓𑀸, 𑀲𑀬𑀁𑀧𑀢𑀺𑀢𑀧𑀼𑀧𑁆𑀨𑀨𑀮𑀧𑀢𑁆𑀢𑀪𑁄𑀚𑀺𑀦𑁄.

𑀇𑀤𑀸𑀦𑀺 𑀢𑁂 𑀅𑀝𑁆𑀞𑀯𑀺𑀥𑁂𑀧𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀗𑁆𑀓𑀟𑁆𑀠𑀺𑀢𑁆𑀯𑀸𑀢𑀺 𑀪𑀺𑀓𑁆𑀔𑀸𑀘𑀭𑀺𑀬𑀸𑀯𑀲𑁂𑀦 𑀮𑀤𑁆𑀥𑀥𑀜𑁆𑀜𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸.

𑀧𑀭𑀺𑀬𑁂𑀝𑁆𑀞𑀺 𑀦𑀸𑀫 𑀤𑀼𑀓𑁆𑀔𑀸𑀢𑀺 𑀧𑀭𑁂𑀲𑀁 𑀕𑁂𑀳𑀢𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀧𑀭𑀺𑀬𑁂𑀝𑁆𑀞𑀺 𑀦𑀸𑀫 𑀤𑀻𑀦𑀯𑀼𑀢𑁆𑀢𑀺𑀪𑀸𑀯𑁂𑀦 𑀤𑀼𑀓𑁆𑀔𑀸. 𑀧𑀸𑀲𑀸𑀡𑀲𑁆𑀲 𑀧𑀭𑀺𑀕𑁆𑀕𑀳𑁄 𑀤𑀼𑀓𑁆𑀔𑁄 𑀧𑀩𑁆𑀩𑀚𑀺𑀢𑀲𑁆𑀲𑀸𑀢𑀺 𑀯𑀸 𑀤𑀦𑁆𑀢𑁂𑀳𑁂𑀯 𑀉𑀧𑁆𑀧𑀸𑀝𑁂𑀢𑁆𑀯𑀸 𑀔𑀸𑀤𑀦𑁆𑀢𑀺.

𑀇𑀫𑀸𑀳𑀺 𑀘𑀢𑀽𑀳𑀺𑀬𑁂𑀯𑀸𑀢𑀺 ‘‘𑀔𑀸𑀭𑀺𑀯𑀺𑀥𑀁 𑀆𑀤𑀸𑀬𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀳𑀺 𑀘𑀢𑀽𑀳𑀺 𑀏𑀯 𑀢𑀸𑀧𑀲𑀧𑀩𑁆𑀩𑀚𑁆𑀚𑀸𑀳𑀻𑀢𑀺.

𑁨𑁮𑁨. 𑀅𑀧𑀸𑀬𑁂 𑀯𑀺𑀦𑀸𑀲𑁂 𑀦𑀺𑀬𑀼𑀢𑁆𑀢𑁄 𑀆𑀧𑀸𑀬𑀺𑀓𑁄. 𑀢𑀩𑁆𑀪𑀸𑀯𑀁 𑀧𑀭𑀺𑀧𑀽𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑁂𑀦 𑀅𑀧𑀭𑀺𑀧𑀼𑀡𑁆𑀡𑁄 𑀅𑀧𑀭𑀺𑀧𑀽𑀭𑀫𑀸𑀦𑁄 ¶ , 𑀓𑀭𑀡𑁂 𑀘𑁂𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀢𑁂𑀦𑀸𑀳 ‘‘𑀆𑀧𑀸𑀬𑀺𑀓𑁂𑀦𑀸𑀧𑀺 𑀅𑀧𑀭𑀺𑀧𑀽𑀭𑀫𑀸𑀦𑁂𑀦𑀸’’𑀢𑀺.

𑀧𑀼𑀩𑁆𑀩𑀓𑀇𑀲𑀺𑀪𑀸𑀯𑀸𑀦𑀼𑀬𑁄𑀕𑀯𑀡𑁆𑀡𑀦𑀸

𑁨𑁮𑁩. 𑀤𑀻𑀬𑀢𑀻𑀢𑀺 𑀤𑀢𑁆𑀢𑀺, 𑀤𑀢𑁆𑀢𑀺𑀬𑁂𑀯 𑀤𑀢𑁆𑀢𑀺𑀓𑀦𑁆𑀢𑀺 𑀆𑀳 ‘‘𑀤𑀺𑀦𑁆𑀦𑀓’’𑀦𑁆𑀢𑀺. 𑀬𑀤𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀫𑁆𑀫𑀼𑀔𑀻𑀪𑀸𑀯𑁄 𑀭𑀜𑁆𑀜𑁄 𑀦 𑀤𑀸𑀢𑀩𑁆𑀩𑁄, 𑀓𑀲𑁆𑀫𑀸𑀲𑁆𑀲 𑀉𑀧𑀲𑀗𑁆𑀓𑀫𑀦𑀁 𑀦 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀔𑁂𑀢𑁆𑀢𑀯𑀺𑀚𑁆𑀚𑀸𑀬𑀸𑀢𑀺 𑀦𑀻𑀢𑀺𑀲𑀢𑁆𑀣𑁂. 𑀧𑀬𑀸𑀢𑀦𑁆𑀢𑀺 𑀲𑀤𑁆𑀥𑀁, 𑀲𑀲𑁆𑀲𑀢𑀺𑀓𑀁 𑀯𑀸, 𑀢𑁂𑀦𑀸𑀳 ‘‘𑀅𑀪𑀺𑀳𑀭𑀺𑀢𑁆𑀯𑀸 𑀤𑀺𑀦𑁆𑀦’’𑀦𑁆𑀢𑀺. 𑀓𑀲𑁆𑀫𑀸 𑀪𑀕𑀯𑀸 ‘‘𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲 𑀓𑁄𑀲𑀮𑀲𑁆𑀲 𑀤𑀢𑁆𑀢𑀺𑀓𑀁 𑀪𑀼𑀜𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀫𑀫𑁆𑀫𑀯𑀘𑀦𑀁 𑀅𑀯𑁄𑀘𑀸𑀢𑀺 𑀢𑀢𑁆𑀣 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀁 𑀧𑀦 𑀓𑀸𑀭𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁨𑁮𑁪. 𑀭𑀣𑀽𑀧𑀢𑁆𑀣𑀭𑁂𑀢𑀺 ¶ 𑀭𑀣𑀲𑁆𑀲 𑀉𑀧𑀭𑀺 𑀅𑀢𑁆𑀣𑀭𑀺𑀢𑀧𑀤𑁂𑀲𑁂. 𑀧𑀸𑀓𑀝𑀫𑀦𑁆𑀢𑀦𑀦𑁆𑀢𑀺 𑀧𑀓𑀸𑀲𑀪𑀽𑀢𑀁 𑀫𑀦𑁆𑀢𑀦𑀁. 𑀢𑀜𑁆𑀳𑀺 𑀲𑀼𑀤𑁆𑀤𑀸𑀤𑀻𑀳𑀺 𑀜𑀸𑀬𑀢𑀻𑀢𑀺 𑀦 𑀭𑀳𑀲𑁆𑀲𑀫𑀦𑁆𑀢𑀦𑀁. 𑀪𑀡𑀢𑀻𑀢𑀺 𑀅𑀧𑀺 𑀦𑀼 𑀪𑀡𑀢𑀺.

𑁨𑁮𑁫. 𑀧𑀯𑀢𑁆𑀢𑀸𑀭𑁄𑀢𑀺 ¶ 𑀧𑀸𑀯𑀘𑀦𑀪𑀸𑀯𑁂𑀦 𑀯𑀢𑁆𑀢𑀸𑀭𑁄, 𑀬𑀲𑁆𑀫𑀸 𑀢𑁂 𑀢𑁂𑀲𑀁 𑀫𑀦𑁆𑀢𑀸𑀦𑀁 𑀧𑀯𑀢𑁆𑀢𑀓𑀸, 𑀢𑀲𑁆𑀫𑀸 𑀆𑀳 ‘‘𑀧𑀯𑀢𑁆𑀢𑀬𑀺𑀢𑀸𑀭𑁄’’𑀢𑀺. 𑀲𑀼𑀤𑁆𑀤𑁂 𑀩𑀳𑀺 𑀓𑀢𑁆𑀯𑀸 𑀭𑀳𑁄 𑀪𑀸𑀲𑀺𑀢𑀩𑁆𑀩𑀝𑁆𑀞𑁂𑀦 𑀫𑀦𑁆𑀢𑀸 𑀏𑀯, 𑀢𑀁𑀢𑀁𑀅𑀢𑁆𑀣𑀧𑀝𑀺𑀧𑀢𑁆𑀢𑀺𑀳𑁂𑀢𑀼𑀢𑀸𑀬 𑀧𑀤𑀦𑁆𑀢𑀺 𑀫𑀦𑁆𑀢𑀧𑀤𑀁, 𑀅𑀦𑀼𑀧𑀦𑀻𑀢𑀸𑀲𑀸𑀥𑀸𑀭𑀡𑀢𑀸𑀬 𑀯𑀸 𑀭𑀳𑀲𑁆𑀲𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀁 𑀳𑀺𑀢𑀓𑀺𑀭𑀺𑀬𑀸𑀬 𑀅𑀥𑀺𑀕𑀫𑀼𑀧𑀸𑀬𑀁. 𑀲𑀚𑁆𑀛𑀸𑀬𑀺𑀢𑀦𑁆𑀢𑀺 𑀕𑀸𑀬𑀦𑀯𑀲𑁂𑀦 𑀲𑀚𑁆𑀛𑀸𑀬𑀺𑀢𑀁, 𑀢𑀁 𑀧𑀦 𑀉𑀤𑀢𑁆𑀢𑀸𑀦𑀼𑀤𑀢𑁆𑀢𑀸𑀤𑀻𑀦𑀁 𑀲𑀭𑀸𑀦𑀁 𑀲𑀫𑁆𑀧𑀸𑀤𑀦𑀯𑀲𑁂𑀦𑁂𑀯 𑀇𑀘𑁆𑀙𑀺𑀢𑀦𑁆𑀢𑀺 𑀆𑀳 ‘‘𑀲𑀭𑀲𑀫𑁆𑀧𑀢𑁆𑀢𑀺𑀯𑀲𑁂𑀦𑀸’’𑀢𑀺. 𑀅𑀜𑁆𑀜𑁂𑀲𑀁 𑀯𑀼𑀢𑁆𑀢𑀦𑁆𑀢𑀺 𑀧𑀸𑀯𑀘𑀦𑀪𑀸𑀯𑁂𑀦 𑀅𑀜𑁆𑀜𑁂𑀲𑀁 𑀯𑀼𑀢𑁆𑀢𑀁. 𑀲𑀫𑀼𑀧𑀩𑁆𑀬𑀽𑀴𑁆𑀳𑀦𑁆𑀢𑀺 𑀲𑀗𑁆𑀕𑀳𑁂𑀢𑁆𑀯𑀸 𑀉𑀧𑀭𑀽𑀧𑀭𑀺 𑀲𑀜𑁆𑀜𑀽𑀴𑁆𑀳𑀁. 𑀭𑀸𑀲𑀺𑀓𑀢𑀦𑁆𑀢𑀺 𑀇𑀭𑀼𑀯𑁂𑀤𑀬𑀚𑀼𑀯𑁂𑀤𑀲𑀸𑀫𑀯𑁂𑀤𑀸𑀤𑀺𑀯𑀲𑁂𑀦 ¶ , 𑀢𑀢𑁆𑀣𑀸𑀧𑀺 𑀧𑀘𑁆𑀘𑁂𑀓𑀁 𑀫𑀦𑁆𑀢𑀩𑁆𑀭𑀳𑁆𑀫𑀸𑀤𑀺𑀯𑀲𑁂𑀦, 𑀅𑀚𑁆𑀛𑀸𑀬𑀸𑀦𑀼𑀯𑀸𑀓𑀸𑀤𑀺𑀯𑀲𑁂𑀦 𑀘 𑀭𑀸𑀲𑀺𑀓𑀢𑀁.

𑀢𑁂𑀲𑀦𑁆𑀢𑀺 𑀫𑀦𑁆𑀢𑀸𑀦𑀁 𑀓𑀢𑁆𑀢𑀽𑀦𑀁. 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀢𑁆𑀯𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀧𑀭𑀺𑀪𑀡𑁆𑀟𑁂𑀦 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑁂𑀦 𑀲𑀢𑁆𑀢𑀸𑀦𑀁 𑀓𑀫𑁆𑀫𑀲𑁆𑀲𑀓𑀢𑀸𑀤𑀺𑀁 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑀦𑀝𑁆𑀞𑁂𑀦 𑀤𑀺𑀩𑁆𑀩𑀘𑀓𑁆𑀔𑀼𑀲𑀤𑀺𑀲𑁂𑀦 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀅𑀢𑀻𑀢𑀓𑀧𑁆𑀧𑁂 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀦𑁆𑀢𑀚𑁆𑀛𑁂𑀦𑀯𑀺𑀥𑀺𑀜𑁆𑀘 𑀑𑀮𑁄𑀓𑁂𑀢𑁆𑀯𑀸. 𑀧𑀸𑀯𑀘𑀦𑁂𑀦 𑀲𑀳 𑀲𑀁𑀲𑀦𑁆𑀤𑀺𑀢𑁆𑀯𑀸𑀢𑀺 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀬𑀁 𑀯𑀘𑀦𑀁 𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀁, 𑀢𑁂𑀦 𑀲𑀳 𑀅𑀯𑀺𑀭𑀼𑀤𑁆𑀥𑀁 𑀓𑀢𑁆𑀯𑀸. 𑀦 𑀳𑀺 𑀢𑁂𑀲𑀁 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑁄 𑀅𑀢𑁆𑀣𑁄 𑀧𑀘𑁆𑀘𑀓𑁆𑀔𑁄 𑀳𑁄𑀢𑀺. 𑀅𑀧𑀭𑀸𑀧𑀭𑁂 𑀧𑀦𑀸𑀢𑀺 𑀅𑀝𑁆𑀞𑀓𑀸𑀤𑀻𑀳𑀺 𑀅𑀧𑀭𑀸 𑀧𑀭𑁂 𑀧𑀘𑁆𑀙𑀺𑀫𑀸 𑀑𑀓𑁆𑀓𑀸𑀓𑀭𑀸𑀚𑀓𑀸𑀮𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑀸. 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀝𑁆𑀞𑀓𑀸𑀤𑀻𑀳𑀺 𑀕𑀦𑁆𑀣𑀺𑀢𑀫𑀦𑁆𑀢𑀧𑀤𑁂𑀲𑀼 𑀓𑀺𑀮𑁂𑀲𑀲𑀦𑁆𑀦𑀺𑀲𑁆𑀲𑀺𑀢𑀧𑀤𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀧𑀤𑁂 𑀧𑀓𑁆𑀔𑀺𑀧𑀦𑀁 𑀓𑀢𑁆𑀯𑀸. 𑀯𑀺𑀭𑀼𑀤𑁆𑀥𑁂 𑀅𑀓𑀁𑀲𑀽𑀢𑀺 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀺𑀓𑀲𑀼𑀢𑁆𑀢𑀸𑀤𑀻𑀲𑀼 𑀆𑀕𑀢𑀦𑀬𑁂𑀦 𑀲𑀁𑀓𑀺𑀮𑁂𑀲𑀺𑀓𑀢𑁆𑀣𑀤𑀻𑀧𑀦𑀢𑁄 𑀧𑀘𑁆𑀘𑀦𑀻𑀓𑀪𑀽𑀢𑁂 𑀅𑀓𑀁𑀲𑀼. 𑀇𑀥𑀸𑀢𑀺 ‘‘𑀢𑁆𑀬𑀸𑀳𑀁 𑀫𑀦𑁆𑀢𑁂 𑀅𑀥𑀻𑀬𑀸𑀫𑀻’’𑀢𑀺 𑀏𑀢𑀲𑁆𑀫𑀺𑀁 𑀞𑀸𑀦𑁂. 𑀧𑀝𑀺𑀜𑁆𑀜𑀁 𑀅𑀕𑁆𑀕𑀳𑁂𑀢𑁆𑀯𑀸𑀢𑀺 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀻’’𑀢𑀺 𑀏𑀯𑀁 𑀧𑀝𑀺𑀜𑁆𑀜𑀁 𑀅𑀕𑁆𑀕𑀳𑁂𑀢𑁆𑀯𑀸𑀯.

𑁨𑁮𑁬. 𑀦𑀺𑀭𑀸𑀫𑀕𑀦𑁆𑀥𑀸𑀢𑀺 𑀓𑀺𑀮𑁂𑀲𑀸𑀲𑀼𑀘𑀺𑀯𑀲𑁂𑀦 𑀯𑀺𑀲𑁆𑀲𑀕𑀦𑁆𑀥𑀭𑀳𑀺𑀢𑀸. 𑀅𑀦𑀺𑀢𑁆𑀣𑀺𑀕𑀦𑁆𑀥𑀸𑀢𑀺 𑀇𑀢𑁆𑀣𑀻𑀦𑀁 𑀕𑀦𑁆𑀥𑀫𑀢𑁆𑀢𑀲𑁆𑀲𑀧𑀺 𑀅𑀯𑀺𑀲𑀳𑀦𑁂𑀦 𑀇𑀢𑁆𑀣𑀺𑀕𑀦𑁆𑀥𑀭𑀳𑀺𑀢𑀸. 𑀏𑀢𑁆𑀣 𑀘 ‘‘𑀦𑀺𑀭𑀸𑀫𑀕𑀦𑁆𑀥𑀸’’𑀢𑀺 ¶ 𑀏𑀢𑁂𑀦 𑀢𑁂𑀲𑀁 𑀧𑁄𑀭𑀸𑀡𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀢𑀁 𑀤𑀲𑁆𑀲𑁂𑀢𑀺, ‘‘𑀅𑀦𑀺𑀢𑁆𑀣𑀺𑀕𑀦𑁆𑀥𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑁄’’𑀢𑀺 𑀏𑀢𑁂𑀦 𑀏𑀓𑀯𑀺𑀳𑀸𑀭𑀺𑀢𑀁, ‘‘𑀭𑀚𑁄𑀚𑀮𑁆𑀮𑀥𑀭𑀸’’𑀢𑀺 𑀏𑀢𑁂𑀦 𑀫𑀡𑁆𑀟𑀦𑀯𑀺𑀪𑀽𑀲𑀦𑀸𑀦𑀼𑀬𑁄𑀕𑀸𑀪𑀸𑀯𑀁, ‘‘𑀅𑀭𑀜𑁆𑀜𑀸𑀬𑀢𑀦𑁂 𑀧𑀩𑁆𑀩𑀢𑀧𑀸𑀤𑁂𑀲𑀼 𑀯𑀲𑀺𑀁𑀲𑀽’’𑀢𑀺 𑀏𑀢𑁂𑀦 𑀫𑀦𑀼𑀲𑁆𑀲𑀽𑀧𑀘𑀸𑀭𑀁 ¶ 𑀧𑀳𑀸𑀬 𑀯𑀺𑀯𑀺𑀢𑁆𑀢𑀯𑀸𑀲𑀁, ‘‘𑀯𑀦𑀫𑀽𑀮𑀨𑀮𑀸𑀳𑀸𑀭𑀸 𑀯𑀲𑀺𑀁𑀲𑀽’’𑀢𑀺 𑀏𑀢𑁂𑀦 𑀲𑀸𑀮𑀺𑀫𑀁𑀲𑁄𑀤𑀦𑀸𑀤𑀺𑀧𑀡𑀻𑀢𑀸𑀳𑀸𑀭𑀧𑀝𑀺𑀓𑁆𑀔𑁂𑀧𑀁, ‘‘𑀬𑀤𑀸’’𑀢𑀺𑀆𑀤𑀺𑀦𑀸 𑀬𑀸𑀦𑀯𑀸𑀳𑀦𑀧𑀝𑀺𑀓𑁆𑀔𑁂𑀧𑀁, ‘‘𑀲𑀩𑁆𑀩𑀤𑀺𑀲𑀸𑀲𑀽’’𑀢𑀺𑀆𑀤𑀺𑀦𑀸 𑀭𑀓𑁆𑀔𑀸𑀯𑀭𑀡𑀧𑀝𑀺𑀓𑁆𑀔𑁂𑀧𑀁, 𑀏𑀯𑀜𑁆𑀘 𑀯𑀤𑀦𑁆𑀢𑁄 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀧𑀓𑁆𑀔𑀺𑀓𑀁 𑀲𑀸𑀘𑀭𑀺𑀬𑀲𑁆𑀲 𑀅𑀫𑁆𑀩𑀝𑁆𑀞𑀲𑁆𑀲 𑀯𑀼𑀢𑁆𑀢𑀺𑀁 𑀉𑀧𑀸𑀤𑀸𑀬 𑀲𑀫𑁆𑀫𑀸𑀧𑀝𑀺𑀧𑀤𑀸𑀧𑀓𑁆𑀔𑀺𑀓𑀸𑀧𑀺 𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀼𑀢𑁆𑀢𑀺 𑀅𑀭𑀺𑀬𑀯𑀺𑀦𑀬𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀉𑀧𑀸𑀤𑀸𑀬 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀬𑁂𑀯. 𑀓𑀼𑀢𑀲𑁆𑀲 𑀲𑀮𑁆𑀮𑁂𑀔𑀧𑀝𑀺𑀧𑀢𑁆𑀢𑀺𑀬𑀼𑀢𑁆𑀢𑀢𑀸𑀢𑀺. ‘‘𑀏𑀯𑀁 𑀲𑀼𑀢𑁂’’𑀢𑀺𑀆𑀤𑀺𑀦𑀸 𑀪𑀕𑀯𑀸 𑀅𑀫𑁆𑀩𑀝𑁆𑀞𑀁 𑀲𑀦𑁆𑀢𑀚𑁆𑀚𑁂𑀦𑁆𑀢𑁄 𑀦𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀯𑁂𑀞𑀓𑁂𑀳𑀻𑀢𑀺 ¶ 𑀯𑁂𑀞𑀓𑀧𑀝𑁆𑀝𑀓𑀸𑀳𑀺. 𑀲𑀫𑀦𑁆𑀢𑀸𑀦𑀕𑀭𑀦𑁆𑀢𑀺 𑀦𑀕𑀭𑀲𑁆𑀲 𑀲𑀫𑀦𑁆𑀢𑀢𑁄. 𑀓𑀢𑀲𑀼𑀥𑀸𑀓𑀫𑁆𑀫𑀁 𑀧𑀸𑀓𑀸𑀭𑀲𑁆𑀲 𑀅𑀥𑁄𑀪𑀸𑀕𑁂 𑀞𑀸𑀦𑀁 𑀯𑀼𑀘𑁆𑀘𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀤𑁆𑀯𑁂𑀮𑀓𑁆𑀔𑀡𑀤𑀲𑁆𑀲𑀦𑀯𑀡𑁆𑀡𑀦𑀸

𑁨𑁮𑁭. 𑀦 𑀲𑀓𑁆𑀓𑁄𑀢𑀺𑀲𑀗𑁆𑀓𑀼𑀘𑀺𑀢𑁂 𑀇𑀭𑀺𑀬𑀸𑀧𑀣𑁂 𑀅𑀦𑀯𑀲𑁂𑀲𑀢𑁄 𑀢𑁂𑀲𑀁 𑀤𑀼𑀩𑁆𑀩𑀺𑀪𑀸𑀯𑀦𑀢𑁄. 𑀕𑀯𑁂𑀲𑀻𑀢𑀺 𑀜𑀸𑀡𑁂𑀦 𑀧𑀭𑀺𑀬𑁂𑀲𑀦𑀫𑀓𑀸𑀲𑀺. 𑀲𑀫𑀸𑀦𑀬𑀻𑀢𑀺 𑀜𑀸𑀡𑁂𑀦 𑀲𑀗𑁆𑀓𑀮𑁂𑀦𑁆𑀢𑁄 𑀲𑀫𑁆𑀫𑀸 𑀆𑀦𑀬𑀺 𑀲𑀫𑀸𑀳𑀭𑀺. ‘‘𑀓𑀗𑁆𑀔𑀢𑀻’’𑀢𑀺 𑀧𑀤𑀲𑁆𑀲 𑀆𑀓𑀗𑁆𑀔𑀢𑀻𑀢𑀺 𑀅𑀬𑀫𑀢𑁆𑀣𑁄𑀢𑀺 𑀆𑀳 ‘‘𑀅𑀳𑁄 𑀯𑀢 𑀧𑀲𑁆𑀲𑁂𑀬𑁆𑀬𑀦𑁆𑀢𑀺 𑀧𑀢𑁆𑀣𑀦𑀁 𑀉𑀧𑁆𑀧𑀸𑀤𑁂𑀢𑀻’’𑀢𑀺. 𑀓𑀺𑀘𑁆𑀙𑀢𑀻𑀢𑀺 𑀓𑀺𑀮𑀫𑀢𑀺. ‘‘𑀓𑀗𑁆𑀔𑀢𑀻’’𑀢𑀺 𑀧𑀤𑀲𑁆𑀲 𑀧𑀼𑀩𑁆𑀩𑁂 𑀆𑀲𑀺𑀲𑀦𑀢𑁆𑀣𑀢𑀁 𑀯𑀢𑁆𑀯𑀸 𑀇𑀤𑀸𑀦𑀺𑀲𑁆𑀲 𑀲𑀁𑀲𑀬𑀢𑁆𑀣𑀢𑀫𑁂𑀯 𑀯𑀺𑀓𑀧𑁆𑀧𑀦𑁆𑀢𑀭𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀗𑁆𑀔𑀸𑀬 𑀯𑀸 𑀤𑀼𑀩𑁆𑀩𑀮𑀸 𑀯𑀺𑀫𑀢𑀺 𑀯𑀼𑀢𑁆𑀢𑀸’’𑀢𑀺 𑀆𑀳. 𑀢𑀻𑀳𑀺 𑀥𑀫𑁆𑀫𑁂𑀳𑀻𑀢𑀺 𑀢𑀺𑀧𑁆𑀧𑀓𑀸𑀭𑁂𑀳𑀺 𑀲𑀁𑀲𑀬𑀥𑀫𑁆𑀫𑁂𑀳𑀺. 𑀓𑀸𑀮𑀼𑀲𑀺𑀬𑀪𑀸𑀯𑁄𑀢𑀺 𑀅𑀧𑁆𑀧𑀲𑀦𑁆𑀦𑀢𑀸𑀬 𑀳𑁂𑀢𑀼𑀪𑀽𑀢𑁄 𑀆𑀯𑀺𑀮𑀪𑀸𑀯𑁄.

𑀬𑀲𑁆𑀫𑀸 𑀪𑀕𑀯𑀢𑁄 𑀓𑁄𑀲𑁄𑀳𑀺𑀢𑀁 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀆𑀯𑁂𑀡𑀺𑀓𑀁 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 𑀯𑀢𑁆𑀣𑀕𑀼𑀬𑁆𑀳𑀁 𑀲𑀼𑀯𑀺𑀲𑀼𑀤𑁆𑀥𑀓𑀜𑁆𑀘𑀦𑀫𑀡𑁆𑀟𑀮𑀲𑀦𑁆𑀦𑀺𑀓𑀸𑀲𑀁, 𑀅𑀢𑁆𑀢𑀦𑁄 𑀲𑀡𑁆𑀞𑀸𑀦𑀲𑀦𑁆𑀦𑀺𑀯𑁂𑀲𑀲𑀼𑀦𑁆𑀤𑀭𑀢𑀸𑀬 ¶ 𑀆𑀚𑀸𑀦𑁂𑀬𑁆𑀬𑀕𑀦𑁆𑀥𑀳𑀢𑁆𑀣𑀺𑀦𑁄 𑀯𑀭𑀗𑁆𑀕𑀧𑀭𑀫𑀘𑀸𑀭𑀼𑀪𑀸𑀯𑀁, 𑀯𑀺𑀓𑀲𑀫𑀸𑀦𑀢𑀧𑀦𑀺𑀬𑀸𑀭𑀯𑀺𑀦𑁆𑀤𑀲𑀫𑀼𑀚𑁆𑀚𑀮𑀓𑁂𑀲𑀭𑀸𑀯𑀢𑁆𑀢𑀯𑀺𑀮𑀸𑀲𑀁, 𑀲𑀜𑁆𑀛𑀸𑀧𑀪𑀸𑀦𑀼𑀭𑀜𑁆𑀚𑀺𑀢𑀚𑀮𑀯𑀦𑀦𑁆𑀢𑀭𑀸𑀪𑀺𑀮𑀓𑁆𑀔𑀺𑀢𑀲𑀫𑁆𑀧𑀼𑀡𑁆𑀡𑀘𑀦𑁆𑀤𑀫𑀡𑁆𑀟𑀮𑀲𑁄𑀪𑀜𑁆𑀘 𑀅𑀢𑁆𑀢𑀦𑁄 𑀲𑀺𑀭𑀺𑀬𑀸 𑀅𑀪𑀺𑀪𑀼𑀬𑁆𑀬 𑀯𑀺𑀭𑀸𑀚𑀢𑀺, 𑀬𑀁 𑀩𑀸𑀳𑀺𑀭𑀩𑁆𑀪𑀦𑁆𑀢𑀭𑀫𑀮𑁂𑀳𑀺 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀢𑀸𑀬, 𑀘𑀺𑀭𑀓𑀸𑀮𑀁 𑀲𑀼𑀧𑀭𑀺𑀘𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀸𑀥𑀺𑀓𑀸𑀭𑀢𑀸𑀬, 𑀲𑀼𑀲𑀡𑁆𑀞𑀺𑀢𑀲𑀡𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀬𑀸 𑀘 ¶ , 𑀓𑁄𑀧𑀻𑀦𑀫𑁆𑀧𑀺 𑀲𑀦𑁆𑀢𑀁 𑀅𑀓𑁄𑀧𑀻𑀦𑀫𑁂𑀯, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀪𑀕𑀯𑀢𑁄 𑀳𑀻’’𑀢𑀺𑀆𑀤𑀺. 𑀧𑀳𑀽𑀢𑀪𑀸𑀯𑀦𑁆𑀢𑀺 𑀧𑀼𑀣𑀼𑀮𑀪𑀸𑀯𑀁. 𑀏𑀢𑁆𑀣𑁂𑀯 𑀳𑀺 𑀢𑀲𑁆𑀲 𑀲𑀁𑀲𑀬𑁄, 𑀢𑀦𑀼𑀫𑀼𑀤𑀼𑀲𑀼𑀓𑀼𑀫𑀸𑀭𑀢𑀸𑀤𑀻𑀲𑀼 𑀧𑀦𑀲𑁆𑀲 𑀕𑀼𑀡𑁂𑀲𑀼 𑀯𑀺𑀘𑀸𑀭𑀡𑀸 𑀏𑀯 𑀦𑀸𑀳𑁄𑀲𑀺.

𑁨𑁮𑁮. 𑀳𑀺𑀭𑀺𑀓𑀭𑀡𑁄𑀓𑀸𑀲𑀦𑁆𑀢𑀺 𑀳𑀺𑀭𑀺𑀬𑀺𑀢𑀩𑁆𑀩𑀝𑁆𑀞𑀸𑀦𑀁. 𑀙𑀸𑀬𑀦𑁆𑀢𑀺 𑀧𑀝𑀺𑀩𑀺𑀫𑁆𑀩𑀁. 𑀓𑀣𑀁 𑀓𑀻𑀤𑀺𑀲𑀦𑁆𑀢𑀺 𑀆𑀳 ‘‘𑀇𑀤𑁆𑀥𑀺𑀬𑀸’’𑀢𑀺𑀆𑀤𑀺. 𑀙𑀸𑀬𑀸𑀭𑀽𑀧𑀓𑀫𑀢𑁆𑀢𑀦𑁆𑀢𑀺 𑀪𑀕𑀯𑀢𑁄 𑀧𑀝𑀺𑀩𑀺𑀫𑁆𑀩𑀭𑀽𑀧𑀁. 𑀢𑀜𑁆𑀘 𑀔𑁄 𑀩𑀼𑀤𑁆𑀥𑀲𑀦𑁆𑀢𑀸𑀦𑀢𑁄 𑀯𑀺𑀦𑀺𑀫𑀼𑀢𑁆𑀢𑀢𑁆𑀢𑀸 𑀭𑀽𑀧𑀓𑀫𑀢𑁆𑀢𑀁 𑀪𑀕𑀯𑀢𑁄 𑀲𑀭𑀻𑀭𑀯𑀡𑁆𑀡𑀲𑀡𑁆𑀞𑀸𑀦𑀸𑀯𑀬𑀯𑀁 𑀇𑀤𑁆𑀥𑀺𑀫𑀬𑀁 𑀩𑀺𑀫𑁆𑀩𑀓𑀫𑀢𑁆𑀢𑀁. 𑀢𑀁 𑀧𑀦 𑀭𑀽𑀧𑀓𑀫𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 𑀬𑀣𑀸 𑀅𑀢𑁆𑀢𑀦𑁄 𑀩𑀼𑀤𑁆𑀥𑀭𑀽𑀧𑀁 𑀦 𑀤𑀺𑀲𑁆𑀲𑀢𑀺, 𑀢𑀣𑀸 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀦𑀺𑀦𑁆𑀦𑁂𑀢𑁆𑀯𑀸𑀢𑀺 𑀦𑀻𑀳𑀭𑀺𑀢𑁆𑀯𑀸. 𑀓𑀮𑁆𑀮𑁄𑀲𑀻𑀢𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂 𑀓𑀼𑀲𑀮𑁄 𑀙𑁂𑀓𑁄 𑀅𑀲𑀺. 𑀢𑀣𑀸𑀓𑀭𑀡𑁂𑀦𑀸𑀢𑀺 𑀓𑀣𑀺𑀦𑀲𑀽𑀘𑀺𑀁 𑀯𑀺𑀬 𑀓𑀭𑀡𑁂𑀦. 𑀏𑀢𑁆𑀣𑀸𑀢𑀺 𑀧𑀳𑀽𑀢𑀚𑀺𑀯𑁆𑀳𑀸𑀬. 𑀫𑀼𑀤𑀼𑀪𑀸𑀯𑁄 𑀧𑀓𑀸𑀲𑀺𑀢𑁄 𑀅𑀫𑀼𑀤𑀼𑀦𑁄 𑀖𑀦𑀲𑀼𑀔𑀼𑀫𑀪𑀸𑀯𑀸𑀧𑀸𑀤𑀦𑀢𑁆𑀣𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀤𑀻𑀖𑀪𑀸𑀯𑁄, 𑀢𑀦𑀼𑀪𑀸𑀯𑁄 𑀘𑀸𑀢𑀺 𑀤𑀝𑁆𑀞𑀩𑁆𑀩𑀁.

𑁨𑁯𑁧. ‘‘𑀅𑀢𑁆𑀣𑀘𑀭𑀓𑁂𑀦𑀸’’𑀢𑀺 ¶ 𑀇𑀫𑀺𑀦𑀸 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀅𑀦𑀢𑁆𑀣𑀘𑀭𑀓𑀢𑀁𑀬𑁂𑀯 𑀯𑀺𑀪𑀸𑀯𑁂𑀢𑀺. 𑀦 𑀅𑀜𑁆𑀜𑀢𑁆𑀭𑀸𑀢𑀺 𑀦 𑀅𑀜𑁆𑀜𑀲𑁆𑀫𑀺𑀁 𑀲𑀼𑀕𑀢𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀉𑀧𑀦𑁂𑀢𑁆𑀯𑀸 ¶ 𑀉𑀧𑀦𑁂𑀢𑁆𑀯𑀸𑀢𑀺 𑀢𑀁 𑀢𑀁 𑀤𑁄𑀲𑀁 𑀉𑀧𑀦𑁂𑀢𑁆𑀯𑀸 𑀉𑀧𑀦𑁂𑀢𑁆𑀯𑀸, 𑀢𑁂𑀦𑀸𑀳 ‘‘𑀲𑀼𑀝𑁆𑀞𑀼𑀤𑀸𑀲𑀸𑀤𑀺𑀪𑀸𑀯𑀁 𑀆𑀭𑁄𑀧𑁂𑀢𑁆𑀯𑀸’’𑀢𑀺. 𑀧𑀸𑀢𑁂𑀲𑀻𑀢𑀺 𑀧𑀯𑀝𑁆𑀝𑀦𑀯𑀲𑁂𑀦 𑀧𑀸𑀢𑁂𑀲𑀺.

𑀧𑁄𑀓𑁆𑀔𑀭𑀲𑀸𑀢𑀺𑀩𑀼𑀤𑁆𑀥𑀽𑀧𑀲𑀗𑁆𑀓𑀫𑀦𑀯𑀡𑁆𑀡𑀦𑀸

𑁨𑁯𑁩-𑁬. 𑀆𑀕𑀫𑀸 𑀦𑀽𑀢𑀺 𑀆𑀕𑀢𑁄 𑀦𑀼. 𑀔𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀇𑀥𑀸𑀢𑀺 𑀏𑀢𑁆𑀣, 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀅𑀥𑀺𑀯𑀸𑀲𑁂𑀢𑀽𑀢𑀺 𑀲𑀸𑀤𑀺𑀬𑀢𑀼, 𑀢𑀁 𑀧𑀦 𑀲𑀸𑀤𑀺𑀬𑀦𑀁 𑀫𑀦𑀲𑀸 𑀲𑀫𑁆𑀧𑀝𑀺𑀕𑁆𑀕𑀳𑁄 𑀳𑁄𑀢𑀻𑀢𑀺 𑀆𑀳 ‘‘𑀲𑀫𑁆𑀧𑀝𑀺𑀘𑁆𑀙𑀢𑀽’’𑀢𑀺.

𑁨𑁯𑁭. 𑀬𑀸𑀯𑀤𑀢𑁆𑀣𑀦𑁆𑀢𑀺 𑀬𑀸𑀯 𑀅𑀢𑁆𑀣𑁄, 𑀢𑀸𑀯 𑀪𑁄𑀚𑀦𑁂𑀦 𑀢𑀤𑀸 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀑𑀡𑀺𑀢𑁆𑀢𑀦𑁆𑀢𑀺 𑀆𑀫𑀺𑀲𑀸𑀧𑀦𑀬𑀦𑁂𑀦 𑀲𑀼𑀘𑀺𑀓𑀢𑀁, 𑀢𑁂𑀦𑀸𑀳 ‘‘𑀳𑀢𑁆𑀣𑁂 𑀘 𑀧𑀢𑁆𑀢𑀜𑁆𑀘 𑀥𑁄𑀯𑀺𑀢𑁆𑀯𑀸’’𑀢𑀺.

𑁨𑁯𑁮. 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀦𑁆𑀢𑀺 𑀅𑀦𑀼𑀧𑀼𑀩𑁆𑀩𑀁 𑀓𑀣𑁂𑀢𑀩𑁆𑀩𑀓𑀣𑀁, 𑀢𑁂𑀦𑀸𑀳 ‘‘𑀅𑀦𑀼𑀧𑀝𑀺𑀧𑀸𑀝𑀺𑀓𑀣’’𑀦𑁆𑀢𑀺. 𑀓𑀸 𑀧𑀦 𑀲𑀸? 𑀤𑀸𑀦𑀸𑀤𑀺𑀓𑀣𑀸𑀢𑀺 𑀆𑀳 ‘‘𑀤𑀸𑀦𑀸𑀦𑀦𑁆𑀢𑀭𑀁 𑀲𑀻𑀮’’𑀦𑁆𑀢𑀺𑀆𑀤𑀺. 𑀢𑁂𑀦 𑀤𑀸𑀦𑀓𑀣𑀸 𑀢𑀸𑀯 𑀧𑀘𑀼𑀭𑀚𑀦𑁂𑀲𑀼𑀧𑀺 𑀧𑀯𑀢𑁆𑀢𑀺𑀬𑀸 𑀲𑀩𑁆𑀩𑀲𑀸𑀥𑀸𑀭𑀡𑀢𑁆𑀢𑀸, 𑀲𑀼𑀓𑀭𑀢𑁆𑀢𑀸, 𑀲𑀻𑀮𑁂 𑀧𑀢𑀺𑀝𑁆𑀞𑀸𑀦𑀲𑁆𑀲 𑀉𑀧𑀸𑀬𑀪𑀸𑀯𑀢𑁄 𑀘 𑀆𑀤𑀺𑀢𑁄 ¶ 𑀓𑀣𑁂𑀢𑀩𑁆𑀩𑀸. 𑀧𑀭𑀺𑀘𑁆𑀘𑀸𑀕𑀲𑀻𑀮𑁄 𑀳𑀺 𑀧𑀼𑀕𑁆𑀕𑀮𑁄 𑀧𑀭𑀺𑀕𑁆𑀕𑀳𑀺𑀢𑀯𑀢𑁆𑀣𑀽𑀲𑀼 𑀦𑀺𑀲𑁆𑀲𑀗𑁆𑀕𑀪𑀸𑀯𑀢𑁄 𑀲𑀼𑀔𑁂𑀦𑁂𑀯 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀢𑀺, 𑀢𑀢𑁆𑀣 𑀘 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄 𑀳𑁄𑀢𑀺. 𑀲𑀻𑀮𑁂𑀦 𑀤𑀸𑀬𑀓𑀧𑀝𑀺𑀕𑁆𑀕𑀸𑀳𑀓𑀲𑀼𑀤𑁆𑀥𑀺𑀢𑁄 𑀧𑀭𑀸𑀦𑀼𑀕𑁆𑀕𑀳𑀁 𑀯𑀢𑁆𑀯𑀸 𑀧𑀭𑀧𑀻𑀴𑀸𑀦𑀺𑀯𑀢𑁆𑀢𑀺𑀯𑀘𑀦𑀢𑁄, 𑀓𑀺𑀭𑀺𑀬𑀥𑀫𑁆𑀫𑀁 𑀯𑀢𑁆𑀯𑀸 𑀅𑀓𑀺𑀭𑀺𑀬𑀥𑀫𑁆𑀫𑀯𑀘𑀦𑀢𑁄, 𑀪𑁄𑀕𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀁 𑀯𑀢𑁆𑀯𑀸 𑀪𑀯𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀯𑀘𑀦𑀢𑁄 𑀘 𑀤𑀸𑀦𑀓𑀣𑀸𑀦𑀦𑁆𑀢𑀭𑀁 𑀲𑀻𑀮𑀓𑀣𑀸 𑀓𑀣𑁂𑀢𑀩𑁆𑀩𑀸, 𑀢𑀜𑁆𑀘𑁂 𑀤𑀸𑀦𑀲𑀻𑀮𑀁 𑀯𑀝𑁆𑀝𑀦𑀺𑀲𑁆𑀲𑀺𑀢𑀁, 𑀅𑀬𑀁 𑀪𑀯𑀲𑀫𑁆𑀧𑀢𑁆𑀢𑀺 𑀢𑀲𑁆𑀲 𑀨𑀮𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 𑀇𑀫𑁂𑀳𑀺 𑀘 𑀤𑀸𑀦𑀲𑀻𑀮𑀫𑀬𑁂𑀳𑀺 𑀧𑀡𑀻𑀢𑀧𑀡𑀻𑀢𑀢𑀭𑀸𑀤𑀺𑀪𑁂𑀤𑀪𑀺𑀦𑁆𑀦𑁂𑀳𑀺 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀳𑀺 𑀏𑀢𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀻𑀲𑀼 𑀧𑀡𑀻𑀢𑀧𑀡𑀻𑀢𑀢𑀭𑀸𑀤𑀺𑀪𑁂𑀤𑀪𑀺𑀦𑁆𑀦𑀸 ¶ 𑀅𑀧𑀭𑀺𑀫𑁂𑀬𑁆𑀬𑀸 𑀤𑀺𑀩𑁆𑀩𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑁄 𑀮𑀤𑁆𑀥𑀩𑁆𑀩𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀤𑀦𑀦𑁆𑀢𑀭𑀁 𑀲𑀕𑁆𑀕𑀓𑀣𑀸. 𑀲𑁆𑀯𑀸𑀬𑀁 𑀲𑀕𑁆𑀕𑁄 𑀭𑀸𑀕𑀸𑀤𑀻𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑁄, 𑀲𑀩𑁆𑀩𑀣𑀸𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑁄 𑀅𑀭𑀺𑀬𑀫𑀕𑁆𑀕𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀲𑀕𑁆𑀕𑀸𑀦𑀦𑁆𑀢𑀭𑀁 𑀫𑀕𑁆𑀕𑁄 𑀓𑀣𑁂𑀢𑀩𑁆𑀩𑁄. 𑀫𑀕𑁆𑀕𑀜𑁆𑀘 𑀓𑀣𑁂𑀦𑁆𑀢𑁂𑀦 𑀢𑀤𑀥𑀺𑀕𑀫𑀼𑀧𑀸𑀬𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀲𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀸𑀧𑀺, 𑀧𑀕𑁂𑀯 𑀇𑀢𑀭𑁂 𑀲𑀩𑁆𑀩𑁂𑀧𑀺 𑀓𑀸𑀫𑀸 𑀦𑀸𑀫 𑀩𑀳𑁆𑀯𑀸𑀤𑀻𑀦𑀯𑀸 𑀅𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸𑀢𑀺 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄, 𑀳𑀻𑀦𑀸 𑀕𑀫𑁆𑀫𑀸 𑀧𑁄𑀣𑀼𑀚𑁆𑀚𑀦𑀺𑀓𑀸 𑀅𑀦𑀭𑀺𑀬𑀸 𑀅𑀦𑀢𑁆𑀣𑀲𑀜𑁆𑀳𑀺𑀢𑀸𑀢𑀺 𑀢𑁂𑀲𑀁 𑀑𑀓𑀸𑀭𑁄 𑀮𑀸𑀫𑀓𑀪𑀸𑀯𑁄, 𑀲𑀩𑁆𑀩𑁂𑀧𑀺 𑀪𑀯𑀸 𑀓𑀺𑀮𑁂𑀲𑀸𑀦𑀁 𑀯𑀢𑁆𑀣𑀼𑀪𑀽𑀢𑀸𑀢𑀺 𑀢𑀢𑁆𑀣 𑀲𑀁𑀓𑀺𑀮𑁂𑀲𑁄, 𑀲𑀩𑁆𑀩𑀲𑀁𑀓𑀺𑀮𑁂𑀲𑀯𑀺𑀧𑁆𑀧𑀫𑀼𑀢𑁆𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑁄 𑀘 𑀓𑀣𑁂𑀢𑀩𑁆𑀩𑁄𑀢𑀺 𑀅𑀬𑀫𑀢𑁆𑀣𑁄 𑀩𑁄𑀥𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀫𑀕𑁆𑀕𑁄𑀢𑀺 𑀘𑁂𑀢𑁆𑀣 𑀇𑀢𑀺-𑀲𑀤𑁆𑀤𑁂𑀦 𑀆𑀤𑀺𑀅𑀢𑁆𑀣𑀤𑀻𑀧𑀦𑀢𑁄 ‘‘𑀓𑀸𑀫𑀸𑀦𑀁 𑀆𑀤𑀻𑀦𑀯𑁄’’𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄𑀢𑀺 ¶ 𑀏𑀯𑀫𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀫𑀕𑁆𑀕𑀜𑀸𑀡𑀁 𑀅𑀲𑀗𑁆𑀔𑀢𑀥𑀫𑁆𑀫𑀸𑀭𑀫𑁆𑀫𑀡𑀁, 𑀦 𑀲𑀗𑁆𑀔𑀢𑀥𑀫𑁆𑀫𑀸𑀭𑀫𑁆𑀫𑀡𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀜𑁆𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀧𑀝𑀺𑀯𑀺𑀚𑁆𑀛𑀦𑁆𑀢𑀦𑁆𑀢𑀺 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑀯𑀲𑁂𑀦 𑀧𑀝𑀺𑀯𑀺𑀚𑁆𑀛𑀦𑁆𑀢𑀁, 𑀢𑁂𑀦𑀸𑀳 ‘‘𑀓𑀺𑀘𑁆𑀘𑀯𑀲𑁂𑀦𑀸’’𑀢𑀺.

𑀧𑁄𑀓𑁆𑀔𑀭𑀲𑀸𑀢𑀺𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸𑀓𑀣𑀸𑀯𑀡𑁆𑀡𑀦𑀸

𑁨𑁯𑁯. 𑀏𑀢𑁆𑀣 𑀘 ‘‘𑀤𑀺𑀝𑁆𑀞𑀥𑀫𑁆𑀫𑁄’’𑀢𑀺𑀆𑀤𑀺 𑀧𑀸𑀴𑀺𑀬𑀁 𑀤𑀲𑁆𑀲𑀦𑀁 𑀦𑀸𑀫 𑀜𑀸𑀡𑀤𑀲𑁆𑀲𑀦𑀢𑁄 𑀅𑀜𑁆𑀜𑀫𑁆𑀧𑀺 𑀅𑀢𑁆𑀣𑀺, 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀧𑀢𑁆𑀢𑀥𑀫𑁆𑀫𑁄’’𑀢𑀺 𑀯𑀼𑀢𑁆𑀢𑀁. 𑀧𑀢𑁆𑀢𑀺 𑀘 𑀜𑀸𑀡𑀲𑀫𑁆𑀧𑀢𑁆𑀢𑀺𑀢𑁄 𑀅𑀜𑁆𑀜𑀫𑁆𑀧𑀺 𑀯𑀺𑀚𑁆𑀚𑀢𑀻𑀢𑀺 𑀢𑀢𑁄 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 ‘‘𑀯𑀺𑀤𑀺𑀢𑀥𑀫𑁆𑀫𑁄’’𑀢𑀺 𑀯𑀼𑀢𑁆𑀢𑀁. 𑀲𑀸 𑀧𑀦𑁂𑀲𑀸 𑀯𑀺𑀤𑀺𑀢𑀥𑀫𑁆𑀫𑀢𑀸 𑀏𑀓𑀤𑁂𑀲𑀢𑁄𑀧𑀺 𑀳𑁄𑀢𑀻𑀢𑀺 𑀦𑀺𑀧𑁆𑀧𑀤𑁂𑀲𑀢𑁄 𑀯𑀺𑀤𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑁄’’𑀢𑀺 ¶ 𑀯𑀼𑀢𑁆𑀢𑀁. 𑀢𑁂𑀦𑀲𑁆𑀲 𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑀁𑀬𑁂𑀯 𑀤𑀻𑀧𑁂𑀢𑀺. 𑀫𑀕𑁆𑀕𑀜𑀸𑀡𑀜𑁆𑀳𑀺 𑀏𑀓𑀸𑀪𑀺𑀲𑀫𑀬𑀯𑀲𑁂𑀦 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀁 𑀦𑀺𑀧𑁆𑀧𑀤𑁂𑀲𑁂𑀦 ¶ 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀲𑀫𑀦𑁆𑀢𑀢𑁄 𑀑𑀕𑀸𑀴𑁆𑀳𑀁 𑀦𑀸𑀫 𑀳𑁄𑀢𑀺, 𑀢𑁂𑀦𑀸𑀳 ‘‘𑀤𑀺𑀝𑁆𑀞𑁄 𑀅𑀭𑀺𑀬𑀲𑀘𑁆𑀘𑀥𑀫𑁆𑀫𑁄 𑀏𑀢𑁂𑀦𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑁄’’𑀢𑀺. 𑀢𑀺𑀡𑁆𑀡𑀸 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀲𑀧𑁆𑀧𑀝𑀺𑀪𑀬𑀓𑀦𑁆𑀢𑀸𑀭𑀲𑀤𑀺𑀲𑀸 𑀲𑁄𑀴𑀲𑀯𑀢𑁆𑀣𑀼𑀓𑀸, 𑀅𑀝𑁆𑀞𑀯𑀢𑁆𑀣𑀼𑀓𑀸 𑀘 𑀢𑀺𑀡𑁆𑀡𑀸 𑀯𑀺𑀢𑀺𑀡𑁆𑀡𑀸 𑀯𑀺𑀘𑀺𑀓𑀺𑀘𑁆𑀙𑀸. 𑀯𑀺𑀕𑀢𑀸 𑀓𑀣𑀗𑁆𑀓𑀣𑀸𑀢𑀺 𑀧𑀯𑀢𑁆𑀢𑀺𑀆𑀤𑀻𑀲𑀼. ‘‘𑀏𑀯𑀁 𑀦𑀼 𑀔𑁄, 𑀦 𑀦𑀼 𑀔𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑀺𑀓𑀸 𑀯𑀺𑀕𑀢𑀸 𑀲𑀫𑀼𑀘𑁆𑀙𑀺𑀦𑁆𑀦𑀸 𑀓𑀣𑀗𑁆𑀓𑀣𑀸. 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄𑀢𑀺 𑀲𑀸𑀭𑀚𑁆𑀚𑀓𑀭𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀧𑀳𑀻𑀦𑀢𑁆𑀢𑀸, 𑀢𑀧𑁆𑀧𑀝𑀺𑀧𑀓𑁆𑀔𑁂𑀲𑀼 𑀘 𑀲𑀻𑀮𑀸𑀤𑀺𑀕𑀼𑀡𑁂𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀯𑁂𑀲𑀸𑀭𑀚𑁆𑀚𑀁 𑀯𑀺𑀲𑀸𑀭𑀤𑀪𑀸𑀯𑀁 𑀯𑁂𑀬𑁆𑀬𑀢𑁆𑀢𑀺𑀬𑀁 𑀧𑀢𑁆𑀢𑁄 𑀅𑀥𑀺𑀕𑀢𑁄. 𑀲𑀸𑀬𑀁 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑁄𑀢𑀺 𑀓𑀢𑁆𑀯𑀸 𑀆𑀳 ‘‘𑀲𑀢𑁆𑀣𑀼𑀲𑀸𑀲𑀦𑁂’’𑀢𑀺. 𑀅𑀢𑁆𑀢𑀦𑀸 𑀧𑀘𑁆𑀘𑀓𑁆𑀔𑀢𑁄 𑀤𑀺𑀝𑁆𑀞𑀢𑁆𑀢𑀸 𑀅𑀥𑀺𑀕𑀢𑀢𑁆𑀢𑀸 𑀦 𑀧𑀭𑀁 𑀧𑀘𑁆𑀘𑁂𑀢𑀺, 𑀦 𑀢𑀲𑁆𑀲 𑀧𑀭𑁄 𑀧𑀘𑁆𑀘𑁂𑀢𑀩𑁆𑀩𑁄 𑀅𑀢𑁆𑀣𑀻𑀢𑀺 𑀅𑀧𑀭𑀧𑁆𑀧𑀘𑁆𑀘𑀬𑁄. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 𑀅𑀯𑀼𑀢𑁆𑀢𑀁, 𑀢𑀁 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.

