📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀤𑀻𑀖𑀦𑀺𑀓𑀸𑀬𑁂

𑀫𑀳𑀸𑀯𑀕𑁆𑀕𑀝𑁆𑀞𑀓𑀣𑀸

𑁧. 𑀫𑀳𑀸𑀧𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀸

𑁧. 𑀏𑀯𑀁 ¶ ¶ ¶ 𑀫𑁂 𑀲𑀼𑀢𑀁…𑀧𑁂… 𑀓𑀭𑁂𑀭𑀺𑀓𑀼𑀝𑀺𑀓𑀸𑀬𑀦𑁆𑀢𑀺 𑀫𑀳𑀸𑀧𑀤𑀸𑀦𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸 𑁋 𑀓𑀭𑁂𑀭𑀺𑀓𑀼𑀝𑀺𑀓𑀸𑀬𑀦𑁆𑀢𑀺 𑀓𑀭𑁂𑀭𑀻𑀢𑀺 𑀯𑀭𑀼𑀡𑀭𑀼𑀓𑁆𑀔𑀲𑁆𑀲 𑀦𑀸𑀫𑀁, 𑀓𑀭𑁂𑀭𑀺𑀫𑀡𑁆𑀟𑀧𑁄 𑀢𑀲𑁆𑀲𑀸 𑀓𑀼𑀝𑀺𑀓𑀸𑀬 𑀤𑁆𑀯𑀸𑀭𑁂 𑀞𑀺𑀢𑁄, 𑀢𑀲𑁆𑀫𑀸 ‘‘𑀓𑀭𑁂𑀭𑀺𑀓𑀼𑀝𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺, 𑀬𑀣𑀸 𑀓𑁄𑀲𑀫𑁆𑀩𑀭𑀼𑀓𑁆𑀔𑀲𑁆𑀲 𑀤𑁆𑀯𑀸𑀭𑁂 𑀞𑀺𑀢𑀢𑁆𑀢𑀸 ‘‘𑀓𑁄𑀲𑀫𑁆𑀩𑀓𑀼𑀝𑀺𑀓𑀸’’𑀢𑀺. 𑀅𑀦𑁆𑀢𑁄𑀚𑁂𑀢𑀯𑀦𑁂 𑀓𑀺𑀭 𑀓𑀭𑁂𑀭𑀺𑀓𑀼𑀝𑀺 𑀓𑁄𑀲𑀫𑁆𑀩𑀓𑀼𑀝𑀺 𑀕𑀦𑁆𑀥𑀓𑀼𑀝𑀺 𑀲𑀮𑀴𑀸𑀕𑀸𑀭𑀦𑁆𑀢𑀺 𑀘𑀢𑁆𑀢𑀸𑀭𑀺 𑀫𑀳𑀸𑀕𑁂𑀳𑀸𑀦𑀺, 𑀏𑀓𑁂𑀓𑀁 𑀲𑀢𑀲𑀳𑀲𑁆𑀲𑀧𑀭𑀺𑀘𑁆𑀘𑀸𑀕𑁂𑀦 𑀦𑀺𑀧𑁆𑀨𑀦𑁆𑀦𑀁. 𑀢𑁂𑀲𑀼 𑀲𑀮𑀴𑀸𑀕𑀸𑀭𑀁 𑀭𑀜𑁆𑀜𑀸 𑀧𑀲𑁂𑀦𑀤𑀺𑀦𑀸 𑀓𑀸𑀭𑀺𑀢𑀁, 𑀲𑁂𑀲𑀸𑀦𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀓𑀸𑀭𑀺𑀢𑀸𑀦𑀺. 𑀇𑀢𑀺 𑀪𑀕𑀯𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀕𑀳𑀧𑀢𑀺𑀦𑀸 𑀣𑀫𑁆𑀪𑀸𑀦𑀁 𑀉𑀧𑀭𑀺 𑀓𑀸𑀭𑀺𑀢𑀸𑀬 𑀤𑁂𑀯𑀯𑀺𑀫𑀸𑀦𑀓𑀧𑁆𑀧𑀸𑀬 𑀓𑀭𑁂𑀭𑀺𑀓𑀼𑀝𑀺𑀓𑀸𑀬𑀁 𑀯𑀺𑀳𑀭𑀢𑀺 ¶ . 𑀧𑀘𑁆𑀙𑀸𑀪𑀢𑁆𑀢𑀦𑁆𑀢𑀺 𑀏𑀓𑀸𑀲𑀦𑀺𑀓𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀸𑀦𑀁 𑀧𑀸𑀢𑁄𑀯 𑀪𑀼𑀢𑁆𑀢𑀸𑀦𑀁 𑀅𑀦𑁆𑀢𑁄𑀫𑀚𑁆𑀛𑀦𑁆𑀳𑀺𑀓𑁂𑀧𑀺 𑀧𑀘𑁆𑀙𑀸𑀪𑀢𑁆𑀢𑀫𑁂𑀯. 𑀇𑀥 𑀧𑀦 𑀧𑀓𑀢𑀺𑀪𑀢𑁆𑀢𑀲𑁆𑀲 𑀧𑀘𑁆𑀙𑀢𑁄 ‘‘𑀧𑀘𑁆𑀙𑀸𑀪𑀢𑁆𑀢’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸𑀦𑀦𑁆𑀢𑀺 𑀧𑀺𑀡𑁆𑀟𑀧𑀸𑀢𑀢𑁄 𑀧𑀝𑀺𑀓𑁆𑀓𑀦𑁆𑀢𑀸𑀦𑀁, 𑀪𑀢𑁆𑀢𑀓𑀺𑀘𑁆𑀘𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀉𑀝𑁆𑀞𑀺𑀢𑀸𑀦𑀦𑁆𑀢𑀺 𑀅𑀢𑁆𑀣𑁄.

𑀓𑀭𑁂𑀭𑀺𑀫𑀡𑁆𑀟𑀮𑀫𑀸𑀴𑁂𑀢𑀺 𑀢𑀲𑁆𑀲𑁂𑀯 𑀓𑀭𑁂𑀭𑀺𑀫𑀡𑁆𑀟𑀧𑀲𑁆𑀲 𑀅𑀯𑀺𑀤𑀽𑀭𑁂 𑀓𑀢𑀸𑀬 𑀦𑀺𑀲𑀻𑀤𑀦𑀲𑀸𑀮𑀸𑀬. 𑀲𑁄 𑀓𑀺𑀭 𑀓𑀭𑁂𑀭𑀺𑀫𑀡𑁆𑀟𑀧𑁄 𑀕𑀦𑁆𑀥𑀓𑀼𑀝𑀺𑀓𑀸𑀬 𑀘 𑀲𑀸𑀮𑀸𑀬 𑀘 ¶ 𑀅𑀦𑁆𑀢𑀭𑁂 𑀳𑁄𑀢𑀺, 𑀢𑀲𑁆𑀫𑀸 𑀕𑀦𑁆𑀥𑀓𑀼𑀝𑀻𑀧𑀺 𑀓𑀭𑁂𑀭𑀺𑀓𑀼𑀝𑀺𑀓𑀸𑀧𑀺 𑀲𑀸𑀮𑀸𑀧𑀺 𑁋 ‘‘𑀓𑀭𑁂𑀭𑀺𑀫𑀡𑁆𑀟𑀮𑀫𑀸𑀴𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀸𑀢𑀺 ‘‘𑀏𑀓𑀫𑁆𑀧𑀺 𑀚𑀸𑀢𑀺𑀁, 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄’’𑀢𑀺 𑀏𑀯𑀁 𑀯𑀺𑀪𑀢𑁆𑀢𑁂𑀦 𑀧𑀼𑀩𑁆𑀩𑁂𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀲𑀦𑁆𑀢𑀸𑀦𑀲𑀗𑁆𑀔𑀸𑀢𑁂𑀦 𑀧𑀼𑀩𑁆𑀩𑁂𑀦𑀺𑀯𑀸𑀲𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀧𑀯𑀢𑁆𑀢𑀺𑀢𑀸. 𑀥𑀫𑁆𑀫𑀻𑀢𑀺 𑀥𑀫𑁆𑀫𑀲𑀁𑀬𑀼𑀢𑁆𑀢𑀸.

𑀉𑀤𑀧𑀸𑀤𑀻𑀢𑀺 𑀅𑀳𑁄 𑀅𑀘𑁆𑀙𑀭𑀺𑀬𑀁 𑀤𑀲𑀩𑀮𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 ¶ , 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀦𑀸𑀫 𑀓𑁂 𑀅𑀦𑀼𑀲𑁆𑀲𑀭𑀦𑁆𑀢𑀺, 𑀓𑁂 𑀦𑀸𑀦𑀼𑀲𑁆𑀲𑀭𑀦𑁆𑀢𑀻𑀢𑀺. 𑀢𑀺𑀢𑁆𑀣𑀺𑀬𑀸 𑀅𑀦𑀼𑀲𑁆𑀲𑀭𑀦𑁆𑀢𑀺, 𑀲𑀸𑀯𑀓𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀩𑀼𑀤𑁆𑀥𑀸 𑀘 𑀅𑀦𑀼𑀲𑁆𑀲𑀭𑀦𑁆𑀢𑀺. 𑀓𑀢𑀭𑀢𑀺𑀢𑁆𑀣𑀺𑀬𑀸 𑀅𑀦𑀼𑀲𑁆𑀲𑀭𑀦𑁆𑀢𑀺? 𑀬𑁂 𑀅𑀕𑁆𑀕𑀧𑁆𑀧𑀢𑁆𑀢𑀓𑀫𑁆𑀫𑀯𑀸𑀤𑀺𑀦𑁄, 𑀢𑁂𑀧𑀺 𑀘𑀢𑁆𑀢𑀸𑀮𑀻𑀲𑀁𑀬𑁂𑀯 𑀓𑀧𑁆𑀧𑁂 𑀅𑀦𑀼𑀲𑁆𑀲𑀭𑀦𑁆𑀢𑀺, 𑀦 𑀢𑀢𑁄 𑀧𑀭𑀁. 𑀲𑀸𑀯𑀓𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑀺. 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀅𑀲𑀗𑁆𑀔𑁆𑀬𑁂𑀬𑁆𑀬𑀜𑁆𑀘𑁂𑀯 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘. 𑀩𑀼𑀤𑁆𑀥𑀸𑀦𑀁 𑀧𑀦 𑀏𑀢𑁆𑀢𑀓𑀦𑁆𑀢𑀺 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺, 𑀬𑀸𑀯𑀢𑀓𑀁 𑀆𑀓𑀗𑁆𑀔𑀦𑁆𑀢𑀺, 𑀢𑀸𑀯𑀢𑀓𑀁 𑀅𑀦𑀼𑀲𑁆𑀲𑀭𑀦𑁆𑀢𑀺.

𑀢𑀺𑀢𑁆𑀣𑀺𑀬𑀸 𑀔𑀦𑁆𑀥𑀧𑀝𑀺𑀧𑀸𑀝𑀺𑀬𑀸 𑀅𑀦𑀼𑀲𑁆𑀲𑀭𑀦𑁆𑀢𑀺, 𑀧𑀝𑀺𑀧𑀸𑀝𑀺𑀁 𑀫𑀼𑀜𑁆𑀘𑀺𑀢𑁆𑀯𑀸 𑀦 𑀲𑀓𑁆𑀓𑁄𑀦𑁆𑀢𑀺. 𑀧𑀝𑀺𑀧𑀸𑀝𑀺𑀬𑀸 𑀅𑀦𑀼𑀲𑁆𑀲𑀭𑀦𑁆𑀢𑀸𑀧𑀺 𑀅𑀲𑀜𑁆𑀜𑀪𑀯𑀁 𑀧𑀢𑁆𑀯𑀸 𑀔𑀦𑁆𑀥𑀧𑁆𑀧𑀯𑀢𑁆𑀢𑀺𑀁 𑀦 𑀧𑀲𑁆𑀲𑀦𑁆𑀢𑀺, 𑀚𑀸𑀮𑁂 𑀧𑀢𑀺𑀢𑀸 𑀓𑀼𑀡𑁆𑀞𑀸 𑀯𑀺𑀬, 𑀓𑀽𑀧𑁂 𑀧𑀢𑀺𑀢𑀸 𑀧𑀗𑁆𑀕𑀼𑀴𑀸 𑀯𑀺𑀬 𑀘 𑀳𑁄𑀦𑁆𑀢𑀺. 𑀢𑁂 𑀢𑀢𑁆𑀣 𑀞𑀢𑁆𑀯𑀸 ‘‘𑀏𑀢𑁆𑀢𑀓𑀫𑁂𑀯, 𑀇𑀢𑁄 𑀧𑀭𑀁 𑀦𑀢𑁆𑀣𑀻’’𑀢𑀺 𑀤𑀺𑀝𑁆𑀞𑀺𑀁 𑀕𑀡𑁆𑀳𑀦𑁆𑀢𑀺. 𑀇𑀢𑀺 𑀢𑀺𑀢𑁆𑀣𑀺𑀬𑀸𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀭𑀡𑀁 𑀅𑀦𑁆𑀥𑀸𑀦𑀁 𑀬𑀝𑁆𑀞𑀺𑀓𑁄𑀝𑀺𑀕𑀫𑀦𑀁 𑀯𑀺𑀬 𑀳𑁄𑀢𑀺. 𑀬𑀣𑀸 𑀳𑀺 𑀅𑀦𑁆𑀥𑀸 𑀬𑀝𑁆𑀞𑀺𑀓𑁄𑀝𑀺𑀕𑁆𑀕𑀸𑀳𑀓𑁂 𑀲𑀢𑀺𑀬𑁂𑀯 𑀕𑀘𑁆𑀙𑀦𑁆𑀢𑀺, 𑀅𑀲𑀢𑀺 𑀢𑀢𑁆𑀣𑁂𑀯 𑀦𑀺𑀲𑀻𑀤𑀦𑁆𑀢𑀺, 𑀏𑀯𑀫𑁂𑀯 𑀢𑀺𑀢𑁆𑀣𑀺𑀬𑀸 𑀔𑀦𑁆𑀥𑀧𑀝𑀺𑀧𑀸𑀝𑀺𑀬𑀸𑀯 𑀅𑀦𑀼𑀲𑁆𑀲𑀭𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀧𑀝𑀺𑀧𑀸𑀝𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦 𑀲𑀓𑁆𑀓𑁄𑀦𑁆𑀢𑀺.

𑀲𑀸𑀯𑀓𑀸𑀧𑀺 𑀔𑀦𑁆𑀥𑀧𑀝𑀺𑀧𑀸𑀝𑀺𑀬𑀸𑀯 𑀅𑀦𑀼𑀲𑁆𑀲𑀭𑀦𑁆𑀢𑀺, 𑀅𑀲𑀜𑁆𑀜𑀪𑀯𑀁 𑀧𑀢𑁆𑀯𑀸 𑀔𑀦𑁆𑀥𑀧𑁆𑀧𑀯𑀢𑁆𑀢𑀺𑀁 𑀦 𑀧𑀲𑁆𑀲𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀢𑁂 𑀯𑀝𑁆𑀝𑁂 𑀲𑀁𑀲𑀭𑀡𑀓𑀲𑀢𑁆𑀢𑀸𑀦𑀁 𑀔𑀦𑁆𑀥𑀸𑀦𑀁 𑀅𑀪𑀸𑀯𑀓𑀸𑀮𑁄 𑀦𑀸𑀫 𑀦𑀢𑁆𑀣𑀺. 𑀅𑀲𑀜𑁆𑀜𑀪𑀯𑁂 𑀧𑀦 𑀧𑀜𑁆𑀘𑀓𑀧𑁆𑀧𑀲𑀢𑀸𑀦𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀢𑀢𑁆𑀢𑀓𑀁 𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀩𑀼𑀤𑁆𑀥𑁂𑀳𑀺 𑀤𑀺𑀦𑁆𑀦𑀦𑀬𑁂 𑀞𑀢𑁆𑀯𑀸 𑀧𑀭𑀢𑁄 𑀅𑀦𑀼𑀲𑁆𑀲𑀭𑀦𑁆𑀢𑀺; 𑀲𑁂𑀬𑁆𑀬𑀣𑀸𑀧𑀺 𑀆𑀬𑀲𑁆𑀫𑀸 𑀲𑁄𑀪𑀺𑀢𑁄. 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀧𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 ¶ 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀁 𑀑𑀮𑁄𑀓𑁂𑀢𑁆𑀯𑀸 𑀅𑀦𑀼𑀲𑁆𑀲𑀭𑀦𑁆𑀢𑀺. 𑀩𑀼𑀤𑁆𑀥𑀸𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀬𑀁 𑀬𑀁 𑀞𑀸𑀦𑀁 𑀧𑀲𑁆𑀲𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀁 𑀢𑀤𑁂𑀯 𑀧𑀲𑁆𑀲𑀦𑁆𑀢𑀺.

𑀢𑀺𑀢𑁆𑀣𑀺𑀬𑀸 ¶ 𑀘 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀫𑀸𑀦𑀸 𑀅𑀢𑁆𑀢𑀦𑀸 𑀤𑀺𑀝𑁆𑀞𑀓𑀢𑀲𑀼𑀢𑀫𑁂𑀯 𑀅𑀦𑀼𑀲𑁆𑀲𑀭𑀦𑁆𑀢𑀺. 𑀢𑀣𑀸 𑀲𑀸𑀯𑀓𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 ¶ 𑀘. 𑀩𑀼𑀤𑁆𑀥𑀸 𑀧𑀦 𑀅𑀢𑁆𑀢𑀦𑀸 𑀯𑀸 𑀧𑀭𑁂𑀳𑀺 𑀯𑀸 𑀤𑀺𑀝𑁆𑀞𑀓𑀢𑀲𑀼𑀢𑀁 𑀲𑀩𑁆𑀩𑀫𑁂𑀯 𑀅𑀦𑀼𑀲𑁆𑀲𑀭𑀦𑁆𑀢𑀺.

𑀢𑀺𑀢𑁆𑀣𑀺𑀬𑀸𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀔𑀚𑁆𑀚𑁄𑀧𑀦𑀓𑀑𑀪𑀸𑀲𑀲𑀤𑀺𑀲𑀁, 𑀲𑀸𑀯𑀓𑀸𑀦𑀁 𑀧𑀤𑀻𑀧𑁄𑀪𑀸𑀲𑀲𑀤𑀺𑀲𑀁, 𑀅𑀕𑁆𑀕𑀲𑀸𑀯𑀓𑀸𑀦𑀁 𑀑𑀲𑀥𑀺𑀢𑀸𑀭𑀓𑁄𑀪𑀸𑀲𑀲𑀤𑀺𑀲𑀁, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀘𑀦𑁆𑀤𑁄𑀪𑀸𑀲𑀲𑀤𑀺𑀲𑀁, 𑀩𑀼𑀤𑁆𑀥𑀸𑀦𑀁 𑀲𑀭𑀤𑀲𑀽𑀭𑀺𑀬𑀫𑀡𑁆𑀟𑀮𑁄𑀪𑀸𑀲𑀲𑀤𑀺𑀲𑀁. 𑀢𑀲𑁆𑀲 𑀏𑀢𑁆𑀢𑀓𑀸𑀦𑀺 𑀚𑀸𑀢𑀺𑀲𑀢𑀸𑀦𑀺 𑀚𑀸𑀢𑀺𑀲𑀳𑀲𑁆𑀲𑀸𑀦𑀺 𑀚𑀸𑀢𑀺𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸𑀦𑀺 𑀓𑀧𑁆𑀧𑀲𑀢𑀸𑀦𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀯𑀸 𑀦𑀢𑁆𑀣𑀺, 𑀬𑀁 𑀓𑀺𑀜𑁆𑀘𑀺 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀦𑁂𑀯 𑀔𑀮𑀺𑀢𑀁, 𑀦 𑀧𑀝𑀺𑀖𑀸𑀢𑀁 𑀳𑁄𑀢𑀺, 𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀫𑁂𑀯 𑀆𑀓𑀗𑁆𑀔𑀫𑀦𑀲𑀺𑀓𑀸𑀭𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀝𑀺𑀩𑀤𑁆𑀥𑀫𑁂𑀯 𑀳𑁄𑀢𑀺. 𑀤𑀼𑀩𑁆𑀩𑀮𑀧𑀢𑁆𑀢𑀧𑀼𑀝𑁂 𑀯𑁂𑀕𑀓𑁆𑀔𑀺𑀢𑁆𑀢𑀦𑀸𑀭𑀸𑀘𑁄 𑀯𑀺𑀬, 𑀲𑀺𑀦𑁂𑀭𑀼𑀓𑀽𑀝𑁂 𑀯𑀺𑀲𑁆𑀲𑀝𑁆𑀞𑀇𑀦𑁆𑀤𑀯𑀚𑀺𑀭𑀁 𑀯𑀺𑀬 𑀘 𑀅𑀲𑀚𑁆𑀚𑀫𑀸𑀦𑀫𑁂𑀯 𑀕𑀘𑁆𑀙𑀢𑀺. ‘‘𑀅𑀳𑁄 𑀫𑀳𑀦𑁆𑀢𑀁 𑀪𑀕𑀯𑀢𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡’’𑀦𑁆𑀢𑀺 𑀏𑀯𑀁 𑀪𑀕𑀯𑀦𑁆𑀢𑀁𑀬𑁂𑀯 𑀆𑀭𑀩𑁆𑀪 𑀓𑀣𑀸 𑀉𑀧𑁆𑀧𑀦𑁆𑀦𑀸, 𑀚𑀸𑀢𑀸 𑀧𑀯𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑀁 𑀲𑀩𑁆𑀩𑀫𑁆𑀧𑀺 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀇𑀢𑀺𑀧𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑁄, 𑀇𑀢𑀺𑀧𑀺 𑀧𑀼𑀩𑁆𑀯𑁂𑀦𑀺𑀯𑀸𑀲𑁄’’𑀢𑀺 𑀏𑀢𑁆𑀢𑀓𑀫𑁂𑀯 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀢𑀺𑀧𑀻𑀢𑀺 𑀏𑀯𑀫𑁆𑀧𑀺.

𑁨-𑁩. 𑀅𑀲𑁆𑀲𑁄𑀲𑀺 𑀔𑁄…𑀧𑁂… 𑀅𑀣 𑀪𑀕𑀯𑀸 𑀅𑀦𑀼𑀧𑁆𑀧𑀢𑁆𑀢𑁄𑀢𑀺 𑀏𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀫𑁂𑀯. 𑀅𑀬𑀫𑁂𑀯 𑀳𑀺 𑀯𑀺𑀲𑁂𑀲𑁄 𑁋 𑀢𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀅𑀲𑁆𑀲𑁄𑀲𑀺, 𑀇𑀥 𑀤𑀺𑀩𑁆𑀩𑀲𑁄𑀢𑁂𑀦. 𑀢𑀢𑁆𑀣 𑀘 𑀯𑀡𑁆𑀡𑀸𑀯𑀡𑁆𑀡𑀓𑀣𑀸 𑀯𑀺𑀧𑁆𑀧𑀓𑀢𑀸, 𑀇𑀥 𑀧𑀼𑀩𑁆𑀩𑁂𑀦𑀺𑀯𑀸𑀲𑀓𑀣𑀸. 𑀢𑀲𑁆𑀫𑀸 𑀪𑀕𑀯𑀸 𑁋 ‘‘𑀇𑀫𑁂 𑀪𑀺𑀓𑁆𑀔𑀽 𑀫𑀫 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀆𑀭𑀩𑁆𑀪 𑀕𑀼𑀡𑀁 𑀣𑁄𑀫𑁂𑀦𑁆𑀢𑀺, 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀲𑁆𑀲 𑀧𑀦 𑀫𑁂 𑀦𑀺𑀧𑁆𑀨𑀢𑁆𑀢𑀺𑀁 𑀦 𑀚𑀸𑀦𑀦𑁆𑀢𑀺; 𑀳𑀦𑁆𑀤 𑀦𑁂𑀲𑀁 𑀢𑀲𑁆𑀲 𑀦𑀺𑀧𑁆𑀨𑀢𑁆𑀢𑀺𑀁 𑀓𑀣𑁂𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀆𑀕𑀦𑁆𑀢𑁆𑀯𑀸 𑀧𑀓𑀢𑀺𑀬𑀸𑀧𑀺 𑀩𑀼𑀤𑁆𑀥𑀸𑀦𑀁 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀢𑁆𑀣𑀫𑁂𑀯 𑀞𑀧𑀺𑀢𑁂 𑀢𑀗𑁆𑀔𑀡𑁂 𑀪𑀺𑀓𑁆𑀔𑀽𑀳𑀺 𑀧𑀧𑁆𑀨𑁄𑀝𑁂𑀢𑁆𑀯𑀸 𑀤𑀺𑀦𑁆𑀦𑁂 𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀓𑀸𑀬 𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂’’𑀢𑀺 𑀧𑀼𑀘𑁆𑀙𑀸𑀬 𑀘 ‘‘𑀇𑀥 ¶ , 𑀪𑀦𑁆𑀢𑁂’’𑀢𑀺𑀆𑀤𑀺𑀧𑀝𑀺𑀯𑀘𑀦𑀲𑁆𑀲 𑀘 𑀧𑀭𑀺𑀬𑁄𑀲𑀸𑀦𑁂 𑀢𑁂𑀲𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀣𑁂𑀢𑀼𑀓𑀸𑀫𑁄 𑀇𑀘𑁆𑀙𑁂𑀬𑁆𑀬𑀸𑀣 𑀦𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀘𑁆𑀙𑁂𑀬𑁆𑀬𑀸𑀣 𑀦𑁄𑀢𑀺 𑀇𑀘𑁆𑀙𑁂𑀬𑁆𑀬𑀸𑀣 𑀦𑀼. 𑀅𑀣 𑀦𑀁 𑀧𑀳𑀝𑁆𑀞𑀫𑀸𑀦𑀲𑀸 𑀪𑀺𑀓𑁆𑀔𑀽 𑀬𑀸𑀘𑀫𑀸𑀦𑀸 𑀏𑀢𑀲𑁆𑀲 𑀪𑀕𑀯𑀸𑀢𑀺𑀆𑀤𑀺𑀫𑀸𑀳𑀁𑀲𑀼. 𑀢𑀢𑁆𑀣 𑀏𑀢𑀲𑁆𑀲𑀸𑀢𑀺 𑀏𑀢𑀲𑁆𑀲 𑀥𑀫𑁆𑀫𑀺𑀓𑀣𑀸𑀓𑀭𑀡𑀲𑁆𑀲.

𑁪. 𑀅𑀣 ¶ 𑀪𑀕𑀯𑀸 𑀢𑁂𑀲𑀁 𑀬𑀸𑀘𑀦𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀼𑀓𑀸𑀫𑁄 ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀼𑀡𑀸𑀣𑀸’’𑀢𑀺 𑀢𑁂 ¶ 𑀲𑁄𑀢𑀸𑀯𑀥𑀸𑀭𑀡𑀲𑀸𑀥𑀼𑀓𑀫𑀦𑀲𑀺𑀓𑀸𑀭𑁂𑀲𑀼 𑀦𑀺𑀬𑁄𑀚𑁂𑀢𑁆𑀯𑀸 𑀅𑀜𑁆𑀜𑁂𑀲𑀁 𑀅𑀲𑀸𑀥𑀸𑀭𑀡𑀁 𑀙𑀺𑀦𑁆𑀦𑀯𑀝𑀼𑀫𑀓𑀸𑀦𑀼𑀲𑁆𑀲𑀭𑀡𑀁 𑀧𑀓𑀸𑀲𑁂𑀢𑀼𑀓𑀸𑀫𑁄 𑀇𑀢𑁄 𑀲𑁄, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀁 𑀯𑀺𑀧𑀲𑁆𑀲𑀻𑀢𑀺 𑀬𑀲𑁆𑀫𑀺𑀁 𑀓𑀧𑁆𑀧𑁂 𑀯𑀺𑀧𑀲𑁆𑀲𑀻. 𑀅𑀬𑀜𑁆𑀳𑀺 ‘𑀬’𑀦𑁆𑀢𑀺 𑀲𑀤𑁆𑀤𑁄 ‘‘𑀬𑀁 𑀫𑁂, 𑀪𑀦𑁆𑀢𑁂, 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁, 𑀆𑀭𑁄𑀘𑁂𑀫𑀺 𑀢𑀁, 𑀪𑀕𑀯𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁦𑁩) 𑀧𑀘𑁆𑀘𑀢𑁆𑀢𑀯𑀘𑀦𑁂 𑀤𑀺𑀲𑁆𑀲𑀢𑀺. ‘‘𑀬𑀁 𑀢𑀁 𑀅𑀧𑀼𑀘𑁆𑀙𑀺𑀫𑁆𑀳 𑀅𑀓𑀺𑀢𑁆𑀢𑀬𑀻 𑀦𑁄, 𑀅𑀜𑁆𑀜𑀁 𑀢𑀁 𑀧𑀼𑀘𑁆𑀙𑀸𑀫 𑀢𑀤𑀺𑀗𑁆𑀖 𑀩𑁆𑀭𑀽𑀳𑀻’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁮𑁮𑁧) 𑀉𑀧𑀬𑁄𑀕𑀯𑀘𑀦𑁂. ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁧.𑁨𑁭𑁭) 𑀓𑀭𑀡𑀯𑀘𑀦𑁂. 𑀇𑀥 𑀧𑀦 𑀪𑀼𑀫𑁆𑀫𑀢𑁆𑀣𑁂𑀢𑀺 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀬𑀲𑁆𑀫𑀺𑀁 𑀓𑀧𑁆𑀧𑁂’’𑀢𑀺. 𑀉𑀤𑀧𑀸𑀤𑀻𑀢𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀉𑀦𑁆𑀦𑀸𑀤𑁂𑀦𑁆𑀢𑁄 𑀉𑀧𑁆𑀧𑀚𑁆𑀚𑀺.

𑀪𑀤𑁆𑀤𑀓𑀧𑁆𑀧𑁂𑀢𑀺 𑀧𑀜𑁆𑀘𑀩𑀼𑀤𑁆𑀥𑀼𑀧𑁆𑀧𑀸𑀤𑀧𑀝𑀺𑀫𑀡𑁆𑀟𑀺𑀢𑀢𑁆𑀢𑀸 𑀲𑀼𑀦𑁆𑀤𑀭𑀓𑀧𑁆𑀧𑁂 𑀲𑀸𑀭𑀓𑀧𑁆𑀧𑁂𑀢𑀺 𑀪𑀕𑀯𑀸 𑀇𑀫𑀁 𑀓𑀧𑁆𑀧𑀁 𑀣𑁄𑀫𑁂𑀦𑁆𑀢𑁄 𑀏𑀯𑀫𑀸𑀳. 𑀬𑀢𑁄 𑀧𑀝𑁆𑀞𑀸𑀬 𑀓𑀺𑀭 𑀅𑀫𑁆𑀳𑀸𑀓𑀁 𑀪𑀕𑀯𑀢𑀸 𑀅𑀪𑀺𑀦𑀻𑀳𑀸𑀭𑁄 𑀓𑀢𑁄, 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀏𑀓𑀓𑀧𑁆𑀧𑁂𑀧𑀺 𑀧𑀜𑁆𑀘 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺. 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀅𑀪𑀺𑀦𑀻𑀳𑀸𑀭𑀲𑁆𑀲 𑀧𑀼𑀭𑀢𑁄 𑀧𑀦 𑀢𑀡𑁆𑀳𑀗𑁆𑀓𑀭𑁄, 𑀫𑁂𑀥𑀗𑁆𑀓𑀭𑁄, 𑀲𑀭𑀡𑀗𑁆𑀓𑀭𑁄, 𑀤𑀻𑀧𑀗𑁆𑀓𑀭𑁄𑀢𑀺 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂𑀲𑀁 𑀑𑀭𑀪𑀸𑀕𑁂 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀩𑀼𑀤𑁆𑀥𑀲𑀼𑀜𑁆𑀜𑀫𑁂𑀯 𑀅𑀳𑁄𑀲𑀺.

𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀧𑀭𑀺𑀬𑁄𑀲𑀸𑀦𑁂 𑀧𑀦 𑀓𑁄𑀡𑁆𑀟𑀜𑁆𑀜𑁄 𑀦𑀸𑀫 𑀩𑀼𑀤𑁆𑀥𑁄 𑀏𑀓𑁄𑀯 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀉𑀧𑁆𑀧𑀦𑁆𑀦𑁄. 𑀢𑀢𑁄𑀧𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀩𑀼𑀤𑁆𑀥𑀲𑀼𑀜𑁆𑀜𑀫𑁂𑀯 𑀅𑀳𑁄𑀲𑀺. 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀧𑀭𑀺𑀬𑁄𑀲𑀸𑀦𑁂 𑀫𑀗𑁆𑀕𑀮𑁄, 𑀲𑀼𑀫𑀦𑁄, 𑀭𑁂𑀯𑀢𑁄, 𑀲𑁄𑀪𑀺𑀢𑁄𑀢𑀺 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀉𑀧𑁆𑀧𑀦𑁆𑀦𑀸 ¶ . 𑀢𑀢𑁄𑀧𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀩𑀼𑀤𑁆𑀥𑀲𑀼𑀜𑁆𑀜𑀫𑁂𑀯 𑀅𑀳𑁄𑀲𑀺. 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀧𑀭𑀺𑀬𑁄𑀲𑀸𑀦𑁂 𑀧𑀦 𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀲𑁆𑀲 𑀉𑀧𑀭𑀺 𑀅𑀦𑁄𑀫𑀤𑀲𑁆𑀲𑀻, 𑀧𑀤𑀼𑀫𑁄, 𑀦𑀸𑀭𑀤𑁄𑀢𑀺 𑀢𑀬𑁄 𑀩𑀼𑀤𑁆𑀥𑀸 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀉𑀧𑁆𑀧𑀦𑁆𑀦𑀸. 𑀢𑀢𑁄𑀧𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀩𑀼𑀤𑁆𑀥𑀲𑀼𑀜𑁆𑀜𑀫𑁂𑀯 𑀅𑀳𑁄𑀲𑀺. 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀧𑀭𑀺𑀬𑁄𑀲𑀸𑀦𑁂 𑀧𑀦 𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀁 𑀉𑀧𑀭𑀺 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀏𑀓𑁄𑀯 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀉𑀧𑁆𑀧𑀦𑁆𑀦𑁄. 𑀢𑀲𑁆𑀲 𑀑𑀭𑀪𑀸𑀕𑁂 𑀇𑀢𑁄 𑀢𑀺𑀁𑀲𑀓𑀧𑁆𑀧𑀲𑀳𑀲𑁆𑀲𑀸𑀦𑀁 𑀉𑀧𑀭𑀺 𑀲𑀼𑀫𑁂𑀥𑁄, 𑀲𑀼𑀚𑀸𑀢𑁄𑀢𑀺 𑀤𑁆𑀯𑁂 𑀩𑀼𑀤𑁆𑀥𑀸 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀉𑀧𑁆𑀧𑀦𑁆𑀦𑀸. 𑀢𑀢𑁄 𑀑𑀭𑀪𑀸𑀕𑁂 𑀇𑀢𑁄 𑀅𑀝𑁆𑀞𑀸𑀭𑀲𑀦𑁆𑀦𑀁 𑀓𑀧𑁆𑀧𑀲𑀳𑀲𑁆𑀲𑀸𑀦𑀁 𑀉𑀧𑀭𑀺 𑀧𑀺𑀬𑀤𑀲𑁆𑀲𑀻, 𑀅𑀢𑁆𑀣𑀤𑀲𑁆𑀲𑀻, 𑀥𑀫𑁆𑀫𑀤𑀲𑁆𑀲𑀻𑀢𑀺 𑀢𑀬𑁄 𑀩𑀼𑀤𑁆𑀥𑀸 ¶ 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀉𑀧𑁆𑀧𑀦𑁆𑀦𑀸. 𑀅𑀣 𑀇𑀢𑁄 𑀘𑀢𑀼𑀦𑀯𑀼𑀢𑀺𑀓𑀧𑁆𑀧𑁂 𑀲𑀺𑀤𑁆𑀥𑀢𑁆𑀣𑁄 𑀦𑀸𑀫 𑀩𑀼𑀤𑁆𑀥𑁄 𑀏𑀓𑁄𑀯 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀉𑀧𑁆𑀧𑀦𑁆𑀦𑁄. 𑀇𑀢𑁄 𑀤𑁆𑀯𑁂 𑀦𑀯𑀼𑀢𑀺𑀓𑀧𑁆𑀧𑁂 𑀢𑀺𑀲𑁆𑀲𑁄, 𑀨𑀼𑀲𑁆𑀲𑁄𑀢𑀺 𑀤𑁆𑀯𑁂 𑀩𑀼𑀤𑁆𑀥𑀸 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀉𑀧𑁆𑀧𑀦𑁆𑀦𑀸. 𑀇𑀢𑁄 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀉𑀧𑁆𑀧𑀦𑁆𑀦𑁄. 𑀇𑀢𑁄 𑀏𑀓𑀢𑀺𑀁𑀲𑁂 𑀓𑀧𑁆𑀧𑁂 𑀲𑀺𑀔𑀻, 𑀯𑁂𑀲𑁆𑀲𑀪𑀽𑀢𑀺 𑀤𑁆𑀯𑁂 𑀩𑀼𑀤𑁆𑀥𑀸 𑀉𑀧𑁆𑀧𑀦𑁆𑀦𑀸. 𑀇𑀫𑀲𑁆𑀫𑀺𑀁 𑀪𑀤𑁆𑀤𑀓𑀧𑁆𑀧𑁂 𑀓𑀓𑀼𑀲𑀦𑁆𑀥𑁄, 𑀓𑁄𑀡𑀸𑀕𑀫𑀦𑁄, 𑀓𑀲𑁆𑀲𑀧𑁄, 𑀕𑁄𑀢𑀫𑁄 𑀅𑀫𑁆𑀳𑀸𑀓𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀉𑀧𑁆𑀧𑀦𑁆𑀦𑀸, 𑀫𑁂𑀢𑁆𑀢𑁂𑀬𑁆𑀬𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀏𑀯𑀫𑀬𑀁 𑀓𑀧𑁆𑀧𑁄 𑀧𑀜𑁆𑀘𑀩𑀼𑀤𑁆𑀥𑀼𑀧𑁆𑀧𑀸𑀤𑀧𑀝𑀺𑀫𑀡𑁆𑀟𑀺𑀢𑀢𑁆𑀢𑀸 𑀲𑀼𑀦𑁆𑀤𑀭𑀓𑀧𑁆𑀧𑁄 𑀲𑀸𑀭𑀓𑀧𑁆𑀧𑁄𑀢𑀺 𑀪𑀕𑀯𑀸 𑀇𑀫𑀁 𑀓𑀧𑁆𑀧𑀁 𑀣𑁄𑀫𑁂𑀦𑁆𑀢𑁄 𑀏𑀯𑀫𑀸𑀳.

𑀓𑀺𑀁 ¶ 𑀧𑀦𑁂𑀢𑀁 𑀩𑀼𑀤𑁆𑀥𑀸𑀦𑀁𑀬𑁂𑀯 𑀧𑀸𑀓𑀝𑀁 𑀳𑁄𑀢𑀺 𑁋 ‘‘𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀏𑀢𑁆𑀢𑀓𑀸 𑀩𑀼𑀤𑁆𑀥𑀸 𑀉𑀧𑁆𑀧𑀦𑁆𑀦𑀸 𑀯𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀯𑀸’’𑀢𑀺, 𑀉𑀤𑀸𑀳𑀼 𑀅𑀜𑁆𑀜𑁂𑀲𑀫𑁆𑀧𑀺 𑀧𑀸𑀓𑀝𑀁 𑀳𑁄𑀢𑀻𑀢𑀺? 𑀅𑀜𑁆𑀜𑁂𑀲𑀫𑁆𑀧𑀺 𑀧𑀸𑀓𑀝𑀁 𑀳𑁄𑀢𑀺. 𑀓𑁂𑀲𑀁? 𑀲𑀼𑀤𑁆𑀥𑀸𑀯𑀸𑀲𑀩𑁆𑀭𑀳𑁆𑀫𑀸𑀦𑀁. 𑀓𑀧𑁆𑀧𑀲𑀡𑁆𑀞𑀸𑀦𑀓𑀸𑀮𑀲𑁆𑀫𑀺𑀜𑁆𑀳𑀺 𑀏𑀓𑀫𑀲𑀗𑁆𑀔𑁆𑀬𑁂𑀬𑁆𑀬𑀁 𑀏𑀓𑀗𑁆𑀕𑀡𑀁 𑀳𑀼𑀢𑁆𑀯𑀸 𑀞𑀺𑀢𑁂 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀮𑁄𑀓𑀲𑁆𑀲 𑀲𑀡𑁆𑀞𑀸𑀦𑀢𑁆𑀣𑀸𑀬 𑀤𑁂𑀯𑁄 𑀯𑀲𑁆𑀲𑀺𑀢𑀼𑀁 𑀆𑀭𑀪𑀢𑀺. 𑀆𑀤𑀺𑀢𑁄𑀯 𑀅𑀦𑁆𑀢𑀭𑀝𑁆𑀞𑀓𑁂 𑀳𑀺𑀫𑀧𑀸𑀢𑁄 𑀯𑀺𑀬 𑀳𑁄𑀢𑀺. 𑀢𑀢𑁄 𑀢𑀺𑀮𑀫𑀢𑁆𑀢𑀸 𑀓𑀡𑀫𑀢𑁆𑀢𑀸 𑀢𑀡𑁆𑀟𑀼𑀮𑀫𑀢𑁆𑀢𑀸 𑀫𑀼𑀕𑁆𑀕-𑀫𑀸𑀲-𑀩𑀤𑀭-𑀆𑀫𑀮𑀓-𑀏𑀴𑀸𑀮𑀼𑀓-𑀓𑀼𑀫𑁆𑀪𑀡𑁆𑀟-𑀅𑀮𑀸𑀩𑀼𑀫𑀢𑁆𑀢𑀸 𑀉𑀤𑀓𑀥𑀸𑀭𑀸 𑀳𑀼𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀉𑀲𑀪𑀤𑁆𑀯𑁂𑀉𑀲𑀪𑀅𑀟𑁆𑀠𑀕𑀸𑀯𑀼𑀢𑀕𑀸𑀯𑀼𑀢𑀤𑁆𑀯𑁂𑀕𑀸𑀯𑀼𑀢𑀅𑀟𑁆𑀠𑀬𑁄𑀚𑀦𑀬𑁄𑀚𑀦𑀤𑁆𑀯𑀺𑀬𑁄𑀚𑀦…𑀧𑁂… 𑀬𑁄𑀚𑀦𑀲𑀢𑀬𑁄𑀚𑀦𑀲𑀳𑀲𑁆𑀲𑀬𑁄𑀚𑀦𑀲𑀢𑀲𑀳𑀲𑁆𑀲𑀫𑀢𑁆𑀢𑀸 ¶ 𑀳𑀼𑀢𑁆𑀯𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀩𑁆𑀪𑀦𑁆𑀢𑀭𑁂 𑀬𑀸𑀯 𑀅𑀯𑀺𑀦𑀝𑁆𑀞𑀩𑁆𑀭𑀳𑁆𑀫𑀮𑁄𑀓𑀸 𑀧𑀽𑀭𑁂𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀅𑀣 𑀢𑀁 𑀉𑀤𑀓𑀁 𑀅𑀦𑀼𑀧𑀼𑀩𑁆𑀩𑁂𑀦 𑀪𑀲𑁆𑀲𑀢𑀺, 𑀪𑀲𑁆𑀲𑀦𑁆𑀢𑁂 𑀉𑀤𑀓𑁂 𑀧𑀓𑀢𑀺𑀤𑁂𑀯𑀮𑁄𑀓𑀝𑁆𑀞𑀸𑀦𑁂𑀲𑀼 𑀤𑁂𑀯𑀮𑁄𑀓𑀸 𑀲𑀡𑁆𑀞𑀳𑀦𑁆𑀢𑀺, 𑀢𑁂𑀲𑀁 𑀲𑀡𑁆𑀞𑀳𑀦𑀯𑀺𑀥𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀓𑀣𑀸𑀬𑀁 𑀯𑀼𑀢𑁆𑀢𑀫𑁂𑀯.

𑀫𑀦𑀼𑀲𑁆𑀲𑀮𑁄𑀓𑀲𑀡𑁆𑀞𑀳𑀦𑀝𑁆𑀞𑀸𑀦𑀁 𑀧𑀦 𑀧𑀢𑁆𑀢𑁂 𑀉𑀤𑀓𑁂 𑀥𑀫𑀓𑀭𑀡𑀫𑀼𑀔𑁂 𑀧𑀺𑀳𑀺𑀢𑁂 𑀯𑀺𑀬 𑀯𑀸𑀢𑀯𑀲𑁂𑀦 𑀢𑀁 𑀉𑀤𑀓𑀁 𑀲𑀦𑁆𑀢𑀺𑀝𑁆𑀞𑀢𑀺, 𑀉𑀤𑀓𑀧𑀺𑀝𑁆𑀞𑁂 𑀉𑀧𑁆𑀧𑀮𑀺𑀦𑀺𑀧𑀡𑁆𑀡𑀁 𑀯𑀺𑀬 𑀧𑀣𑀯𑀻 𑀲𑀡𑁆𑀞𑀳𑀢𑀺. 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑁄 𑀯𑀺𑀦𑀲𑁆𑀲𑀫𑀸𑀦𑁂 𑀮𑁄𑀓𑁂 𑀧𑀘𑁆𑀙𑀸 𑀯𑀺𑀦𑀲𑁆𑀲𑀢𑀺, 𑀲𑀡𑁆𑀞𑀳𑀫𑀸𑀦𑁂 𑀧𑀞𑀫𑀁 𑀲𑀡𑁆𑀞𑀳𑀢𑀺. 𑀢𑀢𑁆𑀣 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀳𑀼𑀢𑁆𑀯𑀸 𑀏𑀓𑁄 𑀧𑀤𑀼𑀫𑀺𑀦𑀺𑀕𑀘𑁆𑀙𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀲𑀘𑁂 𑀢𑀲𑁆𑀫𑀺𑀁 𑀓𑀧𑁆𑀧𑁂 𑀩𑀼𑀤𑁆𑀥𑁄 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀧𑀼𑀧𑁆𑀨𑀁 𑀉𑀧𑁆𑀧𑀚𑁆𑀚𑀢𑀺. 𑀦𑁄 𑀘𑁂, 𑀦𑀼𑀧𑁆𑀧𑀚𑁆𑀚𑀢𑀺. 𑀉𑀧𑁆𑀧𑀚𑁆𑀚𑀫𑀸𑀦𑀜𑁆𑀘 𑀲𑀘𑁂 𑀏𑀓𑁄 𑀩𑀼𑀤𑁆𑀥𑁄 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀏𑀓𑀁 𑀉𑀧𑁆𑀧𑀚𑁆𑀚𑀢𑀺. 𑀲𑀘𑁂 𑀤𑁆𑀯𑁂, 𑀢𑀬𑁄, 𑀘𑀢𑁆𑀢𑀸𑀭𑁄, 𑀧𑀜𑁆𑀘 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀦𑁆𑀢𑀺, 𑀧𑀜𑁆𑀘 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀸𑀦𑀺 𑀘 𑀔𑁄 𑀏𑀓𑀲𑁆𑀫𑀺𑀁𑀬𑁂𑀯 𑀦𑀸𑀴𑁂 𑀓𑀡𑁆𑀡𑀺𑀓𑀸𑀩𑀤𑁆𑀥𑀸𑀦𑀺 𑀳𑀼𑀢𑁆𑀯𑀸. 𑀲𑀼𑀤𑁆𑀥𑀸𑀯𑀸𑀲𑀩𑁆𑀭𑀳𑁆𑀫𑀸𑀦𑁄 ‘‘𑀆𑀬𑀸𑀫 ¶ , 𑀫𑀬𑀁 𑀫𑀸𑀭𑀺𑀲𑀸, 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀺, 𑀩𑀼𑀤𑁆𑀥𑀸𑀦𑀁 𑀅𑀦𑀺𑀩𑁆𑀩𑀢𑁆𑀢𑀦𑀓𑀧𑁆𑀧𑁂 𑀧𑀼𑀧𑁆𑀨𑀁 𑀦 𑀳𑁄𑀢𑀺. 𑀢𑁂 𑀧𑀦 𑀅𑀧𑀼𑀧𑁆𑀨𑀺𑀢𑀕𑀘𑁆𑀙𑀁 𑀤𑀺𑀲𑁆𑀯𑀸 𑁋 ‘‘𑀅𑀦𑁆𑀥𑀓𑀸𑀭𑁄 𑀯𑀢 𑀪𑁄 𑀮𑁄𑀓𑁄 𑀪𑀯𑀺𑀲𑁆𑀲𑀢𑀺, 𑀫𑀢𑀸 𑀫𑀢𑀸 𑀲𑀢𑁆𑀢𑀸 𑀅𑀧𑀸𑀬𑁂 𑀧𑀽𑀭𑁂𑀲𑁆𑀲𑀦𑁆𑀢𑀺, 𑀙 𑀤𑁂𑀯𑀮𑁄𑀓𑀸 𑀦𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀼𑀜𑁆𑀜𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀦𑀢𑁆𑀢𑀫𑀦𑀸 𑀳𑁄𑀦𑁆𑀢𑀺. 𑀧𑀼𑀧𑁆𑀨𑀺𑀢𑀓𑀸𑀮𑁂 𑀧𑀦 𑀧𑀼𑀧𑁆𑀨𑀁 𑀤𑀺𑀲𑁆𑀯𑀸 𑁋 ‘‘𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑁂𑀲𑀼 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀦𑁆𑀢𑁂𑀲𑀼 𑀦𑀺𑀓𑁆𑀔𑀫𑀦𑁆𑀢𑁂𑀲𑀼 𑀲𑀫𑁆𑀩𑀼𑀚𑁆𑀛𑀦𑁆𑀢𑁂𑀲𑀼 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀦𑁆𑀢𑁂𑀲𑀼 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀦𑁆𑀢𑁂𑀲𑀼 𑀤𑁂𑀯𑁄𑀭𑁄𑀳𑀦𑀁 𑀓𑀭𑁄𑀦𑁆𑀢𑁂𑀲𑀼 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑁆𑀚𑀦𑁆𑀢𑁂𑀲𑀼 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑁂𑀲𑀼 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀓𑀫𑁆𑀧𑀦𑀸𑀤𑀻𑀦𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀤𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺 𑀘 ‘‘𑀘𑀢𑁆𑀢𑀸𑀭𑁄 𑀅𑀧𑀸𑀬𑀸 𑀧𑀭𑀺𑀳𑀸𑀬𑀺𑀲𑁆𑀲𑀦𑁆𑀢𑀺, 𑀙 𑀤𑁂𑀯𑀮𑁄𑀓𑀸 𑀦𑀯 𑀩𑁆𑀭𑀳𑁆𑀫𑀮𑁄𑀓𑀸 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻’’𑀢𑀺 𑀘 𑀅𑀢𑁆𑀢𑀫𑀦𑀸 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀩𑁆𑀭𑀳𑁆𑀫𑀮𑁄𑀓𑀁 𑀕𑀘𑁆𑀙𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀪𑀤𑁆𑀤𑀓𑀧𑁆𑀧𑁂 𑀧𑀜𑁆𑀘 𑀧𑀤𑀼𑀫𑀸𑀦𑀺 𑀉𑀧𑁆𑀧𑀚𑁆𑀚𑀺𑀁𑀲𑀼. 𑀢𑁂𑀲𑀁 𑀦𑀺𑀫𑀺𑀢𑁆𑀢𑀸𑀦𑀁 𑀆𑀦𑀼𑀪𑀸𑀯𑁂𑀦 𑀘𑀢𑁆𑀢𑀸𑀭𑁄 𑀩𑀼𑀤𑁆𑀥𑀸 𑀉𑀧𑁆𑀧𑀦𑁆𑀦𑀸, 𑀧𑀜𑁆𑀘𑀫𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀲𑀼𑀤𑁆𑀥𑀸𑀯𑀸𑀲𑀩𑁆𑀭𑀳𑁆𑀫𑀸𑀦𑁄𑀧𑀺 ¶ 𑀢𑀸𑀦𑀺 𑀧𑀤𑀼𑀫𑀸𑀦𑀺 𑀤𑀺𑀲𑁆𑀯𑀸 𑀇𑀫𑀫𑀢𑁆𑀣𑀁 𑀚𑀸𑀦𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀜𑁆𑀜𑁂𑀲𑀫𑁆𑀧𑀺 𑀧𑀸𑀓𑀝𑀁 𑀳𑁄𑀢𑀻’’𑀢𑀺.

𑀆𑀬𑀼𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸

𑁫-𑁭. 𑀇𑀢𑀺 ¶ 𑀪𑀕𑀯𑀸 𑁋 ‘‘𑀇𑀢𑁄 𑀲𑁄, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀧𑁆𑀧𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁 𑀚𑀸𑀢𑀺𑀧𑀭𑀺𑀘𑁆𑀙𑁂𑀤𑀸𑀤𑀺𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑀯𑀺𑀧𑀲𑁆𑀲𑀻, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀬𑀼𑀧𑀭𑀺𑀘𑁆𑀙𑁂𑀤𑁂 𑀧𑀭𑀺𑀢𑁆𑀢𑀁 𑀮𑀳𑀼𑀓𑀦𑁆𑀢𑀺 𑀉𑀪𑀬𑀫𑁂𑀢𑀁 𑀅𑀧𑁆𑀧𑀓𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀬𑀜𑁆𑀳𑀺 𑀅𑀧𑁆𑀧𑀓𑀁, 𑀢𑀁 𑀧𑀭𑀺𑀢𑁆𑀢𑀜𑁆𑀘𑁂𑀯 𑀮𑀳𑀼𑀓𑀜𑁆𑀘 𑀳𑁄𑀢𑀺.

𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄𑀢𑀺 𑀯𑀲𑁆𑀲𑀲𑀢𑀢𑁄 𑀯𑀸 𑀉𑀧𑀭𑀺 𑀅𑀧𑁆𑀧𑀁, 𑀅𑀜𑁆𑀜𑀁 𑀯𑀲𑁆𑀲𑀲𑀢𑀁 𑀅𑀧𑀢𑁆𑀯𑀸 𑀯𑀻𑀲𑀁 𑀯𑀸 𑀢𑀺𑀁𑀲𑀁 𑀯𑀸 𑀘𑀢𑁆𑀢𑀸𑀮𑀻𑀲𑀁 𑀯𑀸 𑀧𑀡𑁆𑀡𑀸𑀲𑀁 𑀯𑀸 𑀲𑀝𑁆𑀞𑀺 𑀯𑀸 𑀯𑀲𑁆𑀲𑀸𑀦𑀺 𑀚𑀻𑀯𑀢𑀺. 𑀏𑀯𑀁 𑀤𑀻𑀖𑀸𑀬𑀼𑀓𑁄 𑀧𑀦 𑀅𑀢𑀺𑀤𑀼𑀮𑁆𑀮𑀪𑁄, 𑀅𑀲𑀼𑀓𑁄 𑀓𑀺𑀭 𑀏𑀯𑀁 𑀘𑀺𑀭𑀁 𑀚𑀻𑀯𑀢𑀻𑀢𑀺 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀤𑀝𑁆𑀞𑀩𑁆𑀩𑁄 𑀳𑁄𑀢𑀺. 𑀢𑀢𑁆𑀣 𑀯𑀺𑀲𑀸𑀔𑀸 𑀉𑀧𑀸𑀲𑀺𑀓𑀸 𑀯𑀻𑀲𑀯𑀲𑁆𑀲𑀲𑀢𑀁 𑀚𑀻𑀯𑀢𑀺, 𑀢𑀣𑀸 𑀧𑁄𑀓𑁆𑀔𑀭𑀲𑀸𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀩𑁆𑀭𑀳𑁆𑀫𑀸𑀬𑀼 𑀩𑁆𑀭𑀸𑀳𑁆𑀫𑀡𑁄, 𑀲𑁂𑀮𑁄 𑀩𑁆𑀭𑀸𑀳𑁆𑀫𑀡𑁄, 𑀩𑀸𑀯𑀭𑀺𑀬𑀩𑁆𑀭𑀸𑀳𑁆𑀫𑀡𑁄, 𑀆𑀦𑀦𑁆𑀤𑀢𑁆𑀣𑁂𑀭𑁄, 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄𑀢𑀺. 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀧𑀦 𑀯𑀲𑁆𑀲𑀲𑀢𑀜𑁆𑀘𑁂𑀯 𑀧𑀡𑁆𑀡𑀸𑀲𑀜𑁆𑀘 𑀯𑀲𑁆𑀲𑀸𑀦𑀺, 𑀩𑀸𑀓𑀼𑀮𑀢𑁆𑀣𑁂𑀭𑁄 𑀯𑀲𑁆𑀲𑀲𑀢𑀜𑁆𑀘𑁂𑀯 𑀲𑀝𑁆𑀞𑀺 𑀘 𑀯𑀲𑁆𑀲𑀸𑀦𑀺. 𑀅𑀬𑀁 𑀲𑀩𑁆𑀩𑀤𑀻𑀖𑀸𑀬𑀼𑀓𑁄. 𑀲𑁄𑀧𑀺 𑀤𑁆𑀯𑁂 𑀯𑀲𑁆𑀲𑀲𑀢𑀸𑀦𑀺 𑀦 𑀚𑀻𑀯𑀢𑀺.

𑀯𑀺𑀧𑀲𑁆𑀲𑀻𑀆𑀤𑀬𑁄 ¶ 𑀧𑀦 𑀲𑀩𑁆𑀩𑁂𑀧𑀺 𑀩𑁄𑀥𑀺𑀲𑀢𑁆𑀢𑀸 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑁂𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀅𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑁂𑀦 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀁𑀲𑀼. 𑀢𑁂𑀦 𑀘𑀺𑀢𑁆𑀢𑁂𑀦 𑀕𑀳𑀺𑀢𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀆𑀬𑀼, 𑀇𑀢𑀺 𑀲𑀩𑁆𑀩𑁂 𑀩𑀼𑀤𑁆𑀥𑀸 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀬𑀼𑀓𑀸. 𑀢𑁂 𑀓𑀲𑁆𑀫𑀸 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀦 𑀅𑀝𑁆𑀞𑀁𑀲𑀼? 𑀉𑀢𑀼𑀪𑁄𑀚𑀦𑀯𑀺𑀧𑀢𑁆𑀢𑀺𑀬𑀸. 𑀉𑀢𑀼𑀪𑁄𑀚𑀦𑀯𑀲𑁂𑀦 𑀳𑀺 𑀆𑀬𑀼 𑀳𑀸𑀬𑀢𑀺𑀧𑀺 𑀯𑀟𑁆𑀠𑀢𑀺𑀧𑀺.

𑀢𑀢𑁆𑀣 𑀬𑀤𑀸 𑀭𑀸𑀚𑀸𑀦𑁄 𑀅𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺, 𑀢𑀤𑀸 𑀉𑀧𑀭𑀸𑀚𑀸𑀦𑁄, 𑀲𑁂𑀦𑀸𑀧𑀢𑀺, 𑀲𑁂𑀝𑁆𑀞𑀺, 𑀲𑀓𑀮𑀦𑀕𑀭𑀁, 𑀲𑀓𑀮𑀭𑀝𑁆𑀞𑀁 𑀅𑀥𑀫𑁆𑀫𑀺𑀓𑀫𑁂𑀯 𑀳𑁄𑀢𑀺; 𑀅𑀣 𑀢𑁂𑀲𑀁 𑀆𑀭𑀓𑁆𑀔𑀤𑁂𑀯𑀢𑀸, 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀫𑀺𑀢𑁆𑀢𑀸 𑀪𑀽𑀫𑀝𑁆𑀞𑀤𑁂𑀯𑀢𑀸, 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀫𑀺𑀢𑁆𑀢𑀸 𑀆𑀓𑀸𑀲𑀝𑁆𑀞𑀓𑀤𑁂𑀯𑀢𑀸, 𑀆𑀓𑀸𑀲𑀝𑁆𑀞𑀓𑀤𑁂𑀯𑀢𑀸𑀦𑀁 𑀫𑀺𑀢𑁆𑀢𑀸 𑀉𑀡𑁆𑀳𑀯𑀮𑀸𑀳𑀓𑀸 𑀤𑁂𑀯𑀢𑀸, 𑀢𑀸𑀲𑀁 𑀫𑀺𑀢𑁆𑀢𑀸 𑀅𑀩𑁆𑀪𑀯𑀮𑀸𑀳𑀓𑀸 𑀤𑁂𑀯𑀢𑀸, 𑀢𑀸𑀲𑀁 𑀫𑀺𑀢𑁆𑀢𑀸 𑀲𑀻𑀢𑀯𑀮𑀸𑀳𑀓𑀸 𑀤𑁂𑀯𑀢𑀸, 𑀢𑀸𑀲𑀁 𑀫𑀺𑀢𑁆𑀢𑀸 𑀯𑀲𑁆𑀲𑀯𑀮𑀸𑀳𑀓𑀸 𑀤𑁂𑀯𑀢𑀸, 𑀢𑀸𑀲𑀁 𑀫𑀺𑀢𑁆𑀢𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 ¶ 𑀤𑁂𑀯𑀢𑀸, 𑀢𑀸𑀲𑀁 𑀫𑀺𑀢𑁆𑀢𑀸 𑀢𑀸𑀯𑀢𑀺𑀁𑀲𑀸 𑀤𑁂𑀯𑀢𑀸, 𑀢𑀸𑀲𑀁 𑀫𑀺𑀢𑁆𑀢𑀸 𑀬𑀸𑀫𑀸 𑀤𑁂𑀯𑀢𑀸𑀢𑀺 𑀏𑀯𑀫𑀸𑀤𑀺. 𑀏𑀯𑀁 𑀬𑀸𑀯 𑀪𑀯𑀕𑁆𑀕𑀸 𑀞𑀧𑁂𑀢𑁆𑀯𑀸 𑀅𑀭𑀺𑀬𑀲𑀸𑀯𑀓𑁂 𑀲𑀩𑁆𑀩𑀸 𑀤𑁂𑀯𑀩𑁆𑀭𑀳𑁆𑀫𑀧𑀭𑀺𑀲𑀸𑀧𑀺 𑀅𑀥𑀫𑁆𑀫𑀺𑀓𑀸𑀯 𑀳𑁄𑀦𑁆𑀢𑀺. 𑀢𑀸𑀲𑀁 𑀅𑀥𑀫𑁆𑀫𑀺𑀓𑀢𑀸𑀬 𑀯𑀺𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀳𑀭𑀦𑁆𑀢𑀺, 𑀯𑀸𑀢𑁄 𑀬𑀣𑀸𑀫𑀕𑁆𑀕𑁂𑀦 𑀦 𑀯𑀸𑀬𑀢𑀺, 𑀅𑀬𑀣𑀸𑀫𑀕𑁆𑀕𑁂𑀦 𑀯𑀸𑀬𑀦𑁆𑀢𑁄 𑀆𑀓𑀸𑀲𑀝𑁆𑀞𑀓𑀯𑀺𑀫𑀸𑀦𑀸𑀦𑀺 𑀔𑁄𑀪𑁂𑀢𑀺, 𑀯𑀺𑀫𑀸𑀦𑁂𑀲𑀼 𑀔𑁄𑀪𑀺𑀢𑁂𑀲𑀼 𑀤𑁂𑀯𑀢𑀸𑀦𑀁 𑀓𑀻𑀴𑀦𑀢𑁆𑀣𑀸𑀬 𑀘𑀺𑀢𑁆𑀢𑀸𑀦𑀺 𑀦 𑀦𑀫𑀦𑁆𑀢𑀺, 𑀤𑁂𑀯𑀢𑀸𑀦𑀁 𑀓𑀻𑀴𑀦𑀢𑁆𑀣𑀸𑀬 𑀘𑀺𑀢𑁆𑀢𑁂𑀲𑀼 𑀅𑀦𑀫𑀦𑁆𑀢𑁂𑀲𑀼 ¶ 𑀲𑀻𑀢𑀼𑀡𑁆𑀳𑀪𑁂𑀤𑁄 𑀉𑀢𑀼 𑀬𑀣𑀸𑀓𑀸𑀮𑁂𑀦 𑀦 𑀲𑀫𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁 𑀅𑀲𑀫𑁆𑀧𑀚𑁆𑀚𑀦𑁆𑀢𑁂 𑀦 𑀲𑀫𑁆𑀫𑀸 𑀤𑁂𑀯𑁄 𑀯𑀲𑁆𑀲𑀢𑀺, 𑀓𑀤𑀸𑀘𑀺 𑀯𑀲𑁆𑀲𑀢𑀺, 𑀓𑀤𑀸𑀘𑀺 𑀦 𑀯𑀲𑁆𑀲𑀢𑀺; 𑀓𑀢𑁆𑀣𑀘𑀺 𑀯𑀲𑁆𑀲𑀢𑀺, 𑀓𑀢𑁆𑀣𑀘𑀺 𑀦 𑀯𑀲𑁆𑀲𑀢𑀺, 𑀯𑀲𑁆𑀲𑀦𑁆𑀢𑁄𑀧𑀺 𑀯𑀧𑁆𑀧𑀓𑀸𑀮𑁂 𑀅𑀗𑁆𑀓𑀼𑀭𑀓𑀸𑀮𑁂 𑀦𑀸𑀴𑀓𑀸𑀮𑁂 𑀧𑀼𑀧𑁆𑀨𑀓𑀸𑀮𑁂 𑀔𑀻𑀭𑀕𑁆𑀕𑀳𑀡𑀸𑀤𑀺𑀓𑀸𑀮𑁂𑀲𑀼 𑀬𑀣𑀸 𑀬𑀣𑀸 𑀲𑀲𑁆𑀲𑀸𑀦𑀁 𑀉𑀧𑀓𑀸𑀭𑁄 𑀦 𑀳𑁄𑀢𑀺, 𑀢𑀣𑀸 𑀢𑀣𑀸 𑀯𑀲𑁆𑀲𑀢𑀺 𑀘 𑀯𑀺𑀕𑀘𑁆𑀙𑀢𑀺 𑀘, 𑀢𑁂𑀦 𑀲𑀲𑁆𑀲𑀸𑀦𑀺 𑀯𑀺𑀲𑀫𑀧𑀸𑀓𑀸𑀦𑀺 𑀳𑁄𑀦𑁆𑀢𑀺, 𑀯𑀺𑀕𑀢𑀕𑀦𑁆𑀥𑀯𑀡𑁆𑀡𑀭𑀲𑀸𑀤𑀺𑀲𑀫𑁆𑀧𑀦𑁆𑀦𑀸𑀦𑀺. 𑀏𑀓𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀢𑀡𑁆𑀟𑀼𑀮𑁂𑀲𑀼𑀧𑀺 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀪𑀢𑁆𑀢𑀁 𑀉𑀢𑁆𑀢𑀡𑁆𑀟𑀼𑀮𑀁 𑀳𑁄𑀢𑀺, 𑀏𑀓𑀲𑁆𑀫𑀺𑀁 𑀅𑀢𑀺𑀓𑀺𑀮𑀺𑀦𑁆𑀦𑀁, 𑀏𑀓𑀲𑁆𑀫𑀺𑀁 𑀲𑀫𑀧𑀸𑀓𑀁. 𑀢𑀁 𑀧𑀭𑀺𑀪𑀼𑀢𑁆𑀢𑀁 𑀓𑀼𑀘𑁆𑀙𑀺𑀬𑀫𑁆𑀧𑀺 𑀢𑀻𑀳𑀸𑀓𑀸𑀭𑁂𑀳𑀺 𑀧𑀘𑁆𑀘𑀢𑀺. 𑀢𑁂𑀦 𑀲𑀢𑁆𑀢𑀸 𑀩𑀳𑁆𑀯𑀸𑀩𑀸𑀥𑀸 𑀘𑁂𑀯 𑀳𑁄𑀦𑁆𑀢𑀺, 𑀅𑀧𑁆𑀧𑀸𑀬𑀼𑀓𑀸 𑀘. 𑀏𑀯𑀁 𑀢𑀸𑀯 𑀉𑀢𑀼𑀪𑁄𑀚𑀦𑀯𑀲𑁂𑀦 𑀆𑀬𑀼 𑀳𑀸𑀬𑀢𑀺.

𑀬𑀤𑀸 ¶ 𑀧𑀦 𑀭𑀸𑀚𑀸𑀦𑁄 𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺, 𑀢𑀤𑀸 𑀉𑀧𑀭𑀸𑀚𑀸𑀦𑁄𑀧𑀺 𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀻𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀩𑁆𑀩𑁂𑀧𑀺 𑀥𑀫𑁆𑀫𑀺𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀁 𑀥𑀫𑁆𑀫𑀺𑀓𑀢𑁆𑀢𑀸 𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀳𑀭𑀦𑁆𑀢𑀺, 𑀬𑀣𑀸𑀫𑀕𑁆𑀕𑁂𑀦 𑀯𑀸𑀢𑁄 𑀯𑀸𑀬𑀢𑀺, 𑀬𑀣𑀸𑀫𑀕𑁆𑀕𑁂𑀦 𑀯𑀸𑀬𑀦𑁆𑀢𑁄 𑀆𑀓𑀸𑀲𑀝𑁆𑀞𑀓𑀯𑀺𑀫𑀸𑀦𑀸𑀦𑀺 𑀦 𑀔𑁄𑀪𑁂𑀢𑀺, 𑀢𑁂𑀲𑀁 𑀅𑀔𑁄𑀪𑀸 𑀤𑁂𑀯𑀢𑀸𑀦𑀁 𑀓𑀻𑀴𑀦𑀢𑁆𑀣𑀸𑀬 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺. 𑀏𑀯𑀁 𑀓𑀸𑀮𑁂𑀦 𑀉𑀢𑀼 𑀲𑀫𑁆𑀧𑀚𑁆𑀚𑀢𑀺, 𑀤𑁂𑀯𑁄 𑀲𑀫𑁆𑀫𑀸 𑀯𑀲𑁆𑀲𑀢𑀺, 𑀯𑀧𑁆𑀧𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀲𑁆𑀲𑀸𑀦𑀁 𑀉𑀧𑀓𑀸𑀭𑀁 𑀓𑀭𑁄𑀦𑁆𑀢𑁄 𑀓𑀸𑀮𑁂 𑀯𑀲𑁆𑀲𑀢𑀺, 𑀓𑀸𑀮𑁂 𑀯𑀺𑀕𑀘𑁆𑀙𑀢𑀺, 𑀢𑁂𑀦 𑀲𑀲𑁆𑀲𑀸𑀦𑀺 𑀲𑀫𑀧𑀸𑀓𑀸𑀦𑀺 𑀲𑀼𑀕𑀦𑁆𑀥𑀸𑀦𑀺 𑀲𑀼𑀯𑀡𑁆𑀡𑀸𑀦𑀺 𑀲𑀼𑀭𑀲𑀸𑀦𑀺 𑀑𑀚𑀯𑀦𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀢𑁂𑀳𑀺 𑀲𑀫𑁆𑀧𑀸𑀤𑀺𑀢𑀁 𑀪𑁄𑀚𑀦𑀁 𑀧𑀭𑀺𑀪𑀼𑀢𑁆𑀢𑀫𑁆𑀧𑀺 𑀲𑀫𑁆𑀫𑀸 𑀧𑀭𑀺𑀧𑀸𑀓𑀁 𑀕𑀘𑁆𑀙𑀢𑀺 ¶ , 𑀢𑁂𑀦 𑀲𑀢𑁆𑀢𑀸 𑀅𑀭𑁄𑀕𑀸 𑀤𑀻𑀖𑀸𑀬𑀼𑀓𑀸 𑀳𑁄𑀦𑁆𑀢𑀺. 𑀏𑀯𑀁 𑀉𑀢𑀼𑀪𑁄𑀚𑀦𑀯𑀲𑁂𑀦 𑀆𑀬𑀼 𑀯𑀟𑁆𑀠𑀢𑀺.

𑀢𑀢𑁆𑀣 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀓𑀸𑀮𑁂 𑀦𑀺𑀩𑁆𑀩𑀢𑁆𑀢𑁄, 𑀲𑀺𑀔𑀻 𑀲𑀢𑁆𑀢𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀓𑀸𑀮𑁂𑀢𑀺 𑀇𑀤𑀁 𑀅𑀦𑀼𑀧𑀼𑀩𑁆𑀩𑁂𑀦 𑀧𑀭𑀺𑀳𑀻𑀦𑀲𑀤𑀺𑀲𑀁 𑀓𑀢𑀁, 𑀦 𑀧𑀦 𑀏𑀯𑀁 𑀧𑀭𑀺𑀳𑀻𑀦𑀁, 𑀯𑀟𑁆𑀠𑀺𑀢𑁆𑀯𑀸 𑀯𑀟𑁆𑀠𑀺𑀢𑁆𑀯𑀸 𑀧𑀭𑀺𑀳𑀻𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀣𑀁? 𑀇𑀫𑀲𑁆𑀫𑀺𑀁 𑀢𑀸𑀯 𑀓𑀧𑁆𑀧𑁂 𑀓𑀓𑀼𑀲𑀦𑁆𑀥𑁄 𑀪𑀕𑀯𑀸 𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀓𑀸𑀮𑁂 𑀦𑀺𑀩𑁆𑀩𑀢𑁆𑀢𑁄, 𑀆𑀬𑀼𑀧𑁆𑀧𑀫𑀸𑀡𑀁 𑀧𑀜𑁆𑀘 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀘𑀢𑁆𑀢𑀸𑀭𑀺 𑀞𑀢𑁆𑀯𑀸 𑀧𑀜𑁆𑀘𑀫𑁂 𑀯𑀺𑀚𑁆𑀚𑀫𑀸𑀦𑁂𑀬𑁂𑀯 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀢𑀁 𑀆𑀬𑀼 𑀧𑀭𑀺𑀳𑀸𑀬𑀫𑀸𑀦𑀁 𑀤𑀲𑀯𑀲𑁆𑀲𑀓𑀸𑀮𑀁 𑀧𑀢𑁆𑀯𑀸 𑀧𑀼𑀦 𑀯𑀟𑁆𑀠𑀫𑀸𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀳𑀼𑀢𑁆𑀯𑀸 𑀢𑀢𑁄 𑀧𑀭𑀺𑀳𑀸𑀬𑀫𑀸𑀦𑀁 𑀢𑀺𑀁𑀲𑀯𑀲𑁆𑀲𑀲𑀳𑀲𑁆𑀲𑀓𑀸𑀮𑁂 𑀞𑀺𑀢𑀁; 𑀢𑀤𑀸 𑀓𑁄𑀡𑀸𑀕𑀫𑀦𑁄 𑀪𑀕𑀯𑀸 𑀦𑀺𑀩𑁆𑀩𑀢𑁆𑀢𑁄. 𑀢𑀲𑁆𑀫𑀺𑀫𑁆𑀧𑀺 𑀢𑀣𑁂𑀯 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀁 𑀆𑀬𑀼 𑀤𑀲𑀯𑀲𑁆𑀲𑀓𑀸𑀮𑀁 𑀧𑀢𑁆𑀯𑀸 𑀧𑀼𑀦 𑀯𑀟𑁆𑀠𑀫𑀸𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀳𑀼𑀢𑁆𑀯𑀸 𑀧𑀭𑀺𑀳𑀸𑀬𑀺𑀢𑁆𑀯𑀸 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀓𑀸𑀮𑁂 𑀞𑀺𑀢𑀁; 𑀢𑀤𑀸 𑀓𑀲𑁆𑀲𑀧𑁄 𑀪𑀕𑀯𑀸 𑀦𑀺𑀩𑁆𑀩𑀢𑁆𑀢𑁄. 𑀢𑀲𑁆𑀫𑀺𑀫𑁆𑀧𑀺 𑀢𑀣𑁂𑀯 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀁 𑀆𑀬𑀼 𑀤𑀲𑀯𑀲𑁆𑀲𑀓𑀸𑀮𑀁 𑀧𑀢𑁆𑀯𑀸 𑀧𑀼𑀦 𑀯𑀟𑁆𑀠𑀫𑀸𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀳𑀼𑀢𑁆𑀯𑀸 𑀧𑀭𑀺𑀳𑀸𑀬𑀺𑀢𑁆𑀯𑀸 𑀯𑀲𑁆𑀲𑀲𑀢𑀓𑀸𑀮𑀁 𑀧𑀢𑁆𑀢𑀁, 𑀅𑀣 𑀅𑀫𑁆𑀳𑀸𑀓𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀦𑀺𑀩𑁆𑀩𑀢𑁆𑀢𑁄. 𑀏𑀯𑀁 𑀅𑀦𑀼𑀧𑀼𑀩𑁆𑀩𑁂𑀦 𑀧𑀭𑀺𑀳𑀸𑀬𑀺𑀢𑁆𑀯𑀸 𑀧𑀭𑀺𑀳𑀸𑀬𑀺𑀢𑁆𑀯𑀸 𑀯𑀟𑁆𑀠𑀺𑀢𑁆𑀯𑀸 𑀯𑀟𑁆𑀠𑀺𑀢𑁆𑀯𑀸 𑀧𑀭𑀺𑀳𑀻𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀬𑀁 𑀬𑀁 𑀆𑀬𑀼𑀧𑀭𑀺𑀫𑀸𑀡𑁂𑀲𑀼 ¶ 𑀫𑀦𑀼𑀲𑁆𑀲𑁂𑀲𑀼 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀢𑀁 𑀢𑀤𑁂𑀯 𑀆𑀬𑀼𑀧𑀭𑀺𑀫𑀸𑀡𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀆𑀬𑀼𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑁄𑀥𑀺𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸

𑁮. 𑀩𑁄𑀥𑀺𑀧𑀭𑀺𑀘𑁆𑀙𑁂𑀤𑁂 ¶ 𑀧𑀦 𑀧𑀸𑀝𑀮𑀺𑀬𑀸 𑀫𑀽𑀮𑁂𑀢𑀺 𑀧𑀸𑀝𑀮𑀺𑀭𑀼𑀓𑁆𑀔𑀲𑁆𑀲 𑀳𑁂𑀝𑁆𑀞𑀸. 𑀢𑀲𑁆𑀲𑀸 𑀧𑀦 𑀧𑀸𑀝𑀮𑀺𑀬𑀸 𑀔𑀦𑁆𑀥𑁄 𑀢𑀁 𑀤𑀺𑀯𑀲𑀁 𑀧𑀡𑁆𑀡𑀸𑀲𑀭𑀢𑀦𑁄 𑀳𑀼𑀢𑁆𑀯𑀸 𑀅𑀩𑁆𑀪𑀼𑀕𑁆𑀕𑀢𑁄, 𑀲𑀸𑀔𑀸 𑀧𑀡𑁆𑀡𑀸𑀲𑀭𑀢𑀦𑀸𑀢𑀺 𑀉𑀩𑁆𑀩𑁂𑀥𑁂𑀦 𑀭𑀢𑀦𑀲𑀢𑀁 𑀅𑀳𑁄𑀲𑀺. 𑀢𑀁 𑀤𑀺𑀯𑀲𑀜𑁆𑀘 𑀲𑀸 𑀧𑀸𑀝𑀮𑀺 𑀓𑀡𑁆𑀡𑀺𑀓𑀸𑀩𑀤𑁆𑀥𑁂𑀳𑀺 𑀯𑀺𑀬 𑀧𑀼𑀧𑁆𑀨𑁂𑀳𑀺 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀏𑀓𑀲𑀜𑁆𑀙𑀦𑁆𑀦𑀸 𑀅𑀳𑁄𑀲𑀺, 𑀤𑀺𑀩𑁆𑀩𑀕𑀦𑁆𑀥𑀁 𑀯𑀸𑀬𑀢𑀺. 𑀦 𑀓𑁂𑀯𑀮𑀜𑁆𑀘 𑀢𑀤𑀸 𑀅𑀬𑀫𑁂𑀯 𑀧𑀼𑀧𑁆𑀨𑀺𑀢𑀸, 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀲𑀩𑁆𑀩𑀧𑀸𑀝𑀮𑀺𑀬𑁄 𑀧𑀼𑀧𑁆𑀨𑀺𑀢𑀸. 𑀦 𑀓𑁂𑀯𑀮𑀜𑁆𑀘 𑀧𑀸𑀝𑀮𑀺𑀬𑁄, 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀲𑀩𑁆𑀩𑀭𑀼𑀓𑁆𑀔𑀸𑀦𑀁 𑀔𑀦𑁆𑀥𑁂𑀲𑀼 𑀔𑀦𑁆𑀥𑀧𑀤𑀼𑀫𑀸𑀦𑀺, 𑀲𑀸𑀔𑀸𑀲𑀼 𑀲𑀸𑀔𑀸𑀧𑀤𑀼𑀫𑀸𑀦𑀺, 𑀮𑀢𑀸𑀲𑀼 𑀮𑀢𑀸𑀧𑀤𑀼𑀫𑀸𑀦𑀺, 𑀆𑀓𑀸𑀲𑁂 𑀆𑀓𑀸𑀲𑀧𑀤𑀼𑀫𑀸𑀦𑀺 𑀧𑀼𑀧𑁆𑀨𑀺𑀢𑀸𑀦𑀺, 𑀧𑀣𑀯𑀺𑀢𑀮𑀁 ¶ 𑀪𑀺𑀦𑁆𑀤𑀺𑀢𑁆𑀯𑀸𑀧𑀺 𑀫𑀳𑀸𑀧𑀤𑀼𑀫𑀸𑀦𑀺 𑀉𑀝𑁆𑀞𑀺𑀢𑀸𑀦𑀺. 𑀫𑀳𑀸𑀲𑀫𑀼𑀤𑁆𑀤𑁄𑀧𑀺 𑀧𑀜𑁆𑀘𑀯𑀡𑁆𑀡𑁂𑀳𑀺 𑀧𑀤𑀼𑀫𑁂𑀳𑀺 𑀦𑀻𑀮𑀼𑀧𑁆𑀧𑀮𑀭𑀢𑁆𑀢𑀼𑀧𑁆𑀧𑀮𑁂𑀳𑀺 𑀘 𑀲𑀜𑁆𑀙𑀦𑁆𑀦𑁄 𑀅𑀳𑁄𑀲𑀺. 𑀲𑀓𑀮𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀁 𑀥𑀚𑀫𑀸𑀮𑀸𑀓𑀼𑀮𑀁 𑀢𑀢𑁆𑀣 𑀢𑀢𑁆𑀣 𑀦𑀺𑀩𑀤𑁆𑀥𑀧𑀼𑀧𑁆𑀨𑀤𑀸𑀫𑀯𑀺𑀲𑁆𑀲𑀝𑁆𑀞𑀫𑀸𑀮𑀸𑀕𑀼𑀴𑀯𑀺𑀧𑁆𑀧𑀓𑀺𑀡𑁆𑀡𑀁 𑀦𑀸𑀦𑀸𑀯𑀡𑁆𑀡𑀓𑀼𑀲𑀼𑀫𑀲𑀫𑀼𑀚𑁆𑀚𑀮𑀁 𑀦𑀦𑁆𑀤𑀦𑀯𑀦𑀘𑀺𑀢𑁆𑀢𑀮𑀢𑀸𑀯𑀦𑀫𑀺𑀲𑁆𑀲𑀓𑀯𑀦𑀨𑀸𑀭𑀼𑀲𑀓𑀯𑀦𑀲𑀤𑀺𑀲𑀁 𑀅𑀳𑁄𑀲𑀺. 𑀧𑀼𑀭𑀢𑁆𑀣𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀉𑀲𑁆𑀲𑀺𑀢𑀤𑁆𑀥𑀚𑀸 𑀧𑀘𑁆𑀙𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀁 𑀅𑀪𑀺𑀳𑀦𑀦𑁆𑀢𑀺. 𑀧𑀘𑁆𑀙𑀺𑀫𑀤𑀓𑁆𑀔𑀺𑀡𑀉𑀢𑁆𑀢𑀭𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀉𑀲𑁆𑀲𑀺𑀢𑀤𑁆𑀥𑀚𑀸 𑀤𑀓𑁆𑀔𑀺𑀡𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀁 𑀅𑀪𑀺𑀳𑀦𑀦𑁆𑀢𑀺. 𑀏𑀯𑀁 𑀅𑀜𑁆𑀜𑀫𑀜𑁆𑀜𑀲𑀺𑀭𑀻𑀲𑀫𑁆𑀧𑀢𑁆𑀢𑀸𑀦𑀺 𑀘𑀓𑁆𑀓𑀯𑀸𑀴𑀸𑀦𑀺 𑀅𑀳𑁂𑀲𑀼𑀁. 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀲𑀓𑀮𑀁 𑀩𑀼𑀤𑁆𑀥𑀕𑀼𑀡𑀯𑀺𑀪𑀯𑀲𑀺𑀭𑀺𑀁 𑀧𑀝𑀺𑀯𑀺𑀚𑁆𑀛𑀫𑀸𑀦𑁄 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀤𑁆𑀥𑁄.

‘‘𑀲𑀺𑀔𑀻, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀼𑀡𑁆𑀟𑀭𑀻𑀓𑀲𑁆𑀲 𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀧𑀤𑀯𑀡𑁆𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣 𑀧𑀦 𑀧𑀼𑀡𑁆𑀟𑀭𑀻𑀓𑁄𑀢𑀺 𑀲𑁂𑀢𑀫𑁆𑀩𑀭𑀼𑀓𑁆𑀔𑁄. 𑀢𑀲𑁆𑀲𑀸𑀧𑀺 𑀢𑀤𑁂𑀯 𑀧𑀭𑀺𑀫𑀸𑀡𑀁. 𑀢𑀁 𑀤𑀺𑀯𑀲𑀜𑁆𑀘 𑀲𑁄𑀧𑀺 𑀤𑀺𑀩𑁆𑀩𑀕𑀦𑁆𑀥𑁂𑀳𑀺 𑀧𑀼𑀧𑁆𑀨𑁂𑀳𑀺 𑀲𑀼𑀲𑀜𑁆𑀙𑀦𑁆𑀦𑁄 𑀅𑀳𑁄𑀲𑀺. 𑀦 𑀓𑁂𑀯𑀮𑀜𑁆𑀘 𑀧𑀼𑀧𑁆𑀨𑁂𑀳𑀺, 𑀨𑀮𑁂𑀳𑀺𑀧𑀺 𑀲𑀜𑁆𑀙𑀦𑁆𑀦𑁄 𑀅𑀳𑁄𑀲𑀺. 𑀢𑀲𑁆𑀲 𑀏𑀓𑀢𑁄 𑀢𑀭𑀼𑀡𑀸𑀦𑀺 𑀨𑀮𑀸𑀦𑀺, 𑀏𑀓𑀢𑁄 𑀫𑀚𑁆𑀛𑀺𑀫𑀸𑀦𑀺 𑀨𑀮𑀸𑀦𑀺, 𑀏𑀓𑀢𑁄 𑀦𑀸𑀢𑀺𑀧𑀓𑁆𑀓𑀸𑀦𑀺 𑀨𑀮𑀸𑀦𑀺, 𑀏𑀓𑀢𑁄 𑀲𑀼𑀧𑀓𑁆𑀓𑀸𑀦𑀺 𑀧𑀓𑁆𑀔𑀺𑀢𑁆𑀢𑀤𑀺𑀩𑁆𑀩𑁄𑀚𑀸𑀦𑀺 𑀯𑀺𑀬 𑀲𑀼𑀭𑀲𑀸𑀦𑀺 𑀑𑀮𑀫𑁆𑀩𑀦𑁆𑀢𑀺. 𑀬𑀣𑀸 𑀲𑁄, 𑀏𑀯𑀁 𑀲𑀓𑀮𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 ¶ 𑀧𑀼𑀧𑁆𑀨𑀽𑀧𑀕𑀭𑀼𑀓𑁆𑀔𑀸 𑀧𑀼𑀧𑁆𑀨𑁂𑀳𑀺, 𑀨𑀮𑀽𑀧𑀕𑀭𑀼𑀓𑁆𑀔𑀸 𑀨𑀮𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑀸 𑀅𑀳𑁂𑀲𑀼𑀁.

𑀲𑀸𑀮𑁄𑀢𑀺 𑀲𑀸𑀮𑀭𑀼𑀓𑁆𑀔𑁄. 𑀢𑀲𑁆𑀲𑀸𑀧𑀺 𑀢𑀤𑁂𑀯 𑀧𑀭𑀺𑀫𑀸𑀡𑀁, 𑀢𑀣𑁂𑀯 𑀧𑀼𑀧𑁆𑀨𑀲𑀺𑀭𑀻𑀯𑀺𑀪𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀺𑀭𑀻𑀲𑀭𑀼𑀓𑁆𑀔𑁂𑀧𑀺 𑀏𑀲𑁂𑀯 𑀦𑀬𑁄. 𑀉𑀤𑀼𑀫𑁆𑀩𑀭𑀭𑀼𑀓𑁆𑀔𑁂 𑀧𑀼𑀧𑁆𑀨𑀸𑀦𑀺 ¶ 𑀦𑀸𑀳𑁂𑀲𑀼𑀁, 𑀨𑀮𑀯𑀺𑀪𑀽𑀢𑀺 𑀧𑀦𑁂𑀢𑁆𑀣 𑀅𑀫𑁆𑀩𑁂 𑀯𑀼𑀢𑁆𑀢𑀦𑀬𑀸𑀯, 𑀢𑀣𑀸 𑀦𑀺𑀕𑁆𑀭𑁄𑀥𑁂, 𑀢𑀣𑀸 𑀅𑀲𑁆𑀲𑀢𑁆𑀣𑁂. 𑀇𑀢𑀺 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀏𑀓𑁄𑀯 𑀧𑀮𑁆𑀮𑀗𑁆𑀓𑁄, 𑀭𑀼𑀓𑁆𑀔𑀸 𑀧𑀦 𑀅𑀜𑁆𑀜𑁂𑀧𑀺 𑀳𑁄𑀦𑁆𑀢𑀺. 𑀢𑁂𑀲𑀼 𑀬𑀲𑁆𑀲 𑀬𑀲𑁆𑀲 𑀭𑀼𑀓𑁆𑀔𑀲𑁆𑀲 𑀫𑀽𑀮𑁂 𑀘𑀢𑀼𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀩𑁄𑀥𑀺𑀁 𑀩𑀼𑀤𑁆𑀥𑀸 𑀧𑀝𑀺𑀯𑀺𑀚𑁆𑀛𑀦𑁆𑀢𑀺, 𑀲𑁄 𑀲𑁄 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀩𑁄𑀥𑀺𑀧𑀭𑀺𑀘𑁆𑀙𑁂𑀤𑁄 𑀦𑀸𑀫.

𑀲𑀸𑀯𑀓𑀬𑀼𑀕𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸

𑁯. 𑀲𑀸𑀯𑀓𑀬𑀼𑀕𑀧𑀭𑀺𑀘𑁆𑀙𑁂𑀤𑁂 𑀧𑀦 𑀔𑀡𑁆𑀟𑀢𑀺𑀲𑁆𑀲𑀦𑁆𑀢𑀺 𑀔𑀡𑁆𑀟𑁄 𑀘 𑀢𑀺𑀲𑁆𑀲𑁄 𑀘. 𑀢𑁂𑀲𑀼 𑀔𑀡𑁆𑀟𑁄 𑀏𑀓𑀧𑀺𑀢𑀺𑀓𑁄 𑀓𑀦𑀺𑀝𑁆𑀞𑀪𑀸𑀢𑀸, 𑀢𑀺𑀲𑁆𑀲𑁄 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 ¶ . 𑀔𑀡𑁆𑀟𑁄 𑀧𑀜𑁆𑀜𑀸𑀧𑀸𑀭𑀫𑀺𑀬𑀸 𑀫𑀢𑁆𑀣𑀓𑀁 𑀧𑀢𑁆𑀢𑁄, 𑀢𑀺𑀲𑁆𑀲𑁄 𑀲𑀫𑀸𑀥𑀺𑀧𑀸𑀭𑀫𑀺𑀬𑀸 𑀫𑀢𑁆𑀣𑀓𑀁 𑀧𑀢𑁆𑀢𑁄. 𑀅𑀕𑁆𑀕𑀦𑁆𑀢𑀺 𑀞𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀅𑀯𑀲𑁂𑀲𑁂𑀳𑀺 𑀲𑀤𑁆𑀥𑀺𑀁 𑀅𑀲𑀤𑀺𑀲𑀕𑀼𑀡𑀢𑀸𑀬 𑀉𑀢𑁆𑀢𑀫𑀁. 𑀪𑀤𑁆𑀤𑀬𑀼𑀕𑀦𑁆𑀢𑀺 𑀅𑀕𑁆𑀕𑀢𑁆𑀢𑀸𑀬𑁂𑀯 𑀪𑀤𑁆𑀤𑀬𑀼𑀕𑀁. 𑀅𑀪𑀺𑀪𑀽𑀲𑀫𑁆𑀪𑀯𑀦𑁆𑀢𑀺 𑀅𑀪𑀺𑀪𑀽 𑀘 𑀲𑀫𑁆𑀪𑀯𑁄 𑀘. 𑀢𑁂𑀲𑀼 𑀅𑀪𑀺𑀪𑀽 𑀧𑀜𑁆𑀜𑀸𑀧𑀸𑀭𑀫𑀺𑀬𑀸 𑀫𑀢𑁆𑀣𑀓𑀁 𑀧𑀢𑁆𑀢𑁄. 𑀲𑀺𑀔𑀺𑀦𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀅𑀭𑀼𑀡𑀯𑀢𑀺𑀢𑁄 𑀩𑁆𑀭𑀳𑁆𑀫𑀮𑁄𑀓𑀁 𑀕𑀦𑁆𑀢𑁆𑀯𑀸 𑀩𑁆𑀭𑀳𑁆𑀫𑀧𑀭𑀺𑀲𑀸𑀬 𑀯𑀺𑀯𑀺𑀥𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀅𑀦𑁆𑀥𑀓𑀸𑀭𑁂𑀦 𑀨𑀭𑀺𑀢𑁆𑀯𑀸 𑁋 ‘‘𑀓𑀺𑀁 𑀇𑀤’’𑀦𑁆𑀢𑀺 𑀲𑀜𑁆𑀚𑀸𑀢𑀲𑀁𑀯𑁂𑀕𑀸𑀦𑀁 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑁋 ‘‘𑀲𑀩𑁆𑀩𑁂 𑀫𑁂 𑀭𑀽𑀧𑀜𑁆𑀘 𑀧𑀲𑁆𑀲𑀦𑁆𑀢𑀼, 𑀲𑀤𑁆𑀤𑀜𑁆𑀘 𑀲𑀼𑀡𑀦𑁆𑀢𑀽’’𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑁋 ‘‘𑀆𑀭𑀫𑁆𑀪𑀣𑀸’’𑀢𑀺 𑀕𑀸𑀣𑀸𑀤𑁆𑀯𑀬𑀁 (𑀲𑀁. 𑀦𑀺. 𑁧.𑁧𑁮𑁫) 𑀪𑀡𑀦𑁆𑀢𑁄 𑀲𑀤𑁆𑀤𑀁 𑀲𑀸𑀯𑁂𑀲𑀺. 𑀲𑀫𑁆𑀪𑀯𑁄 𑀲𑀫𑀸𑀥𑀺𑀧𑀸𑀭𑀫𑀺𑀬𑀸 𑀫𑀢𑁆𑀣𑀓𑀁 𑀧𑀢𑁆𑀢𑁄 𑀅𑀳𑁄𑀲𑀺.

𑀲𑁄𑀡𑀼𑀢𑁆𑀢𑀭𑀦𑁆𑀢𑀺 𑀲𑁄𑀡𑁄 𑀘 𑀉𑀢𑁆𑀢𑀭𑁄 𑀘. 𑀢𑁂𑀲𑀼𑀧𑀺 𑀲𑁄𑀡𑁄 𑀧𑀜𑁆𑀜𑀸𑀧𑀸𑀭𑀫𑀺𑀁 𑀧𑀢𑁆𑀢𑁄, 𑀉𑀢𑁆𑀢𑀭𑁄 𑀲𑀫𑀸𑀥𑀺𑀧𑀸𑀭𑀫𑀺𑀁 𑀧𑀢𑁆𑀢𑁄 𑀅𑀳𑁄𑀲𑀺. 𑀯𑀺𑀥𑀼𑀭𑀲𑀜𑁆𑀚𑀻𑀯𑀦𑁆𑀢𑀺 𑀯𑀺𑀥𑀼𑀭𑁄 𑀘 𑀲𑀜𑁆𑀚𑀻𑀯𑁄 𑀘. 𑀢𑁂𑀲𑀼 𑀯𑀺𑀥𑀼𑀭𑁄 𑀧𑀜𑁆𑀜𑀸𑀧𑀸𑀭𑀫𑀺𑀁 𑀧𑀢𑁆𑀢𑁄 𑀅𑀳𑁄𑀲𑀺, 𑀲𑀜𑁆𑀚𑀻𑀯𑁄 𑀲𑀫𑀸𑀥𑀺𑀧𑀸𑀭𑀫𑀺𑀁 𑀧𑀢𑁆𑀢𑁄. 𑀲𑀫𑀸𑀧𑀚𑁆𑀚𑀦𑀩𑀳𑀼𑀮𑁄 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀓𑀼𑀝𑀺𑀮𑁂𑀡𑀫𑀡𑁆𑀟𑀧𑀸𑀤𑀻𑀲𑀼 𑀲𑀫𑀸𑀧𑀢𑁆𑀢𑀺𑀩𑀮𑁂𑀦 𑀛𑀸𑀬𑀦𑁆𑀢𑁄 𑀏𑀓𑀤𑀺𑀯𑀲𑀁 𑀅𑀭𑀜𑁆𑀜𑁂 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺, 𑀅𑀣 𑀦𑀁 𑀯𑀦𑀓𑀫𑁆𑀫𑀺𑀓𑀸𑀤𑀬𑁄 ‘‘𑀫𑀢𑁄’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀛𑀸𑀧𑁂𑀲𑀼𑀁. 𑀲𑁄 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦 𑀲𑀫𑀸𑀧𑀢𑁆𑀢𑀺𑀢𑁄 𑀉𑀝𑁆𑀞𑀸𑀬 𑀘𑀻𑀯𑀭𑀸𑀦𑀺 𑀧𑀧𑁆𑀨𑁄𑀝𑁂𑀢𑁆𑀯𑀸 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀢𑀤𑀼𑀧𑀸𑀤𑀸𑀬𑁂𑀯 𑀘 𑀦𑀁 ‘‘𑀲𑀜𑁆𑀚𑀻𑀯𑁄’’𑀢𑀺 𑀲𑀜𑁆𑀚𑀸𑀦𑀺𑀁𑀲𑀼. 𑀪𑀺𑀬𑁆𑀬𑁄𑀲𑀼𑀢𑁆𑀢𑀭𑀦𑁆𑀢𑀺 𑀪𑀺𑀬𑁆𑀬𑁄𑀲𑁄 𑀘 𑀉𑀢𑁆𑀢𑀭𑁄 𑀘. 𑀢𑁂𑀲𑀼 𑀪𑀺𑀬𑁆𑀬𑁄𑀲𑁄 𑀧𑀜𑁆𑀜𑀸𑀬 𑀉𑀢𑁆𑀢𑀭𑁄, 𑀉𑀢𑁆𑀢𑀭𑁄 𑀲𑀫𑀸𑀥𑀺𑀦𑀸 𑀅𑀕𑁆𑀕𑁄 𑀅𑀳𑁄𑀲𑀺. 𑀢𑀺𑀲𑁆𑀲𑀪𑀸𑀭𑀤𑁆𑀯𑀸𑀚𑀦𑁆𑀢𑀺 𑀢𑀺𑀲𑁆𑀲𑁄 𑀘 𑀪𑀸𑀭𑀤𑁆𑀯𑀸𑀚𑁄 𑀘 ¶ . 𑀢𑁂𑀲𑀼 𑀢𑀺𑀲𑁆𑀲𑁄 𑀧𑀜𑁆𑀜𑀸𑀧𑀸𑀭𑀫𑀺𑀁 𑀧𑀢𑁆𑀢𑁄, 𑀪𑀸𑀭𑀤𑁆𑀯𑀸𑀚𑁄 𑀲𑀫𑀸𑀥𑀺𑀧𑀸𑀭𑀫𑀺𑀁 𑀧𑀢𑁆𑀢𑁄 𑀅𑀳𑁄𑀲𑀺 ¶ . 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀦𑁆𑀢𑀺 𑀲𑀸𑀭𑀺𑀧𑀼𑀢𑁆𑀢𑁄 𑀘 𑀫𑁄𑀕𑁆𑀕𑀮𑁆𑀮𑀸𑀦𑁄 𑀘. 𑀢𑁂𑀲𑀼 𑀲𑀸𑀭𑀺𑀧𑀼𑀢𑁆𑀢𑁄 𑀧𑀜𑁆𑀜𑀸𑀯𑀺𑀲𑀬𑁂, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀲𑀫𑀸𑀥𑀺𑀯𑀺𑀲𑀬𑁂 𑀅𑀕𑁆𑀕𑁄 𑀅𑀳𑁄𑀲𑀺. 𑀅𑀬𑀁 𑀲𑀸𑀯𑀓𑀬𑀼𑀕𑀧𑀭𑀺𑀘𑁆𑀙𑁂𑀤𑁄 𑀦𑀸𑀫.

𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸

𑁧𑁦. 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀧𑀭𑀺𑀘𑁆𑀙𑁂𑀤𑁂 ¶ 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀧𑀞𑀫𑀲𑀦𑁆𑀦𑀺𑀧𑀸𑀢𑁄 𑀘𑀢𑀼𑀭𑀗𑁆𑀕𑀺𑀓𑁄 𑀅𑀳𑁄𑀲𑀺, 𑀲𑀩𑁆𑀩𑁂 𑀏𑀳𑀺𑀪𑀺𑀓𑁆𑀔𑀽, 𑀲𑀩𑁆𑀩𑁂 𑀇𑀤𑁆𑀥𑀺𑀬𑀸 𑀦𑀺𑀩𑁆𑀩𑀢𑁆𑀢𑀧𑀢𑁆𑀢𑀘𑀻𑀯𑀭𑀸, 𑀲𑀩𑁆𑀩𑁂 𑀅𑀦𑀸𑀫𑀦𑁆𑀢𑀺𑀢𑀸𑀯 𑀆𑀕𑀢𑀸, 𑀇𑀢𑀺 𑀢𑁂 𑀘 𑀔𑁄 𑀧𑀦𑁆𑀦𑀭𑀲𑁂 𑀉𑀧𑁄𑀲𑀣𑀤𑀺𑀯𑀲𑁂. 𑀅𑀣 𑀲𑀢𑁆𑀣𑀸 𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀉𑀧𑁄𑀲𑀣𑀁 𑀑𑀲𑀸𑀭𑁂𑀲𑀺. 𑀤𑀼𑀢𑀺𑀬𑀢𑀢𑀺𑀬𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀣𑀸 𑀲𑁂𑀲𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀲𑀦𑁆𑀦𑀺𑀧𑀸𑀢𑁂𑀲𑀼. 𑀬𑀲𑁆𑀫𑀸 𑀧𑀦 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀧𑀞𑀫𑀩𑁄𑀥𑀺𑀬𑀸𑀯 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺, 𑀇𑀤𑀜𑁆𑀘 𑀲𑀼𑀢𑁆𑀢𑀁 𑀅𑀧𑀭𑀪𑀸𑀕𑁂 𑀯𑀼𑀢𑁆𑀢𑀁, 𑀢𑀲𑁆𑀫𑀸 ‘‘𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄’’𑀢𑀺 𑀅𑀦𑀺𑀝𑁆𑀞𑀧𑁂𑀢𑁆𑀯𑀸 ‘‘𑀅𑀳𑁄𑀲𑀻’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀅𑀟𑁆𑀠𑀢𑁂𑀴𑀲𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀻𑀢𑀺 𑀧𑀼𑀭𑀸𑀡𑀚𑀝𑀺𑀮𑀸𑀦𑀁 𑀲𑀳𑀲𑁆𑀲𑀁, 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀧𑀭𑀺𑀯𑀸𑀭𑀸𑀦𑀺 𑀅𑀟𑁆𑀠𑀢𑁂𑀬𑁆𑀬𑀲𑀢𑀸𑀦𑀻𑀢𑀺 𑀅𑀟𑁆𑀠𑀢𑁂𑀴𑀲𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀺. 𑀢𑀢𑁆𑀣 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀯𑀢𑁆𑀣𑀼𑀁 𑀓𑀣𑁂𑀢𑁆𑀯𑀸 𑀧𑀩𑁆𑀩𑀚𑁆𑀚𑀸 𑀤𑀻𑀧𑁂𑀢𑀩𑁆𑀩𑀸. 𑀧𑀩𑁆𑀩𑀚𑀺𑀢𑀸𑀦𑀁 𑀧𑀦 𑀢𑁂𑀲𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀥𑀫𑁆𑀫𑀲𑁂𑀦𑀸𑀧𑀢𑀺 𑀧𑀦𑁆𑀦𑀭𑀲𑀫𑁂 𑀤𑀺𑀯𑀲𑁂 𑀕𑀺𑀚𑁆𑀛𑀓𑀽𑀝𑀧𑀩𑁆𑀩𑀢𑀫𑀚𑁆𑀛𑁂 𑀲𑀽𑀓𑀭𑀔𑀢𑀮𑁂𑀡𑀧𑀩𑁆𑀪𑀸𑀭𑁂 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀤𑀻𑀖𑀦𑀔𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀲𑀚𑁆𑀚𑀺𑀢𑁂 𑀥𑀫𑁆𑀫𑀬𑀸𑀕𑁂 𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑀲𑀼𑀢𑁆𑀢𑀦𑁆𑀢𑁂 (𑀫. 𑀦𑀺. 𑁨.𑁨𑁦𑁧) 𑀤𑁂𑀲𑀺𑀬𑀫𑀸𑀦𑁂 𑀤𑁂𑀲𑀦𑀁 𑀅𑀦𑀼𑀩𑀼𑀚𑁆𑀛𑀫𑀸𑀦𑀁 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁 𑀧𑀢𑁆𑀢𑁄. 𑀪𑀕𑀯𑀸 𑀣𑁂𑀭𑀲𑁆𑀲 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀜𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀯𑁂𑀴𑀼𑀯𑀦𑁂𑀬𑁂𑀯 𑀧𑀘𑁆𑀘𑀼𑀝𑁆𑀞𑀸𑀲𑀺. 𑀣𑁂𑀭𑁄 𑁋 ‘‘𑀓𑀼𑀳𑀺𑀁 𑀦𑀼 𑀔𑁄 𑀪𑀕𑀯𑀸 𑀕𑀢𑁄’’𑀢𑀺 𑀆𑀯𑀚𑁆𑀚𑀦𑁆𑀢𑁄 𑀯𑁂𑀴𑀼𑀯𑀦𑁂 𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀜𑀢𑁆𑀯𑀸 𑀲𑀬𑀫𑁆𑀧𑀺 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀯𑁂𑀴𑀼𑀯𑀦𑁂𑀬𑁂𑀯 𑀧𑀘𑁆𑀘𑀼𑀝𑁆𑀞𑀸𑀲𑀺. 𑀅𑀣 𑀪𑀕𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀑𑀲𑀸𑀭𑁂𑀲𑀺. 𑀢𑀁 𑀲𑀦𑁆𑀦𑀺𑀧𑀸𑀢𑀁 𑀲𑀦𑁆𑀥𑀸𑀬 𑀪𑀕𑀯𑀸 𑁋 ‘‘𑀅𑀟𑁆𑀠𑀢𑁂𑀴𑀲𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀻’’𑀢𑀺 𑀆𑀳. 𑀅𑀬𑀁 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀧𑀭𑀺𑀘𑁆𑀙𑁂𑀤𑁄 𑀦𑀸𑀫.

𑀉𑀧𑀝𑁆𑀞𑀸𑀓𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸

𑁧𑁧. 𑀉𑀧𑀝𑁆𑀞𑀸𑀓𑀧𑀭𑀺𑀘𑁆𑀙𑁂𑀤𑁂 ¶ 𑀧𑀦 𑀆𑀦𑀦𑁆𑀤𑁄𑀢𑀺 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀪𑀕𑀯𑀢𑁄 𑀳𑀺 𑀧𑀞𑀫𑀩𑁄𑀥𑀺𑀬𑀁 𑀅𑀦𑀺𑀩𑀤𑁆𑀥𑀸 𑀉𑀧𑀝𑁆𑀞𑀸𑀓𑀸 𑀅𑀳𑁂𑀲𑀼𑀁. 𑀏𑀓𑀤𑀸 𑀦𑀸𑀕𑀲𑀫𑀸𑀮𑁄 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀺, 𑀏𑀓𑀤𑀸 𑀦𑀸𑀕𑀺𑀢𑁄, 𑀏𑀓𑀤𑀸 𑀉𑀧𑀯𑀸𑀦𑁄, 𑀏𑀓𑀤𑀸 𑀲𑀼𑀦𑀓𑁆𑀔𑀢𑁆𑀢𑁄, 𑀏𑀓𑀤𑀸 𑀘𑀼𑀦𑁆𑀤𑁄 𑀲𑀫𑀡𑀼𑀤𑁆𑀤𑁂𑀲𑁄, 𑀏𑀓𑀤𑀸 𑀲𑀸𑀕𑀢𑁄 ¶ , 𑀏𑀓𑀤𑀸 𑀫𑁂𑀖𑀺𑀬𑁄. 𑀢𑀢𑁆𑀣 ¶ 𑀏𑀓𑀤𑀸 𑀪𑀕𑀯𑀸 𑀦𑀸𑀕𑀲𑀫𑀸𑀮𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑁄 𑀤𑁆𑀯𑁂𑀥𑀸𑀧𑀣𑀁 𑀧𑀢𑁆𑀢𑁄. 𑀣𑁂𑀭𑁄 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑁋 ‘‘𑀪𑀕𑀯𑀸, 𑀅𑀳𑀁 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀘𑁆𑀙𑀸𑀫𑀻’’𑀢𑀺 𑀆𑀳. 𑀅𑀣 𑀦𑀁 𑀪𑀕𑀯𑀸 𑁋 ‘‘𑀏𑀳𑀺 𑀪𑀺𑀓𑁆𑀔𑀼, 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀘𑁆𑀙𑀸𑀫𑀸’’𑀢𑀺 𑀆𑀳. 𑀲𑁄 𑁋 ‘‘𑀳𑀦𑁆𑀤, 𑀪𑀕𑀯𑀸, 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀘𑀻𑀯𑀭𑀁 𑀕𑀡𑁆𑀳𑀣, 𑀅𑀳𑀁 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀘𑁆𑀙𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀙𑀫𑀸𑀬𑀁 𑀞𑀧𑁂𑀢𑀼𑀁 𑀆𑀭𑀤𑁆𑀥𑁄. 𑀅𑀣 𑀦𑀁 𑀪𑀕𑀯𑀸 𑁋 ‘‘𑀆𑀳𑀭, 𑀪𑀺𑀓𑁆𑀔𑀽’’𑀢𑀺 𑀯𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀕𑀢𑁄. 𑀢𑀲𑁆𑀲𑀧𑀺 𑀪𑀺𑀓𑁆𑀔𑀼𑀦𑁄 𑀇𑀢𑀭𑁂𑀦 𑀫𑀕𑁆𑀕𑁂𑀦 𑀕𑀘𑁆𑀙𑀢𑁄 𑀘𑁄𑀭𑀸 𑀧𑀢𑁆𑀢𑀘𑀻𑀯𑀭𑀜𑁆𑀘𑁂𑀯 𑀳𑀭𑀺𑀁𑀲𑀼, 𑀲𑀻𑀲𑀜𑁆𑀘 𑀪𑀺𑀦𑁆𑀤𑀺𑀁𑀲𑀼. 𑀲𑁄 𑁋 ‘‘𑀪𑀕𑀯𑀸 𑀇𑀤𑀸𑀦𑀺 𑀫𑁂 𑀧𑀝𑀺𑀲𑀭𑀡𑀁, 𑀦 𑀅𑀜𑁆𑀜𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀮𑁄𑀳𑀺𑀢𑁂𑀦 𑀕𑀴𑀺𑀢𑁂𑀦 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. ‘‘𑀓𑀺𑀫𑀺𑀤𑀁 𑀪𑀺𑀓𑁆𑀔𑀽’’𑀢𑀺 𑀘 𑀯𑀼𑀢𑁆𑀢𑁂 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀅𑀣 𑀦𑀁 𑀪𑀕𑀯𑀸 𑁋 ‘‘𑀫𑀸 𑀘𑀺𑀦𑁆𑀢𑀬𑀺, 𑀪𑀺𑀓𑁆𑀔𑀼, 𑀏𑀢𑀁𑀬𑁂𑀯 𑀢𑁂 𑀓𑀸𑀭𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀺𑀯𑀸𑀭𑀬𑀺𑀫𑁆𑀳𑀸’’𑀢𑀺 𑀯𑀢𑁆𑀯𑀸 𑀦𑀁 𑀲𑀫𑀲𑁆𑀲𑀸𑀲𑁂𑀲𑀺.

𑀏𑀓𑀤𑀸 𑀧𑀦 𑀪𑀕𑀯𑀸 𑀫𑁂𑀖𑀺𑀬𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀧𑀸𑀘𑀻𑀦𑀯𑀁𑀲𑀫𑀺𑀕𑀤𑀸𑀬𑁂 𑀚𑀦𑁆𑀢𑀼𑀕𑀸𑀫𑀁 𑀅𑀕𑀫𑀸𑀲𑀺. 𑀢𑀢𑁆𑀭𑀸𑀧𑀺 𑀫𑁂𑀖𑀺𑀬𑁄 𑀚𑀦𑁆𑀢𑀼𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀦𑀤𑀻𑀢𑀻𑀭𑁂 𑀧𑀸𑀲𑀸𑀤𑀺𑀓𑀁 𑀅𑀫𑁆𑀩𑀯𑀦𑀁 𑀤𑀺𑀲𑁆𑀯𑀸 𑁋 ‘‘𑀪𑀕𑀯𑀸, 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀘𑀻𑀯𑀭𑀁 𑀕𑀡𑁆𑀳𑀣, 𑀅𑀳𑀁 𑀢𑀲𑁆𑀫𑀺𑀁 𑀅𑀫𑁆𑀩𑀯𑀦𑁂 𑀲𑀫𑀡𑀥𑀫𑁆𑀫𑀁 𑀓𑀭𑁄𑀫𑀻’’𑀢𑀺 𑀯𑀢𑁆𑀯𑀸 𑀪𑀕𑀯𑀢𑀸 𑀢𑀺𑀓𑁆𑀔𑀢𑁆𑀢𑀼𑀁 𑀦𑀺𑀯𑀸𑀭𑀺𑀬𑀫𑀸𑀦𑁄𑀧𑀺 𑀕𑀦𑁆𑀢𑁆𑀯𑀸 𑀅𑀓𑀼𑀲𑀮𑀯𑀺𑀢𑀓𑁆𑀓𑁂𑀳𑀺 𑀉𑀧𑀤𑁆𑀤𑀼𑀢𑁄 𑀅𑀦𑁆𑀯𑀸𑀲𑀢𑁆𑀢𑁄 (𑀅. 𑀦𑀺. 𑁯.𑁩; 𑀉𑀤𑀸𑀦 𑀧𑀭𑀺𑀘𑁆𑀙𑁂𑀤𑁄 𑁩𑁧 𑀤𑀝𑁆𑀞𑀩𑁆𑀩𑁄). 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀢𑀫𑁆𑀧𑀺 𑀪𑀕𑀯𑀸 𑁋 ‘‘𑀇𑀤𑀫𑁂𑀯 𑀢𑁂 𑀓𑀸𑀭𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀺𑀯𑀸𑀭𑀬𑀺𑀫𑁆𑀳𑀸’’𑀢𑀺 𑀯𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁂, 𑀇𑀤𑀸𑀦𑀺𑀫𑁆𑀳𑀺 𑀫𑀳𑀮𑁆𑀮𑀓𑁄, ‘𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀇𑀫𑀺𑀦𑀸 𑀫𑀕𑁆𑀕𑁂𑀦 𑀕𑀘𑁆𑀙𑀸𑀫𑀸’𑀢𑀺 𑀯𑀼𑀢𑁆𑀢𑁂 𑀅𑀜𑁆𑀜𑁂𑀦 𑀕𑀘𑁆𑀙𑀦𑁆𑀢𑀺, 𑀏𑀓𑀘𑁆𑀘𑁂 𑀫𑀬𑁆𑀳𑀁 𑀧𑀢𑁆𑀢𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀦𑁆𑀢𑀺, 𑀫𑀬𑁆𑀳𑀁 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀚𑀸𑀦𑀸𑀣𑀸’’𑀢𑀺. 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀲𑀁𑀯𑁂𑀕𑁄 𑀉𑀤𑀧𑀸𑀤𑀺. 𑀅𑀣𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑁋 ‘‘𑀅𑀳𑀁 ¶ , 𑀪𑀦𑁆𑀢𑁂, 𑀢𑀼𑀫𑁆𑀳𑁂𑀬𑁂𑀯 𑀧𑀢𑁆𑀣𑀬𑀫𑀸𑀦𑁄 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀧𑀸𑀭𑀫𑀺𑀬𑁄 𑀧𑀽𑀭𑀬𑀺𑀁, 𑀦𑀦𑀼 𑀫𑀸𑀤𑀺𑀲𑁄 𑀫𑀳𑀸𑀧𑀜𑁆𑀜𑁄 𑀉𑀧𑀝𑁆𑀞𑀸𑀓𑁄 𑀦𑀸𑀫 𑀯𑀝𑁆𑀝𑀢𑀺, 𑀅𑀳𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀁 𑀪𑀕𑀯𑀸 𑁋 ‘‘𑀅𑀮𑀁 𑀲𑀸𑀭𑀺𑀧𑀼𑀢𑁆𑀢, 𑀬𑀲𑁆𑀲𑀁 ¶ 𑀤𑀺𑀲𑀸𑀬𑀁 𑀢𑁆𑀯𑀁 𑀯𑀺𑀳𑀭𑀲𑀺, 𑀅𑀲𑀼𑀜𑁆𑀜𑀸𑀬𑁂𑀯 𑀫𑁂 𑀲𑀸 𑀤𑀺𑀲𑀸, 𑀢𑀯 𑀑𑀯𑀸𑀤𑁄 𑀩𑀼𑀤𑁆𑀥𑀸𑀦𑀁 𑀑𑀯𑀸𑀤𑀲𑀤𑀺𑀲𑁄, 𑀦 𑀫𑁂 𑀢𑀬𑀸 𑀉𑀧𑀝𑁆𑀞𑀸𑀓𑀓𑀺𑀘𑁆𑀘𑀁 𑀅𑀢𑁆𑀣𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺. 𑀏𑀢𑁂𑀦𑁂𑀯𑀼𑀧𑀸𑀬𑁂𑀦 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸 𑀉𑀝𑁆𑀞𑀳𑀺𑀁𑀲𑀼. 𑀢𑁂 𑀲𑀩𑁆𑀩𑁂𑀧𑀺 𑀪𑀕𑀯𑀸 𑀧𑀝𑀺𑀓𑁆𑀔𑀺𑀧𑀺.

𑀆𑀦𑀦𑁆𑀤𑀢𑁆𑀣𑁂𑀭𑁄 𑀧𑀦 𑀢𑀼𑀡𑁆𑀳𑀻𑀬𑁂𑀯 𑀦𑀺𑀲𑀻𑀤𑀺. 𑀅𑀣 𑀦𑀁 𑀪𑀺𑀓𑁆𑀔𑀽 𑀏𑀯𑀫𑀸𑀳𑀁𑀲𑀼 𑁋 ‘‘𑀆𑀯𑀼𑀲𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀬𑀸𑀘𑀢𑀺, 𑀢𑁆𑀯𑀫𑁆𑀧𑀺 𑀬𑀸𑀘𑀸𑀳𑀻’’𑀢𑀺. 𑀲𑁄 𑀆𑀳 𑁋 ‘‘𑀬𑀸𑀘𑀺𑀢𑁆𑀯𑀸 𑀮𑀤𑁆𑀥𑀼𑀧𑀝𑁆𑀞𑀸𑀦𑀁 ¶ 𑀦𑀸𑀫 𑀆𑀯𑀼𑀲𑁄 𑀓𑀻𑀤𑀺𑀲𑀁 𑀳𑁄𑀢𑀺, 𑀓𑀺𑀁 𑀫𑀁 𑀲𑀢𑁆𑀣𑀸 𑀦 𑀧𑀲𑁆𑀲𑀢𑀺, 𑀲𑀘𑁂 𑀭𑁄𑀘𑀺𑀲𑁆𑀲𑀢𑀺, 𑀆𑀦𑀦𑁆𑀤𑁄 𑀫𑀁 𑀉𑀧𑀝𑁆𑀞𑀸𑀢𑀽𑀢𑀺 𑀯𑀓𑁆𑀔𑀢𑀻’’𑀢𑀺. 𑀅𑀣 𑀪𑀕𑀯𑀸 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀆𑀦𑀦𑁆𑀤𑁄 𑀅𑀜𑁆𑀜𑁂𑀦 𑀉𑀲𑁆𑀲𑀸𑀳𑁂𑀢𑀩𑁆𑀩𑁄, 𑀲𑀬𑀫𑁂𑀯 𑀚𑀸𑀦𑀺𑀢𑁆𑀯𑀸 𑀫𑀁 𑀉𑀧𑀝𑁆𑀞𑀳𑀺𑀲𑁆𑀲𑀢𑀻’’𑀢𑀺 𑀆𑀳. 𑀢𑀢𑁄 𑀪𑀺𑀓𑁆𑀔𑀽 𑁋 ‘‘𑀉𑀝𑁆𑀞𑁂𑀳𑀺, 𑀆𑀯𑀼𑀲𑁄 𑀆𑀦𑀦𑁆𑀤, 𑀉𑀝𑁆𑀞𑁂𑀳𑀺 𑀆𑀯𑀼𑀲𑁄 𑀆𑀦𑀦𑁆𑀤, 𑀤𑀲𑀩𑀮𑀁 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀬𑀸𑀘𑀸𑀳𑀻’’𑀢𑀺 𑀆𑀳𑀁𑀲𑀼. 𑀣𑁂𑀭𑁄 𑀉𑀝𑁆𑀞𑀳𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀧𑀝𑀺𑀓𑁆𑀔𑁂𑀧𑁂, 𑀘𑀢𑀲𑁆𑀲𑁄 𑀘 𑀆𑀬𑀸𑀘𑀦𑀸𑀢𑀺 𑀅𑀝𑁆𑀞 𑀯𑀭𑁂 𑀬𑀸𑀘𑀺.

𑀘𑀢𑁆𑀢𑀸𑀭𑁄 𑀧𑀝𑀺𑀓𑁆𑀔𑁂𑀧𑀸 𑀦𑀸𑀫 𑁋 ‘‘𑀲𑀘𑁂 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀧𑀡𑀻𑀢𑀁 𑀘𑀻𑀯𑀭𑀁 𑀦 𑀤𑀲𑁆𑀲𑀢𑀺, 𑀧𑀺𑀡𑁆𑀟𑀧𑀸𑀢𑀁 𑀦 𑀤𑀲𑁆𑀲𑀢𑀺, 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀲𑀺𑀢𑀼𑀁 𑀦 𑀤𑀲𑁆𑀲𑀢𑀺, 𑀦𑀺𑀫𑀦𑁆𑀢𑀦𑀁 𑀕𑀳𑁂𑀢𑁆𑀯𑀸 𑀦 𑀕𑀫𑀺𑀲𑁆𑀲𑀢𑀺, 𑀏𑀯𑀸𑀳𑀁 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑁋 ‘‘𑀓𑀺𑀁 𑀧𑀦𑁂𑀢𑁆𑀣, 𑀆𑀦𑀦𑁆𑀤, 𑀆𑀤𑀻𑀦𑀯𑀁 𑀧𑀲𑁆𑀲𑀲𑀻’’𑀢𑀺 𑀯𑀼𑀢𑁆𑀢𑁂 𑁋 ‘‘𑀲𑀘𑀸𑀳𑀁, 𑀪𑀦𑁆𑀢𑁂, 𑀇𑀫𑀸𑀦𑀺 𑀯𑀢𑁆𑀣𑀽𑀦𑀺 𑀮𑀪𑀺𑀲𑁆𑀲𑀸𑀫𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀯𑀢𑁆𑀢𑀸𑀭𑁄 𑁋 ‘𑀆𑀦𑀦𑁆𑀤𑁄 𑀤𑀲𑀩𑀮𑁂𑀦 𑀮𑀤𑁆𑀥𑀁 𑀧𑀡𑀻𑀢𑀁 𑀘𑀻𑀯𑀭𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀲𑀢𑀺, 𑀏𑀓𑀢𑁄 𑀦𑀺𑀫𑀦𑁆𑀢𑀦𑀁 𑀕𑀘𑁆𑀙𑀢𑀺, 𑀏𑀢𑀁 𑀮𑀸𑀪𑀁 𑀮𑀪𑀦𑁆𑀢𑁄 𑀢𑀣𑀸𑀕𑀢𑀁 𑀉𑀧𑀝𑁆𑀞𑀸𑀢𑀺, 𑀓𑁄 𑀏𑀯𑀁 𑀉𑀧𑀝𑁆𑀞𑀳𑀢𑁄 𑀪𑀸𑀭𑁄’𑀢𑀺’’ 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀝𑀺𑀓𑁆𑀔𑁂𑀧𑁂 𑀬𑀸𑀘𑀺.

𑀘𑀢𑀲𑁆𑀲𑁄 𑀆𑀬𑀸𑀘𑀦𑀸 𑀦𑀸𑀫 𑁋 ‘‘𑀲𑀘𑁂, 𑀪𑀦𑁆𑀢𑁂, 𑀪𑀕𑀯𑀸 𑀫𑀬𑀸 𑀕𑀳𑀺𑀢𑀦𑀺𑀫𑀦𑁆𑀢𑀦𑀁 𑀕𑀫𑀺𑀲𑁆𑀲𑀢𑀺, 𑀲𑀘𑀸𑀳𑀁 𑀢𑀺𑀭𑁄𑀭𑀝𑁆𑀞𑀸 𑀢𑀺𑀭𑁄𑀚𑀦𑀧𑀤𑀸 𑀪𑀕𑀯𑀦𑁆𑀢𑀁 𑀤𑀝𑁆𑀞𑀼𑀁 𑀆𑀕𑀢𑀁 𑀧𑀭𑀺𑀲𑀁 𑀆𑀕𑀢𑀓𑁆𑀔𑀡𑁂 𑀏𑀯 𑀪𑀕𑀯𑀦𑁆𑀢𑀁 𑀤𑀲𑁆𑀲𑁂𑀢𑀼𑀁 𑀮𑀘𑁆𑀙𑀸𑀫𑀺, 𑀬𑀤𑀸 𑀫𑁂 𑀓𑀗𑁆𑀔𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀮𑀘𑁆𑀙𑀸𑀫𑀺, 𑀬𑀁 𑀪𑀕𑀯𑀸 𑀫𑀬𑁆𑀳𑀁 𑀧𑀭𑀫𑁆𑀫𑀼𑀔𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑀁 𑀆𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 𑀓𑀣𑁂𑀲𑁆𑀲𑀢𑀺, 𑀏𑀯𑀸𑀳𑀁 𑀪𑀕𑀯𑀦𑁆𑀢𑀁 ¶ 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑁋 ‘‘𑀓𑀁 𑀧𑀦𑁂𑀢𑁆𑀣, 𑀆𑀦𑀦𑁆𑀤, 𑀆𑀦𑀺𑀲𑀁𑀲𑀁 𑀧𑀲𑁆𑀲𑀲𑀻’’𑀢𑀺 ¶ 𑀯𑀼𑀢𑁆𑀢𑁂 𑁋 ‘‘𑀇𑀥, 𑀪𑀦𑁆𑀢𑁂, 𑀲𑀤𑁆𑀥𑀸 𑀓𑀼𑀮𑀧𑀼𑀢𑁆𑀢𑀸 𑀪𑀕𑀯𑀢𑁄 𑀑𑀓𑀸𑀲𑀁 𑀅𑀮𑀪𑀦𑁆𑀢𑀸 𑀫𑀁 𑀏𑀯𑀁 𑀯𑀤𑀦𑁆𑀢𑀺 𑁋 ‘𑀲𑁆𑀯𑁂, 𑀪𑀦𑁆𑀢𑁂 𑀆𑀦𑀦𑁆𑀤, 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀅𑀫𑁆𑀳𑀸𑀓𑀁 𑀖𑀭𑁂 𑀪𑀺𑀓𑁆𑀔𑀁 𑀕𑀡𑁆𑀳𑁂𑀬𑁆𑀬𑀸𑀣𑀸’𑀢𑀺, 𑀲𑀘𑁂 𑀪𑀦𑁆𑀢𑁂 𑀪𑀕𑀯𑀸 𑀢𑀢𑁆𑀣 𑀦 𑀕𑀫𑀺𑀲𑁆𑀲𑀢𑀺, 𑀇𑀘𑁆𑀙𑀺𑀢𑀓𑁆𑀔𑀡𑁂𑀬𑁂𑀯 𑀧𑀭𑀺𑀲𑀁 𑀤𑀲𑁆𑀲𑁂𑀢𑀼𑀁, 𑀓𑀗𑁆𑀔𑀜𑁆𑀘 𑀯𑀺𑀦𑁄𑀤𑁂𑀢𑀼𑀁 𑀑𑀓𑀸𑀲𑀁 𑀦 𑀮𑀘𑁆𑀙𑀸𑀫𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀯𑀢𑁆𑀢𑀸𑀭𑁄 𑁋 ‘𑀓𑀺𑀁 𑀆𑀦𑀦𑁆𑀤𑁄 𑀤𑀲𑀩𑀮𑀁 𑀉𑀧𑀝𑁆𑀞𑀸𑀢𑀺, 𑀏𑀢𑁆𑀢𑀓𑀫𑁆𑀧𑀺𑀲𑁆𑀲 𑀅𑀦𑀼𑀕𑁆𑀕𑀳𑀁 𑀪𑀕𑀯𑀸 𑀦 𑀓𑀭𑁄𑀢𑀻’𑀢𑀺. 𑀪𑀕𑀯𑀢𑁄 𑀘 𑀧𑀭𑀫𑁆𑀫𑀼𑀔𑀸 𑀫𑀁 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺 𑁋 ‘𑀅𑀬𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀕𑀸𑀣𑀸, 𑀇𑀤𑀁 𑀲𑀼𑀢𑁆𑀢𑀁, 𑀇𑀤𑀁 𑀚𑀸𑀢𑀓𑀁, 𑀓𑀢𑁆𑀣 𑀤𑁂𑀲𑀺𑀢’𑀦𑁆𑀢𑀺. 𑀲𑀘𑀸𑀳𑀁 𑀢𑀁 𑀦 𑀲𑀫𑁆𑀧𑀸𑀤𑀬𑀺𑀲𑁆𑀲𑀸𑀫𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀯𑀢𑁆𑀢𑀸𑀭𑁄 𑁋 ‘𑀏𑀢𑁆𑀢𑀓𑀫𑁆𑀧𑀺, 𑀆𑀯𑀼𑀲𑁄, 𑀦 𑀚𑀸𑀦𑀸𑀲𑀺, 𑀓𑀲𑁆𑀫𑀸 𑀢𑁆𑀯𑀁 𑀙𑀸𑀬𑀸 𑀯𑀺𑀬 𑀪𑀕𑀯𑀦𑁆𑀢𑀁 𑀅𑀯𑀺𑀚𑀳𑀦𑁆𑀢𑁄 𑀤𑀻𑀖𑀭𑀢𑁆𑀢𑀁 𑀯𑀺𑀘𑀭𑀲𑀻’𑀢𑀺. 𑀢𑁂𑀦𑀸𑀳𑀁 𑀧𑀭𑀫𑁆𑀫𑀼𑀔𑀸 𑀤𑁂𑀲𑀺𑀢𑀲𑁆𑀲𑀧𑀺 𑀥𑀫𑁆𑀫𑀲𑁆𑀲 𑀧𑀼𑀦 𑀓𑀣𑀦𑀁 𑀇𑀘𑁆𑀙𑀸𑀫𑀻’’𑀢𑀺 𑀇𑀫𑀸 𑀘𑀢𑀲𑁆𑀲𑁄 𑀆𑀬𑀸𑀘𑀦𑀸 𑀬𑀸𑀘𑀺. 𑀪𑀕𑀯𑀸𑀧𑀺𑀲𑁆𑀲 𑀅𑀤𑀸𑀲𑀺.

𑀏𑀯𑀁 𑀇𑀫𑁂 𑀅𑀝𑁆𑀞 𑀯𑀭𑁂 𑀕𑀳𑁂𑀢𑁆𑀯𑀸 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑁄 𑀅𑀳𑁄𑀲𑀺. 𑀢𑀲𑁆𑀲𑁂𑀯 𑀞𑀸𑀦𑀦𑁆𑀢𑀭𑀲𑁆𑀲𑀢𑁆𑀣𑀸𑀬 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 ¶ 𑀧𑀽𑀭𑀺𑀢𑀸𑀦𑀁 𑀧𑀸𑀭𑀫𑀻𑀦𑀁 𑀨𑀮𑀁 𑀧𑀸𑀧𑀼𑀡𑀻𑀢𑀺 𑀇𑀫𑀲𑁆𑀲 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑀪𑀸𑀯𑀁 𑀲𑀦𑁆𑀥𑀸𑀬 𑁋 ‘‘𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀆𑀦𑀦𑁆𑀤𑁄 𑀪𑀺𑀓𑁆𑀔𑀼 𑀉𑀧𑀝𑁆𑀞𑀸𑀓𑁄 𑀅𑀕𑁆𑀕𑀼𑀧𑀝𑁆𑀞𑀸𑀓𑁄’’𑀢𑀺 𑀆𑀳. 𑀅𑀬𑀁 𑀉𑀧𑀝𑁆𑀞𑀸𑀓𑀧𑀭𑀺𑀘𑁆𑀙𑁂𑀤𑁄 𑀦𑀸𑀫.

𑁧𑁨. 𑀧𑀺𑀢𑀺𑀧𑀭𑀺𑀘𑁆𑀙𑁂𑀤𑁄 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯.

𑀯𑀺𑀳𑀸𑀭𑀁 𑀧𑀸𑀯𑀺𑀲𑀻𑀢𑀺 𑀓𑀲𑁆𑀫𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺? 𑀪𑀕𑀯𑀸 𑀓𑀺𑀭 𑀏𑀢𑁆𑀢𑀓𑀁 𑀓𑀣𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀦 𑀢𑀸𑀯 𑀫𑀬𑀸 𑀲𑀢𑁆𑀢𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀯𑀁𑀲𑁄 𑀦𑀺𑀭𑀦𑁆𑀢𑀭𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀓𑀣𑀺𑀢𑁄, 𑀅𑀚𑁆𑀚 𑀫𑀬𑀺 𑀧𑀦 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁂 𑀇𑀫𑁂 𑀪𑀺𑀓𑁆𑀔𑀽 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀆𑀭𑀩𑁆𑀪 𑀯𑀡𑁆𑀡𑀁 𑀓𑀣𑀬𑀺𑀲𑁆𑀲𑀦𑁆𑀢𑀺. 𑀅𑀣𑀸𑀳𑀁 𑀆𑀕𑀦𑁆𑀢𑁆𑀯𑀸 𑀦𑀺𑀭𑀦𑁆𑀢𑀭𑀁 𑀩𑀼𑀤𑁆𑀥𑀯𑀁𑀲𑀁 𑀓𑀣𑁂𑀢𑁆𑀯𑀸 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀪𑀺𑀓𑁆𑀔𑀽𑀦𑀁 𑀓𑀣𑀸𑀯𑀸𑀭𑀲𑁆𑀲 𑀑𑀓𑀸𑀲𑀁 𑀤𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺.

𑀬𑀜𑁆𑀘𑁂𑀢𑀁 𑀪𑀕𑀯𑀸 𑀢𑀦𑁆𑀢𑀺𑀁 𑀓𑀣𑁂𑀲𑀺, 𑀢𑀢𑁆𑀣 𑀓𑀧𑁆𑀧𑀧𑀭𑀺𑀘𑁆𑀙𑁂𑀤𑁄, 𑀚𑀸𑀢𑀺𑀧𑀭𑀺𑀘𑁆𑀙𑁂𑀤𑁄, 𑀕𑁄𑀢𑁆𑀢𑀧𑀭𑀺𑀘𑁆𑀙𑁂𑀤𑁄, 𑀆𑀬𑀼𑀧𑀭𑀺𑀘𑁆𑀙𑁂𑀤𑁄, 𑀩𑁄𑀥𑀺𑀧𑀭𑀺𑀘𑁆𑀙𑁂𑀤𑁄, 𑀲𑀸𑀯𑀓𑀬𑀼𑀕𑀧𑀭𑀺𑀘𑁆𑀙𑁂𑀤𑁄, 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀧𑀭𑀺𑀘𑁆𑀙𑁂𑀤𑁄, 𑀉𑀧𑀝𑁆𑀞𑀸𑀓𑀧𑀭𑀺𑀘𑁆𑀙𑁂𑀤𑁄, 𑀧𑀺𑀢𑀺𑀧𑀭𑀺𑀘𑁆𑀙𑁂𑀤𑁄𑀢𑀺 𑀦𑀯𑀺𑀫𑁂 𑀯𑀸𑀭𑀸 𑀆𑀕𑀢𑀸, 𑀲𑀫𑁆𑀩𑀳𑀼𑀮𑀯𑀸𑀭𑁄 𑀅𑀦𑀸𑀕𑀢𑁄, 𑀆𑀦𑁂𑀢𑁆𑀯𑀸 𑀧𑀦 𑀤𑀻𑀧𑁂𑀢𑀩𑁆𑀩𑁄.

𑀲𑀫𑁆𑀩𑀳𑀼𑀮𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀳𑀺 ¶ ¶ 𑀏𑀓𑀲𑁆𑀫𑀺𑀁 𑀓𑀼𑀮𑀯𑀁𑀲𑀸𑀦𑀼𑀭𑀽𑀧𑁂 𑀧𑀼𑀢𑁆𑀢𑁂 𑀚𑀸𑀢𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀩𑁆𑀩𑀦𑁆𑀢𑀺 𑀅𑀬𑀫𑁂𑀯 𑀯𑀁𑀲𑁄, 𑀅𑀬𑀁 𑀧𑀯𑁂𑀡𑀻. 𑀓𑀲𑁆𑀫𑀸? 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀳𑀺 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀦𑀢𑁄 𑀧𑀝𑁆𑀞𑀸𑀬 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀺 𑀅𑀦𑁂𑀓𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀢𑀢𑁆𑀭 𑀦𑁂𑀲𑀁 𑀬𑀤𑀺 𑀦𑁂𑀯 𑀚𑀸𑀢𑀦𑀕𑀭𑀁, 𑀦 𑀧𑀺𑀢𑀸, 𑀦 𑀫𑀸𑀢𑀸, 𑀦 𑀪𑀭𑀺𑀬𑀸, 𑀦 𑀧𑀼𑀢𑁆𑀢𑁄 𑀧𑀜𑁆𑀜𑀸𑀬𑁂𑀬𑁆𑀬, ‘‘𑀇𑀫𑀲𑁆𑀲 𑀦𑁂𑀯 𑀚𑀸𑀢𑀦𑀕𑀭𑀁, 𑀦 𑀧𑀺𑀢𑀸, 𑀦 𑀪𑀭𑀺𑀬𑀸, 𑀦 𑀧𑀼𑀢𑁆𑀢𑁄 𑀧𑀜𑁆𑀜𑀸𑀬𑀢𑀺, 𑀤𑁂𑀯𑁄 𑀯𑀸 𑀲𑀓𑁆𑀓𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀏𑀲 𑀫𑀜𑁆𑀜𑁂, 𑀤𑁂𑀯𑀸𑀦𑀜𑁆𑀘 𑀈𑀤𑀺𑀲𑀁 𑀧𑀸𑀝𑀺𑀳𑀸𑀭𑀺𑀬𑀁 𑀅𑀦𑀘𑁆𑀙𑀭𑀺𑀬’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀚𑀦𑁄 𑀦𑁂𑀯 𑀲𑁄𑀢𑀩𑁆𑀩𑀁, 𑀦 𑀲𑀤𑁆𑀥𑀸𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬. 𑀢𑀢𑁄 𑀅𑀪𑀺𑀲𑀫𑀬𑁄 𑀦 𑀪𑀯𑁂𑀬𑁆𑀬, 𑀅𑀪𑀺𑀲𑀫𑀬𑁂 𑀅𑀲𑀢𑀺 𑀦𑀺𑀭𑀢𑁆𑀣𑀓𑁄𑀯 𑀩𑀼𑀤𑁆𑀥𑀼𑀧𑁆𑀧𑀸𑀤𑁄, 𑀅𑀦𑀺𑀬𑁆𑀬𑀸𑀦𑀺𑀓𑀁 𑀲𑀸𑀲𑀦𑀁 𑀳𑁄𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑀸𑀦𑀁 𑁋 ‘‘𑀏𑀓𑀲𑁆𑀫𑀺𑀁 𑀓𑀼𑀮𑀯𑀁𑀲𑀸𑀦𑀼𑀭𑀽𑀧𑁂 𑀧𑀼𑀢𑁆𑀢𑁂 𑀚𑀸𑀢𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀩𑁆𑀩’’𑀦𑁆𑀢𑀺 𑀅𑀬𑀫𑁂𑀯 𑀯𑀁𑀲𑁄 𑀅𑀬𑀁 𑀧𑀯𑁂𑀡𑀻. 𑀢𑀲𑁆𑀫𑀸 𑀧𑀼𑀢𑁆𑀢𑀸𑀤𑀻𑀦𑀁 𑀯𑀲𑁂𑀦 𑀲𑀫𑁆𑀩𑀳𑀼𑀮𑀯𑀸𑀭𑁄 𑀆𑀦𑁂𑀢𑁆𑀯𑀸 𑀤𑀻𑀧𑁂𑀢𑀩𑁆𑀩𑁄.

𑀲𑀫𑁆𑀩𑀳𑀼𑀮𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸

𑀢𑀢𑁆𑀣 ¶ 𑁋

𑀲𑀫𑀯𑀢𑁆𑀢𑀓𑁆𑀔𑀦𑁆𑀥𑁄 𑀅𑀢𑀼𑀮𑁄, 𑀲𑀼𑀧𑁆𑀧𑀩𑀼𑀤𑁆𑀥𑁄 𑀘 𑀉𑀢𑁆𑀢𑀭𑁄;

𑀲𑀢𑁆𑀣𑀯𑀸𑀳𑁄 𑀯𑀺𑀚𑀺𑀢𑀲𑁂𑀦𑁄, 𑀭𑀸𑀳𑀼𑀮𑁄 𑀪𑀯𑀢𑀺 𑀲𑀢𑁆𑀢𑀫𑁄𑀢𑀺.

𑀏𑀢𑁂 𑀢𑀸𑀯 𑀲𑀢𑁆𑀢𑀦𑁆𑀦𑀫𑁆𑀧𑀺 𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀦𑀼𑀓𑁆𑀓𑀫𑁂𑀦𑁂𑀯 𑀲𑀢𑁆𑀢 𑀧𑀼𑀢𑁆𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 𑀭𑀸𑀳𑀼𑀮𑀪𑀤𑁆𑀤𑁂 𑀢𑀸𑀯 𑀚𑀸𑀢𑁂 𑀧𑀡𑁆𑀡𑀁 𑀆𑀳𑀭𑀺𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑁂 𑀞𑀧𑀬𑀺𑀁𑀲𑀼. 𑀅𑀣𑀲𑁆𑀲 𑀢𑀸𑀯𑀤𑁂𑀯 𑀲𑀓𑀮𑀲𑀭𑀻𑀭𑀁 𑀔𑁄𑀪𑁂𑀢𑁆𑀯𑀸 𑀧𑀼𑀢𑁆𑀢𑀲𑀺𑀦𑁂𑀳𑁄 𑀅𑀝𑁆𑀞𑀸𑀲𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀓𑀲𑁆𑀫𑀺𑀁 𑀢𑀸𑀯 𑀚𑀸𑀢𑁂 𑀏𑀯𑀭𑀽𑀧𑁄 𑀧𑀼𑀢𑁆𑀢𑀲𑀺𑀦𑁂𑀳𑁄, 𑀧𑀭𑁄𑀲𑀳𑀲𑁆𑀲𑀁 𑀓𑀺𑀭 𑀫𑁂 𑀧𑀼𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀚𑀸𑀢𑁂 𑀇𑀤𑀁 𑀲𑀺𑀦𑁂𑀳𑀩𑀦𑁆𑀥𑀦𑀁 𑀏𑀯𑀁 𑀯𑀟𑁆𑀠𑀦𑁆𑀢𑀁 𑀤𑀼𑀩𑁆𑀪𑁂𑀚𑁆𑀚𑀁 𑀪𑀯𑀺𑀲𑁆𑀲𑀢𑀺, 𑀭𑀸𑀳𑀼 𑀚𑀸𑀢𑁄, 𑀩𑀦𑁆𑀥𑀦𑀁 𑀚𑀸𑀢’’𑀦𑁆𑀢𑀺 𑀆𑀳. 𑀢𑀁 𑀤𑀺𑀯𑀲𑀫𑁂𑀯 𑀘 𑀭𑀚𑁆𑀚𑀁 𑀧𑀳𑀸𑀬 𑀦𑀺𑀓𑁆𑀔𑀦𑁆𑀢𑁄. 𑀏𑀲 𑀦𑀬𑁄 𑀲𑀩𑁆𑀩𑁂𑀲𑀁 𑀧𑀼𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀦𑁆𑀢𑀺. 𑀅𑀬𑀁 𑀧𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑁄.

𑀲𑀼𑀢𑀦𑀸 ¶ 𑀲𑀩𑁆𑀩𑀓𑀸𑀫𑀸 𑀘, 𑀲𑀼𑀘𑀺𑀢𑁆𑀢𑀸 𑀅𑀣 𑀭𑁄𑀘𑀺𑀦𑀻;

𑀭𑀼𑀘𑀕𑁆𑀕𑀢𑀻 𑀲𑀼𑀦𑀦𑁆𑀤𑀸 𑀘, 𑀩𑀺𑀫𑁆𑀩𑀸 𑀪𑀯𑀢𑀺 𑀲𑀢𑁆𑀢𑀫𑀸𑀢𑀺.

𑀏𑀢𑀸 𑀢𑁂𑀲𑀁 𑀲𑀢𑁆𑀢𑀦𑁆𑀦𑀫𑁆𑀧𑀺 𑀧𑀼𑀢𑁆𑀢𑀸𑀦𑀁 𑀫𑀸𑀢𑀭𑁄 𑀅𑀳𑁂𑀲𑀼𑀁. 𑀩𑀺𑀫𑁆𑀩𑀸𑀤𑁂𑀯𑀻 𑀧𑀦 𑀭𑀸𑀳𑀼𑀮𑀓𑀼𑀫𑀸𑀭𑁂 𑀚𑀸𑀢𑁂 𑀭𑀸𑀳𑀼𑀮𑀫𑀸𑀢𑀸𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀅𑀬𑀁 𑀪𑀭𑀺𑀬𑀧𑀭𑀺𑀘𑁆𑀙𑁂𑀤𑁄.

𑀯𑀺𑀧𑀲𑁆𑀲𑀻 ¶ 𑀓𑀓𑀼𑀲𑀦𑁆𑀥𑁄𑀢𑀺 𑀇𑀫𑁂 𑀧𑀦 𑀤𑁆𑀯𑁂 𑀩𑁄𑀥𑀺𑀲𑀢𑁆𑀢𑀸 𑀧𑀬𑀼𑀢𑁆𑀢𑀆𑀚𑀜𑁆𑀜𑀭𑀣𑀫𑀸𑀭𑀼𑀬𑁆𑀳 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀁𑀲𑀼. 𑀲𑀺𑀔𑀻 𑀓𑁄𑀡𑀸𑀕𑀫𑀦𑁄𑀢𑀺 𑀇𑀫𑁂 𑀤𑁆𑀯𑁂 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑀸 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀯𑁂𑀲𑁆𑀲𑀪𑀽 𑀲𑀼𑀯𑀡𑁆𑀡𑀲𑀺𑀯𑀺𑀓𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀓𑀲𑁆𑀲𑀧𑁄 𑀉𑀧𑀭𑀺𑀧𑀸𑀲𑀸𑀤𑁂 𑀫𑀳𑀸𑀢𑀮𑁂 𑀦𑀺𑀲𑀺𑀦𑁆𑀦𑁄𑀯 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀸 𑀉𑀝𑁆𑀞𑀸𑀬 𑀢𑀁 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑁋 ‘‘𑀧𑀸𑀲𑀸𑀤𑁄 𑀉𑀕𑁆𑀕𑀦𑁆𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑁂 𑀑𑀢𑀭𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀧𑀸𑀲𑀸𑀤𑁄 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑁂 𑀑𑀢𑀭𑀺. 𑀫𑀳𑀸𑀧𑀼𑀭𑀺𑀲𑁄𑀧𑀺 𑀢𑀢𑁄 𑀑𑀢𑀭𑀺𑀢𑁆𑀯𑀸 𑀪𑀽𑀫𑀺𑀬𑀁 𑀞𑀢𑁆𑀯𑀸 𑁋 ‘‘𑀧𑀸𑀲𑀸𑀤𑁄 𑀬𑀣𑀸𑀞𑀸𑀦𑁂𑀬𑁂𑀯 𑀧𑀢𑀺𑀝𑁆𑀞𑀸𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑁄 𑀬𑀣𑀸𑀞𑀸𑀦𑁂 𑀧𑀢𑀺𑀝𑁆𑀞𑀸𑀲𑀺. 𑀫𑀳𑀸𑀧𑀼𑀭𑀺𑀲𑁄𑀧𑀺 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀧𑀥𑀸𑀦𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 ¶ 𑀦𑀺𑀲𑀻𑀤𑀺𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀝𑀺𑀯𑀺𑀚𑁆𑀛𑀺. 𑀅𑀫𑁆𑀳𑀸𑀓𑀁 𑀧𑀦 𑀩𑁄𑀥𑀺𑀲𑀢𑁆𑀢𑁄 𑀓𑀡𑁆𑀝𑀓𑀁 𑀅𑀲𑁆𑀲𑀯𑀭𑀫𑀸𑀭𑀼𑀬𑁆𑀳 𑀦𑀺𑀓𑁆𑀔𑀦𑁆𑀢𑁄𑀢𑀺. 𑀅𑀬𑀁 𑀬𑀸𑀦𑀧𑀭𑀺𑀘𑁆𑀙𑁂𑀤𑁄.

𑀯𑀺𑀧𑀲𑁆𑀲𑀺𑀲𑁆𑀲 𑀧𑀦 𑀪𑀕𑀯𑀢𑁄 𑀬𑁄𑀚𑀦𑀧𑁆𑀧𑀫𑀸𑀡𑁂 𑀧𑀤𑁂𑀲𑁂 𑀯𑀺𑀳𑀸𑀭𑁄 𑀧𑀢𑀺𑀝𑁆𑀞𑀸𑀲𑀺, 𑀲𑀺𑀔𑀺𑀲𑁆𑀲 𑀢𑀺𑀕𑀸𑀯𑀼𑀢𑁂, 𑀯𑁂𑀲𑁆𑀲𑀪𑀼𑀲𑁆𑀲 𑀅𑀟𑁆𑀠𑀬𑁄𑀚𑀦𑁂, 𑀓𑀓𑀼𑀲𑀦𑁆𑀥𑀲𑁆𑀲 𑀕𑀸𑀯𑀼𑀢𑁂, 𑀓𑁄𑀡𑀸𑀕𑀫𑀦𑀲𑁆𑀲 𑀅𑀟𑁆𑀠𑀕𑀸𑀯𑀼𑀢𑁂, 𑀓𑀲𑁆𑀲𑀧𑀲𑁆𑀲 𑀯𑀻𑀲𑀢𑀺𑀉𑀲𑀪𑁂. 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀧𑀓𑀢𑀺𑀫𑀸𑀦𑁂𑀦 𑀲𑁄𑀴𑀲𑀓𑀭𑀻𑀲𑁂, 𑀭𑀸𑀚𑀫𑀸𑀦𑁂𑀦 𑀅𑀝𑁆𑀞𑀓𑀭𑀻𑀲𑁂 𑀧𑀤𑁂𑀲𑁂 𑀯𑀺𑀳𑀸𑀭𑁄 𑀧𑀢𑀺𑀝𑁆𑀞𑀺𑀢𑁄𑀢𑀺. 𑀅𑀬𑀁 𑀯𑀺𑀳𑀸𑀭𑀧𑀭𑀺𑀘𑁆𑀙𑁂𑀤𑁄.

𑀯𑀺𑀧𑀲𑁆𑀲𑀺𑀲𑁆𑀲 𑀧𑀦 𑀪𑀕𑀯𑀢𑁄 𑀏𑀓𑀭𑀢𑀦𑀸𑀬𑀸𑀫𑀸 𑀯𑀺𑀤𑀢𑁆𑀣𑀺𑀯𑀺𑀢𑁆𑀣𑀸𑀭𑀸 𑀅𑀝𑁆𑀞𑀗𑁆𑀕𑀼𑀮𑀼𑀩𑁆𑀩𑁂𑀥𑀸 𑀲𑀼𑀯𑀡𑁆𑀡𑀺𑀝𑁆𑀞𑀓𑀸 𑀓𑀸𑀭𑁂𑀢𑁆𑀯𑀸 𑀘𑀽𑀴𑀁𑀲𑁂𑀦 𑀙𑀸𑀤𑁂𑀢𑁆𑀯𑀸 𑀯𑀺𑀳𑀸𑀭𑀝𑁆𑀞𑀸𑀦𑀁 𑀓𑀺𑀡𑀺𑀁𑀲𑀼. 𑀲𑀺𑀔𑀺𑀲𑁆𑀲 𑀲𑀼𑀯𑀡𑁆𑀡𑀬𑀝𑁆𑀞𑀺𑀨𑀸𑀮𑁂𑀳𑀺 𑀙𑀸𑀤𑁂𑀢𑁆𑀯𑀸 𑀓𑀺𑀡𑀺𑀁𑀲𑀼. 𑀯𑁂𑀲𑁆𑀲𑀪𑀼𑀲𑁆𑀲 𑀲𑀼𑀯𑀡𑁆𑀡𑀳𑀢𑁆𑀣𑀺𑀧𑀸𑀤𑀸𑀦𑀺 𑀓𑀸𑀭𑁂𑀢𑁆𑀯𑀸 𑀢𑁂𑀲𑀁 𑀘𑀽𑀴𑀁𑀲𑁂𑀦 𑀙𑀸𑀤𑁂𑀢𑁆𑀯𑀸 𑀓𑀺𑀡𑀺𑀁𑀲𑀼. 𑀓𑀓𑀼𑀲𑀦𑁆𑀥𑀲𑁆𑀲 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀼𑀯𑀡𑁆𑀡𑀺𑀝𑁆𑀞𑀓𑀸𑀳𑀺 𑀙𑀸𑀤𑁂𑀢𑁆𑀯𑀸 𑀓𑀺𑀡𑀺𑀁𑀲𑀼. 𑀓𑁄𑀡𑀸𑀕𑀫𑀦𑀲𑁆𑀲 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀼𑀯𑀡𑁆𑀡𑀓𑀘𑁆𑀙𑀧𑁂𑀳𑀺 𑀙𑀸𑀤𑁂𑀢𑁆𑀯𑀸 𑀓𑀺𑀡𑀺𑀁𑀲𑀼. 𑀓𑀲𑁆𑀲𑀧𑀲𑁆𑀲 ¶ 𑀲𑀼𑀯𑀡𑁆𑀡𑀓𑀝𑁆𑀝𑀻𑀳𑀺𑀬𑁂𑀯 𑀙𑀸𑀤𑁂𑀢𑁆𑀯𑀸 𑀓𑀺𑀡𑀺𑀁𑀲𑀼. 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀲𑀮𑀓𑁆𑀔𑀡𑀸𑀦𑀁 𑀓𑀳𑀸𑀧𑀡𑀸𑀦𑀁 𑀘𑀽𑀴𑀁𑀲𑁂𑀦 𑀙𑀸𑀤𑁂𑀢𑁆𑀯𑀸 𑀓𑀺𑀡𑀺𑀁𑀲𑀼. 𑀅𑀬𑀁 𑀯𑀺𑀳𑀸𑀭𑀪𑀽𑀫𑀺𑀕𑁆𑀕𑀳𑀡𑀥𑀦𑀧𑀭𑀺𑀘𑁆𑀙𑁂𑀤𑁄.

𑀢𑀢𑁆𑀣 ¶ 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀢𑀣𑀸 𑀪𑀽𑀫𑀺𑀁 𑀓𑀺𑀡𑀺𑀢𑁆𑀯𑀸 𑀯𑀺𑀳𑀸𑀭𑀁 𑀓𑀢𑁆𑀯𑀸 𑀤𑀺𑀦𑁆𑀦𑀼𑀧𑀝𑁆𑀞𑀸𑀓𑁄 𑀧𑀼𑀦𑀩𑁆𑀩𑀲𑀼𑀫𑀺𑀢𑁆𑀢𑁄 𑀦𑀸𑀫 𑀅𑀳𑁄𑀲𑀺, 𑀲𑀺𑀔𑀺𑀲𑁆𑀲 𑀲𑀺𑀭𑀺𑀯𑀟𑁆𑀠𑀦𑁄 𑀦𑀸𑀫, 𑀯𑁂𑀲𑁆𑀲𑀪𑀼𑀲𑁆𑀲 𑀲𑁄𑀢𑁆𑀣𑀺𑀬𑁄 𑀦𑀸𑀫, 𑀓𑀓𑀼𑀲𑀦𑁆𑀥𑀲𑁆𑀲 𑀅𑀘𑁆𑀘𑀼𑀢𑁄 𑀦𑀸𑀫, 𑀓𑁄𑀡𑀸𑀕𑀫𑀦𑀲𑁆𑀲 𑀉𑀕𑁆𑀕𑁄 𑀦𑀸𑀫, 𑀓𑀲𑁆𑀲𑀧𑀲𑁆𑀲 𑀲𑀼𑀫𑀦𑁄 𑀦𑀸𑀫, 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀲𑀼𑀤𑀢𑁆𑀢𑁄 𑀦𑀸𑀫. 𑀲𑀩𑁆𑀩𑁂 𑀘𑁂𑀢𑁂 𑀕𑀳𑀧𑀢𑀺𑀫𑀳𑀸𑀲𑀸𑀮𑀸 𑀲𑁂𑀝𑁆𑀞𑀺𑀦𑁄 𑀅𑀳𑁂𑀲𑀼𑀦𑁆𑀢𑀺. 𑀅𑀬𑀁 𑀉𑀧𑀝𑁆𑀞𑀸𑀓𑀧𑀭𑀺𑀘𑁆𑀙𑁂𑀤𑁄 𑀦𑀸𑀫.

𑀅𑀧𑀭𑀸𑀦𑀺 𑀘𑀢𑁆𑀢𑀸𑀭𑀺 𑀅𑀯𑀺𑀚𑀳𑀺𑀢𑀝𑁆𑀞𑀸𑀦𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀲𑀩𑁆𑀩𑀩𑀼𑀤𑁆𑀥𑀸𑀦𑀜𑁆𑀳𑀺 𑀩𑁄𑀥𑀺𑀧𑀮𑁆𑀮𑀗𑁆𑀓𑁄 𑀅𑀯𑀺𑀚𑀳𑀺𑀢𑁄, 𑀏𑀓𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀳𑁄𑀢𑀺. 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀁 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂 𑀅𑀯𑀺𑀚𑀳𑀺𑀢𑀫𑁂𑀯 𑀳𑁄𑀢𑀺. 𑀤𑁂𑀯𑁄𑀭𑁄𑀳𑀦𑀓𑀸𑀮𑁂 𑀲𑀗𑁆𑀓𑀲𑁆𑀲𑀦𑀕𑀭𑀤𑁆𑀯𑀸𑀭𑁂 𑀧𑀞𑀫𑀧𑀤𑀕𑀡𑁆𑀞𑀺𑀓𑀸 𑀅𑀯𑀺𑀚𑀳𑀺𑀢𑀸𑀯 𑀳𑁄𑀢𑀺. 𑀚𑁂𑀢𑀯𑀦𑁂 𑀕𑀦𑁆𑀥𑀓𑀼𑀝𑀺𑀬𑀸 𑀘𑀢𑁆𑀢𑀸𑀭𑀺 𑀫𑀜𑁆𑀘𑀧𑀸𑀤𑀝𑁆𑀞𑀸𑀦𑀸𑀦𑀺 𑀅𑀯𑀺𑀚𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀯𑀺𑀳𑀸𑀭𑁄 𑀧𑀦 𑀔𑀼𑀤𑁆𑀤𑀓𑁄𑀧𑀺 𑀫𑀳𑀦𑁆𑀢𑁄𑀧𑀺 𑀳𑁄𑀢𑀺, 𑀯𑀺𑀳𑀸𑀭𑁄𑀧𑀺 𑀦 𑀯𑀺𑀚𑀳𑀺𑀢𑁄𑀬𑁂𑀯, 𑀦𑀕𑀭𑀁 𑀧𑀦 𑀯𑀺𑀚𑀳𑀢𑀺. 𑀬𑀤𑀸 𑀦𑀕𑀭𑀁 𑀧𑀸𑀘𑀻𑀦𑀢𑁄 𑀳𑁄𑀢𑀺, 𑀢𑀤𑀸 𑀯𑀺𑀳𑀸𑀭𑁄 𑀧𑀘𑁆𑀙𑀺𑀫𑀢𑁄; 𑀬𑀤𑀸 𑀦𑀕𑀭𑀁 𑀤𑀓𑁆𑀔𑀺𑀡𑀢𑁄, 𑀢𑀤𑀸 𑀯𑀺𑀳𑀸𑀭𑁄 𑀉𑀢𑁆𑀢𑀭𑀢𑁄. 𑀬𑀤𑀸 𑀦𑀕𑀭𑀁 𑀧𑀘𑁆𑀙𑀺𑀫𑀢𑁄, 𑀢𑀤𑀸 𑀯𑀺𑀳𑀸𑀭𑁄 𑀧𑀸𑀘𑀻𑀦𑀢𑁄; 𑀬𑀤𑀸 𑀦𑀕𑀭𑀁 𑀉𑀢𑁆𑀢𑀭𑀢𑁄, 𑀢𑀤𑀸 𑀯𑀺𑀳𑀸𑀭𑁄 𑀤𑀓𑁆𑀔𑀺𑀡𑀢𑁄. 𑀇𑀤𑀸𑀦𑀺 𑀧𑀦 𑀦𑀕𑀭𑀁 𑀉𑀢𑁆𑀢𑀭𑀢𑁄, 𑀯𑀺𑀳𑀸𑀭𑁄 𑀤𑀓𑁆𑀔𑀺𑀡𑀢𑁄.

𑀲𑀩𑁆𑀩𑀩𑀼𑀤𑁆𑀥𑀸𑀦𑀜𑁆𑀘 ¶ 𑀆𑀬𑀼𑀯𑁂𑀫𑀢𑁆𑀢𑀁, 𑀧𑀫𑀸𑀡𑀯𑁂𑀫𑀢𑁆𑀢𑀁, 𑀓𑀼𑀮𑀯𑁂𑀫𑀢𑁆𑀢𑀁, 𑀧𑀥𑀸𑀦𑀯𑁂𑀫𑀢𑁆𑀢𑀁, 𑀭𑀲𑁆𑀫𑀺𑀯𑁂𑀫𑀢𑁆𑀢𑀦𑁆𑀢𑀺 𑀧𑀜𑁆𑀘 𑀯𑁂𑀫𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀆𑀬𑀼𑀯𑁂𑀫𑀢𑁆𑀢𑀁 𑀦𑀸𑀫 𑀓𑁂𑀘𑀺 𑀤𑀻𑀖𑀸𑀬𑀼𑀓𑀸 𑀳𑁄𑀦𑁆𑀢𑀺, 𑀓𑁂𑀘𑀺 𑀅𑀧𑁆𑀧𑀸𑀬𑀼𑀓𑀸. 𑀢𑀣𑀸 𑀳𑀺 𑀤𑀻𑀧𑀗𑁆𑀓𑀭𑀲𑁆𑀲 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺, 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀯𑀲𑁆𑀲𑀲𑀢𑀁 𑀆𑀬𑀼𑀧𑁆𑀧𑀫𑀸𑀡𑀁.

𑀧𑀫𑀸𑀡𑀯𑁂𑀫𑀢𑁆𑀢𑀁 𑀦𑀸𑀫 𑀓𑁂𑀘𑀺 𑀤𑀻𑀖𑀸 𑀳𑁄𑀦𑁆𑀢𑀺 𑀓𑁂𑀘𑀺 𑀭𑀲𑁆𑀲𑀸. 𑀢𑀣𑀸 𑀳𑀺 𑀤𑀻𑀧𑀗𑁆𑀓𑀭𑁄 𑀅𑀲𑀻𑀢𑀺𑀳𑀢𑁆𑀣𑁄 𑀅𑀳𑁄𑀲𑀺, 𑀲𑀼𑀫𑀦𑁄 𑀦𑀯𑀼𑀢𑀺𑀳𑀢𑁆𑀣𑁄, 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀅𑀝𑁆𑀞𑀸𑀭𑀲𑀳𑀢𑁆𑀣𑁄.

𑀓𑀼𑀮𑀯𑁂𑀫𑀢𑁆𑀢𑀁 ¶ 𑀦𑀸𑀫 𑀓𑁂𑀘𑀺 𑀔𑀢𑁆𑀢𑀺𑀬𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀓𑁂𑀘𑀺 𑀩𑁆𑀭𑀸𑀳𑁆𑀫𑀡𑀓𑀼𑀮𑁂. 𑀧𑀥𑀸𑀦𑀯𑁂𑀫𑀢𑁆𑀢𑀁 𑀦𑀸𑀫 𑀓𑁂𑀲𑀜𑁆𑀘𑀺 𑀧𑀥𑀸𑀦𑀁 𑀇𑀢𑁆𑀢𑀭𑀓𑀸𑀮𑀫𑁂𑀯 𑀳𑁄𑀢𑀺, 𑀬𑀣𑀸 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄. 𑀓𑁂𑀲𑀜𑁆𑀘𑀺 𑀅𑀤𑁆𑀥𑀦𑀺𑀬𑀁, 𑀬𑀣𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄.

𑀭𑀲𑁆𑀫𑀺𑀯𑁂𑀫𑀢𑁆𑀢𑀁 𑀦𑀸𑀫 𑀫𑀗𑁆𑀕𑀮𑀲𑁆𑀲 𑀪𑀕𑀯𑀢𑁄 𑀲𑀭𑀻𑀭𑀭𑀲𑁆𑀫𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀧𑁆𑀧𑀫𑀸𑀡𑀸 𑀅𑀳𑁄𑀲𑀺. 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀲𑀫𑀦𑁆𑀢𑀸 𑀩𑁆𑀬𑀸𑀫𑀫𑀢𑁆𑀢𑀸 ¶ . 𑀢𑀢𑁆𑀭 𑀭𑀲𑁆𑀫𑀺𑀯𑁂𑀫𑀢𑁆𑀢𑀁 𑀅𑀚𑁆𑀛𑀸𑀲𑀬𑀧𑁆𑀧𑀝𑀺𑀩𑀤𑁆𑀥𑀁, 𑀬𑁄 𑀬𑀢𑁆𑀢𑀓𑀁 𑀇𑀘𑁆𑀙𑀢𑀺, 𑀢𑀲𑁆𑀲 𑀢𑀢𑁆𑀢𑀓𑀁 𑀲𑀭𑀻𑀭𑀧𑁆𑀧𑀪𑀸 𑀨𑀭𑀢𑀺. 𑀫𑀗𑁆𑀕𑀮𑀲𑁆𑀲 𑀧𑀦 𑀦𑀺𑀘𑁆𑀘𑀫𑁆𑀧𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀨𑀭𑀢𑀽𑀢𑀺 𑀅𑀚𑁆𑀛𑀸𑀲𑀬𑁄 𑀅𑀳𑁄𑀲𑀺. 𑀧𑀝𑀺𑀯𑀺𑀤𑁆𑀥𑀕𑀼𑀡𑁂𑀲𑀼 𑀧𑀦 𑀓𑀲𑁆𑀲𑀘𑀺 𑀯𑁂𑀫𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺.

𑀅𑀧𑀭𑀁 𑀅𑀫𑁆𑀳𑀸𑀓𑀁𑀬𑁂𑀯 𑀪𑀕𑀯𑀢𑁄 𑀲𑀳𑀚𑀸𑀢𑀧𑀭𑀺𑀘𑁆𑀙𑁂𑀤𑀜𑁆𑀘 𑀦𑀓𑁆𑀔𑀢𑁆𑀢𑀧𑀭𑀺𑀘𑁆𑀙𑁂𑀤𑀜𑁆𑀘 𑀤𑀻𑀧𑁂𑀲𑀼𑀁. 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑁂𑀦 𑀓𑀺𑀭 𑀲𑀤𑁆𑀥𑀺𑀁 𑀭𑀸𑀳𑀼𑀮𑀫𑀸𑀢𑀸, 𑀆𑀦𑀦𑁆𑀤𑀢𑁆𑀣𑁂𑀭𑁄, 𑀙𑀦𑁆𑀦𑁄, 𑀓𑀡𑁆𑀝𑀓𑁄, 𑀦𑀺𑀥𑀺𑀓𑀼𑀫𑁆𑀪𑁄, 𑀫𑀳𑀸𑀩𑁄𑀥𑀺, 𑀓𑀸𑀴𑀼𑀤𑀸𑀬𑀻𑀢𑀺 𑀇𑀫𑀸𑀦𑀺 𑀲𑀢𑁆𑀢 𑀲𑀳𑀚𑀸𑀢𑀸𑀦𑀺. 𑀫𑀳𑀸𑀧𑀼𑀭𑀺𑀲𑁄 𑀘 𑀉𑀢𑁆𑀢𑀭𑀸𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑁂𑀦𑁂𑀯 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀺, 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺, 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀅𑀓𑀸𑀲𑀺. 𑀯𑀺𑀲𑀸𑀔𑀸𑀦𑀓𑁆𑀔𑀢𑁆𑀢𑁂𑀦 𑀚𑀸𑀢𑁄 𑀘 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀘 𑀧𑀭𑀺𑀦𑀺𑀩𑁆𑀩𑀼𑀢𑁄 𑀘. 𑀫𑀸𑀖𑀦𑀓𑁆𑀔𑀢𑁆𑀢𑁂𑀦𑀲𑁆𑀲 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁄 𑀘 𑀅𑀳𑁄𑀲𑀺, 𑀆𑀬𑀼𑀲𑀗𑁆𑀔𑀸𑀭𑁄𑀲𑁆𑀲𑀚𑁆𑀚𑀦𑀜𑁆𑀘, 𑀅𑀲𑁆𑀲𑀬𑀼𑀚𑀦𑀓𑁆𑀔𑀢𑁆𑀢𑁂𑀦 𑀤𑁂𑀯𑁄𑀭𑁄𑀳𑀦𑀦𑁆𑀢𑀺 𑀏𑀢𑁆𑀢𑀓𑀁 𑀆𑀳𑀭𑀺𑀢𑁆𑀯𑀸 𑀤𑀻𑀧𑁂𑀢𑀩𑁆𑀩𑀁. 𑀅𑀬𑀁 𑀲𑀫𑁆𑀩𑀳𑀼𑀮𑀧𑀭𑀺𑀘𑁆𑀙𑁂𑀤𑁄 𑀦𑀸𑀫.

𑁧𑁩. 𑀇𑀤𑀸𑀦𑀺 𑀅𑀣 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀦𑁆𑀢𑀺𑀆𑀤𑀻𑀲𑀼 𑀢𑁂 𑀪𑀺𑀓𑁆𑀔𑀽 𑁋 ‘‘𑀆𑀯𑀼𑀲𑁄, 𑀧𑀼𑀩𑁆𑀩𑁂𑀦𑀺𑀯𑀸𑀲𑀲𑁆𑀲 𑀦𑀸𑀫 𑀅𑀬𑀁 𑀕𑀢𑀺, 𑀬𑀤𑀺𑀤𑀁 𑀘𑀼𑀢𑀺𑀢𑁄 𑀧𑀝𑁆𑀞𑀸𑀬 𑀧𑀝𑀺𑀲𑀦𑁆𑀥𑀺𑀆𑀭𑁄𑀳𑀦𑀁. 𑀬𑀁 𑀧𑀦 𑀇𑀤𑀁 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀧𑀘𑁆𑀙𑀸𑀫𑀼𑀔𑀁 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀘𑀼𑀢𑀺 𑀕𑀦𑁆𑀢𑀩𑁆𑀩𑀁, 𑀇𑀤𑀁 𑀅𑀢𑀺𑀕𑀭𑀼𑀓𑀁. 𑀆𑀓𑀸𑀲𑁂 𑀧𑀤𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀬 𑀪𑀕𑀯𑀸 𑀓𑀣𑁂𑀲𑀻’’𑀢𑀺 𑀅𑀢𑀺𑀯𑀺𑀫𑁆𑀳𑀬𑀚𑀸𑀢𑀸 𑀳𑀼𑀢𑁆𑀯𑀸 𑁋 ‘‘𑀅𑀘𑁆𑀙𑀭𑀺𑀬𑀁, 𑀆𑀯𑀼𑀲𑁄,’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀧𑀼𑀦 𑀅𑀧𑀭𑀫𑁆𑀧𑀺 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑁋 ‘‘𑀬𑀢𑁆𑀭 𑀳𑀺 𑀦𑀸𑀫 𑀢𑀣𑀸𑀕𑀢𑁄’’𑀢𑀺𑀆𑀤𑀺𑀫𑀸𑀳𑀁𑀲𑀼 ¶ . 𑀢𑀢𑁆𑀣 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀅𑀘𑁆𑀙𑀭𑀺𑀬𑀢𑁆𑀣𑁂 𑀦𑀺𑀧𑀸𑀢𑁄, 𑀬𑁄 𑀦𑀸𑀫 𑀢𑀣𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀙𑀺𑀦𑁆𑀦𑀧𑀧𑀜𑁆𑀘𑁂𑀢𑀺 𑀏𑀢𑁆𑀣 𑀧𑀧𑀜𑁆𑀘𑀸 𑀦𑀸𑀫 𑀢𑀡𑁆𑀳𑀸 𑀫𑀸𑀦𑁄 𑀤𑀺𑀝𑁆𑀞𑀻𑀢𑀺 𑀇𑀫𑁂 𑀢𑀬𑁄 𑀓𑀺𑀮𑁂𑀲𑀸. 𑀙𑀺𑀦𑁆𑀦𑀯𑀝𑀼𑀫𑁂𑀢𑀺 𑀏𑀢𑁆𑀣 𑀯𑀝𑀼𑀫𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀯𑀝𑁆𑀝𑀁 𑀯𑀼𑀘𑁆𑀘𑀢𑀺. 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑁂𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀧𑀭𑀺𑀬𑀸𑀤𑀺𑀦𑁆𑀦𑀲𑀩𑁆𑀩𑀓𑀫𑁆𑀫𑀯𑀝𑁆𑀝𑁂𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑁂𑀢𑀺 𑀲𑀩𑁆𑀩𑀁 𑀯𑀺𑀧𑀸𑀓𑀯𑀝𑁆𑀝𑀲𑀗𑁆𑀔𑀸𑀢𑀁 𑀤𑀼𑀓𑁆𑀔𑀁 𑀯𑀻𑀢𑀺𑀯𑀢𑁆𑀢𑁂 ¶ . 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀻𑀢𑀺 𑀇𑀤𑀁 𑀬𑀢𑁆𑀭𑀸𑀢𑀺 𑀦𑀺𑀧𑀸𑀢𑀯𑀲𑁂𑀦 𑀅𑀦𑀸𑀕𑀢𑀯𑀘𑀦𑀁, 𑀅𑀢𑁆𑀣𑁄 𑀧𑀦𑁂𑀢𑁆𑀣 𑀅𑀢𑀻𑀢𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀪𑀕𑀯𑀸 𑀳𑀺 𑀢𑁂 𑀩𑀼𑀤𑁆𑀥𑁂 𑀅𑀦𑀼𑀲𑁆𑀲𑀭𑀺, 𑀦 𑀇𑀤𑀸𑀦𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺. 𑀏𑀯𑀁𑀲𑀻𑀮𑀸𑀢𑀺 ¶ 𑀫𑀕𑁆𑀕𑀲𑀻𑀮𑁂𑀦 𑀨𑀮𑀲𑀻𑀮𑁂𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀻𑀮𑁂𑀦 𑀏𑀯𑀁𑀲𑀻𑀮𑀸. 𑀏𑀯𑀁𑀥𑀫𑁆𑀫𑀸𑀢𑀺 𑀏𑀢𑁆𑀣 𑀲𑀫𑀸𑀥𑀺𑀧𑀓𑁆𑀔𑀸 𑀥𑀫𑁆𑀫𑀸 𑀅𑀥𑀺𑀧𑁆𑀧𑁂𑀢𑀸, 𑀫𑀕𑁆𑀕𑀲𑀫𑀸𑀥𑀺𑀦𑀸 𑀨𑀮𑀲𑀫𑀸𑀥𑀺𑀦𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀫𑀸𑀥𑀺𑀦𑀸, 𑀏𑀯𑀁𑀲𑀫𑀸𑀥𑀬𑁄𑀢𑀺 𑀅𑀢𑁆𑀣𑁄. 𑀏𑀯𑀁𑀧𑀜𑁆𑀜𑀸𑀢𑀺 𑀫𑀕𑁆𑀕𑀧𑀜𑁆𑀜𑀸𑀤𑀺𑀯𑀲𑁂𑀦𑁂𑀯 𑀏𑀯𑀁𑀧𑀜𑁆𑀜𑀸. 𑀏𑀯𑀁𑀯𑀺𑀳𑀸𑀭𑀻𑀢𑀺 𑀏𑀢𑁆𑀣 𑀧𑀦 𑀳𑁂𑀝𑁆𑀞𑀸 𑀲𑀫𑀸𑀥𑀺𑀧𑀓𑁆𑀔𑀸𑀦𑀁 𑀥𑀫𑁆𑀫𑀸𑀦𑀁 𑀕𑀳𑀺𑀢𑀢𑁆𑀢𑀸 𑀯𑀺𑀳𑀸𑀭𑁄 𑀕𑀳𑀺𑀢𑁄𑀯 𑀧𑀼𑀦 𑀓𑀲𑁆𑀫𑀸 𑀕𑀳𑀺𑀢𑀫𑁂𑀯 𑀕𑀡𑁆𑀳𑀸𑀢𑀻𑀢𑀺 𑀘𑁂; 𑀦 𑀇𑀤𑀁 𑀕𑀳𑀺𑀢𑀫𑁂𑀯, 𑀇𑀤𑀜𑁆𑀳𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀏𑀯𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀻 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀏𑀯𑀁𑀯𑀺𑀫𑀼𑀢𑁆𑀢𑀸𑀢𑀺 𑀏𑀢𑁆𑀣 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀺, 𑀢𑀤𑀗𑁆𑀕𑀯𑀺𑀫𑀼𑀢𑁆𑀢𑀺, 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀺, 𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀻𑀢𑀺 𑀧𑀜𑁆𑀘𑀯𑀺𑀥𑀸 𑀯𑀺𑀫𑀼𑀢𑁆𑀢𑀺. 𑀢𑀢𑁆𑀣 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀲𑀬𑀁 𑀯𑀺𑀓𑁆𑀔𑀫𑁆𑀪𑀺𑀢𑁂𑀳𑀺 𑀦𑀻𑀯𑀭𑀡𑀸𑀤𑀻𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀻𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺𑀓𑀸 𑀲𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀲𑀬𑀁 𑀢𑀲𑁆𑀲 𑀢𑀲𑁆𑀲 𑀧𑀘𑁆𑀘𑀦𑀻𑀓𑀗𑁆𑀕𑀯𑀲𑁂𑀦 𑀧𑀭𑀺𑀘𑁆𑀘𑀢𑁆𑀢𑀸𑀳𑀺 𑀦𑀺𑀘𑁆𑀘𑀲𑀜𑁆𑀜𑀸𑀤𑀻𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀢𑀤𑀗𑁆𑀕𑀯𑀺𑀫𑀼𑀢𑁆𑀢𑀻𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺. 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸 𑀲𑀬𑀁 𑀲𑀫𑀼𑀘𑁆𑀙𑀺𑀦𑁆𑀦𑁂𑀳𑀺 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀻𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺. 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀫𑀕𑁆𑀕𑀸𑀦𑀼𑀪𑀸𑀯𑁂𑀦 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀻𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺. 𑀦𑀺𑀩𑁆𑀩𑀸𑀦𑀁 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀦𑀺𑀲𑁆𑀲𑀝𑀢𑁆𑀢𑀸 𑀅𑀧𑀕𑀢𑀢𑁆𑀢𑀸 𑀤𑀽𑀭𑁂 𑀞𑀺𑀢𑀢𑁆𑀢𑀸 𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀻𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀇𑀢𑀺 𑀇𑀫𑀸𑀲𑀁 𑀧𑀜𑁆𑀘𑀦𑁆𑀦𑀁 𑀯𑀺𑀫𑀼𑀢𑁆𑀢𑀻𑀦𑀁 𑀯𑀲𑁂𑀦 𑁋 ‘‘𑀏𑀯𑀁 𑀯𑀺𑀫𑀼𑀢𑁆𑀢𑀸’’𑀢𑀺 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁧𑁪. 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀏𑀓𑀻𑀪𑀸𑀯𑀸 𑀯𑀼𑀝𑁆𑀞𑀺𑀢𑁄.

𑁧𑁬. ‘‘𑀇𑀢𑁄 𑀲𑁄, 𑀪𑀺𑀓𑁆𑀔𑀯𑁂’’𑀢𑀺 𑀓𑁄 𑀅𑀦𑀼𑀲𑀦𑁆𑀥𑀺? 𑀇𑀤𑀜𑁆𑀳𑀺 𑀲𑀼𑀢𑁆𑀢𑀁 𑁋 ‘‘𑀢𑀣𑀸𑀕𑀢𑀲𑁆𑀲𑁂𑀯𑁂𑀲𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀥𑀸𑀢𑀼 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸’’𑀢𑀺 𑀘 ‘‘𑀤𑁂𑀯𑀢𑀸𑀧𑀺 𑀢𑀣𑀸𑀕𑀢𑀲𑁆𑀲 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼’’𑀦𑁆𑀢𑀺 𑀘 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀆𑀩𑀤𑁆𑀥𑀁. 𑀢𑀢𑁆𑀣 𑀤𑁂𑀯𑀢𑀸𑀭𑁄𑀘𑀦𑀧𑀤𑀁 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑁄𑀲𑀸𑀦𑁂 𑀤𑁂𑀯𑀘𑀸𑀭𑀺𑀓𑀓𑁄𑀮𑀸𑀳𑀮𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀘𑀸𑀭𑁂𑀲𑁆𑀲𑀢𑀺 ¶ . 𑀥𑀫𑁆𑀫𑀥𑀸𑀢𑀼𑀧𑀤𑀸𑀦𑀼𑀲𑀦𑁆𑀥𑀺𑀯𑀲𑁂𑀦 𑀧𑀦 𑀅𑀬𑀁 𑀤𑁂𑀲𑀦𑀸 ¶ 𑀆𑀭𑀤𑁆𑀥𑀸. 𑀢𑀢𑁆𑀣 𑀔𑀢𑁆𑀢𑀺𑀬𑁄 𑀚𑀸𑀢𑀺𑀬𑀸𑀢𑀺𑀆𑀤𑀻𑀦𑀺 𑀏𑀓𑀸𑀤𑀲𑀧𑀤𑀸𑀦𑀺 𑀦𑀺𑀤𑀸𑀦𑀓𑀡𑁆𑀟𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀩𑁄𑀥𑀺𑀲𑀢𑁆𑀢𑀥𑀫𑁆𑀫𑀢𑀸𑀯𑀡𑁆𑀡𑀦𑀸

𑁧𑁭. 𑀅𑀣 ¶ 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀩𑁄𑀥𑀺𑀲𑀢𑁆𑀢𑁄𑀢𑀺𑀆𑀤𑀻𑀲𑀼 𑀧𑀦 𑀯𑀺𑀧𑀲𑁆𑀲𑀻𑀢𑀺 𑀢𑀲𑁆𑀲 𑀦𑀸𑀫𑀁, 𑀢𑀜𑁆𑀘 𑀔𑁄 𑀯𑀺𑀯𑀺𑀥𑁂 𑀅𑀢𑁆𑀣𑁂 𑀧𑀲𑁆𑀲𑀦𑀓𑀼𑀲𑀮𑀢𑀸𑀬 𑀮𑀤𑁆𑀥𑀁. 𑀩𑁄𑀥𑀺𑀲𑀢𑁆𑀢𑁄𑀢𑀺 𑀧𑀡𑁆𑀟𑀺𑀢𑀲𑀢𑁆𑀢𑁄 𑀩𑀼𑀚𑁆𑀛𑀦𑀓𑀲𑀢𑁆𑀢𑁄. 𑀩𑁄𑀥𑀺𑀲𑀗𑁆𑀔𑀸𑀢𑁂𑀲𑀼 𑀯𑀸 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀲𑀢𑁆𑀢𑁄 𑀆𑀲𑀢𑁆𑀢𑁄 𑀮𑀕𑁆𑀕𑀫𑀸𑀦𑀲𑁄𑀢𑀺 𑀩𑁄𑀥𑀺𑀲𑀢𑁆𑀢𑁄. 𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺 𑀏𑀢𑁆𑀣 𑀲𑀢𑁄𑀢𑀺 𑀲𑀢𑀺𑀬𑁂𑀯. 𑀲𑀫𑁆𑀧𑀚𑀸𑀦𑁄𑀢𑀺 𑀜𑀸𑀡𑀁. 𑀲𑀢𑀺𑀁 𑀲𑀽𑀧𑀝𑁆𑀞𑀺𑀢𑀁 𑀓𑀢𑁆𑀯𑀸 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀻𑀢𑀺 𑀅𑀢𑁆𑀣𑁄. 𑀑𑀓𑁆𑀓𑀫𑀻𑀢𑀺 𑀇𑀫𑀺𑀦𑀸 𑀘𑀲𑁆𑀲 𑀑𑀓𑁆𑀓𑀦𑁆𑀢𑀪𑀸𑀯𑁄 𑀧𑀸𑀴𑀺𑀬𑀁 𑀤𑀲𑁆𑀲𑀺𑀢𑁄, 𑀦 𑀑𑀓𑁆𑀓𑀫𑀦𑀓𑁆𑀓𑀫𑁄. 𑀲𑁄 𑀧𑀦 𑀬𑀲𑁆𑀫𑀸 𑀅𑀝𑁆𑀞𑀓𑀣𑀁 𑀆𑀭𑀽𑀴𑁆𑀳𑁄, 𑀢𑀲𑁆𑀫𑀸 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋

𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑀸 𑀳𑀺 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸, 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀧𑀭𑀺𑀘𑁆𑀘𑀚𑀺𑀢𑁆𑀯𑀸, 𑀜𑀸𑀢𑀢𑁆𑀣𑀘𑀭𑀺𑀬𑀮𑁄𑀓𑀢𑁆𑀣𑀘𑀭𑀺𑀬𑀩𑀼𑀤𑁆𑀥𑀘𑀭𑀺𑀬𑀸𑀦𑀁 𑀓𑁄𑀝𑀺𑀁 𑀧𑀢𑁆𑀯𑀸, 𑀯𑁂𑀲𑁆𑀲𑀦𑁆𑀢𑀭𑀲𑀤𑀺𑀲𑁂 𑀢𑀢𑀺𑀬𑁂 𑀅𑀢𑁆𑀢𑀪𑀸𑀯𑁂 𑀞𑀢𑁆𑀯𑀸, 𑀲𑀢𑁆𑀢 𑀫𑀳𑀸𑀤𑀸𑀦𑀸𑀦𑀺 𑀤𑀢𑁆𑀯𑀸, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀣𑀯𑀺𑀁 𑀓𑀫𑁆𑀧𑁂𑀢𑁆𑀯𑀸, 𑀓𑀸𑀮𑀗𑁆𑀓𑀢𑁆𑀯𑀸, 𑀤𑀼𑀢𑀺𑀬𑀘𑀺𑀢𑁆𑀢𑀯𑀸𑀭𑁂 𑀢𑀼𑀲𑀺𑀢𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀯𑀺𑀧𑀲𑁆𑀲𑀻 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑀣𑁂𑀯 𑀓𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀸𑀥𑀺𑀓𑀸 𑀲𑀢𑁆𑀢𑀧𑀜𑁆𑀜𑀸𑀲 𑀯𑀲𑁆𑀲𑀓𑁄𑀝𑀺𑀬𑁄 𑀢𑀢𑁆𑀣 𑀅𑀝𑁆𑀞𑀸𑀲𑀺. 𑀅𑀜𑁆𑀜𑀤𑀸 𑀧𑀦 𑀤𑀻𑀖𑀸𑀬𑀼𑀓𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸 𑀩𑁄𑀥𑀺𑀲𑀢𑁆𑀢𑀸 𑀦 𑀬𑀸𑀯𑀢𑀸𑀬𑀼𑀓𑀁 𑀢𑀺𑀝𑁆𑀞𑀦𑁆𑀢𑀺. 𑀓𑀲𑁆𑀫𑀸? 𑀢𑀢𑁆𑀣 𑀧𑀸𑀭𑀫𑀻𑀦𑀁 𑀤𑀼𑀧𑁆𑀧𑀽𑀭𑀡𑀻𑀬𑀢𑁆𑀢𑀸. 𑀢𑁂 𑀅𑀥𑀺𑀫𑀼𑀢𑁆𑀢𑀺𑀓𑀸𑀮𑀓𑀺𑀭𑀺𑀬𑀁 𑀓𑀢𑁆𑀯𑀸 𑀫𑀦𑀼𑀲𑁆𑀲𑀧𑀣𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀧𑀸𑀭𑀫𑀻𑀦𑀁 𑀧𑀽𑀭𑁂𑀦𑁆𑀢𑁄 𑀧𑀦 𑀬𑀣𑀸 𑀇𑀤𑀸𑀦𑀺 𑀏𑀓𑁂𑀦 𑀅𑀢𑁆𑀢𑀪𑀸𑀯𑁂𑀦 𑀲𑀩𑁆𑀩𑀜𑁆𑀜𑀼𑀢𑀁 𑀉𑀧𑀦𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀏𑀯𑀁 𑀲𑀩𑁆𑀩𑀲𑁄 𑀧𑀽𑀭𑀺𑀢𑀢𑁆𑀢𑀸 𑀢𑀤𑀸 𑀯𑀺𑀧𑀲𑁆𑀲𑀻 𑀩𑁄𑀥𑀺𑀲𑀢𑁆𑀢𑁄 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀅𑀝𑁆𑀞𑀸𑀲𑀺.

𑀤𑁂𑀯𑀢𑀸𑀦𑀁 𑀧𑀦 𑁋 ‘‘𑀫𑀦𑀼𑀲𑁆𑀲𑀸𑀦𑀁 𑀕𑀡𑀦𑀸𑀯𑀲𑁂𑀦 𑀇𑀤𑀸𑀦𑀺 𑀲𑀢𑁆𑀢𑀳𑀺 𑀤𑀺𑀯𑀲𑁂𑀳𑀺 𑀘𑀼𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀜𑁆𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀫𑀸𑀮𑀸 𑀫𑀺𑀮𑀸𑀬𑀦𑁆𑀢𑀺, 𑀯𑀢𑁆𑀣𑀸𑀦𑀺 𑀓𑀺𑀮𑀺𑀲𑁆𑀲𑀦𑁆𑀢𑀺, 𑀓𑀘𑁆𑀙𑁂𑀳𑀺 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀓𑀸𑀬𑁂 𑀤𑀼𑀩𑁆𑀩𑀡𑁆𑀡𑀺𑀬𑀁 𑀑𑀓𑁆𑀓𑀫𑀢𑀺, 𑀤𑁂𑀯𑁄 𑀤𑁂𑀯𑀸𑀲𑀦𑁂 𑀦 𑀲𑀡𑁆𑀞𑀸𑀢𑀺. 𑀢𑀢𑁆𑀣 ¶ 𑀫𑀸𑀮𑀸𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀤𑀺𑀯𑀲𑁂 𑀧𑀺𑀴𑀦𑁆𑀥𑀦𑀫𑀸𑀮𑀸 ¶ , 𑀢𑀸 𑀓𑀺𑀭 𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀸𑀥𑀺𑀓𑀸 𑀲𑀢𑁆𑀢𑀧𑀡𑁆𑀡𑀸𑀲 𑀯𑀲𑁆𑀲𑀓𑁄𑀝𑀺𑀬𑁄 𑀅𑀫𑀺𑀮𑀸𑀬𑀺𑀢𑁆𑀯𑀸 𑀢𑀤𑀸 𑀫𑀺𑀮𑀸𑀬𑀦𑁆𑀢𑀺. 𑀯𑀢𑁆𑀣𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀢𑀓𑀁 𑀧𑀦 𑀓𑀸𑀮𑀁 𑀤𑁂𑀯𑀸𑀦𑀁 𑀦𑁂𑀯 𑀲𑀻𑀢𑀁 𑀦 𑀉𑀡𑁆𑀳𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀭𑀻𑀭𑀸 𑀩𑀺𑀦𑁆𑀤𑀼𑀩𑀺𑀦𑁆𑀤𑀼𑀯𑀲𑁂𑀦 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺. 𑀏𑀢𑁆𑀢𑀓𑀜𑁆𑀘 𑀓𑀸𑀮𑀁 𑀢𑁂𑀲𑀁 𑀲𑀭𑀻𑀭𑁂 𑀔𑀡𑁆𑀟𑀺𑀘𑁆𑀘𑀧𑀸𑀮𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀯𑀡𑁆𑀡𑀢𑀸 𑀦 𑀧𑀜𑁆𑀜𑀸𑀬𑀢𑀺, 𑀤𑁂𑀯𑀥𑀻𑀢𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀯𑀺𑀬 𑀔𑀸𑀬𑀦𑁆𑀢𑀺, 𑀤𑁂𑀯𑀧𑀼𑀢𑁆𑀢𑀸 𑀯𑀻𑀲𑀢𑀺𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀯𑀺𑀬 𑀔𑀸𑀬𑀦𑁆𑀢𑀺, 𑀫𑀭𑀡𑀓𑀸𑀮𑁂 𑀧𑀦 𑀢𑁂𑀲𑀁 𑀓𑀺𑀮𑀦𑁆𑀢𑀭𑀽𑀧𑁄 𑀅𑀢𑁆𑀢𑀪𑀸𑀯𑁄 𑀳𑁄𑀢𑀺. 𑀏𑀢𑁆𑀢𑀓𑀜𑁆𑀘 𑀢𑁂𑀲𑀁 𑀓𑀸𑀮𑀁 𑀤𑁂𑀯𑀮𑁄𑀓𑁂 𑀉𑀓𑁆𑀓𑀡𑁆𑀞𑀺𑀢𑀸 𑀦𑀸𑀫 𑀦𑀢𑁆𑀣𑀺, 𑀫𑀭𑀡𑀓𑀸𑀮𑁂 𑀧𑀦 𑀦𑀺𑀲𑁆𑀲𑀲𑀦𑁆𑀢𑀺 𑀯𑀺𑀚𑀫𑁆𑀪𑀦𑁆𑀢𑀺, 𑀲𑀓𑁂 𑀆𑀲𑀦𑁂 𑀦𑀸𑀪𑀺𑀭𑀫𑀦𑁆𑀢𑀺.

𑀇𑀫𑀸𑀦𑀺 ¶ 𑀧𑀦 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀬𑀣𑀸 𑀮𑁄𑀓𑁂 𑀫𑀳𑀸𑀧𑀼𑀜𑁆𑀜𑀸𑀦𑀁 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀦𑀁𑀬𑁂𑀯 𑀉𑀓𑁆𑀓𑀸𑀧𑀸𑀢𑀪𑀽𑀫𑀺𑀘𑀸𑀮𑀘𑀦𑁆𑀤𑀕𑁆𑀕𑀸𑀳𑀸𑀤𑀻𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺, 𑀦 𑀲𑀩𑁆𑀩𑁂𑀲𑀁; 𑀏𑀯𑀁 𑀫𑀳𑁂𑀲𑀓𑁆𑀔𑀤𑁂𑀯𑀢𑀸𑀦𑀁𑀬𑁂𑀯 𑀧𑀜𑁆𑀜𑀸𑀬𑀦𑁆𑀢𑀺, 𑀦 𑀲𑀩𑁆𑀩𑁂𑀲𑀁. 𑀬𑀣𑀸 𑀘 𑀫𑀦𑀼𑀲𑁆𑀲𑁂𑀲𑀼 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀦𑀓𑁆𑀔𑀢𑁆𑀢𑀧𑀸𑀞𑀓𑀸𑀤𑀬𑁄𑀯 𑀚𑀸𑀦𑀦𑁆𑀢𑀺, 𑀦 𑀲𑀩𑁆𑀩𑁂; 𑀏𑀯𑀁 𑀢𑀸𑀦𑀺𑀧𑀺 𑀦 𑀲𑀩𑁆𑀩𑀤𑁂𑀯𑀢𑀸 𑀚𑀸𑀦𑀦𑁆𑀢𑀺, 𑀧𑀡𑁆𑀟𑀺𑀢𑀸 𑀏𑀯 𑀧𑀦 𑀚𑀸𑀦𑀦𑁆𑀢𑀺. 𑀢𑀢𑁆𑀣 𑀬𑁂 𑀫𑀦𑁆𑀤𑁂𑀦 𑀓𑀼𑀲𑀮𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀸 𑀤𑁂𑀯𑀧𑀼𑀢𑁆𑀢𑀸, 𑀢𑁂 𑀢𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑁋 ‘‘𑀇𑀤𑀸𑀦𑀺 𑀓𑁄 𑀚𑀸𑀦𑀸𑀢𑀺, ‘𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀸’𑀢𑀺’’ 𑀪𑀸𑀬𑀦𑁆𑀢𑀺. 𑀬𑁂 𑀫𑀳𑀸𑀧𑀼𑀜𑁆𑀜𑀸, 𑀢𑁂 ‘‘𑀅𑀫𑁆𑀳𑁂𑀳𑀺 𑀤𑀺𑀦𑁆𑀦𑀁 𑀤𑀸𑀦𑀁, 𑀭𑀓𑁆𑀔𑀺𑀢𑀁 𑀲𑀻𑀮𑀁, 𑀪𑀸𑀯𑀺𑀢𑀁 𑀪𑀸𑀯𑀦𑀁 𑀆𑀕𑀫𑁆𑀫 𑀉𑀧𑀭𑀺 𑀤𑁂𑀯𑀮𑁄𑀓𑁂𑀲𑀼 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀦 𑀪𑀸𑀬𑀦𑁆𑀢𑀺. 𑀯𑀺𑀧𑀲𑁆𑀲𑀻 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑀸𑀦𑀺 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 ‘‘𑀇𑀤𑀸𑀦𑀺 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀦 𑀪𑀸𑀬𑀢𑀺. 𑀅𑀣𑀲𑁆𑀲 𑀢𑁂𑀲𑀼 𑀦𑀺𑀫𑀺𑀢𑁆𑀢𑁂𑀲𑀼 𑀧𑀸𑀢𑀼𑀪𑀽𑀢𑁂𑀲𑀼 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑁋 ‘‘𑀫𑀸𑀭𑀺𑀲, 𑀢𑀼𑀫𑁆𑀳𑁂𑀳𑀺 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁂𑀳𑀺 𑀦 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀁, 𑀦 𑀫𑀸𑀭𑀲𑀫𑁆𑀧𑀢𑁆𑀢𑀺𑀁, 𑀦 𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀁, 𑀦 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀣𑁂𑀦𑁆𑀢𑁂𑀳𑀺 𑀧𑀽𑀭𑀺𑀢𑀸, 𑀮𑁄𑀓𑀦𑀺𑀢𑁆𑀣𑀭𑀡𑀢𑁆𑀣𑀸𑀬 𑀧𑀦 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀣𑀬𑀫𑀸𑀦𑁂𑀳𑀺 𑀧𑀽𑀭𑀺𑀢𑀸. 𑀲𑁄 𑀯𑁄, 𑀇𑀤𑀸𑀦𑀺 𑀓𑀸𑀮𑁄, 𑀫𑀸𑀭𑀺𑀲, 𑀩𑀼𑀤𑁆𑀥𑀢𑁆𑀢𑀸𑀬, 𑀲𑀫𑀬𑁄, 𑀫𑀸𑀭𑀺𑀲, 𑀩𑀼𑀤𑁆𑀥𑀢𑁆𑀢𑀸𑀬𑀸’’𑀢𑀺 𑀬𑀸𑀘𑀦𑁆𑀢𑀺.

𑀅𑀣 𑀫𑀳𑀸𑀲𑀢𑁆𑀢𑁄 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀧𑀝𑀺𑀜𑁆𑀜𑀁 𑀅𑀤𑀢𑁆𑀯𑀸𑀯 𑀓𑀸𑀮𑀤𑀻𑀧𑀤𑁂𑀲𑀓𑀼𑀮𑀚𑀦𑁂𑀢𑁆𑀢𑀺𑀆𑀬𑀼𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀧𑀜𑁆𑀘𑀫𑀳𑀸𑀯𑀺𑀮𑁄𑀓𑀦𑀁 𑀦𑀸𑀫 𑀯𑀺𑀮𑁄𑀓𑁂𑀲𑀺. 𑀢𑀢𑁆𑀣 ‘‘𑀓𑀸𑀮𑁄 𑀦𑀼 𑀔𑁄, 𑀦 𑀓𑀸𑀮𑁄’’𑀢𑀺 𑀧𑀞𑀫𑀁 𑀓𑀸𑀮𑀁 𑀯𑀺𑀮𑁄𑀓𑁂𑀲𑀺. 𑀢𑀢𑁆𑀣 ¶ 𑀯𑀲𑁆𑀲𑀲𑀢𑀲𑀳𑀲𑁆𑀲𑀢𑁄 𑀉𑀤𑁆𑀥𑀁 𑀯𑀟𑁆𑀠𑀺𑀢𑀆𑀬𑀼𑀓𑀸𑀮𑁄 𑀓𑀸𑀮𑁄 𑀦𑀸𑀫 𑀦 𑀳𑁄𑀢𑀺. 𑀓𑀲𑁆𑀫𑀸? 𑀢𑀤𑀸 𑀳𑀺 𑀲𑀢𑁆𑀢𑀸𑀦𑀁 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀦 ¶ 𑀧𑀜𑁆𑀜𑀸𑀬𑀦𑁆𑀢𑀺, 𑀩𑀼𑀤𑁆𑀥𑀸𑀦𑀜𑁆𑀘 𑀥𑀫𑁆𑀫𑀤𑁂𑀲𑀦𑀸 𑀦𑀸𑀫 𑀢𑀺𑀮𑀓𑁆𑀔𑀡𑀫𑀼𑀢𑁆𑀢𑀸 𑀦𑀢𑁆𑀣𑀺. 𑀢𑁂 𑀢𑁂𑀲𑀁 𑁋 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑀺 𑀓𑀣𑁂𑀦𑁆𑀢𑀸𑀦𑀁 𑁋 ‘‘𑀓𑀺𑀁 𑀦𑀸𑀫𑁂𑀢𑀁 𑀓𑀣𑁂𑀦𑁆𑀢𑀻’’𑀢𑀺 𑀦𑁂𑀯 𑀲𑁄𑀢𑀼𑀁, 𑀦 𑀲𑀤𑁆𑀤𑀳𑀺𑀢𑀼𑀁 𑀫𑀜𑁆𑀜𑀦𑁆𑀢𑀺, 𑀢𑀢𑁄 𑀅𑀪𑀺𑀲𑀫𑀬𑁄 𑀦 𑀳𑁄𑀢𑀺, 𑀢𑀲𑁆𑀫𑀺𑀁 𑀅𑀲𑀢𑀺 𑀅𑀦𑀺𑀬𑁆𑀬𑀸𑀦𑀺𑀓𑀁 𑀲𑀸𑀲𑀦𑀁 𑀳𑁄𑀢𑀺. 𑀢𑀲𑁆𑀫𑀸 𑀲𑁄 𑀅𑀓𑀸𑀮𑁄. 𑀯𑀲𑁆𑀲𑀲𑀢𑀢𑁄 𑀊𑀦𑀆𑀬𑀼𑀓𑀸𑀮𑁄𑀧𑀺 𑀓𑀸𑀮𑁄 𑀦 𑀳𑁄𑀢𑀺. 𑀓𑀲𑁆𑀫𑀸? 𑀢𑀤𑀸 𑀳𑀺 𑀲𑀢𑁆𑀢𑀸 𑀉𑀲𑁆𑀲𑀦𑁆𑀦𑀓𑀺𑀮𑁂𑀲𑀸 𑀳𑁄𑀦𑁆𑀢𑀺, 𑀉𑀲𑁆𑀲𑀦𑁆𑀦𑀓𑀺𑀮𑁂𑀲𑀸𑀦𑀜𑁆𑀘 𑀤𑀺𑀦𑁆𑀦𑁄 𑀑𑀯𑀸𑀤𑁄 𑀑𑀯𑀸𑀤𑀝𑁆𑀞𑀸𑀦𑁂 𑀦 𑀢𑀺𑀝𑁆𑀞𑀢𑀺, 𑀉𑀤𑀓𑁂 𑀤𑀡𑁆𑀟𑀭𑀸𑀚𑀺 𑀯𑀺𑀬 𑀔𑀺𑀧𑁆𑀧𑀁 𑀯𑀺𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀲𑁄𑀧𑀺 𑀅𑀓𑀸𑀮𑁄𑀯. 𑀯𑀲𑁆𑀲𑀲𑀢𑀲𑀳𑀲𑁆𑀲𑀢𑁄 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸, 𑀯𑀲𑁆𑀲𑀲𑀢𑀢𑁄 𑀧𑀝𑁆𑀞𑀸𑀬 𑀉𑀤𑁆𑀥𑀁 𑀆𑀬𑀼𑀓𑀸𑀮𑁄 𑀓𑀸𑀮𑁄 𑀦𑀸𑀫, 𑀢𑀤𑀸 𑀘 𑀅𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀸 𑀫𑀦𑀼𑀲𑁆𑀲𑀸. 𑀅𑀣 𑀫𑀳𑀸𑀲𑀢𑁆𑀢𑁄 𑁋 ‘‘𑀦𑀺𑀩𑁆𑀩𑀢𑁆𑀢𑀺𑀢𑀩𑁆𑀩𑀓𑀸𑀮𑁄’’𑀢𑀺 𑀓𑀸𑀮𑀁 𑀧𑀲𑁆𑀲𑀺.

𑀢𑀢𑁄 𑀤𑀻𑀧𑀁 𑀯𑀺𑀮𑁄𑀓𑁂𑀦𑁆𑀢𑁄 𑀲𑀧𑀭𑀺𑀯𑀸𑀭𑁂 𑀘𑀢𑁆𑀢𑀸𑀭𑁄 𑀤𑀻𑀧𑁂 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀢𑀻𑀲𑀼 𑀤𑀻𑀧𑁂𑀲𑀼 𑀩𑀼𑀤𑁆𑀥𑀸 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀚𑀫𑁆𑀩𑀼𑀤𑀻𑀧𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’’𑀢𑀺 𑀤𑀻𑀧𑀁 𑀧𑀲𑁆𑀲𑀺.

𑀢𑀢𑁄 ¶ 𑁋 ‘‘𑀚𑀫𑁆𑀩𑀼𑀤𑀻𑀧𑁄 𑀦𑀸𑀫 𑀫𑀳𑀸, 𑀤𑀲𑀬𑁄𑀚𑀦𑀲𑀳𑀲𑁆𑀲𑀧𑀭𑀺𑀫𑀸𑀡𑁄, 𑀓𑀢𑀭𑀲𑁆𑀫𑀺𑀁 𑀦𑀼 𑀔𑁄 𑀧𑀤𑁂𑀲𑁂 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’’𑀢𑀺 𑀤𑁂𑀲𑀁 𑀯𑀺𑀮𑁄𑀓𑁂𑀦𑁆𑀢𑁄 𑀫𑀚𑁆𑀛𑀺𑀫𑀤𑁂𑀲𑀁 𑀧𑀲𑁆𑀲𑀺. 𑀫𑀚𑁆𑀛𑀺𑀫𑀤𑁂𑀲𑁄 𑀦𑀸𑀫 𑁋 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀕𑀚𑀗𑁆𑀕𑀮𑀁 𑀦𑀸𑀫 𑀦𑀺𑀕𑀫𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁨𑁫𑁯) 𑀦𑀬𑁂𑀦 𑀯𑀺𑀦𑀬𑁂 𑀯𑀼𑀢𑁆𑀢𑁄𑀯. 𑀲𑁄 𑀆𑀬𑀸𑀫𑀢𑁄 𑀢𑀻𑀡𑀺 𑀬𑁄𑀚𑀦𑀲𑀢𑀸𑀦𑀺, 𑀯𑀺𑀢𑁆𑀣𑀸𑀭𑀢𑁄 𑀅𑀟𑁆𑀠𑀢𑁂𑀬𑁆𑀬𑀸𑀦𑀺, 𑀧𑀭𑀺𑀓𑁆𑀔𑁂𑀧𑀢𑁄 𑀦𑀯𑀬𑁄𑀚𑀦𑀲𑀢𑀸𑀦𑀻𑀢𑀺. 𑀏𑀢𑀲𑁆𑀫𑀺𑀜𑁆𑀳𑀺 𑀧𑀤𑁂𑀲𑁂 𑀩𑀼𑀤𑁆𑀥𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀅𑀕𑁆𑀕𑀲𑀸𑀯𑀓𑀸 𑀅𑀲𑀻𑀢𑀺 𑀫𑀳𑀸𑀲𑀸𑀯𑀓𑀸 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑁄 𑀅𑀜𑁆𑀜𑁂 𑀘 𑀫𑀳𑁂𑀲𑀓𑁆𑀔𑀸 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀫𑀳𑀸𑀲𑀸𑀮𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀇𑀤𑀜𑁆𑀘𑁂𑀢𑁆𑀣 𑀩𑀦𑁆𑀥𑀼𑀫𑀢𑀻 𑀦𑀸𑀫 𑀦𑀕𑀭𑀁, 𑀢𑀢𑁆𑀣 𑀫𑀬𑀸 𑀦𑀺𑀩𑁆𑀩𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀦𑀺𑀝𑁆𑀞𑀁 𑀅𑀕𑀫𑀸𑀲𑀺.

𑀢𑀢𑁄 𑀓𑀼𑀮𑀁 𑀯𑀺𑀮𑁄𑀓𑁂𑀦𑁆𑀢𑁄 𑁋 ‘‘𑀩𑀼𑀤𑁆𑀥𑀸 𑀦𑀸𑀫 𑀮𑁄𑀓𑀲𑀫𑁆𑀫𑀢𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀇𑀤𑀸𑀦𑀺 𑀘 𑀔𑀢𑁆𑀢𑀺𑀬𑀓𑀼𑀮𑀁 𑀮𑁄𑀓𑀲𑀫𑁆𑀫𑀢𑀁, 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀺, 𑀩𑀦𑁆𑀥𑀼𑀫𑀸 𑀦𑀸𑀫 𑀫𑁂 𑀭𑀸𑀚𑀸 𑀧𑀺𑀢𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀼𑀮𑀁 𑀧𑀲𑁆𑀲𑀺.

𑀢𑀢𑁄 ¶ 𑀫𑀸𑀢𑀭𑀁 𑀯𑀺𑀮𑁄𑀓𑁂𑀦𑁆𑀢𑁄 𑁋 ‘‘𑀩𑀼𑀤𑁆𑀥𑀫𑀸𑀢𑀸 𑀦𑀸𑀫 𑀮𑁄𑀮𑀸 𑀲𑀼𑀭𑀸𑀥𑀼𑀢𑁆𑀢𑀸 𑀦 𑀳𑁄𑀢𑀺, 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀽𑀭𑀺𑀢𑀧𑀸𑀭𑀫𑀻, 𑀚𑀸𑀢𑀺𑀢𑁄 𑀧𑀝𑁆𑀞𑀸𑀬 𑀅𑀔𑀡𑁆𑀟𑀧𑀜𑁆𑀘𑀲𑀻𑀮𑀸 𑀳𑁄𑀢𑀺, 𑀅𑀬𑀜𑁆𑀘 𑀩𑀦𑁆𑀥𑀼𑀫𑀢𑀻 𑀦𑀸𑀫 𑀤𑁂𑀯𑀻 𑀈𑀤𑀺𑀲𑀸, 𑀅𑀬𑀁 𑀫𑁂 𑀫𑀸𑀢𑀸 𑀪𑀯𑀺𑀲𑁆𑀲𑀢𑀺 ¶ , ‘‘𑀓𑀺𑀢𑁆𑀢𑀓𑀁 𑀧𑀦𑀲𑁆𑀲𑀸 𑀆𑀬𑀽’’𑀢𑀺 𑀆𑀯𑀚𑁆𑀚𑀦𑁆𑀢𑁄 ‘‘𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀉𑀧𑀭𑀺 𑀲𑀢𑁆𑀢 𑀤𑀺𑀯𑀲𑀸𑀦𑀻’’𑀢𑀺 𑀧𑀲𑁆𑀲𑀺.

𑀇𑀢𑀺 𑀇𑀫𑀁 𑀧𑀜𑁆𑀘𑀫𑀳𑀸𑀯𑀺𑀮𑁄𑀓𑀦𑀁 𑀯𑀺𑀮𑁄𑀓𑁂𑀢𑁆𑀯𑀸 ‘‘𑀓𑀸𑀮𑁄, 𑀫𑁂 𑀫𑀸𑀭𑀺𑀲𑀸, 𑀩𑀼𑀤𑁆𑀥𑀪𑀸𑀯𑀸𑀬𑀸’’𑀢𑀺 𑀤𑁂𑀯𑀢𑀸𑀦𑀁 𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑁄 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 𑁋 ‘‘𑀕𑀘𑁆𑀙𑀣, 𑀢𑀼𑀫𑁆𑀳𑁂’’𑀢𑀺 𑀢𑀸 𑀤𑁂𑀯𑀢𑀸 𑀉𑀬𑁆𑀬𑁄𑀚𑁂𑀢𑁆𑀯𑀸 𑀢𑀼𑀲𑀺𑀢𑀤𑁂𑀯𑀢𑀸𑀳𑀺 𑀧𑀭𑀺𑀯𑀼𑀢𑁄 𑀢𑀼𑀲𑀺𑀢𑀧𑀼𑀭𑁂 𑀦𑀦𑁆𑀤𑀦𑀯𑀦𑀁 𑀧𑀸𑀯𑀺𑀲𑀺. 𑀲𑀩𑁆𑀩𑀤𑁂𑀯𑀮𑁄𑀓𑁂𑀲𑀼 𑀳𑀺 𑀦𑀦𑁆𑀤𑀦𑀯𑀦𑀁 𑀅𑀢𑁆𑀣𑀺𑀬𑁂𑀯. 𑀢𑀢𑁆𑀭 𑀦𑀁 𑀤𑁂𑀯𑀢𑀸 𑀇𑀢𑁄 𑀘𑀼𑀢𑁄 𑀲𑀼𑀕𑀢𑀺𑀁 𑀕𑀘𑁆𑀙𑀸𑀢𑀺 𑀧𑀼𑀩𑁆𑀩𑁂𑀓𑀢𑀓𑀼𑀲𑀮𑀓𑀫𑁆𑀫𑁄𑀓𑀸𑀲𑀁 𑀲𑀸𑀭𑀬𑀫𑀸𑀦𑀸 𑀯𑀺𑀘𑀭𑀦𑁆𑀢𑀺. 𑀲𑁄 𑀏𑀯𑀁 𑀤𑁂𑀯𑀢𑀸𑀳𑀺 𑀓𑀼𑀲𑀮𑀁 𑀲𑀸𑀭𑀬𑀫𑀸𑀦𑀸𑀳𑀺 𑀧𑀭𑀺𑀯𑀼𑀢𑁄 𑀢𑀢𑁆𑀣 𑀯𑀺𑀘𑀭𑀦𑁆𑀢𑁄𑀬𑁂𑀯 𑀘𑀯𑀺.

𑀏𑀯𑀁 𑀘𑀼𑀢𑁄 𑀘 ‘𑀘𑀯𑀸𑀫𑀻’𑀢𑀺 𑀚𑀸𑀦𑀸𑀢𑀺, 𑀘𑀼𑀢𑀺𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺. 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸𑀧𑀺 𑀚𑀸𑀦𑀸𑀢𑀺, 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀫𑁂𑀯 𑀦 𑀚𑀸𑀦𑀸𑀢𑀺. ‘‘𑀇𑀫𑀲𑁆𑀫𑀺𑀁 𑀫𑁂 𑀞𑀸𑀦𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑀺𑀢𑀸’’𑀢𑀺 𑀏𑀯𑀁 𑀧𑀦 𑀚𑀸𑀦𑀸𑀢𑀺. 𑀓𑁂𑀘𑀺 𑀧𑀦 𑀣𑁂𑀭𑀸 𑁋 ‘‘𑀆𑀯𑀚𑁆𑀚𑀦𑀧𑀭𑀺𑀬𑀸𑀬𑁄 𑀦𑀸𑀫 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀤𑀼𑀢𑀺𑀬𑀢𑀢𑀺𑀬𑀘𑀺𑀢𑁆𑀢𑀯𑀸𑀭𑁂 𑀏𑀯 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑀺𑀧𑀺𑀝𑀓𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦 𑀆𑀳 𑁋 ‘‘𑀫𑀳𑀸𑀲𑀢𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺 𑀦 𑀅𑀜𑁆𑀜𑁂𑀲𑀁 𑀧𑀝𑀺𑀲𑀦𑁆𑀥𑀺𑀲𑀤𑀺𑀲𑀸, 𑀓𑁄𑀝𑀺𑀧𑁆𑀧𑀢𑁆𑀢𑀁 𑀧𑀦 𑀢𑁂𑀲𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀁. 𑀬𑀲𑁆𑀫𑀸 𑀧𑀦 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀢𑀁 𑀘𑀺𑀢𑁆𑀢𑀁 𑀜𑀸𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀘𑀼𑀢𑀺𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺. 𑀘𑀼𑀢𑀺𑀓𑁆𑀔𑀡𑁂𑀧𑀺 ‘𑀘𑀯𑀸𑀫𑀻’𑀢𑀺 𑀚𑀸𑀦𑀸𑀢𑀺. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺. ‘𑀅𑀲𑀼𑀓𑀲𑁆𑀫𑀺𑀁 𑀫𑁂 𑀞𑀸𑀦𑁂 𑀧𑀝𑀺𑀲𑀦𑁆𑀥𑀺 𑀕𑀳𑀺𑀢𑀸’𑀢𑀺 𑀚𑀸𑀦𑀸𑀢𑀺, 𑀢𑀲𑁆𑀫𑀺𑀁 ¶ 𑀓𑀸𑀮𑁂 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀓𑀫𑁆𑀧𑀢𑀻’’𑀢𑀺. 𑀏𑀯𑀁 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀦𑁆𑀢𑁄 𑀧𑀦 𑀏𑀓𑀽𑀦𑀯𑀻𑀲𑀢𑀺𑀬𑀸 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀲𑁆𑀲 𑀲𑁄𑀫𑀦𑀲𑁆𑀲𑀲𑀳𑀕𑀢𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀅𑀲𑀗𑁆𑀔𑀸𑀭𑀺𑀓𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀲𑀤𑀺𑀲𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑁂𑀦 𑀧𑀝𑀺𑀲𑀦𑁆𑀥𑀺 𑀕𑀡𑁆𑀳𑀺. 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦𑀸𑀢𑀺 𑀆𑀳. 𑀬𑀣𑀸 ¶ 𑀘 𑀅𑀫𑁆𑀳𑀸𑀓𑀁 𑀪𑀕𑀯𑀸, 𑀏𑀯𑀁 𑀲𑁄𑀧𑀺 𑀆𑀲𑀸𑀴𑁆𑀳𑀻𑀧𑀼𑀡𑁆𑀡𑀫𑀸𑀬𑀁 𑀉𑀢𑁆𑀢𑀭𑀸𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑁂𑀦𑁂𑀯 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺.

𑀢𑀤𑀸 𑀓𑀺𑀭 𑀧𑀼𑀭𑁂 𑀧𑀼𑀡𑁆𑀡𑀫𑀸𑀬 𑀲𑀢𑁆𑀢𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀯𑀺𑀕𑀢𑀲𑀼𑀭𑀸𑀧𑀸𑀦𑀁 𑀫𑀸𑀮𑀸𑀕𑀦𑁆𑀥𑀸𑀤𑀺𑀯𑀺𑀪𑀽𑀢𑀺𑀲𑀫𑁆𑀧𑀦𑁆𑀦𑀁 𑀦𑀓𑁆𑀔𑀢𑁆𑀢𑀓𑀻𑀴𑀁 𑀅𑀦𑀼𑀪𑀯𑀫𑀸𑀦𑀸 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀸𑀢𑁄 𑀉𑀝𑁆𑀞𑀸𑀬 𑀕𑀦𑁆𑀥𑁄𑀤𑀓𑁂𑀦 𑀦𑀳𑀸𑀬𑀺𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀸 𑀯𑀭𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀲𑀺𑀭𑀺𑀲𑀬𑀦𑁂 𑀦𑀺𑀧𑀦𑁆𑀦𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀫𑀸𑀦𑀸 𑀇𑀤𑀁 𑀲𑀼𑀧𑀺𑀦𑀁 𑀅𑀤𑁆𑀤𑀲 𑁋 ‘‘𑀘𑀢𑁆𑀢𑀸𑀭𑁄 𑀓𑀺𑀭 ¶ 𑀦𑀁 𑀫𑀳𑀸𑀭𑀸𑀚𑀸𑀦𑁄 𑀲𑀬𑀦𑁂𑀦𑁂𑀯 𑀲𑀤𑁆𑀥𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁄𑀢𑀢𑁆𑀢𑀤𑀳𑀁 𑀦𑁂𑀢𑁆𑀯𑀸 𑀦𑀳𑀸𑀧𑁂𑀢𑁆𑀯𑀸 𑀤𑀺𑀩𑁆𑀩𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀤𑀺𑀩𑁆𑀩𑀕𑀦𑁆𑀥𑁂𑀳𑀺 𑀯𑀺𑀮𑀺𑀫𑁆𑀧𑁂𑀢𑁆𑀯𑀸 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀧𑀺𑀴𑀦𑁆𑀥𑀺𑀢𑁆𑀯𑀸, 𑀢𑀢𑁄 𑀅𑀯𑀺𑀤𑀽𑀭𑁂 𑀭𑀚𑀢𑀧𑀩𑁆𑀩𑀢𑁄, 𑀢𑀲𑁆𑀲 𑀅𑀦𑁆𑀢𑁄 𑀓𑀦𑀓𑀯𑀺𑀫𑀸𑀦𑀁 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀧𑀸𑀘𑀻𑀦𑀢𑁄 𑀲𑀻𑀲𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀸𑀧𑁂𑀲𑀼𑀁. 𑀅𑀣 𑀩𑁄𑀥𑀺𑀲𑀢𑁆𑀢𑁄 𑀲𑁂𑀢𑀯𑀭𑀯𑀸𑀭𑀡𑁄 𑀳𑀼𑀢𑁆𑀯𑀸 𑀢𑀢𑁄 𑀅𑀯𑀺𑀤𑀽𑀭𑁂 𑀏𑀓𑁄 𑀲𑀼𑀯𑀡𑁆𑀡𑀧𑀩𑁆𑀩𑀢𑁄, 𑀢𑀢𑁆𑀣 𑀘𑀭𑀺𑀢𑁆𑀯𑀸 𑀢𑀢𑁄 𑀑𑀭𑀼𑀬𑁆𑀳 𑀭𑀚𑀢𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀓𑀦𑀓𑀯𑀺𑀫𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀫𑀸𑀢𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀤𑀓𑁆𑀔𑀺𑀡𑀧𑀲𑁆𑀲𑀁 𑀨𑀸𑀮𑁂𑀢𑁆𑀯𑀸 𑀓𑀼𑀘𑁆𑀙𑀺𑀁 𑀧𑀯𑀺𑀝𑁆𑀞𑀲𑀤𑀺𑀲𑁄 𑀅𑀳𑁄𑀲𑀺’’.

𑀅𑀣 𑀧𑀩𑀼𑀤𑁆𑀥𑀸 𑀤𑁂𑀯𑀻 𑀢𑀁 𑀲𑀼𑀧𑀺𑀦𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀘𑀢𑀼𑀲𑀝𑁆𑀞𑀺𑀫𑀢𑁆𑀢𑁂 𑀩𑁆𑀭𑀸𑀳𑁆𑀫𑀡𑀧𑀸𑀫𑁄𑀓𑁆𑀔𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀳𑀭𑀺𑀢𑀽𑀧𑀮𑀺𑀢𑁆𑀢𑀸𑀬 𑀮𑀸𑀚𑀸𑀤𑀻𑀳𑀺 𑀓𑀢𑀫𑀗𑁆𑀕𑀮𑀲𑀓𑁆𑀓𑀸𑀭𑀸𑀬 𑀪𑀽𑀫𑀺𑀬𑀸 𑀫𑀳𑀸𑀭𑀳𑀸𑀦𑀺 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀢𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀧𑁆𑀧𑀺𑀫𑀥𑀼𑀲𑀓𑁆𑀓𑀭𑀸𑀪𑀺𑀲𑀗𑁆𑀔𑀢𑀲𑁆𑀲 𑀯𑀭𑀧𑀸𑀬𑀸𑀲𑀲𑁆𑀲 𑀲𑀼𑀯𑀡𑁆𑀡𑀭𑀚𑀢𑀧𑀸𑀢𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀼𑀯𑀡𑁆𑀡𑀭𑀚𑀢𑀧𑀸𑀢𑀻𑀳𑁂𑀯 𑀧𑀝𑀺𑀓𑀼𑀚𑁆𑀚𑀺𑀢𑁆𑀯𑀸 𑀅𑀤𑀸𑀲𑀺, 𑀅𑀜𑁆𑀜𑁂𑀳𑀺 𑀘 𑀅𑀳𑀢𑀯𑀢𑁆𑀣𑀓𑀧𑀺𑀮𑀕𑀸𑀯𑀻𑀤𑀸𑀦𑀸𑀤𑀻𑀳𑀺 𑀦𑁂𑀲𑀁 𑀲𑀦𑁆𑀢𑀧𑁆𑀧𑁂𑀲𑀺. 𑀅𑀣 𑀦𑁂𑀲𑀁 𑀲𑀩𑁆𑀩𑀓𑀸𑀫𑀲𑀦𑁆𑀢𑀧𑁆𑀧𑀺𑀢𑀸𑀦𑀁 𑀢𑀁 𑀲𑀼𑀧𑀺𑀦𑀁 𑀆𑀭𑁄𑀘𑁂𑀢𑁆𑀯𑀸 𑁋 ‘‘𑀓𑀺𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀺. 𑀩𑁆𑀭𑀸𑀳𑁆𑀫𑀡𑀸 𑀆𑀳𑀁𑀲𑀼 𑁋 ‘‘𑀫𑀸 𑀘𑀺𑀦𑁆𑀢𑀬𑀺, 𑀫𑀳𑀸𑀭𑀸𑀚, 𑀤𑁂𑀯𑀺𑀬𑀸 𑀢𑁂 𑀓𑀼𑀘𑁆𑀙𑀺𑀫𑁆𑀳𑀺 𑀕𑀩𑁆𑀪𑁄 𑀧𑀢𑀺𑀝𑁆𑀞𑀺𑀢𑁄, 𑀲𑁄 𑀘 𑀔𑁄 𑀧𑀼𑀭𑀺𑀲𑀕𑀩𑁆𑀪𑁄 𑀦 𑀇𑀢𑁆𑀣𑀺𑀕𑀩𑁆𑀪𑁄, 𑀧𑀼𑀢𑁆𑀢𑁄 𑀢𑁂 𑀪𑀯𑀺𑀲𑁆𑀲𑀢𑀺. 𑀲𑁄 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺𑀲𑁆𑀲𑀢𑀺, 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺 𑀘𑀓𑁆𑀓𑀯𑀢𑁆𑀢𑀻. 𑀲𑀘𑁂 𑀅𑀕𑀸𑀭𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺 𑀮𑁄𑀓𑁂 𑀯𑀺𑀯𑀝𑁆𑀝𑀘𑁆𑀙𑀤𑁄’’𑀢𑀺. 𑀅𑀬𑀁 𑀢𑀸𑀯 𑁋 ‘‘𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀻’’𑀢𑀺 𑀏𑀢𑁆𑀣 𑀯𑀡𑁆𑀡𑀦𑀸𑀓𑁆𑀓𑀫𑁄.

𑀅𑀬𑀫𑁂𑀢𑁆𑀣 ¶ 𑀥𑀫𑁆𑀫𑀢𑀸𑀢𑀺 𑀅𑀬𑀁 𑀏𑀢𑁆𑀣 𑀫𑀸𑀢𑀼𑀓𑀼𑀘𑁆𑀙𑀺𑀑𑀓𑁆𑀓𑀫𑀦𑁂 𑀥𑀫𑁆𑀫𑀢𑀸, 𑀅𑀬𑀁 𑀲𑀪𑀸𑀯𑁄, 𑀅𑀬𑀁 𑀦𑀺𑀬𑀸𑀫𑁄𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀬𑀸𑀫𑁄 𑀘 𑀦𑀸𑀫𑁂𑀲 𑀓𑀫𑁆𑀫𑀦𑀺𑀬𑀸𑀫𑁄, 𑀉𑀢𑀼𑀦𑀺𑀬𑀸𑀫𑁄, 𑀩𑀻𑀚𑀦𑀺𑀬𑀸𑀫𑁄, 𑀘𑀺𑀢𑁆𑀢𑀦𑀺𑀬𑀸𑀫𑁄, 𑀥𑀫𑁆𑀫𑀦𑀺𑀬𑀸𑀫𑁄𑀢𑀺 𑀧𑀜𑁆𑀘𑀯𑀺𑀥𑁄 (𑀥. 𑀲. 𑀅𑀝𑁆𑀞. 𑁪𑁯𑁮).

𑀢𑀢𑁆𑀣 𑀓𑀼𑀲𑀮𑀲𑁆𑀲 𑀇𑀝𑁆𑀞𑀯𑀺𑀧𑀸𑀓𑀤𑀸𑀦𑀁, 𑀅𑀓𑀼𑀲𑀮𑀲𑁆𑀲 𑀅𑀦𑀺𑀝𑁆𑀞𑀯𑀺𑀧𑀸𑀓𑀤𑀸𑀦𑀦𑁆𑀢𑀺 𑀅𑀬𑀁 𑀓𑀫𑁆𑀫𑀦𑀺𑀬𑀸𑀫𑁄. 𑀢𑀲𑁆𑀲 𑀤𑀻𑀧𑀦𑀢𑁆𑀣𑀁 𑁋 ‘‘𑀦 𑀅𑀦𑁆𑀢𑀮𑀺𑀓𑁆𑀔𑁂’’𑀢𑀺 (𑀔𑀼. 𑀧𑀸. 𑁧𑁨𑁭) 𑀕𑀸𑀣𑀸𑀬 𑀯𑀢𑁆𑀣𑀽𑀦𑀺 𑀯𑀢𑁆𑀢𑀩𑁆𑀩𑀸𑀦𑀺. 𑀅𑀧𑀺𑀘 𑀏𑀓𑀸 𑀓𑀺𑀭 𑀇𑀢𑁆𑀣𑀻 𑀲𑀸𑀫𑀺𑀓𑁂𑀦 𑀲𑀤𑁆𑀥𑀺𑀁 𑀪𑀡𑁆𑀟𑀺𑀢𑁆𑀯𑀸 𑀉𑀩𑁆𑀩𑀦𑁆𑀥𑀺𑀢𑁆𑀯𑀸 𑀫𑀭𑀺𑀢𑀼𑀓𑀸𑀫𑀸 ¶ 𑀭𑀚𑁆𑀚𑀼𑀧𑀸𑀲𑁂 𑀕𑀻𑀯𑀁 𑀧𑀯𑁂𑀲𑁂𑀲𑀺. 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀯𑀸𑀲𑀺𑀁 𑀦𑀺𑀲𑁂𑀦𑁆𑀢𑁄 𑀢𑀁 𑀇𑀢𑁆𑀣𑀺𑀓𑀫𑁆𑀫𑀁 𑀤𑀺𑀲𑁆𑀯𑀸 𑀭𑀚𑁆𑀚𑀼𑀁 𑀙𑀺𑀦𑁆𑀤𑀺𑀢𑀼𑀓𑀸𑀫𑁄 𑁋 ‘‘𑀫𑀸 𑀪𑀸𑀬𑀺, 𑀫𑀸 𑀪𑀸𑀬𑀻’’𑀢𑀺 𑀢𑀁 𑀲𑀫𑀲𑁆𑀲𑀸𑀲𑁂𑀦𑁆𑀢𑁄 𑀉𑀧𑀥𑀸𑀯𑀺. 𑀭𑀚𑁆𑀚𑀼 𑀆𑀲𑀻𑀯𑀺𑀲𑁄 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀲𑁄 𑀪𑀻𑀢𑁄 𑀧𑀮𑀸𑀬𑀺. 𑀇𑀢𑀭𑀸 𑀢𑀢𑁆𑀣𑁂𑀯 𑀫𑀭𑀺. 𑀏𑀯𑀫𑀸𑀤𑀻𑀦𑀺 𑀘𑁂𑀢𑁆𑀣 𑀯𑀢𑁆𑀣𑀽𑀦𑀺 𑀤𑀲𑁆𑀲𑁂𑀢𑀩𑁆𑀩𑀸𑀦𑀺.

𑀢𑁂𑀲𑀼 𑀢𑁂𑀲𑀼 𑀚𑀦𑀧𑀤𑁂𑀲𑀼 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀭𑀼𑀓𑁆𑀔𑀸𑀦𑀁 𑀧𑀼𑀧𑁆𑀨𑀨𑀮𑀕𑀳𑀡𑀸𑀤𑀻𑀦𑀺, 𑀯𑀸𑀢𑀲𑁆𑀲 𑀯𑀸𑀬𑀦𑀁 𑀅𑀯𑀸𑀬𑀦𑀁, 𑀆𑀢𑀧𑀲𑁆𑀲 𑀢𑀺𑀓𑁆𑀔𑀢𑀸 𑀫𑀦𑁆𑀤𑀢𑀸, 𑀤𑁂𑀯𑀲𑁆𑀲 𑀯𑀲𑁆𑀲𑀦𑀁 𑀅𑀯𑀲𑁆𑀲𑀦𑀁, 𑀧𑀤𑀼𑀫𑀸𑀦𑀁 𑀤𑀺𑀯𑀸 𑀯𑀺𑀓𑀲𑀦𑀁 𑀭𑀢𑁆𑀢𑀺𑀁 𑀫𑀺𑀮𑀸𑀬𑀦𑀦𑁆𑀢𑀺 𑀏𑀯𑀫𑀸𑀤𑀺 𑀉𑀢𑀼𑀦𑀺𑀬𑀸𑀫𑁄.

𑀬𑀁 𑀧𑀦𑁂𑀢𑀁 𑀲𑀸𑀮𑀺𑀩𑀻𑀚𑀢𑁄 𑀲𑀸𑀮𑀺𑀨𑀮𑀫𑁂𑀯, 𑀫𑀥𑀼𑀭𑀢𑁄 𑀫𑀥𑀼𑀭𑀲𑀁𑀬𑁂𑀯, 𑀢𑀺𑀢𑁆𑀢𑀢𑁄 𑀢𑀺𑀢𑁆𑀢𑀭𑀲𑀁𑀬𑁂𑀯 𑀨𑀮𑀁 𑀳𑁄𑀢𑀺, 𑀅𑀬𑀁 𑀩𑀻𑀚𑀦𑀺𑀬𑀸𑀫𑁄.

𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀥𑀫𑁆𑀫𑀸 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄𑀢𑀺 𑀏𑀯𑀁 𑀬𑀤𑁂𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀦𑀦𑁆𑀢𑀭𑀸 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀁 𑀦𑀺𑀩𑁆𑀩𑀢𑁆𑀢𑀦𑀁, 𑀅𑀬𑀁 𑀘𑀺𑀢𑁆𑀢𑀦𑀺𑀬𑀸𑀫𑁄.

𑀬𑀸 𑀧𑀦𑁂𑀲𑀸 𑀩𑁄𑀥𑀺𑀲𑀢𑁆𑀢𑀸𑀦𑀁 𑀫𑀸𑀢𑀼𑀓𑀼𑀘𑁆𑀙𑀺𑀑𑀓𑁆𑀓𑀫𑀦𑀸𑀤𑀻𑀲𑀼 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀓𑀫𑁆𑀧𑀦𑀸𑀤𑀻𑀦𑀁 𑀧𑀯𑀢𑁆𑀢𑀺, 𑀅𑀬𑀁 𑀥𑀫𑁆𑀫𑀦𑀺𑀬𑀸𑀫𑁄 𑀦𑀸𑀫. 𑀢𑁂𑀲𑀼 𑀇𑀥 𑀥𑀫𑁆𑀫𑀦𑀺𑀬𑀸𑀫𑁄 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀫𑀸 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀥𑀫𑁆𑀫𑀢𑀸 𑀏𑀲𑀸 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳.

𑁧𑁮. 𑀢𑀢𑁆𑀣 𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀢𑀻𑀢𑀺 𑀏𑀢𑁆𑀣 𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀻𑀢𑀺 𑀅𑀬𑀫𑁂𑀯𑀢𑁆𑀣𑁄 ¶ . 𑀑𑀓𑁆𑀓𑀦𑁆𑀢𑁂 𑀳𑀺 𑀢𑀲𑁆𑀫𑀺𑀁 𑀏𑀯𑀁 𑀳𑁄𑀢𑀺, 𑀦 𑀑𑀓𑁆𑀓𑀫𑀫𑀸𑀦𑁂. 𑀅𑀧𑁆𑀧𑀫𑀸𑀡𑁄𑀢𑀺 𑀯𑀼𑀟𑁆𑀠𑀺𑀧𑁆𑀧𑀫𑀸𑀡𑁄, 𑀯𑀺𑀧𑀼𑀮𑁄𑀢𑀺 𑀅𑀢𑁆𑀣𑁄. 𑀉𑀴𑀸𑀭𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀉𑀴𑀸𑀭𑀸𑀦𑀺 𑀉𑀴𑀸𑀭𑀸𑀦𑀺 𑀔𑀸𑀤𑀦𑀻𑀬𑀸𑀦𑀺 𑀔𑀸𑀤𑀦𑁆𑀢𑀻𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁯𑁯) 𑀳𑀺 𑀫𑀥𑀼𑀭𑀁 𑀉𑀴𑀸𑀭𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀴𑀸𑀭𑀸𑀬 𑀔𑀮𑀼 𑀪𑀯𑀁 𑀯𑀘𑁆𑀙𑀸𑀬𑀦𑁄 𑀲𑀫𑀡𑀁 𑀕𑁄𑀢𑀫𑀁 𑀧𑀲𑀁𑀲𑀸𑀬 𑀧𑀲𑀁𑀲𑀢𑀻𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁮𑁮) 𑀲𑁂𑀝𑁆𑀞𑀁 𑀉𑀴𑀸𑀭𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀥 𑀧𑀦 𑀯𑀺𑀧𑀼𑀮𑀁 ¶ 𑀅𑀥𑀺𑀧𑁆𑀧𑁂𑀢𑀁. 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀦𑁆𑀢𑀺 𑀏𑀢𑁆𑀣 𑀤𑁂𑀯𑀸𑀦𑀁 𑀅𑀬𑀫𑀸𑀦𑀼𑀪𑀸𑀯𑁄 𑀦𑀺𑀯𑀢𑁆𑀣𑀯𑀢𑁆𑀣𑀲𑁆𑀲 𑀧𑀪𑀸 𑀤𑁆𑀯𑀸𑀤𑀲𑀬𑁄𑀚𑀦𑀸𑀦𑀺 𑀨𑀭𑀢𑀺, 𑀢𑀣𑀸 𑀲𑀭𑀻𑀭𑀲𑁆𑀲, 𑀢𑀣𑀸 𑀅𑀮𑀗𑁆𑀓𑀸𑀭𑀲𑁆𑀲, 𑀢𑀣𑀸 𑀯𑀺𑀫𑀸𑀦𑀲𑁆𑀲, 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀮𑁄𑀓𑀦𑁆𑀢𑀭𑀺𑀓𑀸𑀢𑀺 ¶ 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀘𑀓𑁆𑀓𑀯𑀸𑀴𑀸𑀦𑀁 𑀅𑀦𑁆𑀢𑀭𑀸 𑀏𑀓𑁂𑀓𑁄 𑀮𑁄𑀓𑀦𑁆𑀢𑀭𑀺𑀓𑁄 𑀳𑁄𑀢𑀺, 𑀢𑀺𑀡𑁆𑀡𑀁 𑀲𑀓𑀝𑀘𑀓𑁆𑀓𑀸𑀦𑀁 𑀯𑀸 𑀢𑀺𑀡𑁆𑀡𑀁 𑀧𑀢𑁆𑀢𑀸𑀦𑀁 𑀯𑀸 𑀅𑀜𑁆𑀜𑀫𑀜𑁆𑀜𑀁 𑀆𑀳𑀘𑁆𑀘 𑀞𑀧𑀺𑀢𑀸𑀦𑀁 𑀫𑀚𑁆𑀛𑁂 𑀑𑀓𑀸𑀲𑁄 𑀯𑀺𑀬. 𑀲𑁄 𑀧𑀦 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑁄 𑀧𑀭𑀺𑀫𑀸𑀡𑀢𑁄 𑀅𑀝𑁆𑀞𑀬𑁄𑀚𑀦𑀲𑀳𑀲𑁆𑀲𑁄 𑀳𑁄𑀢𑀺. 𑀅𑀖𑀸𑀢𑀺 𑀦𑀺𑀘𑁆𑀘𑀯𑀺𑀯𑀝𑀸. 𑀅𑀲𑀁𑀯𑀼𑀢𑀸𑀢𑀺 𑀳𑁂𑀝𑁆𑀞𑀸𑀧𑀺 𑀅𑀧𑁆𑀧𑀢𑀺𑀝𑁆𑀞𑀸. 𑀅𑀦𑁆𑀥𑀓𑀸𑀭𑀸𑀢𑀺 𑀢𑀫𑀪𑀽𑀢𑀸. 𑀅𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑀢𑁄 𑀅𑀦𑁆𑀥𑀪𑀸𑀯𑀓𑀭𑀡𑀢𑀺𑀫𑀺𑀲𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀢𑀢𑁆𑀣 𑀓𑀺𑀭 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦 𑀚𑀸𑀬𑀢𑀺. 𑀏𑀯𑀁𑀫𑀳𑀺𑀤𑁆𑀥𑀺𑀓𑀸𑀢𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀓𑀺𑀭 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀢𑀻𑀲𑀼 𑀤𑀻𑀧𑁂𑀲𑀼 𑀧𑀜𑁆𑀜𑀸𑀬𑀦𑁆𑀢𑀺, 𑀏𑀯𑀁 𑀫𑀳𑀺𑀤𑁆𑀥𑀺𑀓𑀸. 𑀏𑀓𑁂𑀓𑀸𑀬 𑀤𑀺𑀲𑀸𑀬 𑀦𑀯 𑀦𑀯 𑀬𑁄𑀚𑀦𑀲𑀢𑀲𑀳𑀲𑁆𑀲𑀸𑀦𑀺 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀆𑀮𑁄𑀓𑀁 𑀤𑀲𑁆𑀲𑁂𑀦𑁆𑀢𑀺, 𑀏𑀯𑀁𑀫𑀳𑀸𑀦𑀼𑀪𑀸𑀯𑀸. 𑀆𑀪𑀸𑀬 𑀦𑀸𑀦𑀼𑀪𑁄𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀧𑀪𑀸𑀬 𑀦𑀧𑁆𑀧𑀳𑁄𑀦𑁆𑀢𑀺. 𑀢𑁂 𑀓𑀺𑀭 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀲𑁆𑀲 𑀯𑁂𑀫𑀚𑁆𑀛𑁂𑀦 𑀯𑀺𑀘𑀭𑀦𑁆𑀢𑀺, 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀜𑁆𑀘 𑀅𑀢𑀺𑀓𑁆𑀓𑀫𑁆𑀫 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑀸. 𑀢𑀲𑁆𑀫𑀸 𑀢𑁂 𑀢𑀢𑁆𑀣 𑀆𑀪𑀸𑀬 𑀦𑀧𑁆𑀧𑀳𑁄𑀦𑁆𑀢𑀺.

𑀬𑁂𑀧𑀺 𑀢𑀢𑁆𑀣 𑀲𑀢𑁆𑀢𑀸𑀢𑀺 𑀬𑁂𑀧𑀺 𑀢𑀲𑁆𑀫𑀺𑀁 𑀮𑁄𑀓𑀦𑁆𑀢𑀭𑀺𑀓𑀫𑀳𑀸𑀦𑀺𑀭𑀬𑁂 𑀲𑀢𑁆𑀢𑀸 𑀉𑀧𑁆𑀧𑀦𑁆𑀦𑀸. 𑀓𑀺𑀁 𑀧𑀦 𑀓𑀫𑁆𑀫𑀁 𑀓𑀢𑁆𑀯𑀸 𑀢𑀢𑁆𑀣 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀪𑀸𑀭𑀺𑀬𑀁 𑀤𑀸𑀭𑀼𑀡𑀁 𑀫𑀸𑀢𑀸𑀧𑀺𑀢𑀽𑀦𑀁 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀘 𑀉𑀧𑀭𑀺 𑀅𑀧𑀭𑀸𑀥𑀁, 𑀅𑀜𑁆𑀜𑀜𑁆𑀘 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀸𑀡𑀯𑀥𑀸𑀤𑀺𑀲𑀸𑀳𑀲𑀺𑀓𑀓𑀫𑁆𑀫𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀅𑀪𑀬𑀘𑁄𑀭𑀦𑀸𑀕𑀘𑁄𑀭𑀸𑀤𑀬𑁄 𑀯𑀺𑀬. 𑀢𑁂𑀲𑀁 𑀅𑀢𑁆𑀢𑀪𑀸𑀯𑁄 𑀢𑀺𑀕𑀸𑀯𑀼𑀢𑀺𑀓𑁄 𑀳𑁄𑀢𑀺, 𑀯𑀕𑁆𑀕𑀼𑀮𑀻𑀦𑀁 𑀯𑀺𑀬 𑀤𑀻𑀖𑀦𑀔𑀸 𑀳𑁄𑀦𑁆𑀢𑀺. 𑀢𑁂 𑀭𑀼𑀓𑁆𑀔𑁂 𑀯𑀕𑁆𑀕𑀼𑀮𑀺𑀬𑁄 𑀯𑀺𑀬 𑀦𑀔𑁂𑀳𑀺 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑁂 𑀮𑀕𑁆𑀕𑀦𑁆𑀢𑀺. 𑀬𑀤𑀸 ¶ 𑀲𑀁𑀲𑀧𑁆𑀧𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀢𑁆𑀣𑀧𑀸𑀲𑀁 𑀕𑀢𑀸 𑀳𑁄𑀦𑁆𑀢𑀺, 𑀅𑀣 ‘‘𑀪𑀓𑁆𑀔𑁄 𑀦𑁄 𑀮𑀤𑁆𑀥𑁄’’𑀢𑀺 𑀫𑀜𑁆𑀜𑀫𑀸𑀦𑀸 𑀢𑀢𑁆𑀣 𑀯𑀸𑀯𑀝𑀸 𑀯𑀺𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀮𑁄𑀓𑀲𑀦𑁆𑀥𑀸𑀭𑀓𑀉𑀤𑀓𑁂 𑀧𑀢𑀦𑁆𑀢𑀺, 𑀯𑀸𑀢𑁂 𑀧𑀳𑀭𑀦𑁆𑀢𑁂𑀧𑀺 𑀫𑀥𑀼𑀓𑀨𑀮𑀸𑀦𑀺 𑀯𑀺𑀬 𑀙𑀺𑀚𑁆𑀚𑀺𑀢𑁆𑀯𑀸 𑀉𑀤𑀓𑁂 𑀧𑀢𑀦𑁆𑀢𑀺, 𑀧𑀢𑀺𑀢𑀫𑀢𑁆𑀢𑀸𑀯 𑀅𑀘𑁆𑀘𑀦𑁆𑀢𑀔𑀸𑀭𑁂 𑀉𑀤𑀓𑁂 𑀧𑀺𑀝𑁆𑀞𑀧𑀺𑀡𑁆𑀟𑀺 𑀯𑀺𑀬 𑀯𑀺𑀮𑀻𑀬𑀦𑁆𑀢𑀺.

𑀅𑀜𑁆𑀜𑁂𑀧𑀺 𑀓𑀺𑀭 𑀪𑁄 𑀲𑀦𑁆𑀢𑀺 𑀲𑀢𑁆𑀢𑀸𑀢𑀺 𑀪𑁄 𑀬𑀣𑀸 𑀫𑀬𑀁 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀸𑀫, 𑀏𑀯𑀁 𑀅𑀜𑁆𑀜𑁂 𑀓𑀺𑀭 𑀲𑀢𑁆𑀢𑀸𑀧𑀺 𑀇𑀫𑀁 𑀤𑀼𑀓𑁆𑀔𑀫𑀦𑀼𑀪𑀯𑀦𑀢𑁆𑀣𑀸𑀬 𑀇𑀥𑀽𑀧𑀧𑀦𑁆𑀦𑀸𑀢𑀺 𑀢𑀁 𑀤𑀺𑀯𑀲𑀁 𑀧𑀲𑁆𑀲𑀦𑁆𑀢𑀺. 𑀅𑀬𑀁 𑀧𑀦 𑀑𑀪𑀸𑀲𑁄 𑀏𑀓𑀬𑀸𑀕𑀼𑀧𑀸𑀦𑀫𑀢𑁆𑀢𑀫𑁆𑀧𑀺 𑀦 𑀢𑀺𑀝𑁆𑀞𑀢𑀺, 𑀅𑀘𑁆𑀙𑀭𑀸𑀲𑀗𑁆𑀖𑀸𑀝𑀫𑀢𑁆𑀢𑀫𑁂𑀯 𑀯𑀺𑀚𑁆𑀚𑁄𑀪𑀸𑀲𑁄 𑀯𑀺𑀬 𑀦𑀺𑀘𑁆𑀙𑀭𑀺𑀢𑁆𑀯𑀸 𑁋 ‘‘𑀓𑀺𑀁 𑀇𑀤’’𑀦𑁆𑀢𑀺 𑀪𑀡𑀦𑁆𑀢𑀸𑀦𑀁𑀬𑁂𑀯 𑀅𑀦𑁆𑀢𑀭𑀥𑀸𑀬𑀢𑀺. 𑀲𑀗𑁆𑀓𑀫𑁆𑀧𑀢𑀻𑀢𑀺 𑀲𑀫𑀦𑁆𑀢𑀢𑁄 𑀓𑀫𑁆𑀧𑀢𑀺. 𑀇𑀢𑀭𑀤𑁆𑀯𑀬𑀁 𑀧𑀼𑀭𑀺𑀫𑀧𑀤𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀼𑀦 𑀅𑀧𑁆𑀧𑀫𑀸𑀡𑁄 𑀘𑀸𑀢𑀺𑀆𑀤𑀺 𑀦𑀺𑀕𑀫𑀦𑀢𑁆𑀣𑀁 𑀯𑀼𑀢𑁆𑀢𑀁.

𑁧𑁯. 𑀘𑀢𑁆𑀢𑀸𑀭𑁄 ¶ ¶ 𑀦𑀁 𑀤𑁂𑀯𑀧𑀼𑀢𑁆𑀢𑀸 𑀘𑀸𑀢𑀼𑀤𑁆𑀤𑀺𑀲𑀁 𑀭𑀓𑁆𑀔𑀸𑀬 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀏𑀢𑁆𑀣 𑀘𑀢𑁆𑀢𑀸𑀭𑁄𑀢𑀺 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀧𑀦 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀓𑀢𑁆𑀯𑀸 𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀢𑀢𑁆𑀣 𑀇𑀫𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀫𑀳𑀸𑀭𑀸𑀚𑀸𑀦𑁄 𑀔𑀕𑁆𑀕𑀳𑀢𑁆𑀣𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀭𑀓𑁆𑀔𑀢𑁆𑀣𑀸𑀬 𑀉𑀧𑀕𑀦𑁆𑀢𑁆𑀯𑀸 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀝𑁆𑀞𑀸, 𑀇𑀢𑀭𑁂 𑀕𑀩𑁆𑀪𑀤𑁆𑀯𑀸𑀭𑀢𑁄 𑀧𑀝𑁆𑀞𑀸𑀬 𑀅𑀯𑀭𑀼𑀤𑁆𑀥𑀓𑁂 𑀧𑀁𑀲𑀼𑀧𑀺𑀲𑀸𑀘𑀓𑀸𑀤𑀺𑀬𑀓𑁆𑀔𑀕𑀡𑁂 𑀧𑀝𑀺𑀓𑁆𑀓𑀫𑀸𑀧𑁂𑀢𑁆𑀯𑀸 𑀬𑀸𑀯 𑀘𑀓𑁆𑀓𑀯𑀸𑀴𑀸 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁𑀲𑀼.

𑀓𑀺𑀫𑀢𑁆𑀣𑀸𑀬 𑀧𑀦𑀸𑀬𑀁 𑀭𑀓𑁆𑀔𑀸? 𑀦𑀦𑀼 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀓𑀮𑀮𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀘𑁂𑀧𑀺 𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀸𑀭𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀺𑀦𑁂𑀭𑀼𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀸 𑀩𑁄𑀥𑀺𑀲𑀢𑁆𑀢𑀫𑀸𑀢𑀼𑀬𑀸 𑀯𑀸 𑀅𑀦𑁆𑀢𑀭𑀸𑀬𑀓𑀭𑀡𑀢𑁆𑀣𑀁 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀲𑀩𑁆𑀩𑁂 𑀅𑀦𑁆𑀢𑀭𑀸𑀯 𑀅𑀦𑁆𑀢𑀭𑀥𑀸𑀬𑁂𑀬𑁆𑀬𑀼𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀪𑀕𑀯𑀢𑀸 𑀭𑀼𑀳𑀺𑀭𑀼𑀧𑁆𑀧𑀸𑀤𑀯𑀢𑁆𑀣𑀼𑀲𑁆𑀫𑀺𑀁 𑁋 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀧𑀭𑀼𑀧𑀓𑁆𑀓𑀫𑁂𑀦 𑀢𑀣𑀸𑀕𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬. 𑀅𑀦𑀼𑀧𑀓𑁆𑀓𑀫𑁂𑀦, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺. 𑀕𑀘𑁆𑀙𑀣, 𑀢𑀼𑀫𑁆𑀳𑁂 𑀪𑀺𑀓𑁆𑀔𑀯𑁂, 𑀬𑀣𑀸𑀯𑀺𑀳𑀸𑀭𑀁, 𑀅𑀭𑀓𑁆𑀔𑀺𑀬𑀸, 𑀪𑀺𑀓𑁆𑀔𑀯𑁂 𑀢𑀣𑀸𑀕𑀢𑀸’’𑀢𑀺 (𑀘𑀽𑀴𑀯. 𑁩𑁪𑁧). 𑀏𑀯𑀫𑁂𑀯, 𑀢𑁂𑀦 𑀧𑀭𑀼𑀧𑀓𑁆𑀓𑀫𑁂𑀦 𑀦 𑀢𑁂𑀲𑀁 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 ¶ 𑀅𑀢𑁆𑀣𑀺, 𑀲𑀦𑁆𑀢𑀺 𑀔𑁄 𑀧𑀦 𑀅𑀫𑀦𑀼𑀲𑁆𑀲𑀸 𑀯𑀺𑀭𑀽𑀧𑀸 𑀤𑀼𑀤𑁆𑀤𑀲𑀺𑀓𑀸 𑀪𑁂𑀭𑀯𑀭𑀽𑀧𑀸 𑀫𑀺𑀕𑀧𑀓𑁆𑀔𑀺𑀦𑁄, 𑀬𑁂𑀲𑀁 𑀭𑀽𑀧𑀁 𑀯𑀸 𑀤𑀺𑀲𑁆𑀯𑀸 𑀲𑀤𑁆𑀤𑀁 𑀯𑀸 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀪𑀬𑀁 𑀯𑀸 𑀲𑀦𑁆𑀢𑀸𑀲𑁄 𑀯𑀸 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑁂𑀲𑀁 𑀦𑀺𑀯𑀸𑀭𑀡𑀢𑁆𑀣𑀸𑀬 𑀭𑀓𑁆𑀔𑀁 𑀅𑀕𑁆𑀕𑀳𑁂𑀲𑀼𑀁. 𑀅𑀧𑀺𑀘 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀼𑀜𑁆𑀜𑀢𑁂𑀚𑁂𑀦 𑀲𑀜𑁆𑀚𑀸𑀢𑀕𑀸𑀭𑀯𑀸 𑀅𑀢𑁆𑀢𑀦𑁄 𑀕𑀸𑀭𑀯𑀘𑁄𑀤𑀺𑀢𑀸𑀧𑀺 𑀢𑁂 𑀏𑀯𑀫𑀓𑀁𑀲𑀼.

𑀓𑀺𑀁 𑀧𑀦 𑀢𑁂 𑀅𑀦𑁆𑀢𑁄𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑀸 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀼𑀬𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑀺, 𑀦 𑀤𑀲𑁆𑀲𑁂𑀦𑁆𑀢𑀻𑀢𑀺? 𑀦𑀳𑀸𑀦𑀫𑀡𑁆𑀟𑀦𑀪𑁄𑀚𑀦𑀸𑀤𑀺𑀲𑀭𑀻𑀭𑀓𑀺𑀘𑁆𑀘𑀓𑀸𑀮𑁂 𑀦 𑀤𑀲𑁆𑀲𑁂𑀦𑁆𑀢𑀺, 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀯𑀭𑀲𑀬𑀦𑁂 𑀦𑀺𑀧𑀦𑁆𑀦𑀓𑀸𑀮𑁂 𑀧𑀦 𑀤𑀲𑁆𑀲𑁂𑀦𑁆𑀢𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀫𑀦𑀼𑀲𑁆𑀲𑀤𑀲𑁆𑀲𑀦𑀁 𑀦𑀸𑀫 𑀫𑀦𑀼𑀲𑁆𑀲𑀸𑀦𑀁 𑀲𑀧𑁆𑀧𑀝𑀺𑀪𑀬𑀁 𑀳𑁄𑀢𑀺, 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀸𑀢𑀸 𑀧𑀦 𑀅𑀢𑁆𑀢𑀦𑁄 𑀘𑁂𑀯 𑀧𑀼𑀢𑁆𑀢𑀲𑁆𑀲 𑀘 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀢𑁂 𑀤𑀺𑀲𑁆𑀯𑀸 𑀦 𑀪𑀸𑀬𑀢𑀺, 𑀧𑀓𑀢𑀺𑀅𑀦𑁆𑀢𑁂𑀧𑀼𑀭𑀧𑀸𑀮𑀓𑁂𑀲𑀼 𑀯𑀺𑀬 𑀅𑀲𑁆𑀲𑀸 𑀏𑀢𑁂𑀲𑀼 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑁨𑁦. 𑀧𑀓𑀢𑀺𑀬𑀸 𑀲𑀻𑀮𑀯𑀢𑀻𑀢𑀺 𑀲𑀪𑀸𑀯𑁂𑀦𑁂𑀯 𑀲𑀻𑀮𑀲𑀫𑁆𑀧𑀦𑁆𑀦𑀸. 𑀅𑀦𑀼𑀧𑁆𑀧𑀦𑁆𑀦𑁂 𑀓𑀺𑀭 𑀩𑀼𑀤𑁆𑀥𑁂 𑀫𑀦𑀼𑀲𑁆𑀲𑀸 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀲𑀦𑁆𑀢𑀺𑀓𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀲𑀻𑀮𑀁 𑀕𑀡𑁆𑀳𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑀫𑀸𑀢𑀸𑀧𑀺 𑀓𑀸𑀮𑀤𑁂𑀯𑀺𑀮𑀲𑁆𑀲 𑀇𑀲𑀺𑀦𑁄 𑀲𑀦𑁆𑀢𑀺𑀓𑁂 ¶ 𑀲𑀻𑀮𑀁 𑀕𑀡𑁆𑀳𑀸𑀢𑀺. 𑀩𑁄𑀥𑀺𑀲𑀢𑁆𑀢𑁂 𑀧𑀦 𑀓𑀼𑀘𑁆𑀙𑀺𑀕𑀢𑁂 𑀅𑀜𑁆𑀜𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀲𑀻𑀤𑀺𑀢𑀼𑀁 𑀦𑀸𑀫 𑀦 𑀲𑀓𑁆𑀓𑀸, 𑀲𑀫𑀸𑀦𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀕𑀳𑀺𑀢𑀲𑀻𑀮𑀫𑁆𑀧𑀺 𑀆𑀯𑀚𑁆𑀚𑀦𑀓𑀭𑀡𑀫𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀲𑀬𑀫𑁂𑀯 𑀲𑀻𑀮𑀁 𑀅𑀕𑁆𑀕𑀳𑁂𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁧. 𑀧𑀼𑀭𑀺𑀲𑁂𑀲𑀽𑀢𑀺 ¶ 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀺𑀢𑀭𑀁 𑀆𑀤𑀺𑀁 𑀓𑀢𑁆𑀯𑀸 𑀓𑁂𑀲𑀼𑀘𑀺 𑀫𑀦𑀼𑀲𑁆𑀲𑁂𑀲𑀼 𑀧𑀼𑀭𑀺𑀲𑀸𑀥𑀺𑀧𑁆𑀧𑀸𑀬𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀩𑁄𑀥𑀺𑀲𑀢𑁆𑀢𑀫𑀸𑀢𑀼𑀭𑀽𑀧𑀁 𑀧𑀦 𑀓𑀼𑀲𑀮𑀸 𑀲𑀺𑀧𑁆𑀧𑀺𑀓𑀸 𑀧𑁄𑀢𑁆𑀣𑀓𑀫𑁆𑀫𑀸𑀤𑀻𑀲𑀼𑀧𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑀁 𑀤𑀺𑀲𑁆𑀯𑀸 𑀧𑀼𑀭𑀺𑀲𑀲𑁆𑀲 𑀭𑀸𑀕𑁄 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀲𑀘𑁂 𑀧𑀦 𑀢𑀁 𑀭𑀢𑁆𑀢𑀘𑀺𑀢𑁆𑀢𑁄 𑀉𑀧𑀲𑀗𑁆𑀓𑀫𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀧𑀸𑀤𑀸 𑀦 𑀯𑀳𑀦𑁆𑀢𑀺, 𑀤𑀺𑀩𑁆𑀩𑀲𑀗𑁆𑀔𑀮𑀺𑀓𑀸 𑀯𑀺𑀬 𑀩𑀚𑁆𑀛𑀦𑁆𑀢𑀺. 𑀢𑀲𑁆𑀫𑀸 ‘‘𑀅𑀦𑀢𑀺𑀓𑁆𑀓𑀫𑀦𑀻𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁨𑁨. 𑀧𑀜𑁆𑀘𑀦𑁆𑀦𑀁 𑀓𑀸𑀫𑀕𑀼𑀡𑀸𑀦𑀦𑁆𑀢𑀺 𑀧𑀼𑀩𑁆𑀩𑁂 𑀓𑀸𑀫𑀕𑀼𑀡𑀽𑀧𑀲𑀜𑁆𑀳𑀺𑀢𑀦𑁆𑀢𑀺 𑀇𑀫𑀺𑀦𑀸 𑀧𑀼𑀭𑀺𑀲𑀸𑀥𑀺𑀧𑁆𑀧𑀸𑀬𑀯𑀲𑁂𑀦 𑀯𑀢𑁆𑀣𑀼𑀧𑀝𑀺𑀓𑁆𑀔𑁂𑀧𑁄 𑀓𑀢𑁄, 𑀇𑀥 𑀆𑀭𑀫𑁆𑀫𑀡𑀧𑁆𑀧𑀝𑀺𑀮𑀸𑀪𑁄 𑀤𑀲𑁆𑀲𑀺𑀢𑁄. 𑀢𑀤𑀸 𑀓𑀺𑀭 𑀤𑁂𑀯𑀺𑀬𑀸 𑀏𑀯𑀭𑀽𑀧𑁄 𑀧𑀼𑀢𑁆𑀢𑁄 𑀓𑀼𑀘𑁆𑀙𑀺𑀁 𑀉𑀧𑀧𑀦𑁆𑀦𑁄𑀢𑀺 𑀲𑀼𑀢𑁆𑀯𑀸 𑀲𑀫𑀦𑁆𑀢𑀢𑁄 𑀭𑀸𑀚𑀸𑀦𑁄 ¶ 𑀫𑀳𑀕𑁆𑀖𑀆𑀪𑀭𑀡𑀢𑀽𑀭𑀺𑀬𑀸𑀤𑀺𑀯𑀲𑁂𑀦 𑀧𑀜𑁆𑀘𑀤𑁆𑀯𑀸𑀭𑀸𑀭𑀫𑁆𑀫𑀡𑀯𑀢𑁆𑀣𑀼𑀪𑀽𑀢𑀁 𑀧𑀡𑁆𑀡𑀸𑀓𑀸𑀭𑀁 𑀧𑁂𑀲𑁂𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀘 𑀓𑀢𑀓𑀫𑁆𑀫𑀲𑁆𑀲 𑀉𑀲𑁆𑀲𑀦𑁆𑀦𑀢𑁆𑀢𑀸 𑀮𑀸𑀪𑀲𑀓𑁆𑀓𑀸𑀭𑀲𑁆𑀲 𑀧𑀫𑀸𑀡𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺.

𑁨𑁩. 𑀅𑀓𑀺𑀮𑀦𑁆𑀢𑀓𑀸𑀬𑀸𑀢𑀺 𑀬𑀣𑀸 𑀅𑀜𑁆𑀜𑀸 𑀇𑀢𑁆𑀣𑀺𑀬𑁄 𑀕𑀩𑁆𑀪𑀪𑀸𑀭𑁂𑀦 𑀓𑀺𑀮𑀫𑀦𑁆𑀢𑀺 𑀳𑀢𑁆𑀣𑀧𑀸𑀤𑀸 𑀉𑀤𑁆𑀥𑀼𑀫𑀸𑀢𑀢𑀸𑀤𑀻𑀦𑀺 𑀧𑀸𑀧𑀼𑀡𑀦𑁆𑀢𑀺, 𑀏𑀯𑀁 𑀢𑀲𑁆𑀲𑀸 𑀓𑁄𑀘𑀺 𑀓𑀺𑀮𑀫𑀣𑁄 𑀦𑀸𑀳𑁄𑀲𑀺. 𑀢𑀺𑀭𑁄𑀓𑀼𑀘𑁆𑀙𑀺𑀕𑀢𑀦𑁆𑀢𑀺 𑀅𑀦𑁆𑀢𑁄𑀓𑀼𑀘𑁆𑀙𑀺𑀕𑀢𑀁. 𑀧𑀲𑁆𑀲𑀢𑀻𑀢𑀺 𑀓𑀮𑀮𑀸𑀤𑀺𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀜𑁆𑀚𑀸𑀢𑀅𑀗𑁆𑀕𑀧𑀘𑁆𑀘𑀗𑁆𑀕𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀪𑀸𑀯𑀁 𑀉𑀧𑀕𑀢𑀁𑀬𑁂𑀯 𑀧𑀲𑁆𑀲𑀢𑀺. 𑀓𑀺𑀫𑀢𑁆𑀣𑀁 𑀧𑀲𑁆𑀲𑀢𑀺? 𑀲𑀼𑀔𑀯𑀸𑀲𑀢𑁆𑀣𑀁𑀬𑁂𑀯. 𑀬𑀣𑁂𑀯 𑀳𑀺 𑀫𑀸𑀢𑀸 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀦𑀺𑀧𑀦𑁆𑀦𑀸 𑀯𑀸 𑀦𑀺𑀲𑀺𑀦𑁆𑀦𑀸 𑀯𑀸 𑁋 ‘‘𑀳𑀢𑁆𑀣𑀁 𑀯𑀸𑀲𑁆𑀲 𑀧𑀸𑀤𑀁 𑀯𑀸 𑀑𑀮𑀫𑁆𑀩𑀦𑁆𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑀡𑁆𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀲𑀼𑀔𑀯𑀸𑀲𑀢𑁆𑀣𑀁 𑀧𑀼𑀢𑁆𑀢𑀁 𑀑𑀮𑁄𑀓𑁂𑀢𑀺, 𑀏𑀯𑀁 𑀩𑁄𑀥𑀺𑀲𑀢𑁆𑀢𑀫𑀸𑀢𑀸𑀧𑀺 𑀬𑀁 𑀢𑀁 𑀫𑀸𑀢𑀼 𑀉𑀝𑁆𑀞𑀸𑀦𑀕𑀫𑀦𑀧𑀭𑀺𑀯𑀢𑁆𑀢𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀉𑀡𑁆𑀳𑀲𑀻𑀢𑀮𑁄𑀡𑀺𑀓𑀢𑀺𑀢𑁆𑀢𑀓𑀓𑀝𑀼𑀓𑀸𑀳𑀸𑀭𑀅𑀚𑁆𑀛𑁄𑀳𑀭𑀡𑀓𑀸𑀮𑁂𑀲𑀼 𑀘 𑀕𑀩𑁆𑀪𑀲𑁆𑀲 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, ‘‘𑀅𑀢𑁆𑀣𑀺 𑀦𑀼 𑀔𑁄 𑀫𑁂 𑀢𑀁 𑀧𑀼𑀢𑁆𑀢𑀲𑁆𑀲𑀸’’𑀢𑀺 𑀲𑀼𑀔𑀯𑀸𑀲𑀢𑁆𑀣𑀁 𑀑𑀮𑁄𑀓𑀬𑀫𑀸𑀦𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀩𑁄𑀥𑀺𑀲𑀢𑁆𑀢𑀁 𑀧𑀲𑁆𑀲𑀢𑀺. 𑀬𑀣𑀸 𑀳𑀺 𑀅𑀜𑁆𑀜𑁂 𑀅𑀦𑁆𑀢𑁄𑀓𑀼𑀘𑁆𑀙𑀺𑀕𑀢𑀸 𑀧𑀓𑁆𑀓𑀸𑀲𑀬𑀁 𑀅𑀯𑀢𑁆𑀣𑀭𑀺𑀢𑁆𑀯𑀸 𑀆𑀫𑀸𑀲𑀬𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑀭𑀧𑀝𑀮𑀁 𑀧𑀺𑀝𑁆𑀞𑀺𑀢𑁄 𑀓𑀢𑁆𑀯𑀸 𑀧𑀺𑀝𑁆𑀞𑀺𑀓𑀡𑁆𑀟𑀓𑀁 𑀦𑀺𑀲𑁆𑀲𑀸𑀬 𑀉𑀓𑁆𑀓𑀼𑀝𑀺𑀓𑀁 𑀤𑁆𑀯𑀻𑀲𑀼 𑀫𑀼𑀝𑁆𑀞𑀻𑀲𑀼 𑀳𑀦𑀼𑀓𑀁 𑀞𑀧𑁂𑀢𑁆𑀯𑀸 𑀤𑁂𑀯𑁂 ¶ 𑀯𑀲𑁆𑀲𑀦𑁆𑀢𑁂 𑀭𑀼𑀓𑁆𑀔𑀲𑀼𑀲𑀺𑀭𑁂 𑀫𑀓𑁆𑀓𑀝𑀸 𑀯𑀺𑀬 𑀦𑀺𑀲𑀻𑀤𑀦𑁆𑀢𑀺, 𑀦 𑀏𑀯𑀁 𑀩𑁄𑀥𑀺𑀲𑀢𑁆𑀢𑁄, 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀧𑀺𑀝𑁆𑀞𑀺𑀓𑀡𑁆𑀟𑀓𑀁 𑀧𑀺𑀝𑁆𑀞𑀺𑀢𑁄 𑀓𑀢𑁆𑀯𑀸 𑀥𑀫𑁆𑀫𑀸𑀲𑀦𑁂 𑀥𑀫𑁆𑀫𑀓𑀣𑀺𑀓𑁄 𑀯𑀺𑀬 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀻𑀤𑀢𑀺. 𑀧𑀼𑀩𑁆𑀩𑁂𑀓𑀢𑀓𑀫𑁆𑀫𑀁 𑀧𑀦𑀲𑁆𑀲𑀸 𑀯𑀢𑁆𑀣𑀼𑀁 𑀲𑁄𑀥𑁂𑀢𑀺, 𑀲𑀼𑀤𑁆𑀥𑁂 𑀯𑀢𑁆𑀣𑀼𑀫𑁆𑀳𑀺 𑀲𑀼𑀔𑀼𑀫𑀘𑁆𑀙𑀯𑀺𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀢𑀺. 𑀅𑀣 𑀦𑀁 𑀓𑀼𑀘𑁆𑀙𑀺𑀢𑀘𑁄 𑀧𑀝𑀺𑀘𑁆𑀙𑀸𑀤𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀑𑀮𑁄𑀓𑁂𑀦𑁆𑀢𑀺𑀬𑀸 𑀩𑀳𑀺𑀞𑀺𑀢𑁄 𑀯𑀺𑀬 𑀧𑀜𑁆𑀜𑀸𑀬𑀢𑀺. 𑀢𑀫𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀦𑁆𑀢𑁄 𑀪𑀕𑀯𑀸 𑀲𑁂𑀬𑁆𑀬𑀣𑀸𑀧𑀻𑀢𑀺𑀆𑀤𑀺𑀫𑀸𑀳. 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀅𑀦𑁆𑀢𑁄𑀓𑀼𑀘𑁆𑀙𑀺𑀕𑀢𑁄 𑀫𑀸𑀢𑀭𑀁 𑀦 𑀧𑀲𑁆𑀲𑀢𑀺. 𑀦 𑀳𑀺 𑀅𑀦𑁆𑀢𑁄𑀓𑀼𑀘𑁆𑀙𑀺𑀬𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺.

𑁨𑁪. 𑀓𑀸𑀮𑀗𑁆𑀓𑀭𑁄𑀢𑀻𑀢𑀺 ¶ 𑀦 𑀯𑀺𑀚𑀸𑀢𑀪𑀸𑀯𑀧𑀘𑁆𑀘𑀬𑀸, 𑀆𑀬𑀼𑀧𑀭𑀺𑀓𑁆𑀔𑀬𑁂𑀦𑁂𑀯. 𑀩𑁄𑀥𑀺𑀲𑀢𑁆𑀢𑁂𑀦 𑀯𑀲𑀺𑀢𑀝𑁆𑀞𑀸𑀦𑀜𑁆𑀳𑀺 𑀘𑁂𑀢𑀺𑀬𑀓𑀼𑀝𑀺𑀲𑀤𑀺𑀲𑀁 𑀳𑁄𑀢𑀺, 𑀅𑀜𑁆𑀜𑁂𑀲𑀁 𑀅𑀧𑀭𑀺𑀪𑁄𑀕𑀸𑀭𑀳𑀁, 𑀦 𑀘 𑀲𑀓𑁆𑀓𑀸 𑀩𑁄𑀥𑀺𑀲𑀢𑁆𑀢𑀫𑀸𑀢𑀭𑀁 ¶ 𑀅𑀧𑀦𑁂𑀢𑁆𑀯𑀸 𑀅𑀜𑁆𑀜𑀁 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀢𑀼𑀦𑁆𑀢𑀺 𑀢𑀢𑁆𑀢𑀓𑀁𑀬𑁂𑀯 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀆𑀬𑀼𑀧𑁆𑀧𑀫𑀸𑀡𑀁 𑀳𑁄𑀢𑀺, 𑀢𑀲𑁆𑀫𑀸 𑀢𑀤𑀸 𑀓𑀸𑀮𑀗𑁆𑀓𑀭𑁄𑀢𑀺. 𑀓𑀢𑀭𑀲𑁆𑀫𑀺𑀁 𑀧𑀦 𑀯𑀬𑁂 𑀓𑀸𑀮𑀁 𑀓𑀭𑁄𑀢𑀻𑀢𑀺? 𑀫𑀚𑁆𑀛𑀺𑀫𑀯𑀬𑁂. 𑀧𑀞𑀫𑀯𑀬𑀲𑁆𑀫𑀺𑀜𑁆𑀳𑀺 𑀲𑀢𑁆𑀢𑀸𑀦𑀁 𑀅𑀢𑁆𑀢𑀪𑀸𑀯𑁂 𑀙𑀦𑁆𑀤𑀭𑀸𑀕𑁄 𑀩𑀮𑀯𑀸 𑀳𑁄𑀢𑀺, 𑀢𑁂𑀦 𑀢𑀤𑀸 𑀲𑀜𑁆𑀚𑀸𑀢𑀕𑀩𑁆𑀪𑀸 𑀇𑀢𑁆𑀣𑀻 𑀕𑀩𑁆𑀪𑀁 𑀅𑀦𑀼𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀕𑀩𑁆𑀪𑁄 𑀩𑀳𑁆𑀯𑀸𑀩𑀸𑀥𑁄 𑀳𑁄𑀢𑀺. 𑀫𑀚𑁆𑀛𑀺𑀫𑀯𑀬𑀲𑁆𑀲 𑀧𑀦 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀅𑀢𑀺𑀓𑁆𑀓𑀫𑁆𑀫 𑀢𑀢𑀺𑀬𑁂 𑀓𑁄𑀝𑁆𑀞𑀸𑀲𑁂 𑀯𑀢𑁆𑀣𑀼 𑀯𑀺𑀲𑀤𑀁 𑀳𑁄𑀢𑀺, 𑀯𑀺𑀲𑀤𑁂 𑀯𑀢𑁆𑀣𑀼𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀤𑀸𑀭𑀓𑀸 𑀅𑀭𑁄𑀕𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀩𑁄𑀥𑀺𑀲𑀢𑁆𑀢𑀫𑀸𑀢𑀸𑀧𑀺 𑀧𑀞𑀫𑀯𑀬𑁂 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀫𑀚𑁆𑀛𑀺𑀫𑀯𑀬𑀲𑁆𑀲 𑀢𑀢𑀺𑀬𑁂 𑀓𑁄𑀝𑁆𑀞𑀸𑀲𑁂 𑀯𑀺𑀚𑀸𑀬𑀺𑀢𑁆𑀯𑀸 𑀓𑀸𑀮𑀁 𑀓𑀭𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.

𑁨𑁫. 𑀦𑀯 𑀯𑀸 𑀤𑀲 𑀯𑀸𑀢𑀺 𑀏𑀢𑁆𑀣 𑀯𑀸 𑀲𑀤𑁆𑀤𑀲𑁆𑀲 𑀯𑀺𑀓𑀧𑁆𑀧𑀦𑀯𑀲𑁂𑀦 𑀲𑀢𑁆𑀢 𑀯𑀸 𑀅𑀝𑁆𑀞 𑀯𑀸 𑀏𑀓𑀸𑀤𑀲 𑀯𑀸 𑀤𑁆𑀯𑀸𑀤𑀲 𑀯𑀸𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀲𑀢𑁆𑀢𑀫𑀸𑀲𑀚𑀸𑀢𑁄 𑀚𑀻𑀯𑀢𑀺, 𑀲𑀻𑀢𑀼𑀡𑁆𑀳𑀓𑁆𑀔𑀫𑁄 𑀧𑀦 𑀦 𑀳𑁄𑀢𑀺. 𑀅𑀝𑁆𑀞𑀫𑀸𑀲𑀚𑀸𑀢𑁄 𑀦 𑀚𑀻𑀯𑀢𑀺, 𑀅𑀯𑀲𑁂𑀲𑀸 𑀚𑀻𑀯𑀦𑁆𑀢𑀺.

𑁨𑁭. 𑀤𑁂𑀯𑀸 𑀧𑀞𑀫𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀻𑀢𑀺 𑀔𑀻𑀡𑀸𑀲𑀯𑀸 𑀲𑀼𑀤𑁆𑀥𑀸𑀯𑀸𑀲𑀩𑁆𑀭𑀳𑁆𑀫𑀸𑀦𑁄 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺. 𑀓𑀣𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺? ‘‘𑀲𑀽𑀢𑀺𑀯𑁂𑀲𑀁 𑀕𑀡𑁆𑀳𑀺𑀢𑁆𑀯𑀸’’𑀢𑀺 𑀏𑀓𑁂. 𑀢𑀁 𑀧𑀦 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀤𑀁 𑀯𑀼𑀢𑁆𑀢𑀁 𑁋 ‘𑀢𑀤𑀸 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀲𑀼𑀯𑀡𑁆𑀡𑀔𑀘𑀺𑀢𑀁 𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀫𑀘𑁆𑀙𑀓𑁆𑀔𑀺𑀲𑀤𑀺𑀲𑀁 𑀤𑀼𑀓𑀽𑀮𑀧𑀝𑀁 𑀬𑀸𑀯 𑀧𑀸𑀤𑀦𑁆𑀢𑀸 𑀧𑀸𑀭𑀼𑀧𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲𑀸 𑀲𑀮𑁆𑀮𑀳𑀼𑀓𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺, 𑀥𑀫𑀓𑀭𑀡𑀢𑁄 𑀉𑀤𑀓𑀦𑀺𑀓𑁆𑀔𑀫𑀦𑀲𑀤𑀺𑀲𑀁. 𑀅𑀣 𑀢𑁂 𑀧𑀓𑀢𑀺𑀩𑁆𑀭𑀳𑁆𑀫𑀯𑁂𑀲𑁂𑀦𑁂𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀞𑀫𑀁 𑀲𑀼𑀯𑀡𑁆𑀡𑀚𑀸𑀮𑁂𑀦 ¶ 𑀧𑀝𑀺𑀕𑁆𑀕𑀳𑁂𑀲𑀼𑀁. 𑀢𑁂𑀲𑀁 𑀳𑀢𑁆𑀣𑀢𑁄 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀅𑀚𑀺𑀦𑀧𑁆𑀧𑀯𑁂𑀡𑀺𑀬𑀸 𑀧𑀝𑀺𑀕𑁆𑀕𑀳𑁂𑀲𑀼𑀁. 𑀢𑀢𑁄 𑀫𑀦𑀼𑀲𑁆𑀲𑀸 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂𑀦 𑀧𑀝𑀺𑀕𑁆𑀕𑀳𑁂𑀲𑀼𑀁’. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀤𑁂𑀯𑀸 𑀧𑀞𑀫𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, 𑀧𑀘𑁆𑀙𑀸 𑀫𑀦𑀼𑀲𑁆𑀲𑀸’’𑀢𑀺.

𑁨𑁮. 𑀘𑀢𑁆𑀢𑀸𑀭𑁄 𑀦𑀁 𑀤𑁂𑀯𑀧𑀼𑀢𑁆𑀢𑀸𑀢𑀺 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄. 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀅𑀚𑀺𑀦𑀧𑁆𑀧𑀯𑁂𑀡𑀺𑀬𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸. 𑀫𑀳𑁂𑀲𑀓𑁆𑀔𑁄𑀢𑀺 𑀫𑀳𑀸𑀢𑁂𑀚𑁄 𑀫𑀳𑀸𑀬𑀲𑁄 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄.

𑁨𑁯. 𑀯𑀺𑀲𑀤𑁄𑀯 𑀦𑀺𑀓𑁆𑀔𑀫𑀢𑀻𑀢𑀺 𑀬𑀣𑀸 𑀅𑀜𑁆𑀜𑁂 𑀲𑀢𑁆𑀢𑀸 𑀬𑁄𑀦𑀺𑀫𑀕𑁆𑀕𑁂 𑀮𑀕𑁆𑀕𑀦𑁆𑀢𑀸 𑀪𑀕𑁆𑀕𑀯𑀺𑀪𑀕𑁆𑀕𑀸 𑀦𑀺𑀓𑁆𑀔𑀫𑀦𑁆𑀢𑀺, 𑀦 𑀏𑀯𑀁 𑀦𑀺𑀓𑁆𑀔𑀫𑀢𑀺, 𑀅𑀮𑀕𑁆𑀕𑁄 ¶ 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀢𑀻𑀢𑀺 𑀅𑀢𑁆𑀣𑁄 𑀉𑀤𑁂𑀦𑀸𑀢𑀺 𑀉𑀤𑀓𑁂𑀦. 𑀓𑁂𑀦𑀘𑀺 𑀅𑀲𑀼𑀘𑀺𑀦𑀸𑀢𑀺 𑀬𑀣𑀸 𑀅𑀜𑁆𑀜𑁂 𑀲𑀢𑁆𑀢𑀸 𑀓𑀫𑁆𑀫𑀚𑀯𑀸𑀢𑁂𑀳𑀺 𑀉𑀤𑁆𑀥𑀁𑀧𑀸𑀤𑀸 𑀅𑀥𑁄𑀲𑀺𑀭𑀸 𑀬𑁄𑀦𑀺𑀫𑀕𑁆𑀕𑁂 𑀧𑀓𑁆𑀔𑀺𑀢𑁆𑀢𑀸 𑀲𑀢𑀧𑁄𑀭𑀺𑀲𑀁 𑀦𑀭𑀓𑀧𑀧𑀸𑀢𑀁 𑀧𑀢𑀦𑁆𑀢𑀸 𑀯𑀺𑀬, 𑀢𑀸𑀴𑀘𑁆𑀙𑀺𑀤𑁆𑀤𑁂𑀦 𑀦𑀺𑀓𑁆𑀓𑀟𑁆𑀠𑀺𑀬𑀫𑀸𑀦𑀸 𑀳𑀢𑁆𑀣𑀻 𑀯𑀺𑀬 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀸 𑀦𑀸𑀦𑀸𑀅𑀲𑀼𑀘𑀺𑀫𑀓𑁆𑀔𑀺𑀢𑀸𑀯 𑀦𑀺𑀓𑁆𑀔𑀫𑀦𑁆𑀢𑀺, 𑀦 𑀏𑀯𑀁 𑀩𑁄𑀥𑀺𑀲𑀢𑁆𑀢𑁄. 𑀩𑁄𑀥𑀺𑀲𑀢𑁆𑀢𑀜𑁆𑀳𑀺 𑀓𑀫𑁆𑀫𑀚𑀯𑀸𑀢𑀸 ¶ 𑀉𑀤𑁆𑀥𑀧𑀸𑀤𑀁 𑀅𑀥𑁄𑀲𑀺𑀭𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀲𑁄 𑀥𑀫𑁆𑀫𑀸𑀲𑀦𑀢𑁄 𑀑𑀢𑀭𑀦𑁆𑀢𑁄 𑀥𑀫𑁆𑀫𑀓𑀣𑀺𑀓𑁄 𑀯𑀺𑀬, 𑀦𑀺𑀲𑁆𑀲𑁂𑀡𑀺𑀢𑁄 𑀑𑀢𑀭𑀦𑁆𑀢𑁄 𑀧𑀼𑀭𑀺𑀲𑁄 𑀯𑀺𑀬 𑀘 𑀤𑁆𑀯𑁂 𑀳𑀢𑁆𑀣𑁂 𑀘 𑀤𑁆𑀯𑁂 𑀧𑀸𑀤𑁂 𑀘 𑀧𑀲𑀸𑀭𑁂𑀢𑁆𑀯𑀸 𑀞𑀺𑀢𑀓𑁄𑀯 𑀫𑀸𑀢𑀼𑀓𑀼𑀘𑁆𑀙𑀺𑀲𑀫𑁆𑀪𑀯𑁂𑀦 𑀓𑁂𑀦𑀘𑀺 𑀅𑀲𑀼𑀘𑀺𑀦𑀸 𑀅𑀫𑀓𑁆𑀔𑀺𑀢𑁄𑀯 𑀦𑀺𑀓𑁆𑀔𑀫𑀢𑀺.

𑀉𑀤𑀓𑀲𑁆𑀲 𑀥𑀸𑀭𑀸𑀢𑀺 𑀉𑀤𑀓𑀯𑀝𑁆𑀝𑀺𑀬𑁄. 𑀢𑀸𑀲𑀼 𑀲𑀻𑀢𑀸 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀢𑀺 𑀉𑀡𑁆𑀳𑀸 𑀭𑀚𑀢𑀓𑀝𑀸𑀳𑁂. 𑀇𑀤𑀜𑁆𑀘 𑀧𑀣𑀯𑀺𑀢𑀮𑁂 𑀓𑁂𑀦𑀘𑀺 𑀅𑀲𑀼𑀘𑀺𑀦𑀸 𑀅𑀲𑀫𑁆𑀫𑀺𑀲𑁆𑀲𑀁 𑀢𑁂𑀲𑀁 𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬𑀉𑀤𑀓𑀜𑁆𑀘𑁂𑀯 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 𑀓𑀻𑀴𑀸𑀉𑀤𑀓𑀜𑁆𑀘 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁, 𑀅𑀜𑁆𑀜𑀲𑁆𑀲 𑀧𑀦 𑀲𑀼𑀯𑀡𑁆𑀡𑀭𑀚𑀢𑀖𑀝𑁂𑀳𑀺 𑀆𑀳𑀭𑀺𑀬𑀫𑀸𑀦𑀉𑀤𑀓𑀲𑁆𑀲 𑀘𑁂𑀯 𑀳𑀁𑀲𑀯𑀢𑁆𑀢𑀓𑀸𑀤𑀺𑀧𑁄𑀓𑁆𑀔𑀭𑀡𑀻𑀕𑀢𑀲𑁆𑀲 𑀘 𑀉𑀤𑀓𑀲𑁆𑀲 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺.

𑁩𑁧. 𑀲𑀫𑁆𑀧𑀢𑀺𑀚𑀸𑀢𑁄𑀢𑀺 𑀫𑀼𑀳𑀼𑀢𑁆𑀢𑀚𑀸𑀢𑁄. 𑀧𑀸𑀴𑀺𑀬𑀁 𑀧𑀦 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁄 𑀯𑀺𑀬 𑀤𑀲𑁆𑀲𑀺𑀢𑁄, 𑀦 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑀜𑁆𑀳𑀺 𑀦𑀁 𑀧𑀞𑀫𑀁 𑀩𑁆𑀭𑀳𑁆𑀫𑀸𑀦𑁄 𑀲𑀼𑀯𑀡𑁆𑀡𑀚𑀸𑀮𑁂𑀦 𑀧𑀝𑀺𑀕𑁆𑀕𑀡𑁆𑀳𑀺𑀁𑀲𑀼, 𑀢𑁂𑀲𑀁 𑀳𑀢𑁆𑀣𑀢𑁄 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀅𑀚𑀺𑀦𑀧𑁆𑀧𑀯𑁂𑀡𑀺𑀬𑀸, 𑀢𑁂𑀲𑀁 𑀳𑀢𑁆𑀣𑀢𑁄 𑀫𑀦𑀼𑀲𑁆𑀲𑀸 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂𑀦. 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑁄. 𑀲𑁂𑀢𑀫𑁆𑀳𑀺 𑀙𑀢𑁆𑀢𑁂 𑀅𑀦𑀼𑀥𑀸𑀭𑀺𑀬𑀫𑀸𑀦𑁂𑀢𑀺 𑀤𑀺𑀩𑁆𑀩𑀲𑁂𑀢𑀘𑁆𑀙𑀢𑁆𑀢𑁂 𑀅𑀦𑀼𑀥𑀸𑀭𑀺𑀬𑀫𑀸𑀦𑀫𑁆𑀳𑀺. 𑀏𑀢𑁆𑀣 𑀘 𑀙𑀢𑁆𑀢𑀲𑁆𑀲 𑀧𑀭𑀺𑀯𑀸𑀭𑀸𑀦𑀺 𑀔𑀕𑁆𑀕𑀸𑀤𑀻𑀦𑀺 ¶ 𑀧𑀜𑁆𑀘 𑀭𑀸𑀚𑀓𑀓𑀼𑀥𑀪𑀡𑁆𑀟𑀸𑀦𑀺𑀧𑀺 𑀆𑀕𑀢𑀸𑀦𑁂𑀯. 𑀧𑀸𑀴𑀺𑀬𑀁 𑀧𑀦 𑀭𑀸𑀚𑀕𑀫𑀦𑁂 𑀭𑀸𑀚𑀸 𑀯𑀺𑀬 𑀙𑀢𑁆𑀢𑀫𑁂𑀯 𑀯𑀼𑀢𑁆𑀢𑀁. 𑀢𑁂𑀲𑀼 𑀙𑀢𑁆𑀢𑀫𑁂𑀯 𑀧𑀜𑁆𑀜𑀸𑀬𑀢𑀺, 𑀦 𑀙𑀢𑁆𑀢𑀕𑁆𑀕𑀸𑀳𑀓𑁄. 𑀢𑀣𑀸 𑀔𑀕𑁆𑀕𑀢𑀸𑀮𑀯𑀡𑁆𑀝𑀫𑁄𑀭𑀳𑀢𑁆𑀣𑀓𑀯𑀸𑀴𑀩𑀻𑀚𑀦𑀻𑀉𑀡𑁆𑀳𑀻𑀲𑀫𑀢𑁆𑀢𑀸𑀬𑁂𑀯 𑀧𑀜𑁆𑀜𑀸𑀬𑀦𑁆𑀢𑀺, 𑀦 𑀢𑁂𑀲𑀁 𑀕𑀸𑀳𑀓𑀸. 𑀲𑀩𑁆𑀩𑀸𑀦𑀺 𑀓𑀺𑀭 𑀢𑀸𑀦𑀺 𑀅𑀤𑀺𑀲𑁆𑀲𑀫𑀸𑀦𑀭𑀽𑀧𑀸 𑀤𑁂𑀯𑀢𑀸 𑀕𑀡𑁆𑀳𑀺𑀁𑀲𑀼. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋

‘‘𑀅𑀦𑁂𑀓𑀲𑀸𑀔𑀜𑁆𑀘 ¶ 𑀲𑀳𑀲𑁆𑀲𑀫𑀡𑁆𑀟𑀮𑀁,

𑀙𑀢𑁆𑀢𑀁 𑀫𑀭𑀽 𑀥𑀸𑀭𑀬𑀼𑀫𑀦𑁆𑀢𑀮𑀺𑀓𑁆𑀔𑁂;

𑀲𑀼𑀯𑀡𑁆𑀡𑀤𑀡𑁆𑀟𑀸 𑀯𑀺𑀧𑀢𑀦𑁆𑀢𑀺 𑀘𑀸𑀫𑀭𑀸,

𑀦 𑀤𑀺𑀲𑁆𑀲𑀭𑁂 𑀘𑀸𑀫𑀭𑀙𑀢𑁆𑀢𑀕𑀸𑀳𑀓𑀸’’𑀢𑀺. (𑀲𑀼. 𑀦𑀺. 𑁬𑁯𑁩);

𑀲𑀩𑁆𑀩𑀸 𑀘 𑀤𑀺𑀲𑀸𑀢𑀺 𑀇𑀤𑀁 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑀽𑀧𑀭𑀺 𑀞𑀺𑀢𑀲𑁆𑀲 𑀯𑀺𑀬 𑀲𑀩𑁆𑀩𑀤𑀺𑀲𑀸𑀦𑀼𑀯𑀺𑀮𑁄𑀓𑀦𑀁 𑀯𑀼𑀢𑁆𑀢𑀁, 𑀦 𑀔𑁄 𑀧𑀦𑁂𑀯𑀁 𑀤𑀝𑁆𑀞𑀩𑁆𑀩𑀁. 𑀫𑀳𑀸𑀲𑀢𑁆𑀢𑁄 𑀳𑀺 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀧𑀞𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑁄 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀑𑀮𑁄𑀓𑁂𑀲𑀺. 𑀅𑀦𑁂𑀓𑀸𑀦𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀸𑀦𑀺 𑀏𑀓𑀗𑁆𑀕𑀡𑀸𑀦𑀺 𑀅𑀳𑁂𑀲𑀼𑀁. 𑀢𑀢𑁆𑀣 𑀤𑁂𑀯𑀫𑀦𑀼𑀲𑁆𑀲𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑀸 𑁋 ‘‘𑀫𑀳𑀸𑀧𑀼𑀭𑀺𑀲, 𑀇𑀥 𑀢𑀼𑀫𑁆𑀳𑁂𑀳𑀺 𑀲𑀤𑀺𑀲𑁄𑀧𑀺 𑀦𑀢𑁆𑀣𑀺, 𑀓𑀼𑀢𑁄 𑀉𑀢𑁆𑀢𑀭𑀺𑀢𑀭𑁄’’𑀢𑀺 𑀆𑀳𑀁𑀲𑀼. 𑀏𑀯𑀁 𑀘𑀢𑀲𑁆𑀲𑁄 𑀤𑀺𑀲𑀸, 𑀘𑀢𑀲𑁆𑀲𑁄 𑀅𑀦𑀼𑀤𑀺𑀲𑀸, 𑀳𑁂𑀝𑁆𑀞𑀸, 𑀉𑀧𑀭𑀻𑀢𑀺 𑀤𑀲 𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑀸 𑀲𑀤𑀺𑀲𑀁 𑀅𑀤𑀺𑀲𑁆𑀯𑀸 𑁋 ‘‘𑀅𑀬𑀁 𑀉𑀢𑁆𑀢𑀭𑀸 𑀤𑀺𑀲𑀸’’𑀢𑀺 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀅𑀕𑀫𑀸𑀲𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀲𑀪𑀺𑀦𑁆𑀢𑀺 𑀉𑀢𑁆𑀢𑀫𑀁. 𑀅𑀕𑁆𑀕𑁄𑀢𑀺 𑀕𑀼𑀡𑁂𑀳𑀺 𑀲𑀩𑁆𑀩𑀧𑀞𑀫𑁄. 𑀇𑀢𑀭𑀸𑀦𑀺 ¶ 𑀤𑁆𑀯𑁂 𑀧𑀤𑀸𑀦𑀺 𑀏𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄𑀢𑀺 𑀧𑀤𑀤𑁆𑀯𑀬𑁂𑀦 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀧𑀢𑁆𑀢𑀩𑁆𑀩𑀁 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀸𑀲𑀺.

𑀏𑀢𑁆𑀣 𑀘 𑀲𑀫𑁂𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀬𑀸 𑀧𑀢𑀺𑀝𑁆𑀞𑀸𑀦𑀁 𑀘𑀢𑀼𑀭𑀺𑀤𑁆𑀥𑀺𑀧𑀸𑀤𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀉𑀢𑁆𑀢𑀭𑀸𑀪𑀺𑀫𑀼𑀔𑀪𑀸𑀯𑁄 𑀫𑀳𑀸𑀚𑀦𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀕𑀫𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀲𑀢𑁆𑀢𑀧𑀤𑀕𑀫𑀦𑀁 𑀲𑀢𑁆𑀢𑀩𑁄𑀚𑁆𑀛𑀗𑁆𑀕𑀭𑀢𑀦𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀤𑀺𑀩𑁆𑀩𑀲𑁂𑀢𑀘𑁆𑀙𑀢𑁆𑀢𑀥𑀸𑀭𑀡𑀁 𑀯𑀺𑀫𑀼𑀢𑁆𑀢𑀺𑀯𑀭𑀙𑀢𑁆𑀢𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀧𑀜𑁆𑀘𑀭𑀸𑀚𑀓𑀓𑀼𑀥𑀪𑀡𑁆𑀟𑀸𑀦𑀁 𑀧𑀝𑀺𑀮𑀸𑀪𑁄 𑀧𑀜𑁆𑀘𑀳𑀺 𑀯𑀺𑀫𑀼𑀢𑁆𑀢𑀻𑀳𑀺 𑀯𑀺𑀫𑀼𑀘𑁆𑀘𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀲𑀩𑁆𑀩𑀤𑀺𑀲𑀸𑀦𑀼𑀯𑀺𑀮𑁄𑀓𑀦𑀁 𑀅𑀦𑀸𑀯𑀭𑀡𑀜𑀸𑀡𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀆𑀲𑀪𑀺𑀯𑀸𑀘𑀸𑀪𑀸𑀲𑀦𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, ‘‘𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀻’’𑀢𑀺 𑀲𑀻𑀳𑀦𑀸𑀤𑁄 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁 ¶ . 𑀇𑀫𑁂 ¶ 𑀯𑀸𑀭𑀸 𑀧𑀸𑀴𑀺𑀬𑀁 𑀆𑀕𑀢𑀸, 𑀲𑀫𑁆𑀩𑀳𑀼𑀮𑀯𑀸𑀭𑁄 𑀧𑀦 𑀦𑀸𑀕𑀢𑁄, 𑀆𑀳𑀭𑀺𑀢𑁆𑀯𑀸 𑀤𑀻𑀧𑁂𑀢𑀩𑁆𑀩𑁄.

𑀫𑀳𑀸𑀧𑀼𑀭𑀺𑀲𑀲𑁆𑀲 𑀳𑀺 𑀚𑀸𑀢𑀤𑀺𑀯𑀲𑁂 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀓𑀫𑁆𑀧𑀺. 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀫𑁆𑀳𑀺 𑀤𑁂𑀯𑀢𑀸 𑀏𑀓𑀘𑀓𑁆𑀓𑀯𑀸𑀴𑁂 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀧𑀞𑀫𑀁 𑀤𑁂𑀯𑀸 𑀧𑀝𑀺𑀕𑁆𑀕𑀡𑁆𑀳𑀺𑀁𑀲𑀼, 𑀧𑀘𑁆𑀙𑀸 𑀫𑀦𑀼𑀲𑁆𑀲𑀸. 𑀢𑀦𑁆𑀢𑀺𑀩𑀤𑁆𑀥𑀸 𑀯𑀻𑀡𑀸 𑀘𑀫𑁆𑀫𑀩𑀤𑁆𑀥𑀸 𑀪𑁂𑀭𑀺𑀬𑁄 𑀘 𑀓𑁂𑀦𑀘𑀺 𑀅𑀯𑀸𑀤𑀺𑀢𑀸 𑀲𑀬𑀫𑁂𑀯 𑀯𑀚𑁆𑀚𑀺𑀁𑀲𑀼. 𑀫𑀦𑀼𑀲𑁆𑀲𑀸𑀦𑀁 𑀅𑀦𑁆𑀤𑀼𑀩𑀦𑁆𑀥𑀦𑀸𑀤𑀻𑀦𑀺 𑀔𑀡𑁆𑀟𑀸𑀔𑀡𑁆𑀟𑀁 𑀙𑀺𑀚𑁆𑀚𑀺𑀁𑀲𑀼. 𑀲𑀩𑁆𑀩𑀭𑁄𑀕𑀸 𑀯𑀽𑀧𑀲𑀫𑀺𑀁𑀲𑀼, 𑀅𑀫𑁆𑀩𑀺𑀮𑁂𑀦 𑀥𑁄𑀢𑀢𑀫𑁆𑀩𑀫𑀮𑀁 𑀯𑀺𑀬 𑀯𑀺𑀕𑀘𑁆𑀙𑀺𑀁𑀲𑀼. 𑀚𑀘𑁆𑀘𑀦𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀺𑀁𑀲𑀼. 𑀚𑀘𑁆𑀘𑀩𑀥𑀺𑀭𑀸 𑀲𑀤𑁆𑀤𑀁 𑀲𑀼𑀡𑀺𑀁𑀲𑀼. 𑀧𑀻𑀞𑀲𑀧𑁆𑀧𑀻 𑀚𑀯𑀲𑀫𑁆𑀧𑀦𑁆𑀦𑀸 𑀅𑀳𑁂𑀲𑀼𑀁. 𑀚𑀸𑀢𑀺𑀚𑀴𑀸𑀦𑀫𑁆𑀧𑀺 𑀏𑀴𑀫𑀽𑀕𑀸𑀦𑀁 𑀲𑀢𑀺 𑀧𑀢𑀺𑀝𑁆𑀞𑀸𑀲𑀺. 𑀯𑀺𑀤𑁂𑀲𑀧𑀓𑁆𑀔𑀦𑁆𑀤𑀸 𑀦𑀸𑀯𑀸 𑀲𑀼𑀧𑀝𑁆𑀝𑀦𑀁 𑀧𑀸𑀧𑀼𑀡𑀺𑀁𑀲𑀼. 𑀆𑀓𑀸𑀲𑀝𑁆𑀞𑀓𑀪𑀽𑀫𑀝𑁆𑀞𑀓𑀭𑀢𑀦𑀸𑀦𑀺 𑀲𑀓𑀢𑁂𑀚𑁄𑀪𑀸𑀲𑀺𑀢𑀸𑀦𑀺 𑀅𑀳𑁂𑀲𑀼𑀁. 𑀯𑁂𑀭𑀺𑀦𑁄 𑀫𑁂𑀢𑁆𑀢𑀘𑀺𑀢𑁆𑀢𑀁 𑀧𑀝𑀺𑀮𑀪𑀺𑀁𑀲𑀼. 𑀅𑀯𑀻𑀘𑀺𑀫𑁆𑀳𑀺 𑀅𑀕𑁆𑀕𑀺 𑀦𑀺𑀩𑁆𑀩𑀸𑀬𑀺. 𑀮𑁄𑀓𑀦𑁆𑀢𑀭𑁂𑀲𑀼 𑀆𑀮𑁄𑀓𑁄 𑀉𑀤𑀧𑀸𑀤𑀺. 𑀦𑀤𑀻𑀲𑀼 𑀚𑀮𑀁 𑀦𑀧𑁆𑀧𑀯𑀢𑁆𑀢𑀢𑀺. 𑀫𑀳𑀸𑀲𑀫𑀼𑀤𑁆𑀤𑁂 𑀫𑀥𑀼𑀭𑀲𑀁 𑀉𑀤𑀓𑀁 𑀅𑀳𑁄𑀲𑀺. 𑀯𑀸𑀢𑁄 𑀦 𑀯𑀸𑀬𑀺. 𑀆𑀓𑀸𑀲𑀧𑀩𑁆𑀩𑀢𑀭𑀼𑀓𑁆𑀔𑀕𑀢𑀸 𑀲𑀓𑀼𑀡𑀸 𑀪𑀲𑁆𑀲𑀺𑀢𑁆𑀯𑀸 𑀧𑀣𑀯𑀺𑀕𑀢𑀸 𑀅𑀳𑁂𑀲𑀼𑀁. 𑀘𑀦𑁆𑀤𑁄 𑀅𑀢𑀺𑀯𑀺𑀭𑁄𑀘𑀺. 𑀲𑀽𑀭𑀺𑀬𑁄 𑀦 𑀉𑀡𑁆𑀳𑁄, 𑀦 𑀲𑀻𑀢𑀮𑁄, 𑀦𑀺𑀫𑁆𑀫𑀮𑁄 𑀉𑀢𑀼𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺. 𑀤𑁂𑀯𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀫𑀸𑀦𑀤𑁆𑀯𑀸𑀭𑁂 𑀞𑀢𑁆𑀯𑀸 𑀅𑀧𑁆𑀨𑁄𑀝𑀦𑀲𑁂𑀴𑀦𑀘𑁂𑀮𑀼𑀓𑁆𑀔𑁂𑀧𑀸𑀤𑀻𑀳𑀺 𑀫𑀳𑀸𑀓𑀻𑀴𑀓𑀁 𑀓𑀻𑀴𑀺𑀁𑀲𑀼. 𑀘𑀸𑀢𑀼𑀤𑁆𑀤𑀻𑀧𑀺𑀓𑀫𑀳𑀸𑀫𑁂𑀖𑁄 𑀯𑀲𑁆𑀲𑀺. 𑀫𑀳𑀸𑀚𑀦𑀁 𑀦𑁂𑀯 𑀔𑀼𑀤𑀸 𑀦 𑀧𑀺𑀧𑀸𑀲𑀸 𑀧𑀻𑀴𑁂𑀲𑀺. 𑀤𑁆𑀯𑀸𑀭𑀓𑀯𑀸𑀝𑀸𑀦𑀺 𑀲𑀬𑀫𑁂𑀯 𑀯𑀺𑀯𑀭𑀺𑀁𑀲𑀼. 𑀧𑀼𑀧𑁆𑀨𑀽𑀧𑀕𑀨𑀮𑀽𑀧𑀕𑀸 𑀭𑀼𑀓𑁆𑀔𑀸 𑀧𑀼𑀧𑁆𑀨𑀨𑀮𑀸𑀦𑀺 𑀕𑀡𑁆𑀳𑀺𑀁𑀲𑀼. 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀏𑀓𑀤𑁆𑀥𑀚𑀫𑀸𑀮𑀸 𑀅𑀳𑁄𑀲𑀺.

𑀢𑀢𑁆𑀭𑀸𑀧𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀓𑀫𑁆𑀧𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀤𑁂𑀯𑀢𑀸𑀦𑀁 𑀏𑀓𑀘𑀓𑁆𑀓𑀯𑀸𑀴𑁂 𑀲𑀦𑁆𑀦𑀺𑀧𑀸𑀢𑁄 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀓𑀸𑀮𑁂 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀥𑀫𑁆𑀫𑀁 𑀧𑀝𑀺𑀕𑁆𑀕𑀡𑁆𑀳𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀧𑀞𑀫𑀁 𑀤𑁂𑀯𑀢𑀸𑀦𑀁 𑀧𑀝𑀺𑀕𑁆𑀕𑀳𑀡𑀁 𑀘𑀢𑀼𑀦𑁆𑀦𑀁 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁 𑀧𑀝𑀺𑀮𑀸𑀪𑀲𑁆𑀲 ¶ 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀧𑀘𑁆𑀙𑀸 𑀫𑀦𑀼𑀲𑁆𑀲𑀸𑀦𑀁 𑀧𑀝𑀺𑀕𑁆𑀕𑀳𑀡𑀁 ¶ 𑀘𑀢𑀼𑀦𑁆𑀦𑀁 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁 𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀢𑀦𑁆𑀢𑀺𑀩𑀤𑁆𑀥𑀯𑀻𑀡𑀸𑀦𑀁 𑀲𑀬𑀁 𑀯𑀚𑁆𑀚𑀦𑀁 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀘𑀫𑁆𑀫𑀩𑀤𑁆𑀥𑀪𑁂𑀭𑀻𑀦𑀁 𑀯𑀚𑁆𑀚𑀦𑀁 𑀫𑀳𑀢𑀺𑀬𑀸 𑀥𑀫𑁆𑀫𑀪𑁂𑀭𑀺𑀬𑀸 𑀅𑀦𑀼𑀲𑁆𑀲𑀸𑀯𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀅𑀦𑁆𑀤𑀼𑀩𑀦𑁆𑀥𑀦𑀸𑀤𑀻𑀦𑀁 𑀙𑁂𑀤𑁄 𑀅𑀲𑁆𑀫𑀺𑀫𑀸𑀦𑀲𑀫𑀼𑀘𑁆𑀙𑁂𑀤𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀫𑀳𑀸𑀚𑀦𑀲𑁆𑀲 𑀭𑁄𑀕𑀯𑀺𑀕𑀫𑁄 𑀘𑀢𑀼𑀲𑀘𑁆𑀘𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀚𑀘𑁆𑀘𑀦𑁆𑀥𑀸𑀦𑀁 𑀭𑀽𑀧𑀤𑀲𑁆𑀲𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 ¶ . 𑀩𑀥𑀺𑀭𑀸𑀦𑀁 𑀲𑀤𑁆𑀤𑀲𑁆𑀲𑀯𑀦𑀁 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀧𑀻𑀞𑀲𑀧𑁆𑀧𑀻𑀦𑀁 𑀚𑀯𑀲𑀫𑁆𑀧𑀤𑀸 𑀘𑀢𑀼𑀭𑀺𑀤𑁆𑀥𑀺𑀧𑀸𑀤𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀚𑀴𑀸𑀦𑀁 𑀲𑀢𑀺𑀧𑀢𑀺𑀝𑁆𑀞𑀸𑀦𑀁 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀯𑀺𑀤𑁂𑀲𑀧𑀓𑁆𑀔𑀦𑁆𑀤𑀦𑀸𑀯𑀸𑀦𑀁 𑀲𑀼𑀧𑀝𑁆𑀝𑀦𑀲𑀫𑁆𑀧𑀸𑀧𑀼𑀡𑀦𑀁 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀥𑀺𑀕𑀫𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀭𑀢𑀦𑀸𑀦𑀁 𑀲𑀓𑀢𑁂𑀚𑁄𑀪𑀸𑀲𑀺𑀢𑀢𑁆𑀢𑀁 𑀬𑀁 𑀮𑁄𑀓𑀲𑁆𑀲 𑀥𑀫𑁆𑀫𑁄𑀪𑀸𑀲𑀁 𑀤𑀲𑁆𑀲𑁂𑀲𑁆𑀲𑀢𑀺, 𑀢𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁.

𑀯𑁂𑀭𑀻𑀦𑀁 𑀫𑁂𑀢𑁆𑀢𑀘𑀺𑀢𑁆𑀢𑀧𑀝𑀺𑀮𑀸𑀪𑁄 𑀘𑀢𑀼𑀩𑁆𑀭𑀳𑁆𑀫𑀯𑀺𑀳𑀸𑀭𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀅𑀯𑀻𑀘𑀺𑀫𑁆𑀳𑀺 𑀅𑀕𑁆𑀕𑀺𑀦𑀺𑀩𑁆𑀩𑀸𑀬𑀦𑀁 𑀏𑀓𑀸𑀤𑀲𑀅𑀕𑁆𑀕𑀺𑀦𑀺𑀩𑁆𑀩𑀸𑀬𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀮𑁄𑀓𑀦𑁆𑀢𑀭𑀺𑀓𑀸𑀮𑁄𑀓𑁄 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀜𑀸𑀡𑀸𑀮𑁄𑀓𑀤𑀲𑁆𑀲𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀫𑀥𑀼𑀭𑀢𑀸 𑀦𑀺𑀩𑁆𑀩𑀸𑀦𑀭𑀲𑁂𑀦 𑀏𑀓𑀭𑀲𑀪𑀸𑀯𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀯𑀸𑀢𑀲𑁆𑀲 𑀅𑀯𑀸𑀬𑀦𑀁 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀪𑀺𑀦𑁆𑀤𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀲𑀓𑀼𑀡𑀸𑀦𑀁 𑀧𑀣𑀯𑀺𑀕𑀫𑀦𑀁 𑀫𑀳𑀸𑀚𑀦𑀲𑁆𑀲 𑀑𑀯𑀸𑀤𑀁 𑀲𑀼𑀢𑁆𑀯𑀸 𑀧𑀸𑀡𑁂𑀳𑀺 𑀲𑀭𑀡𑀕𑀫𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀘𑀦𑁆𑀤𑀲𑁆𑀲 𑀅𑀢𑀺𑀯𑀺𑀭𑁄𑀘𑀦𑀁 𑀩𑀳𑀼𑀚𑀦𑀓𑀦𑁆𑀢𑀢𑀸𑀬 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀲𑀽𑀭𑀺𑀬𑀲𑁆𑀲 𑀉𑀡𑁆𑀳𑀲𑀻𑀢𑀯𑀺𑀯𑀚𑁆𑀚𑀦𑀉𑀢𑀼𑀲𑀼𑀔𑀢𑀸 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀧𑁆𑀧𑀢𑁆𑀢𑀺𑀬𑀸 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀤𑁂𑀯𑀢𑀸𑀦𑀁 𑀯𑀺𑀫𑀸𑀦𑀤𑁆𑀯𑀸𑀭𑁂𑀲𑀼 𑀞𑀢𑁆𑀯𑀸 𑀅𑀧𑁆𑀨𑁄𑀝𑀦𑀸𑀤𑀻𑀳𑀺 𑀓𑀻𑀴𑀦𑀁 𑀩𑀼𑀤𑁆𑀥𑀪𑀸𑀯𑀁 𑀧𑀢𑁆𑀯𑀸 𑀉𑀤𑀸𑀦𑀁 𑀉𑀤𑀸𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀘𑀸𑀢𑀼𑀤𑁆𑀤𑀻𑀧𑀺𑀓𑀫𑀳𑀸𑀫𑁂𑀖𑀯𑀲𑁆𑀲𑀦𑀁 𑀫𑀳𑀢𑁄 𑀥𑀫𑁆𑀫𑀫𑁂𑀖𑀯𑀲𑁆𑀲𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀔𑀼𑀤𑀸𑀧𑀻𑀴𑀦𑀲𑁆𑀲 𑀅𑀪𑀸𑀯𑁄 𑀓𑀸𑀬𑀕𑀢𑀸𑀲𑀢𑀺𑀅𑀫𑀢𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀧𑀺𑀧𑀸𑀲𑀸𑀧𑀻𑀴𑀦𑀲𑁆𑀲 𑀅𑀪𑀸𑀯𑁄 𑀯𑀺𑀫𑀼𑀢𑁆𑀢𑀺𑀲𑀼𑀔𑁂𑀦 ¶ 𑀲𑀼𑀔𑀺𑀢𑀪𑀸𑀯𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀤𑁆𑀯𑀸𑀭𑀓𑀯𑀸𑀝𑀸𑀦𑀁 𑀲𑀬𑀫𑁂𑀯 𑀯𑀺𑀯𑀭𑀡𑀁 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀤𑁆𑀯𑀸𑀭𑀯𑀺𑀯𑀭𑀡𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀭𑀼𑀓𑁆𑀔𑀸𑀦𑀁 𑀧𑀼𑀧𑁆𑀨𑀨𑀮𑀕𑁆𑀕𑀳𑀡𑀁 𑀯𑀺𑀫𑀼𑀢𑁆𑀢𑀺𑀧𑀼𑀧𑁆𑀨𑁂𑀳𑀺 𑀧𑀼𑀧𑁆𑀨𑀺𑀢𑀲𑁆𑀲 𑀘 𑀲𑀸𑀫𑀜𑁆𑀜𑀨𑀮𑀪𑀸𑀭𑀪𑀭𑀺𑀢𑀪𑀸𑀯𑀲𑁆𑀲 𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸 𑀏𑀓𑀤𑁆𑀥𑀚𑀫𑀸𑀮𑀺𑀢𑀸 𑀅𑀭𑀺𑀬𑀤𑁆𑀥𑀚𑀫𑀸𑀮𑀫𑀸𑀮𑀺𑀢𑀸𑀬 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀲𑀫𑁆𑀩𑀳𑀼𑀮𑀯𑀸𑀭𑁄 𑀦𑀸𑀫.

𑀏𑀢𑁆𑀣 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺 𑁋 ‘‘𑀬𑀤𑀸 𑀫𑀳𑀸𑀧𑀼𑀭𑀺𑀲𑁄 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀧𑀤𑀲𑀸 𑀕𑀦𑁆𑀢𑁆𑀯𑀸 𑀆𑀲𑀪𑀺𑀁 𑀯𑀸𑀘𑀁 𑀅𑀪𑀸𑀲𑀺, 𑀢𑀤𑀸 𑀓𑀺𑀁 𑀧𑀣𑀯𑀺𑀬𑀸 𑀕𑀢𑁄, 𑀉𑀤𑀸𑀳𑀼 𑀆𑀓𑀸𑀲𑁂𑀦; 𑀤𑀺𑀲𑁆𑀲𑀫𑀸𑀦𑁄 𑀕𑀢𑁄, 𑀉𑀤𑀸𑀳𑀼 𑀅𑀤𑀺𑀲𑁆𑀲𑀫𑀸𑀦𑁄; 𑀅𑀘𑁂𑀮𑀓𑁄 𑀕𑀢𑁄, 𑀉𑀤𑀸𑀳𑀼 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄; 𑀤𑀳𑀭𑁄 𑀳𑀼𑀢𑁆𑀯𑀸 𑀕𑀢𑁄 ¶ , 𑀉𑀤𑀸𑀳𑀼 𑀫𑀳𑀮𑁆𑀮𑀓𑁄; 𑀧𑀘𑁆𑀙𑀸𑀧𑀺 𑀓𑀺𑀁 𑀢𑀸𑀤𑀺𑀲𑁄𑀯 𑀅𑀳𑁄𑀲𑀺, 𑀉𑀤𑀸𑀳𑀼 𑀧𑀼𑀦 𑀩𑀸𑀮𑀤𑀸𑀭𑀓𑁄’’𑀢𑀺? 𑀅𑀬𑀁 𑀧𑀦 𑀧𑀜𑁆𑀳𑁄 𑀳𑁂𑀝𑁆𑀞𑀸𑀮𑁄𑀳𑀧𑀸𑀲𑀸𑀤𑁂 𑀲𑀫𑀼𑀝𑁆𑀞𑀺𑀢𑁄 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑁄𑀯. 𑀣𑁂𑀭𑁄 𑀓𑀺𑀭 𑀏𑀢𑁆𑀣 𑀦𑀺𑀬𑀢𑀺𑀧𑀼𑀩𑁆𑀩𑁂𑀓𑀢𑀓𑀫𑁆𑀫𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀯𑀸𑀤𑀯𑀲𑁂𑀦 ¶ 𑀢𑀁 𑀢𑀁 𑀩𑀳𑀼𑀁 𑀯𑀢𑁆𑀯𑀸 𑀅𑀯𑀲𑀸𑀦𑁂 𑀏𑀯𑀁 𑀩𑁆𑀬𑀸𑀓𑀭𑀺 𑁋 ‘‘𑀫𑀳𑀸𑀧𑀼𑀭𑀺𑀲𑁄 𑀧𑀣𑀯𑀺𑀬𑀸 𑀕𑀢𑁄, 𑀫𑀳𑀸𑀚𑀦𑀲𑁆𑀲 𑀧𑀦 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀯𑀺𑀬 𑀅𑀳𑁄𑀲𑀺. 𑀤𑀺𑀲𑁆𑀲𑀫𑀸𑀦𑁄 𑀕𑀢𑁄, 𑀫𑀳𑀸𑀚𑀦𑀲𑁆𑀲 𑀧𑀦 𑀅𑀤𑀺𑀲𑁆𑀲𑀫𑀸𑀦𑁄 𑀯𑀺𑀬 𑀅𑀳𑁄𑀲𑀺. 𑀅𑀘𑁂𑀮𑀓𑁄 𑀕𑀢𑁄, 𑀫𑀳𑀸𑀚𑀦𑀲𑁆𑀲 𑀧𑀦 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄 𑀯𑀺𑀬 𑀉𑀧𑀝𑁆𑀞𑀸𑀲𑀺. 𑀤𑀳𑀭𑁄𑀯 𑀕𑀢𑁄, 𑀫𑀳𑀸𑀚𑀦𑀲𑁆𑀲 𑀧𑀦 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄 𑀯𑀺𑀬 𑀅𑀳𑁄𑀲𑀺. 𑀧𑀘𑁆𑀙𑀸 𑀧𑀦 𑀩𑀸𑀮𑀤𑀸𑀭𑀓𑁄𑀯 𑀅𑀳𑁄𑀲𑀺, 𑀦 𑀢𑀸𑀤𑀺𑀲𑁄’’𑀢𑀺. 𑀧𑀭𑀺𑀲𑀸 𑀘𑀲𑁆𑀲 𑁋 ‘‘𑀩𑀼𑀤𑁆𑀥𑁂𑀦 𑀯𑀺𑀬 𑀳𑀼𑀢𑁆𑀯𑀸 𑀪𑁄 𑀣𑁂𑀭𑁂𑀦 𑀧𑀜𑁆𑀳𑁄 𑀓𑀣𑀺𑀢𑁄’’𑀢𑀺 𑀅𑀢𑁆𑀢𑀫𑀦𑀸 𑀅𑀳𑁄𑀲𑀺. 𑀮𑁄𑀓𑀦𑁆𑀢𑀭𑀺𑀓𑀯𑀸𑀭𑁄 𑀯𑀼𑀢𑁆𑀢𑀦𑀬𑁄 𑀏𑀯.

𑀇𑀫𑀸 𑀘 𑀧𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀓𑀣𑀺𑀢𑀸 𑀲𑀩𑁆𑀩𑀥𑀫𑁆𑀫𑀢𑀸 𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑀸𑀦𑀁 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀯𑀡𑁆𑀡𑀦𑀸

𑁩𑁩. 𑀅𑀤𑁆𑀤𑀲 𑀔𑁄𑀢𑀺 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀆𑀦𑀻𑀢𑀁 𑀅𑀤𑁆𑀤𑀲. 𑀫𑀳𑀸𑀧𑀼𑀭𑀺𑀲𑀲𑁆𑀲𑀸𑀢𑀺 𑀚𑀸𑀢𑀺𑀕𑁄𑀢𑁆𑀢𑀓𑀼𑀮𑀧𑀤𑁂𑀲𑀸𑀤𑀺𑀯𑀲𑁂𑀦 𑀫𑀳𑀦𑁆𑀢𑀲𑁆𑀲 𑀧𑀼𑀭𑀺𑀲𑀲𑁆𑀲. 𑀤𑁆𑀯𑁂 𑀕𑀢𑀺𑀬𑁄𑀢𑀺 𑀤𑁆𑀯𑁂 𑀦𑀺𑀝𑁆𑀞𑀸, 𑀤𑁆𑀯𑁂 𑀦𑀺𑀧𑁆𑀨𑀢𑁆𑀢𑀺𑀬𑁄. 𑀅𑀬𑀜𑁆𑀳𑀺 𑀕𑀢𑀺𑀲𑀤𑁆𑀤𑁄 𑁋 ‘‘𑀧𑀜𑁆𑀘 𑀔𑁄 𑀇𑀫𑀸, 𑀲𑀸𑀭𑀺𑀧𑀼𑀢𑁆𑀢, 𑀕𑀢𑀺𑀬𑁄’’𑀢𑀺 (𑀫. 𑀦𑀺. 𑁧.𑁧𑁫𑁩) 𑀏𑀢𑁆𑀣 𑀦𑀺𑀭𑀬𑀸𑀤𑀺𑀪𑁂𑀤𑀸𑀬 𑀲𑀢𑁆𑀢𑁂𑀳𑀺 𑀕𑀦𑁆𑀢𑀩𑁆𑀩𑀕𑀢𑀺𑀬𑀸 ¶ 𑀯𑀢𑁆𑀢𑀢𑀺. ‘‘𑀇𑀫𑁂𑀲𑀁 𑀔𑁄 𑀅𑀳𑀁 𑀪𑀺𑀓𑁆𑀔𑀽𑀦𑀁 𑀲𑀻𑀮𑀯𑀦𑁆𑀢𑀸𑀦𑀁 𑀓𑀮𑁆𑀬𑀸𑀡𑀥𑀫𑁆𑀫𑀸𑀦𑀁 𑀦𑁂𑀯 𑀚𑀸𑀦𑀸𑀫𑀺 𑀆𑀕𑀢𑀺𑀁 𑀯𑀸 𑀕𑀢𑀺𑀁 𑀯𑀸’’𑀢𑀺 (𑀫. 𑀦𑀺. 𑁧.𑁫𑁦𑁮) 𑀏𑀢𑁆𑀣 𑀅𑀚𑁆𑀛𑀸𑀲𑀬𑁂. ‘‘𑀦𑀺𑀩𑁆𑀩𑀸𑀦𑀁 𑀅𑀭𑀳𑀢𑁄 𑀕𑀢𑀻’’𑀢𑀺 (𑀧𑀭𑀺. 𑁩𑁩𑁯) 𑀏𑀢𑁆𑀣 𑀧𑀝𑀺𑀲𑁆𑀲𑀭𑀡𑁂. ‘‘𑀅𑀧𑀺 𑀘 𑀢𑁆𑀬𑀸𑀳𑀁 𑀩𑁆𑀭𑀳𑁆𑀫𑁂 𑀕𑀢𑀺𑀜𑁆𑀘 𑀧𑀚𑀸𑀦𑀸𑀫𑀺, 𑀚𑀼𑀢𑀺𑀜𑁆𑀘 𑀧𑀚𑀸𑀦𑀸𑀫𑀺 𑀏𑀯𑀁𑀫𑀳𑀺𑀤𑁆𑀥𑀺𑀓𑁄 𑀩𑀓𑁄 𑀩𑁆𑀭𑀳𑁆𑀫𑀸’’𑀢𑀺 (𑀫. 𑀦𑀺. 𑁧.𑁫𑁦𑁩) 𑀏𑀢𑁆𑀣 𑀦𑀺𑀧𑁆𑀨𑀢𑁆𑀢𑀺𑀬𑀁 𑀯𑀢𑁆𑀢𑀢𑀺. 𑀲𑁆𑀯𑀸𑀬𑀫𑀺𑀥𑀸𑀧𑀺 𑀦𑀺𑀧𑁆𑀨𑀢𑁆𑀢𑀺𑀬𑀁 𑀯𑀢𑁆𑀢𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀦𑀜𑁆𑀜𑀸𑀢𑀺 𑀅𑀜𑁆𑀜𑀸 𑀕𑀢𑀺 𑀦𑀺𑀧𑁆𑀨𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺.

𑀥𑀫𑁆𑀫𑀺𑀓𑁄𑀢𑀺 𑀤𑀲𑀓𑀼𑀲𑀮𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁄 𑀅𑀕𑀢𑀺𑀕𑀫𑀦𑀯𑀺𑀭𑀳𑀺𑀢𑁄. 𑀥𑀫𑁆𑀫𑀭𑀸𑀚𑀸𑀢𑀺 𑀇𑀤𑀁 𑀧𑀼𑀭𑀺𑀫𑀧𑀤𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀥𑀫𑁆𑀫𑁂𑀦 𑀯𑀸 𑀮𑀤𑁆𑀥𑀭𑀚𑁆𑀚𑀢𑁆𑀢𑀸 𑀥𑀫𑁆𑀫𑀭𑀸𑀚𑀸. 𑀘𑀸𑀢𑀼𑀭𑀦𑁆𑀢𑁄𑀢𑀺 ¶ 𑀧𑀼𑀭𑀢𑁆𑀣𑀺𑀫𑀲𑀫𑀼𑀤𑁆𑀤𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀲𑀫𑀼𑀤𑁆𑀤𑀸𑀦𑀁 𑀯𑀲𑁂𑀦 𑀘𑀢𑀼𑀭𑀦𑁆𑀢𑀸𑀬 𑀧𑀣𑀯𑀺𑀬𑀸 𑀇𑀲𑁆𑀲𑀭𑁄. 𑀯𑀺𑀚𑀺𑀢𑀸𑀯𑀻𑀢𑀺 𑀯𑀺𑀚𑀺𑀢𑀲𑀗𑁆𑀕𑀸𑀫𑁄. 𑀚𑀦𑀧𑀤𑁄 𑀅𑀲𑁆𑀫𑀺𑀁 𑀣𑀸𑀯𑀭𑀺𑀬𑀁 𑀣𑀺𑀭𑀪𑀸𑀯𑀁 𑀧𑀢𑁆𑀢𑁄𑀢𑀺 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄. 𑀘𑀡𑁆𑀟𑀲𑁆𑀲 𑀳𑀺 𑀭𑀜𑁆𑀜𑁄 𑀩𑀮𑀺𑀤𑀡𑁆𑀟𑀸𑀤𑀻𑀳𑀺 𑀮𑁄𑀓𑀁 𑀧𑀻𑀴𑀬𑀢𑁄 𑀫𑀦𑀼𑀲𑁆𑀲𑀸 𑀫𑀚𑁆𑀛𑀺𑀫𑀚𑀦𑀧𑀤𑀁 𑀙𑀟𑁆𑀟𑁂𑀢𑁆𑀯𑀸 𑀧𑀩𑁆𑀩𑀢𑀲𑀫𑀼𑀤𑁆𑀤𑀢𑀻𑀭𑀸𑀤𑀻𑀦𑀺 𑀦𑀺𑀲𑁆𑀲𑀸𑀬 𑀧𑀘𑁆𑀘𑀦𑁆𑀢𑁂 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀺. 𑀅𑀢𑀺𑀫𑀼𑀤𑀼𑀓𑀲𑁆𑀲 𑀭𑀜𑁆𑀜𑁄 𑀘𑁄𑀭𑁂𑀳𑀺 𑀲𑀸𑀳𑀲𑀺𑀓𑀥𑀦𑀯𑀺𑀮𑁄𑀧𑀧𑀻𑀴𑀺𑀢𑀸 𑀫𑀦𑀼𑀲𑁆𑀲𑀸 𑀧𑀘𑁆𑀘𑀦𑁆𑀢𑀁 𑀧𑀳𑀸𑀬 𑀚𑀦𑀧𑀤𑀫𑀚𑁆𑀛𑁂 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀺, 𑀇𑀢𑀺 𑀏𑀯𑀭𑀽𑀧𑁂 𑀭𑀸𑀚𑀺𑀦𑀺 𑀚𑀦𑀧𑀤𑁄 𑀣𑀺𑀭𑀪𑀸𑀯𑀁 𑀦 𑀧𑀸𑀧𑀼𑀡𑀸𑀢𑀺. 𑀇𑀫𑀲𑁆𑀫𑀺𑀁 𑀧𑀦 ¶ 𑀓𑀼𑀫𑀸𑀭𑁂 𑀭𑀚𑁆𑀚𑀁 𑀓𑀸𑀭𑀬𑀫𑀸𑀦𑁂 𑀏𑀢𑀲𑁆𑀲 𑀚𑀦𑀧𑀤𑁄 𑀧𑀸𑀲𑀸𑀡𑀧𑀺𑀝𑁆𑀞𑀺𑀬𑀁 𑀞𑀧𑁂𑀢𑁆𑀯𑀸 𑀅𑀬𑁄𑀧𑀝𑁆𑀝𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀺𑀬 𑀣𑀺𑀭𑁄 𑀪𑀯𑀺𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑁋 ‘‘𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄’’𑀢𑀺 𑀆𑀳𑀁𑀲𑀼.

𑀲𑀢𑁆𑀢𑀭𑀢𑀦𑀲𑀫𑀦𑁆𑀦𑀸𑀕𑀢𑁄𑀢𑀺 𑀏𑀢𑁆𑀣 𑀭𑀢𑀺𑀚𑀦𑀦𑀝𑁆𑀞𑁂𑀦 𑀭𑀢𑀦𑀁. 𑀅𑀧𑀺𑀘 𑁋

‘‘𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀁 𑀢𑁂𑀦 𑀯𑀼𑀘𑁆𑀘𑀢𑀺’’.

𑀘𑀓𑁆𑀓𑀭𑀢𑀦𑀲𑁆𑀲 𑀘 𑀦𑀺𑀩𑁆𑀩𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀜𑁆𑀜𑀁 𑀤𑁂𑀯𑀝𑁆𑀞𑀸𑀦𑀁 𑀦𑀸𑀫 𑀦 𑀳𑁄𑀢𑀺, 𑀲𑀩𑁆𑀩𑁂 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀢𑀲𑁆𑀲𑁂𑀯 𑀧𑀽𑀚𑀜𑁆𑀘 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀘 𑀓𑀭𑁄𑀦𑁆𑀢𑀻𑀢𑀺 𑀘𑀺𑀢𑁆𑀢𑀻𑀓𑀢𑀝𑁆𑀞𑁂𑀦 𑀭𑀢𑀦𑀁. 𑀘𑀓𑁆𑀓𑀭𑀢𑀦𑀲𑁆𑀲 𑀘 𑀏𑀢𑁆𑀢𑀓𑀁 𑀦𑀸𑀫 𑀥𑀦𑀁 𑀅𑀕𑁆𑀖𑀢𑀻𑀢𑀺 ¶ 𑀅𑀕𑁆𑀖𑁄 𑀦𑀢𑁆𑀣𑀺, 𑀇𑀢𑀺 𑀫𑀳𑀕𑁆𑀖𑀝𑁆𑀞𑁂𑀦𑀸𑀧𑀺 𑀭𑀢𑀦𑀁. 𑀘𑀓𑁆𑀓𑀭𑀢𑀦𑀜𑁆𑀘 𑀅𑀜𑁆𑀜𑁂𑀳𑀺 𑀮𑁄𑀓𑁂 𑀯𑀺𑀚𑁆𑀚𑀫𑀸𑀦𑀭𑀢𑀦𑁂𑀳𑀺 𑀅𑀲𑀤𑀺𑀲𑀦𑁆𑀢𑀺 𑀅𑀢𑀼𑀮𑀝𑁆𑀞𑁂𑀦𑀸𑀧𑀺 𑀭𑀢𑀦𑀁. 𑀬𑀲𑁆𑀫𑀸 𑀘 𑀧𑀦 𑀬𑀲𑁆𑀫𑀺𑀁 𑀓𑀧𑁆𑀧𑁂 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀘𑀓𑁆𑀓𑀯𑀢𑁆𑀢𑀺𑀦𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀩𑀼𑀤𑁆𑀥𑀸 𑀘 𑀓𑀤𑀸𑀘𑀺 𑀓𑀭𑀳𑀘𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀤𑀼𑀮𑁆𑀮𑀪𑀤𑀲𑁆𑀲𑀦𑀝𑁆𑀞𑁂𑀦𑀸𑀧𑀺 𑀭𑀢𑀦𑀁. 𑀢𑀤𑁂𑀢𑀁 𑀚𑀸𑀢𑀺𑀭𑀽𑀧𑀓𑀼𑀮𑀇𑀲𑁆𑀲𑀭𑀺𑀬𑀸𑀤𑀻𑀳𑀺 𑀅𑀦𑁄𑀫𑀲𑁆𑀲 𑀉𑀴𑀸𑀭𑀲𑀢𑁆𑀢𑀲𑁆𑀲𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀅𑀜𑁆𑀜𑀲𑁆𑀲𑀸𑀢𑀺 𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀝𑁆𑀞𑁂𑀦𑀸𑀧𑀺 𑀭𑀢𑀦𑀁. 𑀬𑀣𑀸 𑀘𑀓𑁆𑀓𑀭𑀢𑀦𑀁, 𑀏𑀯𑀁 𑀲𑁂𑀲𑀸𑀦𑀺𑀧𑀻𑀢𑀺. 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀧𑀭𑀺𑀯𑀸𑀭𑀪𑀸𑀯𑁂𑀦 𑀘𑁂𑀯 𑀲𑀩𑁆𑀩𑀪𑁄𑀕𑀽𑀧𑀓𑀭𑀡𑀪𑀸𑀯𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄𑀢𑀺 𑀲𑀢𑁆𑀢𑀭𑀢𑀦𑀲𑀫𑀦𑁆𑀦𑀸𑀕𑀢𑁄.

𑀇𑀤𑀸𑀦𑀺 𑀢𑁂𑀲𑀁 𑀲𑀭𑀽𑀧𑀢𑁄 𑀤𑀲𑁆𑀲𑀦𑀢𑁆𑀣𑀁 𑀢𑀲𑁆𑀲𑀺𑀫𑀸𑀦𑀻𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘𑀓𑁆𑀓𑀭𑀢𑀦𑀦𑁆𑀢𑀺𑀆𑀤𑀻𑀲𑀼 𑀅𑀬𑀁 𑀲𑀗𑁆𑀔𑁂𑀧𑀸𑀥𑀺𑀧𑁆𑀧𑀸𑀬𑁄 𑁋 𑀤𑁆𑀯𑁂𑀲𑀳𑀲𑁆𑀲𑀤𑀻𑀧𑀧𑀭𑀺𑀯𑀸𑀭𑀸𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀤𑀻𑀧𑀸𑀦𑀁 𑀲𑀺𑀭𑀺𑀯𑀺𑀪𑀯𑀁 𑀕𑀳𑁂𑀢𑁆𑀯𑀸 𑀤𑀸𑀢𑀼𑀁 𑀲𑀫𑀢𑁆𑀣𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀪𑀯𑀢𑀺. 𑀢𑀣𑀸 𑀧𑀼𑀭𑁂𑀪𑀢𑁆𑀢𑀫𑁂𑀯 𑀲𑀸𑀕𑀭𑀧𑀭𑀺𑀬𑀦𑁆𑀢𑀁 𑀧𑀣𑀯𑀺𑀁 𑀅𑀦𑀼𑀲𑀁𑀬𑀸𑀬𑀦𑀲𑀫𑀢𑁆𑀣𑀁 𑀯𑁂𑀳𑀸𑀲𑀗𑁆𑀕𑀫𑀁 𑀳𑀢𑁆𑀣𑀺𑀭𑀢𑀦𑀁, 𑀢𑀸𑀤𑀺𑀲𑀫𑁂𑀯 𑀅𑀲𑁆𑀲𑀭𑀢𑀦𑀁, 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀅𑀦𑁆𑀥𑀓𑀸𑀭𑁂 ¶ 𑀬𑁄𑀚𑀦𑀧𑁆𑀧𑀫𑀸𑀡𑀁 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀆𑀮𑁄𑀓𑀤𑀲𑁆𑀲𑀦𑀲𑀫𑀢𑁆𑀣𑀁 𑀫𑀡𑀺𑀭𑀢𑀦𑀁, 𑀙𑀩𑁆𑀩𑀺𑀥𑀤𑁄𑀲𑀯𑀺𑀯𑀚𑁆𑀚𑀺𑀢𑀁 𑀫𑀦𑀸𑀧𑀘𑀸𑀭𑀺 𑀇𑀢𑁆𑀣𑀺𑀭𑀢𑀦𑀁, 𑀬𑁄𑀚𑀦𑀧𑁆𑀧𑀫𑀸𑀡𑁂 𑀅𑀦𑁆𑀢𑁄𑀧𑀣𑀯𑀺𑀕𑀢𑀁 𑀦𑀺𑀥𑀺𑀁 𑀤𑀲𑁆𑀲𑀦𑀲𑀫𑀢𑁆𑀣𑀁 𑀕𑀳𑀧𑀢𑀺𑀭𑀢𑀦𑀁, 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀓𑀮𑀭𑀚𑁆𑀚𑀫𑀦𑀼𑀲𑀸𑀲𑀦𑀲𑀫𑀢𑁆𑀣𑀁 𑀚𑁂𑀝𑁆𑀞𑀧𑀼𑀢𑁆𑀢𑀲𑀗𑁆𑀔𑀸𑀢𑀁 𑀧𑀭𑀺𑀡𑀸𑀬𑀓𑀭𑀢𑀦𑀁 𑀧𑀸𑀢𑀼𑀪𑀯𑀢𑀺.

𑀧𑀭𑁄𑀲𑀳𑀲𑁆𑀲𑀦𑁆𑀢𑀺 𑀅𑀢𑀺𑀭𑁂𑀓𑀲𑀳𑀲𑁆𑀲𑀁. 𑀲𑀽𑀭𑀸𑀢𑀺 𑀅𑀪𑀻𑀭𑀼𑀓𑀸. 𑀯𑀻𑀭𑀗𑁆𑀕𑀭𑀽𑀧𑀸𑀢𑀺 𑀯𑀻𑀭𑀸𑀦𑀁 𑀅𑀗𑁆𑀕𑀁 𑀯𑀻𑀭𑀗𑁆𑀕𑀁, 𑀯𑀻𑀭𑀺𑀬𑀲𑁆𑀲𑁂𑀢𑀁 𑀦𑀸𑀫𑀁, 𑀯𑀻𑀭𑀗𑁆𑀕𑀁 𑀭𑀽𑀧𑀫𑁂𑀢𑁂𑀲𑀦𑁆𑀢𑀺 𑀯𑀻𑀭𑀗𑁆𑀕𑀭𑀽𑀧𑀸, 𑀯𑀻𑀭𑀺𑀬𑀚𑀸𑀢𑀺𑀓𑀸 𑀯𑀻𑀭𑀺𑀬𑀲𑀪𑀸𑀯𑀸 𑀯𑀻𑀭𑀺𑀬𑀫𑀬𑀸 𑀅𑀓𑀺𑀮𑀸𑀲𑀼𑀦𑁄 𑀅𑀳𑁂𑀲𑀼𑀁. 𑀤𑀺𑀯𑀲𑀫𑁆𑀧𑀺 𑀬𑀼𑀚𑁆𑀛𑀦𑁆𑀢𑀸 𑀦 𑀓𑀺𑀮𑀫𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀸𑀕𑀭𑀧𑀭𑀺𑀬𑀦𑁆𑀢𑀦𑁆𑀢𑀺 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀲𑀻𑀫𑀁 𑀓𑀢𑁆𑀯𑀸 𑀞𑀺𑀢𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁. 𑀅𑀤𑀡𑁆𑀟𑁂𑀦𑀸𑀢𑀺 𑀬𑁂 𑀓𑀢𑀸𑀧𑀭𑀸𑀥𑁂 𑀲𑀢𑁆𑀢𑁂 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 ¶ 𑀕𑀡𑁆𑀳𑀦𑁆𑀢𑀺, 𑀢𑁂 𑀥𑀦𑀤𑀡𑁆𑀟𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀺. 𑀬𑁂 𑀙𑁂𑀚𑁆𑀚𑀪𑁂𑀚𑁆𑀚𑀁 𑀅𑀦𑀼𑀲𑀸𑀲𑀦𑁆𑀢𑀺, 𑀢𑁂 𑀲𑀢𑁆𑀣𑀤𑀡𑁆𑀟𑁂𑀦. 𑀅𑀬𑀁 𑀧𑀦 𑀤𑀼𑀯𑀺𑀥𑀫𑁆𑀧𑀺 𑀤𑀡𑁆𑀟𑀁 𑀧𑀳𑀸𑀬 𑀅𑀤𑀡𑁆𑀟𑁂𑀦 𑀅𑀚𑁆𑀛𑀸𑀯𑀲𑀢𑀺. 𑀅𑀲𑀢𑁆𑀣𑁂𑀦𑀸𑀢𑀺 ¶ 𑀬𑁂 𑀏𑀓𑀢𑁄𑀥𑀸𑀭𑀸𑀤𑀺𑀦𑀸 𑀲𑀢𑁆𑀣𑁂𑀦 𑀧𑀭𑀁 𑀯𑀺𑀳𑁂𑀲𑀦𑁆𑀢𑀺, 𑀢𑁂 𑀲𑀢𑁆𑀣𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀺 𑀦𑀸𑀫. 𑀅𑀬𑀁 𑀧𑀦 𑀲𑀢𑁆𑀣𑁂𑀦 𑀔𑀼𑀤𑁆𑀤𑀫𑀓𑁆𑀔𑀺𑀓𑀸𑀬𑀧𑀺 𑀧𑀺𑀯𑀦𑀫𑀢𑁆𑀢𑀁 𑀮𑁄𑀳𑀺𑀢𑀁 𑀓𑀲𑁆𑀲𑀘𑀺 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀥𑀫𑁆𑀫𑁂𑀦𑁂𑀯 𑁋 ‘‘𑀏𑀳𑀺 𑀔𑁄 𑀫𑀳𑀸𑀭𑀸𑀚𑀸’’𑀢𑀺 𑀏𑀯𑀁 𑀧𑀝𑀺𑀭𑀸𑀚𑀽𑀳𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀸𑀕𑀫𑀦𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀧𑀣𑀯𑀺𑀁 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸 𑀅𑀚𑁆𑀛𑀸𑀯𑀲𑀢𑀺, 𑀅𑀪𑀺𑀪𑀯𑀺𑀢𑁆𑀯𑀸 𑀲𑀸𑀫𑀻 𑀳𑀼𑀢𑁆𑀯𑀸 𑀯𑀲𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀏𑀓𑀁 𑀦𑀺𑀧𑁆𑀨𑀢𑁆𑀢𑀺𑀁 𑀓𑀣𑁂𑀢𑁆𑀯𑀸 𑀤𑀼𑀢𑀺𑀬𑀁 𑀓𑀣𑁂𑀢𑀼𑀁 𑀲𑀘𑁂 𑀔𑁄 𑀧𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀭𑀸𑀕𑀤𑁄𑀲𑀫𑁄𑀳𑀫𑀸𑀦𑀤𑀺𑀝𑁆𑀞𑀺𑀓𑀺𑀮𑁂𑀲𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀙𑀤𑀦𑀁 𑀆𑀯𑀭𑀡𑀁 𑀯𑀺𑀯𑀝𑀁 𑀯𑀺𑀤𑁆𑀥𑀁𑀲𑀺𑀢𑀁 𑀯𑀺𑀯𑀝𑀓𑀁 𑀏𑀢𑁂𑀦𑀸𑀢𑀺 𑀯𑀺𑀯𑀝𑀘𑁆𑀙𑀤𑁄. ‘‘𑀯𑀺𑀯𑀝𑁆𑀝𑀘𑁆𑀙𑀤𑀸’’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯 𑀅𑀢𑁆𑀣𑁄.

𑁩𑁫. 𑀏𑀯𑀁 𑀤𑀼𑀢𑀺𑀬𑀁 𑀦𑀺𑀧𑁆𑀨𑀢𑁆𑀢𑀺𑀁 𑀓𑀣𑁂𑀢𑁆𑀯𑀸 𑀢𑀸𑀲𑀁 𑀦𑀺𑀫𑀺𑀢𑁆𑀢𑀪𑀽𑀢𑀸𑀦𑀺 𑀮𑀓𑁆𑀔𑀡𑀸𑀦𑀺 𑀤𑀲𑁆𑀲𑁂𑀢𑀼𑀁 𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄𑀢𑀺 𑀬𑀣𑀸 𑀅𑀜𑁆𑀜𑁂𑀲𑀁 𑀪𑀽𑀫𑀺𑀬𑀁 𑀧𑀸𑀤𑀁 𑀞𑀧𑁂𑀦𑁆𑀢𑀸𑀦𑀁 𑀅𑀕𑁆𑀕𑀧𑀸𑀤𑀢𑀮𑀁 𑀯𑀸 𑀧𑀡𑁆𑀳𑀺 𑀯𑀸 𑀧𑀲𑁆𑀲𑀁 𑀯𑀸 𑀧𑀞𑀫𑀁 𑀨𑀼𑀲𑀢𑀺, 𑀯𑁂𑀫𑀚𑁆𑀛𑁂 𑀯𑀸 𑀧𑀦 𑀙𑀺𑀤𑁆𑀤𑀁 𑀳𑁄𑀢𑀺, 𑀉𑀓𑁆𑀔𑀺𑀧𑀦𑁆𑀢𑀸𑀦𑀁 𑀅𑀕𑁆𑀕𑀢𑀮𑀸𑀤𑀻𑀲𑀼 𑀏𑀓𑀓𑁄𑀝𑁆𑀞𑀸𑀲𑁄𑀯 𑀧𑀞𑀫𑀁 𑀉𑀝𑁆𑀞𑀳𑀢𑀺, 𑀦 𑀏𑀯𑀫𑀲𑁆𑀲. 𑀅𑀲𑁆𑀲 𑀧𑀦 𑀲𑀼𑀯𑀡𑁆𑀡𑀧𑀸𑀤𑀼𑀓𑀢𑀮𑀫𑀺𑀯 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀲𑀓𑀮𑀁 𑀧𑀸𑀤𑀢𑀮𑀁 𑀪𑀽𑀫𑀺𑀁 𑀨𑀼𑀲𑀢𑀺, 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀪𑀽𑀫𑀺𑀢𑁄 𑀉𑀝𑁆𑀞𑀳𑀢𑀺. 𑀢𑀲𑁆𑀫𑀸 𑀅𑀬𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄.

𑀘𑀓𑁆𑀓𑀸𑀦𑀻𑀢𑀺 ¶ 𑀤𑁆𑀯𑀻𑀲𑀼 𑀧𑀸𑀤𑀢𑀮𑁂𑀲𑀼 𑀤𑁆𑀯𑁂 𑀘𑀓𑁆𑀓𑀸𑀦𑀺, 𑀢𑁂𑀲𑀁 𑀅𑀭𑀸 𑀘 𑀦𑁂𑀫𑀺 𑀘 𑀦𑀸𑀪𑀺 𑀘 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸𑀯. 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀸𑀦𑀻𑀢𑀺 𑀇𑀫𑀺𑀦𑀸 𑀧𑀦 𑀅𑀬𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄, 𑀢𑁂𑀲𑀁 𑀓𑀺𑀭 𑀘𑀓𑁆𑀓𑀸𑀦𑀁 𑀧𑀸𑀤𑀢𑀮𑀲𑁆𑀲 𑀫𑀚𑁆𑀛𑁂 𑀦𑀸𑀪𑀺 𑀤𑀺𑀲𑁆𑀲𑀢𑀺, 𑀦𑀸𑀪𑀺𑀧𑀭𑀺𑀘𑁆𑀙𑀺𑀦𑁆𑀦𑀸 𑀯𑀝𑁆𑀝𑀮𑁂𑀔𑀸 𑀤𑀺𑀲𑁆𑀲𑀢𑀺, 𑀦𑀸𑀪𑀺𑀫𑀼𑀔𑀧𑀭𑀺𑀓𑁆𑀔𑁂𑀧𑀧𑀝𑁆𑀝𑁄 𑀤𑀺𑀲𑁆𑀲𑀢𑀺, 𑀧𑀦𑀸𑀴𑀺𑀫𑀼𑀔𑀁 𑀤𑀺𑀲𑁆𑀲𑀢𑀺, 𑀅𑀭𑀸 𑀤𑀺𑀲𑁆𑀲𑀦𑁆𑀢𑀺, 𑀅𑀭𑁂𑀲𑀼 𑀯𑀝𑁆𑀝𑀺𑀮𑁂𑀔𑀸 𑀤𑀺𑀲𑁆𑀲𑀦𑁆𑀢𑀺, 𑀦𑁂𑀫𑀺𑀫𑀡𑀺𑀓𑀸 𑀤𑀺𑀲𑁆𑀲𑀦𑁆𑀢𑀺. 𑀇𑀤𑀁 𑀢𑀸𑀯 𑀧𑀸𑀴𑀺𑀬𑀁 𑀆𑀕𑀢𑀫𑁂𑀯. 𑀲𑀫𑁆𑀩𑀳𑀼𑀮𑀯𑀸𑀭𑁄 𑀧𑀦 𑀅𑀦𑀸𑀕𑀢𑁄, 𑀲𑁄 𑀏𑀯𑀁 𑀤𑀝𑁆𑀞𑀩𑁆𑀩𑁄 𑁋 𑀲𑀢𑁆𑀢𑀺, 𑀲𑀺𑀭𑀺𑀯𑀘𑁆𑀙𑁄, 𑀦𑀦𑁆𑀤𑀺, 𑀲𑁄𑀯𑀢𑁆𑀢𑀺𑀓𑁄, 𑀯𑀝𑀁𑀲𑀓𑁄, 𑀯𑀟𑁆𑀠𑀫𑀸𑀦𑀓𑀁, 𑀫𑀘𑁆𑀙𑀬𑀼𑀕𑀴𑀁, 𑀪𑀤𑁆𑀤𑀧𑀻𑀞𑀁, 𑀅𑀗𑁆𑀓𑀼𑀲𑀓𑁄, 𑀧𑀸𑀲𑀸𑀤𑁄, 𑀢𑁄𑀭𑀡𑀁, 𑀲𑁂𑀢𑀘𑁆𑀙𑀢𑁆𑀢𑀁, 𑀔𑀕𑁆𑀕𑁄, 𑀢𑀸𑀮𑀯𑀡𑁆𑀝𑀁, 𑀫𑁄𑀭𑀳𑀢𑁆𑀣𑀓𑁄, 𑀯𑀸𑀴𑀩𑀻𑀚𑀦𑀻, 𑀉𑀡𑁆𑀳𑀻𑀲𑀁, 𑀫𑀡𑀺, 𑀧𑀢𑁆𑀢𑁄, 𑀲𑀼𑀫𑀦𑀤𑀸𑀫𑀁, 𑀦𑀻𑀮𑀼𑀧𑁆𑀧𑀮𑀁, 𑀭𑀢𑁆𑀢𑀼𑀧𑁆𑀧𑀮𑀁, 𑀲𑁂𑀢𑀼𑀧𑁆𑀧𑀮𑀁, 𑀧𑀤𑀼𑀫𑀁, 𑀧𑀼𑀡𑁆𑀟𑀭𑀻𑀓𑀁, 𑀧𑀼𑀡𑁆𑀡𑀖𑀝𑁄 ¶ , 𑀧𑀼𑀡𑁆𑀡𑀧𑀸𑀢𑀺, 𑀲𑀫𑀼𑀤𑁆𑀤𑁄, 𑀘𑀓𑁆𑀓𑀯𑀸𑀴𑁄, 𑀳𑀺𑀫𑀯𑀸, 𑀲𑀺𑀦𑁂𑀭𑀼, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸, 𑀦𑀓𑁆𑀔𑀢𑁆𑀢𑀸𑀦𑀺, 𑀘𑀢𑁆𑀢𑀸𑀭𑁄 𑀫𑀳𑀸𑀤𑀻𑀧𑀸, 𑀤𑁆𑀯𑀺𑀧𑀭𑀺𑀢𑁆𑀢𑀤𑀻𑀧𑀲𑀳𑀲𑁆𑀲𑀸𑀦𑀺, 𑀅𑀦𑁆𑀢𑀫𑀲𑁄 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀧𑀭𑀺𑀲𑀁 𑀉𑀧𑀸𑀤𑀸𑀬 𑀲𑀩𑁆𑀩𑁄 𑀘𑀓𑁆𑀓𑀮𑀓𑁆𑀔𑀡𑀲𑁆𑀲𑁂𑀯 𑀧𑀭𑀺𑀯𑀸𑀭𑁄.

𑀆𑀬𑀢𑀧𑀡𑁆𑀳𑀻𑀢𑀺 ¶ 𑀤𑀻𑀖𑀧𑀡𑁆𑀳𑀺, 𑀧𑀭𑀺𑀧𑀼𑀡𑁆𑀡𑀧𑀡𑁆𑀳𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀳𑀺 𑀅𑀜𑁆𑀜𑁂𑀲𑀁 𑀅𑀕𑁆𑀕𑀧𑀸𑀤𑁄 𑀤𑀻𑀖𑁄 𑀳𑁄𑀢𑀺, 𑀧𑀡𑁆𑀳𑀺𑀫𑀢𑁆𑀣𑀓𑁂 𑀚𑀗𑁆𑀖𑀸 𑀧𑀢𑀺𑀝𑁆𑀞𑀸𑀢𑀺, 𑀧𑀡𑁆𑀳𑀺𑀁 𑀢𑀘𑁆𑀙𑁂𑀢𑁆𑀯𑀸 𑀞𑀧𑀺𑀢𑀸 𑀯𑀺𑀬 𑀳𑁄𑀢𑀺, 𑀦 𑀏𑀯𑀁 𑀫𑀳𑀸𑀧𑀼𑀭𑀺𑀲𑀲𑁆𑀲. 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀦 𑀘𑀢𑀽𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀅𑀕𑁆𑀕𑀧𑀸𑀤𑁄 𑀳𑁄𑀢𑀺, 𑀢𑀢𑀺𑀬𑁂 𑀓𑁄𑀝𑁆𑀞𑀸𑀲𑁂 𑀚𑀗𑁆𑀖𑀸 𑀧𑀢𑀺𑀝𑁆𑀞𑀸𑀢𑀺, 𑀘𑀢𑀼𑀢𑁆𑀣𑀓𑁄𑀝𑁆𑀞𑀸𑀲𑁂 𑀆𑀭𑀕𑁆𑀕𑁂𑀦 𑀯𑀝𑁆𑀝𑁂𑀢𑁆𑀯𑀸 𑀞𑀧𑀺𑀢𑀸 𑀯𑀺𑀬 𑀭𑀢𑁆𑀢𑀓𑀫𑁆𑀩𑀮𑀕𑁂𑀡𑁆𑀟𑀼𑀓𑀲𑀤𑀺𑀲𑀸 𑀧𑀡𑁆𑀳𑀺 𑀳𑁄𑀢𑀺.

𑀤𑀻𑀖𑀗𑁆𑀕𑀼𑀮𑀻𑀢𑀺 𑀬𑀣𑀸 𑀅𑀜𑁆𑀜𑁂𑀲𑀁 𑀓𑀸𑀘𑀺 𑀅𑀗𑁆𑀕𑀼𑀮𑀺𑀬𑁄 𑀤𑀻𑀖𑀸 𑀳𑁄𑀦𑁆𑀢𑀺, 𑀓𑀸𑀘𑀺 𑀭𑀲𑁆𑀲𑀸, 𑀦 𑀏𑀯𑀁 𑀫𑀳𑀸𑀧𑀼𑀭𑀺𑀲𑀲𑁆𑀲. 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀦 𑀫𑀓𑁆𑀓𑀝𑀲𑁆𑀲𑁂𑀯 𑀤𑀻𑀖𑀸 𑀳𑀢𑁆𑀣𑀧𑀸𑀤𑀗𑁆𑀕𑀼𑀮𑀺𑀬𑁄 𑀫𑀽𑀮𑁂 𑀣𑀽𑀮𑀸, 𑀅𑀦𑀼𑀧𑀼𑀩𑁆𑀩𑁂𑀦 𑀕𑀦𑁆𑀢𑁆𑀯𑀸 𑀅𑀕𑁆𑀕𑁂 𑀢𑀦𑀼𑀓𑀸, 𑀦𑀺𑀬𑁆𑀬𑀸𑀲𑀢𑁂𑀮𑁂𑀦 𑀫𑀤𑁆𑀤𑀺𑀢𑁆𑀯𑀸 𑀯𑀝𑁆𑀝𑀺𑀢𑀳𑀭𑀺𑀢𑀸𑀮𑀯𑀝𑁆𑀝𑀺𑀲𑀤𑀺𑀲𑀸 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀤𑀻𑀖𑀗𑁆𑀕𑀼𑀮𑀻’’𑀢𑀺.

𑀫𑀼𑀤𑀼𑀢𑀮𑀼𑀦𑀳𑀢𑁆𑀣𑀧𑀸𑀤𑁄𑀢𑀺 𑀲𑀧𑁆𑀧𑀺𑀫𑀡𑁆𑀟𑁂 𑀑𑀲𑀸𑀭𑁂𑀢𑁆𑀯𑀸 𑀞𑀧𑀺𑀢𑀁 𑀲𑀢𑀯𑀸𑀭𑀯𑀺𑀳𑀢𑀓𑀧𑁆𑀧𑀸𑀲𑀧𑀝𑀮𑀁 𑀯𑀺𑀬 𑀫𑀼𑀤𑀼. 𑀬𑀣𑀸 𑀘 𑀇𑀤𑀸𑀦𑀺 𑀚𑀸𑀢𑀫𑀢𑁆𑀢𑀲𑁆𑀲, 𑀏𑀯𑀁 𑀯𑀼𑀟𑁆𑀠𑀓𑀸𑀮𑁂𑀧𑀺 𑀫𑀼𑀤𑀼𑀢𑀮𑀼𑀦𑀸𑀬𑁂𑀯 𑀪𑀯𑀺𑀲𑁆𑀲𑀦𑁆𑀢𑀺, 𑀫𑀼𑀤𑀼𑀢𑀮𑀼𑀦𑀸 𑀳𑀢𑁆𑀣𑀧𑀸𑀤𑀸 𑀏𑀢𑀲𑁆𑀲𑀸𑀢𑀺 𑀫𑀼𑀤𑀼𑀢𑀮𑀼𑀦𑀳𑀢𑁆𑀣𑀧𑀸𑀤𑁄.

𑀚𑀸𑀮𑀳𑀢𑁆𑀣𑀧𑀸𑀤𑁄𑀢𑀺 𑀦 𑀘𑀫𑁆𑀫𑁂𑀦 𑀧𑀝𑀺𑀩𑀤𑁆𑀥𑀅𑀗𑁆𑀕𑀼𑀮𑀦𑁆𑀢𑀭𑁄. 𑀏𑀤𑀺𑀲𑁄 𑀳𑀺 𑀨𑀡𑀳𑀢𑁆𑀣𑀓𑁄 𑀧𑀼𑀭𑀺𑀲𑀤𑁄𑀲𑁂𑀦 𑀉𑀧𑀳𑀢𑁄 𑀧𑀩𑁆𑀩𑀚𑁆𑀚𑀁 𑀦 𑀧𑀝𑀺𑀮𑀪𑀢𑀺. 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀦 ¶ 𑀘𑀢𑀲𑁆𑀲𑁄 𑀳𑀢𑁆𑀣𑀗𑁆𑀕𑀼𑀮𑀺𑀬𑁄 𑀧𑀜𑁆𑀘𑀧𑀺 𑀧𑀸𑀤𑀗𑁆𑀕𑀼𑀮𑀺𑀬𑁄 𑀏𑀓𑀧𑁆𑀧𑀫𑀸𑀡𑀸 𑀳𑁄𑀦𑁆𑀢𑀺, 𑀢𑀸𑀲𑀁 𑀏𑀓𑀧𑁆𑀧𑀫𑀸𑀡𑀢𑀸𑀬 𑀬𑀯𑀮𑀓𑁆𑀔𑀡𑀁 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀅𑀣𑀲𑁆𑀲 𑀳𑀢𑁆𑀣𑀧𑀸𑀤𑀸 𑀓𑀼𑀲𑀮𑁂𑀦 𑀯𑀟𑁆𑀠𑀓𑀺𑀦𑀸 𑀬𑁄𑀚𑀺𑀢𑀚𑀸𑀮𑀯𑀸𑀢𑀧𑀸𑀦𑀲𑀤𑀺𑀲𑀸 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀚𑀸𑀮𑀳𑀢𑁆𑀣𑀧𑀸𑀤𑁄’’𑀢𑀺.