𑁪. 𑀲𑁄𑀡𑀤𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦𑁦. 𑀲𑀼𑀦𑁆𑀤𑀭𑀪𑀸𑀯𑁂𑀦 ¶ ¶ ¶ 𑀲𑀸𑀢𑀺𑀲𑀬𑀸𑀦𑀺 𑀅𑀗𑁆𑀕𑀸𑀦𑀺 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀅𑀗𑁆𑀕𑀸, 𑀭𑀸𑀚𑀓𑀼𑀫𑀸𑀭𑀸𑀢𑀺 𑀆𑀳 ‘‘𑀅𑀗𑁆𑀕𑀸 𑀦𑀸𑀫 𑀅𑀗𑁆𑀕𑀧𑀸𑀲𑀸𑀤𑀺𑀓𑀢𑀸𑀬𑀸’’𑀢𑀺𑀆𑀤𑀺. 𑀇𑀥𑀸𑀧𑀺 𑀅𑀥𑀺𑀧𑁆𑀧𑁂𑀢𑀸, 𑀦 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑁂 𑀏𑀯. 𑀆𑀕𑀦𑁆𑀢𑀼𑀁 𑀦 𑀤𑀲𑁆𑀲𑀦𑁆𑀢𑀻𑀢𑀺 𑀆𑀕𑀫𑀦𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀦𑀯𑀲𑁂𑀦 𑀆𑀕𑀦𑁆𑀢𑀼𑀁 𑀦 𑀤𑀲𑁆𑀲𑀦𑁆𑀢𑀺, 𑀦𑀸𑀦𑀼𑀚𑀸𑀦𑀺𑀲𑁆𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀻𑀮𑀸𑀲𑁄𑀓𑀓𑀡𑀺𑀓𑀸𑀭𑀓𑁄𑀯𑀺𑀴𑀸𑀭𑀓𑀼𑀦𑁆𑀤𑀭𑀸𑀚𑀭𑀼𑀓𑁆𑀔𑁂𑀳𑀺 𑀲𑀫𑁆𑀫𑀺𑀲𑁆𑀲𑀢𑀸𑀬 𑀢𑀁 𑀘𑀫𑁆𑀧𑀓𑀯𑀦𑀁 ‘‘𑀦𑀻𑀮𑀸𑀤𑀺𑀧𑀜𑁆𑀘𑀯𑀡𑁆𑀡𑀓𑀼𑀲𑀼𑀫𑀧𑀝𑀺𑀫𑀡𑁆𑀟𑀺𑀢’’𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀘𑀫𑁆𑀧𑀓𑀭𑀼𑀓𑁆𑀔𑀸𑀦𑀁𑀬𑁂𑀯 𑀦𑀻𑀮𑀸𑀤𑀺𑀧𑀜𑁆𑀘𑀓𑀼𑀲𑀼𑀫𑀢𑀸𑀬𑀸𑀢𑀺 𑀯𑀤𑀦𑁆𑀢𑀺. ‘‘𑀪𑀕𑀯𑀸 𑀓𑀼𑀲𑀼𑀫𑀕𑀦𑁆𑀥𑀲𑀼𑀕𑀦𑁆𑀥𑁂 𑀘𑀫𑁆𑀧𑀓𑀯𑀦𑁂 𑀯𑀺𑀳𑀭𑀢𑀻’’𑀢𑀺 𑀇𑀫𑀺𑀦𑀸 𑀦 𑀫𑀸𑀧𑀦𑀓𑀸𑀮𑁂 𑀏𑀯 𑀢𑀲𑁆𑀫𑀺𑀁 𑀦𑀕𑀭𑁂 𑀘𑀫𑁆𑀧𑀓𑀭𑀼𑀓𑁆𑀔𑀸 𑀉𑀲𑁆𑀲𑀦𑁆𑀦𑀸, 𑀅𑀣 𑀔𑁄 𑀅𑀧𑀭𑀪𑀸𑀕𑁂 𑀧𑀻𑀢𑀺 𑀤𑀲𑁆𑀲𑁂𑀢𑀺. 𑀫𑀸𑀧𑀦𑀓𑀸𑀮𑁂 𑀳𑀺 𑀘𑀫𑁆𑀧𑀓𑀸𑀦𑀁 𑀉𑀲𑁆𑀲𑀦𑁆𑀦𑀢𑀸𑀬 𑀲𑀸 𑀦𑀕𑀭𑀻 ‘‘𑀘𑀫𑁆𑀧𑀸’’𑀢𑀺 𑀦𑀸𑀫𑀁 𑀮𑀪𑀺. 𑀇𑀲𑁆𑀲𑀭𑀢𑁆𑀢𑀸𑀢𑀺 𑀅𑀥𑀺𑀧𑀢𑀺𑀪𑀸𑀯𑀢𑁄. 𑀲𑁂𑀦𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑁂𑀦𑀺𑀓𑁄, 𑀲𑁂𑀦𑀺𑀓𑁄 𑀏𑀯 𑀲𑁂𑀦𑀺𑀬𑁄, 𑀅𑀢𑁆𑀣𑀺𑀢𑀸 𑀘𑁂𑀢𑁆𑀣 𑀩𑀳𑀼𑀪𑀸𑀯𑀯𑀺𑀲𑀺𑀝𑁆𑀞𑀸𑀢𑀺 𑀯𑀼𑀢𑁆𑀢𑀁 ‘‘𑀫𑀳𑀢𑀺𑀬𑀸 𑀲𑁂𑀦𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸’’𑀢𑀺.

𑁩𑁦𑁧-𑁨. 𑀲𑀁𑀳𑀢𑀸𑀢𑀺 𑀲𑀦𑁆𑀦𑀺𑀧𑀢𑀺𑀢𑀸, ‘‘𑀲𑀗𑁆𑀖𑀺𑀦𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀲𑀗𑁆𑀖𑀻’’𑀢𑀺 𑀧𑀼𑀣𑀼𑀢𑁆𑀣𑁂 𑀏𑀓𑀯𑀘𑀦𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀢𑁂𑀦𑀸𑀳 ‘‘𑀏𑀢𑁂𑀲’’𑀦𑁆𑀢𑀺. 𑀭𑀸𑀚𑀭𑀸𑀚𑀜𑁆𑀜𑀸𑀤𑀻𑀦𑀁 𑀪𑀡𑁆𑀟𑀥𑀭𑀸 𑀧𑀼𑀭𑀺𑀲𑀸 𑀔𑀢𑀸, 𑀦𑁂𑀲𑀁 ¶ 𑀢𑀸𑀬𑀦𑀢𑁄 𑀔𑀢𑁆𑀢𑀸. 𑀲𑁄 𑀳𑀺 𑀬𑁂𑀳𑀺 𑀬𑀢𑁆𑀣 𑀧𑁂𑀲𑀺𑀢𑁄, 𑀢𑀢𑁆𑀣 𑀢𑁂𑀲𑀁 𑀤𑁄𑀲𑀁 𑀧𑀭𑀺𑀳𑀭𑀦𑁆𑀢𑁄 𑀬𑀼𑀢𑁆𑀢𑀧𑀢𑁆𑀢𑀯𑀲𑁂𑀦 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀓𑀣𑁂𑀢𑀺, 𑀢𑁂𑀦𑀸𑀳 ‘‘𑀧𑀼𑀘𑁆𑀙𑀺𑀢𑀧𑀜𑁆𑀳𑁂 𑀩𑁆𑀬𑀸𑀓𑀭𑀡𑀲𑀫𑀢𑁆𑀣𑁄’’𑀢𑀺. 𑀓𑀼𑀮𑀸𑀧𑀤𑁂𑀲𑀸𑀤𑀺𑀦𑀸 𑀫𑀳𑀢𑀻 𑀫𑀢𑁆𑀢𑀸 𑀏𑀢𑀲𑁆𑀲𑀸𑀢𑀺 𑀫𑀳𑀸𑀫𑀢𑁆𑀢𑁄.

𑀲𑁄𑀡𑀤𑀡𑁆𑀟𑀕𑀼𑀡𑀓𑀣𑀸𑀯𑀡𑁆𑀡𑀦𑀸

𑁩𑁦𑁩. 𑀯𑀺𑀲𑀺𑀝𑁆𑀞𑀁 𑀭𑀚𑁆𑀚𑀁 𑀯𑀺𑀭𑀚𑁆𑀚𑀁, 𑀯𑀺𑀭𑀚𑁆𑀚𑀫𑁂𑀯 𑀯𑁂𑀭𑀚𑁆𑀚𑀁 𑀬𑀣𑀸 ‘‘𑀯𑁂𑀓𑀢𑀁 𑀯𑁂𑀲𑀬’’𑀦𑁆𑀢𑀺, 𑀦𑀸𑀦𑀸𑀯𑀺𑀥𑀁 𑀯𑁂𑀭𑀚𑁆𑀚𑀁 𑀦𑀸𑀦𑀸𑀯𑁂𑀭𑀚𑁆𑀚𑀁, 𑀢𑀢𑁆𑀣 𑀚𑀸𑀢𑀸𑀢𑀺𑀆𑀤𑀺𑀦𑀸 𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀉𑀢𑁆𑀢𑀫𑀩𑁆𑀭𑀸𑀳𑁆𑀫𑀡𑁄𑀢𑀺 ¶ 𑀅𑀪𑀺𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀚𑁆𑀚𑀸𑀲𑀫𑁆𑀧𑀢𑁆𑀢𑀺𑀬𑀸 𑀉𑀕𑁆𑀕𑀢𑀢𑀭𑁄, 𑀉𑀴𑀸𑀭𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄. 𑀅𑀲𑀦𑁆𑀦𑀺𑀧𑀸𑀢𑁄𑀢𑀺 𑀮𑀸𑀪𑀫𑀘𑁆𑀙𑀭𑁂𑀦 𑀦𑀺𑀧𑁆𑀧𑀻𑀴𑀺𑀢𑀢𑀸𑀬 𑀅𑀲𑀦𑁆𑀦𑀺𑀧𑀸𑀢𑁄 𑀯𑀺𑀬 𑀪𑀯𑀺𑀲𑁆𑀲𑀢𑀺.

‘‘𑀅𑀗𑁆𑀕𑁂𑀢𑀺 ¶ 𑀕𑀫𑁂𑀢𑀺 𑀜𑀸𑀧𑁂𑀢𑀻𑀢𑀺 𑀅𑀗𑁆𑀕𑀁, 𑀳𑁂𑀢𑀽𑀢𑀺 𑀆𑀳 ‘‘𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦𑀸’’𑀢𑀺. ‘‘𑀉𑀪𑀢𑁄 𑀲𑀼𑀚𑀸𑀢𑁄’’𑀢𑀺 𑀏𑀢𑁆𑀢𑀓𑁂 𑀯𑀼𑀢𑁆𑀢𑁂 𑀬𑁂𑀳𑀺 𑀓𑁂𑀳𑀺𑀘𑀺 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀲𑀼𑀚𑀸𑀢𑀢𑀸 𑀯𑀺𑀜𑁆𑀜𑀸𑀬𑁂𑀬𑁆𑀬. 𑀲𑀼𑀚𑀸𑀢-𑀲𑀤𑁆𑀤𑁄 𑀘 ‘‘𑀲𑀼𑀚𑀸𑀢𑁄 𑀘𑀸𑀭𑀼𑀤𑀲𑁆𑀲𑀦𑁄’’𑀢𑀺𑀆𑀤𑀻𑀲𑀼 (𑀣𑁂𑀭𑀕𑀸. 𑁮𑁧𑁮) 𑀆𑀭𑁄𑀳𑀲𑀫𑁆𑀧𑀢𑁆𑀢𑀺𑀧𑀭𑀺𑀬𑀸𑀬𑁄𑀢𑀺 𑀚𑀸𑀢𑀺𑀯𑀲𑁂𑀦𑁂𑀯 𑀲𑀼𑀚𑀸𑀢𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘𑀸’’𑀢𑀺 𑀯𑀼𑀢𑁆𑀢𑀁. 𑀅𑀦𑁄𑀭𑀲𑀧𑀼𑀢𑁆𑀢𑀯𑀲𑁂𑀦𑀸𑀧𑀺 𑀮𑁄𑀓𑁂 𑀫𑀸𑀢𑀼𑀧𑀺𑀢𑀼𑀲𑀫𑀜𑁆𑀜𑀸 𑀤𑀺𑀲𑁆𑀲𑀢𑀺, 𑀇𑀥 𑀧𑀦𑀲𑁆𑀲 𑀑𑀭𑀲𑀧𑀼𑀢𑁆𑀢𑀯𑀲𑁂𑀦𑁂𑀯 𑀇𑀘𑁆𑀙𑀺𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑁄’’𑀢𑀺 𑀯𑀼𑀢𑁆𑀢𑀁. 𑀕𑀩𑁆𑀪𑀁 𑀕𑀡𑁆𑀳𑀸𑀢𑀺 𑀥𑀸𑀭𑁂𑀢𑀻𑀢𑀺 𑀕𑀳𑀡𑀻, 𑀕𑀩𑁆𑀪𑀸𑀲𑀬𑀲𑀜𑁆𑀜𑀺𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀧𑁆𑀧𑀤𑁂𑀲𑁄. 𑀬𑀣𑀸𑀪𑀼𑀢𑁆𑀢𑀲𑁆𑀲 ¶ 𑀆𑀳𑀸𑀭𑀲𑁆𑀲 𑀯𑀺𑀧𑀸𑀘𑀦𑀯𑀲𑁂𑀦 𑀕𑀡𑁆𑀳𑀦𑀢𑁄 𑀅𑀙𑀟𑁆𑀟𑀦𑀢𑁄 𑀕𑀳𑀡𑀻, 𑀓𑀫𑁆𑀫𑀚𑀢𑁂𑀚𑁄𑀥𑀸𑀢𑀼.

𑀧𑀺𑀢𑀸 𑀘 𑀫𑀸𑀢𑀸 𑀘 𑀧𑀺𑀢𑀭𑁄, 𑀧𑀺𑀢𑀽𑀦𑀁 𑀧𑀺𑀢𑀭𑁄 𑀧𑀺𑀢𑀸𑀫𑀳𑀸, 𑀢𑁂𑀲𑀁 𑀬𑀼𑀕𑁄 𑀤𑁆𑀯𑀦𑁆𑀤𑁄 𑀧𑀺𑀢𑀸𑀫𑀳𑀬𑀼𑀕𑁄, 𑀢𑀲𑁆𑀫𑀸, 𑀬𑀸𑀯 𑀲𑀢𑁆𑀢𑀫𑀸 𑀧𑀺𑀢𑀸𑀫𑀳𑀬𑀼𑀕𑀸 𑀧𑀺𑀢𑀸𑀫𑀳𑀤𑁆𑀯𑀦𑁆𑀤𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀜𑁆𑀳𑀺 𑀧𑀺𑀢𑀸𑀫𑀳𑀕𑁆𑀕𑀳𑀡𑁂𑀦𑁂𑀯 𑀫𑀸𑀢𑀸𑀫𑀳𑁄𑀧𑀺 𑀕𑀳𑀺𑀢𑁄𑀢𑀺. 𑀲𑁄 𑀅𑀝𑁆𑀞𑀓𑀣𑀸𑀬𑀁 𑀯𑀺𑀲𑀼𑀁 𑀦 𑀉𑀤𑁆𑀥𑀝𑁄. 𑀬𑀼𑀕-𑀲𑀤𑁆𑀤𑁄 𑀘𑁂𑀢𑁆𑀣 𑀏𑀓𑀲𑁂𑀲𑀦𑀬𑁂𑀦 𑀤𑀝𑁆𑀞𑀩𑁆𑀩𑁄 ‘‘𑀬𑀼𑀕𑁄 𑀘 𑀬𑀼𑀕𑁄 𑀘 𑀬𑀼𑀕𑀸’’𑀢𑀺. 𑀏𑀯𑀜𑁆𑀳𑀺 𑀢𑀢𑁆𑀣 𑀢𑀢𑁆𑀣 𑀤𑁆𑀯𑀦𑁆𑀤𑀁 𑀕𑀳𑀺𑀢𑀫𑁂𑀯 𑀳𑁄𑀢𑀺, 𑀢𑁂𑀦𑀸𑀳 ‘‘𑀢𑀢𑁄 𑀉𑀤𑁆𑀥𑀁 𑀲𑀩𑁆𑀩𑁂𑀧𑀺 𑀧𑀼𑀩𑁆𑀩𑀧𑀼𑀭𑀺𑀲𑀸 𑀧𑀺𑀢𑀸𑀫𑀳𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸’’𑀢𑀺. 𑀧𑀼𑀭𑀺𑀲𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑀯𑀲𑁂𑀦 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀳𑀺 ‘‘𑀫𑀸𑀢𑀺𑀢𑁄’’𑀢𑀺 𑀧𑀸𑀴𑀺𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀅𑀓𑁆𑀔𑀺𑀢𑁆𑀢𑁄𑀢𑀺 𑀅𑀧𑁆𑀧𑀢𑁆𑀢𑀔𑁂𑀧𑁄. 𑀅𑀦𑀯𑀓𑁆𑀔𑀺𑀢𑁆𑀢𑁄𑀢𑀺 𑀲𑀤𑁆𑀥𑀣𑀸𑀮𑀺𑀧𑀸𑀓𑀸𑀤𑀻𑀲𑀼 𑀦 𑀅𑀯𑀓𑁆𑀔𑀺𑀢𑁆𑀢𑁄 𑀦 𑀙𑀟𑁆𑀟𑀺𑀢𑁄. 𑀚𑀸𑀢𑀺𑀯𑀸𑀤𑁂𑀦𑀸𑀢𑀺 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 ‘‘𑀉𑀪𑀢𑁄…𑀧𑁂… 𑀧𑀺𑀢𑀸𑀫𑀳𑀬𑀼𑀕𑀸’’𑀢𑀺 𑀏𑀢𑁂𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀬𑁄𑀦𑀺𑀤𑁄𑀲𑀸𑀪𑀸𑀯𑁄 𑀤𑀲𑁆𑀲𑀺𑀢𑁄 𑀲𑀁𑀲𑀼𑀤𑁆𑀥𑀕𑀳𑀡𑀺𑀓𑀪𑀸𑀯𑀓𑀺𑀢𑁆𑀢𑀦𑀢𑁄, ‘‘𑀅𑀓𑁆𑀔𑀺𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑀓𑀺𑀭𑀺𑀬𑀸𑀧𑀭𑀸𑀥𑀸𑀪𑀸𑀯𑁄. 𑀓𑀺𑀭𑀺𑀬𑀸𑀧𑀭𑀸𑀥𑁂𑀦 𑀳𑀺 𑀲𑀢𑁆𑀢𑀸 𑀔𑁂𑀧𑀁 𑀧𑀸𑀧𑀼𑀡𑀦𑁆𑀢𑀺. ‘‘𑀅𑀦𑀼𑀧𑀓𑁆𑀓𑀼𑀝𑁆𑀞𑁄’’𑀢𑀺 𑀇𑀫𑀺𑀦𑀸 𑀅𑀬𑀼𑀢𑁆𑀢𑀲𑀁𑀲𑀕𑁆𑀕𑀸𑀪𑀸𑀯𑁄. 𑀅𑀬𑀼𑀢𑁆𑀢𑀲𑀁𑀲𑀕𑁆𑀕𑀫𑁆𑀧𑀺 𑀳𑀺 𑀧𑀝𑀺𑀘𑁆𑀘 𑀲𑀢𑁆𑀢𑀸 𑀅𑀓𑁆𑀓𑁄𑀲𑀁 𑀮𑀪𑀦𑁆𑀢𑀺.

𑀇𑀲𑁆𑀲𑀭𑁄𑀢𑀺 𑀆𑀥𑀺𑀧𑀢𑁂𑀬𑁆𑀬𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀩𑀮𑁂𑀦 𑀈𑀲𑀦𑀲𑀻𑀮𑁄, 𑀲𑀸 𑀧𑀦𑀲𑁆𑀲 𑀇𑀲𑁆𑀲𑀭𑀢𑀸 𑀯𑀺𑀪𑀯𑀲𑀫𑁆𑀧𑀢𑁆𑀢𑀺𑀧𑀘𑁆𑀘𑀬𑀸 𑀧𑀸𑀓𑀝𑀸 𑀚𑀸𑀢𑀸𑀢𑀺 𑀅𑀟𑁆𑀠𑀢𑀸𑀧𑀭𑀺𑀬𑀸𑀬𑀪𑀸𑀯𑁂𑀦𑁂𑀯 𑀯𑀤𑀦𑁆𑀢𑁄 ‘‘𑀅𑀟𑁆𑀠𑁄𑀢𑀺 𑀇𑀲𑁆𑀲𑀭𑁄’’𑀢𑀺 𑀆𑀳. 𑀫𑀳𑀦𑁆𑀢𑀁 𑀥𑀦𑀁 𑀅𑀲𑁆𑀲 𑀪𑀽𑀫𑀺𑀕𑀢𑀜𑁆𑀘𑁂𑀯 𑀯𑁂𑀳𑀸𑀲𑀝𑁆𑀞𑀜𑁆𑀘𑀸𑀢𑀺 𑀫𑀳𑀤𑁆𑀥𑀦𑁄. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀢𑀲𑁆𑀲 ¶ ¶ . 𑀯𑀤𑀦𑁆𑀢𑀺 ‘‘𑀅𑀦𑁆𑀯𑀬𑀢𑁄, 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀅𑀦𑀼𑀧𑀲𑀗𑁆𑀓𑀫𑀦𑀓𑀸𑀭𑀡𑀁 𑀓𑀺𑀢𑁆𑀢𑁂𑀫𑀸’’𑀢𑀺.

𑀅𑀥𑀺𑀓𑀭𑀽𑀧𑁄𑀢𑀺 ¶ 𑀯𑀺𑀲𑀺𑀝𑁆𑀞𑀭𑀽𑀧𑁄 𑀉𑀢𑁆𑀢𑀫𑀲𑀭𑀻𑀭𑁄. 𑀤𑀲𑁆𑀲𑀦𑀁 𑀅𑀭𑀳𑀢𑀻𑀢𑀺 𑀤𑀲𑁆𑀲𑀦𑀻𑀬𑁄, 𑀢𑁂𑀦𑀸𑀳 ‘‘𑀤𑀲𑁆𑀲𑀦𑀬𑁄𑀕𑁆𑀕𑁄’’𑀢𑀺. 𑀧𑀲𑀸𑀤𑀁 𑀆𑀯𑀳𑀢𑀻𑀢𑀺 𑀧𑀸𑀲𑀸𑀤𑀺𑀓𑁄, 𑀢𑁂𑀦𑀸𑀳 ‘‘𑀘𑀺𑀢𑁆𑀢𑀧𑁆𑀧𑀲𑀸𑀤𑀚𑀦𑀦𑀢𑁄’’𑀢𑀺. 𑀯𑀡𑁆𑀡𑀲𑁆𑀲𑀸𑀢𑀺 𑀯𑀡𑁆𑀡𑀥𑀸𑀢𑀼𑀬𑀸. 𑀲𑀭𑀻𑀭𑀦𑁆𑀢𑀺 𑀲𑀦𑁆𑀦𑀺𑀯𑁂𑀲𑀯𑀺𑀲𑀺𑀝𑁆𑀞𑀁 𑀓𑀭𑀘𑀭𑀡𑀕𑀻𑀯𑀸𑀲𑀻𑀲𑀸𑀤𑀺𑀅𑀯𑀬𑀯𑀲𑀫𑀼𑀤𑀸𑀬𑀁, 𑀲𑁄 𑀘 𑀲𑀡𑁆𑀞𑀸𑀦𑀫𑀼𑀔𑁂𑀦 𑀕𑀬𑁆𑀳𑀢𑀻𑀢𑀺 ‘‘𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬𑀸𑀢𑀺…𑀧𑁂… 𑀲𑀫𑁆𑀧𑀢𑁆𑀢𑀺𑀬𑀸 𑀘𑀸’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀯𑀡𑁆𑀡𑁂𑀲𑀼 𑀲𑀼𑀯𑀡𑁆𑀡𑀯𑀡𑁆𑀡𑁄𑀯 𑀉𑀢𑁆𑀢𑀫𑁄𑀢𑀺 𑀯𑀼𑀢𑁆𑀢𑀁 ‘‘𑀲𑁂𑀝𑁆𑀞𑁂𑀦 𑀲𑀼𑀯𑀡𑁆𑀡𑀯𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀢𑀣𑀸 𑀳𑀺 𑀩𑀼𑀤𑁆𑀥𑀸, 𑀘𑀓𑁆𑀓𑀯𑀢𑁆𑀢𑀺𑀦𑁄 𑀘 𑀲𑀼𑀯𑀡𑁆𑀡𑀯𑀡𑁆𑀡𑀸𑀯 𑀳𑁄𑀦𑁆𑀢𑀺. 𑀩𑁆𑀭𑀳𑁆𑀫𑀯𑀘𑁆𑀙𑀲𑀻𑀢𑀺 𑀉𑀢𑁆𑀢𑀫𑀲𑀭𑀻𑀭𑀸𑀪𑁄, 𑀲𑀼𑀯𑀡𑁆𑀡𑀸𑀪𑁄 𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀇𑀫𑀫𑁂𑀯 𑀳𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀲𑀭𑀻𑀭𑀲𑀤𑀺𑀲𑁂𑀦𑁂𑀯 𑀲𑀭𑀻𑀭𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀯𑀼𑀢𑁆𑀢𑀁, 𑀦 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑀢𑀁. 𑀅𑀔𑀼𑀤𑁆𑀤𑀸𑀯𑀓𑀸𑀲𑁄 𑀤𑀲𑁆𑀲𑀦𑀸𑀬𑀸𑀢𑀺 𑀆𑀭𑁄𑀳𑀧𑀭𑀺𑀡𑀸𑀳𑀲𑀫𑁆𑀧𑀢𑁆𑀢𑀺𑀬𑀸, 𑀅𑀯𑀬𑀯𑀧𑀸𑀭𑀺𑀧𑀽𑀭𑀺𑀬𑀸 𑀘 𑀤𑀲𑁆𑀲𑀦𑀸𑀬 𑀑𑀓𑀸𑀲𑁄 𑀦 𑀔𑀼𑀤𑁆𑀤𑀓𑁄, 𑀢𑁂𑀦𑀸𑀳 ‘‘𑀲𑀩𑁆𑀩𑀸𑀦𑁂𑀯𑀸’’𑀢𑀺𑀆𑀤𑀺.

𑀬𑀫𑀦𑀺𑀬𑀫𑀮𑀓𑁆𑀔𑀡𑀁 𑀲𑀻𑀮𑀫𑀲𑁆𑀲 𑀅𑀢𑁆𑀣𑀻𑀢𑀺 𑀲𑀻𑀮𑀯𑀸. 𑀢𑀁 𑀧𑀦𑀲𑁆𑀲 𑀭𑀢𑁆𑀢𑀜𑁆𑀜𑀼𑀢𑀸𑀬 𑀯𑀼𑀤𑁆𑀥𑀁 𑀯𑀟𑁆𑀠𑀺𑀢𑀁 𑀅𑀢𑁆𑀣𑀻𑀢𑀺 𑀯𑀼𑀤𑁆𑀥𑀲𑀻𑀮𑀻. 𑀢𑁂𑀦 𑀘 𑀲𑀩𑁆𑀩𑀤𑀸 𑀲𑀫𑁆𑀫𑀸𑀬𑁄𑀕𑀢𑁄 𑀯𑀼𑀤𑁆𑀥𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑀩𑁆𑀩𑀫𑁂𑀢𑀁 𑀧𑀜𑁆𑀘𑀲𑀻𑀮𑀫𑀢𑁆𑀢𑀫𑁂𑀯 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺 𑀢𑀢𑁄 𑀧𑀭𑀁 𑀲𑀻𑀮𑀲𑁆𑀲 𑀢𑀢𑁆𑀣 𑀅𑀪𑀸𑀯𑀢𑁄, 𑀢𑁂𑀲𑀜𑁆𑀘 𑀅𑀚𑀸𑀦𑀦𑀢𑁄.

𑀞𑀸𑀦𑀓𑀭𑀡𑀲𑀫𑁆𑀧𑀢𑁆𑀢𑀺𑀬𑀸, 𑀲𑀺𑀓𑁆𑀔𑀸𑀲𑀫𑁆𑀧𑀢𑁆𑀢𑀺𑀬𑀸 𑀘 𑀓𑀢𑁆𑀣𑀘𑀺𑀧𑀺 𑀅𑀦𑀽𑀦𑀢𑀸𑀬 𑀧𑀭𑀺𑀫𑀡𑁆𑀟𑀮𑀧𑀤𑀸𑀦𑀺 𑀩𑁆𑀬𑀜𑁆𑀚𑀦𑀸𑀦𑀺 𑀅𑀓𑁆𑀔𑀭𑀸𑀦𑀺 𑀏𑀢𑀺𑀲𑁆𑀲𑀸𑀢𑀺 𑀧𑀭𑀺𑀫𑀡𑁆𑀟𑀮𑀧𑀤𑀩𑁆𑀬𑀜𑁆𑀚𑀦𑀸. 𑀅𑀣 𑀯𑀸 𑀧𑀚𑁆𑀚𑀢𑀺 𑀅𑀢𑁆𑀣𑁄 ¶ 𑀏𑀢𑁂𑀦𑀸𑀢𑀺 𑀧𑀤𑀁, 𑀦𑀸𑀫𑀸𑀤𑀺. 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀩𑁆𑀬𑀜𑁆𑀚𑁂𑀢𑀻𑀢𑀺 𑀩𑁆𑀬𑀜𑁆𑀚𑀦𑀁, 𑀯𑀸𑀓𑁆𑀬𑀁. 𑀢𑁂𑀲𑀁 𑀧𑀭𑀺𑀧𑀼𑀡𑁆𑀡𑀢𑀸𑀬 𑀧𑀭𑀺𑀫𑀡𑁆𑀟𑀮𑀧𑀤𑀩𑁆𑀬𑀜𑁆𑀚𑀦𑀸. 𑀅𑀢𑁆𑀣𑀜𑀸𑀧𑀦𑁂 𑀲𑀸𑀥𑀦𑀢𑀸𑀬 𑀯𑀸𑀘𑀸𑀯 𑀓𑀭𑀡𑀦𑁆𑀢𑀺 𑀯𑀸𑀓𑁆𑀓𑀭𑀡𑀁, 𑀉𑀤𑀸𑀳𑀸𑀭𑀖𑁄𑀲𑁄. 𑀕𑀼𑀡𑀧𑀭𑀺𑀧𑀼𑀡𑁆𑀡𑀪𑀸𑀯𑁂𑀦 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲, 𑀢𑁂𑀦 𑀯𑀸 𑀪𑀸𑀲𑀺𑀢𑀩𑁆𑀩𑀅𑀢𑁆𑀣𑀲𑁆𑀲. 𑀧𑀽𑀭𑁂 𑀧𑀼𑀡𑁆𑀡𑀪𑀸𑀯𑁂. 𑀧𑀽𑀭𑁂𑀢𑀺 𑀘 𑀧𑀼𑀭𑀺𑀫𑀲𑁆𑀫𑀺𑀁 𑀅𑀢𑁆𑀣𑁂 𑀆𑀥𑀸𑀭𑁂 𑀪𑀼𑀫𑁆𑀫𑀁, 𑀤𑀼𑀢𑀺𑀬𑀲𑁆𑀫𑀺𑀁 𑀯𑀺𑀲𑀬𑁂. ‘‘𑀲𑀼𑀔𑀼𑀫𑀸𑀮𑀢𑁆𑀢𑀦𑁂𑀦𑀸’’𑀢𑀺 𑀇𑀫𑀺𑀦𑀸 𑀢𑀲𑁆𑀲𑀸 𑀯𑀸𑀘𑀸𑀬 𑀫𑀼𑀤𑀼𑀲𑀡𑁆𑀳𑀪𑀸𑀯𑀫𑀸𑀳. 𑀅𑀧𑀮𑀺𑀩𑀼𑀤𑁆𑀥𑀸𑀬 𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀻𑀳𑀺. 𑀲𑀦𑁆𑀤𑀺𑀝𑁆𑀞𑀁 𑀲𑀩𑁆𑀩𑀁 𑀤𑀲𑁆𑀲𑁂𑀢𑁆𑀯𑀸 𑀯𑀺𑀬 𑀏𑀓𑀤𑁂𑀲𑀁 𑀓𑀣𑀦𑀁. 𑀯𑀺𑀮𑀫𑁆𑀩𑀺𑀢𑀁 𑀲𑀡𑀺𑀓𑀁 𑀘𑀺𑀭𑀸𑀬𑀺𑀢𑁆𑀯𑀸 𑀓𑀣𑀦𑀁. ‘‘𑀲𑀦𑁆𑀤𑀺𑀤𑁆𑀥𑀯𑀺𑀮𑀫𑁆𑀩𑀺𑀢𑀸𑀤𑀻’’𑀢𑀺 𑀯𑀸 𑀧𑀸𑀞𑁄. 𑀢𑀢𑁆𑀣 𑀲𑀦𑁆𑀤𑀺𑀤𑁆𑀥𑀁 𑀲𑀦𑁆𑀤𑁂𑀳𑀚𑀦𑀓𑀁. 𑀆𑀤𑀺-𑀲𑀤𑁆𑀤𑁂𑀦 𑀤𑀼𑀓𑁆𑀔𑀮𑀺𑀢𑀸𑀦𑀼𑀓𑀟𑁆𑀠𑀺𑀢𑀸𑀤𑀺𑀁 ¶ 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀧𑀸𑀓𑀝𑀁 𑀓𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀢𑀲𑁆𑀲𑀸 𑀯𑀸𑀘𑀸𑀬 𑀅𑀢𑁆𑀣𑀧𑀸𑀭𑀺𑀧𑀽𑀭𑀺𑀁 𑀯𑀤𑀦𑁆𑀢𑀺.

‘‘𑀚𑀺𑀡𑁆𑀡𑁄’’𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺, 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀸𑀦𑀺 𑀘. 𑀤𑀼𑀢𑀺𑀬𑀦𑀬𑁂 𑀧𑀦 𑀚𑀺𑀡𑁆𑀡𑁄𑀢𑀺 𑀦𑀸𑀬𑀁 𑀚𑀺𑀡𑁆𑀡𑀢𑀸 𑀯𑀬𑁄𑀫𑀢𑁆𑀢𑁂𑀦, 𑀅𑀣 𑀔𑁄 𑀓𑀼𑀮𑀧𑀭𑀺𑀯𑀝𑁆𑀝𑁂𑀦 𑀧𑀼𑀭𑀸𑀡𑀢𑀸𑀢𑀺 𑀆𑀳 ‘‘𑀚𑀺𑀡𑁆𑀡𑁄𑀢𑀺 𑀧𑁄𑀭𑀸𑀡𑁄’’𑀢𑀺𑀆𑀤𑀺, 𑀢𑁂𑀦 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀓𑀼𑀮𑀯𑀲𑁂𑀦 𑀉𑀤𑀺𑀢𑁄𑀤𑀺𑀢𑀪𑀸𑀯𑀫𑀸𑀳. 𑀚𑀸𑀢𑀺𑀯𑀼𑀤𑁆𑀥𑀺𑀬𑀸 ‘‘𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸, 𑀕𑀼𑀡𑀯𑀼𑀤𑁆𑀥𑀺𑀬𑀸 𑀢𑀢𑁄 𑀲𑀸𑀢𑀺𑀲𑀬𑀢𑁆𑀢𑀸 𑀘 ‘‘𑀯𑀼𑀤𑁆𑀥𑁄𑀢𑀺 𑀲𑀻𑀮𑀸𑀘𑀸𑀭𑀸𑀤𑀺𑀕𑀼𑀡𑀯𑀼𑀤𑁆𑀥𑀺𑀬𑀸 𑀬𑀼𑀢𑁆𑀢𑁄’’𑀢𑀺 𑀆𑀳. 𑀢𑀣𑀸 𑀚𑀸𑀢𑀺𑀫𑀳𑀮𑁆𑀮𑀓𑀢𑀸𑀬 ¶ 𑀯𑀓𑁆𑀔𑀫𑀸𑀦𑀢𑁆𑀢𑀸 ‘‘𑀫𑀳𑀮𑁆𑀮𑀓𑁄’’𑀢𑀺 ¶ 𑀧𑀤𑁂𑀦 𑀯𑀺𑀪𑀯𑀫𑀳𑀢𑁆𑀢𑀢𑀸 𑀬𑁄𑀚𑀺𑀢𑀸. 𑀫𑀕𑁆𑀕𑀧𑀝𑀺𑀧𑀦𑁆𑀦𑁄𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀝𑀺𑀧𑀢𑁆𑀢𑀺𑀯𑀻𑀣𑀺𑀁 𑀉𑀧𑀕𑀢𑁄 𑀢𑀁 𑀅𑀯𑁄𑀓𑁆𑀓𑀫𑁆𑀫 𑀘𑀭𑀡𑀢𑁄. 𑀅𑀦𑁆𑀢𑀺𑀫𑀯𑀬𑀦𑁆𑀢𑀺 𑀧𑀘𑁆𑀙𑀺𑀫𑀯𑀬𑀁.

𑀩𑀼𑀤𑁆𑀥𑀕𑀼𑀡𑀓𑀣𑀸𑀯𑀡𑁆𑀡𑀦𑀸

𑁩𑁦𑁪. 𑀢𑀸𑀤𑀺𑀲𑁂𑀳𑀺 𑀫𑀳𑀸𑀦𑀼𑀪𑀸𑀯𑁂𑀳𑀺 𑀲𑀤𑁆𑀥𑀺𑀁 𑀬𑀼𑀕𑀕𑁆𑀕𑀸𑀳𑀯𑀲𑁂𑀦𑀧𑀺 𑀤𑀳𑀦𑀁 𑀦 𑀫𑀸𑀤𑀺𑀲𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀁, 𑀓𑀼𑀢𑁄 𑀧𑀦 𑀉𑀓𑁆𑀓𑀁𑀲𑀦𑀦𑁆𑀢𑀺 𑀇𑀤𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦 𑀬𑀼𑀢𑁆𑀢𑀭𑀽𑀧𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦 𑀔𑁄 𑀧𑀦 𑀫𑁂𑀢𑀁 𑀬𑀼𑀢𑁆𑀢’’𑀦𑁆𑀢𑀺𑀆𑀤𑀺. 𑀲𑀤𑀺𑀲𑀸𑀢𑀺 𑀏𑀓𑀤𑁂𑀲𑁂𑀦 𑀲𑀤𑀺𑀲𑀸. 𑀦 𑀳𑀺 𑀩𑀼𑀤𑁆𑀥𑀸𑀦𑀁 𑀕𑀼𑀡𑁂𑀳𑀺 𑀲𑀩𑁆𑀩𑀣𑀸 𑀲𑀤𑀺𑀲𑀸 𑀓𑁂𑀘𑀺𑀧𑀺 𑀕𑀼𑀡𑀸 𑀅𑀜𑁆𑀜𑁂𑀲𑀼 𑀮𑀩𑁆𑀪𑀦𑁆𑀢𑀺. 𑀇𑀢𑀭𑁂𑀢𑀺 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀅𑀲𑀤𑀺𑀲𑀕𑀼𑀡𑁂. 𑀇𑀤𑀦𑁆𑀢𑀺 𑀇𑀤𑀁 𑀅𑀢𑁆𑀣𑀚𑀸𑀢𑀁. 𑀕𑁄𑀧𑀤𑀓𑀦𑁆𑀢𑀺 𑀕𑀸𑀯𑀺𑀬𑀸 𑀧𑀤𑁂 𑀞𑀺𑀢𑀉𑀤𑀓𑀁.

𑀲𑀝𑁆𑀞𑀺𑀓𑀼𑀮𑀲𑀢𑀲𑀳𑀲𑁆𑀲𑀦𑁆𑀢𑀺 𑀲𑀝𑁆𑀞𑀺𑀲𑀳𑀲𑁆𑀲𑀸𑀥𑀺𑀓𑀁 𑀓𑀼𑀮𑀲𑀢𑀲𑀳𑀲𑁆𑀲𑀁 𑀓𑀼𑀮𑀧𑀭𑀺𑀬𑀸𑀬𑁂𑀦𑀸𑀢𑀺 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀓𑀼𑀮𑀸𑀦𑀼𑀓𑁆𑀓𑀫𑁂𑀦 𑀆𑀕𑀢𑀁. 𑀢𑁂𑀲𑀼𑀧𑀻𑀢𑀺 𑀢𑁂𑀲𑀼𑀧𑀺 𑀘𑀢𑀽𑀲𑀼 𑀦𑀺𑀥𑀻𑀲𑀼. 𑀕𑀳𑀺𑀢𑀕𑀳𑀺𑀢𑀦𑁆𑀢𑀺 𑀕𑀳𑀺𑀢𑀁 𑀕𑀳𑀺𑀢𑀁 𑀞𑀸𑀦𑀁 𑀧𑀽𑀭𑀢𑀺𑀬𑁂𑀯 𑀥𑀦𑁂𑀦 𑀧𑀝𑀺𑀧𑀸𑀓𑀢𑀺𑀓𑀫𑁂𑀯 𑀳𑁄𑀢𑀺. 𑀅𑀧𑀭𑀺𑀫𑀸𑀡𑁄𑀬𑁂𑀯𑀸𑀢𑀺 ‘‘𑀏𑀢𑁆𑀢𑀓𑁄 𑀏𑀲𑁄’’𑀢𑀺 𑀓𑁂𑀦𑀘𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀧𑀭𑀺𑀘𑁆𑀙𑀺𑀦𑁆𑀦𑁄 𑀏𑀯.

𑀢𑀢𑁆𑀣𑀸𑀢𑀺 𑀫𑀜𑁆𑀘𑀓𑁂. 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀻𑀢𑀺 𑀬𑀣𑀸 𑀭𑀸𑀳𑀼 𑀅𑀲𑀼𑀭𑀺𑀦𑁆𑀤𑁄 𑀆𑀬𑀸𑀫𑀢𑁄, 𑀯𑀺𑀢𑁆𑀣𑀸𑀭𑀢𑁄 𑀉𑀩𑁆𑀩𑁂𑀥𑀢𑁄 𑀘 𑀪𑀕𑀯𑀢𑁄 𑀭𑀽𑀧𑀓𑀸𑀬𑀲𑁆𑀲 𑀧𑀭𑀺𑀘𑁆𑀙𑁂𑀤𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀣𑀸 𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑁄 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺.

𑀓𑀺𑀮𑁂𑀲𑁂𑀳𑀺 ¶ 𑀆𑀭𑀓𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀝𑁆𑀞𑁂𑀦 𑀅𑀭𑀺𑀬𑀦𑁆𑀢𑀺 𑀆𑀳 ‘‘𑀅𑀭𑀺𑀬𑀁 𑀉𑀢𑁆𑀢𑀫𑀁 𑀧𑀭𑀺𑀲𑀼𑀤𑁆𑀥’’𑀦𑁆𑀢𑀺. 𑀅𑀦𑀯𑀚𑁆𑀚𑀝𑁆𑀞𑁂𑀦 𑀓𑀼𑀲𑀮𑀁, 𑀦 𑀲𑀼𑀔𑀯𑀺𑀧𑀸𑀓𑀝𑁆𑀞𑁂𑀦. 𑀓𑀢𑁆𑀣𑀘𑀺 ¶ 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀺, 𑀓𑀢𑁆𑀣𑀘𑀺 𑀅𑀧𑀭𑀺𑀫𑀸𑀡𑀸𑀧𑀺 𑀤𑁂𑀯𑀫𑀦𑀼𑀲𑁆𑀲𑀸 𑀬𑀲𑁆𑀫𑀸 𑀘𑀢𑀼𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀅𑀲𑀗𑁆𑀔𑁆𑀬𑁂𑀬𑁆𑀬𑀸 𑀅𑀧𑀭𑀺𑀫𑁂𑀬𑁆𑀬𑀸 𑀤𑁂𑀯𑀫𑀦𑀼𑀲𑁆𑀲𑀸 𑀫𑀕𑁆𑀕𑀨𑀮𑀸𑀫𑀢𑀁 𑀧𑀺𑀯𑀺𑀁𑀲𑀼, 𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀤𑀺𑀧𑀭𑀺𑀫𑀸𑀡𑁂𑀦𑀧𑀺 𑀩𑀳𑀽 𑀏𑀯, 𑀢𑀲𑁆𑀫𑀸 𑀅𑀦𑀼𑀢𑁆𑀢𑀭𑀸𑀘𑀸𑀭𑀲𑀺𑀓𑁆𑀔𑀸𑀧𑀦𑀯𑀲𑁂𑀦 𑀪𑀕𑀯𑀸 𑀩𑀳𑀽𑀦𑀁 𑀆𑀘𑀭𑀺𑀬𑁄. 𑀢𑁂𑀢𑀺 𑀓𑀸𑀫𑀭𑀸𑀕𑀢𑁄 𑀅𑀜𑁆𑀜𑁂 𑀪𑀕𑀯𑀢𑁄 𑀧𑀳𑀻𑀦𑀓𑀺𑀮𑁂𑀲𑁂. 𑀓𑁂𑀴𑀦𑀸𑀢𑀺 𑀓𑁂𑀴𑀸𑀬𑀦𑀸 𑀥𑀦𑀸𑀬𑀦𑀸.

𑀅𑀧𑀸𑀧𑀧𑀼𑀭𑁂𑀓𑁆𑀔𑀸𑀭𑁄𑀢𑀺 𑀅𑀧𑀸𑀧𑁂 𑀧𑀼𑀭𑁂 𑀓𑀭𑁄𑀢𑀺, 𑀦 𑀯𑀸 𑀧𑀸𑀧𑀁 𑀧𑀼𑀭𑀢𑁄 𑀓𑀭𑁄𑀢𑀻𑀢𑀺𑀧𑀺 𑀅𑀧𑀸𑀧𑀧𑀼𑀭𑁂𑀓𑁆𑀔𑀸𑀭𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀸𑀧𑁂 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀧𑀸𑀧𑁂𑀢𑀺 𑀧𑀸𑀧𑀧𑀝𑀺𑀧𑀓𑁆𑀔𑁂, 𑀧𑀸𑀧𑀭𑀳𑀺𑀢𑁂 𑀘. 𑀩𑁆𑀭𑀳𑁆𑀫𑀦𑀺 𑀲𑁂𑀝𑁆𑀞𑁂 𑀩𑀼𑀤𑁆𑀥𑁂 𑀪𑀕𑀯𑀢𑀺 𑀪𑀯𑀸 𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀯𑀲𑁂𑀦 𑀅𑀭𑀺𑀬𑀸𑀬 ¶ 𑀚𑀸𑀢𑀺𑀬𑀸 𑀚𑀸𑀢𑀢𑁆𑀢𑀸, 𑀩𑁆𑀭𑀳𑁆𑀫𑀼𑀦𑁄 𑀯𑀸 𑀪𑀕𑀯𑀢𑁄 𑀳𑀺𑀢𑀸 𑀕𑀭𑀼𑀓𑀭𑀡𑀸𑀤𑀺𑀦𑀸, 𑀬𑀣𑀸𑀦𑀼𑀲𑀺𑀝𑁆𑀞𑀧𑀝𑀺𑀧𑀢𑁆𑀢𑀺𑀬𑀸 𑀘, 𑀩𑁆𑀭𑀳𑁆𑀫𑀁 𑀯𑀸 𑀲𑁂𑀝𑁆𑀞𑀁 𑀅𑀭𑀺𑀬𑀫𑀕𑁆𑀕𑀁 𑀚𑀸𑀦𑀸𑀢𑀻𑀢𑀺 𑀩𑁆𑀭𑀳𑁆𑀫𑀜𑁆𑀜𑀸, 𑀅𑀭𑀺𑀬𑀲𑀸𑀯𑀓𑀲𑀗𑁆𑀔𑀸𑀢𑀸 𑀧𑀚𑀸, 𑀢𑁂𑀦𑀸𑀳 ‘‘𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺𑀆𑀤𑀺. 𑀧𑀓𑀢𑀺𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀯𑀲𑁂𑀦𑀸𑀧𑀺 ‘‘𑀩𑁆𑀭𑀳𑁆𑀫𑀜𑁆𑀜𑀸𑀬 𑀧𑀚𑀸𑀬𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀺𑀭𑁄𑀭𑀝𑁆𑀞𑀸 𑀢𑀺𑀭𑁄𑀚𑀦𑀧𑀤𑀸𑀢𑀺 𑀏𑀢𑁆𑀣 𑀭𑀚𑁆𑀚𑀁 𑀭𑀝𑁆𑀞𑀁, 𑀭𑀸𑀚𑀦𑁆𑀢𑀺 𑀭𑀸𑀚𑀸𑀦𑁄 𑀏𑀢𑁂𑀦𑀸𑀢𑀺, 𑀢𑀤𑁂𑀓𑀤𑁂𑀲𑀪𑀽𑀢𑀸 𑀧𑀤𑁂𑀲𑀸 𑀧𑀦 𑀚𑀦𑀧𑀤𑁄,𑀚𑀦𑀸 𑀧𑀚𑁆𑀚𑀦𑁆𑀢𑀺 𑀏𑀢𑁆𑀣 𑀲𑀼𑀔𑀚𑀻𑀯𑀺𑀓𑀁 𑀧𑀸𑀧𑀼𑀡𑀦𑁆𑀢𑀻𑀢𑀺. 𑀧𑀼𑀘𑁆𑀙𑀸𑀬 𑀯𑀸 𑀤𑁄𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑀫𑀢𑁆𑀣𑀢𑀦𑁆𑀢𑀺 𑀅𑀢𑁆𑀢𑀦𑁄 𑀅𑀲𑀫𑀢𑁆𑀣𑀢𑀁. 𑀪𑀕𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀺 𑀢𑁂𑀲𑀁 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁, 𑀜𑀸𑀡𑀧𑀭𑀺𑀧𑀸𑀓𑀁, 𑀘𑀺𑀢𑁆𑀢𑀸𑀘𑀸𑀭𑀜𑁆𑀘 𑀜𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

‘‘𑀏𑀳𑀺 ¶ 𑀲𑁆𑀯𑀸𑀕𑀢𑀯𑀸𑀤𑀻’’𑀢𑀺 𑀇𑀫𑀺𑀦𑀸 𑀲𑀼𑀔𑀲𑀫𑁆𑀪𑀸𑀲𑀧𑀼𑀩𑁆𑀩𑀓𑀁 𑀧𑀺𑀬𑀯𑀸𑀤𑀺𑀢𑀁 𑀤𑀲𑁆𑀲𑁂𑀢𑀺, ‘‘𑀲𑀔𑀺𑀮𑁄’’𑀢𑀺 𑀇𑀫𑀺𑀦𑀸 𑀲𑀡𑁆𑀳𑀯𑀸𑀘𑀢𑀁, ‘‘𑀲𑀫𑁆𑀫𑁄𑀤𑀓𑁄’’𑀢𑀺 𑀇𑀫𑀺𑀦𑀸 𑀧𑀝𑀺𑀲𑀦𑁆𑀥𑀸𑀭𑀓𑀼𑀲𑀮𑀢𑀁, ‘‘𑀅𑀪𑀸𑀓𑀼𑀝𑀺𑀓𑁄’’𑀢𑀺 𑀇𑀫𑀺𑀦𑀸 𑀲𑀩𑁆𑀩𑀢𑁆𑀣𑁂𑀯 𑀯𑀺𑀧𑁆𑀧𑀲𑀦𑁆𑀦𑀫𑀼𑀔𑀢𑀁, ‘‘𑀉𑀢𑁆𑀢𑀸𑀦𑀫𑀼𑀔𑁄’’𑀢𑀺 𑀇𑀫𑀺𑀦𑀸 𑀲𑀼𑀔𑀸𑀮𑀸𑀧𑀢𑀁, ‘‘𑀧𑀼𑀩𑁆𑀩𑀪𑀸𑀲𑀻’’𑀢𑀺 𑀇𑀫𑀺𑀦𑀸 𑀥𑀫𑁆𑀫𑀸𑀦𑀼𑀕𑁆𑀕𑀳𑀲𑁆𑀲 𑀑𑀓𑀸𑀲𑀓𑀭𑀡𑀢𑁄 𑀳𑀺𑀢𑀚𑁆𑀛𑀸𑀲𑀬𑀢𑀁 𑀪𑀕𑀯𑀢𑁄 𑀯𑀺𑀪𑀸𑀯𑁂𑀢𑀺.

𑀬𑀢𑁆𑀣 𑀓𑀺𑀭𑀸𑀢𑀺 𑀓𑀺𑀭-𑀲𑀤𑁆𑀤𑁄 𑀅𑀭𑀼𑀘𑀺𑀲𑀽𑀘𑀦𑀢𑁆𑀣𑁄, 𑀢𑁂𑀦 𑀪𑀕𑀯𑀢𑀸 𑀅𑀥𑀺𑀯𑀼𑀢𑁆𑀣𑀧𑀤𑁂𑀲𑁂 𑀦 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀧𑀤𑁆𑀤𑀯𑀢𑀸, 𑀅𑀣 𑀔𑁄 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀅𑀧𑀺𑀘𑀸’’𑀢𑀺𑀆𑀤𑀺.

𑀅𑀦𑀼𑀲𑀸𑀲𑀺𑀢𑀩𑁆𑀩𑁄𑀢𑀺 ¶ 𑀯𑀺𑀦𑁂𑀬𑁆𑀬𑀚𑀦𑀲𑀫𑀽𑀳𑁄 𑀕𑀬𑁆𑀳𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀺𑀢𑀁 𑀅𑀭𑀺𑀬𑀲𑀗𑁆𑀖𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀲𑀬𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀅𑀦𑀦𑁆𑀢𑀭𑀲𑁆𑀲 𑀯𑀺𑀥𑀺 𑀧𑀝𑀺𑀲𑁂𑀥𑁄 𑀯𑀸𑀢𑀺 𑀓𑀢𑁆𑀯𑀸. ‘‘𑀢𑀸𑀤𑀺𑀲𑁄𑀯𑀸’’𑀢𑀺 𑀇𑀫𑀺𑀦𑀸 ‘‘𑀲𑀬𑀁 𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑀺𑀓𑀧𑁆𑀧𑁄 𑀏𑀯 𑀧𑀘𑁆𑀘𑀸𑀫𑀝𑁆𑀞𑁄𑀢𑀺. ‘‘𑀧𑀼𑀭𑀺𑀫𑀧𑀤𑀲𑁆𑀲𑁂𑀯 𑀯𑀸’’𑀢𑀺 𑀯𑀺𑀓𑀧𑁆𑀧𑀦𑁆𑀢𑀭𑀕𑁆𑀕𑀳𑀡𑀁. 𑀩𑀳𑀽𑀦𑀁 𑀢𑀺𑀢𑁆𑀣𑀓𑀭𑀸𑀦𑀦𑁆𑀢𑀺 𑀧𑀽𑀭𑀡𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀢𑀺𑀢𑁆𑀣𑀓𑀭𑀸𑀦𑀁, 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀓𑀸𑀭𑀡𑁂𑀦𑀸𑀢𑀺 𑀅𑀧𑁆𑀧𑀺𑀘𑁆𑀙𑀲𑀦𑁆𑀢𑀼𑀝𑁆𑀞𑀢𑀸𑀤𑀺𑀲𑀫𑀸𑀭𑁄𑀧𑀦𑀮𑀓𑁆𑀔𑀡𑁂𑀦 𑀓𑀸𑀭𑀡𑁂𑀦. 𑀆𑀕𑀦𑁆𑀢𑀼𑀓𑀸 𑀦𑀯𑀓𑀸𑀢𑀺 𑀅𑀪𑀺𑀦𑀯𑀸 𑀆𑀕𑀦𑁆𑀢𑀼𑀓𑀸 𑀅𑀩𑁆𑀪𑀸𑀕𑀢𑀸. 𑀧𑀭𑀺𑀬𑀸𑀧𑀼𑀡𑀸𑀫𑀻𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀚𑀸𑀦𑀸𑀫𑀺 𑀲𑀓𑁆𑀓𑁄𑀫𑀺, 𑀢𑁂𑀦𑀸𑀳 ‘‘𑀚𑀸𑀦𑀸𑀫𑀻’’𑀢𑀺. ‘‘𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄’’𑀢𑀺 𑀅𑀪𑀽𑀢𑀧𑀭𑀺𑀓𑀧𑁆𑀧𑀦𑀯𑀘𑀦𑀫𑁂𑀢𑀁 𑀢𑀣𑀸 𑀪𑀸𑀲𑀫𑀸𑀦𑀲𑁆𑀲 𑀅𑀪𑀸𑀯𑀢𑁄.

𑁩𑁦𑁫. 𑀅𑀮𑀁-𑀲𑀤𑁆𑀤𑁄 ¶ 𑀅𑀭𑀳𑀢𑁆𑀢𑁄𑀧𑀺 𑀳𑁄𑀢𑀺 ‘‘𑀅𑀮𑀫𑁂𑀯 𑀦𑀺𑀩𑁆𑀩𑀺𑀦𑁆𑀤𑀺𑀢𑀼’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁨𑁪) 𑀯𑀺𑀬𑀸𑀢𑀺 ¶ 𑀆𑀳 ‘‘𑀅𑀮𑀫𑁂𑀯𑀸𑀢𑀺 𑀬𑀼𑀢𑁆𑀢𑀫𑁂𑀯𑀸’’𑀢𑀺. 𑀧𑀼𑀝𑁂𑀦 𑀦𑁂𑀢𑁆𑀯𑀸 𑀅𑀲𑀺𑀢𑀩𑁆𑀩𑀢𑁄 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀧𑀼𑀝𑁄𑀲𑀁 𑀯𑀼𑀘𑁆𑀘𑀢𑀺 𑀧𑀸𑀣𑁂𑀬𑁆𑀬𑀁. 𑀧𑀼𑀝𑀁𑀲𑁂𑀦 𑀧𑀼𑀭𑀺𑀲𑁂𑀦.

𑀲𑁄𑀡𑀤𑀡𑁆𑀟𑀧𑀭𑀺𑀯𑀺𑀢𑀓𑁆𑀓𑀯𑀡𑁆𑀡𑀦𑀸

𑁩𑁦𑁭. 𑀉𑀪𑀢𑁄𑀧𑀓𑁆𑀔𑀺𑀓𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀤𑀺𑀝𑁆𑀞𑀻𑀦𑀁 𑀯𑀲𑁂𑀦 𑀉𑀪𑀬𑀧𑀓𑁆𑀔𑀺𑀓𑀸. 𑀓𑁂𑀭𑀸𑀝𑀺𑀓𑀸𑀢𑀺 𑀲𑀞𑀸.

𑀩𑁆𑀭𑀸𑀳𑁆𑀫𑀡𑀧𑀜𑁆𑀜𑀢𑁆𑀢𑀺𑀯𑀡𑁆𑀡𑀦𑀸

𑁩𑁦𑁯. 𑀯𑀺𑀖𑀸𑀢𑀦𑁆𑀢𑀺 𑀘𑀺𑀢𑁆𑀢𑀤𑀼𑀓𑁆𑀔𑀁.

𑁩𑁧𑁧-𑁩. 𑀲𑀼𑀚𑀦𑁆𑀢𑀺 𑀳𑁄𑀫𑀤𑀩𑁆𑀩𑀺𑀁 𑀧𑀕𑁆𑀕𑀡𑁆𑀳𑀦𑁆𑀢𑁂𑀲𑀽𑀢𑀺 𑀚𑀼𑀳𑀦𑀢𑁆𑀣𑀁 𑀕𑀡𑁆𑀳𑀦𑀓𑁂𑀲𑀼, 𑀇𑀭𑀼𑀩𑁆𑀩𑀺𑀚𑁆𑀚𑁂𑀲𑀽𑀢𑀺 𑀅𑀢𑁆𑀣𑁄. 𑀧𑀞𑀫𑁄 𑀯𑀸𑀢𑀺 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀬𑀚𑀦𑀓𑀺𑀭𑀺𑀬𑀸𑀬𑀁 𑀲𑀩𑁆𑀩𑀧𑀥𑀸𑀦𑁄 𑀯𑀸. 𑀤𑀼𑀢𑀺𑀬𑁄 𑀯𑀸𑀢𑀺 𑀢𑀤𑀦𑀦𑁆𑀢𑀭𑁄 𑀯𑀸. ‘‘𑀲𑀼𑀚’’𑀦𑁆𑀢𑀺 𑀓𑀭𑀡𑁂 𑀏𑀢𑀁 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀼𑀚𑀸𑀬𑀸’’𑀢𑀺. 𑀅𑀕𑁆𑀕𑀺𑀳𑀼𑀢𑁆𑀢𑀧𑀫𑀼𑀔𑀢𑀸𑀬 𑀬𑀜𑁆𑀜𑀲𑁆𑀲 𑀬𑀜𑁆𑀜𑁂 𑀤𑀺𑀬𑁆𑀬𑀫𑀸𑀦𑀁 𑀲𑀼𑀚𑀸𑀫𑀼𑀔𑁂𑀦 𑀤𑀻𑀬𑀢𑀻𑀢𑀺 𑀆𑀳 ‘‘𑀲𑀼𑀚𑀸𑀬 𑀤𑀺𑀬𑁆𑀬𑀫𑀸𑀦’’𑀦𑁆𑀢𑀺. 𑀧𑁄𑀭𑀸𑀡𑀸𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸. 𑀯𑀺𑀲𑁂𑀲𑀢𑁄𑀢𑀺 𑀯𑀺𑀚𑁆𑀚𑀸𑀘𑀭𑀡𑀯𑀺𑀲𑁂𑀲𑀢𑁄, 𑀦 𑀩𑁆𑀭𑀸𑀳𑁆𑀫𑀡𑁂𑀳𑀺 𑀇𑀘𑁆𑀙𑀺𑀢𑀯𑀺𑀚𑁆𑀚𑀸𑀘𑀭𑀡𑀫𑀢𑁆𑀢𑀢𑁄. 𑀉𑀢𑁆𑀢𑀫𑀩𑁆𑀭𑀸𑀳𑁆𑀫𑀡𑀲𑁆𑀲𑀸𑀢𑀺 𑀅𑀦𑀼𑀢𑁆𑀢𑀭𑀤𑀓𑁆𑀔𑀺𑀡𑁂𑀬𑁆𑀬𑀢𑀸𑀬 𑀉𑀓𑁆𑀓𑀝𑁆𑀞𑀩𑁆𑀭𑀸𑀳𑁆𑀫𑀡𑀲𑁆𑀲. 𑀩𑁆𑀭𑀸𑀳𑁆𑀫𑀡𑀲𑀫𑀬𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀲𑀺𑀤𑁆𑀥𑀦𑁆𑀢𑀁. 𑀫𑀸 𑀪𑀺𑀦𑁆𑀤𑀺 𑀫𑀸 𑀯𑀺𑀦𑀸𑀲𑁂𑀲𑀺.

𑁩𑁧𑁬. 𑀲𑀫𑀲𑀫𑁄𑀢𑀺 ¶ 𑀲𑀫𑁄𑀬𑁂𑀯 𑀳𑀼𑀢𑁆𑀯𑀸 𑀲𑀫𑁄. 𑀳𑀻𑀦𑁄𑀧𑀫𑀯𑀲𑁂𑀦𑀧𑀺 𑀲𑀫𑀢𑀸 𑀯𑀼𑀘𑁆𑀘𑀢𑀻𑀢𑀺 𑀢𑀁 𑀦𑀺𑀯𑀢𑁆𑀢𑁂𑀦𑁆𑀢𑁄 ‘‘𑀞𑀧𑁂𑀢𑁆𑀯𑀸 𑀏𑀓𑀤𑁂𑀲𑀲𑀫𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀓𑀼𑀮𑀓𑁄𑀝𑀺𑀧𑀭𑀺𑀤𑀻𑀧𑀦𑀦𑁆𑀢𑀺 𑀓𑀼𑀮𑀆𑀤𑀺𑀧𑀭𑀺𑀤𑀻𑀧𑀦𑀁 𑀅𑀣𑀸𑀧𑀺 ¶ 𑀲𑀺𑀬𑀸𑀢𑀺 𑀅𑀣𑀸𑀧𑀺 𑀢𑀼𑀫𑁆𑀳𑀸𑀓𑀁 𑀏𑀯𑀁 𑀧𑀭𑀺𑀯𑀺𑀢𑀓𑁆𑀓𑁄 𑀲𑀺𑀬𑀸. 𑀩𑁆𑀭𑀸𑀳𑁆𑀫𑀡𑀪𑀸𑀯𑀁 𑀲𑀸𑀥𑁂𑀢𑀺 𑀯𑀡𑁆𑀡𑁄. 𑀫𑀦𑁆𑀢𑀚𑀸𑀢𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀻𑀮𑀫𑁂𑀯 𑀲𑀸𑀥𑁂𑀲𑁆𑀲𑀢𑀺 𑀩𑁆𑀭𑀸𑀳𑁆𑀫𑀡𑀪𑀸𑀯𑀁. 𑀓𑀲𑁆𑀫𑀸𑀢𑀺 𑀘𑁂? 𑀆𑀳 ‘‘𑀢𑀲𑁆𑀫𑀺𑀜𑁆𑀳𑀺𑀲𑁆𑀲𑀸’’𑀢𑀺𑀆𑀤𑀺. 𑀲𑀫𑁆𑀫𑁄𑀳𑀫𑀢𑁆𑀢𑀁 𑀯𑀡𑁆𑀡𑀸𑀤𑀬𑁄𑀢𑀺 𑀯𑀡𑁆𑀡𑀫𑀦𑁆𑀢𑀚𑀸𑀢𑀺𑀬𑁄 𑀳𑀺 𑀩𑁆𑀭𑀸𑀳𑁆𑀫𑀡𑀪𑀸𑀯𑀲𑁆𑀲 𑀅𑀗𑁆𑀕𑀦𑁆𑀢𑀺 𑀲𑀫𑁆𑀫𑁄𑀳𑀫𑀢𑁆𑀢𑀫𑁂𑀢𑀁 𑀅𑀲𑀫𑀯𑁂𑀓𑁆𑀔𑀺𑀢𑀸𑀪𑀺𑀫𑀸𑀦𑀪𑀸𑀯𑀢𑁄.

𑀲𑀻𑀮𑀧𑀜𑁆𑀜𑀸𑀓𑀣𑀸𑀯𑀡𑁆𑀡𑀦𑀸

𑁩𑁧𑁭. 𑀓𑀣𑀺𑀢𑁄 𑀩𑁆𑀭𑀸𑀳𑁆𑀫𑀡𑁂𑀦 𑀧𑀜𑁆𑀳𑁄𑀢𑀺 ‘‘𑀲𑀻𑀮𑀯𑀸 𑀘 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀤𑁆𑀯𑀺𑀦𑁆𑀦𑀫𑁂𑀯 𑀅𑀗𑁆𑀕𑀸𑀦𑀁 𑀯𑀲𑁂𑀦 ¶ 𑀬𑀣𑀸𑀧𑀼𑀘𑁆𑀙𑀺𑀢𑁄 𑀧𑀜𑁆𑀳𑁄 𑀬𑀸𑀣𑀸𑀯𑀢𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀬𑀣𑀸𑀯𑀺𑀲𑁆𑀲𑀚𑁆𑀚𑀺𑀢𑁂 𑀅𑀢𑁆𑀣𑁂. 𑀢𑀲𑁆𑀲𑀸𑀢𑀺 𑀲𑁄𑀡𑀤𑀡𑁆𑀟𑀲𑁆𑀲. 𑀲𑀻𑀮𑀧𑀭𑀺𑀲𑀼𑀤𑁆𑀥𑀸𑀢𑀺 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀩𑀲𑁄 𑀲𑀼𑀤𑁆𑀥𑀸 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀸. 𑀓𑀼𑀢𑁄 𑀤𑀼𑀲𑁆𑀲𑀻𑀮𑁂 𑀧𑀜𑁆𑀜𑀸 𑀅𑀲𑀫𑀸𑀳𑀺𑀢𑀢𑁆𑀢𑀸 𑀢𑀲𑁆𑀲. 𑀚𑀴𑁂 𑀏𑀴𑀫𑀽𑀕𑁂 𑀓𑀼𑀢𑁄 𑀲𑀻𑀮𑀦𑁆𑀢𑀺 𑀚𑀴𑁂 𑀏𑀴𑀫𑀽𑀕𑁂 𑀤𑀼𑀧𑁆𑀧𑀜𑁆𑀜𑁂 𑀓𑀼𑀢𑁄 𑀲𑀻𑀮𑀁 𑀲𑀻𑀮𑀯𑀺𑀪𑀸𑀕𑀲𑁆𑀲, 𑀲𑀻𑀮𑀧𑀭𑀺𑀲𑁄𑀥𑀦𑀽𑀧𑀸𑀬𑀲𑁆𑀲 𑀘 𑀅𑀚𑀸𑀦𑀦𑀢𑁄. 𑀧𑀓𑀝𑁆𑀞𑀁 𑀉𑀓𑁆𑀓𑀝𑁆𑀞𑀁 𑀜𑀸𑀡𑀁 𑀧𑀜𑁆𑀜𑀸𑀡𑀦𑁆𑀢𑀺, 𑀧𑀸𑀓𑀢𑀺𑀓𑀁 𑀜𑀸𑀡𑀁 𑀦𑀺𑀯𑀢𑁆𑀢𑁂𑀢𑀼𑀁 ‘‘𑀧𑀜𑁆𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀢𑀬𑀺𑀤𑀁 𑀧𑀓𑀸𑀭𑁂𑀳𑀺 𑀚𑀸𑀦𑀦𑀢𑁄 𑀧𑀜𑁆𑀜𑀸𑀯𑀸𑀢𑀺 𑀆𑀳 ‘‘𑀧𑀜𑁆𑀜𑀸𑀡𑀦𑁆𑀢𑀺 𑀧𑀜𑁆𑀜𑀸 𑀬𑁂𑀯𑀸’’𑀢𑀺.

𑀲𑀻𑀮𑁂𑀦𑀥𑁄𑀢𑀸𑀢𑀺 𑀲𑀫𑀸𑀥𑀺𑀧𑀤𑀝𑁆𑀞𑀸𑀦𑁂𑀦 𑀲𑀻𑀮𑁂𑀦 𑀲𑀓𑀮𑀲𑀁𑀓𑀺𑀮𑁂𑀲𑀫𑀮𑀯𑀺𑀲𑀼𑀤𑁆𑀥𑀺𑀬𑀸 𑀥𑁄𑀢𑀸 𑀯𑀺𑀲𑀼𑀤𑁆𑀥𑀸, 𑀢𑁂𑀦𑀸𑀳 ‘‘𑀓𑀣𑀁 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀥𑁄𑀯𑀢𑀻𑀢𑀺 𑀲𑀼𑀚𑁆𑀛𑀢𑀺. 𑀫𑀳𑀸𑀲𑀝𑁆𑀞𑀺𑀯𑀲𑁆𑀲𑀢𑁆𑀣𑁂𑀭𑁄 𑀯𑀺𑀬𑀸𑀢𑀺 𑀲𑀝𑁆𑀞𑀺𑀯𑀲𑁆𑀲𑀫𑀳𑀸𑀣𑁂𑀭𑁄 𑀯𑀺𑀬. 𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑀫𑀢𑁆𑀢𑀫𑁆𑀧𑀻𑀢𑀺 𑀏𑀢𑁆𑀣 𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑁄 𑀦𑀸𑀫 𑀬𑀣𑀸𑀉𑀧𑁆𑀧𑀦𑁆𑀦𑀁 𑀯𑁂𑀤𑀦𑀁 𑀲𑀪𑀸𑀯𑀭𑀲𑀢𑁄 𑀉𑀧𑀥𑀸𑀭𑁂𑀢𑁆𑀯𑀸 ‘‘𑀅𑀬𑀁 𑀯𑁂𑀤𑀦𑀸 𑀨𑀲𑁆𑀲𑀁 𑀧𑀝𑀺𑀘𑁆𑀘, 𑀲𑁄 𑀨𑀲𑁆𑀲𑁄 𑀅𑀦𑀺𑀘𑁆𑀘𑁄 𑀤𑀼𑀓𑁆𑀔𑁄 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄’’𑀢𑀺 𑀮𑀓𑁆𑀔𑀡𑀢𑁆𑀢𑀬𑀁 𑀆𑀭𑁄𑀧𑁂𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀺𑀧𑀲𑁆𑀲𑀦𑀸. 𑀏𑀯𑀁 𑀯𑀺𑀧𑀲𑁆𑀲𑀦𑁆𑀢𑁂𑀦 ¶ ‘‘𑀲𑀼𑀔𑁂𑀦 𑀲𑀓𑁆𑀓𑀸 𑀲𑀸 𑀯𑁂𑀤𑀦𑀸 𑀅𑀥𑀺𑀯𑀸𑀲𑁂𑀢𑀼𑀁 ‘‘𑀯𑁂𑀤𑀦𑀸 𑀏𑀯 𑀯𑁂𑀤𑀺𑀬𑀢𑀻’’𑀢𑀺. 𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸𑀢𑀺 𑀬𑀣𑀸𑀉𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀅𑀦𑀦𑀼𑀯𑀢𑁆𑀢𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀯𑀻𑀣𑀺𑀁 𑀧𑀝𑀺𑀧𑀦𑁆𑀦𑀸𑀬 𑀯𑀺𑀧𑀲𑁆𑀲𑀦𑀸𑀬 𑀢𑀁 𑀯𑀺𑀦𑁄𑀤𑁂𑀢𑁆𑀯𑀸. 𑀲𑀁𑀲𑀼𑀫𑀸𑀭𑀧𑀢𑀺𑀢𑁂𑀦𑀸𑀢𑀺 𑀓𑀼𑀫𑁆𑀪𑀻𑀮𑁂𑀦 𑀯𑀺𑀬 𑀪𑀽𑀫𑀺𑀬𑀁 ¶ 𑀉𑀭𑁂𑀦 𑀦𑀺𑀧𑀚𑁆𑀚𑀦𑁂𑀦. 𑀧𑀜𑁆𑀜𑀸𑀬 𑀲𑀻𑀮𑀁 𑀥𑁄𑀯𑀺𑀢𑁆𑀯𑀸𑀢𑀺 𑀅𑀔𑀡𑁆𑀟𑀸𑀤𑀺𑀪𑀸𑀯𑀸𑀧𑀸𑀤𑀦𑁂𑀦 𑀲𑀻𑀮𑀁 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀧𑀜𑁆𑀜𑀸𑀬 𑀲𑀼𑀯𑀺𑀲𑁄𑀥𑀺𑀢𑀁 𑀓𑀢𑁆𑀯𑀸.

𑁩𑁧𑁮. ‘‘𑀓𑀲𑁆𑀫𑀸 𑀆𑀳𑀸’’𑀢𑀺 𑀉𑀧𑀭𑀺𑀤𑁂𑀲𑀦𑀸𑀬 𑀓𑀸𑀭𑀡𑀁 𑀧𑀼𑀘𑁆𑀙𑀢𑀺. 𑀮𑀚𑁆𑀚𑀸 𑀦𑀸𑀫 ‘‘𑀲𑀻𑀮𑀲𑁆𑀲 𑀚𑀸𑀢𑀺𑀬𑀸 𑀘 𑀕𑀼𑀡𑀤𑁄𑀲𑀧𑀓𑀸𑀲𑀦𑁂𑀦 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀧𑀼𑀘𑁆𑀙𑀺𑀢𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑀻’’𑀢𑀺 𑀧𑀭𑀺𑀲𑀸𑀬 𑀧𑀜𑁆𑀜𑀸𑀢𑀢𑀸. 𑀏𑀢𑁆𑀢𑀓𑀧𑀭𑀫𑀸𑀢𑀺 𑀏𑀢𑁆𑀢𑀓𑀉𑀓𑁆𑀓𑀁𑀲𑀓𑁄𑀝𑀺𑀓𑀸 𑀧𑀜𑁆𑀘 𑀲𑀻𑀮𑀸𑀦𑀺, 𑀯𑁂𑀤𑀢𑁆𑀢𑀬𑀯𑀺𑀪𑀸𑀯𑀦𑀁 𑀧𑀜𑁆𑀜𑀜𑁆𑀘 𑀮𑀓𑁆𑀔𑀡𑀸𑀤𑀺𑀢𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀚𑀸𑀦𑀦𑀁 𑀦𑀢𑁆𑀣𑀺, 𑀓𑁂𑀯𑀮𑀁 𑀢𑀢𑁆𑀣 𑀯𑀘𑀻𑀧𑀭𑀫𑀸 𑀫𑀬𑀦𑁆𑀢𑀺 𑀤𑀲𑁆𑀲𑁂𑀢𑀻𑀢𑀺 𑀆𑀳 ‘‘𑀲𑀻𑀮𑀧𑀜𑁆𑀜𑀸𑀡𑀦𑁆𑀢𑀺 𑀯𑀘𑀦𑀫𑁂𑀯 𑀧𑀭𑀫𑀁 𑀅𑀫𑁆𑀳𑀸𑀓’’𑀦𑁆𑀢𑀺. ‘‘𑀅𑀬𑀁 𑀧𑀦 𑀯𑀺𑀲𑁂𑀲𑁄’’𑀢𑀺 𑀇𑀤𑀁 𑀦𑀺𑀬𑁆𑀬𑀸𑀢𑀦𑀸𑀧𑁂𑀓𑁆𑀔𑀁 𑀲𑀻𑀮𑀦𑀺𑀤𑁆𑀤𑁂𑀲𑁂, 𑀢𑁂𑀦𑀸𑀳 ‘‘𑀲𑀻𑀮𑀫𑀺𑀘𑁆𑀘𑁂𑀯 𑀦𑀺𑀬𑁆𑀬𑀸𑀢𑀺𑀢’’𑀦𑁆𑀢𑀺. 𑀲𑀸𑀫𑀜𑁆𑀜𑀨𑀮𑁂 𑀧𑀦 ‘‘𑀲𑀸𑀫𑀜𑁆𑀜𑀨𑀮’’ 𑀫𑀺𑀘𑁆𑀘𑁂𑀯 𑀦𑀺𑀬𑁆𑀬𑀸𑀢𑀺𑀢𑀁, 𑀧𑀜𑁆𑀜𑀸𑀦𑀺𑀤𑁆𑀤𑁂𑀲𑁂 𑀧𑀦 𑀛𑀸𑀦𑀧𑀜𑁆𑀜𑀁 𑀅𑀥𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀯𑀲𑁂𑀦𑁂𑀯 𑀧𑀜𑁆𑀜𑀸𑀦𑀺𑀬𑁆𑀬𑀸𑀢𑀦𑀁 𑀓𑀢𑀁, 𑀢𑁂𑀦𑀸𑀳 ‘‘𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀻’’𑀢𑀺.

𑀲𑁄𑀡𑀤𑀡𑁆𑀟𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸𑀓𑀣𑀸𑀯𑀡𑁆𑀡𑀦𑀸

𑁩𑁨𑁧-𑁨. 𑀦𑀢𑁆𑀢𑀸𑀢𑀺 𑀧𑀼𑀢𑁆𑀢𑀧𑀼𑀢𑁆𑀢𑁄. 𑀅𑀕𑀸𑀭𑀯𑀁 𑀦𑀸𑀫 𑀦𑀢𑁆𑀣𑀺, 𑀦 𑀘𑀸𑀬𑀁 𑀪𑀕𑀯𑀢𑀺 𑀅𑀕𑀸𑀭𑀯𑁂𑀦 ‘‘𑀅𑀳𑀜𑁆𑀘𑁂𑀯 ¶ 𑀔𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳, 𑀅𑀣 𑀔𑁄 𑀅𑀢𑁆𑀢𑀮𑀸𑀪𑀧𑀭𑀺𑀳𑀸𑀦𑀺𑀪𑀬𑁂𑀦. 𑀅𑀬𑀜𑁆𑀳𑀺 𑀬𑀣𑀸 𑀢𑀣𑀸 𑀅𑀢𑁆𑀢𑀦𑁄 𑀫𑀳𑀸𑀚𑀦𑀲𑁆𑀲 𑀲𑀫𑁆𑀪𑀸𑀯𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑁄𑀳𑀜𑁆𑀜𑁂𑀦 ¶ 𑀧𑀭𑁂 𑀯𑀺𑀫𑁆𑀳𑀸𑀧𑁂𑀢𑁆𑀯𑀸 𑀮𑀸𑀪𑀼𑀧𑁆𑀧𑀸𑀤𑀁 𑀦𑀺𑀚𑀺𑀕𑀺𑀲𑀦𑁆𑀢𑁄 𑀯𑀺𑀘𑀭𑀢𑀺, 𑀢𑀲𑁆𑀫𑀸 𑀢𑀣𑀸 𑀅𑀯𑁄𑀘, 𑀢𑁂𑀦𑀸𑀳 ‘‘𑀇𑀫𑀺𑀦𑀸 𑀓𑀺𑀭𑀸’’𑀢𑀺𑀆𑀤𑀺.

𑀢𑀗𑁆𑀔𑀡𑀸𑀦𑀼𑀭𑀽𑀧𑀸𑀬𑀸𑀢𑀺 𑀬𑀸𑀤𑀺𑀲𑀻 𑀢𑀤𑀸 𑀢𑀲𑁆𑀲 𑀅𑀚𑁆𑀛𑀸𑀲𑀬𑀧𑁆𑀧𑀯𑀢𑁆𑀢𑀺, 𑀢𑀤𑀦𑀼𑀭𑀽𑀧𑀸𑀬𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀢𑀤𑀸 𑀢𑀸𑀤𑀺𑀲𑀲𑁆𑀲 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀲𑁆𑀲 𑀅𑀪𑀸𑀯𑀢𑁄 𑀓𑁂𑀯𑀮𑀁 𑀅𑀩𑁆𑀪𑀼𑀤𑀬𑀦𑀺𑀲𑁆𑀲𑀺𑀢𑁄 𑀏𑀯 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄𑀢𑀺 𑀆𑀳 ‘‘𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀫𑀢𑁆𑀣𑀁 𑀲𑀦𑁆𑀤𑀲𑁆𑀲𑁂𑀢𑁆𑀯𑀸’’𑀢𑀺, 𑀧𑀘𑁆𑀘𑀓𑁆𑀔𑀢𑁄 𑀯𑀺𑀪𑀸𑀯𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀼𑀲𑀮𑁂 𑀥𑀫𑁆𑀫𑁂𑀢𑀺 𑀢𑁂𑀪𑀽𑀫𑀓𑁂 𑀓𑀼𑀲𑀮𑁂 𑀥𑀫𑁆𑀫𑁂, ‘‘𑀘𑀢𑀼𑀪𑀽𑀫𑀓𑁂’’𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯, 𑀢𑁂𑀦𑁂𑀯𑀸𑀳 ‘‘𑀆𑀬𑀢𑀺𑀁 𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀯𑀸𑀲𑀦𑀸𑀪𑀸𑀕𑀺𑀬𑀸 𑀯𑀸’’𑀢𑀺. 𑀢𑀢𑁆𑀣𑀸𑀢𑀺 𑀓𑀼𑀲𑀮𑀥𑀫𑁆𑀫𑁂 𑀬𑀣𑀸 𑀲𑀫𑀸𑀤𑀧𑀺𑀢𑁂. 𑀦𑀦𑁆𑀢𑀺 𑀩𑁆𑀭𑀸𑀳𑁆𑀫𑀡𑀁 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸𑀢𑀺 𑀲𑀫𑁆𑀫𑀤𑁂𑀯 𑀉𑀧𑀭𑀽𑀧𑀭𑀺 𑀦𑀺𑀲𑀸𑀦𑁂𑀢𑁆𑀯𑀸 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀁 𑀆𑀧𑀸𑀤𑁂𑀢𑁆𑀯𑀸. 𑀢𑀁 𑀧𑀦 𑀅𑀢𑁆𑀣𑀢𑁄 𑀢𑀢𑁆𑀣 𑀉𑀲𑁆𑀲𑀸𑀳𑀚𑀦𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀲𑀉𑀲𑁆𑀲𑀸𑀳𑀁 𑀓𑀢𑁆𑀯𑀸’’𑀢𑀺 ¶ . 𑀏𑀯𑀁 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀲𑀉𑀲𑁆𑀲𑀸𑀳𑀢𑀸, 𑀏𑀯𑀭𑀽𑀧𑀁 𑀕𑀼𑀡𑀲𑀫𑀗𑁆𑀕𑀺𑀢𑀸 𑀘 𑀦𑀺𑀬𑀫𑀢𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀸 𑀅𑀢𑁆𑀣𑀲𑀫𑁆𑀧𑀸𑀤𑀦𑀻𑀢𑀺 𑀏𑀯𑀁 𑀲𑀉𑀲𑁆𑀲𑀸𑀳𑀢𑀸𑀬, 𑀅𑀜𑁆𑀜𑁂𑀳𑀺 𑀘 𑀢𑀲𑁆𑀫𑀺𑀁 𑀯𑀺𑀚𑁆𑀚𑀫𑀸𑀦𑀕𑀼𑀡𑁂𑀳𑀺 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀲𑀫𑁆𑀫𑀤𑁂𑀯 𑀳𑀝𑁆𑀞𑀢𑀼𑀝𑁆𑀞𑀪𑀸𑀯𑀁 𑀆𑀧𑀸𑀤𑁂𑀢𑁆𑀯𑀸.

𑀬𑀤𑀺 𑀪𑀕𑀯𑀸 𑀥𑀫𑁆𑀫𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀺, 𑀅𑀣 𑀓𑀲𑁆𑀫𑀸 𑀲𑁄 𑀯𑀺𑀲𑁂𑀲𑀁 𑀦𑀸𑀥𑀺𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀩𑁆𑀭𑀸𑀳𑁆𑀫𑀡𑁄 𑀧𑀦𑀸’’𑀢𑀺𑀆𑀤𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀪𑀕𑀯𑀸 𑀢𑀲𑁆𑀲 𑀢𑀣𑀸 𑀥𑀫𑁆𑀫𑀭𑀢𑀦𑀯𑀲𑁆𑀲𑀁 𑀯𑀲𑁆𑀲𑀻𑀢𑀺 𑀆𑀳 ‘‘𑀓𑁂𑀯𑀮𑀫𑀲𑁆𑀲𑀸’’𑀢𑀺𑀆𑀤𑀺. 𑀦 𑀳𑀺 𑀪𑀕𑀯𑀢𑁄 𑀦𑀺𑀭𑀢𑁆𑀣𑀓𑀸 𑀤𑁂𑀲𑀦𑀸 𑀳𑁄𑀢𑀻𑀢𑀺.

𑀲𑁄𑀡𑀤𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.

𑁫. 𑀓𑀽𑀝𑀤𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨𑁩. 𑀧𑀼𑀭𑀺𑀫𑀲𑀼𑀢𑁆𑀢𑀤𑁆𑀯𑀬𑁂𑀢𑀺 ¶ ¶ ¶ 𑀅𑀫𑁆𑀩𑀝𑁆𑀞𑀲𑁄𑀡𑀤𑀡𑁆𑀟𑀲𑀼𑀢𑁆𑀢𑀤𑁆𑀯𑀬𑁂. 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 𑀬𑀁 𑀢𑀢𑁆𑀣 𑀆𑀕𑀢𑀲𑀤𑀺𑀲𑀁 𑀇𑀥𑀸𑀕𑀢𑀁 𑀢𑀁 𑀅𑀢𑁆𑀣𑀯𑀡𑁆𑀡𑀦𑀢𑁄 𑀯𑀼𑀢𑁆𑀢𑀦𑀬𑀫𑁂𑀯, 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. ‘‘𑀢𑀭𑀼𑀡𑁄 𑀅𑀫𑁆𑀩𑀭𑀼𑀓𑁆𑀔𑁄 𑀅𑀫𑁆𑀩𑀮𑀝𑁆𑀞𑀺𑀓𑀸’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁨) 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀫𑁆𑀩𑀮𑀝𑁆𑀞𑀺𑀓𑀸 𑀩𑁆𑀭𑀳𑁆𑀫𑀚𑀸𑀮𑁂 𑀯𑀼𑀢𑁆𑀢𑀲𑀤𑀺𑀲𑀸𑀯𑀸’’𑀢𑀺.

𑀬𑀜𑁆𑀜𑀸𑀯𑀸𑀝𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀫𑀳𑀸𑀬𑀜𑁆𑀜𑀁 𑀉𑀤𑁆𑀤𑀺𑀲𑁆𑀲 𑀲𑀯𑀺𑀜𑁆𑀜𑀸𑀡𑀓𑀸𑀦𑀺, 𑀅𑀯𑀺𑀜𑁆𑀜𑀸𑀡𑀓𑀸𑀦𑀺 𑀘 𑀬𑀜𑁆𑀜𑀽𑀧𑀓𑀭𑀡𑀸𑀦𑀺 𑀉𑀧𑀝𑁆𑀞𑀧𑀺𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀧𑀸𑀴𑀺𑀬𑀁 ‘‘𑀫𑀳𑀸𑀬𑀜𑁆𑀜𑁄 𑀉𑀧𑀓𑁆𑀔𑀝𑁄’’𑀢𑀺, 𑀢𑀁 𑀉𑀧𑀓𑁆𑀔𑀭𑀡𑀁 𑀢𑁂𑀲𑀁 𑀢𑀣𑀸𑀲𑀚𑁆𑀚𑀦𑀦𑁆𑀢𑀺 𑀆𑀳 ‘‘𑀉𑀧𑀓𑁆𑀔𑀝𑁄𑀢𑀺 𑀲𑀚𑁆𑀚𑀺𑀢𑁄’’𑀢𑀺. 𑀯𑀘𑁆𑀙𑀢𑀭𑀲𑀢𑀸𑀦𑀻𑀢𑀺 𑀬𑀼𑀯𑀪𑀸𑀯𑀧𑁆𑀧𑀢𑁆𑀢𑀸𑀦𑀺 𑀩𑀮𑀯𑀯𑀘𑁆𑀙𑀲𑀢𑀸𑀦𑀺, 𑀢𑁂 𑀧𑀦 𑀯𑀘𑁆𑀙𑀸 𑀏𑀯 𑀳𑁄𑀦𑁆𑀢𑀺, 𑀦 𑀤𑀫𑁆𑀫𑀸 𑀩𑀮𑀺𑀩𑀤𑁆𑀤𑀸 𑀘𑀸𑀢𑀺 𑀆𑀳 ‘‘𑀯𑀘𑁆𑀙𑀲𑀢𑀸𑀦𑀻’’𑀢𑀺. 𑀏𑀢𑁂𑀢𑀺 𑀉𑀲𑀪𑀸𑀤𑀬𑁄 𑀉𑀭𑀩𑁆𑀪𑀧𑀭𑀺𑀬𑁄𑀲𑀸𑀦𑀸. 𑀅𑀦𑁂𑀓𑁂𑀲𑀦𑁆𑀢𑀺 𑀅𑀦𑁂𑀓𑀚𑀸𑀢𑀺𑀓𑀸𑀦𑀁. 𑀲𑀗𑁆𑀔𑁆𑀬𑀸𑀯𑀲𑁂𑀦 𑀅𑀦𑁂𑀓𑀢𑀸 𑀲𑀢𑁆𑀢𑀲𑀢𑀕𑁆𑀕𑀳𑀡𑁂𑀦𑁂𑀯 𑀧𑀭𑀺𑀘𑁆𑀙𑀺𑀦𑁆𑀦𑀸. 𑀫𑀺𑀕𑀧𑀓𑁆𑀔𑀻𑀦𑀦𑁆𑀢𑀺 𑀫𑀳𑀺𑀁𑀲𑀭𑀼𑀭𑀼𑀧𑀲𑀤𑀓𑀼𑀭𑀼𑀗𑁆𑀕𑀕𑁄𑀓𑀡𑁆𑀡𑀫𑀺𑀕𑀸𑀦𑀜𑁆𑀘𑁂𑀯 𑀫𑁄𑀭𑀓𑀧𑀺𑀜𑁆𑀚𑀭𑀢𑀺𑀢𑁆𑀢𑀺𑀭𑀓𑀧𑁄𑀢𑀸𑀤𑀺𑀧𑀓𑁆𑀔𑀻𑀦𑀜𑁆𑀘.

𑁩𑁨𑁮. 𑀬𑀜𑁆𑀜𑀲𑀗𑁆𑀔𑀸𑀢𑀲𑁆𑀲 𑀧𑀼𑀜𑁆𑀜𑀲𑁆𑀲 𑀬𑁄 𑀲𑀁𑀓𑀺𑀮𑁂𑀲𑁄, 𑀢𑀲𑁆𑀲 𑀦𑀺𑀯𑀸𑀭𑀡𑀢𑁄 ¶ 𑀦𑀺𑀲𑁂𑀥𑀦𑀢𑁄 𑀯𑀺𑀥𑀸 𑀯𑀼𑀘𑁆𑀘𑀦𑁆𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀯𑀺𑀦𑁄𑀤𑀦𑀸. 𑀢𑀢𑁄 𑀏𑀯 𑀢𑀸 𑀢𑀁 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀁 𑀅𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀞𑀧𑁂𑀦𑁆𑀢𑀻𑀢𑀺 ‘‘𑀞𑀧𑀦𑀸’’𑀢𑀺 𑀯𑀼𑀢𑁆𑀢𑀸. 𑀢𑀸𑀲𑀁 𑀧𑀦 𑀬𑀜𑁆𑀜𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀯𑀲𑁂𑀦 𑀢𑀻𑀲𑀼 𑀓𑀸𑀮𑁂𑀲𑀼 𑀧𑀯𑀢𑁆𑀢𑀺𑀬𑀸 𑀬𑀜𑁆𑀜𑁄 𑀢𑀺𑀝𑁆𑀞𑀧𑀦𑁄𑀢𑀺 𑀆𑀳 ‘‘𑀢𑀺𑀝𑁆𑀞𑀧𑀦𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀧𑀭𑀺𑀓𑁆𑀔𑀭𑁄𑀦𑁆𑀢𑀺 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀧𑀭𑀺𑀓𑁆𑀔𑀸𑀭𑀸, 𑀧𑀭𑀺𑀯𑀸𑀭𑀸𑀢𑀺 𑀯𑀼𑀢𑁆𑀢𑀁. ‘‘𑀲𑁄𑀴𑀲𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀲𑁄𑀴𑀲𑀧𑀭𑀺𑀯𑀸𑀭’’𑀦𑁆𑀢𑀺.

𑀫𑀳𑀸𑀯𑀺𑀚𑀺𑀢𑀭𑀸𑀚𑀬𑀜𑁆𑀜𑀓𑀣𑀸𑀯𑀡𑁆𑀡𑀦𑀸

𑁩𑁩𑁬. 𑀧𑀼𑀩𑁆𑀩𑀘𑀭𑀺𑀢𑀦𑁆𑀢𑀺 𑀅𑀢𑁆𑀢𑀦𑁄 𑀧𑀼𑀭𑀺𑀫𑀚𑀸𑀢𑀺𑀲𑀫𑁆𑀪𑀽𑀢𑀁 𑀩𑁄𑀥𑀺𑀲𑀫𑁆𑀪𑀸𑀭𑀪𑀽𑀢𑀁 𑀧𑀼𑀜𑁆𑀜𑀘𑀭𑀺𑀬𑀁. 𑀢𑀣𑀸 𑀳𑀺𑀲𑁆𑀲 ¶ 𑀅𑀦𑀼𑀕𑀸𑀫𑀺𑀦𑁄𑀯 𑀦𑀺𑀥𑀺𑀲𑁆𑀲 𑀣𑀸𑀯𑀭𑁄 𑀦𑀺𑀥𑀺 𑀦𑀺𑀤𑀲𑁆𑀲𑀺𑀢𑁄. 𑀅𑀟𑁆𑀠𑀢𑀸 𑀦𑀸𑀫 𑀯𑀺𑀪𑀯𑀲𑀫𑁆𑀧𑀦𑁆𑀦𑀢𑀸, 𑀲𑀸 𑀢𑀁 𑀢𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀬𑁄 𑀓𑁄𑀘𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀯𑀺𑀪𑀯𑁂𑀦 𑀅𑀟𑁆𑀠𑁄 𑀳𑁄𑀢𑀻’’𑀢𑀺 ¶ . 𑀢𑀣𑀸 𑀫𑀳𑀤𑁆𑀥𑀦𑀢𑀸𑀧𑀻𑀢𑀺 𑀢𑀁 𑀉𑀓𑁆𑀓𑀁𑀲𑀕𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀳𑀢𑀸 𑀅𑀧𑀭𑀺𑀫𑀸𑀡𑀲𑀗𑁆𑀔𑁆𑀬𑁂𑀦 𑀥𑀦𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀯𑀼𑀢𑁆𑀢𑀁. 𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀯𑀺𑀲𑁂𑀲𑀢𑁄 𑀓𑀸𑀫𑀸 𑀪𑁄𑀕𑁄 𑀦𑀸𑀫𑀸𑀢𑀺 𑀆𑀳 ‘‘𑀧𑀜𑁆𑀘𑀓𑀸𑀫𑀕𑀼𑀡𑀯𑀲𑁂𑀦𑀸’’𑀢𑀺. 𑀧𑀺𑀡𑁆𑀟𑀧𑀺𑀡𑁆𑀟𑀯𑀲𑁂𑀦𑀸𑀢𑀺 𑀪𑀸𑀚𑀦𑀸𑀮𑀗𑁆𑀓𑀸𑀭𑀸𑀤𑀺𑀯𑀺𑀪𑀸𑀕𑀁 𑀅𑀳𑀼𑀢𑁆𑀯𑀸 𑀓𑁂𑀯𑀮𑀁 𑀔𑀡𑁆𑀟𑀔𑀡𑁆𑀟𑀯𑀲𑁂𑀦.

𑀫𑀸𑀲𑀓𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀣𑀸𑀮𑀓𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀪𑀸𑀚𑀦𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑀢𑁆𑀣𑀲𑁂𑀬𑁆𑀬𑀸𑀯𑀲𑀣𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀼𑀢𑁆𑀢𑀸𑀯𑁂𑀴𑀼𑀭𑀺𑀬𑀯𑀚𑀺𑀭𑀧𑀯𑀸𑀴𑀸𑀦𑀺 ‘‘𑀲𑀢𑁆𑀢𑀭𑀢𑀦𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀲𑀸𑀮𑀺𑀯𑀻𑀳𑀺𑀆𑀤𑀺 𑀧𑀼𑀩𑁆𑀩𑀡𑁆𑀡𑀁 𑀧𑀼𑀭𑀓𑁆𑀔𑀢𑀁𑀲𑀲𑁆𑀲𑀨𑀮𑀦𑁆𑀢𑀺 𑀓𑀢𑁆𑀯𑀸. 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀫𑀼𑀕𑁆𑀕𑀫𑀸𑀲𑀸𑀤𑀺 𑀅𑀧𑀭𑀡𑁆𑀡𑀁. 𑀤𑁂𑀯𑀲𑀺𑀓𑀁…𑀧𑁂… 𑀯𑀲𑁂𑀦𑀸𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀤𑀸𑀢𑀩𑁆𑀩𑀯𑀟𑁆𑀠𑁂𑀢𑀩𑁆𑀩𑀸𑀤𑀺𑀯𑀺𑀥𑀺𑀦𑀸 𑀧𑀭𑀺𑀯𑀢𑁆𑀢𑀦𑀓𑀥𑀦𑀥𑀜𑁆𑀜𑀯𑀲𑁂𑀦.

𑀓𑁄𑀝𑁆𑀞𑀁 𑀯𑀼𑀘𑁆𑀘𑀢𑀺 𑀥𑀜𑁆𑀜𑀲𑁆𑀲 𑀆𑀞𑀧𑀦𑀝𑁆𑀞𑀸𑀦𑀁, 𑀓𑁄𑀝𑁆𑀞𑀪𑀽𑀢𑀁 𑀅𑀕𑀸𑀭𑀁 𑀓𑁄𑀝𑁆𑀞𑀸𑀕𑀸𑀭𑀁 𑀢𑁂𑀦𑀸𑀳 ‘‘𑀥𑀜𑁆𑀜𑁂𑀦…𑀧𑁂… 𑀕𑀸𑀭𑁄 𑀘𑀸’’𑀢𑀺. 𑀏𑀯𑀁 ¶ 𑀲𑀸𑀭𑀕𑀩𑁆𑀪𑀁 ‘‘𑀓𑁄𑀲𑁄’’𑀢𑀺, 𑀥𑀜𑁆𑀜𑀲𑁆𑀲 𑀆𑀞𑀧𑀦𑀝𑁆𑀞𑀸𑀦𑀜𑁆𑀘 ‘‘𑀓𑁄𑀝𑁆𑀞𑀸𑀕𑀸𑀭’’𑀦𑁆𑀢𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀢𑁄 𑀅𑀜𑁆𑀜𑀣𑀸 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸 𑀅𑀲𑀺𑀦𑁄 𑀢𑀺𑀓𑁆𑀔𑀪𑀸𑀯𑀧𑀭𑀺𑀳𑀸𑀭𑀢𑁄 𑀧𑀭𑀺𑀘𑁆𑀙𑀤𑁄 ‘‘𑀓𑁄𑀲𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀭𑀜𑁆𑀜𑁄 𑀢𑀺𑀓𑁆𑀔𑀪𑀸𑀯𑀧𑀭𑀺𑀳𑀭𑀡𑀢𑁆𑀢𑀸 𑀘𑀢𑀼𑀭𑀗𑁆𑀕𑀺𑀦𑀻 𑀲𑁂𑀦𑀸 ‘‘𑀓𑁄𑀲𑁄’’𑀢𑀺 𑀆𑀳 ‘‘𑀘𑀢𑀼𑀩𑁆𑀩𑀺𑀥𑁄 𑀓𑁄𑀲𑁄 𑀳𑀢𑁆𑀣𑀻 𑀅𑀲𑁆𑀲𑀸 𑀭𑀣𑀸 𑀧𑀢𑁆𑀢𑀻’’𑀢𑀺. ‘‘𑀯𑀢𑁆𑀣𑀓𑁄𑀝𑁆𑀞𑀸𑀕𑀸𑀭𑀕𑁆𑀕𑀳𑀡𑁂𑀦𑁂𑀯 𑀲𑀩𑁆𑀩𑀲𑁆𑀲𑀸𑀧𑀺 𑀪𑀡𑁆𑀟𑀝𑁆𑀞𑀧𑀦𑀝𑁆𑀞𑀸𑀦𑀲𑁆𑀲 𑀕𑀳𑀺𑀢𑀢𑁆𑀢𑀸 𑀢𑀺𑀯𑀺𑀥𑀁 𑀓𑁄𑀝𑁆𑀞𑀸𑀕𑀸𑀭𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀇𑀤𑀁 𑀏𑀯𑀁 𑀩𑀳𑀼’’𑀦𑁆𑀢𑀺𑀆𑀤𑀺 𑀭𑀸𑀚𑀸 𑀢𑀫𑀢𑁆𑀣𑀁 𑀚𑀸𑀦𑀦𑁆𑀢𑁄𑀯 𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀓𑀣𑀸𑀧𑁂𑀢𑁆𑀯𑀸 𑀧𑀭𑀺𑀲𑀸𑀬 𑀦𑀺𑀲𑁆𑀲𑀤𑁆𑀤𑀪𑀸𑀯𑀸𑀧𑀸𑀤𑀦𑀢𑁆𑀣𑀜𑁆𑀘 𑀆𑀳 𑀏𑀯𑀁 𑀫𑁂 𑀧𑀓𑀢𑀺𑀓𑁆𑀔𑁄𑀪𑁄 𑀦 𑀪𑀯𑀺𑀲𑁆𑀲𑀢𑀻𑀢𑀺.

𑁩𑁩𑁭-𑁮. 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 𑀚𑀦𑀧𑀤𑀲𑁆𑀲 𑀅𑀦𑀼𑀧𑀤𑁆𑀤𑀯𑀢𑁆𑀣𑀜𑁆𑀘𑁂𑀯 𑀬𑀜𑁆𑀜𑀲𑁆𑀲 𑀘 𑀘𑀺𑀭𑀸𑀦𑀼𑀧𑀯𑀢𑁆𑀢𑀦𑀢𑁆𑀣𑀜𑁆𑀘, 𑀢𑁂𑀦𑀸𑀳 ‘‘𑀅𑀬𑀁 𑀭𑀸𑀚𑀸’’𑀢𑀺𑀆𑀤𑀺.