𑀉𑀤𑁆𑀥𑀁 𑀧𑀢𑀺𑀝𑁆𑀞𑀺𑀢𑀕𑁄𑀧𑁆𑀨𑀓𑀢𑁆𑀢𑀸 𑀉𑀲𑁆𑀲𑀗𑁆𑀔𑀸 𑀧𑀸𑀤𑀸 𑀅𑀲𑁆𑀲𑀸𑀢𑀺 𑀉𑀲𑁆𑀲𑀗𑁆𑀔𑀧𑀸𑀤𑁄. 𑀅𑀜𑁆𑀜𑁂𑀲𑀜𑁆𑀳𑀺 𑀧𑀺𑀝𑁆𑀞𑀺𑀧𑀸𑀤𑁂 𑀕𑁄𑀧𑁆𑀨𑀓𑀸 𑀳𑁄𑀦𑁆𑀢𑀺, 𑀢𑁂𑀦 𑀢𑁂𑀲𑀁 𑀧𑀸𑀤𑀸 𑀆𑀡𑀺𑀩𑀤𑁆𑀥𑀸 𑀯𑀺𑀬 𑀩𑀤𑁆𑀥𑀸 𑀳𑁄𑀦𑁆𑀢𑀺, 𑀦 𑀬𑀣𑀸𑀲𑀼𑀔𑀁 𑀧𑀭𑀺𑀯𑀝𑁆𑀝𑀦𑁆𑀢𑀺, 𑀕𑀘𑁆𑀙𑀦𑁆𑀢𑀸𑀦𑀁 𑀧𑀸𑀤𑀢𑀮𑀸𑀦𑀺𑀧𑀺 𑀦 𑀤𑀺𑀲𑁆𑀲𑀦𑁆𑀢𑀺. 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀦 𑀆𑀭𑀼𑀳𑀺𑀢𑁆𑀯𑀸 𑀉𑀧𑀭𑀺 𑀕𑁄𑀧𑁆𑀨𑀓𑀸 𑀧𑀢𑀺𑀝𑁆𑀞𑀳𑀦𑁆𑀢𑀺, 𑀢𑁂𑀦𑀲𑁆𑀲 𑀦𑀸𑀪𑀺𑀢𑁄 𑀧𑀝𑁆𑀞𑀸𑀬 𑀉𑀧𑀭𑀺𑀫𑀓𑀸𑀬𑁄 𑀦𑀸𑀯𑀸𑀬 𑀞𑀧𑀺𑀢𑀲𑀼𑀯𑀡𑁆𑀡𑀧𑀝𑀺𑀫𑀸 𑀯𑀺𑀬 𑀦𑀺𑀘𑁆𑀘𑀮𑁄 𑀳𑁄𑀢𑀺, 𑀅𑀥𑁄𑀓𑀸𑀬𑁄𑀯 𑀇𑀜𑁆𑀚𑀢𑀺, 𑀲𑀼𑀔𑁂𑀦 𑀧𑀸𑀤𑀸 ¶ 𑀧𑀭𑀺𑀯𑀝𑁆𑀝𑀦𑁆𑀢𑀺, 𑀧𑀼𑀭𑀢𑁄𑀧𑀺 𑀧𑀘𑁆𑀙𑀢𑁄𑀧𑀺 𑀉𑀪𑀬𑀧𑀲𑁆𑀲𑁂𑀲𑀼𑀧𑀺 𑀞𑀢𑁆𑀯𑀸 𑀧𑀲𑁆𑀲𑀦𑁆𑀢𑀸𑀦𑀁 𑀧𑀸𑀤𑀢𑀮𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺, 𑀦 𑀳𑀢𑁆𑀣𑀻𑀦𑀁 𑀯𑀺𑀬 𑀧𑀘𑁆𑀙𑀢𑁄𑀬𑁂𑀯.

𑀏𑀡𑀺𑀚𑀗𑁆𑀖𑁄𑀢𑀺 𑀏𑀡𑀺𑀫𑀺𑀕𑀲𑀤𑀺𑀲𑀚𑀗𑁆𑀖𑁄 𑀫𑀁𑀲𑀼𑀲𑁆𑀲𑀤𑁂𑀦 𑀧𑀭𑀺𑀧𑀼𑀡𑁆𑀡𑀚𑀗𑁆𑀖𑁄, 𑀦 𑀏𑀓𑀢𑁄 𑀩𑀤𑁆𑀥𑀧𑀺𑀡𑁆𑀟𑀺𑀓𑀫𑀁𑀲𑁄 ¶ , 𑀲𑀫𑀦𑁆𑀢𑀢𑁄 𑀲𑀫𑀲𑀡𑁆𑀞𑀺𑀢𑁂𑀦 𑀫𑀁𑀲𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀸𑀳𑀺 𑀲𑀼𑀯𑀝𑁆𑀝𑀺𑀢𑀸𑀳𑀺 𑀲𑀸𑀮𑀺𑀕𑀩𑁆𑀪𑀬𑀯𑀕𑀩𑁆𑀪𑀲𑀤𑀺𑀲𑀸𑀳𑀺 𑀚𑀗𑁆𑀖𑀸𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄.

𑀅𑀦𑁄𑀦𑀫𑀦𑁆𑀢𑁄𑀢𑀺 𑀅𑀦𑀫𑀦𑁆𑀢𑁄, 𑀏𑀢𑁂𑀦𑀲𑁆𑀲 𑀅𑀔𑀼𑀚𑁆𑀚𑀅𑀯𑀸𑀫𑀦𑀪𑀸𑀯𑁄 𑀤𑀻𑀧𑀺𑀢𑁄. 𑀅𑀯𑀲𑁂𑀲𑀚𑀦𑀸 𑀳𑀺 𑀔𑀼𑀚𑁆𑀚𑀸 𑀯𑀸 𑀳𑁄𑀦𑁆𑀢𑀺 𑀯𑀸𑀫𑀦𑀸 𑀯𑀸. 𑀔𑀼𑀚𑁆𑀚𑀸𑀦𑀁 𑀉𑀧𑀭𑀺𑀫𑀓𑀸𑀬𑁄 𑀅𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀺, 𑀯𑀸𑀫𑀦𑀸𑀦𑀁 𑀳𑁂𑀝𑁆𑀞𑀺𑀫𑀓𑀸𑀬𑁄. 𑀢𑁂 𑀅𑀧𑀭𑀺𑀧𑀼𑀡𑁆𑀡𑀓𑀸𑀬𑀢𑁆𑀢𑀸 𑀦 𑀲𑀓𑁆𑀓𑁄𑀦𑁆𑀢𑀺 𑀅𑀦𑁄𑀦𑀫𑀦𑁆𑀢𑀸 𑀚𑀡𑁆𑀡𑀼𑀓𑀸𑀦𑀺 𑀧𑀭𑀺𑀫𑀚𑁆𑀚𑀺𑀢𑀼𑀁. 𑀫𑀳𑀸𑀧𑀼𑀭𑀺𑀲𑁄 𑀧𑀦 𑀧𑀭𑀺𑀧𑀼𑀡𑁆𑀡𑀉𑀪𑀬𑀓𑀸𑀬𑀢𑁆𑀢𑀸 𑀲𑀓𑁆𑀓𑁄𑀢𑀺.

𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑁄𑀢𑀺 𑀉𑀲𑀪𑀯𑀸𑀭𑀡𑀸𑀤𑀻𑀦𑀁 𑀯𑀺𑀬 𑀲𑀼𑀯𑀡𑁆𑀡𑀧𑀤𑀼𑀫𑀓𑀡𑁆𑀡𑀺𑀓𑀲𑀤𑀺𑀲𑁂𑀳𑀺 𑀓𑁄𑀲𑁂𑀳𑀺 𑀑𑀳𑀺𑀢𑀁 𑀧𑀝𑀺𑀘𑁆𑀙𑀦𑁆𑀦𑀁 𑀯𑀢𑁆𑀣𑀕𑀼𑀬𑁆𑀳𑀁 𑀅𑀲𑁆𑀲𑀸𑀢𑀺 𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑁄. 𑀯𑀢𑁆𑀣𑀕𑀼𑀬𑁆𑀳𑀦𑁆𑀢𑀺 𑀯𑀢𑁆𑀣𑁂𑀦 𑀕𑀼𑀳𑀺𑀢𑀩𑁆𑀩𑀁 𑀅𑀗𑁆𑀕𑀚𑀸𑀢𑀁 𑀯𑀼𑀘𑁆𑀘𑀢𑀺.

𑀲𑀼𑀯𑀡𑁆𑀡𑀯𑀡𑁆𑀡𑁄𑀢𑀺 𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑁂𑀦 𑀫𑀚𑁆𑀚𑀺𑀢𑁆𑀯𑀸 𑀤𑀻𑀧𑀺𑀤𑀸𑀞𑀸𑀬 𑀖𑀁𑀲𑀺𑀢𑁆𑀯𑀸 𑀕𑁂𑀭𑀼𑀓𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀞𑀧𑀺𑀢𑀖𑀦𑀲𑀼𑀯𑀡𑁆𑀡𑀭𑀽𑀧𑀲𑀤𑀺𑀲𑁄𑀢𑀺 𑀅𑀢𑁆𑀣𑁄. 𑀏𑀢𑁂𑀦𑀲𑁆𑀲 𑀖𑀦𑀲𑀺𑀦𑀺𑀤𑁆𑀥𑀲𑀡𑁆𑀳𑀲𑀭𑀻𑀭𑀢𑀁 𑀤𑀲𑁆𑀲𑁂𑀢𑁆𑀯𑀸 𑀙𑀯𑀺𑀯𑀡𑁆𑀡𑀤𑀲𑁆𑀲𑀦𑀢𑁆𑀣𑀁 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄𑀢𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀲𑁆𑀲 𑀯𑀸 𑀯𑁂𑀯𑀘𑀦𑀫𑁂𑀢𑀁.

𑀭𑀚𑁄𑀚𑀮𑁆𑀮𑀦𑁆𑀢𑀺 ¶ 𑀭𑀚𑁄 𑀯𑀸 𑀫𑀮𑀁 𑀯𑀸. 𑀦 𑀉𑀧𑀮𑀺𑀫𑁆𑀧𑀢𑀻𑀢𑀺 𑀦 𑀮𑀕𑁆𑀕𑀢𑀺 𑀧𑀤𑀼𑀫𑀧𑀮𑀸𑀲𑀢𑁄 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀯𑀺𑀯𑀝𑁆𑀝𑀢𑀺. 𑀳𑀢𑁆𑀣𑀥𑁄𑀯𑀦𑀸𑀤𑀻𑀦𑀺 𑀧𑀦 𑀉𑀢𑀼𑀕𑁆𑀕𑀳𑀡𑀢𑁆𑀣𑀸𑀬 𑀘𑁂𑀯 𑀤𑀸𑀬𑀓𑀸𑀦𑀁 𑀧𑀼𑀜𑁆𑀜𑀨𑀮𑀢𑁆𑀣𑀸𑀬 𑀘 𑀩𑀼𑀤𑁆𑀥𑀸 𑀓𑀭𑁄𑀦𑁆𑀢𑀺, 𑀯𑀢𑁆𑀢𑀲𑀻𑀲𑁂𑀦𑀸𑀧𑀺 𑀘 𑀓𑀭𑁄𑀦𑁆𑀢𑀺𑀬𑁂𑀯. 𑀲𑁂𑀦𑀸𑀲𑀦𑀁 𑀧𑀯𑀺𑀲𑀦𑁆𑀢𑁂𑀦 𑀳𑀺 𑀪𑀺𑀓𑁆𑀔𑀼𑀦𑀸 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀧𑀯𑀺𑀲𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀫𑁂𑀢𑀁.

𑀉𑀤𑁆𑀥𑀕𑁆𑀕𑀮𑁄𑀫𑁄𑀢𑀺 𑀆𑀯𑀝𑁆𑀝𑀧𑀭𑀺𑀬𑁄𑀲𑀸𑀦𑁂 𑀉𑀤𑁆𑀥𑀕𑁆𑀕𑀸𑀦𑀺 𑀳𑀼𑀢𑁆𑀯𑀸 𑀫𑀼𑀔𑀲𑁄𑀪𑀁 𑀉𑀮𑁆𑀮𑁄𑀓𑀬𑀫𑀸𑀦𑀸𑀦𑀺 𑀯𑀺𑀬 𑀞𑀺𑀢𑀸𑀦𑀺 𑀮𑁄𑀫𑀸𑀦𑀺 𑀅𑀲𑁆𑀲𑀸𑀢𑀺 𑀉𑀤𑁆𑀥𑀕𑁆𑀕𑀮𑁄𑀫𑁄.

𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑁄𑀢𑀺 𑀩𑁆𑀭𑀳𑁆𑀫𑀸 𑀯𑀺𑀬 𑀉𑀚𑀼𑀕𑀢𑁆𑀢𑁄, 𑀉𑀚𑀼𑀫𑁂𑀯 𑀉𑀕𑁆𑀕𑀢𑀤𑀻𑀖𑀲𑀭𑀻𑀭𑁄 𑀪𑀯𑀺𑀲𑁆𑀲𑀢𑀺. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀲𑀢𑁆𑀢𑀸 𑀔𑀦𑁆𑀥𑁂 𑀓𑀝𑀺𑀬𑀁 ¶ 𑀚𑀸𑀡𑀽𑀲𑀽𑀢𑀺 𑀢𑀻𑀲𑀼 𑀞𑀸𑀦𑁂𑀲𑀼 𑀦𑀫𑀦𑁆𑀢𑀺, 𑀢𑁂 𑀓𑀝𑀺𑀬𑀁 𑀦𑀫𑀦𑁆𑀢𑀸 𑀧𑀘𑁆𑀙𑀢𑁄 𑀦𑀫𑀦𑁆𑀢𑀺, 𑀇𑀢𑀭𑁂𑀲𑀼 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀧𑀼𑀭𑀢𑁄. 𑀤𑀻𑀖𑀲𑀭𑀻𑀭𑀸 𑀧𑀦 𑀏𑀓𑁂 𑀧𑀲𑁆𑀲𑀯𑀗𑁆𑀓𑀸 𑀳𑁄𑀦𑁆𑀢𑀺, 𑀏𑀓𑁂 𑀫𑀼𑀔𑀁 𑀉𑀦𑁆𑀦𑀫𑁂𑀢𑁆𑀯𑀸 𑀦𑀓𑁆𑀔𑀢𑁆𑀢𑀸𑀦𑀺 𑀕𑀡𑀬𑀦𑁆𑀢𑀸 𑀯𑀺𑀬 𑀘𑀭𑀦𑁆𑀢𑀺, 𑀏𑀓𑁂 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑀸 𑀲𑀽𑀮𑀲𑀤𑀺𑀲𑀸 𑀳𑁄𑀦𑁆𑀢𑀺, 𑀏𑀓𑁂 𑀧𑀼𑀭𑀢𑁄 𑀧𑀩𑁆𑀪𑀸𑀭𑀸 𑀳𑁄𑀦𑁆𑀢𑀺, 𑀧𑀯𑁂𑀥𑀫𑀸𑀦𑀸 𑀕𑀘𑁆𑀙𑀦𑁆𑀢𑀺. 𑀅𑀬𑀁 𑀧𑀦 𑀉𑀚𑀼𑀫𑁂𑀯 𑀉𑀕𑁆𑀕𑀦𑁆𑀢𑁆𑀯𑀸 𑀤𑀻𑀖𑀧𑁆𑀧𑀫𑀸𑀡𑁄 𑀤𑁂𑀯𑀦𑀕𑀭𑁂 𑀉𑀲𑁆𑀲𑀺𑀢𑀲𑀼𑀯𑀡𑁆𑀡𑀢𑁄𑀭𑀡𑀁 𑀯𑀺𑀬 𑀪𑀯𑀺𑀲𑁆𑀲𑀢𑀻𑀢𑀺 𑀤𑀻𑀧𑁂𑀦𑁆𑀢𑀺. 𑀬𑀣𑀸 𑀘𑁂𑀢𑀁, 𑀏𑀯𑀁 𑀬𑀁 𑀬𑀁 𑀚𑀸𑀢𑀫𑀢𑁆𑀢𑀲𑁆𑀲 ¶ 𑀲𑀩𑁆𑀩𑀲𑁄 𑀅𑀧𑀭𑀺𑀧𑀼𑀡𑁆𑀡𑀁 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀳𑁄𑀢𑀺, 𑀢𑀁 𑀢𑀁 𑀆𑀬𑀢𑀺𑀁 𑀢𑀣𑀸𑀪𑀸𑀯𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀢𑁆𑀢𑀼𑀲𑁆𑀲𑀤𑁄𑀢𑀺 𑀤𑁆𑀯𑁂 𑀳𑀢𑁆𑀣𑀧𑀺𑀝𑁆𑀞𑀺𑀬𑁄 𑀤𑁆𑀯𑁂 𑀧𑀸𑀤𑀧𑀺𑀝𑁆𑀞𑀺𑀬𑁄 𑀤𑁆𑀯𑁂 𑀅𑀁𑀲𑀓𑀽𑀝𑀸𑀦𑀺 𑀔𑀦𑁆𑀥𑁄𑀢𑀺 𑀇𑀫𑁂𑀲𑀼 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀧𑀭𑀺𑀧𑀼𑀡𑁆𑀡𑁄 𑀫𑀁𑀲𑀼𑀲𑁆𑀲𑀤𑁄 𑀅𑀲𑁆𑀲𑀸𑀢𑀺 𑀲𑀢𑁆𑀢𑀼𑀲𑁆𑀲𑀤𑁄. 𑀅𑀜𑁆𑀜𑁂𑀲𑀁 𑀧𑀦 𑀳𑀢𑁆𑀣𑀧𑀸𑀤𑀧𑀺𑀝𑁆𑀞𑀸𑀤𑀻𑀲𑀼 𑀲𑀺𑀭𑀸𑀚𑀸𑀮𑀁 𑀧𑀜𑁆𑀜𑀸𑀬𑀢𑀺, 𑀅𑀁𑀲𑀓𑀽𑀝𑀓𑁆𑀔𑀦𑁆𑀥𑁂𑀲𑀼 𑀅𑀝𑁆𑀞𑀺𑀓𑁄𑀝𑀺𑀬𑁄. 𑀢𑁂 𑀫𑀦𑀼𑀲𑁆𑀲𑀸 𑀧𑁂𑀢𑀸 𑀯𑀺𑀬 𑀔𑀸𑀬𑀦𑁆𑀢𑀺, 𑀦 𑀢𑀣𑀸 𑀫𑀳𑀸𑀧𑀼𑀭𑀺𑀲𑁄, 𑀫𑀳𑀸𑀧𑀼𑀭𑀺𑀲𑁄 𑀧𑀦 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀧𑀭𑀺𑀧𑀼𑀡𑁆𑀡𑀫𑀁𑀲𑀼𑀲𑁆𑀲𑀤𑀢𑁆𑀢𑀸 𑀦𑀺𑀕𑀽𑀴𑁆𑀳𑀲𑀺𑀭𑀸𑀚𑀸𑀮𑁂𑀳𑀺 𑀳𑀢𑁆𑀣𑀧𑀺𑀝𑁆𑀞𑀸𑀤𑀻𑀳𑀺 𑀯𑀝𑁆𑀝𑁂𑀢𑁆𑀯𑀸 𑀲𑀼𑀝𑁆𑀞𑀧𑀺𑀢𑀲𑀼𑀯𑀡𑁆𑀡𑀸𑀴𑀺𑀗𑁆𑀕𑀲𑀤𑀺𑀲𑁂𑀦 𑀔𑀦𑁆𑀥𑁂𑀦 𑀲𑀺𑀮𑀸𑀭𑀽𑀧𑀓𑀁 𑀯𑀺𑀬 𑀔𑀸𑀬𑀢𑀺, 𑀘𑀺𑀢𑁆𑀢𑀓𑀫𑁆𑀫𑀭𑀽𑀧𑀓𑀁 𑀯𑀺𑀬 𑀘 𑀔𑀸𑀬𑀢𑀺.

𑀲𑀻𑀳𑀲𑁆𑀲 𑀧𑀼𑀩𑁆𑀩𑀤𑁆𑀥𑀁 𑀯𑀺𑀬 𑀓𑀸𑀬𑁄 𑀅𑀲𑁆𑀲𑀸𑀢𑀺 𑀲𑀻𑀳𑀧𑀼𑀩𑁆𑀩𑀤𑁆𑀥𑀓𑀸𑀬𑁄. 𑀲𑀻𑀳𑀲𑁆𑀲 𑀳𑀺 𑀧𑀼𑀭𑀢𑁆𑀣𑀺𑀫𑀓𑀸𑀬𑁄𑀯 𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀺, 𑀧𑀘𑁆𑀙𑀺𑀫𑀓𑀸𑀬𑁄 𑀅𑀧𑀭𑀺𑀧𑀼𑀡𑁆𑀡𑁄. 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀦 𑀲𑀻𑀳𑀲𑁆𑀲 𑀧𑀼𑀩𑁆𑀩𑀤𑁆𑀥𑀓𑀸𑀬𑁄 𑀯𑀺𑀬 𑀲𑀩𑁆𑀩𑁄 𑀓𑀸𑀬𑁄 𑀧𑀭𑀺𑀧𑀼𑀡𑁆𑀡𑁄. 𑀲𑁄𑀧𑀺 𑀲𑀻𑀳𑀲𑁆𑀲𑁂𑀯 𑀢𑀢𑁆𑀣 𑀢𑀢𑁆𑀣 𑀯𑀺𑀦𑀢𑀼𑀦𑁆𑀦𑀢𑀸𑀤𑀺𑀯𑀲𑁂𑀦 𑀤𑀼𑀲𑁆𑀲𑀡𑁆𑀞𑀺𑀢𑀯𑀺𑀲𑀡𑁆𑀞𑀺𑀢𑁄 ¶ 𑀦 𑀳𑁄𑀢𑀺, 𑀤𑀻𑀖𑀬𑀼𑀢𑁆𑀢𑀝𑁆𑀞𑀸𑀦𑁂 𑀧𑀦 𑀤𑀻𑀖𑁄, 𑀭𑀲𑁆𑀲𑀣𑀽𑀮𑀓𑀺𑀲𑀧𑀼𑀣𑀼𑀮𑀅𑀦𑀼𑀯𑀝𑁆𑀝𑀺𑀢𑀬𑀼𑀢𑁆𑀢𑀝𑁆𑀞𑀸𑀦𑁂𑀲𑀼 𑀢𑀣𑀸𑀯𑀺𑀥𑁄𑀯 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀫𑀦𑀸𑀧𑀺𑀬𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀯𑀺𑀧𑀸𑀓𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀬𑁂𑀳𑀺 𑀅𑀗𑁆𑀕𑁂𑀳𑀺 𑀤𑀻𑀖𑁂𑀳𑀺 𑀲𑁄𑀪𑀢𑀺, 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀤𑀻𑀖𑀸𑀦𑀺 𑀲𑀡𑁆𑀞𑀦𑁆𑀢𑀺. 𑀬𑁂𑀳𑀺 𑀅𑀗𑁆𑀕𑁂𑀳𑀺 𑀭𑀲𑁆𑀲𑁂𑀳𑀺 𑀲𑁄𑀪𑀢𑀺, 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀭𑀲𑁆𑀲𑀸𑀦𑀺 𑀲𑀡𑁆𑀞𑀦𑁆𑀢𑀺. 𑀬𑁂𑀳𑀺 𑀅𑀗𑁆𑀕𑁂𑀳𑀺 𑀣𑀽𑀮𑁂𑀳𑀺 𑀲𑁄𑀪𑀢𑀺, 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀣𑀽𑀮𑀸𑀦𑀺 𑀲𑀡𑁆𑀞𑀦𑁆𑀢𑀺. 𑀬𑁂𑀳𑀺 𑀅𑀗𑁆𑀕𑁂𑀳𑀺 𑀓𑀺𑀲𑁂𑀳𑀺 𑀲𑁄𑀪𑀢𑀺, 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀓𑀺𑀲𑀸𑀦𑀺 𑀲𑀡𑁆𑀞𑀦𑁆𑀢𑀺. 𑀬𑁂𑀳𑀺 𑀅𑀗𑁆𑀕𑁂𑀳𑀺 𑀧𑀼𑀣𑀼𑀮𑁂𑀳𑀺 𑀲𑁄𑀪𑀢𑀺, 𑀢𑀸𑀦𑀺 𑀅𑀗𑁆𑀕𑀸𑀦𑀺 ¶ 𑀧𑀼𑀣𑀼𑀮𑀸𑀦𑀺 𑀲𑀡𑁆𑀞𑀦𑁆𑀢𑀺. 𑀬𑁂𑀳𑀺 𑀅𑀗𑁆𑀕𑁂𑀳𑀺 𑀯𑀝𑁆𑀝𑁂𑀳𑀺 𑀲𑁄𑀪𑀢𑀺, 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀯𑀝𑁆𑀝𑀸𑀦𑀺 𑀲𑀡𑁆𑀞𑀦𑁆𑀢𑀻’’𑀢𑀺.

𑀇𑀢𑀺 𑀦𑀸𑀦𑀸𑀘𑀺𑀢𑁆𑀢𑁂𑀦 𑀧𑀼𑀜𑁆𑀜𑀘𑀺𑀢𑁆𑀢𑁂𑀦 𑀘𑀺𑀢𑁆𑀢𑀺𑀢𑁄 𑀤𑀲𑀳𑀺 𑀧𑀸𑀭𑀫𑀻𑀳𑀺 𑀲𑀚𑁆𑀚𑀺𑀢𑁄 𑀫𑀳𑀸𑀧𑀼𑀭𑀺𑀲𑀲𑁆𑀲 𑀅𑀢𑁆𑀢𑀪𑀸𑀯𑁄, 𑀮𑁄𑀓𑁂 𑀲𑀩𑁆𑀩𑀲𑀺𑀧𑁆𑀧𑀺𑀦𑁄 𑀯𑀸 𑀲𑀩𑁆𑀩𑀇𑀤𑁆𑀥𑀺𑀫𑀦𑁆𑀢𑁄 𑀯𑀸 𑀧𑀢𑀺𑀭𑀽𑀧𑀓𑀫𑁆𑀧𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺.

𑀘𑀺𑀢𑀦𑁆𑀢𑀭𑀁𑀲𑁄𑀢𑀺 𑀅𑀦𑁆𑀢𑀭𑀁𑀲𑀁 𑀯𑀼𑀘𑁆𑀘𑀢𑀺 𑀤𑁆𑀯𑀺𑀦𑁆𑀦𑀁 𑀓𑁄𑀝𑁆𑀝𑀸𑀦𑀁 𑀅𑀦𑁆𑀢𑀭𑀁, 𑀢𑀁 𑀘𑀺𑀢𑀁 𑀧𑀭𑀺𑀧𑀼𑀡𑁆𑀡𑀁 𑀅𑀦𑁆𑀢𑀭𑀁𑀲𑀁 𑀅𑀲𑁆𑀲𑀸𑀢𑀺 𑀘𑀺𑀢𑀦𑁆𑀢𑀭𑀁𑀲𑁄. 𑀅𑀜𑁆𑀜𑁂𑀲𑀜𑁆𑀳𑀺 𑀢𑀁 𑀞𑀸𑀦𑀁 𑀦𑀺𑀦𑁆𑀦𑀁 𑀳𑁄𑀢𑀺, 𑀤𑁆𑀯𑁂 𑀧𑀺𑀝𑁆𑀞𑀺𑀓𑁄𑀝𑁆𑀝𑀸 𑀧𑀸𑀝𑀺𑀬𑁂𑀓𑁆𑀓𑀸 𑀧𑀜𑁆𑀜𑀸𑀬𑀦𑁆𑀢𑀺. 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀦 𑀓𑀝𑀺𑀢𑁄 𑀧𑀝𑁆𑀞𑀸𑀬 𑀫𑀁𑀲𑀧𑀝𑀮𑀁 𑀬𑀸𑀯 𑀔𑀦𑁆𑀥𑀸 𑀉𑀕𑁆𑀕𑀫𑁆𑀫 𑀲𑀫𑀼𑀲𑁆𑀲𑀺𑀢𑀲𑀼𑀯𑀡𑁆𑀡𑀨𑀮𑀓𑀁 𑀯𑀺𑀬 𑀧𑀺𑀝𑁆𑀞𑀺𑀁 𑀙𑀸𑀤𑁂𑀢𑁆𑀯𑀸 𑀧𑀢𑀺𑀝𑁆𑀞𑀺𑀢𑀁.

𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄𑀢𑀺 ¶ 𑀦𑀺𑀕𑁆𑀭𑁄𑀥𑁄 𑀯𑀺𑀬 𑀧𑀭𑀺𑀫𑀡𑁆𑀟𑀮𑁄. 𑀬𑀣𑀸 𑀧𑀜𑁆𑀜𑀸𑀲𑀳𑀢𑁆𑀣𑀢𑀸𑀬 𑀯𑀸 𑀲𑀢𑀳𑀢𑁆𑀣𑀢𑀸𑀬 𑀯𑀸 𑀲𑀫𑀓𑁆𑀔𑀦𑁆𑀥𑀲𑀸𑀔𑁄 𑀦𑀺𑀕𑁆𑀭𑁄𑀥𑁄 𑀤𑀻𑀖𑀢𑁄𑀧𑀺 𑀯𑀺𑀢𑁆𑀣𑀸𑀭𑀢𑁄𑀧𑀺 𑀏𑀓𑀧𑁆𑀧𑀫𑀸𑀡𑁄𑀯 𑀳𑁄𑀢𑀺, 𑀏𑀯𑀁 𑀓𑀸𑀬𑀢𑁄𑀧𑀺 𑀩𑁆𑀬𑀸𑀫𑀢𑁄𑀧𑀺 𑀏𑀓𑀧𑁆𑀧𑀫𑀸𑀡𑁄. 𑀬𑀣𑀸 𑀅𑀜𑁆𑀜𑁂𑀲𑀁 𑀓𑀸𑀬𑁄 𑀤𑀻𑀖𑁄 𑀯𑀸 𑀳𑁄𑀢𑀺 𑀩𑁆𑀬𑀸𑀫𑁄 𑀯𑀸, 𑀦 𑀏𑀯𑀁 𑀯𑀺𑀲𑀫𑀧𑁆𑀧𑀫𑀸𑀡𑁄𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 𑀬𑀸𑀯𑀢𑀓𑁆𑀯𑀲𑁆𑀲 𑀓𑀸𑀬𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀸𑀯𑀢𑀓𑁄 𑀅𑀲𑁆𑀲𑀸𑀢𑀺 𑀬𑀸𑀯𑀢𑀓𑁆𑀯𑀲𑁆𑀲.

𑀲𑀫𑀯𑀝𑁆𑀝𑀓𑁆𑀔𑀦𑁆𑀥𑁄𑀢𑀺 𑀲𑀫𑀯𑀝𑁆𑀝𑀺𑀢𑀓𑁆𑀔𑀦𑁆𑀥𑁄. 𑀬𑀣𑀸 𑀏𑀓𑁂 𑀓𑁄𑀜𑁆𑀘𑀸 𑀯𑀺𑀬 𑀘 𑀩𑀓𑀸 𑀯𑀺𑀬 𑀘 𑀯𑀭𑀸𑀳𑀸 𑀯𑀺𑀬 𑀘 𑀤𑀻𑀖𑀕𑀮𑀸 𑀯𑀗𑁆𑀓𑀕𑀮𑀸 𑀧𑀼𑀣𑀼𑀮𑀕𑀮𑀸 𑀘 𑀳𑁄𑀦𑁆𑀢𑀺 ¶ , 𑀓𑀣𑀦𑀓𑀸𑀮𑁂 𑀲𑀺𑀭𑀸𑀚𑀸𑀮𑀁 𑀧𑀜𑁆𑀜𑀸𑀬𑀢𑀺, 𑀫𑀦𑁆𑀤𑁄 𑀲𑀭𑁄 𑀦𑀺𑀓𑁆𑀔𑀫𑀢𑀺, 𑀦 𑀏𑀯𑀁 𑀫𑀳𑀸𑀧𑀼𑀭𑀺𑀲𑀲𑁆𑀲. 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀦 𑀲𑀼𑀯𑀝𑁆𑀝𑀺𑀢𑀲𑀼𑀯𑀡𑁆𑀡𑀸𑀴𑀺𑀗𑁆𑀕𑀲𑀤𑀺𑀲𑁄 𑀔𑀦𑁆𑀥𑁄 𑀳𑁄𑀢𑀺, 𑀓𑀣𑀦𑀓𑀸𑀮𑁂 𑀲𑀺𑀭𑀸𑀚𑀸𑀮𑀁 𑀦 𑀧𑀜𑁆𑀜𑀸𑀬𑀢𑀺, 𑀫𑁂𑀖𑀲𑁆𑀲 𑀯𑀺𑀬 𑀕𑀚𑁆𑀚𑀺𑀢𑁄 𑀲𑀭𑁄 𑀫𑀳𑀸 𑀳𑁄𑀢𑀺.

𑀭𑀲𑀕𑁆𑀕𑀲𑀕𑁆𑀕𑀻𑀢𑀺 𑀏𑀢𑁆𑀣 𑀭𑀲𑀁 𑀕𑀲𑀦𑁆𑀢𑀺 𑀳𑀭𑀦𑁆𑀢𑀻𑀢𑀺 𑀭𑀲𑀕𑁆𑀕𑀲𑀸. 𑀭𑀲𑀳𑀭𑀡𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀸 𑀅𑀕𑁆𑀕𑀸 𑀅𑀲𑁆𑀲𑀸𑀢𑀺 𑀭𑀲𑀕𑁆𑀕𑀲𑀕𑁆𑀕𑀻. 𑀫𑀳𑀸𑀧𑀼𑀭𑀺𑀲𑀲𑁆𑀲 𑀓𑀺𑀭 𑀲𑀢𑁆𑀢𑀭𑀲𑀳𑀭𑀡𑀻𑀲𑀳𑀲𑁆𑀲𑀸𑀦𑀺 𑀉𑀤𑁆𑀥𑀕𑁆𑀕𑀸𑀦𑀺 𑀳𑀼𑀢𑁆𑀯𑀸 𑀕𑀻𑀯𑀸𑀬𑀫𑁂𑀯 𑀧𑀝𑀺𑀫𑀼𑀓𑁆𑀓𑀸𑀦𑀺. 𑀢𑀺𑀮𑀨𑀮𑀫𑀢𑁆𑀢𑁄𑀧𑀺 𑀆𑀳𑀸𑀭𑁄 𑀚𑀺𑀯𑁆𑀳𑀕𑁆𑀕𑁂 𑀞𑀧𑀺𑀢𑁄 𑀲𑀩𑁆𑀩𑀓𑀸𑀬𑀁 𑀅𑀦𑀼𑀨𑀭𑀢𑀺. 𑀢𑁂𑀦𑁂𑀯 𑀫𑀳𑀸𑀧𑀥𑀸𑀦𑀁 𑀧𑀤𑀳𑀦𑁆𑀢𑀲𑁆𑀲 𑀏𑀓𑀢𑀡𑁆𑀟𑀼𑀮𑀸𑀤𑀻𑀳𑀺𑀧𑀺 𑀓𑀴𑀸𑀬𑀬𑀽𑀲𑀧𑀲𑀢𑀫𑀢𑁆𑀢𑁂𑀦𑀸𑀧𑀺 𑀓𑀸𑀬𑀲𑁆𑀲 𑀬𑀸𑀧𑀦𑀁 𑀅𑀳𑁄𑀲𑀺. 𑀅𑀜𑁆𑀜𑁂𑀲𑀁 𑀧𑀦 𑀢𑀣𑀸 𑀅𑀪𑀸𑀯𑀸 𑀦 𑀲𑀓𑀮𑀁 𑀓𑀸𑀬𑀁 𑀑𑀚𑀸 𑀨𑀭𑀢𑀺. 𑀢𑁂𑀦 𑀢𑁂 𑀩𑀳𑁆𑀯𑀸𑀩𑀸𑀥𑀸 𑀳𑁄𑀦𑁆𑀢𑀺.

𑀲𑀻𑀳𑀲𑁆𑀲𑁂𑀯 ¶ 𑀳𑀦𑀼 𑀅𑀲𑁆𑀲𑀸𑀢𑀺 𑀲𑀻𑀳𑀳𑀦𑀼. 𑀢𑀢𑁆𑀣 𑀲𑀻𑀳𑀲𑁆𑀲 𑀳𑁂𑀝𑁆𑀞𑀺𑀫𑀳𑀦𑀼𑀫𑁂𑀯 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺, 𑀦 𑀉𑀧𑀭𑀺𑀫𑀁. 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀦 𑀲𑀻𑀳𑀲𑁆𑀲 𑀳𑁂𑀝𑁆𑀞𑀺𑀫𑀁 𑀯𑀺𑀬 𑀤𑁆𑀯𑁂𑀧𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀤𑁆𑀯𑀸𑀤𑀲𑀺𑀬𑀸 𑀧𑀓𑁆𑀔𑀲𑁆𑀲 𑀘𑀦𑁆𑀤𑀲𑀤𑀺𑀲𑀸𑀦𑀺 𑀳𑁄𑀦𑁆𑀢𑀺. 𑀅𑀣 𑀦𑁂𑀫𑀺𑀢𑁆𑀢𑀓𑀸 𑀳𑀦𑀼𑀓𑀧𑀭𑀺𑀬𑀦𑁆𑀢𑀁 𑀑𑀮𑁄𑀓𑁂𑀦𑁆𑀢𑀸𑀯 𑀇𑀫𑁂𑀲𑀼 𑀳𑀦𑀼𑀓𑁂𑀲𑀼 𑀳𑁂𑀝𑁆𑀞𑀺𑀫𑁂 𑀯𑀻𑀲𑀢𑀺 𑀉𑀧𑀭𑀺𑀫𑁂 𑀯𑀻𑀲𑀢𑀻𑀢𑀺 𑀘𑀢𑁆𑀢𑀸𑀮𑀻𑀲𑀤𑀦𑁆𑀢𑀸 𑀲𑀫𑀸 𑀅𑀯𑀺𑀭𑀴𑀸 𑀧𑀢𑀺𑀝𑁆𑀞𑀳𑀺𑀲𑁆𑀲𑀦𑁆𑀢𑀻𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀬𑀜𑁆𑀳𑀺 𑀤𑁂𑀯, 𑀓𑀼𑀫𑀸𑀭𑁄 𑀘𑀢𑁆𑀢𑀸𑀮𑀻𑀲𑀤𑀦𑁆𑀢𑁄 𑀳𑁄𑀢𑀻𑀢𑀺𑀆𑀤𑀺𑀫𑀸𑀳𑀁𑀲𑀼. 𑀢𑀢𑁆𑀭𑀸𑀬𑀫𑀢𑁆𑀣𑁄, 𑀅𑀜𑁆𑀜𑁂𑀲𑀜𑁆𑀳𑀺 𑀧𑀭𑀺𑀧𑀼𑀡𑁆𑀡𑀤𑀦𑁆𑀢𑀸𑀦𑀫𑁆𑀧𑀺 𑀤𑁆𑀯𑀢𑁆𑀢𑀺𑀁𑀲 𑀤𑀦𑁆𑀢𑀸 𑀳𑁄𑀦𑁆𑀢𑀺. 𑀇𑀫𑀲𑁆𑀲 𑀧𑀦 𑀘𑀢𑁆𑀢𑀸𑀮𑀻𑀲𑀁 𑀪𑀯𑀺𑀲𑁆𑀲𑀦𑁆𑀢𑀺. 𑀅𑀜𑁆𑀜𑁂𑀲𑀜𑁆𑀘 𑀓𑁂𑀘𑀺 𑀤𑀦𑁆𑀢𑀸 𑀉𑀘𑁆𑀘𑀸, 𑀓𑁂𑀘𑀺 𑀦𑀻𑀘𑀸𑀢𑀺 𑀯𑀺𑀲𑀫𑀸 𑀳𑁄𑀦𑁆𑀢𑀺, 𑀇𑀫𑀲𑁆𑀲 𑀧𑀦 𑀅𑀬𑀧𑀝𑁆𑀝𑀓𑁂𑀦 𑀙𑀺𑀦𑁆𑀦𑀲𑀗𑁆𑀔𑀧𑀝𑀮𑀁 𑀯𑀺𑀬 𑀲𑀫𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀅𑀜𑁆𑀜𑁂𑀲𑀁 𑀓𑀼𑀫𑁆𑀪𑀺𑀮𑀸𑀦𑀁 𑀯𑀺𑀬 𑀤𑀦𑁆𑀢𑀸 𑀯𑀺𑀭𑀴𑀸 𑀳𑁄𑀦𑁆𑀢𑀺, 𑀫𑀘𑁆𑀙𑀫𑀁𑀲𑀸𑀦𑀺 𑀔𑀸𑀤𑀦𑁆𑀢𑀸𑀦𑀁 𑀤𑀦𑁆𑀢𑀦𑁆𑀢𑀭𑀁 𑀧𑀽𑀭𑁂𑀦𑁆𑀢𑀺. 𑀇𑀫𑀲𑁆𑀲 𑀧𑀦 𑀓𑀦𑀓𑀨𑀮𑀓𑀸𑀬𑀁 𑀲𑀫𑀼𑀲𑁆𑀲𑀺𑀢𑀯𑀚𑀺𑀭𑀧𑀦𑁆𑀢𑀺 𑀯𑀺𑀬 𑀅𑀯𑀺𑀭𑀴𑀸 𑀢𑀽𑀮𑀺𑀓𑀸𑀬 𑀤𑀲𑁆𑀲𑀺𑀢𑀧𑀭𑀺𑀘𑁆𑀙𑁂𑀤𑀸 𑀯𑀺𑀬 𑀤𑀦𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀅𑀜𑁆𑀜𑁂𑀲𑀜𑁆𑀘 𑀧𑀽𑀢𑀺𑀤𑀦𑁆𑀢𑀸 𑀉𑀝𑁆𑀞𑀳𑀦𑁆𑀢𑀺. 𑀢𑁂𑀦 𑀓𑀸𑀘𑀺 𑀤𑀸𑀞𑀸 𑀓𑀸𑀴𑀸𑀧𑀺 𑀯𑀺𑀯𑀡𑁆𑀡𑀸𑀧𑀺 𑀳𑁄𑀦𑁆𑀢𑀺. 𑀅𑀬𑀁 𑀧𑀦 𑀲𑀼𑀝𑁆𑀞𑀼 𑀲𑀼𑀓𑁆𑀓𑀤𑀸𑀞𑁄 𑀑𑀲𑀥𑀺𑀢𑀸𑀭𑀓𑀫𑁆𑀧𑀺 𑀅𑀢𑀺𑀓𑁆𑀓𑀫𑁆𑀫 𑀯𑀺𑀭𑁄𑀘𑀫𑀸𑀦𑀸𑀬 𑀧𑀪𑀸𑀬 𑀲𑀫𑀦𑁆𑀦𑀸𑀕𑀢𑀤𑀸𑀞𑁄 𑀪𑀯𑀺𑀲𑁆𑀲𑀢𑀺.

𑀧𑀳𑀽𑀢𑀚𑀺𑀯𑁆𑀳𑁄𑀢𑀺 ¶ 𑀧𑀼𑀣𑀼𑀮𑀚𑀺𑀯𑁆𑀳𑁄. 𑀅𑀜𑁆𑀜𑁂𑀲𑀁 𑀚𑀺𑀯𑁆𑀳𑀸 𑀣𑀽𑀮𑀸𑀧𑀺 𑀳𑁄𑀦𑁆𑀢𑀺 𑀓𑀺𑀲𑀸𑀧𑀺 𑀭𑀲𑁆𑀲𑀸𑀧𑀺 𑀣𑀤𑁆𑀥𑀸𑀧𑀺 𑀯𑀺𑀲𑀫𑀸𑀧𑀺, 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀦 𑀚𑀺𑀯𑁆𑀳𑀸 𑀫𑀼𑀤𑀼 𑀤𑀻𑀖𑀸 𑀧𑀼𑀣𑀼𑀮𑀸 𑀯𑀡𑁆𑀡𑀲𑀫𑁆𑀧𑀦𑁆𑀦𑀸 𑀳𑁄𑀢𑀺. 𑀲𑁄 𑀳𑀺 𑀏𑀢𑀁 𑀮𑀓𑁆𑀔𑀡𑀁 𑀧𑀭𑀺𑀬𑁂𑀲𑀺𑀢𑀼𑀁 𑀆𑀕𑀢𑀸𑀦𑀁 𑀓𑀗𑁆𑀔𑀸𑀯𑀺𑀦𑁄𑀤𑀦𑀢𑁆𑀣𑀁 𑀫𑀼𑀤𑀼𑀓𑀢𑁆𑀢𑀸 𑀢𑀁 𑀚𑀺𑀯𑁆𑀳𑀁 𑀓𑀣𑀺𑀦𑀲𑀽𑀘𑀺𑀁 𑀯𑀺𑀬 𑀯𑀝𑁆𑀝𑁂𑀢𑁆𑀯𑀸 𑀉𑀪𑁄 𑀦𑀸𑀲𑀺𑀓𑀲𑁄𑀢𑀸𑀦𑀺 𑀧𑀭𑀸𑀫𑀲𑀢𑀺, 𑀤𑀻𑀖𑀢𑁆𑀢𑀸 𑀉𑀪𑁄 𑀓𑀡𑁆𑀡𑀲𑁄𑀢𑀸𑀦𑀺 𑀧𑀭𑀸𑀫𑀲𑀢𑀺 ¶ , 𑀧𑀼𑀣𑀼𑀮𑀢𑁆𑀢𑀸 𑀓𑁂𑀲𑀦𑁆𑀢𑀧𑀭𑀺𑀬𑁄𑀲𑀸𑀦𑀁 𑀓𑁂𑀯𑀮𑀫𑁆𑀧𑀺 𑀦𑀮𑀸𑀝𑀁 𑀧𑀝𑀺𑀘𑁆𑀙𑀸𑀤𑁂𑀢𑀺. 𑀏𑀯𑀫𑀲𑁆𑀲 𑀫𑀼𑀤𑀼𑀤𑀻𑀖𑀧𑀼𑀣𑀼𑀮𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀢𑁂𑀲𑀁 𑀓𑀗𑁆𑀔𑀁 𑀯𑀺𑀦𑁄𑀤𑁂𑀢𑀺. 𑀏𑀯𑀁 𑀢𑀺𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀚𑀺𑀯𑁆𑀳𑀁 𑀲𑀦𑁆𑀥𑀸𑀬 ‘‘𑀧𑀳𑀽𑀢𑀚𑀺𑀯𑁆𑀳𑁄’’𑀢𑀺 𑀯𑀼𑀢𑁆𑀢𑀁.

𑀩𑁆𑀭𑀳𑁆𑀫𑀲𑁆𑀲𑀭𑁄𑀢𑀺 𑀅𑀜𑁆𑀜𑁂 𑀙𑀺𑀦𑁆𑀦𑀲𑁆𑀲𑀭𑀸𑀧𑀺 𑀪𑀺𑀦𑁆𑀦𑀲𑁆𑀲𑀭𑀸𑀧𑀺 𑀓𑀸𑀓𑀲𑁆𑀲𑀭𑀸𑀧𑀺 𑀳𑁄𑀦𑁆𑀢𑀺, 𑀅𑀬𑀁 𑀧𑀦 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀲𑀭𑀲𑀤𑀺𑀲𑁂𑀦 𑀲𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀪𑀯𑀺𑀲𑁆𑀲𑀢𑀺, 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀳𑀺 𑀧𑀺𑀢𑁆𑀢𑀲𑁂𑀫𑁆𑀳𑁂𑀳𑀺 𑀅𑀧𑀮𑀺𑀩𑀼𑀤𑁆𑀥𑀢𑁆𑀢𑀸 𑀲𑀭𑁄 𑀯𑀺𑀲𑀤𑁄 𑀳𑁄𑀢𑀺. 𑀫𑀳𑀸𑀧𑀼𑀭𑀺𑀲𑁂𑀦𑀸𑀧𑀺 𑀓𑀢𑀓𑀫𑁆𑀫𑀁 𑀢𑀲𑁆𑀲 𑀯𑀢𑁆𑀣𑀼𑀁 𑀲𑁄𑀥𑁂𑀢𑀺. 𑀯𑀢𑁆𑀣𑀼𑀦𑁄 𑀲𑀼𑀤𑁆𑀥𑀢𑁆𑀢𑀸 𑀦𑀸𑀪𑀺𑀢𑁄 ¶ 𑀧𑀝𑁆𑀞𑀸𑀬 𑀲𑀫𑀼𑀝𑁆𑀞𑀳𑀦𑁆𑀢𑁄 𑀲𑀭𑁄 𑀯𑀺𑀲𑀤𑁄 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄𑀯 𑀲𑀫𑀼𑀝𑁆𑀞𑀸𑀢𑀺. 𑀓𑀭𑀯𑀻𑀓𑁄 𑀯𑀺𑀬 𑀪𑀡𑀢𑀻𑀢𑀺 𑀓𑀭𑀯𑀻𑀓𑀪𑀸𑀡𑀻, 𑀫𑀢𑁆𑀢𑀓𑀭𑀯𑀻𑀓𑀭𑀼𑀢𑀫𑀜𑁆𑀚𑀼𑀖𑁄𑀲𑁄𑀢𑀺 𑀅𑀢𑁆𑀣𑁄.

𑀅𑀪𑀺𑀦𑀻𑀮𑀦𑁂𑀢𑁆𑀢𑁄𑀢𑀺 𑀦 𑀲𑀓𑀮𑀦𑀻𑀮𑀦𑁂𑀢𑁆𑀢𑁄, 𑀦𑀻𑀮𑀬𑀼𑀢𑁆𑀢𑀝𑁆𑀞𑀸𑀦𑁂 𑀧𑀦𑀲𑁆𑀲 𑀉𑀫𑀸𑀧𑀼𑀧𑁆𑀨𑀲𑀤𑀺𑀲𑁂𑀦 𑀅𑀢𑀺𑀯𑀺𑀲𑀼𑀤𑁆𑀥𑁂𑀦 𑀦𑀻𑀮𑀯𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀦𑀺 𑀦𑁂𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀧𑀻𑀢𑀬𑀼𑀢𑁆𑀢𑀝𑁆𑀞𑀸𑀦𑁂 𑀓𑀡𑀺𑀓𑀸𑀭𑀧𑀼𑀧𑁆𑀨𑀲𑀤𑀺𑀲𑁂𑀦 𑀧𑀻𑀢𑀯𑀡𑁆𑀡𑁂𑀦, 𑀮𑁄𑀳𑀺𑀢𑀬𑀼𑀢𑁆𑀢𑀝𑁆𑀞𑀸𑀦𑁂 𑀩𑀦𑁆𑀥𑀼𑀚𑀻𑀯𑀓𑀧𑀼𑀧𑁆𑀨𑀲𑀤𑀺𑀲𑁂𑀦 𑀮𑁄𑀳𑀺𑀢𑀯𑀡𑁆𑀡𑁂𑀦, 𑀲𑁂𑀢𑀬𑀼𑀢𑁆𑀢𑀝𑁆𑀞𑀸𑀦𑁂 𑀑𑀲𑀥𑀺𑀢𑀸𑀭𑀓𑀲𑀤𑀺𑀲𑁂𑀦 𑀲𑁂𑀢𑀯𑀡𑁆𑀡𑁂𑀦, 𑀓𑀸𑀴𑀬𑀼𑀢𑁆𑀢𑀝𑁆𑀞𑀸𑀦𑁂 𑀅𑀤𑁆𑀤𑀸𑀭𑀺𑀝𑁆𑀞𑀓𑀲𑀤𑀺𑀲𑁂𑀦 𑀓𑀸𑀴𑀯𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀦𑀺. 𑀲𑀼𑀯𑀡𑁆𑀡𑀯𑀺𑀫𑀸𑀦𑁂 𑀉𑀕𑁆𑀖𑀸𑀝𑀺𑀢𑀫𑀡𑀺𑀲𑀻𑀳𑀧𑀜𑁆𑀚𑀭𑀲𑀤𑀺𑀲𑀸𑀦𑀺 𑀔𑀸𑀬𑀦𑁆𑀢𑀺.

𑀕𑁄𑀧𑀔𑀼𑀫𑁄𑀢𑀺 𑀏𑀢𑁆𑀣 𑀧𑀔𑀼𑀫𑀦𑁆𑀢𑀺 𑀲𑀓𑀮𑀘𑀓𑁆𑀔𑀼𑀪𑀡𑁆𑀟𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀁 𑀓𑀸𑀴𑀯𑀘𑁆𑀙𑀓𑀲𑁆𑀲 𑀩𑀳𑀮𑀥𑀸𑀢𑀼𑀓𑀁 𑀳𑁄𑀢𑀺, 𑀭𑀢𑁆𑀢𑀯𑀘𑁆𑀙𑀓𑀲𑁆𑀲 𑀯𑀺𑀧𑁆𑀧𑀲𑀦𑁆𑀦𑀁, 𑀢𑀁𑀫𑀼𑀳𑀼𑀢𑁆𑀢𑀚𑀸𑀢𑀢𑀭𑀼𑀡𑀭𑀢𑁆𑀢𑀯𑀘𑁆𑀙𑀓𑀲𑀤𑀺𑀲𑀘𑀓𑁆𑀔𑀼𑀪𑀡𑁆𑀟𑁄𑀢𑀺 𑀅𑀢𑁆𑀣𑁄. 𑀅𑀜𑁆𑀜𑁂𑀲𑀜𑁆𑀳𑀺 𑀘𑀓𑁆𑀔𑀼𑀪𑀡𑁆𑀟𑀸 𑀅𑀧𑀭𑀺𑀧𑀼𑀡𑁆𑀡𑀸 𑀳𑁄𑀦𑁆𑀢𑀺, 𑀳𑀢𑁆𑀣𑀺𑀫𑀽𑀲𑀺𑀓𑀸𑀤𑀻𑀦𑀁 𑀅𑀓𑁆𑀔𑀺𑀲𑀤𑀺𑀲𑁂𑀳𑀺 𑀯𑀺𑀦𑀺𑀕𑁆𑀕𑀢𑁂𑀳𑀺𑀧𑀺 𑀕𑀫𑁆𑀪𑀻𑀭𑁂𑀳𑀺𑀧𑀺 𑀅𑀓𑁆𑀔𑀻𑀳𑀺 𑀲𑀫𑀦𑁆𑀦𑀸𑀕𑀢𑀸 𑀳𑁄𑀦𑁆𑀢𑀺. 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀦 𑀥𑁄𑀯𑀺𑀢𑁆𑀯𑀸 𑀫𑀚𑁆𑀚𑀺𑀢𑁆𑀯𑀸 𑀞𑀧𑀺𑀢𑀫𑀡𑀺𑀕𑀼𑀴𑀺𑀓𑀸 𑀯𑀺𑀬 𑀫𑀼𑀤𑀼𑀲𑀺𑀦𑀺𑀤𑁆𑀥𑀦𑀻𑀮𑀲𑀼𑀔𑀼𑀫𑀧𑀔𑀼𑀫𑀸𑀘𑀺𑀢𑀸𑀦𑀺 𑀅𑀓𑁆𑀔𑀻𑀦𑀺.

𑀉𑀡𑁆𑀡𑀸𑀢𑀺 𑀉𑀡𑁆𑀡𑀮𑁄𑀫𑀁. 𑀪𑀫𑀼𑀓𑀦𑁆𑀢𑀭𑁂𑀢𑀺 𑀤𑁆𑀯𑀺𑀦𑁆𑀦𑀁 𑀪𑀫𑀼𑀓𑀸𑀦𑀁 𑀯𑁂𑀫𑀚𑁆𑀛𑁂 𑀦𑀸𑀲𑀺𑀓𑀫𑀢𑁆𑀣𑀓𑁂𑀬𑁂𑀯 𑀚𑀸𑀢𑀸, 𑀉𑀕𑁆𑀕𑀦𑁆𑀢𑁆𑀯𑀸 𑀧𑀦 𑀦𑀮𑀸𑀝𑀯𑁂𑀫𑀚𑁆𑀛𑁂 𑀚𑀸𑀢𑀸. 𑀑𑀤𑀸𑀢𑀸𑀢𑀺 𑀧𑀭𑀺𑀲𑀼𑀤𑁆𑀥𑀸, 𑀑𑀲𑀥𑀺𑀢𑀸𑀭𑀓𑀲𑀫𑀸𑀦𑀯𑀡𑁆𑀡𑀸. 𑀫𑀼𑀤𑀽𑀢𑀺 𑀲𑀧𑁆𑀧𑀺𑀫𑀡𑁆𑀟𑁂 𑀑𑀲𑀸𑀭𑁂𑀢𑁆𑀯𑀸 𑀞𑀧𑀺𑀢𑀲𑀢𑀯𑀸𑀭𑀯𑀺𑀳𑀢𑀓𑀧𑁆𑀧𑀸𑀲𑀧𑀝𑀮𑀲𑀤𑀺𑀲𑀸. 𑀢𑀽𑀮𑀲𑀦𑁆𑀦𑀺𑀪𑀸𑀢𑀺 𑀲𑀺𑀫𑁆𑀩𑀮𑀺𑀢𑀽𑀮𑀮𑀢𑀸𑀢𑀽𑀮𑀲𑀫𑀸𑀦𑀸, 𑀅𑀬𑀫𑀲𑁆𑀲 𑀑𑀤𑀸𑀢𑀢𑀸𑀬 𑀉𑀧𑀫𑀸. 𑀲𑀸 𑀧𑀦𑁂𑀲𑀸 𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀆𑀓𑀟𑁆𑀠𑀺𑀬𑀫𑀸𑀦𑀸 𑀉𑀧𑀟𑁆𑀠𑀩𑀸𑀳𑀼𑀧𑁆𑀧𑀫𑀸𑀡𑀸 𑀳𑁄𑀢𑀺, 𑀯𑀺𑀲𑁆𑀲𑀝𑁆𑀞𑀸 ¶ 𑀤𑀓𑁆𑀔𑀺𑀡𑀸𑀯𑀝𑁆𑀝𑀯𑀲𑁂𑀦 𑀆𑀯𑀝𑁆𑀝𑀺𑀢𑁆𑀯𑀸 𑀉𑀤𑁆𑀥𑀕𑁆𑀕𑀸 𑀳𑀼𑀢𑁆𑀯𑀸 ¶ 𑀲𑀦𑁆𑀢𑀺𑀝𑁆𑀞𑀢𑀺. 𑀲𑀼𑀯𑀡𑁆𑀡𑀨𑀮𑀓𑀫𑀚𑁆𑀛𑁂 𑀞𑀧𑀺𑀢𑀭𑀚𑀢𑀧𑀼𑀩𑁆𑀩𑀼𑀴𑀓𑀁 𑀯𑀺𑀬, 𑀲𑀼𑀯𑀡𑁆𑀡𑀖𑀝𑀢𑁄 𑀦𑀺𑀓𑁆𑀔𑀫𑀫𑀸𑀦𑀸 𑀔𑀻𑀭𑀥𑀸𑀭𑀸 𑀯𑀺𑀬, 𑀅𑀭𑀼𑀡𑀧𑁆𑀧𑀪𑀸𑀭𑀜𑁆𑀚𑀺𑀢𑁂 𑀕𑀕𑀦𑀧𑁆𑀧𑀤𑁂𑀲𑁂 𑀑𑀲𑀥𑀺𑀢𑀸𑀭𑀓𑀸 𑀯𑀺𑀬 𑀘 𑀅𑀢𑀺𑀫𑀦𑁄𑀳𑀭𑀸𑀬 𑀲𑀺𑀭𑀺𑀬𑀸 𑀯𑀺𑀭𑁄𑀘𑀢𑀺.

𑀉𑀡𑁆𑀳𑀻𑀲𑀲𑀻𑀲𑁄𑀢𑀺 ¶ 𑀇𑀤𑀁 𑀧𑀭𑀺𑀧𑀼𑀡𑁆𑀡𑀦𑀮𑀸𑀝𑀢𑀜𑁆𑀘 𑀧𑀭𑀺𑀧𑀼𑀡𑁆𑀡𑀲𑀻𑀲𑀢𑀁 𑀘𑀸𑀢𑀺 𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁. 𑀫𑀳𑀸𑀧𑀼𑀭𑀺𑀲𑀲𑁆𑀲 𑀳𑀺 𑀤𑀓𑁆𑀔𑀺𑀡𑀓𑀡𑁆𑀡𑀘𑀽𑀴𑀺𑀓𑀢𑁄 𑀧𑀝𑁆𑀞𑀸𑀬 𑀫𑀁𑀲𑀧𑀝𑀮𑀁 𑀉𑀝𑁆𑀞𑀳𑀺𑀢𑁆𑀯𑀸 𑀲𑀓𑀮𑀦𑀮𑀸𑀝𑀁 𑀙𑀸𑀤𑀬𑀫𑀸𑀦𑀁 𑀧𑀽𑀭𑀬𑀫𑀸𑀦𑀁 𑀕𑀦𑁆𑀢𑁆𑀯𑀸 𑀯𑀸𑀫𑀓𑀡𑁆𑀡𑀘𑀽𑀴𑀺𑀓𑀸𑀬𑀁 𑀧𑀢𑀺𑀝𑁆𑀞𑀺𑀢𑀁, 𑀢𑀁 𑀭𑀜𑁆𑀜𑁄 𑀩𑀦𑁆𑀥𑀉𑀡𑁆𑀳𑀻𑀲𑀧𑀝𑁆𑀝𑁄 𑀯𑀺𑀬 𑀯𑀺𑀭𑁄𑀘𑀢𑀺. 𑀫𑀳𑀸𑀧𑀼𑀭𑀺𑀲𑀲𑁆𑀲 𑀓𑀺𑀭 𑀇𑀫𑀁 𑀮𑀓𑁆𑀔𑀡𑀁 𑀤𑀺𑀲𑁆𑀯𑀸 𑀭𑀸𑀚𑀽𑀦𑀁 𑀉𑀡𑁆𑀳𑀻𑀲𑀧𑀝𑁆𑀝𑀁 𑀅𑀓𑀁𑀲𑀼. 𑀅𑀬𑀁 𑀢𑀸𑀯 𑀏𑀓𑁄 𑀅𑀢𑁆𑀣𑁄. 𑀅𑀜𑁆𑀜𑁂 𑀧𑀦 𑀚𑀦𑀸 𑀅𑀧𑀭𑀺𑀧𑀼𑀡𑁆𑀡𑀲𑀻𑀲𑀸 𑀳𑁄𑀦𑁆𑀢𑀺, 𑀓𑁂𑀘𑀺 𑀓𑀧𑀺𑀲𑀻𑀲𑀸, 𑀓𑁂𑀘𑀺 𑀨𑀮𑀲𑀻𑀲𑀸, 𑀓𑁂𑀘𑀺 𑀅𑀝𑁆𑀞𑀺𑀲𑀻𑀲𑀸, 𑀓𑁂𑀘𑀺 𑀳𑀢𑁆𑀣𑀺𑀲𑀻𑀲𑀸, 𑀓𑁂𑀘𑀺 𑀢𑀼𑀫𑁆𑀩𑀲𑀻𑀲𑀸, 𑀓𑁂𑀘𑀺 𑀧𑀩𑁆𑀪𑀸𑀭𑀲𑀻𑀲𑀸. 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀦 𑀆𑀭𑀕𑁆𑀕𑁂𑀦 𑀯𑀝𑁆𑀝𑁂𑀢𑁆𑀯𑀸 𑀞𑀧𑀺𑀢𑀁 𑀯𑀺𑀬 𑀲𑀼𑀧𑀭𑀺𑀧𑀼𑀡𑁆𑀡𑀁 𑀉𑀤𑀓𑀧𑀼𑀩𑁆𑀩𑀼𑀴𑀲𑀤𑀺𑀲𑀁 𑀲𑀻𑀲𑀁 𑀳𑁄𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀦𑀬𑁂 𑀉𑀡𑁆𑀳𑀻𑀲𑀯𑁂𑀞𑀺𑀢𑀲𑀻𑀲𑁄 𑀯𑀺𑀬𑀸𑀢𑀺 𑀉𑀡𑁆𑀳𑀻𑀲𑀲𑀻𑀲𑁄. 𑀤𑀼𑀢𑀺𑀬𑀦𑀬𑁂 𑀉𑀡𑁆𑀳𑀻𑀲𑀁 𑀯𑀺𑀬 𑀲𑀩𑁆𑀩𑀢𑁆𑀣 𑀧𑀭𑀺𑀫𑀡𑁆𑀟𑀮𑀲𑀻𑀲𑁄𑀢𑀺 𑀉𑀡𑁆𑀳𑀻𑀲𑀲𑀻𑀲𑁄.

𑀯𑀺𑀧𑀲𑁆𑀲𑀻𑀲𑀫𑀜𑁆𑀜𑀸𑀯𑀡𑁆𑀡𑀦𑀸

𑁩𑁭. 𑀲𑀩𑁆𑀩𑀓𑀸𑀫𑁂𑀳𑀻𑀢𑀺 𑀇𑀤𑀁 𑀮𑀓𑁆𑀔𑀡𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 𑀧𑀘𑁆𑀙𑀸 𑀓𑀢𑀁 𑀯𑀺𑀬 𑀯𑀼𑀢𑁆𑀢𑀁, 𑀦 𑀧𑀦𑁂𑀯𑀁 𑀤𑀝𑁆𑀞𑀩𑁆𑀩𑀁. 𑀧𑀞𑀫𑀜𑁆𑀳𑀺 𑀢𑁂 𑀦𑁂𑀫𑀺𑀢𑁆𑀢𑀓𑁂 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀧𑀘𑁆𑀙𑀸 𑀮𑀓𑁆𑀔𑀡𑀧𑀭𑀺𑀕𑁆𑀕𑀡𑁆𑀳𑀦𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀲 𑀯𑀺𑀢𑁆𑀣𑀸𑀭𑁄 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀬𑀁 𑀯𑀼𑀢𑁆𑀢𑁄𑀬𑁂𑀯. 𑀧𑀸𑀬𑁂𑀦𑁆𑀢𑀻𑀢𑀺 𑀣𑀜𑁆𑀜𑀁 𑀧𑀸𑀬𑁂𑀦𑁆𑀢𑀺. 𑀢𑀲𑁆𑀲 𑀓𑀺𑀭 𑀦𑀺𑀤𑁆𑀤𑁄𑀲𑁂𑀦 𑀫𑀥𑀼𑀭𑁂𑀦 𑀔𑀻𑀭𑁂𑀦 𑀲𑀫𑀦𑁆𑀦𑀸𑀕𑀢𑀸 𑀲𑀝𑁆𑀞𑀺 𑀥𑀸𑀢𑀺𑀬𑁄 𑀉𑀧𑀝𑁆𑀞𑀸𑀧𑁂𑀲𑀺, 𑀢𑀣𑀸 𑀲𑁂𑀲𑀸𑀧𑀺 𑀢𑁂𑀲𑀼 𑀢𑁂𑀲𑀼 𑀓𑀫𑁆𑀫𑁂𑀲𑀼 𑀓𑀼𑀲𑀮𑀸 𑀲𑀝𑁆𑀞𑀺𑀲𑀝𑁆𑀞𑀺𑀬𑁂𑀯. 𑀢𑀸𑀲𑀁 𑀧𑁂𑀲𑀦𑀓𑀸𑀭𑀓𑁂 𑀲𑀝𑁆𑀞𑀺 𑀧𑀼𑀭𑀺𑀲𑁂, 𑀢𑀲𑁆𑀲 𑀢𑀲𑁆𑀲 𑀓𑀢𑀸𑀓𑀢𑀪𑀸𑀯𑀁 𑀲𑀮𑁆𑀮𑀓𑁆𑀔𑀡𑁂 𑀲𑀝𑁆𑀞𑀺 𑀅𑀫𑀘𑁆𑀘𑁂 𑀉𑀧𑀝𑁆𑀞𑀸𑀧𑁂𑀲𑀺. 𑀏𑀯𑀁 𑀘𑀢𑁆𑀢𑀸𑀭𑀺 𑀲𑀝𑁆𑀞𑀺𑀬𑁄 𑀇𑀢𑁆𑀣𑀻𑀦𑀁, 𑀤𑁆𑀯𑁂 𑀲𑀝𑁆𑀞𑀺𑀬𑁄 𑀧𑀼𑀭𑀺𑀲𑀸𑀦𑀦𑁆𑀢𑀺 𑀙 𑀲𑀝𑁆𑀞𑀺𑀬𑁄 𑀉𑀧𑀝𑁆𑀞𑀓𑀸𑀦𑀁𑀬𑁂𑀯 𑀅𑀳𑁂𑀲𑀼𑀁. 𑀲𑁂𑀢𑀘𑁆𑀙𑀢𑁆𑀢𑀦𑁆𑀢𑀺 𑀤𑀺𑀩𑁆𑀩𑀲𑁂𑀢𑀘𑁆𑀙𑀢𑁆𑀢𑀁. 𑀓𑀼𑀮𑀤𑀢𑁆𑀢𑀺𑀬𑀁 𑀧𑀦 𑀲𑀺𑀭𑀺𑀕𑀩𑁆𑀪𑁂𑀬𑁂𑀯 𑀢𑀺𑀝𑁆𑀞𑀢𑀺. 𑀫𑀸 𑀦𑀁 𑀲𑀻𑀢𑀁 𑀯𑀸𑀢𑀺𑀆𑀤𑀻𑀲𑀼 𑀫𑀸 𑀅𑀪𑀺𑀪𑀯𑀻𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁆𑀯𑀸𑀲𑁆𑀲𑀼𑀤𑀦𑁆𑀢𑀺 𑀲𑁄 𑀅𑀲𑁆𑀲𑀼𑀤𑀁. 𑀅𑀗𑁆𑀓𑁂𑀦𑁂𑀯 𑀅𑀗𑁆𑀓𑀦𑁆𑀢𑀺 𑀅𑀜𑁆𑀜𑀲𑁆𑀲 𑀩𑀸𑀳𑀼𑀦𑀸𑀯 𑀅𑀜𑁆𑀜𑀲𑁆𑀲 𑀩𑀸𑀳𑀼𑀁. 𑀅𑀜𑁆𑀜𑀲𑁆𑀲 𑀘 𑀅𑀁𑀲𑀓𑀽𑀝𑁂𑀦𑁂𑀯 ¶ 𑀅𑀜𑁆𑀜𑀲𑁆𑀲 𑀅𑀁𑀲𑀓𑀽𑀝𑀁. 𑀧𑀭𑀺𑀳𑀭𑀺𑀬𑀢𑀻𑀢𑀺 𑀦𑀻𑀬𑀢𑀺, 𑀲𑀫𑁆𑀧𑀸𑀧𑀺𑀬𑀢𑀻𑀢𑀺 𑀅𑀢𑁆𑀣𑁄.

𑁩𑁮. 𑀫𑀜𑁆𑀚𑀼𑀲𑁆𑀲𑀭𑁄𑀢𑀺 𑀅𑀔𑀭𑀲𑁆𑀲𑀭𑁄. 𑀯𑀕𑁆𑀕𑀼𑀲𑁆𑀲𑀭𑁄𑀢𑀺 𑀙𑁂𑀓𑀦𑀺𑀧𑀼𑀡𑀲𑁆𑀲𑀭𑁄. 𑀫𑀥𑀼𑀭𑀲𑁆𑀲𑀭𑁄𑀢𑀺 𑀲𑀸𑀢𑀲𑁆𑀲𑀭𑁄. 𑀧𑁂𑀫𑀦𑀺𑀬𑀲𑁆𑀲𑀭𑁄𑀢𑀺 𑀧𑁂𑀫𑀚𑀦𑀓𑀲𑁆𑀲𑀭𑁄. 𑀢𑀢𑁆𑀭𑀺𑀤𑀁 ¶ 𑀓𑀭𑀯𑀻𑀓𑀸𑀦𑀁 𑀫𑀥𑀼𑀭𑀲𑁆𑀲𑀭𑀢𑀸𑀬 𑁋 𑀓𑀭𑀯𑀻𑀓𑀲𑀓𑀼𑀡𑁂 𑀓𑀺𑀭 𑀫𑀥𑀼𑀭𑀭𑀲𑀁 𑀅𑀫𑁆𑀩𑀧𑀓𑁆𑀓𑀁 𑀫𑀼𑀔𑀢𑀼𑀡𑁆𑀟𑀓𑁂𑀦 𑀧𑀳𑀭𑀺𑀢𑁆𑀯𑀸 𑀧𑀕𑁆𑀖𑀭𑀺𑀢𑀭𑀲𑀁 𑀧𑀺𑀯𑀺𑀢𑁆𑀯𑀸 𑀧𑀓𑁆𑀔𑁂𑀦 ¶ 𑀢𑀸𑀮𑀁 𑀤𑀢𑁆𑀯𑀸 𑀯𑀺𑀓𑀽𑀚𑀫𑀸𑀦𑁂 𑀘𑀢𑀼𑀧𑁆𑀧𑀤𑀸 𑀫𑀢𑁆𑀢𑀸 𑀯𑀺𑀬 𑀮𑀴𑀺𑀢𑀼𑀁 𑀆𑀭𑀪𑀦𑁆𑀢𑀺. 𑀕𑁄𑀘𑀭𑀧𑀲𑀼𑀢𑀸𑀧𑀺 𑀘𑀢𑀼𑀧𑁆𑀧𑀤𑀸 𑀫𑀼𑀔𑀕𑀢𑀸𑀦𑀺 𑀢𑀺𑀡𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀢𑀁 𑀲𑀤𑁆𑀤𑀁 𑀲𑀼𑀡𑀦𑁆𑀢𑀺. 𑀯𑀸𑀴𑀫𑀺𑀕𑀸 𑀔𑀼𑀤𑁆𑀤𑀓𑀫𑀺𑀕𑁂 𑀅𑀦𑀼𑀩𑀦𑁆𑀥𑀫𑀸𑀦𑀸 𑀉𑀓𑁆𑀔𑀺𑀢𑁆𑀢𑀁 𑀧𑀸𑀤𑀁 𑀅𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀯 𑀢𑀺𑀝𑁆𑀞𑀦𑁆𑀢𑀺. 𑀅𑀦𑀼𑀩𑀤𑁆𑀥𑀫𑀺𑀕𑀸 𑀘 𑀫𑀭𑀡𑀪𑀬𑀁 𑀚𑀳𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀆𑀓𑀸𑀲𑁂 𑀧𑀓𑁆𑀔𑀦𑁆𑀤𑀸 𑀧𑀓𑁆𑀔𑀺𑀦𑁄𑀧𑀺 𑀧𑀓𑁆𑀔𑁂 𑀧𑀲𑀸𑀭𑁂𑀢𑁆𑀯𑀸 𑀢𑀁 𑀲𑀤𑁆𑀤𑀁 𑀲𑀼𑀡𑀫𑀸𑀦𑀸𑀯 𑀢𑀺𑀝𑁆𑀞𑀦𑁆𑀢𑀺. 𑀉𑀤𑀓𑁂 𑀫𑀘𑁆𑀙𑀸𑀧𑀺 𑀓𑀡𑁆𑀡𑀧𑀝𑀮𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀢𑀁 𑀲𑀤𑁆𑀤𑀁 𑀲𑀼𑀡𑀫𑀸𑀦𑀸𑀯 𑀢𑀺𑀝𑁆𑀞𑀦𑁆𑀢𑀺. 𑀏𑀯𑀁 𑀫𑀥𑀼𑀭𑀲𑁆𑀲𑀭𑀸 𑀓𑀭𑀯𑀻𑀓𑀸.

𑀅𑀲𑀦𑁆𑀥𑀺𑀫𑀺𑀢𑁆𑀢𑀸𑀧𑀺 𑀥𑀫𑁆𑀫𑀸𑀲𑁄𑀓𑀲𑁆𑀲 𑀤𑁂𑀯𑀻 𑁋 ‘‘𑀅𑀢𑁆𑀣𑀺 𑀦𑀼 𑀔𑁄, 𑀪𑀦𑁆𑀢𑁂, 𑀩𑀼𑀤𑁆𑀥𑀲𑁆𑀲𑀭𑁂𑀦 𑀲𑀤𑀺𑀲𑁄 𑀓𑀲𑁆𑀲𑀘𑀺 𑀲𑀭𑁄’’𑀢𑀺 𑀲𑀗𑁆𑀖𑀁 𑀧𑀼𑀘𑁆𑀙𑀺. 𑀅𑀢𑁆𑀣𑀺 𑀓𑀭𑀯𑀻𑀓𑀲𑀓𑀼𑀡𑀲𑁆𑀲𑀸𑀢𑀺. 𑀓𑀼𑀳𑀺𑀁, 𑀪𑀦𑁆𑀢𑁂, 𑀢𑁂 𑀲𑀓𑀼𑀡𑀸𑀢𑀺? 𑀳𑀺𑀫𑀯𑀦𑁆𑀢𑁂𑀢𑀺. 𑀲𑀸 𑀭𑀸𑀚𑀸𑀦𑀁 𑀆𑀳 𑁋 ‘‘𑀤𑁂𑀯, 𑀅𑀳𑀁 𑀓𑀭𑀯𑀻𑀓𑀲𑀓𑀼𑀡𑀁 𑀧𑀲𑁆𑀲𑀺𑀢𑀼𑀓𑀸𑀫𑀸𑀫𑁆𑀳𑀻’’𑀢𑀺. 𑀭𑀸𑀚𑀸 𑁋 ‘‘𑀇𑀫𑀲𑁆𑀫𑀺𑀁 𑀧𑀜𑁆𑀚𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀭𑀯𑀻𑀓𑁄 𑀆𑀕𑀘𑁆𑀙𑀢𑀽’’𑀢𑀺 𑀲𑀼𑀯𑀡𑁆𑀡𑀧𑀜𑁆𑀚𑀭𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀧𑀜𑁆𑀚𑀭𑁄 𑀕𑀦𑁆𑀢𑁆𑀯𑀸 𑀏𑀓𑀲𑁆𑀲 𑀓𑀭𑀯𑀻𑀓𑀲𑁆𑀲 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺. 𑀲𑁄 𑁋 ‘‘𑀭𑀸𑀚𑀸𑀡𑀸𑀬 𑀆𑀕𑀢𑁄 𑀧𑀜𑁆𑀚𑀭𑁄, 𑀦 𑀲𑀓𑁆𑀓𑀸 𑀦 𑀕𑀦𑁆𑀢𑀼’’𑀦𑁆𑀢𑀺 𑀢𑀢𑁆𑀣 𑀦𑀺𑀲𑀻𑀤𑀺. 𑀧𑀜𑁆𑀚𑀭𑁄 𑀆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀧𑀼𑀭𑀢𑁄 𑀅𑀝𑁆𑀞𑀸𑀲𑀺. 𑀦 𑀓𑀭𑀯𑀻𑀓𑀲𑀤𑁆𑀤𑀁 𑀓𑀸𑀭𑀸𑀧𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀅𑀣 𑀭𑀸𑀚𑀸 𑁋 ‘‘𑀓𑀣𑀁, 𑀪𑀡𑁂, 𑀇𑀫𑁂 𑀲𑀤𑁆𑀤𑀁 𑀦 𑀓𑀭𑁄𑀦𑁆𑀢𑀻’’𑀢𑀺 𑀆𑀳. 𑀜𑀸𑀢𑀓𑁂 𑀅𑀤𑀺𑀲𑁆𑀯𑀸 𑀤𑁂𑀯𑀸𑀢𑀺. 𑀅𑀣 𑀦𑀁 𑀭𑀸𑀚𑀸 𑀆𑀤𑀸𑀲𑁂𑀳𑀺 𑀧𑀭𑀺𑀓𑁆𑀔𑀺𑀧𑀸𑀧𑁂𑀲𑀺. 𑀲𑁄 𑀅𑀢𑁆𑀢𑀦𑁄 𑀙𑀸𑀬𑀁 𑀤𑀺𑀲𑁆𑀯𑀸 𑁋 ‘‘𑀜𑀸𑀢𑀓𑀸 𑀫𑁂 𑀆𑀕𑀢𑀸’’𑀢𑀺 𑀫𑀜𑁆𑀜𑀫𑀸𑀦𑁄 𑀧𑀓𑁆𑀔𑁂𑀦 𑀢𑀸𑀮𑀁 𑀤𑀢𑁆𑀯𑀸 𑀫𑀥𑀼𑀭𑀲𑁆𑀲𑀭𑁂𑀦 𑀫𑀡𑀺𑀯𑀁𑀲𑀁 𑀥𑀫𑀫𑀸𑀦𑁄 𑀯𑀺𑀬 𑀯𑀺𑀭𑀯𑀺. 𑀲𑀓𑀮𑀦𑀕𑀭𑁂 𑀫𑀦𑀼𑀲𑁆𑀲𑀸 𑀫𑀢𑁆𑀢𑀸 𑀯𑀺𑀬 𑀮𑀴𑀺𑀁𑀲𑀼. 𑀅𑀲𑀦𑁆𑀥𑀺𑀫𑀺𑀢𑁆𑀢𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀲𑁆𑀲 𑀢𑀸𑀯 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲 𑀏𑀯𑀁 𑀫𑀥𑀼𑀭𑁄 𑀲𑀤𑁆𑀤𑁄, 𑀓𑀻𑀤𑀺𑀲𑁄 𑀦𑀼 𑀔𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀺𑀭𑀺𑀧𑀢𑁆𑀢𑀲𑁆𑀲 𑀪𑀕𑀯𑀢𑁄 𑀲𑀤𑁆𑀤𑁄 𑀅𑀳𑁄𑀲𑀻’’𑀢𑀺 𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀧𑀻𑀢𑀺𑀁 𑀅𑀯𑀺𑀚𑀳𑀺𑀢𑁆𑀯𑀸 𑀲𑀢𑁆𑀢𑀳𑀺 𑀚𑀗𑁆𑀖𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀏𑀯𑀁 𑀫𑀥𑀼𑀭𑁄 𑀓𑀺𑀭 ¶ 𑀓𑀭𑀯𑀻𑀓𑀲𑀤𑁆𑀤𑁄𑀢𑀺. 𑀢𑀢𑁄 𑀧𑀦 𑀲𑀢𑀪𑀸𑀕𑁂𑀦 𑀲𑀳𑀲𑁆𑀲𑀪𑀸𑀕𑁂𑀦 𑀘 𑀫𑀥𑀼𑀭𑀢𑀭𑁄 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀲𑀤𑁆𑀤𑁄 𑀅𑀳𑁄𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁩𑁯. 𑀓𑀫𑁆𑀫𑀯𑀺𑀧𑀸𑀓𑀚𑀦𑁆𑀢𑀺 𑀦 𑀪𑀸𑀯𑀦𑀸𑀫𑀬𑀁, 𑀓𑀫𑁆𑀫𑀯𑀺𑀧𑀸𑀓𑀯𑀲𑁂𑀦 𑀧𑀦 𑀤𑁂𑀯𑀢𑀸𑀦𑀁 𑀘𑀓𑁆𑀔𑀼𑀲𑀤𑀺𑀲𑀫𑁂𑀯 𑀫𑀁𑀲𑀘𑀓𑁆𑀔𑀼 𑀅𑀳𑁄𑀲𑀺 ¶ , 𑀬𑁂𑀦 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀢𑀺𑀮𑀯𑀸𑀳𑁂 𑀧𑀓𑁆𑀔𑀺𑀢𑁆𑀢𑀁 𑀏𑀓𑀢𑀺𑀮𑀫𑁆𑀧𑀺 𑀅𑀬𑀁 𑀲𑁄𑀢𑀺 𑀉𑀤𑁆𑀥𑀭𑀺𑀢𑁆𑀯𑀸 𑀤𑀸𑀢𑀼𑀁 𑀲𑀓𑁆𑀓𑁄𑀢𑀺.

𑁪𑁦. 𑀯𑀺𑀧𑀲𑁆𑀲𑀻𑀢𑀺 𑀏𑀢𑁆𑀣 𑀅𑀬𑀁 𑀯𑀘𑀦𑀢𑁆𑀣𑁄, 𑀅𑀦𑁆𑀢𑀭𑀦𑁆𑀢𑀭𑀸 𑀦𑀺𑀫𑀻𑀮𑀚𑀦𑀺𑀢𑀦𑁆𑀥𑀓𑀸𑀭𑀯𑀺𑀭𑀳𑁂𑀦 𑀯𑀺𑀲𑀼𑀤𑁆𑀥𑀁 𑀧𑀲𑁆𑀲𑀢𑀺, 𑀯𑀺𑀯𑀝𑁂𑀳𑀺 𑀘 𑀅𑀓𑁆𑀔𑀻𑀳𑀺 𑀧𑀲𑁆𑀲𑀢𑀻𑀢𑀺 𑀯𑀺𑀧𑀲𑁆𑀲𑀻; 𑀤𑀼𑀢𑀺𑀬𑀯𑀸𑀭𑁂 𑀯𑀺𑀘𑁂𑀬𑁆𑀬 𑀯𑀺𑀘𑁂𑀬𑁆𑀬 𑀧𑀲𑁆𑀲𑀢𑀻𑀢𑀺 𑀯𑀺𑀧𑀲𑁆𑀲𑀻; 𑀯𑀺𑀘𑀺𑀦𑀺𑀢𑁆𑀯𑀸 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑀅𑀢𑁆𑀣𑁂 𑀧𑀦𑀸𑀬𑀢𑀻𑀢𑀺 𑀅𑀢𑁆𑀣𑁂 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺, 𑀦𑀬𑀢𑀺 𑀯𑀸 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀤𑀺𑀯𑀲𑀁 𑀓𑀺𑀭 ¶ 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀢𑁆𑀣𑁂 𑀅𑀦𑀼𑀲𑀸𑀲𑀦𑁆𑀢𑀲𑁆𑀲 𑀭𑀜𑁆𑀜𑁄 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀫𑀳𑀸𑀧𑀼𑀭𑀺𑀲𑀁 𑀆𑀦𑁂𑀢𑁆𑀯𑀸 𑀳𑀢𑁆𑀣𑁂 𑀞𑀧𑀬𑀺𑀁𑀲𑀼. 𑀢𑀲𑁆𑀲 𑀢𑀁 𑀅𑀗𑁆𑀓𑁂𑀓𑀢𑁆𑀯𑀸 𑀉𑀧𑀮𑀸𑀴𑀬𑀫𑀸𑀦𑀲𑁆𑀲𑁂𑀯 𑀅𑀫𑀘𑁆𑀘𑀸 𑀲𑀸𑀫𑀺𑀓𑀁 𑀅𑀲𑁆𑀲𑀸𑀫𑀺𑀓𑀁 𑀅𑀓𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀅𑀦𑀢𑁆𑀢𑀫𑀦𑀲𑀤𑁆𑀤𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀭𑀸𑀚𑀸 𑁋 ‘‘𑀓𑀺𑀫𑁂𑀢𑀁, 𑀉𑀧𑀥𑀸𑀭𑁂𑀣𑀸’’𑀢𑀺 𑀆𑀳. 𑀉𑀧𑀥𑀸𑀭𑀺𑀬𑀫𑀸𑀦𑀸 𑀅𑀜𑁆𑀜𑀁 𑀅𑀤𑀺𑀲𑁆𑀯𑀸 𑁋 ‘‘𑀅𑀟𑁆𑀟𑀲𑁆𑀲 𑀤𑀼𑀩𑁆𑀩𑀺𑀦𑀺𑀘𑁆𑀙𑀺𑀢𑀢𑁆𑀢𑀸 𑀏𑀯𑀁 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀦 𑀲𑀸𑀫𑀺𑀓𑀁𑀬𑁂𑀯 𑀲𑀸𑀫𑀺𑀓𑀁 𑀓𑀢𑁆𑀯𑀸 ‘‘𑀜𑀢𑁆𑀯𑀸 𑀦𑀼 𑀔𑁄 𑀓𑀼𑀫𑀸𑀭𑁄 𑀏𑀯𑀁 𑀓𑀭𑁄𑀢𑀻’’𑀢𑀺 𑀯𑀻𑀫𑀁𑀲𑀦𑁆𑀢𑀸 𑀧𑀼𑀦 𑀲𑀸𑀫𑀺𑀓𑀁 𑀅𑀲𑁆𑀲𑀸𑀫𑀺𑀓𑀁 𑀅𑀓𑀁𑀲𑀼. 𑀧𑀼𑀦𑀧𑀺 𑀩𑁄𑀥𑀺𑀲𑀢𑁆𑀢𑁄 𑀢𑀣𑁂𑀯 𑀲𑀤𑁆𑀤𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀅𑀣 𑀭𑀸𑀚𑀸 𑁋 ‘‘𑀚𑀸𑀦𑀸𑀢𑀺 𑀫𑀳𑀸𑀧𑀼𑀭𑀺𑀲𑁄’’𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀅𑀧𑁆𑀧𑀫𑀢𑁆𑀢𑁄 𑀅𑀳𑁄𑀲𑀺. 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀯𑀺𑀘𑁂𑀬𑁆𑀬 𑀯𑀺𑀘𑁂𑀬𑁆𑀬 𑀓𑀼𑀫𑀸𑀭𑁄 𑀅𑀢𑁆𑀣𑁂 𑀧𑀦𑀸𑀬𑀢𑀻’’𑀢𑀺.

𑁪𑁨. 𑀯𑀲𑁆𑀲𑀺𑀓𑀦𑁆𑀢𑀺𑀆𑀤𑀻𑀲𑀼 𑀬𑀢𑁆𑀣 𑀲𑀼𑀔𑀁 𑀳𑁄𑀢𑀺 𑀯𑀲𑁆𑀲𑀓𑀸𑀮𑁂 𑀯𑀲𑀺𑀢𑀼𑀁, 𑀅𑀬𑀁 𑀯𑀲𑁆𑀲𑀺𑀓𑁄. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄 𑀯𑀲𑁆𑀲𑀸𑀯𑀸𑀲𑁄 𑀯𑀲𑁆𑀲𑀁, 𑀯𑀲𑁆𑀲𑀁 𑀅𑀭𑀳𑀢𑀻𑀢𑀺 𑀯𑀲𑁆𑀲𑀺𑀓𑁄. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 𑀯𑀲𑁆𑀲𑀺𑀓𑁄 𑀧𑀸𑀲𑀸𑀤𑁄 𑀦𑀸𑀢𑀺𑀉𑀘𑁆𑀘𑁄 𑀳𑁄𑀢𑀺, 𑀦𑀸𑀢𑀺𑀦𑀻𑀘𑁄, 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀦𑀺𑀧𑀺𑀲𑁆𑀲 𑀦𑀸𑀢𑀺𑀩𑀳𑀽𑀦𑀺 𑀦𑀸𑀢𑀺𑀢𑀦𑀽𑀦𑀺, 𑀪𑀽𑀫𑀢𑁆𑀣𑀭𑀡𑀧𑀘𑁆𑀘𑀢𑁆𑀣𑀭𑀡𑀔𑀚𑁆𑀚𑀪𑁄𑀚𑁆𑀚𑀸𑀦𑀺𑀧𑁂𑀢𑁆𑀣 𑀫𑀺𑀲𑁆𑀲𑀓𑀸𑀦𑁂𑀯 𑀯𑀝𑁆𑀝𑀦𑁆𑀢𑀺. 𑀳𑁂𑀫𑀦𑁆𑀢𑀺𑀓𑁂 𑀣𑀫𑁆𑀪𑀸𑀧𑀺 𑀪𑀺𑀢𑁆𑀢𑀺𑀬𑁄𑀧𑀺 𑀦𑀻𑀘𑀸 𑀳𑁄𑀦𑁆𑀢𑀺, 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀦𑀺 𑀢𑀦𑀼𑀓𑀸𑀦𑀺 𑀲𑀼𑀔𑀼𑀫𑀘𑁆𑀙𑀺𑀤𑁆𑀤𑀸𑀦𑀺, 𑀉𑀡𑁆𑀳𑀧𑁆𑀧𑀯𑁂𑀲𑀦𑀢𑁆𑀣𑀸𑀬 𑀪𑀺𑀢𑁆𑀢𑀺𑀦𑀺𑀬𑀽𑀳𑀸𑀦𑀺 𑀦𑀻𑀳𑀭𑀺𑀬𑀦𑁆𑀢𑀺. 𑀪𑀽𑀫𑀢𑁆𑀣𑀭𑀡𑀧𑀘𑁆𑀘𑀢𑁆𑀣𑀭𑀡𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸𑀦𑀺 𑀧𑀦𑁂𑀢𑁆𑀣 𑀉𑀡𑁆𑀳𑀯𑀺𑀭𑀺𑀬𑀸𑀦𑀺 ¶ 𑀓𑀫𑁆𑀩𑀮𑀸𑀤𑀻𑀦𑀺 𑀯𑀝𑁆𑀝𑀦𑁆𑀢𑀺. 𑀔𑀚𑁆𑀚𑀪𑁄𑀚𑁆𑀚𑀁 𑀲𑀺𑀦𑀺𑀤𑁆𑀥𑀁 𑀓𑀝𑀼𑀓𑀲𑀦𑁆𑀦𑀺𑀲𑁆𑀲𑀺𑀢𑀁 𑀦𑀺𑀭𑀼𑀤𑀓𑀲𑀦𑁆𑀦𑀺𑀲𑁆𑀲𑀺𑀢𑀜𑁆𑀘. 𑀕𑀺𑀫𑁆𑀳𑀺𑀓𑁂 𑀣𑀫𑁆𑀪𑀸𑀧𑀺 𑀪𑀺𑀢𑁆𑀢𑀺𑀬𑁄𑀧𑀺 𑀉𑀘𑁆𑀘𑀸 𑀳𑁄𑀦𑁆𑀢𑀺, 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀦𑀺 𑀧𑀦𑁂𑀢𑁆𑀣 𑀩𑀳𑀽𑀦𑀺 𑀯𑀺𑀧𑀼𑀮𑀚𑀸𑀢𑀸𑀦𑀺 𑀳𑁄𑀦𑁆𑀢𑀺, 𑀪𑀽𑀫𑀢𑁆𑀣𑀭𑀡𑀸𑀤𑀻𑀦𑀺 𑀤𑀼𑀓𑀽𑀮𑀫𑀬𑀸𑀦𑀺 𑀯𑀝𑁆𑀝𑀦𑁆𑀢𑀺. 𑀔𑀚𑁆𑀚𑀪𑁄𑀚𑁆𑀚𑀸𑀦𑀺 𑀫𑀥𑀼𑀭𑀲𑀲𑀦𑁆𑀦𑀺𑀲𑁆𑀲𑀺𑀢𑀪𑀭𑀺𑀢𑀸𑀦𑀺. 𑀯𑀸𑀢𑀧𑀸𑀦𑀲𑀫𑀻𑀧𑁂𑀲𑀼 𑀘𑁂𑀢𑁆𑀣 ¶ 𑀦𑀯 𑀘𑀸𑀝𑀺𑀬𑁄 𑀞𑀧𑁂𑀢𑁆𑀯𑀸 𑀉𑀤𑀓𑀲𑁆𑀲 𑀧𑀽𑀭𑁂𑀢𑁆𑀯𑀸 𑀦𑀻𑀮𑀼𑀧𑁆𑀧𑀮𑀸𑀤𑀻𑀳𑀺 𑀲𑀜𑁆𑀙𑀸𑀤𑁂𑀦𑁆𑀢𑀺. 𑀢𑁂𑀲𑀼 𑀢𑁂𑀲𑀼 𑀧𑀤𑁂𑀲𑁂𑀲𑀼 𑀉𑀤𑀓𑀬𑀦𑁆𑀢𑀸𑀦𑀺 𑀓𑀭𑁄𑀦𑁆𑀢𑀺, 𑀬𑁂𑀳𑀺 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀯𑀺𑀬 𑀉𑀤𑀓𑀥𑀸𑀭𑀸 𑀦𑀺𑀓𑁆𑀔𑀫𑀦𑁆𑀢𑀺.

𑀦𑀺𑀧𑁆𑀧𑀼𑀭𑀺𑀲𑁂𑀳𑀻𑀢𑀺 𑀧𑀼𑀭𑀺𑀲𑀯𑀺𑀭𑀳𑀺𑀢𑁂𑀳𑀺. 𑀦 𑀓𑁂𑀯𑀮𑀜𑁆𑀘𑁂𑀢𑁆𑀣 𑀢𑀽𑀭𑀺𑀬𑀸𑀦𑁂𑀯 𑀦𑀺𑀧𑁆𑀧𑀼𑀭𑀺𑀲𑀸𑀦𑀺, 𑀲𑀩𑁆𑀩𑀝𑁆𑀞𑀸𑀦𑀸𑀦𑀺𑀧𑀺 𑀦𑀺𑀧𑁆𑀧𑀼𑀭𑀺𑀲𑀸𑀦𑁂𑀯, 𑀤𑁄𑀯𑀸𑀭𑀺𑀓𑀸𑀧𑀺 𑀇𑀢𑁆𑀣𑀺𑀬𑁄𑀯, 𑀦𑀳𑀸𑀧𑀦𑀸𑀤𑀺𑀧𑀭𑀺𑀓𑀫𑁆𑀫𑀓𑀭𑀸𑀧𑀺 𑀇𑀢𑁆𑀣𑀺𑀬𑁄𑀯. 𑀭𑀸𑀚𑀸 𑀓𑀺𑀭 𑁋 ‘‘𑀢𑀣𑀸𑀭𑀽𑀧𑀁 𑀇𑀲𑁆𑀲𑀭𑀺𑀬𑀲𑀼𑀔𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑀲𑁆𑀲 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀧𑀼𑀭𑀺𑀲𑀸𑀲𑀗𑁆𑀓𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀸 𑀫𑁂 𑀧𑀼𑀢𑁆𑀢𑀲𑁆𑀲 𑀫𑀸 𑀅𑀳𑁄𑀲𑀻’’𑀢𑀺 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀇𑀢𑁆𑀣𑀺𑀬𑁄𑀯 𑀞𑀧𑁂𑀲𑀻𑀢𑀺.

𑀧𑀞𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀚𑀺𑀡𑁆𑀡𑀧𑀼𑀭𑀺𑀲𑀯𑀡𑁆𑀡𑀦𑀸

𑁪𑁩. 𑀤𑀼𑀢𑀺𑀬𑀪𑀸𑀡𑀯𑀸𑀭𑁂 ¶ 𑀕𑁄𑀧𑀸𑀦𑀲𑀺𑀯𑀗𑁆𑀓𑀦𑁆𑀢𑀺 𑀕𑁄𑀧𑀸𑀦𑀲𑀻 𑀯𑀺𑀬 𑀯𑀗𑁆𑀓𑀁. 𑀪𑁄𑀕𑁆𑀕𑀦𑁆𑀢𑀺 𑀔𑀦𑁆𑀥𑁂, 𑀓𑀝𑀺𑀬𑀁, 𑀚𑀸𑀡𑀽𑀲𑀽𑀢𑀺 𑀢𑀻𑀲𑀼 𑀞𑀸𑀦𑁂𑀲𑀼 𑀪𑁄𑀕𑁆𑀕𑀯𑀗𑁆𑀓𑀁. 𑀤𑀡𑁆𑀟𑀧𑀭𑀸𑀬𑀦𑀦𑁆𑀢𑀺 𑀤𑀡𑁆𑀟𑀕𑀢𑀺𑀓𑀁 𑀤𑀡𑁆𑀟𑀧𑀝𑀺𑀲𑀭𑀡𑀁. 𑀆𑀢𑀼𑀭𑀦𑁆𑀢𑀺 𑀚𑀭𑀸𑀢𑀼𑀭𑀁. 𑀕𑀢𑀬𑁄𑀩𑁆𑀩𑀦𑀦𑁆𑀢𑀺 𑀅𑀢𑀺𑀓𑁆𑀓𑀦𑁆𑀢𑀬𑁄𑀩𑁆𑀩𑀦𑀁 𑀧𑀘𑁆𑀙𑀺𑀫𑀯𑀬𑁂 𑀞𑀺𑀢𑀁. 𑀤𑀺𑀲𑁆𑀯𑀸𑀢𑀺 𑀅𑀟𑁆𑀠𑀬𑁄𑀚𑀦𑀧𑁆𑀧𑀫𑀸𑀡𑁂𑀦 𑀩𑀮𑀓𑀸𑀬𑁂𑀦 𑀧𑀭𑀺𑀯𑀼𑀢𑁄 𑀲𑀼𑀲𑀁𑀯𑀺𑀳𑀺𑀢𑀸𑀭𑀓𑁆𑀔𑁄𑀧𑀺 𑀕𑀘𑁆𑀙𑀦𑁆𑀢𑁄 𑀬𑀤𑀸 𑀭𑀣𑁄 𑀧𑀼𑀭𑀢𑁄 𑀳𑁄𑀢𑀺, 𑀧𑀘𑁆𑀙𑀸 𑀩𑀮𑀓𑀸𑀬𑁄, 𑀢𑀸𑀤𑀺𑀲𑁂 𑀑𑀓𑀸𑀲𑁂 𑀲𑀼𑀤𑁆𑀥𑀸𑀯𑀸𑀲𑀔𑀻𑀡𑀸𑀲𑀯𑀩𑁆𑀭𑀳𑁆𑀫𑁂𑀳𑀺 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀭𑀣𑀲𑁆𑀲 𑀧𑀼𑀭𑀢𑁄𑀯 𑀤𑀲𑁆𑀲𑀺𑀢𑀁, 𑀢𑀁 𑀧𑀼𑀭𑀺𑀲𑀁 𑀧𑀲𑁆𑀲𑀺𑀢𑁆𑀯𑀸. 𑀲𑀼𑀤𑁆𑀥𑀸𑀯𑀸𑀲𑀸 𑀓𑀺𑀭 𑁋 ‘‘𑀫𑀳𑀸𑀧𑀼𑀭𑀺𑀲𑁄 𑀧𑀗𑁆𑀓𑁂 𑀕𑀚𑁄 𑀯𑀺𑀬 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀮𑀕𑁆𑀕𑁄, 𑀲𑀢𑀺𑀫𑀲𑁆𑀲 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀸’’𑀢𑀺 𑀢𑀁 𑀤𑀲𑁆𑀲𑁂𑀲𑀼𑀁. 𑀏𑀯𑀁 𑀤𑀲𑁆𑀲𑀺𑀢𑀜𑁆𑀘 𑀢𑀁 𑀩𑁄𑀥𑀺𑀲𑀢𑁆𑀢𑁄 𑀘𑁂𑀯 𑀧𑀲𑁆𑀲𑀢𑀺 𑀲𑀸𑀭𑀣𑀺 𑀘. 𑀩𑁆𑀭𑀳𑁆𑀫𑀸𑀦𑁄 𑀳𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀧𑁆𑀧𑀫𑀸𑀤𑀢𑁆𑀣𑀁 𑀲𑀸𑀭𑀣𑀺𑀲𑁆𑀲 𑀘 𑀓𑀣𑀸𑀲𑀮𑁆𑀮𑀸𑀧𑀢𑁆𑀣𑀁 𑀢𑀁 𑀤𑀲𑁆𑀲𑁂𑀲𑀼𑀁. 𑀓𑀺𑀁 𑀧𑀦𑁂𑀲𑁄𑀢𑀺 ‘‘𑀏𑀲𑁄 𑀚𑀺𑀡𑁆𑀡𑁄𑀢𑀺 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺, 𑀦𑀸𑀳𑀁, 𑀪𑁄 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑀁 𑀅𑀤𑁆𑀤𑀲’’𑀦𑁆𑀢𑀺 𑀧𑀼𑀘𑁆𑀙𑀺.

𑀢𑁂𑀦 ¶ 𑀳𑀻𑀢𑀺 𑀬𑀤𑀺 𑀫𑀬𑁆𑀳𑀫𑁆𑀧𑀺 𑀏𑀯𑀭𑀽𑀧𑁂𑀳𑀺 𑀓𑁂𑀲𑁂𑀳𑀺 𑀏𑀯𑀭𑀽𑀧𑁂𑀦 𑀘 𑀓𑀸𑀬𑁂𑀦 𑀪𑀯𑀺𑀢𑀩𑁆𑀩𑀁, 𑀢𑁂𑀦 𑀳𑀺 𑀲𑀫𑁆𑀫 𑀲𑀸𑀭𑀣𑀺. 𑀅𑀮𑀁 𑀤𑀸𑀦𑀚𑁆𑀚 𑀉𑀬𑁆𑀬𑀸𑀦𑀪𑀽𑀫𑀺𑀬𑀸𑀢𑀺 𑁋 ‘‘𑀅𑀚𑁆𑀚 𑀉𑀬𑁆𑀬𑀸𑀦𑀪𑀽𑀫𑀺𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀕𑀘𑁆𑀙𑀸𑀫, 𑀅𑀮𑀁 𑀢𑀸𑀬 𑀉𑀬𑁆𑀬𑀸𑀦𑀪𑀽𑀫𑀺𑀬𑀸𑀢𑀺 𑀲𑀁𑀯𑀺𑀕𑁆𑀕𑀳𑀤𑀬𑁄 𑀲𑀁𑀯𑁂𑀕𑀸𑀦𑀼𑀭𑀽𑀧𑀫𑀸𑀳. 𑀅𑀦𑁆𑀢𑁂𑀧𑀼𑀭𑀁 𑀕𑀢𑁄𑀢𑀺 𑀇𑀢𑁆𑀣𑀺𑀚𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀺𑀭𑀺𑀕𑀩𑁆𑀪𑁂 𑀏𑀓𑀓𑁄𑀯 𑀦𑀺𑀲𑀺𑀦𑁆𑀦𑁄. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑀸𑀬 𑀚𑀸𑀢𑀺𑀬𑀸 𑀲𑀢𑀺 𑀚𑀭𑀸 𑀧𑀜𑁆𑀜𑀸𑀬𑀢𑀺, 𑀲𑀸 𑀚𑀸𑀢𑀺 𑀥𑀺𑀭𑀢𑁆𑀣𑀼 ¶ 𑀥𑀺𑀓𑁆𑀓𑀢𑀸 𑀅𑀢𑁆𑀣𑀼, 𑀚𑀺𑀕𑀼𑀘𑁆𑀙𑀸𑀫𑁂𑀢𑀁 𑀚𑀸𑀢𑀺𑀦𑁆𑀢𑀺, 𑀚𑀸𑀢𑀺𑀬𑀸 𑀫𑀽𑀮𑀁 𑀔𑀡𑀦𑁆𑀢𑁄 𑀦𑀺𑀲𑀻𑀤𑀺, 𑀧𑀞𑀫𑁂𑀦 𑀲𑀮𑁆𑀮𑁂𑀦 𑀳𑀤𑀬𑁂 𑀯𑀺𑀤𑁆𑀥𑁄 𑀯𑀺𑀬.

𑁪𑁫. 𑀲𑀸𑀭𑀣𑀺𑀁 𑀆𑀫𑀦𑁆𑀢𑀸𑀧𑁂𑀢𑁆𑀯𑀸𑀢𑀺 𑀭𑀸𑀚𑀸 𑀓𑀺𑀭 𑀦𑁂𑀫𑀺𑀢𑁆𑀢𑀓𑁂𑀳𑀺 𑀓𑀣𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀑𑀳𑀺𑀢𑀲𑁄𑀢𑁄 𑀯𑀺𑀘𑀭𑀢𑀺, 𑀲𑁄 ‘‘𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀦𑀺𑀯𑀢𑁆𑀢𑁄’’𑀢𑀺 𑀲𑀼𑀢𑁆𑀯𑀸 𑀲𑀸𑀭𑀣𑀺𑀁 𑀆𑀫𑀦𑁆𑀢𑀸𑀧𑁂𑀲𑀺. 𑀫𑀸 𑀳𑁂𑀯 𑀔𑁄𑀢𑀺𑀆𑀤𑀻𑀲𑀼 𑀭𑀚𑁆𑀚𑀁 𑀓𑀸𑀭𑁂𑀢𑀼, 𑀫𑀸 𑀧𑀩𑁆𑀩𑀚𑀢𑀼, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀘𑀦𑀁 𑀫𑀸 𑀲𑀘𑁆𑀘𑀁 𑀳𑁄𑀢𑀽𑀢𑀺 𑀏𑀯𑀁 𑀘𑀺𑀦𑁆𑀢𑁂𑀲𑀻𑀢𑀺 𑀅𑀢𑁆𑀣𑁄.

𑀩𑁆𑀬𑀸𑀥𑀺𑀧𑀼𑀭𑀺𑀲𑀯𑀡𑁆𑀡𑀦𑀸

𑁪𑁭. 𑀅𑀤𑁆𑀤𑀲 𑀔𑁄𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀼𑀤𑁆𑀥𑀸𑀯𑀸𑀲𑁂𑀳𑀺 𑀤𑀲𑁆𑀲𑀺𑀢𑀁 𑀅𑀤𑁆𑀤𑀲. 𑀆𑀩𑀸𑀥𑀺𑀓𑀦𑁆𑀢𑀺 𑀇𑀭𑀺𑀬𑀸𑀧𑀣𑀪𑀜𑁆𑀚𑀦𑀓𑁂𑀦 𑀯𑀺𑀲𑀪𑀸𑀕𑀩𑀸𑀥𑁂𑀦 𑀆𑀩𑀸𑀥𑀺𑀓𑀁. 𑀤𑀼𑀓𑁆𑀔𑀺𑀢𑀦𑁆𑀢𑀺 𑀭𑁄𑀕𑀤𑀼𑀓𑁆𑀔𑁂𑀦 𑀤𑀼𑀓𑁆𑀔𑀺𑀢𑀁. 𑀩𑀸𑀴𑁆𑀳𑀕𑀺𑀮𑀸𑀦𑀦𑁆𑀢𑀺 𑀅𑀥𑀺𑀫𑀢𑁆𑀢𑀕𑀺𑀮𑀸𑀦𑀁. 𑀧𑀮𑀺𑀧𑀦𑁆𑀦𑀦𑁆𑀢𑀺 𑀦𑀺𑀫𑀼𑀕𑁆𑀕𑀁. 𑀚𑀭𑀸 𑀧𑀜𑁆𑀜𑀸𑀬𑀺𑀲𑁆𑀲𑀢𑀺 𑀩𑁆𑀬𑀸𑀥𑀺 𑀧𑀜𑁆𑀜𑀸𑀬𑀺𑀲𑁆𑀲𑀢𑀻𑀢𑀺 ¶ 𑀇𑀥𑀸𑀧𑀺 𑀬𑀸𑀬 𑀚𑀸𑀢𑀺𑀬𑀸 𑀲𑀢𑀺 𑀇𑀤𑀁 𑀤𑁆𑀯𑀬𑀁 𑀧𑀜𑁆𑀜𑀸𑀬𑀢𑀺, 𑀥𑀺𑀓𑁆𑀓𑀢𑀸 𑀲𑀸 𑀚𑀸𑀢𑀺, 𑀅𑀚𑀸𑀢𑀁 𑀔𑁂𑀫𑀦𑁆𑀢𑀺 𑀚𑀸𑀢𑀺𑀬𑀸 𑀫𑀽𑀮𑀁 𑀔𑀡𑀦𑁆𑀢𑁄 𑀦𑀺𑀲𑀻𑀤𑀺, 𑀤𑀼𑀢𑀺𑀬𑁂𑀦 𑀲𑀮𑁆𑀮𑁂𑀦 𑀯𑀺𑀤𑁆𑀥𑁄 𑀯𑀺𑀬.

𑀓𑀸𑀮𑀗𑁆𑀓𑀢𑀧𑀼𑀭𑀺𑀲𑀯𑀡𑁆𑀡𑀦𑀸

𑁫𑁦. 𑀯𑀺𑀮𑀸𑀢𑀦𑁆𑀢𑀺 𑀲𑀺𑀯𑀺𑀓𑀁. 𑀧𑁂𑀢𑀦𑁆𑀢𑀺 𑀇𑀢𑁄 𑀧𑀝𑀺𑀕𑀢𑀁. 𑀓𑀸𑀮𑀗𑁆𑀓𑀢𑀦𑁆𑀢𑀺 𑀓𑀢𑀓𑀸𑀮𑀁, 𑀬𑀢𑁆𑀢𑀓𑀁 𑀢𑁂𑀦 𑀓𑀸𑀮𑀁 𑀚𑀻𑀯𑀺𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀓𑀢𑁆𑀯𑀸 𑀦𑀺𑀝𑁆𑀞𑀧𑁂𑀢𑁆𑀯𑀸 𑀫𑀢𑀦𑁆𑀢𑀺 𑀅𑀢𑁆𑀣𑁄. 𑀇𑀫𑀫𑁆𑀧𑀺𑀲𑁆𑀲 𑀧𑀼𑀭𑀺𑀫𑀦𑀬𑁂𑀦𑁂𑀯 𑀩𑁆𑀭𑀳𑁆𑀫𑀸𑀦𑁄 𑀤𑀲𑁆𑀲𑁂𑀲𑀼𑀁. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀇𑀥𑀸𑀧𑀺 𑀬𑀸𑀬 𑀚𑀸𑀢𑀺𑀬𑀸 𑀲𑀢𑀺 𑀇𑀤𑀁 𑀢𑀬𑀁 𑀧𑀜𑁆𑀜𑀸𑀬𑀢𑀺, 𑀥𑀺𑀓𑁆𑀓𑀢𑀸 𑀲𑀸 𑀚𑀸𑀢𑀺, 𑀅𑀚𑀸𑀢𑀁 𑀔𑁂𑀫𑀦𑁆𑀢𑀺 𑀚𑀸𑀢𑀺𑀬𑀸 𑀫𑀽𑀮𑀁 𑀔𑀡𑀦𑁆𑀢𑁄 𑀦𑀺𑀲𑀻𑀤𑀺, 𑀢𑀢𑀺𑀬𑁂𑀦 𑀲𑀮𑁆𑀮𑁂𑀦 𑀯𑀺𑀤𑁆𑀥𑁄 𑀯𑀺𑀬.

𑀧𑀩𑁆𑀩𑀚𑀺𑀢𑀯𑀡𑁆𑀡𑀦𑀸

𑁫𑁨. 𑀪𑀡𑁆𑀟𑀼𑀦𑁆𑀢𑀺 ¶ 𑀫𑀼𑀡𑁆𑀟𑀁. 𑀇𑀫𑀫𑁆𑀧𑀺𑀲𑁆𑀲 𑀧𑀼𑀭𑀺𑀫𑀦𑀬𑁂𑀦𑁂𑀯 𑀩𑁆𑀭𑀳𑁆𑀫𑀸𑀦𑁄 𑀤𑀲𑁆𑀲𑁂𑀲𑀼𑀁. 𑀲𑀸𑀥𑀼 𑀥𑀫𑁆𑀫𑀘𑀭𑀺𑀬𑀸𑀢𑀺𑀆𑀤𑀻𑀲𑀼 𑀅𑀬𑀁 𑀤𑁂𑀯 𑀥𑀫𑁆𑀫𑀘𑀭𑀡𑀪𑀸𑀯𑁄 𑀲𑀸𑀥𑀽𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁄𑀢𑀺 𑀏𑀯𑀁 𑀏𑀓𑀫𑁂𑀓𑀲𑁆𑀲 𑀧𑀤𑀲𑁆𑀲 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀩𑁆𑀩𑀸𑀦𑀺 𑀘𑁂𑀢𑀸𑀦𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀯𑁂𑀯𑀘𑀦𑀸𑀦𑁂𑀯. 𑀅𑀯𑀲𑀸𑀦𑁂 𑀧𑀦 𑀅𑀯𑀺𑀳𑀺𑀁𑀲𑀸𑀢𑀺 𑀓𑀭𑀼𑀡𑀸𑀬 𑀧𑀼𑀩𑁆𑀩𑀪𑀸𑀕𑁄. 𑀅𑀦𑀼𑀓𑀫𑁆𑀧𑀸𑀢𑀺 𑀫𑁂𑀢𑁆𑀢𑀸𑀬 𑀧𑀼𑀩𑁆𑀩𑀪𑀸𑀕𑁄. 𑀢𑁂𑀦𑀳𑀻𑀢𑀺 𑀉𑀬𑁆𑀬𑁄𑀚𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀧𑀩𑁆𑀩𑀚𑀺𑀢𑀁 𑀳𑀺𑀲𑁆𑀲 𑀤𑀺𑀲𑁆𑀯𑀸 𑀘𑀺𑀢𑁆𑀢𑀁 𑀧𑀩𑁆𑀩𑀚𑁆𑀚𑀸𑀬 𑀦𑀺𑀦𑁆𑀦𑀁 𑀚𑀸𑀢𑀁. 𑀅𑀣 𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀲𑀸𑀭𑀣𑀺𑀁 𑀉𑀬𑁆𑀬𑁄𑀚𑁂𑀦𑁆𑀢𑁄 𑀢𑁂𑀦 𑀳𑀻𑀢𑀺𑀆𑀤𑀺𑀫𑀸𑀳.

𑀩𑁄𑀥𑀺𑀲𑀢𑁆𑀢𑀧𑀩𑁆𑀩𑀚𑁆𑀚𑀸𑀯𑀡𑁆𑀡𑀦𑀸

𑁫𑁪. 𑀅𑀣 ¶ 𑀔𑁄, 𑀪𑀺𑀓𑁆𑀔𑀯𑁂𑀢𑀺 𑁋 ‘‘𑀧𑀩𑁆𑀩𑀚𑀺𑀢𑀲𑁆𑀲 𑀲𑀸𑀥𑀼 𑀥𑀫𑁆𑀫𑀘𑀭𑀺𑀬𑀸’’𑀢𑀺𑀆𑀤𑀻𑀦𑀺 𑀘 𑀅𑀜𑁆𑀜𑀜𑁆𑀘 𑀩𑀳𑀼𑀁 𑀫𑀳𑀸𑀚𑀦𑀓𑀸𑀬𑁂𑀦 𑀭𑀓𑁆𑀔𑀺𑀬𑀫𑀸𑀦𑀲𑁆𑀲 𑀧𑀼𑀢𑁆𑀢𑀤𑀸𑀭𑀲𑀫𑁆𑀩𑀸𑀥𑁂 𑀖𑀭𑁂 𑀯𑀲𑀢𑁄 𑀆𑀤𑀻𑀦𑀯𑀧𑀝𑀺𑀲𑀁𑀬𑀼𑀢𑁆𑀢𑀜𑁆𑀘𑁂𑀯 𑀫𑀺𑀕𑀪𑀽𑀢𑁂𑀦 𑀘𑁂𑀢𑀲𑀸 𑀬𑀣𑀸𑀲𑀼𑀔𑀁 𑀯𑀦𑁂 𑀯𑀲𑀢𑁄 𑀧𑀩𑁆𑀩𑀚𑀺𑀢𑀲𑁆𑀲 𑀯𑀺𑀯𑁂𑀓𑀸𑀦𑀺𑀲𑀁𑀲𑀧𑀝𑀺𑀲𑀁𑀬𑀼𑀢𑁆𑀢𑀜𑁆𑀘 𑀥𑀫𑁆𑀫𑀺𑀁 𑀓𑀣𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑁋 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀲𑀺.

𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀢𑀁 𑀦𑀸𑀫 𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑀸𑀦𑀁 𑀯𑀁𑀲𑁄𑀯 𑀢𑀦𑁆𑀢𑀺𑀬𑁂𑀯 𑀧𑀯𑁂𑀡𑀻𑀬𑁂𑀯. 𑀅𑀜𑁆𑀜𑁂𑀧𑀺 𑀘 𑀩𑁄𑀥𑀺𑀲𑀢𑁆𑀢𑀸 𑀬𑀣𑀸 𑀅𑀬𑀁 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄, 𑀏𑀯𑀁 𑀘𑀺𑀭𑀲𑁆𑀲𑀁 𑀘𑀺𑀭𑀲𑁆𑀲𑀁 𑀧𑀲𑁆𑀲𑀦𑁆𑀢𑀺. 𑀅𑀫𑁆𑀳𑀸𑀓𑀁 𑀧𑀦 𑀩𑁄𑀥𑀺𑀲𑀢𑁆𑀢𑁄 𑀘𑀢𑁆𑀢𑀸𑀭𑀺𑀧𑀺 𑀏𑀓𑀤𑀺𑀯𑀲𑀁𑀬𑁂𑀯 𑀤𑀺𑀲𑁆𑀯𑀸 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁄𑀫𑀸𑀦𑀤𑀻𑀢𑀻𑀭𑁂 ¶ 𑀧𑀩𑁆𑀩𑀚𑀺𑀢𑁄. 𑀢𑁂𑀦𑁂𑀯 𑀭𑀸𑀚𑀕𑀳𑀁 𑀧𑀢𑁆𑀯𑀸 𑀢𑀢𑁆𑀣 𑀭𑀜𑁆𑀜𑀸 𑀩𑀺𑀫𑁆𑀩𑀺𑀲𑀸𑀭𑁂𑀦 𑁋 ‘‘𑀓𑀺𑀫𑀢𑁆𑀣𑀁, 𑀧𑀡𑁆𑀟𑀺𑀢, 𑀧𑀩𑁆𑀩𑀚𑀺𑀢𑁄𑀲𑀻𑀢𑀺’’ 𑀧𑀼𑀝𑁆𑀞𑁄 𑀆𑀳 𑁋

‘‘𑀚𑀺𑀡𑁆𑀡𑀜𑁆𑀘 𑀤𑀺𑀲𑁆𑀯𑀸 𑀤𑀼𑀔𑀺𑀢𑀜𑁆𑀘 𑀩𑁆𑀬𑀸𑀥𑀺𑀢𑀁,

𑀫𑀢𑀜𑁆𑀘 𑀤𑀺𑀲𑁆𑀯𑀸 𑀕𑀢𑀫𑀸𑀬𑀼𑀲𑀗𑁆𑀔𑀬𑀁;

𑀓𑀸𑀲𑀸𑀬𑀯𑀢𑁆𑀣𑀁 𑀧𑀩𑁆𑀩𑀚𑀺𑀢𑀜𑁆𑀘 𑀤𑀺𑀲𑁆𑀯𑀸,

𑀢𑀲𑁆𑀫𑀸 𑀅𑀳𑀁 𑀧𑀩𑁆𑀩𑀚𑀺𑀢𑁄𑀫𑁆𑀳𑀺 𑀭𑀸𑀚𑀸’’𑀢𑀺.

𑀫𑀳𑀸𑀚𑀦𑀓𑀸𑀬𑀅𑀦𑀼𑀧𑀩𑁆𑀩𑀚𑁆𑀚𑀸𑀯𑀡𑁆𑀡𑀦𑀸

𑁫𑁫. 𑀲𑀼𑀢𑁆𑀯𑀸𑀦 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀲𑀼𑀢𑁆𑀯𑀸 𑀏𑀢𑀤𑀳𑁄𑀲𑀺. 𑀑𑀭𑀓𑁄𑀢𑀺 𑀊𑀦𑀓𑁄 𑀮𑀸𑀫𑀓𑁄. 𑀅𑀦𑀼𑀧𑀩𑁆𑀩𑀚𑀺𑀁𑀲𑀽𑀢𑀺 𑀅𑀦𑀼𑀧𑀩𑁆𑀩𑀚𑀺𑀢𑀸𑀦𑀺 ¶ . 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀬𑀣𑀸 𑀧𑀭𑀢𑁄 𑀔𑀡𑁆𑀟𑀢𑀺𑀲𑁆𑀲𑀸𑀦𑀁 𑀅𑀦𑀼𑀧𑀩𑁆𑀩𑀚𑁆𑀚𑀸𑀬 𑁋 ‘‘𑀩𑀦𑁆𑀥𑀼𑀫𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀦𑀺𑀓𑁆𑀔𑀫𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀦 𑀯𑀼𑀢𑁆𑀢𑀦𑁆𑀢𑀺? 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀼𑀢𑀢𑁆𑀢𑀸. 𑀏𑀢𑁂 𑀓𑀺𑀭 𑀲𑀩𑁆𑀩𑁂𑀧𑀺 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀉𑀧𑀝𑁆𑀞𑀸𑀓𑀧𑀭𑀺𑀲𑀸𑀯, 𑀢𑁂 𑀧𑀸𑀢𑁄𑀯 𑀉𑀧𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀓𑀼𑀫𑀸𑀭𑀁 𑀅𑀤𑀺𑀲𑁆𑀯𑀸 𑀧𑀸𑀢𑀭𑀸𑀲𑀢𑁆𑀣𑀸𑀬 𑀕𑀦𑁆𑀢𑁆𑀯𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑀸 𑀆𑀕𑀫𑁆𑀫 ‘‘𑀓𑀼𑀳𑀺𑀁 𑀓𑀼𑀫𑀸𑀭𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀉𑀬𑁆𑀬𑀸𑀦𑀪𑀽𑀫𑀺𑀁 𑀕𑀢𑁄’’𑀢𑀺 𑀲𑀼𑀢𑁆𑀯𑀸 ‘‘𑀢𑀢𑁆𑀣𑁂𑀯 𑀦𑀁 𑀤𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀓𑁆𑀔𑀫𑀦𑁆𑀢𑀸 𑀦𑀺𑀯𑀢𑁆𑀢𑀫𑀸𑀦𑀁 𑀲𑀸𑀭𑀣𑀺𑀁 𑀤𑀺𑀲𑁆𑀯𑀸 𑁋 ‘‘𑀓𑀼𑀫𑀸𑀭𑁄 𑀧𑀩𑁆𑀩𑀚𑀺𑀢𑁄’’𑀢𑀺 𑀘𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀼𑀢𑀝𑁆𑀞𑀸𑀦𑁂𑀬𑁂𑀯 𑀲𑀩𑁆𑀩𑀸𑀪𑀭𑀡𑀸𑀦𑀺 𑀑𑀫𑀼𑀜𑁆𑀘𑀺𑀢𑁆𑀯𑀸 𑀅𑀦𑁆𑀢𑀭𑀸𑀧𑀡𑀢𑁄 𑀓𑀸𑀲𑀸𑀯𑀧𑀻𑀢𑀸𑀦𑀺 𑀯𑀢𑁆𑀣𑀸𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀼. 𑀇𑀢𑀺 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺𑀦𑀕𑀭𑁂 𑀲𑀼𑀢𑀢𑁆𑀢𑀸 𑀏𑀢𑁆𑀣 𑁋 ‘‘𑀩𑀦𑁆𑀥𑀼𑀫𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀦𑀺𑀓𑁆𑀔𑀫𑀺𑀢𑁆𑀯𑀸’’𑀢𑀺 𑀦 𑀯𑀼𑀢𑁆𑀢𑀁.

𑀘𑀸𑀭𑀺𑀓𑀁 ¶ 𑀘𑀭𑀢𑀻𑀢𑀺 𑀕𑀢𑀕𑀢𑀝𑁆𑀞𑀸𑀦𑁂 𑀫𑀳𑀸𑀫𑀡𑁆𑀟𑀧𑀁 𑀓𑀢𑁆𑀯𑀸 𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀆𑀕𑀫𑁆𑀫 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑀺𑀢𑁄 𑀚𑀦𑀲𑁆𑀲 𑀆𑀬𑀸𑀘𑀺𑀢𑀪𑀺𑀓𑁆𑀔𑀫𑁂𑀯 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀘𑀸𑀭𑀺𑀓𑀁 𑀘𑀭𑀺.

𑀆𑀓𑀺𑀡𑁆𑀡𑁄𑀢𑀺 𑀇𑀫𑀺𑀦𑀸 𑀕𑀡𑁂𑀦 𑀧𑀭𑀺𑀯𑀼𑀢𑁄. 𑀅𑀬𑀁 𑀧𑀦 𑀯𑀺𑀢𑀓𑁆𑀓𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀤𑀸 𑀉𑀧𑁆𑀧𑀦𑁆𑀦𑁄𑀢𑀺? 𑀲𑁆𑀯𑁂 𑀯𑀺𑀲𑀸𑀔𑀧𑀼𑀡𑁆𑀡𑀫𑀸 𑀪𑀯𑀺𑀲𑁆𑀲𑀢𑀻𑀢𑀺 𑀘𑀸𑀢𑀼𑀤𑁆𑀤𑀲𑀻𑀤𑀺𑀯𑀲𑁂. 𑀢𑀤𑀸 𑀓𑀺𑀭 𑀲𑁄 𑁋 ‘‘𑀬𑀣𑁂𑀯 𑀫𑀁 𑀇𑀫𑁂 𑀧𑀼𑀩𑁆𑀩𑁂 𑀕𑀺𑀳𑀺𑀪𑀽𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀘𑀭𑀦𑁆𑀢𑀺, 𑀇𑀤𑀸𑀦𑀺𑀧𑀺 𑀢𑀣𑁂𑀯, 𑀓𑀺𑀁 𑀇𑀫𑀺𑀦𑀸 𑀕𑀡𑁂𑀦𑀸’’𑀢𑀺 𑀕𑀡𑀲𑀗𑁆𑀕𑀡𑀺𑀓𑀸𑀬 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 ‘‘𑀅𑀚𑁆𑀚𑁂𑀯 𑀕𑀘𑁆𑀙𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀦 ‘‘𑀅𑀚𑁆𑀚 𑀅𑀯𑁂𑀮𑀸, 𑀲𑀘𑁂 𑀇𑀤𑀸𑀦𑀺 𑀕𑀫𑀺𑀲𑁆𑀲𑀸𑀫𑀺, 𑀲𑀩𑁆𑀩𑁂𑀯 𑀇𑀫𑁂 𑀚𑀸𑀦𑀺𑀲𑁆𑀲𑀦𑁆𑀢𑀺, 𑀲𑁆𑀯𑁂𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀁 𑀤𑀺𑀯𑀲𑀜𑁆𑀘 𑀉𑀭𑀼𑀯𑁂𑀮𑀕𑀸𑀫𑀲𑀤𑀺𑀲𑁂 𑀕𑀸𑀫𑁂 𑀕𑀸𑀫𑀯𑀸𑀲𑀺𑀦𑁄 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑀬𑀺𑀁𑀲𑀼. 𑀢𑁂 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀫𑁆𑀧𑀺 𑀢𑁂𑀲𑀁 ¶ 𑀧𑀩𑁆𑀩𑀚𑀺𑀢𑀸𑀦𑀁 𑀫𑀳𑀸𑀧𑀼𑀭𑀺𑀲𑀲𑁆𑀲 𑀘 𑀧𑀸𑀬𑀸𑀲𑀫𑁂𑀯 𑀧𑀝𑀺𑀬𑀸𑀤𑀬𑀺𑀁𑀲𑀼. 𑀅𑀣 𑀫𑀳𑀸𑀧𑀼𑀭𑀺𑀲𑁄 𑀧𑀼𑀦𑀤𑀺𑀯𑀲𑁂 𑀢𑀲𑁆𑀫𑀺𑀁𑀬𑁂𑀯 𑀕𑀸𑀫𑁂 𑀢𑁂𑀳𑀺 𑀧𑀩𑁆𑀩𑀚𑀺𑀢𑁂𑀳𑀺 𑀲𑀤𑁆𑀥𑀺𑀁 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀫𑁂𑀯 𑀅𑀕𑀫𑀸𑀲𑀺. 𑀢𑀢𑁆𑀣 𑀢𑁂 𑀧𑀩𑁆𑀩𑀚𑀺𑀢𑀸 𑀫𑀳𑀸𑀧𑀼𑀭𑀺𑀲𑀲𑁆𑀲 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀦𑀺 𑀧𑀯𑀺𑀝𑁆𑀞𑀸. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄.

‘‘𑀞𑀺𑀢𑁂 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂, 𑀲𑀦𑁆𑀦𑀺𑀲𑀻𑀯𑁂𑀲𑀼 𑀧𑀓𑁆𑀔𑀺𑀲𑀼;

𑀲𑀡𑀢𑁂𑀯 𑀩𑁆𑀭𑀳𑀸𑀭𑀜𑁆𑀜𑀁, 𑀢𑀁 𑀪𑀬𑀁 𑀧𑀝𑀺𑀪𑀸𑀢𑀺 𑀫’’𑀦𑁆𑀢𑀺. (𑀲𑀁. 𑀦𑀺. 𑁧.𑁧𑁫);

𑀏𑀯𑀭𑀽𑀧𑁂 ¶ 𑀅𑀯𑀺𑀯𑁂𑀓𑀸𑀭𑀸𑀫𑀸𑀦𑀁 𑀪𑀬𑀓𑀸𑀮𑁂 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀤𑀭𑀣𑀓𑀸𑀮𑁂𑀬𑁂𑀯 𑁋 ‘‘𑀅𑀬𑀁 𑀓𑀸𑀮𑁄’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀸𑀬 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀅𑀜𑁆𑀜𑀤𑀸𑀧𑀺 𑀘 𑀢𑀲𑁆𑀫𑀺𑀁 𑀞𑀸𑀦𑁂 𑀯𑀺𑀘𑀭𑀦𑁆𑀢𑁄 𑀩𑁄𑀥𑀺𑀫𑀡𑁆𑀟𑀁 𑀧𑀲𑁆𑀲𑀢𑀺, 𑀦𑀺𑀲𑀻𑀤𑀺𑀢𑀼𑀁 𑀧𑀦𑀲𑁆𑀲 𑀘𑀺𑀢𑁆𑀢𑀁 𑀦 𑀦𑀫𑀺𑀢𑀧𑀼𑀩𑁆𑀩𑀁. 𑀢𑀁 𑀤𑀺𑀯𑀲𑀁 𑀧𑀦𑀲𑁆𑀲 𑀜𑀸𑀡𑀁 𑀧𑀭𑀺𑀧𑀸𑀓𑀕𑀢𑀁, 𑀢𑀲𑁆𑀫𑀸 𑀅𑀮𑀗𑁆𑀓𑀢𑀁 𑀩𑁄𑀥𑀺𑀫𑀡𑁆𑀟𑀁 𑀤𑀺𑀲𑁆𑀯𑀸 𑀆𑀭𑁄𑀳𑀦𑀢𑁆𑀣𑀸𑀬 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁. 𑀲𑁄 𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁂𑀦 𑀉𑀧𑀕𑀫𑁆𑀫 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀪𑀸𑀕𑁂 𑀘𑀼𑀤𑁆𑀤𑀲𑀳𑀢𑁆𑀣𑀁 𑀧𑀮𑁆𑀮𑀗𑁆𑀓𑀁 𑀧𑀜𑁆𑀜𑀧𑁂𑀢𑁆𑀯𑀸 𑀘𑀢𑀼𑀭𑀗𑁆𑀕𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑁋 ‘‘𑀬𑀸𑀯 𑀩𑀼𑀤𑁆𑀥𑁄 𑀦 𑀳𑁄𑀫𑀺, 𑀦 𑀢𑀸𑀯 𑀇𑀢𑁄 𑀯𑀼𑀝𑁆𑀞𑀳𑀸𑀫𑀻’’𑀢𑀺 𑀧𑀝𑀺𑀜𑁆𑀜𑀁 𑀓𑀢𑁆𑀯𑀸 𑀦𑀺𑀲𑀻𑀤𑀺. 𑀇𑀤𑀫𑀲𑁆𑀲 𑀯𑀽𑀧𑀓𑀸𑀲𑀁 𑀲𑀦𑁆𑀥𑀸𑀬 𑁋 ‘‘𑀏𑀓𑁄𑀯 𑀕𑀡𑀫𑁆𑀳𑀸 𑀯𑀽𑀧𑀓𑀝𑁆𑀞𑁄 𑀯𑀺𑀳𑀸𑀲𑀻’’𑀢𑀺 𑀯𑀼𑀢𑁆𑀢𑀁.

𑀅𑀜𑁆𑀜𑁂𑀦𑁂𑀯 ¶ 𑀢𑀸𑀦𑀻𑀢𑀺 𑀢𑁂 𑀓𑀺𑀭 𑀲𑀸𑀬𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 ‘‘𑀅𑀢𑀺𑀯𑀺𑀓𑀸𑀮𑁄 𑀚𑀸𑀢𑁄, 𑀉𑀧𑀥𑀸𑀭𑁂𑀣𑀸’’𑀢𑀺 𑀯𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀯𑀺𑀯𑀭𑀺𑀢𑁆𑀯𑀸 𑀢𑀁 𑀅𑀧𑀲𑁆𑀲𑀦𑁆𑀢𑀸𑀧𑀺 ‘‘𑀓𑀼𑀳𑀺𑀁 𑀕𑀢𑁄’’𑀢𑀺 𑀦𑀸𑀦𑀼𑀩𑀦𑁆𑀥𑀺𑀁𑀲𑀼, ‘‘𑀕𑀡𑀯𑀸𑀲𑁂 𑀦𑀺𑀩𑁆𑀩𑀺𑀦𑁆𑀦𑁄 𑀏𑀓𑁄 𑀯𑀺𑀳𑀭𑀺𑀢𑀼𑀓𑀸𑀫𑁄 𑀫𑀜𑁆𑀜𑁂 𑀫𑀳𑀸𑀧𑀼𑀭𑀺𑀲𑁄, 𑀩𑀼𑀤𑁆𑀥𑀪𑀽𑀢𑀁𑀬𑁂𑀯 𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀯𑀸 𑀅𑀦𑁆𑀢𑁄𑀚𑀫𑁆𑀩𑀼𑀤𑀻𑀧𑀸𑀪𑀺𑀫𑀼𑀔𑀸 𑀘𑀸𑀭𑀺𑀓𑀁 𑀧𑀓𑁆𑀓𑀦𑁆𑀢𑀸.

𑀩𑁄𑀥𑀺𑀲𑀢𑁆𑀢𑀅𑀪𑀺𑀯𑁂𑀲𑀯𑀡𑁆𑀡𑀦𑀸

𑁫𑁭. 𑀯𑀸𑀲𑀽𑀧𑀕𑀢𑀲𑁆𑀲𑀸𑀢𑀺 𑀩𑁄𑀥𑀺𑀫𑀡𑁆𑀟𑁂 𑀏𑀓𑀭𑀢𑁆𑀢𑀺𑀯𑀸𑀲𑀁 𑀉𑀧𑀕𑀢𑀲𑁆𑀲. 𑀭𑀳𑁄𑀕𑀢𑀲𑁆𑀲𑀸𑀢𑀺 𑀭𑀳𑀲𑀺 𑀕𑀢𑀲𑁆𑀲. 𑀧𑀝𑀺𑀲𑀮𑁆𑀮𑀻𑀦𑀲𑁆𑀲𑀸𑀢𑀺 𑀏𑀓𑀻𑀪𑀸𑀯𑀯𑀲𑁂𑀦 𑀦𑀺𑀮𑀻𑀦𑀲𑁆𑀲. 𑀓𑀺𑀘𑁆𑀙𑀦𑁆𑀢𑀺 𑀤𑀼𑀓𑁆𑀔𑀁. 𑀘𑀯𑀢𑀺 𑀘 𑀉𑀧𑀧𑀚𑁆𑀚𑀢𑀺 𑀘𑀸𑀢𑀺 𑀇𑀤𑀁 𑀤𑁆𑀯𑀬𑀁 𑀧𑀦 𑀅𑀧𑀭𑀸𑀧𑀭𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀚𑀭𑀸𑀫𑀭𑀡𑀲𑁆𑀲𑀸𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀧𑀩𑁆𑀩𑀚𑀦𑁆𑀢𑁄 𑀚𑀺𑀡𑁆𑀡𑀩𑁆𑀬𑀸𑀥𑀺𑀫𑀢𑁆𑀢𑁂𑀬𑁂𑀯 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀢𑁄, 𑀢𑀲𑁆𑀫𑀸𑀲𑁆𑀲 𑀚𑀭𑀸𑀫𑀭𑀡𑀫𑁂𑀯 𑀉𑀧𑀝𑁆𑀞𑀸𑀢𑀺. 𑀢𑁂𑀦𑁂𑀯𑀸𑀳 ¶ 𑁋 ‘‘𑀚𑀭𑀸𑀫𑀭𑀡𑀲𑁆𑀲𑀸’’𑀢𑀺. 𑀇𑀢𑀺 𑀚𑀭𑀸𑀫𑀭𑀡𑀁 𑀫𑀽𑀮𑀁 𑀓𑀢𑁆𑀯𑀸 𑀅𑀪𑀺𑀦𑀺𑀯𑀺𑀝𑁆𑀞𑀲𑁆𑀲 𑀪𑀯𑀕𑁆𑀕𑀢𑁄 𑀑𑀢𑀭𑀦𑁆𑀢𑀲𑁆𑀲 𑀯𑀺𑀬 𑁋 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺.

𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀢𑀺 𑀉𑀧𑀸𑀬𑀫𑀦𑀲𑀺𑀓𑀸𑀭𑀸 𑀧𑀣𑀫𑀦𑀲𑀺𑀓𑀸𑀭𑀸. 𑀅𑀦𑀺𑀘𑁆𑀘𑀸𑀤𑀻𑀦𑀺 𑀳𑀺 𑀅𑀦𑀺𑀘𑁆𑀘𑀸𑀤𑀺𑀢𑁄𑀯 𑀫𑀦𑀲𑀺𑀓𑀭𑁄𑀢𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀦𑀸𑀫 𑀳𑁄𑀢𑀺. 𑀅𑀬𑀜𑁆𑀘 𑁋 ‘‘𑀓𑀺𑀲𑁆𑀫𑀺𑀁 𑀦𑀼 𑀔𑁄 𑀲𑀢𑀺𑀚𑀸𑀢𑀺𑀆𑀤𑀻𑀦𑀺 𑀳𑁄𑀦𑁆𑀢𑀺, 𑀓𑀺𑀲𑁆𑀫𑀺𑀁 𑀅𑀲𑀢𑀺 𑀦 𑀳𑁄𑀦𑁆𑀢𑀻’’𑀢𑀺 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀢𑁂𑀲𑀁 𑀅𑀜𑁆𑀜𑀢𑀭𑁄 ¶ . 𑀢𑀲𑁆𑀫𑀸𑀲𑁆𑀲 𑀇𑀢𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸 𑀇𑀫𑀺𑀦𑀸 𑀉𑀧𑀸𑀬𑀫𑀦𑀲𑀺𑀓𑀸𑀭𑁂𑀦 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄, 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀜𑁆𑀜𑀸𑀬 𑀬𑀲𑁆𑀫𑀺𑀁 𑀲𑀢𑀺 𑀚𑀭𑀸𑀫𑀭𑀡𑀁 𑀳𑁄𑀢𑀺, 𑀢𑁂𑀦 𑀚𑀭𑀸𑀫𑀭𑀡𑀓𑀸𑀭𑀡𑁂𑀦 𑀲𑀤𑁆𑀥𑀺𑀁 𑀲𑀫𑀸𑀕𑀫𑁄 𑀅𑀳𑁄𑀲𑀺. 𑀓𑀺𑀁 𑀧𑀦 𑀢𑀦𑁆𑀢𑀺? 𑀚𑀸𑀢𑀺. 𑀢𑁂𑀦𑀸𑀳 𑁋 ‘‘𑀚𑀸𑀢𑀺𑀬𑀸 𑀔𑁄 𑀲𑀢𑀺 𑀚𑀭𑀸𑀫𑀭𑀡𑀁 𑀳𑁄𑀢𑀻’’𑀢𑀺. 𑀬𑀸 𑀘𑀸𑀬𑀁 𑀚𑀭𑀸𑀫𑀭𑀡𑀲𑁆𑀲 𑀓𑀸𑀭𑀡𑀧𑀭𑀺𑀕𑁆𑀕𑀸𑀳𑀺𑀓𑀸 𑀧𑀜𑁆𑀜𑀸, 𑀢𑀸𑀬 𑀲𑀤𑁆𑀥𑀺𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀫𑀸𑀕𑀫𑁄 𑀅𑀳𑁄𑀲𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀩𑁆𑀩𑀧𑀤𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀦𑀸𑀫𑀭𑀽𑀧𑁂 𑀔𑁄 𑀲𑀢𑀺 𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀢𑁆𑀣 𑀧𑀦 𑀲𑀗𑁆𑀔𑀸𑀭𑁂𑀲𑀼 𑀲𑀢𑀺 𑀯𑀺𑀜𑁆𑀜𑀸𑀡𑀦𑁆𑀢𑀺 𑀘, 𑀅𑀯𑀺𑀚𑁆𑀚𑀸𑀬 𑀲𑀢𑀺 𑀲𑀗𑁆𑀔𑀸𑀭𑀸𑀢𑀺 𑀘 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬, 𑀢𑀤𑀼𑀪𑀬𑀫𑁆𑀧𑀺 𑀦 𑀕𑀳𑀺𑀢𑀁. 𑀓𑀲𑁆𑀫𑀸? 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸 𑀳𑀺 𑀅𑀢𑀻𑀢𑁄 𑀪𑀯𑁄 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀬𑀁 𑀯𑀺𑀧𑀲𑁆𑀲𑀦𑀸 𑀦 𑀖𑀝𑀺𑀬𑀢𑀺. 𑀫𑀳𑀸𑀧𑀼𑀭𑀺𑀲𑁄 𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑁄𑀢𑀺. 𑀦𑀦𑀼 𑀘 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑁂𑀳𑀺 𑀅𑀤𑀺𑀝𑁆𑀞𑁂𑀳𑀺 𑀦 𑀲𑀓𑁆𑀓𑀸 𑀩𑀼𑀤𑁆𑀥𑁂𑀦 𑀪𑀯𑀺𑀢𑀼𑀦𑁆𑀢𑀺. 𑀲𑀘𑁆𑀘𑀁 𑀦 𑀲𑀓𑁆𑀓𑀸, 𑀇𑀫𑀺𑀦𑀸 𑀧𑀦 𑀢𑁂 𑀪𑀯𑀉𑀧𑀸𑀤𑀸𑀦𑀢𑀡𑁆𑀳𑀸𑀯𑀲𑁂𑀦𑁂𑀯 𑀤𑀺𑀝𑁆𑀞𑀸𑀢𑀺. 𑀇𑀫𑀲𑁆𑀫𑀺𑀁 𑀞𑀸𑀦𑁂 ¶ 𑀯𑀺𑀢𑁆𑀣𑀸𑀭𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸 𑀓𑀣𑁂𑀢𑀩𑁆𑀩𑀸. 𑀲𑀸 𑀧𑀦𑁂𑀲𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀓𑀣𑀺𑀢𑀸𑀯.

𑁫𑁮. 𑀧𑀘𑁆𑀘𑀼𑀤𑀸𑀯𑀢𑁆𑀢𑀢𑀻𑀢𑀺 𑀧𑀝𑀺𑀦𑀺𑀯𑀢𑁆𑀢𑀢𑀺. 𑀓𑀢𑀫𑀁 𑀧𑀦𑁂𑀢𑁆𑀣 𑀯𑀺𑀜𑁆𑀜𑀸𑀡𑀁 𑀧𑀘𑁆𑀘𑀼𑀤𑀸𑀯𑀢𑁆𑀢𑀢𑀻𑀢𑀺? 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀫𑁆𑀧𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀫𑁆𑀧𑀺. 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀧𑀘𑁆𑀘𑀬𑀢𑁄 𑀧𑀝𑀺𑀦𑀺𑀯𑀢𑁆𑀢𑀢𑀺, 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀆𑀭𑀫𑁆𑀫𑀡𑀢𑁄. 𑀉𑀪𑀬𑀫𑁆𑀧𑀺 𑀦𑀸𑀫𑀭𑀽𑀧𑀁 𑀦𑀸𑀢𑀺𑀓𑁆𑀓𑀫𑀢𑀺, 𑀦𑀸𑀫𑀭𑀽𑀧𑀢𑁄 𑀧𑀭𑀁 𑀦 𑀕𑀘𑁆𑀙𑀢𑀺. 𑀏𑀢𑁆𑀢𑀸𑀯𑀢𑀸 𑀚𑀸𑀬𑁂𑀣 𑀯𑀸𑀢𑀺𑀆𑀤𑀻𑀲𑀼 𑀯𑀺𑀜𑁆𑀜𑀸𑀡𑁂 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑁂 𑀳𑁄𑀦𑁆𑀢𑁂, 𑀦𑀸𑀫𑀭𑀽𑀧𑁂 𑀘 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁂 𑀳𑁄𑀦𑁆𑀢𑁂, 𑀤𑁆𑀯𑀻𑀲𑀼𑀧𑀺 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀲𑀼 𑀳𑁄𑀦𑁆𑀢𑁂𑀲𑀼 𑀏𑀢𑁆𑀢𑀓𑁂𑀦 𑀚𑀸𑀬𑁂𑀣 𑀯𑀸…𑀧𑁂… 𑀉𑀧𑀧𑀚𑁆𑀚𑁂𑀣 𑀯𑀸, 𑀇𑀢𑁄 𑀳𑀺 𑀧𑀭𑀁 𑀓𑀺𑀁 𑀅𑀜𑁆𑀜𑀁 𑀚𑀸𑀬𑁂𑀬𑁆𑀬 𑀯𑀸…𑀧𑁂… 𑀉𑀧𑀧𑀚𑁆𑀚𑁂𑀬𑁆𑀬 𑀯𑀸. 𑀦𑀦𑀼 𑀏𑀢𑀤𑁂𑀯 𑀚𑀸𑀬𑀢𑀺 𑀘…𑀧𑁂… 𑀉𑀧𑀧𑀚𑁆𑀚𑀢𑀺 𑀘𑀸𑀢𑀺? 𑀏𑀯𑀁 𑀲𑀤𑁆𑀥𑀺𑀁 𑀅𑀧𑀭𑀸𑀧𑀭𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀳𑀺 𑀧𑀜𑁆𑀘 𑀧𑀤𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀢𑀁 𑀏𑀢𑁆𑀢𑀸𑀯𑀢𑀸𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀦𑀺𑀬𑁆𑀬𑀸𑀢𑁂𑀦𑁆𑀢𑁄 𑁋 ‘‘𑀬𑀤𑀺𑀤𑀁 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀯𑀢𑁆𑀯𑀸 𑀢𑀢𑁄 𑀧𑀭𑀁 𑀅𑀦𑀼𑀮𑁄𑀫𑀧𑀘𑁆𑀘𑀬𑀸𑀓𑀸𑀭𑀯𑀲𑁂𑀦 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀫𑀽𑀮𑀁 ¶ 𑀆𑀬𑀢𑀺𑀫𑁆𑀧𑀺 𑀚𑀸𑀢𑀺𑀚𑀭𑀸𑀫𑀭𑀡𑀁 𑀤𑀲𑁆𑀲𑁂𑀢𑀼𑀁 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻𑀢𑀺 𑀲𑀓𑀮𑀲𑁆𑀲 𑀚𑀸𑀢𑀺𑀚𑀭𑀸𑀫𑀭𑀡𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸𑀤𑀺𑀪𑁂𑀤𑀲𑁆𑀲 𑀤𑀼𑀓𑁆𑀔𑀭𑀸𑀲𑀺𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺. 𑀇𑀢𑀺 𑀫𑀳𑀸𑀧𑀼𑀭𑀺𑀲𑁄 𑀲𑀓𑀮𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀁 𑀅𑀤𑁆𑀤𑀲.

𑁫𑁯. 𑀲𑀫𑀼𑀤𑀬𑁄 ¶ 𑀲𑀫𑀼𑀤𑀬𑁄𑀢𑀺 𑀔𑁄𑀢𑀺 𑀦𑀺𑀩𑁆𑀩𑀢𑁆𑀢𑀺 𑀦𑀺𑀩𑁆𑀩𑀢𑁆𑀢𑀻𑀢𑀺 𑀔𑁄. 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀽𑀢𑀺 𑀦 𑀅𑀦𑀼𑀲𑁆𑀲𑀼𑀢𑁂𑀲𑀼 𑀅𑀲𑁆𑀲𑀼𑀢𑀧𑀼𑀩𑁆𑀩𑁂𑀲𑀼. 𑀘𑀓𑁆𑀔𑀼𑀁 𑀉𑀤𑀧𑀸𑀤𑀻𑀢𑀺𑀆𑀤𑀻𑀲𑀼 𑀉𑀤𑀬𑀤𑀲𑁆𑀲𑀦𑀧𑀜𑁆𑀜𑀸𑀯𑁂𑀲𑀸. 𑀤𑀲𑁆𑀲𑀦𑀝𑁆𑀞𑁂𑀦 𑀘𑀓𑁆𑀔𑀼, 𑀜𑀸𑀢𑀓𑀭𑀡𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸, 𑀦𑀺𑀩𑁆𑀩𑀺𑀚𑁆𑀛𑀺𑀢𑁆𑀯𑀸 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀝𑁆𑀞𑁂𑀦 𑀯𑀺𑀚𑁆𑀚𑀸, 𑀑𑀪𑀸𑀲𑀝𑁆𑀞𑁂𑀦 𑀘 𑀆𑀮𑁄𑀓𑁄𑀢𑀺 𑀯𑀼𑀢𑁆𑀢𑀸. 𑀬𑀣𑀸𑀳 𑁋 ‘‘𑀘𑀓𑁆𑀔𑀼𑀁 𑀉𑀤𑀧𑀸𑀤𑀻𑀢𑀺 𑀤𑀲𑁆𑀲𑀦𑀝𑁆𑀞𑁂𑀦. 𑀜𑀸𑀡𑀁 𑀉𑀤𑀧𑀸𑀤𑀻𑀢𑀺 𑀜𑀸𑀢𑀝𑁆𑀞𑁂𑀦. 𑀧𑀜𑁆𑀜𑀸 𑀉𑀤𑀧𑀸𑀤𑀻𑀢𑀺 𑀧𑀚𑀸𑀦𑀦𑀝𑁆𑀞𑁂𑀦. 𑀯𑀺𑀚𑁆𑀚𑀸 𑀉𑀤𑀧𑀸𑀤𑀻𑀢𑀺 𑀧𑀝𑀺𑀯𑁂𑀥𑀝𑁆𑀞𑁂𑀦. 𑀆𑀮𑁄𑀓𑁄 𑀉𑀤𑀧𑀸𑀤𑀻𑀢𑀺 𑀑𑀪𑀸𑀲𑀝𑁆𑀞𑁂𑀦. 𑀘𑀓𑁆𑀔𑀼𑀥𑀫𑁆𑀫𑁄 𑀤𑀲𑁆𑀲𑀦𑀝𑁆𑀞𑁄 𑀅𑀢𑁆𑀣𑁄. 𑀜𑀸𑀡𑀥𑀫𑁆𑀫𑁄 𑀜𑀸𑀢𑀝𑁆𑀞𑁄 𑀅𑀢𑁆𑀣𑁄. 𑀧𑀜𑁆𑀜𑀸𑀥𑀫𑁆𑀫𑁄 𑀧𑀚𑀸𑀦𑀦𑀝𑁆𑀞𑁄 𑀅𑀢𑁆𑀣𑁄. 𑀯𑀺𑀚𑁆𑀚𑀸𑀥𑀫𑁆𑀫𑁄 𑀧𑀝𑀺𑀯𑁂𑀥𑀝𑁆𑀞𑁄 𑀅𑀢𑁆𑀣𑁄. 𑀆𑀮𑁄𑀓𑁄 𑀥𑀫𑁆𑀫𑁄 𑀑𑀪𑀸𑀲𑀝𑁆𑀞𑁄 𑀅𑀢𑁆𑀣𑁄’’𑀢𑀺 (𑀧𑀝𑀺. 𑀫. 𑁨.𑁩𑁯). 𑀏𑀢𑁆𑀢𑀓𑁂𑀳𑀺 𑀧𑀤𑁂𑀳𑀺 𑀓𑀺𑀁 ¶ 𑀓𑀣𑀺𑀢𑀦𑁆𑀢𑀺? 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀻𑀢𑀺 𑀧𑀘𑁆𑀘𑀬𑀲𑀜𑁆𑀚𑀸𑀦𑀦𑀫𑀢𑁆𑀢𑀁 𑀓𑀣𑀺𑀢𑀁. 𑀅𑀣𑀯𑀸 𑀯𑀻𑀣𑀺𑀧𑀝𑀺𑀧𑀦𑁆𑀦𑀸 𑀢𑀭𑀼𑀡𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸𑀢𑀺.

𑁬𑁧. 𑀅𑀥𑀺𑀕𑀢𑁄 𑀔𑁄 𑀫𑁆𑀬𑀸𑀬𑀦𑁆𑀢𑀺 𑀅𑀥𑀺𑀕𑀢𑁄 𑀔𑁄 𑀫𑁂 𑀅𑀬𑀁. 𑀫𑀕𑁆𑀕𑁄𑀢𑀺 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁄. 𑀩𑁄𑀥𑀸𑀬𑀸𑀢𑀺 𑀘𑀢𑀼𑀲𑀘𑁆𑀘𑀩𑀼𑀚𑁆𑀛𑀦𑀢𑁆𑀣𑀸𑀬, 𑀦𑀺𑀩𑁆𑀩𑀸𑀦𑀩𑀼𑀚𑁆𑀛𑀦𑀢𑁆𑀣𑀸𑀬 𑀏𑀯 𑀯𑀸. 𑀅𑀧𑀺 𑀘 𑀩𑀼𑀚𑁆𑀛𑀢𑀻𑀢𑀺 𑀩𑁄𑀥𑀺, 𑀅𑀭𑀺𑀬𑀫𑀕𑁆𑀕𑀲𑁆𑀲𑁂𑀢𑀁 𑀦𑀸𑀫𑀁, 𑀢𑀤𑀢𑁆𑀣𑀸𑀬𑀸𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀫𑀽𑀮𑀓𑁄 𑀳𑀺 𑀅𑀭𑀺𑀬𑀫𑀕𑁆𑀕𑁄𑀢𑀺. 𑀇𑀤𑀸𑀦𑀺 𑀢𑀁 𑀫𑀕𑁆𑀕𑀁 𑀦𑀺𑀬𑁆𑀬𑀸𑀢𑁂𑀦𑁆𑀢𑁄 𑁋 ‘‘𑀬𑀤𑀺𑀤𑀁 𑀦𑀸𑀫𑀭𑀽𑀧𑀦𑀺𑀭𑁄𑀥𑀸𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄𑀢𑀺𑀆𑀤𑀻𑀳𑀺 𑀧𑀘𑁆𑀘𑀢𑁆𑀢𑀧𑀤𑁂𑀳𑀺 𑀦𑀺𑀩𑁆𑀩𑀸𑀦𑀫𑁂𑀯 𑀓𑀣𑀺𑀢𑀁. 𑀇𑀢𑀺 𑀫𑀳𑀸𑀧𑀼𑀭𑀺𑀲𑁄 𑀲𑀓𑀮𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑀺𑀩𑁆𑀩𑀢𑁆𑀢𑀺𑀦𑀺𑀭𑁄𑀥𑀁 𑀅𑀤𑁆𑀤𑀲.

𑁬𑁨. 𑀦𑀺𑀭𑁄𑀥𑁄 𑀦𑀺𑀭𑁄𑀥𑁄𑀢𑀺 𑀔𑁄𑀢𑀺 𑀅𑀦𑀺𑀩𑁆𑀩𑀢𑁆𑀢𑀺 𑀅𑀦𑀺𑀩𑁆𑀩𑀢𑁆𑀢𑀺𑀢𑀺 𑀔𑁄. 𑀘𑀓𑁆𑀔𑀼𑀦𑁆𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀇𑀥 𑀧𑀦 𑀲𑀩𑁆𑀩𑁂𑀳𑁂𑀯 𑀏𑀢𑁂𑀳𑀺 𑀧𑀤𑁂𑀳𑀺 𑁋 ‘‘𑀇𑀫𑀲𑁆𑀫𑀺𑀁 𑀅𑀲𑀢𑀺 𑀇𑀤𑀁 𑀦 𑀳𑁄𑀢𑀻’’𑀢𑀺 𑀦𑀺𑀭𑁄𑀥𑀲𑀜𑁆𑀚𑀸𑀦𑀦𑀫𑀢𑁆𑀢𑀫𑁂𑀯 𑀓𑀣𑀺𑀢𑀁, 𑀅𑀣𑀯𑀸 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀩𑀮𑀯𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸𑀢𑀺.

𑁬𑁩. 𑀅𑀧𑀭𑁂𑀦 𑀲𑀫𑀬𑁂𑀦𑀸𑀢𑀺 𑀏𑀯𑀁 𑀧𑀘𑁆𑀘𑀬𑀜𑁆𑀘 𑀧𑀘𑁆𑀘𑀬𑀦𑀺𑀭𑁄𑀥𑀜𑁆𑀘 𑀯𑀺𑀤𑀺𑀢𑁆𑀯𑀸 𑀢𑀢𑁄 𑀅𑀧𑀭𑀪𑀸𑀕𑁂. 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀽𑀢𑀺 𑀉𑀧𑀸𑀤𑀸𑀦𑀲𑁆𑀲 𑀧𑀘𑁆𑀘𑀬𑀪𑀽𑀢𑁂𑀲𑀼 𑀔𑀦𑁆𑀥𑁂𑀲𑀼. 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀻𑀢𑀺 𑀢𑀫𑁂𑀯 𑀧𑀞𑀫𑀁 𑀤𑀺𑀝𑁆𑀞𑀁 𑀉𑀤𑀬𑀜𑁆𑀘 𑀯𑀬𑀜𑁆𑀘 𑀅𑀦𑀼𑀧𑀲𑁆𑀲𑀫𑀸𑀦𑁄. 𑀯𑀺𑀳𑀸𑀲𑀻𑀢𑀺 𑀲𑀺𑀔𑀸𑀧𑀢𑁆𑀢𑀁 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀁 𑀯𑀳𑀦𑁆𑀢𑁄 𑀯𑀺𑀳𑀭𑀺. 𑀇𑀤𑀁 𑀓𑀲𑁆𑀫𑀸 𑀯𑀼𑀢𑁆𑀢𑀁? 𑀲𑀩𑁆𑀩𑁂𑀬𑁂𑀯 𑀳𑀺 𑀧𑀽𑀭𑀺𑀢𑀧𑀸𑀭𑀫𑀺𑀦𑁄 𑀩𑁄𑀥𑀺𑀲𑀢𑁆𑀢𑀸 𑀧𑀘𑁆𑀙𑀺𑀫𑀪𑀯𑁂 𑀧𑀼𑀢𑁆𑀢𑀲𑁆𑀲 𑀚𑀸𑀢𑀤𑀺𑀯𑀲𑁂 ¶ ¶ 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀧𑀥𑀸𑀦𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀩𑁄𑀥𑀺𑀧𑀮𑁆𑀮𑀗𑁆𑀓𑀫𑀸𑀭𑀼𑀬𑁆𑀳 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑁆𑀯𑀸 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑀺, 𑀤𑀼𑀢𑀺𑀬𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑁂𑀦𑁆𑀢𑀺, 𑀢𑀢𑀺𑀬𑀬𑀸𑀫𑁂 𑀧𑀘𑁆𑀘𑀬𑀸𑀓𑀸𑀭𑀁 𑀲𑀫𑁆𑀫𑀲𑀺𑀢𑁆𑀯𑀸 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀉𑀝𑁆𑀞𑀸𑀬 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀉𑀤𑀬𑀩𑁆𑀩𑀬𑀯𑀲𑁂𑀦 𑀲𑀫𑀧𑀜𑁆𑀜𑀸𑀲 𑀮𑀓𑁆𑀔𑀡𑀸𑀦𑀺 𑀤𑀺𑀲𑁆𑀯𑀸 𑀬𑀸𑀯 𑀕𑁄𑀢𑁆𑀭𑀪𑀼𑀜𑀸𑀡𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑁂𑀦 𑀲𑀓𑀮𑁂 𑀩𑀼𑀤𑁆𑀥𑀕𑀼𑀡𑁂 𑀧𑀝𑀺𑀯𑀺𑀚𑁆𑀛𑀦𑁆𑀢𑀺. 𑀅𑀬𑀫𑁆𑀧𑀺 𑀫𑀳𑀸𑀧𑀼𑀭𑀺𑀲𑁄 𑀧𑀽𑀭𑀺𑀢𑀧𑀸𑀭𑀫𑀻. 𑀲𑁄 𑀬𑀣𑀸𑀯𑀼𑀢𑁆𑀢𑀁 𑀲𑀩𑁆𑀩𑀁 𑀅𑀦𑀼𑀓𑁆𑀓𑀫𑀁 𑀓𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑁂 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀉𑀝𑁆𑀞𑀸𑀬 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀉𑀤𑀬𑀩𑁆𑀩𑀬𑀯𑀺𑀧𑀲𑁆𑀲𑀦𑀁 𑀆𑀭𑀪𑀺. 𑀢𑀁 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀯𑀼𑀢𑁆𑀢𑀁.

𑀢𑀢𑁆𑀣 ¶ 𑀇𑀢𑀺 𑀭𑀽𑀧𑀦𑁆𑀢𑀺 𑀇𑀤𑀁 𑀭𑀽𑀧𑀁, 𑀏𑀢𑁆𑀢𑀓𑀁 𑀭𑀽𑀧𑀁, 𑀇𑀢𑁄 𑀉𑀤𑁆𑀥𑀁 𑀭𑀽𑀧𑀁 𑀦𑀢𑁆𑀣𑀻𑀢𑀺 𑀭𑀼𑀧𑁆𑀧𑀦𑀲𑀪𑀸𑀯𑀜𑁆𑀘𑁂𑀯 𑀪𑀽𑀢𑀼𑀧𑀸𑀤𑀸𑀬𑀪𑁂𑀤𑀜𑁆𑀘 𑀆𑀤𑀺𑀁 𑀓𑀢𑁆𑀯𑀸 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀯𑀲𑁂𑀦 𑀅𑀦𑀯𑀲𑁂𑀲𑀭𑀽𑀧𑀧𑀭𑀺𑀕𑁆𑀕𑀳𑁄 𑀯𑀼𑀢𑁆𑀢𑁄. 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄𑀢𑀺 𑀇𑀫𑀺𑀦𑀸 𑀏𑀯𑀁 𑀧𑀭𑀺𑀕𑁆𑀕𑀳𑀺𑀢𑀲𑁆𑀲 𑀭𑀽𑀧𑀲𑁆𑀲 𑀲𑀫𑀼𑀤𑀬𑀤𑀲𑁆𑀲𑀦𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀢𑀻𑀢𑀺 𑀏𑀯𑀁 𑀲𑀫𑀼𑀤𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀯𑀺𑀢𑁆𑀣𑀸𑀭𑁄 𑁋 ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄, 𑀢𑀡𑁆𑀳𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄, 𑀓𑀫𑁆𑀫𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄, 𑀆𑀳𑀸𑀭𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄𑀢𑀺, 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀻’’𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀣𑀗𑁆𑀕𑀫𑁂𑀧𑀺 ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄…𑀧𑁂… 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑀁 𑀧𑀲𑁆𑀲𑀢𑀻’’𑀢𑀺 (𑀧𑀝𑀺. 𑀫. 𑁧.𑁫𑁦) 𑀅𑀬𑀫𑀲𑁆𑀲 𑀯𑀺𑀢𑁆𑀣𑀸𑀭𑁄.

𑀇𑀢𑀺 𑀯𑁂𑀤𑀦𑀸𑀢𑀺𑀆𑀤𑀻𑀲𑀼𑀧𑀺 𑀅𑀬𑀁 𑀯𑁂𑀤𑀦𑀸, 𑀏𑀢𑁆𑀢𑀓𑀸 𑀯𑁂𑀤𑀦𑀸, 𑀇𑀢𑁄 𑀉𑀤𑁆𑀥𑀁 𑀯𑁂𑀤𑀦𑀸 𑀦𑀢𑁆𑀣𑀺. 𑀅𑀬𑀁 𑀲𑀜𑁆𑀜𑀸, 𑀇𑀫𑁂 𑀲𑀗𑁆𑀔𑀸𑀭𑀸, 𑀇𑀤𑀁 𑀯𑀺𑀜𑁆𑀜𑀸𑀡𑀁, 𑀏𑀢𑁆𑀢𑀓𑀁 𑀯𑀺𑀜𑁆𑀜𑀸𑀡𑀁, 𑀇𑀢𑁄 𑀉𑀤𑁆𑀥𑀁 𑀯𑀺𑀜𑁆𑀜𑀸𑀡𑀁 𑀦𑀢𑁆𑀣𑀻𑀢𑀺 𑀯𑁂𑀤𑀬𑀺𑀢𑀲𑀜𑁆𑀚𑀸𑀦𑀦𑀅𑀪𑀺𑀲𑀗𑁆𑀔𑀭𑀡𑀯𑀺𑀚𑀸𑀦𑀦𑀲𑀪𑀸𑀯𑀜𑁆𑀘𑁂𑀯 𑀲𑀼𑀔𑀸𑀤𑀺𑀭𑀽𑀧𑀲𑀜𑁆𑀜𑀸𑀤𑀺 𑀨𑀲𑁆𑀲𑀸𑀤𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺 𑀪𑁂𑀤𑀜𑁆𑀘 𑀆𑀤𑀺𑀁 𑀓𑀢𑁆𑀯𑀸 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀯𑀲𑁂𑀦 𑀅𑀦𑀯𑀲𑁂𑀲𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀧𑀭𑀺𑀕𑁆𑀕𑀳𑁄 𑀯𑀼𑀢𑁆𑀢𑁄. 𑀇𑀢𑀺 𑀯𑁂𑀤𑀦𑀸𑀬 𑀲𑀫𑀼𑀤𑀬𑁄𑀢𑀺𑀆𑀤𑀻𑀳𑀺 𑀧𑀦 𑀏𑀯𑀁 𑀧𑀭𑀺𑀕𑁆𑀕𑀳𑀺𑀢𑀸𑀦𑀁 𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀸𑀦𑀁 𑀲𑀫𑀼𑀤𑀬𑀤𑀲𑁆𑀲𑀦𑀁 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀧𑀺 𑀇𑀢𑀻𑀢𑀺 𑀏𑀯𑀁 𑀲𑀫𑀼𑀤𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀲𑀫𑁆𑀧𑀺 𑀯𑀺𑀢𑁆𑀣𑀸𑀭𑁄 𑁋 ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄’’𑀢𑀺 (𑀧𑀝𑀺. 𑀫. 𑁧.𑁫𑁦) 𑀭𑀽𑀧𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀢𑀻𑀲𑀼 𑀔𑀦𑁆𑀥𑁂𑀲𑀼 ‘‘𑀆𑀳𑀸𑀭𑀲𑀫𑀼𑀤𑀬𑀸’’𑀢𑀺 𑀅𑀯𑀢𑁆𑀯𑀸 ‘‘𑀨𑀲𑁆𑀲𑀲𑀫𑀼𑀤𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂 ‘‘𑀦𑀸𑀫𑀭𑀽𑀧𑀲𑀫𑀼𑀤𑀬𑀸’’𑀢𑀺 ¶ 𑀅𑀢𑁆𑀣𑀗𑁆𑀕𑀫𑀧𑀤𑀫𑁆𑀧𑀺 𑀢𑁂𑀲𑀁𑀬𑁂𑀯 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀉𑀤𑀬𑀩𑁆𑀩𑀬𑀯𑀺𑀦𑀺𑀘𑁆𑀙𑀬𑁄 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑁄. 𑀢𑀲𑁆𑀲 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄𑀢𑀺 𑀢𑀲𑁆𑀲 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀇𑀫𑁂𑀲𑀼 𑀭𑀽𑀧𑀸𑀤𑀻𑀲𑀼 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀲𑀫𑀧𑀜𑁆𑀜𑀸𑀲𑀮𑀓𑁆𑀔𑀡𑀯𑀲𑁂𑀦 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀬𑀣𑀸𑀦𑀼𑀓𑁆𑀓𑀫𑁂𑀦 𑀯𑀟𑁆𑀠𑀺𑀢𑁂 𑀯𑀺𑀧𑀲𑁆𑀲𑀦𑀸𑀜𑀸𑀡𑁂 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁂𑀦 𑀦𑀺𑀭𑀼𑀚𑁆𑀛𑀫𑀸𑀦𑁂𑀳𑀺 ¶ 𑀆𑀲𑀯𑀲𑀗𑁆𑀔𑀸𑀢𑁂𑀳𑀺 𑀓𑀺𑀮𑁂𑀲𑁂𑀳𑀺 𑀅𑀦𑀼𑀧𑀸𑀤𑀸𑀬 𑀅𑀕𑁆𑀕𑀳𑁂𑀢𑁆𑀯𑀸𑀯 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀢𑀤𑁂𑀢𑀁 ¶ 𑀫𑀕𑁆𑀕𑀓𑁆𑀔𑀡𑁂 𑀯𑀺𑀫𑀼𑀘𑁆𑀘𑀢𑀺 𑀦𑀸𑀫, 𑀨𑀮𑀓𑁆𑀔𑀡𑁂 𑀯𑀺𑀫𑀼𑀢𑁆𑀢𑀁 𑀦𑀸𑀫; 𑀫𑀕𑁆𑀕𑀓𑁆𑀔𑀡𑁂 𑀯𑀸 𑀯𑀺𑀫𑀼𑀢𑁆𑀢𑀜𑁆𑀘𑁂𑀯 𑀯𑀺𑀫𑀼𑀘𑁆𑀘𑀢𑀺 𑀘, 𑀨𑀮𑀓𑁆𑀔𑀡𑁂 𑀯𑀺𑀫𑀼𑀢𑁆𑀢𑀫𑁂𑀯.

𑀏𑀢𑁆𑀢𑀸𑀯𑀢𑀸 𑀘 𑀫𑀳𑀸𑀧𑀼𑀭𑀺𑀲𑁄 𑀲𑀩𑁆𑀩𑀩𑀦𑁆𑀥𑀦𑀸 𑀯𑀺𑀧𑁆𑀧𑀫𑀼𑀢𑁆𑀢𑁄 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑁆𑀨𑀼𑀝𑁆𑀞𑀫𑀺𑀯 𑀧𑀤𑀼𑀫𑀁 𑀲𑀼𑀯𑀺𑀓𑀲𑀺𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑁄 𑀘𑀢𑁆𑀢𑀸𑀭𑀺 𑀫𑀕𑁆𑀕𑀜𑀸𑀡𑀸𑀦𑀺, 𑀘𑀢𑁆𑀢𑀸𑀭𑀺 𑀨𑀮𑀜𑀸𑀡𑀸𑀦𑀺, 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸, 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁, 𑀧𑀜𑁆𑀘𑀕𑀢𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁, 𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺, 𑀲𑀓𑀮𑁂 𑀘 𑀩𑀼𑀤𑁆𑀥𑀕𑀼𑀡𑁂 𑀳𑀢𑁆𑀣𑀕𑀢𑁂 𑀓𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄𑀯 𑁋

‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁, 𑀲𑀦𑁆𑀥𑀸𑀯𑀺𑀲𑁆𑀲𑀁 𑀅𑀦𑀺𑀩𑁆𑀩𑀺𑀲𑀁;

𑀕𑀳𑀓𑀸𑀭𑀁 𑀕𑀯𑁂𑀲𑀦𑁆𑀢𑁄, 𑀤𑀼𑀓𑁆𑀔𑀸 𑀚𑀸𑀢𑀺 𑀧𑀼𑀦𑀧𑁆𑀧𑀼𑀦𑀁.

𑀕𑀳𑀓𑀸𑀭𑀓 𑀤𑀺𑀝𑁆𑀞𑁄𑀲𑀺, 𑀧𑀼𑀦 𑀕𑁂𑀳𑀁 𑀦 𑀓𑀸𑀳𑀲𑀺;

𑀲𑀩𑁆𑀩𑀸 𑀢𑁂 𑀨𑀸𑀲𑀼𑀓𑀸 𑀪𑀕𑁆𑀕𑀸, 𑀕𑀳𑀓𑀽𑀝𑀁 𑀯𑀺𑀲𑀗𑁆𑀔𑀢𑀁;

𑀯𑀺𑀲𑀗𑁆𑀔𑀸𑀭𑀕𑀢𑀁 𑀘𑀺𑀢𑁆𑀢𑀁, 𑀢𑀡𑁆𑀳𑀸𑀦𑀁 𑀔𑀬𑀫𑀚𑁆𑀛𑀕𑀸’’𑀢𑀺. (𑀥. 𑀧. 𑁧𑁫𑁩, 𑁧𑁫𑁪);

‘‘𑀅𑀬𑁄𑀖𑀦𑀳𑀢𑀲𑁆𑀲𑁂𑀯, 𑀚𑀮𑀢𑁄 𑀚𑀸𑀢𑀯𑁂𑀤𑀲𑁄;

𑀅𑀦𑀼𑀧𑀼𑀩𑁆𑀩𑀽𑀧𑀲𑀦𑁆𑀢𑀲𑁆𑀲, 𑀬𑀣𑀸 𑀦 𑀜𑀸𑀬𑀢𑁂 𑀕𑀢𑀺.

𑀏𑀯𑀁 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀸𑀦𑀁, 𑀓𑀸𑀫𑀩𑀦𑁆𑀥𑁄𑀖𑀢𑀸𑀭𑀺𑀦𑀁;

𑀧𑀜𑁆𑀜𑀸𑀧𑁂𑀢𑀼𑀁 𑀕𑀢𑀺 𑀦𑀢𑁆𑀣𑀺, 𑀧𑀢𑁆𑀢𑀸𑀦𑀁 𑀅𑀘𑀮𑀁 𑀲𑀼𑀔’’𑀦𑁆𑀢𑀺. (𑀉𑀤𑀸. 𑁮𑁦);

𑀏𑀯𑀁 𑀫𑀦𑀲𑀺 𑀓𑀭𑁄𑀦𑁆𑀢𑁄 𑀲𑀭𑀤𑁂 𑀲𑀽𑀭𑀺𑀬𑁄 𑀯𑀺𑀬, 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀘 𑀯𑀺𑀭𑁄𑀘𑀺𑀢𑁆𑀣𑀸𑀢𑀺.

𑀤𑀼𑀢𑀺𑀬𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑁆𑀭𑀳𑁆𑀫𑀬𑀸𑀘𑀦𑀓𑀣𑀸𑀯𑀡𑁆𑀡𑀦𑀸

𑁬𑁪. 𑀢𑀢𑀺𑀬𑀪𑀸𑀡𑀯𑀸𑀭𑁂 ¶ ¶ 𑀬𑀁𑀦𑀽𑀦𑀸𑀳𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀦𑁆𑀢𑀺 𑀬𑀤𑀺 𑀧𑀦𑀸𑀳𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁. 𑀅𑀬𑀁 𑀧𑀦 𑀯𑀺𑀢𑀓𑁆𑀓𑁄 𑀓𑀤𑀸 𑀉𑀧𑁆𑀧𑀦𑁆𑀦𑁄𑀢𑀺? 𑀩𑀼𑀤𑁆𑀥𑀪𑀽𑀢𑀲𑁆𑀲 𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂. 𑀲𑁄 𑀓𑀺𑀭 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀲𑀢𑁆𑀢𑀸𑀳𑀁 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺, 𑀲𑀢𑁆𑀢𑀸𑀳𑀁 𑀩𑁄𑀥𑀺𑀧𑀮𑁆𑀮𑀗𑁆𑀓𑀁 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺, 𑀲𑀢𑁆𑀢𑀸𑀳𑀁 𑀭𑀢𑀦𑀘𑀗𑁆𑀓𑀫𑁂 𑀘𑀗𑁆𑀓𑀫𑀺, 𑀲𑀢𑁆𑀢𑀸𑀳𑀁 𑀭𑀢𑀦𑀕𑀩𑁆𑀪𑁂 𑀥𑀫𑁆𑀫𑀁 𑀯𑀺𑀘𑀺𑀦𑀦𑁆𑀢𑁄 𑀦𑀺𑀲𑀻𑀤𑀺, 𑀲𑀢𑁆𑀢𑀸𑀳𑀁 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂 𑀦𑀺𑀲𑀻𑀤𑀺, 𑀲𑀢𑁆𑀢𑀸𑀳𑀁 𑀫𑀼𑀘𑀮𑀺𑀦𑁆𑀤𑁂 𑀦𑀺𑀲𑀻𑀤𑀺, 𑀲𑀢𑁆𑀢𑀸𑀳𑀁 𑀭𑀸𑀚𑀸𑀬𑀢𑀦𑁂 𑀦𑀺𑀲𑀻𑀤𑀺. 𑀢𑀢𑁄 𑀉𑀝𑁆𑀞𑀸𑀬 𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂 𑀦𑀺𑀲𑀺𑀦𑁆𑀦𑀫𑀢𑁆𑀢𑀲𑁆𑀲𑁂𑀯 ¶ 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑁄 𑀅𑀬𑀜𑁆𑀘𑁂𑀯 𑀇𑀢𑁄 𑀅𑀦𑀦𑁆𑀢𑀭𑁄 𑀘 𑀯𑀺𑀢𑀓𑁆𑀓𑁄 𑀉𑀧𑁆𑀧𑀦𑁆𑀦𑁄𑀢𑀺.

𑀢𑀢𑁆𑀣 𑀅𑀥𑀺𑀕𑀢𑁄𑀢𑀺 𑀧𑀝𑀺𑀯𑀺𑀤𑁆𑀥𑁄. 𑀥𑀫𑁆𑀫𑁄𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁄. 𑀕𑀫𑁆𑀪𑀻𑀭𑁄𑀢𑀺 𑀉𑀢𑁆𑀢𑀸𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀯𑀘𑀦𑀫𑁂𑀢𑀁. 𑀤𑀼𑀤𑁆𑀤𑀲𑁄𑀢𑀺 𑀕𑀫𑁆𑀪𑀻𑀭𑀢𑁆𑀢𑀸𑀯 𑀤𑀼𑀤𑁆𑀤𑀲𑁄 𑀤𑀼𑀓𑁆𑀔𑁂𑀦 𑀤𑀝𑁆𑀞𑀩𑁆𑀩𑁄, 𑀦 𑀲𑀓𑁆𑀓𑀸 𑀲𑀼𑀔𑁂𑀦 𑀤𑀝𑁆𑀞𑀼𑀁. 𑀤𑀼𑀤𑁆𑀤𑀲𑀢𑁆𑀢𑀸𑀯 𑀤𑀼𑀭𑀦𑀼𑀩𑁄𑀥𑁄 𑀤𑀼𑀓𑁆𑀔𑁂𑀦 𑀅𑀯𑀩𑀼𑀚𑁆𑀛𑀺𑀢𑀩𑁆𑀩𑁄, 𑀦 𑀲𑀓𑁆𑀓𑀸 𑀲𑀼𑀔𑁂𑀦 𑀅𑀯𑀩𑀼𑀚𑁆𑀛𑀺𑀢𑀼𑀁. 𑀲𑀦𑁆𑀢𑁄𑀢𑀺 𑀦𑀺𑀩𑁆𑀩𑀼𑀢𑁄. 𑀧𑀡𑀻𑀢𑁄𑀢𑀺 𑀅𑀢𑀧𑁆𑀧𑀓𑁄. 𑀇𑀤𑀁 𑀤𑁆𑀯𑀬𑀁 𑀮𑁄𑀓𑀼𑀢𑁆𑀢𑀭𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀢𑀓𑁆𑀓𑀸𑀯𑀘𑀭𑁄𑀢𑀺 𑀢𑀓𑁆𑀓𑁂𑀦 𑀅𑀯𑀘𑀭𑀺𑀢𑀩𑁆𑀩𑁄 𑀑𑀕𑀸𑀳𑀺𑀢𑀩𑁆𑀩𑁄 𑀦 𑀳𑁄𑀢𑀺, 𑀜𑀸𑀡𑁂𑀦𑁂𑀯 𑀅𑀯𑀘𑀭𑀺𑀢𑀩𑁆𑀩𑁄. 𑀦𑀺𑀧𑀼𑀡𑁄𑀢𑀺 𑀲𑀡𑁆𑀳𑁄. 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑁄𑀢𑀺 𑀲𑀫𑁆𑀫𑀸𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀯𑁂𑀤𑀺𑀢𑀩𑁆𑀩𑁄. 𑀆𑀮𑀬𑀭𑀸𑀫𑀸𑀢𑀺 𑀲𑀢𑁆𑀢𑀸 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀅𑀮𑁆𑀮𑀻𑀬𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀆𑀮𑀬𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀆𑀮𑀬𑀦𑁆𑀢𑀺, 𑀢𑀲𑁆𑀫𑀸 𑀆𑀮𑀬𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀳𑀺 𑀆𑀮𑀬𑁂𑀳𑀺 𑀭𑀫𑀦𑁆𑀢𑀻𑀢𑀺 𑀆𑀮𑀬𑀭𑀸𑀫𑀸. 𑀆𑀮𑀬𑁂𑀲𑀼 𑀭𑀢𑀸𑀢𑀺 𑀆𑀮𑀬𑀭𑀢𑀸. 𑀆𑀮𑀬𑁂𑀲𑀼 𑀲𑀼𑀝𑁆𑀞𑀼 𑀫𑀼𑀤𑀺𑀢𑀸𑀢𑀺 𑀆𑀮𑀬𑀲𑀫𑁆𑀫𑀼𑀤𑀺𑀢𑀸. 𑀬𑀣𑁂𑀯 𑀳𑀺 𑀲𑀼𑀲𑀚𑁆𑀚𑀺𑀢𑀁 𑀧𑀼𑀧𑁆𑀨𑀨𑀮𑀪𑀭𑀺𑀢𑀭𑀼𑀓𑁆𑀔𑀸𑀤𑀺𑀲𑀫𑁆𑀧𑀦𑁆𑀦𑀁 𑀉𑀬𑁆𑀬𑀸𑀦𑀁 𑀧𑀯𑀺𑀝𑁆𑀞𑁄 𑀭𑀸𑀚𑀸 𑀢𑀸𑀬 𑀢𑀸𑀬 𑀲𑀫𑁆𑀧𑀢𑁆𑀢𑀺𑀬𑀸 𑀭𑀫𑀢𑀺, 𑀧𑀫𑀼𑀤𑀺𑀢𑁄 𑀆𑀫𑁄𑀤𑀺𑀢𑁄 𑀳𑁄𑀢𑀺, 𑀦 𑀉𑀓𑁆𑀓𑀡𑁆𑀞𑀢𑀺, 𑀲𑀸𑀬𑀁 𑀦𑀺𑀓𑁆𑀔𑀫𑀺𑀢𑀼𑀁 𑀦 𑀇𑀘𑁆𑀙𑀢𑀺, 𑀏𑀯𑀫𑀺𑀫𑁂𑀳𑀺𑀧𑀺 𑀓𑀸𑀫𑀸𑀮𑀬𑀢𑀡𑁆𑀳𑀸𑀮𑀬𑁂𑀳𑀺 𑀲𑀢𑁆𑀢𑀸 𑀭𑀫𑀦𑁆𑀢𑀺, 𑀲𑀁𑀲𑀸𑀭𑀯𑀝𑁆𑀝𑁂 𑀧𑀫𑀼𑀤𑀺𑀢𑀸 𑀅𑀦𑀼𑀓𑁆𑀓𑀡𑁆𑀞𑀺𑀢𑀸 𑀯𑀲𑀦𑁆𑀢𑀺. 𑀢𑁂𑀦 𑀦𑁂𑀲𑀁 𑀪𑀕𑀯𑀸 𑀤𑀼𑀯𑀺𑀥𑀫𑁆𑀧𑀺 𑀆𑀮𑀬𑀁 𑀉𑀬𑁆𑀬𑀸𑀦𑀪𑀽𑀫𑀺𑀁 𑀯𑀺𑀬 𑀤𑀲𑁆𑀲𑁂𑀦𑁆𑀢𑁄 𑁋 ‘‘𑀆𑀮𑀬𑀭𑀸𑀫𑀸’’𑀢𑀺𑀆𑀤𑀺𑀫𑀸𑀳.

𑀬𑀤𑀺𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀢𑀲𑁆𑀲 𑀞𑀸𑀦𑀁 𑀲𑀦𑁆𑀥𑀸𑀬 𑁋 ‘‘𑀬𑀁 𑀇𑀤’’𑀦𑁆𑀢𑀺, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀲𑀦𑁆𑀥𑀸𑀬 𑁋 ‘‘𑀬𑁄 𑀅𑀬’’𑀦𑁆𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀇𑀫𑁂𑀲𑀁 𑀧𑀘𑁆𑀘𑀬𑀸 𑀇𑀤𑀧𑁆𑀧𑀘𑁆𑀘𑀬𑀸, 𑀇𑀤𑀧𑁆𑀧𑀘𑁆𑀘𑀬𑀸 𑀏𑀯 𑀇𑀤𑀧𑁆𑀧𑀘𑁆𑀘𑀬𑀢𑀸, 𑀇𑀤𑀧𑁆𑀧𑀘𑁆𑀘𑀬𑀢𑀸 𑀘 𑀲𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀘𑀸𑀢𑀺 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀲𑀗𑁆𑀔𑀸𑀭𑀸𑀤𑀺𑀧𑀘𑁆𑀘𑀬𑀸𑀦𑀁 ¶ 𑀅𑀯𑀺𑀚𑁆𑀚𑀸𑀤𑀻𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄𑀢𑀺𑀆𑀤𑀺 𑀲𑀩𑁆𑀩𑀁 𑀦𑀺𑀩𑁆𑀩𑀸𑀦𑀫𑁂𑀯. 𑀬𑀲𑁆𑀫𑀸 𑀳𑀺 𑀢𑀁 𑀆𑀕𑀫𑁆𑀫 𑀲𑀩𑁆𑀩𑀲𑀗𑁆𑀔𑀸𑀭𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀺 𑀲𑀫𑁆𑀫𑀦𑁆𑀢𑀺 ¶ 𑀯𑀽𑀧𑀲𑀫𑁆𑀫𑀦𑁆𑀢𑀺 𑀢𑀲𑁆𑀫𑀸 𑁋 ‘‘𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀘 𑀢𑀁 𑀆𑀕𑀫𑁆𑀫 𑀲𑀩𑁆𑀩𑁂 𑀉𑀧𑀥𑀬𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀸 𑀳𑁄𑀦𑁆𑀢𑀺, 𑀲𑀩𑁆𑀩𑀸 𑀢𑀡𑁆𑀳𑀸 𑀔𑀻𑀬𑀦𑁆𑀢𑀺 ¶ , 𑀲𑀩𑁆𑀩𑁂 𑀓𑀺𑀮𑁂𑀲𑀭𑀸𑀕𑀸 𑀯𑀺𑀭𑀚𑁆𑀚𑀦𑁆𑀢𑀺, 𑀲𑀩𑁆𑀩𑀁 𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 ‘‘𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀧𑀦𑁂𑀲𑀸 𑀢𑀡𑁆𑀳𑀸 𑀪𑀯𑁂𑀦 𑀪𑀯𑀁, 𑀨𑀮𑁂𑀦 𑀯𑀸 𑀲𑀤𑁆𑀥𑀺𑀁 𑀓𑀫𑁆𑀫𑀁 𑀯𑀺𑀦𑀢𑀺 𑀲𑀁𑀲𑀺𑀩𑁆𑀩𑀢𑀻𑀢𑀺 𑀓𑀢𑁆𑀯𑀸 𑀯𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁄 𑀯𑀸𑀦𑀢𑁄 𑀦𑀺𑀓𑁆𑀔𑀦𑁆𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀲𑁄 𑀫𑀫𑀲𑁆𑀲 𑀓𑀺𑀮𑀫𑀣𑁄𑀢𑀺 𑀬𑀸 𑀅𑀚𑀸𑀦𑀦𑁆𑀢𑀸𑀦𑀁 𑀤𑁂𑀲𑀦𑀸 𑀦𑀸𑀫, 𑀲𑁄 𑀫𑀫 𑀓𑀺𑀮𑀫𑀣𑁄 𑀅𑀲𑁆𑀲, 𑀲𑀸 𑀫𑀫 𑀯𑀺𑀳𑁂𑀲𑀸 𑀅𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀓𑀸𑀬𑀓𑀺𑀮𑀫𑀣𑁄 𑀘𑁂𑀯 𑀓𑀸𑀬𑀯𑀺𑀳𑁂𑀲𑀸 𑀘 𑀅𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀘𑀺𑀢𑁆𑀢𑁂 𑀧𑀦 𑀉𑀪𑀬𑀫𑁆𑀧𑁂𑀢𑀁 𑀩𑀼𑀤𑁆𑀥𑀸𑀦𑀁 𑀦𑀢𑁆𑀣𑀺.

𑁬𑁫. 𑀅𑀧𑀺𑀲𑁆𑀲𑀽𑀢𑀺 𑀅𑀦𑀼𑀩𑁆𑀭𑀽𑀳𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀲𑁄 𑁋 ‘‘𑀦 𑀓𑁂𑀯𑀮𑀁 𑀏𑀢𑀤𑀳𑁄𑀲𑀺, 𑀇𑀫𑀸𑀧𑀺 𑀕𑀸𑀣𑀸 𑀧𑀝𑀺𑀪𑀁𑀲𑀽’’𑀢𑀺 𑀤𑀻𑀧𑁂𑀢𑀺. 𑀯𑀺𑀧𑀲𑁆𑀲𑀺𑀦𑁆𑀢𑀺𑀆𑀤𑀻𑀲𑀼 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀦𑀘𑁆𑀙𑀭𑀺𑀬𑀸𑀢𑀺 𑀅𑀦𑀼𑀅𑀘𑁆𑀙𑀭𑀺𑀬𑀸. 𑀧𑀝𑀺𑀪𑀁𑀲𑀽𑀢𑀺 𑀧𑀝𑀺𑀪𑀸𑀦𑀲𑀗𑁆𑀔𑀸𑀢𑀲𑁆𑀲 𑀜𑀸𑀡𑀲𑁆𑀲 𑀕𑁄𑀘𑀭𑀸 𑀅𑀳𑁂𑀲𑀼𑀁, 𑀧𑀭𑀺𑀯𑀺𑀢𑀓𑁆𑀓𑀬𑀺𑀢𑀩𑁆𑀩𑀢𑀁 𑀧𑀸𑀧𑀼𑀡𑀺𑀁𑀲𑀼.

𑀓𑀺𑀘𑁆𑀙𑁂𑀦𑀸𑀢𑀺 𑀤𑀼𑀓𑁆𑀔𑁂𑀦, 𑀦 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀲𑀼𑀔𑀧𑀝𑀺𑀧𑀤𑀸𑀯 𑀳𑁄𑀦𑁆𑀢𑀺. 𑀧𑀸𑀭𑀫𑀻𑀧𑀽𑀭𑀡𑀓𑀸𑀮𑁂 𑀧𑀦 𑀲𑀭𑀸𑀕𑀲𑀤𑁄𑀲𑀲𑀫𑁄𑀳𑀲𑁆𑀲𑁂𑀯 𑀲𑀢𑁄 𑀆𑀕𑀢𑀸𑀕𑀢𑀸𑀦𑀁 𑀬𑀸𑀘𑀓𑀸𑀦𑀁 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀕𑀮𑀮𑁄𑀳𑀺𑀢𑀁 𑀦𑀻𑀳𑀭𑀺𑀢𑁆𑀯𑀸 𑀲𑀼𑀅𑀜𑁆𑀚𑀺𑀢𑀸𑀦𑀺 𑀅𑀓𑁆𑀔𑀻𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸 𑀓𑀼𑀮𑀯𑀁𑀲𑀧𑀤𑀻𑀧𑀓𑀁 𑀧𑀼𑀢𑁆𑀢𑀁 𑀫𑀦𑀸𑀧𑀘𑀸𑀭𑀺𑀦𑀺𑀁 𑀪𑀭𑀺𑀬𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀤𑁂𑀦𑁆𑀢𑀲𑁆𑀲 𑀅𑀜𑁆𑀜𑀸𑀦𑀺 𑀘 𑀔𑀦𑁆𑀢𑀺𑀯𑀸𑀤𑀺𑀲𑀤𑀺𑀲𑁂𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀙𑁂𑀚𑁆𑀚𑀪𑁂𑀚𑁆𑀚𑀸𑀤𑀻𑀦𑀺 𑀧𑀸𑀧𑀼𑀡𑀦𑁆𑀢𑀲𑁆𑀲 𑀆𑀕𑀫𑀦𑀻𑀬𑀧𑀝𑀺𑀧𑀤𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀳𑀮𑀦𑁆𑀢𑀺 𑀏𑀢𑁆𑀣 𑀳𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑁄, 𑀅𑀮𑀦𑁆𑀢𑀺 𑀅𑀢𑁆𑀣𑁄. 𑀧𑀓𑀸𑀲𑀺𑀢𑀼𑀦𑁆𑀢𑀺 𑀤𑁂𑀲𑁂𑀢𑀼𑀁; 𑀏𑀯𑀁 𑀓𑀺𑀘𑁆𑀙𑁂𑀦 𑀅𑀥𑀺𑀕𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀮𑀁 𑀤𑁂𑀲𑁂𑀢𑀼𑀁; 𑀓𑁄 𑀅𑀢𑁆𑀣𑁄 𑀤𑁂𑀲𑀺𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀸𑀕𑀤𑁄𑀲𑀧𑀭𑁂𑀢𑁂𑀳𑀻𑀢𑀺 𑀭𑀸𑀕𑀤𑁄𑀲𑀨𑀼𑀝𑁆𑀞𑁂𑀳𑀺 𑀭𑀸𑀕𑀤𑁄𑀲𑀸𑀦𑀼𑀕𑀢𑁂𑀳𑀺 𑀯𑀸.

𑀧𑀝𑀺𑀲𑁄𑀢𑀕𑀸𑀫𑀺𑀦𑁆𑀢𑀺 𑀦𑀺𑀘𑁆𑀘𑀸𑀤𑀻𑀦𑀁 𑀧𑀝𑀺𑀲𑁄𑀢𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸𑀲𑀼𑀪𑀦𑁆𑀢𑀺 𑀏𑀯𑀁 𑀕𑀢𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀁. 𑀭𑀸𑀕𑀭𑀢𑁆𑀢𑀸𑀢𑀺 𑀓𑀸𑀫𑀭𑀸𑀕𑁂𑀦 𑀪𑀯𑀭𑀸𑀕𑁂𑀦 𑀤𑀺𑀝𑁆𑀞𑀺𑀭𑀸𑀕𑁂𑀦 𑀘 𑀭𑀢𑁆𑀢𑀸. 𑀦 𑀤𑀓𑁆𑀔𑀦𑁆𑀢𑀻𑀢𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸 𑀅𑀲𑀼𑀪𑀦𑁆𑀢𑀺 𑀇𑀫𑀺𑀦𑀸 𑀲𑀪𑀸𑀯𑁂𑀦 𑀦 𑀧𑀲𑁆𑀲𑀺𑀲𑁆𑀲𑀦𑁆𑀢𑀺 ¶ , 𑀢𑁂 𑀅𑀧𑀲𑁆𑀲𑀦𑁆𑀢𑁂 𑀓𑁄 𑀲𑀓𑁆𑀔𑀺𑀲𑁆𑀲𑀢𑀺 𑀏𑀯𑀁 𑀕𑀸𑀳𑀸𑀧𑁂𑀢𑀼𑀁? 𑀢𑀫𑁄𑀔𑀦𑁆𑀥𑁂𑀦 𑀆𑀯𑀼𑀝𑀸𑀢𑀺 ¶ 𑀅𑀯𑀺𑀚𑁆𑀚𑀸𑀭𑀸𑀲𑀺𑀦𑀸 𑀅𑀚𑁆𑀛𑁄𑀢𑁆𑀣𑀝𑀸.

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬𑀸𑀢𑀺 𑀦𑀺𑀭𑀼𑀲𑁆𑀲𑀼𑀓𑁆𑀓𑀪𑀸𑀯𑁂𑀦, 𑀅𑀤𑁂𑀲𑁂𑀢𑀼𑀓𑀸𑀫𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀧𑀦𑀲𑁆𑀲 𑀏𑀯𑀁 𑀘𑀺𑀢𑁆𑀢𑀁 𑀦𑀫𑀺? 𑀦𑀦𑀼 𑀏𑀲 𑁋 ‘‘𑀫𑀼𑀢𑁆𑀢𑁄 𑀫𑁄𑀘𑁂𑀲𑁆𑀲𑀸𑀫𑀻, 𑀢𑀺𑀡𑁆𑀡𑁄 𑀢𑀸𑀭𑁂𑀲𑁆𑀲𑀸𑀫𑀺’’,

‘‘𑀓𑀺𑀁 ¶ 𑀫𑁂 𑀅𑀜𑁆𑀜𑀸𑀢𑀯𑁂𑀲𑁂𑀦, 𑀥𑀫𑁆𑀫𑀁 𑀲𑀘𑁆𑀙𑀺𑀓𑀢𑁂𑀦𑀺𑀥;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀢𑁆𑀯𑀸, 𑀲𑀦𑁆𑀢𑀸𑀭𑁂𑀲𑁆𑀲𑀁 𑀲𑀤𑁂𑀯𑀓’’𑀦𑁆𑀢𑀺.

𑀧𑀢𑁆𑀣𑀦𑀁 𑀓𑀢𑁆𑀯𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄𑀢𑀺. 𑀲𑀘𑁆𑀘𑀫𑁂𑀢𑀁, 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀼𑀪𑀸𑀯𑁂𑀦 𑀧𑀦𑀲𑁆𑀲 𑀏𑀯𑀁 𑀘𑀺𑀢𑁆𑀢𑀁 𑀦𑀫𑀺. 𑀢𑀲𑁆𑀲 𑀳𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀢𑀸𑀦𑀁 𑀓𑀺𑀮𑁂𑀲𑀕𑀳𑀦𑀢𑀁 𑀥𑀫𑁆𑀫𑀲𑁆𑀲 𑀘 𑀕𑀫𑁆𑀪𑀻𑀭𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀲𑀢𑁆𑀢𑀸𑀦𑀁 𑀓𑀺𑀮𑁂𑀲𑀕𑀳𑀦𑀢𑀸 𑀘 𑀥𑀫𑁆𑀫𑀕𑀫𑁆𑀪𑀻𑀭𑀢𑀸 𑀘 𑀲𑀩𑁆𑀩𑀸𑀓𑀸𑀭𑁂𑀦 𑀧𑀸𑀓𑀝𑀸 𑀚𑀸𑀢𑀸. 𑀅𑀣𑀲𑁆𑀲 𑁋 ‘‘𑀇𑀫𑁂 𑀲𑀢𑁆𑀢𑀸 𑀓𑀜𑁆𑀚𑀺𑀓𑀧𑀼𑀡𑁆𑀡𑀮𑀸𑀩𑀼 𑀯𑀺𑀬 𑀢𑀓𑁆𑀓𑀪𑀭𑀺𑀢𑀘𑀸𑀝𑀺 𑀯𑀺𑀬 𑀯𑀲𑀸𑀢𑁂𑀮𑀧𑀻𑀢𑀧𑀺𑀮𑁄𑀢𑀺𑀓𑀸 𑀯𑀺𑀬 𑀅𑀜𑁆𑀚𑀦𑀫𑀓𑁆𑀔𑀺𑀢𑀳𑀢𑁆𑀣𑀸 𑀯𑀺𑀬 𑀓𑀺𑀮𑁂𑀲𑀪𑀭𑀺𑀢𑀸 𑀅𑀢𑀺𑀲𑀁𑀓𑀺𑀮𑀺𑀝𑁆𑀞𑀸 𑀭𑀸𑀕𑀭𑀢𑁆𑀢𑀸 𑀤𑁄𑀲𑀤𑀼𑀝𑁆𑀞𑀸 𑀫𑁄𑀳𑀫𑀽𑀴𑁆𑀳𑀸, 𑀢𑁂 𑀓𑀺𑀁 𑀦𑀸𑀫 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀦𑁆𑀢𑀻’’𑀢𑀺 𑀘𑀺𑀦𑁆𑀢𑀬𑀢𑁄 𑀓𑀺𑀮𑁂𑀲𑀕𑀳𑀦𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀼𑀪𑀸𑀯𑁂𑀦𑀸𑀧𑀺 𑀏𑀯𑀁 𑀘𑀺𑀢𑁆𑀢𑀁 𑀦𑀫𑀺.

‘‘𑀅𑀬𑀜𑁆𑀘 𑀥𑀫𑁆𑀫𑁄 𑀧𑀣𑀯𑀻𑀲𑀦𑁆𑀥𑀸𑀭𑀓𑀉𑀤𑀓𑀓𑁆𑀔𑀦𑁆𑀥𑁄 𑀯𑀺𑀬 𑀕𑀫𑁆𑀪𑀻𑀭𑁄, 𑀧𑀩𑁆𑀩𑀢𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀞𑀧𑀺𑀢𑁄 𑀲𑀸𑀲𑀧𑁄 𑀯𑀺𑀬 𑀤𑀼𑀤𑁆𑀤𑀲𑁄, 𑀲𑀢𑀥𑀸 𑀪𑀺𑀦𑁆𑀦𑀲𑁆𑀲 𑀯𑀸𑀮𑀲𑁆𑀲 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀧𑀝𑀺𑀧𑀸𑀤𑀦𑀁 𑀯𑀺𑀬 𑀤𑀼𑀭𑀦𑀼𑀩𑁄𑀥𑁄, 𑀦𑀦𑀼 𑀫𑀬𑀸 𑀳𑀺 𑀇𑀫𑀁 𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀯𑀸𑀬𑀫𑀦𑁆𑀢𑁂𑀦 𑀅𑀤𑀺𑀦𑁆𑀦𑀁 𑀤𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀅𑀭𑀓𑁆𑀔𑀺𑀢𑀁 𑀲𑀻𑀮𑀁 𑀦𑀸𑀫 𑀦𑀢𑁆𑀣𑀺, 𑀅𑀧𑀭𑀺𑀧𑀽𑀭𑀺𑀢𑀸 𑀓𑀸𑀘𑀺 𑀧𑀸𑀭𑀫𑀻 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀲 𑀫𑁂 𑀦𑀺𑀭𑀼𑀲𑁆𑀲𑀸𑀳𑀁 𑀯𑀺𑀬 𑀫𑀸𑀭𑀩𑀮𑀁 𑀯𑀺𑀥𑀫𑀦𑁆𑀢𑀲𑁆𑀲𑀸𑀧𑀺 𑀧𑀣𑀯𑀻 𑀦 𑀓𑀫𑁆𑀧𑀺𑀢𑁆𑀣, 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲𑀸𑀧𑀺 𑀦 𑀓𑀫𑁆𑀧𑀺𑀢𑁆𑀣, 𑀫𑀚𑁆𑀛𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑁂𑀦𑁆𑀢𑀲𑁆𑀲𑀸𑀧𑀺 𑀦 𑀓𑀫𑁆𑀧𑀺𑀢𑁆𑀣, 𑀧𑀘𑁆𑀙𑀺𑀫𑀬𑀸𑀫𑁂 𑀧𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀲𑁆𑀲𑁂𑀯 𑀫𑁂 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀓𑀫𑁆𑀧𑀺𑀢𑁆𑀣. 𑀇𑀢𑀺 𑀫𑀸𑀤𑀺𑀲𑁂𑀦𑀸𑀧𑀺 𑀢𑀺𑀓𑁆𑀔𑀜𑀸𑀡𑁂𑀦 𑀓𑀺𑀘𑁆𑀙𑁂𑀦𑁂𑀯𑀸𑀬𑀁 𑀥𑀫𑁆𑀫𑁄 𑀧𑀝𑀺𑀯𑀺𑀤𑁆𑀥𑁄 𑀢𑀁 𑀮𑁄𑀓𑀺𑀬𑀫𑀳𑀸𑀚𑀦𑀸 𑀓𑀣𑀁 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀦𑁆𑀢𑀻’’𑀢𑀺 𑀥𑀫𑁆𑀫𑀕𑀫𑁆𑀪𑀻𑀭𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀼𑀪𑀸𑀯𑁂𑀦𑀸𑀧𑀺 𑀏𑀯𑀁 𑀘𑀺𑀢𑁆𑀢𑀁 𑀦𑀫𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀺𑀘 ¶ 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁂 𑀤𑁂𑀲𑁂𑀢𑀼𑀓𑀸𑀫𑀢𑀸𑀬𑀧𑀺𑀲𑁆𑀲 𑀏𑀯𑀁 𑀘𑀺𑀢𑁆𑀢𑀁 ¶ 𑀦𑀫𑀺. 𑀚𑀸𑀦𑀸𑀢𑀺 𑀳𑀺 𑀪𑀕𑀯𑀸 𑁋 ‘‘𑀫𑀫 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑁂 𑀦𑀫𑀫𑀸𑀦𑁂 𑀫𑀁 𑀫𑀳𑀸𑀩𑁆𑀭𑀳𑁆𑀫𑀸 𑀥𑀫𑁆𑀫𑀤𑁂𑀲𑀦𑀁 𑀬𑀸𑀘𑀺𑀲𑁆𑀲𑀢𑀺, 𑀇𑀫𑁂 𑀘 𑀲𑀢𑁆𑀢𑀸 𑀩𑁆𑀭𑀳𑁆𑀫𑀕𑀭𑀼𑀓𑀸, 𑀢𑁂 ‘𑀲𑀢𑁆𑀣𑀸 𑀓𑀺𑀭 𑀥𑀫𑁆𑀫𑀁 𑀦 𑀤𑁂𑀲𑁂𑀢𑀼𑀓𑀸𑀫𑁄 𑀅𑀳𑁄𑀲𑀺, 𑀅𑀣 𑀦𑀁 𑀫𑀳𑀸𑀩𑁆𑀭𑀳𑁆𑀫𑀸 𑀬𑀸𑀘𑀺𑀢𑁆𑀯𑀸 𑀤𑁂𑀲𑀸𑀧𑁂𑀲𑀺, 𑀲𑀦𑁆𑀢𑁄 𑀯𑀢 𑀪𑁄 𑀥𑀫𑁆𑀫𑁄, 𑀧𑀡𑀻𑀢𑁄 𑀯𑀢 𑀪𑁄 𑀥𑀫𑁆𑀫𑁄’𑀢𑀺 𑀫𑀜𑁆𑀜𑀫𑀸𑀦𑀸 𑀲𑀼𑀲𑁆𑀲𑀽𑀲𑀺𑀲𑁆𑀲𑀦𑁆𑀢𑀻’’𑀢𑀺. 𑀇𑀫𑀫𑁆𑀧𑀺𑀲𑁆𑀲 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑀁 𑀦𑀫𑀺, 𑀦𑁄 𑀥𑀫𑁆𑀫𑀤𑁂𑀲𑀦𑀸𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁬𑁬. 𑀅𑀜𑁆𑀜𑀢𑀭𑀲𑁆𑀲𑀸𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 ‘‘𑀅𑀜𑁆𑀜𑀢𑀭𑁄’’𑀢𑀺 𑀯𑀼𑀢𑁆𑀢𑀁, 𑀅𑀣 𑀔𑁄 𑀇𑀫𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀚𑁂𑀝𑁆𑀞𑀓𑀫𑀳𑀸𑀩𑁆𑀭𑀳𑁆𑀫𑀸 𑀏𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀦𑀲𑁆𑀲𑀢𑀺 𑀯𑀢 𑀪𑁄 𑀮𑁄𑀓𑁄𑀢𑀺 𑀲𑁄 𑀓𑀺𑀭 𑀇𑀫𑀁 𑀲𑀤𑁆𑀤𑀁 𑀢𑀣𑀸 𑀦𑀺𑀘𑁆𑀙𑀸𑀭𑁂𑀲𑀺, 𑀬𑀣𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀩𑁆𑀭𑀳𑁆𑀫𑀸𑀦𑁄 𑀲𑀼𑀢𑁆𑀯𑀸 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 ¶ 𑀬𑀲𑁆𑀫𑀺𑀁 𑀦𑀸𑀫 𑀮𑁄𑀓𑁂. 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀻𑀢𑀺 𑀢𑁂𑀳𑀺 𑀤𑀲𑀳𑀺 𑀩𑁆𑀭𑀳𑁆𑀫𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀧𑀸𑀢𑀼𑀭𑀳𑁄𑀲𑀺. 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸𑀢𑀺 𑀧𑀜𑁆𑀜𑀸𑀫𑀬𑁂 𑀅𑀓𑁆𑀔𑀺𑀫𑁆𑀳𑀺 𑀅𑀧𑁆𑀧𑀁 𑀧𑀭𑀺𑀢𑁆𑀢𑀁 𑀭𑀸𑀕𑀤𑁄𑀲𑀫𑁄𑀳𑀭𑀚𑀁 𑀏𑀢𑁂𑀲𑀁, 𑀏𑀯𑀁 𑀲𑀪𑀸𑀯𑀸𑀢𑀺 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸. 𑀅𑀲𑁆𑀲𑀯𑀦𑀢𑀸𑀢𑀺 𑀅𑀲𑁆𑀲𑀯𑀦𑀢𑀸𑀬. 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀯𑀲𑁂𑀦 𑀓𑀢𑀸𑀥𑀺𑀓𑀸𑀭𑀸 𑀧𑀭𑀺𑀧𑀸𑀓𑀕𑀢𑀸 𑀧𑀤𑀼𑀫𑀸𑀦𑀺 𑀯𑀺𑀬 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑁆𑀨𑀲𑁆𑀲𑀁, 𑀥𑀫𑁆𑀫𑀤𑁂𑀲𑀦𑀁𑀬𑁂𑀯 𑀆𑀓𑀗𑁆𑀔𑀫𑀸𑀦𑀸 𑀘𑀢𑀼𑀧𑁆𑀧𑀤𑀺𑀓𑀕𑀸𑀣𑀸𑀯𑀲𑀸𑀦𑁂 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀦𑀸𑀭𑀳𑀸 𑀦 𑀏𑀓𑁄, 𑀦 𑀤𑁆𑀯𑁂, 𑀅𑀦𑁂𑀓𑀲𑀢𑀲𑀳𑀲𑁆𑀲𑀸 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀢𑀸𑀭𑁄 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁬𑁯. 𑀅𑀚𑁆𑀛𑁂𑀲𑀦𑀦𑁆𑀢𑀺 𑀏𑀯𑀁 𑀢𑀺𑀓𑁆𑀔𑀢𑁆𑀢𑀼𑀁 𑀬𑀸𑀘𑀦𑀁. 𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀢𑀺 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑁂𑀦 𑀘 𑀆𑀲𑀬𑀸𑀦𑀼𑀲𑀬𑀜𑀸𑀡𑁂𑀦 𑀘. 𑀇𑀫𑁂𑀲𑀜𑁆𑀳𑀺 𑀤𑁆𑀯𑀺𑀦𑁆𑀦𑀁 𑀜𑀸𑀡𑀸𑀦𑀁 ‘‘𑀩𑀼𑀤𑁆𑀥𑀘𑀓𑁆𑀔𑀽’’𑀢𑀺 𑀦𑀸𑀫𑀁, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 ‘‘𑀲𑀫𑀦𑁆𑀢𑀘𑀓𑁆𑀔𑀽’’𑀢𑀺, 𑀢𑀺𑀡𑁆𑀡𑀁 𑀫𑀕𑁆𑀕𑀜𑀸𑀡𑀸𑀦𑀁 ‘‘𑀥𑀫𑁆𑀫𑀘𑀓𑁆𑀔𑀽’’𑀢𑀺. 𑀅𑀧𑁆𑀧𑀭𑀚𑀓𑁆𑀔𑁂𑀢𑀺𑀆𑀤𑀻𑀲𑀼 𑀬𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀜𑁆𑀜𑀸𑀘𑀓𑁆𑀔𑀼𑀫𑁆𑀳𑀺 𑀭𑀸𑀕𑀸𑀤𑀺𑀭𑀚𑀁 𑀅𑀧𑁆𑀧𑀁, 𑀢𑁂 𑀅𑀧𑁆𑀧𑀭𑀚𑀓𑁆𑀔𑀸. 𑀬𑁂𑀲𑀁 𑀢𑀁 𑀫𑀳𑀦𑁆𑀢𑀁, 𑀢𑁂 𑀫𑀳𑀸𑀭𑀚𑀓𑁆𑀔𑀸. 𑀬𑁂𑀲𑀁 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀢𑀺𑀓𑁆𑀔𑀸𑀦𑀺, 𑀢𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸. 𑀬𑁂𑀲𑀁 𑀢𑀸𑀦𑀺 𑀫𑀼𑀤𑀽𑀦𑀺, 𑀢𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑀸. 𑀬𑁂𑀲𑀁 𑀢𑁂𑀬𑁂𑀯 𑀲𑀤𑁆𑀥𑀸𑀤𑀬𑁄 𑀆𑀓𑀸𑀭𑀸 𑀲𑀼𑀦𑁆𑀤𑀭𑀸, 𑀢𑁂 𑀲𑁆𑀯𑀸𑀓𑀸𑀭𑀸. 𑀬𑁂 𑀓𑀣𑀺𑀢𑀓𑀸𑀭𑀡𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑀺, 𑀲𑀼𑀔𑁂𑀦 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀯𑀺𑀜𑁆𑀜𑀸𑀧𑁂𑀢𑀼𑀁, 𑀢𑁂 𑀲𑀼𑀯𑀺𑀜𑁆𑀜𑀸𑀧𑀬𑀸. 𑀬𑁂 𑀧𑀭𑀮𑁄𑀓𑀜𑁆𑀘𑁂𑀯 𑀯𑀚𑁆𑀚𑀜𑁆𑀘 𑀪𑀬𑀢𑁄 𑀧𑀲𑁆𑀲𑀦𑁆𑀢𑀺, 𑀢𑁂 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁄 𑀦𑀸𑀫.

𑀅𑀬𑀁 ¶ ¶ 𑀧𑀦𑁂𑀢𑁆𑀣 𑀧𑀸𑀴𑀺 𑁋 ‘‘𑀲𑀤𑁆𑀥𑁄 𑀧𑀼𑀕𑁆𑀕𑀮𑁄 𑀅𑀧𑁆𑀧𑀭𑀚𑀓𑁆𑀔𑁄, 𑀅𑀲𑁆𑀲𑀤𑁆𑀥𑁄 𑀧𑀼𑀕𑁆𑀕𑀮𑁄 𑀫𑀳𑀸𑀭𑀚𑀓𑁆𑀔𑁄.… 𑀆𑀭𑀤𑁆𑀥𑀯𑀻𑀭𑀺𑀬𑁄…𑀧𑁂… 𑀓𑀼𑀲𑀻𑀢𑁄… 𑀉𑀧𑀝𑁆𑀞𑀺𑀢𑀲𑁆𑀲𑀢𑀺… 𑀫𑀼𑀝𑁆𑀞𑀲𑁆𑀲𑀢𑀺… 𑀲𑀫𑀸𑀳𑀺𑀢𑁄… 𑀅𑀲𑀫𑀸𑀳𑀺𑀢𑁄… 𑀧𑀜𑁆𑀜𑀯𑀸… 𑀤𑀼𑀧𑁆𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀫𑀳𑀸𑀭𑀚𑀓𑁆𑀔𑁄. 𑀢𑀣𑀸 𑀲𑀤𑁆𑀥𑁄 𑀧𑀼𑀕𑁆𑀕𑀮𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄…𑀧𑁂… 𑀧𑀜𑁆𑀜𑀯𑀸 𑀧𑀼𑀕𑁆𑀕𑀮𑁄 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀻, 𑀤𑀼𑀧𑁆𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀦 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀻. 𑀮𑁄𑀓𑁄𑀢𑀺 𑀔𑀦𑁆𑀥𑀮𑁄𑀓𑁄, 𑀥𑀸𑀢𑀼𑀮𑁄𑀓𑁄, 𑀆𑀬𑀢𑀦𑀮𑁄𑀓𑁄, 𑀲𑀫𑁆𑀧𑀢𑁆𑀢𑀺𑀪𑀯𑀮𑁄𑀓𑁄, 𑀯𑀺𑀧𑀢𑁆𑀢𑀺𑀪𑀯𑀮𑁄𑀓𑁄, 𑀲𑀫𑁆𑀧𑀢𑁆𑀢𑀺𑀲𑀫𑁆𑀪𑀯𑀮𑁄𑀓𑁄, 𑀯𑀺𑀧𑀢𑁆𑀢𑀺𑀲𑀫𑁆𑀪𑀯𑀮𑁄𑀓𑁄. 𑀏𑀓𑁄 𑀮𑁄𑀓𑁄 𑁋 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸. 𑀤𑁆𑀯𑁂 𑀮𑁄𑀓𑀸 𑁋 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘. 𑀢𑀬𑁄 𑀮𑁄𑀓𑀸 𑁋 𑀢𑀺𑀲𑁆𑀲𑁄 𑀯𑁂𑀤𑀦𑀸. 𑀘𑀢𑁆𑀢𑀸𑀭𑁄 𑀮𑁄𑀓𑀸 𑁋 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸. 𑀧𑀜𑁆𑀘 𑀮𑁄𑀓𑀸 𑁋 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀙 𑀮𑁄𑀓𑀸 𑁋 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺. 𑀲𑀢𑁆𑀢 𑀮𑁄𑀓𑀸 𑁋 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄. 𑀅𑀝𑁆𑀞 𑀮𑁄𑀓𑀸 𑁋 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸. 𑀦𑀯 𑀮𑁄𑀓𑀸 𑁋 𑀦𑀯 𑀲𑀢𑁆𑀢𑀸𑀯𑀸𑀲𑀸. 𑀤𑀲 𑀮𑁄𑀓𑀸 𑁋 𑀤𑀲𑀸𑀬𑀢𑀦𑀸𑀦𑀺. 𑀤𑁆𑀯𑀸𑀤𑀲 𑀮𑁄𑀓𑀸 𑁋 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺. 𑀅𑀝𑁆𑀞𑀸𑀭𑀲 𑀮𑁄𑀓𑀸 𑁋 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄. 𑀯𑀚𑁆𑀚𑀦𑁆𑀢𑀺 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀯𑀚𑁆𑀚𑀁, 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸 𑀯𑀚𑁆𑀚𑀁, 𑀲𑀩𑁆𑀩𑁂 𑀅𑀪𑀺𑀲𑀗𑁆𑀔𑀸𑀭𑀸 𑀯𑀚𑁆𑀚𑀁, 𑀲𑀩𑁆𑀩𑁂 𑀪𑀯𑀕𑀸𑀫𑀺𑀓𑀫𑁆𑀫𑀸 𑀯𑀚𑁆𑀚𑀁. 𑀇𑀢𑀺 𑀇𑀫𑀲𑁆𑀫𑀺𑀜𑁆𑀘 𑀮𑁄𑀓𑁂 𑀇𑀫𑀲𑁆𑀫𑀺𑀜𑁆𑀘 𑀯𑀚𑁆𑀚𑁂 𑀢𑀺𑀩𑁆𑀩𑀸 𑀪𑀬𑀲𑀜𑁆𑀜𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑁂 𑀯𑀥𑀓𑁂 ¶ . 𑀇𑀫𑁂𑀳𑀺 𑀧𑀜𑁆𑀜𑀸𑀲𑀸𑀬 𑀆𑀓𑀸𑀭𑁂𑀳𑀺 𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 𑀅𑀜𑁆𑀜𑀸𑀢𑀺 𑀧𑀝𑀺𑀯𑀺𑀚𑁆𑀛𑀢𑀺, 𑀇𑀤𑀁 𑀢𑀣𑀸𑀕𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑁂 𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑁧.𑁧𑁧𑁨).

𑀉𑀧𑁆𑀧𑀮𑀺𑀦𑀺𑀬𑀦𑁆𑀢𑀺 𑀉𑀧𑁆𑀧𑀮𑀯𑀦𑁂. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑁆𑀢𑁄𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀻𑀢𑀺 𑀬𑀸𑀦𑀺 𑀅𑀜𑁆𑀜𑀸𑀦𑀺𑀧𑀺 𑀧𑀤𑀼𑀫𑀸𑀦𑀺 𑀅𑀦𑁆𑀢𑁄𑀦𑀺𑀫𑀼𑀕𑁆𑀕𑀸𑀦𑁂𑀯 𑀧𑁄𑀲𑀬𑀦𑁆𑀢𑀺. 𑀉𑀤𑀓𑀁 𑀅𑀘𑁆𑀘𑀼𑀕𑁆𑀕𑀫𑁆𑀫 𑀞𑀺𑀢𑀸𑀦𑀻𑀢𑀺 𑀉𑀤𑀓𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀸𑀦𑀺. 𑀢𑀢𑁆𑀣 𑀬𑀸𑀦𑀺 𑀅𑀘𑁆𑀘𑀼𑀕𑁆𑀕𑀫𑁆𑀫 𑀞𑀺𑀢𑀸𑀦𑀺, 𑀢𑀸𑀦𑀺 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑁆𑀨𑀲𑁆𑀲𑀁 𑀆𑀕𑀫𑀬𑀫𑀸𑀦𑀸𑀦𑀺 𑀞𑀺𑀢𑀸𑀦𑀺 𑀅𑀚𑁆𑀚 𑀧𑀼𑀧𑁆𑀨𑀦𑀓𑀸𑀦𑀺. 𑀬𑀸𑀦𑀺 𑀲𑀫𑁄𑀤𑀓𑀁 𑀞𑀺𑀢𑀸𑀦𑀺, 𑀢𑀸𑀦𑀺 𑀲𑁆𑀯𑁂 𑀧𑀼𑀧𑁆𑀨𑀦𑀓𑀸𑀦𑀺. 𑀬𑀸𑀦𑀺 𑀉𑀤𑀓𑀸𑀦𑀼𑀕𑁆𑀕𑀢𑀸𑀦𑀺 𑀅𑀦𑁆𑀢𑁄𑀉𑀤𑀓𑀧𑁄𑀲𑀻𑀦𑀺, 𑀢𑀸𑀦𑀺 𑀢𑀢𑀺𑀬𑀤𑀺𑀯𑀲𑁂 𑀧𑀼𑀧𑁆𑀨𑀦𑀓𑀸𑀦𑀺. 𑀉𑀤𑀓𑀸 𑀧𑀦 𑀅𑀦𑀼𑀕𑁆𑀕𑀢𑀸𑀦𑀺 𑀅𑀜𑁆𑀜𑀸𑀦𑀺𑀧𑀺 𑀲𑀭𑁄𑀚𑀉𑀧𑁆𑀧𑀮𑀸𑀤𑀻𑀦𑀺 𑀦𑀸𑀫 ¶ 𑀅𑀢𑁆𑀣𑀺, 𑀬𑀸𑀦𑀺 𑀦𑁂𑀯 𑀧𑀼𑀧𑁆𑀨𑀺𑀲𑁆𑀲𑀦𑁆𑀢𑀺, 𑀫𑀘𑁆𑀙𑀓𑀘𑁆𑀙𑀧𑀪𑀓𑁆𑀔𑀸𑀦𑁂𑀯 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀸𑀦𑀺 𑀧𑀸𑀴𑀺𑀁 𑀦𑀸𑀭𑀽𑀴𑁆𑀳𑀸𑀦𑀺. 𑀆𑀳𑀭𑀺𑀢𑁆𑀯𑀸 𑀧𑀦 𑀤𑀻𑀧𑁂𑀢𑀩𑁆𑀩𑀸𑀦𑀻𑀢𑀺 𑀤𑀻𑀧𑀺𑀢𑀸𑀦𑀺. 𑀬𑀣𑁂𑀯 𑀳𑀺 𑀢𑀸𑀦𑀺 𑀘𑀢𑀼𑀩𑁆𑀩𑀺𑀥𑀸𑀦𑀺 𑀧𑀼𑀧𑁆𑀨𑀸𑀦𑀺, 𑀏𑀯𑀫𑁂𑀯 𑀉𑀕𑁆𑀖𑀝𑀺𑀢𑀜𑁆𑀜𑀽, 𑀯𑀺𑀧𑀜𑁆𑀘𑀺𑀢𑀜𑁆𑀜𑀽, 𑀦𑁂𑀬𑁆𑀬𑁄, 𑀧𑀤𑀧𑀭𑀫𑁄𑀢𑀺 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸. 𑀢𑀢𑁆𑀣 𑀬𑀲𑁆𑀲 ¶ 𑀧𑀼𑀕𑁆𑀕𑀮𑀲𑁆𑀲 𑀲𑀳 𑀉𑀤𑀸𑀳𑀝𑀯𑁂𑀮𑀸𑀬 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀉𑀕𑁆𑀖𑀝𑀺𑀢𑀜𑁆𑀜𑀽. 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀗𑁆𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁂 𑀯𑀺𑀪𑀚𑀺𑀬𑀫𑀸𑀦𑁂 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀽. 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀤𑁆𑀤𑁂𑀲𑀢𑁄 𑀧𑀭𑀺𑀧𑀼𑀘𑁆𑀙𑀢𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀭𑁄𑀢𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀦𑁂𑀬𑁆𑀬𑁄. 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀩𑀳𑀼𑀫𑁆𑀧𑀺 𑀲𑀼𑀡𑀢𑁄 𑀩𑀳𑀼𑀫𑁆𑀧𑀺 𑀪𑀡𑀢𑁄 𑀩𑀳𑀼𑀫𑁆𑀧𑀺 𑀕𑀡𑁆𑀳𑀢𑁄 𑀩𑀳𑀼𑀫𑁆𑀧𑀺 𑀥𑀸𑀭𑀬𑀢𑁄 𑀩𑀳𑀼𑀫𑁆𑀧𑀺 𑀯𑀸𑀘𑀬𑀢𑁄 𑀦 𑀢𑀸𑀬 𑀚𑀸𑀢𑀺𑀬𑀸 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀧𑀤𑀧𑀭𑀫𑁄 (𑀧𑀼. 𑀧. 𑁧𑁪𑁮, 𑁧𑁪𑁯, 𑁧𑁫𑁦, 𑁧𑁫𑁧).

𑀢𑀢𑁆𑀣 𑀪𑀕𑀯𑀸 𑀉𑀧𑁆𑀧𑀮𑀯𑀦𑀸𑀤𑀺𑀲𑀤𑀺𑀲𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑁂𑀦𑁆𑀢𑁄 𑁋 ‘‘𑀅𑀚𑁆𑀚 𑀧𑀼𑀧𑁆𑀨𑀦𑀓𑀸𑀦𑀺 𑀯𑀺𑀬 𑀉𑀕𑁆𑀖𑀝𑀺𑀢𑀜𑁆𑀜𑀽, 𑀲𑁆𑀯𑁂 𑀧𑀼𑀧𑁆𑀨𑀦𑀓𑀸𑀦𑀺 𑀯𑀺𑀬 𑀯𑀺𑀧𑀜𑁆𑀘𑀺𑀢𑀜𑁆𑀜𑀽, 𑀢𑀢𑀺𑀬𑀤𑀺𑀯𑀲𑁂 𑀧𑀼𑀧𑁆𑀨𑀦𑀓𑀸𑀦𑀺 𑀯𑀺𑀬 𑀦𑁂𑀬𑁆𑀬𑁄, 𑀫𑀘𑁆𑀙𑀓𑀘𑁆𑀙𑀧𑀪𑀓𑁆𑀔𑀸𑀦𑀺 𑀯𑀺𑀬 𑀧𑀤𑀧𑀭𑀫𑁄’’𑀢𑀺 𑀅𑀤𑁆𑀤𑀲. 𑀧𑀲𑁆𑀲𑀦𑁆𑀢𑁄 𑀘 𑁋 ‘‘𑀏𑀢𑁆𑀢𑀓𑀸 𑀅𑀧𑁆𑀧𑀭𑀚𑀓𑁆𑀔𑀸, 𑀏𑀢𑁆𑀢𑀓𑀸 𑀫𑀳𑀸𑀭𑀚𑀓𑁆𑀔𑀸. 𑀢𑀢𑁆𑀭𑀸𑀧𑀺 𑀏𑀢𑁆𑀢𑀓𑀸 𑀉𑀕𑁆𑀖𑀝𑀺𑀢𑀜𑁆𑀜𑀽’’𑀢𑀺 𑀏𑀯𑀁 𑀲𑀩𑁆𑀩𑀸𑀓𑀸𑀭𑀢𑁄 𑀅𑀤𑁆𑀤𑀲. 𑀢𑀢𑁆𑀣 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸 𑀅𑀢𑁆𑀣𑀁 𑀲𑀸𑀥𑁂𑀢𑀺, 𑀧𑀤𑀧𑀭𑀫𑀸𑀦𑀁 𑀅𑀦𑀸𑀕𑀢𑁂 𑀯𑀸𑀲𑀦𑀢𑁆𑀣𑀸𑀬 𑀳𑁄𑀢𑀺.

𑀅𑀣 𑀪𑀕𑀯𑀸 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀢𑁆𑀣𑀸𑀯𑀳𑀁 𑀥𑀫𑁆𑀫𑀤𑁂𑀲𑀦𑀁 𑀯𑀺𑀤𑀺𑀢𑁆𑀯𑀸 𑀤𑁂𑀲𑁂𑀢𑀼𑀓𑀫𑁆𑀬𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀼𑀦 𑀢𑁂 𑀲𑀩𑁆𑀩𑁂𑀲𑀼𑀧𑀺 𑀢𑀻𑀲𑀼 𑀪𑀯𑁂𑀲𑀼 𑀲𑀩𑁆𑀩𑁂 𑀲𑀢𑁆𑀢𑁂 𑀪𑀩𑁆𑀩𑀸𑀪𑀩𑁆𑀩𑀯𑀲𑁂𑀦 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀅𑀓𑀸𑀲𑀺. 𑀬𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀬𑁂 𑀢𑁂 𑀲𑀢𑁆𑀢𑀸 𑀓𑀫𑁆𑀫𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀯𑀺𑀧𑀸𑀓𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀓𑀺𑀮𑁂𑀲𑀸𑀯𑀭𑀡𑁂𑀦 ¶ 𑀲𑀫𑀦𑁆𑀦𑀸𑀕𑀢𑀸, 𑀅𑀲𑁆𑀲𑀤𑁆𑀥𑀸 𑀅𑀘𑁆𑀙𑀦𑁆𑀤𑀺𑀓𑀸 𑀤𑀼𑀧𑁆𑀧𑀜𑁆𑀜𑀸 𑀅𑀪𑀩𑁆𑀩𑀸 𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀁, 𑀇𑀫𑁂 𑀢𑁂 𑀲𑀢𑁆𑀢𑀸 𑀅𑀪𑀩𑁆𑀩𑀸. 𑀓𑀢𑀫𑁂 𑀲𑀢𑁆𑀢𑀸 𑀪𑀩𑁆𑀩𑀸? 𑀬𑁂 𑀢𑁂 𑀲𑀢𑁆𑀢𑀸 𑀦 𑀓𑀫𑁆𑀫𑀸𑀯𑀭𑀡𑁂𑀦…𑀧𑁂…𑀇𑀫𑁂 𑀢𑁂 𑀲𑀢𑁆𑀢𑀸 𑀪𑀩𑁆𑀩𑀸’’𑀢𑀺 (𑀯𑀺𑀪. 𑁮𑁨𑁭; 𑀧𑀝𑀺. 𑀫. 𑁧.𑁧𑁧𑁪).

𑀢𑀢𑁆𑀣 𑀲𑀩𑁆𑀩𑁂𑀧𑀺 𑀅𑀪𑀩𑁆𑀩𑀧𑀼𑀕𑁆𑀕𑀮𑁂 ¶ 𑀧𑀳𑀸𑀬 𑀪𑀩𑁆𑀩𑀧𑀼𑀕𑁆𑀕𑀮𑁂𑀬𑁂𑀯 𑀜𑀸𑀡𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑁋 ‘‘𑀏𑀢𑁆𑀢𑀓𑀸 𑀭𑀸𑀕𑀘𑀭𑀺𑀢𑀸, 𑀏𑀢𑁆𑀢𑀓𑀸 𑀤𑁄𑀲𑀫𑁄𑀳𑀯𑀺𑀢𑀓𑁆𑀓𑀲𑀤𑁆𑀥𑀸𑀩𑀼𑀤𑁆𑀥𑀺𑀘𑀭𑀺𑀢𑀸’’𑀢𑀺 𑀙 𑀓𑁄𑀝𑁆𑀞𑀸𑀲𑁂 𑀅𑀓𑀸𑀲𑀺. 𑀏𑀯𑀁 𑀓𑀢𑁆𑀯𑀸 𑁋 ‘‘𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺 ¶ . 𑀩𑁆𑀭𑀳𑁆𑀫𑀸 𑀢𑀁 𑀜𑀢𑁆𑀯𑀸 𑀲𑁄𑀫𑀦𑀲𑁆𑀲𑀚𑀸𑀢𑁄 𑀪𑀕𑀯𑀦𑁆𑀢𑀁 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺. 𑀇𑀤𑀁 𑀲𑀦𑁆𑀥𑀸𑀬 𑁋 ‘‘𑀅𑀣 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀩𑁆𑀭𑀳𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁭𑁦. 𑀢𑀢𑁆𑀣 𑀅𑀚𑁆𑀛𑀪𑀸𑀲𑀻𑀢𑀺 𑀅𑀥𑀺𑀅𑀪𑀸𑀲𑀺, 𑀅𑀥𑀺𑀓𑀺𑀘𑁆𑀘 𑀆𑀭𑀩𑁆𑀪 𑀅𑀪𑀸𑀲𑀻𑀢𑀺 𑀅𑀢𑁆𑀣𑁄.

𑀲𑁂𑀮𑁂 𑀬𑀣𑀸 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀝𑁆𑀞𑀺𑀢𑁄𑀢𑀺 𑀲𑁂𑀮𑀫𑀬𑁂 𑀏𑀓𑀕𑁆𑀖𑀦𑁂 𑀧𑀩𑁆𑀩𑀢𑀫𑀼𑀤𑁆𑀥𑀦𑀺 𑀬𑀣𑀸𑀞𑀺𑀢𑁄𑀯, 𑀦 𑀳𑀺 𑀢𑀢𑁆𑀣 𑀞𑀺𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀕𑀻𑀯𑀼𑀓𑁆𑀔𑀺𑀧𑀦𑀧𑀲𑀸𑀭𑀡𑀸𑀤𑀺𑀓𑀺𑀘𑁆𑀘𑀁 𑀅𑀢𑁆𑀣𑀺. 𑀢𑀣𑀽𑀧𑀫𑀦𑁆𑀢𑀺 𑀢𑀧𑁆𑀧𑀝𑀺𑀪𑀸𑀕𑀁 𑀲𑁂𑀮𑀧𑀩𑁆𑀩𑀢𑀽𑀧𑀫𑀁. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄, 𑀬𑀣𑀸 𑀲𑁂𑀮𑀧𑀩𑁆𑀩𑀢𑀫𑀼𑀤𑁆𑀥𑀦𑀺 𑀬𑀣𑀸𑀞𑀺𑀢𑁄𑀯 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀫𑀦𑁆𑀢𑀢𑁄 𑀚𑀦𑀢𑀁 𑀧𑀲𑁆𑀲𑁂𑀬𑁆𑀬, 𑀢𑀣𑀸 𑀢𑁆𑀯𑀫𑁆𑀧𑀺 𑀲𑀼𑀫𑁂𑀥, 𑀲𑀼𑀦𑁆𑀤𑀭𑀧𑀜𑁆𑀜𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀫𑀦𑁆𑀢𑀘𑀓𑁆𑀔𑀼 𑀪𑀕𑀯𑀸 𑀥𑀫𑁆𑀫𑀫𑀬𑀁 𑀧𑀜𑁆𑀜𑀸𑀫𑀬𑀁 𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀲𑀬𑀁 𑀅𑀧𑁂𑀢𑀲𑁄𑀓𑁄 𑀲𑁄𑀓𑀸𑀯𑀢𑀺𑀡𑁆𑀡𑀁 𑀚𑀸𑀢𑀺𑀚𑀭𑀸𑀪𑀺𑀪𑀽𑀢𑀁 𑀚𑀦𑀢𑀁 𑀅𑀧𑁂𑀓𑁆𑀔𑀲𑁆𑀲𑀼, 𑀉𑀧𑀥𑀸𑀭𑀬 𑀉𑀧𑀧𑀭𑀺𑀓𑁆𑀔.

𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸 𑀳𑀺 𑀧𑀩𑁆𑀩𑀢𑀧𑀸𑀤𑁂 𑀲𑀫𑀦𑁆𑀢𑀸 𑀫𑀳𑀦𑁆𑀢𑀁 𑀔𑁂𑀢𑁆𑀢𑀁 𑀓𑀢𑁆𑀯𑀸 𑀢𑀢𑁆𑀣 𑀓𑁂𑀤𑀸𑀭𑀧𑀸𑀴𑀻𑀲𑀼 𑀓𑀼𑀝𑀺𑀓𑀸𑀬𑁄 𑀓𑀢𑁆𑀯𑀸 𑀭𑀢𑁆𑀢𑀺𑀁 𑀅𑀕𑁆𑀕𑀺𑀁 𑀚𑀸𑀮𑁂𑀬𑁆𑀬𑀼𑀁. 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀜𑁆𑀘 𑀅𑀦𑁆𑀥𑀓𑀸𑀭𑀁 𑀅𑀲𑁆𑀲. 𑀅𑀣𑀲𑁆𑀲 𑀧𑀩𑁆𑀩𑀢𑀲𑁆𑀲 𑀫𑀢𑁆𑀣𑀓𑁂 𑀞𑀢𑁆𑀯𑀸 𑀘𑀓𑁆𑀔𑀼𑀫𑀢𑁄 𑀧𑀼𑀭𑀺𑀲𑀲𑁆𑀲 𑀪𑀽𑀫𑀺𑀁 𑀑𑀮𑁄𑀓𑀬𑀢𑁄 𑀦𑁂𑀯 𑀔𑁂𑀢𑁆𑀢𑀁, 𑀦 𑀓𑁂𑀤𑀸𑀭𑀧𑀸𑀴𑀺𑀬𑁄, 𑀦 𑀓𑀼𑀝𑀺𑀬𑁄, 𑀦 𑀢𑀢𑁆𑀣 𑀲𑀬𑀺𑀢𑀫𑀦𑀼𑀲𑁆𑀲𑀸 𑀧𑀜𑁆𑀜𑀸𑀬𑁂𑀬𑁆𑀬𑀼𑀁, 𑀓𑀼𑀝𑀺𑀓𑀸𑀲𑀼 𑀧𑀦 𑀅𑀕𑁆𑀕𑀺𑀚𑀸𑀮𑀫𑀢𑁆𑀢𑀫𑁂𑀯 𑀧𑀜𑁆𑀜𑀸𑀬𑁂𑀬𑁆𑀬. 𑀏𑀯𑀁 𑀥𑀫𑁆𑀫𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀲𑀢𑁆𑀢𑀦𑀺𑀓𑀸𑀬𑀁 𑀑𑀮𑁄𑀓𑀬𑀢𑁄 𑀢𑀣𑀸𑀕𑀢𑀲𑁆𑀲 𑀬𑁂 𑀢𑁂 𑀅𑀓𑀢𑀓𑀮𑁆𑀬𑀸𑀡𑀸 𑀲𑀢𑁆𑀢𑀸, 𑀢𑁂 𑀏𑀓𑀯𑀺𑀳𑀸𑀭𑁂 𑀤𑀓𑁆𑀔𑀺𑀡𑀚𑀸𑀡𑀼𑀧𑀲𑁆𑀲𑁂 𑀦𑀺𑀲𑀺𑀦𑁆𑀦𑀸𑀧𑀺 𑀩𑀼𑀤𑁆𑀥𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀦𑀸𑀕𑀘𑁆𑀙𑀦𑁆𑀢𑀺, 𑀭𑀢𑁆𑀢𑀺𑀁 𑀔𑀺𑀢𑁆𑀢𑀲𑀭𑀸 𑀯𑀺𑀬 𑀳𑁄𑀦𑁆𑀢𑀺. 𑀬𑁂 𑀧𑀦 𑀓𑀢𑀓𑀮𑁆𑀬𑀸𑀡𑀸 𑀯𑁂𑀦𑁂𑀬𑁆𑀬𑀧𑀼𑀕𑁆𑀕𑀮𑀸, 𑀢𑁂 𑀢𑀲𑁆𑀲 𑀤𑀽𑀭𑁂 𑀞𑀺𑀢𑀸𑀧𑀺 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀲𑁄 𑀅𑀕𑁆𑀕𑀺 𑀯𑀺𑀬 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑁄 𑀯𑀺𑀬 𑀘. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀤𑀽𑀭𑁂 𑀲𑀦𑁆𑀢𑁄 𑀧𑀓𑀸𑀲𑁂𑀦𑁆𑀢𑀺, 𑀳𑀺𑀫𑀯𑀦𑁆𑀢𑁄𑀯 𑀧𑀩𑁆𑀩𑀢𑁄;

𑀅𑀲𑀦𑁆𑀢𑁂𑀢𑁆𑀣 𑀦 𑀤𑀺𑀲𑁆𑀲𑀦𑁆𑀢𑀺, 𑀭𑀢𑁆𑀢𑀺𑀁 𑀔𑀺𑀢𑁆𑀢𑀸 𑀬𑀣𑀸 𑀲𑀭𑀸’’𑀢𑀺. (𑀥. 𑀧. 𑁩𑁦𑁪);

𑀉𑀝𑁆𑀞𑁂𑀳𑀻𑀢𑀺 ¶ ¶ 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀘𑀸𑀭𑀺𑀓𑀘𑀭𑀡𑀁 𑀬𑀸𑀘𑀦𑁆𑀢𑁄 𑀪𑀡𑀢𑀺. 𑀯𑀻𑀭𑀸𑀢𑀺𑀆𑀤𑀻𑀲𑀼 𑀪𑀕𑀯𑀸 𑀯𑀻𑀭𑀺𑀬𑀯𑀦𑁆𑀢𑀢𑀸𑀬 𑀯𑀻𑀭𑁄, 𑀤𑁂𑀯𑀧𑀼𑀢𑁆𑀢𑀫𑀘𑁆𑀘𑀼𑀓𑀺𑀮𑁂𑀲𑀫𑀸𑀭𑀸𑀦𑀁 𑀯𑀺𑀚𑀺𑀢𑀢𑁆𑀢𑀸 ¶ 𑀯𑀺𑀚𑀺𑀢𑀲𑀗𑁆𑀕𑀸𑀫𑁄, 𑀚𑀸𑀢𑀺𑀓𑀦𑁆𑀢𑀭𑀸𑀤𑀺𑀦𑀺𑀢𑁆𑀣𑀭𑀡𑀢𑁆𑀣𑀸𑀬 𑀯𑁂𑀦𑁂𑀬𑁆𑀬𑀲𑀢𑁆𑀣𑀯𑀸𑀳𑀦𑀲𑀫𑀢𑁆𑀣𑀢𑀸𑀬 𑀲𑀢𑁆𑀣𑀯𑀸𑀳𑁄, 𑀓𑀸𑀫𑀘𑁆𑀙𑀦𑁆𑀤𑀇𑀡𑀲𑁆𑀲 𑀅𑀪𑀸𑀯𑀢𑁄 𑀅𑀡𑀡𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁭𑁧. 𑀅𑀧𑀸𑀭𑀼𑀢𑀸𑀢𑀺 𑀯𑀺𑀯𑀝𑀸. 𑀅𑀫𑀢𑀲𑁆𑀲 𑀤𑁆𑀯𑀸𑀭𑀸𑀢𑀺 𑀅𑀭𑀺𑀬𑀫𑀕𑁆𑀕𑁄. 𑀲𑁄 𑀳𑀺 𑀅𑀫𑀢𑀲𑀗𑁆𑀔𑀸𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀤𑁆𑀯𑀸𑀭𑀁. 𑀲𑁄 𑀫𑀬𑀸 𑀯𑀺𑀯𑀭𑀺𑀢𑁆𑀯𑀸 𑀞𑀧𑀺𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀫𑀼𑀜𑁆𑀘𑀦𑁆𑀢𑀼 𑀲𑀤𑁆𑀥𑀦𑁆𑀢𑀺 𑀲𑀩𑁆𑀩𑁂 𑀅𑀢𑁆𑀢𑀦𑁄 𑀲𑀤𑁆𑀥𑀁 𑀧𑀫𑀼𑀜𑁆𑀘𑀦𑁆𑀢𑀼 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀼. 𑀧𑀘𑁆𑀙𑀺𑀫𑀧𑀤𑀤𑁆𑀯𑀬𑁂 𑀅𑀬𑀫𑀢𑁆𑀣𑁄, 𑀅𑀳𑀜𑁆𑀳𑀺 𑀅𑀢𑁆𑀢𑀦𑁄 𑀧𑀕𑀼𑀡𑀁 𑀲𑀼𑀧𑁆𑀧𑀯𑀢𑁆𑀢𑀺𑀢𑀫𑁆𑀧𑀺 𑀇𑀫𑀁 𑀧𑀡𑀻𑀢𑀁 𑀉𑀢𑁆𑀢𑀫𑀁 𑀥𑀫𑁆𑀫𑀁 𑀓𑀸𑀬𑀯𑀸𑀘𑀸𑀓𑀺𑀮𑀫𑀣𑀲𑀜𑁆𑀜𑀻 𑀳𑀼𑀢𑁆𑀯𑀸 𑀦 𑀪𑀸𑀲𑀺𑀁, 𑀇𑀤𑀸𑀦𑀺 𑀧𑀦 𑀲𑀩𑁆𑀩𑁂 𑀚𑀦𑀸 𑀲𑀤𑁆𑀥𑀸𑀪𑀸𑀚𑀦𑀁 𑀉𑀧𑀦𑁂𑀦𑁆𑀢𑀼, 𑀧𑀽𑀭𑁂𑀲𑁆𑀲𑀸𑀫𑀺 𑀢𑁂𑀲𑀁 𑀲𑀗𑁆𑀓𑀧𑁆𑀧𑀦𑁆𑀢𑀺.

𑀅𑀕𑁆𑀕𑀲𑀸𑀯𑀓𑀬𑀼𑀕𑀯𑀡𑁆𑀡𑀦𑀸

𑁭𑁩. 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂𑀢𑀺 𑀩𑁄𑀥𑀺𑀭𑀼𑀓𑁆𑀔𑀲𑁆𑀲 𑀅𑀯𑀺𑀤𑀽𑀭𑁂 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂 𑀅𑀦𑁆𑀢𑀭𑀳𑀺𑀢𑁄𑀢𑀺 𑀅𑀢𑁆𑀣𑁄. 𑀔𑁂𑀫𑁂 𑀫𑀺𑀕𑀤𑀸𑀬𑁂𑀢𑀺 𑀇𑀲𑀺𑀧𑀢𑀦𑀁 𑀢𑁂𑀦 𑀲𑀫𑀬𑁂𑀦 𑀔𑁂𑀫𑀁 𑀦𑀸𑀫 𑀉𑀬𑁆𑀬𑀸𑀦𑀁 𑀳𑁄𑀢𑀺, 𑀫𑀺𑀕𑀸𑀦𑀁 𑀧𑀦 𑀅𑀪𑀬𑀯𑀸𑀲𑀢𑁆𑀣𑀸𑀬 𑀤𑀺𑀦𑁆𑀦𑀢𑁆𑀢𑀸 𑀫𑀺𑀕𑀤𑀸𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀔𑁂𑀫𑁂 𑀫𑀺𑀕𑀤𑀸𑀬𑁂’’𑀢𑀺. 𑀬𑀣𑀸 𑀘 𑀯𑀺𑀧𑀲𑁆𑀲𑀻 𑀪𑀕𑀯𑀸, 𑀏𑀯𑀁 𑀅𑀜𑁆𑀜𑁂𑀧𑀺 𑀩𑀼𑀤𑁆𑀥𑀸 𑀧𑀞𑀫𑀁 𑀥𑀫𑁆𑀫𑀤𑁂𑀲𑀦𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀸 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀑𑀢𑀭𑀦𑁆𑀢𑀺. 𑀅𑀫𑁆𑀳𑀸𑀓𑀁 𑀧𑀦 𑀪𑀕𑀯𑀸 𑀉𑀧𑀓𑀲𑁆𑀲 𑀆𑀚𑀻𑀯𑀓𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑁋 ‘‘𑀉𑀧𑀓𑁄 𑀇𑀫𑀁 𑀅𑀤𑁆𑀥𑀸𑀦𑀁 𑀧𑀝𑀺𑀧𑀦𑁆𑀦𑁄, 𑀲𑁄 𑀫𑀁 𑀤𑀺𑀲𑁆𑀯𑀸 𑀲𑀮𑁆𑀮𑀧𑀺𑀢𑁆𑀯𑀸 𑀕𑀫𑀺𑀲𑁆𑀲𑀢𑀺. 𑀅𑀣 𑀧𑀼𑀦 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀆𑀕𑀫𑁆𑀫 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀅𑀝𑁆𑀞𑀸𑀭𑀲𑀬𑁄𑀚𑀦𑀫𑀕𑁆𑀕𑀁 𑀧𑀤𑀲𑀸𑀯 𑀅𑀕𑀫𑀸𑀲𑀺. 𑀤𑀸𑀬𑀧𑀸𑀮𑀁 𑀆𑀫𑀦𑁆𑀢𑁂𑀲𑀻𑀢𑀺 𑀤𑀺𑀲𑁆𑀯𑀸𑀯 𑀧𑀼𑀦𑀧𑁆𑀧𑀼𑀦𑀁 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀅𑀬𑁆𑀬𑁄 𑀦𑁄, 𑀪𑀦𑁆𑀢𑁂, 𑀆𑀕𑀢𑁄’’𑀢𑀺 𑀯𑀢𑁆𑀯𑀸 𑀉𑀧𑀕𑀢𑀁 𑀆𑀫𑀦𑁆𑀢𑁂𑀲𑀺.

𑁭𑁫-𑁬. 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀦𑁆𑀢𑀺 𑀤𑀸𑀦𑀓𑀣𑀁, 𑀤𑀸𑀦𑀸𑀦𑀦𑁆𑀢𑀭𑀁 𑀲𑀻𑀮𑀁, 𑀲𑀻𑀮𑀸𑀦𑀦𑁆𑀢𑀭𑀁 𑀲𑀕𑁆𑀕𑀁, 𑀲𑀕𑁆𑀕𑀸𑀦𑀦𑁆𑀢𑀭𑀁 𑀫𑀕𑁆𑀕𑀦𑁆𑀢𑀺 𑀏𑀯𑀁 𑀅𑀦𑀼𑀧𑀝𑀺𑀧𑀸𑀝𑀺𑀓𑀣𑀁 𑀓𑀣𑁂𑀲𑀺. 𑀢𑀢𑁆𑀣 𑀤𑀸𑀦𑀓𑀣𑀦𑁆𑀢𑀺 𑀇𑀤𑀁 𑀤𑀸𑀦𑀁 𑀦𑀸𑀫 𑀲𑀼𑀔𑀸𑀦𑀁 𑀦𑀺𑀤𑀸𑀦𑀁, 𑀲𑀫𑁆𑀧𑀢𑁆𑀢𑀻𑀦𑀁 𑀫𑀽𑀮𑀁, 𑀪𑁄𑀕𑀸𑀦𑀁 𑀧𑀢𑀺𑀝𑁆𑀞𑀸, 𑀯𑀺𑀲𑀫𑀕𑀢𑀲𑁆𑀲 𑀢𑀸𑀡𑀁 𑀮𑁂𑀡𑀁 𑀕𑀢𑀺 𑀧𑀭𑀸𑀬𑀡𑀁, 𑀇𑀥𑀮𑁄𑀓𑀧𑀭𑀮𑁄𑀓𑁂𑀲𑀼 𑀤𑀸𑀦𑀲𑀤𑀺𑀲𑁄 𑀅𑀯𑀲𑁆𑀲𑀬𑁄 ¶ 𑀧𑀢𑀺𑀝𑁆𑀞𑀸 𑀆𑀭𑀫𑁆𑀫𑀡𑀁 𑀢𑀸𑀡𑀁 𑀮𑁂𑀡𑀁 𑀕𑀢𑀺 𑀧𑀭𑀸𑀬𑀡𑀁 𑀦𑀢𑁆𑀣𑀺. 𑀇𑀤𑀜𑁆𑀳𑀺 𑀅𑀯𑀲𑁆𑀲𑀬𑀝𑁆𑀞𑁂𑀦 𑀭𑀢𑀦𑀫𑀬𑀲𑀻𑀳𑀸𑀲𑀦𑀲𑀤𑀺𑀲𑀁, 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀫𑀳𑀸𑀧𑀣𑀯𑀻𑀲𑀤𑀺𑀲𑀁, 𑀆𑀭𑀫𑁆𑀫𑀡𑀝𑁆𑀞𑁂𑀦 ¶ 𑀆𑀮𑀫𑁆𑀩𑀦𑀭𑀚𑁆𑀚𑀼𑀲𑀤𑀺𑀲𑀁. 𑀇𑀤𑀜𑁆𑀳𑀺 𑀤𑀼𑀓𑁆𑀔𑀦𑀺𑀢𑁆𑀣𑀭𑀡𑀝𑁆𑀞𑁂𑀦 𑀦𑀸𑀯𑀸, 𑀲𑀫𑀲𑁆𑀲𑀸𑀲𑀦𑀝𑁆𑀞𑁂𑀦 𑀲𑀗𑁆𑀕𑀸𑀫𑀲𑀽𑀭𑁄, 𑀪𑀬𑀧𑀭𑀺𑀢𑁆𑀢𑀸𑀡𑀝𑁆𑀞𑁂𑀦 𑀲𑀼𑀲𑀗𑁆𑀔𑀢𑀦𑀕𑀭𑀁, 𑀫𑀘𑁆𑀙𑁂𑀭𑀫𑀮𑀸𑀤𑀻𑀳𑀺 𑀅𑀦𑀼𑀧𑀮𑀺𑀢𑁆𑀢𑀝𑁆𑀞𑁂𑀦 𑀧𑀤𑀼𑀫𑀁, 𑀢𑁂𑀲𑀁 𑀦𑀺𑀤𑀳𑀦𑀝𑁆𑀞𑁂𑀦 𑀅𑀕𑁆𑀕𑀺, 𑀤𑀼𑀭𑀸𑀲𑀤𑀝𑁆𑀞𑁂𑀦 ¶ 𑀆𑀲𑀻𑀯𑀺𑀲𑁄, 𑀅𑀲𑀦𑁆𑀢𑀸𑀲𑀦𑀝𑁆𑀞𑁂𑀦 𑀲𑀻𑀳𑁄, 𑀩𑀮𑀯𑀦𑁆𑀢𑀝𑁆𑀞𑁂𑀦 𑀳𑀢𑁆𑀣𑀻, 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀝𑁆𑀞𑁂𑀦 𑀲𑁂𑀢𑀉𑀲𑀪𑁄, 𑀔𑁂𑀫𑀦𑁆𑀢𑀪𑀽𑀫𑀺𑀲𑀫𑁆𑀧𑀸𑀧𑀦𑀝𑁆𑀞𑁂𑀦 𑀯𑀮𑀸𑀳𑀓𑀅𑀲𑁆𑀲𑀭𑀸𑀚𑀸. 𑀤𑀸𑀦𑀜𑁆𑀳𑀺 𑀮𑁄𑀓𑁂 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀁 𑀫𑀸𑀭𑀲𑀫𑁆𑀧𑀢𑁆𑀢𑀺𑀁 𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀁 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀁 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀅𑀪𑀺𑀲𑀫𑁆𑀩𑁄𑀥𑀺𑀜𑀸𑀡𑀁 𑀤𑁂𑀢𑀻𑀢𑀺 𑀏𑀯𑀫𑀸𑀤𑀺𑀤𑀸𑀦𑀕𑀼𑀡𑀧𑀝𑀺𑀲𑀁𑀬𑀼𑀢𑁆𑀢𑀁 𑀓𑀣𑀁.

𑀬𑀲𑁆𑀫𑀸 𑀧𑀦 𑀤𑀸𑀦𑀁 𑀤𑀤𑀦𑁆𑀢𑁄 𑀲𑀻𑀮𑀁 𑀲𑀫𑀸𑀤𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀢𑀤𑀦𑀦𑁆𑀢𑀭𑀁 𑀲𑀻𑀮𑀓𑀣𑀁 𑀓𑀣𑁂𑀲𑀺. 𑀲𑀻𑀮𑀓𑀣𑀦𑁆𑀢𑀺 𑀲𑀻𑀮𑀁 𑀦𑀸𑀫𑁂𑀢𑀁 𑀅𑀯𑀲𑁆𑀲𑀬𑁄 𑀧𑀢𑀺𑀝𑁆𑀞𑀸 𑀆𑀭𑀫𑁆𑀫𑀡𑀁 𑀢𑀸𑀡𑀁 𑀮𑁂𑀡𑀁 𑀕𑀢𑀺 𑀧𑀭𑀸𑀬𑀡𑀁. 𑀇𑀥𑀮𑁄𑀓𑀧𑀭𑀮𑁄𑀓𑀲𑀫𑁆𑀧𑀢𑁆𑀢𑀻𑀦𑀜𑁆𑀳𑀺 𑀲𑀻𑀮𑀲𑀤𑀺𑀲𑁄 𑀅𑀯𑀲𑁆𑀲𑀬𑁄 𑀧𑀢𑀺𑀝𑁆𑀞𑀸 𑀆𑀭𑀫𑁆𑀫𑀡𑀁 𑀢𑀸𑀡𑀁 𑀮𑁂𑀡𑀁 𑀕𑀢𑀺 𑀧𑀭𑀸𑀬𑀡𑀁 𑀦𑀢𑁆𑀣𑀺, 𑀲𑀻𑀮𑀲𑀤𑀺𑀲𑁄 𑀅𑀮𑀗𑁆𑀓𑀸𑀭𑁄 𑀦𑀢𑁆𑀣𑀺, 𑀲𑀻𑀮𑀧𑀼𑀧𑁆𑀨𑀲𑀤𑀺𑀲𑀁 𑀧𑀼𑀧𑁆𑀨𑀁 𑀦𑀢𑁆𑀣𑀺, 𑀲𑀻𑀮𑀕𑀦𑁆𑀥𑀲𑀤𑀺𑀲𑁄 𑀕𑀦𑁆𑀥𑁄 𑀦𑀢𑁆𑀣𑀺, 𑀲𑀻𑀮𑀸𑀮𑀗𑁆𑀓𑀸𑀭𑁂𑀦 𑀳𑀺 𑀅𑀮𑀗𑁆𑀓𑀢𑀁 𑀲𑀻𑀮𑀓𑀼𑀲𑀼𑀫𑀧𑀺𑀴𑀦𑁆𑀥𑀦𑀁 𑀲𑀻𑀮𑀕𑀦𑁆𑀥𑀸𑀦𑀼𑀮𑀺𑀢𑁆𑀢𑀁 𑀲𑀤𑁂𑀯𑀓𑁄𑀧𑀺 𑀮𑁄𑀓𑁄 𑀑𑀮𑁄𑀓𑁂𑀦𑁆𑀢𑁄 𑀢𑀺𑀢𑁆𑀢𑀺𑀁 𑀦 𑀕𑀘𑁆𑀙𑀢𑀻𑀢𑀺 𑀏𑀯𑀫𑀸𑀤𑀺𑀲𑀻𑀮𑀕𑀼𑀡𑀧𑀝𑀺𑀲𑀁𑀬𑀼𑀢𑁆𑀢𑀁 𑀓𑀣𑀁.

𑀇𑀤𑀁 𑀧𑀦 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀅𑀬𑀁 𑀲𑀕𑁆𑀕𑁄 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀲𑀻𑀮𑀸𑀦𑀦𑁆𑀢𑀭𑀁 𑀲𑀕𑁆𑀕𑀓𑀣𑀁 𑀓𑀣𑁂𑀲𑀺. 𑀲𑀕𑁆𑀕𑀓𑀣𑀦𑁆𑀢𑀺 𑀅𑀬𑀁 𑀲𑀕𑁆𑀕𑁄 𑀦𑀸𑀫 𑀇𑀝𑁆𑀞𑁄 𑀓𑀦𑁆𑀢𑁄 𑀫𑀦𑀸𑀧𑁄, 𑀦𑀺𑀘𑁆𑀘𑀫𑁂𑀢𑁆𑀣 𑀓𑀻𑀴𑀸, 𑀦𑀺𑀘𑁆𑀘𑀁 𑀲𑀫𑁆𑀧𑀢𑁆𑀢𑀺𑀬𑁄 𑀮𑀩𑁆𑀪𑀦𑁆𑀢𑀺, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀸 𑀦𑀯𑀼𑀢𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀤𑀺𑀩𑁆𑀩𑀲𑀼𑀔𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀮𑀪𑀦𑁆𑀢𑀺, 𑀢𑀸𑀯𑀢𑀺𑀁𑀲𑀸 𑀢𑀺𑀲𑁆𑀲𑁄 𑀘 𑀯𑀲𑁆𑀲𑀓𑁄𑀝𑀺𑀬𑁄 𑀲𑀝𑁆𑀞𑀺 𑀘 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀏𑀯𑀫𑀸𑀤𑀺𑀲𑀕𑁆𑀕𑀕𑀼𑀡𑀧𑀝𑀺𑀲𑀁𑀬𑀼𑀢𑁆𑀢𑀁 𑀓𑀣𑀁. 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀁 𑀓𑀣𑀬𑀦𑁆𑀢𑀸𑀦𑀜𑁆𑀳𑀺 𑀩𑀼𑀤𑁆𑀥𑀸𑀦𑀁 𑀫𑀼𑀔𑀁 𑀦𑀧𑁆𑀧𑀳𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀲𑀕𑁆𑀕𑀓𑀣𑀁 𑀓𑀣𑁂𑀬𑁆𑀬’’𑀦𑁆𑀢𑀺𑀆𑀤𑀺.

𑀏𑀯𑀁 𑀲𑀕𑁆𑀕𑀓𑀣𑀸𑀬 𑀧𑀮𑁄𑀪𑁂𑀢𑁆𑀯𑀸 𑀧𑀼𑀦 𑀳𑀢𑁆𑀣𑀺𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀢𑀲𑁆𑀲 𑀲𑁄𑀡𑁆𑀟𑀁 𑀙𑀺𑀦𑁆𑀤𑀦𑁆𑀢𑁄 𑀯𑀺𑀬 𑁋 ‘‘𑀅𑀬𑀫𑁆𑀧𑀺 𑀲𑀕𑁆𑀕𑁄 𑀅𑀦𑀺𑀘𑁆𑀘𑁄 𑀅𑀤𑁆𑀥𑀼𑀯𑁄, 𑀦 𑀏𑀢𑁆𑀣 𑀙𑀦𑁆𑀤𑀭𑀸𑀕𑁄 ¶ 𑀓𑀸𑀢𑀩𑁆𑀩𑁄’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑁋 ‘‘𑀅𑀧𑁆𑀧𑀲𑁆𑀲𑀸𑀤𑀸 𑀓𑀸𑀫𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩𑁫; 𑁨.𑁪𑁨) 𑀦𑀬𑁂𑀦 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 ¶ 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁 𑀓𑀣𑁂𑀲𑀺. 𑀢𑀢𑁆𑀣 𑀆𑀤𑀻𑀦𑀯𑁄𑀢𑀺 𑀤𑁄𑀲𑁄. 𑀑𑀓𑀸𑀭𑁄𑀢𑀺 𑀅𑀯𑀓𑀸𑀭𑁄 𑀮𑀸𑀫𑀓𑀪𑀸𑀯𑁄. 𑀲𑀁𑀓𑀺𑀮𑁂𑀲𑁄𑀢𑀺 𑀢𑁂𑀳𑀺 𑀲𑀢𑁆𑀢𑀸𑀦𑀁 𑀲𑀁𑀲𑀸𑀭𑁂 𑀲𑀁𑀓𑀺𑀮𑀺𑀲𑁆𑀲𑀦𑀁. 𑀬𑀣𑀸𑀳 𑁋 ‘‘𑀓𑀺𑀮𑀺𑀲𑁆𑀲𑀦𑁆𑀢𑀺 𑀯𑀢 𑀪𑁄 𑀲𑀢𑁆𑀢𑀸’’𑀢𑀺 (𑀫. 𑀦𑀺. 𑁨.𑁩𑁫𑁧). 𑀏𑀯𑀁 𑀓𑀸𑀫𑀸𑀤𑀻𑀦𑀯𑁂𑀦 𑀢𑁂𑀚𑁆𑀚𑀢𑁆𑀯𑀸 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺, 𑀧𑀩𑁆𑀩𑀚𑁆𑀚𑀸𑀬 𑀕𑀼𑀡𑀁 𑀧𑀓𑀸𑀲𑁂𑀲𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑀜𑁆𑀘𑁂𑀯 𑀉𑀢𑁆𑀢𑀸𑀦𑀢𑁆𑀣𑀜𑁆𑀘.

𑁭𑁭. 𑀅𑀮𑀢𑁆𑀣𑀼𑀦𑁆𑀢𑀺 𑀓𑀣𑀁 𑀅𑀮𑀢𑁆𑀣𑀼𑀁? 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦. 𑀪𑀕𑀯𑀸 𑀓𑀺𑀭 𑀢𑁂𑀲𑀁 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀲𑁆𑀲𑀽𑀧𑀦𑀺𑀲𑁆𑀲𑀬𑀁 𑀑𑀮𑁄𑀓𑁂𑀦𑁆𑀢𑁄 𑀅𑀦𑁂𑀓𑀸𑀲𑀼 𑀚𑀸𑀢𑀻𑀲𑀼 𑀘𑀻𑀯𑀭𑀤𑀸𑀦𑀸𑀤𑀻𑀦𑀺 𑀤𑀺𑀲𑁆𑀯𑀸 𑀏𑀣 𑀪𑀺𑀓𑁆𑀔𑀯𑁄𑀢𑀺𑀆𑀤𑀺𑀫𑀸𑀳 ¶ . 𑀢𑁂 𑀢𑀸𑀯𑀤𑁂𑀯 𑀪𑀡𑁆𑀟𑀽 𑀓𑀸𑀲𑀸𑀬𑀯𑀲𑀦𑀸 𑀅𑀝𑁆𑀞𑀳𑀺 𑀪𑀺𑀓𑁆𑀔𑀼𑀧𑀭𑀺𑀓𑁆𑀔𑀸𑀭𑁂𑀳𑀺 𑀲𑀭𑀻𑀭𑀧𑀝𑀺𑀫𑀼𑀓𑁆𑀓𑁂𑀳𑁂𑀯 𑀯𑀲𑁆𑀲𑀲𑀢𑀺𑀓𑀢𑁆𑀣𑁂𑀭𑀸 𑀯𑀺𑀬 𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀫𑀸𑀦𑀸𑀯 𑀦𑀺𑀲𑀻𑀤𑀺𑀁𑀲𑀼.

𑀲𑀦𑁆𑀤𑀲𑁆𑀲𑁂𑀲𑀻𑀢𑀺𑀆𑀤𑀻𑀲𑀼 𑀇𑀥𑀮𑁄𑀓𑀢𑁆𑀣𑀁 𑀲𑀦𑁆𑀤𑀲𑁆𑀲𑁂𑀲𑀺, 𑀧𑀭𑀮𑁄𑀓𑀢𑁆𑀣𑀁 𑀲𑀦𑁆𑀤𑀲𑁆𑀲𑁂𑀲𑀺. 𑀇𑀥𑀮𑁄𑀓𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀅𑀦𑀺𑀘𑁆𑀘𑀦𑁆𑀢𑀺 𑀤𑀲𑁆𑀲𑁂𑀲𑀺, 𑀤𑀼𑀓𑁆𑀔𑀦𑁆𑀢𑀺 𑀤𑀲𑁆𑀲𑁂𑀲𑀺, 𑀅𑀦𑀢𑁆𑀢𑀸𑀢𑀺 𑀤𑀲𑁆𑀲𑁂𑀲𑀺, 𑀔𑀦𑁆𑀥𑁂 𑀤𑀲𑁆𑀲𑁂𑀲𑀺, 𑀥𑀸𑀢𑀼𑀬𑁄 𑀤𑀲𑁆𑀲𑁂𑀲𑀺, 𑀆𑀬𑀢𑀦𑀸𑀦𑀺 𑀤𑀲𑁆𑀲𑁂𑀲𑀺, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀤𑀲𑁆𑀲𑁂𑀲𑀺, 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀤𑀲𑁆𑀲𑁂𑀦𑁆𑀢𑁄 𑀧𑀜𑁆𑀘 𑀮𑀓𑁆𑀔𑀡𑀸𑀦𑀺 𑀤𑀲𑁆𑀲𑁂𑀲𑀺, 𑀢𑀣𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀦𑀁, 𑀢𑀣𑀸 𑀯𑀬𑀁 𑀤𑀲𑁆𑀲𑁂𑀦𑁆𑀢𑁄𑀧𑀺 𑀉𑀤𑀬𑀩𑁆𑀩𑀬𑀯𑀲𑁂𑀦 𑀧𑀜𑁆𑀜𑀸𑀲𑀮𑀓𑁆𑀔𑀡𑀸𑀦𑀺 𑀤𑀲𑁆𑀲𑁂𑀲𑀺, 𑀧𑀭𑀮𑁄𑀓𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀦𑀺𑀭𑀬𑀁 𑀤𑀲𑁆𑀲𑁂𑀲𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀁, 𑀧𑁂𑀢𑁆𑀢𑀺𑀯𑀺𑀲𑀬𑀁, 𑀅𑀲𑀼𑀭𑀓𑀸𑀬𑀁, 𑀢𑀺𑀡𑁆𑀡𑀁 𑀓𑀼𑀲𑀮𑀸𑀦𑀁 𑀯𑀺𑀧𑀸𑀓𑀁, 𑀙𑀦𑁆𑀦𑀁 𑀤𑁂𑀯𑀮𑁄𑀓𑀸𑀦𑀁, 𑀦𑀯𑀦𑁆𑀦𑀁 𑀩𑁆𑀭𑀳𑁆𑀫𑀮𑁄𑀓𑀸𑀦𑀁 𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀲𑀺.

𑀲𑀫𑀸𑀤𑀧𑁂𑀲𑀻𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀢𑁂𑀭𑀲𑀥𑀼𑀢𑀗𑁆𑀕𑀤𑀲𑀓𑀣𑀸𑀯𑀢𑁆𑀣𑀼𑀆𑀤𑀺𑀓𑁂 𑀓𑀮𑁆𑀬𑀸𑀡𑀥𑀫𑁆𑀫𑁂 𑀕𑀡𑁆𑀳𑀸𑀧𑁂𑀲𑀺.

𑀲𑀫𑀼𑀢𑁆𑀢𑁂𑀚𑁂𑀲𑀻𑀢𑀺 𑀲𑀼𑀝𑁆𑀞𑀼 𑀉𑀢𑁆𑀢𑁂𑀚𑁂𑀲𑀺, 𑀅𑀩𑁆𑀪𑀼𑀲𑁆𑀲𑀸𑀳𑁂𑀲𑀺. 𑀇𑀥𑀮𑁄𑀓𑀢𑁆𑀣𑀜𑁆𑀘𑁂𑀯 𑀧𑀭𑀮𑁄𑀓𑀢𑁆𑀣𑀜𑁆𑀘 𑀢𑀸𑀲𑁂𑀢𑁆𑀯𑀸 𑀢𑀸𑀲𑁂𑀢𑁆𑀯𑀸 𑀅𑀥𑀺𑀕𑀢𑀁 𑀯𑀺𑀬 𑀓𑀢𑁆𑀯𑀸 𑀓𑀣𑁂𑀲𑀺. 𑀤𑁆𑀯𑀢𑁆𑀢𑀺𑀁𑀲𑀓𑀫𑁆𑀫𑀓𑀸𑀭𑀡𑀧𑀜𑁆𑀘𑀯𑀻𑀲𑀢𑀺𑀫𑀳𑀸𑀪𑀬𑀧𑁆𑀧𑀪𑁂𑀤𑀜𑁆𑀳𑀺 𑀇𑀥𑀮𑁄𑀓𑀢𑁆𑀣𑀁 𑀩𑀼𑀤𑁆𑀥𑁂 𑀪𑀕𑀯𑀢𑀺 𑀢𑀸𑀲𑁂𑀢𑁆𑀯𑀸 𑀢𑀸𑀲𑁂𑀢𑁆𑀯𑀸 𑀓𑀣𑀬𑀦𑁆𑀢𑁂 𑀧𑀘𑁆𑀙𑀸𑀩𑀸𑀳𑀁, 𑀕𑀸𑀴𑁆𑀳𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀘𑀸𑀢𑀼𑀫𑀳𑀸𑀧𑀣𑁂 𑀧𑀳𑀸𑀭𑀲𑀢𑁂𑀦 𑀢𑀸𑀴𑁂𑀢𑁆𑀯𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 ¶ 𑀦𑀺𑀬𑁆𑀬𑀫𑀸𑀦𑁄 𑀯𑀺𑀬 𑀆𑀖𑀸𑀢𑀦𑀪𑀡𑁆𑀟𑀺𑀓𑀸𑀬 𑀞𑀧𑀺𑀢𑀲𑀻𑀲𑁄 𑀯𑀺𑀬 𑀲𑀽𑀮𑁂 𑀉𑀢𑁆𑀢𑀸𑀲𑀺𑀢𑁄 𑀯𑀺𑀬 𑀫𑀢𑁆𑀢𑀳𑀢𑁆𑀣𑀺𑀦𑀸 𑀫𑀤𑁆𑀤𑀺𑀬𑀫𑀸𑀦𑁄 𑀯𑀺𑀬 𑀘 𑀲𑀁𑀯𑀺𑀕𑁆𑀕𑁄 𑀳𑁄𑀢𑀺. 𑀧𑀭𑀮𑁄𑀓𑀢𑁆𑀣𑀜𑁆𑀘 ¶ 𑀓𑀣𑀬𑀦𑁆𑀢𑁂 𑀦𑀺𑀭𑀬𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑁄 𑀯𑀺𑀬 𑀤𑁂𑀯𑀮𑁄𑀓𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁄 𑀯𑀺𑀬 𑀘 𑀳𑁄𑀢𑀺.

𑀲𑀫𑁆𑀧𑀳𑀁𑀲𑁂𑀲𑀻𑀢𑀺 𑀧𑀝𑀺𑀮𑀤𑁆𑀥𑀕𑀼𑀡𑁂𑀦 𑀘𑁄𑀤𑁂𑀲𑀺, 𑀫𑀳𑀸𑀦𑀺𑀲𑀁𑀲𑀁 𑀓𑀢𑁆𑀯𑀸 𑀓𑀣𑁂𑀲𑀻𑀢𑀺 𑀅𑀢𑁆𑀣𑁄.

𑀲𑀗𑁆𑀔𑀸𑀭𑀸𑀦𑀁 𑀆𑀤𑀻𑀦𑀯𑀦𑁆𑀢𑀺 𑀳𑁂𑀝𑁆𑀞𑀸 𑀧𑀞𑀫𑀫𑀕𑁆𑀕𑀸𑀥𑀺𑀕𑀫𑀢𑁆𑀣𑀁 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀓𑀣𑁂𑀲𑀺, 𑀇𑀥 𑀧𑀦 𑀉𑀧𑀭𑀺𑀫𑀕𑁆𑀕𑀸𑀥𑀺𑀕𑀫𑀢𑁆𑀣𑀁 𑁋 ‘‘𑀅𑀦𑀺𑀘𑁆𑀘𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸 𑀅𑀤𑁆𑀥𑀼𑀯𑀸 𑀅𑀦𑀲𑁆𑀲𑀸𑀲𑀺𑀓𑀸, 𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀮𑀫𑁂𑀯 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁 𑀅𑀮𑀁 𑀯𑀺𑀭𑀚𑁆𑀚𑀺𑀢𑀼𑀁 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼’’𑀦𑁆𑀢𑀺𑀆𑀤𑀺𑀦𑀸 (𑀅. 𑀦𑀺. 𑁭.𑁬𑁬; 𑀲𑀁. 𑀦𑀺. 𑁨.𑁧𑁩𑁪) 𑀦𑀬𑁂𑀦 𑀲𑀗𑁆𑀔𑀸𑀭𑀸𑀦𑀁 𑀆𑀤𑀻𑀦𑀯𑀜𑁆𑀘 𑀮𑀸𑀫𑀓𑀪𑀸𑀯𑀜𑁆𑀘 𑀢𑀧𑁆𑀧𑀘𑁆𑀘𑀬𑀜𑁆𑀘 𑀓𑀺𑀮𑀫𑀣𑀁 𑀧𑀓𑀸𑀲𑁂𑀲𑀺. 𑀬𑀣𑀸 𑀘 𑀢𑀢𑁆𑀣 𑀦𑁂𑀓𑁆𑀔𑀫𑁆𑀫𑁂, 𑀏𑀯𑀫𑀺𑀥 𑁋 ‘‘𑀲𑀦𑁆𑀢𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀧𑀡𑀻𑀢𑀁 𑀢𑀸𑀡𑀁 𑀮𑁂𑀡’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀺𑀩𑁆𑀩𑀸𑀦𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺.

𑀫𑀳𑀸𑀚𑀦𑀓𑀸𑀬𑀧𑀩𑁆𑀩𑀚𑁆𑀚𑀸𑀯𑀡𑁆𑀡𑀦𑀸

𑁭𑁮. 𑀫𑀳𑀸𑀚𑀦𑀓𑀸𑀬𑁄𑀢𑀺 ¶ 𑀢𑁂𑀲𑀁𑀬𑁂𑀯 𑀤𑁆𑀯𑀺𑀦𑁆𑀦𑀁 𑀓𑀼𑀫𑀸𑀭𑀸𑀦𑀁 𑀉𑀧𑀝𑁆𑀞𑀸𑀓𑀚𑀦𑀓𑀸𑀬𑁄𑀢𑀺.

𑁮𑁦. 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫, 𑀥𑀫𑁆𑀫𑀜𑁆𑀘𑀸𑀢𑀺 𑀲𑀗𑁆𑀖𑀲𑁆𑀲 𑀅𑀧𑀭𑀺𑀧𑀼𑀡𑁆𑀡𑀢𑁆𑀢𑀸 𑀤𑁆𑀯𑁂𑀯𑀸𑀘𑀺𑀓𑀫𑁂𑀯 𑀲𑀭𑀡𑀫𑀕𑀫𑀁𑀲𑀼.

𑁮𑁧. 𑀅𑀮𑀢𑁆𑀣𑀼𑀦𑁆𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦𑁂𑀯 𑀅𑀮𑀢𑁆𑀣𑀼𑀁. 𑀇𑀢𑁄 𑀅𑀦𑀦𑁆𑀢𑀭𑁂 𑀧𑀩𑁆𑀩𑀚𑀺𑀢𑀯𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄.

𑀘𑀸𑀭𑀺𑀓𑀸𑀅𑀦𑀼𑀚𑀸𑀦𑀦𑀯𑀡𑁆𑀡𑀦𑀸

𑁮𑁫. 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀻𑀢𑀺 𑀓𑀤𑀸 𑀉𑀤𑀧𑀸𑀤𑀺? 𑀲𑀫𑁆𑀩𑁄𑀥𑀺𑀢𑁄 𑀲𑀢𑁆𑀢 𑀲𑀁𑀯𑀘𑁆𑀙𑀭𑀸𑀦𑀺 𑀲𑀢𑁆𑀢 𑀫𑀸𑀲𑁂 𑀲𑀢𑁆𑀢 𑀤𑀺𑀯𑀲𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀉𑀤𑀧𑀸𑀤𑀺. 𑀪𑀕𑀯𑀸 𑀓𑀺𑀭 𑀧𑀺𑀢𑀼𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑁄 𑀯𑀺𑀳𑀸𑀲𑀺. 𑀭𑀸𑀚𑀸𑀧𑀺 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀚𑁂𑀝𑁆𑀞𑀧𑀼𑀢𑁆𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀼𑀤𑁆𑀥𑁄 𑀚𑀸𑀢𑁄, 𑀤𑀼𑀢𑀺𑀬𑀧𑀼𑀢𑁆𑀢𑁄 𑀫𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀕𑁆𑀕𑀲𑀸𑀯𑀓𑁄 𑀚𑀸𑀢𑁄, 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀤𑀼𑀢𑀺𑀬𑀅𑀕𑁆𑀕𑀲𑀸𑀯𑀓𑁄, 𑀇𑀫𑁂 𑀘 𑀅𑀯𑀲𑁂𑀲𑀸 𑀪𑀺𑀓𑁆𑀔𑀽 𑀕𑀺𑀳𑀺𑀓𑀸𑀮𑁂𑀧𑀺 𑀫𑀬𑁆𑀳𑀁 𑀧𑀼𑀢𑁆𑀢𑀫𑁂𑀯 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀺𑀘𑀭𑀺𑀁𑀲𑀼. 𑀇𑀫𑁂 𑀲𑀩𑁆𑀩𑁂 𑀇𑀤𑀸𑀦𑀺𑀧𑀺 ¶ 𑀫𑀬𑁆𑀳𑀁𑀬𑁂𑀯 𑀪𑀸𑀭𑁄, 𑀅𑀳𑀫𑁂𑀯 𑀘 𑀦𑁂 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺, 𑀅𑀜𑁆𑀜𑁂𑀲𑀁 𑀑𑀓𑀸𑀲𑀁 𑀦 𑀤𑀲𑁆𑀲𑀸𑀫𑀻’’𑀢𑀺 𑀯𑀺𑀳𑀸𑀭𑀤𑁆𑀯𑀸𑀭𑀓𑁄𑀝𑁆𑀞𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀭𑀸𑀚𑀕𑁂𑀳𑀤𑁆𑀯𑀸𑀭𑀸 𑀉𑀪𑀬𑀢𑁄 𑀔𑀤𑀺𑀭𑀧𑀸𑀓𑀸𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀓𑀺𑀮𑀜𑁆𑀚𑁂𑀳𑀺 𑀙𑀸𑀤𑀸𑀧𑁂𑀢𑁆𑀯𑀸 𑀯𑀢𑁆𑀣𑁂𑀳𑀺 𑀧𑀝𑀺𑀘𑁆𑀙𑀸𑀤𑀸𑀧𑁂𑀢𑁆𑀯𑀸 𑀉𑀧𑀭𑀺 𑀘 𑀙𑀸𑀤𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀢𑀸𑀭𑀓𑀯𑀺𑀘𑀺𑀢𑁆𑀢𑀁 𑀲𑀫𑁄𑀮𑀫𑁆𑀩𑀺𑀢𑀢𑀸𑀮𑀓𑁆𑀔𑀦𑁆𑀥𑀫𑀢𑁆𑀢𑀁 𑀯𑀺𑀯𑀺𑀥𑀧𑀼𑀧𑁆𑀨𑀤𑀸𑀫𑀯𑀺𑀢𑀸𑀦𑀁 𑀓𑀸𑀭𑀸𑀧𑁂𑀢𑁆𑀯𑀸 𑀳𑁂𑀝𑁆𑀞𑀸 𑀪𑀽𑀫𑀺𑀬𑀁 𑀘𑀺𑀢𑁆𑀢𑀢𑁆𑀣𑀭𑀡𑁂𑀳𑀺 ¶ 𑀲𑀦𑁆𑀣𑀭𑀸𑀧𑁂𑀢𑁆𑀯𑀸 𑀅𑀦𑁆𑀢𑁄 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀫𑀸𑀮𑀸𑀯𑀘𑁆𑀙𑀓𑁂 𑀧𑀼𑀡𑁆𑀡𑀖𑀝𑁂, 𑀲𑀓𑀮𑀫𑀕𑁆𑀕𑀯𑀸𑀲𑀢𑁆𑀣𑀸𑀬 𑀘 𑀕𑀦𑁆𑀥𑀦𑁆𑀢𑀭𑁂 𑀧𑀼𑀧𑁆𑀨𑀸𑀦𑀺 𑀧𑀼𑀧𑁆𑀨𑀦𑁆𑀢𑀭𑁂 𑀕𑀦𑁆𑀥𑁂 𑀘 𑀞𑀧𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺.

𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀅𑀦𑁆𑀢𑁄𑀲𑀸𑀡𑀺𑀬𑀸𑀯 𑀭𑀸𑀚𑀕𑁂𑀳𑀁𑀕𑀦𑁆𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀯𑀺𑀳𑀸𑀭𑀁 𑀧𑀘𑁆𑀘𑀸𑀕𑀘𑁆𑀙𑀢𑀺. 𑀅𑀜𑁆𑀜𑁄 𑀓𑁄𑀘𑀺 𑀤𑀝𑁆𑀞𑀼𑀫𑁆𑀧𑀺 𑀦 𑀮𑀪𑀢𑀺, 𑀓𑀼𑀢𑁄 𑀧𑀦 𑀪𑀺𑀓𑁆𑀔𑀁 𑀯𑀸 𑀤𑀸𑀢𑀼𑀁, 𑀧𑀽𑀚𑀁 𑀯𑀸 𑀓𑀸𑀢𑀼𑀁, 𑀥𑀫𑁆𑀫𑀁 𑀯𑀸 𑀲𑁄𑀢𑀼𑀁. 𑀦𑀸𑀕𑀭𑀸 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀅𑀚𑁆𑀚 𑀲𑀢𑁆𑀣𑀼 𑀮𑁄𑀓𑁂 𑀉𑀧𑁆𑀧𑀦𑁆𑀦𑀲𑁆𑀲 𑀲𑀢𑁆𑀢𑀫𑀸𑀲𑀸𑀥𑀺𑀓𑀸𑀦𑀺 𑀲𑀢𑁆𑀢𑀲𑀁𑀯𑀘𑁆𑀙𑀭𑀸𑀦𑀺, 𑀫𑀬𑀜𑁆𑀘 𑀤𑀝𑁆𑀞𑀼𑀫𑁆𑀧𑀺 𑀦 𑀮𑀪𑀸𑀫, 𑀧𑀕𑁂𑀯 𑀪𑀺𑀓𑁆𑀔𑀁 𑀯𑀸 𑀤𑀸𑀢𑀼𑀁, 𑀧𑀽𑀚𑀁 𑀯𑀸 𑀓𑀸𑀢𑀼𑀁, 𑀥𑀫𑁆𑀫𑀁 𑀯𑀸 𑀲𑁄𑀢𑀼𑀁. 𑀭𑀸𑀚𑀸 𑁋 ‘𑀫𑀬𑁆𑀳𑀫𑁂𑀯 𑀩𑀼𑀤𑁆𑀥𑁄, 𑀫𑀬𑁆𑀳𑀫𑁂𑀯 𑀥𑀫𑁆𑀫𑁄, 𑀫𑀬𑁆𑀳𑀫𑁂𑀯 𑀲𑀗𑁆𑀖𑁄’𑀢𑀺 𑀫𑀫𑀸𑀬𑀺𑀢𑁆𑀯𑀸 𑀲𑀬𑀫𑁂𑀯 𑀉𑀧𑀝𑁆𑀞𑀳𑀺. 𑀲𑀢𑁆𑀣𑀸 𑀘 𑀉𑀧𑁆𑀧𑀚𑁆𑀚𑀫𑀸𑀦𑁄 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀉𑀧𑁆𑀧𑀦𑁆𑀦𑁄. 𑀦 𑀳𑀺 𑀭𑀜𑁆𑀜𑁄𑀬𑁂𑀯 ¶ 𑀦𑀺𑀭𑀬𑁄 𑀉𑀡𑁆𑀳𑁄 𑀅𑀲𑁆𑀲, 𑀅𑀜𑁆𑀜𑁂𑀲𑀁 𑀦𑀻𑀮𑀼𑀧𑁆𑀧𑀮𑀯𑀦𑀲𑀤𑀺𑀲𑁄. 𑀢𑀲𑁆𑀫𑀸 𑀭𑀸𑀚𑀸𑀦𑀁 𑀯𑀤𑀸𑀫. 𑀲𑀘𑁂 𑀦𑁄 𑀲𑀢𑁆𑀣𑀸𑀭𑀁 𑀤𑁂𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀤𑁂𑀢𑀺, 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀢𑁆𑀯𑀸𑀧𑀺 𑀲𑀗𑁆𑀖𑀁 𑀕𑀳𑁂𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀫. 𑀦 𑀲𑀓𑁆𑀓𑀸 𑀔𑁄 𑀧𑀦 𑀲𑀼𑀤𑁆𑀥𑀦𑀸𑀕𑀭𑁂𑀳𑁂𑀯 𑀏𑀯𑀁 𑀓𑀸𑀢𑀼𑀁, 𑀏𑀓𑀁 𑀚𑁂𑀝𑁆𑀞𑀧𑀼𑀭𑀺𑀲𑀫𑁆𑀧𑀺 𑀕𑀡𑁆𑀳𑀸𑀫𑀸’’𑀢𑀺.

𑀢𑁂 𑀲𑁂𑀦𑀸𑀧𑀢𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀲𑁆𑀲𑁂𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑁋 ‘‘𑀲𑀸𑀫𑀺, 𑀓𑀺𑀁 𑀅𑀫𑁆𑀳𑀸𑀓𑀁 𑀧𑀓𑁆𑀔𑁄 𑀳𑁄𑀲𑀺, 𑀉𑀤𑀸𑀳𑀼 𑀭𑀜𑁆𑀜𑁄’’𑀢𑀺 𑀆𑀳𑀁𑀲𑀼. 𑀲𑁄 𑁋 ‘‘𑀅𑀳𑀁 𑀢𑀼𑀫𑁆𑀳𑀸𑀓𑀁 𑀧𑀓𑁆𑀔𑁄 𑀳𑁄𑀫𑀺, 𑀅𑀧𑀺 𑀘 𑀔𑁄 𑀧𑀦 𑀧𑀞𑀫𑀤𑀺𑀯𑀲𑁄 𑀫𑀬𑁆𑀳𑀁 𑀤𑀸𑀢𑀩𑁆𑀩𑁄’’𑀢𑀺. 𑀢𑁂 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀲𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑁋 ‘‘𑀦𑀸𑀕𑀭𑀸, 𑀤𑁂𑀯, 𑀢𑀼𑀫𑁆𑀳𑀸𑀓𑀁 𑀓𑀼𑀧𑀺𑀢𑀸’’𑀢𑀺 𑀆𑀳. 𑀓𑀺𑀫𑀢𑁆𑀣𑀁 𑀢𑀸𑀢𑀸𑀢𑀺? 𑀲𑀢𑁆𑀣𑀸𑀭𑀁 𑀓𑀺𑀭 𑀢𑀼𑀫𑁆𑀳𑁂𑀬𑁂𑀯 𑀉𑀧𑀝𑁆𑀞𑀳𑀣, 𑀅𑀫𑁆𑀳𑁂 𑀦 𑀮𑀪𑀸𑀫𑀸𑀢𑀺. 𑀲𑀘𑁂 𑀇𑀤𑀸𑀦𑀺𑀧𑀺 𑀮𑀪𑀦𑁆𑀢𑀺, 𑀦 𑀓𑀼𑀧𑁆𑀧𑀦𑁆𑀢𑀺, 𑀅𑀮𑀪𑀦𑁆𑀢𑀸 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀢𑀼𑀓𑀸𑀫𑀸 𑀤𑁂𑀯𑀸𑀢𑀺. 𑀬𑀼𑀚𑁆𑀛𑀸𑀫𑀺, 𑀢𑀸𑀢, 𑀦𑀸𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀤𑁂𑀫𑀻𑀢𑀺. 𑀤𑁂𑀯 𑀢𑀼𑀫𑁆𑀳𑀸𑀓𑀁 𑀤𑀸𑀲𑀸 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀬𑀼𑀚𑁆𑀛𑀸𑀫𑀸𑀢𑀺 𑀯𑀤𑀦𑁆𑀢𑀺, 𑀢𑀼𑀫𑁆𑀳𑁂 𑀓𑀁 𑀕𑀡𑁆𑀳𑀺𑀢𑁆𑀯𑀸 𑀬𑀼𑀚𑁆𑀛𑀺𑀲𑁆𑀲𑀣𑀸𑀢𑀺? 𑀦𑀦𑀼 𑀢𑁆𑀯𑀁 𑀲𑁂𑀦𑀸𑀧𑀢𑀻𑀢𑀺? 𑀦𑀸𑀕𑀭𑁂𑀳𑀺 𑀯𑀺𑀦𑀸 𑀦 ¶ 𑀲𑀫𑀢𑁆𑀣𑁄 𑀅𑀳𑀁 𑀤𑁂𑀯𑀸𑀢𑀺. 𑀢𑀢𑁄 𑀭𑀸𑀚𑀸 𑁋 ‘‘𑀩𑀮𑀯𑀦𑁆𑀢𑁄 𑀦𑀸𑀕𑀭𑀸, 𑀲𑁂𑀦𑀸𑀧𑀢𑀺𑀧𑀺 𑀢𑁂𑀲𑀜𑁆𑀜𑁂𑀯 𑀧𑀓𑁆𑀔𑁄’’𑀢𑀺 𑀜𑀢𑁆𑀯𑀸 ‘‘𑀅𑀜𑁆𑀜𑀸𑀦𑀺𑀧𑀺 𑀲𑀢𑁆𑀢𑀫𑀸𑀲𑀸𑀥𑀺𑀓𑀸𑀦𑀺 𑀲𑀢𑁆𑀢𑀲𑀁𑀯𑀘𑁆𑀙𑀭𑀸𑀦𑀺 𑀫𑀬𑁆𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀤𑀤𑀦𑁆𑀢𑀽’’𑀢𑀺 𑀆𑀳. 𑀦𑀸𑀕𑀭𑀸 ¶ 𑀦 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀭𑀸𑀚𑀸 𑁋 ‘‘𑀙 𑀯𑀲𑁆𑀲𑀸𑀦𑀺, 𑀧𑀜𑁆𑀘, 𑀘𑀢𑁆𑀢𑀸𑀭𑀺, 𑀢𑀻𑀡𑀺, 𑀤𑁆𑀯𑁂, 𑀏𑀓𑀯𑀲𑁆𑀲’’𑀦𑁆𑀢𑀺 𑀳𑀸𑀧𑁂𑀲𑀺. 𑀏𑀯𑀁 𑀳𑀸𑀧𑁂𑀦𑁆𑀢𑁂𑀧𑀺 𑀦 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀅𑀜𑁆𑀜𑁂 𑀲𑀢𑁆𑀢 𑀤𑀺𑀯𑀲𑁂 𑀬𑀸𑀘𑀺. 𑀦𑀸𑀕𑀭𑀸 𑁋 ‘‘𑀅𑀢𑀺𑀓𑀓𑁆𑀔𑀴𑀁 𑀤𑀸𑀦𑀺 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀅𑀦𑀼𑀚𑀸𑀦𑀺𑀁𑀲𑀼.

𑀭𑀸𑀚𑀸 𑀲𑀢𑁆𑀢𑀫𑀸𑀲𑀸𑀥𑀺𑀓𑀸𑀦𑀁 𑀲𑀢𑁆𑀢𑀦𑁆𑀦𑀁 𑀲𑀁𑀯𑀘𑁆𑀙𑀭𑀸𑀦𑀁 𑀲𑀚𑁆𑀚𑀺𑀢𑀁 𑀤𑀸𑀦𑀫𑀼𑀔𑀁 𑀲𑀢𑁆𑀢𑀦𑁆𑀦𑀫𑁂𑀯 𑀤𑀺𑀯𑀲𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀙 𑀤𑀺𑀯𑀲𑁂 𑀓𑁂𑀲𑀜𑁆𑀘𑀺 𑀅𑀧𑀲𑁆𑀲𑀦𑁆𑀢𑀸𑀦𑀁𑀬𑁂𑀯 𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀦𑀸𑀕𑀭𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑁋 ‘‘𑀲𑀓𑁆𑀔𑀺𑀲𑁆𑀲𑀣, 𑀢𑀸𑀢, 𑀏𑀯𑀭𑀽𑀧𑀁 𑀤𑀸𑀦𑀁 𑀤𑀸𑀢𑀼’’𑀦𑁆𑀢𑀺 𑀆𑀳. 𑀢𑁂𑀧𑀺 𑁋 ‘‘𑀦𑀦𑀼 𑀅𑀫𑁆𑀳𑁂𑀬𑁂𑀯 𑀦𑀺𑀲𑁆𑀲𑀸𑀬 𑀢𑀁 𑀤𑁂𑀯𑀲𑁆𑀲 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀢𑁆𑀯𑀸 𑁋 ‘‘𑀲𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀧𑀺𑀝𑁆𑀞𑀺𑀳𑀢𑁆𑀣𑁂𑀦 𑀅𑀲𑁆𑀲𑀽𑀦𑀺 𑀧𑀼𑀜𑁆𑀙𑀫𑀸𑀦𑁄 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑁋 ‘‘𑀪𑀦𑁆𑀢𑁂, 𑀅𑀳𑀁 𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁 𑀅𑀜𑁆𑀜𑀲𑁆𑀲 𑀯𑀸𑀭𑀁 𑀅𑀓𑀢𑁆𑀯𑀸 𑀬𑀸𑀯𑀚𑀻𑀯𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀲𑀺𑀁. 𑀦𑀸𑀕𑀭𑀸 𑀦 𑀤𑀸𑀦𑀺 𑀫𑁂 𑀅𑀦𑀼𑀜𑁆𑀜𑀸𑀢𑀸, 𑀦𑀸𑀕𑀭𑀸 𑀳𑀺 ‘𑀫𑀬𑀁 𑀤𑀸𑀦𑀁 𑀤𑀸𑀢𑀼𑀁 𑀦 𑀮𑀪𑀸𑀫𑀸’𑀢𑀺 𑀓𑀼𑀧𑁆𑀧𑀦𑁆𑀢𑀺. 𑀪𑀕𑀯𑀸 𑀲𑁆𑀯𑁂 𑀧𑀝𑁆𑀞𑀸𑀬 𑀢𑁂𑀲𑀁 𑀅𑀦𑀼𑀕𑁆𑀕𑀳𑀁 𑀓𑀭𑁄𑀣𑀸’’𑀢𑀺 𑀆𑀳.

𑀅𑀣 𑀤𑀼𑀢𑀺𑀬𑀤𑀺𑀯𑀲𑁂 𑀲𑁂𑀦𑀸𑀧𑀢𑀺 𑀫𑀳𑀸𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑁋 ‘‘𑀅𑀚𑁆𑀚 𑀬𑀣𑀸 𑀅𑀜𑁆𑀜𑁄 𑀓𑁄𑀘𑀺 𑀏𑀓𑀪𑀺𑀓𑁆𑀔𑀫𑁆𑀧𑀺 𑀦 𑀤𑁂𑀢𑀺, 𑀏𑀯𑀁 𑀭𑀓𑁆𑀔𑀣𑀸’’𑀢𑀺 𑀲𑀫𑀦𑁆𑀢𑀸 𑀧𑀼𑀭𑀺𑀲𑁂 𑀞𑀧𑁂𑀲𑀺. 𑀢𑀁 𑀤𑀺𑀯𑀲𑀁 𑀲𑁂𑀝𑁆𑀞𑀺𑀪𑀭𑀺𑀬𑀸 𑀭𑁄𑀤𑀫𑀸𑀦𑀸 𑀥𑀻𑀢𑀭𑀁 𑀆𑀳 𑁋 ‘‘𑀲𑀘𑁂, 𑀅𑀫𑁆𑀫, 𑀢𑀯 𑀧𑀺𑀢𑀸 𑀚𑀻𑀯𑁂𑀬𑁆𑀬, 𑀅𑀚𑁆𑀚𑀸𑀳𑀁 𑀧𑀞𑀫𑀁 𑀤𑀲𑀩𑀮𑀁 𑀪𑁄𑀚𑁂𑀬𑁆𑀬’’𑀦𑁆𑀢𑀺 ¶ . 𑀲𑀸 𑀢𑀁 𑀆𑀳 𑁋 ‘‘𑀅𑀫𑁆𑀫, 𑀫𑀸 𑀘𑀺𑀦𑁆𑀢𑀬𑀺, 𑀅𑀳𑀁 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺 𑀬𑀣𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀧𑀞𑀫𑀁 𑀅𑀫𑁆𑀳𑀸𑀓𑀁 𑀪𑀺𑀓𑁆𑀔𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀢𑀻’’𑀢𑀺. 𑀢𑀢𑁄 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸𑀬 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀦𑀺𑀭𑀼𑀤𑀓𑀧𑀸𑀬𑀸𑀲𑀲𑁆𑀲 𑀧𑀽𑀭𑁂𑀢𑁆𑀯𑀸 𑀲𑀧𑁆𑀧𑀺𑀫𑀥𑀼𑀲𑀓𑁆𑀓𑀭𑀸𑀤𑀻𑀳𑀺 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀜𑁆𑀜𑀸𑀬 𑀧𑀸𑀢𑀺𑀬𑀸 𑀧𑀝𑀺𑀓𑀼𑀚𑁆𑀚𑀺𑀢𑁆𑀯𑀸 𑀢𑀁 𑀲𑀼𑀫𑀦𑀫𑀸𑀮𑀸𑀕𑀼𑀴𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀸𑀮𑀸𑀕𑀼𑀴𑀲𑀤𑀺𑀲𑀁 𑀓𑀢𑁆𑀯𑀸 𑀪𑀕𑀯𑀢𑁄 𑀕𑀸𑀫𑀁 𑀧𑀯𑀺𑀲𑀦𑀯𑁂𑀮𑀸𑀬 𑀲𑀬𑀫𑁂𑀯 𑀉𑀓𑁆𑀔𑀺𑀧𑀺𑀢𑁆𑀯𑀸 𑀤𑀸𑀲𑀺𑀕𑀡𑀧𑀭𑀺𑀯𑀼𑀢𑀸 𑀦𑀕𑀭𑀸 𑀦𑀺𑀓𑁆𑀔𑀫𑀺. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑁂𑀦𑀸𑀧𑀢𑀺𑀉𑀧𑀝𑁆𑀞𑀸𑀓𑀸 𑁋 ‘‘𑀅𑀫𑁆𑀫, 𑀫𑀸 𑀇𑀢𑁄 𑀅𑀕𑀫𑀸’’𑀢𑀺 𑀯𑀤𑀦𑁆𑀢𑀺. 𑀫𑀳𑀸𑀧𑀼𑀜𑁆𑀜𑀸 𑀦𑀸𑀫 𑀫𑀦𑀸𑀧𑀓𑀣𑀸 𑀳𑁄𑀦𑁆𑀢𑀺, 𑀦 𑀘 𑀢𑁂𑀲𑀁 𑀧𑀼𑀦𑀧𑁆𑀧𑀼𑀦𑀁 𑀪𑀡𑀦𑁆𑀢𑀸𑀦𑀁 𑀓𑀣𑀸 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺. 𑀲𑀸 𑁋 ‘‘𑀘𑀽𑀴𑀧𑀺𑀢𑀸 𑀫𑀳𑀸𑀧𑀺𑀢𑀸 𑀫𑀸𑀢𑀼𑀮𑀸 𑀓𑀺𑀲𑁆𑀲 𑀢𑀼𑀫𑁆𑀳𑁂 𑀕𑀦𑁆𑀢𑀼𑀁 𑀦 𑀤𑁂𑀣𑀸’’𑀢𑀺 𑀆𑀳. 𑀲𑁂𑀦𑀸𑀧𑀢𑀺𑀦𑀸 ¶ 𑁋 ‘‘𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀤𑀸𑀢𑀼𑀁 𑀫𑀸 𑀤𑁂𑀣𑀸’’𑀢𑀺 𑀞𑀧𑀺𑀢𑀫𑁆𑀳 𑀅𑀫𑁆𑀫𑀸𑀢𑀺. 𑀓𑀺𑀁 𑀧𑀦 𑀫𑁂 𑀳𑀢𑁆𑀣𑁂 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀲𑁆𑀲𑀣𑀸𑀢𑀺? 𑀫𑀸𑀮𑀸𑀕𑀼𑀴𑀁 𑀧𑀲𑁆𑀲𑀸𑀫𑀸𑀢𑀺 ¶ . 𑀓𑀺𑀁 𑀢𑀼𑀫𑁆𑀳𑀸𑀓𑀁 𑀲𑁂𑀦𑀸𑀧𑀢𑀺 𑀫𑀸𑀮𑀸𑀕𑀼𑀴𑀧𑀽𑀚𑀫𑁆𑀧𑀺 𑀓𑀸𑀢𑀼𑀁 𑀦 𑀤𑁂𑀢𑀻𑀢𑀺? 𑀤𑁂𑀢𑀺, 𑀅𑀫𑁆𑀫𑀸𑀢𑀺. 𑀢𑁂𑀦 𑀳𑀺, 𑀅𑀧𑁂𑀣, 𑀅𑀧𑁂𑀣𑀸𑀢𑀺 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀸𑀮𑀸𑀕𑀼𑀴𑀁 𑀕𑀡𑁆𑀳𑀸𑀧𑁂𑀣 𑀪𑀕𑀯𑀸𑀢𑀺 𑀆𑀳. 𑀪𑀕𑀯𑀸 𑀏𑀓𑀁 𑀲𑁂𑀦𑀸𑀧𑀢𑀺𑀲𑁆𑀲𑀼𑀧𑀝𑁆𑀞𑀸𑀓𑀁 𑀑𑀮𑁄𑀓𑁂𑀢𑁆𑀯𑀸 𑀫𑀸𑀮𑀸𑀕𑀼𑀴𑀁 𑀕𑀡𑁆𑀳𑀸𑀧𑁂𑀲𑀺. 𑀲𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑁋 ‘‘𑀪𑀕𑀯𑀸, 𑀪𑀯𑀸𑀪𑀯𑁂 𑀦𑀺𑀩𑁆𑀩𑀢𑁆𑀢𑀺𑀬𑀁 𑀫𑁂 𑀲𑀢𑀺 𑀧𑀭𑀺𑀢𑀲𑁆𑀲𑀦𑀚𑀻𑀯𑀺𑀢𑀁 𑀦𑀸𑀫 𑀫𑀸 𑀳𑁄𑀢𑀼, 𑀅𑀬𑀁 𑀲𑀼𑀫𑀦𑀫𑀸𑀮𑀸 𑀯𑀺𑀬 𑀦𑀺𑀩𑁆𑀩𑀢𑁆𑀢𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀧𑀺𑀬𑀸𑀯 𑀳𑁄𑀫𑀺, 𑀦𑀸𑀫𑁂𑀦 𑀘 𑀲𑀼𑀫𑀦𑀸 𑀬𑁂𑀯𑀸’’𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀲𑀢𑁆𑀣𑀸𑀭𑀸 𑁋 ‘‘𑀲𑀼𑀔𑀺𑀦𑀻 𑀳𑁄𑀳𑀻’’𑀢𑀺 𑀯𑀼𑀢𑁆𑀢𑀸 𑀯𑀦𑁆𑀤𑀺𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀪𑀕𑀯𑀸 𑀲𑁂𑀦𑀸𑀧𑀢𑀺𑀲𑁆𑀲 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀲𑁂𑀦𑀸𑀧𑀢𑀺 𑀬𑀸𑀕𑀼𑀁 𑀕𑀳𑁂𑀢𑁆𑀯𑀸 𑀉𑀧𑀕𑀜𑁆𑀙𑀺, 𑀲𑀢𑁆𑀣𑀸 𑀧𑀢𑁆𑀢𑀁 𑀧𑀺𑀤𑀳𑀺. 𑀦𑀺𑀲𑀺𑀦𑁆𑀦𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀲𑀗𑁆𑀖𑁄𑀢𑀺. 𑀅𑀢𑁆𑀣𑀺 𑀦𑁄 𑀏𑀓𑁄 𑀅𑀦𑁆𑀢𑀭𑀸 𑀧𑀺𑀡𑁆𑀟𑀧𑀸𑀢𑁄 𑀮𑀤𑁆𑀥𑁄𑀢𑀺. 𑀲𑁄 𑀫𑀸𑀮𑀁 𑀅𑀧𑀦𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀅𑀤𑁆𑀤𑀲. 𑀘𑀽𑀴𑀼𑀧𑀝𑁆𑀞𑀸𑀓𑁄 𑀆𑀳 𑁋 ‘‘𑀲𑀸𑀫𑀺, 𑀫𑀸𑀮𑀸𑀢𑀺 𑀫𑀁 𑀯𑀢𑁆𑀯𑀸 𑀫𑀸𑀢𑀼𑀕𑀸𑀫𑁄 𑀯𑀜𑁆𑀘𑁂𑀲𑀻’’𑀢𑀺. 𑀧𑀸𑀬𑀸𑀲𑁄 𑀪𑀕𑀯𑀦𑁆𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂𑀲𑀁 𑀪𑀺𑀓𑁆𑀔𑀽𑀦𑀁 𑀧𑀳𑁄𑀢𑀺. 𑀲𑁂𑀦𑀸𑀧𑀢𑀺𑀧𑀺 𑀅𑀢𑁆𑀢𑀦𑁄 𑀤𑁂𑀬𑁆𑀬𑀥𑀫𑁆𑀫𑀁 𑀅𑀤𑀸𑀲𑀺. 𑀲𑀢𑁆𑀣𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀫𑀗𑁆𑀕𑀮𑀁 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁂𑀦𑀸𑀧𑀢𑀺 𑁋 ‘‘𑀓𑀸 𑀦𑀸𑀫 𑀲𑀸 𑀧𑀺𑀡𑁆𑀟𑀧𑀸𑀢𑀫𑀤𑀸𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁂𑀝𑁆𑀞𑀺𑀥𑀻𑀢𑀸, 𑀲𑀸𑀫𑀻𑀢𑀺. 𑀲𑀧𑁆𑀧𑀜𑁆𑀜𑀸 𑀲𑀸 𑀇𑀢𑁆𑀣𑀻, 𑀏𑀯𑀭𑀽𑀧𑀸𑀬 𑀖𑀭𑁂 𑀯𑀲𑀦𑁆𑀢𑀺𑀬𑀸 𑀧𑀼𑀭𑀺𑀲𑀲𑁆𑀲 𑀲𑀕𑁆𑀕𑀲𑀫𑁆𑀧𑀢𑁆𑀢𑀺 𑀦𑀸𑀫 𑀦 𑀤𑀼𑀮𑁆𑀮𑀪𑀸𑀢𑀺 𑀢𑀁 𑀆𑀦𑁂𑀢𑁆𑀯𑀸 𑀚𑁂𑀝𑁆𑀞𑀺𑀓𑀝𑁆𑀞𑀸𑀦𑁂 𑀞𑀧𑁂𑀲𑀺.

𑀧𑀼𑀦𑀤𑀺𑀯𑀲𑁂 𑀦𑀸𑀕𑀭𑀸 𑀤𑀸𑀦𑀫𑀤𑀁𑀲𑀼, 𑀧𑀼𑀦𑀤𑀺𑀯𑀲𑁂 𑀭𑀸𑀚𑀸𑀢𑀺 𑀏𑀓𑀦𑁆𑀢𑀭𑀺𑀓𑀸𑀬 𑀤𑀸𑀦𑀁 𑀤𑀸𑀢𑀼𑀁 𑀆𑀭𑀪𑀺𑀁𑀲𑀼. 𑀭𑀸𑀚𑀸𑀧𑀺 𑀘𑀭𑀧𑀼𑀭𑀺𑀲𑁂 𑀞𑀧𑁂𑀢𑁆𑀯𑀸 𑀦𑀸𑀕𑀭𑁂𑀳𑀺 𑀤𑀺𑀦𑁆𑀦𑀤𑀸𑀦𑀢𑁄 𑀅𑀢𑀺𑀭𑁂𑀓𑀢𑀭𑀁 𑀤𑁂𑀢𑀺, 𑀦𑀸𑀕𑀭𑀸𑀧𑀺 𑀢𑀣𑁂𑀯 𑀓𑀢𑁆𑀯𑀸 𑀭𑀜𑁆𑀜𑀸 𑀤𑀺𑀦𑁆𑀦𑀤𑀸𑀦𑀢𑁄 𑀅𑀢𑀺𑀭𑁂𑀓𑀢𑀭𑀁. 𑀭𑀸𑀚𑀕𑁂𑀳𑁂 𑀦𑀸𑀝𑀓𑀺𑀢𑁆𑀣𑀺𑀬𑁄 𑀤𑀳𑀭𑀲𑀸𑀫𑀡𑁂𑀭𑁂 𑀯𑀤𑀦𑁆𑀢𑀺 𑁋 ‘‘𑀕𑀡𑁆𑀳𑀣, 𑀢𑀸𑀢𑀸, 𑀦 𑀕𑀳𑀧𑀢𑀺𑀓𑀸𑀦𑀁 𑀕𑀢𑁆𑀢𑀯𑀢𑁆𑀣𑀸𑀤𑀻𑀲𑀼 𑀧𑀼𑀜𑁆𑀙𑀺𑀢𑁆𑀯𑀸 𑀩𑀸𑀴𑀤𑀸𑀭𑀓𑀸𑀦𑀁 𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸𑀤𑀺𑀥𑁄𑀯𑀦𑀳𑀢𑁆𑀣𑁂𑀳𑀺 𑀓𑀢𑀁 ¶ , 𑀲𑀼𑀘𑀺𑀁 𑀧𑀡𑀻𑀢𑀁 𑀓𑀢’’𑀦𑁆𑀢𑀺. 𑀧𑀼𑀦𑀤𑀺𑀯𑀲𑁂 𑀦𑀸𑀕𑀭𑀸𑀧𑀺 𑀤𑀤𑀫𑀸𑀦𑀸 𑀯𑀤𑀦𑁆𑀢𑀺 𑁋 ‘‘𑀕𑀡𑁆𑀳𑀣, 𑀢𑀸𑀢𑀸, 𑀦 𑀦𑀕𑀭𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀲𑀗𑁆𑀓𑀟𑁆𑀠𑀺𑀢𑀢𑀡𑁆𑀟𑀼𑀮𑀔𑀻𑀭𑀤𑀥𑀺𑀲𑀧𑁆𑀧𑀺𑀆𑀤𑀻𑀳𑀺, 𑀦 𑀅𑀜𑁆𑀜𑁂𑀲𑀁 𑀚𑀗𑁆𑀖𑀲𑀻𑀲𑀧𑀺𑀝𑁆𑀞𑀺𑀆𑀤𑀻𑀦𑀺 ¶ 𑀪𑀜𑁆𑀚𑀺𑀢𑁆𑀯𑀸 𑀆𑀳𑀭𑀸𑀧𑀺𑀢𑁂𑀳𑀺 𑀓𑀢𑀁, 𑀚𑀸𑀢𑀺𑀲𑀧𑁆𑀧𑀺𑀔𑀻𑀭𑀸𑀤𑀻𑀳𑀺𑀬𑁂𑀯 𑀓𑀢’’𑀦𑁆𑀢𑀺. 𑀏𑀯𑀁 𑀲𑀢𑁆𑀢𑀲𑀼 𑀲𑀁𑀯𑀘𑁆𑀙𑀭𑁂𑀲𑀼 𑀲𑀢𑁆𑀢𑀲𑀼 𑀫𑀸𑀲𑁂𑀲𑀼 𑀲𑀢𑁆𑀢𑀲𑀼 𑀤𑀺𑀯𑀲𑁂𑀲𑀼 𑀘 𑀅𑀢𑀺𑀓𑁆𑀓𑀦𑁆𑀢𑁂𑀲𑀼 𑀅𑀣 𑀪𑀕𑀯𑀢𑁄 𑀅𑀬𑀁 𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀫𑁆𑀩𑁄𑀥𑀺𑀢𑁄 𑀲𑀢𑁆𑀢 𑀲𑀁𑀯𑀘𑁆𑀙𑀭𑀸𑀦𑀺 𑀲𑀢𑁆𑀢 𑀫𑀸𑀲𑀸𑀦𑀺 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀉𑀤𑀧𑀸𑀤𑀻’’𑀢𑀺.

𑁮𑁭. 𑀅𑀜𑁆𑀜𑀢𑀭𑁄 ¶ 𑀫𑀳𑀸𑀩𑁆𑀭𑀳𑁆𑀫𑀸𑀢𑀺 𑀥𑀫𑁆𑀫𑀤𑁂𑀲𑀦𑀁 𑀆𑀬𑀸𑀘𑀺𑀢𑀩𑁆𑀭𑀳𑁆𑀫𑀸𑀯.

𑁮𑁯. 𑀘𑀢𑀼𑀭𑀸𑀲𑀻𑀢𑀺 𑀆𑀯𑀸𑀲𑀲𑀳𑀲𑁆𑀲𑀸𑀦𑀻𑀢𑀺 𑀘𑀢𑀼𑀭𑀸𑀲𑀻𑀢𑀺 𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀺. 𑀢𑁂 𑀲𑀩𑁆𑀩𑁂𑀧𑀺 𑀤𑁆𑀯𑀸𑀤𑀲𑀲𑀳𑀲𑁆𑀲𑀪𑀺𑀓𑁆𑀔𑀼𑀕𑀡𑁆𑀳𑀦𑀓𑀸 𑀫𑀳𑀸𑀯𑀺𑀳𑀸𑀭𑀸 𑀅𑀪𑀬𑀕𑀺𑀭𑀺𑀘𑁂𑀢𑀺𑀬𑀧𑀩𑁆𑀩𑀢𑀘𑀺𑀢𑁆𑀢𑀮𑀧𑀩𑁆𑀩𑀢𑀫𑀳𑀸𑀯𑀺𑀳𑀸𑀭𑀲𑀤𑀺𑀲𑀸𑀯 𑀅𑀳𑁂𑀲𑀼𑀁.

𑁯𑁦. 𑀔𑀦𑁆𑀢𑀻 𑀧𑀭𑀫𑀁 𑀢𑀧𑁄𑀢𑀺 𑀅𑀥𑀺𑀯𑀸𑀲𑀦𑀔𑀦𑁆𑀢𑀺 𑀦𑀸𑀫 𑀧𑀭𑀫𑀁 𑀢𑀧𑁄. 𑀢𑀺𑀢𑀺𑀓𑁆𑀔𑀸𑀢𑀺 𑀔𑀦𑁆𑀢𑀺𑀬𑀸 𑀏𑀯 𑀯𑁂𑀯𑀘𑀦𑀁. 𑀢𑀺𑀢𑀺𑀓𑁆𑀔𑀸 𑀲𑀗𑁆𑀔𑀸𑀢𑀸 𑀅𑀥𑀺𑀯𑀸𑀲𑀦𑀔𑀦𑁆𑀢𑀺 𑀉𑀢𑁆𑀢𑀫𑀁 𑀢𑀧𑁄𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀸𑀦𑀁 𑀧𑀭𑀫𑀦𑁆𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀧𑀦 𑀦𑀺𑀩𑁆𑀩𑀸𑀦𑀁 𑀧𑀭𑀫𑀦𑁆𑀢𑀺 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸. 𑀦 𑀳𑀺 𑀧𑀩𑁆𑀩𑀚𑀺𑀢𑁄 𑀧𑀭𑀽𑀧𑀖𑀸𑀢𑀻𑀢𑀺 𑀬𑁄 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀯𑀺𑀭𑀳𑀺𑀢𑀢𑁆𑀢𑀸 𑀧𑀭𑀁 𑀉𑀧𑀖𑀸𑀢𑁂𑀢𑀺 𑀩𑀸𑀥𑁂𑀢𑀺 𑀳𑀺𑀁𑀲𑀢𑀺, 𑀲𑁄 𑀧𑀩𑁆𑀩𑀚𑀺𑀢𑁄 𑀦𑀸𑀫 𑀦 𑀳𑁄𑀢𑀺. 𑀘𑀢𑀼𑀢𑁆𑀣𑀧𑀸𑀤𑁄 𑀧𑀦 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. ‘‘𑀦 𑀳𑀺 𑀧𑀩𑁆𑀩𑀚𑀺𑀢𑁄’’𑀢𑀺 𑀏𑀢𑀲𑁆𑀲 𑀳𑀺 𑀦 𑀲𑀫𑀡𑁄 𑀳𑁄𑀢𑀻𑀢𑀺 𑀯𑁂𑀯𑀘𑀦𑀁. 𑀧𑀭𑀽𑀧𑀖𑀸𑀢𑀻𑀢𑀺 𑀏𑀢𑀲𑁆𑀲 𑀧𑀭𑀁 𑀯𑀺𑀳𑁂𑀞𑀬𑀦𑁆𑀢𑁄𑀢𑀺 𑀯𑁂𑀯𑀘𑀦𑀁. 𑀅𑀣 𑀯𑀸 𑀧𑀭𑀽𑀧𑀖𑀸𑀢𑀻𑀢𑀺 𑀲𑀻𑀮𑀽𑀧𑀖𑀸𑀢𑀻. 𑀲𑀻𑀮𑀜𑁆𑀳𑀺 𑀉𑀢𑁆𑀢𑀫𑀝𑁆𑀞𑁂𑀦 𑀧𑀭𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑁄 𑀘 𑀲𑀫𑀡𑁄 𑀧𑀭𑀁 𑀬𑀁 𑀓𑀜𑁆𑀘𑀺 𑀲𑀢𑁆𑀢𑀁 𑀯𑀺𑀳𑁂𑀞𑀬𑀦𑁆𑀢𑁄 𑀧𑀭𑀽𑀧𑀖𑀸𑀢𑀻 𑀳𑁄𑀢𑀺, 𑀅𑀢𑁆𑀢𑀦𑁄 𑀲𑀻𑀮𑀁 𑀯𑀺𑀦𑀸𑀲𑀓𑁄, 𑀲𑁄 𑀧𑀩𑁆𑀩𑀚𑀺𑀢𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣𑀯𑀸 𑀬𑁄 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀬𑀸 𑀅𑀪𑀸𑀯𑀢𑁄 𑀧𑀭𑀽𑀧𑀖𑀸𑀢𑀻 𑀳𑁄𑀢𑀺, 𑀧𑀭𑀁 𑀅𑀦𑁆𑀢𑀫𑀲𑁄 𑀟𑀁𑀲𑀫𑀓𑀲𑀫𑁆𑀧𑀺 𑀲𑀜𑁆𑀘𑀺𑀘𑁆𑀘 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀲𑁄 𑀦 𑀳𑀺 𑀧𑀩𑁆𑀩𑀚𑀺𑀢𑁄. 𑀓𑀺𑀁 𑀓𑀸𑀭𑀡𑀸? 𑀫𑀮𑀲𑁆𑀲 𑀅𑀧𑀩𑁆𑀩𑀸𑀚𑀺𑀢𑀢𑁆𑀢𑀸. ‘‘𑀧𑀩𑁆𑀩𑀸𑀚𑀬𑀫𑀢𑁆𑀢𑀦𑁄 𑀫𑀮𑀁, 𑀢𑀲𑁆𑀫𑀸 𑀧𑀩𑁆𑀩𑀚𑀺𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀥. 𑀧. 𑁩𑁮𑁮) 𑀇𑀤𑀜𑁆𑀳𑀺 𑀧𑀩𑁆𑀩𑀚𑀺𑀢𑀮𑀓𑁆𑀔𑀡𑀁. 𑀬𑁄𑀧𑀺 𑀦 𑀳𑁂𑀯 𑀔𑁄 𑀉𑀧𑀖𑀸𑀢𑁂𑀢𑀺, 𑀦 𑀫𑀸𑀭𑁂𑀢𑀺, 𑀅𑀧𑀺 𑀘 𑀤𑀡𑁆𑀟𑀸𑀤𑀻𑀳𑀺 𑀯𑀺𑀳𑁂𑀞𑁂𑀢𑀺, 𑀲𑁄 𑀧𑀭𑀁 𑀯𑀺𑀳𑁂𑀞𑀬𑀦𑁆𑀢𑁄 𑀲𑀫𑀡𑁄 𑀦 𑀳𑁄𑀢𑀺. 𑀓𑀺𑀁 𑀓𑀸𑀭𑀡𑀸? 𑀯𑀺𑀳𑁂𑀲𑀸𑀬 𑀅𑀲𑀫𑀺𑀢𑀢𑁆𑀢𑀸. ‘‘𑀲𑀫𑀺𑀢𑀢𑁆𑀢𑀸 𑀳𑀺 𑀧𑀸𑀧𑀸𑀦𑀁 ¶ , 𑀲𑀫𑀡𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺 (𑀥. 𑀧. 𑁨𑁬𑁫) 𑀇𑀤𑀜𑁆𑀳𑀺 𑀲𑀫𑀡𑀮𑀓𑁆𑀔𑀡𑀁.

𑀤𑀼𑀢𑀺𑀬𑀕𑀸𑀣𑀸𑀬 𑀲𑀩𑁆𑀩𑀧𑀸𑀧𑀲𑁆𑀲𑀸𑀢𑀺 𑀲𑀩𑁆𑀩𑀸𑀓𑀼𑀲𑀮𑀲𑁆𑀲. 𑀅𑀓𑀭𑀡𑀦𑁆𑀢𑀺 𑀅𑀦𑀼𑀧𑁆𑀧𑀸𑀤𑀦𑀁. 𑀓𑀼𑀲𑀮𑀲𑁆𑀲𑀸𑀢𑀺 𑀘𑀢𑀼𑀪𑀽𑀫𑀺𑀓𑀓𑀼𑀲𑀮𑀲𑁆𑀲. 𑀉𑀧𑀲𑀫𑁆𑀧𑀤𑀸𑀢𑀺 𑀧𑀝𑀺𑀮𑀸𑀪𑁄. 𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀧𑀦𑀦𑁆𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀚𑁄𑀢𑀦𑀁, 𑀢𑀁 𑀧𑀦 ¶ 𑀅𑀭𑀳𑀢𑁆𑀢𑁂𑀦 𑀳𑁄𑀢𑀺. 𑀇𑀢𑀺 𑀲𑀻𑀮𑀲𑀁𑀯𑀭𑁂𑀦 𑀲𑀩𑁆𑀩𑀧𑀸𑀧𑀁 𑀧𑀳𑀸𑀬 𑀲𑀫𑀣𑀯𑀺𑀧𑀲𑁆𑀲𑀦𑀸𑀳𑀺 𑀓𑀼𑀲𑀮𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑁂𑀦 𑀘𑀺𑀢𑁆𑀢𑀁 𑀧𑀭𑀺𑀬𑁄𑀤𑀸𑀧𑁂𑀢𑀩𑁆𑀩𑀦𑁆𑀢𑀺 𑀏𑀢𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀑𑀯𑀸𑀤𑁄 𑀅𑀦𑀼𑀲𑀺𑀝𑁆𑀞𑀻 𑀢𑀺.

𑀢𑀢𑀺𑀬𑀕𑀸𑀣𑀸𑀬 ¶ 𑀅𑀦𑀽𑀧𑀯𑀸𑀤𑁄𑀢𑀺 𑀯𑀸𑀘𑀸𑀬 𑀓𑀲𑁆𑀲𑀘𑀺 𑀅𑀦𑀼𑀧𑀯𑀤𑀦𑀁. 𑀅𑀦𑀽𑀧𑀖𑀸𑀢𑁄𑀢𑀺 𑀓𑀸𑀬𑁂𑀦 𑀉𑀧𑀖𑀸𑀢𑀲𑁆𑀲 𑀅𑀓𑀭𑀡𑀁. 𑀧𑀸𑀢𑀺𑀫𑁄𑀓𑁆𑀔𑁂𑀢𑀺 𑀬𑀁 𑀢𑀁 𑀧𑀅𑀢𑀺𑀫𑁄𑀓𑁆𑀔𑀁, 𑀅𑀢𑀺𑀧𑀫𑁄𑀓𑁆𑀔𑀁, 𑀉𑀢𑁆𑀢𑀫𑀲𑀻𑀮𑀁, 𑀧𑀸𑀢𑀺 𑀯𑀸 𑀅𑀕𑀢𑀺𑀯𑀺𑀲𑁂𑀲𑁂𑀳𑀺 𑀫𑁄𑀓𑁆𑀔𑁂𑀢𑀺 𑀤𑀼𑀕𑁆𑀕𑀢𑀺𑀪𑀬𑁂𑀳𑀺, 𑀬𑁄 𑀯𑀸 𑀦𑀁 𑀧𑀸𑀢𑀺, 𑀢𑀁 𑀫𑁄𑀓𑁆𑀔𑁂𑀢𑀻𑀢𑀺 ‘‘𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀧𑀸𑀢𑀺𑀫𑁄𑀓𑁆𑀔𑁂 𑀘 𑀲𑀁𑀯𑀭𑁄. 𑀫𑀢𑁆𑀢𑀜𑁆𑀜𑀼𑀢𑀸𑀢𑀺 𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑀯𑀲𑁂𑀦 𑀧𑀫𑀸𑀡𑀜𑁆𑀜𑀼𑀢𑀸. 𑀧𑀦𑁆𑀢𑀜𑁆𑀘 𑀲𑀬𑀦𑀸𑀲𑀦𑀦𑁆𑀢𑀺 𑀲𑀬𑀦𑀸𑀲𑀦𑀜𑁆𑀘 𑀲𑀗𑁆𑀖𑀝𑁆𑀝𑀦𑀯𑀺𑀭𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀤𑁆𑀯𑀻𑀳𑀺𑀬𑁂𑀯 𑀧𑀘𑁆𑀘𑀬𑁂𑀳𑀺 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑁄 𑀤𑀻𑀧𑀺𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦𑀦𑁆𑀢𑀺 𑀏𑀢𑀁 𑀧𑀭𑀲𑁆𑀲 𑀅𑀦𑀼𑀧𑀯𑀤𑀦𑀁 𑀅𑀦𑀼𑀧𑀖𑀸𑀢𑀦𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄 𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑁂𑀲𑀼 𑀫𑀢𑁆𑀢𑀜𑁆𑀜𑀼𑀢𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑀲𑀺𑀪𑀸𑀯𑀸𑀬 𑀯𑀺𑀯𑀺𑀢𑁆𑀢𑀲𑁂𑀦𑀸𑀲𑀦𑀲𑁂𑀯𑀦𑀜𑁆𑀘 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀑𑀯𑀸𑀤𑁄 𑀅𑀦𑀼𑀲𑀺𑀝𑁆𑀞𑀻𑀢𑀺. 𑀇𑀫𑀸 𑀧𑀦 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀕𑀸𑀣𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀤𑁂𑀯𑀢𑀸𑀭𑁄𑀘𑀦𑀯𑀡𑁆𑀡𑀦𑀸

𑁯𑁧. 𑀏𑀢𑁆𑀢𑀸𑀯𑀢𑀸 𑀘 𑀇𑀫𑀺𑀦𑀸 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀅𑀧𑀤𑀸𑀦𑀸𑀦𑀼𑀲𑀸𑀭𑁂𑀦 𑀯𑀺𑀢𑁆𑀣𑀸𑀭𑀓𑀣𑀦𑁂𑀦 𑁋 ‘‘𑀢𑀣𑀸𑀕𑀢𑀲𑁆𑀲𑁂𑀯𑁂𑀲𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀥𑀸𑀢𑀼 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀬 𑀥𑀫𑁆𑀫𑀥𑀸𑀢𑀼𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑁋 ‘‘𑀤𑁂𑀯𑀢𑀸𑀧𑀺 𑀢𑀣𑀸𑀕𑀢𑀲𑁆𑀲 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼’’𑀦𑁆𑀢𑀺 𑀯𑀼𑀢𑁆𑀢𑀁 𑀤𑁂𑀯𑀢𑀸𑀭𑁄𑀘𑀦𑀁 𑀧𑀓𑀸𑀲𑁂𑀢𑀼𑀁 𑀏𑀓𑀫𑀺𑀤𑀸𑀳𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀲𑀼𑀪𑀕𑀯𑀦𑁂𑀢𑀺 𑀏𑀯𑀁𑀦𑀸𑀫𑀓𑁂 𑀯𑀦𑁂. 𑀲𑀸𑀮𑀭𑀸𑀚𑀫𑀽𑀮𑁂𑀢𑀺 𑀯𑀦𑀧𑁆𑀧𑀢𑀺𑀚𑁂𑀝𑁆𑀞𑀓𑀲𑁆𑀲 𑀫𑀽𑀮𑁂. 𑀓𑀸𑀫𑀘𑁆𑀙𑀦𑁆𑀤𑀁 𑀯𑀺𑀭𑀸𑀚𑁂𑀢𑁆𑀯𑀸𑀢𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀫𑀽𑀮𑀲𑀫𑀼𑀕𑁆𑀖𑀸𑀢𑀯𑀲𑁂𑀦 𑀯𑀺𑀭𑀸𑀚𑁂𑀢𑁆𑀯𑀸. 𑀬𑀣𑀸 𑀘 𑀯𑀺𑀧𑀲𑁆𑀲𑀺𑀲𑁆𑀲, 𑀏𑀯𑀁 𑀲𑁂𑀲𑀩𑀼𑀤𑁆𑀥𑀸𑀦𑀫𑁆𑀧𑀺 𑀲𑀸𑀲𑀦𑁂 𑀯𑀼𑀢𑁆𑀣𑀩𑁆𑀭𑀳𑁆𑀫𑀘𑀭𑀺𑀬𑀸 𑀤𑁂𑀯𑀢𑀸 𑀆𑀭𑁄𑀘𑀬𑀺𑀁𑀲𑀼, 𑀧𑀸𑀴𑀺 𑀧𑀦 𑀯𑀺𑀧𑀲𑁆𑀲𑀺𑀲𑁆𑀲 ¶ 𑀘𑁂𑀯 𑀅𑀫𑁆𑀳𑀸𑀓𑀜𑁆𑀘 𑀪𑀕𑀯𑀢𑁄 𑀯𑀲𑁂𑀦 𑀆𑀕𑀢𑀸.

𑀢𑀢𑁆𑀣 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀬𑀸 𑀦 𑀳𑀸𑀬𑀦𑁆𑀢𑀺, 𑀦 𑀯𑀺𑀳𑀸𑀬𑀦𑁆𑀢𑀻𑀢𑀺 𑀅𑀯𑀺𑀳𑀸. 𑀦 𑀓𑀜𑁆𑀘𑀺 𑀲𑀢𑁆𑀢𑀁 𑀢𑀧𑀦𑁆𑀢𑀻𑀢𑀺 𑀅𑀢𑀧𑁆𑀧𑀸. 𑀲𑀼𑀦𑁆𑀤𑀭𑀤𑀲𑁆𑀲𑀦𑀸 𑀅𑀪𑀺𑀭𑀽𑀧𑀸 𑀧𑀸𑀲𑀸𑀤𑀺𑀓𑀸𑀢𑀺 𑀲𑀼𑀤𑀲𑁆𑀲𑀸. 𑀲𑀼𑀝𑁆𑀞𑀼 𑀧𑀲𑁆𑀲𑀦𑁆𑀢𑀺, 𑀲𑀼𑀦𑁆𑀤𑀭𑀫𑁂𑀢𑁂𑀲𑀁 𑀯𑀸 𑀤𑀲𑁆𑀲𑀦𑀦𑁆𑀢𑀺 𑀲𑀼𑀤𑀲𑁆𑀲𑀻. 𑀲𑀩𑁆𑀩𑁂𑀳𑁂𑀯 𑀘 𑀲𑀕𑀼𑀡𑁂𑀳𑀺 𑀪𑀯𑀲𑀫𑁆𑀧𑀢𑁆𑀢𑀺𑀬𑀸 𑀘 𑀚𑁂𑀝𑁆𑀞𑀸, 𑀦𑀢𑁆𑀣𑁂𑀢𑁆𑀣 𑀓𑀦𑀺𑀝𑁆𑀞𑀸𑀢𑀺 𑀅𑀓𑀦𑀺𑀝𑁆𑀞𑀸.

𑀇𑀥 ¶ ¶ 𑀞𑀢𑁆𑀯𑀸 𑀪𑀸𑀡𑀯𑀸𑀭𑀸 𑀲𑀫𑁄𑀥𑀸𑀦𑁂𑀢𑀩𑁆𑀩𑀸. 𑀇𑀫𑀲𑁆𑀫𑀺𑀜𑁆𑀳𑀺 𑀲𑀼𑀢𑁆𑀢𑁂 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀅𑀧𑀤𑀸𑀦𑀯𑀲𑁂𑀦 𑀢𑀬𑁄 𑀪𑀸𑀡𑀯𑀸𑀭𑀸 𑀯𑀼𑀢𑁆𑀢𑀸. 𑀬𑀣𑀸 𑀘 𑀯𑀺𑀧𑀲𑁆𑀲𑀺𑀲𑁆𑀲, 𑀏𑀯𑀁 𑀲𑀺𑀔𑀻𑀆𑀤𑀻𑀦𑀫𑁆𑀧𑀺 𑀅𑀧𑀤𑀸𑀦𑀯𑀲𑁂𑀦 𑀯𑀼𑀢𑁆𑀢𑀸𑀯. 𑀧𑀸𑀴𑀺 𑀧𑀦 𑀲𑀗𑁆𑀔𑀺𑀢𑁆𑀢𑀸. 𑀇𑀢𑀺 𑀲𑀢𑁆𑀢𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀯𑀲𑁂𑀦 𑀅𑀫𑁆𑀳𑀸𑀓𑀁 𑀪𑀕𑀯𑀢𑀸 𑀏𑀓𑀯𑀻𑀲𑀢𑀺 𑀪𑀸𑀡𑀯𑀸𑀭𑀸 𑀓𑀣𑀺𑀢𑀸. 𑀢𑀣𑀸 𑀅𑀯𑀺𑀳𑁂𑀳𑀺. 𑀢𑀣𑀸 𑀅𑀢𑀧𑁆𑀧𑁂𑀳𑀺. 𑀢𑀣𑀸 𑀲𑀼𑀤𑀲𑁆𑀲𑁂𑀳𑀺. 𑀢𑀣𑀸 𑀲𑀼𑀤𑀲𑁆𑀲𑀻𑀳𑀺. 𑀢𑀣𑀸 𑀅𑀓𑀦𑀺𑀝𑁆𑀞𑁂𑀳𑀻𑀢𑀺 𑀲𑀩𑁆𑀩𑀫𑁆𑀧𑀺 𑀙𑀩𑁆𑀩𑀻𑀲𑀢𑀺𑀪𑀸𑀡𑀯𑀸𑀭𑀲𑀢𑀁 𑀳𑁄𑀢𑀺. 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀅𑀜𑁆𑀜𑀁 𑀲𑀼𑀢𑁆𑀢𑀁 𑀙𑀩𑁆𑀩𑀻𑀲𑀢𑀺𑀪𑀸𑀡𑀯𑀸𑀭𑀲𑀢𑀧𑀭𑀺𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺, 𑀲𑀼𑀢𑁆𑀢𑀦𑁆𑀢𑀭𑀸𑀚𑀸 𑀦𑀸𑀫 𑀅𑀬𑀁 𑀲𑀼𑀢𑁆𑀢𑀦𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀢𑁄 𑀧𑀭𑀁 𑀅𑀦𑀼𑀲𑀦𑁆𑀥𑀺𑀤𑁆𑀯𑀬𑀫𑁆𑀧𑀺 𑀦𑀺𑀬𑁆𑀬𑀸𑀢𑁂𑀦𑁆𑀢𑁄 𑀇𑀢𑀺 𑀔𑁄 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁

𑀫𑀳𑀸𑀧𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑀦𑀺𑀤𑀸𑀦𑀯𑀡𑁆𑀡𑀦𑀸

𑁯𑁫. 𑀏𑀯𑀁 ¶ ¶ ¶ 𑀫𑁂 𑀲𑀼𑀢𑀁…𑀧𑁂… 𑀓𑀼𑀭𑀽𑀲𑀽𑀢𑀺 𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸. 𑀓𑀼𑀭𑀽𑀲𑀼 𑀯𑀺𑀳𑀭𑀢𑀻𑀢𑀺 𑀓𑀼𑀭𑀽 𑀦𑀸𑀫 𑀚𑀸𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀼𑀴𑁆𑀳𑀻𑀲𑀤𑁆𑀤𑁂𑀦 ‘‘𑀓𑀼𑀭𑀽’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀓𑀼𑀭𑀽𑀲𑀼 𑀚𑀦𑀧𑀤𑁂. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀧𑀦𑀸𑀳𑀼 𑁋 𑀫𑀦𑁆𑀥𑀸𑀢𑀼𑀓𑀸𑀮𑁂 𑀢𑀻𑀲𑀼 𑀤𑀻𑀧𑁂𑀲𑀼 𑀫𑀦𑀼𑀲𑁆𑀲𑀸 ‘‘𑀚𑀫𑁆𑀩𑀼𑀤𑀻𑀧𑁄 𑀦𑀸𑀫 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀫𑀳𑀸𑀲𑀸𑀯𑀓𑀘𑀓𑁆𑀓𑀯𑀢𑁆𑀢𑀺𑀧𑁆𑀧𑀪𑀼𑀢𑀻𑀦𑀁 𑀉𑀢𑁆𑀢𑀫𑀫𑀦𑀼𑀲𑁆𑀲𑀸𑀦𑀁 𑀉𑀧𑁆𑀧𑀢𑁆𑀢𑀺𑀪𑀽𑀫𑀺 𑀉𑀢𑁆𑀢𑀫𑀤𑀻𑀧𑁄 𑀅𑀢𑀺𑀭𑀫𑀡𑀻𑀬𑁄’’𑀢𑀺 𑀲𑀼𑀢𑁆𑀯𑀸 𑀭𑀜𑁆𑀜𑀸 𑀫𑀦𑁆𑀥𑀸𑀢𑀼𑀘𑀓𑁆𑀓𑀯𑀢𑁆𑀢𑀺𑀦𑀸 𑀘𑀓𑁆𑀓𑀭𑀢𑀦𑀁 𑀧𑀼𑀭𑀓𑁆𑀔𑀢𑁆𑀯𑀸 𑀘𑀢𑁆𑀢𑀸𑀭𑁄 𑀤𑀻𑀧𑁂 𑀅𑀦𑀼𑀲𑀁𑀬𑀸𑀬𑀦𑁆𑀢𑁂𑀦 𑀲𑀤𑁆𑀥𑀺𑀁 𑀆𑀕𑀫𑀁𑀲𑀼. 𑀢𑀢𑁄 𑀭𑀸𑀚𑀸 𑀧𑀭𑀺𑀡𑀸𑀬𑀓𑀭𑀢𑀦𑀁 𑀧𑀼𑀘𑁆𑀙𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀫𑀦𑀼𑀲𑁆𑀲𑀮𑁄𑀓𑀢𑁄 𑀭𑀫𑀡𑀻𑀬𑀢𑀭𑀁 𑀞𑀸𑀦’’𑀦𑁆𑀢𑀺. 𑀓𑀲𑁆𑀫𑀸 𑀤𑁂𑀯 𑀏𑀯𑀁 𑀪𑀡𑀲𑀺? 𑀓𑀺𑀁 𑀦 𑀧𑀲𑁆𑀲𑀲𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀆𑀦𑀼𑀪𑀸𑀯𑀁, 𑀦𑀦𑀼 𑀏𑀢𑁂𑀲𑀁 𑀞𑀸𑀦𑀁 𑀇𑀢𑁄 𑀭𑀫𑀡𑀻𑀬𑀢𑀭𑀦𑁆𑀢𑀺? 𑀭𑀸𑀚𑀸 𑀘𑀓𑁆𑀓𑀭𑀢𑀦𑀁 𑀧𑀼𑀭𑀓𑁆𑀔𑀢𑁆𑀯𑀸 𑀢𑀢𑁆𑀣 𑀅𑀕𑀫𑀸𑀲𑀺. 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑁋 ‘‘𑀫𑀦𑁆𑀥𑀸𑀢𑀼𑀫𑀳𑀸𑀭𑀸𑀚𑀸 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸𑀯 ‘‘𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄 𑀭𑀸𑀚𑀸, 𑀦 𑀲𑀓𑁆𑀓𑀸 𑀬𑀼𑀤𑁆𑀥𑁂𑀦 𑀧𑀝𑀺𑀩𑀸𑀳𑀺𑀢𑀼’’𑀦𑁆𑀢𑀺 𑀲𑀓𑀁 𑀭𑀚𑁆𑀚𑀁 𑀦𑀺𑀬𑁆𑀬𑀸𑀢𑁂𑀲𑀼𑀁. 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀧𑀼𑀦 𑀧𑀼𑀘𑁆𑀙𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀇𑀢𑁄 𑀭𑀫𑀡𑀻𑀬𑀢𑀭𑀁 𑀞𑀸𑀦’’𑀦𑁆𑀢𑀺?

𑀅𑀣𑀲𑁆𑀲 𑀢𑀸𑀯𑀢𑀺𑀁𑀲𑀪𑀯𑀦𑀁 𑀓𑀣𑀬𑀺𑀁𑀲𑀼. ‘‘𑀢𑀸𑀯𑀢𑀺𑀁𑀲𑀪𑀯𑀦𑀁, 𑀤𑁂𑀯, 𑀇𑀢𑁄 𑀭𑀫𑀡𑀻𑀬𑀢𑀭𑀁. 𑀢𑀢𑁆𑀣 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀧𑀭𑀺𑀘𑀸𑀭𑀓𑀸 𑀤𑁄𑀯𑀸𑀭𑀺𑀓𑀪𑀽𑀫𑀺𑀬𑀁 𑀢𑀺𑀝𑁆𑀞𑀦𑁆𑀢𑀺, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄, 𑀢𑀲𑁆𑀲𑀺𑀫𑀸𑀦𑀺 𑀉𑀧𑀪𑁄𑀕𑀝𑁆𑀞𑀸𑀦𑀸𑀦𑀺 𑁋 𑀬𑁄𑀚𑀦𑀲𑀳𑀲𑁆𑀲𑀼𑀩𑁆𑀩𑁂𑀥𑁄 𑀯𑁂𑀚𑀬𑀦𑁆𑀢𑁄 𑀧𑀸𑀲𑀸𑀤𑁄, 𑀧𑀜𑁆𑀘𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑀸 𑀲𑀼𑀥𑀫𑁆𑀫𑀸 𑀤𑁂𑀯𑀲𑀪𑀸, 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑁄 𑀯𑁂𑀚𑀬𑀦𑁆𑀢𑀭𑀣𑁄 𑀢𑀣𑀸 𑀏𑀭𑀸𑀯𑀡𑁄 𑀳𑀢𑁆𑀣𑀻 ¶ , 𑀤𑀺𑀩𑁆𑀩𑀭𑀼𑀓𑁆𑀔𑀲𑀳𑀲𑁆𑀲𑀧𑁆𑀧𑀝𑀺𑀫𑀡𑁆𑀟𑀺𑀢𑀁 𑀦𑀦𑁆𑀤𑀦𑀯𑀦𑀁, 𑀘𑀺𑀢𑁆𑀢𑀮𑀢𑀸𑀯𑀦𑀁, 𑀨𑀸𑀭𑀼𑀲𑀓𑀯𑀦𑀁, 𑀫𑀺𑀲𑁆𑀲𑀓𑀯𑀦𑀁, 𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑁄 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄, 𑀢𑀲𑁆𑀲 𑀳𑁂𑀝𑁆𑀞𑀸 𑀲𑀝𑁆𑀞𑀺𑀬𑁄𑀚𑀦𑀸𑀬𑀸𑀫𑀸 𑀧𑀜𑁆𑀜𑀸𑀲𑀬𑁄𑀚𑀦𑀯𑀺𑀢𑁆𑀣𑀢𑀸 ¶ 𑀧𑀜𑁆𑀘𑀤𑀲𑀬𑁄𑀚𑀦𑀼𑀩𑁆𑀩𑁂𑀥𑀸 𑀚𑀬𑀓𑀼𑀲𑀼𑀫𑀧𑀼𑀧𑁆𑀨𑀯𑀡𑁆𑀡𑀸 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸, 𑀬𑀲𑁆𑀲𑀸 𑀫𑀼𑀤𑀼𑀢𑀸𑀬 𑀲𑀓𑁆𑀓𑀲𑁆𑀲 𑀦𑀺𑀲𑀻𑀤𑀢𑁄 𑀉𑀧𑀟𑁆𑀠𑀓𑀸𑀬𑁄 𑀅𑀦𑀼𑀧𑀯𑀺𑀲𑀢𑀻’’𑀢𑀺.

𑀢𑀁 ¶ 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀢𑁆𑀣 𑀕𑀦𑁆𑀢𑀼𑀓𑀸𑀫𑁄 𑀘𑀓𑁆𑀓𑀭𑀢𑀦𑀁 𑀅𑀩𑁆𑀪𑀼𑀓𑁆𑀓𑀺𑀭𑀺. 𑀢𑀁 𑀆𑀓𑀸𑀲𑁂 𑀧𑀢𑀺𑀝𑁆𑀞𑀸𑀲𑀺 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬. 𑀅𑀣 𑀤𑁆𑀯𑀺𑀦𑁆𑀦𑀁 𑀤𑁂𑀯𑀮𑁄𑀓𑀸𑀦𑀁 𑀯𑁂𑀫𑀚𑁆𑀛𑀢𑁄 𑀘𑀓𑁆𑀓𑀭𑀢𑀦𑀁 𑀑𑀢𑀭𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀲𑀺 𑀲𑀤𑁆𑀥𑀺𑀁 𑀧𑀭𑀺𑀡𑀸𑀬𑀓𑀭𑀢𑀦𑀧𑀫𑀼𑀔𑀸𑀬 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬. 𑀭𑀸𑀚𑀸 𑀏𑀓𑀓𑁄𑀯 𑀢𑀸𑀯𑀢𑀺𑀁𑀲𑀪𑀯𑀦𑀁 𑀅𑀕𑀫𑀸𑀲𑀺. 𑀲𑀓𑁆𑀓𑁄 𑁋 ‘‘𑀫𑀦𑁆𑀥𑀸𑀢𑀸 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸𑀯 𑀢𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑁋 ‘‘𑀲𑁆𑀯𑀸𑀕𑀢𑀁, 𑀢𑁂 𑀫𑀳𑀸𑀭𑀸𑀚, 𑀲𑀓𑀁 𑀢𑁂 𑀫𑀳𑀸𑀭𑀸𑀚, 𑀅𑀦𑀼𑀲𑀸𑀲 𑀫𑀳𑀸𑀭𑀸𑀚𑀸’’𑀢𑀺 𑀯𑀢𑁆𑀯𑀸 𑀲𑀤𑁆𑀥𑀺𑀁 𑀦𑀸𑀝𑀓𑁂𑀳𑀺 𑀭𑀚𑁆𑀚𑀁 𑀤𑁆𑀯𑁂 𑀪𑀸𑀕𑁂 𑀓𑀢𑁆𑀯𑀸 𑀏𑀓𑀁 𑀪𑀸𑀕𑀫𑀤𑀸𑀲𑀺. 𑀭𑀜𑁆𑀜𑁄 𑀢𑀸𑀯𑀢𑀺𑀁𑀲𑀪𑀯𑀦𑁂 𑀧𑀢𑀺𑀝𑁆𑀞𑀺𑀢𑀫𑀢𑁆𑀢𑀲𑁆𑀲𑁂𑀯 𑀫𑀦𑀼𑀲𑁆𑀲𑀪𑀸𑀯𑁄 𑀯𑀺𑀕𑀘𑁆𑀙𑀺, 𑀤𑁂𑀯𑀪𑀸𑀯𑁄 𑀧𑀸𑀢𑀼𑀭𑀳𑁄𑀲𑀺. 𑀢𑀲𑁆𑀲 𑀓𑀺𑀭 𑀲𑀓𑁆𑀓𑁂𑀦 𑀲𑀤𑁆𑀥𑀺𑀁 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁 𑀦𑀺𑀲𑀺𑀦𑁆𑀦𑀲𑁆𑀲 𑀅𑀓𑁆𑀔𑀺𑀦𑀺𑀫𑀺𑀲𑀫𑀢𑁆𑀢𑁂𑀦 𑀦𑀸𑀦𑀢𑁆𑀢𑀁 𑀧𑀜𑁆𑀜𑀸𑀬𑀢𑀺. 𑀢𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑀸 𑀤𑁂𑀯𑀸 𑀲𑀓𑁆𑀓𑀲𑁆𑀲 𑀘 𑀢𑀲𑁆𑀲 𑀘 𑀦𑀸𑀦𑀢𑁆𑀢𑁂 𑀫𑀼𑀬𑁆𑀳𑀦𑁆𑀢𑀺. 𑀲𑁄 𑀢𑀢𑁆𑀣 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁄 𑀬𑀸𑀯 𑀙𑀢𑁆𑀢𑀺𑀁𑀲 𑀲𑀓𑁆𑀓𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀘𑀼𑀢𑀸, 𑀢𑀸𑀯 𑀭𑀚𑁆𑀚𑀁 𑀓𑀸𑀭𑁂𑀢𑁆𑀯𑀸 𑀅𑀢𑀺𑀢𑁆𑀢𑁄𑀯 𑀓𑀸𑀫𑁂𑀳𑀺 𑀢𑀢𑁄 𑀘𑀯𑀺𑀢𑁆𑀯𑀸 𑀅𑀢𑁆𑀢𑀦𑁄 𑀉𑀬𑁆𑀬𑀸𑀦𑁂 𑀧𑀢𑀺𑀝𑁆𑀞𑀺𑀢𑁄 𑀯𑀸𑀢𑀸𑀢𑀧𑁂𑀦 𑀨𑀼𑀝𑁆𑀞𑀕𑀢𑁆𑀢𑁄 𑀓𑀸𑀮𑀫𑀓𑀸𑀲𑀺.

𑀘𑀓𑁆𑀓𑀭𑀢𑀦𑁂 𑀧𑀦 𑀧𑀼𑀦 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑁂 𑀧𑀭𑀺𑀡𑀸𑀬𑀓𑀭𑀢𑀦𑀁 𑀲𑀼𑀯𑀡𑁆𑀡𑀧𑀝𑁆𑀝𑁂 𑀫𑀦𑁆𑀥𑀸𑀢𑀼 𑀉𑀧𑀸𑀳𑀦𑀁 𑀮𑀺𑀔𑀸𑀧𑁂𑀢𑁆𑀯𑀸 𑀇𑀤𑀁 𑀫𑀦𑁆𑀥𑀸𑀢𑀼 𑀭𑀚𑁆𑀚𑀦𑁆𑀢𑀺 𑀭𑀚𑁆𑀚𑀫𑀦𑀼𑀲𑀸𑀲𑀺. 𑀢𑁂𑀧𑀺 𑀢𑀻𑀳𑀺 𑀤𑀻𑀧𑁂𑀳𑀺 𑀆𑀕𑀢𑀫𑀦𑀼𑀲𑁆𑀲𑀸 𑀧𑀼𑀦 𑀕𑀦𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀧𑀭𑀺𑀡𑀸𑀬𑀓𑀭𑀢𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑁋 ‘‘𑀤𑁂𑀯, 𑀫𑀬𑀁 𑀭𑀜𑁆𑀜𑁄 𑀆𑀦𑀼𑀪𑀸𑀯𑁂𑀦 𑀆𑀕𑀢𑀸, 𑀇𑀤𑀸𑀦𑀺 𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀫, 𑀯𑀲𑀦𑀝𑁆𑀞𑀸𑀦𑀁 𑀦𑁄 𑀤𑁂𑀳𑀻’’𑀢𑀺 𑀬𑀸𑀘𑀺𑀁𑀲𑀼. 𑀲𑁄 𑀢𑁂𑀲𑀁 𑀏𑀓𑀫𑁂𑀓𑀁 𑀚𑀦𑀧𑀤𑀫𑀤𑀸𑀲𑀺. 𑀢𑀢𑁆𑀣 𑀧𑀼𑀩𑁆𑀩𑀯𑀺𑀤𑁂𑀳𑀢𑁄 𑀆𑀕𑀢𑀫𑀦𑀼𑀲𑁆𑀲𑁂𑀳𑀺 𑀆𑀯𑀲𑀺𑀢𑀧𑀤𑁂𑀲𑁄 𑀢𑀸𑀬𑁂𑀯 𑀧𑀼𑀭𑀺𑀫𑀲𑀜𑁆𑀜𑀸𑀬 𑁋 ‘‘𑀯𑀺𑀤𑁂𑀳𑀭𑀝𑁆𑀞’’𑀦𑁆𑀢𑀺 𑀦𑀸𑀫𑀁 𑀮𑀪𑀺, 𑀅𑀧𑀭𑀕𑁄𑀬𑀸𑀦𑀢𑁄 𑀆𑀕𑀢𑀫𑀦𑀼𑀲𑁆𑀲𑁂𑀳𑀺 𑀆𑀯𑀲𑀺𑀢𑀧𑀤𑁂𑀲𑁄 ‘‘𑀅𑀧𑀭𑀦𑁆𑀢𑀚𑀦𑀧𑀤𑁄’’𑀢𑀺 𑀦𑀸𑀫𑀁 𑀮𑀪𑀺, 𑀉𑀢𑁆𑀢𑀭𑀓𑀼𑀭𑀼𑀢𑁄 𑀆𑀕𑀢𑀫𑀦𑀼𑀲𑁆𑀲𑁂𑀳𑀺 𑀆𑀯𑀲𑀺𑀢𑀧𑀤𑁂𑀲𑁄 ‘‘𑀓𑀼𑀭𑀼𑀭𑀝𑁆𑀞’’𑀦𑁆𑀢𑀺 𑀦𑀸𑀫𑀁 ¶ 𑀮𑀪𑀺, 𑀩𑀳𑀼𑀓𑁂 𑀧𑀦 𑀕𑀸𑀫𑀦𑀺𑀕𑀫𑀸𑀤𑀬𑁄 𑀉𑀧𑀸𑀤𑀸𑀬 𑀩𑀳𑀼𑀯𑀘𑀦𑁂𑀦 𑀯𑁄𑀳𑀭𑀺𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀓𑀼𑀭𑀽𑀲𑀼 𑀯𑀺𑀳𑀭𑀢𑀻’’𑀢𑀺.

𑀓𑀫𑁆𑀫𑀸𑀲𑀥𑀫𑁆𑀫𑀁 𑀦𑀸𑀫 𑀓𑀼𑀭𑀽𑀦𑀁 𑀦𑀺𑀕𑀫𑁄𑀢𑀺 𑀓𑀫𑁆𑀫𑀸𑀲𑀥𑀫𑁆𑀫𑀦𑁆𑀢𑀺 𑀏𑀢𑁆𑀣 𑀓𑁂𑀘𑀺 𑀥-𑀓𑀸𑀭𑀲𑁆𑀲 𑀤-𑀓𑀸𑀭𑁂𑀦 𑀅𑀢𑁆𑀣𑀁 𑀯𑀡𑁆𑀡𑀬𑀦𑁆𑀢𑀺. 𑀓𑀫𑁆𑀫𑀸𑀲𑁄 𑀏𑀢𑁆𑀣 𑀤𑀫𑀺𑀢𑁄𑀢𑀺 𑀓𑀫𑁆𑀫𑀸𑀲𑀤𑀫𑁆𑀫𑁄. 𑀓𑀫𑁆𑀫𑀸𑀲𑁄𑀢𑀺 𑀓𑀫𑁆𑀫𑀸𑀲𑀧𑀸𑀤𑁄 𑀧𑁄𑀭𑀺𑀲𑀸𑀤𑁄 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀓𑀺𑀭 𑀧𑀸𑀤𑁂 𑀔𑀸𑀡𑀼𑀓𑁂𑀦 𑀯𑀺𑀤𑁆𑀥𑀝𑁆𑀞𑀸𑀦𑁂 𑀯𑀡𑁄 𑀭𑀼𑀳𑀦𑁆𑀢𑁄 𑀘𑀺𑀢𑁆𑀢𑀤𑀸𑀭𑀼𑀲𑀤𑀺𑀲𑁄 𑀳𑀼𑀢𑁆𑀯𑀸 𑀭𑀼𑀳𑀺. 𑀢𑀲𑁆𑀫𑀸 𑀓𑀫𑁆𑀫𑀸𑀲𑀧𑀸𑀤𑁄𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀲𑁄 𑀘 𑀢𑀲𑁆𑀫𑀺𑀁 𑀑𑀓𑀸𑀲𑁂 𑀤𑀫𑀺𑀢𑁄 𑀧𑁄𑀭𑀺𑀲𑀸𑀤𑀪𑀸𑀯𑀢𑁄 ¶ 𑀧𑀝𑀺𑀲𑁂𑀥𑀺𑀢𑁄 ¶ . 𑀓𑁂𑀦? 𑀫𑀳𑀸𑀲𑀢𑁆𑀢𑁂𑀦. 𑀓𑀢𑀭𑀲𑁆𑀫𑀺𑀁 𑀚𑀸𑀢𑀓𑁂𑀢𑀺? 𑀫𑀳𑀸𑀲𑀼𑀢𑀲𑁄𑀫𑀚𑀸𑀢𑀓𑁂𑀢𑀺 𑀏𑀓𑁂. 𑀇𑀫𑁂 𑀧𑀦 𑀣𑁂𑀭𑀸 𑀚𑀬𑀤𑁆𑀤𑀺𑀲𑀚𑀸𑀢𑀓𑁂𑀢𑀺 𑀯𑀤𑀦𑁆𑀢𑀺. 𑀢𑀤𑀸 𑀳𑀺 𑀫𑀳𑀸𑀲𑀢𑁆𑀢𑁂𑀦 𑀓𑀫𑁆𑀫𑀸𑀲𑀧𑀸𑀤𑁄 𑀤𑀫𑀺𑀢𑁄. 𑀬𑀣𑀸𑀳 𑁋

‘‘𑀧𑀼𑀢𑁆𑀢𑁄 𑀬𑀤𑀸 𑀳𑁄𑀫𑀺 𑀚𑀬𑀤𑁆𑀤𑀺𑀲𑀲𑁆𑀲;

𑀧𑀜𑁆𑀘𑀸𑀮𑀭𑀝𑁆𑀞𑀥𑀺𑀧𑀢𑀺𑀲𑁆𑀲 𑀅𑀢𑁆𑀭𑀚𑁄.