𑀲𑀢𑁆𑀢𑀸𑀦𑀁 𑀳𑀺𑀢𑀲𑁆𑀲 𑀲𑀼𑀔𑀲𑁆𑀲 𑀘 𑀯𑀺𑀤𑀽𑀲𑀦𑀢𑁄 𑀅𑀳𑀺𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀘 𑀆𑀯𑀳𑀦𑀢𑁄 𑀘𑁄𑀭𑀸 𑀏𑀯 𑀓𑀡𑁆𑀝𑀓𑀸, 𑀢𑁂𑀳𑀺 𑀘𑁄𑀭𑀓𑀡𑁆𑀝𑀓𑁂𑀳𑀺. 𑀬𑀣𑀸 𑀕𑀸𑀫𑀯𑀸𑀲𑀻𑀦𑀁 𑀖𑀸𑀢𑀸 𑀕𑀸𑀫𑀖𑀸𑀢𑀸, 𑀏𑀯𑀁 𑀧𑀦𑁆𑀣𑀺𑀓𑀸𑀦𑀁 𑀤𑀼𑀳𑀦𑀸 𑀯𑀺𑀩𑀸𑀥𑀦𑀸 𑀧𑀦𑁆𑀣𑀤𑀼𑀳𑀦𑀸. 𑀅𑀥𑀫𑁆𑀫𑀓𑀸𑀭𑀻𑀢𑀺 𑀥𑀫𑁆𑀫𑀢𑁄 𑀅𑀧𑁂𑀢𑀲𑁆𑀲 𑀅𑀬𑀼𑀢𑁆𑀢𑀲𑁆𑀲 𑀓𑀭𑀡𑀲𑀻𑀮𑁄, 𑀅𑀢𑁆𑀢𑀦𑁄 𑀯𑀺𑀚𑀺𑀢𑁂 𑀚𑀦𑀧𑀤𑀸𑀤𑀻𑀦𑀁 𑀢𑀢𑁄 𑀅𑀦𑀢𑁆𑀣𑀢𑁄 𑀢𑀸𑀬𑀦𑁂𑀦 𑀔𑀢𑁆𑀢𑀺𑀬𑁄 ¶ 𑀬𑁄 𑀔𑀢𑁆𑀢𑀥𑀫𑁆𑀫𑁄, 𑀢𑀲𑁆𑀲 𑀯𑀸 𑀅𑀓𑀭𑀡𑀲𑀻𑀮𑁄𑀢𑀺 𑀅𑀢𑁆𑀣𑁄. 𑀤𑀲𑁆𑀲𑀯𑁄 𑀏𑀯 𑀔𑀻𑀮𑀲𑀤𑀺𑀲𑀢𑁆𑀢𑀸 𑀤𑀲𑁆𑀲𑀼𑀔𑀻𑀮𑀁. 𑀬𑀣𑀸 𑀳𑀺 𑀔𑁂𑀢𑁆𑀢𑁂 𑀔𑀻𑀮𑀁 𑀓𑀲𑀦𑀸𑀤𑀻𑀦𑀁 𑀲𑀼𑀔𑀧𑁆𑀧𑀯𑀢𑁆𑀢𑀺𑀁 ¶ , 𑀫𑀽𑀮𑀲𑀦𑁆𑀢𑀸𑀦𑁂𑀦 𑀲𑀲𑁆𑀲𑀲𑁆𑀲 𑀩𑀼𑀤𑁆𑀥𑀺𑀜𑁆𑀘 𑀯𑀺𑀩𑀦𑁆𑀥𑀢𑀺, 𑀏𑀯𑀁 𑀤𑀲𑁆𑀲𑀯𑁄 𑀭𑀚𑁆𑀚𑁂 𑀭𑀸𑀚𑀸𑀡𑀸𑀬 𑀲𑀼𑀔𑀧𑁆𑀧𑀯𑀢𑁆𑀢𑀺𑀁, 𑀫𑀽𑀮𑀯𑀺𑀭𑀼𑀴𑁆𑀳𑀺𑀬𑀸 𑀚𑀦𑀧𑀤𑀸𑀦𑀁 ¶ 𑀧𑀭𑀺𑀩𑀼𑀤𑁆𑀥𑀺𑀜𑁆𑀘 𑀯𑀺𑀩𑀦𑁆𑀥𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀲𑁆𑀲𑀯𑁄 𑀏𑀯 𑀔𑀻𑀮𑀲𑀤𑀺𑀲𑀢𑁆𑀢𑀸 𑀤𑀲𑁆𑀲𑀼𑀔𑀻𑀮’’𑀦𑁆𑀢𑀺. 𑀯𑀥-𑀲𑀤𑁆𑀤𑁄 𑀳𑀺𑀁𑀲𑀦𑀢𑁆𑀣𑁄𑀧𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀫𑀸𑀭𑀡𑁂𑀦 𑀯𑀸 𑀓𑁄𑀝𑁆𑀝𑀦𑁂𑀦 𑀯𑀸’’𑀢𑀺. 𑀅𑀤𑁆𑀤𑀼𑀩𑀦𑁆𑀥𑀦𑀸𑀤𑀺𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀭𑀚𑁆𑀚𑀼𑀩𑀦𑁆𑀥𑀦𑀲𑀗𑁆𑀔𑀮𑀺𑀓𑀩𑀦𑁆𑀥𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀚𑀸𑀦𑀺𑀬𑀸𑀢𑀺 𑀥𑀦𑀚𑀸𑀦𑀺𑀬𑀸, 𑀢𑁂𑀦𑀸𑀳 ‘‘𑀲𑀢𑀁 𑀕𑀡𑁆𑀳𑀣𑀸’’𑀢𑀺𑀆𑀤𑀺. 𑀧𑀜𑁆𑀘𑀲𑀺𑀔𑀫𑀼𑀡𑁆𑀟𑀓𑀭𑀡𑀦𑁆𑀢𑀺 𑀓𑀸𑀓𑀧𑀓𑁆𑀔𑀓𑀭𑀡𑀁. 𑀕𑁄𑀫𑀬𑀲𑀺𑀜𑁆𑀘𑀦𑀦𑁆𑀢𑀺 𑀲𑀻𑀲𑁂 𑀙𑀓𑀡𑁄𑀤𑀓𑀸𑀯𑀲𑁂𑀘𑀦𑀁. 𑀓𑀼𑀤𑀡𑁆𑀟𑀓𑀩𑀦𑁆𑀥𑀦𑀦𑁆𑀢𑀺 𑀕𑀤𑁆𑀤𑀼𑀮𑀩𑀦𑁆𑀥𑀦𑀁. 𑀏𑀯𑀫𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀔𑀼𑀭𑀫𑀼𑀡𑁆𑀟𑀁 𑀓𑀭𑀺𑀢𑁆𑀯𑀸 𑀪𑀲𑁆𑀫𑀧𑀼𑀝𑀧𑁄𑀣𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀊𑀳𑀦𑀺𑀲𑁆𑀲𑀸𑀫𑀻𑀢𑀺 𑀉𑀤𑁆𑀥𑀭𑀺𑀲𑁆𑀲𑀸𑀫𑀺, 𑀅𑀧𑀦𑁂𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀉𑀲𑁆𑀲𑀳𑀦𑁆𑀢𑀻𑀢𑀺 𑀧𑀼𑀩𑁆𑀩𑁂 𑀢𑀢𑁆𑀣 𑀓𑀢𑀧𑀭𑀺𑀘𑀬𑀢𑀸𑀬 𑀉𑀲𑁆𑀲𑀸𑀳𑀁 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀅𑀦𑀼𑀧𑁆𑀧𑀤𑁂𑀢𑀽𑀢𑀺 𑀅𑀦𑀼 𑀅𑀦𑀼 𑀧𑀤𑁂𑀢𑀼, 𑀢𑁂𑀦𑀸𑀳 ‘‘𑀤𑀺𑀦𑁆𑀦𑁂 𑀅𑀧𑁆𑀧𑀳𑁄𑀦𑁆𑀢𑁂’’𑀢𑀺𑀆𑀤𑀺. 𑀲𑀓𑁆𑀔𑀺𑀓𑀭𑀡𑀧𑀡𑁆𑀡𑀸𑀭𑁄𑀧𑀦𑀸𑀦𑀺 𑀯𑀟𑁆𑀠𑀺𑀬𑀸 𑀲𑀳 𑀯𑀸 𑀯𑀺𑀦𑀸 𑀯𑀸 𑀧𑀼𑀦 𑀕𑀳𑁂𑀢𑀼𑀓𑀸𑀫𑀲𑁆𑀲, 𑀇𑀥 𑀧𑀦 𑀢𑀁 𑀦𑀢𑁆𑀣𑀻𑀢𑀺 𑀆𑀳 ‘‘𑀲𑀓𑁆𑀔𑀺𑀁 𑀅𑀓𑀢𑁆𑀯𑀸’’𑀢𑀺𑀆𑀤𑀺, 𑀢𑁂𑀦𑀸𑀳 ‘‘𑀫𑀽𑀮𑀘𑁆𑀙𑁂𑀚𑁆𑀚𑀯𑀲𑁂𑀦𑀸’’𑀢𑀺. 𑀧𑀓𑀸𑀭𑀢𑁄 𑀪𑀡𑁆𑀟𑀸𑀦𑀺 𑀆𑀪𑀭𑀢𑀺 𑀲𑀫𑁆𑀪𑀭𑀢𑀺 𑀧𑀭𑀺𑀘𑀬𑀢𑀺 𑀏𑀢𑁂𑀦𑀸𑀢𑀺 𑀧𑀸𑀪𑀢𑀁, 𑀪𑀡𑁆𑀟𑀫𑀽𑀮𑀁.

𑀤𑀺𑀯𑀲𑁂 𑀤𑀺𑀯𑀲𑁂 𑀤𑀸𑀢𑀩𑁆𑀩𑀪𑀢𑁆𑀢𑀁 𑀤𑁂𑀯𑀲𑀺𑀓𑀪𑀢𑁆𑀢𑀁. ‘‘𑀅𑀦𑀼𑀫𑀸𑀲𑀁, 𑀅𑀦𑀼𑀧𑁄𑀲𑀣’’𑀦𑁆𑀢𑀺𑀆𑀤𑀺𑀦𑀸 𑀤𑀸𑀢𑀩𑁆𑀩𑀁 𑀯𑁂𑀢𑀦𑀁 𑀫𑀸𑀲𑀺𑀓𑀸𑀤𑀺𑀧𑀭𑀺𑀩𑁆𑀩𑀬𑀁. 𑀢𑀲𑁆𑀲 𑀢𑀲𑁆𑀲 𑀓𑀼𑀮𑀸𑀦𑀼𑀭𑀽𑀧𑁂𑀦 𑀓𑀫𑁆𑀫𑀸𑀦𑀼𑀭𑀽𑀧𑁂𑀦 𑀲𑀽𑀭𑀪𑀸𑀯𑀸𑀦𑀼𑀭𑀽𑀧𑁂𑀦𑀸𑀢𑀺 𑀧𑀘𑁆𑀘𑁂𑀓𑀁 𑀅𑀦𑀼𑀭𑀽𑀧-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀲𑁂𑀦𑀸𑀧𑀘𑁆𑀘𑀸𑀤𑀺 𑀞𑀸𑀦𑀦𑁆𑀢𑀭𑀁. 𑀲𑀓𑀓𑀫𑁆𑀫𑀧𑀲𑀼𑀢𑀢𑁆𑀢𑀸 ¶ , 𑀅𑀦𑀼𑀧𑀤𑁆𑀤𑀯𑀢𑁆𑀢𑀸 𑀘 𑀥𑀦𑀥𑀜𑁆𑀜𑀸𑀦𑀁 𑀭𑀸𑀲𑀺𑀓𑁄 𑀭𑀸𑀲𑀺𑀓𑀸𑀭𑀪𑀽𑀢𑁄. 𑀔𑁂𑀫𑁂𑀦 𑀞𑀺𑀢𑀸𑀢𑀺 𑀅𑀦𑀼𑀧𑀤𑁆𑀤𑀯𑁂𑀦 𑀧𑀯𑀢𑁆𑀢𑀸, 𑀢𑁂𑀦𑀸𑀳 ‘‘𑀅𑀪𑀬𑀸’’𑀢𑀺, 𑀓𑀼𑀢𑁄𑀘𑀺𑀧𑀺 𑀪𑀬𑀭𑀳𑀺𑀢𑀸𑀢𑀺 𑀅𑀢𑁆𑀣𑁄.

𑀘𑀢𑀼𑀧𑀭𑀺𑀓𑁆𑀔𑀸𑀭𑀯𑀡𑁆𑀡𑀦𑀸

𑁩𑁩𑁯. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀺𑀘𑁆𑀘𑁂 𑀅𑀦𑀼𑀬𑀦𑁆𑀢𑀺 𑀅𑀦𑀼𑀯𑀢𑁆𑀢𑀦𑁆𑀢𑀻𑀢𑀺 𑀅𑀦𑀼𑀬𑀦𑁆𑀢𑀸, 𑀅𑀦𑀼𑀬𑀦𑁆𑀢𑀸 𑀏𑀯 𑀆𑀦𑀼𑀬𑀦𑁆𑀢𑀸 𑀬𑀣𑀸 ‘‘𑀅𑀦𑀼𑀪𑀸𑀯𑁄 𑀏𑀯 𑀆𑀦𑀼𑀪𑀸𑀯𑁄’’𑀢𑀺. 𑀅𑀲𑁆𑀲𑀸𑀢𑀺 𑀭𑀜𑁆𑀜𑁄. 𑀢𑁂𑀢𑀺 𑀆𑀦𑀼𑀬𑀦𑁆𑀢𑀔𑀢𑁆𑀢𑀺𑀬𑀸𑀤𑀬𑁄. 𑀅𑀢𑁆𑀢𑀫𑀦𑀸 𑀦 𑀪𑀯𑀺𑀲𑁆𑀲𑀦𑁆𑀢𑀺 ‘‘𑀅𑀫𑁆𑀳𑁂 𑀏𑀢𑁆𑀣 𑀩𑀳𑀺 𑀓𑀭𑁄𑀢𑀻’’𑀢𑀺. 𑀦𑀺𑀩𑀦𑁆𑀥𑀯𑀺𑀧𑀼𑀮𑀸𑀕𑀫𑁄 𑀕𑀸𑀫𑁄 𑀦𑀺𑀕𑀫𑁄, 𑀯𑀺𑀯𑀟𑁆𑀠𑀺𑀢𑀫𑀳𑀸𑀆𑀬𑁄 ¶ 𑀫𑀳𑀸𑀕𑀸𑀫𑁄𑀢𑀺 𑀅𑀢𑁆𑀣𑁄. 𑀚𑀦𑀧𑀤-𑀲𑀤𑁆𑀤𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑁄 𑀏𑀯. 𑀙𑀦𑁆𑀦𑀁 𑀧𑀓𑀢𑀻𑀦𑀁 𑀯𑀲𑁂𑀦 𑀭𑀜𑁆𑀜𑁄 𑀳𑀺𑀢𑀲𑀼𑀔𑀸𑀪𑀺𑀩𑀼𑀤𑁆𑀥𑀺, 𑀢𑀤𑁂𑀓𑀤𑁂𑀲𑀸 𑀘 𑀆𑀦𑀼𑀬𑀦𑁆𑀢𑀸𑀤𑀬𑁄𑀢𑀺 𑀯𑀼𑀢𑁆𑀢𑀁 ‘‘𑀬𑀁 𑀢𑀼𑀫𑁆𑀳𑀸𑀓𑀁 𑀅𑀦𑀼𑀚𑀸𑀦𑀦𑀁 𑀫𑀫 𑀪𑀯𑁂𑀬𑁆𑀬 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺.

𑀅𑀫𑀸 𑀲𑀳 𑀪𑀯𑀦𑁆𑀢𑀺 𑀓𑀺𑀘𑁆𑀘𑁂𑀲𑀽𑀢𑀺 𑀅𑀫𑀘𑁆𑀘𑀸, 𑀭𑀚𑁆𑀚𑀓𑀺𑀘𑁆𑀘𑀯𑁄𑀲𑀸𑀲𑀦𑀓𑀸. 𑀢𑁂 𑀧𑀦 𑀭𑀜𑁆𑀜𑁄 𑀧𑀺𑀬𑀸, 𑀲𑀳𑀧𑀯𑀢𑁆𑀢𑀦𑀓𑀸 𑀘 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀧𑀺𑀬𑀲𑀳𑀸𑀬𑀓𑀸’’𑀢𑀺. 𑀭𑀜𑁆𑀜𑁄 𑀧𑀭𑀺𑀲𑀢𑀺 𑀪𑀯𑀸𑀢𑀺 𑀧𑀸𑀭𑀺𑀲𑀚𑁆𑀚𑀸 ¶ , 𑀢𑁂 𑀧𑀦 𑀓𑁂𑀢𑀺 𑀆𑀳 ‘‘𑀲𑁂𑀲𑀸 𑀆𑀡𑀢𑁆𑀢𑀺𑀓𑀭𑀸’’𑀢𑀺, 𑀬𑀣𑀸𑀯𑀼𑀢𑁆𑀢𑀆𑀦𑀼𑀬𑀦𑁆𑀢𑀔𑀢𑁆𑀢𑀺𑀬𑀸𑀤𑀻 𑀳𑀺 𑀅𑀯𑀲𑁂𑀲𑀸 𑀭𑀜𑁆𑀜𑁄 𑀆𑀡𑀸𑀓𑀭𑀸𑀢𑀺 𑀅𑀢𑁆𑀣𑁄. 𑀲𑀢𑀺𑀧𑀺 𑀤𑁂𑀬𑁆𑀬𑀥𑀫𑁆𑀫𑁂 𑀆𑀦𑀼𑀪𑀸𑀯𑀲𑀫𑁆𑀧𑀢𑁆𑀢𑀺𑀬𑀸, 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀘 𑀅𑀪𑀸𑀯𑁂 𑀢𑀸𑀤𑀺𑀲𑀁 𑀤𑀸𑀢𑀼𑀁 𑀦 𑀲𑀓𑁆𑀓𑀸, 𑀯𑀼𑀟𑁆𑀠𑀓𑀸𑀮𑁂 ¶ 𑀘 𑀢𑀸𑀤𑀺𑀲𑀸𑀦𑀫𑁆𑀧𑀺 𑀭𑀸𑀚𑀽𑀦𑀁 𑀢𑀤𑀼𑀪𑀬𑀁 𑀳𑀸𑀬𑀢𑁂𑀯𑀸𑀢𑀺 𑀆𑀳 ‘‘𑀫𑀳𑀮𑁆𑀮𑀓𑀓𑀸𑀮𑁂…𑀧𑁂… 𑀦 𑀲𑀓𑁆𑀓𑀸’’𑀢𑀺. 𑀅𑀦𑀼𑀫𑀢𑀺𑀬𑀸𑀢𑀺 𑀅𑀦𑀼𑀚𑀸𑀦𑀦𑁂𑀦, 𑀧𑀓𑁆𑀔𑀸𑀢𑀺 𑀲𑀧𑀓𑁆𑀔𑀸 𑀬𑀜𑁆𑀜𑀲𑁆𑀲 𑀅𑀗𑁆𑀕𑀪𑀽𑀢𑀸. 𑀧𑀭𑀺𑀓𑁆𑀔𑀭𑁄𑀦𑁆𑀢𑀻𑀢𑀺 𑀧𑀭𑀺𑀓𑁆𑀔𑀸𑀭𑀸, 𑀲𑀫𑁆𑀪𑀸𑀭𑀸. 𑀇𑀫𑁂 𑀢𑀲𑁆𑀲 𑀬𑀜𑁆𑀜𑀲𑁆𑀲 𑀅𑀗𑁆𑀕𑀪𑀽𑀢𑀸 𑀧𑀭𑀺𑀯𑀸𑀭𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀧𑀭𑀺𑀯𑀸𑀭𑀸 𑀪𑀯𑀦𑁆𑀢𑀻’’𑀢𑀺.

𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀯𑀡𑁆𑀡𑀦𑀸

𑁩𑁪𑁦. 𑀬𑀲𑀲𑀸𑀢𑀺 𑀆𑀦𑀼𑀪𑀸𑀯𑁂𑀦, 𑀢𑁂𑀦𑀸𑀳 ‘‘𑀆𑀡𑀸𑀞𑀧𑀦𑀲𑀫𑀢𑁆𑀣𑀢𑀸𑀬𑀸’’𑀢𑀺. 𑀲𑀤𑁆𑀤𑀳𑀢𑀻𑀢𑀺 ‘‘𑀤𑀸𑀢𑀸 𑀤𑀸𑀦𑀲𑁆𑀲 𑀨𑀮𑀁 𑀧𑀘𑁆𑀘𑀦𑀼𑀪𑁄𑀢𑀻’’𑀢𑀺 𑀧𑀢𑁆𑀢𑀺𑀬𑀸𑀬𑀢𑀺. 𑀤𑀸𑀦𑁂 𑀲𑀽𑀭𑁄𑀢𑀺 𑀤𑀸𑀦𑀲𑀽𑀭𑁄 𑀤𑁂𑀬𑁆𑀬𑀥𑀫𑁆𑀫𑁂 𑀈𑀲𑀓𑀫𑁆𑀧𑀺 𑀲𑀗𑁆𑀕𑀁 𑀅𑀓𑀢𑁆𑀯𑀸 𑀫𑀼𑀢𑁆𑀢𑀘𑀸𑀕𑁄. 𑀲𑁆𑀯𑀸𑀬𑀫𑀢𑁆𑀣𑁄 𑀓𑀫𑁆𑀫𑀲𑁆𑀲𑀓𑀢𑀜𑁆𑀜𑀸𑀡𑀲𑁆𑀲 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑁄, 𑀢𑁂𑀦𑀸𑀳 ‘‘𑀦 𑀲𑀤𑁆𑀥𑀸𑀫𑀢𑁆𑀢𑀓𑁂𑀦𑁂𑀯𑀸’’𑀢𑀺𑀆𑀤𑀺. 𑀬𑀲𑁆𑀲 𑀳𑀺 𑀓𑀫𑁆𑀫𑀲𑁆𑀲𑀓𑀢𑀸 𑀧𑀘𑁆𑀘𑀓𑁆𑀔𑀢𑁄 𑀯𑀺𑀬 𑀉𑀧𑀝𑁆𑀞𑀸𑀢𑀺, 𑀲𑁄 𑀏𑀯𑀁 𑀯𑀼𑀢𑁆𑀢𑁄. 𑀬𑀁 𑀤𑀸𑀦𑀁 𑀤𑁂𑀢𑀻𑀢𑀺 𑀬𑀁 𑀤𑁂𑀬𑁆𑀬𑀥𑀫𑁆𑀫𑀁 𑀧𑀭𑀲𑁆𑀲 𑀤𑁂𑀢𑀺. 𑀢𑀲𑁆𑀲 𑀧𑀢𑀺 𑀳𑀼𑀢𑁆𑀯𑀸𑀢𑀺 𑀢𑀩𑁆𑀩𑀺𑀲𑀬𑀁 𑀮𑁄𑀪𑀁 𑀲𑀼𑀝𑁆𑀞𑀼 𑀅𑀪𑀺𑀪𑀯𑀦𑁆𑀢𑁄 𑀢𑀲𑁆𑀲 𑀅𑀥𑀺𑀧𑀢𑀺 𑀳𑀼𑀢𑁆𑀯𑀸 𑀤𑁂𑀢𑀺 𑀅𑀦𑀥𑀺𑀪𑀯𑀦𑀻𑀬𑀢𑁆𑀢𑀸. ‘‘𑀦 𑀤𑀸𑀲𑁄, 𑀦 𑀲𑀳𑀸𑀬𑁄’’𑀢𑀺 𑀯𑀢𑁆𑀯𑀸 𑀢𑀤𑀼𑀪𑀬𑀁 𑀅𑀦𑁆𑀯𑀬𑀢𑁄, 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀸𑀲𑁄 𑀳𑀼𑀢𑁆𑀯𑀸 𑀤𑁂𑀢𑀺 𑀢𑀡𑁆𑀳𑀸𑀬 𑀤𑀸𑀦𑀲𑁆𑀲 𑀤𑀸𑀲𑀩𑁆𑀬𑀢𑀁 𑀉𑀧𑀕𑀢𑀢𑁆𑀢𑀸. 𑀲𑀳𑀸𑀬𑁄 𑀳𑀼𑀢𑁆𑀯𑀸 𑀤𑁂𑀢𑀺 𑀢𑀲𑁆𑀲 𑀧𑀺𑀬𑀪𑀸𑀯𑀸𑀦𑀺𑀲𑁆𑀲𑀚𑁆𑀚𑀦𑀢𑁄. 𑀲𑀸𑀫𑀻 𑀳𑀼𑀢𑁆𑀯𑀸 𑀤𑁂𑀢𑀺 𑀢𑀢𑁆𑀣 𑀢𑀡𑁆𑀳𑀸𑀤𑀸𑀲𑀩𑁆𑀬𑀢𑁄 𑀅𑀢𑁆𑀢𑀸𑀦𑀁 ¶ 𑀫𑁄𑀘𑁂𑀢𑁆𑀯𑀸 𑀅𑀪𑀺𑀪𑀼𑀬𑁆𑀬 𑀧𑀯𑀢𑁆𑀢𑀦𑀢𑁄. 𑀲𑀸𑀫𑀺𑀧𑀭𑀺𑀪𑁄𑀕𑀲𑀤𑀺𑀲𑀸 𑀳𑁂𑀢𑀲𑁆𑀲𑀸𑀬𑀁 𑀧𑀯𑀢𑁆𑀢𑀢𑀻𑀢𑀺.

𑀲𑀫𑀺𑀢𑀧𑀸𑀧𑀸 ¶ 𑀲𑀫𑀡𑀸, 𑀩𑀸𑀳𑀺𑀢𑀧𑀸𑀧𑀸 𑀩𑁆𑀭𑀸𑀳𑁆𑀫𑀡𑀸 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦, 𑀧𑀩𑁆𑀩𑀚𑁆𑀚𑀸𑀫𑀢𑁆𑀢𑀲𑀫𑀡𑀸 𑀚𑀸𑀢𑀺𑀫𑀢𑁆𑀢𑀩𑁆𑀭𑀸𑀳𑁆𑀫𑀡𑀸 𑀧𑀦 𑀓𑀧𑀡𑀸𑀤𑀺𑀕𑁆𑀕𑀳𑀡𑁂𑀦𑁂𑀯𑁂𑀢𑁆𑀣 𑀕𑀳𑀺𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀼𑀕𑁆𑀕𑀢𑀸𑀢𑀺 𑀤𑀼𑀓𑁆𑀓𑀭𑀚𑀻𑀯𑀺𑀓𑀁 𑀉𑀧𑀕𑀢𑀸 𑀓𑀲𑀺𑀭𑀯𑀼𑀢𑁆𑀢𑀺𑀓𑀸, 𑀢𑁂𑀦𑀸𑀳 ‘‘𑀤𑀮𑀺𑀤𑁆𑀤𑀫𑀦𑀼𑀲𑁆𑀲𑀸’’𑀢𑀺. 𑀅𑀤𑁆𑀥𑀺𑀓𑀸𑀢𑀺 𑀅𑀤𑁆𑀥𑀸𑀦𑀫𑀕𑁆𑀕𑀕𑀸𑀫𑀺𑀦𑁄. 𑀯𑀡𑀺𑀩𑁆𑀩𑀓𑀸𑀢𑀺 𑀤𑀸𑀬𑀓𑀸𑀦𑀁 𑀕𑀼𑀡𑀓𑀺𑀢𑁆𑀢𑀦𑀯𑀲𑁂𑀦, 𑀓𑀫𑁆𑀫𑀨𑀮𑀓𑀺𑀢𑁆𑀢𑀦𑀫𑀼𑀔𑁂𑀦 𑀘 𑀬𑀸𑀘𑀦𑀓𑀸 𑀲𑁂𑀬𑁆𑀬𑀣𑀸𑀧𑀺 𑀦𑀕𑁆𑀕𑀘𑀭𑀺𑀬𑀸𑀤𑀬𑁄, 𑀢𑁂𑀦𑀸𑀳 ‘‘𑀇𑀝𑁆𑀞𑀁 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺. ‘‘𑀧𑀲𑀢𑀫𑀢𑁆𑀢’’𑀦𑁆𑀢𑀺 𑀯𑀻𑀳𑀺𑀢𑀡𑁆𑀟𑀼𑀮𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀁, ‘‘𑀲𑀭𑀸𑀯𑀫𑀢𑁆𑀢’’𑀦𑁆𑀢𑀺 𑀬𑀸𑀕𑀼𑀪𑀢𑁆𑀢𑀸𑀤𑀺𑀯𑀲𑁂𑀦. 𑀑𑀧𑀸𑀦𑀁 𑀯𑀼𑀘𑁆𑀘𑀢𑀺 𑀑𑀕𑀸𑀳𑁂𑀢𑁆𑀯𑀸 𑀧𑀸𑀢𑀩𑁆𑀩𑀢𑁄 𑀦𑀤𑀺𑀢𑀴𑀸𑀓𑀸𑀤𑀻𑀦𑀁 𑀲𑀩𑁆𑀩𑀲𑀸𑀥𑀸𑀭𑀡𑀢𑀺𑀢𑁆𑀣𑀁 𑀑𑀧𑀸𑀦𑀁 𑀯𑀺𑀬 𑀪𑀽𑀢𑁄𑀢𑀺 𑀑𑀧𑀸𑀦𑀪𑀽𑀢𑁄, 𑀢𑁂𑀦𑀸𑀳 ‘‘𑀉𑀤𑀧𑀸𑀦𑀪𑀽𑀢𑁄’’𑀢𑀺𑀆𑀤𑀺. 𑀲𑀼𑀢𑀫𑁂𑀯 𑀲𑀼𑀢𑀚𑀸𑀢𑀦𑁆𑀢𑀺 𑀚𑀸𑀢-𑀲𑀤𑁆𑀤𑀲𑁆𑀲 𑀅𑀦𑀢𑁆𑀣𑀦𑁆𑀢𑀭𑀯𑀸𑀘𑀓𑀢𑀫𑀸𑀳 𑀬𑀣𑀸 ‘‘𑀓𑁄𑀲𑀚𑀸𑀢’’𑀦𑁆𑀢𑀺.

𑀅𑀢𑀻𑀢𑀸𑀤𑀺𑀅𑀢𑁆𑀣𑀘𑀺𑀦𑁆𑀢𑀦𑀲𑀫𑀢𑁆𑀣𑀢𑀸 𑀦𑀸𑀫𑀲𑁆𑀲 𑀭𑀜𑁆𑀜𑁄 𑀅𑀦𑀼𑀫𑀸𑀦𑀯𑀲𑁂𑀦, 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀯𑀲𑁂𑀦 𑀘 𑀯𑁂𑀤𑀺𑀢𑀩𑁆𑀩𑀸 ¶ , 𑀦 𑀩𑀼𑀤𑁆𑀥𑀸𑀦𑀁 𑀯𑀺𑀬 𑀢𑀢𑁆𑀣 𑀧𑀘𑁆𑀘𑀓𑁆𑀔𑀤𑀲𑁆𑀲𑀺𑀢𑀸𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀢𑀻𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀟𑁆𑀠𑀢𑀸𑀤𑀬𑁄 𑀢𑀸𑀯 𑀬𑀜𑁆𑀜𑀲𑁆𑀲 𑀧𑀭𑀺𑀓𑁆𑀔𑀸𑀭𑀸 𑀳𑁄𑀦𑁆𑀢𑀼 𑀢𑁂𑀳𑀺 𑀯𑀺𑀦𑀸 𑀢𑀲𑁆𑀲 𑀅𑀲𑀺𑀚𑁆𑀛𑀦𑀢𑁄, 𑀲𑀼𑀚𑀸𑀢𑀢𑀸 𑀲𑀼𑀭𑀽𑀧𑀢𑀸 𑀧𑀦 𑀓𑀣𑀦𑁆𑀢𑀺 𑀆𑀳 ‘‘𑀏𑀢𑁂𑀳𑀺 𑀓𑀺𑀭𑀸’’𑀢𑀺𑀆𑀤𑀺. 𑀏𑀢𑁆𑀣 𑀘 𑀓𑁂𑀘𑀺 ‘‘𑀬𑀣𑀸 𑀅𑀟𑁆𑀠𑀢𑀸𑀤𑀬𑁄 𑀬𑀜𑁆𑀜𑀲𑁆𑀲 𑀏𑀓𑀁𑀲𑀢𑁄 𑀅𑀗𑁆𑀕𑀸𑀦𑀺, 𑀦 𑀏𑀯𑀫𑀪𑀺𑀚𑀸𑀢𑀢𑀸, 𑀅𑀪𑀺𑀭𑀽𑀧𑀢𑀸 𑀘𑀸𑀢𑀺 𑀤𑀲𑁆𑀲𑁂𑀢𑀼𑀁 𑀓𑀺𑀭𑀲𑀤𑁆𑀤𑀕𑁆𑀕𑀳𑀡’’𑀦𑁆𑀢𑀺 𑀯𑀤𑀦𑁆𑀢𑀺 ‘‘𑀅𑀬𑀁 𑀤𑀼𑀚𑁆𑀚𑀸𑀢𑁄’’𑀢𑀺𑀆𑀤𑀺 𑀯𑀘𑀦𑀲𑁆𑀲 𑀅𑀦𑁂𑀓𑀦𑁆𑀢𑀺𑀓𑀢𑀁 𑀫𑀜𑁆𑀜𑀫𑀸𑀦𑀸, 𑀢𑀬𑀺𑀤𑀁 𑀅𑀲𑀸𑀭𑀁, 𑀲𑀩𑁆𑀩𑀲𑀸𑀥𑀸𑀭𑀡𑀯𑀲𑁂𑀦 𑀳𑁂𑀲 𑀬𑀜𑁆𑀜𑀸𑀭𑀫𑁆𑀪𑁄 𑀢𑀢𑁆𑀣 𑀲𑀺𑀬𑀸 𑀓𑁂𑀲𑀜𑁆𑀘𑀺 𑀢𑀣𑀸𑀧𑀭𑀺𑀯𑀺𑀢𑀓𑁆𑀓𑁄𑀢𑀺 𑀢𑀲𑁆𑀲𑀸𑀧𑀺 𑀅𑀯𑀓𑀸𑀲𑀸𑀪𑀸𑀯𑀸𑀤𑀲𑁆𑀲𑀦𑀢𑁆𑀣𑀁 𑀢𑀣𑀸 𑀯𑀼𑀢𑁆𑀢𑀢𑁆𑀢𑀸. 𑀓𑀺𑀭-𑀲𑀤𑁆𑀤𑁄 𑀧𑀦 𑀢𑀤𑀸 𑀩𑁆𑀭𑀸𑀳𑁆𑀫𑀡𑁂𑀦 𑀘𑀺𑀦𑁆𑀢𑀺𑀢𑀸𑀓𑀸𑀭𑀲𑀽𑀘𑀦𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀫𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀅𑀬𑀁 𑀯𑀺𑀭𑀽𑀧𑁄 𑀤𑀮𑀺𑀤𑁆𑀤𑁄 ¶ 𑀅𑀧𑁆𑀧𑁂𑀲𑀓𑁆𑀔𑁄 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑁆𑀲𑀼𑀢𑁄 𑀅𑀦𑀢𑁆𑀣𑀜𑁆𑀜𑀽 𑀦 𑀫𑁂𑀥𑀸𑀯𑀻’’𑀢𑀺 𑀏𑀢𑁂𑀲𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀘𑀢𑀼𑀧𑀭𑀺𑀓𑁆𑀔𑀸𑀭𑀸𑀤𑀺𑀯𑀡𑁆𑀡𑀦𑀸

𑁩𑁪𑁧. ‘‘𑀲𑀼𑀚𑀁 𑀧𑀕𑁆𑀕𑀡𑁆𑀳𑀦𑁆𑀢𑀸𑀦’’𑀦𑁆𑀢𑀺 𑀧𑀼𑀭𑁄𑀳𑀺𑀢𑀲𑁆𑀲 𑀲𑀬𑀫𑁂𑀯 𑀓𑀝𑀘𑁆𑀙𑀼𑀕𑁆𑀕𑀳𑀡𑀚𑁄𑀢𑀦𑁂𑀦 𑀏𑀯𑀁 𑀲𑀳𑀢𑁆𑀣𑀸, 𑀲𑀓𑁆𑀓𑀘𑁆𑀘𑀜𑁆𑀘 𑀤𑀸𑀦𑁂 𑀬𑀼𑀢𑁆𑀢𑀢𑀸 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺 ¶ . 𑀏𑀯𑀁 𑀤𑀼𑀚𑁆𑀚𑀸𑀢𑀲𑁆𑀲𑀸𑀢𑀺 𑀏𑀢𑁆𑀣𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁪𑁨. 𑀢𑀺𑀡𑁆𑀡𑀁 𑀞𑀸𑀦𑀸𑀦𑀦𑁆𑀢𑀺 𑀤𑀸𑀦𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀪𑀽𑀢𑀸𑀲𑀼 𑀢𑀻𑀲𑀼 𑀪𑀽𑀫𑀻𑀲𑀼, 𑀅𑀯𑀢𑁆𑀣𑀸𑀲𑀽𑀢𑀺 𑀅𑀢𑁆𑀣𑁄. 𑀘𑀮𑀦𑁆𑀢𑀻𑀢𑀺 𑀓𑀫𑁆𑀧𑀦𑁆𑀢𑀺 𑀧𑀼𑀭𑀺𑀫𑀸𑀓𑀸𑀭𑁂𑀦 𑀦 𑀢𑀺𑀝𑁆𑀞𑀦𑁆𑀢𑀺. 𑀓𑀭𑀡𑀢𑁆𑀣𑁂𑀢𑀺 𑀢𑀢𑀺𑀬𑀸𑀯𑀺𑀪𑀢𑁆𑀢𑀺𑀅𑀢𑁆𑀣𑁂. 𑀓𑀢𑁆𑀢𑀭𑀺 𑀳𑁂𑀢𑀁 𑀲𑀸𑀫𑀺𑀯𑀘𑀦𑀁 𑀓𑀭𑀡𑀻𑀬𑀲𑀤𑁆𑀤𑀸𑀧𑁂𑀓𑁆𑀔𑀸𑀬. ‘‘𑀧𑀘𑁆𑀘𑀸𑀦𑀼𑀢𑀸𑀧𑁄 𑀦 𑀓𑀢𑁆𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀅𑀓𑀭𑀡𑀽𑀧𑀸𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀩𑁆𑀩𑀘𑁂𑀢𑀦𑀸 𑀧𑀦 𑀅𑀘𑀮𑀸 𑀧𑀢𑀺𑀝𑁆𑀞𑀧𑁂𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀘𑀮𑀸𑀢𑀺 𑀤𑀴𑁆𑀳𑀸 𑀓𑁂𑀦𑀘𑀺 𑀅𑀲𑀁𑀳𑀻𑀭𑀸. 𑀧𑀢𑀺𑀝𑁆𑀞𑀧𑁂𑀢𑀩𑁆𑀩𑀸𑀢𑀺 𑀲𑀼𑀧𑀢𑀺𑀝𑁆𑀞𑀺𑀢𑀸 𑀓𑀸𑀢𑀩𑁆𑀩𑀸. 𑀏𑀯𑀁 𑀓𑀭𑀡𑁂𑀦 𑀳𑀺 𑀬𑀣𑀸 𑀢𑀁 𑀤𑀸𑀦𑀁 𑀲𑀫𑁆𑀧𑀢𑀺 𑀬𑀣𑀸𑀥𑀺𑀧𑁆𑀧𑀸𑀬𑀁 𑀦𑀺𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀆𑀬𑀢𑀺𑀫𑁆𑀧𑀺 𑀯𑀺𑀧𑀼𑀮𑀨𑀮𑀢𑀸𑀬𑀸𑀢𑀺 𑀆𑀳 ‘‘𑀏𑀯𑀜𑁆𑀳𑀺 𑀤𑀸𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀻’’𑀢𑀺, 𑀯𑀺𑀧𑁆𑀧𑀝𑀺𑀲𑀸𑀭𑁂𑀦 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀪𑀸𑀯𑀢𑁄. 𑀫𑀼𑀜𑁆𑀘𑀘𑁂𑀢𑀦𑀸𑀢𑀺 𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀸. 𑀢𑀲𑁆𑀲𑀸 𑀦𑀺𑀘𑁆𑀘𑀮𑀪𑀸𑀯𑁄 𑀦𑀸𑀫 𑀫𑀼𑀢𑁆𑀢𑀘𑀸𑀕𑀢𑀸 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀉𑀴𑀸𑀭𑀪𑀸𑀯𑁄, 𑀲𑀫𑀦𑀼𑀲𑁆𑀲𑀭𑀡𑀘𑁂𑀢𑀦𑀸𑀬 𑀧𑀦 𑀦𑀺𑀘𑁆𑀘𑀮𑀪𑀸𑀯𑁄 ‘‘𑀅𑀳𑁄 𑀫𑀬𑀸 𑀤𑀸𑀦𑀁 𑀤𑀺𑀦𑁆𑀦𑀁 𑀲𑀸𑀥𑀼 𑀲𑀼𑀝𑁆𑀞𑀽’’𑀢𑀺 𑀢𑀲𑁆𑀲 𑀲𑀓𑁆𑀓𑀘𑁆𑀘𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀅𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀫𑀼𑀜𑁆𑀘𑀘𑁂𑀢𑀦𑀁, 𑀢𑀢𑁆𑀣 𑀧𑀘𑁆𑀘𑀸𑀲𑀫𑀦𑀼𑀲𑁆𑀲𑀭𑀡𑀘𑁂𑀢𑀦𑀜𑁆𑀘 𑀯𑀼𑀢𑁆𑀢𑀦𑀬𑁂𑀦 𑀦𑀺𑀘𑁆𑀘𑀮𑀁 𑀅𑀓𑀭𑁄𑀦𑁆𑀢𑀲𑁆𑀲 𑀯𑀺𑀧𑁆𑀧𑀝𑀺𑀲𑀸𑀭𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲. 𑀔𑁂𑀢𑁆𑀢𑀯𑀺𑀲𑁂𑀲𑁂 𑀧𑀭𑀺𑀘𑁆𑀘𑀸𑀕𑀲𑁆𑀲 𑀓𑀢𑀢𑁆𑀢𑀸 𑀮𑀤𑁆𑀥𑁂𑀲𑀼𑀧𑀺 𑀉𑀴𑀸𑀭𑁂𑀲𑀼 ¶ 𑀪𑁄𑀕𑁂𑀲𑀼 𑀘𑀺𑀢𑁆𑀢𑀁 𑀦𑀸𑀧𑀺 𑀦𑀫𑀢𑀺. 𑀬𑀣𑀸 𑀓𑀣𑀦𑁆𑀢𑀺 𑀆𑀳 ‘‘𑀫𑀳𑀸𑀭𑁄𑀭𑀼𑀯𑀁 𑀉𑀧𑀧𑀦𑁆𑀦𑀲𑁆𑀲 𑀲𑁂𑀝𑁆𑀞𑀺𑀕𑀳𑀧𑀢𑀺𑀦𑁄 𑀯𑀺𑀬𑀸’’𑀢𑀺.

𑀲𑁄 ¶ 𑀓𑀺𑀭 𑀢𑀕𑀭𑀲𑀺𑀔𑀺𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀅𑀢𑁆𑀢𑀦𑁄 𑀕𑁂𑀳𑀤𑁆𑀯𑀸𑀭𑁂 𑀧𑀺𑀡𑁆𑀟𑀸𑀬 𑀞𑀺𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀲 𑀲𑀫𑀡𑀲𑁆𑀲 𑀧𑀺𑀡𑁆𑀟𑀧𑀸𑀢𑀁 𑀤𑁂𑀳𑀻’’𑀢𑀺 𑀪𑀭𑀺𑀬𑀁 𑀆𑀡𑀸𑀧𑁂𑀢𑁆𑀯𑀸 𑀭𑀸𑀚𑀼𑀧𑀝𑁆𑀞𑀸𑀦𑀢𑁆𑀣𑀁 𑀧𑀓𑁆𑀓𑀸𑀫𑀺. 𑀲𑁂𑀝𑁆𑀞𑀺𑀪𑀭𑀺𑀬𑀸 𑀲𑀧𑁆𑀧𑀜𑁆𑀜𑀚𑀸𑀢𑀺𑀓𑀸, 𑀲𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀬𑀸 𑀏𑀢𑁆𑀢𑀓𑁂𑀦 𑀓𑀸𑀮𑁂𑀦 ‘𑀇𑀫𑀲𑁆𑀲 𑀤𑁂𑀣𑀸’𑀢𑀺 𑀯𑀘𑀦𑀫𑀢𑁆𑀢𑀁 𑀧𑀺𑀲𑁆𑀲 𑀦 𑀲𑀼𑀢𑀧𑀼𑀩𑁆𑀩𑀁, 𑀅𑀬𑀜𑁆𑀘 𑀫𑀜𑁆𑀜𑁂 𑀅𑀳𑁄𑀲𑀺 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄, 𑀬𑀣𑀸 𑀢𑀣𑀸 𑀅𑀤𑀢𑁆𑀯𑀸 𑀧𑀡𑀻𑀢𑀁 𑀧𑀺𑀡𑁆𑀟𑀧𑀸𑀢𑀁 𑀤𑀲𑁆𑀲𑀸𑀫𑀻’’𑀢𑀺 𑀉𑀧𑀕𑀦𑁆𑀢𑁆𑀯𑀸 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀁 𑀆𑀤𑀸𑀬 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑁂𑀳𑀺 𑀲𑀸𑀮𑀺𑀢𑀡𑁆𑀟𑀼𑀮𑁂𑀳𑀺 𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑀤𑀦𑀼𑀭𑀽𑀧𑀁 𑀔𑀸𑀤𑀦𑀻𑀬𑀁, 𑀩𑁆𑀬𑀜𑁆𑀚𑀦𑀁, 𑀲𑀽𑀧𑁂𑀬𑁆𑀬𑀜𑁆𑀘 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀩𑀳𑀺 𑀕𑀦𑁆𑀥𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀲𑁆𑀲 𑀳𑀢𑁆𑀣𑁂𑀲𑀼 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀯𑀦𑁆𑀤𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 ‘‘𑀅𑀜𑁆𑀜𑁂𑀲𑀫𑁆𑀧𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀗𑁆𑀕𑀳𑀁 ¶ 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸𑀯 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄𑀧𑀺 𑀔𑁄 𑀲𑁂𑀝𑁆𑀞𑀺 𑀭𑀸𑀚𑀼𑀧𑀝𑁆𑀞𑀸𑀦𑀁 𑀓𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀅𑀳𑀁 ‘‘𑀢𑀼𑀫𑁆𑀳𑀸𑀓𑀁 𑀧𑀺𑀡𑁆𑀟𑀧𑀸𑀢𑀁 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀦𑁆𑀢𑁄, 𑀅𑀧𑀺 𑀯𑁄 𑀮𑀤𑁆𑀥𑁄 𑀧𑀺𑀡𑁆𑀟𑀧𑀸𑀢𑁄𑀢𑀺. 𑀆𑀫 𑀲𑁂𑀝𑁆𑀞𑀺 𑀮𑀤𑁆𑀥𑁄𑀢𑀺. ‘‘𑀧𑀲𑁆𑀲𑀸𑀫𑀸’’𑀢𑀺 𑀕𑀻𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀑𑀮𑁄𑀓𑁂𑀲𑀺. 𑀅𑀣𑀲𑁆𑀲 𑀧𑀺𑀡𑁆𑀟𑀧𑀸𑀢𑀕𑀦𑁆𑀥𑁄 𑀉𑀝𑁆𑀞𑀳𑀺𑀢𑁆𑀯𑀸 𑀦𑀸𑀲𑀧𑀼𑀝𑀁 𑀧𑀽𑀭𑁂𑀲𑀺. 𑀲𑁄 ‘‘𑀫𑀳𑀸 𑀯𑀢 𑀫𑁂 𑀥𑀦𑀩𑁆𑀬𑀬𑁄 𑀚𑀸𑀢𑁄’’𑀢𑀺 𑀘𑀺𑀢𑁆𑀢𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑁄𑀲𑀺. 𑀯𑀺𑀧𑁆𑀧𑀝𑀺𑀲𑀸𑀭𑀲𑁆𑀲 𑀧𑀦 𑀉𑀧𑁆𑀧𑀦𑁆𑀦𑀸𑀓𑀸𑀭𑁄 ‘‘𑀯𑀭𑀫𑁂𑀢’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁧.𑁧𑁩𑁧) 𑀧𑀸𑀴𑀺𑀬𑀁 𑀆𑀕𑀢𑁄𑀬𑁂𑀯. 𑀪𑀸𑀢𑀼 𑀧𑀦𑀸𑀬𑀁 𑀏𑀓𑀁 𑀧𑀼𑀢𑁆𑀢𑀓𑀁 ¶ 𑀲𑀸𑀧𑀢𑁂𑀬𑁆𑀬𑀓𑀸𑀭𑀡𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺, 𑀢𑁂𑀦 𑀫𑀳𑀸𑀭𑁄𑀭𑀼𑀯𑀁 𑀉𑀧𑀧𑀦𑁆𑀦𑁄. 𑀧𑀺𑀡𑁆𑀟𑀧𑀸𑀢𑀤𑀸𑀦𑁂𑀦 𑀧𑀦𑁂𑀲 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀲𑀼𑀕𑁆𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑁄, 𑀲𑀢𑁆𑀢𑀓𑁆𑀔𑀢𑁆𑀢𑀼𑀫𑁂𑀯 𑀘 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄, 𑀦 𑀘𑀸𑀲𑁆𑀲 𑀉𑀴𑀸𑀭𑁂𑀲𑀼 𑀪𑁄𑀕𑁂𑀲𑀼 𑀘𑀺𑀢𑁆𑀢𑀁 𑀦𑀫𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀸𑀧𑀺 𑀉𑀴𑀸𑀭𑁂𑀲𑀼 𑀪𑁄𑀕𑁂𑀲𑀼 𑀘𑀺𑀢𑁆𑀢𑀁 𑀦𑀫𑀢𑀻’’𑀢𑀺.

𑁩𑁪𑁩. 𑀆𑀓𑀭𑁄𑀢𑀺 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀢𑀸𑀬 𑀲𑀫𑀭𑀺𑀬𑀸𑀤𑀁 𑀲𑀧𑀭𑀺𑀘𑁆𑀙𑁂𑀤𑀁 𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀆𑀓𑀸𑀭𑁄, 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀤𑀲𑀳𑀺 𑀆𑀓𑀸𑀭𑁂𑀳𑀻𑀢𑀺 𑀤𑀲𑀳𑀺 𑀓𑀸𑀭𑀡𑁂𑀳𑀻’’𑀢𑀺. 𑀧𑀝𑀺𑀕𑁆𑀕𑀸𑀳𑀓𑀢𑁄 𑀯𑀸𑀢𑀺 𑀩𑀮𑀯𑀢𑀭𑁄 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑁄 𑀧𑀝𑀺𑀕𑁆𑀕𑀸𑀳𑀓𑀢𑁄𑀯 𑀉𑀧𑁆𑀧𑀚𑁆𑀚𑀢𑀺, 𑀇𑀢𑀭𑁄 𑀧𑀦 𑀤𑁂𑀬𑁆𑀬𑀥𑀫𑁆𑀫𑀢𑁄, 𑀧𑀭𑀺𑀯𑀸𑀭𑀚𑀦𑀢𑁄𑀧𑀺 𑀉𑀧𑁆𑀧𑀚𑁆𑀚𑁂𑀬𑁆𑀬𑁂𑀯. 𑀉𑀧𑁆𑀧𑀚𑁆𑀚𑀺𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑀁. 𑀢𑁂𑀲𑀁𑀬𑁂𑀯 𑀧𑀸𑀡𑀸𑀢𑀺𑀧𑀸𑀢𑀻𑀦𑀁. 𑀬𑀚𑀦𑀁 𑀦𑀸𑀫𑁂𑀢𑁆𑀣 𑀤𑀸𑀦𑀁 𑀅𑀥𑀺𑀧𑁆𑀧𑁂𑀢𑀁, 𑀦 𑀅𑀕𑁆𑀕𑀺𑀚𑀼𑀳𑀦𑀦𑁆𑀢𑀺 𑀆𑀳 ‘‘𑀬𑀚𑀢𑀁 𑀪𑀯𑀦𑁆𑀢𑀺 𑀤𑁂𑀢𑀼 𑀪𑀯’’𑀦𑁆𑀢𑀺. 𑀯𑀺𑀲𑁆𑀲𑀚𑁆𑀚𑀢𑀽𑀢𑀺 𑀫𑀼𑀢𑁆𑀢𑀘𑀸𑀕𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑀢𑀼. 𑀅𑀩𑁆𑀪𑀦𑁆𑀢𑀭𑀦𑁆𑀢𑀺 𑀅𑀚𑁆𑀛𑀢𑁆𑀢𑀁, 𑀲𑀓𑀲𑀦𑁆𑀢𑀸𑀦𑁂𑀢𑀺 𑀅𑀢𑁆𑀣𑁄.

𑁩𑁪𑁪. 𑀳𑁂𑀝𑁆𑀞𑀸 𑀲𑁄𑀴𑀲 𑀧𑀭𑀺𑀓𑁆𑀔𑀸𑀭𑀸 𑀯𑀼𑀢𑁆𑀢𑀸 𑀬𑀜𑁆𑀜𑀲𑁆𑀲 𑀢𑁂 𑀯𑀢𑁆𑀣𑀼𑀁 𑀓𑀢𑁆𑀯𑀸, 𑀇𑀥 𑀧𑀦 𑀲𑀦𑁆𑀤𑀲𑁆𑀲𑀦𑀸𑀤𑀺𑀯𑀲𑁂𑀦 𑀅𑀦𑀼𑀫𑁄𑀤𑀦𑀸𑀬 𑀆𑀭𑀤𑁆𑀥𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑁄𑀴𑀲𑀳𑀺 𑀆𑀓𑀸𑀭𑁂𑀳𑀻’’𑀢𑀺. 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀤𑁂𑀲𑀦𑀸𑀦𑀼𑀪𑀸𑀯𑁂𑀦 𑀧𑀘𑁆𑀘𑀓𑁆𑀔𑀢𑁄 𑀯𑀺𑀬 𑀨𑀮𑀁 𑀤𑀲𑁆𑀲𑁂𑀢𑁆𑀯𑀸, 𑀅𑀦𑁂𑀓𑀯𑀸𑀭𑀁 𑀧𑀦 𑀓𑀣𑀦𑀢𑁄 𑀘 𑀆𑀫𑁂𑀟𑀺𑀢𑀯𑀘𑀦𑀁. 𑀢𑀫𑀢𑁆𑀣𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀤𑀸𑀦𑀨𑀮𑀯𑀲𑁂𑀦 𑀓𑀫𑁆𑀫𑀨𑀮𑀲𑀫𑁆𑀩𑀦𑁆𑀥𑀁. 𑀲𑀫𑀸𑀤𑀧𑁂𑀢𑁆𑀯𑀸𑀢𑀺 𑀲𑀼𑀢𑀫𑀢𑁆𑀢𑀫𑁂𑀯 𑀅𑀓𑀢𑁆𑀯𑀸 ¶ 𑀬𑀣𑀸 𑀭𑀸𑀚𑀸 𑀢𑀫𑀢𑁆𑀣𑀁 𑀲𑀫𑁆𑀫𑀤𑁂𑀯 𑀆𑀤𑀺𑀬𑀢𑀺 ¶ 𑀘𑀺𑀢𑁆𑀢𑁂 𑀓𑀭𑁄𑀦𑁆𑀢𑁄 𑀲𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀢𑀣𑀸 𑀲𑀓𑁆𑀓𑀘𑁆𑀘𑀁 𑀆𑀤𑀸𑀧𑁂𑀢𑁆𑀯𑀸. 𑀆𑀫𑁂𑀟𑀺𑀢𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

‘‘𑀯𑀺𑀧𑁆𑀧𑀝𑀺𑀲𑀸𑀭𑀯𑀺𑀦𑁄𑀤𑀦𑁂𑀦𑀸’’𑀢𑀺 ¶ 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀮𑁄𑀪𑀤𑁄𑀲𑀫𑁄𑀳𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀫𑀸𑀦𑀸𑀤𑀬𑁄𑀧𑀺 𑀳𑀺 𑀤𑀸𑀦𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸, 𑀢𑁂𑀲𑀁 𑀯𑀺𑀦𑁄𑀤𑀦𑁂𑀦𑀧𑀺 𑀢𑀁 𑀲𑀫𑀼𑀢𑁆𑀢𑁂𑀚𑀺𑀢𑀁 𑀦𑀸𑀫 𑀳𑁄𑀢𑀺 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀧𑁆𑀧𑀢𑁆𑀢𑀺𑀢𑁄. 𑀆𑀲𑀦𑁆𑀦𑀢𑀭𑀪𑀸𑀯𑀢𑁄 𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀲𑁆𑀲 𑀢𑀩𑁆𑀩𑀺𑀦𑁄𑀤𑀦𑀫𑁂𑀯 𑀕𑀳𑀺𑀢𑀁, 𑀧𑀯𑀢𑁆𑀢𑀺𑀢𑁂𑀧𑀺 𑀳𑀺 𑀤𑀸𑀦𑁂 𑀢𑀲𑁆𑀲 𑀲𑀫𑁆𑀪𑀯𑀢𑁄. 𑀬𑀸𑀣𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑁂𑀳𑀺 𑀕𑀼𑀡𑁂𑀳𑀺 𑀢𑀼𑀝𑁆𑀞𑀧𑀳𑀝𑁆𑀞𑀪𑀸𑀯𑀸𑀧𑀸𑀤𑀦𑀁 𑀲𑀫𑁆𑀧𑀳𑀁𑀲𑀦𑀦𑁆𑀢𑀺 𑀆𑀳 ‘‘𑀲𑀼𑀦𑁆𑀤𑀭𑀁 𑀢𑁂…𑀧𑁂… 𑀣𑀼𑀢𑀺𑀁 𑀓𑀢𑁆𑀯𑀸 𑀓𑀣𑁂𑀲𑀻’’𑀢𑀺. 𑀥𑀫𑁆𑀫𑀢𑁄𑀢𑀺 𑀲𑀘𑁆𑀘𑀢𑁄. 𑀲𑀘𑁆𑀘𑀜𑁆𑀳𑀺 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 𑀥𑀫𑁆𑀫𑀁, 𑀉𑀧𑀲𑀫𑀘𑀭𑀺𑀬𑀸𑀪𑀸𑀯𑀢𑁄 𑀲𑀫𑀁, 𑀬𑀼𑀢𑁆𑀢𑀪𑀸𑀯𑁂𑀦 𑀓𑀸𑀭𑀡𑀦𑁆𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺.