𑀘𑀚𑀺𑀢𑁆𑀯𑀸𑀦 𑀧𑀸𑀡𑀁 𑀧𑀺𑀢𑀭𑀁 𑀧𑀫𑁄𑀘𑀬𑀺𑀁;

𑀓𑀫𑁆𑀫𑀸𑀲𑀧𑀸𑀤𑀫𑁆𑀧𑀺 𑀘𑀳𑀁 𑀧𑀲𑀸𑀤𑀬𑀺’’𑀦𑁆𑀢𑀺.

𑀓𑁂𑀘𑀺 𑀧𑀦 𑀥-𑀓𑀸𑀭𑁂𑀦𑁂𑀯 𑀅𑀢𑁆𑀣𑀁 𑀯𑀡𑁆𑀡𑀬𑀦𑁆𑀢𑀺. 𑀓𑀼𑀭𑀽𑀭𑀝𑁆𑀞𑀯𑀸𑀲𑀻𑀦𑀁 𑀓𑀺𑀭 𑀓𑀼𑀭𑀼𑀯𑀢𑁆𑀢𑀥𑀫𑁆𑀫𑁄, 𑀢𑀲𑁆𑀫𑀺𑀁 𑀓𑀫𑁆𑀫𑀸𑀲𑁄 𑀚𑀸𑀢𑁄, 𑀢𑀲𑁆𑀫𑀸 𑀢𑀁 𑀞𑀸𑀦𑀁 𑀓𑀫𑁆𑀫𑀸𑀲𑁄 𑀏𑀢𑁆𑀣 𑀥𑀫𑁆𑀫𑁄 𑀚𑀸𑀢𑁄𑀢𑀺 𑀓𑀫𑁆𑀫𑀸𑀲𑀥𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀦𑀺𑀯𑀺𑀝𑁆𑀞𑀦𑀺𑀕𑀫𑀲𑁆𑀲𑀸𑀧𑀺 𑀏𑀢𑀤𑁂𑀯 𑀦𑀸𑀫𑀁. 𑀪𑀼𑀫𑁆𑀫𑀯𑀘𑀦𑁂𑀦 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺. 𑀅𑀯𑀲𑀦𑁄𑀓𑀸𑀲𑀢𑁄. 𑀪𑀕𑀯𑀢𑁄 𑀓𑀺𑀭 𑀢𑀲𑁆𑀫𑀺𑀁 𑀦𑀺𑀕𑀫𑁂 𑀯𑀲𑀦𑁄𑀓𑀸𑀲𑁄 𑀓𑁄𑀘𑀺 𑀯𑀺𑀳𑀸𑀭𑁄 𑀦𑀸𑀫 𑀦𑀸𑀳𑁄𑀲𑀺. 𑀦𑀺𑀕𑀫𑀢𑁄 𑀧𑀦 𑀅𑀧𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀉𑀤𑀓𑀲𑀫𑁆𑀧𑀦𑁆𑀦𑁂 𑀭𑀫𑀡𑀻𑀬𑁂 𑀪𑀽𑀫𑀺𑀪𑀸𑀕𑁂 𑀫𑀳𑀸𑀯𑀦𑀲𑀡𑁆𑀟𑁄 𑀅𑀳𑁄𑀲𑀺 𑀢𑀢𑁆𑀣 𑀪𑀕𑀯𑀸 𑀯𑀺𑀳𑀸𑀲𑀺, 𑀢𑀁 𑀦𑀺𑀕𑀫𑀁 𑀕𑁄𑀘𑀭𑀕𑀸𑀫𑀁 𑀓𑀢𑁆𑀯𑀸. 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 ‘‘𑀓𑀼𑀭𑀽𑀲𑀼 𑀯𑀺𑀳𑀭𑀢𑀺 𑀓𑀫𑁆𑀫𑀸𑀲𑀥𑀫𑁆𑀫𑀁 𑀦𑀸𑀫 𑀓𑀼𑀭𑀽𑀦𑀁 𑀦𑀺𑀕𑀫𑁄, 𑀢𑀁 𑀕𑁄𑀘𑀭𑀕𑀸𑀫𑀁 𑀓𑀢𑁆𑀯𑀸’’𑀢𑀺.

𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀫𑁂𑀢𑀁, 𑀕𑀸𑀭𑀯𑀯𑀘𑀦𑀫𑁂𑀢𑀁. 𑀆𑀦𑀦𑁆𑀤𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁. 𑀏𑀓𑀫𑀦𑁆𑀢𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 𑁋 ‘‘𑀯𑀺𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀯𑀢𑁆𑀢𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁭𑁦) 𑀯𑀺𑀬. 𑀢𑀲𑁆𑀫𑀸 𑀬𑀣𑀸 𑀦𑀺𑀲𑀺𑀦𑁆𑀦𑁄 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀢𑀣𑀸 𑀦𑀺𑀲𑀻𑀤𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀏𑀢𑀁 𑀉𑀧𑀬𑁄𑀕𑀯𑀘𑀦𑀁 𑀦𑀺𑀲𑀻𑀤𑀻𑀢𑀺 ¶ 𑀉𑀧𑀸𑀯𑀺𑀲𑀺. 𑀧𑀡𑁆𑀟𑀺𑀢𑀸 𑀳𑀺 𑀕𑀭𑀼𑀝𑁆𑀞𑀸𑀦𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀲𑀦𑀓𑀼𑀲𑀮𑀢𑀸𑀬 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀦𑁆𑀢𑀺. 𑀅𑀬𑀜𑁆𑀘 𑀢𑁂𑀲𑀁 𑀅𑀜𑁆𑀜𑀢𑀭𑁄, 𑀢𑀲𑁆𑀫𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀓𑀣𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀧𑀦 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺? 𑀙 𑀦𑀺𑀲𑀚𑁆𑀚𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀢𑀺𑀤𑀽𑀭𑀁, 𑀅𑀘𑁆𑀘𑀸𑀲𑀦𑁆𑀦𑀁, 𑀉𑀧𑀭𑀺𑀯𑀸𑀢𑀁, 𑀉𑀦𑁆𑀦𑀢𑀧𑁆𑀧𑀤𑁂𑀲𑀁, 𑀅𑀢𑀺𑀲𑀫𑁆𑀫𑀼𑀔𑀁, 𑀅𑀢𑀺𑀧𑀘𑁆𑀙𑀸𑀢𑀺. 𑀅𑀢𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄 𑀳𑀺 𑀲𑀘𑁂 𑀓𑀣𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀉𑀘𑁆𑀘𑀸𑀲𑀤𑁆𑀤𑁂𑀦 𑀓𑀣𑁂𑀢𑀩𑁆𑀩𑀁 𑀳𑁄𑀢𑀺. 𑀅𑀘𑁆𑀘𑀸𑀲𑀦𑁆𑀦𑁂 𑀦𑀺𑀲𑀺𑀦𑁆𑀦𑁄 𑀲𑀗𑁆𑀖𑀝𑁆𑀝𑀦𑀁 𑀓𑀭𑁄𑀢𑀺. 𑀉𑀧𑀭𑀺𑀯𑀸𑀢𑁂 𑀦𑀺𑀲𑀺𑀦𑁆𑀦𑁄 𑀲𑀭𑀻𑀭𑀕𑀦𑁆𑀥𑁂𑀦 𑀩𑀸𑀥𑀢𑀺. 𑀉𑀦𑁆𑀦𑀢𑀧𑁆𑀧𑀤𑁂𑀲𑁂 𑀦𑀺𑀲𑀺𑀦𑁆𑀦𑁄 ¶ 𑀅𑀕𑀸𑀭𑀯𑀁 𑀧𑀓𑀸𑀲𑁂𑀢𑀺. 𑀅𑀢𑀺𑀲𑀫𑁆𑀫𑀼𑀔𑀸 𑀦𑀺𑀲𑀺𑀦𑁆𑀦𑁄 𑀲𑀘𑁂 𑀤𑀝𑁆𑀞𑀼𑀓𑀸𑀫𑁄 𑀳𑁄𑀢𑀺, 𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀁 𑀆𑀳𑀘𑁆𑀘 𑀤𑀝𑁆𑀞𑀩𑁆𑀩𑀁 𑀳𑁄𑀢𑀺. 𑀅𑀢𑀺𑀧𑀘𑁆𑀙𑀸 𑀦𑀺𑀲𑀺𑀦𑁆𑀦𑁄 𑀲𑀘𑁂 𑀤𑀝𑁆𑀞𑀼𑀓𑀸𑀫𑁄 𑀳𑁄𑀢𑀺, 𑀕𑀻𑀯𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀤𑀝𑁆𑀞𑀩𑁆𑀩𑀁 𑀳𑁄𑀢𑀺. 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀢𑀺𑀓𑁆𑀔𑀢𑁆𑀢𑀼𑀁 𑀪𑀕𑀯𑀦𑁆𑀢𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀯𑀦𑁆𑀤𑀺𑀢𑁆𑀯𑀸 𑀏𑀢𑁂 𑀙 𑀦𑀺𑀲𑀚𑁆𑀚𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸 ¶ 𑀤𑀓𑁆𑀔𑀺𑀡𑀚𑀸𑀡𑀼𑀫𑀡𑁆𑀟𑀮𑀲𑁆𑀲 𑀅𑀪𑀺𑀫𑀼𑀔𑀝𑁆𑀞𑀸𑀦𑁂 𑀙𑀩𑁆𑀩𑀡𑁆𑀡𑀸𑀦𑀁 𑀩𑀼𑀤𑁆𑀥𑀭𑀲𑁆𑀫𑀻𑀦𑀁 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀧𑀲𑀦𑁆𑀦𑀮𑀸𑀔𑀸𑀭𑀲𑀁 𑀯𑀺𑀕𑀸𑀳𑀦𑁆𑀢𑁄 𑀯𑀺𑀬 𑀲𑀼𑀯𑀡𑁆𑀡𑀧𑀝𑀁 𑀧𑀸𑀭𑀼𑀧𑀦𑁆𑀢𑁄 𑀯𑀺𑀬 𑀭𑀢𑁆𑀢𑀼𑀧𑁆𑀧𑀮𑀫𑀸𑀮𑀸𑀯𑀺𑀢𑀸𑀦𑀫𑀚𑁆𑀛𑀁 𑀧𑀯𑀺𑀲𑀦𑁆𑀢𑁄 𑀯𑀺𑀬 𑀘 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀦𑀺𑀲𑀻𑀤𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀻’’𑀢𑀺.

𑀓𑀸𑀬 𑀧𑀦 𑀯𑁂𑀮𑀸𑀬, 𑀓𑁂𑀦 𑀓𑀸𑀭𑀡𑁂𑀦 𑀅𑀬𑀫𑀸𑀬𑀲𑁆𑀫𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀦𑁆𑀢𑁄𑀢𑀺? 𑀲𑀸𑀬𑀦𑁆𑀳𑀯𑁂𑀮𑀸𑀬𑀁 𑀧𑀘𑁆𑀘𑀬𑀸𑀓𑀸𑀭𑀧𑀜𑁆𑀳𑀧𑀼𑀘𑁆𑀙𑀦𑀓𑀸𑀭𑀡𑁂𑀦. 𑀢𑀁 𑀤𑀺𑀯𑀲𑀁 𑀓𑀺𑀭𑀸𑀬𑀫𑀸𑀬𑀲𑁆𑀫𑀸 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀖𑀭𑀤𑁆𑀯𑀸𑀭𑁂 𑀖𑀭𑀤𑁆𑀯𑀸𑀭𑁂 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀦𑀺𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀓𑀫𑁆𑀫𑀸𑀲𑀥𑀫𑁆𑀫𑀕𑀸𑀫𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀲𑀢𑁆𑀣𑀼 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀲𑀢𑁆𑀣𑀭𑀺 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀝𑁆𑀞𑁂 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀤𑀺𑀯𑀸𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀓𑁆𑀓𑀦𑁆𑀢𑁂𑀲𑀼 𑀤𑀺𑀯𑀸𑀝𑁆𑀞𑀸𑀦𑀁 𑀧𑀝𑀺𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀘𑀫𑁆𑀫𑀓𑁆𑀔𑀡𑁆𑀟𑀁 𑀧𑀜𑁆𑀜𑀧𑁂𑀢𑁆𑀯𑀸 𑀉𑀤𑀓𑀢𑀼𑀫𑁆𑀩𑀢𑁄 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀉𑀤𑀓𑁂𑀦 𑀳𑀢𑁆𑀣𑀧𑀸𑀤𑁂 𑀲𑀻𑀢𑀮𑁂 𑀓𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺. 𑀅𑀣 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦 𑀲𑀫𑀸𑀧𑀢𑁆𑀢𑀺𑀢𑁄 𑀉𑀝𑁆𑀞𑀸𑀬 𑀧𑀘𑁆𑀘𑀬𑀸𑀓𑀸𑀭𑁂 𑀜𑀸𑀡𑀁 𑀑𑀢𑀸𑀭𑁂𑀲𑀺. 𑀲𑁄 𑁋 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑀁, 𑀅𑀦𑁆𑀢𑀢𑁄 𑀧𑀝𑁆𑀞𑀸𑀬 𑀆𑀤𑀺𑀁, 𑀉𑀪𑀬𑀦𑁆𑀢𑀢𑁄 𑀧𑀝𑁆𑀞𑀸𑀬 𑀫𑀚𑁆𑀛𑀁, 𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀉𑀪𑁄 𑀅𑀦𑁆𑀢𑁂 𑀧𑀸𑀧𑁂𑀦𑁆𑀢𑁄 𑀢𑀺𑀓𑁆𑀔𑀢𑁆𑀢𑀼𑀁 𑀤𑁆𑀯𑀸𑀤𑀲𑀧𑀤𑀁 𑀧𑀘𑁆𑀘𑀬𑀸𑀓𑀸𑀭𑀁 𑀲𑀫𑁆𑀫𑀲𑀺. 𑀢𑀲𑁆𑀲𑁂𑀯𑀁 𑀲𑀫𑁆𑀫𑀲𑀦𑁆𑀢𑀲𑁆𑀲 𑀧𑀘𑁆𑀘𑀬𑀸𑀓𑀸𑀭𑁄 𑀯𑀺𑀪𑀽𑀢𑁄 ¶ 𑀳𑀼𑀢𑁆𑀯𑀸 𑀉𑀢𑁆𑀢𑀸𑀦𑀓𑀼𑀢𑁆𑀢𑀸𑀦𑀓𑁄 𑀯𑀺𑀬 𑀉𑀧𑀝𑁆𑀞𑀸𑀲𑀺.

𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀧𑀘𑁆𑀘𑀬𑀸𑀓𑀸𑀭𑁄 𑀲𑀩𑁆𑀩𑀩𑀼𑀤𑁆𑀥𑁂𑀳𑀺 𑁋 ‘𑀕𑀫𑁆𑀪𑀻𑀭𑁄 𑀘𑁂𑀯 𑀕𑀫𑁆𑀪𑀻𑀭𑀸𑀯𑀪𑀸𑀲𑁄 𑀘𑀸’𑀢𑀺 𑀓𑀣𑀺𑀢𑁄, 𑀫𑀬𑁆𑀳𑀁 𑀔𑁄 𑀧𑀦 𑀧𑀤𑁂𑀲𑀜𑀸𑀡𑁂 𑀞𑀺𑀢𑀲𑁆𑀲 𑀲𑀸𑀯𑀓𑀲𑁆𑀲 𑀲𑀢𑁄 𑀉𑀢𑁆𑀢𑀸𑀦𑁄 𑀯𑀺𑀪𑀽𑀢𑁄 𑀧𑀸𑀓𑀝𑁄 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀫𑀬𑁆𑀳𑀁𑀬𑁂𑀯 𑀦𑀼 𑀔𑁄 𑀏𑀲 𑀉𑀢𑁆𑀢𑀸𑀦𑀓𑁄 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀉𑀤𑀸𑀳𑀼 𑀅𑀜𑁆𑀜𑁂𑀲𑀫𑁆𑀧𑀻’’𑀢𑀺? 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀳𑀦𑁆𑀤𑀸𑀳𑀁 𑀇𑀫𑀁 𑀧𑀜𑁆𑀳𑀁 𑀕𑀳𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀸𑀫𑀺, 𑀅𑀤𑁆𑀥𑀸 𑀫𑁂 𑀪𑀕𑀯𑀸 𑀇𑀫𑀁 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀲𑀸𑀮𑀺𑀦𑁆𑀤𑀁 𑀲𑀺𑀦𑁂𑀭𑀼𑀁 𑀉𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀏𑀓𑀁 𑀲𑀼𑀢𑁆𑀢𑀦𑁆𑀢𑀓𑀣𑀁 𑀓𑀣𑁂𑀢𑁆𑀯𑀸 𑀤𑀲𑁆𑀲𑁂𑀲𑁆𑀲𑀢𑀺. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀁, 𑀪𑀼𑀫𑁆𑀫𑀦𑁆𑀢𑀭𑀁, 𑀧𑀘𑁆𑀘𑀬𑀸𑀓𑀸𑀭𑀁, 𑀲𑀫𑀬𑀦𑁆𑀢𑀭𑀦𑁆𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀞𑀸𑀦𑀸𑀦𑀺 𑀧𑀢𑁆𑀯𑀸 𑀕𑀚𑁆𑀚𑀺𑀢𑀁 𑀫𑀳𑀦𑁆𑀢𑀁 𑀳𑁄𑀢𑀺, 𑀜𑀸𑀡𑀁 𑀅𑀦𑀼𑀧𑀯𑀺𑀲𑀢𑀺, 𑀩𑀼𑀤𑁆𑀥𑀜𑀸𑀡𑀲𑁆𑀲 𑀫𑀳𑀦𑁆𑀢𑀪𑀸𑀯𑁄 ¶ 𑀧𑀜𑁆𑀜𑀸𑀬𑀢𑀺, 𑀤𑁂𑀲𑀦𑀸 𑀕𑀫𑁆𑀪𑀻𑀭𑀸 𑀳𑁄𑀢𑀺 𑀢𑀺𑀮𑀓𑁆𑀔𑀡𑀩𑁆𑀪𑀸𑀳𑀢𑀸 𑀲𑀼𑀜𑁆𑀜𑀢𑀧𑀝𑀺𑀲𑀁𑀬𑀼𑀢𑁆𑀢𑀸’’𑀢𑀺.

𑀲𑁄 𑀓𑀺𑀜𑁆𑀘𑀸𑀧𑀺 𑀧𑀓𑀢𑀺𑀬𑀸𑀯 𑀏𑀓𑀤𑀺𑀯𑀲𑁂 𑀲𑀢𑀯𑀸𑀭𑀫𑁆𑀧𑀺 𑀲𑀳𑀲𑁆𑀲𑀯𑀸𑀭𑀫𑁆𑀧𑀺 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀦𑁆𑀢𑁄 𑀦 𑀅𑀳𑁂𑀢𑀼𑀅𑀓𑀸𑀭𑀡𑁂𑀦 𑀉𑀧𑀲𑀗𑁆𑀓𑀫𑀢𑀺, 𑀢𑀁 𑀤𑀺𑀯𑀲𑀁 𑀧𑀦 𑀇𑀫𑀁 𑀧𑀜𑁆𑀳𑀁 𑀕𑀳𑁂𑀢𑁆𑀯𑀸 𑁋 ‘‘𑀇𑀫𑀁 𑀩𑀼𑀤𑁆𑀥𑀕𑀦𑁆𑀥𑀳𑀢𑁆𑀣𑀺𑀁 𑀆𑀧𑀚𑁆𑀚 𑀜𑀸𑀡𑀓𑁄𑀜𑁆𑀘𑀦𑀸𑀤𑀁 𑀲𑁄𑀲𑁆𑀲𑀸𑀫𑀺, 𑀩𑀼𑀤𑁆𑀥𑀲𑀻𑀳𑀁 𑀆𑀧𑀚𑁆𑀚 𑀜𑀸𑀡𑀲𑀻𑀳𑀦𑀸𑀤𑀁 𑀲𑁄𑀲𑁆𑀲𑀸𑀫𑀺, 𑀩𑀼𑀤𑁆𑀥𑀲𑀺𑀦𑁆𑀥𑀯𑀁 𑀆𑀧𑀚𑁆𑀚 𑀜𑀸𑀡𑀧𑀤𑀯𑀺𑀓𑁆𑀓𑀫𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑀸 𑀉𑀝𑁆𑀞𑀸𑀬 𑀘𑀫𑁆𑀫𑀓𑁆𑀔𑀡𑁆𑀟𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 ¶ 𑀆𑀤𑀸𑀬 𑀲𑀸𑀬𑀦𑁆𑀳𑀲𑀫𑀬𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀸𑀬𑀦𑁆𑀳𑀯𑁂𑀮𑀸𑀬𑀁 𑀧𑀘𑁆𑀘𑀬𑀸𑀓𑀸𑀭𑀧𑀜𑁆𑀳𑀧𑀼𑀘𑁆𑀙𑀦𑀓𑀸𑀭𑀡𑁂𑀦 𑀉𑀧𑀲𑀗𑁆𑀓𑀫𑀦𑁆𑀢𑁄’’𑀢𑀺.

𑀬𑀸𑀯 𑀕𑀫𑁆𑀪𑀻𑀭𑁄𑀢𑀺 𑀏𑀢𑁆𑀣 𑀬𑀸𑀯𑀲𑀤𑁆𑀤𑁄 𑀧𑀫𑀸𑀡𑀸𑀢𑀺𑀓𑁆𑀓𑀫𑁂, 𑀅𑀢𑀺𑀓𑁆𑀓𑀫𑁆𑀫 𑀧𑀫𑀸𑀡𑀁 𑀕𑀫𑁆𑀪𑀻𑀭𑁄, 𑀅𑀢𑀺𑀕𑀫𑁆𑀪𑀻𑀭𑁄𑀢𑀺 𑀅𑀢𑁆𑀣𑁄. 𑀕𑀫𑁆𑀪𑀻𑀭𑀸𑀯𑀪𑀸𑀲𑁄𑀢𑀺 𑀕𑀫𑁆𑀪𑀻𑀭𑁄𑀯 𑀳𑀼𑀢𑁆𑀯𑀸 𑀅𑀯𑀪𑀸𑀲𑀢𑀺, 𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀜𑁆𑀳𑀺 𑀉𑀢𑁆𑀢𑀸𑀦𑀫𑁂𑀯 𑀕𑀫𑁆𑀪𑀻𑀭𑀸𑀯𑀪𑀸𑀲𑀁 𑀳𑁄𑀢𑀺 𑀧𑀽𑀢𑀺𑀧𑀡𑁆𑀡𑀸𑀤𑀺𑀯𑀲𑁂𑀦 𑀓𑀸𑀴𑀯𑀡𑁆𑀡𑀧𑀼𑀭𑀸𑀡𑀉𑀤𑀓𑀁 𑀯𑀺𑀬. 𑀢𑀜𑁆𑀳𑀺 𑀚𑀸𑀡𑀼𑀧𑁆𑀧𑀫𑀸𑀡𑀫𑁆𑀧𑀺 𑀲𑀢𑀧𑁄𑀭𑀺𑀲𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀏𑀓𑀁 𑀕𑀫𑁆𑀪𑀻𑀭𑀁 ¶ 𑀉𑀢𑁆𑀢𑀸𑀦𑀸𑀯𑀪𑀸𑀲𑀁 𑀳𑁄𑀢𑀺 𑀫𑀡𑀺𑀕𑀗𑁆𑀕𑀸𑀬 𑀯𑀺𑀧𑁆𑀧𑀲𑀦𑁆𑀦𑀉𑀤𑀓𑀁 𑀯𑀺𑀬. 𑀢𑀜𑁆𑀳𑀺 𑀲𑀢𑀧𑁄𑀭𑀺𑀲𑀫𑁆𑀧𑀺 𑀚𑀸𑀡𑀼𑀧𑁆𑀧𑀫𑀸𑀡𑀁 𑀯𑀺𑀬 𑀔𑀸𑀬𑀢𑀺. 𑀏𑀓𑀁 𑀉𑀢𑁆𑀢𑀸𑀦𑀁 𑀉𑀢𑁆𑀢𑀸𑀦𑀸𑀯𑀪𑀸𑀲𑀁 𑀳𑁄𑀢𑀺 𑀘𑀸𑀝𑀺𑀆𑀤𑀻𑀲𑀼 𑀉𑀤𑀓𑀁 𑀯𑀺𑀬. 𑀏𑀓𑀁 𑀕𑀫𑁆𑀪𑀻𑀭𑀁 𑀕𑀫𑁆𑀪𑀻𑀭𑀸𑀯𑀪𑀸𑀲𑀁 𑀳𑁄𑀢𑀺 𑀲𑀺𑀦𑁂𑀭𑀼𑀧𑀸𑀤𑀓𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀯𑀺𑀬. 𑀏𑀯𑀁 𑀉𑀤𑀓𑀫𑁂𑀯 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀢𑀺. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀧𑀦𑁂𑀢𑀁 𑀦𑀢𑁆𑀣𑀺. 𑀅𑀬𑀜𑁆𑀳𑀺 𑀕𑀫𑁆𑀪𑀻𑀭𑁄 𑀘𑁂𑀯 𑀕𑀫𑁆𑀪𑀻𑀭𑀸𑀯𑀪𑀸𑀲𑁄 𑀘𑀸𑀢𑀺 𑀏𑀓𑀫𑁂𑀯 𑀦𑀸𑀫𑀁 𑀮𑀪𑀢𑀺. 𑀏𑀯𑀭𑀽𑀧𑁄 𑀲𑀫𑀸𑀦𑁄𑀧𑀺 𑀅𑀣 𑀘 𑀧𑀦 𑀫𑁂 𑀉𑀢𑁆𑀢𑀸𑀦𑀓𑀼𑀢𑁆𑀢𑀸𑀦𑀓𑁄 𑀯𑀺𑀬 𑀔𑀸𑀬𑀢𑀺, 𑀬𑀤𑀺𑀤𑀁 𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁 𑀪𑀦𑁆𑀢𑁂𑀢𑀺. 𑀏𑀯𑀁 𑀅𑀢𑁆𑀢𑀦𑁄 𑀯𑀺𑀫𑁆𑀳𑀬𑀁 𑀧𑀓𑀸𑀲𑁂𑀦𑁆𑀢𑁄 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑁄 𑀦𑀺𑀲𑀻𑀤𑀺.

𑀪𑀕𑀯𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑁋 ‘‘𑀆𑀦𑀦𑁆𑀤𑁄 𑀪𑀯𑀕𑁆𑀕𑀕𑁆𑀕𑀳𑀡𑀸𑀬 𑀳𑀢𑁆𑀣𑀁 𑀧𑀲𑀸𑀭𑁂𑀦𑁆𑀢𑁄 𑀯𑀺𑀬, 𑀲𑀺𑀦𑁂𑀭𑀼𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀺𑀜𑁆𑀚𑀁 𑀦𑀻𑀳𑀭𑀺𑀢𑀼𑀁 𑀯𑀸𑀬𑀫𑀫𑀸𑀦𑁄 𑀯𑀺𑀬, 𑀯𑀺𑀦𑀸 𑀦𑀸𑀯𑀸𑀬 𑀫𑀳𑀸𑀲𑀫𑀼𑀤𑁆𑀤𑀁 𑀢𑀭𑀺𑀢𑀼𑀓𑀸𑀫𑁄 𑀯𑀺𑀬, 𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀣𑀯𑁄𑀚𑀁 𑀕𑀳𑁂𑀢𑀼𑀁 𑀯𑀸𑀬𑀫𑀫𑀸𑀦𑁄 𑀯𑀺𑀬 𑀩𑀼𑀤𑁆𑀥𑀯𑀺𑀲𑀬𑀧𑀜𑁆𑀳𑀁 𑀅𑀢𑁆𑀢𑀦𑁄 𑀉𑀢𑁆𑀢𑀸𑀦𑀁 𑀯𑀤𑀢𑀺. 𑀳𑀦𑁆𑀤𑀲𑁆𑀲 𑀕𑀫𑁆𑀪𑀻𑀭𑀪𑀸𑀯𑀁 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀸 𑀳𑁂𑀯𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀫𑀸 𑀳𑁂𑀯𑀦𑁆𑀢𑀺 𑀳-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀏𑀯𑀁 𑀫𑀸 𑀪𑀡𑀻𑀢𑀺 𑀅𑀢𑁆𑀣𑁄. 𑀫𑀸 𑀳𑁂𑀯𑀦𑁆𑀢𑀺 𑀘 𑀇𑀤𑀁 𑀯𑀘𑀦𑀁 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀉𑀲𑁆𑀲𑀸𑀤𑁂𑀦𑁆𑀢𑁄𑀧𑀺 𑀪𑀡𑀢𑀺 𑀅𑀧𑀲𑀸𑀤𑁂𑀦𑁆𑀢𑁄𑀧𑀺.

𑀉𑀲𑁆𑀲𑀸𑀤𑀦𑀸𑀯𑀡𑁆𑀡𑀦𑀸

𑀢𑀢𑁆𑀣 ¶ 𑀉𑀲𑁆𑀲𑀸𑀤𑁂𑀦𑁆𑀢𑁄 𑁋 𑀆𑀦𑀦𑁆𑀤, 𑀢𑁆𑀯𑀁 𑀫𑀳𑀸𑀧𑀜𑁆𑀜𑁄 𑀯𑀺𑀲𑀤𑀜𑀸𑀡𑁄, 𑀢𑁂𑀦 𑀢𑁂 𑀕𑀫𑁆𑀪𑀻𑀭𑁄𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀉𑀢𑁆𑀢𑀸𑀦𑀓𑁄 𑀯𑀺𑀬 𑀔𑀸𑀬𑀢𑀺. 𑀅𑀜𑁆𑀜𑁂𑀲𑀁 𑀧𑀦𑁂𑀲 𑀉𑀢𑁆𑀢𑀸𑀦𑀓𑁄𑀢𑀺 𑀦 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑁄, 𑀕𑀫𑁆𑀪𑀻𑀭𑁄𑀬𑁂𑀯 𑀘 𑀕𑀫𑁆𑀪𑀻𑀭𑀸𑀯𑀪𑀸𑀲𑁄 𑀘. 𑀢𑀢𑁆𑀣 𑀘𑀢𑀲𑁆𑀲𑁄 𑀉𑀧𑀫𑀸 𑀯𑀤𑀦𑁆𑀢𑀺. 𑀙𑀫𑀸𑀲𑁂 𑀲𑀼𑀪𑁄𑀚𑀦𑀭𑀲𑀧𑀼𑀝𑁆𑀞𑀲𑁆𑀲 𑀓𑀺𑀭 𑀓𑀢𑀬𑁄𑀕𑀲𑁆𑀲 𑀫𑀳𑀸𑀫𑀮𑁆𑀮𑀲𑁆𑀲 𑀲𑀫𑀚𑁆𑀚𑀲𑀫𑀬𑁂 𑀓𑀢𑀫𑀮𑁆𑀮𑀧𑀸𑀲𑀸𑀡𑀧𑀭𑀺𑀘𑀬𑀲𑁆𑀲 𑀬𑀼𑀤𑁆𑀥𑀪𑀽𑀫𑀺𑀁 𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑁆𑀢𑀭𑀸 𑀫𑀮𑁆𑀮𑀧𑀸𑀲𑀸𑀡𑀁 𑀤𑀲𑁆𑀲𑁂𑀲𑀼𑀁, 𑀲𑁄 𑁋 𑀓𑀺𑀁 𑀏𑀢𑀦𑁆𑀢𑀺 𑀆𑀳. 𑀫𑀮𑁆𑀮𑀧𑀸𑀲𑀸𑀡𑁄𑀢𑀺. 𑀆𑀳𑀭𑀣 𑀦𑀦𑁆𑀢𑀺. 𑀉𑀓𑁆𑀔𑀺𑀧𑀺𑀢𑀼𑀁 ¶ 𑀦 𑀲𑀓𑁆𑀓𑁄𑀫𑀸𑀢𑀺 𑀯𑀼𑀢𑁆𑀢𑁂 𑀲𑀬𑀁 𑀕𑀦𑁆𑀢𑁆𑀯𑀸 𑀓𑀼𑀳𑀺𑀁 𑀇𑀫𑀲𑁆𑀲 𑀪𑀸𑀭𑀺𑀬𑀝𑁆𑀞𑀸𑀦𑀦𑁆𑀢𑀺 𑀯𑀢𑁆𑀯𑀸 𑀤𑁆𑀯𑀻𑀳𑀺 𑀳𑀢𑁆𑀣𑁂𑀳𑀺 𑀤𑁆𑀯𑁂 𑀧𑀸𑀲𑀸𑀡𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀓𑀻𑀴𑀸𑀕𑀼𑀴𑁂 𑀯𑀺𑀬 𑀔𑀺𑀧𑀺𑀢𑁆𑀯𑀸 𑀅𑀕𑀫𑀸𑀲𑀺. 𑀢𑀢𑁆𑀣 𑀫𑀮𑁆𑀮𑀲𑁆𑀲 𑀫𑀮𑁆𑀮𑀧𑀸𑀲𑀸𑀡𑁄 𑀮𑀳𑀼𑀓𑁄𑀧𑀺 𑀦 𑀅𑀜𑁆𑀜𑁂𑀲𑀁 𑀮𑀳𑀼𑀓𑁄𑀢𑀺 𑀯𑀢𑁆𑀢𑀩𑁆𑀩𑁄. 𑀙𑀫𑀸𑀲𑁂 𑀲𑀼𑀪𑁄𑀚𑀦𑀭𑀲𑀧𑀼𑀝𑁆𑀞𑁄 𑀫𑀮𑁆𑀮𑁄 𑀯𑀺𑀬 𑀳𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄, 𑀬𑀣𑀸 𑀫𑀮𑁆𑀮𑀲𑁆𑀲 𑀫𑀳𑀸𑀩𑀮𑀢𑀸𑀬 𑀫𑀮𑁆𑀮𑀧𑀸𑀲𑀸𑀡𑁄 𑀮𑀳𑀼𑀓𑁄, 𑀏𑀯𑀁 𑀣𑁂𑀭𑀲𑁆𑀲 𑀫𑀳𑀸𑀧𑀜𑁆𑀜𑀢𑀸𑀬 ¶ 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀉𑀢𑁆𑀢𑀸𑀦𑁄, 𑀲𑁄 𑀅𑀜𑁆𑀜𑁂𑀲𑀁 𑀉𑀢𑁆𑀢𑀸𑀦𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄.

𑀫𑀳𑀸𑀲𑀫𑀼𑀤𑁆𑀤𑁂 𑀘 𑀢𑀺𑀫𑀺𑀦𑀸𑀫 𑀫𑀘𑁆𑀙𑁄 𑀤𑁆𑀯𑀺𑀬𑁄𑀚𑀦𑀲𑀢𑀺𑀓𑁄 𑀢𑀺𑀫𑀺𑀗𑁆𑀕𑀮𑁄 𑀢𑀺𑀬𑁄𑀚𑀦𑀲𑀢𑀺𑀓𑁄, 𑀢𑀺𑀫𑀺𑀧𑀺𑀗𑁆𑀕𑀮𑁄 𑀘𑀢𑀼𑀬𑁄𑀚𑀦𑀲𑀢𑀺𑀓𑁄 𑀢𑀺𑀫𑀺𑀭𑀧𑀺𑀗𑁆𑀕𑀮𑁄 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑁄, 𑀆𑀦𑀦𑁆𑀤𑁄 𑀢𑀺𑀫𑀺𑀦𑀦𑁆𑀤𑁄 𑀅𑀚𑁆𑀛𑀸𑀭𑁄𑀳𑁄 𑀫𑀳𑀸𑀢𑀺𑀫𑀻𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀬𑁄𑀚𑀦𑀲𑀳𑀲𑁆𑀲𑀺𑀓𑀸. 𑀢𑀢𑁆𑀣 𑀢𑀺𑀫𑀺𑀭𑀧𑀺𑀗𑁆𑀕𑀮𑁂𑀦𑁂𑀯 𑀤𑀻𑀧𑁂𑀦𑁆𑀢𑀺. 𑀢𑀲𑁆𑀲 𑀓𑀺𑀭 𑀤𑀓𑁆𑀔𑀺𑀡𑀓𑀡𑁆𑀡𑀁 𑀘𑀸𑀮𑁂𑀦𑁆𑀢𑀲𑁆𑀲 𑀧𑀜𑁆𑀘𑀬𑁄𑀚𑀦𑀲𑀢𑁂 𑀧𑀤𑁂𑀲𑁂 𑀉𑀤𑀓𑀁 𑀘𑀮𑀢𑀺. 𑀢𑀣𑀸 𑀯𑀸𑀫𑀓𑀡𑁆𑀡𑀁. 𑀢𑀣𑀸 𑀦𑀗𑁆𑀕𑀼𑀝𑁆𑀞𑀁, 𑀢𑀣𑀸 𑀲𑀻𑀲𑀁. 𑀤𑁆𑀯𑁂 𑀧𑀦 𑀓𑀡𑁆𑀡𑁂 𑀘𑀸𑀮𑁂𑀢𑁆𑀯𑀸 𑀦𑀗𑁆𑀕𑀼𑀝𑁆𑀞𑁂𑀦 𑀉𑀤𑀓𑀁 𑀧𑀳𑀭𑀺𑀢𑁆𑀯𑀸 𑀲𑀻𑀲𑀁 𑀅𑀧𑀭𑀸𑀧𑀭𑀁 𑀓𑀢𑁆𑀯𑀸 𑀓𑀻𑀴𑀺𑀢𑀼𑀁 𑀆𑀭𑀤𑁆𑀥𑀲𑁆𑀲 𑀲𑀢𑁆𑀢𑀝𑁆𑀞𑀬𑁄𑀚𑀦𑀲𑀢𑁂 𑀧𑀤𑁂𑀲𑁂 𑀪𑀸𑀚𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑁆𑀥𑀦𑁂 𑀆𑀭𑁄𑀧𑀺𑀢𑀁 𑀯𑀺𑀬 𑀉𑀤𑀓𑀁 𑀧𑀓𑁆𑀓𑀼𑀣𑀢𑀺, 𑀢𑀺𑀬𑁄𑀚𑀦𑀲𑀢𑀫𑀢𑁆𑀢𑁂 𑀧𑀤𑁂𑀲𑁂 𑀉𑀤𑀓𑀁 𑀧𑀺𑀝𑁆𑀞𑀺𑀁 𑀙𑀸𑀤𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑀁 𑀫𑀳𑀸𑀲𑀫𑀼𑀤𑁆𑀤𑁄 𑀕𑀫𑁆𑀪𑀻𑀭𑁄 𑀕𑀫𑁆𑀪𑀻𑀭𑁄𑀢𑀺 𑀯𑀤𑀦𑁆𑀢𑀺 𑀓𑀼𑀢𑀲𑁆𑀲 𑀕𑀫𑁆𑀪𑀻𑀭𑀢𑀸, 𑀫𑀬𑀁 𑀧𑀺𑀝𑁆𑀞𑀺𑀧𑀝𑀺𑀘𑁆𑀙𑀸𑀤𑀦𑀫𑀢𑁆𑀢𑀫𑁆𑀧𑀺 𑀉𑀤𑀓𑀁 𑀦 𑀮𑀪𑀸𑀫𑀸’’𑀢𑀺. 𑀢𑀢𑁆𑀣 𑀓𑀸𑀬𑀼𑀧𑀧𑀦𑁆𑀦𑀲𑁆𑀲 𑀢𑀺𑀫𑀺𑀭𑀧𑀺𑀗𑁆𑀕𑀮𑀲𑁆𑀲 𑀫𑀳𑀸𑀲𑀫𑀼𑀤𑁆𑀤𑁄 𑀉𑀢𑁆𑀢𑀸𑀦𑁄𑀢𑀺, 𑀅𑀜𑁆𑀜𑁂𑀲𑀁 𑀔𑀼𑀤𑁆𑀤𑀓𑀫𑀘𑁆𑀙𑀸𑀦𑀁 𑀉𑀢𑁆𑀢𑀸𑀦𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄, 𑀏𑀯𑀫𑁂𑀯 𑀜𑀸𑀡𑀼𑀧𑀧𑀦𑁆𑀦𑀲𑁆𑀲 𑀣𑁂𑀭𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀉𑀢𑁆𑀢𑀸𑀦𑁄𑀢𑀺, 𑀅𑀜𑁆𑀜𑁂𑀲𑀫𑁆𑀧𑀺 𑀉𑀢𑁆𑀢𑀸𑀦𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄.

𑀲𑀼𑀧𑀡𑁆𑀡𑀭𑀸𑀚𑀸 ¶ 𑀘 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑁄, 𑀢𑀲𑁆𑀲 𑀤𑀓𑁆𑀔𑀺𑀡𑀧𑀓𑁆𑀔𑁄 𑀧𑀜𑁆𑀜𑀸𑀲𑀬𑁄𑀚𑀦𑀺𑀓𑁄 𑀳𑁄𑀢𑀺 𑀢𑀣𑀸 𑀯𑀸𑀫𑀧𑀓𑁆𑀔𑁄, 𑀧𑀺𑀜𑁆𑀙𑀯𑀝𑁆𑀝𑀺 𑀲𑀝𑁆𑀞𑀺𑀬𑁄𑀚𑀦𑀺𑀓𑀸, 𑀕𑀻𑀯𑀸 𑀢𑀺𑀁𑀲𑀬𑁄𑀚𑀦𑀺𑀓𑀸, 𑀫𑀼𑀔𑀁 𑀦𑀯𑀬𑁄𑀚𑀦𑀁, 𑀧𑀸𑀤𑀸 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸. 𑀢𑀲𑁆𑀫𑀺𑀁 𑀲𑀼𑀧𑀡𑁆𑀡𑀯𑀸𑀢𑀁 𑀤𑀲𑁆𑀲𑁂𑀢𑀼𑀁 𑀆𑀭𑀤𑁆𑀥𑁂 𑀲𑀢𑁆𑀢𑀝𑁆𑀞𑀬𑁄𑀚𑀦𑀲𑀢𑀁 𑀞𑀸𑀦𑀁 𑀦𑀧𑁆𑀧𑀳𑁄𑀢𑀺. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑀁 𑀆𑀓𑀸𑀲𑁄 𑀅𑀦𑀦𑁆𑀢𑁄 𑀅𑀦𑀦𑁆𑀢𑁄𑀢𑀺 𑀯𑀤𑀦𑁆𑀢𑀺, 𑀓𑀼𑀢𑀲𑁆𑀲 𑀅𑀦𑀦𑁆𑀢𑀢𑀸, 𑀫𑀬𑀁 𑀧𑀓𑁆𑀔𑀯𑀸𑀢𑀧𑁆𑀧𑀲𑀸𑀭𑀡𑁄𑀓𑀸𑀲𑀫𑁆𑀧𑀺 𑀦 𑀮𑀪𑀸𑀫𑀸’’𑀢𑀺. 𑀢𑀢𑁆𑀣 𑀓𑀸𑀬𑀼𑀧𑀧𑀦𑁆𑀦𑀲𑁆𑀲 𑀲𑀼𑀧𑀡𑁆𑀡𑀭𑀜𑁆𑀜𑁄 𑀆𑀓𑀸𑀲𑁄 𑀧𑀭𑀺𑀢𑁆𑀢𑁄𑀢𑀺, 𑀅𑀜𑁆𑀜𑁂𑀲𑀁 𑀔𑀼𑀤𑁆𑀤𑀓𑀧𑀓𑁆𑀔𑀻𑀦𑀁 𑀧𑀭𑀺𑀢𑁆𑀢𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄, 𑀏𑀯𑀫𑁂𑀯 𑀜𑀸𑀡𑀼𑀧𑀧𑀦𑁆𑀦𑀲𑁆𑀲 𑀣𑁂𑀭𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀉𑀢𑁆𑀢𑀸𑀦𑁄𑀢𑀺, 𑀅𑀜𑁆𑀜𑁂𑀲𑀫𑁆𑀧𑀺 𑀉𑀢𑁆𑀢𑀸𑀦𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄.

𑀭𑀸𑀳𑀼 𑀅𑀲𑀼𑀭𑀺𑀦𑁆𑀤𑁄 𑀧𑀦 𑀧𑀸𑀤𑀦𑁆𑀢𑀢𑁄 𑀬𑀸𑀯 𑀓𑁂𑀲𑀦𑁆𑀢𑀸 𑀬𑁄𑀚𑀦𑀸𑀦𑀁 𑀘𑀢𑁆𑀢𑀸𑀭𑀺 𑀲𑀳𑀲𑁆𑀲𑀸𑀦𑀺 𑀅𑀝𑁆𑀞 𑀘 𑀲𑀢𑀸𑀦𑀺 𑀳𑁄𑀢𑀺. 𑀢𑀲𑁆𑀲 𑀤𑁆𑀯𑀺𑀦𑁆𑀦𑀁 𑀩𑀸𑀳𑀸𑀦𑀁 𑀅𑀦𑁆𑀢𑀭𑀁 𑀤𑁆𑀯𑀸𑀤𑀲𑀬𑁄𑀚𑀦𑀲𑀢𑀺𑀓𑀁. 𑀩𑀳𑀮𑀢𑁆𑀢𑁂𑀦 𑀙𑀬𑁄𑀚𑀦𑀲𑀢𑀺𑀓𑀁 ¶ . 𑀳𑀢𑁆𑀣𑀧𑀸𑀤𑀢𑀮𑀸𑀦𑀺 ¶ 𑀢𑀺𑀬𑁄𑀚𑀦𑀲𑀢𑀺𑀓𑀸𑀦𑀺, 𑀢𑀣𑀸 𑀫𑀼𑀔𑀁. 𑀏𑀓𑁂𑀓𑀁 𑀅𑀗𑁆𑀕𑀼𑀮𑀺𑀧𑀩𑁆𑀩𑀁 𑀧𑀜𑁆𑀜𑀸𑀲𑀬𑁄𑀚𑀦𑀁, 𑀢𑀣𑀸 𑀪𑀫𑀼𑀓𑀦𑁆𑀢𑀭𑀁. 𑀦𑀮𑀸𑀝𑀁 𑀢𑀺𑀬𑁄𑀚𑀦𑀲𑀢𑀺𑀓𑀁. 𑀲𑀻𑀲𑀁 𑀦𑀯𑀬𑁄𑀚𑀦𑀲𑀢𑀺𑀓𑀁. 𑀢𑀲𑁆𑀲 𑀫𑀳𑀸𑀲𑀫𑀼𑀤𑁆𑀤𑀁 𑀑𑀢𑀺𑀡𑁆𑀡𑀲𑁆𑀲 𑀕𑀫𑁆𑀪𑀻𑀭𑀁 𑀉𑀤𑀓𑀁 𑀚𑀸𑀡𑀼𑀧𑁆𑀧𑀫𑀸𑀡𑀁 𑀳𑁄𑀢𑀺. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑀁 𑀫𑀳𑀸𑀲𑀫𑀼𑀤𑁆𑀤𑁄 𑀕𑀫𑁆𑀪𑀻𑀭𑁄 𑀕𑀫𑁆𑀪𑀻𑀭𑁄𑀢𑀺 𑀯𑀤𑀦𑁆𑀢𑀺, 𑀓𑀼𑀢𑀲𑁆𑀲 𑀕𑀫𑁆𑀪𑀻𑀭𑀢𑀸, 𑀫𑀬𑀁 𑀚𑀸𑀡𑀼𑀧𑁆𑀧𑀝𑀺𑀘𑁆𑀙𑀸𑀤𑀦𑀫𑀢𑁆𑀢𑀫𑁆𑀧𑀺 𑀉𑀤𑀓𑀁 𑀦 𑀮𑀪𑀸𑀫𑀸’’𑀢𑀺. 𑀢𑀢𑁆𑀣 𑀓𑀸𑀬𑀼𑀧𑀧𑀦𑁆𑀦𑀲𑁆𑀲 𑀭𑀸𑀳𑀼𑀦𑁄 𑀫𑀳𑀸𑀲𑀫𑀼𑀤𑁆𑀤𑁄 𑀉𑀢𑁆𑀢𑀸𑀦𑁄𑀢𑀺, 𑀅𑀜𑁆𑀜𑁂𑀲𑀁 𑀉𑀢𑁆𑀢𑀸𑀦𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄, 𑀏𑀯𑀫𑁂𑀯 𑀜𑀸𑀡𑀼𑀧𑀧𑀦𑁆𑀦𑀲𑁆𑀲 𑀣𑁂𑀭𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀉𑀢𑁆𑀢𑀸𑀦𑁄𑀢𑀺, 𑀅𑀜𑁆𑀜𑁂𑀲𑀫𑁆𑀧𑀺 𑀉𑀢𑁆𑀢𑀸𑀦𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀏𑀢𑀫𑀢𑁆𑀣𑀁 𑀲𑀦𑁆𑀥𑀸𑀬 𑀪𑀕𑀯𑀸 𑁋 ‘‘𑀫𑀸 𑀳𑁂𑀯𑀁, 𑀆𑀦𑀦𑁆𑀤, 𑀅𑀯𑀘; 𑀫𑀸 𑀳𑁂𑀯𑀁, 𑀆𑀦𑀦𑁆𑀤 𑀅𑀯𑀘𑀸’’𑀢𑀺 𑀆𑀳.

𑀣𑁂𑀭𑀲𑁆𑀲 𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀕𑀫𑁆𑀪𑀻𑀭𑁄𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀉𑀢𑁆𑀢𑀸𑀦𑁄𑀢𑀺 𑀉𑀧𑀝𑁆𑀞𑀸𑀢𑀺. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀧𑀼𑀩𑁆𑀩𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸, 𑀢𑀺𑀢𑁆𑀣𑀯𑀸𑀲𑁂𑀦, 𑀲𑁄𑀢𑀸𑀧𑀦𑁆𑀦𑀢𑀸𑀬, 𑀩𑀳𑀼𑀲𑁆𑀲𑀼𑀢𑀪𑀸𑀯𑁂𑀦𑀸𑀢𑀺.

𑀧𑀼𑀩𑁆𑀩𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀓𑀣𑀸

𑀇𑀢𑁄 𑀓𑀺𑀭 𑀲𑀢𑀲𑀳𑀲𑁆𑀲𑀺𑀫𑁂 𑀓𑀧𑁆𑀧𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀲𑀢𑁆𑀣𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺. 𑀢𑀲𑁆𑀲 𑀳𑀁𑀲𑀯𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀆𑀦𑀦𑁆𑀤𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸 ¶ , 𑀲𑀼𑀫𑁂𑀥𑀸 𑀦𑀸𑀫 𑀤𑁂𑀯𑀻 𑀫𑀸𑀢𑀸, 𑀩𑁄𑀥𑀺𑀲𑀢𑁆𑀢𑁄 𑀉𑀢𑁆𑀢𑀭𑀓𑀼𑀫𑀸𑀭𑁄 𑀦𑀸𑀫 𑀅𑀳𑁄𑀲𑀺. 𑀲𑁄 𑀧𑀼𑀢𑁆𑀢𑀲𑁆𑀲 𑀚𑀸𑀢𑀤𑀺𑀯𑀲𑁂 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑁆𑀯𑀸 𑀧𑀥𑀸𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑁋 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭’’𑀦𑁆𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀣𑀯𑀺𑀬𑀁 𑀞𑀧𑁂𑀲𑁆𑀲𑀸𑀫𑀻𑀢𑀺 𑀧𑀸𑀤𑀁 𑀅𑀪𑀺𑀦𑀻𑀳𑀭𑀺. 𑀅𑀣 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀳𑀦𑁆𑀢𑀁 𑀧𑀤𑀼𑀫𑀁 𑀉𑀝𑁆𑀞𑀸𑀲𑀺. 𑀢𑀲𑁆𑀲 𑀥𑀼𑀭𑀧𑀢𑁆𑀢𑀸𑀦𑀺 𑀦𑀯𑀼𑀢𑀺𑀳𑀢𑁆𑀣𑀸𑀦𑀺, 𑀓𑁂𑀲𑀭𑀁 𑀢𑀺𑀁𑀲𑀳𑀢𑁆𑀣𑀁, 𑀓𑀡𑁆𑀡𑀺𑀓𑀸 𑀤𑁆𑀯𑀸𑀤𑀲𑀳𑀢𑁆𑀣𑀸, 𑀦𑀯𑀖𑀝𑀧𑁆𑀧𑀫𑀸𑀡𑁄 𑀭𑁂𑀡𑀼 𑀅𑀳𑁄𑀲𑀺.

𑀲𑀢𑁆𑀣𑀸 𑀧𑀦 𑀉𑀩𑁆𑀩𑁂𑀥𑀢𑁄 𑀅𑀝𑁆𑀞𑀧𑀡𑁆𑀡𑀸𑀲𑀳𑀢𑁆𑀣𑀼𑀩𑁆𑀩𑁂𑀥𑁄 𑀅𑀳𑁄𑀲𑀺. 𑀢𑀲𑁆𑀲 𑀉𑀪𑀺𑀦𑁆𑀦𑀁 𑀩𑀸𑀳𑀸𑀦𑀫𑀦𑁆𑀢𑀭𑀁 𑀅𑀝𑁆𑀞𑀸𑀭𑀲𑀳𑀢𑁆𑀣𑀁, 𑀦𑀮𑀸𑀝𑀁 𑀧𑀜𑁆𑀘𑀳𑀢𑁆𑀣𑀁, 𑀳𑀢𑁆𑀣𑀧𑀸𑀤𑀸 𑀏𑀓𑀸𑀤𑀲𑀳𑀢𑁆𑀣𑀸. 𑀢𑀲𑁆𑀲 𑀏𑀓𑀸𑀤𑀲𑀳𑀢𑁆𑀣𑁂𑀦 𑀧𑀸𑀤𑁂𑀦 𑀤𑁆𑀯𑀸𑀤𑀲𑀳𑀢𑁆𑀣𑀸𑀬 𑀓𑀡𑁆𑀡𑀺𑀓𑀸𑀬 𑀅𑀓𑁆𑀓𑀦𑁆𑀢𑀫𑀢𑁆𑀢𑀸𑀬 𑀦𑀯𑀖𑀝𑀧𑁆𑀧𑀫𑀸𑀡𑁄 𑀭𑁂𑀡𑀼 𑀉𑀝𑁆𑀞𑀸𑀬 𑀅𑀝𑁆𑀞𑀧𑀡𑁆𑀡𑀸𑀲𑀳𑀢𑁆𑀣𑀁 𑀧𑀤𑁂𑀲𑀁 𑀉𑀕𑁆𑀕𑀦𑁆𑀢𑁆𑀯𑀸 𑀑𑀓𑀺𑀡𑁆𑀡𑀫𑀦𑁄𑀲𑀺𑀮𑀸𑀘𑀼𑀡𑁆𑀡𑀁 𑀯𑀺𑀬 𑀧𑀘𑁆𑀘𑁄𑀓𑀺𑀡𑁆𑀡𑁄. 𑀢𑀤𑀼𑀧𑀸𑀤𑀸𑀬 𑀪𑀕𑀯𑀸 𑀧𑀤𑀼𑀫𑀼𑀢𑁆𑀢𑀭𑁄𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀢𑀲𑁆𑀲 𑀤𑁂𑀯𑀺𑀮𑁄 ¶ 𑀘 𑀲𑀼𑀚𑀸𑀢𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀅𑀳𑁂𑀲𑀼𑀁. 𑀅𑀫𑀺𑀢𑀸 𑀘 𑀅𑀲𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸. 𑀲𑀼𑀫𑀦𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄. 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀧𑀺𑀢𑀼𑀲𑀗𑁆𑀕𑀳𑀁 𑀓𑀼𑀭𑀼𑀫𑀸𑀦𑁄 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀳𑀁𑀲𑀯𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀯𑀲𑀢𑀺.

𑀓𑀦𑀺𑀝𑁆𑀞𑀪𑀸𑀢𑀸 ¶ 𑀧𑀦𑀲𑁆𑀲 𑀲𑀼𑀫𑀦𑀓𑀼𑀫𑀸𑀭𑁄 𑀦𑀸𑀫. 𑀢𑀲𑁆𑀲 𑀭𑀸𑀚𑀸 𑀳𑀁𑀲𑀯𑀢𑀺𑀢𑁄 𑀯𑀻𑀲𑀢𑀺𑀬𑁄𑀚𑀦𑀲𑀢𑁂 𑀞𑀸𑀦𑁂 𑀪𑁄𑀕𑀕𑀸𑀫𑀁 𑀅𑀤𑀸𑀲𑀺. 𑀲𑁄 𑀓𑀤𑀸𑀘𑀺 𑀆𑀕𑀦𑁆𑀢𑁆𑀯𑀸 𑀧𑀺𑀢𑀭𑀜𑁆𑀘 𑀲𑀢𑁆𑀣𑀸𑀭𑀜𑁆𑀘 𑀧𑀲𑁆𑀲𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀧𑀘𑁆𑀘𑀦𑁆𑀢𑁄 𑀓𑀼𑀧𑀺𑀢𑁄. 𑀲𑀼𑀫𑀦𑁄 𑀭𑀜𑁆𑀜𑁄 𑀧𑁂𑀲𑁂𑀲𑀺 𑁋 ‘‘𑀧𑀘𑁆𑀘𑀦𑁆𑀢𑁄 𑀓𑀼𑀧𑀺𑀢𑁄’’𑀢𑀺. 𑀭𑀸𑀚𑀸 ‘‘𑀫𑀬𑀸 𑀢𑁆𑀯𑀁 𑀢𑀢𑁆𑀣 𑀓𑀲𑁆𑀫𑀸 𑀞𑀧𑀺𑀢𑁄’’𑀢𑀺 𑀧𑀝𑀺𑀧𑁂𑀲𑁂𑀲𑀺. 𑀲𑁄 𑀦𑀺𑀓𑁆𑀔𑀫𑁆𑀫 𑀘𑁄𑀭𑁂 𑀯𑀽𑀧𑀲𑀫𑁂𑀢𑁆𑀯𑀸 𑁋 ‘‘𑀉𑀧𑀲𑀦𑁆𑀢𑁄, 𑀤𑁂𑀯, 𑀚𑀦𑀧𑀤𑁄’’𑀢𑀺 𑀭𑀜𑁆𑀜𑁄 𑀧𑁂𑀲𑁂𑀲𑀺. 𑀭𑀸𑀚𑀸 𑀢𑀼𑀝𑁆𑀞𑁄 𑁋 ‘‘𑀲𑀻𑀖𑀁 𑀫𑀫 𑀧𑀼𑀢𑁆𑀢𑁄 𑀆𑀕𑀘𑁆𑀙𑀢𑀽’’𑀢𑀺 𑀆𑀳. 𑀢𑀲𑁆𑀲 𑀲𑀳𑀲𑁆𑀲𑀫𑀢𑁆𑀢𑀸 𑀅𑀫𑀘𑁆𑀘𑀸 𑀳𑁄𑀦𑁆𑀢𑀺. 𑀲𑁄 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀧𑀺𑀢𑀸 𑀢𑀼𑀝𑁆𑀞𑁄, 𑀲𑀘𑁂 𑀫𑁂 𑀯𑀭𑀁 𑀤𑁂𑀢𑀺, 𑀓𑀺𑀁 𑀕𑀡𑁆𑀳𑀸𑀫𑀻’’𑀢𑀺. 𑀅𑀣 𑀦𑀁 𑀏𑀓𑀘𑁆𑀘𑁂 ‘‘𑀳𑀢𑁆𑀣𑀺𑀁 𑀕𑀡𑁆𑀳𑀣, 𑀅𑀲𑁆𑀲𑀁 𑀕𑀡𑁆𑀳𑀣, 𑀭𑀣𑀁 𑀕𑀡𑁆𑀳𑀣, 𑀚𑀦𑀧𑀤𑀁 𑀕𑀡𑁆𑀳𑀣, 𑀲𑀢𑁆𑀢𑀭𑀢𑀦𑀸𑀦𑀺 𑀕𑀡𑁆𑀳𑀣𑀸’’𑀢𑀺 𑀆𑀳𑀁𑀲𑀼. 𑀅𑀧𑀭𑁂 𑁋 ‘‘𑀢𑀼𑀫𑁆𑀳𑁂 𑀧𑀣𑀯𑀺𑀲𑁆𑀲𑀭𑀲𑁆𑀲 𑀧𑀼𑀢𑁆𑀢𑀸, 𑀢𑀼𑀫𑁆𑀳𑀸𑀓𑀁 𑀥𑀦𑀁 𑀦 𑀤𑀼𑀮𑁆𑀮𑀪𑀁, 𑀮𑀤𑁆𑀥𑀫𑁆𑀧𑀺 𑀘𑁂𑀢𑀁 𑀲𑀩𑁆𑀩𑀁 𑀧𑀳𑀸𑀬 𑀕𑀫𑀦𑀻𑀬𑀁, 𑀧𑀼𑀜𑁆𑀜𑀫𑁂𑀯 𑀏𑀓𑀁 𑀆𑀤𑀸𑀬 𑀕𑀫𑀦𑀻𑀬𑀁; 𑀢𑀲𑁆𑀫𑀸 𑀢𑁂 𑀤𑁂𑀯𑁂 𑀯𑀭𑀁 𑀤𑀤𑀫𑀸𑀦𑁂 𑀢𑁂𑀫𑀸𑀲𑀁 𑀧𑀤𑀼𑀫𑀼𑀢𑁆𑀢𑀭𑀁 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀸𑀢𑀼𑀁 𑀯𑀭𑀁 𑀕𑀡𑁆𑀳𑀣𑀸’’𑀢𑀺. 𑀲𑁄 𑁋 ‘‘𑀢𑀼𑀫𑁆𑀳𑁂 𑀫𑀬𑁆𑀳𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀸, 𑀦 𑀫𑀫𑁂𑀢𑀁 𑀘𑀺𑀢𑁆𑀢𑀁 𑀅𑀢𑁆𑀣𑀺, 𑀢𑀼𑀫𑁆𑀳𑁂𑀳𑀺 𑀧𑀦 𑀉𑀧𑁆𑀧𑀸𑀤𑀺𑀢𑀁, 𑀏𑀯𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 ¶ 𑀧𑀺𑀢𑀭𑀸𑀧𑀺 𑀆𑀮𑀺𑀗𑁆𑀕𑁂𑀢𑁆𑀯𑀸 𑀢𑀲𑁆𑀲 𑀫𑀢𑁆𑀣𑀓𑁂 𑀘𑀼𑀫𑁆𑀩𑀺𑀢𑁆𑀯𑀸 𑁋 ‘‘𑀯𑀭𑀁 𑀢𑁂 𑀧𑀼𑀢𑁆𑀢, 𑀤𑁂𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼 𑀫𑀳𑀸𑀭𑀸𑀚, 𑀇𑀘𑁆𑀙𑀸𑀫𑀳𑀁 𑀫𑀳𑀸𑀭𑀸𑀚 𑀪𑀕𑀯𑀦𑁆𑀢𑀁 𑀢𑁂𑀫𑀸𑀲𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀦𑁆𑀢𑁄 𑀚𑀻𑀯𑀺𑀢𑀁 𑀅𑀯𑀜𑁆𑀛𑀁 𑀓𑀸𑀢𑀼𑀁, 𑀇𑀫𑀫𑁂𑀯 𑀯𑀭𑀁 𑀤𑁂𑀳𑀻’’𑀢𑀺 𑀆𑀳. ‘‘𑀦 𑀲𑀓𑁆𑀓𑀸 𑀢𑀸𑀢, 𑀅𑀜𑁆𑀜𑀁 𑀯𑀭𑁂𑀳𑀻’’𑀢𑀺 𑀯𑀼𑀢𑁆𑀢𑁂 ‘‘𑀤𑁂𑀯, 𑀔𑀢𑁆𑀢𑀺𑀬𑀸𑀦𑀁 𑀦𑀸𑀫 𑀤𑁆𑀯𑁂 𑀓𑀣𑀸 𑀦𑀢𑁆𑀣𑀺, 𑀏𑀢𑀫𑁂𑀯 𑀤𑁂𑀳𑀺, 𑀦 𑀫𑁂 𑀅𑀜𑁆𑀜𑁂𑀦𑀢𑁆𑀣𑁄’’𑀢𑀺. 𑀢𑀸𑀢 𑀩𑀼𑀤𑁆𑀥𑀸𑀦𑀁 𑀦𑀸𑀫 𑀘𑀺𑀢𑁆𑀢𑀁 𑀤𑀼𑀚𑁆𑀚𑀸𑀦𑀁, 𑀲𑀘𑁂 𑀪𑀕𑀯𑀸 𑀦 𑀇𑀘𑁆𑀙𑀺𑀲𑁆𑀲𑀢𑀺, 𑀫𑀬𑀸 𑀤𑀺𑀦𑁆𑀦𑁂𑀧𑀺 𑀓𑀺𑀁 𑀪𑀯𑀺𑀲𑁆𑀲𑀢𑀻𑀢𑀺? 𑀲𑁄 𑁋 ‘‘𑀲𑀸𑀥𑀼, 𑀤𑁂𑀯, 𑀅𑀳𑀁 𑀪𑀕𑀯𑀢𑁄 𑀘𑀺𑀢𑁆𑀢𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀳𑀸𑀭𑀁 𑀕𑀢𑁄.

𑀢𑁂𑀦 𑀘 𑀲𑀫𑀬𑁂𑀦 𑀪𑀢𑁆𑀢𑀓𑀺𑀘𑁆𑀘𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀝𑁆𑀞𑁄 𑀳𑁄𑀢𑀺. 𑀲𑁄 𑀫𑀡𑁆𑀟𑀮𑀫𑀸𑀴𑁂 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑁂 𑀢𑀁 𑀆𑀳𑀁𑀲𑀼 𑁋 ‘‘𑀭𑀸𑀚𑀧𑀼𑀢𑁆𑀢, 𑀓𑀲𑁆𑀫𑀸 𑀆𑀕𑀢𑁄𑀲𑀻’’𑀢𑀺? 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬, 𑀤𑀲𑁆𑀲𑁂𑀣 𑀫𑁂 𑀪𑀕𑀯𑀦𑁆𑀢𑀦𑁆𑀢𑀺. 𑀦 ¶ 𑀫𑀬𑀁, 𑀭𑀸𑀚𑀧𑀼𑀢𑁆𑀢, 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀁 𑀮𑀪𑀸𑀫𑀸𑀢𑀺. 𑀓𑁄 𑀧𑀦, 𑀪𑀦𑁆𑀢𑁂, 𑀮𑀪𑀢𑀻𑀢𑀺? 𑀲𑀼𑀫𑀦𑀢𑁆𑀣𑁂𑀭𑁄 𑀦𑀸𑀫 𑀭𑀸𑀚𑀧𑀼𑀢𑁆𑀢𑀸𑀢𑀺. ‘‘𑀲𑁄 𑀓𑀼𑀳𑀺𑀁, 𑀪𑀦𑁆𑀢𑁂, 𑀣𑁂𑀭𑁄’’𑀢𑀺. 𑀣𑁂𑀭𑀲𑁆𑀲 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑁋 ‘‘𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀧𑀲𑁆𑀲𑀺𑀢𑀼𑀁, 𑀤𑀲𑁆𑀲𑁂𑀣 𑀫𑁂’’𑀢𑀺 𑀆𑀳. 𑀣𑁂𑀭𑁄 𑁋 ‘‘𑀏𑀳𑀺 𑀭𑀸𑀚𑀧𑀼𑀢𑁆𑀢𑀸’’𑀢𑀺 𑀢𑀁 𑀕𑀳𑁂𑀢𑁆𑀯𑀸 𑀢𑀁 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀞𑀧𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀅𑀪𑀺𑀭𑀼𑀳𑀺. 𑀅𑀣 𑀦𑀁 𑀪𑀕𑀯𑀸 𑁋 ‘‘𑀲𑀼𑀫𑀦, 𑀓𑀲𑁆𑀫𑀸 𑀆𑀕𑀢𑁄𑀲𑀻’’𑀢𑀺 𑀆𑀳. 𑀭𑀸𑀚𑀧𑀼𑀢𑁆𑀢𑁄, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀆𑀕𑀢𑁄𑀢𑀺. 𑀢𑁂𑀦 𑀳𑀺 𑀪𑀺𑀓𑁆𑀔𑀼 𑀆𑀲𑀦𑀁 𑀧𑀜𑁆𑀜𑀸𑀧𑁂𑀳𑀻𑀢𑀺. 𑀣𑁂𑀭𑁄 𑀆𑀲𑀦𑀁 𑀧𑀜𑁆𑀜𑀸𑀧𑁂𑀲𑀺, 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀭𑀸𑀚𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀅𑀓𑀸𑀲𑀺. 𑀓𑀤𑀸 𑀆𑀕𑀢𑁄𑀲𑀺 𑀭𑀸𑀚𑀧𑀼𑀢𑁆𑀢𑀸𑀢𑀺? 𑀪𑀦𑁆𑀢𑁂, 𑀢𑀼𑀫𑁆𑀳𑁂𑀲𑀼 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀝𑁆𑀞𑁂𑀲𑀼. 𑀪𑀺𑀓𑁆𑀔𑀽 𑀧𑀦 𑁋 ‘‘𑀦 𑀫𑀬𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀪𑀕𑀯𑀦𑁆𑀢𑀁 𑀤𑀝𑁆𑀞𑀼𑀁 𑀮𑀪𑀸𑀫𑀸’’𑀢𑀺 𑀫𑀁 ¶ 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀧𑀸𑀳𑁂𑀲𑀼𑀁. 𑀣𑁂𑀭𑁄 𑀧𑀦 𑀏𑀓𑀯𑀘𑀦𑁂𑀦𑁂𑀯 𑀤𑀲𑁆𑀲𑁂𑀲𑀺. 𑀣𑁂𑀭𑁄, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀲𑀸𑀲𑀦𑁂 𑀯𑀮𑁆𑀮𑀪𑁄 𑀫𑀜𑁆𑀜𑁂𑀢𑀺. 𑀆𑀫 𑀭𑀸𑀚𑀓𑀼𑀫𑀸𑀭, 𑀯𑀮𑁆𑀮𑀪𑁄 𑀏𑀲 𑀪𑀺𑀓𑁆𑀔𑀼 𑀫𑀬𑁆𑀳𑀁 𑀲𑀸𑀲𑀦𑁂𑀢𑀺. 𑀪𑀦𑁆𑀢𑁂, 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑁂 𑀓𑀺𑀁 𑀓𑀢𑁆𑀯𑀸 𑀯𑀮𑁆𑀮𑀪𑁄 𑀳𑁄𑀢𑀻𑀢𑀺? 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸 𑀓𑀼𑀫𑀸𑀭𑀸𑀢𑀺. 𑀪𑀕𑀯𑀸, 𑀅𑀳𑀁 𑀣𑁂𑀭𑁄 𑀯𑀺𑀬 𑀩𑀼𑀤𑁆𑀥𑀲𑀸𑀲𑀦𑁂 𑀯𑀮𑁆𑀮𑀪𑁄 𑀳𑁄𑀢𑀼𑀓𑀸𑀫𑁄, 𑀢𑁂𑀫𑀸𑀲𑀁 𑀫𑁂 𑀯𑀲𑁆𑀲𑀸𑀯𑀸𑀲𑀁 𑀅𑀥𑀺𑀯𑀸𑀲𑁂𑀣𑀸𑀢𑀺. 𑀪𑀕𑀯𑀸 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀢𑀢𑁆𑀣 𑀕𑀢𑁂𑀦 𑀅𑀢𑁆𑀣𑁄’’𑀢𑀺 𑀑𑀮𑁄𑀓𑁂𑀢𑁆𑀯𑀸 𑀅𑀢𑁆𑀣𑀻𑀢𑀺 𑀤𑀺𑀲𑁆𑀯𑀸 ‘‘𑀲𑀼𑀜𑁆𑀜𑀸𑀕𑀸𑀭𑁂, 𑀔𑁄 𑀭𑀸𑀚𑀓𑀼𑀫𑀸𑀭 𑀢𑀣𑀸𑀕𑀢𑀸 𑀅𑀪𑀺𑀭𑀫𑀦𑁆𑀢𑀻’’𑀢𑀺 ¶ 𑀆𑀳. 𑀓𑀼𑀫𑀸𑀭𑁄 ‘‘𑀅𑀜𑁆𑀜𑀸𑀢𑀁 𑀪𑀕𑀯𑀸, 𑀅𑀜𑁆𑀜𑀸𑀢𑀁 𑀲𑀼𑀕𑀢𑀸’’𑀢𑀺 𑀯𑀢𑁆𑀯𑀸 ‘‘𑀅𑀳𑀁, 𑀪𑀦𑁆𑀢𑁂, 𑀧𑀼𑀭𑀺𑀫𑀢𑀭𑀁 𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑀁 𑀓𑀸𑀭𑁂𑀫𑀺, 𑀫𑀬𑀸 𑀧𑁂𑀲𑀺𑀢𑁂 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀆𑀕𑀘𑁆𑀙𑀣𑀸’’𑀢𑀺 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀧𑀺𑀢𑀼𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀤𑀺𑀦𑁆𑀦𑀸 𑀫𑁂, 𑀤𑁂𑀯, 𑀪𑀕𑀯𑀢𑀸 𑀧𑀝𑀺𑀜𑁆𑀜𑀸, 𑀫𑀬𑀸 𑀧𑀳𑀺𑀢𑁂 𑀪𑀕𑀯𑀦𑁆𑀢𑀁 𑀧𑁂𑀲𑁂𑀬𑁆𑀬𑀸𑀣𑀸’’𑀢𑀺 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑁄𑀚𑀦𑁂 𑀬𑁄𑀚𑀦𑁂 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀯𑀻𑀲𑀬𑁄𑀚𑀦𑀲𑀢𑀁 𑀅𑀤𑁆𑀥𑀸𑀦𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀦𑀕𑀭𑁂 𑀯𑀺𑀳𑀸𑀭𑀝𑁆𑀞𑀸𑀦𑀁 𑀯𑀺𑀘𑀺𑀦𑀦𑁆𑀢𑁄 𑀲𑁄𑀪𑀦𑀁 𑀦𑀸𑀫 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀉𑀬𑁆𑀬𑀸𑀦𑀁 𑀤𑀺𑀲𑁆𑀯𑀸 𑀲𑀢𑀲𑀳𑀲𑁆𑀲𑁂𑀦 𑀓𑀺𑀡𑀺𑀢𑁆𑀯𑀸 𑀲𑀢𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀺𑀳𑀸𑀭𑀁 𑀓𑀸𑀭𑁂𑀲𑀺. 𑀢𑀢𑁆𑀣 𑀪𑀕𑀯𑀢𑁄 𑀕𑀦𑁆𑀥𑀓𑀼𑀝𑀺𑀁 𑀲𑁂𑀲𑀪𑀺𑀓𑁆𑀔𑀽𑀦𑀜𑁆𑀘 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀢𑁆𑀣𑀸𑀬 𑀓𑀼𑀝𑀺𑀮𑁂𑀡𑀫𑀡𑁆𑀟𑀧𑁂 𑀓𑀸𑀭𑀸𑀧𑁂𑀢𑁆𑀯𑀸 ¶ 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑁂 𑀓𑀢𑁆𑀯𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑀜𑁆𑀘 𑀦𑀺𑀝𑁆𑀞𑀧𑁂𑀢𑁆𑀯𑀸 𑀧𑀺𑀢𑀼𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺 𑁋 ‘‘𑀦𑀺𑀝𑁆𑀞𑀺𑀢𑀁 𑀫𑀬𑁆𑀳𑀁 𑀓𑀺𑀘𑁆𑀘𑀁, 𑀲𑀢𑁆𑀣𑀸𑀭𑀁 𑀧𑀳𑀺𑀡𑀣𑀸’’𑀢𑀺.

𑀭𑀸𑀚𑀸 𑀪𑀕𑀯𑀦𑁆𑀢𑀁 𑀪𑁄𑀚𑁂𑀢𑁆𑀯𑀸 𑁋 ‘‘𑀪𑀕𑀯𑀸, 𑀲𑀼𑀫𑀦𑀲𑁆𑀲 𑀓𑀺𑀘𑁆𑀘𑀁 𑀦𑀺𑀝𑁆𑀞𑀺𑀢𑀁, 𑀢𑀼𑀫𑁆𑀳𑀸𑀓𑀁 𑀕𑀫𑀦𑀁 𑀧𑀘𑁆𑀘𑀸𑀲𑀻𑀲𑀢𑀻’’𑀢𑀺 𑀆𑀳. 𑀪𑀕𑀯𑀸 𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 𑀬𑁄𑀚𑀦𑁂 𑀬𑁄𑀚𑀦𑁂 𑀯𑀺𑀳𑀸𑀭𑁂𑀲𑀼 𑀯𑀲𑀫𑀸𑀦𑁄 𑀅𑀕𑀫𑀸𑀲𑀺. 𑀓𑀼𑀫𑀸𑀭𑁄 ‘‘𑀲𑀢𑁆𑀣𑀸 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀬𑁄𑀚𑀦𑀁 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀫𑀸𑀮𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑁄 𑀯𑀺𑀳𑀸𑀭𑀁 𑀧𑀯𑁂𑀲𑁂𑀢𑁆𑀯𑀸 𑁋

‘‘𑀲𑀢𑀲𑀳𑀲𑁆𑀲𑁂𑀦 𑀫𑁂 𑀓𑀻𑀢𑀁, 𑀲𑀢𑀲𑀳𑀲𑁆𑀲𑁂𑀦 𑀫𑀸𑀧𑀺𑀢𑀁;

𑀲𑁄𑀪𑀦𑀁 𑀦𑀸𑀫 𑀉𑀬𑁆𑀬𑀸𑀦𑀁, 𑀧𑀝𑀺𑀕𑁆𑀕𑀡𑁆𑀳 𑀫𑀳𑀸𑀫𑀼𑀦𑀻’’𑀢𑀺.

𑀯𑀺𑀳𑀸𑀭𑀁 𑀦𑀺𑀬𑁆𑀬𑀸𑀢𑁂𑀲𑀺. 𑀲𑁄 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀤𑀸𑀦𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀤𑀸𑀭𑁂 𑀘 𑀅𑀫𑀘𑁆𑀘𑁂 𑀘 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀳 𑁋 ‘‘𑀅𑀬𑀁 𑀲𑀢𑁆𑀣𑀸 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀤𑀽𑀭𑀢𑁄 𑀆𑀕𑀢𑁄, 𑀩𑀼𑀤𑁆𑀥𑀸 𑀘 𑀦𑀸𑀫 𑀥𑀫𑁆𑀫𑀕𑀭𑀼𑀦𑁄 𑀦 𑀆𑀫𑀺𑀲𑀕𑀭𑀼𑀓𑀸. 𑀢𑀲𑁆𑀫𑀸 𑀅𑀳𑀁 𑀢𑁂𑀫𑀸𑀲𑀁 𑀤𑁆𑀯𑁂 𑀲𑀸𑀝𑀓𑁂 𑀦𑀺𑀯𑀸𑀲𑁂𑀢𑁆𑀯𑀸 𑀤𑀲 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀇𑀥𑁂𑀯 𑀯𑀲𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀔𑀻𑀡𑀸𑀲𑀯𑀲𑀢𑀲𑀳𑀲𑁆𑀲𑀲𑁆𑀲 𑀇𑀫𑀺𑀦𑀸𑀯 𑀦𑀻𑀳𑀸𑀭𑁂𑀦 𑀢𑁂𑀫𑀸𑀲𑀁 𑀤𑀸𑀦𑀁 𑀤𑀤𑁂𑀬𑁆𑀬𑀸𑀣𑀸’’𑀢𑀺.

𑀲𑁄 𑀲𑀼𑀫𑀦𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀲𑀪𑀸𑀕𑁂𑀬𑁂𑀯 𑀞𑀸𑀦𑁂 𑀯𑀲𑀦𑁆𑀢𑁄 𑀬𑀁 𑀣𑁂𑀭𑁄 𑀪𑀕𑀯𑀢𑁄 𑀯𑀢𑁆𑀢𑀁 𑀓𑀭𑁄𑀢𑀺, 𑀢𑀁 ¶ 𑀲𑀩𑁆𑀩𑀁 𑀤𑀺𑀲𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀏𑀓𑀦𑁆𑀢𑀯𑀮𑁆𑀮𑀪𑁄 𑀏𑀲 𑀣𑁂𑀭𑁄, 𑀏𑀢𑀲𑁆𑀲𑁂𑀯 𑀫𑁂 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀓𑀝𑁆𑀞𑀸𑀬 𑀧𑀯𑀸𑀭𑀡𑀸𑀬 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀲𑁆𑀲 𑀧𑀸𑀤𑀫𑀽𑀮𑁂 𑀢𑀺𑀘𑀻𑀯𑀭𑀁 𑀞𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 ¶ 𑀯𑀦𑁆𑀤𑀺𑀢𑁆𑀯𑀸 𑁋 ‘‘𑀪𑀦𑁆𑀢𑁂, 𑀬𑀤𑁂𑀢𑀁 𑀫𑀬𑀸 𑀫𑀕𑁆𑀕𑁂 𑀬𑁄𑀚𑀦𑀦𑁆𑀢𑀭𑀺𑀓𑀁 𑀬𑁄𑀚𑀦𑀦𑁆𑀢𑀭𑀺𑀓𑀁 𑀯𑀺𑀳𑀸𑀭𑀁 𑀓𑀸𑀭𑀸𑀧𑀦𑀢𑁄 𑀧𑀝𑁆𑀞𑀸𑀬 𑀧𑀼𑀜𑁆𑀜𑀁 𑀓𑀢𑀁, 𑀢𑀁 𑀦𑁂𑀯 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀁, 𑀦 𑀫𑀸𑀭𑀲𑀫𑁆𑀧𑀢𑁆𑀢𑀺𑀁, 𑀦 𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀣𑀬𑀦𑁆𑀢𑁂𑀦, 𑀩𑀼𑀤𑁆𑀥𑀲𑁆𑀲 𑀧𑀦 𑀉𑀧𑀝𑁆𑀞𑀸𑀓𑀪𑀸𑀯𑀁 𑀧𑀢𑁆𑀣𑀬𑀦𑁆𑀢𑁂𑀦 𑀓𑀢𑀁. 𑀢𑀲𑁆𑀫𑀸 𑀅𑀳𑀫𑁆𑀧𑀺, 𑀪𑀕𑀯𑀸, 𑀅𑀦𑀸𑀕𑀢𑁂 𑀲𑀼𑀫𑀦𑀢𑁆𑀣𑁂𑀭𑁄 𑀯𑀺𑀬 𑀩𑀼𑀤𑁆𑀥𑀲𑁆𑀲 𑀉𑀧𑀝𑁆𑀞𑀸𑀓𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀦𑀺𑀧𑀢𑀺𑀢𑁆𑀯𑀸 𑀯𑀦𑁆𑀤𑀺.

𑀪𑀕𑀯𑀸 𑁋 ‘‘𑀫𑀳𑀦𑁆𑀢𑀁 𑀓𑀼𑀮𑀧𑀼𑀢𑁆𑀢𑀲𑁆𑀲 𑀘𑀺𑀢𑁆𑀢𑀁, 𑀲𑀫𑀺𑀚𑁆𑀛𑀺𑀲𑁆𑀲𑀢𑀺 𑀦𑀼 𑀔𑁄 𑀦𑁄’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑁋 ‘‘𑀅𑀦𑀸𑀕𑀢𑁂 𑀇𑀢𑁄 𑀲𑀢𑀲𑀳𑀲𑁆𑀲𑀺𑀫𑁂 𑀓𑀧𑁆𑀧𑁂 𑀕𑁄𑀢𑀫𑁄 𑀦𑀸𑀫 ¶ 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲𑁂𑀯 𑀉𑀧𑀝𑁆𑀞𑀸𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑁋

‘‘𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀁 𑀢𑀼𑀬𑁆𑀳𑀁, 𑀲𑀩𑁆𑀩𑀫𑁂𑀯 𑀲𑀫𑀺𑀚𑁆𑀛𑀢𑀼;

𑀲𑀩𑁆𑀩𑁂 𑀧𑀽𑀭𑁂𑀦𑁆𑀢𑀼 𑀲𑀗𑁆𑀓𑀧𑁆𑀧𑀸, 𑀘𑀦𑁆𑀤𑁄 𑀧𑀦𑁆𑀦𑀭𑀲𑁄 𑀬𑀣𑀸’’𑀢𑀺.

𑀆𑀳. 𑀓𑀼𑀫𑀸𑀭𑁄 𑀢𑀁 𑀲𑀼𑀢𑁆𑀯𑀸 𑁋 ‘‘𑀩𑀼𑀤𑁆𑀥𑀸 𑀦𑀸𑀫 𑀅𑀤𑁆𑀯𑁂𑀚𑁆𑀛𑀓𑀣𑀸 𑀳𑁄𑀦𑁆𑀢𑀻’’𑀢𑀺 𑀤𑀼𑀢𑀺𑀬𑀤𑀺𑀯𑀲𑁂𑀬𑁂𑀯 𑀢𑀲𑁆𑀲 𑀪𑀕𑀯𑀢𑁄 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀕𑀘𑁆𑀙𑀦𑁆𑀢𑁄 𑀯𑀺𑀬 𑀅𑀳𑁄𑀲𑀺. 𑀲𑁄 𑀢𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀤𑀸𑀦𑀁 𑀤𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂𑀧𑀺 𑀧𑀺𑀡𑁆𑀟𑀸𑀬 𑀘𑀭𑀢𑁄 𑀣𑁂𑀭𑀲𑁆𑀲 𑀧𑀢𑁆𑀢𑀕𑁆𑀕𑀳𑀡𑀢𑁆𑀣𑀁 𑀉𑀢𑁆𑀢𑀭𑀺𑀲𑀸𑀝𑀓𑀁 𑀤𑀢𑁆𑀯𑀸 𑀧𑀽𑀚𑀫𑀓𑀸𑀲𑀺. 𑀧𑀼𑀦 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀩𑀸𑀭𑀸𑀡𑀲𑀺𑀭𑀸𑀚𑀸 𑀳𑀼𑀢𑁆𑀯𑀸 𑀅𑀝𑁆𑀞𑀦𑁆𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀡𑁆𑀡𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀫𑀡𑀺𑀆𑀥𑀸𑀭𑀓𑁂 𑀉𑀧𑀝𑁆𑀞𑀧𑁂𑀢𑁆𑀯𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀉𑀧𑀝𑁆𑀞𑀸𑀦𑀁 𑀅𑀓𑀸𑀲𑀺. 𑀏𑀢𑀸𑀦𑀺 𑀧𑀸𑀓𑀝𑀝𑁆𑀞𑀸𑀦𑀸𑀦𑀺.

𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀦 𑀤𑀸𑀦𑀁 𑀤𑀤𑀫𑀸𑀦𑁄𑀯 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀅𑀫𑀺𑀢𑁄𑀤𑀦𑀲𑀓𑁆𑀓𑀲𑁆𑀲 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀓𑀢𑀸𑀪𑀺𑀦𑀺𑀓𑁆𑀔𑀫𑀦𑁄 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀞𑀫𑀕𑀫𑀦𑁂𑀦 𑀓𑀧𑀺𑀮𑀯𑀢𑁆𑀣𑀼𑀁 𑀆𑀕𑀦𑁆𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑀦𑁆𑀢𑁂 𑀪𑀕𑀯𑀢𑀺 𑀪𑀕𑀯𑀢𑁄 𑀧𑀭𑀺𑀯𑀸𑀭𑀢𑁆𑀣𑀁 𑀭𑀸𑀚𑀓𑀼𑀫𑀸𑀭𑁂𑀲𑀼 𑀧𑀩𑁆𑀩𑀚𑀺𑀢𑁂𑀲𑀼 𑀪𑀤𑁆𑀤𑀺𑀬𑀸𑀤𑀻𑀳𑀺 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀆𑀬𑀲𑁆𑀫𑀢𑁄 𑀧𑀼𑀡𑁆𑀡𑀲𑁆𑀲 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺 (𑀲𑀁. 𑀦𑀺. 𑁩.𑁮𑁩). 𑀏𑀯𑀫𑁂𑀲 𑀆𑀬𑀲𑁆𑀫𑀸 𑀧𑀼𑀩𑁆𑀩𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀢𑀲𑁆𑀲𑀺𑀫𑀸𑀬 𑀧𑀼𑀩𑁆𑀩𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀕𑀫𑁆𑀪𑀻𑀭𑁄𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀉𑀢𑁆𑀢𑀸𑀦𑀓𑁄 𑀯𑀺𑀬 𑀉𑀧𑀝𑁆𑀞𑀸𑀲𑀺.

𑀢𑀺𑀢𑁆𑀣𑀯𑀸𑀲𑀸𑀤𑀺𑀯𑀡𑁆𑀡𑀦𑀸

𑀢𑀺𑀢𑁆𑀣𑀯𑀸𑀲𑁄𑀢𑀺 ¶ ¶ 𑀧𑀼𑀦𑀧𑁆𑀧𑀼𑀦𑀁 𑀕𑀭𑀽𑀦𑀁 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑀡𑀲𑀯𑀦𑀧𑀭𑀺𑀧𑀼𑀘𑁆𑀙𑀦𑀥𑀸𑀭𑀡𑀸𑀦𑀺 𑀯𑀼𑀘𑁆𑀘𑀦𑁆𑀢𑀺. 𑀲𑁄 𑀣𑁂𑀭𑀲𑁆𑀲 𑀅𑀢𑀺𑀯𑀺𑀬 𑀧𑀭𑀺𑀲𑀼𑀤𑁆𑀥𑁄, 𑀢𑁂𑀦𑀸𑀧𑀺𑀲𑁆𑀲𑀸𑀬𑀁 𑀕𑀫𑁆𑀪𑀻𑀭𑁄𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀉𑀢𑁆𑀢𑀸𑀦𑀓𑁄 𑀯𑀺𑀬 𑀉𑀧𑀝𑁆𑀞𑀸𑀲𑀺.

𑀲𑁄𑀢𑀸𑀧𑀦𑁆𑀦𑀸𑀦𑀜𑁆𑀘 𑀦𑀸𑀫 𑀧𑀘𑁆𑀘𑀬𑀸𑀓𑀸𑀭𑁄 𑀉𑀢𑁆𑀢𑀸𑀦𑀓𑁄𑀯 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀅𑀬𑀜𑁆𑀘 𑀆𑀬𑀲𑁆𑀫𑀸 𑀲𑁄𑀢𑀸𑀧𑀦𑁆𑀦𑁄. 𑀩𑀳𑀼𑀲𑁆𑀲𑀼𑀢𑀸𑀦𑀜𑁆𑀘 𑀘𑀢𑀼𑀳𑀢𑁆𑀣𑁂 𑀑𑀯𑀭𑀓𑁂 𑀧𑀤𑀻𑀧𑁂 𑀚𑀮𑀫𑀸𑀦𑁂 𑀫𑀜𑁆𑀘𑀧𑀻𑀞𑀁 𑀯𑀺𑀬 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁄 ¶ 𑀧𑀸𑀓𑀝𑁄 𑀳𑁄𑀢𑀺, 𑀅𑀬𑀜𑁆𑀘 𑀆𑀬𑀲𑁆𑀫𑀸 𑀩𑀳𑀼𑀲𑁆𑀲𑀼𑀢𑀸𑀦𑀁 𑀅𑀕𑁆𑀕𑁄 𑀳𑁄𑀢𑀺, 𑀩𑀸𑀳𑀼𑀲𑀘𑁆𑀘𑀸𑀦𑀼𑀪𑀸𑀯𑁂𑀦𑀧𑀺𑀲𑁆𑀲 𑀕𑀫𑁆𑀪𑀻𑀭𑁄𑀧𑀺 𑀧𑀘𑁆𑀘𑀬𑀸𑀓𑀸𑀭𑁄 𑀉𑀢𑁆𑀢𑀸𑀦𑀓𑁄 𑀯𑀺𑀬 𑀉𑀧𑀝𑁆𑀞𑀸𑀲𑀺.

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀕𑀫𑁆𑀪𑀻𑀭𑀢𑀸

𑀢𑀢𑁆𑀣 𑀅𑀢𑁆𑀣𑀕𑀫𑁆𑀪𑀻𑀭𑀢𑀸𑀬, 𑀥𑀫𑁆𑀫𑀕𑀫𑁆𑀪𑀻𑀭𑀢𑀸𑀬, 𑀤𑁂𑀲𑀦𑀸𑀕𑀫𑁆𑀪𑀻𑀭𑀢𑀸𑀬, 𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀢𑀸𑀬𑀸𑀢𑀺 𑀘𑀢𑀽𑀳𑀺 𑀆𑀓𑀸𑀭𑁂𑀳𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀕𑀫𑁆𑀪𑀻𑀭𑁄 𑀦𑀸𑀫.

𑀢𑀢𑁆𑀣 𑀚𑀭𑀸𑀫𑀭𑀡𑀲𑁆𑀲 𑀚𑀸𑀢𑀺𑀧𑀘𑁆𑀘𑀬𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄 𑀕𑀫𑁆𑀪𑀻𑀭𑁄…𑀧𑁂… 𑀲𑀗𑁆𑀔𑀸𑀭𑀸𑀦𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄 𑀕𑀫𑁆𑀪𑀻𑀭𑁄𑀢𑀺 𑀅𑀬𑀁 𑀅𑀢𑁆𑀣𑀕𑀫𑁆𑀪𑀻𑀭𑀢𑀸.

𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀝𑁆𑀞𑁄 𑀕𑀫𑁆𑀪𑀻𑀭𑁄…𑀧𑁂… 𑀚𑀸𑀢𑀺𑀬𑀸 𑀚𑀭𑀸𑀫𑀭𑀡𑀲𑁆𑀲 𑀧𑀘𑁆𑀘𑀬𑀝𑁆𑀞𑁄 𑀕𑀫𑁆𑀪𑀻𑀭𑁄𑀢𑀺 𑀅𑀬𑀁 𑀥𑀫𑁆𑀫𑀕𑀫𑁆𑀪𑀻𑀭𑀢𑀸.

𑀓𑀢𑁆𑀣𑀘𑀺 𑀲𑀼𑀢𑁆𑀢𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀅𑀦𑀼𑀮𑁄𑀫𑀢𑁄 𑀤𑁂𑀲𑀺𑀬𑀢𑀺, 𑀓𑀢𑁆𑀣𑀘𑀺 𑀧𑀝𑀺𑀮𑁄𑀫𑀢𑁄, 𑀓𑀢𑁆𑀣𑀘𑀺 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄, 𑀓𑀢𑁆𑀣𑀘𑀺 𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀅𑀦𑀼𑀮𑁄𑀫𑀢𑁄 𑀯𑀸 𑀧𑀝𑀺𑀮𑁄𑀫𑀢𑁄 𑀯𑀸 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀯𑀸, 𑀓𑀢𑁆𑀣𑀘𑀺 𑀢𑀺𑀲𑀦𑁆𑀥𑀺 𑀘𑀢𑀼𑀲𑀗𑁆𑀔𑁂𑀧𑁄, 𑀓𑀢𑁆𑀣𑀘𑀺 𑀤𑁆𑀯𑀺𑀲𑀦𑁆𑀥𑀺 𑀢𑀺𑀲𑀗𑁆𑀔𑁂𑀧𑁄, 𑀓𑀢𑁆𑀣𑀘𑀺 𑀏𑀓𑀲𑀦𑁆𑀥𑀺 𑀤𑁆𑀯𑀺𑀲𑀗𑁆𑀔𑁂𑀧𑁄𑀢𑀺 𑀅𑀬𑀁 𑀤𑁂𑀲𑀦𑀸𑀕𑀫𑁆𑀪𑀻𑀭𑀢𑀸.

𑀅𑀯𑀺𑀚𑁆𑀚𑀸𑀬 𑀧𑀦 𑀅𑀜𑁆𑀜𑀸𑀡𑀅𑀤𑀲𑁆𑀲𑀦𑀲𑀘𑁆𑀘𑀸𑀧𑀝𑀺𑀯𑁂𑀥𑀝𑁆𑀞𑁄 𑀕𑀫𑁆𑀪𑀻𑀭𑁄, 𑀲𑀗𑁆𑀔𑀸𑀭𑀸𑀦𑀁 𑀅𑀪𑀺𑀲𑀗𑁆𑀔𑀭𑀡𑀸𑀬𑀽𑀳𑀦𑀲𑀭𑀸𑀕𑀯𑀺𑀭𑀸𑀕𑀝𑁆𑀞𑁄, 𑀯𑀺𑀜𑁆𑀜𑀸𑀡𑀲𑁆𑀲 𑀲𑀼𑀜𑁆𑀜𑀢𑀅𑀩𑁆𑀬𑀸𑀧𑀸𑀭𑀅𑀲𑀗𑁆𑀓𑀦𑁆𑀢𑀺𑀧𑀝𑀺𑀲𑀦𑁆𑀥𑀺𑀧𑀸𑀢𑀼𑀪𑀸𑀯𑀝𑁆𑀞𑁄, 𑀦𑀸𑀫𑀭𑀽𑀧𑀲𑁆𑀲 𑀏𑀓𑀼𑀧𑁆𑀧𑀸𑀤𑀯𑀺𑀦𑀺𑀩𑁆𑀪𑁄𑀕𑀸𑀯𑀺𑀦𑀺𑀩𑁆𑀪𑁄𑀕𑀦𑀫𑀦𑀭𑀼𑀧𑁆𑀧𑀦𑀝𑁆𑀞𑁄, 𑀲𑀴𑀸𑀬𑀢𑀦𑀲𑁆𑀲 𑀅𑀥𑀺𑀧𑀢𑀺𑀮𑁄𑀓𑀤𑁆𑀯𑀸𑀭𑀓𑁆𑀔𑁂𑀢𑁆𑀢𑀯𑀺𑀲𑀬𑀺𑀪𑀸𑀯𑀝𑁆𑀞𑁄 ¶ , 𑀨𑀲𑁆𑀲𑀲𑁆𑀲 ¶ 𑀨𑀼𑀲𑀦𑀲𑀗𑁆𑀖𑀝𑁆𑀝𑀦𑀲𑀗𑁆𑀕𑀢𑀺𑀲𑀦𑁆𑀦𑀺𑀧𑀸𑀢𑀝𑁆𑀞𑁄, 𑀯𑁂𑀤𑀦𑀸𑀬 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀲𑀼𑀔𑀤𑀼𑀓𑁆𑀔𑀫𑀚𑁆𑀛𑀢𑁆𑀢𑀪𑀸𑀯𑀦𑀺𑀚𑁆𑀚𑀻𑀯𑀯𑁂𑀤𑀬𑀺𑀢𑀝𑁆𑀞𑁄, 𑀢𑀡𑁆𑀳𑀸𑀬 𑀅𑀪𑀺𑀦𑀦𑁆𑀤𑀺𑀢𑀅𑀚𑁆𑀛𑁄𑀲𑀸𑀦𑀲𑀭𑀺𑀢𑀸𑀮𑀢𑀸𑀢𑀡𑁆𑀳𑀸𑀦𑀤𑀻𑀢𑀡𑁆𑀳𑀸𑀲𑀫𑀼𑀤𑁆𑀤𑀤𑀼𑀧𑁆𑀧𑀽𑀭𑀡𑀝𑁆𑀞𑁄, 𑀉𑀧𑀸𑀤𑀸𑀦𑀲𑁆𑀲 𑀆𑀤𑀸𑀦𑀕𑁆𑀕𑀳𑀡𑀸𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑀤𑀼𑀭𑀢𑀺𑀓𑁆𑀓𑀫𑀝𑁆𑀞𑁄, 𑀪𑀯𑀲𑁆𑀲 𑀆𑀬𑀽𑀳𑀦𑀸𑀪𑀺𑀲𑀗𑁆𑀔𑀭𑀡𑀬𑁄𑀦𑀺𑀕𑀢𑀺𑀞𑀺𑀢𑀺𑀦𑀺𑀯𑀸𑀲𑁂𑀲𑀼 𑀔𑀺𑀧𑀦𑀝𑁆𑀞𑁄, 𑀚𑀸𑀢𑀺𑀬𑀸 𑀚𑀸𑀢𑀺𑀲𑀜𑁆𑀚𑀸𑀢𑀺𑀑𑀓𑁆𑀓𑀦𑁆𑀢𑀺𑀦𑀺𑀩𑁆𑀩𑀢𑁆𑀢𑀺𑀧𑀸𑀢𑀼𑀪𑀸𑀯𑀝𑁆𑀞𑁄, 𑀚𑀭𑀸𑀫𑀭𑀡𑀲𑁆𑀲 𑀔𑀬𑀯𑀬𑀪𑁂𑀤𑀯𑀺𑀧𑀭𑀺𑀡𑀸𑀫𑀝𑁆𑀞𑁄 𑀕𑀫𑁆𑀪𑀻𑀭𑁄𑀢𑀺. 𑀏𑀯𑀁 𑀬𑁄 𑀅𑀯𑀺𑀚𑁆𑀚𑀸𑀤𑀻𑀦𑀁 𑀲𑀪𑀸𑀯𑁄, 𑀬𑁂𑀦 𑀧𑀝𑀺𑀯𑁂𑀥𑁂𑀦 𑀅𑀯𑀺𑀚𑁆𑀚𑀸𑀤𑀬𑁄 𑀲𑀭𑀲𑀮𑀓𑁆𑀔𑀡𑀢𑁄 𑀧𑀝𑀺𑀯𑀺𑀤𑁆𑀥𑀸 𑀳𑁄𑀦𑁆𑀢𑀺; 𑀲𑁄 𑀕𑀫𑁆𑀪𑀻𑀭𑁄𑀢𑀺 𑀅𑀬𑀁 𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀲𑀩𑁆𑀩𑀸𑀧𑀺 𑀣𑁂𑀭𑀲𑁆𑀲 𑀉𑀢𑁆𑀢𑀸𑀦𑀓𑀸 𑀯𑀺𑀬 𑀉𑀧𑀝𑁆𑀞𑀸𑀲𑀺. 𑀢𑁂𑀦 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀉𑀲𑁆𑀲𑀸𑀤𑁂𑀦𑁆𑀢𑁄 𑁋 ‘‘𑀫𑀸 𑀳𑁂𑀯’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀬𑀜𑁆𑀘𑁂𑀢𑁆𑀣 ¶ 𑀅𑀥𑀺𑀧𑁆𑀧𑀸𑀬𑁄 𑁋 𑀆𑀦𑀦𑁆𑀤, 𑀢𑁆𑀯𑀁 𑀫𑀳𑀸𑀧𑀜𑁆𑀜𑁄 𑀯𑀺𑀲𑀤𑀜𑀸𑀡𑁄, 𑀢𑁂𑀦 𑀢𑁂 𑀕𑀫𑁆𑀪𑀻𑀭𑁄𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀉𑀢𑁆𑀢𑀸𑀦𑀓𑁄 𑀯𑀺𑀬 𑀔𑀸𑀬𑀢𑀺, 𑀢𑀲𑁆𑀫𑀸 𑁋 ‘‘𑀫𑀬𑁆𑀳𑀫𑁂𑀯 𑀦𑀼 𑀔𑁄 𑀏𑀲 𑀉𑀢𑁆𑀢𑀸𑀦𑀓𑁄 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀉𑀤𑀸𑀳𑀼 𑀅𑀜𑁆𑀜𑁂𑀲𑀫𑁆𑀧𑀻’’𑀢𑀺 𑀫𑀸 𑀏𑀯𑀁 𑀅𑀯𑀘𑀸𑀢𑀺.

𑀅𑀧𑀲𑀸𑀤𑀦𑀸𑀯𑀡𑁆𑀡𑀦𑀸

𑀬𑀁 𑀧𑀦 𑀯𑀼𑀢𑁆𑀢𑀁 𑁋 ‘‘𑀅𑀧𑀲𑀸𑀤𑁂𑀦𑁆𑀢𑁄’’𑀢𑀺, 𑀢𑀢𑁆𑀣 𑀅𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀆𑀦𑀦𑁆𑀤, ‘‘𑀅𑀣 𑀘 𑀧𑀦 𑀫𑁂 𑀉𑀢𑁆𑀢𑀸𑀦𑀓𑀼𑀢𑁆𑀢𑀸𑀦𑀓𑁄 𑀯𑀺𑀬 𑀔𑀸𑀬𑀢𑀻’’𑀢𑀺 𑀫𑀸 𑀳𑁂𑀯𑀁 𑀅𑀯𑀘. 𑀬𑀤𑀺 𑀳𑀺 𑀢𑁂 𑀏𑀲 𑀉𑀢𑁆𑀢𑀸𑀦𑀓𑀼𑀢𑁆𑀢𑀸𑀦𑀓𑁄 𑀯𑀺𑀬 𑀔𑀸𑀬𑀢𑀺, 𑀓𑀲𑁆𑀫𑀸 𑀢𑁆𑀯𑀁 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀲𑁄𑀢𑀸𑀧𑀦𑁆𑀦𑁄 𑀦𑀸𑀳𑁄𑀲𑀺, 𑀫𑀬𑀸 𑀤𑀺𑀦𑁆𑀦𑀦𑀬𑁂𑀯 𑀞𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀝𑀺𑀯𑀺𑀚𑁆𑀛𑀲𑀺. 𑀆𑀦𑀦𑁆𑀤, 𑀇𑀤𑀁 𑀦𑀺𑀩𑁆𑀩𑀸𑀦𑀫𑁂𑀯 𑀕𑀫𑁆𑀪𑀻𑀭𑀁, 𑀧𑀘𑁆𑀘𑀬𑀸𑀓𑀸𑀭𑁄 𑀧𑀦 𑀢𑀯 𑀉𑀢𑁆𑀢𑀸𑀦𑀓𑁄 𑀚𑀸𑀢𑁄, 𑀅𑀣 𑀓𑀲𑁆𑀫𑀸 𑀑𑀴𑀸𑀭𑀺𑀓𑀁 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁 𑀧𑀝𑀺𑀖𑀲𑀁𑀬𑁄𑀚𑀦𑀁, 𑀑𑀴𑀸𑀭𑀺𑀓𑀁 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀧𑀝𑀺𑀖𑀸𑀦𑀼𑀲𑀬𑀦𑁆𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀓𑀺𑀮𑁂𑀲𑁂 𑀲𑀫𑀼𑀕𑁆𑀖𑀸𑀝𑁂𑀢𑁆𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑀁 𑀦 𑀲𑀘𑁆𑀙𑀺𑀓𑀭𑁄𑀲𑀺? 𑀢𑁂𑀬𑁂𑀯 𑀅𑀡𑀼𑀲𑀳𑀕𑀢𑁂 𑀘𑀢𑁆𑀢𑀸𑀭𑁄 𑀓𑀺𑀮𑁂𑀲𑁂 𑀲𑀫𑀼𑀕𑁆𑀖𑀸𑀝𑁂𑀢𑁆𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀦 𑀲𑀘𑁆𑀙𑀺𑀓𑀭𑁄𑀲𑀺? 𑀭𑀽𑀧𑀭𑀸𑀕𑀸𑀤𑀻𑀦𑀺 𑀧𑀜𑁆𑀘 𑀲𑀁𑀬𑁄𑀚𑀦𑀸𑀦𑀺, 𑀪𑀯𑀭𑀸𑀕𑀸𑀦𑀼𑀲𑀬𑀁, 𑀫𑀸𑀦𑀸𑀦𑀼𑀲𑀬𑀁, 𑀅𑀯𑀺𑀚𑁆𑀚𑀸𑀦𑀼𑀲𑀬𑀦𑁆𑀢𑀺 𑀇𑀫𑁂 𑀅𑀝𑁆𑀞 𑀓𑀺𑀮𑁂𑀲𑁂 𑀲𑀫𑀼𑀕𑁆𑀖𑀸𑀝𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀦 𑀲𑀘𑁆𑀙𑀺𑀓𑀭𑁄𑀲𑀺?

𑀓𑀲𑁆𑀫𑀸 ¶ 𑀘 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀁 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀧𑀽𑀭𑀺𑀢𑀧𑀸𑀭𑀫𑀺𑀦𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀯𑀺𑀬 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁 𑀦𑀧𑁆𑀧𑀝𑀺𑀯𑀺𑀚𑁆𑀛𑀲𑀺? 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀸𑀦𑀺 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀽𑀭𑀺𑀢𑀧𑀸𑀭𑀫𑀺𑀦𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀯𑀺𑀬 𑀘 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀦𑀧𑁆𑀧𑀝𑀺𑀯𑀺𑀚𑁆𑀛𑀲𑀺? 𑀬𑀤𑀺 𑀯𑀸 𑀢𑁂 𑀲𑀩𑁆𑀩𑀣𑀸𑀯 𑀏𑀲 𑀉𑀢𑁆𑀢𑀸𑀦𑀓𑁄 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀅𑀣 𑀓𑀲𑁆𑀫𑀸 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀝𑁆𑀞 𑀲𑁄𑀴𑀲 𑀯𑀸 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀽𑀭𑀺𑀢𑀧𑀸𑀭𑀫𑀺𑀦𑁄 𑀩𑀼𑀤𑁆𑀥𑀸 𑀯𑀺𑀬 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀦 𑀲𑀘𑁆𑀙𑀺𑀓𑀭𑁄𑀲𑀺? 𑀓𑀺𑀁 𑀅𑀦𑀢𑁆𑀣𑀺𑀓𑁄𑀲𑀺 𑀏𑀢𑁂𑀳𑀺 𑀯𑀺𑀲𑁂𑀲𑀸𑀥𑀺𑀕𑀫𑁂𑀳𑀺, 𑀧𑀲𑁆𑀲 𑀬𑀸𑀯𑀜𑁆𑀘 𑀢𑁂 𑀅𑀧𑀭𑀤𑁆𑀥𑀁, 𑀢𑁆𑀯𑀁 𑀦𑀸𑀫 𑀲𑀸𑀯𑀓𑁄 𑀧𑀤𑁂𑀲𑀜𑀸𑀡𑁂 ¶ 𑀞𑀺𑀢𑁄 𑀅𑀢𑀺𑀕𑀫𑁆𑀪𑀻𑀭𑀁 𑀧𑀘𑁆𑀘𑀬𑀸𑀓𑀸𑀭𑀁 𑁋 ‘‘𑀉𑀢𑁆𑀢𑀸𑀦𑀓𑁄 𑀫𑁂 𑀉𑀧𑀝𑁆𑀞𑀸𑀢𑀻’’𑀢𑀺 𑀯𑀤𑀲𑀺, 𑀢𑀲𑁆𑀲 𑀢𑁂 𑀇𑀤𑀁 𑀯𑀘𑀦𑀁 𑀩𑀼𑀤𑁆𑀥𑀸𑀦𑀁 𑀓𑀣𑀸𑀬 𑀧𑀘𑁆𑀘𑀦𑀻𑀓𑀁 𑀳𑁄𑀢𑀺, 𑀦 𑀢𑀸𑀤𑀺𑀲𑁂𑀦 𑀦𑀸𑀫 𑀪𑀺𑀓𑁆𑀔𑀼𑀦𑀸 𑀩𑀼𑀤𑁆𑀥𑀸𑀦𑀁 𑀓𑀣𑀸𑀬 𑀧𑀘𑁆𑀘𑀦𑀻𑀓𑀁 𑀓𑀣𑁂𑀢𑀩𑁆𑀩𑀦𑁆𑀢𑀺 𑀬𑀼𑀢𑁆𑀢𑀫𑁂𑀢𑀁.

𑀦𑀦𑀼 𑀫𑀬𑁆𑀳𑀁, 𑀆𑀦𑀦𑁆𑀤, 𑀇𑀤𑀁 𑀧𑀘𑁆𑀘𑀬𑀸𑀓𑀸𑀭𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀯𑀸𑀬𑀫𑀦𑁆𑀢𑀲𑁆𑀲𑁂𑀯 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺? 𑀧𑀘𑁆𑀘𑀬𑀸𑀓𑀸𑀭𑀁 𑀧𑀝𑀺𑀯𑀺𑀚𑁆𑀛𑀦𑀢𑁆𑀣𑀸𑀬 𑀘 𑀧𑀦 𑀫𑁂 𑀅𑀤𑀺𑀦𑁆𑀦𑀁 𑀤𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀅𑀧𑀽𑀭𑀺𑀢𑀧𑀸𑀭𑀫𑀻 𑀦𑀸𑀫 𑀦𑀢𑁆𑀣𑀺. 𑀧𑀘𑁆𑀘𑀬𑀸𑀓𑀸𑀭𑀁 ¶ 𑀧𑀝𑀺𑀯𑀺𑀚𑁆𑀛𑀲𑁆𑀲𑀸𑀫𑀻𑀢𑀺 𑀧𑀦 𑀫𑁂 𑀦𑀺𑀭𑀼𑀲𑁆𑀲𑀸𑀳𑀁 𑀯𑀺𑀬 𑀫𑀸𑀭𑀩𑀮𑀁 𑀯𑀺𑀥𑀫𑀦𑁆𑀢𑀲𑁆𑀲 𑀅𑀬𑀁 𑀫𑀳𑀸𑀧𑀣𑀯𑀻 𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀦 𑀓𑀫𑁆𑀧𑀺 𑀢𑀣𑀸 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀁, 𑀫𑀚𑁆𑀛𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲. 𑀧𑀘𑁆𑀙𑀺𑀫𑀬𑀸𑀫𑁂 𑀧𑀦 𑀫𑁂 𑀩𑀮𑀯𑀧𑀘𑁆𑀘𑀽𑀲𑀲𑀫𑀬𑁂 𑁋 ‘‘𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀦𑀯𑀳𑀺 𑀆𑀓𑀸𑀭𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺 𑀤𑀺𑀝𑁆𑀞𑀫𑀢𑁆𑀢𑁂𑀯 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀅𑀬𑀤𑀡𑁆𑀟𑀓𑁂𑀦 𑀆𑀓𑁄𑀝𑀺𑀢𑀓𑀁𑀲𑀢𑀸𑀮𑀁 𑀯𑀺𑀬 𑀯𑀺𑀭𑀯𑀲𑀢𑀁 𑀯𑀺𑀭𑀯𑀲𑀳𑀲𑁆𑀲𑀁 𑀫𑀼𑀜𑁆𑀘𑀫𑀸𑀦𑀸 𑀯𑀸𑀢𑀸𑀳𑀢𑁂 𑀧𑀤𑀼𑀫𑀺𑀦𑀺𑀧𑀡𑁆𑀡𑁂 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀓𑀫𑁆𑀧𑀺𑀢𑁆𑀣. 𑀏𑀯𑀁 𑀕𑀫𑁆𑀪𑀻𑀭𑁄 𑀘𑀸𑀬𑀁, 𑀆𑀦𑀦𑁆𑀤, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄, 𑀕𑀫𑁆𑀪𑀻𑀭𑀸𑀯𑀪𑀸𑀲𑁄 𑀘. 𑀏𑀢𑀲𑁆𑀲 𑀆𑀦𑀦𑁆𑀤, 𑀥𑀫𑁆𑀫𑀲𑁆𑀲 𑀅𑀦𑀦𑀼𑀩𑁄𑀥𑀸…𑀧𑁂… 𑀦𑀸𑀢𑀺𑀯𑀢𑁆𑀢𑀢𑀻𑀢𑀺.

𑀏𑀢𑀲𑁆𑀲 𑀥𑀫𑁆𑀫𑀲𑁆𑀲𑀸𑀢𑀺 𑀏𑀢𑀲𑁆𑀲 𑀧𑀘𑁆𑀘𑀬𑀥𑀫𑁆𑀫𑀲𑁆𑀲. 𑀅𑀦𑀦𑀼𑀩𑁄𑀥𑀸𑀢𑀺 𑀜𑀸𑀢𑀧𑀭𑀺𑀜𑁆𑀜𑀸𑀯𑀲𑁂𑀦 𑀅𑀦𑀦𑀼𑀩𑀼𑀚𑁆𑀛𑀦𑀸. 𑀅𑀧𑁆𑀧𑀝𑀺𑀯𑁂𑀥𑀸𑀢𑀺 𑀢𑀻𑀭𑀡𑀧𑁆𑀧𑀳𑀸𑀦𑀧𑀭𑀺𑀜𑁆𑀜𑀸𑀯𑀲𑁂𑀦 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑀸. 𑀢𑀦𑁆𑀢𑀸𑀓𑀼𑀮𑀓𑀚𑀸𑀢𑀸𑀢𑀺 𑀢𑀦𑁆𑀢𑀁 𑀯𑀺𑀬 𑀆𑀓𑀼𑀮𑀓𑀚𑀸𑀢𑀸. 𑀬𑀣𑀸 𑀦𑀸𑀫 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀁 𑀫𑀽𑀲𑀺𑀓𑀘𑁆𑀙𑀺𑀦𑁆𑀦𑀁 𑀧𑁂𑀲𑀓𑀸𑀭𑀸𑀦𑀁 𑀢𑀦𑁆𑀢𑀁 𑀢𑀳𑀺𑀁 𑀢𑀳𑀺𑀁 𑀆𑀓𑀼𑀮𑀁 𑀳𑁄𑀢𑀺, 𑀇𑀤𑀁 𑀅𑀕𑁆𑀕𑀁 𑀇𑀤𑀁 𑀫𑀽𑀮𑀦𑁆𑀢𑀺 𑀅𑀕𑁆𑀕𑁂𑀦 𑀯𑀸 𑀅𑀕𑁆𑀕𑀁 𑀫𑀽𑀮𑁂𑀦 𑀯𑀸 𑀫𑀽𑀮𑀁 𑀲𑀫𑀸𑀦𑁂𑀢𑀼𑀁 𑀤𑀼𑀓𑁆𑀓𑀭𑀁 𑀳𑁄𑀢𑀺; 𑀏𑀯𑀫𑁂𑀯 𑀲𑀢𑁆𑀢𑀸 𑀇𑀫𑀲𑁆𑀫𑀺𑀁 𑀧𑀘𑁆𑀘𑀬𑀸𑀓𑀸𑀭𑁂 𑀔𑀮𑀺𑀢𑀸 𑀆𑀓𑀼𑀮𑀸 𑀩𑁆𑀬𑀸𑀓𑀼𑀮𑀸 𑀳𑁄𑀦𑁆𑀢𑀺, 𑀦 𑀲𑀓𑁆𑀓𑁄𑀦𑁆𑀢𑀺 𑀢𑀁𑀧𑀘𑁆𑀘𑀬𑀸𑀓𑀸𑀭𑀁 𑀉𑀚𑀼𑀁 𑀓𑀸𑀢𑀼𑀁. 𑀢𑀢𑁆𑀣 𑀢𑀦𑁆𑀢𑀁 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁂 𑀞𑀢𑁆𑀯𑀸 𑀲𑀓𑁆𑀓𑀸𑀧𑀺 𑀪𑀯𑁂𑀬𑁆𑀬 𑀉𑀚𑀼𑀁 𑀓𑀸𑀢𑀼𑀁, 𑀞𑀧𑁂𑀢𑁆𑀯𑀸 𑀧𑀦 ¶ 𑀤𑁆𑀯𑁂 𑀩𑁄𑀥𑀺𑀲𑀢𑁆𑀢𑁂 𑀅𑀜𑁆𑀜𑁂 𑀲𑀢𑁆𑀢𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀧𑀘𑁆𑀘𑀬𑀸𑀓𑀸𑀭𑀁 𑀉𑀚𑀼𑀁 𑀓𑀸𑀢𑀼𑀁 𑀲𑀫𑀢𑁆𑀣𑀸 𑀦𑀸𑀫 𑀦𑀢𑁆𑀣𑀺. 𑀬𑀣𑀸 𑀧𑀦 𑀆𑀓𑀼𑀮𑀁 𑀢𑀦𑁆𑀢𑀁 𑀓𑀜𑁆𑀚𑀺𑀬𑀁 𑀤𑀢𑁆𑀯𑀸 𑀓𑁄𑀘𑁆𑀙𑁂𑀦 𑀧𑀳𑀢𑀁 𑀢𑀢𑁆𑀣 𑀢𑀢𑁆𑀣 𑀕𑀼𑀴𑀓𑀚𑀸𑀢𑀁 𑀳𑁄𑀢𑀺 𑀕𑀡𑁆𑀞𑀺𑀩𑀤𑁆𑀥𑀁, 𑀏𑀯𑀫𑀺𑀫𑁂 𑀲𑀢𑁆𑀢𑀸 𑀧𑀘𑁆𑀘𑀬𑁂𑀲𑀼 𑀧𑀓𑁆𑀔𑀮𑀺𑀢𑁆𑀯𑀸 𑀧𑀘𑁆𑀘𑀬𑁂 𑀉𑀚𑀼𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀯𑀲𑁂𑀦 𑀆𑀓𑀼𑀮𑀓𑀚𑀸𑀢𑀸 𑀳𑁄𑀦𑁆𑀢𑀺, 𑀕𑀡𑁆𑀞𑀺𑀩𑀤𑁆𑀥𑀸. 𑀬𑁂 𑀳𑀺 𑀓𑁂𑀘𑀺 𑀤𑀺𑀝𑁆𑀞𑀺𑀕𑀢𑀦𑀺𑀲𑁆𑀲𑀺𑀢𑀸, 𑀲𑀩𑁆𑀩𑁂 𑀧𑀘𑁆𑀘𑀬𑀸𑀓𑀸𑀭𑀁 𑀉𑀚𑀼𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀬𑁂𑀯.

𑀓𑀼𑀮𑀸𑀕𑀡𑁆𑀞𑀺𑀓𑀚𑀸𑀢𑀸𑀢𑀺 𑀓𑀼𑀮𑀸𑀕𑀡𑁆𑀞𑀺𑀓𑀁 𑀯𑀼𑀘𑁆𑀘𑀢𑀺 𑀧𑁂𑀲𑀓𑀸𑀭𑀓𑀜𑁆𑀚𑀺𑀬𑀲𑀼𑀢𑁆𑀢𑀁. 𑀓𑀼𑀮𑀸 𑀦𑀸𑀫 𑀲𑀓𑀼𑀡𑀺𑀓𑀸, 𑀢𑀲𑁆𑀲𑀸 𑀓𑀼𑀮𑀸𑀯𑀓𑁄𑀢𑀺𑀧𑀺 𑀏𑀓𑁂. 𑀬𑀣𑀸 𑀳𑀺 𑀢𑀤𑀼𑀪𑀬𑀫𑁆𑀧𑀺 𑀆𑀓𑀼𑀮𑀁 𑀅𑀕𑁆𑀕𑁂𑀦 𑀯𑀸 𑀅𑀕𑁆𑀕𑀁 𑀫𑀽𑀮𑁂𑀦 𑀯𑀸 𑀫𑀽𑀮𑀁 𑀲𑀫𑀸𑀦𑁂𑀢𑀼𑀁 𑀤𑀼𑀓𑁆𑀓𑀭𑀦𑁆𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑀫𑀼𑀜𑁆𑀚𑀧𑀩𑁆𑀩𑀚𑀪𑀽𑀢𑀸𑀢𑀺 ¶ ¶ 𑀫𑀼𑀜𑁆𑀚𑀢𑀺𑀡𑀁 𑀯𑀺𑀬 𑀧𑀩𑁆𑀩𑀚𑀢𑀺𑀡𑀁 𑀯𑀺𑀬 𑀘 𑀪𑀽𑀢𑀸. 𑀬𑀣𑀸 𑀢𑀸𑀦𑀺 𑀢𑀺𑀡𑀸𑀦𑀺 𑀓𑁄𑀝𑁆𑀝𑁂𑀢𑁆𑀯𑀸 𑀓𑀢𑀭𑀚𑁆𑀚𑀼 𑀚𑀺𑀡𑁆𑀡𑀓𑀸𑀮𑁂 𑀓𑀢𑁆𑀣𑀘𑀺 𑀧𑀢𑀺𑀢𑀁 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀢𑀺𑀡𑀸𑀦𑀁 𑀇𑀤𑀁 𑀅𑀕𑁆𑀕𑀁, 𑀇𑀤𑀁 𑀫𑀽𑀮𑀦𑁆𑀢𑀺 𑀅𑀕𑁆𑀕𑁂𑀦 𑀯𑀸 𑀅𑀕𑁆𑀕𑀁 𑀫𑀽𑀮𑁂𑀦 𑀯𑀸 𑀫𑀽𑀮𑀁 𑀲𑀫𑀸𑀦𑁂𑀢𑀼𑀁 𑀤𑀼𑀓𑁆𑀓𑀭𑀦𑁆𑀢𑀺. 𑀢𑀫𑁆𑀧𑀺 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁂 𑀞𑀢𑁆𑀯𑀸 𑀲𑀓𑁆𑀓𑀸 𑀪𑀯𑁂𑀬𑁆𑀬 𑀉𑀚𑀼𑀁 𑀓𑀸𑀢𑀼𑀁, 𑀞𑀧𑁂𑀢𑁆𑀯𑀸 𑀧𑀦 𑀤𑁆𑀯𑁂 𑀩𑁄𑀥𑀺𑀲𑀢𑁆𑀢𑁂 𑀅𑀜𑁆𑀜𑁂 𑀲𑀢𑁆𑀢𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀧𑀘𑁆𑀘𑀬𑀸𑀓𑀸𑀭𑀁 𑀉𑀚𑀼𑀁 𑀓𑀸𑀢𑀼𑀁 𑀲𑀫𑀢𑁆𑀣𑀸 𑀦𑀸𑀫 𑀦𑀢𑁆𑀣𑀺. 𑀏𑀯𑀫𑀬𑀁 𑀧𑀚𑀸 𑀧𑀘𑁆𑀘𑀬𑀸𑀓𑀸𑀭𑁂 𑀉𑀚𑀼𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀤𑀺𑀝𑁆𑀞𑀺𑀕𑀢𑀯𑀲𑁂𑀦 𑀕𑀡𑁆𑀞𑀺𑀓𑀚𑀸𑀢𑀸 𑀳𑀼𑀢𑁆𑀯𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀺.

𑀢𑀢𑁆𑀣 𑀅𑀧𑀸𑀬𑁄𑀢𑀺 𑀦𑀺𑀭𑀬𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀧𑁂𑀢𑁆𑀢𑀺𑀯𑀺𑀲𑀬𑀅𑀲𑀼𑀭𑀓𑀸𑀬𑀸. 𑀲𑀩𑁆𑀩𑁂𑀧𑀺 𑀳𑀺 𑀢𑁂 𑀯𑀟𑁆𑀠𑀺𑀲𑀗𑁆𑀔𑀸𑀢𑀲𑁆𑀲 𑀅𑀬𑀲𑁆𑀲 𑀅𑀪𑀸𑀯𑀢𑁄 𑁋 ‘‘𑀅𑀧𑀸𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀣𑀸 𑀤𑀼𑀓𑁆𑀔𑀲𑁆𑀲 𑀕𑀢𑀺𑀪𑀸𑀯𑀢𑁄 𑀤𑀼𑀕𑁆𑀕𑀢𑀺. 𑀲𑀼𑀔𑀲𑀫𑀼𑀲𑁆𑀲𑀬𑀢𑁄 𑀯𑀺𑀦𑀺𑀧𑀢𑀺𑀢𑀢𑁆𑀢𑀸 𑀯𑀺𑀦𑀺𑀧𑀸𑀢𑁄. 𑀇𑀢𑀭𑁄 𑀧𑀦 𑁋

‘‘𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀺, 𑀥𑀸𑀢𑀼𑀆𑀬𑀢𑀦𑀸𑀦 𑀘;

𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀯𑀢𑁆𑀢𑀫𑀸𑀦𑀸, 𑀲𑀁𑀲𑀸𑀭𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺.

𑀢𑀁 𑀲𑀩𑁆𑀩𑀫𑁆𑀧𑀺 𑀦𑀸𑀢𑀺𑀯𑀢𑁆𑀢𑀢𑀺 𑀦𑀸𑀢𑀺𑀓𑁆𑀓𑀫𑀢𑀺. 𑀅𑀣 𑀔𑁄 𑀘𑀼𑀢𑀺𑀢𑁄 𑀧𑀝𑀺𑀲𑀦𑁆𑀥𑀺𑀁, 𑀧𑀝𑀺𑀲𑀦𑁆𑀥𑀺𑀢𑁄 𑀘𑀼𑀢𑀺𑀦𑁆𑀢𑀺 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄 𑀕𑀡𑁆𑀳𑀦𑁆𑀢𑀸 𑀢𑀻𑀲𑀼 𑀪𑀯𑁂𑀲𑀼 𑀘𑀢𑀽𑀲𑀼 𑀬𑁄𑀦𑀻𑀲𑀼 𑀧𑀜𑁆𑀘𑀲𑀼 𑀕𑀢𑀻𑀲𑀼 𑀲𑀢𑁆𑀢𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑀦𑀯𑀲𑀼 𑀲𑀢𑁆𑀢𑀸𑀯𑀸𑀲𑁂𑀲𑀼 𑀫𑀳𑀸𑀲𑀫𑀼𑀤𑁆𑀤𑁂 𑀯𑀸𑀢𑀼𑀓𑁆𑀔𑀺𑀢𑁆𑀢𑀦𑀸𑀯𑀸 𑀯𑀺𑀬 𑀬𑀦𑁆𑀢𑁂𑀲𑀼 𑀬𑀼𑀢𑁆𑀢𑀕𑁄𑀡𑁄 𑀯𑀺𑀬 𑀘 𑀧𑀭𑀺𑀩𑁆𑀪𑀫𑀢𑀺𑀬𑁂𑀯 ¶ . 𑀇𑀢𑀺 𑀲𑀩𑁆𑀩𑀁 𑀧𑁂𑀢𑀁 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀅𑀧𑀲𑀸𑀤𑁂𑀦𑁆𑀢𑁄 𑀆𑀳𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀡𑁆𑀡𑀦𑀸

𑁯𑁬. 𑀇𑀤𑀸𑀦𑀺 𑀬𑀲𑁆𑀫𑀸 𑀇𑀤𑀁 𑀲𑀼𑀢𑁆𑀢𑀁 𑁋 ‘‘𑀕𑀫𑁆𑀪𑀻𑀭𑁄 𑀘𑀸𑀬𑀁, 𑀆𑀦𑀦𑁆𑀤, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺 𑀘 ‘‘𑀢𑀦𑁆𑀢𑀸𑀓𑀼𑀮𑀓𑀚𑀸𑀢𑀸’’𑀢𑀺 𑀘 𑀤𑁆𑀯𑀻𑀳𑀺𑀬𑁂𑀯 𑀧𑀤𑁂𑀳𑀺 𑀆𑀩𑀤𑁆𑀥𑀁, 𑀢𑀲𑁆𑀫𑀸 𑁋 ‘‘𑀕𑀫𑁆𑀪𑀻𑀭𑁄 𑀘𑀸𑀬𑀁, 𑀆𑀦𑀦𑁆𑀤, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺 𑀇𑀫𑀺𑀦𑀸 𑀢𑀸𑀯 𑀅𑀦𑀼𑀲𑀦𑁆𑀥𑀺𑀦𑀸 𑀧𑀘𑁆𑀘𑀬𑀸𑀓𑀸𑀭𑀲𑁆𑀲 𑀕𑀫𑁆𑀪𑀻𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀤𑁂𑀲𑀦𑀁 𑀆𑀭𑀪𑀦𑁆𑀢𑁄 𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀫𑀢𑁆𑀣𑁄 𑁋 𑀇𑀫𑀲𑁆𑀲 𑀚𑀭𑀸𑀫𑀭𑀡𑀲𑁆𑀲 𑀧𑀘𑁆𑀘𑀬𑁄 𑀇𑀤𑀧𑁆𑀧𑀘𑁆𑀘𑀬𑁄, 𑀢𑀲𑁆𑀫𑀸 𑀇𑀤𑀧𑁆𑀧𑀘𑁆𑀘𑀬𑀸 𑀅𑀢𑁆𑀣𑀺 𑀚𑀭𑀸𑀫𑀭𑀡𑀁, 𑀅𑀢𑁆𑀣𑀺 𑀦𑀼 𑀔𑁄 𑀚𑀭𑀸𑀫𑀭𑀡𑀲𑁆𑀲 𑀧𑀘𑁆𑀘𑀬𑁄, 𑀬𑀫𑁆𑀳𑀸 𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀪𑀯𑁂𑀬𑁆𑀬𑀸𑀢𑀺 ¶ 𑀏𑀯𑀁 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀧𑀡𑁆𑀟𑀺𑀢𑁂𑀦 𑀧𑀼𑀕𑁆𑀕𑀮𑁂𑀦 𑀬𑀣𑀸 𑁋 ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺 𑀯𑀼𑀢𑁆𑀢𑁂 𑀞𑀧𑀦𑀻𑀬𑀢𑁆𑀢𑀸 𑀧𑀜𑁆𑀳𑀲𑁆𑀲 𑀢𑀼𑀡𑁆𑀳𑀻 𑀪𑀯𑀺𑀢𑀩𑁆𑀩𑀁 𑀳𑁄𑀢𑀺, ‘‘𑀅𑀩𑁆𑀬𑀸𑀓𑀢𑀫𑁂𑀢𑀁 ¶ 𑀢𑀣𑀸𑀕𑀢𑁂𑀦𑀸’’𑀢𑀺 𑀯𑀸 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺, 𑀏𑀯𑀁 𑀅𑀧𑁆𑀧𑀝𑀺𑀧𑀚𑁆𑀚𑀺𑀢𑁆𑀯𑀸, 𑀬𑀣𑀸 𑁋 ‘‘𑀘𑀓𑁆𑀔𑀼 𑀲𑀲𑁆𑀲𑀢𑀁 𑀅𑀲𑀲𑁆𑀲𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀲𑀲𑁆𑀲𑀢𑀦𑁆𑀢𑀺 𑀏𑀓𑀁𑀲𑁂𑀦𑁂𑀯 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺, 𑀏𑀯𑀁 𑀏𑀓𑀁𑀲𑁂𑀦𑁂𑀯 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀧𑀼𑀦 𑀓𑀺𑀁 𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁, 𑀓𑁄 𑀦𑀸𑀫 𑀲𑁄 𑀧𑀘𑁆𑀘𑀬𑁄, 𑀬𑀢𑁄 𑀚𑀭𑀸𑀫𑀭𑀡𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑁂 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬𑀁, 𑀏𑀯𑀁 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑀩𑁆𑀩𑀧𑀤𑁂𑀲𑀼.

𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺 𑀇𑀤𑀁 𑀧𑀦 𑀬𑀲𑁆𑀫𑀸 𑀲𑀴𑀸𑀬𑀢𑀦𑀧𑀘𑁆𑀘𑀬𑀸𑀢𑀺 𑀯𑀼𑀢𑁆𑀢𑁂 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀻𑀦𑀁 𑀙𑀦𑁆𑀦𑀁 𑀯𑀺𑀧𑀸𑀓𑀲𑀫𑁆𑀨𑀲𑁆𑀲𑀸𑀦𑀁𑀬𑁂𑀯 𑀕𑀳𑀡𑀁 𑀳𑁄𑀢𑀺, 𑀇𑀥 𑀘 ‘‘𑀲𑀴𑀸𑀬𑀢𑀦𑀧𑀘𑁆𑀘𑀬𑀸’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀕𑀳𑀺𑀢𑀫𑁆𑀧𑀺 𑀅𑀕𑀳𑀺𑀢𑀫𑁆𑀧𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀺𑀲𑁂𑀲𑀁 𑀨𑀲𑁆𑀲𑀲𑁆𑀲 𑀘 𑀲𑀴𑀸𑀬𑀢𑀦𑀢𑁄 𑀅𑀢𑀺𑀭𑀺𑀢𑁆𑀢𑀁 𑀅𑀜𑁆𑀜𑀫𑁆𑀧𑀺 𑀯𑀺𑀲𑁂𑀲𑀧𑀘𑁆𑀘𑀬𑀁 𑀤𑀲𑁆𑀲𑁂𑀢𑀼𑀓𑀸𑀫𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀺𑀦𑀸 𑀧𑀦 𑀯𑀸𑀭𑁂𑀦 𑀪𑀕𑀯𑀢𑀸 𑀓𑀺𑀁 𑀓𑀣𑀺𑀢𑀦𑁆𑀢𑀺? 𑀧𑀘𑁆𑀘𑀬𑀸𑀦𑀁 𑀦𑀺𑀤𑀸𑀦𑀁 𑀓𑀣𑀺𑀢𑀁. 𑀇𑀤𑀜𑁆𑀳𑀺 𑀲𑀼𑀢𑁆𑀢𑀁 𑀧𑀘𑁆𑀘𑀬𑁂 𑀦𑀺𑀚𑁆𑀚𑀝𑁂 𑀦𑀺𑀕𑁆𑀕𑀼𑀫𑁆𑀩𑁂 𑀓𑀢𑁆𑀯𑀸 𑀓𑀣𑀺𑀢𑀢𑁆𑀢𑀸 𑀫𑀳𑀸𑀦𑀺𑀤𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁯𑁮. 𑀇𑀤𑀸𑀦𑀺 𑀢𑁂𑀲𑀁 𑀢𑁂𑀲𑀁 𑀧𑀘𑁆𑀘𑀬𑀸𑀦𑀁 𑀢𑀣𑀁 𑀅𑀯𑀺𑀢𑀣𑀁 𑀅𑀦𑀜𑁆𑀜𑀣𑀁 𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀭𑀺𑀬𑀸𑀬𑁂𑀦𑀸𑀢𑀺 𑀓𑀸𑀭𑀡𑁂𑀦. 𑀲𑀩𑁆𑀩𑁂𑀦𑀲𑀩𑁆𑀩𑀁 𑀲𑀩𑁆𑀩𑀣𑀸𑀲𑀩𑁆𑀩𑀦𑁆𑀢𑀺 𑀦𑀺𑀧𑀸𑀢𑀤𑁆𑀯𑀬𑀫𑁂𑀢𑀁. 𑀢𑀲𑁆𑀲𑀢𑁆𑀣𑁄 𑁋 ‘‘𑀲𑀩𑁆𑀩𑀸𑀓𑀸𑀭𑁂𑀦 𑀲𑀩𑁆𑀩𑀸 𑀲𑀩𑁆𑀩𑁂𑀦 𑀲𑀪𑀸𑀯𑁂𑀦 ¶ 𑀲𑀩𑁆𑀩𑀸 𑀚𑀸𑀢𑀺 𑀦𑀸𑀫 𑀬𑀤𑀺 𑀦 𑀪𑀯𑁂𑀬𑁆𑀬𑀸’’𑀢𑀺. 𑀪𑀯𑀸𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀲𑁆𑀲𑀘𑀻𑀢𑀺 𑀅𑀦𑀺𑀬𑀫𑀯𑀘𑀦𑀫𑁂𑀢𑀁, 𑀤𑁂𑀯𑀸𑀤𑀻𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺. 𑀓𑀺𑀫𑁆𑀳𑀺𑀘𑀻𑀢𑀺 𑀇𑀤𑀫𑁆𑀧𑀺 𑀅𑀦𑀺𑀬𑀫𑀯𑀘𑀦𑀫𑁂𑀯, 𑀓𑀸𑀫𑀪𑀯𑀸𑀤𑀻𑀲𑀼 𑀦𑀯𑀲𑀼 𑀪𑀯𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺. 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀅𑀦𑀺𑀬𑀫𑀺𑀢𑀦𑀺𑀓𑁆𑀔𑀺𑀢𑁆𑀢𑀅𑀢𑁆𑀣𑀯𑀺𑀪𑀚𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀢𑀲𑁆𑀲𑀢𑁆𑀣𑁄 𑁋 ‘‘𑀬𑀁 𑀯𑀼𑀢𑁆𑀢𑀁 ‘𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀻’𑀢𑀺, 𑀢𑀲𑁆𑀲 𑀢𑁂 𑀅𑀢𑁆𑀣𑀁 𑀯𑀺𑀪𑀚𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀯𑀺𑀪𑀚𑀦𑁆𑀢𑁄 𑁋 ‘‘𑀤𑁂𑀯𑀸𑀦𑀁 𑀯𑀸 𑀤𑁂𑀯𑀢𑁆𑀢𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑁂𑀯𑀸𑀦𑀁 𑀯𑀸 𑀤𑁂𑀯𑀢𑁆𑀢𑀸𑀬𑀸𑀢𑀺 𑀬𑀸 𑀅𑀬𑀁 𑀤𑁂𑀯𑀸𑀦𑀁 𑀤𑁂𑀯𑀪𑀸𑀯𑀸𑀬 𑀔𑀦𑁆𑀥𑀚𑀸𑀢𑀺, 𑀬𑀸𑀬 𑀔𑀦𑁆𑀥𑀚𑀸𑀢𑀺𑀬𑀸 𑀤𑁂𑀯𑀸 ‘‘𑀤𑁂𑀯𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀘𑁂 ¶ 𑀳𑀺 𑀚𑀸𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦𑀸𑀪𑀯𑀺𑀲𑁆𑀲𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀤𑁂𑀯𑀸𑀢𑀺 𑀉𑀧𑀧𑀢𑁆𑀢𑀺𑀤𑁂𑀯𑀸. 𑀕𑀦𑁆𑀥𑀩𑁆𑀩𑀸𑀢𑀺 𑀫𑀽𑀮𑀔𑀦𑁆𑀥𑀸𑀤𑀻𑀲𑀼 𑀅𑀥𑀺𑀯𑀢𑁆𑀣𑀤𑁂𑀯𑀢𑀸𑀯. 𑀬𑀓𑁆𑀔𑀸𑀢𑀺 𑀅𑀫𑀦𑀼𑀲𑁆𑀲𑀸. 𑀪𑀽𑀢𑀸𑀢𑀺 𑀬𑁂 𑀓𑁂𑀘𑀺 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸. 𑀧𑀓𑁆𑀔𑀺𑀦𑁄𑀢𑀺 𑀬𑁂 𑀓𑁂𑀘𑀺 𑀅𑀝𑁆𑀞𑀺𑀧𑀓𑁆𑀔𑀸 𑀯𑀸 𑀘𑀫𑁆𑀫𑀧𑀓𑁆𑀔𑀸 𑀯𑀸 𑀮𑁄𑀫𑀧𑀓𑁆𑀔𑀸 𑀯𑀸. 𑀲𑀭𑀻𑀲𑀧𑀸𑀢𑀺 𑀬𑁂 𑀓𑁂𑀘𑀺 𑀪𑀽𑀫𑀺𑀬𑀁 𑀲𑀭𑀦𑁆𑀢𑀸 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀢𑁂𑀲𑀁 𑀤𑁂𑀯𑀕𑀦𑁆𑀥𑀩𑁆𑀩𑀸𑀤𑀻𑀦𑀁. 𑀢𑀤𑀢𑁆𑀣𑀸𑀬𑀸𑀢𑀺 𑀤𑁂𑀯𑀕𑀦𑁆𑀥𑀩𑁆𑀩𑀸𑀤𑀺𑀪𑀸𑀯𑀸𑀬. 𑀚𑀸𑀢𑀺𑀦𑀺𑀭𑁄𑀥𑀸𑀢𑀺 𑀚𑀸𑀢𑀺𑀯𑀺𑀕𑀫𑀸, 𑀚𑀸𑀢𑀺𑀅𑀪𑀸𑀯𑀸𑀢𑀺 𑀅𑀢𑁆𑀣𑁄.

𑀳𑁂𑀢𑀽𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺𑀧𑀺 𑀓𑀸𑀭𑀡𑀯𑁂𑀯𑀘𑀦𑀸𑀦𑀺 𑀏𑀯. 𑀓𑀸𑀭𑀡𑀜𑁆𑀳𑀺 𑀬𑀲𑁆𑀫𑀸 𑀅𑀢𑁆𑀢𑀦𑁄 𑀨𑀮𑀢𑁆𑀣𑀸𑀬 𑀳𑀺𑀦𑁄𑀢𑀺 ¶ 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 ‘‘𑀳𑁂𑀢𑀽’’𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀢𑀁 𑀨𑀮𑀁 𑀦𑀺𑀤𑁂𑀢𑀺 𑁋 ‘‘𑀳𑀦𑁆𑀤, 𑀦𑀁 𑀕𑀡𑁆𑀳𑀣𑀸’’𑀢𑀺 𑀅𑀧𑁆𑀧𑁂𑀢𑀺 𑀯𑀺𑀬 𑀢𑀲𑁆𑀫𑀸 𑀦𑀺𑀤𑀸𑀦𑀁. 𑀬𑀲𑁆𑀫𑀸 𑀨𑀮𑀁 𑀢𑀢𑁄 𑀲𑀫𑀼𑀤𑁂𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀢𑀜𑁆𑀘 𑀧𑀝𑀺𑀘𑁆𑀘 𑀏𑀢𑀺 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀲𑀫𑀼𑀤𑀬𑁄𑀢𑀺 𑀘 𑀧𑀘𑁆𑀘𑀬𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀧𑀺 𑀘 𑀬𑀤𑀺𑀤𑀁 𑀚𑀸𑀢𑀻𑀢𑀺 𑀏𑀢𑁆𑀣 𑀬𑀤𑀺𑀤𑀦𑁆𑀢𑀺 𑀦𑀺𑀧𑀸𑀢𑁄. 𑀢𑀲𑁆𑀲 𑀲𑀩𑁆𑀩𑀧𑀤𑁂𑀲𑀼 𑀮𑀺𑀗𑁆𑀕𑀸𑀦𑀼𑀭𑀽𑀧𑀢𑁄 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀥 𑀧𑀦 𑁋 ‘‘𑀬𑀸 𑀏𑀲𑀸 𑀚𑀸𑀢𑀻’’𑀢𑀺 𑀅𑀬𑀫𑀲𑁆𑀲 𑀅𑀢𑁆𑀣𑁄. 𑀚𑀭𑀸𑀫𑀭𑀡𑀲𑁆𑀲 𑀳𑀺 𑀚𑀸𑀢𑀺 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺.

𑁯𑁯. 𑀪𑀯𑀧𑀤𑁂 𑁋 ‘‘𑀓𑀺𑀫𑁆𑀳𑀺𑀘𑀻’’𑀢𑀺 𑀇𑀫𑀺𑀦𑀸 𑀑𑀓𑀸𑀲𑀧𑀭𑀺𑀕𑁆𑀕𑀳𑁄 𑀓𑀢𑁄. 𑀢𑀢𑁆𑀣 𑀳𑁂𑀝𑁆𑀞𑀸 𑀅𑀯𑀻𑀘𑀺𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀉𑀧𑀭𑀺 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀤𑁂𑀯𑁂 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀓𑀸𑀫𑀪𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀦𑀬𑁄 𑀉𑀧𑀧𑀢𑁆𑀢𑀺𑀪𑀯𑁂. 𑀇𑀥 𑀧𑀦 𑀓𑀫𑁆𑀫𑀪𑀯𑁂 𑀬𑀼𑀚𑁆𑀚𑀢𑀺. 𑀲𑁄 𑀳𑀺 𑀚𑀸𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸𑀯 𑀧𑀘𑁆𑀘𑀬𑁄 𑀳𑁄𑀢𑀺. 𑀉𑀧𑀸𑀤𑀸𑀦𑀧𑀤𑀸𑀤𑀻𑀲𑀼𑀧𑀺 𑁋 ‘‘𑀓𑀺𑀫𑁆𑀳𑀺𑀘𑀻’’𑀢𑀺 𑀇𑀫𑀺𑀦𑀸 𑀑𑀓𑀸𑀲𑀧𑀭𑀺𑀕𑁆𑀕𑀳𑁄𑀯 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁦𑁦. 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 ¶ 𑀪𑀯𑁄𑀢𑀺 𑀏𑀢𑁆𑀣 𑀓𑀸𑀫𑀼𑀧𑀸𑀤𑀸𑀦𑀁 𑀢𑀺𑀡𑁆𑀡𑀫𑁆𑀧𑀺 𑀓𑀫𑁆𑀫𑀪𑀯𑀸𑀦𑀁 𑀢𑀺𑀡𑁆𑀡𑀜𑁆𑀘 𑀉𑀧𑀧𑀢𑁆𑀢𑀺𑀪𑀯𑀸𑀦𑀁 𑀧𑀘𑁆𑀘𑀬𑁄, 𑀢𑀣𑀸 𑀲𑁂𑀲𑀸𑀦𑀺𑀧𑀻𑀢𑀺 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀘𑀢𑀼𑀯𑀻𑀲𑀢𑀺𑀪𑀯𑀸 𑀯𑁂𑀤𑀺𑀢𑀩𑁆𑀩𑀸. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑁂𑀢𑁆𑀣 𑀤𑁆𑀯𑀸𑀤𑀲 𑀓𑀫𑁆𑀫𑀪𑀯𑀸 𑀮𑀩𑁆𑀪𑀦𑁆𑀢𑀺. 𑀢𑁂𑀲𑀁 𑀉𑀧𑀸𑀤𑀸𑀦𑀸𑀦𑀺 𑀲𑀳𑀚𑀸𑀢𑀓𑁄𑀝𑀺𑀬𑀸𑀧𑀺 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸𑀧𑀺 𑀧𑀘𑁆𑀘𑀬𑁄.

𑁧𑁦𑁧. 𑀭𑀽𑀧𑀢𑀡𑁆𑀳𑀸𑀢𑀺 𑀭𑀽𑀧𑀸𑀭𑀫𑁆𑀫𑀡𑁂 𑀢𑀡𑁆𑀳𑀸. 𑀏𑀲 𑀦𑀬𑁄 𑀲𑀤𑁆𑀤𑀢𑀡𑁆𑀳𑀸𑀤𑀻𑀲𑀼. 𑀲𑀸 𑀧𑀦𑁂𑀲𑀸 𑀢𑀡𑁆𑀳𑀸 𑀉𑀧𑀸𑀤𑀸𑀦𑀲𑁆𑀲 𑀲𑀳𑀚𑀸𑀢𑀓𑁄𑀝𑀺𑀬𑀸𑀧𑀺 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸𑀧𑀺 𑀧𑀘𑁆𑀘𑀬𑁄 𑀳𑁄𑀢𑀺.

𑁧𑁦𑁨. 𑀏𑀲 𑀧𑀘𑁆𑀘𑀬𑁄 𑀢𑀡𑁆𑀳𑀸𑀬, 𑀬𑀤𑀺𑀤𑀁 ¶ 𑀯𑁂𑀤𑀦𑀸𑀢𑀺 𑀏𑀢𑁆𑀣 𑀯𑀺𑀧𑀸𑀓𑀯𑁂𑀤𑀦𑀸 𑀢𑀡𑁆𑀳𑀸𑀬 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀜𑁆𑀜𑀸 𑀅𑀜𑁆𑀜𑀣𑀸𑀧𑀻𑀢𑀺.

𑁧𑁦𑁩. 𑀏𑀢𑁆𑀢𑀸𑀯𑀢𑀸 𑀧𑀦 𑀪𑀕𑀯𑀸 𑀯𑀝𑁆𑀝𑀫𑀽𑀮𑀪𑀽𑀢𑀁 𑀧𑀼𑀭𑀺𑀫𑀢𑀡𑁆𑀳𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀤𑁂𑀲𑀦𑀁, 𑀧𑀺𑀝𑁆𑀞𑀺𑀬𑀁 𑀧𑀳𑀭𑀺𑀢𑁆𑀯𑀸 𑀓𑁂𑀲𑁂𑀲𑀼 𑀯𑀸 𑀕𑀳𑁂𑀢𑁆𑀯𑀸 𑀯𑀺𑀭𑀯𑀦𑁆𑀢𑀁 𑀯𑀺𑀭𑀯𑀦𑁆𑀢𑀁 𑀫𑀕𑁆𑀕𑀢𑁄 𑀑𑀓𑁆𑀓𑀫𑁂𑀦𑁆𑀢𑁄 𑀯𑀺𑀬 𑀦𑀯𑀳𑀺 𑀧𑀤𑁂𑀳𑀺 𑀲𑀫𑀼𑀤𑀸𑀘𑀸𑀭𑀢𑀡𑁆𑀳𑀁 𑀤𑀲𑁆𑀲𑁂𑀦𑁆𑀢𑁄 𑁋 ‘‘𑀇𑀢𑀺 𑀔𑁄 𑀧𑀦𑁂𑀢𑀁, 𑀆𑀦𑀦𑁆𑀤, 𑀯𑁂𑀤𑀦𑀁 𑀧𑀝𑀺𑀘𑁆𑀘 𑀢𑀡𑁆𑀳𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀡𑁆𑀳𑀸𑀢𑀺 𑀤𑁆𑀯𑁂 𑀢𑀡𑁆𑀳𑀸 𑀏𑀲𑀦𑀢𑀡𑁆𑀳𑀸 𑀘, 𑀏𑀲𑀺𑀢𑀢𑀡𑁆𑀳𑀸 𑀘. 𑀬𑀸𑀬 𑀢𑀡𑁆𑀳𑀸𑀬 𑀅𑀚𑀧𑀣𑀲𑀗𑁆𑀓𑀼𑀧𑀣𑀸𑀤𑀻𑀦𑀺 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀪𑁄𑀕𑁂 𑀏𑀲𑀢𑀺 𑀕𑀯𑁂𑀲𑀢𑀺, 𑀅𑀬𑀁 𑀏𑀲𑀦𑀢𑀡𑁆𑀳𑀸 𑀦𑀸𑀫. 𑀬𑀸 𑀢𑁂𑀲𑀼 𑀏𑀲𑀺𑀢𑁂𑀲𑀼 𑀕𑀯𑁂𑀲𑀺𑀢𑁂𑀲𑀼 𑀧𑀝𑀺𑀮𑀤𑁆𑀥𑁂𑀲𑀼 𑀢𑀡𑁆𑀳𑀸, 𑀅𑀬𑀁 𑀏𑀲𑀺𑀢𑀢𑀡𑁆𑀳𑀸 𑀦𑀸𑀫. 𑀢𑀤𑀼𑀪𑀬𑀫𑁆𑀧𑀺 𑀲𑀫𑀼𑀤𑀸𑀘𑀸𑀭𑀢𑀡𑁆𑀳𑀸𑀬 𑀏𑀯 𑀅𑀥𑀺𑀯𑀘𑀦𑀁. 𑀢𑀲𑁆𑀫𑀸 ¶ 𑀤𑀼𑀯𑀺𑀥𑀸𑀧𑁂𑀲𑀸 𑀯𑁂𑀤𑀦𑀁 𑀧𑀝𑀺𑀘𑁆𑀘 𑀢𑀡𑁆𑀳𑀸 𑀦𑀸𑀫. 𑀧𑀭𑀺𑀬𑁂𑀲𑀦𑀸 𑀦𑀸𑀫 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀧𑀭𑀺𑀬𑁂𑀲𑀦𑀸, 𑀲𑀸 𑀳𑀺 𑀢𑀡𑁆𑀳𑀸𑀬 𑀲𑀢𑀺 𑀳𑁄𑀢𑀺. 𑀮𑀸𑀪𑁄𑀢𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀧𑀝𑀺𑀮𑀸𑀪𑁄, 𑀲𑁄 𑀳𑀺 𑀧𑀭𑀺𑀬𑁂𑀲𑀦𑀸𑀬 𑀲𑀢𑀺 𑀳𑁄𑀢𑀺. 𑀯𑀺𑀦𑀺𑀘𑁆𑀙𑀬𑁄 𑀧𑀦 𑀜𑀸𑀡𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀺𑀢𑀓𑁆𑀓𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄. 𑀢𑀢𑁆𑀣 𑁋 ‘‘𑀲𑀼𑀔𑀯𑀺𑀦𑀺𑀘𑁆𑀙𑀬𑀁 𑀚𑀜𑁆𑀜𑀸, 𑀲𑀼𑀔𑀯𑀺𑀦𑀺𑀘𑁆𑀙𑀬𑀁 𑀜𑀢𑁆𑀯𑀸 𑀅𑀚𑁆𑀛𑀢𑁆𑀢𑀁 𑀲𑀼𑀔𑀫𑀦𑀼𑀬𑀼𑀜𑁆𑀚𑁂𑀬𑁆𑀬𑀸’’𑀢𑀺 (𑀫. 𑀦𑀺. 𑁩.𑁩𑁨𑁩) 𑀅𑀬𑀁 𑀜𑀸𑀡𑀯𑀺𑀦𑀺𑀘𑁆𑀙𑀬𑁄. ‘‘𑀯𑀺𑀦𑀺𑀘𑁆𑀙𑀬𑁄𑀢𑀺 𑀤𑁆𑀯𑁂 𑀯𑀺𑀦𑀺𑀘𑁆𑀙𑀬𑀸 𑁋 𑀢𑀡𑁆𑀳𑀸𑀯𑀺𑀦𑀺𑀘𑁆𑀙𑀬𑁄 𑀘 𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑁄 𑀘𑀸’’𑀢𑀺 (𑀫𑀳𑀸𑀦𑀺. 𑁧𑁦𑁨). 𑀏𑀯𑀁 𑀆𑀕𑀢𑀸𑀦𑀺 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀢𑀡𑁆𑀳𑀸𑀯𑀺𑀦𑀺𑀘𑁆𑀙𑀬𑁄. 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑁄. ‘‘𑀙𑀦𑁆𑀤𑁄 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀯𑀺𑀢𑀓𑁆𑀓𑀦𑀺𑀤𑀸𑀦𑁄’’𑀢𑀺 (𑀤𑀻. 𑀦𑀺. 𑁨.𑁩𑁫𑁮) 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀇𑀥 𑀯𑀺𑀦𑀺𑀘𑁆𑀙𑀬𑁄𑀢𑀺 𑀯𑀼𑀢𑁆𑀢𑁄 𑀯𑀺𑀢𑀓𑁆𑀓𑁄𑀬𑁂𑀯 𑀆𑀕𑀢𑁄. 𑀮𑀸𑀪𑀁 𑀮𑀪𑀺𑀢𑁆𑀯𑀸 𑀳𑀺 𑀇𑀝𑁆𑀞𑀸𑀦𑀺𑀝𑁆𑀞𑀁 𑀲𑀼𑀦𑁆𑀤𑀭𑀸𑀲𑀼𑀦𑁆𑀤𑀭𑀜𑁆𑀘 𑀯𑀺𑀢𑀓𑁆𑀓𑁂𑀦𑁂𑀯 𑀯𑀺𑀦𑀺𑀘𑁆𑀙𑀺𑀦𑀸𑀢𑀺 ¶ 𑁋 ‘‘𑀏𑀢𑁆𑀢𑀓𑀁 𑀫𑁂 𑀭𑀽𑀧𑀸𑀭𑀫𑁆𑀫𑀡𑀢𑁆𑀣𑀸𑀬 𑀪𑀯𑀺𑀲𑁆𑀲𑀢𑀺, 𑀏𑀢𑁆𑀢𑀓𑀁 𑀲𑀤𑁆𑀤𑀸𑀤𑀺𑀆𑀭𑀫𑁆𑀫𑀡𑀢𑁆𑀣𑀸𑀬, 𑀏𑀢𑁆𑀢𑀓𑀁 𑀫𑀬𑁆𑀳𑀁 𑀪𑀯𑀺𑀲𑁆𑀲𑀢𑀺, 𑀏𑀢𑁆𑀢𑀓𑀁 𑀧𑀭𑀲𑁆𑀲, 𑀏𑀢𑁆𑀢𑀓𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀺, 𑀏𑀢𑁆𑀢𑀓𑀁 𑀦𑀺𑀤𑀳𑀺𑀲𑁆𑀲𑀸𑀫𑀻’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀮𑀸𑀪𑀁 𑀧𑀝𑀺𑀘𑁆𑀘 𑀯𑀺𑀦𑀺𑀘𑁆𑀙𑀬𑁄’’𑀢𑀺.

𑀙𑀦𑁆𑀤𑀭𑀸𑀕𑁄𑀢𑀺 𑀏𑀯𑀁 𑀅𑀓𑀼𑀲𑀮𑀯𑀺𑀢𑀓𑁆𑀓𑁂𑀦 𑀯𑀺𑀢𑀓𑁆𑀓𑀺𑀢𑀯𑀢𑁆𑀣𑀼𑀲𑁆𑀫𑀺𑀁 𑀤𑀼𑀩𑁆𑀩𑀮𑀭𑀸𑀕𑁄 𑀘 𑀩𑀮𑀯𑀭𑀸𑀕𑁄 𑀘 𑀉𑀧𑁆𑀧𑀚𑁆𑀚𑀢𑀺, 𑀇𑀤𑀜𑁆𑀳𑀺 𑀇𑀥 𑀢𑀡𑁆𑀳𑀸. 𑀙𑀦𑁆𑀤𑁄𑀢𑀺 𑀤𑀼𑀩𑁆𑀩𑀮𑀭𑀸𑀕𑀲𑁆𑀲𑀸𑀥𑀺𑀯𑀘𑀦𑀁. 𑀅𑀚𑁆𑀛𑁄𑀲𑀸𑀦𑀦𑁆𑀢𑀺 𑀅𑀳𑀁 𑀫𑀫𑀦𑁆𑀢𑀺 𑀩𑀮𑀯𑀲𑀦𑁆𑀦𑀺𑀝𑁆𑀞𑀸𑀦𑀁. 𑀧𑀭𑀺𑀕𑁆𑀕𑀳𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀯𑀲𑁂𑀦 𑀧𑀭𑀺𑀕𑁆𑀕𑀳𑀡𑀓𑀭𑀡𑀁. 𑀫𑀘𑁆𑀙𑀭𑀺𑀬𑀦𑁆𑀢𑀺 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀲𑁆𑀲 𑀅𑀲𑀳𑀦𑀢𑀸. 𑀢𑁂𑀦𑁂𑀯𑀲𑁆𑀲 𑀧𑁄𑀭𑀸𑀡𑀸 𑀏𑀯𑀁 ¶ 𑀯𑀘𑀦𑀢𑁆𑀣𑀁 𑀯𑀤𑀦𑁆𑀢𑀺 𑁋 ‘‘𑀇𑀤𑀁 𑀅𑀘𑁆𑀙𑀭𑀺𑀬𑀁 𑀫𑀬𑁆𑀳𑀫𑁂𑀯 𑀳𑁄𑀢𑀼, 𑀫𑀸 𑀅𑀜𑁆𑀜𑁂𑀲𑀁 𑀅𑀘𑁆𑀙𑀭𑀺𑀬𑀁 𑀳𑁄𑀢𑀽𑀢𑀺 𑀧𑀯𑀢𑁆𑀢𑀢𑁆𑀢𑀸 𑀫𑀘𑁆𑀙𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀆𑀭𑀓𑁆𑀔𑁄𑀢𑀺 𑀤𑁆𑀯𑀸𑀭𑀧𑀺𑀤𑀳𑀦𑀫𑀜𑁆𑀚𑀽𑀲𑀕𑁄𑀧𑀦𑀸𑀤𑀺𑀯𑀲𑁂𑀦 𑀲𑀼𑀝𑁆𑀞𑀼 𑀭𑀓𑁆𑀔𑀡𑀁. 𑀅𑀥𑀺𑀓𑀭𑁄𑀢𑀻𑀢𑀺 𑀅𑀥𑀺𑀓𑀭𑀡𑀁, 𑀓𑀸𑀭𑀡𑀲𑁆𑀲𑁂𑀢𑀁 𑀦𑀸𑀫𑀁. 𑀆𑀭𑀓𑁆𑀔𑀸𑀥𑀺𑀓𑀭𑀡𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀁, 𑀆𑀭𑀓𑁆𑀔𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀤𑀡𑁆𑀟𑀸𑀤𑀸𑀦𑀸𑀤𑀻𑀲𑀼 𑀧𑀭𑀦𑀺𑀲𑁂𑀥𑀦𑀢𑁆𑀣𑀁 𑀤𑀡𑁆𑀟𑀲𑁆𑀲 𑀆𑀤𑀸𑀦𑀁 𑀤𑀡𑁆𑀟𑀸𑀤𑀸𑀦𑀁. 𑀏𑀓𑀢𑁄 𑀥𑀸𑀭𑀸𑀤𑀺𑀦𑁄 𑀲𑀢𑁆𑀣𑀲𑁆𑀲 𑀆𑀤𑀸𑀦𑀁 𑀲𑀢𑁆𑀣𑀸𑀤𑀸𑀦𑀁. 𑀓𑀮𑀳𑁄𑀢𑀺 𑀓𑀸𑀬𑀓𑀮𑀳𑁄𑀧𑀺 𑀯𑀸𑀘𑀸𑀓𑀮𑀳𑁄𑀧𑀺. 𑀧𑀼𑀭𑀺𑀫𑁄 𑀧𑀼𑀭𑀺𑀫𑁄 𑀯𑀺𑀭𑁄𑀥𑁄 𑀯𑀺𑀕𑁆𑀕𑀳𑁄. 𑀧𑀘𑁆𑀙𑀺𑀫𑁄 𑀧𑀘𑁆𑀙𑀺𑀫𑁄 𑀯𑀺𑀯𑀸𑀤𑁄. 𑀢𑀼𑀯𑀁𑀢𑀼𑀯𑀦𑁆𑀢𑀺 𑀅𑀕𑀸𑀭𑀯𑀯𑀘𑀦𑀁 𑀢𑀼𑀯𑀁𑀢𑀼𑀯𑀁.

𑁧𑁧𑁨. 𑀇𑀤𑀸𑀦𑀺 𑀧𑀝𑀺𑀮𑁄𑀫𑀦𑀬𑁂𑀦𑀸𑀧𑀺 𑀢𑀁𑀲𑀫𑀼𑀤𑀸𑀘𑀸𑀭𑀢𑀡𑁆𑀳𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 𑁋 ‘‘𑀆𑀭𑀓𑁆𑀔𑀸𑀥𑀺𑀓𑀭𑀡’’𑀦𑁆𑀢𑀺 𑀆𑀭𑀪𑀦𑁆𑀢𑁄 𑀤𑁂𑀲𑀦𑀁 𑀦𑀺𑀯𑀢𑁆𑀢𑁂𑀲𑀺. 𑀢𑀢𑁆𑀣 𑀓𑀸𑀫𑀢𑀡𑁆𑀳𑀸𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀭𑀽𑀧𑀸𑀤𑀺𑀢𑀡𑁆𑀳𑀸. 𑀪𑀯𑀢𑀡𑁆𑀳𑀸𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑁄 𑀭𑀸𑀕𑁄. 𑀯𑀺𑀪𑀯𑀢𑀡𑁆𑀳𑀸𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀳𑀕𑀢𑁄 𑀭𑀸𑀕𑁄. 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸𑀢𑀺 𑀯𑀝𑁆𑀝𑀫𑀽𑀮𑀢𑀡𑁆𑀳𑀸 𑀘 𑀲𑀫𑀼𑀤𑀸𑀘𑀸𑀭𑀢𑀡𑁆𑀳𑀸 𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸. 𑀤𑁆𑀯𑀬𑁂𑀦𑀸𑀢𑀺 𑀢𑀡𑁆𑀳𑀸𑀮𑀓𑁆𑀔𑀡𑀯𑀲𑁂𑀦 𑀏𑀓𑀪𑀸𑀯𑀁 𑀕𑀢𑀸𑀧𑀺 𑀯𑀝𑁆𑀝𑀫𑀽𑀮𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀤𑁆𑀯𑀻𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀯𑁂𑀤𑀦𑀸𑀬 𑀏𑀓𑀲𑀫𑁄𑀲𑀭𑀡𑀸 𑀪𑀯𑀦𑁆𑀢𑀺, 𑀯𑁂𑀤𑀦𑀸𑀧𑀘𑁆𑀘𑀬𑁂𑀦 𑀏𑀓𑀧𑀘𑁆𑀘𑀬𑀸𑀢𑀺 𑀅𑀢𑁆𑀣𑁄. 𑀢𑀺𑀯𑀺𑀥𑀜𑁆𑀳𑀺 𑀲𑀫𑁄𑀲𑀭𑀡𑀁 𑀑𑀲𑀭𑀡𑀲𑀫𑁄𑀲𑀭𑀡𑀁, 𑀲𑀳𑀚𑀸𑀢𑀲𑀫𑁄𑀲𑀭𑀡𑀁, 𑀧𑀘𑁆𑀘𑀬𑀲𑀫𑁄𑀲𑀭𑀡𑀜𑁆𑀘. 𑀢𑀢𑁆𑀣 𑁋 ‘‘𑀅𑀣 ¶ 𑀔𑁄 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀓𑀸𑀫𑀲𑀫𑁄𑀲𑀭𑀡𑀸𑀦𑀺 𑀪𑀯𑀦𑁆𑀢𑀻’’𑀢𑀺 𑀇𑀤𑀁 𑀑𑀲𑀭𑀡𑀲𑀫𑁄𑀲𑀭𑀡𑀁 𑀦𑀸𑀫. ‘‘𑀙𑀦𑁆𑀤𑀫𑀽𑀮𑀓𑀸, 𑀆𑀯𑀼𑀲𑁄, 𑀏𑀢𑁂 𑀥𑀫𑁆𑀫𑀸 𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑁄𑀲𑀭𑀡𑀸’’𑀢𑀺 (𑀅. 𑀦𑀺. 𑁮.𑁮𑁩) 𑀇𑀤𑀁 𑀲𑀳𑀚𑀸𑀢𑀲𑀫𑁄𑀲𑀭𑀡𑀁 𑀦𑀸𑀫. ‘‘𑀤𑁆𑀯𑀬𑁂𑀦 𑀯𑁂𑀤𑀦𑀸𑀬 𑀏𑀓𑀲𑀫𑁄𑀲𑀭𑀡𑀸’’𑀢𑀺 𑀇𑀤𑀁 𑀧𑀦 𑀧𑀘𑁆𑀘𑀬𑀲𑀫𑁄𑀲𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁧𑁩. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄𑀢𑀺 ¶ 𑀆𑀤𑀬𑁄 𑀲𑀩𑁆𑀩𑁂 𑀯𑀺𑀧𑀸𑀓𑀨𑀲𑁆𑀲𑀸𑀬𑁂𑀯. 𑀢𑁂𑀲𑀼 𑀞𑀧𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀨𑀲𑁆𑀲𑁂 𑀅𑀯𑀲𑁂𑀲𑀸 𑀤𑁆𑀯𑀢𑁆𑀢𑀺𑀁𑀲 𑀨𑀲𑁆𑀲𑀸 𑀳𑁄𑀦𑁆𑀢𑀺. 𑀬𑀤𑀺𑀤𑀁 𑀨𑀲𑁆𑀲𑁄𑀢𑀺 𑀏𑀢𑁆𑀣 𑀧𑀦 𑀨𑀲𑁆𑀲𑁄 𑀩𑀳𑀼𑀥𑀸 𑀯𑁂𑀤𑀦𑀸𑀬 𑀧𑀘𑁆𑀘𑀬𑁄 𑀳𑁄𑀢𑀺.

𑁧𑁧𑁪. 𑀬𑁂𑀳𑀺, 𑀆𑀦𑀦𑁆𑀤, 𑀆𑀓𑀸𑀭𑁂𑀳𑀻𑀢𑀺𑀆𑀤𑀻𑀲𑀼 𑀆𑀓𑀸𑀭𑀸 𑀯𑀼𑀘𑁆𑀘𑀦𑁆𑀢𑀺 𑀯𑁂𑀤𑀦𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀲𑀤𑀺𑀲𑀲𑀪𑀸𑀯𑀸. 𑀢𑁂𑀬𑁂𑀯 𑀲𑀸𑀥𑀼𑀓𑀁 𑀤𑀲𑁆𑀲𑀺𑀬𑀫𑀸𑀦𑀸 𑀢𑀁 𑀢𑀁 𑀮𑀻𑀦𑀫𑀢𑁆𑀣𑀁 𑀕𑀫𑁂𑀦𑁆𑀢𑀻𑀢𑀺 𑀮𑀺𑀗𑁆𑀕𑀸𑀦𑀺. 𑀢𑀲𑁆𑀲 𑀢𑀲𑁆𑀲 𑀲𑀜𑁆𑀚𑀸𑀦𑀦𑀳𑁂𑀢𑀼𑀢𑁄 𑀦𑀺𑀫𑀺𑀢𑁆𑀢𑀸𑀦𑀺. 𑀢𑀣𑀸 𑀢𑀣𑀸 𑀉𑀤𑁆𑀤𑀺𑀲𑀺𑀢𑀩𑁆𑀩𑀢𑁄 𑀉𑀤𑁆𑀤𑁂𑀲𑀸 ¶ . 𑀢𑀲𑁆𑀫𑀸 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑁋 ‘‘𑀆𑀦𑀦𑁆𑀤, 𑀬𑁂𑀳𑀺 𑀆𑀓𑀸𑀭𑁂𑀳𑀺…𑀧𑁂… 𑀬𑁂𑀳𑀺 𑀉𑀤𑁆𑀤𑁂𑀲𑁂𑀳𑀺 𑀦𑀸𑀫𑀓𑀸𑀬𑀲𑁆𑀲 𑀦𑀸𑀫𑀲𑀫𑀽𑀳𑀲𑁆𑀲 𑀧𑀜𑁆𑀜𑀢𑁆𑀢𑀺 𑀳𑁄𑀢𑀺, 𑀬𑀸 𑀏𑀲𑀸 𑀘 𑀯𑁂𑀤𑀦𑀸𑀬 𑀯𑁂𑀤𑀬𑀺𑀢𑀸𑀓𑀸𑀭𑁂 𑀯𑁂𑀤𑀬𑀺𑀢𑀮𑀺𑀗𑁆𑀕𑁂 𑀯𑁂𑀤𑀬𑀺𑀢𑀦𑀺𑀫𑀺𑀢𑁆𑀢𑁂 𑀯𑁂𑀤𑀦𑀸𑀢𑀺 𑀉𑀤𑁆𑀤𑁂𑀲𑁂 𑀲𑀢𑀺, 𑀲𑀜𑁆𑀜𑀸𑀬 𑀲𑀜𑁆𑀚𑀸𑀦𑀦𑀸𑀓𑀸𑀭𑁂 𑀲𑀜𑁆𑀚𑀸𑀦𑀦𑀮𑀺𑀗𑁆𑀕𑁂 𑀲𑀜𑁆𑀚𑀸𑀦𑀦𑀦𑀺𑀫𑀺𑀢𑁆𑀢𑁂 𑀲𑀜𑁆𑀜𑀸𑀢𑀺 𑀉𑀤𑁆𑀤𑁂𑀲𑁂 𑀲𑀢𑀺, 𑀲𑀗𑁆𑀔𑀸𑀭𑀸𑀦𑀁 𑀘𑁂𑀢𑀦𑀸𑀓𑀸𑀭𑁂 𑀘𑁂𑀢𑀦𑀸𑀮𑀺𑀗𑁆𑀕𑁂 𑀘𑁂𑀢𑀦𑀸𑀦𑀺𑀫𑀺𑀢𑁆𑀢𑁂 𑀘𑁂𑀢𑀦𑀸𑀢𑀺 𑀉𑀤𑁆𑀤𑁂𑀲𑁂 𑀲𑀢𑀺, 𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀚𑀸𑀦𑀦𑀸𑀓𑀸𑀭𑁂 𑀯𑀺𑀚𑀸𑀦𑀦𑀮𑀺𑀗𑁆𑀕𑁂 𑀯𑀺𑀚𑀸𑀦𑀦𑀦𑀺𑀫𑀺𑀢𑁆𑀢𑁂 𑀯𑀺𑀜𑁆𑀜𑀸𑀡𑀦𑁆𑀢𑀺 𑀉𑀤𑁆𑀤𑁂𑀲𑁂 𑀲𑀢𑀺 𑁋 ‘𑀅𑀬𑀁 𑀦𑀸𑀫𑀓𑀸𑀬𑁄’𑀢𑀺 𑀦𑀸𑀫𑀓𑀸𑀬𑀲𑁆𑀲 𑀧𑀜𑁆𑀜𑀢𑁆𑀢𑀺 𑀳𑁄𑀢𑀺. 𑀢𑁂𑀲𑀼 𑀦𑀸𑀫𑀓𑀸𑀬𑀧𑁆𑀧𑀜𑁆𑀜𑀢𑁆𑀢𑀺𑀳𑁂𑀢𑀽𑀲𑀼 𑀯𑁂𑀤𑀦𑀸𑀤𑀻𑀲𑀼 𑀆𑀓𑀸𑀭𑀸𑀤𑀻𑀲𑀼 𑀅𑀲𑀢𑀺 𑀅𑀧𑀺 𑀦𑀼 𑀔𑁄 𑀭𑀽𑀧𑀓𑀸𑀬𑁂 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄 𑀧𑀜𑁆𑀜𑀸𑀬𑁂𑀣? 𑀬𑁆𑀯𑀸𑀬𑀁 𑀘𑀢𑁆𑀢𑀸𑀭𑁄 𑀔𑀦𑁆𑀥𑁂 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑁂 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑀯𑁂𑀯𑀘𑀦𑁄 𑀫𑀦𑁄𑀲𑀫𑁆𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀢𑀺, 𑀅𑀧𑀺 𑀦𑀼 𑀔𑁄 𑀲𑁄 𑀭𑀽𑀧𑀓𑀸𑀬𑁂 𑀧𑀜𑁆𑀜𑀸𑀬𑁂𑀣, 𑀧𑀜𑁆𑀘 𑀧𑀲𑀸𑀤𑁂 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺. 𑀅𑀣 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀫𑁆𑀩𑀭𑀼𑀓𑁆𑀔𑁂 𑀅𑀲𑀢𑀺 𑀚𑀫𑁆𑀩𑀼𑀭𑀼𑀓𑁆𑀔𑀢𑁄 𑀅𑀫𑁆𑀩𑀧𑀓𑁆𑀓𑀲𑁆𑀲 𑀉𑀧𑁆𑀧𑀢𑁆𑀢𑀺𑀁 𑀯𑀺𑀬 𑀭𑀽𑀧𑀓𑀸𑀬𑀢𑁄 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀁 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀦𑁄 𑀳𑁂𑀢𑀁 𑀪𑀦𑁆𑀢𑁂𑀢𑀺 𑀆𑀳.

𑀤𑀼𑀢𑀺𑀬𑀧𑀜𑁆𑀳𑁂 𑀭𑀼𑀧𑁆𑀧𑀦𑀸𑀓𑀸𑀭𑀭𑀼𑀧𑁆𑀧𑀦𑀮𑀺𑀗𑁆𑀕𑀭𑀼𑀧𑁆𑀧𑀦𑀦𑀺𑀫𑀺𑀢𑁆𑀢𑀯𑀲𑁂𑀦 𑀭𑀽𑀧𑀦𑁆𑀢𑀺 𑀉𑀤𑁆𑀤𑁂𑀲𑀯𑀲𑁂𑀦 𑀘 𑀆𑀓𑀸𑀭𑀸𑀤𑀻𑀦𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀝𑀺𑀖𑀲𑀫𑁆𑀨𑀲𑁆𑀲𑁄𑀢𑀺 𑀲𑀧𑁆𑀧𑀝𑀺𑀖𑀁 𑀭𑀽𑀧𑀓𑁆𑀔𑀦𑁆𑀥𑀁 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀓𑀲𑀫𑁆𑀨𑀲𑁆𑀲𑁄. 𑀇𑀥𑀸𑀧𑀺 𑀣𑁂𑀭𑁄 𑀚𑀫𑁆𑀩𑀼𑀭𑀼𑀓𑁆𑀔𑁂 𑀅𑀲𑀢𑀺 𑀅𑀫𑁆𑀩𑀭𑀼𑀓𑁆𑀔𑀢𑁄 𑀚𑀫𑁆𑀩𑀼𑀧𑀓𑁆𑀓𑀲𑁆𑀲 𑀉𑀧𑁆𑀧𑀢𑁆𑀢𑀺𑀁 𑀯𑀺𑀬 𑀦𑀸𑀫𑀓𑀸𑀬𑀢𑁄 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀁 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 ‘‘𑀦𑁄 𑀳𑁂𑀢𑀁 𑀪𑀦𑁆𑀢𑁂’’𑀢𑀺 𑀆𑀳.

𑀢𑀢𑀺𑀬𑀧𑀜𑁆𑀳𑁄 ¶ ¶ 𑀉𑀪𑀬𑀯𑀲𑁂𑀦𑁂𑀯 𑀯𑀼𑀢𑁆𑀢𑁄. 𑀢𑀢𑁆𑀭 𑀣𑁂𑀭𑁄 𑀆𑀓𑀸𑀲𑁂 𑀅𑀫𑁆𑀩𑀚𑀫𑁆𑀩𑀼𑀧𑀓𑁆𑀓𑀸𑀦𑀁 𑀉𑀧𑁆𑀧𑀢𑁆𑀢𑀺𑀁 𑀯𑀺𑀬 𑀦𑀸𑀫𑀭𑀽𑀧𑀸𑀪𑀸𑀯𑁂 𑀤𑁆𑀯𑀺𑀦𑁆𑀦𑀫𑁆𑀧𑀺 𑀨𑀲𑁆𑀲𑀸𑀦𑀁 𑀉𑀧𑁆𑀧𑀢𑁆𑀢𑀺𑀁 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 ‘‘𑀦𑁄 𑀳𑁂𑀢𑀁 𑀪𑀦𑁆𑀢𑁂’’𑀢𑀺 𑀆𑀳.

𑀏𑀯𑀁 𑀤𑁆𑀯𑀺𑀦𑁆𑀦𑀁 𑀨𑀲𑁆𑀲𑀸𑀦𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀘𑁆𑀘𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀢𑁂𑀲𑀁 𑀅𑀯𑀺𑀲𑁂𑀲𑀢𑁄 𑀦𑀸𑀫𑀭𑀽𑀧𑀧𑀘𑁆𑀘𑀬𑀢𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀬𑁂𑀳𑀺 𑀆𑀦𑀦𑁆𑀤 𑀆𑀓𑀸𑀭𑁂𑀳𑀻’’𑀢𑀺 𑀘𑀢𑀼𑀢𑁆𑀣𑀁 𑀧𑀜𑁆𑀳𑀁 𑀆𑀭𑀪𑀺. 𑀬𑀤𑀺𑀤𑀁 𑀦𑀸𑀫𑀭𑀽𑀧𑀦𑁆𑀢𑀺 𑀬𑀁 𑀇𑀤𑀁 𑀦𑀸𑀫𑀭𑀽𑀧𑀁, 𑀬𑀁 𑀇𑀤𑀁 𑀙𑀲𑀼𑀧𑀺 𑀤𑁆𑀯𑀸𑀭𑁂𑀲𑀼 𑀦𑀸𑀫𑀭𑀽𑀧𑀁, 𑀏𑀲𑁂𑀯 𑀳𑁂𑀢𑀼 𑀏𑀲𑁂𑀯 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄. 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀲𑀼 𑀳𑀺 𑀘𑀓𑁆𑀔𑀸𑀤𑀻𑀦𑀺 𑀘𑁂𑀯 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀦𑀺 𑀘 𑀭𑀽𑀧𑀁, 𑀲𑀫𑁆𑀧𑀬𑀼𑀢𑁆𑀢𑀓𑀸 𑀔𑀦𑁆𑀥𑀸 𑀦𑀸𑀫𑀦𑁆𑀢𑀺 𑀏𑀯𑀁 𑀧𑀜𑁆𑀘𑀯𑀺𑀥𑁄𑀧𑀺 𑀲𑁄 𑀨𑀲𑁆𑀲𑁄 𑀦𑀸𑀫𑀭𑀽𑀧𑀧𑀘𑁆𑀘𑀬𑀸𑀯 ¶ 𑀨𑀲𑁆𑀲𑁄. 𑀫𑀦𑁄𑀤𑁆𑀯𑀸𑀭𑁂𑀧𑀺 𑀳𑀤𑀬𑀯𑀢𑁆𑀣𑀼𑀜𑁆𑀘𑁂𑀯 𑀬𑀜𑁆𑀘 𑀭𑀽𑀧𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀇𑀤𑀁 𑀭𑀽𑀧𑀁. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀘𑁂𑀯 𑀬𑀜𑁆𑀘 𑀅𑀭𑀽𑀧𑀁 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀇𑀤𑀁 𑀅𑀭𑀽𑀧𑀁 𑀦𑀸𑀫. 𑀏𑀯𑀁 𑀫𑀦𑁄𑀲𑀫𑁆𑀨𑀲𑁆𑀲𑁄𑀧𑀺 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀦𑀸𑀫𑀭𑀽𑀧𑀁 𑀧𑀦𑀲𑁆𑀲 𑀩𑀳𑀼𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺.

𑁧𑁧𑁫. 𑀦 𑀑𑀓𑁆𑀓𑀫𑀺𑀲𑁆𑀲𑀣𑀸𑀢𑀺 𑀧𑀯𑀺𑀲𑀺𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀁 𑀯𑀺𑀬 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀦 𑀯𑀢𑁆𑀢𑀺𑀲𑁆𑀲𑀣. 𑀲𑀫𑀼𑀘𑁆𑀘𑀺𑀲𑁆𑀲𑀣𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂 𑀅𑀲𑀢𑀺 𑀅𑀧𑀺 𑀦𑀼 𑀔𑁄 𑀲𑀼𑀤𑁆𑀥𑀁 𑀅𑀯𑀲𑁂𑀲𑀁 𑀦𑀸𑀫𑀭𑀽𑀧𑀁 𑀅𑀦𑁆𑀢𑁄𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀓𑀮𑀮𑀸𑀤𑀺𑀪𑀸𑀯𑁂𑀦 𑀲𑀫𑀼𑀘𑁆𑀘𑀺𑀢𑀁 𑀫𑀺𑀲𑁆𑀲𑀓𑀪𑀽𑀢𑀁 𑀳𑀼𑀢𑁆𑀯𑀸 𑀯𑀢𑁆𑀢𑀺𑀲𑁆𑀲𑀣. 𑀑𑀓𑁆𑀓𑀫𑀺𑀢𑁆𑀯𑀸 𑀯𑁄𑀓𑁆𑀓𑀫𑀺𑀲𑁆𑀲𑀣𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀑𑀓𑁆𑀓𑀫𑀺𑀢𑁆𑀯𑀸 𑀘𑀼𑀢𑀺𑀯𑀲𑁂𑀦 𑀯𑁄𑀓𑁆𑀓𑀫𑀺𑀲𑁆𑀲𑀣, 𑀦𑀺𑀭𑀼𑀚𑁆𑀛𑀺𑀲𑁆𑀲𑀣𑀸𑀢𑀺 𑀅𑀢𑁆𑀣𑁄. 𑀲𑁄 𑀧𑀦𑀲𑁆𑀲 𑀦𑀺𑀭𑁄𑀥𑁄 𑀦 𑀢𑀲𑁆𑀲𑁂𑀯 𑀘𑀺𑀢𑁆𑀢𑀲𑁆𑀲 𑀦𑀺𑀭𑁄𑀥𑁂𑀦, 𑀦 𑀢𑀢𑁄 𑀤𑀼𑀢𑀺𑀬𑀢𑀢𑀺𑀬𑀸𑀦𑀁 𑀦𑀺𑀭𑁄𑀥𑁂𑀦 𑀳𑁄𑀢𑀺. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀳𑀺 𑀲𑀤𑁆𑀥𑀺𑀁 𑀲𑀫𑀼𑀝𑁆𑀞𑀺𑀢𑀸𑀦𑀺 𑀲𑀫𑀢𑀺𑀁𑀲 𑀓𑀫𑁆𑀫𑀚𑀭𑀽𑀧𑀸𑀦𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀢𑁂𑀲𑀼 𑀧𑀦 𑀞𑀺𑀢𑁂𑀲𑀼𑀬𑁂𑀯 𑀲𑁄𑀴𑀲 𑀪𑀯𑀗𑁆𑀕𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀕𑀳𑀺𑀢𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀤𑀸𑀭𑀓𑀲𑁆𑀲 𑀯𑀸 𑀫𑀸𑀢𑀼𑀬𑀸 𑀯𑀸 𑀧𑀦𑀲𑁆𑀲 𑀅𑀦𑁆𑀢𑀭𑀸𑀬𑁄 𑀦𑀢𑁆𑀣𑀺. 𑀅𑀬𑀜𑁆𑀳𑀺 𑀅𑀦𑁄𑀓𑀸𑀲𑁄 𑀦𑀸𑀫. 𑀲𑀘𑁂 𑀧𑀦 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑀼𑀝𑁆𑀞𑀺𑀢𑀭𑀽𑀧𑀸𑀦𑀺 𑀲𑀢𑁆𑀢𑀭𑀲𑀫𑀲𑁆𑀲 𑀪𑀯𑀗𑁆𑀕𑀲𑁆𑀲 𑀧𑀘𑁆𑀘𑀬𑀁 𑀤𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀧𑀯𑀢𑁆𑀢𑀺 𑀧𑀯𑀢𑁆𑀢𑀢𑀺, 𑀧𑀯𑁂𑀡𑀻 𑀖𑀝𑀺𑀬𑀢𑀺. 𑀲𑀘𑁂 𑀧𑀦 𑀦 𑀲𑀓𑁆𑀓𑁄𑀦𑁆𑀢𑀺, 𑀧𑀯𑀢𑁆𑀢𑀺 𑀦𑀧𑁆𑀧𑀯𑀢𑁆𑀢𑀢𑀺, 𑀧𑀯𑁂𑀡𑀻 𑀦 𑀖𑀝𑀺𑀬𑀢𑀺, 𑀯𑁄𑀓𑁆𑀓𑀫𑀢𑀺 𑀦𑀸𑀫 𑀳𑁄𑀢𑀺. 𑀢𑀁 𑀲𑀦𑁆𑀥𑀸𑀬 ‘‘𑀑𑀓𑁆𑀓𑀫𑀺𑀢𑁆𑀯𑀸 𑀯𑁄𑀓𑁆𑀓𑀫𑀺𑀲𑁆𑀲𑀣𑀸’’𑀢𑀺 𑀯𑀼𑀢𑁆𑀢𑀁.

𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀇𑀢𑁆𑀣𑀪𑀸𑀯𑀸𑀬, 𑀏𑀯𑀁 𑀧𑀭𑀺𑀧𑀼𑀡𑁆𑀡𑀧𑀜𑁆𑀘𑀓𑁆𑀔𑀦𑁆𑀥𑀪𑀸𑀯𑀸𑀬𑀸𑀢𑀺 𑀅𑀢𑁆𑀣𑁄. 𑀤𑀳𑀭𑀲𑁆𑀲𑁂𑀯 𑀲𑀢𑁄𑀢𑀺 𑀫𑀦𑁆𑀤𑀲𑁆𑀲 𑀩𑀸𑀮𑀲𑁆𑀲𑁂𑀯 𑀲𑀦𑁆𑀢𑀲𑁆𑀲. 𑀯𑁄𑀘𑁆𑀙𑀺𑀚𑁆𑀚𑀺𑀲𑁆𑀲𑀣𑀸𑀢𑀺 𑀉𑀧𑀘𑁆𑀙𑀺𑀚𑁆𑀚𑀺𑀲𑁆𑀲𑀣 ¶ 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀦𑁆𑀢𑀺 𑀯𑀺𑀜𑁆𑀜𑀸𑀡𑁂 𑀉𑀧𑀘𑁆𑀙𑀺𑀦𑁆𑀦𑁂 𑀲𑀼𑀤𑁆𑀥𑀁 𑀦𑀸𑀫𑀭𑀽𑀧𑀫𑁂𑀯 𑀉𑀝𑁆𑀞𑀳𑀺𑀢𑁆𑀯𑀸 𑀧𑀞𑀫𑀯𑀬𑀯𑀲𑁂𑀦 𑀯𑀼𑀟𑁆𑀠𑀺𑀁, 𑀫𑀚𑁆𑀛𑀺𑀫𑀯𑀬𑀯𑀲𑁂𑀦 𑀯𑀺𑀭𑀽𑀴𑁆𑀳𑀺𑀁, 𑀧𑀘𑁆𑀙𑀺𑀫𑀯𑀬𑀯𑀲𑁂𑀦 𑀯𑁂𑀧𑀼𑀮𑁆𑀮𑀁 𑀅𑀧𑀺 𑀦𑀼 𑀔𑁄 𑀆𑀧𑀚𑁆𑀚𑀺𑀲𑁆𑀲𑀣𑀸𑀢𑀺. 𑀤𑀲𑀯𑀲𑁆𑀲𑀯𑀻𑀲𑀢𑀺𑀯𑀲𑁆𑀲𑀯𑀲𑁆𑀲𑀲𑀢𑀯𑀲𑁆𑀲𑀲𑀳𑀲𑁆𑀲𑀲𑀫𑁆𑀧𑀸𑀧𑀦𑁂𑀦 ¶ 𑀯𑀸 𑀅𑀧𑀺 𑀦𑀼 𑀔𑁄 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀣𑀸𑀢𑀺 𑀅𑀢𑁆𑀣𑁄.

𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤𑀸𑀢𑀺 𑀬𑀲𑁆𑀫𑀸 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂𑀧𑀺 ¶ 𑀓𑀼𑀘𑁆𑀙𑀺𑀯𑀸𑀲𑁂𑀧𑀺 𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑁂𑀧𑀺, 𑀧𑀯𑀢𑁆𑀢𑀺𑀬𑀁 𑀤𑀲𑀯𑀲𑁆𑀲𑀸𑀤𑀺𑀓𑀸𑀮𑁂𑀧𑀺 𑀯𑀺𑀜𑁆𑀜𑀸𑀡𑀫𑁂𑀯𑀲𑁆𑀲 𑀧𑀘𑁆𑀘𑀬𑁄, 𑀢𑀲𑁆𑀫𑀸 𑀏𑀲𑁂𑀯 𑀳𑁂𑀢𑀼 𑀏𑀲 𑀧𑀘𑁆𑀘𑀬𑁄 𑀦𑀸𑀫𑀭𑀽𑀧𑀲𑁆𑀲, 𑀬𑀤𑀺𑀤𑀁 𑀯𑀺𑀜𑁆𑀜𑀸𑀡𑀁. 𑀬𑀣𑀸 𑀳𑀺 𑀭𑀸𑀚𑀸 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀦𑀺𑀕𑁆𑀕𑀡𑁆𑀳𑀦𑁆𑀢𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀢𑁆𑀯𑀁 𑀉𑀧𑀭𑀸𑀚𑀸, 𑀢𑁆𑀯𑀁 𑀲𑁂𑀦𑀸𑀧𑀢𑀻𑀢𑀺 𑀓𑁂𑀦 𑀓𑀢𑁄 𑀦𑀦𑀼 𑀫𑀬𑀸 𑀓𑀢𑁄, 𑀲𑀘𑁂 𑀳𑀺 𑀫𑀬𑀺 𑀅𑀓𑀭𑁄𑀦𑁆𑀢𑁂 𑀢𑁆𑀯𑀁 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀉𑀧𑀭𑀸𑀚𑀸 𑀯𑀸 𑀲𑁂𑀦𑀸𑀧𑀢𑀺 𑀯𑀸 𑀪𑀯𑁂𑀬𑁆𑀬𑀸𑀲𑀺, 𑀚𑀸𑀦𑁂𑀬𑁆𑀬𑀸𑀫 𑀯𑁄 𑀩𑀮’’𑀦𑁆𑀢𑀺; 𑀏𑀯𑀫𑁂𑀯 𑀯𑀺𑀜𑁆𑀜𑀸𑀡𑀁 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀢𑁆𑀣𑀢𑁄 𑀏𑀯𑀁 𑀦𑀸𑀫𑀭𑀽𑀧𑀁 𑀯𑀤𑀢𑀺 𑀯𑀺𑀬 ‘‘𑀢𑁆𑀯𑀁 𑀦𑀸𑀫𑀁, 𑀢𑁆𑀯𑀁 𑀭𑀽𑀧𑀁, 𑀢𑁆𑀯𑀁 𑀦𑀸𑀫𑀭𑀽𑀧𑀁 𑀦𑀸𑀫𑀸𑀢𑀺 𑀓𑁂𑀦 𑀓𑀢𑀁, 𑀦𑀦𑀼 𑀫𑀬𑀸 𑀓𑀢𑀁, 𑀲𑀘𑁂 𑀳𑀺 𑀫𑀬𑀺 𑀧𑀼𑀭𑁂𑀘𑀸𑀭𑀺𑀓𑁂 𑀳𑀼𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀅𑀕𑀡𑁆𑀳𑀦𑁆𑀢𑁂 𑀢𑁆𑀯𑀁 𑀦𑀸𑀫𑀁 𑀯𑀸 𑀭𑀽𑀧𑀁 𑀯𑀸 𑀦𑀸𑀫𑀭𑀽𑀧𑀁 𑀯𑀸 𑀪𑀯𑁂𑀬𑁆𑀬𑀸𑀲𑀺, 𑀚𑀸𑀦𑁂𑀬𑁆𑀬𑀸𑀫 𑀯𑁄 𑀩𑀮’’𑀦𑁆𑀢𑀺. 𑀢𑀁 𑀧𑀦𑁂𑀢𑀁 𑀯𑀺𑀜𑁆𑀜𑀸𑀡𑀁 𑀦𑀸𑀫𑀭𑀽𑀧𑀲𑁆𑀲 𑀩𑀳𑀼𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺.

𑁧𑁧𑁬. 𑀤𑀼𑀓𑁆𑀔𑀲𑀫𑀼𑀤𑀬𑀲𑀫𑁆𑀪𑀯𑁄𑀢𑀺 𑀤𑀼𑀓𑁆𑀔𑀭𑀸𑀲𑀺𑀲𑀫𑁆𑀪𑀯𑁄. 𑀬𑀤𑀺𑀤𑀁 𑀦𑀸𑀫𑀭𑀽𑀧𑀦𑁆𑀢𑀺 𑀬𑀁 𑀇𑀤𑀁 𑀦𑀸𑀫𑀭𑀽𑀧𑀁, 𑀏𑀲𑁂𑀯 𑀳𑁂𑀢𑀼 𑀏𑀲 𑀧𑀘𑁆𑀘𑀬𑁄. 𑀬𑀣𑀸 𑀳𑀺 𑀭𑀸𑀚𑀧𑀼𑀭𑀺𑀲𑀸 𑀭𑀸𑀚𑀸𑀦𑀁 𑀦𑀺𑀕𑁆𑀕𑀡𑁆𑀳𑀦𑁆𑀢𑁄 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘‘𑀢𑁆𑀯𑀁 𑀭𑀸𑀚𑀸𑀢𑀺 𑀓𑁂𑀦 𑀓𑀢𑁄, 𑀦𑀦𑀼 𑀫𑀬𑀸 𑀓𑀢𑁄, 𑀲𑀘𑁂 𑀳𑀺 𑀫𑀬𑀺 𑀉𑀧𑀭𑀸𑀚𑀝𑁆𑀞𑀸𑀦𑁂, 𑀫𑀬𑀺 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑁂 𑀅𑀢𑀺𑀝𑁆𑀞𑀦𑁆𑀢𑁂 𑀢𑁆𑀯𑀁 𑀏𑀓𑀓𑁄𑀯 𑀭𑀸𑀚𑀸 𑀪𑀯𑁂𑀬𑁆𑀬𑀸𑀲𑀺, 𑀧𑀲𑁆𑀲𑁂𑀬𑁆𑀬𑀸𑀫 𑀢𑁂 𑀭𑀸𑀚𑀪𑀸𑀯’’𑀦𑁆𑀢𑀺; 𑀏𑀯𑀫𑁂𑀯 𑀦𑀸𑀫𑀭𑀽𑀧𑀫𑁆𑀧𑀺 𑀅𑀢𑁆𑀣𑀢𑁄 𑀏𑀯𑀁 𑀯𑀺𑀜𑁆𑀜𑀸𑀡𑀁 𑀯𑀤𑀢𑀺 𑀯𑀺𑀬 ‘‘𑀢𑁆𑀯𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀦𑁆𑀢𑀺 𑀓𑁂𑀦 𑀓𑀢𑀁, 𑀦𑀦𑀼 𑀅𑀫𑁆𑀳𑁂𑀳𑀺 𑀓𑀢𑀁, 𑀲𑀘𑁂 𑀳𑀺 𑀢𑁆𑀯𑀁 𑀢𑀬𑁄 𑀔𑀦𑁆𑀥𑁂 𑀳𑀤𑀬𑀯𑀢𑁆𑀣𑀼𑀜𑁆𑀘 𑀅𑀦𑀺𑀲𑁆𑀲𑀸𑀬 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀦𑀸𑀫 𑀪𑀯𑁂𑀬𑁆𑀬𑀸𑀲𑀺, 𑀧𑀲𑁆𑀲𑁂𑀬𑁆𑀬𑀸𑀫 𑀢𑁂 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀪𑀸𑀯’’𑀦𑁆𑀢𑀺. 𑀢𑀜𑁆𑀘 𑀧𑀦𑁂𑀢𑀁 𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀲𑁆𑀲 𑀩𑀳𑀼𑀥𑀸 𑀧𑀘𑁆𑀘𑀬𑁄 𑀳𑁄𑀢𑀺.

𑀏𑀢𑁆𑀢𑀸𑀯𑀢𑀸 𑀔𑁄𑀢𑀺 𑀯𑀺𑀜𑁆𑀜𑀸𑀡𑁂 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑁂 𑀳𑁄𑀦𑁆𑀢𑁂, 𑀦𑀸𑀫𑀭𑀽𑀧𑁂 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁂 𑀳𑁄𑀦𑁆𑀢𑁂, 𑀤𑁆𑀯𑀻𑀲𑀼 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀯𑀲𑁂𑀦 𑀧𑀯𑀢𑁆𑀢𑁂𑀲𑀼 𑀏𑀢𑁆𑀢𑀓𑁂𑀦 ¶ 𑀚𑀸𑀬𑁂𑀣 𑀯𑀸…𑀧𑁂… 𑀉𑀧𑀧𑀚𑁆𑀚𑁂𑀣 𑀯𑀸, 𑀚𑀸𑀢𑀺𑀆𑀤𑀬𑁄 𑀧𑀜𑁆𑀜𑀸𑀬𑁂𑀬𑁆𑀬𑀼𑀁 𑀅𑀧𑀭𑀸𑀧𑀭𑀁 𑀯𑀸 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄𑀢𑀺.

𑀅𑀥𑀺𑀯𑀘𑀦𑀧𑀣𑁄𑀢𑀺 ‘‘𑀲𑀺𑀭𑀺𑀯𑀟𑁆𑀠𑀓𑁄 𑀥𑀦𑀯𑀟𑁆𑀠𑀓𑁄’’𑀢𑀺𑀆𑀤𑀺𑀓𑀲𑁆𑀲 𑀅𑀢𑁆𑀣𑀁 𑀅𑀤𑀺𑀲𑁆𑀯𑀸 𑀯𑀘𑀦𑀫𑀢𑁆𑀢𑀫𑁂𑀯 𑀅𑀥𑀺𑀓𑀺𑀘𑁆𑀘 𑀧𑀯𑀢𑁆𑀢𑀲𑁆𑀲 𑀯𑁄𑀳𑀸𑀭𑀲𑁆𑀲 𑀧𑀣𑁄. 𑀦𑀺𑀭𑀼𑀢𑁆𑀢𑀺𑀧𑀣𑁄𑀢𑀺 𑀲𑀭𑀢𑀻𑀢𑀺 𑀲𑀢𑁄, 𑀲𑀫𑁆𑀧𑀚𑀸𑀦𑀸𑀢𑀻𑀢𑀺 𑀲𑀫𑁆𑀧𑀚𑀸𑀦𑁄𑀢𑀺𑀆𑀤𑀺𑀓𑀲𑁆𑀲 ¶ 𑀓𑀸𑀭𑀡𑀸𑀧𑀤𑁂𑀲𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀯𑁄𑀳𑀸𑀭𑀲𑁆𑀲 𑀧𑀣𑁄. 𑀧𑀜𑁆𑀜𑀢𑁆𑀢𑀺𑀧𑀣𑁄𑀢𑀺 𑁋 ‘‘𑀧𑀡𑁆𑀟𑀺𑀢𑁄 ¶ 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀦𑀺𑀧𑀼𑀡𑁄 𑀓𑀢𑀧𑀭𑀧𑁆𑀧𑀯𑀸𑀤𑁄’’𑀢𑀺𑀆𑀤𑀺𑀓𑀲𑁆𑀲 𑀦𑀸𑀦𑀧𑁆𑀧𑀓𑀸𑀭𑀢𑁄 𑀜𑀸𑀧𑀦𑀯𑀲𑁂𑀦 𑀧𑀯𑀢𑁆𑀢𑀲𑁆𑀲 𑀯𑁄𑀳𑀸𑀭𑀲𑁆𑀲 𑀧𑀣𑁄. 𑀇𑀢𑀺 𑀢𑀻𑀳𑀺 𑀧𑀤𑁂𑀳𑀺 𑀅𑀥𑀺𑀯𑀘𑀦𑀸𑀤𑀻𑀦𑀁 𑀯𑀢𑁆𑀣𑀼𑀪𑀽𑀢𑀸 𑀔𑀦𑁆𑀥𑀸𑀯 𑀓𑀣𑀺𑀢𑀸. 𑀧𑀜𑁆𑀜𑀸𑀯𑀘𑀭𑀦𑁆𑀢𑀺 𑀧𑀜𑁆𑀜𑀸𑀬 𑀅𑀯𑀘𑀭𑀺𑀢𑀩𑁆𑀩𑀁 𑀚𑀸𑀦𑀺𑀢𑀩𑁆𑀩𑀁. 𑀯𑀝𑁆𑀝𑀁 𑀯𑀢𑁆𑀢𑀢𑀻𑀢𑀺 𑀲𑀁𑀲𑀸𑀭𑀯𑀝𑁆𑀝𑀁 𑀯𑀢𑁆𑀢𑀢𑀺. 𑀇𑀢𑁆𑀣𑀢𑁆𑀢𑀦𑁆𑀢𑀺 𑀇𑀢𑁆𑀣𑀁𑀪𑀸𑀯𑁄, 𑀔𑀦𑁆𑀥𑀧𑀜𑁆𑀘𑀓𑀲𑁆𑀲𑁂𑀢𑀁 𑀦𑀸𑀫𑀁. 𑀧𑀜𑁆𑀜𑀸𑀧𑀦𑀸𑀬𑀸𑀢𑀺 𑀦𑀸𑀫𑀧𑀜𑁆𑀜𑀢𑁆𑀢𑀢𑁆𑀣𑀸𑀬. ‘‘𑀯𑁂𑀤𑀦𑀸 𑀲𑀜𑁆𑀜𑀸’’𑀢𑀺𑀆𑀤𑀺𑀦𑀸 𑀦𑀸𑀫𑀧𑀜𑁆𑀜𑀢𑁆𑀢𑀢𑁆𑀣𑀸𑀬, 𑀔𑀦𑁆𑀥𑀧𑀜𑁆𑀘𑀓𑀫𑁆𑀧𑀺 𑀏𑀢𑁆𑀢𑀸𑀯𑀢𑀸 𑀧𑀜𑁆𑀜𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀬𑀤𑀺𑀤𑀁 𑀦𑀸𑀫𑀭𑀽𑀧𑀁 𑀲𑀳 𑀯𑀺𑀜𑁆𑀜𑀸𑀡𑁂𑀦𑀸𑀢𑀺 𑀬𑀁 𑀇𑀤𑀁 𑀦𑀸𑀫𑀭𑀽𑀧𑀁 𑀲𑀳 𑀯𑀺𑀜𑁆𑀜𑀸𑀡𑁂𑀦 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀸𑀬 𑀧𑀯𑀢𑁆𑀢𑀢𑀺, 𑀏𑀢𑁆𑀢𑀸𑀯𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀜𑁆𑀳𑁂𑀢𑁆𑀣 𑀦𑀺𑀬𑁆𑀬𑀸𑀢𑀺𑀢𑀯𑀘𑀦𑀁.

𑀅𑀢𑁆𑀢𑀧𑀜𑁆𑀜𑀢𑁆𑀢𑀺𑀯𑀡𑁆𑀡𑀦𑀸

𑁧𑁧𑁭. 𑀇𑀢𑀺 𑀪𑀕𑀯𑀸 𑁋 ‘‘𑀕𑀫𑁆𑀪𑀻𑀭𑁄 𑀘𑀸𑀬𑀁, 𑀆𑀦𑀦𑁆𑀤, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄, 𑀕𑀫𑁆𑀪𑀻𑀭𑀸𑀯𑀪𑀸𑀲𑁄 𑀘𑀸’’𑀢𑀺 𑀧𑀤𑀲𑁆𑀲 𑀅𑀦𑀼𑀲𑀦𑁆𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀢𑀦𑁆𑀢𑀸𑀓𑀼𑀮𑀓𑀚𑀸𑀢𑀸’’𑀢𑀺 𑀧𑀤𑀲𑁆𑀲 𑀅𑀦𑀼𑀲𑀦𑁆𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀺𑀢𑁆𑀢𑀸𑀯𑀢𑀸 𑀘𑀸’’𑀢𑀺𑀆𑀤𑀺𑀓𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀭𑀽𑀧𑀺𑀁 𑀯𑀸 𑀳𑀺, 𑀆𑀦𑀦𑁆𑀤, 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀦𑁆𑀢𑀺𑀆𑀤𑀻𑀲𑀼 𑀬𑁄 𑀅𑀯𑀟𑁆𑀠𑀺𑀢𑀁 𑀓𑀲𑀺𑀡𑀦𑀺𑀫𑀺𑀢𑁆𑀢𑀁 𑀅𑀢𑁆𑀢𑀸𑀢𑀺 𑀕𑀡𑁆𑀳𑀸𑀢𑀺, 𑀲𑁄 𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀧𑀜𑁆𑀜𑀧𑁂𑀢𑀺. 𑀬𑁄 𑀧𑀦 𑀦𑀸𑀦𑀸𑀓𑀲𑀺𑀡𑀮𑀸𑀪𑀻 𑀳𑁄𑀢𑀺, 𑀲𑁄 𑀢𑀁 𑀓𑀤𑀸𑀘𑀺 𑀦𑀻𑀮𑁄, 𑀓𑀤𑀸𑀘𑀺 𑀧𑀻𑀢𑀓𑁄𑀢𑀺 𑀧𑀜𑁆𑀜𑀧𑁂𑀢𑀺. 𑀬𑁄 𑀯𑀟𑁆𑀠𑀺𑀢𑀁 𑀓𑀲𑀺𑀡𑀦𑀺𑀫𑀺𑀢𑁆𑀢𑀁 𑀅𑀢𑁆𑀢𑀸𑀢𑀺 𑀕𑀡𑁆𑀳𑀸𑀢𑀺, 𑀲𑁄 𑀭𑀽𑀧𑀺𑀁 𑀅𑀦𑀦𑁆𑀢𑀁 𑀧𑀜𑁆𑀜𑀧𑁂𑀢𑀺. 𑀬𑁄 𑀯𑀸 𑀧𑀦 𑀅𑀯𑀟𑁆𑀠𑀺𑀢𑀁 𑀓𑀲𑀺𑀡𑀦𑀺𑀫𑀺𑀢𑁆𑀢𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀦𑀺𑀫𑀺𑀢𑁆𑀢𑀨𑀼𑀝𑁆𑀞𑁄𑀓𑀸𑀲𑀁 𑀯𑀸 𑀢𑀢𑁆𑀣 𑀧𑀯𑀢𑁆𑀢𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑁂 𑀯𑀸 𑀢𑁂𑀲𑀼 𑀯𑀺𑀜𑁆𑀜𑀸𑀡𑀫𑀢𑁆𑀢𑀫𑁂𑀯 𑀯𑀸 𑀅𑀢𑁆𑀢𑀸𑀢𑀺 𑀕𑀡𑁆𑀳𑀸𑀢𑀺, 𑀲𑁄 𑀅𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀧𑀜𑁆𑀜𑀧𑁂𑀢𑀺. 𑀬𑁄 𑀯𑀟𑁆𑀠𑀺𑀢𑀁 𑀦𑀺𑀫𑀺𑀢𑁆𑀢𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀦𑀺𑀫𑀺𑀢𑁆𑀢𑀨𑀼𑀝𑁆𑀞𑁄𑀓𑀸𑀲𑀁 𑀯𑀸 𑀢𑀢𑁆𑀣 𑀧𑀯𑀢𑁆𑀢𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑁂 𑀯𑀸 𑀢𑁂𑀲𑀼 𑀯𑀺𑀜𑁆𑀜𑀸𑀡𑀫𑀢𑁆𑀢𑀫𑁂𑀯 𑀯𑀸 𑀅𑀢𑁆𑀢𑀸𑀢𑀺 𑀕𑀡𑁆𑀳𑀸𑀢𑀺, 𑀲𑁄 𑀅𑀭𑀽𑀧𑀺𑀁 𑀅𑀦𑀦𑁆𑀢𑀁 𑀧𑀜𑁆𑀜𑀧𑁂𑀢𑀺.

𑁧𑁧𑁮. 𑀢𑀢𑁆𑀭𑀸𑀦𑀦𑁆𑀤𑀸𑀢𑀺 ¶ 𑀏𑀢𑁆𑀣 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀘𑀢𑀽𑀲𑀼 𑀤𑀺𑀝𑁆𑀞𑀺𑀕𑀢𑀺𑀓𑁂𑀲𑀼. 𑀏𑀢𑀭𑀳𑀺 𑀯𑀸𑀢𑀺 𑀇𑀤𑀸𑀦𑁂𑀯, 𑀦 𑀇𑀢𑁄 𑀧𑀭𑀁. 𑀉𑀘𑁆𑀙𑁂𑀤𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀢𑀢𑁆𑀣𑀪𑀸𑀯𑀺𑀁 𑀯𑀸𑀢𑀺 𑀢𑀢𑁆𑀣 𑀯𑀸 𑀧𑀭𑀮𑁄𑀓𑁂 𑀪𑀸𑀯𑀺𑀁. 𑀲𑀲𑁆𑀲𑀢𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀅𑀢𑀣𑀁 𑀯𑀸 𑀧𑀦 𑀲𑀦𑁆𑀢𑀦𑁆𑀢𑀺 𑀅𑀢𑀣𑀲𑀪𑀸𑀯𑀁 𑀲𑀫𑀸𑀦𑀁. 𑀢𑀣𑀢𑁆𑀢𑀸𑀬𑀸𑀢𑀺 𑀢𑀣𑀪𑀸𑀯𑀸𑀬. 𑀉𑀧𑀓𑀧𑁆𑀧𑁂𑀲𑁆𑀲𑀸𑀫𑀻𑀢𑀺 𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀺. 𑀇𑀫𑀺𑀦𑀸 𑀯𑀺𑀯𑀸𑀤𑀁 𑀤𑀲𑁆𑀲𑁂𑀢𑀺. 𑀉𑀘𑁆𑀙𑁂𑀤𑀯𑀸𑀤𑀻 𑀳𑀺 ‘‘𑀲𑀲𑁆𑀲𑀢𑀯𑀸𑀤𑀺𑀦𑁄 𑀅𑀢𑁆𑀢𑀸𑀦𑀁 𑀅𑀢𑀣𑀁 𑀅𑀦𑀼𑀘𑁆𑀙𑁂𑀤𑀲𑀪𑀸𑀯𑀫𑁆𑀧𑀺 𑀲𑀫𑀸𑀦𑀁 𑀢𑀣𑀢𑁆𑀣𑀸𑀬 ¶ 𑀉𑀘𑁆𑀙𑁂𑀤𑀲𑀪𑀸𑀯𑀸𑀬 𑀉𑀧𑀓𑀧𑁆𑀧𑁂𑀲𑁆𑀲𑀸𑀫𑀺, 𑀲𑀲𑁆𑀲𑀢𑀯𑀸𑀤𑀜𑁆𑀘 𑀚𑀸𑀦𑀸𑀧𑁂𑀢𑁆𑀯𑀸 𑀉𑀘𑁆𑀙𑁂𑀤𑀯𑀸𑀤𑀫𑁂𑀯 𑀦𑀁 𑀕𑀸𑀳𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑀺. 𑀲𑀲𑁆𑀲𑀢𑀯𑀸𑀤𑀻𑀧𑀺 ‘‘𑀉𑀘𑁆𑀙𑁂𑀤𑀯𑀸𑀤𑀺𑀦𑁄 𑀅𑀢𑁆𑀢𑀸𑀦𑀁 𑀅𑀢𑀣𑀁 𑀅𑀲𑀲𑁆𑀲𑀢𑀲𑀪𑀸𑀯𑀫𑁆𑀧𑀺 𑀲𑀫𑀸𑀦𑀁 𑀢𑀣𑀢𑁆𑀣𑀸𑀬 𑀲𑀲𑁆𑀲𑀢𑀪𑀸𑀯𑀸𑀬 𑀉𑀧𑀓𑀧𑁆𑀧𑁂𑀲𑁆𑀲𑀸𑀫𑀺, 𑀉𑀘𑁆𑀙𑁂𑀤𑀯𑀸𑀤𑀜𑁆𑀘 𑀚𑀸𑀦𑀸𑀧𑁂𑀢𑁆𑀯𑀸 𑀲𑀲𑁆𑀲𑀢𑀯𑀸𑀤𑀫𑁂𑀯 𑀦𑀁 𑀕𑀸𑀳𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑀺.

𑀏𑀯𑀁 ¶ 𑀲𑀦𑁆𑀢𑀁 𑀔𑁄𑀢𑀺 𑀏𑀯𑀁 𑀲𑀫𑀸𑀦𑀁 𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀭𑀽𑀧𑀺𑀦𑁆𑀢𑀺 𑀭𑀽𑀧𑀓𑀲𑀺𑀡𑀮𑀸𑀪𑀺𑀁. 𑀧𑀭𑀺𑀢𑁆𑀢𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀅𑀦𑀼𑀲𑁂𑀢𑀻𑀢𑀺 𑀧𑀭𑀺𑀢𑁆𑀢𑁄 𑀅𑀢𑁆𑀢𑀸𑀢𑀺 𑀅𑀬𑀁 𑀤𑀺𑀝𑁆𑀞𑀺 𑀅𑀦𑀼𑀲𑁂𑀢𑀺, 𑀲𑀸 𑀧𑀦 𑀦 𑀯𑀮𑁆𑀮𑀺 𑀯𑀺𑀬 𑀘 𑀮𑀢𑀸 𑀯𑀺𑀬 𑀘 𑀅𑀦𑀼𑀲𑁂𑀢𑀺. 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀅𑀦𑀼𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀘𑁆𑀘𑀸𑀮𑀁 𑀯𑀘𑀦𑀸𑀬𑀸𑀢𑀺 𑀢𑀁 𑀧𑀼𑀕𑁆𑀕𑀮𑀁 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀅𑀦𑀼𑀲𑁂𑀢𑀻𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀅𑀭𑀽𑀧𑀺𑀦𑁆𑀢𑀺 𑀏𑀢𑁆𑀣 𑀧𑀦 𑀅𑀭𑀽𑀧𑀓𑀲𑀺𑀡𑀮𑀸𑀪𑀺𑀁, 𑀅𑀭𑀽𑀧𑀓𑁆𑀔𑀦𑁆𑀥𑀕𑁄𑀘𑀭𑀁 𑀯𑀸𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀢𑀸𑀯𑀢𑀸 𑀮𑀸𑀪𑀺𑀦𑁄 𑀘𑀢𑁆𑀢𑀸𑀭𑁄, 𑀢𑁂𑀲𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀘𑀢𑁆𑀢𑀸𑀭𑁄, 𑀢𑀓𑁆𑀓𑀺𑀓𑀸 𑀘𑀢𑁆𑀢𑀸𑀭𑁄, 𑀢𑁂𑀲𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀘𑀢𑁆𑀢𑀸𑀭𑁄𑀢𑀺 𑀅𑀢𑁆𑀢𑀢𑁄 𑀲𑁄𑀴𑀲 𑀤𑀺𑀝𑁆𑀞𑀺𑀕𑀢𑀺𑀓𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺.

𑀦𑀅𑀢𑁆𑀢𑀧𑀜𑁆𑀜𑀢𑁆𑀢𑀺𑀯𑀡𑁆𑀡𑀦𑀸

𑁧𑁧𑁯. 𑀏𑀯𑀁 𑀬𑁂 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑁂 𑀦 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂 𑀤𑀲𑁆𑀲𑁂𑀢𑀼𑀁 𑁋 ‘‘𑀓𑀺𑀢𑁆𑀢𑀸𑀯𑀢𑀸 𑀘 𑀆𑀦𑀦𑁆𑀤𑀸’’𑀢𑀺𑀆𑀤𑀺𑀫𑀸𑀳. 𑀓𑁂 𑀧𑀦 𑀦 𑀧𑀜𑁆𑀜𑀧𑁂𑀦𑁆𑀢𑀺? 𑀲𑀩𑁆𑀩𑁂 𑀢𑀸𑀯 𑀅𑀭𑀺𑀬𑀧𑀼𑀕𑁆𑀕𑀮𑀸 𑀦 𑀧𑀜𑁆𑀜𑀧𑁂𑀦𑁆𑀢𑀺. 𑀬𑁂 𑀘 𑀩𑀳𑀼𑀲𑁆𑀲𑀼𑀢𑀸 𑀢𑀺𑀧𑀺𑀝𑀓𑀥𑀭𑀸 𑀤𑁆𑀯𑀺𑀧𑀺𑀝𑀓𑀥𑀭𑀸 𑀏𑀓𑀧𑀺𑀝𑀓𑀥𑀭𑀸, 𑀅𑀦𑁆𑀢𑀫𑀲𑁄 𑀏𑀓𑀦𑀺𑀓𑀸𑀬𑀫𑁆𑀧𑀺 𑀲𑀸𑀥𑀼𑀓𑀁 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀉𑀕𑁆𑀕𑀳𑀺𑀢𑀥𑀫𑁆𑀫𑀓𑀣𑀺𑀓𑁄𑀧𑀺 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄𑀧𑀺 𑀧𑀼𑀕𑁆𑀕𑀮𑁄, 𑀢𑁂 𑀦 𑀧𑀜𑁆𑀜𑀧𑁂𑀦𑁆𑀢𑀺𑀬𑁂𑀯. 𑀏𑀢𑁂𑀲𑀜𑁆𑀳𑀺 𑀧𑀝𑀺𑀪𑀸𑀕𑀓𑀲𑀺𑀡𑁂 𑀧𑀝𑀺𑀪𑀸𑀕𑀓𑀲𑀺𑀡𑀫𑀺𑀘𑁆𑀘𑁂𑀯 𑀜𑀸𑀡𑀁 𑀳𑁄𑀢𑀺. 𑀅𑀭𑀽𑀧𑀓𑁆𑀔𑀦𑁆𑀥𑁂𑀲𑀼 𑀘 𑀅𑀭𑀽𑀧𑀓𑁆𑀔𑀦𑁆𑀥𑀸 𑀇𑀘𑁆𑀘𑁂𑀯.

𑀅𑀢𑁆𑀢𑀲𑀫𑀦𑀼𑀧𑀲𑁆𑀲𑀦𑀸𑀯𑀡𑁆𑀡𑀦𑀸

𑁧𑁨𑁧. 𑀏𑀯𑀁 ¶ 𑀬𑁂 𑀦 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑁂 𑀢𑁂 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂 𑀬𑀲𑁆𑀫𑀸 𑀤𑀺𑀝𑁆𑀞𑀺𑀯𑀲𑁂𑀦 𑀲𑀫𑀦𑀼𑀧𑀲𑁆𑀲𑀺𑀢𑁆𑀯𑀸 𑀧𑀜𑁆𑀜𑀧𑁂𑀦𑁆𑀢𑀺, 𑀲𑀸 𑀘 𑀦𑁂𑀲𑀁 𑀲𑀫𑀦𑀼𑀧𑀲𑁆𑀲𑀦𑀸 𑀯𑀻𑀲𑀢𑀺𑀯𑀢𑁆𑀣𑀼𑀓𑀸𑀬 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀅𑀧𑁆𑀧𑀳𑀻𑀦𑀢𑁆𑀢𑀸 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀯𑀻𑀲𑀢𑀺𑀯𑀢𑁆𑀣𑀼𑀓𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀓𑀺𑀢𑁆𑀢𑀸𑀯𑀢𑀸 𑀘 𑀆𑀦𑀦𑁆𑀤𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀯𑁂𑀤𑀦𑀁 𑀯𑀸 𑀳𑀻𑀢𑀺 𑀇𑀫𑀺𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀓𑀣𑀺𑀢𑀸. 𑀅𑀧𑁆𑀧𑀝𑀺𑀲𑀁𑀯𑁂𑀤𑀦𑁄 𑀫𑁂 𑀅𑀢𑁆𑀢𑀸𑀢𑀺 𑀇𑀫𑀺𑀦𑀸 𑀭𑀽𑀧𑀓𑁆𑀔𑀦𑁆𑀥𑀯𑀢𑁆𑀣𑀼𑀓𑀸. 𑀅𑀢𑁆𑀢𑀸 𑀫𑁂 𑀯𑁂𑀤𑀺𑀬𑀢𑀺, 𑀯𑁂𑀤𑀦𑀸𑀥𑀫𑁆𑀫𑁄 𑀳𑀺 𑀫𑁂 𑀅𑀢𑁆𑀢𑀸𑀢𑀺 𑀇𑀫𑀺𑀦𑀸 𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀯𑀢𑁆𑀣𑀼𑀓𑀸 ¶ . 𑀇𑀤𑀜𑁆𑀳𑀺 𑀔𑀦𑁆𑀥𑀢𑁆𑀢𑀬𑀁 𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀯𑁂𑀤𑀺𑀬𑀢𑀺. 𑀏𑀢𑀲𑁆𑀲 𑀘 𑀯𑁂𑀤𑀦𑀸𑀥𑀫𑁆𑀫𑁄 𑀅𑀯𑀺𑀧𑁆𑀧𑀬𑀼𑀢𑁆𑀢𑀲𑀪𑀸𑀯𑁄.

𑁧𑁨𑁨. 𑀇𑀤𑀸𑀦𑀺 ¶ 𑀢𑀢𑁆𑀣 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄 𑁋 ‘‘𑀢𑀢𑁆𑀭𑀸𑀦𑀦𑁆𑀤𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀢𑀻𑀲𑀼 𑀤𑀺𑀝𑁆𑀞𑀺𑀕𑀢𑀺𑀓𑁂𑀲𑀼. 𑀬𑀲𑁆𑀫𑀺𑀁, 𑀆𑀦𑀦𑁆𑀤, 𑀲𑀫𑀬𑁂𑀢𑀺𑀆𑀤𑀺 𑀬𑁄 𑀬𑁄 𑀬𑀁 𑀬𑀁 𑀯𑁂𑀤𑀦𑀁 𑀅𑀢𑁆𑀢𑀸𑀢𑀺 𑀲𑀫𑀦𑀼𑀧𑀲𑁆𑀲𑀢𑀺, 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀢𑀦𑁄 𑀓𑀤𑀸𑀘𑀺 𑀪𑀸𑀯𑀁, 𑀓𑀤𑀸𑀘𑀺 𑀅𑀪𑀸𑀯𑀦𑁆𑀢𑀺 𑀏𑀯𑀫𑀸𑀤𑀺𑀤𑁄𑀲𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁.

𑁧𑁨𑁩. 𑀅𑀦𑀺𑀘𑁆𑀘𑀸𑀤𑀻𑀲𑀼 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄 𑀅𑀦𑀺𑀘𑁆𑀘𑀸. 𑀢𑁂𑀳𑀺 𑀢𑁂𑀳𑀺 𑀓𑀸𑀭𑀡𑁂𑀳𑀺 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫 𑀓𑀢𑀸𑀢𑀺 𑀲𑀗𑁆𑀔𑀢𑀸. 𑀢𑀁 𑀢𑀁 𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀲𑀫𑁆𑀫𑀸 𑀓𑀸𑀭𑀡𑁂𑀦𑁂𑀯 𑀉𑀧𑁆𑀧𑀦𑁆𑀦𑀸𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸. 𑀔𑀬𑁄𑀢𑀺𑀆𑀤𑀺 𑀲𑀩𑁆𑀩𑀁 𑀪𑀗𑁆𑀕𑀲𑁆𑀲 𑀯𑁂𑀯𑀘𑀦𑀁. 𑀬𑀜𑁆𑀳𑀺 𑀪𑀺𑀚𑁆𑀚𑀢𑀺, 𑀢𑀁 𑀔𑀺𑀬𑀢𑀺𑀧𑀺 𑀯𑀬𑀢𑀺𑀧𑀺 𑀯𑀺𑀭𑀚𑁆𑀛𑀢𑀺𑀧𑀺 𑀦𑀺𑀭𑀼𑀚𑁆𑀛𑀢𑀺𑀧𑀺, 𑀢𑀲𑁆𑀫𑀸 𑀔𑀬𑀥𑀫𑁆𑀫𑀸𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀩𑁆𑀬𑀕𑀸 𑀫𑁂𑀢𑀺 𑀯𑀺𑀅𑀕𑀸𑀢𑀺 𑀩𑁆𑀬𑀕𑀸, 𑀯𑀺𑀕𑀢𑁄 𑀦𑀺𑀭𑀼𑀤𑁆𑀥𑁄 𑀫𑁂 𑀅𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀦 𑀏𑀓𑀲𑁆𑀲𑁂𑀯 𑀢𑀻𑀲𑀼𑀧𑀺 𑀓𑀸𑀮𑁂𑀲𑀼 𑁋 ‘‘𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀳𑁄𑀢𑀻𑀢𑀺, 𑀓𑀺𑀁 𑀧𑀦 𑀦 𑀪𑀯𑀺𑀲𑁆𑀲𑀢𑀺? 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀳𑀺 𑀣𑀼𑀲𑀭𑀸𑀲𑀺𑀫𑁆𑀳𑀺 𑀦𑀺𑀓𑁆𑀔𑀺𑀢𑁆𑀢𑀔𑀸𑀡𑀼𑀓𑀲𑁆𑀲𑁂𑀯 𑀦𑀺𑀘𑁆𑀘𑀮𑀢𑀸 𑀦𑀸𑀫 𑀦𑀢𑁆𑀣𑀺, 𑀯𑀦𑀫𑀓𑁆𑀓𑀝𑁄 𑀯𑀺𑀬 𑀅𑀜𑁆𑀜𑀁 𑀕𑀡𑁆𑀳𑀸𑀢𑀺, 𑀅𑀜𑁆𑀜𑀁 𑀫𑀼𑀜𑁆𑀘𑀢𑀺. 𑀅𑀦𑀺𑀘𑁆𑀘𑀲𑀼𑀔𑀤𑀼𑀓𑁆𑀔𑀯𑁄𑀓𑀺𑀡𑁆𑀡𑀦𑁆𑀢𑀺 𑀯𑀺𑀲𑁂𑀲𑁂𑀦 𑀢𑀁 𑀢𑀁 𑀯𑁂𑀤𑀦𑀁 𑀅𑀢𑁆𑀢𑀸𑀢𑀺 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀅𑀦𑀺𑀘𑁆𑀘𑀜𑁆𑀘𑁂𑀯 𑀲𑀼𑀔𑀜𑁆𑀘 𑀤𑀼𑀓𑁆𑀔𑀜𑁆𑀘 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺 𑀅𑀯𑀺𑀲𑁂𑀲𑁂𑀦 𑀯𑁂𑀤𑀦𑀁 𑀅𑀢𑁆𑀢𑀸𑀢𑀺 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀯𑁄𑀓𑀺𑀡𑁆𑀡𑀁 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀁 ¶ 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀯𑁂𑀤𑀦𑀸 𑀳𑀺 𑀢𑀺𑀯𑀺𑀥𑀸 𑀘𑁂𑀯 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀸 𑀘, 𑀢𑀜𑁆𑀘𑁂𑀲 𑀅𑀢𑁆𑀢𑀸𑀢𑀺 𑀲𑀫𑀦𑀼𑀧𑀲𑁆𑀲𑀢𑀺. 𑀇𑀘𑁆𑀘𑀲𑁆𑀲 𑀅𑀦𑀺𑀘𑁆𑀘𑁄 𑀘𑁂𑀯 𑀅𑀢𑁆𑀢𑀸 𑀆𑀧𑀚𑁆𑀚𑀢𑀺, 𑀏𑀓𑀓𑁆𑀔𑀡𑁂 𑀘 𑀩𑀳𑀽𑀦𑀁 𑀯𑁂𑀤𑀦𑀸𑀦𑀁 𑀉𑀧𑁆𑀧𑀸𑀤𑁄. 𑀢𑀁 𑀔𑁄 𑀧𑀦𑁂𑀲 𑀅𑀦𑀺𑀘𑁆𑀘𑀁 𑀅𑀢𑁆𑀢𑀸𑀦𑀁 𑀅𑀦𑀼𑀚𑀸𑀦𑀸𑀢𑀺, 𑀦 𑀏𑀓𑀓𑁆𑀔𑀡𑁂 𑀩𑀳𑀽𑀦𑀁 𑀯𑁂𑀤𑀦𑀸𑀦𑀁 𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀺. 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑁋 ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀢𑁂𑀦𑀧𑁂𑀢𑀁 𑀦𑀓𑁆𑀔𑀫𑀢𑀺 ‘𑀯𑁂𑀤𑀦𑀸 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀺𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁.

𑁧𑁨𑁪. 𑀬𑀢𑁆𑀣 𑀧𑀦𑀸𑀯𑀼𑀲𑁄𑀢𑀺 𑀬𑀢𑁆𑀣 𑀲𑀼𑀤𑁆𑀥𑀭𑀽𑀧𑀓𑁆𑀔𑀦𑁆𑀥𑁂 𑀲𑀩𑁆𑀩𑀲𑁄 𑀯𑁂𑀤𑀬𑀺𑀢𑀁 𑀦𑀢𑁆𑀣𑀺. 𑀅𑀧𑀺 𑀦𑀼 𑀔𑁄 𑀢𑀢𑁆𑀣𑀸𑀢𑀺 𑀅𑀧𑀺 𑀦𑀼 𑀔𑁄 𑀢𑀲𑁆𑀫𑀺𑀁 𑀯𑁂𑀤𑀦𑀸𑀯𑀺𑀭𑀳𑀺𑀢𑁂 𑀢𑀸𑀮𑀯𑀡𑁆𑀝𑁂 𑀯𑀸 𑀯𑀸𑀢𑀧𑀸𑀦𑁂 𑀯𑀸 𑀅𑀲𑁆𑀫𑀻𑀢𑀺 𑀏𑀯𑀁 𑀅𑀳𑀁𑀓𑀸𑀭𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤𑀸𑀢𑀺 𑀬𑀲𑁆𑀫𑀸 𑀲𑀼𑀤𑁆𑀥𑀭𑀽𑀧𑀓𑁆𑀔𑀦𑁆𑀥𑁄 𑀉𑀝𑁆𑀞𑀸𑀬 𑀅𑀳𑀫𑀲𑁆𑀫𑀻𑀢𑀺 𑀦 𑀯𑀤𑀢𑀺, 𑀢𑀲𑁆𑀫𑀸 𑀏𑀢𑁂𑀦𑀧𑀺 𑀏𑀢𑀁 𑀦𑀓𑁆𑀔𑀫𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀺 𑀦𑀼 𑀔𑁄 𑀢𑀢𑁆𑀣 𑀅𑀬𑀫𑀳𑀫𑀲𑁆𑀫𑀻𑀢𑀺 𑀲𑀺𑀬𑀸𑀢𑀺 𑀅𑀧𑀺 𑀦𑀼 𑀔𑁄 𑀢𑁂𑀲𑀼 ¶ 𑀯𑁂𑀤𑀦𑀸𑀥𑀫𑁆𑀫𑁂𑀲𑀼 𑀢𑀻𑀲𑀼 𑀔𑀦𑁆𑀥𑁂𑀲𑀼 𑀏𑀓𑀥𑀫𑁆𑀫𑁄𑀧𑀺 𑀅𑀬𑀁 𑀦𑀸𑀫 𑀅𑀳𑀫𑀲𑁆𑀫𑀻𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸. 𑀅𑀣 𑀯𑀸 𑀯𑁂𑀤𑀦𑀸𑀦𑀺𑀭𑁄𑀥𑀸 𑀲𑀳𑁂𑀯 𑀯𑁂𑀤𑀦𑀸𑀬 𑀦𑀺𑀭𑀼𑀤𑁆𑀥𑁂𑀲𑀼 𑀢𑁂𑀲𑀼 𑀢𑀻𑀲𑀼 𑀔𑀦𑁆𑀥𑁂𑀲𑀼 𑀅𑀧𑀺 𑀦𑀼 𑀔𑁄 𑀅𑀬𑀫𑀳𑀫𑀲𑁆𑀫𑀻𑀢𑀺 𑀯𑀸 𑀅𑀳𑀫𑀲𑁆𑀫𑀻𑀢𑀺 𑀯𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀣𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀲𑀯𑀺𑀲𑀸𑀡𑀲𑁆𑀲 𑀢𑀺𑀔𑀺𑀡𑀪𑀸𑀯𑀁 𑀯𑀺𑀬 𑀢𑀁 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀦𑁄 𑀳𑁂𑀢𑀁 𑀪𑀦𑁆𑀢𑁂𑀢𑀺 𑀆𑀳.

𑀏𑀢𑁆𑀢𑀸𑀯𑀢𑀸 ¶ 𑀓𑀺𑀁 𑀓𑀣𑀺𑀢𑀁 𑀳𑁄𑀢𑀺? 𑀯𑀝𑁆𑀝𑀓𑀣𑀸 𑀓𑀣𑀺𑀢𑀸 𑀳𑁄𑀢𑀺. 𑀪𑀕𑀯𑀸 𑀳𑀺 𑀯𑀝𑁆𑀝𑀓𑀣𑀁 𑀓𑀣𑁂𑀦𑁆𑀢𑁄 𑀓𑀢𑁆𑀣𑀘𑀺 𑀅𑀯𑀺𑀚𑁆𑀚𑀸𑀲𑀻𑀲𑁂𑀦 𑀓𑀣𑁂𑀲𑀺, 𑀓𑀢𑁆𑀣𑀘𑀺 𑀢𑀡𑁆𑀳𑀸𑀲𑀻𑀲𑁂𑀦, 𑀓𑀢𑁆𑀣𑀘𑀺 𑀤𑀺𑀝𑁆𑀞𑀺𑀲𑀻𑀲𑁂𑀦. 𑀢𑀢𑁆𑀣 ‘‘𑀧𑀼𑀭𑀺𑀫𑀸, 𑀪𑀺𑀓𑁆𑀔𑀯𑁂, 𑀓𑁄𑀝𑀺 𑀦𑀧𑁆𑀧𑀜𑁆𑀜𑀸𑀬𑀢𑀺 𑀅𑀯𑀺𑀚𑁆𑀚𑀸𑀬, ‘𑀇𑀢𑁄 𑀧𑀼𑀩𑁆𑀩𑁂 𑀅𑀯𑀺𑀚𑁆𑀚𑀸 𑀦𑀸𑀳𑁄𑀲𑀺, 𑀅𑀣 𑀧𑀘𑁆𑀙𑀸 𑀲𑀫𑀪𑀯𑀻’𑀢𑀺. 𑀏𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀯𑀼𑀘𑁆𑀘𑀢𑀺. 𑀅𑀣 𑀘 𑀧𑀦 𑀧𑀜𑁆𑀜𑀸𑀬𑀢𑀺 𑀇𑀤𑀧𑁆𑀧𑀘𑁆𑀘𑀬𑀸 𑀅𑀯𑀺𑀚𑁆𑀚𑀸’’𑀢𑀺 (𑀅. 𑀦𑀺. 𑁧𑁦.𑁬𑁧) 𑀏𑀯𑀁 𑀅𑀯𑀺𑀚𑁆𑀚𑀸𑀲𑀻𑀲𑁂𑀦 𑀓𑀣𑀺𑀢𑀸. ‘‘𑀧𑀼𑀭𑀺𑀫𑀸, 𑀪𑀺𑀓𑁆𑀔𑀯𑁂, 𑀓𑁄𑀝𑀺 𑀦𑀧𑁆𑀧𑀜𑁆𑀜𑀸𑀬𑀢𑀺 𑀪𑀯𑀢𑀡𑁆𑀳𑀸𑀬, ‘𑀇𑀢𑁄 𑀧𑀼𑀩𑁆𑀩𑁂 𑀪𑀯𑀢𑀡𑁆𑀳𑀸 𑀦𑀸𑀳𑁄𑀲𑀺, 𑀅𑀣 𑀧𑀘𑁆𑀙𑀸 𑀲𑀫𑀪𑀯𑀻’𑀢𑀺. 𑀏𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀯𑀼𑀘𑁆𑀘𑀢𑀺. 𑀅𑀣 𑀘 𑀧𑀦 𑀧𑀜𑁆𑀜𑀸𑀬𑀢𑀺 𑀇𑀤𑀧𑁆𑀧𑀘𑁆𑀘𑀬𑀸 𑀪𑀯𑀢𑀡𑁆𑀳𑀸’’𑀢𑀺 (𑀅. 𑀦𑀺. 𑁧𑁦.𑁬𑁨) 𑀏𑀯𑀁 𑀢𑀡𑁆𑀳𑀸𑀲𑀻𑀲𑁂𑀦 𑀓𑀣𑀺𑀢𑀸. ‘‘𑀧𑀼𑀭𑀺𑀫𑀸, 𑀪𑀺𑀓𑁆𑀔𑀯𑁂, 𑀓𑁄𑀝𑀺 𑀦𑀧𑁆𑀧𑀜𑁆𑀜𑀸𑀬𑀢𑀺 𑀪𑀯𑀤𑀺𑀝𑁆𑀞𑀺𑀬𑀸, ‘𑀇𑀢𑁄 𑀧𑀼𑀩𑁆𑀩𑁂 𑀪𑀯𑀤𑀺𑀝𑁆𑀞𑀺 𑀦𑀸𑀳𑁄𑀲𑀺, 𑀅𑀣 𑀧𑀘𑁆𑀙𑀸 𑀲𑀫𑀪𑀯𑀻’𑀢𑀺, 𑀏𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀯𑀼𑀘𑁆𑀘𑀢𑀺. 𑀅𑀣 𑀘 𑀧𑀦 𑀧𑀜𑁆𑀜𑀸𑀬𑀢𑀺 𑀇𑀤𑀧𑁆𑀧𑀘𑁆𑀘𑀬𑀸 𑀪𑀯𑀤𑀺𑀝𑁆𑀞𑀻’’𑀢𑀺 𑀏𑀯𑀁 𑀤𑀺𑀝𑁆𑀞𑀺𑀲𑀻𑀲𑁂𑀦 𑀓𑀣𑀺𑀢𑀸. 𑀇𑀥𑀸𑀧𑀺 𑀤𑀺𑀝𑁆𑀞𑀺𑀲𑀻𑀲𑁂𑀦𑁂𑀯 𑀓𑀣𑀺𑀢𑀸.

𑀤𑀺𑀝𑁆𑀞𑀺𑀕𑀢𑀺𑀓𑁄 ¶ 𑀳𑀺 𑀲𑀼𑀔𑀸𑀤𑀺𑀯𑁂𑀤𑀦𑀁 𑀅𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀧𑀭𑀸𑀫𑀸𑀲𑀯𑀲𑁂𑀦 𑀲𑀩𑁆𑀩𑀪𑀯𑀬𑁄𑀦𑀺𑀕𑀢𑀺 𑁋 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑁂𑀲𑀼 𑀢𑀢𑁄 𑀢𑀢𑁄 𑀘𑀯𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀉𑀧𑀧𑀚𑁆𑀚𑀦𑁆𑀢𑁄 𑀫𑀳𑀸𑀲𑀫𑀼𑀤𑁆𑀤𑁂 𑀯𑀸𑀢𑀼𑀓𑁆𑀔𑀺𑀢𑁆𑀢𑀦𑀸𑀯𑀸 𑀯𑀺𑀬 𑀲𑀢𑀢𑀁 𑀲𑀫𑀺𑀢𑀁 𑀧𑀭𑀺𑀩𑁆𑀪𑀫𑀢𑀺, 𑀯𑀝𑁆𑀝𑀢𑁄 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁𑀬𑁂𑀯 𑀦 𑀲𑀓𑁆𑀓𑁄𑀢𑀺.

𑁧𑁨𑁬. 𑀇𑀢𑀺 𑀪𑀕𑀯𑀸 𑀧𑀘𑁆𑀘𑀬𑀸𑀓𑀸𑀭𑀫𑀽𑀴𑁆𑀳𑀲𑁆𑀲 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀏𑀢𑁆𑀢𑀓𑁂𑀦 𑀓𑀣𑀸𑀫𑀕𑁆𑀕𑁂𑀦 𑀯𑀝𑁆𑀝𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀯𑀝𑁆𑀝𑀁 𑀓𑀣𑁂𑀦𑁆𑀢𑁄 𑀬𑀢𑁄 𑀔𑁄 𑀧𑀦, 𑀆𑀦𑀦𑁆𑀤, 𑀪𑀺𑀓𑁆𑀔𑀽𑀢𑀺𑀆𑀤𑀺𑀫𑀸𑀳.

𑀢𑀜𑁆𑀘 𑀧𑀦 𑀯𑀺𑀯𑀝𑁆𑀝𑀓𑀣𑀁 𑀪𑀕𑀯𑀸 𑀤𑁂𑀲𑀦𑀸𑀲𑀼 𑀓𑀼𑀲𑀮𑀢𑁆𑀢𑀸 𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀝𑁆𑀞𑀸𑀦𑀁 𑀦𑀯𑀓𑀫𑁆𑀫𑀸𑀤𑀺𑀯𑀲𑁂𑀦 𑀯𑀺𑀓𑁆𑀔𑀺𑀢𑁆𑀢𑀧𑀼𑀕𑁆𑀕𑀮𑀁 𑀅𑀦𑀸𑀫𑀲𑀺𑀢𑁆𑀯𑀸 𑀓𑀸𑀭𑀓𑀲𑁆𑀲 𑀲𑀢𑀺𑀧𑀝𑁆𑀞𑀸𑀦𑀯𑀺𑀳𑀸𑀭𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀆𑀭𑀪𑀦𑁆𑀢𑁄 𑀦𑁂𑀯 𑀯𑁂𑀤𑀦𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀻𑀢𑀺𑀆𑀤𑀺𑀫𑀸𑀳. 𑀏𑀯𑀭𑀽𑀧𑁄 𑀳𑀺 𑀪𑀺𑀓𑁆𑀔𑀼 𑁋 ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 ¶ 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀯𑀸 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀭𑀽𑀧𑀁 𑀅𑀦𑀺𑀘𑁆𑀘𑀢𑁄 𑀯𑀯𑀢𑁆𑀣𑀧𑁂𑀢𑀺, 𑀏𑀓𑀁 𑀲𑀫𑁆𑀫𑀲𑀦𑀁. 𑀤𑀼𑀓𑁆𑀔𑀢𑁄 𑀯𑀯𑀢𑁆𑀣𑀧𑁂𑀢𑀺, 𑀏𑀓𑀁 𑀲𑀫𑁆𑀫𑀲𑀦𑀁. 𑀅𑀦𑀢𑁆𑀢𑀢𑁄 𑀯𑀯𑀢𑁆𑀣𑀧𑁂𑀢𑀺, 𑀏𑀓𑀁 𑀲𑀫𑁆𑀫𑀲𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀲𑁆𑀲 𑀲𑀫𑁆𑀫𑀲𑀦𑀜𑀸𑀡𑀲𑁆𑀲 𑀯𑀲𑁂𑀦 𑀲𑀩𑁆𑀩𑀥𑀫𑁆𑀫𑁂𑀲𑀼 𑀧𑀯𑀢𑁆𑀢𑀢𑁆𑀢𑀸 𑀦𑁂𑀯 𑀯𑁂𑀤𑀦𑀁 𑀅𑀢𑁆𑀢𑀸𑀢𑀺 𑀲𑀫𑀦𑀼𑀧𑀲𑁆𑀲𑀢𑀺, 𑀦 𑀅𑀜𑁆𑀜𑀁, 𑀲𑁄 𑀏𑀯𑀁 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀦 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀻𑀢𑀺 𑀔𑀦𑁆𑀥𑀮𑁄𑀓𑀸𑀤𑀺𑀪𑁂𑀤𑁂 𑀮𑁄𑀓𑁂 𑀭𑀽𑀧𑀸𑀤𑀻𑀲𑀼 𑀥𑀫𑁆𑀫𑁂𑀲𑀼 𑀓𑀺𑀜𑁆𑀘𑀺 𑀏𑀓𑀥𑀫𑁆𑀫𑀫𑁆𑀧𑀺 𑀅𑀢𑁆𑀢𑀸𑀢𑀺 𑀯𑀸 𑀅𑀢𑁆𑀢𑀦𑀺𑀬𑀦𑁆𑀢𑀺 𑀯𑀸 𑀦 𑀉𑀧𑀸𑀤𑀺𑀬𑀢𑀺.

𑀅𑀦𑀼𑀧𑀸𑀤𑀺𑀬𑀁 ¶ 𑀦 𑀧𑀭𑀺𑀢𑀲𑁆𑀲𑀢𑀻𑀢𑀺 𑀅𑀦𑀼𑀧𑀸𑀤𑀺𑀬𑀦𑁆𑀢𑁄 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀧𑀭𑀺𑀢𑀲𑁆𑀲𑀦𑀸𑀬𑀸𑀧𑀺 𑀦 𑀧𑀭𑀺𑀢𑀲𑁆𑀲𑀢𑀺. 𑀅𑀧𑀭𑀺𑀢𑀲𑁆𑀲𑀦𑁆𑀢𑀺 𑀅𑀧𑀭𑀺𑀢𑀲𑁆𑀲𑀫𑀸𑀦𑁄. 𑀧𑀘𑁆𑀘𑀢𑁆𑀢𑀁𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀅𑀢𑁆𑀢𑀦𑀸𑀯 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀏𑀯𑀁 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀧𑀦𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀸𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀔𑀻𑀡𑀸 𑀚𑀸𑀢𑀻𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀇𑀢𑀺 𑀲𑀸 𑀤𑀺𑀝𑁆𑀞𑀻𑀢𑀺 𑀬𑀸 𑀢𑀣𑀸𑀯𑀺𑀫𑀼𑀢𑁆𑀢𑀲𑁆𑀲 𑀅𑀭𑀳𑀢𑁄 𑀤𑀺𑀝𑁆𑀞𑀺, 𑀲𑀸 𑀏𑀯𑀁 𑀤𑀺𑀝𑁆𑀞𑀺. ‘‘𑀇𑀢𑀺𑀲𑁆𑀲 𑀤𑀺𑀝𑁆𑀞𑀻’’𑀢𑀺𑀧𑀺 𑀧𑀸𑀞𑁄. 𑀬𑁄 𑀢𑀣𑀸𑀯𑀺𑀫𑀼𑀢𑁆𑀢𑁄 𑀅𑀭𑀳𑀸, 𑀏𑀯𑀫𑀲𑁆𑀲 𑀤𑀺𑀝𑁆𑀞𑀻𑀢𑀺 𑀅𑀢𑁆𑀣𑁄. 𑀢𑀤𑀓𑀮𑁆𑀮𑀦𑁆𑀢𑀺 𑀢𑀁 𑀦 𑀬𑀼𑀢𑁆𑀢𑀁. 𑀓𑀲𑁆𑀫𑀸? 𑀏𑀯𑀜𑁆𑀳𑀺 𑀲𑀢𑀺 𑁋 ‘‘𑀅𑀭𑀳𑀸 𑀦 𑀓𑀺𑀜𑁆𑀘𑀺 𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀁 𑀪𑀯𑁂𑀬𑁆𑀬, 𑀏𑀯𑀁 𑀜𑀢𑁆𑀯𑀸 𑀯𑀺𑀫𑀼𑀢𑁆𑀢𑀜𑁆𑀘 𑀅𑀭𑀳𑀦𑁆𑀢𑀁 ‘‘𑀦 𑀓𑀺𑀜𑁆𑀘𑀺 𑀚𑀸𑀦𑀸𑀢𑀻’’𑀢𑀺 𑀯𑀢𑁆𑀢𑀼𑀁 ¶ 𑀦 𑀬𑀼𑀢𑁆𑀢𑀁. 𑀢𑁂𑀦𑁂𑀯 𑀘𑀢𑀼𑀦𑁆𑀦𑀫𑁆𑀧𑀺 𑀦𑀬𑀸𑀦𑀁 𑀅𑀯𑀲𑀸𑀦𑁂 𑁋 ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀽’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀬𑀸𑀯𑀢𑀸 𑀆𑀦𑀦𑁆𑀤 𑀅𑀥𑀺𑀯𑀘𑀦𑀦𑁆𑀢𑀺 𑀬𑀢𑁆𑀢𑀓𑁄 𑀅𑀥𑀺𑀯𑀘𑀦𑀲𑀗𑁆𑀔𑀸𑀢𑁄 𑀯𑁄𑀳𑀸𑀭𑁄 𑀅𑀢𑁆𑀣𑀺. 𑀬𑀸𑀯𑀢𑀸 𑀅𑀥𑀺𑀯𑀘𑀦𑀧𑀣𑁄𑀢𑀺 𑀬𑀢𑁆𑀢𑀓𑁄 𑀅𑀥𑀺𑀯𑀘𑀦𑀲𑁆𑀲 𑀧𑀣𑁄, 𑀔𑀦𑁆𑀥𑀸 𑀆𑀬𑀢𑀦𑀸𑀦𑀺 𑀥𑀸𑀢𑀼𑀬𑁄 𑀯𑀸 𑀅𑀢𑁆𑀣𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀧𑀜𑁆𑀜𑀸𑀯𑀘𑀭𑀦𑁆𑀢𑀺 𑀧𑀜𑁆𑀜𑀸𑀬 𑀅𑀯𑀘𑀭𑀺𑀢𑀩𑁆𑀩𑀁 𑀔𑀦𑁆𑀥𑀧𑀜𑁆𑀘𑀓𑀁. 𑀢𑀤𑀪𑀺𑀜𑁆𑀜𑀸𑀢𑀺 𑀢𑀁 𑀅𑀪𑀺𑀚𑀸𑀦𑀺𑀢𑁆𑀯𑀸. 𑀏𑀢𑁆𑀢𑀓𑁂𑀦 𑀪𑀕𑀯𑀢𑀸 𑀓𑀺𑀁 𑀤𑀲𑁆𑀲𑀺𑀢𑀁? 𑀢𑀦𑁆𑀢𑀸𑀓𑀼𑀮𑀧𑀤𑀲𑁆𑀲𑁂𑀯 𑀅𑀦𑀼𑀲𑀦𑁆𑀥𑀺 𑀤𑀲𑁆𑀲𑀺𑀢𑁄.

𑀲𑀢𑁆𑀢𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀯𑀡𑁆𑀡𑀦𑀸

𑁧𑁨𑁭. 𑀇𑀤𑀸𑀦𑀺 𑀬𑁄 𑁋 ‘‘𑀦 𑀧𑀜𑁆𑀜𑀧𑁂𑀢𑀻’’𑀢𑀺 𑀯𑀼𑀢𑁆𑀢𑁄, 𑀲𑁄 𑀬𑀲𑁆𑀫𑀸 𑀕𑀘𑁆𑀙𑀦𑁆𑀢𑁄 𑀕𑀘𑁆𑀙𑀦𑁆𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀬𑁄 𑀘 𑁋 ‘‘𑀦 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁄, 𑀲𑁄 𑀬𑀲𑁆𑀫𑀸 𑀕𑀘𑁆𑀙𑀦𑁆𑀢𑁄 𑀕𑀘𑁆𑀙𑀦𑁆𑀢𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀦𑀺𑀕𑀫𑀦𑀜𑁆𑀘 𑀦𑀸𑀫𑀜𑁆𑀘 𑀤𑀲𑁆𑀲𑁂𑀢𑀼𑀁 𑀲𑀢𑁆𑀢 𑀔𑁄 𑀇𑀫𑀸𑀦𑀦𑁆𑀤 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀲𑀢𑁆𑀢𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑀸, 𑀆𑀭𑀫𑁆𑀫𑀡𑀯𑀲𑁂𑀦 𑀲𑀗𑁆𑀕𑀻𑀢𑀺𑀲𑀼𑀢𑁆𑀢𑁂 (𑀤𑀻. 𑀦𑀺. 𑁩.𑁩𑁧𑁧) 𑀯𑀼𑀢𑁆𑀢𑀸 𑀘𑀢𑀲𑁆𑀲𑁄 𑀆𑀕𑀫𑀺𑀲𑁆𑀲𑀦𑁆𑀢𑀺. 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 ¶ 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺, 𑀯𑀺𑀜𑁆𑀜𑀸𑀡𑀧𑀢𑀺𑀝𑁆𑀞𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀤𑁆𑀯𑁂 𑀘 𑀆𑀬𑀢𑀦𑀸𑀦𑀻𑀢𑀺 𑀤𑁆𑀯𑁂 𑀦𑀺𑀯𑀸𑀲𑀝𑁆𑀞𑀸𑀦𑀸𑀦𑀺. 𑀦𑀺𑀯𑀸𑀲𑀝𑁆𑀞𑀸𑀦𑀜𑁆𑀳𑀺 𑀇𑀥𑀸𑀬𑀢𑀦𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦𑁂𑀯 𑀯𑀓𑁆𑀔𑀢𑀺 𑁋 ‘‘𑀅𑀲𑀜𑁆𑀜𑀲𑀢𑁆𑀢𑀸𑀬𑀢𑀦𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀫𑁂𑀯 𑀤𑀼𑀢𑀺𑀬’’𑀦𑁆𑀢𑀺. 𑀓𑀲𑁆𑀫𑀸 𑀧𑀦𑁂𑀢𑀁 𑀲𑀩𑁆𑀩𑀁 𑀕𑀳𑀺𑀢𑀦𑁆𑀢𑀺? 𑀯𑀝𑁆𑀝𑀧𑀭𑀺𑀬𑀸𑀤𑀸𑀦𑀢𑁆𑀣𑀁. 𑀯𑀝𑁆𑀝𑀜𑁆𑀳𑀺 𑀦 𑀲𑀼𑀤𑁆𑀥𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀯𑀲𑁂𑀦 𑀲𑀼𑀤𑁆𑀥𑀸𑀬𑀢𑀦𑀯𑀲𑁂𑀦 𑀯𑀸 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀺, 𑀪𑀯𑀬𑁄𑀦𑀺𑀕𑀢𑀺𑀲𑀢𑁆𑀢𑀸𑀯𑀸𑀲𑀯𑀲𑁂𑀦 𑀧𑀦 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀫𑁂𑀢𑀁 𑀕𑀳𑀺𑀢𑀁.

𑀇𑀤𑀸𑀦𑀺 ¶ 𑀅𑀦𑀼𑀓𑁆𑀓𑀫𑁂𑀦 𑀢𑀫𑀢𑁆𑀣𑀁 𑀯𑀺𑀪𑀚𑀦𑁆𑀢𑁄 𑀓𑀢𑀫𑀸 𑀲𑀢𑁆𑀢𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁂𑀬𑁆𑀬𑀣𑀸𑀧𑀻𑀢𑀺 𑀦𑀺𑀤𑀲𑁆𑀲𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀬𑀣𑀸 𑀫𑀦𑀼𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀧𑀭𑀺𑀫𑀸𑀡𑁂𑀲𑀼 𑀳𑀺 𑀘𑀓𑁆𑀓𑀯𑀸𑀴𑁂𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀲𑁂𑀦 𑀤𑁆𑀯𑁂𑀧𑀺 𑀏𑀓𑀲𑀤𑀺𑀲𑀸 𑀦𑀢𑁆𑀣𑀺. 𑀬𑁂𑀧𑀺 𑀳𑀺 𑀓𑀢𑁆𑀣𑀘𑀺 𑀬𑀫𑀓𑀪𑀸𑀢𑀭𑁄 𑀯𑀡𑁆𑀡𑁂𑀦 𑀯𑀸 𑀲𑀡𑁆𑀞𑀸𑀦𑁂𑀦 𑀯𑀸 𑀏𑀓𑀲𑀤𑀺𑀲𑀸 𑀳𑁄𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀓𑀣𑀺𑀢𑀳𑀲𑀺𑀢𑀕𑀫𑀦𑀞𑀸𑀦𑀸𑀤𑀻𑀳𑀺 𑀯𑀺𑀲𑁂𑀲𑁄 𑀳𑁄𑀢𑀺𑀬𑁂𑀯. 𑀢𑀲𑁆𑀫𑀸 ¶ 𑀦𑀸𑀦𑀢𑁆𑀢𑀓𑀸𑀬𑀸𑀢𑀺 𑀯𑀼𑀢𑁆𑀢𑀸. 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸 𑀧𑀦 𑀦𑁂𑀲𑀁 𑀢𑀺𑀳𑁂𑀢𑀼𑀓𑀸𑀧𑀺 𑀤𑁆𑀯𑀺𑀳𑁂𑀢𑀼𑀓𑀸𑀧𑀺 𑀅𑀳𑁂𑀢𑀼𑀓𑀸𑀧𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄𑀢𑀺 𑀯𑀼𑀢𑁆𑀢𑀸. 𑀏𑀓𑀘𑁆𑀘𑁂 𑀘 𑀤𑁂𑀯𑀸𑀢𑀺 𑀙 𑀓𑀸𑀫𑀸𑀯𑀘𑀭𑀤𑁂𑀯𑀸. 𑀢𑁂𑀲𑀼 𑀳𑀺 𑀓𑁂𑀲𑀜𑁆𑀘𑀺 𑀓𑀸𑀬𑁄 𑀦𑀻𑀮𑁄 𑀳𑁄𑀢𑀺, 𑀓𑁂𑀲𑀜𑁆𑀘𑀺 𑀧𑀻𑀢𑀓𑀸𑀤𑀺𑀯𑀡𑁆𑀡𑁄. 𑀲𑀜𑁆𑀜𑀸 𑀧𑀦 𑀦𑁂𑀲𑀁 𑀤𑁆𑀯𑀺𑀳𑁂𑀢𑀼𑀓𑀸𑀧𑀺 𑀢𑀺𑀳𑁂𑀢𑀼𑀓𑀸𑀧𑀺 𑀳𑁄𑀦𑁆𑀢𑀺, 𑀅𑀳𑁂𑀢𑀼𑀓𑀸 𑀦𑀢𑁆𑀣𑀺. 𑀏𑀓𑀘𑁆𑀘𑁂 𑀘 𑀯𑀺𑀦𑀺𑀧𑀸𑀢𑀺𑀓𑀸𑀢𑀺 𑀘𑀢𑀼𑀅𑀧𑀸𑀬𑀯𑀺𑀦𑀺𑀫𑀼𑀢𑁆𑀢𑀸 𑀉𑀢𑁆𑀢𑀭𑀫𑀸𑀢𑀸 𑀬𑀓𑁆𑀔𑀺𑀦𑀻, 𑀧𑀺𑀬𑀗𑁆𑀓𑀭𑀫𑀸𑀢𑀸, 𑀨𑀼𑀲𑁆𑀲𑀫𑀺𑀢𑁆𑀢𑀸, 𑀥𑀫𑁆𑀫𑀕𑀼𑀢𑁆𑀢𑀸𑀢𑀺 𑀏𑀯𑀫𑀸𑀤𑀺𑀓𑀸 𑀅𑀜𑁆𑀜𑁂 𑀘 𑀯𑁂𑀫𑀸𑀦𑀺𑀓𑀸 𑀧𑁂𑀢𑀸. 𑀏𑀢𑁂𑀲𑀜𑁆𑀳𑀺 𑀧𑀻𑀢𑀑𑀤𑀸𑀢𑀓𑀸𑀴𑀫𑀗𑁆𑀕𑀼𑀭𑀘𑁆𑀙𑀯𑀺𑀲𑀸𑀫𑀯𑀡𑁆𑀡𑀸𑀤𑀺𑀯𑀲𑁂𑀦 𑀘𑁂𑀯 𑀓𑀺𑀲𑀣𑀽𑀮𑀭𑀲𑁆𑀲𑀤𑀻𑀖𑀯𑀲𑁂𑀦 𑀘 𑀓𑀸𑀬𑁄 𑀦𑀸𑀦𑀸 𑀳𑁄𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀯𑀺𑀬 𑀤𑁆𑀯𑀺𑀳𑁂𑀢𑀼𑀓𑀢𑀺𑀳𑁂𑀢𑀼𑀓𑀅𑀳𑁂𑀢𑀼𑀓𑀯𑀲𑁂𑀦 𑀲𑀜𑁆𑀜𑀸𑀧𑀺. 𑀢𑁂 𑀧𑀦 𑀤𑁂𑀯𑀸 𑀯𑀺𑀬 𑀦 𑀫𑀳𑁂𑀲𑀓𑁆𑀔𑀸, 𑀓𑀧𑀡𑀫𑀦𑀼𑀲𑁆𑀲𑀸 𑀯𑀺𑀬 𑀅𑀧𑁆𑀧𑁂𑀲𑀓𑁆𑀔𑀸, 𑀤𑀼𑀮𑁆𑀮𑀪𑀖𑀸𑀲𑀘𑁆𑀙𑀸𑀤𑀦𑀸 𑀤𑀼𑀓𑁆𑀔𑀧𑀻𑀴𑀺𑀢𑀸 𑀯𑀺𑀳𑀭𑀦𑁆𑀢𑀺. 𑀏𑀓𑀘𑁆𑀘𑁂 𑀓𑀸𑀴𑀧𑀓𑁆𑀔𑁂 𑀤𑀼𑀓𑁆𑀔𑀺𑀢𑀸 𑀚𑀼𑀡𑁆𑀳𑀧𑀓𑁆𑀔𑁂 𑀲𑀼𑀔𑀺𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑀼𑀔𑀲𑀫𑀼𑀲𑁆𑀲𑀬𑀢𑁄 𑀯𑀺𑀦𑀺𑀧𑀢𑀺𑀢𑀢𑁆𑀢𑀸 𑀯𑀺𑀦𑀺𑀧𑀸𑀢𑀺𑀓𑀸𑀢𑀺 𑀯𑀼𑀢𑁆𑀢𑀸. 𑀬𑁂 𑀧𑀦𑁂𑀢𑁆𑀣 𑀢𑀺𑀳𑁂𑀢𑀼𑀓𑀸 𑀢𑁂𑀲𑀁 𑀥𑀫𑁆𑀫𑀸𑀪𑀺𑀲𑀫𑀬𑁄𑀧𑀺 𑀳𑁄𑀢𑀺, 𑀧𑀺𑀬𑀗𑁆𑀓𑀭𑀫𑀸𑀢𑀸 𑀳𑀺 𑀬𑀓𑁆𑀔𑀺𑀦𑀻 𑀧𑀘𑁆𑀘𑀽𑀲𑀲𑀫𑀬𑁂 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀥𑀫𑁆𑀫𑀁 𑀲𑀚𑁆𑀛𑀸𑀬𑀢𑁄 𑀲𑀼𑀢𑁆𑀯𑀸 𑁋

‘‘𑀫𑀸 ¶ 𑀲𑀤𑁆𑀤𑀫𑀓𑀭𑀺 𑀧𑀺𑀬𑀗𑁆𑀓𑀭, 𑀪𑀺𑀓𑁆𑀔𑀼 𑀥𑀫𑁆𑀫𑀧𑀤𑀸𑀦𑀺 𑀪𑀸𑀲𑀢𑀺;

𑀅𑀧𑀺 𑀥𑀫𑁆𑀫𑀧𑀤𑀁 𑀯𑀺𑀚𑀸𑀦𑀺𑀬, 𑀧𑀝𑀺𑀧𑀚𑁆𑀚𑁂𑀫 𑀳𑀺𑀢𑀸𑀬 𑀦𑁄 𑀲𑀺𑀬𑀸;

𑀧𑀸𑀡𑁂𑀲𑀼 𑀘 𑀲𑀁𑀬𑀫𑀸𑀫𑀲𑁂, 𑀲𑀫𑁆𑀧𑀚𑀸𑀦𑀫𑀼𑀲𑀸 𑀦 𑀪𑀡𑀸𑀫𑀲𑁂;

𑀲𑀺𑀓𑁆𑀔𑁂𑀫 𑀲𑀼𑀲𑀻𑀮𑁆𑀬𑀫𑀢𑁆𑀢𑀦𑁄, 𑀅𑀧𑀺 𑀫𑀼𑀘𑁆𑀘𑁂𑀫 𑀧𑀺𑀲𑀸𑀘𑀬𑁄𑀦𑀺𑀬𑀸’’𑀢𑀺. (𑀲𑀁. 𑀦𑀺. 𑁨.𑁪𑁦);

𑀏𑀯𑀁 𑀧𑀼𑀢𑁆𑀢𑀓𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀢𑀁 𑀤𑀺𑀯𑀲𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑀸. 𑀉𑀢𑁆𑀢𑀭𑀫𑀸𑀢𑀸 𑀧𑀦 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸𑀯 𑀲𑁄𑀢𑀸𑀧𑀦𑁆𑀦𑀸 𑀚𑀸𑀢𑀸.

𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀢𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀫𑀳𑀸𑀩𑁆𑀭𑀳𑁆𑀫𑀸𑀦𑁄. 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸𑀢𑀺 𑀢𑁂 𑀲𑀩𑁆𑀩𑁂𑀧𑀺 𑀧𑀞𑀫𑁂𑀦 𑀛𑀸𑀦𑁂𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀸. 𑀢𑁂𑀲𑀼 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸 𑀧𑀦 𑀧𑀭𑀺𑀢𑁆𑀢𑁂𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀸, 𑀢𑁂𑀲𑀁 𑀓𑀧𑁆𑀧𑀲𑁆𑀲 𑀢𑀢𑀺𑀬𑁄 𑀪𑀸𑀕𑁄 𑀆𑀬𑀼𑀧𑁆𑀧𑀫𑀸𑀡𑀁. 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸 𑀫𑀚𑁆𑀛𑀺𑀫𑁂𑀦, 𑀢𑁂𑀲𑀁 𑀉𑀧𑀟𑁆𑀠𑀓𑀧𑁆𑀧𑁄 𑀆𑀬𑀼𑀧𑁆𑀧𑀫𑀸𑀡𑀁, 𑀓𑀸𑀬𑁄 ¶ 𑀘 𑀢𑁂𑀲𑀁 𑀯𑀺𑀧𑁆𑀨𑀸𑀭𑀺𑀓𑀢𑀭𑁄 𑀳𑁄𑀢𑀺. 𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀧𑀡𑀻𑀢𑁂𑀦, 𑀢𑁂𑀲𑀁 𑀓𑀧𑁆𑀧𑁄 𑀆𑀬𑀼𑀧𑁆𑀧𑀫𑀸𑀡𑀁, 𑀓𑀸𑀬𑁄 𑀧𑀦 𑀢𑁂𑀲𑀁 𑀅𑀢𑀺𑀯𑀺𑀧𑁆𑀨𑀸𑀭𑀺𑀓𑁄 𑀳𑁄𑀢𑀺. 𑀇𑀢𑀺 𑀢𑁂 𑀓𑀸𑀬𑀲𑁆𑀲 𑀦𑀸𑀦𑀢𑁆𑀢𑀸, 𑀧𑀞𑀫𑀚𑁆𑀛𑀸𑀦𑀯𑀲𑁂𑀦 𑀲𑀜𑁆𑀜𑀸𑀬 𑀏𑀓𑀢𑁆𑀢𑀸 𑀦𑀸𑀦𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀣𑀸 ¶ 𑀘 𑀢𑁂, 𑀏𑀯𑀁 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀲𑀢𑁆𑀢𑀸. 𑀦𑀺𑀭𑀬𑁂𑀲𑀼 𑀳𑀺 𑀓𑁂𑀲𑀜𑁆𑀘𑀺 𑀕𑀸𑀯𑀼𑀢𑀁, 𑀓𑁂𑀲𑀜𑁆𑀘𑀺 𑀅𑀟𑁆𑀠𑀬𑁄𑀚𑀦𑀁, 𑀓𑁂𑀲𑀜𑁆𑀘𑀺 𑀬𑁄𑀚𑀦𑀁 𑀅𑀢𑁆𑀢𑀪𑀸𑀯𑁄 𑀳𑁄𑀢𑀺, 𑀤𑁂𑀯𑀤𑀢𑁆𑀢𑀲𑁆𑀲 𑀧𑀦 𑀬𑁄𑀚𑀦𑀲𑀢𑀺𑀓𑁄 𑀚𑀸𑀢𑁄. 𑀢𑀺𑀭𑀘𑁆𑀙𑀸𑀦𑁂𑀲𑀼𑀧𑀺 𑀓𑁂𑀘𑀺 𑀔𑀼𑀤𑁆𑀤𑀓𑀸, 𑀓𑁂𑀘𑀺 𑀫𑀳𑀦𑁆𑀢𑀸. 𑀧𑁂𑀢𑁆𑀢𑀺𑀯𑀺𑀲𑀬𑁂𑀧𑀺 𑀓𑁂𑀘𑀺 𑀲𑀝𑁆𑀞𑀺𑀳𑀢𑁆𑀣𑀸, 𑀓𑁂𑀘𑀺 𑀲𑀢𑁆𑀢𑀢𑀺𑀳𑀢𑁆𑀣𑀸, 𑀓𑁂𑀘𑀺 𑀅𑀲𑀻𑀢𑀺𑀳𑀢𑁆𑀣𑀸 𑀳𑁄𑀦𑁆𑀢𑀺, 𑀓𑁂𑀘𑀺 𑀲𑀼𑀯𑀡𑁆𑀡𑀸, 𑀓𑁂𑀘𑀺 𑀤𑀼𑀩𑁆𑀩𑀡𑁆𑀡𑀸 𑀳𑁄𑀦𑁆𑀢𑀺. 𑀢𑀣𑀸 𑀓𑀸𑀮𑀓𑀜𑁆𑀚𑀺𑀓𑀸 𑀅𑀲𑀼𑀭𑀸. 𑀅𑀧𑀺 𑀘𑁂𑀢𑁆𑀣 𑀤𑀻𑀖𑀧𑀺𑀝𑁆𑀞𑀺𑀓𑀧𑁂𑀢𑀸 𑀦𑀸𑀫 𑀲𑀝𑁆𑀞𑀺𑀬𑁄𑀚𑀦𑀺𑀓𑀸𑀧𑀺 𑀳𑁄𑀦𑁆𑀢𑀺. 𑀲𑀜𑁆𑀜𑀸 𑀧𑀦 𑀲𑀩𑁆𑀩𑁂𑀲𑀫𑁆𑀧𑀺 𑀅𑀓𑀼𑀲𑀮𑀯𑀺𑀧𑀸𑀓𑀅𑀳𑁂𑀢𑀼𑀓𑀸𑀯 𑀳𑁄𑀦𑁆𑀢𑀺. 𑀇𑀢𑀺 𑀆𑀧𑀸𑀬𑀺𑀓𑀸𑀧𑀺 𑀦𑀸𑀦𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺.

𑀆𑀪𑀲𑁆𑀲𑀭𑀸𑀢𑀺 𑀤𑀡𑁆𑀟𑀉𑀓𑁆𑀓𑀸𑀬 𑀅𑀘𑁆𑀘𑀺 𑀯𑀺𑀬 𑀏𑀢𑁂𑀲𑀁 𑀲𑀭𑀻𑀭𑀢𑁄 𑀆𑀪𑀸 𑀙𑀺𑀚𑁆𑀚𑀺𑀢𑁆𑀯𑀸 𑀙𑀺𑀚𑁆𑀚𑀺𑀢𑁆𑀯𑀸 𑀧𑀢𑀦𑁆𑀢𑀻 𑀯𑀺𑀬 𑀲𑀭𑀢𑀺 𑀯𑀺𑀲𑁆𑀲𑀭𑀢𑀻𑀢𑀺 𑀆𑀪𑀲𑁆𑀲𑀭𑀸. 𑀢𑁂𑀲𑀼 𑀧𑀜𑁆𑀘𑀓𑀦𑀬𑁂𑀦 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀤𑁆𑀯𑀬𑀁 𑀧𑀭𑀺𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 𑀉𑀧𑀧𑀦𑁆𑀦𑀸 𑀧𑀭𑀺𑀢𑁆𑀢𑀸𑀪𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑁂𑀲𑀁 𑀤𑁆𑀯𑁂 𑀓𑀧𑁆𑀧𑀸 𑀆𑀬𑀼𑀧𑁆𑀧𑀫𑀸𑀡𑀁. 𑀫𑀚𑁆𑀛𑀺𑀫𑀁 𑀪𑀸𑀯𑁂𑀢𑁆𑀯𑀸 𑀉𑀧𑀧𑀦𑁆𑀦𑀸 𑀅𑀧𑁆𑀧𑀫𑀸𑀡𑀸𑀪𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑁂𑀲𑀁 𑀘𑀢𑁆𑀢𑀸𑀭𑁄 𑀓𑀧𑁆𑀧𑀸 𑀆𑀬𑀼𑀧𑁆𑀧𑀫𑀸𑀡𑀁. 𑀧𑀡𑀻𑀢𑀁 𑀪𑀸𑀯𑁂𑀢𑁆𑀯𑀸 𑀉𑀧𑀧𑀦𑁆𑀦𑀸 𑀆𑀪𑀲𑁆𑀲𑀭𑀸 ¶ 𑀦𑀸𑀫 𑀳𑁄𑀦𑁆𑀢𑀺, 𑀢𑁂𑀲𑀁 𑀅𑀝𑁆𑀞 𑀓𑀧𑁆𑀧𑀸 𑀆𑀬𑀼𑀧𑁆𑀧𑀫𑀸𑀡𑀁. 𑀇𑀥 𑀧𑀦 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀩𑁆𑀩𑁂𑀧𑀺 𑀢𑁂 𑀕𑀳𑀺𑀢𑀸. 𑀲𑀩𑁆𑀩𑁂𑀲𑀜𑁆𑀳𑀺 𑀢𑁂𑀲𑀁 𑀓𑀸𑀬𑁄 𑀏𑀓𑀯𑀺𑀧𑁆𑀨𑀸𑀭𑁄𑀯 𑀳𑁄𑀢𑀺, 𑀲𑀜𑁆𑀜𑀸 𑀧𑀦 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀯𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸 𑀯𑀸𑀢𑀺 𑀦𑀸𑀦𑀸.

𑀲𑀼𑀪𑀓𑀺𑀡𑁆𑀳𑀸𑀢𑀺 𑀲𑀼𑀪𑁂𑀦 𑀑𑀓𑀺𑀡𑁆𑀡𑀸 𑀯𑀺𑀓𑀺𑀡𑁆𑀡𑀸, 𑀲𑀼𑀪𑁂𑀦 𑀲𑀭𑀻𑀭𑀧𑁆𑀧𑀪𑀸𑀯𑀡𑁆𑀡𑁂𑀦 𑀏𑀓𑀕𑁆𑀖𑀦𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀲𑀜𑁆𑀳𑀺 𑀆𑀪𑀲𑁆𑀲𑀭𑀸𑀦𑀁 𑀯𑀺𑀬 𑀦 𑀙𑀺𑀚𑁆𑀚𑀺𑀢𑁆𑀯𑀸 𑀙𑀺𑀚𑁆𑀚𑀺𑀢𑁆𑀯𑀸 𑀧𑀪𑀸 𑀕𑀘𑁆𑀙𑀢𑀺. 𑀧𑀜𑁆𑀘𑀓𑀦𑀬𑁂 𑀧𑀦 𑀧𑀭𑀺𑀢𑁆𑀢𑀫𑀚𑁆𑀛𑀺𑀫𑀧𑀡𑀻𑀢𑀲𑁆𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀯𑀲𑁂𑀦 𑀲𑁄𑀴𑀲𑀤𑁆𑀯𑀢𑁆𑀢𑀺𑀁𑀲𑀘𑀢𑀼𑀲𑀝𑁆𑀞𑀺𑀓𑀧𑁆𑀧𑀸𑀬𑀼𑀓𑀸 𑀧𑀭𑀺𑀢𑁆𑀢𑀲𑀼𑀪𑀅𑀧𑁆𑀧𑀫𑀸𑀡𑀲𑀼𑀪𑀲𑀼𑀪𑀓𑀺𑀡𑁆𑀳𑀸 𑀦𑀸𑀫 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀇𑀢𑀺 𑀲𑀩𑁆𑀩𑁂𑀧𑀺 𑀢𑁂 𑀏𑀓𑀢𑁆𑀢𑀓𑀸𑀬𑀸 𑀘𑁂𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀜𑁆𑀜𑀸𑀬 𑀏𑀓𑀢𑁆𑀢𑀲𑀜𑁆𑀜𑀺𑀦𑁄 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑁂𑀳𑀧𑁆𑀨𑀮𑀸𑀧𑀺 𑀘𑀢𑀼𑀢𑁆𑀣𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀫𑁂𑀯 𑀪𑀚𑀦𑁆𑀢𑀺. 𑀅𑀲𑀜𑁆𑀜𑀲𑀢𑁆𑀢𑀸 𑀯𑀺𑀜𑁆𑀜𑀸𑀡𑀸𑀪𑀸𑀯𑀸 𑀏𑀢𑁆𑀣 𑀲𑀗𑁆𑀕𑀳𑀁 𑀦 𑀕𑀘𑁆𑀙𑀦𑁆𑀢𑀺, 𑀲𑀢𑁆𑀢𑀸𑀯𑀸𑀲𑁂𑀲𑀼 𑀕𑀘𑁆𑀙𑀦𑁆𑀢𑀺.

𑀲𑀼𑀤𑁆𑀥𑀸𑀯𑀸𑀲𑀸 𑀯𑀺𑀯𑀝𑁆𑀝𑀧𑀓𑁆𑀔𑁂 𑀞𑀺𑀢𑀸 𑀦 𑀲𑀩𑁆𑀩𑀓𑀸𑀮𑀺𑀓𑀸, 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁆𑀧𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀫𑁆𑀧𑀺 𑀩𑀼𑀤𑁆𑀥𑀲𑀼𑀜𑁆𑀜𑁂 𑀮𑁄𑀓𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀲𑁄𑀴𑀲𑀓𑀧𑁆𑀧𑀲𑀳𑀲𑁆𑀲𑀩𑁆𑀪𑀦𑁆𑀢𑀭𑁂 𑀩𑀼𑀤𑁆𑀥𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀲𑁆𑀲 𑀪𑀕𑀯𑀢𑁄 𑀔𑀦𑁆𑀥𑀯𑀸𑀭𑀝𑁆𑀞𑀸𑀦𑀲𑀤𑀺𑀲𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀦𑁂𑀯 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀁 𑀦 𑀲𑀢𑁆𑀢𑀸𑀯𑀸𑀲𑀁 ¶ 𑀪𑀚𑀦𑁆𑀢𑀺. 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦 𑁋 ‘‘𑀦 𑀔𑁄 𑀧𑀦 𑀲𑁄 𑀲𑀸𑀭𑀺𑀧𑀼𑀢𑁆𑀢 𑀲𑀢𑁆𑀢𑀸𑀯𑀸𑀲𑁄 𑀲𑀼𑀮𑀪𑀭𑀽𑀧𑁄 ¶ 𑀬𑁄 𑀫𑀬𑀸 𑀅𑀦𑀺𑀯𑀼𑀢𑁆𑀣𑀧𑀼𑀩𑁆𑀩𑁄 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀅𑀜𑁆𑀜𑀢𑁆𑀭 𑀲𑀼𑀤𑁆𑀥𑀸𑀯𑀸𑀲𑁂𑀳𑀺 𑀤𑁂𑀯𑁂𑀳𑀻’’𑀢𑀺 (𑀫. 𑀦𑀺. 𑁧.𑁧𑁬𑁦) 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀲𑀼𑀤𑁆𑀥𑀸𑀯𑀸𑀲𑀸𑀧𑀺 𑀘𑀢𑀼𑀢𑁆𑀣𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀁 𑀘𑀢𑀼𑀢𑁆𑀣𑀲𑀢𑁆𑀢𑀸𑀯𑀸𑀲𑀁𑀬𑁂𑀯 𑀪𑀚𑀦𑁆𑀢𑀻𑀢𑀺 𑀯𑀤𑀢𑀺, 𑀢𑀁 𑀅𑀧𑁆𑀧𑀝𑀺𑀩𑀸𑀳𑀺𑀬𑀢𑁆𑀢𑀸 𑀲𑀼𑀢𑁆𑀢𑀲𑁆𑀲 𑀅𑀦𑀼𑀜𑁆𑀜𑀸𑀢𑀁.

𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀦𑁆𑀢𑀺𑀆𑀤𑀻𑀦𑀁 𑀅𑀢𑁆𑀣𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑁄. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀧𑀦 𑀬𑀣𑁂𑀯 𑀲𑀜𑁆𑀜𑀸𑀬, 𑀏𑀯𑀁 𑀯𑀺𑀜𑁆𑀜𑀸𑀡𑀲𑁆𑀲𑀧𑀺 𑀲𑀼𑀔𑀼𑀫𑀢𑁆𑀢𑀸 𑀦𑁂𑀯 𑀯𑀺𑀜𑁆𑀜𑀸𑀡𑀁 𑀦𑀸𑀯𑀺𑀜𑁆𑀜𑀸𑀡𑀁. 𑀢𑀲𑁆𑀫𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑀅𑀯𑀢𑁆𑀯𑀸 𑀆𑀬𑀢𑀦𑁂𑀲𑀼 𑀯𑀼𑀢𑁆𑀢𑀁.

𑁧𑁨𑁮. 𑀢𑀢𑁆𑀭𑀸𑀢𑀺 𑀢𑀸𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼. 𑀢𑀜𑁆𑀘 𑀧𑀚𑀸𑀦𑀸𑀢𑀻𑀢𑀺 𑀢𑀜𑁆𑀘 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀁 𑀧𑀚𑀸𑀦𑀸𑀢𑀺. 𑀢𑀲𑁆𑀲𑀸 𑀘 𑀲𑀫𑀼𑀤𑀬𑀦𑁆𑀢𑀺 ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁪𑁯) 𑀦𑀬𑁂𑀦 𑀢𑀲𑁆𑀲𑀸 𑀲𑀫𑀼𑀤𑀬𑀜𑁆𑀘 𑀧𑀚𑀸𑀦𑀸𑀢𑀺. 𑀢𑀲𑁆𑀲𑀸 𑀘 𑀅𑀢𑁆𑀣𑀗𑁆𑀕𑀫𑀦𑁆𑀢𑀺 𑁋 ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 ¶ 𑀭𑀽𑀧𑀦𑀺𑀭𑁄𑀥𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀲𑁆𑀲𑀸 𑀅𑀢𑁆𑀣𑀗𑁆𑀕𑀫𑀜𑁆𑀘 𑀧𑀚𑀸𑀦𑀸𑀢𑀺. 𑀅𑀲𑁆𑀲𑀸𑀤𑀦𑁆𑀢𑀺 𑀬𑀁 𑀭𑀽𑀧𑀁 𑀧𑀝𑀺𑀘𑁆𑀘…𑀧𑁂… 𑀬𑀁 𑀯𑀺𑀜𑁆𑀜𑀸𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀯𑀺𑀜𑁆𑀜𑀸𑀡𑀲𑁆𑀲 𑀅𑀲𑁆𑀲𑀸𑀤𑁄𑀢𑀺, 𑀏𑀯𑀁 𑀢𑀲𑁆𑀲𑀸 𑀅𑀲𑁆𑀲𑀸𑀤𑀜𑁆𑀘 𑀧𑀚𑀸𑀦𑀸𑀢𑀺. 𑀆𑀤𑀻𑀦𑀯𑀦𑁆𑀢𑀺 𑀬𑀁 𑀭𑀽𑀧𑀁…𑀧𑁂… 𑀬𑀁 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀅𑀬𑀁 𑀯𑀺𑀜𑁆𑀜𑀸𑀡𑀲𑁆𑀲 𑀆𑀤𑀻𑀦𑀯𑁄𑀢𑀺, 𑀏𑀯𑀁 𑀢𑀲𑁆𑀲𑀸 𑀆𑀤𑀻𑀦𑀯𑀜𑁆𑀘 𑀧𑀚𑀸𑀦𑀸𑀢𑀺. 𑀦𑀺𑀲𑁆𑀲𑀭𑀡𑀦𑁆𑀢𑀺 𑀬𑁄 𑀭𑀽𑀧𑀲𑁆𑀫𑀺𑀁…𑀧𑁂… 𑀬𑁄 𑀯𑀺𑀜𑁆𑀜𑀸𑀡𑁂 𑀙𑀦𑁆𑀤𑀭𑀸𑀕𑀯𑀺𑀦𑀬𑁄, 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁, 𑀇𑀤𑀁 𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀭𑀡𑀦𑁆𑀢𑀺 (𑀲𑀁. 𑀦𑀺. 𑁨.𑁨𑁬) 𑀏𑀯𑀁 𑀢𑀲𑁆𑀲𑀸 𑀦𑀺𑀲𑁆𑀲𑀭𑀡𑀜𑁆𑀘 𑀧𑀚𑀸𑀦𑀸𑀢𑀺. 𑀓𑀮𑁆𑀮𑀁 𑀦𑀼 𑀢𑁂𑀦𑀸𑀢𑀺 𑀬𑀼𑀢𑁆𑀢𑀁 𑀦𑀼 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑀁 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀁 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀻𑀦𑀁 𑀯𑀲𑁂𑀦 𑀅𑀳𑀦𑁆𑀢𑀺 𑀯𑀸 𑀫𑀫𑀦𑁆𑀢𑀺 𑀯𑀸 𑀅𑀪𑀺𑀦𑀦𑁆𑀤𑀺𑀢𑀼𑀦𑁆𑀢𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀯𑁂𑀤𑀺𑀢𑀩𑁆𑀩𑁄. 𑀬𑀢𑁆𑀣 𑀧𑀦 𑀭𑀽𑀧𑀁 𑀦𑀢𑁆𑀣𑀺, 𑀢𑀢𑁆𑀣 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀯𑀲𑁂𑀦, 𑀬𑀢𑁆𑀣 𑀯𑀺𑀜𑁆𑀜𑀸𑀡𑀁 𑀦𑀢𑁆𑀣𑀺, 𑀢𑀢𑁆𑀣 𑀏𑀓𑀲𑁆𑀲 𑀔𑀦𑁆𑀥𑀲𑁆𑀲 𑀯𑀲𑁂𑀦 𑀲𑀫𑀼𑀤𑀬𑁄 𑀬𑁄𑀚𑁂𑀢𑀩𑁆𑀩𑁄. 𑀆𑀳𑀸𑀭𑀲𑀫𑀼𑀤𑀬𑀸 𑀆𑀳𑀸𑀭𑀦𑀺𑀭𑁄𑀥𑀸𑀢𑀺 𑀇𑀤𑀜𑁆𑀘𑁂𑀢𑁆𑀣 𑀧𑀤𑀁 𑀬𑁄𑀚𑁂𑀢𑀩𑁆𑀩𑀁.

𑀬𑀢𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀽𑀢𑀺 𑀬𑀤𑀸 𑀔𑁄 𑀆𑀦𑀦𑁆𑀤, 𑀪𑀺𑀓𑁆𑀔𑀼. 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄𑀢𑀺 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀅𑀕𑁆𑀕𑀳𑁂𑀢𑁆𑀯𑀸 𑀯𑀺𑀫𑀼𑀢𑁆𑀢𑁄. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀢𑀺 𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑁄. 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀅𑀲𑀘𑁆𑀙𑀺𑀓𑀢𑁆𑀯𑀸 𑀧𑀜𑁆𑀜𑀸𑀩𑀮𑁂𑀦𑁂𑀯 𑀦𑀸𑀫𑀓𑀸𑀬𑀲𑁆𑀲 𑀘 𑀭𑀽𑀧𑀓𑀸𑀬𑀲𑁆𑀲 𑀘 𑀅𑀧𑁆𑀧𑀯𑀢𑁆𑀢𑀺𑀁 𑀓𑀢𑁆𑀯𑀸 𑀯𑀺𑀫𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀲𑁄 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀘 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀞𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 ¶ 𑀘𑀸𑀢𑀺 𑀧𑀜𑁆𑀘𑀯𑀺𑀥𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄? 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀦 𑀳𑁂𑀯 𑀔𑁄 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄’’𑀢𑀺 (𑀧𑀼. 𑀧. 𑁧𑁫).

𑀅𑀝𑁆𑀞𑀯𑀺𑀫𑁄𑀓𑁆𑀔𑀯𑀡𑁆𑀡𑀦𑀸

𑁧𑁨𑁯. 𑀏𑀯𑀁 ¶ 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀕𑀫𑀦𑀜𑁆𑀘 𑀦𑀸𑀫𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀢𑀭𑀲𑁆𑀲 𑀤𑀲𑁆𑀲𑁂𑀢𑀼𑀁 𑀅𑀝𑁆𑀞 𑀔𑁄 𑀇𑀫𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀫𑁄𑀓𑁆𑀔𑁄𑀢𑀺 𑀓𑁂𑀦𑀝𑁆𑀞𑁂𑀦 𑀯𑀺𑀫𑁄𑀓𑁆𑀔𑁄? 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁂𑀦. 𑀓𑁄 𑀧𑀦𑀸𑀬𑀁 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁄 𑀦𑀸𑀫? 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀘 𑀲𑀼𑀝𑁆𑀞𑀼 𑀫𑀼𑀘𑁆𑀘𑀦𑀝𑁆𑀞𑁄, 𑀆𑀭𑀫𑁆𑀫𑀡𑁂 𑀘 𑀅𑀪𑀺𑀭𑀢𑀺𑀯𑀲𑁂𑀦 𑀲𑀼𑀝𑁆𑀞𑀼 𑀫𑀼𑀘𑁆𑀘𑀦𑀝𑁆𑀞𑁄, 𑀧𑀺𑀢𑀼𑀅𑀗𑁆𑀓𑁂 𑀯𑀺𑀲𑁆𑀲𑀝𑁆𑀞𑀗𑁆𑀕𑀧𑀘𑁆𑀘𑀗𑁆𑀕𑀲𑁆𑀲 𑀤𑀸𑀭𑀓𑀲𑁆𑀲 𑀲𑀬𑀦𑀁 𑀯𑀺𑀬 𑀅𑀦𑀺𑀕𑁆𑀕𑀳𑀺𑀢𑀪𑀸𑀯𑁂𑀦 𑀦𑀺𑀭𑀸𑀲𑀗𑁆𑀓𑀢𑀸𑀬 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀁 𑀧𑀦𑀢𑁆𑀣𑁄 𑀧𑀘𑁆𑀙𑀺𑀫𑁂 ¶ 𑀯𑀺𑀫𑁄𑀓𑁆𑀔𑁂 𑀦𑀢𑁆𑀣𑀺, 𑀧𑀼𑀭𑀺𑀫𑁂𑀲𑀼 𑀲𑀩𑁆𑀩𑁂𑀲𑀼 𑀅𑀢𑁆𑀣𑀺.

𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑀏𑀢𑁆𑀣 𑀅𑀚𑁆𑀛𑀢𑁆𑀢𑀁 𑀓𑁂𑀲𑀸𑀤𑀻𑀲𑀼 𑀦𑀻𑀮𑀓𑀲𑀺𑀡𑀸𑀤𑀻𑀲𑀼 𑀦𑀻𑀮𑀓𑀲𑀺𑀡𑀸𑀤𑀺𑀯𑀲𑁂𑀦 𑀉𑀧𑁆𑀧𑀸𑀤𑀺𑀢𑀁 𑀭𑀽𑀧𑀚𑁆𑀛𑀸𑀦𑀁 𑀭𑀽𑀧𑀁, 𑀢𑀤𑀲𑁆𑀲𑀢𑁆𑀣𑀻𑀢𑀺 𑀭𑀽𑀧𑀻. 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑀩𑀳𑀺𑀤𑁆𑀥𑀸𑀧𑀺 𑀦𑀻𑀮𑀓𑀲𑀺𑀡𑀸𑀤𑀻𑀦𑀺 𑀭𑀽𑀧𑀸𑀦𑀺 𑀛𑀸𑀦𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀺. 𑀇𑀫𑀺𑀦𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀯𑀢𑁆𑀣𑀼𑀓𑁂𑀲𑀼 𑀓𑀲𑀺𑀡𑁂𑀲𑀼 𑀉𑀧𑁆𑀧𑀸𑀤𑀺𑀢𑀚𑁆𑀛𑀸𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀘𑀢𑁆𑀢𑀸𑀭𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻𑀢𑀺 𑀅𑀚𑁆𑀛𑀢𑁆𑀢𑀁 𑀦 𑀭𑀽𑀧𑀲𑀜𑁆𑀜𑀻, 𑀅𑀢𑁆𑀢𑀦𑁄 𑀓𑁂𑀲𑀸𑀤𑀻𑀲𑀼 𑀅𑀦𑀼𑀧𑁆𑀧𑀸𑀤𑀺𑀢𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁄𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀩𑀳𑀺𑀤𑁆𑀥𑀸 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀩𑀳𑀺𑀤𑁆𑀥𑀸𑀯 𑀉𑀧𑁆𑀧𑀸𑀤𑀺𑀢𑀚𑁆𑀛𑀸𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀤𑀲𑁆𑀲𑀺𑀢𑀸𑀦𑀺.

𑀲𑀼𑀪𑀦𑁆𑀢𑁆𑀯𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀲𑀼𑀯𑀺𑀲𑀼𑀤𑁆𑀥𑁂𑀲𑀼 𑀦𑀻𑀮𑀸𑀤𑀻𑀲𑀼 𑀯𑀡𑁆𑀡𑀓𑀲𑀺𑀡𑁂𑀲𑀼 𑀛𑀸𑀦𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀦𑁆𑀢𑁄𑀅𑀧𑁆𑀧𑀦𑀸𑀬𑀁 𑀲𑀼𑀪𑀦𑁆𑀢𑀺 𑀆𑀪𑁄𑀕𑁄 𑀦𑀢𑁆𑀣𑀺, 𑀬𑁄 𑀧𑀦 𑀯𑀺𑀲𑀼𑀤𑁆𑀥𑀁 𑀲𑀼𑀪𑀁 𑀓𑀲𑀺𑀡𑀫𑀸𑀭𑀫𑁆𑀫𑀡𑀁 𑀓𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀲𑁄 𑀬𑀲𑁆𑀫𑀸 𑀲𑀼𑀪𑀦𑁆𑀢𑀺 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀏𑀯𑀁 𑀤𑁂𑀲𑀦𑀸 𑀓𑀢𑀸. 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀧𑀦 𑁋 ‘‘𑀓𑀣𑀁 𑀲𑀼𑀪𑀦𑁆𑀢𑁆𑀯𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑀺𑀫𑁄𑀓𑁆𑀔𑁄? 𑀇𑀥 𑀪𑀺𑀓𑁆𑀔𑀼 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺…𑀧𑁂… 𑀫𑁂𑀢𑁆𑀢𑀸𑀬 𑀪𑀸𑀯𑀺𑀢𑀢𑁆𑀢𑀸 𑀲𑀢𑁆𑀢𑀸 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺. 𑀓𑀭𑀼𑀡𑀸, 𑀫𑀼𑀤𑀺𑀢𑀸, 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺…𑀧𑁂… 𑀉𑀧𑁂𑀓𑁆𑀔𑀸𑀬 𑀪𑀸𑀯𑀺𑀢𑀢𑁆𑀢𑀸 𑀲𑀢𑁆𑀢𑀸 𑀅𑀧𑁆𑀧𑀝𑀺𑀓𑀽𑀮𑀸 ¶ 𑀳𑁄𑀦𑁆𑀢𑀺. 𑀏𑀯𑀁 𑀲𑀼𑀪𑀁 𑀢𑁆𑀯𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑀺𑀫𑁄𑀓𑁆𑀔𑁄’’𑀢𑀺 (𑀧𑀝𑀺. 𑀫. 𑁧.𑁨𑁧𑁨) 𑀯𑀼𑀢𑁆𑀢𑀁.

𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀦𑁆𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀫𑁂𑀯. 𑀅𑀬𑀁 𑀅𑀝𑁆𑀞𑀫𑁄 𑀯𑀺𑀫𑁄𑀓𑁆𑀔𑁄𑀢𑀺 𑀅𑀬𑀁 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀲𑀩𑁆𑀩𑀲𑁄 𑀯𑀺𑀲𑀼𑀤𑁆𑀥𑀢𑁆𑀢𑀸 𑀯𑀺𑀫𑀼𑀢𑁆𑀢𑀢𑁆𑀢𑀸 𑀅𑀝𑁆𑀞𑀫𑁄 𑀉𑀢𑁆𑀢𑀫𑁄 𑀯𑀺𑀫𑁄𑀓𑁆𑀔𑁄 𑀦𑀸𑀫.

𑁧𑁩𑁦. 𑀅𑀦𑀼𑀮𑁄𑀫𑀦𑁆𑀢𑀺 ¶ 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸. 𑀧𑀝𑀺𑀮𑁄𑀫𑀦𑁆𑀢𑀺 𑀧𑀭𑀺𑀬𑁄𑀲𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀆𑀤𑀺𑀢𑁄. 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀦𑁆𑀢𑀺 𑀇𑀤𑀁 𑀅𑀢𑀺𑀧𑀕𑀼𑀡𑀢𑁆𑀢𑀸 𑀲𑀫𑀸𑀧𑀢𑁆𑀢𑀻𑀦𑀁 𑀅𑀝𑁆𑀞𑀢𑁆𑀯𑀸𑀯 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀭𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀬𑀢𑁆𑀣𑀺𑀘𑁆𑀙𑀓𑀦𑁆𑀢𑀺 𑀑𑀓𑀸𑀲𑀧𑀭𑀺𑀤𑀻𑀧𑀦𑀁, 𑀬𑀢𑁆𑀣 𑀬𑀢𑁆𑀣 𑀑𑀓𑀸𑀲𑁂 𑀇𑀘𑁆𑀙𑀢𑀺. 𑀬𑀤𑀺𑀘𑁆𑀙𑀓𑀦𑁆𑀢𑀺 𑀲𑀫𑀸𑀧𑀢𑁆𑀢𑀺𑀤𑀻𑀧𑀦𑀁, 𑀬𑀁 𑀬𑀁 𑀲𑀫𑀸𑀧𑀢𑁆𑀢𑀺𑀁 𑀇𑀘𑁆𑀙𑀢𑀺. 𑀬𑀸𑀯𑀢𑀺𑀘𑁆𑀙𑀓𑀦𑁆𑀢𑀺 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀤𑀻𑀧𑀦𑀁 ¶ , 𑀬𑀸𑀯𑀢𑀓𑀁 𑀅𑀤𑁆𑀥𑀸𑀦𑀁 𑀇𑀘𑁆𑀙𑀢𑀺. 𑀲𑀫𑀸𑀧𑀚𑁆𑀚𑀢𑀻𑀢𑀺 𑀢𑀁 𑀢𑀁 𑀲𑀫𑀸𑀧𑀢𑁆𑀢𑀺𑀁 𑀧𑀯𑀺𑀲𑀢𑀺. 𑀯𑀼𑀝𑁆𑀞𑀸𑀢𑀻𑀢𑀺 𑀢𑀢𑁄 𑀉𑀝𑁆𑀞𑀸𑀬 𑀢𑀺𑀝𑁆𑀞𑀢𑀺.

𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀢𑀺 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀯𑀺𑀫𑀼𑀢𑁆𑀢𑁄, 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀸 𑀭𑀽𑀧𑀓𑀸𑀬𑀢𑁄 𑀯𑀺𑀫𑀼𑀢𑁆𑀢𑁄, 𑀫𑀕𑁆𑀕𑁂𑀦 𑀦𑀸𑀫𑀓𑀸𑀬𑀢𑁄 𑀯𑀺𑀫𑀼𑀢𑁆𑀢𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀅𑀘𑁆𑀘𑀻 𑀬𑀣𑀸 𑀯𑀸𑀢𑀯𑁂𑀕𑁂𑀦 𑀔𑀺𑀢𑁆𑀢𑀸, (𑀉𑀧𑀲𑀺𑀯𑀸𑀢𑀺 𑀪𑀕𑀯𑀸)

𑀅𑀢𑁆𑀣𑀁 𑀧𑀮𑁂𑀢𑀺 𑀦 𑀉𑀧𑁂𑀢𑀺 𑀲𑀗𑁆𑀔𑀁;

𑀏𑀯𑀁 𑀫𑀼𑀦𑀻 𑀦𑀸𑀫𑀓𑀸𑀬𑀸 𑀯𑀺𑀫𑀼𑀢𑁆𑀢𑁄,

𑀅𑀢𑁆𑀣𑀁 𑀧𑀮𑁂𑀢𑀺 𑀦 𑀉𑀧𑁂𑀢𑀺 𑀲𑀗𑁆𑀔’’𑀦𑁆𑀢𑀺. (𑀲𑀼. 𑀦𑀺. 𑁧𑁦𑁮𑁦);

𑀲𑁄 𑀧𑀦𑁂𑀲 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀢𑁄 𑀉𑀝𑁆𑀞𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀘 𑀅𑀦𑀸𑀕𑀸𑀫𑀻 𑀳𑀼𑀢𑁆𑀯𑀸 𑀦𑀺𑀭𑁄𑀥𑀸 𑀉𑀝𑁆𑀞𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀘𑀸𑀢𑀺 𑀧𑀜𑁆𑀘𑀯𑀺𑀥𑁄. 𑀓𑁂𑀘𑀺 𑀧𑀦 𑁋 ‘‘𑀬𑀲𑁆𑀫𑀸 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑁆𑀧𑀺 𑀤𑀼𑀯𑀗𑁆𑀕𑀺𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀁, 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀫𑁆𑀧𑀺 𑀢𑀸𑀤𑀺𑀲𑀫𑁂𑀯. 𑀢𑀲𑁆𑀫𑀸 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀉𑀝𑁆𑀞𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄𑀧𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺.

𑀅𑀬𑀁 𑀧𑀦 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀧𑀜𑁆𑀳𑁄 𑀳𑁂𑀝𑁆𑀞𑀸 𑀮𑁄𑀳𑀧𑀸𑀲𑀸𑀤𑁂 𑀲𑀫𑀼𑀝𑁆𑀞𑀳𑀺𑀢𑁆𑀯𑀸 𑀢𑀺𑀧𑀺𑀝𑀓𑀘𑀽𑀴𑀲𑀼𑀫𑀦𑀢𑁆𑀣𑁂𑀭𑀲𑁆𑀲 𑀯𑀡𑁆𑀡𑀦𑀁 𑀦𑀺𑀲𑁆𑀲𑀸𑀬 𑀘𑀺𑀭𑁂𑀦 𑀯𑀺𑀦𑀺𑀘𑁆𑀙𑀬𑀁 𑀧𑀢𑁆𑀢𑁄 ¶ . 𑀕𑀺𑀭𑀺𑀯𑀺𑀳𑀸𑀭𑁂 𑀓𑀺𑀭 𑀣𑁂𑀭𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑁄 𑀏𑀓𑀲𑁆𑀲 𑀧𑀺𑀡𑁆𑀟𑀧𑀸𑀢𑀺𑀓𑀲𑁆𑀲 𑀫𑀼𑀔𑀢𑁄 𑀢𑀁 𑀧𑀜𑁆𑀳𑀁 𑀲𑀼𑀢𑁆𑀯𑀸 𑀆𑀳 𑁋 ‘‘𑀆𑀯𑀼𑀲𑁄, 𑀳𑁂𑀝𑁆𑀞𑀸𑀮𑁄𑀳𑀧𑀸𑀲𑀸𑀤𑁂 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀲𑁆𑀲 𑀥𑀫𑁆𑀫𑀁 𑀯𑀡𑁆𑀡𑀬𑀢𑁄 𑀦 𑀓𑁂𑀦𑀘𑀺 𑀲𑀼𑀢𑀧𑀼𑀩𑁆𑀩’’𑀦𑁆𑀢𑀺. 𑀓𑀺𑀁 𑀧𑀦, 𑀪𑀦𑁆𑀢𑁂, 𑀣𑁂𑀭𑁄 𑀅𑀯𑀘𑀸𑀢𑀺? 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀓𑀺𑀜𑁆𑀘𑀸𑀧𑀺 𑀤𑀼𑀯𑀗𑁆𑀕𑀺𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀁 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀢𑀺, 𑀓𑀺𑀮𑁂𑀲𑀸𑀦𑀁 𑀧𑀦 𑀆𑀲𑀦𑁆𑀦𑀧𑀓𑁆𑀔𑁂 𑀯𑀺𑀭𑀽𑀳𑀦𑀝𑁆𑀞𑀸𑀦𑁂 𑀲𑀫𑀼𑀤𑀸𑀘𑀭𑀢𑀺. 𑀇𑀫𑁂 𑀳𑀺 𑀓𑀺𑀮𑁂𑀲𑀸 𑀦𑀸𑀫 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀦𑀻𑀮𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀆𑀭𑀫𑁆𑀫𑀡𑀁 𑀉𑀧𑀦𑀺𑀲𑁆𑀲𑀸𑀬 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀜𑁆𑀘 𑀢𑀁 𑀆𑀭𑀫𑁆𑀫𑀡𑀁 𑀦 𑀲𑀫𑀢𑀺𑀓𑁆𑀓𑀫𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀲𑁄 𑀭𑀽𑀧𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀭𑀽𑀧𑀚𑁆𑀛𑀸𑀦𑀯𑀲𑁂𑀦 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄𑀯 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀢𑀺, 𑀇𑀤𑀁 𑀆𑀯𑀼𑀲𑁄 𑀣𑁂𑀭𑁄 𑀅𑀯𑀘. 𑀇𑀤𑀜𑁆𑀘 𑀧𑀦 𑀯𑀢𑁆𑀯𑀸 𑀇𑀤𑀁 𑀲𑀼𑀢𑁆𑀢𑀁 𑀆𑀳𑀭𑀺 𑁋 ‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄. 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀝𑁆𑀞𑀯𑀺𑀫𑁄𑀓𑁆𑀔𑁂 ¶ ¶ 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄’’𑀢𑀺 (𑀧𑀼. 𑀧. 𑁨𑁪).

𑀇𑀫𑀸𑀬 𑀘 𑀆𑀦𑀦𑁆𑀤 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀆𑀦𑀦𑁆𑀤 𑀇𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀺𑀢𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁

𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁧. 𑀏𑀯𑀁 ¶ ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀫𑀦𑀼𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸 𑁋 𑀕𑀺𑀚𑁆𑀛𑀓𑀽𑀝𑁂𑀢𑀺 𑀕𑀺𑀚𑁆𑀛𑀸 𑀢𑀲𑁆𑀲 𑀓𑀽𑀝𑁂𑀲𑀼 𑀯𑀲𑀺𑀁𑀲𑀼, 𑀕𑀺𑀚𑁆𑀛𑀲𑀤𑀺𑀲𑀁 𑀯𑀸 𑀢𑀲𑁆𑀲 𑀓𑀽𑀝𑀁 𑀅𑀢𑁆𑀣𑀻𑀢𑀺 𑀕𑀺𑀚𑁆𑀛𑀓𑀽𑀝𑁄, 𑀢𑀲𑁆𑀫𑀺𑀁 𑀕𑀺𑀚𑁆𑀛𑀓𑀽𑀝𑁂. 𑀅𑀪𑀺𑀬𑀸𑀢𑀼𑀓𑀸𑀫𑁄𑀢𑀺 𑀅𑀪𑀺𑀪𑀯𑀦𑀢𑁆𑀣𑀸𑀬 𑀬𑀸𑀢𑀼𑀓𑀸𑀫𑁄. 𑀯𑀚𑁆𑀚𑀻𑀢𑀺 𑀯𑀚𑁆𑀚𑀺𑀭𑀸𑀚𑀸𑀦𑁄. 𑀏𑀯𑀁𑀫𑀳𑀺𑀤𑁆𑀥𑀺𑀓𑁂𑀢𑀺 𑀏𑀯𑀁 𑀫𑀳𑀢𑀺𑀬𑀸 𑀭𑀸𑀚𑀺𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁂, 𑀏𑀢𑁂𑀦 𑀦𑁂𑀲𑀁 𑀲𑀫𑀕𑁆𑀕𑀪𑀸𑀯𑀁 𑀓𑀣𑁂𑀲𑀺. 𑀏𑀯𑀁𑀫𑀳𑀸𑀦𑀼𑀪𑀸𑀯𑁂𑀢𑀺 𑀏𑀯𑀁 𑀫𑀳𑀦𑁆𑀢𑁂𑀦 𑀆𑀦𑀼𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑁂, 𑀏𑀢𑁂𑀦 𑀦𑁂𑀲𑀁 𑀳𑀢𑁆𑀣𑀺𑀲𑀺𑀧𑁆𑀧𑀸𑀤𑀻𑀲𑀼 𑀓𑀢𑀲𑀺𑀓𑁆𑀔𑀢𑀁 𑀓𑀣𑁂𑀲𑀺, 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀲𑀺𑀓𑁆𑀔𑀺𑀢𑀸 𑀯𑀢𑀺𑀫𑁂 𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑀓𑀸, 𑀲𑀼𑀲𑀺𑀓𑁆𑀔𑀺𑀢𑀸 𑀯𑀢𑀺𑀫𑁂 𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑀓𑀸, 𑀬𑀢𑁆𑀭 𑀳𑀺 𑀦𑀸𑀫 𑀲𑀼𑀔𑀼𑀫𑁂𑀦 𑀢𑀸𑀴𑀘𑁆𑀙𑀺𑀕𑁆𑀕𑀮𑁂𑀦 𑀅𑀲𑀦𑀁 𑀅𑀢𑀺𑀧𑀸𑀢𑀬𑀺𑀲𑁆𑀲𑀦𑁆𑀢𑀺 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀁 𑀅𑀯𑀺𑀭𑀸𑀥𑀺𑀢’’𑀦𑁆𑀢𑀺 (𑀲𑀁. 𑀦𑀺. 𑁫.𑁧𑁧𑁧𑁫). 𑀉𑀘𑁆𑀙𑁂𑀘𑁆𑀙𑀸𑀫𑀻𑀢𑀺 𑀉𑀘𑁆𑀙𑀺𑀦𑁆𑀤𑀺𑀲𑁆𑀲𑀸𑀫𑀺. 𑀯𑀺𑀦𑀸𑀲𑁂𑀲𑁆𑀲𑀸𑀫𑀻𑀢𑀺 𑀦𑀸𑀲𑁂𑀲𑁆𑀲𑀸𑀫𑀺, 𑀅𑀤𑀲𑁆𑀲𑀦𑀁 𑀧𑀸𑀧𑁂𑀲𑁆𑀲𑀸𑀫𑀺. 𑀅𑀦𑀬𑀩𑁆𑀬𑀲𑀦𑀦𑁆𑀢𑀺 𑀏𑀢𑁆𑀣 𑀦 𑀅𑀬𑁄𑀢𑀺 𑀅𑀦𑀬𑁄, 𑀅𑀯𑀟𑁆𑀠𑀺𑀬𑀸 𑀏𑀢𑀁 𑀦𑀸𑀫𑀁. 𑀳𑀺𑀢𑀜𑁆𑀘 𑀲𑀼𑀔𑀜𑁆𑀘 𑀯𑀺𑀬𑀲𑁆𑀲𑀢𑀺 𑀯𑀺𑀓𑁆𑀔𑀺𑀧𑀢𑀻𑀢𑀺 𑀩𑁆𑀬𑀲𑀦𑀁, 𑀜𑀸𑀢𑀺𑀧𑀸𑀭𑀺𑀚𑀼𑀜𑁆𑀜𑀸𑀤𑀻𑀦𑀁 𑀏𑀢𑀁 𑀦𑀸𑀫𑀁. 𑀆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀧𑀸𑀧𑀬𑀺𑀲𑁆𑀲𑀸𑀫𑀺.

𑀇𑀢𑀺 𑀓𑀺𑀭 𑀲𑁄 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀇𑀫𑀁 𑀬𑀼𑀤𑁆𑀥𑀓𑀣𑀫𑁂𑀯 𑀓𑀣𑁂𑀢𑀺, 𑀕𑀫𑀦𑀲𑀚𑁆𑀚𑀸 𑀳𑁄𑀣𑀸𑀢𑀺 𑀏𑀯𑀁 𑀩𑀮𑀓𑀸𑀬𑀁 𑀆𑀡𑀸𑀧𑁂𑀢𑀺. 𑀓𑀲𑁆𑀫𑀸? 𑀕𑀗𑁆𑀕𑀸𑀬𑀁 𑀓𑀺𑀭 𑀏𑀓𑀁 𑀧𑀝𑁆𑀝𑀦𑀕𑀸𑀫𑀁 𑀦𑀺𑀲𑁆𑀲𑀸𑀬 𑀅𑀟𑁆𑀠𑀬𑁄𑀚𑀦𑀁 𑀅𑀚𑀸𑀢𑀲𑀢𑁆𑀢𑀼𑀦𑁄 𑀆𑀡𑀸, 𑀅𑀟𑁆𑀠𑀬𑁄𑀚𑀦𑀁 𑀮𑀺𑀘𑁆𑀙𑀯𑀻𑀦𑀁. 𑀏𑀢𑁆𑀣 𑀧𑀦 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀭𑀸𑀧𑀺 𑀘 𑀧𑀩𑁆𑀩𑀢𑀧𑀸𑀤𑀢𑁄 𑀫𑀳𑀕𑁆𑀖𑀪𑀡𑁆𑀟𑀁 𑀑𑀢𑀭𑀢𑀺. 𑀢𑀁 𑀲𑀼𑀢𑁆𑀯𑀸 𑁋 ‘‘𑀅𑀚𑁆𑀚 𑀬𑀸𑀫𑀺, 𑀲𑁆𑀯𑁂 𑀬𑀸𑀫𑀻’’𑀢𑀺 𑀅𑀚𑀸𑀢𑀲𑀢𑁆𑀢𑀼𑀦𑁄 𑀲𑀁𑀯𑀺𑀤𑀳𑀦𑁆𑀢𑀲𑁆𑀲𑁂𑀯 𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑁄 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸 𑀧𑀼𑀭𑁂𑀢𑀭𑀁 𑀕𑀦𑁆𑀢𑁆𑀯𑀸 𑀲𑀩𑁆𑀩𑀁 𑀕𑀡𑁆𑀳𑀦𑁆𑀢𑀺. 𑀅𑀚𑀸𑀢𑀲𑀢𑁆𑀢𑀼 𑀧𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 ¶ 𑀓𑀼𑀚𑁆𑀛𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀢𑁂 𑀧𑀼𑀦𑀲𑀁𑀯𑀘𑁆𑀙𑀭𑁂𑀧𑀺 𑀢𑀣𑁂𑀯 𑀓𑀭𑁄𑀦𑁆𑀢𑀺. 𑀅𑀣 𑀲𑁄 𑀩𑀮𑀯𑀸𑀖𑀸𑀢𑀚𑀸𑀢𑁄 𑀢𑀤𑀸 𑀏𑀯𑀫𑀓𑀸𑀲𑀺.

𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀕𑀡𑁂𑀦 𑀲𑀤𑁆𑀥𑀺𑀁 𑀬𑀼𑀤𑁆𑀥𑀁 𑀦𑀸𑀫 𑀪𑀸𑀭𑀺𑀬𑀁, 𑀏𑀓𑁄𑀧𑀺 𑀫𑁄𑀖𑀧𑁆𑀧𑀳𑀸𑀭𑁄 𑀦𑀸𑀫 𑀦𑀢𑁆𑀣𑀺, 𑀏𑀓𑁂𑀦 𑀔𑁄 𑀧𑀦 𑀧𑀡𑁆𑀟𑀺𑀢𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀓𑀭𑁄𑀦𑁆𑀢𑁄 𑀦𑀺𑀧𑁆𑀧𑀭𑀸𑀥𑁄 𑀳𑁄𑀢𑀺, 𑀧𑀡𑁆𑀟𑀺𑀢𑁄 𑀘 𑀲𑀢𑁆𑀣𑀸𑀭𑀸 𑀲𑀤𑀺𑀲𑁄 ¶ 𑀦𑀢𑁆𑀣𑀺, 𑀲𑀢𑁆𑀣𑀸 𑀘 𑀅𑀯𑀺𑀤𑀽𑀭𑁂 𑀥𑀼𑀭𑀯𑀺𑀳𑀸𑀭𑁂 𑀯𑀲𑀢𑀺, 𑀳𑀦𑁆𑀤𑀸𑀳𑀁 𑀧𑁂𑀲𑁂𑀢𑁆𑀯𑀸 𑀧𑀼𑀘𑁆𑀙𑀸𑀫𑀺 ¶ . 𑀲𑀘𑁂 𑀫𑁂 𑀕𑀢𑁂𑀦 𑀓𑁄𑀘𑀺 𑀅𑀢𑁆𑀣𑁄 𑀪𑀯𑀺𑀲𑁆𑀲𑀢𑀺, 𑀲𑀢𑁆𑀣𑀸 𑀢𑀼𑀡𑁆𑀳𑀻 𑀪𑀯𑀺𑀲𑁆𑀲𑀢𑀺, 𑀅𑀦𑀢𑁆𑀣𑁂 𑀧𑀦 𑀲𑀢𑀺 𑀓𑀺𑀁 𑀭𑀜𑁆𑀜𑁄 𑀢𑀢𑁆𑀣 𑀕𑀫𑀦𑁂𑀦𑀸𑀢𑀺 𑀯𑀓𑁆𑀔𑀢𑀻’’𑀢𑀺. 𑀲𑁄 𑀯𑀲𑁆𑀲𑀓𑀸𑀭𑀩𑁆𑀭𑀸𑀳𑁆𑀫𑀡𑀁 𑀧𑁂𑀲𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀭𑀸𑀚𑀸…𑀧𑁂… 𑀆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺.

𑀭𑀸𑀚𑀅𑀧𑀭𑀺𑀳𑀸𑀦𑀺𑀬𑀥𑀫𑁆𑀫𑀯𑀡𑁆𑀡𑀦𑀸

𑁧𑁩𑁪. 𑀪𑀕𑀯𑀦𑁆𑀢𑀁 𑀩𑀻𑀚𑀬𑀫𑀸𑀦𑁄𑀢𑀺 𑀣𑁂𑀭𑁄 𑀯𑀢𑁆𑀢𑀲𑀻𑀲𑁂 𑀞𑀢𑁆𑀯𑀸 𑀪𑀕𑀯𑀦𑁆𑀢𑀁 𑀩𑀻𑀚𑀢𑀺, 𑀪𑀕𑀯𑀢𑁄 𑀧𑀦 𑀲𑀻𑀢𑀁 𑀯𑀸 𑀉𑀡𑁆𑀳𑀁 𑀯𑀸 𑀦𑀢𑁆𑀣𑀺. 𑀪𑀕𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀅𑀫𑀦𑁆𑀢𑁂𑀢𑁆𑀯𑀸 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑀼𑀓𑀸𑀫𑁄 𑀓𑀺𑀦𑁆𑀢𑀺 𑀢𑁂, 𑀆𑀦𑀦𑁆𑀤, 𑀲𑀼𑀢𑀦𑁆𑀢𑀺𑀆𑀤𑀺𑀫𑀸𑀳. 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀸𑀢𑀸𑀢𑀺 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀲𑀦𑁆𑀦𑀺𑀧𑀢𑀦𑁆𑀢𑀸𑀧𑀺 𑀅𑀦𑁆𑀢𑀭𑀦𑁆𑀢𑀭𑀸 𑀲𑀦𑁆𑀦𑀺𑀧𑀢𑀦𑁆𑀢𑀸𑀧𑀺 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀸𑀢𑀸𑀯. 𑀲𑀦𑁆𑀦𑀺𑀧𑀸𑀢𑀩𑀳𑀼𑀮𑀸𑀢𑀺 𑀳𑀺𑀬𑁆𑀬𑁄𑀧𑀺 𑀲𑀦𑁆𑀦𑀺𑀧𑀢𑀺𑀫𑁆𑀳𑀸, 𑀧𑀼𑀭𑀺𑀫𑀤𑀺𑀯𑀲𑀫𑁆𑀧𑀺 𑀲𑀦𑁆𑀦𑀺𑀧𑀢𑀺𑀫𑁆𑀳𑀸, 𑀧𑀼𑀦 𑀅𑀚𑁆𑀚 𑀓𑀺𑀫𑀢𑁆𑀣𑀁 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀫𑀸𑀢𑀺 𑀯𑁄𑀲𑀸𑀦𑀁 𑀅𑀦𑀸𑀧𑀚𑁆𑀚𑀦𑁆𑀢𑀸 𑀲𑀦𑁆𑀦𑀺𑀧𑀸𑀢𑀩𑀳𑀼𑀮𑀸 𑀦𑀸𑀫 𑀳𑁄𑀦𑁆𑀢𑀺. 𑀬𑀸𑀯𑀓𑀻𑀯𑀜𑁆𑀘𑀸𑀢𑀺 𑀬𑀢𑁆𑀢𑀓𑀁 𑀓𑀸𑀮𑀁. 𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻𑀢𑀺 𑁋 𑀅𑀪𑀺𑀡𑁆𑀳𑀁 𑀅𑀲𑀦𑁆𑀦𑀺𑀧𑀢𑀦𑁆𑀢𑀸 𑀳𑀺 𑀤𑀺𑀲𑀸𑀯𑀺𑀤𑀺𑀲𑀸𑀲𑀼 𑀆𑀕𑀢𑀁 𑀲𑀸𑀲𑀦𑀁 𑀦 𑀲𑀼𑀡𑀦𑁆𑀢𑀺, 𑀢𑀢𑁄 𑁋 ‘‘𑀅𑀲𑀼𑀓𑀕𑀸𑀫𑀲𑀻𑀫𑀸 𑀯𑀸 𑀦𑀺𑀕𑀫𑀲𑀻𑀫𑀸 𑀯𑀸 𑀆𑀓𑀼𑀮𑀸, 𑀅𑀲𑀼𑀓𑀝𑁆𑀞𑀸𑀦𑁂 𑀘𑁄𑀭𑀸 𑀯𑀸 𑀧𑀭𑀺𑀬𑀼𑀝𑁆𑀞𑀺𑀢𑀸’’𑀢𑀺 𑀦 𑀚𑀸𑀦𑀦𑁆𑀢𑀺, 𑀘𑁄𑀭𑀸𑀧𑀺 ‘‘𑀧𑀫𑀢𑁆𑀢𑀸 𑀭𑀸𑀚𑀸𑀦𑁄’’𑀢𑀺 𑀜𑀢𑁆𑀯𑀸 𑀕𑀸𑀫𑀦𑀺𑀕𑀫𑀸𑀤𑀻𑀦𑀺 𑀧𑀳𑀭𑀦𑁆𑀢𑀸 𑀚𑀦𑀧𑀤𑀁 𑀦𑀸𑀲𑁂𑀦𑁆𑀢𑀺. 𑀏𑀯𑀁 𑀭𑀸𑀚𑀽𑀦𑀁 𑀧𑀭𑀺𑀳𑀸𑀦𑀺 𑀳𑁄𑀢𑀺. 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀢𑀦𑁆𑀢𑀸 𑀧𑀦 𑀢𑀁 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀡𑀦𑁆𑀢𑀺, 𑀢𑀢𑁄 𑀩𑀮𑀁 𑀧𑁂𑀲𑁂𑀢𑁆𑀯𑀸 𑀅𑀫𑀺𑀢𑁆𑀢𑀫𑀤𑁆𑀤𑀦𑀁 𑀓𑀭𑁄𑀦𑁆𑀢𑀺, 𑀘𑁄𑀭𑀸𑀧𑀺 𑁋 ‘‘𑀅𑀧𑁆𑀧𑀫𑀢𑁆𑀢𑀸 𑀭𑀸𑀚𑀸𑀦𑁄, 𑀦 𑀲𑀓𑁆𑀓𑀸 𑀅𑀫𑁆𑀳𑁂𑀳𑀺 𑀯𑀕𑁆𑀕𑀩𑀦𑁆𑀥𑁂𑀳𑀺 𑀯𑀺𑀘𑀭𑀺𑀢𑀼’’𑀦𑁆𑀢𑀺 𑀪𑀺𑀚𑁆𑀚𑀺𑀢𑁆𑀯𑀸 𑀧𑀮𑀸𑀬𑀦𑁆𑀢𑀺. 𑀏𑀯𑀁 𑀭𑀸𑀚𑀽𑀦𑀁 𑀯𑀼𑀤𑁆𑀥𑀺 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸 𑀦𑁄 𑀧𑀭𑀺𑀳𑀸𑀦𑀻’’𑀢𑀺. 𑀢𑀢𑁆𑀣 𑀧𑀸𑀝𑀺𑀓𑀗𑁆𑀔𑀸𑀢𑀺 𑀇𑀘𑁆𑀙𑀺𑀢𑀩𑁆𑀩𑀸, 𑀅𑀯𑀲𑁆𑀲𑀁 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀤𑀝𑁆𑀞𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀲𑀫𑀕𑁆𑀕𑀸𑀢𑀺𑀆𑀤𑀻𑀲𑀼 𑀲𑀦𑁆𑀦𑀺𑀧𑀸𑀢𑀪𑁂𑀭𑀺𑀬𑀸 𑀦𑀺𑀕𑁆𑀕𑀢𑀸𑀬 𑁋 ‘‘𑀅𑀚𑁆𑀚 𑀫𑁂 𑀓𑀺𑀘𑁆𑀘𑀁 𑀅𑀢𑁆𑀣𑀺, 𑀫𑀗𑁆𑀕𑀮𑀁 𑀅𑀢𑁆𑀣𑀻’’𑀢𑀺 𑀯𑀺𑀓𑁆𑀔𑁂𑀧𑀁 ¶ 𑀓𑀭𑁄𑀦𑁆𑀢𑀸 𑀦 𑀲𑀫𑀕𑁆𑀕𑀸 𑀲𑀦𑁆𑀦𑀺𑀧𑀢𑀦𑁆𑀢𑀺 𑀦𑀸𑀫. 𑀪𑁂𑀭𑀺𑀲𑀤𑁆𑀤𑀁 𑀧𑀦 𑀲𑀼𑀢𑁆𑀯𑀸𑀯 𑀪𑀼𑀜𑁆𑀚𑀦𑁆𑀢𑀸𑀧𑀺 𑀅𑀮𑀗𑁆𑀓𑀭𑀺𑀬𑀫𑀸𑀦𑀸𑀧𑀺 𑀯𑀢𑁆𑀣𑀸𑀦𑀺 𑀦𑀺𑀯𑀸𑀲𑁂𑀦𑁆𑀢𑀸𑀧𑀺 𑀅𑀟𑁆𑀠𑀪𑀼𑀢𑁆𑀢𑀸 𑀯𑀸 𑀅𑀟𑁆𑀠𑀸𑀮𑀗𑁆𑀓𑀢𑀸 𑀯𑀸 𑀯𑀢𑁆𑀣𑀁 𑀦𑀺𑀯𑀸𑀲𑀬𑀫𑀸𑀦𑀸 𑀯𑀸 𑀲𑀦𑁆𑀦𑀺𑀧𑀢𑀦𑁆𑀢𑀸 𑀲𑀫𑀕𑁆𑀕𑀸 𑀲𑀦𑁆𑀦𑀺𑀧𑀢𑀦𑁆𑀢𑀺 𑀦𑀸𑀫. 𑀲𑀦𑁆𑀦𑀺𑀧𑀢𑀺𑀢𑀸 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀫𑀦𑁆𑀢𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑀁 𑀓𑀢𑁆𑀯𑀸 𑀏𑀓𑀢𑁄𑀯 𑀅𑀯𑀼𑀝𑁆𑀞𑀳𑀦𑁆𑀢𑀸 ¶ 𑀦 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀦𑁆𑀢𑀺 𑀦𑀸𑀫. 𑀏𑀯𑀁 𑀯𑀼𑀝𑁆𑀞𑀺𑀢𑁂𑀲𑀼 𑀳𑀺 𑀬𑁂 𑀧𑀞𑀫𑀁 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀫𑁆𑀳𑁂𑀳𑀺 𑀩𑀸𑀳𑀺𑀭𑀓𑀣𑀸𑀯 𑀲𑀼𑀢𑀸, 𑀇𑀤𑀸𑀦𑀺 𑀯𑀺𑀦𑀺𑀘𑁆𑀙𑀬𑀓𑀣𑀸 𑀪𑀯𑀺𑀲𑁆𑀲𑀢𑀻’’𑀢𑀺. 𑀏𑀓𑀢𑁄 𑀯𑀼𑀝𑁆𑀞𑀳𑀦𑁆𑀢𑀸 𑀧𑀦 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀦𑁆𑀢𑀺 𑀦𑀸𑀫. 𑀅𑀧𑀺𑀘 𑁋 ‘‘𑀅𑀲𑀼𑀓𑀝𑁆𑀞𑀸𑀦𑁂𑀲𑀼 𑀕𑀸𑀫𑀲𑀻𑀫𑀸 ¶ 𑀯𑀸 𑀦𑀺𑀕𑀫𑀲𑀻𑀫𑀸 𑀯𑀸 𑀆𑀓𑀼𑀮𑀸, 𑀘𑁄𑀭𑀸 𑀧𑀭𑀺𑀬𑀼𑀝𑁆𑀞𑀺𑀢𑀸’’𑀢𑀺 𑀲𑀼𑀢𑁆𑀯𑀸 𑁋 ‘‘𑀓𑁄 𑀕𑀦𑁆𑀢𑁆𑀯𑀸 𑀇𑀫𑀁 𑀅𑀫𑀺𑀢𑁆𑀢𑀫𑀤𑁆𑀤𑀦𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁂 𑁋 ‘‘𑀅𑀳𑀁 𑀧𑀞𑀫𑀁, 𑀅𑀳𑀁 𑀧𑀞𑀫’’𑀦𑁆𑀢𑀺 𑀯𑀢𑁆𑀯𑀸 𑀕𑀘𑁆𑀙𑀦𑁆𑀢𑀸𑀧𑀺 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀦𑁆𑀢𑀺 𑀦𑀸𑀫. 𑀏𑀓𑀲𑁆𑀲 𑀧𑀦 𑀓𑀫𑁆𑀫𑀦𑁆𑀢𑁂 𑀑𑀲𑀻𑀤𑀫𑀸𑀦𑁂 𑀲𑁂𑀲𑀸 𑀭𑀸𑀚𑀸𑀦𑁄 𑀧𑀼𑀢𑁆𑀢𑀪𑀸𑀢𑀭𑁄 𑀧𑁂𑀲𑁂𑀢𑁆𑀯𑀸 𑀢𑀲𑁆𑀲 𑀓𑀫𑁆𑀫𑀦𑁆𑀢𑀁 𑀉𑀧𑀢𑁆𑀣𑀫𑁆𑀪𑀬𑀫𑀸𑀦𑀸𑀧𑀺, 𑀆𑀕𑀦𑁆𑀢𑀼𑀓𑀭𑀸𑀚𑀸𑀦𑀁 𑁋 ‘‘𑀅𑀲𑀼𑀓𑀲𑁆𑀲 𑀕𑁂𑀳𑀁 𑀕𑀘𑁆𑀙𑀢𑀼, 𑀅𑀲𑀼𑀓𑀲𑁆𑀲 𑀕𑁂𑀳𑀁 𑀕𑀘𑁆𑀙𑀢𑀽’’𑀢𑀺 𑀅𑀯𑀢𑁆𑀯𑀸 𑀲𑀩𑁆𑀩𑁂 𑀏𑀓𑀢𑁄 𑀲𑀗𑁆𑀕𑀡𑁆𑀳𑀦𑁆𑀢𑀸𑀧𑀺, 𑀏𑀓𑀲𑁆𑀲 𑀫𑀗𑁆𑀕𑀮𑁂 𑀯𑀸 𑀭𑁄𑀕𑁂 𑀯𑀸 𑀅𑀜𑁆𑀜𑀲𑁆𑀫𑀺𑀁 𑀯𑀸 𑀧𑀦 𑀢𑀸𑀤𑀺𑀲𑁂 𑀲𑀼𑀔𑀤𑀼𑀓𑁆𑀔𑁂 𑀉𑀧𑁆𑀧𑀦𑁆𑀦𑁂 𑀲𑀩𑁆𑀩𑁂 𑀢𑀢𑁆𑀣 𑀲𑀳𑀸𑀬𑀪𑀸𑀯𑀁 𑀕𑀘𑁆𑀙𑀦𑁆𑀢𑀸𑀧𑀺 𑀲𑀫𑀕𑁆𑀕𑀸 𑀯𑀚𑁆𑀚𑀺𑀓𑀭𑀡𑀻𑀬𑀸𑀦𑀺 𑀓𑀭𑁄𑀦𑁆𑀢𑀺 𑀦𑀸𑀫.

𑀅𑀧𑀜𑁆𑀜𑀢𑁆𑀢𑀦𑁆𑀢𑀺𑀆𑀤𑀻𑀲𑀼 𑀧𑀼𑀩𑁆𑀩𑁂 𑀅𑀓𑀢𑀁 𑀲𑀼𑀗𑁆𑀓𑀁 𑀯𑀸 𑀩𑀮𑀺𑀁 𑀯𑀸 𑀤𑀡𑁆𑀟𑀁 𑀯𑀸 𑀆𑀳𑀭𑀸𑀧𑁂𑀦𑁆𑀢𑀸 𑀅𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀦𑁆𑀢𑀺 𑀦𑀸𑀫. 𑀧𑁄𑀭𑀸𑀡𑀧𑀯𑁂𑀡𑀺𑀬𑀸 𑀆𑀕𑀢𑀫𑁂𑀯 𑀧𑀦 𑀅𑀦𑀸𑀳𑀭𑀸𑀧𑁂𑀦𑁆𑀢𑀸 𑀧𑀜𑁆𑀜𑀢𑁆𑀢𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺 𑀦𑀸𑀫. 𑀘𑁄𑀭𑁄𑀢𑀺 𑀕𑀳𑁂𑀢𑁆𑀯𑀸 𑀤𑀲𑁆𑀲𑀺𑀢𑁂 𑀅𑀯𑀺𑀘𑀺𑀦𑀺𑀢𑁆𑀯𑀸𑀯 𑀙𑁂𑀚𑁆𑀚𑀪𑁂𑀚𑁆𑀚𑀁 𑀅𑀦𑀼𑀲𑀸𑀲𑁂𑀦𑁆𑀢𑀸 𑀧𑁄𑀭𑀸𑀡𑀁 𑀯𑀚𑁆𑀚𑀺𑀥𑀫𑁆𑀫𑀁 𑀲𑀫𑀸𑀤𑀸𑀬 𑀦 𑀯𑀢𑁆𑀢𑀦𑁆𑀢𑀺 𑀦𑀸𑀫. 𑀢𑁂𑀲𑀁 𑀅𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀦𑁆𑀢𑀸𑀦𑀁 𑀅𑀪𑀺𑀦𑀯𑀲𑀼𑀗𑁆𑀓𑀸𑀤𑀻𑀳𑀺 𑀧𑀻𑀴𑀺𑀢𑀸 𑀫𑀦𑀼𑀲𑁆𑀲𑀸 𑁋 ‘‘𑀅𑀢𑀺𑀉𑀧𑀤𑁆𑀤𑀼𑀢𑀫𑁆𑀳, 𑀓𑁄 𑀇𑀫𑁂𑀲𑀁 𑀯𑀺𑀚𑀺𑀢𑁂 𑀯𑀲𑀺𑀲𑁆𑀲𑀢𑀻’’𑀢𑀺 𑀧𑀘𑁆𑀘𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀘𑁄𑀭𑀸 𑀯𑀸 𑀘𑁄𑀭𑀲𑀳𑀸𑀬𑀸 𑀯𑀸 𑀳𑀼𑀢𑁆𑀯𑀸 𑀚𑀦𑀧𑀤𑀁 𑀧𑀳𑀭𑀦𑁆𑀢𑀺. 𑀧𑀜𑁆𑀜𑀢𑁆𑀢𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀸𑀦𑀁 𑀧𑀯𑁂𑀡𑀻𑀆𑀕𑀢𑀸𑀦𑀺 𑀲𑀼𑀗𑁆𑀓𑀸𑀤𑀻𑀦𑀺 𑀅𑀕𑀡𑁆𑀳𑀦𑁆𑀢𑀸𑀦𑀁 𑀓𑁄𑀲𑁄 𑀧𑀭𑀺𑀳𑀸𑀬𑀢𑀺. 𑀢𑀢𑁄 𑀳𑀢𑁆𑀣𑀺𑀅𑀲𑁆𑀲𑀩𑀮𑀓𑀸𑀬𑀑𑀭𑁄𑀥𑀸𑀤𑀬𑁄 𑀬𑀣𑀸𑀦𑀺𑀩𑀤𑁆𑀥𑀁 𑀯𑀝𑁆𑀝𑀁 𑀅𑀮𑀪𑀫𑀸𑀦𑀸 𑀣𑀸𑀫𑁂𑀦 𑀩𑀮𑁂𑀦 𑀧𑀭𑀺𑀳𑀸𑀬𑀦𑁆𑀢𑀺. 𑀢𑁂 𑀦𑁂𑀯 𑀬𑀼𑀤𑁆𑀥𑀓𑁆𑀔𑀫𑀸 𑀳𑁄𑀦𑁆𑀢𑀺, 𑀦 𑀧𑀸𑀭𑀺𑀘𑀭𑀺𑀬𑀓𑁆𑀔𑀫𑀸. 𑀧𑁄𑀭𑀸𑀡𑀁 𑀯𑀚𑁆𑀚𑀺𑀥𑀫𑁆𑀫𑀁 𑀲𑀫𑀸𑀤𑀸𑀬 𑀅𑀯𑀢𑁆𑀢𑀦𑁆𑀢𑀸𑀦𑀁 𑀯𑀺𑀚𑀺𑀢𑁂 𑀫𑀦𑀼𑀲𑁆𑀲𑀸 𑁋 ‘‘𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀁 𑀧𑀺𑀢𑀭𑀁 𑀪𑀸𑀢𑀭𑀁 𑀅𑀘𑁄𑀭𑀁𑀬𑁂𑀯 𑀘𑁄𑀭𑁄𑀢𑀺 ¶ 𑀓𑀢𑁆𑀯𑀸 𑀙𑀺𑀦𑁆𑀤𑀺𑀁𑀲𑀼 𑀪𑀺𑀦𑁆𑀤𑀺𑀁𑀲𑀽’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀧𑀘𑁆𑀘𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀘𑁄𑀭𑀸 𑀯𑀸 𑀘𑁄𑀭𑀲𑀳𑀸𑀬𑀸 𑀯𑀸 𑀳𑀼𑀢𑁆𑀯𑀸 𑀚𑀦𑀧𑀤𑀁 𑀧𑀳𑀭𑀦𑁆𑀢𑀺, 𑀏𑀯𑀁 𑀭𑀸𑀚𑀽𑀦𑀁 𑀧𑀭𑀺𑀳𑀸𑀦𑀺 𑀳𑁄𑀢𑀺, 𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀦𑁆𑀢𑀸𑀦𑀁 𑀧𑀦 ‘‘𑀧𑀯𑁂𑀡𑀻𑀆𑀕𑀢𑀫𑁂𑀯 𑀭𑀸𑀚𑀸𑀦𑁄 𑀓𑀭𑁄𑀦𑁆𑀢𑀻’’𑀢𑀺 𑀫𑀦𑀼𑀲𑁆𑀲𑀸 𑀳𑀝𑁆𑀞𑀢𑀼𑀝𑁆𑀞𑀸 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀓𑁂 𑀓𑀫𑁆𑀫𑀦𑁆𑀢𑁂 𑀲𑀫𑁆𑀧𑀸𑀤𑁂𑀦𑁆𑀢𑀺. 𑀧𑀜𑁆𑀜𑀢𑁆𑀢𑀁 𑀅𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀸𑀦𑀁 𑀧𑀯𑁂𑀡𑀻𑀆𑀕𑀢𑀸𑀦𑀺 𑀲𑀼𑀗𑁆𑀓𑀸𑀤𑀻𑀦𑀺 𑀕𑀡𑁆𑀳𑀦𑁆𑀢𑀸𑀦𑀁 ¶ 𑀓𑁄𑀲𑁄 𑀯𑀟𑁆𑀠𑀢𑀺, 𑀢𑀢𑁄 𑀳𑀢𑁆𑀣𑀺𑀅𑀲𑁆𑀲𑀩𑀮𑀓𑀸𑀬𑀑𑀭𑁄𑀥𑀸𑀤𑀬𑁄 𑀬𑀣𑀸𑀦𑀺𑀩𑀤𑁆𑀥𑀁 𑀯𑀝𑁆𑀝𑀁 𑀮𑀪𑀫𑀸𑀦𑀸 𑀣𑀸𑀫𑀩𑀮𑀲𑀫𑁆𑀧𑀦𑁆𑀦𑀸 𑀬𑀼𑀤𑁆𑀥𑀓𑁆𑀔𑀫𑀸 𑀘𑁂𑀯 𑀧𑀸𑀭𑀺𑀘𑀭𑀺𑀬𑀓𑁆𑀔𑀫𑀸 𑀘 𑀳𑁄𑀦𑁆𑀢𑀺.

𑀧𑁄𑀭𑀸𑀡𑀁 𑀯𑀚𑁆𑀚𑀺𑀥𑀫𑁆𑀫𑀦𑁆𑀢𑀺 𑀏𑀢𑁆𑀣 𑀧𑀼𑀩𑁆𑀩𑁂 𑀓𑀺𑀭 𑀯𑀚𑁆𑀚𑀺𑀭𑀸𑀚𑀸𑀦𑁄 ‘‘𑀅𑀬𑀁 𑀘𑁄𑀭𑁄’’𑀢𑀺 𑀆𑀦𑁂𑀢𑁆𑀯𑀸 𑀤𑀲𑁆𑀲𑀺𑀢𑁂 ‘‘𑀕𑀡𑁆𑀳𑀣 𑀦𑀁 𑀘𑁄𑀭’’𑀦𑁆𑀢𑀺 𑀅𑀯𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀫𑀳𑀸𑀫𑀢𑁆𑀢𑀸𑀦𑀁 𑀤𑁂𑀦𑁆𑀢𑀺. 𑀢𑁂 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀲𑀘𑁂 𑀅𑀘𑁄𑀭𑁄 𑀳𑁄𑀢𑀺, 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺. 𑀲𑀘𑁂 𑀘𑁄𑀭𑁄, 𑀅𑀢𑁆𑀢𑀦𑀸 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸 𑀯𑁄𑀳𑀸𑀭𑀺𑀓𑀸𑀦𑀁 𑀤𑁂𑀦𑁆𑀢𑀺. 𑀢𑁂𑀧𑀺 𑀅𑀘𑁄𑀭𑁄 𑀘𑁂, 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺. 𑀘𑁄𑀭𑁄 𑀘𑁂, 𑀲𑀼𑀢𑁆𑀢𑀥𑀭𑀸𑀦𑀁 𑀤𑁂𑀦𑁆𑀢𑀺. 𑀢𑁂𑀧𑀺 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀅𑀘𑁄𑀭𑁄 𑀘𑁂, 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺. 𑀘𑁄𑀭𑁄 𑀘𑁂, 𑀅𑀝𑁆𑀞𑀓𑀼𑀮𑀺𑀓𑀸𑀦𑀁 𑀤𑁂𑀦𑁆𑀢𑀺. 𑀢𑁂𑀧𑀺 𑀢𑀣𑁂𑀯 𑀓𑀢𑁆𑀯𑀸 𑀲𑁂𑀦𑀸𑀧𑀢𑀺𑀲𑁆𑀲, 𑀲𑁂𑀦𑀸𑀧𑀢𑀺 𑀉𑀧𑀭𑀸𑀚𑀲𑁆𑀲, 𑀉𑀧𑀭𑀸𑀚𑀸 𑀭𑀜𑁆𑀜𑁄, 𑀭𑀸𑀚𑀸 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸 𑀅𑀘𑁄𑀭𑁄 𑀘𑁂, 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀲𑀘𑁂 ¶ 𑀧𑀦 𑀘𑁄𑀭𑁄 𑀳𑁄𑀢𑀺, 𑀧𑀯𑁂𑀡𑀻𑀧𑁄𑀢𑁆𑀣𑀓𑀁 𑀯𑀸𑀘𑀸𑀧𑁂𑀢𑀺. 𑀢𑀢𑁆𑀣 𑁋 ‘‘𑀬𑁂𑀦 𑀇𑀤𑀁 𑀦𑀸𑀫 𑀓𑀢𑀁, 𑀢𑀲𑁆𑀲 𑀅𑀬𑀁 𑀦𑀸𑀫 𑀤𑀡𑁆𑀟𑁄’’𑀢𑀺 𑀮𑀺𑀔𑀺𑀢𑀁. 𑀭𑀸𑀚𑀸 𑀢𑀲𑁆𑀲 𑀓𑀺𑀭𑀺𑀬𑀁 𑀢𑁂𑀦 𑀲𑀫𑀸𑀦𑁂𑀢𑁆𑀯𑀸 𑀢𑀤𑀦𑀼𑀘𑁆𑀙𑀯𑀺𑀓𑀁 𑀤𑀡𑁆𑀟𑀁 𑀓𑀭𑁄𑀢𑀺. 𑀇𑀢𑀺 𑀏𑀢𑀁 𑀧𑁄𑀭𑀸𑀡𑀁 𑀯𑀚𑁆𑀚𑀺𑀥𑀫𑁆𑀫𑀁 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑀸𑀦𑀁 𑀫𑀦𑀼𑀲𑁆𑀲𑀸 𑀦 𑀉𑀚𑁆𑀛𑀸𑀬𑀦𑁆𑀢𑀺, ‘‘𑀭𑀸𑀚𑀸𑀦𑁄 𑀧𑁄𑀭𑀸𑀡𑀧𑀯𑁂𑀡𑀺𑀬𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀏𑀢𑁂𑀲𑀁 𑀤𑁄𑀲𑁄 𑀦𑀢𑁆𑀣𑀺, 𑀅𑀫𑁆𑀳𑀸𑀓𑀁𑀬𑁂𑀯 𑀤𑁄𑀲𑁄’’𑀢𑀺 𑀅𑀧𑁆𑀧𑀫𑀢𑁆𑀢𑀸 𑀓𑀫𑁆𑀫𑀦𑁆𑀢𑁂 𑀓𑀭𑁄𑀦𑁆𑀢𑀺. 𑀏𑀯𑀁 𑀭𑀸𑀚𑀽𑀦𑀁 𑀯𑀼𑀤𑁆𑀥𑀺 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻’’𑀢𑀺.

𑀲𑀓𑁆𑀓𑀭𑁄𑀦𑁆𑀢𑀻𑀢𑀺 𑀬𑀁𑀓𑀺𑀜𑁆𑀘𑀺 𑀢𑁂𑀲𑀁 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀸 𑀲𑀼𑀦𑁆𑀤𑀭𑀫𑁂𑀯 𑀓𑀭𑁄𑀦𑁆𑀢𑀺. 𑀕𑀭𑀼𑀁 𑀓𑀭𑁄𑀦𑁆𑀢𑀻𑀢𑀺 𑀕𑀭𑀼𑀪𑀸𑀯𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸𑀯 𑀓𑀭𑁄𑀦𑁆𑀢𑀺. 𑀫𑀸𑀦𑁂𑀦𑁆𑀢𑀻𑀢𑀺 𑀫𑀦𑁂𑀦 𑀧𑀺𑀬𑀸𑀬𑀦𑁆𑀢𑀺. 𑀧𑀽𑀚𑁂𑀦𑁆𑀢𑀻𑀢𑀺 𑀦𑀺𑀧𑀘𑁆𑀘𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑀺. 𑀲𑁄𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀻𑀢𑀺 𑀤𑀺𑀯𑀲𑀲𑁆𑀲 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀉𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀓𑀣𑀁 𑀲𑁄𑀢𑀩𑁆𑀩𑀁 𑀲𑀤𑁆𑀥𑀸𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺. 𑀢𑀢𑁆𑀣 𑀬𑁂 𑀏𑀯𑀁 𑀫𑀳𑀮𑁆𑀮𑀓𑀸𑀦𑀁 𑀭𑀸𑀚𑀽𑀦𑀁 𑀲𑀓𑁆𑀓𑀸𑀭𑀸𑀤𑀻𑀦𑀺 𑀦 𑀓𑀭𑁄𑀦𑁆𑀢𑀺, 𑀑𑀯𑀸𑀤𑀢𑁆𑀣𑀸𑀬 𑀘 𑀦𑁂𑀲𑀁 𑀉𑀧𑀝𑁆𑀞𑀸𑀦𑀁 𑀦 𑀕𑀘𑁆𑀙𑀦𑁆𑀢𑀺, 𑀢𑁂 𑀢𑁂𑀳𑀺 𑀯𑀺𑀲𑁆𑀲𑀝𑁆𑀞𑀸 𑀅𑀦𑁄𑀯𑀤𑀺𑀬𑀫𑀸𑀦𑀸 𑀓𑀻𑀴𑀸𑀧𑀲𑀼𑀢𑀸 𑀭𑀚𑁆𑀚𑀢𑁄 𑀧𑀭𑀺𑀳𑀸𑀬𑀦𑁆𑀢𑀺. 𑀬𑁂 𑀧𑀦 𑀢𑀣𑀸 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑁂𑀲𑀁 𑀫𑀳𑀮𑁆𑀮𑀓𑀭𑀸𑀚𑀸𑀦𑁄 𑁋 ‘‘𑀇𑀤𑀁 𑀓𑀸𑀢𑀩𑁆𑀩𑀁, 𑀇𑀤𑀁 𑀦 𑀓𑀸𑀢𑀩𑁆𑀩’’𑀦𑁆𑀢𑀺 ¶ 𑀧𑁄𑀭𑀸𑀡𑀁 𑀧𑀯𑁂𑀡𑀺𑀁 𑀆𑀘𑀺𑀓𑁆𑀔𑀦𑁆𑀢𑀺. 𑀲𑀗𑁆𑀕𑀸𑀫𑀁 𑀧𑀢𑁆𑀯𑀸𑀧𑀺 𑁋 ‘‘𑀏𑀯𑀁 𑀧𑀯𑀺𑀲𑀺𑀢𑀩𑁆𑀩𑀁, 𑀏𑀯𑀁 𑀦𑀺𑀓𑁆𑀔𑀫𑀺𑀢𑀩𑁆𑀩’’𑀦𑁆𑀢𑀺 𑀉𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑀺. 𑀢𑁂 𑀢𑁂𑀳𑀺 𑀑𑀯𑀤𑀺𑀬𑀫𑀸𑀦𑀸 𑀬𑀣𑀸𑀑𑀯𑀸𑀤𑀁 𑀧𑀝𑀺𑀧𑀚𑁆𑀚𑀦𑁆𑀢𑀸 𑀲𑀓𑁆𑀓𑁄𑀦𑁆𑀢𑀺 𑀭𑀸𑀚𑀧𑁆𑀧𑀯𑁂𑀡𑀺𑀁 𑀲𑀦𑁆𑀥𑀸𑀭𑁂𑀢𑀼𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻’’𑀢𑀺.

𑀓𑀼𑀮𑀺𑀢𑁆𑀣𑀺𑀬𑁄𑀢𑀺 ¶ 𑀓𑀼𑀮𑀖𑀭𑀡𑀺𑀬𑁄. 𑀓𑀼𑀮𑀓𑀼𑀫𑀸𑀭𑀺𑀬𑁄𑀢𑀺 𑀅𑀦𑀺𑀯𑀺𑀤𑁆𑀥𑀸 𑀢𑀸𑀲𑀁 𑀥𑀻𑀢𑀭𑁄. 𑀑𑀓𑁆𑀓𑀲𑁆𑀲 𑀧𑀲𑀬𑁆𑀳𑀸𑀢𑀺 𑀏𑀢𑁆𑀣 ‘‘𑀑𑀓𑁆𑀓𑀲𑁆𑀲𑀸’’𑀢𑀺 𑀯𑀸 ‘‘𑀧𑀲𑀬𑁆𑀳𑀸’’𑀢𑀺 𑀯𑀸 𑀧𑀲𑀬𑁆𑀳𑀸𑀓𑀸𑀭𑀲𑁆𑀲𑁂𑀯𑁂𑀢𑀁 𑀦𑀸𑀫𑀁. ‘‘𑀉𑀓𑁆𑀓𑀲𑁆𑀲𑀸’’𑀢𑀺𑀧𑀺 𑀧𑀞𑀦𑁆𑀢𑀺. 𑀢𑀢𑁆𑀣 𑀑𑀓𑁆𑀓𑀲𑁆𑀲𑀸𑀢𑀺 𑀅𑀯𑀓𑀲𑁆𑀲𑀺𑀢𑁆𑀯𑀸 𑀆𑀓𑀟𑁆𑀠𑀺𑀢𑁆𑀯𑀸. 𑀧𑀲𑀬𑁆𑀳𑀸𑀢𑀺 𑀅𑀪𑀺𑀪𑀯𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸𑀢𑀺 𑀅𑀬𑀁 𑀯𑀘𑀦𑀢𑁆𑀣𑁄. 𑀏𑀯𑀜𑁆𑀳𑀺 𑀓𑀭𑁄𑀦𑁆𑀢𑀸𑀦𑀁 𑀯𑀺𑀚𑀺𑀢𑁂 𑀫𑀦𑀼𑀲𑁆𑀲𑀸 𑁋 ‘‘𑀅𑀫𑁆𑀳𑀸𑀓𑀁 𑀕𑁂𑀳𑁂 𑀧𑀼𑀢𑁆𑀢𑀫𑀸𑀢𑀭𑁄𑀧𑀺, 𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸𑀤𑀻𑀦𑀺 𑀫𑀼𑀔𑁂𑀦 𑀅𑀧𑀦𑁂𑀢𑁆𑀯𑀸 𑀲𑀁𑀯𑀟𑁆𑀠𑀺𑀢𑀥𑀻𑀢𑀭𑁄𑀧𑀺 𑀇𑀫𑁂 𑀭𑀸𑀚𑀸𑀦𑁄 𑀩𑀮𑀓𑁆𑀓𑀸𑀭𑁂𑀦 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀖𑀭𑁂 𑀯𑀸𑀲𑁂𑀦𑁆𑀢𑀻’’𑀢𑀺 𑀓𑀼𑀧𑀺𑀢𑀸 𑀧𑀘𑁆𑀘𑀦𑁆𑀢𑀁 𑀧𑀯𑀺𑀲𑀺𑀢𑁆𑀯𑀸 𑀘𑁄𑀭𑀸 𑀯𑀸 𑀘𑁄𑀭𑀲𑀳𑀸𑀬𑀸 𑀯𑀸 𑀳𑀼𑀢𑁆𑀯𑀸 𑀚𑀦𑀧𑀤𑀁 𑀧𑀳𑀭𑀦𑁆𑀢𑀺. 𑀏𑀯𑀁 𑀅𑀓𑀭𑁄𑀦𑁆𑀢𑀸𑀦𑀁 𑀧𑀦 𑀯𑀺𑀚𑀺𑀢𑁂 𑀫𑀦𑀼𑀲𑁆𑀲𑀸 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸 𑀲𑀓𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀸 𑀭𑀸𑀚𑀓𑁄𑀲𑀁 𑀯𑀟𑁆𑀠𑁂𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀯𑀼𑀤𑁆𑀥𑀺𑀳𑀸𑀦𑀺𑀬𑁄 𑀯𑁂𑀤𑀺𑀢𑀩𑁆𑀩𑀸.

𑀯𑀚𑁆𑀚𑀻𑀦𑀁 𑀯𑀚𑁆𑀚𑀺𑀘𑁂𑀢𑀺𑀬𑀸𑀦𑀻𑀢𑀺 𑀯𑀚𑁆𑀚𑀺𑀭𑀸𑀚𑀽𑀦𑀁 𑀯𑀚𑁆𑀚𑀺𑀭𑀝𑁆𑀞𑁂 𑀘𑀺𑀢𑁆𑀢𑀻𑀓𑀢𑀝𑁆𑀞𑁂𑀦 𑀘𑁂𑀢𑀺𑀬𑀸𑀦𑀻𑀢𑀺 𑀮𑀤𑁆𑀥𑀦𑀸𑀫𑀸𑀦𑀺 𑀬𑀓𑁆𑀔𑀝𑁆𑀞𑀸𑀦𑀸𑀦𑀺. 𑀅𑀩𑁆𑀪𑀦𑁆𑀢𑀭𑀸𑀦𑀻𑀢𑀺 𑀅𑀦𑁆𑀢𑁄𑀦𑀕𑀭𑁂 𑀞𑀺𑀢𑀸𑀦𑀺. 𑀩𑀸𑀳𑀺𑀭𑀸𑀦𑀻𑀢𑀺 𑀩𑀳𑀺𑀦𑀕𑀭𑁂 𑀞𑀺𑀢𑀸𑀦𑀺 ¶ . 𑀤𑀺𑀦𑁆𑀦𑀧𑀼𑀩𑁆𑀩𑀦𑁆𑀢𑀺 𑀧𑀼𑀩𑁆𑀩𑁂 𑀤𑀺𑀦𑁆𑀦𑀁. 𑀓𑀢𑀧𑀼𑀩𑁆𑀩𑀦𑁆𑀢𑀺 𑀧𑀼𑀩𑁆𑀩𑁂 𑀓𑀢𑀁. 𑀦𑁄 𑀧𑀭𑀺𑀳𑀸𑀧𑁂𑀲𑁆𑀲𑀦𑁆𑀢𑀻𑀢𑀺 𑀅𑀧𑀭𑀺𑀳𑀸𑀧𑁂𑀢𑁆𑀯𑀸 𑀬𑀣𑀸𑀧𑀯𑀢𑁆𑀢𑀫𑁂𑀯 𑀓𑀭𑀺𑀲𑁆𑀲𑀦𑁆𑀢𑀺 𑀥𑀫𑁆𑀫𑀺𑀓𑀁 𑀩𑀮𑀺𑀁 𑀧𑀭𑀺𑀳𑀸𑀧𑁂𑀦𑁆𑀢𑀸𑀦𑀜𑁆𑀳𑀺 𑀤𑁂𑀯𑀢𑀸 𑀆𑀭𑀓𑁆𑀔𑀁 𑀲𑀼𑀲𑀁𑀯𑀺𑀳𑀺𑀢𑀁 𑀦 𑀓𑀭𑁄𑀦𑁆𑀢𑀺, 𑀅𑀦𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀚𑀦𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀧𑀺 𑀉𑀧𑁆𑀧𑀦𑁆𑀦𑀁 𑀓𑀸𑀲𑀲𑀻𑀲𑀭𑁄𑀕𑀸𑀤𑀺𑀁 𑀯𑀟𑁆𑀠𑁂𑀦𑁆𑀢𑀺, 𑀲𑀗𑁆𑀕𑀸𑀫𑁂 𑀧𑀢𑁆𑀢𑁂 𑀲𑀳𑀸𑀬𑀸 𑀦 𑀳𑁄𑀦𑁆𑀢𑀺. 𑀅𑀧𑀭𑀺𑀳𑀸𑀧𑁂𑀦𑁆𑀢𑀸𑀦𑀁 𑀧𑀦 𑀆𑀭𑀓𑁆𑀔𑀁 𑀲𑀼𑀲𑀁𑀯𑀺𑀳𑀺𑀢𑀁 𑀓𑀭𑁄𑀦𑁆𑀢𑀺, 𑀅𑀦𑀼𑀧𑁆𑀧𑀦𑁆𑀦𑀁 𑀲𑀼𑀔𑀁 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀧𑀺 𑀉𑀧𑁆𑀧𑀦𑁆𑀦𑀁 𑀓𑀸𑀲𑀲𑀻𑀲𑀭𑁄𑀕𑀸𑀤𑀺𑀁 𑀳𑀦𑀦𑁆𑀢𑀺, 𑀲𑀗𑁆𑀕𑀸𑀫𑀲𑀻𑀲𑁂 𑀲𑀳𑀸𑀬𑀸 𑀳𑁄𑀦𑁆𑀢𑀻𑀢𑀺 𑀏𑀯𑀫𑁂𑀢𑁆𑀣 𑀯𑀼𑀤𑁆𑀥𑀺𑀳𑀸𑀦𑀺𑀬𑁄 𑀯𑁂𑀤𑀺𑀢𑀩𑁆𑀩𑀸.