𑁩𑁪𑁫. 𑀢𑀲𑁆𑀫𑀺𑀁 𑀬𑀜𑁆𑀜𑁂 𑀭𑀼𑀓𑁆𑀔𑀢𑀺𑀡𑀘𑁆𑀙𑁂𑀤𑁄𑀧𑀺 𑀦𑀸𑀫 𑀦𑀸𑀳𑁄𑀲𑀺, 𑀓𑀼𑀢𑁄 𑀧𑀸𑀡𑀯𑀥𑁄𑀢𑀺 𑀧𑀸𑀡𑀯𑀥𑀸𑀪𑀸𑀯𑀲𑁆𑀲𑁂𑀯 𑀤𑀴𑁆𑀳𑀻𑀓𑀭𑀡𑀢𑁆𑀣𑀁 𑀲𑀩𑁆𑀩𑀲𑁄 𑀯𑀺𑀧𑀭𑀻𑀢𑀕𑀸𑀳𑀸𑀯𑀺𑀤𑀽𑀲𑀺𑀢𑀜𑁆𑀘𑀲𑁆𑀲 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀦𑁂𑀯 𑀕𑀸𑀯𑁄 𑀳𑀜𑁆𑀜𑀺𑀁𑀲𑀽’’𑀢𑀺 𑀆𑀤𑀺𑀁 𑀯𑀢𑁆𑀯𑀸𑀧𑀺 ‘‘𑀦 𑀭𑀼𑀓𑁆𑀔𑀸 𑀙𑀺𑀚𑁆𑀚𑀺𑀁𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑁂𑀦𑀸𑀳 ‘‘𑀓𑀺𑀁 𑀧𑀦 𑀕𑀸𑀯𑁄’’𑀢𑀺𑀆𑀤𑀺. 𑀩𑀭𑀺𑀳𑀺𑀲𑀢𑁆𑀣𑀸𑀬𑀸𑀢𑀺 𑀧𑀭𑀺𑀘𑁆𑀙𑁂𑀤𑀦𑀢𑁆𑀣𑀸𑀬. 𑀯𑀦𑀫𑀸𑀮𑀸𑀲𑀗𑁆𑀔𑁂𑀧𑁂𑀦𑀸𑀢𑀺 𑀯𑀦𑀧𑀼𑀧𑁆𑀨𑁂𑀳𑀺 𑀕𑀦𑁆𑀣𑀺𑀢𑀫𑀸𑀮𑀸𑀦𑀺𑀬𑀸𑀫𑁂𑀦. 𑀪𑀽𑀫𑀺𑀬𑀁 𑀯𑀸 𑀧𑀢𑁆𑀣𑀭𑀦𑁆𑀢𑀻𑀢𑀺 𑀯𑁂𑀤𑀺𑀪𑀽𑀫𑀺𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑀸 𑀢𑀢𑁆𑀣 𑀧𑀦𑁆𑀣𑀭𑀦𑁆𑀢𑀺. 𑀅𑀦𑁆𑀢𑁄𑀕𑁂𑀳𑀤𑀸𑀲𑀸𑀤𑀬𑁄𑀢𑀺 𑀅𑀦𑁆𑀢𑁄𑀚𑀸𑀢𑀥𑀦𑀓𑁆𑀓𑀻𑀢𑀓𑀭𑀫𑀭𑀸𑀦𑀻𑀢𑀲𑀬𑀁𑀤𑀸𑀲𑀸. 𑀧𑀼𑀩𑁆𑀩𑀫𑁂𑀯𑀸𑀢𑀺 𑀪𑀢𑀺𑀓𑀭𑀡𑀢𑁄 𑀧𑀕𑁂𑀯. 𑀕𑀳𑁂𑀢𑁆𑀯𑀸 𑀓𑀭𑁄𑀦𑁆𑀢𑀻𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀕𑀳𑁂𑀢𑁆𑀯𑀸 𑀓𑀭𑁄𑀦𑁆𑀢𑀺. 𑀢𑀚𑁆𑀚𑀺𑀢𑀸𑀢𑀺 ¶ 𑀕𑀚𑁆𑀚𑀺𑀢𑀸. 𑀧𑀺𑀬𑀲𑀫𑀼𑀤𑀸𑀘𑀸𑀭𑁂𑀦𑁂𑀯𑀸𑀢𑀺 𑀇𑀝𑁆𑀞𑀯𑀘𑀦𑁂𑀦𑁂𑀯. 𑀨𑀸𑀡𑀺𑀢𑁂𑀦 𑀘𑁂𑀯𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄, 𑀢𑁂𑀦 𑀧𑀡𑀻𑀢𑀧𑀡𑀻𑀢𑀸𑀦𑀁 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀤𑀻𑀦𑀜𑁆𑀘𑁂𑀯 𑀯𑀢𑁆𑀣𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀬𑀸𑀦𑀲𑁂𑀬𑁆𑀬𑀸𑀤𑀻𑀦𑀜𑁆𑀘 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄, 𑀢𑁂𑀦𑀸𑀳 ‘‘𑀧𑀡𑀻𑀢𑁂𑀳𑀺 𑀲𑀧𑁆𑀧𑀺𑀢𑁂𑀮𑀸𑀤𑀺𑀲𑀫𑁆𑀫𑀺𑀲𑁆𑀲𑁂𑀳𑁂𑀯𑀸’’𑀢𑀺𑀆𑀤𑀺.

𑁩𑁪𑁬. 𑀲𑀁 𑀦𑀸𑀫 𑀥𑀦𑀁, 𑀢𑀲𑁆𑀲 𑀧𑀢𑀻𑀢𑀺 𑀲𑀧𑀢𑀺, 𑀥𑀦𑀯𑀸. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀳𑀺𑀢𑀸𑀯𑀳𑀢𑁆𑀢𑀸 𑀢𑀲𑁆𑀲 𑀳𑀺𑀢𑀦𑁆𑀢𑀺 𑀲𑀸𑀧𑀢𑁂𑀬𑁆𑀬𑀁, 𑀢𑀤𑁂𑀯 𑀥𑀦𑀁. 𑀢𑁂𑀦𑀸𑀳 ‘‘𑀧𑀳𑀽𑀢𑀁 𑀲𑀸𑀧𑀢𑁂𑀬𑁆𑀬𑀁 𑀆𑀤𑀸𑀬𑀸𑀢𑀺 𑀩𑀳𑀼𑀁 𑀥𑀦𑀁 𑀕𑀳𑁂𑀢𑁆𑀯𑀸’’𑀢𑀺. 𑀕𑀸𑀫𑀪𑀸𑀕𑁂𑀦𑀸𑀢𑀺 𑀲𑀗𑁆𑀓𑀺𑀢𑁆𑀢𑀦𑀯𑀲𑁂𑀦 𑀕𑀸𑀫𑁂 𑀯𑀸 𑀕𑀳𑁂𑀢𑀩𑁆𑀩𑀪𑀸𑀕𑁂𑀦.

𑁩𑁪𑁭. ‘‘𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸’’𑀢𑀺 𑀬𑀸𑀕𑀼𑀲𑀻𑀲𑁂𑀦 𑀧𑀸𑀢𑀭𑀸𑀲𑀪𑁄𑀚𑀦𑀫𑀸𑀳. 𑀧𑀼𑀭𑀢𑁆𑀣𑀺𑀫𑁂𑀦 𑀬𑀜𑁆𑀜𑀯𑀸𑀝𑀲𑁆𑀲𑀸𑀢𑀺 𑀭𑀜𑁆𑀜𑁄 𑀤𑀸𑀦𑀲𑀸𑀮𑀸𑀬 𑀦𑀸𑀢𑀺𑀤𑀽𑀭𑁂 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀪𑀸𑀕𑁂𑀢𑀺 ¶ 𑀅𑀢𑁆𑀣𑁄, 𑀬𑀢𑁄 𑀢𑀢𑁆𑀣 𑀧𑀸𑀢𑀭𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀓𑀺𑀮𑀦𑁆𑀢𑀭𑀽𑀧𑀸𑀬𑁂𑀯 𑀲𑀸𑀬𑀦𑁆𑀳𑁂 𑀲𑀸𑀮𑀁 𑀧𑀸𑀧𑀼𑀡𑀦𑁆𑀢𑀺 ‘‘𑀤𑀓𑁆𑀔𑀺𑀡𑁂𑀦 𑀬𑀜𑁆𑀜𑀯𑀸𑀝𑀲𑁆𑀲𑀸’’𑀢𑀺 𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁩𑁪𑁮. 𑀧𑀭𑀺𑀳𑀸𑀭𑁂𑀦𑀸𑀢𑀺 ¶ 𑀪𑀕𑀯𑀦𑁆𑀢𑀁 𑀕𑀭𑀼𑀁 𑀓𑀢𑁆𑀯𑀸 𑀅𑀕𑀸𑀭𑀯𑀧𑀭𑀺𑀳𑀸𑀭𑁂𑀦.

𑀦𑀺𑀘𑁆𑀘𑀤𑀸𑀦𑀅𑀦𑀼𑀓𑀼𑀮𑀬𑀜𑁆𑀜𑀯𑀡𑁆𑀡𑀦𑀸

𑁩𑁪𑁯. 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬𑀸𑀢𑀺 𑀤𑀸𑀦𑁂 𑀉𑀝𑁆𑀞𑀸𑀦𑀯𑀻𑀭𑀺𑀬𑀁 𑀲𑀓𑁆𑀓𑀘𑁆𑀘𑀁 𑀓𑀢𑁆𑀯𑀸. 𑀅𑀧𑁆𑀧𑀲𑀫𑁆𑀪𑀸𑀭𑀢𑀭𑁄𑀢𑀺 𑀅𑀢𑀺𑀯𑀺𑀬 𑀧𑀭𑀺𑀢𑁆𑀢𑀲𑀫𑁆𑀪𑀸𑀭𑁄. 𑀲𑀫𑀸𑀭𑀪𑀻𑀬𑀢𑀺 𑀬𑀜𑁆𑀜𑁄 𑀏𑀢𑁂𑀳𑀻𑀢𑀺 𑀲𑀫𑀸𑀭𑀫𑁆𑀪𑀸, 𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀯𑀲𑁂𑀦 𑀧𑀯𑀢𑁆𑀢𑀲𑀢𑁆𑀢𑀧𑀻𑀴𑀸. 𑀅𑀧𑁆𑀧𑀝𑁆𑀞𑀢𑀭𑁄𑀢𑀺 𑀧𑀦 𑀅𑀢𑀺𑀯𑀺𑀬 𑀅𑀧𑁆𑀧𑀓𑀺𑀘𑁆𑀘𑁄𑀢𑀺 𑀅𑀢𑁆𑀣𑁄. 𑀯𑀺𑀧𑀸𑀓𑀲𑀜𑁆𑀜𑀺𑀢𑀁 𑀅𑀢𑀺𑀲𑀬𑁂𑀦 𑀫𑀳𑀦𑁆𑀢𑀁 𑀲𑀤𑀺𑀲𑀨𑀮𑀁 𑀏𑀢𑀲𑁆𑀲𑀸𑀢𑀺 ¶ 𑀫𑀳𑀧𑁆𑀨𑀮𑀢𑀭𑁄. 𑀉𑀤𑀬𑀲𑀜𑁆𑀜𑀺𑀢𑀁 𑀅𑀢𑀺𑀲𑀬𑁂𑀦 𑀫𑀳𑀦𑁆𑀢𑀁 𑀦𑀺𑀲𑁆𑀲𑀦𑁆𑀤𑀸𑀤𑀺𑀨𑀮𑀁 𑀏𑀢𑀲𑁆𑀲𑀸𑀢𑀺 𑀫𑀳𑀸𑀦𑀺𑀲𑀁𑀲𑀢𑀭𑁄. 𑀥𑀼𑀯𑀤𑀸𑀦𑀸𑀦𑀻𑀢𑀺 𑀥𑀼𑀯𑀸𑀦𑀺 𑀣𑀺𑀭𑀸𑀦𑀺 𑀅𑀘𑁆𑀙𑀺𑀦𑁆𑀦𑀸𑀦𑀺 𑀓𑀢𑁆𑀯𑀸 𑀤𑀸𑀢𑀩𑁆𑀩𑀤𑀸𑀦𑀸𑀦𑀺. 𑀅𑀦𑀼𑀓𑀼𑀮𑀬𑀜𑁆𑀜𑀸𑀦𑀻𑀢𑀺 𑀅𑀦𑀼𑀓𑀼𑀮𑀁 𑀓𑀼𑀮𑀸𑀦𑀼𑀓𑁆𑀓𑀫𑀁 𑀉𑀧𑀸𑀤𑀸𑀬 𑀤𑀸𑀢𑀩𑁆𑀩𑀤𑀸𑀦𑀸𑀦𑀺, 𑀢𑁂𑀦𑀸𑀳 ‘‘𑀅𑀫𑁆𑀳𑀸𑀓’’𑀦𑁆𑀢𑀺𑀆𑀤𑀺. 𑀦𑀺𑀩𑀤𑁆𑀥𑀤𑀸𑀦𑀸𑀦𑀻𑀢𑀺 𑀦𑀺𑀩𑀦𑁆𑀥𑁂𑀢𑁆𑀯𑀸 𑀦𑀺𑀬𑀫𑁂𑀢𑁆𑀯𑀸 𑀧𑀯𑁂𑀡𑀻𑀯𑀲𑁂𑀦 𑀧𑀯𑀢𑁆𑀢𑀺𑀢𑀤𑀸𑀦𑀸𑀦𑀺.

𑀳𑀢𑁆𑀣𑀺𑀤𑀦𑁆𑀢𑁂𑀦 𑀧𑀯𑀢𑁆𑀢𑀺𑀢𑀸 𑀤𑀦𑁆𑀢𑀫𑀬𑀲𑀮𑀸𑀓𑀸, 𑀬𑀢𑁆𑀣 𑀤𑀸𑀬𑀓𑀸𑀦𑀁 𑀦𑀸𑀫𑀁 𑀅𑀗𑁆𑀓𑀦𑁆𑀢𑀺. 𑀭𑀜𑁆𑀜𑁄𑀢𑀺 𑀲𑁂𑀢𑀯𑀸𑀳𑀦𑀭𑀜𑁆𑀜𑁄.

𑀆𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀲𑁂𑀦𑁄 𑀯𑀺𑀬 𑀫𑀁𑀲𑀧𑁂𑀲𑀺𑀁 𑀓𑀲𑁆𑀫𑀸 𑀑𑀓𑁆𑀔𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀸𑀲𑀻’’𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀧𑀼𑀩𑁆𑀩𑀘𑁂𑀢𑀦𑀸𑀫𑀼𑀜𑁆𑀘𑀘𑁂𑀢𑀦𑀸𑀅𑀧𑀭𑀘𑁂𑀢𑀦𑀸𑀲𑀫𑁆𑀧𑀢𑁆𑀢𑀺𑀬𑀸 𑀤𑀸𑀬𑀓𑀲𑁆𑀲 𑀯𑀲𑁂𑀦 𑀢𑀻𑀡𑀺 𑀅𑀗𑁆𑀕𑀸𑀦𑀺, 𑀯𑀻𑀢𑀭𑀸𑀕𑀢𑀸𑀯𑀻𑀢𑀤𑁄𑀲𑀢𑀸𑀯𑀻𑀢𑀫𑁄𑀳𑀢𑀸𑀧𑀝𑀺𑀧𑀢𑁆𑀢𑀺𑀬𑀸 𑀤𑀓𑁆𑀔𑀺𑀡𑁂𑀬𑁆𑀬𑀲𑁆𑀲 𑀯𑀲𑁂𑀦 𑀢𑀻𑀡𑀻𑀢𑀺 𑀏𑀯𑀁 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑀸𑀬 𑀤𑀓𑁆𑀔𑀺𑀡𑀸𑀬. 𑀅𑀧𑀭𑀸𑀧𑀭𑀁 𑀉𑀧𑁆𑀧𑀚𑁆𑀚𑀦𑀓𑀘𑁂𑀢𑀦𑀸𑀯𑀲𑁂𑀦 𑀫𑀳𑀸𑀦𑀤𑀻 𑀯𑀺𑀬, 𑀫𑀳𑁄𑀖𑁄 𑀯𑀺𑀬 𑀘 𑀇𑀢𑁄 𑀘𑀺𑀢𑁄 𑀘 𑀅𑀪𑀺𑀲𑀦𑁆𑀤𑀺𑀢𑁆𑀯𑀸 𑀑𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑀺𑀬𑀸 𑀧𑀼𑀜𑁆𑀜𑀫𑁂𑀯 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄.

𑁩𑁫𑁦. 𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑀁 𑀦𑀢𑁆𑀣𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀤𑀸𑀬𑀓𑀲𑁆𑀲 𑀩𑁆𑀬𑀸𑀧𑀸𑀭𑀸𑀧𑀚𑁆𑀚𑀦𑀢𑁄, 𑀢𑁂𑀦𑀸𑀳 ‘‘𑀏𑀓𑁂𑀦𑀸’’𑀢𑀺𑀆𑀤𑀺. 𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑀁 𑀅𑀢𑁆𑀣𑀺 𑀬𑀣𑀸𑀭𑀤𑁆𑀥𑀲𑁆𑀲 𑀆𑀯𑀸𑀲𑀲𑁆𑀲 𑀓𑀢𑀺𑀧𑀬𑁂𑀦𑀸𑀧𑀺 𑀓𑀸𑀮𑁂𑀦 𑀧𑀭𑀺𑀲𑀫𑀸𑀧𑁂𑀢𑀩𑁆𑀩𑀢𑁄, 𑀢𑁂𑀦𑀸𑀳 ¶ ‘‘𑀧𑀡𑁆𑀡𑀲𑀸𑀮’’𑀦𑁆𑀢𑀺𑀆𑀤𑀺. 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦𑀸𑀢𑀺 𑀲𑀼𑀢𑁆𑀢𑀦𑁆𑀢𑀧𑀸𑀴𑀺𑀦𑀬𑁂𑀦. (𑀫. 𑀦𑀺. 𑁧.𑁧𑁨, 𑁧𑁩; 𑀅. 𑀦𑀺. 𑁨.𑁫𑁮) 𑀦𑀯 𑀆𑀦𑀺𑀲𑀁𑀲𑀸𑀢𑀺 𑀲𑀻𑀢𑀧𑀝𑀺𑀖𑀸𑀢𑀸𑀤𑀬𑁄 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑀧𑀭𑀺𑀬𑁄𑀲𑀸𑀦𑀸 𑀦𑀯 𑀉𑀤𑀬𑀸. 𑀅𑀧𑁆𑀧𑀫𑀢𑁆𑀢𑀢𑀸𑀬 𑀘𑁂𑀢𑁂 𑀯𑀼𑀢𑁆𑀢𑀸.

𑀬𑀲𑁆𑀫𑀸 𑀆𑀯𑀸𑀲𑀁 𑀤𑁂𑀦𑁆𑀢𑁂𑀦 𑀦𑀸𑀫 𑀲𑀩𑁆𑀩𑀫𑁆𑀧𑀺 𑀧𑀘𑁆𑀘𑀬𑀚𑀸𑀢𑀁 𑀤𑀺𑀦𑁆𑀦𑀫𑁂𑀯 𑀳𑁄𑀢𑀺. 𑀤𑁆𑀯𑁂 𑀢𑀬𑁄 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀺𑀜𑁆𑀘𑀺 ¶ 𑀅𑀮𑀤𑁆𑀥𑀸 𑀆𑀕𑀢𑀲𑁆𑀲𑀧𑀺 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑀁 𑀆𑀭𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀦𑁆𑀳𑀸𑀬𑀺𑀢𑁆𑀯𑀸 𑀧𑀢𑀺𑀲𑁆𑀲𑀬𑁂 𑀫𑀼𑀳𑀼𑀢𑁆𑀢𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀓𑀸𑀬𑁂 𑀩𑀮𑀁 𑀆𑀳𑀭𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑀁 𑀯𑀺𑀬 𑀳𑁄𑀢𑀺 ¶ . 𑀩𑀳𑀺 𑀯𑀺𑀘𑀭𑀦𑁆𑀢𑀲𑁆𑀲 𑀘 𑀓𑀸𑀬𑁂 𑀯𑀡𑁆𑀡𑀥𑀸𑀢𑀼 𑀯𑀸𑀢𑀸𑀢𑀧𑁂𑀳𑀺 𑀓𑀺𑀮𑀫𑀢𑀺, 𑀧𑀢𑀺𑀲𑁆𑀲𑀬𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀫𑀼𑀳𑀼𑀢𑁆𑀢𑀁 𑀦𑀺𑀧𑀦𑁆𑀦𑀲𑁆𑀲 𑀯𑀺𑀲𑀪𑀸𑀕𑀲𑀦𑁆𑀢𑀢𑀺 𑀯𑀽𑀧𑀲𑀫𑁆𑀫𑀢𑀺, 𑀲𑀪𑀸𑀕𑀲𑀦𑁆𑀢𑀢𑀺 𑀧𑀢𑀺𑀝𑁆𑀞𑀸𑀢𑀺, 𑀯𑀡𑁆𑀡𑀥𑀸𑀢𑀼 𑀆𑀳𑀭𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑀸 𑀯𑀺𑀬 𑀳𑁄𑀢𑀺. 𑀩𑀳𑀺 𑀯𑀺𑀘𑀭𑀦𑁆𑀢𑀲𑁆𑀲 𑀘 𑀧𑀸𑀤𑁂 𑀓𑀡𑁆𑀝𑀓𑁄 𑀯𑀺𑀚𑁆𑀛𑀢𑀺, 𑀔𑀸𑀡𑀼 𑀧𑀳𑀭𑀢𑀺, 𑀲𑀭𑀻𑀲𑀧𑀸𑀤𑀺𑀧𑀭𑀺𑀲𑁆𑀲𑀬𑀸 𑀘𑁂𑀯 𑀘𑁄𑀭𑀪𑀬𑀜𑁆𑀘 𑀉𑀧𑁆𑀧𑀚𑁆𑀚𑀢𑀺, 𑀧𑀢𑀺𑀲𑁆𑀲𑀬𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀦𑀺𑀧𑀦𑁆𑀦𑀲𑁆𑀲 𑀲𑀩𑁆𑀩𑁂 𑀢𑁂 𑀧𑀭𑀺𑀲𑁆𑀲𑀬𑀸 𑀦 𑀳𑁄𑀦𑁆𑀢𑀺, 𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑀥𑀫𑁆𑀫𑀧𑀻𑀢𑀺𑀲𑀼𑀔𑀁, 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲 𑀉𑀧𑀲𑀫𑀲𑀼𑀔𑀜𑁆𑀘 𑀉𑀧𑁆𑀧𑀚𑁆𑀚𑀢𑀺 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀸𑀪𑀸𑀯𑀢𑁄. 𑀩𑀳𑀺 𑀯𑀺𑀘𑀭𑀦𑁆𑀢𑀲𑁆𑀲 𑀘 𑀓𑀸𑀬𑁂 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀅𑀓𑁆𑀔𑀻𑀦𑀺 𑀨𑀦𑁆𑀤𑀦𑁆𑀢𑀺, 𑀲𑁂𑀦𑀸𑀲𑀦𑀁 𑀧𑀯𑀺𑀲𑀦𑀓𑁆𑀔𑀡𑁂 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀫𑀼𑀳𑀼𑀢𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀧𑀦 𑀅𑀓𑁆𑀔𑀻𑀦𑀁 𑀧𑀲𑀸𑀤𑁄 𑀆𑀳𑀭𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑁄 𑀯𑀺𑀬 𑀳𑁄𑀢𑀺, 𑀤𑁆𑀯𑀸𑀭𑀯𑀸𑀢𑀧𑀸𑀦𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀧𑀜𑁆𑀜𑀸𑀬𑀦𑁆𑀢𑀺. 𑀏𑀢𑀲𑁆𑀫𑀺𑀜𑁆𑀘 𑀆𑀯𑀸𑀲𑁂 𑀯𑀲𑀦𑁆𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀯𑀸𑀲𑀁 𑀤𑁂𑀦𑁆𑀢𑁂𑀦 𑀦𑀸𑀫 𑀲𑀩𑁆𑀩𑀫𑁆𑀧𑀺 𑀧𑀘𑁆𑀘𑀬𑀚𑀸𑀢𑀁 𑀤𑀺𑀦𑁆𑀦𑀫𑁂𑀯 𑀳𑁄𑀢𑀻’’𑀢𑀺, 𑀢𑀲𑁆𑀫𑀸 𑀏𑀢𑁂 𑀬𑀣𑀸𑀯𑀼𑀢𑁆𑀢𑀸 𑀲𑀩𑁆𑀩𑁂𑀧𑀺 𑀆𑀦𑀺𑀲𑀁𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀧𑁆𑀧𑀫𑀢𑁆𑀢𑀢𑀸𑀬 𑀘𑁂𑀢𑁂 𑀯𑀼𑀢𑁆𑀢𑀸’’𑀢𑀺.

𑀲𑀻𑀢𑀦𑁆𑀢𑀺 𑀅𑀚𑁆𑀛𑀢𑁆𑀢𑀁 𑀥𑀸𑀢𑀼𑀓𑁆𑀔𑁄𑀪𑀯𑀲𑁂𑀦 𑀯𑀸 𑀩𑀳𑀺𑀤𑁆𑀥𑀸 𑀉𑀢𑀼𑀯𑀺𑀧𑀭𑀺𑀡𑀸𑀫𑀯𑀲𑁂𑀦 𑀯𑀸 𑀉𑀧𑁆𑀧𑀚𑁆𑀚𑀦𑀓𑀲𑀻𑀢𑀁. 𑀉𑀡𑁆𑀳𑀦𑁆𑀢𑀺 𑀅𑀕𑁆𑀕𑀺𑀲𑀦𑁆𑀢𑀸𑀧𑀁, 𑀢𑀲𑁆𑀲 𑀯𑀦𑀟𑀸𑀳𑀸𑀤𑀻𑀲𑀼 (𑀯𑀦𑀤𑀸𑀳𑀸𑀤𑀻𑀲𑀼 𑀯𑀸 𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁨𑁯𑁫) 𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀝𑀺𑀳𑀦𑁆𑀢𑀻𑀢𑀺 𑀧𑀝𑀺𑀩𑀸𑀳𑀢𑀺, 𑀬𑀣𑀸 𑀢𑀤𑀼𑀪𑀬𑀯𑀲𑁂𑀦 𑀓𑀸𑀬𑀘𑀺𑀢𑁆𑀢𑀸𑀦𑀁 𑀩𑀸𑀥𑀦𑀁 𑀦 𑀳𑁄𑀢𑀺, 𑀏𑀯𑀁 𑀓𑀭𑁄𑀢𑀺. 𑀲𑀻𑀢𑀼𑀡𑁆𑀳𑀩𑁆𑀪𑀸𑀳𑀢𑁂 ¶ 𑀳𑀺 𑀲𑀭𑀻𑀭𑁂 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀪𑀺𑀓𑁆𑀔𑀼 𑀬𑁄𑀦𑀺𑀲𑁄 𑀧𑀤𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀯𑀸𑀴𑀫𑀺𑀕𑀸𑀦𑀻𑀢𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀘𑀡𑁆𑀟𑀫𑀺𑀕𑁂. 𑀕𑀼𑀢𑁆𑀢𑀲𑁂𑀦𑀸𑀲𑀦𑀜𑁆𑀳𑀺 𑀆𑀭𑀜𑁆𑀜𑀓𑀫𑁆𑀧𑀺 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀢𑁂 𑀧𑀭𑀺𑀲𑁆𑀲𑀬𑀸 𑀦 𑀳𑁄𑀦𑁆𑀢𑀻𑀢𑀺. 𑀲𑀭𑀻𑀲𑀧𑁂𑀢𑀺 𑀬𑁂 𑀓𑁂𑀘𑀺 𑀲𑀭𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀤𑀻𑀖𑀚𑀸𑀢𑀺𑀓𑁂 𑀲𑀧𑁆𑀧𑀸𑀤𑀺𑀓𑁂. 𑀫𑀓𑀲𑁂𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁, 𑀟𑀁𑀲𑀸𑀤𑀻𑀦𑀫𑁆𑀧𑀺 𑀏𑀢𑁂𑀲𑁆𑀯𑁂𑀯 ¶ (𑀏𑀢𑀦𑁂𑀯 𑀲𑀸𑀭𑀢𑁆𑀣. 𑀝𑀻. 𑀘𑀽𑀴𑀯𑀕𑁆𑀕 𑁩.𑁨𑁯𑁫) 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀺𑀲𑀺𑀭𑁂𑀢𑀺 𑀲𑀺𑀲𑀺𑀭𑀓𑀸𑀮𑀯𑀲𑁂𑀦, 𑀲𑀢𑁆𑀢𑀸𑀳𑀯𑀤𑁆𑀤𑀮𑀺𑀓𑀸𑀤𑀺𑀯𑀲𑁂𑀦 𑀘 𑀉𑀧𑁆𑀧𑀦𑁆𑀦𑁂 𑀲𑀺𑀲𑀺𑀭𑀲𑀫𑁆𑀨𑀲𑁆𑀲𑁂. 𑀯𑀼𑀝𑁆𑀞𑀺𑀬𑁄𑀢𑀺 𑀬𑀤𑀸 𑀢𑀤𑀸 𑀉𑀧𑁆𑀧𑀦𑁆𑀦𑀸 𑀯𑀲𑁆𑀲𑀯𑀼𑀝𑁆𑀞𑀺𑀬𑁄 𑀧𑀝𑀺𑀳𑀦𑀢𑀻𑀢𑀺 𑀬𑁄𑀚𑀦𑀸.

𑀯𑀸𑀢𑀸𑀢𑀧𑁄 𑀖𑁄𑀭𑁄𑀢𑀺 𑀭𑀼𑀓𑁆𑀔𑀕𑀘𑁆𑀙𑀸𑀤𑀻𑀦𑀁 𑀉𑀫𑁆𑀫𑀽𑀮𑀪𑀜𑁆𑀚𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀖𑁄𑀭𑁄 𑀲𑀭𑀚𑀅𑀭𑀚𑀸𑀤𑀺𑀪𑁂𑀤𑁄 𑀯𑀸𑀢𑁄 𑀘𑁂𑀯 𑀕𑀺𑀫𑁆𑀳𑀧𑀭𑀺𑀴𑀸𑀳𑀲𑀫𑀬𑁂𑀲𑀼 𑀉𑀧𑁆𑀧𑀢𑁆𑀢𑀺𑀬𑀸 𑀖𑁄𑀭𑁄 𑀲𑀽𑀭𑀺𑀬𑀸𑀢𑀧𑁄 𑀘. 𑀧𑀝𑀺𑀳𑀜𑁆𑀜𑀢𑀻𑀢𑀺 𑀧𑀝𑀺𑀩𑀸𑀳𑀻𑀬𑀢𑀺. 𑀮𑁂𑀡𑀢𑁆𑀣𑀦𑁆𑀢𑀺 𑀦𑀸𑀦𑀸𑀭𑀫𑁆𑀫𑀡𑀢𑁄 𑀘𑀺𑀢𑁆𑀢𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑀢𑁆𑀣𑀁. 𑀲𑀼𑀔𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀧𑀭𑀺𑀲𑁆𑀲𑀬𑀸𑀪𑀸𑀯𑁂𑀦 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀁. 𑀛𑀸𑀬𑀺𑀢𑀼𑀦𑁆𑀢𑀺 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀘𑀺𑀢𑁆𑀢𑀁 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀉𑀧𑀦𑀺𑀚𑁆𑀛𑀸𑀬𑀺𑀢𑀼𑀁. 𑀯𑀺𑀧𑀲𑁆𑀲𑀺𑀢𑀼𑀦𑁆𑀢𑀺 𑀅𑀦𑀺𑀘𑁆𑀘𑀸𑀤𑀺𑀢𑁄 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑀼𑀁.

𑀯𑀺𑀳𑀸𑀭𑁂𑀢𑀺 ¶ 𑀧𑀢𑀺𑀲𑁆𑀲𑀬𑁂. 𑀓𑀸𑀭𑀬𑁂𑀢𑀺 𑀓𑀸𑀭𑀸𑀧𑁂𑀬𑁆𑀬. 𑀭𑀫𑁆𑀫𑁂𑀢𑀺 𑀫𑀦𑁄𑀭𑀫𑁂 𑀦𑀺𑀯𑀸𑀲𑀲𑀼𑀔𑁂. 𑀯𑀸𑀲𑀬𑁂𑀢𑁆𑀣 𑀩𑀳𑀼𑀲𑁆𑀲𑀼𑀢𑁂𑀢𑀺 𑀓𑀸𑀭𑁂𑀢𑁆𑀯𑀸 𑀧𑀦 𑀏𑀢𑁆𑀣 𑀯𑀺𑀳𑀸𑀭𑁂𑀲𑀼 𑀩𑀳𑀼𑀲𑁆𑀲𑀼𑀢𑁂 𑀲𑀻𑀮𑀯𑀦𑁆𑀢𑁂 𑀓𑀮𑁆𑀬𑀸𑀡𑀥𑀫𑁆𑀫𑁂 𑀦𑀺𑀯𑀸𑀲𑁂𑀬𑁆𑀬, 𑀢𑁂 𑀦𑀺𑀯𑀸𑀲𑁂𑀦𑁆𑀢𑁄 𑀧𑀦 𑀢𑁂𑀲𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀬𑀣𑀸 𑀧𑀘𑁆𑀘𑀬𑁂𑀳𑀺 𑀓𑀺𑀮𑀫𑀣𑁄 𑀦 𑀳𑁄𑀢𑀺, 𑀏𑀯𑀁 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘 𑀤𑀤𑁂𑀬𑁆𑀬 𑀉𑀚𑀼𑀪𑀽𑀢𑁂𑀲𑀼 𑀅𑀚𑁆𑀛𑀸𑀲𑀬𑀲𑀫𑁆𑀧𑀦𑁆𑀦𑁂𑀲𑀼 𑀓𑀫𑁆𑀫𑀓𑀫𑁆𑀫𑀨𑀮𑀸𑀦𑀁, 𑀭𑀢𑀦𑀢𑁆𑀢𑀬𑀕𑀼𑀡𑀸𑀦𑀜𑁆𑀘 𑀲𑀤𑁆𑀤𑀳𑀦𑁂𑀦 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸.

𑀇𑀤𑀸𑀦𑀺 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀽𑀧𑀓𑀸𑀭𑀺𑀢𑀁 𑀤𑀲𑁆𑀲𑁂𑀢𑀼𑀁 ¶ ‘‘𑀢𑁂 𑀢𑀲𑁆𑀲𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀢𑁂𑀢𑀺 𑀩𑀳𑀼𑀲𑁆𑀲𑀼𑀢𑀸. 𑀢𑀲𑁆𑀲𑀸𑀢𑀺 𑀉𑀧𑀸𑀲𑀓𑀲𑁆𑀲. 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀻𑀢𑀺 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀧𑀦𑀽𑀤𑀦𑀁 𑀲𑀤𑁆𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀬𑀁 𑀲𑁄 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬𑀸𑀢𑀺 𑀲𑁄 𑀉𑀧𑀸𑀲𑀓𑁄 𑀬𑀁 𑀲𑀤𑁆𑀥𑀫𑁆𑀫𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀦𑁂𑀦 𑀚𑀸𑀦𑀺𑀢𑁆𑀯𑀸 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑁂𑀦 𑀅𑀦𑀸𑀲𑀯𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺 𑀏𑀓𑀸𑀤𑀲𑀕𑁆𑀕𑀺𑀯𑀽𑀧𑀲𑀫𑁂𑀦 𑀲𑀻𑀢𑀺 𑀪𑀯𑀢𑀺.

𑀲𑀻𑀢𑀧𑀝𑀺𑀖𑀸𑀢𑀸𑀤𑀬𑁄 𑀯𑀺𑀧𑀲𑁆𑀲𑀦𑀸𑀯𑀲𑀸𑀦𑀸 𑀢𑁂𑀭𑀲, 𑀅𑀦𑁆𑀦𑀸𑀤𑀺𑀮𑀸𑀪𑁄, 𑀥𑀫𑁆𑀫𑀲𑁆𑀲𑀯𑀦𑀁, 𑀥𑀫𑁆𑀫𑀸𑀯𑀩𑁄𑀥𑁄, 𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀏𑀯𑀁 𑀲𑀢𑁆𑀢𑀭𑀲.

𑁩𑁫𑁧. 𑀅𑀢𑁆𑀢𑀦𑁄 𑀲𑀦𑁆𑀢𑀓𑀸𑀢𑀺 𑀅𑀢𑁆𑀢𑀦𑀺𑀬𑀸. 𑀤𑀼𑀧𑁆𑀧𑀭𑀺𑀘𑁆𑀘𑀚𑀦𑀁 𑀮𑁄𑀪𑀁 𑀦𑀺𑀕𑁆𑀕𑀡𑁆𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲. 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀲𑀦𑁆𑀢𑀺𑀓𑁂𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 ¶ 𑀬𑀣𑀸𑀕𑀳𑀺𑀢𑁂 𑀲𑀭𑀡𑁂. 𑀦𑀢𑁆𑀣𑀺 𑀧𑀼𑀦𑀧𑁆𑀧𑀼𑀦𑀁 𑀓𑀢𑁆𑀢𑀩𑁆𑀩𑀢𑀸 𑀯𑀺𑀜𑁆𑀜𑀽𑀚𑀸𑀢𑀺𑀓𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑀫𑀬𑀁 𑀧𑀼𑀜𑁆𑀜’’𑀦𑁆𑀢𑀺 ‘‘𑀲𑀘𑁂 𑀢𑁆𑀯𑀁 𑀦 𑀬𑀣𑀸𑀕𑀳𑀺𑀢𑀁 𑀲𑀭𑀡𑀁 𑀪𑀺𑀦𑁆𑀤𑀺𑀲𑁆𑀲𑀢𑀺, 𑀏𑀯𑀸𑀳𑀁 𑀢𑀁 𑀫𑀸𑀭𑁂𑀫𑀻’’𑀢𑀺 𑀬𑀤𑀺𑀧𑀺 𑀓𑁄𑀘𑀺 𑀢𑀺𑀡𑁆𑀳𑁂𑀦 𑀲𑀢𑁆𑀣𑁂𑀦 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬, 𑀢𑀣𑀸𑀧𑀺 ‘‘𑀦𑁂𑀯𑀸𑀳𑀁 𑀩𑀼𑀤𑁆𑀥𑀁 𑀦 𑀩𑀼𑀤𑁆𑀥𑁄𑀢𑀺, 𑀥𑀫𑁆𑀫𑀁 𑀦 𑀥𑀫𑁆𑀫𑁄𑀢𑀺, 𑀲𑀗𑁆𑀖𑀁 𑀦 𑀲𑀗𑁆𑀖𑁄𑀢𑀺 𑀯𑀤𑀸𑀫𑀻’’𑀢𑀺 𑀤𑀴𑁆𑀳𑀢𑀭𑀁 𑀓𑀢𑁆𑀯𑀸 𑀕𑀳𑀺𑀢𑀲𑀭𑀡𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁.

𑁩𑁫𑁨. 𑀲𑀭𑀡𑀁 𑀉𑀧𑀕𑀢𑁂𑀦 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀲𑀓𑁆𑀓𑀘𑁆𑀘𑀁 𑀯𑀢𑁆𑀣𑀼𑀢𑁆𑀢𑀬𑀧𑀽𑀚𑀸 𑀓𑀸𑀢𑀩𑁆𑀩𑀸, 𑀢𑀢𑁆𑀣 𑀘 𑀲𑀁𑀓𑀺𑀮𑁂𑀲𑁄 𑀧𑀭𑀺𑀳𑀦𑀺𑀢𑀩𑁆𑀩𑁄, 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀦 𑀲𑀫𑀸𑀤𑀸𑀦𑀫𑀢𑁆𑀢𑀁, 𑀲𑀫𑁆𑀧𑀢𑁆𑀢𑀯𑀢𑁆𑀣𑀼𑀢𑁄 𑀯𑀺𑀭𑀫𑀡𑀫𑀢𑁆𑀢𑀜𑁆𑀘𑀸𑀢𑀺 𑀲𑀭𑀡𑀕𑀫𑀦𑀢𑁄 𑀲𑀻𑀮𑀲𑁆𑀲 𑀅𑀧𑁆𑀧𑀝𑁆𑀞𑀢𑀭𑀢𑀸, 𑀅𑀧𑁆𑀧𑀲𑀫𑀸𑀭𑀫𑁆𑀪𑀢𑀭𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀤𑀸𑀦𑀸𑀤𑀺𑀦𑀸 𑀤𑀡𑁆𑀟𑀦𑀺𑀥𑀸𑀦𑀢𑁄, 𑀲𑀓𑀮𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀸𑀥𑀺𑀝𑁆𑀞𑀸𑀦𑀢𑁄 𑀘𑀲𑁆𑀲 𑀫𑀳𑀧𑁆𑀨𑀮𑀫𑀳𑀸𑀦𑀺𑀲𑀁𑀲𑀢𑀭𑀢𑀸 𑀤𑀝𑁆𑀞𑀩𑁆𑀩𑀸.

𑀯𑀓𑁆𑀔𑀫𑀸𑀦𑀦𑀬𑁂𑀦 ¶ 𑀘 𑀯𑁂𑀭𑀳𑁂𑀢𑀼𑀢𑀸𑀬 𑀯𑁂𑀭𑀁 𑀯𑀼𑀘𑁆𑀘𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀸𑀧𑀥𑀫𑁆𑀫𑁄, 𑀢𑀁 𑀫𑀡𑀢𑀺 ‘‘𑀫𑀬𑀺 𑀇𑀥 𑀞𑀺𑀢𑀸𑀬 𑀓𑀣𑀁 𑀆𑀕𑀘𑁆𑀙𑀲𑀻’’𑀢𑀺 𑀢𑀚𑁆𑀚𑁂𑀦𑁆𑀢𑀻 𑀯𑀺𑀬 𑀦𑀻𑀳𑀭𑀢𑀻𑀢𑀺 𑀯𑁂𑀭𑀫𑀡𑀻, 𑀢𑀢𑁄 𑀯𑀸 𑀧𑀸𑀧𑀥𑀫𑁆𑀫𑀢𑁄 ¶ 𑀯𑀺𑀭𑀫𑀢𑀺 𑀏𑀢𑀸𑀬𑀸𑀢𑀺 ‘‘𑀯𑀺𑀭𑀫𑀡𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀇𑀓𑀸𑀭𑀲𑁆𑀲 𑀏𑀓𑀸𑀭𑀁 𑀓𑀢𑁆𑀯𑀸 ‘‘𑀯𑁂𑀭𑀫𑀡𑀻’’𑀢𑀺 𑀯𑀼𑀢𑁆𑀢𑀸. 𑀅𑀲𑀫𑀸𑀤𑀺𑀦𑁆𑀦𑀲𑀻𑀮𑀲𑁆𑀲 𑀲𑀫𑁆𑀧𑀢𑁆𑀢𑀢𑁄 𑀬𑀣𑀸𑀉𑀧𑀝𑁆𑀞𑀺𑀢𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀯𑀢𑁆𑀣𑀼𑀢𑁄 𑀯𑀺𑀭𑀢𑀺 𑀲𑀫𑁆𑀧𑀢𑁆𑀢𑀯𑀺𑀭𑀢𑀺. 𑀲𑀫𑀸𑀤𑀸𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀯𑀺𑀭𑀢𑀺 𑀲𑀫𑀸𑀤𑀸𑀦𑀯𑀺𑀭𑀢𑀺. 𑀲𑁂𑀢𑀼 𑀯𑀼𑀘𑁆𑀘𑀢𑀺 𑀅𑀭𑀺𑀬𑀫𑀕𑁆𑀕𑁄, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀸 𑀳𑀼𑀢𑁆𑀯𑀸 𑀧𑀸𑀧𑀥𑀫𑁆𑀫𑀸𑀦𑀁 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀖𑀸𑀢𑀦𑀯𑀺𑀭𑀢𑀺 𑀲𑁂𑀢𑀼𑀖𑀸𑀢𑀯𑀺𑀭𑀢𑀺. 𑀇𑀤𑀸𑀦𑀺 𑀢𑀺𑀲𑁆𑀲𑁄 𑀯𑀺𑀭𑀢𑀺𑀬𑁄 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀳𑀭𑀢𑀻𑀢𑀺 𑀅𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀧𑀭𑀺𑀯𑀚𑁆𑀚𑁂𑀢𑀺. 𑀦 𑀳𑀦𑀸𑀫𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀢𑁂𑀦 ‘‘𑀅𑀤𑀺𑀦𑁆𑀦𑀁 𑀦𑀸𑀤𑀺𑀬𑀸𑀫𑀻’’𑀢𑀺 𑀏𑀯𑀁 𑀆𑀤𑀻𑀦𑀁 𑀲𑀗𑁆𑀕𑀳𑁄, 𑀯𑀸-𑀲𑀤𑁆𑀤𑁂𑀦 𑀯𑀸, 𑀢𑁂𑀦𑀸𑀳 ‘‘𑀲𑀺𑀓𑁆𑀔𑀸𑀧𑀤𑀸𑀦𑀺 𑀕𑀡𑁆𑀳𑀦𑁆𑀢𑀲𑁆𑀲𑀸’’𑀢𑀺.

𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸𑀤𑀺𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸. 𑀇𑀤𑀸𑀦𑀺 𑀢𑀸𑀲𑀁 𑀯𑀺𑀭𑀢𑀻𑀦𑀁 𑀆𑀭𑀫𑁆𑀫𑀡𑀢𑁄 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀸 𑀤𑁆𑀯𑁂𑀢𑀺 𑀲𑀫𑁆𑀧𑀢𑁆𑀢𑀲𑀫𑀸𑀤𑀸𑀦𑀯𑀺𑀭𑀢𑀺𑀬𑁄. 𑀧𑀘𑁆𑀙𑀺𑀫𑀸𑀢𑀺 𑀲𑁂𑀢𑀼𑀖𑀸𑀢𑀯𑀺𑀭𑀢𑀺. 𑀲𑀩𑁆𑀩𑀸𑀦𑀺𑀧𑀺 𑀪𑀺𑀦𑁆𑀦𑀸𑀦𑀺 𑀳𑁄𑀦𑁆𑀢𑀺 𑀏𑀓𑀚𑁆𑀛𑀁 𑀲𑀫𑀸𑀤𑀺𑀦𑁆𑀦𑀢𑁆𑀢𑀸. 𑀢𑀤𑁂𑀯 𑀪𑀺𑀚𑁆𑀚𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀫𑀸𑀤𑀺𑀦𑁆𑀦𑀢𑁆𑀢𑀸 ¶ . 𑀕𑀳𑀝𑁆𑀞𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀪𑁂𑀤𑁄 𑀦𑀸𑀫 𑀦𑀢𑁆𑀣𑀺 𑀧𑀝𑀺𑀧𑀓𑁆𑀔𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀅𑀓𑀼𑀧𑁆𑀧𑀲𑀪𑀸𑀯𑀢𑁆𑀢𑀸, 𑀢𑁂𑀦𑀸𑀳 ‘‘𑀪𑀯𑀦𑁆𑀢𑀭𑁂𑀧𑀻’’𑀢𑀺. 𑀬𑁄𑀦𑀺𑀲𑀺𑀤𑁆𑀥𑀦𑁆𑀢𑀺 𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀸𑀦𑀁 𑀉𑀤𑁆𑀥𑀁 𑀢𑀺𑀭𑀺𑀬𑀫𑁂𑀯 𑀤𑀻𑀖𑀢𑀸 𑀯𑀺𑀬 𑀚𑀸𑀢𑀺𑀲𑀺𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀩𑁄𑀥𑀺𑀲𑀢𑁆𑀢𑁂 𑀓𑀼𑀘𑁆𑀙𑀺𑀕𑀢𑁂 𑀩𑁄𑀥𑀺𑀲𑀢𑁆𑀢𑀫𑀸𑀢𑀼𑀲𑀻𑀮𑀁 𑀯𑀺𑀬 𑀥𑀫𑁆𑀫𑀢𑀸𑀬 𑀲𑀪𑀸𑀯𑁂𑀦𑁂𑀯 𑀲𑀺𑀤𑁆𑀥𑀁 𑀥𑀫𑁆𑀫𑀢𑀸𑀲𑀺𑀤𑁆𑀥𑀁, 𑀫𑀕𑁆𑀕𑀥𑀫𑁆𑀫𑀢𑀸𑀬 𑀯𑀸 𑀅𑀭𑀺𑀬𑀫𑀕𑁆𑀕𑀸𑀦𑀼𑀪𑀸𑀯𑁂𑀦 𑀲𑀺𑀤𑁆𑀥𑀁 𑀥𑀫𑁆𑀫𑀢𑀸𑀲𑀺𑀤𑁆𑀥𑀁. 𑀤𑀺𑀝𑁆𑀞𑀺𑀉𑀚𑀼𑀓𑀭𑀡𑀁 ¶ 𑀦𑀸𑀫 𑀪𑀸𑀭𑀺𑀬𑀁 𑀤𑀼𑀓𑁆𑀔𑀁, 𑀢𑀲𑁆𑀫𑀸 𑀲𑀭𑀡𑀕𑀫𑀦𑀁 𑀲𑀺𑀓𑁆𑀔𑀸𑀧𑀤𑀲𑀫𑀸𑀤𑀸𑀦𑀢𑁄 𑀫𑀳𑀝𑁆𑀞𑀢𑀭𑀫𑁂𑀯, 𑀦 𑀅𑀧𑁆𑀧𑀝𑁆𑀞𑀢𑀭𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀢𑀣𑀸 𑀯𑀸 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀻𑀢𑀺 𑀆𑀤𑀭𑀕𑀸𑀭𑀯𑀁 𑀅𑀓𑀢𑁆𑀯𑀸 𑀲𑀫𑀸𑀤𑀺𑀬𑀦𑁆𑀢𑀲𑁆𑀲𑀸𑀧𑀺. 𑀲𑀸𑀥𑀼𑀓𑀁 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀻𑀢𑀺 𑀲𑀓𑁆𑀓𑀘𑁆𑀘𑀁 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀦𑁆𑀢𑀲𑁆𑀲𑀸𑀧𑀺, 𑀦 𑀤𑀺𑀕𑀼𑀡𑀁, 𑀢𑀺𑀕𑀼𑀡𑀁 𑀯𑀸 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄.