𑀥𑀫𑁆𑀫𑀺𑀓𑀸 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀻𑀢𑀺 𑀏𑀢𑁆𑀣 𑀭𑀓𑁆𑀔𑀸 𑀏𑀯 𑀬𑀣𑀸 𑀅𑀦𑀺𑀘𑁆𑀙𑀺𑀢𑀁 𑀦 𑀕𑀘𑁆𑀙𑀢𑀺, 𑀏𑀯𑀁 𑀆𑀯𑀭𑀡𑀢𑁄 𑀆𑀯𑀭𑀡𑀁. 𑀬𑀣𑀸 𑀇𑀘𑁆𑀙𑀺𑀢𑀁 𑀦 𑀯𑀺𑀦𑀲𑁆𑀲𑀢𑀺, 𑀏𑀯𑀁 𑀕𑁄𑀧𑀸𑀬𑀦𑀢𑁄 𑀕𑀼𑀢𑁆𑀢𑀺. 𑀢𑀢𑁆𑀣 𑀩𑀮𑀓𑀸𑀬𑁂𑀦 𑀧𑀭𑀺𑀯𑀸𑀭𑁂𑀢𑁆𑀯𑀸 𑀭𑀓𑁆𑀔𑀡𑀁 𑀧𑀩𑁆𑀩𑀚𑀺𑀢𑀸𑀦𑀁 𑀥𑀫𑁆𑀫𑀺𑀓𑀸 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺 ¶ 𑀦𑀸𑀫 𑀦 𑀳𑁄𑀢𑀺. 𑀬𑀣𑀸 𑀧𑀦 𑀯𑀺𑀳𑀸𑀭𑀲𑁆𑀲 𑀉𑀧𑀯𑀦𑁂 𑀭𑀼𑀓𑁆𑀔𑁂 𑀦 𑀙𑀺𑀦𑁆𑀤𑀦𑁆𑀢𑀺, 𑀯𑀸𑀚𑀺𑀓𑀸 𑀯𑀚𑁆𑀛𑀁 𑀦 𑀓𑀭𑁄𑀦𑁆𑀢𑀺, 𑀧𑁄𑀓𑁆𑀔𑀭𑀡𑀻𑀲𑀼 𑀫𑀘𑁆𑀙𑁂 𑀦 𑀕𑀡𑁆𑀳𑀦𑁆𑀢𑀺, 𑀏𑀯𑀁 𑀓𑀭𑀡𑀁 𑀥𑀫𑁆𑀫𑀺𑀓𑀸 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺 𑀦𑀸𑀫. 𑀓𑀺𑀦𑁆𑀢𑀺 𑀅𑀦𑀸𑀕𑀢𑀸 𑀘𑀸𑀢𑀺 𑀇𑀫𑀺𑀦𑀸 𑀧𑀦 𑀦𑁂𑀲𑀁 𑀏𑀯𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑁄𑀢𑀺 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀢𑀺.

𑀢𑀢𑁆𑀣 ¶ 𑀬𑁂 𑀅𑀦𑀸𑀕𑀢𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀆𑀕𑀫𑀦𑀁 𑀦 𑀇𑀘𑁆𑀙𑀦𑁆𑀢𑀺, 𑀢𑁂 𑀅𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺 𑀅𑀧𑁆𑀧𑀲𑀦𑁆𑀦𑀸. 𑀧𑀩𑁆𑀩𑀚𑀺𑀢𑁂 𑀘 𑀲𑀫𑁆𑀧𑀢𑁆𑀢𑁂 𑀧𑀘𑁆𑀘𑀼𑀕𑁆𑀕𑀫𑀦𑀁 𑀦 𑀓𑀭𑁄𑀦𑁆𑀢𑀺, 𑀕𑀦𑁆𑀢𑁆𑀯𑀸 𑀦 𑀧𑀲𑁆𑀲𑀦𑁆𑀢𑀺, 𑀧𑀝𑀺𑀲𑀦𑁆𑀣𑀸𑀭𑀁 𑀦 𑀓𑀭𑁄𑀦𑁆𑀢𑀺, 𑀧𑀜𑁆𑀳𑀁 𑀦 𑀧𑀼𑀘𑁆𑀙𑀦𑁆𑀢𑀺, 𑀥𑀫𑁆𑀫𑀁 𑀦 𑀲𑀼𑀡𑀦𑁆𑀢𑀺, 𑀤𑀸𑀦𑀁 𑀦 𑀤𑁂𑀦𑁆𑀢𑀺, 𑀅𑀦𑀼𑀫𑁄𑀤𑀦𑀁 𑀦 𑀲𑀼𑀡𑀦𑁆𑀢𑀺, 𑀦𑀺𑀯𑀸𑀲𑀦𑀝𑁆𑀞𑀸𑀦𑀁 𑀦 𑀲𑀁𑀯𑀺𑀤𑀳𑀦𑁆𑀢𑀺. 𑀅𑀣 𑀦𑁂𑀲𑀁 𑀅𑀯𑀡𑁆𑀡𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺 𑁋 ‘‘𑀅𑀲𑀼𑀓𑁄 𑀦𑀸𑀫 𑀭𑀸𑀚𑀸 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄, 𑀧𑀩𑁆𑀩𑀚𑀺𑀢𑁂 𑀲𑀫𑁆𑀧𑀢𑁆𑀢𑁂 𑀧𑀘𑁆𑀘𑀼𑀕𑁆𑀕𑀫𑀦𑀁 𑀦 𑀓𑀭𑁄𑀢𑀺…𑀧𑁂… 𑀦𑀺𑀯𑀸𑀲𑀦𑀝𑁆𑀞𑀸𑀦𑀁 𑀦 𑀲𑀁𑀯𑀺𑀤𑀳𑀢𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑀸 𑀢𑀲𑁆𑀲 𑀦𑀕𑀭𑀤𑁆𑀯𑀸𑀭𑁂𑀦 𑀦 𑀕𑀘𑁆𑀙𑀦𑁆𑀢𑀺, 𑀕𑀘𑁆𑀙𑀦𑁆𑀢𑀸𑀧𑀺 𑀦𑀕𑀭𑀁 𑀦 𑀧𑀯𑀺𑀲𑀦𑁆𑀢𑀺. 𑀏𑀯𑀁 𑀅𑀦𑀸𑀕𑀢𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀅𑀦𑀸𑀕𑀫𑀦𑀫𑁂𑀯 𑀳𑁄𑀢𑀺. 𑀆𑀕𑀢𑀸𑀦𑀫𑁆𑀧𑀺 𑀨𑀸𑀲𑀼𑀯𑀺𑀳𑀸𑀭𑁂 𑀅𑀲𑀢𑀺 𑀬𑁂𑀧𑀺 𑀅𑀚𑀸𑀦𑀺𑀢𑁆𑀯𑀸 𑀆𑀕𑀢𑀸, 𑀢𑁂 𑁋 ‘‘𑀯𑀲𑀺𑀲𑁆𑀲𑀸𑀫𑀸𑀢𑀺 𑀢𑀸𑀯 𑀘𑀺𑀦𑁆𑀢𑁂𑀢𑁆𑀯𑀸 𑀆𑀕𑀢𑀫𑁆𑀳𑀸, 𑀇𑀫𑁂𑀲𑀁 𑀧𑀦 𑀭𑀸𑀚𑀽𑀦𑀁 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀓𑁄 𑀯𑀲𑀺𑀲𑁆𑀲𑀢𑀻’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀏𑀯𑀁 𑀅𑀦𑀸𑀕𑀢𑁂𑀲𑀼 𑀅𑀦𑀸𑀕𑀘𑁆𑀙𑀦𑁆𑀢𑁂𑀲𑀼, 𑀆𑀕𑀢𑁂𑀲𑀼 𑀤𑀼𑀓𑁆𑀔𑀁 𑀯𑀺𑀳𑀭𑀦𑁆𑀢𑁂𑀲𑀼 𑀲𑁄 𑀤𑁂𑀲𑁄 𑀧𑀩𑁆𑀩𑀚𑀺𑀢𑀸𑀦𑀁 𑀅𑀦𑀸𑀯𑀸𑀲𑁄 𑀳𑁄𑀢𑀺. 𑀢𑀢𑁄 𑀤𑁂𑀯𑀢𑀸𑀭𑀓𑁆𑀔𑀸 𑀦 𑀳𑁄𑀢𑀺, 𑀤𑁂𑀯𑀢𑀸𑀭𑀓𑁆𑀔𑀸𑀬 𑀅𑀲𑀢𑀺 𑀅𑀫𑀦𑀼𑀲𑁆𑀲𑀸 𑀑𑀓𑀸𑀲𑀁 𑀮𑀪𑀦𑁆𑀢𑀺. 𑀅𑀫𑀦𑀼𑀲𑁆𑀲𑀸 𑀉𑀲𑁆𑀲𑀦𑁆𑀦𑀸 𑀅𑀦𑀼𑀧𑁆𑀧𑀦𑁆𑀦𑀁 𑀩𑁆𑀬𑀸𑀥𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀲𑀻𑀮𑀯𑀦𑁆𑀢𑀸𑀦𑀁 𑀤𑀲𑁆𑀲𑀦𑀧𑀜𑁆𑀳𑀸𑀧𑀼𑀘𑁆𑀙𑀦𑀸𑀤𑀺𑀯𑀢𑁆𑀣𑀼𑀓𑀲𑁆𑀲 𑀧𑀼𑀜𑁆𑀜𑀲𑁆𑀲 𑀅𑀦𑀸𑀕𑀫𑁄 𑀳𑁄𑀢𑀺. 𑀯𑀺𑀧𑀭𑀺𑀬𑀸𑀬𑁂𑀦 𑀧𑀦 𑀬𑀣𑀸𑀯𑀼𑀢𑁆𑀢𑀓𑀡𑁆𑀳𑀧𑀓𑁆𑀔𑀯𑀺𑀧𑀭𑀻𑀢𑀲𑁆𑀲 𑀲𑀼𑀓𑁆𑀓𑀧𑀓𑁆𑀔𑀲𑁆𑀲 𑀲𑀫𑁆𑀪𑀯𑁄 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀯𑀼𑀤𑁆𑀥𑀺𑀳𑀸𑀦𑀺𑀬𑁄 𑀯𑁂𑀤𑀺𑀢𑀩𑁆𑀩𑀸.

𑁧𑁩𑁫. 𑀏𑀓𑀫𑀺𑀤𑀸𑀳𑀦𑁆𑀢𑀺 𑀇𑀤𑀁 𑀪𑀕𑀯𑀸 𑀧𑀼𑀩𑁆𑀩𑁂 𑀯𑀚𑁆𑀚𑀻𑀦𑀁 𑀇𑀫𑀲𑁆𑀲 𑀯𑀚𑁆𑀚𑀺𑀲𑀢𑁆𑀢𑀓𑀲𑁆𑀲 𑀤𑁂𑀲𑀺𑀢𑀪𑀸𑀯𑀧𑁆𑀧𑀓𑀸𑀲𑀦𑀢𑁆𑀣𑀫𑀸𑀳 ¶ . 𑀢𑀢𑁆𑀣 𑀲𑀸𑀭𑀦𑁆𑀤𑀤𑁂 𑀘𑁂𑀢𑀺𑀬𑁂𑀢𑀺 𑀏𑀯𑀁𑀦𑀸𑀫𑀓𑁂 𑀯𑀺𑀳𑀸𑀭𑁂. 𑀅𑀦𑀼𑀧𑁆𑀧𑀦𑁆𑀦𑁂 𑀓𑀺𑀭 𑀩𑀼𑀤𑁆𑀥𑁂 𑀢𑀢𑁆𑀣 𑀲𑀸𑀭𑀦𑁆𑀤𑀤𑀲𑁆𑀲 𑀬𑀓𑁆𑀔𑀲𑁆𑀲 𑀦𑀺𑀯𑀸𑀲𑀦𑀝𑁆𑀞𑀸𑀦𑀁 𑀘𑁂𑀢𑀺𑀬𑀁 𑀅𑀳𑁄𑀲𑀺. 𑀅𑀣𑁂𑀢𑁆𑀣 𑀪𑀕𑀯𑀢𑁄 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀲𑀼𑀁, 𑀲𑁄 𑀲𑀸𑀭𑀦𑁆𑀤𑀤𑁂 𑀘𑁂𑀢𑀺𑀬𑁂 𑀓𑀢𑀢𑁆𑀢𑀸 𑀲𑀸𑀭𑀦𑁆𑀤𑀤𑀘𑁂𑀢𑀺𑀬𑀦𑁆𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀢𑁄.

𑀅𑀓𑀭𑀡𑀻𑀬𑀸𑀢𑀺 𑀅𑀓𑀸𑀢𑀩𑁆𑀩𑀸, 𑀅𑀕𑁆𑀕𑀳𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀬𑀤𑀺𑀤𑀦𑁆𑀢𑀺 ¶ 𑀦𑀺𑀧𑀸𑀢𑀫𑀢𑁆𑀢𑀁. 𑀬𑀼𑀤𑁆𑀥𑀲𑁆𑀲𑀸𑀢𑀺 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀅𑀪𑀺𑀫𑀼𑀔𑀬𑀼𑀤𑁆𑀥𑁂𑀦 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀢𑁆𑀭 𑀉𑀧𑀮𑀸𑀧𑀦𑀸𑀬𑀸𑀢𑀺 𑀞𑀧𑁂𑀢𑁆𑀯𑀸 𑀉𑀧𑀮𑀸𑀧𑀦𑀁. 𑀉𑀧𑀮𑀸𑀧𑀦𑀸 𑀦𑀸𑀫 𑁋 ‘‘𑀅𑀮𑀁 𑀯𑀺𑀯𑀸𑀤𑁂𑀦, 𑀇𑀤𑀸𑀦𑀺 𑀲𑀫𑀕𑁆𑀕𑀸 𑀳𑁄𑀫𑀸’’𑀢𑀺 𑀳𑀢𑁆𑀣𑀺𑀅𑀲𑁆𑀲𑀭𑀣𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀻𑀦𑀺 𑀧𑁂𑀲𑁂𑀢𑁆𑀯𑀸 𑀲𑀗𑁆𑀕𑀳𑀓𑀭𑀡𑀁. 𑀏𑀯𑀜𑁆𑀳𑀺 𑀲𑀗𑁆𑀕𑀳𑀁 𑀓𑀢𑁆𑀯𑀸 𑀓𑁂𑀯𑀮𑀁 𑀯𑀺𑀲𑁆𑀲𑀸𑀲𑁂𑀦 𑀲𑀓𑁆𑀓𑀸 𑀕𑀡𑁆𑀳𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀢𑁆𑀭 𑀫𑀺𑀣𑀼𑀪𑁂𑀤𑀸𑀬𑀸𑀢𑀺 𑀞𑀧𑁂𑀢𑁆𑀯𑀸 𑀫𑀺𑀣𑀼𑀪𑁂𑀤𑀁. 𑀇𑀫𑀺𑀦𑀸 𑀅𑀜𑁆𑀜𑀫𑀜𑁆𑀜𑀪𑁂𑀤𑀁 𑀓𑀢𑁆𑀯𑀸𑀧𑀺 𑀲𑀓𑁆𑀓𑀸 𑀏𑀢𑁂 𑀕𑀳𑁂𑀢𑀼𑀦𑁆𑀢𑀺 ¶ 𑀤𑀲𑁆𑀲𑁂𑀢𑀺. 𑀇𑀤𑀁 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑁄 𑀓𑀣𑀸𑀬 𑀦𑀬𑀁 𑀮𑀪𑀺𑀢𑁆𑀯𑀸 𑀆𑀳.

𑀓𑀺𑀁 𑀧𑀦 𑀪𑀕𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀇𑀫𑀸𑀬 𑀓𑀣𑀸𑀬 𑀦𑀬𑀮𑀸𑀪𑀁 𑀦 𑀚𑀸𑀦𑀸𑀢𑀻𑀢𑀺? 𑀆𑀫, 𑀚𑀸𑀦𑀸𑀢𑀺. 𑀚𑀸𑀦𑀦𑁆𑀢𑁄 𑀓𑀲𑁆𑀫𑀸 𑀓𑀣𑁂𑀲𑀻𑀢𑀺? 𑀅𑀦𑀼𑀓𑀫𑁆𑀧𑀸𑀬. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀫𑀬𑀸 𑀅𑀓𑀣𑀺𑀢𑁂𑀧𑀺 𑀓𑀢𑀺𑀧𑀸𑀳𑁂𑀦 𑀕𑀦𑁆𑀢𑁆𑀯𑀸 𑀲𑀩𑁆𑀩𑁂 𑀕𑀡𑁆𑀳𑀺𑀲𑁆𑀲𑀢𑀺, 𑀓𑀣𑀺𑀢𑁂 𑀧𑀦 𑀲𑀫𑀕𑁆𑀕𑁂 𑀪𑀺𑀦𑁆𑀤𑀦𑁆𑀢𑁄 𑀢𑀻𑀳𑀺 𑀲𑀁𑀯𑀘𑁆𑀙𑀭𑁂𑀳𑀺 𑀕𑀡𑁆𑀳𑀺𑀲𑁆𑀲𑀢𑀺, 𑀏𑀢𑁆𑀢𑀓𑀫𑁆𑀧𑀺 𑀚𑀻𑀯𑀺𑀢𑀫𑁂𑀯 𑀯𑀭𑀁, 𑀏𑀢𑁆𑀢𑀓𑀜𑁆𑀳𑀺 𑀚𑀻𑀯𑀦𑁆𑀢𑀸 𑀅𑀢𑁆𑀢𑀦𑁄 𑀧𑀢𑀺𑀝𑁆𑀞𑀸𑀦𑀪𑀽𑀢𑀁 𑀧𑀼𑀜𑁆𑀜𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺.

𑀅𑀪𑀺𑀦𑀦𑁆𑀤𑀺𑀢𑁆𑀯𑀸𑀢𑀺 𑀘𑀺𑀢𑁆𑀢𑁂𑀦 𑀅𑀪𑀺𑀦𑀦𑁆𑀤𑀺𑀢𑁆𑀯𑀸. 𑀅𑀦𑀼𑀫𑁄𑀤𑀺𑀢𑁆𑀯𑀸𑀢𑀺 ‘‘𑀬𑀸𑀯 𑀲𑀼𑀪𑀸𑀲𑀺𑀢𑀜𑁆𑀘𑀺𑀤𑀁 𑀪𑁄𑀢𑀸 𑀕𑁄𑀢𑀫𑁂𑀦𑀸’’𑀢𑀺 𑀯𑀸𑀘𑀸𑀬 𑀅𑀦𑀼𑀫𑁄𑀤𑀺𑀢𑁆𑀯𑀸. 𑀧𑀓𑁆𑀓𑀸𑀫𑀻𑀢𑀺 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀢𑁄. 𑀢𑀢𑁄 𑀦𑀁 𑀭𑀸𑀚𑀸 𑁋 ‘‘𑀓𑀺𑀁 𑀆𑀘𑀭𑀺𑀬, 𑀪𑀕𑀯𑀸 𑀅𑀯𑀘𑀸’’𑀢𑀺 𑀧𑀼𑀘𑁆𑀙𑀺. 𑀲𑁄 𑁋 ‘‘𑀬𑀣𑀸 𑀪𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀘𑀦𑀁 𑀦 𑀲𑀓𑁆𑀓𑀸 𑀯𑀚𑁆𑀚𑀻 𑀓𑁂𑀦𑀘𑀺 𑀕𑀳𑁂𑀢𑀼𑀁, 𑀅𑀧𑀺 𑀘 𑀉𑀧𑀮𑀸𑀧𑀦𑀸𑀬 𑀯𑀸 𑀫𑀺𑀣𑀼𑀪𑁂𑀤𑁂𑀦 𑀯𑀸 𑀲𑀓𑁆𑀓𑀸’’𑀢𑀺 𑀆𑀳. 𑀢𑀢𑁄 𑀦𑀁 𑀭𑀸𑀚𑀸 𑁋 ‘‘𑀉𑀧𑀮𑀸𑀧𑀦𑀸𑀬 𑀅𑀫𑁆𑀳𑀸𑀓𑀁 𑀳𑀢𑁆𑀣𑀺𑀅𑀲𑁆𑀲𑀸𑀤𑀬𑁄 𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀪𑁂𑀤𑁂𑀦𑁂𑀯 𑀢𑁂 𑀕𑀳𑁂𑀲𑁆𑀲𑀸𑀫𑀺, 𑀓𑀺𑀁 𑀓𑀭𑁄𑀫𑀸’’𑀢𑀺 𑀧𑀼𑀘𑁆𑀙𑀺. 𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀢𑀼𑀫𑁆𑀳𑁂 𑀯𑀚𑁆𑀚𑀺𑀁 𑀆𑀭𑀩𑁆𑀪 𑀧𑀭𑀺𑀲𑀢𑀺 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀣. 𑀢𑀢𑁄 𑀅𑀳𑀁 𑁋 ‘‘𑀓𑀺𑀁 𑀢𑁂 𑀫𑀳𑀸𑀭𑀸𑀚 𑀢𑁂𑀳𑀺, 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀳𑀺 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀻𑀦𑀺 𑀓𑀢𑁆𑀯𑀸 𑀚𑀻𑀯𑀦𑁆𑀢𑀼 𑀏𑀢𑁂 𑀭𑀸𑀚𑀸𑀦𑁄’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀫𑀺𑀲𑁆𑀲𑀸𑀫𑀺. 𑀢𑀢𑁄 𑀢𑀼𑀫𑁆𑀳𑁂 𑁋 ‘‘𑀓𑀺𑀦𑁆𑀦𑀼 𑀔𑁄 𑀪𑁄 𑀏𑀲 𑀩𑁆𑀭𑀸𑀳𑁆𑀫𑀡𑁄 𑀯𑀚𑁆𑀚𑀺𑀁 𑀆𑀭𑀩𑁆𑀪 𑀧𑀯𑀢𑁆𑀢𑀁 𑀓𑀣𑀁 𑀧𑀝𑀺𑀩𑀸𑀳𑀢𑀻’’𑀢𑀺 𑀯𑀤𑁂𑀬𑁆𑀬𑀸𑀣, 𑀤𑀺𑀯𑀲𑀪𑀸𑀕𑁂 𑀘𑀸𑀳𑀁 𑀢𑁂𑀲𑀁 𑀧𑀡𑁆𑀡𑀸𑀓𑀸𑀭𑀁 𑀧𑁂𑀲𑁂𑀲𑁆𑀲𑀸𑀫𑀺, 𑀢𑀫𑁆𑀧𑀺 𑀕𑀸𑀳𑀸𑀧𑁂𑀢𑁆𑀯𑀸 𑀢𑀼𑀫𑁆𑀳𑁂𑀧𑀺 𑀫𑀫 𑀤𑁄𑀲𑀁 𑀆𑀭𑁄𑀧𑁂𑀢𑁆𑀯𑀸 𑀩𑀦𑁆𑀥𑀦𑀢𑀸𑀮𑀦𑀸𑀤𑀻𑀦𑀺 𑀅𑀓𑀢𑁆𑀯𑀸𑀯 𑀓𑁂𑀯𑀮𑀁 𑀔𑀼𑀭𑀫𑀼𑀡𑁆𑀟𑀁 𑀫𑀁 𑀓𑀢𑁆𑀯𑀸 𑀦𑀕𑀭𑀸 𑀦𑀻𑀳𑀭𑀸𑀧𑁂𑀣. 𑀅𑀣𑀸𑀳𑀁 𑁋 ‘‘𑀫𑀬𑀸 𑀢𑁂 𑀦𑀕𑀭𑁂 𑀧𑀸𑀓𑀸𑀭𑁄 𑀧𑀭𑀺𑀔𑀸 𑀘 𑀓𑀸𑀭𑀺𑀢𑀸, 𑀅𑀳𑀁 𑀓𑀺𑀭 𑀤𑀼𑀩𑁆𑀩𑀮𑀝𑁆𑀞𑀸𑀦𑀜𑁆𑀘 𑀉𑀢𑁆𑀢𑀸𑀦𑀕𑀫𑁆𑀪𑀻𑀭𑀝𑁆𑀞𑀸𑀦𑀜𑁆𑀘 𑀚𑀸𑀦𑀸𑀫𑀺, 𑀦 𑀘𑀺𑀭𑀲𑁆𑀲𑁂𑀯 𑀤𑀸𑀦𑀺 ¶ 𑀉𑀚𑀼𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 ¶ 𑀯𑀓𑁆𑀔𑀸𑀫𑀺. 𑀢𑀁 𑀲𑀼𑀢𑁆𑀯𑀸 𑀢𑀼𑀫𑁆𑀳𑁂 𑁋 ‘‘𑀕𑀘𑁆𑀙𑀢𑀽’’𑀢𑀺 𑀯𑀤𑁂𑀬𑁆𑀬𑀸𑀣𑀸𑀢𑀺. 𑀭𑀸𑀚𑀸 𑀲𑀩𑁆𑀩𑀁 𑀅𑀓𑀸𑀲𑀺.

𑀮𑀺𑀘𑁆𑀙𑀯𑀻 𑀢𑀲𑁆𑀲 𑀦𑀺𑀓𑁆𑀔𑀫𑀦𑀁 𑀲𑀼𑀢𑁆𑀯𑀸 𑁋 ‘‘𑀲𑀞𑁄 𑀩𑁆𑀭𑀸𑀳𑁆𑀫𑀡𑁄, 𑀫𑀸 𑀢𑀲𑁆𑀲 𑀕𑀗𑁆𑀕𑀁 𑀉𑀢𑁆𑀢𑀭𑀺𑀢𑀼𑀁 𑀅𑀤𑀢𑁆𑀣𑀸’’𑀢𑀺 𑀆𑀳𑀁𑀲𑀼. 𑀢𑀢𑁆𑀭 𑀏𑀓𑀘𑁆𑀘𑁂𑀳𑀺 𑁋 ‘‘𑀅𑀫𑁆𑀳𑁂 𑀆𑀭𑀩𑁆𑀪 𑀓𑀣𑀺𑀢𑀢𑁆𑀢𑀸 𑀓𑀺𑀭 𑀲𑁄 𑀏𑀯𑀁 𑀓𑀢𑁄’’𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺, 𑀪𑀡𑁂, 𑀏𑀢𑀽’’𑀢𑀺 𑀪𑀡𑀺𑀁𑀲𑀼. 𑀲𑁄 𑀕𑀦𑁆𑀢𑁆𑀯𑀸 𑀮𑀺𑀘𑁆𑀙𑀯𑀻 𑀤𑀺𑀲𑁆𑀯𑀸 ‘‘𑀓𑀺𑀁 𑀆𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺, 𑀮𑀺𑀘𑁆𑀙𑀯𑀺𑀦𑁄 𑁋 ‘‘𑀅𑀧𑁆𑀧𑀫𑀢𑁆𑀢𑀓𑁂𑀦 𑀦𑀸𑀫 𑀏𑀯𑀁 𑀕𑀭𑀼𑀁 𑀤𑀡𑁆𑀟𑀁 𑀓𑀸𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 ¶ 𑀯𑀢𑁆𑀯𑀸 𑁋 ‘‘𑀓𑀺𑀁 𑀢𑁂 𑀢𑀢𑁆𑀭 𑀞𑀸𑀦𑀦𑁆𑀢𑀭’’𑀦𑁆𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀯𑀺𑀦𑀺𑀘𑁆𑀙𑀬𑀸𑀫𑀘𑁆𑀘𑁄𑀳𑀫𑀲𑁆𑀫𑀻’’𑀢𑀺. 𑀢𑀤𑁂𑀯 𑀢𑁂 𑀞𑀸𑀦𑀦𑁆𑀢𑀭𑀁 𑀳𑁄𑀢𑀽𑀢𑀺. 𑀲𑁄 𑀲𑀼𑀝𑁆𑀞𑀼𑀢𑀭𑀁 𑀯𑀺𑀦𑀺𑀘𑁆𑀙𑀬𑀁 𑀓𑀭𑁄𑀢𑀺, 𑀭𑀸𑀚𑀓𑀼𑀫𑀸𑀭𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀦𑁆𑀢𑀺.

𑀲𑁄 𑀧𑀢𑀺𑀝𑁆𑀞𑀺𑀢𑀕𑀼𑀡𑁄 𑀳𑀼𑀢𑁆𑀯𑀸 𑀏𑀓𑀤𑀺𑀯𑀲𑀁 𑀏𑀓𑀁 𑀮𑀺𑀘𑁆𑀙𑀯𑀺𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀕𑀦𑁆𑀢𑁆𑀯𑀸 𑁋 𑀤𑀸𑀭𑀓𑀸 𑀓𑀲𑀦𑁆𑀢𑀻𑀢𑀺 𑀧𑀼𑀘𑁆𑀙𑀺. 𑀆𑀫, 𑀓𑀲𑀦𑁆𑀢𑀺. 𑀤𑁆𑀯𑁂 𑀕𑁄𑀡𑁂 𑀬𑁄𑀚𑁂𑀢𑁆𑀯𑀸𑀢𑀺? 𑀆𑀫, 𑀤𑁆𑀯𑁂 𑀕𑁄𑀡𑁂 𑀬𑁄𑀚𑁂𑀢𑁆𑀯𑀸𑀢𑀺. 𑀏𑀢𑁆𑀢𑀓𑀁 𑀯𑀢𑁆𑀯𑀸 𑀦𑀺𑀯𑀢𑁆𑀢𑁄. 𑀢𑀢𑁄 𑀢𑀁 𑀅𑀜𑁆𑀜𑁄 𑁋 ‘‘𑀓𑀺𑀁 𑀆𑀘𑀭𑀺𑀬𑁄 𑀆𑀳𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 𑀯𑀼𑀢𑁆𑀢𑀁 𑀅𑀲𑀤𑁆𑀤𑀳𑀦𑁆𑀢𑁄 ‘‘𑀦 𑀫𑁂 𑀏𑀲 𑀬𑀣𑀸𑀪𑀽𑀢𑀁 𑀓𑀣𑁂𑀢𑀻’’𑀢𑀺 𑀢𑁂𑀦 𑀲𑀤𑁆𑀥𑀺𑀁 𑀪𑀺𑀚𑁆𑀚𑀺. 𑀩𑁆𑀭𑀸𑀳𑁆𑀫𑀡𑁄 𑀅𑀜𑁆𑀜𑀲𑁆𑀫𑀺𑀁 𑀤𑀺𑀯𑀲𑁂 𑀏𑀓𑀁 𑀮𑀺𑀘𑁆𑀙𑀯𑀺𑀁 𑀏𑀓𑀫𑀦𑁆𑀢𑀁 𑀦𑁂𑀢𑁆𑀯𑀸 𑁋 ‘‘𑀓𑁂𑀦 𑀩𑁆𑀬𑀜𑁆𑀚𑀦𑁂𑀦 𑀪𑀼𑀢𑁆𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀯𑀢𑁆𑀢𑁄. 𑀢𑀫𑁆𑀧𑀺 𑀅𑀜𑁆𑀜𑁄 𑀧𑀼𑀘𑁆𑀙𑀺𑀢𑁆𑀯𑀸 𑀅𑀲𑀤𑁆𑀤𑀳𑀦𑁆𑀢𑁄 𑀢𑀣𑁂𑀯 𑀪𑀺𑀚𑁆𑀚𑀺. 𑀩𑁆𑀭𑀸𑀳𑁆𑀫𑀡𑁄 𑀅𑀧𑀭𑀫𑁆𑀧𑀺 𑀤𑀺𑀯𑀲𑀁 𑀏𑀓𑀁 𑀮𑀺𑀘𑁆𑀙𑀯𑀺𑀁 𑀏𑀓𑀫𑀦𑁆𑀢𑀁 𑀦𑁂𑀢𑁆𑀯𑀸 𑁋 ‘‘𑀅𑀢𑀺𑀤𑀼𑀕𑁆𑀕𑀢𑁄𑀲𑀺 𑀓𑀺𑀭𑀸’’𑀢𑀺 𑀧𑀼𑀘𑁆𑀙𑀺. 𑀓𑁄 𑀏𑀯𑀫𑀸𑀳𑀸𑀢𑀺 𑀧𑀼𑀘𑁆𑀙𑀺𑀢𑁄 𑀅𑀲𑀼𑀓𑁄 𑀦𑀸𑀫 𑀮𑀺𑀘𑁆𑀙𑀯𑀻𑀢𑀺. 𑀅𑀧𑀭𑀫𑁆𑀧𑀺 𑀏𑀓𑀫𑀦𑁆𑀢𑀁 𑀦𑁂𑀢𑁆𑀯𑀸 𑁋 ‘‘𑀢𑁆𑀯𑀁 𑀓𑀺𑀭 𑀪𑀻𑀭𑀼𑀓𑀚𑀸𑀢𑀺𑀓𑁄’’𑀢𑀺 𑀧𑀼𑀘𑁆𑀙𑀺. 𑀓𑁄 𑀏𑀯𑀫𑀸𑀳𑀸𑀢𑀺? 𑀅𑀲𑀼𑀓𑁄 𑀦𑀸𑀫 𑀮𑀺𑀘𑁆𑀙𑀯𑀻𑀢𑀺. 𑀏𑀯𑀁 𑀅𑀜𑁆𑀜𑁂𑀦 𑀅𑀓𑀣𑀺𑀢𑀫𑁂𑀯 𑀅𑀜𑁆𑀜𑀲𑁆𑀲 𑀓𑀣𑁂𑀦𑁆𑀢𑁄 𑀢𑀻𑀳𑀺 𑀲𑀁𑀯𑀘𑁆𑀙𑀭𑁂𑀳𑀺 𑀢𑁂 𑀭𑀸𑀚𑀸𑀦𑁄 𑀅𑀜𑁆𑀜𑀫𑀜𑁆𑀜𑀁 𑀪𑀺𑀦𑁆𑀤𑀺𑀢𑁆𑀯𑀸 𑀬𑀣𑀸 𑀤𑁆𑀯𑁂 𑀏𑀓𑀫𑀕𑁆𑀕𑁂𑀦 𑀦 𑀕𑀘𑁆𑀙𑀦𑁆𑀢𑀺, 𑀢𑀣𑀸 𑀓𑀢𑁆𑀯𑀸 𑀲𑀦𑁆𑀦𑀺𑀧𑀸𑀢𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀮𑀺𑀘𑁆𑀙𑀯𑀺𑀦𑁄 𑁋 ‘‘𑀇𑀲𑁆𑀲𑀭𑀸 𑀲𑀦𑁆𑀦𑀺𑀧𑀢𑀦𑁆𑀢𑀼, 𑀲𑀽𑀭𑀸 𑀲𑀦𑁆𑀦𑀺𑀧𑀢𑀦𑁆𑀢𑀽’’𑀢𑀺 𑀯𑀢𑁆𑀯𑀸 𑀦 𑀲𑀦𑁆𑀦𑀺𑀧𑀢𑀺𑀁𑀲𑀼.

𑀩𑁆𑀭𑀸𑀳𑁆𑀫𑀡𑁄 𑁋 ‘‘𑀅𑀬𑀁 𑀤𑀸𑀦𑀺 𑀓𑀸𑀮𑁄, 𑀲𑀻𑀖𑀁 𑀆𑀕𑀘𑁆𑀙𑀢𑀽’’𑀢𑀺 𑀭𑀜𑁆𑀜𑁄 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀭𑀸𑀚𑀸 𑀲𑀼𑀢𑁆𑀯𑀸𑀯 𑀩𑀮𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀯𑁂𑀲𑀸𑀮𑀺𑀓𑀸 𑀲𑀼𑀢𑁆𑀯𑀸 𑁋 ‘‘𑀭𑀜𑁆𑀜𑁄 𑀕𑀗𑁆𑀕𑀁 𑀉𑀢𑁆𑀢𑀭𑀺𑀢𑀼𑀁 𑀦 𑀤𑀲𑁆𑀲𑀸𑀫𑀸’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀼𑀁. 𑀢𑀫𑁆𑀧𑀺 𑀲𑀼𑀢𑁆𑀯𑀸 𑁋 ‘‘𑀕𑀘𑁆𑀙𑀦𑁆𑀢𑀼 𑀲𑀽𑀭𑀭𑀸𑀚𑀸𑀦𑁄’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀦 ¶ 𑀲𑀦𑁆𑀦𑀺𑀧𑀢𑀺𑀁𑀲𑀼. ‘‘𑀦𑀕𑀭𑀧𑁆𑀧𑀯𑁂𑀲𑀦𑀁 𑀦 𑀤𑀲𑁆𑀲𑀸𑀫, 𑀤𑁆𑀯𑀸𑀭𑀸𑀦𑀺 𑀧𑀺𑀤𑀳𑀺𑀢𑁆𑀯𑀸 𑀞𑀲𑁆𑀲𑀸𑀫𑀸’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀼𑀁. 𑀏𑀓𑁄𑀧𑀺 𑀦 𑀲𑀦𑁆𑀦𑀺𑀧𑀢𑀺. 𑀬𑀣𑀸𑀯𑀺𑀯𑀝𑁂𑀳𑁂𑀯 𑀤𑁆𑀯𑀸𑀭𑁂𑀳𑀺 𑀧𑀯𑀺𑀲𑀺𑀢𑁆𑀯𑀸 𑀲𑀩𑁆𑀩𑁂 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀢𑁆𑀯𑀸 𑀕𑀢𑁄.

𑀪𑀺𑀓𑁆𑀔𑀼𑀅𑀧𑀭𑀺𑀳𑀸𑀦𑀺𑀬𑀥𑀫𑁆𑀫𑀯𑀡𑁆𑀡𑀦𑀸

𑁧𑁩𑁬. 𑀅𑀣 ¶ 𑀔𑁄 𑀪𑀕𑀯𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀢𑀺𑀆𑀤𑀺𑀫𑁆𑀳𑀺 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸𑀢𑀺 𑀤𑀽𑀭𑀯𑀺𑀳𑀸𑀭𑁂𑀲𑀼 𑀇𑀤𑁆𑀥𑀺𑀫𑀦𑁆𑀢𑁂 𑀧𑁂𑀲𑁂𑀢𑁆𑀯𑀸 𑀲𑀦𑁆𑀢𑀺𑀓𑀯𑀺𑀳𑀸𑀭𑁂𑀲𑀼 𑀲𑀬𑀁 𑀕𑀦𑁆𑀢𑁆𑀯𑀸 𑁋 ‘‘𑀲𑀦𑁆𑀦𑀺𑀧𑀢𑀣, 𑀆𑀬𑀲𑁆𑀫𑀦𑁆𑀢𑁄; 𑀪𑀕𑀯𑀸 𑀯𑁄 𑀲𑀦𑁆𑀦𑀺𑀧𑀸𑀢𑀁 𑀇𑀘𑁆𑀙𑀢𑀻’’𑀢𑀺 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸. 𑀅𑀧𑀭𑀺𑀳𑀸𑀦𑀺𑀬𑁂𑀢𑀺 ¶ 𑀅𑀧𑀭𑀺𑀳𑀸𑀦𑀺𑀓𑀭𑁂, 𑀯𑀼𑀤𑁆𑀥𑀺𑀳𑁂𑀢𑀼𑀪𑀽𑀢𑁂𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀘𑀦𑁆𑀤𑀲𑀳𑀲𑁆𑀲𑀁 𑀲𑀽𑀭𑀺𑀬𑀲𑀳𑀲𑁆𑀲𑀁 𑀉𑀝𑁆𑀞𑀧𑁂𑀦𑁆𑀢𑁄 𑀯𑀺𑀬 𑀘𑀢𑀼𑀓𑀼𑀝𑁆𑀝𑀓𑁂 𑀕𑁂𑀳𑁂 𑀅𑀦𑁆𑀢𑁄 𑀢𑁂𑀮𑀤𑀻𑀧𑀲𑀳𑀲𑁆𑀲𑀁 𑀉𑀚𑁆𑀚𑀸𑀮𑁂𑀦𑁆𑀢𑁄 𑀯𑀺𑀬 𑀧𑀸𑀓𑀝𑁂 𑀓𑀢𑁆𑀯𑀸 𑀓𑀣𑀬𑀺𑀲𑁆𑀲𑀸𑀫𑀻𑀢𑀺.

𑀢𑀢𑁆𑀣 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀸𑀢𑀸𑀢𑀺 𑀇𑀤𑀁 𑀯𑀚𑁆𑀚𑀺𑀲𑀢𑁆𑀢𑀓𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀇𑀥𑀸𑀧𑀺 𑀘 𑀅𑀪𑀺𑀡𑁆𑀳𑀁 𑀅𑀲𑀦𑁆𑀦𑀺𑀧𑀢𑀺𑀢𑀸 𑀤𑀺𑀲𑀸𑀲𑀼 𑀆𑀕𑀢𑀲𑀸𑀲𑀦𑀁 𑀦 𑀲𑀼𑀡𑀦𑁆𑀢𑀺. 𑀢𑀢𑁄 𑁋 ‘‘𑀅𑀲𑀼𑀓𑀯𑀺𑀳𑀸𑀭𑀲𑀻𑀫𑀸 𑀆𑀓𑀼𑀮𑀸, 𑀉𑀧𑁄𑀲𑀣𑀧𑀯𑀸𑀭𑀡𑀸 𑀞𑀺𑀢𑀸, 𑀅𑀲𑀼𑀓𑀲𑁆𑀫𑀺𑀁 𑀞𑀸𑀦𑁂 𑀪𑀺𑀓𑁆𑀔𑀽 𑀯𑁂𑀚𑁆𑀚𑀓𑀫𑁆𑀫𑀤𑀽𑀢𑀓𑀫𑁆𑀫𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀯𑀺𑀜𑁆𑀜𑀢𑁆𑀢𑀺𑀩𑀳𑀼𑀮𑀸 𑀧𑀼𑀧𑁆𑀨𑀤𑀸𑀦𑀸𑀤𑀻𑀳𑀺 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀻’’𑀢𑀺𑀆𑀤𑀻𑀦𑀺 𑀦 𑀚𑀸𑀦𑀦𑁆𑀢𑀺, 𑀧𑀸𑀧𑀪𑀺𑀓𑁆𑀔𑀽𑀧𑀺 ‘‘𑀧𑀫𑀢𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺 𑀜𑀢𑁆𑀯𑀸 𑀭𑀸𑀲𑀺𑀪𑀽𑀢𑀸 𑀲𑀸𑀲𑀦𑀁 𑀑𑀲𑀓𑁆𑀓𑀸𑀧𑁂𑀦𑁆𑀢𑀺. 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀢𑀺𑀢𑀸 𑀧𑀦 𑀢𑀁 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀡𑀦𑁆𑀢𑀺, 𑀢𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑁂𑀲𑁂𑀢𑁆𑀯𑀸 𑀲𑀻𑀫𑀁 𑀉𑀚𑀼𑀁 𑀓𑀭𑁄𑀦𑁆𑀢𑀺, 𑀉𑀧𑁄𑀲𑀣𑀧𑀯𑀸𑀭𑀡𑀸𑀤𑀬𑁄 𑀧𑀯𑀢𑁆𑀢𑀸𑀧𑁂𑀦𑁆𑀢𑀺, 𑀫𑀺𑀘𑁆𑀙𑀸𑀚𑀻𑀯𑀸𑀦𑀁 𑀉𑀲𑁆𑀲𑀦𑁆𑀦𑀝𑁆𑀞𑀸𑀦𑁂 𑀅𑀭𑀺𑀬𑀯𑀁𑀲𑀓𑁂 𑀧𑁂𑀲𑁂𑀢𑁆𑀯𑀸 𑀅𑀭𑀺𑀬𑀯𑀁𑀲𑀁 𑀓𑀣𑀸𑀧𑁂𑀦𑁆𑀢𑀺, 𑀧𑀸𑀧𑀪𑀺𑀓𑁆𑀔𑀽𑀦𑀁 𑀯𑀺𑀦𑀬𑀥𑀭𑁂𑀳𑀺 𑀦𑀺𑀕𑁆𑀕𑀳𑀁 𑀓𑀸𑀭𑀸𑀧𑁂𑀦𑁆𑀢𑀺, 𑀧𑀸𑀧𑀪𑀺𑀓𑁆𑀔𑀽𑀧𑀺 ‘‘𑀅𑀧𑁆𑀧𑀫𑀢𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀦 𑀲𑀓𑁆𑀓𑀸 𑀅𑀫𑁆𑀳𑁂𑀳𑀺 𑀯𑀕𑁆𑀕𑀩𑀦𑁆𑀥𑁂𑀦 𑀯𑀺𑀘𑀭𑀺𑀢𑀼’’𑀦𑁆𑀢𑀺 𑀪𑀺𑀚𑁆𑀚𑀺𑀢𑁆𑀯𑀸 𑀧𑀮𑀸𑀬𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀳𑀸𑀦𑀺𑀯𑀼𑀤𑁆𑀥𑀺𑀬𑁄 𑀯𑁂𑀤𑀺𑀢𑀩𑁆𑀩𑀸.

𑀲𑀫𑀕𑁆𑀕𑀸𑀢𑀺𑀆𑀤𑀻𑀲𑀼 𑀘𑁂𑀢𑀺𑀬𑀧𑀝𑀺𑀚𑀕𑁆𑀕𑀦𑀢𑁆𑀣𑀁 𑀯𑀸 𑀩𑁄𑀥𑀺𑀕𑁂𑀳𑀉𑀧𑁄𑀲𑀣𑀸𑀕𑀸𑀭𑀘𑁆𑀙𑀸𑀤𑀦𑀢𑁆𑀣𑀁 𑀯𑀸 𑀓𑀢𑀺𑀓𑀯𑀢𑁆𑀢𑀁 𑀯𑀸 𑀞𑀧𑁂𑀢𑀼𑀓𑀸𑀫𑀢𑀸𑀬 𑀑𑀯𑀸𑀤𑀁 𑀯𑀸 𑀤𑀸𑀢𑀼𑀓𑀸𑀫𑀢𑀸𑀬 𑁋 ‘‘𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀢𑀽’’𑀢𑀺 𑀪𑁂𑀭𑀺𑀬𑀸 𑀯𑀸 𑀖𑀡𑁆𑀝𑀺𑀬𑀸 𑀯𑀸 𑀆𑀓𑁄𑀝𑀺𑀢𑀸𑀬 𑁋 ‘‘𑀫𑀬𑁆𑀳𑀁 𑀘𑀻𑀯𑀭𑀓𑀫𑁆𑀫𑀁 𑀅𑀢𑁆𑀣𑀺, 𑀫𑀬𑁆𑀳𑀁 𑀧𑀢𑁆𑀢𑁄 𑀧𑀘𑀺𑀢𑀩𑁆𑀩𑁄, 𑀫𑀬𑁆𑀳𑀁 𑀦𑀯𑀓𑀫𑁆𑀫𑀁 𑀅𑀢𑁆𑀣𑀻’’𑀢𑀺 𑀯𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑀸 𑀦 𑀲𑀫𑀕𑁆𑀕𑀸 𑀲𑀦𑁆𑀦𑀺𑀧𑀢𑀦𑁆𑀢𑀺 𑀦𑀸𑀫. 𑀲𑀩𑁆𑀩𑀁 𑀧𑀦 𑀢𑀁 𑀓𑀫𑁆𑀫𑀁 𑀞𑀧𑁂𑀢𑁆𑀯𑀸 𑁋 ‘‘𑀅𑀳𑀁 𑀧𑀼𑀭𑀺𑀫𑀢𑀭𑀁, 𑀅𑀳𑀁 𑀧𑀼𑀭𑀺𑀫𑀢𑀭’’𑀦𑁆𑀢𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀲𑀦𑁆𑀦𑀺𑀧𑀢𑀦𑁆𑀢𑀸 𑀲𑀫𑀕𑁆𑀕𑀸 𑀲𑀦𑁆𑀦𑀺𑀧𑀢𑀦𑁆𑀢𑀺 𑀦𑀸𑀫. 𑀲𑀦𑁆𑀦𑀺𑀧𑀢𑀺𑀢𑀸 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀫𑀦𑁆𑀢𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑀁 ¶ 𑀓𑀢𑁆𑀯𑀸 𑀏𑀓𑀢𑁄 𑀅𑀯𑀼𑀝𑁆𑀞𑀳𑀦𑁆𑀢𑀸 𑀲𑀫𑀕𑁆𑀕𑀸 𑀦 𑀯𑀼𑀝𑁆𑀞𑀳𑀦𑁆𑀢𑀺 𑀦𑀸𑀫. 𑀏𑀯𑀁 𑀯𑀼𑀝𑁆𑀞𑀺𑀢𑁂𑀲𑀼 𑀳𑀺 𑀬𑁂 𑀧𑀞𑀫𑀁 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀏𑀯𑀁 𑀳𑁄𑀢𑀺 𑁋 ‘‘𑀅𑀫𑁆𑀳𑁂𑀳𑀺 𑀩𑀸𑀳𑀺𑀭𑀓𑀣𑀸𑀯 𑀲𑀼𑀢𑀸, 𑀇𑀤𑀸𑀦𑀺 𑀯𑀺𑀦𑀺𑀘𑁆𑀙𑀬𑀓𑀣𑀸 𑀪𑀯𑀺𑀲𑁆𑀲𑀢𑀻’’𑀢𑀺. 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀯𑀼𑀝𑁆𑀞𑀳𑀦𑁆𑀢𑀸 𑀧𑀦 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀦𑁆𑀢𑀺 𑀦𑀸𑀫. 𑀅𑀧𑀺𑀘 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀯𑀺𑀳𑀸𑀭𑀲𑀻𑀫𑀸 𑀆𑀓𑀼𑀮𑀸, 𑀉𑀧𑁄𑀲𑀣𑀧𑀯𑀸𑀭𑀡𑀸 𑀞𑀺𑀢𑀸, 𑀅𑀲𑀼𑀓𑀝𑁆𑀞𑀸𑀦𑁂 𑀯𑁂𑀚𑁆𑀚𑀓𑀫𑁆𑀫𑀸𑀤𑀺𑀓𑀸𑀭𑀓𑀸 𑀧𑀸𑀧𑀪𑀺𑀓𑁆𑀔𑀽 𑀉𑀲𑁆𑀲𑀦𑁆𑀦𑀸’’𑀢𑀺 𑀲𑀼𑀢𑁆𑀯𑀸 𑁋 ‘‘𑀓𑁄 𑀕𑀦𑁆𑀢𑁆𑀯𑀸 ¶ 𑀢𑁂𑀲𑀁 𑀦𑀺𑀕𑁆𑀕𑀳𑀁 𑀓𑀭𑀺𑀲𑁆𑀲𑀢𑀻’’𑀢𑀺 ¶ 𑀯𑀼𑀢𑁆𑀢𑁂 𑁋 ‘‘𑀅𑀳𑀁 𑀧𑀞𑀫𑀁, 𑀅𑀳𑀁 𑀧𑀞𑀫’’𑀦𑁆𑀢𑀺 𑀯𑀢𑁆𑀯𑀸 𑀕𑀘𑁆𑀙𑀦𑁆𑀢𑀸𑀧𑀺 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀦𑁆𑀢𑀺 𑀦𑀸𑀫.

𑀆𑀕𑀦𑁆𑀢𑀼𑀓𑀁 𑀧𑀦 𑀤𑀺𑀲𑁆𑀯𑀸 𑁋 ‘‘𑀇𑀫𑀁 𑀧𑀭𑀺𑀯𑁂𑀡𑀁 𑀬𑀸𑀳𑀺, 𑀏𑀢𑀁 𑀧𑀭𑀺𑀯𑁂𑀡𑀁 𑀬𑀸𑀳𑀺, 𑀅𑀬𑀁 𑀓𑁄’’𑀢𑀺 𑀅𑀯𑀢𑁆𑀯𑀸 𑀲𑀩𑁆𑀩𑁂 𑀯𑀢𑁆𑀢𑀁 𑀓𑀭𑁄𑀦𑁆𑀢𑀸𑀧𑀺, 𑀚𑀺𑀡𑁆𑀡𑀧𑀢𑁆𑀢𑀘𑀻𑀯𑀭𑀓𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀧𑀢𑁆𑀢𑀘𑀻𑀯𑀭𑀁 𑀧𑀭𑀺𑀬𑁂𑀲𑀫𑀸𑀦𑀸𑀧𑀺, 𑀕𑀺𑀮𑀸𑀦𑀲𑁆𑀲 𑀕𑀺𑀮𑀸𑀦𑀪𑁂𑀲𑀚𑁆𑀚𑀁 𑀧𑀭𑀺𑀬𑁂𑀲𑀫𑀸𑀦𑀸𑀧𑀺, 𑀕𑀺𑀮𑀸𑀦𑀫𑁂𑀯 𑀅𑀦𑀸𑀣𑀁 𑁋 ‘‘𑀅𑀲𑀼𑀓𑀧𑀭𑀺𑀯𑁂𑀡𑀁 𑀬𑀸𑀳𑀺, 𑀅𑀲𑀼𑀓𑀧𑀭𑀺𑀯𑁂𑀡𑀁 𑀬𑀸𑀳𑀻’’𑀢𑀺 𑀅𑀯𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀭𑀺𑀯𑁂𑀡𑁂 𑀧𑀝𑀺𑀚𑀕𑁆𑀕𑀦𑁆𑀢𑀸𑀧𑀺, 𑀏𑀓𑁄 𑀑𑀮𑀺𑀬𑀫𑀸𑀦𑀓𑁄 𑀕𑀦𑁆𑀣𑁄 𑀳𑁄𑀢𑀺, 𑀧𑀜𑁆𑀜𑀯𑀦𑁆𑀢𑀁 𑀪𑀺𑀓𑁆𑀔𑀼𑀁 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀢𑁂𑀦 𑀢𑀁 𑀕𑀦𑁆𑀣𑀁 𑀉𑀓𑁆𑀔𑀺𑀧𑀸𑀧𑁂𑀦𑁆𑀢𑀸𑀧𑀺 𑀲𑀫𑀕𑁆𑀕𑀸 𑀲𑀗𑁆𑀖𑀁 𑀓𑀭𑀡𑀻𑀬𑀸𑀦𑀺 𑀓𑀭𑁄𑀦𑁆𑀢𑀺 𑀦𑀸𑀫.

𑀅𑀧𑀜𑁆𑀜𑀢𑁆𑀢𑀦𑁆𑀢𑀺𑀆𑀤𑀻𑀲𑀼 𑀦𑀯𑀁 𑀅𑀥𑀫𑁆𑀫𑀺𑀓𑀁 𑀓𑀢𑀺𑀓𑀯𑀢𑁆𑀢𑀁 𑀯𑀸 𑀲𑀺𑀓𑁆𑀔𑀸𑀧𑀤𑀁 𑀯𑀸 𑀩𑀦𑁆𑀥𑀦𑁆𑀢𑀸 𑀅𑀧𑀜𑁆𑀜𑀢𑁆𑀢𑀁 𑀧𑀜𑁆𑀜𑀧𑁂𑀦𑁆𑀢𑀺 𑀦𑀸𑀫, 𑀧𑀼𑀭𑀸𑀡𑀲𑀦𑁆𑀣𑀢𑀯𑀢𑁆𑀣𑀼𑀲𑁆𑀫𑀺𑀁 𑀲𑀸𑀯𑀢𑁆𑀣𑀺𑀬𑀁 𑀪𑀺𑀓𑁆𑀔𑀽 𑀯𑀺𑀬. 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀲𑀸𑀲𑀦𑀁 𑀤𑀻𑀧𑁂𑀦𑁆𑀢𑀸 𑀧𑀜𑁆𑀜𑀢𑁆𑀢𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺 𑀦𑀸𑀫, 𑀯𑀲𑁆𑀲𑀲𑀢𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀯𑁂𑀲𑀸𑀮𑀺𑀓𑀸 𑀯𑀚𑁆𑀚𑀺𑀧𑀼𑀢𑁆𑀢𑀓𑀸 𑀯𑀺𑀬. 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸 𑀧𑀦 𑀆𑀧𑀢𑁆𑀢𑀺𑀬𑁄 𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀫𑀦𑁆𑀢𑀸 𑀬𑀣𑀸𑀧𑀜𑁆𑀜𑀢𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀫𑀸𑀤𑀸𑀬 𑀦 𑀯𑀢𑁆𑀢𑀦𑁆𑀢𑀺 𑀦𑀸𑀫, 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸 𑀯𑀺𑀬. 𑀦𑀯𑀁 𑀧𑀦 𑀓𑀢𑀺𑀓𑀯𑀢𑁆𑀢𑀁 𑀯𑀸 𑀲𑀺𑀓𑁆𑀔𑀸𑀧𑀤𑀁 𑀯𑀸 𑀅𑀩𑀦𑁆𑀥𑀦𑁆𑀢𑀸, 𑀥𑀫𑁆𑀫𑀯𑀺𑀦𑀬𑀢𑁄 𑀲𑀸𑀲𑀦𑀁 𑀤𑀻𑀧𑁂𑀦𑁆𑀢𑀸, 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀅𑀲𑀫𑀽𑀳𑀦𑀦𑁆𑀢𑀸 𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀧𑁂𑀦𑁆𑀢𑀺, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺, 𑀬𑀣𑀸𑀧𑀜𑁆𑀜𑀢𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑀺 𑀦𑀸𑀫, 𑀆𑀬𑀲𑁆𑀫𑀸 𑀉𑀧𑀲𑁂𑀦𑁄 𑀯𑀺𑀬, 𑀆𑀬𑀲𑁆𑀫𑀸 𑀬𑀲𑁄 𑀓𑀸𑀓𑀡𑁆𑀟𑀓𑀧𑀼𑀢𑁆𑀢𑁄 𑀯𑀺𑀬 𑀘.

‘‘𑀲𑀼𑀡𑀸𑀢𑀼, 𑀫𑁂 𑀆𑀯𑀼𑀲𑁄 𑀲𑀗𑁆𑀖𑁄, 𑀲𑀦𑁆𑀢𑀫𑁆𑀳𑀸𑀓𑀁 𑀲𑀺𑀓𑁆𑀔𑀸𑀧𑀤𑀸𑀦𑀺 𑀕𑀺𑀳𑀺𑀕𑀢𑀸𑀦𑀺, 𑀕𑀺𑀳𑀺𑀦𑁄𑀧𑀺 𑀚𑀸𑀦𑀦𑁆𑀢𑀺, ‘𑀇𑀤𑀁 𑀯𑁄 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀓𑀧𑁆𑀧𑀢𑀺, 𑀇𑀤𑀁 𑀯𑁄 𑀦 𑀓𑀧𑁆𑀧𑀢𑀻’𑀢𑀺. 𑀲𑀘𑁂 𑀳𑀺 𑀫𑀬𑀁 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 ¶ 𑀲𑀫𑀽𑀳𑀦𑀺𑀲𑁆𑀲𑀸𑀫, 𑀪𑀯𑀺𑀲𑁆𑀲𑀦𑁆𑀢𑀺 𑀯𑀢𑁆𑀢𑀸𑀭𑁄 𑁋 ‘𑀥𑀽𑀫𑀓𑀸𑀮𑀺𑀓𑀁 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀬𑀸𑀯𑀺𑀫𑁂𑀲𑀁 𑀲𑀢𑁆𑀣𑀸 𑀅𑀝𑁆𑀞𑀸𑀲𑀺, 𑀢𑀸𑀯𑀺𑀫𑁂 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀺𑀓𑁆𑀔𑀺𑀁𑀲𑀼. 𑀬𑀢𑁄 𑀇𑀫𑁂𑀲𑀁 𑀲𑀢𑁆𑀣𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀦 𑀤𑀸𑀦𑀺𑀫𑁂 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀺𑀓𑁆𑀔𑀦𑁆𑀢𑀻’𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀅𑀧𑀜𑁆𑀜𑀢𑁆𑀢𑀁 ¶ 𑀦 𑀧𑀜𑁆𑀜𑀧𑁂𑀬𑁆𑀬, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑁂𑀬𑁆𑀬, 𑀬𑀣𑀸𑀧𑀜𑁆𑀜𑀢𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬𑀸’’𑀢𑀺 (𑀘𑀼𑀴𑀯. 𑁪𑁪𑁨) 𑁋

𑀇𑀫𑀁 𑀢𑀦𑁆𑀢𑀺𑀁 𑀞𑀧𑀬𑀦𑁆𑀢𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀯𑀺𑀬 𑀘. 𑀯𑀼𑀤𑁆𑀥𑀺𑀬𑁂𑀯𑀸𑀢𑀺 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀯𑀼𑀟𑁆𑀠𑀺𑀬𑁂𑀯, 𑀦𑁄 𑀧𑀭𑀺𑀳𑀸𑀦𑀺.

𑀣𑁂𑀭𑀸𑀢𑀺 ¶ 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀸 𑀣𑁂𑀭𑀓𑀸𑀭𑀓𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀩𑀳𑀽 𑀭𑀢𑁆𑀢𑀺𑀬𑁄 𑀚𑀸𑀦𑀦𑁆𑀢𑀻𑀢𑀺 𑀭𑀢𑁆𑀢𑀜𑁆𑀜𑀽. 𑀘𑀺𑀭𑀁 𑀧𑀩𑁆𑀩𑀚𑀺𑀢𑀸𑀦𑀁 𑀏𑀢𑁂𑀲𑀦𑁆𑀢𑀺 𑀘𑀺𑀭𑀧𑀩𑁆𑀩𑀚𑀺𑀢𑀸. 𑀲𑀗𑁆𑀖𑀲𑁆𑀲 𑀧𑀺𑀢𑀼𑀝𑁆𑀞𑀸𑀦𑁂 𑀞𑀺𑀢𑀸𑀢𑀺 𑀲𑀗𑁆𑀖𑀧𑀺𑀢𑀭𑁄. 𑀧𑀺𑀢𑀼𑀝𑁆𑀞𑀸𑀦𑁂 𑀞𑀺𑀢𑀢𑁆𑀢𑀸 𑀲𑀗𑁆𑀖𑀁 𑀧𑀭𑀺𑀦𑁂𑀦𑁆𑀢𑀺 𑀧𑀼𑀩𑁆𑀩𑀗𑁆𑀕𑀫𑀸 𑀳𑀼𑀢𑁆𑀯𑀸 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀧𑀯𑀢𑁆𑀢𑁂𑀦𑁆𑀢𑀻𑀢𑀺 𑀲𑀗𑁆𑀖𑀧𑀭𑀺𑀡𑀸𑀬𑀓𑀸.

𑀬𑁂 𑀢𑁂𑀲𑀁 𑀲𑀓𑁆𑀓𑀸𑀭𑀸𑀤𑀻𑀦𑀺 𑀦 𑀓𑀭𑁄𑀦𑁆𑀢𑀺, 𑀑𑀯𑀸𑀤𑀢𑁆𑀣𑀸𑀬 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀉𑀧𑀝𑁆𑀞𑀸𑀦𑀁 𑀦 𑀕𑀘𑁆𑀙𑀦𑁆𑀢𑀺, 𑀢𑁂𑀧𑀺 𑀢𑁂𑀲𑀁 𑀑𑀯𑀸𑀤𑀁 𑀦 𑀤𑁂𑀦𑁆𑀢𑀺, 𑀧𑀯𑁂𑀡𑀻𑀓𑀣𑀁 𑀦 𑀓𑀣𑁂𑀦𑁆𑀢𑀺, 𑀲𑀸𑀭𑀪𑀽𑀢𑀁 𑀥𑀫𑁆𑀫𑀧𑀭𑀺𑀬𑀸𑀬𑀁 𑀦 𑀲𑀺𑀓𑁆𑀔𑀸𑀧𑁂𑀦𑁆𑀢𑀺. 𑀢𑁂 𑀢𑁂𑀳𑀺 𑀯𑀺𑀲𑁆𑀲𑀝𑁆𑀞𑀸 𑀲𑀻𑀮𑀸𑀤𑀻𑀳𑀺 𑀥𑀫𑁆𑀫𑀓𑁆𑀔𑀦𑁆𑀥𑁂𑀳𑀺 𑀲𑀢𑁆𑀢𑀳𑀺 𑀘 𑀅𑀭𑀺𑀬𑀥𑀦𑁂𑀳𑀻𑀢𑀺 𑀏𑀯𑀫𑀸𑀤𑀻𑀳𑀺 𑀕𑀼𑀡𑁂𑀳𑀺 𑀧𑀭𑀺𑀳𑀸𑀬𑀦𑁆𑀢𑀺. 𑀬𑁂 𑀧𑀦 𑀢𑁂𑀲𑀁 𑀲𑀓𑁆𑀓𑀸𑀭𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀢𑁂𑀧𑀺 𑀢𑁂𑀲𑀁 𑀑𑀯𑀸𑀤𑀁 𑀤𑁂𑀦𑁆𑀢𑀺. ‘‘𑀏𑀯𑀁 𑀢𑁂 𑀅𑀪𑀺𑀓𑁆𑀓𑀫𑀺𑀢𑀩𑁆𑀩𑀁, 𑀏𑀯𑀁 𑀢𑁂 𑀧𑀝𑀺𑀓𑁆𑀓𑀫𑀺𑀢𑀩𑁆𑀩𑀁, 𑀏𑀯𑀁 𑀢𑁂 𑀆𑀮𑁄𑀓𑀺𑀢𑀩𑁆𑀩𑀁, 𑀏𑀯𑀁 𑀢𑁂 𑀯𑀺𑀮𑁄𑀓𑀺𑀢𑀩𑁆𑀩𑀁, 𑀏𑀯𑀁 𑀢𑁂 𑀲𑀫𑀺𑀜𑁆𑀚𑀺𑀢𑀩𑁆𑀩𑀁, 𑀏𑀯𑀁 𑀢𑁂 𑀧𑀲𑀸𑀭𑀺𑀢𑀩𑁆𑀩𑀁, 𑀏𑀯𑀁 𑀢𑁂 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀁 𑀥𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀧𑀯𑁂𑀡𑀻𑀓𑀣𑀁 𑀓𑀣𑁂𑀦𑁆𑀢𑀺, 𑀲𑀸𑀭𑀪𑀽𑀢𑀁 𑀥𑀫𑁆𑀫𑀧𑀭𑀺𑀬𑀸𑀬𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑀺, 𑀢𑁂𑀭𑀲𑀳𑀺 𑀥𑀼𑀢𑀗𑁆𑀕𑁂𑀳𑀺 𑀤𑀲𑀳𑀺 𑀓𑀣𑀸𑀯𑀢𑁆𑀣𑀽𑀳𑀺 𑀅𑀦𑀼𑀲𑀸𑀲𑀦𑁆𑀢𑀺. 𑀢𑁂 𑀢𑁂𑀲𑀁 𑀑𑀯𑀸𑀤𑁂 𑀞𑀢𑁆𑀯𑀸 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀯𑀟𑁆𑀠𑀫𑀸𑀦𑀸 𑀲𑀸𑀫𑀜𑁆𑀜𑀢𑁆𑀣𑀁 𑀅𑀦𑀼𑀧𑀸𑀧𑀼𑀡𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀳𑀸𑀦𑀺𑀯𑀼𑀤𑁆𑀥𑀺𑀬𑁄 𑀯𑁂𑀤𑀺𑀢𑀩𑁆𑀩𑀸.

𑀧𑀼𑀦𑀩𑁆𑀪𑀯𑀤𑀸𑀦𑀁 𑀧𑀼𑀦𑀩𑁆𑀪𑀯𑁄, 𑀧𑀼𑀦𑀩𑁆𑀪𑀯𑁄 𑀲𑀻𑀮𑀫𑀲𑁆𑀲𑀸𑀢𑀺 𑀧𑁄𑀦𑁄𑀩𑁆𑀪𑀯𑀺𑀓𑀸, 𑀧𑀼𑀦𑀩𑁆𑀪𑀯𑀤𑀸𑀬𑀺𑀓𑀸𑀢𑀺 𑀅𑀢𑁆𑀣𑁄, 𑀢𑀲𑁆𑀫𑀸 𑀧𑁄𑀦𑁄𑀩𑁆𑀪𑀯𑀺𑀓𑀸𑀬. 𑀦 𑀯𑀲𑀁 𑀕𑀘𑁆𑀙𑀦𑁆𑀢𑀻𑀢𑀺 𑀏𑀢𑁆𑀣 𑀬𑁂 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀓𑀸𑀭𑀡𑀸 𑀉𑀧𑀝𑁆𑀞𑀸𑀓𑀸𑀦𑀁 𑀧𑀤𑀸𑀦𑀼𑀧𑀤𑀺𑀓𑀸 𑀳𑀼𑀢𑁆𑀯𑀸 𑀕𑀸𑀫𑀢𑁄 𑀕𑀸𑀫𑀁 𑀯𑀺𑀘𑀭𑀦𑁆𑀢𑀺, 𑀢𑁂 𑀢𑀲𑁆𑀲𑀸 𑀢𑀡𑁆𑀳𑀸𑀬 𑀯𑀲𑀁 𑀕𑀘𑁆𑀙𑀦𑁆𑀢𑀺 𑀦𑀸𑀫, 𑀇𑀢𑀭𑁂 𑀦 𑀕𑀘𑁆𑀙𑀦𑁆𑀢𑀺 ¶ 𑀦𑀸𑀫. 𑀢𑀢𑁆𑀣 𑀳𑀸𑀦𑀺𑀯𑀼𑀤𑁆𑀥𑀺𑀬𑁄 𑀧𑀸𑀓𑀝𑀸𑀬𑁂𑀯.

𑀆𑀭𑀜𑁆𑀜𑀓𑁂𑀲𑀽𑀢𑀺 𑀧𑀜𑁆𑀘𑀥𑀦𑀼𑀲𑀢𑀺𑀓𑀧𑀘𑁆𑀙𑀺𑀫𑁂𑀲𑀼. 𑀲𑀸𑀧𑁂𑀓𑁆𑀔𑀸𑀢𑀺 𑀲𑀢𑀡𑁆𑀳𑀸 𑀲𑀸𑀮𑀬𑀸. 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑁂𑀲𑀼 𑀳𑀺 𑀛𑀸𑀦𑀁 𑀅𑀧𑁆𑀧𑁂𑀢𑁆𑀯𑀸𑀧𑀺 𑀢𑀢𑁄 𑀯𑀼𑀝𑁆𑀞𑀺𑀢𑀫𑀢𑁆𑀢𑁄𑀯 𑀇𑀢𑁆𑀣𑀺𑀧𑀼𑀭𑀺𑀲𑀤𑀸𑀭𑀺𑀓𑀸𑀤𑀺𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀬𑁂𑀦𑀲𑁆𑀲 𑀅𑀥𑀺𑀕𑀢𑀯𑀺𑀲𑁂𑀲𑁄𑀧𑀺 𑀳𑀸𑀬𑀢𑀺𑀬𑁂𑀯. 𑀅𑀭𑀜𑁆𑀜𑁂 𑀧𑀦 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀧𑀝𑀺𑀩𑀼𑀤𑁆𑀥𑀫𑀢𑁆𑀢𑁄 𑀲𑀻𑀳𑀩𑁆𑀬𑀕𑁆𑀖𑀫𑁄𑀭𑀸𑀤𑀻𑀦𑀁 𑀲𑀤𑁆𑀤𑀁 ¶ 𑀲𑀼𑀡𑀸𑀢𑀺, 𑀬𑁂𑀦 𑀆𑀭𑀜𑁆𑀜𑀓𑀁 𑀧𑀻𑀢𑀺𑀁 𑀮𑀪𑀺𑀢𑁆𑀯𑀸 𑀢𑀫𑁂𑀯 𑀲𑀫𑁆𑀫𑀲𑀦𑁆𑀢𑁄 𑀅𑀕𑁆𑀕𑀨𑀮𑁂 𑀧𑀢𑀺𑀝𑁆𑀞𑀸𑀢𑀺. 𑀇𑀢𑀺 𑀪𑀕𑀯𑀸 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑁂 𑀛𑀸𑀦𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀪𑀺𑀓𑁆𑀔𑀼𑀦𑁄 𑀅𑀭𑀜𑁆𑀜𑁂 𑀦𑀺𑀤𑁆𑀤𑀸𑀬𑀦𑁆𑀢𑀫𑁂𑀯 𑀧𑀲𑀁𑀲𑀢𑀺. 𑀢𑀲𑁆𑀫𑀸 𑀢𑀫𑁂𑀯 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑁋 ‘‘𑀆𑀭𑀜𑁆𑀜𑀓𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀲𑀸𑀧𑁂𑀓𑁆𑀔𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀳.

𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀲𑀢𑀺𑀁 𑀉𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀅𑀩𑁆𑀪𑀦𑁆𑀢𑀭𑁂 𑀲𑀢𑀺𑀁 𑀉𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀺. 𑀧𑁂𑀲𑀮𑀸𑀢𑀺 𑀧𑀺𑀬𑀲𑀻𑀮𑀸. 𑀇𑀥𑀸𑀧𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀆𑀕𑀫𑀦𑀁 𑀅𑀦𑀺𑀘𑁆𑀙𑀦𑁆𑀢𑀸 𑀦𑁂𑀯𑀸𑀲𑀺𑀓𑀸 𑀅𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺 𑀅𑀧𑁆𑀧𑀲𑀦𑁆𑀦𑀸 ¶ . 𑀲𑀫𑁆𑀧𑀢𑁆𑀢𑀪𑀺𑀓𑁆𑀔𑀽𑀦𑀁 𑀧𑀘𑁆𑀘𑀼𑀕𑁆𑀕𑀫𑀦𑀧𑀢𑁆𑀢𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑀡𑀆𑀲𑀦𑀧𑀜𑁆𑀜𑀸𑀧𑀦𑀢𑀸𑀮𑀯𑀡𑁆𑀝𑀕𑁆𑀕𑀳𑀡𑀸𑀤𑀻𑀦𑀺 𑀦 𑀓𑀭𑁄𑀦𑁆𑀢𑀺, 𑀅𑀣 𑀦𑁂𑀲𑀁 𑀅𑀯𑀡𑁆𑀡𑁄 𑀉𑀕𑁆𑀕𑀘𑁆𑀙𑀢𑀺 𑁋 ‘‘𑀅𑀲𑀼𑀓𑀯𑀺𑀳𑀸𑀭𑀯𑀸𑀲𑀺𑀦𑁄 𑀪𑀺𑀓𑁆𑀔𑀽 𑀅𑀲𑁆𑀲𑀤𑁆𑀥𑀸 𑀅𑀧𑁆𑀧𑀲𑀦𑁆𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑀸𑀦𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀦 𑀓𑀭𑁄𑀦𑁆𑀢𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑀸 𑀯𑀺𑀳𑀸𑀭𑀤𑁆𑀯𑀸𑀭𑁂𑀦 𑀕𑀘𑁆𑀙𑀦𑁆𑀢𑀸𑀧𑀺 𑀯𑀺𑀳𑀸𑀭𑀁 𑀦 𑀧𑀯𑀺𑀲𑀦𑁆𑀢𑀺. 𑀏𑀯𑀁 𑀅𑀦𑀸𑀕𑀢𑀸𑀦𑀁 𑀅𑀦𑀸𑀕𑀫𑀦𑀫𑁂𑀯 𑀳𑁄𑀢𑀺. 𑀆𑀕𑀢𑀸𑀦𑀁 𑀧𑀦 𑀨𑀸𑀲𑀼𑀯𑀺𑀳𑀸𑀭𑁂 𑀅𑀲𑀢𑀺 𑀬𑁂𑀧𑀺 𑀅𑀚𑀸𑀦𑀺𑀢𑁆𑀯𑀸 𑀆𑀕𑀢𑀸, 𑀢𑁂 𑁋 ‘‘𑀯𑀲𑀺𑀲𑁆𑀲𑀸𑀫𑀸𑀢𑀺 𑀢𑀸𑀯 𑀘𑀺𑀦𑁆𑀢𑁂𑀢𑁆𑀯𑀸 𑀆𑀕𑀢𑀸𑀫𑁆𑀳, 𑀇𑀫𑁂𑀲𑀁 𑀧𑀦 𑀦𑁂𑀯𑀸𑀲𑀺𑀓𑀸𑀦𑀁 𑀇𑀫𑀺𑀦𑀸 𑀦𑀻𑀳𑀸𑀭𑁂𑀦 𑀓𑁄 𑀯𑀲𑀺𑀲𑁆𑀲𑀢𑀻’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀏𑀯𑀁 𑀲𑁄 𑀯𑀺𑀳𑀸𑀭𑁄 𑀅𑀜𑁆𑀜𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀦𑀸𑀯𑀸𑀲𑁄𑀯 𑀳𑁄𑀢𑀺. 𑀢𑀢𑁄 𑀦𑁂𑀯𑀸𑀲𑀺𑀓𑀸 𑀲𑀻𑀮𑀯𑀦𑁆𑀢𑀸𑀦𑀁 𑀤𑀲𑁆𑀲𑀦𑀁 𑀅𑀮𑀪𑀦𑁆𑀢𑀸 𑀓𑀗𑁆𑀔𑀸𑀯𑀺𑀦𑁄𑀤𑀦𑀁 𑀯𑀸 𑀆𑀘𑀸𑀭𑀲𑀺𑀓𑁆𑀔𑀸𑀧𑀓𑀁 𑀯𑀸 𑀫𑀥𑀼𑀭𑀥𑀫𑁆𑀫𑀲𑁆𑀲𑀯𑀦𑀁 𑀯𑀸 𑀦 𑀮𑀪𑀦𑁆𑀢𑀺, 𑀢𑁂𑀲𑀁 𑀦𑁂𑀯 𑀅𑀕𑁆𑀕𑀳𑀺𑀢𑀥𑀫𑁆𑀫𑀕𑁆𑀕𑀳𑀡𑀁, 𑀦 𑀕𑀳𑀺𑀢𑀲𑀚𑁆𑀛𑀸𑀬𑀓𑀭𑀡𑀁 𑀳𑁄𑀢𑀺. 𑀇𑀢𑀺 𑀦𑁂𑀲𑀁 𑀳𑀸𑀦𑀺𑀬𑁂𑀯 𑀳𑁄𑀢𑀺, 𑀦 𑀯𑀼𑀤𑁆𑀥𑀺.

𑀬𑁂 𑀧𑀦 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀆𑀕𑀫𑀦𑀁 𑀇𑀘𑁆𑀙𑀦𑁆𑀢𑀺, 𑀢𑁂 𑀲𑀤𑁆𑀥𑀸 𑀳𑁄𑀦𑁆𑀢𑀺 𑀧𑀲𑀦𑁆𑀦𑀸, 𑀆𑀕𑀢𑀸𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀘𑁆𑀘𑀼𑀕𑁆𑀕𑀫𑀦𑀸𑀤𑀻𑀦𑀺 𑀓𑀢𑁆𑀯𑀸 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀢𑁂 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀁 𑀧𑀯𑀺𑀲𑀦𑁆𑀢𑀺, 𑀓𑀗𑁆𑀔𑀁 𑀯𑀺𑀦𑁄𑀤𑁂𑀦𑁆𑀢𑀺, 𑀫𑀥𑀼𑀭𑀥𑀫𑁆𑀫𑀲𑁆𑀲𑀯𑀦𑀁 𑀮𑀪𑀦𑁆𑀢𑀺. 𑀅𑀣 𑀦𑁂𑀲𑀁 𑀓𑀺𑀢𑁆𑀢𑀺𑀲𑀤𑁆𑀤𑁄 𑀉𑀕𑁆𑀕𑀘𑁆𑀙𑀢𑀺 𑁋 ‘‘𑀅𑀲𑀼𑀓𑀯𑀺𑀳𑀸𑀭𑀪𑀺𑀓𑁆𑀔𑀽 𑀏𑀯𑀁 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀯𑀢𑁆𑀢𑀲𑀫𑁆𑀧𑀦𑁆𑀦𑀸 𑀲𑀗𑁆𑀕𑀸𑀳𑀓𑀸’’𑀢𑀺. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀤𑀽𑀭𑀢𑁄𑀧𑀺 𑀏𑀦𑁆𑀢𑀺, 𑀢𑁂𑀲𑀁 𑀦𑁂𑀯𑀸𑀲𑀺𑀓𑀸 𑀯𑀢𑁆𑀢𑀁 𑀓𑀭𑁄𑀦𑁆𑀢𑀺 ¶ , 𑀲𑀫𑀻𑀧𑀁 𑀆𑀕𑀦𑁆𑀢𑁆𑀯𑀸 𑀯𑀼𑀟𑁆𑀠𑀢𑀭𑀁 𑀆𑀕𑀦𑁆𑀢𑀼𑀓𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺, 𑀦𑀯𑀓𑀢𑀭𑀲𑁆𑀲 𑀲𑀦𑁆𑀢𑀺𑀓𑁂 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺. 𑀦𑀺𑀲𑀻𑀤𑀺𑀢𑁆𑀯𑀸 𑁋 ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀺𑀲𑁆𑀲𑀣 𑀕𑀫𑀺𑀲𑁆𑀲𑀣𑀸’’𑀢𑀺 𑀧𑀼𑀘𑁆𑀙𑀦𑁆𑀢𑀺. ‘𑀕𑀫𑀺𑀲𑁆𑀲𑀸𑀫𑀻’𑀢𑀺 𑀯𑀼𑀢𑁆𑀢𑁂 𑁋 ‘‘𑀲𑀧𑁆𑀧𑀸𑀬𑀁 𑀲𑁂𑀦𑀸𑀲𑀦𑀁, 𑀲𑀼𑀮𑀪𑀸 𑀪𑀺𑀓𑁆𑀔𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀕𑀦𑁆𑀢𑀼𑀁 𑀦 𑀤𑁂𑀦𑁆𑀢𑀺. 𑀯𑀺𑀦𑀬𑀥𑀭𑁄 𑀘𑁂 𑀳𑁄𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀯𑀺𑀦𑀬𑀁 𑀲𑀚𑁆𑀛𑀸𑀬𑀦𑁆𑀢𑀺. 𑀲𑀼𑀢𑁆𑀢𑀦𑁆𑀢𑀸𑀤𑀺𑀥𑀭𑁄 𑀘𑁂, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀢𑀁 𑀢𑀁 𑀥𑀫𑁆𑀫𑀁 𑀲𑀚𑁆𑀛𑀸𑀬𑀦𑁆𑀢𑀺. 𑀆𑀕𑀦𑁆𑀢𑀼𑀓𑀸𑀦𑀁 𑀣𑁂𑀭𑀸𑀦𑀁 𑀑𑀯𑀸𑀤𑁂 𑀞𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑀺. 𑀆𑀕𑀦𑁆𑀢𑀼𑀓𑀸 ‘‘𑀏𑀓𑀁 ¶ 𑀤𑁆𑀯𑁂 𑀤𑀺𑀯𑀲𑀸𑀦𑀺 𑀯𑀲𑀺𑀲𑁆𑀲𑀸𑀫𑀸𑀢𑀺 𑀆𑀕𑀢𑀸𑀫𑁆𑀳, 𑀇𑀫𑁂𑀲𑀁 𑀧𑀦 𑀲𑀼𑀔𑀲𑀁𑀯𑀸𑀲𑀢𑀸𑀬 𑀤𑀲𑀤𑁆𑀯𑀸𑀤𑀲𑀯𑀲𑁆𑀲𑀸𑀦𑀺 𑀯𑀲𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀢𑀸𑀭𑁄 𑀳𑁄𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀳𑀸𑀦𑀺𑀯𑀼𑀤𑁆𑀥𑀺𑀬𑁄 𑀯𑁂𑀤𑀺𑀢𑀩𑁆𑀩𑀸.

𑁧𑁩𑁭. 𑀤𑀼𑀢𑀺𑀬𑀲𑀢𑁆𑀢𑀓𑁂 𑀓𑀫𑁆𑀫𑀁 𑀆𑀭𑀸𑀫𑁄 𑀏𑀢𑁂𑀲𑀦𑁆𑀢𑀺 𑀓𑀫𑁆𑀫𑀸𑀭𑀸𑀫𑀸𑀢𑀺. 𑀓𑀫𑁆𑀫𑁂 𑀭𑀢𑀸𑀢𑀺 𑀓𑀫𑁆𑀫𑀭𑀢𑀸. 𑀓𑀫𑁆𑀫𑀸𑀭𑀸𑀫𑀢𑀫𑀦𑀼𑀬𑀼𑀢𑁆𑀢𑀸𑀢𑀺 𑀬𑀼𑀢𑁆𑀢𑀸 𑀧𑀬𑀼𑀢𑁆𑀢𑀸 𑀅𑀦𑀼𑀬𑀼𑀢𑁆𑀢𑀸. 𑀢𑀢𑁆𑀣 𑀓𑀫𑁆𑀫𑀦𑁆𑀢𑀺 𑀇𑀢𑀺𑀓𑀸𑀢𑀩𑁆𑀩𑀓𑀫𑁆𑀫𑀁 𑀯𑀼𑀘𑁆𑀘𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀻𑀯𑀭𑀯𑀺𑀘𑀸𑀭𑀡𑀁, 𑀘𑀻𑀯𑀭𑀓𑀭𑀡𑀁, 𑀉𑀧𑀢𑁆𑀣𑀫𑁆𑀪𑀦𑀁, 𑀲𑀽𑀘𑀺𑀖𑀭𑀁, 𑀧𑀢𑁆𑀢𑀢𑁆𑀣𑀯𑀺𑀓𑀁, 𑀅𑀲𑀁𑀩𑀤𑁆𑀥𑀓𑀁, 𑀓𑀸𑀬𑀩𑀦𑁆𑀥𑀦𑀁, 𑀥𑀫𑀓𑀭𑀡𑀁, 𑀆𑀥𑀸𑀭𑀓𑀁, 𑀧𑀸𑀤𑀓𑀣𑀮𑀺𑀓𑀁, 𑀲𑀫𑁆𑀫𑀚𑁆𑀚𑀦𑀻𑀆𑀤𑀻𑀦𑀁 𑀓𑀭𑀡𑀦𑁆𑀢𑀺. 𑀏𑀓𑀘𑁆𑀘𑁄 𑀳𑀺 𑀏𑀢𑀸𑀦𑀺 𑀓𑀭𑁄𑀦𑁆𑀢𑁄 𑀲𑀓𑀮𑀤𑀺𑀯𑀲𑀁 𑀏𑀢𑀸𑀦𑁂𑀯 𑀓𑀭𑁄𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀲 𑀧𑀝𑀺𑀓𑁆𑀔𑁂𑀧𑁄. 𑀬𑁄 𑀧𑀦 𑀏𑀢𑁂𑀲𑀁 𑀓𑀭𑀡𑀯𑁂𑀮𑀸𑀬𑀫𑁂𑀯 𑀏𑀢𑀸𑀦𑀺 𑀓𑀭𑁄𑀢𑀺, 𑀉𑀤𑁆𑀤𑁂𑀲𑀯𑁂𑀮𑀸𑀬𑀁 𑀉𑀤𑁆𑀤𑁂𑀲𑀁 𑀕𑀡𑁆𑀳𑀸𑀢𑀺, 𑀲𑀚𑁆𑀛𑀸𑀬𑀯𑁂𑀮𑀸𑀬𑀁 𑀲𑀚𑁆𑀛𑀸𑀬𑀢𑀺, 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀯𑁂𑀮𑀸𑀬𑀁 ¶ 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀁 𑀓𑀭𑁄𑀢𑀺, 𑀫𑀦𑀲𑀺𑀓𑀸𑀭𑀯𑁂𑀮𑀸𑀬𑀁 𑀫𑀦𑀲𑀺𑀓𑀸𑀭𑀁 𑀓𑀭𑁄𑀢𑀺, 𑀦 𑀲𑁄 𑀓𑀫𑁆𑀫𑀸𑀭𑀸𑀫𑁄 𑀦𑀸𑀫.

𑀦 𑀪𑀲𑁆𑀲𑀸𑀭𑀸𑀫𑀸𑀢𑀺 𑀏𑀢𑁆𑀣 𑀬𑁄 𑀇𑀢𑁆𑀣𑀺𑀯𑀡𑁆𑀡𑀧𑀼𑀭𑀺𑀲𑀯𑀡𑁆𑀡𑀸𑀤𑀺𑀯𑀲𑁂𑀦 𑀆𑀮𑀸𑀧𑀲𑀮𑁆𑀮𑀸𑀧𑀁 𑀓𑀭𑁄𑀦𑁆𑀢𑁄𑀬𑁂𑀯 𑀤𑀺𑀯𑀲𑀜𑁆𑀘 𑀭𑀢𑁆𑀢𑀺𑀜𑁆𑀘 𑀯𑀻𑀢𑀺𑀦𑀸𑀫𑁂𑀢𑀺, 𑀏𑀯𑀭𑀽𑀧𑁂 𑀪𑀲𑁆𑀲𑁂 𑀧𑀭𑀺𑀬𑀦𑁆𑀢𑀓𑀸𑀭𑀻 𑀦 𑀳𑁄𑀢𑀺, 𑀅𑀬𑀁 𑀪𑀲𑁆𑀲𑀸𑀭𑀸𑀫𑁄 𑀦𑀸𑀫. 𑀬𑁄 𑀧𑀦 𑀭𑀢𑁆𑀢𑀺𑀦𑁆𑀤𑀺𑀯𑀁 𑀥𑀫𑁆𑀫𑀁 𑀓𑀣𑁂𑀢𑀺, 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀅𑀬𑀁 𑀅𑀧𑁆𑀧𑀪𑀲𑁆𑀲𑁄𑀯 𑀪𑀲𑁆𑀲𑁂 𑀧𑀭𑀺𑀬𑀦𑁆𑀢𑀓𑀸𑀭𑀻𑀬𑁂𑀯. 𑀓𑀲𑁆𑀫𑀸? ‘‘𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀬𑀁 𑀓𑀭𑀡𑀻𑀬𑀁 𑁋 𑀥𑀫𑁆𑀫𑀻 𑀯𑀸 𑀓𑀣𑀸, 𑀅𑀭𑀺𑀬𑁄 𑀯𑀸 𑀢𑀼𑀡𑁆𑀳𑀻𑀪𑀸𑀯𑁄’’𑀢𑀺 (𑀫. 𑀦𑀺. 𑁧.𑁨𑁭𑁩) 𑀯𑀼𑀢𑁆𑀢𑀢𑁆𑀢𑀸.

𑀦 𑀦𑀺𑀤𑁆𑀤𑀸𑀭𑀸𑀫𑀸𑀢𑀺 𑀏𑀢𑁆𑀣 𑀬𑁄 𑀕𑀘𑁆𑀙𑀦𑁆𑀢𑁄𑀧𑀺 𑀦𑀺𑀲𑀺𑀦𑁆𑀦𑁄𑀧𑀺 𑀦𑀺𑀧𑀦𑁆𑀦𑁄𑀧𑀺 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑁄 𑀦𑀺𑀤𑁆𑀤𑀸𑀬𑀢𑀺𑀬𑁂𑀯, 𑀅𑀬𑀁 𑀦𑀺𑀤𑁆𑀤𑀸𑀭𑀸𑀫𑁄 𑀦𑀸𑀫. 𑀬𑀲𑁆𑀲 𑀧𑀦 𑀓𑀭𑀚𑀓𑀸𑀬𑀕𑁂𑀮𑀜𑁆𑀜𑁂𑀦 𑀘𑀺𑀢𑁆𑀢𑀁 𑀪𑀯𑀗𑁆𑀕𑁂 𑀑𑀢𑀭𑀢𑀺 ¶ , 𑀦𑀸𑀬𑀁 𑀦𑀺𑀤𑁆𑀤𑀸𑀭𑀸𑀫𑁄. 𑀢𑁂𑀦𑁂𑀯𑀸𑀳 𑁋 ‘‘𑀅𑀪𑀺𑀚𑀸𑀦𑀸𑀫𑀳𑀁 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑁄 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺𑀢𑀸’’𑀢𑀺 (𑀫. 𑀦𑀺. 𑁧.𑁩𑁮𑁭).

𑀦 𑀲𑀗𑁆𑀕𑀡𑀺𑀓𑀸𑀭𑀸𑀫𑀸𑀢𑀺 𑀏𑀢𑁆𑀣 𑀬𑁄 𑀏𑀓𑀲𑁆𑀲 𑀤𑀼𑀢𑀺𑀬𑁄 𑀤𑁆𑀯𑀺𑀦𑁆𑀦𑀁 𑀢𑀢𑀺𑀬𑁄 𑀢𑀺𑀡𑁆𑀡𑀁 𑀘𑀢𑀼𑀢𑁆𑀣𑁄𑀢𑀺 𑀏𑀯𑀁 𑀲𑀁𑀲𑀝𑁆𑀞𑁄𑀯 𑀯𑀺𑀳𑀭𑀢𑀺, 𑀏𑀓𑀓𑁄 𑀅𑀲𑁆𑀲𑀸𑀤𑀁 𑀦 𑀮𑀪𑀢𑀺, 𑀅𑀬𑀁 𑀲𑀗𑁆𑀕𑀡𑀺𑀓𑀸𑀭𑀸𑀫𑁄. 𑀬𑁄 𑀧𑀦 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀏𑀓𑀓𑁄 𑀅𑀲𑁆𑀲𑀸𑀤𑀁 𑀮𑀪𑀢𑀺, 𑀦𑀸𑀬𑀁 𑀲𑀗𑁆𑀕𑀡𑀺𑀓𑀸𑀭𑀸𑀫𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀦 ¶ 𑀧𑀸𑀧𑀺𑀘𑁆𑀙𑀸𑀢𑀺 𑀏𑀢𑁆𑀣 𑀅𑀲𑀦𑁆𑀢𑀲𑀫𑁆𑀪𑀸𑀯𑀦𑀸𑀬 𑀇𑀘𑁆𑀙𑀸𑀬 𑀲𑀫𑀦𑁆𑀦𑀸𑀕𑀢𑀸 𑀤𑀼𑀲𑁆𑀲𑀻𑀮𑀸 𑀧𑀸𑀧𑀺𑀘𑁆𑀙𑀸 𑀦𑀸𑀫.

𑀦 𑀧𑀸𑀧𑀫𑀺𑀢𑁆𑀢𑀸𑀤𑀻𑀲𑀼 𑀧𑀸𑀧𑀸 𑀫𑀺𑀢𑁆𑀢𑀸 𑀏𑀢𑁂𑀲𑀦𑁆𑀢𑀺 𑀧𑀸𑀧𑀫𑀺𑀢𑁆𑀢𑀸. 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀲𑀳 𑀅𑀬𑀦𑀢𑁄 𑀧𑀸𑀧𑀸 𑀲𑀳𑀸𑀬𑀸 𑀏𑀢𑁂𑀲𑀦𑁆𑀢𑀺 𑀧𑀸𑀧𑀲𑀳𑀸𑀬𑀸. 𑀢𑀦𑁆𑀦𑀺𑀦𑁆𑀦𑀢𑀧𑁆𑀧𑁄𑀡𑀢𑀧𑁆𑀧𑀩𑁆𑀪𑀸𑀭𑀢𑀸𑀬 𑀧𑀸𑀧𑁂𑀲𑀼 𑀲𑀫𑁆𑀧𑀯𑀗𑁆𑀓𑀸𑀢𑀺 𑀧𑀸𑀧𑀲𑀫𑁆𑀧𑀯𑀗𑁆𑀓𑀸.

𑀑𑀭𑀫𑀢𑁆𑀢𑀓𑁂𑀦𑀸𑀢𑀺 𑀅𑀯𑀭𑀫𑀢𑁆𑀢𑀓𑁂𑀦 𑀅𑀧𑁆𑀧𑀫𑀢𑁆𑀢𑀓𑁂𑀦. 𑀅𑀦𑁆𑀢𑀭𑀸𑀢𑀺 𑀅𑀭𑀳𑀢𑁆𑀢𑀁 𑀅𑀧𑀢𑁆𑀯𑀸𑀯 𑀏𑀢𑁆𑀣𑀦𑁆𑀢𑀭𑁂. 𑀯𑁄𑀲𑀸𑀦𑀦𑁆𑀢𑀺 𑀧𑀭𑀺𑀦𑀺𑀝𑁆𑀞𑀺𑀢𑀪𑀸𑀯𑀁 𑁋 ‘‘𑀅𑀮𑀫𑁂𑀢𑁆𑀢𑀸𑀯𑀢𑀸’’𑀢𑀺 𑀑𑀲𑀓𑁆𑀓𑀦𑀁 𑀞𑀺𑀢𑀓𑀺𑀘𑁆𑀘𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀬𑀸𑀯 𑀲𑀻𑀮𑀧𑀸𑀭𑀺𑀲𑀼𑀤𑁆𑀥𑀺𑀫𑀢𑁆𑀢𑁂𑀦 𑀯𑀸 𑀯𑀺𑀧𑀲𑁆𑀲𑀦𑀸𑀫𑀢𑁆𑀢𑁂𑀦 𑀯𑀸 𑀛𑀸𑀦𑀫𑀢𑁆𑀢𑁂𑀦 𑀯𑀸 𑀲𑁄𑀢𑀸𑀧𑀦𑁆𑀦𑀪𑀸𑀯𑀫𑀢𑁆𑀢𑁂𑀦 𑀯𑀸 𑀲𑀓𑀤𑀸𑀕𑀸𑀫𑀺𑀪𑀸𑀯𑀫𑀢𑁆𑀢𑁂𑀦 𑀯𑀸 𑀅𑀦𑀸𑀕𑀸𑀫𑀺𑀪𑀸𑀯𑀫𑀢𑁆𑀢𑁂𑀦 𑀯𑀸 𑀯𑁄𑀲𑀸𑀦𑀁 𑀦 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀢𑀸𑀯 𑀯𑀼𑀤𑁆𑀥𑀺𑀬𑁂𑀯 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻’’𑀢𑀺.

𑁧𑁩𑁮. 𑀢𑀢𑀺𑀬𑀲𑀢𑁆𑀢𑀓𑁂 ¶ 𑀲𑀤𑁆𑀥𑀸𑀢𑀺 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸. 𑀢𑀢𑁆𑀣 𑀆𑀕𑀫𑀦𑀻𑀬𑀲𑀤𑁆𑀥𑀸, 𑀅𑀥𑀺𑀕𑀫𑀲𑀤𑁆𑀥𑀸, 𑀧𑀲𑀸𑀤𑀲𑀤𑁆𑀥𑀸, 𑀑𑀓𑀧𑁆𑀧𑀦𑀲𑀤𑁆𑀥𑀸𑀢𑀺 𑀘𑀢𑀼𑀩𑁆𑀩𑀺𑀥𑀸 𑀲𑀤𑁆𑀥𑀸. 𑀢𑀢𑁆𑀣 𑀆𑀕𑀫𑀦𑀻𑀬𑀲𑀤𑁆𑀥𑀸 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸𑀦𑀁 𑀳𑁄𑀢𑀺. 𑀅𑀥𑀺𑀕𑀫𑀲𑀤𑁆𑀥𑀸 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁. 𑀩𑀼𑀤𑁆𑀥𑁄 𑀥𑀫𑁆𑀫𑁄 𑀲𑀗𑁆𑀖𑁄𑀢𑀺 𑀯𑀼𑀢𑁆𑀢𑁂 𑀧𑀦 𑀧𑀲𑀸𑀤𑁄 𑀧𑀲𑀸𑀤𑀲𑀤𑁆𑀥𑀸. 𑀑𑀓𑀧𑁆𑀧𑁂𑀢𑁆𑀯𑀸 𑀧𑀓𑀧𑁆𑀧𑁂𑀢𑁆𑀯𑀸 𑀧𑀦 𑀲𑀤𑁆𑀤𑀳𑀦𑀁 𑀑𑀓𑀧𑁆𑀧𑀦𑀲𑀤𑁆𑀥𑀸. 𑀲𑀸 𑀤𑀼𑀯𑀺𑀥𑀸𑀧𑀺 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀢𑀸𑀬 𑀳𑀺 𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄, 𑀯𑀓𑁆𑀓𑀮𑀺𑀢𑁆𑀣𑁂𑀭𑀲𑀤𑀺𑀲𑁄 𑀳𑁄𑀢𑀺. 𑀢𑀲𑁆𑀲 𑀳𑀺 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀁 𑀯𑀸, 𑀩𑁄𑀥𑀺𑀬𑀗𑁆𑀕𑀡𑀯𑀢𑁆𑀢𑀁 𑀯𑀸 𑀓𑀢𑀫𑁂𑀯 𑀳𑁄𑀢𑀺. 𑀉𑀧𑀚𑁆𑀛𑀸𑀬𑀯𑀢𑁆𑀢𑀆𑀘𑀭𑀺𑀬𑀯𑀢𑁆𑀢𑀸𑀤𑀻𑀦𑀺 𑀲𑀩𑁆𑀩𑀯𑀢𑁆𑀢𑀸𑀦𑀺 𑀧𑀽𑀭𑁂𑀢𑀺. 𑀳𑀺𑀭𑀺𑀫𑀦𑀸𑀢𑀺 𑀧𑀸𑀧𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀸𑀬 𑀳𑀺𑀭𑀺𑀬𑀸 𑀬𑀼𑀢𑁆𑀢𑀘𑀺𑀢𑁆𑀢𑀸. 𑀑𑀢𑁆𑀢𑀧𑁆𑀧𑀻𑀢𑀺 𑀧𑀸𑀧𑀢𑁄 𑀪𑀸𑀬𑀦𑀮𑀓𑁆𑀔𑀡𑁂𑀦 𑀑𑀢𑁆𑀢𑀧𑁆𑀧𑁂𑀦 𑀲𑀫𑀦𑁆𑀦𑀸𑀕𑀢𑀸.

𑀩𑀳𑀼𑀲𑁆𑀲𑀼𑀢𑀸𑀢𑀺 𑀏𑀢𑁆𑀣 𑀧𑀦 𑀧𑀭𑀺𑀬𑀢𑁆𑀢𑀺𑀩𑀳𑀼𑀲𑁆𑀲𑀼𑀢𑁄, 𑀧𑀝𑀺𑀯𑁂𑀥𑀩𑀳𑀼𑀲𑁆𑀲𑀼𑀢𑁄𑀢𑀺 ¶ 𑀤𑁆𑀯𑁂 𑀩𑀳𑀼𑀲𑁆𑀲𑀼𑀢𑀸. 𑀧𑀭𑀺𑀬𑀢𑁆𑀢𑀻𑀢𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺. 𑀧𑀝𑀺𑀯𑁂𑀥𑁄𑀢𑀺 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀧𑀭𑀺𑀬𑀢𑁆𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀲𑀸 𑀬𑁂𑀦 𑀩𑀳𑀼 𑀲𑀼𑀢𑀸, 𑀲𑁄 𑀩𑀳𑀼𑀲𑁆𑀲𑀼𑀢𑁄. 𑀲𑁄 𑀧𑀦𑁂𑀲 𑀦𑀺𑀲𑁆𑀲𑀬𑀫𑀼𑀘𑁆𑀘𑀦𑀓𑁄, 𑀧𑀭𑀺𑀲𑀼𑀧𑀝𑁆𑀞𑀸𑀓𑁄, 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄, 𑀲𑀩𑁆𑀩𑀢𑁆𑀣𑀓𑀩𑀳𑀼𑀲𑁆𑀲𑀼𑀢𑁄𑀢𑀺 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀢𑀬𑁄 𑀩𑀳𑀼𑀲𑁆𑀲𑀼𑀢𑀸 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀑𑀯𑀸𑀤𑀯𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑀸. 𑀲𑀩𑁆𑀩𑀢𑁆𑀣𑀓𑀩𑀳𑀼𑀲𑁆𑀲𑀼𑀢𑀸 𑀧𑀦 𑀆𑀦𑀦𑁆𑀤𑀢𑁆𑀣𑁂𑀭𑀲𑀤𑀺𑀲𑀸 𑀳𑁄𑀦𑁆𑀢𑀺. 𑀢𑁂 𑀇𑀥 𑀅𑀥𑀺𑀧𑁆𑀧𑁂𑀢𑀸.

𑀆𑀭𑀤𑁆𑀥𑀯𑀻𑀭𑀺𑀬𑀸𑀢𑀺 ¶ 𑀬𑁂𑀲𑀁 𑀓𑀸𑀬𑀺𑀓𑀜𑁆𑀘 𑀘𑁂𑀢𑀲𑀺𑀓𑀜𑁆𑀘 𑀯𑀻𑀭𑀺𑀬𑀁 𑀆𑀭𑀤𑁆𑀥𑀁 𑀳𑁄𑀢𑀺. 𑀢𑀢𑁆𑀣 𑀬𑁂 𑀓𑀸𑀬𑀲𑀗𑁆𑀕𑀡𑀺𑀓𑀁 𑀯𑀺𑀦𑁄𑀤𑁂𑀢𑁆𑀯𑀸 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀅𑀝𑁆𑀞𑀆𑀭𑀩𑁆𑀪𑀯𑀢𑁆𑀣𑀼𑀯𑀲𑁂𑀦 𑀏𑀓𑀓𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀓𑀸𑀬𑀺𑀓𑀯𑀻𑀭𑀺𑀬𑀁 𑀆𑀭𑀤𑁆𑀥𑀁 𑀦𑀸𑀫 𑀳𑁄𑀢𑀺. 𑀬𑁂 𑀘𑀺𑀢𑁆𑀢𑀲𑀗𑁆𑀕𑀸𑀡𑀺𑀓𑀁 𑀯𑀺𑀦𑁄𑀤𑁂𑀢𑁆𑀯𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀏𑀓𑀓𑀸 𑀳𑁄𑀦𑁆𑀢𑀺, 𑀕𑀫𑀦𑁂 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀲𑁆𑀲 𑀞𑀸𑀦𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀤𑁂𑀦𑁆𑀢𑀺, 𑀞𑀸𑀦𑁂 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀲𑁆𑀲 𑀦𑀺𑀲𑀚𑁆𑀚𑀁, 𑀦𑀺𑀲𑀚𑁆𑀚𑀸𑀬 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀲𑁆𑀲 𑀲𑀬𑀦𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀤𑁂𑀦𑁆𑀢𑀺, 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀝𑁆𑀞𑀸𑀦𑁂𑀬𑁂𑀯 𑀓𑀺𑀮𑁂𑀲𑁂 𑀦𑀺𑀕𑁆𑀕𑀡𑁆𑀳𑀦𑁆𑀢𑀺, 𑀢𑁂𑀲𑀁 𑀘𑁂𑀢𑀲𑀺𑀓𑀯𑀻𑀭𑀺𑀬𑀁 𑀆𑀭𑀤𑁆𑀥𑀁 𑀦𑀸𑀫 𑀳𑁄𑀢𑀺.

𑀉𑀧𑀝𑁆𑀞𑀺𑀢𑀲𑁆𑀲𑀢𑀻𑀢𑀺 𑀘𑀺𑀭𑀓𑀢𑀸𑀤𑀻𑀦𑀁 𑀲𑀭𑀺𑀢𑀸 𑀅𑀦𑀼𑀲𑁆𑀲𑀭𑀺𑀢𑀸 𑀫𑀳𑀸𑀕𑀢𑀺𑀫𑁆𑀩𑀬𑀅𑀪𑀬𑀢𑁆𑀣𑁂𑀭𑀤𑀻𑀖𑀪𑀸𑀡𑀅𑀪𑀬𑀢𑁆𑀣𑁂𑀭𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑀸 𑀯𑀺𑀬. 𑀫𑀳𑀸𑀕𑀢𑀺𑀫𑁆𑀩𑀬𑀅𑀪𑀬𑀢𑁆𑀣𑁂𑀭𑁄 𑀓𑀺𑀭 𑀚𑀸𑀢𑀧𑀜𑁆𑀘𑀫𑀤𑀺𑀯𑀲𑁂 𑀫𑀗𑁆𑀕𑀮𑀧𑀸𑀬𑀸𑀲𑁂 𑀢𑀼𑀡𑁆𑀟𑀁 𑀧𑀲𑀸𑀭𑁂𑀦𑁆𑀢𑀁 𑀯𑀸𑀬𑀲𑀁 𑀤𑀺𑀲𑁆𑀯𑀸 𑀳𑀼𑀁 𑀳𑀼𑀦𑁆𑀢𑀺 𑀲𑀤𑁆𑀤𑀫𑀓𑀸𑀲𑀺. 𑀅𑀣 𑀲𑁄 𑀣𑁂𑀭𑀓𑀸𑀮𑁂 𑁋 ‘‘𑀓𑀤𑀸 𑀧𑀝𑁆𑀞𑀸𑀬, 𑀪𑀦𑁆𑀢𑁂, 𑀲𑀭𑀣𑀸’’𑀢𑀺 𑀪𑀺𑀓𑁆𑀔𑀽𑀳𑀺 𑀧𑀼𑀘𑁆𑀙𑀺𑀢𑁄 ‘‘𑀚𑀸𑀢𑀧𑀜𑁆𑀘𑀫𑀤𑀺𑀯𑀲𑁂 𑀓𑀢𑀲𑀤𑁆𑀤𑀢𑁄 𑀧𑀝𑁆𑀞𑀸𑀬 𑀆𑀯𑀼𑀲𑁄’’𑀢𑀺 𑀆𑀳.

𑀤𑀻𑀖𑀪𑀸𑀡𑀓𑀅𑀪𑀬𑀢𑁆𑀣𑁂𑀭𑀲𑁆𑀲 𑀚𑀸𑀢𑀦𑀯𑀫𑀤𑀺𑀯𑀲𑁂 𑀫𑀸𑀢𑀸 𑀘𑀼𑀫𑁆𑀩𑀺𑀲𑁆𑀲𑀸𑀫𑀻𑀢𑀺 𑀑𑀦𑀢𑀸 𑀢𑀲𑁆𑀲𑀸 𑀫𑁄𑀴𑀺 𑀫𑀼𑀘𑁆𑀘𑀺𑀢𑁆𑀣 ¶ . 𑀢𑀢𑁄 𑀢𑀼𑀫𑁆𑀩𑀫𑀢𑁆𑀢𑀸𑀦𑀺 𑀲𑀼𑀫𑀦𑀧𑀼𑀧𑁆𑀨𑀸𑀦𑀺 𑀤𑀸𑀭𑀓𑀲𑁆𑀲 𑀉𑀭𑁂 𑀧𑀢𑀺𑀢𑁆𑀯𑀸 𑀤𑀼𑀓𑁆𑀔𑀁 𑀚𑀦𑀬𑀺𑀁𑀲𑀼. 𑀲𑁄 𑀣𑁂𑀭𑀓𑀸𑀮𑁂 𑁋 ‘‘𑀓𑀤𑀸 𑀧𑀝𑁆𑀞𑀸𑀬, 𑀪𑀦𑁆𑀢𑁂, 𑀲𑀭𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁄 𑁋 ‘‘𑀚𑀸𑀢𑀦𑀯𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀆𑀳.

𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁄 𑁋 ‘‘𑀅𑀦𑀼𑀭𑀸𑀥𑀧𑀼𑀭𑁂 𑀢𑀻𑀡𑀺 𑀤𑁆𑀯𑀸𑀭𑀸𑀦𑀺 𑀧𑀺𑀤𑀳𑀸𑀧𑁂𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀏𑀓𑁂𑀦 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀦𑀁 𑀓𑀢𑁆𑀯𑀸 𑁋 ‘𑀢𑁆𑀯𑀁 𑀓𑀺𑀦𑁆𑀦𑀸𑀫𑁄, 𑀢𑁆𑀯𑀁 𑀓𑀺𑀦𑁆𑀦𑀸𑀫𑁄’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀲𑀸𑀬𑀁 𑀧𑀼𑀦 𑀅𑀧𑀼𑀘𑁆𑀙𑀺𑀢𑁆𑀯𑀸𑀯 𑀢𑁂𑀲𑀁 𑀦𑀸𑀫𑀸𑀦𑀺 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑀼𑀁 𑁋 ‘‘𑀲𑀓𑁆𑀓𑀸 𑀆𑀯𑀼𑀲𑁄’’𑀢𑀺 𑀆𑀳. 𑀏𑀯𑀭𑀽𑀧𑁂 𑀪𑀺𑀓𑁆𑀔𑀽 𑀲𑀦𑁆𑀥𑀸𑀬 𑁋 ‘‘𑀉𑀧𑀝𑁆𑀞𑀺𑀢𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁.

𑀧𑀜𑁆𑀜𑀯𑀦𑁆𑀢𑁄𑀢𑀺 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀧𑀭𑀺𑀕𑁆𑀕𑀸𑀳𑀺𑀓𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸. 𑀅𑀧𑀺 𑀘 𑀤𑁆𑀯𑀻𑀳𑀺𑀧𑀺 𑀏𑀢𑁂𑀳𑀺 𑀧𑀤𑁂𑀳𑀺 𑀯𑀺𑀧𑀲𑁆𑀲𑀓𑀸𑀦𑀁 ¶ 𑀪𑀺𑀓𑁆𑀔𑀽𑀦𑀁 𑀯𑀺𑀧𑀲𑁆𑀲𑀦𑀸𑀲𑀫𑁆𑀪𑀸𑀭𑀪𑀽𑀢𑀸 𑀲𑀫𑁆𑀫𑀸𑀲𑀢𑀺 𑀘𑁂𑀯 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀘 𑀓𑀣𑀺𑀢𑀸.

𑁧𑁩𑁯. 𑀘𑀢𑀼𑀢𑁆𑀣𑀲𑀢𑁆𑀢𑀓𑁂 𑀲𑀢𑀺𑀬𑁂𑀯 𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀢𑀢𑁆𑀣 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀧𑀯𑀺𑀘𑀬𑀮𑀓𑁆𑀔𑀡𑁄 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀧𑀕𑁆𑀕𑀳𑀮𑀓𑁆𑀔𑀡𑁄 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀨𑀭𑀡𑀮𑀓𑁆𑀔𑀡𑁄 ¶ 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀉𑀧𑀲𑀫𑀮𑀓𑁆𑀔𑀡𑁄 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁄 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀧𑀝𑀺𑀲𑀗𑁆𑀔𑀸𑀦𑀮𑀓𑁆𑀔𑀡𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀪𑀸𑀯𑁂𑀲𑁆𑀲𑀦𑁆𑀢𑀻𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀸, 𑀙𑀳𑀺 𑀓𑀸𑀭𑀡𑁂𑀳𑀺 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀸, 𑀦𑀯𑀳𑀺 𑀓𑀸𑀭𑀡𑁂𑀳𑀺 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀸, 𑀤𑀲𑀳𑀺 𑀓𑀸𑀭𑀡𑁂𑀳𑀺 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀸, 𑀲𑀢𑁆𑀢𑀳𑀺 𑀓𑀸𑀭𑀡𑁂𑀳𑀺 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀸, 𑀤𑀲𑀳𑀺 𑀓𑀸𑀭𑀡𑁂𑀳𑀺 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀸, 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀸 𑀯𑀟𑁆𑀠𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀲𑀫𑁆𑀧𑀬𑀼𑀢𑁆𑀢𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑁂 𑀲𑀫𑁆𑀩𑁄𑀚𑁆𑀛𑀗𑁆𑀕𑁂 𑀓𑀣𑁂𑀲𑀺.

𑁧𑁪𑁦. 𑀧𑀜𑁆𑀘𑀫𑀲𑀢𑁆𑀢𑀓𑁂 𑀅𑀦𑀺𑀘𑁆𑀘𑀲𑀜𑁆𑀜𑀸𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀲𑀜𑁆𑀜𑀸. 𑀅𑀦𑀢𑁆𑀢𑀲𑀜𑁆𑀜𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀸 𑀲𑀢𑁆𑀢 𑀮𑁄𑀓𑀺𑀬𑀯𑀺𑀧𑀲𑁆𑀲𑀦𑀸𑀧𑀺 𑀳𑁄𑀦𑁆𑀢𑀺. ‘‘𑀏𑀢𑀁 𑀲𑀦𑁆𑀢𑀁, 𑀏𑀢𑀁 𑀧𑀡𑀻𑀢𑀁, 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄’’𑀢𑀺 (𑀅. 𑀦𑀺. 𑁯.𑁩𑁬) 𑀆𑀕𑀢𑀯𑀲𑁂𑀦𑁂𑀢𑁆𑀣 𑀤𑁆𑀯𑁂 𑀮𑁄𑀓𑀼𑀢𑁆𑀢𑀭𑀸𑀧𑀺 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁧𑁪𑁧. 𑀙𑀓𑁆𑀓𑁂 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀦𑁆𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀓𑀢𑁆𑀢𑀩𑁆𑀩𑀁 𑀓𑀸𑀬𑀓𑀫𑁆𑀫𑀁. 𑀯𑀘𑀻𑀓𑀫𑁆𑀫𑀫𑀦𑁄𑀓𑀫𑁆𑀫𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀸𑀦𑀺 𑀧𑀦 𑀪𑀺𑀓𑁆𑀔𑀽𑀦𑀁 𑀯𑀲𑁂𑀦 𑀆𑀕𑀢𑀸𑀦𑀺 𑀕𑀺𑀳𑀻𑀲𑀼𑀧𑀺 𑀮𑀩𑁆𑀪𑀦𑁆𑀢𑀺 ¶ . 𑀪𑀺𑀓𑁆𑀔𑀽𑀦𑀜𑁆𑀳𑀺 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀆𑀪𑀺𑀲𑀫𑀸𑀘𑀸𑀭𑀺𑀓𑀥𑀫𑁆𑀫𑀧𑀽𑀭𑀡𑀁 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀕𑀺𑀳𑀻𑀦𑀁 𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣𑀸𑀬 𑀩𑁄𑀥𑀺𑀯𑀦𑁆𑀤𑀦𑀢𑁆𑀣𑀸𑀬 𑀲𑀗𑁆𑀖𑀦𑀺𑀫𑀦𑁆𑀢𑀦𑀢𑁆𑀣𑀸𑀬 𑀕𑀫𑀦𑀁, 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀁, 𑀧𑀢𑁆𑀢𑀧𑁆𑀧𑀝𑀺𑀕𑁆𑀕𑀳𑀡𑀁, 𑀆𑀲𑀦𑀧𑀜𑁆𑀜𑀸𑀧𑀦𑀁, 𑀅𑀦𑀼𑀕𑀫𑀦𑀦𑁆𑀢𑀺 𑀏𑀯𑀫𑀸𑀤𑀺𑀓𑀁 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫.

𑀪𑀺𑀓𑁆𑀔𑀽𑀦𑀁 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀆𑀘𑀸𑀭𑀧𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀁, 𑀓𑀫𑁆𑀫𑀝𑁆𑀞𑀸𑀦𑀓𑀣𑀦𑀁, 𑀥𑀫𑁆𑀫𑀤𑁂𑀲𑀦𑀸, 𑀢𑁂𑀧𑀺𑀝𑀓𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫. 𑀕𑀺𑀳𑀻𑀦𑀁 𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣𑀸𑀬 𑀕𑀘𑁆𑀙𑀸𑀫 ¶ , 𑀩𑁄𑀥𑀺𑀯𑀦𑁆𑀤𑀦𑀢𑁆𑀣𑀸𑀬 𑀕𑀘𑁆𑀙𑀸𑀫, 𑀥𑀫𑁆𑀫𑀲𑁆𑀲𑀯𑀦𑀁 𑀓𑀭𑀺𑀲𑁆𑀲𑀸𑀫, 𑀤𑀻𑀧𑀫𑀸𑀮𑀧𑀼𑀧𑁆𑀨𑀧𑀽𑀚𑀁 𑀓𑀭𑀺𑀲𑁆𑀲𑀸𑀫, 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀲𑀫𑀸𑀤𑀸𑀬 𑀯𑀢𑁆𑀢𑀺𑀲𑁆𑀲𑀸𑀫, 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀤𑀲𑁆𑀲𑀸𑀫, 𑀯𑀲𑁆𑀲𑀯𑀸𑀲𑀺𑀓𑀁 𑀤𑀲𑁆𑀲𑀸𑀫, 𑀅𑀚𑁆𑀚 𑀲𑀗𑁆𑀖𑀲𑁆𑀲 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀤𑀲𑁆𑀲𑀸𑀫, 𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀔𑀸𑀤𑀦𑀻𑀬𑀸𑀤𑀻𑀦𑀺 𑀲𑀁𑀯𑀺𑀤𑀳𑀣, 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀣, 𑀧𑀸𑀦𑀻𑀬𑀁 𑀉𑀧𑀝𑁆𑀞𑀧𑁂𑀣, 𑀲𑀗𑁆𑀖𑀁 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀆𑀦𑁂𑀣, 𑀧𑀜𑁆𑀜𑀢𑁆𑀢𑀸𑀲𑀦𑁂 ¶ 𑀦𑀺𑀲𑀻𑀤𑀸𑀧𑁂𑀣, 𑀙𑀦𑁆𑀤𑀚𑀸𑀢𑀸 𑀉𑀲𑁆𑀲𑀸𑀳𑀚𑀸𑀢𑀸 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀣𑀸𑀢𑀺𑀆𑀤𑀺𑀓𑀣𑀦𑀓𑀸𑀮𑁂 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫.

𑀪𑀺𑀓𑁆𑀔𑀽𑀦𑀁 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀲𑀭𑀻𑀭𑀧𑁆𑀧𑀝𑀺𑀚𑀕𑁆𑀕𑀦𑀁, 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀸𑀤𑀻𑀦𑀺 𑀘 𑀓𑀢𑁆𑀯𑀸 𑀯𑀺𑀯𑀺𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀲𑀼𑀔𑀻 𑀳𑁄𑀦𑁆𑀢𑀼 𑀅𑀯𑁂𑀭𑀸 𑀅𑀩𑁆𑀬𑀸𑀧𑀚𑁆𑀚𑀸𑀢𑀺 𑀘𑀺𑀦𑁆𑀢𑀦𑀁 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫. 𑀕𑀺𑀳𑀻𑀦𑀁 ‘𑀅𑀬𑁆𑀬𑀸 𑀲𑀼𑀔𑀻 𑀳𑁄𑀦𑁆𑀢𑀼, 𑀅𑀯𑁂𑀭𑀸 𑀅𑀩𑁆𑀬𑀸𑀧𑀚𑁆𑀚𑀸’𑀢𑀺 𑀘𑀺𑀦𑁆𑀢𑀦𑀁 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫.

𑀆𑀯𑀺 𑀘𑁂𑀯 𑀭𑀳𑁄 𑀘𑀸𑀢𑀺 𑀲𑀫𑁆𑀫𑀼𑀔𑀸 𑀘 𑀧𑀭𑀫𑁆𑀫𑀼𑀔𑀸 𑀘. 𑀢𑀢𑁆𑀣 𑀦𑀯𑀓𑀸𑀦𑀁 𑀘𑀻𑀯𑀭𑀓𑀫𑁆𑀫𑀸𑀤𑀻𑀲𑀼 𑀲𑀳𑀸𑀬𑀪𑀸𑀯𑀕𑀫𑀦𑀁 𑀲𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀣𑁂𑀭𑀸𑀦𑀁 𑀧𑀦 𑀧𑀸𑀤𑀥𑁄𑀯𑀦𑀯𑀦𑁆𑀤𑀦𑀩𑀻𑀚𑀦𑀤𑀸𑀦𑀸𑀤𑀺𑀪𑁂𑀤𑀁 𑀲𑀩𑁆𑀩𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀲𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀉𑀪𑀬𑁂𑀳𑀺𑀧𑀺 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀸𑀦𑀁 𑀤𑀸𑀭𑀼𑀪𑀡𑁆𑀟𑀸𑀤𑀻𑀦𑀁 𑀢𑁂𑀲𑀼 𑀅𑀯𑀫𑀜𑁆𑀜𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑀸 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀸𑀦𑀁 𑀯𑀺𑀬 𑀧𑀝𑀺𑀲𑀸𑀫𑀦𑀁 𑀧𑀭𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫.

𑀤𑁂𑀯𑀢𑁆𑀣𑁂𑀭𑁄 𑀢𑀺𑀲𑁆𑀲𑀢𑁆𑀣𑁂𑀭𑁄𑀢𑀺 𑀏𑀯𑀁 𑀧𑀕𑁆𑀕𑀬𑁆𑀳 𑀯𑀘𑀦𑀁 𑀲𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫. 𑀯𑀺𑀳𑀸𑀭𑁂 𑀅𑀲𑀦𑁆𑀢𑀁 𑀧𑀦 𑀧𑀝𑀺𑀧𑀼𑀘𑁆𑀙𑀦𑁆𑀢𑀲𑁆𑀲 𑀓𑀼𑀳𑀺𑀁 𑀅𑀫𑁆𑀳𑀸𑀓𑀁 𑀤𑁂𑀯𑀢𑁆𑀣𑁂𑀭𑁄, 𑀓𑀼𑀳𑀺𑀁 𑀅𑀫𑁆𑀳𑀸𑀓𑀁 𑀢𑀺𑀲𑁆𑀲𑀢𑁆𑀣𑁂𑀭𑁄, 𑀓𑀤𑀸 𑀦𑀼 𑀔𑁄 𑀆𑀕𑀫𑀺𑀲𑁆𑀲𑀢𑀻𑀢𑀺 𑀏𑀯𑀁 𑀫𑀫𑀸𑀬𑀦𑀯𑀘𑀦𑀁 𑀧𑀭𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫.

𑀫𑁂𑀢𑁆𑀢𑀸𑀲𑀺𑀦𑁂𑀳𑀲𑀺𑀦𑀺𑀤𑁆𑀥𑀸𑀦𑀺 𑀧𑀦 𑀦𑀬𑀦𑀸𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀧𑀲𑀦𑁆𑀦𑁂𑀦 𑀫𑀼𑀔𑁂𑀦 𑀑𑀮𑁄𑀓𑀦𑀁 𑀲𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 ¶ 𑀫𑀦𑁄𑀓𑀫𑁆𑀫𑀁 𑀦𑀸𑀫. 𑀤𑁂𑀯𑀢𑁆𑀣𑁂𑀭𑁄 𑀢𑀺𑀲𑁆𑀲𑀢𑁆𑀣𑁂𑀭𑁄 𑀅𑀭𑁄𑀕𑁄 𑀳𑁄𑀢𑀼, 𑀅𑀧𑁆𑀧𑀸𑀩𑀸𑀥𑁄𑀢𑀺 𑀲𑀫𑀦𑁆𑀦𑀸𑀳𑀭𑀡𑀁 𑀧𑀭𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫.

𑀮𑀸𑀪𑀸𑀢𑀺 𑀘𑀻𑀯𑀭𑀸𑀤𑀬𑁄 𑀮𑀤𑁆𑀥𑀧𑀘𑁆𑀘𑀬𑀸. 𑀥𑀫𑁆𑀫𑀺𑀓𑀸𑀢𑀺 𑀓𑀼𑀳𑀦𑀸𑀤𑀺𑀪𑁂𑀤𑀁 𑀫𑀺𑀘𑁆𑀙𑀸𑀚𑀻𑀯𑀁 𑀯𑀚𑁆𑀚𑁂𑀢𑁆𑀯𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀉𑀧𑁆𑀧𑀦𑁆𑀦𑀸. 𑀅𑀦𑁆𑀢𑀫𑀲𑁄 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀫𑀢𑁆𑀢𑀫𑁆𑀧𑀻𑀢𑀺 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀧𑀢𑁆𑀢𑁂 𑀧𑀭𑀺𑀬𑀸𑀧𑀦𑁆𑀦𑀁 𑀧𑀢𑁆𑀢𑀲𑁆𑀲 𑀅𑀦𑁆𑀢𑁄𑀕𑀢𑀁 𑀤𑁆𑀯𑀺𑀢𑀺𑀓𑀝𑀘𑁆𑀙𑀼𑀪𑀺𑀓𑁆𑀔𑀸𑀫𑀢𑁆𑀢𑀫𑁆𑀧𑀺 ¶ . 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀻𑀢𑀺 𑀏𑀢𑁆𑀣 𑀤𑁆𑀯𑁂 𑀧𑀝𑀺𑀯𑀺𑀪𑀢𑁆𑀢𑀸 𑀦𑀸𑀫 𑁋 𑀆𑀫𑀺𑀲𑀧𑁆𑀧𑀝𑀺𑀯𑀺𑀪𑀢𑁆𑀢𑀜𑁆𑀘, 𑀧𑀼𑀕𑁆𑀕𑀮𑀧𑁆𑀧𑀝𑀺𑀯𑀺𑀪𑀢𑁆𑀢𑀜𑁆𑀘. 𑀢𑀢𑁆𑀣 𑁋 ‘‘𑀏𑀢𑁆𑀢𑀓𑀁 𑀤𑀲𑁆𑀲𑀸𑀫𑀺, 𑀏𑀢𑁆𑀢𑀓𑀁 𑀦 𑀤𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀘𑀺𑀢𑁆𑀢𑁂𑀦 𑀯𑀺𑀪𑀚𑀦𑀁 𑀆𑀫𑀺𑀲𑀧𑁆𑀧𑀝𑀺𑀯𑀺𑀪𑀢𑁆𑀢𑀁 𑀦𑀸𑀫. ‘‘𑀅𑀲𑀼𑀓𑀲𑁆𑀲 𑀤𑀲𑁆𑀲𑀸𑀫𑀺, 𑀅𑀲𑀼𑀓𑀲𑁆𑀲 𑀦 𑀤𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀘𑀺𑀢𑁆𑀢𑁂𑀦 𑀯𑀺𑀪𑀚𑀦𑀁 𑀧𑀦 𑀧𑀼𑀕𑁆𑀕𑀮𑀧𑁆𑀧𑀝𑀺𑀯𑀺𑀪𑀢𑁆𑀢𑀁 𑀦𑀸𑀫. 𑀢𑀤𑀼𑀪𑀬𑀫𑁆𑀧𑀺 𑀅𑀓𑀢𑁆𑀯𑀸 𑀬𑁄 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀁 𑀪𑀼𑀜𑁆𑀚𑀢𑀺, 𑀅𑀬𑀁 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀻 𑀦𑀸𑀫.

𑀲𑀻𑀮𑀯𑀦𑁆𑀢𑁂𑀳𑀺 ¶ 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀸𑀥𑀸𑀭𑀡𑀪𑁄𑀕𑀻𑀢𑀺 𑀏𑀢𑁆𑀣 𑀲𑀸𑀥𑀸𑀭𑀡𑀪𑁄𑀕𑀺𑀦𑁄 𑀇𑀤𑀁 𑀮𑀓𑁆𑀔𑀡𑀁, 𑀬𑀁 𑀬𑀁 𑀧𑀡𑀻𑀢𑀁 𑀮𑀩𑁆𑀪𑀢𑀺, 𑀢𑀁 𑀢𑀁 𑀦𑁂𑀯 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀢𑀸𑀫𑀼𑀔𑁂𑀦 𑀕𑀺𑀳𑀻𑀦𑀁 𑀤𑁂𑀢𑀺, 𑀦 𑀅𑀢𑁆𑀢𑀦𑀸 𑀪𑀼𑀜𑁆𑀚𑀢𑀺, 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀘 𑁋 ‘‘𑀲𑀗𑁆𑀖𑁂𑀦 𑀲𑀸𑀥𑀸𑀭𑀡𑀁 𑀳𑁄𑀢𑀽’’𑀢𑀺 𑀕𑀳𑁂𑀢𑁆𑀯𑀸 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁 𑀲𑀗𑁆𑀖𑀲𑀦𑁆𑀢𑀓𑀁 𑀯𑀺𑀬 𑀧𑀲𑁆𑀲𑀢𑀺.

𑀇𑀫𑀁 𑀧𑀦 𑀲𑀸𑀭𑀡𑀻𑀬𑀥𑀫𑁆𑀫𑀁 𑀓𑁄 𑀧𑀽𑀭𑁂𑀢𑀺, 𑀓𑁄 𑀦 𑀧𑀽𑀭𑁂𑀢𑀻𑀢𑀺? 𑀤𑀼𑀲𑁆𑀲𑀻𑀮𑁄 𑀢𑀸𑀯 𑀦 𑀧𑀽𑀭𑁂𑀢𑀺. 𑀦 𑀳𑀺 𑀢𑀲𑁆𑀲 𑀲𑀦𑁆𑀢𑀓𑀁 𑀲𑀻𑀮𑀯𑀦𑁆𑀢𑀸 𑀕𑀡𑁆𑀳𑀦𑁆𑀢𑀺. 𑀧𑀭𑀺𑀲𑀼𑀤𑁆𑀥𑀲𑀻𑀮𑁄 𑀧𑀦 𑀯𑀢𑁆𑀢𑀁 𑀅𑀔𑀡𑁆𑀟𑁂𑀦𑁆𑀢𑁄 𑀧𑀽𑀭𑁂𑀢𑀺. 𑀢𑀢𑁆𑀭𑀺𑀤𑀁 𑀯𑀢𑁆𑀢𑀁 𑁋 𑀬𑁄 𑀳𑀺 𑀑𑀤𑀺𑀲𑁆𑀲𑀓𑀁 𑀓𑀢𑁆𑀯𑀸 𑀫𑀸𑀢𑀼 𑀯𑀸 𑀧𑀺𑀢𑀼 𑀯𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀤𑀻𑀦𑀁 𑀯𑀸 𑀤𑁂𑀢𑀺, 𑀲𑁄 𑀤𑀸𑀢𑀩𑁆𑀩𑀁 𑀤𑁂𑀢𑀺, 𑀲𑀸𑀭𑀡𑀻𑀬𑀥𑀫𑁆𑀫𑁄 𑀧𑀦𑀲𑁆𑀲 𑀦 𑀳𑁄𑀢𑀺, 𑀧𑀮𑀺𑀩𑁄𑀥𑀚𑀕𑁆𑀕𑀦𑀁 𑀦𑀸𑀫 𑀳𑁄𑀢𑀺. 𑀲𑀸𑀭𑀡𑀻𑀬𑀥𑀫𑁆𑀫𑁄 𑀳𑀺 𑀫𑀼𑀢𑁆𑀢𑀧𑀮𑀺𑀩𑁄𑀥𑀲𑁆𑀲𑁂𑀯 𑀯𑀝𑁆𑀝𑀢𑀺. 𑀢𑁂𑀦 𑀧𑀦 𑀑𑀤𑀺𑀲𑁆𑀲𑀓𑀁 𑀤𑁂𑀦𑁆𑀢𑁂𑀦 𑀕𑀺𑀮𑀸𑀦𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀆𑀕𑀦𑁆𑀢𑀼𑀓𑀕𑀫𑀺𑀓𑀸𑀦𑀜𑁆𑀘𑁂𑀯 𑀦𑀯𑀧𑀩𑁆𑀩𑀚𑀺𑀢𑀲𑁆𑀲 𑀘 𑀲𑀗𑁆𑀖𑀸𑀝𑀺𑀧𑀢𑁆𑀢𑀕𑁆𑀕𑀳𑀡𑀁 𑀅𑀚𑀸𑀦𑀦𑁆𑀢𑀲𑁆𑀲 𑀤𑀸𑀢𑀩𑁆𑀩𑀁. 𑀏𑀢𑁂𑀲𑀁 𑀤𑀢𑁆𑀯𑀸 𑀅𑀯𑀲𑁂𑀲𑀁 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀣𑁄𑀓𑀁 𑀅𑀤𑀢𑁆𑀯𑀸 𑀬𑁄 𑀬𑀢𑁆𑀢𑀓𑀁 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀢𑀢𑁆𑀢𑀓𑀁 𑀤𑀸𑀢𑀩𑁆𑀩𑀁. 𑀅𑀯𑀲𑀺𑀝𑁆𑀞𑁂 𑀅𑀲𑀢𑀺 𑀧𑀼𑀦 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀬𑀁 𑀬𑀁 𑀧𑀡𑀻𑀢𑀁, 𑀢𑀁 𑀤𑀢𑁆𑀯𑀸 𑀲𑁂𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. ‘‘𑀲𑀻𑀮𑀯𑀦𑁆𑀢𑁂𑀳𑀻’’𑀢𑀺 𑀯𑀘𑀦𑀢𑁄 𑀤𑀼𑀲𑁆𑀲𑀻𑀮𑀲𑁆𑀲 𑀅𑀤𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀺.

𑀅𑀬𑀁 𑀧𑀦 𑀲𑀸𑀭𑀡𑀻𑀬𑀥𑀫𑁆𑀫𑁄 𑀲𑀼𑀲𑀺𑀓𑁆𑀔𑀺𑀢𑀸𑀬 𑀧𑀭𑀺𑀲𑀸𑀬 𑀲𑀼𑀧𑀽𑀭𑁄 𑀳𑁄𑀢𑀺, 𑀦𑁄 𑀅𑀲𑀺𑀓𑁆𑀔𑀺𑀢𑀸𑀬 𑀧𑀭𑀺𑀲𑀸𑀬. 𑀲𑀼𑀲𑀺𑀓𑁆𑀔𑀺𑀢𑀸𑀬 𑀳𑀺 𑀧𑀭𑀺𑀲𑀸𑀬 𑀬𑁄 𑀅𑀜𑁆𑀜𑀢𑁄 𑀮𑀪𑀢𑀺, 𑀲𑁄 𑀦 𑀕𑀡𑁆𑀳𑀸𑀢𑀺. 𑀅𑀜𑁆𑀜𑀢𑁄 𑀅𑀮𑀪𑀦𑁆𑀢𑁄𑀧𑀺 𑀧𑀫𑀸𑀡𑀬𑀼𑀢𑁆𑀢𑀫𑁂𑀯 𑀕𑀡𑁆𑀳𑀸𑀢𑀺, 𑀦𑀸𑀢𑀺𑀭𑁂𑀓𑀁. 𑀅𑀬𑀁 𑀧𑀦 𑀲𑀸𑀭𑀡𑀻𑀬𑀥𑀫𑁆𑀫𑁄 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀮𑀤𑁆𑀥𑀁 𑀮𑀤𑁆𑀥𑀁 𑀤𑁂𑀦𑁆𑀢𑀲𑁆𑀲𑀸𑀧𑀺 𑀤𑁆𑀯𑀸𑀤𑀲𑀳𑀺 𑀯𑀲𑁆𑀲𑁂𑀳𑀺 𑀧𑀽𑀭𑀢𑀺, 𑀦 𑀢𑀢𑁄 𑀑𑀭𑀁. 𑀲𑀘𑁂 𑀳𑀺 𑀤𑁆𑀯𑀸𑀤𑀲𑀫𑁂 ¶ 𑀯𑀲𑁆𑀲𑁂 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑁄 𑀧𑀺𑀡𑁆𑀟𑀧𑀸𑀢𑀧𑀽𑀭𑀁 𑀧𑀢𑁆𑀢𑀁 𑀆𑀲𑀦𑀲𑀸𑀮𑀸𑀬𑀁 𑀞𑀧𑁂𑀢𑁆𑀯𑀸 𑀦𑀳𑀸𑀬𑀺𑀢𑀼𑀁 𑀕𑀘𑁆𑀙𑀢𑀺 𑀲𑀗𑁆𑀖𑀢𑁆𑀣𑁂𑀭𑁄 𑀘 𑀓𑀲𑁆𑀲𑁂𑀲𑁄 𑀧𑀢𑁆𑀢𑁄𑀢𑀺, ‘‘𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑀲𑁆𑀲𑀸’’𑀢𑀺 ¶ 𑀯𑀼𑀢𑁆𑀢𑁂 ‘‘𑀆𑀳𑀭𑀣 𑀦’’𑀦𑁆𑀢𑀺 𑀲𑀩𑁆𑀩𑀁 𑀧𑀺𑀡𑁆𑀟𑀧𑀸𑀢𑀁 𑀯𑀺𑀘𑀸𑀭𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀘 𑀭𑀺𑀢𑁆𑀢𑀁 𑀧𑀢𑁆𑀢𑀁 𑀞𑀧𑁂𑀢𑀺, 𑀅𑀣 𑀲𑁄 𑀪𑀺𑀓𑁆𑀔𑀼 𑀭𑀺𑀢𑁆𑀢𑀁 𑀧𑀢𑁆𑀢𑀁 𑀤𑀺𑀲𑁆𑀯𑀸 ‘‘𑀫𑀬𑁆𑀳𑀁 𑀅𑀦𑀯𑀲𑁂𑀲𑁂𑀢𑁆𑀯𑀸𑀯 𑀧𑀭𑀺𑀪𑀼𑀜𑁆𑀚𑀺𑀁𑀲𑀽’’𑀢𑀺 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑀺, 𑀲𑀸𑀭𑀡𑀻𑀬𑀥𑀫𑁆𑀫𑁄 𑀪𑀺𑀚𑁆𑀚𑀢𑀺, 𑀧𑀼𑀦 𑀤𑁆𑀯𑀸𑀤𑀲𑀯𑀲𑁆𑀲𑀸𑀦𑀺 𑀧𑀽𑀭𑁂𑀢𑀩𑁆𑀩𑁄 𑀳𑁄𑀢𑀺. 𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑀲𑀤𑀺𑀲𑁄 𑀳𑁂𑀲, 𑀲𑀓𑀺𑀁 𑀔𑀡𑁆𑀟𑁂 𑀚𑀸𑀢𑁂 𑀧𑀼𑀦 𑀧𑀽𑀭𑁂𑀢𑀩𑁆𑀩𑁄𑀯. 𑀬𑁄 𑀧𑀦 𑁋 ‘‘𑀮𑀸𑀪𑀸 𑀯𑀢 ¶ 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂, 𑀬𑀲𑁆𑀲 𑀫𑁂 𑀧𑀢𑁆𑀢𑀕𑀢𑀁 𑀅𑀦𑀸𑀧𑀼𑀘𑁆𑀙𑀸𑀯 𑀲𑀩𑁆𑀭𑀳𑁆𑀫𑀘𑀸𑀭𑀻 𑀧𑀭𑀺𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀲𑁄𑀫𑀦𑀲𑁆𑀲𑀁 𑀚𑀦𑁂𑀢𑀺, 𑀢𑀲𑁆𑀲 𑀧𑀼𑀡𑁆𑀡𑁄 𑀦𑀸𑀫 𑀳𑁄𑀢𑀺.

𑀏𑀯𑀁 𑀧𑀽𑀭𑀺𑀢𑀲𑀸𑀭𑀡𑀻𑀬𑀥𑀫𑁆𑀫𑀲𑁆𑀲 𑀧𑀦 𑀦𑁂𑀯 𑀇𑀲𑁆𑀲𑀸, 𑀦 𑀫𑀘𑁆𑀙𑀭𑀺𑀬𑀁 𑀳𑁄𑀢𑀺. 𑀲𑁄 𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺, 𑀲𑀼𑀮𑀪𑀧𑀘𑁆𑀘𑀬𑁄 𑀘, 𑀧𑀢𑁆𑀢𑀕𑀢𑀫𑀲𑁆𑀲 𑀤𑀺𑀬𑁆𑀬𑀫𑀸𑀦𑀫𑁆𑀧𑀺 𑀦 𑀔𑀻𑀬𑀢𑀺, 𑀪𑀸𑀚𑀦𑀻𑀬𑀪𑀡𑁆𑀟𑀝𑁆𑀞𑀸𑀦𑁂 𑀅𑀕𑁆𑀕𑀪𑀡𑁆𑀟𑀁 𑀮𑀪𑀢𑀺, 𑀪𑀬𑁂 𑀯𑀸 𑀙𑀸𑀢𑀓𑁂 𑀯𑀸 𑀲𑀫𑁆𑀧𑀢𑁆𑀢𑁂 𑀤𑁂𑀯𑀢𑀸 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀦𑁆𑀢𑀺.

𑀢𑀢𑁆𑀭𑀺𑀫𑀸𑀦𑀺 𑀯𑀢𑁆𑀣𑀽𑀦𑀺 𑁋 𑀲𑁂𑀦𑀕𑀺𑀭𑀺𑀯𑀸𑀲𑀻 𑀢𑀺𑀲𑁆𑀲𑀢𑁆𑀣𑁂𑀭𑁄 𑀓𑀺𑀭 𑀫𑀳𑀸𑀕𑀺𑀭𑀺𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀧𑀜𑁆𑀜𑀸𑀲 𑀫𑀳𑀸𑀣𑁂𑀭𑀸 𑀦𑀸𑀕𑀤𑀻𑀧𑀁 𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀸 𑀕𑀺𑀭𑀺𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀺𑀜𑁆𑀘𑀺 𑀅𑀮𑀤𑁆𑀥𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀣𑁂𑀭𑁄 𑀧𑀦 𑀧𑀯𑀺𑀲𑀦𑁆𑀢𑁄 𑀢𑁂 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀮𑀤𑁆𑀥𑀁, 𑀪𑀦𑁆𑀢𑁂’’𑀢𑀺? 𑀯𑀺𑀘𑀭𑀺𑀫𑁆𑀳 𑀆𑀯𑀼𑀲𑁄𑀢𑀺. 𑀲𑁄 𑀢𑁂𑀲𑀁 𑀅𑀮𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂 𑀬𑀸𑀯𑀸𑀳𑀁 𑀆𑀕𑀘𑁆𑀙𑀸𑀫𑀺, 𑀢𑀸𑀯 𑀇𑀥𑁂𑀯 𑀳𑁄𑀣𑀸’’𑀢𑀺. 𑀫𑀬𑀁, 𑀆𑀯𑀼𑀲𑁄, 𑀧𑀜𑁆𑀜𑀸𑀲 𑀚𑀦𑀸 𑀧𑀢𑁆𑀢𑀢𑁂𑀫𑀦𑀫𑀢𑁆𑀢𑀫𑁆𑀧𑀺 𑀦 𑀮𑀪𑀺𑀫𑁆𑀳𑀸𑀢𑀺. 𑀪𑀦𑁆𑀢𑁂, 𑀦𑁂𑀯𑀸𑀲𑀺𑀓𑀸 𑀦𑀸𑀫 𑀧𑀝𑀺𑀩𑀮𑀸 𑀳𑁄𑀦𑁆𑀢𑀺, 𑀅𑀮𑀪𑀦𑁆𑀢𑀸𑀧𑀺 𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑀲𑀪𑀸𑀕𑀁 𑀚𑀸𑀦𑀦𑁆𑀢𑀻𑀢𑀺. 𑀣𑁂𑀭𑀸 𑀆𑀕𑀫𑁂𑀲𑀼𑀁. 𑀣𑁂𑀭𑁄 𑀕𑀸𑀫𑀁 𑀧𑀸𑀯𑀺𑀲𑀺. 𑀥𑀼𑀭𑀕𑁂𑀳𑁂𑀬𑁂𑀯 𑀫𑀳𑀸𑀉𑀧𑀸𑀲𑀺𑀓𑀸 𑀔𑀻𑀭𑀪𑀢𑁆𑀢𑀁 𑀲𑀚𑁆𑀚𑁂𑀢𑁆𑀯𑀸 𑀣𑁂𑀭𑀁 𑀑𑀮𑁄𑀓𑀬𑀫𑀸𑀦𑀸 𑀞𑀺𑀢𑀸. 𑀅𑀣 𑀣𑁂𑀭𑀲𑁆𑀲 𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑀲𑁆𑀲𑁂𑀯 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺, 𑀲𑁄 𑀢𑀁 𑀆𑀤𑀸𑀬 𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀕𑀡𑁆𑀳𑀣, 𑀪𑀦𑁆𑀢𑁂𑀢𑀺, 𑀲𑀗𑁆𑀖𑀢𑁆𑀣𑁂𑀭𑀁 𑀆𑀳. 𑀣𑁂𑀭𑁄 𑁋 ‘‘𑀅𑀫𑁆𑀳𑁂𑀳𑀺 𑀏𑀢𑁆𑀢𑀓𑁂𑀳𑀺 𑀓𑀺𑀜𑁆𑀘𑀺 𑀦 𑀮𑀤𑁆𑀥𑀁, 𑀅𑀬𑀁 𑀲𑀻𑀖𑀫𑁂𑀯 𑀕𑀳𑁂𑀢𑁆𑀯𑀸 𑀆𑀕𑀢𑁄, 𑀓𑀺𑀁 𑀦𑀼 𑀔𑁄’’𑀢𑀺 𑀲𑁂𑀲𑀸𑀦𑀁 𑀫𑀼𑀔𑀁 𑀑𑀮𑁄𑀓𑁂𑀲𑀺. 𑀣𑁂𑀭𑁄 𑀑𑀮𑁄𑀓𑀦𑀸𑀓𑀸𑀭𑁂𑀦𑁂𑀯 𑀜𑀢𑁆𑀯𑀸 ‘‘𑀪𑀦𑁆𑀢𑁂, 𑀥𑀫𑁆𑀫𑁂𑀦 𑀲𑀫𑁂𑀦 𑀮𑀤𑁆𑀥𑀧𑀺𑀡𑁆𑀟𑀧𑀸𑀢𑁄, 𑀦𑀺𑀓𑁆𑀓𑀼𑀓𑁆𑀓𑀼𑀘𑁆𑀘𑀸 𑀕𑀡𑁆𑀳𑀣𑀸’’𑀢𑀺𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑁂𑀲𑀁 𑀬𑀸𑀯𑀤𑀢𑁆𑀣𑀁 𑀤𑀢𑁆𑀯𑀸 𑀅𑀢𑁆𑀢𑀦𑀸𑀧𑀺 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀺.

𑀅𑀣 𑀦𑀁 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀣𑁂𑀭𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀤𑀸, 𑀆𑀯𑀼𑀲𑁄, 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀻’’𑀢𑀺? 𑀦𑀢𑁆𑀣𑀺 𑀫𑁂, 𑀪𑀦𑁆𑀢𑁂, 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄𑀢𑀺. 𑀛𑀸𑀦𑀮𑀸𑀪𑀻𑀲𑀺, 𑀆𑀯𑀼𑀲𑁄𑀢𑀺? 𑀏𑀢𑀫𑁆𑀧𑀺 ¶ 𑀫𑁂, 𑀪𑀦𑁆𑀢𑁂, 𑀦𑀢𑁆𑀣𑀻𑀢𑀺. 𑀦𑀦𑀼, 𑀆𑀯𑀼𑀲𑁄, 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺? 𑀲𑀸𑀭𑀡𑀻𑀬𑀥𑀫𑁆𑀫𑁄 𑀫𑁂, 𑀪𑀦𑁆𑀢𑁂, 𑀧𑀽𑀭𑀺𑀢𑁄, 𑀢𑀲𑁆𑀲 𑀫𑁂 𑀥𑀫𑁆𑀫𑀲𑁆𑀲 𑀧𑀽𑀭𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀘𑁂𑀧𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁 𑀳𑁄𑀢𑀺, 𑀧𑀢𑁆𑀢𑀕𑀢𑀁 𑀦 𑀔𑀻𑀬𑀢𑀻𑀢𑀺. 𑀢𑁂 𑀲𑀼𑀢𑁆𑀯𑀸 ¶ 𑁋 ‘‘𑀲𑀸𑀥𑀼 𑀲𑀸𑀥𑀼 𑀲𑀧𑁆𑀧𑀼𑀭𑀺𑀲, 𑀅𑀦𑀼𑀘𑁆𑀙𑀯𑀺𑀓𑀫𑀺𑀤𑀁 𑀢𑀼𑀬𑁆𑀳’’𑀦𑁆𑀢𑀺 𑀆𑀳𑀁𑀲𑀼. 𑀇𑀤𑀁 𑀢𑀸𑀯 𑁋 ‘‘𑀧𑀢𑁆𑀢𑀕𑀢𑀁 𑀦 𑀔𑀻𑀬𑀢𑀻’’𑀢𑀺 𑀏𑀢𑁆𑀣 𑀯𑀢𑁆𑀣𑀼.

𑀅𑀬𑀫𑁂𑀯 𑀧𑀦 𑀣𑁂𑀭𑁄 𑀘𑁂𑀢𑀺𑀬𑀧𑀩𑁆𑀩𑀢𑁂 𑀕𑀺𑀭𑀺𑀪𑀡𑁆𑀟𑀫𑀳𑀸𑀧𑀽𑀚𑀸𑀬 𑀤𑀸𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀺𑀁 𑀯𑀭𑀪𑀡𑁆𑀟𑀦𑁆𑀢𑀺 𑀧𑀼𑀘𑁆𑀙𑀺. 𑀤𑁆𑀯𑁂 𑀲𑀸𑀝𑀓𑀸, 𑀪𑀦𑁆𑀢𑁂𑀢𑀺. 𑀏𑀢𑁂 𑀫𑀬𑁆𑀳𑀁 ¶ 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀻𑀢𑀺. 𑀢𑀁 𑀲𑀼𑀢𑁆𑀯𑀸 𑀅𑀫𑀘𑁆𑀘𑁄 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 𑁋 ‘‘𑀏𑀓𑁄 𑀤𑀳𑀭𑁄 𑀏𑀯𑀁 𑀯𑀤𑀢𑀻’’𑀢𑀺. 𑀤𑀳𑀭𑀲𑁆𑀲 𑀏𑀯𑀁 𑀘𑀺𑀢𑁆𑀢𑀁, 𑀫𑀳𑀸𑀣𑁂𑀭𑀸𑀦𑀁 𑀧𑀦 𑀲𑀼𑀔𑀼𑀫𑀲𑀸𑀝𑀓𑀸 𑀯𑀝𑁆𑀝𑀦𑁆𑀢𑀻𑀢𑀺 𑀯𑀢𑁆𑀯𑀸 𑀫𑀳𑀸𑀣𑁂𑀭𑀸𑀦𑀁 𑀤𑀲𑁆𑀲𑀸𑀫𑀻𑀢𑀺 𑀞𑀧𑁂𑀢𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀝𑀺𑀧𑀸𑀝𑀺𑀬𑀸 𑀞𑀺𑀢𑁂 𑀤𑁂𑀦𑁆𑀢𑀲𑁆𑀲 𑀫𑀢𑁆𑀣𑀓𑁂 𑀞𑀧𑀺𑀢𑀸𑀧𑀺 𑀢𑁂 𑀲𑀸𑀝𑀓𑀸 𑀳𑀢𑁆𑀣𑀁 𑀦𑀸𑀭𑁄𑀳𑀦𑁆𑀢𑀺. 𑀅𑀜𑁆𑀜𑁂 𑀆𑀭𑁄𑀳𑀦𑁆𑀢𑀺. 𑀤𑀳𑀭𑀲𑁆𑀲 𑀤𑀸𑀦𑀓𑀸𑀮𑁂 𑀧𑀦 𑀳𑀢𑁆𑀣𑀁 𑀆𑀭𑀼𑀴𑁆𑀳𑀸. 𑀲𑁄 𑀢𑀲𑁆𑀲 𑀳𑀢𑁆𑀣𑁂 𑀧𑀸𑀢𑁂𑀢𑁆𑀯𑀸 𑀅𑀫𑀘𑁆𑀘𑀲𑁆𑀲 𑀫𑀼𑀔𑀁 𑀑𑀮𑁄𑀓𑁂𑀢𑁆𑀯𑀸 𑀤𑀳𑀭𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀤𑀸𑀦𑀁 𑀤𑀢𑁆𑀯𑀸 𑀲𑀗𑁆𑀖𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑀳𑀭𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑁋 ‘‘𑀪𑀦𑁆𑀢𑁂, 𑀇𑀫𑀁 𑀥𑀫𑁆𑀫𑀁 𑀓𑀤𑀸 𑀧𑀝𑀺𑀯𑀺𑀚𑁆𑀛𑀺𑀢𑁆𑀣𑀸’’𑀢𑀺 𑀆𑀳. 𑀲𑁄 𑀧𑀭𑀺𑀬𑀸𑀬𑁂𑀦𑀸𑀧𑀺 𑀅𑀲𑀦𑁆𑀢𑀁 𑀅𑀯𑀤𑀦𑁆𑀢𑁄 𑁋 ‘‘𑀦𑀢𑁆𑀣𑀺 𑀫𑀬𑁆𑀳𑀁 𑀫𑀳𑀸𑀭𑀸𑀚 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄’’𑀢𑀺 𑀆𑀳. 𑀦𑀦𑀼, 𑀪𑀦𑁆𑀢𑁂, 𑀧𑀼𑀩𑁆𑀩𑁂 𑀅𑀯𑀘𑀼𑀢𑁆𑀣𑀸𑀢𑀺. 𑀆𑀫, 𑀫𑀳𑀸𑀭𑀸𑀚, 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑁄 𑀅𑀳𑀁, 𑀢𑀲𑁆𑀲 𑀫𑁂 𑀥𑀫𑁆𑀫𑀲𑁆𑀲 𑀧𑀽𑀭𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀪𑀸𑀚𑀦𑀻𑀬𑀪𑀡𑁆𑀟𑀝𑁆𑀞𑀸𑀦𑁂 𑀅𑀕𑁆𑀕𑀪𑀡𑁆𑀟𑀁 𑀧𑀸𑀧𑀼𑀡𑀸𑀢𑀻𑀢𑀺. ‘‘𑀲𑀸𑀥𑀼 𑀲𑀸𑀥𑀼, 𑀪𑀦𑁆𑀢𑁂, 𑀅𑀦𑀼𑀘𑁆𑀙𑀯𑀺𑀓𑀫𑀺𑀤𑀁 𑀢𑀼𑀬𑁆𑀳’’𑀦𑁆𑀢𑀺 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀇𑀤𑀁 𑁋 ‘‘𑀪𑀸𑀚𑀦𑀻𑀬𑀪𑀡𑁆𑀟𑀝𑁆𑀞𑀸𑀦𑁂 𑀅𑀕𑁆𑀕𑀪𑀡𑁆𑀟𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀏𑀢𑁆𑀣 𑀯𑀢𑁆𑀣𑀼.

𑀩𑁆𑀭𑀸𑀳𑁆𑀫𑀡𑀢𑀺𑀲𑁆𑀲𑀪𑀬𑁂 𑀧𑀦 𑀪𑀸𑀢𑀭𑀕𑀸𑀫𑀯𑀸𑀲𑀺𑀦𑁄 𑀦𑀸𑀕𑀢𑁆𑀣𑁂𑀭𑀺𑀬𑀸 𑀅𑀦𑀸𑀭𑁄𑀘𑁂𑀢𑁆𑀯𑀸𑀯 𑀧𑀮𑀸𑀬𑀺𑀁𑀲𑀼. 𑀣𑁂𑀭𑀻 𑀧𑀘𑁆𑀘𑀽𑀲𑀲𑀫𑀬𑁂 𑁋 ‘‘𑀅𑀢𑀺𑀯𑀺𑀬 𑀅𑀧𑁆𑀧𑀦𑀺𑀕𑁆𑀖𑁄𑀲𑁄 𑀕𑀸𑀫𑁄, 𑀉𑀧𑀥𑀸𑀭𑁂𑀣 𑀢𑀸𑀯𑀸’’𑀢𑀺 𑀤𑀳𑀭𑀪𑀺𑀓𑁆𑀔𑀼𑀦𑀺𑀬𑁄 𑀆𑀳. 𑀢𑀸 𑀕𑀦𑁆𑀢𑁆𑀯𑀸 𑀲𑀩𑁆𑀩𑁂𑀲𑀁 𑀕𑀢𑀪𑀸𑀯𑀁 𑀜𑀢𑁆𑀯𑀸 𑀆𑀕𑀫𑁆𑀫 𑀣𑁂𑀭𑀺𑀬𑀸 𑀆𑀭𑁄𑀘𑁂𑀲𑀼𑀁. 𑀲𑀸 𑀲𑀼𑀢𑁆𑀯𑀸 ‘‘𑀫𑀸 𑀢𑀼𑀫𑁆𑀳𑁂 𑀢𑁂𑀲𑀁 𑀕𑀢𑀪𑀸𑀯𑀁 𑀘𑀺𑀦𑁆𑀢𑀬𑀺𑀢𑁆𑀣, 𑀅𑀢𑁆𑀢𑀦𑁄 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀲𑀼𑀬𑁂𑀯 𑀬𑁄𑀕𑀁 𑀓𑀭𑁄𑀣𑀸’’𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬𑀁 𑀧𑀸𑀭𑀼𑀧𑀺𑀢𑁆𑀯𑀸 𑀅𑀢𑁆𑀢𑀤𑁆𑀯𑀸𑀤𑀲𑀫𑀸 𑀕𑀸𑀫𑀤𑁆𑀯𑀸𑀭𑁂 𑀦𑀺𑀕𑁆𑀭𑁄𑀥𑀫𑀽𑀮𑁂 𑀅𑀝𑁆𑀞𑀸𑀲𑀺. 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸𑀤𑁂𑀯𑀢𑀸 𑀤𑁆𑀯𑀸𑀤𑀲𑀦𑁆𑀦𑀫𑁆𑀧𑀺 𑀪𑀺𑀓𑁆𑀔𑀼𑀦𑀻𑀦𑀁 𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸 ‘‘𑀅𑀬𑁆𑀬𑁂, 𑀫𑀸 𑀅𑀜𑁆𑀜𑀢𑁆𑀣 𑀕𑀘𑁆𑀙𑀣, 𑀦𑀺𑀘𑁆𑀘𑀁 ¶ 𑀇𑀥𑁂𑀯 𑀏𑀣𑀸’’𑀢𑀺 𑀆𑀳. 𑀣𑁂𑀭𑀺𑀬𑀸 𑀧𑀦 𑀓𑀦𑀺𑀝𑁆𑀞𑀪𑀸𑀢𑀸 𑀦𑀸𑀕𑀢𑁆𑀣𑁂𑀭𑁄 𑀦𑀸𑀫 𑀅𑀢𑁆𑀣𑀺, 𑀲𑁄 𑁋 ‘‘𑀫𑀳𑀦𑁆𑀢𑀁 𑀪𑀬𑀁, 𑀦 𑀲𑀓𑁆𑀓𑀸 𑀇𑀥 𑀬𑀸𑀧𑁂𑀢𑀼𑀁, 𑀧𑀭𑀢𑀻𑀭𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀤𑁆𑀯𑀸𑀤𑀲𑀫𑁄𑀯 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀸 𑀦𑀺𑀓𑁆𑀔𑀦𑁆𑀢𑁄 𑀣𑁂𑀭𑀺𑀁 𑀤𑀺𑀲𑁆𑀯𑀸 𑀕𑀫𑀺𑀲𑁆𑀲𑀸𑀫𑀻𑀢𑀺 𑀪𑀸𑀢𑀭𑀕𑀸𑀫𑀁 𑀆𑀕𑀢𑁄. 𑀣𑁂𑀭𑀻 𑁋 ‘‘𑀣𑁂𑀭𑀸 𑀆𑀕𑀢𑀸’’𑀢𑀺 𑀲𑀼𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀓𑀺𑀁 𑀅𑀬𑁆𑀬𑀸𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺. 𑀲𑀸 𑁋 ‘‘𑀅𑀚𑁆𑀚 𑀏𑀓𑀤𑀺𑀯𑀲𑀁 𑀯𑀺𑀳𑀸𑀭𑁂𑀬𑁂𑀯 𑀯𑀲𑀺𑀢𑁆𑀯𑀸 𑀲𑁆𑀯𑁂 𑀕𑀫𑀺𑀲𑁆𑀲𑀣𑀸’’𑀢𑀺 𑀆𑀳. 𑀣𑁂𑀭𑀸 𑀯𑀺𑀳𑀸𑀭𑀁 𑀅𑀕𑀫𑀁𑀲𑀼.

𑀣𑁂𑀭𑀻 ¶ 𑀧𑀼𑀦𑀤𑀺𑀯𑀲𑁂 𑀭𑀼𑀓𑁆𑀔𑀫𑀽𑀮𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀇𑀫𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀆𑀳. 𑀣𑁂𑀭𑁄 𑁋 ‘‘𑀯𑀝𑁆𑀝𑀺𑀲𑁆𑀲𑀢𑀺 𑀣𑁂𑀭𑀻’’𑀢𑀺 𑀯𑀢𑁆𑀯𑀸 𑀢𑀼𑀡𑁆𑀳𑀻 𑀅𑀝𑁆𑀞𑀸𑀲𑀺. 𑀥𑀫𑁆𑀫𑀺𑀓𑁄 𑀢𑀸𑀢 𑀧𑀺𑀡𑁆𑀟𑀧𑀸𑀢𑁄 ¶ , 𑀓𑀼𑀓𑁆𑀓𑀼𑀘𑁆𑀘𑀁 𑀅𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀣𑀸𑀢𑀺. ‘‘𑀯𑀝𑁆𑀝𑀺𑀲𑁆𑀲𑀢𑀺 𑀣𑁂𑀭𑀻’’𑀢𑀺. 𑀲𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂 𑀔𑀺𑀧𑀺. 𑀧𑀢𑁆𑀢𑁄 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺. 𑀣𑁂𑀭𑁄 𑁋 ‘‘𑀲𑀢𑁆𑀢𑀢𑀸𑀮𑀫𑀢𑁆𑀢𑁂 𑀞𑀺𑀢𑀫𑁆𑀧𑀺 𑀪𑀺𑀓𑁆𑀔𑀼𑀦𑀺𑀪𑀢𑁆𑀢𑀫𑁂𑀯 𑀣𑁂𑀭𑀻’’𑀢𑀺 𑀯𑀢𑁆𑀯𑀸 𑁋 ‘‘𑀪𑀬𑀁 𑀦𑀸𑀫 𑀲𑀩𑁆𑀩𑀓𑀸𑀮𑀁 𑀦 𑀳𑁄𑀢𑀺, 𑀪𑀬𑁂 𑀯𑀽𑀧𑀲𑀦𑁆𑀢𑁂 𑀅𑀭𑀺𑀬𑀯𑀁𑀲𑀁 𑀓𑀣𑀬𑀫𑀸𑀦𑁄, ‘𑀪𑁄 𑀧𑀺𑀡𑁆𑀟𑀧𑀸𑀢𑀺𑀓, 𑀪𑀺𑀓𑁆𑀔𑀼𑀦𑀺𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀻𑀢𑀺𑀦𑀸𑀫𑀬𑀺𑀢𑁆𑀣𑀸’𑀢𑀺 𑀘𑀺𑀢𑁆𑀢𑁂𑀦 𑀅𑀦𑀼𑀯𑀤𑀺𑀬𑀫𑀸𑀦𑁄 𑀲𑀦𑁆𑀣𑀫𑁆𑀪𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣 𑀣𑁂𑀭𑀺𑀬𑁄’’𑀢𑀺 𑀫𑀕𑁆𑀕𑀁 𑀆𑀭𑀼𑀳𑀺.

𑀭𑀼𑀓𑁆𑀔𑀤𑁂𑀯𑀢𑀸𑀧𑀺 𑁋 ‘‘𑀲𑀘𑁂 𑀣𑁂𑀭𑁄 𑀣𑁂𑀭𑀺𑀬𑀸 𑀳𑀢𑁆𑀣𑀢𑁄 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀢𑀺, 𑀦 𑀦𑀁 𑀦𑀺𑀯𑀢𑁆𑀢𑁂𑀲𑁆𑀲𑀸𑀫𑀺. 𑀲𑀘𑁂 𑀦 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀢𑀺, 𑀦𑀺𑀯𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑀬𑀫𑀸𑀦𑀸 𑀞𑀢𑁆𑀯𑀸 𑀣𑁂𑀭𑀲𑁆𑀲 𑀕𑀫𑀦𑀁 𑀤𑀺𑀲𑁆𑀯𑀸 𑀭𑀼𑀓𑁆𑀔𑀸 𑀑𑀭𑀼𑀬𑁆𑀳 𑀧𑀢𑁆𑀢𑀁, 𑀪𑀦𑁆𑀢𑁂, 𑀤𑁂𑀣𑀸𑀢𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀣𑁂𑀭𑀁 𑀭𑀼𑀓𑁆𑀔𑀫𑀽𑀮𑀁𑀬𑁂𑀯 𑀆𑀦𑁂𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀁 𑀧𑀝𑀺𑀜𑁆𑀜𑀁 𑀓𑀸𑀭𑁂𑀢𑁆𑀯𑀸 𑀤𑁆𑀯𑀸𑀤𑀲 𑀪𑀺𑀓𑁆𑀔𑀼𑀦𑀺𑀬𑁄 𑀤𑁆𑀯𑀸𑀤𑀲 𑀪𑀺𑀓𑁆𑀔𑀽 𑀘 𑀲𑀢𑁆𑀢𑀯𑀲𑁆𑀲𑀸𑀦𑀺 𑀉𑀧𑀝𑁆𑀞𑀳𑀺. 𑀇𑀤𑀁 𑁋 ‘‘𑀤𑁂𑀯𑀢𑀸 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀦𑁆𑀢𑀻’’𑀢𑀺 𑀏𑀢𑁆𑀣 𑀯𑀢𑁆𑀣𑀼. 𑀢𑀢𑁆𑀭 𑀳𑀺 𑀣𑁂𑀭𑀻 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀺𑀓𑀸 𑀅𑀳𑁄𑀲𑀺.

𑀅𑀔𑀡𑁆𑀟𑀸𑀦𑀻𑀢𑀺𑀆𑀤𑀻𑀲𑀼 𑀬𑀲𑁆𑀲 𑀲𑀢𑁆𑀢𑀲𑀼 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀲𑀼 𑀆𑀤𑀺𑀫𑁆𑀳𑀺 𑀯𑀸 𑀅𑀦𑁆𑀢𑁂 𑀯𑀸 𑀲𑀺𑀓𑁆𑀔𑀸𑀧𑀤𑀁 𑀪𑀺𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀲 𑀲𑀻𑀮𑀁 𑀧𑀭𑀺𑀬𑀦𑁆𑀢𑁂 𑀙𑀺𑀦𑁆𑀦𑀲𑀸𑀝𑀓𑁄 𑀯𑀺𑀬 𑀔𑀡𑁆𑀟𑀁 𑀦𑀸𑀫. 𑀬𑀲𑁆𑀲 𑀧𑀦 𑀯𑁂𑀫𑀚𑁆𑀛𑁂 𑀪𑀺𑀦𑁆𑀦𑀁, 𑀢𑀲𑁆𑀲 𑀫𑀚𑁆𑀛𑁂 𑀙𑀺𑀤𑁆𑀤𑀲𑀸𑀝𑀓𑁄 𑀯𑀺𑀬 𑀙𑀺𑀤𑁆𑀤𑀁 𑀦𑀸𑀫 𑀳𑁄𑀢𑀺. 𑀬𑀲𑁆𑀲 𑀧𑀦 𑀧𑀝𑀺𑀧𑀸𑀝𑀺𑀬𑀸 𑀤𑁆𑀯𑁂 𑀢𑀻𑀡𑀺 𑀪𑀺𑀦𑁆𑀦𑀸𑀦𑀺, 𑀢𑀲𑁆𑀲 𑀧𑀺𑀝𑁆𑀞𑀺𑀬𑀁 𑀯𑀸 𑀓𑀼𑀘𑁆𑀙𑀺𑀬𑀁 𑀯𑀸 𑀉𑀝𑁆𑀞𑀺𑀢𑁂𑀦 𑀯𑀺𑀲𑀪𑀸𑀕𑀯𑀡𑁆𑀡𑁂𑀦 𑀓𑀸𑀴𑀭𑀢𑁆𑀢𑀸𑀤𑀻𑀦𑀁 𑀅𑀜𑁆𑀜𑀢𑀭𑀯𑀡𑁆𑀡𑀸 𑀕𑀸𑀯𑀻 𑀯𑀺𑀬 𑀲𑀩𑀮𑀁 𑀦𑀸𑀫 𑀳𑁄𑀢𑀺. 𑀬𑀲𑁆𑀲 𑀧𑀦 𑀅𑀦𑁆𑀢𑀭𑀦𑁆𑀢𑀭𑀸 𑀯𑀺𑀲𑀪𑀸𑀕𑀩𑀺𑀦𑁆𑀤𑀼𑀘𑀺𑀢𑁆𑀭𑀸 𑀕𑀸𑀯𑀻 ¶ 𑀯𑀺𑀬 𑀓𑀫𑁆𑀫𑀸𑀲𑀁 𑀦𑀸𑀫 𑀳𑁄𑀢𑀺. 𑀬𑀲𑁆𑀲 𑀧𑀦 𑀲𑀩𑁆𑀩𑁂𑀦𑀲𑀩𑁆𑀩𑀁 𑀅𑀪𑀺𑀦𑁆𑀦𑀸𑀦𑀺, 𑀢𑀲𑁆𑀲 𑀢𑀸𑀦𑀺 𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀢𑀸𑀦𑀺 𑀧𑀦𑁂𑀢𑀸𑀦𑀺 𑀢𑀡𑁆𑀳𑀸𑀤𑀸𑀲𑀩𑁆𑀬𑀢𑁄 𑀫𑁄𑀘𑁂𑀢𑁆𑀯𑀸 𑀪𑀼𑀚𑀺𑀲𑁆𑀲𑀪𑀸𑀯𑀓𑀭𑀡𑀢𑁄 𑀪𑀼𑀚𑀺𑀲𑁆𑀲𑀸𑀦𑀺. 𑀩𑀼𑀤𑁆𑀥𑀸𑀤𑀻𑀳𑀺 𑀯𑀺𑀜𑁆𑀜𑀽𑀳𑀺 𑀧𑀲𑀢𑁆𑀣𑀢𑁆𑀢𑀸 𑀯𑀺𑀜𑁆𑀜𑀼𑀧𑀲𑀢𑁆𑀣𑀸𑀦𑀺, 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀅𑀧𑀭𑀸𑀫𑀝𑁆𑀞𑀢𑁆𑀢𑀸 𑁋 ‘‘𑀇𑀤𑀁 𑀦𑀸𑀫 𑀢𑁆𑀯𑀁 𑀆𑀧𑀦𑁆𑀦𑀧𑀼𑀩𑁆𑀩𑁄’’𑀢𑀺 𑀓𑁂𑀦𑀘𑀺 𑀧𑀭𑀸𑀫𑀝𑁆𑀞𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀘 𑀅𑀧𑀭𑀸𑀫𑀝𑁆𑀞𑀸𑀦𑀺, 𑀉𑀧𑀘𑀸𑀭𑀲𑀫𑀸𑀥𑀺𑀁 𑀯𑀸 𑀅𑀧𑁆𑀧𑀦𑀸𑀲𑀫𑀸𑀥𑀺𑀁 𑀯𑀸 𑀲𑀁𑀯𑀢𑁆𑀢𑀬𑀦𑁆𑀢𑀻𑀢𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀲𑀻𑀮𑀲𑀸𑀫𑀜𑁆𑀜𑀕𑀢𑀸 ¶ 𑀯𑀺𑀳𑀭𑀺𑀲𑁆𑀲𑀦𑁆𑀢𑀻𑀢𑀺 𑀢𑁂𑀲𑀼 𑀢𑁂𑀲𑀼 𑀤𑀺𑀲𑀸𑀪𑀸𑀕𑁂𑀲𑀼 𑀯𑀺𑀳𑀭𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀫𑀸𑀦𑀪𑀸𑀯𑀽𑀧𑀕𑀢𑀲𑀻𑀮𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺. 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀜𑁆𑀳𑀺 𑀲𑀻𑀮𑀁 𑀲𑀫𑀼𑀤𑁆𑀤𑀦𑁆𑀢𑀭𑁂𑀧𑀺 𑀤𑁂𑀯𑀮𑁄𑀓𑁂𑀧𑀺 𑀯𑀲𑀦𑁆𑀢𑀸𑀦𑀁 𑀅𑀜𑁆𑀜𑁂𑀲𑀁 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀲𑀻𑀮𑁂𑀦 𑀲𑀫𑀸𑀦𑀫𑁂𑀯 𑀳𑁄𑀢𑀺, 𑀦𑀢𑁆𑀣𑀺 𑀫𑀕𑁆𑀕𑀲𑀻𑀮𑁂 𑀦𑀸𑀦𑀢𑁆𑀢𑀁. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀬𑀸𑀬𑀁 ¶ 𑀤𑀺𑀝𑁆𑀞𑀻𑀢𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀅𑀭𑀺𑀬𑀸𑀢𑀺 𑀦𑀺𑀤𑁆𑀤𑁄𑀲𑀸. 𑀦𑀺𑀬𑁆𑀬𑀸𑀢𑀻𑀢𑀺 𑀦𑀺𑀬𑁆𑀬𑀸𑀦𑀺𑀓𑀸. 𑀢𑀓𑁆𑀓𑀭𑀲𑁆𑀲𑀸𑀢𑀺 𑀬𑁄 𑀢𑀣𑀸𑀓𑀸𑀭𑀻 𑀳𑁄𑀢𑀺. 𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑀢𑁆𑀣𑀁. 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑀸𑀢𑀺 𑀲𑀫𑀸𑀦𑀤𑀺𑀝𑁆𑀞𑀺𑀪𑀸𑀯𑀁 𑀉𑀧𑀕𑀢𑀸 𑀳𑀼𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺. 𑀯𑀼𑀤𑁆𑀥𑀺𑀬𑁂𑀯𑀸𑀢𑀺 𑀏𑀯𑀁 𑀯𑀺𑀳𑀭𑀦𑁆𑀢𑀸𑀦𑀁 𑀯𑀼𑀤𑁆𑀥𑀺𑀬𑁂𑀯 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻𑀢𑀺.

𑁧𑁪𑁨. 𑀏𑀢𑀤𑁂𑀯 𑀩𑀳𑀼𑀮𑀦𑁆𑀢𑀺 𑀆𑀲𑀦𑁆𑀦𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀢𑀸 𑀪𑀺𑀓𑁆𑀔𑀼 𑀑𑀯𑀤𑀦𑁆𑀢𑁄 𑀧𑀼𑀦𑀧𑁆𑀧𑀼𑀦𑀁 𑀏𑀢𑀁𑀬𑁂𑀯 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁄𑀢𑀺. 𑀇𑀢𑀺 𑀲𑀻𑀮𑀦𑁆𑀢𑀺 𑀏𑀯𑀁 𑀲𑀻𑀮𑀁, 𑀏𑀢𑁆𑀢𑀓𑀁 𑀲𑀻𑀮𑀁. 𑀏𑀢𑁆𑀣 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀲𑀻𑀮𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀲𑀫𑀸𑀥𑀺, 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀧𑀜𑁆𑀜𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀻𑀮𑀧𑀭𑀺𑀪𑀸𑀯𑀺𑀢𑁄𑀢𑀺 𑀆𑀤𑀻𑀲𑀼 𑀬𑀲𑁆𑀫𑀺𑀁 𑀲𑀻𑀮𑁂 𑀞𑀢𑁆𑀯𑀸𑀯 𑀫𑀕𑁆𑀕𑀲𑀫𑀸𑀥𑀺𑀁 𑀨𑀮𑀲𑀫𑀸𑀥𑀺𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺. 𑀏𑀲𑁄 𑀢𑁂𑀦 𑀲𑀻𑀮𑁂𑀦 𑀧𑀭𑀺𑀪𑀸𑀯𑀺𑀢𑁄 𑀫𑀳𑀧𑁆𑀨𑀮𑁄 𑀳𑁄𑀢𑀺, 𑀫𑀳𑀸𑀦𑀺𑀲𑀁𑀲𑁄. 𑀬𑀫𑁆𑀳𑀺 𑀲𑀫𑀸𑀥𑀺𑀫𑁆𑀳𑀺 𑀞𑀢𑁆𑀯𑀸 𑀫𑀕𑁆𑀕𑀧𑀜𑁆𑀜𑀁 𑀨𑀮𑀧𑀜𑁆𑀜𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀲𑀸 𑀢𑁂𑀦 𑀲𑀫𑀸𑀥𑀺𑀦𑀸 𑀧𑀭𑀺𑀪𑀸𑀯𑀺𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺, 𑀫𑀳𑀸𑀦𑀺𑀲𑀁𑀲𑀸. 𑀬𑀸𑀬 𑀧𑀜𑁆𑀜𑀸𑀬 𑀞𑀢𑁆𑀯𑀸 𑀫𑀕𑁆𑀕𑀘𑀺𑀢𑁆𑀢𑀁 𑀨𑀮𑀘𑀺𑀢𑁆𑀢𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀢𑀁 𑀢𑀸𑀬 𑀧𑀭𑀺𑀪𑀸𑀯𑀺𑀢𑀁 𑀲𑀫𑁆𑀫𑀤𑁂𑀯 𑀆𑀲𑀯𑁂𑀳𑀺 𑀯𑀺𑀫𑀼𑀘𑁆𑀘𑀢𑀺.

𑀬𑀣𑀸𑀪𑀺𑀭𑀦𑁆𑀢𑀦𑁆𑀢𑀺 𑀩𑀼𑀤𑁆𑀥𑀸𑀦𑀁 𑀅𑀦𑀪𑀺𑀭𑀢𑀺𑀧𑀭𑀺𑀢𑀲𑁆𑀲𑀺𑀢𑀁 𑀦𑀸𑀫 𑀦𑀢𑁆𑀣𑀺, 𑀬𑀣𑀸𑀭𑀼𑀘𑀺 𑀬𑀣𑀸𑀅𑀚𑁆𑀛𑀸𑀲𑀬𑀦𑁆𑀢𑀺 𑀧𑀦 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀬𑀸𑀫𑀸𑀢𑀺 𑀏𑀳𑀺 𑀬𑀸𑀫. ‘‘𑀅𑀬𑀸𑀫𑀸’’𑀢𑀺𑀧𑀺 𑀧𑀸𑀞𑁄, 𑀕𑀘𑁆𑀙𑀸𑀫𑀸𑀢𑀺 ¶ 𑀅𑀢𑁆𑀣𑁄. 𑀆𑀦𑀦𑁆𑀤𑀸𑀢𑀺 𑀪𑀕𑀯𑀸 𑀲𑀦𑁆𑀢𑀺𑀓𑀸𑀯𑀘𑀭𑀢𑁆𑀢𑀸 𑀣𑁂𑀭𑀁 𑀆𑀮𑀧𑀢𑀺. 𑀣𑁂𑀭𑁄 𑀧𑀦 𑁋 ‘‘𑀕𑀡𑁆𑀳𑀣𑀸𑀯𑀼𑀲𑁄 𑀧𑀢𑁆𑀢𑀘𑀻𑀯𑀭𑀸𑀦𑀺, 𑀪𑀕𑀯𑀸 𑀅𑀲𑀼𑀓𑀝𑁆𑀞𑀸𑀦𑀁 𑀕𑀦𑁆𑀢𑀼𑀓𑀸𑀫𑁄’’𑀢𑀺 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀢𑀺.

𑁧𑁪𑁪. 𑀅𑀫𑁆𑀩𑀮𑀝𑁆𑀞𑀺𑀓𑀸𑀕𑀫𑀦𑀁 𑀉𑀢𑁆𑀢𑀸𑀦𑀫𑁂𑀯. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄𑀢𑀺𑀆𑀤𑀺 (𑀤𑀻. 𑀦𑀺. 𑁩.𑁧𑁪𑁧) 𑀲𑀫𑁆𑀧𑀲𑀸𑀤𑀦𑀻𑀬𑁂 𑀯𑀺𑀢𑁆𑀣𑀸𑀭𑀺𑀢𑀁.

𑀤𑀼𑀲𑁆𑀲𑀻𑀮𑀆𑀤𑀻𑀦𑀯𑀯𑀡𑁆𑀡𑀦𑀸

𑁧𑁪𑁮. 𑀧𑀸𑀝𑀮𑀺𑀕𑀫𑀦𑁂 ¶ 𑀆𑀯𑀲𑀣𑀸𑀕𑀸𑀭𑀦𑁆𑀢𑀺 𑀆𑀕𑀦𑁆𑀢𑀼𑀓𑀸𑀦𑀁 𑀆𑀯𑀲𑀣𑀕𑁂𑀳𑀁. 𑀧𑀸𑀝𑀮𑀺𑀕𑀸𑀫𑁂 𑀓𑀺𑀭 𑀦𑀺𑀘𑁆𑀘𑀓𑀸𑀮𑀁 𑀤𑁆𑀯𑀺𑀦𑁆𑀦𑀁 𑀭𑀸𑀚𑀽𑀦𑀁 𑀲𑀳𑀸𑀬𑀓𑀸 𑀆𑀕𑀦𑁆𑀢𑁆𑀯𑀸 𑀓𑀼𑀮𑀸𑀦𑀺 𑀕𑁂𑀳𑀢𑁄 𑀦𑀻𑀳𑀭𑀺𑀢𑁆𑀯𑀸 𑀫𑀸𑀲𑀫𑁆𑀧𑀺 𑀅𑀟𑁆𑀠𑀫𑀸𑀲𑀫𑁆𑀧𑀺 𑀯𑀲𑀦𑁆𑀢𑀺. 𑀢𑁂 𑀫𑀦𑀼𑀲𑁆𑀲𑀸 𑀦𑀺𑀘𑁆𑀘𑀼𑀧𑀤𑁆𑀤𑀼𑀢𑀸 𑁋 ‘‘𑀏𑀢𑁂𑀲𑀁 𑀆𑀕𑀢𑀓𑀸𑀮𑁂 𑀯𑀲𑀦𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀕𑀭𑀫𑀚𑁆𑀛𑁂 𑀫𑀳𑀢𑀺𑀁 𑀲𑀸𑀮𑀁 𑀓𑀭𑀺𑀢𑁆𑀯𑀸 𑀢𑀲𑁆𑀲𑀸 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀪𑀡𑁆𑀟𑀧𑀝𑀺𑀲𑀸𑀫𑀦𑀝𑁆𑀞𑀸𑀦𑀁, 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀦𑀺𑀯𑀸𑀲𑀝𑁆𑀞𑀸𑀦𑀁 𑀅𑀓𑀁𑀲𑀼. 𑀢𑁂 𑁋 ‘‘𑀪𑀕𑀯𑀸 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸𑀯 𑁋 ‘‘𑀅𑀫𑁆𑀳𑁂𑀳𑀺 𑀕𑀦𑁆𑀢𑁆𑀯𑀸𑀧𑀺 𑀪𑀕𑀯𑀸 𑀆𑀦𑁂𑀢𑀩𑁆𑀩𑁄 𑀲𑀺𑀬𑀸, 𑀲𑁄 𑀲𑀬𑀫𑁂𑀯 𑀅𑀫𑁆𑀳𑀸𑀓𑀁 𑀯𑀲𑀦𑀝𑁆𑀞𑀸𑀦𑀁 𑀲𑀫𑁆𑀧𑀢𑁆𑀢𑁄, 𑀅𑀚𑁆𑀚 𑀪𑀕𑀯𑀦𑁆𑀢𑀁 𑀆𑀯𑀲𑀣𑁂 𑀫𑀗𑁆𑀕𑀮𑀁 𑀯𑀤𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀏𑀢𑀤𑀢𑁆𑀣𑀫𑁂𑀯 𑀉𑀧𑀲𑀗𑁆𑀓𑀫𑀦𑁆𑀢𑀸. 𑀢𑀲𑁆𑀫𑀸 𑀏𑀯𑀫𑀸𑀳𑀁𑀲𑀼. 𑀬𑁂𑀦 𑀆𑀯𑀲𑀣𑀸𑀕𑀸𑀭𑀦𑁆𑀢𑀺 𑀢𑁂 𑀓𑀺𑀭 ¶ 𑁋 ‘‘𑀩𑀼𑀤𑁆𑀥𑀸 𑀦𑀸𑀫 𑀅𑀭𑀜𑁆𑀜𑀚𑁆𑀛𑀸𑀲𑀬𑀸 𑀅𑀭𑀜𑁆𑀜𑀸𑀭𑀸𑀫𑀸 𑀅𑀦𑁆𑀢𑁄𑀕𑀸𑀫𑁂 𑀯𑀲𑀺𑀢𑀼𑀁 𑀇𑀘𑁆𑀙𑁂𑀬𑁆𑀬𑀼𑀁 𑀯𑀸 𑀦𑁄 𑀯𑀸’’𑀢𑀺 𑀪𑀕𑀯𑀢𑁄 𑀫𑀦𑀁 𑀅𑀚𑀸𑀦𑀦𑁆𑀢𑀸 𑀆𑀯𑀲𑀣𑀸𑀕𑀸𑀭𑀁 𑀅𑀧𑁆𑀧𑀝𑀺𑀚𑀕𑁆𑀕𑀺𑀢𑁆𑀯𑀸𑀯 𑀆𑀕𑀫𑀁𑀲𑀼. 𑀇𑀤𑀸𑀦𑀺 𑀪𑀕𑀯𑀢𑁄 𑀫𑀦𑀁 𑀜𑀢𑁆𑀯𑀸 𑀧𑀼𑀭𑁂𑀢𑀭𑀁 𑀕𑀦𑁆𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀸𑀢𑀺 𑀬𑁂𑀦𑀸𑀯𑀲𑀣𑀸𑀕𑀸𑀭𑀁, 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀲𑀩𑁆𑀩𑀲𑀦𑁆𑀣𑀭𑀺𑀦𑁆𑀢𑀺 𑀬𑀣𑀸 𑀲𑀩𑁆𑀩𑀁 𑀲𑀦𑁆𑀣𑀢𑀁 𑀳𑁄𑀢𑀺, 𑀏𑀯𑀁 𑀲𑀦𑁆𑀣𑀭𑀺𑀁.

𑁧𑁪𑁯. 𑀤𑀼𑀲𑁆𑀲𑀻𑀮𑁄𑀢𑀺 𑀅𑀲𑀻𑀮𑁄 𑀦𑀺𑀲𑁆𑀲𑀻𑀮𑁄. 𑀲𑀻𑀮𑀯𑀺𑀧𑀦𑁆𑀦𑁄𑀢𑀺 𑀯𑀺𑀧𑀦𑁆𑀦𑀲𑀻𑀮𑁄 𑀪𑀺𑀦𑁆𑀦𑀲𑀁𑀯𑀭𑁄. 𑀧𑀫𑀸𑀤𑀸𑀥𑀺𑀓𑀭𑀡𑀦𑁆𑀢𑀺 𑀧𑀫𑀸𑀤𑀓𑀸𑀭𑀡𑀸.

𑀇𑀤𑀜𑁆𑀘 𑀲𑀼𑀢𑁆𑀢𑀁 𑀕𑀳𑀝𑁆𑀞𑀸𑀦𑀁 𑀯𑀲𑁂𑀦 𑀆𑀕𑀢𑀁 𑀧𑀩𑁆𑀩𑀚𑀺𑀢𑀸𑀦𑀫𑁆𑀧𑀺 𑀧𑀦 𑀮𑀩𑁆𑀪𑀢𑁂𑀯. 𑀕𑀳𑀝𑁆𑀞𑁄 𑀳𑀺 𑀬𑁂𑀦 𑀬𑁂𑀦 𑀲𑀺𑀧𑁆𑀧𑀝𑁆𑀞𑀸𑀦𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀢𑀺 𑁋 𑀬𑀤𑀺 𑀓𑀲𑀺𑀬𑀸, 𑀬𑀤𑀺 𑀯𑀡𑀺𑀚𑁆𑀚𑀸𑀬, 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀲𑁂𑀦 𑀧𑀫𑀢𑁆𑀢𑁄 𑀢𑀁 𑀢𑀁 𑀬𑀣𑀸𑀓𑀸𑀮𑀁 𑀲𑀫𑁆𑀧𑀸𑀤𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀣𑀲𑁆𑀲 𑀫𑀽𑀮𑀫𑁆𑀧𑀺 𑀯𑀺𑀦𑀲𑁆𑀲𑀢𑀺. 𑀫𑀸𑀖𑀸𑀢𑀓𑀸𑀮𑁂 𑀧𑀸𑀡𑀸𑀢𑀺𑀧𑀸𑀢𑀁 𑀧𑀦 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀦𑀺 𑀘 𑀓𑀭𑁄𑀦𑁆𑀢𑁄 𑀤𑀡𑁆𑀟𑀯𑀲𑁂𑀦 𑀫𑀳𑀢𑀺𑀁 𑀪𑁄𑀕𑀚𑀸𑀦𑀺𑀁 𑀦𑀺𑀕𑀘𑁆𑀙𑀢𑀺. 𑀧𑀩𑁆𑀩𑀚𑀺𑀢𑁄 𑀤𑀼𑀲𑁆𑀲𑀻𑀮𑁄 𑀘 𑀧𑀫𑀸𑀤𑀓𑀸𑀭𑀡𑀸 𑀲𑀻𑀮𑀢𑁄 𑀩𑀼𑀤𑁆𑀥𑀯𑀘𑀦𑀢𑁄 𑀛𑀸𑀦𑀢𑁄 𑀲𑀢𑁆𑀢𑀅𑀭𑀺𑀬𑀥𑀦𑀢𑁄 𑀘 𑀚𑀸𑀦𑀺𑀁 𑀦𑀺𑀕𑀘𑁆𑀙𑀢𑀺.

𑀕𑀳𑀝𑁆𑀞𑀲𑁆𑀲 𑁋 ‘‘𑀅𑀲𑀼𑀓𑁄 𑀦𑀸𑀫 𑀅𑀲𑀼𑀓𑀓𑀼𑀮𑁂 𑀚𑀸𑀢𑁄 𑀤𑀼𑀲𑁆𑀲𑀻𑀮𑁄 𑀧𑀸𑀧𑀥𑀫𑁆𑀫𑁄 ¶ 𑀧𑀭𑀺𑀘𑁆𑀘𑀢𑁆𑀢𑀇𑀥𑀮𑁄𑀓𑀧𑀭𑀮𑁄𑀓𑁄 𑀲𑀮𑀸𑀓𑀪𑀢𑁆𑀢𑀫𑀢𑁆𑀢𑀫𑁆𑀧𑀺 𑀦 𑀤𑁂𑀢𑀻’’𑀢𑀺 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺. 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑁋 ‘‘𑀅𑀲𑀼𑀓𑁄 𑀦𑀸𑀫 𑀦𑀸𑀲𑀓𑁆𑀔𑀺 𑀲𑀻𑀮𑀁 𑀭𑀓𑁆𑀔𑀺𑀢𑀼𑀁, 𑀦 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀳𑁂𑀢𑀼𑀁, 𑀯𑁂𑀚𑁆𑀚𑀓𑀫𑁆𑀫𑀸𑀤𑀻𑀳𑀺 ¶ 𑀚𑀻𑀯𑀢𑀺, 𑀙𑀳𑀺 𑀅𑀕𑀸𑀭𑀯𑁂𑀳𑀺 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀏𑀯𑀁 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺.

𑀅𑀯𑀺𑀲𑀸𑀭𑀤𑁄𑀢𑀺 𑀕𑀳𑀝𑁆𑀞𑁄 𑀢𑀸𑀯 𑁋 ‘‘𑀅𑀯𑀲𑁆𑀲𑀁 𑀩𑀳𑀽𑀦𑀁 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑁂 𑀓𑁂𑀘𑀺 𑀫𑀫 𑀓𑀫𑁆𑀫𑀁 𑀚𑀸𑀦𑀺𑀲𑁆𑀲𑀦𑁆𑀢𑀺, 𑀅𑀣 𑀫𑀁 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀸, ‘‘𑀭𑀸𑀚𑀓𑀼𑀮𑀲𑁆𑀲 𑀯𑀸 𑀤𑀲𑁆𑀲𑀦𑁆𑀢𑀻’’𑀢𑀺 𑀲𑀪𑀬𑁄 𑀉𑀧𑀲𑀗𑁆𑀓𑀫𑀢𑀺, 𑀫𑀗𑁆𑀓𑀼𑀪𑀽𑀢𑁄 𑀧𑀢𑁆𑀢𑀓𑁆𑀔𑀦𑁆𑀥𑁄 𑀅𑀥𑁄𑀫𑀼𑀔𑁄 𑀅𑀗𑁆𑀕𑀼𑀮𑀺𑀓𑁂𑀦 𑀪𑀽𑀫𑀺𑀁 𑀓𑀲𑀦𑁆𑀢𑁄 𑀦𑀺𑀲𑀻𑀤𑀢𑀺, 𑀯𑀺𑀲𑀸𑀭𑀤𑁄 𑀳𑀼𑀢𑁆𑀯𑀸 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀧𑀩𑁆𑀩𑀚𑀺𑀢𑁄𑀧𑀺 𑁋 ‘‘𑀩𑀳𑀽 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀺𑀢𑀸, 𑀅𑀯𑀲𑁆𑀲𑀁 𑀓𑁄𑀘𑀺 𑀫𑀫 𑀓𑀫𑁆𑀫𑀁 𑀚𑀸𑀦𑀺𑀲𑁆𑀲𑀢𑀺, 𑀅𑀣 𑀫𑁂 𑀉𑀧𑁄𑀲𑀣𑀫𑁆𑀧𑀺 𑀧𑀯𑀸𑀭𑀡𑀫𑁆𑀧𑀺 𑀞𑀧𑁂𑀢𑁆𑀯𑀸 𑀲𑀸𑀫𑀜𑁆𑀜𑀢𑁄 𑀘𑀸𑀯𑁂𑀢𑁆𑀯𑀸 𑀦𑀺𑀓𑁆𑀓𑀟𑁆𑀠𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀪𑀬𑁄 𑀉𑀧𑀲𑀗𑁆𑀓𑀫𑀢𑀺, 𑀯𑀺𑀲𑀸𑀭𑀤𑁄 𑀳𑀼𑀢𑁆𑀯𑀸 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀏𑀓𑀘𑁆𑀘𑁄 𑀧𑀦 𑀤𑀼𑀲𑁆𑀲𑀻𑀮𑁄𑀧𑀺 𑀤𑀧𑁆𑀧𑀺𑀢𑁄 𑀯𑀺𑀬 𑀯𑀺𑀘𑀭𑀢𑀺, 𑀲𑁄𑀧𑀺 𑀅𑀚𑁆𑀛𑀸𑀲𑀬𑁂𑀦 𑀫𑀗𑁆𑀓𑀼 𑀳𑁄𑀢𑀺𑀬𑁂𑀯.

𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀗𑁆𑀓𑀭𑁄𑀢𑀻𑀢𑀺 𑀢𑀲𑁆𑀲 𑀳𑀺 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑀲𑁆𑀲 𑀤𑀼𑀲𑁆𑀲𑀻𑀮𑀓𑀫𑁆𑀫𑁂 𑀲𑀫𑀸𑀤𑀸𑀬 𑀧𑀯𑀢𑁆𑀢𑀺𑀢𑀝𑁆𑀞𑀸𑀦𑀁 𑀆𑀧𑀸𑀣𑀫𑀸𑀕𑀘𑁆𑀙𑀢𑀺, 𑀲𑁄 𑀉𑀫𑁆𑀫𑀻𑀮𑁂𑀢𑁆𑀯𑀸 𑀇𑀥𑀮𑁄𑀓𑀁 𑀧𑀲𑁆𑀲𑀢𑀺, 𑀦𑀺𑀫𑀻𑀮𑁂𑀢𑁆𑀯𑀸 𑀧𑀭𑀮𑁄𑀓𑀁 𑀧𑀲𑁆𑀲𑀢𑀺 ¶ , 𑀢𑀲𑁆𑀲 𑀘𑀢𑁆𑀢𑀸𑀭𑁄 𑀅𑀧𑀸𑀬𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀲𑀢𑁆𑀢𑀺𑀲𑀢𑁂𑀦 𑀲𑀻𑀲𑁂 𑀧𑀳𑀭𑀺𑀬𑀫𑀸𑀦𑁄 𑀯𑀺𑀬 𑀳𑁄𑀢𑀺. 𑀲𑁄 𑁋 ‘‘𑀯𑀸𑀭𑁂𑀣, 𑀯𑀸𑀭𑁂𑀣𑀸’’𑀢𑀺 𑀯𑀺𑀭𑀯𑀦𑁆𑀢𑁄 𑀫𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀁 𑀓𑀭𑁄𑀢𑀻’’𑀢𑀺. 𑀧𑀜𑁆𑀘𑀫𑀧𑀤𑀁 𑀉𑀢𑁆𑀢𑀸𑀦𑀫𑁂𑀯.

𑁧𑁫𑁦. 𑀆𑀦𑀺𑀲𑀁𑀲𑀓𑀣𑀸 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀸.

𑁧𑁫𑁧. 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬𑀸𑀢𑀺 𑀅𑀜𑁆𑀜𑀸𑀬 𑀧𑀸𑀴𑀺𑀫𑀼𑀢𑁆𑀢𑀓𑀸𑀬 𑀥𑀫𑁆𑀫𑀺𑀓𑀣𑀸𑀬 𑀘𑁂𑀯 𑀆𑀯𑀲𑀣𑀸𑀦𑀼𑀫𑁄𑀤𑀦𑀸𑀬 𑀘 𑀆𑀓𑀸𑀲𑀕𑀗𑁆𑀕𑀁 𑀑𑀢𑀸𑀭𑁂𑀦𑁆𑀢𑁄 𑀯𑀺𑀬 𑀬𑁄𑀚𑀦𑀧𑁆𑀧𑀫𑀸𑀡𑀁 𑀫𑀳𑀸𑀫𑀥𑀼𑀁 𑀧𑀻𑀴𑁂𑀢𑁆𑀯𑀸 𑀫𑀥𑀼𑀧𑀸𑀦𑀁 𑀧𑀸𑀬𑁂𑀦𑁆𑀢𑁄 𑀯𑀺𑀬 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺. 𑀅𑀪𑀺𑀓𑁆𑀓𑀦𑁆𑀢𑀸𑀢𑀺 𑀅𑀢𑀺𑀓𑁆𑀓𑀦𑁆𑀢𑀸 𑀔𑀻𑀡𑀸 𑀔𑀬𑀯𑀬𑀁 𑀉𑀧𑁂𑀢𑀸. 𑀲𑀼𑀜𑁆𑀜𑀸𑀕𑀸𑀭𑀦𑁆𑀢𑀺 𑀧𑀸𑀝𑀺𑀬𑁂𑀓𑁆𑀓𑀁 𑀲𑀼𑀜𑁆𑀜𑀸𑀕𑀸𑀭𑀁 𑀦𑀸𑀫 𑀦𑀢𑁆𑀣𑀺, 𑀢𑀢𑁆𑀣𑁂𑀯 𑀧𑀦 𑀏𑀓𑀧𑀲𑁆𑀲𑁂 𑀲𑀸𑀡𑀺𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑁋 ‘‘𑀇𑀥 𑀲𑀢𑁆𑀣𑀸 𑀯𑀺𑀲𑁆𑀲𑀫𑀺𑀲𑁆𑀲𑀢𑀻’’𑀢𑀺 𑀫𑀜𑁆𑀘𑀓𑀁 𑀧𑀜𑁆𑀜𑀧𑁂𑀲𑀼𑀁. 𑀪𑀕𑀯𑀸 𑁋 ‘‘𑀘𑀢𑀽𑀳𑀺𑀧𑀺 𑀇𑀭𑀺𑀬𑀸𑀧𑀣𑁂𑀳𑀺 𑀧𑀭𑀺𑀪𑀼𑀢𑁆𑀢𑀁 𑀏𑀢𑁂𑀲𑀁 𑀫𑀳𑀧𑁆𑀨𑀮𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀢𑁆𑀣 𑀲𑀻𑀳𑀲𑁂𑀬𑁆𑀬𑀁 ¶ 𑀓𑀧𑁆𑀧𑁂𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀲𑀼𑀜𑁆𑀜𑀸𑀕𑀸𑀭𑀁 𑀧𑀸𑀯𑀺𑀲𑀻’’𑀢𑀺.

𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑀫𑀸𑀧𑀦𑀯𑀡𑁆𑀡𑀦𑀸

𑁧𑁫𑁨. 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸𑀢𑀺 ¶ 𑀲𑀼𑀦𑀺𑀥𑁄 𑀘 𑀯𑀲𑁆𑀲𑀓𑀸𑀭𑁄 𑀘 𑀤𑁆𑀯𑁂 𑀩𑁆𑀭𑀸𑀳𑁆𑀫𑀡𑀸. 𑀫𑀕𑀥𑀫𑀳𑀸𑀫𑀢𑁆𑀢𑀸𑀢𑀺 𑀫𑀕𑀥𑀭𑀜𑁆𑀜𑁄 𑀫𑀳𑀸𑀫𑀢𑁆𑀢𑀸 𑀫𑀳𑀸𑀅𑀫𑀘𑁆𑀘𑀸, 𑀫𑀕𑀥𑀭𑀝𑁆𑀞𑁂 𑀯𑀸 𑀫𑀳𑀸𑀫𑀢𑁆𑀢𑀸 𑀫𑀳𑀢𑀺𑀬𑀸 𑀇𑀲𑁆𑀲𑀭𑀺𑀬𑀫𑀢𑁆𑀢𑀸𑀬 𑀲𑀫𑀦𑁆𑀦𑀸𑀕𑀢𑀸𑀢𑀺 𑀫𑀕𑀥𑀫𑀳𑀸𑀫𑀢𑁆𑀢𑀸. 𑀧𑀸𑀝𑀮𑀺𑀕𑀸𑀫𑁂 𑀦𑀕𑀭𑀦𑁆𑀢𑀺 𑀧𑀸𑀝𑀮𑀺𑀕𑀸𑀫𑀁 𑀦𑀕𑀭𑀁 𑀓𑀢𑁆𑀯𑀸 𑀫𑀸𑀧𑁂𑀦𑁆𑀢𑀺. 𑀯𑀚𑁆𑀚𑀻𑀦𑀁 𑀧𑀝𑀺𑀩𑀸𑀳𑀸𑀬𑀸𑀢𑀺 𑀯𑀚𑁆𑀚𑀺𑀭𑀸𑀚𑀓𑀼𑀮𑀸𑀦𑀁 𑀆𑀬𑀫𑀼𑀔𑀧𑀘𑁆𑀙𑀺𑀦𑁆𑀤𑀦𑀢𑁆𑀣𑀁. 𑀲𑀳𑀲𑁆𑀲𑁂𑀯𑀸𑀢𑀺 𑀏𑀓𑁂𑀓𑀯𑀕𑁆𑀕𑀯𑀲𑁂𑀦 𑀲𑀳𑀲𑁆𑀲𑀁 𑀲𑀳𑀲𑁆𑀲𑀁 𑀳𑀼𑀢𑁆𑀯𑀸. 𑀯𑀢𑁆𑀣𑀽𑀦𑀻𑀢𑀺 𑀖𑀭𑀯𑀢𑁆𑀣𑀽𑀦𑀺. 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀦𑁆𑀢𑀺 𑀭𑀜𑁆𑀜𑀜𑁆𑀘 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀜𑁆𑀘 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁 𑀯𑀢𑁆𑀣𑀼𑀯𑀺𑀚𑁆𑀚𑀸𑀧𑀸𑀞𑀓𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺. 𑀢𑁂 𑀓𑀺𑀭 𑀅𑀢𑁆𑀢𑀦𑁄 𑀲𑀺𑀧𑁆𑀧𑀸𑀦𑀼𑀪𑀸𑀯𑁂𑀦 𑀳𑁂𑀝𑁆𑀞𑀸 𑀧𑀣𑀯𑀺𑀬𑀁 𑀢𑀺𑀁𑀲𑀳𑀢𑁆𑀣𑀫𑀢𑁆𑀢𑁂 𑀞𑀸𑀦𑁂 𑁋 ‘‘𑀇𑀥 𑀦𑀸𑀕𑀕𑁆𑀕𑀸𑀳𑁄, 𑀇𑀥 𑀬𑀓𑁆𑀔𑀕𑁆𑀕𑀸𑀳𑁄, 𑀇𑀥 𑀪𑀽𑀢𑀕𑁆𑀕𑀸𑀳𑁄, 𑀧𑀸𑀲𑀸𑀡𑁄 𑀯𑀸 𑀔𑀸𑀡𑀼𑀓𑁄 𑀯𑀸 𑀅𑀢𑁆𑀣𑀻’’𑀢𑀺 𑀧𑀲𑁆𑀲𑀦𑁆𑀢𑀺. 𑀢𑁂 𑀢𑀤𑀸 𑀲𑀺𑀧𑁆𑀧𑀁 𑀚𑀧𑁆𑀧𑀺𑀢𑁆𑀯𑀸 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑀬𑀫𑀸𑀦𑀸 𑀯𑀺𑀬 𑀫𑀸𑀧𑁂𑀦𑁆𑀢𑀺. 𑀅𑀣𑀯𑀸 𑀦𑁂𑀲𑀁 𑀲𑀭𑀻𑀭𑁂 𑀤𑁂𑀯𑀢𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁 𑀘𑀺𑀢𑁆𑀢𑀁 𑀦𑀸𑀫𑁂𑀦𑁆𑀢𑀺. 𑀢𑀸 𑀘𑀢𑀽𑀲𑀼 𑀓𑁄𑀡𑁂𑀲𑀼 𑀔𑀸𑀡𑀼𑀓𑁂 𑀓𑁄𑀝𑁆𑀝𑁂𑀢𑁆𑀯𑀸 𑀯𑀢𑁆𑀣𑀼𑀫𑁆𑀳𑀺 𑀕𑀳𑀺𑀢𑀫𑀢𑁆𑀢𑁂 𑀧𑀝𑀺𑀯𑀺𑀕𑀘𑁆𑀙𑀦𑁆𑀢𑀺. 𑀲𑀤𑁆𑀥𑀸𑀦𑀁 𑀓𑀼𑀮𑀸𑀦𑀁 𑀲𑀤𑁆𑀥𑀸 𑀤𑁂𑀯𑀢𑀸 𑀢𑀣𑀸 𑀓𑀭𑁄𑀦𑁆𑀢𑀺, 𑀅𑀲𑁆𑀲𑀤𑁆𑀥𑀸𑀦𑀁 𑀓𑀼𑀮𑀸𑀦𑀁 𑀅𑀲𑁆𑀲𑀤𑁆𑀥𑀸 𑀤𑁂𑀯𑀢𑀸𑀯. 𑀓𑀺𑀁 𑀓𑀸𑀭𑀡𑀸? 𑀲𑀤𑁆𑀥𑀸𑀦𑀜𑁆𑀳𑀺 𑀏𑀯𑀁 𑀳𑁄𑀢𑀺 𑁋 ‘‘𑀇𑀥 𑀫𑀦𑀼𑀲𑁆𑀲𑀸 𑀦𑀺𑀯𑁂𑀲𑀦𑀁 𑀫𑀸𑀧𑁂𑀢𑁆𑀯𑀸 𑀧𑀞𑀫𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀫𑀗𑁆𑀕𑀮𑀁 𑀯𑀟𑁆𑀠𑀸𑀧𑁂𑀲𑁆𑀲𑀦𑁆𑀢𑀺. 𑀅𑀣 𑀫𑀬𑀁 𑀲𑀻𑀮𑀯𑀦𑁆𑀢𑀸𑀦𑀁 𑀤𑀲𑁆𑀲𑀦𑀁, 𑀥𑀫𑁆𑀫𑀓𑀣𑀁, 𑀧𑀜𑁆𑀳𑀸𑀯𑀺𑀲𑁆𑀲𑀚𑁆𑀚𑀦𑀁 ¶ , 𑀅𑀦𑀼𑀫𑁄𑀤𑀦𑀜𑁆𑀘 𑀲𑁄𑀢𑀼𑀁 𑀮𑀪𑀺𑀲𑁆𑀲𑀸𑀫, 𑀫𑀦𑀼𑀲𑁆𑀲𑀸 𑀤𑀸𑀦𑀁 𑀤𑀢𑁆𑀯𑀸 𑀅𑀫𑁆𑀳𑀸𑀓𑀁 𑀧𑀢𑁆𑀢𑀺𑀁 𑀤𑀲𑁆𑀲𑀦𑁆𑀢𑀻’’𑀢𑀺.

𑀢𑀸𑀯𑀢𑀺𑀁𑀲𑁂𑀳𑀻𑀢𑀺 𑀬𑀣𑀸 𑀳𑀺 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀏𑀓𑀁 𑀧𑀡𑁆𑀟𑀺𑀢𑀫𑀦𑀼𑀲𑁆𑀲𑀁, 𑀏𑀓𑀲𑁆𑀫𑀺𑀁 𑀯𑀸 𑀯𑀺𑀳𑀸𑀭𑁂 𑀏𑀓𑀁 𑀩𑀳𑀼𑀲𑁆𑀲𑀼𑀢𑀪𑀺𑀓𑁆𑀔𑀼𑀁 𑀉𑀧𑀸𑀤𑀸𑀬 𑁋 ‘‘𑀅𑀲𑀼𑀓𑀓𑀼𑀮𑁂 𑀫𑀦𑀼𑀲𑁆𑀲𑀸 𑀧𑀡𑁆𑀟𑀺𑀢𑀸, 𑀅𑀲𑀼𑀓𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀩𑀳𑀼𑀲𑁆𑀲𑀼𑀢𑀸’’𑀢𑀺 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀯𑀺𑀲𑁆𑀲𑀓𑀫𑁆𑀫𑀜𑁆𑀘 𑀤𑁂𑀯𑀧𑀼𑀢𑁆𑀢𑀁 𑀉𑀧𑀸𑀤𑀸𑀬 𑁋 ‘‘𑀢𑀸𑀯𑀢𑀺𑀁𑀲𑀸 𑀧𑀡𑁆𑀟𑀺𑀢𑀸’’𑀢𑀺 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄. 𑀢𑁂𑀦𑀸𑀳 𑁋 ‘‘𑀢𑀸𑀯𑀢𑀺𑀁𑀲𑁂𑀳𑀻’’𑀢𑀺. 𑀢𑀸𑀯𑀢𑀺𑀁𑀲𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸𑀧𑀺 𑀯𑀺𑀬 𑀫𑀸𑀧𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀬𑀸𑀯𑀢𑀸 𑀅𑀭𑀺𑀬𑀁 𑀆𑀬𑀢𑀦𑀦𑁆𑀢𑀺 𑀬𑀢𑁆𑀢𑀓𑀁 𑀅𑀭𑀺𑀬𑀓𑀫𑀦𑀼𑀲𑁆𑀲𑀸𑀦𑀁 𑀑𑀲𑀭𑀡𑀝𑁆𑀞𑀸𑀦𑀁 ¶ 𑀦𑀸𑀫 𑀅𑀢𑁆𑀣𑀺. 𑀬𑀸𑀯𑀢𑀸 𑀯𑀡𑀺𑀧𑁆𑀧𑀣𑁄𑀢𑀺 𑀬𑀢𑁆𑀢𑀓𑀁 𑀯𑀸𑀡𑀺𑀚𑀸𑀦𑀁 𑀆𑀪𑀢𑀪𑀡𑁆𑀟𑀲𑁆𑀲 ¶ 𑀭𑀸𑀲𑀺𑀯𑀲𑁂𑀦𑁂𑀯 𑀓𑀬𑀯𑀺𑀓𑁆𑀓𑀬𑀝𑁆𑀞𑀸𑀦𑀁 𑀦𑀸𑀫, 𑀯𑀸𑀡𑀺𑀚𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀯𑀸 𑀅𑀢𑁆𑀣𑀺. 𑀇𑀤𑀁 𑀅𑀕𑁆𑀕𑀦𑀕𑀭𑀦𑁆𑀢𑀺 𑀢𑁂𑀲𑀁 𑀅𑀭𑀺𑀬𑀸𑀬𑀢𑀦𑀯𑀡𑀺𑀧𑁆𑀧𑀣𑀸𑀦𑀁 𑀇𑀤𑀁 𑀅𑀕𑁆𑀕𑀦𑀕𑀭𑀁 𑀚𑁂𑀝𑁆𑀞𑀓𑀁 𑀧𑀸𑀫𑁄𑀓𑁆𑀔𑀁 𑀪𑀯𑀺𑀲𑁆𑀲𑀢𑀻𑀢𑀺. 𑀧𑀼𑀝𑀪𑁂𑀤𑀦𑀦𑁆𑀢𑀺 𑀪𑀡𑁆𑀟𑀧𑀼𑀝𑀪𑁂𑀤𑀦𑀝𑁆𑀞𑀸𑀦𑀁, 𑀪𑀡𑁆𑀟𑀪𑀡𑁆𑀟𑀺𑀓𑀸𑀦𑀁 𑀫𑁄𑀘𑀦𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀮𑀤𑁆𑀥𑀪𑀡𑁆𑀟𑀫𑁆𑀧𑀺 𑀳𑀺 𑀇𑀥𑁂𑀯 𑀮𑀪𑀺𑀲𑁆𑀲𑀦𑁆𑀢𑀺, 𑀅𑀜𑁆𑀜𑀢𑁆𑀣 𑀯𑀺𑀓𑁆𑀓𑀬𑁂𑀦 𑀅𑀕𑀘𑁆𑀙𑀦𑁆𑀢𑀫𑁆𑀧𑀺 𑀘 𑀇𑀥𑁂𑀯 𑀕𑀫𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀇𑀥𑁂𑀯 𑀧𑀼𑀝𑀁 𑀪𑀺𑀦𑁆𑀤𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀘𑀢𑀽𑀲𑀼 𑀳𑀺 𑀤𑁆𑀯𑀸𑀭𑁂𑀲𑀼 𑀘𑀢𑁆𑀢𑀸𑀭𑀺 𑀲𑀪𑀸𑀬𑀁 𑀏𑀓𑀦𑁆𑀢𑀺 𑀏𑀯𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀜𑁆𑀘𑀲𑀢𑀲𑀳𑀲𑁆𑀲𑀸𑀦𑀺 𑀉𑀝𑁆𑀞𑀳𑀺𑀲𑁆𑀲𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀅𑀕𑁆𑀕𑀺𑀢𑁄 𑀯𑀸𑀢𑀺𑀆𑀤𑀻𑀲𑀼 𑀘𑀓𑀸𑀭𑀢𑁆𑀣𑁄 𑀯𑀸-𑀲𑀤𑁆𑀤𑁄. 𑀅𑀕𑁆𑀕𑀺𑀦𑀸 𑀘 𑀉𑀤𑀓𑁂𑀦 𑀘 𑀫𑀺𑀣𑀼𑀪𑁂𑀤𑁂𑀦 𑀘 𑀦𑀲𑁆𑀲𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀓𑁄𑀝𑁆𑀞𑀸𑀲𑁄 𑀅𑀕𑁆𑀕𑀺𑀦𑀸 𑀦𑀲𑁆𑀲𑀺𑀲𑁆𑀲𑀢𑀺, 𑀦𑀺𑀩𑁆𑀩𑀸𑀧𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀏𑀓𑀁 𑀕𑀗𑁆𑀕𑀸 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀢𑀺. 𑀏𑀓𑁄 𑁋 ‘‘𑀇𑀫𑀺𑀦𑀸 𑀅𑀓𑀣𑀺𑀢𑀁 𑀅𑀫𑀼𑀲𑁆𑀲, 𑀅𑀫𑀼𑀦𑀸 𑀅𑀓𑀣𑀺𑀢𑀁 𑀇𑀫𑀲𑁆𑀲𑀸’’𑀢𑀺 𑀯𑀤𑀦𑁆𑀢𑀸𑀦𑀁 𑀧𑀺𑀲𑀼𑀡𑀯𑀸𑀘𑀸𑀦𑀁 𑀯𑀲𑁂𑀦 𑀪𑀺𑀦𑁆𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀅𑀜𑁆𑀜𑀫𑀜𑁆𑀜𑀪𑁂𑀤𑁂𑀦𑁂𑀯 𑀦𑀲𑁆𑀲𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀺 𑀯𑀢𑁆𑀯𑀸 𑀪𑀕𑀯𑀸 𑀧𑀘𑁆𑀘𑀽𑀲𑀓𑀸𑀮𑁂 𑀕𑀗𑁆𑀕𑀸𑀬 𑀢𑀻𑀭𑀁 𑀕𑀦𑁆𑀢𑁆𑀯𑀸 𑀓𑀢𑀫𑀼𑀔𑀥𑁄𑀯𑀦𑁄 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀁 𑀆𑀕𑀫𑀬𑀫𑀸𑀦𑁄 𑀦𑀺𑀲𑀻𑀤𑀺.

𑁧𑁫𑁩. 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸𑀧𑀺 𑁋 ‘‘𑀅𑀫𑁆𑀳𑀸𑀓𑀁 𑀭𑀸𑀚𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀉𑀧𑀝𑁆𑀞𑀸𑀓𑁄, 𑀲𑁄 𑀅𑀫𑁆𑀳𑁂 𑀧𑀼𑀘𑁆𑀙𑀺𑀲𑁆𑀲𑀢𑀺, ‘𑀲𑀢𑁆𑀣𑀸 𑀓𑀺𑀭 𑀧𑀸𑀝𑀮𑀺𑀕𑀸𑀫𑀁 𑀅𑀕𑀫𑀸𑀲𑀺, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀣, 𑀦 𑀉𑀧𑀲𑀗𑁆𑀓𑀫𑀺𑀢𑁆𑀣𑀸’𑀢𑀺. 𑀉𑀧𑀲𑀗𑁆𑀓𑀫𑀺𑀫𑁆𑀳𑀸𑀢𑀺 𑀘 𑀯𑀼𑀢𑁆𑀢𑁂 𑁋 ‘𑀦𑀺𑀫𑀦𑁆𑀢𑀬𑀺𑀢𑁆𑀣, 𑀦 𑀦𑀺𑀫𑀦𑁆𑀢𑀬𑀺𑀢𑁆𑀣𑀸’𑀢𑀺 𑀘 𑀧𑀼𑀘𑁆𑀙𑀺𑀲𑁆𑀲𑀢𑀺. 𑀦 𑀦𑀺𑀫𑀦𑁆𑀢𑀬𑀺𑀫𑁆𑀳𑀸𑀢𑀺 𑀘 𑀯𑀼𑀢𑁆𑀢𑁂 𑀅𑀫𑁆𑀳𑀸𑀓𑀁 𑀤𑁄𑀲𑀁 𑀆𑀭𑁄𑀧𑁂𑀢𑁆𑀯𑀸 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀢𑀺. 𑀇𑀤𑀁 𑀘𑀸𑀧𑀺 𑀫𑀬𑀁 𑀆𑀕𑀢𑀝𑁆𑀞𑀸𑀦𑁂 𑀦𑀕𑀭𑀁 𑀫𑀸𑀧𑁂𑀫, 𑀲𑀫𑀡𑀲𑁆𑀲 𑀔𑁄 𑀧𑀦 𑀕𑁄𑀢𑀫𑀲𑁆𑀲 𑀕𑀢𑀕𑀢𑀝𑁆𑀞𑀸𑀦𑁂 𑀓𑀸𑀴𑀓𑀡𑁆𑀡𑀺𑀲𑀢𑁆𑀢𑀸 ¶ 𑀧𑀝𑀺𑀓𑁆𑀓𑀫𑀦𑁆𑀢𑀺, 𑀢𑀁 𑀫𑀬𑀁 𑀦𑀕𑀭𑀫𑀗𑁆𑀕𑀮𑀁 𑀯𑀤𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀺𑀫𑀦𑁆𑀢𑀬𑀺𑀁𑀲𑀼. 𑀢𑀲𑁆𑀫𑀸 𑁋 ‘‘𑀅𑀣 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀧𑀼𑀩𑁆𑀩𑀡𑁆𑀳𑀲𑀫𑀬𑀦𑁆𑀢𑀺 𑀧𑀼𑀩𑁆𑀩𑀡𑁆𑀳𑀓𑀸𑀮𑁂. 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀕𑀸𑀫𑀧𑁆𑀧𑀯𑁂𑀲𑀦𑀦𑀻𑀳𑀸𑀭𑁂𑀦 𑀦𑀺𑀯𑀸𑀲𑀦𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 ¶ 𑀩𑀦𑁆𑀥𑀺𑀢𑁆𑀯𑀸. 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬𑀸𑀢𑀺 𑀧𑀢𑁆𑀢𑀜𑁆𑀘 𑀘𑀻𑀯𑀭𑀜𑁆𑀘 𑀆𑀤𑀺𑀬𑀺𑀢𑁆𑀯𑀸 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 𑀓𑀢𑁆𑀯𑀸.

𑀲𑀻𑀮𑀯𑀦𑁆𑀢𑁂𑀢𑁆𑀣𑀸𑀢𑀺 𑀲𑀻𑀮𑀯𑀦𑁆𑀢𑁂 𑀏𑀢𑁆𑀣. 𑀲𑀜𑁆𑀜𑀢𑁂𑀢𑀺 𑀓𑀸𑀬𑀯𑀸𑀘𑀸𑀫𑀦𑁂𑀳𑀺 𑀲𑀜𑁆𑀜𑀢𑁂.

𑀢𑀸𑀲𑀁 ¶ 𑀤𑀓𑁆𑀔𑀺𑀡𑀫𑀸𑀤𑀺𑀬𑁂𑀢𑀺 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀢𑀸𑀲𑀁 𑀖𑀭𑀤𑁂𑀯𑀢𑀸𑀦𑀁 𑀆𑀤𑀺𑀲𑁂𑀬𑁆𑀬, 𑀧𑀢𑁆𑀢𑀺𑀁 𑀤𑀤𑁂𑀬𑁆𑀬. 𑀧𑀽𑀚𑀺𑀢𑀸 𑀧𑀽𑀚𑀬𑀦𑁆𑀢𑀻𑀢𑀺 𑁋 ‘‘𑀇𑀫𑁂 𑀫𑀦𑀼𑀲𑁆𑀲𑀸 𑀅𑀫𑁆𑀳𑀸𑀓𑀁 𑀜𑀸𑀢𑀓𑀸𑀧𑀺 𑀦 𑀳𑁄𑀦𑁆𑀢𑀺, 𑀏𑀯𑀫𑁆𑀧𑀺 𑀦𑁄 𑀧𑀢𑁆𑀢𑀺𑀁 𑀤𑁂𑀦𑁆𑀢𑀻’’𑀢𑀺 𑀆𑀭𑀓𑁆𑀔𑀁 𑀲𑀼𑀲𑀁𑀯𑀺𑀳𑀺𑀢𑀁 𑀓𑀭𑁄𑀣𑀸𑀢𑀺 𑀲𑀼𑀝𑁆𑀞𑀼 𑀆𑀭𑀓𑁆𑀔𑀁 𑀓𑀭𑁄𑀦𑁆𑀢𑀺. 𑀫𑀸𑀦𑀺𑀢𑀸 𑀫𑀸𑀦𑀬𑀦𑁆𑀢𑀻𑀢𑀺 𑀓𑀸𑀮𑀸𑀦𑀼𑀓𑀸𑀮𑀁 𑀩𑀮𑀺𑀓𑀫𑁆𑀫𑀓𑀭𑀡𑁂𑀦 𑀫𑀸𑀦𑀺𑀢𑀸 ‘‘𑀏𑀢𑁂 𑀫𑀦𑀼𑀲𑁆𑀲𑀸 𑀅𑀫𑁆𑀳𑀸𑀓𑀁 𑀜𑀸𑀢𑀓𑀸𑀧𑀺 𑀦 𑀳𑁄𑀦𑁆𑀢𑀺, 𑀘𑀢𑀼𑀫𑀸𑀲𑀙𑀫𑀸𑀲𑀦𑁆𑀢𑀭𑁂 𑀦𑁄 𑀩𑀮𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀻’’𑀢𑀺 𑀫𑀸𑀦𑁂𑀦𑁆𑀢𑀺, 𑀫𑀸𑀦𑁂𑀦𑁆𑀢𑀺𑀬𑁄 𑀉𑀧𑁆𑀧𑀦𑁆𑀦𑀁 𑀧𑀭𑀺𑀲𑁆𑀲𑀬𑀁 𑀳𑀭𑀦𑁆𑀢𑀺.

𑀢𑀢𑁄 𑀦𑀦𑁆𑀢𑀺 𑀢𑀢𑁄 𑀦𑀁 𑀧𑀡𑁆𑀟𑀺𑀢𑀚𑀸𑀢𑀺𑀓𑀁 𑀫𑀦𑀼𑀲𑁆𑀲𑀁. 𑀑𑀭𑀲𑀦𑁆𑀢𑀺 𑀉𑀭𑁂 𑀞𑀧𑁂𑀢𑁆𑀯𑀸 𑀲𑀁𑀯𑀟𑁆𑀠𑀺𑀢𑀁, 𑀬𑀣𑀸 𑀫𑀸𑀢𑀸 𑀑𑀭𑀲𑀁 𑀧𑀼𑀢𑁆𑀢𑀁 𑀅𑀦𑀼𑀓𑀫𑁆𑀧𑀢𑀺, 𑀉𑀧𑁆𑀧𑀦𑁆𑀦𑀧𑀭𑀺𑀲𑁆𑀲𑀬𑀳𑀭𑀡𑀢𑁆𑀣𑀫𑁂𑀯 𑀢𑀲𑁆𑀲 𑀯𑀸𑀬𑀫𑀢𑀺, 𑀏𑀯𑀁 𑀅𑀦𑀼𑀓𑀫𑁆𑀧𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀪𑀤𑁆𑀭𑀸𑀦𑀺 𑀧𑀲𑁆𑀲𑀢𑀻𑀢𑀺 𑀲𑀼𑀦𑁆𑀤𑀭𑀸𑀦𑀺 𑀧𑀲𑁆𑀲𑀢𑀺.

𑁧𑁫𑁪. 𑀉𑀴𑀼𑀫𑁆𑀧𑀦𑁆𑀢𑀺 𑀧𑀸𑀭𑀕𑀫𑀦𑀢𑁆𑀣𑀸𑀬 𑀆𑀡𑀺𑀬𑁄 𑀓𑁄𑀝𑁆𑀝𑁂𑀢𑁆𑀯𑀸 𑀓𑀢𑀁. 𑀓𑀼𑀮𑁆𑀮𑀦𑁆𑀢𑀺 𑀯𑀮𑁆𑀮𑀺𑀆𑀤𑀻𑀳𑀺 𑀩𑀦𑁆𑀥𑀺𑀢𑁆𑀯𑀸 𑀓𑀢𑀁.

‘‘𑀬𑁂 𑀢𑀭𑀦𑁆𑀢𑀺 𑀅𑀡𑁆𑀡𑀯’’𑀦𑁆𑀢𑀺 𑀕𑀸𑀣𑀸𑀬 𑀅𑀡𑁆𑀡𑀯𑀦𑁆𑀢𑀺 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀬𑁄𑀚𑀦𑀫𑀢𑁆𑀢𑀁 𑀕𑀫𑁆𑀪𑀻𑀭𑀲𑁆𑀲 𑀘 𑀧𑀼𑀣𑀼𑀮𑀲𑁆𑀲 𑀘 𑀉𑀤𑀓𑀝𑁆𑀞𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀭𑀦𑁆𑀢𑀺 𑀇𑀥 𑀦𑀤𑀻 𑀅𑀥𑀺𑀧𑁆𑀧𑁂𑀢𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺, 𑀬𑁂 𑀕𑀫𑁆𑀪𑀻𑀭𑀯𑀺𑀢𑁆𑀣𑀢𑀁 𑀢𑀡𑁆𑀳𑀸𑀲𑀭𑀁 𑀢𑀭𑀦𑁆𑀢𑀺, 𑀢𑁂 𑀅𑀭𑀺𑀬𑀫𑀕𑁆𑀕𑀲𑀗𑁆𑀔𑀸𑀢𑀁 𑀲𑁂𑀢𑀼𑀁 𑀓𑀢𑁆𑀯𑀸𑀦. 𑀯𑀺𑀲𑀚𑁆𑀚 𑀧𑀮𑁆𑀮𑀮𑀸𑀦𑀺 𑀅𑀦𑀸𑀫𑀲𑀺𑀢𑁆𑀯𑀸 𑀉𑀤𑀓𑀪𑀭𑀺𑀢𑀸𑀦𑀺 𑀦𑀺𑀦𑁆𑀦𑀝𑁆𑀞𑀸𑀦𑀸𑀦𑀺. 𑀅𑀬𑀁 𑀧𑀦 𑀇𑀤𑀁 𑀅𑀧𑁆𑀧𑀫𑀢𑁆𑀢𑀓𑀁 𑀢𑀭𑀺𑀢𑀼𑀓𑀸𑀫𑁄𑀧𑀺 𑀓𑀼𑀮𑁆𑀮𑀜𑁆𑀳𑀺 𑀚𑀦𑁄 𑀧𑀩𑀦𑁆𑀥𑀢𑀺. 𑀩𑀼𑀤𑁆𑀥𑀸 𑀘 𑀩𑀼𑀤𑁆𑀥𑀲𑀸𑀯𑀓𑀸 𑀘 𑀯𑀺𑀦𑀸𑀬𑁂𑀯 𑀓𑀼𑀮𑁆𑀮𑁂𑀦 𑀢𑀺𑀡𑁆𑀡𑀸 𑀫𑁂𑀥𑀸𑀯𑀺𑀦𑁄 𑀚𑀦𑀸𑀢𑀺.

𑀧𑀞𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀭𑀺𑀬𑀲𑀘𑁆𑀘𑀓𑀣𑀸𑀯𑀡𑁆𑀡𑀦𑀸

𑁧𑁫𑁫. 𑀓𑁄𑀝𑀺𑀕𑀸𑀫𑁄𑀢𑀺 ¶ 𑀫𑀳𑀸𑀧𑀦𑀸𑀤𑀲𑁆𑀲 𑀧𑀸𑀲𑀸𑀤𑀓𑁄𑀝𑀺𑀬𑀁 𑀓𑀢𑀕𑀸𑀫𑁄. 𑀅𑀭𑀺𑀬𑀲𑀘𑁆𑀘𑀸𑀦𑀦𑁆𑀢𑀺 𑀅𑀭𑀺𑀬𑀪𑀸𑀯𑀓𑀭𑀸𑀦𑀁 𑀲𑀘𑁆𑀘𑀸𑀦𑀁. 𑀅𑀦𑀦𑀼𑀩𑁄𑀥𑀸𑀢𑀺 𑀅𑀩𑀼𑀚𑁆𑀛𑀦𑁂𑀦 𑀅𑀚𑀸𑀦𑀦𑁂𑀦. 𑀅𑀧𑁆𑀧𑀝𑀺𑀯𑁂𑀥𑀸𑀢𑀺 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁂𑀦. 𑀲𑀦𑁆𑀥𑀸𑀯𑀺𑀢𑀦𑁆𑀢𑀺 𑀪𑀯𑀢𑁄 𑀪𑀯𑀁 𑀕𑀫𑀦𑀯𑀲𑁂𑀦 ¶ 𑀲𑀦𑁆𑀥𑀸𑀯𑀺𑀢𑀁. 𑀲𑀁𑀲𑀭𑀺𑀢𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀕𑀫𑀦𑀸𑀕𑀫𑀦𑀯𑀲𑁂𑀦 𑀲𑀁𑀲𑀭𑀺𑀢𑀁. 𑀫𑀫𑀜𑁆𑀘𑁂𑀯 ¶ 𑀢𑀼𑀫𑁆𑀳𑀸𑀓𑀜𑁆𑀘𑀸𑀢𑀺 𑀫𑀬𑀸 𑀘 𑀢𑀼𑀫𑁆𑀳𑁂𑀳𑀺 𑀘. 𑀅𑀣 𑀯𑀸 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀦𑁆𑀢𑀺 𑀲𑀦𑁆𑀥𑀸𑀯𑀦𑀁 𑀲𑀁𑀲𑀭𑀡𑀁 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘 𑀅𑀳𑁄𑀲𑀻𑀢𑀺 𑀏𑀫𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸𑀢𑀺 𑀪𑀯𑀢𑁄 𑀪𑀯𑀁 𑀦𑀬𑀦𑀲𑀫𑀢𑁆𑀣𑀸 𑀢𑀡𑁆𑀳𑀸𑀭𑀚𑁆𑀚𑀼 𑀲𑀼𑀝𑁆𑀞𑀼 𑀳𑀢𑀸 𑀙𑀺𑀦𑁆𑀦𑀸 𑀅𑀧𑁆𑀧𑀯𑀢𑁆𑀢𑀺𑀓𑀢𑀸.

𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀯𑀡𑁆𑀡𑀦𑀸

𑁧𑁫𑁬. 𑀦𑀸𑀢𑀺𑀓𑀸𑀢𑀺 𑀏𑀓𑀁 𑀢𑀴𑀸𑀓𑀁 𑀦𑀺𑀲𑁆𑀲𑀸𑀬 𑀤𑁆𑀯𑀺𑀦𑁆𑀦𑀁 𑀘𑀽𑀴𑀧𑀺𑀢𑀼𑀫𑀳𑀸𑀧𑀺𑀢𑀼𑀧𑀼𑀢𑁆𑀢𑀸𑀦𑀁 𑀤𑁆𑀯𑁂 𑀕𑀸𑀫𑀸. 𑀦𑀸𑀢𑀺𑀓𑁂𑀢𑀺 𑀏𑀓𑀲𑁆𑀫𑀺𑀁 𑀜𑀸𑀢𑀺𑀕𑀸𑀫𑀓𑁂. 𑀕𑀺𑀜𑁆𑀚𑀓𑀸𑀯𑀲𑀣𑁂𑀢𑀺 𑀇𑀝𑁆𑀞𑀓𑀸𑀫𑀬𑁂 𑀆𑀯𑀲𑀣𑁂.

𑁧𑁫𑁭. 𑀑𑀭𑀫𑁆𑀪𑀸𑀕𑀺𑀬𑀸𑀦𑀦𑁆𑀢𑀺 𑀳𑁂𑀝𑁆𑀞𑀸𑀪𑀸𑀕𑀺𑀬𑀸𑀦𑀁, 𑀓𑀸𑀫𑀪𑀯𑁂𑀬𑁂𑀯 𑀧𑀝𑀺𑀲𑀦𑁆𑀥𑀺𑀕𑁆𑀕𑀸𑀳𑀸𑀧𑀓𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀑𑀭𑀦𑁆𑀢𑀺 𑀮𑀤𑁆𑀥𑀦𑀸𑀫𑁂𑀳𑀺 𑀯𑀸 𑀢𑀻𑀳𑀺 𑀫𑀕𑁆𑀕𑁂𑀳𑀺 𑀧𑀳𑀸𑀢𑀩𑁆𑀩𑀸𑀦𑀻𑀢𑀺𑀧𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀺. 𑀢𑀢𑁆𑀣 𑀓𑀸𑀫𑀘𑁆𑀙𑀦𑁆𑀤𑁄, 𑀩𑁆𑀬𑀸𑀧𑀸𑀤𑁄𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀲𑀫𑀸𑀧𑀢𑁆𑀢𑀺𑀬𑀸 𑀯𑀸 𑀅𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀺, 𑀫𑀕𑁆𑀕𑁂𑀦 𑀯𑀸 𑀅𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑀯𑀲𑁂𑀦 𑀉𑀤𑁆𑀥𑀁 𑀪𑀸𑀕𑀁 𑀭𑀽𑀧𑀪𑀯𑀜𑁆𑀘 𑀅𑀭𑀽𑀧𑀪𑀯𑀜𑁆𑀘 𑀕𑀦𑁆𑀢𑀼𑀁 𑀦 𑀤𑁂𑀦𑁆𑀢𑀺. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀻𑀦𑀺 𑀢𑀻𑀡𑀺 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀫𑁆𑀧𑀺 𑀆𑀦𑁂𑀢𑁆𑀯𑀸 𑀧𑀼𑀦 𑀇𑀥𑁂𑀯 𑀦𑀺𑀩𑁆𑀩𑀢𑁆𑀢𑀸𑀧𑁂𑀦𑁆𑀢𑀻𑀢𑀺 𑀲𑀩𑁆𑀩𑀸𑀦𑀺𑀧𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑁂𑀯. 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀦𑀸𑀕𑀫𑀦𑀲𑀪𑀸𑀯𑀸.

𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸𑀢𑀺 𑀏𑀢𑁆𑀣 𑀓𑀤𑀸𑀘𑀺 𑀓𑀭𑀳𑀘𑀺 𑀉𑀧𑁆𑀧𑀢𑁆𑀢𑀺𑀬𑀸 𑀘, 𑀧𑀭𑀺𑀬𑀼𑀝𑁆𑀞𑀸𑀦𑀫𑀦𑁆𑀤𑀢𑀸𑀬 𑀘𑀸𑀢𑀺 𑀤𑁆𑀯𑁂𑀥𑀸𑀧𑀺 𑀢𑀦𑀼𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀓𑀤𑀸𑀕𑀸𑀫𑀺𑀲𑁆𑀲 𑀳𑀺 𑀧𑀼𑀣𑀼𑀚𑁆𑀚𑀦𑀸𑀦𑀁 𑀯𑀺𑀬 𑀅𑀪𑀺𑀡𑁆𑀳𑀁 𑀭𑀸𑀕𑀸𑀤𑀬𑁄 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀓𑀤𑀸𑀘𑀺 𑀓𑀭𑀳𑀘𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀉𑀧𑁆𑀧𑀚𑁆𑀚𑀫𑀸𑀦𑀸 𑀘 𑀧𑀼𑀣𑀼𑀚𑁆𑀚𑀦𑀸𑀦𑀁 𑀯𑀺𑀬 𑀩𑀳𑀮𑀩𑀳𑀮𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀫𑀓𑁆𑀔𑀺𑀓𑀸𑀧𑀢𑁆𑀢𑀁 𑀯𑀺𑀬 𑀢𑀦𑀼𑀓𑀢𑀦𑀼𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀤𑀻𑀖𑀪𑀸𑀡𑀓𑀢𑀺𑀧𑀺𑀝𑀓𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀬𑀲𑁆𑀫𑀸 𑀲𑀓𑀤𑀸𑀕𑀸𑀫𑀺𑀲𑁆𑀲 𑀧𑀼𑀢𑁆𑀢𑀥𑀻𑀢𑀭𑁄 𑀳𑁄𑀦𑁆𑀢𑀺, 𑀑𑀭𑁄𑀥𑀸 𑀘 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀩𑀳𑀮𑀸 𑀓𑀺𑀮𑁂𑀲𑀸. 𑀇𑀤𑀁 𑀧𑀦 𑀪𑀯𑀢𑀦𑀼𑀓𑀯𑀲𑁂𑀦 𑀓𑀣𑀺𑀢’’𑀦𑁆𑀢𑀺. 𑀢𑀁 𑀅𑀝𑁆𑀞𑀓𑀣𑀸𑀬𑀁 𑁋 ‘‘𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀢𑁆𑀢𑀪𑀯𑁂 𑀞𑀧𑁂𑀢𑁆𑀯𑀸 𑀅𑀝𑁆𑀞𑀫𑁂 𑀪𑀯𑁂 𑀪𑀯𑀢𑀦𑀼𑀓𑀁 𑀦𑀢𑁆𑀣𑀺. 𑀲𑀓𑀤𑀸𑀕𑀸𑀫𑀺𑀲𑁆𑀲 𑀤𑁆𑀯𑁂 𑀪𑀯𑁂 𑀞𑀧𑁂𑀢𑁆𑀯𑀸 𑀧𑀜𑁆𑀘𑀲𑀼 𑀪𑀯𑁂𑀲𑀼 𑀪𑀯𑀢𑀦𑀼𑀓𑀁 𑀦𑀢𑁆𑀣𑀺. 𑀅𑀦𑀸𑀕𑀸𑀫𑀺𑀲𑁆𑀲 𑀭𑀽𑀧𑀸𑀭𑀽𑀧𑀪𑀯𑁂 𑀞𑀧𑁂𑀢𑁆𑀯𑀸 𑀓𑀸𑀫𑀪𑀯𑁂 𑀪𑀯𑀢𑀦𑀼𑀓𑀁 𑀦𑀢𑁆𑀣𑀺. 𑀔𑀻𑀡𑀸𑀲𑀯𑀲𑁆𑀲 𑀓𑀺𑀲𑁆𑀫𑀺𑀜𑁆𑀘𑀺 𑀪𑀯𑁂 𑀪𑀯𑀢𑀦𑀼𑀓𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺.

𑀇𑀫𑀁 ¶ 𑀮𑁄𑀓𑀦𑁆𑀢𑀺 𑀇𑀫𑀁 𑀓𑀸𑀫𑀸𑀯𑀘𑀭𑀮𑁄𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀬𑀜𑁆𑀘𑁂𑀢𑁆𑀣 ¶ 𑀅𑀥𑀺𑀧𑁆𑀧𑀸𑀬𑁄, 𑀲𑀘𑁂 𑀳𑀺 𑀫𑀦𑀼𑀲𑁆𑀲𑁂𑀲𑀼 𑀲𑀓𑀤𑀸𑀕𑀸𑀫𑀺𑀨𑀮𑀁 𑀧𑀢𑁆𑀢𑁄 𑀤𑁂𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 ¶ 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀅𑀲𑀓𑁆𑀓𑁄𑀦𑁆𑀢𑁄 𑀧𑀦 𑀅𑀯𑀲𑁆𑀲𑀁 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀲𑀘𑁆𑀙𑀺𑀓𑀭𑁄𑀢𑀺. 𑀤𑁂𑀯𑁂𑀲𑀼 𑀲𑀓𑀤𑀸𑀕𑀸𑀫𑀺𑀨𑀮𑀁 𑀧𑀢𑁆𑀢𑁄𑀧𑀺 𑀲𑀘𑁂 𑀫𑀦𑀼𑀲𑁆𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀅𑀲𑀓𑁆𑀓𑁄𑀦𑁆𑀢𑁄 𑀧𑀦 𑀅𑀯𑀲𑁆𑀲𑀁 𑀤𑁂𑀯𑀮𑁄𑀓𑀁 𑀕𑀦𑁆𑀢𑁆𑀯𑀸 𑀲𑀘𑁆𑀙𑀺𑀓𑀭𑁄𑀢𑀻𑀢𑀺.

𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄𑀢𑀺 𑀏𑀢𑁆𑀣 𑀯𑀺𑀦𑀺𑀧𑀢𑀦𑀁 𑀯𑀺𑀦𑀺𑀧𑀸𑀢𑁄, 𑀦𑀸𑀲𑁆𑀲 𑀯𑀺𑀦𑀺𑀧𑀸𑀢𑁄 𑀥𑀫𑁆𑀫𑁄𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄. 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀅𑀯𑀺𑀦𑀺𑀧𑀸𑀢𑀲𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀦𑀺𑀬𑀢𑁄𑀢𑀺 𑀥𑀫𑁆𑀫𑀦𑀺𑀬𑀸𑀫𑁂𑀦 𑀦𑀺𑀬𑀢𑁄. 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄𑀢𑀺 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀲𑀗𑁆𑀔𑀸𑀢𑀸 𑀲𑀫𑁆𑀩𑁄𑀥𑀺 𑀧𑀭𑀁 𑀅𑀬𑀦𑀁 𑀅𑀲𑁆𑀲 𑀕𑀢𑀺 𑀧𑀝𑀺𑀲𑀭𑀡𑀁 𑀅𑀯𑀲𑁆𑀲𑀁 𑀧𑀢𑁆𑀢𑀩𑁆𑀩𑀸𑀢𑀺 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄.

𑀥𑀫𑁆𑀫𑀸𑀤𑀸𑀲𑀥𑀫𑁆𑀫𑀧𑀭𑀺𑀬𑀸𑀬𑀯𑀡𑁆𑀡𑀦𑀸

𑁧𑁫𑁮. 𑀯𑀺𑀳𑁂𑀲𑀸𑀢𑀺 𑀢𑁂𑀲𑀁 𑀢𑁂𑀲𑀁 𑀜𑀸𑀡𑀕𑀢𑀺𑀁 𑀜𑀸𑀡𑀽𑀧𑀧𑀢𑁆𑀢𑀺𑀁 𑀜𑀸𑀡𑀸𑀪𑀺𑀲𑀫𑁆𑀧𑀭𑀸𑀬𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀓𑀸𑀬𑀓𑀺𑀮𑀫𑀣𑁄𑀯 𑀏𑀲, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲𑀸𑀢𑀺 𑀤𑀻𑀧𑁂𑀢𑀺, 𑀘𑀺𑀢𑁆𑀢𑀯𑀺𑀳𑁂𑀲𑀸 𑀧𑀦 𑀩𑀼𑀤𑁆𑀥𑀸𑀦𑀁 𑀦𑀢𑁆𑀣𑀺. 𑀥𑀫𑁆𑀫𑀸𑀤𑀸𑀲𑀦𑁆𑀢𑀺 𑀥𑀫𑁆𑀫𑀫𑀬𑀁 𑀆𑀤𑀸𑀲𑀁. 𑀬𑁂𑀦𑀸𑀢𑀺 𑀬𑁂𑀦 𑀥𑀫𑁆𑀫𑀸𑀤𑀸𑀲𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀔𑀻𑀡𑀸𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑁄𑀢𑀺 𑀇𑀤𑀁 𑀦𑀺𑀭𑀬𑀸𑀤𑀻𑀦𑀁𑀬𑁂𑀯 𑀯𑁂𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀦𑀺𑀭𑀬𑀸𑀤𑀬𑁄 𑀳𑀺 𑀯𑀟𑁆𑀠𑀺𑀲𑀗𑁆𑀔𑀸𑀢𑀢𑁄 𑀅𑀬𑀢𑁄 𑀅𑀧𑁂𑀢𑀢𑁆𑀢𑀸 𑀅𑀧𑀸𑀬𑀸. 𑀤𑀼𑀓𑁆𑀔𑀲𑁆𑀲 𑀕𑀢𑀺 𑀧𑀝𑀺𑀲𑀭𑀡𑀦𑁆𑀢𑀺 𑀤𑀼𑀕𑁆𑀕𑀢𑀺. 𑀬𑁂 𑀤𑀼𑀓𑁆𑀓𑀝𑀓𑀸𑀭𑀺𑀦𑁄, 𑀢𑁂 𑀏𑀢𑁆𑀣 𑀯𑀺𑀯𑀲𑀸 𑀦𑀺𑀧𑀢𑀦𑁆𑀢𑀻𑀢𑀺 𑀯𑀺𑀦𑀺𑀧𑀸𑀢𑀸.

𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦𑀸𑀢𑀺 𑀩𑀼𑀤𑁆𑀥𑀕𑀼𑀡𑀸𑀦𑀁 𑀬𑀣𑀸𑀪𑀽𑀢𑀢𑁄 𑀜𑀸𑀢𑀢𑁆𑀢𑀸 𑀅𑀘𑀮𑁂𑀦 𑀅𑀘𑁆𑀘𑀼𑀢𑁂𑀦 𑀧𑀲𑀸𑀤𑁂𑀦. 𑀉𑀧𑀭𑀺 𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺𑀧𑀺 𑀲𑁄 𑀪𑀕𑀯𑀸𑀢𑀺𑀆𑀤𑀻𑀦𑀁 𑀧𑀦 𑀯𑀺𑀢𑁆𑀣𑀸𑀭𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑁄.

𑀅𑀭𑀺𑀬𑀓𑀦𑁆𑀢𑁂𑀳𑀻𑀢𑀺 𑀅𑀭𑀺𑀬𑀸𑀦𑀁 𑀓𑀦𑁆𑀢𑁂𑀳𑀺 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺. 𑀧𑀜𑁆𑀘 𑀲𑀻𑀮𑀸𑀦𑀺 𑀳𑀺 𑀅𑀭𑀺𑀬𑀲𑀸𑀯𑀓𑀸𑀦𑀁 𑀓𑀦𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀪𑀯𑀦𑁆𑀢𑀭𑁂𑀧𑀺 𑀅𑀯𑀺𑀚𑀳𑀺𑀢𑀩𑁆𑀩𑀢𑁄. 𑀢𑀸𑀦𑀺 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀲𑀩𑁆𑀩𑁄𑀧𑀺 𑀧𑀦𑁂𑀢𑁆𑀣 𑀲𑀁𑀯𑀭𑁄 𑀮𑀩𑁆𑀪𑀢𑀺𑀬𑁂𑀯.

𑀲𑁄𑀢𑀸𑀧𑀦𑁆𑀦𑁄𑀳𑀫𑀲𑁆𑀫𑀻𑀢𑀺 𑀇𑀤𑀁 𑀤𑁂𑀲𑀦𑀸𑀲𑀻𑀲𑀫𑁂𑀯. 𑀲𑀓𑀤𑀸𑀕𑀸𑀫𑀺𑀆𑀤𑀬𑁄𑀧𑀺 𑀧𑀦 𑀲𑀓𑀤𑀸𑀕𑀸𑀫𑀻𑀳𑀫𑀲𑁆𑀫𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀩𑁆𑀬𑀸𑀓𑀭𑁄𑀦𑁆𑀢𑀺 𑀬𑁂𑀯𑀸𑀢𑀺. 𑀲𑀩𑁆𑀩𑁂𑀲𑀫𑁆𑀧𑀺 𑀳𑀺 𑀲𑀺𑀓𑁆𑀔𑀸𑀧𑀤𑀸𑀯𑀺𑀭𑁄𑀥𑁂𑀦 𑀬𑀼𑀢𑁆𑀢𑀝𑁆𑀞𑀸𑀦𑁂 𑀩𑁆𑀬𑀸𑀓𑀭𑀡𑀁 𑀅𑀦𑀼𑀜𑁆𑀜𑀸𑀢𑀫𑁂𑀯 𑀳𑁄𑀢𑀺.

𑀅𑀫𑁆𑀩𑀧𑀸𑀮𑀻𑀕𑀡𑀺𑀓𑀸𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁬𑁧. 𑀯𑁂𑀲𑀸𑀮𑀺𑀬𑀁 ¶ ¶ 𑀯𑀺𑀳𑀭𑀢𑀻𑀢𑀺 𑀏𑀢𑁆𑀣 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀻 𑀇𑀤𑁆𑀥𑀸 𑀘𑁂𑀯 𑀳𑁄𑀢𑀺 𑀨𑀻𑀢𑀸𑀘𑀸𑀢𑀺𑀆𑀤𑀺𑀦𑀸 𑀔𑀦𑁆𑀥𑀓𑁂 𑀯𑀼𑀢𑁆𑀢𑀦𑀬𑁂𑀦 ¶ 𑀯𑁂𑀲𑀸𑀮𑀺𑀬𑀸 𑀲𑀫𑁆𑀧𑀦𑁆𑀦𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀫𑁆𑀩𑀧𑀸𑀮𑀺𑀯𑀦𑁂𑀢𑀺 𑀅𑀫𑁆𑀩𑀧𑀸𑀮𑀺𑀬𑀸 𑀕𑀡𑀺𑀓𑀸𑀬 𑀉𑀬𑁆𑀬𑀸𑀦𑀪𑀽𑀢𑁂 𑀅𑀫𑁆𑀩𑀯𑀦𑁂. 𑀲𑀢𑁄 𑀪𑀺𑀓𑁆𑀔𑀯𑁂𑀢𑀺 𑀪𑀕𑀯𑀸 𑀅𑀫𑁆𑀩𑀧𑀸𑀮𑀺𑀤𑀲𑁆𑀲𑀦𑁂 𑀲𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑁆𑀣𑀁 𑀯𑀺𑀲𑁂𑀲𑀢𑁄 𑀇𑀥 𑀲𑀢𑀺𑀧𑀝𑁆𑀞𑀸𑀦𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀲𑀭𑀢𑀻𑀢𑀺 𑀲𑀢𑁄. 𑀲𑀫𑁆𑀧𑀚𑀸𑀦𑀸𑀢𑀻𑀢𑀺 𑀲𑀫𑁆𑀧𑀚𑀸𑀦𑁄. 𑀲𑀢𑀺𑀬𑀸 𑀘 𑀲𑀫𑁆𑀧𑀚𑀜𑁆𑀜𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸 𑀯𑀺𑀳𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂 𑀯𑀓𑁆𑀔𑀸𑀫.

𑀦𑀻𑀮𑀸𑀢𑀺 𑀇𑀤𑀁 𑀲𑀩𑁆𑀩𑀲𑀗𑁆𑀕𑀸𑀳𑀓𑀁. 𑀦𑀻𑀮𑀯𑀡𑁆𑀡𑀸𑀢𑀺𑀆𑀤𑀺 𑀢𑀲𑁆𑀲𑁂𑀯 𑀯𑀺𑀪𑀸𑀕𑀤𑀲𑁆𑀲𑀦𑀁. 𑀢𑀢𑁆𑀣 𑀦 𑀢𑁂𑀲𑀁 𑀧𑀓𑀢𑀺𑀯𑀡𑁆𑀡𑁄 𑀦𑀻𑀮𑁄, 𑀦𑀻𑀮𑀯𑀺𑀮𑁂𑀧𑀦𑀯𑀺𑀮𑀺𑀢𑁆𑀢𑀢𑁆𑀢𑀸 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀦𑀻𑀮𑀯𑀢𑁆𑀣𑀸𑀢𑀺 𑀧𑀝𑀤𑀼𑀓𑀽𑀮𑀓𑁄𑀲𑁂𑀬𑁆𑀬𑀸𑀤𑀻𑀦𑀺𑀧𑀺 𑀢𑁂𑀲𑀁 𑀦𑀻𑀮𑀸𑀦𑁂𑀯 𑀳𑁄𑀦𑁆𑀢𑀺. 𑀦𑀻𑀮𑀸𑀮𑀗𑁆𑀓𑀸𑀭𑀸𑀢𑀺 𑀦𑀻𑀮𑀫𑀡𑀻𑀳𑀺 𑀦𑀻𑀮𑀧𑀼𑀧𑁆𑀨𑁂𑀳𑀺 𑀅𑀮𑀗𑁆𑀓𑀢𑀸, 𑀭𑀣𑀸𑀧𑀺 𑀢𑁂𑀲𑀁 𑀦𑀻𑀮𑀫𑀡𑀺𑀔𑀘𑀺𑀢𑀸 𑀦𑀻𑀮𑀯𑀢𑁆𑀣𑀧𑀭𑀺𑀓𑁆𑀔𑀺𑀢𑁆𑀢𑀸 𑀦𑀻𑀮𑀤𑁆𑀥𑀚𑀸 𑀦𑀻𑀮𑀯𑀫𑁆𑀫𑀺𑀓𑁂𑀳𑀺 𑀦𑀻𑀮𑀸𑀪𑀭𑀡𑁂𑀳𑀺 𑀦𑀻𑀮𑀅𑀲𑁆𑀲𑁂𑀳𑀺 𑀬𑀼𑀢𑁆𑀢𑀸, 𑀧𑀢𑁄𑀤𑀮𑀝𑁆𑀞𑀺𑀬𑁄𑀧𑀺 𑀦𑀻𑀮𑀸 𑀬𑁂𑀯𑀸𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀺𑀯𑀝𑁆𑀝𑁂𑀲𑀻𑀢𑀺 𑀧𑀳𑀭𑀺. 𑀓𑀺𑀁 𑀚𑁂 𑀅𑀫𑁆𑀩𑀧𑀸𑀮𑀻𑀢𑀺 𑀚𑁂𑀢𑀺 𑀆𑀮𑀧𑀦𑀯𑀘𑀦𑀁, 𑀪𑁄𑀢𑀺 𑀅𑀫𑁆𑀩𑀧𑀸𑀮𑀺, 𑀓𑀺𑀁 𑀓𑀸𑀭𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀓𑀺𑀜𑁆𑀘𑀸’’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄. 𑀲𑀸𑀳𑀸𑀭𑀦𑁆𑀢𑀺 𑀲𑀚𑀦𑀧𑀤𑀁. 𑀅𑀗𑁆𑀕𑀼𑀮𑀺𑀁 𑀨𑁄𑀝𑁂𑀲𑀼𑀦𑁆𑀢𑀺 𑀅𑀗𑁆𑀕𑀼𑀮𑀺𑀁 𑀘𑀸𑀮𑁂𑀲𑀼𑀁. 𑀅𑀫𑁆𑀩𑀓𑀸𑀬𑀸𑀢𑀺 𑀇𑀢𑁆𑀣𑀺𑀓𑀸𑀬.

𑀬𑁂𑀲𑀦𑁆𑀢𑀺 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀬𑁂𑀳𑀺 𑀅𑀤𑀺𑀝𑁆𑀞𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀑𑀮𑁄𑀓𑁂𑀣𑀸𑀢𑀺 𑀧𑀲𑁆𑀲𑀣. 𑀅𑀯𑀮𑁄𑀓𑁂𑀣𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀲𑁆𑀲𑀣. 𑀉𑀧𑀲𑀁𑀳𑀭𑀣𑀸𑀢𑀺 𑀉𑀧𑀦𑁂𑀣. 𑀇𑀫𑀁 𑀮𑀺𑀘𑁆𑀙𑀯𑀺𑀧𑀭𑀺𑀲𑀁 𑀢𑀼𑀫𑁆𑀳𑀸𑀓𑀁 𑀘𑀺𑀢𑁆𑀢𑁂𑀦 𑀢𑀸𑀯𑀢𑀺𑀁𑀲𑀲𑀤𑀺𑀲𑀁 𑀉𑀧𑀲𑀁𑀳𑀭𑀣 𑀉𑀧𑀦𑁂𑀣 𑀅𑀮𑁆𑀮𑀻𑀬𑀸𑀧𑁂𑀣. 𑀬𑀣𑁂𑀯 𑀢𑀸𑀯𑀢𑀺𑀁𑀲𑀸 𑀅𑀪𑀺𑀭𑀽𑀧𑀸 𑀧𑀸𑀲𑀸𑀤𑀺𑀓𑀸 𑀦𑀻𑀮𑀸𑀤𑀺𑀦𑀸𑀦𑀸𑀯𑀡𑁆𑀡𑀸, 𑀏𑀯𑀫𑀺𑀫𑁂 𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑁄𑀧𑀻𑀢𑀺 𑀢𑀸𑀯𑀢𑀺𑀁𑀲𑁂𑀳𑀺 𑀲𑀫𑀓𑁂 𑀓𑀢𑁆𑀯𑀸 𑀧𑀲𑁆𑀲𑀣𑀸𑀢𑀺 𑀅𑀢𑁆𑀣𑁄.

𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀅𑀦𑁂𑀓𑀲𑀢𑁂𑀳𑀺 𑀲𑀼𑀢𑁆𑀢𑁂𑀳𑀺 𑀘𑀓𑁆𑀔𑀸𑀤𑀻𑀦𑀁 𑀭𑀽𑀧𑀸𑀤𑀻𑀲𑀼 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀁 𑀧𑀝𑀺𑀲𑁂𑀥𑁂𑀢𑁆𑀯𑀸 𑀇𑀥 𑀫𑀳𑀦𑁆𑀢𑁂𑀦 𑀉𑀲𑁆𑀲𑀸𑀳𑁂𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁂 𑀉𑀬𑁆𑀬𑁄𑀚𑁂𑀢𑀻𑀢𑀺? 𑀳𑀺𑀢𑀓𑀸𑀫𑀢𑀸𑀬. 𑀢𑀢𑁆𑀭 𑀓𑀺𑀭 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀑𑀲𑀦𑁆𑀦𑀯𑀻𑀭𑀺𑀬𑀸, 𑀢𑁂𑀲𑀁 ¶ 𑀲𑀫𑁆𑀧𑀢𑁆𑀢𑀺𑀬𑀸 𑀧𑀮𑁄𑀪𑁂𑀦𑁆𑀢𑁄 𑁋 ‘‘𑀅𑀧𑁆𑀧𑀫𑀸𑀤𑁂𑀦 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀏𑀯𑀭𑀽𑀧𑀸 𑀇𑀲𑁆𑀲𑀭𑀺𑀬𑀲𑀫𑁆𑀧𑀢𑁆𑀢𑀺 𑀲𑀼𑀮𑀪𑀸’’𑀢𑀺 𑀲𑀫𑀡𑀥𑀫𑁆𑀫𑁂 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁 𑀆𑀳. 𑀅𑀦𑀺𑀘𑁆𑀘𑀮𑀓𑁆𑀔𑀡𑀯𑀺𑀪𑀸𑀯𑀦𑀢𑁆𑀣𑀜𑁆𑀘𑀸𑀧𑀺 ¶ 𑀏𑀯𑀫𑀸𑀳. 𑀦𑀘𑀺𑀭𑀲𑁆𑀲𑁂𑀯 𑀳𑀺 𑀲𑀩𑁆𑀩𑁂𑀧𑀺𑀫𑁂 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑀲𑁂𑀦 𑀯𑀺𑀦𑀸𑀲𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀺. 𑀅𑀣 𑀦𑁂𑀲𑀁 𑀭𑀚𑁆𑀚𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀞𑀺𑀢𑀪𑀺𑀓𑁆𑀔𑀽 𑁋 ‘‘𑀢𑀣𑀸𑀭𑀽𑀧𑀸𑀬𑀧𑀺 𑀦𑀸𑀫 ¶ 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀦𑀸𑀲𑁄 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’𑀢𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀪𑀸𑀯𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀻𑀢𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀯𑀺𑀪𑀸𑀯𑀦𑀢𑁆𑀣𑀁 𑀆𑀳.

𑀅𑀥𑀺𑀯𑀸𑀲𑁂𑀢𑀽𑀢𑀺 𑀅𑀫𑁆𑀩𑀧𑀸𑀮𑀺𑀬𑀸 𑀦𑀺𑀫𑀦𑁆𑀢𑀺𑀢𑀪𑀸𑀯𑀁 𑀜𑀢𑁆𑀯𑀸𑀧𑀺 𑀓𑀲𑁆𑀫𑀸 𑀦𑀺𑀫𑀦𑁆𑀢𑁂𑀦𑁆𑀢𑀻𑀢𑀺? 𑀅𑀲𑀤𑁆𑀤𑀳𑀦𑀢𑀸𑀬 𑀘𑁂𑀯 𑀯𑀢𑁆𑀢𑀲𑀻𑀲𑁂𑀦 𑀘. 𑀲𑀸 𑀳𑀺 𑀥𑀼𑀢𑁆𑀢𑀸 𑀇𑀢𑁆𑀣𑀻 𑀅𑀦𑀺𑀫𑀦𑁆𑀢𑁂𑀢𑁆𑀯𑀸𑀧𑀺 𑀦𑀺𑀫𑀦𑁆𑀢𑁂𑀫𑀻𑀢𑀺 𑀯𑀤𑁂𑀬𑁆𑀬𑀸𑀢𑀺 𑀢𑁂𑀲𑀁 𑀘𑀺𑀢𑁆𑀢𑀁 𑀅𑀳𑁄𑀲𑀺, 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀕𑀫𑀦𑀓𑀸𑀮𑁂 𑀘 𑀦𑀺𑀫𑀦𑁆𑀢𑁂𑀢𑁆𑀯𑀸 𑀕𑀫𑀦𑀁 𑀦𑀸𑀫 𑀫𑀦𑀼𑀲𑁆𑀲𑀸𑀦𑀁 𑀯𑀢𑁆𑀢𑀫𑁂𑀯.

𑀯𑁂𑀴𑀼𑀯𑀕𑀸𑀫𑀯𑀲𑁆𑀲𑀽𑀧𑀕𑀫𑀦𑀯𑀡𑁆𑀡𑀦𑀸

𑁧𑁬𑁩. 𑀯𑁂𑀴𑀼𑀯𑀕𑀸𑀫𑀓𑁄𑀢𑀺 𑀯𑁂𑀲𑀸𑀮𑀺𑀬𑀸 𑀲𑀫𑀻𑀧𑁂 𑀯𑁂𑀴𑀼𑀯𑀕𑀸𑀫𑁄. 𑀬𑀣𑀸𑀫𑀺𑀢𑁆𑀢𑀦𑁆𑀢𑀺𑀆𑀤𑀻𑀲𑀼 𑀫𑀺𑀢𑁆𑀢𑀸 𑀫𑀺𑀢𑁆𑀢𑀸𑀯. 𑀲𑀦𑁆𑀤𑀺𑀝𑁆𑀞𑀸𑀢𑀺 𑀢𑀢𑁆𑀣 𑀢𑀢𑁆𑀣 𑀲𑀗𑁆𑀕𑀫𑁆𑀫 𑀤𑀺𑀝𑁆𑀞𑀫𑀢𑁆𑀢𑀸 𑀦𑀸𑀢𑀺𑀤𑀴𑁆𑀳𑀫𑀺𑀢𑁆𑀢𑀸. 𑀲𑀫𑁆𑀪𑀢𑁆𑀢𑀸𑀢𑀺 𑀲𑀼𑀝𑁆𑀞𑀼 𑀪𑀢𑁆𑀢𑀸 𑀲𑀺𑀦𑁂𑀳𑀯𑀦𑁆𑀢𑁄 𑀤𑀴𑁆𑀳𑀫𑀺𑀢𑁆𑀢𑀸. 𑀬𑁂𑀲𑀁 𑀬𑁂𑀲𑀁 𑀬𑀢𑁆𑀣 𑀬𑀢𑁆𑀣 𑀏𑀯𑀭𑀽𑀧𑀸 𑀪𑀺𑀓𑁆𑀔𑀽 𑀅𑀢𑁆𑀣𑀺, 𑀢𑁂 𑀢𑁂 𑀢𑀢𑁆𑀣 𑀢𑀢𑁆𑀣 𑀯𑀲𑁆𑀲𑀁 𑀉𑀧𑁂𑀣𑀸𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀏𑀯𑀫𑀸𑀳? 𑀢𑁂𑀲𑀁 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀸𑀬. 𑀢𑁂𑀲𑀜𑁆𑀳𑀺 𑀯𑁂𑀴𑀼𑀯𑀕𑀸𑀫𑀓𑁂 𑀲𑁂𑀦𑀸𑀲𑀦𑀁 𑀦𑀧𑁆𑀧𑀳𑁄𑀢𑀺, 𑀪𑀺𑀓𑁆𑀔𑀸𑀧𑀺 𑀫𑀦𑁆𑀤𑀸. 𑀲𑀫𑀦𑁆𑀢𑀸 𑀯𑁂𑀲𑀸𑀮𑀺𑀬𑀸 𑀧𑀦 𑀩𑀳𑀽𑀦𑀺 𑀲𑁂𑀦𑀸𑀲𑀦𑀸𑀦𑀺, 𑀪𑀺𑀓𑁆𑀔𑀸𑀧𑀺 𑀲𑀼𑀮𑀪𑀸, 𑀢𑀲𑁆𑀫𑀸 𑀏𑀯𑀫𑀸𑀳. 𑀅𑀣 𑀓𑀲𑁆𑀫𑀸 𑁋 ‘‘𑀬𑀣𑀸𑀲𑀼𑀔𑀁 𑀕𑀘𑁆𑀙𑀣𑀸’’𑀢𑀺 𑀦 𑀯𑀺𑀲𑁆𑀲𑀚𑁆𑀚𑁂𑀲𑀺? 𑀢𑁂𑀲𑀁 𑀅𑀦𑀼𑀓𑀫𑁆𑀧𑀸𑀬. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀳𑀁 𑀤𑀲𑀫𑀸𑀲𑀫𑀢𑁆𑀢𑀁 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀲𑀘𑁂 𑀇𑀫𑁂 𑀤𑀽𑀭𑀁 𑀕𑀘𑁆𑀙𑀺𑀲𑁆𑀲𑀦𑁆𑀢𑀺, 𑀫𑀫 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀤𑀝𑁆𑀞𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀅𑀣 𑀦𑁂𑀲𑀁 𑁋 ‘‘𑀲𑀢𑁆𑀣𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑁄 𑀅𑀫𑁆𑀳𑀸𑀓𑀁 𑀲𑀢𑀺𑀫𑀢𑁆𑀢𑀫𑁆𑀧𑀺 𑀦 𑀅𑀤𑀸𑀲𑀺, 𑀲𑀘𑁂 𑀚𑀸𑀦𑁂𑀬𑁆𑀬𑀸𑀫, 𑀏𑀯𑀁 𑀦 𑀤𑀽𑀭𑁂 𑀯𑀲𑁂𑀬𑁆𑀬𑀸𑀫𑀸’’𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑁄 𑀪𑀯𑁂𑀬𑁆𑀬. 𑀯𑁂𑀲𑀸𑀮𑀺𑀬𑀸 𑀲𑀫𑀦𑁆𑀢𑀸 𑀧𑀦 𑀯𑀲𑀦𑁆𑀢𑀸 𑀫𑀸𑀲𑀲𑁆𑀲 𑀅𑀝𑁆𑀞 𑀯𑀸𑀭𑁂 𑀆𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀦𑁆𑀢𑀺, 𑀲𑀼𑀕𑀢𑁄𑀯𑀸𑀤𑀁 𑀮𑀪𑀺𑀲𑁆𑀲𑀦𑁆𑀢𑀻’’𑀢𑀺 𑀦 𑀯𑀺𑀲𑁆𑀲𑀚𑁆𑀚𑁂𑀲𑀺.

𑁧𑁬𑁪. 𑀔𑀭𑁄𑀢𑀺 𑀨𑀭𑀼𑀲𑁄. 𑀆𑀩𑀸𑀥𑁄𑀢𑀺 𑀯𑀺𑀲𑀪𑀸𑀕𑀭𑁄𑀕𑁄. 𑀩𑀸𑀴𑁆𑀳𑀸𑀢𑀺 𑀩𑀮𑀯𑀢𑀺𑀬𑁄. 𑀫𑀸𑀭𑀡𑀦𑁆𑀢𑀺𑀓𑀸𑀢𑀺 𑀫𑀭𑀡𑀦𑁆𑀢𑀁 𑀫𑀭𑀡𑀲𑀦𑁆𑀢𑀺𑀓𑀁 𑀧𑀸𑀧𑀦𑀲𑀫𑀢𑁆𑀣𑀸. 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀅𑀥𑀺𑀯𑀸𑀲𑁂𑀲𑀻𑀢𑀺 𑀲𑀢𑀺𑀁 𑀲𑀽𑀧𑀝𑁆𑀞𑀺𑀢𑀁 𑀓𑀢𑁆𑀯𑀸 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀥𑀺𑀯𑀸𑀲𑁂𑀲𑀺. 𑀅𑀯𑀺𑀳𑀜𑁆𑀜𑀫𑀸𑀦𑁄𑀢𑀺 𑀯𑁂𑀤𑀦𑀸𑀦𑀼𑀯𑀢𑁆𑀢𑀦𑀯𑀲𑁂𑀦 𑀅𑀧𑀭𑀸𑀧𑀭𑀁 ¶ 𑀧𑀭𑀺𑀯𑀢𑁆𑀢𑀦𑀁 𑀅𑀓𑀭𑁄𑀦𑁆𑀢𑁄 𑀅𑀧𑀻𑀴𑀺𑀬𑀫𑀸𑀦𑁄 𑀅𑀤𑀼𑀓𑁆𑀔𑀺𑀬𑀫𑀸𑀦𑁄𑀯 𑀅𑀥𑀺𑀯𑀸𑀲𑁂𑀲𑀺 ¶ . 𑀅𑀦𑀸𑀫𑀦𑁆𑀢𑁂𑀢𑁆𑀯𑀸𑀢𑀺 𑀅𑀚𑀸𑀦𑀸𑀧𑁂𑀢𑁆𑀯𑀸. 𑀅𑀦𑀧𑀮𑁄𑀓𑁂𑀢𑁆𑀯𑀸𑀢𑀺 𑀦 𑀅𑀧𑀮𑁄𑀓𑁂𑀢𑁆𑀯𑀸 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀁 𑀅𑀤𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀻𑀭𑀺𑀬𑁂𑀦𑀸𑀢𑀺 𑀧𑀼𑀩𑁆𑀩𑀪𑀸𑀕𑀯𑀻𑀭𑀺𑀬𑁂𑀦 𑀘𑁂𑀯 𑀨𑀮𑀲𑀫𑀸𑀧𑀢𑁆𑀢𑀺𑀯𑀻𑀭𑀺𑀬𑁂𑀦 𑀘. 𑀧𑀝𑀺𑀧𑀡𑀸𑀫𑁂𑀢𑁆𑀯𑀸𑀢𑀺 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸. 𑀚𑀻𑀯𑀺𑀢𑀲𑀗𑁆𑀔𑀸𑀭𑀦𑁆𑀢𑀺 𑀏𑀢𑁆𑀣 𑀚𑀻𑀯𑀺𑀢𑀫𑁆𑀧𑀺 𑀚𑀻𑀯𑀺𑀢𑀲𑀗𑁆𑀔𑀸𑀭𑁄. 𑀬𑁂𑀦 𑀚𑀻𑀯𑀺𑀢𑀁 𑀲𑀗𑁆𑀔𑀭𑀺𑀬𑀢𑀺 𑀙𑀺𑀚𑁆𑀚𑀫𑀸𑀦𑀁 𑀖𑀝𑁂𑀢𑁆𑀯𑀸 𑀞𑀧𑀺𑀬𑀢𑀺, 𑀲𑁄 𑀨𑀮𑀲𑀫𑀸𑀧𑀢𑁆𑀢𑀺𑀥𑀫𑁆𑀫𑁄𑀧𑀺 𑀚𑀻𑀯𑀺𑀢𑀲𑀗𑁆𑀔𑀸𑀭𑁄. 𑀲𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀅𑀥𑀺𑀝𑁆𑀞𑀸𑀬𑀸𑀢𑀺 ¶ 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀯𑀢𑁆𑀢𑁂𑀢𑁆𑀯𑀸, 𑀚𑀻𑀯𑀺𑀢𑀝𑁆𑀞𑀧𑀦𑀲𑀫𑀢𑁆𑀣𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑁂𑀬𑁆𑀬𑀦𑁆𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄.

𑀓𑀺𑀁 𑀧𑀦 𑀪𑀕𑀯𑀸 𑀇𑀢𑁄 𑀧𑀼𑀩𑁆𑀩𑁂 𑀨𑀮𑀲𑀫𑀸𑀧𑀢𑁆𑀢𑀺𑀁 𑀦 𑀲𑀫𑀸𑀧𑀚𑁆𑀚𑀢𑀻𑀢𑀺? 𑀲𑀫𑀸𑀧𑀚𑁆𑀚𑀢𑀺. 𑀲𑀸 𑀧𑀦 𑀔𑀡𑀺𑀓𑀲𑀫𑀸𑀧𑀢𑁆𑀢𑀺. 𑀔𑀡𑀺𑀓𑀲𑀫𑀸𑀧𑀢𑁆𑀢𑀺 𑀘 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁𑀬𑁂𑀯 𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀢𑀺, 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀫𑀢𑁆𑀢𑀲𑁆𑀲 𑀓𑀝𑁆𑀞𑀧𑀸𑀢𑁂𑀦 𑀯𑀸 𑀓𑀞𑀮𑀧𑀸𑀢𑁂𑀦 𑀯𑀸 𑀙𑀺𑀦𑁆𑀦𑀲𑁂𑀯𑀸𑀮𑁄 𑀯𑀺𑀬 𑀉𑀤𑀓𑀁 𑀧𑀼𑀦 𑀲𑀭𑀻𑀭𑀁 𑀯𑁂𑀤𑀦𑀸 𑀅𑀚𑁆𑀛𑁄𑀢𑁆𑀣𑀭𑀢𑀺. 𑀬𑀸 𑀧𑀦 𑀭𑀽𑀧𑀲𑀢𑁆𑀢𑀓𑀁 𑀅𑀭𑀽𑀧𑀲𑀢𑁆𑀢𑀓𑀜𑁆𑀘 𑀦𑀺𑀕𑁆𑀕𑀼𑀫𑁆𑀩𑀁 𑀦𑀺𑀚𑁆𑀚𑀝𑀁 𑀓𑀢𑁆𑀯𑀸 𑀫𑀳𑀸𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀲𑀫𑀸𑀧𑀦𑁆𑀦𑀸 𑀲𑀫𑀸𑀧𑀢𑁆𑀢𑀺, 𑀲𑀸 𑀲𑀼𑀝𑁆𑀞𑀼 𑀯𑀺𑀓𑁆𑀔𑀫𑁆𑀪𑁂𑀢𑀺. 𑀬𑀣𑀸 𑀦𑀸𑀫 𑀧𑀼𑀭𑀺𑀲𑁂𑀦 𑀧𑁄𑀓𑁆𑀔𑀭𑀡𑀺𑀁 𑀑𑀕𑀸𑀳𑁂𑀢𑁆𑀯𑀸 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀲𑀼𑀝𑁆𑀞𑀼 𑀅𑀧𑀩𑁆𑀬𑀽𑀴𑁆𑀳𑁄 𑀲𑁂𑀯𑀸𑀮𑁄 𑀘𑀺𑀭𑁂𑀦 𑀉𑀤𑀓𑀁 𑀑𑀢𑁆𑀣𑀭𑀢𑀺; 𑀏𑀯𑀫𑁂𑀯 𑀢𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀘𑀺𑀭𑁂𑀦 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺 𑀪𑀕𑀯𑀸 𑀢𑀁 𑀤𑀺𑀯𑀲𑀁 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀅𑀪𑀺𑀦𑀯𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀦𑁆𑀢𑁄 𑀯𑀺𑀬 𑀭𑀽𑀧𑀲𑀢𑁆𑀢𑀓𑀁 𑀅𑀭𑀽𑀧𑀲𑀢𑁆𑀢𑀓𑀁 𑀦𑀺𑀕𑁆𑀕𑀼𑀫𑁆𑀩𑀁 𑀦𑀺𑀚𑁆𑀚𑀝𑀁 𑀓𑀢𑁆𑀯𑀸 𑀘𑀼𑀤𑁆𑀤𑀲𑀳𑀸𑀓𑀸𑀭𑁂𑀳𑀺 𑀲𑀦𑁆𑀦𑁂𑀢𑁆𑀯𑀸 𑀫𑀳𑀸𑀯𑀺𑀧𑀲𑁆𑀲𑀦𑀸𑀬 𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑁋 ‘‘𑀤𑀲𑀫𑀸𑀲𑁂 𑀫𑀸 𑀉𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺. 𑀲𑀫𑀸𑀧𑀢𑁆𑀢𑀺𑀯𑀺𑀓𑁆𑀔𑀫𑁆𑀪𑀺𑀢𑀸 𑀯𑁂𑀤𑀦𑀸 𑀤𑀲𑀫𑀸𑀲𑁂 𑀦 𑀉𑀧𑁆𑀧𑀚𑁆𑀚𑀺 𑀬𑁂𑀯.

𑀕𑀺𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀕𑀺𑀮𑀸𑀦𑁄 𑀳𑀼𑀢𑁆𑀯𑀸 𑀧𑀼𑀦 𑀯𑀼𑀝𑁆𑀞𑀺𑀢𑁄. 𑀫𑀥𑀼𑀭𑀓𑀚𑀸𑀢𑁄 𑀯𑀺𑀬𑀸𑀢𑀺 𑀲𑀜𑁆𑀚𑀸𑀢𑀕𑀭𑀼𑀪𑀸𑀯𑁄 𑀲𑀜𑁆𑀚𑀸𑀢𑀣𑀤𑁆𑀥𑀪𑀸𑀯𑁄 𑀲𑀽𑀮𑁂 𑀉𑀢𑁆𑀢𑀸𑀲𑀺𑀢𑀧𑀼𑀭𑀺𑀲𑁄 𑀯𑀺𑀬. 𑀦 𑀧𑀓𑁆𑀔𑀸𑀬𑀦𑁆𑀢𑀻𑀢𑀺 𑀦𑀧𑁆𑀧𑀓𑀸𑀲𑀦𑁆𑀢𑀺, 𑀦𑀸𑀦𑀸𑀓𑀸𑀭𑀢𑁄 𑀦 𑀉𑀧𑀝𑁆𑀞𑀳𑀦𑁆𑀢𑀺. 𑀥𑀫𑁆𑀫𑀸𑀧𑀺 𑀫𑀁 𑀦 𑀧𑀝𑀺𑀪𑀦𑁆𑀢𑀻𑀢𑀺 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀥𑀫𑁆𑀫𑀸 𑀫𑀬𑁆𑀳𑀁 𑀧𑀸𑀓𑀝𑀸 𑀦 𑀳𑁄𑀦𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀢𑀦𑁆𑀢𑀺𑀥𑀫𑁆𑀫𑀸 𑀧𑀦 𑀣𑁂𑀭𑀲𑁆𑀲 𑀲𑀼𑀧𑀕𑀼𑀡𑀸. 𑀦 𑀉𑀤𑀸𑀳𑀭𑀢𑀻𑀢𑀺 𑀧𑀘𑁆𑀙𑀺𑀫𑀁 𑀑𑀯𑀸𑀤𑀁 𑀦 𑀤𑁂𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑁧𑁬𑁫. 𑀅𑀦𑀦𑁆𑀢𑀭𑀁 ¶ 𑀅𑀩𑀸𑀳𑀺𑀭𑀦𑁆𑀢𑀺 𑀥𑀫𑁆𑀫𑀯𑀲𑁂𑀦 𑀯𑀸 𑀧𑀼𑀕𑁆𑀕𑀮𑀯𑀲𑁂𑀦 𑀯𑀸 𑀉𑀪𑀬𑀁 𑀅𑀓𑀢𑁆𑀯𑀸. ‘‘𑀏𑀢𑁆𑀢𑀓𑀁 𑀥𑀫𑁆𑀫𑀁 𑀧𑀭𑀲𑁆𑀲 𑀦 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 ¶ 𑀳𑀺 𑀘𑀺𑀦𑁆𑀢𑁂𑀦𑁆𑀢𑁄 𑀥𑀫𑁆𑀫𑀁 𑀅𑀩𑁆𑀪𑀦𑁆𑀢𑀭𑀁 𑀓𑀭𑁄𑀢𑀺 𑀦𑀸𑀫. ‘‘𑀏𑀢𑁆𑀢𑀓𑀁 𑀧𑀭𑀲𑁆𑀲 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀥𑀫𑁆𑀫𑀁 𑀩𑀸𑀳𑀺𑀭𑀁 𑀓𑀭𑁄𑀢𑀺 𑀦𑀸𑀫. ‘‘𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀧𑀦 𑀧𑀼𑀕𑁆𑀕𑀮𑀁 𑀅𑀩𑁆𑀪𑀦𑁆𑀢𑀭𑀁 𑀓𑀭𑁄𑀢𑀺 𑀦𑀸𑀫. ‘‘𑀇𑀫𑀲𑁆𑀲 𑀦 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀧𑀼𑀕𑁆𑀕𑀮𑀁 𑀩𑀸𑀳𑀺𑀭𑀁 𑀓𑀭𑁄𑀢𑀺 𑀦𑀸𑀫. 𑀏𑀯𑀁 𑀅𑀓𑀢𑁆𑀯𑀸 𑀤𑁂𑀲𑀺𑀢𑁄𑀢𑀺 𑀅𑀢𑁆𑀣𑁄. 𑀆𑀘𑀭𑀺𑀬𑀫𑀼𑀝𑁆𑀞𑀻𑀢𑀺 𑀬𑀣𑀸 𑀩𑀸𑀳𑀺𑀭𑀓𑀸𑀦𑀁 𑀆𑀘𑀭𑀺𑀬𑀫𑀼𑀝𑁆𑀞𑀺 𑀦𑀸𑀫 𑀳𑁄𑀢𑀺. 𑀤𑀳𑀭𑀓𑀸𑀮𑁂 𑀓𑀲𑁆𑀲𑀘𑀺 𑀅𑀓𑀣𑁂𑀢𑁆𑀯𑀸 𑀧𑀘𑁆𑀙𑀺𑀫𑀓𑀸𑀮𑁂 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑀸 𑀧𑀺𑀬𑀫𑀦𑀸𑀧𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀓𑀣𑁂𑀦𑁆𑀢𑀺, 𑀏𑀯𑀁 𑀢𑀣𑀸𑀕𑀢𑀲𑁆𑀲 𑁋 ‘‘𑀇𑀤𑀁 𑀫𑀳𑀮𑁆𑀮𑀓𑀓𑀸𑀮𑁂 𑀧𑀘𑁆𑀙𑀺𑀫𑀝𑁆𑀞𑀸𑀦𑁂 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀫𑀼𑀝𑁆𑀞𑀺𑀁 𑀓𑀢𑁆𑀯𑀸 ‘‘𑀧𑀭𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀞𑀧𑀺𑀢𑀁 𑀓𑀺𑀜𑁆𑀘𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺.

𑀅𑀳𑀁 ¶ 𑀪𑀺𑀓𑁆𑀔𑀼𑀲𑀗𑁆𑀖𑀦𑁆𑀢𑀺 𑀅𑀳𑀫𑁂𑀯 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻𑀢𑀺 𑀯𑀸 𑀫𑀫𑀼𑀤𑁆𑀤𑁂𑀲𑀺𑀓𑁄𑀢𑀺 𑀅𑀳𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀝𑁆𑀞𑁂𑀦 𑀉𑀤𑁆𑀤𑁂𑀲𑁄 𑀅𑀲𑁆𑀲𑀸𑀢𑀺 𑀫𑀫𑀼𑀤𑁆𑀤𑁂𑀲𑀺𑀓𑁄. 𑀫𑀁𑀬𑁂𑀯 𑀉𑀤𑁆𑀤𑀺𑀲𑀺𑀢𑁆𑀯𑀸 𑀫𑀫 𑀧𑀘𑁆𑀘𑀸𑀲𑀻𑀲𑀫𑀸𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀳𑁄𑀢𑀼, 𑀫𑀫 𑀅𑀘𑁆𑀘𑀬𑁂𑀦 𑀯𑀸 𑀫𑀸 𑀅𑀳𑁂𑀲𑀼𑀁, 𑀬𑀁 𑀯𑀸 𑀢𑀁 𑀯𑀸 𑀳𑁄𑀢𑀽𑀢𑀺 𑀇𑀢𑀺 𑀯𑀸 𑀬𑀲𑁆𑀲 𑀅𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀦 𑀏𑀯𑀁 𑀳𑁄𑀢𑀻𑀢𑀺 𑀩𑁄𑀥𑀺𑀧𑀮𑁆𑀮𑀗𑁆𑀓𑁂𑀬𑁂𑀯 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀸𑀦𑀁 𑀯𑀺𑀳𑀢𑀢𑁆𑀢𑀸 𑀏𑀯𑀁 𑀦 𑀳𑁄𑀢𑀺. 𑀲 𑀓𑀺𑀦𑁆𑀢𑀺 𑀲𑁄 𑀓𑀺𑀁. 𑀆𑀲𑀻𑀢𑀺𑀓𑁄𑀢𑀺 𑀅𑀲𑀻𑀢𑀺𑀲𑀁𑀯𑀘𑁆𑀙𑀭𑀺𑀓𑁄. 𑀇𑀤𑀁 𑀧𑀘𑁆𑀙𑀺𑀫𑀯𑀬𑀅𑀦𑀼𑀧𑁆𑀧𑀢𑁆𑀢𑀪𑀸𑀯𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀯𑁂𑀞𑀫𑀺𑀲𑁆𑀲𑀓𑁂𑀦𑀸𑀢𑀺 𑀩𑀸𑀳𑀩𑀦𑁆𑀥𑀘𑀓𑁆𑀓𑀩𑀦𑁆𑀥𑀸𑀤𑀺𑀦𑀸 𑀧𑀝𑀺𑀲𑀗𑁆𑀔𑀭𑀡𑁂𑀦 𑀯𑁂𑀞𑀫𑀺𑀲𑁆𑀲𑀓𑁂𑀦. 𑀫𑀜𑁆𑀜𑁂𑀢𑀺 𑀚𑀺𑀡𑁆𑀡𑀲𑀓𑀝𑀁 𑀯𑀺𑀬 𑀯𑁂𑀞𑀫𑀺𑀲𑁆𑀲𑀓𑁂𑀦 𑀫𑀜𑁆𑀜𑁂 𑀬𑀸𑀧𑁂𑀢𑀺. 𑀅𑀭𑀳𑀢𑁆𑀢𑀨𑀮𑀯𑁂𑀞𑀦𑁂𑀦 𑀘𑀢𑀼𑀇𑀭𑀺𑀬𑀸𑀧𑀣𑀓𑀧𑁆𑀧𑀦𑀁 𑀢𑀣𑀸𑀕𑀢𑀲𑁆𑀲 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀬𑀲𑁆𑀫𑀺𑀁, 𑀆𑀦𑀦𑁆𑀤, 𑀲𑀫𑀬𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀦𑁆𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀻𑀦𑀁. 𑀏𑀓𑀘𑁆𑀘𑀸𑀦𑀁 𑀯𑁂𑀤𑀦𑀸𑀦𑀦𑁆𑀢𑀺 𑀮𑁄𑀓𑀺𑀬𑀸𑀦𑀁 𑀯𑁂𑀤𑀦𑀸𑀦𑀁. 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤𑀸𑀢𑀺 𑀬𑀲𑁆𑀫𑀸 𑀇𑀫𑀺𑀦𑀸 𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑁂𑀦 𑀨𑀸𑀲𑀼 𑀳𑁄𑀢𑀺, 𑀢𑀲𑁆𑀫𑀸 𑀢𑀼𑀫𑁆𑀳𑁂𑀧𑀺 𑀢𑀤𑀢𑁆𑀣𑀸𑀬 𑀏𑀯𑀁 𑀯𑀺𑀳𑀭𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀢𑁆𑀢𑀤𑀻𑀧𑀸𑀢𑀺 𑀫𑀳𑀸𑀲𑀫𑀼𑀤𑁆𑀤𑀕𑀢𑀤𑀻𑀧𑀁 𑀯𑀺𑀬 𑀅𑀢𑁆𑀢𑀸𑀦𑀁 𑀤𑀻𑀧𑀁 𑀧𑀢𑀺𑀝𑁆𑀞𑀁 𑀓𑀢𑁆𑀯𑀸 𑀯𑀺𑀳𑀭𑀣. 𑀅𑀢𑁆𑀢𑀲𑀭𑀡𑀸𑀢𑀺 𑀅𑀢𑁆𑀢𑀕𑀢𑀺𑀓𑀸𑀯 𑀳𑁄𑀣, 𑀫𑀸 𑀅𑀜𑁆𑀜𑀕𑀢𑀺𑀓𑀸. 𑀥𑀫𑁆𑀫𑀤𑀻𑀧𑀥𑀫𑁆𑀫𑀲𑀭𑀡𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀫𑀢𑀕𑁆𑀕𑁂𑀢𑀺 𑀢𑀫𑀅𑀕𑁆𑀕𑁂. 𑀫𑀚𑁆𑀛𑁂 𑀢𑀓𑀸𑀭𑁄 𑀧𑀤𑀲𑀦𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀇𑀫𑁂 𑀅𑀕𑁆𑀕𑀢𑀫𑀸𑀢𑀺 𑀢𑀫𑀢𑀕𑁆𑀕𑀸’’𑀢𑀺. 𑀏𑀯𑀁 𑀲𑀩𑁆𑀩𑀁 𑀢𑀫𑀬𑁄𑀕𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀢𑀺𑀯𑀺𑀬 𑀅𑀕𑁆𑀕𑁂 𑀉𑀢𑁆𑀢𑀫𑀪𑀸𑀯𑁂 𑀏𑀢𑁂 ¶ , 𑀆𑀦𑀦𑁆𑀤 ¶ , 𑀫𑀫 𑀪𑀺𑀓𑁆𑀔𑀽 𑀪𑀯𑀺𑀲𑁆𑀲𑀦𑁆𑀢𑀺. 𑀢𑁂𑀲𑀁 𑀅𑀢𑀺𑀅𑀕𑁆𑀕𑁂 𑀪𑀯𑀺𑀲𑁆𑀲𑀦𑁆𑀢𑀺, 𑀬𑁂 𑀓𑁂𑀘𑀺 𑀲𑀺𑀓𑁆𑀔𑀸𑀓𑀸𑀫𑀸, 𑀲𑀩𑁆𑀩𑁂𑀧𑀺 𑀢𑁂 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀕𑁄𑀘𑀭𑀸𑀯 𑀪𑀺𑀓𑁆𑀔𑀽 𑀅𑀕𑁆𑀕𑁂 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀤𑀼𑀢𑀺𑀬𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀫𑀺𑀢𑁆𑀢𑁄𑀪𑀸𑀲𑀓𑀣𑀸𑀯𑀡𑁆𑀡𑀦𑀸

𑁧𑁬𑁬. 𑀯𑁂𑀲𑀸𑀮𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀻𑀢𑀺 𑀓𑀤𑀸 𑀧𑀸𑀯𑀺𑀲𑀺? 𑀉𑀓𑁆𑀓𑀘𑁂𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑁂𑀲𑀸𑀮𑀺𑀁 𑀕𑀢𑀓𑀸𑀮𑁂. 𑀪𑀕𑀯𑀸 𑀓𑀺𑀭 𑀯𑀼𑀝𑁆𑀞𑀯𑀲𑁆𑀲𑁄 𑀯𑁂𑀴𑀼𑀯𑀕𑀸𑀫𑀓𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 𑀆𑀕𑀢𑀫𑀕𑁆𑀕𑁂𑀦𑁂𑀯 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀚𑁂𑀢𑀯𑀦𑀁 𑀧𑀸𑀯𑀺𑀲𑀺. 𑀥𑀫𑁆𑀫𑀲𑁂𑀦𑀸𑀧𑀢𑀺 𑀪𑀕𑀯𑀢𑁄 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑀁 𑀕𑀢𑁄. 𑀲𑁄 𑀢𑀢𑁆𑀣 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀓𑁆𑀓𑀦𑁆𑀢𑁂𑀲𑀼 𑀤𑀺𑀯𑀸𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀘𑀫𑁆𑀫𑀓𑁆𑀔𑀡𑁆𑀟𑀁 𑀧𑀜𑁆𑀜𑀧𑁂𑀢𑁆𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 ¶ 𑀧𑀸𑀯𑀺𑀲𑀺. 𑀅𑀣𑀲𑁆𑀲 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦 𑀢𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀅𑀬𑀁 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀩𑀼𑀤𑁆𑀥𑀸 𑀦𑀼 𑀔𑁄 𑀧𑀞𑀫𑀁 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺, 𑀅𑀕𑀲𑀸𑀯𑀓𑀸 𑀦𑀼 𑀔𑁄’’𑀢𑀺? 𑀢𑀢𑁄 𑁋 ‘‘𑀅𑀕𑁆𑀕𑀲𑀸𑀯𑀓𑀸 𑀧𑀞𑀫’’𑀦𑁆𑀢𑀺 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀆𑀬𑀼𑀲𑀗𑁆𑀔𑀸𑀭𑀁 𑀑𑀮𑁄𑀓𑁂𑀲𑀺. 𑀲𑁄 𑁋 ‘‘𑀲𑀢𑁆𑀢𑀸𑀳𑀫𑁂𑀯 𑀫𑁂 𑀆𑀬𑀼𑀲𑀗𑁆𑀔𑀸𑀭𑁄 𑀧𑀯𑀢𑁆𑀢𑀢𑀻’’𑀢𑀺 𑀜𑀢𑁆𑀯𑀸 𑁋 ‘‘𑀓𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀢𑁄 𑁋 ‘‘𑀭𑀸𑀳𑀼𑀮𑁄 𑀢𑀸𑀯𑀢𑀺𑀁𑀲𑁂𑀲𑀼 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑁄 𑀙𑀤𑁆𑀤𑀦𑁆𑀢𑀤𑀳𑁂, 𑀅𑀳𑀁 𑀓𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀦 𑀘𑀺𑀦𑁆𑀢𑁂𑀦𑁆𑀢𑁄 𑀫𑀸𑀢𑀭𑀁 𑀆𑀭𑀩𑁆𑀪 𑀲𑀢𑀺𑀁 𑀉𑀧𑁆𑀧𑀸𑀤𑁂𑀲𑀺 𑁋 ‘‘𑀫𑀬𑁆𑀳𑀁 𑀫𑀸𑀢𑀸 𑀲𑀢𑁆𑀢𑀦𑁆𑀦𑀁 𑀅𑀭𑀳𑀦𑁆𑀢𑀸𑀦𑀁 𑀫𑀸𑀢𑀸 𑀳𑀼𑀢𑁆𑀯𑀸𑀧𑀺 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑁂𑀲𑀼 𑀅𑀧𑁆𑀧𑀲𑀦𑁆𑀦𑀸, 𑀅𑀢𑁆𑀣𑀺 𑀦𑀼 𑀔𑁄 𑀢𑀲𑁆𑀲𑀸 𑀉𑀧𑀦𑀺𑀲𑁆𑀲𑀬𑁄, 𑀦𑀢𑁆𑀣𑀺 𑀦𑀼 𑀔𑁄’’𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑁋 ‘‘𑀓𑀲𑁆𑀲 𑀤𑁂𑀲𑀦𑀸𑀬 𑀅𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑁋 ‘‘𑀫𑀫𑁂𑀯 𑀥𑀫𑁆𑀫𑀤𑁂𑀲𑀦𑀸𑀬 𑀪𑀯𑀺𑀲𑁆𑀲𑀢𑀺, 𑀦 𑀅𑀜𑁆𑀜𑀲𑁆𑀲. 𑀲𑀘𑁂 𑀔𑁄 𑀧𑀦𑀸𑀳𑀁 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀪𑀯𑁂𑀬𑁆𑀬𑀁, 𑀪𑀯𑀺𑀲𑁆𑀲𑀦𑁆𑀢𑀺 𑀫𑁂 𑀯𑀢𑁆𑀢𑀸𑀭𑁄 𑁋 ‘𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀅𑀯𑀲𑁂𑀲𑀚𑀦𑀸𑀦𑀫𑁆𑀧𑀺 𑀅𑀯𑀲𑁆𑀲𑀬𑁄 𑀳𑁄𑀢𑀺. 𑀢𑀣𑀸 𑀳𑀺𑀲𑁆𑀲 𑀲𑀫𑀘𑀺𑀢𑁆𑀢𑀲𑀼𑀢𑁆𑀢𑀤𑁂𑀲𑀦𑀸𑀤𑀺𑀯𑀲𑁂 (𑀅. 𑀦𑀺. 𑁧.𑁩𑁭) 𑀓𑁄𑀝𑀺𑀲𑀢𑀲𑀳𑀲𑁆𑀲𑀤𑁂𑀯𑀢𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸 ¶ . 𑀢𑀬𑁄 𑀫𑀕𑁆𑀕𑁂 𑀧𑀝𑀺𑀯𑀺𑀤𑁆𑀥𑀤𑁂𑀯𑀢𑀸𑀦𑀁 𑀕𑀡𑀦𑀸 𑀦𑀢𑁆𑀣𑀺. 𑀅𑀜𑁆𑀜𑁂𑀲𑀼 𑀘 𑀞𑀸𑀦𑁂𑀲𑀼 𑀅𑀦𑁂𑀓𑀸 𑀅𑀪𑀺𑀲𑀫𑀬𑀸 ¶ 𑀤𑀺𑀲𑁆𑀲𑀦𑁆𑀢𑀺. 𑀣𑁂𑀭𑁂𑀯 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀸𑀦𑁂𑀯 𑀅𑀲𑀻𑀢𑀺𑀓𑀼𑀮𑀲𑀳𑀲𑁆𑀲𑀸𑀦𑀺. 𑀲𑁄 𑀤𑀸𑀦𑀺 𑀲𑀓𑀫𑀸𑀢𑀼𑀫𑀺𑀘𑁆𑀙𑀸𑀤𑀲𑁆𑀲𑀦𑀫𑀢𑁆𑀢𑀫𑁆𑀧𑀺 𑀳𑀭𑀺𑀢𑀼𑀁 𑀦𑀸𑀲𑀓𑁆𑀔𑀻’𑀢𑀺. 𑀢𑀲𑁆𑀫𑀸 𑀫𑀸𑀢𑀭𑀁 𑀫𑀺𑀘𑁆𑀙𑀸𑀤𑀲𑁆𑀲𑀦𑀸 𑀫𑁄𑀘𑁂𑀢𑁆𑀯𑀸 𑀚𑀸𑀢𑁄𑀯𑀭𑀓𑁂𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑁋 ‘‘𑀅𑀚𑁆𑀚𑁂𑀯 𑀪𑀕𑀯𑀦𑁆𑀢𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀼𑀦𑁆𑀤𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺. ‘‘𑀆𑀯𑀼𑀲𑁄, 𑀘𑀼𑀦𑁆𑀤, 𑀅𑀫𑁆𑀳𑀸𑀓𑀁 𑀧𑀜𑁆𑀘𑀲𑀢𑀸𑀬 𑀪𑀺𑀓𑁆𑀔𑀼𑀧𑀭𑀺𑀲𑀸𑀬 𑀲𑀜𑁆𑀜𑀁 𑀤𑁂𑀳𑀺 𑁋 ‘𑀕𑀡𑁆𑀳𑀣𑀸𑀯𑀼𑀲𑁄 𑀧𑀢𑁆𑀢𑀘𑀻𑀯𑀭𑀸𑀦𑀺, 𑀥𑀫𑁆𑀫𑀲𑁂𑀦𑀸𑀧𑀢𑀺 𑀦𑀸𑀴𑀓𑀕𑀸𑀫𑀁 𑀕𑀦𑁆𑀢𑀼𑀓𑀸𑀫𑁄’𑀢𑀺’’. 𑀣𑁂𑀭𑁄 𑀢𑀣𑀸 𑀅𑀓𑀸𑀲𑀺. 𑀪𑀺𑀓𑁆𑀔𑀽 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀫𑀁𑀲𑀼. 𑀣𑁂𑀭𑁄 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑀤𑁆𑀯𑀸𑀭𑁂 𑀞𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑁄 𑁋 ‘‘𑀇𑀤𑀁 𑀤𑀸𑀦𑀺 𑀧𑀘𑁆𑀙𑀺𑀫𑀤𑀲𑁆𑀲𑀦𑀁, 𑀧𑀼𑀦 𑀆𑀕𑀫𑀦𑀁 𑀦𑀢𑁆𑀣𑀻’’𑀢𑀺 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀧𑀭𑀺𑀯𑀼𑀢𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀢𑀤𑀯𑁄𑀘 𑁋

‘‘𑀙𑀺𑀦𑁆𑀦𑁄 𑀤𑀸𑀦𑀺 𑀪𑀯𑀺𑀲𑁆𑀲𑀸𑀫𑀺, 𑀮𑁄𑀓𑀦𑀸𑀣 𑀫𑀳𑀸𑀫𑀼𑀦𑀺;

𑀕𑀫𑀦𑀸𑀕𑀫𑀦𑀁 𑀦𑀢𑁆𑀣𑀺, 𑀧𑀘𑁆𑀙𑀺𑀫𑀸 𑀯𑀦𑁆𑀤𑀦𑀸 𑀅𑀬𑀁.

𑀚𑀻𑀯𑀺𑀢𑀁 𑀅𑀧𑁆𑀧𑀓𑀁 𑀫𑀬𑁆𑀳𑀁, 𑀇𑀢𑁄 𑀲𑀢𑁆𑀢𑀸𑀳𑀫𑀘𑁆𑀘𑀬𑁂;

𑀦𑀺𑀓𑁆𑀔𑀺𑀧𑁂𑀬𑁆𑀬𑀸𑀫𑀳𑀁 𑀤𑁂𑀳𑀁, 𑀪𑀸𑀭𑀯𑁄𑀭𑁄𑀧𑀦𑀁 𑀬𑀣𑀸.

𑀅𑀦𑀼𑀚𑀸𑀦𑀸𑀢𑀼 𑀫𑁂 𑀪𑀦𑁆𑀢𑁂, 𑀪𑀕𑀯𑀸, 𑀅𑀦𑀼𑀚𑀸𑀦𑀸𑀢𑀼 𑀲𑀼𑀕𑀢𑁄;

𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄 𑀫𑁂, 𑀑𑀲𑁆𑀲𑀝𑁆𑀞𑁄 𑀆𑀬𑀼𑀲𑀗𑁆𑀔𑀸𑀭𑁄’’𑀢𑀺.

𑀩𑀼𑀤𑁆𑀥𑀸 ¶ 𑀧𑀦 𑀬𑀲𑁆𑀫𑀸 ‘‘𑀧𑀭𑀺𑀦𑀺𑀩𑁆𑀩𑀸𑀳𑀻’’𑀢𑀺 𑀯𑀼𑀢𑁆𑀢𑁂 𑀫𑀭𑀡𑀲𑀁𑀯𑀡𑁆𑀡𑀦𑀁 𑀲𑀁𑀯𑀡𑁆𑀡𑁂𑀦𑁆𑀢𑀺 𑀦𑀸𑀫, ‘‘𑀫𑀸 𑀧𑀭𑀺𑀦𑀺𑀩𑁆𑀩𑀸𑀳𑀻’’𑀢𑀺 𑀯𑀼𑀢𑁆𑀢𑁂 𑀯𑀝𑁆𑀝𑀲𑁆𑀲 𑀕𑀼𑀡𑀁 𑀓𑀣𑁂𑀦𑁆𑀢𑀻𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀤𑁄𑀲𑀁 𑀆𑀭𑁄𑀧𑁂𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀢𑀤𑀼𑀪𑀬𑀫𑁆𑀧𑀺 𑀦 𑀯𑀤𑀦𑁆𑀢𑀺. 𑀢𑁂𑀦 𑀦𑀁 𑀪𑀕𑀯𑀸 𑀆𑀳 𑁋 ‘‘𑀓𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀲𑀺 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺? ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀫𑀕𑀥𑁂𑀲𑀼 𑀦𑀸𑀴𑀓𑀕𑀸𑀫𑁂 𑀚𑀸𑀢𑁄𑀯𑀭𑀓𑁄, 𑀢𑀢𑁆𑀣𑀸𑀳𑀁 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀬𑀲𑁆𑀲 𑀤𑀸𑀦𑀺 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀓𑀸𑀮𑀁 𑀫𑀜𑁆𑀜𑀲𑀺, 𑀇𑀤𑀸𑀦𑀺 𑀧𑀦 𑀢𑁂 𑀚𑁂𑀝𑁆𑀞𑀓𑀦𑀺𑀝𑁆𑀞𑀪𑀸𑀢𑀺𑀓𑀸𑀦𑀁 𑀢𑀸𑀤𑀺𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀲𑁆𑀲𑀦𑀁 𑀤𑀼𑀮𑁆𑀮𑀪𑀁 𑀪𑀯𑀺𑀲𑁆𑀲𑀢𑀻𑀢𑀺 𑀤𑁂𑀲𑁂𑀳𑀺 𑀢𑁂𑀲𑀁 𑀥𑀫𑁆𑀫’’𑀦𑁆𑀢𑀺 𑀆𑀳.

𑀣𑁂𑀭𑁄 𑁋 ‘‘𑀲𑀢𑁆𑀣𑀸 𑀫𑀬𑁆𑀳𑀁 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀧𑀼𑀩𑁆𑀩𑀗𑁆𑀕𑀫𑀁 𑀥𑀫𑁆𑀫𑀤𑁂𑀲𑀦𑀁 𑀧𑀘𑁆𑀘𑀸𑀲𑀻𑀲𑀢𑀻’’𑀢𑀺 𑀜𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀢𑀸𑀮𑀧𑁆𑀧𑀫𑀸𑀡𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀼𑀦 𑀑𑀭𑀼𑀬𑁆𑀳 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 ¶ 𑀲𑀢𑁆𑀢𑀢𑀸𑀮𑀧𑁆𑀧𑀫𑀸𑀡𑁂 ¶ 𑀅𑀦𑁆𑀢𑀮𑀺𑀓𑁆𑀔𑁂 𑀞𑀺𑀢𑁄 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁 𑀤𑀲𑁆𑀲𑁂𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑀓𑀮𑀦𑀕𑀭𑀁 𑀲𑀦𑁆𑀦𑀺𑀧𑀢𑀺. 𑀣𑁂𑀭𑁄 𑀑𑀭𑀼𑀬𑁆𑀳 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀕𑀫𑀦𑀓𑀸𑀮𑁄 𑀫𑁂, 𑀪𑀦𑁆𑀢𑁂’’𑀢𑀺 𑀆𑀳. 𑀪𑀕𑀯𑀸 ‘‘𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀧𑀝𑀺𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀥𑀫𑁆𑀫𑀸𑀲𑀦𑀸 𑀉𑀝𑁆𑀞𑀸𑀬 𑀕𑀦𑁆𑀥𑀓𑀼𑀝𑀺𑀅𑀪𑀺𑀫𑀼𑀔𑁄 𑀕𑀦𑁆𑀢𑁆𑀯𑀸 𑀫𑀡𑀺𑀨𑀮𑀓𑁂 𑀅𑀝𑁆𑀞𑀸𑀲𑀺. 𑀣𑁂𑀭𑁄 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀦𑁆𑀤𑀺𑀢𑁆𑀯𑀸 𑁋 ‘‘𑀪𑀕𑀯𑀸 𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀲𑁆𑀲 𑀉𑀧𑀭𑀺 𑀅𑀦𑁄𑀫𑀤𑀲𑁆𑀲𑀺𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀢𑀺𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀁 𑀧𑀢𑁆𑀣𑁂𑀲𑀺𑀁. 𑀲𑀸 𑀫𑁂 𑀧𑀢𑁆𑀣𑀦𑀸 𑀲𑀫𑀺𑀤𑁆𑀥𑀸, 𑀤𑀺𑀝𑁆𑀞𑀸 𑀢𑀼𑀫𑁆𑀳𑁂, 𑀢𑀁 𑀧𑀞𑀫𑀤𑀲𑁆𑀲𑀦𑀁, 𑀇𑀤𑀁 𑀧𑀘𑁆𑀙𑀺𑀫𑀤𑀲𑁆𑀲𑀦𑀁. 𑀧𑀼𑀦 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀁 𑀦𑀢𑁆𑀣𑀻’’𑀢𑀺 𑁋 𑀯𑀢𑁆𑀯𑀸 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀬𑀸𑀯 𑀤𑀲𑁆𑀲𑀦𑀯𑀺𑀲𑀬𑁄, 𑀢𑀸𑀯 𑀅𑀪𑀺𑀫𑀼𑀔𑁄𑀯 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀓𑀺𑀲𑁆𑀫𑀺𑀜𑁆𑀘𑀺 𑀞𑀸𑀦𑁂 𑀕𑀫𑀦𑀸𑀕𑀫𑀦𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀫𑀳𑀸𑀪𑀽𑀫𑀺𑀘𑀸𑀮𑁄 𑀅𑀳𑁄𑀲𑀺. 𑀪𑀕𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑁂 𑀪𑀺𑀓𑁆𑀔𑀽 𑀆𑀳 𑁋 ‘‘𑀅𑀦𑀼𑀕𑀘𑁆𑀙𑀣, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑀸𑀓𑀁 𑀚𑁂𑀝𑁆𑀞𑀪𑀸𑀢𑀺𑀓’’𑀦𑁆𑀢𑀺. 𑀪𑀺𑀓𑁆𑀔𑀽 𑀬𑀸𑀯 𑀤𑁆𑀯𑀸𑀭𑀓𑁄𑀝𑁆𑀞𑀓𑀸 𑀅𑀕𑀫𑀁𑀲𑀼. 𑀣𑁂𑀭𑁄 𑁋 ‘‘𑀢𑀺𑀝𑁆𑀞𑀣, 𑀢𑀼𑀫𑁆𑀳𑁂 𑀆𑀯𑀼𑀲𑁄, 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣𑀸’’𑀢𑀺 𑀦𑀺𑀯𑀢𑁆𑀢𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬𑁂𑀯 𑀲𑀤𑁆𑀥𑀺𑀁 𑀧𑀓𑁆𑀓𑀸𑀫𑀺. 𑀫𑀦𑀼𑀲𑁆𑀲𑀸 𑁋 ‘‘𑀧𑀼𑀩𑁆𑀩𑁂 𑀅𑀬𑁆𑀬𑁄 𑀧𑀘𑁆𑀘𑀸𑀕𑀫𑀦𑀘𑀸𑀭𑀺𑀓𑀁 𑀘𑀭𑀢𑀺, 𑀇𑀤𑀁 𑀤𑀸𑀦𑀺 𑀕𑀫𑀦𑀁 𑀦 𑀧𑀼𑀦 𑀧𑀘𑁆𑀘𑀸𑀕𑀫𑀦𑀸𑀬𑀸’’𑀢𑀺 𑀧𑀭𑀺𑀤𑁂𑀯𑀦𑁆𑀢𑀸 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀢𑁂𑀧𑀺 ‘‘𑀅𑀧𑁆𑀧𑀫𑀢𑁆𑀢𑀸 𑀳𑁄𑀣 𑀆𑀯𑀼𑀲𑁄, 𑀏𑀯𑀁𑀪𑀸𑀯𑀺𑀦𑁄 𑀦𑀸𑀫 𑀲𑀗𑁆𑀔𑀸𑀭𑀸’’𑀢𑀺 𑀦𑀺𑀯𑀢𑁆𑀢𑀸𑀧𑁂𑀲𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀢𑁆𑀢𑀸𑀳𑀁 𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀕𑁆𑀕𑀳𑀁 𑀓𑀭𑁄𑀦𑁆𑀢𑁄 𑀲𑀸𑀬𑀁 𑀦𑀸𑀴𑀓𑀕𑀸𑀫𑀁 𑀧𑀢𑁆𑀯𑀸 𑀕𑀸𑀫𑀤𑁆𑀯𑀸𑀭𑁂 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑁂 𑀅𑀝𑁆𑀞𑀸𑀲𑀺. 𑀅𑀣 𑀉𑀧𑀭𑁂𑀯𑀢𑁄 𑀦𑀸𑀫 𑀣𑁂𑀭𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑁄 𑀩𑀳𑀺𑀕𑀸𑀫𑀁 𑀕𑀘𑁆𑀙𑀦𑁆𑀢𑁄 𑀣𑁂𑀭𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀣𑁂𑀭𑁄 𑀢𑀁 𑀆𑀳 𑁋 ‘‘𑀅𑀢𑁆𑀣𑀺 𑀕𑁂𑀳𑁂 𑀢𑁂 𑀅𑀬𑁆𑀬𑀺𑀓𑀸’’𑀢𑀺? 𑀆𑀫, 𑀪𑀦𑁆𑀢𑁂𑀢𑀺. 𑀕𑀘𑁆𑀙 𑀅𑀫𑁆𑀳𑀸𑀓𑀁 𑀇𑀥𑀸𑀕𑀢𑀪𑀸𑀯𑀁 𑀆𑀭𑁄𑀘𑁂𑀳𑀺. ‘‘𑀓𑀲𑁆𑀫𑀸 𑀆𑀕𑀢𑁄’’𑀢𑀺 𑀘 𑀯𑀼𑀢𑁆𑀢𑁂 ‘‘𑀅𑀚𑁆𑀚 𑀓𑀺𑀭 𑀏𑀓𑀤𑀺𑀯𑀲𑀁 𑀅𑀦𑁆𑀢𑁄𑀕𑀸𑀫𑁂 𑀪𑀯𑀺𑀲𑁆𑀲𑀢𑀺, 𑀚𑀸𑀢𑁄𑀯𑀭𑀓𑀁 𑀧𑀝𑀺𑀚𑀕𑁆𑀕𑀣, 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀦𑀺𑀯𑀸𑀲𑀦𑀝𑁆𑀞𑀸𑀦𑀁 𑀚𑀸𑀦𑀸𑀣𑀸’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 ‘‘𑀅𑀬𑁆𑀬𑀺𑀓𑁂, 𑀫𑀬𑁆𑀳𑀁 𑀫𑀸𑀢𑀼𑀮𑁄 ¶ 𑀆𑀕𑀢𑁄’’𑀢𑀺 𑀆𑀳. 𑀇𑀤𑀸𑀦𑀺 𑀓𑀼𑀳𑀺𑀦𑁆𑀢𑀺? 𑀕𑀸𑀫𑀤𑁆𑀯𑀸𑀭𑁂𑀢𑀺. 𑀏𑀓𑀓𑁄𑀯, 𑀅𑀜𑁆𑀜𑁄𑀧𑀺 𑀓𑁄𑀘𑀺 𑀅𑀢𑁆𑀣𑀻𑀢𑀺 ¶ ? 𑀅𑀢𑁆𑀣𑀺 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽𑀢𑀺. 𑀓𑀺𑀁 𑀓𑀸𑀭𑀡𑀸 𑀆𑀕𑀢𑁄𑀢𑀺? 𑀲𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀩𑁆𑀭𑀸𑀳𑁆𑀫𑀡𑀻 𑁋 ‘‘𑀓𑀺𑀁 𑀦𑀼 𑀔𑁄 𑀏𑀢𑁆𑀢𑀓𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀧𑀝𑀺𑀚𑀕𑁆𑀕𑀸𑀧𑁂𑀢𑀺 ¶ , 𑀤𑀳𑀭𑀓𑀸𑀮𑁂 𑀧𑀩𑁆𑀩𑀚𑀺𑀢𑁆𑀯𑀸 𑀫𑀳𑀮𑁆𑀮𑀓𑀓𑀸𑀮𑁂 𑀕𑀺𑀳𑀻 𑀳𑁄𑀢𑀼𑀓𑀸𑀫𑁄’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀻 𑀚𑀸𑀢𑁄𑀯𑀭𑀓𑀁 𑀧𑀝𑀺𑀚𑀕𑁆𑀕𑀸𑀧𑁂𑀢𑁆𑀯𑀸 𑀧𑀜𑁆𑀘𑀲𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀲𑀦𑀝𑁆𑀞𑀸𑀦𑀁 𑀓𑀸𑀭𑁂𑀢𑁆𑀯𑀸 𑀤𑀡𑁆𑀟𑀤𑀻𑀧𑀺𑀓𑀸𑀬𑁄 𑀚𑀸𑀮𑁂𑀢𑁆𑀯𑀸 𑀣𑁂𑀭𑀲𑁆𑀲 𑀧𑀸𑀳𑁂𑀲𑀺.

𑀣𑁂𑀭𑁄 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺. 𑀅𑀪𑀺𑀭𑀼𑀳𑀺𑀢𑁆𑀯𑀸 𑀘 𑀚𑀸𑀢𑁄𑀯𑀭𑀓𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚𑁂𑀯 𑁋 ‘‘𑀢𑀼𑀫𑁆𑀳𑀸𑀓𑀁 𑀯𑀲𑀦𑀝𑁆𑀞𑀸𑀦𑀁 𑀕𑀘𑁆𑀙𑀣𑀸’’𑀢𑀺 𑀪𑀺𑀓𑁆𑀔𑀽 𑀉𑀬𑁆𑀬𑁄𑀚𑁂𑀲𑀺. 𑀢𑁂𑀲𑀼 𑀕𑀢𑀫𑀢𑁆𑀢𑁂𑀲𑀼𑀬𑁂𑀯 𑀣𑁂𑀭𑀲𑁆𑀲 𑀔𑀭𑁄 𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑀺, 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀸 𑀫𑀸𑀭𑀡𑀦𑁆𑀢𑀺𑀓𑀸 𑀯𑁂𑀤𑀦𑀸 𑀯𑀢𑁆𑀢𑀦𑁆𑀢𑀺, 𑀏𑀓𑀁 𑀪𑀸𑀚𑀦𑀁 𑀧𑀯𑀺𑀲𑀢𑀺, 𑀏𑀓𑀁 𑀦𑀺𑀓𑁆𑀔𑀫𑀢𑀺. 𑀩𑁆𑀭𑀸𑀳𑁆𑀫𑀡𑀻 𑁋 ‘‘𑀫𑀫 𑀧𑀼𑀢𑁆𑀢𑀲𑁆𑀲 𑀧𑀯𑀢𑁆𑀢𑀺 𑀫𑀬𑁆𑀳𑀁 𑀦 𑀭𑀼𑀘𑁆𑀘𑀢𑀻’’𑀢𑀺 𑀅𑀢𑁆𑀢𑀦𑁄 𑀯𑀲𑀦𑀕𑀩𑁆𑀪𑀤𑁆𑀯𑀸𑀭𑀁 𑀦𑀺𑀲𑁆𑀲𑀸𑀬 𑀅𑀝𑁆𑀞𑀸𑀲𑀺. 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 ‘‘𑀥𑀫𑁆𑀫𑀲𑁂𑀦𑀸𑀧𑀢𑀺 𑀓𑀼𑀳𑀺𑀁 𑀯𑀺𑀳𑀭𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑀸 ‘‘𑀦𑀸𑀴𑀓𑀕𑀸𑀫𑁂 𑀚𑀸𑀢𑁄𑀯𑀭𑀓𑁂 𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑁂 𑀦𑀺𑀧𑀦𑁆𑀦𑁄, 𑀧𑀘𑁆𑀙𑀺𑀫𑀤𑀲𑁆𑀲𑀦𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀕𑀫𑁆𑀫 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀣𑁂𑀭𑁄 𑁋 𑀓𑁂 𑀢𑀼𑀫𑁆𑀳𑁂𑀢𑀺? 𑀫𑀳𑀸𑀭𑀸𑀚𑀸𑀦𑁄, 𑀪𑀦𑁆𑀢𑁂𑀢𑀺. 𑀓𑀲𑁆𑀫𑀸 𑀆𑀕𑀢𑀢𑁆𑀣𑀸𑀢𑀺? 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸 𑀪𑀯𑀺𑀲𑁆𑀲𑀸𑀫𑀸𑀢𑀺. 𑀳𑁄𑀢𑀼, 𑀅𑀢𑁆𑀣𑀺 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄, 𑀕𑀘𑁆𑀙𑀣 𑀢𑀼𑀫𑁆𑀳𑁂𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀢𑁂𑀲𑀁 𑀕𑀢𑀸𑀯𑀲𑀸𑀦𑁂 𑀢𑁂𑀦𑁂𑀯 𑀦𑀬𑁂𑀦 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄, 𑀢𑀲𑁆𑀫𑀺𑀁 𑀕𑀢𑁂 𑀲𑀼𑀬𑀸𑀫𑀸𑀤𑀬𑁄 𑀫𑀳𑀸𑀩𑁆𑀭𑀳𑁆𑀫𑀸 𑀘 𑀆𑀕𑀫𑀺𑀁𑀲𑀼. 𑀢𑁂𑀧𑀺 𑀢𑀣𑁂𑀯 𑀣𑁂𑀭𑁄 𑀉𑀬𑁆𑀬𑁄𑀚𑁂𑀲𑀺.

𑀩𑁆𑀭𑀸𑀳𑁆𑀫𑀡𑀻 𑀤𑁂𑀯𑀢𑀸𑀦𑀁 𑀆𑀕𑀫𑀦𑀜𑁆𑀘 𑀕𑀫𑀦𑀜𑁆𑀘 𑀤𑀺𑀲𑁆𑀯𑀸 𑁋 ‘‘𑀓𑁂 𑀦𑀼 𑀔𑁄 𑀏𑀢𑁂 𑀫𑀫 𑀧𑀼𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀻’’𑀢𑀺 𑀣𑁂𑀭𑀲𑁆𑀲 𑀕𑀩𑁆𑀪𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑁋 ‘‘𑀢𑀸𑀢, 𑀘𑀼𑀦𑁆𑀤, 𑀓𑀸 𑀧𑀯𑀢𑁆𑀢𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑁋 ‘‘𑀫𑀳𑀸𑀉𑀧𑀸𑀲𑀺𑀓𑀸, 𑀪𑀦𑁆𑀢𑁂 𑀆𑀕𑀢𑀸’’𑀢𑀺 𑀆𑀳. 𑀣𑁂𑀭𑁄 𑀓𑀲𑁆𑀫𑀸 𑀅𑀯𑁂𑀮𑀸𑀬 𑀆𑀕𑀢𑀢𑁆𑀣𑀸𑀢𑀺 𑀧𑀼𑀘𑁆𑀙𑀺. 𑀲𑀸 𑀢𑀼𑀬𑁆𑀳𑀁 𑀢𑀸𑀢 𑀤𑀲𑁆𑀲𑀦𑀢𑁆𑀣𑀸𑀬𑀸𑀢𑀺 𑀯𑀢𑁆𑀯𑀸 ‘‘𑀢𑀸𑀢 𑀓𑁂 𑀧𑀞𑀫𑀁 𑀆𑀕𑀢𑀸’’𑀢𑀺 𑀧𑀼𑀘𑁆𑀙𑀺. 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄, 𑀉𑀧𑀸𑀲𑀺𑀓𑁂𑀢𑀺. 𑀢𑀸𑀢, 𑀢𑁆𑀯𑀁 𑀘𑀢𑀽𑀳𑀺 𑀫𑀳𑀸𑀭𑀸𑀚𑁂𑀳𑀺 𑀫𑀳𑀦𑁆𑀢𑀢𑀭𑁄𑀢𑀺? 𑀆𑀭𑀸𑀫𑀺𑀓𑀲𑀤𑀺𑀲𑀸 𑀏𑀢𑁂 𑀉𑀧𑀸𑀲𑀺𑀓𑁂, 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀔𑀕𑁆𑀕𑀳𑀢𑁆𑀣𑀸 𑀳𑀼𑀢𑁆𑀯𑀸 𑀆𑀭𑀓𑁆𑀔𑀁 𑀅𑀓𑀁𑀲𑀽𑀢𑀺. 𑀢𑁂𑀲𑀁 𑀢𑀸𑀢, 𑀕𑀢𑀸𑀯𑀲𑀸𑀦𑁂 𑀓𑁄 𑀆𑀕𑀢𑁄𑀢𑀺? 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄𑀢𑀺. 𑀤𑁂𑀯𑀭𑀸𑀚𑀢𑁄𑀧𑀺 𑀢𑁆𑀯𑀁 𑀢𑀸𑀢, 𑀫𑀳𑀦𑁆𑀢𑀢𑀭𑁄𑀢𑀺? 𑀪𑀡𑁆𑀟𑀕𑀸𑀳𑀓𑀲𑀸𑀫𑀡𑁂𑀭𑀲𑀤𑀺𑀲𑁄 ¶ 𑀏𑀲 𑀉𑀧𑀸𑀲𑀺𑀓𑁂, 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼 𑀢𑀸𑀯𑀢𑀺𑀁𑀲𑀢𑁄 𑀑𑀢𑀭𑀡𑀓𑀸𑀮𑁂 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀑𑀢𑀺𑀡𑁆𑀡𑁄𑀢𑀺. 𑀢𑀲𑁆𑀲 𑀢𑀸𑀢 𑀕𑀢𑀸𑀯𑀲𑀸𑀦𑁂 𑀚𑁄𑀢𑀫𑀸𑀦𑁄 𑀯𑀺𑀬 𑀓𑁄 𑀆𑀕𑀢𑁄𑀢𑀺? 𑀉𑀧𑀸𑀲𑀺𑀓𑁂 𑀢𑀼𑀬𑁆𑀳𑀁 𑀪𑀕𑀯𑀸 𑀘 𑀲𑀢𑁆𑀣𑀸 𑀘 𑀫𑀳𑀸𑀩𑁆𑀭𑀳𑁆𑀫𑀸 𑀦𑀸𑀫 𑀏𑀲𑁄𑀢𑀺. 𑀫𑀬𑁆𑀳𑀁 𑀪𑀕𑀯𑀢𑁄 𑀫𑀳𑀸𑀩𑁆𑀭𑀳𑁆𑀫𑀢𑁄𑀧𑀺 𑀢𑁆𑀯𑀁 𑀢𑀸𑀢 𑀫𑀳𑀦𑁆𑀢𑀢𑀭𑁄𑀢𑀺? 𑀆𑀫 𑀉𑀧𑀸𑀲𑀺𑀓𑁂, 𑀏𑀢𑁂 𑀦𑀸𑀫 𑀓𑀺𑀭 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼 ¶ 𑀚𑀸𑀢𑀤𑀺𑀯𑀲𑁂 𑀘𑀢𑁆𑀢𑀸𑀭𑁄 𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀫𑀳𑀸𑀧𑀼𑀭𑀺𑀲𑀁 𑀲𑀼𑀯𑀡𑁆𑀡𑀚𑀸𑀮𑁂𑀦 𑀧𑀝𑀺𑀕𑁆𑀕𑀡𑁆𑀳𑀺𑀁𑀲𑀽𑀢𑀺.

𑀅𑀣 ¶ 𑀩𑁆𑀭𑀸𑀳𑁆𑀫𑀡𑀺𑀬𑀸 𑁋 ‘‘𑀧𑀼𑀢𑁆𑀢𑀲𑁆𑀲 𑀢𑀸𑀯 𑀫𑁂 𑀅𑀬𑀁 𑀆𑀦𑀼𑀪𑀸𑀯𑁄, 𑀓𑀻𑀤𑀺𑀲𑁄 𑀯𑀢 𑀫𑀬𑁆𑀳𑀁 𑀧𑀼𑀢𑁆𑀢𑀲𑁆𑀲 𑀪𑀕𑀯𑀢𑁄 𑀲𑀢𑁆𑀣𑀼 𑀆𑀦𑀼𑀪𑀸𑀯𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑀬𑀦𑁆𑀢𑀺𑀬𑀸 𑀲𑀳𑀲𑀸 𑀧𑀜𑁆𑀘𑀯𑀡𑁆𑀡𑀸 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀓𑀮𑀲𑀭𑀻𑀭𑁂 𑀨𑀭𑀺. 𑀣𑁂𑀭𑁄 𑁋 ‘‘𑀉𑀧𑁆𑀧𑀦𑁆𑀦𑀁 𑀫𑁂 𑀫𑀸𑀢𑀼 𑀧𑀻𑀢𑀺𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀤𑀸𑀦𑀺 𑀓𑀸𑀮𑁄 𑀥𑀫𑁆𑀫𑀤𑁂𑀲𑀦𑀸𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀓𑀺𑀁 𑀘𑀺𑀦𑁆𑀢𑁂𑀲𑀺 𑀫𑀳𑀸𑀉𑀧𑀸𑀲𑀺𑀓𑁂’’𑀢𑀺 𑀆𑀳. 𑀲𑀸 𑁋 ‘‘𑀧𑀼𑀢𑁆𑀢𑀲𑁆𑀲 𑀢𑀸𑀯 𑀫𑁂 𑀅𑀬𑀁 𑀕𑀼𑀡𑁄, 𑀲𑀢𑁆𑀣𑀼 𑀧𑀦𑀲𑁆𑀲 𑀓𑀻𑀤𑀺𑀲𑁄 𑀕𑀼𑀡𑁄 𑀪𑀯𑀺𑀲𑁆𑀲𑀢𑀻𑀢𑀺 𑀇𑀤𑀁, 𑀢𑀸𑀢, 𑀘𑀺𑀦𑁆𑀢𑁂𑀫𑀻’’𑀢𑀺 𑀆𑀳. 𑀫𑀳𑀸𑀉𑀧𑀸𑀲𑀺𑀓𑁂, 𑀫𑀬𑁆𑀳𑀁 𑀲𑀢𑁆𑀣𑀼 𑀚𑀸𑀢𑀓𑁆𑀔𑀡𑁂, 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑁂, 𑀲𑀫𑁆𑀩𑁄𑀥𑀺𑀬𑀁, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂 𑀘 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀓𑀫𑁆𑀧𑀺𑀢𑁆𑀣, 𑀲𑀻𑀮𑁂𑀦 𑀲𑀫𑀸𑀥𑀺𑀦𑀸 𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑁂𑀦 𑀲𑀫𑁄 𑀦𑀸𑀫 𑀦𑀢𑁆𑀣𑀺, 𑀇𑀢𑀺𑀧𑀺 𑀲𑁄 𑀪𑀕𑀯𑀸𑀢𑀺 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀩𑀼𑀤𑁆𑀥𑀕𑀼𑀡𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀤𑁂𑀲𑀦𑀁 𑀓𑀣𑁂𑀲𑀺.

𑀩𑁆𑀭𑀸𑀳𑁆𑀫𑀡𑀻 𑀧𑀺𑀬𑀧𑀼𑀢𑁆𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀧𑀼𑀢𑁆𑀢𑀁 𑀆𑀳 𑁋 ‘‘𑀢𑀸𑀢, 𑀉𑀧𑀢𑀺𑀲𑁆𑀲, 𑀓𑀲𑁆𑀫𑀸 𑀏𑀯𑀫𑀓𑀸𑀲𑀺, 𑀏𑀯𑀭𑀽𑀧𑀁 𑀦𑀸𑀫 𑀅𑀫𑀢𑀁 𑀫𑀬𑁆𑀳𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀦 𑀅𑀤𑀸𑀲𑀻’’𑀢𑀺. 𑀣𑁂𑀭𑁄 𑁋 ‘‘𑀤𑀺𑀦𑁆𑀦𑀁 𑀤𑀸𑀦𑀺 𑀫𑁂 𑀫𑀸𑀢𑀼 𑀭𑀽𑀧𑀲𑀸𑀭𑀺𑀬𑀸 𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑁄𑀲𑀸𑀯𑀦𑀺𑀓𑀫𑀽𑀮𑀁, 𑀏𑀢𑁆𑀢𑀓𑁂𑀦 𑀯𑀝𑁆𑀝𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀕𑀘𑁆𑀙 𑀫𑀳𑀸𑀉𑀧𑀸𑀲𑀺𑀓𑁂’’𑀢𑀺 𑀩𑁆𑀭𑀸𑀳𑁆𑀫𑀡𑀺𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 ‘‘𑀘𑀼𑀦𑁆𑀤 𑀓𑀸 𑀯𑁂𑀮𑀸’’𑀢𑀺 𑀆𑀳. 𑀩𑀮𑀯𑀧𑀘𑁆𑀘𑀽𑀲𑀓𑀸𑀮𑁄, 𑀪𑀦𑁆𑀢𑁂𑀢𑀺. 𑀢𑁂𑀦 𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀳𑀻𑀢𑀺. 𑀲𑀦𑁆𑀦𑀺𑀧𑀢𑀺𑀢𑁄, 𑀪𑀦𑁆𑀢𑁂, 𑀲𑀗𑁆𑀖𑁄𑀢𑀺. 𑀫𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀳𑀺 𑀘𑀼𑀦𑁆𑀤𑀸𑀢𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀲𑀺. 𑀣𑁂𑀭𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄 𑀘𑀢𑀼𑀘𑀢𑁆𑀢𑀸𑀮𑀻𑀲𑀁 𑀯𑁄 𑀯𑀲𑁆𑀲𑀸𑀦𑀺 𑀫𑀬𑀸 𑀲𑀤𑁆𑀥𑀺𑀁 𑀯𑀺𑀘𑀭𑀦𑁆𑀢𑀸𑀦𑀁 𑀬𑀁 𑀫𑁂 𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸 𑀦 𑀭𑁄𑀘𑁂𑀣, 𑀔𑀫𑀣 𑀢𑀁 𑀆𑀯𑀼𑀲𑁄𑀢𑀺. 𑀏𑀢𑁆𑀢𑀓𑀁, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀙𑀸𑀬𑀸 𑀯𑀺𑀬 𑀢𑀼𑀫𑁆𑀳𑁂 𑀅𑀫𑀼𑀜𑁆𑀘𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑀸𑀦𑀁 𑀅𑀭𑀼𑀘𑁆𑀘𑀦𑀓𑀁 𑀦𑀸𑀫 𑀦𑀢𑁆𑀣𑀺, 𑀢𑀼𑀫𑁆𑀳𑁂 𑀧𑀦 𑀅𑀫𑁆𑀳𑀸𑀓𑀁 𑀔𑀫𑀣𑀸𑀢𑀺. 𑀅𑀣 ¶ 𑀣𑁂𑀭𑁄 𑀅𑀭𑀼𑀡𑀲𑀺𑀔𑀸𑀬 𑀧𑀜𑁆𑀜𑀸𑀬𑀫𑀸𑀦𑀸𑀬 𑀫𑀳𑀸𑀧𑀣𑀯𑀺𑀁 𑀉𑀦𑁆𑀦𑀸𑀤𑀬𑀦𑁆𑀢𑁄 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀩𑀳𑀽 𑀤𑁂𑀯𑀫𑀦𑀼𑀲𑁆𑀲𑀸 𑀣𑁂𑀭𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑁂 𑀲𑀓𑁆𑀓𑀸𑀭𑀁 𑀓𑀭𑀺𑀁𑀲𑀼.

𑀆𑀬𑀲𑁆𑀫𑀸 ¶ 𑀘𑀼𑀦𑁆𑀤𑁄 𑀣𑁂𑀭𑀲𑁆𑀲 𑀧𑀢𑁆𑀢𑀘𑀻𑀯𑀭𑀜𑁆𑀘 𑀥𑀸𑀢𑀼𑀧𑀭𑀺𑀲𑁆𑀲𑀸𑀯𑀦𑀜𑁆𑀘 𑀕𑀳𑁂𑀢𑁆𑀯𑀸 𑀚𑁂𑀢𑀯𑀦𑀁 𑀕𑀦𑁆𑀢𑁆𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀕𑀳𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺. 𑀪𑀕𑀯𑀸 𑀥𑀸𑀢𑀼𑀧𑀭𑀺𑀲𑁆𑀲𑀸𑀯𑀦𑀁 𑀕𑀳𑁂𑀢𑁆𑀯𑀸 𑀧𑀜𑁆𑀘𑀳𑀺 𑀕𑀸𑀣𑀸𑀲𑀢𑁂𑀳𑀺 𑀣𑁂𑀭𑀲𑁆𑀲 𑀕𑀼𑀡𑀁 𑀓𑀣𑁂𑀢𑁆𑀯𑀸 𑀥𑀸𑀢𑀼𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀭𑀸𑀚𑀕𑀳𑀕𑀫𑀦𑀢𑁆𑀣𑀸𑀬 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺. 𑀣𑁂𑀭𑁄 𑀪𑀺𑀓𑁆𑀔𑀽𑀦𑀁 𑀆𑀭𑁄𑀘𑁂𑀲𑀺. 𑀪𑀕𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀭𑀸𑀚𑀕𑀳𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀕𑀢𑀓𑀸𑀮𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀪𑀕𑀯𑀸 𑀢𑀲𑁆𑀲 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀁 𑀓𑀸𑀭𑀸𑀧𑁂𑀢𑁆𑀯𑀸 𑀭𑀸𑀚𑀕𑀳𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀕𑀗𑁆𑀕𑀸𑀪𑀺𑀫𑀼𑀔𑁄 𑀕𑀦𑁆𑀢𑁆𑀯𑀸 𑀉𑀓𑁆𑀓𑀘𑁂𑀮𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀕𑀗𑁆𑀕𑀸𑀢𑀻𑀭𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀢𑀢𑁆𑀣 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀦𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁 𑀲𑀼𑀢𑁆𑀢𑀁 𑀤𑁂𑀲𑁂𑀢𑁆𑀯𑀸 𑀉𑀓𑁆𑀓𑀘𑁂𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑁂𑀲𑀸𑀮𑀺𑀁 𑀅𑀕𑀫𑀸𑀲𑀺. 𑀏𑀯𑀁 𑀕𑀢𑁂 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 ¶ 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑁂𑀲𑀸𑀮𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀻𑀢𑀺 𑀅𑀬𑀫𑁂𑀢𑁆𑀣 𑀅𑀦𑀼𑀧𑀼𑀩𑁆𑀩𑀻 𑀓𑀣𑀸.

𑀦𑀺𑀲𑀻𑀤𑀦𑀦𑁆𑀢𑀺 𑀏𑀢𑁆𑀣 𑀘𑀫𑁆𑀫𑀓𑁆𑀔𑀡𑁆𑀟𑀁 𑀅𑀥𑀺𑀧𑁆𑀧𑁂𑀢𑀁. 𑀉𑀤𑁂𑀦𑀘𑁂𑀢𑀺𑀬𑀦𑁆𑀢𑀺 𑀉𑀤𑁂𑀦𑀬𑀓𑁆𑀔𑀲𑁆𑀲 𑀘𑁂𑀢𑀺𑀬𑀝𑁆𑀞𑀸𑀦𑁂 𑀓𑀢𑀯𑀺𑀳𑀸𑀭𑁄 𑀯𑀼𑀘𑁆𑀘𑀢𑀺. 𑀕𑁄𑀢𑀫𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀪𑀸𑀯𑀺𑀢𑀸𑀢𑀺 𑀯𑀟𑁆𑀠𑀺𑀢𑀸. 𑀩𑀳𑀼𑀮𑀻𑀓𑀢𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀢𑀸. 𑀬𑀸𑀦𑀻𑀓𑀢𑀸𑀢𑀺 𑀬𑀼𑀢𑁆𑀢𑀬𑀸𑀦𑀁 𑀯𑀺𑀬 𑀓𑀢𑀸. 𑀯𑀢𑁆𑀣𑀼𑀓𑀢𑀸𑀢𑀺 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀯𑀢𑁆𑀣𑀼 𑀯𑀺𑀬 𑀓𑀢𑀸. 𑀅𑀦𑀼𑀝𑁆𑀞𑀺𑀢𑀸𑀢𑀺 𑀅𑀥𑀺𑀝𑁆𑀞𑀺𑀢𑀸. 𑀧𑀭𑀺𑀘𑀺𑀢𑀸𑀢𑀺 𑀲𑀫𑀦𑁆𑀢𑀢𑁄 𑀘𑀺𑀢𑀸 𑀲𑀼𑀯𑀟𑁆𑀠𑀺𑀢𑀸. 𑀲𑀼𑀲𑀫𑀸𑀭𑀤𑁆𑀥𑀸𑀢𑀺 𑀲𑀼𑀝𑁆𑀞𑀼 𑀲𑀫𑀸𑀭𑀤𑁆𑀥𑀸.

𑀇𑀢𑀺 𑀅𑀦𑀺𑀬𑀫𑁂𑀦 𑀓𑀣𑁂𑀢𑁆𑀯𑀸 𑀧𑀼𑀦 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀢𑀣𑀸𑀕𑀢𑀲𑁆𑀲 𑀔𑁄𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 𑀓𑀧𑁆𑀧𑀦𑁆𑀢𑀺 𑀆𑀬𑀼𑀓𑀧𑁆𑀧𑀁. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀬𑀁 𑀫𑀦𑀼𑀲𑁆𑀲𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀁 𑀳𑁄𑀢𑀺, 𑀢𑀁 𑀧𑀭𑀺𑀧𑀼𑀡𑁆𑀡𑀁 𑀓𑀭𑁄𑀦𑁆𑀢𑁄 𑀢𑀺𑀝𑁆𑀞𑁂𑀬𑁆𑀬. 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸𑀢𑀺 𑁋 ‘‘𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄’’𑀢𑀺 (𑀤𑀻. 𑀦𑀺. 𑁨.𑁭; 𑀅. 𑀦𑀺. 𑁬.𑁭𑁪) 𑀯𑀼𑀢𑁆𑀢𑀯𑀲𑁆𑀲𑀲𑀢𑀢𑁄 𑀅𑀢𑀺𑀭𑁂𑀓𑀁 𑀯𑀸. 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀩𑀼𑀤𑁆𑀥𑀸𑀦𑀁 𑀅𑀝𑁆𑀞𑀸𑀦𑁂 𑀕𑀚𑁆𑀚𑀺𑀢𑀁 𑀦𑀸𑀫 𑀦𑀢𑁆𑀣𑀺. 𑀬𑀣𑁂𑀯 𑀳𑀺 𑀯𑁂𑀴𑀼𑀯𑀕𑀸𑀫𑀓𑁂 𑀉𑀧𑁆𑀧𑀦𑁆𑀦𑀁 𑀫𑀸𑀭𑀡𑀦𑁆𑀢𑀺𑀓𑀁 𑀯𑁂𑀤𑀦𑀁 𑀤𑀲 𑀫𑀸𑀲𑁂 𑀯𑀺𑀓𑁆𑀔𑀫𑁆𑀪𑁂𑀢𑀺, 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 ¶ 𑀢𑀁 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀤𑀲 𑀤𑀲 𑀫𑀸𑀲𑁂 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀇𑀫𑀁 𑀪𑀤𑁆𑀤𑀓𑀧𑁆𑀧𑀫𑁂𑀯 𑀢𑀺𑀝𑁆𑀞𑁂𑀬𑁆𑀬, 𑀓𑀲𑁆𑀫𑀸 𑀧𑀦 𑀦 𑀞𑀺𑀢𑁄𑀢𑀺? 𑀉𑀧𑀸𑀤𑀺𑀦𑁆𑀦𑀓𑀲𑀭𑀻𑀭𑀁 𑀦𑀸𑀫 𑀔𑀡𑁆𑀟𑀺𑀘𑁆𑀘𑀸𑀤𑀻𑀳𑀺 𑀅𑀪𑀺𑀪𑀼𑀬𑁆𑀬𑀢𑀺, 𑀩𑀼𑀤𑁆𑀥𑀸 𑀘 𑀔𑀡𑁆𑀟𑀺𑀘𑁆𑀘𑀸𑀤𑀺𑀪𑀸𑀯𑀁 𑀅𑀧𑀢𑁆𑀯𑀸 𑀧𑀜𑁆𑀘𑀫𑁂 𑀆𑀬𑀼𑀓𑁄𑀝𑁆𑀞𑀸𑀲𑁂 𑀩𑀳𑀼𑀚𑀦𑀲𑁆𑀲 𑀧𑀺𑀬𑀫𑀦𑀸𑀧𑀓𑀸𑀮𑁂𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺. 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑁂𑀲𑀼 𑀘 𑀫𑀳𑀸𑀲𑀸𑀯𑀓𑁂𑀲𑀼 𑀧𑀭𑀺𑀦𑀺𑀩𑁆𑀩𑀼𑀢𑁂𑀲𑀼 𑀏𑀓𑀓𑁂𑀦𑁂𑀯 𑀔𑀸𑀡𑀼𑀓𑁂𑀦 𑀯𑀺𑀬 ¶ 𑀞𑀸𑀢𑀩𑁆𑀩𑀁 𑀳𑁄𑀢𑀺, 𑀤𑀳𑀭𑀲𑀸𑀫𑀡𑁂𑀭𑀧𑀭𑀺𑀯𑀸𑀭𑀺𑀢𑁂𑀦 𑀯𑀸. 𑀢𑀢𑁄 𑁋 ‘𑀅𑀳𑁄 𑀩𑀼𑀤𑁆𑀥𑀸𑀦𑀁 𑀧𑀭𑀺𑀲𑀸’𑀢𑀺 𑀳𑀻𑀴𑁂𑀢𑀩𑁆𑀩𑀢𑀁 𑀆𑀧𑀚𑁆𑀚𑁂𑀬𑁆𑀬. 𑀢𑀲𑁆𑀫𑀸 𑀦 𑀞𑀺𑀢𑁄’’𑀢𑀺. 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀲𑁄 𑀦 𑀭𑀼𑀘𑁆𑀘𑀢𑀺, ‘‘𑀆𑀬𑀼𑀓𑀧𑁆𑀧𑁄’’𑀢𑀺 𑀇𑀤𑀫𑁂𑀯 𑀅𑀝𑁆𑀞𑀓𑀣𑀸𑀬𑀁 𑀦𑀺𑀬𑀫𑀺𑀢𑀁.

𑁧𑁬𑁭. 𑀬𑀣𑀸 𑀢𑀁 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀬𑀣𑀸 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄 𑀅𑀚𑁆𑀛𑁄𑀢𑁆𑀣𑀝𑀘𑀺𑀢𑁆𑀢𑁄 𑀅𑀜𑁆𑀜𑁄𑀧𑀺 𑀓𑁄𑀘𑀺 𑀧𑀼𑀣𑀼𑀚𑁆𑀚𑀦𑁄 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬, 𑀏𑀯𑀫𑁂𑀯 𑀦𑀸𑀲𑀓𑁆𑀔𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀓𑀺𑀁 𑀓𑀸𑀭𑀡𑀸? 𑀫𑀸𑀭𑁄 𑀳𑀺 𑀬𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀤𑁆𑀯𑀸𑀤𑀲 𑀯𑀺𑀧𑀮𑁆𑀮𑀸𑀲𑀸 𑀅𑀧𑁆𑀧𑀳𑀻𑀦𑀸, 𑀢𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀼𑀝𑁆𑀞𑀸𑀢𑀺. 𑀣𑁂𑀭𑀲𑁆𑀲 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸 𑀅𑀧𑁆𑀧𑀳𑀻𑀦𑀸, 𑀢𑁂𑀦𑀲𑁆𑀲 𑀫𑀸𑀭𑁄 𑀘𑀺𑀢𑁆𑀢𑀁 𑀧𑀭𑀺𑀬𑀼𑀝𑁆𑀞𑀸𑀢𑀺. 𑀲𑁄 𑀧𑀦 𑀘𑀺𑀢𑁆𑀢𑀧𑀭𑀺𑀬𑀼𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑁄 𑀓𑀺𑀁 𑀓𑀭𑁄𑀢𑀻𑀢𑀺? 𑀪𑁂𑀭𑀯𑀁 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀲𑀤𑁆𑀤𑀸𑀭𑀫𑁆𑀫𑀡𑀁 𑀯𑀸 𑀲𑀸𑀯𑁂𑀢𑀺, 𑀢𑀢𑁄 𑀲𑀢𑁆𑀢𑀸 𑀢𑀁 𑀤𑀺𑀲𑁆𑀯𑀸 𑀯𑀸 𑀲𑀼𑀢𑁆𑀯𑀸 𑀯𑀸 𑀲𑀢𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀺𑀯𑀝𑀫𑀼𑀔𑀸 𑀳𑁄𑀦𑁆𑀢𑀺. 𑀢𑁂𑀲𑀁 𑀫𑀼𑀔𑁂𑀦 𑀳𑀢𑁆𑀣𑀁 𑀧𑀯𑁂𑀲𑁂𑀢𑁆𑀯𑀸 𑀳𑀤𑀬𑀁 𑀫𑀤𑁆𑀤𑀢𑀺. 𑀢𑀢𑁄 𑀯𑀺𑀲𑀜𑁆𑀜𑀸𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀣𑁂𑀭𑀲𑁆𑀲 𑀧𑀦𑁂𑀲 𑀫𑀼𑀔𑁂𑀦 𑀳𑀢𑁆𑀣𑀁 𑀧𑀯𑁂𑀲𑁂𑀢𑀼𑀁 𑀓𑀺𑀁 𑀲𑀓𑁆𑀔𑀺𑀲𑁆𑀲𑀢𑀺 ¶ ? 𑀪𑁂𑀭𑀯𑀸𑀭𑀫𑁆𑀫𑀡𑀁 𑀧𑀦 𑀤𑀲𑁆𑀲𑁂𑀢𑀺. 𑀢𑀁 𑀤𑀺𑀲𑁆𑀯𑀸 𑀣𑁂𑀭𑁄 𑀦𑀺𑀫𑀺𑀢𑁆𑀢𑁄𑀪𑀸𑀲𑀁 𑀦 𑀧𑀝𑀺𑀯𑀺𑀚𑁆𑀛𑀺. 𑀪𑀕𑀯𑀸 𑀚𑀸𑀦𑀦𑁆𑀢𑁄𑀬𑁂𑀯 𑁋 ‘‘𑀓𑀺𑀫𑀢𑁆𑀣𑀁 𑀬𑀸𑀯𑀢𑀢𑀺𑀬𑀁 𑀆𑀫𑀦𑁆𑀢𑁂𑀲𑀻’’𑀢𑀺? 𑀧𑀭𑀢𑁄 ‘‘𑀢𑀺𑀝𑁆𑀞𑀢𑀼, 𑀪𑀦𑁆𑀢𑁂, 𑀪𑀕𑀯𑀸’’𑀢𑀺 𑀬𑀸𑀘𑀺𑀢𑁂 ‘‘𑀢𑀼𑀬𑁆𑀳𑁂𑀯𑁂𑀢𑀁 𑀤𑀼𑀓𑁆𑀓𑀝𑀁, 𑀢𑀼𑀬𑁆𑀳𑁂𑀯𑁂𑀢𑀁 𑀅𑀧𑀭𑀤𑁆𑀥’’𑀦𑁆𑀢𑀺 𑀤𑁄𑀲𑀸𑀭𑁄𑀧𑀦𑁂𑀦 𑀲𑁄𑀓𑀢𑀦𑀼𑀓𑀭𑀡𑀢𑁆𑀣𑀁.

𑀫𑀸𑀭𑀬𑀸𑀘𑀦𑀓𑀣𑀸𑀯𑀡𑁆𑀡𑀦𑀸

𑁧𑁬𑁮. 𑀫𑀸𑀭𑁄 𑀧𑀸𑀧𑀺𑀫𑀸𑀢𑀺 𑀏𑀢𑁆𑀣 𑀫𑀸𑀭𑁄𑀢𑀺 𑀲𑀢𑁆𑀢𑁂 𑀅𑀦𑀢𑁆𑀣𑁂 𑀦𑀺𑀬𑁄𑀚𑁂𑀦𑁆𑀢𑁄 𑀫𑀸𑀭𑁂𑀢𑀻𑀢𑀺 𑀫𑀸𑀭𑁄. 𑀧𑀸𑀧𑀺𑀫𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑁄 𑀳𑀺 𑀧𑀸𑀧𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀢𑁆𑀢𑀸 ‘‘𑀧𑀸𑀧𑀺𑀫𑀸’’𑀢𑀺 𑀯𑀼𑀘𑁆𑀘𑀢𑀺. 𑀓𑀡𑁆𑀳𑁄, 𑀅𑀦𑁆𑀢𑀓𑁄, 𑀦𑀫𑀼𑀘𑀺, 𑀧𑀫𑀢𑁆𑀢𑀩𑀦𑁆𑀥𑀽𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫𑀸𑀦𑀺. 𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸𑀢𑀺 𑀅𑀬𑀜𑁆𑀳𑀺 𑀪𑀕𑀯𑀢𑁄 𑀲𑀫𑁆𑀩𑁄𑀥𑀺𑀧𑀢𑁆𑀢𑀺𑀬𑀸 𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂 𑀩𑁄𑀥𑀺𑀫𑀡𑁆𑀟𑁂𑀬𑁂𑀯 𑀆𑀕𑀦𑁆𑀢𑁆𑀯𑀸 𑁋 ‘‘𑀪𑀕𑀯𑀸 𑀬𑀤𑀢𑁆𑀣𑀁 𑀢𑀼𑀫𑁆𑀳𑁂𑀳𑀺 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸, 𑀲𑁄 𑀯𑁄 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀧𑀝𑀺𑀯𑀺𑀤𑁆𑀥𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀓𑀺𑀁 𑀢𑁂 𑀮𑁄𑀓𑀯𑀺𑀘𑀸𑀭𑀡𑁂𑀦𑀸’’𑀢𑀺 𑀯𑀢𑁆𑀯𑀸, 𑀬𑀣𑀸 𑀅𑀚𑁆𑀚 ¶ , 𑀏𑀯𑀫𑁂𑀯 ‘‘𑀧𑀭𑀺𑀦𑀺𑀩𑁆𑀩𑀸𑀢𑀼 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸’’𑀢𑀺 𑀬𑀸𑀘𑀺. 𑀪𑀕𑀯𑀸 𑀘𑀲𑁆𑀲 𑁋 ‘‘𑀦 ¶ 𑀢𑀸𑀯𑀸𑀳’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀺. 𑀢𑀁 𑀲𑀦𑁆𑀥𑀸𑀬 ‘‘𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸 𑀪𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀯𑀺𑀬𑀢𑁆𑀢𑀸𑀢𑀺 𑀫𑀕𑁆𑀕𑀯𑀲𑁂𑀦 𑀯𑀺𑀬𑀢𑁆𑀢𑀸. 𑀢𑀣𑁂𑀯 𑀯𑀺𑀦𑀻𑀢𑀸 𑀢𑀣𑀸 𑀯𑀺𑀲𑀸𑀭𑀤𑀸. 𑀩𑀳𑀼𑀲𑁆𑀲𑀼𑀢𑀸𑀢𑀺 𑀢𑁂𑀧𑀺𑀝𑀓𑀯𑀲𑁂𑀦 𑀩𑀳𑀼 𑀲𑀼𑀢𑀫𑁂𑀢𑁂𑀲𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸. 𑀢𑀫𑁂𑀯 𑀥𑀫𑁆𑀫𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀫𑁆𑀫𑀥𑀭𑀸. 𑀅𑀣𑀯𑀸 𑀧𑀭𑀺𑀬𑀢𑁆𑀢𑀺𑀩𑀳𑀼𑀲𑁆𑀲𑀼𑀢𑀸 𑀘𑁂𑀯 𑀧𑀝𑀺𑀯𑁂𑀥𑀩𑀳𑀼𑀲𑁆𑀲𑀼𑀢𑀸 𑀘. 𑀧𑀭𑀺𑀬𑀢𑁆𑀢𑀺𑀧𑀝𑀺𑀯𑁂𑀥𑀥𑀫𑁆𑀫𑀸𑀦𑀁𑀬𑁂𑀯 𑀥𑀸𑀭𑀡𑀢𑁄 𑀥𑀫𑁆𑀫𑀥𑀭𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀦𑁆𑀦𑀸𑀢𑀺 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫𑀪𑀽𑀢𑀁 𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀁 𑀧𑀝𑀺𑀧𑀦𑁆𑀦𑀸. 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸𑀢𑀺 𑀅𑀦𑀼𑀘𑁆𑀙𑀯𑀺𑀓𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸. 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑁄𑀢𑀺 𑀅𑀦𑀼𑀥𑀫𑁆𑀫𑀘𑀭𑀡𑀲𑀻𑀮𑀸. 𑀲𑀓𑀁 𑀆𑀘𑀭𑀺𑀬𑀓𑀦𑁆𑀢𑀺 𑀅𑀢𑁆𑀢𑀦𑁄 𑀆𑀘𑀭𑀺𑀬𑀯𑀸𑀤𑀁. 𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀻𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀯𑁂𑀯𑀘𑀦𑀸𑀦𑀺. 𑀲𑀳𑀥𑀫𑁆𑀫𑁂𑀦𑀸𑀢𑀺 𑀲𑀳𑁂𑀢𑀼𑀓𑁂𑀦 𑀲𑀓𑀸𑀭𑀡𑁂𑀦 𑀯𑀘𑀦𑁂𑀦. 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀬𑀸𑀯 𑀦 𑀦𑀺𑀬𑁆𑀬𑀸𑀦𑀺𑀓𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀺.

𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀁 𑀲𑀓𑀮𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁. 𑀇𑀤𑁆𑀥𑀦𑁆𑀢𑀺 𑀲𑀫𑀺𑀤𑁆𑀥𑀁 𑀛𑀸𑀦𑀲𑁆𑀲𑀸𑀤𑀯𑀲𑁂𑀦. 𑀨𑀻𑀢𑀦𑁆𑀢𑀺 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀁 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑀁 𑀯𑀺𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀧𑀢𑁆𑀢𑀺𑀯𑀲𑁂𑀦. 𑀯𑀺𑀢𑁆𑀣𑀸𑀭𑀺𑀓𑀦𑁆𑀢𑀺 𑀯𑀺𑀢𑁆𑀣𑀢𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂 𑀧𑀢𑀺𑀝𑁆𑀞𑀺𑀢𑀯𑀲𑁂𑀦. 𑀩𑀸𑀳𑀼𑀚𑀜𑁆𑀜𑀦𑁆𑀢𑀺 𑀩𑀳𑀼𑀚𑀦𑁂𑀳𑀺 𑀜𑀸𑀢𑀁 𑀧𑀝𑀺𑀯𑀺𑀤𑁆𑀥𑀁 𑀫𑀳𑀸𑀚𑀦𑀸𑀪𑀺𑀲𑀫𑀬𑀯𑀲𑁂𑀦. 𑀧𑀼𑀣𑀼𑀪𑀽𑀢𑀦𑁆𑀢𑀺 𑀲𑀩𑁆𑀩𑀸𑀓𑀸𑀭𑀯𑀲𑁂𑀦 𑀧𑀼𑀣𑀼𑀮𑀪𑀸𑀯𑀧𑁆𑀧𑀢𑁆𑀢𑀁. 𑀓𑀣𑀁? 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 ¶ 𑀲𑀼𑀧𑁆𑀧𑀓𑀸𑀲𑀺𑀢𑀦𑁆𑀢𑀺 𑀬𑀢𑁆𑀢𑀓𑀸 𑀯𑀺𑀜𑁆𑀜𑀼𑀚𑀸𑀢𑀺𑀓𑀸 𑀤𑁂𑀯𑀸 𑀘𑁂𑀯 𑀫𑀦𑀼𑀲𑁆𑀲𑀸 𑀘 𑀅𑀢𑁆𑀣𑀺 𑀲𑀩𑁆𑀩𑁂𑀳𑀺 𑀲𑀼𑀝𑁆𑀞𑀼 𑀧𑀓𑀸𑀲𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄𑀢𑀺 𑀦𑀺𑀭𑀸𑀮𑀬𑁄. 𑀢𑁆𑀯𑀜𑁆𑀳𑀺 𑀧𑀸𑀧𑀺𑀫, 𑀅𑀝𑁆𑀞𑀫𑀲𑀢𑁆𑀢𑀸𑀳𑀢𑁄 𑀧𑀝𑁆𑀞𑀸𑀬 𑁋 ‘‘𑀧𑀭𑀺𑀦𑀺𑀩𑁆𑀩𑀸𑀢𑀼 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀼, 𑀲𑀼𑀕𑀢𑁄’’𑀢𑀺 𑀯𑀺𑀭𑀯𑀦𑁆𑀢𑁄 𑀆𑀳𑀺𑀡𑁆𑀟𑀺𑀢𑁆𑀣. 𑀅𑀚𑁆𑀚 𑀤𑀸𑀦𑀺 𑀧𑀝𑁆𑀞𑀸𑀬 𑀯𑀺𑀕𑀢𑀼𑀲𑁆𑀲𑀸𑀳𑁄 𑀳𑁄𑀳𑀺; 𑀫𑀸 𑀫𑀬𑁆𑀳𑀁 𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀁 𑀯𑀸𑀬𑀸𑀫𑀁 𑀓𑀭𑁄𑀳𑀻𑀢𑀺 𑀯𑀤𑀢𑀺.

𑀆𑀬𑀼𑀲𑀗𑁆𑀔𑀸𑀭𑀑𑀲𑁆𑀲𑀚𑁆𑀚𑀦𑀯𑀡𑁆𑀡𑀦𑀸

𑁧𑁬𑁯. 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑀻𑀢𑀺 𑀲𑀢𑀺𑀁 𑀲𑀽𑀧𑀝𑁆𑀞𑀺𑀢𑀁 𑀓𑀢𑁆𑀯𑀸 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀆𑀬𑀼𑀲𑀗𑁆𑀔𑀸𑀭𑀁 𑀯𑀺𑀲𑁆𑀲𑀚𑁆𑀚𑀺, 𑀧𑀚𑀳𑀺. 𑀢𑀢𑁆𑀣 𑀦 𑀪𑀕𑀯𑀸 𑀳𑀢𑁆𑀣𑁂𑀦 𑀮𑁂𑀟𑁆𑀟𑀼𑀁 𑀯𑀺𑀬 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑀺, 𑀢𑁂𑀫𑀸𑀲𑀫𑀢𑁆𑀢𑀫𑁂𑀯 𑀧𑀦 𑀲𑀫𑀸𑀧𑀢𑁆𑀢𑀺𑀁 ¶ 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀧𑀭𑀁 𑀦 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀑𑀲𑁆𑀲𑀚𑀻’’𑀢𑀺. ‘‘𑀉𑀲𑁆𑀲𑀚𑁆𑀚𑀻’’𑀢𑀺 𑀧𑀺 𑀧𑀸𑀞𑁄. 𑀫𑀳𑀸𑀪𑀽𑀫𑀺𑀘𑀸𑀮𑁄𑀢𑀺 ¶ 𑀫𑀳𑀦𑁆𑀢𑁄 𑀧𑀣𑀯𑀻𑀓𑀫𑁆𑀧𑁄. 𑀢𑀤𑀸 𑀓𑀺𑀭 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀓𑀫𑁆𑀧𑀺𑀢𑁆𑀣. 𑀪𑀺𑀁𑀲𑀦𑀓𑁄𑀢𑀺 𑀪𑀬𑀚𑀦𑀓𑁄. 𑀤𑁂𑀯𑀤𑀼𑀦𑁆𑀤𑀼𑀪𑀺𑀬𑁄 𑀘 𑀨𑀮𑀺𑀁𑀲𑀽𑀢𑀺 𑀤𑁂𑀯𑀪𑁂𑀭𑀺𑀬𑁄 𑀨𑀮𑀺𑀁𑀲𑀼, 𑀤𑁂𑀯𑁄 𑀲𑀼𑀓𑁆𑀔𑀕𑀚𑁆𑀚𑀺𑀢𑀁 𑀕𑀚𑁆𑀚𑀺, 𑀅𑀓𑀸𑀮𑀯𑀺𑀚𑁆𑀚𑀼𑀮𑀢𑀸 𑀦𑀺𑀘𑁆𑀙𑀭𑀺𑀁𑀲𑀼, 𑀔𑀡𑀺𑀓𑀯𑀲𑁆𑀲𑀁 𑀯𑀲𑁆𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀓𑀲𑁆𑀫𑀸 𑀉𑀤𑀸𑀦𑁂𑀲𑀺? 𑀓𑁄𑀘𑀺 𑀦𑀸𑀫 𑀯𑀤𑁂𑀬𑁆𑀬 𑁋 ‘‘𑀪𑀕𑀯𑀸 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑁋 ‘𑀧𑀭𑀺𑀦𑀺𑀩𑁆𑀩𑀸𑀬𑀣, 𑀪𑀦𑁆𑀢𑁂, 𑀧𑀭𑀺𑀦𑀺𑀩𑁆𑀩𑀸𑀬𑀣, 𑀪𑀦𑁆𑀢𑁂’𑀢𑀺 𑀉𑀧𑀤𑁆𑀤𑀼𑀢𑁄 𑀪𑀬𑁂𑀦 𑀆𑀬𑀼𑀲𑀗𑁆𑀔𑀸𑀭𑀁 𑀯𑀺𑀲𑁆𑀲𑀚𑁆𑀚𑁂𑀲𑀻’’𑀢𑀺. ‘‘𑀢𑀲𑁆𑀲𑁄𑀓𑀸𑀲𑁄 𑀫𑀸 𑀳𑁄𑀢𑀼, 𑀪𑀻𑀢𑀲𑁆𑀲 𑀉𑀤𑀸𑀦𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀏𑀢𑀲𑁆𑀲 𑀤𑀻𑀧𑀦𑀢𑁆𑀣𑀁 𑀧𑀻𑀢𑀺𑀯𑁂𑀕𑀯𑀺𑀲𑁆𑀲𑀝𑁆𑀞𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀲𑀩𑁆𑀩𑁂𑀲𑀁 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀻𑀦𑀫𑁆𑀧𑀺 𑀧𑀘𑁆𑀘𑀓𑁆𑀔𑀪𑀸𑀯𑀢𑁄 𑀢𑀼𑀮𑀺𑀢𑀁 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀢𑀼𑀮𑀁. 𑀓𑀺𑀁 𑀢𑀁? 𑀓𑀸𑀫𑀸𑀯𑀘𑀭𑀓𑀫𑁆𑀫𑀁. 𑀦 𑀢𑀼𑀮𑀁, 𑀦 𑀯𑀸 𑀢𑀼𑀮𑀁 𑀲𑀤𑀺𑀲𑀫𑀲𑁆𑀲 𑀅𑀜𑁆𑀜𑀁 𑀮𑁄𑀓𑀺𑀬𑀁 𑀓𑀫𑁆𑀫𑀁 𑀅𑀢𑁆𑀣𑀻𑀢𑀺 𑀅𑀢𑀼𑀮𑀁. 𑀓𑀺𑀁 𑀢𑀁? 𑀫𑀳𑀕𑁆𑀕𑀢𑀓𑀫𑁆𑀫𑀁. 𑀅𑀣𑀯𑀸 𑀓𑀸𑀫𑀸𑀯𑀘𑀭𑀭𑀽𑀧𑀸𑀯𑀘𑀭𑀁 𑀢𑀼𑀮𑀁, 𑀅𑀭𑀽𑀧𑀸𑀯𑀘𑀭𑀁 𑀅𑀢𑀼𑀮𑀁. 𑀅𑀧𑁆𑀧𑀯𑀺𑀧𑀸𑀓𑀁 𑀯𑀸 𑀢𑀼𑀮𑀁, 𑀩𑀳𑀼𑀯𑀺𑀧𑀸𑀓𑀁 𑀅𑀢𑀼𑀮𑀁. 𑀲𑀫𑁆𑀪𑀯𑀦𑁆𑀢𑀺 𑀲𑀫𑁆𑀪𑀯𑀲𑁆𑀲 𑀳𑁂𑀢𑀼𑀪𑀽𑀢𑀁, 𑀧𑀺𑀡𑁆𑀟𑀓𑀸𑀭𑀓𑀁 𑀭𑀸𑀲𑀺𑀓𑀸𑀭𑀓𑀦𑁆𑀢𑀺 𑀅𑀢𑁆𑀣𑁄. 𑀪𑀯𑀲𑀗𑁆𑀔𑀸𑀭𑀦𑁆𑀢𑀺 𑀧𑀼𑀦𑀩𑁆𑀪𑀯𑀲𑀗𑁆𑀔𑀸𑀭𑀡𑀓𑀁. 𑀅𑀯𑀲𑁆𑀲𑀚𑀻𑀢𑀺 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀫𑀼𑀦𑀻𑀢𑀺 𑀩𑀼𑀤𑁆𑀥𑀫𑀼𑀦𑀺. 𑀅𑀚𑁆𑀛𑀢𑁆𑀢𑀭𑀢𑁄𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀭𑀢𑁄. 𑀲𑀫𑀸𑀳𑀺𑀢𑁄𑀢𑀺 𑀉𑀧𑀘𑀸𑀭𑀧𑁆𑀧𑀦𑀸𑀲𑀫𑀸𑀥𑀺𑀯𑀲𑁂𑀦 𑀲𑀫𑀸𑀳𑀺𑀢𑁄. 𑀅𑀪𑀺𑀦𑁆𑀤𑀺 𑀓𑀯𑀘𑀫𑀺𑀯𑀸𑀢𑀺 𑀓𑀯𑀘𑀁 𑀯𑀺𑀬 𑀅𑀪𑀺𑀦𑁆𑀤𑀺. 𑀅𑀢𑁆𑀢𑀲𑀫𑁆𑀪𑀯𑀦𑁆𑀢𑀺 𑀅𑀢𑁆𑀢𑀦𑀺 𑀲𑀜𑁆𑀚𑀸𑀢𑀁 𑀓𑀺𑀮𑁂𑀲𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀲𑀯𑀺𑀧𑀸𑀓𑀝𑁆𑀞𑁂𑀦 𑀲𑀫𑁆𑀪𑀯𑀁, 𑀪𑀯𑀸𑀪𑀺𑀲𑀗𑁆𑀔𑀸𑀭𑀡𑀝𑁆𑀞𑁂𑀦 𑀪𑀯𑀲𑀗𑁆𑀔𑀸𑀭𑀦𑁆𑀢𑀺 𑀘 𑀮𑀤𑁆𑀥𑀦𑀸𑀫𑀁 𑀢𑀼𑀮𑀸𑀢𑀼𑀮𑀲𑀗𑁆𑀔𑀸𑀢𑀁 ¶ 𑀮𑁄𑀓𑀺𑀬𑀓𑀫𑁆𑀫𑀜𑁆𑀘 𑀑𑀲𑁆𑀲𑀚𑀺. 𑀲𑀗𑁆𑀕𑀸𑀫𑀲𑀻𑀲𑁂 𑀫𑀳𑀸𑀬𑁄𑀥𑁄 𑀓𑀯𑀘𑀁 𑀯𑀺𑀬 𑀅𑀢𑁆𑀢𑀲𑀫𑁆𑀪𑀯𑀁 𑀓𑀺𑀮𑁂𑀲𑀜𑁆𑀘 𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀸𑀳𑀺𑀢𑁄 𑀳𑀼𑀢𑁆𑀯𑀸 𑀅𑀪𑀺𑀦𑁆𑀤𑀻’’𑀢𑀺.

𑀅𑀣 𑀯𑀸 𑀢𑀼𑀮𑀦𑁆𑀢𑀺 𑀢𑀼𑀮𑁂𑀦𑁆𑀢𑁄 𑀢𑀻𑀭𑁂𑀦𑁆𑀢𑁄. 𑀅𑀢𑀼𑀮𑀜𑁆𑀘 𑀲𑀫𑁆𑀪𑀯𑀦𑁆𑀢𑀺 𑀦𑀺𑀩𑁆𑀩𑀸𑀦𑀜𑁆𑀘𑁂𑀯 𑀲𑀫𑁆𑀪𑀯𑀜𑁆𑀘. 𑀪𑀯𑀲𑀗𑁆𑀔𑀸𑀭𑀦𑁆𑀢𑀺 𑀪𑀯𑀕𑀸𑀫𑀺𑀓𑀫𑁆𑀫𑀁. 𑀅𑀯𑀲𑁆𑀲𑀚𑀺 𑀫𑀼𑀦𑀻𑀢𑀺 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀦𑀺𑀘𑁆𑀘𑀸, 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁 𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁩.𑁩𑁮) 𑀦𑀬𑁂𑀦 𑀢𑀼𑀮𑀬𑀦𑁆𑀢𑁄 𑀩𑀼𑀤𑁆𑀥𑀫𑀼𑀦𑀺 𑀪𑀯𑁂 𑀆𑀤𑀻𑀦𑀯𑀁, 𑀦𑀺𑀩𑁆𑀩𑀸𑀦𑁂 𑀘 𑀆𑀦𑀺𑀲𑀁𑀲𑀁 𑀤𑀺𑀲𑁆𑀯𑀸 𑀢𑀁 𑀔𑀦𑁆𑀥𑀸𑀦𑀁 𑀫𑀽𑀮𑀪𑀽𑀢𑀁 𑀪𑀯𑀲𑀗𑁆𑀔𑀸𑀭𑀓𑀫𑁆𑀫𑀁 𑁋 ‘‘𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺 (𑀫. 𑀦𑀺. 𑁨.𑁮𑁧) 𑀏𑀯𑀁 𑀯𑀼𑀢𑁆𑀢𑁂𑀦 𑀓𑀫𑁆𑀫𑀓𑁆𑀔𑀬𑀓𑀭𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 ¶ 𑀅𑀯𑀲𑁆𑀲𑀚𑀺. 𑀓𑀣𑀁? 𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀸𑀳𑀺𑀢𑁄 𑀅𑀪𑀺𑀦𑁆𑀤𑀺 𑀓𑀯𑀘𑀫𑀺𑀯 𑀅𑀢𑁆𑀢𑀦𑀺 ¶ 𑀲𑀫𑁆𑀪𑀯𑀁. 𑀲𑁄 𑀳𑀺 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀣𑀯𑀲𑁂𑀦 𑀲𑀫𑀸𑀳𑀺𑀢𑁄𑀢𑀺 𑀏𑀯𑀁 𑀧𑀼𑀩𑁆𑀩𑀪𑀸𑀕𑀢𑁄 𑀧𑀝𑁆𑀞𑀸𑀬 𑀲𑀫𑀣𑀯𑀺𑀧𑀲𑁆𑀲𑀦𑀸𑀩𑀮𑁂𑀦 𑀓𑀯𑀘𑀫𑀺𑀯 𑀅𑀢𑁆𑀢𑀪𑀸𑀯𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑀁, 𑀅𑀢𑁆𑀢𑀦𑀺 𑀲𑀫𑁆𑀪𑀯𑀢𑁆𑀢𑀸 ‘‘𑀅𑀢𑁆𑀢𑀲𑀫𑁆𑀪𑀯’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀲𑀩𑁆𑀩𑀓𑀺𑀮𑁂𑀲𑀚𑀸𑀮𑀁 𑀅𑀪𑀺𑀦𑁆𑀤𑀺. 𑀓𑀺𑀮𑁂𑀲𑀸𑀪𑀸𑀯𑁂𑀦 𑀘 𑀓𑀢𑀓𑀫𑁆𑀫𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸 𑀅𑀯𑀲𑁆𑀲𑀝𑁆𑀞𑀁 𑀦𑀸𑀫 𑀳𑁄𑀢𑀻𑀢𑀺 𑀏𑀯𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑁂𑀦 𑀓𑀫𑁆𑀫𑀁 𑀧𑀚𑀳𑀺, 𑀧𑀳𑀻𑀦𑀓𑀺𑀮𑁂𑀲𑀲𑁆𑀲 𑀘 𑀪𑀬𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀪𑀻𑀢𑁄𑀯 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑀺, 𑀅𑀪𑀻𑀢𑀪𑀸𑀯𑀜𑀸𑀧𑀦𑀢𑁆𑀣𑀜𑁆𑀘 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀫𑀳𑀸𑀪𑀽𑀫𑀺𑀘𑀸𑀮𑀯𑀡𑁆𑀡𑀦𑀸

𑁧𑁭𑁧. 𑀬𑀁 𑀫𑀳𑀸𑀯𑀸𑀢𑀸𑀢𑀺 𑀬𑁂𑀦 𑀲𑀫𑀬𑁂𑀦 𑀬𑀲𑁆𑀫𑀺𑀁 𑀯𑀸 𑀲𑀫𑀬𑁂 𑀫𑀳𑀸𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀫𑀳𑀸𑀯𑀸𑀢𑀸 𑀯𑀸𑀬𑀦𑁆𑀢𑀸𑀧𑀺 𑀉𑀓𑁆𑀔𑁂𑀧𑀓𑀯𑀸𑀢𑀸 𑀦𑀸𑀫 𑀉𑀝𑁆𑀞𑀳𑀦𑁆𑀢𑀺, 𑀢𑁂 𑀯𑀸𑀬𑀦𑁆𑀢𑀸 𑀲𑀝𑁆𑀞𑀺𑀲𑀳𑀲𑁆𑀲𑀸𑀥𑀺𑀓𑀦𑀯𑀬𑁄𑀚𑀦𑀲𑀢𑀲𑀳𑀲𑁆𑀲𑀩𑀳𑀮𑀁 𑀉𑀤𑀓𑀲𑀦𑁆𑀥𑀸𑀭𑀓𑀁 𑀯𑀸𑀢𑀁 𑀉𑀧𑀘𑁆𑀙𑀺𑀦𑁆𑀤𑀦𑁆𑀢𑀺, 𑀢𑀢𑁄 𑀆𑀓𑀸𑀲𑁂 𑀉𑀤𑀓𑀁 𑀪𑀲𑁆𑀲𑀢𑀺, 𑀢𑀲𑁆𑀫𑀺𑀁 𑀪𑀲𑁆𑀲𑀦𑁆𑀢𑁂 𑀧𑀣𑀯𑀻 𑀪𑀲𑁆𑀲𑀢𑀺. 𑀧𑀼𑀦 𑀯𑀸𑀢𑁄 𑀅𑀢𑁆𑀢𑀦𑁄 𑀩𑀮𑁂𑀦 𑀅𑀦𑁆𑀢𑁄𑀥𑀫𑀓𑀭𑀡𑁂 𑀯𑀺𑀬 𑀉𑀤𑀓𑀁 𑀆𑀩𑀦𑁆𑀥𑀺𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀢𑀢𑁄 𑀉𑀤𑀓𑀁 𑀉𑀕𑁆𑀕𑀘𑁆𑀙𑀢𑀺, 𑀢𑀲𑁆𑀫𑀺𑀁 𑀉𑀕𑁆𑀕𑀘𑁆𑀙𑀦𑁆𑀢𑁂 𑀧𑀣𑀯𑀻 𑀉𑀕𑁆𑀕𑀘𑁆𑀙𑀢𑀺. 𑀏𑀯𑀁 𑀉𑀤𑀓𑀁 𑀓𑀫𑁆𑀧𑀺𑀢𑀁 𑀧𑀣𑀯𑀺𑀁 𑀓𑀫𑁆𑀧𑁂𑀢𑀺. 𑀏𑀢𑀜𑁆𑀘 𑀓𑀫𑁆𑀧𑀦𑀁 𑀬𑀸𑀯 𑀅𑀚𑁆𑀚𑀓𑀸𑀮𑀸𑀧𑀺 𑀳𑁄𑀢𑀺𑀬𑁂𑀯, 𑀩𑀳𑀮𑀪𑀸𑀯𑁂𑀦 𑀧𑀦 𑀦 𑀑𑀕𑀘𑁆𑀙𑀦𑀼𑀕𑁆𑀕𑀘𑁆𑀙𑀦𑀁 𑀧𑀜𑁆𑀜𑀸𑀬𑀢𑀺.

𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄𑀢𑀺 𑀇𑀚𑁆𑀛𑀦𑀲𑁆𑀲 𑀫𑀳𑀦𑁆𑀢𑀢𑀸𑀬 𑀫𑀳𑀺𑀤𑁆𑀥𑀺𑀓𑁄, 𑀅𑀦𑀼𑀪𑀯𑀺𑀢𑀩𑁆𑀩𑀲𑁆𑀲 𑀫𑀳𑀦𑁆𑀢𑀢𑀸𑀬 𑀫𑀳𑀸𑀦𑀼𑀪𑀸𑀯𑁄. 𑀧𑀭𑀺𑀢𑁆𑀢𑀸𑀢𑀺 𑀤𑀼𑀩𑁆𑀩𑀮𑀸. 𑀅𑀧𑁆𑀧𑀫𑀸𑀡𑀸𑀢𑀺 𑀩𑀮𑀯𑀸. 𑀲𑁄 𑀇𑀫𑀁 𑀧𑀣𑀯𑀺𑀁 𑀓𑀫𑁆𑀧𑁂𑀢𑀻𑀢𑀺 𑀲𑁄 𑀇𑀤𑁆𑀥𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀲𑀁𑀯𑁂𑀚𑁂𑀦𑁆𑀢𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀯𑀺𑀬, 𑀯𑀻𑀫𑀁𑀲𑀦𑁆𑀢𑁄 𑀯𑀸 𑀫𑀳𑀸𑀦𑀸𑀕𑀢𑁆𑀣𑁂𑀭𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑁄 𑀲𑀗𑁆𑀖𑀭𑀓𑁆𑀔𑀺𑀢𑀲𑀸𑀫𑀡𑁂𑀭𑁄 𑀯𑀺𑀬 𑀧𑀣𑀯𑀺𑀁 𑀓𑀫𑁆𑀧𑁂𑀢𑀺. 𑀲𑁄 𑀓𑀺𑀭𑀸𑀬𑀲𑁆𑀫𑀸 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ¶ 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑁄𑀘𑀺 𑀪𑀺𑀓𑁆𑀔𑀼, 𑀬𑁂𑀦 𑀧𑀩𑁆𑀩𑀚𑀺𑀢𑀤𑀺𑀯𑀲𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀯𑁂𑀚𑀬𑀦𑁆𑀢𑁄 𑀧𑀸𑀲𑀸𑀤𑁄 𑀓𑀫𑁆𑀧𑀺𑀢𑀧𑀼𑀩𑁆𑀩𑁄’’𑀢𑀺? 𑀢𑀢𑁄 𑁋 ‘‘𑀦𑀢𑁆𑀣𑀺 𑀓𑁄𑀘𑀻’’𑀢𑀺 𑀜𑀢𑁆𑀯𑀸 𑁋 ‘‘𑀅𑀳𑀁 𑀓𑀫𑁆𑀧𑁂𑀲𑁆𑀲𑀸𑀫𑀻’’𑀢𑀺 𑀅𑀪𑀺𑀜𑁆𑀜𑀸𑀩𑀮𑁂𑀦 𑀯𑁂𑀚𑀬𑀦𑁆𑀢𑀫𑀢𑁆𑀣𑀓𑁂 𑀞𑀢𑁆𑀯𑀸 𑀧𑀸𑀤𑁂𑀦 𑀧𑀳𑀭𑀺𑀢𑁆𑀯𑀸 𑀓𑀫𑁆𑀧𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣 𑀦𑀁 𑀲𑀓𑁆𑀓𑀲𑁆𑀲 𑀦𑀸𑀝𑀓𑀺𑀢𑁆𑀣𑀺𑀬𑁄 𑀆𑀳𑀁𑀲𑀼 𑁋 ‘‘𑀧𑀼𑀢𑁆𑀢 𑀲𑀗𑁆𑀖𑀭𑀓𑁆𑀔𑀺𑀢, 𑀢𑁆𑀯𑀁 𑀧𑀽𑀢𑀺𑀕𑀦𑁆𑀥𑁂𑀦𑁂𑀯 𑀲𑀻𑀲𑁂𑀦 𑀯𑁂𑀚𑀬𑀦𑁆𑀢𑀁 𑀓𑀫𑁆𑀧𑁂𑀢𑀼𑀁 𑀇𑀘𑁆𑀙𑀲𑀺, 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄 𑀢𑀸𑀢 𑀧𑀸𑀲𑀸𑀤𑁄, 𑀓𑀣𑀁 𑀓𑀫𑁆𑀧𑁂𑀢𑀼𑀁 ¶ 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺?

𑀲𑀸𑀫𑀡𑁂𑀭𑁄 ¶ 𑁋 ‘‘𑀇𑀫𑀸 𑀤𑁂𑀯𑀢𑀸 𑀫𑀬𑀸 𑀲𑀤𑁆𑀥𑀺𑀁 𑀓𑁂𑀴𑀺𑀁 𑀓𑀭𑁄𑀦𑁆𑀢𑀺, 𑀅𑀳𑀁 𑀔𑁄 𑀧𑀦 𑀆𑀘𑀭𑀺𑀬𑀁 𑀦𑀸𑀮𑀢𑁆𑀣𑀁, 𑀓𑀳𑀁 𑀦𑀼 𑀔𑁄 𑀫𑁂 𑀆𑀘𑀭𑀺𑀬𑁄 𑀲𑀸𑀫𑀼𑀤𑁆𑀤𑀺𑀓𑀫𑀳𑀸𑀦𑀸𑀕𑀢𑁆𑀣𑁂𑀭𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀮𑁂𑀡𑀁 𑀫𑀸𑀧𑁂𑀢𑁆𑀯𑀸 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀺𑀦𑁆𑀦𑁄𑀢𑀺 𑀜𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀢𑁄 𑀦𑀁 𑀣𑁂𑀭𑁄 𑁋 ‘‘𑀓𑀺𑀁, 𑀢𑀸𑀢 𑀲𑀗𑁆𑀖𑀭𑀓𑁆𑀔𑀺𑀢, 𑀅𑀲𑀺𑀓𑁆𑀔𑀺𑀢𑁆𑀯𑀸𑀯 𑀬𑀼𑀤𑁆𑀥𑀁 𑀧𑀯𑀺𑀝𑁆𑀞𑁄𑀲𑀻’’𑀢𑀺 𑀯𑀢𑁆𑀯𑀸 ‘‘𑀦𑀸𑀲𑀓𑁆𑀔𑀺, 𑀢𑀸𑀢, 𑀯𑁂𑀚𑀬𑀦𑁆𑀢𑀁 𑀓𑀫𑁆𑀧𑁂𑀢𑀼’’𑀦𑁆𑀢𑀺 𑀧𑀼𑀘𑁆𑀙𑀺. 𑀆𑀘𑀭𑀺𑀬𑀁, 𑀪𑀦𑁆𑀢𑁂, 𑀦𑀸𑀮𑀢𑁆𑀣𑀦𑁆𑀢𑀺. 𑀅𑀣 𑀦𑀁 𑀣𑁂𑀭𑁄 𑁋 ‘‘𑀢𑀸𑀢 𑀢𑀼𑀫𑁆𑀳𑀸𑀤𑀺𑀲𑁂 𑀅𑀓𑀫𑁆𑀧𑁂𑀦𑁆𑀢𑁂 𑀓𑁄 𑀅𑀜𑁆𑀜𑁄 𑀓𑀫𑁆𑀧𑁂𑀲𑁆𑀲𑀢𑀺. 𑀤𑀺𑀝𑁆𑀞𑀧𑀼𑀩𑁆𑀩𑀁 𑀢𑁂, 𑀢𑀸𑀢, 𑀉𑀤𑀓𑀧𑀺𑀝𑁆𑀞𑁂 𑀕𑁄𑀫𑀬𑀔𑀡𑁆𑀟𑀁 𑀧𑀺𑀮𑀯𑀦𑁆𑀢𑀁, 𑀢𑀸𑀢, 𑀓𑀧𑀮𑁆𑀮𑀓𑀧𑀽𑀯𑀁 𑀧𑀘𑀦𑁆𑀢𑀸 𑀅𑀦𑁆𑀢𑀦𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑀺, 𑀇𑀫𑀺𑀦𑀸 𑀑𑀧𑀫𑁆𑀫𑁂𑀦 𑀚𑀸𑀦𑀸𑀳𑀻’’𑀢𑀺 𑀆𑀳. 𑀲𑁄 𑁋 ‘‘𑀯𑀝𑁆𑀝𑀺𑀲𑁆𑀲𑀢𑀺, 𑀪𑀦𑁆𑀢𑁂, 𑀏𑀢𑁆𑀢𑀓𑁂𑀦𑀸’’𑀢𑀺 𑀯𑀢𑁆𑀯𑀸 𑀧𑀸𑀲𑀸𑀤𑁂𑀦 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀁 𑀉𑀤𑀓𑀁 𑀳𑁄𑀢𑀽𑀢𑀺 𑀅𑀥𑀺𑀝𑁆𑀞𑀸𑀬 𑀯𑁂𑀚𑀬𑀦𑁆𑀢𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺.

𑀤𑁂𑀯𑀥𑀻𑀢𑀭𑁄 𑀢𑀁 𑀤𑀺𑀲𑁆𑀯𑀸 𑁋 ‘‘𑀏𑀓𑀯𑀸𑀭𑀁 𑀮𑀚𑁆𑀚𑀺𑀢𑁆𑀯𑀸 𑀕𑀢𑁄, 𑀧𑀼𑀦𑀧𑀺 𑀲𑀸𑀫𑀡𑁂𑀭𑁄 𑀏𑀢𑀺, 𑀧𑀼𑀦𑀧𑀺 𑀏𑀢𑀻’’𑀢𑀺 𑀯𑀤𑀺𑀁𑀲𑀼. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑁋 ‘‘𑀫𑀸 𑀫𑀬𑁆𑀳𑀁 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀓𑀣𑀬𑀺𑀢𑁆𑀣, 𑀇𑀤𑀸𑀦𑀺 𑀢𑁂𑀦 𑀆𑀘𑀭𑀺𑀬𑁄 𑀮𑀤𑁆𑀥𑁄, 𑀔𑀡𑁂𑀦 𑀧𑀸𑀲𑀸𑀤𑀁 𑀓𑀫𑁆𑀧𑁂𑀲𑁆𑀲𑀢𑀻’’𑀢𑀺 𑀆𑀳. 𑀲𑀸𑀫𑀡𑁂𑀭𑁄𑀧𑀺 𑀧𑀸𑀤𑀗𑁆𑀕𑀼𑀝𑁆𑀞𑁂𑀦 𑀧𑀸𑀲𑀸𑀤𑀣𑀽𑀧𑀺𑀓𑀁 𑀧𑀳𑀭𑀺. 𑀧𑀸𑀲𑀸𑀤𑁄 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀑𑀡𑀫𑀢𑀺. 𑀤𑁂𑀯𑀢𑀸 𑁋 ‘‘𑀧𑀢𑀺𑀝𑁆𑀞𑀸𑀢𑀼𑀁 𑀤𑁂𑀳𑀺, 𑀢𑀸𑀢, 𑀧𑀸𑀲𑀸𑀤𑀲𑁆𑀲 𑀧𑀢𑀺𑀝𑁆𑀞𑀸𑀢𑀼𑀁 𑀤𑁂𑀳𑀺, 𑀢𑀸𑀢, 𑀧𑀸𑀲𑀸𑀤𑀲𑁆𑀲𑀸’’𑀢𑀺 𑀯𑀺𑀭𑀯𑀺𑀁𑀲𑀼. 𑀲𑀸𑀫𑀡𑁂𑀭𑁄 𑀧𑀸𑀲𑀸𑀤𑀁 𑀬𑀣𑀸𑀞𑀸𑀦𑁂 𑀞𑀧𑁂𑀢𑁆𑀯𑀸 𑀧𑀸𑀲𑀸𑀤𑀫𑀢𑁆𑀣𑀓𑁂 𑀞𑀢𑁆𑀯𑀸 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀅𑀚𑁆𑀚𑁂𑀯𑀸𑀳𑀁 𑀧𑀩𑁆𑀩𑀚𑀺𑀢𑁄, 𑀅𑀚𑁆𑀚 𑀧𑀢𑁆𑀢𑀸𑀲𑀯𑀓𑁆𑀔𑀬𑀁;

𑀅𑀚𑁆𑀚 𑀓𑀫𑁆𑀧𑁂𑀫𑀺 𑀧𑀸𑀲𑀸𑀤𑀁, 𑀅𑀳𑁄 𑀩𑀼𑀤𑁆𑀥𑀲𑁆𑀲𑀼𑀴𑀸𑀭𑀢𑀸.

𑀅𑀚𑁆𑀚𑁂𑀯𑀸𑀳𑀁 𑀧𑀩𑁆𑀩𑀚𑀺𑀢𑁄…𑀧𑁂… 𑀅𑀳𑁄 𑀥𑀫𑁆𑀫𑀲𑁆𑀲𑀼𑀴𑀸𑀭𑀢𑀸.

𑀅𑀚𑁆𑀚𑁂𑀯𑀸𑀳𑀁 𑀧𑀩𑁆𑀩𑀚𑀺𑀢𑁄…𑀧𑁂… 𑀅𑀳𑁄 𑀲𑀗𑁆𑀖𑀲𑁆𑀲𑀼𑀴𑀸𑀭𑀢𑀸𑀢𑀺.

𑀇𑀢𑁄 ¶ 𑀧𑀭𑁂𑀲𑀼 𑀙𑀲𑀼 𑀧𑀣𑀯𑀻𑀓𑀫𑁆𑀧𑁂𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀫𑀳𑀸𑀧𑀤𑀸𑀦𑁂 𑀯𑀼𑀢𑁆𑀢𑀫𑁂𑀯.

𑀇𑀢𑀺 𑀇𑀫𑁂𑀲𑀼 𑀅𑀝𑁆𑀞𑀲𑀼 𑀧𑀣𑀯𑀻𑀓𑀫𑁆𑀧𑁂𑀲𑀼 𑀧𑀞𑀫𑁄 𑀥𑀸𑀢𑀼𑀓𑁄𑀧𑁂𑀦, 𑀤𑀼𑀢𑀺𑀬𑁄 𑀇𑀤𑁆𑀥𑀸𑀦𑀼𑀪𑀸𑀯𑁂𑀦, 𑀢𑀢𑀺𑀬𑀘𑀢𑀼𑀢𑁆𑀣𑀸 𑀧𑀼𑀜𑁆𑀜𑀢𑁂𑀚𑁂𑀦, 𑀧𑀜𑁆𑀘𑀫𑁄 𑀜𑀸𑀡𑀢𑁂𑀚𑁂𑀦, 𑀙𑀝𑁆𑀞𑁄 𑀲𑀸𑀥𑀼𑀓𑀸𑀭𑀤𑀸𑀦𑀯𑀲𑁂𑀦, 𑀲𑀢𑁆𑀢𑀫𑁄 𑀓𑀸𑀭𑀼𑀜𑁆𑀜𑀪𑀸𑀯𑁂𑀦, 𑀅𑀝𑁆𑀞𑀫𑁄 𑀆𑀭𑁄𑀤𑀦𑁂𑀦. 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀦𑁆𑀢𑁂 𑀘 𑀢𑀢𑁄 𑀦𑀺𑀓𑁆𑀔𑀫𑀦𑁆𑀢𑁂 𑀘 𑀫𑀳𑀸𑀲𑀢𑁆𑀢𑁂 𑀢𑀲𑁆𑀲 𑀧𑀼𑀜𑁆𑀜𑀢𑁂𑀚𑁂𑀦 𑀧𑀣𑀯𑀻 𑀅𑀓𑀫𑁆𑀧𑀺𑀢𑁆𑀣. 𑀅𑀪𑀺𑀲𑀫𑁆𑀩𑁄𑀥𑀺𑀬𑀁 𑀜𑀸𑀡𑀢𑁂𑀚𑁂𑀦 𑀅𑀪𑀺𑀳𑀢𑀸 ¶ 𑀳𑀼𑀢𑁆𑀯𑀸 𑀅𑀓𑀫𑁆𑀧𑀺𑀢𑁆𑀣. 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂 ¶ 𑀲𑀸𑀥𑀼𑀓𑀸𑀭𑀪𑀸𑀯𑀲𑀡𑁆𑀞𑀺𑀢𑀸 𑀲𑀸𑀥𑀼𑀓𑀸𑀭𑀁 𑀤𑀤𑀫𑀸𑀦𑀸 𑀅𑀓𑀫𑁆𑀧𑀺𑀢𑁆𑀣. 𑀆𑀬𑀼𑀲𑀗𑁆𑀔𑀸𑀭𑁄𑀲𑁆𑀲𑀚𑁆𑀚𑀦𑁂 𑀓𑀸𑀭𑀼𑀜𑁆𑀜𑀲𑀪𑀸𑀯𑀲𑀡𑁆𑀞𑀺𑀢𑀸 𑀘𑀺𑀢𑁆𑀢𑀲𑀗𑁆𑀔𑁄𑀪𑀁 𑀅𑀲𑀳𑀫𑀸𑀦𑀸 𑀅𑀓𑀫𑁆𑀧𑀺𑀢𑁆𑀣. 𑀧𑀭𑀺𑀦𑀺𑀩𑁆𑀩𑀸𑀦𑁂 𑀆𑀭𑁄𑀤𑀦𑀯𑁂𑀕𑀢𑀼𑀦𑁆𑀦𑀸 𑀳𑀼𑀢𑁆𑀯𑀸 𑀅𑀓𑀫𑁆𑀧𑀺𑀢𑁆𑀣. 𑀅𑀬𑀁 𑀧𑀦𑀢𑁆𑀣𑁄 𑀧𑀣𑀯𑀻𑀤𑁂𑀯𑀢𑀸𑀬 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄, 𑀫𑀳𑀸𑀪𑀽𑀢𑀧𑀣𑀯𑀺𑀬𑀸 𑀧𑀦𑁂𑀢𑀁 𑀦𑀢𑁆𑀣𑀺 𑀅𑀘𑁂𑀢𑀦𑀢𑁆𑀢𑀸𑀢𑀺.

𑀇𑀫𑁂 𑀔𑁄, 𑀆𑀦𑀦𑁆𑀤, 𑀅𑀝𑁆𑀞 𑀳𑁂𑀢𑀽𑀢𑀺 𑀏𑀢𑁆𑀣 𑀇𑀫𑁂𑀢𑀺 𑀦𑀺𑀤𑁆𑀤𑀺𑀝𑁆𑀞𑀦𑀺𑀤𑀲𑁆𑀲𑀦𑀁. 𑀏𑀢𑁆𑀢𑀸𑀯𑀢𑀸 𑀘 𑀧𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑁋 ‘‘𑀅𑀤𑁆𑀥𑀸 𑀅𑀚𑁆𑀚 𑀪𑀕𑀯𑀢𑀸 𑀆𑀬𑀼𑀲𑀗𑁆𑀔𑀸𑀭𑁄 𑀑𑀲𑁆𑀲𑀝𑁆𑀞𑁄’’𑀢𑀺 𑀲𑀮𑁆𑀮𑀓𑁆𑀔𑁂𑀲𑀺. 𑀪𑀕𑀯𑀸 𑀧𑀦 𑀲𑀮𑁆𑀮𑀓𑁆𑀔𑀺𑀢𑀪𑀸𑀯𑀁 𑀚𑀸𑀦𑀦𑁆𑀢𑁄𑀧𑀺 𑀑𑀓𑀸𑀲𑀁 𑀅𑀤𑀢𑁆𑀯𑀸𑀯 𑀅𑀜𑁆𑀜𑀸𑀦𑀺𑀧𑀺 𑀅𑀝𑁆𑀞𑀓𑀸𑀦𑀺 𑀲𑀫𑁆𑀧𑀺𑀡𑁆𑀟𑁂𑀦𑁆𑀢𑁄 𑁋 ‘‘𑀅𑀝𑁆𑀞 𑀔𑁄 𑀇𑀫𑀸’’𑀢𑀺𑀆𑀤𑀺𑀫𑀸𑀳.

𑀅𑀝𑁆𑀞𑀧𑀭𑀺𑀲𑀯𑀡𑁆𑀡𑀦𑀸

𑁧𑁭𑁨. 𑀢𑀢𑁆𑀣 𑀅𑀦𑁂𑀓𑀲𑀢𑀁 𑀔𑀢𑁆𑀢𑀺𑀬𑀧𑀭𑀺𑀲𑀦𑁆𑀢𑀺 𑀩𑀺𑀫𑁆𑀩𑀺𑀲𑀸𑀭𑀲𑀫𑀸𑀕𑀫𑀜𑀸𑀢𑀺𑀲𑀫𑀸𑀕𑀮𑀺𑀘𑁆𑀙𑀯𑀻𑀲𑀫𑀸𑀕𑀫𑀸𑀤𑀺𑀲𑀤𑀺𑀲𑀁, 𑀲𑀸 𑀧𑀦 𑀅𑀜𑁆𑀜𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼𑀧𑀺 𑀮𑀩𑁆𑀪𑀢𑁂𑀬𑁂𑀯. 𑀲𑀮𑁆𑀮𑀧𑀺𑀢𑀧𑀼𑀩𑁆𑀩𑀦𑁆𑀢𑀺 𑀆𑀮𑀸𑀧𑀲𑀮𑁆𑀮𑀸𑀧𑁄 𑀓𑀢𑀧𑀼𑀩𑁆𑀩𑁄. 𑀲𑀸𑀓𑀘𑁆𑀙𑀸𑀢𑀺 𑀥𑀫𑁆𑀫𑀲𑀸𑀓𑀘𑁆𑀙𑀸𑀧𑀺 𑀲𑀫𑀸𑀧𑀚𑁆𑀚𑀺𑀢𑀧𑀼𑀩𑁆𑀩𑀸. 𑀬𑀸𑀤𑀺𑀲𑀓𑁄 𑀢𑁂𑀲𑀁 𑀯𑀡𑁆𑀡𑁄𑀢𑀺 𑀢𑁂 𑀑𑀤𑀸𑀢𑀸𑀧𑀺 𑀳𑁄𑀦𑁆𑀢𑀺 𑀓𑀸𑀴𑀸𑀧𑀺 𑀫𑀗𑁆𑀕𑀼𑀭𑀘𑁆𑀙𑀯𑀻𑀧𑀺, 𑀲𑀢𑁆𑀣𑀸 𑀲𑀼𑀯𑀡𑁆𑀡𑀯𑀡𑁆𑀡𑁄𑀯. 𑀇𑀤𑀁 𑀧𑀦 𑀲𑀡𑁆𑀞𑀸𑀦𑀁 𑀧𑀝𑀺𑀘𑁆𑀘 𑀓𑀣𑀺𑀢𑀁. 𑀲𑀡𑁆𑀞𑀸𑀦𑀫𑁆𑀧𑀺 𑀘 𑀓𑁂𑀯𑀮𑀁 𑀢𑁂𑀲𑀁 𑀧𑀜𑁆𑀜𑀸𑀬𑀢𑀺𑀬𑁂𑀯, 𑀦 𑀧𑀦 𑀪𑀕𑀯𑀸 𑀫𑀺𑀮𑀓𑁆𑀔𑀼𑀲𑀤𑀺𑀲𑁄 𑀳𑁄𑀢𑀺, 𑀦𑀸𑀧𑀺 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑁄, 𑀩𑀼𑀤𑁆𑀥𑀯𑁂𑀲𑁂𑀦𑁂𑀯 𑀦𑀺𑀲𑀻𑀤𑀢𑀺. 𑀢𑁂 𑀧𑀦 𑀅𑀢𑁆𑀢𑀦𑁄 𑀲𑀫𑀸𑀦𑀲𑀡𑁆𑀞𑀸𑀦𑀫𑁂𑀯 𑀧𑀲𑁆𑀲𑀦𑁆𑀢𑀺. 𑀬𑀸𑀤𑀺𑀲𑀓𑁄 𑀢𑁂𑀲𑀁 𑀲𑀭𑁄𑀢𑀺 𑀢𑁂 𑀙𑀺𑀦𑁆𑀦𑀲𑁆𑀲𑀭𑀸𑀧𑀺 𑀳𑁄𑀦𑁆𑀢𑀺 𑀕𑀕𑁆𑀕𑀭𑀲𑁆𑀲𑀭𑀸𑀧𑀺 𑀓𑀸𑀓𑀲𑁆𑀲𑀭𑀸𑀧𑀺, 𑀲𑀢𑁆𑀣𑀸 𑀩𑁆𑀭𑀳𑁆𑀫𑀲𑁆𑀲𑀭𑁄𑀯. 𑀇𑀤𑀁 𑀧𑀦 𑀪𑀸𑀲𑀦𑁆𑀢𑀭𑀁 𑀲𑀦𑁆𑀥𑀸𑀬 𑀓𑀣𑀺𑀢𑀁. 𑀲𑀘𑁂𑀧𑀺 𑀳𑀺 𑀲𑀢𑁆𑀣𑀸 𑀭𑀸𑀚𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀓𑀣𑁂𑀢𑀺, ‘‘𑀅𑀚𑁆𑀚 𑀭𑀸𑀚𑀸 𑀫𑀥𑀼𑀭𑁂𑀦 𑀲𑀭𑁂𑀦 𑀓𑀣𑁂𑀢𑀻’’𑀢𑀺 𑀢𑁂𑀲𑀁 𑀳𑁄𑀢𑀺. 𑀓𑀣𑁂𑀢𑁆𑀯𑀸 𑀧𑀓𑁆𑀓𑀦𑁆𑀢𑁂 𑀧𑀦 𑀪𑀕𑀯𑀢𑀺 𑀧𑀼𑀦 𑀭𑀸𑀚𑀸𑀦𑀁 𑀆𑀕𑀢𑀁 𑀤𑀺𑀲𑁆𑀯𑀸 𑁋 ‘‘𑀓𑁄 𑀦𑀼 𑀔𑁄 𑀅𑀬’’𑀦𑁆𑀢𑀺 𑀯𑀻𑀫𑀁𑀲𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣 𑀓𑁄 𑀦𑀼 𑀔𑁄 𑀅𑀬𑀦𑁆𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀇𑀤𑀸𑀦𑁂𑀯 𑀫𑀸𑀕𑀥𑀪𑀸𑀲𑀸𑀬 𑀲𑀻𑀳𑀴𑀪𑀸𑀲𑀸𑀬 𑀫𑀥𑀼𑀭𑁂𑀦𑀸𑀓𑀸𑀭𑁂𑀦 𑀓𑀣𑁂𑀦𑁆𑀢𑁄 𑀓𑁄 𑀦𑀼 𑀔𑁄 𑀅𑀬𑀁 𑀅𑀦𑁆𑀢𑀭𑀳𑀺𑀢𑁄, 𑀓𑀺𑀁 𑀤𑁂𑀯𑁄, 𑀉𑀤𑀸𑀳𑀼 𑀫𑀦𑀼𑀲𑁆𑀲𑁄𑀢𑀺 𑀏𑀯𑀁 𑀯𑀻𑀫𑀁𑀲𑀦𑁆𑀢𑀸𑀧𑀺 ¶ 𑀦 𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀫𑀢𑁆𑀣𑀁 𑀧𑀦𑁂𑀯𑀁 𑀅𑀚𑀸𑀦𑀦𑁆𑀢𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺? 𑀯𑀸𑀲𑀦𑀢𑁆𑀣𑀸𑀬 ¶ . 𑀏𑀯𑀁 𑀲𑀼𑀢𑁄𑀧𑀺 𑀳𑀺 𑀥𑀫𑁆𑀫𑁄 𑀅𑀦𑀸𑀕𑀢𑁂 𑀧𑀘𑁆𑀘𑀬𑁄 𑀳𑁄𑀢𑀺 𑀬𑁂𑀯𑀸𑀢𑀺 𑀅𑀦𑀸𑀕𑀢𑀁 𑀧𑀝𑀺𑀘𑁆𑀘 𑀤𑁂𑀲𑁂𑀢𑀺. 𑀅𑀦𑁂𑀓𑀲𑀢𑀁 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀦𑁆𑀢𑀺𑀆𑀤𑀻𑀦𑀫𑁆𑀧𑀺 𑀲𑁄𑀡𑀤𑀡𑁆𑀟𑀓𑀽𑀝𑀤𑀡𑁆𑀟𑀲𑀫𑀸𑀕𑀫𑀸𑀤𑀺𑀯𑀲𑁂𑀦 ¶ 𑀘𑁂𑀯 𑀅𑀜𑁆𑀜𑀘𑀓𑁆𑀓𑀯𑀸𑀴𑀯𑀲𑁂𑀦 𑀘 𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀫𑀸 𑀧𑀦 𑀅𑀝𑁆𑀞 𑀧𑀭𑀺𑀲𑀸 𑀪𑀕𑀯𑀸 𑀓𑀺𑀫𑀢𑁆𑀣𑀁 𑀆𑀳𑀭𑀺? 𑀅𑀪𑀻𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀫𑁂𑀯. 𑀇𑀫𑀸 𑀓𑀺𑀭 𑀆𑀳𑀭𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀆𑀦𑀦𑁆𑀤, 𑀇𑀫𑀸𑀧𑀺 𑀅𑀝𑁆𑀞 𑀧𑀭𑀺𑀲𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀢𑀣𑀸𑀕𑀢𑀲𑁆𑀲 𑀪𑀬𑀁 𑀯𑀸 𑀲𑀸𑀭𑀚𑁆𑀚𑀁 𑀯𑀸 𑀦𑀢𑁆𑀣𑀺, 𑀫𑀸𑀭𑀁 𑀧𑀦 𑀏𑀓𑀓𑀁 𑀤𑀺𑀲𑁆𑀯𑀸 𑀢𑀣𑀸𑀕𑀢𑁄 𑀪𑀸𑀬𑁂𑀬𑁆𑀬𑀸𑀢𑀺 𑀓𑁄 𑀏𑀯𑀁 𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑀼𑀫𑀭𑀳𑀢𑀺. 𑀅𑀪𑀻𑀢𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀅𑀘𑁆𑀙𑀫𑁆𑀪𑀻, 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑀻’’𑀢𑀺.

𑀅𑀝𑁆𑀞𑀅𑀪𑀺𑀪𑀸𑀬𑀢𑀦𑀯𑀡𑁆𑀡𑀦𑀸

𑁧𑁭𑁩. 𑀅𑀪𑀺𑀪𑀸𑀬𑀢𑀦𑀸𑀦𑀻𑀢𑀺 𑀅𑀪𑀺𑀪𑀯𑀦𑀓𑀸𑀭𑀡𑀸𑀦𑀺. 𑀓𑀺𑀁 𑀅𑀪𑀺𑀪𑀯𑀦𑁆𑀢𑀺? 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀧𑀺 𑀆𑀭𑀫𑁆𑀫𑀡𑀸𑀦𑀺𑀧𑀺. 𑀢𑀸𑀦𑀺 𑀳𑀺 𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀅𑀪𑀺𑀪𑀯𑀦𑁆𑀢𑀺, 𑀧𑀼𑀕𑁆𑀕𑀮𑀲𑁆𑀲 𑀜𑀸𑀡𑀼𑀢𑁆𑀢𑀭𑀺𑀬𑀢𑀸𑀬 𑀆𑀭𑀫𑁆𑀫𑀡𑀸𑀦𑀺.

𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻𑀢𑀺𑀆𑀤𑀻𑀲𑀼 𑀧𑀦 𑀅𑀚𑁆𑀛𑀢𑁆𑀢𑀭𑀽𑀧𑁂 𑀧𑀭𑀺𑀓𑀫𑁆𑀫𑀯𑀲𑁂𑀦 𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻 𑀦𑀸𑀫 𑀳𑁄𑀢𑀺. 𑀅𑀚𑁆𑀛𑀢𑁆𑀢𑀜𑁆𑀳𑀺 𑀦𑀻𑀮𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀓𑁂𑀲𑁂 𑀯𑀸 𑀧𑀺𑀢𑁆𑀢𑁂 𑀯𑀸 𑀅𑀓𑁆𑀔𑀺𑀢𑀸𑀭𑀓𑀸𑀬 𑀯𑀸 𑀓𑀭𑁄𑀢𑀺. 𑀧𑀻𑀢𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀫𑁂𑀤𑁂 𑀯𑀸 𑀙𑀯𑀺𑀬𑀸 𑀯𑀸 𑀳𑀢𑁆𑀣𑀧𑀸𑀤𑀧𑀺𑀝𑁆𑀞𑁂𑀲𑀼 𑀯𑀸 𑀅𑀓𑁆𑀔𑀻𑀦𑀁 𑀧𑀻𑀢𑀓𑀝𑁆𑀞𑀸𑀦𑁂 𑀯𑀸 𑀓𑀭𑁄𑀢𑀺. 𑀮𑁄𑀳𑀺𑀢𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀫𑀁𑀲𑁂 𑀯𑀸 𑀮𑁄𑀳𑀺𑀢𑁂 𑀯𑀸 𑀚𑀺𑀯𑁆𑀳𑀸𑀬 𑀯𑀸 𑀅𑀓𑁆𑀔𑀻𑀦𑀁 𑀭𑀢𑁆𑀢𑀝𑁆𑀞𑀸𑀦𑁂 𑀯𑀸 𑀓𑀭𑁄𑀢𑀺. 𑀑𑀤𑀸𑀢𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀝𑁆𑀞𑀺𑀫𑁆𑀳𑀺 𑀯𑀸 𑀤𑀦𑁆𑀢𑁂 𑀯𑀸 𑀦𑀔𑁂 𑀯𑀸 𑀅𑀓𑁆𑀔𑀻𑀦𑀁 𑀲𑁂𑀢𑀝𑁆𑀞𑀸𑀦𑁂 𑀯𑀸 𑀓𑀭𑁄𑀢𑀺. 𑀢𑀁 𑀧𑀦 𑀲𑀼𑀦𑀻𑀮𑀁 𑀲𑀼𑀧𑀻𑀢𑀁 𑀲𑀼𑀮𑁄𑀳𑀺𑀢𑀓𑀁 𑀲𑀼𑀑𑀤𑀸𑀢𑀓𑀁 𑀦 𑀳𑁄𑀢𑀺, 𑀅𑀯𑀺𑀲𑀼𑀤𑁆𑀥𑀫𑁂𑀯 𑀳𑁄𑀢𑀺.

𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑀬𑀲𑁆𑀲𑁂𑀯𑀁 𑀧𑀭𑀺𑀓𑀫𑁆𑀫𑀁 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀦𑀺𑀫𑀺𑀢𑁆𑀢𑀁 𑀧𑀦 𑀩𑀳𑀺𑀤𑁆𑀥𑀸, 𑀲𑁄 𑀏𑀯𑀁 𑀅𑀚𑁆𑀛𑀢𑁆𑀢𑀁 𑀧𑀭𑀺𑀓𑀫𑁆𑀫𑀲𑁆𑀲 𑀩𑀳𑀺𑀤𑁆𑀥𑀸 𑀘 𑀅𑀧𑁆𑀧𑀦𑀸𑀬 𑀯𑀲𑁂𑀦 𑁋 ‘‘𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀺𑀢𑁆𑀢𑀸𑀦𑀻𑀢𑀺 𑀅𑀯𑀟𑁆𑀠𑀺𑀢𑀸𑀦𑀺. 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻𑀢𑀺 𑀲𑀼𑀯𑀡𑁆𑀡𑀸𑀦𑀺 𑀯𑀸 𑀳𑁄𑀦𑁆𑀢𑀺, 𑀤𑀼𑀩𑁆𑀩𑀡𑁆𑀡𑀸𑀦𑀺 𑀯𑀸. 𑀧𑀭𑀺𑀢𑁆𑀢𑀯𑀲𑁂𑀦𑁂𑀯 𑀇𑀤𑀁 𑀅𑀪𑀺𑀪𑀸𑀬𑀢𑀦𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀸𑀦𑀺 𑀅𑀪𑀺𑀪𑀼𑀬𑁆𑀬𑀸𑀢𑀺 𑀬𑀣𑀸 𑀦𑀸𑀫 𑀲𑀫𑁆𑀧𑀦𑁆𑀦𑀕𑀳𑀡𑀺𑀓𑁄 𑀓𑀝𑀘𑁆𑀙𑀼𑀫𑀢𑁆𑀢𑀁 𑀪𑀢𑁆𑀢𑀁 𑀮𑀪𑀺𑀢𑁆𑀯𑀸 𑁋 ‘‘𑀓𑀺𑀁 ¶ 𑀏𑀢𑁆𑀣 𑀪𑀼𑀜𑁆𑀚𑀺𑀢𑀩𑁆𑀩𑀁 𑀅𑀢𑁆𑀣𑀻’’𑀢𑀺 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀏𑀓𑀓𑀩𑀴𑀫𑁂𑀯 𑀓𑀭𑁄𑀢𑀺, 𑀏𑀯𑀫𑁂𑀯 𑀜𑀸𑀡𑀼𑀢𑁆𑀢𑀭𑀺𑀓𑁄 𑀧𑀼𑀕𑁆𑀕𑀮𑁄 𑀯𑀺𑀲𑀤𑀜𑀸𑀡𑁄 ¶ 𑁋 ‘‘𑀓𑀺𑀁 𑀏𑀢𑁆𑀣 𑀧𑀭𑀺𑀢𑁆𑀢𑀓𑁂 𑀆𑀭𑀫𑁆𑀫𑀡𑁂 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁 𑀅𑀢𑁆𑀣𑀺, 𑀦𑀸𑀬𑀁 𑀫𑀫 𑀪𑀸𑀭𑁄’’𑀢𑀺 𑀢𑀸𑀦𑀺 𑀭𑀽𑀧𑀸𑀦𑀺 𑀅𑀪𑀺𑀪𑀯𑀺𑀢𑁆𑀯𑀸 𑀲𑀫𑀸𑀧𑀚𑁆𑀚𑀢𑀺, 𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯𑁂𑀢𑁆𑀣 𑀅𑀧𑁆𑀧𑀦𑀁 𑀧𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀚𑀸𑀦𑀸𑀫𑀺 ¶ 𑀧𑀲𑁆𑀲𑀸𑀫𑀻𑀢𑀺 𑀇𑀫𑀺𑀦𑀸 𑀧𑀦𑀲𑁆𑀲 𑀆𑀪𑁄𑀕𑁄 𑀓𑀣𑀺𑀢𑁄. 𑀲𑁄 𑀘 𑀔𑁄 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀲𑁆𑀲, 𑀦 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁. 𑀏𑀯𑀁𑀲𑀜𑁆𑀜𑀻 𑀳𑁄𑀢𑀻𑀢𑀺 𑀆𑀪𑁄𑀕𑀲𑀜𑁆𑀜𑀸𑀬𑀧𑀺 𑀛𑀸𑀦𑀲𑀜𑁆𑀜𑀸𑀬𑀧𑀺 𑀏𑀯𑀁𑀲𑀜𑁆𑀜𑀻 𑀳𑁄𑀢𑀺. 𑀅𑀪𑀺𑀪𑀯𑀦𑀲𑀜𑁆𑀜𑀸 𑀳𑀺𑀲𑁆𑀲 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀫𑁆𑀧𑀺 𑀅𑀢𑁆𑀣𑀺, 𑀆𑀪𑁄𑀕𑀲𑀜𑁆𑀜𑀸 𑀧𑀦 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀲𑁆𑀲𑁂𑀯.

𑀅𑀧𑁆𑀧𑀫𑀸𑀡𑀸𑀦𑀻𑀢𑀺 𑀯𑀟𑁆𑀠𑀺𑀢𑀧𑁆𑀧𑀫𑀸𑀡𑀸𑀦𑀺, 𑀫𑀳𑀦𑁆𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀪𑀺𑀪𑀼𑀬𑁆𑀬𑀸𑀢𑀺 𑀏𑀢𑁆𑀣 𑀧𑀦 𑀬𑀣𑀸 𑀫𑀳𑀕𑁆𑀖𑀲𑁄 𑀧𑀼𑀭𑀺𑀲𑁄 𑀏𑀓𑀁 𑀪𑀢𑁆𑀢𑀯𑀟𑁆𑀠𑀺𑀢𑀓𑀁 𑀮𑀪𑀺𑀢𑁆𑀯𑀸 𑁋 ‘‘𑀅𑀜𑁆𑀜𑀫𑁆𑀧𑀺 𑀳𑁄𑀢𑀼, 𑀓𑀺𑀁 𑀏𑀢𑀁 𑀫𑀬𑁆𑀳𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀢𑀁 𑀦 𑀫𑀳𑀦𑁆𑀢𑀢𑁄 𑀧𑀲𑁆𑀲𑀢𑀺, 𑀏𑀯𑀫𑁂𑀯 𑀜𑀸𑀡𑀼𑀢𑁆𑀢𑀭𑁄 𑀧𑀼𑀕𑁆𑀕𑀮𑁄 𑀯𑀺𑀲𑀤𑀜𑀸𑀡𑁄 ‘‘𑀓𑀺𑀁 𑀏𑀢𑁆𑀣 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁, 𑀦𑀬𑀺𑀤𑀁 𑀅𑀧𑁆𑀧𑀫𑀸𑀡𑀁, 𑀦 𑀫𑀬𑁆𑀳𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀓𑀭𑀡𑁂 𑀪𑀸𑀭𑁄 𑀅𑀢𑁆𑀣𑀻’’𑀢𑀺 𑀢𑀸𑀦𑀺 𑀅𑀪𑀺𑀪𑀯𑀺𑀢𑁆𑀯𑀸 𑀲𑀫𑀸𑀧𑀚𑁆𑀚𑀢𑀺, 𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯𑁂𑀢𑁆𑀣 𑀅𑀧𑁆𑀧𑀦𑀁 𑀧𑀸𑀧𑁂𑀢𑀻𑀢𑀺 𑀅𑀢𑁆𑀣𑁄.

𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻𑀢𑀺 𑀅𑀮𑀸𑀪𑀺𑀢𑀸𑀬 𑀯𑀸 𑀅𑀦𑀢𑁆𑀣𑀺𑀓𑀢𑀸𑀬 𑀯𑀸 𑀅𑀚𑁆𑀛𑀢𑁆𑀢𑀭𑀽𑀧𑁂 𑀧𑀭𑀺𑀓𑀫𑁆𑀫𑀲𑀜𑁆𑀜𑀸𑀯𑀺𑀭𑀳𑀺𑀢𑁄.

𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻𑀢𑀺 𑀬𑀲𑁆𑀲 𑀧𑀭𑀺𑀓𑀫𑁆𑀫𑀫𑁆𑀧𑀺 𑀦𑀺𑀫𑀺𑀢𑁆𑀢𑀫𑁆𑀧𑀺 𑀩𑀳𑀺𑀤𑁆𑀥𑀸𑀯 𑀉𑀧𑁆𑀧𑀦𑁆𑀦𑀁, 𑀲𑁄 𑀏𑀯𑀁 𑀩𑀳𑀺𑀤𑁆𑀥𑀸 𑀧𑀭𑀺𑀓𑀫𑁆𑀫𑀲𑁆𑀲 𑀘𑁂𑀯 𑀅𑀧𑁆𑀧𑀦𑀸𑀬 𑀘 𑀯𑀲𑁂𑀦 𑁋 ‘‘𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀲𑀫𑁂𑀢𑁆𑀣 𑀘𑀢𑀼𑀢𑁆𑀣𑀸𑀪𑀺𑀪𑀸𑀬𑀢𑀦𑁂 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀫𑁂𑀲𑀼 𑀧𑀦 𑀘𑀢𑀽𑀲𑀼 𑀧𑀭𑀺𑀢𑁆𑀢𑀁 𑀯𑀺𑀢𑀓𑁆𑀓𑀘𑀭𑀺𑀢𑀯𑀲𑁂𑀦 𑀆𑀕𑀢𑀁, 𑀅𑀧𑁆𑀧𑀫𑀸𑀡𑀁 𑀫𑁄𑀳𑀘𑀭𑀺𑀢𑀯𑀲𑁂𑀦, 𑀲𑀼𑀯𑀡𑁆𑀡𑀁 𑀤𑁄𑀲𑀘𑀭𑀺𑀢𑀯𑀲𑁂𑀦, 𑀤𑀼𑀩𑁆𑀩𑀡𑁆𑀡𑀁 𑀭𑀸𑀕𑀘𑀭𑀺𑀢𑀯𑀲𑁂𑀦. 𑀏𑀢𑁂𑀲𑀜𑁆𑀳𑀺 𑀏𑀢𑀸𑀦𑀺 𑀲𑀧𑁆𑀧𑀸𑀬𑀸𑀦𑀺. 𑀲𑀸 𑀘 𑀦𑁂𑀲𑀁 𑀲𑀧𑁆𑀧𑀸𑀬𑀢𑀸 𑀯𑀺𑀢𑁆𑀣𑀸𑀭𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀘𑀭𑀺𑀢𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀸.

𑀧𑀜𑁆𑀘𑀫𑀅𑀪𑀺𑀪𑀸𑀬𑀢𑀦𑀸𑀤𑀻𑀲𑀼 𑀦𑀻𑀮𑀸𑀦𑀻𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀲𑁂𑀦 𑀯𑀼𑀢𑁆𑀢𑀁. 𑀦𑀻𑀮𑀯𑀡𑁆𑀡𑀸𑀦𑀻𑀢𑀺 𑀯𑀡𑁆𑀡𑀯𑀲𑁂𑀦. 𑀦𑀻𑀮𑀦𑀺𑀤𑀲𑁆𑀲𑀦𑀸𑀦𑀻𑀢𑀺 𑀦𑀺𑀤𑀲𑁆𑀲𑀦𑀯𑀲𑁂𑀦, 𑀅𑀧𑀜𑁆𑀜𑀸𑀬 𑀫𑀸𑀦𑀯𑀺𑀯𑀭𑀸𑀦𑀺 𑀅𑀲𑀫𑁆𑀪𑀺𑀦𑁆𑀦𑀯𑀡𑁆𑀡𑀸𑀦𑀺 𑀏𑀓𑀦𑀻𑀮𑀸𑀦𑁂𑀯 𑀳𑀼𑀢𑁆𑀯𑀸 𑀤𑀺𑀲𑁆𑀲𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀻𑀮𑀦𑀺𑀪𑀸𑀲𑀸𑀦𑀻𑀢𑀺 𑀇𑀤𑀁 𑀧𑀦 𑀑𑀪𑀸𑀲𑀯𑀲𑁂𑀦 𑀯𑀼𑀢𑁆𑀢𑀁, 𑀦𑀻𑀮𑁄𑀪𑀸𑀲𑀸𑀦𑀺 𑀦𑀻𑀮𑀧𑁆𑀧𑀪𑀸𑀬𑀼𑀢𑁆𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀦𑁂𑀲𑀁 𑀯𑀺𑀲𑀼𑀤𑁆𑀥𑀢𑀁 𑀤𑀲𑁆𑀲𑁂𑀢𑀺. 𑀯𑀺𑀲𑀼𑀤𑁆𑀥𑀯𑀡𑁆𑀡𑀯𑀲𑁂𑀦𑁂𑀯 ¶ 𑀳𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀪𑀺𑀪𑀸𑀬𑀢𑀦𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀉𑀫𑀸𑀧𑀼𑀧𑁆𑀨𑀦𑁆𑀢𑀺 𑀏𑀢𑀜𑁆𑀳𑀺 𑀧𑀼𑀧𑁆𑀨𑀁 𑀲𑀺𑀦𑀺𑀤𑁆𑀥𑀁 𑀫𑀼𑀤𑀼, 𑀤𑀺𑀲𑁆𑀲𑀫𑀸𑀦𑀫𑁆𑀧𑀺 𑀦𑀻𑀮𑀫𑁂𑀯 𑀳𑁄𑀢𑀺. 𑀕𑀺𑀭𑀺𑀓𑀡𑁆𑀡𑀺𑀓𑀧𑀼𑀧𑁆𑀨𑀸𑀤𑀻𑀦𑀺 𑀧𑀦 𑀤𑀺𑀲𑁆𑀲𑀫𑀸𑀦𑀸𑀦𑀺 𑀲𑁂𑀢𑀥𑀸𑀢𑀼𑀓𑀸𑀦𑁂𑀯 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀇𑀤𑀫𑁂𑀯 𑀕𑀳𑀺𑀢𑀁, 𑀦 ¶ 𑀢𑀸𑀦𑀺. 𑀩𑀸𑀭𑀸𑀡𑀲𑁂𑀬𑁆𑀬𑀓𑀦𑁆𑀢𑀺 𑀩𑀸𑀭𑀸𑀡𑀲𑀺𑀲𑀫𑁆𑀪𑀯𑀁. 𑀢𑀢𑁆𑀣 𑀓𑀺𑀭 𑀓𑀧𑁆𑀧𑀸𑀲𑁄𑀧𑀺 ¶ 𑀫𑀼𑀤𑀼, 𑀲𑀼𑀢𑁆𑀢𑀓𑀦𑁆𑀢𑀺𑀓𑀸𑀬𑁄𑀧𑀺 𑀢𑀦𑁆𑀢𑀯𑀸𑀬𑀸𑀧𑀺 𑀙𑁂𑀓𑀸, 𑀉𑀤𑀓𑀫𑁆𑀧𑀺 𑀲𑀼𑀘𑀺 𑀲𑀺𑀦𑀺𑀤𑁆𑀥𑀁. 𑀢𑀲𑁆𑀫𑀸 𑀢𑀁 𑀯𑀢𑁆𑀣𑀁 𑀉𑀪𑀢𑁄𑀪𑀸𑀕𑀯𑀺𑀫𑀝𑁆𑀞𑀁 𑀳𑁄𑀢𑀺; 𑀤𑁆𑀯𑀻𑀲𑀼𑀧𑀺 𑀧𑀲𑁆𑀲𑁂𑀲𑀼 𑀫𑀝𑁆𑀞𑀁 𑀫𑀼𑀤𑀼 𑀲𑀺𑀦𑀺𑀤𑁆𑀥𑀁 𑀔𑀸𑀬𑀢𑀺.

𑀧𑀻𑀢𑀸𑀦𑀻𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀦𑀻𑀮𑀓𑀲𑀺𑀡𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀦𑀻𑀮𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺 𑀧𑀼𑀧𑁆𑀨𑀲𑁆𑀫𑀺𑀁 𑀯𑀸 𑀯𑀢𑁆𑀣𑀲𑁆𑀫𑀺𑀁 𑀯𑀸 𑀯𑀡𑁆𑀡𑀥𑀸𑀢𑀼𑀬𑀸 𑀯𑀸’’𑀢𑀺𑀆𑀤𑀺𑀓𑀁 𑀧𑀦𑁂𑀢𑁆𑀣 𑀓𑀲𑀺𑀡𑀓𑀭𑀡𑀜𑁆𑀘 𑀧𑀭𑀺𑀓𑀫𑁆𑀫𑀜𑁆𑀘 𑀅𑀧𑁆𑀧𑀦𑀸𑀯𑀺𑀥𑀸𑀦𑀜𑁆𑀘 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀫𑁂𑀯. 𑀇𑀫𑀸𑀦𑀺𑀧𑀺 𑀅𑀝𑁆𑀞 𑀅𑀪𑀺𑀪𑀸𑀬𑀢𑀦𑀸𑀦𑀺 𑀅𑀪𑀻𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀫𑁂𑀯 𑀆𑀦𑀻𑀢𑀸𑀦𑀺. 𑀇𑀫𑀸𑀦𑀺 𑀓𑀺𑀭 𑀯𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀆𑀦𑀦𑁆𑀤, 𑀏𑀯𑀭𑀽𑀧𑀸𑀧𑀺 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀘 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀘 𑀢𑀣𑀸𑀕𑀢𑀲𑁆𑀲 𑀪𑀬𑀁 𑀯𑀸 𑀲𑀸𑀭𑀚𑁆𑀚𑀁 𑀯𑀸 𑀦𑀢𑁆𑀣𑀺, 𑀫𑀸𑀭𑀁 𑀧𑀦 𑀏𑀓𑀓𑀁 𑀤𑀺𑀲𑁆𑀯𑀸 𑀢𑀣𑀸𑀕𑀢𑁄 𑀪𑀸𑀬𑁂𑀬𑁆𑀬𑀸𑀢𑀺 𑀓𑁄 𑀏𑀯𑀁 𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑀼𑀫𑀭𑀳𑀢𑀺. 𑀅𑀪𑀻𑀢𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀅𑀘𑁆𑀙𑀫𑁆𑀪𑀻, 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑀻’’𑀢𑀺.

𑀅𑀝𑁆𑀞𑀯𑀺𑀫𑁄𑀓𑁆𑀔𑀯𑀡𑁆𑀡𑀦𑀸

𑁧𑁭𑁪. 𑀯𑀺𑀫𑁄𑀓𑁆𑀔𑀓𑀣𑀸 𑀉𑀢𑁆𑀢𑀸𑀦𑀢𑁆𑀣𑀸𑀬𑁂𑀯. 𑀇𑀫𑁂𑀧𑀺 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸 𑀅𑀪𑀻𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀫𑁂𑀯 𑀆𑀦𑀻𑀢𑀸. 𑀇𑀫𑁂𑀧𑀺 𑀓𑀺𑀭 𑀯𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀆𑀦𑀦𑁆𑀤, 𑀏𑀢𑀸𑀧𑀺 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲 𑀘 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀘 𑀢𑀣𑀸𑀕𑀢𑀲𑁆𑀲 𑀪𑀬𑀁 𑀯𑀸 𑀲𑀸𑀭𑀚𑁆𑀚𑀁 𑀯𑀸 𑀦𑀢𑁆𑀣𑀺…𑀧𑁂… 𑀑𑀲𑁆𑀲𑀚𑀻’’𑀢𑀺.

𑁧𑁭𑁫. 𑀇𑀤𑀸𑀦𑀺𑀧𑀺 𑀪𑀕𑀯𑀸 𑀆𑀦𑀦𑁆𑀤𑀲𑁆𑀲 𑀑𑀓𑀸𑀲𑀁 𑀅𑀤𑀢𑁆𑀯𑀸𑀯 𑀏𑀓𑀫𑀺𑀤𑀸𑀳𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀧𑀭𑀫𑁆𑀧𑀺 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀧𑀞𑀫𑀫𑁂𑀯 𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂.

𑁧𑁭𑁭. 𑀑𑀲𑁆𑀲𑀝𑁆𑀞𑁄𑀢𑀺 𑀯𑀺𑀲𑁆𑀲𑀚𑁆𑀚𑀺𑀢𑁄 𑀧𑀭𑀺𑀘𑁆𑀙𑀺𑀦𑁆𑀦𑁄, 𑀏𑀯𑀁 𑀓𑀺𑀭 𑀯𑀢𑁆𑀯𑀸 𑁋 ‘‘𑀢𑁂𑀦𑀸𑀬𑀁 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀓𑀫𑁆𑀧𑀺𑀢𑁆𑀣𑀸’’𑀢𑀺 𑀆𑀳.

𑀆𑀦𑀦𑁆𑀤𑀬𑀸𑀘𑀦𑀓𑀣𑀸

𑁧𑁭𑁮. 𑀅𑀮𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑀯𑀘𑀦𑀫𑁂𑀢𑀁. 𑀩𑁄𑀥𑀺𑀦𑁆𑀢𑀺 𑀘𑀢𑀼𑀫𑀕𑁆𑀕𑀜𑀸𑀡𑀧𑀝𑀺𑀯𑁂𑀖𑀁. 𑀲𑀤𑁆𑀤𑀳𑀲𑀺 𑀢𑁆𑀯𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀪𑀸𑀯𑀁 𑀢𑀣𑀸𑀕𑀢𑀲𑁆𑀲 𑀲𑀤𑁆𑀤𑀳𑀲𑀻𑀢𑀺 𑀯𑀤𑀢𑀺. 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤𑀸𑀢𑀺 ¶ 𑀬𑀲𑁆𑀫𑀸 𑀇𑀤𑀁 𑀯𑀘𑀦𑀁 𑀲𑀤𑁆𑀤𑀳𑀲𑀺, 𑀢𑀲𑁆𑀫𑀸 𑀢𑀼𑀬𑁆𑀳𑁂𑀯𑁂𑀢𑀁 𑀤𑀼𑀓𑁆𑀓𑀝𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁧𑁭𑁯. 𑀏𑀓𑀫𑀺𑀤𑀸𑀳𑀦𑁆𑀢𑀺 ¶ 𑀇𑀤𑀁 𑀪𑀕𑀯𑀸 𑁋 ‘‘𑀦 𑀓𑁂𑀯𑀮𑀁 𑀅𑀳𑀁 𑀇𑀥𑁂𑀯 𑀢𑀁 𑀆𑀫𑀦𑁆𑀢𑁂𑀲𑀺𑀁, 𑀅𑀜𑁆𑀜𑀤𑀸𑀧𑀺 𑀆𑀫𑀦𑁆𑀢𑁂𑀢𑁆𑀯𑀸 𑀑𑀴𑀸𑀭𑀺𑀓𑀁 𑀦𑀺𑀫𑀺𑀢𑁆𑀢𑀁 𑀅𑀓𑀸𑀲𑀺𑀁, 𑀢𑀫𑁆𑀧𑀺 ¶ 𑀢𑀬𑀸 𑀦 𑀧𑀝𑀺𑀯𑀺𑀤𑁆𑀥𑀁, 𑀢𑀯𑁂𑀯𑀸𑀬𑀁 𑀅𑀧𑀭𑀸𑀥𑁄’’𑀢𑀺 𑀏𑀯𑀁 𑀲𑁄𑀓𑀯𑀺𑀦𑁄𑀤𑀦𑀢𑁆𑀣𑀸𑀬 𑀦𑀸𑀦𑀧𑁆𑀧𑀓𑀸𑀭𑀢𑁄 𑀣𑁂𑀭𑀲𑁆𑀲𑁂𑀯 𑀤𑁄𑀲𑀸𑀭𑁄𑀧𑀦𑀢𑁆𑀣𑀁 𑀆𑀭𑀪𑀺.

𑁧𑁮𑁩. 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀻𑀢𑀺 𑀫𑀸𑀢𑀸𑀧𑀺𑀢𑀸𑀪𑀸𑀢𑀸𑀪𑀕𑀺𑀦𑀺𑀆𑀤𑀺𑀓𑁂𑀳𑀺 𑀚𑀸𑀢𑀺𑀬𑀸 𑀦𑀸𑀦𑀸𑀪𑀸𑀯𑁄, 𑀫𑀭𑀡𑁂𑀦 𑀯𑀺𑀦𑀸𑀪𑀸𑀯𑁄, 𑀪𑀯𑁂𑀦 𑀅𑀜𑁆𑀜𑀣𑀸𑀪𑀸𑀯𑁄. 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸𑀢𑀺 𑀢𑀦𑁆𑀢𑀺 𑀢𑀲𑁆𑀫𑀸, 𑀬𑀲𑁆𑀫𑀸 𑀲𑀩𑁆𑀩𑁂𑀳𑁂𑀯 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄, 𑀢𑀲𑁆𑀫𑀸 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸𑀧𑀺, 𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸𑀧𑀺, 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑁆𑀯𑀸𑀧𑀺, 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑁆𑀯𑀸𑀧𑀺, 𑀤𑁂𑀯𑁄𑀭𑁄𑀳𑀡𑀁 𑀓𑀢𑁆𑀯𑀸𑀧𑀺, 𑀬𑀁 𑀢𑀁 𑀚𑀸𑀢𑀁 𑀪𑀽𑀢𑀁 𑀲𑀗𑁆𑀔𑀢𑀁 𑀧𑀮𑁄𑀓𑀥𑀫𑁆𑀫𑀁, 𑀢𑀁 𑀯𑀢 𑀢𑀣𑀸𑀕𑀢𑀲𑁆𑀲𑀸𑀧𑀺 𑀲𑀭𑀻𑀭𑀁 𑀫𑀸 𑀧𑀮𑀼𑀚𑁆𑀚𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀭𑁄𑀤𑀦𑁆𑀢𑁂𑀦𑀸𑀧𑀺 𑀓𑀦𑁆𑀤𑀦𑁆𑀢𑁂𑀦𑀸𑀧𑀺 𑀦 𑀲𑀓𑁆𑀓𑀸 𑀢𑀁 𑀓𑀸𑀭𑀡𑀁 𑀮𑀤𑁆𑀥𑀼𑀦𑁆𑀢𑀺. 𑀧𑀼𑀦 𑀧𑀘𑁆𑀘𑀸𑀯𑀫𑀺𑀲𑁆𑀲𑀢𑀻𑀢𑀺 𑀬𑀁 𑀘𑀢𑁆𑀢𑀁 𑀯𑀦𑁆𑀢𑀁, 𑀢𑀁 𑀯𑀢 𑀧𑀼𑀦 𑀧𑀝𑀺𑀔𑀸𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑁧𑁮𑁪. 𑀬𑀣𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀬𑀣𑀸 𑀇𑀤𑀁 𑀲𑀺𑀓𑁆𑀔𑀸𑀢𑁆𑀢𑀬𑀲𑀗𑁆𑀕𑀳𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁. 𑀅𑀤𑁆𑀥𑀦𑀺𑀬𑀦𑁆𑀢𑀺 𑀅𑀤𑁆𑀥𑀸𑀦𑀓𑁆𑀔𑀫𑀁. 𑀘𑀺𑀭𑀝𑁆𑀞𑀺𑀢𑀺𑀓𑀦𑁆𑀢𑀺 𑀘𑀺𑀭𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀘𑀺𑀭𑀝𑁆𑀞𑀺𑀢𑀺𑀓𑀁. 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸𑀢𑀺𑀆𑀤𑀺 𑀲𑀩𑁆𑀩𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦𑁂𑀯 𑀓𑀣𑀺𑀢𑀁. 𑀏𑀢𑁂𑀲𑀁 𑀧𑀦 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀦𑀺𑀘𑁆𑀙𑀬𑁄 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀢𑀢𑀺𑀬𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀸𑀕𑀸𑀧𑀮𑁄𑀓𑀺𑀢𑀯𑀡𑁆𑀡𑀦𑀸

𑁧𑁮𑁬. 𑀦𑀸𑀕𑀸𑀧𑀮𑁄𑀓𑀺𑀢𑀦𑁆𑀢𑀺 𑀬𑀣𑀸 𑀳𑀺 𑀫𑀳𑀸𑀚𑀦𑀲𑁆𑀲 𑀅𑀝𑁆𑀞𑀻𑀦𑀺 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀆𑀳𑀘𑁆𑀘 𑀞𑀺𑀢𑀸𑀦𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁, 𑀅𑀗𑁆𑀓𑀼𑀲𑀓𑀮𑀕𑁆𑀕𑀸𑀦𑀺 𑀯𑀺𑀬, 𑀦 𑀏𑀯𑀁 𑀩𑀼𑀤𑁆𑀥𑀸𑀦𑀁. 𑀩𑀼𑀤𑁆𑀥𑀸𑀦𑀁 ¶ 𑀧𑀦 𑀲𑀗𑁆𑀔𑀮𑀺𑀓𑀸𑀦𑀺 𑀯𑀺𑀬 𑀏𑀓𑀸𑀩𑀤𑁆𑀥𑀸𑀦𑀺 𑀳𑀼𑀢𑁆𑀯𑀸 𑀞𑀺𑀢𑀸𑀦𑀺, 𑀢𑀲𑁆𑀫𑀸 𑀧𑀘𑁆𑀙𑀢𑁄 𑀅𑀧𑀮𑁄𑀓𑀦𑀓𑀸𑀮𑁂 𑀦 𑀲𑀓𑁆𑀓𑀸 𑀳𑁄𑀢𑀺 𑀕𑀻𑀯𑀁 𑀧𑀭𑀺𑀯𑀢𑁆𑀢𑁂𑀢𑀼𑀁. 𑀬𑀣𑀸 𑀧𑀦 𑀳𑀢𑁆𑀣𑀺𑀦𑀸𑀕𑁄 𑀧𑀘𑁆𑀙𑀸𑀪𑀸𑀕𑀁 𑀅𑀧𑀮𑁄𑀓𑁂𑀢𑀼𑀓𑀸𑀫𑁄 𑀲𑀓𑀮𑀲𑀭𑀻𑀭𑁂𑀦𑁂𑀯 𑀧𑀭𑀺𑀯𑀢𑁆𑀢𑀢𑀺, 𑀏𑀯𑀁 𑀧𑀭𑀺𑀯𑀢𑁆𑀢𑀺𑀢𑀩𑁆𑀩𑀁 𑀳𑁄𑀢𑀺. 𑀪𑀕𑀯𑀢𑁄 𑀧𑀦 𑀦𑀕𑀭𑀤𑁆𑀯𑀸𑀭𑁂 𑀞𑀢𑁆𑀯𑀸 𑁋 ‘‘𑀯𑁂𑀲𑀸𑀮𑀺𑀁 𑀅𑀧𑀮𑁄𑀓𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀫𑀢𑁆𑀢𑁂 𑁋 ‘‘𑀪𑀕𑀯𑀸 𑀅𑀦𑁂𑀓𑀸𑀦𑀺 𑀓𑀧𑁆𑀧𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁂𑀳𑀺 𑀢𑀼𑀫𑁆𑀳𑁂𑀳𑀺 𑀦 𑀕𑀻𑀯𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 ¶ 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀅𑀬𑀁 𑀧𑀣𑀯𑀻 𑀓𑀼𑀮𑀸𑀮𑀘𑀓𑁆𑀓𑀁 𑀯𑀺𑀬 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 ¶ 𑀯𑁂𑀲𑀸𑀮𑀺𑀦𑀕𑀭𑀸𑀪𑀺𑀫𑀼𑀔𑀁 𑀅𑀓𑀸𑀲𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀦𑀦𑀼 𑀘 𑀦 𑀓𑁂𑀯𑀮𑀁 𑀯𑁂𑀲𑀸𑀮𑀺𑀬𑀸𑀯, 𑀲𑀸𑀯𑀢𑁆𑀣𑀺𑀭𑀸𑀚𑀕𑀳𑀦𑀸𑀴𑀦𑁆𑀤𑀧𑀸𑀝𑀮𑀺𑀕𑀸𑀫𑀓𑁄𑀝𑀺𑀕𑀸𑀫𑀦𑀸𑀢𑀺𑀓𑀕𑀸𑀫𑀓𑁂𑀲𑀼𑀧𑀺 𑀢𑀢𑁄 𑀢𑀢𑁄 𑀦𑀺𑀓𑁆𑀔𑀦𑁆𑀢𑀓𑀸𑀮𑁂 𑀢𑀁 𑀢𑀁 𑀲𑀩𑁆𑀩𑀁 𑀧𑀘𑁆𑀙𑀺𑀫𑀤𑀲𑁆𑀲𑀦𑀫𑁂𑀯, 𑀢𑀢𑁆𑀣 𑀢𑀢𑁆𑀣 𑀓𑀲𑁆𑀫𑀸 𑀦𑀸𑀕𑀸𑀧𑀮𑁄𑀓𑀺𑀢𑀁 𑀦𑀸𑀧𑀮𑁄𑀓𑁂𑀲𑀻𑀢𑀺? 𑀅𑀦𑀘𑁆𑀙𑀭𑀺𑀬𑀢𑁆𑀢𑀸. 𑀢𑀢𑁆𑀣 𑀢𑀢𑁆𑀣 𑀳𑀺 𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀧𑀮𑁄𑀓𑁂𑀦𑁆𑀢𑀲𑁆𑀲𑁂𑀢𑀁 𑀦 𑀅𑀘𑁆𑀙𑀭𑀺𑀬𑀁 𑀳𑁄𑀢𑀺, 𑀢𑀲𑁆𑀫𑀸 𑀦𑀸𑀧𑀮𑁄𑀓𑁂𑀲𑀺. 𑀅𑀧𑀺 𑀘 𑀯𑁂𑀲𑀸𑀮𑀺𑀭𑀸𑀚𑀸𑀦𑁄 𑀆𑀲𑀦𑁆𑀦𑀯𑀺𑀦𑀸𑀲𑀸, 𑀢𑀺𑀡𑁆𑀡𑀁 𑀯𑀲𑁆𑀲𑀸𑀦𑀁 𑀉𑀧𑀭𑀺 𑀯𑀺𑀦𑀲𑁆𑀲𑀺𑀲𑁆𑀲𑀦𑁆𑀢𑀺. 𑀢𑁂 𑀢𑀁 𑀦𑀕𑀭𑀤𑁆𑀯𑀸𑀭𑁂 𑀦𑀸𑀕𑀸𑀧𑀮𑁄𑀓𑀺𑀢𑀁 𑀦𑀸𑀫 𑀘𑁂𑀢𑀺𑀬𑀁 𑀓𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀲𑁆𑀲𑀦𑁆𑀢𑀺, 𑀢𑀁 𑀦𑁂𑀲𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀻𑀢𑀺 𑀢𑁂𑀲𑀁 𑀅𑀦𑀼𑀓𑀫𑁆𑀧𑀸𑀬 𑀅𑀧𑀮𑁄𑀓𑁂𑀲𑀺.

𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀭𑁄. 𑀘𑀓𑁆𑀔𑀼𑀫𑀸𑀢𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸. 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄.

𑀘𑀢𑀼𑀫𑀳𑀸𑀧𑀤𑁂𑀲𑀯𑀡𑁆𑀡𑀦𑀸

𑁧𑁮𑁭. 𑀫𑀳𑀸𑀧𑀤𑁂𑀲𑁂𑀢𑀺 𑀫𑀳𑀸𑀑𑀓𑀸𑀲𑁂, 𑀫𑀳𑀸𑀅𑀧𑀤𑁂𑀲𑁂 𑀯𑀸, 𑀩𑀼𑀤𑁆𑀥𑀸𑀤𑀬𑁄 𑀫𑀳𑀦𑁆𑀢𑁂 𑀫𑀳𑀦𑁆𑀢𑁂 𑀅𑀧𑀤𑀺𑀲𑀺𑀢𑁆𑀯𑀸 𑀯𑀼𑀢𑁆𑀢𑀸𑀦𑀺 𑀫𑀳𑀸𑀓𑀸𑀭𑀡𑀸𑀦𑀻𑀢𑀺 𑀅𑀢𑁆𑀣𑁄.

𑁧𑁮𑁮. 𑀦𑁂𑀯 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀦𑁆𑀢𑀺 𑀳𑀝𑁆𑀞𑀢𑀼𑀝𑁆𑀞𑁂𑀳𑀺 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀧𑀼𑀩𑁆𑀩𑁂𑀯 𑀦 𑀲𑁄𑀢𑀩𑁆𑀩𑀁, 𑀏𑀯𑀁 𑀓𑀢𑁂 𑀳𑀺 𑀧𑀘𑁆𑀙𑀸 ‘‘𑀇𑀤𑀁 𑀦 𑀲𑀫𑁂𑀢𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑁋 ‘‘𑀓𑀺𑀁 𑀧𑀼𑀩𑁆𑀩𑁂𑀯 𑀅𑀬𑀁 𑀥𑀫𑁆𑀫𑁄, 𑀇𑀤𑀸𑀦𑀺 𑀦 𑀥𑀫𑁆𑀫𑁄’’𑀢𑀺 𑀯𑀢𑁆𑀯𑀸 𑀮𑀤𑁆𑀥𑀺𑀁 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀦𑁆𑀢𑀺 𑁋 ‘‘𑀓𑀺𑀁 𑀏𑀲 𑀩𑀸𑀮𑁄 𑀯𑀤𑀢𑀻’’𑀢𑀺 𑀏𑀯𑀁 𑀧𑀼𑀩𑁆𑀩𑁂𑀯 𑀦 𑀯𑀢𑁆𑀢𑀩𑁆𑀩𑀁, 𑀏𑀯𑀁 𑀯𑀼𑀢𑁆𑀢𑁂 𑀳𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀫𑁆𑀧𑀺 𑀦 𑀯𑀓𑁆𑀔𑀢𑀺. 𑀢𑁂𑀦𑀸𑀳 𑁋 ‘‘𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸’’𑀢𑀺. 𑀧𑀤𑀩𑁆𑀬𑀜𑁆𑀚𑀦𑀸𑀦𑀻𑀢𑀺 𑀧𑀤𑀲𑀗𑁆𑀔𑀸𑀢𑀸𑀦𑀺 𑀩𑁆𑀬𑀜𑁆𑀚𑀦𑀸𑀦𑀺. 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑁆𑀯𑀸𑀢𑀺 𑀇𑀫𑀲𑁆𑀫𑀺𑀁 ¶ 𑀞𑀸𑀦𑁂 𑀧𑀸𑀴𑀺 𑀯𑀼𑀢𑁆𑀢𑀸, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀦𑀼𑀲𑀦𑁆𑀥𑀺 𑀓𑀣𑀺𑀢𑁄, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀼𑀩𑁆𑀩𑀸𑀧𑀭𑀁 𑀓𑀣𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀕𑀳𑁂𑀢𑁆𑀯𑀸. 𑀲𑀼𑀢𑁆𑀢𑁂 𑀑𑀲𑀸𑀭𑁂𑀢𑀩𑁆𑀩𑀸𑀦𑀻𑀢𑀺 𑀲𑀼𑀢𑁆𑀢𑁂 𑀑𑀢𑀸𑀭𑁂𑀢𑀩𑁆𑀩𑀸𑀦𑀺. 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑁂𑀢𑀩𑁆𑀩𑀸𑀦𑀻𑀢𑀺 𑀯𑀺𑀦𑀬𑁂 𑀲𑀁𑀲𑀦𑁆𑀤𑁂𑀢𑀩𑁆𑀩𑀸𑀦𑀺.

𑀏𑀢𑁆𑀣 𑀘 𑀲𑀼𑀢𑁆𑀢𑀦𑁆𑀢𑀺 𑀯𑀺𑀦𑀬𑁄. 𑀬𑀣𑀸𑀳 𑁋 ‘‘𑀓𑀢𑁆𑀣 𑀧𑀝𑀺𑀓𑁆𑀔𑀺𑀢𑁆𑀢𑀁? 𑀲𑀸𑀯𑀢𑁆𑀣𑀺𑀬𑀁 𑀲𑀼𑀢𑁆𑀢𑀯𑀺𑀪𑀗𑁆𑀕𑁂’’𑀢𑀺 (𑀘𑀼𑀴𑀯. 𑁪𑁫𑁭). 𑀯𑀺𑀦𑀬𑁄𑀢𑀺 𑀔𑀦𑁆𑀥𑀓𑁄. 𑀬𑀣𑀸𑀳 𑁋 ‘‘𑀯𑀺𑀦𑀬𑀸𑀢𑀺𑀲𑀸𑀭𑁂’’𑀢𑀺. 𑀏𑀯𑀁 𑀯𑀺𑀦𑀬𑀧𑀺𑀝𑀓𑀫𑁆𑀧𑀺 𑀦 ¶ 𑀧𑀭𑀺𑀬𑀸𑀤𑀺𑀬𑀢𑀺. 𑀉𑀪𑀢𑁄𑀯𑀺𑀪𑀗𑁆𑀕𑀸 𑀧𑀦 𑀲𑀼𑀢𑁆𑀢𑀁, 𑀔𑀦𑁆𑀥𑀓𑀧𑀭𑀺𑀯𑀸𑀭𑀸 𑀯𑀺𑀦𑀬𑁄𑀢𑀺 𑀏𑀯𑀁 𑀯𑀺𑀦𑀬𑀧𑀺𑀝𑀓𑀁 𑀧𑀭𑀺𑀬𑀸𑀤𑀺𑀬𑀢𑀺. 𑀅𑀣𑀯𑀸 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀲𑀼𑀢𑁆𑀢𑀁, 𑀯𑀺𑀦𑀬𑀧𑀺𑀝𑀓𑀁 𑀯𑀺𑀦𑀬𑁄𑀢𑀺 𑀏𑀯𑀁 𑀤𑁆𑀯𑁂𑀬𑁂𑀯 𑀧𑀺𑀝𑀓𑀸𑀦𑀺 𑀧𑀭𑀺𑀬𑀸𑀤𑀺𑀬𑀦𑁆𑀢𑀺. 𑀲𑀼𑀢𑁆𑀢𑀦𑁆𑀢𑀸𑀪𑀺𑀥𑀫𑁆𑀫𑀧𑀺𑀝𑀓𑀸𑀦𑀺 ¶ 𑀯𑀸 𑀲𑀼𑀢𑁆𑀢𑀁, 𑀯𑀺𑀦𑀬𑀧𑀺𑀝𑀓𑀁 𑀯𑀺𑀦𑀬𑁄𑀢𑀺 𑀏𑀯𑀫𑁆𑀧𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀦 𑀢𑀸𑀯 𑀧𑀭𑀺𑀬𑀸𑀤𑀺𑀬𑀦𑁆𑀢𑀺. 𑀅𑀲𑀼𑀢𑁆𑀢𑀦𑀸𑀫𑀓𑀜𑁆𑀳𑀺 𑀩𑀼𑀤𑁆𑀥𑀯𑀘𑀦𑀁 𑀦𑀸𑀫 𑀅𑀢𑁆𑀣𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀚𑀸𑀢𑀓𑀁, 𑀧𑀝𑀺𑀲𑀫𑁆𑀪𑀺𑀤𑀸, 𑀦𑀺𑀤𑁆𑀤𑁂𑀲𑁄, 𑀲𑀼𑀢𑁆𑀢𑀦𑀺𑀧𑀸𑀢𑁄, 𑀥𑀫𑁆𑀫𑀧𑀤𑀁, 𑀉𑀤𑀸𑀦𑀁, 𑀇𑀢𑀺𑀯𑀼𑀢𑁆𑀢𑀓𑀁, 𑀯𑀺𑀫𑀸𑀦𑀯𑀢𑁆𑀣𑀼, 𑀧𑁂𑀢𑀯𑀢𑁆𑀣𑀼, 𑀣𑁂𑀭𑀕𑀸𑀣𑀸, 𑀣𑁂𑀭𑀻𑀕𑀸𑀣𑀸, 𑀅𑀧𑀤𑀸𑀦𑀦𑁆𑀢𑀺.

𑀲𑀼𑀤𑀺𑀦𑁆𑀦𑀢𑁆𑀣𑁂𑀭𑁄 𑀧𑀦 𑁋 ‘‘𑀅𑀲𑀼𑀢𑁆𑀢𑀦𑀸𑀫𑀓𑀁 𑀩𑀼𑀤𑁆𑀥𑀯𑀘𑀦𑀁 𑀦 𑀅𑀢𑁆𑀣𑀻’’𑀢𑀺 𑀢𑀁 𑀲𑀩𑁆𑀩𑀁 𑀧𑀝𑀺𑀧𑀓𑁆𑀔𑀺𑀧𑀺𑀢𑁆𑀯𑀸 𑁋 ‘‘𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑀼𑀢𑁆𑀢𑀁, 𑀯𑀺𑀦𑀬𑁄 𑀧𑀦 𑀓𑀸𑀭𑀡’’𑀦𑁆𑀢𑀺 𑀆𑀳. 𑀢𑀢𑁄 𑀢𑀁 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀇𑀤𑀁 𑀲𑀼𑀢𑁆𑀢𑀫𑀸𑀳𑀭𑀺 𑁋

‘‘𑀬𑁂 𑀔𑁄 𑀢𑁆𑀯𑀁, 𑀕𑁄𑀢𑀫𑀺, 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬𑀸𑀲𑀺, 𑀇𑀫𑁂 𑀥𑀫𑁆𑀫𑀸 𑀲𑀭𑀸𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀺𑀭𑀸𑀕𑀸𑀬, 𑀲𑀜𑁆𑀜𑁄𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀺𑀲𑀜𑁆𑀜𑁄𑀕𑀸𑀬, 𑀆𑀘𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀅𑀧𑀘𑀬𑀸𑀬, 𑀫𑀳𑀺𑀘𑁆𑀙𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀅𑀧𑁆𑀧𑀺𑀘𑁆𑀙𑀢𑀸𑀬, 𑀅𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀦𑁆𑀢𑀼𑀝𑁆𑀞𑀺𑀬𑀸, 𑀲𑀗𑁆𑀕𑀡𑀺𑀓𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀧𑀯𑀺𑀯𑁂𑀓𑀸𑀬, 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀻𑀭𑀺𑀬𑀸𑀭𑀫𑁆𑀪𑀸𑀬, 𑀤𑀼𑀩𑁆𑀪𑀭𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀼𑀪𑀭𑀢𑀸𑀬. 𑀏𑀓𑀁𑀲𑁂𑀦, 𑀕𑁄𑀢𑀫𑀺, 𑀥𑀸𑀭𑁂𑀬𑁆𑀬𑀸𑀲𑀺 𑁋 ‘𑀦𑁂𑀲𑁄 𑀥𑀫𑁆𑀫𑁄, 𑀦𑁂𑀲𑁄 𑀯𑀺𑀦𑀬𑁄, 𑀦𑁂𑀢𑀁 𑀲𑀢𑁆𑀣𑀼𑀲𑀸𑀲𑀦’𑀦𑁆𑀢𑀺. 𑀬𑁂 𑀘 𑀔𑁄 𑀢𑁆𑀯𑀁, 𑀕𑁄𑀢𑀫𑀺, 𑀥𑀫𑁆𑀫𑁂 𑀚𑀸𑀦𑁂𑀬𑁆𑀬𑀸𑀲𑀺, 𑀇𑀫𑁂 𑀥𑀫𑁆𑀫𑀸 𑀯𑀺𑀭𑀸𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀭𑀸𑀕𑀸𑀬, 𑀯𑀺𑀲𑀜𑁆𑀜𑁄𑀕𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀜𑁆𑀜𑁄𑀕𑀸𑀬, 𑀅𑀧𑀘𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀆𑀘𑀬𑀸𑀬, 𑀅𑀧𑁆𑀧𑀺𑀘𑁆𑀙𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀫𑀳𑀺𑀘𑁆𑀙𑀢𑀸𑀬, 𑀲𑀦𑁆𑀢𑀼𑀝𑁆𑀞𑀺𑀬𑀸 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀅𑀲𑀦𑁆𑀢𑀼𑀝𑁆𑀞𑀺𑀬𑀸, 𑀧𑀯𑀺𑀯𑁂𑀓𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀲𑀗𑁆𑀕𑀡𑀺𑀓𑀸𑀬 ¶ , 𑀯𑀻𑀭𑀺𑀬𑀸𑀭𑀫𑁆𑀪𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀓𑁄𑀲𑀚𑁆𑀚𑀸𑀬, 𑀲𑀼𑀪𑀭𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀤𑀼𑀩𑁆𑀪𑀭𑀢𑀸𑀬. 𑀏𑀓𑀁𑀲𑁂𑀦, 𑀕𑁄𑀢𑀫𑀺, 𑀥𑀸𑀭𑁂𑀬𑁆𑀬𑀸𑀲𑀺 𑁋 ‘𑀏𑀲𑁄 𑀥𑀫𑁆𑀫𑁄, 𑀏𑀲𑁄 𑀯𑀺𑀦𑀬𑁄, 𑀏𑀢𑀁 𑀲𑀢𑁆𑀣𑀼𑀲𑀸𑀲𑀦’𑀦𑁆𑀢𑀺’’ (𑀅. 𑀦𑀺. 𑁮.𑁫𑁩).

𑀢𑀲𑁆𑀫𑀸 𑀲𑀼𑀢𑁆𑀢𑁂𑀢𑀺 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀑𑀢𑀸𑀭𑁂𑀢𑀩𑁆𑀩𑀸𑀦𑀺. 𑀯𑀺𑀦𑀬𑁂𑀢𑀺 𑀏𑀢𑀲𑁆𑀫𑀺𑀁 𑀭𑀸𑀕𑀸𑀤𑀺𑀯𑀺𑀦𑀬𑀓𑀸𑀭𑀡𑁂 𑀲𑀁𑀲𑀦𑁆𑀤𑁂𑀢𑀩𑁆𑀩𑀸𑀦𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀦 𑀘𑁂𑀯 𑀲𑀼𑀢𑁆𑀢𑁂 𑀑𑀲𑀭𑀦𑁆𑀢𑀻𑀢𑀺 𑀲𑀼𑀢𑁆𑀢𑀧𑀝𑀺𑀧𑀸𑀝𑀺𑀬𑀸 𑀓𑀢𑁆𑀣𑀘𑀺 𑀅𑀦𑀸𑀕𑀦𑁆𑀢𑁆𑀯𑀸 𑀙𑀮𑁆𑀮𑀺𑀁 𑀉𑀝𑁆𑀞𑀧𑁂𑀢𑁆𑀯𑀸 𑀕𑀼𑀴𑁆𑀳𑀯𑁂𑀲𑁆𑀲𑀦𑁆𑀢𑀭-𑀕𑀼𑀴𑁆𑀳𑀉𑀫𑁆𑀫𑀕𑁆𑀕-𑀕𑀼𑀴𑁆𑀳𑀯𑀺𑀦𑀬-𑀯𑁂𑀤𑀮𑁆𑀮𑀧𑀺𑀝𑀓𑀸𑀦𑀁 𑀅𑀜𑁆𑀜𑀢𑀭𑀢𑁄 𑀆𑀕𑀢𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀆𑀕𑀢𑀸𑀦𑀺 𑀳𑀺 𑀭𑀸𑀕𑀸𑀤𑀺𑀯𑀺𑀦𑀬𑁂 𑀘 𑀦 𑀧𑀜𑁆𑀜𑀸𑀬𑀫𑀸𑀦𑀸𑀦𑀺 𑀙𑀟𑁆𑀟𑁂𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀇𑀢𑀺 𑀳𑁂𑀢𑀁, 𑀪𑀺𑀓𑁆𑀔𑀯𑁂, 𑀙𑀟𑁆𑀟𑁂𑀬𑁆𑀬𑀸𑀣𑀸’’𑀢𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀁 ¶ , 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑀁 𑀫𑀳𑀸𑀧𑀤𑁂𑀲𑀁 𑀥𑀸𑀭𑁂𑀬𑁆𑀬𑀸𑀣𑀸𑀢𑀺 𑀇𑀤𑀁 ¶ 𑀘𑀢𑀼𑀢𑁆𑀣𑀁 𑀥𑀫𑁆𑀫𑀲𑁆𑀲 𑀧𑀢𑀺𑀝𑁆𑀞𑀸𑀦𑁄𑀓𑀸𑀲𑀁 𑀥𑀸𑀭𑁂𑀬𑁆𑀬𑀸𑀣.

𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀇𑀫𑀁 𑀧𑀓𑀺𑀡𑁆𑀡𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀼𑀢𑁆𑀢𑁂 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸, 𑀔𑀦𑁆𑀥𑀓𑁂 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸, 𑀘𑀢𑁆𑀢𑀸𑀭𑀺 𑀧𑀜𑁆𑀳𑀩𑁆𑀬𑀸𑀓𑀭𑀡𑀸𑀦𑀺, 𑀲𑀼𑀢𑁆𑀢𑀁, 𑀲𑀼𑀢𑁆𑀢𑀸𑀦𑀼𑀮𑁄𑀫𑀁, 𑀆𑀘𑀭𑀺𑀬𑀯𑀸𑀤𑁄, 𑀅𑀢𑁆𑀢𑀦𑁄𑀫𑀢𑀺, 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄𑀢𑀺.

𑀢𑀢𑁆𑀣 𑁋 ‘‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄’’𑀢𑀺 𑀥𑀫𑁆𑀫𑀯𑀺𑀦𑀺𑀘𑁆𑀙𑀬𑁂 𑀧𑀢𑁆𑀢𑁂 𑀇𑀫𑁂 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸 𑀧𑀫𑀸𑀡𑀁. 𑀬𑀁 𑀏𑀢𑁆𑀣 𑀲𑀫𑁂𑀢𑀺 𑀢𑀤𑁂𑀯 𑀕𑀳𑁂𑀢𑀩𑁆𑀩𑀁, 𑀇𑀢𑀭𑀁 𑀯𑀺𑀭𑀯𑀦𑁆𑀢𑀲𑁆𑀲𑀧𑀺 𑀦 𑀕𑀳𑁂𑀢𑀩𑁆𑀩𑀁.

‘‘𑀇𑀤𑀁 𑀓𑀧𑁆𑀧𑀢𑀺, 𑀇𑀤𑀁 𑀦 𑀓𑀧𑁆𑀧𑀢𑀻’’𑀢𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀯𑀺𑀦𑀺𑀘𑁆𑀙𑀬𑁂 𑀧𑀢𑁆𑀢𑁂 𑁋 ‘‘𑀬𑀁, 𑀪𑀺𑀓𑁆𑀔𑀯𑁂, 𑀫𑀬𑀸 𑀇𑀤𑀁 𑀦 𑀓𑀧𑁆𑀧𑀢𑀻𑀢𑀺 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀁, 𑀢𑀁 𑀘𑁂 𑀅𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺, 𑀓𑀧𑁆𑀧𑀺𑀬𑀁 𑀧𑀝𑀺𑀩𑀸𑀳𑀢𑀺, 𑀢𑀁 𑀯𑁄 𑀦 𑀓𑀧𑁆𑀧𑀢𑀻’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁩𑁦𑁫) 𑀦𑀬𑁂𑀦 𑀔𑀦𑁆𑀥𑀓𑁂 𑀯𑀼𑀢𑁆𑀢𑀸 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸 𑀧𑀫𑀸𑀡𑀁. 𑀢𑁂𑀲𑀁 𑀯𑀺𑀦𑀺𑀘𑁆𑀙𑀬𑀓𑀣𑀸 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀼𑀢𑁆𑀢𑀸. 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀬𑀁 𑀓𑀧𑁆𑀧𑀺𑀬𑀁 𑀅𑀦𑀼𑀮𑁄𑀫𑁂𑀢𑀺, 𑀢𑀤𑁂𑀯 𑀓𑀧𑁆𑀧𑀺𑀬𑀁, 𑀇𑀢𑀭𑀁 𑀅𑀓𑀧𑁆𑀧𑀺𑀬𑀦𑁆𑀢𑀺 𑀏𑀯𑀁 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀸𑀢𑀩𑁆𑀩𑀁.

𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄, 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄, 𑀧𑀝𑀺𑀧𑀼𑀘𑁆𑀙𑀸𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄, 𑀞𑀧𑀦𑀻𑀬𑁄 𑀧𑀜𑁆𑀳𑁄𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀜𑁆𑀳𑀩𑁆𑀬𑀸𑀓𑀭𑀡𑀸𑀦𑀺 𑀦𑀸𑀫. 𑀢𑀢𑁆𑀣 ‘‘𑀘𑀓𑁆𑀔𑀼𑀁 𑀅𑀦𑀺𑀘𑁆𑀘’’𑀦𑁆𑀢𑀺 𑀧𑀼𑀝𑁆𑀞𑁂𑀦 𑁋 ‘‘𑀆𑀫 𑀅𑀦𑀺𑀘𑁆𑀘’’𑀦𑁆𑀢𑀺 𑀏𑀓𑀁𑀲𑁂𑀦𑁂𑀯 𑀩𑁆𑀬𑀸𑀓𑀸𑀢𑀩𑁆𑀩𑀁 ¶ . 𑀏𑀲 𑀦𑀬𑁄 𑀲𑁄𑀢𑀸𑀤𑀻𑀲𑀼. 𑀅𑀬𑀁 𑀏𑀓𑀁𑀲𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄. ‘‘𑀅𑀦𑀺𑀘𑁆𑀘𑀁 𑀦𑀸𑀫 𑀘𑀓𑁆𑀔𑀼’’𑀦𑁆𑀢𑀺 𑀧𑀼𑀝𑁆𑀞𑁂𑀦 𑁋 ‘‘𑀦 𑀘𑀓𑁆𑀔𑀼𑀫𑁂𑀯, 𑀲𑁄𑀢𑀫𑁆𑀧𑀺 𑀅𑀦𑀺𑀘𑁆𑀘𑀁 𑀖𑀸𑀦𑀫𑁆𑀧𑀺 𑀅𑀦𑀺𑀘𑁆𑀘’’𑀦𑁆𑀢𑀺 𑀏𑀯𑀁 𑀯𑀺𑀪𑀚𑀺𑀢𑁆𑀯𑀸 𑀩𑁆𑀬𑀸𑀓𑀸𑀢𑀩𑁆𑀩𑀁. 𑀅𑀬𑀁 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄. ‘‘𑀬𑀣𑀸 𑀘𑀓𑁆𑀔𑀼 𑀢𑀣𑀸 𑀲𑁄𑀢𑀁, 𑀬𑀣𑀸 𑀲𑁄𑀢𑀁 𑀢𑀣𑀸 𑀘𑀓𑁆𑀔𑀼’’𑀦𑁆𑀢𑀺 𑀧𑀼𑀝𑁆𑀞𑁂𑀦 ‘‘𑀓𑁂𑀦𑀝𑁆𑀞𑁂𑀦 𑀧𑀼𑀘𑁆𑀙𑀲𑀻’’𑀢𑀺 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 ‘‘𑀤𑀲𑁆𑀲𑀦𑀝𑁆𑀞𑁂𑀦 𑀧𑀼𑀘𑁆𑀙𑀸𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀦 𑀳𑀻’’𑀢𑀺 𑀩𑁆𑀬𑀸𑀓𑀸𑀢𑀩𑁆𑀩𑀁, ‘‘𑀅𑀦𑀺𑀘𑁆𑀘𑀝𑁆𑀞𑁂𑀦 𑀧𑀼𑀘𑁆𑀙𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀆𑀫𑀸𑀢𑀺 𑀩𑁆𑀬𑀸𑀓𑀸𑀢𑀩𑁆𑀩𑀁. 𑀅𑀬𑀁 𑀧𑀝𑀺𑀧𑀼𑀘𑁆𑀙𑀸𑀩𑁆𑀬𑀸𑀓𑀭𑀡𑀻𑀬𑁄 𑀧𑀜𑁆𑀳𑁄. ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’’𑀦𑁆𑀢𑀺𑀆𑀤𑀻𑀦𑀺 𑀧𑀼𑀝𑁆𑀞𑁂𑀦 𑀧𑀦 ‘‘𑀅𑀩𑁆𑀬𑀸𑀓𑀢𑀫𑁂𑀢𑀁 𑀪𑀕𑀯𑀢𑀸’’𑀢𑀺 𑀞𑀧𑁂𑀢𑀩𑁆𑀩𑁄, 𑀏𑀲 𑀧𑀜𑁆𑀳𑁄 𑀦 𑀩𑁆𑀬𑀸𑀓𑀸𑀢𑀩𑁆𑀩𑁄. 𑀅𑀬𑀁 𑀞𑀧𑀦𑀻𑀬𑁄 𑀧𑀜𑁆𑀳𑁄. 𑀇𑀢𑀺 𑀢𑁂𑀦𑀸𑀓𑀸𑀭𑁂𑀦 𑀧𑀜𑁆𑀳𑁂 𑀲𑀫𑁆𑀧𑀢𑁆𑀢𑁂 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀜𑁆𑀳𑀩𑁆𑀬𑀸𑀓𑀭𑀡𑀸𑀦𑀺 𑀧𑀫𑀸𑀡𑀁. 𑀇𑀫𑁂𑀲𑀁 𑀯𑀲𑁂𑀦 𑀲𑁄 𑀧𑀜𑁆𑀳𑁄 𑀩𑁆𑀬𑀸𑀓𑀸𑀢𑀩𑁆𑀩𑁄.

𑀲𑀼𑀢𑁆𑀢𑀸𑀤𑀻𑀲𑀼 𑀧𑀦 𑀲𑀼𑀢𑁆𑀢𑀁 𑀦𑀸𑀫 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀽𑀴𑁆𑀳𑀸𑀦𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺. 𑀲𑀼𑀢𑁆𑀢𑀸𑀦𑀼𑀮𑁄𑀫𑀁 𑀦𑀸𑀫 𑀅𑀦𑀼𑀮𑁄𑀫𑀓𑀧𑁆𑀧𑀺𑀬𑀁. 𑀆𑀘𑀭𑀺𑀬𑀯𑀸𑀤𑁄 𑀦𑀸𑀫 𑀅𑀝𑁆𑀞𑀓𑀣𑀸. 𑀅𑀢𑁆𑀢𑀦𑁄𑀫𑀢𑀺 𑀦𑀸𑀫 𑀦𑀬𑀕𑁆𑀕𑀸𑀳𑁂𑀦 ¶ 𑀅𑀦𑀼𑀩𑀼𑀤𑁆𑀥𑀺𑀬𑀸 𑀅𑀢𑁆𑀢𑀦𑁄 𑀧𑀝𑀺𑀪𑀸𑀦𑀁. 𑀢𑀢𑁆𑀣 𑀲𑀼𑀢𑁆𑀢𑀁 𑀅𑀧𑁆𑀧𑀝𑀺𑀩𑀸𑀳𑀺𑀬𑀁, 𑀢𑀁 𑀧𑀝𑀺𑀩𑀸𑀳𑀦𑁆𑀢𑁂𑀦 𑀩𑀼𑀤𑁆𑀥𑁄𑀯 𑀧𑀝𑀺𑀩𑀸𑀳𑀺𑀢𑁄 𑀳𑁄𑀢𑀺. 𑀅𑀦𑀼𑀮𑁄𑀫𑀓𑀧𑁆𑀧𑀺𑀬𑀁 ¶ 𑀧𑀦 𑀲𑀼𑀢𑁆𑀢𑁂𑀦 𑀲𑀫𑁂𑀦𑁆𑀢𑀫𑁂𑀯 𑀕𑀳𑁂𑀢𑀩𑁆𑀩𑀁, 𑀦 𑀇𑀢𑀭𑀁. 𑀆𑀘𑀭𑀺𑀬𑀯𑀸𑀤𑁄𑀧𑀺 𑀲𑀼𑀢𑁆𑀢𑁂𑀦 𑀲𑀫𑁂𑀦𑁆𑀢𑁄𑀬𑁂𑀯 𑀕𑀳𑁂𑀢𑀩𑁆𑀩𑁄, 𑀦 𑀇𑀢𑀭𑁄. 𑀅𑀢𑁆𑀢𑀦𑁄𑀫𑀢𑀺 𑀧𑀦 𑀲𑀩𑁆𑀩𑀤𑀼𑀩𑁆𑀩𑀮𑀸, 𑀲𑀸𑀧𑀺 𑀲𑀼𑀢𑁆𑀢𑁂𑀦 𑀲𑀫𑁂𑀦𑁆𑀢𑀸𑀬𑁂𑀯 𑀕𑀳𑁂𑀢𑀩𑁆𑀩𑀸, 𑀦 𑀇𑀢𑀭𑀸. 𑀧𑀜𑁆𑀘𑀲𑀢𑀺𑀓𑀸, 𑀲𑀢𑁆𑀢𑀲𑀢𑀺𑀓𑀸, 𑀲𑀳𑀲𑁆𑀲𑀺𑀓𑀸𑀢𑀺 𑀇𑀫𑀸 𑀧𑀦 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄. 𑀲𑀼𑀢𑁆𑀢𑀫𑁆𑀧𑀺 𑀢𑀸𑀲𑀼 𑀆𑀕𑀢𑀫𑁂𑀯 𑀧𑀫𑀸𑀡𑀁, 𑀇𑀢𑀭𑀁 𑀕𑀸𑀭𑀬𑁆𑀳𑀲𑀼𑀢𑁆𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀢𑀢𑁆𑀣 𑀑𑀢𑀭𑀦𑁆𑀢𑀸𑀦𑀺𑀧𑀺 𑀳𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀦 𑀘𑁂𑀯 𑀲𑀼𑀢𑁆𑀢𑁂 𑀑𑀢𑀭𑀦𑁆𑀢𑀺, 𑀦 𑀘 𑀯𑀺𑀦𑀬𑁂 𑀲𑀦𑁆𑀤𑀺𑀲𑁆𑀲𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀓𑀫𑁆𑀫𑀸𑀭𑀧𑀼𑀢𑁆𑀢𑀘𑀼𑀦𑁆𑀤𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁮𑁯. 𑀓𑀫𑁆𑀫𑀸𑀭𑀧𑀼𑀢𑁆𑀢𑀲𑁆𑀲𑀸𑀢𑀺 𑀲𑀼𑀯𑀡𑁆𑀡𑀓𑀸𑀭𑀧𑀼𑀢𑁆𑀢𑀲𑁆𑀲. 𑀲𑁄 𑀓𑀺𑀭 𑀅𑀟𑁆𑀠𑁄 𑀫𑀳𑀸𑀓𑀼𑀝𑀼𑀫𑁆𑀩𑀺𑀓𑁄 𑀪𑀕𑀯𑀢𑁄 𑀧𑀞𑀫𑀤𑀲𑁆𑀲𑀦𑁂𑀦𑁂𑀯 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀅𑀫𑁆𑀩𑀯𑀦𑁂 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀦𑀺𑀬𑁆𑀬𑀸𑀢𑁂𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀅𑀫𑁆𑀩𑀯𑀦𑁂’’𑀢𑀺.

𑀲𑀽𑀓𑀭𑀫𑀤𑁆𑀤𑀯𑀦𑁆𑀢𑀺 𑀦𑀸𑀢𑀺𑀢𑀭𑀼𑀡𑀲𑁆𑀲 𑀦𑀸𑀢𑀺𑀚𑀺𑀡𑁆𑀡𑀲𑁆𑀲 𑀏𑀓𑀚𑁂𑀝𑁆𑀞𑀓𑀲𑀽𑀓𑀭𑀲𑁆𑀲 𑀧𑀯𑀢𑁆𑀢𑀫𑀁𑀲𑀁. 𑀢𑀁 𑀓𑀺𑀭 𑀫𑀼𑀤𑀼 𑀘𑁂𑀯 𑀲𑀺𑀦𑀺𑀤𑁆𑀥𑀜𑁆𑀘 𑀳𑁄𑀢𑀺, 𑀢𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀲𑀸𑀥𑀼𑀓𑀁 𑀧𑀘𑀸𑀧𑁂𑀢𑁆𑀯𑀸𑀢𑀺 ¶ 𑀅𑀢𑁆𑀣𑁄. 𑀏𑀓𑁂 𑀪𑀡𑀦𑁆𑀢𑀺 𑁋 ‘‘𑀲𑀽𑀓𑀭𑀫𑀤𑁆𑀤𑀯𑀦𑁆𑀢𑀺 𑀧𑀦 𑀫𑀼𑀤𑀼𑀑𑀤𑀦𑀲𑁆𑀲 𑀧𑀜𑁆𑀘𑀕𑁄𑀭𑀲𑀬𑀽𑀲𑀧𑀸𑀘𑀦𑀯𑀺𑀥𑀸𑀦𑀲𑁆𑀲 𑀦𑀸𑀫𑁂𑀢𑀁, 𑀬𑀣𑀸 𑀕𑀯𑀧𑀸𑀦𑀁 𑀦𑀸𑀫 𑀧𑀸𑀓𑀦𑀸𑀫’’𑀦𑁆𑀢𑀺. 𑀓𑁂𑀘𑀺 𑀪𑀡𑀦𑁆𑀢𑀺 𑁋 ‘‘𑀲𑀽𑀓𑀭𑀫𑀤𑁆𑀤𑀯𑀁 𑀦𑀸𑀫 𑀭𑀲𑀸𑀬𑀦𑀯𑀺𑀥𑀺, 𑀢𑀁 𑀧𑀦 𑀭𑀲𑀸𑀬𑀦𑀲𑀢𑁆𑀣𑁂 𑀆𑀕𑀘𑁆𑀙𑀢𑀺, 𑀢𑀁 𑀘𑀼𑀦𑁆𑀤𑁂𑀦 𑁋 ‘𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀁 𑀦 𑀪𑀯𑁂𑀬𑁆𑀬𑀸’𑀢𑀺 𑀭𑀲𑀸𑀬𑀦𑀁 𑀧𑀝𑀺𑀬𑀢𑁆𑀢’’𑀦𑁆𑀢𑀺. 𑀢𑀢𑁆𑀣 𑀧𑀦 𑀤𑁆𑀯𑀺𑀲𑀳𑀲𑁆𑀲𑀤𑀻𑀧𑀧𑀭𑀺𑀯𑀸𑀭𑁂𑀲𑀼 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀤𑁂𑀯𑀢𑀸 𑀑𑀚𑀁 𑀧𑀓𑁆𑀔𑀺𑀧𑀺𑀁𑀲𑀼.

𑀦𑀸𑀳𑀁 𑀢𑀦𑁆𑀢𑀺 𑀇𑀫𑀁 𑀲𑀻𑀳𑀦𑀸𑀤𑀁 𑀓𑀺𑀫𑀢𑁆𑀣𑀁 𑀦𑀤𑀢𑀺? 𑀧𑀭𑀽𑀧𑀯𑀸𑀤𑀫𑁄𑀘𑀦𑀢𑁆𑀣𑀁. 𑀅𑀢𑁆𑀢𑀦𑀸 𑀧𑀭𑀺𑀪𑀼𑀢𑁆𑀢𑀸𑀯𑀲𑁂𑀲𑀁 𑀦𑁂𑀯 𑀪𑀺𑀓𑁆𑀔𑀽𑀦𑀁, 𑀦 𑀫𑀦𑀼𑀲𑁆𑀲𑀸𑀦𑀁 𑀤𑀸𑀢𑀼𑀁 𑀅𑀤𑀸𑀲𑀺, 𑀆𑀯𑀸𑀝𑁂 𑀦𑀺𑀔𑀡𑀸𑀧𑁂𑀢𑁆𑀯𑀸 𑀯𑀺𑀦𑀸𑀲𑁂𑀲𑀻𑀢𑀺 𑀳𑀺 𑀯𑀢𑁆𑀢𑀼𑀓𑀸𑀫𑀸𑀦𑀁 𑀇𑀤𑀁 𑀲𑀼𑀢𑁆𑀯𑀸 𑀯𑀘𑀦𑁄𑀓𑀸𑀲𑁄 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀧𑀭𑁂𑀲𑀁 𑀉𑀧𑀯𑀸𑀤𑀫𑁄𑀘𑀦𑀢𑁆𑀣𑀁 𑀲𑀻𑀳𑀦𑀸𑀤𑀁 𑀦𑀤𑀢𑀻𑀢𑀺.

𑁧𑁯𑁦. 𑀪𑀼𑀢𑁆𑀢𑀲𑁆𑀲 𑀘 𑀲𑀽𑀓𑀭𑀫𑀤𑁆𑀤𑀯𑁂𑀦𑀸𑀢𑀺 𑀪𑀼𑀢𑁆𑀢𑀲𑁆𑀲 𑀉𑀤𑀧𑀸𑀤𑀺, 𑀦 𑀧𑀦 𑀪𑀼𑀢𑁆𑀢𑀧𑀘𑁆𑀘𑀬𑀸. 𑀬𑀤𑀺 𑀳𑀺 𑀅𑀪𑀼𑀢𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀺𑀲𑁆𑀲𑀣, 𑀅𑀢𑀺𑀔𑀭𑁄 𑀪𑀯𑀺𑀲𑁆𑀲𑀢𑀺. 𑀲𑀺𑀦𑀺𑀤𑁆𑀥𑀪𑁄𑀚𑀦𑀁 𑀪𑀼𑀢𑁆𑀢𑀢𑁆𑀢𑀸 𑀧𑀦𑀲𑁆𑀲 𑀢𑀦𑀼𑀯𑁂𑀤𑀦𑀸 𑀅𑀳𑁄𑀲𑀺. 𑀢𑁂𑀦𑁂𑀯 𑀧𑀤𑀲𑀸 𑀕𑀦𑁆𑀢𑀼𑀁 𑀅𑀲𑀓𑁆𑀔𑀺. 𑀯𑀺𑀭𑁂𑀘𑀫𑀸𑀦𑁄𑀢𑀺 𑀅𑀪𑀺𑀡𑁆𑀳𑀁 𑀧𑀯𑀢𑁆𑀢𑀮𑁄𑀳𑀺𑀢𑀯𑀺𑀭𑁂𑀘𑀦𑁄𑀯 𑀲𑀫𑀸𑀦𑁄 ¶ . 𑀅𑀯𑁄𑀘𑀸𑀢𑀺 𑀅𑀢𑁆𑀢𑀦𑀸 𑀧𑀢𑁆𑀣𑀺𑀢𑀝𑁆𑀞𑀸𑀦𑁂 𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀏𑀯𑀫𑀸𑀳. 𑀇𑀫𑀸 𑀧𑀦 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀞𑀧𑀺𑀢𑀕𑀸𑀣𑀸𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀧𑀸𑀦𑀻𑀬𑀸𑀳𑀭𑀡𑀯𑀡𑁆𑀡𑀦𑀸

𑁧𑁯𑁧. 𑀇𑀗𑁆𑀖𑀸𑀢𑀺 𑀘𑁄𑀤𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀘𑁆𑀙𑁄𑀤𑀓𑀸𑀢𑀺 ¶ 𑀧𑀲𑀦𑁆𑀦𑁄𑀤𑀓𑀸. 𑀲𑀸𑀢𑁄𑀤𑀓𑀸𑀢𑀺 𑀫𑀥𑀼𑀭𑁄𑀤𑀓𑀸. 𑀲𑀻𑀢𑁄𑀤𑀓𑀸𑀢𑀺 𑀢𑀦𑀼𑀲𑀻𑀢𑀮𑀲𑀮𑀺𑀮𑀸. 𑀲𑁂𑀢𑀓𑀸𑀢𑀺 𑀦𑀺𑀓𑁆𑀓𑀤𑁆𑀤𑀫𑀸. 𑀲𑀼𑀧𑁆𑀧𑀢𑀺𑀢𑁆𑀣𑀸𑀢𑀺 𑀲𑀼𑀦𑁆𑀤𑀭𑀢𑀺𑀢𑁆𑀣𑀸.

𑀧𑀼𑀓𑁆𑀓𑀼𑀲𑀫𑀮𑁆𑀮𑀧𑀼𑀢𑁆𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁯𑁨. 𑀧𑀼𑀓𑁆𑀓𑀼𑀲𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀫𑀮𑁆𑀮𑀧𑀼𑀢𑁆𑀢𑁄𑀢𑀺 𑀫𑀮𑁆𑀮𑀭𑀸𑀚𑀧𑀼𑀢𑁆𑀢𑁄. 𑀫𑀮𑁆𑀮𑀸 𑀓𑀺𑀭 𑀯𑀸𑀭𑁂𑀦 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀺. 𑀬𑀸𑀯 𑀦𑁂𑀲𑀁 𑀯𑀸𑀭𑁄 𑀦 𑀧𑀸𑀧𑀼𑀡𑀸𑀢𑀺, 𑀢𑀸𑀯 𑀯𑀡𑀺𑀚𑁆𑀚𑀁 𑀓𑀭𑁄𑀦𑁆𑀢𑀺. 𑀅𑀬𑀫𑁆𑀧𑀺 𑀯𑀡𑀺𑀚𑁆𑀚𑀫𑁂𑀯 𑀓𑀭𑁄𑀦𑁆𑀢𑁄 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀬𑁄𑀚𑀸𑀧𑁂𑀢𑁆𑀯𑀸 𑀥𑀼𑀭𑀯𑀸𑀢𑁂 𑀯𑀸𑀬𑀦𑁆𑀢𑁂 𑀧𑀼𑀭𑀢𑁄 𑀕𑀘𑁆𑀙𑀢𑀺, 𑀧𑀘𑁆𑀙𑀸 𑀯𑀸𑀢𑁂 𑀯𑀸𑀬𑀦𑁆𑀢𑁂 𑀲𑀢𑁆𑀣𑀯𑀸𑀳𑀁 𑀧𑀼𑀭𑀢𑁄 𑀧𑁂𑀲𑁂𑀢𑁆𑀯𑀸 𑀲𑀬𑀁 𑀧𑀘𑁆𑀙𑀸 𑀕𑀘𑁆𑀙𑀢𑀺. 𑀢𑀤𑀸 𑀧𑀦 𑀧𑀘𑁆𑀙𑀸 𑀯𑀸𑀢𑁄 𑀯𑀸𑀬𑀺, 𑀢𑀲𑁆𑀫𑀸 𑀏𑀲 𑀧𑀼𑀭𑀢𑁄 𑀲𑀢𑁆𑀣𑀯𑀸𑀳𑀁 𑀧𑁂𑀲𑁂𑀢𑁆𑀯𑀸 𑀲𑀩𑁆𑀩𑀭𑀢𑀦𑀬𑀸𑀦𑁂 ¶ 𑀦𑀺𑀲𑀻𑀤𑀺𑀢𑁆𑀯𑀸 𑀓𑀼𑀲𑀺𑀦𑀸𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀧𑀸𑀯𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀓𑀼𑀲𑀺𑀦𑀸𑀭𑀸𑀬 𑀧𑀸𑀯𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺.

𑀆𑀴𑀸𑀭𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀤𑀻𑀖𑀧𑀺𑀗𑁆𑀕𑀮𑁄 𑀓𑀺𑀭𑁂𑀲𑁄, 𑀢𑁂𑀦𑀲𑁆𑀲 𑀆𑀴𑀸𑀭𑁄𑀢𑀺 𑀦𑀸𑀫𑀁 𑀅𑀳𑁄𑀲𑀺. 𑀓𑀸𑀮𑀸𑀫𑁄𑀢𑀺 𑀕𑁄𑀢𑁆𑀢𑀁. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑁄 𑀦𑀸𑀫. 𑀦𑁂𑀯 𑀤𑀓𑁆𑀔𑀢𑀻𑀢𑀺 𑀦 𑀅𑀤𑁆𑀤𑀲. 𑀬𑀢𑁆𑀭𑀲𑀤𑁆𑀤𑀬𑀼𑀢𑁆𑀢𑀢𑁆𑀢𑀸 𑀧𑀦𑁂𑀢𑀁 𑀅𑀦𑀸𑀕𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀏𑀯𑀭𑀽𑀧𑀜𑁆𑀳𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀲𑀤𑁆𑀤𑀮𑀓𑁆𑀔𑀡𑀁.

𑁧𑁯𑁩. 𑀦𑀺𑀘𑁆𑀙𑀭𑀦𑁆𑀢𑀻𑀲𑀽𑀢𑀺 𑀯𑀺𑀘𑀭𑀦𑁆𑀢𑀻𑀲𑀼. 𑀅𑀲𑀦𑀺𑀬𑀸 𑀨𑀮𑀦𑁆𑀢𑀺𑀬𑀸𑀢𑀺 𑀦𑀯𑀯𑀺𑀥𑀸𑀬 𑀅𑀲𑀦𑀺𑀬𑀸 𑀪𑀺𑀚𑁆𑀚𑀫𑀸𑀦𑀸𑀬 𑀯𑀺𑀬 𑀫𑀳𑀸𑀭𑀯𑀁 𑀭𑀯𑀦𑁆𑀢𑀺𑀬𑀸. 𑀦𑀯𑀯𑀺𑀥𑀸 𑀳𑀺 𑀅𑀲𑀦𑀺𑀬𑁄 𑁋 𑀅𑀲𑀜𑁆𑀜𑀸, 𑀯𑀺𑀘𑀓𑁆𑀓𑀸, 𑀲𑀢𑁂𑀭𑀸, 𑀕𑀕𑁆𑀕𑀭𑀸, 𑀓𑀧𑀺𑀲𑀻𑀲𑀸, 𑀫𑀘𑁆𑀙𑀯𑀺𑀮𑁄𑀮𑀺𑀓𑀸, 𑀓𑀼𑀓𑁆𑀓𑀼𑀝𑀓𑀸, 𑀤𑀡𑁆𑀟𑀫𑀡𑀺𑀓𑀸, 𑀲𑀼𑀓𑁆𑀔𑀸𑀲𑀦𑀻𑀢𑀺. 𑀢𑀢𑁆𑀣 𑀅𑀲𑀜𑁆𑀜𑀸 𑀅𑀲𑀜𑁆𑀜𑀁 𑀓𑀭𑁄𑀢𑀺. 𑀯𑀺𑀘𑀓𑁆𑀓𑀸 𑀏𑀓𑀁 𑀘𑀓𑁆𑀓𑀁 𑀓𑀭𑁄𑀢𑀺. 𑀲𑀢𑁂𑀭𑀸 𑀲𑀢𑁂𑀭𑀲𑀤𑀺𑀲𑀸 𑀳𑀼𑀢𑁆𑀯𑀸 𑀧𑀢𑀢𑀺. 𑀕𑀕𑁆𑀕𑀭𑀸 𑀕𑀕𑁆𑀕𑀭𑀸𑀬𑀫𑀸𑀦𑀸 𑀧𑀢𑀢𑀺. 𑀓𑀧𑀺𑀲𑀻𑀲𑀸 𑀪𑀫𑀼𑀓𑀁 𑀉𑀓𑁆𑀔𑀺𑀧𑁂𑀦𑁆𑀢𑁄 𑀫𑀓𑁆𑀓𑀝𑁄 𑀯𑀺𑀬 𑀳𑁄𑀢𑀺. 𑀫𑀘𑁆𑀙𑀯𑀺𑀮𑁄𑀮𑀺𑀓𑀸 𑀯𑀺𑀮𑁄𑀮𑀺𑀢𑀫𑀘𑁆𑀙𑁄 𑀯𑀺𑀬 𑀳𑁄𑀢𑀺. 𑀓𑀼𑀓𑁆𑀓𑀼𑀝𑀓𑀸 𑀓𑀼𑀓𑁆𑀓𑀼𑀝𑀲𑀤𑀺𑀲𑀸 𑀳𑀼𑀢𑁆𑀯𑀸 𑀧𑀢𑀢𑀺. 𑀤𑀡𑁆𑀟𑀫𑀡𑀺𑀓𑀸 𑀦𑀗𑁆𑀕𑀮𑀲𑀤𑀺𑀲𑀸 𑀳𑀼𑀢𑁆𑀯𑀸 𑀧𑀢𑀢𑀺. 𑀲𑀼𑀓𑁆𑀔𑀸𑀲𑀦𑀻 𑀧𑀢𑀺𑀢𑀝𑁆𑀞𑀸𑀦𑀁 𑀲𑀫𑀼𑀕𑁆𑀖𑀸𑀝𑁂𑀢𑀺.

𑀤𑁂𑀯𑁂 ¶ 𑀯𑀲𑁆𑀲𑀦𑁆𑀢𑁂𑀢𑀺 𑀲𑀼𑀓𑁆𑀔𑀕𑀚𑁆𑀚𑀺𑀢𑀁 𑀕𑀚𑁆𑀚𑀺𑀢𑁆𑀯𑀸 𑀅𑀦𑁆𑀢𑀭𑀦𑁆𑀢𑀭𑀸 𑀯𑀲𑁆𑀲𑀦𑁆𑀢𑁂. 𑀆𑀢𑀼𑀫𑀸𑀬𑀦𑁆𑀢𑀺 𑀆𑀢𑀼𑀫𑀁 𑀦𑀺𑀲𑁆𑀲𑀸𑀬 𑀯𑀺𑀳𑀭𑀸𑀫𑀺. 𑀪𑀼𑀲𑀸𑀕𑀸𑀭𑁂𑀢𑀺 𑀔𑀮𑀲𑀸𑀮𑀸𑀬𑀁. 𑀏𑀢𑁆𑀣𑁂𑀲𑁄𑀢𑀺 𑀏𑀢𑀲𑁆𑀫𑀺𑀁 𑀓𑀸𑀭𑀡𑁂 𑀏𑀲𑁄 𑀫𑀳𑀸𑀚𑀦𑀓𑀸𑀬𑁄 𑀲𑀦𑁆𑀦𑀺𑀧𑀢𑀺𑀢𑁄. 𑀓𑁆𑀯 𑀅𑀳𑁄𑀲𑀻𑀢𑀺 𑀓𑀼𑀳𑀺𑀁 𑀅𑀳𑁄𑀲𑀺. 𑀲𑁄 𑀢𑀁 𑀪𑀦𑁆𑀢𑁂𑀢𑀺 𑀲𑁄 𑀢𑁆𑀯𑀁 𑀪𑀦𑁆𑀢𑁂.

𑁧𑁯𑁪. 𑀲𑀺𑀗𑁆𑀕𑀻𑀯𑀡𑁆𑀡𑀦𑁆𑀢𑀺 𑀲𑀺𑀗𑁆𑀕𑀻𑀲𑀼𑀯𑀡𑁆𑀡𑀯𑀡𑁆𑀡𑀁. 𑀬𑀼𑀕𑀫𑀝𑁆𑀞𑀦𑁆𑀢𑀺 ¶ 𑀫𑀝𑁆𑀞𑀬𑀼𑀕𑀁, 𑀲𑀡𑁆𑀳𑀲𑀸𑀝𑀓𑀬𑀼𑀕𑀴𑀦𑁆𑀢𑀺 𑀅𑀢𑁆𑀣𑁄. 𑀥𑀸𑀭𑀡𑀻𑀬𑀦𑁆𑀢𑀺 𑀅𑀦𑁆𑀢𑀭𑀦𑁆𑀢𑀭𑀸 𑀫𑀬𑀸 𑀥𑀸𑀭𑁂𑀢𑀩𑁆𑀩𑀁, 𑀧𑀭𑀺𑀤𑀳𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀓𑀺𑀭 𑀲𑁄 𑀢𑀣𑀸𑀭𑀽𑀧𑁂 𑀙𑀡𑀤𑀺𑀯𑀲𑁂𑀬𑁂𑀯 𑀥𑀸𑀭𑁂𑀢𑁆𑀯𑀸 𑀲𑁂𑀲𑀓𑀸𑀮𑁂 𑀦𑀺𑀓𑁆𑀔𑀺𑀧𑀢𑀺. 𑀏𑀯𑀁 𑀉𑀢𑁆𑀢𑀫𑀁 𑀫𑀗𑁆𑀕𑀮𑀯𑀢𑁆𑀣𑀬𑀼𑀕𑀁 𑀲𑀦𑁆𑀥𑀸𑀬𑀸𑀳. 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸𑀢𑀺 𑀫𑀬𑀺 𑀅𑀦𑀼𑀓𑀫𑁆𑀧𑀁 𑀧𑀝𑀺𑀘𑁆𑀘. 𑀅𑀘𑁆𑀙𑀸𑀤𑁂𑀳𑀻𑀢𑀺 𑀉𑀧𑀘𑀸𑀭𑀯𑀘𑀦𑀫𑁂𑀢𑀁 𑁋 𑀏𑀓𑀁 𑀫𑀬𑁆𑀳𑀁 𑀤𑁂𑀳𑀺, 𑀏𑀓𑀁 𑀆𑀦𑀦𑁆𑀤𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀦 𑀣𑁂𑀭𑁄 𑀢𑀁 𑀕𑀡𑁆𑀳𑀻𑀢𑀺? 𑀆𑀫 𑀕𑀡𑁆𑀳𑀺. 𑀓𑀲𑁆𑀫𑀸? 𑀫𑀢𑁆𑀣𑀓𑀧𑁆𑀧𑀢𑁆𑀢𑀓𑀺𑀘𑁆𑀘𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀳𑁂𑀲 𑀏𑀯𑀭𑀽𑀧𑀁 𑀮𑀸𑀪𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀧𑀝𑀺𑀧𑀦𑁆𑀦𑁄. 𑀢𑀁 𑀧𑀦𑀲𑁆𑀲 𑀉𑀧𑀝𑁆𑀞𑀸𑀓𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀢𑁆𑀢𑀁. 𑀢𑀲𑁆𑀫𑀸 𑀅𑀕𑁆𑀕𑀳𑁂𑀲𑀺. 𑀬𑁂 𑀘𑀸𑀧𑀺 𑀏𑀯𑀁 𑀯𑀤𑁂𑀬𑁆𑀬𑀼𑀁 𑁋 ‘‘𑀅𑀦𑀸𑀭𑀸𑀥𑀓𑁄 𑀫𑀜𑁆𑀜𑁂 𑀆𑀦𑀦𑁆𑀤𑁄 ¶ 𑀧𑀜𑁆𑀘𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀉𑀧𑀝𑁆𑀞𑀳𑀦𑁆𑀢𑁂𑀦 𑀦 𑀓𑀺𑀜𑁆𑀘𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑀸 𑀢𑁂𑀦 𑀮𑀤𑁆𑀥𑀧𑀼𑀩𑁆𑀩’’𑀦𑁆𑀢𑀺. 𑀢𑁂𑀲𑀁 𑀯𑀘𑀦𑁄𑀓𑀸𑀲𑀘𑁆𑀙𑁂𑀤𑀦𑀢𑁆𑀣𑀫𑁆𑀧𑀺 𑀅𑀕𑁆𑀕𑀳𑁂𑀲𑀺. 𑀅𑀧𑀺 𑀘 𑀚𑀸𑀦𑀸𑀢𑀺 𑀪𑀕𑀯𑀸 𑁋 ‘‘𑀆𑀦𑀦𑁆𑀤𑁄 𑀕𑀳𑁂𑀢𑁆𑀯𑀸𑀧𑀺 𑀅𑀢𑁆𑀢𑀦𑀸 𑀦 𑀥𑀸𑀭𑁂𑀲𑁆𑀲𑀢𑀺, 𑀫𑀬𑁆𑀳𑀁𑀬𑁂𑀯 𑀧𑀽𑀚𑀁 𑀓𑀭𑀺𑀲𑁆𑀲𑀢𑀺. 𑀫𑀮𑁆𑀮𑀧𑀼𑀢𑁆𑀢𑁂𑀦 𑀧𑀦 𑀆𑀦𑀦𑁆𑀤𑀁 𑀧𑀽𑀚𑁂𑀦𑁆𑀢𑁂𑀦 𑀲𑀗𑁆𑀖𑁄𑀧𑀺 𑀧𑀽𑀚𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀫𑀲𑁆𑀲 𑀫𑀳𑀸𑀧𑀼𑀜𑁆𑀜𑀭𑀸𑀲𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀣𑁂𑀭𑀲𑁆𑀲 𑀏𑀓𑀁 𑀤𑀸𑀧𑁂𑀲𑀺. 𑀣𑁂𑀭𑁄𑀧𑀺 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀅𑀕𑁆𑀕𑀳𑁂𑀲𑀻𑀢𑀺. 𑀥𑀫𑁆𑀫𑀺𑀬𑀸 𑀓𑀣𑀸𑀬𑀸𑀢𑀺 𑀯𑀢𑁆𑀣𑀸𑀦𑀼𑀫𑁄𑀤𑀦𑀓𑀣𑀸𑀬.

𑁧𑁯𑁫. 𑀪𑀕𑀯𑀢𑁄 𑀓𑀸𑀬𑀁 𑀉𑀧𑀦𑀸𑀫𑀺𑀢𑀦𑁆𑀢𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀯𑀲𑁂𑀦 𑀅𑀮𑁆𑀮𑀻𑀬𑀸𑀧𑀺𑀢𑀁. 𑀪𑀕𑀯𑀸𑀧𑀺 𑀢𑀢𑁄 𑀏𑀓𑀁 𑀦𑀺𑀯𑀸𑀲𑁂𑀲𑀺, 𑀏𑀓𑀁 𑀧𑀸𑀭𑀼𑀧𑀺. 𑀳𑀢𑀘𑁆𑀘𑀺𑀓𑀁 𑀯𑀺𑀬𑀸𑀢𑀺 𑀬𑀣𑀸 𑀳𑀢𑀘𑁆𑀘𑀺𑀓𑁄 𑀅𑀗𑁆𑀕𑀸𑀭𑁄 𑀅𑀦𑁆𑀢𑀦𑁆𑀢𑁂𑀦𑁂𑀯 𑀚𑁄𑀢𑀢𑀺, 𑀩𑀳𑀺 𑀧𑀦𑀲𑁆𑀲 𑀧𑀪𑀸 𑀦𑀢𑁆𑀣𑀺, 𑀏𑀯𑀁 𑀩𑀳𑀺 𑀧𑀝𑀺𑀘𑁆𑀙𑀦𑁆𑀦𑀧𑁆𑀧𑀪𑀁 𑀳𑀼𑀢𑁆𑀯𑀸 𑀔𑀸𑀬𑀢𑀻𑀢𑀺 𑀅𑀢𑁆𑀣𑁄.

𑀇𑀫𑁂𑀲𑀼 𑀔𑁄, 𑀆𑀦𑀦𑁆𑀤, 𑀤𑁆𑀯𑀻𑀲𑀼𑀧𑀺 𑀓𑀸𑀮𑁂𑀲𑀽𑀢𑀺 𑀓𑀲𑁆𑀫𑀸 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀓𑀸𑀮𑁂𑀲𑀼 𑀏𑀯𑀁 𑀳𑁄𑀢𑀺? 𑀆𑀳𑀸𑀭𑀯𑀺𑀲𑁂𑀲𑁂𑀦 𑀘𑁂𑀯 𑀩𑀮𑀯𑀲𑁄𑀫𑀦𑀲𑁆𑀲𑁂𑀦 𑀘. 𑀏𑀢𑁂𑀲𑀼 𑀳𑀺 𑀤𑁆𑀯𑀻𑀲𑀼 𑀓𑀸𑀮𑁂𑀲𑀼 𑀲𑀓𑀮𑀘𑀓𑁆𑀓𑀯𑀸𑀴𑁂 𑀤𑁂𑀯𑀢𑀸 𑀆𑀳𑀸𑀭𑁂 𑀑𑀚𑀁 𑀧𑀓𑁆𑀔𑀺𑀧𑀦𑁆𑀢𑀺, 𑀢𑀁 𑀧𑀡𑀻𑀢𑀪𑁄𑀚𑀦𑀁 𑀓𑀼𑀘𑁆𑀙𑀺𑀁 𑀧𑀯𑀺𑀲𑀺𑀢𑁆𑀯𑀸 𑀧𑀲𑀦𑁆𑀦𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀧𑀲𑀦𑁆𑀦𑀢𑁆𑀢𑀸 𑀫𑀦𑀘𑁆𑀙𑀝𑁆𑀞𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀢𑀺𑀯𑀺𑀬 𑀯𑀺𑀭𑁄𑀘𑀦𑁆𑀢𑀺. 𑀲𑀫𑁆𑀩𑁄𑀥𑀺𑀤𑀺𑀯𑀲𑁂 𑀘𑀲𑁆𑀲 𑁋 ‘‘𑀅𑀦𑁂𑀓𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀜𑁆𑀘𑀺𑀢𑁄 𑀯𑀢 𑀫𑁂 𑀓𑀺𑀮𑁂𑀲𑀭𑀸𑀲𑀺 𑀅𑀚𑁆𑀚 𑀧𑀳𑀻𑀦𑁄’’𑀢𑀺 𑀆𑀯𑀚𑁆𑀚𑀦𑁆𑀢𑀲𑁆𑀲 𑀩𑀮𑀯𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀘𑀺𑀢𑁆𑀢𑁂 𑀧𑀲𑀦𑁆𑀦𑁂 𑀮𑁄𑀳𑀺𑀢𑀁 𑀧𑀲𑀻𑀤𑀢𑀺, 𑀮𑁄𑀳𑀺𑀢𑁂 𑀧𑀲𑀦𑁆𑀦𑁂 𑀫𑀦𑀘𑁆𑀙𑀝𑁆𑀞𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀢𑀺𑀯𑀺𑀬 𑀯𑀺𑀭𑁄𑀘𑀦𑁆𑀢𑀺. 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂𑀧𑀺 𑁋 ‘‘𑀅𑀚𑁆𑀚, 𑀤𑀸𑀦𑀸𑀳𑀁, 𑀅𑀦𑁂𑀓𑁂𑀳𑀺 ¶ 𑀩𑀼𑀤𑁆𑀥𑀲𑀢𑀲𑀳𑀲𑁆𑀲𑁂𑀳𑀺 𑀧𑀯𑀺𑀝𑁆𑀞𑀁 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀁 𑀦𑀸𑀫 𑀦𑀕𑀭𑀁 𑀧𑀯𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀯𑀚𑁆𑀚𑀦𑁆𑀢𑀲𑁆𑀲 ¶ 𑀩𑀮𑀯𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀘𑀺𑀢𑁆𑀢𑁂 𑀧𑀲𑀦𑁆𑀦𑁂 𑀮𑁄𑀳𑀺𑀢𑀁 𑀧𑀲𑀻𑀤𑀢𑀺, 𑀮𑁄𑀳𑀺𑀢𑁂 𑀧𑀲𑀦𑁆𑀦𑁂 𑀫𑀦𑀘𑁆𑀙𑀝𑁆𑀞𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀢𑀺𑀯𑀺𑀬 𑀯𑀺𑀭𑁄𑀘𑀦𑁆𑀢𑀺. 𑀇𑀢𑀺 𑀆𑀳𑀸𑀭𑀯𑀺𑀲𑁂𑀲𑁂𑀦 𑀘𑁂𑀯 𑀩𑀮𑀯𑀲𑁄𑀫𑀦𑀲𑁆𑀲𑁂𑀦 𑀘 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀓𑀸𑀮𑁂𑀲𑀼 𑀏𑀯𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀉𑀧𑀯𑀢𑁆𑀢𑀦𑁂𑀢𑀺 𑀧𑀸𑀘𑀻𑀦𑀢𑁄 𑀦𑀺𑀯𑀢𑁆𑀢𑀦𑀲𑀸𑀮𑀯𑀦𑁂. 𑀅𑀦𑁆𑀢𑀭𑁂𑀦 𑀬𑀫𑀓𑀲𑀸𑀮𑀸𑀦𑀦𑁆𑀢𑀺 𑀬𑀫𑀓𑀲𑀸𑀮𑀭𑀼𑀓𑁆𑀔𑀸𑀦𑀁 𑀫𑀚𑁆𑀛𑁂.

𑀲𑀺𑀗𑁆𑀕𑀻𑀯𑀡𑁆𑀡𑀦𑁆𑀢𑀺 𑀕𑀸𑀣𑀸 𑀲𑀗𑁆𑀕𑀻𑀢𑀺𑀓𑀸𑀮𑁂 𑀞𑀧𑀺𑀢𑀸.

𑁧𑁯𑁬. 𑀦𑁆𑀳𑀢𑁆𑀯𑀸 ¶ 𑀘 𑀧𑀺𑀯𑀺𑀢𑁆𑀯𑀸 𑀘𑀸𑀢𑀺 𑀏𑀢𑁆𑀣 𑀢𑀤𑀸 𑀓𑀺𑀭 𑀪𑀕𑀯𑀢𑀺 𑀦𑀳𑀸𑀬𑀦𑁆𑀢𑁂 𑀅𑀦𑁆𑀢𑁄𑀦𑀤𑀺𑀬𑀁 𑀫𑀘𑁆𑀙𑀓𑀘𑁆𑀙𑀧𑀸 𑀘 𑀉𑀪𑀢𑁄𑀢𑀻𑀭𑁂𑀲𑀼 𑀯𑀦𑀲𑀡𑁆𑀟𑁄 𑀘 𑀲𑀩𑁆𑀩𑀁 𑀲𑀼𑀯𑀡𑁆𑀡𑀯𑀡𑁆𑀡𑀫𑁂𑀯 𑀳𑁄𑀢𑀺. 𑀅𑀫𑁆𑀩𑀯𑀦𑀦𑁆𑀢𑀺 𑀢𑀲𑁆𑀲𑀸𑀬𑁂𑀯 𑀦𑀤𑀺𑀬𑀸 𑀢𑀻𑀭𑁂 𑀅𑀫𑁆𑀩𑀯𑀦𑀁. 𑀆𑀬𑀲𑁆𑀫𑀦𑁆𑀢𑀁 𑀘𑀼𑀦𑁆𑀤𑀓𑀦𑁆𑀢𑀺 𑀢𑀲𑁆𑀫𑀺𑀁 𑀓𑀺𑀭 𑀔𑀡𑁂 𑀆𑀦𑀦𑁆𑀤𑀢𑁆𑀣𑁂𑀭𑁄 𑀉𑀤𑀓𑀲𑀸𑀝𑀓𑀁 𑀧𑀻𑀴𑁂𑀦𑁆𑀢𑁄 𑀑𑀳𑀻𑀬𑀺, 𑀘𑀼𑀦𑁆𑀤𑀢𑁆𑀣𑁂𑀭𑁄 𑀲𑀫𑀻𑀧𑁂 𑀅𑀳𑁄𑀲𑀺. 𑀢𑀁 𑀪𑀕𑀯𑀸 𑀆𑀫𑀦𑁆𑀢𑁂𑀲𑀺.

𑀕𑀦𑁆𑀢𑁆𑀯𑀸𑀦 𑀩𑀼𑀤𑁆𑀥𑁄 𑀦𑀤𑀺𑀓𑀁 𑀓𑀓𑀼𑀥𑀦𑁆𑀢𑀺 𑀇𑀫𑀸𑀧𑀺 𑀕𑀸𑀣𑀸 𑀲𑀗𑁆𑀕𑀻𑀢𑀺𑀓𑀸𑀮𑁂𑀬𑁂𑀯 𑀞𑀧𑀺𑀢𑀸. 𑀢𑀢𑁆𑀣 𑀧𑀯𑀢𑁆𑀢𑀸 𑀪𑀕𑀯𑀸 𑀇𑀥 𑀥𑀫𑁆𑀫𑁂𑀢𑀺 𑀪𑀕𑀯𑀸 𑀇𑀥 𑀲𑀸𑀲𑀦𑁂 𑀥𑀫𑁆𑀫𑁂 𑀧𑀯𑀢𑁆𑀢𑀸, 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀺 𑀧𑀯𑀢𑁆𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀧𑀫𑀼𑀔𑁂 𑀦𑀺𑀲𑀻𑀤𑀻𑀢𑀺 𑀲𑀢𑁆𑀣𑀼 𑀧𑀼𑀭𑀢𑁄𑀯 𑀦𑀺𑀲𑀻𑀤𑀺. 𑀏𑀢𑁆𑀢𑀸𑀯𑀢𑀸 𑀘 𑀣𑁂𑀭𑁄 𑀅𑀦𑀼𑀧𑁆𑀧𑀢𑁆𑀢𑁄. 𑀏𑀯𑀁 𑀅𑀦𑀼𑀧𑁆𑀧𑀢𑁆𑀢𑀁 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺.

𑁧𑁯𑁭. 𑀅𑀮𑀸𑀪𑀸𑀢𑀺 𑀬𑁂 𑀅𑀜𑁆𑀜𑁂𑀲𑀁 𑀤𑀸𑀦𑀸𑀦𑀺𑀲𑀁𑀲𑀲𑀗𑁆𑀔𑀸𑀢𑀸 𑀮𑀸𑀪𑀸 𑀳𑁄𑀦𑁆𑀢𑀺, 𑀢𑁂 𑀅𑀮𑀸𑀪𑀸. 𑀤𑀼𑀮𑁆𑀮𑀤𑁆𑀥𑀦𑁆𑀢𑀺 𑀧𑀼𑀜𑁆𑀜𑀯𑀺𑀲𑁂𑀲𑁂𑀦 𑀮𑀤𑁆𑀥𑀫𑁆𑀧𑀺 𑀫𑀦𑀼𑀲𑁆𑀲𑀢𑁆𑀢𑀁 𑀤𑀼𑀮𑁆𑀮𑀤𑁆𑀥𑀁. 𑀬𑀲𑁆𑀲 𑀢𑁂𑀢𑀺 𑀬𑀲𑁆𑀲 𑀢𑀯. 𑀉𑀢𑁆𑀢𑀡𑁆𑀟𑀼𑀮𑀁 𑀯𑀸 𑀅𑀢𑀺𑀓𑀺𑀮𑀺𑀦𑁆𑀦𑀁 𑀯𑀸 𑀓𑁄 𑀚𑀸𑀦𑀸𑀢𑀺, 𑀓𑀻𑀤𑀺𑀲𑀫𑁆𑀧𑀺 𑀧𑀘𑁆𑀙𑀺𑀫𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀣𑀸𑀕𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀤𑁆𑀥𑀸 𑀢𑁂 𑀬𑀁 𑀯𑀸 𑀢𑀁 𑀯𑀸 𑀤𑀺𑀦𑁆𑀦𑀁 𑀪𑀯𑀺𑀲𑁆𑀲𑀢𑀻𑀢𑀺. 𑀮𑀸𑀪𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀤𑀸𑀦𑀸𑀦𑀺𑀲𑀁𑀲𑀲𑀗𑁆𑀔𑀸𑀢𑀸 𑀮𑀸𑀪𑀸. 𑀲𑀼𑀮𑀤𑁆𑀥𑀦𑁆𑀢𑀺 𑀢𑀼𑀬𑁆𑀳𑀁 𑀫𑀦𑀼𑀲𑁆𑀲𑀢𑁆𑀢𑀁 𑀲𑀼𑀮𑀤𑁆𑀥𑀁. 𑀲𑀫𑀲𑀫𑀨𑀮𑀸𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀲𑀫𑀸𑀦𑀨𑀮𑀸.

𑀦𑀦𑀼 𑀘 𑀬𑀁 𑀲𑀼𑀚𑀸𑀢𑀸𑀬 𑀤𑀺𑀦𑁆𑀦𑀁 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀢𑀣𑀸𑀕𑀢𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀲𑁄 𑀲𑀭𑀸𑀕𑀲𑀤𑁄𑀲𑀲𑀫𑁄𑀳𑀓𑀸𑀮𑁂 𑀧𑀭𑀺𑀪𑀼𑀢𑁆𑀢𑁄, 𑀅𑀬𑀁 𑀧𑀦 𑀘𑀼𑀦𑁆𑀤𑁂𑀦 𑀤𑀺𑀦𑁆𑀦𑁄 𑀯𑀻𑀢𑀭𑀸𑀕𑀯𑀻𑀢𑀤𑁄𑀲𑀯𑀻𑀢𑀫𑁄𑀳𑀓𑀸𑀮𑁂 𑀧𑀭𑀺𑀪𑀼𑀢𑁆𑀢𑁄, 𑀓𑀲𑁆𑀫𑀸 𑀏𑀢𑁂 𑀲𑀫𑀨𑀮𑀸𑀢𑀺? 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀢𑀸𑀬 𑀘 𑀲𑀫𑀸𑀧𑀢𑁆𑀢𑀺𑀲𑀫𑀢𑀸𑀬 𑀘 𑀅𑀦𑀼𑀲𑁆𑀲𑀭𑀡𑀲𑀫𑀢𑀸𑀬 𑀘. 𑀪𑀕𑀯𑀸 ¶ 𑀳𑀺 𑀲𑀼𑀚𑀸𑀢𑀸𑀬 𑀤𑀺𑀦𑁆𑀦𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀉𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀘𑀼𑀦𑁆𑀤𑁂𑀦 𑀤𑀺𑀦𑁆𑀦𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀏𑀯𑀁 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀢𑀸𑀬𑀧𑀺 𑀲𑀫𑀨𑀮𑀸. 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀤𑀺𑀯𑀲𑁂 𑀘 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀸 ¶ 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀺, 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂𑀧𑀺 𑀲𑀩𑁆𑀩𑀸 𑀢𑀸 𑀲𑀫𑀸𑀧𑀚𑁆𑀚𑀻𑀢𑀺 𑀏𑀯𑀁 𑀲𑀫𑀸𑀧𑀢𑁆𑀢𑀺𑀲𑀫𑀢𑀸𑀬𑀧𑀺 𑀲𑀫𑀨𑀮𑀸. 𑀲𑀼𑀚𑀸𑀢𑀸 𑀘 𑀅𑀧𑀭𑀪𑀸𑀕𑁂 𑀅𑀲𑁆𑀲𑁄𑀲𑀺 𑁋 ‘‘𑀦 𑀓𑀺𑀭𑁂𑀲𑀸 𑀭𑀼𑀓𑁆𑀔𑀤𑁂𑀯𑀢𑀸, 𑀩𑁄𑀥𑀺𑀲𑀢𑁆𑀢𑁄 𑀓𑀺𑀭𑁂𑀲, 𑀢𑀁 𑀓𑀺𑀭 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 ¶ , 𑀲𑀢𑁆𑀢𑀲𑀢𑁆𑀢𑀸𑀳𑀁 𑀓𑀺𑀭𑀲𑁆𑀲 𑀢𑁂𑀦 𑀬𑀸𑀧𑀦𑀁 𑀅𑀳𑁄𑀲𑀻’’𑀢𑀺. 𑀢𑀲𑁆𑀲𑀸 𑀇𑀤𑀁 𑀲𑀼𑀢𑁆𑀯𑀸 𑁋 ‘‘𑀮𑀸𑀪𑀸 𑀯𑀢 𑀫𑁂’’𑀢𑀺 𑀅𑀦𑀼𑀲𑁆𑀲𑀭𑀦𑁆𑀢𑀺𑀬𑀸 𑀩𑀮𑀯𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀤𑀧𑀸𑀤𑀺. 𑀘𑀼𑀦𑁆𑀤𑀲𑁆𑀲𑀸𑀧𑀺 𑀅𑀧𑀭𑀪𑀸𑀕𑁂 𑁋 ‘‘𑀅𑀯𑀲𑀸𑀦𑀧𑀺𑀡𑁆𑀟𑀧𑀸𑀢𑁄 𑀓𑀺𑀭 𑀫𑀬𑀸 𑀤𑀺𑀦𑁆𑀦𑁄, 𑀥𑀫𑁆𑀫𑀲𑀻𑀲𑀁 𑀓𑀺𑀭 𑀫𑁂 𑀕𑀳𑀺𑀢𑀁, 𑀫𑀬𑁆𑀳𑀁 𑀓𑀺𑀭 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀢𑁆𑀣𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺 𑀲𑀼𑀢𑁆𑀯𑀸 ‘‘𑀮𑀸𑀪𑀸 𑀯𑀢 𑀫𑁂’’𑀢𑀺 𑀅𑀦𑀼𑀲𑁆𑀲𑀭𑀢𑁄 𑀩𑀮𑀯𑀲𑁄𑀫𑀦𑀲𑁆𑀲𑀁 𑀉𑀤𑀧𑀸𑀤𑀻𑀢𑀺 𑀏𑀯𑀁 𑀅𑀦𑀼𑀲𑁆𑀲𑀭𑀡𑀲𑀫𑀢𑀸𑀬𑀧𑀺 𑀲𑀫𑀨𑀮𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀲𑀲𑀁𑀯𑀢𑁆𑀢𑀦𑀺𑀓𑀦𑁆𑀢𑀺 𑀧𑀭𑀺𑀯𑀸𑀭𑀲𑀁𑀯𑀢𑁆𑀢𑀦𑀺𑀓𑀁. 𑀆𑀥𑀺𑀧𑀢𑁂𑀬𑁆𑀬𑀲𑀁𑀯𑀢𑁆𑀢𑀦𑀺𑀓𑀦𑁆𑀢𑀺 𑀚𑁂𑀝𑁆𑀞𑀓𑀪𑀸𑀯𑀲𑀁𑀯𑀢𑁆𑀢𑀦𑀺𑀓𑀁.

𑀲𑀁𑀬𑀫𑀢𑁄𑀢𑀺 𑀲𑀻𑀮𑀲𑀁𑀬𑀫𑁂𑀦 𑀲𑀁𑀬𑀫𑀦𑁆𑀢𑀲𑁆𑀲, 𑀲𑀁𑀯𑀭𑁂 𑀞𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀯𑁂𑀭𑀁 𑀦 𑀘𑀻𑀬𑀢𑀻𑀢𑀺 𑀧𑀜𑁆𑀘𑀯𑀺𑀥𑀁 𑀯𑁂𑀭𑀁 𑀦 𑀯𑀟𑁆𑀠𑀢𑀺. 𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀦𑁆𑀢𑀺 𑀓𑀼𑀲𑀮𑁄 𑀧𑀦 𑀜𑀸𑀡𑀲𑀫𑁆𑀧𑀦𑁆𑀦𑁄 𑀅𑀭𑀺𑀬𑀫𑀕𑁆𑀕𑁂𑀦 𑀅𑀦𑀯𑀲𑁂𑀲𑀁 𑀧𑀸𑀧𑀓𑀁 𑀮𑀸𑀫𑀓𑀁 𑀅𑀓𑀼𑀲𑀮𑀁 𑀚𑀳𑀸𑀢𑀺. 𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲 𑀦𑀺𑀩𑁆𑀩𑀼𑀢𑁄𑀢𑀺 𑀲𑁄 𑀇𑀫𑀁 𑀧𑀸𑀧𑀓𑀁 𑀚𑀳𑀺𑀢𑁆𑀯𑀸 𑀭𑀸𑀕𑀸𑀤𑀻𑀦𑀁 𑀔𑀬𑀸 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀼𑀢𑁄𑀢𑀺. 𑀇𑀢𑀺 𑀘𑀼𑀦𑁆𑀤𑀲𑁆𑀲 𑀘 𑀤𑀓𑁆𑀔𑀺𑀡𑀁, 𑀅𑀢𑁆𑀢𑀦𑁄 𑀘 𑀤𑀓𑁆𑀔𑀺𑀡𑁂𑀬𑁆𑀬𑀲𑀫𑁆𑀧𑀢𑁆𑀢𑀺𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺.

𑀘𑀢𑀼𑀢𑁆𑀣𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀬𑀫𑀓𑀲𑀸𑀮𑀸𑀯𑀡𑁆𑀡𑀦𑀸

𑁧𑁯𑁮. 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀦𑁆𑀢𑀺 𑀇𑀥 𑀪𑀺𑀓𑁆𑀔𑀽𑀦𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺. 𑀯𑁂𑀴𑀼𑀯𑀕𑀸𑀫𑁂 𑀯𑁂𑀤𑀦𑀸𑀯𑀺𑀓𑁆𑀔𑀫𑁆𑀪𑀦𑀢𑁄 𑀧𑀝𑁆𑀞𑀸𑀬 𑀳𑀺 𑁋 ‘‘𑀦 𑀘𑀺𑀭𑁂𑀦 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’’𑀢𑀺 𑀲𑀼𑀢𑁆𑀯𑀸 𑀢𑀢𑁄 𑀢𑀢𑁄 𑀆𑀕𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀏𑀓𑀪𑀺𑀓𑁆𑀔𑀼𑀧𑀺 𑀧𑀓𑁆𑀓𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀕𑀡𑀦𑀯𑀻𑀢𑀺𑀯𑀢𑁆𑀢𑁄 𑀲𑀗𑁆𑀖𑁄 𑀅𑀳𑁄𑀲𑀺. 𑀉𑀧𑀯𑀢𑁆𑀢𑀦𑀁 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑀦𑁆𑀢𑀺 𑀬𑀣𑁂𑀯 𑀳𑀺 𑀓𑀮𑀫𑁆𑀩𑀦𑀤𑀻𑀢𑀻𑀭𑀢𑁄 𑀭𑀸𑀚𑀫𑀸𑀢𑀼𑀯𑀺𑀳𑀸𑀭𑀤𑁆𑀯𑀸𑀭𑁂𑀦 𑀣𑀽𑀧𑀸𑀭𑀸𑀫𑀁 𑀕𑀦𑁆𑀢𑀩𑁆𑀩𑀁 ¶ 𑀳𑁄𑀢𑀺, 𑀏𑀯𑀁 𑀳𑀺𑀭𑀜𑁆𑀜𑀯𑀢𑀺𑀬𑀸 𑀧𑀸𑀭𑀺𑀫𑀢𑀻𑀭𑀢𑁄 𑀲𑀸𑀮𑀯𑀦𑀼𑀬𑁆𑀬𑀸𑀦𑀁, 𑀬𑀣𑀸 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀣𑀽𑀧𑀸𑀭𑀸𑀫𑁄, 𑀏𑀯𑀁 𑀢𑀁 𑀓𑀼𑀲𑀺𑀦𑀸𑀭𑀸𑀬𑀁 𑀳𑁄𑀢𑀺. 𑀬𑀣𑀸 𑀣𑀽𑀧𑀸𑀭𑀸𑀫𑀢𑁄 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀕𑀭𑀁 𑀧𑀯𑀺𑀲𑀦𑀫𑀕𑁆𑀕𑁄 𑀧𑀸𑀘𑀻𑀦𑀫𑀼𑀔𑁄 ¶ 𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑁂𑀦 𑀦𑀺𑀯𑀢𑁆𑀢𑁄, 𑀏𑀯𑀁 𑀉𑀬𑁆𑀬𑀸𑀦𑀢𑁄 𑀲𑀸𑀮𑀯𑀦𑀁 𑀧𑀸𑀘𑀻𑀦𑀫𑀼𑀔𑀁 𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑁂𑀦 𑀦𑀺𑀯𑀢𑁆𑀢𑀁. 𑀢𑀲𑁆𑀫𑀸 𑀢𑀁 𑁋 ‘‘𑀉𑀧𑀯𑀢𑁆𑀢𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀦𑁆𑀢𑀭𑁂𑀦 𑀬𑀫𑀓𑀲𑀸𑀮𑀸𑀦𑀁 ¶ 𑀉𑀢𑁆𑀢𑀭𑀲𑀻𑀲𑀓𑀦𑁆𑀢𑀺 𑀢𑀲𑁆𑀲 𑀓𑀺𑀭 𑀫𑀜𑁆𑀘𑀓𑀲𑁆𑀲 𑀏𑀓𑀸 𑀲𑀸𑀮𑀧𑀦𑁆𑀢𑀺 𑀲𑀻𑀲𑀪𑀸𑀕𑁂 𑀳𑁄𑀢𑀺, 𑀏𑀓𑀸 𑀧𑀸𑀤𑀪𑀸𑀕𑁂. 𑀢𑀢𑁆𑀭𑀸𑀧𑀺 𑀏𑀓𑁄 𑀢𑀭𑀼𑀡𑀲𑀸𑀮𑁄 𑀲𑀻𑀲𑀪𑀸𑀕𑀲𑁆𑀲 𑀆𑀲𑀦𑁆𑀦𑁄 𑀳𑁄𑀢𑀺, 𑀏𑀓𑁄 𑀧𑀸𑀤𑀪𑀸𑀕𑀲𑁆𑀲. 𑀅𑀧𑀺 𑀘 𑀬𑀫𑀓𑀲𑀸𑀮𑀸 𑀦𑀸𑀫 𑀫𑀽𑀮𑀔𑀦𑁆𑀥𑀯𑀺𑀝𑀧𑀧𑀢𑁆𑀢𑁂𑀳𑀺 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀺𑀩𑁆𑀩𑀺𑀢𑁆𑀯𑀸 𑀞𑀺𑀢𑀲𑀸𑀮𑀸𑀢𑀺 𑀯𑀼𑀢𑁆𑀢𑀁. 𑀫𑀜𑁆𑀘𑀓𑀁 𑀧𑀜𑁆𑀜𑀧𑁂𑀳𑀻𑀢𑀺 𑀢𑀲𑁆𑀫𑀺𑀁 𑀓𑀺𑀭 𑀉𑀬𑁆𑀬𑀸𑀦𑁂 𑀭𑀸𑀚𑀓𑀼𑀮𑀲𑁆𑀲 𑀲𑀬𑀦𑀫𑀜𑁆𑀘𑁄 𑀅𑀢𑁆𑀣𑀺, 𑀢𑀁 𑀲𑀦𑁆𑀥𑀸𑀬 𑀧𑀜𑁆𑀜𑀧𑁂𑀳𑀻𑀢𑀺 𑀆𑀳. 𑀣𑁂𑀭𑁄𑀧𑀺 𑀢𑀁𑀬𑁂𑀯 𑀧𑀜𑁆𑀜𑀧𑁂𑀢𑁆𑀯𑀸 𑀅𑀤𑀸𑀲𑀺.

𑀓𑀺𑀮𑀦𑁆𑀢𑁄𑀲𑁆𑀫𑀺, 𑀆𑀦𑀦𑁆𑀤, 𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀢𑀣𑀸𑀕𑀢𑀲𑁆𑀲 𑀳𑀺 𑁋

‘‘𑀕𑁄𑀘𑀭𑀺 𑀓𑀴𑀸𑀧𑁄 𑀕𑀗𑁆𑀕𑁂𑀬𑁆𑀬𑁄, 𑀧𑀺𑀗𑁆𑀕𑀮𑁄 𑀧𑀩𑁆𑀩𑀢𑁂𑀬𑁆𑀬𑀓𑁄;

𑀳𑁂𑀫𑀯𑀢𑁄 𑀘 𑀢𑀫𑁆𑀩𑁄 𑀘, 𑀫𑀦𑁆𑀤𑀸𑀓𑀺𑀦𑀺 𑀉𑀧𑁄𑀲𑀣𑁄;

𑀙𑀤𑁆𑀤𑀦𑁆𑀢𑁄𑀬𑁂𑀯 𑀤𑀲𑀫𑁄, 𑀏𑀢𑁂 𑀦𑀸𑀕𑀸𑀦𑀫𑀼𑀢𑁆𑀢𑀫𑀸’’𑀢𑀺. 𑁋

𑀏𑀢𑁆𑀣 𑀬𑀁 𑀤𑀲𑀦𑁆𑀦𑀁 𑀕𑁄𑀘𑀭𑀺𑀲𑀗𑁆𑀔𑀸𑀢𑀸𑀦𑀁 𑀧𑀓𑀢𑀺𑀳𑀢𑁆𑀣𑀻𑀦𑀁 𑀩𑀮𑀁, 𑀢𑀁 𑀏𑀓𑀲𑁆𑀲 𑀓𑀴𑀸𑀧𑀲𑁆𑀲𑀸𑀢𑀺. 𑀏𑀯𑀁 𑀤𑀲𑀕𑀼𑀡𑀯𑀟𑁆𑀠𑀺𑀢𑀸𑀬 𑀕𑀡𑀦𑀸𑀬 𑀧𑀓𑀢𑀺𑀳𑀢𑁆𑀣𑀻𑀦𑀁 𑀓𑁄𑀝𑀺𑀲𑀳𑀲𑁆𑀲𑀩𑀮𑀧𑁆𑀧𑀫𑀸𑀡𑀁 𑀩𑀮𑀁, 𑀢𑀁 𑀲𑀩𑁆𑀩𑀫𑁆𑀧𑀺 𑀘𑀼𑀦𑁆𑀤𑀲𑁆𑀲 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀘𑀗𑁆𑀕𑀯𑀸𑀭𑁂 𑀧𑀓𑁆𑀔𑀺𑀢𑁆𑀢𑀉𑀤𑀓𑀁 𑀯𑀺𑀬 𑀧𑀭𑀺𑀓𑁆𑀔𑀬𑀁 𑀕𑀢𑀁. 𑀧𑀸𑀯𑀸𑀦𑀕𑀭𑀢𑁄 𑀢𑀻𑀡𑀺 𑀕𑀸𑀯𑀼𑀢𑀸𑀦𑀺 𑀓𑀼𑀲𑀺𑀦𑀸𑀭𑀸𑀦𑀕𑀭𑀁, 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀧𑀜𑁆𑀘𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 𑀫𑀳𑀢𑀸 𑀉𑀲𑁆𑀲𑀸𑀳𑁂𑀦 𑀆𑀕𑀘𑁆𑀙𑀦𑁆𑀢𑁄𑀧𑀺 𑀲𑀽𑀭𑀺𑀬𑀲𑁆𑀲 𑀅𑀢𑁆𑀣𑀗𑁆𑀕𑀫𑀺𑀢𑀯𑁂𑀮𑀸𑀬𑀁 𑀲𑀜𑁆𑀛𑀸𑀲𑀫𑀬𑁂 𑀪𑀕𑀯𑀸 𑀲𑀸𑀮𑀯𑀦𑀁 𑀧𑀯𑀺𑀝𑁆𑀞𑁄. 𑀏𑀯𑀁 𑀭𑁄𑀕𑁄 𑀲𑀩𑁆𑀩𑀁 𑀆𑀭𑁄𑀕𑁆𑀬𑀁 𑀫𑀤𑁆𑀤𑀦𑁆𑀢𑁄 𑀆𑀕𑀘𑁆𑀙𑀢𑀺. 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀬 𑀲𑀩𑁆𑀩𑀮𑁄𑀓𑀲𑁆𑀲 𑀲𑀁𑀯𑁂𑀕𑀓𑀭𑀁 𑀯𑀸𑀘𑀁 𑀪𑀸𑀲𑀦𑁆𑀢𑁄 𑁋 ‘‘𑀓𑀺𑀮𑀦𑁆𑀢𑁄𑀲𑁆𑀫𑀺, 𑀆𑀦𑀦𑁆𑀤, 𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀆𑀳.

𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀏𑀯𑀁 𑀫𑀳𑀦𑁆𑀢𑁂𑀦 𑀉𑀲𑁆𑀲𑀸𑀳𑁂𑀦 𑀇𑀥𑀸𑀕𑀢𑁄, 𑀓𑀺𑀁 𑀅𑀜𑁆𑀜𑀢𑁆𑀣 𑀦 𑀲𑀓𑁆𑀓𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀼𑀦𑁆𑀢𑀺? 𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀼𑀁 𑀦𑀸𑀫 𑀦 𑀓𑀢𑁆𑀣𑀘𑀺 𑀦 𑀲𑀓𑁆𑀓𑀸, 𑀢𑀻𑀳𑀺 𑀧𑀦 𑀓𑀸𑀭𑀡𑁂𑀳𑀺 𑀇𑀥𑀸𑀕𑀢𑁄, 𑀇𑀤𑀜𑁆𑀳𑀺 𑀪𑀕𑀯𑀸 𑀏𑀯𑀁 𑀧𑀲𑁆𑀲𑀢𑀺 𑁋 ‘‘𑀫𑀬𑀺 𑀅𑀜𑁆𑀜𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑁂 𑀫𑀳𑀸𑀲𑀼𑀤𑀲𑁆𑀲𑀦𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀼𑀧𑁆𑀧𑀢𑁆𑀢𑀺 𑀦 𑀪𑀯𑀺𑀲𑁆𑀲𑀢𑀺, 𑀓𑀼𑀲𑀺𑀦𑀸𑀭𑀸𑀬𑀁 ¶ 𑀧𑀦 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑁂 𑀬𑀫𑀳𑀁 𑀤𑁂𑀯𑀮𑁄𑀓𑁂 𑀅𑀦𑀼𑀪𑀯𑀺𑀢𑀩𑁆𑀩𑀁 𑀲𑀫𑁆𑀧𑀢𑁆𑀢𑀺𑀁 𑀫𑀦𑀼𑀲𑁆𑀲𑀮𑁄𑀓𑁂𑀬𑁂𑀯 𑀅𑀦𑀼𑀪𑀯𑀺𑀁, 𑀢𑀁 𑀤𑁆𑀯𑀻𑀳𑀺 𑀪𑀸𑀡𑀯𑀸𑀭𑁂𑀳𑀺 𑀫𑀡𑁆𑀟𑁂𑀢𑁆𑀯𑀸 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀫𑁂 𑀲𑀼𑀢𑁆𑀯𑀸 𑀩𑀳𑀽 𑀚𑀦𑀸 𑀓𑀼𑀲𑀮𑀁 𑀓𑀸𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀻’’𑀢𑀺.

𑀅𑀧𑀭𑀫𑁆𑀧𑀺 ¶ 𑀧𑀲𑁆𑀲𑀢𑀺 𑁋 ‘‘𑀫𑀁 𑀅𑀜𑁆𑀜𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀁 𑀲𑀼𑀪𑀤𑁆𑀤𑁄 𑀦 𑀧𑀲𑁆𑀲𑀺𑀲𑁆𑀲𑀢𑀺, 𑀲𑁄 𑀘 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑁄 ¶ , 𑀦 𑀲𑀸𑀯𑀓𑀯𑁂𑀦𑁂𑀬𑁆𑀬𑁄; 𑀦 𑀢𑀁 𑀲𑀸𑀯𑀓𑀸 𑀯𑀺𑀦𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀓𑀼𑀲𑀺𑀦𑀸𑀭𑀸𑀬𑀁 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀁 𑀧𑀦 𑀫𑀁 𑀲𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀧𑀜𑁆𑀳𑀸𑀯𑀺𑀲𑁆𑀲𑀚𑁆𑀚𑀦𑀧𑀭𑀺𑀬𑁄𑀲𑀸𑀦𑁂 𑀘 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀫𑀫 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀫𑀬𑀺 𑀥𑀭𑀫𑀸𑀦𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀘𑁆𑀙𑀺𑀫𑀲𑀸𑀯𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺.

𑀅𑀧𑀭𑀫𑁆𑀧𑀺 𑀧𑀲𑁆𑀲𑀢𑀺 𑁋 ‘‘𑀫𑀬𑀺 𑀅𑀜𑁆𑀜𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑁂 𑀥𑀸𑀢𑀼𑀪𑀸𑀚𑀦𑀻𑀬𑁂 𑀫𑀳𑀸𑀓𑀮𑀳𑁄 𑀪𑀯𑀺𑀲𑁆𑀲𑀢𑀺, 𑀮𑁄𑀳𑀺𑀢𑀁 𑀦𑀤𑀻 𑀯𑀺𑀬 𑀲𑀦𑁆𑀤𑀺𑀲𑁆𑀲𑀢𑀺. 𑀓𑀼𑀲𑀺𑀦𑀸𑀭𑀸𑀬𑀁 𑀧𑀭𑀺𑀦𑀺𑀩𑁆𑀩𑀼𑀢𑁂 𑀤𑁄𑀡𑀩𑁆𑀭𑀸𑀳𑁆𑀫𑀡𑁄 𑀢𑀁 𑀯𑀺𑀯𑀸𑀤𑀁 𑀯𑀽𑀧𑀲𑀫𑁂𑀢𑁆𑀯𑀸 𑀥𑀸𑀢𑀼𑀬𑁄 𑀯𑀺𑀪𑀚𑀺𑀲𑁆𑀲𑀢𑀻’’𑀢𑀺. 𑀇𑀫𑁂𑀳𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀏𑀯𑀁 𑀫𑀳𑀦𑁆𑀢𑁂𑀦 𑀉𑀲𑁆𑀲𑀸𑀳𑁂𑀦 𑀇𑀥𑀸𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀻𑀳𑀲𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀓𑀸𑀫𑀪𑁄𑀕𑀻𑀲𑁂𑀬𑁆𑀬𑀸, 𑀧𑁂𑀢𑀲𑁂𑀬𑁆𑀬𑀸, 𑀲𑀻𑀳𑀲𑁂𑀬𑁆𑀬𑀸, 𑀢𑀣𑀸𑀕𑀢𑀲𑁂𑀬𑁆𑀬𑀸𑀢𑀺 𑀘𑀢𑀲𑁆𑀲𑁄 𑀲𑁂𑀬𑁆𑀬𑀸.

𑀢𑀢𑁆𑀣 𑁋 ‘‘𑀬𑁂𑀪𑀼𑀬𑁆𑀬𑁂𑀦, 𑀪𑀺𑀓𑁆𑀔𑀯𑁂, 𑀓𑀸𑀫𑀪𑁄𑀕𑀻 𑀲𑀢𑁆𑀢𑀸 𑀯𑀸𑀫𑁂𑀦 𑀧𑀲𑁆𑀲𑁂𑀦 𑀲𑁂𑀦𑁆𑀢𑀻’’𑀢𑀺 𑀅𑀬𑀁 𑀓𑀸𑀫𑀪𑁄𑀕𑀻𑀲𑁂𑀬𑁆𑀬𑀸. 𑀢𑁂𑀲𑀼 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀬𑀦𑁆𑀢𑀸 𑀦𑀸𑀫 𑀦𑀢𑁆𑀣𑀺.

‘‘𑀬𑁂𑀪𑀼𑀬𑁆𑀬𑁂𑀦, 𑀪𑀺𑀓𑁆𑀔𑀯𑁂, 𑀧𑁂𑀢𑀸 𑀉𑀢𑁆𑀢𑀸𑀦𑀸 𑀲𑁂𑀦𑁆𑀢𑀻’’𑀢𑀺 𑀅𑀬𑀁 𑀧𑁂𑀢𑀲𑁂𑀬𑁆𑀬𑀸. 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑀢𑁆𑀢𑀸 𑀳𑀺 𑀧𑁂𑀢𑀸 𑀅𑀝𑁆𑀞𑀺𑀲𑀗𑁆𑀖𑀸𑀝𑀚𑀝𑀺𑀢𑀸 𑀏𑀓𑁂𑀦 𑀧𑀲𑁆𑀲𑁂𑀦 𑀲𑀬𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀉𑀢𑁆𑀢𑀸𑀦𑀸𑀯 𑀲𑁂𑀦𑁆𑀢𑀺.

‘‘𑀲𑀻𑀳𑁄, 𑀪𑀺𑀓𑁆𑀔𑀯𑁂, 𑀫𑀺𑀕𑀭𑀸𑀚𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺…𑀧𑁂… 𑀅𑀢𑁆𑀢𑀫𑀦𑁄 𑀳𑁄𑀢𑀻’’𑀢𑀺 (𑀅. 𑀦𑀺. 𑁪.𑁨𑁪𑁬) 𑀅𑀬𑀁 𑀲𑀻𑀳𑀲𑁂𑀬𑁆𑀬𑀸. 𑀢𑁂𑀚𑀼𑀲𑁆𑀲𑀤𑀢𑁆𑀢𑀸 𑀳𑀺 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀤𑁆𑀯𑁂 𑀧𑀼𑀭𑀺𑀫𑀧𑀸𑀤𑁂 𑀏𑀓𑀲𑁆𑀫𑀺𑀁 𑀞𑀸𑀦𑁂, 𑀧𑀘𑁆𑀙𑀺𑀫𑀧𑀸𑀤𑁂 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀦𑀗𑁆𑀕𑀼𑀝𑁆𑀞𑀁 𑀅𑀦𑁆𑀢𑀭𑀲𑀢𑁆𑀣𑀺𑀫𑁆𑀳𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀭𑀺𑀫𑀧𑀸𑀤𑀧𑀘𑁆𑀙𑀺𑀫𑀧𑀸𑀤𑀦𑀗𑁆𑀕𑀼𑀝𑁆𑀞𑀸𑀦𑀁 𑀞𑀺𑀢𑁄𑀓𑀸𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀧𑀼𑀭𑀺𑀫𑀧𑀸𑀤𑀸𑀦𑀁 𑀫𑀢𑁆𑀣𑀓𑁂 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀲𑀬𑀢𑀺. 𑀤𑀺𑀯𑀲𑀁 𑀲𑀬𑀺𑀢𑁆𑀯𑀸𑀧𑀺 𑀧𑀩𑀼𑀚𑁆𑀛𑀫𑀸𑀦𑁄 𑀦 𑀉𑀢𑁆𑀭𑀲𑀦𑁆𑀢𑁄 𑀧𑀩𑀼𑀚𑁆𑀛𑀢𑀺, 𑀲𑀻𑀲𑀁 𑀧𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀭𑀺𑀫𑀧𑀸𑀤𑀸𑀤𑀻𑀦𑀁 𑀞𑀺𑀢𑁄𑀓𑀸𑀲𑀁 𑀲𑀮𑁆𑀮𑀓𑁆𑀔𑁂𑀢𑀺. 𑀲𑀘𑁂 𑀓𑀺𑀜𑁆𑀘𑀺 𑀞𑀸𑀦𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑀁 𑀳𑁄𑀢𑀺 𑁋 ‘‘𑀦 𑀬𑀺𑀤𑀁 𑀢𑀼𑀬𑁆𑀳𑀁 𑀚𑀸𑀢𑀺𑀬𑀸 𑀲𑀽𑀭𑀪𑀸𑀯𑀲𑁆𑀲 𑀘 𑀅𑀦𑀼𑀭𑀽𑀧’’𑀦𑁆𑀢𑀺 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 𑀢𑀢𑁆𑀣𑁂𑀯 𑀲𑀬𑀢𑀺, 𑀦 𑀕𑁄𑀘𑀭𑀸𑀬 𑀧𑀓𑁆𑀓𑀫𑀢𑀺. 𑀅𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁂 𑀧𑀦 ¶ 𑁋 ‘‘𑀢𑀼𑀬𑁆𑀳𑀁 𑀚𑀸𑀢𑀺𑀬𑀸 𑀘 𑀲𑀽𑀭𑀪𑀸𑀯𑀲𑁆𑀲 𑀘 𑀅𑀦𑀼𑀭𑀽𑀧𑀫𑀺𑀤’’𑀦𑁆𑀢𑀺 𑀳𑀝𑁆𑀞𑀢𑀼𑀝𑁆𑀞𑁄 𑀉𑀝𑁆𑀞𑀸𑀬 𑀲𑀻𑀳𑀯𑀺𑀚𑀫𑁆𑀪𑀺𑀢𑀁 ¶ 𑀯𑀺𑀚𑀫𑁆𑀪𑀺𑀢𑁆𑀯𑀸 𑀓𑁂𑀲𑀭𑀪𑀸𑀭𑀁 𑀯𑀺𑀥𑀼𑀦𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀕𑁄𑀘𑀭𑀸𑀬 𑀧𑀓𑁆𑀓𑀫𑀢𑀺.

‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁂𑀬𑁆𑀬𑀸 ¶ 𑀧𑀦 𑀢𑀣𑀸𑀕𑀢𑀲𑁆𑀲 𑀲𑁂𑀬𑁆𑀬𑀸𑀢𑀺 𑀯𑀼𑀘𑁆𑀘𑀢𑀺’’ (𑀅. 𑀦𑀺. 𑁪.𑁨𑁪𑁬). 𑀢𑀸𑀲𑀼 𑀇𑀥 𑀲𑀻𑀳𑀲𑁂𑀬𑁆𑀬𑀸 𑀆𑀕𑀢𑀸. 𑀅𑀬𑀜𑁆𑀳𑀺 𑀢𑁂𑀚𑀼𑀲𑁆𑀲𑀤𑀇𑀭𑀺𑀬𑀸𑀧𑀣𑀢𑁆𑀢𑀸 𑀉𑀢𑁆𑀢𑀫𑀲𑁂𑀬𑁆𑀬𑀸 𑀦𑀸𑀫.

𑀧𑀸𑀤𑁂 𑀧𑀸𑀤𑀦𑁆𑀢𑀺 𑀤𑀓𑁆𑀔𑀺𑀡𑀧𑀸𑀤𑁂 𑀯𑀸𑀫𑀧𑀸𑀤𑀁. 𑀅𑀘𑁆𑀘𑀸𑀥𑀸𑀬𑀸𑀢𑀺 𑀅𑀢𑀺𑀆𑀥𑀸𑀬, 𑀈𑀲𑀓𑀁 𑀅𑀢𑀺𑀓𑁆𑀓𑀫𑁆𑀫 𑀞𑀧𑁂𑀢𑁆𑀯𑀸. 𑀕𑁄𑀧𑁆𑀨𑀓𑁂𑀦 𑀳𑀺 𑀕𑁄𑀧𑁆𑀨𑀓𑁂, 𑀚𑀸𑀡𑀼𑀦𑀸 𑀯𑀸 𑀚𑀸𑀡𑀼𑀫𑁆𑀳𑀺 𑀲𑀗𑁆𑀖𑀝𑁆𑀝𑀺𑀬𑀫𑀸𑀦𑁂 𑀅𑀪𑀺𑀡𑁆𑀳𑀁 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀦 𑀳𑁄𑀢𑀺, 𑀲𑁂𑀬𑁆𑀬𑀸 𑀅𑀨𑀸𑀲𑀼𑀓𑀸 𑀳𑁄𑀢𑀺. 𑀬𑀣𑀸 𑀧𑀦 𑀦 𑀲𑀗𑁆𑀖𑀝𑁆𑀝𑁂𑀢𑀺, 𑀏𑀯𑀁 𑀅𑀢𑀺𑀓𑁆𑀓𑀫𑁆𑀫 𑀞𑀧𑀺𑀢𑁂 𑀯𑁂𑀤𑀦𑀸 𑀦𑀼𑀧𑁆𑀧𑀚𑁆𑀚𑀢𑀺, 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺, 𑀲𑁂𑀬𑁆𑀬𑀸 𑀨𑀸𑀲𑀼 𑀳𑁄𑀢𑀺. 𑀢𑀲𑁆𑀫𑀸 𑀏𑀯𑀁 𑀦𑀺𑀧𑀚𑁆𑀚𑀺. 𑀅𑀦𑀼𑀝𑁆𑀞𑀸𑀦𑀲𑁂𑀬𑁆𑀬𑀁 𑀉𑀧𑀕𑀢𑀢𑁆𑀢𑀸 𑀧𑀦𑁂𑀢𑁆𑀣 𑁋 ‘‘𑀉𑀝𑁆𑀞𑀸𑀦𑀲𑀜𑁆𑀜𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸’’𑀢𑀺 𑀦 𑀯𑀼𑀢𑁆𑀢𑀁. 𑀓𑀸𑀬𑀯𑀲𑁂𑀦 𑀘𑁂𑀢𑁆𑀣 𑀅𑀦𑀼𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁, 𑀦𑀺𑀤𑁆𑀤𑀸𑀯𑀲𑁂𑀦 𑀧𑀦 𑀢𑀁 𑀭𑀢𑁆𑀢𑀺𑀁 𑀪𑀕𑀯𑀢𑁄 𑀪𑀯𑀗𑁆𑀕𑀲𑁆𑀲 𑀑𑀓𑀸𑀲𑁄𑀬𑁂𑀯 𑀦𑀸𑀳𑁄𑀲𑀺. 𑀧𑀞𑀫𑀬𑀸𑀫𑀲𑁆𑀫𑀺𑀜𑁆𑀳𑀺 𑀫𑀮𑁆𑀮𑀸𑀦𑀁 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀺, 𑀫𑀚𑁆𑀛𑀺𑀫𑀬𑀸𑀫𑁂 𑀲𑀼𑀪𑀤𑁆𑀤𑀲𑁆𑀲 𑀧𑀘𑁆𑀙𑀺𑀫𑀬𑀸𑀫𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀑𑀯𑀤𑀺, 𑀩𑀮𑀯𑀧𑀘𑁆𑀘𑀽𑀲𑁂 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑀸𑀢𑀺 𑀲𑀩𑁆𑀩𑁂 𑀲𑀫𑀦𑁆𑀢𑀢𑁄 𑀧𑀼𑀧𑁆𑀨𑀺𑀢𑀸 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀕𑁆𑀕𑀸 𑀏𑀓𑀘𑁆𑀙𑀦𑁆𑀦𑀸 𑀅𑀳𑁂𑀲𑀼𑀁, 𑀦 𑀓𑁂𑀯𑀮𑀜𑁆𑀘 𑀬𑀫𑀓𑀲𑀸𑀮𑀸𑀬𑁂𑀯, 𑀲𑀩𑁆𑀩𑁂𑀧𑀺 𑀭𑀼𑀓𑁆𑀔𑀸 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀸𑀯 𑀅𑀳𑁂𑀲𑀼𑀁. 𑀦 𑀓𑁂𑀯𑀮𑀜𑁆𑀳𑀺 𑀢𑀲𑁆𑀫𑀺𑀁𑀬𑁂𑀯 𑀉𑀬𑁆𑀬𑀸𑀦𑁂, 𑀲𑀓𑀮𑀜𑁆𑀳𑀺𑀧𑀺 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀧𑀼𑀧𑁆𑀨𑀽𑀧𑀕𑀸 𑀧𑀼𑀧𑁆𑀨𑀁 𑀕𑀡𑁆𑀳𑀺𑀁𑀲𑀼, 𑀨𑀮𑀽𑀧𑀕𑀸 𑀨𑀮𑀁 𑀕𑀡𑁆𑀳𑀺𑀁𑀲𑀼, 𑀲𑀩𑁆𑀩𑀭𑀼𑀓𑁆𑀔𑀸𑀦𑀁 𑀔𑀦𑁆𑀥𑁂𑀲𑀼 𑀔𑀦𑁆𑀥𑀧𑀤𑀼𑀫𑀸𑀦𑀺, 𑀲𑀸𑀔𑀸𑀲𑀼 𑀲𑀸𑀔𑀸𑀧𑀤𑀼𑀫𑀸𑀦𑀺, 𑀯𑀮𑁆𑀮𑀻𑀲𑀼 𑀯𑀮𑁆𑀮𑀺𑀧𑀤𑀼𑀫𑀸𑀦𑀺, 𑀆𑀓𑀸𑀲𑁂𑀲𑀼 𑀆𑀓𑀸𑀲𑀧𑀤𑀼𑀫𑀸𑀦𑀺 𑀧𑀣𑀯𑀻𑀢𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀤𑀡𑁆𑀟𑀧𑀤𑀼𑀫𑀸𑀦𑀺 𑀧𑀼𑀧𑁆𑀨𑀺𑀁𑀲𑀼. 𑀲𑀩𑁆𑀩𑁄 𑀫𑀳𑀸𑀲𑀫𑀼𑀤𑁆𑀤𑁄 𑀧𑀜𑁆𑀘𑀯𑀡𑁆𑀡𑀧𑀤𑀼𑀫𑀲𑀜𑁆𑀙𑀦𑁆𑀦𑁄 𑀅𑀳𑁄𑀲𑀺. 𑀢𑀺𑀬𑁄𑀚𑀦𑀲𑀳𑀲𑁆𑀲𑀯𑀺𑀢𑁆𑀣𑀢𑁄 𑀳𑀺𑀫𑀯𑀸 𑀖𑀦𑀩𑀤𑁆𑀥𑀫𑁄𑀭𑀧𑀺𑀜𑁆𑀙𑀓𑀮𑀸𑀧𑁄 𑀯𑀺𑀬, 𑀦𑀺𑀭𑀦𑁆𑀢𑀭𑀁 𑀫𑀸𑀮𑀸𑀤𑀸𑀫𑀕𑀯𑀘𑁆𑀙𑀺𑀓𑁄 𑀯𑀺𑀬, 𑀲𑀼𑀝𑁆𑀞𑀼 𑀧𑀻𑀴𑁂𑀢𑁆𑀯𑀸 𑀆𑀩𑀤𑁆𑀥𑀧𑀼𑀧𑁆𑀨𑀯𑀝𑀁𑀲𑀓𑁄 𑀯𑀺𑀬, 𑀲𑀼𑀧𑀽𑀭𑀺𑀢𑀁 𑀧𑀼𑀧𑁆𑀨𑀘𑀗𑁆𑀓𑁄𑀝𑀓𑀁 𑀯𑀺𑀬 𑀘 𑀅𑀢𑀺𑀭𑀫𑀡𑀻𑀬𑁄 𑀅𑀳𑁄𑀲𑀺.

𑀢𑁂 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀁 𑀑𑀓𑀺𑀭𑀦𑁆𑀢𑀻𑀢𑀺 𑀢𑁂 𑀬𑀫𑀓𑀲𑀸𑀮𑀸 𑀪𑀼𑀫𑁆𑀫𑀤𑁂𑀯𑀢𑀸𑀳𑀺 𑀲𑀜𑁆𑀘𑀮𑀺𑀢𑀔𑀦𑁆𑀥𑀲𑀸𑀔𑀯𑀺𑀝𑀧𑀸 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀁 𑀅𑀯𑀓𑀺𑀭𑀦𑁆𑀢𑀺, 𑀲𑀭𑀻𑀭𑀲𑁆𑀲 𑀉𑀧𑀭𑀺 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀚𑁆𑀛𑁄𑀓𑀺𑀭𑀦𑁆𑀢𑀻𑀢𑀺 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀸 𑀯𑀺𑀬 𑀓𑀺𑀭𑀦𑁆𑀢𑀺. 𑀅𑀪𑀺𑀧𑁆𑀧𑀓𑀺𑀭𑀦𑁆𑀢𑀻𑀢𑀺 𑀅𑀪𑀺𑀡𑁆𑀳𑀁 𑀧𑀼𑀦𑀧𑁆𑀧𑀼𑀦𑀁 𑀧𑀓𑀺𑀭𑀦𑁆𑀢𑀺𑀬𑁂𑀯. 𑀤𑀺𑀩𑁆𑀩𑀸𑀦𑀻𑀢𑀺 ¶ 𑀤𑁂𑀯𑀮𑁄𑀓𑁂 𑀦𑀦𑁆𑀤𑀧𑁄𑀓𑁆𑀔𑀭𑀡𑀻𑀲𑀫𑁆𑀪𑀯𑀸𑀦𑀺, 𑀢𑀸𑀦𑀺 𑀳𑁄𑀦𑁆𑀢𑀺 ¶ 𑀲𑀼𑀯𑀡𑁆𑀡𑀯𑀡𑁆𑀡𑀸𑀦𑀺 𑀧𑀡𑁆𑀡𑀘𑁆𑀙𑀢𑁆𑀢𑀧𑁆𑀧𑀫𑀸𑀡𑀧𑀢𑁆𑀢𑀸𑀦𑀺, 𑀫𑀳𑀸𑀢𑀼𑀫𑁆𑀩𑀫𑀢𑁆𑀢𑀁 𑀭𑁂𑀡𑀼𑀁 𑀕𑀡𑁆𑀳𑀦𑁆𑀢𑀺. 𑀦 𑀓𑁂𑀯𑀮𑀜𑁆𑀘 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀸𑀦𑁂𑀯, 𑀅𑀜𑁆𑀜𑀸𑀦𑀺𑀧𑀺 𑀧𑀦 𑀤𑀺𑀩𑁆𑀩𑀸𑀦𑀺 𑀧𑀸𑀭𑀺𑀘𑁆𑀙𑀢𑁆𑀢𑀓𑀓𑁄𑀯𑀺𑀴𑀸𑀭𑀧𑀼𑀧𑁆𑀨𑀸𑀤𑀻𑀦𑀺 𑀲𑀼𑀯𑀡𑁆𑀡𑀘𑀗𑁆𑀓𑁄𑀝𑀓𑀸𑀦𑀺 𑀧𑀽𑀭𑁂𑀢𑁆𑀯𑀸 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀫𑁆𑀧𑀺 𑀢𑀺𑀤𑀲𑀧𑀼𑀭𑁂𑀧𑀺 𑀩𑁆𑀭𑀳𑁆𑀫𑀮𑁄𑀓𑁂𑀧𑀺 𑀞𑀺𑀢𑀸𑀳𑀺 𑀤𑁂𑀯𑀢𑀸𑀳𑀺 𑀧𑀯𑀺𑀝𑁆𑀞𑀸𑀦𑀺, 𑀅𑀦𑁆𑀢𑀮𑀺𑀓𑁆𑀔𑀸 𑀧𑀢𑀦𑁆𑀢𑀺. 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀦𑁆𑀢𑀺 𑀅𑀦𑁆𑀢𑀭𑀸 𑀅𑀯𑀺𑀓𑀺𑀡𑁆𑀡𑀸𑀦𑁂𑀯 𑀆𑀕𑀦𑁆𑀢𑁆𑀯𑀸 𑀧𑀢𑁆𑀢𑀓𑀺𑀜𑁆𑀚𑀓𑁆𑀔𑀭𑁂𑀡𑀼𑀘𑀼𑀡𑁆𑀡𑁂𑀳𑀺 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀫𑁂𑀯 𑀑𑀓𑀺𑀭𑀦𑁆𑀢𑀺.

𑀤𑀺𑀩𑁆𑀩𑀸𑀦𑀺𑀧𑀺 ¶ 𑀘𑀦𑁆𑀤𑀦𑀘𑀼𑀡𑁆𑀡𑀸𑀦𑀻𑀢𑀺 𑀤𑁂𑀯𑀢𑀸𑀦𑀁 𑀉𑀧𑀓𑀧𑁆𑀧𑀦𑀘𑀦𑁆𑀤𑀦𑀘𑀼𑀡𑁆𑀡𑀸𑀦𑀺. 𑀦 𑀓𑁂𑀯𑀮𑀜𑁆𑀘 𑀤𑁂𑀯𑀢𑀸𑀦𑀁𑀬𑁂𑀯, 𑀦𑀸𑀕𑀲𑀼𑀧𑀡𑁆𑀡𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀉𑀧𑀓𑀧𑁆𑀧𑀦𑀘𑀦𑁆𑀤𑀦𑀘𑀼𑀡𑁆𑀡𑀸𑀦𑀺. 𑀦 𑀓𑁂𑀯𑀮𑀜𑁆𑀘 𑀘𑀦𑁆𑀤𑀦𑀘𑀼𑀡𑁆𑀡𑀸𑀦𑁂𑀯, 𑀓𑀸𑀴𑀸𑀦𑀼𑀲𑀸𑀭𑀺𑀓𑀮𑁄𑀳𑀺𑀢𑀘𑀦𑁆𑀤𑀦𑀸𑀤𑀺𑀲𑀩𑁆𑀩𑀤𑀺𑀩𑁆𑀩𑀕𑀦𑁆𑀥𑀚𑀸𑀮𑀘𑀼𑀡𑁆𑀡𑀸𑀦𑀺, 𑀳𑀭𑀺𑀢𑀸𑀮𑀅𑀜𑁆𑀚𑀦𑀲𑀼𑀯𑀡𑁆𑀡𑀭𑀚𑀢𑀘𑀼𑀡𑁆𑀡𑀸𑀦𑀺 𑀲𑀩𑁆𑀩𑀤𑀺𑀩𑁆𑀩𑀕𑀦𑁆𑀥𑀯𑀸𑀲𑀯𑀺𑀓𑀢𑀺𑀬𑁄 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀲𑀫𑀼𑀕𑁆𑀕𑁂 𑀧𑀽𑀭𑁂𑀢𑁆𑀯𑀸 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀆𑀤𑀻𑀲𑀼 𑀞𑀺𑀢𑀸𑀳𑀺 𑀤𑁂𑀯𑀢𑀸𑀳𑀺 𑀧𑀯𑀺𑀝𑁆𑀞𑀸𑀦𑀺 𑀅𑀦𑁆𑀢𑀭𑀸 𑀅𑀯𑀺𑀧𑁆𑀧𑀓𑀺𑀭𑀺𑀢𑁆𑀯𑀸 𑀢𑀣𑀸𑀕𑀢𑀲𑁆𑀲𑁂𑀯 𑀲𑀭𑀻𑀭𑀁 𑀑𑀓𑀺𑀭𑀦𑁆𑀢𑀺.

𑀤𑀺𑀩𑁆𑀩𑀸𑀦𑀺𑀧𑀺 𑀢𑀽𑀭𑀺𑀬𑀸𑀦𑀻𑀢𑀺 𑀤𑁂𑀯𑀢𑀸𑀦𑀁 𑀉𑀧𑀓𑀧𑁆𑀧𑀦𑀢𑀽𑀭𑀺𑀬𑀸𑀦𑀺. 𑀦 𑀓𑁂𑀯𑀮𑀜𑁆𑀘 𑀢𑀸𑀦𑀺𑀬𑁂𑀯, 𑀲𑀩𑁆𑀩𑀸𑀦𑀺𑀧𑀺 𑀢𑀦𑁆𑀢𑀺𑀩𑀤𑁆𑀥𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑀖𑀦𑀲𑀼𑀲𑀺𑀭𑀪𑁂𑀤𑀸𑀦𑀺 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀤𑁂𑀯𑀦𑀸𑀕𑀲𑀼𑀧𑀡𑁆𑀡𑀫𑀦𑀼𑀲𑁆𑀲𑀸𑀦𑀁 𑀢𑀽𑀭𑀺𑀬𑀸𑀦𑀺 𑀏𑀓𑀘𑀓𑁆𑀓𑀯𑀸𑀴𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀦𑁆𑀢𑀮𑀺𑀓𑁆𑀔𑁂 𑀯𑀚𑁆𑀚𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀤𑀺𑀩𑁆𑀩𑀸𑀦𑀺𑀧𑀺 𑀲𑀗𑁆𑀕𑀻𑀢𑀸𑀦𑀻𑀢𑀺 𑀯𑀭𑀼𑀡𑀯𑀸𑀭𑀡𑀤𑁂𑀯𑀢𑀸 𑀓𑀺𑀭 𑀦𑀸𑀫𑁂𑀢𑀸 𑀤𑀻𑀖𑀸𑀬𑀼𑀓𑀸 𑀤𑁂𑀯𑀢𑀸 𑁋 ‘‘𑀫𑀳𑀸𑀧𑀼𑀭𑀺𑀲𑁄 𑀫𑀦𑀼𑀲𑁆𑀲𑀧𑀣𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀼𑀢𑁆𑀯𑀸 ‘‘𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀤𑀺𑀯𑀲𑁂 𑀦𑀁 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀫𑀸𑀮𑀁 𑀕𑀦𑁆𑀣𑁂𑀢𑀼𑀫𑀸𑀭𑀪𑀺𑀁𑀲𑀼. 𑀢𑀸 𑀕𑀦𑁆𑀣𑀫𑀸𑀦𑀸𑀯 𑁋 ‘‘𑀫𑀳𑀸𑀧𑀼𑀭𑀺𑀲𑁄 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀲𑀼𑀢𑁆𑀯𑀸 ‘‘𑀢𑀼𑀫𑁆𑀳𑁂 𑀓𑀲𑁆𑀲 𑀕𑀦𑁆𑀣𑀣𑀸’’𑀢𑀺 𑀯𑀼𑀢𑁆𑀢𑀸 ‘‘𑀦 𑀢𑀸𑀯 𑀦𑀺𑀝𑁆𑀞𑀸𑀢𑀺, 𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑀤𑀺𑀯𑀲𑁂 𑀕𑀡𑁆𑀳𑀺𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀧𑀼𑀦𑀧𑀺 ‘‘𑀦𑀺𑀓𑁆𑀔𑀦𑁆𑀢𑁄’’𑀢𑀺 𑀲𑀼𑀢𑁆𑀯𑀸 ‘‘𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀤𑀺𑀯𑀲𑁂 𑀕𑀫𑀺𑀲𑁆𑀲𑀸𑀫𑀸’’𑀢𑀺. 𑀏𑀓𑀽𑀦𑀢𑀺𑀁𑀲𑀯𑀲𑁆𑀲𑀸𑀦𑀺 𑀖𑀭𑁂 𑀯𑀲𑀺𑀢𑁆𑀯𑀸 ‘‘𑀅𑀚𑁆𑀚 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀦𑁆𑀢𑁄’’𑀢𑀺𑀧𑀺 𑀲𑀼𑀢𑁆𑀯𑀸 ‘‘𑀅𑀪𑀺𑀲𑀫𑁆𑀩𑁄𑀥𑀺𑀤𑀺𑀯𑀲𑁂 𑀕𑀫𑀺𑀲𑁆𑀲𑀸𑀫𑀸’’𑀢𑀺. 𑀙𑀩𑁆𑀩𑀲𑁆𑀲𑀸𑀦𑀺 𑀧𑀥𑀸𑀦𑀁 𑀓𑀢𑁆𑀯𑀸 ‘‘𑀅𑀚𑁆𑀚 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺𑀧𑀺 𑀲𑀼𑀢𑁆𑀯𑀸 ‘‘𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀤𑀺𑀯𑀲𑁂 𑀕𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀲𑀢𑁆𑀢𑀲𑀢𑁆𑀢𑀸𑀳𑀸𑀦𑀺 𑀩𑁄𑀥𑀺𑀫𑀡𑁆𑀟𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 ¶ 𑀇𑀲𑀺𑀧𑀢𑀦𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢’’𑀦𑁆𑀢𑀺𑀧𑀺 𑀲𑀼𑀢𑁆𑀯𑀸 ‘‘𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀤𑀺𑀯𑀲𑁂 𑀕𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀅𑀚𑁆𑀚 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀻’’𑀢𑀺𑀧𑀺 ¶ 𑀲𑀼𑀢𑁆𑀯𑀸 ‘‘𑀤𑁂𑀯𑁄𑀭𑁄𑀳𑀡𑀤𑀺𑀯𑀲𑁂 𑀕𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀅𑀚𑁆𑀚 𑀤𑁂𑀯𑁄𑀭𑁄𑀳𑀡𑀁 𑀓𑀭𑀻’’𑀢𑀺𑀧𑀺 𑀲𑀼𑀢𑁆𑀯𑀸 ‘‘𑀆𑀬𑀼𑀲𑀗𑁆𑀔𑀸𑀭𑁄𑀲𑁆𑀲𑀚𑁆𑀚𑀦𑁂 𑀕𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀅𑀚𑁆𑀚 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑀻’’𑀢𑀺𑀧𑀺 𑀲𑀼𑀢𑁆𑀯𑀸 ‘‘𑀦 𑀢𑀸𑀯 𑀦𑀺𑀝𑁆𑀞𑀸𑀢𑀺, 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂 𑀕𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀅𑀚𑁆𑀚 𑀪𑀕𑀯𑀸 𑀬𑀫𑀓𑀲𑀸𑀮𑀸𑀦𑀫𑀦𑁆𑀢𑀭𑁂 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀲𑀻𑀳𑀲𑁂𑀬𑁆𑀬𑀁 𑀉𑀧𑀕𑀢𑁄 𑀩𑀮𑀯𑀧𑀘𑁆𑀘𑀽𑀲𑀲𑀫𑀬𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺. 𑀢𑀼𑀫𑁆𑀳𑁂 𑀓𑀲𑁆𑀲 𑀕𑀦𑁆𑀣𑀣𑀸’’𑀢𑀺 𑀲𑀼𑀢𑁆𑀯𑀸 𑀧𑀦 𑁋 ‘‘𑀓𑀺𑀦𑁆𑀦𑀸𑀫𑁂𑀢𑀁, ‘𑀅𑀚𑁆𑀚𑁂𑀯 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀅𑀚𑁆𑀚𑁂𑀯 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀺, 𑀅𑀚𑁆𑀚𑁂𑀯 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺, 𑀅𑀚𑁆𑀚𑁂𑀯 𑀩𑀼𑀤𑁆𑀥𑁄 𑀅𑀳𑁄𑀲𑀺, 𑀅𑀚𑁆𑀚𑁂𑀯 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀬𑀺, 𑀅𑀚𑁆𑀚𑁂𑀯 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀅𑀓𑀸𑀲𑀺, 𑀅𑀚𑁆𑀚𑁂𑀯 𑀤𑁂𑀯𑀮𑁄𑀓𑀸 𑀑𑀢𑀺𑀡𑁆𑀡𑁄, 𑀅𑀚𑁆𑀚𑁂𑀯 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑀺, 𑀅𑀚𑁆𑀚𑁂𑀯 𑀓𑀺𑀭 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’𑀢𑀺. 𑀦𑀦𑀼 𑀦𑀸𑀫 𑀤𑀼𑀢𑀺𑀬𑀤𑀺𑀯𑀲𑁂 𑀬𑀸𑀕𑀼𑀧𑀸𑀦𑀓𑀸𑀮𑀫𑀢𑁆𑀢𑀫𑁆𑀧𑀺 𑀞𑀸𑀢𑀩𑁆𑀩𑀁 𑀅𑀲𑁆𑀲. 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀢𑀲𑁆𑀲 𑀦𑀸𑀫 𑀅𑀦𑀦𑀼𑀘𑁆𑀙𑀯𑀺𑀓𑀫𑁂𑀢’’𑀦𑁆𑀢𑀺 𑀅𑀧𑀭𑀺𑀦𑀺𑀝𑁆𑀞𑀺𑀢𑀸𑀯 𑀫𑀸𑀮𑀸𑀬𑁄 𑀕𑀳𑁂𑀢𑁆𑀯𑀸 𑀆𑀕𑀫𑁆𑀫 𑀅𑀦𑁆𑀢𑁄 𑀘𑀓𑁆𑀓𑀯𑀸𑀴𑁂 ¶ 𑀑𑀓𑀸𑀲𑀁 𑀅𑀮𑀪𑀫𑀸𑀦𑀸 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀮𑀫𑁆𑀩𑀺𑀢𑁆𑀯𑀸 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀸𑀯 𑀆𑀥𑀸𑀯𑀦𑁆𑀢𑀺𑀬𑁄 𑀳𑀢𑁆𑀣𑁂𑀦 𑀳𑀢𑁆𑀣𑀁 𑀕𑀻𑀯𑀸𑀬 𑀕𑀻𑀯𑀁 𑀕𑀳𑁂𑀢𑁆𑀯𑀸 𑀢𑀻𑀡𑀺 𑀭𑀢𑀦𑀸𑀦𑀺 𑀆𑀭𑀩𑁆𑀪 𑀤𑁆𑀯𑀢𑁆𑀢𑀺𑀁𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀤𑀲 𑀧𑀸𑀭𑀫𑀺𑀬𑁄 𑀅𑀟𑁆𑀠𑀙𑀝𑁆𑀞𑀸𑀦𑀺 𑀚𑀸𑀢𑀓𑀲𑀢𑀸𑀦𑀺 𑀘𑀼𑀤𑁆𑀤𑀲 𑀩𑀼𑀤𑁆𑀥𑀜𑀸𑀡𑀸𑀦𑀺 𑀆𑀭𑀩𑁆𑀪 𑀕𑀸𑀬𑀺𑀢𑁆𑀯𑀸 𑀢𑀲𑁆𑀲 𑀢𑀲𑁆𑀲 𑀅𑀯𑀲𑀸𑀦𑁂 ‘‘𑀫𑀳𑀸𑀬𑀲𑁄, 𑀫𑀳𑀸𑀬𑀲𑁄’’𑀢𑀺 𑀯𑀤𑀦𑁆𑀢𑀺. 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁 𑁋 ‘‘𑀤𑀺𑀩𑁆𑀩𑀸𑀦𑀺𑀧𑀺 𑀲𑀗𑁆𑀕𑀻𑀢𑀸𑀦𑀺 𑀅𑀦𑁆𑀢𑀮𑀺𑀓𑁆𑀔𑁂 𑀯𑀢𑁆𑀢𑀦𑁆𑀢𑀺 𑀢𑀣𑀸𑀕𑀢𑀲𑁆𑀲 𑀧𑀽𑀚𑀸𑀬𑀸’’𑀢𑀺.

𑁧𑁯𑁯. 𑀪𑀕𑀯𑀸 𑀧𑀦 𑀬𑀫𑀓𑀲𑀸𑀮𑀸𑀦𑀁 𑀅𑀦𑁆𑀢𑀭𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀦𑀺𑀧𑀦𑁆𑀦𑁄𑀬𑁂𑀯 𑀧𑀣𑀯𑀻𑀢𑀮𑀢𑁄 𑀬𑀸𑀯 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀸, 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀢𑁄 𑀘 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀦𑁆𑀦𑀺𑀧𑀢𑀺𑀢𑀸𑀬 𑀧𑀭𑀺𑀲𑀸𑀬 𑀫𑀳𑀦𑁆𑀢𑀁 𑀉𑀲𑁆𑀲𑀸𑀳𑀁 𑀤𑀺𑀲𑁆𑀯𑀸 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀆𑀭𑁄𑀘𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁…𑀧𑁂… 𑀢𑀣𑀸𑀕𑀢𑀲𑁆𑀲 𑀧𑀽𑀚𑀸𑀬𑀸’’𑀢𑀺. 𑀏𑀯𑀁 𑀫𑀳𑀸𑀲𑀓𑁆𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂𑀦𑀸𑀧𑀺 𑀅𑀢𑁆𑀢𑀦𑁄 𑀅𑀲𑀓𑁆𑀓𑀢𑀪𑀸𑀯𑀫𑁂𑀯 𑀤𑀲𑁆𑀲𑀦𑁆𑀢𑁄 𑀦 𑀔𑁄, 𑀆𑀦𑀦𑁆𑀤, 𑀏𑀢𑁆𑀢𑀸𑀯𑀢𑀸𑀢𑀺𑀆𑀤𑀺𑀫𑀸𑀳.

𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀆𑀦𑀦𑁆𑀤, 𑀫𑀬𑀸 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀦𑀺𑀧𑀦𑁆𑀦𑁂𑀦 𑀅𑀝𑁆𑀞 𑀥𑀫𑁆𑀫𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀅𑀪𑀺𑀦𑀻𑀳𑀸𑀭𑀁 𑀓𑀭𑁄𑀦𑁆𑀢𑁂𑀦 ¶ 𑀦 𑀫𑀸𑀮𑀸𑀕𑀦𑁆𑀥𑀢𑀽𑀭𑀺𑀬𑀲𑀗𑁆𑀕𑀻𑀢𑀸𑀦𑀁 𑀅𑀢𑁆𑀣𑀸𑀬 𑀅𑀪𑀺𑀦𑀻𑀳𑀸𑀭𑁄 𑀓𑀢𑁄, 𑀦 𑀏𑀢𑀤𑀢𑁆𑀣𑀸𑀬 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸. 𑀢𑀲𑁆𑀫𑀸 𑀦 𑀔𑁄 𑀅𑀳𑀁 𑀏𑀢𑀸𑀬 𑀧𑀽𑀚𑀸𑀬 𑀧𑀽𑀚𑀺𑀢𑁄 𑀦𑀸𑀫 𑀳𑁄𑀫𑀻’’𑀢𑀺.

𑀓𑀲𑁆𑀫𑀸 ¶ 𑀧𑀦 𑀪𑀕𑀯𑀸 𑀅𑀜𑁆𑀜𑀢𑁆𑀣 𑀏𑀓𑀁 𑀉𑀫𑀸𑀧𑀼𑀧𑁆𑀨𑀫𑀢𑁆𑀢𑀫𑁆𑀧𑀺 𑀕𑀳𑁂𑀢𑁆𑀯𑀸 𑀩𑀼𑀤𑁆𑀥𑀕𑀼𑀡𑁂 𑀆𑀯𑀚𑁆𑀚𑁂𑀢𑁆𑀯𑀸 𑀓𑀢𑀸𑀬 𑀧𑀽𑀚𑀸𑀬 𑀩𑀼𑀤𑁆𑀥𑀜𑀸𑀡𑁂𑀦𑀸𑀧𑀺 𑀅𑀧𑀭𑀺𑀘𑁆𑀙𑀺𑀦𑁆𑀦𑀁 𑀯𑀺𑀧𑀸𑀓𑀁 𑀯𑀡𑁆𑀡𑁂𑀢𑁆𑀯𑀸 𑀇𑀥 𑀏𑀯𑀁 𑀫𑀳𑀦𑁆𑀢𑀁 𑀧𑀽𑀚𑀁 𑀧𑀝𑀺𑀓𑁆𑀔𑀺𑀧𑀢𑀻𑀢𑀺? 𑀧𑀭𑀺𑀲𑀸𑀦𑀼𑀕𑁆𑀕𑀳𑁂𑀦 𑀘𑁂𑀯 𑀲𑀸𑀲𑀦𑀲𑁆𑀲 𑀘 𑀘𑀺𑀭𑀝𑁆𑀞𑀺𑀢𑀺𑀓𑀸𑀫𑀢𑀸𑀬. 𑀲𑀘𑁂 𑀳𑀺 𑀪𑀕𑀯𑀸 𑀏𑀯𑀁 𑀦 𑀧𑀝𑀺𑀓𑁆𑀔𑀺𑀧𑁂𑀬𑁆𑀬, 𑀅𑀦𑀸𑀕𑀢𑁂 𑀲𑀻𑀮𑀲𑁆𑀲 𑀆𑀕𑀢𑀝𑁆𑀞𑀸𑀦𑁂 𑀲𑀻𑀮𑀁 𑀦 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀺, 𑀲𑀫𑀸𑀥𑀺𑀲𑁆𑀲 𑀆𑀕𑀢𑀝𑁆𑀞𑀸𑀦𑁂 𑀲𑀫𑀸𑀥𑀺𑀁 𑀦 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀺, 𑀯𑀺𑀧𑀲𑁆𑀲𑀦𑀸𑀬 𑀆𑀕𑀢𑀝𑁆𑀞𑀸𑀦𑁂 𑀯𑀺𑀧𑀲𑁆𑀲𑀦𑀸𑀕𑀩𑁆𑀪𑀁 𑀦 𑀕𑀸𑀳𑀸𑀧𑁂𑀲𑁆𑀲𑀦𑁆𑀢𑀺. 𑀉𑀧𑀝𑁆𑀞𑀸𑀓𑁂 𑀲𑀫𑀸𑀤𑀧𑁂𑀢𑁆𑀯𑀸 𑀧𑀽𑀚𑀁𑀬𑁂𑀯 𑀓𑀸𑀭𑁂𑀦𑁆𑀢𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺. 𑀆𑀫𑀺𑀲𑀧𑀽𑀚𑀸 𑀘 𑀦𑀸𑀫𑁂𑀲𑀸 𑀲𑀸𑀲𑀦𑀁 𑀏𑀓𑀤𑀺𑀯𑀲𑀫𑁆𑀧𑀺 𑀏𑀓𑀬𑀸𑀕𑀼𑀧𑀸𑀦𑀓𑀸𑀮𑀫𑀢𑁆𑀢𑀫𑁆𑀧𑀺 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀫𑀳𑀸𑀯𑀺𑀳𑀸𑀭𑀲𑀤𑀺𑀲𑀜𑁆𑀳𑀺 𑀯𑀺𑀳𑀸𑀭𑀲𑀳𑀲𑁆𑀲𑀁 𑀫𑀳𑀸𑀘𑁂𑀢𑀺𑀬𑀲𑀤𑀺𑀲𑀜𑁆𑀘 𑀘𑁂𑀢𑀺𑀬𑀲𑀳𑀲𑁆𑀲𑀫𑁆𑀧𑀺 𑀲𑀸𑀲𑀦𑀁 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀬𑁂𑀦 𑀓𑀫𑁆𑀫𑀁 𑀓𑀢𑀁, 𑀢𑀲𑁆𑀲𑁂𑀯 𑀳𑁄𑀢𑀺. 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀧𑀦 𑀢𑀣𑀸𑀕𑀢𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀸 𑀧𑀽𑀚𑀸. 𑀲𑀸 𑀳𑀺 𑀢𑁂𑀦 𑀧𑀢𑁆𑀣𑀺𑀢𑀸 𑀘𑁂𑀯, 𑀲𑀓𑁆𑀓𑁄𑀢𑀺 𑀲𑀸𑀲𑀦𑀜𑁆𑀘 𑀲𑀦𑁆𑀥𑀸𑀭𑁂𑀢𑀼𑀁, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀬𑁄 𑀔𑁄 𑀆𑀦𑀦𑁆𑀤𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄𑀢𑀺 𑀦𑀯𑀯𑀺𑀥𑀲𑁆𑀲 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 ¶ . 𑀲𑀸𑀬𑁂𑀯 𑀧𑀦 𑀧𑀝𑀺𑀧𑀤𑀸 𑀅𑀦𑀼𑀘𑁆𑀙𑀯𑀺𑀓𑀢𑁆𑀢𑀸 ‘‘𑀲𑀸𑀫𑀻𑀘𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀲𑀸𑀫𑀻𑀘𑀺𑀁 𑀧𑀝𑀺𑀧𑀦𑁆𑀦𑁄𑀢𑀺 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄. 𑀢𑀫𑁂𑀯 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀲𑀗𑁆𑀔𑀸𑀢𑀁 𑀅𑀦𑀼𑀥𑀫𑁆𑀫𑀁 𑀘𑀭𑀢𑀺 𑀧𑀽𑀭𑁂𑀢𑀻𑀢𑀺 𑀅𑀦𑀼𑀥𑀫𑁆𑀫𑀘𑀸𑀭𑀻.

𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀢𑀺 𑀘 𑀲𑀻𑀮𑀁 𑀆𑀘𑀸𑀭𑀧𑀜𑁆𑀜𑀢𑁆𑀢𑀺 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀁 𑀬𑀸𑀯 𑀕𑁄𑀢𑁆𑀭𑀪𑀼𑀢𑁄 𑀲𑀫𑁆𑀫𑀸𑀧𑀝𑀺𑀧𑀤𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀲𑁆𑀫𑀸 𑀬𑁄 𑀪𑀺𑀓𑁆𑀔𑀼 𑀙𑀲𑀼 𑀅𑀕𑀸𑀭𑀯𑁂𑀲𑀼 𑀧𑀢𑀺𑀝𑁆𑀞𑀸𑀬 𑀧𑀜𑁆𑀜𑀢𑁆𑀢𑀺𑀁 𑀅𑀢𑀺𑀓𑁆𑀓𑀫𑀢𑀺, 𑀅𑀦𑁂𑀲𑀦𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺, 𑀅𑀬𑀁 𑀦 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄. 𑀬𑁄 𑀧𑀦 𑀲𑀩𑁆𑀩𑀁 𑀅𑀢𑁆𑀢𑀦𑁄 𑀧𑀜𑁆𑀜𑀢𑁆𑀢𑀁 𑀲𑀺𑀓𑁆𑀔𑀸𑀧𑀤𑀁 𑀚𑀺𑀦𑀯𑁂𑀮𑀁 𑀚𑀺𑀦𑀫𑀭𑀺𑀬𑀸𑀤𑀁 𑀚𑀺𑀦𑀓𑀸𑀴𑀲𑀼𑀢𑁆𑀢𑀁 𑀅𑀡𑀼𑀫𑀢𑁆𑀢𑀫𑁆𑀧𑀺 𑀦 𑀯𑀻𑀢𑀺𑀓𑁆𑀓𑀫𑀢𑀺, 𑀅𑀬𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀦𑀸𑀫. 𑀪𑀺𑀓𑁆𑀔𑀼𑀦𑀺𑀬𑀸𑀧𑀺 𑀏𑀲𑁂𑀯 𑀦𑀬𑁄. 𑀬𑁄 𑀉𑀧𑀸𑀲𑀓𑁄 𑀧𑀜𑁆𑀘 𑀯𑁂𑀭𑀸𑀦𑀺 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑁂 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺 𑀅𑀧𑁆𑀧𑁂𑀢𑀺, 𑀅𑀬𑀁 𑀦 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄. 𑀬𑁄 𑀧𑀦 𑀢𑀻𑀲𑀼 𑀲𑀭𑀡𑁂𑀲𑀼, 𑀧𑀜𑁆𑀘𑀲𑀼𑀧𑀺 𑀲𑀻𑀮𑁂𑀲𑀼, 𑀤𑀲𑀲𑀼 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺, 𑀫𑀸𑀲𑀲𑁆𑀲 𑀅𑀝𑁆𑀞 𑀉𑀧𑁄𑀲𑀣𑁂 𑀓𑀭𑁄𑀢𑀺, 𑀤𑀸𑀦𑀁 𑀤𑁂𑀢𑀺, 𑀕𑀦𑁆𑀥𑀧𑀽𑀚𑀁 𑀫𑀸𑀮𑀸𑀧𑀽𑀚𑀁 𑀓𑀭𑁄𑀢𑀺, 𑀫𑀸𑀢𑀭𑀁 𑀧𑀺𑀢𑀭𑀁 ¶ 𑀉𑀧𑀝𑁆𑀞𑀸𑀢𑀺, 𑀥𑀫𑁆𑀫𑀺𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀉𑀧𑀝𑁆𑀞𑀸𑀢𑀺, 𑀅𑀬𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀦𑀸𑀫. 𑀉𑀧𑀸𑀲𑀺𑀓𑀸𑀬𑀧𑀺 𑀏𑀲𑁂𑀯 𑀦𑀬𑁄.

𑀧𑀭𑀫𑀸𑀬 ¶ 𑀧𑀽𑀚𑀸𑀬𑀸𑀢𑀺 𑀉𑀢𑁆𑀢𑀫𑀸𑀬 𑀧𑀽𑀚𑀸𑀬. 𑀅𑀬𑀜𑁆𑀳𑀺 𑀦𑀺𑀭𑀸𑀫𑀺𑀲𑀧𑀽𑀚𑀸 𑀦𑀸𑀫 𑀲𑀓𑁆𑀓𑁄𑀢𑀺 𑀫𑀫 𑀲𑀸𑀲𑀦𑀁 𑀲𑀦𑁆𑀥𑀸𑀭𑁂𑀢𑀼𑀁. 𑀬𑀸𑀯 𑀳𑀺 𑀇𑀫𑀸 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀫𑀁 𑀇𑀫𑀸𑀬 𑀧𑀽𑀚𑁂𑀲𑁆𑀲𑀦𑁆𑀢𑀺, 𑀢𑀸𑀯 𑀫𑀫 𑀲𑀸𑀲𑀦𑀁 𑀫𑀚𑁆𑀛𑁂 𑀦𑀪𑀲𑁆𑀲 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀯𑀺𑀭𑁄𑀘𑀺𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀉𑀧𑀯𑀸𑀡𑀢𑁆𑀣𑁂𑀭𑀯𑀡𑁆𑀡𑀦𑀸

𑁨𑁦𑁦. 𑀅𑀧𑀲𑀸𑀭𑁂𑀲𑀻𑀢𑀺 𑀅𑀧𑀦𑁂𑀲𑀺. 𑀅𑀧𑁂𑀳𑀻𑀢𑀺 𑀅𑀧𑀕𑀘𑁆𑀙. 𑀣𑁂𑀭𑁄 𑀏𑀓𑀯𑀘𑀦𑁂𑀦𑁂𑀯 𑀢𑀸𑀮𑀯𑀡𑁆𑀝𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀉𑀧𑀝𑁆𑀞𑀸𑀓𑁄𑀢𑀺𑀆𑀤𑀺 𑀧𑀞𑀫𑀩𑁄𑀥𑀺𑀬𑀁 𑀅𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑀪𑀸𑀯𑀁 𑀲𑀦𑁆𑀥𑀸𑀬𑀸𑀳. 𑀅𑀬𑀁, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀉𑀧𑀯𑀸𑀡𑁄𑀢𑀺 𑀏𑀯𑀁 𑀣𑁂𑀭𑁂𑀦 𑀯𑀼𑀢𑁆𑀢𑁂 𑀆𑀦𑀦𑁆𑀤𑁄 𑀉𑀧𑀯𑀸𑀡𑀲𑁆𑀲 𑀲𑀤𑁄𑀲𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀢𑀺, ‘𑀳𑀦𑁆𑀤𑀲𑁆𑀲 𑀦𑀺𑀤𑁆𑀤𑁄𑀲𑀪𑀸𑀯𑀁 𑀓𑀣𑁂𑀲𑁆𑀲𑀸𑀫𑀻’𑀢𑀺 𑀪𑀕𑀯𑀸 𑀬𑁂𑀪𑀼𑀬𑁆𑀬𑁂𑀦 𑀆𑀦𑀦𑁆𑀤𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑁂𑀪𑀼𑀬𑁆𑀬𑁂𑀦𑀸𑀢𑀺 𑀇𑀤𑀁 𑀅𑀲𑀜𑁆𑀜𑀲𑀢𑁆𑀢𑀸𑀦𑀜𑁆𑀘𑁂𑀯 𑀅𑀭𑀽𑀧𑀤𑁂𑀯𑀢𑀸𑀦𑀜𑁆𑀘 𑀑𑀳𑀻𑀦𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀧𑁆𑀨𑀼𑀝𑁄𑀢𑀺 𑀅𑀲𑀫𑁆𑀨𑀼𑀝𑁆𑀞𑁄 𑀅𑀪𑀭𑀺𑀢𑁄 𑀯𑀸. 𑀪𑀕𑀯𑀢𑁄 𑀓𑀺𑀭 𑀆𑀲𑀦𑁆𑀦𑀧𑀤𑁂𑀲𑁂 𑀯𑀸𑀮𑀕𑁆𑀕𑀫𑀢𑁆𑀢𑁂 𑀑𑀓𑀸𑀲𑁂 𑀲𑀼𑀔𑀼𑀫𑀢𑁆𑀢𑀪𑀸𑀯𑀁 𑀫𑀸𑀧𑁂𑀢𑁆𑀯𑀸 𑀤𑀲 𑀤𑀲 𑀫𑀳𑁂𑀲𑀓𑁆𑀔𑀸 𑀤𑁂𑀯𑀢𑀸 𑀅𑀝𑁆𑀞𑀁𑀲𑀼. 𑀢𑀸𑀲𑀁 𑀧𑀭𑀢𑁄 𑀯𑀻𑀲𑀢𑀺 𑀯𑀻𑀲𑀢𑀺. 𑀢𑀸𑀲𑀁 𑀧𑀭𑀢𑁄 𑀢𑀺𑀁𑀲𑀢𑀺 𑀢𑀺𑀁𑀲𑀢𑀺. 𑀢𑀸𑀲𑀁 𑀧𑀭𑀢𑁄 𑀘𑀢𑁆𑀢𑀸𑀮𑀻𑀲𑀁 𑀘𑀢𑁆𑀢𑀸𑀮𑀻𑀲𑀁. 𑀢𑀸𑀲𑀁 𑀧𑀭𑀢𑁄 𑀧𑀜𑁆𑀜𑀸𑀲𑀁 𑀧𑀜𑁆𑀜𑀸𑀲𑀁. 𑀢𑀸𑀲𑀁 𑀧𑀭𑀢𑁄 𑀲𑀝𑁆𑀞𑀺 𑀲𑀝𑁆𑀞𑀺 𑀤𑁂𑀯𑀢𑀸 𑀅𑀝𑁆𑀞𑀁𑀲𑀼. 𑀢𑀸 𑀅𑀜𑁆𑀜𑀫𑀜𑁆𑀜𑀁 𑀳𑀢𑁆𑀣𑁂𑀦 𑀯𑀸 𑀧𑀸𑀤𑁂𑀦 𑀯𑀸 𑀯𑀢𑁆𑀣𑁂𑀦 𑀯𑀸 𑀦 𑀩𑁆𑀬𑀸𑀩𑀸𑀥𑁂𑀦𑁆𑀢𑀺. ‘‘𑀅𑀧𑁂𑀳𑀺 𑀫𑀁, 𑀫𑀸 𑀖𑀝𑁆𑀝𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀸𑀓𑀸𑀭𑀁 𑀦𑀸𑀫 𑀦𑀢𑁆𑀣𑀺. ‘‘𑀢𑀸 ¶ 𑀔𑁄 𑀧𑀦 𑀤𑁂𑀯𑀢𑀸𑀬𑁄 𑀤𑀲𑀧𑀺 𑀳𑀼𑀢𑁆𑀯𑀸 𑀯𑀻𑀲𑀢𑀺𑀧𑀺 𑀳𑀼𑀢𑁆𑀯𑀸 𑀢𑀺𑀁𑀲𑀫𑁆𑀧𑀺 𑀳𑀼𑀢𑁆𑀯𑀸 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀳𑀼𑀢𑁆𑀯𑀸 𑀧𑀜𑁆𑀜𑀸𑀲𑀫𑁆𑀧𑀺 𑀳𑀼𑀢𑁆𑀯𑀸 𑀆𑀭𑀕𑁆𑀕𑀓𑁄𑀝𑀺𑀦𑀺𑀢𑀼𑀤𑀦𑀫𑀢𑁆𑀢𑁂𑀧𑀺 𑀢𑀺𑀝𑁆𑀞𑀦𑁆𑀢𑀺, 𑀦 𑀘 𑀅𑀜𑁆𑀜𑀫𑀜𑁆𑀜𑀁 𑀩𑁆𑀬𑀸𑀩𑀸𑀥𑁂𑀦𑁆𑀢𑀻’’𑀢𑀺 (𑀅. 𑀦𑀺. 𑁧.𑁩𑁭) 𑀯𑀼𑀢𑁆𑀢𑀲𑀤𑀺𑀲𑀸𑀯 𑀅𑀳𑁂𑀲𑀼𑀁. 𑀑𑀯𑀸𑀭𑁂𑀦𑁆𑀢𑁄𑀢𑀺 𑀆𑀯𑀸𑀭𑁂𑀦𑁆𑀢𑁄. 𑀣𑁂𑀭𑁄 𑀓𑀺𑀭 𑀧𑀓𑀢𑀺𑀬𑀸𑀧𑀺 𑀫𑀳𑀸𑀲𑀭𑀻𑀭𑁄 𑀳𑀢𑁆𑀣𑀺𑀧𑁄𑀢𑀓𑀲𑀤𑀺𑀲𑁄. 𑀲𑁄 𑀧𑀁𑀲𑀼𑀓𑀽𑀮𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀅𑀢𑀺𑀫𑀳𑀸 𑀯𑀺𑀬 𑀅𑀳𑁄𑀲𑀺.

𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬𑀸𑀢𑀺 𑀪𑀕𑀯𑀢𑁄 𑀫𑀼𑀔𑀁 𑀤𑀝𑁆𑀞𑀼𑀁 𑀅𑀮𑀪𑀫𑀸𑀦𑀸 𑀏𑀯𑀁 𑀉𑀚𑁆𑀛𑀸𑀬𑀺𑀁𑀲𑀼. 𑀓𑀺𑀁 𑀧𑀦 𑀢𑀸 𑀣𑁂𑀭𑀁 𑀯𑀺𑀦𑀺𑀯𑀺𑀚𑁆𑀛 𑀧𑀲𑁆𑀲𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺? 𑀆𑀫, 𑀦 𑀲𑀓𑁆𑀓𑁄𑀦𑁆𑀢𑀺. 𑀤𑁂𑀯𑀢𑀸 𑀳𑀺 𑀧𑀼𑀣𑀼𑀚𑁆𑀚𑀦𑁂 𑀯𑀺𑀦𑀺𑀯𑀺𑀚𑁆𑀛 𑀧𑀲𑁆𑀲𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀦 𑀔𑀻𑀡𑀸𑀲𑀯𑁂. 𑀣𑁂𑀭𑀲𑁆𑀲 𑀘 𑀫𑀳𑁂𑀲𑀓𑁆𑀔𑀢𑀸𑀬 ¶ 𑀢𑁂𑀚𑀼𑀲𑁆𑀲𑀤𑀢𑀸𑀬 𑀉𑀧𑀕𑀦𑁆𑀢𑀼𑀫𑁆𑀧𑀺 𑀦 𑀲𑀓𑁆𑀓𑁄𑀦𑁆𑀢𑀺. 𑀓𑀲𑁆𑀫𑀸 ¶ 𑀧𑀦 𑀣𑁂𑀭𑁄𑀯 𑀢𑁂𑀚𑀼𑀲𑁆𑀲𑀤𑁄, 𑀦 𑀅𑀜𑁆𑀜𑁂 𑀅𑀭𑀳𑀦𑁆𑀢𑁄𑀢𑀺? 𑀬𑀲𑁆𑀫𑀸 𑀓𑀲𑁆𑀲𑀧𑀩𑀼𑀤𑁆𑀥𑀲𑁆𑀲 𑀘𑁂𑀢𑀺𑀬𑁂 𑀆𑀭𑀓𑁆𑀔𑀤𑁂𑀯𑀢𑀸 𑀅𑀳𑁄𑀲𑀺.

𑀯𑀺𑀧𑀲𑁆𑀲𑀺𑀫𑁆𑀳𑀺 𑀓𑀺𑀭 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀏𑀓𑀕𑁆𑀖𑀦𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑀲𑀤𑀺𑀲𑀲𑁆𑀲 𑀥𑀸𑀢𑀼𑀲𑀭𑀻𑀭𑀲𑁆𑀲 𑀏𑀓𑀫𑁂𑀯 𑀘𑁂𑀢𑀺𑀬𑀁 𑀅𑀓𑀁𑀲𑀼, 𑀤𑀻𑀖𑀸𑀬𑀼𑀓𑀩𑀼𑀤𑁆𑀥𑀸𑀦𑀜𑁆𑀳𑀺 𑀏𑀓𑀫𑁂𑀯 𑀘𑁂𑀢𑀺𑀬𑀁 𑀳𑁄𑀢𑀺. 𑀢𑀁 𑀫𑀦𑀼𑀲𑁆𑀲𑀸 𑀭𑀢𑀦𑀸𑀬𑀸𑀫𑀸𑀳𑀺 𑀯𑀺𑀤𑀢𑁆𑀣𑀺𑀯𑀺𑀢𑁆𑀣𑀢𑀸𑀳𑀺 𑀤𑁆𑀯𑀗𑁆𑀕𑀼𑀮𑀩𑀳𑀮𑀸𑀳𑀺 𑀲𑀼𑀯𑀡𑁆𑀡𑀺𑀝𑁆𑀞𑀓𑀸𑀳𑀺 𑀳𑀭𑀺𑀢𑀸𑀮𑁂𑀦 𑀘 𑀫𑀦𑁄𑀲𑀺𑀮𑀸𑀬 𑀘 𑀫𑀢𑁆𑀢𑀺𑀓𑀸𑀓𑀺𑀘𑁆𑀘𑀁 𑀢𑀺𑀮𑀢𑁂𑀮𑁂𑀦𑁂𑀯 𑀉𑀤𑀓𑀓𑀺𑀘𑁆𑀘𑀁 𑀲𑀸𑀥𑁂𑀢𑁆𑀯𑀸 𑀬𑁄𑀚𑀦𑀧𑁆𑀧𑀫𑀸𑀡𑀁 𑀉𑀝𑁆𑀞𑀧𑁂𑀲𑀼𑀁. 𑀢𑀢𑁄 𑀪𑀼𑀫𑁆𑀫𑀸 𑀤𑁂𑀯𑀢𑀸 𑀬𑁄𑀚𑀦𑀧𑁆𑀧𑀫𑀸𑀡𑀁, 𑀢𑀢𑁄 𑀆𑀓𑀸𑀲𑀝𑁆𑀞𑀓𑀤𑁂𑀯𑀢𑀸, 𑀢𑀢𑁄 𑀉𑀡𑁆𑀳𑀯𑀮𑀸𑀳𑀓𑀤𑁂𑀯𑀢𑀸, 𑀢𑀢𑁄 𑀅𑀩𑁆𑀪𑀯𑀮𑀸𑀳𑀓𑀤𑁂𑀯𑀢𑀸, 𑀢𑀢𑁄 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀢𑀸, 𑀢𑀢𑁄 𑀢𑀸𑀯𑀢𑀺𑀁𑀲𑀸 𑀤𑁂𑀯𑀢𑀸 𑀬𑁄𑀚𑀦𑀧𑁆𑀧𑀫𑀸𑀡𑀁 𑀉𑀝𑁆𑀞𑀧𑁂𑀲𑀼𑀦𑁆𑀢𑀺 𑀏𑀯𑀁 𑀲𑀢𑁆𑀢𑀬𑁄𑀚𑀦𑀺𑀓𑀁 𑀘𑁂𑀢𑀺𑀬𑀁 𑀅𑀳𑁄𑀲𑀺. 𑀫𑀦𑀼𑀲𑁆𑀲𑁂𑀲𑀼 𑀫𑀸𑀮𑀸𑀕𑀦𑁆𑀥𑀯𑀢𑁆𑀣𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀆𑀕𑀢𑁂𑀲𑀼 𑀆𑀭𑀓𑁆𑀔𑀤𑁂𑀯𑀢𑀸 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀧𑀲𑁆𑀲𑀦𑁆𑀢𑀸𑀦𑀁𑀬𑁂𑀯 𑀘𑁂𑀢𑀺𑀬𑀁 𑀧𑀽𑀚𑁂𑀲𑀺.

𑀢𑀤𑀸 𑀅𑀬𑀁 𑀣𑁂𑀭𑁄 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁄 𑀳𑀼𑀢𑁆𑀯𑀸 𑀏𑀓𑀁 𑀧𑀻𑀢𑀓𑀁 𑀯𑀢𑁆𑀣𑀁 𑀆𑀤𑀸𑀬 𑀕𑀢𑁄. 𑀤𑁂𑀯𑀢𑀸 𑀢𑀲𑁆𑀲 𑀳𑀢𑁆𑀣𑀢𑁄 𑀯𑀢𑁆𑀣𑀁 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀁 𑀧𑀽𑀚𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 ‘‘𑀅𑀳𑀫𑁆𑀧𑀺 𑀅𑀦𑀸𑀕𑀢𑁂 𑀏𑀯𑀭𑀽𑀧𑀲𑁆𑀲 𑀩𑀼𑀤𑁆𑀥𑀲𑁆𑀲 𑀘𑁂𑀢𑀺𑀬𑁂 𑀆𑀭𑀓𑁆𑀔𑀤𑁂𑀯𑀢𑀸 𑀳𑁄𑀫𑀻’’𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀤𑁂𑀯𑀮𑁄𑀓𑁂 𑀘 𑀫𑀦𑀼𑀲𑁆𑀲𑀮𑁄𑀓𑁂 𑀘 𑀲𑀁𑀲𑀭𑀦𑁆𑀢𑀲𑁆𑀲𑁂𑀯 𑀓𑀲𑁆𑀲𑀧𑁄 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑀲𑁆𑀲𑀸𑀧𑀺 𑀏𑀓𑀫𑁂𑀯 𑀥𑀸𑀢𑀼𑀲𑀭𑀻𑀭𑀁 𑀅𑀳𑁄𑀲𑀺. 𑀢𑀁 𑀕𑀳𑁂𑀢𑁆𑀯𑀸 𑀬𑁄𑀚𑀦𑀺𑀓𑀁 𑀘𑁂𑀢𑀺𑀬𑀁 𑀓𑀸𑀭𑁂𑀲𑀼𑀁. 𑀲𑁄 𑀢𑀢𑁆𑀣 𑀆𑀭𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀲𑀸𑀲𑀦𑁂 𑀅𑀦𑁆𑀢𑀭𑀳𑀺𑀢𑁂 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀢𑀢𑁄 𑀘𑀼𑀢𑁄 𑀫𑀳𑀸𑀓𑀼𑀮𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀇𑀢𑀺 𑀘𑁂𑀢𑀺𑀬𑁂 𑀆𑀭𑀓𑁆𑀔𑀤𑁂𑀯𑀢𑀸 𑀳𑀼𑀢𑁆𑀯𑀸 𑀆𑀕𑀢𑀢𑁆𑀢𑀸 𑀣𑁂𑀭𑁄 𑀢𑁂𑀚𑀼𑀲𑁆𑀲𑀤𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀤𑁂𑀯𑀢𑀸 ¶ , 𑀆𑀦𑀦𑁆𑀤, 𑀉𑀚𑁆𑀛𑀸𑀬𑀦𑁆𑀢𑀻𑀢𑀺 𑀇𑀢𑀺 𑀆𑀦𑀦𑁆𑀤, 𑀤𑁂𑀯𑀢𑀸 𑀉𑀚𑁆𑀛𑀸𑀬𑀦𑁆𑀢𑀺, 𑀦 𑀫𑀬𑁆𑀳𑀁 𑀧𑀼𑀢𑁆𑀢𑀲𑁆𑀲 𑀅𑀜𑁆𑀜𑁄 𑀓𑁄𑀘𑀺 𑀤𑁄𑀲𑁄 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺.

𑁨𑁦𑁧. 𑀓𑀣𑀁𑀪𑀽𑀢𑀸 𑀧𑀦, 𑀪𑀦𑁆𑀢𑁂𑀢𑀺 𑀓𑀲𑁆𑀫𑀸 𑀆𑀳? 𑀪𑀕𑀯𑀸 𑀢𑀼𑀫𑁆𑀳𑁂 𑁋 ‘‘𑀤𑁂𑀯𑀢𑀸 𑀉𑀚𑁆𑀛𑀸𑀬𑀦𑁆𑀢𑀻’’𑀢𑀺 𑀯𑀤𑀣, 𑀓𑀣𑀁 𑀪𑀽𑀢𑀸 𑀧𑀦 𑀢𑀸 𑀢𑀼𑀫𑁆𑀳𑁂 𑀫𑀦𑀲𑀺 𑀓𑀭𑁄𑀣 ¶ , 𑀓𑀺𑀁 𑀢𑀼𑀫𑁆𑀳𑀸𑀓𑀁 𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀥𑀺𑀯𑀸𑀲𑁂𑀦𑁆𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀅𑀣 𑀪𑀕𑀯𑀸 𑁋 ‘‘𑀦𑀸𑀳𑀁 𑀅𑀥𑀺𑀯𑀸𑀲𑀦𑀓𑀸𑀭𑀡𑀁 𑀯𑀤𑀸𑀫𑀻’’𑀢𑀺 𑀢𑀸𑀲𑀁 𑀅𑀦𑀥𑀺𑀯𑀸𑀲𑀦𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀲𑀦𑁆𑀢𑀸𑀦𑀦𑁆𑀤𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 ¶ 𑀆𑀓𑀸𑀲𑁂 𑀧𑀣𑀯𑀻𑀲𑀜𑁆𑀜𑀺𑀦𑀺𑀬𑁄𑀢𑀺 𑀆𑀓𑀸𑀲𑁂 𑀧𑀣𑀯𑀺𑀁 𑀫𑀸𑀧𑁂𑀢𑁆𑀯𑀸 𑀢𑀢𑁆𑀣 𑀧𑀣𑀯𑀻𑀲𑀜𑁆𑀜𑀺𑀦𑀺𑀬𑁄. 𑀓𑀦𑁆𑀤𑀦𑁆𑀢𑀻𑀢𑀺 𑀭𑁄𑀤𑀦𑁆𑀢𑀺. 𑀙𑀺𑀦𑁆𑀦𑀧𑀸𑀢𑀁 𑀧𑀧𑀢𑀦𑁆𑀢𑀻𑀢𑀺 𑀫𑀚𑁆𑀛𑁂 𑀙𑀺𑀦𑁆𑀦𑀸 𑀯𑀺𑀬 𑀳𑀼𑀢𑁆𑀯𑀸 𑀬𑀢𑁄 𑀯𑀸 𑀢𑀢𑁄 𑀯𑀸 𑀧𑀧𑀢𑀦𑁆𑀢𑀺. 𑀆𑀯𑀝𑁆𑀝𑀦𑁆𑀢𑀻𑀢𑀺 𑀆𑀯𑀝𑁆𑀝𑀦𑁆𑀢𑀺𑀬𑁄 𑀧𑀢𑀺𑀢𑀝𑁆𑀞𑀸𑀦𑀫𑁂𑀯 𑀆𑀕𑀘𑁆𑀙𑀦𑁆𑀢𑀺. 𑀯𑀺𑀯𑀝𑁆𑀝𑀦𑁆𑀢𑀻𑀢𑀺 𑀧𑀢𑀺𑀢𑀝𑁆𑀞𑀸𑀦𑀢𑁄 𑀧𑀭𑀪𑀸𑀕𑀁 𑀯𑀝𑁆𑀝𑀫𑀸𑀦𑀸 𑀕𑀘𑁆𑀙𑀦𑁆𑀢𑀺. 𑀅𑀧𑀺𑀘 𑀤𑁆𑀯𑁂 𑀧𑀸𑀤𑁂 𑀧𑀲𑀸𑀭𑁂𑀢𑁆𑀯𑀸 𑀲𑀓𑀺𑀁 𑀧𑀼𑀭𑀢𑁄 𑀲𑀓𑀺𑀁 𑀧𑀘𑁆𑀙𑀢𑁄 𑀲𑀓𑀺𑀁 𑀯𑀸𑀫𑀢𑁄 𑀲𑀓𑀺𑀁 𑀤𑀓𑁆𑀔𑀺𑀡𑀢𑁄 𑀲𑀁𑀧𑀭𑀺𑀯𑀢𑁆𑀢𑀫𑀸𑀦𑀸𑀧𑀺 𑁋 ‘‘𑀆𑀯𑀝𑁆𑀝𑀦𑁆𑀢𑀺 𑀯𑀺𑀯𑀝𑁆𑀝𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀦𑁆𑀢𑀸𑀦𑀦𑁆𑀤, 𑀤𑁂𑀯𑀢𑀸 𑀧𑀣𑀯𑀺𑀬𑀁 𑀧𑀣𑀯𑀻𑀲𑀜𑁆𑀜𑀺𑀦𑀺𑀬𑁄𑀢𑀺 𑀧𑀓𑀢𑀺𑀧𑀣𑀯𑀻 𑀓𑀺𑀭 𑀤𑁂𑀯𑀢𑀸 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀢𑁆𑀣 𑀳𑀢𑁆𑀣𑀓𑁄 𑀩𑁆𑀭𑀳𑁆𑀫𑀸 𑀯𑀺𑀬 𑀤𑁂𑀯𑀢𑀸 𑀑𑀲𑀻𑀤𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀑𑀴𑀸𑀭𑀺𑀓𑀁 𑀳𑀢𑁆𑀣𑀓, 𑀅𑀢𑁆𑀢𑀪𑀸𑀯𑀁 𑀅𑀪𑀺𑀦𑀺𑀫𑁆𑀫𑀺𑀦𑀸𑀳𑀻’’𑀢𑀺 (𑀅. 𑀦𑀺. 𑁩.𑁧𑁨𑁮). 𑀢𑀲𑁆𑀫𑀸 𑀬𑀸 𑀤𑁂𑀯𑀢𑀸 𑀧𑀣𑀯𑀺𑀬𑀁 𑀧𑀣𑀯𑀺𑀁 𑀫𑀸𑀧𑁂𑀲𑀼𑀁, 𑀢𑀸 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀧𑀣𑀯𑀺𑀬𑀁 𑀧𑀣𑀯𑀻𑀲𑀜𑁆𑀜𑀺𑀦𑀺𑀬𑁄’’𑀢𑀺.

𑀯𑀻𑀢𑀭𑀸𑀕𑀸𑀢𑀺 𑀧𑀳𑀻𑀦𑀤𑁄𑀫𑀦𑀲𑁆𑀲𑀸 𑀲𑀺𑀮𑀸𑀣𑀫𑁆𑀪𑀲𑀤𑀺𑀲𑀸 𑀅𑀦𑀸𑀕𑀸𑀫𑀺𑀔𑀻𑀡𑀸𑀲𑀯𑀤𑁂𑀯𑀢𑀸.

𑀘𑀢𑀼𑀲𑀁𑀯𑁂𑀚𑀦𑀻𑀬𑀞𑀸𑀦𑀯𑀡𑁆𑀡𑀦𑀸

𑁨𑁦𑁨. 𑀯𑀲𑁆𑀲𑀁𑀯𑀼𑀝𑁆𑀞𑀸𑀢𑀺 𑀩𑀼𑀤𑁆𑀥𑀓𑀸𑀮𑁂 𑀓𑀺𑀭 𑀤𑁆𑀯𑀻𑀲𑀼 𑀓𑀸𑀮𑁂𑀲𑀼 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀓𑀫𑁆𑀫𑀝𑁆𑀞𑀸𑀦𑀕𑁆𑀕𑀳𑀡𑀢𑁆𑀣𑀁, 𑀯𑀼𑀝𑁆𑀞𑀯𑀲𑁆𑀲𑀸 𑀘 𑀕𑀳𑀺𑀢𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀯𑀺𑀲𑁂𑀲𑀸𑀭𑁄𑀘𑀦𑀢𑁆𑀣𑀁. 𑀬𑀣𑀸 𑀘 𑀩𑀼𑀤𑁆𑀥𑀓𑀸𑀮𑁂, 𑀏𑀯𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂𑀧𑀺 𑀅𑀧𑀸𑀭𑀕𑀗𑁆𑀕𑀸𑀬 𑀪𑀺𑀓𑁆𑀔𑀽 𑀮𑁄𑀳𑀧𑀸𑀲𑀸𑀤𑁂 𑀲𑀦𑁆𑀦𑀺𑀧𑀢𑀺𑀁𑀲𑀼, 𑀧𑀸𑀭𑀕𑀗𑁆𑀕𑀸𑀬 𑀪𑀺𑀓𑁆𑀔𑀽 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑁂. 𑀢𑁂𑀲𑀼 𑀅𑀧𑀸𑀭𑀕𑀗𑁆𑀕𑀸𑀬 𑀪𑀺𑀓𑁆𑀔𑀽 𑀲𑀗𑁆𑀓𑀸𑀭𑀙𑀟𑁆𑀟𑀓𑀲𑀫𑁆𑀫𑀚𑁆𑀚𑀦𑀺𑀬𑁄 𑀕𑀳𑁂𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀫𑀳𑀸𑀯𑀺𑀳𑀸𑀭𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀘𑁂𑀢𑀺𑀬𑁂 𑀲𑀼𑀥𑀸𑀓𑀫𑁆𑀫𑀁 𑀓𑀢𑁆𑀯𑀸 𑁋 ‘‘𑀯𑀼𑀝𑁆𑀞𑀯𑀲𑁆𑀲𑀸 𑀆𑀕𑀦𑁆𑀢𑁆𑀯𑀸 𑀮𑁄𑀳𑀧𑀸𑀲𑀸𑀤𑁂 𑀲𑀦𑁆𑀦𑀺𑀧𑀢𑀣𑀸’’𑀢𑀺 𑀯𑀢𑁆𑀢𑀁 𑀓𑀢𑁆𑀯𑀸 𑀨𑀸𑀲𑀼𑀓𑀝𑁆𑀞𑀸𑀦𑁂𑀲𑀼 𑀯𑀲𑀺𑀢𑁆𑀯𑀸 𑀯𑀼𑀝𑁆𑀞𑀯𑀲𑁆𑀲𑀸 𑀆𑀕𑀦𑁆𑀢𑁆𑀯𑀸 𑀮𑁄𑀳𑀧𑀸𑀲𑀸𑀤𑁂 𑀧𑀜𑁆𑀘𑀦𑀺𑀓𑀸𑀬𑀫𑀡𑁆𑀟𑀮𑁂, 𑀬𑁂𑀲𑀁 𑀧𑀸𑀴𑀺 𑀧𑀕𑀼𑀡𑀸, 𑀢𑁂 𑀧𑀸𑀴𑀺𑀁 𑀲𑀚𑁆𑀛𑀸𑀬𑀦𑁆𑀢𑀺. 𑀬𑁂𑀲𑀁 𑀅𑀝𑁆𑀞𑀓𑀣𑀸 𑀧𑀕𑀼𑀡𑀸, 𑀢𑁂 𑀅𑀝𑁆𑀞𑀓𑀣𑀁 𑀲𑀚𑁆𑀛𑀸𑀬𑀦𑁆𑀢𑀺. ¶ 𑀬𑁄 𑀧𑀸𑀴𑀺𑀁 𑀯𑀸 𑀅𑀝𑁆𑀞𑀓𑀣𑀁 𑀯𑀸 𑀯𑀺𑀭𑀸𑀥𑁂𑀢𑀺 ¶ , 𑀢𑀁 𑁋 ‘‘𑀓𑀲𑁆𑀲 𑀲𑀦𑁆𑀢𑀺𑀓𑁂 𑀢𑀬𑀸 𑀕𑀳𑀺𑀢’’𑀦𑁆𑀢𑀺 𑀯𑀺𑀘𑀸𑀭𑁂𑀢𑁆𑀯𑀸 𑀉𑀚𑀼𑀁 𑀓𑀢𑁆𑀯𑀸 𑀕𑀸𑀳𑀸𑀧𑁂𑀦𑁆𑀢𑀺. 𑀧𑀸𑀭𑀕𑀗𑁆𑀕𑀸𑀯𑀸𑀲𑀺𑀦𑁄𑀧𑀺 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑁂 𑀏𑀯𑀫𑁂𑀯 𑀓𑀭𑁄𑀦𑁆𑀢𑀺. 𑀏𑀯𑀁 𑀤𑁆𑀯𑀻𑀲𑀼 𑀓𑀸𑀮𑁂𑀲𑀼 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀬𑁂 𑀧𑀼𑀭𑁂 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀕𑀢𑀸 𑀯𑀺𑀲𑁂𑀲𑀸𑀭𑁄𑀘𑀦𑀢𑁆𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀏𑀯𑀭𑀽𑀧𑁂 𑀲𑀦𑁆𑀥𑀸𑀬 ‘‘𑀧𑀼𑀩𑁆𑀩𑁂 𑀪𑀦𑁆𑀢𑁂 𑀯𑀲𑁆𑀲𑀁𑀯𑀼𑀝𑁆𑀞𑀸’’𑀢𑀺𑀆𑀤𑀺𑀫𑀸𑀳.

𑀫𑀦𑁄𑀪𑀸𑀯𑀦𑀻𑀬𑁂𑀢𑀺 𑀫𑀦𑀲𑀸 𑀪𑀸𑀯𑀺𑀢𑁂 𑀲𑀫𑁆𑀪𑀸𑀯𑀺𑀢𑁂. 𑀬𑁂 𑀯𑀸 𑀫𑀦𑁄 𑀫𑀦𑀁 𑀪𑀸𑀯𑁂𑀦𑁆𑀢𑀺 𑀯𑀟𑁆𑀠𑁂𑀦𑁆𑀢𑀺 𑀭𑀸𑀕𑀭𑀚𑀸𑀤𑀻𑀦𑀺 𑀧𑀯𑀸𑀳𑁂𑀦𑁆𑀢𑀺, 𑀏𑀯𑀭𑀽𑀧𑁂𑀢𑀺 𑀅𑀢𑁆𑀣𑁄. 𑀣𑁂𑀭𑁄 ¶ 𑀓𑀺𑀭 𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀫𑀳𑀮𑁆𑀮𑀓𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀣𑀤𑁆𑀥𑁄 𑀳𑀼𑀢𑁆𑀯𑀸 𑀦 𑀦𑀺𑀲𑀻𑀤𑀢𑀺, 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀳𑀢𑁆𑀣𑀢𑁄 𑀙𑀢𑁆𑀢𑀜𑁆𑀘 𑀧𑀢𑁆𑀢𑀘𑀻𑀯𑀭𑀜𑁆𑀘 𑀕𑀳𑁂𑀢𑁆𑀯𑀸 𑀧𑀻𑀞𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀤𑁂𑀢𑀺, 𑀢𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲 𑀯𑀢𑁆𑀢𑀁 𑀓𑀢𑁆𑀯𑀸 𑀲𑁂𑀦𑀸𑀲𑀦𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀤𑁂𑀢𑀺. 𑀦𑀯𑀓𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑁄 𑀦 𑀦𑀺𑀲𑀻𑀤𑀢𑀺, 𑀲𑀫𑀻𑀧𑁂 𑀞𑀢𑁆𑀯𑀸 𑀯𑀢𑁆𑀢𑀁 𑀓𑀭𑁄𑀢𑀺. 𑀲𑁄 𑀢𑀸𑀬 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀅𑀧𑀭𑀺𑀳𑀸𑀦𑀺𑀁 𑀧𑀢𑁆𑀣𑀬𑀫𑀸𑀦𑁄 𑀏𑀯𑀫𑀸𑀳.

𑀅𑀣 𑀪𑀕𑀯𑀸 𑁋 ‘‘𑀆𑀦𑀦𑁆𑀤𑁄 𑀫𑀦𑁄𑀪𑀸𑀯𑀦𑀻𑀬𑀸𑀦𑀁 𑀤𑀲𑁆𑀲𑀦𑀁 𑀦 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑀺, 𑀳𑀦𑁆𑀤𑀲𑁆𑀲, 𑀫𑀦𑁄𑀪𑀸𑀯𑀦𑀻𑀬𑀸𑀦𑀁 𑀤𑀲𑁆𑀲𑀦𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺, 𑀬𑀢𑁆𑀣 𑀯𑀲𑀦𑁆𑀢𑁄 𑀇𑀢𑁄 𑀘𑀺𑀢𑁄 𑀘 𑀅𑀦𑀸𑀳𑀺𑀡𑁆𑀟𑀺𑀢𑁆𑀯𑀸𑀯 𑀮𑀘𑁆𑀙𑀢𑀺 𑀫𑀦𑁄𑀪𑀸𑀯𑀦𑀻𑀬𑁂 𑀪𑀺𑀓𑁆𑀔𑀽 𑀤𑀲𑁆𑀲𑀦𑀸𑀬𑀸𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀘𑀢𑁆𑀢𑀸𑀭𑀺𑀫𑀸𑀦𑀻𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀲𑀤𑁆𑀥𑀲𑁆𑀲𑀸𑀢𑀺 𑀩𑀼𑀤𑁆𑀥𑀸𑀤𑀻𑀲𑀼 𑀧𑀲𑀦𑁆𑀦𑀘𑀺𑀢𑁆𑀢𑀲𑁆𑀲 𑀯𑀢𑁆𑀢𑀲𑀫𑁆𑀧𑀦𑁆𑀦𑀲𑁆𑀲, 𑀬𑀲𑁆𑀲 𑀧𑀸𑀢𑁄 𑀧𑀝𑁆𑀞𑀸𑀬 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀸𑀤𑀻𑀦𑀺 𑀲𑀩𑁆𑀩𑀯𑀢𑁆𑀢𑀸𑀦𑀺 𑀓𑀢𑀸𑀦𑁂𑀯 𑀧𑀜𑁆𑀜𑀸𑀬𑀦𑁆𑀢𑀺. 𑀤𑀲𑁆𑀲𑀦𑀻𑀬𑀸𑀦𑀻𑀢𑀺 𑀤𑀲𑁆𑀲𑀦𑀸𑀭𑀳𑀸𑀦𑀺 𑀤𑀲𑁆𑀲𑀦𑀢𑁆𑀣𑀸𑀬 𑀕𑀦𑁆𑀢𑀩𑁆𑀩𑀸𑀦𑀺. 𑀲𑀁𑀯𑁂𑀚𑀦𑀻𑀬𑀸𑀦𑀻𑀢𑀺 𑀲𑀁𑀯𑁂𑀕𑀚𑀦𑀓𑀸𑀦𑀺. 𑀞𑀸𑀦𑀸𑀦𑀻𑀢𑀺 𑀓𑀸𑀭𑀡𑀸𑀦𑀺, 𑀧𑀤𑁂𑀲𑀞𑀸𑀦𑀸𑀦𑁂𑀯 𑀯𑀸.

𑀬𑁂 𑀳𑀺 𑀓𑁂𑀘𑀻𑀢𑀺 𑀇𑀤𑀁 𑀘𑁂𑀢𑀺𑀬𑀘𑀸𑀭𑀺𑀓𑀸𑀬 𑀲𑀢𑁆𑀣𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀘𑁂𑀢𑀺𑀬𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸𑀢𑀺 𑀬𑁂 𑀘 𑀢𑀸𑀯 𑀢𑀢𑁆𑀣 𑀢𑀢𑁆𑀣 𑀘𑁂𑀢𑀺𑀬𑀗𑁆𑀕𑀡𑀁 𑀲𑀫𑁆𑀫𑀚𑁆𑀚𑀦𑁆𑀢𑀸, 𑀆𑀲𑀦𑀸𑀦𑀺 𑀥𑁄𑀯𑀦𑁆𑀢𑀸 𑀩𑁄𑀥𑀺𑀫𑁆𑀳𑀺 𑀉𑀤𑀓𑀁 𑀲𑀺𑀜𑁆𑀘𑀦𑁆𑀢𑀸 𑀆𑀳𑀺𑀡𑁆𑀟𑀦𑁆𑀢𑀺, 𑀢𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺 𑀅𑀲𑀼𑀓𑀯𑀺𑀳𑀸𑀭𑁂 ‘‘𑀘𑁂𑀢𑀺𑀬𑀁 𑀯𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀅𑀦𑁆𑀢𑀭𑀸 𑀓𑀸𑀮𑀗𑁆𑀓𑀭𑁄𑀦𑁆𑀢𑀸𑀧𑀺 𑀅𑀦𑀦𑁆𑀢𑀭𑀸𑀬𑁂𑀦 𑀲𑀕𑁆𑀕𑁂 𑀧𑀢𑀺𑀝𑁆𑀞𑀳𑀺𑀲𑁆𑀲𑀦𑁆𑀢𑀺 𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀆𑀦𑀦𑁆𑀤𑀧𑀼𑀘𑁆𑀙𑀸𑀓𑀣𑀸𑀯𑀡𑁆𑀡𑀦𑀸

𑁨𑁦𑁩. 𑀅𑀤𑀲𑁆𑀲𑀦𑀁 ¶ ¶ , 𑀆𑀦𑀦𑁆𑀤𑀸𑀢𑀺 𑀬𑀤𑁂𑀢𑀁 𑀫𑀸𑀢𑀼𑀕𑀸𑀫𑀲𑁆𑀲 𑀅𑀤𑀲𑁆𑀲𑀦𑀁, 𑀅𑀬𑀫𑁂𑀢𑁆𑀣 𑀉𑀢𑁆𑀢𑀫𑀸 𑀧𑀝𑀺𑀧𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀲𑁂𑀦𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀳𑀺 𑀪𑀺𑀓𑁆𑀔𑀼 𑀆𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑁂 𑀞𑀺𑀢𑀫𑁆𑀧𑀺 𑀫𑀸𑀢𑀼𑀕𑀸𑀫𑀁 𑀬𑀸𑀯 𑀦 𑀧𑀲𑁆𑀲𑀢𑀺, 𑀢𑀸𑀯𑀲𑁆𑀲 𑀏𑀓𑀁𑀲𑁂𑀦𑁂𑀯 𑀦 𑀮𑁄𑀪𑁄 𑀉𑀧𑁆𑀧𑀚𑁆𑀚𑀢𑀺, 𑀦 𑀘𑀺𑀢𑁆𑀢𑀁 𑀘𑀮𑀢𑀺. 𑀤𑀲𑁆𑀲𑀦𑁂 𑀧𑀦 𑀲𑀢𑀺𑀬𑁂𑀯 𑀢𑀤𑀼𑀪𑀬𑀫𑁆𑀧𑀺 𑀅𑀲𑁆𑀲. 𑀢𑁂𑀦𑀸𑀳 𑁋 ‘‘𑀅𑀤𑀲𑁆𑀲𑀦𑀁 𑀆𑀦𑀦𑁆𑀤𑀸’’𑀢𑀺. 𑀤𑀲𑁆𑀲𑀦𑁂 𑀪𑀕𑀯𑀸 𑀲𑀢𑀺 𑀓𑀣𑀦𑁆𑀢𑀺 𑀪𑀺𑀓𑁆𑀔𑀁 𑀕𑀳𑁂𑀢𑁆𑀯𑀸 𑀉𑀧𑀕𑀢𑀝𑁆𑀞𑀸𑀦𑀸𑀤𑀻𑀲𑀼 𑀤𑀲𑁆𑀲𑀦𑁂 𑀲𑀢𑀺 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀅𑀣 𑀪𑀕𑀯𑀸 𑀬𑀲𑁆𑀫𑀸 𑀔𑀕𑁆𑀕𑀁 𑀕𑀳𑁂𑀢𑁆𑀯𑀸 𑁋 ‘‘𑀲𑀘𑁂 𑀫𑀬𑀸 𑀲𑀤𑁆𑀥𑀺𑀁 𑀆𑀮𑀧𑀲𑀺, 𑀏𑀢𑁆𑀣𑁂𑀯 𑀢𑁂 𑀲𑀻𑀲𑀁 𑀧𑀸𑀢𑁂𑀲𑁆𑀲𑀸𑀫𑀻’’𑀢𑀺 𑀞𑀺𑀢𑀧𑀼𑀭𑀺𑀲𑁂𑀦 𑀯𑀸, ‘‘𑀲𑀘𑁂 𑀫𑀬𑀸 𑀲𑀤𑁆𑀥𑀺𑀁 𑀆𑀮𑀧𑀲𑀺, 𑀏𑀢𑁆𑀣𑁂𑀯 𑀢𑁂 𑀫𑀁𑀲𑀁 𑀫𑀼𑀭𑀼𑀫𑀼𑀭𑀸𑀧𑁂𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 ¶ 𑀞𑀺𑀢𑀬𑀓𑁆𑀔𑀺𑀦𑀺𑀬𑀸 𑀯𑀸 𑀆𑀮𑀧𑀺𑀢𑀼𑀁 𑀯𑀭𑀁. 𑀏𑀓𑀲𑁆𑀲𑁂𑀯 𑀳𑀺 𑀅𑀢𑁆𑀢𑀪𑀸𑀯𑀲𑁆𑀲 𑀢𑀧𑁆𑀧𑀘𑁆𑀘𑀬𑀸 𑀯𑀺𑀦𑀸𑀲𑁄 𑀳𑁄𑀢𑀺, 𑀦 𑀅𑀧𑀸𑀬𑁂𑀲𑀼 𑀅𑀧𑀭𑀺𑀘𑁆𑀙𑀺𑀦𑁆𑀦𑀤𑀼𑀓𑁆𑀔𑀸𑀦𑀼𑀪𑀯𑀦𑀁. 𑀫𑀸𑀢𑀼𑀕𑀸𑀫𑁂𑀦 𑀧𑀦 𑀆𑀮𑀸𑀧𑀲𑀮𑁆𑀮𑀸𑀧𑁂 𑀲𑀢𑀺 𑀯𑀺𑀲𑁆𑀲𑀸𑀲𑁄 𑀳𑁄𑀢𑀺, 𑀯𑀺𑀲𑁆𑀲𑀸𑀲𑁂 𑀲𑀢𑀺 𑀑𑀢𑀸𑀭𑁄 𑀳𑁄𑀢𑀺, 𑀑𑀢𑀺𑀡𑁆𑀡𑀘𑀺𑀢𑁆𑀢𑁄 𑀲𑀻𑀮𑀩𑁆𑀬𑀲𑀦𑀁 𑀧𑀢𑁆𑀯𑀸 𑀅𑀧𑀸𑀬𑀧𑀽𑀭𑀓𑁄 𑀳𑁄𑀢𑀺; 𑀢𑀲𑁆𑀫𑀸 𑀅𑀦𑀸𑀮𑀸𑀧𑁄𑀢𑀺 𑀆𑀳. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀲𑀮𑁆𑀮𑀧𑁂 𑀅𑀲𑀺𑀳𑀢𑁆𑀣𑁂𑀦, 𑀧𑀺𑀲𑀸𑀘𑁂𑀦𑀸𑀧𑀺 𑀲𑀮𑁆𑀮𑀧𑁂;

𑀆𑀲𑀻𑀯𑀺𑀲𑀫𑁆𑀧𑀺 𑀆𑀲𑀻𑀤𑁂, 𑀬𑁂𑀦 𑀤𑀝𑁆𑀞𑁄 𑀦 𑀚𑀻𑀯𑀢𑀺;

𑀦 𑀢𑁆𑀯𑁂𑀯 𑀏𑀓𑁄 𑀏𑀓𑀸𑀬, 𑀫𑀸𑀢𑀼𑀕𑀸𑀫𑁂𑀦 𑀲𑀮𑁆𑀮𑀧𑁂’’𑀢𑀺. (𑀅. 𑀦𑀺. 𑁫.𑁫𑁫);

𑀆𑀮𑀧𑀦𑁆𑀢𑁂𑀦 𑀧𑀦𑀸𑀢𑀺 𑀲𑀘𑁂 𑀫𑀸𑀢𑀼𑀕𑀸𑀫𑁄 𑀤𑀺𑀯𑀲𑀁 𑀯𑀸 𑀧𑀼𑀘𑁆𑀙𑀢𑀺, 𑀲𑀻𑀮𑀁 𑀯𑀸 𑀬𑀸𑀘𑀢𑀺, 𑀥𑀫𑁆𑀫𑀁 𑀯𑀸 𑀲𑁄𑀢𑀼𑀓𑀸𑀫𑁄 𑀳𑁄𑀢𑀺, 𑀧𑀜𑁆𑀳𑀁 𑀯𑀸 𑀧𑀼𑀘𑁆𑀙𑀢𑀺, 𑀢𑀣𑀸𑀭𑀽𑀧𑀁 𑀯𑀸 𑀧𑀦𑀲𑁆𑀲 𑀧𑀩𑁆𑀩𑀚𑀺𑀢𑁂𑀳𑀺 𑀓𑀢𑁆𑀢𑀩𑁆𑀩𑀓𑀫𑁆𑀫𑀁 𑀳𑁄𑀢𑀺, 𑀏𑀯𑀭𑀽𑀧𑁂 𑀓𑀸𑀮𑁂 𑀅𑀦𑀸𑀮𑀧𑀦𑁆𑀢𑀁 ‘‘𑀫𑀽𑀕𑁄 𑀅𑀬𑀁, 𑀩𑀥𑀺𑀭𑁄 𑀅𑀬𑀁, 𑀪𑀼𑀢𑁆𑀯𑀸𑀯 𑀩𑀤𑁆𑀥𑀫𑀼𑀔𑁄 𑀦𑀺𑀲𑀻𑀤𑀢𑀻’’𑀢𑀺 𑀯𑀤𑀢𑀺, 𑀢𑀲𑁆𑀫𑀸 𑀅𑀯𑀲𑁆𑀲𑀁 𑀆𑀮𑀧𑀺𑀢𑀩𑁆𑀩𑀁 𑀳𑁄𑀢𑀺. 𑀏𑀯𑀁 𑀆𑀮𑀧𑀦𑁆𑀢𑁂𑀦 𑀧𑀦 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀅𑀣 𑀪𑀕𑀯𑀸 𑁋 ‘‘𑀏𑀣 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀫𑀢𑁆𑀢𑀻𑀲𑀼 𑀫𑀸𑀢𑀼𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀣, 𑀪𑀕𑀺𑀦𑀺𑀫𑀢𑁆𑀢𑀻𑀲𑀼 𑀪𑀕𑀺𑀦𑀺𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀣, 𑀥𑀻𑀢𑀼𑀫𑀢𑁆𑀢𑀻𑀲𑀼 𑀥𑀻𑀢𑀼𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀣𑀸’’𑀢𑀺 (𑀲𑀁. 𑀦𑀺. 𑁪.𑁧𑁨𑁭) 𑀇𑀫𑀁 𑀑𑀯𑀸𑀤𑀁 𑀲𑀦𑁆𑀥𑀸𑀬 𑀲𑀢𑀺, 𑀆𑀦𑀦𑁆𑀤, 𑀉𑀧𑀝𑁆𑀞𑀧𑁂𑀢𑀩𑁆𑀩𑀸𑀢𑀺 𑀆𑀳.

𑁨𑁦𑁪. 𑀅𑀩𑁆𑀬𑀸𑀯𑀝𑀸𑀢𑀺 𑀅𑀢𑀦𑁆𑀢𑀺𑀩𑀤𑁆𑀥𑀸 𑀦𑀺𑀭𑀼𑀲𑁆𑀲𑀼𑀓𑁆𑀓𑀸 𑀳𑁄𑀣. 𑀲𑀸𑀭𑀢𑁆𑀣𑁂 𑀖𑀝𑀣𑀸𑀢𑀺 𑀉𑀢𑁆𑀢𑀫𑀢𑁆𑀣𑁂 𑀅𑀭𑀳𑀢𑁆𑀢𑁂 𑀖𑀝𑁂𑀣. 𑀅𑀦𑀼𑀬𑀼𑀜𑁆𑀚𑀣𑀸𑀢𑀺 𑀢𑀤𑀥𑀺𑀕𑀫𑀸𑀬 𑀅𑀦𑀼𑀬𑁄𑀕𑀁 ¶ 𑀓𑀭𑁄𑀣. 𑀅𑀧𑁆𑀧𑀫𑀢𑁆𑀢𑀸𑀢𑀺 𑀢𑀢𑁆𑀣 𑀅𑀯𑀺𑀧𑁆𑀧𑀫𑀼𑀝𑁆𑀞𑀲𑀢𑀻. 𑀯𑀻𑀭𑀺𑀬𑀸𑀢𑀸𑀧𑀬𑁄𑀕𑁂𑀦 𑀆𑀢𑀸𑀧𑀺𑀦𑁄. 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀦𑀺𑀭𑀧𑁂𑀓𑁆𑀔𑀢𑀸𑀬 𑀧𑀳𑀺𑀢𑀢𑁆𑀢𑀸 𑀧𑁂𑀲𑀺𑀢𑀘𑀺𑀢𑁆𑀢𑀸 𑀯𑀺𑀳𑀭𑀣.

𑁨𑁦𑁫. 𑀓𑀣𑀁 ¶ 𑀧𑀦, 𑀪𑀦𑁆𑀢𑁂𑀢𑀺 𑀢𑁂𑀳𑀺 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸𑀤𑀻𑀳𑀺 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀅𑀤𑁆𑀥𑀸 𑀫𑀁 𑀢𑁂 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺 𑁋 ‘‘𑀓𑀣𑀁, 𑀪𑀦𑁆𑀢𑁂, 𑀆𑀦𑀦𑁆𑀤 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺; ‘‘𑀢𑁂𑀲𑀸𑀳𑀁 𑀓𑀣𑀁 𑀧𑀝𑀺𑀯𑀘𑀦𑀁 𑀤𑁂𑀫𑀻’’𑀢𑀺 𑀧𑀼𑀘𑁆𑀙𑀢𑀺. 𑀅𑀳𑀢𑁂𑀦 𑀯𑀢𑁆𑀣𑁂𑀦𑀸𑀢𑀺 𑀦𑀯𑁂𑀦 𑀓𑀸𑀲𑀺𑀓𑀯𑀢𑁆𑀣𑁂𑀦. 𑀯𑀺𑀳𑀢𑁂𑀦 𑀓𑀧𑁆𑀧𑀸𑀲𑁂𑀦𑀸𑀢𑀺 𑀲𑀼𑀧𑁄𑀣𑀺𑀢𑁂𑀦 𑀓𑀧𑁆𑀧𑀸𑀲𑁂𑀦. 𑀓𑀸𑀲𑀺𑀓𑀯𑀢𑁆𑀣𑀜𑁆𑀳𑀺 𑀲𑀼𑀔𑀼𑀫𑀢𑁆𑀢𑀸 𑀢𑁂𑀮𑀁 𑀦 𑀕𑀡𑁆𑀳𑀸𑀢𑀺, 𑀓𑀧𑁆𑀧𑀸𑀲𑁄 𑀧𑀦 𑀕𑀡𑁆𑀳𑀸𑀢𑀺. 𑀢𑀲𑁆𑀫𑀸 ‘‘𑀯𑀺𑀳𑀢𑁂𑀦 𑀓𑀧𑁆𑀧𑀸𑀲𑁂𑀦𑀸’’𑀢𑀺 𑀆𑀳. 𑀆𑀬𑀲𑀸𑀬𑀸𑀢𑀺 𑀲𑁄𑀯𑀡𑁆𑀡𑀸𑀬. 𑀲𑁄𑀯𑀡𑁆𑀡𑀜𑁆𑀳𑀺 𑀇𑀥 ‘‘𑀅𑀬𑀲’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁.

𑀣𑀽𑀧𑀸𑀭𑀳𑀧𑀼𑀕𑁆𑀕𑀮𑀯𑀡𑁆𑀡𑀦𑀸

𑁨𑁦𑁬. 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻𑀢𑀺 𑀏𑀢𑁆𑀣 𑀓𑀲𑁆𑀫𑀸 𑀪𑀕𑀯𑀸 𑀅𑀕𑀸𑀭𑀫𑀚𑁆𑀛𑁂 𑀯𑀲𑀺𑀢𑁆𑀯𑀸 𑀓𑀸𑀮𑀗𑁆𑀓𑀢𑀲𑁆𑀲 𑀭𑀜𑁆𑀜𑁄 𑀣𑀽𑀧𑀸𑀭𑀳𑀢𑀁 𑀅𑀦𑀼𑀚𑀸𑀦𑀸𑀢𑀺, 𑀦 𑀲𑀻𑀮𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀪𑀺𑀓𑁆𑀔𑀼𑀲𑁆𑀲𑀸𑀢𑀺? 𑀅𑀦𑀘𑁆𑀙𑀭𑀺𑀬𑀢𑁆𑀢𑀸. 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀽𑀦𑀜𑁆𑀳𑀺 ¶ 𑀣𑀽𑀧𑁂 𑀅𑀦𑀼𑀜𑁆𑀜𑀸𑀬𑀫𑀸𑀦𑁂 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀢𑀸𑀯 𑀣𑀽𑀧𑀸𑀦𑀁 𑀑𑀓𑀸𑀲𑁄 𑀦 𑀪𑀯𑁂𑀬𑁆𑀬, 𑀢𑀣𑀸 𑀅𑀜𑁆𑀜𑁂𑀲𑀼 𑀞𑀸𑀦𑁂𑀲𑀼. 𑀢𑀲𑁆𑀫𑀸 ‘‘𑀅𑀦𑀘𑁆𑀙𑀭𑀺𑀬𑀸 𑀢𑁂 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀦𑀸𑀦𑀼𑀚𑀸𑀦𑀸𑀢𑀺. 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀏𑀓𑁄𑀯 𑀦𑀺𑀩𑁆𑀩𑀢𑁆𑀢𑀢𑀺, 𑀢𑁂𑀦𑀲𑁆𑀲 𑀣𑀽𑀧𑁄 𑀅𑀘𑁆𑀙𑀭𑀺𑀬𑁄 𑀳𑁄𑀢𑀺. 𑀧𑀼𑀣𑀼𑀚𑁆𑀚𑀦𑀲𑀻𑀮𑀯𑀢𑁄 𑀧𑀦 𑀧𑀭𑀺𑀦𑀺𑀩𑁆𑀩𑀼𑀢𑀪𑀺𑀓𑁆𑀔𑀼𑀦𑁄 𑀯𑀺𑀬 𑀫𑀳𑀦𑁆𑀢𑀫𑁆𑀧𑀺 𑀲𑀓𑁆𑀓𑀸𑀭𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺𑀬𑁂𑀯.

𑀆𑀦𑀦𑁆𑀤𑀅𑀘𑁆𑀙𑀭𑀺𑀬𑀥𑀫𑁆𑀫𑀯𑀡𑁆𑀡𑀦𑀸

𑁨𑁦𑁭. 𑀯𑀺𑀳𑀸𑀭𑀦𑁆𑀢𑀺 𑀇𑀥 𑀫𑀡𑁆𑀟𑀮𑀫𑀸𑀮𑁄 𑀯𑀺𑀳𑀸𑀭𑁄𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀢𑀁 𑀧𑀯𑀺𑀲𑀺𑀢𑁆𑀯𑀸. 𑀓𑀧𑀺𑀲𑀻𑀲𑀦𑁆𑀢𑀺 𑀤𑁆𑀯𑀸𑀭𑀩𑀸𑀳𑀓𑁄𑀝𑀺𑀬𑀁 𑀞𑀺𑀢𑀁 𑀅𑀕𑁆𑀕𑀴𑀭𑀼𑀓𑁆𑀔𑀁. 𑀭𑁄𑀤𑀫𑀸𑀦𑁄 𑀅𑀝𑁆𑀞𑀸𑀲𑀻𑀢𑀺 𑀲𑁄 𑀓𑀺𑀭𑀸𑀬𑀲𑁆𑀫𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀢𑁆𑀣𑀸𑀭𑀸 𑀫𑀫 𑀲𑀁𑀯𑁂𑀕𑀚𑀦𑀓𑀁 𑀯𑀲𑀦𑀝𑁆𑀞𑀸𑀦𑀁 𑀓𑀣𑀺𑀢𑀁, 𑀘𑁂𑀢𑀺𑀬𑀘𑀸𑀭𑀺𑀓𑀸𑀬 𑀲𑀸𑀢𑁆𑀣𑀓𑀪𑀸𑀯𑁄 𑀓𑀣𑀺𑀢𑁄, 𑀫𑀸𑀢𑀼𑀕𑀸𑀫𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑀺𑀢𑁄, 𑀅𑀢𑁆𑀢𑀦𑁄 𑀲𑀭𑀻𑀭𑁂 𑀧𑀝𑀺𑀧𑀢𑁆𑀢𑀺 𑀅𑀓𑁆𑀔𑀸𑀢𑀸, 𑀘𑀢𑁆𑀢𑀸𑀭𑁄 𑀣𑀽𑀧𑀸𑀭𑀳𑀸 𑀓𑀣𑀺𑀢𑀸, 𑀥𑀼𑀯𑀁 𑀅𑀚𑁆𑀚 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’’𑀢𑀺, 𑀢𑀲𑁆𑀲𑁂𑀯𑀁 𑀘𑀺𑀦𑁆𑀢𑀬𑀢𑁄 𑀩𑀮𑀯𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀭𑁄𑀤𑀦𑀁 𑀦𑀸𑀫 𑀅𑀨𑀸𑀲𑀼𑀓𑀁, 𑀏𑀓𑀫𑀦𑁆𑀢𑀁 𑀕𑀦𑁆𑀢𑁆𑀯𑀸 ¶ 𑀲𑁄𑀓𑀁 𑀢𑀦𑀼𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺, 𑀲𑁄 𑀢𑀣𑀸 𑀅𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀭𑁄𑀤𑀫𑀸𑀦𑁄 𑀅𑀝𑁆𑀞𑀸𑀲𑀻’’𑀢𑀺.

𑀅𑀳𑀜𑁆𑀘 𑀯𑀢𑀫𑁆𑀳𑀻𑀢𑀺 𑀅𑀳𑀜𑁆𑀘 𑀯𑀢 𑀅𑀫𑁆𑀳𑀺, 𑀅𑀳𑀁 𑀯𑀢𑀫𑁆𑀳𑀻𑀢𑀺𑀧𑀺 𑀧𑀸𑀞𑁄. 𑀬𑁄 𑀫𑀫 𑀅𑀦𑀼𑀓𑀫𑁆𑀧𑀓𑁄𑀢𑀺 𑀬𑁄 𑀫𑀁 𑀅𑀦𑀼𑀓𑀫𑁆𑀧𑀢𑀺 𑀅𑀦𑀼𑀲𑀸𑀲𑀢𑀺, 𑀲𑁆𑀯𑁂 𑀤𑀸𑀦𑀺 𑀧𑀝𑁆𑀞𑀸𑀬 𑀓𑀲𑁆𑀲 𑀫𑀼𑀔𑀥𑁄𑀯𑀦𑀁 𑀤𑀲𑁆𑀲𑀸𑀫𑀺, 𑀓𑀲𑁆𑀲 𑀧𑀸𑀤𑁂 𑀥𑁄𑀯𑀺𑀲𑁆𑀲𑀸𑀫𑀺, 𑀓𑀲𑁆𑀲 𑀲𑁂𑀦𑀸𑀲𑀦𑀁 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀺, 𑀓𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀺𑀲𑁆𑀲𑀸𑀫𑀻𑀢𑀺 𑀩𑀳𑀼𑀁 𑀯𑀺𑀮𑀧𑀺. 𑀆𑀫𑀦𑁆𑀢𑁂𑀲𑀻𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀦𑁆𑀢𑀭𑁂 𑀣𑁂𑀭𑀁 𑀅𑀤𑀺𑀲𑁆𑀯𑀸 𑀆𑀫𑀦𑁆𑀢𑁂𑀲𑀺.

𑀫𑁂𑀢𑁆𑀢𑁂𑀦 ¶ 𑀓𑀸𑀬𑀓𑀫𑁆𑀫𑁂𑀦𑀸𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑀯𑀲𑁂𑀦 𑀧𑀯𑀢𑁆𑀢𑀺𑀢𑁂𑀦 𑀫𑀼𑀔𑀥𑁄𑀯𑀦𑀤𑀸𑀦𑀸𑀤𑀺𑀓𑀸𑀬𑀓𑀫𑁆𑀫𑁂𑀦. 𑀳𑀺𑀢𑁂𑀦𑀸𑀢𑀺 𑀳𑀺𑀢𑀯𑀼𑀤𑁆𑀥𑀺𑀬𑀸 𑀓𑀢𑁂𑀦. 𑀲𑀼𑀔𑁂𑀦𑀸𑀢𑀺 𑀲𑀼𑀔𑀲𑁄𑀫𑀦𑀲𑁆𑀲𑁂𑀦𑁂𑀯 𑀓𑀢𑁂𑀦, 𑀦 𑀤𑀼𑀓𑁆𑀔𑀺𑀦𑀸 𑀤𑀼𑀫𑁆𑀫𑀦𑁂𑀦 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀤𑁆𑀯𑀬𑁂𑀦𑀸𑀢𑀺 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀅𑀓𑀢𑁂𑀦. 𑀬𑀣𑀸 𑀳𑀺 𑀏𑀓𑁄 𑀲𑀫𑁆𑀫𑀼𑀔𑀸𑀯 𑀓𑀭𑁄𑀢𑀺 𑀦 𑀧𑀭𑀫𑁆𑀫𑀼𑀔𑀸, 𑀏𑀓𑁄 𑀧𑀭𑀫𑁆𑀫𑀼𑀔𑀸𑀯 𑀓𑀭𑁄𑀢𑀺 𑀦 𑀲𑀫𑁆𑀫𑀼𑀔𑀸 𑀏𑀯𑀁 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀓𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀧𑁆𑀧𑀫𑀸𑀡𑁂𑀦𑀸𑀢𑀺 𑀧𑀫𑀸𑀡𑀯𑀺𑀭𑀳𑀺𑀢𑁂𑀦. 𑀘𑀓𑁆𑀓𑀯𑀸𑀴𑀫𑁆𑀧𑀺 𑀳𑀺 𑀅𑀢𑀺𑀲𑀫𑁆𑀩𑀸𑀥𑀁, 𑀪𑀯𑀕𑁆𑀕𑀫𑁆𑀧𑀺 𑀅𑀢𑀺𑀦𑀻𑀘𑀁, 𑀢𑀬𑀸 𑀓𑀢𑀁 𑀓𑀸𑀬𑀓𑀫𑁆𑀫𑀫𑁂𑀯 ¶ 𑀩𑀳𑀼𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀫𑁂𑀢𑁆𑀢𑁂𑀦 𑀯𑀘𑀻𑀓𑀫𑁆𑀫𑁂𑀦𑀸𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑀯𑀲𑁂𑀦 𑀧𑀯𑀢𑁆𑀢𑀺𑀢𑁂𑀦 𑀫𑀼𑀔𑀥𑁄𑀯𑀦𑀓𑀸𑀮𑀸𑀭𑁄𑀘𑀦𑀸𑀤𑀺𑀦𑀸 𑀯𑀘𑀻𑀓𑀫𑁆𑀫𑁂𑀦. 𑀅𑀧𑀺 𑀘 𑀑𑀯𑀸𑀤𑀁 𑀲𑀼𑀢𑁆𑀯𑀸 𑁋 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀯𑀘𑀦𑀫𑁆𑀧𑀺 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀫𑁂𑀯. 𑀫𑁂𑀢𑁆𑀢𑁂𑀦 𑀫𑀦𑁄𑀓𑀫𑁆𑀫𑁂𑀦𑀸𑀢𑀺 𑀓𑀸𑀮𑀲𑁆𑀲𑁂𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀯𑀺𑀯𑀺𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑁋 ‘‘𑀲𑀢𑁆𑀣𑀸 𑀅𑀭𑁄𑀕𑁄 𑀳𑁄𑀢𑀼, 𑀅𑀩𑁆𑀬𑀸𑀧𑀚𑁆𑀚𑁄 𑀲𑀼𑀔𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀺𑀢𑁂𑀦 𑀫𑀦𑁄𑀓𑀫𑁆𑀫𑁂𑀦. 𑀓𑀢𑀧𑀼𑀜𑁆𑀜𑁄𑀲𑀻𑀢𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑁄𑀲𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀢𑀧𑀼𑀜𑁆𑀜𑁄𑀲𑀻𑀢𑀺 𑀘 𑀏𑀢𑁆𑀢𑀸𑀯𑀢𑀸 𑀯𑀺𑀲𑁆𑀲𑀢𑁆𑀣𑁄 𑀫𑀸 𑀧𑀫𑀸𑀤𑀫𑀸𑀧𑀚𑁆𑀚𑀺, 𑀅𑀣 𑀔𑁄 𑀧𑀥𑀸𑀦𑀫𑀦𑀼𑀬𑀼𑀜𑁆𑀚. 𑀏𑀯𑀜𑁆𑀳𑀺 𑀅𑀦𑀼𑀬𑀼𑀢𑁆𑀢𑁄 𑀔𑀺𑀧𑁆𑀧𑀁 𑀳𑁄𑀳𑀺𑀲𑀺 𑀅𑀦𑀸𑀲𑀯𑁄, 𑀥𑀫𑁆𑀫𑀲𑀗𑁆𑀕𑀻𑀢𑀺𑀓𑀸𑀮𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀲𑀺. 𑀦 𑀳𑀺 𑀫𑀸𑀤𑀺𑀲𑀲𑁆𑀲 𑀓𑀢𑀧𑀸𑀭𑀺𑀘𑀭𑀺𑀬𑀸 𑀦𑀺𑀧𑁆𑀨𑀮𑀸 𑀦𑀸𑀫 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁨𑁦𑁮. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀫𑀳𑀸𑀧𑀣𑀯𑀺𑀁 𑀧𑀢𑁆𑀣𑀭𑀦𑁆𑀢𑁄 𑀯𑀺𑀬 𑀆𑀓𑀸𑀲𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀯𑀺𑀬 𑀘𑀓𑁆𑀓𑀯𑀸𑀴𑀕𑀺𑀭𑀺𑀁 𑀑𑀲𑀸𑀭𑁂𑀦𑁆𑀢𑁄 𑀯𑀺𑀬 𑀲𑀺𑀦𑁂𑀭𑀼𑀁 𑀉𑀓𑁆𑀔𑀺𑀧𑁂𑀦𑁆𑀢𑁄 𑀯𑀺𑀬 𑀫𑀳𑀸𑀚𑀫𑁆𑀩𑀼𑀁 𑀔𑀦𑁆𑀥𑁂 𑀕𑀳𑁂𑀢𑁆𑀯𑀸 𑀘𑀸𑀮𑁂𑀦𑁆𑀢𑁄 𑀯𑀺𑀬 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀕𑀼𑀡𑀓𑀣𑀁 𑀆𑀭𑀪𑀦𑁆𑀢𑁄 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺. 𑀢𑀢𑁆𑀣 ‘‘𑀬𑁂𑀧𑀺 ¶ 𑀢𑁂, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀻’’𑀢𑀺 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀁? 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑁆𑀲 𑀦𑀢𑁆𑀣𑀺𑀢𑀸𑀬. 𑀏𑀢𑁂𑀦𑁂𑀯 𑀘𑁂𑀢𑀁 𑀯𑁂𑀤𑀺𑀢𑀩𑁆𑀩𑀁 𑁋 ‘‘𑀬𑀣𑀸 𑀘𑀓𑁆𑀓𑀯𑀸𑀴𑀦𑁆𑀢𑀭𑁂𑀧𑀺 𑀅𑀜𑁆𑀜𑁄 𑀩𑀼𑀤𑁆𑀥𑁄 𑀦𑀢𑁆𑀣𑀻’’𑀢𑀺. 𑀧𑀡𑁆𑀟𑀺𑀢𑁄𑀢𑀺 𑀩𑁆𑀬𑀢𑁆𑀢𑁄. 𑀫𑁂𑀥𑀸𑀯𑀻𑀢𑀺 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀤𑀻𑀲𑀼 𑀓𑀼𑀲𑀮𑁄.

𑁨𑁦𑁯. 𑀪𑀺𑀓𑁆𑀔𑀼𑀧𑀭𑀺𑀲𑀸 𑀆𑀦𑀦𑁆𑀤𑀁 𑀤𑀲𑁆𑀲𑀦𑀸𑀬𑀸𑀢𑀺 𑀬𑁂 𑀪𑀕𑀯𑀦𑁆𑀢𑀁 𑀧𑀲𑁆𑀲𑀺𑀢𑀼𑀓𑀸𑀫𑀸 𑀣𑁂𑀭𑀁 𑀉𑀧𑀲𑀗𑁆𑀓𑀫𑀦𑁆𑀢𑀺, 𑀬𑁂 𑀘 ‘‘𑀆𑀬𑀲𑁆𑀫𑀸 𑀓𑀺𑀭𑀸𑀦𑀦𑁆𑀤𑁄 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑁄 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀩𑀳𑀼𑀲𑁆𑀲𑀼𑀢𑁄 𑀲𑀗𑁆𑀖𑀲𑁄𑀪𑀦𑁄’’𑀢𑀺 𑀣𑁂𑀭𑀲𑁆𑀲 𑀕𑀼𑀡𑁂 𑀲𑀼𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀺, 𑀢𑁂 𑀲𑀦𑁆𑀥𑀸𑀬 ‘‘𑀪𑀺𑀓𑁆𑀔𑀼𑀧𑀭𑀺𑀲𑀸 𑀆𑀦𑀦𑁆𑀤𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀢𑁆𑀢𑀫𑀦𑀸𑀢𑀺 𑀲𑀯𑀦𑁂𑀦 𑀦𑁄 𑀤𑀲𑁆𑀲𑀦𑀁 𑀲𑀫𑁂𑀢𑀻𑀢𑀺 𑀲𑀓𑀫𑀦𑀸 𑀢𑀼𑀝𑁆𑀞𑀘𑀺𑀢𑁆𑀢𑀸. 𑀥𑀫𑁆𑀫𑀦𑁆𑀢𑀺 ‘‘𑀓𑀘𑁆𑀘𑀺, 𑀆𑀯𑀼𑀲𑁄, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦 𑀓𑀫𑁆𑀫𑀁 𑀓𑀭𑁄𑀣, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀯𑀢𑁆𑀢𑀁 𑀧𑀽𑀭𑁂𑀣𑀸’’𑀢𑀺 𑀏𑀯𑀭𑀽𑀧𑀁 𑀧𑀝𑀺𑀲𑀦𑁆𑀣𑀸𑀭𑀥𑀫𑁆𑀫𑀁. 𑀢𑀢𑁆𑀣 𑀪𑀺𑀓𑁆𑀔𑀼𑀦𑀻𑀲𑀼 𑁋 ‘‘𑀓𑀘𑁆𑀘𑀺, 𑀪𑀕𑀺𑀦𑀺𑀬𑁄, 𑀅𑀝𑁆𑀞 𑀕𑀭𑀼𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀣𑀸’’𑀢𑀺 𑀇𑀤𑀫𑁆𑀧𑀺 𑀦𑀸𑀦𑀸𑀓𑀭𑀡𑀁 𑀳𑁄𑀢𑀺. 𑀉𑀧𑀸𑀲𑀓𑁂𑀲𑀼 𑀆𑀕𑀢𑁂𑀲𑀼 ‘‘𑀉𑀧𑀸𑀲𑀓, 𑀦 𑀢𑁂 𑀓𑀘𑁆𑀘𑀺 𑀲𑀻𑀲𑀁 𑀯𑀸 𑀅𑀗𑁆𑀕𑀁 𑀯𑀸 ¶ 𑀭𑀼𑀚𑁆𑀚𑀢𑀺, 𑀅𑀭𑁄𑀕𑀸 𑀢𑁂 𑀧𑀼𑀢𑁆𑀢𑀪𑀸𑀢𑀭𑁄’’𑀢𑀺 𑀦 𑀏𑀯𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀢𑀺. 𑀏𑀯𑀁 𑀧𑀦 𑀓𑀭𑁄𑀢𑀺 𑁋 ‘‘𑀓𑀣𑀁 𑀉𑀧𑀸𑀲𑀓𑀸 𑀢𑀻𑀡𑀺 𑀲𑀭𑀡𑀸𑀦𑀺 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀣, 𑀫𑀸𑀲𑀲𑁆𑀲 𑀅𑀝𑁆𑀞 ¶ 𑀉𑀧𑁄𑀲𑀣𑁂 𑀓𑀭𑁄𑀣, 𑀫𑀸𑀢𑀸𑀧𑀺𑀢𑀽𑀦𑀁 𑀉𑀧𑀝𑁆𑀞𑀸𑀦𑀯𑀢𑁆𑀢𑀁 𑀧𑀽𑀭𑁂𑀣, 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀧𑀝𑀺𑀚𑀕𑁆𑀕𑀣𑀸’’𑀢𑀺. 𑀉𑀧𑀸𑀲𑀺𑀓𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀇𑀤𑀸𑀦𑀺 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀘𑀓𑁆𑀓𑀯𑀢𑁆𑀢𑀺𑀦𑀸 𑀲𑀤𑁆𑀥𑀺𑀁 𑀉𑀧𑀫𑀁 𑀓𑀭𑁄𑀦𑁆𑀢𑁄 𑀘𑀢𑁆𑀢𑀸𑀭𑁄𑀫𑁂 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀔𑀢𑁆𑀢𑀺𑀬𑀸𑀢𑀺 𑀅𑀪𑀺𑀲𑀺𑀢𑁆𑀢𑀸 𑀘 𑀅𑀦𑀪𑀺𑀲𑀺𑀢𑁆𑀢𑀸 𑀘 𑀔𑀢𑁆𑀢𑀺𑀬𑀚𑀸𑀢𑀺𑀓𑀸. 𑀢𑁂 𑀓𑀺𑀭 𑁋 ‘‘𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀦𑀸𑀫 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀆𑀓𑀸𑀲𑁂𑀦 𑀯𑀺𑀘𑀭𑀦𑁆𑀢𑁄 𑀭𑀚𑁆𑀚𑀁 𑀅𑀦𑀼𑀲𑀸𑀲𑀢𑀺 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸’’𑀢𑀺 𑀢𑀲𑁆𑀲 𑀕𑀼𑀡𑀓𑀣𑀁 𑀲𑀼𑀢𑁆𑀯𑀸 ‘‘𑀲𑀯𑀦𑁂𑀦 𑀤𑀲𑁆𑀲𑀦𑀫𑁆𑀧𑀺 𑀲𑀫’’𑀦𑁆𑀢𑀺 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺. 𑀪𑀸𑀲𑀢𑀻𑀢𑀺 𑀓𑀣𑁂𑀦𑁆𑀢𑁄 𑁋 ‘‘𑀓𑀣𑀁, 𑀢𑀸𑀢𑀸, 𑀭𑀸𑀚𑀥𑀫𑁆𑀫𑀁 𑀧𑀽𑀭𑁂𑀣, 𑀧𑀯𑁂𑀡𑀺𑀁 𑀭𑀓𑁆𑀔𑀣𑀸’’𑀢𑀺 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀢𑀺. 𑀩𑁆𑀭𑀸𑀳𑁆𑀫𑀡𑁂𑀲𑀼 𑀧𑀦 𑁋 ‘‘𑀓𑀣𑀁 𑀆𑀘𑀭𑀺𑀬𑀸 𑀫𑀦𑁆𑀢𑁂 𑀯𑀸𑀘𑁂𑀣, 𑀓𑀣𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀫𑀦𑁆𑀢𑁂 𑀕𑀡𑁆𑀳𑀦𑁆𑀢𑀺, 𑀤𑀓𑁆𑀔𑀺𑀡𑀁 𑀯𑀸 𑀯𑀢𑁆𑀣𑀸𑀦𑀺 𑀯𑀸 𑀓𑀧𑀺𑀮𑀁 𑀯𑀸 𑀅𑀮𑀢𑁆𑀣𑀸’’𑀢𑀺 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀢𑀺. 𑀕𑀳𑀧𑀢𑀻𑀲𑀼 𑁋 ‘‘𑀓𑀣𑀁 𑀢𑀸𑀢𑀸, 𑀦 𑀯𑁄 𑀭𑀸𑀚𑀓𑀼𑀮𑀢𑁄 𑀤𑀡𑁆𑀟𑁂𑀦 𑀯𑀸 𑀩𑀮𑀺𑀦𑀸 𑀯𑀸 𑀧𑀻𑀴𑀸 𑀅𑀢𑁆𑀣𑀺, 𑀲𑀫𑁆𑀫𑀸 ¶ 𑀤𑁂𑀯𑁄 𑀥𑀸𑀭𑀁 𑀅𑀦𑀼𑀧𑀯𑁂𑀘𑁆𑀙𑀢𑀺, 𑀲𑀲𑁆𑀲𑀸𑀦𑀺 𑀲𑀫𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀏𑀯𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀢𑀺. 𑀲𑀫𑀡𑁂𑀲𑀼 𑁋 ‘‘𑀓𑀣𑀁, 𑀪𑀦𑁆𑀢𑁂, 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀼𑀮𑀪𑀸, 𑀲𑀫𑀡𑀥𑀫𑁆𑀫𑁂 𑀦 𑀧𑀫𑀚𑁆𑀚𑀣𑀸’’𑀢𑀺 𑀏𑀯𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀢𑀺.

𑀫𑀳𑀸𑀲𑀼𑀤𑀲𑁆𑀲𑀦𑀲𑀼𑀢𑁆𑀢𑀤𑁂𑀲𑀦𑀸𑀯𑀡𑁆𑀡𑀦𑀸

𑁨𑁧𑁦. 𑀔𑀼𑀤𑁆𑀤𑀓𑀦𑀕𑀭𑀓𑁂𑀢𑀺 𑀦𑀕𑀭𑀧𑀢𑀺𑀭𑀽𑀧𑀓𑁂 𑀲𑀫𑁆𑀩𑀸𑀥𑁂 𑀔𑀼𑀤𑁆𑀤𑀓𑀦𑀕𑀭𑀓𑁂. 𑀉𑀚𑁆𑀚𑀗𑁆𑀕𑀮𑀦𑀕𑀭𑀓𑁂𑀢𑀺 𑀯𑀺𑀲𑀫𑀦𑀕𑀭𑀓𑁂. 𑀲𑀸𑀔𑀸𑀦𑀕𑀭𑀓𑁂𑀢𑀺 𑀬𑀣𑀸 𑀭𑀼𑀓𑁆𑀔𑀸𑀦𑀁 𑀲𑀸𑀔𑀸 𑀦𑀸𑀫 𑀔𑀼𑀤𑁆𑀤𑀓𑀸 𑀳𑁄𑀦𑁆𑀢𑀺, 𑀏𑀯𑀫𑁂𑀯 𑀅𑀜𑁆𑀜𑁂𑀲𑀁 𑀫𑀳𑀸𑀦𑀕𑀭𑀸𑀦𑀁 𑀲𑀸𑀔𑀸𑀲𑀤𑀺𑀲𑁂 𑀔𑀼𑀤𑁆𑀤𑀓𑀦𑀕𑀭𑀓𑁂. 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀢𑀺 𑀔𑀢𑁆𑀢𑀺𑀬𑀫𑀳𑀸𑀲𑀸𑀭𑀧𑁆𑀧𑀢𑁆𑀢𑀸 𑀫𑀳𑀸𑀔𑀢𑁆𑀢𑀺𑀬𑀸. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀢𑁂𑀲𑀼 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸 𑀦𑀸𑀫 𑀬𑁂𑀲𑀁 𑀓𑁄𑀝𑀺𑀲𑀢𑀫𑁆𑀧𑀺 𑀓𑁄𑀝𑀺𑀲𑀳𑀲𑁆𑀲𑀫𑁆𑀧𑀺 𑀥𑀦𑀁 𑀦𑀺𑀔𑀡𑀺𑀢𑁆𑀯𑀸 𑀞𑀧𑀺𑀢𑀁, 𑀤𑀺𑀯𑀲𑀧𑀭𑀺𑀩𑁆𑀩𑀬𑁄 𑀏𑀓𑀁 𑀓𑀳𑀸𑀧𑀡𑀲𑀓𑀝𑀁 𑀦𑀺𑀕𑀘𑁆𑀙𑀢𑀺, 𑀲𑀸𑀬𑀁 𑀤𑁆𑀯𑁂 𑀧𑀯𑀺𑀲𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀦𑀸𑀫 𑀬𑁂𑀲𑀁 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀦𑀺𑀳𑀺𑀢𑀁 𑀳𑁄𑀢𑀺, 𑀤𑀺𑀯𑀲𑀧𑀭𑀺𑀩𑁆𑀩𑀬𑁄 𑀏𑀓𑁄 𑀓𑀳𑀸𑀧𑀡𑀓𑀼𑀫𑁆𑀪𑁄 𑀦𑀺𑀕𑀘𑁆𑀙𑀢𑀺, 𑀲𑀸𑀬𑀁 𑀏𑀓𑀲𑀓𑀝𑀁 𑀧𑀯𑀺𑀲𑀢𑀺. 𑀕𑀳𑀧𑀢𑀺𑀫𑀳𑀸𑀲𑀸𑀮𑀸 𑀦𑀸𑀫 𑀬𑁂𑀲𑀁 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀥𑀦𑀁 𑀦𑀺𑀳𑀺𑀢𑀁 𑀳𑁄𑀢𑀺, 𑀤𑀺𑀯𑀲𑀧𑀭𑀺𑀩𑁆𑀩𑀬𑁄 𑀧𑀜𑁆𑀘 𑀓𑀳𑀸𑀧𑀡𑀫𑁆𑀩𑀡𑀸𑀦𑀺 𑀦𑀺𑀕𑀘𑁆𑀙𑀦𑁆𑀢𑀺, 𑀲𑀸𑀬𑀁 𑀓𑀼𑀫𑁆𑀪𑁄 𑀧𑀯𑀺𑀲𑀢𑀺.

𑀫𑀸 ¶ 𑀳𑁂𑀯𑀁, 𑀆𑀦𑀦𑁆𑀤, 𑀅𑀯𑀘𑀸𑀢𑀺 𑀆𑀦𑀦𑁆𑀤, 𑀫𑀸 𑀏𑀯𑀁 𑀅𑀯𑀘, 𑀦 𑀇𑀫𑀁 ‘‘𑀔𑀼𑀤𑁆𑀤𑀓𑀦𑀕𑀭’’𑀦𑁆𑀢𑀺 ¶ 𑀯𑀢𑁆𑀢𑀩𑁆𑀩𑀁. 𑀅𑀳𑀜𑁆𑀳𑀺 𑀇𑀫𑀲𑁆𑀲𑁂𑀯 𑀦𑀕𑀭𑀲𑁆𑀲 𑀲𑀫𑁆𑀧𑀢𑁆𑀢𑀺𑀁 𑀓𑀣𑁂𑀢𑀼𑀁 𑁋 ‘‘𑀅𑀦𑁂𑀓𑀯𑀸𑀭𑀁 𑀢𑀺𑀝𑁆𑀞𑀁 𑀦𑀺𑀲𑀻𑀤𑀁 𑀫𑀳𑀦𑁆𑀢𑁂𑀦 𑀉𑀲𑁆𑀲𑀸𑀳𑁂𑀦, 𑀫𑀳𑀦𑁆𑀢𑁂𑀦 𑀧𑀭𑀓𑁆𑀓𑀫𑁂𑀦 𑀇𑀥𑀸𑀕𑀢𑁄’’𑀢𑀺 𑀯𑀢𑁆𑀯𑀸 𑀪𑀽𑀢𑀧𑀼𑀩𑁆𑀩𑀦𑁆𑀢𑀺𑀆𑀤𑀺𑀫𑀸𑀳. 𑀲𑀼𑀪𑀺𑀓𑁆𑀔𑀸𑀢𑀺 𑀔𑀚𑁆𑀚𑀪𑁄𑀚𑁆𑀚𑀲𑀫𑁆𑀧𑀦𑁆𑀦𑀸. 𑀳𑀢𑁆𑀣𑀺𑀲𑀤𑁆𑀤𑁂𑀦𑀸𑀢𑀺 𑀏𑀓𑀲𑁆𑀫𑀺𑀁 𑀳𑀢𑁆𑀣𑀺𑀫𑁆𑀳𑀺 𑀲𑀤𑁆𑀤𑀁 𑀓𑀭𑁄𑀦𑁆𑀢𑁂 𑀘𑀢𑀼𑀭𑀸𑀲𑀻𑀢𑀺𑀳𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀲𑀤𑁆𑀤𑀁 𑀓𑀭𑁄𑀦𑁆𑀢𑀺, 𑀇𑀢𑀺 𑀳𑀢𑁆𑀣𑀺𑀲𑀤𑁆𑀤𑁂𑀦 𑀅𑀯𑀺𑀯𑀺𑀢𑁆𑀢𑀸, 𑀳𑁄𑀢𑀺, 𑀢𑀣𑀸 𑀅𑀲𑁆𑀲𑀲𑀤𑁆𑀤𑁂𑀦. 𑀧𑀼𑀜𑁆𑀜𑀯𑀦𑁆𑀢𑁄 𑀧𑀦𑁂𑀢𑁆𑀣 𑀲𑀢𑁆𑀢𑀸 𑀘𑀢𑀼𑀲𑀺𑀦𑁆𑀥𑀯𑀬𑀼𑀢𑁆𑀢𑁂𑀳𑀺 𑀭𑀣𑁂𑀳𑀺 𑀅𑀜𑁆𑀜𑀫𑀜𑁆𑀜𑀁 𑀅𑀦𑀼𑀩𑀦𑁆𑀥𑀫𑀸𑀦𑀸 𑀅𑀦𑁆𑀢𑀭𑀯𑀻𑀣𑀻𑀲𑀼 𑀯𑀺𑀘𑀭𑀦𑁆𑀢𑀺, 𑀇𑀢𑀺 𑀭𑀣𑀲𑀤𑁆𑀤𑁂𑀦 𑀅𑀯𑀺𑀯𑀺𑀢𑁆𑀢𑀸 𑀳𑁄𑀢𑀺. 𑀦𑀺𑀘𑁆𑀘𑀁 𑀧𑀬𑁄𑀚𑀺𑀢𑀸𑀦𑁂𑀯 𑀧𑀦𑁂𑀢𑁆𑀣 𑀪𑁂𑀭𑀺𑀆𑀤𑀻𑀦𑀺 𑀢𑀽𑀭𑀺𑀬𑀸𑀦𑀺, 𑀇𑀢𑀺 𑀪𑁂𑀭𑀺𑀲𑀤𑁆𑀤𑀸𑀤𑀻𑀳𑀺𑀧𑀺 𑀅𑀯𑀺𑀯𑀺𑀢𑁆𑀢𑀸 𑀳𑁄𑀢𑀺. 𑀢𑀢𑁆𑀣 𑀲𑀫𑁆𑀫𑀲𑀤𑁆𑀤𑁄𑀢𑀺 𑀓𑀁𑀲𑀢𑀸𑀴𑀲𑀤𑁆𑀤𑁄. 𑀧𑀸𑀡𑀺𑀢𑀸𑀴𑀲𑀤𑁆𑀤𑁄𑀢𑀺 𑀧𑀸𑀡𑀺𑀦𑀸 𑀘𑀢𑀼𑀭𑀲𑁆𑀲𑀅𑀫𑁆𑀩𑀡𑀢𑀸𑀴𑀲𑀤𑁆𑀤𑁄. 𑀓𑀼𑀝𑀪𑁂𑀭𑀺𑀲𑀤𑁆𑀤𑁄𑀢𑀺𑀧𑀺 𑀯𑀤𑀦𑁆𑀢𑀺.

𑀅𑀲𑁆𑀦𑀸𑀣 ¶ 𑀧𑀺𑀯𑀣 𑀔𑀸𑀤𑀣𑀸𑀢𑀺 𑀅𑀲𑁆𑀦𑀸𑀣 𑀧𑀺𑀯𑀣 𑀔𑀸𑀤𑀣. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀪𑀼𑀜𑁆𑀚𑀣 𑀪𑁄𑀢𑀺 𑀇𑀫𑀺𑀦𑀸 𑀤𑀲𑀫𑁂𑀦 𑀲𑀤𑁆𑀤𑁂𑀦 𑀅𑀯𑀺𑀯𑀺𑀢𑁆𑀢𑀸 𑀳𑁄𑀢𑀺 𑀅𑀦𑀼𑀧𑀘𑁆𑀙𑀺𑀦𑁆𑀦𑀲𑀤𑁆𑀤𑀸. 𑀬𑀣𑀸 𑀧𑀦 𑀅𑀜𑁆𑀜𑁂𑀲𑀼 𑀦𑀕𑀭𑁂𑀲𑀼 ‘‘𑀓𑀘𑀯𑀭𑀁 𑀙𑀟𑁆𑀟𑁂𑀣, 𑀓𑀼𑀤𑀸𑀮𑀁 𑀕𑀡𑁆𑀳𑀣, 𑀧𑀘𑁆𑀙𑀺𑀁 𑀕𑀡𑁆𑀳𑀣, 𑀧𑀯𑀸𑀲𑀁 𑀕𑀫𑀺𑀲𑁆𑀲𑀸𑀫, 𑀢𑀡𑁆𑀟𑀼𑀮𑀧𑀼𑀝𑀁 𑀕𑀡𑁆𑀳𑀣, 𑀪𑀢𑁆𑀢𑀧𑀼𑀝𑀁 𑀕𑀡𑁆𑀳𑀣, 𑀨𑀮𑀓𑀸𑀯𑀼𑀥𑀸𑀤𑀻𑀦𑀺 𑀲𑀚𑁆𑀚𑀸𑀦𑀺 𑀓𑀭𑁄𑀣𑀸’’𑀢𑀺 𑀏𑀯𑀭𑀽𑀧𑀸 𑀲𑀤𑁆𑀤𑀸 𑀳𑁄𑀦𑁆𑀢𑀺, 𑀦 𑀬𑀺𑀥 𑀏𑀯𑀁 𑀅𑀳𑁄𑀲𑀻𑀢𑀺 𑀤𑀲𑁆𑀲𑁂𑀢𑀺.

‘‘𑀤𑀲𑀫𑁂𑀦 𑀲𑀤𑁆𑀤𑁂𑀦𑀸’’𑀢𑀺 𑀘 𑀯𑀢𑁆𑀯𑀸 ‘‘𑀓𑀼𑀲𑀸𑀯𑀢𑀻, 𑀆𑀦𑀦𑁆𑀤, 𑀭𑀸𑀚𑀥𑀸𑀦𑀻 𑀲𑀢𑁆𑀢𑀳𑀺 𑀧𑀸𑀓𑀸𑀭𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀸 𑀅𑀳𑁄𑀲𑀻’’𑀢𑀺 𑀲𑀩𑁆𑀩𑀁 𑀫𑀳𑀸𑀲𑀼𑀤𑀲𑁆𑀲𑀦𑀲𑀼𑀢𑁆𑀢𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀕𑀘𑁆𑀙 𑀢𑁆𑀯𑀁 𑀆𑀦𑀦𑁆𑀤𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀪𑀺𑀓𑁆𑀓𑀫𑀣𑀸𑀢𑀺 𑀅𑀪𑀺𑀫𑀼𑀔𑀸 𑀓𑀫𑀣, 𑀆𑀕𑀘𑁆𑀙𑀣𑀸𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀦 𑀢𑁂 𑀪𑀕𑀯𑀢𑁄 𑀆𑀕𑀢𑀪𑀸𑀯𑀁 𑀦 𑀚𑀸𑀦𑀦𑁆𑀢𑀻𑀢𑀺? 𑀚𑀸𑀦𑀦𑁆𑀢𑀺. 𑀩𑀼𑀤𑁆𑀥𑀸𑀦𑀁 𑀕𑀢𑀕𑀢𑀝𑁆𑀞𑀸𑀦𑀁 𑀦𑀸𑀫 𑀫𑀳𑀦𑁆𑀢𑀁 𑀓𑁄𑀮𑀸𑀳𑀮𑀁 𑀳𑁄𑀢𑀺, 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀦𑀺𑀲𑀺𑀦𑁆𑀦𑀢𑁆𑀢𑀸 𑀦 𑀆𑀕𑀢𑀸. ‘‘𑀢𑁂 𑀆𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀞𑀸𑀦𑀦𑀺𑀲𑀚𑁆𑀚𑁄𑀓𑀸𑀲𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀤𑀲𑁆𑀲𑀦𑁆𑀢𑀻’’𑀢𑀺 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀅𑀯𑁂𑀮𑀸𑀬𑀫𑁆𑀧𑀺 𑀪𑀕𑀯𑀸 𑀧𑁂𑀲𑁂𑀲𑀺.

𑀫𑀮𑁆𑀮𑀸𑀦𑀁 𑀯𑀦𑁆𑀤𑀦𑀸𑀯𑀡𑁆𑀡𑀦𑀸

𑁨𑁧𑁧. 𑀅𑀫𑁆𑀳𑀸𑀓𑀜𑁆𑀘 𑀦𑁄𑀢𑀺 𑀏𑀢𑁆𑀣 𑀦𑁄 𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀖𑀸𑀯𑀺𑀦𑁄𑀢𑀺 𑀉𑀧𑁆𑀧𑀦𑁆𑀦𑀤𑀼𑀓𑁆𑀔𑀸. 𑀤𑀼𑀫𑁆𑀫𑀦𑀸𑀢𑀺 𑀅𑀦𑀢𑁆𑀢𑀫𑀦𑀸. 𑀘𑁂𑀢𑁄𑀤𑀼𑀓𑁆𑀔𑀲𑀫𑀧𑁆𑀧𑀺𑀢𑀸𑀢𑀺 𑀤𑁄𑀫𑀦𑀲𑁆𑀲𑀲𑀫𑀧𑁆𑀧𑀺𑀢𑀸. 𑀓𑀼𑀮𑀧𑀭𑀺𑀯𑀢𑁆𑀢𑀲𑁄 𑀓𑀼𑀮𑀧𑀭𑀺𑀯𑀢𑁆𑀢𑀲𑁄 𑀞𑀧𑁂𑀢𑁆𑀯𑀸𑀢𑀺 𑀏𑀓𑁂𑀓𑀁 ¶ 𑀓𑀼𑀮𑀧𑀭𑀺𑀯𑀢𑁆𑀢𑀁 𑀓𑀼𑀮𑀲𑀗𑁆𑀔𑁂𑀧𑀁 𑀯𑀻𑀣𑀺𑀲𑀪𑀸𑀕𑁂𑀦 𑀘𑁂𑀯 𑀭𑀘𑁆𑀙𑀸𑀲𑀪𑀸𑀕𑁂𑀦 𑀘 𑀯𑀺𑀲𑀼𑀁 𑀯𑀺𑀲𑀼𑀁 𑀞𑀧𑁂𑀢𑁆𑀯𑀸.

𑀲𑀼𑀪𑀤𑁆𑀤𑀧𑀭𑀺𑀩𑁆𑀩𑀸𑀚𑀓𑀯𑀢𑁆𑀣𑀼𑀯𑀡𑁆𑀡𑀦𑀸

𑁨𑁧𑁨. 𑀲𑀼𑀪𑀤𑁆𑀤𑁄 ¶ 𑀦𑀸𑀫 𑀧𑀭𑀺𑀩𑁆𑀩𑀸𑀚𑀓𑁄𑀢𑀺 𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑁄. 𑀓𑀗𑁆𑀔𑀸𑀥𑀫𑁆𑀫𑁄𑀢𑀺 𑀯𑀺𑀫𑀢𑀺𑀥𑀫𑁆𑀫𑁄. 𑀓𑀲𑁆𑀫𑀸 𑀧𑀦𑀲𑁆𑀲 𑀅𑀚𑁆𑀚 𑀏𑀯𑀁 𑀅𑀳𑁄𑀲𑀻𑀢𑀺? 𑀢𑀣𑀸𑀯𑀺𑀥𑀉𑀧𑀦𑀺𑀲𑁆𑀲𑀬𑀢𑁆𑀢𑀸. 𑀧𑀼𑀩𑁆𑀩𑁂 𑀓𑀺𑀭 𑀧𑀼𑀜𑁆𑀜𑀓𑀭𑀡𑀓𑀸𑀮𑁂 𑀤𑁆𑀯𑁂 𑀪𑀸𑀢𑀭𑁄 𑀅𑀳𑁂𑀲𑀼𑀁. 𑀢𑁂 𑀏𑀓𑀢𑁄𑀯 𑀲𑀲𑁆𑀲𑀁 𑀅𑀓𑀁𑀲𑀼. 𑀢𑀢𑁆𑀣 𑀚𑁂𑀝𑁆𑀞𑀓𑀲𑁆𑀲 𑁋 ‘‘𑀏𑀓𑀲𑁆𑀫𑀺𑀁 𑀲𑀲𑁆𑀲𑁂 𑀦𑀯𑀯𑀸𑀭𑁂 𑀅𑀕𑁆𑀕𑀲𑀲𑁆𑀲𑀤𑀸𑀦𑀁 𑀫𑀬𑀸 𑀤𑀸𑀢𑀩𑁆𑀩’’𑀦𑁆𑀢𑀺 𑀅𑀳𑁄𑀲𑀺. 𑀲𑁄 𑀯𑀧𑁆𑀧𑀓𑀸𑀮𑁂 𑀩𑀻𑀚𑀕𑁆𑀕𑀁 𑀦𑀸𑀫 𑀤𑀢𑁆𑀯𑀸 𑀕𑀩𑁆𑀪𑀓𑀸𑀮𑁂 𑀓𑀦𑀺𑀝𑁆𑀞𑁂𑀦 𑀲𑀤𑁆𑀥𑀺𑀁 ¶ 𑀫𑀦𑁆𑀢𑁂𑀲𑀺 𑁋 ‘‘𑀕𑀩𑁆𑀪𑀓𑀸𑀮𑁂 𑀕𑀩𑁆𑀪𑀁 𑀨𑀸𑀮𑁂𑀢𑁆𑀯𑀸 𑀤𑀲𑁆𑀲𑀸𑀫𑀸’’𑀢𑀺 𑀓𑀦𑀺𑀝𑁆𑀞𑁄 𑁋 ‘‘𑀢𑀭𑀼𑀡𑀲𑀲𑁆𑀲𑀁 𑀦𑀸𑀲𑁂𑀢𑀼𑀓𑀸𑀫𑁄𑀲𑀻’’𑀢𑀺 𑀆𑀳. 𑀚𑁂𑀝𑁆𑀞𑁄 𑀓𑀦𑀺𑀝𑁆𑀞𑀲𑁆𑀲 𑀅𑀦𑀦𑀼𑀯𑀢𑁆𑀢𑀦𑀪𑀸𑀯𑀁 𑀜𑀢𑁆𑀯𑀸 𑀔𑁂𑀢𑁆𑀢𑀁 𑀯𑀺𑀪𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀢𑁄 𑀕𑀩𑁆𑀪𑀁 𑀨𑀸𑀮𑁂𑀢𑁆𑀯𑀸 𑀔𑀻𑀭𑀁 𑀦𑀻𑀳𑀭𑀺𑀢𑁆𑀯𑀸 𑀲𑀧𑁆𑀧𑀺𑀦𑀯𑀦𑀻𑀢𑁂𑀦 𑀲𑀁𑀬𑁄𑀚𑁂𑀢𑁆𑀯𑀸 𑀅𑀤𑀸𑀲𑀺, 𑀧𑀼𑀣𑀼𑀓𑀓𑀸𑀮𑁂 𑀧𑀼𑀣𑀼𑀓𑀁 𑀓𑀸𑀭𑁂𑀢𑁆𑀯𑀸 𑀅𑀤𑀸𑀲𑀺, 𑀮𑀸𑀬𑀦𑀓𑀸𑀮𑁂 𑀮𑀸𑀬𑀦𑀕𑁆𑀕𑀁, 𑀯𑁂𑀡𑀺𑀓𑀭𑀡𑁂 𑀯𑁂𑀡𑀕𑁆𑀕𑀁, 𑀓𑀮𑀸𑀧𑀸𑀤𑀻𑀲𑀼 𑀓𑀮𑀸𑀧𑀕𑁆𑀕𑀁, 𑀔𑀮𑀕𑁆𑀕𑀁, 𑀔𑀮𑀪𑀡𑁆𑀟𑀕𑁆𑀕𑀁, 𑀓𑁄𑀝𑁆𑀞𑀕𑁆𑀕𑀦𑁆𑀢𑀺 𑀏𑀯𑀁 𑀏𑀓𑀲𑀲𑁆𑀲𑁂 𑀦𑀯𑀯𑀸𑀭𑁂 𑀅𑀕𑁆𑀕𑀤𑀸𑀦𑀁 𑀅𑀤𑀸𑀲𑀺. 𑀓𑀦𑀺𑀝𑁆𑀞𑁄 𑀧𑀦 𑀉𑀤𑁆𑀥𑀭𑀺𑀢𑁆𑀯𑀸 𑀅𑀤𑀸𑀲𑀺.

𑀢𑁂𑀲𑀼 𑀚𑁂𑀝𑁆𑀞𑀓𑁄 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑁄 𑀚𑀸𑀢𑁄. 𑀪𑀕𑀯𑀸 𑁋 ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 ‘‘𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄 𑀏𑀓𑀲𑁆𑀫𑀺𑀁 𑀲𑀲𑁆𑀲𑁂 𑀦𑀯 𑀅𑀕𑁆𑀕𑀤𑀸𑀦𑀸𑀦𑀺 𑀅𑀤𑀸𑀲𑀺, 𑀇𑀫𑀁 𑀅𑀕𑁆𑀕𑀥𑀫𑁆𑀫𑀁 𑀢𑀲𑁆𑀲 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀲𑀩𑁆𑀩𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀲𑁄 𑀅𑀝𑁆𑀞𑀸𑀭𑀲𑀳𑀺 𑀩𑁆𑀭𑀳𑁆𑀫𑀓𑁄𑀝𑀻𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀓𑀦𑀺𑀝𑁆𑀞𑁄 𑀧𑀦 𑀑𑀳𑀻𑀬𑀺𑀢𑁆𑀯𑀸 𑀧𑀘𑁆𑀙𑀸 𑀤𑀸𑀦𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 𑀲𑀢𑁆𑀣𑀼 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀓𑀸𑀫𑁄 𑀅𑀳𑁄𑀲𑀺.

𑀫𑀸 𑀢𑀣𑀸𑀕𑀢𑀁 𑀯𑀺𑀳𑁂𑀞𑁂𑀲𑀻𑀢𑀺 𑀣𑁂𑀭𑁄 𑀓𑀺𑀭 𑁋 ‘‘𑀏𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀦𑀸𑀫 𑀅𑀢𑁆𑀢𑀦𑁄 𑀕𑀳𑀡𑀫𑁂𑀯 𑀕𑀡𑁆𑀳𑀦𑁆𑀢𑀺, 𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀸𑀧𑀦𑀢𑁆𑀣𑀸𑀬 𑀪𑀕𑀯𑀢𑁄 𑀩𑀳𑀼𑀁 𑀪𑀸𑀲𑀫𑀸𑀦𑀲𑁆𑀲 𑀓𑀸𑀬𑀯𑀸𑀘𑀸𑀯𑀺𑀳𑁂𑀲𑀸 𑀪𑀯𑀺𑀲𑁆𑀲𑀢𑀺, 𑀧𑀓𑀢𑀺𑀬𑀸𑀧𑀺 𑀘 𑀓𑀺𑀮𑀦𑁆𑀢𑁄𑀬𑁂𑀯 𑀪𑀕𑀯𑀸’’𑀢𑀺 𑀫𑀜𑁆𑀜𑀫𑀸𑀦𑁄 𑀏𑀯𑀫𑀸𑀳. 𑀧𑀭𑀺𑀩𑁆𑀩𑀸𑀚𑀓𑁄 𑁋 ‘‘𑀦 𑀫𑁂 𑀅𑀬𑀁 𑀪𑀺𑀓𑁆𑀔𑀼 𑀑𑀓𑀸𑀲𑀁 𑀓𑀭𑁄𑀢𑀺, 𑀅𑀢𑁆𑀣𑀺𑀓𑁂𑀦 𑀧𑀦 𑀅𑀦𑀼𑀯𑀢𑁆𑀢𑀺𑀢𑁆𑀯𑀸 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀣𑁂𑀭𑀁 𑀅𑀦𑀼𑀯𑀢𑁆𑀢𑀦𑁆𑀢𑁄 𑀤𑀼𑀢𑀺𑀬𑀫𑁆𑀧𑀺 𑀢𑀢𑀺𑀬𑀫𑁆𑀧𑀺 𑀆𑀳.

𑁨𑁧𑁩. 𑀅𑀲𑁆𑀲𑁄𑀲𑀺 ¶ 𑀔𑁄𑀢𑀺 𑀲𑀸𑀡𑀺𑀤𑁆𑀯𑀸𑀭𑁂 𑀞𑀺𑀢𑀲𑁆𑀲 𑀪𑀸𑀲𑀢𑁄 𑀧𑀓𑀢𑀺𑀲𑁄𑀢𑁂𑀦𑁂𑀯 𑀅𑀲𑁆𑀲𑁄𑀲𑀺, 𑀲𑀼𑀢𑁆𑀯𑀸 𑀘 𑀧𑀦 𑀲𑀼𑀪𑀤𑁆𑀤𑀲𑁆𑀲𑁂𑀯 𑀅𑀢𑁆𑀣𑀸𑀬 𑀫𑀳𑀢𑀸 𑀉𑀲𑁆𑀲𑀸𑀳𑁂𑀦 𑀆𑀕𑀢𑀢𑁆𑀢𑀸 𑀅𑀮𑀁 𑀆𑀦𑀦𑁆𑀤𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀮𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀜𑁆𑀜𑀸𑀧𑁂𑀓𑁆𑀔𑁄𑀯𑀸𑀢𑀺 𑀅𑀜𑁆𑀜𑀸𑀢𑀼𑀓𑀸𑀫𑁄𑀯 𑀳𑀼𑀢𑁆𑀯𑀸. 𑀅𑀩𑁆𑀪𑀜𑁆𑀜𑀺𑀁𑀲𑀽𑀢𑀺 𑀬𑀣𑀸 𑀢𑁂𑀲𑀁 𑀧𑀝𑀺𑀜𑁆𑀜𑀸, 𑀢𑀣𑁂𑀯 𑀚𑀸𑀦𑀺𑀁𑀲𑀼. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀘𑁂 𑀦𑁂𑀲𑀁 𑀲𑀸 𑀧𑀝𑀺𑀜𑁆𑀜𑀸 𑀦𑀺𑀬𑁆𑀬𑀸𑀦𑀺𑀓𑀸, 𑀲𑀩𑁆𑀩𑁂 𑀅𑀩𑁆𑀪𑀜𑁆𑀜𑀁𑀲𑀼, 𑀦𑁄 𑀘𑁂, 𑀦 𑀅𑀩𑁆𑀪𑀜𑁆𑀜𑀁𑀲𑀼. 𑀢𑀲𑁆𑀫𑀸 𑀓𑀺𑀁 𑀢𑁂𑀲𑀁 𑀧𑀝𑀺𑀜𑁆𑀜𑀸 𑀦𑀺𑀬𑁆𑀬𑀸𑀦𑀺𑀓𑀸, 𑀅𑀦𑀺𑀬𑁆𑀬𑀸𑀦𑀺𑀓𑀸𑀢𑀺 ¶ 𑀅𑀬𑀫𑁂𑀯 ¶ 𑀢𑀲𑁆𑀲 𑀧𑀜𑁆𑀳𑀲𑁆𑀲 𑀅𑀢𑁆𑀣𑁄. 𑀅𑀣 𑀪𑀕𑀯𑀸 𑀢𑁂𑀲𑀁 𑀅𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀓𑀣𑀦𑁂𑀦 𑀅𑀢𑁆𑀣𑀸𑀪𑀸𑀯𑀢𑁄 𑀘𑁂𑀯 𑀑𑀓𑀸𑀲𑀸𑀪𑀸𑀯𑀢𑁄 𑀘 ‘‘𑀅𑀮’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀥𑀫𑁆𑀫𑀫𑁂𑀯 𑀤𑁂𑀲𑁂𑀲𑀺. 𑀧𑀞𑀫𑀬𑀸𑀫𑀲𑁆𑀫𑀺𑀜𑁆𑀳𑀺 𑀫𑀮𑁆𑀮𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀲𑀼𑀪𑀤𑁆𑀤𑀲𑁆𑀲, 𑀧𑀘𑁆𑀙𑀺𑀫𑀬𑀸𑀫𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀑𑀯𑀤𑀺𑀢𑁆𑀯𑀸 𑀩𑀮𑀯𑀧𑀘𑁆𑀘𑀽𑀲𑀲𑀫𑀬𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺𑀘𑁆𑀘𑁂𑀯 𑀪𑀕𑀯𑀸 𑀆𑀕𑀢𑁄.

𑁨𑁧𑁪. 𑀲𑀫𑀡𑁄𑀧𑀺 𑀢𑀢𑁆𑀣 𑀦 𑀉𑀧𑀮𑀩𑁆𑀪𑀢𑀻𑀢𑀺 𑀧𑀞𑀫𑁄 𑀲𑁄𑀢𑀸𑀧𑀦𑁆𑀦𑀲𑀫𑀡𑁄𑀧𑀺 𑀢𑀢𑁆𑀣 𑀦𑀢𑁆𑀣𑀺, 𑀤𑀼𑀢𑀺𑀬𑁄 𑀲𑀓𑀤𑀸𑀕𑀸𑀫𑀺𑀲𑀫𑀡𑁄𑀧𑀺, 𑀢𑀢𑀺𑀬𑁄 𑀅𑀦𑀸𑀕𑀸𑀫𑀺𑀲𑀫𑀡𑁄𑀧𑀺, 𑀘𑀢𑀼𑀢𑁆𑀣𑁄 𑀅𑀭𑀳𑀢𑁆𑀢𑀲𑀫𑀡𑁄𑀧𑀺 𑀢𑀢𑁆𑀣 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. ‘‘𑀇𑀫𑀲𑁆𑀫𑀺𑀁 𑀔𑁄’’𑀢𑀺 𑀧𑀼𑀭𑀺𑀫𑀤𑁂𑀲𑀦𑀸𑀬 𑀅𑀦𑀺𑀬𑀫𑀢𑁄 𑀯𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀲𑀸𑀲𑀦𑀁 𑀦𑀺𑀬𑀫𑁂𑀦𑁆𑀢𑁄 𑀆𑀳. 𑀲𑀼𑀜𑁆𑀜𑀸 𑀧𑀭𑀧𑁆𑀧𑀯𑀸𑀤𑀸 𑀲𑀫𑀡𑁂𑀪𑀻𑀢𑀺 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁 𑀅𑀢𑁆𑀣𑀸𑀬 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁂𑀳𑀺 𑀘𑀢𑀽𑀳𑀺, 𑀫𑀕𑁆𑀕𑀝𑁆𑀞𑁂𑀳𑀺 𑀘𑀢𑀽𑀳𑀺, 𑀨𑀮𑀝𑁆𑀞𑁂𑀳𑀺 𑀘𑀢𑀽𑀳𑀻𑀢𑀺 𑀤𑁆𑀯𑀸𑀤𑀲𑀳𑀺 𑀲𑀫𑀡𑁂𑀳𑀺 𑀲𑀼𑀜𑁆𑀜𑀸 𑀧𑀭𑀧𑁆𑀧𑀯𑀸𑀤𑀸 𑀢𑀼𑀘𑁆𑀙𑀸 𑀭𑀺𑀢𑁆𑀢𑀓𑀸. 𑀇𑀫𑁂 𑀘 𑀲𑀼𑀪𑀤𑁆𑀤𑀸𑀢𑀺 𑀇𑀫𑁂 𑀤𑁆𑀯𑀸𑀤𑀲 𑀪𑀺𑀓𑁆𑀔𑀽. 𑀲𑀫𑁆𑀫𑀸 𑀯𑀺𑀳𑀭𑁂𑀬𑁆𑀬𑀼𑀦𑁆𑀢𑀺 𑀏𑀢𑁆𑀣 𑀲𑁄𑀢𑀸𑀧𑀦𑁆𑀦𑁄 𑀅𑀢𑁆𑀢𑀦𑁄 𑀅𑀥𑀺𑀕𑀢𑀝𑁆𑀞𑀸𑀦𑀁 𑀅𑀜𑁆𑀜𑀲𑁆𑀲 𑀓𑀣𑁂𑀢𑁆𑀯𑀸 𑀢𑀁 𑀲𑁄𑀢𑀸𑀧𑀦𑁆𑀦𑀁 𑀓𑀭𑁄𑀦𑁆𑀢𑁄 𑀲𑀫𑁆𑀫𑀸 𑀯𑀺𑀳𑀭𑀢𑀺 𑀦𑀸𑀫. 𑀏𑀲 𑀦𑀬𑁄 𑀲𑀓𑀤𑀸𑀕𑀸𑀫𑀺𑀆𑀤𑀻𑀲𑀼. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑁄 𑀅𑀜𑁆𑀜𑀫𑁆𑀧𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀁 𑀓𑀭𑁄𑀦𑁆𑀢𑁄 𑀲𑀫𑁆𑀫𑀸 𑀯𑀺𑀳𑀭𑀢𑀺 𑀦𑀸𑀫. 𑀏𑀲 𑀦𑀬𑁄 𑀲𑁂𑀲𑀫𑀕𑁆𑀕𑀝𑁆𑀞𑁂𑀲𑀼. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀢𑁆𑀣𑀸𑀬 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄 𑀅𑀢𑁆𑀢𑀦𑁄 𑀧𑀕𑀼𑀡𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸 𑀅𑀜𑁆𑀜𑀫𑁆𑀧𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀢𑁆𑀣𑀸𑀬 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀁 𑀓𑀭𑁄𑀦𑁆𑀢𑁄 𑀲𑀫𑁆𑀫𑀸 𑀯𑀺𑀳𑀭𑀢𑀺 𑀦𑀸𑀫. 𑀏𑀲 𑀦𑀬𑁄 𑀲𑁂𑀲𑀫𑀕𑁆𑀕𑀢𑁆𑀣𑀸𑀬 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁂𑀲𑀼. 𑀇𑀤𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀲𑀫𑁆𑀫𑀸 𑀯𑀺𑀳𑀭𑁂𑀬𑁆𑀬𑀼’’𑀦𑁆𑀢𑀺. 𑀅𑀲𑀼𑀜𑁆𑀜𑁄 𑀮𑁄𑀓𑁄 𑀅𑀭𑀳𑀦𑁆𑀢𑁂𑀳𑀺 𑀅𑀲𑁆𑀲𑀸𑀢𑀺 𑀦𑀴𑀯𑀦𑀁 𑀲𑀭𑀯𑀦𑀁 𑀯𑀺𑀬 𑀦𑀺𑀭𑀦𑁆𑀢𑀭𑁄 ¶ 𑀅𑀲𑁆𑀲.

𑀏𑀓𑀽𑀦𑀢𑀺𑀁𑀲𑁄 𑀯𑀬𑀲𑀸𑀢𑀺 𑀯𑀬𑁂𑀦 𑀏𑀓𑀽𑀦𑀢𑀺𑀁𑀲𑀯𑀲𑁆𑀲𑁄 𑀳𑀼𑀢𑁆𑀯𑀸. 𑀬𑀁 𑀧𑀩𑁆𑀩𑀚𑀺𑀦𑁆𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀓𑀺𑀁 𑀓𑀼𑀲𑀮𑀸𑀦𑀼𑀏𑀲𑀻𑀢𑀺 ‘‘𑀓𑀺𑀁 𑀓𑀼𑀲𑀮’’𑀦𑁆𑀢𑀺 𑀅𑀦𑀼𑀏𑀲𑀦𑁆𑀢𑁄 𑀧𑀭𑀺𑀬𑁂𑀲𑀦𑁆𑀢𑁄. 𑀢𑀢𑁆𑀣 𑁋 ‘‘𑀓𑀺𑀁 𑀓𑀼𑀲𑀮’’𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀁 𑀕𑀯𑁂𑀲𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀬𑀢𑁄 𑀅𑀳𑀦𑁆𑀢𑀺 𑀬𑀢𑁄 𑀧𑀝𑁆𑀞𑀸𑀬 𑀅𑀳𑀁 𑀧𑀩𑁆𑀩𑀚𑀺𑀢𑁄, 𑀏𑀢𑁆𑀣𑀦𑁆𑀢𑀭𑁂 𑀲𑀫𑀥𑀺𑀓𑀸𑀦𑀺 𑀧𑀜𑁆𑀜𑀸𑀲 𑀯𑀲𑁆𑀲𑀸𑀦𑀺 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀜𑀸𑀬𑀲𑁆𑀲 𑀥𑀫𑁆𑀫𑀲𑁆𑀲𑀸𑀢𑀺 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑀲𑁆𑀲. 𑀧𑀤𑁂𑀲𑀯𑀢𑁆𑀢𑀻𑀢𑀺 𑀧𑀤𑁂𑀲𑁂 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁂 𑀧𑀯𑀢𑁆𑀢𑀦𑁆𑀢𑁄. 𑀇𑀢𑁄 𑀩𑀳𑀺𑀤𑁆𑀥𑀸𑀢𑀺 𑀫𑀫 𑀲𑀸𑀲𑀦𑀢𑁄 𑀩𑀳𑀺𑀤𑁆𑀥𑀸. 𑀲𑀫𑀡𑁄𑀧𑀺 ¶ 𑀦𑀢𑁆𑀣𑀻𑀢𑀺 𑀧𑀤𑁂𑀲𑀯𑀢𑁆𑀢𑀺𑀯𑀺𑀧𑀲𑁆𑀲𑀓𑁄𑀧𑀺 𑀦𑀢𑁆𑀣𑀺, 𑀧𑀞𑀫𑀲𑀫𑀡𑁄 𑀲𑁄𑀢𑀸𑀧𑀦𑁆𑀦𑁄𑀧𑀺 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀬𑁂 𑀏𑀢𑁆𑀣𑀸𑀢𑀺 𑀬𑁂 𑀢𑀼𑀫𑁆𑀳𑁂 𑀏𑀢𑁆𑀣 𑀲𑀸𑀲𑀦𑁂 𑀲𑀢𑁆𑀣𑀸𑀭𑀸 𑀲𑀫𑁆𑀫𑀼𑀔𑀸 𑀅𑀦𑁆𑀢𑁂𑀯𑀸𑀲𑀺𑀓𑀸𑀪𑀺𑀲𑁂𑀓𑁂𑀦 𑀅𑀪𑀺𑀲𑀺𑀢𑁆𑀢𑀸, 𑀢𑁂𑀲𑀁 𑀯𑁄 𑀮𑀸𑀪𑀸 𑀢𑁂𑀲𑀁 𑀯𑁄 𑀲𑀼𑀮𑀤𑁆𑀥𑀦𑁆𑀢𑀺. 𑀩𑀸𑀳𑀺𑀭𑀲𑀫𑀬𑁂 𑀓𑀺𑀭 𑀬𑀁 𑀅𑀦𑁆𑀢𑁂𑀯𑀸𑀲𑀺𑀓𑀁 𑀆𑀘𑀭𑀺𑀬𑁄 𑁋 ‘‘𑀇𑀫𑀁 𑀧𑀩𑁆𑀩𑀸𑀚𑁂𑀳𑀺 ¶ , 𑀇𑀫𑀁 𑀑𑀯𑀤, 𑀇𑀫𑀁 𑀅𑀦𑀼𑀲𑀸𑀲𑀸’’𑀢𑀺 𑀯𑀤𑀢𑀺, 𑀲𑁄 𑀢𑁂𑀦 𑀅𑀢𑁆𑀢𑀦𑁄 𑀞𑀸𑀦𑁂 𑀞𑀧𑀺𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑁋 ‘‘𑀇𑀫𑀁 𑀧𑀩𑁆𑀩𑀚𑁂𑀳𑀺, 𑀇𑀫𑀁 𑀑𑀯𑀤, 𑀇𑀫𑀁 𑀅𑀦𑀼𑀲𑀸𑀲𑀸’’𑀢𑀺 𑀇𑀫𑁂 𑀮𑀸𑀪𑀸 𑀳𑁄𑀦𑁆𑀢𑀺. 𑀣𑁂𑀭𑀫𑁆𑀧𑀺 𑀲𑀼𑀪𑀤𑁆𑀤𑁄 𑀢𑀫𑁂𑀯 𑀩𑀸𑀳𑀺𑀭𑀲𑀫𑀬𑀁 𑀕𑀳𑁂𑀢𑁆𑀯𑀸 𑀏𑀯𑀫𑀸𑀳.

𑀅𑀮𑀢𑁆𑀣 𑀔𑁄𑀢𑀺 𑀓𑀣𑀁 𑀅𑀮𑀢𑁆𑀣? 𑀣𑁂𑀭𑁄 𑀓𑀺𑀭 𑀦𑀁 𑀏𑀓𑀫𑀦𑁆𑀢𑀁 𑀦𑁂𑀢𑁆𑀯𑀸 𑀉𑀤𑀓𑀢𑀼𑀫𑁆𑀩𑀢𑁄 𑀧𑀸𑀦𑀻𑀬𑁂𑀦 𑀲𑀻𑀲𑀁 𑀢𑁂𑀫𑁂𑀢𑁆𑀯𑀸 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑀸𑀧𑁂𑀢𑁆𑀯𑀸 𑀲𑀭𑀡𑀸𑀦𑀺 𑀤𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀆𑀦𑁂𑀲𑀺. 𑀪𑀕𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺. 𑀲𑁄 𑀢𑀁 𑀕𑀳𑁂𑀢𑁆𑀯𑀸 𑀉𑀬𑁆𑀬𑀸𑀦𑀲𑁆𑀲 𑀏𑀓𑀫𑀦𑁆𑀢𑁂 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀸𑀬 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀆𑀕𑀫𑁆𑀫 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀢𑀁 𑀲𑀦𑁆𑀥𑀸𑀬 𑁋 ‘‘𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑁄 𑀔𑁄 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑁄 𑀘 𑀪𑀕𑀯𑀢𑁄 𑀧𑀘𑁆𑀙𑀺𑀫𑁄 𑀲𑀓𑁆𑀔𑀺𑀲𑀸𑀯𑀓𑁄 𑀅𑀳𑁄𑀲𑀻𑀢𑀺 𑀲𑀗𑁆𑀕𑀻𑀢𑀺𑀓𑀸𑀭𑀓𑀸𑀦𑀁 𑀯𑀘𑀦𑀁. 𑀢𑀢𑁆𑀣 𑀬𑁄 𑀪𑀕𑀯𑀢𑀺 𑀥𑀭𑀫𑀸𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀉𑀧𑀲𑀫𑁆𑀧𑀤𑀁 𑀮𑀪𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀉𑀧𑀲𑀫𑁆𑀧𑀤𑀫𑁆𑀧𑀺 𑀯𑀸 𑀥𑀭𑀫𑀸𑀦𑁂𑀬𑁂𑀯 𑀮𑀪𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀓𑀫𑁆𑀫𑀝𑁆𑀞𑀸𑀦𑀫𑁆𑀧𑀺 𑀯𑀸 𑀥𑀭𑀫𑀸𑀦𑁂𑀬𑁂𑀯 𑀕𑀳𑁂𑀢𑁆𑀯𑀸 𑀅𑀧𑀭𑀪𑀸𑀕𑁂 𑀅𑀭𑀳𑀢𑁆𑀢𑀫𑁂𑀯 𑀧𑀸𑀧𑀼𑀡𑀸𑀢𑀺, 𑀲𑀩𑁆𑀩𑁄𑀧𑀺 𑀲𑁄 𑀧𑀘𑁆𑀙𑀺𑀫𑁄 𑀲𑀓𑁆𑀔𑀺𑀲𑀸𑀯𑀓𑁄. 𑀅𑀬𑀁 𑀧𑀦 𑀥𑀭𑀫𑀸𑀦𑁂𑀬𑁂𑀯 𑀪𑀕𑀯𑀢𑀺 ¶ 𑀧𑀩𑁆𑀩𑀚𑀺𑀢𑁄 𑀘 𑀉𑀧𑀲𑀫𑁆𑀧𑀦𑁆𑀦𑁄 𑀘 𑀓𑀫𑁆𑀫𑀝𑁆𑀞𑀸𑀦𑀜𑁆𑀘 𑀕𑀳𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄𑀢𑀺.

𑀧𑀜𑁆𑀘𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀣𑀸𑀕𑀢𑀧𑀘𑁆𑀙𑀺𑀫𑀯𑀸𑀘𑀸𑀯𑀡𑁆𑀡𑀦𑀸

𑁨𑁧𑁬. 𑀇𑀤𑀸𑀦𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀑𑀯𑀸𑀤𑀁 𑀆𑀭𑀪𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀅𑀣 𑀔𑁄 𑀪𑀕𑀯𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄𑀢𑀺 𑀥𑀫𑁆𑀫𑁄𑀧𑀺 𑀤𑁂𑀲𑀺𑀢𑁄 𑀘𑁂𑀯 ¶ 𑀧𑀜𑁆𑀜𑀢𑁆𑀢𑁄 𑀘, 𑀯𑀺𑀦𑀬𑁄𑀧𑀺 𑀤𑁂𑀲𑀺𑀢𑁄 𑀘𑁂𑀯 𑀧𑀜𑁆𑀜𑀢𑁆𑀢𑁄 𑀘. 𑀧𑀜𑁆𑀜𑀢𑁆𑀢𑁄 𑀘 𑀦𑀸𑀫 𑀞𑀧𑀺𑀢𑁄 𑀧𑀝𑁆𑀞𑀧𑀺𑀢𑁄𑀢𑀺 𑀅𑀢𑁆𑀣𑁄. 𑀲𑁄 𑀯𑁄 𑀫𑀫𑀘𑁆𑀘𑀬𑁂𑀦𑀸𑀢𑀺 𑀲𑁄 𑀥𑀫𑁆𑀫𑀯𑀺𑀦𑀬𑁄 𑀢𑀼𑀫𑁆𑀳𑀸𑀓𑀁 𑀫𑀫𑀘𑁆𑀘𑀬𑁂𑀦 𑀲𑀢𑁆𑀣𑀸. 𑀫𑀬𑀸 𑀳𑀺 𑀯𑁄 𑀞𑀺𑀢𑁂𑀦𑁂𑀯 𑁋 ‘‘𑀇𑀤𑀁 𑀮𑀳𑀼𑀓𑀁, 𑀇𑀤𑀁 𑀕𑀭𑀼𑀓𑀁, 𑀇𑀤𑀁 𑀲𑀢𑁂𑀓𑀺𑀘𑁆𑀙𑀁, 𑀇𑀤𑀁 𑀅𑀢𑁂𑀓𑀺𑀘𑁆𑀙𑀁, 𑀇𑀤𑀁 𑀮𑁄𑀓𑀯𑀚𑁆𑀚𑀁, 𑀇𑀤𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀅𑀬𑀁 𑀆𑀧𑀢𑁆𑀢𑀺 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀺𑀓𑁂 𑀯𑀼𑀝𑁆𑀞𑀸𑀢𑀺, 𑀅𑀬𑀁 𑀆𑀧𑀢𑁆𑀢𑀺 𑀕𑀡𑀲𑁆𑀲 𑀲𑀦𑁆𑀢𑀺𑀓𑁂 𑀯𑀼𑀝𑁆𑀞𑀸𑀢𑀺, 𑀅𑀬𑀁 𑀲𑀗𑁆𑀖𑀲𑁆𑀲 𑀲𑀦𑁆𑀢𑀺𑀓𑁂 𑀯𑀼𑀝𑁆𑀞𑀸𑀢𑀻’’𑀢𑀺 ¶ 𑀲𑀢𑁆𑀢𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀯𑀲𑁂𑀦 𑀑𑀢𑀺𑀡𑁆𑀡𑁂 𑀯𑀢𑁆𑀣𑀼𑀲𑁆𑀫𑀺𑀁 𑀲𑀔𑀦𑁆𑀥𑀓𑀧𑀭𑀺𑀯𑀸𑀭𑁄 𑀉𑀪𑀢𑁄𑀯𑀺𑀪𑀗𑁆𑀕𑁄 𑀯𑀺𑀦𑀬𑁄 𑀦𑀸𑀫 𑀤𑁂𑀲𑀺𑀢𑁄, 𑀢𑀁 𑀲𑀓𑀮𑀫𑁆𑀧𑀺 𑀯𑀺𑀦𑀬𑀧𑀺𑀝𑀓𑀁 𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀼𑀫𑁆𑀳𑀸𑀓𑀁 𑀲𑀢𑁆𑀣𑀼𑀓𑀺𑀘𑁆𑀘𑀁 𑀲𑀸𑀥𑁂𑀲𑁆𑀲𑀢𑀺.