𑀅𑀪𑀬𑀤𑀸𑀦𑀢𑀸𑀬 𑀲𑀻𑀮𑀲𑁆𑀲 𑀤𑀸𑀦𑀪𑀸𑀯𑁄, 𑀅𑀦𑀯𑀲𑁂𑀲𑀁 𑀯𑀸 𑀲𑀢𑁆𑀢𑀦𑀺𑀓𑀸𑀬𑀁 𑀤𑀬𑀢𑀺 𑀢𑁂𑀦 𑀭𑀓𑁆𑀔𑀢𑀻𑀢𑀺 𑀤𑀸𑀦𑀁, 𑀲𑀻𑀮𑀁. ‘‘𑀅𑀕𑁆𑀕𑀸𑀦𑀻’’𑀢𑀺 𑀜𑀸𑀢𑀢𑁆𑀢𑀸 𑀅𑀕𑁆𑀕𑀜𑁆𑀜𑀸𑀦𑀺. 𑀘𑀺𑀭𑀭𑀢𑁆𑀢𑀢𑀸𑀬 𑀜𑀸𑀢𑀢𑁆𑀢𑀸 𑀭𑀢𑁆𑀢𑀜𑁆𑀜𑀸𑀦𑀺. ‘‘𑀅𑀭𑀺𑀬𑀸𑀦𑀁 𑀲𑀸𑀥𑀽𑀦𑀁 𑀯𑀁𑀲𑀸𑀦𑀻’’𑀢𑀺 𑀜𑀸𑀢𑀢𑁆𑀢𑀸 𑀯𑀁𑀲𑀜𑁆𑀜𑀸𑀦𑀺. ‘‘𑀧𑁄𑀭𑀸𑀡𑀸𑀦𑀻’’𑀢𑀺𑀆𑀤𑀻𑀲𑀼 𑀧𑀼𑀭𑀺𑀫𑀸𑀦𑀁 𑀏𑀢𑀸𑀦𑀺 𑀧𑁄𑀭𑀸𑀡𑀸𑀦𑀺. 𑀲𑀩𑁆𑀩𑀲𑁄 𑀓𑁂𑀦𑀘𑀺𑀧𑀺 𑀧𑀓𑀸𑀭𑁂𑀦 𑀲𑀸𑀥𑀽𑀳𑀺 𑀦 𑀓𑀺𑀡𑁆𑀡𑀸𑀦𑀺 𑀦 𑀔𑀺𑀢𑁆𑀢𑀸𑀦𑀺 𑀦 𑀙𑀟𑁆𑀟𑀺𑀢𑀸𑀦𑀻𑀢𑀺 𑀅𑀲𑀗𑁆𑀓𑀺𑀡𑁆𑀡𑀸𑀦𑀺. 𑀅𑀬𑀜𑁆𑀘 𑀦𑀬𑁄 𑀦𑁂𑀲𑀁 𑀬𑀣𑀸 𑀅𑀢𑀻𑀢𑁂, 𑀏𑀯𑀁 𑀏𑀢𑀭𑀳𑀺, 𑀅𑀦𑀸𑀕𑀢𑁂 𑀘𑀸𑀢𑀺 𑀆𑀳 ‘‘𑀅𑀲𑀗𑁆𑀓𑀺𑀡𑁆𑀡𑀧𑀼𑀩𑁆𑀩𑀸𑀦𑀺 𑀦 𑀲𑀗𑁆𑀓𑀺𑀬𑀦𑁆𑀢𑀺 𑀦 𑀲𑀗𑁆𑀓𑀺𑀬𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀢𑁄 𑀏𑀯 𑀅𑀧𑁆𑀧𑀧𑀺𑀓𑀼𑀝𑁆𑀞𑀸𑀦𑀺 𑀦 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀺. 𑀦 𑀳𑀺 𑀓𑀤𑀸𑀘𑀺𑀧𑀺 𑀯𑀺𑀜𑁆𑀜𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀳𑀺𑀁𑀲𑀸𑀤𑀺𑀧𑀸𑀧𑀥𑀫𑁆𑀫𑀁 𑀅𑀦𑀼𑀚𑀸𑀦𑀦𑁆𑀢𑀺. 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀅𑀪𑀬𑀁 𑀤𑁂𑀢𑀻𑀢𑀺 𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀳𑀺𑀢𑀤𑀡𑁆𑀟𑀢𑁆𑀢𑀸 𑀲𑀓𑀮𑀲𑁆𑀲𑀧𑀺 𑀲𑀢𑁆𑀢𑀦𑀺𑀓𑀸𑀬𑀲𑁆𑀲 𑀪𑀬𑀸𑀪𑀸𑀯𑀁 𑀤𑁂𑀢𑀺. 𑀦 𑀳𑀺 𑀅𑀭𑀺𑀬𑀲𑀸𑀯𑀓𑀢𑁄 𑀓𑀲𑁆𑀲𑀘𑀺 𑀪𑀬𑀁 𑀳𑁄𑀢𑀺. 𑀅𑀯𑁂𑀭𑀦𑁆𑀢𑀺 𑀯𑁂𑀭𑀸𑀪𑀸𑀯𑀁. 𑀅𑀩𑁆𑀬𑀸𑀧𑀚𑁆𑀛𑀦𑁆𑀢𑀺 𑀦𑀺𑀤𑁆𑀤𑀼𑀓𑁆𑀔𑀢𑀁.

𑀦𑀦𑀼 ¶ 𑀘 𑀧𑀜𑁆𑀘𑀲𑀻𑀮𑀁 𑀲𑀩𑁆𑀩𑀓𑀸𑀮𑀺𑀓𑀁, 𑀦 𑀘 𑀏𑀓𑀦𑁆𑀢𑀢𑁄 𑀯𑀺𑀫𑀼𑀢𑁆𑀢𑀸𑀬𑀢𑀦𑀁, 𑀲𑀭𑀡𑀕𑀫𑀦𑀁 𑀧𑀦 𑀩𑀼𑀤𑁆𑀥𑀼𑀧𑁆𑀧𑀸𑀤𑀳𑁂𑀢𑀼𑀓𑀁, 𑀏𑀓𑀦𑁆𑀢𑀯𑀺𑀫𑀼𑀢𑁆𑀢𑀸𑀬𑀢𑀦𑀜𑁆𑀘, 𑀢𑀢𑁆𑀣 𑀓𑀣𑀁 𑀲𑀭𑀡𑀸𑀕𑀫𑀦𑀢𑁄 𑀧𑀜𑁆𑀘𑀲𑀻𑀮𑀲𑁆𑀲 𑀫𑀳𑀧𑁆𑀨𑀮𑀢𑀸𑀢𑀺 𑀆𑀳 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀚𑁂𑀝𑁆𑀞𑀓𑀦𑁆𑀢𑀺 𑀉𑀢𑁆𑀢𑀫𑀁. ‘‘𑀲𑀭𑀡𑀕𑀫𑀦𑁂𑀬𑁂𑀯 𑀧𑀢𑀺𑀝𑁆𑀞𑀸𑀬𑀸’’𑀢𑀺 ¶ 𑀇𑀫𑀺𑀦𑀸 𑀢𑀲𑁆𑀲 𑀲𑀻𑀮𑀲𑁆𑀲 𑀲𑀭𑀡𑀕𑀫𑀦𑁂𑀦 𑀅𑀪𑀺𑀲𑀗𑁆𑀔𑀢𑀢𑀫𑀸𑀳.

𑁩𑁫𑁩. 𑀈𑀤𑀺𑀲𑀫𑁂𑀯𑀸𑀢𑀺 𑀏𑀯𑀁 𑀲𑀁𑀓𑀺𑀮𑁂𑀲𑀁 𑀧𑀝𑀺𑀧𑀓𑁆𑀔𑀫𑁂𑀯 𑀳𑀼𑀢𑁆𑀯𑀸. 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀳𑀺 𑀕𑀼𑀡𑁂𑀳𑀻𑀢𑀺 𑀏𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀕𑀼𑀡𑀸 𑀦𑀸𑀫 𑀲𑀭𑀡𑀕𑀫𑀦𑀁, 𑀲𑀻𑀮𑀲𑀫𑁆𑀧𑀤𑀸, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸𑀢𑀺 𑀏𑀯𑀁 𑀆𑀤𑀬𑁄. 𑀧𑀞𑀫𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀦 𑀓𑀺𑀮𑀫𑀢𑀻𑀢𑀺 ¶ 𑀬𑁄𑀚𑀦𑀸. 𑀢𑀸𑀦𑀻𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀺. ‘‘𑀧𑀞𑀫𑀚𑁆𑀛𑀸𑀦’’𑀦𑁆𑀢𑀺 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄 𑀅𑀬𑀦𑁆𑀢𑀺 𑀆𑀳 ‘‘𑀏𑀓𑀁 𑀓𑀧𑁆𑀧’’𑀦𑁆𑀢𑀺, 𑀏𑀓𑀁 𑀫𑀳𑀸𑀓𑀧𑁆𑀧𑀦𑁆𑀢𑀺 𑀅𑀢𑁆𑀣𑁄. 𑀳𑀻𑀦𑀁 𑀧𑀦 𑀧𑀞𑀫𑀚𑁆𑀛𑀸𑀦𑀁, 𑀫𑀚𑁆𑀛𑀺𑀫𑀜𑁆𑀘 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀲𑁆𑀲 𑀢𑀢𑀺𑀬𑀁 𑀪𑀸𑀕𑀁, 𑀉𑀧𑀟𑁆𑀠𑀓𑀧𑁆𑀧𑀜𑁆𑀘 𑀆𑀬𑀼𑀁 𑀤𑁂𑀢𑀺. ‘‘𑀤𑀼𑀢𑀺𑀬𑀁 𑀅𑀝𑁆𑀞𑀓𑀧𑁆𑀧𑁂’’𑀢𑀺 𑀆𑀤𑀻𑀲𑀼𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀫𑀳𑀸𑀓𑀧𑁆𑀧𑀯𑀲𑁂𑀦𑁂𑀯 𑀘 𑀕𑀳𑁂𑀢𑀩𑁆𑀩𑀁. 𑀬𑀲𑁆𑀫𑀸 𑀯𑀸 𑀧𑀡𑀻𑀢𑀸𑀦𑀺𑀬𑁂𑀯𑁂𑀢𑁆𑀣 𑀛𑀸𑀦𑀸𑀦𑀺 𑀅𑀥𑀺𑀧𑁆𑀧𑁂𑀢𑀸𑀦𑀺 𑀫𑀳𑀧𑁆𑀨𑀮𑀢𑀭𑀪𑀸𑀯𑀤𑀲𑁆𑀲𑀦𑀧𑀭𑀢𑁆𑀢𑀸 𑀤𑁂𑀲𑀦𑀸𑀬, 𑀢𑀲𑁆𑀫𑀸 ‘‘𑀧𑀞𑀫𑀚𑁆𑀛𑀸𑀦𑀁 𑀏𑀓𑀁 𑀓𑀧𑁆𑀧’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀤𑁂𑀯𑀸𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑁂𑀯. 𑀬𑀤𑀺 𑀏𑀯𑀁 𑀓𑀣𑀁 𑀆𑀭𑀼𑀧𑁆𑀧𑀢𑀸𑀢𑀺 𑀆𑀳 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀻’’𑀢𑀺𑀆𑀤𑀺.

𑀲𑀫𑁆𑀫𑀤𑁂𑀯 𑀦𑀺𑀘𑁆𑀘𑀲𑀜𑁆𑀜𑀸𑀤𑀺𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸 𑀧𑀼𑀩𑁆𑀩𑀪𑀸𑀕𑀺𑀬𑁂 𑀏𑀯 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀲𑀫𑁆𑀫𑀸𑀦𑁂𑀦𑁆𑀢𑀻 𑀯𑀺𑀧𑀲𑁆𑀲𑀦𑀸 𑀯𑀺𑀧𑀲𑁆𑀲𑀓𑀲𑁆𑀲 𑀅𑀦𑀧𑁆𑀧𑀓𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀲𑀫𑀸𑀯𑀳𑀢𑀻𑀢𑀺 𑀆𑀳 ‘‘𑀯𑀺𑀧𑀲𑁆𑀲𑀦𑀸…𑀧𑁂… 𑀅𑀪𑀸𑀯𑀸’’𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢’’𑀦𑁆𑀢𑀺. (𑀥. 𑀧. 𑁩𑁭𑁪);

𑀬𑀲𑁆𑀫𑀸 𑀅𑀬𑀁 𑀤𑁂𑀲𑀦𑀸 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀇𑀫𑀸𑀦𑀺 𑀜𑀸𑀡𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀲𑁆𑀲 ¶ 𑀯𑀲𑁂𑀦 𑀧𑀯𑀢𑁆𑀢𑀺𑀢𑀸, 𑀢𑀲𑁆𑀫𑀸 ‘‘𑀯𑀺𑀧𑀲𑁆𑀲𑀦𑀸𑀜𑀸𑀡𑁂 𑀧𑀢𑀺𑀝𑁆𑀞𑀸𑀬 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄’’𑀢𑀺 𑀳𑁂𑀝𑁆𑀞𑀺𑀫𑀁 𑀳𑁂𑀝𑁆𑀞𑀺𑀫𑀁 𑀉𑀧𑀭𑀺𑀫𑀲𑁆𑀲 𑀉𑀧𑀭𑀺𑀫𑀲𑁆𑀲 𑀧𑀢𑀺𑀝𑁆𑀞𑀸𑀪𑀽𑀢𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀫𑀸𑀦𑀭𑀽𑀧𑀦𑀺𑀫𑁆𑀫𑀸𑀦𑀁 𑀦𑀸𑀫 𑀫𑀦𑁄𑀫𑀬𑀺𑀤𑁆𑀥𑀺𑀬𑀸 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀓𑀺𑀘𑁆𑀘𑀦𑁆𑀢𑀺 𑀆𑀳 ‘‘𑀅𑀢𑁆𑀢𑀦𑁄…𑀧𑁂… 𑀫𑀳𑀧𑁆𑀨𑀮𑀸’’𑀢𑀺. 𑀯𑀺𑀓𑀼𑀩𑁆𑀩𑀦𑀤𑀲𑁆𑀲𑀦𑀲𑀫𑀢𑁆𑀣𑀢𑀸𑀬𑀸𑀢𑀺 𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀯𑀺𑀯𑀺𑀥𑀭𑀽𑀧𑀓𑀭𑀡𑀁 𑀯𑀺𑀓𑀼𑀩𑁆𑀩𑀦𑀁, 𑀢𑀲𑁆𑀲 𑀤𑀲𑁆𑀲𑀦𑀲𑀫𑀢𑁆𑀣𑀪𑀸𑀯𑁂𑀦. 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀦𑀸𑀫 𑀧𑀼𑀭𑀺𑀫𑀚𑀸𑀢𑀻𑀲𑀼 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑁄 𑀔𑀦𑁆𑀥𑀧𑁆𑀧𑀤𑁂𑀲𑁄. 𑀲𑀫𑀸𑀧𑁂𑀦𑁆𑀢𑁄𑀢𑀺 𑀧𑀭𑀺𑀬𑁄𑀲𑀸𑀧𑁂𑀦𑁆𑀢𑁄.

𑀓𑀽𑀝𑀤𑀦𑁆𑀢𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸𑀓𑀣𑀸𑀯𑀡𑁆𑀡𑀦𑀸

𑁩𑁫𑁪-𑁮. 𑀲𑀩𑁆𑀩𑁂 ¶ 𑀢𑁂 𑀧𑀸𑀡𑀬𑁄𑀢𑀺 ‘‘𑀲𑀢𑁆𑀢 𑀘 𑀉𑀲𑀪𑀲𑀢𑀸𑀦𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂 𑀲𑀩𑁆𑀩𑁂 𑀧𑀸𑀡𑀺𑀦𑁄. 𑀆𑀓𑀼𑀮𑀪𑀸𑀯𑁄𑀢𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀥𑀫𑁆𑀫𑀲𑁆𑀲 𑀲𑀼𑀢𑀢𑁆𑀢𑀸 𑀧𑀸𑀡𑀻𑀲𑀼 𑀅𑀦𑀼𑀤𑁆𑀤𑀬𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀞𑀺𑀢𑀲𑁆𑀲 ‘‘𑀓𑀣𑀜𑁆𑀳𑀺 𑀦𑀸𑀫 𑀫𑀬𑀸 𑀢𑀸𑀯 𑀩𑀳𑀽 𑀧𑀸𑀡𑀺𑀦𑁄 𑀫𑀸𑀭𑀡𑀢𑁆𑀣𑀸𑀬 𑀩𑀦𑁆𑀥𑀸𑀧𑀺𑀢𑀸’’𑀢𑀺 𑀘𑀺𑀢𑁆𑀢𑁂 𑀧𑀭𑀺𑀩𑁆𑀬𑀸𑀓𑀼𑀮𑀪𑀸𑀯𑁄 ¶ 𑀉𑀤𑀧𑀸𑀤𑀺. 𑀲𑀼𑀢𑁆𑀯𑀸𑀢𑀺 ‘‘𑀩𑀦𑁆𑀥𑀦𑀢𑁄 𑀫𑁄𑀘𑀺𑀢𑀸’’𑀢𑀺 𑀲𑀼𑀢𑁆𑀯𑀸. 𑀓𑀸𑀫𑀘𑁆𑀙𑀦𑁆𑀤𑀯𑀺𑀕𑀫𑁂𑀦 𑀓𑀮𑁆𑀮𑀘𑀺𑀢𑁆𑀢𑀢𑀸 𑀅𑀭𑁄𑀕𑀘𑀺𑀢𑁆𑀢𑀢𑀸, 𑀩𑁆𑀬𑀸𑀧𑀸𑀤𑀯𑀺𑀕𑀫𑁂𑀦 𑀫𑁂𑀢𑁆𑀢𑀸𑀯𑀲𑁂𑀦 𑀫𑀼𑀤𑀼𑀘𑀺𑀢𑁆𑀢𑀢𑀸 𑀅𑀓𑀣𑀺𑀦𑀘𑀺𑀢𑁆𑀢𑀢𑀸, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑁆𑀧𑀳𑀸𑀦𑁂𑀦 𑀯𑀺𑀓𑁆𑀔𑁂𑀧𑀯𑀺𑀕𑀫𑀦𑀢𑁄 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑀢𑀸 𑀢𑁂𑀳𑀺 𑀦 𑀧𑀺𑀳𑀺𑀢𑀘𑀺𑀢𑁆𑀢𑀢𑀸, 𑀣𑀺𑀦𑀫𑀺𑀤𑁆𑀥𑀯𑀺𑀕𑀫𑁂𑀦 𑀉𑀤𑀕𑁆𑀕𑀘𑀺𑀢𑁆𑀢𑀢𑀸 𑀲𑀁𑀧𑀕𑁆𑀕𑀡𑁆𑀳𑀦𑀯𑀲𑁂𑀦 𑀅𑀮𑀻𑀦𑀘𑀺𑀢𑁆𑀢𑀢𑀸, 𑀯𑀺𑀘𑀺𑀓𑀺𑀘𑁆𑀙𑀸𑀯𑀺𑀕𑀫𑁂𑀦 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀥𑀺𑀫𑀼𑀢𑁆𑀢𑀢𑀸𑀬 𑀧𑀲𑀦𑁆𑀦𑀘𑀺𑀢𑁆𑀢𑀢𑀸 𑀘 𑀳𑁄𑀢𑀻𑀢𑀺 𑀆𑀳 ‘‘𑀓𑀮𑁆𑀮𑀘𑀺𑀢𑁆𑀢𑀦𑁆𑀢𑀺𑀆𑀤𑀺 𑀅𑀦𑀼𑀧𑀼𑀩𑁆𑀩𑀺𑀓𑀣𑀸𑀦𑀼𑀪𑀸𑀯𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑀦𑀻𑀯𑀭𑀡𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀓𑀽𑀝𑀤𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.

𑁬. 𑀫𑀳𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑀩𑁆𑀭𑀸𑀳𑁆𑀫𑀡𑀤𑀽𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁫𑁯. 𑀧𑀼𑀦𑀧𑁆𑀧𑀼𑀦𑀁 ¶ ¶ ¶ 𑀯𑀺𑀲𑀸𑀮𑀻𑀪𑀸𑀯𑀽𑀧𑀕𑀫𑀦𑀢𑁄𑀢𑀺 𑀧𑀼𑀩𑁆𑀩𑁂 𑀓𑀺𑀭 𑀧𑀼𑀢𑁆𑀢𑀥𑀻𑀢𑀼𑀯𑀲𑁂𑀦 𑀤𑁆𑀯𑁂 𑀤𑁆𑀯𑁂 𑀳𑀼𑀢𑁆𑀯𑀸 𑀲𑁄𑀴𑀲𑀓𑁆𑀔𑀢𑁆𑀢𑀼𑀁 𑀚𑀸𑀢𑀸𑀦𑀁 𑀮𑀺𑀘𑁆𑀙𑀯𑀻𑀭𑀸𑀚𑀓𑀼𑀫𑀸𑀭𑀸𑀦𑀁 𑀲𑀧𑀭𑀺𑀯𑀸𑀭𑀸𑀦𑀁 𑀅𑀦𑀼𑀓𑁆𑀓𑀫𑁂𑀦𑁂𑀯 𑀯𑀟𑁆𑀠𑀦𑁆𑀢𑀸𑀦𑀁 𑀦𑀺𑀯𑀸𑀲𑀦𑀝𑁆𑀞𑀸𑀦𑀸𑀭𑀸𑀫𑀼𑀬𑁆𑀬𑀸𑀦𑀧𑁄𑀓𑁆𑀔𑀭𑀡𑀻𑀆𑀤𑀻𑀦𑀁 𑀧𑀢𑀺𑀝𑁆𑀞𑀸𑀦𑀲𑁆𑀲 𑀅𑀧𑁆𑀧𑀳𑁄𑀦𑀓𑀢𑀸𑀬 𑀦𑀕𑀭𑀁 𑀢𑀺𑀓𑁆𑀔𑀢𑁆𑀢𑀼𑀁 𑀕𑀸𑀯𑀼𑀢𑀦𑁆𑀢𑀭𑁂𑀦 𑀕𑀸𑀯𑀼𑀢𑀦𑁆𑀢𑀭𑁂𑀦 𑀧𑀭𑀺𑀓𑁆𑀔𑀺𑀧𑀺𑀁𑀲𑀼, 𑀢𑁂𑀦𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀯𑀺𑀲𑀸𑀮𑀻𑀪𑀸𑀯𑀁 𑀕𑀢𑀢𑁆𑀢𑀸 ‘‘𑀯𑁂𑀲𑀸𑀮𑀻’’ 𑀢𑁆𑀯𑁂𑀯 𑀦𑀸𑀫𑀁 𑀚𑀸𑀢𑀁, 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀦𑀧𑁆𑀧𑀼𑀦𑀁 𑀯𑀺𑀲𑀸𑀮𑀻𑀪𑀸𑀯𑀽𑀧𑀕𑀫𑀦𑀢𑁄 𑀯𑁂𑀲𑀸𑀮𑀻𑀢𑀺 𑀮𑀤𑁆𑀥𑀦𑀸𑀫𑀓𑁂 𑀦𑀕𑀭𑁂’’𑀢𑀺. 𑀲𑀬𑀁𑀚𑀸𑀢𑀦𑁆𑀢𑀺 𑀲𑀬𑀫𑁂𑀯 𑀚𑀸𑀢𑀁 𑀅𑀭𑁄𑀧𑀺𑀫𑀁. 𑀫𑀳𑀦𑁆𑀢𑀪𑀸𑀯𑁂𑀦𑁂𑀯𑀸𑀢𑀺 𑀭𑀼𑀓𑁆𑀔𑀕𑀘𑁆𑀙𑀸𑀦𑀁, 𑀞𑀺𑀢𑁄𑀓𑀸𑀲𑀲𑁆𑀲 𑀘 𑀫𑀳𑀦𑁆𑀢𑀪𑀸𑀯𑁂𑀦, 𑀢𑁂𑀦𑀸𑀳 ‘‘𑀳𑀺𑀫𑀯𑀦𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑀁 𑀳𑀼𑀢𑁆𑀯𑀸’’𑀢𑀺. 𑀓𑀽𑀝𑀸𑀕𑀸𑀭𑀲𑀸𑀮𑀸𑀲𑀗𑁆𑀔𑁂𑀧𑁂𑀦𑀸𑀢𑀺 𑀳𑀁𑀲𑀯𑀝𑁆𑀝𑀓𑀘𑁆𑀙𑀦𑁆𑀦𑁂𑀦 𑀓𑀽𑀝𑀸𑀕𑀸𑀭𑀲𑀸𑀮𑀸𑀦𑀺𑀬𑀸𑀫𑁂𑀦. 𑀓𑁄𑀲𑀮𑁂𑀲𑀼 𑀚𑀸𑀢𑀸, 𑀪𑀯𑀸 𑀯𑀸, 𑀢𑀁 𑀯𑀸 𑀭𑀝𑁆𑀞𑀁 𑀦𑀺𑀯𑀸𑀲𑁄 𑀏𑀢𑁂𑀲𑀦𑁆𑀢𑀺 𑀓𑁄𑀲𑀮𑀓𑀸. 𑀏𑀯𑀁 𑀫𑀸𑀕𑀥𑀓𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀲𑁆𑀲 𑀅𑀓𑀭𑀡𑁂 𑀧𑀼𑀕𑁆𑀕𑀮𑁄 𑀫𑀳𑀸𑀚𑀸𑀦𑀺𑀬𑁄 𑀳𑁄𑀢𑀺, 𑀢𑀁 𑀓𑀭𑀡𑀁 𑀅𑀭𑀳𑀢𑀻𑀢𑀺 𑀓𑀭𑀡𑀻𑀬𑀁 𑀢𑁂𑀦 𑀓𑀭𑀡𑀻𑀬𑁂𑀦, 𑀢𑁂𑀦𑀸𑀳 ‘‘𑀅𑀯𑀲𑁆𑀲𑀁 𑀓𑀢𑁆𑀢𑀩𑁆𑀩𑀓𑀫𑁆𑀫𑁂𑀦𑀸’’𑀢𑀺. 𑀢𑀁 𑀓𑀺𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀢𑀺 𑀲𑀢𑀺 𑀲𑀫𑀯𑀸𑀬𑁂 𑀓𑀸𑀢𑀩𑁆𑀩𑀢𑁄.

𑁩𑁬𑁦. 𑀬𑀸 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀚𑁆𑀚𑀦𑀸𑀭𑀳𑀸 𑀦𑀸𑀦𑀢𑁆𑀢𑀲𑀜𑁆𑀜𑀸, 𑀢𑀸𑀲𑀁 ¶ 𑀯𑀲𑁂𑀦 𑀦𑀸𑀦𑀸𑀭𑀫𑁆𑀫𑀡𑀸𑀘𑀸𑀭𑀢𑁄. 𑀲𑀫𑁆𑀪𑀯𑀦𑁆𑀢𑀲𑁆𑀲𑁂𑀯 𑀧𑀝𑀺𑀲𑁂𑀥𑁄. 𑀧𑀝𑀺𑀓𑁆𑀓𑀫𑁆𑀫𑀸𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀣𑀸 𑀘𑀺𑀢𑁆𑀢𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸. 𑀲𑀮𑁆𑀮𑀻𑀦𑁄𑀢𑀺 𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑀸 𑀏𑀓𑀢𑁆𑀢𑀸𑀭𑀫𑁆𑀫𑀡𑀁 𑀅𑀮𑁆𑀮𑀻𑀦𑁄.

𑀑𑀝𑁆𑀞𑀤𑁆𑀥𑀮𑀺𑀘𑁆𑀙𑀯𑀻𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁬𑁧. 𑀅𑀤𑁆𑀥𑁄𑀝𑁆𑀞𑀢𑀸𑀬𑀸𑀢𑀺 𑀢𑀲𑁆𑀲 𑀓𑀺𑀭 𑀉𑀢𑁆𑀢𑀭𑁄𑀝𑁆𑀞𑀁 𑀅𑀧𑁆𑀧𑀓𑀢𑀸𑀬 𑀢𑀺𑀭𑀺𑀬𑀁 𑀨𑀸𑀮𑁂𑀢𑁆𑀯𑀸 𑀅𑀧𑀦𑀻𑀢𑀤𑁆𑀥𑀁 𑀯𑀺𑀬 𑀔𑀸𑀬𑀢𑀺 𑀘𑀢𑁆𑀢𑀸𑀭𑁄 𑀤𑀦𑁆𑀢𑁂, 𑀤𑁆𑀯𑁂 𑀘 𑀤𑀸𑀞𑀸 𑀦 𑀙𑀸𑀤𑁂𑀢𑀺, 𑀢𑁂𑀦 𑀦𑀁 ‘‘𑀑𑀝𑁆𑀞𑀤𑁆𑀥𑁄’’𑀢𑀺 𑀯𑁄𑀳𑀭𑀦𑁆𑀢𑀺. 𑀅𑀬𑀁 ¶ 𑀓𑀺𑀭 𑀉𑀧𑀸𑀲𑀓𑁄 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀤𑀸𑀬𑀓𑁄 𑀤𑀸𑀦𑀧𑀢𑀺 𑀩𑀼𑀤𑁆𑀥𑀫𑀸𑀫𑀓𑁄 𑀥𑀫𑁆𑀫𑀫𑀸𑀫𑀓𑁄 𑀲𑀗𑁆𑀖𑀫𑀸𑀫𑀓𑁄, 𑀢𑁂𑀦𑀸𑀳 𑀧𑀼𑀭𑁂𑀪𑀢𑁆𑀢𑀦𑁆𑀢𑀺𑀆𑀤𑀺.

𑁩𑁬𑁨. 𑀲𑀸𑀲𑀦𑁂 ¶ 𑀬𑀼𑀢𑁆𑀢𑀧𑀬𑀼𑀢𑁆𑀢𑁄𑀢𑀺 𑀪𑀸𑀯𑀦𑀁 𑀅𑀦𑀼𑀬𑀼𑀢𑁆𑀢𑁄. 𑀲𑀩𑁆𑀩𑀢𑁆𑀣 𑀲𑀻𑀳𑀲𑀫𑀸𑀦𑀯𑀼𑀢𑁆𑀢𑀺𑀦𑁄𑀧𑀺 𑀪𑀕𑀯𑀢𑁄 𑀧𑀭𑀺𑀲𑀸𑀬 𑀫𑀳𑀦𑁆𑀢𑁂 𑀲𑀢𑀺 𑀢𑀤𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀧𑀯𑀢𑁆𑀢𑀺𑀬𑀫𑀸𑀦𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀯𑀺𑀲𑁂𑀲𑁄 𑀳𑁄𑀢𑀻𑀢𑀺 𑀆𑀳 ‘‘𑀫𑀳𑀦𑁆𑀢𑁂𑀦 𑀉𑀲𑁆𑀲𑀸𑀳𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀢𑀻’’𑀢𑀺.

‘‘𑀯𑀺𑀲𑁆𑀲𑀸𑀲𑀺𑀓𑁄’’𑀢𑀺 𑀯𑀢𑁆𑀯𑀸 𑀢𑀫𑀲𑁆𑀲 𑀯𑀺𑀲𑁆𑀲𑀸𑀲𑀺𑀓𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀣𑁂𑀭𑀲𑁆𑀲 𑀔𑀻𑀡𑀸 𑀲𑀯𑀲𑁆𑀲𑀲𑀢𑁄 𑀆𑀮𑀲𑀺𑀬𑀪𑀸𑀯𑁄 ‘‘𑀅𑀧𑁆𑀧𑀳𑀻𑀦𑁄’’𑀢𑀺 𑀦 𑀯𑀢𑁆𑀢𑀩𑁆𑀩𑁄, 𑀯𑀸𑀲𑀦𑀸𑀮𑁂𑀲𑀁 𑀧𑀦 𑀉𑀧𑀸𑀤𑀸𑀬𑀸𑀳 ‘‘𑀈𑀲𑀓𑀁 𑀅𑀧𑁆𑀧𑀳𑀻𑀦𑁄 𑀯𑀺𑀬 𑀳𑁄𑀢𑀻’’𑀢𑀺. 𑀦 𑀳𑀺 𑀲𑀸𑀯𑀓𑀸𑀦𑀁 𑀲𑀯𑀸𑀲𑀦𑀸 𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀺.

𑁩𑁬𑁩. 𑀯𑀺𑀦𑁂𑀬𑁆𑀬𑀚𑀦𑀸𑀦𑀼𑀭𑁄𑀥𑁂𑀦 𑀩𑀼𑀤𑁆𑀥𑀸𑀦𑀁 𑀧𑀸𑀝𑀺𑀳𑀸𑀭𑀺𑀬𑀯𑀺𑀚𑀫𑁆𑀪𑀦𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀣 𑀔𑁄 𑀪𑀕𑀯𑀸’’𑀢𑀺𑀆𑀤𑀺, 𑀢𑁂𑀦𑁂𑀯𑀸𑀳 ‘‘𑀲𑀁𑀲𑀽𑀘𑀺𑀢𑀦𑀺𑀓𑁆𑀔𑀫𑀦𑁄’’𑀢𑀺. 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀦𑀯𑁂𑀮𑀸𑀬𑀜𑁆𑀳𑀺 𑀙𑀩𑁆𑀩𑀡𑁆𑀡𑀸 𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀆𑀯𑁂𑀴𑀸𑀯𑁂𑀴𑀸𑀬𑀫𑀮𑀸𑀬𑀫𑀮𑀸 𑀳𑀼𑀢𑁆𑀯𑀸 𑀲𑀯𑀺𑀲𑁂𑀲𑀸 𑀧𑀪𑀲𑁆𑀲𑀭𑀸 𑀯𑀺𑀦𑀺𑀘𑁆𑀙𑀭𑀺𑀁𑀲𑀼.

𑁩𑁬𑁪. 𑀢𑀢𑁄 𑀧𑀭𑀦𑁆𑀢𑀺 ‘‘𑀳𑀺𑀬𑁆𑀬𑁄’’𑀢𑀺 𑀯𑀼𑀢𑁆𑀢𑀤𑀺𑀯𑀲𑀢𑁄 𑀅𑀦𑀦𑁆𑀢𑀭𑀁 𑀧𑀭𑀁 𑀧𑀼𑀭𑀺𑀫𑀢𑀭𑀁 𑀅𑀢𑀺𑀲𑀬𑁂𑀦 𑀧𑀼𑀭𑀺𑀫𑀢𑁆𑀢𑀸. 𑀇𑀢𑀺 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀯𑀯𑀢𑁆𑀣𑀺𑀢𑁄 𑀬𑀣𑀸𑀓𑁆𑀓𑀫𑀁 𑀧𑀼𑀭𑀺𑀫𑀧𑀼𑀭𑀺𑀫𑀢𑀭𑀪𑀸𑀯𑁄. 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀤𑁂𑀢𑁆𑀣 ‘‘𑀧𑀼𑀭𑀺𑀫𑀢𑀭’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀢𑁄 𑀧𑀪𑀼𑀢𑀺 𑀬𑀁 ¶ 𑀬𑀁 𑀑𑀭𑀁, 𑀢𑀁 𑀢𑀁 𑀧𑀼𑀭𑀺𑀫𑀁, 𑀬𑀁 𑀬𑀁 𑀧𑀭𑀁, 𑀢𑀁 𑀢𑀁 𑀧𑀼𑀭𑀺𑀫𑀢𑀭𑀁, 𑀑𑀭𑀧𑀸𑀭𑀪𑀸𑀯𑀲𑁆𑀲 𑀯𑀺𑀬 𑀧𑀼𑀭𑀺𑀫𑀧𑀼𑀭𑀺𑀫𑀢𑀭𑀪𑀸𑀯𑀲𑁆𑀲 𑀘 𑀅𑀧𑁂𑀓𑁆𑀔𑀸𑀲𑀺𑀤𑁆𑀥𑀺𑀢𑁄, 𑀢𑁂𑀦𑀸𑀳 ‘‘𑀢𑀢𑁄 𑀧𑀝𑁆𑀞𑀸𑀬𑀸’’𑀢𑀺𑀆𑀤𑀺. 𑀫𑀽𑀮𑀤𑀺𑀯𑀲𑀢𑁄 𑀧𑀝𑁆𑀞𑀸𑀬𑀸𑀢𑀺𑀆𑀤𑀺𑀤𑀺𑀯𑀲𑀢𑁄 𑀧𑀝𑁆𑀞𑀸𑀬. 𑀅𑀕𑁆𑀕𑀦𑁆𑀢𑀺 𑀧𑀞𑀫𑀁. 𑀢𑀁 𑀧𑀦𑁂𑀢𑁆𑀣 𑀧𑀭𑀸 𑀅𑀢𑀻𑀢𑀸 𑀓𑁄𑀝𑀺 𑀳𑁄𑀢𑀻𑀢𑀺 𑀆𑀳 ‘‘𑀧𑀭𑀓𑁄𑀝𑀺𑀁 𑀓𑀢𑁆𑀯𑀸’’𑀢𑀺. 𑀬𑀁-𑀲𑀤𑁆𑀤𑀬𑁄𑀕𑁂𑀦 𑀘𑀸𑀬𑀁 ‘‘𑀯𑀺𑀳𑀭𑀸𑀫𑀻’’𑀢𑀺 𑀯𑀢𑁆𑀢𑀫𑀸𑀦𑀧𑁆𑀧𑀬𑁄𑀕𑁄, 𑀅𑀢𑁆𑀣𑁄 𑀧𑀦 𑀅𑀢𑀻𑀢𑀓𑀸𑀮𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄, 𑀢𑁂𑀦𑀸𑀳 ‘‘𑀯𑀺𑀳𑀸𑀲𑀺𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀧𑀞𑀫𑀯𑀺𑀓𑀧𑁆𑀧𑁂 ‘‘𑀯𑀺𑀳𑀭𑀸𑀫𑀻’’𑀢𑀺 𑀧𑀤𑀲𑁆𑀲 ‘‘𑀬𑀤𑀕𑁆𑀕𑁂’’𑀢𑀺 𑀇𑀫𑀺𑀦𑀸 𑀉𑀚𑀼𑀓𑀁 𑀲𑀫𑁆𑀩𑀦𑁆𑀥𑁄 𑀤𑀲𑁆𑀲𑀺𑀢𑁄, 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀦 ‘‘𑀢𑀻𑀡𑀺 𑀯𑀲𑁆𑀲𑀸𑀦𑀻’’𑀢𑀺 𑀇𑀫𑀺𑀦𑀸𑀧𑀺.

𑀧𑀺𑀬𑀚𑀸𑀢𑀺𑀓𑀸𑀦𑀻𑀢𑀺 𑀇𑀝𑁆𑀞𑀲𑀪𑀸𑀯𑀸𑀦𑀺. 𑀲𑀸𑀢𑀚𑀸𑀢𑀺𑀓𑀸𑀦𑀻𑀢𑀺 𑀫𑀥𑀼𑀭𑀲𑀪𑀸𑀯𑀸𑀦𑀺. 𑀫𑀥𑀼𑀭𑀁 𑀯𑀺𑀬𑀸𑀢𑀺 𑀳𑀺 ‘‘𑀫𑀥𑀼𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀫𑀦𑁄𑀭𑀫𑀁 𑀬𑀁 𑀓𑀺𑀜𑁆𑀘𑀺. 𑀓𑀸𑀫𑀽𑀧𑀲𑀜𑁆𑀳𑀺𑀢𑀸𑀦𑀻𑀢𑀺 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑁂𑀦 𑀓𑀸𑀫𑁂𑀦 𑀉𑀧𑀲𑀁𑀳𑀺𑀢𑀸𑀦𑀺, 𑀓𑀸𑀫𑀦𑀻𑀬𑀸𑀦𑀻𑀢𑀺 𑀅𑀢𑁆𑀣𑁄, 𑀢𑁂𑀦𑀸𑀳 ‘‘𑀓𑀸𑀫𑀲𑁆𑀲𑀸𑀤𑀬𑀼𑀢𑁆𑀢𑀸𑀦𑀻’’𑀢𑀺, 𑀓𑀸𑀫𑀲𑁆𑀲𑀸𑀤𑀲𑁆𑀲 𑀬𑀼𑀢𑁆𑀢𑀸𑀦𑀺 𑀬𑁄𑀕𑁆𑀬𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀭𑀻𑀭𑀲𑀡𑁆𑀞𑀸𑀦𑁂𑀢𑀺 𑀲𑀭𑀻𑀭𑀩𑀺𑀫𑁆𑀩𑁂, 𑀆𑀥𑀸𑀭𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀢𑀲𑁆𑀫𑀸 𑀲𑀤𑁆𑀤𑁂𑀦𑀸𑀢𑀺 ¶ 𑀢𑀁 𑀦𑀺𑀲𑁆𑀲𑀸𑀬 ¶ 𑀢𑀢𑁄 𑀉𑀧𑁆𑀧𑀦𑁆𑀦𑁂𑀦 𑀲𑀤𑁆𑀤𑁂𑀦𑀸𑀢𑀺 𑀅𑀢𑁆𑀣𑁄. 𑀫𑀥𑀼𑀭𑁂𑀦𑀸𑀢𑀺 𑀇𑀝𑁆𑀞𑁂𑀦. 𑀏𑀢𑁆𑀢𑀸𑀯𑀢𑀸𑀢𑀺 𑀤𑀺𑀩𑁆𑀩𑀲𑁄𑀢𑀜𑀸𑀡𑀲𑁆𑀲 𑀧𑀭𑀺𑀓𑀫𑁆𑀫𑀸𑀓𑀣𑀦𑀫𑀢𑁆𑀢𑁂𑀦. ‘‘𑀅𑀢𑁆𑀢𑀦𑀸 𑀜𑀸𑀢𑀫𑁆𑀧𑀺 𑀦 𑀓𑀣𑁂𑀢𑀺, 𑀓𑀺𑀫𑀲𑁆𑀲 𑀲𑀸𑀲𑀦𑁂 𑀅𑀥𑀺𑀝𑁆𑀞𑀸𑀦𑁂𑀦𑀸’’𑀢𑀺 𑀓𑀼𑀚𑁆𑀛𑀦𑁆𑀢𑁄 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀲𑀳 𑀓𑀼𑀚𑁆𑀛𑀦𑁂𑀦𑁂𑀯 𑀛𑀸𑀦𑀸𑀪𑀺𑀜𑁆𑀜𑀸𑀳𑀺 𑀧𑀭𑀺𑀳𑀸𑀬𑀺. 𑀘𑀺𑀦𑁆𑀢𑁂𑀲𑀻𑀢𑀺 ‘‘𑀓𑀲𑁆𑀫𑀸 𑀦𑀼 𑀔𑁄 𑀫𑀬𑁆𑀳𑀁 𑀢𑀁 𑀧𑀭𑀺𑀓𑀫𑁆𑀫𑀁 𑀦 𑀓𑀣𑁂𑀲𑀻’’𑀢𑀺 𑀧𑀭𑀺𑀯𑀺𑀢𑀓𑁆𑀓𑁂𑀦𑁆𑀢𑁄 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦𑀯𑀲𑁂𑀦 𑀘𑀺𑀦𑁆𑀢𑁂𑀲𑀺. 𑀅𑀦𑀼𑀓𑁆𑀓𑀫𑁂𑀦𑀸𑀢𑀺 𑀧𑀸𑀣𑀺𑀓𑀲𑀼𑀢𑁆𑀢𑁂 𑀆𑀕𑀢𑀦𑀬𑁂𑀦 ¶ 𑀢𑀁 𑀢𑀁 𑀅𑀬𑀼𑀢𑁆𑀢𑀫𑁂𑀯 𑀘𑀺𑀦𑁆𑀢𑁂𑀦𑁆𑀢𑁄, 𑀪𑀸𑀲𑀦𑁆𑀢𑁄, 𑀓𑀭𑁄𑀦𑁆𑀢𑁄 𑀘 𑀅𑀦𑀼𑀓𑁆𑀓𑀫𑁂𑀦. 𑀪𑀕𑀯𑀢𑀺 𑀩𑀤𑁆𑀥𑀸𑀖𑀸𑀢𑀢𑀸𑀬 𑀲𑀸𑀲𑀦𑁂 𑀧𑀢𑀺𑀝𑁆𑀞𑀁 𑀅𑀮𑀪𑀦𑁆𑀢𑁄 𑀕𑀺𑀳𑀺𑀪𑀸𑀯𑀁 𑀧𑀢𑁆𑀯𑀸.

𑀏𑀓𑀁𑀲𑀪𑀸𑀯𑀺𑀢𑀲𑀫𑀸𑀥𑀺𑀯𑀡𑁆𑀡𑀦𑀸

𑁩𑁬𑁬-𑁩𑁭𑁧. 𑀏𑀓𑀁𑀲𑀸𑀬𑀸𑀢𑀺 𑀢𑀤𑀢𑁆𑀣𑁂𑀬𑁂𑀯 𑀘𑀢𑀼𑀢𑁆𑀣𑀻, 𑀢𑀲𑁆𑀫𑀸 𑀏𑀓𑀁𑀲𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀅𑀁𑀲-𑀲𑀤𑁆𑀤𑁄 𑀘𑁂𑀢𑁆𑀣 𑀓𑁄𑀝𑁆𑀞𑀸𑀲𑀧𑀭𑀺𑀬𑀸𑀬𑁄, 𑀲𑁄 𑀘 𑀅𑀥𑀺𑀓𑀸𑀭𑀢𑁄 𑀤𑀺𑀩𑁆𑀩𑀭𑀽𑀧𑀤𑀲𑁆𑀲𑀦𑀤𑀺𑀩𑁆𑀩𑀲𑀤𑁆𑀤𑀲𑁆𑀲𑀯𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀏𑀓𑀓𑁄𑀝𑁆𑀞𑀸𑀲𑀸𑀬𑀸’’𑀢𑀺𑀆𑀤𑀺. 𑀅𑀦𑀼𑀤𑀺𑀲𑀸𑀬𑀸𑀢𑀺 𑀧𑀼𑀭𑀢𑁆𑀣𑀺𑀫𑀤𑀓𑁆𑀔𑀺𑀡𑀸𑀤𑀺𑀪𑁂𑀤𑀸𑀬 𑀘𑀢𑀼𑀩𑁆𑀩𑀺𑀥𑀸𑀬 𑀅𑀦𑀼𑀤𑀺𑀲𑀸𑀬. 𑀉𑀪𑀬𑀓𑁄𑀝𑁆𑀞𑀸𑀲𑀸𑀬𑀸𑀢𑀺 𑀤𑀺𑀩𑁆𑀩𑀭𑀽𑀧𑀤𑀲𑁆𑀲𑀦𑀢𑁆𑀣𑀸𑀬, 𑀤𑀺𑀩𑁆𑀩𑀲𑀤𑁆𑀤𑀲𑁆𑀲𑀯𑀦𑀢𑁆𑀣𑀸𑀬 𑀘. 𑀪𑀸𑀯𑀺𑀢𑁄𑀢𑀺 𑀬𑀣𑀸 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁, 𑀤𑀺𑀩𑁆𑀩𑀲𑁄𑀢𑀜𑀸𑀡𑀜𑁆𑀘 𑀲𑀫𑀥𑀺𑀕𑀢𑀁 𑀳𑁄𑀢𑀺, 𑀏𑀯𑀁 𑀪𑀸𑀯𑀺𑀢𑁄. 𑀢𑀬𑀺𑀤𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀭𑀺𑀓𑀫𑁆𑀫𑀓𑀭𑀡𑁂𑀦 𑀇𑀚𑁆𑀛𑀦𑁆𑀢𑀻𑀲𑀼 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺, 𑀏𑀓𑀚𑁆𑀛𑀁 𑀇𑀚𑁆𑀛𑀦𑁆𑀢𑀻𑀲𑀼𑀧𑀺 𑀓𑀫𑁂𑀦𑁂𑀯 𑀓𑀺𑀘𑁆𑀘𑀲𑀺𑀤𑁆𑀥𑀺 𑀏𑀓𑀚𑁆𑀛𑀁 𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸 𑀅𑀲𑀫𑁆𑀪𑀯𑀢𑁄. 𑀧𑀸𑀴𑀺𑀬𑀫𑁆𑀧𑀺 𑀏𑀓𑀲𑁆𑀲 𑀉𑀪𑀬𑀲𑀫𑀢𑁆𑀣𑀢𑀸𑀲𑀦𑁆𑀤𑀲𑁆𑀲𑀦𑀢𑁆𑀣𑀫𑁂𑀯 ‘‘𑀤𑀺𑀩𑁆𑀩𑀸𑀦𑀜𑁆𑀘 𑀭𑀽𑀧𑀸𑀦𑀁 𑀤𑀲𑁆𑀲𑀦𑀸𑀬, 𑀤𑀺𑀩𑁆𑀩𑀸𑀦𑀜𑁆𑀘 𑀲𑀤𑁆𑀤𑀸𑀦𑀁 𑀲𑀯𑀦𑀸𑀬𑀸’’𑀢𑀺 𑀯𑀼𑀢𑁆𑀢𑀁, 𑀦 𑀏𑀓𑀚𑁆𑀛𑀁 𑀓𑀺𑀘𑁆𑀘𑀲𑀺𑀤𑁆𑀥𑀺𑀲𑀫𑁆𑀪𑀯𑀢𑁄. ‘‘𑀏𑀓𑀁𑀲𑀪𑀸𑀯𑀺𑀢𑁄 𑀲𑀫𑀸𑀥𑀺𑀳𑁂𑀢𑀽’’𑀢𑀺 𑀇𑀫𑀺𑀦𑀸 𑀲𑀼𑀦𑀓𑁆𑀔𑀢𑁆𑀢𑁄 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀬 𑀏𑀯 𑀧𑀭𑀺𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀤𑀺𑀩𑁆𑀩𑀲𑀤𑁆𑀤𑀁 𑀦𑀸𑀲𑁆𑀲𑁄𑀲𑁆𑀲𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀧𑀡𑁆𑀡𑀓𑀦𑁆𑀢𑀺 𑀅𑀯𑀺𑀭𑀚𑁆𑀛𑀦𑀓𑀁, 𑀅𑀦𑀯𑀚𑁆𑀚𑀦𑁆𑀢𑀺 𑀯𑀸 𑀅𑀢𑁆𑀣𑁄.

𑁩𑁭𑁨. ‘‘𑀲𑀫𑀸𑀥𑀺 𑀏𑀯’’ 𑀪𑀸𑀯𑁂𑀢𑀩𑁆𑀩𑀝𑁆𑀞𑁂𑀦 𑀲𑀫𑀸𑀥𑀺𑀪𑀸𑀯𑀦𑀸. ‘‘𑀤𑀺𑀩𑁆𑀩𑀲𑁄𑀢𑀜𑀸𑀡𑀁 𑀲𑁂𑀝𑁆𑀞’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁂𑀦𑀸𑀧𑀺 𑀫𑀳𑀸𑀮𑀺𑀦𑀸 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀫𑁆𑀧𑀺 𑀢𑁂𑀦 𑀲𑀳 𑀕𑀳𑁂𑀢𑁆𑀯𑀸 ‘‘𑀏𑀢𑀸𑀲𑀁 𑀦𑀽𑀦 𑀪𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀺𑀢𑀦𑁆𑀢𑀺 ‘‘𑀉𑀪𑀬𑀁𑀲𑀪𑀸𑀯𑀺𑀢𑀸𑀦𑀁 𑀲𑀫𑀸𑀥𑀻𑀦𑀦𑁆𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀩𑀸𑀳𑀺𑀭𑀸 ¶ 𑀏𑀢𑀸 𑀲𑀫𑀸𑀥𑀺𑀪𑀸𑀯𑀦𑀸 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸. 𑀢𑀸 𑀳𑀺 𑀇𑀢𑁄 𑀩𑀸𑀳𑀺𑀭𑀓𑀸𑀦𑀫𑁆𑀧𑀺 𑀇𑀚𑁆𑀛𑀦𑁆𑀢𑀺. 𑀦 𑀅𑀚𑁆𑀛𑀢𑁆𑀢𑀺𑀓𑀸 𑀪𑀕𑀯𑀢𑁄 𑀲𑀸𑀫𑀼𑀓𑁆𑀓𑀁𑀲𑀺𑀓𑀪𑀸𑀯𑁂𑀦 ¶ 𑀅𑀧𑁆𑀧𑀯𑁂𑀤𑀺𑀢𑀢𑁆𑀢𑀸. 𑀬𑀤𑀢𑁆𑀣𑀦𑁆𑀢𑀺 𑀬𑁂𑀲𑀁 𑀅𑀢𑁆𑀣𑀸𑀬. 𑀢𑁂𑀢𑀺 𑀢𑁂 𑀅𑀭𑀺𑀬𑀨𑀮𑀥𑀫𑁆𑀫𑁂. 𑀢𑁂 𑀳𑀺 𑀲𑀘𑁆𑀙𑀺𑀓𑀸𑀢𑀩𑁆𑀩𑀸𑀢𑀺.

𑀘𑀢𑀼𑀅𑀭𑀺𑀬𑀨𑀮𑀯𑀡𑁆𑀡𑀦𑀸

𑁩𑁭𑁩. 𑀢𑀲𑁆𑀫𑀸𑀢𑀺 ¶ 𑀯𑀝𑁆𑀝𑀤𑀼𑀓𑁆𑀔𑁂 𑀲𑀁𑀬𑁄𑀚𑀦𑀢𑁄. ‘‘𑀫𑀕𑁆𑀕𑀲𑁄𑀢𑀁 𑀆𑀧𑀦𑁆𑀦𑁄’’𑀢𑀺 𑀨𑀮𑀝𑁆𑀞𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. 𑀫𑀕𑁆𑀕𑀝𑁆𑀞𑁄 𑀳𑀺 𑀫𑀕𑁆𑀕𑀲𑁄𑀢𑀁 𑀆𑀧𑀚𑁆𑀚𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑁄𑀢𑀸𑀧𑀦𑁆𑀦𑁂’’𑀢𑀺, ‘‘𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁂’’𑀢𑀺 (𑀫. 𑀦𑀺. 𑁩.𑁩𑁭𑁯) 𑀘. 𑀅𑀧𑀢𑀦𑀥𑀫𑁆𑀫𑁄𑀢𑀺 𑀅𑀦𑀼𑀧𑁆𑀧𑀚𑁆𑀚𑀦- (𑀫. 𑀦𑀺. 𑁩.𑁩𑁭𑁯) 𑀲𑀪𑀸𑀯𑁄. 𑀥𑀫𑁆𑀫𑀦𑀺𑀬𑀸𑀫𑁂𑀦𑀸𑀢𑀺 𑀫𑀕𑁆𑀕𑀥𑀫𑁆𑀫𑀦𑀺𑀬𑀸𑀫𑁂𑀦. 𑀳𑁂𑀝𑁆𑀞𑀺𑀫𑀦𑁆𑀢𑀢𑁄 𑀲𑀢𑁆𑀢𑀫𑀪𑀯𑀢𑁄 𑀉𑀧𑀭𑀺 𑀅𑀦𑀼𑀧𑁆𑀧𑀚𑁆𑀚𑀦𑀥𑀫𑁆𑀫𑀢𑀸𑀬 𑀯𑀸 𑀦𑀺𑀬𑀢𑁄. 𑀧𑀭𑀁 𑀅𑀬𑀦𑀁 𑀧𑀭𑀸𑀕𑀢𑀺.

𑀢𑀦𑀼𑀢𑁆𑀢𑀁 𑀦𑀸𑀫 𑀧𑀯𑀢𑁆𑀢𑀺𑀬𑀸 𑀫𑀦𑁆𑀤𑀢𑀸, 𑀯𑀺𑀭𑀴𑀢𑀸 𑀘𑀸𑀢𑀺 𑀆𑀳 ‘‘𑀢𑀦𑀼𑀢𑁆𑀢𑀸’’𑀢𑀺𑀆𑀤𑀺. 𑀳𑁂𑀝𑁆𑀞𑀸𑀪𑀸𑀕𑀺𑀬𑀸𑀦𑀦𑁆𑀢𑀺 𑀳𑁂𑀝𑁆𑀞𑀸𑀪𑀸𑀕𑀲𑁆𑀲 𑀓𑀸𑀫𑀪𑀯𑀲𑁆𑀲𑀧𑀘𑁆𑀘𑀬𑀪𑀸𑀯𑁂𑀦 𑀳𑀺𑀢𑀸𑀦𑀁. 𑀑𑀧𑀧𑀸𑀢𑀺𑀓𑁄𑀢𑀺 𑀉𑀧𑀧𑀸𑀢𑀺𑀓𑁄 𑀉𑀧𑀧𑀢𑀦𑁂 𑀲𑀸𑀥𑀼𑀓𑀸𑀭𑀻𑀢𑀺 𑀓𑀢𑁆𑀯𑀸. 𑀯𑀺𑀫𑀼𑀘𑁆𑀘𑀢𑀻𑀢𑀺 𑀯𑀺𑀫𑀼𑀢𑁆𑀢𑀺, 𑀘𑀺𑀢𑁆𑀢𑀫𑁂𑀯 𑀯𑀺𑀫𑀼𑀢𑁆𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀆𑀳 ‘‘𑀲𑀩𑁆𑀩𑀓𑀺𑀮𑁂𑀲…𑀧𑁂… 𑀅𑀥𑀺𑀯𑀘𑀦’’𑀦𑁆𑀢𑀺. 𑀘𑀺𑀢𑁆𑀢𑀲𑀻𑀲𑁂𑀦 𑀘𑁂𑀢𑁆𑀣 𑀲𑀫𑀸𑀥𑀺 𑀕𑀳𑀺𑀢𑁄 ‘‘𑀘𑀺𑀢𑁆𑀢𑀁 ¶ 𑀧𑀜𑁆𑀜𑀜𑁆𑀘 𑀪𑀸𑀯𑀬’’𑀦𑁆𑀢𑀺. 𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁩; 𑀧𑁂𑀝𑀓𑁄. 𑁨𑁨; 𑀫𑀺. 𑀧. 𑁨.𑁯) 𑀯𑀺𑀬. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄, 𑀢𑁂𑀦𑀸𑀳 ‘‘𑀧𑀜𑁆𑀜𑀸𑀯 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀻’’𑀢𑀺. 𑀲𑀸𑀫𑀦𑁆𑀢𑀺 𑀅𑀢𑁆𑀢𑀦𑀸𑀯, 𑀅𑀧𑀭𑀧𑁆𑀧𑀘𑁆𑀘𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀪𑀺𑀜𑁆𑀜𑀸𑀢𑀺 𑀬-𑀓𑀸𑀭𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀅𑀪𑀺𑀚𑀸𑀦𑀺𑀢𑁆𑀯𑀸’’𑀢𑀺.

𑀅𑀭𑀺𑀬𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀯𑀡𑁆𑀡𑀦𑀸

𑁩𑁭𑁪-𑁫. 𑀅𑀭𑀺𑀬𑀲𑀸𑀯𑀓𑁄 𑀦𑀺𑀩𑁆𑀩𑀸𑀦𑀁, 𑀅𑀭𑀺𑀬𑀨𑀮𑀜𑁆𑀘 𑀧𑀝𑀺𑀧𑀚𑁆𑀚𑀢𑀺 𑀏𑀢𑀸𑀬𑀸𑀢𑀺 𑀧𑀝𑀺𑀧𑀤𑀸, 𑀲𑀸 𑀘 𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑁄 𑀏𑀯𑀸𑀢𑀺 𑀇𑀥 ‘‘𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬𑀸’’𑀢𑀺 𑀅𑀭𑀺𑀬𑀫𑀕𑁆𑀕𑀫𑀸𑀳. ‘‘𑀅𑀝𑁆𑀞 𑀅𑀗𑁆𑀕𑀸𑀦𑀺 𑀅𑀲𑁆𑀲𑀸’’𑀢𑀺 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑀁 𑀅𑀓𑀢𑁆𑀯𑀸 𑀅𑀝𑁆𑀞𑀗𑁆𑀕𑀸𑀦𑀺 𑀅𑀲𑁆𑀲 𑀲𑀦𑁆𑀢𑀻𑀢𑀺 𑀅𑀝𑁆𑀞𑀗𑁆𑀕𑀺𑀓𑁄𑀢𑀺 𑀧𑀤𑀲𑀺𑀤𑁆𑀥𑀺 𑀤𑀝𑁆𑀞𑀩𑁆𑀩𑀸.

𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑀁 𑀬𑀸𑀣𑀸𑀯𑀢𑁄 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑀦𑀲𑀪𑀸𑀯𑀸 𑀲𑀫𑁆𑀫𑀸 𑀤𑀲𑁆𑀲𑀦𑀮𑀓𑁆𑀔𑀡𑀸. 𑀲𑀫𑁆𑀫𑀤𑁂𑀯 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀺𑀭𑁄𑀧𑀦𑀲𑀪𑀸𑀯𑁄 𑀲𑀫𑁆𑀫𑀸 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄. 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀸 𑀯𑀸𑀘𑀸 𑀚𑀦𑀁 𑀲𑀗𑁆𑀕𑀡𑁆𑀳𑀸𑀢𑀻𑀢𑀺 𑀢𑀩𑁆𑀩𑀺𑀧𑀓𑁆𑀔𑀯𑀺𑀭𑀢𑀺𑀲𑀪𑀸𑀯𑀸 𑀲𑀫𑁆𑀫𑀸𑀯𑀸𑀘𑀸 𑀪𑁂𑀤𑀓𑀭𑀫𑀺𑀘𑁆𑀙𑀸𑀯𑀸𑀘𑀸𑀧𑀳𑀸𑀦𑁂𑀦 ¶ 𑀚𑀦𑁂 𑀲𑀫𑁆𑀧𑀬𑀼𑀢𑁆𑀢𑁂 𑀘 𑀧𑀭𑀺𑀕𑁆𑀕𑀡𑁆𑀳𑀦𑀓𑀺𑀘𑁆𑀘𑀯𑀢𑀻 𑀳𑁄𑀢𑀻𑀢𑀺 𑀲𑀫𑁆𑀫𑀸 𑀧𑀭𑀺𑀕𑁆𑀕𑀳𑀡𑀮𑀓𑁆𑀔𑀡𑀸. 𑀬𑀣𑀸 𑀘𑀻𑀯𑀭𑀓𑀫𑁆𑀫𑀸𑀤𑀺𑀓𑁄 𑀓𑀫𑁆𑀫𑀦𑁆𑀢𑁄 𑀏𑀓𑀁 𑀓𑀸𑀢𑀩𑁆𑀩𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀢𑀁 𑀢𑀁 𑀓𑀺𑀭𑀺𑀬𑀸𑀦𑀺𑀧𑁆𑀨𑀸𑀤𑀓𑁄 𑀯𑀸 𑀘𑁂𑀢𑀦𑀸𑀲𑀗𑁆𑀔𑀸𑀢𑁄 𑀓𑀫𑁆𑀫𑀦𑁆𑀢𑁄 𑀳𑀢𑁆𑀣𑀧𑀸𑀤𑀘𑀮𑀦𑀸𑀤𑀺𑀓𑀁 𑀓𑀺𑀭𑀺𑀬𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀏𑀯𑀁 𑀲𑀸𑀯𑀚𑁆𑀚𑀓𑀢𑁆𑀢𑀩𑁆𑀩𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀸𑀧𑀓𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀧𑁆𑀧𑀳𑀸𑀦𑁂𑀦 ¶ 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀦𑀺𑀭𑀯𑀚𑁆𑀚𑀲𑀫𑀼𑀝𑁆𑀞𑀸𑀧𑀦𑀓𑀺𑀘𑁆𑀘𑀯𑀸 ¶ 𑀳𑁄𑀢𑀺, 𑀲𑀫𑁆𑀧𑀬𑀼𑀢𑁆𑀢𑁂 𑀘 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑁄 𑀏𑀯 𑀧𑀯𑀢𑁆𑀢𑀢𑀻𑀢𑀺 𑀲𑀫𑁆𑀫𑀸 𑀲𑀫𑀼𑀝𑁆𑀞𑀸𑀧𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄. 𑀓𑀸𑀬𑀯𑀸𑀘𑀸𑀦𑀁, 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀘 𑀲𑀁𑀓𑀺𑀮𑁂𑀲𑀪𑀽𑀢𑀫𑀺𑀘𑁆𑀙𑀸𑀚𑀻𑀯𑀧𑁆𑀧𑀳𑀸𑀦𑁂𑀦 𑀲𑀫𑁆𑀫𑀸 𑀯𑁄𑀤𑀸𑀧𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀆𑀚𑀻𑀯𑁄. 𑀓𑁄𑀲𑀚𑁆𑀚𑀧𑀓𑁆𑀔𑀢𑁄 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀕𑁆𑀕𑀡𑁆𑀳𑀦𑀲𑀪𑀸𑀯𑁄𑀢𑀺 𑀲𑀫𑁆𑀫𑀸 𑀧𑀕𑁆𑀕𑀸𑀳𑀮𑀓𑁆𑀔𑀡𑁄 𑀲𑀫𑁆𑀫𑀸𑀯𑀸𑀬𑀸𑀫𑁄. 𑀲𑀫𑁆𑀫𑀤𑁂𑀯 𑀉𑀧𑀝𑁆𑀞𑀸𑀦𑀲𑀪𑀸𑀯𑀸𑀢𑀺 𑀲𑀫𑁆𑀫𑀸 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑀸 𑀲𑀫𑁆𑀫𑀸𑀲𑀢𑀺. 𑀯𑀺𑀓𑁆𑀔𑁂𑀧𑀯𑀺𑀤𑁆𑀥𑀁𑀲𑀦𑁂𑀦 𑀲𑀫𑁆𑀫𑀤𑁂𑀯 𑀘𑀺𑀢𑁆𑀢𑀲𑁆𑀲 𑀲𑀫𑀸𑀤𑀳𑀦𑀲𑀪𑀸𑀯𑁄𑀢𑀺 𑀲𑀫𑁆𑀫𑀸 𑀲𑀫𑀸𑀥𑀸𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀲𑀫𑀸𑀥𑀺.

𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑀸 𑀤𑀺𑀝𑁆𑀞𑁂𑀓𑀝𑁆𑀞𑀸 𑀅𑀯𑀺𑀚𑁆𑀚𑀸𑀤𑀬𑁄. 𑀧𑀲𑁆𑀲𑀢𑀻𑀢𑀺 𑀧𑀓𑀸𑀲𑁂𑀢𑀺 𑀓𑀺𑀘𑁆𑀘𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀢𑀺, 𑀢𑁂𑀦𑀸𑀳 ‘‘𑀢𑀧𑁆𑀧𑀝𑀺𑀘𑁆𑀙𑀸𑀤𑀓…𑀧𑁂… 𑀅𑀲𑀫𑁆𑀫𑁄𑀳𑀢𑁄’’𑀢𑀺. 𑀢𑁂𑀦𑁂𑀯 𑀳𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁂𑀦 𑀅𑀗𑁆𑀕𑁂𑀦 𑀢𑀢𑁆𑀣 𑀧𑀘𑁆𑀘𑀯𑁂𑀓𑁆𑀔𑀡𑀸 𑀧𑀯𑀢𑁆𑀢𑀢𑀻𑀢𑀺 𑀢𑀣𑁂𑀯𑀸𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄.

𑀓𑀺𑀘𑁆𑀘𑀢𑁄𑀢𑀺 𑀧𑀼𑀩𑁆𑀩𑀪𑀸𑀕𑁂𑀳𑀺 𑀤𑀼𑀓𑁆𑀔𑀸𑀤𑀺𑀜𑀸𑀡𑁂𑀳𑀺 𑀓𑀸𑀢𑀩𑁆𑀩𑀲𑁆𑀲 𑀓𑀺𑀘𑁆𑀘𑀲𑁆𑀲 𑀇𑀥 𑀲𑀸𑀢𑀺𑀲𑀬𑀁 𑀦𑀺𑀧𑁆𑀨𑀢𑁆𑀢𑀺𑀢𑁄 𑀇𑀫𑀲𑁆𑀲𑁂𑀯 𑀯𑀸 𑀜𑀸𑀡𑀲𑁆𑀲 𑀤𑀼𑀓𑁆𑀔𑀸𑀤𑀺𑀧𑁆𑀧𑀓𑀸𑀲𑀦𑀓𑀺𑀘𑁆𑀘𑀢𑁄. 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀓𑀸𑀢𑀩𑁆𑀩𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀢𑁄. 𑀢𑀻𑀡𑀺 𑀦𑀸𑀫𑀸𑀦𑀺 𑀮𑀪𑀢𑀺 𑀓𑀸𑀫𑀲𑀗𑁆𑀓𑀧𑁆𑀧𑀸𑀤𑀺𑀧𑁆𑀧𑀳𑀸𑀦𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀢𑁄. 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 (𑀯𑀺𑀪. 𑁭𑁦𑁩) ‘‘𑀯𑀺𑀭𑀢𑀺𑀘𑁂𑀢𑀦𑀸, 𑀲𑀩𑁆𑀩𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀘 𑀲𑀺𑀓𑁆𑀔𑀸𑀧𑀤𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀢𑀢𑁆𑀣 𑀧𑀥𑀸𑀦𑀸𑀦𑀁 𑀯𑀺𑀭𑀢𑀺𑀘𑁂𑀢𑀦𑀸𑀦𑀁 𑀯𑀲𑁂𑀦 ‘‘𑀯𑀺𑀭𑀢𑀺𑀬𑁄𑀧𑀺 ¶ 𑀳𑁄𑀦𑁆𑀢𑀺 𑀘𑁂𑀢𑀦𑀸𑀬𑁄𑀧𑀻’’𑀢𑀺 𑀆𑀳. 𑀫𑀼𑀲𑀸𑀯𑀸𑀤𑀸𑀤𑀻𑀳𑀺 𑀯𑀺𑀭𑀫𑀡𑀓𑀸𑀮𑁂 𑀯𑀸 𑀯𑀺𑀭𑀢𑀺𑀬𑁄, 𑀲𑀼𑀪𑀸𑀲𑀺𑀢𑀸𑀤𑀺𑀯𑀸𑀘𑀸𑀪𑀸𑀲𑀦𑀸𑀤𑀺𑀓𑀸𑀮𑁂 𑀘 𑀘𑁂𑀢𑀦𑀸𑀬𑁄 𑀬𑁄𑀚𑁂𑀢𑀩𑁆𑀩𑀸. 𑀫𑀕𑁆𑀕𑀓𑁆𑀔𑀡𑁂 𑀯𑀺𑀭𑀢𑀺𑀬𑁄𑀯 𑀘𑁂𑀢𑀦𑀸𑀦𑀁 𑀅𑀫𑀕𑁆𑀕𑀗𑁆𑀕𑀢𑁆𑀢𑀸 𑀏𑀓𑀲𑁆𑀲 𑀜𑀸𑀡𑀲𑁆𑀲 𑀤𑀼𑀓𑁆𑀔𑀸𑀤𑀺𑀜𑀸𑀡𑀢𑀸 𑀯𑀺𑀬, 𑀏𑀓𑀸𑀬 𑀯𑀺𑀭𑀢𑀺𑀬𑀸 𑀫𑀼𑀲𑀸𑀯𑀸𑀤𑀸𑀤𑀺𑀯𑀺𑀭𑀢𑀺𑀪𑀸𑀯𑁄 𑀯𑀺𑀬 𑀘 𑀏𑀓𑀸𑀬 𑀘𑁂𑀢𑀦𑀸𑀬 𑀲𑀫𑁆𑀫𑀸𑀯𑀸𑀘𑀸𑀤𑀺𑀓𑀺𑀘𑁆𑀘𑀢𑁆𑀢𑀬𑀲𑀸𑀥𑀦𑀲𑀪𑀸𑀯𑀸𑀪𑀸𑀯𑀸 𑀲𑀫𑁆𑀫𑀸𑀯𑀸𑀘𑀸𑀤𑀺𑀪𑀸𑀯𑀸𑀲𑀺𑀤𑁆𑀥𑀺𑀢𑁄, 𑀢𑀁𑀲𑀺𑀤𑁆𑀥𑀺𑀬𑀜𑁆𑀘 𑀅𑀗𑁆𑀕𑀢𑁆𑀢𑀬𑀢𑁆𑀢𑀸𑀲𑀺𑀤𑁆𑀥𑀺𑀢𑁄 𑀘. 𑀲𑀫𑁆𑀫𑀧𑁆𑀧𑀥𑀸𑀦𑀲𑀢𑀺𑀧𑀝𑁆𑀞𑀸𑀦𑀯𑀲𑁂𑀦𑀸𑀢𑀺 ¶ 𑀘𑀢𑀼𑀲𑀫𑁆𑀫𑀧𑁆𑀧𑀥𑀸𑀦𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀯𑀲𑁂𑀦.

𑀧𑀼𑀩𑁆𑀩𑀪𑀸𑀕𑁂𑀧𑀺 𑀫𑀕𑁆𑀕𑀓𑁆𑀔𑀡𑁂𑀧𑀺 𑀲𑀫𑁆𑀫𑀸𑀲𑀫𑀸𑀥𑀺𑀬𑁂𑀯𑀸𑀢𑀺. 𑀬𑀤𑀺𑀧𑀺 𑀲𑀫𑀸𑀥𑀺𑀉𑀧𑀓𑀸𑀭𑀓𑀸𑀦𑀁 𑀅𑀪𑀺𑀦𑀺𑀭𑁄𑀧𑀦𑀸𑀦𑀼𑀫𑀚𑁆𑀚𑀦𑀲𑀫𑁆𑀧𑀺𑀬𑀸𑀬𑀦𑀩𑁆𑀭𑀽𑀳𑀦𑀲𑀦𑁆𑀢𑀲𑀼𑀔𑀸𑀦𑀁 𑀯𑀺𑀢𑀓𑁆𑀓𑀸𑀤𑀻𑀦𑀁 𑀯𑀲𑁂𑀦 𑀘𑀢𑀽𑀳𑀺 𑀛𑀸𑀦𑁂𑀳𑀺 𑀲𑀫𑁆𑀫𑀸𑀲𑀫𑀸𑀥𑀺 𑀯𑀺𑀪𑀢𑁆𑀢𑁄, 𑀢𑀣𑀸𑀧𑀺 𑀯𑀸𑀬𑀸𑀫𑁄 𑀯𑀺𑀬 𑀅𑀦𑀼𑀧𑁆𑀧𑀦𑁆𑀦𑀸𑀓𑀼𑀲𑀮𑀸𑀦𑀼𑀧𑁆𑀧𑀸𑀤𑀦𑀸𑀤𑀺𑀘𑀢𑀼𑀯𑀸𑀬𑀸𑀫𑀓𑀺𑀘𑁆𑀘𑀁, 𑀲𑀢𑀺 𑀯𑀺𑀬 𑀘 𑀅𑀲𑀼𑀪𑀸𑀲𑀼𑀔𑀸𑀦𑀺𑀘𑁆𑀘𑀸𑀦𑀢𑁆𑀢𑁂𑀲𑀼 𑀓𑀸𑀬𑀸𑀤𑀻𑀲𑀼 𑀲𑀼𑀪𑀸𑀤𑀺𑀲𑀜𑁆𑀜𑀸𑀧𑀳𑀸𑀦𑀘𑀢𑀼𑀲𑀢𑀺𑀓𑀺𑀘𑁆𑀘𑀁 𑀏𑀓𑁄 𑀲𑀫𑀸𑀥𑀺 𑀘𑀢𑀼𑀓𑁆𑀓𑀚𑁆𑀛𑀸𑀦𑀲𑀫𑀸𑀥𑀺𑀓𑀺𑀘𑁆𑀘𑀁 𑀦 𑀲𑀸𑀥𑁂𑀢𑀻𑀢𑀺 𑀧𑀼𑀩𑁆𑀩𑀪𑀸𑀕𑁂𑀧𑀺 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺 𑀏𑀯 𑀫𑀕𑁆𑀕𑀓𑁆𑀔𑀡𑁂𑀧𑀺, 𑀢𑀣𑀸 𑀧𑀼𑀩𑁆𑀩𑀪𑀸𑀕𑁂𑀧𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺 𑀏𑀯 𑀫𑀕𑁆𑀕𑀓𑁆𑀔𑀡𑁂𑀧𑀻𑀢𑀺 𑀅𑀢𑁆𑀣𑁄.

𑀢𑀲𑁆𑀫𑀸𑀢𑀺 ¶ 𑀧𑀜𑁆𑀜𑀸𑀧𑀚𑁆𑀚𑁄𑀢𑀢𑁆𑀢𑀸 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀧𑀜𑁆𑀜𑀸𑀲𑀢𑁆𑀣𑀢𑁆𑀢𑀸 𑀓𑀺𑀮𑁂𑀲𑀘𑁄𑀭𑁂 𑀖𑀸𑀢𑁂𑀦𑁆𑀢𑁄. 𑀩𑀳𑀼𑀓𑀸𑀭𑀢𑁆𑀢𑀸𑀢𑀺 𑀬𑁆𑀯𑀸𑀬𑀁 𑀅𑀦𑀸𑀤𑀺𑀫𑀢𑀺 𑀲𑀁𑀲𑀸𑀭𑁂 𑀇𑀫𑀺𑀦𑀸 𑀓𑀤𑀸𑀘𑀺𑀧𑀺 𑀅𑀲𑀫𑀼𑀕𑁆𑀖𑀸𑀝𑀺𑀢𑀧𑀼𑀩𑁆𑀩𑁄 𑀓𑀺𑀮𑁂𑀲𑀕𑀡𑁄 𑀢𑀲𑁆𑀲 𑀲𑀫𑀼𑀕𑁆𑀖𑀸𑀝𑀓𑁄 𑀅𑀭𑀺𑀬𑀫𑀕𑁆𑀕𑁄 ¶ . 𑀢𑀢𑁆𑀣 𑀘𑀸𑀬𑀁 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀧𑀼𑀩𑁆𑀩𑀗𑁆𑀕𑀫𑀸 𑀳𑁄𑀢𑀻𑀢𑀺 𑀩𑀳𑀼𑀓𑀸𑀭𑀸, 𑀢𑀲𑁆𑀫𑀸 𑀩𑀳𑀼𑀓𑀸𑀭𑀢𑁆𑀢𑀸.

𑀢𑀲𑁆𑀲𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸. ‘‘𑀩𑀳𑀼𑀓𑀸𑀭𑁄’’𑀢𑀺 𑀯𑀢𑁆𑀯𑀸 𑀢𑀁 𑀩𑀳𑀼𑀓𑀸𑀭𑀢𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀅𑀬𑀁’’ 𑀢𑀫𑁆𑀩𑀓𑀁𑀲𑀸𑀤𑀺𑀫𑀬𑀢𑁆𑀢𑀸 𑀓𑀽𑀝𑁄. 𑀅𑀬𑀁 𑀲𑀫𑀲𑀸𑀭𑀢𑀸𑀬 𑀫𑀳𑀸𑀲𑀸𑀭𑀢𑀸𑀬 𑀙𑁂𑀓𑁄. 𑀏𑀯𑀦𑁆𑀢𑀺 𑀬𑀣𑀸 𑀳𑁂𑀭𑀜𑁆𑀜𑀺𑀓𑀲𑁆𑀲 𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 𑀓𑀳𑀸𑀧𑀡𑀯𑀺𑀪𑀸𑀕𑀚𑀸𑀦𑀦𑁂 𑀓𑀭𑀡𑀦𑁆𑀢𑀭𑀁 𑀩𑀳𑀼𑀓𑀸𑀭𑀁 𑀬𑀤𑀺𑀤𑀁 𑀳𑀢𑁆𑀣𑁄, 𑀏𑀯𑀁 𑀬𑁄𑀕𑀸𑀯𑀘𑀭𑀲𑁆𑀲 𑀧𑀜𑁆𑀜𑀸𑀬 𑀑𑀮𑁄𑀓𑁂𑀢𑁆𑀯𑀸 𑀥𑀫𑁆𑀫𑀯𑀺𑀪𑀸𑀕𑀚𑀸𑀦𑀦𑁂 𑀥𑀫𑁆𑀫𑀦𑁆𑀢𑀭𑀁 𑀩𑀳𑀼𑀓𑀸𑀭𑀁 𑀬𑀤𑀺𑀤𑀁 𑀯𑀺𑀢𑀓𑁆𑀓𑁄 𑀯𑀺𑀢𑀓𑁆𑀓𑁂𑀢𑁆𑀯𑀸 𑀢𑀤𑀯𑀩𑁄𑀥𑀢𑁄, 𑀢𑀲𑁆𑀫𑀸 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀩𑀳𑀼𑀓𑀸𑀭𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀼𑀢𑀺𑀬𑀉𑀧𑀫𑀸𑀬𑀁 𑀏𑀯𑀦𑁆𑀢𑀺 𑀬𑀣𑀸 𑀢𑀘𑁆𑀙𑀓𑁄 𑀧𑀭𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀤𑀺𑀦𑁆𑀦𑀁 𑀤𑀩𑁆𑀩𑀲𑀫𑁆𑀪𑀸𑀭𑀁 𑀯𑀸𑀲𑀺𑀬𑀸 𑀢𑀘𑁆𑀙𑁂𑀢𑁆𑀯𑀸 𑀕𑁂𑀳𑀓𑀭𑀡𑀓𑀫𑁆𑀫𑁂 𑀉𑀧𑀦𑁂𑀢𑀺, 𑀏𑀯𑀁 𑀬𑁄𑀕𑀸𑀯𑀘𑀭𑁄 𑀯𑀺𑀢𑀓𑁆𑀓𑁂𑀦 𑀮𑀓𑁆𑀔𑀡𑀸𑀤𑀺𑀢𑁄 𑀯𑀺𑀢𑀓𑁆𑀓𑁂𑀢𑁆𑀯𑀸 𑀤𑀺𑀦𑁆𑀦𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀓𑀫𑁆𑀫𑁂 𑀉𑀧𑀦𑁂𑀢𑀻𑀢𑀺 𑀬𑁄𑀚𑀦𑀸. 𑀯𑀘𑀻𑀪𑁂𑀤𑀲𑁆𑀲 𑀉𑀧𑀓𑀸𑀭𑀓𑁄 𑀯𑀺𑀢𑀓𑁆𑀓𑁄 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀯𑀘𑀻𑀪𑁂𑀤𑀦𑀺𑀯𑀢𑁆𑀢𑀦𑀧𑀯𑀢𑁆𑀢𑀦𑀓𑀭𑀸𑀬 𑀲𑀫𑁆𑀫𑀸𑀯𑀸𑀘𑀸𑀬𑀧𑀺 𑀉𑀧𑀓𑀸𑀭𑀓𑁄 𑀏𑀯𑀸𑀢𑀺 ‘‘𑀲𑁆𑀯𑀸𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀯𑀘𑀻𑀪𑁂𑀤𑀲𑁆𑀲 ¶ 𑀦𑀺𑀬𑀸𑀫𑀺𑀓𑀸 𑀯𑀸𑀘𑀸 𑀓𑀸𑀬𑀺𑀓𑀓𑀺𑀭𑀺𑀬𑀸𑀦𑀺𑀬𑀸𑀫𑀓𑀲𑁆𑀲 𑀓𑀫𑁆𑀫𑀦𑁆𑀢𑀲𑁆𑀲 𑀉𑀧𑀓𑀸𑀭𑀺𑀓𑀸. 𑀢𑀤𑀼𑀪𑀬𑀸𑀦𑀦𑁆𑀢𑀭𑀦𑁆𑀢𑀺 𑀤𑀼𑀘𑁆𑀘𑀭𑀺𑀢𑀤𑁆𑀯𑀬𑀧𑀳𑀸𑀬𑀓𑀲𑁆𑀲 𑀲𑀼𑀘𑀭𑀺𑀢𑀤𑁆𑀯𑀬𑀧𑀸𑀭𑀺𑀧𑀽𑀭𑀺𑀳𑁂𑀢𑀼𑀪𑀽𑀢𑀲𑁆𑀲 𑀲𑀫𑁆𑀫𑀸𑀯𑀸𑀘𑀸𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀤𑁆𑀯𑀬𑀲𑁆𑀲 𑀅𑀦𑀦𑁆𑀢𑀭𑀁. 𑀇𑀤𑀁 𑀯𑀻𑀭𑀺𑀬𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀁. 𑀇𑀦𑁆𑀤𑁆𑀭𑀺𑀬𑀲𑀫𑀢𑀸𑀤𑀬𑁄 𑀲𑀫𑀸𑀥𑀺𑀲𑁆𑀲 𑀉𑀧𑀓𑀸𑀭𑀥𑀫𑁆𑀫𑀸. 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀅𑀧𑀓𑀸𑀭𑀥𑀫𑁆𑀫𑀸 ¶ 𑀯𑁂𑀤𑀺𑀢𑀩𑁆𑀩𑀸. 𑀕𑀢𑀺𑀬𑁄𑀢𑀺 𑀦𑀺𑀧𑁆𑀨𑀢𑁆𑀢𑀺𑀬𑁄, 𑀓𑀺𑀘𑁆𑀘𑀸𑀤𑀺𑀲𑀪𑀸𑀯𑁂 𑀯𑀸. 𑀲𑀫𑀦𑁆𑀦𑁂𑀲𑀺𑀢𑁆𑀯𑀸𑀢𑀺 𑀉𑀧𑀥𑀸𑀭𑁂𑀢𑁆𑀯𑀸.

𑀤𑁆𑀯𑁂𑀧𑀩𑁆𑀩𑀚𑀺𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁭𑁬-𑁭. ‘‘𑀓𑀲𑁆𑀫𑀸 𑀆𑀭𑀤𑁆𑀥’’𑀦𑁆𑀢𑀺 𑀅𑀦𑀼𑀲𑀦𑁆𑀥𑀺𑀓𑀸𑀭𑀡𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀅𑀬𑀁 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑁂𑀦 𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺𑀯𑀲𑁂𑀦 𑀉𑀧𑀭𑀺 𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀢𑀺 𑀢𑀣𑀸𑀮𑀤𑁆𑀥𑀺𑀓𑀢𑁆𑀢𑀸. 𑀅𑀲𑁆𑀲𑀸𑀢𑀺 𑀮𑀺𑀘𑁆𑀙𑀯𑀻𑀭𑀜𑁆𑀜𑁄. 𑀤𑁂𑀲𑀦𑀸𑀬𑀸𑀢𑀺 𑀲𑀡𑁆𑀳𑀲𑀼𑀔𑀼𑀫𑀸𑀬𑀁 𑀲𑀼𑀜𑁆𑀜𑀢𑀧𑀝𑀺𑀲𑀁𑀬𑀼𑀢𑁆𑀢𑀸𑀬𑀁 𑀬𑀣𑀸𑀤𑁂𑀲𑀺𑀢𑀤𑁂𑀲𑀦𑀸𑀬𑀁. 𑀦𑀸𑀥𑀺𑀫𑀼𑀘𑁆𑀘𑀢𑀻𑀢𑀺 𑀦 𑀲𑀤𑁆𑀤𑀳𑀢𑀺 𑀦 𑀧𑀲𑀻𑀤𑀢𑀺. 𑀢𑀦𑁆𑀢𑀺𑀥𑀫𑁆𑀫𑀁 𑀦𑀸𑀫 𑀓𑀣𑁂𑀦𑁆𑀢𑁄𑀢𑀺 𑀬𑁂𑀲𑀁 𑀅𑀢𑁆𑀣𑀸𑀬 𑀥𑀫𑁆𑀫𑁄 𑀓𑀣𑀻𑀬𑀢𑀺, 𑀢𑀲𑁆𑀫𑀺𑀁 𑀢𑁂𑀲𑀁 𑀅𑀲𑀢𑀺𑀧𑀺 𑀫𑀕𑁆𑀕𑀧𑀝𑀺𑀯𑁂𑀥𑁂 𑀓𑁂𑀯𑀮𑀁 𑀲𑀸𑀲𑀦𑁂 𑀢𑀦𑁆𑀢𑀺𑀥𑀫𑁆𑀫𑀁 𑀓𑀢𑁆𑀯𑀸 𑀓𑀣𑁂𑀦𑁆𑀢𑁄. 𑀏𑀯𑀭𑀽𑀧𑀲𑁆𑀲𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑀢𑀸𑀬 𑀏𑀯𑀁𑀧𑀸𑀓𑀝𑀥𑀫𑁆𑀫𑀓𑀸𑀬𑀲𑁆𑀲 𑀲𑀢𑁆𑀣𑀼. 𑀬𑀼𑀢𑁆𑀢𑀁 ¶ 𑀦𑀼 𑀔𑁄 𑀏𑀢𑀁 𑀅𑀲𑁆𑀲𑀸𑀢𑀺 𑀅𑀲𑁆𑀲 𑀧𑀞𑀫𑀚𑁆𑀛𑀸𑀦𑀸𑀤𑀺𑀲𑀫𑀥𑀺𑀕𑀫𑁂𑀦 𑀲𑀫𑀸𑀳𑀺𑀢𑀘𑀺𑀢𑁆𑀢𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀏𑀢𑀁 ‘‘𑀢𑀁 𑀚𑀻𑀯’’𑀦𑁆𑀢𑀺𑀆𑀤𑀺𑀦𑀸 𑀉𑀘𑁆𑀙𑁂𑀤𑀸𑀤𑀺𑀕𑀸𑀳𑀕𑀳𑀡𑀁 𑀅𑀧𑀺 𑀦𑀼 𑀬𑀼𑀢𑁆𑀢𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀮𑀤𑁆𑀥𑀺𑀬𑀸 𑀧𑀦 𑀛𑀸𑀦𑀸𑀥𑀺𑀕𑀫𑀫𑀢𑁆𑀢𑁂𑀦 𑀦 𑀢𑀸𑀯 𑀯𑀺𑀯𑁂𑀘𑀺𑀢𑀢𑁆𑀢𑀸 ‘‘𑀢𑁂𑀳𑀺 𑀬𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁 𑀢𑀁 𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀛𑀸𑀦𑀮𑀸𑀪𑀺𑀦𑁄𑀧𑀺 𑀢𑀁 𑀕𑀳𑀡𑀁 ‘‘𑀅𑀬𑀼𑀢𑁆𑀢𑀫𑁂𑀯𑀸’’𑀢𑀺 𑀢𑀁 𑀉𑀘𑁆𑀙𑁂𑀤𑀯𑀸𑀤𑀁 𑀲𑀲𑁆𑀲𑀢𑀯𑀸𑀤𑀁 𑀯𑀸 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸. 𑀅𑀢𑁆𑀢𑀫𑀦𑀸 𑀅𑀳𑁂𑀲𑀼𑀦𑁆𑀢𑀺 𑀬𑀲𑁆𑀫𑀸 𑀔𑀻𑀡𑀸𑀲𑀯𑁄 𑀯𑀺𑀕𑀢𑀲𑀫𑁆𑀫𑁄𑀳𑁄 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄, ‘‘𑀢𑀲𑁆𑀫𑀸 𑀢𑀲𑁆𑀲 𑀢𑀣𑀸 𑀯𑀢𑁆𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀉𑀧𑁆𑀧𑀦𑁆𑀦𑀦𑀺𑀘𑁆𑀙𑀬𑀢𑀸𑀬 𑀢𑀁 𑀫𑀫 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀢𑁆𑀢𑀫𑀦𑀸 𑀅𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀲𑁄𑀧𑀺 𑀮𑀺𑀘𑁆𑀙𑀯𑀻 𑀭𑀸𑀚𑀸 𑀢𑁂 𑀯𑀺𑀬 𑀲𑀜𑁆𑀚𑀸𑀢𑀦𑀺𑀘𑁆𑀙𑀬𑀢𑁆𑀢𑀸 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀫𑀳𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.

𑁭. 𑀚𑀸𑀮𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑀤𑁆𑀯𑁂𑀧𑀩𑁆𑀩𑀚𑀺𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁭𑁮. ‘‘𑀖𑁄𑀲𑀺𑀢𑁂𑀦 ¶ ¶ ¶ 𑀲𑁂𑀝𑁆𑀞𑀺𑀦𑀸 𑀓𑀢𑁂 𑀆𑀭𑀸𑀫𑁂’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀓𑁄𑀬𑀁 𑀖𑁄𑀲𑀺𑀢𑀲𑁂𑀝𑁆𑀞𑀺 𑀦𑀸𑀫, 𑀓𑀣𑀜𑁆𑀘𑀸𑀦𑁂𑀦 𑀆𑀭𑀸𑀫𑁄 𑀓𑀸𑀭𑀺𑀢𑁄, 𑀓𑀣𑀁 𑀯𑀸 𑀢𑀢𑁆𑀣 𑀪𑀕𑀯𑀸 𑀯𑀺𑀳𑀸𑀲𑀻𑀢𑀺 𑀢𑀁 𑀲𑀩𑁆𑀩𑀁 𑀲𑀫𑀼𑀤𑀸𑀕𑀫𑀢𑁄 𑀧𑀝𑁆𑀞𑀸𑀬 𑀲𑀗𑁆𑀔𑁂𑀧𑀢𑁄𑀯 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀩𑁆𑀩𑁂 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁄𑀢𑀺 𑀅𑀮𑁆𑀮𑀓𑀧𑁆𑀧𑀭𑀝𑁆𑀞𑀢𑁄. 𑀢𑀤𑀸𑀢𑀺 𑀢𑁂𑀲𑀁 𑀢𑀁 𑀕𑀸𑀫𑀁 𑀧𑀯𑀺𑀝𑁆𑀞𑀤𑀺𑀯𑀲𑁂. 𑀩𑀮𑀯𑀧𑀸𑀬𑀸𑀲𑀦𑁆𑀢𑀺 𑀕𑀭𑀼𑀢𑀭𑀁 𑀩𑀳𑀼𑀧𑀸𑀬𑀸𑀲𑀁. 𑀅𑀲𑀦𑁆𑀦𑀺𑀳𑀺𑀢𑁂𑀢𑀺 𑀕𑁂𑀳𑀢𑁄 𑀩𑀳𑀺 𑀕𑀢𑁂. 𑀪𑀼𑀲𑁆𑀲𑀢𑀻𑀢𑀺 𑀭𑀯𑀢𑀺. 𑀖𑁄𑀲𑀓𑀤𑁂𑀯𑀧𑀼𑀢𑁆𑀢𑁄𑀢𑁆𑀯𑁂𑀯 𑀦𑀸𑀫𑀁 𑀅𑀳𑁄𑀲𑀺 𑀲𑀭𑀖𑁄𑀲𑀲𑀫𑁆𑀧𑀢𑁆𑀢𑀺𑀬𑀸. 𑀯𑁂𑀬𑁆𑀬𑀢𑁆𑀢𑀺𑀬𑁂𑀦𑀸𑀢𑀺 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑁂𑀦. 𑀖𑁄𑀲𑀺𑀢𑀲𑁂𑀝𑁆𑀞𑀺 𑀦𑀸𑀫 𑀚𑀸𑀢𑁄 𑀢𑀸𑀬 𑀏𑀯 𑀘𑀲𑁆𑀲 𑀲𑀭𑀲𑀫𑁆𑀧𑀢𑁆𑀢𑀺𑀬𑀸 𑀖𑁄𑀲𑀺𑀢𑀦𑀸𑀫𑀢𑀸.

𑀲𑀭𑀻𑀭𑀲𑀦𑁆𑀢𑀧𑁆𑀧𑀦𑀢𑁆𑀣𑀦𑁆𑀢𑀺 𑀳𑀺𑀫𑀯𑀦𑁆𑀢𑁂 𑀨𑀮𑀫𑀽𑀮𑀸𑀳𑀸𑀭𑀢𑀸𑀬 𑀓𑀺𑀮𑀦𑁆𑀢𑀲𑀭𑀻𑀭𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑁂𑀦 𑀢𑀲𑁆𑀲 𑀲𑀦𑁆𑀢𑀧𑁆𑀧𑀦𑀢𑁆𑀣𑀁 𑀧𑀻𑀦𑀦𑀢𑁆𑀣𑀁. 𑀢𑀲𑀺𑀢𑀸𑀢𑀺 𑀧𑀺𑀧𑀸𑀲𑀺𑀢𑀸. 𑀓𑀺𑀮𑀦𑁆𑀢𑀸𑀢𑀺 𑀧𑀭𑀺𑀲𑁆𑀲𑀦𑁆𑀢𑀓𑀸𑀬𑀸. 𑀢𑁂 𑀓𑀺𑀭 𑀢𑀁 𑀯𑀝𑀭𑀼𑀓𑁆𑀔𑀁 𑀧𑀢𑁆𑀯𑀸 𑀢𑀲𑁆𑀲 𑀲𑁄𑀪𑀸𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀫𑀳𑀸𑀦𑀼𑀪𑀸𑀯𑀸 𑀫𑀜𑁆𑀜𑁂 𑀏𑀢𑁆𑀣 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸, ‘‘𑀲𑀸𑀥𑀼 𑀯𑀢𑀸𑀬𑀁 𑀤𑁂𑀯𑀢𑀸 𑀅𑀫𑁆𑀳𑀸𑀓𑀁 𑀅𑀤𑁆𑀥𑀸𑀦𑀧𑀭𑀺𑀲𑁆𑀲𑀫𑀁 𑀯𑀺𑀦𑁄𑀤𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀲𑀼𑀁, 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀢𑁆𑀣 𑀅𑀥𑀺𑀯𑀢𑁆𑀣𑀸…𑀧𑁂… 𑀦𑀺𑀲𑀻𑀤𑀺𑀁𑀲𑀽’’𑀢𑀺. 𑀲𑁄𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺. 𑀪𑀢𑀓𑀸𑀦𑀦𑁆𑀢𑀺 𑀪𑀢𑀺𑀬𑀸 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀦𑁆𑀢𑀸𑀦𑀁 𑀤𑀸𑀲𑀧𑁂𑀲𑀓𑀫𑁆𑀫𑀓𑀭𑀸𑀦𑀁. 𑀧𑀓𑀢𑀺𑀪𑀢𑁆𑀢𑀯𑁂𑀢𑀦𑀦𑁆𑀢𑀺 𑀧𑀓𑀢𑀺𑀬𑀸 𑀤𑀸𑀢𑀩𑁆𑀩𑀪𑀢𑁆𑀢𑀯𑁂𑀢𑀦𑀁, 𑀢𑀤𑀸 𑀉𑀧𑁄𑀲𑀣𑀺𑀓𑀢𑁆𑀢𑀸 ¶ 𑀓𑀫𑁆𑀫𑀁 𑀅𑀓𑀭𑁄𑀦𑁆𑀢𑀸𑀦𑀫𑁆𑀧𑀺 𑀓𑀫𑁆𑀫𑀓𑀭𑀡𑀤𑀺𑀯𑀲𑁂𑀦 𑀤𑀸𑀢𑀩𑁆𑀩𑀪𑀢𑁆𑀢𑀯𑁂𑀢𑀦𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀓𑀜𑁆𑀘𑀻𑀢𑀺 𑀓𑀜𑁆𑀘𑀺𑀧𑀺 𑀪𑀢𑀓𑀁.

𑀉𑀧𑁂𑀘𑁆𑀘 𑀧𑀭𑀲𑁆𑀲 𑀯𑀸𑀘𑀸𑀬 𑀆𑀭𑀫𑁆𑀪𑀦𑀁 𑀩𑀸𑀥𑀦𑀁 𑀉𑀧𑀸𑀭𑀫𑁆𑀪𑁄, 𑀤𑁄𑀲𑀤𑀲𑁆𑀲𑀦𑀯𑀲𑁂𑀦 𑀖𑀝𑁆𑀝𑀦𑀦𑁆𑀢𑀺 𑀅𑀢𑁆𑀣𑁄, 𑀢𑁂𑀦𑀸𑀳 ‘‘𑀉𑀧𑀸𑀭𑀫𑁆𑀪𑀸𑀥𑀺𑀧𑁆𑀧𑀸𑀬𑁂𑀦 𑀯𑀸𑀤𑀁 𑀆𑀭𑁄𑀧𑁂𑀢𑀼𑀓𑀸𑀫𑀸 𑀳𑀼𑀢𑁆𑀯𑀸’’𑀢𑀺. 𑀯𑀤𑀦𑁆𑀢𑀺 𑀦𑀺𑀦𑁆𑀤𑀦𑀯𑀲𑁂𑀦 𑀓𑀣𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀳𑀺 𑀯𑀸𑀤𑁄, 𑀤𑁄𑀲𑁄. 𑀢𑀁 𑀆𑀭𑁄𑀧𑁂𑀢𑀼𑀓𑀸𑀫𑀸, 𑀧𑀢𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑀸 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺, 𑀇𑀥 𑀬𑀁 𑀯𑀢𑁆𑀣𑀼𑀁 𑀚𑀻𑀯𑀲𑀜𑁆𑀜𑀺𑀢𑀁, 𑀢𑀤𑁂𑀯 𑀲𑀭𑀻𑀭𑀲𑀜𑁆𑀜𑀺𑀢𑀦𑁆𑀢𑀺 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 ¶ 𑀯𑀸𑀤𑀁 𑀕𑀳𑁂𑀢𑁆𑀯𑀸 𑀯𑀤𑀦𑁆𑀢𑀺. 𑀭𑀽𑀧𑀜𑁆𑀘 𑀅𑀢𑁆𑀢𑀸𑀦𑀜𑁆𑀘 ¶ 𑀅𑀤𑁆𑀯𑀬𑀁 𑀓𑀢𑁆𑀯𑀸 𑀲𑀫𑀦𑀼𑀧𑀲𑁆𑀲𑀦𑀯𑀲𑁂𑀦 ‘‘𑀲𑀢𑁆𑀢𑁄’’𑀢𑀺 𑀯𑀸 𑀩𑀸𑀳𑀺𑀭𑀓𑀧𑀭𑀺𑀓𑀧𑁆𑀧𑀺𑀢𑀁 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺. 𑀪𑀺𑀚𑁆𑀚𑀢𑀻𑀢𑀺 𑀦𑀺𑀭𑀼𑀤𑀬𑀯𑀺𑀦𑀸𑀲𑀯𑀲𑁂𑀦 𑀯𑀺𑀦𑀲𑁆𑀲𑀢𑀺. 𑀢𑁂𑀦 𑀚𑀻𑀯𑀲𑀭𑀻𑀭𑀸𑀦𑀁 𑀅𑀦𑀜𑁆𑀜𑀢𑁆𑀢𑀸𑀦𑀼𑀚𑀸𑀦𑀦𑀢𑁄, 𑀲𑀭𑀻𑀭𑀲𑁆𑀲 𑀘 𑀪𑁂𑀤𑀤𑀲𑁆𑀲𑀦𑀢𑁄. 𑀦 𑀳𑁂𑀢𑁆𑀣 𑀬𑀣𑀸 𑀪𑁂𑀤𑀯𑀢𑀸 𑀲𑀭𑀻𑀭𑀢𑁄 𑀅𑀦𑀜𑁆𑀜𑀢𑁆𑀢𑀸 𑀅𑀤𑀺𑀝𑁆𑀞𑁄𑀧𑀺 𑀚𑀻𑀯𑀲𑁆𑀲 𑀪𑁂𑀤𑁄 𑀯𑀼𑀢𑁆𑀢𑁄, 𑀏𑀯𑀁 𑀅𑀤𑀺𑀝𑁆𑀞𑀪𑁂𑀤𑀢𑁄 𑀅𑀦𑀜𑁆𑀜𑀢𑁆𑀢𑀸 𑀲𑀭𑀻𑀭𑀲𑁆𑀲𑀸𑀧𑀺 𑀅𑀪𑁂𑀤𑁄𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁 𑀢𑀲𑁆𑀲 𑀪𑁂𑀤𑀲𑁆𑀲 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑀢𑁆𑀢𑀸, 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀘 𑀲𑀭𑀻𑀭𑀲𑁆𑀲 𑀅𑀪𑀸𑀯𑀢𑁄𑀢𑀺 𑀆𑀳 ‘‘𑀉𑀘𑁆𑀙𑁂𑀤𑀯𑀸𑀤𑁄 𑀳𑁄𑀢𑀻’’𑀢𑀺.

‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’𑀦𑁆𑀢𑀺 𑀅𑀜𑁆𑀜𑀤𑁂𑀯 𑀯𑀢𑁆𑀣𑀼𑀁 𑀚𑀻𑀯𑀲𑀜𑁆𑀜𑀺𑀢𑀁, 𑀅𑀜𑁆𑀜𑀁 𑀯𑀢𑁆𑀣𑀼𑀁 𑀲𑀭𑀻𑀭𑀲𑀜𑁆𑀜𑀺𑀢𑀦𑁆𑀢𑀺 ‘‘𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 ¶ 𑀯𑀸𑀤𑀁 𑀕𑀳𑁂𑀢𑁆𑀯𑀸 𑀯𑀤𑀦𑁆𑀢𑀺. 𑀭𑀽𑀧𑁂 𑀪𑁂𑀤𑀲𑁆𑀲 𑀤𑀺𑀝𑁆𑀞𑀢𑁆𑀢𑀸, 𑀅𑀢𑁆𑀢𑀦𑀺 𑀘 𑀢𑀤𑀪𑀸𑀯𑀢𑁄 𑀅𑀢𑁆𑀢𑀸 𑀦𑀺𑀘𑁆𑀘𑁄𑀢𑀺 𑀆𑀧𑀦𑁆𑀦𑀫𑁂𑀯𑀸𑀢𑀺 𑀆𑀳 ‘‘𑀢𑀼𑀫𑁆𑀳𑀸𑀓𑀁…𑀧𑁂… 𑀆𑀧𑀚𑁆𑀚𑀢𑀻’’𑀢𑀺.

𑁩𑁭𑁯-𑁩𑁮𑁦. 𑀢𑀬𑀺𑀤𑀁 𑀦𑁂𑀲𑀁 𑀯𑀜𑁆𑀛𑀸𑀲𑀼𑀢𑀲𑁆𑀲 𑀤𑀻𑀖𑀭𑀲𑁆𑀲𑀢𑀸𑀧𑀭𑀺𑀓𑀧𑁆𑀧𑀦𑀲𑀤𑀺𑀲𑀦𑁆𑀢𑀺 𑀓𑀢𑁆𑀯𑀸 𑀞𑀧𑀦𑀻𑀬𑁄𑀬𑀁 𑀧𑀜𑁆𑀳𑁄𑀢𑀺 𑀢𑀢𑁆𑀣 𑀭𑀸𑀚𑀦𑀺𑀫𑀻𑀮𑀦𑀁 𑀓𑀢𑁆𑀯𑀸 𑀲𑀢𑁆𑀣𑀸 𑀉𑀧𑀭𑀺 𑀦𑁂𑀲𑀁 ‘‘𑀢𑁂𑀦 𑀳𑀸𑀯𑀼𑀲𑁄 𑀲𑀼𑀡𑀸𑀣𑀸’’𑀢𑀺𑀆𑀤𑀺𑀦𑀸 𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀻𑀢𑀺 𑀆𑀳 ‘‘𑀅𑀣 𑀪𑀕𑀯𑀸’’𑀢𑀺𑀆𑀤𑀺. 𑀢𑀲𑁆𑀲𑀸 𑀬𑁂𑀯𑀸𑀢𑀺 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀤𑀸𑀬.

𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀲𑁆𑀲𑀸𑀢𑀺 𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑀲𑁆𑀲 ‘‘𑀏𑀯𑀫𑀳𑀁 𑀇𑀢𑁄 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀲𑁆𑀲𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑀲𑁆𑀲 𑀢𑀤𑀦𑀼𑀭𑀽𑀧𑀜𑁆𑀘 𑀲𑀻𑀮𑀁 𑀧𑀽𑀭𑁂𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑁂𑀦 𑀲𑀫𑀸𑀳𑀺𑀢𑀘𑀺𑀢𑁆𑀢𑀲𑁆𑀲. 𑀏𑀢𑀁 𑀯𑀢𑁆𑀢𑀼𑀦𑁆𑀢𑀺 𑀏𑀢𑀁 𑀓𑀺𑀮𑁂𑀲𑀯𑀝𑁆𑀝𑀧𑀭𑀺𑀩𑀼𑀤𑁆𑀥𑀺𑀤𑀻𑀧𑀦𑀁 ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺𑀆𑀤𑀺𑀓𑀁 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀦𑀺𑀲𑁆𑀲𑀺𑀢𑀁 𑀯𑀘𑀦𑀁 𑀯𑀢𑁆𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑁄 𑀦 𑀳𑁄𑀢𑀻𑀢𑀺 𑀥𑀫𑁆𑀫𑁂𑀲𑀼 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀦 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀆𑀲𑀧𑁆𑀧𑀦𑀧𑀭𑀺𑀲𑀧𑁆𑀧𑀦𑀯𑀲𑁂𑀦 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.