𑀞𑀺𑀢𑁂𑀦𑁂𑀯 𑀘 𑀫𑀬𑀸 𑁋 ‘‘𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀧𑀜𑁆𑀘 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦 𑀇𑀫𑁂 𑀥𑀫𑁆𑀫𑁂 𑀯𑀺𑀪𑀚𑀺𑀢𑁆𑀯𑀸 𑀯𑀺𑀪𑀚𑀺𑀢𑁆𑀯𑀸 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀤𑁂𑀲𑀺𑀢𑀁, 𑀢𑀁 𑀲𑀓𑀮𑀫𑁆𑀧𑀺 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀼𑀫𑁆𑀳𑀸𑀓𑀁 𑀲𑀢𑁆𑀣𑀼𑀓𑀺𑀘𑁆𑀘𑀁 𑀲𑀸𑀥𑁂𑀲𑁆𑀲𑀢𑀺. 𑀞𑀺𑀢𑁂𑀦𑁂𑀯 𑀘 𑀫𑀬𑀸 𑁋 ‘‘𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺, 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄, 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺, 𑀩𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺, 𑀦𑀯 𑀳𑁂𑀢𑀽, 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸, 𑀲𑀢𑁆𑀢 𑀨𑀲𑁆𑀲𑀸, 𑀲𑀢𑁆𑀢 𑀯𑁂𑀤𑀦𑀸, 𑀲𑀢𑁆𑀢 𑀲𑀜𑁆𑀜𑀸, 𑀲𑀢𑁆𑀢 𑀲𑀜𑁆𑀘𑁂𑀢𑀦𑀸, 𑀲𑀢𑁆𑀢 𑀘𑀺𑀢𑁆𑀢𑀸𑀦𑀺. 𑀢𑀢𑁆𑀭𑀸𑀧𑀺 ‘𑀏𑀢𑁆𑀢𑀓𑀸 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸, 𑀏𑀢𑁆𑀢𑀓𑀸 𑀭𑀽𑀧𑀸𑀯𑀘𑀭𑀸, 𑀏𑀢𑁆𑀢𑀓𑀸 𑀅𑀭𑀽𑀧𑀸𑀯𑀘𑀭𑀸, 𑀏𑀢𑁆𑀢𑀓𑀸 𑀧𑀭𑀺𑀬𑀸𑀧𑀦𑁆𑀦𑀸, 𑀏𑀢𑁆𑀢𑀓𑀸 𑀅𑀧𑀭𑀺𑀬𑀸𑀧𑀦𑁆𑀦𑀸, 𑀏𑀢𑁆𑀢𑀓𑀸 𑀮𑁄𑀓𑀺𑀬𑀸, 𑀏𑀢𑁆𑀢𑀓𑀸 𑀮𑁄𑀓𑀼𑀢𑁆𑀢𑀭𑀸’𑀢𑀺’’ 𑀇𑀫𑁂 𑀥𑀫𑁆𑀫𑁂 𑀯𑀺𑀪𑀚𑀺𑀢𑁆𑀯𑀸 𑀯𑀺𑀪𑀚𑀺𑀢𑁆𑀯𑀸 𑀘𑀢𑀼𑀯𑀻𑀲𑀢𑀺𑀲𑀫𑀦𑁆𑀢𑀧𑀝𑁆𑀞𑀸𑀦𑀅𑀦𑀦𑁆𑀢𑀦𑀬𑀫𑀳𑀸𑀧𑀝𑁆𑀞𑀸𑀦𑀧𑀝𑀺𑀫𑀡𑁆𑀟𑀺𑀢𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀤𑁂𑀲𑀺𑀢𑀁, 𑀢𑀁 𑀲𑀓𑀮𑀫𑁆𑀧𑀺 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀼𑀫𑁆𑀳𑀸𑀓𑀁 𑀲𑀢𑁆𑀣𑀼𑀓𑀺𑀘𑁆𑀘𑀁 𑀲𑀸𑀥𑁂𑀲𑁆𑀲𑀢𑀺.

𑀇𑀢𑀺 𑀲𑀩𑁆𑀩𑀫𑁆𑀧𑁂𑀢𑀁 𑀅𑀪𑀺𑀲𑀫𑁆𑀩𑁄𑀥𑀺𑀢𑁄 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀸 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀸𑀦𑀺 𑀪𑀸𑀲𑀺𑀢𑀁 𑀮𑀧𑀺𑀢𑀁 𑁋 ‘‘𑀢𑀻𑀡𑀺 𑀧𑀺𑀝𑀓𑀸𑀦𑀺, 𑀧𑀜𑁆𑀘 𑀦𑀺𑀓𑀸𑀬𑀸, 𑀦𑀯𑀗𑁆𑀕𑀸𑀦𑀺, 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻’’𑀢𑀺 𑀏𑀯𑀁 𑀫𑀳𑀸𑀧𑀪𑁂𑀤𑀁 𑀳𑁄𑀢𑀺. 𑀇𑀢𑀺 ¶ 𑀇𑀫𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀺 𑀢𑀺𑀝𑁆𑀞𑀦𑁆𑀢𑀺, 𑀅𑀳𑀁 𑀏𑀓𑁄𑀯 𑀧𑀭𑀺𑀦𑀺𑀩𑁆𑀩𑀸𑀬𑀸𑀫𑀺. 𑀅𑀳𑀜𑁆𑀘 𑀔𑁄 𑀧𑀦 𑀤𑀸𑀦𑀺 𑀏𑀓𑀓𑁄𑀯 𑀑𑀯𑀤𑀸𑀫𑀺 𑀅𑀦𑀼𑀲𑀸𑀲𑀸𑀫𑀺, 𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀇𑀫𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀺 𑀢𑀼𑀫𑁆𑀳𑁂 𑀑𑀯𑀤𑀺𑀲𑁆𑀲𑀦𑁆𑀢𑀺 𑀅𑀦𑀼𑀲𑀸𑀲𑀺𑀲𑁆𑀲𑀦𑁆𑀢𑀻𑀢𑀺 𑀏𑀯𑀁 𑀪𑀕𑀯𑀸 𑀩𑀳𑀽𑀦𑀺 𑀓𑀸𑀭𑀡𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑁋 ‘‘𑀲𑁄 𑀯𑁄 𑀫𑀫𑀘𑁆𑀘𑀬𑁂𑀦 𑀲𑀢𑁆𑀣𑀸’’𑀢𑀺 𑀑𑀯𑀤𑀺𑀢𑁆𑀯𑀸 𑀧𑀼𑀦 𑀅𑀦𑀸𑀕𑀢𑁂 𑀘𑀸𑀭𑀺𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 𑀬𑀣𑀸 𑀔𑁄 𑀧𑀦𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 ¶ 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀓𑀣𑁂𑀦𑁆𑀢𑀺 𑀯𑁄𑀳𑀭𑀦𑁆𑀢𑀺. 𑀦𑀸𑀫𑁂𑀦 𑀯𑀸 𑀕𑁄𑀢𑁆𑀢𑁂𑀦 𑀯𑀸𑀢𑀺 𑀦𑀯𑀓𑀸𑀢𑀺 𑀅𑀯𑀢𑁆𑀯𑀸 ‘‘𑀢𑀺𑀲𑁆𑀲, 𑀦𑀸𑀕𑀸’’𑀢𑀺 𑀏𑀯𑀁 𑀦𑀸𑀫𑁂𑀦 𑀯𑀸, ‘‘𑀓𑀲𑁆𑀲𑀧, 𑀕𑁄𑀢𑀫𑀸’’𑀢𑀺 𑀏𑀯𑀁 𑀕𑁄𑀢𑁆𑀢𑁂𑀦 𑀯𑀸, ‘‘𑀆𑀯𑀼𑀲𑁄 𑀢𑀺𑀲𑁆𑀲, 𑀆𑀯𑀼𑀲𑁄 𑀓𑀲𑁆𑀲𑀧𑀸’’𑀢𑀺 𑀏𑀯𑀁 𑀆𑀯𑀼𑀲𑁄𑀯𑀸𑀤𑁂𑀦 𑀯𑀸 𑀲𑀫𑀼𑀤𑀸𑀘𑀭𑀺𑀢𑀩𑁆𑀩𑁄. 𑀪𑀦𑁆𑀢𑁂𑀢𑀺 𑀯𑀸 𑀆𑀬𑀲𑁆𑀫𑀸𑀢𑀺 𑀯𑀸𑀢𑀺 𑀪𑀦𑁆𑀢𑁂 𑀢𑀺𑀲𑁆𑀲, 𑀆𑀬𑀲𑁆𑀫𑀸 𑀢𑀺𑀲𑁆𑀲𑀸𑀢𑀺 𑀏𑀯𑀁 𑀲𑀫𑀼𑀤𑀸𑀘𑀭𑀺𑀢𑀩𑁆𑀩𑁄. 𑀲𑀫𑀽𑀳𑀦𑀢𑀽𑀢𑀺 𑀆𑀓𑀗𑁆𑀔𑀫𑀸𑀦𑁄 𑀲𑀫𑀽𑀳𑀦𑀢𑀼, 𑀬𑀤𑀺 𑀇𑀘𑁆𑀙𑀢𑀺 𑀲𑀫𑀽𑀳𑀦𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀧𑀦 𑀲𑀫𑀽𑀳𑀦𑀣𑀸𑀢𑀺 𑀏𑀓𑀁𑀲𑁂𑀦𑁂𑀯 𑀅𑀯𑀢𑁆𑀯𑀸 𑀯𑀺𑀓𑀧𑁆𑀧𑀯𑀘𑀦𑁂𑀦𑁂𑀯 𑀞𑀧𑁂𑀲𑀻𑀢𑀺? 𑀫𑀳𑀸𑀓𑀲𑁆𑀲𑀧𑀲𑁆𑀲 𑀩𑀮𑀁 𑀤𑀺𑀝𑁆𑀞𑀢𑁆𑀢𑀸. 𑀧𑀲𑁆𑀲𑀢𑀺 𑀳𑀺 𑀪𑀕𑀯𑀸 ¶ 𑁋 ‘‘𑀲𑀫𑀽𑀳𑀦𑀣𑀸𑀢𑀺 𑀯𑀼𑀢𑁆𑀢𑁂𑀧𑀺 𑀲𑀗𑁆𑀕𑀻𑀢𑀺𑀓𑀸𑀮𑁂 𑀓𑀲𑁆𑀲𑀧𑁄 𑀦 𑀲𑀫𑀽𑀳𑀦𑀺𑀲𑁆𑀲𑀢𑀻’’𑀢𑀺. 𑀢𑀲𑁆𑀫𑀸 𑀯𑀺𑀓𑀧𑁆𑀧𑁂𑀦𑁂𑀯 𑀞𑀧𑁂𑀲𑀺.

𑀢𑀢𑁆𑀣 𑁋 ‘‘𑀏𑀓𑀘𑁆𑀘𑁂 𑀣𑁂𑀭𑀸 𑀏𑀯𑀫𑀸𑀳𑀁𑀲𑀼 𑁋 𑀘𑀢𑁆𑀢𑀸𑀭𑀺 𑀧𑀸𑀭𑀸𑀚𑀺𑀓𑀸𑀦𑀺 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸𑀦𑀺 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀜𑁆𑀘𑀲𑀢𑀺𑀓𑀲𑀗𑁆𑀕𑀻𑀢𑀺𑀬𑀁 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀓𑀣𑀸 𑀆𑀕𑀢𑀸𑀯 𑀯𑀺𑀦𑀺𑀘𑁆𑀙𑀬𑁄 𑀧𑁂𑀢𑁆𑀣 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀼𑀢𑁆𑀢𑁄. 𑀓𑁂𑀘𑀺 𑀧𑀦𑀸𑀳𑀼 𑁋 ‘‘𑀪𑀦𑁆𑀢𑁂, 𑀦𑀸𑀕𑀲𑁂𑀦, 𑀓𑀢𑀫𑀁 𑀔𑀼𑀤𑁆𑀤𑀓𑀁, 𑀓𑀢𑀫𑀁 𑀅𑀦𑀼𑀔𑀼𑀤𑁆𑀤𑀓’’𑀦𑁆𑀢𑀺 𑀫𑀺𑀮𑀺𑀦𑁆𑀤𑁂𑀦 𑀭𑀜𑁆𑀜𑀸 𑀧𑀼𑀘𑁆𑀙𑀺𑀢𑁄. ‘‘𑀤𑀼𑀓𑁆𑀓𑀝𑀁, 𑀫𑀳𑀸𑀭𑀸𑀚, 𑀔𑀼𑀤𑁆𑀤𑀓𑀁, 𑀤𑀼𑀩𑁆𑀪𑀸𑀲𑀺𑀢𑀁 𑀅𑀦𑀼𑀔𑀼𑀤𑁆𑀤𑀓’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦𑀸𑀕𑀲𑁂𑀦𑀢𑁆𑀣𑁂𑀭𑁄 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀁 𑀚𑀸𑀦𑀸𑀢𑀺. 𑀫𑀳𑀸𑀓𑀲𑁆𑀲𑀧𑁄 𑀧𑀦 𑀢𑀁 𑀅𑀚𑀸𑀦𑀦𑁆𑀢𑁄 𑁋

‘‘𑀲𑀼𑀡𑀸𑀢𑀼 𑀫𑁂, 𑀆𑀯𑀼𑀲𑁄, 𑀲𑀗𑁆𑀖𑁄 𑀲𑀦𑁆𑀢𑀫𑁆𑀳𑀸𑀓𑀁 𑀲𑀺𑀓𑁆𑀔𑀸𑀧𑀤𑀸𑀦𑀺 𑀕𑀺𑀳𑀺𑀕𑀢𑀸𑀦𑀺, 𑀕𑀺𑀳𑀺𑀦𑁄𑀧𑀺 𑀚𑀸𑀦𑀦𑁆𑀢𑀺 𑁋 ‘‘𑀇𑀤𑀁 𑀯𑁄 𑀲𑀫𑀡𑀸𑀦𑀁 𑀲𑀓𑁆𑀬𑀧𑀼𑀢𑁆𑀢𑀺𑀬𑀸𑀦𑀁 𑀓𑀧𑁆𑀧𑀢𑀺, 𑀇𑀤𑀁 𑀯𑁄 𑀦 𑀓𑀧𑁆𑀧𑀢𑀻’’𑀢𑀺. 𑀲𑀘𑁂 𑀫𑀬𑀁 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀽𑀳𑀦𑀺𑀲𑁆𑀲𑀸𑀫, 𑀪𑀯𑀺𑀲𑁆𑀲𑀦𑁆𑀢𑀺 𑀯𑀢𑁆𑀢𑀸𑀭𑁄 𑁋 ‘‘𑀥𑀽𑀫𑀓𑀸𑀮𑀺𑀓𑀁 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀬𑀸𑀯 𑀦𑁂𑀲𑀁 𑀲𑀢𑁆𑀣𑀸 𑀅𑀝𑁆𑀞𑀸𑀲𑀺, 𑀢𑀸𑀯𑀺𑀫𑁂 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀺𑀓𑁆𑀔𑀺𑀁𑀲𑀼, 𑀬𑀢𑁄 𑀇𑀫𑁂𑀲𑀁 𑀲𑀢𑁆𑀣𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀦 𑀤𑀸𑀦𑀺𑀫𑁂 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀺𑀓𑁆𑀔𑀦𑁆𑀢𑀻’’𑀢𑀺. 𑀬𑀤𑀺 𑀲𑀗𑁆𑀖𑀲𑁆𑀲 ¶ 𑀧𑀢𑁆𑀢𑀓𑀮𑁆𑀮𑀁, 𑀲𑀗𑁆𑀖𑁄 𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀧𑁂𑀬𑁆𑀬, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑁂𑀬𑁆𑀬, 𑀬𑀣𑀸𑀧𑀜𑁆𑀜𑀢𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀫𑀸𑀤𑀸𑀬 𑀯𑀢𑁆𑀢𑁂𑀬𑁆𑀬. 𑀏𑀲𑀸 𑀜𑀢𑁆𑀢𑀻𑀢𑀺 𑁋

𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀲𑀻𑀢𑀺. 𑀦 𑀢𑀁 𑀏𑀯𑀁 𑀕𑀳𑁂𑀢𑀩𑁆𑀩𑀁. 𑀦𑀸𑀕𑀲𑁂𑀦𑀢𑁆𑀣𑁂𑀭𑁄 𑀳𑀺 𑁋 ‘‘𑀧𑀭𑀯𑀸𑀤𑀺𑀦𑁄 𑀑𑀓𑀸𑀲𑁄 𑀫𑀸 𑀅𑀳𑁄𑀲𑀻’’𑀢𑀺 𑀏𑀯𑀫𑀸𑀳. 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 ‘‘𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀧𑀢𑁆𑀢𑀺𑀁 𑀦 𑀲𑀫𑀽𑀳𑀦𑀺𑀲𑁆𑀲𑀸𑀫𑀻’’𑀢𑀺 𑀓𑀫𑁆𑀫𑀯𑀸𑀘𑀁 𑀲𑀸𑀯𑁂𑀲𑀺.

𑀩𑁆𑀭𑀳𑁆𑀫𑀤𑀡𑁆𑀟𑀓𑀣𑀸𑀧𑀺 ¶ 𑀲𑀗𑁆𑀕𑀻𑀢𑀺𑀬𑀁 𑀆𑀕𑀢𑀢𑁆𑀢𑀸𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀯𑀺𑀦𑀺𑀘𑁆𑀙𑀺𑀢𑀸.

𑀓𑀗𑁆𑀔𑀸𑀢𑀺 𑀤𑁆𑀯𑁂𑀴𑁆𑀳𑀓𑀁. 𑀯𑀺𑀫𑀢𑀻𑀢𑀺 𑀯𑀺𑀦𑀺𑀘𑁆𑀙𑀺𑀢𑀼𑀁 𑀅𑀲𑀫𑀢𑁆𑀣𑀢𑀸, 𑀩𑀼𑀤𑁆𑀥𑁄 𑀦𑀼 𑀔𑁄, 𑀦 𑀩𑀼𑀤𑁆𑀥𑁄 𑀦𑀼 𑀔𑁄, 𑀥𑀫𑁆𑀫𑁄 𑀦𑀼 𑀔𑁄, 𑀦 𑀥𑀫𑁆𑀫𑁄 𑀦𑀼 𑀔𑁄, 𑀲𑀗𑁆𑀖𑁄 𑀦𑀼 𑀔𑁄, 𑀦 𑀲𑀗𑁆𑀖𑁄 𑀦𑀼 𑀔𑁄, 𑀫𑀕𑁆𑀕𑁄 𑀦𑀼 𑀔𑁄, 𑀦 𑀫𑀕𑁆𑀕𑁄 𑀦𑀼 𑀔𑁄, 𑀧𑀝𑀺𑀧𑀤𑀸 𑀦𑀼 𑀔𑁄, 𑀦 𑀧𑀝𑀺𑀧𑀤𑀸 𑀦𑀼 𑀔𑁄𑀢𑀺 𑀬𑀲𑁆𑀲 𑀲𑀁𑀲𑀬𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀁 𑀯𑁄 𑀯𑀤𑀸𑀫𑀺 ‘‘𑀧𑀼𑀘𑁆𑀙𑀣 𑀪𑀺𑀓𑁆𑀔𑀯𑁂’’𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄. 𑀲𑀢𑁆𑀣𑀼𑀕𑀸𑀭𑀯𑁂𑀦𑀸𑀧𑀺 𑀦 𑀧𑀼𑀘𑁆𑀙𑁂𑀬𑁆𑀬𑀸𑀣𑀸𑀢𑀺 𑀫𑀬𑀁 𑀲𑀢𑁆𑀣𑀼𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀫𑁆𑀳, 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸𑀧𑀺 𑀦𑁄 𑀲𑀢𑁆𑀣𑀼 𑀲𑀦𑁆𑀢𑀓𑀸𑀯, 𑀢𑁂 𑀫𑀬𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀓𑀗𑁆𑀔𑀁 𑀅𑀓𑀢𑁆𑀯𑀸 ¶ 𑀦 𑀅𑀭𑀳𑀸𑀫 𑀅𑀚𑁆𑀚 𑀧𑀘𑁆𑀙𑀺𑀫𑀓𑀸𑀮𑁂 𑀓𑀗𑁆𑀔𑀁 𑀓𑀸𑀢𑀼𑀦𑁆𑀢𑀺 𑀲𑀘𑁂 𑀏𑀯𑀁 𑀲𑀢𑁆𑀣𑀭𑀺 𑀕𑀸𑀭𑀯𑁂𑀦 𑀦 𑀧𑀼𑀘𑁆𑀙𑀣. 𑀲𑀳𑀸𑀬𑀓𑁄𑀧𑀺 𑀪𑀺𑀓𑁆𑀔𑀯𑁂 𑀲𑀳𑀸𑀬𑀓𑀲𑁆𑀲 𑀆𑀭𑁄𑀘𑁂𑀢𑀽𑀢𑀺 𑀢𑀼𑀫𑁆𑀳𑀸𑀓𑀁 𑀬𑁄 𑀬𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀤𑀺𑀝𑁆𑀞𑁄 𑀲𑀫𑁆𑀪𑀢𑁆𑀢𑁄, 𑀲𑁄 𑀢𑀲𑁆𑀲 𑀆𑀭𑁄𑀘𑁂𑀢𑀼, 𑀅𑀳𑀁 𑀏𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀓𑀣𑁂𑀲𑁆𑀲𑀸𑀫𑀺, 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀲𑀩𑁆𑀩𑁂 𑀦𑀺𑀓𑁆𑀓𑀗𑁆𑀔𑀸 𑀪𑀯𑀺𑀲𑁆𑀲𑀣𑀸𑀢𑀺 𑀤𑀲𑁆𑀲𑁂𑀢𑀺.

𑀏𑀯𑀁 𑀧𑀲𑀦𑁆𑀦𑁄𑀢𑀺 𑀏𑀯𑀁 𑀲𑀤𑁆𑀤𑀳𑀸𑀫𑀺 𑀅𑀳𑀦𑁆𑀢𑀺 𑀅𑀢𑁆𑀣𑁄. 𑀜𑀸𑀡𑀫𑁂𑀯𑀸𑀢𑀺 𑀦𑀺𑀓𑁆𑀓𑀗𑁆𑀔𑀪𑀸𑀯𑀧𑀘𑁆𑀘𑀓𑁆𑀔𑀓𑀭𑀡𑀜𑀸𑀡𑀁𑀬𑁂𑀯, 𑀏𑀢𑁆𑀣 𑀢𑀣𑀸𑀕𑀢𑀲𑁆𑀲 𑀦 𑀲𑀤𑁆𑀥𑀸𑀫𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀇𑀫𑁂𑀲𑀜𑁆𑀳𑀺, 𑀆𑀦𑀦𑁆𑀤𑀸𑀢𑀺 𑀇𑀫𑁂𑀲𑀁 𑀅𑀦𑁆𑀢𑁄𑀲𑀸𑀡𑀺𑀬𑀁 𑀦𑀺𑀲𑀺𑀦𑁆𑀦𑀸𑀦𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁. 𑀬𑁄 𑀧𑀘𑁆𑀙𑀺𑀫𑀓𑁄𑀢𑀺 𑀬𑁄 𑀕𑀼𑀡𑀯𑀲𑁂𑀦 𑀧𑀘𑁆𑀙𑀺𑀫𑀓𑁄. 𑀆𑀦𑀦𑁆𑀤𑀢𑁆𑀣𑁂𑀭𑀁𑀬𑁂𑀯 𑀲𑀦𑁆𑀥𑀸𑀬𑀸𑀳.

𑁨𑁧𑁮. 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣𑀸𑀢𑀺 𑀲𑀢𑀺𑀅𑀯𑀺𑀧𑁆𑀧𑀯𑀸𑀲𑁂𑀦 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀲𑀫𑁆𑀧𑀸𑀤𑁂𑀬𑁆𑀬𑀸𑀣. 𑀇𑀢𑀺 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑁂 𑀦𑀺𑀧𑀦𑁆𑀦𑁄 𑀧𑀜𑁆𑀘𑀘𑀢𑁆𑀢𑀸𑀮𑀻𑀲 𑀯𑀲𑁆𑀲𑀸𑀦𑀺 𑀤𑀺𑀦𑁆𑀦𑀁 𑀑𑀯𑀸𑀤𑀁 𑀲𑀩𑁆𑀩𑀁 𑀏𑀓𑀲𑁆𑀫𑀺𑀁 𑀅𑀧𑁆𑀧𑀫𑀸𑀤𑀧𑀤𑁂𑀬𑁂𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀤𑀸𑀲𑀺. 𑀅𑀬𑀁 𑀢𑀣𑀸𑀕𑀢𑀲𑁆𑀲 𑀧𑀘𑁆𑀙𑀺𑀫𑀸 𑀯𑀸𑀘𑀸𑀢𑀺 𑀇𑀤𑀁 𑀧𑀦 𑀲𑀗𑁆𑀕𑀻𑀢𑀺𑀓𑀸𑀭𑀓𑀸𑀦𑀁 ¶ 𑀯𑀘𑀦𑀁.

𑀧𑀭𑀺𑀦𑀺𑀩𑁆𑀩𑀼𑀢𑀓𑀣𑀸𑀯𑀡𑁆𑀡𑀦𑀸

𑁨𑁧𑁯. 𑀇𑀢𑁄 𑀧𑀭𑀁 𑀬𑀁 𑀧𑀭𑀺𑀦𑀺𑀩𑁆𑀩𑀸𑀦𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀢𑀁 𑀤𑀲𑁆𑀲𑁂𑀢𑀼𑀁 𑀅𑀣 𑀔𑁄 𑀪𑀕𑀯𑀸 𑀧𑀞𑀫𑀁 𑀛𑀸𑀦𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀼𑀢𑁄 𑀪𑀦𑁆𑀢𑁂𑀢𑀺 𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀪𑀕𑀯𑀢𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀅𑀪𑀸𑀯𑀁 𑀤𑀺𑀲𑁆𑀯𑀸 𑀧𑀼𑀘𑁆𑀙𑀢𑀺. 𑀦 𑀆𑀯𑀼𑀲𑁄𑀢𑀺 𑀣𑁂𑀭𑁄 𑀓𑀣𑀁 𑀚𑀸𑀦𑀸𑀢𑀺? 𑀣𑁂𑀭𑁄 𑀓𑀺𑀭 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁𑀬𑁂𑀯 𑀢𑀁 𑀢𑀁 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑁄 𑀬𑀸𑀯 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀸 𑀯𑀼𑀝𑁆𑀞𑀸𑀦𑀁, 𑀢𑀸𑀯 𑀕𑀦𑁆𑀢𑁆𑀯𑀸 𑀇𑀤𑀸𑀦𑀺 𑀪𑀕𑀯𑀸 ¶ 𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄, 𑀅𑀦𑁆𑀢𑁄𑀦𑀺𑀭𑁄𑀥𑁂 𑀘 𑀓𑀸𑀮𑀗𑁆𑀓𑀺𑀭𑀺𑀬𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀚𑀸𑀦𑀸𑀢𑀺.

𑀅𑀣 𑀔𑁄 𑀪𑀕𑀯𑀸 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺…𑀧𑁂… 𑀢𑀢𑀺𑀬𑀚𑁆𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀻𑀢𑀺 𑀏𑀢𑁆𑀣 𑀪𑀕𑀯𑀸 𑀘𑀢𑀼𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺, 𑀢𑁂𑀭𑀲𑀲𑀼 𑀞𑀸𑀦𑁂𑀲𑀼 𑀤𑀼𑀢𑀺𑀬𑀚𑁆𑀛𑀸𑀦𑀁, 𑀢𑀣𑀸 𑀢𑀢𑀺𑀬𑀚𑁆𑀛𑀸𑀦𑀁, 𑀧𑀦𑁆𑀦𑀭𑀲𑀲𑀼 𑀞𑀸𑀦𑁂𑀲𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀓𑀣𑀁? 𑀤𑀲𑀲𑀼 𑀅𑀲𑀼𑀪𑁂𑀲𑀼, 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀅𑀝𑁆𑀞𑀲𑀼 𑀓𑀲𑀺𑀡𑁂𑀲𑀼, 𑀫𑁂𑀢𑁆𑀢𑀸𑀓𑀭𑀼𑀡𑀸𑀫𑀼𑀤𑀺𑀢𑀸𑀲𑀼, 𑀆𑀦𑀸𑀧𑀸𑀦𑁂, 𑀧𑀭𑀺𑀘𑁆𑀙𑁂𑀤𑀸𑀓𑀸𑀲𑁂𑀢𑀺 𑀇𑀫𑁂𑀲𑀼 𑀢𑀸𑀯 𑀘𑀢𑀼𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀞𑀧𑁂𑀢𑁆𑀯𑀸 𑀧𑀦 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀜𑁆𑀘 𑀤𑀲 𑀅𑀲𑀼𑀪𑀸𑀦𑀺 𑀘 𑀲𑁂𑀲𑁂𑀲𑀼 𑀢𑁂𑀭𑀲𑀲𑀼 𑀤𑀼𑀢𑀺𑀬𑀚𑁆𑀛𑀸𑀦𑀁 ¶ , 𑀢𑁂𑀲𑀼𑀬𑁂𑀯 𑀘 𑀢𑀢𑀺𑀬𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀅𑀝𑁆𑀞𑀲𑀼 𑀧𑀦 𑀓𑀲𑀺𑀡𑁂𑀲𑀼, 𑀉𑀧𑁂𑀓𑁆𑀔𑀸𑀩𑁆𑀭𑀳𑁆𑀫𑀯𑀺𑀳𑀸𑀭𑁂, 𑀆𑀦𑀸𑀧𑀸𑀦𑁂, 𑀧𑀭𑀺𑀘𑁆𑀙𑁂𑀤𑀸𑀓𑀸𑀲𑁂, 𑀘𑀢𑀽𑀲𑀼 𑀅𑀭𑀽𑀧𑁂𑀲𑀽𑀢𑀺 𑀇𑀫𑁂𑀲𑀼 𑀧𑀦𑁆𑀦𑀭𑀲𑀲𑀼 𑀞𑀸𑀦𑁂𑀲𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀅𑀬𑀫𑁆𑀧𑀺 𑀘 𑀲𑀗𑁆𑀔𑁂𑀧𑀓𑀣𑀸𑀯. 𑀦𑀺𑀩𑁆𑀩𑀸𑀦𑀧𑀼𑀭𑀁 𑀧𑀯𑀺𑀲𑀦𑁆𑀢𑁄 𑀧𑀦 𑀪𑀕𑀯𑀸 𑀥𑀫𑁆𑀫𑀲𑁆𑀲𑀸𑀫𑀻 𑀲𑀩𑁆𑀩𑀸𑀧𑀺 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀸 𑀲𑀫𑀸𑀧𑀢𑁆𑀢𑀺𑀬𑁄 𑀧𑀯𑀺𑀲𑀺𑀢𑁆𑀯𑀸 𑀯𑀺𑀤𑁂𑀲𑀁 𑀕𑀘𑁆𑀙𑀦𑁆𑀢𑁄 𑀜𑀸𑀢𑀺𑀚𑀦𑀁 𑀆𑀮𑀺𑀗𑁆𑀕𑁂𑀢𑁆𑀯𑀸 𑀯𑀺𑀬 𑀲𑀩𑁆𑀩𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀧𑀯𑀺𑀝𑁆𑀞𑁄.

𑀘𑀢𑀼𑀢𑁆𑀣𑀚𑁆𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀲𑀫𑀦𑀦𑁆𑀢𑀭𑀸 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀏𑀢𑁆𑀣 𑀛𑀸𑀦𑀲𑀫𑀦𑀦𑁆𑀢𑀭𑀁, 𑀧𑀘𑁆𑀘𑀯𑁂𑀓𑁆𑀔𑀡𑀸𑀲𑀫𑀦𑀦𑁆𑀢𑀭𑀦𑁆𑀢𑀺 𑀤𑁆𑀯𑁂 𑀲𑀫𑀦𑀦𑁆𑀢𑀭𑀸𑀦𑀺. 𑀢𑀢𑁆𑀣 𑀛𑀸𑀦𑀸 𑀯𑀼𑀝𑁆𑀞𑀸𑀬 𑀪𑀯𑀗𑁆𑀕𑀁 𑀑𑀢𑀺𑀡𑁆𑀡𑀲𑁆𑀲 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀦𑀁 𑀛𑀸𑀦𑀲𑀫𑀦𑀦𑁆𑀢𑀭𑀁 𑀦𑀸𑀫. 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀧𑀼𑀦 𑀛𑀸𑀦𑀗𑁆𑀕𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀺𑀡𑁆𑀡𑀲𑁆𑀲 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀲𑀫𑀦𑀦𑁆𑀢𑀭𑀁 𑀦𑀸𑀫. 𑀇𑀫𑀸𑀦𑀺𑀧𑀺 𑀤𑁆𑀯𑁂 𑀲𑀫𑀦𑀦𑁆𑀢𑀭𑀸𑀦𑁂𑀯. 𑀪𑀕𑀯𑀸 𑀧𑀦 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀛𑀸𑀦𑀸 𑀯𑀼𑀝𑁆𑀞𑀸𑀬 𑀛𑀸𑀦𑀗𑁆𑀕𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀪𑀯𑀗𑁆𑀕𑀘𑀺𑀢𑁆𑀢𑁂𑀦 𑀅𑀩𑁆𑀬𑀸𑀓𑀢𑁂𑀦 𑀤𑀼𑀓𑁆𑀔𑀲𑀘𑁆𑀘𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀬𑁂 ¶ 𑀳𑀺 𑀓𑁂𑀘𑀺 𑀩𑀼𑀤𑁆𑀥𑀸 𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀯𑀸 𑀅𑀭𑀺𑀬𑀲𑀸𑀯𑀓𑀸 𑀯𑀸 𑀅𑀦𑁆𑀢𑀫𑀲𑁄 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀁 𑀉𑀧𑀸𑀤𑀸𑀬 𑀲𑀩𑁆𑀩𑁂 𑀪𑀯𑀗𑁆𑀕𑀘𑀺𑀢𑁆𑀢𑁂𑀦𑁂𑀯 𑀅𑀩𑁆𑀬𑀸𑀓𑀢𑁂𑀦 𑀤𑀼𑀓𑁆𑀔𑀲𑀘𑁆𑀘𑁂𑀦 𑀓𑀸𑀮𑀗𑁆𑀓𑀭𑁄𑀦𑁆𑀢𑀻𑀢𑀺. 𑀫𑀳𑀸𑀪𑀽𑀫𑀺𑀘𑀸𑀮𑀸𑀤𑀻𑀦𑀺 𑀯𑀼𑀢𑁆𑀢𑀦𑀬𑀸𑀦𑁂𑀯𑀸𑀢𑀺.

𑁨𑁨𑁦. 𑀪𑀽𑀢𑀸𑀢𑀺 𑀲𑀢𑁆𑀢𑀸. 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀧𑀝𑀺𑀪𑀸𑀕𑀧𑀼𑀕𑁆𑀕𑀮𑀯𑀺𑀭𑀳𑀺𑀢𑁄. 𑀩𑀮𑀧𑁆𑀧𑀢𑁆𑀢𑁄𑀢𑀺 𑀤𑀲𑀯𑀺𑀥𑀜𑀸𑀡𑀩𑀮𑀁 𑀧𑀢𑁆𑀢𑁄.

𑁨𑁨𑁧. 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄𑀢𑀺 ¶ 𑀉𑀧𑁆𑀧𑀸𑀤𑀯𑀬𑀲𑀪𑀸𑀯𑀸. 𑀢𑁂𑀲𑀁 𑀯𑀽𑀧𑀲𑀫𑁄𑀢𑀺 𑀢𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀯𑀽𑀧𑀲𑀫𑁄, 𑀅𑀲𑀗𑁆𑀔𑀢𑀁 𑀦𑀺𑀩𑁆𑀩𑀸𑀦𑀫𑁂𑀯 𑀲𑀼𑀔𑀦𑁆𑀢𑀺 𑀅𑀢𑁆𑀣𑁄.

𑁨𑁨𑁨. 𑀦𑀸𑀳𑀼 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁄𑀢𑀺 𑀦 𑀚𑀸𑀢𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁄. 𑀅𑀦𑁂𑀚𑁄𑀢𑀺 𑀢𑀡𑁆𑀳𑀸𑀲𑀗𑁆𑀔𑀸𑀢𑀸𑀬 𑀏𑀚𑀸𑀬 𑀅𑀪𑀸𑀯𑁂𑀦 𑀅𑀦𑁂𑀚𑁄. 𑀲𑀦𑁆𑀢𑀺𑀫𑀸𑀭𑀩𑁆𑀪𑀸𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀁 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀧𑀝𑀺𑀘𑁆𑀘 𑀲𑀦𑁆𑀥𑀸𑀬. 𑀬𑀁 𑀓𑀸𑀮𑀫𑀓𑀭𑀻𑀢𑀺 𑀬𑁄 𑀓𑀸𑀮𑀁 𑀅𑀓𑀭𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀆𑀯𑀼𑀲𑁄, 𑀬𑁄 𑀫𑀫 𑀲𑀢𑁆𑀣𑀸 𑀩𑀼𑀤𑁆𑀥𑀫𑀼𑀦𑀺 𑀲𑀦𑁆𑀢𑀺𑀁 𑀕𑀫𑀺𑀲𑁆𑀲𑀸𑀫𑀻𑀢𑀺, 𑀲𑀦𑁆𑀢𑀺𑀁 𑀆𑀭𑀩𑁆𑀪 𑀓𑀸𑀮𑀫𑀓𑀭𑀺, 𑀢𑀲𑁆𑀲 𑀞𑀺𑀢𑀘𑀺𑀢𑁆𑀢𑀲𑁆𑀲 𑀢𑀸𑀤𑀺𑀦𑁄 𑀇𑀤𑀸𑀦𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁄 𑀦 𑀚𑀸𑀢𑁄, 𑀦𑀢𑁆𑀣𑀺, 𑀦𑀧𑁆𑀧𑀯𑀢𑁆𑀢𑀢𑀻’’𑀢𑀺.

𑀅𑀲𑀮𑁆𑀮𑀻𑀦𑁂𑀦𑀸𑀢𑀺 𑀅𑀮𑀻𑀦𑁂𑀦 𑀅𑀲𑀗𑁆𑀓𑀼𑀝𑀺𑀢𑁂𑀦 𑀲𑀼𑀯𑀺𑀓𑀲𑀺𑀢𑁂𑀦𑁂𑀯 𑀘𑀺𑀢𑁆𑀢𑁂𑀦. 𑀯𑁂𑀤𑀦𑀁 𑀅𑀚𑁆𑀛𑀯𑀸𑀲𑀬𑀻𑀢𑀺 𑀯𑁂𑀤𑀦𑀁 𑀅𑀥𑀺𑀯𑀸𑀲𑁂𑀲𑀺, 𑀦 𑀯𑁂𑀤𑀦𑀸𑀦𑀼𑀯𑀢𑁆𑀢𑀻 𑀳𑀼𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀲𑀫𑁆𑀧𑀭𑀺𑀯𑀢𑁆𑀢𑀺. 𑀯𑀺𑀫𑁄𑀓𑁆𑀔𑁄𑀢𑀺 𑀓𑁂𑀦𑀘𑀺 𑀥𑀫𑁆𑀫𑁂𑀦 𑀅𑀦𑀸𑀯𑀭𑀡𑀯𑀺𑀫𑁄𑀓𑁆𑀔𑁄 𑀲𑀩𑁆𑀩𑀲𑁄 𑀅𑀧𑀜𑁆𑀜𑀢𑁆𑀢𑀺𑀪𑀸𑀯𑀽𑀧𑀕𑀫𑁄 𑀧𑀚𑁆𑀚𑁄𑀢𑀦𑀺𑀩𑁆𑀩𑀸𑀦𑀲𑀤𑀺𑀲𑁄 𑀚𑀸𑀢𑁄.

𑁨𑁨𑁩. 𑀢𑀤𑀸𑀲𑀻𑀢𑀺 ¶ ‘‘𑀲𑀳 𑀧𑀭𑀺𑀦𑀺𑀩𑁆𑀩𑀸𑀦𑀸 𑀫𑀳𑀸𑀪𑀽𑀫𑀺𑀘𑀸𑀮𑁄’’𑀢𑀺 𑀏𑀯𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀪𑀽𑀫𑀺𑀘𑀸𑀮𑀫𑁂𑀯 𑀲𑀦𑁆𑀥𑀸𑀬𑀸𑀳. 𑀢𑀜𑁆𑀳𑀺 𑀮𑁄𑀫𑀳𑀁𑀲𑀦𑀜𑁆𑀘 𑀪𑀺𑀁𑀲𑀦𑀓𑀜𑁆𑀘 𑀆𑀲𑀺. 𑀲𑀩𑁆𑀩𑀸𑀓𑀸𑀭𑀯𑀭𑀽𑀧𑁂𑀢𑁂𑀢𑀺 𑀲𑀩𑁆𑀩𑀯𑀭𑀓𑀸𑀭𑀡𑀽𑀧𑁂𑀢𑁂.

𑁨𑁨𑁪. 𑀅𑀯𑀻𑀢𑀭𑀸𑀕𑀸𑀢𑀺 𑀧𑀼𑀣𑀼𑀚𑁆𑀚𑀦𑀸 𑀘𑁂𑀯 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀦𑁄 𑀘. 𑀢𑁂𑀲𑀜𑁆𑀳𑀺 𑀤𑁄𑀫𑀦𑀲𑁆𑀲𑀁 𑀅𑀧𑁆𑀧𑀳𑀻𑀦𑀁. 𑀢𑀲𑁆𑀫𑀸 𑀢𑁂𑀧𑀺 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑀺. 𑀉𑀪𑁄𑀧𑀺 𑀳𑀢𑁆𑀣𑁂 𑀲𑀻𑀲𑁂 𑀞𑀧𑁂𑀢𑁆𑀯𑀸 𑀭𑁄𑀤𑀦𑁆𑀢𑀻𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁨𑁨𑁫. 𑀉𑀚𑁆𑀛𑀸𑀬𑀦𑁆𑀢𑀻𑀢𑀺 ‘‘𑀅𑀬𑁆𑀬𑀸 𑀅𑀢𑁆𑀢𑀦𑀸𑀧𑀺 𑀅𑀥𑀺𑀯𑀸𑀲𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀲𑁂𑀲𑀚𑀦𑀁 𑀓𑀣𑀁 𑀲𑀫𑀲𑁆𑀲𑀸𑀲𑁂𑀲𑁆𑀲𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺𑀬𑁄 𑀉𑀚𑁆𑀛𑀸𑀬𑀦𑁆𑀢𑀺. 𑀓𑀣𑀁𑀪𑀽𑀢𑀸 𑀧𑀦 𑀪𑀦𑁆𑀢𑁂 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀤𑁂𑀯𑀢𑀸 𑀫𑀦𑀲𑀺𑀓𑀭𑁄𑀢𑀻𑀢𑀺 𑀤𑁂𑀯𑀢𑀸, 𑀪𑀦𑁆𑀢𑁂, 𑀓𑀣𑀁𑀪𑀽𑀢𑀸 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀲𑀮𑁆𑀮𑀓𑁆𑀔𑁂𑀢𑀺, 𑀓𑀺𑀁 𑀢𑀸 𑀲𑀢𑁆𑀣𑀼 𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀥𑀺𑀯𑀸𑀲𑁂𑀦𑁆𑀢𑀻𑀢𑀺?

𑀅𑀣 𑀢𑀸𑀲𑀁 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀣𑁂𑀭𑁄 𑀲𑀦𑁆𑀢𑀸𑀯𑀼𑀲𑁄𑀢𑀺𑀆𑀤𑀺𑀫𑀸𑀳. 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀭𑀢𑁆𑀢𑀸𑀯𑀲𑁂𑀲𑀦𑁆𑀢𑀺 ¶ 𑀩𑀮𑀯𑀧𑀘𑁆𑀘𑀽𑀲𑁂 𑀧𑀭𑀺𑀦𑀺𑀩𑁆𑀩𑀼𑀢𑀢𑁆𑀢𑀸 𑀭𑀢𑁆𑀢𑀺𑀬𑀸 𑀅𑀯𑀲𑁂𑀲𑀁 ¶ 𑀘𑀼𑀮𑁆𑀮𑀓𑀤𑁆𑀥𑀸𑀦𑀁. 𑀥𑀫𑁆𑀫𑀺𑀬𑀸 𑀓𑀣𑀸𑀬𑀸𑀢𑀺 𑀅𑀜𑁆𑀜𑀸 𑀧𑀸𑀝𑀺𑀬𑁂𑀓𑁆𑀓𑀸 𑀥𑀫𑁆𑀫𑀓𑀣𑀸 𑀦𑀸𑀫 𑀦𑀢𑁆𑀣𑀺, ‘‘𑀆𑀯𑀼𑀲𑁄 𑀲𑀤𑁂𑀯𑀓𑁂 𑀦𑀸𑀫 𑀮𑁄𑀓𑁂 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑀲𑁆𑀲 𑀲𑀢𑁆𑀣𑀼𑀦𑁄 𑀅𑀬𑀁 𑀫𑀘𑁆𑀘𑀼𑀭𑀸𑀚𑀸 𑀦 𑀮𑀚𑁆𑀚𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀮𑁄𑀓𑀺𑀬𑀫𑀳𑀸𑀚𑀦𑀲𑁆𑀲 𑀮𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀏𑀯𑀭𑀽𑀧𑀸𑀬 𑀧𑀦 𑀫𑀭𑀡𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀓𑀣𑀸𑀬 𑀯𑀻𑀢𑀺𑀦𑀸𑀫𑁂𑀲𑀼𑀁. 𑀢𑁂𑀲𑀜𑁆𑀳𑀺 𑀢𑀁 𑀓𑀣𑀁 𑀓𑀣𑁂𑀦𑁆𑀢𑀸𑀦𑀁 𑀫𑀼𑀳𑀼𑀢𑁆𑀢𑁂𑀦𑁂𑀯 𑀅𑀭𑀼𑀡𑀁 𑀉𑀕𑁆𑀕𑀘𑁆𑀙𑀺.

𑁨𑁨𑁬. 𑀅𑀣 𑀔𑁄𑀢𑀺 𑀅𑀭𑀼𑀡𑀼𑀕𑁆𑀕𑀁 𑀤𑀺𑀲𑁆𑀯𑀸𑀯 𑀣𑁂𑀭𑁄 𑀣𑁂𑀭𑀁 𑀏𑀢𑀤𑀯𑁄𑀘. 𑀢𑁂𑀦𑁂𑀯 𑀓𑀭𑀡𑀻𑀬𑁂𑀦𑀸𑀢𑀺 𑀓𑀻𑀤𑀺𑀲𑁂𑀦 𑀦𑀼 𑀔𑁄 𑀧𑀭𑀺𑀦𑀺𑀩𑁆𑀩𑀸𑀦𑀝𑁆𑀞𑀸𑀦𑁂 𑀫𑀸𑀮𑀸𑀕𑀦𑁆𑀥𑀸𑀤𑀺𑀲𑀓𑁆𑀓𑀸𑀭𑁂𑀦 𑀪𑀯𑀺𑀢𑀩𑁆𑀩𑀁, 𑀓𑀻𑀤𑀺𑀲𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀲𑀚𑁆𑀚𑀝𑁆𑀞𑀸𑀦𑁂𑀦 𑀪𑀯𑀺𑀢𑀩𑁆𑀩𑀁, 𑀓𑀻𑀤𑀺𑀲𑁂𑀦 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺, 𑀏𑀯𑀁 𑀬𑀁 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀲𑀼𑀢𑁆𑀯𑀸 𑀓𑀢𑁆𑀢𑀩𑁆𑀩𑀁 𑀢𑁂𑀦𑁂𑀯 𑀓𑀭𑀡𑀻𑀬𑁂𑀦.

𑀩𑀼𑀤𑁆𑀥𑀲𑀭𑀻𑀭𑀧𑀽𑀚𑀸𑀯𑀡𑁆𑀡𑀦𑀸

𑁨𑁨𑁭. 𑀲𑀩𑁆𑀩𑀜𑁆𑀘 𑀢𑀸𑀴𑀸𑀯𑀘𑀭𑀦𑁆𑀢𑀺 𑀲𑀩𑁆𑀩𑀁 𑀢𑀽𑀭𑀺𑀬𑀪𑀡𑁆𑀟𑀁. 𑀲𑀦𑁆𑀦𑀺𑀧𑀸𑀢𑁂𑀣𑀸𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀲𑀫𑀸𑀳𑀭𑀣. 𑀢𑁂 𑀢𑀣𑁂𑀯 𑀅𑀓𑀁𑀲𑀼. 𑀫𑀡𑁆𑀟𑀮𑀫𑀸𑀴𑁂𑀢𑀺 𑀤𑀼𑀲𑁆𑀲𑀫𑀡𑁆𑀟𑀮𑀫𑀸𑀴𑁂. 𑀧𑀝𑀺𑀬𑀸𑀤𑁂𑀦𑁆𑀢𑀸𑀢𑀺 𑀲𑀚𑁆𑀚𑁂𑀦𑁆𑀢𑀸.

𑀤𑀓𑁆𑀔𑀺𑀡𑁂𑀦 𑀤𑀓𑁆𑀔𑀺𑀡𑀦𑁆𑀢𑀺 𑀦𑀕𑀭𑀲𑁆𑀲 𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁂𑀦𑁂𑀯 𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑀁. 𑀩𑀸𑀳𑀺𑀭𑁂𑀦 𑀩𑀸𑀳𑀺𑀭𑀦𑁆𑀢𑀺 ¶ 𑀅𑀦𑁆𑀢𑁄𑀦𑀕𑀭𑀁 𑀅𑀧𑁆𑀧𑀯𑁂𑀲𑁂𑀢𑁆𑀯𑀸 𑀩𑀸𑀳𑀺𑀭𑁂𑀦𑁂𑀯 𑀦𑀕𑀭𑀲𑁆𑀲 𑀩𑀸𑀳𑀺𑀭𑀧𑀲𑁆𑀲𑀁 𑀳𑀭𑀺𑀢𑁆𑀯𑀸. 𑀤𑀓𑁆𑀔𑀺𑀡𑀢𑁄 𑀦𑀕𑀭𑀲𑁆𑀲𑀸𑀢𑀺 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀤𑀓𑁆𑀔𑀺𑀡𑀤𑁆𑀯𑀸𑀭𑀲𑀤𑀺𑀲𑁂 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀢𑁆𑀯𑀸 𑀚𑁂𑀢𑀯𑀦𑀲𑀤𑀺𑀲𑁂 𑀞𑀸𑀦𑁂 𑀛𑀸𑀧𑁂𑀲𑁆𑀲𑀸𑀫𑀸𑀢𑀺 𑀅𑀢𑁆𑀣𑁄.

𑁨𑁨𑁮. 𑀅𑀝𑁆𑀞 𑀫𑀮𑁆𑀮𑀧𑀸𑀫𑁄𑀓𑁆𑀔𑀸𑀢𑀺 𑀫𑀚𑁆𑀛𑀺𑀫𑀯𑀬𑀸 𑀣𑀸𑀫𑀲𑀫𑁆𑀧𑀦𑁆𑀦𑀸 𑀅𑀝𑁆𑀞𑀫𑀮𑁆𑀮𑀭𑀸𑀚𑀸𑀦𑁄. 𑀲𑀻𑀲𑀁 𑀦𑁆𑀳𑀸𑀢𑀸𑀢𑀺 𑀲𑀻𑀲𑀁 𑀥𑁄𑀯𑀺𑀢𑁆𑀯𑀸 𑀦𑀳𑀸𑀢𑀸. 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀦𑁆𑀢𑀺 𑀣𑁂𑀭𑁄𑀯 𑀤𑀺𑀩𑁆𑀩𑀘𑀓𑁆𑀔𑀼𑀓𑁄𑀢𑀺 𑀧𑀸𑀓𑀝𑁄, 𑀢𑀲𑁆𑀫𑀸 𑀢𑁂 𑀲𑀦𑁆𑀢𑁂𑀲𑀼𑀧𑀺 𑀅𑀜𑁆𑀜𑁂𑀲𑀼 𑀫𑀳𑀸𑀣𑁂𑀭𑁂𑀲𑀼 𑁋 ‘‘𑀅𑀬𑀁 𑀦𑁄 𑀧𑀸𑀓𑀝𑀁 𑀓𑀢𑁆𑀯𑀸 𑀓𑀣𑁂𑀲𑁆𑀲𑀢𑀻’’𑀢𑀺 𑀣𑁂𑀭𑀁 𑀧𑀼𑀘𑁆𑀙𑀺𑀁𑀲𑀼. 𑀓𑀣𑀁 𑀧𑀦, 𑀪𑀦𑁆𑀢𑁂, 𑀤𑁂𑀯𑀢𑀸𑀦𑀁 𑀅𑀥𑀺𑀧𑁆𑀧𑀸𑀬𑁄𑀢𑀺 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀢𑀸𑀯 𑀅𑀥𑀺𑀧𑁆𑀧𑀸𑀬𑀁 𑀚𑀸𑀦𑀸𑀫. 𑀤𑁂𑀯𑀢𑀸𑀦𑀁 𑀓𑀣𑀁 𑀅𑀥𑀺𑀧𑁆𑀧𑀸𑀬𑁄𑀢𑀺 𑀧𑀼𑀘𑁆𑀙𑀦𑁆𑀢𑀺. 𑀣𑁂𑀭𑁄 𑀧𑀞𑀫𑀁 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 𑀢𑀼𑀫𑁆𑀳𑀸𑀓𑀁 𑀔𑁄𑀢𑀺𑀆𑀤𑀺𑀫𑀸𑀳. 𑀫𑀓𑀼𑀝𑀩𑀦𑁆𑀥𑀦𑀁 𑀦𑀸𑀫 𑀫𑀮𑁆𑀮𑀸𑀦𑀁 𑀘𑁂𑀢𑀺𑀬𑀦𑁆𑀢𑀺 𑀫𑀮𑁆𑀮𑀭𑀸𑀚𑀽𑀦𑀁 𑀧𑀲𑀸𑀥𑀦𑀫𑀗𑁆𑀕𑀮𑀲𑀸𑀮𑀸𑀬 𑀏𑀢𑀁 𑀦𑀸𑀫𑀁. 𑀘𑀺𑀢𑁆𑀢𑀻𑀓𑀢𑀝𑁆𑀞𑁂𑀦 𑀧𑀦𑁂𑀲𑀸 ‘‘𑀘𑁂𑀢𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁨𑁨𑁯. 𑀬𑀸𑀯 ¶ ¶ 𑀲𑀦𑁆𑀥𑀺𑀲𑀫𑀮𑀲𑀗𑁆𑀓𑀝𑀻𑀭𑀸𑀢𑀺 𑀏𑀢𑁆𑀣 𑀲𑀦𑁆𑀥𑀺 𑀦𑀸𑀫 𑀖𑀭𑀲𑀦𑁆𑀥𑀺. 𑀲𑀫𑀮𑀁 𑀦𑀸𑀫 𑀕𑀽𑀣𑀭𑀸𑀲𑀺𑀦𑀺𑀤𑁆𑀥𑀫𑀦𑀧𑀦𑀸𑀴𑀺. 𑀲𑀗𑁆𑀓𑀝𑀻𑀭𑀁 𑀦𑀸𑀫 𑀲𑀗𑁆𑀓𑀸𑀭𑀝𑁆𑀞𑀸𑀦𑀁. 𑀤𑀺𑀩𑁆𑀩𑁂𑀳𑀺 𑀘 𑀫𑀸𑀦𑀼𑀲𑀓𑁂𑀳𑀺 𑀘 𑀦𑀘𑁆𑀘𑁂𑀳𑀻𑀢𑀺 𑀉𑀧𑀭𑀺 𑀤𑁂𑀯𑀢𑀸𑀦𑀁 𑀦𑀘𑁆𑀘𑀸𑀦𑀺 𑀳𑁄𑀦𑁆𑀢𑀺, 𑀳𑁂𑀝𑁆𑀞𑀸 𑀫𑀦𑀼𑀲𑁆𑀲𑀸𑀦𑀁. 𑀏𑀲 𑀦𑀬𑁄 𑀕𑀻𑀢𑀸𑀤𑀻𑀲𑀼. 𑀅𑀧𑀺𑀘 𑀤𑁂𑀯𑀢𑀸𑀦𑀁 𑀅𑀦𑁆𑀢𑀭𑁂 𑀫𑀦𑀼𑀲𑁆𑀲𑀸, 𑀫𑀦𑀼𑀲𑁆𑀲𑀸𑀦𑀁 𑀅𑀦𑁆𑀢𑀭𑁂 𑀤𑁂𑀯𑀢𑀸𑀢𑀺 𑀏𑀯𑀫𑁆𑀧𑀺 𑀲𑀓𑁆𑀓𑀭𑁄𑀦𑁆𑀢𑀸 𑀧𑀽𑀚𑁂𑀦𑁆𑀢𑀸 𑀅𑀕𑀫𑀁𑀲𑀼. 𑀫𑀚𑁆𑀛𑁂𑀦 𑀫𑀚𑁆𑀛𑀁 𑀦𑀕𑀭𑀲𑁆𑀲 𑀳𑀭𑀺𑀢𑁆𑀯𑀸𑀢𑀺 𑀏𑀯𑀁 𑀳𑀭𑀺𑀬𑀫𑀸𑀦𑁂 𑀪𑀕𑀯𑀢𑁄 𑀲𑀭𑀻𑀭𑁂 𑀩𑀦𑁆𑀥𑀼𑀮𑀫𑀮𑁆𑀮𑀲𑁂𑀦𑀸𑀧𑀢𑀺𑀪𑀭𑀺𑀬𑀸 𑀫𑀮𑁆𑀮𑀺𑀓𑀸 𑀦𑀸𑀫 𑁋 ‘‘𑀪𑀕𑀯𑀢𑁄 𑀲𑀭𑀻𑀭𑀁 𑀆𑀳𑀭𑀦𑁆𑀢𑀻’’𑀢𑀺 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀲𑀸𑀫𑀺𑀓𑀲𑁆𑀲 𑀓𑀸𑀮𑀁 𑀓𑀺𑀭𑀺𑀬𑀢𑁄 𑀧𑀝𑁆𑀞𑀸𑀬 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀞𑀧𑀺𑀢𑀁 𑀯𑀺𑀲𑀸𑀔𑀸𑀬 𑀧𑀲𑀸𑀥𑀦𑀲𑀤𑀺𑀲𑀁 𑀫𑀳𑀸𑀮𑀢𑀸𑀧𑀲𑀸𑀥𑀦𑀁 𑀦𑀻𑀳𑀭𑀸𑀧𑁂𑀢𑁆𑀯𑀸 𑁋 ‘‘𑀇𑀫𑀺𑀦𑀸 𑀲𑀢𑁆𑀣𑀸𑀭𑀁 𑀧𑀽𑀚𑁂𑀲𑁆𑀲𑀸𑀫𑀻’’𑀢𑀺 𑀢𑀁 𑀫𑀚𑁆𑀚𑀸𑀧𑁂𑀢𑁆𑀯𑀸 𑀕𑀦𑁆𑀥𑁄𑀤𑀓𑁂𑀦 𑀥𑁄𑀯𑀺𑀢𑁆𑀯𑀸 𑀤𑁆𑀯𑀸𑀭𑁂 𑀞𑀺𑀢𑀸.

𑀢𑀁 𑀓𑀺𑀭 𑀧𑀲𑀸𑀥𑀦𑀁 𑀢𑀸𑀲𑀜𑁆𑀘 𑀤𑁆𑀯𑀺𑀦𑁆𑀦𑀁 𑀇𑀢𑁆𑀣𑀻𑀦𑀁, 𑀤𑁂𑀯𑀤𑀸𑀦𑀺𑀬𑀘𑁄𑀭𑀲𑁆𑀲 𑀕𑁂𑀳𑁂𑀢𑀺 𑀢𑀻𑀲𑀼𑀬𑁂𑀯 𑀞𑀸𑀦𑁂𑀲𑀼 𑀅𑀳𑁄𑀲𑀺. 𑀲𑀸 𑀘 𑀲𑀢𑁆𑀣𑀼 𑀲𑀭𑀻𑀭𑁂 𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑁂 𑁋 ‘‘𑀑𑀢𑀸𑀭𑁂𑀣, 𑀢𑀸𑀢𑀸, 𑀲𑀢𑁆𑀣𑀼𑀲𑀭𑀻𑀭’’𑀦𑁆𑀢𑀺 𑀯𑀢𑁆𑀯𑀸 𑀢𑀁 𑀧𑀲𑀸𑀥𑀦𑀁 𑀲𑀢𑁆𑀣𑀼𑀲𑀭𑀻𑀭𑁂 𑀧𑀝𑀺𑀫𑀼𑀜𑁆𑀘𑀺. 𑀢𑀁 𑀲𑀻𑀲𑀢𑁄 𑀧𑀝𑁆𑀞𑀸𑀬 𑀧𑀝𑀺𑀫𑀼𑀓𑁆𑀓𑀁 𑀬𑀸𑀯𑀧𑀸𑀤𑀢𑀮𑀸𑀕𑀢𑀁. 𑀲𑀼𑀯𑀡𑁆𑀡𑀯𑀡𑁆𑀡𑀁 𑀪𑀕𑀯𑀢𑁄 𑀲𑀭𑀻𑀭𑀁 𑀲𑀢𑁆𑀢𑀭𑀢𑀦𑀫𑀬𑁂𑀦 𑀫𑀳𑀸𑀧𑀲𑀸𑀥𑀦𑁂𑀦 𑀧𑀲𑀸𑀥𑀺𑀢𑀁 𑀅𑀢𑀺𑀯𑀺𑀬 𑀯𑀺𑀭𑁄𑀘𑀺𑀢𑁆𑀣. 𑀢𑀁 𑀲𑀸 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀧𑀢𑁆𑀣𑀦𑀁 𑀅𑀓𑀸𑀲𑀺 𑁋 ‘‘𑀪𑀕𑀯𑀸 𑀬𑀸𑀯 𑀯𑀝𑁆𑀝𑁂 𑀲𑀁𑀲𑀭𑀺𑀲𑁆𑀲𑀸𑀫𑀺, 𑀢𑀸𑀯 𑀫𑁂 𑀧𑀸𑀝𑀺𑀬𑁂𑀓𑁆𑀓𑀁 𑀧𑀲𑀸𑀥𑀦𑀓𑀺𑀘𑁆𑀘𑀁 𑀫𑀸 𑀳𑁄𑀢𑀼, 𑀦𑀺𑀘𑁆𑀘𑀁 𑀧𑀝𑀺𑀫𑀼𑀓𑁆𑀓𑀧𑀲𑀸𑀥𑀦𑀲𑀤𑀺𑀲𑀫𑁂𑀯 𑀲𑀭𑀻𑀭𑀁 𑀳𑁄𑀢𑀽’’𑀢𑀺.

𑀅𑀣 𑀪𑀕𑀯𑀦𑁆𑀢𑀁 𑀲𑀢𑁆𑀢𑀭𑀢𑀦𑀫𑀬𑁂𑀦 𑀫𑀳𑀸𑀧𑀲𑀸𑀥𑀦𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑁂𑀦 𑀤𑁆𑀯𑀸𑀭𑁂𑀦 𑀦𑀻𑀳𑀭𑀺𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑁂𑀦 𑀦𑀕𑀭𑀲𑁆𑀲 𑀫𑀓𑀼𑀝𑀩𑀦𑁆𑀥𑀦𑀁 𑀫𑀮𑁆𑀮𑀸𑀦𑀁 𑀘𑁂𑀢𑀺𑀬𑀁, 𑀏𑀢𑁆𑀣 𑀪𑀕𑀯𑀢𑁄 𑀲𑀭𑀻𑀭𑀁 𑀦𑀺𑀓𑁆𑀔𑀺𑀧𑀺𑀁𑀲𑀼.

𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀯𑀢𑁆𑀣𑀼𑀯𑀡𑁆𑀡𑀦𑀸

𑁨𑁩𑁧. 𑀧𑀸𑀯𑀸𑀬 ¶ 𑀓𑀼𑀲𑀺𑀦𑀸𑀭𑀦𑁆𑀢𑀺 𑀧𑀸𑀯𑀸𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 ‘‘𑀓𑀼𑀲𑀺𑀦𑀸𑀭𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀻𑀢𑀺 𑀏𑀢𑁆𑀣 𑀓𑀲𑁆𑀫𑀸 𑀤𑀺𑀯𑀸𑀯𑀺𑀳𑀸𑀭𑀦𑁆𑀢𑀺 𑀦 𑀯𑀼𑀢𑁆𑀢𑀁? 𑀤𑀺𑀯𑀸𑀯𑀺𑀳𑀸𑀭𑀢𑁆𑀣𑀸𑀬 𑀅𑀦𑀺𑀲𑀺𑀦𑁆𑀦𑀢𑁆𑀢𑀸. 𑀣𑁂𑀭𑀲𑁆𑀲 𑀳𑀺 𑀧𑀭𑀺𑀯𑀸𑀭𑀸 𑀪𑀺𑀓𑁆𑀔𑀽 𑀲𑀩𑁆𑀩𑁂 𑀲𑀼𑀔𑀲𑀁𑀯𑀤𑁆𑀥𑀺𑀢𑀸 𑀫𑀳𑀸𑀧𑀼𑀜𑁆𑀜𑀸. 𑀢𑁂 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂 𑀢𑀢𑁆𑀢𑀧𑀸𑀲𑀸𑀡𑀲𑀤𑀺𑀲𑀸𑀬 𑀪𑀽𑀫𑀺𑀬𑀸 𑀧𑀤𑀲𑀸 𑀕𑀘𑁆𑀙𑀦𑁆𑀢𑀸 𑀓𑀺𑀮𑀫𑀺𑀁𑀲𑀼. 𑀣𑁂𑀭𑁄 𑀢𑁂 𑀤𑀺𑀲𑁆𑀯𑀸 𑁋 ‘‘𑀪𑀺𑀓𑁆𑀔𑀽 𑀓𑀺𑀮𑀫𑀦𑁆𑀢𑀺, 𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑀜𑁆𑀘 𑀦 𑀤𑀽𑀭𑀁, 𑀣𑁄𑀓𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀤𑀭𑀣𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀓𑀼𑀲𑀺𑀦𑀸𑀭𑀁 𑀕𑀦𑁆𑀢𑁆𑀯𑀸 𑀤𑀲𑀩𑀮𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀫𑀕𑁆𑀕𑀸 ¶ 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 ¶ 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀧𑁂𑀢𑁆𑀯𑀸 𑀉𑀤𑀓𑀢𑀼𑀫𑁆𑀩𑀢𑁄 𑀉𑀤𑀓𑁂𑀦 𑀳𑀢𑁆𑀣𑀧𑀸𑀤𑁂 𑀲𑀻𑀢𑀮𑁂 𑀓𑀢𑁆𑀯𑀸 𑀦𑀺𑀲𑀻𑀤𑀺. 𑀧𑀭𑀺𑀯𑀸𑀭𑀪𑀺𑀓𑁆𑀔𑀽𑀧𑀺𑀲𑁆𑀲 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂 𑀓𑀫𑁆𑀫𑀁 𑀓𑀼𑀭𑀼𑀫𑀸𑀦𑀸 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀯𑀡𑁆𑀡𑀁 𑀪𑀡𑀫𑀸𑀦𑀸 𑀦𑀺𑀲𑀻𑀤𑀺𑀁𑀲𑀼. 𑀇𑀢𑀺 𑀤𑀭𑀣𑀯𑀺𑀦𑁄𑀤𑀦𑀢𑁆𑀣𑀸𑀬 𑀦𑀺𑀲𑀺𑀦𑁆𑀦𑀢𑁆𑀢𑀸 ‘‘𑀤𑀺𑀯𑀸𑀯𑀺𑀳𑀸𑀭’’𑀦𑁆𑀢𑀺 𑀦 𑀯𑀼𑀢𑁆𑀢𑀁.

𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸𑀢𑀺 𑀫𑀳𑀸𑀧𑀸𑀢𑀺𑀧𑁆𑀧𑀫𑀸𑀡𑀁 𑀧𑀼𑀧𑁆𑀨𑀁 𑀆𑀕𑀦𑁆𑀢𑀼𑀓𑀤𑀡𑁆𑀟𑀓𑁂 𑀞𑀧𑁂𑀢𑁆𑀯𑀸 𑀙𑀢𑁆𑀢𑀁 𑀯𑀺𑀬 𑀕𑀳𑁂𑀢𑁆𑀯𑀸. 𑀅𑀤𑁆𑀤𑀲 𑀔𑁄𑀢𑀺 𑀆𑀕𑀘𑁆𑀙𑀦𑁆𑀢𑀁 𑀤𑀽𑀭𑀢𑁄 𑀅𑀤𑁆𑀤𑀲. 𑀤𑀺𑀲𑁆𑀯𑀸 𑀘 𑀧𑀦 𑀘𑀺𑀦𑁆𑀢𑁂𑀲𑀺 𑁋

‘‘𑀏𑀢𑀁 𑀆𑀚𑀻𑀯𑀓𑀲𑁆𑀲 𑀳𑀢𑁆𑀣𑁂 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀁 𑀧𑀜𑁆𑀜𑀸𑀬𑀢𑀺, 𑀏𑀢𑀜𑁆𑀘 𑀦 𑀲𑀩𑁆𑀩𑀤𑀸 𑀫𑀦𑀼𑀲𑁆𑀲𑀧𑀣𑁂 𑀧𑀜𑁆𑀜𑀸𑀬𑀢𑀺, 𑀬𑀤𑀸 𑀧𑀦 𑀓𑁄𑀘𑀺 𑀇𑀤𑁆𑀥𑀺𑀫𑀸 𑀇𑀤𑁆𑀥𑀺𑀁 𑀯𑀺𑀓𑀼𑀩𑁆𑀩𑀢𑀺, 𑀢𑀤𑀸 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀲𑁆𑀲 𑀘 𑀫𑀸𑀢𑀼𑀓𑀼𑀘𑁆𑀙𑀺𑀑𑀓𑁆𑀓𑀫𑀦𑀸𑀤𑀻𑀲𑀼 𑀳𑁄𑀢𑀺. 𑀦 𑀔𑁄 𑀧𑀦 𑀅𑀚𑁆𑀚 𑀓𑁂𑀦𑀘𑀺 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁 𑀓𑀢𑀁, 𑀦 𑀫𑁂 𑀲𑀢𑁆𑀣𑀸 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄, 𑀦 𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑁆𑀢𑁄, 𑀦𑀸𑀧𑀺𑀲𑁆𑀲 𑀅𑀚𑁆𑀚 𑀅𑀪𑀺𑀲𑀫𑁆𑀩𑁄𑀥𑀺, 𑀦 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀁, 𑀦 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁, 𑀦 𑀤𑁂𑀯𑁄𑀭𑁄𑀳𑀡𑀁, 𑀦 𑀆𑀬𑀼𑀲𑀗𑁆𑀔𑀸𑀭𑁄𑀲𑁆𑀲𑀚𑁆𑀚𑀦𑀁. 𑀫𑀳𑀮𑁆𑀮𑀓𑁄 𑀧𑀦 𑀫𑁂 𑀲𑀢𑁆𑀣𑀸 𑀥𑀼𑀯𑀁 𑀧𑀭𑀺𑀦𑀺𑀩𑁆𑀩𑀼𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺.

𑀢𑀢𑁄 𑁋 ‘‘𑀧𑀼𑀘𑁆𑀙𑀸𑀫𑀺 𑀦’’𑀦𑁆𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑁋 ‘‘𑀲𑀘𑁂 𑀔𑁄 𑀧𑀦 𑀦𑀺𑀲𑀺𑀦𑁆𑀦𑀓𑁄𑀯 𑀧𑀼𑀘𑁆𑀙𑀸𑀫𑀺, 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀓𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀉𑀝𑁆𑀞𑀳𑀺𑀢𑁆𑀯𑀸 𑀞𑀺𑀢𑀝𑁆𑀞𑀸𑀦𑀢𑁄 𑀅𑀧𑀓𑁆𑀓𑀫𑁆𑀫 𑀙𑀤𑁆𑀤𑀦𑁆𑀢𑁄 𑀦𑀸𑀕𑀭𑀸𑀚𑀸 𑀫𑀡𑀺𑀘𑀫𑁆𑀫𑀁 𑀯𑀺𑀬 𑀤𑀲𑀩𑀮𑀤𑀢𑁆𑀢𑀺𑀬𑀁 𑀫𑁂𑀖𑀯𑀡𑁆𑀡𑀁 𑀧𑀁𑀲𑀼𑀓𑀽𑀮𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀅𑀜𑁆𑀚𑀮𑀺𑀁 𑀲𑀺𑀭𑀲𑁆𑀫𑀺𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀲𑀢𑁆𑀣𑀭𑀺 𑀓𑀢𑁂𑀦 𑀕𑀸𑀭𑀯𑁂𑀦 𑀆𑀚𑀻𑀯𑀓𑀲𑁆𑀲 𑀅𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 𑁋 ‘‘𑀆𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸𑀭𑀁 𑀚𑀸𑀦𑀸𑀲𑀻’’𑀢𑀺 𑀆𑀳. 𑀓𑀺𑀁 𑀧𑀦 𑀲𑀢𑁆𑀣𑀼 𑀧𑀭𑀺𑀦𑀺𑀩𑁆𑀩𑀸𑀦𑀁 𑀚𑀸𑀦𑀦𑁆𑀢𑁄 𑀧𑀼𑀘𑁆𑀙𑀺 𑀅𑀚𑀸𑀦𑀦𑁆𑀢𑁄𑀢𑀺? 𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀁 𑀔𑀻𑀡𑀸𑀲𑀯𑀸𑀦𑀁 𑀚𑀸𑀦𑀦𑀁, 𑀅𑀦𑀸𑀯𑀚𑁆𑀚𑀺𑀢𑀢𑁆𑀢𑀸 𑀧𑀦𑁂𑀲 𑀅𑀚𑀸𑀦𑀦𑁆𑀢𑁄 𑀧𑀼𑀘𑁆𑀙𑀻𑀢𑀺 ¶ 𑀏𑀓𑁂. 𑀣𑁂𑀭𑁄 𑀲𑀫𑀸𑀧𑀢𑁆𑀢𑀺𑀩𑀳𑀼𑀮𑁄, 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀮𑁂𑀡𑀫𑀡𑁆𑀟𑀧𑀸𑀤𑀻𑀲𑀼 𑀦𑀺𑀘𑁆𑀘𑀁 𑀲𑀫𑀸𑀧𑀢𑁆𑀢𑀺𑀩𑀮𑁂𑀦𑁂𑀯 𑀬𑀸𑀧𑁂𑀢𑀺, 𑀓𑀼𑀮𑀲𑀦𑁆𑀢𑀓𑀫𑁆𑀧𑀺 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑁂 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑁄𑀯 𑀪𑀺𑀓𑁆𑀔𑀁 𑀕𑀡𑁆𑀳𑀸𑀢𑀺. 𑀣𑁂𑀭𑁄 𑀓𑀺𑀭 𑀇𑀫𑀺𑀦𑀸 𑀧𑀘𑁆𑀙𑀺𑀫𑁂𑀦 𑀅𑀢𑁆𑀢𑀪𑀸𑀯𑁂𑀦 𑀫𑀳𑀸𑀚𑀦𑀸𑀦𑀼𑀕𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀺 𑁋 ‘‘𑀬𑁂 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀯𑀸 𑀤𑁂𑀦𑁆𑀢𑀺 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀯𑀸 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀢𑁂𑀲𑀁 𑀢𑀁 𑀫𑀳𑀧𑁆𑀨𑀮𑀁 𑀳𑁄𑀢𑀽’’𑀢𑀺 𑀏𑀯𑀁 ¶ 𑀓𑀭𑁄𑀢𑀺. 𑀢𑀲𑁆𑀫𑀸 𑀲𑀫𑀸𑀧𑀢𑁆𑀢𑀺𑀩𑀳𑀼𑀮𑀢𑀸𑀬 𑀦 𑀚𑀸𑀦𑀸𑀢𑀺. 𑀇𑀢𑀺 𑀅𑀚𑀸𑀦𑀦𑁆𑀢𑁄𑀯 𑀧𑀼𑀘𑁆𑀙𑀢𑀻𑀢𑀺 𑀯𑀤𑀦𑁆𑀢𑀺, 𑀢𑀁 ¶ 𑀦 𑀕𑀳𑁂𑀢𑀩𑁆𑀩𑀁.

𑀦 𑀳𑁂𑀢𑁆𑀣 𑀅𑀚𑀸𑀦𑀦𑀓𑀸𑀭𑀡𑀁 𑀅𑀢𑁆𑀣𑀺. 𑀅𑀪𑀺𑀮𑀓𑁆𑀔𑀺𑀢𑀁 𑀲𑀢𑁆𑀣𑀼 𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀳𑁄𑀲𑀺, 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀓𑀫𑁆𑀧𑀦𑀸𑀤𑀻𑀳𑀺 𑀦𑀺𑀫𑀺𑀢𑁆𑀢𑁂𑀳𑀺. 𑀣𑁂𑀭𑀲𑁆𑀲 𑀧𑀦 𑀧𑀭𑀺𑀲𑀸𑀬 𑀓𑁂𑀳𑀺𑀘𑀺 𑀪𑀺𑀓𑁆𑀔𑀽𑀳𑀺 𑀪𑀕𑀯𑀸 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀓𑁂𑀳𑀺𑀘𑀺 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀢𑀢𑁆𑀣 𑀬𑁂𑀳𑀺𑀧𑀺 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀢𑁂𑀧𑀺 𑀧𑀲𑁆𑀲𑀺𑀢𑀼𑀓𑀸𑀫𑀸𑀯, 𑀬𑁂𑀳𑀺𑀧𑀺 𑀅𑀤𑀺𑀝𑁆𑀞𑀧𑀼𑀩𑁆𑀩𑁄, 𑀢𑁂𑀧𑀺 𑀧𑀲𑁆𑀲𑀺𑀢𑀼𑀓𑀸𑀫𑀸𑀯. 𑀢𑀢𑁆𑀣 𑀬𑁂𑀳𑀺 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀢𑁂 𑀅𑀢𑀺𑀤𑀲𑁆𑀲𑀦𑀓𑀸𑀫𑀢𑀸𑀬 𑀕𑀦𑁆𑀢𑁆𑀯𑀸 ‘‘𑀓𑀼𑀳𑀺𑀁 𑀪𑀕𑀯𑀸’’𑀢𑀺 𑀧𑀼𑀘𑁆𑀙𑀦𑁆𑀢𑀸 ‘‘𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺 𑀲𑀼𑀢𑁆𑀯𑀸 𑀲𑀦𑁆𑀥𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀘𑀻𑀯𑀭𑀜𑁆𑀘 𑀧𑀢𑁆𑀢𑀜𑁆𑀘 𑀙𑀟𑁆𑀟𑁂𑀢𑁆𑀯𑀸 𑀏𑀓𑀯𑀢𑁆𑀣𑀸 𑀯𑀸 𑀤𑀼𑀦𑁆𑀦𑀺𑀯𑀢𑁆𑀣𑀸 𑀯𑀸 𑀤𑀼𑀧𑁆𑀧𑀸𑀭𑀼𑀢𑀸 𑀯𑀸 𑀉𑀭𑀸𑀦𑀺 𑀧𑀝𑀺𑀧𑀺𑀲𑀦𑁆𑀢𑀸 𑀧𑀭𑁄𑀤𑀺𑀲𑁆𑀲𑀦𑁆𑀢𑀺. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑁋 ‘‘𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀆𑀕𑀢𑀸 𑀧𑀁𑀲𑀼𑀓𑀽𑀮𑀺𑀓𑀸 𑀲𑀬𑀫𑁆𑀧𑀺 𑀇𑀢𑁆𑀣𑀺𑀬𑁄 𑀯𑀺𑀬 𑀧𑀭𑁄𑀤𑀦𑁆𑀢𑀺, 𑀢𑁂 𑀓𑀺𑀁 𑀅𑀫𑁆𑀳𑁂 𑀲𑀫𑀲𑁆𑀲𑀸𑀲𑁂𑀲𑁆𑀲𑀦𑁆𑀢𑀻’’𑀢𑀺 𑀫𑀬𑁆𑀳𑀁 𑀤𑁄𑀲𑀁 𑀤𑀲𑁆𑀲𑀦𑁆𑀢𑀺. 𑀇𑀤𑀁 𑀧𑀦 𑀲𑀼𑀜𑁆𑀜𑀁 𑀫𑀳𑀸𑀅𑀭𑀜𑁆𑀜𑀁, 𑀇𑀥 𑀬𑀣𑀸 𑀢𑀣𑀸 𑀭𑁄𑀤𑀦𑁆𑀢𑁂𑀲𑀼 𑀤𑁄𑀲𑁄 𑀦𑀢𑁆𑀣𑀺. 𑀧𑀼𑀭𑀺𑀫𑀢𑀭𑀁 𑀲𑀼𑀢𑁆𑀯𑀸 𑀦𑀸𑀫 𑀲𑁄𑀓𑁄𑀧𑀺 𑀢𑀦𑀼𑀓𑁄 𑀳𑁄𑀢𑀻𑀢𑀺 𑀪𑀺𑀓𑁆𑀔𑀽𑀦𑀁 𑀲𑀢𑀼𑀧𑁆𑀧𑀸𑀤𑀦𑀢𑁆𑀣𑀸𑀬 𑀚𑀸𑀦𑀦𑁆𑀢𑁄𑀯 𑀧𑀼𑀘𑁆𑀙𑀺.

𑀅𑀚𑁆𑀚 𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁄 𑀲𑀫𑀡𑁄 𑀕𑁄𑀢𑀫𑁄𑀢𑀺 𑀅𑀚𑁆𑀚 𑀲𑀫𑀡𑁄 𑀕𑁄𑀢𑀫𑁄 𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁄. 𑀢𑀢𑁄 𑀫𑁂 𑀇𑀤𑀦𑁆𑀢𑀺 𑀢𑀢𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀝𑁆𑀞𑀸𑀦𑀢𑁄.

𑁨𑁩𑁨. 𑀲𑀼𑀪𑀤𑁆𑀤𑁄 𑀦𑀸𑀫 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄𑀢𑀺 ‘‘𑀲𑀼𑀪𑀤𑁆𑀤𑁄’’𑀢𑀺 𑀢𑀲𑁆𑀲 𑀦𑀸𑀫𑀁. 𑀯𑀼𑀟𑁆𑀠𑀓𑀸𑀮𑁂 𑀧𑀦 𑀧𑀩𑁆𑀩𑀚𑀺𑀢𑀢𑁆𑀢𑀸 ‘‘𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀓𑀲𑁆𑀫𑀸 𑀧𑀦 𑀲𑁄 𑀏𑀯𑀫𑀸𑀳? 𑀪𑀕𑀯𑀢𑀺 𑀆𑀖𑀸𑀢𑁂𑀦. 𑀅𑀬𑀁 𑀓𑀺𑀭𑁂𑀲𑁄 𑀔𑀦𑁆𑀥𑀓𑁂 𑀆𑀕𑀢𑁂 𑀆𑀢𑀼𑀫𑀸𑀯𑀢𑁆𑀣𑀼𑀲𑁆𑀫𑀺𑀁 𑀦𑀳𑀸𑀧𑀺𑀢𑀧𑀼𑀩𑁆𑀩𑀓𑁄 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄 𑀪𑀕𑀯𑀢𑀺 𑀓𑀼𑀲𑀺𑀦𑀸𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀟𑁆𑀠𑀢𑁂𑀴𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀆𑀢𑀼𑀫𑀁 𑀆𑀕𑀘𑁆𑀙𑀦𑁆𑀢𑁂 𑀪𑀕𑀯𑀸 𑀆𑀕𑀘𑁆𑀙𑀢𑀻𑀢𑀺 𑀲𑀼𑀢𑁆𑀯𑀸 𑁋 ‘‘𑀆𑀕𑀢𑀓𑀸𑀮𑁂 𑀬𑀸𑀕𑀼𑀧𑀸𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀺𑀢𑁂 𑀤𑁆𑀯𑁂 𑀧𑀼𑀢𑁆𑀢𑁂 𑀏𑀢𑀤𑀯𑁄𑀘 𑁋 ‘‘𑀪𑀕𑀯𑀸 𑀓𑀺𑀭, 𑀢𑀸𑀢𑀸, 𑀆𑀢𑀼𑀫𑀁 𑀆𑀕𑀘𑁆𑀙𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀅𑀟𑁆𑀠𑀢𑁂𑀴𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺; 𑀕𑀘𑁆𑀙𑀣 𑀢𑀼𑀫𑁆𑀳𑁂, 𑀢𑀸𑀢𑀸, 𑀔𑀼𑀭𑀪𑀡𑁆𑀟𑀁 𑀆𑀤𑀸𑀬 𑀦𑀸𑀴𑀺𑀬𑀸𑀯𑀸𑀧𑀓𑁂𑀦 𑀅𑀦𑀼𑀖𑀭𑀓𑀁 𑀅𑀦𑀼𑀖𑀭𑀓𑀁 𑀆𑀳𑀺𑀡𑁆𑀟𑀣 𑀮𑁄𑀡𑀫𑁆𑀧𑀺 𑀢𑁂𑀮𑀫𑁆𑀧𑀺 𑀢𑀡𑁆𑀟𑀼𑀮𑀫𑁆𑀧𑀺 𑀔𑀸𑀤𑀦𑀻𑀬𑀫𑁆𑀧𑀺 ¶ 𑀲𑀁𑀳𑀭𑀣 ¶ 𑀪𑀕𑀯𑀢𑁄 𑀆𑀕𑀢𑀲𑁆𑀲 𑀬𑀸𑀕𑀼𑀧𑀸𑀦𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 (𑀫𑀳𑀸𑀯. 𑁩𑁦𑁩). 𑀢𑁂 𑀢𑀣𑀸 𑀅𑀓𑀁𑀲𑀼.

𑀫𑀦𑀼𑀲𑁆𑀲𑀸 ¶ 𑀢𑁂 𑀤𑀸𑀭𑀓𑁂 𑀫𑀜𑁆𑀚𑀼𑀓𑁂 𑀧𑀝𑀺𑀪𑀸𑀦𑁂𑀬𑁆𑀬𑀓𑁂 𑀤𑀺𑀲𑁆𑀯𑀸 𑀓𑀸𑀭𑁂𑀢𑀼𑀓𑀸𑀫𑀸𑀧𑀺 𑀅𑀓𑀸𑀭𑁂𑀢𑀼𑀓𑀸𑀫𑀸𑀧𑀺 𑀓𑀸𑀭𑁂𑀦𑁆𑀢𑀺𑀬𑁂𑀯. 𑀓𑀢𑀓𑀸𑀮𑁂 𑁋 ‘‘𑀓𑀺𑀁 𑀕𑀡𑁆𑀳𑀺𑀲𑁆𑀲𑀣 𑀢𑀸𑀢𑀸’’𑀢𑀺 𑀧𑀼𑀘𑁆𑀙𑀦𑁆𑀢𑀺. 𑀢𑁂 𑀯𑀤𑀦𑁆𑀢𑀺 𑁋 ‘‘𑀦 𑀅𑀫𑁆𑀳𑀸𑀓𑀁 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀅𑀢𑁆𑀣𑁄, 𑀧𑀺𑀢𑀸 𑀧𑀦 𑀦𑁄 𑀪𑀕𑀯𑀢𑁄, 𑀆𑀕𑀢𑀓𑀸𑀮𑁂 𑀬𑀸𑀕𑀼𑀤𑀸𑀦𑀁 𑀤𑀸𑀢𑀼𑀓𑀸𑀫𑁄’’𑀢𑀺. 𑀢𑀁 𑀲𑀼𑀢𑁆𑀯𑀸 𑀫𑀦𑀼𑀲𑁆𑀲𑀸 𑀅𑀧𑀭𑀺𑀕𑀡𑁂𑀢𑁆𑀯𑀸𑀯 𑀬𑀁 𑀢𑁂 𑀲𑀓𑁆𑀓𑁄𑀦𑁆𑀢𑀺 𑀆𑀳𑀭𑀺𑀢𑀼𑀁, 𑀲𑀩𑁆𑀩𑀁 𑀤𑁂𑀦𑁆𑀢𑀺. 𑀬𑀫𑁆𑀧𑀺 𑀦 𑀲𑀓𑁆𑀓𑁄𑀦𑁆𑀢𑀺, 𑀫𑀦𑀼𑀲𑁆𑀲𑁂𑀳𑀺 𑀧𑁂𑀲𑁂𑀦𑁆𑀢𑀺. 𑀅𑀣 𑀪𑀕𑀯𑀢𑀺 𑀆𑀢𑀼𑀫𑀁 𑀆𑀕𑀦𑁆𑀢𑁆𑀯𑀸 𑀪𑀼𑀲𑀸𑀕𑀸𑀭𑀁 𑀧𑀯𑀺𑀝𑁆𑀞𑁂 𑀲𑀼𑀪𑀤𑁆𑀤𑁄 𑀲𑀸𑀬𑀦𑁆𑀳𑀲𑀫𑀬𑀁 𑀕𑀸𑀫𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀉𑀧𑀸𑀲𑀓𑀸, 𑀦𑀸𑀳𑀁 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀸 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀧𑀘𑁆𑀘𑀸𑀲𑀻𑀲𑀸𑀫𑀺, 𑀫𑀬𑁆𑀳𑀁 𑀤𑀸𑀭𑀓𑁂𑀳𑀺 𑀆𑀪𑀢𑀸𑀦𑀺 𑀢𑀡𑁆𑀟𑀼𑀮𑀸𑀤𑀻𑀦𑀺𑀬𑁂𑀯 𑀲𑀗𑁆𑀖𑀲𑁆𑀲 𑀧𑀳𑁄𑀦𑁆𑀢𑀺. 𑀬𑀁 𑀳𑀢𑁆𑀣𑀓𑀫𑁆𑀫𑀁, 𑀢𑀁 𑀫𑁂 𑀤𑁂𑀣𑀸’’𑀢𑀺. ‘‘𑀇𑀤𑀜𑁆𑀘𑀺𑀤𑀜𑁆𑀘 𑀕𑀡𑁆𑀳𑀣𑀸’’𑀢𑀺 𑀲𑀩𑁆𑀩𑀽𑀧𑀓𑀭𑀡𑀸𑀦𑀺 𑀕𑀸𑀳𑁂𑀢𑁆𑀯𑀸 𑀯𑀺𑀳𑀸𑀭𑁂 𑀉𑀤𑁆𑀥𑀦𑀸𑀦𑀺 𑀓𑀸𑀭𑁂𑀢𑁆𑀯𑀸 𑀏𑀓𑀁 𑀓𑀸𑀴𑀓𑀁 𑀓𑀸𑀲𑀸𑀯𑀁 𑀦𑀺𑀯𑀸𑀲𑁂𑀢𑁆𑀯𑀸 𑀢𑀸𑀤𑀺𑀲𑀫𑁂𑀯 𑀧𑀸𑀭𑀼𑀧𑀺𑀢𑁆𑀯𑀸 𑁋 ‘‘𑀇𑀤𑀁 𑀓𑀭𑁄𑀣, 𑀇𑀤𑀁 𑀓𑀭𑁄𑀣𑀸’’𑀢𑀺 𑀲𑀩𑁆𑀩𑀭𑀢𑁆𑀢𑀺𑀁 𑀯𑀺𑀘𑀸𑀭𑁂𑀦𑁆𑀢𑁄 𑀲𑀢𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀪𑁄𑀚𑁆𑀚𑀬𑀸𑀕𑀼𑀜𑁆𑀘 𑀫𑀥𑀼𑀕𑁄𑀴𑀓𑀜𑁆𑀘 𑀧𑀝𑀺𑀬𑀸𑀤𑀸𑀧𑁂𑀲𑀺. 𑀪𑁄𑀚𑁆𑀚𑀬𑀸𑀕𑀼 𑀦𑀸𑀫 𑀪𑀼𑀜𑁆𑀚𑀺𑀢𑁆𑀯𑀸 𑀧𑀸𑀢𑀩𑁆𑀩𑀬𑀸𑀕𑀼, 𑀢𑀢𑁆𑀣 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀫𑀘𑁆𑀙𑀫𑀁𑀲𑀧𑀼𑀧𑁆𑀨𑀨𑀮𑀭𑀲𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀔𑀸𑀤𑀦𑀻𑀬𑀁 𑀦𑀸𑀫 𑀲𑀩𑁆𑀩𑀁 𑀧𑀓𑁆𑀔𑀺𑀧𑀢𑀺 𑀓𑀻𑀴𑀺𑀢𑀼𑀓𑀸𑀫𑀸𑀦𑀁 𑀲𑀻𑀲𑀫𑀓𑁆𑀔𑀦𑀬𑁄𑀕𑁆𑀕𑀸 𑀳𑁄𑀢𑀺 𑀲𑀼𑀕𑀦𑁆𑀥𑀕𑀦𑁆𑀥𑀸.

𑀅𑀣 𑀪𑀕𑀯𑀸 𑀓𑀸𑀮𑀲𑁆𑀲𑁂𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁 𑀆𑀢𑀼𑀫𑀦𑀕𑀭𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀫𑀦𑀼𑀲𑁆𑀲𑀸 𑀢𑀲𑁆𑀲 𑀆𑀭𑁄𑀘𑁂𑀲𑀼𑀁 𑁋 ‘‘𑀪𑀕𑀯𑀸 𑀧𑀺𑀡𑁆𑀟𑀸𑀬 𑀕𑀸𑀫𑀁 𑀧𑀯𑀺𑀲𑀢𑀺, 𑀢𑀬𑀸 𑀓𑀲𑁆𑀲 𑀬𑀸𑀕𑀼 𑀧𑀝𑀺𑀬𑀸𑀤𑀺𑀢𑀸’’𑀢𑀺. 𑀲𑁄 𑀬𑀣𑀸𑀦𑀺𑀯𑀢𑁆𑀣𑀧𑀸𑀭𑀼𑀢𑁂𑀳𑁂𑀯 𑀢𑁂𑀳𑀺 𑀓𑀸𑀴𑀓𑀓𑀸𑀲𑀸𑀯𑁂𑀳𑀺 𑀏𑀓𑁂𑀦 𑀳𑀢𑁆𑀣𑁂𑀦 𑀤𑀩𑁆𑀩𑀺𑀜𑁆𑀘 𑀓𑀝𑀘𑁆𑀙𑀼𑀜𑁆𑀘 𑀕𑀳𑁂𑀢𑁆𑀯𑀸 𑀩𑁆𑀭𑀳𑁆𑀫𑀸 𑀯𑀺𑀬 𑀤𑀓𑁆𑀔𑀺𑀡𑀚𑀸𑀡𑀼𑀫𑀡𑁆𑀟𑀮𑀁 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑁋 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀬𑀸𑀕𑀼’’𑀦𑁆𑀢𑀺 𑀆𑀳.

𑀢𑀢𑁄 ‘‘𑀚𑀸𑀦𑀦𑁆𑀢𑀸𑀧𑀺 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀻’’𑀢𑀺 𑀔𑀦𑁆𑀥𑀓𑁂 𑀆𑀕𑀢𑀦𑀬𑁂𑀦 𑀪𑀕𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 𑀘 𑀲𑀼𑀢𑁆𑀯𑀸 𑀘 𑀢𑀁 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀁 𑀯𑀺𑀕𑀭𑀳𑀺𑀢𑁆𑀯𑀸 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀓𑀧𑁆𑀧𑀺𑀬𑀲𑀫𑀸𑀤𑀸𑀦𑀲𑀺𑀓𑁆𑀔𑀸𑀧𑀤𑀜𑁆𑀘, 𑀔𑀼𑀭𑀪𑀡𑁆𑀟𑀧𑀭𑀺𑀳𑀭𑀡𑀲𑀺𑀓𑁆𑀔𑀸𑀧𑀤𑀜𑁆𑀘𑀸𑀢𑀺 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 ¶ 𑀧𑀜𑁆𑀜𑀧𑁂𑀢𑁆𑀯𑀸 𑁋 ‘‘𑀪𑀺𑀓𑁆𑀔𑀯𑁂, 𑀅𑀦𑁂𑀓𑀓𑀧𑁆𑀧𑀓𑁄𑀝𑀺𑀬𑁄 𑀪𑁄𑀚𑀦𑀁 𑀧𑀭𑀺𑀬𑁂𑀲𑀦𑁆𑀢𑁂𑀳𑁂𑀯 ¶ 𑀯𑀻𑀢𑀺𑀦𑀸𑀫𑀺𑀢𑀸, 𑀇𑀤𑀁 𑀧𑀦 𑀢𑀼𑀫𑁆𑀳𑀸𑀓𑀁 𑀅𑀓𑀧𑁆𑀧𑀺𑀬𑀁 𑀅𑀥𑀫𑁆𑀫𑁂𑀦 𑀉𑀧𑁆𑀧𑀦𑁆𑀦𑀁 𑀪𑁄𑀚𑀦𑀁, 𑀇𑀫𑀁 𑀧𑀭𑀺𑀪𑀼𑀢𑁆𑀢𑀸𑀦𑀁 𑀅𑀦𑁂𑀓𑀸𑀦𑀺 𑀅𑀢𑁆𑀢𑀪𑀸𑀯𑀲𑀳𑀲𑁆𑀲𑀸𑀦𑀺 𑀅𑀧𑀸𑀬𑁂𑀲𑁆𑀯𑁂𑀯 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀦𑁆𑀢𑀺, 𑀅𑀧𑁂𑀣 𑀫𑀸 𑀕𑀡𑁆𑀳𑀣𑀸’’𑀢𑀺 𑀪𑀺𑀓𑁆𑀔𑀸𑀘𑀸𑀭𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺. 𑀏𑀓𑀪𑀺𑀓𑁆𑀔𑀼𑀦𑀸𑀧𑀺 𑀦 𑀓𑀺𑀜𑁆𑀘𑀺 𑀕𑀳𑀺𑀢𑀁.

𑀲𑀼𑀪𑀤𑁆𑀤𑁄 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 𑀅𑀬𑀁 ‘‘𑀲𑀩𑁆𑀩𑀁 𑀚𑀸𑀦𑀸𑀫𑀻’’𑀢𑀺 𑀆𑀳𑀺𑀡𑁆𑀟𑀢𑀺. 𑀲𑀘𑁂 𑀦 𑀕𑀳𑀺𑀢𑀼𑀓𑀸𑀫𑁄, 𑀧𑁂𑀲𑁂𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀁. 𑀅𑀬𑀁 𑀧𑀓𑁆𑀓𑀸𑀳𑀸𑀭𑁄 𑀦𑀸𑀫 𑀲𑀩𑁆𑀩𑀘𑀺𑀭𑀁 𑀢𑀺𑀝𑁆𑀞𑀦𑁆𑀢𑁄 𑀲𑀢𑁆𑀢𑀸𑀳𑀫𑀢𑁆𑀢𑀁 𑀢𑀺𑀝𑁆𑀞𑁂𑀬𑁆𑀬. 𑀇𑀤𑀜𑁆𑀳𑀺 𑀫𑀫 𑀬𑀸𑀯𑀚𑀻𑀯𑀁 𑀧𑀭𑀺𑀬𑀢𑁆𑀢𑀁 𑀅𑀲𑁆𑀲. 𑀲𑀩𑁆𑀩𑀁 𑀢𑁂𑀦 𑀦𑀸𑀲𑀺𑀢𑀁, 𑀅𑀳𑀺𑀢𑀓𑀸𑀫𑁄 𑀅𑀬𑀁 𑀫𑀬𑁆𑀳𑀦𑁆𑀢𑀺 ¶ 𑀪𑀕𑀯𑀢𑀺 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀤𑀲𑀩𑀮𑁂 𑀥𑀭𑀦𑁆𑀢𑁂 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀦𑀸𑀲𑀓𑁆𑀔𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀬𑀁 𑀉𑀘𑁆𑀘𑀸 𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀫𑀳𑀸𑀧𑀼𑀭𑀺𑀲𑁄, 𑀲𑀘𑁂 𑀓𑀺𑀜𑁆𑀘𑀺 𑀯𑀓𑁆𑀔𑀸𑀫𑀺, 𑀫𑀁𑀬𑁂𑀯 𑀲𑀦𑁆𑀢𑀚𑁆𑀚𑁂𑀲𑁆𑀲𑀢𑀻’’𑀢𑀺. 𑀲𑁆𑀯𑀸𑀬𑀁 𑀅𑀚𑁆𑀚 ‘‘𑀧𑀭𑀺𑀦𑀺𑀩𑁆𑀩𑀼𑀢𑁄 𑀪𑀕𑀯𑀸’’𑀢𑀺 𑀲𑀼𑀢𑁆𑀯𑀸 𑀮𑀤𑁆𑀥𑀲𑁆𑀲𑀸𑀲𑁄 𑀯𑀺𑀬 𑀳𑀝𑁆𑀞𑀢𑀼𑀝𑁆𑀞𑁄 𑀏𑀯𑀫𑀸𑀳.

𑀣𑁂𑀭𑁄 𑀢𑀁 𑀲𑀼𑀢𑁆𑀯𑀸 𑀳𑀤𑀬𑁂 𑀧𑀳𑀸𑀭𑀤𑀸𑀦𑀁 𑀯𑀺𑀬 𑀫𑀢𑁆𑀣𑀓𑁂 𑀧𑀢𑀺𑀢𑀲𑀼𑀓𑁆𑀔𑀸𑀲𑀦𑀺 𑀯𑀺𑀬 𑀫𑀜𑁆𑀜𑀺, 𑀥𑀫𑁆𑀫𑀲𑀁𑀯𑁂𑀕𑁄 𑀘𑀲𑁆𑀲 𑀉𑀧𑁆𑀧𑀚𑁆𑀚𑀺 𑁋 ‘‘𑀲𑀢𑁆𑀢𑀸𑀳𑀫𑀢𑁆𑀢𑀧𑀭𑀺𑀦𑀺𑀩𑁆𑀩𑀼𑀢𑁄 𑀪𑀕𑀯𑀸, 𑀅𑀚𑁆𑀚𑀸𑀧𑀺𑀲𑁆𑀲 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀭𑀻𑀭𑀁 𑀥𑀭𑀢𑀺𑀬𑁂𑀯, 𑀤𑀼𑀓𑁆𑀔𑁂𑀦 𑀪𑀕𑀯𑀢𑀸 𑀆𑀭𑀸𑀥𑀺𑀢𑀲𑀸𑀲𑀦𑁂 𑀦𑀸𑀫 𑀏𑀯𑀁 𑀮𑀳𑀼 𑀫𑀳𑀦𑁆𑀢𑀁 𑀧𑀸𑀧𑀓𑀲𑀝𑀁 𑀓𑀡𑁆𑀝𑀓𑁄 𑀉𑀧𑁆𑀧𑀦𑁆𑀦𑁄, 𑀅𑀮𑀁 𑀔𑁄 𑀧𑀦𑁂𑀲 𑀧𑀸𑀧𑁄 𑀯𑀟𑁆𑀠𑀫𑀸𑀦𑁄 𑀅𑀜𑁆𑀜𑁂𑀧𑀺 𑀏𑀯𑀭𑀽𑀧𑁂 𑀲𑀳𑀸𑀬𑁂 𑀮𑀪𑀺𑀢𑁆𑀯𑀸 𑀲𑀓𑁆𑀓𑀸 𑀲𑀸𑀲𑀦𑀁 𑀑𑀲𑀓𑁆𑀓𑀸𑀧𑁂𑀢𑀼’’𑀦𑁆𑀢𑀺. 𑀢𑀢𑁄 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋

‘‘𑀲𑀘𑁂 𑀔𑁄 𑀧𑀦𑀸𑀳𑀁 𑀇𑀫𑀁 𑀫𑀳𑀮𑁆𑀮𑀓𑀁 𑀇𑀥𑁂𑀯 𑀧𑀺𑀮𑁄𑀢𑀺𑀓𑀁 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀙𑀸𑀭𑀺𑀓𑀸𑀬 𑀑𑀓𑀺𑀭𑀸𑀧𑁂𑀢𑁆𑀯𑀸 𑀦𑀻𑀳𑀭𑀸𑀧𑁂𑀲𑁆𑀲𑀸𑀫𑀺, 𑀫𑀦𑀼𑀲𑁆𑀲𑀸 ‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀭𑀻𑀭𑁂 𑀥𑀭𑀫𑀸𑀦𑁂𑀬𑁂𑀯 𑀲𑀸𑀯𑀓𑀸 𑀯𑀺𑀯𑀤𑀦𑁆𑀢𑀻’𑀢𑀺 𑀅𑀫𑁆𑀳𑀸𑀓𑀁 𑀤𑁄𑀲𑀁 𑀤𑀲𑁆𑀲𑁂𑀲𑁆𑀲𑀦𑁆𑀢𑀺 𑀅𑀥𑀺𑀯𑀸𑀲𑁂𑀫𑀺 𑀢𑀸𑀯.

𑀪𑀕𑀯𑀢𑀸 𑀳𑀺 𑀤𑁂𑀲𑀺𑀢𑁄 𑀥𑀫𑁆𑀫𑁄 𑀅𑀲𑀗𑁆𑀕𑀳𑀺𑀢𑀧𑀼𑀧𑁆𑀨𑀭𑀸𑀲𑀺𑀲𑀤𑀺𑀲𑁄. 𑀢𑀢𑁆𑀣 𑀬𑀣𑀸 𑀯𑀸𑀢𑁂𑀦 𑀧𑀳𑀝𑀧𑀼𑀧𑁆𑀨𑀸𑀦𑀺 𑀬𑀢𑁄 𑀯𑀸 𑀢𑀢𑁄 𑀯𑀸 𑀕𑀘𑁆𑀙𑀦𑁆𑀢𑀺, 𑀏𑀯𑀫𑁂𑀯 𑀏𑀯𑀭𑀽𑀧𑀸𑀦𑀁 𑀧𑀸𑀧𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀯𑀺𑀦𑀬𑁂 𑀏𑀓𑀁 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀲𑀼𑀢𑁆𑀢𑁂 𑀏𑀓𑁄 𑀤𑁆𑀯𑁂 𑀧𑀜𑁆𑀳𑀸𑀯𑀸𑀭𑀸 𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀅𑀪𑀺𑀥𑀫𑁆𑀫𑁂 𑀏𑀓𑀁 𑀤𑁆𑀯𑁂 𑀪𑀽𑀫𑀦𑁆𑀢𑀭𑀸𑀦𑀺 𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀅𑀦𑀼𑀓𑁆𑀓𑀫𑁂𑀦 𑀫𑀽𑀮𑁂 𑀦𑀝𑁆𑀞𑁂 𑀧𑀺𑀲𑀸𑀘𑀲𑀤𑀺𑀲𑀸 𑀪𑀯𑀺𑀲𑁆𑀲𑀸𑀫; 𑀢𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀸𑀫. 𑀏𑀯𑀜𑁆𑀳𑀺 𑀲𑀢𑀺 𑀤𑀴𑁆𑀳𑀁 ¶ 𑀲𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀯𑀺𑀬 𑀅𑀬𑀁 𑀥𑀫𑁆𑀫𑀯𑀺𑀦𑀬𑁄 𑀦𑀺𑀘𑁆𑀘𑀮𑁄 𑀪𑀯𑀺𑀲𑁆𑀲𑀢𑀺.

𑀏𑀢𑀤𑀢𑁆𑀣𑀜𑁆𑀳𑀺 𑀪𑀕𑀯𑀸 ¶ 𑀫𑀬𑁆𑀳𑀁 𑀢𑀻𑀡𑀺 𑀕𑀸𑀯𑀼𑀢𑀸𑀦𑀺 𑀧𑀘𑁆𑀘𑀼𑀕𑁆𑀕𑀫𑀦𑀁 𑀅𑀓𑀸𑀲𑀺, 𑀢𑀻𑀳𑀺 𑀑𑀯𑀸𑀤𑁂𑀳𑀺 𑀉𑀧𑀲𑀫𑁆𑀧𑀤𑀁 𑀅𑀤𑀸𑀲𑀺, 𑀓𑀸𑀬𑀢𑁄 𑀅𑀧𑀦𑁂𑀢𑁆𑀯𑀸 𑀓𑀸𑀬𑁂 𑀘𑀻𑀯𑀭𑀧𑀭𑀺𑀯𑀢𑁆𑀢𑀦𑀁 𑀅𑀓𑀸𑀲𑀺, 𑀆𑀓𑀸𑀲𑁂 𑀧𑀸𑀡𑀺𑀁 𑀘𑀸𑀮𑁂𑀢𑁆𑀯𑀸 𑀘𑀦𑁆𑀤𑀽𑀧𑀫𑀁 𑀧𑀝𑀺𑀧𑀤𑀁 𑀓𑀣𑁂𑀦𑁆𑀢𑁄 𑀫𑀁 𑀓𑀸𑀬𑀲𑀓𑁆𑀔𑀺𑀁 𑀓𑀢𑁆𑀯𑀸 𑀓𑀣𑁂𑀲𑀺, 𑀢𑀺𑀓𑁆𑀔𑀢𑁆𑀢𑀼𑀁 𑀲𑀓𑀮𑀲𑀸𑀲𑀦𑀤𑀸𑀬𑀚𑁆𑀚𑀁 𑀧𑀝𑀺𑀘𑁆𑀙𑀸𑀧𑁂𑀲𑀺. 𑀫𑀸𑀤𑀺𑀲𑁂 𑀪𑀺𑀓𑁆𑀔𑀼𑀫𑁆𑀳𑀺 𑀢𑀺𑀝𑁆𑀞𑀫𑀸𑀦𑁂 𑀅𑀬𑀁 𑀧𑀸𑀧𑁄 𑀲𑀸𑀲𑀦𑁂 𑀯𑀼𑀟𑁆𑀠𑀺𑀁 𑀫𑀸 𑀅𑀮𑀢𑁆𑀣. 𑀬𑀸𑀯 𑀅𑀥𑀫𑁆𑀫𑁄 𑀦 𑀤𑀺𑀧𑁆𑀧𑀢𑀺, 𑀥𑀫𑁆𑀫𑁄 𑀦 𑀧𑀝𑀺𑀩𑀸𑀳𑀺𑀬𑀢𑀺. 𑀅𑀯𑀺𑀦𑀬𑁄 𑀦 𑀤𑀺𑀧𑁆𑀧𑀢𑀺 𑀯𑀺𑀦𑀬𑁄 𑀦 𑀧𑀝𑀺𑀩𑀸𑀳𑀺𑀬𑀢𑀺. 𑀅𑀥𑀫𑁆𑀫𑀯𑀸𑀤𑀺𑀦𑁄 𑀦 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀥𑀫𑁆𑀫𑀯𑀸𑀤𑀺𑀦𑁄 𑀦 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺; 𑀅𑀯𑀺𑀦𑀬𑀯𑀸𑀤𑀺𑀦𑁄 𑀦 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀯𑀺𑀦𑀬𑀯𑀸𑀤𑀺𑀦𑁄 𑀦 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺. 𑀢𑀸𑀯 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀲𑁆𑀲𑀸𑀫𑀺. 𑀢𑀢𑁄 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀳𑁄𑀦𑀓𑀁 𑀕𑀳𑁂𑀢𑁆𑀯𑀸 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 ¶ 𑀓𑀣𑁂𑀲𑁆𑀲𑀦𑁆𑀢𑀺. 𑀅𑀣𑀸𑀬𑀁 𑀧𑀸𑀧𑁄 𑀲𑀬𑀫𑁂𑀯 𑀦𑀺𑀕𑁆𑀕𑀳𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀧𑀼𑀦 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀲𑀸𑀲𑀦𑀁 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘 𑀪𑀯𑀺𑀲𑁆𑀲𑀢𑀻’’𑀢𑀺.

𑀲𑁄 𑀏𑀯𑀁 𑀦𑀸𑀫 𑀫𑀬𑁆𑀳𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀓𑀲𑁆𑀲𑀘𑀺 𑀅𑀦𑀸𑀭𑁄𑀘𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀫𑀲𑁆𑀲𑀸𑀲𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄…𑀧𑁂… 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺.

𑁨𑁩𑁩. 𑀘𑀺𑀢𑀓𑀦𑁆𑀢𑀺 𑀯𑀻𑀲𑀭𑀢𑀦𑀲𑀢𑀺𑀓𑀁 𑀘𑀦𑁆𑀤𑀦𑀘𑀺𑀢𑀓𑀁. 𑀆𑀴𑀺𑀫𑁆𑀧𑁂𑀲𑁆𑀲𑀸𑀫𑀸𑀢𑀺 𑀅𑀕𑁆𑀕𑀺𑀁 𑀕𑀸𑀳𑀸𑀧𑁂𑀲𑁆𑀲𑀸𑀫. 𑀦 𑀲𑀓𑁆𑀓𑁄𑀦𑁆𑀢𑀺 𑀆𑀴𑀺𑀫𑁆𑀧𑁂𑀢𑀼𑀦𑁆𑀢𑀺 𑀅𑀝𑁆𑀞𑀧𑀺 𑀲𑁄𑀴𑀲𑀧𑀺 𑀤𑁆𑀯𑀢𑁆𑀢𑀺𑀁𑀲𑀧𑀺 𑀚𑀦𑀸 𑀚𑀸𑀮𑀦𑀢𑁆𑀣𑀸𑀬 𑀬𑀫𑀓𑀬𑀫𑀓𑀉𑀓𑁆𑀓𑀸𑀬𑁄 𑀕𑀳𑁂𑀢𑁆𑀯𑀸 𑀢𑀸𑀮𑀯𑀡𑁆𑀝𑁂𑀳𑀺 𑀩𑀻𑀚𑀦𑁆𑀢𑀸 𑀪𑀲𑁆𑀢𑀸𑀳𑀺 𑀥𑀫𑀦𑁆𑀢𑀸 𑀢𑀸𑀦𑀺 𑀢𑀸𑀦𑀺 𑀓𑀸𑀭𑀡𑀸𑀦𑀺 𑀓𑀭𑁄𑀦𑁆𑀢𑀸𑀧𑀺 𑀦 𑀲𑀓𑁆𑀓𑁄𑀦𑁆𑀢𑀺𑀬𑁂𑀯 𑀅𑀕𑁆𑀕𑀺𑀁 𑀕𑀸𑀳𑀸𑀧𑁂𑀢𑀼𑀁. 𑀤𑁂𑀯𑀢𑀸𑀦𑀁 𑀅𑀥𑀺𑀧𑁆𑀧𑀸𑀬𑁄𑀢𑀺 𑀏𑀢𑁆𑀣 𑀢𑀸 𑀓𑀺𑀭 𑀤𑁂𑀯𑀢𑀸 𑀣𑁂𑀭𑀲𑁆𑀲 𑀉𑀧𑀝𑁆𑀞𑀸𑀓𑀤𑁂𑀯𑀢𑀸𑀯. 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑁂𑀲𑀼 𑀳𑀺 𑀘𑀺𑀢𑁆𑀢𑀸𑀦𑀺 𑀧𑀲𑀸𑀤𑁂𑀢𑁆𑀯𑀸 𑀢𑁂𑀲𑀁 𑀉𑀧𑀝𑁆𑀞𑀸𑀓𑀸𑀦𑀺 𑀅𑀲𑀻𑀢𑀺𑀓𑀼𑀮𑀲𑀳𑀲𑁆𑀲𑀸𑀦𑀺 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀸𑀦𑀺. 𑀢𑀢𑁆𑀣 𑀣𑁂𑀭𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀸 𑀤𑁂𑀯𑀢𑀸 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀣𑁂𑀭𑀁 𑀅𑀤𑀺𑀲𑁆𑀯𑀸 𑁋 ‘‘𑀓𑀼𑀳𑀺𑀁 𑀦𑀼 𑀔𑁄 𑀅𑀫𑁆𑀳𑀸𑀓𑀁 𑀓𑀼𑀮𑀽𑀧𑀓𑀢𑁆𑀣𑁂𑀭𑁄’’𑀢𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀝𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀓𑀼𑀮𑀽𑀧𑀓𑀢𑁆𑀣𑁂𑀭𑁂𑀦 𑀅𑀯𑀦𑁆𑀤𑀺𑀢𑁂 𑀘𑀺𑀢𑀓𑁄 𑀫𑀸 𑀧𑀚𑁆𑀚𑀮𑀺𑀢𑁆𑀣𑀸’’𑀢𑀺 𑀅𑀥𑀺𑀝𑁆𑀞𑀳𑀺𑀁𑀲𑀼.

𑀫𑀦𑀼𑀲𑁆𑀲𑀸 ¶ 𑀢𑀁 𑀲𑀼𑀢𑁆𑀯𑀸 𑁋 ‘‘𑀫𑀳𑀸𑀓𑀲𑁆𑀲𑀧𑁄 𑀓𑀺𑀭 𑀦𑀸𑀫 𑀪𑁄 𑀪𑀺𑀓𑁆𑀔𑀼 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 ‘𑀤𑀲𑀩𑀮𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺𑀲𑁆𑀲𑀸𑀫𑀻’𑀢𑀺 𑀆𑀕𑀘𑁆𑀙𑀢𑀺. 𑀢𑀲𑁆𑀫𑀺𑀁 𑀓𑀺𑀭 𑀅𑀦𑀸𑀕𑀢𑁂 𑀘𑀺𑀢𑀓𑁄 𑀦 𑀧𑀚𑁆𑀚𑀮𑀺𑀲𑁆𑀲𑀢𑀺. 𑀓𑀻𑀤𑀺𑀲𑁄 𑀪𑁄 𑀲𑁄 𑀪𑀺𑀓𑁆𑀔𑀼 𑀓𑀸𑀴𑁄 𑀑𑀤𑀸𑀢𑁄 𑀤𑀻𑀖𑁄 𑀭𑀲𑁆𑀲𑁄, 𑀏𑀯𑀭𑀽𑀧𑁂 𑀦𑀸𑀫 𑀪𑁄 𑀪𑀺𑀓𑁆𑀔𑀼𑀫𑁆𑀳𑀺 𑀞𑀺𑀢𑁂 𑀓𑀺𑀁 𑀤𑀲𑀩𑀮𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀦𑀸𑀫𑀸’’𑀢𑀺 𑀓𑁂𑀘𑀺 ¶ 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑀸 𑀧𑀝𑀺𑀧𑀣𑀁 𑀕𑀘𑁆𑀙𑀺𑀁𑀲𑀼. 𑀓𑁂𑀘𑀺 𑀯𑀻𑀣𑀺𑀬𑁄 𑀯𑀺𑀘𑀺𑀢𑁆𑀢𑀸 𑀓𑀢𑁆𑀯𑀸 𑀆𑀕𑀫𑀦𑀫𑀕𑁆𑀕𑀁 𑀑𑀮𑁄𑀓𑀬𑀫𑀸𑀦𑀸 𑀅𑀝𑁆𑀞𑀁𑀲𑀼.

𑁨𑁩𑁪. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀬𑁂𑀦 𑀓𑀼𑀲𑀺𑀦𑀸𑀭𑀸…𑀧𑁂… 𑀲𑀺𑀭𑀲𑀸 𑀯𑀦𑁆𑀤𑀻𑀢𑀺 𑀣𑁂𑀭𑁄 𑀓𑀺𑀭 𑀘𑀺𑀢𑀓𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀆𑀯𑀚𑁆𑀚𑀦𑁆𑀢𑁄𑀯 𑀲𑀮𑁆𑀮𑀓𑁆𑀔𑁂𑀲𑀺 𑁋 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀻𑀲𑀁, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀸𑀤𑀸’’𑀢𑀺. 𑀢𑀢𑁄 𑀧𑀸𑀤𑀸𑀦𑀁 𑀲𑀫𑀻𑀧𑁂 𑀞𑀢𑁆𑀯𑀸 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑁋 ‘‘𑀅𑀭𑀸𑀲𑀳𑀲𑁆𑀲𑀧𑀝𑀺𑀫𑀡𑁆𑀟𑀺𑀢𑀘𑀓𑁆𑀓𑀮𑀓𑁆𑀔𑀡𑀧𑀢𑀺𑀝𑁆𑀞𑀺𑀢𑀸 𑀤𑀲𑀩𑀮𑀲𑁆𑀲 𑀧𑀸𑀤𑀸 𑀲𑀤𑁆𑀥𑀺𑀁 𑀓𑀧𑁆𑀧𑀸𑀲𑀧𑀝𑀮𑁂𑀳𑀺 𑀧𑀜𑁆𑀘 𑀤𑀼𑀲𑁆𑀲𑀬𑀼𑀕𑀲𑀢𑀸𑀦𑀺 𑀲𑀼𑀯𑀡𑁆𑀡𑀤𑁄𑀡𑀺𑀁 𑀘𑀦𑁆𑀤𑀦𑀘𑀺𑀢𑀓𑀜𑁆𑀘 𑀤𑁆𑀯𑁂𑀥𑀸 𑀓𑀢𑁆𑀯𑀸 𑀫𑀬𑁆𑀳𑀁 𑀉𑀢𑁆𑀢𑀫𑀗𑁆𑀕𑁂 𑀲𑀺𑀭𑀲𑁆𑀫𑀺𑀁 𑀧𑀢𑀺𑀝𑁆𑀞𑀳𑀦𑁆𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀲𑀳 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑁂𑀦 𑀢𑀸𑀦𑀺 𑀧𑀜𑁆𑀘 𑀤𑀼𑀲𑁆𑀲𑀬𑀼𑀕𑀲𑀢𑀸𑀦𑀺 𑀤𑁆𑀯𑁂𑀥𑀸 𑀓𑀢𑁆𑀯𑀸 𑀯𑀮𑀸𑀳𑀓𑀦𑁆𑀢𑀭𑀸 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀧𑀸𑀤𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀣𑁂𑀭𑁄 𑀯𑀺𑀓𑀲𑀺𑀢𑀭𑀢𑁆𑀢𑀧𑀤𑀼𑀫𑀲𑀤𑀺𑀲𑁂 𑀳𑀢𑁆𑀣𑁂 𑀧𑀲𑀸𑀭𑁂𑀢𑁆𑀯𑀸 𑀲𑀼𑀯𑀡𑁆𑀡𑀯𑀡𑁆𑀡𑁂 𑀲𑀢𑁆𑀣𑀼𑀧𑀸𑀤𑁂 𑀬𑀸𑀯 𑀕𑁄𑀧𑁆𑀨𑀓𑀸 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀺𑀭𑀯𑀭𑁂 𑀧𑀢𑀺𑀝𑁆𑀞𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀻’’𑀢𑀺.

𑀫𑀳𑀸𑀚𑀦𑁄 ¶ 𑀢𑀁 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀫𑀳𑀸𑀦𑀸𑀤𑀁 𑀦𑀤𑀺, 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀬𑀣𑀸𑀭𑀼𑀘𑀺 𑀯𑀦𑁆𑀤𑀺. 𑀏𑀯𑀁 𑀧𑀦 𑀣𑁂𑀭𑁂𑀦 𑀘 𑀫𑀳𑀸𑀚𑀦𑁂𑀦 𑀘 𑀢𑁂𑀳𑀺 𑀘 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀯𑀦𑁆𑀤𑀺𑀢𑀫𑀢𑁆𑀢𑁂 𑀧𑀼𑀦 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀧𑀓𑀢𑀺𑀅𑀥𑀺𑀝𑁆𑀞𑀸𑀦𑀯𑀲𑁂𑀦𑁂𑀯 𑀣𑁂𑀭𑀲𑁆𑀲 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀅𑀮𑀢𑁆𑀢𑀓𑀯𑀡𑁆𑀡𑀸𑀦𑀺 𑀪𑀕𑀯𑀢𑁄 𑀧𑀸𑀤𑀢𑀮𑀸𑀦𑀺 𑀘𑀦𑁆𑀤𑀦𑀤𑀸𑀭𑀼𑀆𑀤𑀻𑀲𑀼 𑀓𑀺𑀜𑁆𑀘𑀺 𑀅𑀘𑀸𑀮𑁂𑀢𑁆𑀯𑀸𑀯 𑀬𑀣𑀸𑀞𑀸𑀦𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀬𑀣𑀸𑀞𑀸𑀦𑁂 𑀞𑀺𑀢𑀸𑀦𑁂𑀯 𑀅𑀳𑁂𑀲𑀼𑀁. 𑀪𑀕𑀯𑀢𑁄 𑀳𑀺 𑀧𑀸𑀤𑁂𑀲𑀼 𑀦𑀺𑀓𑁆𑀔𑀫𑀦𑁆𑀢𑁂𑀲𑀼 𑀯𑀸 𑀧𑀯𑀺𑀲𑀦𑁆𑀢𑁂𑀲𑀼 𑀯𑀸 𑀓𑀧𑁆𑀧𑀸𑀲𑀅𑀁𑀲𑀼 𑀯𑀸 𑀤𑀲𑀺𑀓𑀢𑀦𑁆𑀢𑀁 𑀯𑀸 𑀢𑁂𑀮𑀩𑀺𑀦𑁆𑀤𑀼 𑀯𑀸 𑀤𑀸𑀭𑀼𑀓𑁆𑀔𑀦𑁆𑀥𑀁 𑀯𑀸 𑀞𑀸𑀦𑀸 𑀘𑀮𑀺𑀢𑀁 𑀦𑀸𑀫 𑀦𑀸𑀳𑁄𑀲𑀺. 𑀲𑀩𑁆𑀩𑀁 𑀬𑀣𑀸𑀞𑀸𑀦𑁂 𑀞𑀺𑀢𑀫𑁂𑀯 𑀅𑀳𑁄𑀲𑀺. 𑀉𑀝𑁆𑀞𑀳𑀺𑀢𑁆𑀯𑀸 𑀧𑀦 𑀅𑀢𑁆𑀣𑀗𑁆𑀕𑀢𑁂 𑀘𑀦𑁆𑀤𑁂 𑀯𑀺𑀬 𑀲𑀽𑀭𑀺𑀬𑁂 𑀯𑀺𑀬 𑀘 𑀢𑀣𑀸𑀕𑀢𑀲𑁆𑀲 𑀧𑀸𑀤𑁂𑀲𑀼 𑀅𑀦𑁆𑀢𑀭𑀳𑀺𑀢𑁂𑀲𑀼 𑀫𑀳𑀸𑀚𑀦𑁄 𑀫𑀳𑀸𑀓𑀦𑁆𑀤𑀺𑀢𑀁 𑀓𑀦𑁆𑀤𑀺. 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑀢𑁄 𑀅𑀥𑀺𑀓𑀢𑀭𑀁 𑀓𑀸𑀭𑀼𑀜𑁆𑀜𑀁 𑀅𑀳𑁄𑀲𑀺.

𑀲𑀬𑀫𑁂𑀯 ¶ 𑀪𑀕𑀯𑀢𑁄 𑀘𑀺𑀢𑀓𑁄 𑀧𑀚𑁆𑀚𑀮𑀻𑀢𑀺 𑀇𑀤𑀁 𑀧𑀦 𑀓𑀲𑁆𑀲𑀘𑀺 𑀧𑀚𑁆𑀚𑀮𑀸𑀧𑁂𑀢𑀼𑀁 𑀯𑀸𑀬𑀫𑀦𑁆𑀢𑀲𑁆𑀲 𑀅𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀧𑀦𑁂𑀲 𑀲𑀫𑀦𑁆𑀢𑀢𑁄 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀧𑀚𑁆𑀚𑀮𑀺.

𑁨𑁩𑁫. 𑀲𑀭𑀻𑀭𑀸𑀦𑁂𑀯 𑀅𑀯𑀲𑀺𑀲𑁆𑀲𑀺𑀁𑀲𑀽𑀢𑀺 𑀧𑀼𑀩𑁆𑀩𑁂 𑀏𑀓𑀕𑁆𑀖𑀦𑁂𑀦 𑀞𑀺𑀢𑀢𑁆𑀢𑀸 𑀲𑀭𑀻𑀭𑀁 𑀦𑀸𑀫 𑀅𑀳𑁄𑀲𑀺. 𑀇𑀤𑀸𑀦𑀺 𑀯𑀺𑀧𑁆𑀧𑀓𑀺𑀡𑁆𑀡𑀢𑁆𑀢𑀸 𑀲𑀭𑀻𑀭𑀸𑀦𑀻𑀢𑀺 𑀯𑀼𑀢𑁆𑀢𑀁 𑀲𑀼𑀫𑀦𑀫𑀓𑀼𑀴𑀲𑀤𑀺𑀲𑀸 ¶ 𑀘 𑀥𑁄𑀢𑀫𑀼𑀢𑁆𑀢𑀲𑀤𑀺𑀲𑀸 𑀘 𑀲𑀼𑀯𑀡𑁆𑀡𑀲𑀤𑀺𑀲𑀸 𑀘 𑀥𑀸𑀢𑀼𑀬𑁄 𑀅𑀯𑀲𑀺𑀲𑁆𑀲𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀤𑀻𑀖𑀸𑀬𑀼𑀓𑀩𑀼𑀤𑁆𑀥𑀸𑀦𑀜𑁆𑀳𑀺 𑀲𑀭𑀻𑀭𑀁 𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑀲𑀤𑀺𑀲𑀁 𑀏𑀓𑀫𑁂𑀯 𑀳𑁄𑀢𑀺. 𑀪𑀕𑀯𑀸 𑀧𑀦 𑁋 ‘‘𑀅𑀳𑀁 𑀦 𑀘𑀺𑀭𑀁 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀸𑀫𑀺, 𑀫𑀬𑁆𑀳𑀁 𑀲𑀸𑀲𑀦𑀁 𑀢𑀸𑀯 𑀲𑀩𑁆𑀩𑀢𑁆𑀣 𑀦 𑀯𑀺𑀢𑁆𑀣𑀸𑀭𑀺𑀢𑀁, 𑀢𑀲𑁆𑀫𑀸 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲𑀸𑀧𑀺 𑀫𑁂 𑀲𑀸𑀲𑀧𑀫𑀢𑁆𑀢𑀫𑁆𑀧𑀺 𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀘𑁂𑀢𑀺𑀬𑀁 𑀓𑀢𑁆𑀯𑀸 𑀧𑀭𑀺𑀘𑀭𑀦𑁆𑀢𑁄 𑀫𑀳𑀸𑀚𑀦𑁄 𑀲𑀕𑁆𑀕𑀧𑀭𑀸𑀬𑀡𑁄 𑀳𑁄𑀢𑀽’’𑀢𑀺 𑀥𑀸𑀢𑀽𑀦𑀁 𑀯𑀺𑀓𑀺𑀭𑀡𑀁 𑀅𑀥𑀺𑀝𑁆𑀞𑀸𑀲𑀺. 𑀓𑀢𑀺, 𑀧𑀦𑀲𑁆𑀲 𑀥𑀸𑀢𑀼𑀬𑁄 𑀯𑀺𑀧𑁆𑀧𑀓𑀺𑀡𑁆𑀡𑀸, 𑀓𑀢𑀺 𑀦 𑀯𑀺𑀧𑁆𑀧𑀓𑀺𑀡𑁆𑀡𑀸𑀢𑀺. 𑀘𑀢𑀲𑁆𑀲𑁄 𑀤𑀸𑀞𑀸, 𑀤𑁆𑀯𑁂 𑀅𑀓𑁆𑀔𑀓𑀸, 𑀉𑀡𑁆𑀳𑀻𑀲𑀦𑁆𑀢𑀺 𑀇𑀫𑀸 𑀲𑀢𑁆𑀢 𑀥𑀸𑀢𑀼𑀬𑁄 𑀦 𑀯𑀺𑀧𑁆𑀧𑀓𑀺𑀭𑀺𑀁𑀲𑀼, 𑀲𑁂𑀲𑀸 𑀯𑀺𑀧𑁆𑀧𑀓𑀺𑀭𑀺𑀁𑀲𑀽𑀢𑀺. 𑀢𑀢𑁆𑀣 𑀲𑀩𑁆𑀩𑀔𑀼𑀤𑁆𑀤𑀓𑀸 𑀥𑀸𑀢𑀼 𑀲𑀸𑀲𑀧𑀩𑀻𑀚𑀫𑀢𑁆𑀢𑀸 𑀅𑀳𑁄𑀲𑀺, 𑀫𑀳𑀸𑀥𑀸𑀢𑀼 𑀫𑀚𑁆𑀛𑁂 𑀪𑀺𑀦𑁆𑀦𑀢𑀡𑁆𑀟𑀼𑀮𑀫𑀢𑁆𑀢𑀸, 𑀅𑀢𑀺𑀫𑀳𑀢𑀻 𑀫𑀚𑁆𑀛𑁂 𑀪𑀺𑀦𑁆𑀦𑀫𑀼𑀕𑁆𑀕𑀫𑀢𑁆𑀢𑀸𑀢𑀺.

𑀉𑀤𑀓𑀥𑀸𑀭𑀸𑀢𑀺 𑀅𑀕𑁆𑀕𑀩𑀸𑀳𑀼𑀫𑀢𑁆𑀢𑀸𑀧𑀺 𑀚𑀗𑁆𑀖𑀫𑀢𑁆𑀢𑀸𑀧𑀺 𑀢𑀸𑀮𑀓𑁆𑀔𑀦𑁆𑀥𑀫𑀢𑁆𑀢𑀸𑀧𑀺 𑀉𑀤𑀓𑀥𑀸𑀭𑀸 𑀆𑀓𑀸𑀲𑀢𑁄 𑀧𑀢𑀺𑀢𑁆𑀯𑀸 𑀦𑀺𑀩𑁆𑀩𑀸𑀧𑁂𑀲𑀺. 𑀉𑀤𑀓𑀲𑀸𑀮𑀢𑁄𑀢𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀲𑀸𑀮𑀭𑀼𑀓𑁆𑀔𑁂 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁, 𑀢𑁂𑀲𑀫𑁆𑀧𑀺 𑀳𑀺 𑀔𑀦𑁆𑀥𑀦𑁆𑀢𑀭𑀯𑀺𑀝𑀧𑀦𑁆𑀢𑀭𑁂𑀳𑀺 𑀉𑀤𑀓𑀥𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑀺𑀩𑁆𑀩𑀸𑀧𑁂𑀲𑀼𑀁. 𑀪𑀕𑀯𑀢𑁄 𑀘𑀺𑀢𑀓𑁄 𑀫𑀳𑀦𑁆𑀢𑁄. 𑀲𑀫𑀦𑁆𑀢𑀸 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸𑀧𑀺 𑀦𑀗𑁆𑀕𑀮𑀲𑀻𑀲𑀫𑀢𑁆𑀢𑀸 𑀉𑀤𑀓𑀯𑀝𑁆𑀝𑀺 𑀨𑀮𑀺𑀓𑀯𑀝𑀁𑀲𑀓𑀲𑀤𑀺𑀲𑀸 𑀉𑀕𑁆𑀕𑀦𑁆𑀢𑁆𑀯𑀸 𑀘𑀺𑀢𑀓𑀫𑁂𑀯 𑀕𑀡𑁆𑀳𑀦𑁆𑀢𑀺. 𑀕𑀦𑁆𑀥𑁄𑀤𑀓𑁂𑀦𑀸𑀢𑀺 𑀲𑀼𑀯𑀡𑁆𑀡𑀖𑀝𑁂 𑀭𑀚𑀢𑀖𑀝𑁂 𑀘 𑀧𑀽𑀭𑁂𑀢𑁆𑀯𑀸 𑀆𑀪𑀢𑀦𑀸𑀦𑀸𑀕𑀦𑁆𑀥𑁄𑀤𑀓𑁂𑀦. 𑀦𑀺𑀩𑁆𑀩𑀸𑀧𑁂𑀲𑀼𑀦𑁆𑀢𑀺 𑀲𑀼𑀯𑀡𑁆𑀡𑀫𑀬𑀭𑀚𑀢𑀫𑀬𑁂𑀳𑀺 𑀅𑀝𑁆𑀞𑀤𑀡𑁆𑀟𑀓𑁂𑀳𑀺 𑀯𑀺𑀓𑀺𑀭𑀺𑀢𑁆𑀯𑀸 𑀘𑀦𑁆𑀤𑀦𑀘𑀺𑀢𑀓𑀁 𑀦𑀺𑀩𑁆𑀩𑀸𑀧𑁂𑀲𑀼𑀁.

𑀏𑀢𑁆𑀣 ¶ 𑀘 𑀘𑀺𑀢𑀓𑁂 𑀛𑀸𑀬𑀫𑀸𑀦𑁂 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀲𑀸𑀮𑀭𑀼𑀓𑁆𑀔𑀸𑀦𑀁 𑀲𑀸𑀔𑀦𑁆𑀢𑀭𑁂𑀳𑀺 𑀯𑀺𑀝𑀧𑀦𑁆𑀢𑀭𑁂𑀳𑀺 𑀧𑀢𑁆𑀢𑀦𑁆𑀢𑀭𑁂𑀳𑀺 𑀚𑀸𑀮𑀸 𑀉𑀕𑁆𑀕𑀘𑁆𑀙𑀦𑁆𑀢𑀺, 𑀧𑀢𑁆𑀢𑀁 𑀯𑀸 𑀲𑀸𑀔𑀸 𑀯𑀸 𑀧𑀼𑀧𑁆𑀨𑀁 𑀯𑀸 𑀤𑀟𑁆𑀠𑀸 𑀦𑀸𑀫 𑀦𑀢𑁆𑀣𑀺, 𑀓𑀺𑀧𑀺𑀮𑁆𑀮𑀺𑀓𑀸𑀧𑀺 𑀫𑀓𑁆𑀓𑀝𑀓𑀸𑀧𑀺 𑀚𑀸𑀮𑀸𑀦𑀁 𑀅𑀦𑁆𑀢𑀭𑁂𑀦𑁂𑀯 𑀯𑀺𑀘𑀭𑀦𑁆𑀢𑀺 ¶ . 𑀆𑀓𑀸𑀲𑀢𑁄 𑀧𑀢𑀺𑀢𑀉𑀤𑀓𑀥𑀸𑀭𑀸𑀲𑀼𑀧𑀺 𑀲𑀸𑀮𑀭𑀼𑀓𑁆𑀔𑁂𑀳𑀺 𑀦𑀺𑀓𑁆𑀔𑀦𑁆𑀢𑀉𑀤𑀓𑀥𑀸𑀭𑀸𑀲𑀼𑀧𑀺 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀉𑀤𑀓𑀥𑀸𑀭𑀸𑀲𑀼𑀧𑀺 𑀥𑀫𑁆𑀫𑀓𑀣𑀸𑀯 𑀧𑀫𑀸𑀡𑀁. 𑀏𑀯𑀁 𑀘𑀺𑀢𑀓𑀁 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀧𑀦 𑀫𑀮𑁆𑀮𑀭𑀸𑀚𑀸𑀦𑁄 𑀲𑀦𑁆𑀣𑀸𑀕𑀸𑀭𑁂 𑀘𑀢𑀼𑀚𑁆𑀚𑀸𑀢𑀺𑀬𑀕𑀦𑁆𑀥𑀧𑀭𑀺𑀪𑀡𑁆𑀟𑀁 𑀓𑀸𑀭𑁂𑀢𑁆𑀯𑀸 𑀮𑀸𑀚𑀧𑀜𑁆𑀘𑀫𑀸𑀦𑀺 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀉𑀧𑀭𑀺 𑀘𑁂𑀮𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀲𑀼𑀯𑀡𑁆𑀡𑀢𑀸𑀭𑀓𑀸𑀤𑀻𑀳𑀺 𑀔𑀘𑀺𑀢𑁆𑀯𑀸 𑀢𑀢𑁆𑀣 𑀕𑀦𑁆𑀥𑀤𑀸𑀫𑀫𑀸𑀮𑀸𑀤𑀸𑀫𑀭𑀢𑀦𑀤𑀸𑀫𑀸𑀦𑀺 𑀑𑀮𑀫𑁆𑀩𑁂𑀢𑁆𑀯𑀸 ¶ 𑀲𑀦𑁆𑀣𑀸𑀕𑀸𑀭𑀢𑁄 𑀬𑀸𑀯 𑀫𑀓𑀼𑀝𑀩𑀦𑁆𑀥𑀦𑀲𑀗𑁆𑀔𑀸𑀢𑀸 𑀲𑀻𑀲𑀧𑀲𑀸𑀥𑀦𑀫𑀗𑁆𑀕𑀮𑀲𑀸𑀮𑀸, 𑀢𑀸𑀯 𑀉𑀪𑁄𑀳𑀺 𑀧𑀲𑁆𑀲𑁂𑀳𑀺 𑀲𑀸𑀡𑀺𑀓𑀺𑀮𑀜𑁆𑀚𑀧𑀭𑀺𑀓𑁆𑀔𑁂𑀧𑀁 𑀓𑀸𑀭𑁂𑀢𑁆𑀯𑀸 𑀉𑀧𑀭𑀺 𑀘𑁂𑀮𑀯𑀺𑀢𑀸𑀦𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀢𑀸𑀭𑀓𑀸𑀤𑀻𑀳𑀺 𑀔𑀘𑀺𑀢𑁆𑀯𑀸 𑀢𑀢𑁆𑀣𑀧𑀺 𑀕𑀦𑁆𑀥𑀤𑀸𑀫𑀫𑀸𑀮𑀸𑀤𑀸𑀫𑀭𑀢𑀦𑀤𑀸𑀫𑀸𑀦𑀺 𑀑𑀮𑀫𑁆𑀩𑁂𑀢𑁆𑀯𑀸 𑀫𑀡𑀺𑀤𑀡𑁆𑀟𑀯𑀡𑁆𑀡𑁂𑀳𑀺 𑀯𑁂𑀡𑀽𑀳𑀺 𑀘 𑀧𑀜𑁆𑀘𑀯𑀡𑁆𑀡𑀤𑁆𑀥𑀚𑁂 𑀉𑀲𑁆𑀲𑀸𑀧𑁂𑀢𑁆𑀯𑀸 𑀲𑀫𑀦𑁆𑀢𑀸 𑀯𑀸𑀢𑀧𑀝𑀸𑀓𑀸 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀼𑀲𑀫𑁆𑀫𑀝𑁆𑀞𑀸𑀲𑀼 𑀯𑀻𑀣𑀻𑀲𑀼 𑀓𑀤𑀮𑀺𑀬𑁄 𑀘 𑀧𑀼𑀡𑁆𑀡𑀖𑀝𑁂 𑀘 𑀞𑀧𑁂𑀢𑁆𑀯𑀸 𑀤𑀡𑁆𑀟𑀓𑀤𑀻𑀧𑀺𑀓𑀸 𑀚𑀸𑀮𑁂𑀢𑁆𑀯𑀸 𑀅𑀮𑀗𑁆𑀓𑀢𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀲𑀳 𑀥𑀸𑀢𑀽𑀳𑀺 𑀲𑀼𑀯𑀡𑁆𑀡𑀤𑁄𑀡𑀺𑀁 𑀞𑀧𑁂𑀢𑁆𑀯𑀸 𑀫𑀸𑀮𑀸𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑁂𑀦𑁆𑀢𑀸 𑀲𑀸𑀥𑀼𑀓𑀻𑀴𑀺𑀢𑀁 𑀓𑀻𑀴𑀦𑁆𑀢𑀸 𑀅𑀦𑁆𑀢𑁄𑀦𑀕𑀭𑀁 𑀧𑀯𑁂𑀲𑁂𑀢𑁆𑀯𑀸 𑀲𑀦𑁆𑀣𑀸𑀕𑀸𑀭𑁂 𑀲𑀭𑀪𑀫𑀬𑀧𑀮𑁆𑀮𑀗𑁆𑀓𑁂 𑀞𑀧𑁂𑀢𑁆𑀯𑀸 𑀉𑀧𑀭𑀺 𑀲𑁂𑀢𑀘𑁆𑀙𑀢𑁆𑀢𑀁 𑀥𑀸𑀭𑁂𑀲𑀼𑀁. 𑀏𑀯𑀁 𑀓𑀢𑁆𑀯𑀸 𑁋 ‘‘𑀅𑀣 𑀔𑁄 𑀓𑁄𑀲𑀺𑀦𑀸𑀭𑀓𑀸 𑀫𑀮𑁆𑀮𑀸 𑀪𑀕𑀯𑀢𑁄 𑀲𑀭𑀻𑀭𑀸𑀦𑀺 𑀲𑀢𑁆𑀢𑀸𑀳𑀁 𑀲𑀦𑁆𑀣𑀸𑀕𑀸𑀭𑁂 𑀲𑀢𑁆𑀢𑀺𑀧𑀜𑁆𑀚𑀭𑀁 𑀓𑀭𑀺𑀢𑁆𑀯𑀸’’𑀢𑀺 𑀲𑀩𑁆𑀩𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀲𑀢𑁆𑀢𑀺𑀧𑀜𑁆𑀚𑀭𑀁 𑀓𑀭𑀺𑀢𑁆𑀯𑀸𑀢𑀺 𑀲𑀢𑁆𑀢𑀺𑀳𑀢𑁆𑀣𑁂𑀳𑀺 𑀧𑀼𑀭𑀺𑀲𑁂𑀳𑀺 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸. 𑀥𑀦𑀼𑀧𑀸𑀓𑀸𑀭𑀦𑁆𑀢𑀺 𑀧𑀞𑀫𑀁 𑀢𑀸𑀯 𑀳𑀢𑁆𑀣𑀺𑀓𑀼𑀫𑁆𑀪𑁂𑀦 𑀓𑀼𑀫𑁆𑀪𑀁 𑀧𑀳𑀭𑀦𑁆𑀢𑁂 𑀧𑀭𑀺𑀓𑁆𑀔𑀺𑀧𑀸𑀧𑁂𑀲𑀼𑀁, 𑀢𑀢𑁄 𑀅𑀲𑁆𑀲𑁂 𑀕𑀻𑀯𑀸𑀬 𑀕𑀻𑀯𑀁 𑀧𑀳𑀭𑀦𑁆𑀢𑁂, 𑀢𑀢𑁄 𑀭𑀣𑁂 𑀆𑀡𑀺𑀓𑁄𑀝𑀺𑀬𑀸 𑀆𑀡𑀺𑀓𑁄𑀝𑀺𑀁 𑀧𑀳𑀭𑀦𑁆𑀢𑁂, 𑀢𑀢𑁄 𑀬𑁄𑀥𑁂 𑀩𑀸𑀳𑀼𑀦𑀸 𑀩𑀸𑀳𑀼𑀁 𑀧𑀳𑀭𑀦𑁆𑀢𑁂. 𑀢𑁂𑀲𑀁 𑀧𑀭𑀺𑀬𑀦𑁆𑀢𑁂 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀧𑀳𑀭𑀫𑀸𑀦𑀸𑀦𑀺 𑀥𑀦𑀽𑀦𑀺 𑀧𑀭𑀺𑀓𑁆𑀔𑀺𑀧𑀸𑀧𑁂𑀲𑀼𑀁. 𑀇𑀢𑀺 𑀲𑀫𑀦𑁆𑀢𑀸 𑀬𑁄𑀚𑀦𑀧𑁆𑀧𑀫𑀸𑀡𑀁 𑀞𑀸𑀦𑀁 𑀲𑀢𑁆𑀢𑀸𑀳𑀁 𑀲𑀦𑁆𑀦𑀸𑀳𑀕𑀯𑀘𑁆𑀙𑀺𑀓𑀁 𑀯𑀺𑀬 𑀓𑀢𑁆𑀯𑀸 𑀆𑀭𑀓𑁆𑀔𑀁 𑀲𑀁𑀯𑀺𑀤𑀳𑀺𑀁𑀲𑀼. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀥𑀦𑀼𑀧𑀸𑀓𑀸𑀭𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸’’𑀢𑀺.

𑀓𑀲𑁆𑀫𑀸 𑀧𑀦𑁂𑀢𑁂 𑀏𑀯𑀫𑀓𑀁𑀲𑀽𑀢𑀺? 𑀇𑀢𑁄 𑀧𑀼𑀭𑀺𑀫𑁂𑀲𑀼 𑀳𑀺 𑀤𑁆𑀯𑀻𑀲𑀼 𑀲𑀢𑁆𑀢𑀸𑀳𑁂𑀲𑀼 𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀞𑀸𑀦𑀦𑀺𑀲𑀚𑁆𑀚𑁄𑀓𑀸𑀲𑀁 𑀓𑀭𑁄𑀦𑁆𑀢𑀸 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀲𑀁𑀯𑀺𑀤𑀳𑀦𑁆𑀢𑀸 𑀲𑀸𑀥𑀼𑀓𑀻𑀴𑀺𑀓𑀸𑀬 𑀑𑀓𑀸𑀲𑀁 𑀦 𑀮𑀪𑀺𑀁𑀲𑀼. 𑀢𑀢𑁄 𑀦𑁂𑀲𑀁 𑀅𑀳𑁄𑀲𑀺 𑁋 ‘‘𑀇𑀫𑀁 𑀲𑀢𑁆𑀢𑀸𑀳𑀁 𑀲𑀸𑀥𑀼𑀓𑀻𑀴𑀺𑀢𑀁 𑀓𑀻𑀴𑀺𑀲𑁆𑀲𑀸𑀫, 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺 𑀬𑀁 𑀅𑀫𑁆𑀳𑀸𑀓𑀁 𑀧𑀫𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀓𑁄𑀘𑀺𑀤𑁂𑀯 𑀆𑀕𑀦𑁆𑀢𑁆𑀯𑀸 𑀥𑀸𑀢𑀼𑀬𑁄 𑀕𑀡𑁆𑀳𑁂𑀬𑁆𑀬, 𑀢𑀲𑁆𑀫𑀸 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀓𑀻𑀴𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀢𑀣𑀸 𑀏𑀯𑀫𑀓𑀁𑀲𑀼.

𑀲𑀭𑀻𑀭𑀥𑀸𑀢𑀼𑀯𑀺𑀪𑀚𑀦𑀯𑀡𑁆𑀡𑀦𑀸

𑁨𑁩𑁬. 𑀅𑀲𑁆𑀲𑁄𑀲𑀺 ¶ ¶ 𑀔𑁄 𑀭𑀸𑀚𑀸𑀢𑀺 𑀓𑀣𑀁 𑀅𑀲𑁆𑀲𑁄𑀲𑀺? 𑀧𑀞𑀫𑀫𑁂𑀯 𑀓𑀺𑀭𑀲𑁆𑀲 𑀅𑀫𑀘𑁆𑀘𑀸 𑀲𑀼𑀢𑁆𑀯𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀲𑀢𑁆𑀣𑀸 𑀦𑀸𑀫 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀦 𑀲𑁄 𑀲𑀓𑁆𑀓𑀸 𑀧𑀼𑀦 𑀆𑀳𑀭𑀺𑀢𑀼𑀁. 𑀧𑁄𑀣𑀼𑀚𑁆𑀚𑀦𑀺𑀓𑀲𑀤𑁆𑀥𑀸𑀬 𑀧𑀦 𑀅𑀫𑁆𑀳𑀸𑀓𑀁 𑀭𑀜𑁆𑀜𑀸 𑀲𑀤𑀺𑀲𑁄 𑀦𑀢𑁆𑀣𑀺, 𑀲𑀘𑁂 𑀏𑀲 𑀇𑀫𑀺𑀦𑀸𑀯 𑀦𑀺𑀬𑀸𑀫𑁂𑀦 𑀲𑀼𑀡𑀺𑀲𑁆𑀲𑀢𑀺, 𑀳𑀤𑀬𑀫𑀲𑁆𑀲 𑀨𑀮𑀺𑀲𑁆𑀲𑀢𑀺. 𑀭𑀸𑀚𑀸 𑀔𑁄 𑀧𑀦 𑀅𑀫𑁆𑀳𑁂𑀳𑀺 𑀅𑀦𑀼𑀭𑀓𑁆𑀔𑀺𑀢𑀩𑁆𑀩𑁄’’𑀢𑀺 𑀢𑁂 𑀢𑀺𑀲𑁆𑀲𑁄 𑀲𑀼𑀯𑀡𑁆𑀡𑀤𑁄𑀡𑀺𑀬𑁄 𑀆𑀳𑀭𑀺𑀢𑁆𑀯𑀸 𑀘𑀢𑀼𑀫𑀥𑀼𑀭𑀲𑁆𑀲 𑀧𑀽𑀭𑁂𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀢𑀤𑀯𑁄𑀘𑀼𑀁 𑁋 ‘‘𑀤𑁂𑀯 ¶ , 𑀅𑀫𑁆𑀳𑁂𑀳𑀺 𑀲𑀼𑀧𑀺𑀦𑀓𑁄 𑀤𑀺𑀝𑁆𑀞𑁄, 𑀢𑀲𑁆𑀲 𑀧𑀝𑀺𑀖𑀸𑀢𑀢𑁆𑀣𑀁 𑀢𑀼𑀫𑁆𑀳𑁂𑀳𑀺 𑀤𑀼𑀓𑀽𑀮𑀤𑀼𑀧𑀝𑁆𑀝𑀁 𑀦𑀺𑀯𑀸𑀲𑁂𑀢𑁆𑀯𑀸 𑀬𑀣𑀸 𑀦𑀸𑀲𑀸𑀧𑀼𑀝𑀫𑀢𑁆𑀢𑀁 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀘𑀢𑀼𑀫𑀥𑀼𑀭𑀤𑁄𑀡𑀺𑀬𑀸 𑀦𑀺𑀧𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀭𑀸𑀚𑀸 𑀅𑀢𑁆𑀣𑀘𑀭𑀸𑀦𑀁 𑀅𑀫𑀘𑁆𑀘𑀸𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀏𑀯𑀁 𑀳𑁄𑀢𑀼 𑀢𑀸𑀢𑀸’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺.

𑀅𑀣𑁂𑀓𑁄 𑀅𑀫𑀘𑁆𑀘𑁄 𑀅𑀮𑀗𑁆𑀓𑀸𑀭𑀁 𑀑𑀫𑀼𑀜𑁆𑀘𑀺𑀢𑁆𑀯𑀸 𑀓𑁂𑀲𑁂 𑀧𑀓𑀺𑀭𑀺𑀬 𑀬𑀸𑀬 𑀤𑀺𑀲𑀸𑀬 𑀲𑀢𑁆𑀣𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀢𑀤𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀭𑀸𑀚𑀸𑀦𑀁 𑀆𑀳 𑁋 ‘‘𑀤𑁂𑀯, 𑀫𑀭𑀡𑀢𑁄 𑀫𑀼𑀘𑁆𑀘𑀦𑀓𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀅𑀫𑁆𑀳𑀸𑀓𑀁 𑀆𑀬𑀼𑀯𑀟𑁆𑀠𑀦𑁄 𑀘𑁂𑀢𑀺𑀬𑀝𑁆𑀞𑀸𑀦𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀅𑀪𑀺𑀲𑁂𑀓𑀲𑀺𑀜𑁆𑀘𑀓𑁄 𑀲𑁄 𑀪𑀕𑀯𑀸 𑀲𑀢𑁆𑀣𑀸 𑀓𑀼𑀲𑀺𑀦𑀸𑀭𑀸𑀬 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺. 𑀭𑀸𑀚𑀸 𑀲𑀼𑀢𑁆𑀯𑀸𑀯 𑀯𑀺𑀲𑀜𑁆𑀜𑀻𑀚𑀸𑀢𑁄 𑀘𑀢𑀼𑀫𑀥𑀼𑀭𑀤𑁄𑀡𑀺𑀬𑀁 𑀉𑀲𑀼𑀫𑀁 𑀫𑀼𑀜𑁆𑀘𑀺. 𑀅𑀣 𑀦𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀤𑀼𑀢𑀺𑀬𑀸𑀬 𑀤𑁄𑀡𑀺𑀬𑀸 𑀦𑀺𑀧𑀚𑁆𑀚𑀸𑀧𑁂𑀲𑀼𑀁. 𑀲𑁄 𑀧𑀼𑀦 𑀲𑀜𑁆𑀜𑀁 𑀮𑀪𑀺𑀢𑁆𑀯𑀸 𑁋 ‘‘𑀢𑀸𑀢𑀸, 𑀓𑀺𑀁 𑀯𑀤𑁂𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀲𑀢𑁆𑀣𑀸, 𑀫𑀳𑀸𑀭𑀸𑀚, 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺. 𑀭𑀸𑀚𑀸 𑀧𑀼𑀦𑀧𑀺 𑀯𑀺𑀲𑀜𑁆𑀜𑀻𑀚𑀸𑀢𑁄 𑀘𑀢𑀼𑀫𑀥𑀼𑀭𑀤𑁄𑀡𑀺𑀬𑀸 𑀉𑀲𑀼𑀫𑀁 𑀫𑀼𑀜𑁆𑀘𑀺. 𑀅𑀣 𑀦𑀁 𑀢𑀢𑁄𑀧𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀢𑀺𑀬𑀸𑀬 𑀤𑁄𑀡𑀺𑀬𑀸 𑀦𑀺𑀧𑀚𑁆𑀚𑀸𑀧𑁂𑀲𑀼𑀁. 𑀲𑁄 𑀧𑀼𑀦 𑀲𑀜𑁆𑀜𑀁 𑀮𑀪𑀺𑀢𑁆𑀯𑀸 ‘‘𑀢𑀸𑀢𑀸, 𑀓𑀺𑀁 𑀯𑀤𑁂𑀣𑀸’’𑀢𑀺 𑀧𑀼𑀘𑁆𑀙𑀺. ‘‘𑀲𑀢𑁆𑀣𑀸, 𑀫𑀳𑀸𑀭𑀸𑀚, 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺. 𑀭𑀸𑀚𑀸 𑀧𑀼𑀦𑀧𑀺 𑀯𑀺𑀲𑀜𑁆𑀜𑀻𑀚𑀸𑀢𑁄, 𑀅𑀣 𑀦𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀦𑀳𑀸𑀧𑁂𑀢𑁆𑀯𑀸 𑀫𑀢𑁆𑀣𑀓𑁂 𑀖𑀝𑁂𑀳𑀺 𑀉𑀤𑀓𑀁 𑀆𑀲𑀺𑀜𑁆𑀘𑀺𑀁𑀲𑀼.

𑀭𑀸𑀚𑀸 𑀲𑀜𑁆𑀜𑀁 𑀮𑀪𑀺𑀢𑁆𑀯𑀸 𑀆𑀲𑀦𑀸 𑀯𑀼𑀝𑁆𑀞𑀸𑀬 𑀕𑀦𑁆𑀥𑀧𑀭𑀺𑀪𑀸𑀯𑀺𑀢𑁂 𑀫𑀡𑀺𑀯𑀡𑁆𑀡𑁂 𑀓𑁂𑀲𑁂 𑀯𑀺𑀓𑀺𑀭𑀺𑀢𑁆𑀯𑀸 𑀲𑀼𑀯𑀡𑁆𑀡𑀨𑀮𑀓𑀯𑀡𑁆𑀡𑀸𑀬 𑀧𑀺𑀝𑁆𑀞𑀺𑀬𑀁 𑀧𑀓𑀺𑀭𑀺𑀢𑁆𑀯𑀸 𑀧𑀸𑀡𑀺𑀦𑀸 𑀉𑀭𑀁 𑀧𑀳𑀭𑀺𑀢𑁆𑀯𑀸 𑀧𑀯𑀸𑀴𑀗𑁆𑀓𑀼𑀭𑀯𑀡𑁆𑀡𑀸𑀳𑀺 𑀲𑀼𑀯𑀝𑁆𑀝𑀺𑀢𑀗𑁆𑀕𑀼𑀮𑀻𑀳𑀺 𑀲𑀼𑀯𑀡𑁆𑀡𑀩𑀺𑀫𑁆𑀩𑀺𑀲𑀓𑀯𑀡𑁆𑀡𑀁 𑀉𑀭𑀁 𑀲𑀺𑀩𑁆𑀩𑀦𑁆𑀢𑁄 𑀯𑀺𑀬 𑀕𑀳𑁂𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑁄 𑀉𑀫𑁆𑀫𑀢𑁆𑀢𑀓𑀯𑁂𑀲𑁂𑀦 𑀅𑀦𑁆𑀢𑀭𑀯𑀻𑀣𑀺𑀁 𑀑𑀢𑀺𑀡𑁆𑀡𑁄, 𑀲𑁄 𑀅𑀮𑀗𑁆𑀓𑀢𑀦𑀸𑀝𑀓𑀧𑀭𑀺𑀯𑀼𑀢𑁄 𑀦𑀕𑀭𑀢𑁄 𑀦𑀺𑀓𑁆𑀔𑀫𑁆𑀫 𑀚𑀻𑀯𑀓𑀫𑁆𑀩𑀯𑀦𑀁 𑀕𑀦𑁆𑀢𑁆𑀯𑀸 𑀬𑀲𑁆𑀫𑀺𑀁 𑀞𑀸𑀦𑁂 𑀦𑀺𑀲𑀺𑀦𑁆𑀦𑁂𑀦 𑀪𑀕𑀯𑀢𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀢𑀁 𑀑𑀮𑁄𑀓𑁂𑀢𑁆𑀯𑀸 ¶ 𑁋 ‘‘𑀪𑀕𑀯𑀸 𑀲𑀩𑁆𑀩𑀜𑁆𑀜𑀼, 𑀦𑀦𑀼 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑀬𑀺𑀢𑁆𑀣, 𑀲𑁄𑀓𑀲𑀮𑁆𑀮𑀁 𑀫𑁂 𑀯𑀺𑀦𑁄𑀤𑀬𑀺𑀢𑁆𑀣, 𑀢𑀼𑀫𑁆𑀳𑁂 𑀫𑀬𑁆𑀳𑀁 𑀲𑁄𑀓𑀲𑀮𑁆𑀮𑀁 𑀦𑀻𑀳𑀭𑀺𑀢𑁆𑀣, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀲𑀭𑀡𑀁 𑀕𑀢𑁄, 𑀇𑀤𑀸𑀦𑀺 𑀧𑀦 𑀫𑁂 𑀧𑀝𑀺𑀯𑀘𑀦𑀫𑁆𑀧𑀺 𑀦 𑀤𑁂𑀣, 𑀪𑀕𑀯𑀸’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀤𑁂𑀯𑀺𑀢𑁆𑀯𑀸 ‘‘𑀦𑀦𑀼 𑀪𑀕𑀯𑀸 𑀅𑀳𑀁 𑀅𑀜𑁆𑀜𑀤𑀸 𑀏𑀯𑀭𑀽𑀧𑁂 𑀓𑀸𑀮𑁂 ‘𑀢𑀼𑀫𑁆𑀳𑁂 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑀸 ¶ 𑀚𑀫𑁆𑀩𑀼𑀤𑀻𑀧𑀢𑀮𑁂 𑀘𑀸𑀭𑀺𑀓𑀁 𑀘𑀭𑀣𑀸’𑀢𑀺 𑀲𑀼𑀡𑁄𑀫𑀺, 𑀇𑀤𑀸𑀦𑀺 𑀧𑀦𑀸𑀳𑀁 𑀢𑀼𑀫𑁆𑀳𑀸𑀓𑀁 𑀅𑀦𑀦𑀼𑀭𑀽𑀧𑀁 𑀅𑀬𑀼𑀢𑁆𑀢𑀁 𑀧𑀯𑀢𑁆𑀢𑀺𑀁 𑀲𑀼𑀡𑁄𑀫𑀻’’𑀢𑀺 𑀏𑀯𑀫𑀸𑀤𑀻𑀦𑀺 𑀘 𑀯𑀢𑁆𑀯𑀸 𑀲𑀝𑁆𑀞𑀺𑀫𑀢𑁆𑀢𑀸𑀳𑀺 𑀕𑀸𑀣𑀸𑀳𑀺 ¶ 𑀪𑀕𑀯𑀢𑁄 𑀕𑀼𑀡𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀫 𑀧𑀭𑀺𑀤𑁂𑀯𑀺𑀢𑁂𑀦𑁂𑀯 𑀦 𑀲𑀺𑀚𑁆𑀛𑀢𑀺, 𑀤𑀲𑀩𑀮𑀲𑁆𑀲 𑀥𑀸𑀢𑀼𑀬𑁄 𑀆𑀳𑀭𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀅𑀲𑁆𑀲𑁄𑀲𑀺. 𑀲𑀼𑀢𑁆𑀯𑀸 𑀘 𑀇𑀫𑀺𑀲𑁆𑀲𑀸 𑀯𑀺𑀲𑀜𑁆𑀜𑀺𑀪𑀸𑀯𑀸𑀤𑀺𑀧𑀯𑀢𑁆𑀢𑀺𑀬𑀸 𑀅𑀯𑀲𑀸𑀦𑁂 𑀤𑀽𑀢𑀁 𑀧𑀸𑀳𑁂𑀲𑀺. 𑀢𑀁 𑀲𑀦𑁆𑀥𑀸𑀬 𑀅𑀣 𑀔𑁄 𑀭𑀸𑀚𑀸𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀤𑀽𑀢𑀁 𑀧𑀸𑀳𑁂𑀲𑀻𑀢𑀺 𑀤𑀽𑀢𑀜𑁆𑀘 𑀧𑀡𑁆𑀡𑀜𑁆𑀘 𑀧𑁂𑀲𑁂𑀲𑀺. 𑀧𑁂𑀲𑁂𑀢𑁆𑀯𑀸 𑀘 𑀧𑀦 𑁋 ‘‘𑀲𑀘𑁂 𑀤𑀲𑁆𑀲𑀦𑁆𑀢𑀺, 𑀲𑀼𑀦𑁆𑀤𑀭𑀁. 𑀦𑁄 𑀘𑁂 𑀤𑀲𑁆𑀲𑀦𑁆𑀢𑀺, 𑀆𑀳𑀭𑀡𑀼𑀧𑀸𑀬𑁂𑀦 𑀆𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀲𑀬𑀫𑁆𑀧𑀺 𑀦𑀺𑀓𑁆𑀔𑀦𑁆𑀢𑁄𑀬𑁂𑀯. 𑀬𑀣𑀸 𑀘 𑀅𑀚𑀸𑀢𑀲𑀢𑁆𑀢𑀼, 𑀏𑀯𑀁 𑀮𑀺𑀘𑁆𑀙𑀯𑀻𑀆𑀤𑀬𑁄𑀧𑀺 𑀤𑀽𑀢𑀁 𑀧𑁂𑀲𑁂𑀢𑁆𑀯𑀸 𑀲𑀬𑀫𑁆𑀧𑀺 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀦𑀺𑀓𑁆𑀔𑀫𑀺𑀁𑀲𑀼𑀬𑁂𑀯. 𑀢𑀢𑁆𑀣 𑀧𑀸𑀯𑁂𑀬𑁆𑀬𑀓𑀸 𑀲𑀩𑁆𑀩𑁂𑀳𑀺 𑀆𑀲𑀦𑁆𑀦𑀢𑀭𑀸 𑀓𑀼𑀲𑀺𑀦𑀸𑀭𑀢𑁄 𑀢𑀺𑀕𑀸𑀯𑀼𑀢𑀦𑁆𑀢𑀭𑁂 𑀦𑀕𑀭𑁂 𑀯𑀲𑀦𑁆𑀢𑀺, 𑀪𑀕𑀯𑀸𑀧𑀺 𑀧𑀸𑀯𑀁 𑀧𑀯𑀺𑀲𑀺𑀢𑁆𑀯𑀸𑀯 𑀓𑀼𑀲𑀺𑀦𑀸𑀭𑀁 𑀕𑀢𑁄. 𑀅𑀣 𑀓𑀲𑁆𑀫𑀸 𑀧𑀞𑀫𑀢𑀭𑀁 𑀦 𑀆𑀕𑀢𑀸𑀢𑀺 𑀘𑁂? 𑀫𑀳𑀸𑀧𑀭𑀺𑀯𑀸𑀭𑀸 𑀧𑀦𑁂𑀢𑁂 𑀭𑀸𑀚𑀸𑀦𑁄 𑀫𑀳𑀸𑀧𑀭𑀺𑀯𑀸𑀭𑀁 𑀓𑀭𑁄𑀦𑁆𑀢𑀸𑀯 𑀧𑀘𑁆𑀙𑀢𑁄 𑀚𑀸𑀢𑀸.

𑀢𑁂 𑀲𑀗𑁆𑀖𑁂 𑀕𑀡𑁂 𑀏𑀢𑀤𑀯𑁄𑀘𑀼𑀦𑁆𑀢𑀺 𑀲𑀩𑁆𑀩𑁂𑀧𑀺 𑀢𑁂 𑀲𑀢𑁆𑀢𑀦𑀕𑀭𑀯𑀸𑀲𑀺𑀦𑁄 𑀆𑀕𑀦𑁆𑀢𑁆𑀯𑀸 𑁋 ‘‘𑀅𑀫𑁆𑀳𑀸𑀓𑀁 𑀥𑀸𑀢𑀼𑀬𑁄 𑀯𑀸 𑀤𑁂𑀦𑁆𑀢𑀼, 𑀬𑀼𑀤𑁆𑀥𑀁 𑀯𑀸’’𑀢𑀺 𑀓𑀼𑀲𑀺𑀦𑀸𑀭𑀸𑀦𑀕𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑁂 𑁋 ‘‘𑀏𑀢𑀁 𑀪𑀕𑀯𑀸 𑀅𑀫𑁆𑀳𑀸𑀓𑀁 𑀕𑀸𑀫𑀓𑁆𑀔𑁂𑀢𑁆𑀢𑁂’’𑀢𑀺 𑀧𑀝𑀺𑀯𑀘𑀦𑀁 𑀅𑀯𑁄𑀘𑀼𑀁. 𑀢𑁂 𑀓𑀺𑀭 𑀏𑀯𑀫𑀸𑀳𑀁𑀲𑀼 𑁋 ‘‘𑀦 𑀫𑀬𑀁 𑀲𑀢𑁆𑀣𑀼 𑀲𑀸𑀲𑀦𑀁 𑀧𑀳𑀺𑀡𑀺𑀫𑁆𑀳, 𑀦𑀸𑀧𑀺 𑀕𑀦𑁆𑀢𑁆𑀯𑀸 𑀆𑀦𑀬𑀺𑀫𑁆𑀳. 𑀲𑀢𑁆𑀣𑀸 𑀧𑀦 𑀲𑀬𑀫𑁂𑀯 𑀆𑀕𑀦𑁆𑀢𑁆𑀯𑀸 𑀲𑀸𑀲𑀦𑀁 𑀧𑁂𑀲𑁂𑀢𑁆𑀯𑀸 𑀅𑀫𑁆𑀳𑁂 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀢𑀼𑀫𑁆𑀳𑁂𑀧𑀺 𑀔𑁄 𑀧𑀦 𑀬𑀁 𑀢𑀼𑀫𑁆𑀳𑀸𑀓𑀁 𑀕𑀸𑀫𑀓𑁆𑀔𑁂𑀢𑁆𑀢𑁂 𑀭𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀦 𑀢𑀁 𑀅𑀫𑁆𑀳𑀸𑀓𑀁 𑀤𑁂𑀣. 𑀲𑀤𑁂𑀯𑀓𑁂 𑀘 𑀮𑁄𑀓𑁂 𑀩𑀼𑀤𑁆𑀥𑀭𑀢𑀦𑀲𑀫𑀁 𑀭𑀢𑀦𑀁 𑀦𑀸𑀫 𑀦𑀢𑁆𑀣𑀺, 𑀏𑀯𑀭𑀽𑀧𑀁 𑀉𑀢𑁆𑀢𑀫𑀭𑀢𑀦𑀁 𑀮𑀪𑀺𑀢𑁆𑀯𑀸 𑀫𑀬𑀁 𑀦 𑀤𑀲𑁆𑀲𑀸𑀫. 𑀦 𑀔𑁄 𑀧𑀦 𑀢𑀼𑀫𑁆𑀳𑁂𑀳𑀺𑀬𑁂𑀯 𑀫𑀸𑀢𑀼𑀣𑀦𑀢𑁄 𑀔𑀻𑀭𑀁 𑀧𑀻𑀢𑀁, 𑀅𑀫𑁆𑀳𑁂𑀳𑀺𑀧𑀺 𑀫𑀸𑀢𑀼𑀣𑀦𑀢𑁄 𑀔𑀻𑀭𑀁 𑀧𑀻𑀢𑀁. 𑀦 𑀢𑀼𑀫𑁆𑀳𑁂𑀬𑁂𑀯 𑀧𑀼𑀭𑀺𑀲𑀸, 𑀅𑀫𑁆𑀳𑁂𑀧𑀺 𑀧𑀼𑀭𑀺𑀲𑀸 𑀳𑁄𑀢𑀽’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀅𑀳𑀁𑀓𑀸𑀭𑀁 𑀓𑀢𑁆𑀯𑀸 𑀲𑀸𑀲𑀦𑀧𑀝𑀺𑀲𑀸𑀲𑀦𑀁 𑀧𑁂𑀲𑁂𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀫𑀸𑀦𑀕𑀚𑁆𑀚𑀺𑀢𑀁 𑀕𑀚𑁆𑀚𑀦𑁆𑀢𑀺. 𑀬𑀼𑀤𑁆𑀥𑁂 𑀧𑀦 𑀲𑀢𑀺 𑀓𑁄𑀲𑀺𑀦𑀸𑀭𑀓𑀸𑀦𑀁𑀬𑁂𑀯 𑀚𑀬𑁄 𑀅𑀪𑀯𑀺𑀲𑁆𑀲. 𑀓𑀲𑁆𑀫𑀸? 𑀬𑀲𑁆𑀫𑀸 𑀥𑀸𑀢𑀼𑀧𑀸𑀲𑀦𑀢𑁆𑀣𑀁 ¶ 𑀆𑀕𑀢𑀸 𑀤𑁂𑀯𑀢𑀸 𑀦𑁂𑀲𑀁 𑀧𑀓𑁆𑀔𑀸 𑀅𑀳𑁂𑀲𑀼𑀁. 𑀧𑀸𑀴𑀺𑀬𑀁 𑀧𑀦 𑁋 ‘‘𑀪𑀕𑀯𑀸 𑀅𑀫𑁆𑀳𑀸𑀓𑀁 𑀕𑀸𑀫𑀓𑁆𑀔𑁂𑀢𑁆𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀦 𑀫𑀬𑀁 𑀤𑀲𑁆𑀲𑀸𑀫 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀪𑀸𑀕’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀆𑀕𑀢𑀁.

𑁨𑁩𑁭. 𑀏𑀯𑀁 𑀯𑀼𑀢𑁆𑀢𑁂 𑀤𑁄𑀡𑁄 𑀩𑁆𑀭𑀸𑀳𑁆𑀫𑀡𑁄𑀢𑀺 𑀤𑁄𑀡𑀩𑁆𑀭𑀸𑀳𑁆𑀫𑀡𑁄 𑀇𑀫𑀁 𑀢𑁂𑀲𑀁 𑀯𑀺𑀯𑀸𑀤𑀁 𑀲𑀼𑀢𑁆𑀯𑀸 𑁋 ‘‘𑀏𑀢𑁂 𑀭𑀸𑀚𑀸𑀦𑁄 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑀝𑁆𑀞𑀸𑀦𑁂 𑀯𑀺𑀯𑀸𑀤𑀁 𑀓𑀭𑁄𑀦𑁆𑀢𑀺, 𑀦 𑀔𑁄 𑀧𑀦𑁂𑀢𑀁 𑀧𑀢𑀺𑀭𑀽𑀧𑀁, 𑀅𑀮𑀁 𑀇𑀫𑀺𑀦𑀸 𑀓𑀮𑀳𑁂𑀦, 𑀯𑀽𑀧𑀲𑀫𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀲𑁄 𑀕𑀦𑁆𑀢𑁆𑀯𑀸 𑀢𑁂 𑀲𑀗𑁆𑀖𑁂 𑀕𑀡𑁂 𑀏𑀢𑀤𑀯𑁄𑀘. 𑀓𑀺𑀫𑀯𑁄𑀘? 𑀉𑀦𑁆𑀦𑀢𑀧𑁆𑀧𑀤𑁂𑀲𑁂 ¶ ¶ 𑀞𑀢𑁆𑀯𑀸 𑀤𑁆𑀯𑀺𑀪𑀸𑀡𑀯𑀸𑀭𑀧𑀭𑀺𑀫𑀸𑀡𑀁 𑀤𑁄𑀡𑀕𑀚𑁆𑀚𑀺𑀢𑀁 𑀦𑀸𑀫 𑀅𑀯𑁄𑀘. 𑀢𑀢𑁆𑀣 𑀧𑀞𑀫𑀪𑀸𑀡𑀯𑀸𑀭𑁂 𑀢𑀸𑀯 𑀏𑀓𑀧𑀤𑀫𑁆𑀧𑀺 𑀢𑁂 𑀦 𑀚𑀸𑀦𑀺𑀁𑀲𑀼. 𑀤𑀼𑀢𑀺𑀬𑀪𑀸𑀡𑀯𑀸𑀭𑀧𑀭𑀺𑀬𑁄𑀲𑀸𑀦𑁂 𑁋 ‘‘𑀆𑀘𑀭𑀺𑀬𑀲𑁆𑀲 𑀯𑀺𑀬 𑀪𑁄 𑀲𑀤𑁆𑀤𑁄, 𑀆𑀘𑀭𑀺𑀬𑀲𑁆𑀲 𑀯𑀺𑀬 𑀪𑁄 𑀲𑀤𑁆𑀤𑁄’’𑀢𑀺 𑀲𑀩𑁆𑀩𑁂 𑀦𑀺𑀭𑀯𑀸 𑀅𑀳𑁂𑀲𑀼𑀁. 𑀚𑀫𑁆𑀩𑀼𑀤𑀻𑀧𑀢𑀮𑁂 𑀓𑀺𑀭 𑀓𑀼𑀮𑀖𑀭𑁂 𑀚𑀸𑀢𑀸 𑀬𑁂𑀪𑀼𑀬𑁆𑀬𑁂𑀦 𑀢𑀲𑁆𑀲 𑀦 𑀅𑀦𑁆𑀢𑁂𑀯𑀸𑀲𑀺𑀓𑁄 𑀦𑀸𑀫 𑀦𑀢𑁆𑀣𑀺. 𑀅𑀣 𑀲𑁄 𑀢𑁂 𑀅𑀢𑁆𑀢𑀦𑁄 𑀯𑀘𑀦𑀁 𑀲𑀼𑀢𑁆𑀯𑀸 𑀦𑀺𑀭𑀯𑁂 𑀢𑀼𑀡𑁆𑀳𑀻𑀪𑀽𑀢𑁂 𑀯𑀺𑀤𑀺𑀢𑁆𑀯𑀸 𑀧𑀼𑀦 𑀏𑀢𑀤𑀯𑁄𑀘 𑁋 ‘‘𑀲𑀼𑀡𑀦𑁆𑀢𑀼 𑀪𑁄𑀦𑁆𑀢𑁄’’𑀢𑀺 𑀏𑀢𑀁 𑀕𑀸𑀣𑀸𑀤𑁆𑀯𑀬𑀁 𑀅𑀯𑁄𑀘.

𑀢𑀢𑁆𑀣 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄𑀢𑀺 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄. 𑀅𑀳𑀼 𑀔𑀦𑁆𑀢𑀺𑀯𑀸𑀤𑁄𑀢𑀺 𑀩𑀼𑀤𑁆𑀥𑀪𑀽𑀫𑀺𑀁 𑀅𑀧𑁆𑀧𑀢𑁆𑀯𑀸𑀧𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁄 𑀔𑀦𑁆𑀢𑀺𑀯𑀸𑀤𑀺𑀢𑀸𑀧𑀲𑀓𑀸𑀮𑁂 𑀥𑀫𑁆𑀫𑀧𑀸𑀮𑀓𑀼𑀫𑀸𑀭𑀓𑀸𑀮𑁂 𑀙𑀤𑁆𑀤𑀦𑁆𑀢𑀳𑀢𑁆𑀣𑀺𑀓𑀸𑀮𑁂 𑀪𑀽𑀭𑀺𑀤𑀢𑁆𑀢𑀦𑀸𑀕𑀭𑀸𑀚𑀓𑀸𑀮𑁂 𑀘𑀫𑁆𑀧𑁂𑀬𑁆𑀬𑀦𑀸𑀕𑀭𑀸𑀚𑀓𑀸𑀮𑁂 𑀲𑀗𑁆𑀔𑀧𑀸𑀮𑀦𑀸𑀕𑀭𑀸𑀚𑀓𑀸𑀮𑁂 𑀫𑀳𑀸𑀓𑀧𑀺𑀓𑀸𑀮𑁂 𑀅𑀜𑁆𑀜𑁂𑀲𑀼 𑀘 𑀩𑀳𑀽𑀲𑀼 𑀚𑀸𑀢𑀓𑁂𑀲𑀼 𑀧𑀭𑁂𑀲𑀼 𑀓𑁄𑀧𑀁 𑀅𑀓𑀢𑁆𑀯𑀸 𑀔𑀦𑁆𑀢𑀺𑀫𑁂𑀯 𑀅𑀓𑀸𑀲𑀺. 𑀔𑀦𑁆𑀢𑀺𑀫𑁂𑀯 𑀯𑀡𑁆𑀡𑀬𑀺. 𑀓𑀺𑀫𑀗𑁆𑀕𑀁 𑀧𑀦 𑀏𑀢𑀭𑀳𑀺 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀢𑀸𑀤𑀺𑀮𑀓𑁆𑀔𑀡𑀁 𑀧𑀢𑁆𑀢𑁄, 𑀲𑀩𑁆𑀩𑀣𑀸𑀧𑀺 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄 𑀔𑀦𑁆𑀢𑀺𑀯𑀸𑀤𑁄 𑀅𑀳𑁄𑀲𑀺, 𑀢𑀲𑁆𑀲 𑀏𑀯𑀁𑀯𑀺𑀥𑀲𑁆𑀲. 𑀦 𑀳𑀺 𑀲𑀸𑀥𑀼 𑀬𑀁 𑀉𑀢𑁆𑀢𑀫𑀧𑀼𑀕𑁆𑀕𑀮𑀲𑁆𑀲, 𑀲𑀭𑀻𑀭𑀪𑀸𑀕𑁂 𑀲𑀺𑀬𑀸 𑀲𑀫𑁆𑀧𑀳𑀸𑀭𑁄𑀢𑀺 𑀦 𑀳𑀺 𑀲𑀸𑀥𑀼𑀬𑀦𑁆𑀢𑀺 𑀦 𑀳𑀺 𑀲𑀸𑀥𑀼 𑀅𑀬𑀁. 𑀲𑀭𑀻𑀭𑀪𑀸𑀕𑁂𑀢𑀺 𑀲𑀭𑀻𑀭𑀯𑀺𑀪𑀸𑀕𑀦𑀺𑀫𑀺𑀢𑁆𑀢𑀁, 𑀥𑀸𑀢𑀼𑀓𑁄𑀝𑁆𑀞𑀸𑀲𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀲𑀺𑀬𑀸 𑀲𑀫𑁆𑀧𑀳𑀸𑀭𑁄𑀢𑀺 𑀆𑀯𑀼𑀥𑀲𑀫𑁆𑀧𑀳𑀸𑀭𑁄 𑀲𑀸𑀥𑀼 𑀦 𑀲𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀩𑁆𑀩𑁂𑀯 𑀪𑁄𑀦𑁆𑀢𑁄 𑀲𑀳𑀺𑀢𑀸𑀢𑀺 𑀲𑀩𑁆𑀩𑁂𑀯 𑀪𑁄𑀦𑁆𑀢𑁄 𑀲𑀳𑀺𑀢𑀸 𑀳𑁄𑀣, 𑀫𑀸 𑀪𑀺𑀚𑁆𑀚𑀣. 𑀲𑀫𑀕𑁆𑀕𑀸𑀢𑀺 𑀓𑀸𑀬𑁂𑀦 𑀘 𑀯𑀸𑀘𑀸𑀬 𑀘 𑀏𑀓𑀲𑀦𑁆𑀦𑀺𑀧𑀸𑀢𑀸 𑀏𑀓𑀯𑀘𑀦𑀸 𑀲𑀫𑀕𑁆𑀕𑀸 𑀳𑁄𑀣. 𑀲𑀫𑁆𑀫𑁄𑀤𑀫𑀸𑀦𑀸𑀢𑀺 𑀘𑀺𑀢𑁆𑀢𑁂𑀦𑀸𑀧𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀫𑁄𑀤𑀫𑀸𑀦𑀸 𑀳𑁄𑀣. 𑀓𑀭𑁄𑀫𑀝𑁆𑀞𑀪𑀸𑀕𑁂𑀢𑀺 𑀪𑀕𑀯𑀢𑁄 𑀲𑀭𑀻𑀭𑀸𑀦𑀺 𑀅𑀝𑁆𑀞 𑀪𑀸𑀕𑁂 𑀓𑀭𑁄𑀫 ¶ . 𑀘𑀓𑁆𑀔𑀼𑀫𑀢𑁄𑀢𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀢𑁄 𑀩𑀼𑀤𑁆𑀥𑀲𑁆𑀲. 𑀦 𑀓𑁂𑀯𑀮𑀁 𑀢𑀼𑀫𑁆𑀳𑁂𑀬𑁂𑀯, 𑀩𑀳𑀼𑀚𑀦𑁄𑀧𑀺 𑀧𑀲𑀦𑁆𑀦𑁄, 𑀢𑁂𑀲𑀼 𑀏𑀓𑁄𑀧𑀺 𑀮𑀤𑁆𑀥𑀼𑀁 𑀅𑀬𑀼𑀢𑁆𑀢𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀩𑀳𑀼𑀁 𑀓𑀸𑀭𑀡𑀁 𑀯𑀢𑁆𑀯𑀸 𑀲𑀜𑁆𑀜𑀸𑀧𑁂𑀲𑀺.

𑁨𑁩𑁮. 𑀢𑁂𑀲𑀁 𑀲𑀗𑁆𑀖𑀸𑀦𑀁 𑀕𑀡𑀸𑀦𑀁 𑀧𑀝𑀺𑀲𑁆𑀲𑀼𑀢𑁆𑀯𑀸𑀢𑀺 𑀢𑁂𑀲𑀁 𑀢𑁂𑀲𑀁 𑀢𑀢𑁄 𑀢𑀢𑁄 𑀲𑀫𑀸𑀕𑀢𑀲𑀗𑁆𑀖𑀸𑀦𑀁 𑀲𑀫𑀸𑀕𑀢𑀕𑀡𑀸𑀦𑀁 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸. 𑀪𑀕𑀯𑀢𑁄 ¶ 𑀲𑀭𑀻𑀭𑀸𑀦𑀺 𑀅𑀝𑁆𑀞𑀥𑀸 𑀲𑀫𑀁 𑀲𑀼𑀯𑀺𑀪𑀢𑁆𑀢𑀁 𑀯𑀺𑀪𑀚𑀺𑀢𑁆𑀯𑀸𑀢𑀺 𑀏𑀢𑁆𑀣 𑀅𑀬𑀫𑀦𑀼𑀓𑁆𑀓𑀫𑁄 𑁋 𑀤𑁄𑀡𑁄 𑀓𑀺𑀭 𑀢𑁂𑀲𑀁 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀲𑀼𑀯𑀡𑁆𑀡𑀤𑁄𑀡𑀺𑀁 𑀯𑀺𑀯𑀭𑀸𑀧𑁂𑀲𑀺. 𑀭𑀸𑀚𑀸𑀦𑁄 𑀆𑀕𑀦𑁆𑀢𑁆𑀯𑀸 𑀤𑁄𑀡𑀺𑀬𑀁𑀬𑁂𑀯 𑀞𑀺𑀢𑀸 𑀲𑀼𑀯𑀡𑁆𑀡𑀯𑀡𑁆𑀡𑀸 𑀥𑀸𑀢𑀼𑀬𑁄 𑀤𑀺𑀲𑁆𑀯𑀸 𑁋 ‘‘𑀪𑀕𑀯𑀸 𑀲𑀩𑁆𑀩𑀜𑁆𑀜𑀼 𑀧𑀼𑀩𑁆𑀩𑁂 𑀫𑀬𑀁 𑀢𑀼𑀫𑁆𑀳𑀸𑀓𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑀁 𑀙𑀩𑁆𑀩𑀡𑁆𑀡𑀩𑀼𑀤𑁆𑀥𑀭𑀲𑁆𑀫𑀺𑀔𑀘𑀺𑀢𑀁 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀲𑀫𑀼𑀚𑁆𑀚𑀮𑀺𑀢𑀲𑁄𑀪𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀭𑀻𑀭𑀁 𑀅𑀤𑁆𑀤𑀲𑀸𑀫, 𑀇𑀤𑀸𑀦𑀺 𑀧𑀦 𑀲𑀼𑀯𑀡𑁆𑀡𑀯𑀡𑁆𑀡𑀸𑀯 𑀥𑀸𑀢𑀼𑀬𑁄 𑀅𑀯𑀲𑀺𑀝𑁆𑀞𑀸 𑀚𑀸𑀢𑀸, 𑀦 𑀬𑀼𑀢𑁆𑀢𑀫𑀺𑀤𑀁 𑀪𑀕𑀯𑀸 𑀢𑀼𑀫𑁆𑀳𑀸𑀓’’𑀦𑁆𑀢𑀺 𑀧𑀭𑀺𑀤𑁂𑀯𑀺𑀁𑀲𑀼.

𑀩𑁆𑀭𑀸𑀳𑁆𑀫𑀡𑁄𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀢𑁂𑀲𑀁 𑀧𑀫𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀤𑀓𑁆𑀔𑀺𑀡𑀤𑀸𑀞𑀁 𑀕𑀳𑁂𑀢𑁆𑀯𑀸 𑀯𑁂𑀞𑀦𑁆𑀢𑀭𑁂 𑀞𑀧𑁂𑀲𑀺, 𑀅𑀣 ¶ 𑀧𑀘𑁆𑀙𑀸 𑀅𑀝𑁆𑀞𑀥𑀸 𑀲𑀫𑀁 𑀲𑀼𑀯𑀺𑀪𑀢𑁆𑀢𑀁 𑀯𑀺𑀪𑀚𑀺, 𑀲𑀩𑁆𑀩𑀸𑀧𑀺 𑀥𑀸𑀢𑀼𑀬𑁄 𑀧𑀸𑀓𑀢𑀺𑀓𑀦𑀸𑀴𑀺𑀬𑀸 𑀲𑁄𑀴𑀲 𑀦𑀸𑀴𑀺𑀬𑁄 𑀅𑀳𑁂𑀲𑀼𑀁, 𑀏𑀓𑁂𑀓𑀦𑀕𑀭𑀯𑀸𑀲𑀺𑀦𑁄 𑀤𑁆𑀯𑁂 𑀤𑁆𑀯𑁂 𑀦𑀸𑀴𑀺𑀬𑁄 𑀮𑀪𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀦 𑀥𑀸𑀢𑀼𑀬𑁄 𑀯𑀺𑀪𑀚𑀦𑁆𑀢𑀲𑁆𑀲𑁂𑀯 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑁋 ‘‘𑀓𑁂𑀦 𑀦𑀼 𑀔𑁄 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀓𑀗𑁆𑀔𑀘𑁆𑀙𑁂𑀤𑀦𑀢𑁆𑀣𑀸𑀬 𑀘𑀢𑀼𑀲𑀘𑁆𑀘𑀓𑀣𑀸𑀬 𑀧𑀘𑁆𑀘𑀬𑀪𑀽𑀢𑀸 𑀪𑀕𑀯𑀢𑁄 𑀤𑀓𑁆𑀔𑀺𑀡𑀤𑀸𑀞𑀸 𑀕𑀳𑀺𑀢𑀸’’𑀢𑀺 𑀑𑀮𑁄𑀓𑁂𑀦𑁆𑀢𑁄 ‘‘𑀩𑁆𑀭𑀸𑀳𑁆𑀫𑀡𑁂𑀦 𑀕𑀳𑀺𑀢𑀸’’𑀢𑀺 𑀤𑀺𑀲𑁆𑀯𑀸 𑁋 ‘‘𑀩𑁆𑀭𑀸𑀳𑁆𑀫𑀡𑁄𑀧𑀺 𑀤𑀸𑀞𑀸𑀬 𑀅𑀦𑀼𑀘𑁆𑀙𑀯𑀺𑀓𑀁 𑀲𑀓𑁆𑀓𑀸𑀭𑀁 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀕𑀡𑁆𑀳𑀸𑀫𑀺 𑀦’’𑀦𑁆𑀢𑀺 𑀯𑁂𑀞𑀦𑁆𑀢𑀭𑀢𑁄 𑀕𑀳𑁂𑀢𑁆𑀯𑀸 𑀲𑀼𑀯𑀡𑁆𑀡𑀘𑀗𑁆𑀓𑁄𑀝𑀓𑁂 𑀞𑀧𑁂𑀢𑁆𑀯𑀸 𑀤𑁂𑀯𑀮𑁄𑀓𑀁 𑀦𑁂𑀢𑁆𑀯𑀸 𑀘𑀽𑀴𑀸𑀫𑀡𑀺𑀘𑁂𑀢𑀺𑀬𑁂 𑀧𑀢𑀺𑀝𑁆𑀞𑀧𑁂𑀲𑀺.

𑀩𑁆𑀭𑀸𑀳𑁆𑀫𑀡𑁄𑀧𑀺 𑀥𑀸𑀢𑀼𑀬𑁄 𑀯𑀺𑀪𑀚𑀺𑀢𑁆𑀯𑀸 𑀤𑀸𑀞𑀁 𑀅𑀧𑀲𑁆𑀲𑀦𑁆𑀢𑁄 𑀘𑁄𑀭𑀺𑀓𑀸𑀬 𑀕𑀳𑀺𑀢𑀢𑁆𑀢𑀸 𑁋 ‘‘𑀓𑁂𑀦 𑀫𑁂 𑀤𑀸𑀞𑀸 𑀕𑀳𑀺𑀢𑀸’’𑀢𑀺 𑀧𑀼𑀘𑁆𑀙𑀺𑀢𑀼𑀫𑁆𑀧𑀺 𑀦𑀸𑀲𑀓𑁆𑀔𑀺. ‘‘𑀦𑀦𑀼 𑀢𑀬𑀸𑀯 𑀥𑀸𑀢𑀼𑀬𑁄 𑀪𑀸𑀚𑀺𑀢𑀸, 𑀓𑀺𑀁 𑀢𑁆𑀯𑀁 𑀧𑀞𑀫𑀁𑀬𑁂𑀯 𑀅𑀢𑁆𑀢𑀦𑁄 𑀥𑀸𑀢𑀼𑀬𑀸 𑀅𑀢𑁆𑀣𑀺𑀪𑀸𑀯𑀁 𑀦 𑀅𑀜𑁆𑀜𑀸𑀲𑀻’’𑀢𑀺 𑀅𑀢𑁆𑀢𑀦𑀺 𑀤𑁄𑀲𑀸𑀭𑁄𑀧𑀦𑀁 𑀲𑀫𑁆𑀧𑀲𑁆𑀲𑀦𑁆𑀢𑁄 𑁋 ‘‘𑀫𑀬𑁆𑀳𑀫𑁆𑀧𑀺 𑀓𑁄𑀝𑁆𑀞𑀸𑀲𑀁 𑀤𑁂𑀣𑀸’’𑀢𑀺 𑀯𑀢𑁆𑀢𑀼𑀫𑁆𑀧𑀺 𑀦𑀸𑀲𑀓𑁆𑀔𑀺. 𑀢𑀢𑁄 𑁋 ‘‘𑀅𑀬𑀫𑁆𑀧𑀺 𑀲𑀼𑀯𑀡𑁆𑀡𑀢𑀼𑀫𑁆𑀩𑁄 𑀥𑀸𑀢𑀼𑀕𑀢𑀺𑀓𑁄𑀯, 𑀬𑁂𑀦 𑀢𑀣𑀸𑀕𑀢𑀲𑁆𑀲 𑀥𑀸𑀢𑀼𑀬𑁄 𑀫𑀺𑀢𑀸, 𑀇𑀫𑀲𑁆𑀲𑀸𑀳𑀁 𑀣𑀽𑀧𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀇𑀫𑀁 𑀫𑁂 𑀪𑁄𑀦𑁆𑀢𑁄 𑀢𑀼𑀫𑁆𑀩𑀁 𑀤𑀤𑀦𑁆𑀢𑀽𑀢𑀺 𑀆𑀳.

𑀧𑀺𑀧𑁆𑀧𑀮𑀺𑀯𑀦𑀺𑀬𑀸 ¶ 𑀫𑁄𑀭𑀺𑀬𑀸𑀧𑀺 𑀅𑀚𑀸𑀢𑀲𑀢𑁆𑀢𑀼𑀆𑀤𑀬𑁄 𑀯𑀺𑀬 𑀤𑀽𑀢𑀁 𑀧𑁂𑀲𑁂𑀢𑁆𑀯𑀸 𑀬𑀼𑀤𑁆𑀥𑀲𑀚𑁆𑀚𑀸𑀯 𑀦𑀺𑀓𑁆𑀔𑀫𑀺𑀁𑀲𑀼.

𑀥𑀸𑀢𑀼𑀣𑀽𑀧𑀧𑀽𑀚𑀸𑀯𑀡𑁆𑀡𑀦𑀸

𑁨𑁩𑁯. 𑀭𑀸𑀚𑀕𑀳𑁂 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀣𑀽𑀧𑀜𑁆𑀘 𑀫𑀳𑀜𑁆𑀘 𑀅𑀓𑀸𑀲𑀻𑀢𑀺 𑀓𑀣𑀁 𑀅𑀓𑀸𑀲𑀺? 𑀓𑀼𑀲𑀺𑀦𑀸𑀭𑀢𑁄 𑀬𑀸𑀯 𑀭𑀸𑀚𑀕𑀳𑀁 𑀧𑀜𑁆𑀘𑀯𑀻𑀲𑀢𑀺 𑀬𑁄𑀚𑀦𑀸𑀦𑀺, 𑀏𑀢𑁆𑀣𑀦𑁆𑀢𑀭𑁂 𑀅𑀝𑁆𑀞𑀉𑀲𑀪𑀯𑀺𑀢𑁆𑀣𑀢𑀁 𑀲𑀫𑀢𑀮𑀁 𑀫𑀕𑁆𑀕𑀁 ¶ 𑀓𑀸𑀭𑁂𑀢𑁆𑀯𑀸 𑀬𑀸𑀤𑀺𑀲𑀁 𑀫𑀮𑁆𑀮𑀭𑀸𑀚𑀸𑀦𑁄 𑀫𑀓𑀼𑀝𑀩𑀦𑁆𑀥𑀦𑀲𑁆𑀲 𑀘 𑀲𑀦𑁆𑀣𑀸𑀕𑀸𑀭𑀲𑁆𑀲 𑀘 𑀅𑀦𑁆𑀢𑀭𑁂 𑀧𑀽𑀚𑀁 𑀓𑀸𑀭𑁂𑀲𑀼𑀁. 𑀢𑀸𑀤𑀺𑀲𑀁 𑀧𑀜𑁆𑀘𑀯𑀻𑀲𑀢𑀺𑀬𑁄𑀚𑀦𑁂𑀧𑀺 𑀫𑀕𑁆𑀕𑁂 𑀧𑀽𑀚𑀁 𑀓𑀸𑀭𑁂𑀢𑁆𑀯𑀸 𑀮𑁄𑀓𑀲𑁆𑀲 𑀅𑀦𑀼𑀓𑁆𑀓𑀡𑁆𑀞𑀦𑀢𑁆𑀣𑀁 𑀲𑀩𑁆𑀩𑀢𑁆𑀣 𑀅𑀦𑁆𑀢𑀭𑀸𑀧𑀡𑁂 𑀧𑀲𑀸𑀭𑁂𑀢𑁆𑀯𑀸 𑀲𑀼𑀯𑀡𑁆𑀡𑀤𑁄𑀡𑀺𑀬𑀁 𑀧𑀓𑁆𑀔𑀺𑀢𑁆𑀢𑀥𑀸𑀢𑀼𑀬𑁄 𑀲𑀢𑁆𑀢𑀺𑀧𑀜𑁆𑀚𑀭𑁂𑀦 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀚𑀺𑀢𑁂 𑀧𑀜𑁆𑀘𑀬𑁄𑀚𑀦𑀲𑀢𑀧𑀭𑀺𑀫𑀡𑁆𑀟𑀮𑁂 𑀫𑀦𑀼𑀲𑁆𑀲𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀲𑀺. 𑀢𑁂 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀓𑀼𑀲𑀺𑀦𑀸𑀭𑀢𑁄 𑀲𑀸𑀥𑀼𑀓𑀻𑀴𑀺𑀢𑀁 𑀓𑀻𑀴𑀦𑁆𑀢𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑀢𑁆𑀣 𑀬𑀢𑁆𑀣 𑀲𑀼𑀯𑀡𑁆𑀡𑀯𑀡𑁆𑀡𑀸𑀦𑀺 𑀧𑀼𑀧𑁆𑀨𑀸𑀦𑀺 𑀧𑀲𑁆𑀲𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣 𑀥𑀸𑀢𑀼𑀬𑁄 𑀲𑀢𑁆𑀢𑀺𑀅𑀦𑁆𑀢𑀭𑁂 𑀞𑀧𑁂𑀢𑁆𑀯𑀸 𑀧𑀽𑀚𑀁 𑀅𑀓𑀁𑀲𑀼. 𑀢𑁂𑀲𑀁 𑀧𑀼𑀧𑁆𑀨𑀸𑀦𑀁 𑀔𑀻𑀡𑀓𑀸𑀮𑁂 𑀕𑀘𑁆𑀙𑀦𑁆𑀢𑀺, 𑀭𑀣𑀲𑁆𑀲 𑀥𑀼𑀭𑀝𑁆𑀞𑀸𑀦𑀁 𑀧𑀘𑁆𑀙𑀺𑀫𑀝𑁆𑀞𑀸𑀦𑁂 𑀲𑀫𑁆𑀧𑀢𑁆𑀢𑁂 𑀲𑀢𑁆𑀢 𑀤𑀺𑀯𑀲𑁂 𑀲𑀸𑀥𑀼𑀓𑀻𑀴𑀺𑀢𑀁 𑀓𑀻𑀴𑀦𑁆𑀢𑀺. 𑀏𑀯𑀁 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀸𑀦𑀁 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀲𑀢𑁆𑀢 𑀫𑀸𑀲𑀸𑀦𑀺 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀯𑀻𑀢𑀺𑀯𑀢𑁆𑀢𑀸𑀦𑀺.

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 ¶ 𑁋 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀩𑀮𑀓𑁆𑀓𑀸𑀭𑁂𑀦 𑀲𑀸𑀥𑀼𑀓𑀻𑀴𑀺𑀢𑀸𑀬 𑀉𑀧𑀤𑁆𑀤𑀼𑀢𑀫𑁆𑀳 𑀲𑀩𑁆𑀩𑁂 𑀦𑁄 𑀓𑀫𑁆𑀫𑀦𑁆𑀢𑀸 𑀦𑀝𑁆𑀞𑀸’’𑀢𑀺 𑀉𑀚𑁆𑀛𑀸𑀬𑀦𑁆𑀢𑀸 𑀫𑀦𑀁 𑀧𑀤𑁄𑀲𑁂𑀢𑁆𑀯𑀸 𑀙𑀴𑀸𑀲𑀻𑀢𑀺𑀲𑀳𑀲𑁆𑀲𑀫𑀢𑁆𑀢𑀸 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑀸. 𑀔𑀻𑀡𑀸𑀲𑀯𑀸 𑀆𑀯𑀚𑁆𑀚𑀺𑀢𑁆𑀯𑀸 ‘‘𑀫𑀳𑀸𑀚𑀦𑁄 𑀫𑀦𑀁 𑀧𑀤𑁄𑀲𑁂𑀢𑁆𑀯𑀸 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑀻’’𑀢𑀺 𑀤𑀺𑀲𑁆𑀯𑀸 𑁋 ‘‘𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀥𑀸𑀢𑀼𑀆𑀳𑀭𑀡𑀽𑀧𑀸𑀬𑀁 𑀓𑀸𑀭𑁂𑀲𑁆𑀲𑀸𑀫𑀸’’𑀢𑀺 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑁋 ‘‘𑀥𑀸𑀢𑀼𑀆𑀳𑀭𑀡𑀽𑀧𑀸𑀬𑀁 𑀓𑀭𑁄𑀳𑀺 𑀫𑀳𑀸𑀭𑀸𑀚𑀸’’𑀢𑀺 𑀆𑀳𑀁𑀲𑀼. 𑀲𑀓𑁆𑀓𑁄 𑀆𑀳 𑁋 ‘‘𑀪𑀦𑁆𑀢𑁂, 𑀧𑀼𑀣𑀼𑀚𑁆𑀚𑀦𑁄 𑀦𑀸𑀫 𑀅𑀚𑀸𑀢𑀲𑀢𑁆𑀢𑀼𑀦𑀸 𑀲𑀫𑁄 𑀲𑀤𑁆𑀥𑁄 𑀦𑀢𑁆𑀣𑀺, 𑀦 𑀲𑁄 𑀫𑀫 𑀯𑀘𑀦𑀁 𑀓𑀭𑀺𑀲𑁆𑀲𑀢𑀺, 𑀅𑀧𑀺𑀘 𑀔𑁄 𑀫𑀸𑀭𑀯𑀺𑀪𑀺𑀁𑀲𑀓𑀲𑀤𑀺𑀲𑀁 𑀯𑀺𑀪𑀺𑀁𑀲𑀓𑀁 𑀤𑀲𑁆𑀲𑁂𑀲𑁆𑀲𑀸𑀫𑀺, 𑀫𑀳𑀸𑀲𑀤𑁆𑀤𑀁 𑀲𑀸𑀯𑁂𑀲𑁆𑀲𑀸𑀫𑀺, 𑀬𑀓𑁆𑀔𑀕𑀸𑀳𑀓𑀔𑀺𑀧𑀺𑀢𑀓𑀅𑀭𑁄𑀘𑀓𑁂 𑀓𑀭𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 ‘𑀅𑀫𑀦𑀼𑀲𑁆𑀲𑀸 𑀫𑀳𑀸𑀭𑀸𑀚 𑀓𑀼𑀧𑀺𑀢𑀸 𑀥𑀸𑀢𑀼𑀬𑁄 𑀆𑀳𑀭𑀸𑀧𑁂𑀣𑀸’𑀢𑀺 𑀯𑀤𑁂𑀬𑁆𑀬𑀸𑀣, 𑀏𑀯𑀁 𑀲𑁄 𑀆𑀳𑀭𑀸𑀧𑁂𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀲𑀓𑁆𑀓𑁄 𑀢𑀁 𑀲𑀩𑁆𑀩𑀁 𑀅𑀓𑀸𑀲𑀺.

𑀣𑁂𑀭𑀸𑀧𑀺 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑁋 ‘‘𑀫𑀳𑀸𑀭𑀸𑀚, 𑀅𑀫𑀦𑀼𑀲𑁆𑀲𑀸 𑀓𑀼𑀧𑀺𑀢𑀸, 𑀥𑀸𑀢𑀼𑀬𑁄 𑀆𑀳𑀭𑀸𑀧𑁂𑀳𑀻’’𑀢𑀺 𑀪𑀡𑀺𑀁𑀲𑀼. 𑀭𑀸𑀚𑀸 𑁋 ‘‘𑀦 𑀢𑀸𑀯, 𑀪𑀦𑁆𑀢𑁂, 𑀫𑀬𑁆𑀳𑀁 𑀘𑀺𑀢𑁆𑀢𑀁 ¶ 𑀢𑀼𑀲𑁆𑀲𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀆𑀳𑀭𑀦𑁆𑀢𑀽’’𑀢𑀺 𑀆𑀳. 𑀲𑀢𑁆𑀢𑀫𑀤𑀺𑀯𑀲𑁂 𑀥𑀸𑀢𑀼𑀬𑁄 𑀆𑀳𑀭𑀺𑀁𑀲𑀼. 𑀏𑀯𑀁 𑀆𑀳𑀢𑀸 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀭𑀸𑀚𑀕𑀳𑁂 𑀣𑀽𑀧𑀜𑁆𑀘 𑀫𑀳𑀜𑁆𑀘 𑀅𑀓𑀸𑀲𑀺. 𑀇𑀢𑀭𑁂𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 ¶ 𑀩𑀮𑀸𑀦𑀼𑀭𑀽𑀧𑁂𑀦 𑀆𑀳𑀭𑀺𑀢𑁆𑀯𑀸 𑀲𑀓𑀲𑀓𑀝𑁆𑀞𑀸𑀦𑁂𑀲𑀼 𑀣𑀽𑀧𑀜𑁆𑀘 𑀫𑀳𑀜𑁆𑀘 𑀅𑀓𑀁𑀲𑀼.

𑁨𑁪𑁦. 𑀏𑀯𑀫𑁂𑀢𑀁 𑀪𑀽𑀢𑀧𑀼𑀩𑁆𑀩𑀦𑁆𑀢𑀺 𑀏𑀯𑀁 𑀏𑀢𑀁 𑀥𑀸𑀢𑀼𑀪𑀸𑀚𑀦𑀜𑁆𑀘𑁂𑀯 𑀤𑀲𑀣𑀽𑀧𑀓𑀭𑀡𑀜𑁆𑀘 𑀚𑀫𑁆𑀩𑀼𑀤𑀻𑀧𑁂 𑀪𑀽𑀢𑀧𑀼𑀩𑁆𑀩𑀦𑁆𑀢𑀺 𑀧𑀘𑁆𑀙𑀸 𑀲𑀗𑁆𑀕𑀻𑀢𑀺𑀓𑀸𑀭𑀓𑀸 𑀆𑀳𑀁𑀲𑀼. 𑀏𑀯𑀁 𑀧𑀢𑀺𑀝𑁆𑀞𑀺𑀢𑁂𑀲𑀼 𑀧𑀦 𑀣𑀽𑀧𑁂𑀲𑀼 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀥𑀸𑀢𑀽𑀦𑀁 𑀅𑀦𑁆𑀢𑀭𑀸𑀬𑀁 𑀤𑀺𑀲𑁆𑀯𑀸 𑀭𑀸𑀚𑀸𑀦𑀁 𑀅𑀚𑀸𑀢𑀲𑀢𑁆𑀢𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀫𑀳𑀸𑀭𑀸𑀚, 𑀏𑀓𑀁 𑀥𑀸𑀢𑀼𑀦𑀺𑀥𑀸𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. 𑀲𑀸𑀥𑀼, 𑀪𑀦𑁆𑀢𑁂, 𑀦𑀺𑀥𑀸𑀦𑀓𑀫𑁆𑀫𑀁 𑀢𑀸𑀯 𑀫𑀫 𑀳𑁄𑀢𑀼, 𑀲𑁂𑀲𑀥𑀸𑀢𑀼𑀬𑁄 𑀧𑀦 𑀓𑀣𑀁 𑀆𑀳𑀭𑀸𑀫𑀻𑀢𑀺? 𑀦, 𑀫𑀳𑀸𑀭𑀸𑀚, 𑀥𑀸𑀢𑀼𑀆𑀳𑀭𑀡𑀁 𑀢𑀼𑀬𑁆𑀳𑀁 𑀪𑀸𑀭𑁄, 𑀅𑀫𑁆𑀳𑀸𑀓𑀁 𑀪𑀸𑀭𑁄𑀢𑀺. 𑀲𑀸𑀥𑀼, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀥𑀸𑀢𑀼𑀬𑁄 𑀆𑀳𑀭𑀣, 𑀅𑀳𑀁 𑀥𑀸𑀢𑀼𑀦𑀺𑀥𑀸𑀦𑀁 𑀓𑀭𑀺𑀲𑁆𑀲𑀸𑀫𑀻𑀢𑀺. 𑀣𑁂𑀭𑁄 𑀢𑁂𑀲𑀁 𑀢𑁂𑀲𑀁 𑀭𑀸𑀚𑀓𑀼𑀮𑀸𑀦𑀁 𑀧𑀭𑀺𑀘𑀭𑀡𑀫𑀢𑁆𑀢𑀫𑁂𑀯 𑀞𑀧𑁂𑀢𑁆𑀯𑀸 𑀲𑁂𑀲𑀥𑀸𑀢𑀼𑀬𑁄 𑀆𑀳𑀭𑀺. 𑀭𑀸𑀫𑀕𑀸𑀫𑁂 𑀧𑀦 𑀥𑀸𑀢𑀼𑀬𑁄 𑀦𑀸𑀕𑀸 𑀧𑀭𑀺𑀕𑁆𑀕𑀡𑁆𑀳𑀺𑀁𑀲𑀼, 𑀢𑀸𑀲𑀁 𑀅𑀦𑁆𑀢𑀭𑀸𑀬𑁄 𑀦𑀢𑁆𑀣𑀺. ‘‘𑀅𑀦𑀸𑀕𑀢𑁂 𑀮𑀗𑁆𑀓𑀸𑀤𑀻𑀧𑁂 𑀫𑀳𑀸𑀯𑀺𑀳𑀸𑀭𑁂 𑀫𑀳𑀸𑀘𑁂𑀢𑀺𑀬𑀫𑁆𑀳𑀺 𑀦𑀺𑀤𑀳𑀺𑀲𑁆𑀲𑀦𑁆𑀢𑀻’’𑀢𑀺 𑀢𑀸 𑀦 𑀆𑀳𑀭𑀺𑀢𑁆𑀯𑀸 𑀲𑁂𑀲𑁂𑀳𑀺 𑀲𑀢𑁆𑀢𑀳𑀺 𑀦𑀕𑀭𑁂𑀳𑀺 𑀆𑀳𑀭𑀺𑀢𑁆𑀯𑀸 𑀭𑀸𑀚𑀕𑀳𑀲𑁆𑀲 𑀧𑀸𑀘𑀻𑀦𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁂 𑀞𑀢𑁆𑀯𑀸 𑁋 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀬𑁄 𑀧𑀸𑀲𑀸𑀡𑁄 𑀅𑀢𑁆𑀣𑀺, 𑀲𑁄 𑀅𑀦𑁆𑀢𑀭𑀥𑀸𑀬𑀢𑀼, 𑀧𑀁𑀲𑀼 𑀲𑀼𑀯𑀺𑀲𑀼𑀤𑁆𑀥𑀸 𑀳𑁄𑀢𑀼, 𑀉𑀤𑀓𑀁 𑀫𑀸 𑀉𑀝𑁆𑀞𑀳𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺.

𑀭𑀸𑀚𑀸 𑀢𑀁 𑀞𑀸𑀦𑀁 𑀔𑀡𑀸𑀧𑁂𑀢𑁆𑀯𑀸 𑀢𑀢𑁄 𑀉𑀤𑁆𑀥𑀢𑀧𑀁𑀲𑀼𑀦𑀸 𑀇𑀝𑁆𑀞𑀓𑀸 𑀓𑀸𑀭𑁂𑀢𑁆𑀯𑀸 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸𑀦𑀁 𑀘𑁂𑀢𑀺𑀬𑀸𑀦𑀺 ¶ 𑀓𑀸𑀭𑁂𑀢𑀺. ‘‘𑀇𑀥 𑀭𑀸𑀚𑀸 𑀓𑀺𑀁 𑀓𑀸𑀭𑁂𑀢𑀻’’𑀢𑀺 𑀧𑀼𑀘𑁆𑀙𑀦𑁆𑀢𑀸𑀦𑀫𑁆𑀧𑀺 ‘‘𑀫𑀳𑀸𑀲𑀸𑀯𑀓𑀸𑀦𑀁 𑀘𑁂𑀢𑀺𑀬𑀸𑀦𑀻’’𑀢𑀺 𑀯𑀤𑀦𑁆𑀢𑀺, 𑀦 𑀓𑁄𑀘𑀺 𑀥𑀸𑀢𑀼𑀦𑀺𑀥𑀸𑀦𑀪𑀸𑀯𑀁 𑀚𑀸𑀦𑀸𑀢𑀺. 𑀅𑀲𑀻𑀢𑀺𑀳𑀢𑁆𑀣𑀕𑀫𑁆𑀪𑀻𑀭𑁂 𑀧𑀦 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀚𑀸𑀢𑁂 𑀳𑁂𑀝𑁆𑀞𑀸 𑀮𑁄𑀳𑀲𑀦𑁆𑀣𑀸𑀭𑀁 𑀲𑀦𑁆𑀣𑀭𑀸𑀧𑁂𑀢𑁆𑀯𑀸 𑀢𑀢𑁆𑀣 𑀣𑀽𑀧𑀸𑀭𑀸𑀫𑁂 𑀘𑁂𑀢𑀺𑀬𑀖𑀭𑀧𑁆𑀧𑀫𑀸𑀡𑀁 𑀢𑀫𑁆𑀩𑀮𑁄𑀳𑀫𑀬𑀁 𑀕𑁂𑀳𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀝𑁆𑀞 𑀅𑀝𑁆𑀞 𑀳𑀭𑀺𑀘𑀦𑁆𑀤𑀦𑀸𑀤𑀺𑀫𑀬𑁂 𑀓𑀭𑀡𑁆𑀟𑁂 𑀘 𑀣𑀽𑀧𑁂 𑀘 𑀓𑀸𑀭𑀸𑀧𑁂𑀲𑀺. 𑀅𑀣 𑀪𑀕𑀯𑀢𑁄 𑀥𑀸𑀢𑀼𑀬𑁄 𑀳𑀭𑀺𑀘𑀦𑁆𑀤𑀦𑀓𑀭𑀡𑁆𑀟𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀳𑀭𑀺𑀘𑀦𑁆𑀤𑀦𑀓𑀭𑀡𑁆𑀟𑀓𑀫𑁆𑀧𑀺 𑀅𑀜𑁆𑀜𑀲𑁆𑀫𑀺𑀁 𑀳𑀭𑀺𑀘𑀦𑁆𑀤𑀦𑀓𑀭𑀡𑁆𑀟𑀓𑁂, 𑀢𑀫𑁆𑀧𑀺 𑀅𑀜𑁆𑀜𑀲𑁆𑀫𑀺𑀦𑁆𑀢𑀺 𑀏𑀯𑀁 𑀅𑀝𑁆𑀞 𑀳𑀭𑀺𑀘𑀦𑁆𑀤𑀦𑀓𑀭𑀡𑁆𑀟𑁂 𑀏𑀓𑀢𑁄 𑀓𑀢𑁆𑀯𑀸 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀢𑁂 𑀅𑀝𑁆𑀞 𑀓𑀭𑀡𑁆𑀟𑁂 𑀅𑀝𑁆𑀞𑀲𑀼 𑀳𑀭𑀺𑀘𑀦𑁆𑀤𑀦𑀣𑀽𑀧𑁂𑀲𑀼, 𑀅𑀝𑁆𑀞 𑀳𑀭𑀺𑀘𑀦𑁆𑀤𑀦𑀣𑀽𑀧𑁂 𑀅𑀝𑁆𑀞𑀲𑀼 𑀮𑁄𑀳𑀺𑀢𑀘𑀦𑁆𑀤𑀦𑀓𑀭𑀡𑁆𑀟𑁂𑀲𑀼, 𑀅𑀝𑁆𑀞 𑀮𑁄𑀳𑀺𑀢𑀘𑀦𑁆𑀤𑀦𑀓𑀭𑀡𑁆𑀟𑁂 𑀅𑀝𑁆𑀞𑀲𑀼 𑀮𑁄𑀳𑀺𑀢𑀘𑀦𑁆𑀤𑀦𑀣𑀽𑀧𑁂𑀲𑀼, 𑀅𑀝𑁆𑀞 𑀮𑁄𑀳𑀺𑀢𑀘𑀦𑁆𑀤𑀦𑀣𑀽𑀧𑁂 𑀅𑀝𑁆𑀞𑀲𑀼 𑀤𑀦𑁆𑀢𑀓𑀭𑀡𑁆𑀟𑁂𑀲𑀼 ¶ , 𑀅𑀝𑁆𑀞 𑀤𑀦𑁆𑀢𑀓𑀭𑀡𑁆𑀟𑁂 ¶ 𑀅𑀝𑁆𑀞𑀲𑀼 𑀤𑀦𑁆𑀢𑀣𑀽𑀧𑁂𑀲𑀼, 𑀅𑀝𑁆𑀞 𑀤𑀦𑁆𑀢𑀣𑀽𑀧𑁂 𑀅𑀝𑁆𑀞𑀲𑀼 𑀲𑀩𑁆𑀩𑀭𑀢𑀦𑀓𑀭𑀡𑁆𑀟𑁂𑀲𑀼, 𑀅𑀝𑁆𑀞 𑀲𑀩𑁆𑀩𑀭𑀢𑀦𑀓𑀭𑀡𑁆𑀟𑁂 𑀅𑀝𑁆𑀞𑀲𑀼 𑀲𑀩𑁆𑀩𑀭𑀢𑀦𑀣𑀽𑀧𑁂𑀲𑀼, 𑀅𑀝𑁆𑀞 𑀲𑀩𑁆𑀩𑀭𑀢𑀦𑀣𑀽𑀧𑁂 𑀅𑀝𑁆𑀞𑀲𑀼 𑀲𑀼𑀯𑀡𑁆𑀡𑀓𑀭𑀡𑁆𑀟𑁂𑀲𑀼, 𑀅𑀝𑁆𑀞 𑀲𑀼𑀯𑀡𑁆𑀡𑀓𑀭𑀡𑁆𑀟𑁂, 𑀅𑀝𑁆𑀞𑀲𑀼 𑀲𑀼𑀯𑀡𑁆𑀡𑀣𑀽𑀧𑁂𑀲𑀼, 𑀅𑀝𑁆𑀞 𑀲𑀼𑀯𑀡𑁆𑀡𑀣𑀽𑀧𑁂 𑀅𑀝𑁆𑀞𑀲𑀼 𑀭𑀚𑀢𑀓𑀭𑀡𑁆𑀟𑁂𑀲𑀼, 𑀅𑀝𑁆𑀞 𑀭𑀚𑀢𑀓𑀭𑀡𑁆𑀟𑁂 𑀅𑀝𑁆𑀞𑀲𑀼 𑀭𑀚𑀢𑀣𑀽𑀧𑁂𑀲𑀼, 𑀅𑀝𑁆𑀞 𑀭𑀚𑀢𑀣𑀽𑀧𑁂, 𑀅𑀝𑁆𑀞𑀲𑀼 𑀫𑀡𑀺𑀓𑀭𑀡𑁆𑀟𑁂𑀲𑀼, 𑀅𑀝𑁆𑀞 𑀫𑀡𑀺𑀓𑀭𑀡𑁆𑀟𑁂 𑀅𑀝𑁆𑀞𑀲𑀼 𑀫𑀡𑀺𑀣𑀽𑀧𑁂𑀲𑀼, 𑀅𑀝𑁆𑀞 𑀫𑀡𑀺𑀣𑀽𑀧𑁂 𑀅𑀝𑁆𑀞𑀲𑀼 𑀮𑁄𑀳𑀺𑀢𑀗𑁆𑀓𑀓𑀭𑀡𑁆𑀟𑁂𑀲𑀼, 𑀅𑀝𑁆𑀞 𑀮𑁄𑀳𑀺𑀢𑀗𑁆𑀓𑀓𑀭𑀡𑁆𑀟𑁂 𑀅𑀝𑁆𑀞𑀲𑀼 𑀮𑁄𑀳𑀺𑀢𑀗𑁆𑀓𑀣𑀽𑀧𑁂𑀲𑀼, 𑀅𑀝𑁆𑀞 𑀮𑁄𑀳𑀺𑀢𑀗𑁆𑀓𑀣𑀽𑀧𑁂 𑀅𑀝𑁆𑀞𑀲𑀼 𑀫𑀲𑀸𑀭𑀕𑀮𑁆𑀮𑀓𑀭𑀡𑁆𑀟𑁂𑀲𑀼, 𑀅𑀝𑁆𑀞 𑀫𑀲𑀸𑀭𑀕𑀮𑁆𑀮𑀓𑀭𑀡𑁆𑀟𑁂 𑀅𑀝𑁆𑀞𑀲𑀼 𑀫𑀲𑀸𑀭𑀕𑀮𑁆𑀮𑀣𑀽𑀧𑁂𑀲𑀼, 𑀅𑀝𑁆𑀞 𑀫𑀲𑀸𑀭𑀕𑀮𑁆𑀮𑀣𑀽𑀧𑁂 𑀅𑀝𑁆𑀞𑀲𑀼 𑀨𑀮𑀺𑀓𑀓𑀭𑀡𑁆𑀟𑁂𑀲𑀼, 𑀅𑀝𑁆𑀞 𑀨𑀮𑀺𑀓𑀓𑀭𑀡𑁆𑀟𑁂 𑀅𑀝𑁆𑀞𑀲𑀼 𑀨𑀮𑀺𑀓𑀫𑀬𑀣𑀽𑀧𑁂𑀲𑀼 𑀧𑀓𑁆𑀔𑀺𑀧𑀺.

𑀲𑀩𑁆𑀩𑁂𑀲𑀁 𑀉𑀧𑀭𑀺𑀫𑀁 𑀨𑀮𑀺𑀓𑀘𑁂𑀢𑀺𑀬𑀁 𑀣𑀽𑀧𑀸𑀭𑀸𑀫𑀘𑁂𑀢𑀺𑀬𑀧𑁆𑀧𑀫𑀸𑀡𑀁 𑀅𑀳𑁄𑀲𑀺, 𑀢𑀲𑁆𑀲 𑀉𑀧𑀭𑀺 𑀲𑀩𑁆𑀩𑀭𑀢𑀦𑀫𑀬𑀁 𑀕𑁂𑀳𑀁 𑀓𑀸𑀭𑁂𑀲𑀺, 𑀢𑀲𑁆𑀲 𑀉𑀧𑀭𑀺 𑀲𑀼𑀯𑀡𑁆𑀡𑀫𑀬𑀁, 𑀢𑀲𑁆𑀲 𑀉𑀧𑀭𑀺 𑀭𑀚𑀢𑀫𑀬𑀁, 𑀢𑀲𑁆𑀲 𑀉𑀧𑀭𑀺 𑀢𑀫𑁆𑀩𑀮𑁄𑀳𑀫𑀬𑀁 𑀕𑁂𑀳𑀁. 𑀢𑀢𑁆𑀣 𑀲𑀩𑁆𑀩𑀭𑀢𑀦𑀫𑀬𑀁 𑀯𑀸𑀮𑀺𑀓𑀁 𑀑𑀓𑀺𑀭𑀺𑀢𑁆𑀯𑀸 𑀚𑀮𑀚𑀣𑀮𑀚𑀧𑀼𑀧𑁆𑀨𑀸𑀦𑀁 𑀲𑀳𑀲𑁆𑀲𑀸𑀦𑀺 𑀯𑀺𑀧𑁆𑀧𑀓𑀺𑀭𑀺𑀢𑁆𑀯𑀸 𑀅𑀟𑁆𑀠𑀙𑀝𑁆𑀞𑀸𑀦𑀺 𑀚𑀸𑀢𑀓𑀲𑀢𑀸𑀦𑀺 𑀅𑀲𑀻𑀢𑀺𑀫𑀳𑀸𑀣𑁂𑀭𑁂 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸𑀦𑀁 𑀫𑀳𑀸𑀫𑀸𑀬𑀸𑀤𑁂𑀯𑀺𑀁 𑀲𑀢𑁆𑀢 𑀲𑀳𑀚𑀸𑀢𑁂𑀢𑀺 𑀲𑀩𑁆𑀩𑀸𑀦𑁂𑀢𑀸𑀦𑀺 𑀲𑀼𑀯𑀡𑁆𑀡𑀫𑀬𑀸𑀦𑁂𑀯 𑀓𑀸𑀭𑁂𑀲𑀺. 𑀧𑀜𑁆𑀘𑀧𑀜𑁆𑀘𑀲𑀢𑁂 𑀲𑀼𑀯𑀡𑁆𑀡𑀭𑀚𑀢𑀫𑀬𑁂 𑀧𑀼𑀡𑁆𑀡𑀖𑀝𑁂 𑀞𑀧𑀸𑀧𑁂𑀲𑀺, 𑀧𑀜𑁆𑀘 𑀲𑀼𑀯𑀡𑁆𑀡𑀤𑁆𑀥𑀚𑀲𑀢𑁂 𑀉𑀲𑁆𑀲𑀸𑀧𑁂𑀲𑀺. 𑀧𑀜𑁆𑀘𑀲𑀢𑁂 𑀲𑀼𑀯𑀡𑁆𑀡𑀤𑀻𑀧𑁂, 𑀧𑀜𑁆𑀘𑀲𑀢𑁂 𑀭𑀚𑀢𑀤𑀻𑀧𑁂 𑀓𑀸𑀭𑀸𑀧𑁂𑀢𑁆𑀯𑀸 𑀲𑀼𑀕𑀦𑁆𑀥𑀢𑁂𑀮𑀲𑁆𑀲 𑀧𑀽𑀭𑁂𑀢𑁆𑀯𑀸 𑀢𑁂𑀲𑀼 𑀤𑀼𑀓𑀽𑀮𑀯𑀝𑁆𑀝𑀺𑀬𑁄 𑀞𑀧𑁂𑀲𑀺.

𑀅𑀣𑀸𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑁋 ‘‘𑀫𑀸𑀮𑀸 𑀫𑀸 𑀫𑀺𑀮𑀸𑀬𑀦𑁆𑀢𑀼, 𑀕𑀦𑁆𑀥𑀸 𑀫𑀸 𑀯𑀺𑀦𑀲𑁆𑀲𑀦𑁆𑀢𑀼, 𑀤𑀻𑀧𑀸 𑀫𑀸 𑀯𑀺𑀚𑁆𑀛𑀸𑀬𑀦𑁆𑀢𑀽’’𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀝𑁆𑀝𑁂 𑀅𑀓𑁆𑀔𑀭𑀸𑀦𑀺 𑀙𑀺𑀦𑁆𑀤𑀸𑀧𑁂𑀲𑀺 𑁋

‘‘𑀅𑀦𑀸𑀕𑀢𑁂 𑀧𑀺𑀬𑀤𑀸𑀲𑁄 𑀦𑀸𑀫 𑀓𑀼𑀫𑀸𑀭𑁄 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀅𑀲𑁄𑀓𑁄 𑀥𑀫𑁆𑀫𑀭𑀸𑀚𑀸 𑀪𑀯𑀺𑀲𑁆𑀲𑀢𑀺. 𑀲𑁄 𑀇𑀫𑀸 𑀥𑀸𑀢𑀼𑀬𑁄 𑀯𑀺𑀢𑁆𑀣𑀸𑀭𑀺𑀓𑀸 𑀓𑀭𑀺𑀲𑁆𑀲𑀢𑀻’’𑀢𑀺.

𑀭𑀸𑀚𑀸 ¶ 𑀲𑀩𑁆𑀩𑀧𑀲𑀸𑀥𑀦𑁂𑀳𑀺 𑀧𑀽𑀚𑁂𑀢𑁆𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀤𑁆𑀯𑀸𑀭𑀁 𑀧𑀺𑀤𑀳𑀦𑁆𑀢𑁄 𑀦𑀺𑀓𑁆𑀔𑀫𑀺, 𑀲𑁄 𑀢𑀫𑁆𑀩𑀮𑁄𑀳𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀆𑀯𑀺𑀜𑁆𑀙𑀦𑀭𑀚𑁆𑀚𑀼𑀬𑀁 𑀓𑀼𑀜𑁆𑀘𑀺𑀓𑀫𑀼𑀤𑁆𑀤𑀺𑀓𑀁 𑀩𑀦𑁆𑀥𑀺𑀢𑁆𑀯𑀸 ¶ 𑀢𑀢𑁆𑀣𑁂𑀯 𑀫𑀳𑀦𑁆𑀢𑀁 𑀫𑀡𑀺𑀓𑁆𑀔𑀦𑁆𑀥𑀁 𑀞𑀧𑁂𑀢𑁆𑀯𑀸 𑁋 ‘‘𑀅𑀦𑀸𑀕𑀢𑁂 𑀤𑀮𑀺𑀤𑁆𑀤𑀭𑀸𑀚𑀸 𑀇𑀫𑀁 𑀫𑀡𑀺𑀁 𑀕𑀳𑁂𑀢𑁆𑀯𑀸 ¶ 𑀥𑀸𑀢𑀽𑀦𑀁 𑀲𑀓𑁆𑀓𑀸𑀭𑀁 𑀓𑀭𑁄𑀢𑀽’’𑀢𑀺 𑀅𑀓𑁆𑀔𑀭𑀁 𑀙𑀺𑀦𑁆𑀤𑀸𑀧𑁂𑀲𑀺.

𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀯𑀺𑀲𑁆𑀲𑀓𑀫𑁆𑀫𑀁 𑀆𑀫𑀦𑁆𑀢𑁂𑀢𑁆𑀯𑀸 𑁋 ‘‘𑀢𑀸𑀢, 𑀅𑀚𑀸𑀢𑀲𑀢𑁆𑀢𑀼𑀦𑀸 𑀥𑀸𑀢𑀼𑀦𑀺𑀥𑀸𑀦𑀁 𑀓𑀢𑀁, 𑀏𑀢𑁆𑀣 𑀆𑀭𑀓𑁆𑀔𑀁 𑀧𑀝𑁆𑀞𑀧𑁂𑀳𑀻’’𑀢𑀺 𑀧𑀳𑀺𑀡𑀺. 𑀲𑁄 𑀆𑀕𑀦𑁆𑀢𑁆𑀯𑀸 𑀯𑀸𑀴𑀲𑀗𑁆𑀖𑀸𑀝𑀬𑀦𑁆𑀢𑀁 𑀬𑁄𑀚𑁂𑀲𑀺, 𑀓𑀝𑁆𑀞𑀭𑀽𑀧𑀓𑀸𑀦𑀺 𑀢𑀲𑁆𑀫𑀺𑀁 𑀥𑀸𑀢𑀼𑀕𑀩𑁆𑀪𑁂 𑀨𑀮𑀺𑀓𑀯𑀡𑁆𑀡𑀔𑀕𑁆𑀕𑁂 𑀕𑀸𑀳𑁂𑀢𑁆𑀯𑀸 𑀯𑀸𑀢𑀲𑀤𑀺𑀲𑁂𑀦 𑀯𑁂𑀕𑁂𑀦 𑀅𑀦𑀼𑀧𑀭𑀺𑀬𑀸𑀬𑀦𑁆𑀢𑀁 𑀬𑀦𑁆𑀢𑀁 𑀬𑁄𑀚𑁂𑀢𑁆𑀯𑀸 𑀏𑀓𑀸𑀬 𑀏𑀯 𑀆𑀡𑀺𑀬𑀸 𑀩𑀦𑁆𑀥𑀺𑀢𑁆𑀯𑀸 𑀲𑀫𑀦𑁆𑀢𑀢𑁄 𑀕𑀺𑀜𑁆𑀚𑀓𑀸𑀯𑀲𑀣𑀸𑀓𑀸𑀭𑁂𑀦 𑀲𑀺𑀮𑀸𑀧𑀭𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀉𑀧𑀭𑀺 𑀏𑀓𑀸𑀬 𑀧𑀺𑀤𑀳𑀺𑀢𑁆𑀯𑀸 𑀧𑀁𑀲𑀼𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀪𑀽𑀫𑀺𑀁 𑀲𑀫𑀁 𑀓𑀢𑁆𑀯𑀸 𑀢𑀲𑁆𑀲 𑀉𑀧𑀭𑀺 𑀧𑀸𑀲𑀸𑀡𑀣𑀽𑀧𑀁 𑀧𑀢𑀺𑀝𑁆𑀞𑀧𑁂𑀲𑀺. 𑀏𑀯𑀁 𑀦𑀺𑀝𑁆𑀞𑀺𑀢𑁂 𑀥𑀸𑀢𑀼𑀦𑀺𑀥𑀸𑀦𑁂 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀣𑁂𑀭𑁄𑀧𑀺 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀭𑀸𑀚𑀸𑀧𑀺 𑀬𑀣𑀸𑀓𑀫𑁆𑀫𑀁 𑀕𑀢𑁄, 𑀢𑁂𑀧𑀺 𑀫𑀦𑀼𑀲𑁆𑀲𑀸 𑀓𑀸𑀮𑀗𑁆𑀓𑀢𑀸.

𑀅𑀧𑀭𑀪𑀸𑀕𑁂 𑀧𑀺𑀬𑀤𑀸𑀲𑁄 𑀦𑀸𑀫 𑀓𑀼𑀫𑀸𑀭𑁄 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀅𑀲𑁄𑀓𑁄 𑀦𑀸𑀫 𑀥𑀫𑁆𑀫𑀭𑀸𑀚𑀸 𑀳𑀼𑀢𑁆𑀯𑀸 𑀢𑀸 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀚𑀫𑁆𑀩𑀼𑀤𑀻𑀧𑁂 𑀯𑀺𑀢𑁆𑀣𑀸𑀭𑀺𑀓𑀸 𑀅𑀓𑀸𑀲𑀺. 𑀓𑀣𑀁? 𑀲𑁄 𑀦𑀺𑀕𑁆𑀭𑁄𑀥𑀲𑀸𑀫𑀡𑁂𑀭𑀁 𑀦𑀺𑀲𑁆𑀲𑀸𑀬 𑀲𑀸𑀲𑀦𑁂 𑀮𑀤𑁆𑀥𑀧𑁆𑀧𑀲𑀸𑀤𑁄 𑀘𑀢𑀼𑀭𑀸𑀲𑀻𑀢𑀺 𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀺 𑀓𑀸𑀭𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀼𑀘𑁆𑀙𑀺 𑁋 ‘‘𑀪𑀦𑁆𑀢𑁂, 𑀫𑀬𑀸 𑀘𑀢𑀼𑀭𑀸𑀲𑀻𑀢𑀺 𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀺 𑀓𑀸𑀭𑀺𑀢𑀸𑀦𑀺, 𑀥𑀸𑀢𑀼𑀬𑁄 𑀓𑀼𑀢𑁄 𑀮𑀪𑀺𑀲𑁆𑀲𑀸𑀫𑀻’’𑀢𑀺? 𑀫𑀳𑀸𑀭𑀸𑀚, 𑁋 ‘‘𑀥𑀸𑀢𑀼𑀦𑀺𑀥𑀸𑀦𑀁 𑀦𑀸𑀫 𑀅𑀢𑁆𑀣𑀻’’𑀢𑀺 𑀲𑀼𑀡𑁄𑀫, 𑀦 𑀧𑀦 𑀧𑀜𑁆𑀜𑀸𑀬𑀢𑀺 𑁋 ‘‘𑀅𑀲𑀼𑀓𑀲𑁆𑀫𑀺𑀁 𑀞𑀸𑀦𑁂’’𑀢𑀺. 𑀭𑀸𑀚𑀸 𑀭𑀸𑀚𑀕𑀳𑁂 𑀘𑁂𑀢𑀺𑀬𑀁 𑀪𑀺𑀦𑁆𑀤𑀸𑀧𑁂𑀢𑁆𑀯𑀸 𑀥𑀸𑀢𑀼𑀁 𑀅𑀧𑀲𑁆𑀲𑀦𑁆𑀢𑁄 𑀧𑀝𑀺𑀧𑀸𑀓𑀢𑀺𑀓𑀁 𑀓𑀸𑀭𑁂𑀢𑁆𑀯𑀸 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀬𑁄𑀢𑀺 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀕𑀳𑁂𑀢𑁆𑀯𑀸 𑀯𑁂𑀲𑀸𑀮𑀺𑀁 𑀕𑀢𑁄. 𑀢𑀢𑁆𑀭𑀸𑀧𑀺 𑀅𑀮𑀪𑀺𑀢𑁆𑀯𑀸 𑀓𑀧𑀺𑀮𑀯𑀢𑁆𑀣𑀼𑀁. 𑀢𑀢𑁆𑀭𑀸𑀧𑀺 𑀅𑀮𑀪𑀺𑀢𑁆𑀯𑀸 𑀭𑀸𑀫𑀕𑀸𑀫𑀁 𑀕𑀢𑁄. 𑀭𑀸𑀫𑀕𑀸𑀫𑁂 𑀦𑀸𑀕𑀸 𑀘𑁂𑀢𑀺𑀬𑀁 𑀪𑀺𑀦𑁆𑀤𑀺𑀢𑀼𑀁 𑀦 𑀅𑀤𑀁𑀲𑀼, 𑀘𑁂𑀢𑀺𑀬𑁂 𑀦𑀺𑀧𑀢𑀺𑀢𑀓𑀼𑀤𑀸𑀮𑁄 𑀔𑀡𑁆𑀟𑀸𑀔𑀡𑁆𑀟𑀁 𑀳𑁄𑀢𑀺. 𑀏𑀯𑀁 𑀢𑀢𑁆𑀭𑀸𑀧𑀺 𑀅𑀮𑀪𑀺𑀢𑁆𑀯𑀸 𑀅𑀮𑁆𑀮𑀓𑀧𑁆𑀧𑀁 𑀯𑁂𑀞𑀤𑀻𑀧𑀁 𑀧𑀸𑀯𑀁 𑀓𑀼𑀲𑀺𑀦𑀸𑀭𑀦𑁆𑀢𑀺 𑀲𑀩𑁆𑀩𑀢𑁆𑀣 𑀘𑁂𑀢𑀺𑀬𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀥𑀸𑀢𑀼𑀁 𑀅𑀮𑀪𑀺𑀢𑁆𑀯𑀸𑀯 𑀧𑀝𑀺𑀧𑀸𑀓𑀢𑀺𑀓𑀸𑀦𑀺 𑀓𑀢𑁆𑀯𑀸 𑀧𑀼𑀦 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑁋 ‘‘𑀅𑀢𑁆𑀣𑀺 𑀓𑁂𑀦𑀘𑀺 𑀲𑀼𑀢𑀧𑀼𑀩𑁆𑀩𑀁 ‘𑀅𑀲𑀼𑀓𑀝𑁆𑀞𑀸𑀦𑁂 𑀦𑀸𑀫 𑀥𑀸𑀢𑀼𑀦𑀺𑀥𑀸𑀦’𑀦𑁆𑀢𑀺’’ 𑀧𑀼𑀘𑁆𑀙𑀺.

𑀢𑀢𑁆𑀭𑁂𑀓𑁄 𑀯𑀻𑀲𑀯𑀲𑁆𑀲𑀲𑀢𑀺𑀓𑁄 𑀣𑁂𑀭𑁄 𑁋 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀥𑀸𑀢𑀼𑀦𑀺𑀥𑀸𑀦’’𑀦𑁆𑀢𑀺 𑀦 𑀚𑀸𑀦𑀸𑀫𑀺, 𑀫𑀬𑁆𑀳𑀁 𑀧𑀦 𑀧𑀺𑀢𑀸 𑀫𑀳𑀸𑀣𑁂𑀭𑁄 𑀫𑀁 𑀲𑀢𑁆𑀢𑀯𑀲𑁆𑀲𑀓𑀸𑀮𑁂 ¶ 𑀫𑀸𑀮𑀸𑀘𑀗𑁆𑀓𑁄𑀝𑀓𑀁 𑀕𑀸𑀳𑀸𑀧𑁂𑀢𑁆𑀯𑀸 𑁋 ‘‘𑀏𑀳𑀺 𑀲𑀸𑀫𑀡𑁂𑀭, 𑀅𑀲𑀼𑀓𑀕𑀘𑁆𑀙𑀦𑁆𑀢𑀭𑁂 𑀧𑀸𑀲𑀸𑀡𑀣𑀽𑀧𑁄 ¶ 𑀅𑀢𑁆𑀣𑀺, 𑀢𑀢𑁆𑀣 𑀕𑀘𑁆𑀙𑀸𑀫𑀸’’𑀢𑀺 𑀕𑀦𑁆𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑁋 ‘‘𑀇𑀫𑀁 𑀞𑀸𑀦𑀁 𑀉𑀧𑀥𑀸𑀭𑁂𑀢𑀼𑀁 𑀯𑀝𑁆𑀝𑀢𑀺 𑀲𑀸𑀫𑀡𑁂𑀭𑀸’’𑀢𑀺 𑀆𑀳. 𑀅𑀳𑀁 𑀏𑀢𑁆𑀢𑀓𑀁 𑀚𑀸𑀦𑀸𑀫𑀺 𑀫𑀳𑀸𑀭𑀸𑀚𑀸𑀢𑀺 𑀆𑀳. 𑀭𑀸𑀚𑀸 ‘‘𑀏𑀢𑀤𑁂𑀯 𑀞𑀸𑀦’’𑀦𑁆𑀢𑀺 ¶ 𑀯𑀢𑁆𑀯𑀸 𑀕𑀘𑁆𑀙𑁂 𑀳𑀸𑀭𑁂𑀢𑁆𑀯𑀸 𑀧𑀸𑀲𑀸𑀡𑀣𑀽𑀧𑀜𑁆𑀘 𑀧𑀁𑀲𑀼𑀜𑁆𑀘 𑀅𑀧𑀦𑁂𑀢𑁆𑀯𑀸 𑀳𑁂𑀝𑁆𑀞𑀸 𑀲𑀼𑀥𑀸𑀪𑀽𑀫𑀺𑀁 𑀅𑀤𑁆𑀤𑀲. 𑀢𑀢𑁄 𑀲𑀼𑀥𑀜𑁆𑀘 𑀇𑀝𑁆𑀞𑀓𑀸𑀬𑁄 𑀘 𑀳𑀸𑀭𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀧𑀭𑀺𑀯𑁂𑀡𑀁 𑀑𑀭𑀼𑀬𑁆𑀳 𑀲𑀢𑁆𑀢𑀭𑀢𑀦𑀯𑀸𑀮𑀼𑀓𑀁 𑀅𑀲𑀺𑀳𑀢𑁆𑀣𑀸𑀦𑀺 𑀘 𑀓𑀝𑁆𑀞𑀭𑀽𑀧𑀓𑀸𑀦𑀺 𑀲𑀫𑁆𑀧𑀭𑀺𑀯𑀢𑁆𑀢𑀓𑀸𑀦𑀺 𑀅𑀤𑁆𑀤𑀲. 𑀲𑁄 𑀬𑀓𑁆𑀔𑀤𑀸𑀲𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀩𑀮𑀺𑀓𑀫𑁆𑀫𑀁 𑀓𑀸𑀭𑁂𑀢𑁆𑀯𑀸𑀧𑀺 𑀦𑁂𑀯 𑀅𑀦𑁆𑀢𑀁 𑀦 𑀓𑁄𑀝𑀺𑀁 𑀧𑀲𑁆𑀲𑀦𑁆𑀢𑁄 𑀤𑁂𑀯𑀢𑀸𑀦𑀁 𑀦𑀫𑀲𑁆𑀲𑀫𑀸𑀦𑁄 𑁋 ‘‘𑀅𑀳𑀁 𑀇𑀫𑀸 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺𑀬𑀸 𑀯𑀺𑀳𑀸𑀭𑀲𑀳𑀲𑁆𑀲𑁂𑀲𑀼 𑀦𑀺𑀤𑀳𑀺𑀢𑁆𑀯𑀸 𑀲𑀓𑁆𑀓𑀸𑀭𑀁 𑀓𑀭𑁄𑀫𑀺, 𑀫𑀸 𑀫𑁂 𑀤𑁂𑀯𑀢𑀸 𑀅𑀦𑁆𑀢𑀭𑀸𑀬𑀁 𑀓𑀭𑁄𑀦𑁆𑀢𑀽’’𑀢𑀺 𑀆𑀳.

𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀯𑀺𑀲𑁆𑀲𑀓𑀫𑁆𑀫𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀸𑀢, 𑀅𑀲𑁄𑀓𑁄 𑀥𑀫𑁆𑀫𑀭𑀸𑀚𑀸 ‘𑀥𑀸𑀢𑀼𑀬𑁄 𑀦𑀻𑀳𑀭𑀺𑀲𑁆𑀲𑀸𑀫𑀻’𑀢𑀺 𑀧𑀭𑀺𑀯𑁂𑀡𑀁 𑀑𑀢𑀺𑀡𑁆𑀡𑁄, 𑀕𑀦𑁆𑀢𑁆𑀯𑀸 𑀓𑀝𑁆𑀞𑀭𑀽𑀧𑀓𑀸𑀦𑀺 𑀳𑀸𑀭𑁂𑀳𑀻’’𑀢𑀺. 𑀲𑁄 𑀧𑀜𑁆𑀘𑀘𑀽𑀴𑀕𑀸𑀫𑀤𑀸𑀭𑀓𑀯𑁂𑀲𑁂𑀦 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀧𑀼𑀭𑀢𑁄 𑀥𑀦𑀼𑀳𑀢𑁆𑀣𑁄 𑀞𑀢𑁆𑀯𑀸 𑁋 ‘‘𑀳𑀭𑀸𑀫𑀺 𑀫𑀳𑀸𑀭𑀸𑀚𑀸’’𑀢𑀺 𑀆𑀳. ‘‘𑀳𑀭, 𑀢𑀸𑀢𑀸’’𑀢𑀺 𑀲𑀭𑀁 𑀕𑀳𑁂𑀢𑁆𑀯𑀸 𑀲𑀦𑁆𑀥𑀺𑀫𑁆𑀳𑀺𑀬𑁂𑀯 𑀯𑀺𑀚𑁆𑀛𑀺, 𑀲𑀩𑁆𑀩𑀁 𑀯𑀺𑀧𑁆𑀧𑀓𑀺𑀭𑀺𑀬𑀺𑀢𑁆𑀣. 𑀅𑀣 𑀭𑀸𑀚𑀸 𑀆𑀯𑀺𑀜𑁆𑀙𑀦𑁂 𑀩𑀦𑁆𑀥𑀁 𑀓𑀼𑀜𑁆𑀘𑀺𑀓𑀫𑀼𑀤𑁆𑀤𑀺𑀓𑀁 𑀕𑀡𑁆𑀳𑀺, 𑀫𑀡𑀺𑀓𑁆𑀔𑀦𑁆𑀥𑀁 𑀧𑀲𑁆𑀲𑀺. ‘‘𑀅𑀦𑀸𑀕𑀢𑁂 𑀤𑀮𑀺𑀤𑁆𑀤𑀭𑀸𑀚𑀸 𑀇𑀫𑀁 𑀫𑀡𑀺𑀁 𑀕𑀳𑁂𑀢𑁆𑀯𑀸 𑀥𑀸𑀢𑀽𑀦𑀁 𑀲𑀓𑁆𑀓𑀸𑀭𑀁 𑀓𑀭𑁄𑀢𑀽’’𑀢𑀺 𑀧𑀼𑀦 𑀅𑀓𑁆𑀔𑀭𑀸𑀦𑀺 𑀤𑀺𑀲𑁆𑀯𑀸 𑀓𑀼𑀚𑁆𑀛𑀺𑀢𑁆𑀯𑀸 𑁋 ‘‘𑀫𑀸𑀤𑀺𑀲𑀁 𑀦𑀸𑀫 𑀭𑀸𑀚𑀸𑀦𑀁 𑀤𑀮𑀺𑀤𑁆𑀤𑀭𑀸𑀚𑀸𑀢𑀺 𑀯𑀢𑁆𑀢𑀼𑀁 𑀅𑀬𑀼𑀢𑁆𑀢’’𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀖𑀝𑁂𑀢𑁆𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀸𑀧𑁂𑀢𑁆𑀯𑀸 𑀅𑀦𑁆𑀢𑁄𑀕𑁂𑀳𑀁 𑀧𑀯𑀺𑀝𑁆𑀞𑁄.

𑀅𑀝𑁆𑀞𑀸𑀭𑀲𑀯𑀲𑁆𑀲𑀸𑀥𑀺𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀉𑀧𑀭𑀺 𑀆𑀭𑁄𑀧𑀺𑀢𑀤𑀻𑀧𑀸 𑀢𑀣𑁂𑀯 𑀧𑀚𑁆𑀚𑀮𑀦𑁆𑀢𑀺. 𑀦𑀻𑀮𑀼𑀧𑁆𑀧𑀮𑀧𑀼𑀧𑁆𑀨𑀸𑀦𑀺 𑀢𑀗𑁆𑀔𑀡𑀁 𑀆𑀳𑀭𑀺𑀢𑁆𑀯𑀸 𑀆𑀭𑁄𑀧𑀺𑀢𑀸𑀦𑀺 𑀯𑀺𑀬, 𑀧𑀼𑀧𑁆𑀨𑀲𑀦𑁆𑀣𑀸𑀭𑁄 𑀢𑀗𑁆𑀔𑀡𑀁 𑀲𑀦𑁆𑀣𑀢𑁄 𑀯𑀺𑀬, 𑀕𑀦𑁆𑀥𑀸 𑀢𑀁 𑀫𑀼𑀳𑀼𑀢𑁆𑀢𑀁 𑀧𑀺𑀲𑀺𑀢𑁆𑀯𑀸 𑀞𑀧𑀺𑀢𑀸 𑀯𑀺𑀬 𑀭𑀸𑀚𑀸 𑀲𑀼𑀯𑀡𑁆𑀡𑀧𑀝𑁆𑀝𑀁 𑀕𑀳𑁂𑀢𑁆𑀯𑀸 𑁋 ‘‘𑀅𑀦𑀸𑀕𑀢𑁂 𑀧𑀺𑀬𑀤𑀸𑀲𑁄 𑀦𑀸𑀫 𑀓𑀼𑀫𑀸𑀭𑁄 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀅𑀲𑁄𑀓𑁄 𑀦𑀸𑀫 𑀥𑀫𑁆𑀫𑀭𑀸𑀚𑀸 𑀪𑀯𑀺𑀲𑁆𑀲𑀢𑀺 𑀲𑁄 𑀇𑀫𑀸 𑀥𑀸𑀢𑀼𑀬𑁄 𑀯𑀺𑀢𑁆𑀣𑀸𑀭𑀺𑀓𑀸 𑀓𑀭𑀺𑀲𑁆𑀲𑀢𑀻’’𑀢𑀺 𑀯𑀸𑀘𑁂𑀢𑁆𑀯𑀸 𑁋 ‘‘𑀤𑀺𑀝𑁆𑀞𑁄 𑀪𑁄, 𑀅𑀳𑀁 𑀅𑀬𑁆𑀬𑁂𑀦 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦𑀸’’𑀢𑀺 𑀯𑀢𑁆𑀯𑀸 𑀯𑀸𑀫𑀳𑀢𑁆𑀣𑀁 𑀆𑀪𑀼𑀚𑀺𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀅𑀧𑁆𑀨𑁄𑀝𑁂𑀲𑀺. 𑀲𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀭𑀺𑀘𑀭𑀡𑀥𑀸𑀢𑀼𑀫𑀢𑁆𑀢𑀫𑁂𑀯 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸 ¶ 𑀥𑀸𑀢𑀼𑀕𑁂𑀳𑀁 𑀧𑀼𑀩𑁆𑀩𑁂 𑀧𑀺𑀳𑀺𑀢𑀦𑀬𑁂𑀦𑁂𑀯 𑀧𑀺𑀤𑀳𑀺𑀢𑁆𑀯𑀸 𑀲𑀩𑁆𑀩𑀁 𑀬𑀣𑀸𑀧𑀓𑀢𑀺𑀬𑀸𑀯 𑀓𑀢𑁆𑀯𑀸 𑀉𑀧𑀭𑀺 𑀧𑀸𑀲𑀸𑀡𑀘𑁂𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺𑀬𑀸 𑀯𑀺𑀳𑀸𑀭𑀲𑀳𑀲𑁆𑀲𑁂𑀲𑀼 𑀥𑀸𑀢𑀼𑀬𑁄 ¶ 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀫𑀳𑀸𑀣𑁂𑀭𑁂 𑀯𑀦𑁆𑀤𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀤𑀸𑀬𑀸𑀤𑁄𑀫𑁆𑀳𑀺, 𑀪𑀦𑁆𑀢𑁂, 𑀩𑀼𑀤𑁆𑀥𑀲𑀸𑀲𑀦𑁂’’𑀢𑀺. 𑀓𑀺𑀲𑁆𑀲 𑀤𑀸𑀬𑀸𑀤𑁄 𑀢𑁆𑀯𑀁, 𑀫𑀳𑀸𑀭𑀸𑀚, 𑀩𑀸𑀳𑀺𑀭𑀓𑁄 𑀢𑁆𑀯𑀁 𑀲𑀸𑀲𑀦𑀲𑁆𑀲𑀸𑀢𑀺. 𑀪𑀦𑁆𑀢𑁂, 𑀙𑀦𑁆𑀦𑀯𑀼𑀢𑀺𑀓𑁄𑀝𑀺𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺 𑀯𑀺𑀳𑀸𑀭𑀲𑀳𑀲𑁆𑀲𑀸𑀦𑀺 𑀓𑀸𑀭𑁂𑀢𑁆𑀯𑀸 𑀅𑀳𑀁 𑀦 𑀤𑀸𑀬𑀸𑀤𑁄, 𑀅𑀜𑁆𑀜𑁄 𑀓𑁄 𑀤𑀸𑀬𑀸𑀤𑁄𑀢𑀺? 𑀧𑀘𑁆𑀘𑀬𑀤𑀸𑀬𑀓𑁄 𑀦𑀸𑀫 𑀢𑁆𑀯𑀁 𑀫𑀳𑀸𑀭𑀸𑀚, 𑀬𑁄 𑀧𑀦 𑀅𑀢𑁆𑀢𑀦𑁄 𑀧𑀼𑀢𑁆𑀢𑀜𑁆𑀘 𑀥𑀻𑀢𑀭𑀜𑁆𑀘 𑀧𑀩𑁆𑀩𑀸𑀚𑁂𑀢𑀺, 𑀅𑀬𑀁 𑀲𑀸𑀲𑀦𑁂 𑀤𑀸𑀬𑀸𑀤𑁄 𑀦𑀸𑀫𑀸𑀢𑀺. 𑀲𑁄 𑀧𑀼𑀢𑁆𑀢𑀜𑁆𑀘 𑀥𑀻𑀢𑀭𑀜𑁆𑀘 𑀧𑀩𑁆𑀩𑀸𑀚𑁂𑀲𑀺. 𑀅𑀣 𑀦𑀁 𑀣𑁂𑀭𑀸 𑀆𑀳𑀁𑀲𑀼 𑁋 ‘‘𑀇𑀤𑀸𑀦𑀺, 𑀫𑀳𑀸𑀭𑀸𑀚, 𑀲𑀸𑀲𑀦𑁂 𑀤𑀸𑀬𑀸𑀤𑁄𑀲𑀻’’𑀢𑀺.

𑀏𑀯𑀫𑁂𑀢𑀁 ¶ 𑀪𑀽𑀢𑀧𑀼𑀩𑁆𑀩𑀦𑁆𑀢𑀺 𑀏𑀯𑀁 𑀏𑀢𑀁 𑀅𑀢𑀻𑀢𑁂 𑀥𑀸𑀢𑀼𑀦𑀺𑀥𑀸𑀦𑀫𑁆𑀧𑀺 𑀚𑀫𑁆𑀩𑀼𑀤𑀻𑀧𑀢𑀮𑁂 𑀪𑀽𑀢𑀧𑀼𑀩𑁆𑀩𑀦𑁆𑀢𑀺. 𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀸𑀭𑀸𑀧𑀺 𑀇𑀫𑀁 𑀧𑀤𑀁 𑀞𑀧𑀬𑀺𑀁𑀲𑀼.

𑀅𑀝𑁆𑀞𑀤𑁄𑀡𑀁 𑀘𑀓𑁆𑀔𑀼𑀫𑀢𑁄 𑀲𑀭𑀻𑀭𑀦𑁆𑀢𑀺𑀆𑀤𑀺𑀕𑀸𑀣𑀸𑀬𑁄 𑀧𑀦 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀣𑁂𑀭𑁂𑀳𑀺 𑀯𑀼𑀢𑁆𑀢𑀸𑀢𑀺.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁

𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀫𑀳𑀸𑀲𑀼𑀤𑀲𑁆𑀲𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑀓𑀼𑀲𑀸𑀯𑀢𑀻𑀭𑀸𑀚𑀥𑀸𑀦𑀻𑀯𑀡𑁆𑀡𑀦𑀸

𑁨𑁪𑁧. 𑀏𑀯𑀁 ¶ ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀲𑀼𑀤𑀲𑁆𑀲𑀦𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸 𑁋 𑀲𑀩𑁆𑀩𑀭𑀢𑀦𑀫𑀬𑁄𑀢𑀺 𑀏𑀢𑁆𑀣 𑀏𑀓𑀸 𑀇𑀝𑁆𑀞𑀓𑀸 𑀲𑁄𑀯𑀡𑁆𑀡𑀫𑀬𑀸, 𑀏𑀓𑀸 𑀭𑀽𑀧𑀺𑀬𑀫𑀬𑀸, 𑀏𑀓𑀸 𑀯𑁂𑀴𑀼𑀭𑀺𑀬𑀫𑀬𑀸, 𑀏𑀓𑀸 𑀨𑀮𑀺𑀓𑀫𑀬𑀸, 𑀏𑀓𑀸 𑀮𑁄𑀳𑀺𑀢𑀗𑁆𑀓𑀫𑀬𑀸, 𑀏𑀓𑀸 𑀫𑀲𑀸𑀭𑀕𑀮𑁆𑀮𑀫𑀬𑀸, 𑀏𑀓𑀸 𑀲𑀩𑁆𑀩𑀭𑀢𑀦𑀫𑀬𑀸, 𑀅𑀬𑀁 𑀧𑀸𑀓𑀸𑀭𑁄 𑀲𑀩𑁆𑀩𑀧𑀸𑀓𑀸𑀭𑀸𑀦𑀁 𑀅𑀦𑁆𑀢𑁄 𑀉𑀩𑁆𑀩𑁂𑀥𑁂𑀦 𑀲𑀝𑁆𑀞𑀺𑀳𑀢𑁆𑀣𑁄 𑀅𑀳𑁄𑀲𑀺. 𑀏𑀓𑁂 𑀧𑀦 𑀣𑁂𑀭𑀸 𑁋 ‘‘𑀦𑀕𑀭𑀁 𑀦𑀸𑀫 𑀅𑀦𑁆𑀢𑁄 𑀞𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀸𑀦𑀁 𑀤𑀲𑁆𑀲𑀦𑀻𑀬𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀩𑀸𑀳𑀺𑀭𑁄 𑀲𑀝𑁆𑀞𑀺𑀳𑀢𑁆𑀣𑁄, 𑀲𑁂𑀲𑀸 𑀅𑀦𑀼𑀧𑀼𑀩𑁆𑀩𑀦𑀻𑀘𑀸’’𑀢𑀺 𑀯𑀤𑀦𑁆𑀢𑀺. 𑀏𑀓𑁂 𑁋 ‘‘𑀩𑀳𑀺 𑀞𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀸𑀦𑀁 𑀤𑀲𑁆𑀲𑀦𑀻𑀬𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀅𑀩𑁆𑀪𑀦𑁆𑀢𑀭𑀺𑀫𑁄 𑀲𑀝𑁆𑀞𑀺𑀳𑀢𑁆𑀣𑁄, 𑀲𑁂𑀲𑀸 𑀅𑀦𑀼𑀧𑀼𑀩𑁆𑀩𑀦𑀻𑀘𑀸’’𑀢𑀺. 𑀏𑀓𑁂 𑁋 ‘‘𑀅𑀦𑁆𑀢𑁄 𑀘 𑀩𑀳𑀺 𑀘 𑀞𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀸𑀦𑀁 𑀤𑀲𑁆𑀲𑀦𑀻𑀬𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀫𑀚𑁆𑀛𑁂 𑀧𑀸𑀓𑀸𑀭𑁄 𑀲𑀝𑁆𑀞𑀺𑀳𑀢𑁆𑀣𑁄, 𑀅𑀦𑁆𑀢𑁄 𑀘 𑀩𑀳𑀺 𑀘 𑀢𑀬𑁄 𑀢𑀬𑁄 𑀅𑀦𑀼𑀧𑀼𑀩𑁆𑀩𑀦𑀻𑀘𑀸’’𑀢𑀺.

𑀏𑀲𑀺𑀓𑀸𑀢𑀺 𑀏𑀲𑀺𑀓𑀢𑁆𑀣𑀫𑁆𑀪𑁄. 𑀢𑀺𑀧𑁄𑀭𑀺𑀲𑀗𑁆𑀕𑀸𑀢𑀺 𑀏𑀓𑀁 𑀧𑁄𑀭𑀺𑀲𑀁 𑀫𑀚𑁆𑀛𑀺𑀫𑀧𑀼𑀭𑀺𑀲𑀲𑁆𑀲 𑀅𑀢𑁆𑀢𑀦𑁄 𑀳𑀢𑁆𑀣𑁂𑀦 𑀧𑀜𑁆𑀘𑀳𑀢𑁆𑀣𑀁, 𑀢𑁂𑀦 𑀢𑀺𑀧𑁄𑀭𑀺𑀲𑀧𑀭𑀺𑀓𑁆𑀔𑁂𑀧𑀸 𑀧𑀦𑁆𑀦𑀭𑀲𑀳𑀢𑁆𑀣𑀧𑀭𑀺𑀫𑀸𑀡𑀸𑀢𑀺 𑀅𑀢𑁆𑀣𑁄. 𑀢𑁂 𑀧𑀦 𑀓𑀣𑀁 𑀞𑀺𑀢𑀸𑀢𑀺? 𑀦𑀕𑀭𑀲𑁆𑀲 𑀩𑀸𑀳𑀺𑀭𑀧𑀲𑁆𑀲𑁂 𑀏𑀓𑁂𑀓𑀁 𑀫𑀳𑀸𑀤𑁆𑀯𑀸𑀭𑀩𑀸𑀳𑀁 𑀦𑀺𑀲𑁆𑀲𑀸𑀬 𑀏𑀓𑁂𑀓𑁄, 𑀏𑀓𑁂𑀓𑀁 𑀔𑀼𑀤𑁆𑀤𑀓𑀤𑁆𑀯𑀸𑀭𑀩𑀸𑀳𑀁 𑀦𑀺𑀲𑁆𑀲𑀸𑀬 𑀏𑀓𑁂𑀓𑁄, 𑀫𑀳𑀸𑀤𑁆𑀯𑀸𑀭𑀔𑀼𑀤𑁆𑀤𑀓𑀤𑁆𑀯𑀸𑀭𑀸𑀦𑀁 𑀅𑀦𑁆𑀢𑀭𑀸 𑀢𑀬𑁄 𑀢𑀬𑁄𑀢𑀺. 𑀢𑀸𑀮𑀧𑀦𑁆𑀢𑀻𑀲𑀼 𑀲𑀩𑁆𑀩𑀭𑀢𑀦𑀫𑀬𑀸𑀦𑀁 𑀢𑀸𑀮𑀸𑀦𑀁 𑀏𑀓𑀁 𑀲𑁄𑀯𑀡𑁆𑀡𑀫𑀬𑀦𑁆𑀢𑀺 𑀧𑀸𑀓𑀸𑀭𑁂 𑀯𑀼𑀢𑁆𑀢𑀮𑀓𑁆𑀔𑀡𑀫𑁂𑀯 𑀯𑁂𑀤𑀺𑀢𑀩𑁆𑀩𑀁, 𑀧𑀡𑁆𑀡𑀨𑀮𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀸 𑀧𑀦 𑀢𑀸𑀮𑀧𑀦𑁆𑀢𑀺𑀬𑁄 𑀅𑀲𑀻𑀢𑀺𑀳𑀢𑁆𑀣𑀸 𑀉𑀩𑁆𑀩𑁂𑀥𑁂𑀦, 𑀯𑀺𑀧𑁆𑀧𑀓𑀺𑀡𑁆𑀡𑀯𑀸𑀮𑀼𑀓𑁂 𑀲𑀫𑀢𑀮𑁂 𑀪𑀽𑀫𑀺𑀪𑀸𑀕𑁂 𑀧𑀸𑀓𑀸𑀭𑀦𑁆𑀢𑀭𑁂 𑀏𑀓𑁂𑀓𑀸 𑀳𑀼𑀢𑁆𑀯𑀸 𑀞𑀺𑀢𑀸.

𑀯𑀕𑁆𑀕𑀽𑀢𑀺 𑀙𑁂𑀓𑁄 𑀲𑀼𑀦𑁆𑀤𑀭𑁄. 𑀭𑀚𑀦𑀻𑀬𑁄𑀢𑀺 𑀭𑀜𑁆𑀚𑁂𑀢𑀼𑀁 𑀲𑀫𑀢𑁆𑀣𑁄. 𑀔𑀫𑀦𑀻𑀬𑁄𑀢𑀺 𑀤𑀺𑀯𑀲𑀫𑁆𑀧𑀺 𑀲𑀼𑀬𑁆𑀬𑀫𑀸𑀦𑁄 𑀔𑀫𑀢𑁂𑀯, 𑀦 𑀩𑀻𑀪𑀘𑁆𑀙𑁂𑀢𑀺. 𑀫𑀤𑀦𑀻𑀬𑁄𑀢𑀺 ¶ 𑀫𑀸𑀦𑀫𑀤𑀧𑀼𑀭𑀺𑀲𑀫𑀤𑀚𑀦𑀦𑁄. 𑀧𑀜𑁆𑀘𑀗𑁆𑀕𑀺𑀓𑀲𑁆𑀲𑀸𑀢𑀺 𑀆𑀢𑀢𑀁 𑀯𑀺𑀢𑀢𑀁 𑀆𑀢𑀢𑀯𑀺𑀢𑀢𑀁 ¶ 𑀲𑀼𑀲𑀺𑀭𑀁 𑀖𑀦𑀦𑁆𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲. 𑀢𑀢𑁆𑀣 𑀆𑀢𑀢𑀁 𑀦𑀸𑀫 𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑁂𑀲𑀼 𑀪𑁂𑀭𑀻𑀆𑀤𑀻𑀲𑀼 𑀏𑀓𑀢𑀮𑀁 𑀢𑀽𑀭𑀺𑀬𑀁. 𑀯𑀺𑀢𑀢𑀁 𑀦𑀸𑀫 𑀉𑀪𑀬𑀢𑀮𑀁. 𑀆𑀢𑀢𑀯𑀺𑀢𑀢𑀁 𑀦𑀸𑀫 𑀲𑀩𑁆𑀩𑀢𑁄 𑀧𑀭𑀺𑀬𑁄𑀦𑀤𑁆𑀥𑀁. 𑀲𑀼𑀲𑀺𑀭𑀁 ¶ 𑀦𑀸𑀫 𑀯𑀁𑀲𑀸𑀤𑀺. 𑀖𑀦𑀁 𑀦𑀸𑀫 𑀲𑀫𑁆𑀫𑀸𑀤𑀺. 𑀲𑀼𑀯𑀺𑀦𑀻𑀢𑀲𑁆𑀲𑀸𑀢𑀺 𑀆𑀓𑀟𑁆𑀠𑀦𑀲𑀺𑀣𑀺𑀮𑀓𑀭𑀡𑀸𑀤𑀻𑀳𑀺 𑀲𑀼𑀫𑀼𑀘𑁆𑀙𑀺𑀢𑀲𑁆𑀲. 𑀲𑀼𑀧𑁆𑀧𑀝𑀺𑀢𑀸𑀴𑀺𑀢𑀲𑁆𑀲𑀸𑀢𑀺 𑀧𑀫𑀸𑀡𑁂 𑀞𑀺𑀢𑀪𑀸𑀯𑀚𑀸𑀦𑀦𑀢𑁆𑀣𑀁 𑀲𑀼𑀝𑁆𑀞𑀼 𑀧𑀝𑀺𑀢𑀸𑀴𑀺𑀢𑀲𑁆𑀲. 𑀲𑀼𑀓𑀼𑀲𑀮𑁂𑀳𑀺 𑀲𑀫𑀦𑁆𑀦𑀸𑀳𑀢𑀲𑁆𑀲𑀸𑀢𑀺 𑀬𑁂 𑀯𑀸𑀤𑀺𑀢𑀼𑀁 𑀙𑁂𑀓𑀸 𑀓𑀼𑀲𑀮𑀸, 𑀢𑁂𑀳𑀺 𑀯𑀸𑀤𑀺𑀢𑀲𑁆𑀲. 𑀥𑀼𑀢𑁆𑀢𑀸𑀢𑀺 𑀅𑀓𑁆𑀔𑀥𑀼𑀢𑁆𑀢𑀸,. 𑀲𑁄𑀡𑁆𑀟𑀸𑀢𑀺 𑀲𑀼𑀭𑀸𑀲𑁄𑀡𑁆𑀟𑀸. 𑀢𑁂𑀬𑁂𑀯 𑀧𑀼𑀦𑀧𑁆𑀧𑀼𑀦𑀁 𑀧𑀸𑀢𑀼𑀓𑀸𑀫𑀢𑀸𑀯𑀲𑁂𑀦 𑀧𑀺𑀧𑀸𑀲𑀸. 𑀧𑀭𑀺𑀘𑀸𑀭𑁂𑀲𑀼𑀦𑁆𑀢𑀺 (𑀤𑀻. 𑀦𑀺. 𑁨.𑁧𑁩𑁨) 𑀳𑀢𑁆𑀣𑀁 𑀯𑀸 𑀧𑀸𑀤𑀁 𑀯𑀸 𑀘𑀸𑀮𑁂𑀢𑁆𑀯𑀸 𑀦𑀘𑁆𑀘𑀦𑁆𑀢𑀸 𑀓𑀻𑀴𑀺𑀁𑀲𑀼.

𑀘𑀓𑁆𑀓𑀭𑀢𑀦𑀯𑀡𑁆𑀡𑀦𑀸

𑁨𑁪𑁩. 𑀲𑀻𑀲𑀁 𑀦𑁆𑀳𑀸𑀢𑀲𑁆𑀲𑀸𑀢𑀺 𑀲𑀻𑀲𑁂𑀦 𑀲𑀤𑁆𑀥𑀺𑀁 𑀕𑀦𑁆𑀥𑁄𑀤𑀓𑁂𑀦 𑀦𑀳𑀸𑀢𑀲𑁆𑀲. 𑀉𑀧𑁄𑀲𑀣𑀺𑀓𑀲𑁆𑀲𑀸𑀢𑀺 𑀲𑀫𑀸𑀤𑀺𑀦𑁆𑀦𑀉𑀧𑁄𑀲𑀣𑀗𑁆𑀕𑀲𑁆𑀲. 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑀲𑁆𑀲𑀸𑀢𑀺 𑀧𑀸𑀲𑀸𑀤𑀯𑀭𑀲𑁆𑀲 𑀉𑀧𑀭𑀺 𑀕𑀢𑀲𑁆𑀲, 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀧𑀸𑀲𑀸𑀤𑀯𑀭𑀲𑁆𑀲 𑀉𑀧𑀭𑀺𑀫𑀳𑀸𑀢𑀮𑁂 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀲𑀻𑀮𑀸𑀦𑀺 𑀆𑀯𑀚𑁆𑀚𑀦𑁆𑀢𑀲𑁆𑀲. 𑀢𑀤𑀸 𑀓𑀺𑀭 𑀭𑀸𑀚𑀸 𑀧𑀸𑀢𑁄𑀯 𑀲𑀢𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑁄𑀴𑀲𑀳𑀺 𑀕𑀦𑁆𑀥𑁄𑀤𑀓𑀖𑀝𑁂𑀳𑀺 𑀲𑀻𑀲𑀁 𑀦𑀳𑀸𑀬𑀺𑀢𑁆𑀯𑀸 𑀓𑀢𑀧𑀸𑀢𑀭𑀸𑀲𑁄 𑀲𑀼𑀤𑁆𑀥𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀏𑀓𑀁𑀲𑀁 𑀓𑀭𑀺𑀢𑁆𑀯𑀸 𑀉𑀧𑀭𑀺𑀧𑀸𑀲𑀸𑀤𑀲𑁆𑀲 𑀲𑀺𑀭𑀺𑀲𑀬𑀦𑁂 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀅𑀢𑁆𑀢𑀦𑁄 𑀤𑀸𑀦𑀸𑀤𑀺𑀫𑀬𑀁 𑀧𑀼𑀜𑁆𑀜𑀲𑀫𑀼𑀤𑀸𑀬𑀁 𑀆𑀯𑀚𑁆𑀚𑀦𑁆𑀢𑁄 𑀦𑀺𑀲𑀻𑀤𑀺. 𑀅𑀬𑀁 𑀲𑀩𑁆𑀩𑀘𑀓𑁆𑀓𑀯𑀢𑁆𑀢𑀻𑀦𑀁 𑀥𑀫𑁆𑀫𑀢𑀸.

𑀢𑁂𑀲𑀁 𑀢𑀁 𑀆𑀯𑀚𑁆𑀚𑀦𑁆𑀢𑀸𑀦𑀁𑀬𑁂𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀼𑀜𑁆𑀜𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀦𑀻𑀮𑀫𑀡𑀺𑀲𑀗𑁆𑀖𑀸𑀢𑀲𑀤𑀺𑀲𑀁 𑀧𑀸𑀘𑀻𑀦𑀲𑀫𑀼𑀤𑁆𑀤𑀚𑀮𑀢𑀮𑀁 𑀪𑀺𑀦𑁆𑀤𑀫𑀸𑀦𑀁 𑀯𑀺𑀬, 𑀆𑀓𑀸𑀲𑀁 𑀅𑀮𑀗𑁆𑀓𑀼𑀭𑀼𑀫𑀸𑀦𑀁 𑀯𑀺𑀬 𑀤𑀺𑀩𑁆𑀩𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀪𑀯𑀢𑀺. 𑀢𑀁 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲𑀸𑀧𑀺 𑀢𑀣𑁂𑀯 𑀧𑀸𑀢𑀼𑀭𑀳𑁄𑀲𑀺. 𑀢𑀬𑀺𑀤𑀁 𑀤𑀺𑀩𑁆𑀩𑀸𑀦𑀼𑀪𑀸𑀯𑀬𑀼𑀢𑁆𑀢𑀢𑁆𑀢𑀸 𑀤𑀺𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀳𑀲𑁆𑀲𑀁 𑀅𑀲𑁆𑀲 𑀅𑀭𑀸𑀦𑀦𑁆𑀢𑀺 𑀲𑀳𑀲𑁆𑀲𑀸𑀭𑀁. 𑀲𑀳 𑀦𑁂𑀫𑀺𑀬𑀸, 𑀲𑀳 𑀦𑀸𑀪𑀺𑀬𑀸 𑀘𑀸𑀢𑀺 𑀲𑀦𑁂𑀫𑀺𑀓𑀁 𑀲𑀦𑀸𑀪𑀺𑀓𑀁. 𑀲𑀩𑁆𑀩𑁂𑀳𑀺 𑀆𑀓𑀸𑀭𑁂𑀳𑀺 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁.

𑀢𑀢𑁆𑀣 𑀘𑀓𑁆𑀓𑀜𑁆𑀘 𑀢𑀁 𑀭𑀢𑀺𑀚𑀦𑀦𑀝𑁆𑀞𑁂𑀦 𑀭𑀢𑀦𑀜𑁆𑀘𑀸𑀢𑀺 𑀘𑀓𑁆𑀓𑀭𑀢𑀦𑀁. 𑀬𑀸𑀬 𑀧𑀦 𑀢𑀁 𑀦𑀸𑀪𑀺𑀬𑀸 ‘‘𑀲𑀦𑀸𑀪𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁, 𑀲𑀸 𑀇𑀦𑁆𑀤𑀦𑀻𑀮𑀫𑀬𑀸 𑀳𑁄𑀢𑀺, 𑀫𑀚𑁆𑀛𑁂 𑀧𑀦𑀲𑁆𑀲𑀸 𑀲𑀸𑀭𑀭𑀚𑀢𑀫𑀬𑀸 𑀧𑀦𑀸𑀴𑀺, 𑀬𑀸𑀬 ¶ 𑀲𑀼𑀤𑁆𑀥𑀲𑀺𑀦𑀺𑀤𑁆𑀥𑀤𑀦𑁆𑀢𑀧𑀦𑁆𑀢𑀺𑀬𑀸 𑀳𑀲𑀫𑀸𑀦𑀸 𑀯𑀺𑀬 𑀯𑀺𑀭𑁄𑀘𑀢𑀺, 𑀫𑀚𑁆𑀛𑁂 𑀙𑀺𑀤𑁆𑀤𑁂𑀦 𑀯𑀺𑀬 𑀘𑀦𑁆𑀤𑀫𑀡𑁆𑀟𑀮𑁂𑀦, 𑀉𑀪𑁄𑀲𑀼𑀧𑀺 𑀩𑀸𑀳𑀺𑀭𑀦𑁆𑀢𑁂𑀲𑀼 𑀭𑀚𑀢𑀧𑀝𑁆𑀝𑁂𑀦 𑀓𑀢𑀧𑀭𑀺𑀓𑁆𑀔𑁂𑀧𑀸 𑀳𑁄𑀢𑀺. 𑀢𑁂𑀲𑀼 𑀧𑀦𑀲𑁆𑀲 𑀦𑀸𑀪𑀺𑀧𑀦𑀸𑀴𑀺𑀧𑀭𑀺𑀓𑁆𑀔𑁂𑀧𑀧𑀝𑁆𑀝𑁂𑀲𑀼 ¶ 𑀬𑀼𑀢𑁆𑀢𑀬𑀼𑀢𑁆𑀢𑀝𑁆𑀞𑀸𑀦𑁂𑀲𑀼 𑀧𑀭𑀺𑀘𑁆𑀙𑁂𑀤𑀮𑁂𑀔𑀸 𑀲𑀼𑀯𑀺𑀪𑀢𑁆𑀢𑀸𑀯 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀦𑁆𑀢𑀺. 𑀅𑀬𑀁 𑀢𑀸𑀯 𑀅𑀲𑁆𑀲 𑀦𑀸𑀪𑀺𑀬𑀸 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀢𑀸.

𑀬𑁂𑀳𑀺 ¶ 𑀧𑀦 𑀢𑀁 𑁋 ‘‘𑀅𑀭𑁂𑀳𑀺 𑀲𑀳𑀲𑁆𑀲𑀸𑀭’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑁂 𑀲𑀢𑁆𑀢𑀭𑀢𑀦𑀫𑀬𑀸 𑀲𑀽𑀭𑀺𑀬𑀭𑀲𑁆𑀫𑀺𑀬𑁄 𑀯𑀺𑀬 𑀧𑀪𑀸𑀲𑀫𑁆𑀧𑀦𑁆𑀦𑀸 𑀳𑁄𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀖𑀝𑀓𑀫𑀡𑀺𑀓𑀧𑀭𑀺𑀘𑁆𑀙𑁂𑀤𑀮𑁂𑀔𑀸𑀤𑀻𑀦𑀺 𑀲𑀼𑀯𑀺𑀪𑀢𑁆𑀢𑀸𑀦𑁂𑀯 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀦𑁆𑀢𑀺. 𑀅𑀬𑀫𑀲𑁆𑀲 𑀅𑀭𑀸𑀦𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀢𑀸.

𑀬𑀸𑀬 𑀧𑀦 𑀢𑀁 𑀦𑁂𑀫𑀺𑀬𑀸 𑁋 ‘‘𑀲𑀦𑁂𑀫𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁, 𑀲𑀸 𑀩𑀸𑀮𑀲𑀽𑀭𑀺𑀬𑀭𑀲𑁆𑀫𑀺𑀓𑀮𑀸𑀧𑀲𑀺𑀭𑀺𑀁 𑀅𑀯𑀳𑀲𑀫𑀸𑀦𑀸 𑀯𑀺𑀬 𑀲𑀼𑀭𑀢𑁆𑀢𑀲𑀼𑀤𑁆𑀥𑀲𑀺𑀦𑀺𑀤𑁆𑀥𑀧𑀯𑀸𑀴𑀫𑀬𑀸 𑀳𑁄𑀢𑀺. 𑀲𑀦𑁆𑀥𑀻𑀲𑀼 𑀧𑀦𑀲𑁆𑀲𑀸 𑀲𑀜𑁆𑀛𑀸𑀭𑀸𑀕𑀲𑀲𑁆𑀲𑀺𑀭𑀺𑀓𑀸 𑀭𑀢𑁆𑀢𑀚𑀫𑁆𑀩𑀼𑀦𑀤𑀧𑀝𑁆𑀝𑀸 𑀯𑀝𑁆𑀝𑀧𑀭𑀺𑀘𑁆𑀙𑁂𑀤𑀮𑁂𑀔𑀸 𑀲𑀼𑀯𑀺𑀪𑀢𑁆𑀢𑀸 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀦𑁆𑀢𑀺. 𑀅𑀬𑀫𑀲𑁆𑀲 𑀦𑁂𑀫𑀺𑀬𑀸 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀢𑀸.

𑀦𑁂𑀫𑀺𑀫𑀡𑁆𑀟𑀮𑀧𑀺𑀝𑁆𑀞𑀺𑀬𑀁 𑀧𑀦𑀲𑁆𑀲 𑀤𑀲𑀦𑁆𑀦𑀁 𑀤𑀲𑀦𑁆𑀦𑀁 𑀅𑀭𑀸𑀦𑀁 𑀅𑀦𑁆𑀢𑀭𑁂 𑀥𑀫𑀦𑀯𑀁𑀲𑁄 𑀯𑀺𑀬 𑀅𑀦𑁆𑀢𑁄 𑀲𑀼𑀲𑀺𑀭𑁄 𑀙𑀺𑀤𑁆𑀤𑀫𑀡𑁆𑀟𑀮𑀔𑀘𑀺𑀢𑁄 𑀯𑀸𑀢𑀕𑀸𑀳𑀻 𑀧𑀯𑀸𑀴𑀤𑀡𑁆𑀟𑁄 𑀳𑁄𑀢𑀺, 𑀬𑀲𑁆𑀲 𑀯𑀸𑀢𑁂𑀭𑀺𑀢𑀲𑁆𑀲 𑀲𑀼𑀓𑀼𑀲𑀮𑀲𑀫𑀦𑁆𑀦𑀸𑀳𑀢𑀲𑁆𑀲 𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀲𑁆𑀲 𑀯𑀺𑀬 𑀲𑀤𑁆𑀤𑁄 𑀯𑀕𑁆𑀕𑀼 𑀘 𑀭𑀚𑀦𑀻𑀬𑁄 𑀘 𑀓𑀫𑀦𑀻𑀬𑁄 𑀘 𑀫𑀤𑀦𑀻𑀬𑁄 𑀘 𑀳𑁄𑀢𑀺. 𑀢𑀲𑁆𑀲 𑀔𑁄 𑀧𑀦 𑀧𑀯𑀸𑀴𑀤𑀡𑁆𑀟𑀲𑁆𑀲 𑀉𑀧𑀭𑀺 𑀲𑁂𑀢𑀘𑁆𑀙𑀢𑁆𑀢𑀁 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀲𑀫𑁄𑀲𑀭𑀺𑀢𑀓𑀼𑀲𑀼𑀫𑀤𑀸𑀫𑀸𑀦𑀁 𑀤𑁆𑀯𑁂 𑀧𑀦𑁆𑀢𑀺𑀬𑁄𑀢𑀺 𑀏𑀯𑀁 𑀲𑀫𑁄𑀲𑀭𑀺𑀢𑀓𑀼𑀲𑀼𑀫𑀤𑀸𑀫𑀧𑀦𑁆𑀢𑀺𑀲𑀢𑀤𑁆𑀯𑀬𑀧𑀭𑀺𑀯𑀸𑀭𑀲𑁂𑀢𑀘𑁆𑀙𑀢𑁆𑀢𑀲𑀢𑀥𑀸𑀭𑀺𑀦𑀸 𑀧𑀯𑀸𑀴𑀤𑀡𑁆𑀟𑀲𑀢𑁂𑀦 𑀲𑀫𑀼𑀧𑀲𑁄𑀪𑀺𑀢𑀦𑁂𑀫𑀺𑀧𑀭𑀺𑀓𑁆𑀔𑁂𑀧𑀲𑁆𑀲 𑀤𑁆𑀯𑀺𑀦𑁆𑀦𑀫𑁆𑀧𑀺 𑀦𑀸𑀪𑀺𑀧𑀦𑀸𑀴𑀻𑀦𑀁 𑀅𑀦𑁆𑀢𑁄 𑀤𑁆𑀯𑁂 𑀲𑀻𑀳𑀫𑀼𑀔𑀸𑀦𑀺 𑀳𑁄𑀦𑁆𑀢𑀺, 𑀬𑁂𑀳𑀺 𑀢𑀸𑀮𑀓𑁆𑀔𑀦𑁆𑀥𑀧𑁆𑀧𑀫𑀸𑀡𑀸 𑀧𑀼𑀡𑁆𑀡𑀘𑀦𑁆𑀤𑀓𑀺𑀭𑀡𑀓𑀮𑀸𑀧𑀲𑀲𑁆𑀲𑀺𑀭𑀻𑀓𑀸 𑀢𑀭𑀼𑀡𑀭𑀯𑀺𑀲𑀫𑀸𑀦𑀭𑀢𑁆𑀢𑀓𑀫𑁆𑀩𑀮𑀕𑁂𑀡𑁆𑀟𑀼𑀓𑀧𑀭𑀺𑀬𑀦𑁆𑀢𑀸 𑀆𑀓𑀸𑀲𑀕𑀗𑁆𑀕𑀸𑀕𑀢𑀺𑀲𑁄𑀪𑀁 𑀅𑀯𑀳𑀲𑀫𑀸𑀦𑀸 𑀯𑀺𑀬 𑀤𑁆𑀯𑁂 𑀫𑀼𑀢𑁆𑀢𑀓𑀮𑀸𑀧𑀸 𑀑𑀮𑀫𑁆𑀩𑀦𑁆𑀢𑀺. 𑀬𑁂𑀳𑀺 𑀘𑀓𑁆𑀓𑀭𑀢𑀦𑁂𑀦 𑀲𑀤𑁆𑀥𑀺𑀁 𑀆𑀓𑀸𑀲𑁂 𑀲𑀫𑁆𑀧𑀭𑀺𑀯𑀢𑁆𑀢𑀫𑀸𑀦𑁂𑀳𑀺 𑀢𑀻𑀡𑀺 𑀘𑀓𑁆𑀓𑀸𑀦𑀺 𑀏𑀓𑀢𑁄 𑀧𑀭𑀺𑀯𑀢𑁆𑀢𑀦𑁆𑀢𑀸𑀦𑀺 𑀯𑀺𑀬 𑀔𑀸𑀬𑀦𑁆𑀢𑀺. 𑀅𑀬𑀫𑀲𑁆𑀲 𑀲𑀩𑁆𑀩𑀲𑁄 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀢𑀸.

𑀢𑀁 𑀧𑀦𑁂𑀢𑀁 𑀏𑀯𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁 𑀧𑀓𑀢𑀺𑀬𑀸 𑀲𑀸𑀬𑀫𑀸𑀲𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀖𑀭𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀸𑀲𑀦𑁂𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 𑀧𑀯𑀢𑁆𑀢𑀓𑀣𑀸𑀲𑀮𑁆𑀮𑀸𑀧𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀯𑀻𑀣𑀺𑀘𑀢𑀼𑀓𑁆𑀓𑀸𑀤𑀻𑀲𑀼 ¶ 𑀓𑀻𑀴𑀫𑀸𑀦𑁂 𑀤𑀸𑀭𑀓𑀚𑀦𑁂 𑀦𑀸𑀢𑀺𑀉𑀘𑁆𑀘𑁂𑀦 𑀦𑀸𑀢𑀺𑀦𑀻𑀘𑁂𑀦 𑀯𑀦𑀲𑀡𑁆𑀟𑀫𑀢𑁆𑀣𑀓𑀸𑀲𑀦𑁆𑀦𑁂𑀦 𑀆𑀓𑀸𑀲𑀧𑁆𑀧𑀤𑁂𑀲𑁂𑀦 𑀉𑀧𑀲𑁄𑀪𑀬𑀫𑀸𑀦𑀁 𑀯𑀺𑀬, 𑀭𑀼𑀓𑁆𑀔𑀲𑀸𑀔𑀕𑁆𑀕𑀸𑀦𑀺 𑀤𑁆𑀯𑀸𑀤𑀲𑀬𑁄𑀚𑀦𑀢𑁄 𑀧𑀝𑁆𑀞𑀸𑀬 𑀲𑀼𑀬𑁆𑀬𑀫𑀸𑀦𑁂𑀦 𑀫𑀥𑀼𑀭𑀲𑁆𑀲𑀭𑁂𑀦 ¶ 𑀲𑀢𑁆𑀢𑀸𑀦𑀁 𑀲𑁄𑀢𑀸𑀦𑀺 𑀑𑀥𑀸𑀧𑀬𑀫𑀸𑀦𑀁 𑀬𑁄𑀚𑀦𑀢𑁄 𑀧𑀝𑁆𑀞𑀸𑀬 𑀦𑀸𑀦𑀧𑁆𑀧𑀪𑀸𑀲𑀫𑀼𑀤𑀬𑀲𑀫𑀼𑀚𑁆𑀚𑀮𑁂𑀦 𑀯𑀡𑁆𑀡𑁂𑀦 𑀦𑀬𑀦𑀸𑀦𑀺 𑀲𑀫𑀸𑀓𑀟𑁆𑀠𑀦𑁆𑀢𑀁 𑀯𑀺𑀬, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀼𑀜𑁆𑀜𑀸𑀦𑀼𑀪𑀸𑀯𑀁 𑀉𑀕𑁆𑀖𑁄𑀲𑀬𑀦𑁆𑀢𑀁 𑀯𑀺𑀬, 𑀭𑀸𑀚𑀥𑀸𑀦𑀺𑀬𑀸 𑀅𑀪𑀺𑀫𑀼𑀔𑀁 𑀆𑀕𑀘𑁆𑀙𑀢𑀺.

𑀅𑀣𑀲𑁆𑀲 𑀘𑀓𑁆𑀓𑀭𑀢𑀦𑀲𑁆𑀲 𑀲𑀤𑁆𑀤𑀲𑀯𑀦𑁂𑀦𑁂𑀯 𑁋 ‘‘𑀓𑀼𑀢𑁄 𑀦𑀼 𑀔𑁄, 𑀓𑀲𑁆𑀲 𑀦𑀼 𑀔𑁄 𑀅𑀬𑀁 𑀲𑀤𑁆𑀤𑁄’’𑀢𑀺 𑀆𑀯𑀚𑁆𑀚𑀺𑀢𑀳𑀤𑀬𑀸𑀦𑀁 𑀧𑀼𑀭𑀢𑁆𑀣𑀺𑀫𑀤𑀺𑀲𑀁 𑀆𑀮𑁄𑀓𑀬𑀫𑀸𑀦𑀸𑀦𑀁 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀅𑀜𑁆𑀜𑀢𑀭𑁄 𑀅𑀜𑁆𑀜𑀢𑀭𑀁 𑀏𑀯𑀫𑀸𑀳 ¶ 𑁋 ‘‘𑀧𑀲𑁆𑀲𑀣, 𑀪𑁄, 𑀅𑀘𑁆𑀙𑀭𑀺𑀬𑀁, 𑀅𑀬𑀁 𑀧𑀼𑀡𑁆𑀡𑀘𑀦𑁆𑀤𑁄 𑀧𑀼𑀩𑁆𑀩𑁂 𑀏𑀓𑁄 𑀉𑀕𑁆𑀕𑀘𑁆𑀙𑀢𑀺, 𑀅𑀚𑁆𑀚𑁂𑀯 𑀧𑀦 𑀅𑀢𑁆𑀢𑀤𑀼𑀢𑀺𑀬𑁄 𑀉𑀕𑁆𑀕𑀢𑁄, 𑀏𑀢𑀜𑁆𑀳𑀺 𑀭𑀸𑀚𑀳𑀁𑀲𑀫𑀺𑀣𑀼𑀦𑀫𑀺𑀯 𑀧𑀼𑀡𑁆𑀡𑀘𑀦𑁆𑀤𑀫𑀺𑀣𑀼𑀦𑀁 𑀧𑀼𑀩𑁆𑀩𑀸𑀧𑀭𑀺𑀬𑁂𑀦 𑀕𑀕𑀦𑀢𑀮𑀁 𑀅𑀪𑀺𑀮𑀗𑁆𑀖𑀢𑀻’’𑀢𑀺. 𑀢𑀫𑀜𑁆𑀜𑁄 𑀆𑀳 𑁋 ‘‘𑀓𑀺𑀁 𑀓𑀣𑁂𑀲𑀺, 𑀲𑀫𑁆𑀫, 𑀓𑀼𑀳𑀺𑀁 𑀦𑀸𑀫 𑀢𑀬𑀸 𑀤𑁆𑀯𑁂 𑀧𑀼𑀡𑁆𑀡𑀘𑀦𑁆𑀤𑀸 𑀏𑀓𑀢𑁄 𑀉𑀕𑁆𑀕𑀘𑁆𑀙𑀦𑁆𑀢𑀸 𑀤𑀺𑀝𑁆𑀞𑀧𑀼𑀩𑁆𑀩𑀸, 𑀦𑀦𑀼 𑀏𑀲 𑀢𑀧𑀦𑀻𑀬𑀭𑀁𑀲𑀺𑀥𑀸𑀭𑁄 𑀧𑀺𑀜𑁆𑀙𑀭𑀓𑀺𑀭𑀡𑁄 𑀤𑀺𑀯𑀸𑀓𑀭𑁄 𑀉𑀕𑁆𑀕𑀢𑁄’’𑀢𑀺, 𑀢𑀫𑀜𑁆𑀜𑁄 𑀳𑀲𑀺𑀢𑀁 𑀓𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀓𑀺𑀁 𑀉𑀫𑁆𑀫𑀢𑁆𑀢𑁄𑀲𑀺, 𑀦𑀦𑀼 𑀇𑀤𑀸𑀦𑁂𑀯 𑀤𑀺𑀯𑀸𑀓𑀭𑁄 𑀅𑀢𑁆𑀣𑀗𑁆𑀕𑀢𑁄, 𑀲𑁄 𑀓𑀣𑀁 𑀇𑀫𑀁 𑀧𑀼𑀡𑁆𑀡𑀘𑀦𑁆𑀤𑀁 𑀅𑀦𑀼𑀩𑀦𑁆𑀥𑀫𑀸𑀦𑁄 𑀉𑀕𑁆𑀕𑀘𑁆𑀙𑀺𑀲𑁆𑀲𑀢𑀺? 𑀅𑀤𑁆𑀥𑀸 𑀧𑀦𑁂𑀢𑀁 𑀅𑀦𑁂𑀓𑀭𑀢𑀦𑀧𑁆𑀧𑀪𑀸𑀲𑀫𑀼𑀤𑀬𑀼𑀚𑁆𑀚𑀮𑀁 𑀏𑀓𑀲𑁆𑀲𑀸𑀧𑀺 𑀧𑀼𑀜𑁆𑀜𑀯𑀢𑁄 𑀯𑀺𑀫𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀅𑀧𑀲𑀸𑀭𑀬𑀦𑁆𑀢𑀸 𑀅𑀜𑁆𑀜𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀪𑁄, 𑀓𑀺𑀁 𑀩𑀳𑀼𑀁 𑀯𑀺𑀮𑀧𑀣, 𑀦𑁂𑀯𑀸𑀬𑀁 𑀧𑀼𑀡𑁆𑀡𑀘𑀦𑁆𑀤𑁄, 𑀦 𑀲𑀽𑀭𑀺𑀬𑁄 𑀦 𑀤𑁂𑀯𑀯𑀺𑀫𑀸𑀦𑀁. 𑀦 𑀳𑁂𑀢𑁂𑀲𑀁 𑀏𑀯𑀭𑀽𑀧𑀸 𑀲𑀺𑀭𑀺𑀲𑀫𑁆𑀧𑀢𑁆𑀢𑀺 𑀅𑀢𑁆𑀣𑀺, 𑀘𑀓𑁆𑀓𑀭𑀢𑀦𑁂𑀦 𑀧𑀦 𑀏𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺.

𑀏𑀯𑀁 𑀧𑀯𑀢𑁆𑀢𑀲𑀮𑁆𑀮𑀸𑀧𑀲𑁆𑀲𑁂𑀯 𑀢𑀲𑁆𑀲 𑀚𑀦𑀲𑁆𑀲 𑀘𑀦𑁆𑀤𑀫𑀡𑁆𑀟𑀮𑀁 𑀑𑀳𑀸𑀬 𑀢𑀁 𑀘𑀓𑁆𑀓𑀭𑀢𑀦𑀁 𑀅𑀪𑀺𑀫𑀼𑀔𑀁 𑀳𑁄𑀢𑀺. 𑀢𑀢𑁄 𑀢𑁂𑀳𑀺 𑁋 ‘‘𑀓𑀲𑁆𑀲 𑀦𑀼 𑀔𑁄 𑀇𑀤𑀁 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄 𑁋 ‘‘𑀦 𑀓𑀲𑁆𑀲𑀘𑀺 𑀅𑀜𑁆𑀜𑀲𑁆𑀲, 𑀦𑀦𑀼 𑀅𑀫𑁆𑀳𑀸𑀓𑀁 𑀫𑀳𑀸𑀭𑀸𑀚𑀸 𑀧𑀽𑀭𑀺𑀢𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑁄, 𑀢𑀲𑁆𑀲𑁂𑀢𑀁 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺. 𑀅𑀣 𑀲𑁄 𑀘 𑀫𑀳𑀸𑀚𑀦𑁄, 𑀬𑁄 𑀘 𑀅𑀜𑁆𑀜𑁄 𑀧𑀲𑁆𑀲𑀢𑀺, 𑀲𑀩𑁆𑀩𑁄 𑀘𑀓𑁆𑀓𑀭𑀢𑀦𑀫𑁂𑀯 𑀅𑀦𑀼𑀕𑀘𑁆𑀙𑀢𑀺. 𑀢𑀁 𑀘𑀸𑀧𑀺 𑀘𑀓𑁆𑀓𑀭𑀢𑀦𑀁 𑀭𑀜𑁆𑀜𑁄𑀬𑁂𑀯 𑀅𑀢𑁆𑀣𑀸𑀬 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀜𑀸𑀧𑁂𑀢𑀼𑀓𑀸𑀫𑀁 𑀯𑀺𑀬 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀸𑀓𑀸𑀭𑀫𑀢𑁆𑀣𑀓𑁂𑀦𑁂𑀯 ¶ 𑀦𑀕𑀭𑀁 𑀅𑀦𑀼𑀲𑀁𑀬𑀸𑀬𑀺𑀢𑁆𑀯𑀸, 𑀅𑀣 𑀭𑀜𑁆𑀜𑁄 𑀅𑀦𑁆𑀢𑁂𑀧𑀼𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸, 𑀅𑀦𑁆𑀢𑁂𑀧𑀼𑀭𑀲𑁆𑀲 𑀘 𑀉𑀢𑁆𑀢𑀭𑀲𑀻𑀳𑀧𑀜𑁆𑀚𑀭𑀲𑀤𑀺𑀲𑁂 𑀞𑀸𑀦𑁂 𑀬𑀣𑀸 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀲𑀼𑀔𑁂𑀦 𑀲𑀓𑁆𑀓𑀸 𑀳𑁄𑀢𑀺 𑀧𑀽𑀚𑁂𑀢𑀼𑀁, 𑀏𑀯𑀁 𑀅𑀓𑁆𑀔𑀸𑀳𑀢𑀁 𑀯𑀺𑀬 𑀢𑀺𑀝𑁆𑀞𑀢𑀺.

𑀏𑀯𑀁 𑀞𑀺𑀢𑀲𑁆𑀲 𑀧𑀦𑀲𑁆𑀲 𑀯𑀸𑀢𑀧𑀸𑀦𑀙𑀺𑀤𑁆𑀤𑀸𑀤𑀻𑀳𑀺 𑀧𑀯𑀺𑀲𑀺𑀢𑁆𑀯𑀸 𑀦𑀸𑀦𑀸𑀯𑀺𑀭𑀸𑀕𑀭𑀢𑀦𑀧𑁆𑀧𑀪𑀸𑀲𑀫𑀼𑀚𑁆𑀚𑀮𑀁 𑀅𑀦𑁆𑀢𑁄𑀧𑀸𑀲𑀸𑀤𑀁 𑀅𑀮𑀗𑁆𑀓𑀼𑀭𑀼𑀫𑀸𑀦𑀁 𑀧𑀪𑀸𑀲𑀫𑀽𑀳𑀁 𑀤𑀺𑀲𑁆𑀯𑀸 𑀤𑀲𑁆𑀲𑀦𑀢𑁆𑀣𑀸𑀬 𑀲𑀜𑁆𑀚𑀸𑀢𑀸𑀪𑀺𑀮𑀸𑀲𑁄 ¶ 𑀭𑀸𑀚𑀸 𑀳𑁄𑀢𑀺. 𑀧𑀭𑀺𑀚𑀦𑁄𑀧𑀺𑀲𑁆𑀲 𑀧𑀺𑀬𑀯𑀘𑀦𑀧𑀸𑀪𑀢𑁂𑀦 𑀆𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀦𑀺𑀯𑁂𑀤𑁂𑀢𑀺. 𑀅𑀣 𑀭𑀸𑀚𑀸 𑀩𑀮𑀯𑀧𑀻𑀢𑀺𑀧𑀸𑀫𑁄𑀚𑁆𑀚𑀨𑀼𑀝𑀲𑀭𑀻𑀭𑁄 𑀧𑀮𑁆𑀮𑀗𑁆𑀓𑀁 𑀫𑁄𑀘𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀲𑀻𑀳𑀧𑀜𑁆𑀚𑀭𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀢𑀁 𑀘𑀓𑁆𑀓𑀭𑀢𑀦𑀁 𑀤𑀺𑀲𑁆𑀯𑀸 ‘‘𑀲𑀼𑀢𑀁 𑀔𑁄 𑀧𑀦 𑀫𑁂𑀢’’𑀦𑁆𑀢𑀺𑀆𑀤𑀺𑀓𑀁 𑀘𑀺𑀦𑁆𑀢𑀦𑀁 𑀘𑀺𑀦𑁆𑀢𑀬𑀢𑀺. 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲𑀸𑀧𑀺 𑀲𑀩𑁆𑀩𑀁 𑀢𑀁 𑀢𑀣𑁂𑀯 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀤𑀺𑀲𑁆𑀯𑀸 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲…𑀧𑁂… 𑀅𑀲𑁆𑀲𑀁 𑀦𑀼 𑀔𑁄 𑀅𑀳𑀁 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻’’𑀢𑀺. 𑀢𑀢𑁆𑀣 𑀲𑁄 𑀳𑁄𑀢𑀺 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻𑀢𑀺 𑀓𑀺𑀢𑁆𑀢𑀸𑀯𑀢𑀸 𑀘𑀓𑁆𑀓𑀯𑀢𑁆𑀢𑀻 𑀳𑁄𑀢𑀻𑀢𑀺? 𑀏𑀓𑀗𑁆𑀕𑀼𑀮𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀘𑀓𑁆𑀓𑀭𑀢𑀦𑁂 𑀆𑀓𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀯𑀢𑁆𑀢𑁂 𑀇𑀤𑀸𑀦𑀺 𑀢𑀲𑁆𑀲 𑀧𑀯𑀢𑁆𑀢𑀸𑀧𑀦𑀢𑁆𑀣𑀁 𑀬𑀁 𑀓𑀸𑀢𑀩𑁆𑀩𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀅𑀣 𑀔𑁄 𑀆𑀦𑀦𑁆𑀤𑀸𑀢𑀺𑀆𑀤𑀺𑀫𑀸𑀳.

𑁨𑁪𑁪. 𑀢𑀢𑁆𑀣 ¶ 𑀉𑀝𑁆𑀞𑀸𑀬𑀸𑀲𑀦𑀸𑀢𑀺 𑀦𑀺𑀲𑀺𑀦𑁆𑀦𑀸𑀲𑀦𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀘𑀓𑁆𑀓𑀭𑀢𑀦𑀲𑀫𑀻𑀧𑀁 𑀆𑀕𑀦𑁆𑀢𑁆𑀯𑀸. 𑀲𑀼𑀯𑀡𑁆𑀡𑀪𑀺𑀗𑁆𑀓𑀸𑀭𑀁 𑀕𑀳𑁂𑀢𑁆𑀯𑀸𑀢𑀺 𑀳𑀢𑁆𑀣𑀺𑀲𑁄𑀡𑁆𑀟𑀲𑀤𑀺𑀲𑀧𑀦𑀸𑀴𑀺𑀁 𑀲𑀼𑀯𑀡𑁆𑀡𑀪𑀺𑀗𑁆𑀓𑀸𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸. 𑀅𑀦𑁆𑀯𑀤𑁂𑀯 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬𑀸𑀢𑀺 𑀲𑀩𑁆𑀩𑀘𑀓𑁆𑀓𑀯𑀢𑁆𑀢𑀻𑀦𑀜𑁆𑀳𑀺 𑀉𑀤𑀓𑁂𑀦 𑀅𑀩𑁆𑀪𑀼𑀓𑁆𑀓𑀺𑀭𑀺𑀢𑁆𑀯𑀸 𑁋 ‘‘𑀅𑀪𑀺𑀯𑀺𑀚𑀺𑀦𑀸𑀢𑀼 𑀪𑀯𑀁 𑀘𑀓𑁆𑀓𑀭𑀢𑀦’’𑀦𑁆𑀢𑀺 𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀘𑀓𑁆𑀓𑀭𑀢𑀦𑀁 𑀧𑀯𑀢𑁆𑀢𑀢𑀺. 𑀬𑀲𑁆𑀲 𑀧𑀯𑀢𑁆𑀢𑀺 𑀲𑀫𑀓𑀸𑀮𑀫𑁂𑀯 𑀲𑁄 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀦𑀸𑀫 𑀳𑁄𑀢𑀺. 𑀧𑀯𑀢𑁆𑀢𑁂 𑀧𑀦 𑀘𑀓𑁆𑀓𑀭𑀢𑀦𑁂 𑀢𑀁 𑀅𑀦𑀼𑀩𑀦𑁆𑀥𑀫𑀸𑀦𑁄𑀯 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀺𑀬𑀸𑀦𑀯𑀭𑀁 𑀆𑀭𑀼𑀬𑁆𑀳 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺. 𑀅𑀣𑀲𑁆𑀲 𑀙𑀢𑁆𑀢𑀘𑀸𑀫𑀭𑀸𑀤𑀺𑀳𑀢𑁆𑀣𑁄 𑀧𑀭𑀺𑀚𑀦𑁄 𑀘𑁂𑀯 𑀅𑀦𑁆𑀢𑁂𑀧𑀼𑀭𑀚𑀦𑁄 𑀘 𑀢𑀢𑁄 𑀦𑀸𑀦𑀸𑀓𑀸𑀭𑀓𑀜𑁆𑀘𑀼𑀓𑀓𑀯𑀘𑀸𑀤𑀺𑀲𑀦𑁆𑀦𑀸𑀳𑀯𑀺𑀪𑀽𑀲𑀺𑀢𑁂𑀦 𑀯𑀺𑀯𑀺𑀥𑀸𑀪𑀭𑀡𑀧𑁆𑀧𑀪𑀸𑀲𑀫𑀼𑀚𑁆𑀚𑀮𑁂𑀦 𑀲𑀫𑀼𑀲𑁆𑀲𑀺𑀢𑀤𑁆𑀥𑀚𑀧𑀝𑀸𑀓𑀧𑀝𑀺𑀫𑀡𑁆𑀟𑀺𑀢𑁂𑀦 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀩𑀮𑀓𑀸𑀬𑁂𑀦 𑀲𑀤𑁆𑀥𑀺𑀁 𑀉𑀧𑀭𑀸𑀚𑀲𑁂𑀦𑀸𑀧𑀢𑀺𑀧𑀪𑀼𑀢𑀬𑁄𑀧𑀺 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀫𑁂𑀯 𑀧𑀭𑀺𑀯𑀸𑀭𑁂𑀦𑁆𑀢𑀺.

𑀭𑀸𑀚𑀬𑀼𑀢𑁆𑀢𑀸 𑀧𑀦 𑀚𑀦𑀲𑀗𑁆𑀕𑀳𑀢𑁆𑀣𑀁 𑀦𑀕𑀭𑀯𑀻𑀣𑀻𑀲𑀼 𑀪𑁂𑀭𑀺𑀬𑁄 𑀘𑀭𑀸𑀧𑁂𑀦𑁆𑀢𑀺 𑁋 ‘‘𑀢𑀸𑀢𑀸, 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀘𑀓𑁆𑀓𑀭𑀢𑀦𑀁 𑀦𑀺𑀩𑁆𑀩𑀢𑁆𑀢𑀁, 𑀅𑀢𑁆𑀢𑀦𑁄 𑀯𑀺𑀪𑀯𑀸𑀦𑀼𑀭𑀽𑀧𑁂𑀦 𑀫𑀡𑁆𑀟𑀺𑀢𑀧𑀲𑀸𑀥𑀺𑀓𑀸 𑀲𑀦𑁆𑀦𑀺𑀧𑀢𑀣𑀸’’𑀢𑀺. 𑀫𑀳𑀸𑀚𑀦𑁄 ¶ 𑀧𑀦 𑀧𑀓𑀢𑀺𑀬𑀸 𑀘𑀓𑁆𑀓𑀭𑀢𑀦𑀲𑀤𑁆𑀤𑁂𑀦𑁂𑀯 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀧𑀳𑀸𑀬 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀆𑀤𑀸𑀬 𑀲𑀦𑁆𑀦𑀺𑀧𑀢𑀺𑀢𑁄𑀯 𑀲𑁄𑀧𑀺 𑀲𑀩𑁆𑀩𑁄 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀫𑁂𑀯 𑀧𑀭𑀺𑀯𑀸𑀭𑁂𑀢𑀺. 𑀬𑀲𑁆𑀲 𑀬𑀲𑁆𑀲 𑀳𑀺 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀕𑀦𑁆𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀲𑁄 𑀆𑀓𑀸𑀲𑀕𑀢𑁄𑀯 𑀳𑁄𑀢𑀺. 𑀏𑀯𑀁 𑀤𑁆𑀯𑀸𑀤𑀲𑀬𑁄𑀚𑀦𑀸𑀬𑀸𑀫𑀯𑀺𑀢𑁆𑀣𑀸𑀭𑀸 𑀧𑀭𑀺𑀲𑀸 𑀳𑁄𑀢𑀺. 𑀢𑀢𑁆𑀣 𑀏𑀓𑀧𑀼𑀭𑀺𑀲𑁄𑀧𑀺 𑀙𑀺𑀦𑁆𑀦𑀪𑀺𑀦𑁆𑀦𑀲𑀭𑀻𑀭𑁄 𑀯𑀸 𑀓𑀺𑀮𑀺𑀝𑁆𑀞𑀯𑀢𑁆𑀣𑁄 𑀯𑀸 ¶ 𑀦𑀢𑁆𑀣𑀺. 𑀲𑀼𑀘𑀺𑀧𑀭𑀺𑀯𑀸𑀭𑁄 𑀳𑀺 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻. 𑀘𑀓𑁆𑀓𑀯𑀢𑁆𑀢𑀺𑀧𑀭𑀺𑀲𑀸 𑀦𑀸𑀫 𑀯𑀺𑀚𑁆𑀚𑀸𑀥𑀭𑀧𑀼𑀭𑀺𑀲𑀸 𑀯𑀺𑀬 𑀆𑀓𑀸𑀲𑁂 𑀕𑀘𑁆𑀙𑀫𑀸𑀦𑀸 𑀇𑀦𑁆𑀤𑀦𑀻𑀮𑀫𑀡𑀺𑀢𑀮𑁂 𑀯𑀺𑀧𑁆𑀧𑀓𑀺𑀡𑁆𑀡𑀭𑀢𑀦𑀲𑀤𑀺𑀲𑀸 𑀳𑁄𑀢𑀺. 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲𑀸𑀧𑀺 𑀢𑀣𑁂𑀯 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀦𑁆𑀯𑀤𑁂𑀯 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬𑀸’’𑀢𑀺.

𑀢𑀁 𑀧𑀦 𑀘𑀓𑁆𑀓𑀭𑀢𑀦𑀁 𑀭𑀼𑀓𑁆𑀔𑀕𑁆𑀕𑀸𑀦𑀁 𑀉𑀧𑀭𑀽𑀧𑀭𑀺 𑀦𑀸𑀢𑀺𑀉𑀘𑁆𑀘𑁂𑀦 𑀦𑀸𑀢𑀺𑀦𑀻𑀘𑁂𑀦 𑀕𑀕𑀦𑀧𑁆𑀧𑀤𑁂𑀲𑁂𑀦 𑀧𑀯𑀢𑁆𑀢𑀢𑀺. 𑀬𑀣𑀸 𑀭𑀼𑀓𑁆𑀔𑀸𑀦𑀁 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑁂𑀳𑀺 𑀅𑀢𑁆𑀣𑀺𑀓𑀸, 𑀢𑀸𑀦𑀺 𑀲𑀼𑀔𑁂𑀦 𑀕𑀳𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀬𑀣𑀸 𑀘 𑀪𑀽𑀫𑀺𑀬𑀁 𑀞𑀺𑀢𑀸 ‘‘𑀏𑀲 𑀭𑀸𑀚𑀸, 𑀏𑀲 𑀉𑀧𑀭𑀸𑀚𑀸, 𑀏𑀲 𑀲𑁂𑀦𑀸𑀧𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀞𑀸𑀦𑀸𑀤𑀻𑀲𑀼 𑀘 𑀇𑀭𑀺𑀬𑀸𑀧𑀣𑁂𑀲𑀼 𑀬𑁄 𑀬𑁂𑀦 𑀇𑀘𑁆𑀙𑀢𑀺, 𑀲𑁄 𑀢𑁂𑀦𑁂𑀯 𑀕𑀘𑁆𑀙𑀢𑀺. 𑀘𑀺𑀢𑁆𑀢𑀓𑀫𑁆𑀫𑀸𑀤𑀺𑀲𑀺𑀧𑁆𑀧𑀧𑀲𑀼𑀢𑀸 𑀘𑁂𑀢𑁆𑀣 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀸𑀬𑁂𑀯 𑀕𑀘𑁆𑀙𑀦𑁆𑀢𑀺. 𑀬𑀣𑁂𑀯 𑀳𑀺 𑀪𑀽𑀫𑀺𑀬𑀁, 𑀢𑀣𑀸 𑀢𑁂𑀲𑀁 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀆𑀓𑀸𑀲𑁂𑀯 𑀇𑀚𑁆𑀛𑀦𑁆𑀢𑀺. 𑀏𑀯𑀁 𑀘𑀓𑁆𑀓𑀯𑀢𑁆𑀢𑀺𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀢𑀁 𑀘𑀓𑁆𑀓𑀭𑀢𑀦𑀁 𑀯𑀸𑀫𑀧𑀲𑁆𑀲𑁂𑀦 𑀲𑀺𑀦𑁂𑀭𑀼𑀁 𑀧𑀳𑀸𑀬 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀉𑀧𑀭𑀺𑀪𑀸𑀕𑁂𑀦 𑀲𑀢𑁆𑀢𑀲𑀳𑀲𑁆𑀲𑀬𑁄𑀚𑀦𑀧𑁆𑀧𑀫𑀸𑀡𑀁 𑀧𑀼𑀩𑁆𑀩𑀯𑀺𑀤𑁂𑀳𑀁 𑀕𑀘𑁆𑀙𑀢𑀺.

𑀢𑀢𑁆𑀣 𑀬𑁄 𑀯𑀺𑀦𑀺𑀩𑁆𑀩𑁂𑀥𑁂𑀦 𑀤𑁆𑀯𑀸𑀤𑀲𑀬𑁄𑀚𑀦𑀸𑀬, 𑀧𑀭𑀺𑀓𑁆𑀔𑁂𑀧𑀢𑁄 𑀙𑀢𑁆𑀢𑀺𑀁𑀲𑀬𑁄𑀚𑀦𑀸𑀬 𑀧𑀭𑀺𑀲𑀸𑀬 𑀲𑀦𑁆𑀦𑀺𑀯𑁂𑀲𑀓𑁆𑀔𑀫𑁄 ¶ 𑀲𑀼𑀮𑀪𑀸𑀳𑀸𑀭𑀽𑀧𑀓𑀭𑀡𑁄 𑀙𑀸𑀬𑀼𑀤𑀓𑀲𑀫𑁆𑀧𑀦𑁆𑀦𑁄 𑀲𑀼𑀘𑀺𑀲𑀫𑀢𑀮𑁄 𑀭𑀫𑀡𑀻𑀬𑁄 𑀪𑀽𑀫𑀺𑀪𑀸𑀕𑁄, 𑀢𑀲𑁆𑀲 𑀉𑀧𑀭𑀺𑀪𑀸𑀕𑁂 𑀢𑀁 𑀘𑀓𑁆𑀓𑀭𑀢𑀦𑀁 𑀅𑀓𑁆𑀔𑀸𑀳𑀢𑀁 𑀯𑀺𑀬 𑀢𑀺𑀝𑁆𑀞𑀢𑀺. 𑀅𑀣 𑀢𑁂𑀦 𑀲𑀜𑁆𑀜𑀸𑀡𑁂𑀦 𑀲𑁄 𑀫𑀳𑀸𑀚𑀦𑁄 𑀑𑀢𑀭𑀺𑀢𑁆𑀯𑀸 𑀬𑀣𑀸𑀭𑀼𑀘𑀺 𑀦𑀳𑀸𑀦𑀪𑁄𑀚𑀦𑀸𑀤𑀻𑀦𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑁄 𑀯𑀸𑀲𑀁 𑀓𑀧𑁆𑀧𑁂𑀢𑀺. 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲𑀸𑀧𑀺 𑀲𑀩𑁆𑀩𑀁 𑀢𑀣𑁂𑀯 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀬𑀲𑁆𑀫𑀺𑀁 𑀔𑁄 𑀧𑀦𑀸𑀦𑀦𑁆𑀤, 𑀧𑀤𑁂𑀲𑁂 𑀘𑀓𑁆𑀓𑀭𑀢𑀦𑀁 𑀧𑀢𑀺𑀝𑁆𑀞𑀸𑀢𑀺, 𑀢𑀢𑁆𑀣 𑀲𑁄 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀯𑀸𑀲𑀁 𑀉𑀧𑀕𑀘𑁆𑀙𑀺 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬𑀸’’𑀢𑀺.

𑀏𑀯𑀁 𑀯𑀸𑀲𑀁 𑀉𑀧𑀕𑀢𑁂 𑀘𑀓𑁆𑀓𑀯𑀢𑁆𑀢𑀺𑀫𑁆𑀳𑀺 𑀬𑁂 𑀢𑀢𑁆𑀣 𑀭𑀸𑀚𑀸𑀦𑁄, 𑀢𑁂 ‘‘𑀧𑀭𑀘𑀓𑁆𑀓𑀁 𑀆𑀕𑀢’’𑀦𑁆𑀢𑀺 𑀲𑀼𑀢𑁆𑀯𑀸𑀧𑀺 𑀦 𑀩𑀮𑀓𑀸𑀬𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀬𑀼𑀤𑁆𑀥𑀲𑀚𑁆𑀚𑀸 𑀳𑁄𑀦𑁆𑀢𑀺. 𑀘𑀓𑁆𑀓𑀭𑀢𑀦𑀲𑁆𑀲 𑀳𑀺 𑀉𑀧𑁆𑀧𑀢𑁆𑀢𑀺𑀲𑀫𑀦𑀦𑁆𑀢𑀭𑀫𑁂𑀯 𑀦𑀢𑁆𑀣𑀺 𑀲𑁄 𑀲𑀢𑁆𑀢𑁄 𑀦𑀸𑀫, 𑀬𑁄 𑀧𑀘𑁆𑀘𑀢𑁆𑀣𑀺𑀓𑀲𑀜𑁆𑀜𑀸𑀬 𑀢𑀁 𑀭𑀸𑀚𑀸𑀦𑀁 𑀆𑀭𑀩𑁆𑀪 ¶ 𑀆𑀯𑀼𑀥𑀁 𑀉𑀓𑁆𑀔𑀺𑀧𑀺𑀢𑀼𑀁 𑀯𑀺𑀲𑀳𑁂𑀬𑁆𑀬. 𑀅𑀬𑀫𑀸𑀦𑀼𑀪𑀸𑀯𑁄 𑀘𑀓𑁆𑀓𑀭𑀢𑀦𑀲𑁆𑀲.

𑀘𑀓𑁆𑀓𑀸𑀦𑀼𑀪𑀸𑀯𑁂𑀦 ¶ 𑀳𑀺 𑀢𑀲𑁆𑀲 𑀭𑀜𑁆𑀜𑁄,

𑀅𑀭𑀻 𑀅𑀲𑁂𑀲𑀸 𑀤𑀫𑀣𑀁 𑀉𑀧𑁂𑀦𑁆𑀢𑀺;

𑀅𑀭𑀺𑀦𑁆𑀤𑀫𑀁 𑀦𑀸𑀫 𑀦𑀭𑀸𑀥𑀺𑀧𑀲𑁆𑀲,

𑀢𑁂𑀦𑁂𑀯 𑀢𑀁 𑀯𑀼𑀘𑁆𑀘𑀢𑀺 𑀢𑀲𑁆𑀲 𑀘𑀓𑁆𑀓𑀦𑁆𑀢𑀺.

𑀢𑀲𑁆𑀫𑀸 𑀲𑀩𑁆𑀩𑁂𑀧𑀺 𑀢𑁂 𑀭𑀸𑀚𑀸𑀦𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀚𑁆𑀚𑀲𑀺𑀭𑀺𑀯𑀺𑀪𑀯𑀸𑀦𑀼𑀭𑀽𑀧𑀁 𑀧𑀸𑀪𑀢𑀁 𑀕𑀳𑁂𑀢𑁆𑀯𑀸 𑀢𑀁 𑀭𑀸𑀚𑀸𑀦𑀁 𑀉𑀧𑀕𑀫𑁆𑀫 𑀑𑀦𑀢𑀲𑀺𑀭𑀸 𑀅𑀢𑁆𑀢𑀦𑁄 𑀫𑁄𑀴𑀺𑀫𑀡𑀺𑀧𑁆𑀧𑀪𑀸𑀪𑀺𑀲𑁂𑀓𑁂𑀦 𑀢𑀲𑁆𑀲 𑀧𑀸𑀤𑀧𑀽𑀚𑀁 𑀓𑀭𑁄𑀦𑁆𑀢𑀸 𑁋 ‘‘𑀏𑀳𑀺 𑀔𑁄, 𑀫𑀳𑀸𑀭𑀸𑀚𑀸’’𑀢𑀺𑀆𑀤𑀻𑀳𑀺 𑀯𑀘𑀦𑁂𑀳𑀺 𑀢𑀲𑁆𑀲 𑀓𑀺𑀁𑀓𑀸𑀭𑀧𑀝𑀺𑀲𑀸𑀯𑀺𑀢𑀁 𑀆𑀧𑀚𑁆𑀚𑀦𑁆𑀢𑀺. 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲𑀸𑀧𑀺 𑀢𑀣𑁂𑀯 𑀅𑀓𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀬𑁂 𑀔𑁄, 𑀧𑀦𑀸𑀦𑀦𑁆𑀤, 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬…𑀧𑁂… 𑀅𑀦𑀼𑀲𑀸𑀲, 𑀫𑀳𑀸𑀭𑀸𑀚𑀸’’𑀢𑀺.

𑀢𑀢𑁆𑀣 𑀲𑁆𑀯𑀸𑀕𑀢𑀦𑁆𑀢𑀺 𑀲𑀼 𑀆𑀕𑀢𑀁. 𑀏𑀓𑀲𑁆𑀫𑀺𑀜𑁆𑀳𑀺 𑀆𑀕𑀢𑁂 𑀲𑁄𑀘𑀦𑁆𑀢𑀺, 𑀕𑀢𑁂 𑀦𑀦𑁆𑀤𑀦𑁆𑀢𑀺. 𑀏𑀓𑀲𑁆𑀫𑀺𑀁 𑀆𑀕𑀢𑁂 𑀦𑀦𑁆𑀤𑀦𑁆𑀢𑀺, 𑀕𑀢𑁂 𑀲𑁄𑀘𑀦𑁆𑀢𑀺, 𑀢𑀸𑀤𑀺𑀲𑁄 𑀢𑁆𑀯𑀁 𑀆𑀕𑀫𑀦𑀦𑀦𑁆𑀤𑀦𑁄, 𑀕𑀫𑀦𑀲𑁄𑀘𑀦𑁄. 𑀢𑀲𑁆𑀫𑀸 𑀢𑀯 𑀆𑀕𑀫𑀦𑀁 𑀲𑀼𑀆𑀕𑀫𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀧𑀦 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀦𑀸𑀧𑀺 𑁋 ‘‘𑀏𑀢𑁆𑀢𑀓𑀁 𑀦𑀸𑀫 𑀫𑁂 𑀅𑀦𑀼𑀯𑀲𑁆𑀲𑀁 𑀩𑀮𑀺𑀁 𑀉𑀧𑀓𑀧𑁆𑀧𑁂𑀣𑀸’’𑀢𑀺 𑀯𑀤𑀢𑀺, 𑀦𑀸𑀧𑀺 𑀅𑀜𑁆𑀜𑀲𑁆𑀲 𑀪𑁄𑀕𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀤𑁂𑀢𑀺. 𑀅𑀢𑁆𑀢𑀦𑁄 𑀧𑀦 𑀥𑀫𑁆𑀫𑀭𑀸𑀚𑀪𑀸𑀯𑀲𑁆𑀲 𑀅𑀦𑀼𑀭𑀽𑀧𑀸𑀬 𑀧𑀜𑁆𑀜𑀸𑀬 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀧𑁂𑀫𑀦𑀻𑀬𑁂𑀦 𑀫𑀜𑁆𑀚𑀼𑀦𑀸 𑀲𑀭𑁂𑀦 𑁋 ‘‘𑀧𑀲𑁆𑀲𑀣 𑀢𑀸𑀢𑀸, 𑀧𑀸𑀡𑀸𑀢𑀺𑀧𑀸𑀢𑁄 𑀦𑀸𑀫𑁂𑀲 𑀆𑀲𑁂𑀯𑀺𑀢𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 ‘‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄’’𑀢𑀺𑀆𑀤𑀺𑀓𑀁 ¶ 𑀑𑀯𑀸𑀤𑀁 𑀤𑁂𑀢𑀺. 𑀫𑀳𑀸𑀲𑀼𑀤𑀲𑁆𑀲𑀦𑁄𑀧𑀺 𑀢𑀣𑁂𑀯 𑀅𑀓𑀸𑀲𑀺, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀏𑀯𑀫𑀸𑀳 𑁋 ‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄…𑀧𑁂… 𑀬𑀣𑀸𑀪𑀼𑀢𑁆𑀢𑀜𑁆𑀘 𑀪𑀼𑀜𑁆𑀚𑀣𑀸’𑀢𑀺’’. 𑀓𑀺𑀁 𑀧𑀦 𑀲𑀩𑁆𑀩𑁂𑀧𑀺 𑀭𑀜𑁆𑀜𑁄 𑀇𑀫𑀁 𑀑𑀯𑀸𑀤𑀁 𑀕𑀡𑁆𑀳𑀦𑁆𑀢𑀻𑀢𑀺? 𑀩𑀼𑀤𑁆𑀥𑀲𑁆𑀲𑀸𑀧𑀺 𑀢𑀸𑀯 𑀲𑀩𑁆𑀩𑁂 𑀦 𑀕𑀡𑁆𑀳𑀦𑁆𑀢𑀺, 𑀭𑀜𑁆𑀜𑁄 𑀓𑀺𑀁 𑀕𑀡𑁆𑀳𑀺𑀲𑁆𑀲𑀦𑁆𑀢𑀻𑀢𑀺. 𑀢𑀲𑁆𑀫𑀸 𑀬𑁂 𑀧𑀡𑁆𑀟𑀺𑀢𑀸 𑀯𑀺𑀪𑀸𑀯𑀺𑀦𑁄, 𑀢𑁂 𑀕𑀡𑁆𑀳𑀦𑁆𑀢𑀺. 𑀲𑀩𑁆𑀩𑁂 𑀧𑀦 𑀅𑀦𑀼𑀬𑀦𑁆𑀢𑀸 𑀪𑀯𑀦𑁆𑀢𑀺. 𑀢𑀲𑁆𑀫𑀸 𑀬𑁂 𑀔𑁄 𑀧𑀦𑀸𑀦𑀦𑁆𑀤𑀸𑀢𑀺𑀆𑀤𑀺𑀫𑀸𑀳.

𑀅𑀣 𑀢𑀁 𑀘𑀓𑁆𑀓𑀭𑀢𑀦𑀁 𑀏𑀯𑀁 𑀧𑀼𑀩𑁆𑀩𑀯𑀺𑀤𑁂𑀳𑀯𑀸𑀲𑀻𑀦𑀁 𑀑𑀯𑀸𑀤𑁂 𑀤𑀺𑀦𑁆𑀦𑁂 𑀓𑀢𑀧𑀸𑀢𑀭𑀸𑀲𑁂 𑀘𑀓𑁆𑀓𑀯𑀢𑁆𑀢𑀺𑀩𑀮𑁂𑀦 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀲𑀫𑀼𑀤𑁆𑀤𑀁 𑀅𑀚𑁆𑀛𑁄𑀕𑀸𑀳𑀢𑀺. 𑀬𑀣𑀸 𑀬𑀣𑀸 𑀘 𑀢𑀁 𑀅𑀚𑁆𑀛𑁄𑀕𑀸𑀳𑀢𑀺, 𑀢𑀣𑀸 𑀢𑀣𑀸 𑀅𑀕𑀤𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀲𑀗𑁆𑀔𑀺𑀢𑁆𑀢𑀨𑀡𑁄 𑀦𑀸𑀕𑀭𑀸𑀚𑀸 𑀯𑀺𑀬, 𑀲𑀗𑁆𑀔𑀺𑀢𑁆𑀢𑀊𑀫𑀺𑀯𑀺𑀧𑁆𑀨𑀸𑀭𑀁 𑀳𑀼𑀢𑁆𑀯𑀸 𑀑𑀕𑀘𑁆𑀙𑀫𑀸𑀦𑀁 𑀫𑀳𑀸𑀲𑀫𑀼𑀤𑁆𑀤𑀲𑀮𑀺𑀮𑀁 𑀬𑁄𑀚𑀦𑀫𑀢𑁆𑀢𑀁 𑀑𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀲𑀫𑀼𑀤𑁆𑀤𑁂 𑀯𑁂𑀴𑀼𑀭𑀺𑀬𑀪𑀺𑀢𑁆𑀢𑀺 𑀯𑀺𑀬 𑀢𑀺𑀝𑁆𑀞𑀢𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀘 𑀢𑀲𑁆𑀲 𑀭𑀜𑁆𑀜𑁄 𑀧𑀼𑀜𑁆𑀜𑀲𑀺𑀭𑀺𑀁 𑀤𑀝𑁆𑀞𑀼𑀓𑀸𑀫𑀸𑀦𑀺 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑀢𑀮𑁂 𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀺 ¶ ¶ 𑀦𑀸𑀦𑀸𑀭𑀢𑀦𑀸𑀦𑀺 𑀢𑀢𑁄 𑀢𑀢𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀧𑀤𑁂𑀲𑀁 𑀧𑀽𑀭𑀬𑀦𑁆𑀢𑀺. 𑀅𑀣 𑀲𑀸 𑀭𑀸𑀚𑀧𑀭𑀺𑀲𑀸 𑀢𑀁 𑀦𑀸𑀦𑀸𑀭𑀢𑀦𑀧𑀭𑀺𑀧𑀽𑀭𑀁 𑀫𑀳𑀸𑀲𑀫𑀼𑀤𑁆𑀤𑀢𑀮𑀁 𑀤𑀺𑀲𑁆𑀯𑀸 𑀬𑀣𑀸𑀭𑀼𑀘𑀺 𑀉𑀘𑁆𑀙𑀗𑁆𑀕𑀸𑀤𑀻𑀳𑀺 𑀆𑀤𑀺𑀬𑀢𑀺, 𑀬𑀣𑀸𑀭𑀼𑀘𑀺 𑀆𑀤𑀺𑀦𑁆𑀦𑀭𑀢𑀦𑀸𑀬 𑀧𑀦 𑀧𑀭𑀺𑀲𑀸𑀬 𑀢𑀁 𑀘𑀓𑁆𑀓𑀭𑀢𑀦𑀁 𑀧𑀝𑀺𑀦𑀺𑀯𑀢𑁆𑀢𑀢𑀺. 𑀧𑀝𑀺𑀦𑀺𑀯𑀢𑁆𑀢𑀫𑀸𑀦𑁂 𑀘 𑀢𑀲𑁆𑀫𑀺𑀁 𑀧𑀭𑀺𑀲𑀸 𑀅𑀕𑁆𑀕𑀢𑁄 𑀳𑁄𑀢𑀺, 𑀫𑀚𑁆𑀛𑁂 𑀭𑀸𑀚𑀸, 𑀅𑀦𑁆𑀢𑁂 𑀘𑀓𑁆𑀓𑀭𑀢𑀦𑀁. 𑀢𑀫𑁆𑀧𑀺 𑀚𑀮𑀦𑀺𑀥𑀺𑀚𑀮𑀁 𑀧𑀮𑁄𑀪𑀺𑀬𑀫𑀸𑀦𑀫𑀺𑀯 𑀘𑀓𑁆𑀓𑀭𑀢𑀦𑀲𑀺𑀭𑀺𑀬𑀸, 𑀅𑀲𑀳𑀫𑀸𑀦𑀫𑀺𑀯 𑀘 𑀢𑁂𑀦 𑀯𑀺𑀬𑁄𑀕𑀁 𑀦𑁂𑀫𑀺𑀫𑀡𑁆𑀟𑀮𑀧𑀭𑀺𑀬𑀦𑁆𑀢𑀁 𑀅𑀪𑀺𑀳𑀦𑀦𑁆𑀢𑀁 𑀦𑀺𑀭𑀦𑁆𑀢𑀭𑀫𑁂𑀯 𑀉𑀧𑀕𑀘𑁆𑀙𑀢𑀺. 𑀏𑀯𑀁 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀧𑀼𑀭𑀢𑁆𑀣𑀺𑀫𑀫𑀳𑀸𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀧𑀼𑀩𑁆𑀩𑀯𑀺𑀤𑁂𑀳𑀁 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸 𑀤𑀓𑁆𑀔𑀺𑀡𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀚𑀫𑁆𑀩𑀼𑀤𑀻𑀧𑀁 𑀯𑀺𑀚𑁂𑀢𑀼𑀓𑀸𑀫𑁄 𑀘𑀓𑁆𑀓𑀭𑀢𑀦𑀤𑁂𑀲𑀺𑀢𑁂𑀦 𑀫𑀕𑁆𑀕𑁂𑀦 𑀤𑀓𑁆𑀔𑀺𑀡𑀲𑀫𑀼𑀤𑁆𑀤𑀸𑀪𑀺𑀫𑀼𑀔𑁄 𑀕𑀘𑁆𑀙𑀢𑀺. 𑀫𑀳𑀸𑀲𑀼𑀤𑀲𑁆𑀲𑀦𑁄𑀧𑀺 𑀢𑀣𑁂𑀯 𑀅𑀕𑀫𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄, 𑀆𑀦𑀦𑁆𑀤, 𑀘𑀓𑁆𑀓𑀭𑀢𑀦𑀁 𑀧𑀼𑀭𑀢𑁆𑀣𑀺𑀫𑀁 𑀲𑀫𑀼𑀤𑁆𑀤𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀤𑀓𑁆𑀔𑀺𑀡𑀁 𑀤𑀺𑀲𑀁 𑀧𑀯𑀢𑁆𑀢𑀻’’𑀢𑀺.

𑀏𑀯𑀁 𑀧𑀯𑀢𑁆𑀢𑀫𑀸𑀦𑀲𑁆𑀲 𑀧𑀦 𑀢𑀲𑁆𑀲 𑀧𑀯𑀢𑁆𑀢𑀦𑀯𑀺𑀥𑀸𑀦𑀁, 𑀲𑁂𑀦𑀸𑀲𑀦𑁆𑀦𑀺𑀯𑁂𑀲𑁄, 𑀧𑀝𑀺𑀭𑀸𑀚𑀸𑀕𑀫𑀦𑀁, 𑀢𑁂𑀲𑀁 𑀅𑀦𑀼𑀲𑀸𑀲𑀦𑀺𑀧𑁆𑀧𑀤𑀸𑀦𑀁 𑀤𑀓𑁆𑀔𑀺𑀡𑀲𑀫𑀼𑀤𑁆𑀤𑀅𑀚𑁆𑀛𑁄𑀕𑀸𑀳𑀦𑀁 𑀲𑀫𑀼𑀤𑁆𑀤𑀲𑀮𑀺𑀮𑀲𑁆𑀲 𑀑𑀕𑀘𑁆𑀙𑀫𑀸𑀦𑀁 𑀭𑀢𑀦𑀸𑀦𑀁 𑀆𑀤𑀸𑀦𑀦𑁆𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀚𑀺𑀦𑀺𑀢𑁆𑀯𑀸 𑀧𑀦 𑀢𑀁 𑀤𑀲𑀲𑀳𑀲𑁆𑀲𑀬𑁄𑀚𑀦𑀧𑁆𑀧𑀫𑀸𑀡𑀁 𑀚𑀫𑁆𑀩𑀼𑀤𑀻𑀧𑀁 𑀤𑀓𑁆𑀔𑀺𑀡𑀲𑀫𑀼𑀤𑁆𑀤𑀢𑁄𑀧𑀺 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀲𑀢𑁆𑀢𑀬𑁄𑀚𑀦𑀲𑀳𑀲𑁆𑀲𑀧𑁆𑀧𑀫𑀸𑀡𑀁 𑀅𑀧𑀭𑀕𑁄𑀬𑀸𑀦𑀁 𑀯𑀺𑀚𑁂𑀢𑀼𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀦𑁆𑀢𑁆𑀯𑀸 𑀢𑀫𑁆𑀧𑀺 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀢𑀣𑁂𑀯 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸 𑀧𑀘𑁆𑀙𑀺𑀫𑀲𑀫𑀼𑀤𑁆𑀤𑀢𑁄𑀧𑀺 𑀉𑀢𑁆𑀢𑀭𑀺𑀢𑁆𑀯𑀸 𑀅𑀝𑁆𑀞𑀬𑁄𑀚𑀦𑀲𑀳𑀲𑁆𑀲𑀧𑁆𑀧𑀫𑀸𑀡𑀁 𑀉𑀢𑁆𑀢𑀭𑀓𑀼𑀭𑀼𑀁 𑀯𑀺𑀚𑁂𑀢𑀼𑀁 𑀢𑀣𑁂𑀯 𑀕𑀦𑁆𑀢𑁆𑀯𑀸 𑀢𑀫𑁆𑀧𑀺 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀢𑀣𑁂𑀯 𑀅𑀪𑀺𑀯𑀺𑀚𑀺𑀬 𑀉𑀢𑁆𑀢𑀭𑀲𑀫𑀼𑀤𑁆𑀤𑀢𑁄 𑀧𑀘𑁆𑀘𑀼𑀢𑁆𑀢𑀭𑀢𑀺.

𑀏𑀢𑁆𑀢𑀸𑀯𑀢𑀸 ¶ 𑀭𑀜𑁆𑀜𑀸 𑀘𑀓𑁆𑀓𑀯𑀢𑁆𑀢𑀺𑀦𑀸 𑀘𑀸𑀢𑀼𑀭𑀦𑁆𑀢𑀸𑀬 𑀧𑀣𑀯𑀺𑀬𑀸 𑀆𑀥𑀺𑀧𑀘𑁆𑀘𑀁 𑀅𑀥𑀺𑀕𑀢𑀁 𑀳𑁄𑀢𑀺. 𑀲𑁄 𑀏𑀯𑀁 𑀯𑀺𑀚𑀺𑀢𑀯𑀺𑀚𑀬𑁄 𑀅𑀢𑁆𑀢𑀦𑁄 𑀭𑀚𑁆𑀚𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀲𑀧𑀭𑀺𑀲𑁄 𑀉𑀤𑁆𑀥𑀁 𑀕𑀕𑀦𑀢𑀮𑀁 𑀅𑀪𑀺𑀮𑀗𑁆𑀖𑀺𑀢𑁆𑀯𑀸 𑀲𑀼𑀯𑀺𑀓𑀲𑀺𑀢𑀧𑀤𑀼𑀫𑀓𑀼𑀫𑀼𑀤𑀧𑀼𑀡𑁆𑀟𑀭𑀻𑀓𑀯𑀦𑀯𑀺𑀘𑀺𑀢𑁆𑀢𑁂 𑀘𑀢𑁆𑀢𑀸𑀭𑁄 𑀚𑀸𑀢𑀲𑁆𑀲𑀭𑁂 𑀯𑀺𑀬 𑀧𑀜𑁆𑀘𑀲𑀢𑀧𑀜𑁆𑀘𑀲𑀢𑀧𑀭𑀺𑀢𑁆𑀢𑀤𑀻𑀧𑀧𑀭𑀺𑀯𑀸𑀭𑁂 𑀘𑀢𑁆𑀢𑀸𑀭𑁄 𑀫𑀳𑀸𑀤𑀻𑀧𑁂 𑀑𑀮𑁄𑀓𑁂𑀢𑁆𑀯𑀸 𑀘𑀓𑁆𑀓𑀭𑀢𑀦𑀤𑁂𑀲𑀺𑀢𑁂𑀦𑁂𑀯 𑀫𑀕𑁆𑀕𑁂𑀦 ¶ 𑀬𑀣𑀸𑀦𑀼𑀓𑁆𑀓𑀫𑀁 𑀅𑀢𑁆𑀢𑀦𑁄 𑀭𑀸𑀚𑀥𑀸𑀦𑀺𑀁 𑀧𑀘𑁆𑀘𑀸𑀕𑀘𑁆𑀙𑀢𑀺. 𑀅𑀣 𑀢𑀁 𑀘𑀓𑁆𑀓𑀭𑀢𑀦𑀁 𑀅𑀦𑁆𑀢𑁂𑀧𑀼𑀭𑀤𑁆𑀯𑀸𑀭𑀁 𑀲𑁄𑀪𑀬𑀫𑀸𑀦𑀁 𑀯𑀺𑀬 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺.

𑀏𑀯𑀁 𑀧𑀢𑀺𑀝𑁆𑀞𑀺𑀢𑁂 𑀧𑀦 𑀢𑀲𑁆𑀫𑀺𑀁 𑀘𑀓𑁆𑀓𑀭𑀢𑀦𑁂 𑀭𑀸𑀚𑀦𑁆𑀢𑁂𑀧𑀼𑀭𑁂 𑀉𑀓𑁆𑀓𑀸𑀳𑀺 𑀯𑀸 𑀤𑀻𑀧𑀺𑀓𑀸𑀳𑀺 𑀯𑀸 𑀓𑀺𑀜𑁆𑀘𑀺 ¶ 𑀓𑀭𑀡𑀻𑀬𑀁 𑀦 𑀳𑁄𑀢𑀺, 𑀘𑀓𑁆𑀓𑀭𑀢𑀦𑁄𑀪𑀸𑀲𑁄𑀬𑁂𑀯 𑀭𑀢𑁆𑀢𑀺𑀁 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀢𑀺𑀬𑁂𑀯. 𑀬𑁂 𑀧𑀦 𑀅𑀦𑁆𑀥𑀓𑀸𑀭𑀢𑁆𑀣𑀺𑀓𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀅𑀦𑁆𑀥𑀓𑀸𑀭𑀫𑁂𑀯 𑀳𑁄𑀢𑀺. 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲𑀸𑀧𑀺 𑀲𑀩𑁆𑀩𑀫𑁂𑀢𑀁 𑀢𑀣𑁂𑀯 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀤𑀓𑁆𑀔𑀺𑀡𑀁 𑀲𑀫𑀼𑀤𑁆𑀤𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸…𑀧𑁂… 𑀏𑀯𑀭𑀽𑀧𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀻’’𑀢𑀺.

𑀳𑀢𑁆𑀣𑀺𑀭𑀢𑀦𑀯𑀡𑁆𑀡𑀦𑀸

𑁨𑁪𑁬. 𑀏𑀯𑀁 𑀧𑀸𑀢𑀼𑀪𑀽𑀢𑀘𑀓𑁆𑀓𑀭𑀢𑀦𑀲𑁆𑀲𑁂𑀯 𑀘𑀓𑁆𑀓𑀯𑀢𑁆𑀢𑀺𑀦𑁄 𑀅𑀫𑀘𑁆𑀘𑀸 𑀧𑀓𑀢𑀺𑀫𑀗𑁆𑀕𑀮𑀳𑀢𑁆𑀣𑀺𑀝𑁆𑀞𑀸𑀦𑀁 𑀲𑀫𑀁 𑀲𑀼𑀘𑀺𑀪𑀽𑀫𑀺𑀪𑀸𑀕𑀁 𑀓𑀸𑀭𑁂𑀢𑁆𑀯𑀸 𑀳𑀭𑀺𑀘𑀦𑁆𑀤𑀦𑀸𑀤𑀻𑀳𑀺 𑀲𑀼𑀭𑀪𑀺𑀕𑀦𑁆𑀥𑁂𑀳𑀺 𑀉𑀧𑀮𑀺𑀫𑁆𑀧𑀸𑀧𑁂𑀢𑁆𑀯𑀸 𑀳𑁂𑀝𑁆𑀞𑀸 𑀯𑀺𑀘𑀺𑀢𑁆𑀢𑀯𑀡𑁆𑀡𑀲𑀼𑀭𑀪𑀺𑀓𑀼𑀲𑀼𑀫𑀲𑀫𑁄𑀓𑀺𑀡𑁆𑀡𑀁 𑀉𑀧𑀭𑀺 𑀲𑀼𑀯𑀡𑁆𑀡𑀢𑀸𑀭𑀓𑀸𑀦𑀁 𑀅𑀦𑁆𑀢𑀭𑀦𑁆𑀢𑀭𑀸 𑀲𑀫𑁄𑀲𑀭𑀺𑀢𑀫𑀦𑀼𑀜𑁆𑀜𑀓𑀼𑀲𑀼𑀫𑀤𑀸𑀫𑀧𑀝𑀺𑀫𑀡𑁆𑀟𑀺𑀢𑀯𑀺𑀢𑀸𑀦𑀁 𑀤𑁂𑀯𑀯𑀺𑀫𑀸𑀦𑀁 𑀯𑀺𑀬 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑁋 ‘‘𑀏𑀯𑀭𑀽𑀧𑀲𑁆𑀲 𑀦𑀸𑀫 𑀤𑁂𑀯 𑀳𑀢𑁆𑀣𑀺𑀭𑀢𑀦𑀲𑁆𑀲 𑀆𑀕𑀫𑀦𑀁 𑀘𑀺𑀦𑁆𑀢𑁂𑀣𑀸’’𑀢𑀺 𑀯𑀤𑀦𑁆𑀢𑀺. 𑀲𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀸𑀦𑀺 𑀘 𑀲𑀫𑀸𑀤𑀸𑀬 𑀢𑀁 𑀧𑀼𑀜𑁆𑀜𑀲𑀫𑁆𑀧𑀢𑁆𑀢𑀺𑀁 𑀆𑀯𑀚𑁆𑀚𑀦𑁆𑀢𑁄 𑀦𑀺𑀲𑀻𑀤𑀺. 𑀅𑀣𑀲𑁆𑀲 𑀧𑀼𑀜𑁆𑀜𑀸𑀦𑀼𑀪𑀸𑀯𑀘𑁄𑀤𑀺𑀢𑁄 𑀙𑀤𑁆𑀤𑀦𑁆𑀢𑀓𑀼𑀮𑀸 𑀯𑀸 𑀉𑀧𑁄𑀲𑀣𑀓𑀼𑀮𑀸 𑀯𑀸 𑀢𑀁 𑀲𑀓𑁆𑀓𑀸𑀭𑀯𑀺𑀲𑁂𑀲𑀁 𑀅𑀦𑀼𑀪𑀯𑀺𑀢𑀼𑀓𑀸𑀫𑁄 𑀢𑀭𑀼𑀡𑀭𑀯𑀺𑀫𑀡𑁆𑀟𑀮𑀸𑀪𑀺𑀭𑀢𑁆𑀢𑀘𑀭𑀡𑀕𑀻𑀯𑀸𑀫𑀼𑀔𑀧𑀝𑀺𑀫𑀡𑁆𑀟𑀺𑀢𑀯𑀺𑀲𑀼𑀤𑁆𑀥𑀲𑁂𑀢𑀲𑀭𑀻𑀭𑁄 𑀲𑀢𑁆𑀢𑀧𑀢𑀺𑀝𑁆𑀞𑁄 𑀲𑀼𑀲𑀡𑁆𑀞𑀺𑀢𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀦𑁆𑀦𑀺𑀯𑁂𑀲𑁄 𑀯𑀺𑀓𑀲𑀺𑀢𑀭𑀢𑁆𑀢𑀧𑀤𑀼𑀫𑀘𑀸𑀭𑀼𑀧𑁄𑀓𑁆𑀔𑀭𑁄 𑀇𑀤𑁆𑀥𑀺𑀫𑀸 𑀬𑁄𑀕𑀻 𑀯𑀺𑀬 𑀯𑁂𑀳𑀸𑀲𑀕𑀫𑀦𑀲𑀫𑀢𑁆𑀣𑁄 𑀫𑀦𑁄𑀲𑀺𑀮𑀸𑀘𑀼𑀡𑁆𑀡𑀭𑀜𑁆𑀚𑀺𑀢𑀧𑀭𑀺𑀬𑀦𑁆𑀢𑁄 𑀯𑀺𑀬 𑀭𑀚𑀢𑀧𑀩𑁆𑀩𑀢𑁄 𑀳𑀢𑁆𑀣𑀺𑀲𑁂𑀝𑁆𑀞𑁄 𑀆𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀢𑀺𑀝𑁆𑀞𑀢𑀺. 𑀲𑁄 𑀙𑀤𑁆𑀤𑀦𑁆𑀢𑀓𑀼𑀮𑀸 𑀆𑀕𑀘𑁆𑀙𑀦𑁆𑀢𑁄 𑀲𑀩𑁆𑀩𑀓𑀦𑀺𑀝𑁆𑀞𑁄 𑀆𑀕𑀘𑁆𑀙𑀢𑀺. 𑀉𑀧𑁄𑀲𑀣𑀓𑀼𑀮𑀸 𑀆𑀕𑀘𑁆𑀙𑀦𑁆𑀢𑁄 𑀲𑀩𑁆𑀩𑀚𑁂𑀝𑁆𑀞𑁄. 𑀧𑀸𑀴𑀺𑀬𑀁 𑀧𑀦 𑀉𑀧𑁄𑀲𑀣𑁄 𑀦𑀸𑀕𑀭𑀸𑀚𑀸 𑀇𑀘𑁆𑀘𑁂𑀯 𑀆𑀕𑀢𑀁. 𑀦𑀸𑀕𑀭𑀸𑀚𑀸 𑀦𑀸𑀫 𑀓𑀲𑁆𑀲𑀘𑀺 𑀅𑀧𑀭𑀺𑀪𑁄𑀕𑁄, 𑀲𑀩𑁆𑀩𑀓𑀦𑀺𑀝𑁆𑀞𑁄 𑀆𑀕𑀘𑁆𑀙𑀢𑀻𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀲𑁆𑀯𑀸𑀬𑀁 𑀧𑀽𑀭𑀺𑀢𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀸𑀦𑀁 𑀘𑀓𑁆𑀓𑀯𑀢𑁆𑀢𑀻𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑀺𑀦𑁆𑀢𑀬𑀦𑁆𑀢𑀸𑀦𑀁 𑀆𑀕𑀘𑁆𑀙𑀢𑀺. 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀧𑀦 𑀲𑀬𑀫𑁂𑀯 𑀧𑀓𑀢𑀺𑀫𑀗𑁆𑀕𑀮𑀳𑀢𑁆𑀣𑀺𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀢𑀁 𑀳𑀢𑁆𑀣𑀺𑀁 𑀅𑀧𑀦𑁂𑀢𑁆𑀯𑀸 𑀢𑀢𑁆𑀣 𑀅𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀼𑀦 𑀘𑀧𑀭𑀁 𑀆𑀦𑀦𑁆𑀤…𑀧𑁂… 𑀦𑀸𑀕𑀭𑀸𑀚𑀸’’𑀢𑀺.

𑀏𑀯𑀁 ¶ ¶ 𑀧𑀸𑀢𑀼𑀪𑀽𑀢𑀁 𑀧𑀦 𑀢𑀁 𑀳𑀢𑁆𑀣𑀺𑀭𑀢𑀦𑀁 𑀤𑀺𑀲𑁆𑀯𑀸 𑀳𑀢𑁆𑀣𑀺𑀕𑁄𑀧𑀓𑀸𑀤𑀬𑁄 𑀳𑀝𑁆𑀞𑀢𑀼𑀝𑁆𑀞𑀸 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀦𑁆𑀢𑀺. 𑀭𑀸𑀚𑀸 𑀢𑀼𑀭𑀺𑀢𑀢𑀼𑀭𑀺𑀢𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 𑁋 ‘‘𑀪𑀤𑁆𑀤𑀓𑀁 𑀯𑀢 𑀪𑁄 𑀳𑀢𑁆𑀣𑀺𑀬𑀸𑀦𑀁, 𑀲𑀘𑁂 𑀤𑀫𑀣𑀁 𑀉𑀧𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑀬𑀦𑁆𑀢𑁄 𑀳𑀢𑁆𑀣𑀁 ¶ 𑀧𑀲𑀸𑀭𑁂𑀢𑀺. 𑀅𑀣 𑀲𑁄 𑀖𑀭𑀥𑁂𑀦𑀼𑀯𑀘𑁆𑀙𑀓𑁄 𑀯𑀺𑀬 𑀓𑀡𑁆𑀡𑁂 𑀑𑀮𑀫𑁆𑀩𑀺𑀢𑁆𑀯𑀸 𑀲𑀽𑀭𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀢𑀺. 𑀭𑀸𑀚𑀸 𑀢𑀁 𑀆𑀭𑁄𑀳𑀺𑀢𑀼𑀓𑀸𑀫𑁄 𑀳𑁄𑀢𑀺. 𑀅𑀣𑀲𑁆𑀲 𑀧𑀭𑀺𑀚𑀦𑀸 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸 𑀢𑀁 𑀳𑀢𑁆𑀣𑀺𑀭𑀢𑀦𑀁 𑀲𑀼𑀯𑀡𑁆𑀡𑀤𑁆𑀥𑀚𑀁 𑀲𑀼𑀯𑀡𑁆𑀡𑀸𑀮𑀗𑁆𑀓𑀸𑀭𑀁 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀁 𑀓𑀢𑁆𑀯𑀸 𑀉𑀧𑀦𑁂𑀦𑁆𑀢𑀺. 𑀭𑀸𑀚𑀸 𑀢𑀁 𑀅𑀦𑀺𑀲𑀻𑀤𑀸𑀧𑁂𑀢𑁆𑀯𑀸𑀯 𑀲𑀢𑁆𑀢𑀭𑀢𑀦𑀫𑀬𑀸𑀬 𑀦𑀺𑀲𑁆𑀲𑁂𑀡𑀺𑀬𑀸 𑀆𑀭𑀼𑀬𑁆𑀳 𑀆𑀓𑀸𑀲𑀕𑀫𑀦𑀦𑀺𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺. 𑀢𑀲𑁆𑀲 𑀲𑀳 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯 𑀲𑁄 𑀦𑀸𑀕𑀭𑀸𑀚𑀸 𑀭𑀸𑀚𑀳𑀁𑀲𑁄 𑀯𑀺𑀬 𑀇𑀦𑁆𑀤𑀦𑀻𑀮𑀫𑀡𑀺𑀧𑁆𑀧𑀪𑀸𑀚𑀸𑀮𑀁 𑀦𑀻𑀮𑀕𑀕𑀦𑀢𑀮𑀁 𑀅𑀪𑀺𑀮𑀗𑁆𑀖𑀢𑀺. 𑀢𑀢𑁄 𑀘𑀓𑁆𑀓𑀘𑀸𑀭𑀺𑀓𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀓𑀮𑀭𑀸𑀚𑀧𑀭𑀺𑀲𑀸. 𑀇𑀢𑀺 𑀲𑀧𑀭𑀺𑀲𑁄 𑀭𑀸𑀚𑀸 𑀅𑀦𑁆𑀢𑁄𑀧𑀸𑀢𑀭𑀸𑀲𑁂𑀬𑁂𑀯 𑀲𑀓𑀮𑀧𑀣𑀯𑀺𑀁 𑀅𑀦𑀼𑀲𑀁𑀬𑀸𑀬𑀺𑀢𑁆𑀯𑀸 𑀭𑀸𑀚𑀥𑀸𑀦𑀺𑀁 𑀧𑀘𑁆𑀘𑀸𑀕𑀘𑁆𑀙𑀢𑀺. 𑀏𑀯𑀁 𑀫𑀳𑀺𑀤𑁆𑀥𑀺𑀓𑀁 𑀘𑀓𑁆𑀓𑀯𑀢𑁆𑀢𑀺𑀦𑁄 𑀳𑀢𑁆𑀣𑀺𑀭𑀢𑀦𑀁 𑀳𑁄𑀢𑀺. 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲𑀸𑀧𑀺 𑀢𑀸𑀤𑀺𑀲𑀫𑁂𑀯 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀤𑀺𑀲𑁆𑀯𑀸 𑀭𑀜𑁆𑀜𑁄…𑀧𑁂… 𑀧𑀸𑀢𑀼𑀭𑀳𑁄𑀲𑀻’’𑀢𑀺.

𑀅𑀲𑁆𑀲𑀭𑀢𑀦𑀯𑀡𑁆𑀡𑀦𑀸

𑁨𑁪𑁭. 𑀏𑀯𑀁 𑀧𑀸𑀢𑀼𑀪𑀽𑀢𑀳𑀢𑁆𑀣𑀺𑀭𑀢𑀦𑀲𑁆𑀲 𑀧𑀦 𑀘𑀓𑁆𑀓𑀯𑀢𑁆𑀢𑀺𑀦𑁄 𑀅𑀫𑀘𑁆𑀘𑀸 𑀧𑀓𑀢𑀺𑀫𑀗𑁆𑀕𑀮𑀅𑀲𑁆𑀲𑀝𑁆𑀞𑀸𑀦𑀁 𑀲𑀼𑀘𑀺𑀲𑀫𑀢𑀮𑀁 𑀓𑀸𑀭𑁂𑀢𑁆𑀯𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀘 𑀧𑀼𑀭𑀺𑀫𑀦𑀬𑁂𑀦𑁂𑀯 𑀭𑀜𑁆𑀜𑁄 𑀢𑀲𑁆𑀲 𑀆𑀕𑀫𑀦𑀘𑀺𑀦𑁆𑀢𑀦𑀢𑁆𑀣𑀁 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑀺. 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀓𑀢𑀤𑀸𑀦𑀫𑀸𑀦𑀦𑀲𑀓𑁆𑀓𑀸𑀭𑁄 𑀲𑀫𑀸𑀤𑀺𑀦𑁆𑀦𑀲𑀻𑀮𑀩𑁆𑀩𑀢𑁄 𑀧𑀸𑀲𑀸𑀤𑀢𑀮𑁂 𑀲𑀼𑀔𑀦𑀺𑀲𑀺𑀦𑁆𑀦𑁄 𑀧𑀼𑀜𑁆𑀜𑀲𑀫𑁆𑀧𑀢𑁆𑀢𑀺𑀁 𑀲𑀫𑀦𑀼𑀲𑁆𑀲𑀭𑀢𑀺. 𑀅𑀣𑀲𑁆𑀲 𑀧𑀼𑀜𑁆𑀜𑀸𑀦𑀼𑀪𑀸𑀯𑀘𑁄𑀤𑀺𑀢𑁄 𑀲𑀺𑀦𑁆𑀥𑀯𑀓𑀼𑀮𑀢𑁄 𑀯𑀺𑀚𑁆𑀚𑀼𑀮𑀢𑀸𑀯𑀺𑀦𑀤𑁆𑀥𑀲𑀭𑀤𑀓𑀸𑀮𑀲𑁂𑀢𑀯𑀮𑀸𑀳𑀓𑀭𑀸𑀲𑀺𑀲𑀲𑁆𑀲𑀺𑀭𑀻𑀓𑁄 𑀭𑀢𑁆𑀢𑀧𑀸𑀤𑁄 𑀭𑀢𑁆𑀢𑀢𑀼𑀡𑁆𑀟𑁄 𑀘𑀦𑁆𑀤𑀧𑁆𑀧𑀪𑀸𑀧𑀼𑀜𑁆𑀚𑀲𑀤𑀺𑀲𑀲𑀼𑀤𑁆𑀥𑀲𑀺𑀦𑀺𑀤𑁆𑀥𑀖𑀦𑀲𑀁𑀳𑀢𑀲𑀭𑀻𑀭𑁄 𑀓𑀸𑀓𑀕𑀻𑀯𑀸 𑀯𑀺𑀬 𑀇𑀦𑁆𑀤𑀦𑀻𑀮𑀫𑀡𑀺 𑀯𑀺𑀬 𑀘 𑀓𑀸𑀴𑀯𑀡𑁆𑀡𑁂𑀦 𑀲𑀻𑀲𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀓𑀸𑀴𑀲𑀻𑀲𑁄𑀢𑀺 𑀲𑀼𑀝𑁆𑀞𑀼 𑀓𑀧𑁆𑀧𑁂𑀢𑁆𑀯𑀸 𑀞𑀧𑀺𑀢𑁂𑀳𑀺 𑀯𑀺𑀬 𑀫𑀼𑀜𑁆𑀚𑀲𑀤𑀺𑀲𑁂𑀳𑀺 𑀲𑀡𑁆𑀳𑀯𑀝𑁆𑀝𑀉𑀚𑀼𑀕𑀢𑁂𑀳𑀺 𑀓𑁂𑀲𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀼𑀜𑁆𑀚𑀓𑁂𑀲𑁄 𑀯𑁂𑀳𑀸𑀲𑀗𑁆𑀕𑀫𑁄 𑀯𑀮𑀸𑀳𑀓𑁄 𑀦𑀸𑀫 𑀅𑀲𑁆𑀲𑀭𑀸𑀚𑀸 𑀆𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀢𑀺𑀝𑁆𑀞𑀸𑀢𑀺. 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀧𑀦𑁂𑀲 𑀳𑀢𑁆𑀣𑀺𑀭𑀢𑀦𑀁 𑀯𑀺𑀬 𑀆𑀕𑀢𑁄. 𑀲𑁂𑀲𑀁 𑀲𑀩𑁆𑀩𑀁 𑀳𑀢𑁆𑀣𑀺𑀭𑀢𑀦𑁂 ¶ 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀭𑀽𑀧𑀁 𑀅𑀲𑁆𑀲𑀭𑀢𑀦𑀁 𑀲𑀦𑁆𑀥𑀸𑀬 𑀪𑀕𑀯𑀸 𑁋 ‘‘𑀧𑀼𑀦 𑀘 𑀧𑀭’’𑀦𑁆𑀢𑀺𑀆𑀤𑀺𑀫𑀸𑀳.