𑀏𑀢𑀫𑁂𑀯𑀁 𑀚𑀸𑀦𑀸𑀫𑀻𑀢𑀺 𑀬𑁂𑀦 𑀲𑁄 𑀪𑀺𑀓𑁆𑀔𑀼 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀏𑀢𑀁 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀁 𑀘𑀺𑀢𑁆𑀢𑀦𑁆𑀢𑀺 𑀏𑀯𑀁 𑀚𑀸𑀦𑀸𑀫𑀺. 𑀦𑁄 𑀘 𑀏𑀯𑀁 𑀯𑀤𑀸𑀫𑀻𑀢𑀺 𑀬𑀣𑀸 𑀤𑀺𑀝𑁆𑀞𑀺𑀕𑀢𑀺𑀓𑀸 𑀢𑀁 𑀥𑀫𑁆𑀫𑀚𑀸𑀢𑀁 𑀲𑀦𑀺𑀲𑁆𑀲𑀬𑀁 𑀅𑀪𑁂𑀤𑀢𑁄 𑀕𑀡𑁆𑀳𑀦𑁆𑀢𑀸 ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺 𑀯𑀸 𑀢𑀤𑀼𑀪𑀬𑀁 𑀪𑁂𑀤𑀢𑁄 𑀕𑀡𑁆𑀳𑀦𑁆𑀢𑀸 ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’𑀦𑁆𑀢𑀺 𑀯𑀸 𑀅𑀢𑁆𑀢𑀦𑁄 𑀫𑀺𑀘𑁆𑀙𑀸𑀕𑀸𑀳𑀁 𑀧𑀯𑁂𑀤𑁂𑀦𑁆𑀢𑀺, 𑀅𑀳𑀁 𑀧𑀦 𑀦 𑀏𑀯𑀁 𑀯𑀤𑀸𑀫𑀺 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀲𑀼𑀧𑀭𑀺𑀜𑁆𑀜𑀸𑀢𑀢𑁆𑀢𑀸, 𑀢𑁂𑀦𑀸𑀳 ‘‘𑀅𑀣 𑀔𑁄’’𑀢𑀺𑀆𑀤𑀺 ¶ . 𑀩𑀸𑀳𑀺𑀭𑀓𑀸 𑀬𑁂𑀪𑀼𑀬𑁆𑀬𑁂𑀦 𑀓𑀲𑀺𑀡𑀚𑁆𑀛𑀸𑀦𑀸𑀦𑀺 ¶ 𑀏𑀯 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 𑀆𑀳 ‘‘𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀪𑀸𑀯𑀦𑁆𑀢𑁂𑀲𑁆𑀲𑀸’’𑀢𑀺. 𑀬𑀲𑁆𑀫𑀸 𑀪𑀸𑀯𑀦𑀸𑀦𑀼𑀪𑀸𑀯𑁂𑀦 𑀛𑀸𑀦𑀸𑀥𑀺𑀕𑀫𑁄, 𑀪𑀸𑀯𑀦𑀸 𑀘 𑀧𑀣𑀯𑀻𑀓𑀲𑀺𑀡𑀸𑀤𑀺𑀲𑀜𑁆𑀚𑀸𑀦𑀦𑀫𑀼𑀔𑁂𑀦 𑀳𑁄𑀢𑀻𑀢𑀺 𑀲𑀜𑁆𑀜𑀸𑀲𑀻𑀲𑁂𑀦 ¶ 𑀦𑀺𑀤𑁆𑀤𑀺𑀲𑀻𑀬𑀢𑀺, 𑀢𑀲𑁆𑀫𑀸 𑀆𑀳 ‘‘𑀲𑀜𑁆𑀜𑀸𑀩𑀮𑁂𑀦 𑀉𑀧𑁆𑀧𑀦𑁆𑀦’’𑀦𑁆𑀢𑀺. 𑀢𑁂𑀦𑀸𑀳 𑁋 ‘‘𑀧𑀣𑀯𑀻𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺𑀆𑀤𑀺. ‘‘𑀦 𑀓𑀮𑁆𑀮𑀁 𑀢𑀲𑁆𑀲𑁂𑀢’’𑀦𑁆𑀢𑀺 𑀇𑀤𑀁 𑀬𑀲𑁆𑀫𑀸 𑀪𑀕𑀯𑀢𑀸 𑀢𑀢𑁆𑀣 𑀢𑀢𑁆𑀣 ‘‘𑀅𑀣 𑀘 𑀧𑀦𑀸𑀳𑀁 𑀦 𑀯𑀤𑀸𑀫𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦 𑀯𑀢𑁆𑀢𑀩𑁆𑀩𑀁 𑀓𑀺𑀭𑁂𑀢𑀁 𑀓𑁂𑀯𑀮𑀺𑀦𑀸 𑀉𑀢𑁆𑀢𑀫𑀧𑀼𑀭𑀺𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳, 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀜𑁆𑀜𑀫𑀸𑀦𑀸 𑀯𑀤𑀦𑁆𑀢𑀻’’𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀚𑀸𑀮𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.

𑁮. 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑀅𑀘𑁂𑀮𑀓𑀲𑁆𑀲𑀧𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁮𑁧. 𑀬𑀲𑁆𑀫𑀺𑀁 ¶ ¶ ¶ 𑀭𑀝𑁆𑀞𑁂 𑀢𑀁 𑀦𑀕𑀭𑀁, 𑀢𑀲𑁆𑀲 𑀭𑀝𑁆𑀞𑀲𑁆𑀲𑀧𑀺 𑀬𑀲𑁆𑀫𑀺𑀁 𑀦𑀕𑀭𑁂 𑀢𑀤𑀸 𑀪𑀕𑀯𑀸 𑀯𑀺𑀳𑀸𑀲𑀺, 𑀢𑀲𑁆𑀲 𑀦𑀕𑀭𑀲𑁆𑀲𑀧𑀺 𑀏𑀢𑀤𑁂𑀯 𑀦𑀸𑀫𑀁, 𑀢𑀲𑁆𑀫𑀸 𑀉𑀭𑀼𑀜𑁆𑀜𑀸𑀬𑀦𑁆𑀢𑀺 𑀉𑀭𑀼𑀜𑁆𑀜𑀸𑀚𑀦𑀧𑀤𑁂 𑀉𑀭𑀼𑀜𑁆𑀜𑀸𑀲𑀗𑁆𑀔𑀸𑀢𑁂 𑀦𑀕𑀭𑁂𑀢𑀺 𑀅𑀢𑁆𑀣𑁄. 𑀭𑀫𑀡𑀻𑀬𑁄𑀢𑀺 𑀫𑀦𑁄𑀳𑀭𑀪𑀽𑀫𑀺𑀪𑀸𑀕𑀢𑀸𑀬 𑀙𑀸𑀬𑀽𑀤𑀓𑀲𑀫𑁆𑀧𑀢𑁆𑀢𑀺𑀬𑀸, 𑀚𑀦𑀯𑀺𑀯𑀺𑀢𑁆𑀢𑀢𑀸𑀬 𑀘 𑀫𑀦𑁄𑀭𑀫𑁄. 𑀦𑀸𑀫𑀦𑁆𑀢𑀺 𑀕𑁄𑀢𑁆𑀢𑀦𑀸𑀫𑀁. 𑀢𑀧𑀦𑀁 𑀲𑀦𑁆𑀢𑀧𑀦𑀁 𑀓𑀸𑀬𑀲𑁆𑀲 𑀔𑁂𑀤𑀦𑀁 𑀢𑀧𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀢𑀧𑀲𑁆𑀲𑀻, 𑀢𑀁 𑀢𑀧𑀲𑁆𑀲𑀺𑀁. 𑀬𑀲𑁆𑀫𑀸 𑀢𑀣𑀸𑀪𑀽𑀢𑁄 𑀢𑀧𑀁 𑀦𑀺𑀲𑁆𑀲𑀺𑀢𑁄, 𑀢𑀧𑁄 𑀯𑀸 𑀢𑀁 𑀦𑀺𑀲𑁆𑀲𑀺𑀢𑁄, 𑀢𑀲𑁆𑀫𑀸 𑀆𑀳 ‘‘𑀢𑀧𑀦𑀺𑀲𑁆𑀲𑀺𑀢𑀓’’𑀦𑁆𑀢𑀺. 𑀮𑀽𑀔𑀁 𑀯𑀸 𑀨𑀭𑀼𑀲𑀁 𑀲𑀸𑀥𑀼𑀲𑀫𑁆𑀫𑀢𑀸𑀘𑀸𑀭𑀯𑀺𑀭𑀳𑀢𑁄 𑀦𑀧𑀲𑀸𑀤𑀦𑀻𑀬𑀁 𑀆𑀚𑀻𑀯𑀢𑀺 𑀯𑀢𑁆𑀢𑀢𑀻𑀢𑀺 𑀮𑀽𑀔𑀸𑀚𑀻𑀯𑀻, 𑀢𑀁 𑀮𑀽𑀔𑀸𑀚𑀻𑀯𑀺𑀁. 𑀫𑀼𑀢𑁆𑀢𑀸𑀘𑀸𑀭𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀭𑀢𑁄 𑀧𑀸𑀴𑀺𑀬𑀁 (𑀤𑀻. 𑀦𑀺. 𑁧.𑁩𑁯𑁭) 𑀆𑀕𑀢𑀸 𑀳𑀢𑁆𑀣𑀸𑀧𑀮𑁂𑀔𑀦𑀸𑀤𑀬𑁄 𑀲𑀗𑁆𑀕𑀳𑀺𑀢𑀸. 𑀉𑀧𑁆𑀧𑀡𑁆𑀟𑁂𑀢𑀻𑀢𑀺 𑀉𑀳𑀲𑀦𑀯𑀲𑁂𑀦 𑀧𑀭𑀺𑀪𑀸𑀲𑀢𑀺. 𑀉𑀧𑀯𑀤𑀢𑀻𑀢𑀺 𑀅𑀯𑀜𑁆𑀜𑀸𑀧𑀼𑀩𑁆𑀩𑀓𑀁 𑀅𑀧𑀯𑀤𑀢𑀺, 𑀢𑁂𑀦𑀸𑀳 ‘‘𑀳𑀻𑀴𑁂𑀢𑀺 𑀯𑀫𑁆𑀪𑁂𑀢𑀻’’𑀢𑀺. 𑀥𑀫𑁆𑀫𑀲𑁆𑀲 𑀘 𑀅𑀦𑀼𑀥𑀫𑁆𑀫𑀁𑀢𑀺 𑀏𑀢𑁆𑀣 𑀥𑀫𑁆𑀫𑁄 𑀦𑀸𑀫 𑀳𑁂𑀢𑀼 ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁭𑁨𑁦) 𑀯𑀺𑀬𑀸𑀢𑀺 𑀆𑀳 ‘‘𑀓𑀸𑀭𑀡𑀲𑁆𑀲 𑀅𑀦𑀼𑀓𑀸𑀭𑀡’’𑀦𑁆𑀢𑀺. 𑀓𑀸𑀭𑀡𑀦𑁆𑀢𑀺 𑀘𑁂𑀢𑁆𑀣 𑀢𑀣𑀸𑀧𑀯𑀢𑁆𑀢𑀲𑁆𑀲 𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄 𑀢𑀲𑁆𑀲 𑀧𑀯𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄. 𑀅𑀢𑁆𑀣𑀧𑁆𑀧𑀬𑀼𑀢𑁆𑀢𑁄 𑀳𑀺 𑀲𑀤𑁆𑀤𑀧𑁆𑀧𑀬𑁄𑀕𑁄. 𑀅𑀦𑀼𑀓𑀸𑀭𑀡𑀦𑁆𑀢𑀺 𑀘 𑀲𑁄 𑀏𑀯 𑀧𑀭𑁂𑀳𑀺 𑀢𑀣𑀸 𑀯𑀼𑀘𑁆𑀘𑀫𑀸𑀦𑁄. 𑀧𑀭𑁂𑀳𑀻𑀢𑀺 ¶ ‘‘𑀬𑁂 𑀢𑁂’’𑀢𑀺 𑀯𑀼𑀢𑁆𑀢𑀲𑀢𑁆𑀢𑁂𑀳𑀺 𑀧𑀭𑁂𑀳𑀺. 𑀯𑀼𑀢𑁆𑀢𑀓𑀸𑀭𑀡𑁂𑀦𑀸𑀢𑀺 𑀬𑀣𑀸 𑀢𑁂𑀳𑀺 𑀯𑀼𑀢𑁆𑀢𑀁, 𑀢𑀣𑀸 𑀘𑁂 𑀢𑀼𑀫𑁆𑀳𑁂𑀳𑀺 𑀦 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 𑀢𑁂𑀳𑀺 𑀯𑀼𑀢𑁆𑀢𑀓𑀸𑀭𑀡𑁂𑀦 𑀲𑀓𑀸𑀭𑀡𑁄 𑀳𑀼𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀯𑀸𑀤𑁄 𑀯𑀸 𑀢𑀢𑁄 𑀧𑀭𑀁 𑀢𑀲𑁆𑀲 𑀅𑀦𑀼𑀯𑀸𑀤𑁄 𑀓𑁄𑀘𑀺 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀢𑀩𑁆𑀩𑀁 𑀞𑀸𑀦𑀁 𑀓𑀸𑀭𑀡𑀁 𑀦𑀸𑀕𑀘𑁆𑀙𑁂𑀬𑁆𑀬, 𑀓𑀺𑀫𑁂𑀯𑀁 𑀦𑀸𑀕𑀘𑁆𑀙𑀢𑀻𑀢𑀺 𑀬𑁄𑀚𑀦𑀸. ‘‘𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑁂𑀢𑀺.

𑁩𑁮𑁨. 𑀇𑀤𑀸𑀦𑀺 𑀬𑀁 𑀯𑀺𑀪𑀚𑁆𑀚𑀯𑀸𑀤𑀁 𑀲𑀦𑁆𑀥𑀸𑀬 𑀪𑀕𑀯𑀢𑀸 ‘‘𑀦 𑀫𑁂 𑀢𑁂 𑀯𑀼𑀢𑁆𑀢𑀯𑀸𑀤𑀺𑀦𑁄’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀢𑁆𑀯𑀸 𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀇𑀥𑀸𑀳𑀁 𑀓𑀲𑁆𑀲𑀧𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀥𑁂𑀓𑀘𑁆𑀘𑁄’’𑀢𑀺𑀆𑀤𑀺𑀫𑀸𑀳 ¶ . 𑀪𑀕𑀯𑀸 ¶ 𑀳𑀺 𑀦𑀺𑀭𑀢𑁆𑀣𑀓𑀁 𑀅𑀦𑀼𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑀁 𑀓𑀸𑀬𑀓𑀺𑀮𑀫𑀣𑀁 ‘‘𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀤𑀼𑀓𑁆𑀔𑁄 𑀅𑀦𑀭𑀺𑀬𑁄 𑀅𑀦𑀢𑁆𑀣𑀲𑀁𑀳𑀺𑀢𑁄’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁩.𑁧𑁦𑁮𑁧; 𑀫𑀳𑀸𑀯. 𑁧𑁩; 𑀧𑀝𑀺. 𑀫. 𑁨.𑁩𑁦) 𑀕𑀭𑀳𑀢𑀺. 𑀲𑀸𑀢𑁆𑀣𑀓𑀁 𑀧𑀦 𑀉𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑀁 ‘‘𑀆𑀭𑀜𑁆𑀜𑀺𑀓𑁄 𑀳𑁄𑀢𑀺, 𑀧𑀁𑀲𑀼𑀓𑀽𑀮𑀺𑀓𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀯𑀡𑁆𑀡𑁂𑀢𑀺. 𑀅𑀧𑁆𑀧𑀧𑀼𑀜𑁆𑀜𑀢𑀸𑀬𑀸𑀢𑀺 𑀅𑀧𑀼𑀜𑁆𑀜𑀢𑀸𑀬. 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀪𑀸𑀯𑀢𑁄 𑀓𑀫𑁆𑀫𑀨𑀮𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁭𑁧; 𑀫. 𑀦𑀺. 𑁧.𑁪𑁪𑁫; 𑁨.𑁯𑁪, 𑁯𑁫, 𑁨𑁨𑁫; 𑁩.𑁯𑁧, 𑁧𑁧𑁫; 𑀲𑀁. 𑀦𑀺. 𑁩.𑁨𑁧𑁦; 𑀥. 𑀲. 𑁧𑁨𑁨𑁧; 𑀯𑀺𑀪. 𑁯𑁩𑁮) 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀼𑀭𑀓𑁆𑀔𑀢𑁆𑀯𑀸 𑀢𑀣𑀸 𑀢𑀣𑀸 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸. 𑀅𑀦𑁂𑀲𑀦𑀯𑀲𑁂𑀦𑀸𑀢𑀺 𑀓𑁄𑀳𑀜𑁆𑀜𑁂 𑀞𑀢𑁆𑀯𑀸 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀺𑀘𑁆𑀙𑀸𑀬 𑀫𑀺𑀘𑁆𑀙𑀸𑀚𑀻𑀯𑀯𑀲𑁂𑀦. 𑀇𑀫𑁂 𑀤𑁆𑀯𑁂𑀢𑀺 ‘‘𑀅𑀧𑁆𑀧𑀧𑀼𑀜𑁆𑀜𑁄 𑀧𑀼𑀜𑁆𑀜𑀯𑀸’’𑀢𑀺 𑀘 𑀯𑀼𑀢𑁆𑀢𑁂 𑀤𑀼𑀘𑁆𑀘𑀭𑀺𑀢𑀓𑀸𑀭𑀺𑀦𑁄 𑀤𑁆𑀯𑁂 𑀧𑀼𑀕𑁆𑀕𑀮𑁂 𑀲𑀦𑁆𑀥𑀸𑀬.

‘‘𑀇𑀫𑁂 ¶ 𑀤𑁆𑀯𑁂 𑀲𑀦𑁆𑀥𑀸𑀬𑀸’’𑀢𑀺 𑀏𑀢𑁆𑀣 𑀧𑀦 𑀤𑀼𑀢𑀺𑀬𑀦𑀬𑁂 ‘‘𑀅𑀧𑁆𑀧𑀧𑀼𑀜𑁆𑀜𑁄, 𑀧𑀼𑀜𑁆𑀜𑀯𑀸’’𑀢𑀺 𑀘 𑀯𑀼𑀢𑁆𑀢𑁂 𑀲𑀼𑀘𑀭𑀺𑀢𑀓𑀸𑀭𑀺𑀦𑁄𑀢𑀺 𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀓𑀫𑁆𑀫𑀓𑀺𑀭𑀺𑀬𑀯𑀸𑀤𑀺𑀦𑁄 𑀳𑀺 𑀇𑀫𑁂 𑀤𑁆𑀯𑁂 𑀧𑀼𑀕𑁆𑀕𑀮𑀸. 𑀇𑀢𑀺 𑀧𑀞𑀫𑀤𑀼𑀢𑀺𑀬𑀦𑀬𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀢𑀺𑀬𑀘𑀢𑀼𑀢𑁆𑀣𑀦𑀬𑁂𑀲𑀼 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀩𑀸𑀳𑀺𑀭𑀓𑀸𑀘𑀸𑀭𑀬𑀼𑀢𑁆𑀢𑁄 𑀢𑀺𑀢𑁆𑀣𑀺𑀬𑀸𑀘𑀸𑀭𑀬𑀼𑀢𑁆𑀢𑁄, 𑀦 𑀯𑀺𑀫𑀼𑀢𑁆𑀢𑀸𑀘𑀸𑀭𑁄. 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑁆𑀯𑀸𑀢𑀺 𑀅𑀥𑀫𑁆𑀫𑀺𑀓𑁂𑀦 𑀲𑀼𑀔𑁂𑀦 𑀅𑀢𑁆𑀢𑀸𑀦𑀁 𑀲𑀼𑀔𑁂𑀢𑁆𑀯𑀸, 𑀢𑁂𑀦𑀸𑀳 ‘‘𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸’’𑀢𑀺. ‘‘𑀦 𑀤𑀸𑀦𑀺 𑀫𑀬𑀸 𑀲𑀤𑀺𑀲𑁄 𑀅𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀢𑀺𑀲𑁆𑀲𑀦𑁆𑀦𑀁 𑀫𑀜𑁆𑀜𑀦𑀸𑀦𑀁 𑀯𑀲𑁂𑀦 𑀤𑀼𑀘𑁆𑀘𑀭𑀺𑀢𑀧𑀽𑀭𑀡𑀫𑀸𑀳. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦𑀸𑀢𑀺 ‘‘𑀦𑀢𑁆𑀣𑀺 𑀓𑀸𑀫𑁂𑀲𑀼 𑀤𑁄𑀲𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦. 𑀧𑀭𑀺𑀩𑁆𑀩𑀸𑀚𑀺𑀓𑀸𑀬𑀸𑀢𑀺 𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑀸𑀬 𑀢𑀸𑀧𑀲𑀤𑀸𑀭𑀺𑀓𑀸𑀬. 𑀤𑀳𑀭𑀸𑀬𑀸𑀢𑀺 𑀢𑀭𑀼𑀡𑀸𑀬. 𑀫𑀼𑀤𑀼𑀓𑀸𑀬𑀸𑀢𑀺 𑀲𑀼𑀔𑀼𑀫𑀸𑀮𑀸𑀬. 𑀮𑁄𑀫𑀲𑀸𑀬𑀸𑀢𑀺 𑀢𑀦𑀼𑀢𑀫𑁆𑀩𑀮𑁄𑀫𑀢𑀸𑀬 𑀅𑀧𑁆𑀧𑀮𑁄𑀫𑀸𑀬. 𑀓𑀸𑀫𑁂𑀲𑀽𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼. 𑀧𑀸𑀢𑀩𑁆𑀬𑀢𑀦𑁆𑀢𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁, 𑀧𑀸𑀢𑀩𑁆𑀬𑀢𑀦𑁆𑀢𑀺 𑀯𑀸 𑀧𑀭𑀺𑀪𑀼𑀜𑁆𑀚𑀦𑀓𑀢𑀁. 𑀆𑀧𑀚𑁆𑀚𑀦𑁆𑀢𑁄𑀢𑀺 𑀉𑀧𑀕𑀘𑁆𑀙𑀦𑁆𑀢𑁄. 𑀧𑀭𑀺𑀪𑁄𑀕𑀢𑁆𑀣𑁄 𑀳𑀺 𑀅𑀬𑀁 𑀧𑀸-𑀲𑀤𑁆𑀤𑁄, 𑀓𑀢𑁆𑀢𑀼𑀲𑀸𑀥𑀦𑁄 𑀘 𑀢𑀩𑁆𑀩-𑀲𑀤𑁆𑀤𑁄, 𑀬𑀣𑀸𑀭𑀼𑀘𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀓𑀺𑀮𑁂𑀲𑀓𑀸𑀫𑁄𑀧𑀺 𑀳𑀺 𑀅𑀲𑁆𑀲𑀸𑀤𑀺𑀬𑀫𑀸𑀦𑁄 𑀯𑀢𑁆𑀣𑀼𑀓𑀸𑀫𑀦𑁆𑀢𑁄𑀕𑀥𑁄𑀬𑁂𑀯.

𑀇𑀤𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀅𑀢𑁆𑀣𑀧𑁆𑀧𑀪𑁂𑀤𑀁 𑀯𑀺𑀪𑀚𑁆𑀚𑀦𑀁. 𑀢𑀺𑀢𑁆𑀣𑀺𑀬𑀯𑀲𑁂𑀦 𑀆𑀕𑀢𑀁 𑀅𑀝𑁆𑀞𑀓𑀣𑀸𑀬𑀁 𑀢𑀣𑀸 𑀯𑀺𑀪𑀢𑁆𑀢𑀢𑁆𑀢𑀸. 𑀲𑀸𑀲𑀦𑁂𑀧𑀻𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂𑀧𑀺.

𑀅𑀭𑀳𑀢𑁆𑀢𑀁 ¶ 𑀯𑀸 𑀅𑀢𑁆𑀢𑀦𑀺 𑀅𑀲𑀦𑁆𑀢𑀁 ‘‘𑀅𑀢𑁆𑀣𑀻’’𑀢𑀺 𑀯𑀺𑀧𑁆𑀧𑀝𑀺𑀚𑀸𑀦𑀺𑀢𑁆𑀯𑀸. 𑀲𑀸𑀫𑀦𑁆𑀢𑀚𑀧𑁆𑀧𑀦𑀁, 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀁, 𑀇𑀭𑀺𑀬𑀸𑀧𑀣𑀦𑀺𑀲𑁆𑀲𑀺𑀢𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀯𑀸 𑀓𑀼𑀳𑀦𑀯𑀢𑁆𑀣𑀽𑀦𑀺. 𑀢𑀸𑀤𑀺𑀲𑁄 ¶ 𑀯𑀸𑀢𑀺 𑀥𑀼𑀢𑀗𑁆𑀕- (𑀫𑀺. 𑀧. 𑁪.𑁨; 𑀯𑀺𑀲𑀼𑀤𑁆𑀥𑀺. 𑁧.𑁨𑁨) ¶ 𑀲𑀫𑀸𑀤𑀸𑀦𑀯𑀲𑁂𑀦 𑀮𑀽𑀔𑀸𑀚𑀻𑀯𑀻 𑀏𑀯. 𑀤𑀼𑀮𑁆𑀮𑀪𑀲𑀼𑀔𑁄 𑀪𑀯𑀺𑀲𑁆𑀲𑀸𑀫𑀺 𑀤𑀼𑀕𑁆𑀕𑀢𑀻𑀲𑀼 𑀉𑀧𑀧𑀢𑁆𑀢𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁮𑁩. 𑀅𑀲𑀼𑀓𑀝𑁆𑀞𑀸𑀦𑀢𑁄𑀢𑀺 𑀅𑀲𑀼𑀓𑀪𑀯𑀢𑁄. 𑀆𑀕𑀢𑀸𑀢𑀺 𑀦𑀺𑀩𑁆𑀩𑀢𑁆𑀢𑀦𑀯𑀲𑁂𑀦 𑀇𑀥𑀸𑀕𑀢𑀸. 𑀇𑀤𑀸𑀦𑀺 𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀦𑁆𑀢𑀺 𑀆𑀬𑀢𑀺𑀁 𑀦𑀺𑀩𑁆𑀩𑀢𑁆𑀢𑀦𑀝𑁆𑀞𑀸𑀦𑀁. 𑀧𑀼𑀦 𑀉𑀧𑀧𑀢𑁆𑀢𑀺𑀦𑁆𑀢𑀺 𑀆𑀬𑀢𑀺𑀁 𑀅𑀦𑀦𑁆𑀢𑀭𑀪𑀯𑀢𑁄 𑀢𑀢𑀺𑀬𑀁 𑀉𑀧𑀧𑀢𑁆𑀢𑀺𑀁, 𑀧𑀼𑀦 𑀉𑀧𑀧𑀢𑁆𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀦𑀺𑀩𑁆𑀩𑀢𑁆𑀢𑀺. 𑀓𑁂𑀦 𑀓𑀸𑀭𑀡𑁂𑀦𑀸𑀢𑀺 𑀬𑀣𑀸𑀪𑀽𑀢𑀁 𑀅𑀚𑀸𑀦𑀦𑁆𑀢𑁄 𑀳𑀺 𑀇𑀘𑁆𑀙𑀸𑀤𑁄𑀲𑀯𑀲𑁂𑀦 𑀬𑀁 𑀓𑀺𑀜𑁆𑀘𑀺 𑀕𑀭𑀳𑁂𑀬𑁆𑀬, 𑀅𑀳𑀁 𑀧𑀦 𑀬𑀣𑀸𑀪𑀽𑀢𑀁 𑀚𑀸𑀦𑀦𑁆𑀢𑁄 𑀲𑀩𑁆𑀩𑀁 𑀢𑀁 𑀓𑁂𑀦 𑀓𑀸𑀭𑀡𑁂𑀦 𑀕𑀭𑀳𑀺𑀲𑁆𑀲𑀸𑀫𑀺, 𑀢𑀁 𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑁂𑀦𑀸𑀳 ‘‘𑀕𑀭𑀳𑀺𑀢𑀩𑁆𑀩𑀫𑁂𑀯𑀸’’𑀢𑀺𑀆𑀤𑀺. 𑀢𑀫𑀢𑁆𑀣𑀦𑁆𑀢𑀺 𑀕𑀭𑀳𑀺𑀢𑀩𑁆𑀩𑀲𑁆𑀲𑁂𑀯 𑀕𑀭𑀳𑀡𑀁, 𑀧𑀲𑀁𑀲𑀺𑀢𑀩𑁆𑀩𑀲𑁆𑀲 𑀘 𑀧𑀲𑀁𑀲𑀦𑀁.

𑀦 𑀓𑁄𑀘𑀺 ‘‘𑀦 𑀲𑀸𑀥𑀽’’𑀢𑀺 𑀯𑀤𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑁆𑀲, 𑀲𑀫𑁆𑀧𑀭𑀸𑀬𑀺𑀓𑀲𑁆𑀲 𑀘 𑀅𑀢𑁆𑀣𑀲𑁆𑀲 𑀲𑀸𑀥𑀦𑀯𑀲𑁂𑀦𑁂𑀯 𑀧𑀯𑀢𑁆𑀢𑀺𑀬𑀸 𑀪𑀤𑁆𑀤𑀓𑀢𑁆𑀢𑀸. 𑀧𑀜𑁆𑀘𑀯𑀺𑀥𑀁 𑀯𑁂𑀭𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀜𑁆𑀘𑀯𑀺𑀥𑀁 𑀯𑁂𑀭𑀁. 𑀢𑀜𑁆𑀳𑀺 𑀧𑀜𑁆𑀘𑀯𑀺𑀥𑀲𑁆𑀲 𑀲𑀻𑀮𑀲𑁆𑀲 𑀧𑀝𑀺𑀲𑀢𑁆𑀢𑀼𑀪𑀸𑀯𑀢𑁄, 𑀲𑀢𑁆𑀢𑀸𑀦𑀁 𑀯𑁂𑀭𑀳𑁂𑀢𑀼𑀢𑀸𑀬 𑀘 ‘‘𑀯𑁂𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁄 𑀏𑀯 𑀢𑀁 𑀦 𑀓𑁄𑀘𑀺 ‘‘𑀲𑀸𑀥𑀽’’𑀢𑀺 𑀯𑀤𑀢𑀺, 𑀢𑀣𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀢𑁆𑀣𑀸𑀦𑀁 𑀅𑀲𑀸𑀥𑀦𑀢𑁄, 𑀲𑀢𑁆𑀢𑀸𑀦𑀁 𑀲𑀸𑀥𑀼𑀪𑀸𑀯𑀲𑁆𑀲 𑀘 𑀤𑀽𑀲𑀦𑀢𑁄. 𑀦 𑀦𑀺𑀭𑀼𑀦𑁆𑀥𑀺𑀢𑀩𑁆𑀩𑀦𑁆𑀢𑀺 𑀭𑀽𑀧𑀕𑁆𑀕𑀳𑀡𑁂 𑀦 𑀦𑀺𑀯𑀸𑀭𑁂𑀢𑀩𑁆𑀩𑀁. 𑀤𑀲𑁆𑀲𑀦𑀻𑀬𑀤𑀲𑁆𑀲𑀦𑀢𑁆𑀣𑁄 𑀳𑀺 𑀘𑀓𑁆𑀔𑀼𑀧𑀝𑀺𑀮𑀸𑀪𑁄𑀢𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄. 𑀬𑀤𑀕𑁆𑀕𑁂𑀦 𑀢𑁂𑀲𑀁 𑀧𑀜𑁆𑀘𑀤𑁆𑀯𑀸𑀭𑁂 𑀅𑀲𑀁𑀯𑀭𑁄 𑀲𑀸𑀥𑀼 ¶ , 𑀢𑀤𑀕𑁆𑀕𑁂𑀦 𑀢𑀢𑁆𑀣 𑀲𑀁𑀯𑀭𑁄 𑀦 𑀲𑀸𑀥𑀽𑀢𑀺 𑀆𑀳 ‘‘𑀧𑀼𑀦 𑀬𑀁 𑀢𑁂 𑀏𑀓𑀘𑁆𑀘𑀦𑁆𑀢𑀺 𑀧𑀜𑁆𑀘𑀤𑁆𑀯𑀸𑀭𑁂 𑀲𑀁𑀯𑀭’’𑀦𑁆𑀢𑀺.

𑀅𑀣 𑀯𑀸 𑀬𑀁 𑀢𑁂 𑀏𑀓𑀘𑁆𑀘𑀁 𑀯𑀤𑀦𑁆𑀢𑀺 ‘‘𑀲𑀸𑀥𑀽’’𑀢𑀺 𑀢𑁂 ‘‘𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀯𑀼𑀢𑁆𑀢𑀸 𑀢𑀺𑀢𑁆𑀣𑀺𑀬𑀸 𑀬𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀸𑀤𑀺𑀁 ‘‘𑀲𑀸𑀥𑀽’’𑀢𑀺 𑀯𑀤𑀦𑁆𑀢𑀺, 𑀫𑀬𑀁 𑀢𑀁 𑀦 ‘‘𑀲𑀸𑀥𑀽’’𑀢𑀺 𑀯𑀤𑀸𑀫. 𑀬𑀁 𑀢𑁂 𑀏𑀓𑀘𑁆𑀘𑀁 𑀯𑀤𑀦𑁆𑀢𑀺 ‘‘𑀦 𑀲𑀸𑀥𑀽’’𑀢𑀺 𑀬𑀁 𑀧𑀦 𑀢𑁂 𑀅𑀦𑀯𑀚𑁆𑀚𑀧𑀘𑁆𑀘𑀬𑀧𑀭𑀺𑀪𑁄𑀕𑀁, 𑀲𑀼𑀦𑀺𑀯𑀢𑁆𑀣𑀲𑀼𑀧𑀸𑀭𑀼𑀧𑀦𑀸𑀤𑀺𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀜𑁆𑀘 ‘‘𑀦 𑀲𑀸𑀥𑀽’’𑀢𑀺 𑀯𑀤𑀦𑁆𑀢𑀺, 𑀢𑀁 𑀫𑀬𑀁 ‘‘𑀲𑀸𑀥𑀽’’𑀢𑀺 𑀯𑀤𑀸𑀫𑀸𑀢𑀺 𑀏𑀯𑀁 𑀧𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 ¶ 𑀬𑀁 𑀧𑀭𑀯𑀸𑀤𑀫𑀽𑀮𑀓𑀁 𑀘𑀢𑀼𑀓𑁆𑀓𑀁 𑀤𑀲𑁆𑀲𑀺𑀢𑀁, 𑀢𑀤𑁂𑀯 𑀧𑀼𑀦 𑀲𑀓𑀯𑀸𑀤𑀫𑀽𑀮𑀓𑀁 𑀓𑀢𑁆𑀯𑀸 𑀤𑀲𑁆𑀲𑀺𑀢𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑁄 ‘‘𑀏𑀯’’𑀦𑁆𑀢𑀺𑀆𑀤𑀺𑀫𑀸𑀳. 𑀬𑀜𑁆𑀳𑀺 𑀓𑀺𑀜𑁆𑀘𑀺 𑀓𑁂𑀦𑀘𑀺 𑀲𑀫𑀸𑀦𑀁, 𑀢𑁂𑀦𑀧𑀺 𑀢𑀁 𑀲𑀫𑀸𑀦𑀫𑁂𑀯, 𑀢𑀣𑀸 𑀅𑀲𑀫𑀸𑀦𑀁 𑀧𑀻𑀢𑀺. 𑀲𑀫𑀸𑀦𑀸𑀲𑀫𑀸𑀦𑀢𑀦𑁆𑀢𑀺 𑀲𑀫𑀸𑀦𑀸𑀲𑀫𑀸𑀦𑀢𑀸𑀫𑀢𑁆𑀢𑀁. 𑀅𑀦𑀯𑀲𑁂𑀲𑀢𑁄 𑀳𑀺 𑀧𑀳𑀸𑀢𑀩𑁆𑀩𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀁 𑀲𑀓𑀯𑀸𑀤𑁂 𑀤𑀺𑀲𑁆𑀲𑀢𑀺, 𑀦 𑀧𑀭𑀯𑀸𑀤𑁂. 𑀢𑀣𑀸 𑀧𑀭𑀺𑀧𑀼𑀡𑁆𑀡𑀫𑁂𑀯 𑀘 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀸𑀤𑀦𑀁 𑀲𑀓𑀯𑀸𑀤𑁂, 𑀦 𑀧𑀭𑀯𑀸𑀤𑁂. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑁆𑀬𑀸𑀳’’𑀦𑁆𑀢𑀺𑀆𑀤𑀺.

𑀲𑀫𑀦𑀼𑀬𑀼𑀜𑁆𑀚𑀸𑀧𑀦𑀓𑀣𑀸𑀯𑀡𑁆𑀡𑀦𑀸

𑁩𑁮𑁫. 𑀮𑀤𑁆𑀥𑀺𑀁 ¶ 𑀧𑀼𑀘𑁆𑀙𑀦𑁆𑀢𑁄𑀢𑀺 ‘‘𑀓𑀺𑀁 𑀲𑀫𑀡𑁄 𑀕𑁄𑀢𑀫𑁄 𑀲𑀁𑀓𑀺𑀮𑁂𑀲𑀥𑀫𑁆𑀫𑁂 𑀅𑀦𑀯𑀲𑁂𑀲𑀁 𑀧𑀳𑀸𑀬 𑀯𑀢𑁆𑀢𑀢𑀺, 𑀉𑀤𑀸𑀳𑀼 𑀧𑀭𑁂 𑀕𑀡𑀸𑀘𑀭𑀺𑀬𑀸. 𑀏𑀢𑁆𑀣 𑀢𑀸𑀯 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀯𑀤𑀸’’𑀢𑀺 𑀮𑀤𑁆𑀥𑀺𑀁 𑀧𑀼𑀘𑁆𑀙𑀦𑁆𑀢𑁄. 𑀓𑀸𑀭𑀡𑀁 𑀧𑀼𑀘𑁆𑀙𑀦𑁆𑀢𑁄𑀢𑀺 ‘‘𑀲𑀫𑀡𑁄 𑀕𑁄𑀢𑀫𑁄 𑀲𑀁𑀓𑀺𑀮𑁂𑀲𑀥𑀫𑁆𑀫𑁂 𑀅𑀦𑀯𑀲𑁂𑀲𑀁 𑀧𑀳𑀸𑀬 𑀯𑀢𑁆𑀢𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀓𑁂𑀦 𑀓𑀸𑀭𑀡𑁂𑀦 𑀏𑀯𑀫𑀢𑁆𑀣𑀁 𑀕𑀸𑀳𑀬𑀸’’𑀢𑀺 𑀓𑀸𑀭𑀡𑀁 𑀧𑀼𑀘𑁆𑀙𑀦𑁆𑀢𑁄. 𑀉𑀪𑀬𑀁 𑀧𑀼𑀘𑁆𑀙𑀦𑁆𑀢𑁄𑀢𑀺 ‘‘𑀇𑀤𑀁 𑀦𑀸𑀫𑁂𑀢𑁆𑀣 𑀓𑀸𑀭𑀡’’𑀦𑁆𑀢𑀺 𑀓𑀸𑀭𑀡𑀁 𑀯𑀢𑁆𑀯𑀸 𑀧𑀝𑀺𑀜𑁆𑀜𑀸𑀢𑁂 𑀅𑀢𑁆𑀣𑁂 𑀲𑀸𑀥𑀺𑀬𑀫𑀸𑀦𑁂 𑀅𑀦𑁆𑀯𑀬𑀢𑁄, 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀓𑀸𑀭𑀡𑀁 𑀲𑀫𑀢𑁆𑀣𑁂𑀢𑀼𑀁 𑀲𑀤𑀺𑀲𑀸𑀲𑀤𑀺𑀲𑀪𑁂𑀤𑀁 𑀉𑀧𑀫𑁄𑀤𑀸𑀳𑀭𑀡𑀤𑁆𑀯𑀬𑀁 𑀧𑀼𑀘𑁆𑀙𑀦𑁆𑀢𑁄, 𑀉𑀪𑀬𑀁 𑀧𑀼𑀘𑁆𑀙𑀦𑁆𑀢𑁄 𑀓𑀸𑀭𑀡𑀲𑁆𑀲 𑀘 𑀢𑀺𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀬𑀸 𑀬𑀣𑀸𑀧𑀝𑀺𑀜𑁆𑀜𑀸𑀢𑁂 𑀅𑀢𑁆𑀣𑁂 𑀲𑀸𑀥𑀺𑀢𑁂 ¶ 𑀲𑀫𑁆𑀫𑀤𑁂𑀯 𑀅𑀦𑀼𑀧𑀘𑁆𑀙𑀸 𑀪𑀸𑀲𑀦𑁆𑀢𑁄 𑀦𑀺𑀕𑀫𑁂𑀦𑁆𑀢𑁄 𑀲𑀫𑀦𑀼𑀪𑀸𑀲𑀢𑀺 𑀦𑀸𑀫. 𑀉𑀧𑀲𑀁𑀳𑀭𑀺𑀢𑁆𑀯𑀸𑀢𑀺 𑀉𑀧𑀦𑁂𑀢𑁆𑀯𑀸. ‘‘𑀓𑀺𑀁 𑀢𑁂’’𑀢𑀺𑀆𑀤𑀺 𑀉𑀧𑀲𑀁𑀳𑀭𑀡𑀸𑀓𑀸𑀭𑀤𑀲𑁆𑀲𑀦𑀁. 𑀤𑀼𑀢𑀺𑀬𑀧𑀤𑁂𑀢𑀺 ‘‘𑀲𑀗𑁆𑀖𑁂𑀦 𑀯𑀸 𑀲𑀗𑁆𑀖’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂.

𑀢𑀫𑀢𑁆𑀣𑀦𑁆𑀢𑀺 𑀢𑀁 𑀧𑀳𑀸𑀢𑀩𑁆𑀩𑀥𑀫𑁆𑀫𑀸𑀦𑀁 𑀅𑀦𑀯𑀲𑁂𑀲𑀁 𑀧𑀳𑀸𑀬 𑀯𑀢𑁆𑀢𑀦𑀲𑀗𑁆𑀔𑀸𑀢𑀜𑁆𑀘 𑀲𑀫𑀸𑀤𑀸𑀢𑀩𑁆𑀩𑀥𑀫𑁆𑀫𑀸𑀦𑀁 𑀅𑀦𑀯𑀲𑁂𑀲𑀁 𑀲𑀫𑀸𑀤𑀸𑀬 𑀯𑀢𑁆𑀢𑀦𑀲𑀗𑁆𑀔𑀸𑀢𑀜𑁆𑀘 𑀅𑀢𑁆𑀣𑀁. 𑀬𑁄𑀚𑁂𑀢𑁆𑀯𑀸𑀢𑀺 𑀅𑀓𑀼𑀲𑀮𑀸𑀤𑀺𑀧𑀤𑁂𑀳𑀺 𑀬𑁄𑀚𑁂𑀢𑁆𑀯𑀸. 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦 𑀅𑀓𑀼𑀲𑀮𑀸 𑀘𑁂𑀯 𑀢𑀢𑁄𑀬𑁂𑀯 𑀅𑀓𑀼𑀲𑀮𑀸𑀢𑀺 𑀘 𑀲𑀗𑁆𑀔𑀁 𑀕𑀢𑀸𑀢𑀺 𑀲𑀗𑁆𑀔𑀸𑀢𑀸 𑀢𑀢𑁆𑀣 𑀧𑀼𑀭𑀺𑀫𑀧𑀤𑁂𑀦 𑀏𑀓𑀦𑁆𑀢𑀸𑀓𑀼𑀲𑀮𑁂 𑀯𑀤𑀢𑀺, 𑀤𑀼𑀢𑀺𑀬𑀧𑀤𑁂𑀦 𑀢𑀁𑀲𑀳𑀕𑀢𑁂, 𑀢𑀁𑀧𑀓𑁆𑀔𑀺𑀬𑁂 𑀘, 𑀢𑁂𑀦𑀸𑀳 ‘‘𑀓𑁄𑀝𑁆𑀞𑀸𑀲𑀁 𑀯𑀸 𑀓𑀢𑁆𑀯𑀸 𑀞𑀧𑀺𑀢𑀸’’𑀢𑀺, 𑀅𑀓𑀼𑀲𑀮𑀧𑀓𑁆𑀔𑀺𑀬𑀪𑀸𑀯𑁂𑀦 𑀯𑀯𑀢𑁆𑀣𑀸𑀧𑀺𑀢𑀸𑀢𑀺 𑀅𑀢𑁆𑀣𑁄. 𑀅𑀯𑀚𑁆𑀚𑀝𑁆𑀞𑁄 𑀤𑁄𑀲𑀝𑁆𑀞𑁄 𑀕𑀸𑀭𑀬𑁆𑀳𑀧𑀭𑀺𑀬𑀸𑀬𑀢𑁆𑀢𑀸𑀢𑀺 𑀆𑀳 ‘‘𑀲𑀸𑀯𑀚𑁆𑀚𑀸𑀢𑀺 𑀲𑀤𑁄𑀲𑀸’’𑀢𑀺. 𑀅𑀭𑀺𑀬𑀸 𑀦𑀸𑀫 𑀦𑀺𑀤𑁆𑀤𑁄𑀲𑀸, 𑀇𑀫𑁂 𑀧𑀦 𑀓𑀢𑁆𑀣𑀘𑀺𑀧𑀺 𑀦𑀺𑀤𑁆𑀤𑁄𑀲𑀸 𑀦 𑀳𑁄𑀦𑁆𑀢𑀻𑀢𑀺 𑀦𑀺𑀤𑁆𑀤𑁄𑀲𑀝𑁆𑀞𑁂𑀦 𑀅𑀭𑀺𑀬𑀸 𑀪𑀯𑀺𑀢𑀼𑀁 𑀦𑀸𑀮𑀁 𑀅𑀲𑀫𑀢𑁆𑀣𑀸.

𑁩𑁮𑁬-𑁩𑁯𑁨. 𑀬𑀦𑁆𑀢𑀺 ¶ 𑀓𑀸𑀭𑀡𑁂 𑀏𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀬𑁂𑀦 𑀯𑀺𑀜𑁆𑀜𑀽’’𑀢𑀺. 𑀬𑀁 𑀯𑀸 𑀧𑀦𑀸𑀢𑀺 ‘‘𑀬𑀁 𑀧𑀦 𑀓𑀺𑀜𑁆𑀘𑀻’’𑀢𑀺 𑀅𑀲𑀫𑁆𑀪𑀸𑀯𑀦𑀯𑀘𑀦𑀫𑁂𑀢𑀦𑁆𑀢𑀺 𑀆𑀳 ‘‘𑀬𑀁 𑀯𑀸 𑀢𑀁 𑀯𑀸 𑀅𑀧𑁆𑀧𑀫𑀢𑁆𑀢𑀓’’𑀦𑁆𑀢𑀺. 𑀕𑀡𑀸𑀘𑀭𑀺𑀬𑀸 𑀧𑀽𑀭𑀡𑀸𑀤𑀬𑁄. 𑀲𑀢𑁆𑀣𑀼𑀧𑁆𑀧𑀪𑀯𑀢𑁆𑀢𑀸 𑀲𑀗𑁆𑀖𑀲𑁆𑀲 𑀲𑀗𑁆𑀖𑀲𑀫𑁆𑀧𑀢𑁆𑀢𑀺𑀬𑀸𑀧𑀺 𑀲𑀢𑁆𑀣𑀼𑀲𑀫𑁆𑀧𑀢𑁆𑀢𑀺 𑀯𑀺𑀪𑀸𑀯𑀻𑀬𑀢𑀻𑀢𑀺 𑀆𑀳 ‘‘𑀲𑀗𑁆𑀖𑀧𑀲𑀁𑀲𑀸𑀬𑀧𑀺 𑀲𑀢𑁆𑀣𑀼𑀬𑁂𑀯 𑀧𑀲𑀁𑀲𑀸𑀲𑀺𑀤𑁆𑀥𑀺𑀢𑁄’’𑀢𑀺. 𑀲𑀸 𑀧𑀦 𑀧𑀲𑀁𑀲𑀸 𑀧𑀲𑀸𑀤𑀳𑁂𑀢𑀼𑀓𑀸𑀢𑀺 𑀧𑀲𑀸𑀤𑀫𑀼𑀔𑁂𑀦 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀲𑀻𑀤𑀫𑀸𑀦𑀸𑀧𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀺-𑀲𑀤𑁆𑀤𑁂𑀦 𑀬𑀣𑀸 𑀅𑀦𑁆𑀯𑀬𑀢𑁄 𑀧𑀲𑀁𑀲𑀸 𑀲𑀫𑀼𑀘𑁆𑀘𑀻𑀬𑀢𑀺, 𑀏𑀯𑀁 𑀲𑀢𑁆𑀣𑀼𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀲𑀸𑀯𑀓𑁂𑀲𑀼, 𑀲𑀸𑀯𑀓𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀘 𑀲𑀢𑁆𑀣𑀭𑀺 𑀅𑀧𑁆𑀧𑀲𑀸𑀤𑁄 𑀲𑀫𑀼𑀘𑁆𑀘𑀻𑀬𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀭𑀻𑀭𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀭𑀽𑀧𑀲𑀫𑁆𑀧𑀢𑁆𑀢𑀺𑀁, 𑀭𑀽𑀧𑀓𑀸𑀬𑀧𑀸𑀭𑀺𑀧𑀽𑀭𑀺𑀦𑁆𑀢𑀺 𑀅𑀢𑁆𑀣𑁄. 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄 𑀭𑀽𑀧𑀧𑁆𑀧𑀫𑀸𑀡𑀸 ¶ , 𑀖𑁄𑀲𑀥𑀫𑁆𑀫𑀧𑁆𑀧𑀫𑀸𑀡𑀸 𑀘. 𑀧𑀼𑀦 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄𑀢𑀺 𑀥𑀫𑁆𑀫𑀧𑁆𑀧𑀫𑀸𑀡𑀯𑀲𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀬𑀸 𑀲𑀗𑁆𑀖𑀲𑁆𑀲 𑀧𑀲𑀁𑀲𑀸𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄.

𑀢𑀢𑁆𑀣 ¶ 𑀬𑀸 𑀩𑀼𑀤𑁆𑀥𑀸𑀦𑀁, 𑀩𑀼𑀤𑁆𑀥𑀲𑀸𑀯𑀓𑀸𑀦𑀁𑀬𑁂𑀯 𑀘 𑀧𑀸𑀲𑀁𑀲𑀢𑀸, 𑀅𑀜𑁆𑀜𑁂𑀲𑀜𑁆𑀘 𑀢𑀤𑀪𑀸𑀯𑁄 𑀚𑁄𑀢𑀺𑀢𑁄, 𑀢𑀁 𑀯𑀺𑀭𑀢𑀺𑀧𑁆𑀧𑀳𑀸𑀦𑀲𑀁𑀯𑀭𑀼𑀤𑁆𑀤𑁂𑀲𑀯𑀲𑁂𑀦 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀫𑀥𑀺𑀧𑁆𑀧𑀸𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑁂𑀢𑀼𑀖𑀸𑀢𑀯𑀺𑀭𑀢𑀺 𑀦𑀸𑀫 𑀅𑀭𑀺𑀬𑀫𑀕𑁆𑀕𑀯𑀺𑀭𑀢𑀺. 𑀯𑀺𑀧𑀲𑁆𑀲𑀦𑀸𑀫𑀢𑁆𑀢𑀯𑀲𑁂𑀦𑀸𑀢𑀺 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀯𑀸 ‘‘𑀤𑀼𑀓𑁆𑀔’’𑀦𑁆𑀢𑀺 𑀯𑀸 𑀯𑀺𑀯𑀺𑀥𑀁 𑀤𑀲𑁆𑀲𑀦𑀫𑀢𑁆𑀢𑀯𑀲𑁂𑀦, 𑀦 𑀧𑀦 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑀧𑀘𑁆𑀘𑀬𑀧𑀭𑀺𑀕𑁆𑀕𑀡𑁆𑀳𑀦𑀧𑀼𑀩𑁆𑀩𑀓𑀁 𑀮𑀓𑁆𑀔𑀡𑀢𑁆𑀢𑀬𑀁 𑀆𑀭𑁄𑀧𑁂𑀢𑁆𑀯𑀸 𑀲𑀗𑁆𑀔𑀸𑀭𑀸𑀦𑀁 𑀲𑀫𑁆𑀫𑀲𑀦𑀯𑀲𑁂𑀦. 𑀇𑀢𑀭𑀸𑀦𑀻𑀢𑀺 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀸𑀦𑀺. ‘‘𑀲𑁂𑀲’’𑀦𑁆𑀢𑀺 𑀧𑀜𑁆𑀘𑀲𑀻𑀮𑀢𑁄 𑀅𑀜𑁆𑀜𑁄 𑀲𑀩𑁆𑀩𑁄 𑀲𑀻𑀮𑀲𑀁𑀯𑀭𑁄, ‘‘𑀔𑀫𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁪; 𑁩.𑁧𑁫𑁯; 𑀅. 𑀦𑀺. 𑁪.𑁧𑁧𑁪) 𑀯𑀼𑀢𑁆𑀢𑁄 𑀲𑀼𑀧𑀭𑀺𑀲𑀼𑀤𑁆𑀥𑁄 𑀔𑀦𑁆𑀢𑀺𑀲𑀁𑀯𑀭𑁄, ‘‘𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀺𑀬𑁆𑀬𑀭𑁂’’𑀢𑀺 (𑀲𑀼. 𑀦𑀺. 𑁧𑁦𑁪𑁧; 𑀘𑀽𑀴𑀦𑀺. 𑁬𑁦) 𑀏𑀯𑀁 𑀯𑀼𑀢𑁆𑀢𑁄 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑁂𑀤𑀓𑁄 𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑁄 𑀜𑀸𑀡𑀲𑀁𑀯𑀭𑁄, 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀺𑀤𑀳𑀦𑀯𑀲𑁂𑀦 𑀧𑀯𑀢𑁆𑀢𑁄 𑀧𑀭𑀺𑀲𑀼𑀤𑁆𑀥𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄, ‘‘𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁪𑁦𑁨; 𑀫. 𑀦𑀺. 𑁧.𑁧𑁩𑁫; 𑀲𑀁. 𑀦𑀺. 𑁫.𑁮; 𑀯𑀺𑀪. 𑁨𑁦𑁫) 𑀯𑀼𑀢𑁆𑀢𑁄 𑀲𑀫𑁆𑀫𑀧𑁆𑀧𑀥𑀸𑀦𑀲𑀗𑁆𑀔𑀸𑀢𑁄 𑀯𑀻𑀭𑀺𑀬𑀲𑀁𑀯𑀭𑁄𑀢𑀺 𑀇𑀫𑀁 𑀲𑀁𑀯𑀭𑀧𑀜𑁆𑀘𑀓𑀁 𑀲𑀦𑁆𑀥𑀸𑀬𑀸𑀳. 𑀧𑀜𑁆𑀘 𑀔𑁄 𑀧𑀦𑀺𑀫𑁂 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀢𑀺𑀆𑀤𑀺 𑀲𑀸𑀲𑀦𑁂 𑀲𑀻𑀮𑀲𑁆𑀲 𑀩𑀳𑀼𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀢𑀤𑁂𑀓𑀤𑁂𑀲𑁂 𑀏𑀯 𑀧𑀭𑁂𑀲𑀁 𑀅𑀯𑀝𑁆𑀞𑀸𑀦𑀤𑀲𑁆𑀲𑀦𑀢𑁆𑀣𑀁 ¶ 𑀬𑀣𑀸𑀯𑀼𑀢𑁆𑀢𑀲𑀻𑀮𑀲𑀁𑀯𑀭𑀲𑁆𑀲𑁂𑀯 𑀧𑀼𑀦 𑀕𑀳𑀡𑀁.