𑀫𑀡𑀺𑀭𑀢𑀦𑀯𑀡𑁆𑀡𑀦𑀸

𑁨𑁪𑁮. 𑀏𑀯𑀁 𑀧𑀸𑀢𑀼𑀪𑀽𑀢𑀅𑀲𑁆𑀲𑀭𑀢𑀦𑀲𑁆𑀲 𑀧𑀦 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀦𑁄 𑀘𑀢𑀼𑀳𑀢𑁆𑀣𑀸𑀬𑀸𑀫𑀁 𑀲𑀓𑀝𑀦𑀸𑀪𑀺𑀲𑀫𑀧𑀭𑀺𑀡𑀸𑀳𑀁 𑀉𑀪𑁄𑀲𑀼 𑀅𑀦𑁆𑀢𑁂𑀲𑀼 𑀓𑀡𑁆𑀡𑀺𑀓𑀧𑀭𑀺𑀬𑀦𑁆𑀢𑀢𑁄 𑀯𑀺𑀦𑀺𑀕𑁆𑀕𑀢𑁂𑀳𑀺 𑀲𑀼𑀧𑀭𑀺𑀲𑀼𑀤𑁆𑀥𑀫𑀼𑀢𑁆𑀢𑀸𑀓𑀮𑀸𑀧𑁂𑀳𑀺 𑀤𑁆𑀯𑀻𑀳𑀺 𑀓𑀜𑁆𑀘𑀦𑀧𑀤𑀼𑀫𑁂𑀳𑀺 𑀅𑀮𑀗𑁆𑀓𑀢𑀁 𑀘𑀢𑀼𑀭𑀸𑀲𑀻𑀢𑀺𑀫𑀡𑀺𑀲𑀳𑀲𑁆𑀲𑀧𑀭𑀺𑀯𑀸𑀭𑀁 𑀢𑀸𑀭𑀸𑀕𑀡𑀧𑀭𑀺𑀯𑀼𑀢𑀲𑁆𑀲 ¶ 𑀧𑀼𑀡𑁆𑀡𑀘𑀦𑁆𑀤𑀲𑀲𑁆𑀲𑀺𑀭𑀺𑀁 𑀨𑀭𑀫𑀸𑀦𑀁 ¶ 𑀯𑀺𑀬 𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑀢𑁄 𑀫𑀡𑀺𑀭𑀢𑀦𑀁 𑀆𑀕𑀘𑁆𑀙𑀢𑀺. 𑀢𑀲𑁆𑀲𑁂𑀯𑀁 𑀆𑀕𑀢𑀲𑁆𑀲 𑀫𑀼𑀢𑁆𑀢𑀸𑀚𑀸𑀮𑀓𑁂 𑀞𑀧𑁂𑀢𑁆𑀯𑀸 𑀯𑁂𑀴𑀼𑀧𑀭𑀫𑁆𑀧𑀭𑀸𑀬 𑀲𑀝𑁆𑀞𑀺𑀳𑀢𑁆𑀣𑀧𑁆𑀧𑀫𑀸𑀡𑀁 𑀆𑀓𑀸𑀲𑀁 𑀆𑀭𑁄𑀧𑀺𑀢𑀲𑁆𑀲 𑀭𑀢𑁆𑀢𑀺𑀪𑀸𑀕𑁂 𑀲𑀫𑀦𑁆𑀢𑀸 𑀬𑁄𑀚𑀦𑀧𑁆𑀧𑀫𑀸𑀡𑀁 𑀑𑀓𑀸𑀲𑀁 𑀆𑀪𑀸 𑀨𑀭𑀢𑀺, 𑀬𑀸𑀬 𑀲𑀩𑁆𑀩𑁄 𑀲𑁄 𑀑𑀓𑀸𑀲𑁄 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸 𑀯𑀺𑀬 𑀲𑀜𑁆𑀚𑀸𑀢𑀸𑀮𑁄𑀓𑁄 𑀳𑁄𑀢𑀺. 𑀢𑀢𑁄 𑀓𑀲𑁆𑀲𑀓𑀸 𑀓𑀲𑀺𑀓𑀫𑁆𑀫𑀁 𑀯𑀸𑀡𑀺𑀚𑀸 𑀆𑀧𑀡𑀼𑀕𑁆𑀖𑀸𑀝𑀦𑀁 𑀢𑁂 𑀢𑁂 𑀲𑀺𑀧𑁆𑀧𑀺𑀦𑁄 𑀢𑀁 𑀢𑀁 𑀓𑀫𑁆𑀫𑀦𑁆𑀢𑀁 𑀧𑀬𑁄𑀚𑁂𑀦𑁆𑀢𑀺 ‘‘𑀤𑀺𑀯𑀸’’𑀢𑀺 𑀫𑀜𑁆𑀜𑀫𑀸𑀦𑀸. 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲𑀸𑀧𑀺 𑀲𑀩𑁆𑀩𑀁 𑀢𑀁 𑀢𑀣𑁂𑀯 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀼𑀦 𑀘 𑀧𑀭𑀁 𑀆𑀦𑀦𑁆𑀤,…𑀧𑁂… 𑀫𑀡𑀺𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀻’’𑀢𑀺.

𑀇𑀢𑁆𑀣𑀺𑀭𑀢𑀦𑀯𑀡𑁆𑀡𑀦𑀸

𑁨𑁪𑁯. 𑀏𑀯𑀁 𑀧𑀸𑀢𑀼𑀪𑀽𑀢𑀫𑀡𑀺𑀭𑀢𑀦𑀲𑁆𑀲 𑀧𑀦 𑀘𑀓𑁆𑀓𑀯𑀢𑁆𑀢𑀺𑀦𑁄 𑀯𑀺𑀲𑀬𑀲𑀼𑀔𑀯𑀺𑀲𑁂𑀲𑀲𑁆𑀲 𑀯𑀺𑀲𑁂𑀲𑀓𑀸𑀭𑀡𑀁 𑀇𑀢𑁆𑀣𑀺𑀭𑀢𑀦𑀁 𑀧𑀸𑀢𑀼𑀪𑀯𑀢𑀺. 𑀫𑀤𑁆𑀤𑀭𑀸𑀚𑀓𑀼𑀮𑀢𑁄 𑀯𑀸 𑀳𑀺𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀁 𑀆𑀦𑁂𑀦𑁆𑀢𑀺, 𑀉𑀢𑁆𑀢𑀭𑀓𑀼𑀭𑀼𑀢𑁄 𑀯𑀸 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀲𑀬𑀁 𑀆𑀕𑀘𑁆𑀙𑀢𑀺. 𑀅𑀯𑀲𑁂𑀲𑀸 𑀧𑀦𑀲𑁆𑀲𑀸 𑀲𑀫𑁆𑀧𑀢𑁆𑀢𑀺 𑁋 ‘‘𑀧𑀼𑀦 𑀘 𑀧𑀭𑀁, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀇𑀢𑁆𑀣𑀺𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺, 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀸𑀴𑀺𑀬𑀁𑀬𑁂𑀯 𑀆𑀕𑀢𑀸.

𑀢𑀢𑁆𑀣 𑀲𑀡𑁆𑀞𑀸𑀦𑀧𑀸𑀭𑀺𑀧𑀽𑀭𑀺𑀬𑀸 𑀅𑀥𑀺𑀓𑀁 𑀭𑀽𑀧𑀁 𑀅𑀲𑁆𑀲𑀸𑀢𑀺 𑀅𑀪𑀺𑀭𑀽𑀧𑀸. 𑀤𑀺𑀲𑁆𑀲𑀫𑀸𑀦𑀸𑀯 𑀘𑀓𑁆𑀔𑀽𑀦𑀺 𑀧𑀺𑀡𑀬𑀢𑀺, 𑀢𑀲𑁆𑀫𑀸 𑀅𑀜𑁆𑀜𑀁 𑀓𑀺𑀘𑁆𑀘𑀯𑀺𑀓𑁆𑀔𑁂𑀧𑀁 𑀳𑀺𑀢𑁆𑀯𑀸𑀧𑀺 𑀤𑀝𑁆𑀞𑀩𑁆𑀩𑀸𑀢𑀺 𑀤𑀲𑁆𑀲𑀦𑀻𑀬𑀸. 𑀤𑀺𑀲𑁆𑀲𑀫𑀸𑀦𑀸𑀯 𑀲𑁄𑀫𑀦𑀲𑁆𑀲𑀯𑀲𑁂𑀦 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀻𑀢𑀺 𑀧𑀸𑀲𑀸𑀤𑀺𑀓𑀸. 𑀧𑀭𑀫𑀸𑀬𑀸𑀢𑀺 𑀏𑀯𑀁 𑀧𑀲𑀸𑀤𑀸𑀯𑀳𑀢𑁆𑀢𑀸 𑀉𑀢𑁆𑀢𑀫𑀸𑀬. 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬𑀸𑀢𑀺 𑀯𑀡𑁆𑀡𑀲𑀼𑀦𑁆𑀤𑀭𑀢𑀸𑀬. 𑀲𑀫𑀦𑁆𑀦𑀸𑀕𑀢𑀸𑀢𑀺 𑀉𑀧𑁂𑀢𑀸. 𑀅𑀪𑀺𑀭𑀽𑀧𑀸 𑀯𑀸 𑀬𑀲𑁆𑀫𑀸 𑀦𑀸𑀢𑀺𑀤𑀻𑀖𑀸 𑀦𑀸𑀢𑀺𑀭𑀲𑁆𑀲𑀸. 𑀤𑀲𑁆𑀲𑀦𑀻𑀬𑀸 𑀬𑀲𑁆𑀫𑀸 𑀦𑀸𑀢𑀺𑀓𑀺𑀲𑀸 𑀦𑀸𑀢𑀺𑀣𑀽𑀮𑀸. 𑀧𑀸𑀲𑀸𑀤𑀺𑀓𑀸 ¶ 𑀬𑀲𑁆𑀫𑀸 𑀦𑀸𑀢𑀺𑀓𑀸𑀴𑀺𑀓𑀸 𑀦𑀸𑀘𑁆𑀘𑁄𑀤𑀸𑀢𑀸. 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸 𑀬𑀲𑁆𑀫𑀸 𑀅𑀪𑀺𑀓𑁆𑀓𑀦𑁆𑀢𑀸 𑀫𑀸𑀦𑀼𑀲𑀺𑀯𑀡𑁆𑀡𑀁 𑀅𑀧𑁆𑀧𑀢𑁆𑀢𑀸 𑀤𑀺𑀩𑁆𑀩𑀯𑀡𑁆𑀡𑀁. 𑀫𑀦𑀼𑀲𑁆𑀲𑀸𑀦𑀜𑁆𑀳𑀺 𑀯𑀡𑁆𑀡𑀸𑀪𑀸 𑀩𑀳𑀺 𑀦 𑀦𑀺𑀘𑁆𑀙𑀭𑀢𑀺. 𑀤𑁂𑀯𑀸𑀦𑀁 𑀧𑀦 𑀅𑀢𑀺𑀤𑀽𑀭𑀫𑁆𑀧𑀺 𑀦𑀺𑀘𑁆𑀙𑀭𑀢𑀺.

𑀢𑀲𑁆𑀲𑀸 𑀧𑀦 𑀤𑁆𑀯𑀸𑀤𑀲𑀳𑀢𑁆𑀣𑀧𑁆𑀧𑀫𑀸𑀡𑀁 𑀧𑀤𑁂𑀲𑀁 𑀲𑀭𑀻𑀭𑀸𑀪𑀸 𑀑𑀪𑀸𑀲𑁂𑀢𑀺. 𑀦𑀸𑀢𑀺𑀤𑀻𑀖𑀸𑀤𑀻𑀲𑀼 𑀘𑀲𑁆𑀲𑀸 𑀧𑀞𑀫𑀬𑀼𑀕𑀴𑁂𑀦 𑀆𑀭𑁄𑀳𑀲𑀫𑁆𑀧𑀢𑁆𑀢𑀺, 𑀤𑀼𑀢𑀺𑀬𑀬𑀼𑀕𑀴𑁂𑀦 𑀧𑀭𑀺𑀡𑀸𑀳𑀲𑀫𑁆𑀧𑀢𑁆𑀢𑀺, 𑀢𑀢𑀺𑀬𑀬𑀼𑀕𑀴𑁂𑀦 𑀯𑀡𑁆𑀡𑀲𑀫𑁆𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀙𑀳𑀺 𑀯𑀸𑀧𑀺 𑀏𑀢𑁂𑀳𑀺 𑀓𑀸𑀬𑀯𑀺𑀧𑀢𑁆𑀢𑀺𑀬𑀸 𑀅𑀪𑀸𑀯𑁄, 𑀅𑀢𑀺𑀓𑁆𑀓𑀦𑁆𑀢𑀸 𑀫𑀸𑀦𑀼𑀲𑀺𑀯𑀡𑁆𑀡𑀦𑁆𑀢𑀺 𑀇𑀫𑀺𑀦𑀸 𑀓𑀸𑀬𑀲𑀫𑁆𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀢𑀽𑀮𑀧𑀺𑀘𑀼𑀦𑁄 𑀯𑀸 𑀓𑀧𑁆𑀧𑀸𑀲𑀧𑀺𑀘𑀼𑀦𑁄 𑀯𑀸𑀢𑀺 𑀲𑀧𑁆𑀧𑀺𑀫𑀡𑁆𑀟𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑀺𑀢𑀲𑁆𑀲 𑀲𑀢𑀯𑀸𑀭𑀯𑀺𑀳𑀢𑀲𑁆𑀲 𑀢𑀽𑀮𑀧𑀺𑀘𑀼𑀦𑁄 𑀯𑀸 𑀓𑀧𑁆𑀧𑀸𑀲𑀧𑀺𑀘𑀼𑀦𑁄 𑀯𑀸. 𑀲𑀻𑀢𑁂𑀢𑀺 𑀭𑀜𑁆𑀜𑁄 𑀲𑀻𑀢𑀓𑀸𑀮𑁂. 𑀉𑀡𑁆𑀳𑁂𑀢𑀺 𑀭𑀜𑁆𑀜𑁄 𑀉𑀡𑁆𑀳𑀓𑀸𑀮𑁂. 𑀘𑀦𑁆𑀤𑀦𑀕𑀦𑁆𑀥𑁄𑀢𑀺 𑀦𑀺𑀘𑁆𑀘𑀓𑀸𑀮𑀫𑁂𑀯 𑀲𑀼𑀧𑀺𑀲𑀺𑀢𑀲𑁆𑀲 ¶ 𑀅𑀪𑀺𑀦𑀯𑀲𑁆𑀲 𑀘𑀢𑀼𑀚𑁆𑀚𑀸𑀢𑀺𑀲𑀫𑀸𑀬𑁄𑀚𑀺𑀢𑀲𑁆𑀲 ¶ 𑀳𑀭𑀺𑀘𑀦𑁆𑀤𑀦𑀲𑁆𑀲 𑀕𑀦𑁆𑀥𑁄 𑀓𑀸𑀬𑀢𑁄 𑀯𑀸𑀬𑀢𑀺. 𑀉𑀧𑁆𑀧𑀮𑀕𑀦𑁆𑀥𑁄 𑀯𑀸𑀬𑀢𑀻𑀢𑀺 𑀳𑀲𑀺𑀢𑀓𑀣𑀺𑀢𑀓𑀸𑀮𑁂𑀲𑀼 𑀫𑀼𑀔𑀢𑁄 𑀢𑀗𑁆𑀔𑀡𑀁 𑀯𑀺𑀓𑀲𑀺𑀢𑀲𑁆𑀲𑁂𑀯 𑀦𑀻𑀮𑀼𑀧𑁆𑀧𑀮𑀲𑁆𑀲 𑀅𑀢𑀺𑀲𑀼𑀭𑀪𑀺𑀕𑀦𑁆𑀥𑁄 𑀯𑀸𑀬𑀢𑀺.

𑀏𑀯𑀁 𑀭𑀽𑀧𑀲𑀫𑁆𑀨𑀲𑁆𑀲𑀕𑀦𑁆𑀥𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸𑀬 𑀧𑀦𑀲𑁆𑀲𑀸 𑀲𑀭𑀻𑀭𑀲𑀫𑁆𑀧𑀢𑁆𑀢𑀺𑀬𑀸 𑀅𑀦𑀼𑀭𑀽𑀧𑀁 𑀆𑀘𑀸𑀭𑀁 𑀤𑀲𑁆𑀲𑁂𑀢𑀼𑀁 𑀢𑀁 𑀔𑁄 𑀧𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀦𑀺𑀲𑀺𑀦𑁆𑀦𑀸𑀲𑀦𑀢𑁄 𑀅𑀕𑁆𑀕𑀺𑀤𑀟𑁆𑀠𑀸 𑀯𑀺𑀬 𑀧𑀞𑀫𑀫𑁂𑀯 𑀉𑀝𑁆𑀞𑀸𑀢𑀻𑀢𑀺 𑀧𑀼𑀩𑁆𑀩𑀼𑀝𑁆𑀞𑀸𑀬𑀺𑀦𑀻. 𑀢𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑁂 𑀢𑀲𑁆𑀲 𑀢𑀸𑀮𑀯𑀡𑁆𑀝𑁂𑀦 𑀩𑀻𑀚𑀦𑀸𑀤𑀺𑀓𑀺𑀘𑁆𑀘𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀦𑀺𑀧𑀢𑀢𑀺 𑀦𑀺𑀲𑀻𑀤𑀢𑀻𑀢𑀺 𑀧𑀘𑁆𑀙𑀸𑀦𑀺𑀧𑀸𑀢𑀺𑀦𑀻. 𑀓𑀺𑀁 𑀓𑀭𑁄𑀫𑀺, 𑀢𑁂 𑀤𑁂𑀯𑀸𑀢𑀺 𑀯𑀸𑀘𑀸𑀬 𑀓𑀺𑀁-𑀓𑀸𑀭𑀁 𑀧𑀝𑀺𑀲𑀸𑀯𑁂𑀢𑀻𑀢𑀺 𑀓𑀺𑀁 𑀓𑀸𑀭𑀧𑀝𑀺𑀲𑁆𑀲𑀸𑀯𑀺𑀦𑀻. 𑀭𑀜𑁆𑀜𑁄 𑀫𑀦𑀸𑀧𑀫𑁂𑀯 𑀘𑀭𑀢𑀺 𑀓𑀭𑁄𑀢𑀻𑀢𑀺 𑀫𑀦𑀸𑀧𑀘𑀸𑀭𑀺𑀦𑀻. 𑀬𑀁 𑀭𑀜𑁆𑀜𑁄 𑀧𑀺𑀬𑀁 𑀢𑀤𑁂𑀯 𑀯𑀤𑀢𑀻𑀢𑀺 𑀧𑀺𑀬𑀯𑀸𑀤𑀺𑀦𑀻.

𑀇𑀤𑀸𑀦𑀺 𑁋 ‘‘𑀲𑁆𑀯𑀸𑀲𑁆𑀲𑀸 𑀆𑀘𑀸𑀭𑁄 𑀪𑀸𑀯𑀯𑀺𑀲𑀼𑀤𑁆𑀥𑀺𑀬𑀸𑀯, 𑀦 𑀲𑀸𑀞𑁂𑀬𑁆𑀬𑀦𑀸’’𑀢𑀺 𑀤𑀲𑁆𑀲𑁂𑀢𑀼𑀁 𑀢𑀁 𑀔𑁄 𑀧𑀦𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑁄 𑀅𑀢𑀺𑀘𑀭𑀻𑀢𑀺 𑀦 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀘𑀭𑀺, 𑀞𑀧𑁂𑀢𑁆𑀯𑀸 𑀭𑀸𑀚𑀸𑀦𑀁 𑀅𑀜𑁆𑀜𑀁 𑀧𑀼𑀭𑀺𑀲𑀁 𑀘𑀺𑀢𑁆𑀢𑁂𑀦𑀧𑀺 𑀦 𑀧𑀢𑁆𑀣𑁂𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁆𑀣 𑀬𑁂 𑀢𑀲𑁆𑀲𑀸 𑀆𑀤𑀺𑀫𑁆𑀳𑀺 ‘‘𑀅𑀪𑀺𑀭𑀽𑀧𑀸’’𑀢𑀺𑀆𑀤𑀬𑁄, 𑀅𑀦𑁆𑀢𑁂 ‘‘𑀧𑀼𑀩𑁆𑀩𑀼𑀝𑁆𑀞𑀸𑀬𑀺𑀦𑀻’’𑀢𑀺𑀆𑀤𑀬𑁄 𑀕𑀼𑀡𑀸 𑀯𑀼𑀢𑁆𑀢𑀸, 𑀢𑁂 𑀧𑀓𑀢𑀺𑀕𑀼𑀡𑀸 𑀏𑀯. ‘‘𑀅𑀢𑀺𑀓𑁆𑀓𑀦𑁆𑀢𑀸 𑀫𑀸𑀦𑀼𑀲𑀺𑀯𑀡𑁆𑀡’’𑀦𑁆𑀢𑀺𑀆𑀤𑀬𑁄 𑀧𑀦 𑀘𑀓𑁆𑀓𑀯𑀢𑁆𑀢𑀺𑀦𑁄 𑀧𑀼𑀜𑁆𑀜𑀁 𑀉𑀧𑀦𑀺𑀲𑁆𑀲𑀸𑀬 𑀘𑀓𑁆𑀓𑀭𑀢𑀦𑀧𑀸𑀢𑀼𑀪𑀸𑀯𑀢𑁄 𑀧𑀝𑁆𑀞𑀸𑀬 𑀧𑀼𑀭𑀺𑀫𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀪𑀺𑀭𑀽𑀧𑀢𑀸𑀤𑀺𑀓𑀸𑀧𑀺 ¶ 𑀯𑀸 𑀘𑀓𑁆𑀓𑀭𑀢𑀦𑀧𑀸𑀢𑀼𑀪𑀸𑀯𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀸 𑀚𑀸𑀢𑀸. 𑀢𑁂𑀦𑀸𑀳 𑁋 ‘‘𑀏𑀯𑀭𑀽𑀧𑀁 𑀇𑀢𑁆𑀣𑀺𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀻’’𑀢𑀺.

𑀕𑀳𑀧𑀢𑀺𑀭𑀢𑀦𑀯𑀡𑁆𑀡𑀦𑀸

𑁨𑁫𑁦. 𑀏𑀯𑀁 𑀧𑀸𑀢𑀼𑀪𑀽𑀢𑀇𑀢𑁆𑀣𑀺𑀭𑀢𑀦𑀲𑁆𑀲 𑀧𑀦 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀦𑁄 𑀥𑀦𑀓𑀭𑀡𑀻𑀬𑀸𑀦𑀁 𑀓𑀺𑀘𑁆𑀘𑀸𑀦𑀁 𑀬𑀣𑀸𑀲𑀼𑀔𑀁 𑀧𑀯𑀢𑁆𑀢𑀦𑀢𑁆𑀣𑀁 𑀕𑀳𑀧𑀢𑀺𑀭𑀢𑀦𑀁 𑀧𑀸𑀢𑀼𑀪𑀯𑀢𑀺. 𑀲𑁄 𑀧𑀓𑀢𑀺𑀬𑀸𑀯 𑀫𑀳𑀸𑀪𑁄𑀕𑁄, 𑀫𑀳𑀸𑀪𑁄𑀕𑀓𑀼𑀮𑁂 𑀚𑀸𑀢𑁄. 𑀭𑀜𑁆𑀜𑁄 𑀥𑀦𑀭𑀸𑀲𑀺𑀯𑀟𑁆𑀠𑀓𑁄 𑀲𑁂𑀝𑁆𑀞𑀺𑀕𑀳𑀧𑀢𑀺 𑀳𑁄𑀢𑀺. 𑀘𑀓𑁆𑀓𑀭𑀢𑀦𑀸𑀦𑀼𑀪𑀸𑀯𑀲𑀳𑀺𑀢𑀁 𑀧𑀦𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑀚𑀁 𑀤𑀺𑀩𑁆𑀩𑀘𑀓𑁆𑀔𑀼 𑀧𑀸𑀢𑀼𑀪𑀯𑀢𑀺, 𑀬𑁂𑀦 𑀅𑀦𑁆𑀢𑁄𑀧𑀣𑀯𑀺𑀬𑀫𑁆𑀧𑀺 𑀬𑁄𑀚𑀦𑀩𑁆𑀪𑀦𑁆𑀢𑀭𑁂 𑀦𑀺𑀥𑀺𑀁 𑀧𑀲𑁆𑀲𑀢𑀺, 𑀲𑁄 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑀫𑀸𑀦𑀲𑁄 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀥𑀦𑁂𑀦 𑀧𑀯𑀸𑀭𑁂𑀢𑁆𑀯𑀸 𑀲𑀩𑁆𑀩𑀸𑀦𑀺 𑀥𑀦𑀓𑀭𑀡𑀻𑀬𑀸𑀦𑀺 𑀲𑀫𑁆𑀧𑀸𑀤𑁂𑀢𑀺 ¶ . 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲𑀸𑀧𑀺 𑀢𑀣𑁂𑀯 𑀲𑀫𑁆𑀧𑀸𑀤𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀼𑀦 𑀘𑀧𑀭𑀁 𑀆𑀦𑀦𑁆𑀤…𑀧𑁂… 𑀏𑀯𑀭𑀽𑀧𑀁 𑀕𑀳𑀧𑀢𑀺𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀻’’𑀢𑀺.

𑀧𑀭𑀺𑀡𑀸𑀬𑀓𑀭𑀢𑀦𑀯𑀡𑁆𑀡𑀦𑀸

𑁨𑁫𑁧. 𑀏𑀯𑀁 ¶ 𑀧𑀸𑀢𑀼𑀪𑀽𑀢𑀕𑀳𑀧𑀢𑀺𑀭𑀢𑀦𑀲𑁆𑀲 𑀧𑀦 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀲𑀩𑁆𑀩𑀓𑀺𑀘𑁆𑀘𑀲𑀁𑀯𑀺𑀥𑀸𑀦𑀲𑀫𑀢𑁆𑀣𑀁 𑀧𑀭𑀺𑀡𑀸𑀬𑀓𑀭𑀢𑀦𑀁 𑀧𑀸𑀢𑀼𑀪𑀯𑀢𑀺. 𑀲𑁄 𑀭𑀜𑁆𑀜𑁄 𑀚𑁂𑀝𑁆𑀞𑀧𑀼𑀢𑁆𑀢𑁄𑀯 𑀳𑁄𑀢𑀺. 𑀧𑀓𑀢𑀺𑀬𑀸 𑀏𑀯 𑀲𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀯𑀺𑀪𑀸𑀯𑀻. 𑀭𑀜𑁆𑀜𑁄 𑀧𑀼𑀜𑁆𑀜𑀸𑀦𑀼𑀪𑀸𑀯𑀁 𑀦𑀺𑀲𑁆𑀲𑀸𑀬 𑀧𑀦𑀲𑁆𑀲 𑀅𑀢𑁆𑀢𑀦𑁄 𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀧𑀭𑀘𑀺𑀢𑁆𑀢𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀬𑁂𑀦 𑀤𑁆𑀯𑀸𑀤𑀲𑀬𑁄𑀚𑀦𑀸𑀬 𑀭𑀸𑀚𑀧𑀭𑀺𑀲𑀸𑀬 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀭𑀜𑁆𑀜𑁄 𑀳𑀺𑀢𑁂 𑀘 𑀅𑀳𑀺𑀢𑁂 𑀘 𑀯𑀯𑀢𑁆𑀣𑀧𑁂𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺, 𑀲𑁄𑀧𑀺 𑀢𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑀳𑀤𑀬𑁄 𑀭𑀸𑀚𑀸𑀦𑀁 𑀲𑀩𑁆𑀩𑀓𑀺𑀘𑁆𑀘𑀸𑀦𑀼𑀲𑀸𑀲𑀦𑁂𑀦 𑀧𑀯𑀸𑀭𑁂𑀢𑀺. 𑀫𑀳𑀸𑀲𑀼𑀤𑀲𑁆𑀲𑀦𑀫𑁆𑀧𑀺 𑀢𑀣𑁂𑀯 𑀧𑀯𑀸𑀭𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀼𑀦 𑀘𑀧𑀭𑀁…𑀧𑁂… 𑀧𑀭𑀺𑀡𑀸𑀬𑀓𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀻’’𑀢𑀺.

𑀢𑀢𑁆𑀣 𑀞𑀧𑁂𑀢𑀩𑁆𑀩𑀁 𑀞𑀧𑁂𑀢𑀼𑀦𑁆𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑀦𑁆𑀢𑀭𑁂 𑀞𑀧𑁂𑀢𑀩𑁆𑀩𑀁 𑀞𑀧𑁂𑀢𑀼𑀁.

𑀘𑀢𑀼𑀇𑀤𑁆𑀥𑀺𑀲𑀫𑀦𑁆𑀦𑀸𑀕𑀢𑀯𑀡𑁆𑀡𑀦𑀸

𑁨𑁫𑁨. 𑀲𑀫𑀯𑁂𑀧𑀸𑀓𑀺𑀦𑀺𑀬𑀸𑀢𑀺 𑀲𑀫𑀯𑀺𑀧𑀸𑀘𑀦𑀺𑀬𑀸. 𑀕𑀳𑀡𑀺𑀬𑀸𑀢𑀺 𑀓𑀫𑁆𑀫𑀚𑀢𑁂𑀚𑁄𑀥𑀸𑀢𑀼𑀬𑀸. 𑀢𑀢𑁆𑀣 𑀬𑀲𑁆𑀲 𑀪𑀼𑀢𑁆𑀢𑀫𑀢𑁆𑀢𑁄𑀯 𑀆𑀳𑀸𑀭𑁄 𑀚𑀻𑀭𑀢𑀺, 𑀬𑀲𑁆𑀲 𑀯𑀸 ¶ 𑀧𑀦 𑀧𑀼𑀝𑀪𑀢𑁆𑀢𑀁 𑀯𑀺𑀬 𑀢𑀢𑁆𑀣𑁂𑀯 𑀢𑀺𑀝𑁆𑀞𑀢𑀺, 𑀉𑀪𑁄𑀧𑁂𑀢𑁂 𑀦 𑀲𑀫𑀯𑁂𑀧𑀸𑀓𑀺𑀦𑀺𑀬𑀸 𑀲𑀫𑀦𑁆𑀦𑀸𑀕𑀢𑀸. 𑀬𑀲𑁆𑀲 𑀧𑀦 𑀧𑀼𑀦 𑀪𑀢𑁆𑀢𑀓𑀸𑀮𑁂 𑀪𑀢𑁆𑀢𑀙𑀦𑁆𑀤𑁄 𑀉𑀧𑁆𑀧𑀚𑁆𑀚𑀢𑁂𑀯, 𑀅𑀬𑀁 𑀲𑀫𑀯𑁂𑀧𑀸𑀓𑀺𑀦𑀺𑀬𑀸 𑀲𑀫𑀦𑁆𑀦𑀸𑀕𑀢𑁄𑀢𑀺.

𑀥𑀫𑁆𑀫𑀧𑀸𑀲𑀸𑀤𑀧𑁄𑀓𑁆𑀔𑀭𑀡𑀺𑀯𑀡𑁆𑀡𑀦𑀸

𑁨𑁫𑁩. 𑀫𑀸𑀧𑁂𑀲𑀺 𑀔𑁄𑀢𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀚𑀦𑀭𑀸𑀲𑀺𑀁 𑀓𑀸𑀭𑁂𑀢𑁆𑀯𑀸 𑀦 𑀫𑀸𑀧𑁂𑀲𑀺, 𑀭𑀜𑁆𑀜𑁄 𑀧𑀦 𑀲𑀳 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯 𑀪𑀽𑀫𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺 𑀧𑁄𑀓𑁆𑀔𑀭𑀡𑀻𑀲𑀳𑀲𑁆𑀲𑀸𑀦𑀺 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑀸𑀦𑀺 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀤𑁆𑀯𑀻𑀳𑀺 𑀯𑁂𑀤𑀺𑀓𑀸𑀳𑀻𑀢𑀺 𑀏𑀓𑀸𑀬 𑀇𑀝𑁆𑀞𑀓𑀸𑀦𑀁 𑀧𑀭𑀺𑀬𑀦𑁆𑀢𑁂𑀬𑁂𑀯 𑀧𑀭𑀺𑀓𑁆𑀔𑀺𑀢𑁆𑀢𑀸 𑀏𑀓𑀸𑀬 𑀧𑀭𑀺𑀯𑁂𑀡𑀧𑀭𑀺𑀘𑁆𑀙𑁂𑀤𑀧𑀭𑀺𑀬𑀦𑁆𑀢𑁂. 𑀏𑀢𑀤𑀳𑁄𑀲𑀻𑀢𑀺 𑀓𑀲𑁆𑀫𑀸 𑀅𑀳𑁄𑀲𑀺? 𑀏𑀓𑀤𑀺𑀯𑀲𑀁 𑀓𑀺𑀭 𑀦𑀳𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘 𑀕𑀘𑁆𑀙𑀦𑁆𑀢𑀁 𑀫𑀳𑀸𑀚𑀦𑀁 𑀫𑀳𑀸𑀧𑀼𑀭𑀺𑀲𑁄 𑀑𑀮𑁄𑀓𑁂𑀢𑁆𑀯𑀸 𑀇𑀫𑁂 𑀉𑀫𑁆𑀫𑀢𑁆𑀢𑀓𑀯𑁂𑀲𑁂𑀦𑁂𑀯 𑀕𑀘𑁆𑀙𑀦𑁆𑀢𑀺. 𑀲𑀘𑁂 𑀏𑀢𑁂𑀲𑀁 𑀏𑀢𑁆𑀣 𑀧𑀺𑀴𑀦𑁆𑀥𑀦𑀧𑀼𑀧𑁆𑀨𑀸𑀦𑀺 𑀪𑀯𑁂𑀬𑁆𑀬𑀼𑀁, 𑀪𑀤𑁆𑀤𑀓𑀁 𑀲𑀺𑀬𑀸𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺. 𑀢𑀢𑁆𑀣 𑀲𑀩𑁆𑀩𑁄𑀢𑀼𑀓𑀦𑁆𑀢𑀺 ¶ 𑀧𑀼𑀧𑁆𑀨𑀁 𑀦𑀸𑀫 𑀏𑀓𑀲𑁆𑀫𑀺𑀁𑀬𑁂𑀯 𑀉𑀢𑀼𑀫𑁆𑀳𑀺 𑀧𑀼𑀧𑁆𑀨𑀢𑀺. 𑀅𑀳𑀁 𑀧𑀦 𑀢𑀣𑀸 𑀓𑀭𑀺𑀲𑁆𑀲𑀸𑀫𑀺 𑁋 ‘‘𑀬𑀣𑀸 𑀲𑀩𑁆𑀩𑁂𑀲𑀼 𑀉𑀢𑀽𑀲𑀼 𑀧𑀼𑀧𑁆𑀨𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺𑀁. 𑀭𑁄𑀧𑀸𑀧𑁂𑀲𑀻𑀢𑀺 𑀦𑀸𑀦𑀸𑀯𑀡𑁆𑀡𑀉𑀧𑁆𑀧𑀮𑀩𑀻𑀚𑀸𑀤𑀻𑀦𑀺 𑀢𑀢𑁄 𑀢𑀢𑁄 𑀆𑀳𑀭𑀸𑀧𑁂𑀢𑁆𑀯𑀸 𑀦 𑀭𑁄𑀧𑀸𑀧𑁂𑀲𑀺, 𑀲𑀳 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯 𑀧𑀦𑀲𑁆𑀲 𑀲𑀩𑁆𑀩𑀁 𑀇𑀚𑁆𑀛𑀢𑀺. 𑀢𑀁 𑀮𑁄𑀓𑁄 𑀭𑀜𑁆𑀜𑀸 𑀭𑁄𑀧𑀺𑀢𑀦𑁆𑀢𑀺 𑀫𑀜𑁆𑀜𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀭𑁄𑀧𑀸𑀧𑁂𑀲𑀻’’𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀫𑀳𑀸𑀚𑀦𑁄 𑀦𑀸𑀦𑀧𑁆𑀧𑀓𑀸𑀭𑀁 𑀚𑀮𑀚𑀣𑀮𑀚𑀫𑀸𑀮𑀁 𑀧𑀺𑀴𑀦𑁆𑀥𑀺𑀢𑁆𑀯𑀸 𑀦𑀓𑁆𑀔𑀢𑁆𑀢𑀁 𑀓𑀻𑀴𑀫𑀸𑀦𑁄 ¶ 𑀯𑀺𑀬 𑀕𑀘𑁆𑀙𑀢𑀺.

𑁨𑁫𑁪. 𑀅𑀣 𑀭𑀸𑀚𑀸 𑀢𑀢𑁄 𑀉𑀢𑁆𑀢𑀭𑀺𑀧𑀺 𑀚𑀦𑀁 𑀲𑀼𑀔𑀲𑀫𑀧𑁆𑀧𑀺𑀢𑀁 𑀓𑀸𑀢𑀼𑀓𑀸𑀫𑁄 𑁋 ‘‘𑀬𑀁𑀦𑀽𑀦𑀸𑀳𑀁 𑀇𑀫𑀸𑀲𑀁 𑀧𑁄𑀓𑁆𑀔𑀭𑀡𑀻𑀦𑀁 𑀢𑀻𑀭𑁂’’𑀢𑀺𑀆𑀤𑀺𑀦𑀸 𑀚𑀦𑀲𑁆𑀲 𑀲𑀼𑀔𑀯𑀺𑀥𑀸𑀦𑀁 𑀘𑀺𑀦𑁆𑀢𑁂𑀢𑁆𑀯𑀸 𑀲𑀩𑁆𑀩𑀁 𑀅𑀓𑀸𑀲𑀺. 𑀢𑀢𑁆𑀣 𑀦𑁆𑀳𑀸𑀧𑁂𑀲𑀼𑀦𑁆𑀢𑀺 𑀅𑀜𑁆𑀜𑁄 𑀲𑀭𑀻𑀭𑀁 𑀉𑀩𑁆𑀩𑀝𑁆𑀝𑁂𑀲𑀺, 𑀅𑀜𑁆𑀜𑁄 𑀘𑀼𑀡𑁆𑀡𑀸𑀦𑀺 𑀬𑁄𑀚𑁂𑀲𑀺, 𑀅𑀜𑁆𑀜𑁄 𑀢𑀻𑀭𑁂 𑀦𑀳𑀸𑀬𑀦𑁆𑀢𑀲𑁆𑀲 𑀉𑀤𑀓𑀁 𑀆𑀳𑀭𑀺, 𑀅𑀜𑁆𑀜𑁄 𑀯𑀢𑁆𑀣𑀸𑀦𑀺 𑀧𑀝𑀺𑀕𑁆𑀕𑀳𑁂𑀲𑀺 𑀘𑁂𑀯 𑀅𑀤𑀸𑀲𑀺 𑀘.

𑀧𑀝𑁆𑀞𑀧𑁂𑀲𑀺 𑀔𑁄𑀢𑀺 𑀓𑀣𑀁 𑀧𑀝𑁆𑀞𑀧𑁂𑀲𑀺? 𑀇𑀢𑁆𑀣𑀻𑀦𑀜𑁆𑀘 𑀧𑀼𑀭𑀺𑀲𑀸𑀦𑀜𑁆𑀘 𑀅𑀦𑀼𑀘𑁆𑀙𑀯𑀺𑀓𑁂 𑀅𑀮𑀗𑁆𑀓𑀸𑀭𑁂 𑀓𑀸𑀭𑁂𑀢𑁆𑀯𑀸 𑀇𑀢𑁆𑀣𑀺𑀫𑀢𑁆𑀢𑀫𑁂𑀯 𑀢𑀢𑁆𑀣 𑀧𑀭𑀺𑀘𑀸𑀭𑀯𑀲𑁂𑀦 𑀲𑁂𑀲𑀁 𑀲𑀩𑁆𑀩𑀁 𑀧𑀭𑀺𑀘𑁆𑀘𑀸𑀕𑀯𑀲𑁂𑀦 𑀞𑀧𑁂𑀢𑁆𑀯𑀸 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀤𑀸𑀦𑀁 𑀤𑁂𑀢𑀺, 𑀢𑀁 𑀧𑀭𑀺𑀪𑀼𑀜𑁆𑀚𑀣𑀸𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀫𑀳𑀸𑀚𑀦𑁄 𑀧𑁄𑀓𑁆𑀔𑀭𑀡𑀻𑀢𑀻𑀭𑀁 𑀆𑀕𑀦𑁆𑀢𑁆𑀯𑀸 𑀦𑀳𑀢𑁆𑀯𑀸 𑀯𑀢𑁆𑀣𑀸𑀦𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀦𑀸𑀦𑀸𑀕𑀦𑁆𑀥𑁂𑀳𑀺 𑀯𑀺𑀮𑀺𑀢𑁆𑀢𑁄 𑀧𑀺𑀴𑀦𑁆𑀥𑀦𑀯𑀺𑀘𑀺𑀢𑁆𑀢𑀫𑀸𑀮𑁄 𑀤𑀸𑀦𑀕𑁆𑀕𑀁 ¶ 𑀕𑀦𑁆𑀢𑁆𑀯𑀸 𑀅𑀦𑁂𑀓𑀧𑁆𑀧𑀓𑀸𑀭𑁂𑀲𑀼 𑀬𑀸𑀕𑀼𑀪𑀢𑁆𑀢𑀔𑀚𑁆𑀚𑀓𑁂𑀲𑀼 𑀅𑀝𑁆𑀞𑀯𑀺𑀥𑀧𑀸𑀦𑁂𑀲𑀼 𑀘 𑀬𑁄 𑀬𑀁 𑀇𑀘𑁆𑀙𑀢𑀺, 𑀲𑁄 𑀢𑀁 𑀔𑀸𑀤𑀺𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘 𑀦𑀸𑀦𑀸𑀯𑀡𑁆𑀡𑀸𑀦𑀺 𑀔𑁄𑀫𑀲𑀼𑀔𑀼𑀫𑀸𑀦𑀺 𑀯𑀢𑁆𑀣𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀬𑁂𑀲𑀁 𑀢𑀸𑀤𑀺𑀲𑀸𑀦𑀺 𑀅𑀢𑁆𑀣𑀺, 𑀢𑁂 𑀑𑀳𑀸𑀬 𑀕𑀘𑁆𑀙𑀦𑁆𑀢𑀺. 𑀬𑁂𑀲𑀁 𑀧𑀦 𑀦𑀢𑁆𑀣𑀺, 𑀢𑁂 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀳𑀢𑁆𑀣𑀺𑀅𑀲𑁆𑀲𑀬𑀸𑀦𑀸𑀤𑀻𑀲𑀼𑀧𑀺 𑀦𑀺𑀲𑀻𑀤𑀺𑀢𑁆𑀯𑀸 𑀣𑁄𑀓𑀁 𑀯𑀺𑀘𑀭𑀺𑀢𑁆𑀯𑀸 𑀅𑀦𑀢𑁆𑀣𑀺𑀓𑀸 𑀑𑀳𑀸𑀬, 𑀅𑀢𑁆𑀣𑀺𑀓𑀸 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀯𑀭𑀲𑀬𑀦𑁂𑀲𑀼 𑀦𑀺𑀧𑀚𑁆𑀚𑀺𑀢𑁆𑀯𑀸 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀅𑀦𑀢𑁆𑀣𑀺𑀓𑀸 𑀑𑀳𑀸𑀬, 𑀅𑀢𑁆𑀣𑀺𑀓𑀸 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀇𑀢𑁆𑀣𑀻𑀳𑀺𑀧𑀺 𑀲𑀤𑁆𑀥𑀺𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀅𑀦𑀢𑁆𑀣𑀺𑀓𑀸 𑀑𑀳𑀸𑀬, 𑀅𑀢𑁆𑀣𑀺𑀓𑀸 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀲𑀢𑁆𑀢𑀯𑀺𑀥𑀭𑀢𑀦𑀧𑀲𑀸𑀥𑀦𑀸𑀦𑀺 𑀘 𑀧𑀲𑀸𑀥𑁂𑀢𑁆𑀯𑀸𑀧𑀺 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀅𑀦𑀢𑁆𑀣𑀺𑀓𑀸 𑀑𑀳𑀸𑀬, 𑀅𑀢𑁆𑀣𑀺𑀓𑀸 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀢𑀫𑁆𑀧𑀺 𑀤𑀸𑀦𑀁 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀤𑀻𑀬𑀢𑁂𑀯. 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀓𑀸𑀦𑀁 𑀅𑀜𑁆𑀜𑀁 𑀓𑀫𑁆𑀫𑀁 𑀦𑀢𑁆𑀣𑀺, 𑀭𑀜𑁆𑀜𑁄 𑀤𑀸𑀦𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸𑀯 𑀯𑀺𑀘𑀭𑀦𑁆𑀢𑀺.

𑁨𑁫𑁫. 𑀅𑀣 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀅𑀬𑀁 𑀭𑀸𑀚𑀸 𑀏𑀯𑀭𑀽𑀧𑀁 𑀤𑀸𑀦𑀁 𑀤𑀤𑀦𑁆𑀢𑁄𑀧𑀺 ‘𑀫𑀬𑁆𑀳𑀁 𑀢𑀡𑁆𑀟𑀼𑀮𑀸𑀤𑀻𑀦𑀺 𑀯𑀸 𑀔𑀻𑀭𑀸𑀤𑀻𑀦𑀺 𑀯𑀸 𑀤𑁂𑀣𑀸’𑀢𑀺 𑀦 𑀓𑀺𑀜𑁆𑀘𑀺 𑀆𑀳𑀭𑀸𑀧𑁂𑀢𑀺, 𑀦 𑀔𑁄 𑀧𑀦 𑀅𑀫𑁆𑀳𑀸𑀓𑀁 𑁋 ‘𑀭𑀸𑀚𑀸 𑀆𑀳𑀭𑀸𑀧𑁂𑀢𑀻’𑀢𑀺 𑀢𑀼𑀡𑁆𑀳𑀻𑀫𑀸𑀲𑀺𑀢𑀼𑀁 𑀧𑀢𑀺𑀭𑀽𑀧’’𑀦𑁆𑀢𑀺 𑀢𑁂 𑀩𑀳𑀼𑀁 𑀲𑀸𑀧𑀢𑁂𑀬𑁆𑀬𑀁 𑀲𑀁𑀳𑀭𑀺𑀢𑁆𑀯𑀸 𑀭𑀜𑁆𑀜𑁄 𑀉𑀧𑀦𑀸𑀫𑁂𑀲𑀼𑀁. 𑀢𑀲𑁆𑀫𑀸 𑁋 ‘‘𑀅𑀣 𑀔𑁄, 𑀆𑀦𑀦𑁆𑀤, 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸’’𑀢𑀺𑀆𑀤𑀺𑀫𑀸𑀳. 𑀏𑀯𑀁 𑀲𑀫𑀘𑀺𑀦𑁆𑀢𑁂𑀲𑀼𑀦𑁆𑀢𑀺 𑀓𑀲𑁆𑀫𑀸 𑀏𑀯𑀁 𑀘𑀺𑀦𑁆𑀢𑁂𑀲𑀼𑀁? 𑀓𑀲𑁆𑀲𑀘𑀺 𑀖𑀭𑀢𑁄 𑀅𑀧𑁆𑀧𑀁 𑀆𑀪𑀢𑀁, 𑀓𑀲𑁆𑀲𑀘𑀺 𑀩𑀳𑀼. 𑀢𑀲𑁆𑀫𑀺𑀁 𑀧𑀝𑀺𑀲𑀁𑀳𑀭𑀺𑀬𑀫𑀸𑀦𑁂 ¶ 𑁋 ‘‘𑀓𑀺𑀁 𑀢𑀯𑁂𑀯 𑀖𑀭𑀢𑁄 𑀲𑀼𑀦𑁆𑀤𑀭𑀁 𑀆𑀪𑀢𑀁, 𑀦 𑀫𑀬𑁆𑀳𑀁 𑀖𑀭𑀢𑁄, 𑀓𑀺𑀁 𑀢𑀯𑁂𑀯 𑀖𑀭𑀢𑁄 𑀩𑀳𑀼 ¶ , 𑀦 𑀫𑀬𑁆𑀳’’𑀦𑁆𑀢𑀺 𑀏𑀯𑀁 𑀓𑀮𑀳𑀲𑀤𑁆𑀤𑁄𑀧𑀺 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀲𑁄 𑀫𑀸 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺 𑀏𑀯𑀁 𑀲𑀫𑀘𑀺𑀦𑁆𑀢𑁂𑀲𑀼𑀁.

𑁨𑁫𑁬. 𑀏𑀳𑀺 𑀢𑁆𑀯𑀁 𑀲𑀫𑁆𑀫𑀸𑀢𑀺 𑀏𑀳𑀺 𑀢𑁆𑀯𑀁 𑀯𑀬𑀲𑁆𑀲. 𑀥𑀫𑁆𑀫𑀁 𑀦𑀸𑀫 𑀧𑀸𑀲𑀸𑀤𑀦𑁆𑀢𑀺 𑀧𑀸𑀲𑀸𑀤𑀲𑁆𑀲 𑀦𑀸𑀫𑀁 𑀆𑀭𑁄𑀧𑁂𑀢𑁆𑀯𑀸𑀯 𑀆𑀡𑀸𑀧𑁂𑀲𑀺. 𑀯𑀺𑀲𑁆𑀲𑀓𑀫𑁆𑀫𑁄 𑀧𑀦 𑀓𑀻𑀯 𑀫𑀳𑀦𑁆𑀢𑁄 𑀤𑁂𑀯 𑀧𑀸𑀲𑀸𑀤𑁄 𑀳𑁄𑀢𑀽𑀢𑀺 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀤𑀻𑀖𑀢𑁄 𑀬𑁄𑀚𑀦𑀁 𑀯𑀺𑀢𑁆𑀣𑀸𑀭𑀢𑁄 𑀅𑀟𑁆𑀠𑀬𑁄𑀚𑀦𑀁 𑀲𑀩𑁆𑀩𑀭𑀢𑀦𑀫𑀬𑁄𑀯 𑀳𑁄𑀢𑀽𑀢𑀺 𑀯𑀼𑀢𑁆𑀢𑁂𑀧𑀺 ‘𑀏𑀯𑀁 𑀳𑁄𑀢𑀼, 𑀪𑀤𑁆𑀤𑀁 𑀢𑀯 𑀯𑀘𑀦’𑀦𑁆𑀢𑀺 𑀢𑀲𑁆𑀲 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀥𑀫𑁆𑀫𑀭𑀸𑀚𑀸𑀦𑀁 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸 𑀫𑀸𑀧𑁂𑀲𑀺. 𑀢𑀢𑁆𑀣 𑀏𑀯𑀁 𑀪𑀤𑁆𑀤𑀁 𑀢𑀯𑀸𑀢𑀺 𑀔𑁄 𑀆𑀦𑀦𑁆𑀤𑀸𑀢𑀺 𑀏𑀯𑀁 𑀪𑀤𑁆𑀤𑀁 𑀢𑀯 𑀇𑀢𑀺 𑀔𑁄 𑀆𑀦𑀦𑁆𑀤. 𑀧𑀝𑀺𑀲𑁆𑀲𑀼𑀢𑁆𑀯𑀸𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸, 𑀯𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀼𑀡𑁆𑀳𑀻𑀪𑀸𑀯𑁂𑀦𑀸𑀢𑀺 𑀲𑀫𑀡𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀓𑀭𑀡𑁄𑀓𑀸𑀲𑁄 ¶ 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀇𑀘𑁆𑀙𑀦𑁆𑀢𑁄 𑀢𑀼𑀡𑁆𑀳𑀻𑀪𑀸𑀯𑁂𑀦 𑀅𑀥𑀺𑀯𑀸𑀲𑁂𑀲𑀺. 𑀲𑀸𑀭𑀫𑀬𑁄𑀢𑀺 𑀘𑀦𑁆𑀤𑀦𑀲𑀸𑀭𑀫𑀬𑁄.

𑁨𑁫𑁭. 𑀤𑁆𑀯𑀻𑀳𑀺 𑀯𑁂𑀤𑀺𑀓𑀸𑀳𑀻𑀢𑀺 𑀏𑀢𑁆𑀣 𑀏𑀓𑀸 𑀯𑁂𑀤𑀺𑀓𑀸 𑀧𑀦𑀲𑁆𑀲 𑀉𑀡𑁆𑀳𑀻𑀲𑀫𑀢𑁆𑀣𑀓𑁂 𑀅𑀳𑁄𑀲𑀺, 𑀏𑀓𑀸 𑀳𑁂𑀝𑁆𑀞𑀸 𑀧𑀭𑀺𑀘𑁆𑀙𑁂𑀤𑀫𑀢𑁆𑀣𑀓𑁂.

𑁨𑁫𑁮. 𑀤𑀼𑀤𑁆𑀤𑀺𑀓𑁆𑀔𑁄 𑀅𑀳𑁄𑀲𑀻𑀢𑀺 𑀤𑀼𑀉𑀤𑁆𑀤𑀺𑀓𑁆𑀔𑁄, 𑀧𑀪𑀸𑀲𑀫𑁆𑀧𑀢𑁆𑀢𑀺𑀬𑀸 𑀤𑀼𑀤𑁆𑀤𑀲𑁄𑀢𑀺 𑀅𑀢𑁆𑀣𑁄. 𑀫𑀼𑀲𑀢𑀻𑀢𑀺 𑀳𑀭𑀢𑀺 𑀨𑀦𑁆𑀤𑀸𑀧𑁂𑀢𑀺 𑀦𑀺𑀘𑁆𑀘𑀮𑀪𑀸𑀯𑁂𑀦 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀤𑁂𑀢𑀺. 𑀯𑀺𑀤𑁆𑀥𑁂𑀢𑀺 𑀉𑀩𑁆𑀩𑀺𑀤𑁆𑀥𑁂, 𑀫𑁂𑀖𑀯𑀺𑀕𑀫𑁂𑀦 𑀤𑀽𑀭𑀻𑀪𑀽𑀢𑁂𑀢𑀺 𑀅𑀢𑁆𑀣𑁄. 𑀤𑁂𑀯𑁂𑀢𑀺 𑀆𑀓𑀸𑀲𑁂.

𑁨𑁫𑁯. 𑀫𑀸𑀧𑁂𑀲𑀺 𑀔𑁄𑀢𑀺 𑀅𑀳𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑁄𑀓𑁆𑀔𑀭𑀡𑀺𑀁 𑀫𑀸𑀧𑁂𑀫𑀺, 𑀢𑀼𑀫𑁆𑀳𑀸𑀓𑀁 𑀖𑀭𑀸𑀦𑀺 𑀪𑀺𑀦𑁆𑀤𑀣𑀸𑀢𑀺 𑀦 𑀏𑀯𑀁 𑀓𑀸𑀭𑁂𑀢𑁆𑀯𑀸 𑀫𑀸𑀧𑁂𑀲𑀺. 𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦𑁂𑀯 𑀧𑀦𑀲𑁆𑀲 𑀪𑀽𑀫𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀢𑀣𑀸𑀭𑀽𑀧𑀸 𑀧𑁄𑀓𑁆𑀔𑀭𑀡𑀻 𑀅𑀳𑁄𑀲𑀺. 𑀢𑁂 𑀲𑀩𑁆𑀩𑀓𑀸𑀫𑁂𑀳𑀻𑀢𑀺 𑀲𑀩𑁆𑀩𑁂𑀳𑀺 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀯𑀢𑁆𑀣𑀽𑀳𑀺, 𑀲𑀫𑀡𑁂 𑀲𑀫𑀡𑀧𑀭𑀺𑀓𑁆𑀔𑀸𑀭𑁂𑀳𑀺, 𑀩𑁆𑀭𑀸𑀳𑁆𑀫𑀡𑁂 𑀩𑁆𑀭𑀸𑀳𑁆𑀫𑀡𑀧𑀭𑀺𑀓𑁆𑀔𑀸𑀭𑁂𑀳𑀺 𑀲𑀦𑁆𑀢𑀧𑁆𑀧𑁂𑀲𑀻𑀢𑀺.

𑀧𑀞𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀛𑀸𑀦𑀲𑀫𑁆𑀧𑀢𑁆𑀢𑀺𑀯𑀡𑁆𑀡𑀦𑀸

𑁨𑁬𑁦. 𑀫𑀳𑀺𑀤𑁆𑀥𑀺𑀓𑁄𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦𑁂𑀯 𑀘𑀢𑀼𑀭𑀸𑀲𑀻𑀢𑀺𑀧𑁄𑀓𑁆𑀔𑀭𑀡𑀻𑀲𑀳𑀲𑁆𑀲𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀲𑀗𑁆𑀔𑀸𑀢𑀸𑀬 𑀫𑀳𑀢𑀺𑀬𑀸 ¶ 𑀇𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀫𑀳𑀸𑀦𑀼𑀪𑀸𑀯𑁄𑀢𑀺 𑀢𑁂𑀲𑀁𑀬𑁂𑀯 𑀅𑀦𑀼𑀪𑀯𑀺𑀢𑀩𑁆𑀩𑀸𑀦𑀁 𑀫𑀳𑀦𑁆𑀢𑀢𑀸𑀬 𑀫𑀳𑀸𑀦𑀼𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀢𑀲𑁆𑀲 𑁋 ‘‘𑀓𑀢𑀫𑁂𑀲𑀁 𑀢𑀺𑀡𑁆𑀡’’𑀦𑁆𑀢𑀺 𑀅𑀢𑁆𑀣𑁄. 𑀤𑀸𑀦𑀲𑁆𑀲𑀸𑀢𑀺 𑀲𑀫𑁆𑀧𑀢𑁆𑀢𑀺𑀧𑀭𑀺𑀘𑁆𑀘𑀸𑀕𑀲𑁆𑀲. 𑀤𑀫𑀲𑁆𑀲𑀸𑀢𑀺 𑀆𑀴𑀯𑀓𑀲𑀼𑀢𑁆𑀢𑁂 𑀧𑀜𑁆𑀜𑀸 𑀤𑀫𑁄𑀢𑀺 𑀆𑀕𑀢𑁄. 𑀇𑀥 𑀅𑀢𑁆𑀢𑀸𑀦𑀁 ¶ 𑀤𑀫𑁂𑀦𑁆𑀢𑁂𑀦 𑀓𑀢𑀁 𑀉𑀧𑁄𑀲𑀣𑀓𑀫𑁆𑀫𑀁. 𑀲𑀁𑀬𑀫𑀲𑁆𑀲𑀸𑀢𑀺 𑀲𑀻𑀮𑀲𑁆𑀲.

𑀩𑁄𑀥𑀺𑀲𑀢𑁆𑀢𑀧𑀼𑀩𑁆𑀩𑀬𑁄𑀕𑀯𑀡𑁆𑀡𑀦𑀸

𑀇𑀥 𑀞𑀢𑁆𑀯𑀸 𑀧𑀦𑀲𑁆𑀲 𑀧𑀼𑀩𑁆𑀩𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀭𑀸𑀚𑀸 𑀓𑀺𑀭 𑀧𑀼𑀩𑁆𑀩𑁂 𑀕𑀳𑀧𑀢𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀥𑀭𑀫𑀸𑀦𑀓𑀲𑁆𑀲𑁂𑀯 𑀓𑀲𑁆𑀲𑀧𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑁂 𑀏𑀓𑁄 𑀣𑁂𑀭𑁄 𑀅𑀭𑀜𑁆𑀜𑁂 𑀯𑀸𑀲𑀁 𑀯𑀲𑀢𑀺, 𑀩𑁄𑀥𑀺𑀲𑀢𑁆𑀢𑁄 𑀅𑀢𑁆𑀢𑀦𑁄 ¶ 𑀓𑀫𑁆𑀫𑁂𑀦 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄 𑀣𑁂𑀭𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀣𑁂𑀭𑀲𑁆𑀲 𑀦𑀺𑀲𑀚𑁆𑀚𑀦𑀝𑁆𑀞𑀸𑀦𑀘𑀗𑁆𑀓𑀫𑀦𑀝𑁆𑀞𑀸𑀦𑀸𑀦𑀺 𑀑𑀮𑁄𑀓𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀇𑀥𑁂𑀯, 𑀪𑀦𑁆𑀢𑁂, 𑀅𑀬𑁆𑀬𑁄 𑀯𑀲𑀢𑀻’’𑀢𑀺? 𑀆𑀫, 𑀉𑀧𑀸𑀲𑀓𑀸𑀢𑀺 𑀲𑀼𑀢𑁆𑀯𑀸 𑁋 ‘‘𑀇𑀥𑁂𑀯 𑀅𑀬𑁆𑀬𑀲𑁆𑀲 𑀧𑀡𑁆𑀡𑀲𑀸𑀮𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀧𑀳𑀸𑀬 𑀤𑀩𑁆𑀩𑀲𑀫𑁆𑀪𑀸𑀭𑀁 𑀓𑁄𑀝𑁆𑀝𑁂𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀓𑀢𑁆𑀯𑀸 𑀙𑀸𑀤𑁂𑀢𑁆𑀯𑀸 𑀪𑀺𑀢𑁆𑀢𑀺𑀬𑁄 𑀫𑀢𑁆𑀢𑀺𑀓𑀸𑀬 𑀮𑀺𑀫𑁆𑀧𑀺𑀢𑁆𑀯𑀸 𑀤𑁆𑀯𑀸𑀭𑀁 𑀬𑁄𑀚𑁂𑀢𑁆𑀯𑀸 𑀓𑀝𑁆𑀞𑀢𑁆𑀣𑀭𑀡𑀁 𑀓𑀢𑁆𑀯𑀸 𑁋 ‘‘𑀓𑀭𑀺𑀲𑁆𑀲𑀢𑀺 𑀦𑀼 𑀔𑁄 𑀧𑀭𑀺𑀪𑁄𑀕𑀁, 𑀦 𑀓𑀭𑀺𑀲𑁆𑀲𑀢𑀻’’𑀢𑀺 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀣𑁂𑀭𑁄 𑀅𑀦𑁆𑀢𑁄𑀕𑀸𑀫𑀢𑁄 𑀆𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀓𑀝𑁆𑀞𑀢𑁆𑀣𑀭𑀡𑁂 𑀦𑀺𑀲𑀻𑀤𑀺. 𑀉𑀧𑀸𑀲𑀓𑁄𑀧𑀺 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀲𑀫𑀻𑀧𑁂 𑀦𑀺𑀲𑀺𑀦𑁆𑀦𑁄 ‘‘𑀨𑀸𑀲𑀼𑀓𑀸, 𑀪𑀦𑁆𑀢𑁂, 𑀧𑀡𑁆𑀡𑀲𑀸𑀮𑀸’’𑀢𑀺 𑀧𑀼𑀘𑁆𑀙𑀺. 𑀨𑀸𑀲𑀼𑀓𑀸, 𑀪𑀤𑁆𑀤𑀫𑀼𑀔, 𑀧𑀩𑁆𑀩𑀚𑀺𑀢𑀲𑀸𑀭𑀼𑀧𑁆𑀧𑀸𑀢𑀺. 𑀯𑀲𑀺𑀲𑁆𑀲𑀣, 𑀪𑀦𑁆𑀢𑁂, 𑀇𑀥𑀸𑀢𑀺? 𑀆𑀫, 𑀉𑀧𑀸𑀲𑀓𑀸𑀢𑀺, 𑀲𑁄 𑀅𑀥𑀺𑀯𑀸𑀲𑀦𑀸𑀓𑀸𑀭𑁂𑀦 𑀯𑀲𑀺𑀲𑁆𑀲𑀢𑀻𑀢𑀺 𑀜𑀢𑁆𑀯𑀸 𑀦𑀺𑀩𑀤𑁆𑀥𑀁 𑀫𑀬𑁆𑀳𑀁 𑀖𑀭𑀤𑁆𑀯𑀸𑀭𑀁 𑀆𑀕𑀦𑁆𑀢𑀩𑁆𑀩𑀦𑁆𑀢𑀺 𑀧𑀝𑀺𑀚𑀸𑀦𑀸𑀧𑁂𑀢𑁆𑀯𑀸 𑁋 ‘‘𑀏𑀓𑀁 𑀫𑁂, 𑀪𑀦𑁆𑀢𑁂, 𑀯𑀭𑀁 𑀤𑁂𑀣𑀸’’𑀢𑀺 𑀆𑀳. 𑀅𑀢𑀺𑀓𑁆𑀓𑀦𑁆𑀢𑀯𑀭𑀸, 𑀉𑀧𑀸𑀲𑀓, 𑀧𑀩𑁆𑀩𑀚𑀺𑀢𑀸𑀢𑀺. 𑀪𑀦𑁆𑀢𑁂, 𑀬𑀜𑁆𑀘 𑀓𑀧𑁆𑀧𑀢𑀺, 𑀬𑀜𑁆𑀘 𑀅𑀦𑀯𑀚𑁆𑀚𑀦𑁆𑀢𑀺. 𑀯𑀤𑁂𑀳𑀺 𑀉𑀧𑀸𑀲𑀓𑀸𑀢𑀺. 𑀪𑀦𑁆𑀢𑁂, 𑀦𑀺𑀩𑀤𑁆𑀥𑀯𑀲𑀦𑀝𑁆𑀞𑀸𑀦𑁂 𑀦𑀸𑀫 𑀫𑀦𑀼𑀲𑁆𑀲𑀸 𑀫𑀗𑁆𑀕𑀮𑁂 𑀯𑀸 𑀅𑀫𑀗𑁆𑀕𑀮𑁂 𑀯𑀸 𑀆𑀕𑀫𑀦𑀁 𑀇𑀘𑁆𑀙𑀦𑁆𑀢𑀺, 𑀅𑀦𑀸𑀕𑀘𑁆𑀙𑀦𑁆𑀢𑀲𑁆𑀲 𑀓𑀼𑀚𑁆𑀛𑀦𑁆𑀢𑀺. 𑀢𑀲𑁆𑀫𑀸 𑀅𑀜𑁆𑀜𑀁 𑀦𑀺𑀫𑀦𑁆𑀢𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸𑀧𑀺 𑀫𑀬𑁆𑀳𑀁 𑀖𑀭𑀁 𑀧𑀯𑀺𑀲𑀺𑀢𑁆𑀯𑀸𑀯 𑀪𑀢𑁆𑀢𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑀩𑁆𑀩𑀦𑁆𑀢𑀺. 𑀣𑁂𑀭𑁄 𑀅𑀥𑀺𑀯𑀸𑀲𑁂𑀲𑀺.

𑀲𑁄 𑀧𑀡𑁆𑀡𑀲𑀸𑀮𑀸𑀬 𑀓𑀝𑀲𑀸𑀝𑀓𑀁 𑀧𑀢𑁆𑀣𑀭𑀺𑀢𑁆𑀯𑀸 𑀫𑀜𑁆𑀘𑀧𑀻𑀞𑀁 𑀧𑀜𑁆𑀜𑀧𑁂𑀲𑀺, 𑀅𑀧𑀲𑁆𑀲𑁂𑀦𑀁 𑀦𑀺𑀓𑁆𑀔𑀺𑀧𑀺, 𑀧𑀸𑀤𑀓𑀣𑀮𑀺𑀓𑀁 𑀞𑀧𑁂𑀲𑀺, 𑀧𑁄𑀓𑁆𑀔𑀭𑀡𑀺𑀁 𑀔𑀡𑀺, 𑀘𑀗𑁆𑀓𑀫𑀁 𑀓𑀢𑁆𑀯𑀸 𑀯𑀸𑀮𑀺𑀓𑀁 𑀑𑀓𑀺𑀭𑀺, 𑀫𑀺𑀕𑁂 𑀆𑀕𑀦𑁆𑀢𑁆𑀯𑀸 𑀪𑀺𑀢𑁆𑀢𑀺𑀁 𑀖𑀁𑀲𑀺𑀢𑁆𑀯𑀸 𑀫𑀢𑁆𑀢𑀺𑀓𑀁 𑀧𑀸𑀢𑁂𑀦𑁆𑀢𑁂 𑀤𑀺𑀲𑁆𑀯𑀸 𑀓𑀡𑁆𑀝𑀓𑀯𑀢𑀺𑀁 𑀧𑀭𑀺𑀓𑁆𑀔𑀺𑀧𑀺. 𑀧𑁄𑀓𑁆𑀔𑀭𑀡𑀺𑀁 𑀑𑀢𑀭𑀺𑀢𑁆𑀯𑀸 𑀉𑀤𑀓𑀁 𑀆𑀴𑀼𑀮𑀺𑀓𑀁 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 𑀅𑀦𑁆𑀢𑁄 𑀧𑀸𑀲𑀸𑀡𑁂𑀳𑀺 𑀘𑀺𑀦𑀺𑀢𑁆𑀯𑀸 𑀩𑀳𑀺 𑀓𑀡𑁆𑀝𑀓𑀯𑀢𑀺𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁄𑀯𑀢𑀺𑀧𑀭𑀺𑀬𑀦𑁆𑀢𑁂 𑀢𑀸𑀮𑀧𑀦𑁆𑀢𑀺𑀬𑁄 𑀭𑁄𑀧𑁂𑀢𑀺, 𑀫𑀳𑀸𑀘𑀗𑁆𑀓𑀫𑁂 𑀲𑀫𑁆𑀫𑀝𑁆𑀞𑀝𑁆𑀞𑀸𑀦𑀁 𑀆𑀴𑀼𑀮𑁂𑀦𑁆𑀢𑁂 𑀤𑀺𑀲𑁆𑀯𑀸 𑀘𑀗𑁆𑀓𑀫𑀫𑁆𑀧𑀺 𑀯𑀢𑀺𑀬𑀸 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁄𑀯𑀢𑀺𑀧𑀭𑀺𑀬𑀦𑁆𑀢𑁂 𑀢𑀸𑀮𑀧𑀦𑁆𑀢𑀺𑀁 𑀭𑁄𑀧𑁂𑀲𑀺. 𑀏𑀯𑀁 ¶ 𑀆𑀯𑀸𑀲𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 ¶ 𑀣𑁂𑀭𑀲𑁆𑀲 𑀢𑀺𑀘𑀻𑀯𑀭𑀁, 𑀧𑀺𑀡𑁆𑀟𑀧𑀸𑀢𑀁, 𑀑𑀲𑀥𑀁, 𑀧𑀭𑀺𑀪𑁄𑀕𑀪𑀸𑀚𑀦𑀁, 𑀆𑀭𑀓𑀡𑁆𑀝𑀓𑀁, 𑀧𑀺𑀧𑁆𑀨𑀮𑀺𑀓𑀁, 𑀦𑀔𑀘𑁆𑀙𑁂𑀤𑀦𑀁, 𑀲𑀽𑀘𑀺𑀁, 𑀓𑀢𑁆𑀢𑀭𑀬𑀝𑁆𑀞𑀺𑀁, 𑀉𑀧𑀸𑀳𑀦𑀁, 𑀉𑀤𑀓𑀢𑀼𑀫𑁆𑀩𑀁, 𑀙𑀢𑁆𑀢𑀁, 𑀤𑀻𑀧𑀓𑀧𑀮𑁆𑀮𑀓𑀁, 𑀫𑀮𑀳𑀭𑀡𑀺𑀁. 𑀧𑀭𑀺𑀲𑁆𑀲𑀸𑀯𑀦𑀁, 𑀥𑀫𑀓𑀭𑀡𑀁, 𑀧𑀢𑁆𑀢𑀁, 𑀣𑀸𑀮𑀓𑀁, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀧𑀩𑁆𑀩𑀚𑀺𑀢𑀸𑀦𑀁 𑀧𑀭𑀺𑀪𑁄𑀕𑀚𑀸𑀢𑀁, 𑀲𑀩𑁆𑀩𑀁 𑀅𑀤𑀸𑀲𑀺. 𑀣𑁂𑀭𑀲𑁆𑀲 𑀩𑁄𑀥𑀺𑀲𑀢𑁆𑀢𑁂𑀦 𑀅𑀤𑀺𑀦𑁆𑀦𑀧𑀭𑀺𑀓𑁆𑀔𑀸𑀭𑁄 𑀦𑀸𑀫 𑀦𑀸𑀳𑁄𑀲𑀺. 𑀲𑁄 𑀲𑀻𑀮𑀸𑀦𑀺 𑀭𑀓𑁆𑀔𑀦𑁆𑀢𑁄 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑁄 𑀬𑀸𑀯𑀚𑀻𑀯𑀁 ¶ 𑀣𑁂𑀭𑀁 𑀉𑀧𑀝𑁆𑀞𑀳𑀺. 𑀣𑁂𑀭𑁄 𑀢𑀢𑁆𑀣𑁂𑀯 𑀯𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀩𑁄𑀥𑀺𑀲𑀢𑁆𑀢𑁄𑀧𑀺 𑀬𑀸𑀯𑀢𑀸𑀬𑀼𑀓𑀁 𑀧𑀼𑀜𑁆𑀜𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀘𑁆𑀙𑀦𑁆𑀢𑁄 𑀓𑀼𑀲𑀸𑀯𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀭𑀸𑀚𑀸 𑀅𑀳𑁄𑀲𑀺.

‘‘𑀏𑀯𑀁 𑀦𑀸𑀢𑀺𑀫𑀳𑀦𑁆𑀢𑀫𑁆𑀧𑀺, 𑀧𑀼𑀜𑁆𑀜𑀁 𑀆𑀬𑀢𑀦𑁂 𑀓𑀢𑀁;

𑀫𑀳𑀸𑀯𑀺𑀧𑀸𑀓𑀁 𑀳𑁄𑀢𑀻𑀢𑀺, 𑀓𑀢𑁆𑀢𑀩𑁆𑀩𑀁 𑀢𑀁 𑀯𑀺𑀪𑀸𑀯𑀺𑀦𑀸’’.

𑀫𑀳𑀸𑀯𑀺𑀬𑀽𑀳𑀦𑁆𑀢𑀺 𑀭𑀚𑀢𑀫𑀬𑀁 𑀫𑀳𑀸𑀓𑀽𑀝𑀸𑀕𑀸𑀭𑀁. 𑀢𑀢𑁆𑀣 𑀯𑀲𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀅𑀕𑀫𑀸𑀲𑀺, 𑀏𑀢𑁆𑀢𑀸𑀯𑀢𑀸 𑀓𑀸𑀫𑀯𑀺𑀢𑀓𑁆𑀓𑀸𑀢𑀺 𑀓𑀸𑀫𑀯𑀺𑀢𑀓𑁆𑀓 𑀢𑀬𑀸 𑀏𑀢𑁆𑀢𑀸𑀯𑀢𑀸 𑀦𑀺𑀯𑀢𑁆𑀢𑀺𑀢𑀩𑁆𑀩𑀁, 𑀇𑀢𑁄 𑀧𑀭𑀁 𑀢𑀼𑀬𑁆𑀳𑀁 𑀅𑀪𑀽𑀫𑀺, 𑀇𑀤𑀁 𑀛𑀸𑀦𑀸𑀕𑀸𑀭𑀁 𑀦𑀸𑀫, 𑀦𑀬𑀺𑀤𑀁 𑀢𑀬𑀸 𑀲𑀤𑁆𑀥𑀺𑀁 𑀯𑀲𑀦𑀝𑁆𑀞𑀸𑀦𑀦𑁆𑀢𑀺 𑀏𑀯𑀁 𑀢𑀬𑁄 𑀯𑀺𑀢𑀓𑁆𑀓𑁂 𑀓𑀽𑀝𑀸𑀕𑀸𑀭𑀤𑁆𑀯𑀸𑀭𑁂𑀬𑁂𑀯 𑀦𑀺𑀯𑀢𑁆𑀢𑁂𑀲𑀺.

𑁨𑁬𑁧. 𑀧𑀞𑀫𑀚𑁆𑀛𑀸𑀦𑀦𑁆𑀢𑀺𑀆𑀤𑀻𑀲𑀼 𑀯𑀺𑀲𑀼𑀁 𑀓𑀲𑀺𑀡𑀧𑀭𑀺𑀓𑀫𑁆𑀫𑀓𑀺𑀘𑁆𑀘𑀁 𑀦𑀸𑀫 𑀦𑀢𑁆𑀣𑀺. 𑀦𑀻𑀮𑀓𑀲𑀺𑀡𑁂𑀦 𑀅𑀢𑁆𑀣𑁂 𑀲𑀢𑀺 𑀦𑀻𑀮𑀫𑀡𑀺𑀁, 𑀧𑀻𑀢𑀓𑀲𑀺𑀡𑁂𑀦 𑀅𑀢𑁆𑀣𑁂 𑀲𑀢𑀺 𑀲𑀼𑀯𑀡𑁆𑀡𑀁, 𑀮𑁄𑀳𑀺𑀢𑀓𑀲𑀺𑀡𑁂𑀦 𑀅𑀢𑁆𑀣𑁂 𑀲𑀢𑀺 𑀭𑀢𑁆𑀢𑀫𑀡𑀺𑀁, 𑀑𑀤𑀸𑀢𑀓𑀲𑀺𑀡𑁂𑀦 𑀅𑀢𑁆𑀣𑁂 𑀲𑀢𑀺 𑀭𑀚𑀢𑀦𑁆𑀢𑀺 𑀑𑀮𑁄𑀓𑀺𑀢𑀑𑀮𑁄𑀓𑀺𑀢𑀝𑁆𑀞𑀸𑀦𑁂 𑀓𑀲𑀺𑀡𑀫𑁂𑀯 𑀧𑀜𑁆𑀜𑀸𑀬𑀢𑀺.

𑁨𑁬𑁨. 𑀫𑁂𑀢𑁆𑀢𑀸𑀲𑀳𑀕𑀢𑁂𑀦𑀸𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀫𑁆𑀧𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀫𑁂𑀯. 𑀇𑀢𑀺 𑀧𑀸𑀴𑀺𑀬𑀁 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺, 𑀘𑀢𑁆𑀢𑀸𑀭𑀺 𑀅𑀧𑁆𑀧𑀫𑀜𑁆𑀜𑀸𑀦𑁂𑀯 𑀯𑀼𑀢𑁆𑀢𑀸𑀦𑀺. 𑀫𑀳𑀸𑀧𑀼𑀭𑀺𑀲𑁄 𑀧𑀦 𑀲𑀩𑁆𑀩𑀸𑀧𑀺 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄, 𑀧𑀜𑁆𑀘 𑀅𑀪𑀺𑀜𑁆𑀜𑀸𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀸𑀤𑀺𑀯𑀲𑁂𑀦 𑀘𑀼𑀤𑁆𑀤𑀲𑀳𑀸𑀓𑀸𑀭𑁂𑀳𑀺 𑀲𑀫𑀸𑀧𑀢𑁆𑀢𑀺𑀬𑁄 𑀧𑀯𑀺𑀲𑀦𑁆𑀢𑁄 𑀫𑀥𑀼𑀧𑀝𑀮𑀁 𑀧𑀯𑀺𑀝𑁆𑀞𑀪𑀫𑀭𑁄 𑀫𑀥𑀼𑀭𑀲𑁂𑀦 𑀯𑀺𑀬 𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦𑁂𑀯 𑀬𑀸𑀧𑁂𑀢𑀺.

𑀘𑀢𑀼𑀭𑀸𑀲𑀻𑀢𑀺𑀦𑀕𑀭𑀲𑀳𑀲𑁆𑀲𑀸𑀤𑀺𑀯𑀡𑁆𑀡𑀦𑀸

𑁨𑁬𑁩. 𑀓𑀼𑀲𑀸𑀯𑀢𑀻𑀭𑀸𑀚𑀥𑀸𑀦𑀺𑀧𑁆𑀧𑀫𑀼𑀔𑀸𑀦𑀻𑀢𑀺 ¶ 𑀓𑀼𑀲𑀸𑀯𑀢𑀻 𑀭𑀸𑀚𑀥𑀸𑀦𑀻 𑀢𑁂𑀲𑀁 𑀦𑀕𑀭𑀸𑀦𑀁 𑀧𑀫𑀼𑀔𑀸 𑀲𑀩𑁆𑀩𑀲𑁂𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀪𑀢𑁆𑀢𑀸𑀪𑀺𑀳𑀸𑀭𑁄𑀢𑀺 ¶ 𑀅𑀪𑀺𑀳𑀭𑀺𑀢𑀩𑁆𑀩𑀪𑀢𑁆𑀢𑀁.

𑁨𑁬𑁪. 𑀯𑀲𑁆𑀲𑀲𑀢𑀲𑁆𑀲 ¶ 𑀯𑀲𑁆𑀲𑀲𑀢𑀲𑁆𑀲𑀸𑀢𑀺 𑀓𑀲𑁆𑀫𑀸 𑀏𑀯𑀁 𑀘𑀺𑀦𑁆𑀢𑁂𑀲𑀺? 𑀢𑁂𑀲𑀁 𑀲𑀤𑁆𑀤𑁂𑀦 𑀉𑀓𑁆𑀓𑀡𑁆𑀞𑀺𑀢𑁆𑀯𑀸, ‘‘𑀲𑀫𑀸𑀧𑀦𑁆𑀦𑀲𑁆𑀲 𑀲𑀤𑁆𑀤𑁄 𑀓𑀡𑁆𑀝𑀓𑁄’’𑀢𑀺 (𑀅. 𑀦𑀺. 𑁧𑁦.𑁭𑁨) 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀲𑀤𑁆𑀤𑁂𑀦 𑀉𑀓𑁆𑀓𑀡𑁆𑀞𑀺𑀢𑁄 𑀫𑀳𑀸𑀧𑀼𑀭𑀺𑀲𑁄. 𑀅𑀣 𑀓𑀲𑁆𑀫𑀸 𑀫𑀸 𑀆𑀕𑀘𑁆𑀙𑀦𑁆𑀢𑀽𑀢𑀺 𑀦 𑀯𑀤𑀢𑀺? 𑀇𑀤𑀸𑀦𑀺 𑀭𑀸𑀚𑀸 𑀦 𑀧𑀲𑁆𑀲𑀢𑀻𑀢𑀺 𑀦𑀺𑀩𑀤𑁆𑀥𑀯𑀢𑁆𑀢𑀁 𑀦 𑀮𑀪𑀺𑀲𑁆𑀲𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀸 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺 𑀦 𑀯𑀤𑀢𑀺.

𑀲𑀼𑀪𑀤𑁆𑀤𑀸𑀤𑁂𑀯𑀺𑀉𑀧𑀲𑀗𑁆𑀓𑀫𑀦𑀯𑀡𑁆𑀡𑀦𑀸

𑁨𑁬𑁫. 𑀏𑀢𑀤𑀳𑁄𑀲𑀻𑀢𑀺 𑀓𑀤𑀸 𑀏𑀢𑀁 𑀅𑀳𑁄𑀲𑀺. 𑀭𑀜𑁆𑀜𑁄 𑀓𑀸𑀮𑀗𑁆𑀓𑀺𑀭𑀺𑀬𑀤𑀺𑀯𑀲𑁂. 𑀢𑀤𑀸 𑀓𑀺𑀭 𑀤𑁂𑀯𑀢𑀸 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀭𑀸𑀚𑀸 𑀅𑀦𑀸𑀣𑀓𑀸𑀮𑀗𑁆𑀓𑀺𑀭𑀺𑀬𑀁 𑀫𑀸 𑀓𑀭𑁄𑀢𑀼, 𑀑𑀭𑁄𑀥𑁂𑀳𑀺 𑀩𑀳𑀽𑀳𑀺 𑀥𑀻𑀢𑀽𑀳𑀺 𑀧𑀼𑀢𑁆𑀢𑁂𑀳𑀺 𑀧𑀭𑀺𑀯𑀸𑀭𑀺𑀢𑁄𑀯 𑀓𑀭𑁄𑀢𑀽’’𑀢𑀺. 𑀅𑀣 𑀤𑁂𑀯𑀺𑀁 𑀆𑀯𑀝𑁆𑀝𑁂𑀢𑁆𑀯𑀸 𑀢𑀲𑁆𑀲𑀸 𑀏𑀯𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀼𑀁. 𑀧𑀻𑀢𑀸𑀦𑀺 𑀯𑀢𑁆𑀣𑀸𑀦𑀻𑀢𑀺 𑀢𑀸𑀦𑀺 𑀓𑀺𑀭 𑀧𑀓𑀢𑀺𑀬𑀸 𑀭𑀜𑁆𑀜𑁄 𑀫𑀦𑀸𑀧𑀸𑀦𑀺, 𑀢𑀲𑁆𑀫𑀸 𑀢𑀸𑀦𑀺 𑀧𑀸𑀭𑀼𑀧𑀣𑀸𑀢𑀺 𑀆𑀳. 𑀏𑀢𑁆𑀣𑁂𑀯 𑀤𑁂𑀯𑀺 𑀢𑀺𑀝𑁆𑀞𑀸𑀢𑀺 𑀤𑁂𑀯𑀺 𑀇𑀫𑀁 𑀛𑀸𑀦𑀸𑀕𑀸𑀭𑀁 𑀦𑀸𑀫 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀯𑀲𑀦𑀝𑁆𑀞𑀸𑀦𑀁 𑀦 𑀳𑁄𑀢𑀺, 𑀛𑀸𑀦𑀭𑀢𑀺𑀯𑀺𑀦𑁆𑀤𑀦𑀝𑁆𑀞𑀸𑀦𑀁 𑀫𑀫, 𑀫𑀸 𑀇𑀥 𑀧𑀸𑀯𑀺𑀲𑀻𑀢𑀺.

𑁨𑁬𑁬. 𑀏𑀢𑀤𑀳𑁄𑀲𑀻𑀢𑀺 𑀮𑁄𑀓𑁂 𑀲𑀢𑁆𑀢𑀸 𑀦𑀸𑀫 𑀫𑀭𑀡𑀸𑀲𑀦𑁆𑀦𑀓𑀸𑀮𑁂 𑀅𑀢𑀺𑀯𑀺𑀬 𑀯𑀺𑀭𑁄𑀘𑀦𑁆𑀢𑀺, 𑀢𑁂𑀦𑀲𑁆𑀲 𑀭𑀜𑁆𑀜𑁄 𑀯𑀺𑀧𑁆𑀧𑀲𑀦𑁆𑀦𑀇𑀦𑁆𑀤𑁆𑀭𑀺𑀬𑀪𑀸𑀯𑀁 𑀤𑀺𑀲𑁆𑀯𑀸 𑀏𑀯𑀁 𑀅𑀳𑁄𑀲𑀺, 𑀢𑀢𑁄 𑀫𑀸 𑀭𑀜𑁆𑀜𑁄 𑀓𑀸𑀮𑀗𑁆𑀓𑀺𑀭𑀺𑀬𑀸 𑀅𑀳𑁄𑀲𑀻𑀢𑀺 𑀢𑀲𑁆𑀲 𑀓𑀸𑀮𑀗𑁆𑀓𑀺𑀭𑀺𑀬𑀁 𑀅𑀦𑀺𑀘𑁆𑀙𑀫𑀸𑀦𑀸 𑀲𑀫𑁆𑀧𑀢𑀺 𑀕𑀼𑀡𑀫𑀲𑁆𑀲 𑀓𑀣𑀬𑀺𑀢𑁆𑀯𑀸 𑀢𑀺𑀝𑁆𑀞𑀫𑀸𑀦𑀸𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀇𑀫𑀸𑀦𑀺 𑀢𑁂 𑀤𑁂𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀙𑀦𑁆𑀤𑀁 𑀚𑀦𑁂𑀳𑀻𑀢𑀺 𑀧𑁂𑀫𑀁 𑀉𑀧𑁆𑀧𑀸𑀤𑁂𑀳𑀺, 𑀭𑀢𑀺𑀁 𑀓𑀭𑁄𑀳𑀺. 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀦𑁆𑀢𑀺 𑀚𑀻𑀯𑀺𑀢𑁂 𑀲𑀸𑀧𑁂𑀓𑁆𑀔𑀁, 𑀆𑀮𑀬𑀁, 𑀢𑀡𑁆𑀳𑀁 𑀓𑀭𑁄𑀳𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀔𑁄 𑀫𑀁 𑀢𑁆𑀯𑀁 𑀤𑁂𑀯𑀻𑀢𑀺 ‘‘𑀫𑀬𑀁 𑀔𑁄, 𑀤𑁂𑀯, 𑀇𑀢𑁆𑀣𑀺𑀬𑁄 𑀦𑀸𑀫 𑀧𑀩𑁆𑀩𑀚𑀺𑀢𑀸𑀦𑀁 𑀉𑀧𑀘𑀸𑀭𑀓𑀣𑀁 𑀦 𑀚𑀸𑀦𑀸𑀫, 𑀓𑀣𑀁 𑀯𑀤𑀸𑀫 𑀫𑀳𑀸𑀭𑀸𑀚𑀸’’𑀢𑀺 𑀭𑀸𑀚𑀸𑀦𑀁 ‘‘𑀧𑀩𑁆𑀩𑀚𑀺𑀢𑁄 𑀅𑀬’’𑀦𑁆𑀢𑀺 𑀫𑀜𑁆𑀜𑀫𑀸𑀦𑀸𑀬 𑀤𑁂𑀯𑀺𑀬𑀸 𑀯𑀼𑀢𑁆𑀢𑁂 𑁋 ‘‘𑀏𑀯𑀁 𑀔𑁄 𑀫𑀁, 𑀢𑁆𑀯𑀁 𑀤𑁂𑀯𑀺, 𑀲𑀫𑀼𑀤𑀸𑀘𑀭𑀸𑀳𑀻’’𑀢𑀺𑀆𑀤𑀺𑀫𑀸𑀳. 𑀕𑀭𑀳𑀺𑀢𑀸𑀢𑀺 𑀩𑀼𑀤𑁆𑀥𑁂𑀳𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺 𑀲𑀸𑀯𑀓𑁂𑀳𑀺 𑀅𑀜𑁆𑀜𑁂𑀳𑀺 𑀘 𑀧𑀡𑁆𑀟𑀺𑀢𑁂𑀳𑀺 𑀩𑀳𑀼𑀲𑁆𑀲𑀼𑀢𑁂𑀳𑀺 𑀕𑀭𑀳𑀺𑀢𑀸. 𑀓𑀺𑀁 𑀓𑀸𑀭𑀡𑀸? 𑀲𑀸𑀧𑁂𑀓𑁆𑀔𑀓𑀸𑀮𑀓𑀺𑀭𑀺𑀬𑀸 ¶ 𑀳𑀺 𑀅𑀢𑁆𑀢𑀦𑁄𑀬𑁂𑀯 𑀕𑁂𑀳𑁂 𑀬𑀓𑁆𑀔𑀓𑀼𑀓𑁆𑀓𑀼𑀭𑀅𑀚𑀕𑁄𑀡𑀫𑀳𑀺𑀁𑀲𑀫𑀽𑀲𑀺𑀓𑀓𑀼𑀓𑁆𑀓𑀼𑀝𑀊𑀓𑀸𑀫𑀗𑁆𑀕𑀼𑀮𑀸𑀤𑀺𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀦𑀓𑀸𑀭𑀡𑀁 𑀳𑁄𑀢𑀺.

𑁨𑁬𑁮. 𑀅𑀣 ¶ 𑀔𑁄, 𑀆𑀦𑀦𑁆𑀤, 𑀲𑀼𑀪𑀤𑁆𑀤𑀸 𑀤𑁂𑀯𑀻 𑀅𑀲𑁆𑀲𑀽𑀦𑀺 𑀧𑀼𑀜𑁆𑀙𑀺𑀢𑁆𑀯𑀸𑀢𑀺 𑀤𑁂𑀯𑀻 𑀏𑀓𑀫𑀦𑁆𑀢𑀁 𑀕𑀦𑁆𑀢𑁆𑀯𑀸 𑀭𑁄𑀤𑀺𑀢𑁆𑀯𑀸 𑀓𑀦𑁆𑀤𑀺𑀢𑁆𑀯𑀸 𑀅𑀲𑁆𑀲𑀽𑀦𑀺 𑀧𑀼𑀜𑁆𑀙𑀺𑀢𑁆𑀯𑀸 𑀏𑀢𑀤𑀯𑁄𑀘.

𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑀫𑀯𑀡𑁆𑀡𑀦𑀸

𑁨𑁬𑁯. 𑀕𑀳𑀧𑀢𑀺𑀲𑁆𑀲 𑀯𑀸𑀢𑀺 𑀓𑀲𑁆𑀫𑀸 ¶ 𑀆𑀳? 𑀢𑁂𑀲𑀁 𑀓𑀺𑀭 𑀲𑁄𑀡𑀲𑁂𑀝𑁆𑀞𑀺𑀧𑀼𑀢𑁆𑀢𑀸𑀤𑀻𑀦𑀁 𑀯𑀺𑀬 𑀫𑀳𑀢𑀻 𑀲𑀫𑁆𑀧𑀢𑁆𑀢𑀺 𑀳𑁄𑀢𑀺, 𑀲𑁄𑀡𑀲𑁆𑀲 𑀓𑀺𑀭 𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀏𑀓𑀸 𑀪𑀢𑁆𑀢𑀧𑀸𑀢𑀺 𑀤𑁆𑀯𑁂 𑀲𑀢𑀲𑀳𑀲𑁆𑀲𑀸𑀦𑀺 𑀅𑀕𑁆𑀖𑀢𑀺. 𑀇𑀢𑀺 𑀢𑁂𑀲𑀁 𑀢𑀸𑀤𑀺𑀲𑀁 𑀪𑀢𑁆𑀢𑀁 𑀪𑀼𑀢𑁆𑀢𑀸𑀦𑀁 𑀫𑀼𑀳𑀼𑀢𑁆𑀢𑀁 𑀪𑀢𑁆𑀢𑀲𑀫𑁆𑀫𑀤𑁄 𑀪𑀢𑁆𑀢𑀫𑀼𑀘𑁆𑀙𑀸 𑀪𑀢𑁆𑀢𑀓𑀺𑀮𑀫𑀣𑁄 𑀳𑁄𑀢𑀺.

𑁨𑁭𑁧. 𑀬𑀁 𑀢𑁂𑀦 𑀲𑀫𑀬𑁂𑀦 𑀅𑀚𑁆𑀛𑀸𑀯𑀲𑀸𑀫𑀻𑀢𑀺 𑀬𑀢𑁆𑀣 𑀯𑀲𑀸𑀫𑀺, 𑀢𑀁 𑀏𑀓𑀁𑀬𑁂𑀯 𑀦𑀕𑀭𑀁 𑀳𑁄𑀢𑀺, 𑀅𑀯𑀲𑁂𑀲𑁂𑀲𑀼 𑀧𑀼𑀢𑁆𑀢𑀥𑀻𑀢𑀸𑀤𑀬𑁄 𑀘𑁂𑀯 𑀤𑀸𑀲𑀫𑀦𑀼𑀲𑁆𑀲𑀸 𑀘 𑀯𑀲𑀺𑀁𑀲𑀼. 𑀧𑀸𑀲𑀸𑀤𑀓𑀽𑀝𑀸𑀕𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀮𑁆𑀮𑀗𑁆𑀓𑀸𑀤𑀻𑀲𑀼𑀧𑀺 𑀏𑀓𑀁𑀬𑁂𑀯 𑀧𑀮𑁆𑀮𑀗𑁆𑀓𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀲𑁂𑀲𑀸 𑀧𑀼𑀢𑁆𑀢𑀸𑀤𑀻𑀦𑀁 𑀧𑀭𑀺𑀪𑁄𑀕𑀸 𑀳𑁄𑀦𑁆𑀢𑀺. 𑀇𑀢𑁆𑀣𑀻𑀲𑀼𑀧𑀺 𑀏𑀓𑀸𑀯 𑀧𑀘𑁆𑀘𑀼𑀧𑀝𑁆𑀞𑀸𑀢𑀺, 𑀲𑁂𑀲𑀸 𑀧𑀭𑀺𑀯𑀸𑀭𑀫𑀢𑁆𑀢𑀸 𑀳𑁄𑀦𑁆𑀢𑀺, 𑀧𑀭𑀺𑀤𑀳𑀸𑀫𑀻𑀢𑀺 𑀏𑀓𑀫𑁂𑀯 𑀤𑀼𑀲𑁆𑀲𑀬𑀼𑀕𑀁 𑀦𑀺𑀯𑀸𑀲𑁂𑀫𑀺, 𑀲𑁂𑀲𑀸𑀦𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀸𑀦𑀁 𑀅𑀲𑀻𑀢𑀺𑀲𑀳𑀲𑁆𑀲𑀸𑀥𑀺𑀓𑀸𑀦𑀁 𑀲𑁄𑀴𑀲𑀦𑁆𑀦𑀁 𑀧𑀼𑀭𑀺𑀲𑀲𑀢𑀲𑀳𑀲𑁆𑀲𑀸𑀦𑀁 𑀳𑁄𑀦𑁆𑀢𑀺. 𑀪𑀼𑀜𑁆𑀚𑀸𑀫𑀻𑀢𑀺 𑀧𑀭𑀫𑀧𑁆𑀧𑀫𑀸𑀡𑁂𑀦 𑀦𑀸𑀴𑀺𑀓𑁄𑀤𑀦𑀫𑀢𑁆𑀢𑀁 𑀪𑀼𑀜𑁆𑀚𑀸𑀫𑀺, 𑀲𑁂𑀲𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀸𑀦𑀁 𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑀸𑀥𑀺𑀓𑀸𑀦𑀁 𑀅𑀝𑁆𑀞𑀦𑁆𑀦𑀁 𑀧𑀼𑀭𑀺𑀲𑀲𑀢𑀲𑀳𑀲𑁆𑀲𑀸𑀦𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀓𑀣𑀸𑀮𑀺𑀧𑀸𑀓𑁄 𑀳𑀺 𑀤𑀲𑀦𑁆𑀦𑀁 𑀚𑀦𑀸𑀦𑀁 𑀧𑀳𑁄𑀢𑀺.

𑀏𑀢𑀸𑀦𑀺 𑀧𑀦 𑀘𑀢𑀼𑀭𑀸𑀲𑀻𑀢𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 𑀘𑁂𑀯 𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀺 𑀘 𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺 𑀘 𑀏𑀓𑀺𑀲𑁆𑀲𑀸𑀬𑁂𑀯 𑀧𑀡𑁆𑀡𑀲𑀸𑀮𑀸𑀬 𑀦𑀺𑀲𑁆𑀲𑀦𑁆𑀤𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀺. 𑀘𑀢𑀼𑀭𑀸𑀲𑀻𑀢𑀺 𑀧𑀮𑁆𑀮𑀗𑁆𑀓𑀲𑀳𑀲𑁆𑀲𑀸𑀦𑀺 𑀦𑀺𑀧𑀚𑁆𑀚𑀦𑀢𑁆𑀣𑀸𑀬 𑀤𑀺𑀦𑁆𑀦𑀫𑀜𑁆𑀘𑀓𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀺. 𑀘𑀢𑀼𑀭𑀸𑀲𑀻𑀢𑀺 𑀳𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀅𑀲𑁆𑀲𑀲𑀳𑀲𑁆𑀲𑀸𑀦𑀺 𑀭𑀣𑀲𑀳𑀲𑁆𑀲𑀸𑀦𑀺 𑀦𑀺𑀲𑀻𑀤𑀦𑀢𑁆𑀣𑀸𑀬 𑀤𑀺𑀦𑁆𑀦𑀧𑀻𑀞𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀺. 𑀘𑀢𑀼𑀭𑀸𑀲𑀻𑀢𑀺 𑀫𑀡𑀺𑀲𑀳𑀲𑁆𑀲𑀸𑀦𑀺 𑀏𑀓𑀤𑀻𑀧𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀺. 𑀘𑀢𑀼𑀭𑀸𑀲𑀻𑀢𑀺 𑀧𑁄𑀓𑁆𑀔𑀭𑀡𑀻𑀲𑀳𑀲𑁆𑀲𑀸𑀦𑀺 𑀏𑀓𑀧𑁄𑀓𑁆𑀔𑀭𑀡𑀺𑀬𑀸 𑀦𑀺𑀲𑁆𑀲𑀦𑁆𑀤𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀺. 𑀘𑀢𑀼𑀭𑀸𑀲𑀻𑀢𑀺 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀧𑀼𑀢𑁆𑀢𑀲𑀳𑀲𑁆𑀲𑀸𑀦𑀺 𑀕𑀳𑀧𑀢𑀺𑀲𑀳𑀲𑁆𑀲𑀸𑀦𑀺 𑀧𑀭𑀺𑀪𑁄𑀕𑀪𑀸𑀚𑀦𑀧𑀢𑁆𑀢𑀣𑀸𑀮𑀓 𑀥𑀫𑀓𑀭𑀡 𑀧𑀭𑀺𑀲𑁆𑀲𑀸𑀯𑀦 𑀆𑀭𑀓𑀡𑁆𑀝𑀓 𑀧𑀺𑀧𑁆𑀨𑀮𑀓 𑀦𑀔𑀘𑁆𑀙𑁂𑀤𑀦 𑀓𑀼𑀜𑁆𑀘𑀺𑀓𑀓𑀡𑁆𑀡𑀫𑀮𑀳𑀭𑀡𑀻 𑀧𑀸𑀤𑀓𑀣𑀮𑀺𑀓 𑀉𑀧𑀸𑀳𑀦 𑀙𑀢𑁆𑀢 𑀓𑀢𑁆𑀢𑀭𑀬𑀝𑁆𑀞𑀺𑀤𑀸𑀦𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀺. 𑀘𑀢𑀼𑀭𑀸𑀲𑀻𑀢𑀺 𑀥𑁂𑀦𑀼𑀲𑀳𑀲𑁆𑀲𑀸𑀦𑀺 𑀕𑁄𑀭𑀲𑀤𑀸𑀦𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀺. 𑀘𑀢𑀼𑀭𑀸𑀲𑀻𑀢𑀺 𑀯𑀢𑁆𑀣𑀓𑁄𑀝𑀺𑀲𑀳𑀲𑁆𑀲𑀸𑀦𑀺 ¶ 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀤𑀸𑀦𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀺 ¶ . 𑀘𑀢𑀼𑀭𑀸𑀲𑀻𑀢𑀺 𑀣𑀸𑀮𑀺𑀧𑀸𑀓𑀲𑀳𑀲𑁆𑀲𑀸𑀦𑀺 𑀪𑁄𑀚𑀦𑀤𑀸𑀦𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀦𑀺𑀩𑁆𑀩𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁨𑁭𑁨. 𑀏𑀯𑀁 𑀪𑀕𑀯𑀸 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀲𑀫𑁆𑀧𑀢𑁆𑀢𑀺𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀢𑁆𑀯𑀸 𑀲𑀩𑁆𑀩𑀁 𑀢𑀁 𑀤𑀸𑀭𑀓𑀸𑀦𑀁 𑀧𑀁𑀲𑁆𑀯𑀸𑀕𑀸𑀭𑀓𑀻𑀴𑀦𑀁 ¶ 𑀯𑀺𑀬 𑀤𑀲𑁆𑀲𑁂𑀦𑁆𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑀓𑁂 𑀦𑀺𑀧𑀦𑁆𑀦𑁄𑀯 𑀧𑀲𑁆𑀲𑀸𑀦𑀦𑁆𑀤𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀧𑀭𑀺𑀡𑀢𑀸𑀢𑀺 𑀧𑀓𑀢𑀺𑀯𑀺𑀚𑀳𑀦𑁂𑀦 𑀦𑀺𑀩𑁆𑀩𑀼𑀢𑀧𑀤𑀻𑀧𑁄 𑀯𑀺𑀬 𑀅𑀧𑀜𑁆𑀜𑀢𑁆𑀢𑀺𑀓𑀪𑀸𑀯𑀁 𑀕𑀢𑀸. 𑀏𑀯𑀁 𑀅𑀦𑀺𑀘𑁆𑀘𑀸 𑀔𑁄, 𑀆𑀦𑀦𑁆𑀤, 𑀲𑀗𑁆𑀔𑀸𑀭𑀸𑀢𑀺 𑀏𑀯𑀁 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀸.

𑀏𑀢𑁆𑀢𑀸𑀯𑀢𑀸 𑀪𑀕𑀯𑀸 𑀬𑀣𑀸 𑀦𑀸𑀫 𑀧𑀼𑀭𑀺𑀲𑁄 𑀲𑀢𑀳𑀢𑁆𑀣𑀼𑀩𑁆𑀩𑁂𑀥𑁂 𑀘𑀫𑁆𑀧𑀓𑀭𑀼𑀓𑁆𑀔𑁂 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀅𑀪𑀺𑀭𑀼𑀳𑀺𑀢𑁆𑀯𑀸 𑀘𑀫𑁆𑀧𑀓𑀧𑀼𑀧𑁆𑀨𑀁 𑀆𑀤𑀸𑀬 𑀦𑀺𑀲𑁆𑀲𑁂𑀡𑀺𑀁 𑀫𑀼𑀜𑁆𑀘𑀦𑁆𑀢𑁄 𑀑𑀢𑀭𑁂𑀬𑁆𑀬, 𑀏𑀯𑀫𑁂𑀯 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀦𑁆𑀢𑁄 𑀯𑀺𑀬 𑀅𑀦𑁂𑀓𑀯𑀲𑁆𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀼𑀩𑁆𑀩𑁂𑀥𑀁 𑀫𑀳𑀸𑀲𑀼𑀤𑀲𑁆𑀲𑀦𑀲𑀫𑁆𑀧𑀢𑁆𑀢𑀺𑀁 𑀆𑀭𑀼𑀬𑁆𑀳 𑀲𑀫𑁆𑀧𑀢𑁆𑀢𑀺𑀫𑀢𑁆𑀣𑀓𑁂 𑀞𑀺𑀢𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀆𑀤𑀸𑀬 𑀦𑀺𑀲𑁆𑀲𑁂𑀡𑀺𑀁 𑀫𑀼𑀜𑁆𑀘𑀦𑁆𑀢𑁄 𑀯𑀺𑀬 𑀑𑀢𑀺𑀡𑁆𑀡𑁄. 𑀢𑁂𑀦𑁂𑀯 𑀧𑀼𑀩𑁆𑀩𑁂 𑀯𑀲𑀪𑀭𑀸𑀚𑀸 𑀤𑀻𑀖𑀪𑀸𑀡𑀓𑀢𑁆𑀣𑁂𑀭𑀸𑀦𑀁 𑀮𑁄𑀳𑀧𑀸𑀲𑀸𑀤𑀲𑁆𑀲 𑀧𑀸𑀘𑀻𑀦𑀧𑀲𑁆𑀲𑁂 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀁 𑀇𑀫𑀁 𑀲𑀼𑀢𑁆𑀢𑀁 𑀲𑀚𑁆𑀛𑀸𑀬𑀦𑁆𑀢𑀸𑀦𑀁 𑀲𑀼𑀢𑁆𑀯𑀸 𑁋 ‘‘𑀓𑀺𑀁, 𑀪𑁄, 𑀫𑀬𑁆𑀳𑀁 𑀅𑀬𑁆𑀬𑀓𑁂𑀦 𑀏𑀢𑁆𑀣 𑀯𑀼𑀢𑁆𑀢𑀁, 𑀅𑀢𑁆𑀢𑀦𑁄 𑀔𑀸𑀤𑀺𑀢𑀧𑀻𑀢𑀝𑁆𑀞𑀸𑀦𑁂 𑀲𑀫𑁆𑀧𑀢𑁆𑀢𑀺𑀫𑁂𑀯 𑀓𑀣𑁂𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑁋 ‘‘𑀏𑀯𑀁 𑀅𑀦𑀺𑀘𑁆𑀘𑀸 𑀔𑁄, 𑀆𑀦𑀦𑁆𑀤, 𑀲𑀗𑁆𑀔𑀸𑀭𑀸’’𑀢𑀺 𑀯𑀼𑀢𑁆𑀢𑀓𑀸𑀮𑁂 ‘‘𑀇𑀫𑀁, 𑀪𑁄, 𑀤𑀺𑀲𑁆𑀯𑀸 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀢𑀸 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀸𑀫𑀳𑀢𑁆𑀣𑀁 𑀲𑀫𑀺𑀜𑁆𑀚𑀺𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀅𑀧𑁆𑀨𑁄𑀝𑁂𑀢𑁆𑀯𑀸 𑁋 ‘‘𑀲𑀸𑀥𑀼 𑀲𑀸𑀥𑀽’’𑀢𑀺 𑀢𑀼𑀝𑁆𑀞𑀳𑀤𑀬𑁄 𑀲𑀸𑀥𑀼𑀓𑀸𑀭𑀁 𑀅𑀤𑀸𑀲𑀺.

𑀏𑀯𑀁 𑀅𑀤𑁆𑀥𑀼𑀯𑀸𑀢𑀺 𑀏𑀯𑀁 𑀉𑀤𑀓𑀧𑀼𑀧𑁆𑀨𑀼𑀴𑀸𑀤𑀬𑁄 𑀯𑀺𑀬 𑀥𑀼𑀯𑀪𑀸𑀯𑀯𑀺𑀭𑀳𑀺𑀢𑀸. 𑀏𑀯𑀁 𑀅𑀦𑀲𑁆𑀲𑀸𑀲𑀺𑀓𑀸𑀢𑀺 𑀏𑀯𑀁 𑀲𑀼𑀧𑀺𑀦𑀓𑁂 𑀧𑀻𑀢𑀧𑀸𑀦𑀻𑀬𑀁 𑀯𑀺𑀬 𑀅𑀦𑀼𑀮𑀺𑀢𑁆𑀢𑀘𑀦𑁆𑀤𑀦𑀁 𑀯𑀺𑀬 𑀘 𑀅𑀲𑁆𑀲𑀸𑀲𑀯𑀺𑀭𑀳𑀺𑀢𑀸.

𑀲𑀭𑀻𑀭𑀁 𑀦𑀺𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀲𑀭𑀻𑀭𑀁 𑀙𑀟𑁆𑀟𑁂𑀬𑁆𑀬. 𑀇𑀤𑀸𑀦𑀺 𑀅𑀜𑁆𑀜𑀲𑁆𑀲 𑀲𑀭𑀻𑀭𑀲𑁆𑀲 𑀦𑀺𑀓𑁆𑀔𑁂𑀧𑁄 𑀯𑀸 𑀧𑀝𑀺𑀚𑀕𑁆𑀕𑀦𑀁 𑀯𑀸 𑀦𑀢𑁆𑀣𑀺 𑀓𑀺𑀮𑁂𑀲𑀧𑀳𑀻𑀦𑀢𑁆𑀢𑀸, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲𑀸𑀢𑀺 𑀯𑀤𑀢𑀺. 𑀇𑀤𑀁 𑀧𑀦 𑀯𑀢𑁆𑀯𑀸 𑀧𑀼𑀦 𑀣𑁂𑀭𑀁 𑀆𑀫𑀦𑁆𑀢𑁂𑀲𑀺, 𑀘𑀓𑁆𑀓𑀯𑀢𑁆𑀢𑀺𑀦𑁄 𑀆𑀦𑀼𑀪𑀸𑀯𑁄 𑀦𑀸𑀫 𑀭𑀜𑁆𑀜𑁄 𑀧𑀩𑁆𑀩𑀚𑀺𑀢𑀲𑁆𑀲 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀅𑀦𑁆𑀢𑀭𑀥𑀸𑀬𑀢𑀺. 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀧𑀦 𑀓𑀸𑀮𑀗𑁆𑀓𑀺𑀭𑀺𑀬𑀢𑁄 𑀲𑀢𑁆𑀢𑀫𑁂𑀯 𑀤𑀺𑀯𑀲𑁂 𑀲𑀢𑁆𑀢𑀭𑀢𑀦𑀧𑀸𑀓𑀸𑀭𑀸 𑀲𑀢𑁆𑀢𑀭𑀢𑀦𑀢𑀸𑀮𑀸 𑀘𑀢𑀼𑀭𑀸𑀲𑀻𑀢𑀺 𑀧𑁄𑀓𑁆𑀔𑀭𑀡𑀻𑀲𑀳𑀲𑁆𑀲𑀸𑀦𑀺 𑀥𑀫𑁆𑀫𑀧𑀸𑀲𑀸𑀤𑁄 𑀥𑀫𑁆𑀫𑀧𑁄𑀓𑁆𑀔𑀭𑀡𑀻 𑀘𑀓𑁆𑀓𑀭𑀢𑀦𑀦𑁆𑀢𑀺 𑀲𑀩𑁆𑀩𑀫𑁂𑀢𑀁 𑀅𑀦𑁆𑀢𑀭𑀥𑀸𑀬𑀻𑀢𑀺. 𑀳𑀢𑁆𑀣𑀺𑀆𑀤𑀻𑀲𑀼 𑀧𑀦 𑀅𑀬𑀁 𑀥𑀫𑁆𑀫𑀢𑀸 𑀔𑀻𑀡𑀸𑀬𑀼𑀓𑀸 𑀲𑀳𑁂𑀯 𑀓𑀸𑀮𑀗𑁆𑀓𑀭𑁄𑀦𑁆𑀢𑀺. 𑀆𑀬𑀼𑀲𑁂𑀲𑁂 ¶ 𑀲𑀢𑀺 𑀳𑀢𑁆𑀣𑀺𑀭𑀢𑀦𑀁 𑀉𑀧𑁄𑀲𑀣𑀓𑀼𑀮𑀁 𑀕𑀘𑁆𑀙𑀢𑀺, 𑀅𑀲𑁆𑀲𑀭𑀢𑀦𑀁 𑀯𑀮𑀸𑀳𑀓𑀓𑀼𑀮𑀁, 𑀫𑀡𑀺𑀭𑀢𑀦𑀁 𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑀫𑁂𑀯 ¶ 𑀕𑀘𑁆𑀙𑀢𑀺. 𑀇𑀢𑁆𑀣𑀺𑀭𑀢𑀦𑀲𑁆𑀲 ¶ 𑀆𑀦𑀼𑀪𑀸𑀯𑁄 𑀅𑀦𑁆𑀢𑀭𑀥𑀸𑀬𑀢𑀺. 𑀕𑀳𑀧𑀢𑀺𑀭𑀢𑀦𑀲𑁆𑀲 𑀘𑀓𑁆𑀔𑀼 𑀧𑀸𑀓𑀢𑀺𑀓𑀫𑁂𑀯 𑀳𑁄𑀢𑀺. 𑀧𑀭𑀺𑀡𑀸𑀬𑀓𑀭𑀢𑀦𑀲𑁆𑀲 𑀯𑁂𑀬𑁆𑀬𑀢𑁆𑀢𑀺𑀬𑀁 𑀦𑀲𑁆𑀲𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸𑀢𑀺 𑀇𑀤𑀁 𑀧𑀸𑀴𑀺𑀬𑀁 𑀆𑀭𑀼𑀴𑁆𑀳𑀜𑁆𑀘 𑀅𑀦𑀸𑀭𑀼𑀴𑁆𑀳𑀜𑁆𑀘 𑀲𑀩𑁆𑀩𑀁 𑀪𑀕𑀯𑀸 𑀅𑀯𑁄𑀘. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁

𑀫𑀳𑀸𑀲𑀼𑀤𑀲𑁆𑀲𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀚𑀦𑀯𑀲𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑀦𑀸𑀢𑀺𑀓𑀺𑀬𑀸𑀤𑀺𑀩𑁆𑀬𑀸𑀓𑀭𑀡𑀯𑀡𑁆𑀡𑀦𑀸

𑁨𑁭𑁩-𑁨𑁭𑁫. 𑀏𑀯𑀁 ¶ ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀚𑀦𑀯𑀲𑀪𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀅𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑁋 𑀧𑀭𑀺𑀢𑁄 𑀧𑀭𑀺𑀢𑁄 𑀚𑀦𑀧𑀤𑁂𑀲𑀽𑀢𑀺 𑀲𑀫𑀦𑁆𑀢𑀸 𑀲𑀫𑀦𑁆𑀢𑀸 𑀚𑀦𑀧𑀤𑁂𑀲𑀼. 𑀧𑀭𑀺𑀘𑀸𑀭𑀓𑁂𑀢𑀺 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀸𑀦𑀁 𑀧𑀭𑀺𑀘𑀸𑀭𑀓𑁂. 𑀉𑀧𑀧𑀢𑁆𑀢𑀻𑀲𑀽𑀢𑀺 𑀜𑀸𑀡𑀕𑀢𑀺𑀧𑀼𑀜𑁆𑀜𑀸𑀦𑀁 𑀉𑀧𑀧𑀢𑁆𑀢𑀻𑀲𑀼. 𑀓𑀸𑀲𑀺𑀓𑁄𑀲𑀮𑁂𑀲𑀽𑀢𑀺 𑀓𑀸𑀲𑀻𑀲𑀼 𑀘 𑀓𑁄𑀲𑀮𑁂𑀲𑀼 𑀘, 𑀓𑀸𑀲𑀺𑀭𑀝𑁆𑀞𑁂 𑀘 𑀓𑁄𑀲𑀮𑀭𑀝𑁆𑀞𑁂 𑀘𑀸𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀗𑁆𑀕𑀫𑀕𑀥𑀬𑁄𑀦𑀓𑀓𑀫𑁆𑀩𑁄𑀚𑀅𑀲𑁆𑀲𑀓𑀅𑀯𑀦𑁆𑀢𑀺𑀭𑀝𑁆𑀞𑁂𑀲𑀼 𑀧𑀦 𑀙𑀲𑀼 𑀦 𑀩𑁆𑀬𑀸𑀓𑀭𑁄𑀢𑀺. 𑀇𑀫𑁂𑀲𑀁 𑀧𑀦 𑀲𑁄𑀴𑀲𑀦𑁆𑀦𑀁 𑀫𑀳𑀸𑀚𑀦𑀧𑀤𑀸𑀦𑀁 𑀧𑀼𑀭𑀺𑀫𑁂𑀲𑀼 𑀤𑀲𑀲𑀼𑀬𑁂𑀯 𑀩𑁆𑀬𑀸𑀓𑀭𑁄𑀢𑀺. 𑀦𑀸𑀢𑀺𑀓𑀺𑀬𑀸𑀢𑀺 𑀦𑀸𑀢𑀺𑀓𑀕𑀸𑀫𑀯𑀸𑀲𑀺𑀦𑁄.

𑀢𑁂𑀦𑀸𑀢𑀺 𑀢𑁂𑀦 𑀅𑀦𑀸𑀕𑀸𑀫𑀺𑀆𑀤𑀺𑀪𑀸𑀯𑁂𑀦. 𑀲𑀼𑀢𑁆𑀯𑀸𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀩𑁆𑀬𑀸𑀓𑀭𑁄𑀦𑁆𑀢𑀲𑁆𑀲 𑀪𑀕𑀯𑀢𑁄 𑀧𑀜𑁆𑀳𑀸𑀩𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸 𑀢𑁂𑀲𑀁 𑀅𑀦𑀸𑀕𑀸𑀫𑀺𑀆𑀤𑀻𑀲𑀼 𑀦𑀺𑀝𑁆𑀞𑀗𑁆𑀕𑀢𑀸 𑀳𑀼𑀢𑁆𑀯𑀸. 𑀢𑁂𑀦 𑀅𑀦𑀸𑀕𑀸𑀫𑀺𑀆𑀤𑀺𑀪𑀸𑀯𑁂𑀦 𑀅𑀢𑁆𑀢𑀫𑀦𑀸 𑀅𑀳𑁂𑀲𑀼𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀢𑁂𑀦𑀸𑀢𑀺 𑀢𑁂 𑀦𑀸𑀢𑀺𑀓𑀺𑀬𑀸𑀢𑀺 𑀯𑀼𑀢𑁆𑀢𑀁. 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀦-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁 𑀳𑁄𑀢𑀺.

𑀆𑀦𑀦𑁆𑀤𑀧𑀭𑀺𑀓𑀣𑀸𑀯𑀡𑁆𑀡𑀦𑀸

𑁨𑁭𑁭. 𑀪𑀕𑀯𑀦𑁆𑀢𑀁 𑀓𑀺𑀢𑁆𑀢𑀬𑀫𑀸𑀦𑀭𑀽𑀧𑁄𑀢𑀺 𑀅𑀳𑁄 𑀩𑀼𑀤𑁆𑀥𑁄, 𑀅𑀳𑁄 𑀥𑀫𑁆𑀫𑁄, 𑀅𑀳𑁄 𑀲𑀗𑁆𑀖𑁄; 𑀅𑀳𑁄 𑀥𑀫𑁆𑀫𑁄 𑀲𑁆𑀯𑀸𑀓𑁆𑀔𑀸𑀢𑁄𑀢𑀺 𑀏𑀯𑀁 𑀓𑀺𑀢𑁆𑀢𑀬𑀦𑁆𑀢𑁄𑀯 𑀓𑀸𑀮𑀫𑀓𑀸𑀲𑀺. 𑀩𑀳𑀼𑀚𑀦𑁄 𑀧𑀲𑀻𑀤𑁂𑀬𑁆𑀬𑀸𑀢𑀺 𑀅𑀫𑁆𑀳𑀸𑀓𑀁 𑀧𑀺𑀢𑀸 𑀫𑀸𑀢𑀸 𑀪𑀸𑀢𑀸 𑀪𑀕𑀺𑀦𑀻 𑀧𑀼𑀢𑁆𑀢𑁄 𑀥𑀻𑀢𑀸 𑀲𑀳𑀸𑀬𑀓𑁄, 𑀢𑁂𑀦 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀪𑀼𑀢𑁆𑀢𑀸, 𑀏𑀓𑀢𑁄 𑀲𑀬𑀺𑀢𑀸, 𑀢𑀲𑁆𑀲 𑀇𑀤𑀜𑁆𑀘𑀺𑀤𑀜𑁆𑀘 𑀫𑀦𑀸𑀧𑀁 𑀅𑀓𑀭𑀺𑀫𑁆𑀳, 𑀲𑁄 𑀓𑀺𑀭 𑀅𑀦𑀸𑀕𑀸𑀫𑀻 𑀲𑀓𑀤𑀸𑀕𑀸𑀫𑀻 𑀲𑁄𑀢𑀸𑀧𑀦𑁆𑀦𑁄; 𑀅𑀳𑁄 𑀲𑀸𑀥𑀼, 𑀅𑀳𑁄 𑀲𑀼𑀝𑁆𑀞𑀽𑀢𑀺 𑀏𑀯𑀁 𑀩𑀳𑀼𑀚𑀦𑁄 𑀧𑀲𑀸𑀤𑀁 𑀆𑀧𑀚𑁆𑀚𑁂𑀬𑁆𑀬.

𑁨𑁭𑁮. 𑀕𑀢𑀺𑀦𑁆𑀢𑀺 ¶ 𑀜𑀸𑀡𑀕𑀢𑀺𑀁. 𑀅𑀪𑀺𑀲𑀫𑁆𑀧𑀭𑀸𑀬𑀦𑁆𑀢𑀺 𑀜𑀸𑀡𑀸𑀪𑀺𑀲𑀫𑁆𑀧𑀭𑀸𑀬𑀫𑁂𑀯. 𑀅𑀤𑁆𑀤𑀲𑀸 𑀔𑁄𑀢𑀺 𑀓𑀺𑀢𑁆𑀢𑀓𑁂 𑀚𑀦𑁂 𑀅𑀤𑁆𑀤𑀲? 𑀘𑀢𑀼𑀯𑀻𑀲𑀢𑀺𑀲𑀢𑀲𑀳𑀲𑁆𑀲𑀸𑀦𑀺.

𑁨𑁭𑁯. 𑀉𑀧𑀲𑀦𑁆𑀢𑀧𑀤𑀺𑀲𑁆𑀲𑁄𑀢𑀺 ¶ 𑀉𑀧𑀲𑀦𑁆𑀢𑀤𑀲𑁆𑀲𑀦𑁄. 𑀪𑀸𑀢𑀺𑀭𑀺𑀯𑀸𑀢𑀺 ¶ 𑀅𑀢𑀺𑀯𑀺𑀬 𑀪𑀸𑀢𑀺, 𑀅𑀢𑀺𑀯𑀺𑀬 𑀯𑀺𑀭𑁄𑀘𑀢𑀺. 𑀇𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀺 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁. 𑀅𑀤𑁆𑀤𑀲𑀁 𑀔𑁄 𑀅𑀳𑀁 𑀆𑀦𑀦𑁆𑀤𑀸𑀢𑀺 𑀦𑁂𑀯 𑀤𑀲, 𑀦 𑀯𑀻𑀲𑀢𑀺, 𑀦 𑀲𑀢𑀁, 𑀦 𑀲𑀳𑀲𑁆𑀲𑀁, 𑀅𑀦𑀽𑀦𑀸𑀥𑀺𑀓𑀸𑀦𑀺 𑀘𑀢𑀼𑀯𑀻𑀲𑀢𑀺𑀲𑀢𑀲𑀳𑀲𑁆𑀲𑀸𑀦𑀺 𑀅𑀤𑁆𑀤𑀲𑀦𑁆𑀢𑀺 𑀆𑀳.

𑀚𑀦𑀯𑀲𑀪𑀬𑀓𑁆𑀔𑀯𑀡𑁆𑀡𑀦𑀸

𑁨𑁮𑁦. 𑀤𑀺𑀲𑁆𑀯𑀸 𑀧𑀦 𑀫𑁂 𑀏𑀢𑁆𑀢𑀓𑁄 𑀚𑀦𑁄 𑀫𑀁 𑀦𑀺𑀲𑁆𑀲𑀸𑀬 𑀤𑀼𑀓𑁆𑀔𑀸 𑀧𑀫𑀼𑀢𑁆𑀢𑁄𑀢𑀺 𑀩𑀮𑀯𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀺, 𑀘𑀺𑀢𑁆𑀢𑀁 𑀧𑀲𑀻𑀤𑀺, 𑀘𑀺𑀢𑁆𑀢𑀲𑁆𑀲 𑀧𑀲𑀦𑁆𑀦𑀢𑁆𑀢𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀮𑁄𑀳𑀺𑀢𑀁 𑀧𑀲𑀻𑀤𑀺, 𑀮𑁄𑀳𑀺𑀢𑀲𑁆𑀲 𑀧𑀲𑀦𑁆𑀦𑀢𑁆𑀢𑀸 𑀫𑀦𑀘𑁆𑀙𑀝𑁆𑀞𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀲𑀻𑀤𑀺𑀁𑀲𑀽𑀢𑀺 𑀲𑀩𑁆𑀩𑀫𑀺𑀤𑀁 𑀯𑀢𑁆𑀯𑀸 𑀅𑀣 𑀔𑁄 𑀆𑀦𑀦𑁆𑀤𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑁆𑀫𑀸 𑀲𑁄 𑀪𑀕𑀯𑀢𑁄 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀤𑀲𑀲𑀳𑀲𑁆𑀲𑀸𑀥𑀺𑀓𑀲𑁆𑀲 𑀚𑀦𑀲𑀢𑀲𑀳𑀲𑁆𑀲𑀲𑁆𑀲 𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑁄 𑀚𑀸𑀢𑁄, 𑀢𑀲𑁆𑀫𑀸 𑀚𑀦𑀯𑀲𑀪𑁄𑀢𑀺𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺.

𑀇𑀢𑁄 𑀲𑀢𑁆𑀢𑀸𑀢𑀺 𑀇𑀢𑁄 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀲𑀢𑁆𑀢. 𑀢𑀢𑁄 𑀲𑀢𑁆𑀢𑀸𑀢𑀺 𑀢𑀢𑁄 𑀫𑀦𑀼𑀲𑁆𑀲𑀮𑁄𑀓𑀸 𑀘𑀯𑀺𑀢𑁆𑀯𑀸 𑀲𑀢𑁆𑀢. 𑀲𑀁𑀲𑀸𑀭𑀸𑀦𑀺 𑀘𑀢𑀼𑀤𑁆𑀤𑀲𑀸𑀢𑀺 𑀲𑀩𑁆𑀩𑀸𑀧𑀺 𑀘𑀢𑀼𑀤𑁆𑀤𑀲𑀔𑀦𑁆𑀥𑀧𑀝𑀺𑀧𑀸𑀝𑀺𑀬𑁄. 𑀦𑀺𑀯𑀸𑀲𑀫𑀪𑀺𑀚𑀸𑀦𑀸𑀫𑀻𑀢𑀺 𑀚𑀸𑀢𑀺𑀯𑀲𑁂𑀦 𑀦𑀺𑀯𑀸𑀲𑀁 𑀚𑀸𑀦𑀸𑀫𑀺. 𑀬𑀢𑁆𑀣 𑀫𑁂 𑀯𑀼𑀲𑀺𑀢𑀁 𑀧𑀼𑀭𑁂𑀢𑀺 𑀬𑀢𑁆𑀣 𑀤𑁂𑀯𑁂𑀲𑀼 𑀘 𑀯𑁂𑀲𑁆𑀲𑀯𑀡𑀲𑁆𑀲 𑀲𑀳𑀩𑁆𑀬𑀢𑀁 𑀉𑀧𑀕𑀢𑁂𑀦 𑀫𑀦𑀼𑀲𑁆𑀲𑁂𑀲𑀼 𑀘 𑀭𑀸𑀚𑀪𑀽𑀢𑁂𑀦 𑀇𑀢𑁄 𑀅𑀢𑁆𑀢𑀪𑀸𑀯𑀢𑁄 𑀧𑀼𑀭𑁂𑀬𑁂𑀯 𑀫𑀬𑀸 𑀯𑀼𑀲𑀺𑀢𑀁. 𑀧𑀼𑀭𑁂 𑀏𑀯𑀁 𑀯𑀼𑀲𑀺𑀢𑀢𑁆𑀢𑀸 𑀏𑀯 𑀘 𑀇𑀤𑀸𑀦𑀺 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀢𑀻𑀲𑀼 𑀯𑀢𑁆𑀣𑀽𑀲𑀼 𑀩𑀳𑀼𑀁 𑀧𑀼𑀜𑁆𑀜𑀁 𑀓𑀢𑁆𑀯𑀸 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀉𑀧𑀭𑀺 𑀦𑀺𑀩𑁆𑀩𑀢𑁆𑀢𑀺𑀢𑀼𑀁 𑀲𑀫𑀢𑁆𑀣𑁄𑀧𑀺 𑀤𑀻𑀖𑀭𑀢𑁆𑀢𑀁 𑀯𑀼𑀲𑀺𑀢𑀝𑁆𑀞𑀸𑀦𑁂 𑀦𑀺𑀓𑀦𑁆𑀢𑀺𑀬𑀸 𑀩𑀮𑀯𑀢𑀸𑀬 𑀏𑀢𑁆𑀣𑁂𑀯 𑀦𑀺𑀩𑁆𑀩𑀢𑁆𑀢𑁄.

𑁨𑁮𑁧. 𑀆𑀲𑀸 𑀘 𑀧𑀦 𑀫𑁂 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 𑀇𑀫𑀺𑀦𑀸𑀳𑀁 𑀲𑁄𑀢𑀸𑀧𑀦𑁆𑀦𑁄𑀢𑀺 𑀦 𑀲𑀼𑀢𑁆𑀢𑀧𑁆𑀧𑀫𑀢𑁆𑀢𑁄𑀯 𑀳𑀼𑀢𑁆𑀯𑀸 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀲𑀺𑀁. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀢𑁆𑀣𑀸𑀬 𑀧𑀦 𑀫𑁂 𑀯𑀺𑀧𑀲𑁆𑀲𑀦𑀸 𑀆𑀭𑀤𑁆𑀥𑀸. 𑀅𑀚𑁆𑀚𑁂𑀯 𑀅𑀚𑁆𑀚𑁂𑀯 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀲𑀉𑀲𑁆𑀲𑀸𑀳𑁄 𑀯𑀺𑀳𑀭𑀸𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀬𑀤𑀕𑁆𑀕𑁂𑀢𑀺 𑀮𑀝𑁆𑀞𑀺𑀯𑀦𑀼𑀬𑁆𑀬𑀸𑀦𑁂 𑀧𑀞𑀫𑀤𑀲𑁆𑀲𑀦𑁂 𑀲𑁄𑀢𑀸𑀧𑀦𑁆𑀦𑀤𑀺𑀯𑀲𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀤𑀕𑁆𑀕𑁂 𑀅𑀳𑀁, 𑀪𑀦𑁆𑀢𑁂, 𑀤𑀻𑀖𑀭𑀢𑁆𑀢𑀁 𑀅𑀯𑀺𑀦𑀺𑀧𑀸𑀢𑁄 𑀅𑀯𑀺𑀦𑀺𑀧𑀸𑀢𑀁 𑀲𑀜𑁆𑀚𑀸𑀦𑀸𑀫𑀻𑀢𑀺 𑀢𑀁𑀤𑀺𑀯𑀲𑀁 𑀆𑀤𑀺𑀁 𑀓𑀢𑁆𑀯𑀸, 𑀅𑀳𑀁, 𑀪𑀦𑁆𑀢𑁂, 𑀧𑀼𑀭𑀺𑀫𑀁 𑀘𑀢𑀼𑀤𑁆𑀤𑀲𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀁 𑀤𑀻𑀖𑀭𑀢𑁆𑀢𑀁 𑀅𑀯𑀺𑀦𑀺𑀧𑀸𑀢𑁄 𑀮𑀝𑁆𑀞𑀺𑀯𑀦𑀼𑀬𑁆𑀬𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀯𑀲𑁂𑀦 𑀅𑀥𑀺𑀕𑀢𑀁 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀢𑀁 𑀲𑀜𑁆𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀅𑀦𑀘𑁆𑀙𑀭𑀺𑀬𑀦𑁆𑀢𑀺 ¶ 𑀅𑀦𑀼𑀅𑀘𑁆𑀙𑀭𑀺𑀬𑀁. 𑀘𑀺𑀦𑁆𑀢𑀬𑀫𑀸𑀦𑀁 𑀧𑀼𑀦𑀧𑁆𑀧𑀼𑀦𑀁 𑀅𑀘𑁆𑀙𑀭𑀺𑀬𑀫𑁂𑀯𑀺𑀤𑀁 𑀬𑀁 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀕𑀘𑁆𑀙𑀦𑁆𑀢𑁄 𑀪𑀕𑀯𑀦𑁆𑀢𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀤𑁆𑀤𑀲𑀁. 𑀇𑀤𑀫𑁆𑀧𑀺 𑀅𑀘𑁆𑀙𑀭𑀺𑀬𑀁 ¶ 𑀬𑀜𑁆𑀘 𑀯𑁂𑀲𑁆𑀲𑀯𑀡𑀲𑁆𑀲 ¶ 𑀫𑀳𑀸𑀭𑀸𑀚𑀲𑁆𑀲 𑀲𑀬𑀁𑀧𑀭𑀺𑀲𑀸𑀬 𑀪𑀸𑀲𑀢𑁄 𑀪𑀕𑀯𑀢𑁄 𑀤𑀺𑀝𑁆𑀞𑀲𑀤𑀺𑀲𑀫𑁂𑀯 𑀲𑀫𑁆𑀫𑀼𑀔𑀸 𑀲𑀼𑀢𑀁. 𑀤𑁆𑀯𑁂 𑀧𑀘𑁆𑀘𑀬𑀸𑀢𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀤𑀺𑀝𑁆𑀞𑀪𑀸𑀯𑁄 𑀘 𑀯𑁂𑀲𑁆𑀲𑀯𑀡𑀲𑁆𑀲 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀆𑀭𑁄𑀘𑁂𑀢𑀼𑀓𑀸𑀫𑀢𑀸 𑀘.

𑀤𑁂𑀯𑀲𑀪𑀸𑀯𑀡𑁆𑀡𑀦𑀸

𑁨𑁮𑁨. 𑀲𑀦𑁆𑀦𑀺𑀧𑀢𑀺𑀢𑀸𑀢𑀺 𑀓𑀲𑁆𑀫𑀸 𑀲𑀦𑁆𑀦𑀺𑀧𑀢𑀺𑀢𑀸? 𑀢𑁂 𑀓𑀺𑀭 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀯𑀲𑁆𑀲𑀽𑀧𑀦𑀸𑀬𑀺𑀓𑀲𑀗𑁆𑀕𑀳𑀢𑁆𑀣𑀁, 𑀧𑀯𑀸𑀭𑀡𑀸𑀲𑀗𑁆𑀕𑀳𑀢𑁆𑀣𑀁, 𑀥𑀫𑁆𑀫𑀲𑀯𑀦𑀢𑁆𑀣𑀁, 𑀧𑀸𑀭𑀺𑀘𑁆𑀙𑀢𑁆𑀢𑀓𑀓𑀻𑀴𑀸𑀦𑀼𑀪𑀯𑀦𑀢𑁆𑀣𑀦𑁆𑀢𑀺. 𑀢𑀢𑁆𑀣 𑀲𑁆𑀯𑁂 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀢𑀺 𑀆𑀲𑀸𑀴𑁆𑀳𑀻𑀧𑀼𑀡𑁆𑀡𑀫𑀸𑀬 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑀸 𑀲𑀼𑀥𑀫𑁆𑀫𑀸𑀬 𑀤𑁂𑀯𑀲𑀪𑀸𑀬 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀦𑁆𑀢𑁂𑀦𑁆𑀢𑀺 𑀅𑀲𑀼𑀓𑀯𑀺𑀳𑀸𑀭𑁂 𑀏𑀓𑁄 𑀪𑀺𑀓𑁆𑀔𑀼 𑀯𑀲𑁆𑀲𑀽𑀧𑀕𑀢𑁄, 𑀅𑀲𑀼𑀓𑀯𑀺𑀳𑀸𑀭𑁂 𑀤𑁆𑀯𑁂 𑀢𑀬𑁄 𑀘𑀢𑁆𑀢𑀸𑀭𑁄 𑀧𑀜𑁆𑀘 𑀤𑀲 𑀯𑀻𑀲𑀢𑀺 𑀢𑀺𑀁𑀲𑀁 𑀘𑀢𑁆𑀢𑀸𑀮𑀻𑀲𑀁 𑀧𑀜𑁆𑀜𑀸𑀲𑀁 𑀲𑀢𑀁 𑀲𑀳𑀲𑁆𑀲𑀁 𑀪𑀺𑀓𑁆𑀔𑀽 𑀯𑀲𑁆𑀲𑀽𑀧𑀕𑀢𑀸, 𑀏𑀢𑁆𑀣𑁂𑀢𑁆𑀣 𑀞𑀸𑀦𑁂 𑀅𑀬𑁆𑀬𑀸𑀦𑀁 𑀆𑀭𑀓𑁆𑀔𑀁 𑀲𑀼𑀲𑀁𑀯𑀺𑀳𑀺𑀢𑀁 𑀓𑀭𑁄𑀣𑀸𑀢𑀺 𑀏𑀯𑀁 𑀯𑀲𑁆𑀲𑀽𑀧𑀦𑀸𑀬𑀺𑀓𑀲𑀗𑁆𑀕𑀳𑁄 𑀓𑀢𑁄 𑀳𑁄𑀢𑀺.

𑀢𑀤𑀸𑀧𑀺 𑀏𑀢𑁂𑀦𑁂𑀯 𑀓𑀸𑀭𑀡𑁂𑀦 𑀲𑀦𑁆𑀦𑀺𑀧𑀢𑀺𑀢𑀸. 𑀇𑀤𑀁 𑀢𑁂𑀲𑀁 𑀳𑁄𑀢𑀺 𑀆𑀲𑀦𑀲𑁆𑀫𑀺𑀦𑁆𑀢𑀺 𑀇𑀤𑀁 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀸𑀦𑀁 𑀆𑀲𑀦𑀁 𑀳𑁄𑀢𑀺. 𑀏𑀯𑀁 𑀢𑁂𑀲𑀼 𑀦𑀺𑀲𑀺𑀦𑁆𑀦𑁂𑀲𑀼 𑀅𑀣 𑀧𑀘𑁆𑀙𑀸 𑀅𑀫𑁆𑀳𑀸𑀓𑀁 𑀆𑀲𑀦𑀁 𑀳𑁄𑀢𑀺.

𑀬𑁂𑀦𑀢𑁆𑀣𑁂𑀦𑀸𑀢𑀺 𑀬𑁂𑀦 𑀯𑀲𑁆𑀲𑀽𑀧𑀦𑀸𑀬𑀺𑀓𑀢𑁆𑀣𑁂𑀦. 𑀢𑀁 𑀅𑀢𑁆𑀣𑀁 𑀘𑀺𑀦𑁆𑀢𑀬𑀺𑀢𑁆𑀯𑀸 𑀢𑀁 𑀅𑀢𑁆𑀣𑀁 𑀫𑀦𑁆𑀢𑀬𑀺𑀢𑁆𑀯𑀸𑀢𑀺 𑀢𑀁 𑀅𑀭𑀜𑁆𑀜𑀯𑀸𑀲𑀺𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀭𑀓𑁆𑀔𑀢𑁆𑀣𑀁 𑀘𑀺𑀦𑁆𑀢𑀬𑀺𑀢𑁆𑀯𑀸. 𑀏𑀢𑁆𑀣𑁂𑀢𑁆𑀣 𑀯𑀼𑀝𑁆𑀞𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀭𑀓𑁆𑀔𑀁 𑀲𑀁𑀯𑀺𑀤𑀳𑀣𑀸𑀢𑀺 𑀘𑀢𑀽𑀳𑀺 𑀫𑀳𑀸𑀭𑀸𑀚𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸. 𑀯𑀼𑀢𑁆𑀢𑀯𑀘𑀦𑀸𑀧𑀺 𑀢𑀦𑁆𑀢𑀺 𑀢𑁂𑀢𑁆𑀢𑀺𑀁𑀲 𑀤𑁂𑀯𑀧𑀼𑀢𑁆𑀢𑀸 𑀯𑀤𑀦𑁆𑀢𑀺, 𑀫𑀳𑀸𑀭𑀸𑀚𑀸𑀦𑁄 𑀯𑀼𑀢𑁆𑀢𑀯𑀘𑀦𑀸 𑀦𑀸𑀫. 𑀢𑀣𑀸 𑀢𑁂𑀢𑁆𑀢𑀺𑀁𑀲 𑀤𑁂𑀯𑀧𑀼𑀢𑁆𑀢𑀸 𑀧𑀘𑁆𑀘𑀸𑀦𑀼𑀲𑀸𑀲𑀦𑁆𑀢𑀺, 𑀇𑀢𑀭𑁂 𑀧𑀘𑁆𑀘𑀸𑀦𑀼𑀲𑀺𑀝𑁆𑀞𑀯𑀘𑀦𑀸 𑀦𑀸𑀫. 𑀧𑀤𑀤𑁆𑀯𑀬𑁂𑀧𑀺 𑀧𑀦 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀫𑁂𑀯. 𑀅𑀯𑀺𑀧𑀓𑁆𑀓𑀦𑁆𑀢𑀸𑀢𑀺 𑀅𑀕𑀢𑀸.

𑁨𑁮𑁩. 𑀉𑀴𑀸𑀭𑁄𑀢𑀺 𑀯𑀺𑀧𑀼𑀮𑁄 𑀫𑀳𑀸. 𑀤𑁂𑀯𑀸𑀦𑀼𑀪𑀸𑀯𑀦𑁆𑀢𑀺 𑀬𑀸 𑀲𑀸 𑀲𑀩𑁆𑀩𑀤𑁂𑀯𑀢𑀸𑀦𑀁 𑀯𑀢𑁆𑀣𑀸𑀮𑀗𑁆𑀓𑀸𑀭𑀯𑀺𑀫𑀸𑀦𑀲𑀭𑀻𑀭𑀸𑀦𑀁 𑀧𑀪𑀸 𑀤𑁆𑀯𑀸𑀤𑀲 𑀬𑁄𑀚𑀦𑀸𑀦𑀺 𑀨𑀭𑀢𑀺. 𑀫𑀳𑀸𑀧𑀼𑀜𑁆𑀜𑀸𑀦𑀁 𑀧𑀦 𑀲𑀭𑀻𑀭𑀧𑁆𑀧𑀪𑀸 𑀬𑁄𑀚𑀦𑀲𑀢𑀁 𑀨𑀭𑀢𑀺. 𑀢𑀁 𑀤𑁂𑀯𑀸𑀦𑀼𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸.

𑀩𑁆𑀭𑀳𑁆𑀫𑀼𑀦𑁄 ¶ 𑀳𑁂𑀢𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀦𑁆𑀢𑀺 𑀬𑀣𑀸 𑀲𑀽𑀭𑀺𑀬𑀲𑁆𑀲 𑀉𑀤𑀬𑀢𑁄 𑀏𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀏𑀢𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀬𑀤𑀺𑀤𑀁 𑀅𑀭𑀼𑀡𑀼𑀕𑁆𑀕𑀁, 𑀏𑀯𑀫𑁂𑀯 𑀩𑁆𑀭𑀳𑁆𑀫𑀼𑀦𑁄𑀧𑀺 𑀏𑀢𑀁 𑁋 ‘‘𑀧𑀼𑀩𑁆𑀩𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀤𑀻𑀧𑁂𑀢𑀺.

𑀲𑀦𑀗𑁆𑀓𑀼𑀫𑀸𑀭𑀓𑀣𑀸𑀯𑀡𑁆𑀡𑀦𑀸

𑁨𑁮𑁪. 𑀅𑀦𑀪𑀺𑀲𑀫𑁆𑀪𑀯𑀦𑀻𑀬𑁄𑀢𑀺 ¶ ¶ 𑀅𑀧𑀢𑁆𑀢𑀩𑁆𑀩𑁄, 𑀦 𑀢𑀁 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀧𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀘𑀓𑁆𑀔𑀼𑀧𑀣𑀲𑁆𑀫𑀺𑀦𑁆𑀢𑀺 𑀘𑀓𑁆𑀔𑀼𑀧𑀲𑀸𑀤𑁂 𑀆𑀧𑀸𑀣𑁂 𑀯𑀸. 𑀲𑁄 𑀤𑁂𑀯𑀸𑀦𑀁 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑁂 𑀲𑀫𑁆𑀪𑀯𑀦𑀻𑀬𑁄 𑀧𑀢𑁆𑀢𑀩𑁆𑀩𑁄 𑀦 𑀳𑁄𑀢𑀺, 𑀦 𑀅𑀪𑀺𑀪𑀯𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑁂𑀝𑁆𑀞𑀸 𑀳𑁂𑀝𑁆𑀞𑀸 𑀳𑀺 𑀤𑁂𑀯𑀢𑀸 𑀉𑀧𑀭𑀽𑀧𑀭𑀺 𑀤𑁂𑀯𑀸𑀦𑀁 𑀑𑀴𑀸𑀭𑀺𑀓𑀁 𑀓𑀢𑁆𑀯𑀸 𑀫𑀸𑀧𑀺𑀢𑀫𑁂𑀯 𑀅𑀢𑁆𑀢𑀪𑀸𑀯𑀁 𑀧𑀲𑁆𑀲𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀯𑁂𑀤𑀧𑀝𑀺𑀮𑀸𑀪𑀦𑁆𑀢𑀺 𑀢𑀼𑀝𑁆𑀞𑀺𑀧𑀝𑀺𑀮𑀸𑀪𑀁. 𑀅𑀥𑀼𑀦𑀸𑀪𑀺𑀲𑀺𑀢𑁆𑀢𑁄 𑀭𑀚𑁆𑀚𑁂𑀦𑀸𑀢𑀺 𑀲𑀫𑁆𑀧𑀢𑀺 𑀅𑀪𑀺𑀲𑀺𑀢𑁆𑀢𑁄 𑀭𑀚𑁆𑀚𑁂𑀦. 𑀅𑀬𑀁 𑀧𑀦𑀢𑁆𑀣𑁄 𑀤𑀼𑀝𑁆𑀞𑀕𑀸𑀫𑀡𑀺𑀅𑀪𑀬𑀯𑀢𑁆𑀣𑀼𑀦𑀸 𑀤𑀻𑀧𑁂𑀢𑀩𑁆𑀩𑁄 𑁋

𑀲𑁄 𑀓𑀺𑀭 𑀤𑁆𑀯𑀢𑁆𑀢𑀺𑀁𑀲 𑀤𑀫𑀺𑀴𑀭𑀸𑀚𑀸𑀦𑁄 𑀯𑀺𑀚𑀺𑀢𑁆𑀯𑀸 𑀅𑀦𑀼𑀭𑀸𑀥𑀧𑀼𑀭𑁂 𑀧𑀢𑁆𑀢𑀸𑀪𑀺𑀲𑁂𑀓𑁄 𑀢𑀼𑀝𑁆𑀞𑀲𑁄𑀫𑀦𑀲𑁆𑀲𑁂𑀦 𑀫𑀸𑀲𑀁 𑀦𑀺𑀤𑁆𑀤𑀁 𑀦 𑀮𑀪𑀺, 𑀢𑀢𑁄 𑁋 ‘‘𑀦𑀺𑀤𑁆𑀤𑀁 𑀦 𑀮𑀪𑀸𑀫𑀺, 𑀪𑀦𑁆𑀢𑁂’’𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀘𑀺𑀓𑁆𑀔𑀺. 𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀅𑀚𑁆𑀚 𑀉𑀧𑁄𑀲𑀣𑀁 𑀅𑀥𑀺𑀝𑁆𑀞𑀸𑀳𑀻𑀢𑀺. 𑀲𑁄 𑀘 𑀉𑀧𑁄𑀲𑀣𑀁 𑀅𑀥𑀺𑀝𑁆𑀞𑀸𑀲𑀺. 𑀲𑀗𑁆𑀖𑁄 𑀕𑀦𑁆𑀢𑁆𑀯𑀸 𑁋 ‘‘𑀘𑀺𑀢𑁆𑀢𑀬𑀫𑀓𑀁 𑀲𑀚𑁆𑀛𑀸𑀬𑀣𑀸’’𑀢𑀺 𑀅𑀝𑁆𑀞 𑀆𑀪𑀺𑀥𑀫𑁆𑀫𑀺𑀓𑀪𑀺𑀓𑁆𑀔𑀽 𑀧𑁂𑀲𑁂𑀲𑀺. 𑀢𑁂 𑀕𑀦𑁆𑀢𑁆𑀯𑀸 𑁋 ‘‘𑀦𑀺𑀧𑀚𑁆𑀚 𑀢𑁆𑀯𑀁, 𑀫𑀳𑀸𑀭𑀸𑀚𑀸,’’𑀢𑀺 𑀯𑀢𑁆𑀯𑀸 𑀲𑀚𑁆𑀛𑀸𑀬𑀁 𑀆𑀭𑀪𑀺𑀁𑀲𑀼. 𑀭𑀸𑀚𑀸 𑀲𑀚𑁆𑀛𑀸𑀬𑀁 𑀲𑀼𑀡𑀦𑁆𑀢𑁄𑀯 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀣𑁂𑀭𑀸 𑁋 𑀭𑀸𑀚𑀸𑀦𑀁 𑀫𑀸 𑀧𑀩𑁄𑀥𑀬𑀺𑀢𑁆𑀣𑀸𑀢𑀺 𑀧𑀓𑁆𑀓𑀫𑀺𑀁𑀲𑀼. 𑀭𑀸𑀚𑀸 𑀤𑀼𑀢𑀺𑀬𑀤𑀺𑀯𑀲𑁂 𑀲𑀽𑀭𑀺𑀬𑀼𑀕𑁆𑀕𑀫𑀦𑁂 𑀧𑀩𑀼𑀚𑁆𑀛𑀺𑀢𑁆𑀯𑀸 𑀣𑁂𑀭𑁂 𑀅𑀧𑀲𑁆𑀲𑀦𑁆𑀢𑁄 𑁋 ‘‘𑀓𑀼𑀳𑀺𑀁 𑀅𑀬𑁆𑀬𑀸’’𑀢𑀺 𑀧𑀼𑀘𑁆𑀙𑀺. 𑀢𑀼𑀫𑁆𑀳𑀸𑀓𑀁 𑀦𑀺𑀤𑁆𑀤𑁄𑀓𑁆𑀓𑀫𑀦𑀪𑀸𑀯𑀁 𑀜𑀢𑁆𑀯𑀸 𑀕𑀢𑀸𑀢𑀺. 𑀦𑀢𑁆𑀣𑀺, 𑀪𑁄, 𑀫𑀬𑁆𑀳𑀁 𑀅𑀬𑁆𑀬𑀓𑀲𑁆𑀲 𑀤𑀸𑀭𑀓𑀸𑀦𑀁 𑀅𑀚𑀸𑀦𑀦𑀓𑀪𑁂𑀲𑀚𑁆𑀚𑀁 𑀦𑀸𑀫, 𑀬𑀸𑀯 𑀦𑀺𑀤𑁆𑀤𑀸𑀪𑁂𑀲𑀚𑁆𑀚𑀫𑁆𑀧𑀺 𑀚𑀸𑀦𑀦𑁆𑀢𑀺 𑀬𑁂𑀯𑀸𑀢𑀺 𑀆𑀳.

𑀧𑀜𑁆𑀘𑀲𑀺𑀔𑁄𑀢𑀺 𑀧𑀜𑁆𑀘𑀲𑀺𑀔𑀕𑀦𑁆𑀥𑀩𑁆𑀩𑀲𑀤𑀺𑀲𑁄 𑀳𑀼𑀢𑁆𑀯𑀸. 𑀧𑀜𑁆𑀘𑀲𑀺𑀔𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑀲𑁆𑀲 𑀓𑀺𑀭 𑀲𑀩𑁆𑀩𑀤𑁂𑀯𑀢𑀸 𑀅𑀢𑁆𑀢𑀪𑀸𑀯𑀁 𑀫𑀫𑀸𑀬𑀦𑁆𑀢𑀺. 𑀢𑀲𑁆𑀫𑀸 𑀩𑁆𑀭𑀳𑁆𑀫𑀸𑀧𑀺 𑀢𑀸𑀤𑀺𑀲𑀁𑀬𑁂𑀯 𑀅𑀢𑁆𑀢𑀪𑀸𑀯𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀧𑀸𑀢𑀼𑀭𑀳𑁄𑀲𑀺. 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀻𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀺.

𑀯𑀺𑀲𑁆𑀲𑀝𑁆𑀞𑁄𑀢𑀺 𑀲𑀼𑀫𑀼𑀢𑁆𑀢𑁄 𑀅𑀧𑀮𑀺𑀩𑀼𑀤𑁆𑀥𑁄. 𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀅𑀢𑁆𑀣𑀯𑀺𑀜𑁆𑀜𑀸𑀧𑀦𑁄. 𑀫𑀜𑁆𑀚𑀽𑀢𑀺 𑀫𑀥𑀼𑀭𑁄 𑀫𑀼𑀤𑀼. 𑀲𑀯𑀦𑀻𑀬𑁄𑀢𑀺 𑀲𑁄𑀢𑀩𑁆𑀩𑀬𑀼𑀢𑁆𑀢𑀓𑁄 𑀓𑀡𑁆𑀡𑀲𑀼𑀔𑁄. 𑀩𑀺𑀦𑁆𑀤𑀽𑀢𑀺 ¶ 𑀏𑀓𑀕𑁆𑀖𑀦𑁄. 𑀅𑀯𑀺𑀲𑀸𑀭𑀻𑀢𑀺 𑀲𑀼𑀯𑀺𑀲𑀤𑁄 𑀅𑀯𑀺𑀧𑁆𑀧𑀓𑀺𑀡𑁆𑀡𑁄. 𑀕𑀫𑁆𑀪𑀻𑀭𑁄𑀢𑀺 𑀦𑀸𑀪𑀺𑀫𑀽𑀮𑀢𑁄 𑀧𑀝𑁆𑀞𑀸𑀬 𑀕𑀫𑁆𑀪𑀻𑀭𑀲𑀫𑀼𑀝𑁆𑀞𑀺𑀢𑁄, 𑀦 𑀚𑀺𑀯𑁆𑀳𑀸𑀤𑀦𑁆𑀢𑀑𑀝𑁆𑀞𑀢𑀸𑀮𑀼𑀫𑀢𑁆𑀢𑀧𑁆𑀧𑀳𑀸𑀭𑀲𑀫𑀼𑀝𑁆𑀞𑀺𑀢𑁄. 𑀏𑀯𑀁 𑀲𑀫𑀼𑀝𑁆𑀞𑀺𑀢𑁄 𑀳𑀺 𑀅𑀫𑀥𑀼𑀭𑁄 𑀘 𑀳𑁄𑀢𑀺, 𑀦 𑀘 𑀤𑀽𑀭𑀁 𑀲𑀸𑀯𑁂𑀢𑀺. 𑀦𑀺𑀦𑁆𑀦𑀸𑀤𑀻𑀢𑀺 ¶ 𑀫𑀳𑀸𑀫𑁂𑀖𑀫𑀼𑀤𑀺𑀗𑁆𑀕𑀲𑀤𑁆𑀤𑁄 𑀯𑀺𑀬 𑀦𑀺𑀦𑁆𑀦𑀸𑀤𑀬𑀼𑀢𑁆𑀢𑁄. 𑀅𑀧𑀺𑀘𑁂𑀢𑁆𑀣 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀧𑀤𑀁 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀅𑀢𑁆𑀣𑁄𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸𑀧𑀭𑀺𑀲𑀦𑁆𑀢𑀺 𑀬𑀢𑁆𑀢𑀓𑀸 𑀧𑀭𑀺𑀲𑀸, 𑀢𑀢𑁆𑀢𑀓𑀫𑁂𑀯 𑀯𑀺𑀜𑁆𑀜𑀸𑀧𑁂𑀢𑀺. 𑀅𑀦𑁆𑀢𑁄 𑀧𑀭𑀺𑀲𑀸𑀬𑀁 𑀬𑁂𑀯𑀲𑁆𑀲 𑀲𑀤𑁆𑀤𑁄 𑀲𑀫𑁆𑀧𑀭𑀺𑀯𑀢𑁆𑀢𑀢𑀺, 𑀦 𑀩𑀳𑀺𑀤𑁆𑀥𑀸 𑀯𑀺𑀥𑀸𑀯𑀢𑀺. 𑀬𑁂 𑀳𑀺 𑀓𑁂𑀘𑀻𑀢𑀺 ¶ 𑀆𑀤𑀺 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀤𑀢𑀺. 𑀲𑀭𑀡𑀁 𑀕𑀢𑀸𑀢𑀺 𑀦 𑀬𑀣𑀸 𑀯𑀸 𑀢𑀣𑀸 𑀯𑀸 𑀲𑀭𑀡𑀁 𑀕𑀢𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀦𑀺𑀩𑁆𑀩𑁂𑀫𑀢𑀺𑀓𑀕𑀳𑀺𑀢𑀲𑀭𑀡𑁂 𑀧𑀦 𑀲𑀦𑁆𑀥𑀸𑀬 𑀯𑀤𑀢𑀺. 𑀕𑀦𑁆𑀥𑀩𑁆𑀩𑀓𑀸𑀬𑀁 𑀧𑀭𑀺𑀧𑀽𑀭𑁂𑀦𑁆𑀢𑀻𑀢𑀺 𑀕𑀦𑁆𑀥𑀩𑁆𑀩𑀤𑁂𑀯𑀕𑀡𑀁 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀇𑀢𑀺 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼 𑀮𑁄𑀓𑁂 𑀉𑀧𑁆𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀙 𑀤𑁂𑀯𑀮𑁄𑀓𑀸𑀤𑀻𑀲𑀼 𑀧𑀺𑀝𑁆𑀞𑀁 𑀓𑁄𑀝𑁆𑀝𑁂𑀢𑁆𑀯𑀸 𑀧𑀽𑀭𑀺𑀢𑀦𑀸𑀴𑀺 𑀯𑀺𑀬 𑀲𑀭𑀯𑀦𑀦𑀴𑀯𑀦𑀁 𑀯𑀺𑀬 𑀘 𑀦𑀺𑀭𑀦𑁆𑀢𑀭𑀁 𑀚𑀸𑀢𑀧𑀭𑀺𑀲𑀸𑀢𑀺 𑀆𑀳.

𑀪𑀸𑀯𑀺𑀢𑀇𑀤𑁆𑀥𑀺𑀧𑀸𑀤𑀯𑀡𑁆𑀡𑀦𑀸

𑁨𑁮𑁭. 𑀬𑀸𑀯𑀲𑀼𑀧𑀜𑁆𑀜𑀢𑁆𑀢𑀸 𑀘𑀺𑀫𑁂 𑀢𑁂𑀦 𑀪𑀕𑀯𑀢𑀸𑀢𑀺 𑀢𑁂𑀦 𑀫𑀬𑁆𑀳𑀁 𑀲𑀢𑁆𑀣𑀸𑀭𑀸 𑀪𑀕𑀯𑀢𑀸 𑀬𑀸𑀯 𑀲𑀼𑀧𑀜𑁆𑀜𑀢𑁆𑀢𑀸 𑀬𑀸𑀯 𑀲𑀼𑀓𑀣𑀺𑀢𑀸. 𑀇𑀤𑁆𑀥𑀺𑀧𑀸𑀤𑀸𑀢𑀺 𑀏𑀢𑁆𑀣 𑀇𑀚𑁆𑀛𑀦𑀝𑁆𑀞𑁂𑀦 𑀇𑀤𑁆𑀥𑀺, 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀧𑀸𑀤𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀤𑁆𑀥𑀺𑀧𑀳𑀼𑀢𑀸𑀬𑀸𑀢𑀺 𑀇𑀤𑁆𑀥𑀺𑀧𑀳𑁄𑀦𑀓𑀢𑀸𑀬. 𑀇𑀤𑁆𑀥𑀺𑀯𑀺𑀲𑀯𑀺𑀢𑀸𑀬𑀸𑀢𑀺 𑀇𑀤𑁆𑀥𑀺𑀯𑀺𑀧𑀚𑁆𑀚𑀦𑀪𑀸𑀯𑀸𑀬, 𑀧𑀼𑀦𑀧𑁆𑀧𑀼𑀦𑀁 𑀆𑀲𑁂𑀯𑀦𑀯𑀲𑁂𑀦 𑀘𑀺𑀡𑁆𑀡𑀯𑀲𑀺𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀢𑀸𑀬𑀸𑀢𑀺 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀪𑀸𑀯𑀸𑀬, 𑀦𑀸𑀦𑀧𑁆𑀧𑀓𑀸𑀭𑀢𑁄 𑀓𑀢𑁆𑀯𑀸 𑀤𑀲𑁆𑀲𑀦𑀢𑁆𑀣𑀸𑀬. 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀦𑁆𑀢𑀺𑀆𑀤𑀻𑀲𑀼 𑀙𑀦𑁆𑀤𑀳𑁂𑀢𑀼𑀓𑁄 𑀙𑀦𑁆𑀤𑀸𑀥𑀺𑀓𑁄 𑀯𑀸 𑀲𑀫𑀸𑀥𑀺 𑀙𑀦𑁆𑀤𑀲𑀫𑀸𑀥𑀺, 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑀁 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀫𑀸𑀥𑀺𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀥𑀸𑀦𑀪𑀽𑀢𑀸 𑀲𑀗𑁆𑀔𑀸𑀭𑀸 𑀧𑀥𑀸𑀦𑀲𑀗𑁆𑀔𑀸𑀭𑀸. 𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑀲𑁆𑀲 𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀙𑀦𑁆𑀤𑀲𑀫𑀸𑀥𑀺𑀦𑀸 𑀘 𑀧𑀥𑀸𑀦𑀲𑀗𑁆𑀔𑀸𑀭𑁂𑀦 𑀘 𑀉𑀧𑁂𑀢𑀁. 𑀇𑀤𑁆𑀥𑀺𑀧𑀸𑀤𑀦𑁆𑀢𑀺 𑀦𑀺𑀧𑁆𑀨𑀢𑁆𑀢𑀺𑀧𑀭𑀺𑀬𑀸𑀬𑁂𑀦 𑀇𑀚𑁆𑀛𑀦𑀝𑁆𑀞𑁂𑀦 𑀯𑀸, 𑀇𑀚𑁆𑀛𑀦𑁆𑀢𑀺 𑀏𑀢𑀸𑀬 𑀲𑀢𑁆𑀢𑀸 𑀇𑀤𑁆𑀥𑀸 𑀯𑀼𑀤𑁆𑀥𑀸 𑀉𑀓𑁆𑀓𑀁𑀲𑀕𑀢𑀸 𑀳𑁄𑀦𑁆𑀢𑀻𑀢𑀺 𑀇𑀫𑀺𑀦𑀸 𑀯𑀸 𑀧𑀭𑀺𑀬𑀸𑀬𑁂𑀦 𑀇𑀤𑁆𑀥𑀻𑀢𑀺 𑀲𑀗𑁆𑀔𑁆𑀬𑀁 𑀕𑀢𑀸𑀦𑀁 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀸𑀦𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀧𑀸𑀤𑀪𑀽𑀢𑁄 𑀲𑁂𑀲𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀸𑀲𑀻𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀇𑀤𑁆𑀥𑀺𑀧𑀸𑀤𑁄𑀢𑀺 𑀢𑀣𑀸𑀪𑀽𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 (𑀯𑀺𑀪. 𑁪𑁩𑁪). 𑀇𑀫𑀺𑀦𑀸 ¶ 𑀦𑀬𑁂𑀦 𑀲𑁂𑀲𑁂𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑁂𑀯 ¶ 𑀳𑀺 𑀙𑀦𑁆𑀤𑀁 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀫𑀸𑀥𑀺 𑀙𑀦𑁆𑀤𑀲𑀫𑀸𑀥𑀻𑀢𑀺 𑀯𑀼𑀢𑁆𑀢𑁄, 𑀏𑀯𑀁 𑀯𑀻𑀭𑀺𑀬𑀁, 𑀘𑀺𑀢𑁆𑀢𑀁, 𑀯𑀻𑀫𑀁𑀲𑀁 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀫𑀸𑀥𑀺 𑀯𑀻𑀫𑀁𑀲𑀸𑀲𑀫𑀸𑀥𑀻𑀢𑀺 𑀯𑀼𑀘𑁆𑀘𑀢𑀺. 𑀅𑀧𑀺𑀘 𑀉𑀧𑀘𑀸𑀭𑀚𑁆𑀛𑀸𑀦𑀁 𑀧𑀸𑀤𑁄, 𑀧𑀞𑀫𑀚𑁆𑀛𑀸𑀦𑀁 𑀇𑀤𑁆𑀥𑀺. 𑀲𑀉𑀧𑀘𑀸𑀭𑀁 𑀧𑀞𑀫𑀚𑁆𑀛𑀸𑀦𑀁 𑀧𑀸𑀤𑁄, 𑀤𑀼𑀢𑀺𑀬𑀚𑁆𑀛𑀸𑀦𑀁 𑀇𑀤𑁆𑀥𑀻𑀢𑀺 𑀏𑀯𑀁 𑀧𑀼𑀩𑁆𑀩𑀪𑀸𑀕𑁂 𑀧𑀸𑀤𑁄, 𑀅𑀧𑀭𑀪𑀸𑀕𑁂 𑀇𑀤𑁆𑀥𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀢𑁆𑀣𑀸𑀭𑁂𑀦 𑀇𑀤𑁆𑀥𑀺𑀧𑀸𑀤𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀘 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬 𑀘 𑀯𑀼𑀢𑁆𑀢𑀸.

𑀓𑁂𑀘𑀺 𑀧𑀦 ‘‘𑀦𑀺𑀧𑁆𑀨𑀦𑁆𑀦𑀸 𑀇𑀤𑁆𑀥𑀺. 𑀅𑀦𑀺𑀧𑁆𑀨𑀦𑁆𑀦𑁄 𑀇𑀤𑁆𑀥𑀺𑀧𑀸𑀤𑁄’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀯𑀸𑀤𑀫𑀤𑁆𑀤𑀦𑀢𑁆𑀣𑀸𑀬 𑀅𑀪𑀺𑀥𑀫𑁆𑀫𑁂 𑀉𑀢𑁆𑀢𑀭𑀘𑀽𑀴𑀺𑀓𑀯𑀸𑀭𑁄 𑀦𑀸𑀫 𑀆𑀪𑀢𑁄 𑁋 ‘‘𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄, 𑀯𑀻𑀭𑀺𑀬𑀺𑀤𑁆𑀥𑀺𑀧𑀸𑀤𑁄, 𑀘𑀺𑀢𑁆𑀢𑀺𑀤𑁆𑀥𑀺𑀧𑀸𑀤𑁄, 𑀯𑀻𑀫𑀁𑀲𑀺𑀤𑁆𑀥𑀺𑀧𑀸𑀤𑁄. 𑀢𑀢𑁆𑀣 𑀓𑀢𑀫𑁄 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄? 𑀇𑀥 𑀪𑀺𑀓𑁆𑀔𑀼 𑀬𑀲𑁆𑀫𑀺𑀁 ¶ 𑀲𑀫𑀬𑁂 𑀮𑁄𑀓𑀼𑀢𑁆𑀢𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺 𑀦𑀺𑀬𑁆𑀬𑀸𑀦𑀺𑀓𑀁 𑀅𑀧𑀘𑀬𑀕𑀸𑀫𑀺𑀁 𑀤𑀺𑀝𑁆𑀞𑀺𑀕𑀢𑀸𑀦𑀁 𑀧𑀳𑀸𑀦𑀸𑀬 𑀧𑀞𑀫𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑀺𑀬𑀸 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀤𑀼𑀓𑁆𑀔𑀸𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀁. 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀙𑀦𑁆𑀤𑁄 𑀙𑀦𑁆𑀤𑀺𑀓𑀢𑀸 𑀓𑀢𑁆𑀢𑀼𑀓𑀫𑁆𑀬𑀢𑀸 𑀓𑀼𑀲𑀮𑁄 𑀥𑀫𑁆𑀫𑀘𑁆𑀙𑀦𑁆𑀤𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄, 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 (𑀯𑀺𑀪. 𑁪𑁫𑁮). 𑀇𑀫𑁂 𑀧𑀦 𑀮𑁄𑀓𑀼𑀢𑁆𑀢𑀭𑀯𑀲𑁂𑀦𑁂𑀯 𑀆𑀕𑀢𑀸. 𑀢𑀢𑁆𑀣 𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑁄 𑀙𑀦𑁆𑀤𑀁 𑀥𑀼𑀭𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀁 𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀲𑁄𑀡𑀢𑁆𑀣𑁂𑀭𑁄 𑀯𑀻𑀭𑀺𑀬𑀁 𑀥𑀼𑀭𑀁 𑀓𑀢𑁆𑀯𑀸, 𑀲𑀫𑁆𑀪𑀽𑀢𑀢𑁆𑀣𑁂𑀭𑁄 𑀘𑀺𑀢𑁆𑀢𑀁 𑀥𑀼𑀭𑀁 𑀓𑀢𑁆𑀯𑀸, 𑀆𑀬𑀲𑁆𑀫𑀸 𑀫𑁄𑀖𑀭𑀸𑀚𑀸 𑀯𑀻𑀫𑀁𑀲𑀁 𑀥𑀼𑀭𑀁 𑀓𑀢𑁆𑀯𑀸𑀢𑀺.

𑀢𑀢𑁆𑀣 𑀬𑀣𑀸 𑀘𑀢𑀽𑀲𑀼 𑀅𑀫𑀘𑁆𑀘𑀧𑀼𑀢𑁆𑀢𑁂𑀲𑀼 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁂𑀲𑀼 𑀏𑀓𑁄 𑀉𑀧𑀝𑁆𑀞𑀸𑀦𑁂 𑀙𑀦𑁆𑀤𑀚𑀸𑀢𑁄 𑀭𑀜𑁆𑀜𑁄 𑀅𑀚𑁆𑀛𑀸𑀲𑀬𑀜𑁆𑀘 𑀭𑀼𑀘𑀺𑀜𑁆𑀘 𑀜𑀢𑁆𑀯𑀸 𑀤𑀺𑀯𑀸 𑀘 𑀭𑀢𑁆𑀢𑁄 𑀘 𑀉𑀧𑀝𑁆𑀞𑀳𑀦𑁆𑀢𑁄 𑀭𑀸𑀚𑀸𑀦𑀁 𑀆𑀭𑀸𑀥𑁂𑀢𑁆𑀯𑀸 𑀞𑀸𑀦𑀦𑁆𑀢𑀭𑀁 𑀧𑀸𑀧𑀼𑀡𑀺. 𑀬𑀣𑀸 𑀲𑁄, 𑀏𑀯𑀁 𑀙𑀦𑁆𑀤𑀥𑀼𑀭𑁂𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀓𑁄 𑀧𑀦 𑁋 ‘‘𑀤𑀺𑀯𑀲𑁂 𑀤𑀺𑀯𑀲𑁂 𑀉𑀧𑀝𑁆𑀞𑀸𑀢𑀼𑀁 𑀓𑁄 𑀲𑀓𑁆𑀓𑁄𑀢𑀺, 𑀉𑀧𑁆𑀧𑀦𑁆𑀦𑁂 𑀓𑀺𑀘𑁆𑀘𑁂 𑀧𑀭𑀓𑁆𑀓𑀫𑁂𑀦 𑀆𑀭𑀸𑀥𑁂𑀲𑁆𑀲𑀸𑀫𑀻’’𑀢𑀺 𑀓𑀼𑀧𑀺𑀢𑁂 𑀧𑀘𑁆𑀘𑀦𑁆𑀢𑁂 𑀭𑀜𑁆𑀜𑀸 𑀧𑀳𑀺𑀢𑁄 𑀧𑀭𑀓𑁆𑀓𑀫𑁂𑀦 𑀲𑀢𑁆𑀢𑀼𑀫𑀤𑁆𑀤𑀦𑀁 𑀓𑀢𑁆𑀯𑀸 𑀞𑀸𑀦𑀦𑁆𑀢𑀭𑀁 𑀧𑀸𑀧𑀼𑀡𑀺. 𑀬𑀣𑀸 𑀲𑁄, 𑀏𑀯𑀁 𑀯𑀻𑀭𑀺𑀬𑀥𑀼𑀭𑁂𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀓𑁄 ¶ 𑁋 ‘‘𑀤𑀺𑀯𑀲𑁂 𑀤𑀺𑀯𑀲𑁂 𑀉𑀧𑀝𑁆𑀞𑀸𑀦𑀫𑁆𑀧𑀺 𑀉𑀭𑁂𑀦 𑀲𑀢𑁆𑀢𑀺𑀲𑀭𑀧𑀝𑀺𑀘𑁆𑀙𑀦𑁆𑀦𑀫𑁆𑀧𑀺 ¶ 𑀪𑀸𑀭𑁄𑀬𑁂𑀯, 𑀫𑀦𑁆𑀢𑀩𑀮𑁂𑀦 𑀆𑀭𑀸𑀥𑁂𑀲𑁆𑀲𑀸𑀫𑀻’’𑀢𑀺 𑀔𑀢𑁆𑀢𑀯𑀺𑀚𑁆𑀚𑀸𑀬 𑀓𑀢𑀧𑀭𑀺𑀘𑀬𑀢𑁆𑀢𑀸 𑀫𑀦𑁆𑀢𑀲𑀁𑀯𑀺𑀥𑀸𑀦𑁂𑀦 𑀭𑀸𑀚𑀸𑀦𑀁 𑀆𑀭𑀸𑀥𑁂𑀢𑁆𑀯𑀸 𑀞𑀸𑀦𑀦𑁆𑀢𑀭𑀁 𑀧𑀸𑀧𑀼𑀡𑀸𑀢𑀺. 𑀬𑀣𑀸 𑀲𑁄, 𑀏𑀯𑀁 𑀘𑀺𑀢𑁆𑀢𑀥𑀼𑀭𑁂𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀭𑁄 𑁋 ‘‘𑀓𑀺𑀁 𑀇𑀫𑁂𑀳𑀺 𑀉𑀧𑀝𑁆𑀞𑀸𑀦𑀸𑀤𑀻𑀳𑀺, 𑀭𑀸𑀚𑀸𑀦𑁄 𑀦𑀸𑀫 𑀚𑀸𑀢𑀺𑀲𑀫𑁆𑀧𑀦𑁆𑀦𑀲𑁆𑀲 𑀞𑀸𑀦𑀦𑁆𑀢𑀭𑀁 𑀤𑁂𑀦𑁆𑀢𑀺, 𑀢𑀸𑀤𑀺𑀲𑀲𑁆𑀲 𑀤𑁂𑀦𑁆𑀢𑁄 𑀫𑀬𑁆𑀳𑀁 𑀤𑀲𑁆𑀲𑀢𑀻’’𑀢𑀺 𑀚𑀸𑀢𑀺𑀲𑀫𑁆𑀧𑀢𑁆𑀢𑀺𑀫𑁂𑀯 𑀦𑀺𑀲𑁆𑀲𑀸𑀬 𑀞𑀸𑀦𑀦𑁆𑀢𑀭𑀁 𑀧𑀸𑀧𑀼𑀡𑀺, 𑀬𑀣𑀸 𑀲𑁄, 𑀏𑀯𑀁 𑀲𑀼𑀧𑀭𑀺𑀲𑀼𑀤𑁆𑀥𑀁 𑀯𑀻𑀫𑀁𑀲𑀁 𑀦𑀺𑀲𑁆𑀲𑀸𑀬 𑀯𑀻𑀫𑀁𑀲𑀥𑀼𑀭𑁂𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀦𑁂𑀓𑀯𑀺𑀳𑀺𑀢𑀦𑁆𑀢𑀺 𑀅𑀦𑁂𑀓𑀯𑀺𑀥𑀁. 𑀇𑀤𑁆𑀥𑀺𑀯𑀺𑀥𑀦𑁆𑀢𑀺 𑀇𑀤𑁆𑀥𑀺𑀓𑁄𑀝𑁆𑀞𑀸𑀲𑀁.

𑀢𑀺𑀯𑀺𑀥𑀑𑀓𑀸𑀲𑀸𑀥𑀺𑀕𑀫𑀯𑀡𑁆𑀡𑀦𑀸

𑁨𑁮𑁮. 𑀲𑀼𑀔𑀲𑁆𑀲𑀸𑀥𑀺𑀕𑀫𑀸𑀬𑀸𑀢𑀺 𑀛𑀸𑀦𑀲𑀼𑀔𑀲𑁆𑀲 𑀫𑀕𑁆𑀕𑀲𑀼𑀔𑀲𑁆𑀲 𑀨𑀮𑀲𑀼𑀔𑀲𑁆𑀲 𑀘 𑀅𑀥𑀺𑀕𑀫𑀸𑀬. 𑀲𑀁𑀲𑀝𑁆𑀞𑁄𑀢𑀺 ¶ 𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁄. 𑀅𑀭𑀺𑀬𑀥𑀫𑁆𑀫𑀦𑁆𑀢𑀺 𑀅𑀭𑀺𑀬𑁂𑀦 𑀪𑀕𑀯𑀢𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀁 𑀥𑀫𑁆𑀫𑀁. 𑀲𑀼𑀡𑀸𑀢𑀻𑀢𑀺 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀆𑀤𑀻𑀳𑀺 𑀯𑀸 𑀤𑁂𑀲𑀺𑀬𑀫𑀸𑀦𑀁 𑀲𑀼𑀡𑀸𑀢𑀺. 𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑀻𑀢𑀺 𑀉𑀧𑀸𑀬𑀢𑁄 𑀧𑀣𑀢𑁄 𑀓𑀸𑀭𑀡𑀢𑁄 ‘𑀅𑀦𑀺𑀘𑁆𑀘’𑀦𑁆𑀢𑀺𑀆𑀤𑀺𑀯𑀲𑁂𑀦 𑀫𑀦𑀲𑀺 𑀓𑀭𑁄𑀢𑀺. ‘‘𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀦𑀸𑀫 𑀉𑀧𑀸𑀬𑀫𑀦𑀲𑀺𑀓𑀸𑀭𑁄 𑀧𑀣𑀫𑀦𑀲𑀺𑀓𑀸𑀭𑁄, 𑀅𑀦𑀺𑀘𑁆𑀘𑁂 𑀅𑀦𑀺𑀘𑁆𑀘𑀦𑁆𑀢𑀺 𑀤𑀼𑀓𑁆𑀔𑁂 𑀤𑀼𑀓𑁆𑀔𑀦𑁆𑀢𑀺 𑀅𑀦𑀢𑁆𑀢𑀦𑀺 𑀅𑀦𑀢𑁆𑀢𑀸𑀢𑀺 𑀅𑀲𑀼𑀪𑁂 𑀅𑀲𑀼𑀪𑀦𑁆𑀢𑀺 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑁂𑀦 𑀯𑀸 𑀘𑀺𑀢𑁆𑀢𑀲𑁆𑀲 𑀆𑀯𑀝𑁆𑀝𑀦𑀸 𑀅𑀦𑁆𑀯𑀸𑀯𑀝𑁆𑀝𑀦𑀸 𑀆𑀪𑁄𑀕𑁄 𑀲𑀫𑀦𑁆𑀦𑀸𑀳𑀸𑀭𑁄 𑀫𑀦𑀲𑀺𑀓𑀸𑀭𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀓𑀫𑁆𑀫𑀁 𑀆𑀭𑀪𑀢𑀻𑀢𑀺 𑀅𑀢𑁆𑀣𑁄. 𑀅𑀲𑀁𑀲𑀝𑁆𑀞𑁄𑀢𑀺 𑀯𑀢𑁆𑀣𑀼𑀓𑀸𑀫𑁂𑀳𑀺𑀧𑀺 𑀓𑀺𑀮𑁂𑀲𑀓𑀸𑀫𑁂𑀳𑀺𑀧𑀺 𑀅𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺. 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀦𑁆𑀢𑀺 𑀉𑀧𑁆𑀧𑀚𑁆𑀚𑀢𑀺 𑀧𑀞𑀫𑀚𑁆𑀛𑀸𑀦𑀲𑀼𑀔𑀁. 𑀲𑀼𑀔𑀸 𑀪𑀺𑀬𑁆𑀬𑁄 𑀲𑁄𑀫𑀦𑀲𑁆𑀲𑀦𑁆𑀢𑀺 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀛𑀸𑀦𑀲𑀼𑀔𑀧𑀘𑁆𑀘𑀬𑀸 𑀅𑀧𑀭𑀸𑀧𑀭𑀁 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀧𑀫𑀼𑀤𑀸𑀢𑀺 𑀢𑀼𑀝𑁆𑀞𑀸𑀓𑀸𑀭𑀢𑁄 𑀤𑀼𑀩𑁆𑀩𑀮𑀧𑀻𑀢𑀺. 𑀧𑀸𑀫𑁄𑀚𑁆𑀚𑀦𑁆𑀢𑀺 𑀩𑀮𑀯𑀢𑀭𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁. 𑀧𑀞𑀫𑁄 𑀑𑀓𑀸𑀲𑀸𑀥𑀺𑀕𑀫𑁄𑀢𑀺 𑀧𑀞𑀫𑀚𑁆𑀛𑀸𑀦𑀁 𑀧𑀜𑁆𑀘𑀦𑀻𑀯𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀅𑀢𑁆𑀢𑀦𑁄 𑀑𑀓𑀸𑀲𑀁 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 ‘‘𑀧𑀞𑀫𑁄 𑀑𑀓𑀸𑀲𑀸𑀥𑀺𑀕𑀫𑁄’’𑀢𑀺 𑀯𑀼𑀢𑁆𑀢𑀁.

𑀑𑀴𑀸𑀭𑀺𑀓𑀸𑀢𑀺 ¶ 𑀏𑀢𑁆𑀣 𑀓𑀸𑀬𑀯𑀘𑀻𑀲𑀗𑁆𑀔𑀸𑀭𑀸 𑀢𑀸𑀯 𑀑𑀴𑀸𑀭𑀺𑀓𑀸 𑀳𑁄𑀦𑁆𑀢𑀼, 𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀓𑀣𑀁 𑀑𑀴𑀸𑀭𑀺𑀓𑀸𑀢𑀺? 𑀅𑀧𑁆𑀧𑀳𑀻𑀦𑀢𑁆𑀢𑀸. 𑀓𑀸𑀬𑀲𑀗𑁆𑀔𑀸𑀭𑀸 𑀳𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀦 𑀧𑀳𑀻𑀬𑀦𑁆𑀢𑀺, 𑀯𑀘𑀻𑀲𑀗𑁆𑀔𑀸𑀭𑀸 𑀤𑀼𑀢𑀺𑀬𑀚𑁆𑀛𑀸𑀦𑁂𑀦, 𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸. 𑀇𑀢𑀺 𑀓𑀸𑀬𑀯𑀘𑀻𑀲𑀗𑁆𑀔𑀸𑀭𑁂𑀲𑀼 𑀧𑀳𑀻𑀦𑁂𑀲𑀼𑀧𑀺 𑀢𑁂 𑀢𑀺𑀝𑁆𑀞𑀦𑁆𑀢𑀺𑀬𑁂𑀯𑀸𑀢𑀺 𑀧𑀳𑀻𑀦𑁂 𑀉𑀧𑀸𑀤𑀸𑀬 ¶ 𑀅𑀧𑁆𑀧𑀳𑀻𑀦𑀢𑁆𑀢𑀸 𑀑𑀴𑀸𑀭𑀺𑀓𑀸 𑀦𑀸𑀫 𑀚𑀸𑀢𑀸. 𑀲𑀼𑀔𑀦𑁆𑀢𑀺 𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀁. 𑀲𑀼𑀔𑀸 𑀪𑀺𑀬𑁆𑀬𑁄 𑀲𑁄𑀫𑀦𑀲𑁆𑀲𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀅𑀧𑀭𑀸𑀧𑀭𑀁 𑀲𑁄𑀫𑀦𑀲𑁆𑀲𑀁. 𑀤𑀼𑀢𑀺𑀬𑁄 𑀑𑀓𑀸𑀲𑀸𑀥𑀺𑀕𑀫𑁄𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀼𑀔𑀁 𑀤𑀼𑀓𑁆𑀔𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀅𑀢𑁆𑀢𑀦𑁄 𑀑𑀓𑀸𑀲𑀁 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 ‘‘𑀤𑀼𑀢𑀺𑀬𑁄 𑀑𑀓𑀸𑀲𑀸𑀥𑀺𑀕𑀫𑁄’’𑀢𑀺 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀸𑀦𑀺 𑀧𑀦𑁂𑀢𑁆𑀣 𑀘𑀢𑀼𑀢𑁆𑀣𑁂 𑀕𑀳𑀺𑀢𑁂 𑀕𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀸𑀦𑀻𑀢𑀺.

𑀇𑀤𑀁 𑀓𑀼𑀲𑀮𑀦𑁆𑀢𑀺𑀆𑀤𑀻𑀲𑀼 𑀓𑀼𑀲𑀮𑀁 𑀦𑀸𑀫 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀸. 𑀅𑀓𑀼𑀲𑀮𑀦𑁆𑀢𑀺 𑀤𑀲𑀅𑀓𑀼𑀲𑀮𑀓𑀫𑁆𑀫𑀧𑀣𑀸. 𑀲𑀸𑀯𑀚𑁆𑀚𑀤𑀼𑀓𑀸𑀤𑀬𑁄𑀧𑀺 𑀏𑀢𑁂𑀲𑀁 𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀲𑀩𑁆𑀩𑀜𑁆𑀘𑁂𑀯 𑀧𑀦𑁂𑀢𑀁 𑀓𑀡𑁆𑀳𑀜𑁆𑀘 𑀲𑀼𑀓𑁆𑀓𑀜𑁆𑀘 𑀲𑀧𑁆𑀧𑀝𑀺𑀪𑀸𑀕𑀜𑁆𑀘𑀸𑀢𑀺 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀁. 𑀦𑀺𑀩𑁆𑀩𑀸𑀦𑀫𑁂𑀯 𑀳𑁂𑀢𑀁 𑀅𑀧𑁆𑀧𑀝𑀺𑀪𑀸𑀕𑀁. 𑀅𑀯𑀺𑀚𑁆𑀚𑀸 𑀧𑀳𑀻𑀬𑀢𑀻𑀢𑀺 𑀯𑀝𑁆𑀝𑀧𑀝𑀺𑀘𑁆𑀙𑀸𑀤𑀺𑀓𑀸 𑀅𑀯𑀺𑀚𑁆𑀚𑀸 𑀧𑀳𑀻𑀬𑀢𑀺. 𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑀢𑀺. 𑀲𑀼𑀔𑀦𑁆𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑀼𑀔𑀜𑁆𑀘𑁂𑀯 𑀨𑀮𑀲𑀼𑀔𑀜𑁆𑀘. 𑀲𑀼𑀔𑀸 𑀪𑀺𑀬𑁆𑀬𑁄 𑀲𑁄𑀫𑀦𑀲𑁆𑀲𑀦𑁆𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀅𑀧𑀭𑀸𑀧𑀭𑀁 𑀲𑁄𑀫𑀦𑀲𑁆𑀲𑀁. 𑀢𑀢𑀺𑀬𑁄 𑀑𑀓𑀸𑀲𑀸𑀥𑀺𑀕𑀫𑁄𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁄 𑀲𑀩𑁆𑀩𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀅𑀢𑁆𑀢𑀦𑁄 𑀑𑀓𑀸𑀲𑀁 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 ‘‘𑀢𑀢𑀺𑀬𑁄 𑀑𑀓𑀸𑀲𑀸𑀥𑀺𑀕𑀫𑁄’’𑀢𑀺 𑀯𑀼𑀢𑁆𑀢𑁄. 𑀲𑁂𑀲𑀫𑀕𑁆𑀕𑀸 𑀧𑀦 𑀢𑀲𑁆𑀫𑀺𑀁 𑀕𑀳𑀺𑀢𑁂 𑀅𑀦𑁆𑀢𑁄𑀕𑀥𑀸 𑀏𑀯𑀸𑀢𑀺 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀸.

𑀇𑀫𑁂 ¶ 𑀧𑀦 𑀢𑀬𑁄 𑀑𑀓𑀸𑀲𑀸𑀥𑀺𑀕𑀫𑀸 𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑀯𑀲𑁂𑀦 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀸. 𑀓𑀣𑀁? 𑀲𑀩𑁆𑀩𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀧𑀘𑀸𑀭𑀯𑀲𑁂𑀦 𑀘 𑀅𑀧𑁆𑀧𑀦𑀸𑀯𑀲𑁂𑀦 𑀘 𑀯𑀯𑀢𑁆𑀣𑀧𑁂𑀢𑁆𑀯𑀸 𑀘𑀢𑀼𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀧𑀞𑀫𑀚𑁆𑀛𑀸𑀦𑀁 ‘‘𑀧𑀞𑀫𑁄 𑀑𑀓𑀸𑀲𑀸𑀥𑀺𑀕𑀫𑁄’’𑀢𑀺 𑀓𑀣𑁂𑀢𑀩𑁆𑀩𑀁. 𑀢𑁂𑀭𑀲𑀲𑀼 𑀞𑀸𑀦𑁂𑀲𑀼 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀸𑀦𑀺, 𑀧𑀦𑁆𑀦𑀭𑀲𑀲𑀼 𑀞𑀸𑀦𑁂𑀲𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑀜𑁆𑀘 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀧𑀸𑀧𑁂𑀢𑁆𑀯𑀸 ‘‘𑀤𑀼𑀢𑀺𑀬𑁄 𑀑𑀓𑀸𑀲𑀸𑀥𑀺𑀕𑀫𑁄’’𑀢𑀺 𑀓𑀣𑁂𑀢𑀩𑁆𑀩𑀁. 𑀤𑀲 𑀉𑀧𑀘𑀸𑀭𑀚𑁆𑀛𑀸𑀦𑀸𑀦𑀺 𑀧𑀦 𑀫𑀕𑁆𑀕𑀲𑁆𑀲 𑀧𑀤𑀝𑁆𑀞𑀸𑀦𑀪𑀽𑀢𑀸𑀦𑀺 𑀢𑀢𑀺𑀬𑀁 𑀑𑀓𑀸𑀲𑀸𑀥𑀺𑀕𑀫𑀁 𑀪𑀚𑀦𑁆𑀢𑀺. 𑀅𑀧𑀺𑀘 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀧𑀞𑀫𑀁 𑀑𑀓𑀸𑀲𑀸𑀥𑀺𑀕𑀫𑀁 𑀪𑀚𑀢𑀺, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸 𑀤𑀼𑀢𑀺𑀬𑀁, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸 𑀢𑀢𑀺𑀬𑀦𑁆𑀢𑀺 𑀏𑀯𑀁 𑀲𑀺𑀓𑁆𑀔𑀸𑀯𑀲𑁂𑀦𑀧𑀺 𑀓𑀣𑁂𑀢𑀩𑁆𑀩𑀁. 𑀲𑀸𑀫𑀜𑁆𑀜𑀨𑀮𑁂𑀧𑀺 𑀘𑀽𑀴𑀲𑀻𑀮𑀢𑁄 𑀬𑀸𑀯 𑀧𑀞𑀫𑀚𑁆𑀛𑀸𑀦𑀸 𑀧𑀞𑀫𑁄 𑀑𑀓𑀸𑀲𑀸𑀥𑀺𑀕𑀫𑁄 ¶ , 𑀤𑀼𑀢𑀺𑀬𑀚𑁆𑀛𑀸𑀦𑀢𑁄 𑀬𑀸𑀯 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀸 𑀤𑀼𑀢𑀺𑀬𑁄 ¶ , 𑀯𑀺𑀧𑀲𑁆𑀲𑀦𑀸𑀢𑁄 𑀬𑀸𑀯 𑀅𑀭𑀳𑀢𑁆𑀢𑀸 𑀢𑀢𑀺𑀬𑁄 𑀑𑀓𑀸𑀲𑀸𑀥𑀺𑀕𑀫𑁄𑀢𑀺 𑀏𑀯𑀁 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀦𑁆𑀢𑀯𑀲𑁂𑀦𑀧𑀺 𑀓𑀣𑁂𑀢𑀩𑁆𑀩𑀁. 𑀢𑀻𑀲𑀼 𑀧𑀦 𑀧𑀺𑀝𑀓𑁂𑀲𑀼 𑀯𑀺𑀦𑀬𑀧𑀺𑀝𑀓𑀁 𑀧𑀞𑀫𑀁 𑀑𑀓𑀸𑀲𑀸𑀥𑀺𑀕𑀫𑀁 𑀪𑀚𑀢𑀺, 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀤𑀼𑀢𑀺𑀬𑀁, 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀢𑀢𑀺𑀬𑀦𑁆𑀢𑀺 𑀏𑀯𑀁 𑀧𑀺𑀝𑀓𑀯𑀲𑁂𑀦𑀧𑀺 𑀓𑀣𑁂𑀢𑀩𑁆𑀩𑀁.

𑀧𑀼𑀩𑁆𑀩𑁂 𑀓𑀺𑀭 𑀫𑀳𑀸𑀣𑁂𑀭𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀇𑀫𑀫𑁂𑀯 𑀲𑀼𑀢𑁆𑀢𑀁 𑀧𑀝𑁆𑀞𑀧𑁂𑀦𑁆𑀢𑀺. 𑀓𑀺𑀁 𑀓𑀸𑀭𑀡𑀸? 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀯𑀺𑀪𑀚𑀺𑀢𑁆𑀯𑀸 𑀓𑀣𑁂𑀢𑀼𑀁 𑀮𑀪𑀺𑀲𑁆𑀲𑀸𑀫𑀸𑀢𑀺. 𑀢𑁂𑀧𑀺𑀝𑀓𑁂𑀦 𑀳𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀓𑀣𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀣𑀺𑀢𑀦𑁆𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑁂𑀧𑀺𑀝𑀓𑀁 𑀪𑀚𑀸𑀧𑁂𑀢𑁆𑀯𑀸 𑀓𑀣𑀺𑀢𑀫𑁂𑀯 𑀇𑀤𑀁 𑀲𑀼𑀢𑁆𑀢𑀁 𑀲𑀼𑀓𑀣𑀺𑀢𑀁 𑀳𑁄𑀢𑀻𑀢𑀺.

𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀯𑀡𑁆𑀡𑀦𑀸

𑁨𑁮𑁯. 𑀓𑀼𑀲𑀮𑀲𑁆𑀲𑀸𑀥𑀺𑀕𑀫𑀸𑀬𑀸𑀢𑀺 𑀫𑀕𑁆𑀕𑀓𑀼𑀲𑀮𑀲𑁆𑀲 𑀘𑁂𑀯 𑀨𑀮𑀓𑀼𑀲𑀮𑀲𑁆𑀲 𑀘 𑀅𑀥𑀺𑀕𑀫𑀢𑁆𑀣𑀸𑀬. 𑀉𑀪𑀬𑀫𑁆𑀧𑀺 𑀳𑁂𑀢𑀁 𑀅𑀦𑀯𑀚𑁆𑀚𑀝𑁆𑀞𑁂𑀦 𑀔𑁂𑀫𑀝𑁆𑀞𑁂𑀦 𑀯𑀸 𑀓𑀼𑀲𑀮𑀫𑁂𑀯. 𑀢𑀢𑁆𑀣 𑀲𑀫𑁆𑀫𑀸𑀲𑀫𑀸𑀥𑀺𑀬𑀢𑀻𑀢𑀺 𑀢𑀲𑁆𑀫𑀺𑀁 𑀅𑀚𑁆𑀛𑀢𑁆𑀢𑀓𑀸𑀬𑁂 𑀲𑀫𑀸𑀳𑀺𑀢𑁄 𑀏𑀓𑀕𑁆𑀕𑀘𑀺𑀢𑁆𑀢𑁄 𑀳𑁄𑀢𑀺. 𑀩𑀳𑀺𑀤𑁆𑀥𑀸 𑀧𑀭𑀓𑀸𑀬𑁂 𑀜𑀸𑀡𑀤𑀲𑁆𑀲𑀦𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀅𑀢𑁆𑀢𑀦𑁄 𑀓𑀸𑀬𑀢𑁄 𑀧𑀭𑀲𑁆𑀲 𑀓𑀸𑀬𑀸𑀪𑀺𑀫𑀼𑀔𑀁 𑀜𑀸𑀡𑀁 𑀧𑁂𑀲𑁂𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀲𑀩𑁆𑀩𑀢𑁆𑀣𑁂𑀯 𑀘 𑀲𑀢𑀺𑀫𑀸𑀢𑀺 𑀧𑀤𑁂𑀦 𑀓𑀸𑀬𑀸𑀤𑀺𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺, 𑀮𑁄𑀓𑁄𑀢𑀺 𑀧𑀤𑁂𑀦 𑀧𑀭𑀺𑀕𑁆𑀕𑀳𑀺𑀢𑀓𑀸𑀬𑀸𑀤𑀬𑁄𑀯 𑀮𑁄𑀓𑁄. 𑀘𑀢𑁆𑀢𑀸𑀭𑁄 𑀘𑁂𑀢𑁂 𑀲𑀢𑀺𑀧𑀝𑁆𑀞𑀸𑀦𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀓𑀣𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀢𑁆𑀢𑀲𑀫𑀸𑀥𑀺𑀧𑀭𑀺𑀓𑁆𑀔𑀸𑀭𑀯𑀡𑁆𑀡𑀦𑀸

𑁨𑁯𑁦. 𑀲𑀫𑀸𑀥𑀺𑀧𑀭𑀺𑀓𑁆𑀔𑀸𑀭𑀸𑀢𑀺 𑀏𑀢𑁆𑀣 𑀢𑀬𑁄 𑀧𑀭𑀺𑀓𑁆𑀔𑀸𑀭𑀸. ‘‘𑀭𑀣𑁄 𑀲𑀻𑀮𑀧𑀭𑀺𑀓𑁆𑀔𑀸𑀭𑁄 𑀛𑀸𑀦𑀓𑁆𑀔𑁄 𑀘𑀓𑁆𑀓𑀯𑀻𑀭𑀺𑀬𑁄’’𑀢𑀺 (𑀲𑀁. 𑀦𑀺. 𑁫.𑁪) 𑀳𑀺 𑀏𑀢𑁆𑀣 𑀅𑀮𑀗𑁆𑀓𑀸𑀭𑁄 𑀧𑀭𑀺𑀓𑁆𑀔𑀸𑀭𑁄 𑀦𑀸𑀫. ‘‘𑀲𑀢𑁆𑀢𑀳𑀺 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀳𑀺 ¶ 𑀲𑀼𑀧𑀭𑀺𑀓𑁆𑀔𑀢𑀁 𑀳𑁄𑀢𑀻’’𑀢𑀺 (𑀅. 𑀦𑀺. 𑁭.𑁬𑁭) 𑀏𑀢𑁆𑀣 𑀧𑀭𑀺𑀯𑀸𑀭𑁄 𑀧𑀭𑀺𑀓𑁆𑀔𑀸𑀭𑁄 𑀦𑀸𑀫. ‘‘𑀕𑀺𑀮𑀸𑀦𑀧𑀘𑁆𑀘𑀬𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑁄’’𑀢𑀺 (𑀤𑀻. 𑀦𑀺. 𑁩.𑁧𑁮𑁨) 𑀏𑀢𑁆𑀣 𑀲𑀫𑁆𑀪𑀸𑀭𑁄 𑀧𑀭𑀺𑀓𑁆𑀔𑀸𑀭𑁄 𑀦𑀸𑀫. 𑀇𑀥 𑀧𑀦 𑀧𑀭𑀺𑀯𑀸𑀭𑀧𑀭𑀺𑀓𑁆𑀔𑀸𑀭𑀯𑀲𑁂𑀦 ‘‘𑀲𑀢𑁆𑀢 𑀲𑀫𑀸𑀥𑀺𑀧𑀭𑀺𑀓𑁆𑀔𑀸𑀭𑀸’’𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀓𑁆𑀔𑀢𑀸𑀢𑀺 𑀧𑀭𑀺𑀯𑀸𑀭𑀺𑀢𑀸. 𑀅𑀬𑀁 𑀯𑀼𑀘𑁆𑀘𑀢𑀺 𑀲𑁄 𑀅𑀭𑀺𑀬𑁄 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑀅𑀬𑀁 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀧𑀭𑀺𑀯𑀼𑀢𑁄 𑀘𑀓𑁆𑀓𑀯𑀢𑁆𑀢𑀻 𑀯𑀺𑀬 𑀲𑀢𑁆𑀢𑀳𑀺 𑀅𑀗𑁆𑀕𑁂𑀳𑀺 𑀧𑀭𑀺𑀯𑀼𑀢𑁄 ¶ ‘‘𑀅𑀭𑀺𑀬𑁄 𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑀉𑀧𑀦𑀺𑀲𑁄 𑀇𑀢𑀺𑀧𑀻𑀢𑀺 𑀲𑀉𑀧𑀦𑀺𑀲𑁆𑀲𑀬𑁄 𑀇𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀲𑀧𑀭𑀺𑀯𑀸𑀭𑁄 𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑁆𑀲𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀁 𑀞𑀺𑀢𑀲𑁆𑀲. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀳𑁄𑀢𑀻𑀢𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀯𑀢𑁆𑀢𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀧𑀤𑁂𑀲𑀼. 𑀅𑀬𑀁 𑀧𑀦𑀢𑁆𑀣𑁄 𑀫𑀕𑁆𑀕𑀯𑀲𑁂𑀦𑀸𑀧𑀺 𑀨𑀮𑀯𑀲𑁂𑀦𑀸𑀧𑀺 𑀯𑁂𑀤𑀺𑀢𑀩𑁆𑀩𑁄. 𑀓𑀣𑀁? 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀁 𑀞𑀺𑀢𑀲𑁆𑀲 ¶ 𑀫𑀕𑁆𑀕𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀳𑁄𑀢𑀺…𑀧𑁂… 𑀫𑀕𑁆𑀕𑀜𑀸𑀡𑁂 𑀞𑀺𑀢𑀲𑁆𑀲 𑀫𑀕𑁆𑀕𑀯𑀺𑀫𑀼𑀢𑁆𑀢𑀺 𑀧𑀳𑁄𑀢𑀺. 𑀢𑀣𑀸 𑀨𑀮𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀁 𑀞𑀺𑀢𑀲𑁆𑀲 𑀨𑀮𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀳𑁄𑀢𑀺…𑀧𑁂… 𑀨𑀮𑀲𑀫𑁆𑀫𑀸𑀜𑀸𑀡𑁂 𑀞𑀺𑀢𑀲𑁆𑀲 𑀨𑀮𑀯𑀺𑀫𑀼𑀢𑁆𑀢𑀺 𑀧𑀳𑁄𑀢𑀻𑀢𑀺.

𑀲𑁆𑀯𑀸𑀓𑁆𑀔𑀸𑀢𑁄𑀢𑀺𑀆𑀤𑀻𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀡𑁆𑀡𑀺𑀢𑀸𑀦𑀺. 𑀅𑀧𑀸𑀭𑀼𑀢𑀸𑀢𑀺 𑀯𑀺𑀯𑀝𑀸. 𑀅𑀫𑀢𑀲𑁆𑀲𑀸𑀢𑀺 𑀦𑀺𑀩𑁆𑀩𑀸𑀦𑀲𑁆𑀲. 𑀤𑁆𑀯𑀸𑀭𑀸𑀢𑀺 𑀧𑀯𑁂𑀲𑀦𑀫𑀕𑁆𑀕𑀸. 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦𑀸𑀢𑀺 𑀅𑀘𑀮𑀧𑁆𑀧𑀲𑀸𑀤𑁂𑀦. 𑀥𑀫𑁆𑀫𑀯𑀺𑀦𑀻𑀢𑀸𑀢𑀺 𑀲𑀫𑁆𑀫𑀸𑀦𑀺𑀬𑁆𑀬𑀸𑀦𑁂𑀦 𑀦𑀺𑀬𑁆𑀬𑀸𑀢𑀸.

𑀅𑀢𑁆𑀣𑀸𑀬𑀁 𑀇𑀢𑀭𑀸 𑀧𑀚𑀸𑀢𑀺 𑀅𑀦𑀸𑀕𑀸𑀫𑀺𑀦𑁄 𑀲𑀦𑁆𑀥𑀸𑀬𑀸𑀳, 𑀅𑀦𑀸𑀕𑀸𑀫𑀺𑀦𑁄 𑀘 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀼𑀜𑁆𑀜𑀪𑀸𑀕𑀸𑀢𑀺 𑀧𑀼𑀜𑁆𑀜𑀓𑁄𑀝𑁆𑀞𑀸𑀲𑁂𑀦 𑀦𑀺𑀩𑁆𑀩𑀢𑁆𑀢𑀸. 𑀑𑀢𑁆𑀢𑀧𑁆𑀧𑀦𑁆𑀢𑀺 𑀑𑀢𑁆𑀢𑀧𑁆𑀧𑀫𑀸𑀦𑁄. 𑀢𑁂𑀦 𑀓𑀤𑀸𑀘𑀺 𑀦𑀸𑀫 𑀫𑀼𑀲𑀸 𑀅𑀲𑁆𑀲𑀸𑀢𑀺 𑀫𑀼𑀲𑀸𑀯𑀸𑀤𑀪𑀬𑁂𑀦 𑀲𑀗𑁆𑀔𑀸𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀦 𑀧𑀦 𑀫𑀫 𑀲𑀗𑁆𑀔𑀸𑀢𑀼𑀁 𑀩𑀮𑀁 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺.

𑁨𑁯𑁧. 𑀢𑀁 𑀓𑀺𑀁 𑀫𑀜𑁆𑀜𑀢𑀺 𑀪𑀯𑀦𑁆𑀢𑀺 𑀇𑀫𑀺𑀦𑀸 𑀓𑁂𑀯𑀮𑀁 𑀯𑁂𑀲𑁆𑀲𑀯𑀡𑀁 𑀧𑀼𑀘𑁆𑀙𑀢𑀺, 𑀦 𑀧𑀦𑀲𑁆𑀲 𑀏𑀯𑀭𑀽𑀧𑁄 𑀲𑀢𑁆𑀣𑀸 𑀦𑀸𑀳𑁄𑀲𑀻𑀢𑀺 𑀯𑀸 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀯𑀸 𑀮𑀤𑁆𑀥𑀺 𑀅𑀢𑁆𑀣𑀺. 𑀲𑀩𑁆𑀩𑀩𑀼𑀤𑁆𑀥𑀸𑀦𑀜𑁆𑀳𑀺 𑀅𑀪𑀺𑀲𑀫𑀬𑁂 𑀯𑀺𑀲𑁂𑀲𑁄 𑀦𑀢𑁆𑀣𑀺.

𑁨𑁯𑁨. 𑀲𑀬𑀁𑀧𑀭𑀺𑀲𑀸𑀬𑀦𑁆𑀢𑀺 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬𑀁. 𑀢𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀢𑀁 𑀇𑀤𑀁 𑀲𑀓𑀮𑀁 𑀲𑀺𑀓𑁆𑀔𑀢𑁆𑀢𑀬𑀩𑁆𑀭𑀳𑁆𑀫𑀘𑀭𑀺𑀬𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀇𑀫𑀸𑀦𑀺 𑀧𑀦 𑀧𑀤𑀸𑀦𑀺 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀞𑀧𑀺𑀢𑀸𑀦𑀻𑀢𑀺.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁

𑀚𑀦𑀯𑀲𑀪𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀫𑀳𑀸𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯𑁩. 𑀏𑀯𑀁 ¶ ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀫𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑁋 𑀧𑀜𑁆𑀘𑀲𑀺𑀔𑁄𑀢𑀺 𑀧𑀜𑁆𑀘𑀘𑀽𑀴𑁄 𑀧𑀜𑁆𑀘𑀓𑀼𑀡𑁆𑀟𑀮𑀺𑀓𑁄. 𑀲𑁄 𑀓𑀺𑀭 𑀫𑀦𑀼𑀲𑁆𑀲𑀧𑀣𑁂 𑀧𑀼𑀜𑁆𑀜𑀓𑀫𑁆𑀫𑀓𑀭𑀡𑀓𑀸𑀮𑁂 𑀤𑀳𑀭𑁄 𑀧𑀜𑁆𑀘𑀘𑀽𑀴𑀓𑀤𑀸𑀭𑀓𑀓𑀸𑀮𑁂 𑀯𑀘𑁆𑀙𑀧𑀸𑀮𑀓𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸 𑀅𑀜𑁆𑀜𑁂𑀧𑀺 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀩𑀳𑀺𑀕𑀸𑀫𑁂 𑀘𑀢𑀼𑀫𑀕𑁆𑀕𑀝𑁆𑀞𑀸𑀦𑁂𑀲𑀼 𑀲𑀸𑀮𑀁 𑀓𑀭𑁄𑀦𑁆𑀢𑁄 𑀧𑁄𑀓𑁆𑀔𑀭𑀡𑀺𑀁 𑀔𑀡𑀦𑁆𑀢𑁄 𑀲𑁂𑀢𑀼𑀁 𑀩𑀦𑁆𑀥𑀦𑁆𑀢𑁄 𑀯𑀺𑀲𑀫𑀁 𑀫𑀕𑁆𑀕𑀁 𑀲𑀫𑀁 𑀓𑀭𑁄𑀦𑁆𑀢𑁄 𑀬𑀸𑀦𑀸𑀦𑀁 𑀅𑀓𑁆𑀔𑀧𑀝𑀺𑀖𑀸𑀢𑀦𑀭𑀼𑀓𑁆𑀔𑁂 𑀳𑀭𑀦𑁆𑀢𑁄𑀢𑀺 𑀏𑀯𑀭𑀽𑀧𑀸𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀯𑀺𑀘𑀭𑀺𑀢𑁆𑀯𑀸 𑀤𑀳𑀭𑁄𑀯 𑀓𑀸𑀮𑀫𑀓𑀸𑀲𑀺. 𑀢𑀲𑁆𑀲 𑀲𑁄 𑀅𑀢𑁆𑀢𑀪𑀸𑀯𑁄 𑀇𑀝𑁆𑀞𑁄 𑀓𑀦𑁆𑀢𑁄 𑀫𑀦𑀸𑀧𑁄 𑀅𑀳𑁄𑀲𑀺. 𑀲𑁄 𑀓𑀸𑀮𑀁 𑀓𑀢𑁆𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑀮𑁄𑀓𑁂 𑀦𑀯𑀼𑀢𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀧𑁆𑀧𑀫𑀸𑀡𑀁 𑀆𑀬𑀼𑀁 𑀕𑀳𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀲 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑁄 𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑀲𑀤𑀺𑀲𑁄 𑀅𑀢𑁆𑀢𑀪𑀸𑀯𑁄 𑀅𑀳𑁄𑀲𑀺. 𑀲𑁄 𑀲𑀓𑀝𑀲𑀳𑀲𑁆𑀲𑀫𑀢𑁆𑀢𑀁 𑀆𑀪𑀭𑀡𑀁 𑀧𑀲𑀸𑀥𑁂𑀢𑁆𑀯𑀸 𑀦𑀯𑀓𑀼𑀫𑁆𑀪𑀫𑀢𑁆𑀢𑁂 𑀕𑀦𑁆𑀥𑁂 𑀯𑀺𑀮𑀺𑀫𑁆𑀧𑀺𑀢𑁆𑀯𑀸 𑀤𑀺𑀩𑁆𑀩𑀭𑀢𑁆𑀢𑀯𑀢𑁆𑀣𑀥𑀭𑁄 𑀭𑀢𑁆𑀢𑀲𑀼𑀯𑀡𑁆𑀡𑀓𑀡𑁆𑀡𑀺𑀓𑀁 𑀧𑀺𑀴𑀦𑁆𑀥𑀺𑀢𑁆𑀯𑀸 𑀧𑀜𑁆𑀘𑀳𑀺 𑀓𑀼𑀡𑁆𑀟𑀮𑀓𑁂𑀳𑀺 𑀧𑀺𑀝𑁆𑀞𑀺𑀬𑀁 𑀯𑀢𑁆𑀢𑀫𑀸𑀦𑁂𑀳𑀺 𑀧𑀜𑁆𑀘𑀘𑀽𑀴𑀓𑀤𑀸𑀭𑀓𑀧𑀭𑀺𑀳𑀸𑀭𑁂𑀦𑁂𑀯 𑀯𑀺𑀘𑀭𑀢𑀺. 𑀢𑁂𑀦𑁂𑀢𑀁 ‘‘𑀧𑀜𑁆𑀘𑀲𑀺𑀔𑁄’’ 𑀢𑁆𑀯𑁂𑀯 𑀲𑀜𑁆𑀚𑀸𑀦𑀦𑁆𑀢𑀺.

𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸𑀢𑀺 𑀅𑀪𑀺𑀓𑁆𑀓𑀦𑁆𑀢𑀸𑀬 𑀔𑀻𑀡𑀸𑀬 𑀭𑀢𑁆𑀢𑀺𑀬𑀸, 𑀏𑀓𑀓𑁄𑀝𑁆𑀞𑀸𑀲𑀁 𑀅𑀢𑀻𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄𑀢𑀺 𑀅𑀢𑀺𑀇𑀝𑁆𑀞𑀓𑀦𑁆𑀢𑀫𑀦𑀸𑀧𑀯𑀡𑁆𑀡𑁄. 𑀧𑀓𑀢𑀺𑀬𑀸𑀧𑀺 𑀳𑁂𑀲 𑀓𑀦𑁆𑀢𑀯𑀡𑁆𑀡𑁄, 𑀅𑀮𑀗𑁆𑀓𑀭𑀺𑀢𑁆𑀯𑀸 𑀆𑀕𑀢𑀢𑁆𑀢𑀸 𑀧𑀦 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀅𑀳𑁄𑀲𑀺. 𑀓𑁂𑀯𑀮𑀓𑀧𑁆𑀧𑀦𑁆𑀢𑀺 𑀅𑀦𑀯𑀲𑁂𑀲𑀁 𑀲𑀫𑀦𑁆𑀢𑀢𑁄. 𑀅𑀦𑀯𑀲𑁂𑀲𑀢𑁆𑀣𑁄 𑀏𑀢𑁆𑀣 𑀓𑁂𑀯𑀮𑀲𑀤𑁆𑀤𑁄. 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀏𑀢𑁆𑀣 𑀯𑀺𑀬. 𑀲𑀫𑀦𑁆𑀢𑀢𑁄 𑀅𑀢𑁆𑀣𑁄 𑀓𑀧𑁆𑀧𑀲𑀤𑁆𑀤𑁄, 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀑𑀪𑀸𑀲𑁂𑀢𑁆𑀯𑀸𑀢𑀺 𑀆𑀪𑀸𑀬 𑀨𑀭𑀺𑀢𑁆𑀯𑀸, 𑀘𑀦𑁆𑀤𑀺𑀫𑀸 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀘 𑀏𑀓𑁄𑀪𑀸𑀲𑀁 𑀏𑀓𑀧𑀚𑁆𑀚𑁄𑀢𑀁 𑀓𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀤𑁂𑀯𑀲𑀪𑀸𑀯𑀡𑁆𑀡𑀦𑀸

𑁨𑁯𑁪. 𑀲𑀼𑀥𑀫𑁆𑀫𑀸𑀬𑀁 𑀲𑀪𑀸𑀬𑀦𑁆𑀢𑀺 𑀲𑀼𑀥𑀫𑁆𑀫𑀸𑀬 𑀦𑀸𑀫 𑀇𑀢𑁆𑀣𑀺𑀬𑀸 𑀭𑀢𑀦𑀫𑀢𑁆𑀢𑀓𑀡𑁆𑀡𑀺𑀓𑀭𑀼𑀓𑁆𑀔𑀦𑀺𑀲𑁆𑀲𑀦𑁆𑀤𑁂𑀦 𑀦𑀺𑀩𑁆𑀩𑀢𑁆𑀢𑀲𑀪𑀸𑀬𑀁 ¶ . 𑀢𑀲𑁆𑀲𑀸 ¶ 𑀓𑀺𑀭 𑀨𑀮𑀺𑀓𑀫𑀬𑀸 𑀪𑀽𑀫𑀺, 𑀫𑀡𑀺𑀫𑀬𑀸 𑀆𑀡𑀺𑀬𑁄 ¶ , 𑀲𑀼𑀯𑀡𑁆𑀡𑀫𑀬𑀸 𑀣𑀫𑁆𑀪𑀸, 𑀭𑀚𑀢𑀫𑀬𑀸 𑀣𑀫𑁆𑀪𑀖𑀝𑀺𑀓𑀸 𑀘 𑀲𑀗𑁆𑀖𑀸𑀢𑀸 𑀘, 𑀧𑀯𑀸𑀴𑀫𑀬𑀸𑀦𑀺 𑀯𑀸𑀴𑀭𑀽𑀧𑀸𑀦𑀺, 𑀲𑀢𑁆𑀢𑀭𑀢𑀦𑀫𑀬𑀸 𑀕𑁄𑀧𑀸𑀦𑀲𑀺𑀬𑁄 𑀘 𑀧𑀓𑁆𑀔𑀧𑀸𑀲𑀓𑀸 𑀘 𑀫𑀼𑀔𑀯𑀝𑁆𑀝𑀺 𑀘, 𑀇𑀦𑁆𑀤𑀦𑀻𑀮𑀇𑀝𑁆𑀞𑀓𑀸𑀳𑀺 𑀙𑀤𑀦𑀁, 𑀲𑁄𑀯𑀡𑁆𑀡𑀫𑀬𑀁 𑀙𑀤𑀦𑀧𑀻𑀞𑀁, 𑀭𑀚𑀢𑀫𑀬𑀸 𑀣𑀽𑀧𑀺𑀓𑀸, 𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀢𑀻𑀡𑀺 𑀬𑁄𑀚𑀦𑀲𑀢𑀸𑀦𑀺, 𑀧𑀭𑀺𑀓𑁆𑀔𑁂𑀧𑀢𑁄 𑀦𑀯𑀬𑁄𑀚𑀦𑀲𑀢𑀸𑀦𑀺, 𑀉𑀩𑁆𑀩𑁂𑀥𑀢𑁄 𑀧𑀜𑁆𑀘𑀬𑁄𑀚𑀦𑀲𑀢𑀸𑀦𑀺, 𑀏𑀯𑀭𑀽𑀧𑀸𑀬𑀁 𑀲𑀼𑀥𑀫𑁆𑀫𑀸𑀬𑀁 𑀲𑀪𑀸𑀬𑀁.

𑀥𑀢𑀭𑀝𑁆𑀞𑁄𑀢𑀺𑀆𑀤𑀻𑀲𑀼 𑀥𑀢𑀭𑀝𑁆𑀞𑁄 𑀕𑀦𑁆𑀥𑀩𑁆𑀩𑀭𑀸𑀚𑀸 𑀕𑀦𑁆𑀥𑀩𑁆𑀩𑀤𑁂𑀯𑀢𑀸𑀦𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀦 𑀧𑀭𑀺𑀯𑀼𑀢𑁄 𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀼𑀯𑀡𑁆𑀡𑀫𑀬𑀸𑀦𑀺 𑀨𑀮𑀓𑀸𑀦𑀺 𑀘 𑀲𑀼𑀯𑀡𑁆𑀡𑀲𑀢𑁆𑀢𑀺𑀬𑁄 𑀘 𑀕𑀸𑀳𑀸𑀧𑁂𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀧𑀘𑁆𑀙𑀺𑀫𑀸𑀪𑀺𑀫𑀼𑀔𑁄 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑀢𑀸 𑀧𑀼𑀭𑀢𑁄 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑁄.

𑀯𑀺𑀭𑀽𑀴𑁆𑀳𑀓𑁄 𑀓𑀼𑀫𑁆𑀪𑀡𑁆𑀟𑀭𑀸𑀚𑀸 𑀓𑀼𑀫𑁆𑀪𑀡𑁆𑀟𑀤𑁂𑀯𑀢𑀸𑀦𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀦 𑀧𑀭𑀺𑀯𑀼𑀢𑁄 𑀓𑁄𑀝𑀺𑀲𑀢𑀲𑀳𑀲𑁆𑀲𑀭𑀚𑀢𑀫𑀬𑀸𑀦𑀺 𑀨𑀮𑀓𑀸𑀦𑀺 𑀘 𑀲𑀼𑀯𑀡𑁆𑀡𑀲𑀢𑁆𑀢𑀺𑀬𑁄 𑀘 𑀕𑀸𑀳𑀸𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑀢𑀸 𑀧𑀼𑀭𑀢𑁄 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑁄.

𑀯𑀺𑀭𑀽𑀧𑀓𑁆𑀔𑁄 𑀦𑀸𑀕𑀭𑀸𑀚𑀸 𑀦𑀸𑀕𑀸𑀦𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀦 𑀧𑀭𑀺𑀯𑀼𑀢𑁄 𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀡𑀺𑀫𑀬𑀸𑀦𑀺 𑀫𑀳𑀸𑀨𑀮𑀓𑀸𑀦𑀺 𑀘 𑀲𑀼𑀯𑀡𑁆𑀡𑀲𑀢𑁆𑀢𑀺𑀬𑁄 𑀘 𑀕𑀸𑀳𑀸𑀧𑁂𑀢𑁆𑀯𑀸 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀧𑀼𑀭𑀢𑁆𑀣𑀺𑀫𑀸𑀪𑀺𑀫𑀼𑀔𑁄 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑀢𑀸 𑀧𑀼𑀭𑀢𑁄 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑁄.

𑀯𑁂𑀲𑁆𑀲𑀯𑀡𑁄 𑀬𑀓𑁆𑀔𑀭𑀸𑀚𑀸 𑀬𑀓𑁆𑀔𑀸𑀦𑀁 𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀦 𑀧𑀭𑀺𑀯𑀼𑀢𑁄 𑀓𑁄𑀝𑀺𑀲𑀢𑀲𑀳𑀲𑁆𑀲𑀧𑀯𑀸𑀴𑀫𑀬𑀸𑀦𑀺 𑀫𑀳𑀸𑀨𑀮𑀓𑀸𑀦𑀺 𑀘 𑀲𑀼𑀯𑀡𑁆𑀡𑀲𑀢𑁆𑀢𑀺𑀬𑁄 𑀘 𑀕𑀸𑀳𑀸𑀧𑁂𑀢𑁆𑀯𑀸 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀤𑀓𑁆𑀔𑀺𑀡𑀸𑀪𑀺𑀫𑀼𑀔𑁄 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑀢𑀸 𑀧𑀼𑀭𑀢𑁄 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀣 𑀧𑀘𑁆𑀙𑀸 𑀅𑀫𑁆𑀳𑀸𑀓𑀁 𑀆𑀲𑀦𑀁 𑀳𑁄𑀢𑀻𑀢𑀺 𑀢𑁂𑀲𑀁 𑀧𑀘𑁆𑀙𑀢𑁄 𑀅𑀫𑁆𑀳𑀸𑀓𑀁 𑀦𑀺𑀲𑀻𑀤𑀺𑀢𑀼𑀁 𑀑𑀓𑀸𑀲𑁄 𑀧𑀸𑀧𑀼𑀡𑀸𑀢𑀺. 𑀢𑀢𑁄 𑀧𑀭𑀁 𑀧𑀯𑀺𑀲𑀺𑀢𑀼𑀁 𑀯𑀸 𑀧𑀲𑁆𑀲𑀺𑀢𑀼𑀁 𑀯𑀸 𑀦 𑀮𑀪𑀸𑀫. 𑀲𑀦𑁆𑀦𑀺𑀧𑀸𑀢𑀓𑀸𑀭𑀡𑀁 𑀧𑀦𑁂𑀢𑁆𑀣 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀘𑀢𑀼𑀩𑁆𑀩𑀺𑀥𑀫𑁂𑀯. 𑀢𑁂𑀲𑀼 𑀯𑀲𑁆𑀲𑀽𑀧𑀦𑀸𑀬𑀺𑀓𑀲𑀗𑁆𑀕𑀳𑁄 𑀯𑀺𑀢𑁆𑀣𑀸𑀭𑀺𑀢𑁄. 𑀬𑀣𑀸 𑀧𑀦 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬, 𑀏𑀯𑀁 𑀫𑀳𑀸𑀧𑀯𑀸𑀭𑀡𑀸𑀬𑀧𑀺 𑀧𑀼𑀡𑁆𑀡𑀫𑀤𑀺𑀯𑀲𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀅𑀚𑁆𑀚 𑀓𑀢𑁆𑀣 𑀕𑀦𑁆𑀢𑁆𑀯𑀸 𑀓𑀲𑁆𑀲 𑀲𑀦𑁆𑀢𑀺𑀓𑁂 𑀧𑀯𑀸𑀭𑁂𑀲𑁆𑀲𑀸𑀫𑀸’’𑀢𑀺 𑀫𑀦𑁆𑀢𑁂𑀦𑁆𑀢𑀺. 𑀢𑀢𑁆𑀣 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀬𑁂𑀪𑀼𑀬𑁆𑀬𑁂𑀦 𑀧𑀺𑀬𑀗𑁆𑀕𑀼𑀤𑀻𑀧𑀫𑀳𑀸𑀯𑀺𑀳𑀸𑀭𑀲𑁆𑀫𑀺𑀁𑀬𑁂𑀯 𑀧𑀯𑀸𑀭𑁂𑀢𑀺. 𑀲𑁂𑀲𑀸 𑀤𑁂𑀯𑀢𑀸 𑀧𑀸𑀭𑀺𑀘𑁆𑀙𑀢𑁆𑀢𑀓𑀸𑀤𑀻𑀦𑀺 ¶ 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀘𑁂𑀯 𑀤𑀺𑀩𑁆𑀩𑀘𑀦𑁆𑀤𑀦𑀘𑀼𑀡𑁆𑀡𑀸𑀦𑀺 𑀘 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀫𑀦𑀸𑀧𑀝𑁆𑀞𑀸𑀦𑀫𑁂𑀯 𑀕𑀦𑁆𑀢𑁆𑀯𑀸 𑀧𑀯𑀸𑀭𑁂𑀦𑁆𑀢𑀺. 𑀏𑀯𑀁 𑀧𑀯𑀸𑀭𑀡𑀲𑀗𑁆𑀕𑀳𑀢𑁆𑀣𑀸𑀬 𑀲𑀦𑁆𑀦𑀺𑀧𑀢𑀦𑁆𑀢𑀺 ¶ .

𑀤𑁂𑀯𑀮𑁄𑀓𑁂 ¶ 𑀧𑀦 𑀆𑀲𑀸𑀯𑀢𑀻 𑀦𑀸𑀫 𑀮𑀢𑀸 𑀅𑀢𑁆𑀣𑀺. 𑀲𑀸 𑀧𑀼𑀧𑁆𑀨𑀺𑀲𑁆𑀲𑀢𑀻𑀢𑀺 𑀤𑁂𑀯𑀸 𑀯𑀲𑁆𑀲𑀲𑀳𑀲𑁆𑀲𑀁 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀧𑀸𑀭𑀺𑀘𑁆𑀙𑀢𑁆𑀢𑀓𑁂 𑀧𑀼𑀧𑁆𑀨𑀫𑀸𑀦𑁂 𑀏𑀓𑀯𑀲𑁆𑀲𑀁 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀢𑁂 𑀢𑀲𑁆𑀲 𑀧𑀡𑁆𑀟𑀼𑀧𑀮𑀸𑀲𑀸𑀤𑀺𑀪𑀸𑀯𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺. 𑀬𑀣𑀸𑀳 𑁋

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄 𑀧𑀡𑁆𑀟𑀼𑀧𑀮𑀸𑀲𑁄 𑀳𑁄𑀢𑀺, 𑀅𑀢𑁆𑀢𑀫𑀦𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀦𑁆𑀢𑀺 𑁋 ‘𑀧𑀡𑁆𑀟𑀼𑀧𑀮𑀸𑀲𑁄 𑀔𑁄 𑀤𑀸𑀦𑀺 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄, 𑀦 𑀘𑀺𑀭𑀲𑁆𑀲𑁂𑀯 𑀧𑀦𑁆𑀦𑀧𑀮𑀸𑀲𑁄 𑀪𑀯𑀺𑀲𑁆𑀲𑀢𑀻’𑀢𑀺. 𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄 𑀧𑀦𑁆𑀦𑀧𑀮𑀸𑀲𑁄 𑀳𑁄𑀢𑀺, 𑀔𑀸𑀭𑀓𑀚𑀸𑀢𑁄 𑀳𑁄𑀢𑀺, 𑀚𑀸𑀮𑀓𑀚𑀸𑀢𑁄 𑀳𑁄𑀢𑀺, 𑀓𑀼𑀝𑀼𑀫𑀮𑀓𑀚𑀸𑀢𑁄 𑀳𑁄𑀢𑀺, 𑀓𑁄𑀭𑀓𑀚𑀸𑀢𑁄 𑀳𑁄𑀢𑀺. 𑀅𑀢𑁆𑀢𑀫𑀦𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀦𑁆𑀢𑀺 𑁋 ‘𑀓𑁄𑀭𑀓𑀚𑀸𑀢𑁄 𑀤𑀸𑀦𑀺 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄 𑀦 𑀘𑀺𑀭𑀲𑁆𑀲𑁂𑀯 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑁄 𑀪𑀯𑀺𑀲𑁆𑀲𑀢𑀻’𑀢𑀺 (𑀅. 𑀦𑀺. 𑁭.𑁬𑁯).

𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀲𑁆𑀲 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀘𑁆𑀙𑀢𑁆𑀢𑀓𑀲𑁆𑀲 𑀓𑁄𑀯𑀺𑀴𑀸𑀭𑀲𑁆𑀲 𑀲𑀫𑀦𑁆𑀢𑀸 𑀧𑀜𑁆𑀜𑀸𑀲 𑀬𑁄𑀚𑀦𑀸𑀦𑀺 𑀆𑀪𑀸𑀬 𑀨𑀼𑀝𑀁 𑀳𑁄𑀢𑀺, 𑀅𑀦𑀼𑀯𑀸𑀢𑀁 𑀬𑁄𑀚𑀦𑀲𑀢𑀁 𑀕𑀦𑁆𑀥𑁄 𑀕𑀘𑁆𑀙𑀢𑀺. 𑀅𑀬𑀫𑀸𑀦𑀼𑀪𑀸𑀯𑁄 𑀧𑀸𑀭𑀺𑀘𑁆𑀙𑀢𑁆𑀢𑀓𑀲𑁆𑀲 𑀓𑁄𑀯𑀺𑀴𑀸𑀭𑀲𑁆𑀲𑀸’’𑀢𑀺.

𑀧𑀼𑀧𑁆𑀨𑀺𑀢𑁂 𑀧𑀸𑀭𑀺𑀘𑁆𑀙𑀢𑁆𑀢𑀓𑁂 𑀆𑀭𑁄𑀳𑀡𑀓𑀺𑀘𑁆𑀘𑀁 𑀯𑀸 𑀅𑀗𑁆𑀓𑀼𑀲𑀓𑀁 𑀕𑀳𑁂𑀢𑁆𑀯𑀸 𑀦𑀫𑀦𑀓𑀺𑀘𑁆𑀘𑀁 𑀯𑀸 𑀧𑀼𑀧𑁆𑀨𑀸𑀳𑀭𑀡𑀢𑁆𑀣𑀁 𑀘𑀗𑁆𑀓𑁄𑀝𑀓𑀓𑀺𑀘𑁆𑀘𑀁 𑀯𑀸 𑀦𑀢𑁆𑀣𑀺, 𑀓𑀦𑁆𑀢𑀦𑀓𑀯𑀸𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀯𑀡𑁆𑀝𑀢𑁄 𑀓𑀦𑁆𑀢𑀢𑀺, 𑀲𑀫𑁆𑀧𑀝𑀺𑀘𑁆𑀙𑀦𑀓𑀯𑀸𑀢𑁄 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀧𑀯𑁂𑀲𑀦𑀓𑀯𑀸𑀢𑁄 𑀲𑀼𑀥𑀫𑁆𑀫𑀁 𑀤𑁂𑀯𑀲𑀪𑀁 𑀧𑀯𑁂𑀲𑁂𑀢𑀺, 𑀲𑀫𑁆𑀫𑀚𑁆𑀚𑀦𑀓𑀯𑀸𑀢𑁄 𑀧𑀼𑀭𑀸𑀡𑀧𑀼𑀧𑁆𑀨𑀸𑀦𑀺 𑀦𑀻𑀳𑀭𑀢𑀺, 𑀲𑀦𑁆𑀣𑀭𑀡𑀓𑀯𑀸𑀢𑁄 𑀧𑀢𑁆𑀢𑀓𑀡𑁆𑀡𑀺𑀓𑀓𑁂𑀲𑀭𑀸𑀦𑀺 𑀦𑀘𑁆𑀘𑀦𑁆𑀢𑁄 𑀲𑀦𑁆𑀣𑀭𑀢𑀺, 𑀫𑀚𑁆𑀛𑀝𑁆𑀞𑀸𑀦𑁂 𑀥𑀫𑁆𑀫𑀸𑀲𑀦𑀁 𑀳𑁄𑀢𑀺. 𑀬𑁄𑀚𑀦𑀧𑁆𑀧𑀫𑀸𑀡𑁄 𑀭𑀢𑀦𑀧𑀮𑁆𑀮𑀗𑁆𑀓𑁄 𑀉𑀧𑀭𑀺 𑀢𑀺𑀬𑁄𑀚𑀦𑁂𑀦 𑀲𑁂𑀢𑀘𑁆𑀙𑀢𑁆𑀢𑁂𑀦 𑀥𑀸𑀭𑀬𑀫𑀸𑀦𑁂𑀦, 𑀢𑀤𑀦𑀦𑁆𑀢𑀭𑀁 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 ¶ 𑀆𑀲𑀦𑀁 𑀅𑀢𑁆𑀣𑀭𑀺𑀬𑀢𑀺. 𑀢𑀢𑁄 𑀢𑁂𑀢𑁆𑀢𑀺𑀁𑀲𑀸𑀬 𑀤𑁂𑀯𑀧𑀼𑀢𑁆𑀢𑀸𑀦𑀁, 𑀢𑀢𑁄 𑀅𑀜𑁆𑀜𑀸𑀲𑀁 𑀫𑀳𑁂𑀲𑀓𑁆𑀔𑀤𑁂𑀯𑀢𑀸𑀦𑀁. 𑀅𑀜𑁆𑀜𑀢𑀭𑀤𑁂𑀯𑀢𑀸𑀦𑀁 𑀧𑀦 𑀧𑀼𑀧𑁆𑀨𑀓𑀡𑁆𑀡𑀺𑀓𑀸𑀯 𑀆𑀲𑀦𑀁 𑀳𑁄𑀢𑀺.

𑀤𑁂𑀯𑀸 𑀤𑁂𑀯𑀲𑀪𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺. 𑀢𑀢𑁄 𑀧𑀼𑀧𑁆𑀨𑁂𑀳𑀺 𑀭𑁂𑀡𑀼𑀯𑀝𑁆𑀝𑀺 𑀉𑀕𑁆𑀕𑀦𑁆𑀢𑁆𑀯𑀸 𑀉𑀧𑀭𑀺 𑀓𑀡𑁆𑀡𑀺𑀓𑀁 𑀆𑀳𑀘𑁆𑀘 𑀦𑀺𑀧𑀢𑀫𑀸𑀦𑀸 𑀤𑁂𑀯𑀢𑀸𑀦𑀁 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀁 𑀅𑀢𑁆𑀢𑀪𑀸𑀯𑀁 𑀮𑀸𑀔𑀸𑀭𑀲𑀧𑀭𑀺𑀓𑀫𑁆𑀫𑀲𑀚𑁆𑀚𑀺𑀢𑀁 𑀯𑀺𑀬 ¶ 𑀓𑀭𑁄𑀢𑀺. 𑀢𑁂𑀲𑀁 𑀲𑀸 𑀓𑀻𑀴𑀸 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀧𑀭𑀺𑀬𑁄𑀲𑀸𑀦𑀁 𑀕𑀘𑁆𑀙𑀢𑀺. 𑀏𑀯𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑀓𑀻𑀴𑀸𑀦𑀼𑀪𑀯𑀦𑀢𑁆𑀣𑀸𑀬 𑀲𑀦𑁆𑀦𑀺𑀧𑀢𑀦𑁆𑀢𑀺.

𑀫𑀸𑀲𑀲𑁆𑀲 ¶ 𑀧𑀦 𑀅𑀝𑁆𑀞𑀤𑀺𑀯𑀲𑁂 𑀤𑁂𑀯𑀮𑁄𑀓𑁂 𑀫𑀳𑀸𑀥𑀫𑁆𑀫𑀲𑀯𑀦𑀁 𑀖𑀼𑀲𑀢𑀺. 𑀢𑀢𑁆𑀣 𑀲𑀼𑀥𑀫𑁆𑀫𑀸𑀬𑀁 𑀤𑁂𑀯𑀲𑀪𑀸𑀬𑀁 𑀲𑀦𑀗𑁆𑀓𑀼𑀫𑀸𑀭𑁄 𑀯𑀸 𑀫𑀳𑀸𑀩𑁆𑀭𑀳𑁆𑀫𑀸, 𑀲𑀓𑁆𑀓𑁄 𑀯𑀸 𑀤𑁂𑀯𑀸𑀦𑀫𑀺𑀦𑁆𑀤𑁄, 𑀥𑀫𑁆𑀫𑀓𑀣𑀺𑀓𑀪𑀺𑀓𑁆𑀔𑀼 𑀯𑀸, 𑀅𑀜𑁆𑀜𑀢𑀭𑁄 𑀯𑀸 𑀥𑀫𑁆𑀫𑀓𑀣𑀺𑀓𑁄 𑀤𑁂𑀯𑀧𑀼𑀢𑁆𑀢𑁄 𑀥𑀫𑁆𑀫𑀓𑀣𑀁 𑀓𑀣𑁂𑀢𑀺. 𑀅𑀝𑁆𑀞𑀫𑀺𑀬𑀁 𑀧𑀓𑁆𑀔𑀲𑁆𑀲 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀸𑀦𑀁 𑀅𑀫𑀘𑁆𑀘𑀸, 𑀘𑀸𑀢𑀼𑀤𑁆𑀤𑀲𑀺𑀬𑀁 𑀧𑀼𑀢𑁆𑀢𑀸, 𑀧𑀦𑁆𑀦𑀭𑀲𑁂 𑀲𑀬𑀁 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀝𑁆𑀝𑀜𑁆𑀘 𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑀜𑁆𑀘 𑀕𑀡𑁆𑀳𑀺𑀢𑁆𑀯𑀸 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀅𑀦𑀼𑀯𑀺𑀘𑀭𑀦𑁆𑀢𑀺. 𑀢𑁂 𑁋 ‘‘𑀅𑀲𑀼𑀓𑀸 𑀦𑀸𑀫 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑁄, 𑀥𑀫𑁆𑀫𑀁 𑀲𑀭𑀡𑀁 𑀕𑀢𑁄. 𑀲𑀗𑁆𑀖𑀁 𑀲𑀭𑀡𑀁 𑀕𑀢𑁄. 𑀧𑀜𑁆𑀘𑀲𑀻𑀮𑀸𑀦𑀺 𑀭𑀓𑁆𑀔𑀢𑀺. 𑀫𑀸𑀲𑀲𑁆𑀲 𑀅𑀝𑁆𑀞 𑀉𑀧𑁄𑀲𑀣𑁂 𑀓𑀭𑁄𑀢𑀺. 𑀫𑀸𑀢𑀼𑀉𑀧𑀝𑁆𑀞𑀸𑀦𑀁 𑀧𑀽𑀭𑁂𑀢𑀺. 𑀧𑀺𑀢𑀼𑀉𑀧𑀝𑁆𑀞𑀸𑀦𑀁 𑀧𑀽𑀭𑁂𑀢𑀺. 𑀅𑀲𑀼𑀓𑀝𑁆𑀞𑀸𑀦𑁂 𑀉𑀧𑁆𑀧𑀮𑀳𑀢𑁆𑀣𑀓𑀲𑀢𑁂𑀦 𑀧𑀼𑀧𑁆𑀨𑀓𑀼𑀫𑁆𑀪𑁂𑀦 𑀧𑀽𑀚𑀸 𑀓𑀢𑀸. 𑀤𑀻𑀧𑀲𑀳𑀲𑁆𑀲𑀁 𑀆𑀭𑁄𑀧𑀺𑀢𑀁. 𑀅𑀓𑀸𑀮𑀥𑀫𑁆𑀫𑀲𑀯𑀦𑀁 𑀓𑀸𑀭𑀺𑀢𑀁. 𑀙𑀢𑁆𑀢𑀯𑁂𑀤𑀺𑀓𑀸 𑀧𑀼𑀝𑀯𑁂𑀤𑀺𑀓𑀸 𑀓𑀼𑀘𑁆𑀙𑀺𑀯𑁂𑀤𑀺𑀓𑀸 𑀲𑀻𑀳𑀸𑀲𑀦𑀁 𑀲𑀻𑀳𑀲𑁄𑀧𑀸𑀦𑀁 𑀓𑀸𑀭𑀺𑀢𑀁. 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑀺. 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑁂 𑀲𑀫𑀸𑀤𑀸𑀬 𑀯𑀢𑁆𑀢𑀢𑀻’’𑀢𑀺 𑀲𑀼𑀯𑀡𑁆𑀡𑀧𑀝𑁆𑀝𑁂 𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑁂𑀦 𑀮𑀺𑀔𑀺𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀧𑀜𑁆𑀘𑀲𑀺𑀔𑀲𑁆𑀲 𑀳𑀢𑁆𑀣𑁂 𑀤𑁂𑀦𑁆𑀢𑀺. 𑀧𑀜𑁆𑀘𑀲𑀺𑀔𑁄 𑀫𑀸𑀢𑀮𑀺𑀲𑁆𑀲 𑀳𑀢𑁆𑀣𑁂 𑀤𑁂𑀢𑀺. 𑀫𑀸𑀢𑀮𑀺 𑀲𑀗𑁆𑀕𑀸𑀳𑀓𑁄 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀤𑁂𑀢𑀺.

𑀬𑀤𑀸 𑀧𑀼𑀜𑁆𑀜𑀓𑀫𑁆𑀫𑀓𑀸𑀭𑀓𑀸 𑀩𑀳𑀽 𑀦 𑀳𑁄𑀦𑁆𑀢𑀺, 𑀧𑁄𑀢𑁆𑀣𑀓𑁄 𑀔𑀼𑀤𑁆𑀤𑀓𑁄 𑀳𑁄𑀢𑀺, 𑀢𑀁 𑀤𑀺𑀲𑁆𑀯𑀸𑀯 𑀤𑁂𑀯𑀸 𑁋 ‘‘𑀧𑀫𑀢𑁆𑀢𑁄, 𑀯𑀢 𑀪𑁄 𑀫𑀳𑀸𑀚𑀦𑁄 𑀯𑀺𑀳𑀭𑀢𑀺, 𑀘𑀢𑁆𑀢𑀸𑀭𑁄 𑀅𑀧𑀸𑀬𑀸 𑀧𑀭𑀺𑀧𑀽𑀭𑀺𑀲𑁆𑀲𑀦𑁆𑀢𑀺, 𑀙 𑀤𑁂𑀯𑀮𑁄𑀓𑀸 𑀢𑀼𑀘𑁆𑀙𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀦𑀢𑁆𑀢𑀫𑀦𑀸 𑀳𑁄𑀦𑁆𑀢𑀺. 𑀲𑀘𑁂 𑀧𑀦 𑀧𑁄𑀢𑁆𑀣𑀓𑁄 𑀫𑀳𑀸 𑀳𑁄𑀢𑀺, 𑀢𑀁 𑀤𑀺𑀲𑁆𑀯𑀸𑀯 𑀤𑁂𑀯𑀸 𑁋 ‘‘𑀅𑀧𑁆𑀧𑀫𑀢𑁆𑀢𑁄, 𑀯𑀢 𑀪𑁄, 𑀫𑀳𑀸𑀚𑀦𑁄 𑀯𑀺𑀳𑀭𑀢𑀺, 𑀘𑀢𑁆𑀢𑀸𑀭𑁄 𑀅𑀧𑀸𑀬𑀸 𑀲𑀼𑀜𑁆𑀜𑀸 𑀪𑀯𑀺𑀲𑁆𑀲𑀦𑁆𑀢𑀺 ¶ , 𑀙 𑀤𑁂𑀯𑀮𑁄𑀓𑀸 𑀧𑀭𑀺𑀧𑀽𑀭𑀺𑀲𑁆𑀲𑀦𑁆𑀢𑀺, 𑀩𑀼𑀤𑁆𑀥𑀲𑀸𑀲𑀦𑁂 𑀧𑀼𑀜𑁆𑀜𑀸𑀦𑀺 𑀓𑀭𑀺𑀢𑁆𑀯𑀸 𑀆𑀕𑀢𑁂 𑀫𑀳𑀸𑀧𑀼𑀜𑁆𑀜𑁂 𑀧𑀼𑀭𑀓𑁆𑀔𑀢𑁆𑀯𑀸 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀢𑀼𑀁 𑀮𑀪𑀺𑀲𑁆𑀲𑀸𑀫𑀸’’𑀢𑀺 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺. 𑀢𑀁 𑀧𑁄𑀢𑁆𑀣𑀓𑀁 𑀕𑀳𑁂𑀢𑁆𑀯𑀸 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀯𑀸𑀘𑁂𑀢𑀺. 𑀢𑀲𑁆𑀲 𑀧𑀓𑀢𑀺𑀦𑀺𑀬𑀸𑀫𑁂𑀦 𑀓𑀣𑁂𑀦𑁆𑀢𑀲𑁆𑀲 𑀲𑀤𑁆𑀤𑁄 𑀤𑁆𑀯𑀸𑀤𑀲 𑀬𑁄𑀚𑀦𑀸𑀦𑀺 𑀕𑀡𑁆𑀳𑀸𑀢𑀺. 𑀉𑀘𑁆𑀘𑁂𑀦 𑀲𑀭𑁂𑀦 𑀓𑀣𑁂𑀦𑁆𑀢𑀲𑁆𑀲 𑀘 𑀲𑀓𑀮𑀁 𑀤𑀲𑀬𑁄𑀚𑀦𑀲𑀳𑀲𑁆𑀲𑀁 𑀤𑁂𑀯𑀦𑀕𑀭𑀁 𑀙𑀸𑀤𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀏𑀯𑀁 𑀥𑀫𑁆𑀫𑀲𑀯𑀦𑀢𑁆𑀣𑀸𑀬 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀇𑀥 𑀧𑀦 𑀧𑀯𑀸𑀭𑀡𑀲𑀗𑁆𑀕𑀳𑀢𑁆𑀣𑀸𑀬 𑀲𑀦𑁆𑀦𑀺𑀧𑀢𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀣𑀸𑀕𑀢𑀁 𑀦𑀫𑀲𑁆𑀲𑀦𑁆𑀢𑀸𑀢𑀺 𑀦𑀯𑀳𑀺 𑀓𑀸𑀭𑀡𑁂𑀳𑀺 𑀢𑀣𑀸𑀕𑀢𑀁 𑀦𑀫𑀲𑁆𑀲𑀫𑀸𑀦𑀸 ¶ . 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢𑀦𑁆𑀢𑀺 𑀲𑁆𑀯𑀸𑀓𑁆𑀔𑀸𑀢𑀢𑀸𑀤𑀺𑀪𑁂𑀤𑀁 𑀥𑀫𑁆𑀫𑀲𑁆𑀲 𑀲𑀼𑀥𑀫𑁆𑀫𑀢𑀁 𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑀢𑀸𑀤𑀺𑀪𑁂𑀤𑀁 𑀲𑀗𑁆𑀖𑀲𑁆𑀲 𑀘 𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀦𑁆𑀢𑀺 𑀅𑀢𑁆𑀣𑁄.

𑀅𑀝𑁆𑀞𑀬𑀣𑀸𑀪𑀼𑀘𑁆𑀘𑀯𑀡𑁆𑀡𑀦𑀸

𑁨𑁯𑁬. 𑀬𑀣𑀸𑀪𑀼𑀘𑁆𑀘𑁂𑀢𑀺 𑀬𑀣𑀸𑀪𑀽𑀢𑁂 𑀬𑀣𑀸𑀲𑀪𑀸𑀯𑁂. 𑀯𑀡𑁆𑀡𑁂𑀢𑀺 𑀕𑀼𑀡𑁂. 𑀧𑀬𑀺𑀭𑀼𑀤𑀸𑀳𑀸𑀲𑀻𑀢𑀺 𑀓𑀣𑁂𑀲𑀺. 𑀩𑀳𑀼𑀚𑀦𑀳𑀺𑀢𑀸𑀬 ¶ 𑀧𑀝𑀺𑀧𑀦𑁆𑀦𑁄𑀢𑀺 𑀓𑀣𑀁 𑀧𑀝𑀺𑀧𑀦𑁆𑀦𑁄? 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀅𑀝𑁆𑀞 𑀥𑀫𑁆𑀫𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀩𑀼𑀤𑁆𑀥𑀢𑁆𑀣𑀸𑀬 𑀅𑀪𑀺𑀦𑀻𑀳𑀭𑀫𑀸𑀦𑁄𑀧𑀺 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺.

𑀤𑀸𑀦𑀧𑀸𑀭𑀫𑀻, 𑀲𑀻𑀮𑀧𑀸𑀭𑀫𑀻, 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻, 𑀧𑀜𑁆𑀜𑀸𑀧𑀸𑀭𑀫𑀻, 𑀯𑀻𑀭𑀺𑀬𑀧𑀸𑀭𑀫𑀻, 𑀔𑀦𑁆𑀢𑀺𑀧𑀸𑀭𑀫𑀻, 𑀲𑀘𑁆𑀘𑀧𑀸𑀭𑀫𑀻, 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀻, 𑀫𑁂𑀢𑁆𑀢𑀸𑀧𑀸𑀭𑀫𑀻, 𑀉𑀧𑁂𑀓𑁆𑀔𑀸𑀧𑀸𑀭𑀫𑀻𑀢𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀇𑀫𑀸 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁄𑀧𑀺 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄.

𑀔𑀦𑁆𑀢𑀺𑀯𑀸𑀤𑀺𑀢𑀸𑀧𑀲𑀓𑀸𑀮𑁂, 𑀘𑀽𑀴𑀥𑀫𑁆𑀫𑀧𑀸𑀮𑀓𑀼𑀫𑀸𑀭𑀓𑀸𑀮𑁂, 𑀙𑀤𑁆𑀤𑀦𑁆𑀢𑀦𑀸𑀕𑀭𑀸𑀚𑀓𑀸𑀮𑁂, 𑀪𑀽𑀭𑀺𑀤𑀢𑁆𑀢𑀘𑀫𑁆𑀧𑁂𑀬𑁆𑀬𑀲𑀗𑁆𑀔𑀧𑀸𑀮𑀦𑀸𑀕𑀭𑀸𑀚𑀓𑀸𑀮𑁂, 𑀫𑀳𑀸𑀓𑀧𑀺𑀓𑀸𑀮𑁂 𑀘 𑀢𑀸𑀤𑀺𑀲𑀸𑀦𑀺 𑀤𑀼𑀓𑁆𑀓𑀭𑀸𑀦𑀺 𑀓𑀭𑁄𑀦𑁆𑀢𑁄𑀧𑀺 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄. 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑁂 𑀞𑀢𑁆𑀯𑀸 𑀲𑀢𑁆𑀢𑀲𑀢𑀓𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀧𑀣𑀯𑀺𑀁 𑀓𑀫𑁆𑀧𑁂𑀢𑁆𑀯𑀸 𑀧𑀸𑀭𑀫𑀻𑀓𑀽𑀝𑀁 𑀕𑀡𑁆𑀳𑀦𑁆𑀢𑁄𑀧𑀺 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄. 𑀢𑀢𑁄 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀢𑀼𑀲𑀺𑀢𑀧𑀼𑀭𑁂 𑀬𑀸𑀯𑀢𑀸𑀬𑀼𑀓𑀁 𑀢𑀺𑀝𑁆𑀞𑀦𑁆𑀢𑁄𑀧𑀺 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄.

𑀢𑀢𑁆𑀣 𑀧𑀜𑁆𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀳𑀺 𑀬𑀸𑀘𑀺𑀢𑁄 𑀧𑀜𑁆𑀘 𑀫𑀳𑀸𑀯𑀺𑀮𑁄𑀓𑀦𑀸𑀦𑀺 𑀯𑀺𑀮𑁄𑀓𑁂𑀢𑁆𑀯𑀸 𑀤𑁂𑀯𑀸𑀦𑀁 𑀲𑀗𑁆𑀕𑀳𑀢𑁆𑀣𑀸𑀬 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 𑀢𑀼𑀲𑀺𑀢𑀧𑀼𑀭𑀸 ¶ 𑀘𑀯𑀺𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑁄𑀧𑀺 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄.

𑀤𑀲 𑀫𑀸𑀲𑁂 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀯𑀲𑀺𑀢𑁆𑀯𑀸 𑀮𑀼𑀫𑁆𑀩𑀺𑀦𑀻𑀯𑀦𑁂 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑁆𑀢𑁄𑀧𑀺, 𑀏𑀓𑀽𑀦𑀢𑀺𑀁𑀲𑀯𑀲𑁆𑀲𑀸𑀦𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺𑀢𑁆𑀯𑀸 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁄𑀫𑀦𑀤𑀻𑀢𑀻𑀭𑁂 𑀧𑀩𑁆𑀩𑀚𑀦𑁆𑀢𑁄𑀧𑀺, 𑀙𑀩𑁆𑀩𑀲𑁆𑀲𑀸𑀦𑀺 𑀧𑀥𑀸𑀦𑁂𑀦 𑀅𑀢𑁆𑀢𑀸𑀦𑀁 𑀓𑀺𑀮𑀫𑁂𑀢𑁆𑀯𑀸 𑀩𑁄𑀥𑀺𑀧𑀮𑁆𑀮𑀗𑁆𑀓𑀁 𑀆𑀭𑀼𑀬𑁆𑀳 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄𑀧𑀺, 𑀲𑀢𑁆𑀢𑀲𑀢𑁆𑀢𑀸𑀳𑀁 𑀩𑁄𑀥𑀺𑀫𑀡𑁆𑀟𑁂 𑀬𑀸𑀧𑁂𑀦𑁆𑀢𑁄𑀧𑀺, 𑀇𑀲𑀺𑀧𑀢𑀦𑀁 𑀆𑀕𑀫𑁆𑀫 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀦𑁆𑀢𑁄𑀧𑀺, 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀦𑁆𑀢𑁄𑀧𑀺, 𑀤𑁂𑀯𑁄𑀭𑁄𑀳𑀡𑀁 𑀑𑀭𑁄𑀳𑀦𑁆𑀢𑁄𑀧𑀺, 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀧𑀜𑁆𑀘𑀘𑀢𑁆𑀢𑀸𑀮𑀻𑀲 𑀯𑀲𑁆𑀲𑀸𑀦𑀺 𑀢𑀺𑀝𑁆𑀞𑀦𑁆𑀢𑁄𑀧𑀺, 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑀦𑁆𑀢𑁄𑀧𑀺, 𑀬𑀫𑀓𑀲𑀸𑀮𑀸𑀦𑀫𑀦𑁆𑀢𑀭𑁂 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑁄𑀧𑀺 ¶ 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄. 𑀬𑀸𑀯𑀲𑁆𑀲 𑀲𑀸𑀲𑀧𑀫𑀢𑁆𑀢𑀸𑀧𑀺 𑀥𑀸𑀢𑀼𑀬𑁄 𑀥𑀭𑀦𑁆𑀢𑀺, 𑀢𑀸𑀯 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀧𑀤𑀸𑀦𑀺 𑀏𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. 𑀢𑀢𑁆𑀣 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀅𑀢𑁆𑀣𑁄.

𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀻𑀢𑀺 𑀅𑀢𑀻𑀢𑁂𑀧𑀺 𑀩𑀼𑀤𑁆𑀥𑀢𑁄 𑀅𑀜𑁆𑀜𑀁 𑀦 𑀲𑀫𑀦𑀼𑀧𑀲𑁆𑀲𑀸𑀫, 𑀅𑀦𑀸𑀕𑀢𑁂𑀧𑀺 𑀦 𑀲𑀫𑀦𑀼𑀧𑀲𑁆𑀲𑀸𑀫, 𑀏𑀢𑀭𑀳𑀺 𑀧𑀦 𑀅𑀜𑁆𑀜𑀲𑁆𑀲 𑀲𑀢𑁆𑀣𑀼𑀦𑁄 𑀅𑀪𑀸𑀯𑀢𑁄𑀬𑁂𑀯 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸 𑀦 𑀲𑀫𑀦𑀼𑀧𑀲𑁆𑀲𑀸𑀫𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀳𑀺 𑁋 ‘‘𑀅𑀢𑀻𑀢𑀸𑀦𑀸𑀕𑀢𑀸 𑀩𑀼𑀤𑁆𑀥𑀸 𑀅𑀫𑁆𑀳𑀸𑀓𑀁 ¶ 𑀲𑀢𑁆𑀣𑀸𑀭𑀸 𑀲𑀤𑀺𑀲𑀸𑀬𑁂𑀯, 𑀓𑀺𑀁 𑀲𑀓𑁆𑀓𑁄 𑀓𑀣𑁂𑀢𑀻’’𑀢𑀺 𑀯𑀺𑀘𑀸𑀭𑁂𑀢𑁆𑀯𑀸 𑁋 ‘‘𑀏𑀢𑀭𑀳𑀺 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀲𑀢𑁆𑀣𑀸 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸𑀭𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑁄 𑀓𑁄𑀘𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀦 𑀧𑀲𑁆𑀲𑀸𑀫𑀸𑀢𑀺 𑀓𑀣𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀘 𑀏𑀢𑁆𑀣, 𑀏𑀯𑀁 𑀇𑀢𑁄 𑀧𑀭𑁂𑀲𑀼𑀧𑀺 𑀧𑀤𑁂𑀲𑀼 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁆𑀯𑀸𑀓𑁆𑀔𑀸𑀢𑀸𑀤𑀻𑀦𑀺 𑀘 𑀓𑀼𑀲𑀮𑀸𑀤𑀻𑀦𑀺 𑀘 𑀯𑀼𑀢𑁆𑀢𑀢𑁆𑀣𑀸𑀦𑁂𑀯.

𑀕𑀗𑁆𑀕𑁄𑀤𑀓𑀁 𑀬𑀫𑀼𑀦𑁄𑀤𑀓𑁂𑀦𑀸𑀢𑀺 𑀕𑀗𑁆𑀕𑀸𑀬𑀫𑀼𑀦𑀸𑀦𑀁 𑀲𑀫𑀸𑀕𑀫𑀝𑁆𑀞𑀸𑀦𑁂 𑀉𑀤𑀓𑀁 𑀯𑀡𑁆𑀡𑁂𑀦𑀧𑀺 𑀕𑀦𑁆𑀥𑁂𑀦𑀧𑀺 𑀭𑀲𑁂𑀦𑀧𑀺 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺, 𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡𑀁 𑀯𑀺𑀬 𑀏𑀓𑀲𑀤𑀺𑀲𑀫𑁂𑀯 𑀳𑁄𑀢𑀺, 𑀦 𑀫𑀳𑀸𑀲𑀫𑀼𑀤𑁆𑀤𑀉𑀤𑀓𑁂𑀦 𑀲𑀁𑀲𑀝𑁆𑀞𑀓𑀸𑀮𑁂 𑀯𑀺𑀬 𑀯𑀺𑀲𑀤𑀺𑀲𑀁. 𑀧𑀭𑀺𑀲𑀼𑀤𑁆𑀥𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀧𑀝𑀺𑀧𑀤𑀸𑀧𑀺 𑀧𑀭𑀺𑀲𑀼𑀤𑁆𑀥𑀸𑀯. 𑀦 𑀳𑀺 𑀤𑀳𑀭𑀓𑀸𑀮𑁂 𑀯𑁂𑀚𑁆𑀚𑀓𑀫𑁆𑀫𑀸𑀤𑀻𑀦𑀺 𑀓𑀢𑁆𑀯𑀸 𑀅𑀕𑁄𑀘𑀭𑁂 𑀘𑀭𑀺𑀢𑁆𑀯𑀸 𑀫𑀳𑀮𑁆𑀮𑀓𑀓𑀸𑀮𑁂 𑀦𑀺𑀩𑁆𑀩𑀸𑀦𑀁 𑀤𑀝𑁆𑀞𑀼𑀁 𑀲𑀓𑁆𑀓𑀸, 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻 𑀧𑀦 𑀧𑀝𑀺𑀧𑀤𑀸 𑀧𑀭𑀺𑀲𑀼𑀤𑁆𑀥𑀸𑀯 𑀯𑀝𑁆𑀝𑀢𑀺 𑀆𑀓𑀸𑀲𑀽𑀧𑀫𑀸. 𑀬𑀣𑀸 𑀳𑀺 𑀆𑀓𑀸𑀲𑀫𑁆𑀧𑀺 𑀅𑀮𑀕𑁆𑀕𑀁 𑀧𑀭𑀺𑀲𑀼𑀤𑁆𑀥𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀆𑀓𑀸𑀲𑁂 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀸𑀦𑀁 𑀯𑀺𑀬 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀧𑀤𑀸𑀧𑀺 𑀓𑀼𑀮𑁂 𑀯𑀸 𑀕𑀡𑁂 𑀯𑀸 𑀅𑀮𑀕𑁆𑀕𑀸 ¶ 𑀅𑀩𑀤𑁆𑀥𑀸 𑀆𑀓𑀸𑀲𑀽𑀧𑀫𑀸 𑀯𑀝𑁆𑀝𑀢𑀺. 𑀲𑀸 𑀧𑀦𑁂𑀲𑀸 𑀢𑀸𑀤𑀺𑀲𑀸𑀯 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀸 𑀓𑀣𑀺𑀢𑀸 𑀤𑁂𑀲𑀺𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀁𑀲𑀦𑁆𑀤𑀢𑀺 𑀦𑀺𑀩𑁆𑀩𑀸𑀦𑀜𑁆𑀘 𑀧𑀝𑀺𑀧𑀤𑀸 𑀘𑀸’’𑀢𑀺.

𑀧𑀝𑀺𑀧𑀦𑁆𑀦𑀸𑀦𑀦𑁆𑀢𑀺 𑀧𑀝𑀺𑀧𑀤𑀸𑀬 𑀞𑀺𑀢𑀸𑀦𑀁. 𑀯𑀼𑀲𑀺𑀢𑀯𑀢𑀦𑁆𑀢𑀺 𑀯𑀼𑀢𑁆𑀣𑀯𑀸𑀲𑀸𑀦𑀁 𑀏𑀢𑁂𑀲𑀁. 𑀮𑀤𑁆𑀥𑀲𑀳𑀸𑀬𑁄𑀢𑀺 𑀏𑀢𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀲𑀳 𑀅𑀬𑀦𑀢𑁄 𑀲𑀳𑀸𑀬𑁄. ‘‘𑀅𑀤𑀼𑀢𑀺𑀬𑁄 𑀅𑀲𑀳𑀸𑀬𑁄 𑀅𑀧𑁆𑀧𑀝𑀺𑀲𑀫𑁄’’𑀢𑀺 𑀇𑀤𑀁 𑀧𑀦 𑀅𑀲𑀤𑀺𑀲𑀝𑁆𑀞𑁂𑀦 𑀯𑀼𑀢𑁆𑀢𑀁. 𑀅𑀧𑀦𑀼𑀚𑁆𑀚𑀸𑀢𑀺 𑀢𑁂𑀲𑀁 𑀫𑀚𑁆𑀛𑁂𑀧𑀺 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀳𑀭𑀦𑁆𑀢𑁄 𑀘𑀺𑀢𑁆𑀢𑁂𑀦 𑀅𑀧𑀦𑀼𑀚𑁆𑀚, 𑀅𑀧𑀦𑀼𑀚𑁆𑀚𑁂𑀯 𑀏𑀓𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄.

𑀅𑀪𑀺𑀦𑀺𑀧𑁆𑀨𑀦𑁆𑀦𑁄 ¶ 𑀔𑁄 𑀧𑀦 𑀢𑀲𑁆𑀲 𑀪𑀕𑀯𑀢𑁄 𑀮𑀸𑀪𑁄𑀢𑀺 𑀢𑀲𑁆𑀲 𑀪𑀕𑀯𑀢𑁄 𑀫𑀳𑀸𑀮𑀸𑀪𑁄 𑀉𑀧𑁆𑀧𑀦𑁆𑀦𑁄. 𑀓𑀤𑀸 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑁄? 𑀅𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀲𑀢𑁆𑀢𑀲𑀢𑁆𑀢𑀸𑀳𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀇𑀲𑀺𑀧𑀢𑀦𑁂 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀤𑀫𑀦𑀁 𑀓𑀭𑁄𑀦𑁆𑀢𑀲𑁆𑀲 𑀢𑀬𑁄 𑀚𑀝𑀺𑀮𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀭𑀸𑀚𑀕𑀳𑀁 𑀕𑀢𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀤𑀫𑀦𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑁄. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀲𑀓𑁆𑀓𑀢𑁄 𑀳𑁄𑀢𑀺 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺 (𑀲𑀁. 𑀦𑀺. 𑁨.𑁭𑁦). 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑁂𑀲𑀼 𑀘𑀢𑀽𑀲𑀼 𑀅𑀲𑀗𑁆𑀔𑁆𑀬𑁂𑀬𑁆𑀬𑁂𑀲𑀼 𑀉𑀲𑁆𑀲𑀦𑁆𑀦𑀧𑀼𑀜𑁆𑀜𑀦𑀺𑀲𑁆𑀲𑀦𑁆𑀤𑀲𑀫𑀼𑀧𑁆𑀧𑀦𑁆𑀦𑁄 𑀮𑀸𑀪𑀲𑀓𑁆𑀓𑀸𑀭𑁄 𑀫𑀳𑁄𑀖𑁄 𑀯𑀺𑀬 𑀅𑀚𑁆𑀛𑁄𑀢𑁆𑀣𑀭𑀫𑀸𑀦𑁄 𑀆𑀕𑀘𑁆𑀙𑀢𑀺.

𑀏𑀓𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀭𑀸𑀚𑀕𑀳𑁂 𑀲𑀸𑀯𑀢𑁆𑀣𑀺𑀬𑀁 𑀲𑀸𑀓𑁂𑀢𑁂 𑀓𑁄𑀲𑀫𑁆𑀩𑀺𑀬𑀁 𑀩𑀸𑀭𑀸𑀡𑀲𑀺𑀬𑀁 𑀪𑀕𑀯𑀢𑁄 𑀧𑀝𑀺𑀧𑀸𑀝𑀺𑀪𑀢𑁆𑀢𑀁 ¶ 𑀦𑀸𑀫 𑀉𑀧𑁆𑀧𑀦𑁆𑀦𑀁, 𑀢𑀢𑁆𑀣𑁂𑀓𑁄 𑁋 ‘‘𑀅𑀳𑀁 𑀲𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀧𑀡𑁆𑀡𑀁 𑀮𑀺𑀔𑀺𑀢𑁆𑀯𑀸 𑀯𑀺𑀳𑀸𑀭𑀤𑁆𑀯𑀸𑀭𑁂 𑀩𑀦𑁆𑀥𑀺. 𑀅𑀜𑁆𑀜𑁄 𑁋 𑀅𑀳𑀁 𑀤𑁆𑀯𑁂 𑀲𑀢𑀸𑀦𑀺. 𑀅𑀜𑁆𑀜𑁄 𑁋 𑀅𑀳𑀁 𑀧𑀜𑁆𑀘 𑀲𑀢𑀸𑀦𑀺. 𑀅𑀜𑁆𑀜𑁄 𑁋 𑀅𑀳𑀁 𑀲𑀳𑀲𑁆𑀲𑀁. 𑀅𑀜𑁆𑀜𑁄 𑁋 𑀅𑀳𑀁 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺. 𑀅𑀜𑁆𑀜𑁄 𑁋 𑀅𑀳𑀁 𑀧𑀜𑁆𑀘. 𑀤𑀲. 𑀯𑀻𑀲𑀢𑀺. 𑀧𑀜𑁆𑀜𑀸𑀲𑀁; 𑀅𑀜𑁆𑀜𑁄 𑁋 𑀅𑀳𑀁 𑀲𑀢𑀲𑀳𑀲𑁆𑀲𑀁. 𑀅𑀜𑁆𑀜𑁄 𑁋 𑀅𑀳𑀁 𑀤𑁆𑀯𑁂 𑀲𑀢𑀲𑀳𑀲𑁆𑀲𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀧𑀡𑁆𑀡𑀁 𑀮𑀺𑀔𑀺𑀢𑁆𑀯𑀸 𑀯𑀺𑀳𑀸𑀭𑀤𑁆𑀯𑀸𑀭𑁂 𑀩𑀦𑁆𑀥𑀺. 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑀫𑁆𑀧𑀺 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 𑁋 ‘‘𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀲𑀓𑀝𑀸𑀦𑀺 𑀧𑀽𑀭𑁂𑀢𑁆𑀯𑀸 𑀫𑀳𑀸𑀚𑀦𑁄 𑀅𑀦𑀼𑀩𑀦𑁆𑀥𑀺𑀬𑁂𑀯. 𑀬𑀣𑀸𑀳 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀚𑀸𑀦𑀧𑀤𑀸 𑀫𑀦𑀼𑀲𑁆𑀲𑀸 𑀩𑀳𑀼𑀁 𑀮𑁄𑀡𑀫𑁆𑀧𑀺 𑀢𑁂𑀮𑀫𑁆𑀧𑀺 𑀢𑀡𑁆𑀟𑀼𑀮𑀫𑁆𑀧𑀺 𑀔𑀸𑀤𑀦𑀻𑀬𑀫𑁆𑀧𑀺 𑀲𑀓𑀝𑁂𑀲𑀼 𑀆𑀭𑁄𑀧𑁂𑀢𑁆𑀯𑀸 𑀪𑀕𑀯𑀢𑁄 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀸 𑀳𑁄𑀦𑁆𑀢𑀺 𑁋 ‘𑀬𑀢𑁆𑀣 𑀧𑀝𑀺𑀧𑀸𑀝𑀺𑀁 ¶ 𑀮𑀪𑀺𑀲𑁆𑀲𑀸𑀫, 𑀢𑀢𑁆𑀣 𑀪𑀢𑁆𑀢𑀁 𑀓𑀭𑀺𑀲𑁆𑀲𑀸𑀫𑀸’𑀢𑀺’’ (𑀫𑀳𑀸𑀯. 𑁨𑁮𑁨). 𑀏𑀯𑀁 𑀅𑀜𑁆𑀜𑀸𑀦𑀺𑀧𑀺 𑀔𑀦𑁆𑀥𑀓𑁂 𑀘 𑀯𑀺𑀦𑀬𑁂 𑀘 𑀩𑀳𑀽𑀦𑀺 𑀯𑀢𑁆𑀣𑀽𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀅𑀲𑀤𑀺𑀲𑀤𑀸𑀦𑁂 𑀧𑀦𑁂𑀲 𑀮𑀸𑀪𑁄 𑀫𑀢𑁆𑀣𑀓𑀁 𑀧𑀢𑁆𑀢𑁄. 𑀏𑀓𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀪𑀕𑀯𑀢𑀺 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀚𑁂𑀢𑀯𑀦𑀁 𑀲𑀫𑁆𑀧𑀢𑁆𑀢𑁂 𑀭𑀸𑀚𑀸 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀸𑀦𑀁 𑀅𑀤𑀸𑀲𑀺. 𑀤𑀼𑀢𑀺𑀬𑀤𑀺𑀯𑀲𑁂 𑀦𑀸𑀕𑀭𑀸 𑀅𑀤𑀁𑀲𑀼. 𑀧𑀼𑀦 𑀢𑁂𑀲𑀁 𑀤𑀸𑀦𑀢𑁄 𑀅𑀢𑀺𑀭𑁂𑀓𑀁 𑀭𑀸𑀚𑀸, 𑀢𑀲𑁆𑀲 𑀤𑀸𑀦𑀢𑁄 𑀅𑀢𑀺𑀭𑁂𑀓𑀁 𑀦𑀸𑀕𑀭𑀸𑀢𑀺 𑀏𑀯𑀁 𑀩𑀳𑀽𑀲𑀼 𑀤𑀺𑀯𑀲𑁂𑀲𑀼 𑀕𑀢𑁂𑀲𑀼 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀦𑀸𑀕𑀭𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀅𑀢𑀺𑀭𑁂𑀓𑀢𑀭𑀁 𑀓𑀭𑁄𑀦𑁆𑀢𑀺, 𑀧𑀣𑀯𑀺𑀲𑁆𑀲𑀭𑁄 𑀧𑀦 𑀭𑀸𑀚𑀸 𑀦𑀸𑀕𑀭𑁂𑀳𑀺 𑀤𑀸𑀦𑁂 𑀧𑀭𑀸𑀚𑀺𑀢𑁄𑀢𑀺 𑀕𑀭𑀳𑀸 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀣𑀲𑁆𑀲 𑀫𑀮𑁆𑀮𑀺𑀓𑀸 𑀉𑀧𑀸𑀬𑀁 𑀆𑀘𑀺𑀓𑁆𑀔𑀺. 𑀲𑁄 𑀭𑀸𑀚𑀗𑁆𑀕𑀡𑁂 𑀲𑀸𑀮𑀓𑀮𑁆𑀬𑀸𑀡𑀺𑀧𑀤𑀭𑁂𑀳𑀺 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀢𑀁 𑀦𑀻𑀮𑀼𑀧𑁆𑀧𑀮𑁂𑀳𑀺 ¶ 𑀙𑀸𑀤𑁂𑀢𑁆𑀯𑀸 𑀧𑀜𑁆𑀘 𑀆𑀲𑀦𑀲𑀢𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀧𑀜𑁆𑀘 𑀳𑀢𑁆𑀣𑀺𑀲𑀢𑀸𑀦𑀺 𑀆𑀲𑀦𑀸𑀦𑀁 𑀧𑀘𑁆𑀙𑀸𑀪𑀸𑀕𑁂 𑀞𑀧𑁂𑀢𑁆𑀯𑀸 𑀏𑀓𑁂𑀓𑁂𑀦 𑀳𑀢𑁆𑀣𑀺𑀦𑀸 𑀏𑀓𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑁂𑀢𑀘𑁆𑀙𑀢𑁆𑀢𑀁 𑀥𑀸𑀭𑀸𑀧𑁂𑀲𑀺. 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀆𑀲𑀦𑀸𑀦𑀁 𑀅𑀦𑁆𑀢𑀭𑁂 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸 𑀏𑀓𑁂𑀓𑀸 𑀔𑀢𑁆𑀢𑀺𑀬𑀥𑀻𑀢𑀸 𑀘𑀢𑀼𑀚𑁆𑀚𑀸𑀢𑀺𑀬𑀕𑀦𑁆𑀥𑀁 𑀧𑀺𑀲𑀢𑀺. 𑀦𑀺𑀝𑁆𑀞𑀺𑀢𑀁 𑀦𑀺𑀝𑁆𑀞𑀺𑀢𑀁 𑀫𑀚𑁆𑀛𑀝𑁆𑀞𑀸𑀦𑁂 𑀕𑀦𑁆𑀥𑀫𑁆𑀩𑀡𑁂 𑀧𑀓𑁆𑀔𑀺𑀧𑀢𑀺, 𑀢𑀁 𑀅𑀧𑀭𑀸 𑀔𑀢𑁆𑀢𑀺𑀬𑀥𑀻𑀢𑀸 𑀦𑀻𑀮𑀼𑀧𑁆𑀧𑀮𑀳𑀢𑁆𑀣𑀓𑁂𑀦 𑀲𑀫𑁆𑀧𑀭𑀺𑀯𑀢𑁆𑀢𑁂𑀢𑀺. 𑀏𑀯𑀁 𑀏𑀓𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀲𑁆𑀲𑁄 𑀢𑀺𑀲𑁆𑀲𑁄 𑀔𑀢𑁆𑀢𑀺𑀬𑀥𑀻𑀢𑀭𑁄 𑀧𑀭𑀺𑀯𑀸𑀭𑀸, 𑀅𑀧𑀭𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸 𑀇𑀢𑁆𑀣𑀻 𑀢𑀸𑀮𑀯𑀡𑁆𑀝𑀁 𑀕𑀳𑁂𑀢𑁆𑀯𑀸 𑀩𑀻𑀚𑀢𑀺, 𑀅𑀜𑁆𑀜𑀸 𑀥𑀫𑀓𑀭𑀡𑀁 𑀕𑀳𑁂𑀢𑁆𑀯𑀸 𑀉𑀤𑀓𑀁 𑀧𑀭𑀺𑀲𑁆𑀲𑀸𑀯𑁂𑀢𑀺, 𑀅𑀜𑁆𑀜𑀸 𑀧𑀢𑁆𑀢𑀢𑁄 𑀉𑀤𑀓𑀁 𑀳𑀭𑀢𑀺. 𑀪𑀕𑀯𑀢𑁄 𑀘𑀢𑁆𑀢𑀸𑀭𑀺 𑀅𑀦𑀕𑁆𑀖𑀸𑀦𑀺 𑀅𑀳𑁂𑀲𑀼𑀁. 𑀧𑀸𑀤𑀓𑀣𑀮𑀺𑀓𑀸 𑀆𑀥𑀸𑀭𑀓𑁄 𑀅𑀧𑀲𑁆𑀲𑁂𑀦𑀨𑀮𑀓𑀁 𑀙𑀢𑁆𑀢𑀧𑀸𑀤𑀫𑀡𑀻𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀦𑀕𑁆𑀖𑀸𑀦𑀺 𑀅𑀳𑁂𑀲𑀼𑀁. 𑀲𑀗𑁆𑀖𑀦𑀯𑀓𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑁄 𑀲𑀢𑀲𑀳𑀲𑁆𑀲𑀁 𑀅𑀕𑁆𑀖𑀢𑀺. 𑀢𑀲𑁆𑀫𑀺𑀜𑁆𑀘 𑀤𑀸𑀦𑁂 𑀅𑀗𑁆𑀕𑀼𑀮𑀺𑀫𑀸𑀮𑀢𑁆𑀣𑁂𑀭𑁄 𑀲𑀗𑁆𑀖𑀦𑀯𑀓𑁄 𑀅𑀳𑁄𑀲𑀺. 𑀢𑀲𑁆𑀲 𑀆𑀲𑀦𑀲𑀫𑀻𑀧𑁂 𑀆𑀦𑀻𑀢𑁄 𑀳𑀢𑁆𑀣𑀻 𑀢𑀁 𑀉𑀧𑀕𑀦𑁆𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀢𑁄 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑁋 ‘‘𑀅𑀜𑁆𑀜𑁄 𑀳𑀢𑁆𑀣𑀻 𑀦𑀢𑁆𑀣𑀻’’𑀢𑀺? 𑀤𑀼𑀝𑁆𑀞𑀳𑀢𑁆𑀣𑀻 𑀧𑀦 𑀅𑀢𑁆𑀣𑀺, 𑀆𑀦𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑁋 𑀲𑀗𑁆𑀖𑀦𑀯𑀓𑁄 𑀓𑀢𑀭𑁄 𑀫𑀳𑀸𑀭𑀸𑀚𑀸𑀢𑀺? 𑀅𑀗𑁆𑀕𑀼𑀮𑀺𑀫𑀸𑀮𑀢𑁆𑀣𑁂𑀭𑁄 𑀪𑀕𑀯𑀸𑀢𑀺. 𑀢𑁂𑀦 𑀳𑀺 𑀢𑀁 𑀤𑀼𑀝𑁆𑀞𑀳𑀢𑁆𑀣𑀺𑀁 𑀆𑀦𑁂𑀢𑁆𑀯𑀸 𑀞𑀧𑁂𑀢𑀼, 𑀫𑀳𑀸𑀭𑀸𑀚𑀸𑀢𑀺. 𑀳𑀢𑁆𑀣𑀺𑀁 𑀫𑀡𑁆𑀟𑀬𑀺𑀢𑁆𑀯𑀸 𑀆𑀦𑀬𑀺𑀁𑀲𑀼. 𑀲𑁄 𑀣𑁂𑀭𑀲𑁆𑀲 𑀢𑁂𑀚𑁂𑀦 𑀦𑀸𑀲𑀸𑀯𑀸𑀢𑀲𑀜𑁆𑀘𑀭𑀡𑀫𑀢𑁆𑀢𑀫𑁆𑀧𑀺 ¶ 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺. 𑀏𑀯𑀁 𑀦𑀺𑀭𑀦𑁆𑀢𑀭𑀁 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀤𑀸𑀦𑀁 𑀤𑀻𑀬𑀺𑀢𑁆𑀣. 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀭𑀸𑀚𑀸 𑀤𑀲𑀩𑀮𑀁 𑀯𑀦𑁆𑀤𑀺𑀢𑁆𑀯𑀸 𑁋 ‘‘𑀪𑀕𑀯𑀸 𑀫𑀬𑁆𑀳𑀁 𑀥𑀫𑁆𑀫𑀁 𑀤𑁂𑀲𑁂𑀣𑀸’’𑀢𑀺 𑀆𑀳.

𑀢𑀲𑁆𑀲𑀜𑁆𑀘 ¶ 𑀧𑀭𑀺𑀲𑀢𑀺 𑀓𑀸𑀴𑁄 𑀘 𑀚𑀼𑀡𑁆𑀳𑁄 𑀘𑀸𑀢𑀺 𑀤𑁆𑀯𑁂 𑀅𑀫𑀘𑁆𑀘𑀸 𑀳𑁄𑀦𑁆𑀢𑀺. 𑀓𑀸𑀴𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀦𑀲𑁆𑀲𑀢𑀺 𑀭𑀸𑀚𑀓𑀼𑀮𑀲𑁆𑀲 𑀲𑀦𑁆𑀢𑀓𑀁, 𑀓𑀺𑀁 𑀦𑀸𑀫𑁂𑀢𑁂 𑀏𑀢𑁆𑀢𑀓𑀸 𑀚𑀦𑀸 𑀓𑀭𑀺𑀲𑁆𑀲𑀦𑁆𑀢𑀺, 𑀪𑀼𑀜𑁆𑀚𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀦𑀺𑀤𑁆𑀤𑀸𑀬𑀺𑀲𑁆𑀲𑀦𑁆𑀢𑁂𑀯, 𑀇𑀤𑀁 𑀧𑀦 𑀏𑀓𑁄 𑀭𑀸𑀚𑀧𑀼𑀭𑀺𑀲𑁄 𑀮𑀪𑀺𑀢𑁆𑀯𑀸 𑀓𑀺𑀁 𑀦𑀸𑀫 𑀦 𑀓𑀭𑁂𑀬𑁆𑀬, 𑀅𑀳𑁄 𑀦𑀲𑁆𑀲𑀢𑀺 𑀭𑀜𑁆𑀜𑁄 𑀲𑀦𑁆𑀢𑀓’’𑀦𑁆𑀢𑀺. 𑀚𑀼𑀡𑁆𑀳𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀳𑀦𑁆𑀢𑀁 𑀇𑀤𑀁 𑀭𑀸𑀚𑀢𑁆𑀢𑀦𑀁 𑀦𑀸𑀫, 𑀓𑁄 𑀅𑀜𑁆𑀜𑁄 𑀇𑀤𑀁 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺? 𑀓𑀺𑀁 𑀭𑀸𑀚𑀸 𑀦𑀸𑀫 𑀲𑁄, 𑀬𑁄 𑀭𑀸𑀚𑀢𑁆𑀢𑀦𑁂 𑀞𑀺𑀢𑁄𑀧𑀺 𑀏𑀯𑀭𑀽𑀧𑀁 𑀤𑀸𑀦𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺. 𑀪𑀕𑀯𑀸 𑀧𑀭𑀺𑀲𑀸𑀬 𑀅𑀚𑁆𑀛𑀸𑀲𑀬𑀁 𑀑𑀮𑁄𑀓𑁂𑀦𑁆𑀢𑁄 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀅𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 𑁋 ‘‘𑀲𑀘𑁂 𑀅𑀚𑁆𑀚 𑀚𑀼𑀡𑁆𑀳𑀲𑁆𑀲 𑀅𑀚𑁆𑀛𑀸𑀲𑀬𑁂𑀦 𑀥𑀫𑁆𑀫𑀓𑀣𑀁 𑀓𑀣𑁂𑀫𑀺, 𑀓𑀸𑀴𑀲𑁆𑀲 𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀨𑀮𑀺𑀲𑁆𑀲𑀢𑀺 ¶ . 𑀫𑀬𑀸 𑀔𑁄 𑀧𑀦 𑀲𑀢𑁆𑀢𑀸𑀦𑀼𑀤𑁆𑀤𑀬𑀢𑀸𑀬 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸. 𑀚𑀼𑀡𑁆𑀳𑁄 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀤𑀺𑀯𑀲𑁂 𑀫𑀬𑀺 𑀥𑀫𑁆𑀫𑀁 𑀓𑀣𑀬𑀦𑁆𑀢𑁂 𑀫𑀕𑁆𑀕𑀨𑀮𑀁 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀧𑀦 𑀓𑀸𑀴𑀁 𑀑𑀮𑁄𑀓𑁂𑀲𑁆𑀲𑀸𑀫𑀻’’𑀢𑀺 𑀭𑀜𑁆𑀜𑁄 𑀘𑀢𑀼𑀧𑁆𑀧𑀤𑀺𑀓𑀫𑁂𑀯 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀦 𑀯𑁂 𑀓𑀤𑀭𑀺𑀬𑀸 𑀤𑁂𑀯𑀮𑁄𑀓𑀁 𑀯𑀚𑀦𑁆𑀢𑀺,

𑀩𑀸𑀮𑀸 𑀳𑀯𑁂 𑀦𑀧𑁆𑀧𑀲𑀁𑀲𑀦𑁆𑀢𑀺 𑀤𑀸𑀦𑀁;

𑀥𑀻𑀭𑁄 𑀘 𑀤𑀸𑀦𑀁 𑀅𑀦𑀼𑀫𑁄𑀤𑀫𑀸𑀦𑁄,

𑀢𑁂𑀦𑁂𑀯 𑀲𑁄 𑀳𑁄𑀢𑀺 𑀲𑀼𑀔𑀻 𑀧𑀭𑀢𑁆𑀣𑀸’’𑀢𑀺. (𑀥. 𑀧. 𑁧𑁭𑁭);

𑀭𑀸𑀚𑀸 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 𑁋 ‘‘𑀫𑀬𑀸 𑀫𑀳𑀸𑀤𑀸𑀦𑀁 𑀤𑀺𑀦𑁆𑀦𑀁, 𑀲𑀢𑁆𑀣𑀸 𑀘 𑀫𑁂 𑀫𑀦𑁆𑀤𑀫𑁂𑀯 𑀥𑀫𑁆𑀫𑀁 𑀓𑀣𑁂𑀲𑀺, 𑀦𑀸𑀲𑀓𑁆𑀔𑀺𑀁 𑀫𑀜𑁆𑀜𑁂 𑀤𑀲𑀩𑀮𑀲𑁆𑀲 𑀘𑀺𑀢𑁆𑀢𑀁 𑀕𑀳𑁂𑀢𑀼’’𑀦𑁆𑀢𑀺. 𑀲𑁄 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀫𑀬𑀸, 𑀪𑀦𑁆𑀢𑁂, 𑀫𑀳𑀦𑁆𑀢𑀁 𑀤𑀸𑀦𑀁 𑀤𑀺𑀦𑁆𑀦𑀁, 𑀅𑀦𑀼𑀫𑁄𑀤𑀦𑀸 𑀘 𑀫𑁂 𑀦 𑀫𑀳𑀢𑀻 𑀓𑀢𑀸, 𑀓𑁄 𑀦𑀼 𑀔𑁄 𑀫𑁂, 𑀪𑀦𑁆𑀢𑁂, 𑀤𑁄𑀲𑁄’’𑀢𑀺? 𑀦𑀢𑁆𑀣𑀺, 𑀫𑀳𑀸𑀭𑀸𑀚, 𑀢𑀯 𑀤𑁄𑀲𑁄, 𑀧𑀭𑀺𑀲𑀸 𑀧𑀦 𑀅𑀧𑀭𑀺𑀲𑀼𑀤𑁆𑀥𑀸, 𑀢𑀲𑁆𑀫𑀸 𑀥𑀫𑁆𑀫𑀁 𑀦 𑀤𑁂𑀲𑁂𑀲𑀺𑀦𑁆𑀢𑀺. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀧𑀭𑀺𑀲𑀸 𑀦 𑀲𑀼𑀤𑁆𑀥𑀸𑀢𑀺? 𑀲𑀢𑁆𑀣𑀸 𑀤𑁆𑀯𑀺𑀦𑁆𑀦𑀁 𑀅𑀫𑀘𑁆𑀘𑀸𑀦𑀁 𑀧𑀭𑀺𑀯𑀺𑀢𑀓𑁆𑀓𑀁 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀓𑀸𑀴𑀁 𑀧𑀼𑀘𑁆𑀙𑀺 𑁋 ‘‘𑀏𑀯𑀁, 𑀢𑀸𑀢, 𑀓𑀸𑀴𑀸’’𑀢𑀺? ‘‘𑀏𑀯𑀁, 𑀫𑀳𑀸𑀭𑀸𑀚𑀸’’𑀢𑀺. ‘‘𑀫𑀬𑀺 𑀫𑀫 𑀲𑀦𑁆𑀢𑀓𑀁 𑀤𑀤𑀫𑀸𑀦𑁂 𑀢𑀯 𑀓𑀢𑀭𑀁 𑀞𑀸𑀦𑀁 𑀭𑀼𑀚𑁆𑀚𑀢𑀺, 𑀦 𑀢𑀁 𑀲𑀓𑁆𑀓𑁄𑀫𑀺 𑀧𑀲𑁆𑀲𑀺𑀢𑀼𑀁, 𑀧𑀩𑁆𑀩𑀸𑀚𑁂𑀣 𑀦𑀁 𑀫𑀫 𑀭𑀝𑁆𑀞𑀢𑁄’’𑀢𑀺 𑀆𑀳. 𑀢𑀢𑁄 𑀚𑀼𑀡𑁆𑀳𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀏𑀯𑀁 𑀓𑀺𑀭, 𑀢𑀸𑀢, 𑀘𑀺𑀦𑁆𑀢𑁂𑀲𑀻’’𑀢𑀺? ‘‘𑀆𑀫, 𑀫𑀳𑀸𑀭𑀸𑀚𑀸’’𑀢𑀺. ‘‘𑀢𑀯 𑀘𑀺𑀢𑁆𑀢𑀸𑀦𑀼𑀭𑀽𑀧𑀫𑁂𑀯 𑀳𑁄𑀢𑀽’’𑀢𑀺 𑀢𑀲𑁆𑀫𑀺𑀁𑀬𑁂𑀯 𑀫𑀡𑁆𑀟𑀧𑁂 𑀏𑀯𑀁 𑀧𑀜𑁆𑀜𑀢𑁆𑀢𑁂𑀲𑀼𑀬𑁂𑀯 𑀆𑀲𑀦𑁂𑀲𑀼 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀢𑀸𑀬𑁂𑀯 𑀔𑀢𑁆𑀢𑀺𑀬𑀥𑀻𑀢𑀭𑁄 ¶ 𑀧𑀭𑀺𑀯𑀸𑀭𑀸𑀧𑁂𑀢𑁆𑀯𑀸 𑀭𑀸𑀚𑀕𑁂𑀳𑀢𑁄 𑀥𑀦𑀁 𑀕𑀳𑁂𑀢𑁆𑀯𑀸 𑀫𑀬𑀸 ¶ 𑀤𑀺𑀦𑁆𑀦𑀲𑀤𑀺𑀲𑀫𑁂𑀯 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀤𑀸𑀦𑀁 𑀤𑁂𑀳𑀻𑀢𑀺. 𑀲𑁄 𑀢𑀣𑀸 𑀅𑀤𑀸𑀲𑀺. 𑀤𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑁋 ‘‘𑀥𑀫𑁆𑀫𑀁 𑀪𑀕𑀯𑀸 𑀤𑁂𑀲𑁂𑀣𑀸’’𑀢𑀺 𑀆𑀳.

𑀲𑀢𑁆𑀣𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀤𑀸𑀦𑀸𑀦𑀁 𑀅𑀦𑀼𑀫𑁄𑀤𑀦𑀁 𑀏𑀓𑀢𑁄 𑀓𑀢𑁆𑀯𑀸 𑀤𑁆𑀯𑁂 𑀫𑀳𑀸𑀦𑀤𑀺𑀬𑁄 𑀏𑀓𑁄𑀖𑀧𑀼𑀡𑁆𑀡𑀸 𑀓𑀼𑀭𑀼𑀫𑀸𑀦𑁄 𑀯𑀺𑀬 𑀫𑀳𑀸𑀥𑀫𑁆𑀫𑀤𑁂𑀲𑀦𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀚𑀼𑀡𑁆𑀳𑁄 𑀲𑁄𑀢𑀸𑀧𑀦𑁆𑀦𑁄 𑀅𑀳𑁄𑀲𑀺. 𑀭𑀸𑀚𑀸 𑀧𑀲𑀻𑀤𑀺𑀢𑁆𑀯𑀸 𑀤𑀲𑀩𑀮𑀲𑁆𑀲 𑀩𑀸𑀳𑀺𑀭𑀯𑀢𑁆𑀣𑀼𑀁 𑀦𑀸𑀫 𑀅𑀤𑀸𑀲𑀺. 𑀏𑀯𑀁 𑀅𑀪𑀺𑀦𑀺𑀧𑁆𑀨𑀦𑁆𑀦𑁄 𑀔𑁄 𑀧𑀦 𑀢𑀲𑁆𑀲 𑀪𑀕𑀯𑀢𑁄 𑀮𑀸𑀪𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀪𑀺𑀦𑀺𑀧𑁆𑀨𑀦𑁆𑀦𑁄 ¶ 𑀲𑀺𑀮𑁄𑀓𑁄𑀢𑀺 𑀯𑀡𑁆𑀡𑀕𑀼𑀡𑀓𑀺𑀢𑁆𑀢𑀦𑀁. 𑀲𑁄𑀧𑀺 𑀪𑀕𑀯𑀢𑁄 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀢𑁄 𑀧𑀝𑁆𑀞𑀸𑀬 𑀅𑀪𑀺𑀦𑀺𑀧𑁆𑀨𑀦𑁆𑀦𑁄. 𑀢𑀢𑁄 𑀧𑀝𑁆𑀞𑀸𑀬 𑀳𑀺 𑀪𑀕𑀯𑀢𑁄 𑀔𑀢𑁆𑀢𑀺𑀬𑀸𑀧𑀺 𑀯𑀡𑁆𑀡𑀁 𑀓𑀣𑁂𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑀸𑀧𑀺 𑀕𑀳𑀧𑀢𑀬𑁄𑀧𑀺 𑀦𑀸𑀕𑀸 𑀲𑀼𑀧𑀡𑁆𑀡𑀸 𑀕𑀦𑁆𑀥𑀩𑁆𑀩𑀸 𑀤𑁂𑀯𑀢𑀸 𑀩𑁆𑀭𑀳𑁆𑀫𑀸𑀦𑁄𑀧𑀺 𑀓𑀺𑀢𑁆𑀢𑀺𑀁 𑀯𑀢𑁆𑀯𑀸 𑁋 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸. 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀧𑀺 𑀯𑀭𑀭𑁄𑀚𑀲𑁆𑀲 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀅𑀯𑀡𑁆𑀡𑀁 𑀓𑀣𑁂𑀳𑀻𑀢𑀺 𑀉𑀬𑁆𑀬𑁄𑀚𑁂𑀲𑀼𑀁. 𑀲𑁄 𑀲𑀳𑀲𑁆𑀲𑀁 𑀕𑀳𑁂𑀢𑁆𑀯𑀸 𑀤𑀲𑀩𑀮𑀁 𑀧𑀸𑀤𑀢𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑁂𑀲𑀦𑁆𑀢𑀸 𑀅𑀧𑀮𑁄𑀓𑀬𑀫𑀸𑀦𑁄 𑀮𑀺𑀓𑁆𑀔𑀸𑀫𑀢𑁆𑀢𑀫𑁆𑀧𑀺 𑀯𑀚𑁆𑀚𑀁 𑀅𑀤𑀺𑀲𑁆𑀯𑀸 𑁋 ‘‘𑀯𑀺𑀧𑁆𑀧𑀓𑀺𑀡𑁆𑀡𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀯𑀺𑀪𑀽𑀲𑀺𑀢𑁂 𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑀺𑀢𑁆𑀢𑁂 𑀲𑀼𑀨𑀼𑀮𑁆𑀮𑀺𑀢𑀧𑀸𑀭𑀺𑀘𑁆𑀙𑀢𑁆𑀢𑀓𑀢𑀸𑀭𑀸𑀕𑀡𑀲𑀫𑀼𑀚𑁆𑀚𑀮𑀺𑀢𑀅𑀦𑁆𑀢𑀮𑀺𑀓𑁆𑀔𑀯𑀺𑀘𑀺𑀢𑁆𑀢𑀓𑀼𑀲𑀼𑀫𑀲𑀲𑁆𑀲𑀺𑀭𑀺𑀓𑀦𑀦𑁆𑀤𑀦𑀯𑀦𑀲𑀤𑀺𑀲𑁂 𑀅𑀦𑀯𑀚𑁆𑀚𑀅𑀢𑁆𑀢𑀪𑀸𑀯𑁂 𑀅𑀯𑀡𑁆𑀡𑀁 𑀯𑀤𑀦𑁆𑀢𑀲𑁆𑀲 𑀫𑀼𑀔𑀫𑁆𑀧𑀺 𑀯𑀺𑀧𑀭𑀺𑀯𑀢𑁆𑀢𑁂𑀬𑁆𑀬, 𑀫𑀼𑀤𑁆𑀥𑀸𑀧𑀺 𑀲𑀢𑁆𑀢𑀥𑀸 𑀨𑀮𑁂𑀬𑁆𑀬, 𑀅𑀯𑀡𑁆𑀡𑀁 𑀯𑀢𑁆𑀢𑀼𑀁 𑀉𑀧𑀸𑀬𑁄 𑀦𑀢𑁆𑀣𑀺, 𑀯𑀡𑁆𑀡𑀫𑁂𑀯 𑀯𑀤𑀺𑀲𑁆𑀲𑀸𑀫𑀻’’𑀢𑀺 𑀧𑀸𑀤𑀢𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑁂𑀲𑀦𑁆𑀢𑀸 𑀅𑀢𑀺𑀭𑁂𑀓𑀧𑀤𑀲𑀳𑀲𑁆𑀲𑁂𑀦 𑀯𑀡𑁆𑀡𑀫𑁂𑀯 𑀓𑀣𑁂𑀲𑀺. 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑁂 𑀧𑀦𑁂𑀲 𑀯𑀡𑁆𑀡𑁄 𑀦𑀸𑀫 𑀫𑀢𑁆𑀣𑀓𑀁 𑀧𑀢𑁆𑀢𑁄. 𑀏𑀯𑀁 𑀅𑀪𑀺𑀦𑀺𑀧𑁆𑀨𑀦𑁆𑀦𑁄 𑀲𑀺𑀮𑁄𑀓𑁄𑀢𑀺.

𑀬𑀸𑀯 𑀫𑀜𑁆𑀜𑁂 𑀔𑀢𑁆𑀢𑀺𑀬𑀸𑀢𑀺 𑀔𑀢𑁆𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸 𑀯𑁂𑀲𑁆𑀲𑀸 𑀲𑀼𑀤𑁆𑀤𑀸 𑀦𑀸𑀕𑀸 𑀲𑀼𑀧𑀡𑁆𑀡𑀸 𑀬𑀓𑁆𑀔𑀸 𑀅𑀲𑀼𑀭𑀸 𑀤𑁂𑀯𑀸 𑀩𑁆𑀭𑀳𑁆𑀫𑀸𑀦𑁄𑀢𑀺 𑀲𑀩𑁆𑀩𑁂𑀯 𑀢𑁂 𑀲𑀫𑁆𑀧𑀺𑀬𑀸𑀬𑀫𑀸𑀦𑀭𑀽𑀧𑀸 𑀳𑀝𑁆𑀞𑀢𑀼𑀝𑁆𑀞𑀸 𑀯𑀺𑀳𑀭𑀦𑁆𑀢𑀺. 𑀯𑀺𑀕𑀢𑀫𑀤𑁄 𑀔𑁄 𑀧𑀦𑀸𑀢𑀺 𑀏𑀢𑁆𑀢𑀓𑀸 𑀫𑀁 𑀚𑀦𑀸 𑀲𑀫𑁆𑀧𑀺𑀬𑀸𑀬𑀫𑀸𑀦𑀭𑀽𑀧𑀸 𑀯𑀺𑀳𑀭𑀦𑁆𑀢𑀻𑀢𑀺 𑀦 𑀫𑀤𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀤𑀯𑀸𑀤𑀺𑀯𑀲𑁂𑀦 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀯𑀺𑀕𑀢𑀫𑀤𑁄 𑀔𑁄 𑀧𑀦 𑀲𑁄 𑀪𑀕𑀯𑀸 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺.

𑀬𑀣𑀸𑀯𑀸𑀤𑀻𑀢𑀺 ¶ 𑀬𑀁 𑀯𑀸𑀘𑀸𑀬 𑀯𑀤𑀢𑀺, 𑀢𑀤𑀦𑁆𑀯𑀬𑀫𑁂𑀯𑀲𑁆𑀲 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺. 𑀬𑀜𑁆𑀘 𑀓𑀸𑀬𑁂𑀦 𑀓𑀭𑁄𑀢𑀺, 𑀢𑀤𑀦𑁆𑀯𑀬𑀫𑁂𑀯𑀲𑁆𑀲 𑀯𑀘𑀻𑀓𑀫𑁆𑀫𑀁 𑀳𑁄𑀢𑀺. 𑀓𑀸𑀬𑁄 𑀯𑀸 𑀯𑀸𑀘𑀁, 𑀯𑀸𑀘𑀸 𑀯𑀸 𑀓𑀸𑀬𑀁 𑀦𑀸𑀢𑀺𑀓𑁆𑀓𑀫𑀢𑀺, 𑀯𑀸𑀘𑀸 𑀓𑀸𑀬𑁂𑀦, 𑀓𑀸𑀬𑁄 𑀘 𑀯𑀸𑀘𑀸𑀬 𑀲𑀫𑁂𑀢𑀺. 𑀬𑀣𑀸 𑀘 𑁋

‘‘𑀯𑀸𑀫𑁂𑀦 ¶ 𑀲𑀽𑀓𑀭𑁄 𑀳𑁄𑀢𑀺, 𑀤𑀓𑁆𑀔𑀺𑀡𑁂𑀦 𑀅𑀚𑀸𑀫𑀺𑀕𑁄;

𑀲𑀭𑁂𑀦 𑀦𑁂𑀮𑀓𑁄 𑀳𑁄𑀢𑀺, 𑀯𑀺𑀲𑀸𑀡𑁂𑀦 𑀚𑀭𑀕𑁆𑀕𑀯𑁄’’𑀢𑀺. 𑁋

𑀅𑀬𑀁 𑀲𑀽𑀓𑀭𑀬𑀓𑁆𑀔𑁄 𑀲𑀽𑀓𑀭𑁂 𑀤𑀺𑀲𑁆𑀯𑀸 𑀲𑀽𑀓𑀭𑀲𑀤𑀺𑀲𑀁 𑀯𑀸𑀫𑀧𑀲𑁆𑀲𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂 𑀕𑀳𑁂𑀢𑁆𑀯𑀸 𑀔𑀸𑀤𑀢𑀺, 𑀅𑀚𑀸𑀫𑀺𑀕𑁂 𑀤𑀺𑀲𑁆𑀯𑀸 𑀢𑀁𑀲𑀤𑀺𑀲𑀁 ¶ 𑀤𑀓𑁆𑀔𑀺𑀡𑀧𑀲𑁆𑀲𑀁 𑀤𑀲𑁆𑀲𑁂𑀢𑁆𑀯𑀸 𑀢𑁂 𑀕𑀳𑁂𑀢𑁆𑀯𑀸 𑀔𑀸𑀤𑀢𑀺, 𑀦𑁂𑀮𑀓𑀯𑀘𑁆𑀙𑀓𑁂 𑀤𑀺𑀲𑁆𑀯𑀸 𑀯𑀘𑁆𑀙𑀓𑀭𑀯𑀁 𑀭𑀯𑀦𑁆𑀢𑁄 𑀢𑁂 𑀕𑀳𑁂𑀢𑁆𑀯𑀸 𑀔𑀸𑀤𑀢𑀺, 𑀕𑁄𑀡𑁂 𑀤𑀺𑀲𑁆𑀯𑀸 𑀢𑁂𑀲𑀁 𑀯𑀺𑀲𑀸𑀡𑀲𑀤𑀺𑀲𑀸𑀦𑀺 𑀯𑀺𑀲𑀸𑀡𑀸𑀦𑀺 𑀫𑀸𑀧𑁂𑀢𑁆𑀯𑀸 𑀢𑁂 𑀤𑀽𑀭𑀢𑁄𑀯 𑁋 ‘‘𑀕𑁄𑀡𑁄 𑀯𑀺𑀬 𑀤𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀉𑀧𑀕𑀢𑁂 𑀕𑀳𑁂𑀢𑁆𑀯𑀸 𑀔𑀸𑀤𑀢𑀺. 𑀬𑀣𑀸 𑀘 𑀥𑀫𑁆𑀫𑀺𑀓𑀯𑀸𑀬𑀲𑀚𑀸𑀢𑀓𑁂 𑀲𑀓𑀼𑀡𑁂𑀳𑀺 𑀧𑀼𑀝𑁆𑀞𑁄 𑀯𑀸𑀬𑀲𑁄 𑁋 ‘‘𑀅𑀳𑀁 𑀯𑀸𑀢𑀪𑀓𑁆𑀔𑁄, 𑀯𑀸𑀢𑀪𑀓𑁆𑀔𑀢𑀸𑀬 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀧𑀸𑀡𑀓𑀸𑀦𑀜𑁆𑀘 𑀫𑀭𑀡𑀪𑀬𑁂𑀦 𑀏𑀓𑁂𑀦𑁂𑀯 𑀧𑀸𑀤𑁂𑀦 𑀞𑀺𑀢𑁄, 𑀢𑀲𑁆𑀫𑀸 𑀢𑀼𑀫𑁆𑀳𑁂𑀧𑀺 𑁋

‘‘𑀥𑀫𑁆𑀫𑀁 𑀘𑀭𑀣 𑀪𑀤𑁆𑀤𑀁 𑀯𑁄, 𑀥𑀫𑁆𑀫𑀁 𑀘𑀭𑀣 𑀜𑀸𑀢𑀬𑁄;

𑀥𑀫𑁆𑀫𑀘𑀸𑀭𑀻 𑀲𑀼𑀔𑀁 𑀲𑁂𑀢𑀺, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘𑀸’’𑀢𑀺.

𑀲𑀓𑀼𑀡𑁂𑀲𑀼 𑀯𑀺𑀲𑁆𑀲𑀸𑀲𑀁 𑀉𑀧𑁆𑀧𑀸𑀤𑁂𑀲𑀺, 𑀢𑀢𑁄 𑁋

‘‘𑀪𑀤𑁆𑀤𑀓𑁄 𑀯𑀢𑀸𑀬𑀁 𑀧𑀓𑁆𑀔𑀻, 𑀤𑀺𑀚𑁄 𑀧𑀭𑀫𑀥𑀫𑁆𑀫𑀺𑀓𑁄;

𑀏𑀓𑀧𑀸𑀤𑁂𑀦 𑀢𑀺𑀝𑁆𑀞𑀦𑁆𑀢𑁄, 𑀥𑀫𑁆𑀫𑁄 𑀥𑀫𑁆𑀫𑁄𑀢𑀺 𑀪𑀸𑀲𑀢𑀻’’𑀢𑀺.

𑀏𑀯𑀁 𑀯𑀺𑀲𑁆𑀲𑀸𑀲𑀫𑀸𑀕𑀢𑁂 𑀲𑀓𑀼𑀡𑁂 𑀔𑀸𑀤𑀺𑀢𑁆𑀣. 𑀢𑁂𑀦 𑀢𑁂𑀲𑀁 𑀯𑀸𑀘𑀸 𑀓𑀸𑀬𑁂𑀦, 𑀓𑀸𑀬𑁄 𑀘 𑀯𑀸𑀘𑀸𑀬 𑀦 𑀲𑀫𑁂𑀢𑀺, 𑀦 𑀏𑀯𑀁 𑀪𑀕𑀯𑀢𑁄. 𑀪𑀕𑀯𑀢𑁄 𑀧𑀦 𑀯𑀸𑀘𑀸 𑀓𑀸𑀬𑁂𑀦, 𑀓𑀸𑀬𑁄 𑀘 𑀯𑀸𑀘𑀸𑀬 𑀲𑀫𑁂𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀢𑀺𑀡𑁆𑀡𑀸 𑀢𑀭𑀺𑀢𑀸 𑀯𑀺𑀘𑀺𑀓𑀺𑀘𑁆𑀙𑀸 𑀅𑀲𑁆𑀲𑀸𑀢𑀺 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄. ‘‘𑀓𑀣𑀫𑀺𑀤𑀁 𑀓𑀣𑀫𑀺𑀤’’𑀦𑁆𑀢𑀺 𑀏𑀯𑀭𑀽𑀧𑀸 𑀯𑀺𑀕𑀢𑀸 𑀓𑀣𑀁𑀓𑀣𑀸 𑀅𑀲𑁆𑀲𑀸𑀢𑀺 𑀯𑀺𑀕𑀢𑀓𑀣𑀁𑀓𑀣𑁄. 𑀬𑀣𑀸 𑀳𑀺 𑀫𑀳𑀸𑀚𑀦𑁄 𑁋 ‘‘𑀅𑀬𑀁 𑀭𑀼𑀓𑁆𑀔𑁄, 𑀓𑀺𑀁 𑀭𑀼𑀓𑁆𑀔𑁄 𑀦𑀸𑀫, 𑀅𑀬𑀁 𑀕𑀸𑀫𑁄, 𑀅𑀬𑀁 𑀚𑀦𑀧𑀤𑁄, 𑀇𑀤𑀁 𑀭𑀝𑁆𑀞𑀁, 𑀓𑀺𑀁 𑀭𑀝𑁆𑀞𑀁 𑀦𑀸𑀫, 𑀓𑀲𑁆𑀫𑀸 𑀦𑀼 𑀔𑁄 𑀅𑀬𑀁 𑀭𑀼𑀓𑁆𑀔𑁄 𑀉𑀚𑀼𑀓𑁆𑀔𑀦𑁆𑀥𑁄, 𑀅𑀬𑀁 𑀯𑀗𑁆𑀓𑀓𑁆𑀔𑀦𑁆𑀥𑁄, 𑀓𑀲𑁆𑀫𑀸 𑀓𑀡𑁆𑀝𑀓𑁄 𑀓𑁄𑀘𑀺 𑀉𑀚𑀼𑀓𑁄 𑀳𑁄𑀢𑀺, 𑀓𑁄𑀘𑀺 𑀯𑀗𑁆𑀓𑁄, 𑀧𑀼𑀧𑁆𑀨𑀁 𑀓𑀺𑀜𑁆𑀘𑀺 𑀲𑀼𑀕𑀦𑁆𑀥𑀁, 𑀓𑀺𑀜𑁆𑀘𑀺 𑀤𑀼𑀕𑁆𑀕𑀦𑁆𑀥𑀁, 𑀨𑀮𑀁 𑀓𑀺𑀜𑁆𑀘𑀺 ¶ 𑀫𑀥𑀼𑀭𑀁, 𑀓𑀺𑀜𑁆𑀘𑀺 𑀅𑀫𑀥𑀼𑀭’’𑀦𑁆𑀢𑀺 𑀲𑀓𑀗𑁆𑀔𑁄𑀯 𑀳𑁄𑀢𑀺, 𑀦 𑀏𑀯𑀁 𑀲𑀢𑁆𑀣𑀸. 𑀲𑀢𑁆𑀣𑀸 𑀳𑀺 𑁋 ‘‘𑀇𑀫𑁂𑀲𑀁 𑀦𑀸𑀫 𑀥𑀸𑀢𑀽𑀦𑀁 𑀉𑀲𑁆𑀲𑀦𑁆𑀦𑀼𑀲𑁆𑀲𑀦𑁆𑀦𑀢𑁆𑀢𑀸 𑀇𑀤𑀁 𑀏𑀯𑀁 𑀳𑁄𑀢𑀻’’𑀢𑀺 𑀯𑀺𑀕𑀢𑀓𑀣𑀁𑀓𑀣𑁄𑀯 ¶ . 𑀬𑀣𑀸 𑀘 𑀧𑀞𑀫𑀚𑁆𑀛𑀸𑀦𑀸𑀤𑀺𑀮𑀸𑀪𑀻𑀦𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀲𑀼 𑀓𑀗𑁆𑀔𑀸 𑀳𑁄𑀢𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀫𑁆𑀧𑀺 ¶ 𑀳𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂 𑀬𑀸𑀣𑀸𑀯𑀲𑀦𑁆𑀦𑀺𑀝𑁆𑀞𑀸𑀦𑀸𑀪𑀸𑀯𑀢𑁄 𑀯𑁄𑀳𑀸𑀭𑀯𑀲𑁂𑀦 𑀓𑀗𑁆𑀔𑀸 𑀦𑀸𑀫 𑀳𑁄𑀢𑀺𑀬𑁂𑀯, 𑀦 𑀏𑀯𑀁 𑀩𑀼𑀤𑁆𑀥𑀲𑁆𑀲. 𑀲𑁄 𑀳𑀺 𑀪𑀕𑀯𑀸 𑀲𑀩𑁆𑀩𑀢𑁆𑀣 𑀯𑀺𑀕𑀢𑀓𑀣𑀁𑀓𑀣𑁄𑀢𑀺 𑀤𑀲𑁆𑀲𑁂𑀢𑀺.

𑀧𑀭𑀺𑀬𑁄𑀲𑀺𑀢𑀲𑀗𑁆𑀓𑀧𑁆𑀧𑁄𑀢𑀺 𑀬𑀣𑀸 𑀓𑁂𑀘𑀺 𑀲𑀻𑀮𑀫𑀢𑁆𑀢𑁂𑀦, 𑀓𑁂𑀘𑀺 𑀯𑀺𑀧𑀲𑁆𑀲𑀦𑀸𑀫𑀢𑁆𑀢𑁂𑀦, 𑀓𑁂𑀘𑀺 𑀧𑀞𑀫𑀚𑁆𑀛𑀸𑀦𑁂𑀦…𑀧𑁂… 𑀓𑁂𑀘𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸, 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀪𑀸𑀯𑀫𑀢𑁆𑀢𑁂𑀦…𑀧𑁂… 𑀓𑁂𑀘𑀺 𑀅𑀭𑀳𑀢𑁆𑀢𑁂𑀦, 𑀓𑁂𑀘𑀺 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑁂𑀦, 𑀓𑁂𑀘𑀺 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑁂𑀦 𑀧𑀭𑀺𑀬𑁄𑀲𑀺𑀢𑀲𑀗𑁆𑀓𑀧𑁆𑀧𑀸 𑀧𑀭𑀺𑀧𑀼𑀡𑁆𑀡𑀫𑀦𑁄𑀭𑀣𑀸 𑀳𑁄𑀦𑁆𑀢𑀺, 𑀦 𑀏𑀯𑀁 𑀫𑀫 𑀲𑀢𑁆𑀣𑀸. 𑀫𑀫 𑀧𑀦 𑀲𑀢𑁆𑀣𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀧𑀭𑀺𑀬𑁄𑀲𑀺𑀢𑀲𑀗𑁆𑀓𑀧𑁆𑀧𑁄𑀢𑀺 𑀤𑀲𑁆𑀲𑁂𑀢𑀺.

𑀅𑀚𑁆𑀛𑀸𑀲𑀬𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀅𑀥𑀺𑀓𑀸𑀲𑀬𑁂𑀦 𑀉𑀢𑁆𑀢𑀫𑀦𑀺𑀲𑁆𑀲𑀬𑀪𑀽𑀢𑁂𑀦 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀧𑁄𑀭𑀸𑀡𑀩𑁆𑀭𑀳𑁆𑀫𑀘𑀭𑀺𑀬𑀪𑀽𑀢𑁂𑀦 𑀘 𑀅𑀭𑀺𑀬𑀫𑀕𑁆𑀕𑁂𑀦 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀯𑀺𑀕𑀢𑀓𑀣𑀁𑀓𑀣𑁄 𑀧𑀭𑀺𑀬𑁄𑀲𑀺𑀢𑀲𑀗𑁆𑀓𑀧𑁆𑀧𑁄𑀢𑀺 𑀅𑀢𑁆𑀣𑁄. ‘‘𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯’’𑀦𑁆𑀢𑀺 𑀳𑀺 𑀯𑀘𑀦𑀢𑁄 𑀧𑀭𑀺𑀬𑁄𑀲𑀺𑀢𑀲𑀗𑁆𑀓𑀧𑁆𑀧𑀢𑀸𑀧𑀺 𑀪𑀕𑀯𑀢𑁄 𑀅𑀭𑀺𑀬𑀫𑀕𑁆𑀕𑁂𑀦𑁂𑀯 𑀦𑀺𑀧𑁆𑀨𑀦𑁆𑀦𑀸𑀢𑀺.

𑁨𑁯𑁭. 𑀬𑀣𑀭𑀺𑀯 𑀪𑀕𑀯𑀸𑀢𑀺 𑀬𑀣𑀸 𑀪𑀕𑀯𑀸, 𑀏𑀯𑀁 𑀏𑀓𑀲𑁆𑀫𑀺𑀁 𑀚𑀫𑁆𑀩𑀼𑀤𑀻𑀧𑀢𑀮𑁂 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑀸 𑀅𑀳𑁄 𑀯𑀢 𑀘𑀢𑁆𑀢𑀸𑀭𑁄 𑀚𑀺𑀦𑀸 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀼𑀦𑁆𑀢𑀺 𑀧𑀘𑁆𑀘𑀸𑀲𑀺𑀲𑀫𑀸𑀦𑀸 𑀯𑀤𑀦𑁆𑀢𑀺. 𑀅𑀣𑀸𑀧𑀭𑁂 𑀢𑀻𑀲𑀼 𑀫𑀡𑁆𑀟𑀮𑁂𑀲𑀼 𑀏𑀓𑀢𑁄 𑀯𑀺𑀘𑀭𑀡𑀪𑀸𑀯𑀁 𑀆𑀓𑀗𑁆𑀔𑀫𑀸𑀦𑀸 𑀢𑀬𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀢𑀺 𑀆𑀳𑀁𑀲𑀼. 𑀅𑀧𑀭𑁂 𑁋 ‘‘𑀤𑀲 𑀧𑀸𑀭𑀫𑀺𑀬𑁄 𑀦𑀸𑀫 𑀧𑀽𑀭𑁂𑀢𑁆𑀯𑀸 𑀘𑀢𑀼𑀦𑁆𑀦𑀁 𑀢𑀺𑀡𑁆𑀡𑀁 𑀯𑀸 𑀉𑀧𑁆𑀧𑀢𑁆𑀢𑀺 𑀤𑀼𑀮𑁆𑀮𑀪𑀸, 𑀲𑀘𑁂 𑀧𑀦 𑀏𑀓𑁄 𑀦𑀺𑀩𑀤𑁆𑀥𑀯𑀸𑀲𑀁 𑀯𑀲𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬, 𑀏𑀓𑁄 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄, 𑀏𑀯𑀫𑁆𑀧𑀺 𑀚𑀫𑁆𑀩𑀼𑀤𑀻𑀧𑁄 𑀲𑁄𑀪𑁂𑀬𑁆𑀬 𑀘𑁂𑀯, 𑀩𑀳𑀼𑀜𑁆𑀘 𑀳𑀺𑀢𑀲𑀼𑀔𑀫𑀥𑀺𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀳𑁄 𑀯𑀢, 𑀫𑀸𑀭𑀺𑀲𑀸𑀢𑀺 𑀆𑀳𑀁𑀲𑀼.

𑁨𑁯𑁮. 𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄 𑀬𑀦𑁆𑀢𑀺 𑀏𑀢𑁆𑀣 𑀞𑀸𑀦𑀁 𑀅𑀯𑀓𑀸𑀲𑁄𑀢𑀺 𑀉𑀪𑀬𑀫𑁂𑀢𑀁 𑀓𑀸𑀭𑀡𑀸𑀥𑀺𑀯𑀘𑀦𑀫𑁂𑀯. 𑀓𑀸𑀭𑀡𑀜𑁆𑀳𑀺 𑀢𑀺𑀝𑁆𑀞𑀢𑀺 ¶ 𑀏𑀢𑁆𑀣 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀨𑀮𑀦𑁆𑀢𑀺 𑀞𑀸𑀦𑀁. 𑀑𑀓𑀸𑀲𑁄 𑀯𑀺𑀬 𑀘𑀲𑁆𑀲 𑀢𑀁 𑀢𑁂𑀦 𑀯𑀺𑀦𑀸 𑀅𑀜𑁆𑀜𑀢𑁆𑀣 𑀅𑀪𑀸𑀯𑀢𑁄𑀢𑀺 𑀅𑀯𑀓𑀸𑀲𑁄. 𑀬𑀦𑁆𑀢𑀺 𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ¶ 𑁋 ‘‘𑀬𑁂𑀦 𑀓𑀸𑀭𑀡𑁂𑀦 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀩𑀼𑀤𑁆𑀥𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑀁 𑀓𑀸𑀭𑀡𑀁 𑀦𑀢𑁆𑀣𑀻’’𑀢𑀺.

𑀏𑀢𑁆𑀣 𑀘 𑁋

‘‘𑀬𑀸𑀯𑀢𑀸 ¶ 𑀘𑀦𑁆𑀤𑀺𑀫𑀲𑀽𑀭𑀺𑀬𑀸, 𑀧𑀭𑀺𑀳𑀭𑀦𑁆𑀢𑀺 𑀤𑀺𑀲𑀸 𑀪𑀦𑁆𑀢𑀺 𑀯𑀺𑀭𑁄𑀘𑀦𑀸;

𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁄, 𑀏𑀢𑁆𑀣 𑀢𑁂 𑀯𑀢𑁆𑀢𑀢𑁂 𑀯𑀲𑁄’’𑀢𑀺. (𑀫. 𑀦𑀺. 𑁧.𑁫𑁦𑁩) 𑁋

𑀕𑀸𑀣𑀸𑀬 𑀏𑀓𑀘𑀓𑁆𑀓𑀯𑀸𑀴𑀫𑁂𑀯 𑀏𑀓𑀸 𑀮𑁄𑀓𑀥𑀸𑀢𑀼. ‘‘𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀅𑀓𑀫𑁆𑀧𑀺𑀢𑁆𑀣𑀸’’𑀢𑀺 (𑀅. 𑀦𑀺. 𑁩.𑁧𑁨𑁬) 𑀆𑀕𑀢𑀝𑁆𑀞𑀸𑀦𑁂 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀁 𑀏𑀓𑀸 𑀮𑁄𑀓𑀥𑀸𑀢𑀼. ‘‘𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀢𑀺𑀲𑀳𑀲𑁆𑀲𑀺𑀫𑀳𑀸𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀬𑁆𑀬, 𑀑𑀪𑀸𑀲𑁂𑀦 𑀘 𑀨𑀭𑁂𑀬𑁆𑀬𑀸’’𑀢𑀺 (𑀅. 𑀦𑀺. 𑁩.𑁮𑁧) 𑀆𑀕𑀢𑀝𑁆𑀞𑀸𑀦𑁂 𑀢𑀺𑀲𑀳𑀲𑁆𑀲𑀺𑀫𑀳𑀸𑀲𑀳𑀲𑁆𑀲𑀻 𑀏𑀓𑀸 𑀮𑁄𑀓𑀥𑀸𑀢𑀼. ‘‘𑀅𑀬𑀜𑁆𑀘 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀽’’𑀢𑀺 (𑀫. 𑀦𑀺. 𑁩.𑁨𑁦𑁧) 𑀆𑀕𑀢𑀝𑁆𑀞𑀸𑀦𑁂 𑀤𑀲𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀸𑀦𑀺 𑀏𑀓𑀸 𑀮𑁄𑀓𑀥𑀸𑀢𑀼. 𑀢𑀁 𑀲𑀦𑁆𑀥𑀸𑀬 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸𑀢𑀺 𑀆𑀳. 𑀏𑀢𑁆𑀢𑀓𑀜𑁆𑀳𑀺 𑀚𑀸𑀢𑀺𑀔𑁂𑀢𑁆𑀢𑀁 𑀦𑀸𑀫. 𑀢𑀢𑁆𑀭𑀸𑀧𑀺 𑀞𑀧𑁂𑀢𑁆𑀯𑀸 𑀇𑀫𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀚𑀫𑁆𑀩𑀼𑀤𑀻𑀧𑀲𑁆𑀲 𑀫𑀚𑁆𑀛𑀺𑀫𑀤𑁂𑀲𑀁 𑀦 𑀅𑀜𑁆𑀜𑀢𑁆𑀭 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀚𑀸𑀢𑀺𑀔𑁂𑀢𑁆𑀢𑀢𑁄 𑀧𑀦 𑀧𑀭𑀁 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀫𑁂𑀯 𑀦 𑀧𑀜𑁆𑀜𑀸𑀬𑀢𑀺. 𑀬𑁂𑀦𑀢𑁆𑀣𑁂𑀦𑀸𑀢𑀺 𑀬𑁂𑀦 𑀧𑀯𑀸𑀭𑀡𑀲𑀗𑁆𑀕𑀳𑀢𑁆𑀣𑁂𑀦.

𑀲𑀦𑀗𑁆𑀓𑀼𑀫𑀸𑀭𑀓𑀣𑀸𑀯𑀡𑁆𑀡𑀦𑀸

𑁩𑁦𑁦. 𑀯𑀡𑁆𑀡𑁂𑀦 𑀘𑁂𑀯 𑀬𑀲𑀲𑀸 𑀘𑀸𑀢𑀺 𑀅𑀮𑀗𑁆𑀓𑀸𑀭𑀧𑀭𑀺𑀯𑀸𑀭𑁂𑀦 𑀘 𑀧𑀼𑀜𑁆𑀜𑀲𑀺𑀭𑀺𑀬𑀸 𑀘𑀸𑀢𑀺 𑀅𑀢𑁆𑀣𑁄.

𑁩𑁦𑁧. 𑀲𑀸𑀥𑀼 𑀫𑀳𑀸𑀩𑁆𑀭𑀳𑁆𑀫𑁂𑀢𑀺 𑀏𑀢𑁆𑀣 𑀲𑀫𑁆𑀧𑀲𑀸𑀤𑀦𑁂 𑀲𑀸𑀥𑀼𑀲𑀤𑁆𑀤𑁄. 𑀲𑀗𑁆𑀔𑀸𑀬 𑀫𑁄𑀤𑀸𑀫𑀸𑀢𑀺 𑀚𑀸𑀦𑀺𑀢𑁆𑀯𑀸 𑀫𑁄𑀤𑀸𑀫.

𑀕𑁄𑀯𑀺𑀦𑁆𑀤𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁦𑁪. 𑀬𑀸𑀯 𑀤𑀻𑀖𑀭𑀢𑁆𑀢𑀁 𑀫𑀳𑀸𑀧𑀜𑁆𑀜𑁄𑀯 𑀲𑁄 𑀪𑀕𑀯𑀸𑀢𑀺 𑀏𑀢𑁆𑀢𑀓𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀅𑀣 𑀔𑁄 𑀬𑀸𑀯 𑀤𑀻𑀖𑀭𑀢𑁆𑀢𑀁 𑀅𑀢𑀺𑀘𑀺𑀭𑀭𑀢𑁆𑀢𑀁 𑀫𑀳𑀸𑀧𑀜𑁆𑀜𑁄𑀯 𑀲𑁄 𑀪𑀕𑀯𑀸. 𑀦𑁄𑀢𑀺 𑀓𑀣𑀁 𑀢𑀼𑀫𑁆𑀳𑁂 𑀫𑀜𑁆𑀜𑀣𑀸𑀢𑀺. 𑀅𑀣 𑀲𑀬𑀫𑁂𑀯𑁂𑀢𑀁 𑀧𑀜𑁆𑀳𑀁 𑀩𑁆𑀬𑀸𑀓𑀸𑀢𑀼𑀓𑀸𑀫𑁄 𑁋 ‘‘𑀅𑀦𑀘𑁆𑀙𑀭𑀺𑀬𑀫𑁂𑀢𑀁, 𑀫𑀸𑀭𑀺𑀲𑀸, 𑀬𑀁 𑀇𑀤𑀸𑀦𑀺 𑀧𑀸𑀭𑀫𑀺𑀬𑁄 ¶ 𑀧𑀽𑀭𑁂𑀢𑁆𑀯𑀸 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀢𑀺𑀡𑁆𑀡𑀁 𑀫𑀸𑀭𑀸𑀦𑀁 𑀫𑀢𑁆𑀣𑀓𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀝𑀺𑀯𑀺𑀤𑁆𑀥𑀅𑀲𑀸𑀥𑀸𑀭𑀡𑀜𑀸𑀡𑁄 𑀲𑁄 𑀪𑀕𑀯𑀸 𑀫𑀳𑀸𑀧𑀜𑁆𑀜𑁄 𑀪𑀯𑁂𑀬𑁆𑀬, 𑀓𑀺𑀫𑁂𑀢𑁆𑀣 𑀅𑀘𑁆𑀙𑀭𑀺𑀬𑀁, 𑀅𑀧𑀭𑀺𑀧𑀓𑁆𑀓𑀸𑀬 𑀧𑀦 𑀩𑁄𑀥𑀺𑀬𑀸 𑀧𑀤𑁂𑀲𑀜𑀸𑀡𑁂 ¶ 𑀞𑀺𑀢𑀲𑁆𑀲 𑀲𑀭𑀸𑀕𑀸𑀤𑀺𑀓𑀸𑀮𑁂𑀧𑀺 𑀫𑀳𑀸𑀧𑀜𑁆𑀜𑀪𑀸𑀯𑀫𑁂𑀯 𑀯𑁄, 𑀫𑀸𑀭𑀺𑀲𑀸, 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀪𑀯𑀧𑀝𑀺𑀘𑁆𑀙𑀦𑁆𑀦𑀓𑀸𑀭𑀡𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀪𑀽𑀢𑀧𑀼𑀩𑁆𑀩𑀁 𑀪𑁄𑀢𑀺𑀆𑀤𑀺𑀫𑀸𑀳.

𑀧𑀼𑀭𑁄𑀳𑀺𑀢𑁄𑀢𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀅𑀦𑀼𑀲𑀸𑀲𑀦𑀧𑀼𑀭𑁄𑀳𑀺𑀢𑁄. 𑀕𑁄𑀯𑀺𑀦𑁆𑀤𑁄𑀢𑀺 𑀕𑁄𑀯𑀺𑀦𑁆𑀤𑀺𑀬𑀸𑀪𑀺𑀲𑁂𑀓𑁂𑀦 𑀅𑀪𑀺𑀲𑀺𑀢𑁆𑀢𑁄 ¶ , 𑀧𑀓𑀢𑀺𑀬𑀸 𑀧𑀦𑀲𑁆𑀲 𑀅𑀜𑁆𑀜𑀤𑁂𑀯 𑀦𑀸𑀫𑀁, 𑀅𑀪𑀺𑀲𑀺𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 ‘‘𑀕𑁄𑀯𑀺𑀦𑁆𑀤𑁄’’𑀢𑀺 𑀲𑀗𑁆𑀔𑁆𑀬𑀁 𑀕𑀢𑁄. 𑀚𑁄𑀢𑀺𑀧𑀸𑀮𑁄𑀢𑀺 𑀚𑁄𑀢𑀦𑀢𑁄 𑀘 𑀧𑀸𑀮𑀦𑀢𑁄 𑀘 𑀚𑁄𑀢𑀺𑀧𑀸𑀮𑁄. 𑀢𑀲𑁆𑀲 𑀓𑀺𑀭 𑀚𑀸𑀢𑀤𑀺𑀯𑀲𑁂 𑀲𑀩𑁆𑀩𑀸𑀯𑀼𑀥𑀸𑀦𑀺 𑀉𑀚𑁆𑀚𑁄𑀢𑀺𑀁𑀲𑀼. 𑀭𑀸𑀚𑀸𑀧𑀺 𑀧𑀘𑁆𑀘𑀽𑀲𑀲𑀫𑀬𑁂 𑀅𑀢𑁆𑀢𑀦𑁄 𑀫𑀗𑁆𑀕𑀮𑀸𑀯𑀼𑀥𑀁 𑀧𑀚𑁆𑀚𑀮𑀺𑀢𑀁 𑀤𑀺𑀲𑁆𑀯𑀸 𑀪𑀻𑀢𑁄 𑀅𑀝𑁆𑀞𑀸𑀲𑀺. 𑀕𑁄𑀯𑀺𑀦𑁆𑀤𑁄 𑀧𑀸𑀢𑁄𑀯 𑀭𑀸𑀚𑀽𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀼𑀔𑀲𑁂𑀬𑁆𑀬𑀁 𑀧𑀼𑀘𑁆𑀙𑀺 𑀭𑀸𑀚𑀸 𑁋 ‘‘𑀓𑀼𑀢𑁄 𑀫𑁂 𑀆𑀘𑀭𑀺𑀬, 𑀲𑀼𑀔𑀲𑁂𑀬𑁆𑀬𑀸’’𑀢𑀺 𑀯𑀢𑁆𑀯𑀸 𑀢𑀁 𑀓𑀸𑀭𑀡𑀁 𑀆𑀭𑁄𑀘𑁂𑀲𑀺. 𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚, 𑀫𑀬𑁆𑀳𑀁 𑀧𑀼𑀢𑁆𑀢𑁄 𑀚𑀸𑀢𑁄, 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀲𑀓𑀮𑀦𑀕𑀭𑁂 𑀆𑀯𑀼𑀥𑀸𑀦𑀺 𑀧𑀚𑁆𑀚𑀮𑀺𑀁𑀲𑀽𑀢𑀺. 𑀭𑀸𑀚𑀸 𑁋 ‘‘𑀓𑀺𑀁 𑀦𑀼 𑀔𑁄 𑀫𑁂 𑀓𑀼𑀫𑀸𑀭𑁄 𑀧𑀘𑁆𑀘𑀢𑁆𑀣𑀺𑀓𑁄 𑀪𑀯𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀼𑀝𑁆𑀞𑀼𑀢𑀭𑀁 𑀪𑀸𑀬𑀺. ‘‘𑀓𑀺𑀁 𑀯𑀺𑀢𑀓𑁆𑀓𑁂𑀲𑀺 𑀫𑀳𑀸𑀭𑀸𑀚𑀸’’𑀢𑀺 𑀘 𑀧𑀼𑀝𑁆𑀞𑁄 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀅𑀣 𑀦𑀁 𑀕𑁄𑀯𑀺𑀦𑁆𑀤𑁄 ‘‘𑀫𑀸 𑀪𑀸𑀬𑀺 𑀫𑀳𑀸𑀭𑀸𑀚, 𑀦𑁂𑀲𑁄 𑀓𑀼𑀫𑀸𑀭𑁄 𑀢𑀼𑀫𑁆𑀳𑀸𑀓𑀁 𑀤𑀼𑀩𑁆𑀪𑀺𑀲𑁆𑀲𑀢𑀺, 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀦 𑀢𑁂𑀦 𑀲𑀫𑁄 𑀧𑀜𑁆𑀜𑀸𑀬 𑀦 𑀪𑀯𑀺𑀲𑁆𑀲𑀢𑀺, 𑀫𑀫 𑀧𑀼𑀢𑁆𑀢𑀲𑁆𑀲 𑀯𑀘𑀦𑁂𑀦 𑀫𑀳𑀸𑀚𑀦𑀲𑁆𑀲 𑀓𑀗𑁆𑀔𑀸 𑀙𑀺𑀚𑁆𑀚𑀺𑀲𑁆𑀲𑀢𑀺, 𑀢𑀼𑀫𑁆𑀳𑀸𑀓𑀜𑁆𑀘 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀅𑀦𑀼𑀲𑀸𑀲𑀺𑀲𑁆𑀲𑀢𑀻’’𑀢𑀺 𑀲𑀫𑀲𑁆𑀲𑀸𑀲𑁂𑀢𑀺. 𑀭𑀸𑀚𑀸 𑀢𑀼𑀝𑁆𑀞𑁄 𑁋 ‘‘𑀓𑀼𑀫𑀸𑀭𑀲𑁆𑀲 𑀔𑀻𑀭𑀫𑀽𑀮𑀁 𑀳𑁄𑀢𑀽’’𑀢𑀺 𑀲𑀳𑀲𑁆𑀲𑀁 𑀤𑀢𑁆𑀯𑀸 ‘‘𑀓𑀼𑀫𑀸𑀭𑀁 𑀫𑀳𑀮𑁆𑀮𑀓𑀓𑀸𑀮𑁂 𑀫𑀫 𑀤𑀲𑁆𑀲𑁂𑀣𑀸’’𑀢𑀺 𑀆𑀳. 𑀓𑀼𑀫𑀸𑀭𑁄 𑀅𑀦𑀼𑀧𑀼𑀩𑁆𑀩𑁂𑀦 𑀯𑀼𑀟𑁆𑀠𑀺𑀫𑀦𑀼𑀧𑁆𑀧𑀢𑁆𑀢𑁄. 𑀚𑁄𑀢𑀺𑀢𑀢𑁆𑀢𑀸 𑀧𑀦𑀲𑁆𑀲 𑀧𑀸𑀮𑀦𑀲𑀫𑀢𑁆𑀣𑀢𑀸𑀬 𑀘 𑀚𑁄𑀢𑀺𑀧𑀸𑀮𑁄𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀚𑁄𑀢𑀦𑀢𑁄 𑀘 𑀧𑀸𑀮𑀦𑀢𑁄 𑀘 𑀚𑁄𑀢𑀺𑀧𑀸𑀮𑁄’’𑀢𑀺.

𑀲𑀫𑁆𑀫𑀸 𑀯𑁄𑀲𑁆𑀲𑀚𑁆𑀚𑀺𑀢𑁆𑀯𑀸𑀢𑀺 𑀲𑀫𑁆𑀫𑀸 𑀯𑁄𑀲𑁆𑀲𑀚𑁆𑀚𑀺𑀢𑁆𑀯𑀸. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀅𑀮𑀫𑀢𑁆𑀣𑀤𑀲𑀢𑀭𑁄𑀢𑀺 𑀲𑀫𑀢𑁆𑀣𑁄 𑀧𑀝𑀺𑀩𑀮𑁄 𑀅𑀢𑁆𑀣𑀤𑀲𑁄 𑀅𑀮𑀫𑀢𑁆𑀣𑀤𑀲𑁄, 𑀢𑀁 𑀅𑀮𑀫𑀢𑁆𑀣𑀤𑀲𑀁 𑀢𑀺𑀭𑁂𑀢𑀻𑀢𑀺 𑀅𑀮𑀫𑀢𑁆𑀣𑀤𑀲𑀢𑀭𑁄. 𑀚𑁄𑀢𑀺𑀧𑀸𑀮𑀲𑁆𑀲𑁂𑀯 𑀫𑀸𑀡𑀯𑀲𑁆𑀲 𑀅𑀦𑀼𑀲𑀸𑀲𑀦𑀺𑀬𑀸𑀢𑀺 𑀲𑁄𑀧𑀺 𑀚𑁄𑀢𑀺𑀧𑀸𑀮𑀁𑀬𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀅𑀦𑀼𑀲𑀸𑀲𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁩𑁦𑁫. 𑀪𑀯𑀫𑀢𑁆𑀣𑀼 ¶ 𑀪𑀯𑀦𑁆𑀢𑀁 𑀚𑁄𑀢𑀺𑀧𑀸𑀮𑀦𑁆𑀢𑀺 𑀪𑁄𑀢𑁄 𑀚𑁄𑀢𑀺𑀧𑀸𑀮𑀲𑁆𑀲 𑀪𑀯𑁄 𑀯𑀼𑀤𑁆𑀥𑀺 𑀯𑀺𑀲𑁂𑀲𑀸𑀥𑀺𑀕𑀫𑁄 𑀲𑀩𑁆𑀩𑀓𑀮𑁆𑀬𑀸𑀡𑀜𑁆𑀘𑁂𑀯 𑀫𑀗𑁆𑀕𑀮𑀜𑁆𑀘 𑀳𑁄𑀢𑀽𑀢𑀺 𑀅𑀢𑁆𑀣𑁄. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀦𑁆𑀢𑀺? ‘‘𑀅𑀮𑀁, 𑀫𑀳𑀸𑀭𑀸𑀚, 𑀫𑀸 𑀘𑀺𑀦𑁆𑀢𑀬𑀺, 𑀥𑀼𑀯𑀥𑀫𑁆𑀫𑁄 𑀏𑀲 𑀲𑀩𑁆𑀩𑀲𑀢𑁆𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀭𑀡𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀁 𑀲𑁄𑀓𑀯𑀺𑀦𑁄𑀤𑀦𑀧𑀝𑀺𑀲𑀦𑁆𑀣𑀸𑀭𑀓𑀣𑀁 𑀧𑀭𑀺𑀬𑁄𑀲𑀸𑀧𑁂𑀢𑁆𑀯𑀸. 𑀫𑀸 𑀦𑁄 𑀪𑀯𑀁 𑀚𑁄𑀢𑀺𑀧𑀸𑀮𑁄 𑀅𑀦𑀼𑀲𑀸𑀲𑀦𑀺𑀬𑀸 ¶ 𑀧𑀘𑁆𑀘𑀩𑁆𑀬𑀸𑀳𑀸𑀲𑀻𑀢𑀺 𑀫𑀸 𑀧𑀝𑀺𑀩𑁆𑀬𑀸𑀓𑀸𑀲𑀺, ‘‘𑀅𑀦𑀼𑀲𑀸𑀲𑀸’’𑀢𑀺 𑀯𑀼𑀢𑁆𑀢𑁄 𑁋 ‘‘𑀦𑀸𑀳𑀁 𑀅𑀦𑀼𑀲𑀸𑀲𑀸𑀫𑀻’’𑀢𑀺 𑀦𑁄 𑀫𑀸 𑀅𑀦𑀼𑀲𑀸𑀲𑀦𑀺𑀬𑀸 𑀧𑀘𑁆𑀘𑀓𑁆𑀔𑀸𑀲𑀻𑀢𑀺 𑀅𑀢𑁆𑀣𑁄. 𑀅𑀪𑀺𑀲𑀫𑁆𑀪𑁄𑀲𑀻𑀢𑀺 𑀲𑀁𑀯𑀺𑀤𑀳𑀺𑀢𑁆𑀯𑀸 𑀧𑀝𑁆𑀞𑀧𑁂𑀲𑀺. 𑀫𑀦𑀼𑀲𑁆𑀲𑀸 𑀏𑀯𑀫𑀸𑀳𑀁𑀲𑀽𑀢𑀺 𑀢𑀁 𑀧𑀺𑀢𑀭𑀸 𑀫𑀳𑀸𑀧𑀜𑁆𑀜𑀢𑀭𑀁 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀅𑀦𑀼𑀲𑀸𑀲𑀦𑁆𑀢𑀁 𑀲𑀩𑁆𑀩𑀓𑀫𑁆𑀫𑁂 𑀅𑀪𑀺𑀲𑀫𑁆𑀪𑀯𑀦𑁆𑀢𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑀘𑀺𑀢𑁆𑀢𑀸 𑀕𑁄𑀯𑀺𑀦𑁆𑀤𑁄 𑀯𑀢, 𑀪𑁄, 𑀩𑁆𑀭𑀸𑀳𑁆𑀫𑀡𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀯𑀢, 𑀪𑁄, 𑀩𑁆𑀭𑀸𑀳𑁆𑀫𑀡𑁄𑀢𑀺 𑀏𑀯𑀫𑀸𑀳𑀁𑀲𑀼. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺, ‘‘𑀕𑁄𑀯𑀺𑀦𑁆𑀤𑁄 𑀯𑀢, 𑀪𑁄, 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺 𑀏𑀢𑀲𑁆𑀲 𑀧𑀺𑀢𑀸; 𑀅𑀬𑀁 𑀧𑀦 𑀫𑀳𑀸𑀕𑁄𑀯𑀺𑀦𑁆𑀤𑁄 𑀯𑀢, 𑀪𑁄, 𑀩𑁆𑀭𑀸𑀳𑁆𑀫𑀡𑁄’’𑀢𑀺.

𑀭𑀚𑁆𑀚𑀲𑀁𑀯𑀺𑀪𑀚𑀦𑀯𑀡𑁆𑀡𑀦𑀸

𑁩𑁦𑁬. 𑀬𑁂𑀦 ¶ 𑀢𑁂 𑀙 𑀔𑀢𑁆𑀢𑀺𑀬𑀸𑀢𑀺 𑀬𑁂 𑀢𑁂 ‘‘𑀲𑀳𑀸𑀬𑀸’’𑀢𑀺 𑀯𑀼𑀢𑁆𑀢𑀸 𑀙 𑀔𑀢𑁆𑀢𑀺𑀬𑀸, 𑀢𑁂 𑀓𑀺𑀭 𑀭𑁂𑀡𑀼𑀲𑁆𑀲 𑀏𑀓𑀧𑀺𑀢𑀺𑀓𑀸 𑀓𑀦𑀺𑀝𑁆𑀞𑀪𑀸𑀢𑀭𑁄, 𑀢𑀲𑁆𑀫𑀸 𑀫𑀳𑀸𑀕𑁄𑀯𑀺𑀦𑁆𑀤𑁄 ‘‘𑀅𑀬𑀁 𑀅𑀪𑀺𑀲𑀺𑀢𑁆𑀢𑁄 𑀏𑀢𑁂𑀲𑀁 𑀭𑀚𑁆𑀚𑀲𑀁𑀯𑀺𑀪𑀸𑀕𑀁 𑀓𑀭𑁂𑀬𑁆𑀬 𑀯𑀸 𑀦 𑀯𑀸, 𑀬𑀁𑀦𑀽𑀦𑀸𑀳𑀁 𑀢𑁂 𑀧𑀝𑀺𑀓𑀘𑁆𑀘𑁂𑀯 𑀭𑁂𑀡𑀼𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑁆𑀯𑀸 𑀧𑀝𑀺𑀜𑁆𑀜𑀁 𑀕𑀡𑁆𑀳𑀸𑀧𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀬𑁂𑀦 𑀢𑁂 𑀙 𑀔𑀢𑁆𑀢𑀺𑀬𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀭𑀸𑀚𑀓𑀢𑁆𑀢𑀸𑀭𑁄𑀢𑀺 𑀭𑀸𑀚𑀓𑀸𑀭𑀓𑀸 𑀅𑀫𑀘𑁆𑀘𑀸.

𑁩𑁦𑁭. 𑀫𑀤𑀦𑀻𑀬𑀸 𑀓𑀸𑀫𑀸𑀢𑀺 𑀫𑀤𑀓𑀭𑀸 𑀧𑀫𑀸𑀤𑀓𑀭𑀸 𑀓𑀸𑀫𑀸. 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀏𑀲 𑀅𑀦𑀼𑀲𑁆𑀲𑀭𑀺𑀢𑀼𑀫𑁆𑀧𑀺 𑀦 𑀲𑀓𑁆𑀓𑀼𑀡𑁂𑀬𑁆𑀬, 𑀢𑀲𑁆𑀫𑀸 𑀆𑀬𑀦𑁆𑀢𑀼 𑀪𑁄𑀦𑁆𑀢𑁄 𑀆𑀕𑀘𑁆𑀙𑀦𑁆𑀢𑀽𑀢𑀺 𑀅𑀢𑁆𑀣𑁄.

𑁩𑁦𑁮. 𑀲𑀭𑀸𑀫𑀳𑀁 𑀪𑁄𑀢𑀺 𑀢𑀤𑀸 𑀓𑀺𑀭 𑀫𑀦𑀼𑀲𑁆𑀲𑀸𑀦𑀁 𑀲𑀘𑁆𑀘𑀯𑀸𑀤𑀺𑀓𑀸𑀮𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀓𑀤𑀸 𑀫𑀬𑀸 𑀯𑀼𑀢𑁆𑀢𑀁, 𑀓𑁂𑀦 𑀤𑀺𑀝𑁆𑀞𑀁, 𑀓𑁂𑀦 𑀲𑀼𑀢’’𑀦𑁆𑀢𑀺 𑀅𑀪𑀽𑀢𑀁 𑀅𑀯𑀢𑁆𑀯𑀸 ‘‘𑀲𑀭𑀸𑀫𑀳𑀁 𑀪𑁄’’𑀢𑀺 𑀆𑀳. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀦𑁆𑀢𑀺 𑀓𑀺𑀁 𑀫𑀳𑀸𑀭𑀸𑀚 𑀤𑁂𑀯𑀢𑁆𑀢𑀁 𑀕𑀢𑁂 𑀭𑀜𑁆𑀜𑁂 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀥𑀼𑀯𑀥𑀫𑁆𑀫𑁄 𑀏𑀲 𑀲𑀩𑁆𑀩𑀲𑀢𑁆𑀢𑀸𑀦𑀁, 𑀏𑀯𑀁𑀪𑀸𑀯𑀺𑀦𑁄 𑀲𑀗𑁆𑀔𑀸𑀭𑀸𑀢𑀺 𑀏𑀯𑀭𑀽𑀧𑀁 𑀧𑀝𑀺𑀲𑀦𑁆𑀣𑀸𑀭𑀓𑀣𑀁. 𑀲𑀩𑁆𑀩𑀸𑀦𑀺 𑀲𑀓𑀝𑀫𑀼𑀔𑀸𑀦𑀺 𑀧𑀝𑁆𑀞𑀧𑁂𑀲𑀻𑀢𑀺 𑀲𑀩𑁆𑀩𑀸𑀦𑀺 𑀙 ¶ 𑀭𑀚𑁆𑀚𑀸𑀦𑀺 𑀲𑀓𑀝𑀫𑀼𑀔𑀸𑀦𑀺 𑀧𑀝𑁆𑀞𑀧𑁂𑀲𑀺. 𑀏𑀓𑁂𑀓𑀲𑁆𑀲 𑀭𑀜𑁆𑀜𑁄 𑀭𑀚𑁆𑀚𑀁 𑀢𑀺𑀬𑁄𑀚𑀦𑀲𑀢𑀁 𑀳𑁄𑀢𑀺, 𑀭𑁂𑀡𑀼𑀲𑁆𑀲 𑀭𑀜𑁆𑀜𑁄 𑀭𑀚𑁆𑀚𑁄𑀲𑀭𑀡𑀧𑀤𑁂𑀲𑁄 𑀤𑀲𑀕𑀸𑀯𑀼𑀢𑀁, 𑀫𑀚𑁆𑀛𑁂 𑀧𑀦 𑀭𑁂𑀡𑀼𑀲𑁆𑀲 𑀭𑀚𑁆𑀚𑀁 𑀯𑀺𑀢𑀸𑀦𑀲𑀤𑀺𑀲𑀁 𑀅𑀳𑁄𑀲𑀺. 𑀓𑀲𑁆𑀫𑀸 𑀏𑀯𑀁 𑀧𑀝𑁆𑀞𑀧𑁂𑀲𑀻𑀢𑀺? 𑀓𑀸𑀮𑁂𑀦 𑀓𑀸𑀮𑀁 𑀭𑀸𑀚𑀸𑀦𑀁 𑀧𑀲𑁆𑀲𑀺𑀢𑀼𑀁 𑀆𑀕𑀘𑁆𑀙𑀦𑁆𑀢𑀸 𑀅𑀜𑁆𑀜𑀲𑁆𑀲 𑀭𑀚𑁆𑀚𑀁 𑀅𑀧𑀻𑀴𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀚𑁆𑀚𑀧𑀤𑁂𑀲𑁂𑀦𑁂𑀯 𑀆𑀕𑀫𑀺𑀲𑁆𑀲𑀦𑁆𑀢𑀺 𑀘𑁂𑀯 𑀕𑀫𑀺𑀲𑁆𑀲𑀦𑁆𑀢𑀺 𑀘. 𑀧𑀭𑀭𑀚𑁆𑀚𑀁 𑀑𑀢𑀺𑀡𑁆𑀡𑀲𑁆𑀲 𑀳𑀺 𑁋 ‘‘𑀪𑀢𑁆𑀢𑀁 𑀤𑁂𑀣, 𑀕𑁄𑀡𑀁 𑀤𑁂𑀣𑀸’’𑀢𑀺 𑀯𑀤𑀢𑁄 𑀫𑀦𑀼𑀲𑁆𑀲𑀸 𑀉𑀚𑁆𑀛𑀸𑀬𑀦𑁆𑀢𑀺 𑁋 ‘‘𑀇𑀫𑁂 𑀭𑀸𑀚𑀸𑀦𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀚𑀺𑀢𑁂𑀦 𑀦 𑀕𑀘𑁆𑀙𑀦𑁆𑀢𑀺, 𑀅𑀫𑁆𑀳𑀸𑀓𑀁 𑀧𑀻𑀴𑀁 ¶ 𑀓𑀭𑁄𑀦𑁆𑀢𑀻’’𑀢𑀺. 𑀅𑀢𑁆𑀢𑀦𑁄 𑀯𑀺𑀚𑀺𑀢𑁂𑀦 𑀕𑀘𑁆𑀙𑀦𑁆𑀢𑀲𑁆𑀲 ‘‘𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀸 𑀇𑀫𑀺𑀦𑀸 𑀇𑀤𑀜𑁆𑀘𑀺𑀤𑀜𑁆𑀘 𑀮𑀤𑁆𑀥𑀩𑁆𑀩𑀫𑁂𑀯𑀸’’𑀢𑀺 𑀫𑀦𑀼𑀲𑁆𑀲𑀸 𑀧𑀻𑀴𑀁 𑀦 𑀫𑀜𑁆𑀜𑀦𑁆𑀢𑀺. 𑀇𑀫𑀫𑀢𑁆𑀣𑀁 𑀘𑀺𑀦𑁆𑀢𑀬𑀺𑀢𑁆𑀯𑀸 𑀫𑀳𑀸𑀕𑁄𑀯𑀺𑀦𑁆𑀤𑁄 ‘‘𑀲𑀫𑁆𑀫𑁄𑀤𑀫𑀸𑀦𑀸 𑀭𑀸𑀚𑀸𑀦𑁄 𑀘𑀺𑀭𑀁 𑀭𑀚𑁆𑀚𑀫𑀦𑀼𑀲𑀸𑀲𑀦𑁆𑀢𑀽’’𑀢𑀺 𑀏𑀯𑀁 𑀧𑀝𑁆𑀞𑀧𑁂𑀲𑀺.

‘‘𑀤𑀦𑁆𑀢𑀧𑀼𑀭𑀁 𑀓𑀮𑀺𑀗𑁆𑀕𑀸𑀦𑀁, 𑀅𑀲𑁆𑀲𑀓𑀸𑀦𑀜𑁆𑀘 𑀧𑁄𑀢𑀦𑀁;

𑀫𑀸𑀳𑀺𑀲𑁆𑀲𑀢𑀺 𑀅𑀯𑀦𑁆𑀢𑀻𑀦𑀁, 𑀲𑁄𑀯𑀻𑀭𑀸𑀦𑀜𑁆𑀘 𑀭𑁄𑀤𑀼𑀓𑀁.

𑀫𑀺𑀣𑀺𑀮𑀸 𑀘 𑀯𑀺𑀤𑁂𑀳𑀸𑀦𑀁, 𑀘𑀫𑁆𑀧𑀸 𑀅𑀗𑁆𑀕𑁂𑀲𑀼 𑀫𑀸𑀧𑀺𑀢𑀸;

𑀩𑀸𑀭𑀸𑀡𑀲𑀻 𑀘 𑀓𑀸𑀲𑀻𑀦𑀁, 𑀏𑀢𑁂 𑀕𑁄𑀯𑀺𑀦𑁆𑀤𑀫𑀸𑀧𑀺𑀢𑀸’’𑀢𑀺. 𑁋

𑀏𑀢𑀸𑀦𑀺 ¶ 𑀲𑀢𑁆𑀢 𑀦𑀕𑀭𑀸𑀦𑀺 𑀫𑀳𑀸𑀕𑁄𑀯𑀺𑀦𑁆𑀤𑁂𑀦𑁂𑀯 𑀢𑁂𑀲𑀁 𑀭𑀸𑀚𑀽𑀦𑀁 𑀅𑀢𑁆𑀣𑀸𑀬 𑀫𑀸𑀧𑀺𑀢𑀸𑀦𑀺.

‘‘𑀲𑀢𑁆𑀢𑀪𑀽 𑀩𑁆𑀭𑀳𑁆𑀫𑀤𑀢𑁆𑀢𑁄 𑀘, 𑀯𑁂𑀲𑁆𑀲𑀪𑀽 𑀪𑀭𑀢𑁄 𑀲𑀳;

𑀭𑁂𑀡𑀼 𑀤𑁆𑀯𑁂 𑀘 𑀥𑀢𑀭𑀝𑁆𑀞𑀸, 𑀢𑀤𑀸𑀲𑀼𑀁 𑀲𑀢𑁆𑀢 𑀪𑀸𑀭𑀥𑀸’’𑀢𑀺. 𑁋

𑀇𑀫𑀸𑀦𑀺 𑀢𑁂𑀲𑀁 𑀲𑀢𑁆𑀢𑀦𑁆𑀦𑀫𑁆𑀧𑀺 𑀦𑀸𑀫𑀸𑀦𑀺. 𑀢𑁂𑀲𑀼 𑀳𑀺 𑀏𑀓𑁄 𑀲𑀢𑁆𑀢𑀪𑀽 𑀦𑀸𑀫 𑀅𑀳𑁄𑀲𑀺, 𑀏𑀓𑁄 𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫, 𑀏𑀓𑁄 𑀯𑁂𑀲𑁆𑀲𑀪𑀽 𑀦𑀸𑀫, 𑀏𑀓𑁄 𑀢𑁂𑀦𑁂𑀯 𑀲𑀳 𑀪𑀭𑀢𑁄 𑀦𑀸𑀫, 𑀏𑀓𑁄 𑀭𑁂𑀡𑀼 𑀦𑀸𑀫, 𑀤𑁆𑀯𑁂 𑀧𑀦 𑀥𑀢𑀭𑀝𑁆𑀞𑀸𑀢𑀺 𑀇𑀫𑁂 𑀲𑀢𑁆𑀢 𑀚𑀫𑁆𑀩𑀼𑀤𑀻𑀧𑀢𑀮𑁂 𑀪𑀸𑀭𑀥𑀸 𑀫𑀳𑀸𑀭𑀸𑀚𑀸𑀦𑁄 𑀅𑀳𑁂𑀲𑀼𑀦𑁆𑀢𑀺.

𑀧𑀞𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀺𑀢𑁆𑀢𑀺𑀲𑀤𑁆𑀤𑀅𑀩𑁆𑀪𑀼𑀕𑁆𑀕𑀫𑀦𑀯𑀡𑁆𑀡𑀦𑀸

𑁩𑁧𑁧. 𑀉𑀧𑀲𑀗𑁆𑀓𑀫𑀺𑀁𑀲𑀽𑀢𑀺 ¶ ‘‘𑀅𑀫𑁆𑀳𑀸𑀓𑀁 𑀅𑀬𑀁 𑀇𑀲𑁆𑀲𑀭𑀺𑀬𑀲𑀫𑁆𑀧𑀢𑁆𑀢𑀺 𑀦 𑀅𑀜𑁆𑀜𑀲𑁆𑀲𑀸𑀦𑀼𑀪𑀸𑀯𑁂𑀦, 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲𑀸𑀦𑀼𑀪𑀸𑀯𑁂𑀦 𑀦𑀺𑀧𑁆𑀨𑀦𑁆𑀦𑀸. 𑀫𑀳𑀸𑀕𑁄𑀯𑀺𑀦𑁆𑀤𑁄 𑀅𑀫𑁆𑀳𑁂 𑀲𑀢𑁆𑀢 𑀭𑀸𑀚𑀸𑀦𑁄 𑀲𑀫𑀕𑁆𑀕𑁂 𑀓𑀢𑁆𑀯𑀸 𑀚𑀫𑁆𑀩𑀼𑀤𑀻𑀧𑀢𑀮𑁂 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀧𑀼𑀩𑁆𑀩𑀽𑀧𑀓𑀸𑀭𑀺𑀲𑁆𑀲 𑀧𑀦 𑀦 𑀲𑀼𑀓𑀭𑀸 𑀧𑀝𑀺𑀓𑀺𑀭𑀺𑀬𑀸 𑀓𑀸𑀢𑀼𑀁. 𑀅𑀫𑁆𑀳𑁂 𑀲𑀢𑁆𑀢𑀧𑀺 𑀚𑀦𑁂 𑀏𑀲𑁄𑀬𑁂𑀯 𑀅𑀦𑀼𑀲𑀸𑀲𑀢𑀼, 𑀏𑀢𑀁𑀬𑁂𑀯 𑀲𑁂𑀦𑀸𑀧𑀢𑀺𑀜𑁆𑀘 𑀧𑀼𑀭𑁄𑀳𑀺𑀢𑀜𑁆𑀘 𑀓𑀭𑁄𑀫, 𑀏𑀯𑀁 𑀦𑁄 𑀯𑀼𑀤𑁆𑀥𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀫𑀳𑀸𑀕𑁄𑀯𑀺𑀦𑁆𑀤𑁄𑀧𑀺 𑁋 ‘‘𑀫𑀬𑀸 𑀏𑀢𑁂 𑀲𑀫𑀕𑁆𑀕𑀸 𑀓𑀢𑀸, 𑀲𑀘𑁂 𑀏𑀢𑁂𑀲𑀁 𑀅𑀜𑁆𑀜𑁄 𑀲𑁂𑀦𑀸𑀧𑀢𑀺 𑀧𑀼𑀭𑁄𑀳𑀺𑀢𑁄 𑀘 𑀪𑀯𑀺𑀲𑁆𑀲𑀢𑀺, 𑀢𑀢𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑁂𑀦𑀸𑀧𑀢𑀺𑀧𑀼𑀭𑁄𑀳𑀺𑀢𑀸𑀦𑀁 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀪𑀺𑀦𑁆𑀤𑀺𑀲𑁆𑀲𑀦𑁆𑀢𑀺, 𑀅𑀥𑀺𑀯𑀸𑀲𑁂𑀫𑀺 𑀦𑁂𑀲𑀁 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀜𑁆𑀘 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀜𑁆𑀘𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀏𑀯𑀁 𑀪𑁄’’𑀢𑀺 𑀧𑀘𑁆𑀘𑀲𑁆𑀲𑁄𑀲𑀺.

𑀲𑀢𑁆𑀢 𑀘 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁂𑀢𑀺 ‘‘𑀅𑀳𑀁 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀲𑀫𑁆𑀫𑀼𑀔𑁄 𑀪𑀯𑁂𑀬𑁆𑀬𑀁 𑀯𑀸 𑀦 𑀯𑀸, 𑀬𑀢𑁆𑀣𑀸𑀳𑀁 𑀲𑀫𑁆𑀫𑀼𑀔𑁄 𑀦 𑀪𑀯𑀺𑀲𑁆𑀲𑀸𑀫𑀺, 𑀢𑀢𑁆𑀣𑁂𑀯 𑀢𑁂 𑀓𑀢𑁆𑀢𑀩𑁆𑀩𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀢𑁆𑀢 ¶ 𑀅𑀦𑀼𑀧𑀼𑀭𑁄𑀳𑀺𑀢𑁂 𑀞𑀧𑁂𑀲𑀺. 𑀢𑁂 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 𑁋 ‘‘𑀲𑀢𑁆𑀢 𑀘 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁂’’𑀢𑀺. 𑀤𑀺𑀯𑀲𑀲𑁆𑀲 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀲𑀸𑀬𑀁 𑀧𑀸𑀢𑁄 𑀯𑀸 𑀦𑀳𑀸𑀬𑀦𑁆𑀢𑀻𑀢𑀺 𑀦𑀳𑀸𑀢𑀓𑀸. 𑀯𑀢𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑁂 𑀯𑀸 𑀦𑀳𑀸𑀢𑀸, 𑀢𑀢𑁄 𑀧𑀝𑁆𑀞𑀸𑀬 𑀩𑁆𑀭𑀸𑀳𑁆𑀫𑀡𑁂𑀳𑀺 𑀲𑀤𑁆𑀥𑀺𑀁 𑀦 𑀔𑀸𑀤𑀦𑁆𑀢𑀺 𑀦 𑀧𑀺𑀯𑀦𑁆𑀢𑀻𑀢𑀺 𑀦𑀳𑀸𑀢𑀓𑀸.

𑁩𑁧𑁨. 𑀅𑀩𑁆𑀪𑀼𑀕𑁆𑀕𑀘𑁆𑀙𑀻𑀢𑀺 ¶ 𑀅𑀪𑀺𑀉𑀕𑁆𑀕𑀘𑁆𑀙𑀺. 𑀢𑀤𑀸 𑀓𑀺𑀭 𑀫𑀦𑀼𑀲𑁆𑀲𑀸𑀦𑀁 ‘‘𑀦 𑀩𑁆𑀭𑀳𑁆𑀫𑀼𑀦𑀸 𑀲𑀤𑁆𑀥𑀺𑀁 𑀅𑀫𑀦𑁆𑀢𑁂𑀢𑁆𑀯𑀸 𑀲𑀓𑁆𑀓𑀸 𑀏𑀯𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀅𑀦𑀼𑀲𑀸𑀲𑀺𑀢𑀼’’𑀦𑁆𑀢𑀺 𑀦𑀺𑀲𑀺𑀦𑁆𑀦𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂 𑀅𑀬𑀫𑁂𑀯 𑀓𑀣𑀸 𑀧𑀯𑀢𑁆𑀢𑀺𑀢𑁆𑀣. 𑀦 𑀔𑁄 𑀧𑀦𑀸𑀳𑀦𑁆𑀢𑀺 𑀫𑀳𑀸𑀧𑀼𑀭𑀺𑀲𑁄 𑀓𑀺𑀭 𑁋 ‘‘𑀅𑀬𑀁 𑀫𑀬𑁆𑀳𑀁 𑀅𑀪𑀽𑀢𑁄 𑀯𑀡𑁆𑀡𑁄 𑀉𑀧𑁆𑀧𑀦𑁆𑀦𑁄, 𑀯𑀡𑁆𑀡𑀼𑀧𑁆𑀧𑀢𑁆𑀢𑀺 𑀔𑁄 𑀧𑀦 𑀦 𑀪𑀸𑀭𑀺𑀬𑀸, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀡𑁆𑀡𑀲𑁆𑀲 𑀭𑀓𑁆𑀔𑀦𑀫𑁂𑀯 𑀪𑀸𑀭𑀺𑀬𑀁, 𑀅𑀬𑀜𑁆𑀘 𑀫𑁂 𑀅𑀘𑀺𑀦𑁆𑀢𑁂𑀢𑁆𑀯𑀸 𑀅𑀫𑀦𑁆𑀢𑁂𑀢𑁆𑀯𑀸 𑀓𑀭𑁄𑀦𑁆𑀢𑀲𑁆𑀲𑁂𑀯 𑀯𑀡𑁆𑀡𑁄 𑀉𑀧𑁆𑀧𑀦𑁆𑀦𑁄𑀯, 𑀘𑀺𑀦𑁆𑀢𑁂𑀢𑁆𑀯𑀸 𑀫𑀦𑁆𑀢𑁂𑀢𑁆𑀯𑀸 𑀓𑀭𑁄𑀦𑁆𑀢𑀲𑁆𑀲 𑀧𑀦 𑀯𑀺𑀢𑁆𑀣𑀸𑀭𑀺𑀓𑀢𑀭𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀭𑀳𑁆𑀫𑀤𑀲𑁆𑀲𑀦𑁂 𑀉𑀧𑀸𑀬𑀁 𑀧𑀭𑀺𑀬𑁂𑀲𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀲𑀼𑀢𑀁 𑀔𑁄 𑀧𑀦 𑀫𑁂𑀢𑀦𑁆𑀢𑀺𑀆𑀤𑀺𑀅𑀢𑁆𑀣𑀁 𑀧𑀭𑀺𑀯𑀺𑀢𑀓𑁆𑀓𑁂𑀲𑀺.

𑁩𑁧𑁩. 𑀬𑁂𑀦 ¶ 𑀭𑁂𑀡𑀼 𑀭𑀸𑀚𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀏𑀯𑀁 𑀫𑁂 𑀅𑀦𑁆𑀢𑀭𑀸 𑀤𑀝𑁆𑀞𑀼𑀓𑀸𑀫𑁄 𑀯𑀸 𑀲𑀮𑁆𑀮𑀧𑀺𑀢𑀼𑀓𑀸𑀫𑁄 𑀯𑀸 𑀦 𑀪𑀯𑀺𑀲𑁆𑀲𑀢𑀺, 𑀬𑀢𑁄 𑀙𑀺𑀦𑁆𑀦𑀧𑀮𑀺𑀩𑁄𑀥𑁄 𑀲𑀼𑀔𑀁 𑀯𑀺𑀳𑀭𑀺𑀲𑁆𑀲𑀸𑀫𑀻𑀢𑀺 𑀧𑀮𑀺𑀩𑁄𑀥𑀼𑀧𑀘𑁆𑀙𑁂𑀤𑀦𑀢𑁆𑀣𑀁 𑀉𑀧𑀲𑀗𑁆𑀓𑀫𑀺, 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑁩𑁧𑁬. 𑀲𑀸𑀤𑀺𑀲𑀺𑀬𑁄𑀢𑀺 𑀲𑀫𑀯𑀡𑁆𑀡𑀸 𑀲𑀫𑀚𑀸𑀢𑀺𑀓𑀸.

𑁩𑁧𑁭. 𑀦𑀯𑀁 𑀲𑀦𑁆𑀥𑀸𑀕𑀸𑀭𑀁 𑀓𑀸𑀭𑁂𑀢𑁆𑀯𑀸𑀢𑀺 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀘𑀗𑁆𑀓𑀫𑀦𑀲𑀫𑁆𑀧𑀦𑁆𑀦𑀁 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀯𑀲𑀦𑀓𑁆𑀔𑀫𑀁 𑀩𑀳𑀺 𑀦𑀴𑀧𑀭𑀺𑀓𑁆𑀔𑀺𑀢𑁆𑀢𑀁 𑀯𑀺𑀘𑀺𑀢𑁆𑀢𑀁 𑀆𑀯𑀲𑀣𑀁 𑀓𑀸𑀭𑁂𑀢𑁆𑀯𑀸. 𑀓𑀭𑀼𑀡𑀁 𑀛𑀸𑀦𑀁 𑀛𑀸𑀬𑀻𑀢𑀺 𑀓𑀭𑀼𑀡𑀸𑀬 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀁 𑀛𑀸𑀬𑀺, 𑀓𑀭𑀼𑀡𑀸𑀫𑀼𑀔𑁂𑀦 𑀧𑀦𑁂𑀢𑁆𑀣 𑀅𑀯𑀲𑁂𑀲𑀸𑀧𑀺 𑀢𑀬𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀕𑀳𑀺𑀢𑀸𑀯. 𑀉𑀓𑁆𑀓𑀡𑁆𑀞𑀦𑀸 𑀧𑀭𑀺𑀢𑀲𑁆𑀲𑀦𑀸𑀢𑀺 𑀛𑀸𑀦𑀪𑀽𑀫𑀺𑀬𑀁 𑀞𑀺𑀢𑀲𑁆𑀲 𑀅𑀦𑀪𑀺𑀭𑀢𑀺𑀉𑀓𑁆𑀓𑀡𑁆𑀞𑀦𑀸 𑀯𑀸 𑀪𑀬𑀧𑀭𑀺𑀢𑀲𑁆𑀲𑀦𑀸 𑀯𑀸 𑀦𑀢𑁆𑀣𑀺, 𑀩𑁆𑀭𑀳𑁆𑀫𑀼𑀦𑁄 𑀧𑀦 𑀆𑀕𑀫𑀦𑀧𑀢𑁆𑀣𑀦𑀸 𑀆𑀕𑀫𑀦𑀢𑀡𑁆𑀳𑀸 𑀅𑀳𑀽𑀢𑀺 𑀅𑀢𑁆𑀣𑁄.

𑀩𑁆𑀭𑀳𑁆𑀫𑀼𑀦𑀸𑀲𑀸𑀓𑀘𑁆𑀙𑀸𑀯𑀡𑁆𑀡𑀦𑀸

𑁩𑁧𑁮. 𑀪𑀬𑀦𑁆𑀢𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑀫𑁂𑀯. 𑀅𑀚𑀸𑀦𑀦𑁆𑀢𑀸𑀢𑀺 𑀅𑀚𑀸𑀦𑀫𑀸𑀦𑀸. 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬𑀦𑁆𑀢𑀺 (𑀤𑀻. 𑀦𑀺. 𑁨.𑁧𑁭𑁯) 𑀫𑀬𑀁 𑀓𑀺𑀦𑁆𑀢𑀺 𑀢𑀁 𑀚𑀸𑀦𑀸𑀫, 𑀅𑀬𑀁 𑀓𑀢𑁆𑀣𑀯𑀸𑀲𑀺𑀓𑁄, 𑀓𑀺𑀦𑁆𑀦𑀸𑀫𑁄, 𑀓𑀺𑀁 𑀕𑁄𑀢𑁆𑀢𑁄𑀢𑀺𑀆𑀤𑀻𑀦𑀁 𑀆𑀓𑀸𑀭𑀸𑀦𑀁 𑀓𑁂𑀦 𑀆𑀓𑀸𑀭𑁂𑀦 𑀢𑀁 𑀥𑀸𑀭𑀬𑀸𑀫𑀸𑀢𑀺 𑀅𑀢𑁆𑀣𑁄.

𑀫𑀁 𑀯𑁂 𑀓𑀼𑀫𑀸𑀭𑀁 𑀚𑀸𑀦𑀦𑁆𑀢𑀻𑀢𑀺 𑀫𑀁 ‘‘𑀓𑀼𑀫𑀸𑀭𑁄’’𑀢𑀺 ‘‘𑀤𑀳𑀭𑁄’’𑀢𑀺 𑀚𑀸𑀦𑀦𑁆𑀢𑀺. 𑀩𑁆𑀭𑀳𑁆𑀫𑀮𑁄𑀓𑁂𑀢𑀺 𑀲𑁂𑀝𑁆𑀞𑀮𑁄𑀓𑁂. 𑀲𑀦𑀦𑁆𑀢𑀦𑀦𑁆𑀢𑀺 𑀘𑀺𑀭𑀢𑀦𑀁 𑀧𑁄𑀭𑀸𑀡𑀓𑀁 ¶ . 𑀅𑀳𑀁 𑀲𑁄 𑀧𑁄𑀭𑀸𑀡𑀓𑀼𑀫𑀸𑀭𑁄 𑀲𑀦𑀗𑁆𑀓𑀼𑀫𑀸𑀭𑁄 𑀦𑀸𑀫 𑀩𑁆𑀭𑀳𑁆𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀁 𑀕𑁄𑀯𑀺𑀦𑁆𑀤 𑀚𑀸𑀦𑀸𑀳𑀻𑀢𑀺 𑀕𑁄𑀯𑀺𑀦𑁆𑀤 𑀧𑀡𑁆𑀟𑀺𑀢, 𑀢𑁆𑀯𑀁 𑀏𑀯𑀁 𑀚𑀸𑀦𑀸𑀳𑀺, 𑀏𑀯𑀁 𑀫𑀁 𑀥𑀸𑀭𑁂𑀳𑀺.

‘‘𑀆𑀲𑀦𑀁 ¶ 𑀉𑀤𑀓𑀁 𑀧𑀚𑁆𑀚𑀁, 𑀫𑀥𑀼𑀲𑀸𑀓𑀜𑁆𑀘 𑀩𑁆𑀭𑀳𑁆𑀫𑀼𑀦𑁄;

𑀅𑀕𑁆𑀖𑁂 𑀪𑀯𑀦𑁆𑀢𑀁 𑀧𑀼𑀘𑁆𑀙𑀸𑀫, 𑀅𑀕𑁆𑀖𑀁 𑀓𑀼𑀭𑀼𑀢𑀼 𑀦𑁄 𑀪𑀯’’𑀦𑁆𑀢𑀺. 𑁋

𑀏𑀢𑁆𑀣 𑀅𑀕𑁆𑀖𑀦𑁆𑀢𑀺 𑀅𑀢𑀺𑀣𑀺𑀦𑁄 𑀉𑀧𑀦𑀸𑀫𑁂𑀢𑀩𑁆𑀩𑀁 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯 𑀇𑀤𑀫𑀸𑀲𑀦𑀁 𑀧𑀜𑁆𑀜𑀢𑁆𑀢𑀁, 𑀏𑀢𑁆𑀣 𑀦𑀺𑀲𑀻𑀤𑀣, 𑀇𑀤𑀁 𑀉𑀤𑀓𑀁 𑀧𑀭𑀺𑀲𑀼𑀤𑁆𑀥𑀁, 𑀇𑀢𑁄 𑀧𑀸𑀦𑀻𑀬𑀁 𑀧𑀺𑀯𑀣, 𑀧𑀸𑀤𑁂 𑀥𑁄𑀯𑀣, 𑀇𑀤𑀁 𑀧𑀚𑁆𑀚𑀁 𑀧𑀸𑀤𑀸𑀦𑀁 𑀳𑀺𑀢𑀢𑁆𑀣𑀸𑀬 𑀅𑀪𑀺𑀲𑀗𑁆𑀔𑀢𑀁 𑀢𑁂𑀮𑀁, 𑀇𑀢𑁄 𑀧𑀸𑀤𑁂 𑀫𑀓𑁆𑀔𑁂𑀣, 𑀇𑀤𑀁 𑀫𑀥𑀼𑀲𑀸𑀓𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦 𑀅𑀜𑁆𑀜𑁂𑀲𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑀤𑀺𑀲𑀁 𑀳𑁄𑀢𑀺, 𑀦 𑀲𑁄 ‘‘𑀇𑀤𑀁 𑀲𑁆𑀯𑁂, 𑀇𑀤𑀁 𑀢𑀢𑀺𑀬𑀤𑀺𑀯𑀲𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀦𑁆𑀦𑀺𑀥𑀺𑀁 ¶ 𑀦𑀸𑀫 𑀓𑀭𑁄𑀢𑀺. 𑀫𑀥𑀼𑀲𑀸𑀓𑀁 𑀧𑀦 𑀅𑀮𑁄𑀡𑀁 𑀅𑀥𑀽𑀧𑀦𑀁 𑀅𑀢𑀓𑁆𑀓𑀁 𑀉𑀤𑀓𑁂𑀦 𑀲𑁂𑀤𑀺𑀢𑀲𑀸𑀓𑀁, 𑀢𑀁 𑀲𑀦𑁆𑀥𑀸𑀬𑁂𑀲 𑁋 ‘‘𑀇𑀤𑀁 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀯𑀤𑀦𑁆𑀢𑁄 ‘‘𑀅𑀕𑁆𑀖𑁂 𑀪𑀯𑀦𑁆𑀢𑀁 𑀧𑀼𑀘𑁆𑀙𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀇𑀫𑁂 𑀲𑀩𑁆𑀩𑁂𑀧𑀺 𑀅𑀕𑁆𑀖𑀸 𑀩𑁆𑀭𑀳𑁆𑀫𑀼𑀦𑁄 𑀅𑀢𑁆𑀣𑀺. 𑀢𑁂 𑀅𑀕𑁆𑀖𑁂 𑀪𑀯𑀦𑁆𑀢𑀁 𑀧𑀼𑀘𑁆𑀙𑀸𑀫. 𑀏𑀯𑀁 𑀧𑀼𑀘𑁆𑀙𑀦𑁆𑀢𑀸𑀦𑀜𑁆𑀘 𑀅𑀕𑁆𑀖𑀁 𑀓𑀼𑀭𑀼𑀢𑀼 𑀦𑁄 𑀪𑀯𑀁, 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀦𑁄 𑀪𑀯𑀁 𑀇𑀤𑀫𑀕𑁆𑀖𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀁 𑀧𑀦𑁂𑀲 𑁋 ‘‘𑀇𑀢𑁄 𑀏𑀓𑀫𑁆𑀧𑀺 𑀩𑁆𑀭𑀳𑁆𑀫𑀸 𑀦 𑀪𑀼𑀜𑁆𑀚𑀢𑀻’’𑀢𑀺 𑀇𑀤𑀁 𑀦 𑀚𑀸𑀦𑀸𑀢𑀻𑀢𑀺. 𑀦𑁄 𑀦 𑀚𑀸𑀦𑀸𑀢𑀺, 𑀚𑀸𑀦𑀦𑁆𑀢𑁄𑀧𑀺 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀆𑀕𑀢𑁄 𑀅𑀢𑀺𑀣𑀺 𑀧𑀼𑀘𑁆𑀙𑀺𑀢𑀩𑁆𑀩𑁄𑀢𑀺 𑀯𑀢𑁆𑀢𑀲𑀻𑀲𑁂𑀦 𑀧𑀼𑀘𑁆𑀙𑀢𑀺.

𑀅𑀣 𑀔𑁄 𑀩𑁆𑀭𑀳𑁆𑀫𑀸 𑁋 ‘‘𑀓𑀺𑀁 𑀦𑀼 𑀔𑁄 𑀧𑀡𑁆𑀟𑀺𑀢𑁄 𑀫𑀫 𑀧𑀭𑀺𑀪𑁄𑀕𑀓𑀭𑀡𑀸𑀪𑀸𑀯𑀁 𑀜𑀢𑁆𑀯𑀸 𑀧𑀼𑀘𑁆𑀙𑀢𑀺, 𑀉𑀤𑀸𑀳𑀼 𑀓𑁄𑀳𑀜𑁆𑀜𑁂 𑀞𑀢𑁆𑀯𑀸 𑀧𑀼𑀘𑁆𑀙𑀢𑀻’’𑀢𑀺 𑀲𑀫𑀦𑁆𑀦𑀸𑀳𑀭𑀦𑁆𑀢𑁄 ‘‘𑀯𑀢𑁆𑀢𑀲𑀻𑀲𑁂 𑀞𑀺𑀢𑁄 𑀧𑀼𑀘𑁆𑀙𑀢𑀻’’𑀢𑀺 𑀜𑀢𑁆𑀯𑀸 𑀧𑀝𑀺𑀕𑁆𑀕𑀡𑁆𑀳𑀺𑀢𑀼𑀁 𑀤𑀸𑀦𑀺 𑀫𑁂 𑀯𑀝𑁆𑀝𑀢𑀻𑀢𑀺 𑀧𑀝𑀺𑀕𑁆𑀕𑀡𑁆𑀳𑀸𑀫 𑀢𑁂 𑀅𑀕𑁆𑀖𑀁, 𑀬𑀁 𑀢𑁆𑀯𑀁 𑀕𑁄𑀯𑀺𑀦𑁆𑀤 𑀪𑀸𑀲𑀲𑀻𑀢𑀺 𑀆𑀳. 𑀬𑀁 𑀢𑁆𑀯𑀁 𑀕𑁄𑀯𑀺𑀦𑁆𑀤 𑀪𑀸𑀲𑀲𑀺 𑁋 ‘‘𑀇𑀤𑀫𑀸𑀲𑀦𑀁 𑀧𑀜𑁆𑀜𑀢𑁆𑀢𑀁, 𑀏𑀢𑁆𑀣 𑀦𑀺𑀲𑀻𑀤𑀣𑀸’’𑀢𑀺𑀆𑀤𑀺, 𑀢𑀢𑁆𑀭 𑀢𑁂 𑀫𑀬𑀁 𑀆𑀲𑀦𑁂 𑀦𑀺𑀲𑀺𑀦𑁆𑀦𑀸 𑀦𑀸𑀫 𑀳𑁄𑀫, 𑀧𑀸𑀦𑀻𑀬𑀁 𑀧𑀻𑀢𑀸 𑀦𑀸𑀫 𑀳𑁄𑀫, 𑀧𑀸𑀤𑀸𑀧𑀺 𑀫𑁂 𑀥𑁄𑀢𑀸 𑀦𑀸𑀫 𑀳𑁄𑀦𑁆𑀢𑀼, 𑀢𑁂𑀮𑁂𑀦𑀧𑀺 𑀫𑀓𑁆𑀔𑀺𑀢𑀸 𑀦𑀸𑀫 𑀳𑁄𑀦𑁆𑀢𑀼, 𑀉𑀤𑀓𑀲𑀸𑀓𑀫𑁆𑀧𑀺 𑀧𑀭𑀺𑀪𑀼𑀢𑁆𑀢𑀁 𑀦𑀸𑀫 𑀳𑁄𑀢𑀼, 𑀢𑀬𑀸 𑀤𑀺𑀦𑁆𑀦𑀁 𑀅𑀥𑀺𑀯𑀸𑀲𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀁 𑀬𑀁 𑀢𑁆𑀯𑀁 𑀪𑀸𑀲𑀲𑀺, 𑀢𑀁 𑀢𑀁 𑀫𑀬𑀸 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀝𑀺𑀕𑁆𑀕𑀡𑁆𑀳𑀸𑀫 𑀢𑁂 𑀅𑀕𑁆𑀖𑀁, 𑀬𑀁 𑀢𑁆𑀯𑀁 𑀕𑁄𑀯𑀺𑀦𑁆𑀤 𑀪𑀸𑀲𑀲𑀻’’𑀢𑀺. 𑀏𑀯𑀁 𑀧𑀦 𑀅𑀕𑁆𑀖𑀁 𑀧𑀝𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀜𑁆𑀳𑀲𑁆𑀲 𑀑𑀓𑀸𑀲𑀁 𑀓𑀭𑁄𑀦𑁆𑀢𑁄 𑀤𑀺𑀝𑁆𑀞𑀥𑀫𑁆𑀫𑀳𑀺𑀢𑀢𑁆𑀣𑀸𑀬𑀸𑀢𑀺𑀆𑀤𑀺𑀫𑀸𑀳.

𑀓𑀗𑁆𑀔𑀻 ¶ 𑀅𑀓𑀗𑁆𑀔𑀺𑀁 𑀧𑀭𑀯𑁂𑀤𑀺𑀬𑁂𑀲𑀽𑀢𑀺 𑀅𑀳𑀁 𑀲𑀯𑀺𑀘𑀺𑀓𑀺𑀘𑁆𑀙𑁄 𑀪𑀯𑀦𑁆𑀢𑀁 𑀧𑀭𑁂𑀦 𑀲𑀬𑀁 𑀅𑀪𑀺𑀲𑀗𑁆𑀔𑀢𑀢𑁆𑀢𑀸 𑀧𑀭𑀲𑁆𑀲 𑀧𑀸𑀓𑀝𑁂𑀲𑀼 𑀧𑀭𑀯𑁂𑀤𑀺𑀬𑁂𑀲𑀼 𑀧𑀜𑁆𑀳𑁂𑀲𑀼 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑀁.

𑀳𑀺𑀢𑁆𑀯𑀸 𑀫𑀫𑀢𑁆𑀢𑀦𑁆𑀢𑀺 𑀇𑀤𑀁 𑀫𑀫, 𑀇𑀤𑀁 𑀫𑀫𑀸𑀢𑀺 𑀉𑀧𑀓𑀭𑀡𑀢𑀡𑁆𑀳𑀁 𑀘𑀚𑀺𑀢𑁆𑀯𑀸. 𑀫𑀦𑀼𑀚𑁂𑀲𑀽𑀢𑀺 𑀲𑀢𑁆𑀢𑁂𑀲𑀼, 𑀫𑀦𑀼𑀚𑁂𑀲𑀼 𑀬𑁄 𑀓𑁄𑀘𑀺 𑀫𑀦𑀼𑀚𑁄 𑀫𑀫𑀢𑁆𑀢𑀁 𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀓𑁄𑀤𑀺𑀪𑀽𑀢𑁄𑀢𑀺 𑀏𑀓𑀻𑀪𑀽𑀢𑁄, 𑀏𑀓𑁄 𑀢𑀺𑀝𑁆𑀞𑀦𑁆𑀢𑁄 𑀏𑀓𑁄 𑀦𑀺𑀲𑀻𑀤𑀦𑁆𑀢𑁄𑀢𑀺. 𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑀏𑀓𑁄 𑀉𑀤𑁂𑀢𑀺 𑀧𑀯𑀢𑁆𑀢𑀢𑀻𑀢𑀺 𑀏𑀓𑁄𑀤𑀺, 𑀢𑀸𑀤𑀺𑀲𑁄 𑀪𑀽𑀢𑁄𑀢𑀺 𑀏𑀓𑁄𑀤𑀺𑀪𑀽𑀢𑁄 ¶ . 𑀓𑀭𑀼𑀡𑁂𑀥𑀺𑀫𑀼𑀢𑁆𑀢𑁄𑀢𑀺 𑀓𑀭𑀼𑀡𑀸𑀛𑀸𑀦𑁂 𑀅𑀥𑀺𑀫𑀼𑀢𑁆𑀢𑁄, 𑀢𑀁 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦𑀺𑀭𑀸𑀫𑀕𑀦𑁆𑀥𑁄𑀢𑀺 𑀯𑀺𑀲𑁆𑀲𑀕𑀦𑁆𑀥𑀯𑀺𑀭𑀳𑀺𑀢𑁄. 𑀏𑀢𑁆𑀣 𑀞𑀺𑀢𑁄𑀢𑀺 𑀏𑀢𑁂𑀲𑀼 𑀥𑀫𑁆𑀫𑁂𑀲𑀼 𑀞𑀺𑀢𑁄. 𑀏𑀢𑁆𑀣 𑀘 𑀲𑀺𑀓𑁆𑀔𑀫𑀸𑀦𑁄𑀢𑀺 ¶ 𑀏𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀺𑀓𑁆𑀔𑀫𑀸𑀦𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀉𑀧𑀭𑀺 𑀫𑀳𑀸𑀕𑁄𑀯𑀺𑀦𑁆𑀤𑁂𑀦 𑀘 𑀩𑁆𑀭𑀳𑁆𑀫𑀼𑀦𑀸 𑀘 𑀯𑀼𑀢𑁆𑀢𑁄𑀬𑁂𑀯.

𑁩𑁨𑁦. 𑀢𑀢𑁆𑀣 𑀏𑀢𑁂 𑀅𑀯𑀺𑀤𑁆𑀯𑀸𑀢𑀺 𑀏𑀢𑁂 𑀆𑀫𑀕𑀦𑁆𑀥𑁂 𑀅𑀳𑀁 𑀅𑀯𑀺𑀤𑁆𑀯𑀸, 𑀦 𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀇𑀥 𑀩𑁆𑀭𑀽𑀳𑀺 𑀥𑀻𑀭𑀸𑀢𑀺 𑀢𑁂 𑀫𑁂 𑀢𑁆𑀯𑀁 𑀇𑀥 𑀥𑀻𑀭 𑀧𑀡𑁆𑀟𑀺𑀢, 𑀩𑁆𑀭𑀽𑀳𑀺, 𑀯𑀤. 𑀓𑁂𑀦𑀸𑀯𑀝𑀸 𑀯𑀸𑀢𑀺 𑀧𑀚𑀸 𑀓𑀼𑀭𑀼𑀢𑀽𑀢𑀺 𑀓𑀢𑀫𑁂𑀦 𑀓𑀺𑀮𑁂𑀲𑀸𑀯𑀭𑀡𑁂𑀦 𑀆𑀯𑀭𑀺𑀢𑀸 𑀧𑀚𑀸 𑀧𑀽𑀢𑀺𑀓𑀸 𑀯𑀸𑀬𑀢𑀺. 𑀆𑀧𑀸𑀬𑀺𑀓𑀸𑀢𑀺 𑀅𑀧𑀸𑀬𑀽𑀧𑀕𑀸. 𑀦𑀺𑀯𑀼𑀢𑀩𑁆𑀭𑀳𑁆𑀫𑀮𑁄𑀓𑀸𑀢𑀺 𑀦𑀺𑀯𑀼𑀢𑁄 𑀧𑀺𑀳𑀺𑀢𑁄 𑀩𑁆𑀭𑀳𑁆𑀫𑀮𑁄𑀓𑁄 𑀅𑀲𑁆𑀲𑀸𑀢𑀺 𑀦𑀺𑀯𑀼𑀢𑀩𑁆𑀭𑀳𑁆𑀫𑀮𑁄𑀓𑁄. 𑀓𑀢𑀫𑁂𑀦 𑀓𑀺𑀮𑁂𑀲𑁂𑀦 𑀧𑀚𑀸𑀬 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀫𑀕𑁆𑀕𑁄 𑀦𑀺𑀯𑀼𑀢𑁄 𑀧𑀺𑀳𑀺𑀢𑁄 𑀧𑀝𑀺𑀘𑁆𑀙𑀦𑁆𑀦𑁄𑀢𑀺 𑀧𑀼𑀘𑁆𑀙𑀢𑀺.

𑀓𑁄𑀥𑁄 𑀫𑁄𑀲𑀯𑀚𑁆𑀚𑀁 𑀦𑀺𑀓𑀢𑀺 𑀘 𑀤𑀼𑀩𑁆𑀪𑁄𑀢𑀺 𑀓𑀼𑀚𑁆𑀛𑀦𑀮𑀓𑁆𑀔𑀡𑁄 𑀓𑁄𑀥𑁄 𑀘, 𑀧𑀭𑀯𑀺𑀲𑀁𑀯𑀸𑀤𑀦𑀮𑀓𑁆𑀔𑀡𑁄 𑀫𑀼𑀲𑀸𑀯𑀸𑀤𑁄 𑀘, 𑀲𑀤𑀺𑀲𑀁 𑀤𑀲𑁆𑀲𑁂𑀢𑁆𑀯𑀸 𑀯𑀜𑁆𑀘𑀦𑀮𑀓𑁆𑀔𑀡𑀸 𑀦𑀺𑀓𑀢𑀺 𑀘, 𑀫𑀺𑀢𑁆𑀢𑀤𑀼𑀩𑁆𑀪𑀦𑀮𑀓𑁆𑀔𑀡𑁄 𑀤𑀼𑀩𑁆𑀪𑁄 𑀘. 𑀓𑀤𑀭𑀺𑀬𑀢𑀸 𑀅𑀢𑀺𑀫𑀸𑀦𑁄 𑀉𑀲𑀽𑀬𑀸𑀢𑀺 𑀣𑀤𑁆𑀥𑀫𑀘𑁆𑀙𑀭𑀺𑀬𑀮𑀓𑁆𑀔𑀡𑀸 𑀓𑀤𑀭𑀺𑀬𑀢𑀸 𑀘, 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑀦𑀮𑀓𑁆𑀔𑀡𑁄 𑀅𑀢𑀺𑀫𑀸𑀦𑁄 𑀘, 𑀧𑀭𑀲𑀫𑁆𑀧𑀢𑁆𑀢𑀺𑀔𑀻𑀬𑀦𑀮𑀓𑁆𑀔𑀡𑀸 𑀉𑀲𑀽𑀬𑀸 𑀘. 𑀇𑀘𑁆𑀙𑀸 𑀯𑀺𑀯𑀺𑀘𑁆𑀙𑀸 𑀧𑀭𑀳𑁂𑀞𑀦𑀸 𑀘𑀸𑀢𑀺 𑀢𑀡𑁆𑀳𑀸𑀮𑀓𑁆𑀔𑀡𑀸 𑀇𑀘𑁆𑀙𑀸 𑀘, 𑀫𑀘𑁆𑀙𑀭𑀺𑀬𑀮𑀓𑁆𑀔𑀡𑀸 𑀯𑀺𑀯𑀺𑀘𑁆𑀙𑀸 𑀘, 𑀯𑀺𑀳𑀺𑀁𑀲𑀸𑀮𑀓𑁆𑀔𑀡𑀸 𑀧𑀭𑀳𑁂𑀞𑀦𑀸 𑀘. 𑀮𑁄𑀪𑁄 𑀘 𑀤𑁄𑀲𑁄 𑀘 𑀫𑀤𑁄 𑀘 𑀫𑁄𑀳𑁄𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀮𑀼𑀩𑁆𑀪𑀦𑀮𑀓𑁆𑀔𑀡𑁄 𑀮𑁄𑀪𑁄 𑀘, 𑀤𑀼𑀲𑁆𑀲𑀦𑀮𑀓𑁆𑀔𑀡𑁄 𑀤𑁄𑀲𑁄 𑀘, 𑀫𑀚𑁆𑀚𑀦𑀮𑀓𑁆𑀔𑀡𑁄 𑀫𑀤𑁄 𑀘, 𑀫𑀼𑀬𑁆𑀳𑀦𑀮𑀓𑁆𑀔𑀡𑁄 𑀫𑁄𑀳𑁄 𑀘. 𑀏𑀢𑁂𑀲𑀼 𑀬𑀼𑀢𑁆𑀢𑀸 𑀅𑀦𑀺𑀭𑀸𑀫𑀕𑀦𑁆𑀥𑀸𑀢𑀺 𑀏𑀢𑁂𑀲𑀼 𑀘𑀼𑀤𑁆𑀤𑀲𑀲𑀼 𑀓𑀺𑀮𑁂𑀲𑁂𑀲𑀼 𑀬𑀼𑀢𑁆𑀢𑀸 𑀧𑀚𑀸 𑀦𑀺𑀭𑀸𑀫𑀕𑀦𑁆𑀥𑀸 𑀦 𑀳𑁄𑀢𑀺, 𑀆𑀫𑀕𑀦𑁆𑀥𑀸 𑀲𑀓𑀼𑀡𑀧𑀕𑀦𑁆𑀥𑀸 ¶ 𑀧𑀽𑀢𑀺𑀕𑀦𑁆𑀥𑀸𑀬𑁂𑀯𑀸𑀢𑀺 𑀯𑀤𑀢𑀺. 𑀆𑀧𑀸𑀬𑀺𑀓𑀸 𑀦𑀺𑀯𑀼𑀢𑀩𑁆𑀭𑀳𑁆𑀫𑀮𑁄𑀓𑀸𑀢𑀺 𑀏𑀲𑀸 𑀧𑀦 𑀆𑀧𑀸𑀬𑀺𑀓𑀸 𑀘𑁂𑀯 𑀳𑁄𑀢𑀺, 𑀧𑀝𑀺𑀘𑁆𑀙𑀦𑁆𑀦𑀩𑁆𑀭𑀳𑁆𑀫𑀮𑁄𑀓𑀫𑀕𑁆𑀕𑀸 𑀘𑀸𑀢𑀺. 𑀇𑀤𑀁 𑀧𑀦 𑀲𑀼𑀢𑁆𑀢𑀁 𑀓𑀣𑁂𑀦𑁆𑀢𑁂𑀦 𑀆𑀫𑀕𑀦𑁆𑀥𑀲𑀼𑀢𑁆𑀢𑁂𑀦 𑀤𑀻𑀧𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀁, 𑀆𑀫𑀕𑀦𑁆𑀥𑀲𑀼𑀢𑁆𑀢𑀫𑁆𑀧𑀺 𑀇𑀫𑀺𑀦𑀸 𑀤𑀻𑀧𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀁.

𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸𑀢𑀺 𑀢𑁂 𑀆𑀫𑀕𑀦𑁆𑀥𑀸 𑀲𑀼𑀦𑀺𑀫𑁆𑀫𑀤𑀬𑀸 𑀲𑀼𑀔𑁂𑀦 𑀦𑀺𑀫𑁆𑀫𑀤𑁂𑀢𑀩𑁆𑀩𑀸 𑀧𑀳𑀸𑀢𑀩𑁆𑀩𑀸 𑀦 𑀳𑁄𑀦𑁆𑀢𑀺, 𑀤𑀼𑀧𑁆𑀧𑀚𑀳𑀸 𑀤𑀼𑀚𑁆𑀚𑀬𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀲 𑀤𑀸𑀦𑀺 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀓𑀸𑀮𑀁 𑀫𑀜𑁆𑀜𑀢𑀻𑀢𑀺 ‘‘𑀬𑀲𑁆𑀲𑀸 𑀧𑀩𑁆𑀩𑀚𑁆𑀚𑀸𑀬 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀓𑀸𑀮𑀁 𑀫𑀜𑁆𑀜𑀢𑀺, 𑀅𑀬𑀫𑁂𑀯 𑀳𑁄𑀢𑀼, 𑀏𑀯𑀁 𑀲𑀢𑀺 𑀫𑀬𑁆𑀳𑀫𑁆𑀧𑀺 𑀢𑀯 𑀲𑀦𑁆𑀢𑀺𑀓𑁂 𑀆𑀕𑀫𑀦𑀁 𑀲𑁆𑀯𑀸𑀕𑀫𑀦𑀁 𑀪𑀯𑀺𑀲𑁆𑀲𑀢𑀺, 𑀓𑀣𑀺𑀢𑀥𑀫𑁆𑀫𑀓𑀣𑀸 𑀲𑀼𑀓𑀣𑀺𑀢𑀸 𑀪𑀯𑀺𑀲𑁆𑀲𑀢𑀺, 𑀢𑁆𑀯𑀁 𑀢𑀸𑀢 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 ¶ 𑀅𑀕𑁆𑀕𑀧𑀼𑀭𑀺𑀲𑁄 𑀤𑀳𑀭𑁄 𑀧𑀞𑀫𑀯𑀬𑁂 𑀞𑀺𑀢𑁄, 𑀏𑀯𑀁 𑀫𑀳𑀦𑁆𑀢𑀁 𑀦𑀸𑀫 𑀲𑀫𑁆𑀧𑀢𑁆𑀢𑀺𑀲𑀺𑀭𑀺𑀯𑀺𑀮𑀸𑀲𑀁 𑀧𑀳𑀸𑀬 𑀢𑀯 𑀧𑀩𑁆𑀩𑀚𑀦𑀁 𑀦𑀸𑀫 𑀕𑀦𑁆𑀥𑀳𑀢𑁆𑀣𑀺𑀦𑁄 𑀅𑀬𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀕𑀫𑀦𑀁 𑀯𑀺𑀬 𑀅𑀢𑀺𑀉𑀴𑀸𑀭𑀁, 𑀩𑀼𑀤𑁆𑀥𑀢𑀦𑁆𑀢𑀺 𑀦𑀸𑀫𑁂𑀲𑀸’’𑀢𑀺 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑀴𑁆𑀳𑀻𑀓𑀫𑁆𑀫𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀩𑁆𑀭𑀳𑁆𑀫𑀮𑁄𑀓𑀫𑁂𑀯 𑀕𑀢𑁄.

𑀭𑁂𑀡𑀼𑀭𑀸𑀚𑀆𑀫𑀦𑁆𑀢𑀦𑀸𑀯𑀡𑁆𑀡𑀦𑀸

𑁩𑁨𑁧. 𑀫𑀳𑀸𑀧𑀼𑀭𑀺𑀲𑁄𑀧𑀺 ¶ ‘‘𑀫𑀫 𑀇𑀢𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀦𑀁 𑀦𑀸𑀫 𑀦 𑀬𑀼𑀢𑁆𑀢𑀁, 𑀅𑀳𑀁 𑀭𑀸𑀚𑀓𑀼𑀮𑀲𑁆𑀲 𑀅𑀢𑁆𑀣𑀁 𑀅𑀦𑀼𑀲𑀸𑀲𑀸𑀫𑀺, 𑀢𑀲𑁆𑀫𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑁆𑀲𑀸𑀫𑀺. 𑀲𑀘𑁂 𑀲𑁄𑀧𑀺 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀲𑀼𑀦𑁆𑀤𑀭𑀫𑁂𑀯. 𑀦𑁄 𑀘𑁂 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀅𑀳𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀪𑁄 𑀫𑀳𑀸𑀕𑁄𑀯𑀺𑀦𑁆𑀤𑁄,…𑀧𑁂… 𑀦𑀸𑀳𑀁 𑀧𑁄𑀭𑁄𑀳𑀘𑁆𑀘𑁂 𑀭𑀫𑁂’’𑀢𑀺.

𑀢𑀢𑁆𑀣 𑀢𑁆𑀯𑀁 𑀧𑀚𑀸𑀦𑀲𑁆𑀲𑀼 𑀭𑀚𑁆𑀚𑁂𑀦𑀸𑀢𑀺 𑀢𑀯 𑀭𑀚𑁆𑀚𑁂𑀦 𑀢𑁆𑀯𑀫𑁂𑀯 𑀚𑀸𑀦𑀸𑀳𑀺. 𑀦𑀸𑀳𑀁 𑀧𑁄𑀭𑁄𑀳𑀺𑀘𑁆𑀘𑁂 𑀭𑀫𑁂𑀢𑀺 𑀅𑀳𑀁 𑀧𑀼𑀭𑁄𑀳𑀺𑀢𑀪𑀸𑀯𑁂 𑀦 𑀭𑀫𑀸𑀫𑀺, 𑀉𑀓𑁆𑀓𑀡𑁆𑀞𑀺𑀢𑁄𑀲𑁆𑀫𑀺, 𑀅𑀜𑁆𑀜𑀁 𑀅𑀦𑀼𑀲𑀸𑀲𑀓𑀁 𑀚𑀸𑀦𑀸𑀳𑀺, 𑀦𑀸𑀳𑀁 𑀧𑁄𑀭𑁄𑀳𑀺𑀘𑁆𑀘𑁂 𑀭𑀫𑁂𑀢𑀺.

𑀅𑀣 𑀭𑀸𑀚𑀸 𑁋 ‘‘𑀥𑀼𑀯𑀁 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑁂𑀳𑁂 𑀪𑁄𑀕𑀸 𑀫𑀦𑁆𑀤𑀸 𑀚𑀸𑀢𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀥𑀦𑁂𑀦 𑀦𑀺𑀫𑀦𑁆𑀢𑁂𑀦𑁆𑀢𑁄 𑁋 ‘‘𑀲𑀘𑁂 𑀢𑁂 𑀊𑀦𑀁 𑀓𑀸𑀫𑁂𑀳𑀺. 𑀅𑀳𑀁 𑀧𑀭𑀺𑀧𑀽𑀭𑀬𑀸𑀫𑀺 𑀢𑁂’’𑀢𑀺 𑀯𑀢𑁆𑀯𑀸 𑀧𑀼𑀦 𑁋 ‘‘𑀓𑀺𑀦𑁆𑀦𑀼 𑀔𑁄 𑀏𑀲 𑀏𑀓𑀓𑁄 𑀯𑀺𑀳𑀭𑀦𑁆𑀢𑁄 𑀓𑁂𑀦𑀘𑀺 𑀯𑀺𑀳𑀺𑀁𑀲𑀺𑀢𑁄 𑀪𑀯𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸,

‘‘𑀬𑁄 𑀢𑀁 𑀳𑀺𑀁𑀲𑀢𑀺 𑀯𑀸𑀭𑁂𑀫𑀺, 𑀪𑀽𑀫𑀺𑀲𑁂𑀦𑀸𑀧𑀢𑀺 𑀅𑀳𑀁;

𑀢𑀼𑀯𑀁 𑀧𑀺𑀢𑀸 𑀅𑀳𑀁 𑀧𑀼𑀢𑁆𑀢𑁄, 𑀫𑀸 𑀦𑁄 𑀕𑁄𑀯𑀺𑀦𑁆𑀤 𑀧𑀸𑀚𑀳𑀻’’𑀢𑀺. 𑁋

𑀆𑀳 ¶ . 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀢𑀁 𑀳𑀺𑀁𑀲𑀢𑀺, 𑀢𑀁 𑀯𑀸𑀭𑁂𑀫𑀺, 𑀓𑁂𑀯𑀮𑀁 𑀢𑀼𑀫𑁆𑀳𑁂 ‘‘𑀅𑀲𑀼𑀓𑁄’’𑀢𑀺 𑀆𑀘𑀺𑀓𑁆𑀔𑀣, 𑀅𑀳𑀫𑁂𑀢𑁆𑀣 𑀓𑀢𑁆𑀢𑀩𑁆𑀩𑀁 𑀚𑀸𑀦𑀺𑀲𑁆𑀲𑀸𑀫𑀻𑀢𑀺. 𑀪𑀽𑀫𑀺𑀲𑁂𑀦𑀸𑀧𑀢𑀺 𑀅𑀳𑀦𑁆𑀢𑀺 𑀅𑀣 𑀯𑀸 𑀅𑀳𑀁 𑀧𑀣𑀯𑀺𑀬𑀸 𑀲𑀸𑀫𑀻, 𑀲𑁆𑀯𑀸𑀳𑀁 𑀇𑀫𑀁 𑀭𑀚𑁆𑀚𑀁 𑀢𑀼𑀫𑁆𑀳𑁂𑀬𑁂𑀯 𑀧𑀝𑀺𑀘𑁆𑀙𑀸𑀧𑁂𑀲𑁆𑀲𑀸𑀫𑀺. 𑀢𑀼𑀯𑀁 𑀧𑀺𑀢𑀸 𑀅𑀳𑀁 𑀧𑀼𑀢𑁆𑀢𑁄𑀢𑀺 𑀢𑁆𑀯𑀁 𑀧𑀺𑀢𑀺𑀝𑁆𑀞𑀸𑀦𑁂 𑀞𑀲𑁆𑀲𑀲𑀺, 𑀅𑀳𑀁 𑀧𑀼𑀢𑁆𑀢𑀝𑁆𑀞𑀸𑀦𑁂. 𑀲𑁄 𑀢𑁆𑀯𑀁 𑀫𑀫 𑀫𑀦𑀁 𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄𑀬𑁂𑀯 𑀫𑀦𑀁 𑀕𑁄𑀯𑀺𑀦𑁆𑀤, 𑀧𑀸𑀚𑁂𑀳𑀺; 𑀬𑀣𑀸 𑀇𑀘𑁆𑀙𑀲𑀺 𑀢𑀣𑀸 𑀧𑀯𑀢𑁆𑀢𑀲𑁆𑀲𑀼. 𑀅𑀳𑀁 𑀧𑀦 𑀢𑀯 𑀫𑀦𑀁𑀬𑁂𑀯 𑀅𑀦𑀼𑀯𑀢𑁆𑀢𑀦𑁆𑀢𑁄 𑀢𑀬𑀸 𑀤𑀺𑀦𑁆𑀦𑀧𑀺𑀡𑁆𑀟𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀢𑀁 𑀅𑀲𑀺𑀘𑀫𑁆𑀫𑀳𑀢𑁆𑀣𑁄 𑀯𑀸 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀺, 𑀭𑀣𑀁 𑀯𑀸 𑀢𑁂 𑀧𑀸𑀚𑁂𑀲𑁆𑀲𑀸𑀫𑀺. ‘‘𑀫𑀸 𑀦𑁄 𑀕𑁄𑀯𑀺𑀦𑁆𑀤, 𑀧𑀚𑀳𑀻’’𑀢𑀺 𑀯𑀸 𑀧𑀸𑀞𑁄 ¶ . 𑀢𑀲𑁆𑀲𑀢𑁆𑀣𑁄 𑁋 𑀢𑁆𑀯𑀁 𑀧𑀺𑀢𑀺𑀝𑁆𑀞𑀸𑀦𑁂 𑀢𑀺𑀝𑁆𑀞, 𑀅𑀳𑀁 𑀧𑀼𑀢𑁆𑀢𑀝𑁆𑀞𑀸𑀦𑁂 𑀞𑀲𑁆𑀲𑀸𑀫𑀺. 𑀫𑀸 𑀦𑁄 𑀢𑁆𑀯𑀁 𑀪𑁄 𑀕𑁄𑀯𑀺𑀦𑁆𑀤, 𑀧𑀚𑀳𑀺, 𑀫𑀸 𑀧𑀭𑀺𑀘𑁆𑀘𑀚𑀻𑀢𑀺. 𑀅𑀣 𑀫𑀳𑀸𑀧𑀼𑀭𑀺𑀲𑁄 𑀬𑀁 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺, 𑀢𑀲𑁆𑀲 𑀅𑀢𑁆𑀢𑀦𑀺 𑀅𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀦 ¶ 𑀫𑀢𑁆𑀣𑀺 𑀊𑀦𑀁 𑀓𑀸𑀫𑁂𑀳𑀺, 𑀳𑀺𑀁𑀲𑀺𑀢𑀸 𑀫𑁂 𑀦 𑀯𑀺𑀚𑁆𑀚𑀢𑀺;

𑀅𑀫𑀦𑀼𑀲𑁆𑀲𑀯𑀘𑁄 𑀲𑀼𑀢𑁆𑀯𑀸, 𑀢𑀲𑁆𑀫𑀸𑀳𑀁 𑀦 𑀕𑀳𑁂 𑀭𑀫𑁂’’𑀢𑀺. 𑁋

𑀆𑀳. 𑀢𑀢𑁆𑀣 𑀦 𑀫𑀢𑁆𑀣𑀻𑀢𑀺 𑀦 𑀫𑁂 𑀅𑀢𑁆𑀣𑀺. 𑀕𑀳𑁂𑀢𑀺 𑀕𑁂𑀳𑁂. 𑀅𑀣 𑀦𑀁 𑀭𑀸𑀚𑀸 𑀧𑀼𑀘𑁆𑀙𑀺 𑁋

‘‘𑀅𑀫𑀦𑀼𑀲𑁆𑀲𑁄 𑀓𑀣𑀁 𑀯𑀡𑁆𑀡𑁄, 𑀓𑀺𑀁 𑀢𑁂 𑀅𑀢𑁆𑀣𑀁 𑀅𑀪𑀸𑀲𑀣;

𑀬𑀜𑁆𑀘 𑀲𑀼𑀢𑁆𑀯𑀸 𑀚𑀳𑀸𑀲𑀺 𑀦𑁄, 𑀕𑁂𑀳𑁂 𑀅𑀫𑁆𑀳𑁂 𑀘 𑀓𑁂𑀯𑀮𑀻’’𑀢𑀺.

𑀢𑀢𑁆𑀣 𑀚𑀳𑀸𑀲𑀺 𑀦𑁄, 𑀕𑁂𑀳𑁂 𑀅𑀫𑁆𑀳𑁂 𑀘 𑀓𑁂𑀯𑀮𑀻𑀢𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀫𑁆𑀧𑀢𑁆𑀢𑀺𑀪𑀭𑀺𑀢𑁂 𑀕𑁂𑀳𑁂 𑀲𑀗𑁆𑀕𑀳𑀯𑀲𑁂𑀦 𑀅𑀢𑁆𑀢𑀦𑁄 𑀕𑁂𑀳𑁂 𑀓𑀭𑁄𑀦𑁆𑀢𑁄 𑀬𑀁 𑀲𑀼𑀢𑁆𑀯𑀸 𑀅𑀫𑁆𑀳𑀸𑀓𑀁 𑀕𑁂𑀳𑁂 𑀘 𑀅𑀫𑁆𑀳𑁂 𑀘 𑀓𑁂𑀯𑀮𑀻 𑀲𑀩𑁆𑀩𑁂 𑀅𑀧𑀭𑀺𑀲𑁂𑀲𑁂 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀚𑀳𑀸𑀲𑀻𑀢𑀺 𑀯𑀤𑀢𑀺.

𑀅𑀣𑀲𑁆𑀲 𑀆𑀘𑀺𑀓𑁆𑀔𑀦𑁆𑀢𑁄 𑀫𑀳𑀸𑀧𑀼𑀭𑀺𑀲𑁄 𑀉𑀧𑀯𑀼𑀢𑁆𑀣𑀲𑁆𑀲 𑀫𑁂 𑀧𑀼𑀩𑁆𑀩𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀧𑀯𑀼𑀢𑁆𑀣𑀲𑁆𑀲𑀸𑀢𑀺 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀏𑀓𑀻𑀪𑀸𑀯𑀁 𑀉𑀧𑀕𑀦𑁆𑀢𑁆𑀯𑀸 𑀯𑀼𑀢𑁆𑀣𑀲𑁆𑀲. 𑀬𑀺𑀝𑁆𑀞𑀓𑀸𑀫𑀲𑁆𑀲 𑀫𑁂 𑀲𑀢𑁄𑀢𑀺 𑀬𑀚𑀺𑀢𑀼𑀓𑀸𑀫𑀲𑁆𑀲 𑀫𑁂 ¶ 𑀲𑀫𑀸𑀦𑀲𑁆𑀲. 𑀅𑀕𑁆𑀕𑀺 𑀧𑀚𑁆𑀚𑀮𑀺𑀢𑁄 𑀆𑀲𑀺, 𑀓𑀼𑀲𑀧𑀢𑁆𑀢𑀧𑀭𑀺𑀢𑁆𑀣𑀢𑁄𑀢𑀺 𑀓𑀼𑀲𑀧𑀢𑁆𑀢𑁂𑀳𑀺 𑀧𑀭𑀺𑀢𑁆𑀣𑀢𑁄 𑀲𑀧𑁆𑀧𑀺𑀤𑀥𑀺𑀫𑀥𑀼𑀆𑀤𑀻𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀕𑁆𑀕𑀺 𑀚𑀮𑀬𑀺𑀢𑀼𑀫𑀸𑀭𑀤𑁆𑀥𑁄 𑀆𑀲𑀺, 𑀏𑀯𑀁 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 ‘‘𑀫𑀳𑀸𑀚𑀦𑀲𑁆𑀲 𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀞𑀺𑀢𑀲𑁆𑀲 𑀫𑀫𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀲𑀦𑀦𑁆𑀢𑀦𑁄𑀢𑀺 𑀲𑀦𑀗𑁆𑀓𑀼𑀫𑀸𑀭𑁄 𑀩𑁆𑀭𑀳𑁆𑀫𑀸. 𑀢𑀢𑁄 𑀭𑀸𑀚𑀸 𑀲𑀬𑀫𑁆𑀧𑀺 𑀧𑀩𑁆𑀩𑀚𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀲𑀤𑁆𑀤𑀳𑀸𑀫𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀣𑀁 𑀯𑀢𑁆𑀢𑁂𑀣 𑀅𑀜𑁆𑀜𑀣𑀸𑀢𑀺 𑀓𑀣𑀁 𑀢𑀼𑀫𑁆𑀳𑁂 𑀅𑀜𑁆𑀜𑀣𑀸 𑀯𑀢𑁆𑀢𑀺𑀲𑁆𑀲𑀣. 𑀢𑁂 𑀢𑀁 𑀅𑀦𑀼𑀯𑀢𑁆𑀢𑀺𑀲𑁆𑀲𑀸𑀫𑀸𑀢𑀺 𑀢𑁂 𑀫𑀬𑀫𑁆𑀧𑀺 𑀢𑀼𑀫𑁆𑀳𑁂𑀬𑁂𑀯 𑀅𑀦𑀼𑀯𑀢𑁆𑀢𑀺𑀲𑁆𑀲𑀸𑀫, 𑀅𑀦𑀼𑀧𑀩𑁆𑀩𑀚𑀺𑀲𑁆𑀲𑀸𑀫𑀸𑀢𑀺 𑀅𑀢𑁆𑀣𑁄. ‘‘𑀅𑀦𑀼𑀯𑀚𑀺𑀲𑁆𑀲𑀸𑀫𑀸’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀅𑀦𑀼𑀕𑀘𑁆𑀙𑀺𑀲𑁆𑀲𑀸𑀫𑀸𑀢𑀺 𑀅𑀢𑁆𑀣𑁄. 𑀅𑀓𑀸𑀘𑁄𑀢𑀺 𑀦𑀺𑀓𑁆𑀓𑀸𑀘𑁄 𑀅𑀓𑀓𑁆𑀓𑀲𑁄. 𑀕𑁄𑀯𑀺𑀦𑁆𑀤𑀲𑁆𑀲𑀸𑀦𑀼𑀲𑀸𑀲𑀦𑁂𑀢𑀺 𑀢𑀯 𑀕𑁄𑀯𑀺𑀦𑁆𑀤𑀲𑁆𑀲 𑀲𑀸𑀲𑀦𑁂. 𑀪𑀯𑀦𑁆𑀢𑀁 𑀕𑁄𑀯𑀺𑀦𑁆𑀤𑀫𑁂𑀯 𑀲𑀢𑁆𑀣𑀸𑀭𑀁 𑀓𑀭𑀺𑀢𑁆𑀯𑀸 𑀘𑀭𑀺𑀲𑁆𑀲𑀸𑀫𑀸𑀢𑀺 𑀯𑀤𑀢𑀺.

𑀙 𑀔𑀢𑁆𑀢𑀺𑀬𑀆𑀫𑀦𑁆𑀢𑀦𑀸𑀯𑀡𑁆𑀡𑀦𑀸

𑁩𑁨𑁨. 𑀬𑁂𑀦 ¶ 𑀢𑁂 𑀙 𑀔𑀢𑁆𑀢𑀺𑀬𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀭𑁂𑀡𑀼𑀁 𑀭𑀸𑀚𑀸𑀦𑀁 ‘‘𑀲𑀸𑀥𑀼 𑀫𑀳𑀸𑀭𑀸𑀚 𑀭𑀚𑁆𑀚𑀁 𑀦𑀸𑀫 𑀫𑀸𑀢𑀭𑀁 𑀧𑀺𑀢𑀭𑀁 𑀪𑀸𑀢𑀺𑀪𑀕𑀺𑀦𑀻𑀆𑀤𑀬𑁄𑀧𑀺 𑀫𑀸𑀭𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁂𑀲𑀼 𑀲𑀢𑁆𑀢𑁂𑀲𑀼 𑀏𑀯𑀁 𑀫𑀳𑀦𑁆𑀢𑀁 𑀭𑀚𑁆𑀚𑀲𑀺𑀭𑀺𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑀼𑀓𑀸𑀫𑁂𑀦 𑀉𑀴𑀸𑀭𑀁 𑀫𑀳𑀸𑀭𑀸𑀚𑁂𑀦 𑀓𑀢’’𑀦𑁆𑀢𑀺 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀤𑀴𑁆𑀳𑀢𑀭𑀫𑀲𑁆𑀲 𑀉𑀲𑁆𑀲𑀸𑀳𑀁 𑀓𑀢𑁆𑀯𑀸 𑀉𑀧𑀲𑀗𑁆𑀓𑀫𑀺 ¶ . 𑀏𑀯𑀁 𑀲𑀫𑀘𑀺𑀦𑁆𑀢𑁂𑀲𑀼𑀦𑁆𑀢𑀺 𑀭𑀜𑁆𑀜𑁄 𑀘𑀺𑀦𑁆𑀢𑀺𑀢𑀦𑀬𑁂𑀦𑁂𑀯 𑀓𑀤𑀸𑀘𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑁄𑀕𑀸 𑀧𑀭𑀺𑀳𑀻𑀦𑀸 𑀪𑀯𑁂𑀬𑁆𑀬𑀼𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀲𑀫𑀘𑀺𑀦𑁆𑀢𑁂𑀲𑀼𑀁. 𑀥𑀦𑁂𑀦 𑀲𑀺𑀓𑁆𑀔𑁂𑀬𑁆𑀬𑀸𑀫𑀸𑀢𑀺 𑀉𑀧𑀮𑀸𑀧𑁂𑀬𑁆𑀬𑀸𑀫 𑀲𑀗𑁆𑀕𑀡𑁆𑀳𑁂𑀬𑁆𑀬𑀸𑀫. 𑀢𑀸𑀯𑀢𑀓𑀁 𑀆𑀳𑀭𑀻𑀬𑀢𑀦𑁆𑀢𑀺 𑀢𑀸𑀯𑀢𑀓𑀁 𑀆𑀳𑀭𑀸𑀧𑀺𑀬𑀢𑀼 𑀕𑀡𑁆𑀳𑀺𑀬𑀢𑀼, 𑀬𑀢𑁆𑀢𑀓𑀁 𑀇𑀘𑁆𑀙𑀣, 𑀢𑀢𑁆𑀢𑀓𑀁 𑀕𑀡𑁆𑀳𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀯𑀦𑁆𑀢𑀸𑀦𑀁𑀬𑁂𑀯 𑀯𑀸𑀳𑀲𑀸𑀢𑀺 𑀪𑀯𑀦𑁆𑀢𑁂 𑀧𑀘𑁆𑀘𑀬𑀁 𑀓𑀢𑁆𑀯𑀸, 𑀢𑀼𑀫𑁆𑀳𑁂𑀳𑀺 𑀤𑀺𑀦𑁆𑀦𑀢𑁆𑀢𑀸𑀬𑁂𑀯 𑀧𑀳𑀽𑀢𑀁 𑀲𑀸𑀧𑀢𑁂𑀬𑁆𑀬𑀁 𑀚𑀸𑀢𑀁.

𑁩𑁨𑁩. 𑀲𑀘𑁂 𑀚𑀳𑀣 𑀓𑀸𑀫𑀸𑀦𑀻𑀢𑀺 𑀲𑀘𑁂 𑀯𑀢𑁆𑀣𑀼𑀓𑀸𑀫𑁂 𑀘 𑀓𑀺𑀮𑁂𑀲𑀓𑀸𑀫𑁂 𑀘 𑀧𑀭𑀺𑀘𑁆𑀘𑀚𑀣. 𑀬𑀢𑁆𑀣 𑀲𑀢𑁆𑀢𑁄 𑀧𑀼𑀣𑀼𑀚𑁆𑀚𑀦𑁄𑀢𑀺 𑀬𑁂𑀲𑀼 𑀓𑀸𑀫𑁂𑀲𑀼 𑀧𑀼𑀣𑀼𑀚𑁆𑀚𑀦𑁄 𑀲𑀢𑁆𑀢𑁄 𑀮𑀕𑁆𑀕𑁄 𑀮𑀕𑁆𑀕𑀺𑀢𑁄. 𑀆𑀭𑀫𑁆𑀪𑀯𑁆𑀳𑁄 𑀤𑀴𑁆𑀳𑀸 𑀳𑁄𑀣𑀸𑀢𑀺 𑀏𑀯𑀁 𑀲𑀦𑁆𑀢𑁂 𑀯𑀻𑀭𑀺𑀬𑀁 𑀆𑀭𑀪𑀣, 𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑀢𑀁 𑀅𑀥𑀺𑀝𑁆𑀞𑀸𑀬 𑀤𑀴𑁆𑀳𑀸 𑀪𑀯𑀣. 𑀔𑀦𑁆𑀢𑀻𑀩𑀮𑀲𑀫𑀸𑀳𑀺𑀢𑀸𑀢𑀺 𑀔𑀦𑁆𑀢𑀺𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑀸 𑀪𑀯𑀣𑀸𑀢𑀺 𑀭𑀸𑀚𑀽𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀢𑀺.

𑀏𑀲 𑀫𑀕𑁆𑀕𑁄 𑀉𑀚𑀼𑀫𑀕𑁆𑀕𑁄𑀢𑀺 𑀏𑀲 𑀓𑀭𑀼𑀡𑀸𑀛𑀸𑀦𑀫𑀕𑁆𑀕𑁄 𑀉𑀚𑀼𑀫𑀕𑁆𑀕𑁄 𑀦𑀸𑀫. 𑀏𑀲 𑀫𑀕𑁆𑀕𑁄 𑀅𑀦𑀼𑀢𑁆𑀢𑀭𑁄𑀢𑀺 𑀏𑀲𑁂𑀯 ¶ 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸 𑀅𑀲𑀤𑀺𑀲𑀫𑀕𑁆𑀕𑁄 𑀉𑀢𑁆𑀢𑀫𑀫𑀕𑁆𑀕𑁄 𑀦𑀸𑀫. 𑀲𑀤𑁆𑀥𑀫𑁆𑀫𑁄 𑀲𑀩𑁆𑀪𑀺 𑀭𑀓𑁆𑀔𑀺𑀢𑁄𑀢𑀺 𑀏𑀲𑁄 𑀏𑀯 𑀘 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑁂𑀳𑀺 𑀲𑀩𑁆𑀪𑀺𑀭𑀓𑁆𑀔𑀺𑀢𑀥𑀫𑁆𑀫𑁄 𑀦𑀸𑀫. 𑀇𑀢𑀺 𑀓𑀭𑀼𑀡𑀸𑀛𑀸𑀦𑀲𑁆𑀲 𑀯𑀡𑁆𑀡𑀪𑀡𑀦𑁂𑀦𑀸𑀧𑀺 𑀢𑁂𑀲𑀁 𑀅𑀦𑀺𑀯𑀢𑁆𑀢𑀦𑀢𑁆𑀣𑀸𑀬 𑀤𑀴𑁆𑀳𑀻𑀓𑀫𑁆𑀫𑀫𑁂𑀯 𑀓𑀭𑁄𑀢𑀺.

𑀓𑁄 𑀦𑀼 𑀔𑁄 𑀧𑀦 𑀪𑁄 𑀚𑀸𑀦𑀸𑀢𑀺 𑀚𑀻𑀯𑀺𑀢𑀸𑀦𑀦𑁆𑀢𑀺 𑀪𑁄 𑀚𑀻𑀯𑀺𑀢𑀁 𑀦𑀸𑀫 𑀉𑀤𑀓𑀧𑀼𑀧𑁆𑀨𑀼𑀴𑀽𑀧𑀫𑀁 𑀢𑀺𑀡𑀕𑁆𑀕𑁂 𑀉𑀲𑁆𑀲𑀸𑀯𑀩𑀺𑀦𑁆𑀤𑀽𑀧𑀫𑀁 𑀢𑀗𑁆𑀔𑀡𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑀁, 𑀢𑀲𑁆𑀲 𑀓𑁄 𑀕𑀢𑀺𑀁 𑀚𑀸𑀦𑀸𑀢𑀺, 𑀓𑀺𑀲𑁆𑀫𑀺𑀁 𑀔𑀡𑁂 𑀪𑀺𑀚𑁆𑀚𑀺𑀲𑁆𑀲𑀢𑀺? 𑀕𑀫𑀦𑀻𑀬𑁄 𑀲𑀫𑁆𑀧𑀭𑀸𑀬𑁄𑀢𑀺 𑀧𑀭𑀮𑁄𑀓𑁄 𑀧𑀦 𑀅𑀯𑀲𑁆𑀲𑀁 𑀕𑀦𑁆𑀢𑀩𑁆𑀩𑁄𑀯, 𑀢𑀢𑁆𑀣 𑀧𑀡𑁆𑀟𑀺𑀢𑁂𑀦 𑀓𑀼𑀮𑀧𑀼𑀢𑁆𑀢𑁂𑀦 𑀫𑀦𑁆𑀢𑀸𑀬𑀁 𑀩𑁄𑀤𑁆𑀥𑀩𑁆𑀩𑀁. 𑀫𑀦𑁆𑀢𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀢𑀸𑀬 𑀫𑀦𑁆𑀢𑁂𑀢𑀩𑁆𑀩𑀁 𑀩𑀼𑀚𑁆𑀛𑀺𑀢𑀩𑁆𑀩𑀁, 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀜𑁆𑀘 𑀚𑀸𑀦𑀺𑀢𑀩𑁆𑀩𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀓𑀭𑀡𑀢𑁆𑀣𑁂 𑀯𑀸 𑀪𑀼𑀫𑁆𑀫𑀁. 𑀫𑀦𑁆𑀢𑀸𑀬𑀁 𑀩𑁄𑀤𑁆𑀥𑀩𑁆𑀩𑀦𑁆𑀢𑀺 𑀫𑀦𑁆𑀢𑀸𑀬 𑀩𑀼𑀚𑁆𑀛𑀺𑀢𑀩𑁆𑀩𑀁, 𑀜𑀸𑀡𑁂𑀦 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀓𑀺𑀁 𑀩𑀼𑀚𑁆𑀛𑀺𑀢𑀩𑁆𑀩𑀁? 𑀚𑀻𑀯𑀺𑀢𑀲𑁆𑀲 𑀤𑀼𑀚𑁆𑀚𑀸𑀦𑀢𑀸, 𑀲𑀫𑁆𑀧𑀭𑀸𑀬𑀲𑁆𑀲 ¶ 𑀘 𑀅𑀯𑀲𑁆𑀲𑀁 𑀕𑀫𑀦𑀻𑀬𑀢𑀸, 𑀩𑀼𑀚𑁆𑀛𑀺𑀢𑁆𑀯𑀸 𑀘 𑀧𑀦 𑀲𑀩𑁆𑀩𑀧𑀮𑀺𑀩𑁄𑀥𑁂 𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡𑀁.

𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀤𑀻𑀦𑀁 𑀆𑀫𑀦𑁆𑀢𑀦𑀸𑀯𑀡𑁆𑀡𑀦𑀸

𑁩𑁨𑁪. 𑀅𑀧𑁆𑀧𑁂𑀲𑀓𑁆𑀔𑀸 𑀘 𑀅𑀧𑁆𑀧𑀮𑀸𑀪𑀸 𑀘𑀸𑀢𑀺 𑀪𑁄 𑀧𑀩𑁆𑀩𑀚𑁆𑀚𑀸 𑀦𑀸𑀫 𑀅𑀧𑁆𑀧𑀬𑀲𑀸 𑀘𑁂𑀯, 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀳𑀺 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑀁 𑀯𑀺𑀳𑁂𑀞𑁂𑀢𑁆𑀯𑀸 𑀯𑀺𑀳𑁂𑀞𑁂𑀢𑁆𑀯𑀸 𑀮𑀸𑀫𑀓𑀁 𑀅𑀦𑀸𑀣𑀁 𑀓𑀢𑁆𑀯𑀸𑀯 𑀓𑀣𑁂𑀦𑁆𑀢𑀺. 𑀅𑀧𑁆𑀧𑀮𑀸𑀪𑀸 𑀘, 𑀲𑀓𑀮𑀕𑀸𑀫𑀁 𑀘𑀭𑀺𑀢𑁆𑀯𑀸𑀧𑀺 𑀅𑀚𑁆𑀛𑁄𑀳𑀭𑀡𑀻𑀬𑀁 𑀤𑀼𑀮𑁆𑀮𑀪𑀫𑁂𑀯. 𑀇𑀤𑀁 𑀧𑀦 𑀩𑁆𑀭𑀳𑁆𑀫𑀜𑁆𑀜𑀁 ¶ 𑀫𑀳𑁂𑀲𑀓𑁆𑀔𑀜𑁆𑀘 𑀫𑀳𑀸𑀬𑀲𑀢𑁆𑀢𑀸, 𑀫𑀳𑀸𑀮𑀸𑀪𑀜𑁆𑀘 𑀮𑀸𑀪𑀲𑀓𑁆𑀓𑀸𑀭𑀲𑀫𑁆𑀧𑀦𑁆𑀦𑀢𑁆𑀢𑀸. 𑀪𑀯𑀜𑁆𑀳𑀺 𑀏𑀢𑀭𑀳𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀅𑀕𑁆𑀕𑀧𑀼𑀭𑁄𑀳𑀺𑀢𑁄 𑀲𑀩𑁆𑀩𑀢𑁆𑀣 𑀅𑀕𑁆𑀕𑀸𑀲𑀦𑀁 𑀅𑀕𑁆𑀕𑁄𑀤𑀓𑀁 𑀅𑀕𑁆𑀕𑀪𑀢𑁆𑀢𑀁 𑀅𑀕𑁆𑀕𑀕𑀦𑁆𑀥𑀁 𑀅𑀕𑁆𑀕𑀫𑀸𑀮𑀁 𑀮𑀪𑀢𑀻𑀢𑀺.

𑀭𑀸𑀚𑀸𑀯 𑀭𑀜𑁆𑀜𑀦𑁆𑀢𑀺 𑀅𑀳𑀜𑁆𑀳𑀺 𑀪𑁄 𑀏𑀢𑀭𑀳𑀺 𑀧𑀓𑀢𑀺𑀭𑀜𑁆𑀜𑀁 𑀫𑀚𑁆𑀛𑁂 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀯𑀺𑀬. 𑀩𑁆𑀭𑀳𑁆𑀫𑀸𑀯 𑀩𑁆𑀭𑀳𑁆𑀫𑀸𑀦𑀦𑁆𑀢𑀺 𑀧𑀓𑀢𑀺𑀩𑁆𑀭𑀳𑁆𑀫𑀸𑀦𑀁 𑀫𑀚𑁆𑀛𑁂 𑀫𑀳𑀸𑀩𑁆𑀭𑀳𑁆𑀫𑀲𑀤𑀺𑀲𑁄. 𑀤𑁂𑀯𑀢𑀸𑀯 𑀕𑀳𑀧𑀢𑀺𑀓𑀸𑀦𑀦𑁆𑀢𑀺 𑀅𑀯𑀲𑁂𑀲𑀕𑀳𑀧𑀢𑀺𑀓𑀸𑀦𑀁 𑀧𑀦𑀫𑁆𑀳𑀺 𑀲𑀓𑁆𑀓𑀤𑁂𑀯𑀭𑀸𑀚𑀲𑀤𑀺𑀲𑁄.

𑀪𑀭𑀺𑀬𑀸𑀦𑀁 𑀆𑀫𑀦𑁆𑀢𑀦𑀸𑀯𑀡𑁆𑀡𑀦𑀸

𑁩𑁨𑁫. 𑀘𑀢𑁆𑀢𑀸𑀭𑀻𑀲𑀸 𑀪𑀭𑀺𑀬𑀸 𑀲𑀸𑀤𑀺𑀲𑀺𑀬𑁄𑀢𑀺 𑀲𑀸𑀤𑀺𑀲𑀺𑀬𑁄𑀯 𑀘𑀢𑁆𑀢𑀸𑀭𑀻𑀲𑀸 𑀪𑀭𑀺𑀬𑀸, 𑀅𑀜𑁆𑀜𑀸 𑀧𑀦𑀲𑁆𑀲 𑀢𑀻𑀲𑀼 𑀯𑀬𑁂𑀲𑀼 𑀦𑀸𑀝𑀓𑀺𑀢𑁆𑀣𑀺𑀬𑁄 𑀩𑀳𑀼𑀓𑀸𑀬𑁂𑀯.

𑀫𑀳𑀸𑀕𑁄𑀯𑀺𑀦𑁆𑀤𑀧𑀩𑁆𑀩𑀚𑁆𑀚𑀸𑀯𑀡𑁆𑀡𑀦𑀸

𑁩𑁨𑁬. 𑀘𑀸𑀭𑀺𑀓𑀁 𑀘𑀭𑀢𑀻𑀢𑀺 𑀕𑀸𑀫𑀦𑀺𑀕𑀫𑀧𑀝𑀺𑀧𑀸𑀝𑀺𑀬𑀸 𑀘𑀸𑀭𑀺𑀓𑀁 𑀘𑀭𑀢𑀺, 𑀕𑀢𑀕𑀢𑀝𑁆𑀞𑀸𑀦𑁂 ¶ 𑀩𑀼𑀤𑁆𑀥𑀓𑁄𑀮𑀸𑀳𑀮𑀁 𑀯𑀺𑀬 𑀳𑁄𑀢𑀺. 𑀫𑀦𑀼𑀲𑁆𑀲𑀸 ‘‘𑀫𑀳𑀸𑀕𑁄𑀯𑀺𑀦𑁆𑀤𑀧𑀡𑁆𑀟𑀺𑀢𑁄 𑀓𑀺𑀭 𑀆𑀕𑀘𑁆𑀙𑀢𑀻’’𑀢𑀺 𑀲𑀼𑀢𑁆𑀯𑀸 𑀧𑀼𑀭𑁂𑀢𑀭𑀫𑁂𑀯 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀫𑀕𑁆𑀕𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀏𑀦𑁆𑀢𑀺, 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀫𑀳𑁄𑀖𑁄 𑀯𑀺𑀬 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁄 𑀉𑀧𑁆𑀧𑀚𑁆𑀚𑀺. 𑀲𑀢𑁆𑀢𑀧𑀼𑀭𑁄𑀳𑀺𑀢𑀲𑁆𑀲𑀸𑀢𑀺 𑀲𑀢𑁆𑀢𑀦𑁆𑀦𑀁 𑀭𑀸𑀚𑀽𑀦𑀁 𑀧𑀼𑀭𑁄𑀳𑀺𑀢𑀲𑁆𑀲. 𑀇𑀢𑀺 𑀬𑀣𑀸 𑀏𑀢𑀭𑀳𑀺 𑀏𑀯𑀭𑀽𑀧𑁂𑀲𑀼 𑀯𑀸 𑀞𑀸𑀦𑁂𑀲𑀼 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀤𑀼𑀓𑁆𑀔𑁂 𑀉𑀧𑁆𑀧𑀦𑁆𑀦𑁂 ‘‘𑀦𑀫𑁄 𑀩𑀼𑀤𑁆𑀥𑀲𑁆𑀲𑀸’’𑀢𑀺 𑀯𑀤𑀦𑁆𑀢𑀺, 𑀏𑀯𑀁 𑀢𑀤𑀸 ‘‘𑀦𑀫𑀢𑁆𑀣𑀼 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲, 𑀦𑀫𑀢𑁆𑀣𑀼 𑀲𑀢𑁆𑀢𑀧𑀼𑀭𑁄𑀳𑀺𑀢𑀲𑁆𑀲𑀸’’𑀢𑀺 𑀯𑀤𑀦𑁆𑀢𑀺.

𑁩𑁨𑁭. 𑀫𑁂𑀢𑁆𑀢𑀸𑀲𑀳𑀕𑀢𑁂𑀦𑀸𑀢𑀺𑀆𑀤𑀺𑀦𑀸 ¶ 𑀦𑀬𑁂𑀦 𑀧𑀸𑀴𑀺𑀬𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀯 𑀆𑀕𑀢𑀸, 𑀫𑀳𑀸𑀧𑀼𑀭𑀺𑀲𑁄 𑀧𑀦 𑀲𑀩𑁆𑀩𑀸𑀧𑀺 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀘 𑀧𑀜𑁆𑀘 𑀘 𑀅𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀲𑀸𑀯𑀓𑀸𑀦𑀜𑁆𑀘 𑀩𑁆𑀭𑀳𑁆𑀫𑀮𑁄𑀓𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑀁 𑀤𑁂𑀲𑁂𑀲𑀻𑀢𑀺 𑀩𑁆𑀭𑀳𑁆𑀫𑀮𑁄𑀓𑁂 𑀩𑁆𑀭𑀳𑁆𑀫𑀼𑀦𑀸 𑀲𑀳𑀪𑀸𑀯𑀸𑀬 𑀫𑀕𑁆𑀕𑀁 𑀓𑀣𑁂𑀲𑀺.

𑁩𑁨𑁮. 𑀲𑀩𑁆𑀩𑁂𑀦𑀲𑀩𑁆𑀩𑀦𑁆𑀢𑀺 𑀬𑁂 𑀅𑀝𑁆𑀞 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀧𑀜𑁆𑀘 𑀘 𑀅𑀪𑀺𑀜𑁆𑀜𑀸𑀬𑁄 𑀦𑀺𑀩𑁆𑀩𑀢𑁆𑀢𑁂𑀲𑀼𑀁. 𑀬𑁂 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀸𑀲𑀦𑀁 𑀆𑀚𑀸𑀦𑀺𑀁𑀲𑀽𑀢𑀺 𑀬𑁂 𑀅𑀝𑁆𑀞𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀏𑀓𑀲𑀫𑀸𑀧𑀢𑁆𑀢𑀺𑀫𑁆𑀧𑀺 𑀦 𑀚𑀸𑀦𑀺𑀁𑀲𑀼, 𑀦 𑀲𑀓𑁆𑀔𑀺𑀁𑀲𑀼 𑀦𑀺𑀩𑁆𑀩𑀢𑁆𑀢𑁂𑀢𑀼𑀁. 𑀅𑀫𑁄𑀖𑀸𑀢𑀺 𑀲𑀯𑀺𑀧𑀸𑀓𑀸. 𑀅𑀯𑀜𑁆𑀛𑀸𑀢𑀺 𑀦 𑀯𑀜𑁆𑀛𑀸. 𑀲𑀩𑁆𑀩𑀦𑀺𑀳𑀻𑀦𑀁 𑀧𑀲𑀯𑀦𑁆𑀢𑀺 𑀕𑀦𑁆𑀥𑀩𑁆𑀩𑀓𑀸𑀬𑀁 ¶ 𑀧𑀲𑀯𑀺. 𑀲𑀨𑀮𑀸𑀢𑀺 𑀅𑀯𑀲𑁂𑀲𑀤𑁂𑀯𑀮𑁄𑀓𑀽𑀧𑀧𑀢𑁆𑀢𑀻𑀳𑀺 𑀲𑀸𑀢𑁆𑀣𑀸. 𑀲𑀉𑀤𑁆𑀭𑀬𑀸𑀢𑀺 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸 𑀲𑀯𑀼𑀟𑁆𑀠𑀺.

𑁩𑁨𑁯. 𑀲𑀭𑀸𑀫𑀳𑀦𑁆𑀢𑀺 𑀲𑀭𑀸𑀫𑀺 𑀅𑀳𑀁 𑀧𑀜𑁆𑀘𑀲𑀺𑀔, 𑀇𑀫𑀺𑀦𑀸 𑀓𑀺𑀭 𑀧𑀤𑁂𑀦 𑀅𑀬𑀁 𑀲𑀼𑀢𑁆𑀢𑀦𑁆𑀢𑁄 𑀩𑀼𑀤𑁆𑀥𑀪𑀸𑀲𑀺𑀢𑁄 𑀦𑀸𑀫 𑀚𑀸𑀢𑁄. 𑀦 𑀦𑀺𑀩𑁆𑀩𑀺𑀤𑀸𑀬𑀸𑀢𑀺 𑀦 𑀯𑀝𑁆𑀝𑁂 𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀣𑀸𑀬. 𑀦 𑀯𑀺𑀭𑀸𑀕𑀸𑀬𑀸𑀢𑀺 𑀦 𑀯𑀝𑁆𑀝𑁂 𑀯𑀺𑀭𑀸𑀕𑀢𑁆𑀣𑀸𑀬. 𑀦 𑀦𑀺𑀭𑁄𑀥𑀸𑀬𑀸𑀢𑀺 𑀦 𑀯𑀝𑁆𑀝𑀲𑁆𑀲 𑀦𑀺𑀭𑁄𑀥𑀢𑁆𑀣𑀸𑀬. 𑀦 𑀉𑀧𑀲𑀫𑀸𑀬𑀸𑀢𑀺 𑀦 𑀯𑀝𑁆𑀝𑀲𑁆𑀲 𑀉𑀧𑀲𑀫𑀦𑀢𑁆𑀣𑀸𑀬. 𑀦 𑀅𑀪𑀺𑀜𑁆𑀜𑀸𑀬𑀸𑀢𑀺 𑀦 𑀯𑀝𑁆𑀝𑀁 𑀅𑀪𑀺𑀚𑀸𑀦𑀦𑀢𑁆𑀣𑀸𑀬. 𑀦 𑀲𑀫𑁆𑀩𑁄𑀥𑀸𑀬𑀸𑀢𑀺 𑀦 𑀓𑀺𑀮𑁂𑀲𑀦𑀺𑀤𑁆𑀤𑀸𑀯𑀺𑀕𑀫𑁂𑀦 𑀯𑀝𑁆𑀝𑀢𑁄 𑀧𑀩𑀼𑀚𑁆𑀛𑀦𑀢𑁆𑀣𑀸𑀬. 𑀦 𑀦𑀺𑀩𑁆𑀩𑀸𑀦𑀸𑀬𑀸𑀢𑀺 𑀦 𑀅𑀫𑀢𑀦𑀺𑀩𑁆𑀩𑀸𑀦𑀢𑁆𑀣𑀸𑀬.

𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬𑀸𑀢𑀺 𑀏𑀓𑀦𑁆𑀢𑀫𑁂𑀯 𑀯𑀝𑁆𑀝𑁂 𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀣𑀸𑀬. 𑀏𑀢𑁆𑀣 𑀧𑀦 𑀦𑀺𑀩𑁆𑀩𑀺𑀤𑀸𑀬𑀸𑀢𑀺 𑀯𑀺𑀧𑀲𑁆𑀲𑀦𑀸. 𑀯𑀺𑀭𑀸𑀕𑀸𑀬𑀸𑀢𑀺 𑀫𑀕𑁆𑀕𑁄. 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬𑀸𑀢𑀺 𑀦𑀺𑀩𑁆𑀩𑀸𑀦𑀁. 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬𑀸𑀢𑀺 𑀫𑀕𑁆𑀕𑁄. 𑀦𑀺𑀩𑁆𑀩𑀸𑀦𑀸𑀬𑀸𑀢𑀺 𑀦𑀺𑀩𑁆𑀩𑀸𑀦𑀫𑁂𑀯. 𑀏𑀯𑀁 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀺𑀧𑀲𑁆𑀲𑀦𑀸, 𑀢𑀻𑀲𑀼 𑀫𑀕𑁆𑀕𑁄, 𑀢𑀻𑀲𑀼 𑀦𑀺𑀩𑁆𑀩𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀏𑀯𑀁 𑀯𑀯𑀢𑁆𑀣𑀸𑀦𑀓𑀣𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀺𑀬𑀸𑀬𑁂𑀦 𑀧𑀦 𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 ¶ 𑀫𑀕𑁆𑀕𑀯𑁂𑀯𑀘𑀦𑀸𑀦𑀺𑀧𑀺 𑀦𑀺𑀩𑁆𑀩𑀸𑀦𑀯𑁂𑀯𑀘𑀦𑀸𑀦𑀺𑀧𑀺 𑀳𑁄𑀦𑁆𑀢𑀺𑀬𑁂𑀯. 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀲𑀘𑁆𑀘𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀫𑁂𑀯.

𑁩𑁩𑁦. 𑀬𑁂 𑀦 𑀲𑀩𑁆𑀩𑁂𑀦𑀲𑀩𑁆𑀩𑀦𑁆𑀢𑀺 𑀬𑁂 𑀘𑀢𑁆𑀢𑀸𑀭𑁄𑀧𑀺 𑀅𑀭𑀺𑀬𑀫𑀕𑁆𑀕𑁂 𑀧𑀭𑀺𑀧𑀽𑀭𑁂𑀢𑀼𑀁 𑀦 𑀚𑀸𑀦𑀦𑁆𑀢𑀺, 𑀢𑀻𑀡𑀺 𑀯𑀸 𑀤𑁆𑀯𑁂 𑀯𑀸 𑀏𑀓𑀁 𑀯𑀸 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺. 𑀲𑀩𑁆𑀩𑁂𑀲𑀁𑀬𑁂𑀯 𑀇𑀫𑁂𑀲𑀁 𑀓𑀼𑀮𑀧𑀼𑀢𑁆𑀢𑀸𑀦𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀘𑀺𑀡𑁆𑀡𑀓𑀼𑀮𑀧𑀼𑀢𑁆𑀢𑀸𑀦𑀁. 𑀅𑀫𑁄𑀖𑀸…𑀧𑁂… 𑀲𑀨𑀮𑀸 𑀲𑀉𑀤𑁆𑀭𑀬𑀸𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑀪𑀕𑀯𑀦𑁆𑀢𑀁 ¶ 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸𑀢𑀺 (𑀤𑀻. 𑀦𑀺. 𑁨.𑁧𑁮𑁮) 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀘𑀺𑀢𑁆𑀢𑁂𑀦 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀯𑀸𑀘𑀸𑀬 𑀧𑀲𑀁𑀲𑀫𑀸𑀦𑁄 𑀅𑀦𑀼𑀫𑁄𑀤𑀺𑀢𑁆𑀯𑀸 𑀫𑀳𑀦𑁆𑀢𑀁 𑀅𑀜𑁆𑀚𑀮𑀺𑀁 𑀲𑀺𑀭𑀲𑁆𑀫𑀺𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀧𑀲𑀦𑁆𑀦𑀮𑀸𑀔𑀸𑀭𑀲𑁂 𑀦𑀺𑀫𑀼𑀚𑁆𑀚𑀫𑀸𑀦𑁄 𑀯𑀺𑀬 𑀤𑀲𑀩𑀮𑀲𑁆𑀲 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀚𑀸𑀮𑀦𑁆𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀦𑁆𑀤𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀢𑁆𑀣𑀯𑀦𑁆𑀢𑁄 𑀅𑀪𑀺𑀢𑁆𑀣𑀯𑀦𑁆𑀢𑁄 𑀲𑀢𑁆𑀣𑀼 𑀧𑀼𑀭𑀢𑁄 𑀅𑀦𑁆𑀢𑀭𑀥𑀸𑀬𑀺𑀢𑁆𑀯𑀸 𑀅𑀢𑁆𑀢𑀦𑁄 𑀤𑁂𑀯𑀮𑁄𑀓𑀫𑁂𑀯 𑀅𑀕𑀫𑀸𑀲𑀻𑀢𑀺.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁

𑀫𑀳𑀸𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀫𑀳𑀸𑀲𑀫𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑀦𑀺𑀤𑀸𑀦𑀯𑀡𑁆𑀡𑀦𑀸

𑁩𑁩𑁧. 𑀏𑀯𑀁 ¶ ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀲𑀫𑀬𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀫𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸 𑁋 𑀲𑀓𑁆𑀓𑁂𑀲𑀽𑀢𑀺 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑁂 𑀯𑀼𑀢𑁆𑀢𑁂𑀦 𑀉𑀧𑁆𑀧𑀢𑁆𑀢𑀺𑀦𑀬𑁂𑀦 ‘‘𑀲𑀓𑁆𑀬𑀸 𑀯𑀢, 𑀪𑁄 𑀓𑀼𑀫𑀸𑀭𑀸’’𑀢𑀺 𑀉𑀤𑀸𑀦𑀁 𑀧𑀝𑀺𑀘𑁆𑀘 𑀲𑀓𑁆𑀓𑀸𑀢𑀺 𑀮𑀤𑁆𑀥𑀦𑀸𑀫𑀸𑀦𑀁 𑀭𑀸𑀚𑀓𑀼𑀫𑀸𑀭𑀸𑀦𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀼𑀴𑁆𑀳𑀻𑀲𑀤𑁆𑀤𑁂𑀦 ‘‘𑀲𑀓𑁆𑀓𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀲𑀓𑁆𑀓𑁂𑀲𑀼 𑀚𑀦𑀧𑀤𑁂. 𑀫𑀳𑀸𑀯𑀦𑁂𑀢𑀺 𑀲𑀬𑀁𑀚𑀸𑀢𑁂 𑀅𑀭𑁄𑀧𑀺𑀢𑁂 𑀳𑀺𑀫𑀯𑀦𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑁂 𑀫𑀳𑀢𑀺 𑀯𑀦𑁂. 𑀲𑀩𑁆𑀩𑁂𑀳𑁂𑀯 𑀅𑀭𑀳𑀦𑁆𑀢𑁂𑀳𑀻𑀢𑀺 𑀇𑀫𑀁 𑀲𑀼𑀢𑁆𑀢𑀁 𑀓𑀣𑀺𑀢𑀤𑀺𑀯𑀲𑁂𑀬𑁂𑀯 𑀧𑀢𑁆𑀢𑀅𑀭𑀳𑀢𑁆𑀢𑁂𑀳𑀺.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀲𑀸𑀓𑀺𑀬𑀓𑁄𑀮𑀺𑀬𑀸 𑀓𑀺𑀭 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑀲𑁆𑀲 𑀘 𑀓𑁄𑀮𑀺𑀬𑀦𑀕𑀭𑀲𑁆𑀲 𑀘 𑀅𑀦𑁆𑀢𑀭𑁂 𑀭𑁄𑀳𑀺𑀡𑀺𑀁 𑀦𑀸𑀫 𑀦𑀤𑀺𑀁 𑀏𑀓𑁂𑀦𑁂𑀯 𑀆𑀯𑀭𑀡𑁂𑀦 𑀩𑀦𑁆𑀥𑀸𑀧𑁂𑀢𑁆𑀯𑀸 𑀲𑀲𑁆𑀲𑀸𑀦𑀺 𑀓𑀭𑁄𑀦𑁆𑀢𑀺, 𑀅𑀣 𑀚𑁂𑀝𑁆𑀞𑀫𑀽𑀮𑀫𑀸𑀲𑁂 𑀲𑀲𑁆𑀲𑁂𑀲𑀼 𑀫𑀺𑀮𑀸𑀬𑀦𑁆𑀢𑁂𑀲𑀼 𑀉𑀪𑀬𑀦𑀕𑀭𑀯𑀸𑀲𑀺𑀓𑀸𑀦𑀫𑁆𑀧𑀺 𑀓𑀫𑁆𑀫𑀓𑀭𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑀢𑁆𑀣 𑀓𑁄𑀮𑀺𑀬𑀦𑀕𑀭𑀯𑀸𑀲𑀺𑀦𑁄 𑀆𑀳𑀁𑀲𑀼 𑁋 ‘‘𑀇𑀤𑀁 𑀉𑀤𑀓𑀁 𑀉𑀪𑀢𑁄 𑀳𑀭𑀺𑀬𑀫𑀸𑀦𑀁 𑀦 𑀢𑀼𑀫𑁆𑀳𑀸𑀓𑀁 𑀦 𑀅𑀫𑁆𑀳𑀸𑀓𑀁 𑀧𑀳𑁄𑀲𑁆𑀲𑀢𑀺, 𑀅𑀫𑁆𑀳𑀸𑀓𑀁 𑀧𑀦 𑀲𑀲𑁆𑀲𑀁 𑀏𑀓𑁂𑀦 𑀉𑀤𑀓𑁂𑀦𑁂𑀯 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀢𑀺, 𑀇𑀤𑀁 𑀉𑀤𑀓𑀁 𑀅𑀫𑁆𑀳𑀸𑀓𑀁 𑀤𑁂𑀣𑀸’’𑀢𑀺. 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑀯𑀸𑀲𑀺𑀦𑁄 𑀆𑀳𑀁𑀲𑀼 𑁋 ‘‘𑀢𑀼𑀫𑁆𑀳𑁂𑀲𑀼 𑀓𑁄𑀝𑁆𑀞𑁂 𑀧𑀽𑀭𑁂𑀢𑁆𑀯𑀸 𑀞𑀺𑀢𑁂𑀲𑀼 𑀫𑀬𑀁 𑀭𑀢𑁆𑀢𑀲𑀼𑀯𑀡𑁆𑀡𑀦𑀻𑀮𑀫𑀡𑀺𑀓𑀸𑀴𑀓𑀳𑀸𑀧𑀡𑁂 𑀘 𑀕𑀳𑁂𑀢𑁆𑀯𑀸 𑀧𑀘𑁆𑀙𑀺𑀧𑀲𑀺𑀩𑁆𑀩𑀓𑀸𑀤𑀺𑀳𑀢𑁆𑀣𑀸 𑀦 𑀲𑀓𑁆𑀔𑀺𑀲𑁆𑀲𑀸𑀫 𑀢𑀼𑀫𑁆𑀳𑀸𑀓𑀁 𑀖𑀭𑀤𑁆𑀯𑀸𑀭𑁂 𑀯𑀺𑀘𑀭𑀺𑀢𑀼𑀁, 𑀅𑀫𑁆𑀳𑀸𑀓𑀫𑁆𑀧𑀺 𑀲𑀲𑁆𑀲𑀁 𑀏𑀓𑁂𑀦𑁂𑀯 𑀉𑀤𑀓𑁂𑀦 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀢𑀺, 𑀇𑀤𑀁 𑀉𑀤𑀓𑀁 𑀅𑀫𑁆𑀳𑀸𑀓𑀁 𑀤𑁂𑀣𑀸’’𑀢𑀺. ‘‘𑀦 ¶ 𑀫𑀬𑀁 𑀤𑀲𑁆𑀲𑀸𑀫𑀸’’𑀢𑀺. ‘‘𑀫𑀬𑀫𑁆𑀧𑀺 𑀦 𑀤𑀲𑁆𑀲𑀸𑀫𑀸’’𑀢𑀺. 𑀏𑀯𑀁 𑀓𑀮𑀳𑀁 𑀯𑀟𑁆𑀠𑁂𑀢𑁆𑀯𑀸 𑀏𑀓𑁄 𑀉𑀝𑁆𑀞𑀸𑀬 𑀏𑀓𑀲𑁆𑀲 𑀧𑀳𑀸𑀭𑀁 𑀅𑀤𑀸𑀲𑀺, 𑀲𑁄𑀧𑀺 𑀅𑀜𑁆𑀜𑀲𑁆𑀲𑀸𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀧𑀳𑀭𑀺𑀢𑁆𑀯𑀸 𑀭𑀸𑀚𑀓𑀼𑀮𑀸𑀦𑀁 𑀚𑀸𑀢𑀺𑀁 𑀖𑀝𑁆𑀝𑁂𑀢𑁆𑀯𑀸 𑀓𑀮𑀳𑀁 𑀯𑀟𑁆𑀠𑀬𑀺𑀁𑀲𑀼.

𑀓𑁄𑀮𑀺𑀬𑀓𑀫𑁆𑀫𑀓𑀭𑀸 𑀯𑀤𑀦𑁆𑀢𑀺 𑁋 ‘‘𑀢𑀼𑀫𑁆𑀳𑁂 𑀓𑀧𑀺𑀮𑀯𑀢𑁆𑀣𑀼𑀯𑀸𑀲𑀺𑀓𑁂 𑀕𑀳𑁂𑀢𑁆𑀯𑀸 𑀕𑀚𑁆𑀚𑀣, 𑀬𑁂 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀬𑁄 𑀯𑀺𑀬 𑀅𑀢𑁆𑀢𑀦𑁄 𑀪𑀕𑀺𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀲𑀺𑀁𑀲𑀼. 𑀏𑀢𑁂𑀲𑀁 𑀳𑀢𑁆𑀣𑀺𑀦𑁄 𑀘 𑀅𑀲𑁆𑀲𑀸 𑀘 𑀨𑀮𑀓𑀸𑀯𑀼𑀥𑀸𑀦𑀺 ¶ 𑀘 𑀅𑀫𑁆𑀳𑀸𑀓𑀁 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? 𑀲𑀸𑀓𑀺𑀬𑀓𑀫𑁆𑀫𑀓𑀭𑀸𑀧𑀺 𑀯𑀤𑀦𑁆𑀢𑀺 𑁋 ‘‘𑀢𑀼𑀫𑁆𑀳𑁂 𑀤𑀸𑀦𑀺 𑀓𑀼𑀝𑁆𑀞𑀺𑀦𑁄 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀕𑀚𑁆𑀚𑀣, 𑀬𑁂 𑀅𑀦𑀸𑀣𑀸 𑀦𑀺𑀕𑁆𑀕𑀢𑀺𑀓𑀸 𑀢𑀺𑀭𑀘𑁆𑀙𑀸𑀦𑀸 𑀯𑀺𑀬 𑀓𑁄𑀮𑀭𑀼𑀓𑁆𑀔𑁂 𑀯𑀲𑀺𑀁𑀲𑀼, 𑀏𑀢𑁂𑀲𑀁 𑀳𑀢𑁆𑀣𑀺𑀦𑁄 𑀘 𑀅𑀲𑁆𑀲𑀸 𑀘 𑀨𑀮𑀓𑀸𑀯𑀼𑀥𑀸𑀦𑀺 𑀘 𑀅𑀫𑁆𑀳𑀸𑀓𑀁 ¶ 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? 𑀢𑁂 𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀦𑀺𑀬𑀼𑀢𑁆𑀢𑀅𑀫𑀘𑁆𑀘𑀸𑀦𑀁 𑀓𑀣𑁂𑀲𑀼𑀁, 𑀅𑀫𑀘𑁆𑀘𑀸 𑀭𑀸𑀚𑀓𑀼𑀮𑀸𑀦𑀁 𑀓𑀣𑁂𑀲𑀼𑀁, 𑀢𑀢𑁄 𑀲𑀸𑀓𑀺𑀬𑀸 𑁋 ‘‘𑀪𑀕𑀺𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀸𑀲𑀺𑀓𑀸𑀦𑀁 𑀣𑀸𑀫𑀜𑁆𑀘 𑀩𑀮𑀜𑁆𑀘 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺 𑀬𑀼𑀤𑁆𑀥𑀲𑀚𑁆𑀚𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀓𑁄𑀮𑀺𑀬𑀸𑀧𑀺 𑁋 ‘‘𑀓𑁄𑀮𑀭𑀼𑀓𑁆𑀔𑀯𑀸𑀲𑀻𑀦𑀁 𑀣𑀸𑀫𑀜𑁆𑀘 𑀩𑀮𑀜𑁆𑀘 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺 𑀬𑀼𑀤𑁆𑀥𑀲𑀚𑁆𑀚𑀸 𑀦𑀺𑀓𑁆𑀔𑀫𑀺𑀁𑀲𑀼.

𑀪𑀕𑀯𑀸𑀧𑀺 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑁂𑀯 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀇𑀫𑁂 𑀏𑀯𑀁 𑀬𑀼𑀤𑁆𑀥𑀲𑀚𑁆𑀚𑁂 𑀦𑀺𑀓𑁆𑀔𑀫𑀦𑁆𑀢𑁂 𑀅𑀤𑁆𑀤𑀲. 𑀤𑀺𑀲𑁆𑀯𑀸 𑁋 ‘‘𑀫𑀬𑀺 𑀕𑀢𑁂 𑀅𑀬𑀁 𑀓𑀮𑀳𑁄 𑀯𑀽𑀧𑀲𑀫𑀺𑀲𑁆𑀲𑀢𑀺 𑀦𑀼 𑀔𑁄 𑀉𑀤𑀸𑀳𑀼 𑀦𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑁋 ‘‘𑀅𑀳𑀫𑁂𑀢𑁆𑀣 𑀕𑀦𑁆𑀢𑁆𑀯𑀸 𑀓𑀮𑀳𑀯𑀽𑀧𑀲𑀫𑀦𑀢𑁆𑀣𑀁 𑀢𑀻𑀡𑀺 𑀚𑀸𑀢𑀓𑀸𑀦𑀺 𑀓𑀣𑁂𑀲𑁆𑀲𑀸𑀫𑀺, 𑀢𑀢𑁄 𑀓𑀮𑀳𑁄 𑀯𑀽𑀧𑀲𑀫𑀺𑀲𑁆𑀲𑀢𑀺. 𑀅𑀣 𑀲𑀸𑀫𑀕𑁆𑀕𑀺𑀤𑀻𑀧𑀦𑀢𑁆𑀣𑀸𑀬 𑀤𑁆𑀯𑁂 𑀚𑀸𑀢𑀓𑀸𑀦𑀺 𑀓𑀣𑁂𑀢𑁆𑀯𑀸 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀁 𑀤𑁂𑀲𑁂𑀲𑁆𑀲𑀸𑀫𑀺. 𑀤𑁂𑀲𑀦𑀁 𑀲𑀼𑀢𑁆𑀯𑀸 𑀉𑀪𑀬𑀦𑀕𑀭𑀯𑀸𑀲𑀺𑀦𑁄𑀧𑀺 𑀅𑀟𑁆𑀠𑀢𑀺𑀬𑀸𑀦𑀺 𑀅𑀟𑁆𑀠𑀢𑀺𑀬𑀸𑀦𑀺 𑀓𑀼𑀫𑀸𑀭𑀲𑀢𑀸𑀦𑀺 𑀤𑀲𑁆𑀲𑀦𑁆𑀢𑀺, 𑀅𑀳𑀁 𑀢𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀢𑀤𑀸 𑀫𑀳𑀸𑀲𑀫𑀸𑀕𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀫𑀓𑀸𑀲𑀺. 𑀢𑀲𑁆𑀫𑀸 𑀇𑀫𑁂𑀲𑀼 𑀬𑀼𑀤𑁆𑀥𑀲𑀚𑁆𑀚𑁂𑀲𑀼 𑀦𑀺𑀓𑁆𑀔𑀫𑀦𑁆𑀢𑁂𑀲𑀼 𑀓𑀲𑁆𑀲𑀘𑀺 𑀅𑀦𑀸𑀭𑁄𑀘𑁂𑀢𑁆𑀯𑀸 𑀲𑀬𑀫𑁂𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀕𑀦𑁆𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀲𑁂𑀦𑀸𑀦𑀁 𑀅𑀦𑁆𑀢𑀭𑁂 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀺𑀲𑀻𑀤𑀺.

𑀓𑀧𑀺𑀮𑀯𑀢𑁆𑀣𑀼𑀯𑀸𑀲𑀺𑀦𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸𑀯 𑁋 ‘‘𑀅𑀫𑁆𑀳𑀸𑀓𑀁 𑀜𑀸𑀢𑀺𑀲𑁂𑀝𑁆𑀞𑁄 𑀲𑀢𑁆𑀣𑀸 𑀆𑀕𑀢𑁄, 𑀤𑀺𑀝𑁆𑀞𑁄 𑀦𑀼 𑀔𑁄 𑀢𑁂𑀦 𑀅𑀫𑁆𑀳𑀸𑀓𑀁 𑀓𑀮𑀳𑀓𑀸𑀭𑀡𑀪𑀸𑀯𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀦 𑀔𑁄 𑀧𑀦 𑀲𑀓𑁆𑀓𑀸 𑀪𑀕𑀯𑀢𑀺 𑀆𑀕𑀢𑁂 𑀅𑀫𑁆𑀳𑁂𑀳𑀺 𑀧𑀭𑀲𑁆𑀲 𑀲𑀭𑀻𑀭𑁂 𑀲𑀢𑁆𑀣𑀁 𑀧𑀸𑀢𑁂𑀢𑀼𑀁, 𑀓𑁄𑀮𑀺𑀬𑀦𑀕𑀭𑀯𑀸𑀲𑀺𑀦𑁄 𑀅𑀫𑁆𑀳𑁂 ¶ 𑀳𑀦𑀦𑁆𑀢𑀼 𑀯𑀸 𑀧𑀘𑀦𑁆𑀢𑀼 𑀯𑀸’’𑀢𑀺 𑀆𑀯𑀼𑀥𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀓𑁄𑀮𑀺𑀬𑀦𑀕𑀭𑀯𑀸𑀲𑀺𑀦𑁄𑀧𑀺 𑀢𑀣𑁂𑀯 𑀘𑀺𑀦𑁆𑀢𑁂𑀢𑁆𑀯𑀸 𑀆𑀯𑀼𑀥𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼.

𑀪𑀕𑀯𑀸 𑀚𑀸𑀦𑀦𑁆𑀢𑁄𑀯 𑁋 ‘‘𑀓𑀲𑁆𑀫𑀸 𑀆𑀕𑀢𑀢𑁆𑀣 𑀫𑀳𑀸𑀭𑀸𑀚𑀸’’𑀢𑀺 𑀧𑀼𑀘𑁆𑀙𑀺. 𑀪𑀕𑀯𑀸, 𑀦 𑀢𑀺𑀢𑁆𑀣𑀓𑀻𑀴𑀸𑀬 𑀦 𑀧𑀩𑁆𑀩𑀢𑀓𑀻𑀴𑀸𑀬 𑀦 𑀦𑀤𑀻𑀓𑀻𑀴𑀸𑀬 𑀦 𑀕𑀺𑀭𑀺𑀤𑀲𑁆𑀲𑀦𑀢𑁆𑀣𑀁, 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀲𑀗𑁆𑀕𑀸𑀫𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀆𑀕𑀢𑀫𑁆𑀳𑀸𑀢𑀺. 𑀓𑀺𑀁 𑀦𑀺𑀲𑁆𑀲𑀸𑀬 𑀯𑁄 𑀓𑀮𑀳𑁄 𑀫𑀳𑀸𑀭𑀸𑀚𑀸𑀢𑀺? 𑀉𑀤𑀓𑀁, 𑀪𑀦𑁆𑀢𑁂𑀢𑀺. 𑀉𑀤𑀓𑀁 𑀓𑀺𑀁 𑀅𑀕𑁆𑀖𑀢𑀺 𑀫𑀳𑀸𑀭𑀸𑀚𑀸𑀢𑀺? 𑀅𑀧𑁆𑀧𑀕𑁆𑀖𑀁, 𑀪𑀦𑁆𑀢𑁂𑀢𑀺. 𑀧𑀣𑀯𑀻 𑀦𑀸𑀫 𑀓𑀺𑀁 𑀅𑀕𑁆𑀖𑀢𑀺 𑀫𑀳𑀸𑀭𑀸𑀚𑀸𑀢𑀺? 𑀅𑀦𑀕𑁆𑀖𑀸, 𑀪𑀦𑁆𑀢𑁂𑀢𑀺. 𑀔𑀢𑁆𑀢𑀺𑀬𑀸 𑀓𑀺𑀁 𑀅𑀕𑁆𑀖𑀦𑁆𑀢𑀺 𑀫𑀳𑀸𑀭𑀸𑀚𑀸𑀢𑀺? 𑀔𑀢𑁆𑀢𑀺𑀬𑀸 𑀦𑀸𑀫 𑀅𑀦𑀕𑁆𑀖𑀸 𑀪𑀦𑁆𑀢𑁂𑀢𑀺. 𑀅𑀧𑁆𑀧𑀫𑀽𑀮𑀓𑀁 𑀉𑀤𑀓𑀁 𑀦𑀺𑀲𑁆𑀲𑀸𑀬 𑀓𑀺𑀫𑀢𑁆𑀣𑀁 𑀅𑀦𑀕𑁆𑀖𑁂 𑀔𑀢𑁆𑀢𑀺𑀬𑁂 𑀦𑀸𑀲𑁂𑀣, 𑀫𑀳𑀸𑀭𑀸𑀚𑀸𑀢𑀺? ‘‘𑀓𑀮𑀳𑁂 𑀅𑀲𑁆𑀲𑀸𑀤𑁄 𑀦𑀸𑀫 𑀦𑀢𑁆𑀣𑀺, 𑀓𑀮𑀳𑀯𑀲𑁂𑀦 𑀫𑀳𑀸𑀭𑀸𑀚𑀸 𑀅𑀝𑁆𑀞𑀸𑀦𑁂 𑀯𑁂𑀭𑀁 𑀓𑀢𑁆𑀯𑀸 𑀏𑀓𑀸𑀬 𑀭𑀼𑀓𑁆𑀔𑀤𑁂𑀯𑀢𑀸𑀬 𑀓𑀸𑀴𑀲𑀻𑀳𑁂𑀦 𑀲𑀤𑁆𑀥𑀺𑀁 𑀩𑀤𑁆𑀥𑀸𑀖𑀸𑀢𑁄 ¶ 𑀲𑀓𑀮𑀫𑁆𑀧𑀺 ¶ 𑀇𑀫𑀁 𑀓𑀧𑁆𑀧𑀁 𑀅𑀦𑀼𑀧𑁆𑀧𑀢𑁆𑀢𑁄𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀨𑀦𑁆𑀤𑀦𑀚𑀸𑀢𑀓𑀁 𑀓𑀣𑁂𑀲𑀺. 𑀢𑀢𑁄 ‘‘𑀧𑀭𑀧𑀢𑁆𑀢𑀺𑀬𑁂𑀦 𑀦𑀸𑀫 𑀫𑀳𑀸𑀭𑀸𑀚𑀸 𑀦 𑀪𑀯𑀺𑀢𑀩𑁆𑀩𑀁. 𑀧𑀭𑀧𑀢𑁆𑀢𑀺𑀬𑀸 𑀳𑀼𑀢𑁆𑀯𑀸 𑀳𑀺 𑀏𑀓𑀲𑁆𑀲 𑀲𑀲𑀓𑀲𑁆𑀲 𑀓𑀣𑀸𑀬 𑀢𑀺𑀬𑁄𑀚𑀦𑀲𑀳𑀲𑁆𑀲𑀯𑀺𑀢𑁆𑀣𑀢𑁂 𑀳𑀺𑀫𑀯𑀦𑁆𑀢𑁂 𑀘𑀢𑀼𑀧𑁆𑀧𑀤𑀕𑀡𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀺𑀦𑁄 𑀅𑀳𑁂𑀲𑀼𑀁. 𑀢𑀲𑁆𑀫𑀸 𑀧𑀭𑀧𑀢𑁆𑀢𑀺𑀬𑁂𑀦 𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀧𑀣𑀯𑀻𑀉𑀦𑁆𑀤𑁆𑀭𑀺𑀬𑀚𑀸𑀢𑀓𑀁 𑀓𑀣𑁂𑀲𑀺. 𑀢𑀢𑁄 𑁋 ‘‘𑀓𑀤𑀸𑀘𑀺, 𑀫𑀳𑀸𑀭𑀸𑀚𑀸, 𑀤𑀼𑀩𑁆𑀩𑀮𑁄𑀧𑀺 𑀫𑀳𑀩𑁆𑀩𑀮𑀲𑁆𑀲 𑀭𑀦𑁆𑀥𑀁 𑀯𑀺𑀯𑀭𑀁 𑀧𑀲𑁆𑀲𑀢𑀺, 𑀓𑀤𑀸𑀘𑀺 𑀫𑀳𑀩𑁆𑀩𑀮𑁄 𑀤𑀼𑀩𑁆𑀩𑀮𑀲𑁆𑀲. 𑀮𑀝𑀼𑀓𑀺𑀓𑀸𑀧𑀺 𑀳𑀺 𑀲𑀓𑀼𑀡𑀺𑀓𑀸 𑀳𑀢𑁆𑀣𑀺𑀦𑀸𑀕𑀁 𑀖𑀸𑀢𑁂𑀲𑀻’’𑀢𑀺 𑀯𑀢𑁆𑀯𑀸 𑀮𑀝𑀼𑀓𑀺𑀓𑀚𑀸𑀢𑀓𑀁 𑀓𑀣𑁂𑀲𑀺. 𑀏𑀯𑀁 𑀓𑀮𑀳𑀯𑀽𑀧𑀲𑀫𑀢𑁆𑀣𑀸𑀬 𑀢𑀻𑀡𑀺 𑀚𑀸𑀢𑀓𑀸𑀦𑀺 𑀓𑀣𑁂𑀢𑁆𑀯𑀸 𑀲𑀸𑀫𑀕𑁆𑀕𑀺𑀧𑀭𑀺𑀤𑀻𑀧𑀦𑀢𑁆𑀣𑀸𑀬 𑀤𑁆𑀯𑁂 𑀚𑀸𑀢𑀓𑀸𑀦𑀺 𑀓𑀣𑁂𑀲𑀺. 𑀓𑀣𑀁? 𑀲𑀫𑀕𑁆𑀕𑀸𑀦𑀜𑁆𑀳𑀺 𑀫𑀳𑀸𑀭𑀸𑀚𑀸 𑀓𑁄𑀘𑀺 𑀑𑀢𑀸𑀭𑀁 𑀦𑀸𑀫 𑀧𑀲𑁆𑀲𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀯𑀢𑁆𑀯𑀸 𑀭𑀼𑀓𑁆𑀔𑀥𑀫𑁆𑀫𑀚𑀸𑀢𑀓𑀁 𑀓𑀣𑁂𑀲𑀺. 𑀢𑀢𑁄 ‘‘𑀲𑀫𑀕𑁆𑀕𑀸𑀦𑀁 𑀫𑀳𑀸𑀭𑀸𑀚𑀸 𑀓𑁄𑀘𑀺 𑀯𑀺𑀯𑀭𑀁 𑀧𑀲𑁆𑀲𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀬𑀤𑀸 𑀧𑀦 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀸𑀤𑀫𑀓𑀁𑀲𑀼, 𑀅𑀣 𑀢𑁂 𑀦𑁂𑀲𑀸𑀤𑀧𑀼𑀢𑁆𑀢𑁄 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀆𑀤𑀸𑀬 𑀕𑀢𑁄. 𑀯𑀺𑀯𑀸𑀤𑁂 𑀅𑀲𑁆𑀲𑀸𑀤𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀯𑀝𑁆𑀝𑀓𑀚𑀸𑀢𑀓𑀁 𑀓𑀣𑁂𑀲𑀺. 𑀏𑀯𑀁 𑀇𑀫𑀸𑀦𑀺 𑀧𑀜𑁆𑀘 𑀚𑀸𑀢𑀓𑀸𑀦𑀺 𑀓𑀣𑁂𑀢𑁆𑀯𑀸 𑀅𑀯𑀲𑀸𑀦𑁂 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀁 𑀓𑀣𑁂𑀲𑀺.

𑀭𑀸𑀚𑀸𑀦𑁄 ¶ 𑀧𑀲𑀦𑁆𑀦𑀸 𑁋 ‘‘𑀲𑀘𑁂 𑀲𑀢𑁆𑀣𑀸 𑀦𑀸𑀕𑀫𑀺𑀲𑁆𑀲, 𑀫𑀬𑀁 𑀲𑀳𑀢𑁆𑀣𑀸 𑀅𑀜𑁆𑀜𑀫𑀜𑁆𑀜𑀁𑀬𑁂𑀯 𑀯𑀥𑀺𑀢𑁆𑀯𑀸 𑀮𑁄𑀳𑀺𑀢𑀦𑀤𑀺𑀁 𑀧𑀯𑀢𑁆𑀢𑀬𑀺𑀲𑁆𑀲𑀸𑀫, 𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀪𑀸𑀢𑀭𑁄 𑀕𑁂𑀳𑀤𑁆𑀯𑀸𑀭𑁂 𑀦 𑀧𑀲𑁆𑀲𑁂𑀬𑁆𑀬𑀸𑀫, 𑀲𑀸𑀲𑀦𑀧𑀝𑀺𑀲𑀸𑀲𑀦𑀫𑁆𑀧𑀺 𑀦𑁄 𑀆𑀳𑀭𑀡𑀓𑁄 𑀦 𑀪𑀯𑀺𑀲𑁆𑀲𑀢𑀺. 𑀲𑀢𑁆𑀣𑀸𑀭𑀁 𑀦𑀺𑀲𑁆𑀲𑀸𑀬 𑀦𑁄 𑀚𑀻𑀯𑀺𑀢𑀁 𑀮𑀤𑁆𑀥𑀁. 𑀲𑀘𑁂 𑀧𑀦 𑀲𑀢𑁆𑀣𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺𑀲𑁆𑀲, 𑀤𑁆𑀯𑀺𑀲𑀳𑀲𑁆𑀲𑀤𑀻𑀧𑀧𑀭𑀺𑀯𑀸𑀭𑁂𑀲𑀼 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀭𑀚𑁆𑀚𑀫𑀲𑁆𑀲 𑀳𑀢𑁆𑀣𑀕𑀢𑀁 𑀅𑀪𑀯𑀺𑀲𑁆𑀲, 𑀅𑀢𑀺𑀭𑁂𑀓𑀲𑀳𑀲𑁆𑀲𑀁 𑀔𑁄 𑀧𑀦𑀲𑁆𑀲 𑀧𑀼𑀢𑁆𑀢𑀸 𑀅𑀪𑀯𑀺𑀲𑁆𑀲𑀁𑀲𑀼, 𑀢𑀢𑁄 𑀔𑀢𑁆𑀢𑀺𑀬𑀧𑀭𑀺𑀯𑀸𑀭𑁄𑀯 𑀅𑀯𑀺𑀘𑀭𑀺𑀲𑁆𑀲. 𑀢𑀁 𑀔𑁄 𑀧𑀦𑁂𑀲 𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀫𑁆𑀩𑁄𑀥𑀺𑀁 𑀧𑀢𑁆𑀢𑁄, 𑀇𑀤𑀸𑀦𑀺𑀧𑀺 𑀔𑀢𑁆𑀢𑀺𑀬𑀧𑀭𑀺𑀯𑀸𑀭𑁄𑀬𑁂𑀯 𑀯𑀺𑀘𑀭𑀢𑀽’’𑀢𑀺 𑀉𑀪𑀬𑀦𑀕𑀭𑀯𑀸𑀲𑀺𑀦𑁄 𑀅𑀟𑁆𑀠𑀢𑀺𑀬𑀸𑀦𑀺 𑀅𑀟𑁆𑀠𑀢𑀺𑀬𑀸𑀦𑀺 𑀓𑀼𑀫𑀸𑀭𑀲𑀢𑀸𑀦𑀺 𑀅𑀤𑀁𑀲𑀼. 𑀪𑀕𑀯𑀸 𑀢𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀫𑀳𑀸𑀯𑀦𑀁 𑀅𑀕𑀫𑀸𑀲𑀺. 𑀢𑁂𑀲𑀁 𑀕𑀭𑀼𑀕𑀸𑀭𑀯𑀯𑀲𑁂𑀦 𑀦 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀧𑀩𑁆𑀩𑀚𑀺𑀢𑀸𑀦𑀁 𑀅𑀦𑀪𑀺𑀭𑀢𑀺 𑀉𑀧𑁆𑀧𑀚𑁆𑀚𑀺. 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬𑁄𑀧𑀺 𑀦𑁂𑀲𑀁 ‘‘𑀅𑀬𑁆𑀬𑀧𑀼𑀢𑁆𑀢𑀸 𑀉𑀓𑁆𑀓𑀡𑁆𑀞𑀦𑁆𑀢𑀼, 𑀖𑀭𑀸𑀯𑀸𑀲𑁄 𑀦 𑀲𑀡𑁆𑀞𑀸𑀢𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀲𑀸𑀲𑀦𑀁 𑀧𑁂𑀲𑁂𑀦𑁆𑀢𑀺. 𑀢𑁂 𑀅𑀢𑀺𑀭𑁂𑀓𑀢𑀭𑀁 𑀉𑀓𑁆𑀓𑀡𑁆𑀞𑀺𑀁𑀲𑀼.

𑀪𑀕𑀯𑀸 𑀆𑀯𑀚𑁆𑀚𑀦𑁆𑀢𑁄 𑀢𑁂𑀲𑀁 𑀅𑀦𑀪𑀺𑀭𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀇𑀫𑁂 𑀪𑀺𑀓𑁆𑀔𑀽 𑀫𑀸𑀤𑀺𑀲𑁂𑀦 𑀩𑀼𑀤𑁆𑀥𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀯𑀲𑀦𑁆𑀢𑀸 𑀉𑀓𑁆𑀓𑀡𑁆𑀞𑀦𑁆𑀢𑀺, 𑀳𑀦𑁆𑀤 𑀦𑁂𑀲𑀁 𑀓𑀼𑀡𑀸𑀮𑀤𑀳𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀢𑀢𑁆𑀣 𑀦𑁂𑀢𑁆𑀯𑀸 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀲𑁆𑀲𑀸𑀫𑀻’’𑀢𑀺 ¶ 𑀓𑀼𑀡𑀸𑀮𑀤𑀳𑀲𑁆𑀲 𑀯𑀡𑁆𑀡𑀁 𑀓𑀣𑁂𑀲𑀺. 𑀢𑁂 𑀢𑀁 𑀤𑀝𑁆𑀞𑀼𑀓𑀸𑀫𑀸 𑀅𑀳𑁂𑀲𑀼𑀁. 𑀤𑀝𑁆𑀞𑀼𑀓𑀸𑀫𑀢𑁆𑀣, 𑀪𑀺𑀓𑁆𑀔𑀯𑁂, 𑀓𑀼𑀡𑀸𑀮𑀤𑀳𑀦𑁆𑀢𑀺? 𑀆𑀫 𑀪𑀕𑀯𑀸𑀢𑀺. 𑀬𑀤𑀺 𑀏𑀯𑀁, 𑀏𑀣, 𑀕𑀘𑁆𑀙𑀸𑀫𑀸𑀢𑀺. 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀪𑀕𑀯𑀸 𑀕𑀫𑀦𑀝𑁆𑀞𑀸𑀦𑀁 𑀫𑀬𑀁 𑀓𑀣𑀁 𑀕𑀫𑀺𑀲𑁆𑀲𑀸𑀫𑀸𑀢𑀺? 𑀢𑀼𑀫𑁆𑀳𑁂 𑀕𑀦𑁆𑀢𑀼𑀓𑀸𑀫𑀸 𑀳𑁄𑀣, 𑀅𑀳𑀁 𑀫𑀫𑀸𑀦𑀼𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻𑀢𑀺. 𑀲𑀸𑀥𑀼, 𑀪𑀦𑁆𑀢𑁂𑀢𑀺. 𑀅𑀣 𑀪𑀕𑀯𑀸 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 ¶ 𑀓𑀼𑀡𑀸𑀮𑀤𑀳𑁂 𑀧𑀢𑀺𑀝𑁆𑀞𑀸𑀬 𑀢𑁂 𑀪𑀺𑀓𑁆𑀔𑀽 𑀆𑀳 𑁋 ‘‘𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀓𑀼𑀡𑀸𑀮𑀤𑀳𑁂 𑀬𑁂𑀲𑀁 𑀫𑀘𑁆𑀙𑀸𑀦𑀁 𑀦𑀸𑀫𑀁 𑀦 𑀚𑀸𑀦𑀸𑀣, 𑀢𑁂𑀲𑀁 𑀦𑀸𑀫𑀁 𑀧𑀼𑀘𑁆𑀙𑀣𑀸’’𑀢𑀺.

𑀢𑁂 𑀧𑀼𑀘𑁆𑀙𑀺𑀁𑀲𑀼, 𑀪𑀕𑀯𑀸 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀺𑀢𑀁 𑀓𑀣𑁂𑀲𑀺. 𑀦 𑀓𑁂𑀯𑀮𑀁 𑀫𑀘𑁆𑀙𑀸𑀦𑀁𑀬𑁂𑀯, 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀭𑀼𑀓𑁆𑀔𑀸𑀦𑀫𑁆𑀧𑀺 𑀧𑀩𑁆𑀩𑀢𑀧𑀸𑀤𑁂 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀲𑀓𑀼𑀡𑀸𑀦𑀫𑁆𑀧𑀺 𑀦𑀸𑀫𑀸𑀦𑀺 𑀧𑀼𑀘𑁆𑀙𑀸𑀧𑁂𑀢𑁆𑀯𑀸 𑀓𑀣𑁂𑀲𑀺. 𑀅𑀣 𑀤𑁆𑀯𑀻𑀳𑀺 𑀲𑀓𑀼𑀡𑁂𑀳𑀺 𑀫𑀼𑀔𑀢𑀼𑀡𑁆𑀟𑀓𑁂𑀦 𑀟𑀁𑀲𑀺𑀢𑁆𑀯𑀸 𑀕𑀳𑀺𑀢𑀤𑀡𑁆𑀟𑀓𑁂 𑀦𑀺𑀲𑀺𑀦𑁆𑀦𑁄 𑀓𑀼𑀡𑀸𑀮𑀲𑀓𑀼𑀡𑀭𑀸𑀚𑀸 𑀧𑀼𑀭𑀢𑁄 𑀧𑀘𑁆𑀙𑀢𑁄 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀲𑀓𑀼𑀡𑀲𑀗𑁆𑀖𑀧𑀭𑀺𑀯𑀼𑀢𑁄 𑀆𑀕𑀘𑁆𑀙𑀢𑀺. 𑀪𑀺𑀓𑁆𑀔𑀽 𑀢𑀁 𑀤𑀺𑀲𑁆𑀯𑀸 𑁋 ‘‘𑀏𑀲, 𑀪𑀦𑁆𑀢𑁂, 𑀇𑀫𑁂𑀲𑀁 𑀲𑀓𑀼𑀡𑀸𑀦𑀁 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺, 𑀧𑀭𑀺𑀯𑀸𑀭𑀸 𑀏𑀢𑁂 𑀏𑀢𑀲𑁆𑀲𑀸’’𑀢𑀺 ¶ 𑀫𑀜𑁆𑀜𑀸𑀫𑀸𑀢𑀺. 𑀏𑀯𑀫𑁂𑀯, 𑀪𑀺𑀓𑁆𑀔𑀯𑁂, 𑀅𑀬𑀫𑁆𑀧𑀺 𑀫𑀫 𑀯𑀁𑀲𑁄 𑀫𑀫 𑀧𑀯𑁂𑀡𑀻𑀢𑀺. 𑀇𑀤𑀸𑀦𑀺 𑀢𑀸𑀯 𑀫𑀬𑀁, 𑀪𑀦𑁆𑀢𑁂, 𑀏𑀢𑁂 𑀲𑀓𑀼𑀡𑁂 𑀧𑀲𑁆𑀲𑀸𑀫. 𑀬𑀁 𑀧𑀦 𑀪𑀕𑀯𑀸 ‘‘𑀅𑀬𑀫𑁆𑀧𑀺 𑀫𑀫 𑀯𑀁𑀲𑁄 𑀫𑀫 𑀧𑀯𑁂𑀡𑀻’’𑀢𑀺 𑀆𑀳, 𑀢𑀁 𑀲𑁄𑀢𑀼𑀓𑀸𑀫𑀫𑁆𑀳𑀸𑀢𑀺. 𑀲𑁄𑀢𑀼𑀓𑀸𑀫𑀢𑁆𑀣 𑀪𑀺𑀓𑁆𑀔𑀯𑁂𑀢𑀺? 𑀆𑀫, 𑀪𑀕𑀯𑀸𑀢𑀺. 𑀢𑁂𑀦 𑀳𑀺 𑀲𑀼𑀡𑀸𑀣𑀸𑀢𑀺 𑀢𑀻𑀳𑀺 𑀕𑀸𑀣𑀸𑀲𑀢𑁂𑀳𑀺 𑀫𑀡𑁆𑀟𑁂𑀢𑁆𑀯𑀸 𑀓𑀼𑀡𑀸𑀮𑀚𑀸𑀢𑀓𑀁 𑀓𑀣𑁂𑀦𑁆𑀢𑁄 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀩𑁆𑀩𑁂𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀫𑀕𑁆𑀕𑁂𑀦𑁂𑀯 𑀘 𑀦𑁂𑀲𑀁 𑀇𑀤𑁆𑀥𑀺𑀧𑀺 𑀆𑀕𑀢𑀸. 𑀪𑀕𑀯𑀸 𑁋 ‘‘𑀳𑁄𑀢𑀼 𑀢𑀸𑀯 𑀏𑀢𑁆𑀢𑀓𑀁 𑀏𑀢𑁂𑀲𑀁 𑀪𑀺𑀓𑁆𑀔𑀽𑀦’’𑀦𑁆𑀢𑀺 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀫𑀳𑀸𑀯𑀦𑀫𑁂𑀯 𑀅𑀕𑀫𑀸𑀲𑀺. 𑀢𑁂𑀧𑀺 𑀪𑀺𑀓𑁆𑀔𑀽 𑀕𑀫𑀦𑀓𑀸𑀮𑁂 𑀤𑀲𑀩𑀮𑀲𑁆𑀲 𑀆𑀦𑀼𑀪𑀸𑀯𑁂𑀦 𑀕𑀦𑁆𑀢𑁆𑀯𑀸 𑀆𑀕𑀫𑀦𑀓𑀸𑀮𑁂 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀫𑀳𑀸𑀯𑀦𑁂 𑀑𑀢𑀭𑀺𑀁𑀲𑀼.

𑀪𑀕𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 𑁋 ‘‘𑀏𑀣, 𑀪𑀺𑀓𑁆𑀔𑀯𑁂, 𑀦𑀺𑀲𑀻𑀤𑀣, 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀯𑀚𑁆𑀛𑀸𑀦𑀁 𑀯𑁄 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑀺. 𑀪𑀺𑀓𑁆𑀔𑀽 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀪𑀕𑀯𑀸 𑀅𑀫𑁆𑀳𑀸𑀓𑀁 𑀅𑀦𑀪𑀺𑀭𑀢𑀪𑀸𑀯𑀁 𑀜𑀢𑁆𑀯𑀸 𑀓𑀼𑀡𑀸𑀮𑀤𑀳𑀁 𑀦𑁂𑀢𑁆𑀯𑀸 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀲𑀺, 𑀢𑀢𑁆𑀣 𑀲𑁄𑀢𑀸𑀧𑀢𑁆𑀢𑀺𑀨𑀮𑀧𑁆𑀧𑀢𑁆𑀢𑀸𑀦𑀁 𑀦𑁄 𑀇𑀤𑀸𑀦𑀺 𑀇𑀥 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀁 𑀅𑀤𑀸𑀲𑀺, 𑀦 𑀔𑁄 𑀧𑀦𑀫𑁆𑀳𑁂𑀳𑀺 ‘𑀲𑁄𑀢𑀸𑀧𑀦𑁆𑀦𑀸 𑀫𑀬’𑀦𑁆𑀢𑀺 𑀯𑀻𑀢𑀺𑀦𑀸𑀫𑁂𑀢𑀼𑀁 𑀯𑀝𑁆𑀝𑀢𑀺, 𑀉𑀢𑁆𑀢𑀫𑀧𑀼𑀭𑀺𑀲𑀲𑀤𑀺𑀲𑁂𑀳𑀺 𑀦𑁄 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑁂 𑀤𑀲𑀩𑀮𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀸𑀬 𑀦𑀺𑀲𑀻𑀤𑀦𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀩𑁆𑀪𑀸𑀭𑀭𑀼𑀓𑁆𑀔𑀫𑀽𑀮𑁂𑀲𑀼 𑀦𑀺𑀲𑀻𑀤𑀺𑀁𑀲𑀼.

𑀪𑀕𑀯𑀸 ¶ 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀪𑀺𑀓𑁆𑀔𑀽 𑀧𑀓𑀢𑀺𑀬𑀸𑀧𑀺 𑀅𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀝𑁆𑀞𑀸𑀦𑀸, 𑀮𑀤𑁆𑀥𑀼𑀧𑀸𑀬𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑁄 𑀓𑀺𑀮𑀫𑀦𑀓𑀸𑀭𑀡𑀁 𑀦𑀸𑀫 𑀦𑀢𑁆𑀣𑀺. 𑀕𑀘𑁆𑀙𑀦𑁆𑀢𑀸 𑀕𑀘𑁆𑀙𑀦𑁆𑀢𑀸 𑀘 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑁋 ‘‘𑀅𑀢𑁆𑀢𑀦𑀸 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀕𑀼𑀡𑀁 𑀆𑀭𑁄𑀘𑁂𑀲𑁆𑀲𑀸𑀫𑀸’𑀢𑀺 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀦𑁆𑀢𑀺. 𑀏𑀢𑁂𑀲𑀼 𑀆𑀕𑀢𑁂𑀲𑀼 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀤𑁂𑀯𑀢𑀸 𑀏𑀓𑀘𑀓𑁆𑀓𑀯𑀸𑀴𑁂 𑀲𑀦𑁆𑀦𑀺𑀧𑀢𑀺𑀲𑁆𑀲𑀦𑁆𑀢𑀺, 𑀫𑀳𑀸𑀲𑀫𑀬𑁄 𑀪𑀯𑀺𑀲𑁆𑀲𑀢𑀺, 𑀯𑀺𑀯𑀺𑀢𑁆𑀢𑁂 𑀑𑀓𑀸𑀲𑁂 𑀫𑀬𑀸 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀢𑀢𑁄 𑀯𑀺𑀯𑀺𑀢𑁆𑀢𑁂 𑀑𑀓𑀸𑀲𑁂 𑀩𑀼𑀤𑁆𑀥𑀸𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀲𑀻𑀤𑀺.

𑀲𑀩𑁆𑀩𑀧𑀞𑀫𑀁 ¶ 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀕𑀢𑀣𑁂𑀭𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀢𑁄 𑀅𑀧𑀭𑁄 𑀢𑀢𑁄 𑀅𑀧𑀭𑁄𑀢𑀺 𑀧𑀜𑁆𑀘𑀲𑀢𑀸𑀧𑀺 𑀧𑀤𑀼𑀫𑀺𑀦𑀺𑀬𑀁 𑀧𑀤𑀼𑀫𑀸𑀦𑀺 𑀯𑀺𑀬 𑀯𑀺𑀓𑀲𑀺𑀁𑀲𑀼. 𑀲𑀩𑁆𑀩𑀧𑀞𑀫𑀁 ¶ 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀪𑀺𑀓𑁆𑀔𑀼 𑁋 ‘‘𑀪𑀕𑀯𑀢𑁄 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀧𑀮𑁆𑀮𑀗𑁆𑀓𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀦𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀉𑀝𑁆𑀞𑀸𑀬 𑀤𑀲𑀩𑀮𑀸𑀪𑀺𑀫𑀼𑀔𑁄 𑀅𑀳𑁄𑀲𑀺. 𑀏𑀯𑀁 𑀅𑀧𑀭𑁄𑀧𑀺 𑀅𑀧𑀭𑁄𑀧𑀻𑀢𑀺 𑀧𑀜𑁆𑀘𑀲𑀢𑀸𑀧𑀺 𑀪𑀢𑁆𑀢𑀲𑀸𑀮𑀁 𑀧𑀯𑀺𑀲𑀦𑁆𑀢𑀸 𑀯𑀺𑀬 𑀧𑀝𑀺𑀧𑀸𑀝𑀺𑀬𑀸𑀯 𑀆𑀕𑀫𑀁𑀲𑀼. 𑀧𑀞𑀫𑀁 𑀆𑀕𑀢𑁄 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀧𑀝𑀺𑀮𑀤𑁆𑀥𑀕𑀼𑀡𑀁 𑀆𑀭𑁄𑀘𑁂𑀢𑀼𑀓𑀸𑀫𑁄 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀅𑀜𑁆𑀜𑁄 𑀓𑁄𑀘𑀺, 𑀦𑀢𑁆𑀣𑀻’’𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀕𑀫𑀦𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀅𑀧𑀭𑀫𑁆𑀧𑀺 𑀅𑀤𑁆𑀤𑀲 𑀅𑀧𑀭𑀫𑁆𑀧𑀺 𑀅𑀤𑁆𑀤𑀲. 𑀇𑀢𑀺 𑀲𑀩𑁆𑀩𑁂𑀧𑀺 𑀢𑁂 𑀆𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀬𑀁 𑀇𑀫𑀲𑁆𑀲 𑀳𑀭𑀸𑀬𑀫𑀸𑀦𑁄 𑀦 𑀓𑀣𑁂𑀲𑀺, 𑀅𑀬𑀁 𑀇𑀫𑀲𑁆𑀲 𑀳𑀭𑀸𑀬𑀫𑀸𑀦𑁄 𑀦 𑀓𑀣𑁂𑀲𑀻𑀢𑀺. 𑀔𑀻𑀡𑀸𑀲𑀯𑀸𑀦𑀁 𑀓𑀺𑀭 𑀤𑁆𑀯𑁂 𑀆𑀓𑀸𑀭𑀸 𑀳𑁄𑀦𑁆𑀢𑀺 𑁋 ‘‘𑀅𑀳𑁄 𑀯𑀢 𑀫𑀬𑀸 𑀧𑀝𑀺𑀮𑀤𑁆𑀥𑀕𑀼𑀡𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀔𑀺𑀧𑁆𑀧𑀫𑁂𑀯 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀸’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀧𑀝𑀺𑀮𑀤𑁆𑀥𑀪𑀸𑀯𑀁 𑀧𑀦 𑀦𑀺𑀥𑀺𑀮𑀤𑁆𑀥𑀧𑀼𑀭𑀺𑀲𑁄 𑀯𑀺𑀬 𑀦 𑀅𑀜𑁆𑀜𑀲𑁆𑀲 𑀆𑀭𑁄𑀘𑁂𑀢𑀼𑀓𑀸𑀫𑁄 𑀳𑁄𑀢𑀺.

𑀏𑀯𑀁 𑀑𑀲𑀻𑀤𑀫𑀢𑁆𑀢𑁂 𑀧𑀦 𑀢𑀲𑁆𑀫𑀺𑀁 𑀅𑀭𑀺𑀬𑀫𑀡𑁆𑀟𑀮𑁂 𑀧𑀸𑀘𑀻𑀦𑀬𑀼𑀕𑀦𑁆𑀥𑀭𑀧𑀭𑀺𑀓𑁆𑀔𑁂𑀧𑀢𑁄 𑀅𑀩𑁆𑀪𑀸, 𑀫𑀳𑀺𑀓𑀸, 𑀥𑀽𑀫𑁄, 𑀭𑀚𑁄, 𑀭𑀸𑀳𑀽𑀢𑀺 𑀇𑀫𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑀧𑀝𑀺𑀫𑀡𑁆𑀟𑀺𑀢𑀲𑁆𑀲 𑀮𑁄𑀓𑀲𑁆𑀲 𑀭𑀸𑀫𑀡𑁂𑀬𑁆𑀬𑀓𑀤𑀲𑁆𑀲𑀦𑀢𑁆𑀣𑀁 𑀧𑀸𑀘𑀻𑀦𑀤𑀺𑀲𑀸𑀬 𑀉𑀓𑁆𑀔𑀺𑀢𑁆𑀢𑀭𑀚𑀢𑀫𑀬𑀫𑀳𑀸𑀆𑀤𑀸𑀲𑀫𑀡𑁆𑀟𑀮𑀁 𑀯𑀺𑀬, 𑀦𑁂𑀫𑀺𑀯𑀝𑁆𑀝𑀺𑀬𑀁 𑀕𑀳𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑀺𑀬𑀫𑀸𑀦𑀭𑀚𑀢𑀘𑀓𑁆𑀓𑀲𑀲𑁆𑀲𑀺𑀭𑀺𑀓𑀁 𑀧𑀼𑀡𑁆𑀡𑀘𑀦𑁆𑀤𑀫𑀡𑁆𑀟𑀮𑀁 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀅𑀦𑀺𑀮𑀧𑀣𑀁 𑀧𑀝𑀺𑀧𑀚𑁆𑀚𑀺𑀢𑁆𑀣. 𑀇𑀢𑀺 𑀏𑀯𑀭𑀽𑀧𑁂 𑀔𑀡𑁂 𑀮𑀬𑁂 𑀫𑀼𑀳𑀼𑀢𑁆𑀢𑁂 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀫𑀳𑀸𑀯𑀦𑁂 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀩𑁆𑀩𑁂𑀳𑁂𑀯 𑀅𑀭𑀳𑀦𑁆𑀢𑁂𑀳𑀺.

𑀢𑀢𑁆𑀣 𑀪𑀕𑀯𑀸𑀧𑀺 𑀫𑀳𑀸𑀲𑀫𑁆𑀫𑀢𑀲𑁆𑀲 𑀯𑀁𑀲𑁂 𑀉𑀧𑁆𑀧𑀦𑁆𑀦𑁄, 𑀢𑁂𑀧𑀺 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀫𑀳𑀸𑀲𑀫𑁆𑀫𑀢𑀲𑁆𑀲 𑀓𑀼𑀮𑁂 𑀉𑀧𑁆𑀧𑀦𑁆𑀦𑀸. 𑀪𑀕𑀯𑀸𑀧𑀺 𑀔𑀢𑁆𑀢𑀺𑀬𑀕𑀩𑁆𑀪𑁂 𑀚𑀸𑀢𑁄, 𑀢𑁂𑀧𑀺 𑀔𑀢𑁆𑀢𑀺𑀬𑀕𑀩𑁆𑀪𑁂 ¶ 𑀚𑀸𑀢𑀸. 𑀪𑀕𑀯𑀸𑀧𑀺 𑀭𑀸𑀚𑀧𑀩𑁆𑀩𑀚𑀺𑀢𑁄, 𑀢𑁂𑀧𑀺 𑀭𑀸𑀚𑀧𑀩𑁆𑀩𑀚𑀺𑀢𑀸. 𑀪𑀕𑀯𑀸𑀧𑀺 𑀲𑁂𑀢𑀘𑁆𑀙𑀢𑁆𑀢𑀁 𑀧𑀳𑀸𑀬 𑀳𑀢𑁆𑀣𑀕𑀢𑀁 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀦𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁄, 𑀢𑁂𑀧𑀺 𑀲𑁂𑀢𑀘𑁆𑀙𑀢𑁆𑀢𑀁 𑀧𑀳𑀸𑀬 𑀳𑀢𑁆𑀣𑀕𑀢𑀸𑀦𑀺 𑀭𑀚𑁆𑀚𑀸𑀦𑀺 𑀦𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀸. 𑀇𑀢𑀺 𑀪𑀕𑀯𑀸 𑀧𑀭𑀺𑀲𑀼𑀤𑁆𑀥𑁂 𑀑𑀓𑀸𑀲𑁂 𑀧𑀭𑀺𑀲𑀼𑀤𑁆𑀥𑁂 𑀭𑀢𑁆𑀢𑀺𑀪𑀸𑀕𑁂 𑀲𑀬𑀁 𑀧𑀭𑀺𑀲𑀼𑀤𑁆𑀥𑁄 𑀧𑀭𑀺𑀲𑀼𑀤𑁆𑀥𑀧𑀭𑀺𑀯𑀸𑀭𑁄 𑀯𑀻𑀢𑀭𑀸𑀕𑁄 𑀯𑀻𑀢𑀭𑀸𑀕𑀧𑀭𑀺𑀯𑀸𑀭𑁄 𑀯𑀻𑀢𑀤𑁄𑀲𑁄 𑀯𑀻𑀢𑀤𑁄𑀲𑀧𑀭𑀺𑀯𑀸𑀭𑁄 𑀯𑀻𑀢𑀫𑁄𑀳𑁄 𑀯𑀻𑀢𑀫𑁄𑀳𑀧𑀭𑀺𑀯𑀸𑀭𑁄 𑀦𑀺𑀢𑁆𑀢𑀡𑁆𑀳𑁄 𑀦𑀺𑀢𑁆𑀢𑀡𑁆𑀳𑀧𑀭𑀺𑀯𑀸𑀭𑁄 𑀦𑀺𑀓𑁆𑀓𑀺𑀮𑁂𑀲𑁄 𑀦𑀺𑀓𑁆𑀓𑀺𑀮𑁂𑀲𑀧𑀭𑀺𑀯𑀸𑀭𑁄 𑀲𑀦𑁆𑀢𑁄 𑀲𑀦𑁆𑀢𑀧𑀭𑀺𑀯𑀸𑀭𑁄 𑀤𑀦𑁆𑀢𑁄 𑀤𑀦𑁆𑀢𑀧𑀭𑀺𑀯𑀸𑀭𑁄 𑀫𑀼𑀢𑁆𑀢𑁄 𑀫𑀼𑀢𑁆𑀢𑀧𑀭𑀺𑀯𑀸𑀭𑁄 𑀅𑀢𑀺𑀯𑀺𑀬 𑀯𑀺𑀭𑁄𑀘𑀢𑀻𑀢𑀺. 𑀯𑀡𑁆𑀡𑀪𑀽𑀫𑀺 ¶ 𑀦𑀸𑀫𑁂𑀲𑀸, 𑀬𑀢𑁆𑀢𑀓𑀁 𑀲𑀓𑁆𑀓𑁄𑀢𑀺, 𑀢𑀢𑁆𑀢𑀓𑀁 𑀯𑀢𑁆𑀢𑀩𑁆𑀩𑀁. 𑀇𑀢𑀺 𑀇𑀫𑁂 𑀪𑀺𑀓𑁆𑀔𑀽 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀩𑁆𑀩𑁂𑀳𑁂𑀯 𑀅𑀭𑀳𑀦𑁆𑀢𑁂𑀳𑀻’’𑀢𑀺.

𑀬𑁂𑀪𑀼𑀬𑁆𑀬𑁂𑀦𑀸𑀢𑀺 ¶ 𑀩𑀳𑀼𑀢𑀭𑀸 𑀲𑀦𑁆𑀦𑀺𑀧𑀢𑀺𑀢𑀸, 𑀫𑀦𑁆𑀤𑀸 𑀦 𑀲𑀦𑁆𑀦𑀺𑀧𑀢𑀺𑀢𑀸 𑀅𑀲𑀜𑁆𑀜𑀸 𑀅𑀭𑀽𑀧𑀸𑀯𑀘𑀭𑀤𑁂𑀯𑀢𑀸 𑀲𑀫𑀸𑀧𑀦𑁆𑀦𑀤𑁂𑀯𑀢𑀸 𑀘. 𑀢𑀢𑁆𑀭𑀸𑀬𑀁 𑀲𑀦𑁆𑀦𑀺𑀧𑀸𑀢𑀓𑁆𑀓𑀫𑁄 𑀫𑀳𑀸𑀯𑀦𑀲𑁆𑀲 𑀓𑀺𑀭 𑀲𑀸𑀫𑀦𑁆𑀢𑀸 𑀤𑁂𑀯𑀢𑀸 𑀘𑀮𑀺𑀁𑀲𑀼 𑁋 ‘‘𑀆𑀬𑀸𑀫, 𑀪𑁄 𑀩𑀼𑀤𑁆𑀥𑀤𑀲𑁆𑀲𑀦𑀁 𑀦𑀸𑀫 𑀩𑀳𑀽𑀧𑀓𑀸𑀭𑀁, 𑀥𑀫𑁆𑀫𑀲𑁆𑀲𑀯𑀦𑀁 𑀩𑀳𑀽𑀧𑀓𑀸𑀭𑀁, 𑀪𑀺𑀓𑁆𑀔𑀼𑀲𑀗𑁆𑀖𑀤𑀲𑁆𑀲𑀦𑀁 𑀩𑀳𑀽𑀧𑀓𑀸𑀭𑀁, 𑀆𑀬𑀸𑀫 𑀆𑀬𑀸𑀫𑀸’’𑀢𑀺 𑀫𑀳𑀸𑀲𑀤𑁆𑀤𑀁 𑀓𑀼𑀭𑀼𑀫𑀸𑀦𑀸 𑀆𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀜𑁆𑀘 𑀢𑀁𑀫𑀼𑀳𑀼𑀢𑁆𑀢𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀔𑀻𑀡𑀸𑀲𑀯𑁂 𑀘 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀢𑀸𑀲𑀁 𑀢𑀸𑀲𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀤𑁆𑀤𑀦𑁆𑀢𑀭𑀅𑀟𑁆𑀠𑀕𑀸𑀯𑀼𑀢𑀕𑀸𑀯𑀼𑀢𑀅𑀟𑁆𑀠𑀬𑁄𑀚𑀦𑀬𑁄𑀚𑀦𑀸𑀤𑀺𑀯𑀲𑁂𑀦 𑀢𑀺𑀬𑁄𑀚𑀦𑀲𑀳𑀲𑁆𑀲𑀯𑀺𑀢𑁆𑀣𑀢𑁂 𑀳𑀺𑀫𑀯𑀦𑁆𑀢𑁂, 𑀢𑀺𑀓𑁆𑀔𑀢𑁆𑀢𑀼𑀁 𑀢𑁂𑀲𑀝𑁆𑀞𑀺𑀬𑀸 𑀦𑀕𑀭𑀲𑀳𑀲𑁆𑀲𑁂𑀲𑀼, 𑀦𑀯𑀦𑀯𑀼𑀢𑀺𑀬𑀸 𑀤𑁄𑀡𑀫𑀼𑀔𑀲𑀢𑀲𑀳𑀲𑁆𑀲𑁂𑀲𑀼, 𑀙𑀦𑁆𑀦𑀯𑀼𑀢𑀺𑀬𑀸 𑀧𑀝𑁆𑀝𑀦𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀲𑀼, 𑀙𑀧𑀡𑁆𑀡𑀸𑀲𑀸𑀬 𑀭𑀢𑀦𑀸𑀓𑀭𑁂𑀲𑀽𑀢𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑁂, 𑀧𑀼𑀩𑁆𑀩𑀯𑀺𑀤𑁂𑀳𑁂, 𑀅𑀧𑀭𑀕𑁄𑀬𑀸𑀦𑁂, 𑀉𑀢𑁆𑀢𑀭𑀓𑀼𑀭𑀼𑀫𑁆𑀳𑀺, 𑀤𑁆𑀯𑀻𑀲𑀼 𑀧𑀭𑀺𑀢𑁆𑀢𑀤𑀻𑀧𑀲𑀳𑀲𑁆𑀲𑁂𑀲𑀽𑀢𑀺 𑀲𑀓𑀮𑀘𑀓𑁆𑀓𑀯𑀸𑀴𑁂, 𑀢𑀢𑁄 𑀤𑀼𑀢𑀺𑀬𑀢𑀢𑀺𑀬𑀘𑀓𑁆𑀓𑀯𑀸𑀴𑁂𑀢𑀺 𑀏𑀯𑀁 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀜𑁆𑀳𑀺 𑀇𑀥 𑀤𑀲𑀮𑁄𑀓𑀥𑀸𑀢𑀼𑀬𑁄𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀤𑀲𑀳𑀺 𑀘 𑀮𑁄𑀓𑀥𑀸𑀢𑀽𑀳𑀺 𑀤𑁂𑀯𑀢𑀸 𑀬𑁂𑀪𑀼𑀬𑁆𑀬𑁂𑀦 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀻’’𑀢𑀺.

𑀏𑀯𑀁 𑀲𑀦𑁆𑀦𑀺𑀧𑀢𑀺𑀢𑀸𑀳𑀺 𑀤𑁂𑀯𑀢𑀸𑀳𑀺 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀽𑀘𑀺𑀖𑀭𑁂 𑀦𑀺𑀭𑀦𑁆𑀢𑀭𑀁 𑀧𑀓𑁆𑀔𑀺𑀢𑁆𑀢𑀲𑀽𑀘𑀻𑀳𑀺 𑀯𑀺𑀬 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺. 𑀢𑀢𑁆𑀭 𑀩𑁆𑀭𑀳𑁆𑀫𑀮𑁄𑀓𑀲𑁆𑀲 𑀏𑀯𑀁 𑀉𑀘𑁆𑀘𑀢𑁆𑀢𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀮𑁄𑀳𑀧𑀸𑀲𑀸𑀤𑁂 𑀓𑀺𑀭 𑀲𑀢𑁆𑀢𑀓𑀽𑀝𑀸𑀕𑀸𑀭𑀲𑀫𑁄 𑀧𑀸𑀲𑀸𑀡𑁄 𑀩𑁆𑀭𑀳𑁆𑀫𑀮𑁄𑀓𑁂 𑀞𑀢𑁆𑀯𑀸 𑀅𑀥𑁄 𑀔𑀺𑀢𑁆𑀢𑁄 𑀘𑀢𑀽𑀳𑀺 ¶ 𑀫𑀸𑀲𑁂𑀳𑀺 𑀧𑀣𑀯𑀺𑀁 𑀧𑀸𑀧𑀼𑀡𑀸𑀢𑀺. 𑀏𑀯𑀁 𑀫𑀳𑀦𑁆𑀢𑁂 𑀑𑀓𑀸𑀲𑁂 𑀬𑀣𑀸 𑀳𑁂𑀝𑁆𑀞𑀸 𑀞𑀢𑁆𑀯𑀸 𑀔𑀺𑀢𑁆𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀯𑀸 𑀥𑀽𑀫𑁄 𑀯𑀸 𑀉𑀧𑀭𑀺 𑀕𑀦𑁆𑀢𑀼𑀁, 𑀉𑀧𑀭𑀺 𑀯𑀸 𑀞𑀢𑁆𑀯𑀸 𑀔𑀺𑀢𑁆𑀢𑀲𑀸𑀲𑀧𑀸 𑀳𑁂𑀝𑁆𑀞𑀸 𑀑𑀢𑀭𑀺𑀢𑀼𑀁 𑀅𑀦𑁆𑀢𑀭𑀁 𑀦 𑀮𑀪𑀦𑁆𑀢𑀺, 𑀏𑀯𑀁 𑀦𑀺𑀭𑀦𑁆𑀢𑀭𑀁 𑀤𑁂𑀯𑀢𑀸 𑀅𑀳𑁂𑀲𑀼𑀁. 𑀬𑀣𑀸 𑀔𑁄 𑀧𑀦 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀅𑀲𑀫𑁆𑀩𑀸𑀥𑀁 𑀳𑁄𑀢𑀺, 𑀆𑀕𑀢𑀸𑀕𑀢𑀸 𑀫𑀳𑁂𑀲𑀓𑁆𑀔𑀸 𑀔𑀢𑁆𑀢𑀺𑀬𑀸 𑀑𑀓𑀸𑀲𑀁 𑀮𑀪𑀦𑁆𑀢𑀺𑀬𑁂𑀯, 𑀧𑀭𑀢𑁄 𑀧𑀭𑀢𑁄 𑀧𑀦 𑀅𑀢𑀺𑀲𑀫𑁆𑀩𑀸𑀥𑀁 𑀳𑁄𑀢𑀺, 𑀏𑀯𑀫𑁂𑀯 𑀪𑀕𑀯𑀢𑁄 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀅𑀲𑀫𑁆𑀩𑀸𑀥𑀁, 𑀆𑀕𑀢𑀸𑀕𑀢𑀸 𑀫𑀳𑁂𑀲𑀓𑁆𑀔𑀸 𑀤𑁂𑀯𑀢𑀸 𑀘 𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀘 𑀑𑀓𑀸𑀲𑀁 𑀮𑀪𑀦𑁆𑀢𑀺𑀬𑁂𑀯. 𑀅𑀧𑀺𑀲𑀼𑀤𑀁 ¶ 𑀪𑀕𑀯𑀢𑁄 𑀆𑀲𑀦𑁆𑀦𑀸𑀲𑀦𑁆𑀦𑀝𑁆𑀞𑀸𑀦𑁂 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀸𑀮𑀕𑁆𑀕𑀓𑁄𑀝𑀺𑀦𑀺𑀢𑀼𑀤𑀦𑀫𑀢𑁆𑀢𑁂 𑀧𑀤𑁂𑀲𑁂 𑀤𑀲𑀧𑀺 𑀯𑀻𑀲𑀫𑁆𑀧𑀺 𑀲𑀩𑁆𑀩𑀧𑀭𑀢𑁄 𑀢𑀺𑀁𑀲𑀫𑁆𑀧𑀺 𑀤𑁂𑀯𑀢𑀸 𑀲𑀼𑀔𑀼𑀫𑁂 𑀲𑀼𑀔𑀼𑀫𑁂 𑀅𑀢𑁆𑀢𑀪𑀸𑀯𑁂 𑀫𑀸𑀧𑁂𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀲𑀝𑁆𑀞𑀺 𑀲𑀝𑁆𑀞𑀺 𑀤𑁂𑀯𑀢𑀸 𑀅𑀝𑁆𑀞𑀁𑀲𑀼.

𑀲𑀼𑀤𑁆𑀥𑀸𑀯𑀸𑀲𑀓𑀸𑀬𑀺𑀓𑀸𑀦𑀦𑁆𑀢𑀺 𑀲𑀼𑀤𑁆𑀥𑀸𑀯𑀸𑀲𑀯𑀸𑀲𑀻𑀦𑀁. 𑀲𑀼𑀤𑁆𑀥𑀸𑀯𑀸𑀲𑀸 𑀦𑀸𑀫 𑀲𑀼𑀤𑁆𑀥𑀸𑀦𑀁 𑀅𑀦𑀸𑀕𑀸𑀫𑀺𑀔𑀻𑀡𑀸𑀲𑀯𑀸𑀦𑀁 𑀆𑀯𑀸𑀲𑀸 𑀧𑀜𑁆𑀘 𑀩𑁆𑀭𑀳𑁆𑀫𑀮𑁄𑀓𑀸. 𑀏𑀢𑀤𑀳𑁄𑀲𑀻𑀢𑀺 𑀓𑀲𑁆𑀫𑀸 𑀅𑀳𑁄𑀲𑀺? 𑀢𑁂 𑀓𑀺𑀭 𑀩𑁆𑀭𑀳𑁆𑀫𑀸𑀦𑁄 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦 𑀯𑀼𑀝𑁆𑀞𑀺𑀢𑀸 𑀩𑁆𑀭𑀳𑁆𑀫𑀪𑀯𑀦𑀁 𑀑𑀮𑁄𑀓𑁂𑀦𑁆𑀢𑀸 𑀧𑀘𑁆𑀙𑀸𑀪𑀢𑁆𑀢𑁂 𑀪𑀢𑁆𑀢𑀕𑁂𑀳𑀁 𑀯𑀺𑀬 𑀲𑀼𑀜𑁆𑀜𑀢𑀁 𑀅𑀤𑁆𑀤𑀲𑀁𑀲𑀼. 𑀢𑀢𑁄 ‘‘𑀓𑀼𑀳𑀺𑀁 𑀩𑁆𑀭𑀳𑁆𑀫𑀸𑀦𑁄 𑀕𑀢𑀸’’𑀢𑀺 𑀆𑀯𑀚𑁆𑀚𑀦𑁆𑀢𑀸 𑀫𑀳𑀸𑀲𑀫𑀸𑀕𑀫𑀁 𑀜𑀢𑁆𑀯𑀸 𑁋 ‘‘𑀅𑀬𑀁 𑀲𑀫𑀸𑀕𑀫𑁄 𑀫𑀳𑀸, 𑀫𑀬𑀁 𑀑𑀳𑀻𑀦𑀸, 𑀑𑀳𑀻𑀦𑀓𑀸𑀦𑀁 𑀑𑀓𑀸𑀲𑁄 𑀤𑀼𑀮𑁆𑀮𑀪𑁄 𑀳𑁄𑀢𑀺, 𑀢𑀲𑁆𑀫𑀸 ¶ 𑀕𑀘𑁆𑀙𑀦𑁆𑀢𑀸 𑀅𑀢𑀼𑀘𑁆𑀙𑀳𑀢𑁆𑀣𑀸 𑀳𑀼𑀢𑁆𑀯𑀸 𑀏𑀓𑁂𑀓𑀁 𑀕𑀸𑀣𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀕𑀘𑁆𑀙𑀸𑀫. 𑀢𑀸𑀬 𑀫𑀳𑀸𑀲𑀫𑀸𑀕𑀫𑁂 𑀘 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀲𑁆𑀲𑀸𑀫, 𑀤𑀲𑀩𑀮𑀲𑁆𑀲 𑀘 𑀯𑀡𑁆𑀡𑀁 𑀪𑀸𑀲𑀺𑀲𑁆𑀲𑀸𑀫𑀸’’𑀢𑀺. 𑀇𑀢𑀺 𑀢𑁂𑀲𑀁 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀆𑀯𑀚𑁆𑀚𑀺𑀢𑀢𑁆𑀢𑀸 𑀏𑀢𑀤𑀳𑁄𑀲𑀺.

𑁩𑁩𑁨. 𑀪𑀕𑀯𑀢𑁄 𑀧𑀼𑀭𑀢𑁄 𑀧𑀸𑀢𑀼𑀭𑀳𑁂𑀲𑀼𑀦𑁆𑀢𑀺 𑀧𑀸𑀴𑀺𑀬𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀅𑀪𑀺𑀫𑀼𑀔𑀝𑁆𑀞𑀸𑀦𑁂𑀬𑁂𑀯 𑀑𑀢𑀺𑀡𑁆𑀡𑀸 𑀯𑀺𑀬 𑀓𑀢𑁆𑀯𑀸 𑀯𑀼𑀢𑁆𑀢𑀸, 𑀦 𑀔𑁄 𑀧𑀦𑁂𑀢𑁆𑀣 𑀏𑀯𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂 𑀧𑀦 𑀩𑁆𑀭𑀳𑁆𑀫𑀮𑁄𑀓𑁂 𑀞𑀺𑀢𑀸𑀬𑁂𑀯 𑀕𑀸𑀣𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀏𑀓𑁄 𑀧𑀼𑀭𑀢𑁆𑀣𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀑𑀢𑀭𑀺, 𑀏𑀓𑁄 𑀤𑀓𑁆𑀔𑀺𑀡𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁, 𑀏𑀓𑁄 𑀧𑀘𑁆𑀙𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁, 𑀏𑀓𑁄 𑀉𑀢𑁆𑀢𑀭𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀑𑀢𑀭𑀺. 𑀢𑀢𑁄 𑀧𑀼𑀭𑀢𑁆𑀣𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀑𑀢𑀺𑀡𑁆𑀡𑀩𑁆𑀭𑀳𑁆𑀫𑀸 𑀦𑀻𑀮𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀻𑀮𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀦𑀁 𑀫𑀡𑀺𑀘𑀫𑁆𑀫𑀁 𑀧𑀝𑀺𑀫𑀼𑀜𑁆𑀘𑀦𑁆𑀢𑁄 𑀯𑀺𑀬 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀩𑀼𑀤𑁆𑀥𑀯𑀻𑀣𑀺 ¶ 𑀦𑀸𑀫 𑀓𑁂𑀦𑀘𑀺 𑀑𑀢𑁆𑀣𑀭𑀺𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀧𑀳𑀝𑀩𑀼𑀤𑁆𑀥𑀯𑀻𑀣𑀺𑀬𑀸𑀯 𑀆𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀅𑀢𑁆𑀢𑀦𑀸 𑀅𑀪𑀺𑀲𑀗𑁆𑀔𑀢𑀁 𑀕𑀸𑀣𑀁 𑀅𑀪𑀸𑀲𑀺.

𑀤𑀓𑁆𑀔𑀺𑀡𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀑𑀢𑀺𑀡𑁆𑀡𑀩𑁆𑀭𑀳𑁆𑀫𑀸𑀧𑀺 𑀧𑀻𑀢𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀻𑀢𑀭𑀲𑁆𑀫𑀺𑀬𑁄 𑀲𑀼𑀯𑀡𑁆𑀡𑀧𑀪𑀁 𑀫𑀼𑀜𑁆𑀘𑀺𑀢𑁆𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀦𑀁 𑀲𑀼𑀯𑀡𑁆𑀡𑀧𑀝𑀁 𑀧𑀸𑀭𑀼𑀧𑁂𑀦𑁆𑀢𑁄 𑀯𑀺𑀬 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀢𑀣𑁂𑀯 𑀅𑀝𑁆𑀞𑀸𑀲𑀺. 𑀧𑀘𑁆𑀙𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 ¶ 𑀑𑀢𑀺𑀡𑁆𑀡𑀩𑁆𑀭𑀳𑁆𑀫𑀸𑀧𑀺 𑀮𑁄𑀳𑀺𑀢𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀮𑁄𑀳𑀺𑀢𑀭𑀲𑁆𑀫𑀺𑀬𑁄 𑀫𑀼𑀜𑁆𑀘𑀺𑀢𑁆𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀦𑀁 𑀭𑀢𑁆𑀢𑀯𑀭𑀓𑀫𑁆𑀩𑀮𑁂𑀦 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀢𑀣𑁂𑀯 𑀅𑀝𑁆𑀞𑀸𑀲𑀺. 𑀉𑀢𑁆𑀢𑀭𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀑𑀢𑀺𑀡𑁆𑀡𑀩𑁆𑀭𑀳𑁆𑀫𑀸𑀧𑀺 𑀑𑀤𑀸𑀢𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀑𑀤𑀸𑀢𑀭𑀲𑁆𑀫𑀺𑀬𑁄 𑀫𑀼𑀜𑁆𑀘𑀺𑀢𑁆𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀦𑀁 𑀲𑀼𑀫𑀦𑀧𑀝𑀁 𑀧𑀸𑀭𑀼𑀧𑀦𑁆𑀢𑁄 𑀯𑀺𑀬 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀢𑀣𑁂𑀯 𑀅𑀝𑁆𑀞𑀸𑀲𑀺.

𑀧𑀸𑀴𑀺𑀬𑀁 𑀧𑀦 ‘‘𑀪𑀕𑀯𑀢𑁄 𑀧𑀼𑀭𑀢𑁄 𑀧𑀸𑀢𑀼𑀭𑀳𑁂𑀲𑀼𑀁. 𑀅𑀣 𑀔𑁄 𑀢𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀽’’𑀢𑀺 𑀏𑀯𑀁 𑀏𑀓𑀓𑁆𑀔𑀡𑀁 𑀯𑀺𑀬 𑀧𑀼𑀭𑀢𑁄 𑀧𑀸𑀢𑀼𑀪𑀸𑀯𑁄 𑀘 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑀪𑀸𑀯𑁄 𑀘 𑀯𑀼𑀢𑁆𑀢𑁄, 𑀲𑁄 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀅𑀳𑁄𑀲𑀺, 𑀏𑀓𑀢𑁄 𑀓𑀢𑁆𑀯𑀸 𑀧𑀦 𑀤𑀲𑁆𑀲𑀺𑀢𑁄. 𑀕𑀸𑀣𑀸𑀪𑀸𑀲𑀦𑀁 𑀧𑀦 𑀧𑀸𑀴𑀺𑀬𑀁 𑀯𑀺𑀲𑀼𑀁 𑀯𑀺𑀲𑀼𑀁𑀬𑁂𑀯 𑀯𑀼𑀢𑁆𑀢𑀁.

𑀢𑀢𑁆𑀣 𑀫𑀳𑀸𑀲𑀫𑀬𑁄𑀢𑀺 𑀫𑀳𑀸𑀲𑀫𑀽𑀳𑁄. 𑀧𑀯𑀦𑀁 𑀯𑀼𑀘𑁆𑀘𑀢𑀺 𑀯𑀦𑀲𑀡𑁆𑀟𑁄. 𑀉𑀪𑀬𑁂𑀦𑀧𑀺 𑀪𑀕𑀯𑀸 𑀇𑀫𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀅𑀚𑁆𑀚 𑀫𑀳𑀸𑀲𑀫𑀽𑀳𑁄 𑀫𑀳𑀸𑀲𑀦𑁆𑀦𑀺𑀧𑀸𑀢𑁄𑀢𑀺 𑀆𑀳. 𑀢𑀢𑁄 𑀬𑁂𑀲𑀁 𑀲𑁄 𑀲𑀦𑁆𑀦𑀺𑀧𑀸𑀢𑁄, 𑀢𑁂 𑀤𑀲𑁆𑀲𑁂𑀢𑀼𑀁 𑀤𑁂𑀯𑀓𑀸𑀬𑀸 ¶ 𑀲𑀫𑀸𑀕𑀢𑀸𑀢𑀺 𑀆𑀳. 𑀢𑀢𑁆𑀣 𑀤𑁂𑀯𑀓𑀸𑀬𑀸𑀢𑀺 𑀤𑁂𑀯𑀖𑀝𑀸. 𑀆𑀕𑀢𑀫𑁆𑀳 𑀇𑀫𑀁 𑀥𑀫𑁆𑀫𑀲𑀫𑀬𑀦𑁆𑀢𑀺 𑀏𑀯𑀁 𑀲𑀫𑀸𑀕𑀢𑁂 𑀤𑁂𑀯𑀓𑀸𑀬𑁂 𑀤𑀺𑀲𑁆𑀯𑀸 𑀫𑀬𑀫𑁆𑀧𑀺 𑀇𑀫𑀁 𑀥𑀫𑁆𑀫𑀲𑀫𑀽𑀳𑀁 𑀆𑀕𑀢𑀸. 𑀓𑀺𑀁 𑀓𑀸𑀭𑀡𑀸? 𑀤𑀓𑁆𑀔𑀺𑀢𑀸𑀬𑁂 𑀅𑀧𑀭𑀸𑀚𑀺𑀢𑀲𑀗𑁆𑀖𑀁, 𑀓𑁂𑀦𑀘𑀺 𑀅𑀧𑀭𑀸𑀚𑀺𑀢𑀁 𑀅𑀚𑁆𑀚𑁂𑀯 𑀢𑀬𑁄 𑀫𑀸𑀭𑁂 𑀫𑀤𑁆𑀤𑀺𑀢𑁆𑀯𑀸 𑀯𑀺𑀚𑀺𑀢𑀲𑀗𑁆𑀕𑀸𑀫𑀁 𑀇𑀫𑀁 𑀅𑀧𑀭𑀸𑀚𑀺𑀢𑀲𑀗𑁆𑀖𑀁 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀢𑀫𑁆𑀳𑀸𑀢𑀺 𑀅𑀢𑁆𑀣𑁄. 𑀲𑁄 𑀧𑀦 𑀩𑁆𑀭𑀳𑁆𑀫𑀸 𑀇𑀫𑀁 𑀕𑀸𑀣𑀁 𑀪𑀸𑀲𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁𑀬𑁂𑀯 𑀅𑀝𑁆𑀞𑀸𑀲𑀺.

𑀅𑀣 𑀤𑀼𑀢𑀺𑀬𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑀅𑀪𑀸𑀲𑀺. 𑀢𑀢𑁆𑀣 𑀢𑀢𑁆𑀭 𑀪𑀺𑀓𑁆𑀔𑀯𑁄𑀢𑀺 𑀢𑀲𑁆𑀫𑀺𑀁 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑁂 𑀪𑀺𑀓𑁆𑀔𑀽. 𑀲𑀫𑀸𑀤𑀳𑀁𑀲𑀽𑀢𑀺 𑀲𑀫𑀸𑀥𑀺𑀦𑀸 𑀬𑁄𑀚𑁂𑀲𑀼𑀁. 𑀘𑀺𑀢𑁆𑀢𑀫𑀢𑁆𑀢𑀦𑁄 𑀉𑀚𑀼𑀓𑀁 𑀅𑀓𑀁𑀲𑀽𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀲𑀩𑁆𑀩𑁂 𑀯𑀗𑁆𑀓𑀓𑀼𑀝𑀺𑀮𑀚𑀺𑀫𑁆𑀳𑀪𑀸𑀯𑁂 𑀳𑀭𑀺𑀢𑁆𑀯𑀸 𑀉𑀚𑀼𑀓𑀁 𑀅𑀓𑀭𑀺𑀁𑀲𑀼. 𑀲𑀸𑀭𑀣𑀻𑀯 𑀦𑁂𑀢𑁆𑀢𑀸𑀦𑀺 𑀕𑀳𑁂𑀢𑁆𑀯𑀸𑀢𑀺 ¶ 𑀬𑀣𑀸 𑀲𑀫𑀧𑁆𑀧𑀯𑀢𑁆𑀢𑁂𑀲𑀼 𑀲𑀺𑀦𑁆𑀥𑀯𑁂𑀲𑀼 𑀑𑀥𑀲𑁆𑀢𑀧𑀢𑁄𑀤𑁄 𑀲𑀸𑀭𑀣𑀺 𑀲𑀩𑁆𑀩𑀬𑁄𑀢𑁆𑀢𑀸𑀦𑀺 𑀕𑀳𑁂𑀢𑁆𑀯𑀸 𑀅𑀘𑁄𑀤𑁂𑀦𑁆𑀢𑁄 𑀅𑀯𑀸𑀭𑁂𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀏𑀯𑀁 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀲𑀫𑀦𑁆𑀦𑀸𑀕𑀢𑀸 𑀕𑀼𑀢𑁆𑀢𑀤𑁆𑀯𑀸𑀭𑀸 𑀲𑀩𑁆𑀩𑁂𑀧𑁂𑀢𑁂 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀇𑀦𑁆𑀤𑁆𑀭𑀺𑀬𑀸𑀦𑀺 𑀭𑀓𑁆𑀔𑀦𑁆𑀢𑀺 𑀧𑀡𑁆𑀟𑀺𑀢𑀸, 𑀏𑀢𑁂 𑀤𑀝𑁆𑀞𑀼𑀁 𑀇𑀥𑀸𑀕𑀢𑀫𑁆𑀳 𑀪𑀕𑀯𑀸𑀢𑀺. 𑀲𑁄𑀧𑀺 𑀕𑀦𑁆𑀢𑁆𑀯𑀸 𑀬𑀣𑀸𑀞𑀸𑀦𑁂𑀬𑁂𑀯 𑀅𑀝𑁆𑀞𑀸𑀲𑀺.

𑀅𑀣 ¶ 𑀢𑀢𑀺𑀬𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑀅𑀪𑀸𑀲𑀺. 𑀢𑀢𑁆𑀣 𑀙𑁂𑀢𑁆𑀯𑀸 𑀔𑀻𑀮𑀦𑁆𑀢𑀺 𑀭𑀸𑀕𑀤𑁄𑀲𑀫𑁄𑀳𑀔𑀻𑀮𑀁 𑀙𑀺𑀦𑁆𑀤𑀺𑀢𑁆𑀯𑀸. 𑀧𑀮𑀺𑀖𑀦𑁆𑀢𑀺 𑀭𑀸𑀕𑀤𑁄𑀲𑀫𑁄𑀳𑀧𑀮𑀺𑀖𑀫𑁂𑀯. 𑀇𑀦𑁆𑀤𑀔𑀻𑀮𑀦𑁆𑀢𑀺𑀧𑀺 𑀭𑀸𑀕𑀤𑁄𑀲𑀫𑁄𑀳𑀇𑀦𑁆𑀤𑀔𑀻𑀮𑀫𑁂𑀯. 𑀊𑀳𑀘𑁆𑀘 𑀫𑀦𑁂𑀚𑀸𑀢𑀺 𑀏𑀢𑁂 𑀢𑀡𑁆𑀳𑀸𑀏𑀚𑀸𑀬 𑀅𑀪𑀸𑀯𑁂𑀦 𑀅𑀦𑁂𑀚𑀸 𑀪𑀺𑀓𑁆𑀔𑀽 𑀇𑀦𑁆𑀤𑀔𑀻𑀮𑀁 𑀊𑀳𑀘𑁆𑀘 𑀲𑀫𑀽𑀳𑀦𑀺𑀢𑁆𑀯𑀸. 𑀢𑁂 𑀘𑀭𑀦𑁆𑀢𑀻𑀢𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀅𑀧𑁆𑀧𑀝𑀺𑀳𑀢𑀘𑀸𑀭𑀺𑀓𑀁 𑀘𑀭𑀦𑁆𑀢𑀺. 𑀲𑀼𑀤𑁆𑀥𑀸𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀸. 𑀯𑀺𑀫𑀮𑀸𑀢𑀺 𑀦𑀺𑀫𑁆𑀫𑀮𑀸. 𑀇𑀤𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀘𑀓𑁆𑀔𑀼𑀫𑀢𑀸𑀢𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀦𑁆𑀢𑁂𑀦. 𑀲𑀼𑀤𑀦𑁆𑀢𑀸𑀢𑀺 𑀘𑀓𑁆𑀔𑀼𑀢𑁄𑀧𑀺 𑀤𑀦𑁆𑀢𑀸, 𑀲𑁄𑀢𑀢𑁄𑀧𑀺 𑀖𑀸𑀦𑀢𑁄𑀧𑀺 𑀚𑀺𑀯𑁆𑀳𑀸𑀢𑁄𑀧𑀺 𑀓𑀸𑀬𑀢𑁄𑀧𑀺 𑀫𑀦𑀢𑁄𑀧𑀺 𑀤𑀦𑁆𑀢𑀸. 𑀲𑀼𑀲𑀼𑀦𑀸𑀕𑀸𑀢𑀺 𑀢𑀭𑀼𑀡𑀦𑀸𑀕𑀸. 𑀢𑁂 𑀏𑀯𑀭𑀽𑀧𑁂𑀦 𑀅𑀦𑀼𑀢𑁆𑀢𑀭𑁂𑀦 𑀬𑁄𑀕𑀸𑀘𑀭𑀺𑀬𑁂𑀦 𑀤𑀫𑀺𑀢𑁂 𑀢𑀭𑀼𑀡𑀦𑀸𑀕𑁂 𑀤𑀲𑁆𑀲𑀦𑀸𑀬 𑀆𑀕𑀢𑀫𑁆𑀳 𑀪𑀕𑀯𑀸𑀢𑀺. 𑀲𑁄𑀧𑀺 𑀕𑀦𑁆𑀢𑁆𑀯𑀸 𑀬𑀣𑀸𑀞𑀸𑀦𑁂𑀬𑁂𑀯 𑀅𑀝𑁆𑀞𑀸𑀲𑀺.

𑀅𑀣 𑀘𑀢𑀼𑀢𑁆𑀣𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑀅𑀪𑀸𑀲𑀺. 𑀢𑀢𑁆𑀣 𑀕𑀢𑀸𑀲𑁂𑀢𑀺 𑀦𑀺𑀩𑁆𑀩𑁂𑀫𑀢𑀺𑀓𑀲𑀭𑀡𑀕𑀫𑀦𑁂𑀦 𑀕𑀢𑀸. 𑀲𑁄𑀧𑀺 𑀕𑀦𑁆𑀢𑁆𑀯𑀸 𑀬𑀣𑀸𑀞𑀸𑀦𑁂𑀬𑁂𑀯 𑀅𑀝𑁆𑀞𑀸𑀲𑀺.

𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑀯𑀡𑁆𑀡𑀦𑀸

𑁩𑁩𑁩. 𑀅𑀣 𑀪𑀕𑀯𑀸 𑀑𑀮𑁄𑀓𑁂𑀦𑁆𑀢𑁄 𑀧𑀣𑀯𑀻𑀢𑀮𑀢𑁄 𑀬𑀸𑀯 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀧𑀭𑀺𑀘𑁆𑀙𑁂𑀤𑀸 𑀬𑀸𑀯 𑀅𑀓𑀦𑀺𑀝𑁆𑀞𑀩𑁆𑀭𑀳𑁆𑀫𑀮𑁄𑀓𑀸 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀳𑀸 𑀅𑀬𑀁 𑀤𑁂𑀯𑀢𑀸𑀲𑀫𑀸𑀕𑀫𑁄, 𑀪𑀺𑀓𑁆𑀔𑀽 𑀧𑀦 𑀏𑀯𑀁 𑀫𑀳𑀸 𑀤𑁂𑀯𑀢𑀸𑀬 𑀲𑀫𑀸𑀕𑀫𑁄𑀢𑀺 𑀦 𑀚𑀸𑀦𑀦𑁆𑀢𑀺, 𑀳𑀦𑁆𑀤, 𑀦𑁂𑀲𑀁 𑀆𑀘𑀺𑀓𑁆𑀔𑀸𑀫𑀻’’𑀢𑀺, 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 ¶ ‘‘𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻’’𑀢𑀺 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀢𑀢𑁆𑀣 𑀏𑀢𑀧𑀭𑀫𑀸𑀢𑀺 𑀏𑀢𑀁 𑀧𑀭𑀫𑀁 𑀧𑀫𑀸𑀡𑀁 𑀏𑀢𑁂𑀲𑀦𑁆𑀢𑀺 𑀏𑀢𑀧𑀭𑀫𑀸. 𑀇𑀤𑀸𑀦𑀺 𑀩𑀼𑀤𑁆𑀥𑀸𑀦𑀁 𑀧𑀦 𑀅𑀪𑀸𑀯𑀸 ‘‘𑀬𑁂𑀧𑀺 𑀢𑁂, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀻’’𑀢𑀺 𑀢𑀢𑀺𑀬𑁄 𑀯𑀸𑀭𑁄 𑀦 𑀯𑀼𑀢𑁆𑀢𑁄. 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺, 𑀪𑀺𑀓𑁆𑀔𑀯𑁂𑀢𑀺 𑀓𑀲𑁆𑀫𑀸 𑀆𑀳? 𑀤𑁂𑀯𑀢𑀸𑀦𑀁 𑀘𑀺𑀢𑁆𑀢𑀓𑀮𑁆𑀮𑀢𑀸𑀚𑀦𑀦𑀢𑁆𑀣𑀁. 𑀤𑁂𑀯𑀢𑀸 𑀓𑀺𑀭 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀪𑀕𑀯𑀸 𑀏𑀯𑀁 𑀫𑀳𑀦𑁆𑀢𑁂 𑀲𑀫𑀸𑀕𑀫𑁂 𑀫𑀳𑁂𑀲𑀓𑁆𑀔𑀸𑀦𑀁𑀬𑁂𑀯 𑀤𑁂𑀯𑀢𑀸𑀦𑀁 𑀦𑀸𑀫𑀕𑁄𑀢𑁆𑀢𑀸𑀦𑀺 𑀓𑀣𑁂𑀲𑁆𑀲𑀢𑀺, 𑀅𑀧𑁆𑀧𑁂𑀲𑀓𑁆𑀔𑀸𑀦𑀁 𑀓𑀺𑀁 𑀓𑀣𑁂𑀲𑁆𑀲𑀢𑀻’’𑀢𑀺? 𑀅𑀣 ¶ 𑀪𑀕𑀯𑀸 ‘‘𑀇𑀫𑀸 𑀤𑁂𑀯𑀢𑀸 𑀓𑀺𑀁 𑀘𑀺𑀦𑁆𑀢𑁂𑀦𑁆𑀢𑀻’’𑀢𑀺 𑀆𑀯𑀚𑁆𑀚𑀦𑁆𑀢𑁄 𑀫𑀼𑀔𑁂𑀦 𑀳𑀢𑁆𑀣𑀁 𑀧𑀯𑁂𑀲𑁂𑀢𑁆𑀯𑀸 𑀳𑀤𑀬𑀫𑀁𑀲𑀁 𑀫𑀤𑁆𑀤𑀦𑁆𑀢𑁄 𑀯𑀺𑀬 𑀲𑀪𑀡𑁆𑀟𑀁 𑀘𑁄𑀭𑀁 𑀕𑀡𑁆𑀳𑀦𑁆𑀢𑁄 𑀯𑀺𑀬 𑀘 𑀢𑀁 𑀢𑀸𑀲𑀁 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑁋 ‘‘𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀢𑁄 𑀆𑀕𑀢𑀸𑀕𑀢𑀸𑀦𑀁 𑀅𑀧𑁆𑀧𑁂𑀲𑀓𑁆𑀔𑀫𑀳𑁂𑀲𑀓𑁆𑀔𑀸𑀦𑀁 𑀲𑀩𑁆𑀩𑀸𑀲𑀫𑁆𑀧𑀺 𑀤𑁂𑀯𑀢𑀸𑀦𑀁 𑀦𑀸𑀫𑀕𑁄𑀢𑁆𑀢𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺.

𑀩𑀼𑀤𑁆𑀥𑀸 𑀦𑀸𑀫 𑀫𑀳𑀦𑁆𑀢𑀸 𑀏𑀢𑁂 𑀲𑀢𑁆𑀢𑀯𑀺𑀲𑁂𑀲𑀸, 𑀬𑀁 𑀲𑀤𑁂𑀯𑀓𑀲𑁆𑀲 ¶ 𑀮𑁄𑀓𑀲𑁆𑀲 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀦 𑀓𑀺𑀜𑁆𑀘𑀺 𑀓𑀢𑁆𑀣𑀘𑀺 𑀦𑀻𑀮𑀸𑀤𑀺𑀯𑀲𑁂𑀦 𑀯𑀺𑀪𑀢𑁆𑀢𑀭𑀽𑀧𑀸𑀭𑀫𑁆𑀫𑀡𑁂𑀲𑀼 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸 𑀪𑁂𑀭𑀻𑀲𑀤𑁆𑀤𑀸𑀤𑀺𑀯𑀲𑁂𑀦 𑀯𑀺𑀪𑀢𑁆𑀢𑀲𑀤𑁆𑀤𑀸𑀭𑀫𑁆𑀫𑀡𑀸𑀤𑀻𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀤𑁆𑀤𑀸𑀤𑀺𑀆𑀭𑀫𑁆𑀫𑀡𑀁 𑀯𑀸 𑀅𑀢𑁆𑀣𑀺, 𑀬𑀁 𑀏𑀢𑁂𑀲𑀁 𑀜𑀸𑀡𑀫𑀼𑀔𑁂 𑀆𑀧𑀸𑀣𑀁 𑀦𑀸𑀕𑀘𑁆𑀙𑀢𑀺. 𑀬𑀣𑀸𑀳 𑁋

‘‘𑀬𑀁 𑀪𑀺𑀓𑁆𑀔𑀯𑁂 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲…𑀧𑁂… 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀫𑀳𑀁 𑀚𑀸𑀦𑀸𑀫𑀺, 𑀢𑀫𑀳𑀁 𑀧𑀲𑁆𑀲𑀸𑀫𑀺, 𑀢𑀫𑀳𑀁 𑀅𑀩𑁆𑀪𑀜𑁆𑀜𑀸𑀲𑀺’’𑀦𑁆𑀢𑀺 (𑀅. 𑀦𑀺. 𑁪.𑁨𑁪).

𑀏𑀯𑀁 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑁄 𑀪𑀕𑀯𑀸 𑀲𑀩𑁆𑀩𑀸𑀧𑀺 𑀢𑀸 𑀤𑁂𑀯𑀢𑀸 𑀪𑀩𑁆𑀩𑀸𑀪𑀩𑁆𑀩𑀯𑀲𑁂𑀦 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀅𑀓𑀸𑀲𑀺. ‘‘𑀓𑀫𑁆𑀫𑀸𑀯𑀭𑀡𑁂𑀦 𑀯𑀸 𑀲𑀫𑀦𑁆𑀦𑀸𑀕𑀢𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸 𑀲𑀢𑁆𑀢𑀸 𑀅𑀪𑀩𑁆𑀩𑀸 𑀦𑀸𑀫. 𑀢𑁂 𑀏𑀓𑀯𑀺𑀳𑀸𑀭𑁂 𑀯𑀲𑀦𑁆𑀢𑁂𑀧𑀺 𑀩𑀼𑀤𑁆𑀥𑀸 𑀦 𑀑𑀮𑁄𑀓𑁂𑀦𑁆𑀢𑀺. 𑀯𑀺𑀧𑀭𑀻𑀢𑀸 𑀧𑀦 𑀪𑀩𑁆𑀩𑀸 𑀦𑀸𑀫, 𑀢𑁂 𑀤𑀽𑀭𑁂 𑀯𑀲𑀦𑁆𑀢𑁂𑀧𑀺 𑀕𑀦𑁆𑀢𑁆𑀯𑀸 𑀲𑀗𑁆𑀕𑀡𑁆𑀳𑀦𑁆𑀢𑀺. 𑀢𑀲𑁆𑀫𑀸 𑀢𑀲𑁆𑀫𑀺𑀫𑁆𑀧𑀺 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑁂 𑀬𑁂 𑀅𑀪𑀩𑁆𑀩𑀸, 𑀢𑁂 𑀧𑀳𑀸𑀬 𑀪𑀩𑁆𑀩𑁂 𑀧𑀭𑀺𑀕𑁆𑀕𑀳𑁂𑀲𑀺. 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑁋 ‘‘𑀏𑀢𑁆𑀢𑀓𑀸 𑀏𑀢𑁆𑀣 𑀭𑀸𑀕𑀘𑀭𑀺𑀢𑀸, 𑀏𑀢𑁆𑀢𑀓𑀸 𑀤𑁄𑀲𑀘𑀭𑀺𑀢𑀸, 𑀏𑀢𑁆𑀢𑀓𑀸 𑀫𑁄𑀳𑀘𑀭𑀺𑀢𑀸’’𑀢𑀺 𑀘𑀭𑀺𑀢𑀯𑀲𑁂𑀦 𑀙 𑀓𑁄𑀝𑁆𑀞𑀸𑀲𑁂 𑀅𑀓𑀸𑀲𑀺. 𑀅𑀣 𑀦𑁂𑀲𑀁 𑀲𑀧𑁆𑀧𑀸𑀬𑀁 𑀥𑀫𑁆𑀫𑀤𑁂𑀲𑀦𑀁 𑀉𑀧𑀥𑀸𑀭𑀬𑀦𑁆𑀢𑁄 𑁋 ‘‘𑀭𑀸𑀕𑀘𑀭𑀺𑀢𑀸𑀦𑀁 𑀤𑁂𑀯𑀢𑀸𑀦𑀁 𑀲𑀫𑁆𑀫𑀸𑀧𑀭𑀺𑀩𑁆𑀩𑀸𑀚𑀦𑀺𑀬𑀲𑀼𑀢𑁆𑀢𑀁 𑀓𑀣𑁂𑀲𑁆𑀲𑀸𑀫𑀺, 𑀤𑁄𑀲𑀘𑀭𑀺𑀢𑀸𑀦𑀁 𑀓𑀮𑀳𑀯𑀺𑀯𑀸𑀤𑀲𑀼𑀢𑁆𑀢𑀁, 𑀫𑁄𑀳𑀘𑀭𑀺𑀢𑀸𑀦𑀁 𑀫𑀳𑀸𑀩𑁆𑀬𑀽𑀳𑀲𑀼𑀢𑁆𑀢𑀁, 𑀯𑀺𑀢𑀓𑁆𑀓𑀘𑀭𑀺𑀢𑀸𑀦𑀁 𑀘𑀽𑀴𑀩𑁆𑀬𑀽𑀳𑀲𑀼𑀢𑁆𑀢𑀁, 𑀲𑀤𑁆𑀥𑀸𑀘𑀭𑀺𑀢𑀸𑀦𑀁 𑀢𑀼𑀯𑀝𑁆𑀝𑀓𑀧𑀝𑀺𑀧𑀤𑀁, 𑀩𑀼𑀤𑁆𑀥𑀺𑀘𑀭𑀺𑀢𑀸𑀦𑀁 𑀧𑀼𑀭𑀸𑀪𑁂𑀤𑀲𑀼𑀢𑁆𑀢𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀤𑁂𑀲𑀦𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀼𑀦 𑀢𑀁 𑀧𑀭𑀺𑀲𑀁 𑀫𑀦𑀲𑀸𑀓𑀸𑀲𑀺 𑁋 ‘‘𑀅𑀢𑁆𑀢𑀚𑁆𑀛𑀸𑀲𑀬𑁂𑀦 𑀦𑀼 𑀔𑁄 𑀚𑀸𑀦𑁂𑀬𑁆𑀬, 𑀧𑀭𑀚𑁆𑀛𑀸𑀲𑀬𑁂𑀦 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀓𑁂𑀦 𑀧𑀼𑀘𑁆𑀙𑀸𑀯𑀲𑁂𑀦𑀸’’𑀢𑀺. 𑀢𑀢𑁄 ‘‘𑀧𑀼𑀘𑁆𑀙𑀸𑀯𑀲𑁂𑀦 𑀚𑀸𑀦𑁂𑀬𑁆𑀬𑀸’’𑀢𑀺 𑀜𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑁄𑀘𑀺 𑀤𑁂𑀯𑀢𑀸𑀦𑀁 𑀅𑀚𑁆𑀛𑀸𑀲𑀬𑀁 𑀕𑀳𑁂𑀢𑁆𑀯𑀸 𑀘𑀭𑀺𑀢𑀯𑀲𑁂𑀦 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀲𑀫𑀢𑁆𑀣𑁄’’𑀢𑀺 ‘‘𑀢𑁂𑀲𑀼 𑀧𑀜𑁆𑀘𑀲𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀏𑀓𑁄𑀧𑀺 ¶ 𑀦 𑀲𑀓𑁆𑀓𑁄𑀢𑀻’’𑀢𑀺 𑀅𑀤𑁆𑀤𑀲. 𑀢𑀢𑁄 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑁂 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀘 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 ‘‘𑀢𑁂𑀧𑀺 ¶ 𑀦 𑀲𑀓𑁆𑀓𑁄𑀦𑁆𑀢𑀻’’𑀢𑀺 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀲𑀘𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀪𑀯𑁂𑀬𑁆𑀬, 𑀲𑀓𑁆𑀓𑀼𑀡𑁂𑀬𑁆𑀬 𑀦𑀼 𑀔𑁄’’𑀢𑀺 ‘‘𑀲𑁄𑀧𑀺 𑀦 𑀲𑀓𑁆𑀓𑀼𑀡𑁂𑀬𑁆𑀬𑀸’’𑀢𑀺 𑀜𑀢𑁆𑀯𑀸 ‘‘𑀲𑀓𑁆𑀓𑀲𑀼𑀬𑀸𑀫𑀸𑀤𑀻𑀲𑀼 𑀓𑁄𑀘𑀺 𑀲𑀓𑁆𑀓𑀼𑀡𑁂𑀬𑁆𑀬𑀸’’𑀢𑀺 𑀲𑀫𑀦𑁆𑀦𑀸𑀳𑀭𑀺. 𑀲𑀘𑁂 𑀳𑀺 𑀢𑁂𑀲𑀼 𑀓𑁄𑀘𑀺 𑀲𑀓𑁆𑀓𑀼𑀡𑁂𑀬𑁆𑀬, 𑀢𑀁 𑀧𑀼𑀘𑁆𑀙𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀯𑀺𑀲𑁆𑀲𑀚𑁆𑀚𑁂𑀬𑁆𑀬, 𑀦 𑀧𑀦 𑀢𑁂𑀲𑀼𑀧𑀺 𑀓𑁄𑀘𑀺 𑀲𑀓𑁆𑀓𑁄𑀢𑀺.

𑀅𑀣𑀲𑁆𑀲 ¶ 𑀏𑀢𑀤𑀳𑁄𑀲𑀺 𑁋 ‘‘𑀫𑀸𑀤𑀺𑀲𑁄 𑀩𑀼𑀤𑁆𑀥𑁄𑀬𑁂𑀯 𑀲𑀓𑁆𑀓𑀼𑀡𑁂𑀬𑁆𑀬, 𑀅𑀢𑁆𑀣𑀺 𑀧𑀦 𑀓𑀢𑁆𑀣𑀘𑀺 𑀅𑀜𑁆𑀜𑁄 𑀩𑀼𑀤𑁆𑀥𑁄’’𑀢𑀺 𑀅𑀦𑀦𑁆𑀢𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀦𑀦𑁆𑀢𑀜𑀸𑀡𑀁 𑀧𑀢𑁆𑀣𑀭𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀅𑀜𑁆𑀜𑀁 𑀩𑀼𑀤𑁆𑀥𑀁 𑀦 𑀅𑀤𑁆𑀤𑀲. 𑀅𑀦𑀘𑁆𑀙𑀭𑀺𑀬𑀜𑁆𑀘𑁂𑀢𑀁, 𑀬𑀁 𑀇𑀤𑀸𑀦𑀺 𑀅𑀢𑁆𑀢𑀦𑀸 𑀲𑀫𑀁 𑀦 𑀧𑀲𑁆𑀲𑁂𑀬𑁆𑀬, 𑀲𑁄 𑀚𑀸𑀢𑀤𑀺𑀯𑀲𑁂𑀧𑀺 𑀩𑁆𑀭𑀳𑁆𑀫𑀚𑀸𑀮𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀢𑀦𑀸 𑀲𑀫𑀁 𑀅𑀧𑀲𑁆𑀲𑀦𑁆𑀢𑁄 𑁋 ‘‘𑀅𑀕𑁆𑀕𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲𑀸’’𑀢𑀺 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀁 𑀲𑀻𑀳𑀦𑀸𑀤𑀁 𑀦𑀤𑀺. 𑀏𑀯𑀁 𑀅𑀜𑁆𑀜𑀁 𑀅𑀢𑁆𑀢𑀦𑀸 𑀲𑀫𑀁 𑀅𑀧𑀲𑁆𑀲𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀅𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀅𑀳𑀫𑁂𑀯 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀁, 𑀏𑀯𑀫𑁆𑀧𑁂𑀢𑀸 𑀤𑁂𑀯𑀢𑀸 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁. 𑀅𑀜𑁆𑀜𑀲𑁆𑀫𑀺𑀁 𑀧𑀦 𑀩𑀼𑀤𑁆𑀥𑁂𑀬𑁂𑀯 𑀧𑀼𑀘𑁆𑀙𑀦𑁆𑀢𑁂 𑀫𑀬𑀺 𑀘 𑀯𑀺𑀲𑁆𑀲𑀚𑁆𑀚𑀦𑁆𑀢𑁂 𑀅𑀘𑁆𑀙𑁂𑀭𑀓𑀁 𑀪𑀯𑀺𑀲𑁆𑀲𑀢𑀺, 𑀲𑀓𑁆𑀔𑀺𑀲𑁆𑀲𑀦𑁆𑀢𑀺 𑀘 𑀤𑁂𑀯𑀢𑀸 𑀧𑀝𑀺𑀯𑀺𑀚𑁆𑀛𑀺𑀢𑀼𑀁, 𑀢𑀲𑁆𑀫𑀸 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑀁 𑀫𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑁋 ‘‘𑀧𑀢𑁆𑀢𑀘𑀻𑀯𑀭𑀕𑀳𑀡𑀁 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀁 𑀲𑀫𑀺𑀜𑁆𑀚𑀺𑀢𑀧𑀲𑀸𑀭𑀺𑀢𑀜𑁆𑀘 𑀫𑀫 𑀲𑀤𑀺𑀲𑀁𑀬𑁂𑀯 𑀳𑁄𑀢𑀽’’𑀢𑀺 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀳𑀺 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀸𑀘𑀻𑀦𑀬𑀼𑀕𑀦𑁆𑀥𑀭𑀧𑀭𑀺𑀓𑁆𑀔𑁂𑀧𑀢𑁄 𑀉𑀮𑁆𑀮𑀗𑁆𑀖𑀫𑀸𑀦𑀁 𑀘𑀦𑁆𑀤𑀫𑀡𑁆𑀟𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑀁 𑀯𑀺𑀬 𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑁂𑀦 𑀅𑀥𑀺𑀝𑁆𑀞𑀸𑀲𑀺.

𑀤𑁂𑀯𑀲𑀗𑁆𑀖𑁄 𑀢𑀁 𑀤𑀺𑀲𑁆𑀯𑀸 𑁋 ‘‘𑀅𑀜𑁆𑀜𑁄𑀧𑀺 𑀦𑀼 𑀔𑁄, 𑀪𑁄, 𑀘𑀦𑁆𑀤𑁄 𑀉𑀕𑁆𑀕𑀢𑁄’’𑀢𑀺 𑀆𑀳. 𑀅𑀣 𑀘𑀦𑁆𑀤𑀁 𑀑𑀳𑀸𑀬 𑀆𑀲𑀦𑁆𑀦𑀢𑀭𑁂 𑀚𑀸𑀢𑁂 ‘‘𑀦 𑀘𑀦𑁆𑀤𑁄, 𑀲𑀽𑀭𑀺𑀬𑁄 𑀉𑀕𑁆𑀕𑀢𑁄’’𑀢𑀺, 𑀧𑀼𑀦 𑀆𑀲𑀦𑁆𑀦𑀢𑀭𑁂 𑀚𑀸𑀢𑁂 ‘‘𑀦 𑀲𑀽𑀭𑀺𑀬𑁄, 𑀤𑁂𑀯𑀯𑀺𑀫𑀸𑀦𑀁 𑀏𑀓’’𑀦𑁆𑀢𑀺, 𑀧𑀼𑀦 𑀆𑀲𑀦𑁆𑀦𑀢𑀭𑁂 𑀚𑀸𑀢𑁂 ‘‘𑀦 𑀤𑁂𑀯𑀯𑀺𑀫𑀸𑀦𑀁, 𑀤𑁂𑀯𑀧𑀼𑀢𑁆𑀢𑁄 𑀏𑀓𑁄’’𑀢𑀺, 𑀧𑀼𑀦 𑀆𑀲𑀦𑁆𑀦𑀢𑀭𑁂 𑀚𑀸𑀢𑁂 ‘‘𑀦 𑀤𑁂𑀯𑀧𑀼𑀢𑁆𑀢𑁄, 𑀫𑀳𑀸𑀩𑁆𑀭𑀳𑁆𑀫𑀸 𑀏𑀓𑁄’’𑀢𑀺, 𑀧𑀼𑀦 𑀆𑀲𑀦𑁆𑀦𑀢𑀭𑁂 𑀚𑀸𑀢𑁂 ‘‘𑀦 𑀫𑀳𑀸𑀩𑁆𑀭𑀳𑁆𑀫𑀸, 𑀅𑀧𑀭𑁄𑀧𑀺 𑀪𑁄 𑀩𑀼𑀤𑁆𑀥𑁄 𑀆𑀕𑀢𑁄’’𑀢𑀺 𑀆𑀳. 𑀢𑀢𑁆𑀣 𑀧𑀼𑀣𑀼𑀚𑁆𑀚𑀦𑀤𑁂𑀯𑀢𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀏𑀓𑀩𑀼𑀤𑁆𑀥𑀲𑁆𑀲 𑀢𑀸𑀯 𑀅𑀬𑀁 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑁄, 𑀤𑁆𑀯𑀺𑀦𑁆𑀦𑀁 𑀓𑀻𑀯 𑀫𑀳𑀦𑁆𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀭𑀺𑀬𑀤𑁂𑀯𑀢𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀩𑀼𑀤𑁆𑀥𑀸 𑀦𑀸𑀫 𑀦𑀢𑁆𑀣𑀺, 𑀅𑀤𑁆𑀥𑀸 𑀪𑀕𑀯𑀢𑀸 𑀅𑀢𑁆𑀢𑀦𑀸 𑀲𑀤𑀺𑀲𑁄 𑀅𑀜𑁆𑀜𑁄 𑀏𑀓𑁄 𑀩𑀼𑀤𑁆𑀥𑁄 𑀦𑀺𑀫𑁆𑀫𑀺𑀢𑁄’’𑀢𑀺.

𑀅𑀣 𑀢𑀲𑁆𑀲 𑀤𑁂𑀯𑀲𑀗𑁆𑀖𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑁄 𑀆𑀕𑀦𑁆𑀢𑁆𑀯𑀸 𑀤𑀲𑀩𑀮𑀁 𑀅𑀯𑀦𑁆𑀤𑀺𑀢𑁆𑀯𑀸𑀯 𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀲𑀫𑀲𑀫𑀁 𑀓𑀢𑁆𑀯𑀸 𑀫𑀸𑀧𑀺𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀪𑀕𑀯𑀢𑁄𑀧𑀺 𑀤𑁆𑀯𑀢𑁆𑀢𑀺𑀁𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺, 𑀦𑀺𑀫𑁆𑀫𑀺𑀢𑀲𑁆𑀲𑀸𑀧𑀺 𑀤𑁆𑀯𑀢𑁆𑀢𑀺𑀁𑀲𑀸𑀯, 𑀪𑀕𑀯𑀢𑁄𑀧𑀺 ¶ 𑀲𑀭𑀻𑀭𑀸 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀦𑁆𑀢𑀺 ¶ , 𑀦𑀺𑀫𑁆𑀫𑀺𑀢𑀲𑁆𑀲𑀸𑀧𑀺, 𑀪𑀕𑀯𑀢𑁄 𑀲𑀭𑀻𑀭𑀭𑀲𑁆𑀫𑀺𑀬𑁄 𑀦𑀺𑀫𑁆𑀫𑀺𑀢𑀲𑁆𑀲 𑀲𑀭𑀻𑀭𑁂 𑀧𑀝𑀺𑀳𑀜𑁆𑀜𑀦𑁆𑀢𑀺, 𑀦𑀺𑀫𑁆𑀫𑀺𑀢𑀲𑁆𑀲 𑀲𑀭𑀻𑀭𑀭𑀲𑁆𑀫𑀺𑀬𑁄 𑀪𑀕𑀯𑀢𑁄 𑀓𑀸𑀬𑁂 𑀧𑀝𑀺𑀳𑀜𑁆𑀜𑀦𑁆𑀢𑀺. 𑀢𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀲𑀭𑀻𑀭𑀢𑁄 ¶ 𑀉𑀕𑁆𑀕𑀫𑁆𑀫 𑀅𑀓𑀦𑀺𑀝𑁆𑀞𑀪𑀯𑀦𑀁 𑀆𑀳𑀘𑁆𑀘 𑀢𑀢𑁄 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀤𑁂𑀯𑀢𑀸𑀦𑀁 𑀫𑀢𑁆𑀣𑀓𑀧𑀭𑀺𑀬𑀦𑁆𑀢𑁂 𑀑𑀢𑀭𑀺𑀢𑁆𑀯𑀸 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀲𑀼𑀯𑀡𑁆𑀡𑀫𑀬𑀯𑀗𑁆𑀓𑀕𑁄𑀧𑀸𑀦𑀲𑀻𑀯𑀺𑀦𑀤𑁆𑀥𑀫𑀺𑀯 𑀘𑁂𑀢𑀺𑀬𑀖𑀭𑀁 𑀯𑀺𑀭𑁄𑀘𑀺𑀢𑁆𑀣. 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀏𑀓𑀘𑀓𑁆𑀓𑀯𑀸𑀴𑁂 𑀭𑀸𑀲𑀺𑀪𑀽𑀢𑀸 𑀤𑁆𑀯𑀺𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀭𑀲𑁆𑀫𑀺𑀕𑀩𑁆𑀪𑀦𑁆𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑁄 𑀦𑀺𑀲𑀻𑀤𑀦𑁆𑀢𑁄𑀬𑁂𑀯 𑀤𑀲𑀩𑀮𑀲𑁆𑀲 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀅𑀪𑀺𑀢𑁆𑀣𑀯𑀦𑁆𑀢𑁄 𑁋

‘‘𑀧𑀼𑀘𑁆𑀙𑀸𑀫𑀺 𑀫𑀼𑀦𑀺𑀁 𑀧𑀳𑀽𑀢𑀧𑀜𑁆𑀜𑀁,

𑀢𑀺𑀡𑁆𑀡𑀁 𑀧𑀸𑀭𑀗𑁆𑀕𑀢𑀁 𑀧𑀭𑀺𑀦𑀺𑀩𑁆𑀩𑀼𑀢𑀁 𑀞𑀺𑀢𑀢𑁆𑀢𑀁;

𑀦𑀺𑀓𑁆𑀔𑀫𑁆𑀫 𑀖𑀭𑀸 𑀧𑀦𑀼𑀚𑁆𑀚 𑀓𑀸𑀫𑁂,

𑀓𑀣𑀁 𑀪𑀺𑀓𑁆𑀔𑀼 𑀲𑀫𑁆𑀫𑀸 𑀲𑁄 𑀮𑁄𑀓𑁂 𑀧𑀭𑀺𑀩𑁆𑀩𑀚𑁂𑀬𑁆𑀬𑀸’’𑀢𑀺. (𑀲𑀼. 𑀦𑀺. 𑁩𑁬𑁧) 𑁋

𑀕𑀸𑀣𑀁 𑀅𑀪𑀸𑀲𑀺. 𑀲𑀢𑁆𑀣𑀸 𑀤𑁂𑀯𑀢𑀸𑀦𑀁 𑀢𑀸𑀯 𑀘𑀺𑀢𑁆𑀢𑀓𑀮𑁆𑀮𑀢𑀸𑀚𑀦𑀦𑀢𑁆𑀣𑀁 𑀆𑀕𑀢𑀸𑀕𑀢𑀸𑀦𑀁 𑀦𑀸𑀫𑀕𑁄𑀢𑁆𑀢𑀸𑀦𑀺 𑀓𑀣𑁂𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳.

𑁩𑁩𑁪. 𑀢𑀢𑁆𑀣 𑀲𑀺𑀮𑁄𑀓𑀫𑀦𑀼𑀓𑀲𑁆𑀲𑀸𑀫𑀻𑀢𑀺 𑀅𑀓𑁆𑀔𑀭𑀧𑀤𑀦𑀺𑀬𑀫𑀺𑀢𑀁 𑀯𑀘𑀦𑀲𑀗𑁆𑀖𑀸𑀢𑀁 𑀧𑀯𑀢𑁆𑀢𑀬𑀺𑀲𑁆𑀲𑀸𑀫𑀺. 𑀬𑀢𑁆𑀣 𑀪𑀼𑀫𑁆𑀫𑀸 𑀢𑀤𑀲𑁆𑀲𑀺𑀢𑀸𑀢𑀺 𑀬𑁂𑀲𑀼 𑀬𑁂𑀲𑀼 𑀞𑀸𑀦𑁂𑀲𑀼 𑀪𑀼𑀫𑁆𑀫𑀸 𑀤𑁂𑀯𑀢𑀸 𑀢𑀁 𑀢𑀁 𑀦𑀺𑀲𑁆𑀲𑀺𑀢𑀸. 𑀬𑁂 𑀲𑀺𑀢𑀸 𑀕𑀺𑀭𑀺𑀕𑀩𑁆𑀪𑀭𑀦𑁆𑀢𑀺𑀆𑀤𑀻𑀳𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀯𑀡𑁆𑀡𑀁 𑀓𑀣𑁂𑀲𑀺, 𑀬𑁂 𑀪𑀺𑀓𑁆𑀔𑀽 𑀕𑀺𑀭𑀺𑀓𑀼𑀘𑁆𑀙𑀺𑀁 𑀦𑀺𑀲𑁆𑀲𑀺𑀢𑀸𑀢𑀺 𑀅𑀢𑁆𑀣𑁄. 𑀧𑀳𑀺𑀢𑀢𑁆𑀢𑀸𑀢𑀺 𑀧𑁂𑀲𑀺𑀢𑀘𑀺𑀢𑁆𑀢𑀸. 𑀲𑀫𑀸𑀳𑀺𑀢𑀸𑀢𑀺 𑀅𑀯𑀺𑀓𑁆𑀔𑀺𑀢𑁆𑀢𑀸.

𑀧𑀼𑀣𑀽𑀢𑀺 𑀩𑀳𑀼𑀚𑀦𑀸. 𑀲𑀻𑀳𑀸𑀯 𑀲𑀮𑁆𑀮𑀻𑀦𑀸𑀢𑀺 𑀲𑀻𑀳𑀸 𑀯𑀺𑀬 𑀦𑀺𑀮𑀻𑀦𑀸 𑀏𑀓𑀢𑁆𑀢𑀁 𑀉𑀧𑀕𑀢𑀸. 𑀮𑁄𑀫𑀳𑀁𑀲𑀸𑀪𑀺𑀲𑀫𑁆𑀪𑀼𑀦𑁄𑀢𑀺 𑀮𑁄𑀫𑀳𑀁𑀲𑀁 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑀸, 𑀦𑀺𑀩𑁆𑀪𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀑𑀤𑀸𑀢𑀫𑀦𑀲𑀸 𑀲𑀼𑀤𑁆𑀥𑀸𑀢𑀺 𑀑𑀤𑀸𑀢𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀲𑀼𑀤𑁆𑀥𑀸. 𑀯𑀺𑀧𑁆𑀧𑀲𑀦𑁆𑀦𑀸𑀫𑀦𑀸𑀯𑀺𑀮𑀸𑀢𑀺 𑀯𑀺𑀧𑁆𑀧𑀲𑀦𑁆𑀦𑀅𑀦𑀸𑀯𑀺𑀮𑀸.

𑀪𑀺𑀬𑁆𑀬𑁄𑀧𑀜𑁆𑀘𑀲𑀢𑁂 𑀜𑀢𑁆𑀯𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀤𑁆𑀥𑀺𑀁 𑀅𑀢𑀺𑀭𑁂𑀓𑀧𑀜𑁆𑀘𑀲𑀢𑁂 𑀪𑀺𑀓𑁆𑀔𑀽 𑀚𑀸𑀦𑀺𑀢𑁆𑀯𑀸. 𑀯𑀦𑁂 𑀓𑀸𑀧𑀺𑀮𑀯𑀢𑁆𑀣𑀯𑁂𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑀫𑀻𑀧𑀫𑁆𑀳𑀺 𑀚𑀸𑀢𑁂 𑀯𑀦𑀲𑀡𑁆𑀟𑁂. 𑀢𑀢𑁄 𑀆𑀫𑀦𑁆𑀢𑀬𑀻 𑀲𑀢𑁆𑀣𑀸𑀢𑀺 𑀢𑀤𑀸 𑀆𑀫𑀦𑁆𑀢𑀬𑀺. 𑀲𑀸𑀯𑀓𑁂 ¶ 𑀲𑀸𑀲𑀦𑁂 𑀭𑀢𑁂𑀢𑀺 𑀅𑀢𑁆𑀢𑀦𑁄 𑀥𑀫𑁆𑀫𑀤𑁂𑀲𑀦𑀸𑀬 𑀲𑀯𑀦𑀦𑁆𑀢𑁂 𑀚𑀸𑀢𑀢𑁆𑀢𑀸 𑀲𑀸𑀯𑀓𑁂 ¶ 𑀲𑀺𑀓𑁆𑀔𑀢𑁆𑀢𑀬𑀲𑀸𑀲𑀦𑁂 ¶ 𑀭𑀢𑀢𑁆𑀢𑀸 𑀲𑀸𑀲𑀦𑁂 𑀭𑀢𑁂. 𑀇𑀤𑀁 𑀲𑀩𑁆𑀩𑀁 𑁋 ‘‘𑀲𑀺𑀮𑁄𑀓𑀫𑀦𑀼𑀓𑀲𑁆𑀲𑀸𑀫𑀻’’𑀢𑀺 𑀯𑀘𑀦𑀢𑁄 𑀅𑀜𑁆𑀜𑁂𑀦 𑀯𑀼𑀢𑁆𑀢𑀁 𑀯𑀺𑀬 𑀓𑀢𑁆𑀯𑀸 𑀯𑀤𑀢𑀺.

𑀤𑁂𑀯𑀓𑀸𑀬𑀸 𑀅𑀪𑀺𑀓𑁆𑀓𑀦𑁆𑀢𑀸, 𑀢𑁂 𑀯𑀺𑀚𑀸𑀦𑀸𑀣 𑀪𑀺𑀓𑁆𑀔𑀯𑁄𑀢𑀺 𑀢𑁂 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀯𑀺𑀚𑀸𑀦𑀸𑀣𑀸𑀢𑀺 𑀦𑁂𑀲𑀁 𑀪𑀺𑀓𑁆𑀔𑀽𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀪𑀺𑀦𑀻𑀳𑀸𑀭𑀢𑁆𑀣𑀸𑀬 𑀓𑀣𑁂𑀲𑀺. 𑀢𑁂 𑀘 𑀆𑀢𑀧𑁆𑀧𑀫𑀓𑀭𑀼𑀁, 𑀲𑀼𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀦𑁆𑀢𑀺 𑀢𑁂 𑀘 𑀪𑀺𑀓𑁆𑀔𑀽 𑀢𑀁 𑀩𑀼𑀤𑁆𑀥𑀲𑀸𑀲𑀦𑀁 𑀲𑀼𑀢𑁆𑀯𑀸 𑀢𑀸𑀯𑀤𑁂𑀯 𑀢𑀤𑀢𑁆𑀣𑀸𑀬 𑀯𑀻𑀭𑀺𑀬𑀁 𑀓𑀭𑀺𑀁𑀲𑀼.

𑀏𑀯𑀁 𑀓𑀢𑀫𑀢𑁆𑀢𑀸𑀢𑀧𑁆𑀧𑀸𑀦𑀁𑀬𑁂𑀯 𑀢𑁂𑀲𑀁 𑀧𑀸𑀢𑀼𑀭𑀳𑀼 𑀜𑀸𑀡𑀁. 𑀓𑀻𑀤𑀺𑀲𑀁? 𑀅𑀫𑀦𑀼𑀲𑁆𑀲𑀸𑀦𑀁 𑀤𑀲𑁆𑀲𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀉𑀧𑁆𑀧𑀚𑁆𑀚𑀺. 𑀦 𑀢𑀁 𑀢𑁂𑀳𑀺 𑀢𑀲𑁆𑀫𑀺𑀁 𑀔𑀡𑁂 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀁. 𑀅𑀭𑀺𑀬𑀫𑀕𑁆𑀕𑁂𑀦𑁂𑀯 𑀳𑀺 𑀢𑀁 𑀦𑀺𑀧𑁆𑀨𑀦𑁆𑀦𑀁. 𑀅𑀫𑀦𑀼𑀲𑁆𑀲𑀤𑀲𑁆𑀲𑀦𑀢𑁆𑀣𑀁 𑀧𑀦𑀲𑁆𑀲 𑀅𑀪𑀺𑀦𑀻𑀳𑀸𑀭𑀫𑀢𑁆𑀢𑀫𑁂𑀯 𑀓𑀢𑀁. 𑀲𑀢𑁆𑀣𑀸𑀧𑀺 𑁋 ‘‘𑀅𑀢𑁆𑀣𑀺 𑀢𑀼𑀫𑁆𑀳𑀸𑀓𑀁 𑀜𑀸𑀡𑀁, 𑀢𑀁 𑀦𑀻𑀳𑀭𑀺𑀢𑁆𑀯𑀸 𑀢𑁂𑀦 𑀳𑀺 𑀢𑁂 𑀯𑀺𑀚𑀸𑀦𑀸𑀣𑀸’’𑀢𑀺 𑀇𑀤𑀫𑁂𑀯 𑀲𑀦𑁆𑀥𑀸𑀬 ‘‘𑀢𑁂 𑀯𑀺𑀚𑀸𑀦𑀸𑀣, 𑀪𑀺𑀓𑁆𑀔𑀯𑁄’’𑀢𑀺 𑀆𑀳.

𑀅𑀧𑁆𑀧𑁂𑀓𑁂 𑀲𑀢𑀫𑀤𑁆𑀤𑀓𑁆𑀔𑀼𑀦𑁆𑀢𑀺 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀅𑀫𑀦𑀼𑀲𑁆𑀲𑀸𑀦𑀁 𑀲𑀢𑀁 𑀅𑀤𑁆𑀤𑀲𑀁𑀲𑀼. 𑀲𑀳𑀲𑁆𑀲𑀁 𑀅𑀣 𑀲𑀢𑁆𑀢𑀭𑀺𑀦𑁆𑀢𑀺 𑀏𑀓𑁂 𑀲𑀳𑀲𑁆𑀲𑀁. 𑀏𑀓𑁂 𑀲𑀢𑁆𑀢𑀢𑀺 𑀲𑀳𑀲𑁆𑀲𑀸𑀦𑀺.

𑀲𑀢𑀁 𑀏𑀓𑁂 𑀲𑀳𑀲𑁆𑀲𑀸𑀦𑀦𑁆𑀢𑀺 𑀏𑀓𑁂 𑀲𑀢𑀲𑀳𑀲𑁆𑀲𑀁 𑀅𑀤𑁆𑀤𑀲𑀁𑀲𑀼. 𑀅𑀧𑁆𑀧𑁂𑀓𑁂𑀦𑀦𑁆𑀢𑀫𑀤𑁆𑀤𑀓𑁆𑀔𑀼𑀦𑁆𑀢𑀺 𑀯𑀺𑀧𑀼𑀮𑀁 𑀅𑀤𑁆𑀤𑀲𑀁𑀲𑀼, 𑀲𑀢𑀯𑀲𑁂𑀦 𑀲𑀳𑀲𑁆𑀲𑀯𑀲𑁂𑀦 𑀘 𑀅𑀧𑀭𑀺𑀘𑁆𑀙𑀺𑀦𑁆𑀦𑁂𑀧𑀺 𑀅𑀤𑁆𑀤𑀲𑀁𑀲𑀽𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸? 𑀬𑀲𑁆𑀫𑀸 𑀤𑀺𑀲𑀸 𑀲𑀩𑁆𑀩𑀸 𑀨𑀼𑀝𑀸 𑀅𑀳𑀼𑀁, 𑀪𑀭𑀺𑀢𑀸 𑀲𑀫𑁆𑀧𑀼𑀡𑁆𑀡𑀸𑀯 𑀅𑀳𑁂𑀲𑀼𑀁.

𑀢𑀜𑁆𑀘 𑀲𑀩𑁆𑀩𑀁 𑀅𑀪𑀺𑀜𑁆𑀜𑀸𑀬𑀸𑀢𑀺 𑀬𑀁 𑀢𑁂𑀲𑀼 𑀏𑀓𑁂𑀦𑁂𑀓𑁂𑀦 𑀤𑀺𑀝𑁆𑀞𑀁, 𑀢𑀜𑁆𑀘 𑀲𑀩𑁆𑀩𑀁 𑀚𑀸𑀦𑀺𑀢𑁆𑀯𑀸. 𑀯𑀯𑀢𑁆𑀣𑀺𑀢𑁆𑀯𑀸𑀦 𑀘𑀓𑁆𑀔𑀼𑀫𑀸𑀢𑀺 𑀳𑀢𑁆𑀣𑀢𑀮𑁂 𑀮𑁂𑀔𑀁 𑀯𑀺𑀬 𑀧𑀘𑁆𑀘𑀓𑁆𑀔𑀢𑁄 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸 𑀲𑀢𑁆𑀣𑀸. 𑀢𑀢𑁄 𑀆𑀫𑀦𑁆𑀢𑀬𑀻𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀕𑀸𑀣𑀫𑁂𑀯 𑀦𑀸𑀫𑀕𑁄𑀢𑁆𑀢𑀓𑀺𑀢𑁆𑀢𑀦𑀢𑁆𑀣𑀸𑀬 𑀆𑀳. 𑀢𑀼𑀫𑁆𑀳𑁂 𑀏𑀢𑁂 𑀯𑀺𑀚𑀸𑀦𑀸𑀣, 𑀧𑀲𑁆𑀲𑀣, 𑀑𑀮𑁄𑀓𑁂𑀣, 𑀬𑁂 𑀯𑁄𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀻𑀢𑀺 𑀅𑀬𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄. 𑀕𑀺𑀭𑀸𑀳𑀻𑀢𑀺 𑀯𑀘𑀦𑁂𑀳𑀺. 𑀅𑀦𑀼𑀧𑀼𑀩𑁆𑀩𑀲𑁄𑀢𑀺 𑀅𑀦𑀼𑀧𑀝𑀺𑀧𑀸𑀝𑀺𑀬𑀸.

𑁩𑁩𑁫. 𑀲𑀢𑁆𑀢𑀲𑀳𑀲𑁆𑀲𑀸 𑀢𑁂 𑀬𑀓𑁆𑀔𑀸, 𑀪𑀼𑀫𑁆𑀫𑀸 𑀓𑀸𑀧𑀺𑀮𑀯𑀢𑁆𑀣𑀯𑀸𑀢𑀺 𑀲𑀢𑁆𑀢𑀲𑀳𑀲𑁆𑀲𑀸 𑀢𑀸𑀯𑁂𑀢𑁆𑀣 𑀓𑀧𑀺𑀮𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀦𑀺𑀩𑁆𑀩𑀢𑁆𑀢𑀸 𑀪𑀼𑀫𑁆𑀫𑀸 𑀬𑀓𑁆𑀔𑀸𑀬𑁂𑀯𑀸𑀢𑀺 𑀯𑀤𑀢𑀺 ¶ . 𑀇𑀤𑁆𑀥𑀺𑀫𑀦𑁆𑀢𑁄𑀢𑀺 ¶ 𑀤𑀺𑀩𑁆𑀩𑀇𑀤𑁆𑀥𑀺𑀬𑀼𑀢𑁆𑀢𑀸. 𑀚𑀼𑀢𑀺𑀫𑀦𑁆𑀢𑁄𑀢𑀺 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑀸. 𑀯𑀡𑁆𑀡𑀯𑀦𑁆𑀢𑁄𑀢𑀺 𑀲𑀭𑀻𑀭𑀯𑀡𑁆𑀡𑀲𑀫𑁆𑀧𑀦𑁆𑀦𑀸. 𑀬𑀲𑀲𑁆𑀲𑀺𑀦𑁄𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑀸. 𑀫𑁄𑀤𑀫𑀸𑀦𑀸 𑀅𑀪𑀺𑀓𑁆𑀓𑀸𑀫𑀼𑀦𑁆𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑀸 𑀆𑀕𑀢𑀸. 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀯𑀦𑀦𑁆𑀢𑀺 𑀇𑀫𑀁 𑀫𑀳𑀸𑀯𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀁 𑀪𑀺𑀓𑁆𑀔𑀽𑀦𑀁 ¶ 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀢𑀸. 𑀅𑀣 𑀯𑀸 𑀲𑀫𑀺𑀢𑀺𑀦𑁆𑀢𑀺 𑀲𑀫𑀽𑀳𑀁, 𑀪𑀺𑀓𑁆𑀔𑀼𑀲𑀫𑀽𑀳𑀁 𑀤𑀲𑁆𑀲𑀦𑀸𑀬 𑀆𑀕𑀢𑀸𑀢𑀺𑀧𑀺 𑀅𑀢𑁆𑀣𑁄.

𑀙𑀲𑀳𑀲𑁆𑀲𑀸 𑀳𑁂𑀫𑀯𑀢𑀸, 𑀬𑀓𑁆𑀔𑀸 𑀦𑀸𑀦𑀢𑁆𑀢𑀯𑀡𑁆𑀡𑀺𑀦𑁄𑀢𑀺 𑀙𑀲𑀳𑀲𑁆𑀲𑀸 𑀳𑁂𑀫𑀯𑀢𑀧𑀩𑁆𑀩𑀢𑁂 𑀦𑀺𑀩𑁆𑀩𑀢𑁆𑀢𑀬𑀓𑁆𑀔𑀸, 𑀢𑁂 𑀘 𑀲𑀩𑁆𑀩𑁂𑀧𑀺 𑀦𑀻𑀮𑀸𑀤𑀺𑀯𑀡𑁆𑀡𑀯𑀲𑁂𑀦 𑀦𑀸𑀦𑀢𑁆𑀢𑀯𑀡𑁆𑀡𑀸.

𑀲𑀸𑀢𑀸𑀕𑀺𑀭𑀸 𑀢𑀺𑀲𑀳𑀲𑁆𑀲𑀸𑀢𑀺 𑀲𑀸𑀢𑀸𑀕𑀺𑀭𑀺𑀧𑀩𑁆𑀩𑀢𑁂 𑀦𑀺𑀩𑁆𑀩𑀢𑁆𑀢𑀬𑀓𑁆𑀔𑀸 𑀢𑀺𑀲𑀳𑀲𑁆𑀲𑀸.

𑀇𑀘𑁆𑀘𑁂𑀢𑁂 𑀲𑁄𑀴𑀲𑀲𑀳𑀲𑁆𑀲𑀸𑀢𑀺 𑀏𑀢𑁂 𑀲𑀩𑁆𑀩𑁂𑀧𑀺 𑀲𑁄𑀴𑀲𑀲𑀳𑀲𑁆𑀲𑀸 𑀳𑁄𑀦𑁆𑀢𑀺.

𑀯𑁂𑀲𑁆𑀲𑀸𑀫𑀺𑀢𑁆𑀢𑀸 𑀧𑀜𑁆𑀘𑀲𑀢𑀸𑀢𑀺 𑀯𑁂𑀲𑁆𑀲𑀸𑀫𑀺𑀢𑁆𑀢𑀧𑀩𑁆𑀩𑀢𑁂 𑀦𑀺𑀩𑁆𑀩𑀢𑁆𑀢𑀸 𑀧𑀜𑁆𑀘𑀲𑀢𑀸.

𑀓𑀼𑀫𑁆𑀪𑀻𑀭𑁄 𑀭𑀸𑀚𑀕𑀳𑀺𑀓𑁄𑀢𑀺 𑀭𑀸𑀚𑀕𑀳𑀦𑀕𑀭𑁂 𑀦𑀺𑀩𑁆𑀩𑀢𑁆𑀢𑁄 𑀓𑀼𑀫𑁆𑀪𑀻𑀭𑁄 𑀦𑀸𑀫 𑀬𑀓𑁆𑀔𑁄. 𑀯𑁂𑀧𑀼𑀮𑁆𑀮𑀲𑁆𑀲 𑀦𑀺𑀯𑁂𑀲𑀦𑀦𑁆𑀢𑀺 𑀢𑀲𑁆𑀲 𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑁄 𑀦𑀺𑀯𑁂𑀲𑀦𑀁 𑀦𑀺𑀯𑀸𑀲𑀦𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀪𑀺𑀬𑁆𑀬𑁄 𑀦𑀁 𑀲𑀢𑀲𑀳𑀲𑁆𑀲𑀁, 𑀬𑀓𑁆𑀔𑀸𑀦𑀁 𑀧𑀬𑀺𑀭𑀼𑀧𑀸𑀲𑀢𑀻𑀢𑀺 𑀢𑀁 𑀅𑀢𑀺𑀭𑁂𑀓𑀁 𑀬𑀓𑁆𑀔𑀸𑀦𑀁 𑀲𑀢𑀲𑀳𑀲𑁆𑀲𑀁 𑀧𑀬𑀺𑀭𑀼𑀧𑀸𑀲𑀢𑀺. 𑀓𑀼𑀫𑁆𑀪𑀻𑀭𑁄 𑀭𑀸𑀚𑀕𑀳𑀺𑀓𑁄, 𑀲𑁄𑀧𑀸𑀕𑀸 𑀲𑀫𑀺𑀢𑀺𑀁 𑀯𑀦𑀦𑁆𑀢𑀺 𑀲𑁄𑀧𑀺 𑀓𑀼𑀫𑁆𑀪𑀻𑀭𑁄 𑀲𑀧𑀭𑀺𑀯𑀸𑀭𑁄 𑀇𑀫𑀁 𑀯𑀦𑀁 𑀪𑀺𑀓𑁆𑀔𑀼𑀲𑀫𑀺𑀢𑀺𑀁 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀢𑁄.

𑁩𑁩𑁬. 𑀧𑀼𑀭𑀺𑀫𑀜𑁆𑀘 𑀤𑀺𑀲𑀁 𑀭𑀸𑀚𑀸, 𑀥𑀢𑀭𑀝𑁆𑀞𑁄 𑀧𑀲𑀸𑀲𑀢𑀻𑀢𑀺 𑀧𑀸𑀘𑀻𑀦𑀤𑀺𑀲𑀁 𑀅𑀦𑀼𑀲𑀸𑀲𑀢𑀺. 𑀕𑀦𑁆𑀥𑀩𑁆𑀩𑀸𑀦𑀁 𑀅𑀥𑀺𑀧𑀢𑀻𑀢𑀺 𑀘𑀢𑀽𑀲𑀼𑀧𑀺 𑀤𑀺𑀲𑀸𑀲𑀼 𑀕𑀦𑁆𑀥𑀩𑁆𑀩𑀸𑀦𑀁 𑀚𑁂𑀝𑁆𑀞𑀓𑁄. 𑀲𑀩𑁆𑀩𑁂 𑀢𑁂 𑀢𑀲𑁆𑀲 𑀯𑀲𑁂 𑀯𑀢𑁆𑀢𑀦𑁆𑀢𑀺. 𑀫𑀳𑀸𑀭𑀸𑀚𑀸 𑀬𑀲𑀲𑁆𑀲𑀺𑀲𑁄𑀢𑀺 𑀫𑀳𑀸𑀧𑀭𑀺𑀯𑀸𑀭𑁄 𑀏𑀲𑁄 𑀫𑀳𑀸𑀭𑀸𑀚𑀸.

𑀧𑀼𑀢𑁆𑀢𑀸𑀧𑀺 ¶ 𑀢𑀲𑁆𑀲 𑀩𑀳𑀯𑁄, 𑀇𑀦𑁆𑀤𑀦𑀸𑀫𑀸 𑀫𑀳𑀩𑁆𑀩𑀮𑀸𑀢𑀺 𑀢𑀲𑁆𑀲 𑀥𑀢𑀭𑀝𑁆𑀞𑀲𑁆𑀲 𑀩𑀳𑀯𑁄 𑀫𑀳𑀩𑁆𑀩𑀮𑀸 𑀧𑀼𑀢𑁆𑀢𑀸, 𑀢𑁂 𑀲𑀩𑁆𑀩𑁂 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀦𑀸𑀫𑀥𑀸𑀭𑀓𑀸.

𑀯𑀺𑀭𑀽𑀴𑁆𑀳𑁄 𑀢𑀁 𑀧𑀲𑀸𑀲𑀢𑀻𑀢𑀺 𑀢𑀁 𑀤𑀺𑀲𑀁 𑀯𑀺𑀭𑀽𑀴𑁆𑀳𑁄 𑀅𑀦𑀼𑀲𑀸𑀲𑀢𑀺.

𑀧𑀼𑀢𑁆𑀢𑀸𑀧𑀺 𑀢𑀲𑁆𑀲𑀸𑀢𑀺 𑀢𑀲𑁆𑀲𑀸𑀧𑀺 𑀢𑀸𑀤𑀺𑀲𑀸𑀬𑁂𑀯 𑀧𑀼𑀢𑁆𑀢𑀸. 𑀧𑀸𑀴𑀺𑀬𑀁 𑀧𑀦 ‘‘𑀫𑀳𑀩𑁆𑀩𑀮𑀸’’𑀢𑀺 𑀮𑀺𑀔𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀲𑀩𑁆𑀩𑀯𑀸𑀭𑁂𑀲𑀼 ‘‘𑀫𑀳𑀸𑀩𑀮𑀸’’𑀢𑀺 𑀧𑀸𑀞𑁄.

‘‘𑀧𑀼𑀭𑀺𑀫𑀁 ¶ ¶ 𑀤𑀺𑀲𑀁 𑀥𑀢𑀭𑀝𑁆𑀞𑁄, 𑀤𑀓𑁆𑀔𑀺𑀡𑁂𑀦 𑀯𑀺𑀭𑀽𑀴𑁆𑀳𑀓𑁄;

𑀧𑀘𑁆𑀙𑀺𑀫𑁂𑀦 𑀯𑀺𑀭𑀽𑀧𑀓𑁆𑀔𑁄, 𑀓𑀼𑀯𑁂𑀭𑁄 𑀉𑀢𑁆𑀢𑀭𑀁 𑀤𑀺𑀲𑀁.

𑀘𑀢𑁆𑀢𑀸𑀭𑁄 𑀢𑁂 𑀫𑀳𑀸𑀭𑀸𑀚𑀸, 𑀲𑀫𑀦𑁆𑀢𑀸 𑀘𑀢𑀼𑀭𑁄 𑀤𑀺𑀲𑀸;

𑀤𑀤𑁆𑀤𑀮𑁆𑀮𑀫𑀸𑀦𑀸 𑀅𑀝𑁆𑀞𑀁𑀲𑀼, 𑀯𑀦𑁂 𑀓𑀸𑀧𑀺𑀮𑀯𑀢𑁆𑀣𑀯𑁂’’𑀢𑀺.

𑀇𑀫𑀸 𑀧𑀦 𑀕𑀸𑀣𑀸 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦 𑀯𑀼𑀢𑁆𑀢𑀸.

𑀅𑀬𑀜𑁆𑀘𑁂𑀢𑁆𑀣 𑀅𑀢𑁆𑀣𑁄 𑁋 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀥𑀢𑀭𑀝𑁆𑀞𑀸 𑀦𑀸𑀫 𑀫𑀳𑀸𑀭𑀸𑀚𑀸𑀦𑁄 𑀅𑀢𑁆𑀣𑀺. 𑀢𑁂 𑀲𑀩𑁆𑀩𑁂𑀧𑀺 𑀓𑁄𑀝𑀺𑀲𑀢𑀲𑀳𑀲𑁆𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀕𑀦𑁆𑀥𑀩𑁆𑀩𑀧𑀭𑀺𑀯𑀸𑀭𑀸 𑀆𑀕𑀦𑁆𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀓𑀧𑀺𑀮𑀯𑀢𑁆𑀣𑀼𑀫𑀳𑀸𑀯𑀦𑀢𑁄 𑀧𑀝𑁆𑀞𑀸𑀬 𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑀸. 𑀏𑀯𑀁 𑀤𑀓𑁆𑀔𑀺𑀡𑀤𑀺𑀲𑀸𑀤𑀻𑀲𑀼 𑀯𑀺𑀭𑀽𑀴𑁆𑀳𑀓𑀸𑀤𑀬𑁄. 𑀢𑁂𑀦𑁂𑀯𑀸𑀳 𑁋 ‘‘𑀲𑀫𑀦𑁆𑀢𑀸 𑀘𑀢𑀼𑀭𑁄 𑀤𑀺𑀲𑀸, 𑀤𑀤𑁆𑀤𑀮𑁆𑀮𑀫𑀸𑀦𑀸 𑀅𑀝𑁆𑀞𑀁𑀲𑀽’’𑀢𑀺. 𑀇𑀤𑀜𑁆𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀲𑀫𑀦𑁆𑀢𑀸 𑀘𑀓𑁆𑀓𑀯𑀸𑀴𑁂𑀳𑀺 𑀆𑀕𑀦𑁆𑀢𑁆𑀯𑀸 𑀘𑀢𑀼𑀭𑁄 𑀤𑀺𑀲𑀸 𑀧𑀩𑁆𑀩𑀢𑀫𑀢𑁆𑀣𑀓𑁂𑀲𑀼 𑀅𑀕𑁆𑀕𑀺𑀓𑁆𑀔𑀦𑁆𑀥𑀸 𑀯𑀺𑀬 𑀲𑀼𑀝𑁆𑀞𑀼 𑀚𑀮𑀫𑀸𑀦𑀸 𑀞𑀺𑀢𑀸’’𑀢𑀺. 𑀢𑁂 𑀧𑀦 𑀬𑀲𑁆𑀫𑀸 𑀓𑀧𑀺𑀮𑀯𑀢𑁆𑀣𑀼𑀯𑀦𑀫𑁂𑀯 𑀲𑀦𑁆𑀥𑀸𑀬 𑀆𑀕𑀢𑀸, 𑀢𑀲𑁆𑀫𑀸 𑀘𑀓𑁆𑀓𑀯𑀸𑀴𑀁 𑀧𑀽𑀭𑁂𑀢𑁆𑀯𑀸 𑀘𑀓𑁆𑀓𑀯𑀸𑀴𑁂𑀦 𑀲𑀫𑀲𑀫𑀸 𑀞𑀺𑀢𑀸𑀧𑀺 𑁋 ‘‘𑀯𑀦𑁂 𑀓𑀸𑀧𑀺𑀮𑀯𑀢𑁆𑀣𑀯𑁂’’𑀢𑀺 𑀯𑀼𑀢𑁆𑀢𑀸.

𑁩𑁩𑁭. 𑀢𑁂𑀲𑀁 𑀫𑀸𑀬𑀸𑀯𑀺𑀦𑁄 𑀤𑀸𑀲𑀸, 𑀆𑀕𑀼𑀁 𑀯𑀜𑁆𑀘𑀦𑀺𑀓𑀸 𑀲𑀞𑀸𑀢𑀺 𑀢𑁂𑀲𑀁 𑀫𑀳𑀸𑀭𑀸𑀚𑀸𑀦𑀁 𑀓𑀢𑀧𑀸𑀧𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸𑀬 𑀫𑀸𑀬𑀸𑀬 𑀬𑀼𑀢𑁆𑀢𑀸 𑀓𑀼𑀝𑀺𑀮𑀸𑀘𑀸𑀭𑀸 𑀤𑀸𑀲𑀸 𑀅𑀢𑁆𑀣𑀺, 𑀬𑁂 𑀲𑀫𑁆𑀫𑀼𑀔𑀧𑀭𑀫𑁆𑀫𑀼𑀔𑀯𑀜𑁆𑀘𑀦𑀸𑀳𑀺 𑀮𑁄𑀓𑀁 𑀯𑀜𑁆𑀘𑀦𑀢𑁄 ‘‘𑀯𑀜𑁆𑀘𑀦𑀺𑀓𑀸’’𑀢𑀺 𑀘, 𑀓𑁂𑀭𑀸𑀝𑀺𑀬𑀲𑀸𑀞𑁂𑀬𑁆𑀬𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 ‘‘𑀲𑀞𑀸’’𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀧𑀺 𑀆𑀕𑀢𑀸𑀢𑀺 𑀅𑀢𑁆𑀣𑁄. 𑀫𑀸𑀬𑀸 𑀓𑀼𑀝𑁂𑀡𑁆𑀟𑀼 𑀯𑀺𑀝𑁂𑀡𑁆𑀟𑀼, 𑀯𑀺𑀝𑀼𑀘𑁆𑀘 𑀯𑀺𑀝𑀼𑀝𑁄 𑀲𑀳𑀸𑀢𑀺 𑀢𑁂 𑀤𑀸𑀲𑀸 𑀲𑀩𑁆𑀩𑁂𑀧𑀺 𑀫𑀸𑀬𑀸𑀓𑀸𑀭𑀓𑀸𑀯. 𑀦𑀸𑀫𑁂𑀦 𑀧𑀦𑁂𑀢𑁆𑀣 𑀏𑀓𑁄 𑀓𑀼𑀝𑁂𑀡𑁆𑀟𑀼 𑀦𑀸𑀫, 𑀏𑀓𑁄 𑀯𑀺𑀝𑁂𑀡𑁆𑀟𑀼 𑀦𑀸𑀫. 𑀧𑀸𑀴𑀺𑀬𑀁 𑀧𑀦 ‘‘𑀯𑁂𑀝𑁂𑀡𑁆𑀟𑀽’’𑀢𑀺 𑀮𑀺𑀔𑀦𑁆𑀢𑀺. 𑀏𑀓𑁄 𑀯𑀺𑀝𑀼𑀘𑁆𑀘 𑀦𑀸𑀫, 𑀏𑀓𑁄 𑀯𑀺𑀝𑀼𑀝𑁄 𑀦𑀸𑀫. 𑀲𑀳𑀸𑀢𑀺 𑀲𑁄𑀧𑀺 𑀯𑀺𑀝𑀼𑀝𑁄 𑀢𑁂𑀳𑀺 𑀲𑀳𑁂𑀯 𑀆𑀕𑀢𑁄.

𑀘𑀦𑁆𑀤𑀦𑁄 ¶ 𑀓𑀸𑀫𑀲𑁂𑀝𑁆𑀞𑁄 𑀘, 𑀓𑀺𑀦𑁆𑀦𑀺𑀖𑀡𑁆𑀟𑀼 𑀦𑀺𑀖𑀡𑁆𑀟𑀼 𑀘𑀸𑀢𑀺 𑀅𑀧𑀭𑁄 𑀓𑀺𑀦𑁆𑀦𑀺𑀖𑀡𑁆𑀟𑀼 𑀦𑀸𑀫. 𑀧𑀸𑀴𑀺𑀬𑀁 𑀧𑀦 ‘‘𑀓𑀺𑀦𑁆𑀦𑀼𑀖𑀡𑁆𑀟𑀽’’𑀢𑀺 𑀮𑀺𑀔𑀦𑁆𑀢𑀺. 𑀦𑀺𑀖𑀡𑁆𑀟𑀼 𑀘𑀸𑀢𑀺 𑀅𑀜𑁆𑀜𑁄 𑀦𑀺𑀖𑀡𑁆𑀟𑀼 𑀦𑀸𑀫, 𑀏𑀢𑁆𑀢𑀓𑀸 𑀤𑀸𑀲𑀸. 𑀇𑀢𑁄 𑀧𑀭𑁂 𑀧𑀦 𑁋

‘‘𑀧𑀦𑀸𑀤𑁄 ¶ 𑀑𑀧𑀫𑀜𑁆𑀜𑁄 𑀘, 𑀤𑁂𑀯𑀲𑀼𑀢𑁄 𑀘 𑀫𑀸𑀢𑀮𑀺;

𑀘𑀺𑀢𑁆𑀢𑀲𑁂𑀦𑁄 𑀘 𑀕𑀦𑁆𑀥𑀩𑁆𑀩𑁄, 𑀦𑀴𑁄 𑀭𑀸𑀚𑀸 𑀚𑀦𑁂𑀲𑀪𑁄;

𑀆𑀕𑀼𑀁 𑀧𑀜𑁆𑀘𑀲𑀺𑀔𑁄 𑀘𑁂𑀯, 𑀢𑀺𑀫𑁆𑀩𑀭𑀽 𑀲𑀽𑀭𑀺𑀬𑀯𑀘𑁆𑀙𑀲𑀸’’𑀢𑀺. 𑁋

𑀇𑀫𑁂 ¶ 𑀤𑁂𑀯𑀭𑀸𑀚𑀸𑀦𑁄. 𑀢𑀢𑁆𑀣 𑀤𑁂𑀯𑀲𑀼𑀢𑁄𑀢𑀺 𑀤𑁂𑀯𑀲𑀸𑀭𑀣𑀺. 𑀘𑀺𑀢𑁆𑀢𑀲𑁂𑀦𑁄𑀢𑀺 𑀘𑀺𑀢𑁆𑀢𑁄 𑀘 𑀲𑁂𑀦𑁄 𑀘 𑀘𑀺𑀢𑁆𑀢𑀲𑁂𑀦𑁄 𑀘. 𑀕𑀦𑁆𑀥𑀩𑁆𑀩𑁄𑀢𑀺 𑀅𑀬𑀁 𑀘𑀺𑀢𑁆𑀢𑀲𑁂𑀦𑁄 𑀕𑀦𑁆𑀥𑀩𑁆𑀩𑀓𑀸𑀬𑀺𑀓𑁄 𑀤𑁂𑀯𑀧𑀼𑀢𑁆𑀢𑁄, 𑀦 𑀓𑁂𑀯𑀮𑀁 𑀘𑁂𑀲, 𑀲𑀩𑁆𑀩𑁂 𑀧𑁂𑀢𑁂 𑀧𑀦𑀸𑀤𑀸𑀤𑀬𑁄 𑀕𑀦𑁆𑀥𑀩𑁆𑀩𑀸 𑀏𑀯. 𑀦𑀴𑁄𑀭𑀸𑀚𑀸𑀢𑀺 𑀦𑀴𑀓𑀸𑀭𑀤𑁂𑀯𑀧𑀼𑀢𑁆𑀢𑁄 𑀦𑀸𑀫𑁂𑀓𑁄. 𑀚𑀦𑁂𑀲𑀪𑁄𑀢𑀺 𑀚𑀦𑀯𑀲𑀪𑁄 𑀤𑁂𑀯𑀧𑀼𑀢𑁆𑀢𑁄. 𑀆𑀕𑀼𑀁 𑀧𑀜𑁆𑀘𑀲𑀺𑀔𑁄 𑀘𑁂𑀯𑀸𑀢𑀺 𑀧𑀜𑁆𑀘𑀲𑀺𑀔𑁄 𑀘𑁂𑀯 𑀤𑁂𑀯𑀧𑀼𑀢𑁆𑀢𑁄 𑀆𑀕𑀢𑁄. 𑀢𑀺𑀫𑁆𑀩𑀭𑀽𑀢𑀺 𑀢𑀺𑀫𑁆𑀩𑀭𑀽 𑀦𑀸𑀫 𑀕𑀦𑁆𑀥𑀩𑁆𑀩𑀤𑁂𑀯𑀭𑀸𑀚𑀸. 𑀲𑀽𑀭𑀺𑀬𑀯𑀘𑁆𑀙𑀲𑀸𑀢𑀺 𑀢𑀲𑁆𑀲𑁂𑀯 𑀥𑀻𑀢𑀸.

𑀏𑀢𑁂 𑀘𑀜𑁆𑀜𑁂 𑀘 𑀭𑀸𑀚𑀸𑀦𑁄, 𑀕𑀦𑁆𑀥𑀩𑁆𑀩𑀸 𑀲𑀳 𑀭𑀸𑀚𑀼𑀪𑀻𑀢𑀺 𑀏𑀢𑁂 𑀘 𑀦𑀸𑀫𑀯𑀲𑁂𑀦 𑀯𑀼𑀢𑁆𑀢𑀕𑀦𑁆𑀥𑀩𑁆𑀩𑀭𑀸𑀚𑀸𑀦𑁄 𑀅𑀜𑁆𑀜𑁂 𑀘 𑀏𑀢𑁂𑀳𑀺 𑀭𑀸𑀚𑀽𑀳𑀺 𑀲𑀤𑁆𑀥𑀺𑀁 𑀩𑀳𑀽 𑀕𑀦𑁆𑀥𑀩𑁆𑀩𑀸. 𑀫𑁄𑀤𑀫𑀸𑀦𑀸 𑀅𑀪𑀺𑀓𑁆𑀓𑀸𑀫𑀼𑀁, 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀯𑀦𑀦𑁆𑀢𑀺 𑀳𑀝𑁆𑀞𑀢𑀼𑀝𑁆𑀞𑀘𑀺𑀢𑁆𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑀫𑀺𑀢𑀺𑀁 𑀇𑀫𑀁 𑀯𑀦𑀁 𑀆𑀕𑀢𑀸𑀢𑀺 𑀅𑀢𑁆𑀣𑁄.

𑁩𑁩𑁮. 𑀅𑀣𑀸𑀕𑀼𑀁 𑀦𑀸𑀕𑀲𑀸 𑀦𑀸𑀕𑀸, 𑀯𑁂𑀲𑀸𑀮𑀸 𑀲𑀳𑀢𑀘𑁆𑀙𑀓𑀸𑀢𑀺 𑀦𑀸𑀕𑀲𑀤𑀳𑀯𑀸𑀲𑀺𑀓𑀸 𑀘 𑀯𑁂𑀲𑀸𑀮𑀻𑀯𑀸𑀲𑀺𑀓𑀸 𑀘 𑀦𑀸𑀕𑀸 𑀲𑀳 𑀢𑀘𑁆𑀙𑀓𑀦𑀸𑀕𑀧𑀭𑀺𑀲𑀸𑀬 𑀆𑀕𑀢𑀸𑀢𑀺 𑀅𑀢𑁆𑀣𑁄. 𑀓𑀫𑁆𑀩𑀮𑀲𑁆𑀲𑀢𑀭𑀸𑀢𑀺 𑀓𑀫𑁆𑀩𑀮𑁄 𑀘 𑀅𑀲𑁆𑀲𑀢𑀭𑁄 𑀘. 𑀏𑀢𑁂 𑀓𑀺𑀭 𑀲𑀺𑀦𑁂𑀭𑀼𑀧𑀸𑀤𑁂 𑀯𑀲𑀦𑁆𑀢𑀺, 𑀲𑀼𑀧𑀡𑁆𑀡𑁂𑀳𑀺𑀧𑀺 𑀅𑀦𑀼𑀤𑁆𑀥𑀭𑀡𑀻𑀬𑀸 𑀫𑀳𑁂𑀲𑀓𑁆𑀔𑀦𑀸𑀕𑀸 𑀧𑀸𑀬𑀸𑀕𑀸 𑀲𑀳 𑀜𑀸𑀢𑀺𑀪𑀻𑀢𑀺 𑀧𑀬𑀸𑀕𑀢𑀺𑀢𑁆𑀣𑀯𑀸𑀲𑀺𑀦𑁄 𑀘 𑀲𑀳 𑀜𑀸𑀢𑀺𑀲𑀗𑁆𑀖𑁂𑀦 𑀆𑀕𑀢𑀸.

𑀬𑀸𑀫𑀼𑀦𑀸 𑀥𑀢𑀭𑀝𑁆𑀞𑀸 𑀘𑀸𑀢𑀺 𑀬𑀫𑀼𑀦𑀯𑀸𑀲𑀺𑀦𑁄 𑀘 𑀥𑀢𑀭𑀝𑁆𑀞𑀓𑀼𑀮𑁂 𑀉𑀧𑁆𑀧𑀦𑁆𑀦𑀸 𑀦𑀸𑀕𑀸 𑀘. 𑀏𑀭𑀸𑀯𑀡𑁄 𑀫𑀳𑀸𑀦𑀸𑀕𑁄𑀢𑀺 𑀏𑀭𑀸𑀯𑀡𑁄 𑀘 𑀤𑁂𑀯𑀧𑀼𑀢𑁆𑀢𑁄, 𑀚𑀸𑀢𑀺𑀬𑀸 𑀦𑀸𑀕𑁄 𑀦 𑀳𑁄𑀢𑀺. 𑀦𑀸𑀕𑀯𑁄𑀳𑀸𑀭𑁂𑀦 𑀧𑀦𑁂𑀲 𑀯𑁄𑀳𑀭𑀺𑀬𑀢𑀺. 𑀲𑁄𑀧𑀸𑀕𑀸𑀢𑀺 𑀲𑁄𑀧𑀺 𑀆𑀕𑀢𑁄.

𑀬𑁂 ¶ 𑀦𑀸𑀕𑀭𑀸𑀚𑁂 𑀲𑀳𑀲𑀸 𑀳𑀭𑀦𑁆𑀢𑀻𑀢𑀺 𑀬𑁂 𑀇𑀫𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀦𑀸𑀕𑁂 𑀮𑁄𑀪𑀸𑀪𑀺𑀪𑀽𑀢𑀸 𑀲𑀸𑀳𑀲𑀁 𑀓𑀢𑁆𑀯𑀸 𑀳𑀭𑀦𑁆𑀢𑀺 𑀕𑀡𑁆𑀳𑀦𑁆𑀢𑀺. 𑀤𑀺𑀩𑁆𑀩𑀸 𑀤𑀺𑀚𑀸 𑀧𑀓𑁆𑀔𑀻 𑀯𑀺𑀲𑀼𑀤𑁆𑀥𑀘𑀓𑁆𑀔𑀽𑀢𑀺 𑀤𑀺𑀩𑁆𑀩𑀸𑀦𑀼𑀪𑀸𑀯𑀢𑁄 𑀤𑀺𑀩𑁆𑀩𑀸 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀘 𑀅𑀡𑁆𑀟𑀓𑁄𑀲𑀢𑁄 𑀘𑀸𑀢𑀺 𑀤𑁆𑀯𑁂 𑀯𑀸𑀭𑁂 𑀚𑀸𑀢𑀸𑀢𑀺 𑀤𑀺𑀚𑀸 𑀧𑀓𑁆𑀔𑀬𑀼𑀢𑁆𑀢𑀢𑀸𑀬 𑀧𑀓𑁆𑀔𑀻 𑀬𑁄𑀚𑀦𑀲𑀢𑀦𑁆𑀢𑀭𑁂𑀧𑀺 𑀬𑁄𑀚𑀦𑀲𑀳𑀲𑁆𑀲𑀦𑁆𑀢𑀭𑁂𑀧𑀺 𑀦𑀸𑀕𑁂 𑀤𑀲𑁆𑀲𑀦𑀲𑀫𑀢𑁆𑀣𑀘𑀓𑁆𑀔𑀼𑀢𑀸𑀬 𑀯𑀺𑀲𑀼𑀤𑁆𑀥𑀘𑀓𑁆𑀔𑀽. 𑀯𑁂𑀳𑀸𑀬𑀲𑀸 ¶ 𑀢𑁂 𑀯𑀦𑀫𑀚𑁆𑀛𑀧𑁆𑀧𑀢𑁆𑀢𑀸𑀢𑀺 𑀢𑁂 𑀆𑀓𑀸𑀲𑁂𑀦𑁂𑀯 𑀇𑀫𑀁 𑀫𑀳𑀸𑀯𑀦𑀁 𑀲𑀫𑁆𑀧𑀢𑁆𑀢𑀸. 𑀘𑀺𑀢𑁆𑀭𑀸 𑀲𑀼𑀧𑀡𑁆𑀡𑀸 𑀇𑀢𑀺 𑀢𑁂𑀲 𑀦𑀸𑀫𑀦𑁆𑀢𑀺 𑀢𑁂𑀲𑀁 ‘‘𑀘𑀺𑀢𑁆𑀭𑀲𑀼𑀧𑀡𑁆𑀡𑀸’’𑀢𑀺 𑀦𑀸𑀫𑀁.

𑀅𑀪𑀬𑀁 ¶ 𑀢𑀤𑀸 𑀦𑀸𑀕𑀭𑀸𑀚𑀸𑀦𑀫𑀸𑀲𑀺, 𑀲𑀼𑀧𑀡𑁆𑀡𑀢𑁄 𑀔𑁂𑀫𑀫𑀓𑀸𑀲𑀺 𑀩𑀼𑀤𑁆𑀥𑁄𑀢𑀺 𑀢𑀲𑁆𑀫𑀸 𑀲𑀩𑁆𑀩𑁂𑀧𑀺 𑀢𑁂 𑀅𑀜𑁆𑀜𑀫𑀜𑁆𑀜𑀁 𑀲𑀡𑁆𑀳𑀸𑀳𑀺 𑀯𑀸𑀘𑀸𑀳𑀺 𑀉𑀧𑀯𑁆𑀳𑀬𑀦𑁆𑀢𑀸 𑀫𑀺𑀢𑁆𑀢𑀸 𑀯𑀺𑀬 𑀩𑀦𑁆𑀥𑀯𑀸 𑀯𑀺𑀬 𑀘 𑀲𑀫𑀼𑀮𑁆𑀮𑀧𑀦𑁆𑀢𑀸 𑀲𑀫𑁆𑀫𑁄𑀤𑀫𑀸𑀦𑀸 𑀆𑀮𑀺𑀗𑁆𑀕𑀦𑁆𑀢𑀸 𑀳𑀢𑁆𑀣𑁂 𑀕𑀡𑁆𑀳𑀦𑁆𑀢𑀸 𑀅𑀁𑀲𑀓𑀽𑀝𑁂 𑀳𑀢𑁆𑀣𑀁 𑀞𑀧𑁂𑀦𑁆𑀢𑀸 𑀳𑀝𑁆𑀞𑀢𑀼𑀝𑁆𑀞𑀘𑀺𑀢𑁆𑀢𑀸. 𑀦𑀸𑀕𑀸 𑀲𑀼𑀧𑀡𑁆𑀡𑀸 𑀲𑀭𑀡𑀫𑀓𑀁𑀲𑀼 𑀩𑀼𑀤𑁆𑀥𑀦𑁆𑀢𑀺 𑀩𑀼𑀤𑁆𑀥𑀁𑀬𑁂𑀯 𑀲𑀭𑀡𑀁 𑀕𑀢𑀸.

𑁩𑁩𑁯. 𑀚𑀺𑀢𑀸 𑀯𑀚𑀺𑀭𑀳𑀢𑁆𑀣𑁂𑀦𑀸𑀢𑀺 𑀇𑀦𑁆𑀤𑁂𑀦 𑀤𑁂𑀯𑀭𑀜𑁆𑀜𑀸 𑀚𑀺𑀢𑀸. 𑀲𑀫𑀼𑀤𑁆𑀤𑀁 𑀅𑀲𑀼𑀭𑀸𑀲𑀺𑀢𑀸𑀢𑀺 𑀫𑀳𑀸𑀲𑀫𑀼𑀤𑁆𑀤𑀯𑀸𑀲𑀺𑀦𑁄 𑀲𑀼𑀚𑀸𑀢𑀸𑀬 𑀅𑀲𑀼𑀭𑀓𑀜𑁆𑀜𑀸𑀬 𑀓𑀸𑀭𑀡𑀸 𑀲𑀩𑁆𑀩𑁂𑀧𑀺 𑀪𑀸𑀢𑀭𑁄 𑀯𑀸𑀲𑀯𑀲𑁆𑀲𑁂𑀢𑁂, 𑀇𑀤𑁆𑀥𑀺𑀫𑀦𑁆𑀢𑁄 𑀬𑀲𑀲𑁆𑀲𑀺𑀦𑁄.

𑀢𑁂𑀲𑀼 𑀓𑀸𑀮𑀓𑀜𑁆𑀘𑀸 𑀫𑀳𑀸𑀪𑀺𑀲𑁆𑀫𑀸𑀢𑀺 𑀓𑀸𑀮𑀓𑀜𑁆𑀘𑀸 𑀘 𑀫𑀳𑀦𑁆𑀢𑁂 𑀪𑀺𑀁𑀲𑀦𑁂 𑀅𑀢𑁆𑀢𑀪𑀸𑀯𑁂 𑀫𑀸𑀧𑁂𑀢𑁆𑀯𑀸 𑀆𑀕𑀫𑀺𑀁𑀲𑀼. 𑀅𑀲𑀼𑀭𑀸 𑀤𑀸𑀦𑀯𑁂𑀖𑀲𑀸𑀢𑀺 𑀤𑀸𑀦𑀯𑁂𑀖𑀲𑀸 𑀦𑀸𑀫 𑀅𑀜𑁆𑀜𑁂 𑀥𑀦𑀼𑀕𑁆𑀕𑀳𑀅𑀲𑀼𑀭𑀸. 𑀯𑁂𑀧𑀘𑀺𑀢𑁆𑀢𑀺 𑀲𑀼𑀘𑀺𑀢𑁆𑀢𑀺 𑀘, 𑀧𑀳𑀸𑀭𑀸𑀤𑁄 𑀦𑀫𑀼𑀘𑀻 𑀲𑀳𑀸𑀢𑀺 𑀯𑁂𑀧𑀘𑀺𑀢𑁆𑀢𑀺𑀅𑀲𑀼𑀭𑁄, 𑀲𑀼𑀘𑀺𑀢𑁆𑀢𑀺𑀅𑀲𑀼𑀭𑁄 𑀘𑀸𑀢𑀺 𑀏𑀢𑁂 𑀘 𑀅𑀲𑀼𑀭𑀸 𑀦𑀫𑀼𑀘𑀺 𑀘 𑀫𑀸𑀭𑁄 𑀤𑁂𑀯𑀧𑀼𑀢𑁆𑀢𑁄 𑀏𑀢𑁂𑀳𑀺 𑀲𑀳𑁂𑀯 𑀆𑀕𑀢𑁄. 𑀇𑀫𑁂 𑀅𑀲𑀼𑀭𑀸 𑀫𑀳𑀸𑀲𑀫𑀼𑀤𑁆𑀤𑀯𑀸𑀲𑀺𑀦𑁄, 𑀅𑀬𑀁 𑀧𑀭𑀦𑀺𑀫𑁆𑀫𑀺𑀢𑀤𑁂𑀯𑀮𑁄𑀓𑀯𑀸𑀲𑀻, 𑀓𑀲𑁆𑀫𑀸 𑀏𑀢𑁂𑀳𑀺 𑀲𑀳𑀸𑀕𑀢𑁄𑀢𑀺? 𑀅𑀘𑁆𑀙𑀦𑁆𑀤𑀺𑀓𑀢𑁆𑀢𑀸. 𑀢𑁂𑀧𑀺 𑀳𑀺 𑀅𑀘𑁆𑀙𑀦𑁆𑀤𑀺𑀓𑀸 𑀅𑀪𑀩𑁆𑀩𑀸, 𑀅𑀬𑀫𑁆𑀧𑀺 𑀢𑀸𑀤𑀺𑀲𑁄𑀬𑁂𑀯. 𑀢𑀲𑁆𑀫𑀸 𑀥𑀸𑀢𑀼𑀲𑁄 𑀲𑀁𑀲𑀦𑁆𑀤𑀫𑀸𑀦𑁄 𑀆𑀕𑀢𑁄.

𑀲𑀢𑀜𑁆𑀘 𑀩𑀮𑀺𑀧𑀼𑀢𑁆𑀢𑀸𑀦𑀦𑁆𑀢𑀺 𑀩𑀮𑀺𑀦𑁄 𑀫𑀳𑀸𑀅𑀲𑀼𑀭𑀲𑁆𑀲 𑀧𑀼𑀢𑁆𑀢𑀸𑀦𑀁 𑀲𑀢𑀁. 𑀲𑀩𑁆𑀩𑁂 𑀯𑁂𑀭𑁄𑀘𑀦𑀸𑀫𑀓𑀸𑀢𑀺 𑀲𑀩𑁆𑀩𑁂 𑀅𑀢𑁆𑀢𑀦𑁄 𑀫𑀸𑀢𑀼𑀮𑀲𑁆𑀲 𑀭𑀸𑀳𑀼𑀲𑁆𑀲𑁂𑀯 𑀦𑀸𑀫𑀥𑀭𑀸. 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀩𑀮𑀺𑀲𑁂𑀦𑀦𑁆𑀢𑀺 𑀅𑀢𑁆𑀢𑀦𑁄 𑀩𑀮𑀺𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀲𑀩𑁆𑀩𑁂 𑀓𑀢𑀲𑀦𑁆𑀦𑀸𑀳𑀸𑀯 𑀳𑀼𑀢𑁆𑀯𑀸. 𑀭𑀸𑀳𑀼𑀪𑀤𑁆𑀤𑀫𑀼𑀧𑀸𑀕𑀫𑀼𑀦𑁆𑀢𑀺 𑀭𑀸𑀳𑀼𑀅𑀲𑀼𑀭𑀺𑀦𑁆𑀤𑀁 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀲𑀫𑀬𑁄 ¶ 𑀤𑀸𑀦𑀺 𑀪𑀤𑁆𑀤𑀦𑁆𑀢𑁂𑀢𑀺 𑀪𑀤𑁆𑀤𑀁 𑀢𑀯 𑀳𑁄𑀢𑀼, 𑀲𑀫𑀬𑁄 𑀢𑁂 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀯𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀤𑀲𑁆𑀲𑀦𑀸𑀬𑀸𑀢𑀺 𑀅𑀢𑁆𑀣𑁄.

𑁩𑁪𑁦. 𑀆𑀧𑁄 𑀘 𑀤𑁂𑀯𑀸 𑀧𑀣𑀯𑀻, 𑀢𑁂𑀚𑁄 𑀯𑀸𑀬𑁄 𑀢𑀤𑀸𑀕𑀫𑀼𑀦𑁆𑀢𑀺 𑀆𑀧𑁄𑀓𑀲𑀺𑀡𑀸𑀤𑀻𑀲𑀼 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸 𑀆𑀧𑁄𑀢𑀺𑀆𑀤𑀺𑀦𑀸𑀫𑀓𑀸 𑀤𑁂𑀯𑀸 𑀆𑀕𑀫𑀼𑀁. 𑀯𑀭𑀼𑀡𑀸 𑀯𑀸𑀭𑀡𑀸 𑀤𑁂𑀯𑀸, 𑀲𑁄𑀫𑁄 𑀘 𑀬𑀲𑀲𑀸 𑀲𑀳𑀸𑀢𑀺 𑀯𑀭𑀼𑀡𑀤𑁂𑀯𑀢𑀸 ¶ , 𑀯𑀸𑀭𑀡𑀤𑁂𑀯𑀢𑀸, 𑀲𑁄𑀫𑀤𑁂𑀯𑀢𑀸𑀢𑀺 𑀏𑀯𑀁 𑀦𑀸𑀫𑀓𑀸 𑀘 𑀤𑁂𑀯𑀸 𑀬𑀲𑀲𑀸 𑀦𑀸𑀫 𑀤𑁂𑀯𑁂𑀦 𑀲𑀳𑀸𑀕𑀢𑀸𑀢𑀺 𑀅𑀢𑁆𑀣𑁄. 𑀫𑁂𑀢𑁆𑀢𑀸𑀓𑀭𑀼𑀡𑀸𑀓𑀸𑀬𑀺𑀓𑀸𑀢𑀺 𑀫𑁂𑀢𑁆𑀢𑀸𑀛𑀸𑀦𑁂 𑀘 𑀓𑀭𑀼𑀡𑀸𑀛𑀸𑀦𑁂 𑀘 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀤𑁂𑀯𑀸. 𑀆𑀕𑀼𑀁 𑀤𑁂𑀯𑀸 𑀬𑀲𑀲𑁆𑀲𑀺𑀦𑁄𑀢𑀺 𑀏𑀢𑁂𑀧𑀺 𑀫𑀳𑀸𑀬𑀲𑀸 𑀤𑁂𑀯𑀸 𑀆𑀕𑀢𑀸.

𑀤𑀲𑁂𑀢𑁂 𑀤𑀲𑀥𑀸 𑀓𑀸𑀬𑀸, 𑀲𑀩𑁆𑀩𑁂 𑀦𑀸𑀦𑀢𑁆𑀢𑀯𑀡𑁆𑀡𑀺𑀦𑁄𑀢𑀺 𑀢𑁂 𑀤𑀲𑀥𑀸 𑀞𑀺𑀢𑀸 𑀤𑀲 𑀤𑁂𑀯𑀓𑀸𑀬𑀸 𑀲𑀩𑁆𑀩𑁂 𑀦𑀻𑀮𑀸𑀤𑀺𑀯𑀲𑁂𑀦 𑀦𑀸𑀦𑀢𑁆𑀢𑀯𑀡𑁆𑀡𑀸 𑀆𑀕𑀢𑀸𑀢𑀺 𑀅𑀢𑁆𑀣𑁄.

𑀯𑁂𑀡𑁆𑀟𑀽 ¶ 𑀘 𑀤𑁂𑀯𑀸𑀢𑀺 𑀯𑁂𑀡𑁆𑀟𑀼𑀤𑁂𑀯𑀢𑀸 𑀘. 𑀲𑀳𑀮𑀺 𑀘𑀸𑀢𑀺 𑀲𑀳𑀮𑀺𑀤𑁂𑀯𑀢𑀸 𑀘. 𑀅𑀲𑀫𑀸 𑀘 𑀤𑀼𑀯𑁂 𑀬𑀫𑀸𑀢𑀺 𑀅𑀲𑀫𑀤𑁂𑀯𑀢𑀸 𑀘 𑀤𑁆𑀯𑁂 𑀘 𑀬𑀫𑀓𑀸 𑀤𑁂𑀯𑀸. 𑀘𑀦𑁆𑀤𑀲𑁆𑀲𑀼𑀧𑀦𑀺𑀲𑀸 𑀤𑁂𑀯𑀸, 𑀘𑀦𑁆𑀤𑀫𑀸𑀕𑀼𑀁 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀘𑀦𑁆𑀤𑀦𑀺𑀲𑁆𑀲𑀺𑀢𑀓𑀸 𑀤𑁂𑀯𑀸 𑀘𑀦𑁆𑀤𑀁 𑀧𑀼𑀭𑀢𑁄 𑀓𑀢𑁆𑀯𑀸 𑀆𑀕𑀢𑀸. 𑀢𑀣𑀸 𑀲𑀽𑀭𑀺𑀬𑀦𑀺𑀲𑁆𑀲𑀺𑀢𑀓𑀸 𑀤𑁂𑀯𑀸 𑀲𑀽𑀭𑀺𑀬𑀁 𑀧𑀼𑀭𑀓𑁆𑀔𑀢𑁆𑀯𑀸. 𑀦𑀓𑁆𑀔𑀢𑁆𑀢𑀸𑀦𑀺 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀦𑀓𑁆𑀔𑀢𑁆𑀢𑀦𑀺𑀲𑁆𑀲𑀺𑀢𑀸𑀧𑀺 𑀤𑁂𑀯𑀸 𑀦𑀓𑁆𑀔𑀢𑁆𑀢𑀸𑀦𑀺 𑀧𑀼𑀭𑀢𑁄 𑀓𑀢𑁆𑀯𑀸 𑀆𑀕𑀢𑀸. 𑀆𑀕𑀼𑀁 𑀫𑀦𑁆𑀤𑀯𑀮𑀸𑀳𑀓𑀸𑀢𑀺 𑀯𑀸𑀢𑀯𑀮𑀸𑀳𑀓𑀸, 𑀅𑀩𑁆𑀪𑀯𑀮𑀸𑀳𑀓𑀸, 𑀉𑀡𑁆𑀳𑀯𑀮𑀸𑀳𑀓𑀸 𑀏𑀢𑁂 𑀲𑀩𑁆𑀩𑁂𑀧𑀺 𑀯𑀮𑀸𑀳𑀓𑀸𑀬𑀺𑀓𑀸 ‘‘𑀫𑀦𑁆𑀤𑀯𑀮𑀸𑀳𑀓𑀸’’ 𑀦𑀸𑀫 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀧𑀺 𑀆𑀕𑀢𑀸𑀢𑀺 𑀅𑀢𑁆𑀣𑁄. 𑀯𑀲𑀽𑀦𑀁 𑀯𑀸𑀲𑀯𑁄 𑀲𑁂𑀝𑁆𑀞𑁄, 𑀲𑀓𑁆𑀓𑁄𑀧𑀸𑀕𑀸 𑀧𑀼𑀭𑀺𑀦𑁆𑀤𑀤𑁄𑀢𑀺 𑀯𑀲𑀽𑀦𑀁 𑀤𑁂𑀯𑀢𑀸𑀦𑀁 𑀲𑁂𑀝𑁆𑀞𑁄 𑀯𑀸𑀲𑀯𑁄 𑀬𑁄 𑀲𑀓𑁆𑀓𑁄𑀢𑀺 𑀘, 𑀧𑀼𑀭𑀺𑀦𑁆𑀤𑀤𑁄𑀢𑀺 𑀘 𑀯𑀼𑀘𑁆𑀘𑀢𑀺, 𑀲𑁄𑀧𑀺 𑀆𑀕𑀢𑁄.

𑀤𑀲𑁂𑀢𑁂 𑀤𑀲𑀥𑀸 𑀓𑀸𑀬𑀸𑀢𑀺 𑀏𑀢𑁂𑀧𑀺 𑀤𑀲 𑀤𑁂𑀯𑀓𑀸𑀬𑀸 𑀤𑀲𑀥𑀸𑀯 𑀆𑀕𑀢𑀸. 𑀲𑀩𑁆𑀩𑁂 𑀦𑀸𑀦𑀢𑁆𑀢𑀯𑀡𑁆𑀡𑀺𑀦𑁄𑀢𑀺 𑀦𑀻𑀮𑀸𑀤𑀺𑀯𑀲𑁂𑀦 𑀦𑀸𑀦𑀢𑁆𑀢𑀯𑀡𑁆𑀡𑀸.

𑀅𑀣𑀸𑀕𑀼𑀁 𑀲𑀳𑀪𑀽 𑀤𑁂𑀯𑀸𑀢𑀺 𑀅𑀣 𑀲𑀳𑀪𑀽 𑀦𑀸𑀫 𑀤𑁂𑀯𑀸 𑀆𑀕𑀢𑀸. 𑀚𑀮𑀫𑀕𑁆𑀕𑀺𑀲𑀺𑀔𑀸𑀭𑀺𑀯𑀸𑀢𑀺 𑀅𑀕𑁆𑀕𑀺𑀲𑀺𑀔𑀸 𑀯𑀺𑀬 𑀚𑀮𑀦𑁆𑀢𑀸. 𑀚𑀮𑀫𑀕𑁆𑀕𑀺 𑀘 𑀲𑀺𑀔𑀸𑀭𑀺𑀯𑀸𑀢𑀺 𑀇𑀫𑀸𑀦𑀺 𑀢𑁂𑀲𑀁 𑀦𑀸𑀫𑀸𑀦𑀻𑀢𑀺𑀧𑀺 𑀯𑀼𑀢𑁆𑀢𑀁. 𑀅𑀭𑀺𑀝𑁆𑀞𑀓𑀸 𑀘 𑀭𑁄𑀚𑀸 𑀘𑀸𑀢𑀺 𑀅𑀭𑀺𑀝𑁆𑀞𑀓𑀤𑁂𑀯𑀸 𑀘 𑀭𑁄𑀚𑀤𑁂𑀯𑀸 𑀘. 𑀉𑀫𑀸𑀧𑀼𑀧𑁆𑀨𑀦𑀺𑀪𑀸𑀲𑀺𑀦𑁄𑀢𑀺 𑀉𑀫𑀸𑀧𑀼𑀧𑁆𑀨𑀤𑁂𑀯𑀸 𑀦𑀸𑀫 𑀏𑀢𑁂 𑀤𑁂𑀯𑀸 ¶ . 𑀉𑀫𑀸𑀧𑀼𑀧𑁆𑀨𑀲𑀤𑀺𑀲𑀸 𑀳𑀺 𑀢𑁂𑀲𑀁 𑀲𑀭𑀻𑀭𑀸𑀪𑀸, 𑀢𑀲𑁆𑀫𑀸 ‘‘𑀉𑀫𑀸𑀧𑀼𑀧𑁆𑀨𑀦𑀺𑀪𑀸𑀲𑀺𑀦𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀯𑀭𑀼𑀡𑀸 𑀲𑀳𑀥𑀫𑁆𑀫𑀸 𑀘𑀸𑀢𑀺 𑀏𑀢𑁂 𑀘 𑀤𑁆𑀯𑁂 𑀚𑀦𑀸. 𑀅𑀘𑁆𑀘𑀼𑀢𑀸 𑀘 𑀅𑀦𑁂𑀚𑀓𑀸𑀢𑀺 𑀅𑀘𑁆𑀘𑀼𑀢𑀤𑁂𑀯𑀢𑀸 𑀘 𑀅𑀦𑁂𑀚𑀓𑀤𑁂𑀯𑀢𑀸 𑀘. 𑀲𑀼𑀮𑁂𑀬𑁆𑀬𑀭𑀼𑀘𑀺𑀭𑀸 ¶ 𑀆𑀕𑀼𑀦𑁆𑀢𑀺 𑀲𑀼𑀮𑁂𑀬𑁆𑀬𑀸 𑀘 𑀭𑀼𑀘𑀺𑀭𑀸 𑀘 𑀆𑀕𑀢𑀸. 𑀆𑀕𑀼𑀁 𑀯𑀸𑀲𑀯𑀦𑁂𑀲𑀺𑀦𑁄𑀢𑀺 𑀯𑀸𑀲𑀯𑀦𑁂𑀲𑀻𑀤𑁂𑀯𑀸 𑀦𑀸𑀫 𑀆𑀕𑀢𑀸. 𑀤𑀲𑁂𑀢𑁂 𑀤𑀲𑀥𑀸 𑀓𑀸𑀬𑀸𑀢𑀺 𑀏𑀢𑁂𑀧𑀺 𑀤𑀲𑀤𑁂𑀯𑀓𑀸𑀬𑀸 𑀤𑀲𑀥𑀸𑀯 𑀆𑀕𑀢𑀸.

𑀲𑀫𑀸𑀦𑀸 𑀫𑀳𑀸𑀲𑀫𑀸𑀦𑀸𑀢𑀺 𑀲𑀫𑀸𑀦𑀸 𑀘 𑀫𑀳𑀸𑀲𑀫𑀸𑀦𑀸 𑀘. 𑀫𑀸𑀦𑀼𑀲𑀸 𑀫𑀸𑀦𑀼𑀲𑀼𑀢𑁆𑀢𑀫𑀸𑀢𑀺 𑀫𑀸𑀦𑀼𑀲𑀸 𑀘 𑀫𑀸𑀦𑀼𑀲𑀼𑀢𑁆𑀢𑀫𑀸 𑀘. 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸 𑀆𑀕𑀼𑀁, 𑀆𑀕𑀼𑀁 𑀫𑀦𑁄𑀧𑀤𑁄𑀲𑀺𑀓𑀸𑀢𑀺 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸 𑀫𑀦𑁄𑀧𑀤𑁄𑀲𑀺𑀓𑀸 𑀘 𑀤𑁂𑀯𑀸 𑀆𑀕𑀢𑀸.

𑀅𑀣𑀸𑀕𑀼𑀁 𑀳𑀭𑀬𑁄 𑀤𑁂𑀯𑀸𑀢𑀺 𑀳𑀭𑀺𑀤𑁂𑀯𑀸 𑀦𑀸𑀫 𑀆𑀕𑀢𑀸. 𑀬𑁂 𑀘 𑀮𑁄𑀳𑀺𑀢𑀯𑀸𑀲𑀺𑀦𑁄𑀢𑀺 𑀮𑁄𑀳𑀺𑀢𑀯𑀸𑀲𑀺𑀦𑁄 𑀘 𑀆𑀕𑀢𑀸. 𑀧𑀸𑀭𑀕𑀸 𑀫𑀳𑀸𑀧𑀸𑀭𑀕𑀸𑀢𑀺 𑀏𑀢𑁂 𑀘 𑀤𑀼𑀯𑀺𑀥𑀸 𑀆𑀕𑀢𑀸. 𑀤𑀲𑁂𑀢𑁂 𑀤𑀲𑀥𑀸 𑀓𑀸𑀬𑀸𑀢𑀺 𑀏𑀢𑁂𑀧𑀺 𑀤𑀲𑀤𑁂𑀯𑀓𑀸𑀬𑀸 𑀤𑀲𑀥𑀸𑀯 𑀆𑀕𑀢𑀸.

𑀲𑀼𑀓𑁆𑀓𑀸 ¶ 𑀓𑀭𑀫𑁆𑀪𑀸 𑀅𑀭𑀼𑀡𑀸, 𑀆𑀕𑀼𑀁 𑀯𑁂𑀖𑀦𑀲𑀸 𑀲𑀳𑀸𑀢𑀺 𑀏𑀢𑁂 𑀲𑀼𑀓𑁆𑀓𑀸𑀤𑀬𑁄 𑀢𑀬𑁄, 𑀢𑁂𑀳𑀺 𑀲𑀳 𑀯𑁂𑀖𑀦𑀲𑀸 𑀘 𑀆𑀕𑀢𑀸. 𑀑𑀤𑀸𑀢𑀕𑀬𑁆𑀳𑀸 𑀧𑀸𑀫𑁄𑀓𑁆𑀔𑀸𑀢𑀺 𑀑𑀤𑀸𑀢𑀕𑀬𑁆𑀳𑀸 𑀦𑀸𑀫 𑀧𑀸𑀫𑁄𑀓𑁆𑀔𑀤𑁂𑀯𑀸 𑀆𑀕𑀢𑀸. 𑀆𑀕𑀼𑀁 𑀤𑁂𑀯𑀸 𑀯𑀺𑀘𑀓𑁆𑀔𑀡𑀸𑀢𑀺 𑀯𑀺𑀘𑀓𑁆𑀔𑀡𑀸 𑀦𑀸𑀫 𑀤𑁂𑀯𑀸 𑀆𑀕𑀢𑀸.

𑀲𑀤𑀸𑀫𑀢𑁆𑀢𑀸 𑀳𑀸𑀭𑀕𑀚𑀸𑀢𑀺 𑀲𑀤𑀸𑀫𑀢𑁆𑀢𑀸 𑀘 𑀳𑀸𑀭𑀕𑀚𑀸 𑀘. 𑀫𑀺𑀲𑁆𑀲𑀓𑀸 𑀘 𑀬𑀲𑀲𑁆𑀲𑀺𑀦𑁄𑀢𑀺 𑀬𑀲𑀲𑀫𑁆𑀧𑀦𑁆𑀦𑀸 𑀫𑀺𑀲𑁆𑀲𑀓𑀤𑁂𑀯𑀸 𑀘. 𑀣𑀦𑀬𑀁 𑀆𑀕 𑀧𑀚𑁆𑀚𑀼𑀦𑁆𑀦𑁄𑀢𑀺 𑀧𑀚𑁆𑀚𑀼𑀦𑁆𑀦𑁄 𑀘 𑀤𑁂𑀯𑀭𑀸𑀚𑀸 𑀣𑀦𑀬𑀦𑁆𑀢𑁄 𑀆𑀕𑀢𑁄. 𑀬𑁄 𑀤𑀺𑀲𑀸 𑀅𑀪𑀺𑀯𑀲𑁆𑀲𑀢𑀻𑀢𑀺 𑀬𑁄 𑀬𑀁 𑀬𑀁 𑀤𑀺𑀲𑀁 𑀬𑀸𑀢𑀺, 𑀢𑀢𑁆𑀣 𑀢𑀢𑁆𑀣 𑀤𑁂𑀯𑁄 𑀯𑀲𑁆𑀲𑀢𑀺. 𑀤𑀲𑁂𑀢𑁂 𑀤𑀲𑀥𑀸 𑀓𑀸𑀬𑀸𑀢𑀺 𑀏𑀢𑁂𑀧𑀺 𑀤𑀲𑀤𑁂𑀯𑀓𑀸𑀬𑀸 𑀤𑀲𑀥𑀸 𑀆𑀕𑀢𑀸.

𑀔𑁂𑀫𑀺𑀬𑀸 𑀢𑀼𑀲𑀺𑀢𑀸 𑀬𑀸𑀫𑀸𑀢𑀺 𑀔𑁂𑀫𑀺𑀬𑀸 𑀤𑁂𑀯𑀸 𑀢𑀼𑀲𑀺𑀢𑀧𑀼𑀭𑀯𑀸𑀲𑀺𑀦𑁄 𑀘 𑀬𑀸𑀫𑀸𑀤𑁂𑀯𑀮𑁄𑀓𑀯𑀸𑀲𑀺𑀦𑁄 𑀘. 𑀓𑀣𑀓𑀸 𑀘 𑀬𑀲𑀲𑁆𑀲𑀺𑀦𑁄𑀢𑀺 𑀬𑀲𑀲𑀫𑁆𑀧𑀦𑁆𑀦𑀸 𑀓𑀣𑀓𑀤𑁂𑀯𑀸 𑀘. 𑀧𑀸𑀴𑀺𑀬𑀁 𑀧𑀦 ‘‘𑀓𑀝𑁆𑀞𑀓𑀸 𑀘𑀸’’𑀢𑀺 𑀮𑀺𑀔𑀦𑁆𑀢𑀺. 𑀮𑀫𑁆𑀩𑀻𑀢𑀓𑀸 𑀮𑀸𑀫𑀲𑁂𑀝𑁆𑀞𑀸𑀢𑀺 𑀮𑀫𑁆𑀩𑀺𑀢𑀓𑀤𑁂𑀯𑀸 𑀘 𑀮𑀸𑀫𑀲𑁂𑀝𑁆𑀞𑀤𑁂𑀯𑀸 𑀘. 𑀚𑁄𑀢𑀺𑀦𑀸𑀫𑀸 𑀘 𑀆𑀲𑀯𑀸𑀢𑀺 𑀧𑀩𑁆𑀩𑀢𑀫𑀢𑁆𑀣𑀓𑁂 𑀓𑀢𑀦𑀴𑀕𑁆𑀕𑀺𑀓𑁆𑀔𑀦𑁆𑀥𑁄 𑀯𑀺𑀬 𑀚𑁄𑀢𑀫𑀸𑀦𑀸 𑀚𑁄𑀢𑀺𑀤𑁂𑀯𑀸 𑀦𑀸𑀫 𑀅𑀢𑁆𑀣𑀺, 𑀢𑁂 𑀘 𑀆𑀲𑀸 𑀘 𑀤𑁂𑀯𑀸 𑀆𑀕𑀢𑀸𑀢𑀺 𑀅𑀢𑁆𑀣𑁄. 𑀧𑀸𑀴𑀺𑀬𑀁 ¶ 𑀧𑀦 ‘‘𑀚𑀸𑀢𑀺𑀦𑀸𑀫𑀸’’𑀢𑀺 𑀮𑀺𑀔𑀦𑁆𑀢𑀺. 𑀆𑀲𑀸 𑀤𑁂𑀯𑀢𑀸 𑀙𑀦𑁆𑀤𑀯𑀲𑁂𑀦 𑀆𑀲𑀯𑀸𑀢𑀺 𑀯𑀼𑀢𑁆𑀢𑀸. 𑀦𑀺𑀫𑁆𑀫𑀸𑀦𑀭𑀢𑀺𑀦𑁄 𑀆𑀕𑀼𑀁, 𑀅𑀣𑀸𑀕𑀼𑀁 𑀧𑀭𑀦𑀺𑀫𑁆𑀫𑀺𑀢𑀸. 𑀤𑀲𑁂𑀢𑁂 𑀤𑀲𑀥𑀸 𑀓𑀸𑀬𑀸𑀢𑀺 𑀏𑀢𑁂𑀧𑀺 𑀤𑀲 𑀤𑁂𑀯𑀓𑀸𑀬𑀸 𑀤𑀲𑀥𑀸𑀯 𑀆𑀕𑀢𑀸.

𑀲𑀝𑁆𑀞𑁂𑀢𑁂 ¶ 𑀤𑁂𑀯𑀦𑀺𑀓𑀸𑀬𑀸𑀢𑀺 𑀏𑀢𑁂 𑀘 𑀆𑀧𑁄 𑀘 𑀤𑁂𑀯𑀸𑀢𑀺𑀆𑀤𑀺𑀓𑀸 𑀙 𑀤𑀲𑀓𑀸 𑀲𑀝𑁆𑀞𑀺 𑀤𑁂𑀯𑀦𑀺𑀓𑀸𑀬𑀸 𑀲𑀩𑁆𑀩𑁂 𑀦𑀻𑀮𑀸𑀤𑀺𑀯𑀲𑁂𑀦 𑀦𑀸𑀦𑀢𑁆𑀢𑀯𑀡𑁆𑀡𑀺𑀦𑁄. 𑀦𑀸𑀫𑀦𑁆𑀯𑀬𑁂𑀦 𑀆𑀕𑀘𑁆𑀙𑀼𑀦𑁆𑀢𑀺 𑀦𑀸𑀫𑀪𑀸𑀕𑁂𑀦 𑀦𑀸𑀫𑀓𑁄𑀝𑁆𑀞𑀸𑀲𑁂𑀦 𑀆𑀕𑀢𑀸. 𑀬𑁂 𑀘𑀜𑁆𑀜𑁂 𑀲𑀤𑀺𑀲𑀸 𑀲𑀳𑀸𑀢𑀺 𑀬𑁂 𑀘 𑀅𑀜𑁆𑀜𑁂𑀧𑀺 𑀢𑁂𑀳𑀺 𑀲𑀤𑀺𑀲𑀸 𑀯𑀡𑁆𑀡𑀢𑁄𑀧𑀺 𑀦𑀸𑀫𑀢𑁄𑀧𑀺 𑀏𑀢𑀸𑀤𑀺𑀲𑀸𑀬𑁂𑀯 𑀲𑁂𑀲𑀘𑀓𑁆𑀓𑀯𑀸𑀴𑁂𑀲𑀼 𑀤𑁂𑀯𑀸, 𑀢𑁂𑀧𑀺 𑀆𑀕𑀢𑀸𑀬𑁂𑀯𑀸𑀢𑀺 𑀏𑀓𑀧𑀤𑁂𑀦𑁂𑀯 𑀓𑀮𑀸𑀧𑀁 𑀯𑀺𑀬 𑀧𑀼𑀝𑀓𑀁 𑀯𑀺𑀬 𑀘 𑀓𑀢𑁆𑀯𑀸 𑀲𑀩𑁆𑀩𑀸 𑀤𑁂𑀯𑀢𑀸 𑀦𑀺𑀤𑁆𑀤𑀺𑀲𑀢𑀺.

𑀏𑀯𑀁 𑀤𑀲𑀲𑀼 𑀮𑁄𑀓𑀥𑀸𑀢𑀼𑀲𑀳𑀲𑁆𑀲𑁂𑀲𑀼 𑀤𑁂𑀯𑀓𑀸𑀬𑁂 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀬𑀤𑀢𑁆𑀣𑀁 𑀢𑁂 𑀆𑀕𑀢𑀸, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀧𑀯𑀼𑀝𑁆𑀞𑀚𑀸𑀢𑀺𑀦𑁆𑀢𑀺 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀧𑀯𑀼𑀝𑁆𑀞𑀸 𑀯𑀺𑀕𑀢𑀸 𑀚𑀸𑀢𑀺 𑀅𑀲𑁆𑀲𑀸𑀢𑀺 𑀅𑀭𑀺𑀬𑀲𑀗𑁆𑀖𑁄 𑀧𑀯𑀼𑀝𑁆𑀞𑀚𑀸𑀢𑀺 𑀦𑀸𑀫, 𑀢𑀁 𑀧𑀯𑀼𑀝𑁆𑀞𑀚𑀸𑀢𑀺𑀁 𑀭𑀸𑀕𑀤𑁄𑀲𑀫𑁄𑀳𑀔𑀻𑀮𑀸𑀦𑀁 𑀅𑀪𑀸𑀯𑀸 𑀅𑀔𑀻𑀮𑀁 𑀘𑀢𑁆𑀢𑀸𑀭𑁄 𑀑𑀖𑁂 𑀢𑀭𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀑𑀖𑀢𑀺𑀡𑁆𑀡𑀁 𑀘𑀢𑀼𑀦𑁆𑀦𑀁 𑀆𑀲𑀯𑀸𑀦𑀁 𑀅𑀪𑀸𑀯𑁂𑀦 𑀅𑀦𑀸𑀲𑀯𑀁 𑀅𑀭𑀺𑀬𑀲𑀗𑁆𑀖𑀁 𑀤𑀓𑁆𑀔𑁂𑀫 𑀧𑀲𑁆𑀲𑀺𑀲𑁆𑀲𑀸𑀫. 𑀢𑁂𑀲𑀜𑁆𑀜𑁂𑀯 𑀑𑀖𑀸𑀦𑀁 𑀢𑀺𑀡𑁆𑀡𑀢𑁆𑀢𑀸 𑀑𑀖𑀢𑀭𑀁 𑀆𑀕𑀼𑀁 𑀅𑀓𑀭𑀡𑀢𑁄 𑀦𑀸𑀕𑀁. 𑀅𑀲𑀺𑀢𑀸𑀢𑀺𑀕𑀦𑁆𑀢𑀺 𑀓𑀸𑀴𑀓𑀪𑀸𑀯𑀸𑀢𑀻𑀢𑀁 𑀘𑀦𑁆𑀤𑀁𑀯 𑀲𑀺𑀭𑀺𑀬𑀸 𑀯𑀺𑀭𑁄𑀘𑀫𑀸𑀦𑀁 𑀤𑀲𑀩𑀮𑀜𑁆𑀘 𑀤𑀓𑁆𑀔𑁂𑀫 𑀧𑀲𑁆𑀲𑀺𑀲𑁆𑀲𑀸𑀫𑀸𑀢𑀺 𑀏𑀢𑀤𑀢𑁆𑀣𑀁 𑀲𑀩𑁆𑀩𑁂𑀧𑀺 𑀢𑁂 𑀦𑀸𑀫𑀦𑁆𑀯𑀬𑁂𑀦 𑀆𑀕𑀘𑁆𑀙𑀼𑀁, 𑀬𑁂 𑀘𑀜𑁆𑀜𑁂 𑀲𑀤𑀺𑀲𑀸 𑀲𑀳𑀸𑀢𑀺.

𑁩𑁪𑁧. 𑀇𑀤𑀸𑀦𑀺 ¶ 𑀩𑁆𑀭𑀳𑁆𑀫𑀸𑀦𑁄 𑀤𑀲𑁆𑀲𑁂𑀦𑁆𑀢𑁄 𑀲𑀼𑀩𑁆𑀭𑀳𑁆𑀫𑀸 𑀧𑀭𑀫𑀢𑁆𑀢𑁄 𑀘𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀩𑁆𑀭𑀳𑁆𑀫𑀸𑀢𑀺 𑀏𑀓𑁄 𑀩𑁆𑀭𑀳𑁆𑀫𑀸. 𑀧𑀭𑀫𑀢𑁆𑀢𑁄𑀧𑀺 𑀩𑁆𑀭𑀳𑁆𑀫𑀸𑀯. 𑀧𑀼𑀢𑁆𑀢𑀸 𑀇𑀤𑁆𑀥𑀺𑀫𑀢𑁄 𑀲𑀳𑀸𑀢𑀺 𑀏𑀢𑁂 𑀇𑀤𑁆𑀥𑀺𑀫𑀢𑁄 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀼𑀢𑁆𑀢𑀸 𑀅𑀭𑀺𑀬𑀩𑁆𑀭𑀳𑁆𑀫𑀸𑀦𑁄 𑀲𑀳𑁂𑀯 𑀆𑀕𑀢𑀸. 𑀲𑀦𑀗𑁆𑀓𑀼𑀫𑀸𑀭𑁄 𑀢𑀺𑀲𑁆𑀲𑁄 𑀘𑀸𑀢𑀺 𑀲𑀦𑀗𑁆𑀓𑀼𑀫𑀸𑀭𑁄 𑀘 𑀢𑀺𑀲𑁆𑀲𑀫𑀳𑀸𑀩𑁆𑀭𑀳𑁆𑀫𑀸 𑀘. 𑀲𑁄𑀧𑀸𑀕𑀸𑀢𑀺 𑀲𑁄𑀧𑀺 𑀆𑀕𑀢𑁄.

‘‘𑀲𑀳𑀲𑁆𑀲𑀁 𑀩𑁆𑀭𑀳𑁆𑀫𑀮𑁄𑀓𑀸𑀦𑀁, 𑀫𑀳𑀸𑀩𑁆𑀭𑀳𑁆𑀫𑀸𑀪𑀺𑀢𑀺𑀝𑁆𑀞𑀢𑀺;

𑀉𑀧𑀧𑀦𑁆𑀦𑁄 𑀚𑀼𑀢𑀺𑀫𑀦𑁆𑀢𑁄, 𑀪𑀺𑀲𑁆𑀫𑀸𑀓𑀸𑀬𑁄 𑀬𑀲𑀲𑁆𑀲𑀺 𑀲𑁄’’𑀢𑀺. 𑁋

𑀏𑀢𑁆𑀣 ¶ 𑀲𑀳𑀲𑁆𑀲𑀁 𑀩𑁆𑀭𑀳𑁆𑀫𑀮𑁄𑀓𑀸𑀦𑀦𑁆𑀢𑀺 𑀏𑀓𑀗𑁆𑀕𑀼𑀮𑀺𑀬𑀸 𑀏𑀓𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀤𑀲𑀳𑀺 𑀅𑀗𑁆𑀕𑀼𑀮𑀻𑀳𑀺 𑀤𑀲𑀲𑀳𑀲𑁆𑀲𑀺𑀘𑀓𑁆𑀓𑀯𑀸𑀴𑁂 𑀆𑀮𑁄𑀓𑀨𑀭𑀡𑀲𑀫𑀢𑁆𑀣𑀸𑀦𑀁 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀲𑀳𑀲𑁆𑀲𑀁 𑀆𑀕𑀢𑀁. 𑀫𑀳𑀸𑀩𑁆𑀭𑀳𑁆𑀫𑀸𑀪𑀺𑀢𑀺𑀝𑁆𑀞𑀢𑀻𑀢𑀺 𑀬𑀢𑁆𑀣 𑀏𑀓𑁂𑀓𑁄 𑀫𑀳𑀸𑀩𑁆𑀭𑀳𑁆𑀫𑀸 𑀅𑀜𑁆𑀜𑁂 𑀩𑁆𑀭𑀳𑁆𑀫𑁂 𑀅𑀪𑀺𑀪𑀯𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀉𑀧𑀧𑀦𑁆𑀦𑁄𑀢𑀺 ¶ 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄. 𑀚𑀼𑀢𑀺𑀫𑀦𑁆𑀢𑁄𑀢𑀺 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑁄. 𑀪𑀺𑀲𑁆𑀫𑀸𑀓𑀸𑀬𑁄𑀢𑀺 𑀫𑀳𑀸𑀓𑀸𑀬𑁄, 𑀤𑁆𑀯𑀻𑀳𑀺 𑀢𑀻𑀳𑀺 𑀫𑀸𑀕𑀥𑀺𑀓𑁂𑀳𑀺 𑀕𑀸𑀫𑀓𑁆𑀔𑁂𑀢𑁆𑀢𑁂𑀳𑀺 𑀲𑀫𑀧𑁆𑀧𑀫𑀸𑀡𑀅𑀢𑁆𑀢𑀪𑀸𑀯𑁄. 𑀬𑀲𑀲𑁆𑀲𑀺𑀲𑁄𑀢𑀺 𑀅𑀢𑁆𑀢𑀪𑀸𑀯𑀲𑀺𑀭𑀻𑀲𑀗𑁆𑀔𑀸𑀢𑁂𑀦 𑀬𑀲𑁂𑀦 𑀲𑀫𑀦𑁆𑀦𑀸𑀕𑀢𑁄.

𑀤𑀲𑁂𑀢𑁆𑀣 𑀇𑀲𑁆𑀲𑀭𑀸 𑀆𑀕𑀼𑀁, 𑀧𑀘𑁆𑀘𑁂𑀓𑀯𑀲𑀯𑀢𑁆𑀢𑀺𑀦𑁄𑀢𑀺 𑀏𑀢𑀲𑁆𑀫𑀺𑀜𑁆𑀘 𑀩𑁆𑀭𑀳𑁆𑀫𑀲𑀳𑀲𑁆𑀲𑁂 𑀬𑁂 𑀧𑀸𑀝𑀺𑀬𑁂𑀓𑁆𑀓𑀁 𑀧𑀸𑀝𑀺𑀬𑁂𑀓𑁆𑀓𑀁 𑀯𑀲𑀁 𑀯𑀢𑁆𑀢𑁂𑀦𑁆𑀢𑀺, 𑀏𑀯𑀭𑀽𑀧𑀸 𑀤𑀲 𑀇𑀲𑁆𑀲𑀭𑀸 𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀆𑀕𑀢𑀸. 𑀢𑁂𑀲𑀜𑁆𑀘 𑀫𑀚𑁆𑀛𑀢𑁄 𑀆𑀕, 𑀳𑀸𑀭𑀺𑀢𑁄 𑀧𑀭𑀺𑀯𑀸𑀭𑀺𑀢𑁄𑀢𑀺 𑀢𑁂𑀲𑀁 𑀩𑁆𑀭𑀳𑁆𑀫𑀸𑀦𑀁 𑀫𑀚𑁆𑀛𑁂 𑀳𑀸𑀭𑀺𑀢𑁄 𑀦𑀸𑀫 𑀫𑀳𑀸𑀩𑁆𑀭𑀳𑁆𑀫𑀸 𑀲𑀢𑀲𑀳𑀲𑁆𑀲𑀩𑁆𑀭𑀳𑁆𑀫𑀧𑀭𑀺𑀯𑀸𑀭𑁄 𑀆𑀕𑀢𑁄.

𑁩𑁪𑁨. 𑀢𑁂 𑀘 𑀲𑀩𑁆𑀩𑁂 𑀅𑀪𑀺𑀓𑁆𑀓𑀦𑁆𑀢𑁂, 𑀲𑀇𑀦𑁆𑀤𑁂 𑀤𑁂𑀯𑁂 𑀲𑀩𑁆𑀭𑀳𑁆𑀫𑀓𑁂𑀢𑀺 𑀢𑁂 𑀲𑀩𑁆𑀩𑁂𑀧𑀺 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀆𑀕𑀢𑁂 𑀤𑁂𑀯𑀓𑀸𑀬𑁂, 𑀳𑀸𑀭𑀺𑀢𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀆𑀕𑀢𑁂 𑀩𑁆𑀭𑀳𑁆𑀫𑀓𑀸𑀬𑁂 𑀘. 𑀫𑀸𑀭𑀲𑁂𑀦𑀸 𑀅𑀪𑀺𑀓𑁆𑀓𑀸𑀫𑀻𑀢𑀺 𑀫𑀸𑀭𑀲𑁂𑀦𑀸 𑀅𑀪𑀺𑀕𑀢𑀸. 𑀧𑀲𑁆𑀲 𑀓𑀡𑁆𑀳𑀲𑁆𑀲 𑀫𑀦𑁆𑀤𑀺𑀬𑀦𑁆𑀢𑀺 𑀓𑀸𑀴𑀓𑀲𑁆𑀲 𑀫𑀸𑀭𑀲 𑀩𑀸𑀮𑀪𑀸𑀯𑀁 𑀧𑀲𑁆𑀲𑀣.

𑀏𑀣 𑀕𑀡𑁆𑀳𑀣 𑀩𑀦𑁆𑀥𑀣𑀸𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀆𑀡𑀸𑀧𑁂𑀲𑀺. 𑀭𑀸𑀕𑁂𑀦 𑀩𑀤𑁆𑀥𑀫𑀢𑁆𑀣𑀼 𑀯𑁄𑀢𑀺 𑀲𑀩𑁆𑀩𑀁 𑀯𑁄 𑀇𑀤𑀁 𑀤𑁂𑀯𑀫𑀡𑁆𑀟𑀮𑀁 𑀭𑀸𑀕𑁂𑀦 𑀩𑀤𑁆𑀥𑀁 𑀳𑁄𑀢𑀼. 𑀲𑀫𑀦𑁆𑀢𑀸 𑀧𑀭𑀺𑀯𑀸𑀭𑁂𑀣, 𑀫𑀸 𑀯𑁄 𑀫𑀼𑀜𑁆𑀘𑀺𑀢𑁆𑀣 𑀓𑁄𑀘𑀺 𑀦𑀦𑁆𑀢𑀺 𑀢𑀼𑀫𑁆𑀳𑀸𑀓𑀁 𑀏𑀓𑁄𑀧𑀺 𑀏𑀢𑁂𑀲𑀼 𑀏𑀓𑀫𑁆𑀧𑀺 𑀫𑀸 𑀫𑀼𑀜𑁆𑀘𑀺. ‘‘𑀫𑀸 𑀯𑁄 𑀫𑀼𑀜𑁆𑀘𑁂𑀣𑀸’’𑀢𑀺𑀧𑀺 𑀧𑀸𑀞𑁄, 𑀏𑀲𑁂𑀯𑀢𑁆𑀣𑁄.

𑀇𑀢𑀺 𑀢𑀢𑁆𑀣 𑀫𑀳𑀸𑀲𑁂𑀦𑁄, 𑀓𑀡𑁆𑀳𑁄 𑀲𑁂𑀦𑀁 𑀅𑀧𑁂𑀲𑀬𑀻𑀢𑀺 𑀏𑀯𑀁 𑀢𑀢𑁆𑀣 𑀫𑀳𑀸𑀲𑀫𑀬𑁂 𑀫𑀳𑀸𑀲𑁂𑀦𑁄 𑀫𑀸𑀭𑁄 𑀫𑀸𑀭𑀲𑁂𑀦𑀁 ¶ 𑀅𑀧𑁂𑀲𑀬𑀺. 𑀧𑀸𑀡𑀺𑀦𑀸 𑀢𑀮𑀫𑀸𑀳𑀘𑁆𑀘𑀸𑀢𑀺 𑀳𑀢𑁆𑀣𑁂𑀦 𑀧𑀣𑀯𑀻𑀢𑀮𑀁 𑀧𑀳𑀭𑀺𑀢𑁆𑀯𑀸. 𑀲𑀭𑀁 𑀓𑀢𑁆𑀯𑀸𑀦 𑀪𑁂𑀭𑀯𑀦𑁆𑀢𑀺 𑀫𑀸𑀭𑀯𑀺𑀪𑀺𑀁𑀲𑀓𑀤𑀲𑁆𑀲𑀦𑀢𑁆𑀣𑀁 𑀪𑀬𑀸𑀦𑀓𑀁 𑀲𑀭𑀜𑁆𑀘 𑀓𑀢𑁆𑀯𑀸.

𑀬𑀣𑀸 𑀧𑀸𑀯𑀼𑀲𑁆𑀲𑀓𑁄 𑀫𑁂𑀖𑁄, 𑀣𑀦𑀬𑀦𑁆𑀢𑁄 𑀲𑀯𑀺𑀚𑁆𑀚𑀼𑀓𑁄𑀢𑀺 𑀲𑀯𑀺𑀚𑁆𑀚𑀼𑀓𑁄 𑀧𑀸𑀯𑀼𑀲𑁆𑀲𑀓𑀫𑁂𑀖𑁄 𑀯𑀺𑀬 𑀫𑀳𑀸𑀕𑀚𑁆𑀚𑀺𑀢𑀁 𑀕𑀚𑁆𑀚𑀦𑁆𑀢𑁄. 𑀢𑀤𑀸 𑀲𑁄 𑀧𑀘𑁆𑀘𑀼𑀤𑀸𑀯𑀢𑁆𑀢𑀻𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀲𑁄 𑀫𑀸𑀭𑁄 𑀢𑀁 𑀯𑀺𑀪𑀺𑀁𑀲𑀦𑀓𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑁄 ¶ . 𑀲𑀗𑁆𑀓𑀼𑀤𑁆𑀥𑁄 𑀅𑀲𑀬𑀁 𑀯𑀲𑁂𑀢𑀺 𑀲𑀼𑀝𑁆𑀞𑀼 𑀓𑀼𑀤𑁆𑀥𑁄 𑀓𑀼𑀧𑀺𑀢𑁄 𑀓𑀜𑁆𑀘𑀺 𑀯𑀲𑁂 𑀯𑀢𑁆𑀢𑁂𑀢𑀼𑀁 ¶ 𑀅𑀲𑀓𑁆𑀓𑁄𑀦𑁆𑀢𑁄 𑀅𑀲𑀬𑀁𑀯𑀲𑁂 𑀅𑀲𑀬𑀁𑀯𑀲𑀻 𑀅𑀢𑁆𑀢𑀦𑁄 𑀯𑀲𑁂𑀦 𑀅𑀓𑀸𑀫𑀓𑁄 𑀳𑀼𑀢𑁆𑀯𑀸 𑀦𑀺𑀯𑀢𑁆𑀢𑁄. 𑀪𑀕𑀯𑀸 𑀓𑀺𑀭 ‘‘𑀅𑀬𑀁 𑀫𑀸𑀭𑁄 𑀇𑀫𑀁 𑀫𑀳𑀸𑀲𑀫𑀸𑀕𑀫𑀁 𑀤𑀺𑀲𑁆𑀯𑀸 ‘𑀅𑀪𑀺𑀲𑀫𑀬𑀦𑁆𑀢𑀭𑀸𑀬𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀅𑀦𑁆𑀢𑀭𑀦𑁆𑀢𑀭𑁂 𑀫𑀸𑀭𑀲𑁂𑀦𑀁 𑀧𑁂𑀲𑁂𑀢𑁆𑀯𑀸 𑀫𑀸𑀭𑀁 𑀯𑀺𑀪𑀺𑀁𑀲𑀓𑀁 𑀤𑀲𑁆𑀲𑁂𑀢𑀻’’𑀢𑀺 𑀅𑀜𑁆𑀜𑀸𑀲𑀺. 𑀧𑀓𑀢𑀺 𑀘𑁂𑀲𑀸 𑀪𑀕𑀯𑀢𑁄, 𑀬𑀢𑁆𑀣 𑀅𑀪𑀺𑀲𑀫𑀬𑁄 𑀦 𑀪𑀯𑀺𑀲𑁆𑀲𑀢𑀺, 𑀢𑀢𑁆𑀣 𑀫𑀸𑀭𑀁 𑀯𑀺𑀪𑀺𑀁𑀲𑀓𑀁 𑀤𑀲𑁆𑀲𑁂𑀦𑁆𑀢𑀁 𑀦 𑀦𑀺𑀯𑀸𑀭𑁂𑀢𑀺. 𑀬𑀢𑁆𑀣 𑀧𑀦 𑀅𑀪𑀺𑀲𑀫𑀬𑁄 𑀳𑁄𑀢𑀺, 𑀢𑀢𑁆𑀣 𑀬𑀣𑀸 𑀧𑀭𑀺𑀲𑀸 𑀦𑁂𑀯 𑀫𑀸𑀭𑀲𑁆𑀲 𑀭𑀽𑀧𑀁 𑀧𑀲𑁆𑀲𑀢𑀺, 𑀦 𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀏𑀯𑀁 𑀅𑀥𑀺𑀝𑁆𑀞𑀸𑀢𑀻𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀲𑀫𑀸𑀕𑀫𑁂 𑀫𑀳𑀸𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀬𑀣𑀸 𑀤𑁂𑀯𑀢𑀸 𑀦𑁂𑀯 𑀢𑀲𑁆𑀲 𑀭𑀽𑀧𑀁 𑀧𑀲𑁆𑀲𑀦𑁆𑀢𑀺, 𑀦 𑀲𑀤𑁆𑀤𑀁 𑀲𑀼𑀡𑀦𑁆𑀢𑀺, 𑀏𑀯𑀁 𑀅𑀥𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋‘‘𑀢𑀤𑀸 𑀲𑁄 𑀧𑀘𑁆𑀘𑀼𑀤𑀸𑀯𑀢𑁆𑀢𑀺, 𑀲𑀗𑁆𑀓𑀼𑀤𑁆𑀥𑁄 𑀅𑀲𑀬𑀁𑀯𑀲𑁂’’𑀢𑀺.

𑁩𑁪𑁩. 𑀢𑀜𑁆𑀘 𑀲𑀩𑁆𑀩𑀁 𑀅𑀪𑀺𑀜𑁆𑀜𑀸𑀬, 𑀯𑀯𑀢𑁆𑀣𑀺𑀢𑁆𑀯𑀸𑀦 𑀘𑀓𑁆𑀔𑀼𑀫𑀸𑀢𑀺 𑀢𑀁 𑀲𑀩𑁆𑀩𑀁 𑀪𑀕𑀯𑀸 𑀚𑀸𑀦𑀺𑀢𑁆𑀯𑀸 𑀯𑀯𑀢𑁆𑀣𑀧𑁂𑀢𑁆𑀯𑀸 𑀘.

𑀫𑀸𑀭𑀲𑁂𑀦𑀸 𑀅𑀪𑀺𑀓𑁆𑀓𑀦𑁆𑀢𑀸, 𑀢𑁂 𑀯𑀺𑀚𑀸𑀦𑀸𑀣 𑀪𑀺𑀓𑁆𑀔𑀯𑁄𑀢𑀺 𑀪𑀺𑀓𑁆𑀔𑀯𑁂 𑀫𑀸𑀭𑀲𑁂𑀦𑀸 𑀅𑀪𑀺𑀓𑁆𑀓𑀦𑁆𑀢𑀸, 𑀢𑁂 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀁 𑀯𑀺𑀚𑀸𑀦𑀸𑀣, 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀣𑀸𑀢𑀺 𑀯𑀤𑀢𑀺. 𑀆𑀢𑀧𑁆𑀧𑀫𑀓𑀭𑀼𑀦𑁆𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀁 𑀧𑀯𑀺𑀲𑀦𑀢𑁆𑀣𑀸𑀬 𑀯𑀻𑀭𑀺𑀬𑀁 𑀆𑀭𑀪𑀺𑀁𑀲𑀼. 𑀯𑀻𑀢𑀭𑀸𑀕𑁂𑀳𑀺 𑀧𑀓𑁆𑀓𑀸𑀫𑀼𑀦𑁆𑀢𑀺 𑀫𑀸𑀭𑁄 𑀘 𑀫𑀸𑀭𑀲𑁂𑀦𑀸 𑀘 𑀯𑀻𑀢𑀭𑀸𑀕𑁂𑀳𑀺 𑀅𑀭𑀺𑀬𑁂𑀳𑀺 𑀤𑀽𑀭𑀢𑁄𑀯 𑀅𑀧𑀓𑁆𑀓𑀫𑀼𑀁. 𑀦𑁂𑀲𑀁 𑀮𑁄𑀫𑀸𑀧𑀺 𑀇𑀜𑁆𑀚𑀬𑀼𑀦𑁆𑀢𑀺 𑀢𑁂𑀲𑀁 𑀯𑀻𑀢𑀭𑀸𑀕𑀸𑀦𑀁 𑀮𑁄𑀫𑀸𑀦𑀺𑀧𑀺 𑀦 𑀘𑀸𑀮𑀬𑀺𑀁𑀲𑀼. 𑀅𑀣 𑀫𑀸𑀭𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀆𑀭𑀩𑁆𑀪 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀲𑀩𑁆𑀩𑁂 𑀯𑀺𑀚𑀺𑀢𑀲𑀗𑁆𑀕𑀸𑀫𑀸, 𑀪𑀬𑀸𑀢𑀻𑀢𑀸 𑀬𑀲𑀲𑁆𑀲𑀺𑀦𑁄;

𑀫𑁄𑀤𑀦𑁆𑀢𑀺 𑀲𑀳 𑀪𑀽𑀢𑁂𑀳𑀺, 𑀲𑀸𑀯𑀓𑀸 𑀢𑁂 𑀚𑀦𑁂𑀲𑀼𑀢𑀸’’𑀢𑀺.

𑀢𑀢𑁆𑀣 𑀫𑁄𑀤𑀦𑁆𑀢𑀺 𑀲𑀳 𑀪𑀽𑀢𑁂𑀳𑀻𑀢𑀺 𑀤𑀲𑀩𑀮𑀲𑁆𑀲 𑀲𑀸𑀲𑀦𑁂 𑀪𑀽𑀢𑁂𑀳𑀺 𑀲𑀜𑁆𑀚𑀸𑀢𑁂𑀳𑀺 𑀅𑀭𑀺𑀬𑁂𑀳𑀺 𑀲𑀤𑁆𑀥𑀺𑀁 𑀫𑁄𑀤𑀦𑁆𑀢𑀺 𑀧𑀫𑁄𑀤𑀦𑁆𑀢𑀺. 𑀚𑀦𑁂𑀲𑀼𑀢𑀸𑀢𑀺 𑀚𑀦𑁂 𑀯𑀺𑀲𑁆𑀲𑀼𑀢𑀸 𑀧𑀸𑀓𑀝𑀸 𑀅𑀪𑀺𑀜𑁆𑀜𑀸𑀢𑀸.

𑀇𑀤𑀁 ¶ 𑀧𑀦 𑀫𑀳𑀸𑀲𑀫𑀬𑀲𑀼𑀢𑁆𑀢𑀁 𑀦𑀸𑀫 𑀤𑁂𑀯𑀢𑀸𑀦𑀁 𑀧𑀺𑀬𑀁 𑀫𑀦𑀸𑀧𑀁, 𑀢𑀲𑁆𑀫𑀸 𑀫𑀗𑁆𑀕𑀮𑀁 𑀯𑀤𑀦𑁆𑀢𑁂𑀦 𑀅𑀪𑀺𑀦𑀯𑀝𑁆𑀞𑀸𑀦𑁂𑀲𑀼 𑀇𑀤𑀫𑁂𑀯 𑀲𑀼𑀢𑁆𑀢𑀁 𑀯𑀢𑁆𑀢𑀩𑁆𑀩𑀁. 𑀤𑁂𑀯𑀢𑀸 𑀓𑀺𑀭 𑁋‘‘𑀇𑀫𑀁 𑀲𑀼𑀢𑁆𑀢𑀁 𑀲𑀼𑀡𑀺𑀲𑁆𑀲𑀸𑀫𑀸’’𑀢𑀺 ¶ 𑀑𑀳𑀺𑀢𑀲𑁄𑀢𑀸 𑀯𑀺𑀘𑀭𑀦𑁆𑀢𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀦𑀲𑁆𑀲 ¶ 𑀓𑁄𑀝𑀺𑀲𑀢𑀲𑀳𑀲𑁆𑀲𑀤𑁂𑀯𑀢𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸, 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀕𑀡𑀦𑀸 𑀦𑀢𑁆𑀣𑀺.

𑀤𑁂𑀯𑀢𑀸𑀦𑀜𑁆𑀘𑀲𑁆𑀲 𑀧𑀺𑀬𑀫𑀦𑀸𑀧𑀪𑀸𑀯𑁂 𑀇𑀤𑀁 𑀯𑀢𑁆𑀣𑀼 𑁋 𑀓𑁄𑀝𑀺𑀧𑀩𑁆𑀩𑀢𑀯𑀺𑀳𑀸𑀭𑁂 𑀓𑀺𑀭 𑀦𑀸𑀕𑀮𑁂𑀡𑀤𑁆𑀯𑀸𑀭𑁂 𑀦𑀸𑀕𑀭𑀼𑀓𑁆𑀔𑁂 𑀏𑀓𑀸 𑀤𑁂𑀯𑀥𑀻𑀢𑀸 𑀯𑀲𑀢𑀺. 𑀏𑀓𑁄 𑀤𑀳𑀭𑁄 𑀅𑀦𑁆𑀢𑁄𑀮𑁂𑀡𑁂 𑀇𑀫𑀁 𑀲𑀼𑀢𑁆𑀢𑀁 𑀲𑀚𑁆𑀛𑀸𑀬𑀢𑀺. 𑀤𑁂𑀯𑀥𑀻𑀢𑀸 𑀲𑀼𑀢𑁆𑀯𑀸 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀫𑀳𑀸𑀲𑀤𑁆𑀤𑁂𑀦 𑀲𑀸𑀥𑀼𑀓𑀸𑀭𑀫𑀤𑀸𑀲𑀺. 𑀓𑁄 𑀏𑀲𑁄𑀢𑀺. 𑀅𑀳𑀁, 𑀪𑀦𑁆𑀢𑁂, 𑀤𑁂𑀯𑀥𑀻𑀢𑀸𑀢𑀺. 𑀓𑀲𑁆𑀫𑀸 𑀲𑀸𑀥𑀼𑀓𑀸𑀭𑀫𑀤𑀸𑀲𑀻𑀢𑀺? 𑀪𑀦𑁆𑀢𑁂, 𑀤𑀲𑀩𑀮𑁂𑀦 𑀫𑀳𑀸𑀯𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀣𑀺𑀢𑀤𑀺𑀯𑀲𑁂 𑀇𑀫𑀁 𑀲𑀼𑀢𑁆𑀢𑀁 𑀲𑀼𑀢𑁆𑀯𑀸 𑀅𑀚𑁆𑀚 𑀅𑀲𑁆𑀲𑁄𑀲𑀺𑀁, 𑀪𑀕𑀯𑀢𑀸 𑀓𑀣𑀺𑀢𑀢𑁄 𑀏𑀓𑀓𑁆𑀔𑀭𑀫𑁆𑀧𑀺 𑀅𑀳𑀸𑀧𑁂𑀢𑁆𑀯𑀸 𑀲𑀼𑀕𑁆𑀕𑀳𑀺𑀢𑁄 𑀅𑀬𑀁 𑀥𑀫𑁆𑀫𑁄 𑀢𑀼𑀫𑁆𑀳𑁂𑀳𑀻𑀢𑀺. 𑀤𑀲𑀩𑀮𑀲𑁆𑀲 𑀓𑀣𑀬𑀢𑁄 𑀲𑀼𑀢𑀁 𑀢𑀬𑀸𑀢𑀺? 𑀆𑀫, 𑀪𑀦𑁆𑀢𑁂𑀢𑀺. 𑀫𑀳𑀸 𑀓𑀺𑀭 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺, 𑀢𑁆𑀯𑀁 𑀓𑀢𑁆𑀣 𑀞𑀺𑀢𑀸 𑀲𑀼𑀡𑀻𑀢𑀺?

𑀅𑀳𑀁, 𑀪𑀦𑁆𑀢𑁂, 𑀫𑀳𑀸𑀯𑀦𑀯𑀸𑀲𑀺𑀬𑀸 𑀤𑁂𑀯𑀢𑀸, 𑀫𑀳𑁂𑀲𑀓𑁆𑀔𑀸𑀲𑀼 𑀧𑀦 𑀤𑁂𑀯𑀢𑀸𑀲𑀼 𑀆𑀕𑀘𑁆𑀙𑀦𑁆𑀢𑀻𑀲𑀼 𑀚𑀫𑁆𑀩𑀼𑀤𑀻𑀧𑁂 𑀑𑀓𑀸𑀲𑀁 𑀦𑀸𑀮𑀢𑁆𑀣𑀁, 𑀅𑀣 𑀇𑀫𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀆𑀕𑀦𑁆𑀢𑁆𑀯𑀸 𑀚𑀫𑁆𑀩𑀼𑀓𑁄𑀮𑀧𑀝𑁆𑀝𑀦𑁂 𑀞𑀢𑁆𑀯𑀸 𑀲𑁄𑀢𑀼𑀁 𑀆𑀭𑀤𑁆𑀥𑀫𑁆𑀳𑀺, 𑀢𑀢𑁆𑀭𑀸𑀧𑀺 𑀫𑀳𑁂𑀲𑀓𑁆𑀔𑀸𑀲𑀼 𑀤𑁂𑀯𑀢𑀸𑀲𑀼 𑀆𑀕𑀘𑁆𑀙𑀦𑁆𑀢𑀻𑀲𑀼 𑀅𑀦𑀼𑀓𑁆𑀓𑀫𑁂𑀦 𑀧𑀝𑀺𑀓𑁆𑀓𑀫𑀫𑀸𑀦𑀸 𑀭𑁄𑀳𑀡𑀚𑀦𑀧𑀤𑁂 𑀫𑀳𑀸𑀕𑀸𑀫𑀲𑁆𑀲 𑀧𑀺𑀝𑁆𑀞𑀺𑀪𑀸𑀕𑀢𑁄 𑀲𑀫𑀼𑀤𑁆𑀤𑁂 𑀕𑀮𑀧𑁆𑀧𑀫𑀸𑀡𑀁 𑀉𑀤𑀓𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀞𑀺𑀢𑀸 𑀅𑀲𑁆𑀲𑁄𑀲𑀺𑀦𑁆𑀢𑀺. 𑀢𑀼𑀬𑁆𑀳𑀁 𑀞𑀺𑀢𑀝𑁆𑀞𑀸𑀦𑀢𑁄 𑀤𑀽𑀭𑁂 𑀲𑀢𑁆𑀣𑀸𑀭𑀁 𑀧𑀲𑁆𑀲𑀲𑀺 𑀤𑁂𑀯𑀢𑁂𑀢𑀺? 𑀓𑀺𑀁 𑀓𑀣𑁂𑀣, 𑀪𑀦𑁆𑀢𑁂, 𑀲𑀢𑁆𑀣𑀸 𑀫𑀳𑀸𑀯𑀦𑁂 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀦𑀺𑀭𑀦𑁆𑀢𑀭𑀁 𑀫𑀫𑀜𑁆𑀜𑁂𑀯 𑀑𑀮𑁄𑀓𑁂𑀢𑀻𑀢𑀺 𑀫𑀜𑁆𑀜𑀫𑀸𑀦𑀸 𑀑𑀢𑀧𑁆𑀧𑀫𑀸𑀦𑀸 𑀊𑀫𑀻𑀲𑀼 𑀦𑀺𑀮𑀬𑀸𑀫𑀻𑀢𑀺.

𑀢𑀁 𑀤𑀺𑀯𑀲𑀁 𑀓𑀺𑀭 𑀓𑁄𑀝𑀺𑀲𑀢𑀲𑀳𑀲𑁆𑀲𑀤𑁂𑀯𑀢𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸, 𑀢𑀼𑀫𑁆𑀳𑁂𑀧𑀺 𑀢𑀤𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸𑀢𑀺? 𑀦𑀢𑁆𑀣𑀺, 𑀪𑀦𑁆𑀢𑁂. 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀢𑀢𑁆𑀣 𑀫𑀜𑁆𑀜𑁂𑀢𑀺? 𑀦𑀢𑁆𑀣𑀺, 𑀪𑀦𑁆𑀢𑁂. 𑀲𑀓𑀤𑀸𑀕𑀸𑀫𑀺𑀨𑀮𑀁 𑀧𑀢𑁆𑀢𑀢𑁆𑀣 𑀫𑀜𑁆𑀜𑁂𑀢𑀺? 𑀦𑀢𑁆𑀣𑀺, 𑀪𑀦𑁆𑀢𑁂. 𑀢𑀬𑁄 𑀫𑀕𑁆𑀕𑁂 𑀧𑀢𑁆𑀢𑀸 𑀤𑁂𑀯𑀢𑀸 𑀓𑀺𑀭 𑀕𑀡𑀦𑀧𑀣𑀁 ¶ 𑀅𑀢𑀻𑀢𑀸, 𑀲𑁄𑀢𑀸𑀧𑀦𑁆𑀦𑀸 𑀚𑀸𑀢𑀢𑁆𑀣 𑀫𑀜𑁆𑀜𑁂𑀢𑀺? 𑀤𑁂𑀯𑀢𑀸 𑀢𑀁 𑀤𑀺𑀯𑀲𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑀢𑁆𑀢𑀸 𑀳𑀭𑀸𑀬𑀫𑀸𑀦𑀸 𑁋‘‘𑀅𑀧𑀼𑀘𑁆𑀙𑀺𑀢𑀩𑁆𑀩𑀁 𑀧𑀼𑀘𑁆𑀙𑀢𑀺 𑀅𑀬𑁆𑀬𑁄’’𑀢𑀺 𑀆𑀳. 𑀢𑀢𑁄 𑀦𑀁 𑀲𑁄 𑀪𑀺𑀓𑁆𑀔𑀼 𑀆𑀳 𑁋 ‘‘𑀲𑀓𑁆𑀓𑀸 𑀧𑀦 𑀤𑁂𑀯𑀢𑁂, 𑀢𑀯 𑀅𑀢𑁆𑀢𑀪𑀸𑀯𑀁 𑀅𑀫𑁆𑀳𑀸𑀓𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺? 𑀦 𑀲𑀓𑁆𑀓𑀸 𑀪𑀦𑁆𑀢𑁂 𑀲𑀓𑀮𑀓𑀸𑀬𑀁 ¶ 𑀤𑀲𑁆𑀲𑁂𑀢𑀼𑀁, 𑀅𑀗𑁆𑀕𑀼𑀮𑀺𑀧𑀩𑁆𑀩𑀫𑀢𑁆𑀢𑀁 𑀤𑀲𑁆𑀲𑁂𑀲𑁆𑀲𑀸𑀫𑀺 𑀅𑀬𑁆𑀬𑀲𑁆𑀲𑀸𑀢𑀺 𑀓𑀼𑀜𑁆𑀘𑀺𑀓𑀙𑀺𑀤𑁆𑀤𑁂𑀦 𑀅𑀗𑁆𑀕𑀼𑀮𑀺𑀁 𑀅𑀦𑁆𑀢𑁄𑀮𑁂𑀡𑀸𑀪𑀺𑀫𑀼𑀔𑀁 𑀅𑀓𑀸𑀲𑀺, 𑀘𑀦𑁆𑀤𑀲𑀳𑀲𑁆𑀲𑀲𑀽𑀭𑀺𑀬𑀲𑀳𑀲𑁆𑀲𑀉𑀕𑁆𑀕𑀫𑀦𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀤𑁂𑀯𑀥𑀻𑀢𑀸 ‘‘𑀅𑀧𑁆𑀧𑀫𑀢𑁆𑀢𑀸, 𑀪𑀦𑁆𑀢𑁂, 𑀳𑁄𑀣𑀸’’𑀢𑀺 𑀤𑀳𑀭𑀪𑀺𑀓𑁆𑀔𑀼𑀁 ¶ 𑀯𑀦𑁆𑀤𑀺𑀢𑁆𑀯𑀸 𑀅𑀕𑀫𑀸𑀲𑀺. 𑀏𑀯𑀁 𑀇𑀫𑀁 𑀲𑀼𑀢𑁆𑀢𑀁 𑀤𑁂𑀯𑀢𑀸𑀦𑀁 𑀧𑀺𑀬𑀁 𑀫𑀦𑀸𑀧𑀁, 𑀫𑀫𑀸𑀬𑀦𑁆𑀢𑀺 𑀦𑀁 𑀤𑁂𑀯𑀢𑀸𑀢𑀺.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁

𑀫𑀳𑀸𑀲𑀫𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑀦𑀺𑀤𑀸𑀦𑀯𑀡𑁆𑀡𑀦𑀸

𑁩𑁪𑁪. 𑀏𑀯𑀁 ¶ ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀫𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑁋 𑀅𑀫𑁆𑀩𑀲𑀡𑁆𑀟𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄𑀢𑀺 𑀲𑁄 𑀓𑀺𑀭 𑀕𑀸𑀫𑁄 𑀅𑀫𑁆𑀩𑀲𑀡𑁆𑀟𑀸𑀦𑀁 𑀅𑀯𑀺𑀤𑀽𑀭𑁂 𑀦𑀺𑀯𑀺𑀝𑁆𑀞𑁄, 𑀢𑀲𑁆𑀫𑀸 ‘‘𑀅𑀫𑁆𑀩𑀲𑀡𑁆𑀟𑀸’’ 𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀯𑁂𑀤𑀺𑀬𑀓𑁂 𑀧𑀩𑁆𑀩𑀢𑁂𑀢𑀺 𑀲𑁄 𑀓𑀺𑀭 𑀧𑀩𑁆𑀩𑀢𑁄 𑀧𑀩𑁆𑀩𑀢𑀧𑀸𑀤𑁂 𑀚𑀸𑀢𑁂𑀦 𑀫𑀡𑀺𑀯𑁂𑀤𑀺𑀓𑀸𑀲𑀤𑀺𑀲𑁂𑀦 𑀦𑀻𑀮𑀯𑀦𑀲𑀡𑁆𑀟𑁂𑀦 𑀲𑀫𑀦𑁆𑀢𑀸 𑀧𑀭𑀺𑀓𑁆𑀔𑀺𑀢𑁆𑀢𑁄, 𑀢𑀲𑁆𑀫𑀸 ‘𑀯𑁂𑀤𑀺𑀬𑀓𑀧𑀩𑁆𑀩𑀢𑁄’ 𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀢𑁄. 𑀇𑀦𑁆𑀤𑀲𑀸𑀮𑀕𑀼𑀳𑀸𑀬𑀦𑁆𑀢𑀺 𑀧𑀼𑀩𑁆𑀩𑁂𑀧𑀺 𑀲𑀸 𑀤𑁆𑀯𑀺𑀦𑁆𑀦𑀁 𑀧𑀩𑁆𑀩𑀢𑀸𑀦𑀁 𑀅𑀦𑁆𑀢𑀭𑁂 𑀕𑀼𑀳𑀸, 𑀇𑀦𑁆𑀤𑀲𑀸𑀮𑀭𑀼𑀓𑁆𑀔𑁄 𑀘𑀲𑁆𑀲𑀸 𑀤𑁆𑀯𑀸𑀭𑁂, 𑀢𑀲𑁆𑀫𑀸 ‘𑀇𑀦𑁆𑀤𑀲𑀸𑀮𑀕𑀼𑀳𑀸’𑀢𑀺 𑀲𑀗𑁆𑀔𑁆𑀬𑀁 𑀕𑀢𑀸. 𑀅𑀣 𑀦𑀁 𑀓𑀼𑀝𑁆𑀝𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀦𑀺 𑀬𑁄𑀚𑁂𑀢𑁆𑀯𑀸 𑀲𑀼𑀧𑀭𑀺𑀦𑀺𑀝𑁆𑀞𑀺𑀢𑀲𑀼𑀥𑀸𑀓𑀫𑁆𑀫𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑀯𑀺𑀘𑀺𑀢𑁆𑀢𑀁 𑀮𑁂𑀡𑀁 𑀓𑀢𑁆𑀯𑀸 𑀪𑀕𑀯𑀢𑁄 𑀅𑀤𑀁𑀲𑀼. 𑀧𑀼𑀭𑀺𑀫𑀯𑁄𑀳𑀸𑀭𑀯𑀲𑁂𑀦 𑀧𑀦 ‘‘𑀇𑀦𑁆𑀤𑀲𑀸𑀮𑀕𑀼𑀳𑀸’’ 𑀢𑁆𑀯𑁂𑀯 𑀦𑀁 𑀲𑀜𑁆𑀚𑀸𑀦𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘𑀇𑀦𑁆𑀤𑀲𑀸𑀮𑀕𑀼𑀳𑀸𑀬’𑀦𑁆𑀢𑀺.

𑀉𑀲𑁆𑀲𑀼𑀓𑁆𑀓𑀁 𑀉𑀤𑀧𑀸𑀤𑀻𑀢𑀺 𑀥𑀫𑁆𑀫𑀺𑀓𑁄 𑀉𑀲𑁆𑀲𑀸𑀳𑁄 𑀉𑀧𑁆𑀧𑀚𑁆𑀚𑀺. 𑀦𑀦𑀼 𑀘 𑀏𑀲 𑀅𑀪𑀺𑀡𑁆𑀳𑀤𑀲𑁆𑀲𑀸𑀯𑀻 𑀪𑀕𑀯𑀢𑁄, 𑀦 𑀲𑁄 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑁄 𑀦𑀸𑀫 𑀅𑀢𑁆𑀣𑀺, 𑀬𑀢𑁆𑀣𑀸𑀬𑀁 𑀦 𑀆𑀕𑀢𑀧𑀼𑀩𑁆𑀩𑁄, 𑀲𑀓𑁆𑀓𑁂𑀦 𑀲𑀤𑀺𑀲𑁄 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻 𑀤𑁂𑀯𑀧𑀼𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀅𑀣 𑀓𑀲𑁆𑀫𑀸 𑀩𑀼𑀤𑁆𑀥𑀤𑀲𑁆𑀲𑀦𑀁 𑀅𑀦𑀸𑀕𑀢𑀧𑀼𑀩𑁆𑀩𑀲𑁆𑀲 𑀯𑀺𑀬 𑀅𑀲𑁆𑀲 𑀉𑀲𑁆𑀲𑀸𑀳𑁄 𑀉𑀤𑀧𑀸𑀤𑀻𑀢𑀺? 𑀫𑀭𑀡𑀪𑀬𑁂𑀦 𑀲𑀦𑁆𑀢𑀚𑁆𑀚𑀺𑀢𑀢𑁆𑀢𑀸. 𑀢𑀲𑁆𑀫𑀺𑀁 𑀓𑀺𑀭𑀲𑁆𑀲 𑀲𑀫𑀬𑁂 𑀆𑀬𑀼 𑀧𑀭𑀺𑀓𑁆𑀔𑀻𑀡𑁄, 𑀲𑁄 𑀧𑀜𑁆𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 ‘‘𑀧𑀭𑀺𑀓𑁆𑀔𑀻𑀡𑁄 ¶ 𑀤𑀸𑀦𑀺 𑀫𑁂 𑀆𑀬𑀽’’𑀢𑀺 𑀅𑀜𑁆𑀜𑀸𑀲𑀺. 𑀬𑁂𑀲𑀜𑁆𑀘 𑀤𑁂𑀯𑀧𑀼𑀢𑁆𑀢𑀸𑀦𑀁 𑀫𑀭𑀡𑀦𑀺𑀫𑀺𑀢𑁆𑀢𑀸𑀦𑀺 𑀆𑀯𑀺 𑀪𑀯𑀦𑁆𑀢𑀺, 𑀢𑁂𑀲𑀼 𑀬𑁂 𑀧𑀭𑀺𑀢𑁆𑀢𑀓𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸, 𑀢𑁂 ‘‘𑀓𑀼𑀳𑀺𑀁 𑀦𑀼 𑀔𑁄 𑀇𑀤𑀸𑀦𑀺 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀸’’𑀢𑀺 𑀪𑀬𑀁 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀦𑁆𑀢𑀺. 𑀬𑁂 𑀓𑀢𑀪𑀻𑀭𑀼𑀢𑁆𑀢𑀸𑀦𑀸 𑀩𑀳𑀼𑀁 𑀧𑀼𑀜𑁆𑀜𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸, 𑀢𑁂 𑀅𑀢𑁆𑀢𑀦𑀸 𑀤𑀺𑀦𑁆𑀦𑀤𑀸𑀦𑀁 𑀭𑀓𑁆𑀔𑀺𑀢𑀲𑀻𑀮𑀁 𑀪𑀸𑀯𑀺𑀢𑀪𑀸𑀯𑀦𑀜𑁆𑀘 𑀆𑀕𑀫𑁆𑀫 ‘‘𑀉𑀧𑀭𑀺𑀤𑁂𑀯𑀮𑁄𑀓𑁂 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀦 𑀪𑀸𑀬𑀦𑁆𑀢𑀺.

𑀲𑀓𑁆𑀓𑁄 ¶ 𑀧𑀦 𑀤𑁂𑀯𑀭𑀸𑀚𑀸 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀤𑀲𑀬𑁄𑀚𑀦𑀲𑀳𑀲𑁆𑀲𑀁 𑀤𑁂𑀯𑀦𑀕𑀭𑀁, 𑀬𑁄𑀚𑀦𑀲𑀳𑀲𑁆𑀲𑀼𑀩𑁆𑀩𑁂𑀥𑀁 𑀯𑁂𑀚𑀬𑀦𑁆𑀢𑀁, 𑀢𑀺𑀬𑁄𑀚𑀦𑀲𑀢𑀺𑀓𑀁 𑀲𑀼𑀥𑀫𑁆𑀫𑀤𑁂𑀯𑀲𑀪𑀁, 𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑀁, 𑀲𑀝𑁆𑀞𑀺𑀬𑁄𑀚𑀦𑀺𑀓𑀁 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀁, 𑀅𑀟𑁆𑀠𑀢𑀺𑀬𑀸 𑀦𑀸𑀝𑀓𑀓𑁄𑀝𑀺𑀬𑁄 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑀧𑀭𑀺𑀲𑀁, 𑀦𑀦𑁆𑀤𑀦𑀯𑀦𑀁, 𑀘𑀺𑀢𑁆𑀢𑀮𑀢𑀸𑀯𑀦𑀁 ¶ , 𑀫𑀺𑀲𑁆𑀲𑀓𑀯𑀦𑀁, 𑀨𑀸𑀭𑀼𑀲𑀓𑀯𑀦𑀦𑁆𑀢𑀺 𑀏𑀢𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀦𑀲𑁆𑀲𑀢𑀺 𑀯𑀢 𑀪𑁄 𑀫𑁂 𑀅𑀬𑀁 𑀲𑀫𑁆𑀧𑀢𑁆𑀢𑀻’’𑀢𑀺 𑀪𑀬𑀸𑀪𑀺𑀪𑀽𑀢𑁄 𑀅𑀳𑁄𑀲𑀺.

𑀢𑀢𑁄 ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑁄𑀘𑀺 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀮𑁄𑀓𑀧𑀺𑀢𑀸𑀫𑀳𑁄 𑀫𑀳𑀸𑀩𑁆𑀭𑀳𑁆𑀫𑀸 𑀯𑀸, 𑀬𑁄 𑀫𑁂 𑀳𑀤𑀬𑀦𑀺𑀲𑁆𑀲𑀺𑀢𑀁 𑀲𑁄𑀓𑀲𑀮𑁆𑀮𑀁 𑀲𑀫𑀼𑀤𑁆𑀥𑀭𑀺𑀢𑁆𑀯𑀸 𑀇𑀫𑀁 𑀲𑀫𑁆𑀧𑀢𑁆𑀢𑀺𑀁 𑀣𑀸𑀯𑀭𑀁 𑀓𑀭𑁂𑀬𑁆𑀬𑀸’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀓𑀜𑁆𑀘𑀺 𑀅𑀤𑀺𑀲𑁆𑀯𑀸 𑀧𑀼𑀦 𑀅𑀤𑁆𑀤𑀲 ‘‘𑀫𑀸𑀤𑀺𑀲𑀸𑀦𑀁 𑀲𑀢𑀲𑀳𑀲𑁆𑀲𑀸𑀦𑀫𑁆𑀧𑀺 𑀉𑀧𑁆𑀧𑀦𑁆𑀦𑀁 𑀲𑁄𑀓𑀲𑀮𑁆𑀮𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀉𑀤𑁆𑀥𑀭𑀺𑀢𑀼𑀁 𑀧𑀝𑀺𑀩𑀮𑁄’’𑀢𑀺. 𑀅𑀣𑁂𑀯𑀁 𑀧𑀭𑀺𑀯𑀺𑀢𑀓𑁆𑀓𑁂𑀦𑁆𑀢𑀲𑁆𑀲 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀉𑀲𑁆𑀲𑀼𑀓𑁆𑀓𑀁 𑀉𑀤𑀧𑀸𑀤𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬.

𑀓𑀳𑀁 𑀦𑀼 𑀔𑁄 𑀪𑀕𑀯𑀸 𑀏𑀢𑀭𑀳𑀺 𑀯𑀺𑀳𑀭𑀢𑀻𑀢𑀺 𑀓𑀢𑀭𑀲𑁆𑀫𑀺𑀁 𑀚𑀦𑀧𑀤𑁂 𑀓𑀢𑀭𑀁 𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀓𑀲𑁆𑀲 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀓𑀲𑁆𑀲 𑀅𑀫𑀢𑀁 𑀥𑀫𑁆𑀫𑀁 𑀤𑁂𑀲𑀬𑀫𑀸𑀦𑁄 𑀯𑀺𑀳𑀭𑀢𑀻𑀢𑀺. 𑀅𑀤𑁆𑀤𑀲𑀸 𑀔𑁄𑀢𑀺 𑀅𑀤𑁆𑀤𑀓𑁆𑀔𑀺 𑀧𑀝𑀺𑀯𑀺𑀚𑁆𑀛𑀺. 𑀫𑀸𑀭𑀺𑀲𑀸𑀢𑀺 𑀧𑀺𑀬𑀯𑀘𑀦𑀫𑁂𑀢𑀁, 𑀤𑁂𑀯𑀢𑀸𑀦𑀁 𑀧𑀸𑀝𑀺𑀬𑁂𑀓𑁆𑀓𑁄 𑀯𑁄𑀳𑀸𑀭𑁄. 𑀦𑀺𑀤𑁆𑀤𑀼𑀓𑁆𑀔𑀸𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀲𑁆𑀫𑀸 𑀧𑀦𑁂𑀲 𑀤𑁂𑀯𑁂 𑀆𑀫𑀦𑁆𑀢𑁂𑀲𑀺? 𑀲𑀳𑀸𑀬𑀢𑁆𑀣𑀸𑀬. 𑀧𑀼𑀩𑁆𑀩𑁂 𑀓𑀺𑀭𑁂𑀲 𑀪𑀕𑀯𑀢𑀺 𑀲𑀴𑀮𑀖𑀭𑁂 𑀯𑀺𑀳𑀭𑀦𑁆𑀢𑁂 𑀏𑀓𑀓𑁄𑀯 𑀤𑀲𑁆𑀲𑀦𑀸𑀬 𑀅𑀕𑀫𑀸𑀲𑀺. 𑀲𑀢𑁆𑀣𑀸 ‘‘𑀅𑀧𑀭𑀺𑀧𑀓𑁆𑀓𑀁 𑀢𑀸𑀯𑀲𑁆𑀲 𑀜𑀸𑀡𑀁, 𑀓𑀢𑀺𑀧𑀸𑀳𑀁 𑀧𑀦 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀬𑀺 𑀇𑀦𑁆𑀤𑀲𑀸𑀮𑀕𑀼𑀳𑀸𑀬𑀁 𑀯𑀺𑀳𑀭𑀦𑁆𑀢𑁂 𑀧𑀜𑁆𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 𑀫𑀭𑀡𑀪𑀬𑀪𑀻𑀢𑁄 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘𑀼𑀤𑁆𑀤𑀲 𑀧𑀜𑁆𑀳𑁂 𑀧𑀼𑀘𑁆𑀙𑀺𑀢𑁆𑀯𑀸 𑀉𑀧𑁂𑀓𑁆𑀔𑀸𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀸𑀯𑀲𑀸𑀦𑁂 𑀅𑀲𑀻𑀢𑀺𑀬𑀸 𑀤𑁂𑀯𑀢𑀸𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀑𑀓𑀸𑀲𑀁 𑀦𑀸𑀓𑀸𑀲𑀺. 𑀲𑁄 ‘‘𑀫𑀫 𑀧𑀼𑀩𑁆𑀩𑁂𑀧𑀺 ¶ 𑀏𑀓𑀓𑀲𑁆𑀲 𑀕𑀢𑀢𑁆𑀢𑀸 𑀲𑀢𑁆𑀣𑀸𑀭𑀸 𑀑𑀓𑀸𑀲𑁄 𑀦 𑀓𑀢𑁄, 𑀅𑀤𑁆𑀥𑀸 𑀫𑁂 𑀦𑀢𑁆𑀣𑀺 𑀫𑀕𑁆𑀕𑀨𑀮𑀲𑁆𑀲 𑀉𑀧𑀦𑀺𑀲𑁆𑀲𑀬𑁄, 𑀏𑀓𑀲𑁆𑀲 𑀧𑀦 𑀉𑀧𑀦𑀺𑀲𑁆𑀲𑀬𑁂 𑀲𑀢𑀺 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀸𑀬𑀧𑀺 𑀧𑀭𑀺𑀲𑀸𑀬 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺𑀬𑁂𑀯. 𑀅𑀯𑀲𑁆𑀲𑀁 𑀔𑁄 𑀧𑀦 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀓𑀲𑁆𑀲𑀘𑀺 𑀤𑁂𑀯𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀪𑀯𑀺𑀲𑁆𑀲𑀢𑀺, 𑀢𑀁 𑀲𑀦𑁆𑀥𑀸𑀬 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀢𑀺. 𑀢𑀁 𑀲𑀼𑀢𑁆𑀯𑀸 𑀅𑀳𑀫𑁆𑀧𑀺 𑀅𑀢𑁆𑀢𑀦𑁄 𑀤𑁄𑀫𑀦𑀲𑁆𑀲𑀁 𑀯𑀽𑀧𑀲𑀫𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀳𑀸𑀬𑀢𑁆𑀣𑀸𑀬 𑀆𑀫𑀦𑁆𑀢𑁂𑀲𑀺.

𑀏𑀯𑀁 𑀪𑀤𑁆𑀤𑀁 𑀢𑀯𑀸𑀢𑀺 𑀔𑁄 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸𑀢𑀺 𑀏𑀯𑀁 𑀳𑁄𑀢𑀼 𑀫𑀳𑀸𑀭𑀸𑀚, 𑀕𑀘𑁆𑀙𑀸𑀫 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬, 𑀤𑀼𑀮𑁆𑀮𑀪𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑁄, 𑀪𑀤𑁆𑀤𑀁 𑀢𑀯, 𑀬𑁄 𑀢𑁆𑀯𑀁 ‘‘𑀧𑀩𑁆𑀩𑀢𑀓𑀻𑀴𑀁 𑀦𑀤𑀻𑀓𑀻𑀴𑀁 𑀕𑀘𑁆𑀙𑀸𑀫𑀸’’𑀢𑀺 𑀅𑀯𑀢𑁆𑀯𑀸 ¶ 𑀅𑀫𑁆𑀳𑁂 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀦𑀺𑀬𑁄𑀚𑁂𑀲𑀻𑀢𑀺. 𑀧𑀘𑁆𑀘𑀲𑁆𑀲𑁄𑀲𑀼𑀦𑁆𑀢𑀺 𑀢𑀲𑁆𑀲 𑀯𑀘𑀦𑀁 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼.

𑁩𑁪𑁫. 𑀧𑀜𑁆𑀘𑀲𑀺𑀔𑀁 ¶ 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀻𑀢𑀺 𑀤𑁂𑀯𑁂 𑀢𑀸𑀯 𑀆𑀫𑀦𑁆𑀢𑁂𑀢𑀼, 𑀇𑀫𑀁 𑀓𑀲𑁆𑀫𑀸 𑀯𑀺𑀲𑀼𑀁 𑀆𑀫𑀦𑁆𑀢𑁂𑀲𑀺? 𑀑𑀓𑀸𑀲𑀓𑀭𑀡𑀢𑁆𑀣𑀁. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 ‘‘𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑀢𑀸 𑀕𑀳𑁂𑀢𑁆𑀯𑀸 𑀥𑀼𑀭𑁂𑀦 𑀧𑀳𑀭𑀦𑁆𑀢𑀲𑁆𑀲 𑀯𑀺𑀬 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀦 𑀬𑀼𑀢𑁆𑀢𑀁, 𑀅𑀬𑀁 𑀧𑀦 𑀧𑀜𑁆𑀘𑀲𑀺𑀔𑁄 𑀤𑀲𑀩𑀮𑀲𑁆𑀲 𑀉𑀧𑀝𑁆𑀞𑀸𑀓𑁄 𑀯𑀮𑁆𑀮𑀪𑁄 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀕𑀦𑁆𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀇𑀫𑀁 𑀧𑀼𑀭𑀢𑁄 𑀧𑁂𑀲𑁂𑀢𑁆𑀯𑀸 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀇𑀫𑀺𑀦𑀸 𑀓𑀢𑁄𑀓𑀸𑀲𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀑𑀓𑀸𑀲𑀓𑀭𑀡𑀢𑁆𑀣𑀁 𑀆𑀫𑀦𑁆𑀢𑁂𑀲𑀺.

𑀏𑀯𑀁 𑀪𑀤𑁆𑀤𑀁 𑀢𑀯𑀸𑀢𑀺 𑀲𑁄 ‘‘𑀏𑀯𑀁 𑀫𑀳𑀸𑀭𑀸𑀚, 𑀳𑁄𑀢𑀼, 𑀪𑀤𑁆𑀤𑀁 𑀢𑀯, 𑀬𑁄 𑀢𑁆𑀯𑀁 𑀫𑀁 ‘𑀏𑀳𑀺, 𑀫𑀸𑀭𑀺𑀲, 𑀉𑀬𑁆𑀬𑀸𑀦𑀓𑀻𑀴𑀸𑀤𑀻𑀦𑀺 𑀯𑀸 𑀦𑀝𑀲𑀫𑀚𑁆𑀚𑀸𑀤𑀻𑀦𑀺 𑀯𑀸 𑀤𑀲𑁆𑀲𑀦𑀸𑀬 𑀕𑀘𑁆𑀙𑀸𑀫𑀸’𑀢𑀺 𑀅𑀯𑀢𑁆𑀯𑀸 ‘𑀩𑀼𑀤𑁆𑀥𑀁 𑀧𑀲𑁆𑀲𑀺𑀲𑁆𑀲𑀸𑀫, 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀸’𑀢𑀺 𑀯𑀤𑀲𑀻’’𑀢𑀺 𑀤𑀴𑁆𑀳𑀢𑀭𑀁 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑁄 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀯𑀘𑀦𑀁 𑀧𑀝𑀺𑀲𑁆𑀲𑀼𑀢𑁆𑀯𑀸 𑀅𑀦𑀼𑀘𑀭𑀺𑀬𑀁 𑀲𑀳𑀘𑀭𑀡𑀁 𑀏𑀓𑀢𑁄 𑀕𑀫𑀦𑀁 𑀉𑀧𑀸𑀕𑀫𑀺.

𑀢𑀢𑁆𑀣 𑀩𑁂𑀮𑀼𑀯𑀧𑀡𑁆𑀟𑀼𑀦𑁆𑀢𑀺 𑀩𑁂𑀮𑀼𑀯𑀧𑀓𑁆𑀓𑀁 𑀯𑀺𑀬 𑀧𑀡𑁆𑀟𑀼𑀯𑀡𑁆𑀡𑀁. 𑀢𑀲𑁆𑀲 𑀓𑀺𑀭 𑀲𑁄𑀯𑀡𑁆𑀡𑀫𑀬𑀁 𑀧𑁄𑀓𑁆𑀔𑀭𑀁, 𑀇𑀦𑁆𑀤𑀦𑀻𑀮𑀫𑀬𑁄 𑀤𑀡𑁆𑀟𑁄, 𑀭𑀚𑀢𑀫𑀬𑀸 𑀢𑀦𑁆𑀢𑀺𑀬𑁄, 𑀧𑀯𑀸𑀴𑀫𑀬𑀸 𑀯𑁂𑀞𑀓𑀸, 𑀯𑀻𑀡𑀸𑀧𑀢𑁆𑀢𑀓𑀁 𑀕𑀸𑀯𑀼𑀢𑀁, 𑀢𑀦𑁆𑀢𑀺𑀩𑀦𑁆𑀥𑀦𑀝𑁆𑀞𑀸𑀦𑀁 𑀕𑀸𑀯𑀼𑀢𑀁, 𑀉𑀧𑀭𑀺 𑀤𑀡𑁆𑀟𑀓𑁄 𑀕𑀸𑀯𑀼𑀢𑀦𑁆𑀢𑀺 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀸 𑀯𑀻𑀡𑀸. 𑀇𑀢𑀺 𑀲𑁄 𑀢𑀁 𑀯𑀻𑀡𑀁 𑀆𑀤𑀸𑀬 𑀲𑀫𑀧𑀜𑁆𑀜𑀸𑀲𑀫𑀼𑀘𑁆𑀙𑀦𑀸 𑀫𑀼𑀘𑁆𑀙𑁂𑀢𑁆𑀯𑀸 𑀅𑀕𑁆𑀕𑀦𑀔𑁂𑀳𑀺 𑀧𑀳𑀭𑀺𑀢𑁆𑀯𑀸 𑀫𑀥𑀼𑀭𑀁 𑀕𑀻𑀢𑀲𑁆𑀲𑀭𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀲𑁂𑀲𑀤𑁂𑀯𑁂 𑀲𑀓𑁆𑀓𑀲𑁆𑀲 𑀕𑀫𑀦𑀓𑀸𑀮𑀁 ¶ 𑀚𑀸𑀦𑀸𑀧𑁂𑀦𑁆𑀢𑁄 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀯𑀁 𑀢𑀲𑁆𑀲 𑀕𑀻𑀢𑀯𑀸𑀤𑀺𑀢𑀲𑀜𑁆𑀜𑀸𑀬 𑀲𑀦𑁆𑀦𑀺𑀧𑀢𑀺𑀢𑁂 𑀤𑁂𑀯𑀕𑀡𑁂 𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄…𑀧𑁂… 𑀯𑁂𑀤𑀺𑀬𑀓𑁂 𑀧𑀩𑁆𑀩𑀢𑁂 𑀧𑀘𑁆𑀘𑀼𑀝𑁆𑀞𑀸𑀲𑀺.

𑁩𑁪𑁬. 𑀅𑀢𑀺𑀭𑀺𑀯 𑀑𑀪𑀸𑀲𑀚𑀸𑀢𑁄𑀢𑀺 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀏𑀓𑀲𑁆𑀲𑁂𑀯 𑀤𑁂𑀯𑀲𑁆𑀲 𑀯𑀸 𑀫𑀸𑀭𑀲𑁆𑀲 𑀯𑀸 𑀩𑁆𑀭𑀳𑁆𑀫𑀼𑀦𑁄 𑀯𑀸 𑀑𑀪𑀸𑀲𑁂𑀦 𑀑𑀪𑀸𑀲𑀚𑀸𑀢𑁄 𑀳𑁄𑀢𑀺, 𑀢𑀁𑀤𑀺𑀯𑀲𑀁 𑀧𑀦 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑀢𑀸𑀦𑀁 𑀑𑀪𑀸𑀲𑁂𑀦 𑀅𑀢𑀺𑀭𑀺𑀯 𑀑𑀪𑀸𑀲𑀚𑀸𑀢𑁄 𑀏𑀓𑀧𑀚𑁆𑀚𑁄𑀢𑁄 𑀲𑀳𑀲𑁆𑀲𑀘𑀦𑁆𑀤𑀲𑀽𑀭𑀺𑀬𑀉𑀕𑁆𑀕𑀢𑀓𑀸𑀮𑀲𑀤𑀺𑀲𑁄 𑀅𑀳𑁄𑀲𑀺. 𑀧𑀭𑀺𑀢𑁄 𑀕𑀸𑀫𑁂𑀲𑀼 𑀫𑀦𑀼𑀲𑁆𑀲𑀸𑀢𑀺 𑀲𑀫𑀦𑁆𑀢𑀸 𑀕𑀸𑀫𑁂𑀲𑀼 𑀫𑀦𑀼𑀲𑁆𑀲𑀸. 𑀧𑀓𑀢𑀺𑀲𑀸𑀬𑀫𑀸𑀲𑀓𑀸𑀮𑁂𑀬𑁂𑀯 𑀓𑀺𑀭 𑀕𑀸𑀫𑀫𑀚𑁆𑀛𑁂 𑀤𑀸𑀭𑀓𑁂𑀲𑀼 𑀓𑀻𑀴𑀦𑁆𑀢𑁂𑀲𑀼 𑀢𑀢𑁆𑀣 𑀲𑀓𑁆𑀓𑁄 𑀅𑀕𑀫𑀸𑀲𑀺, 𑀢𑀲𑁆𑀫𑀸 𑀫𑀦𑀼𑀲𑁆𑀲𑀸 𑀧𑀲𑁆𑀲𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼. 𑀦𑀦𑀼 𑀘 𑀫𑀚𑁆𑀛𑀺𑀫𑀬𑀸𑀫𑁂 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀦𑁆𑀢𑀺, 𑀅𑀬𑀁 𑀓𑀲𑁆𑀫𑀸 ¶ 𑀧𑀞𑀫𑀬𑀸𑀫𑀲𑁆𑀲𑀸𑀧𑀺 𑀧𑀼𑀭𑀺𑀫𑀪𑀸𑀕𑁂𑀬𑁂𑀯 𑀆𑀕𑀢𑁄𑀢𑀺? 𑀫𑀭𑀡𑀪𑀬𑁂𑀦𑁂𑀯 𑀢𑀚𑁆𑀚𑀺𑀢𑀢𑁆𑀢𑀸. 𑀓𑀺𑀁𑀲𑀼 𑀦𑀸𑀫𑀸𑀢𑀺 𑀓𑀺𑀁𑀲𑀼 𑀦𑀸𑀫 𑀪𑁄 𑀏𑀢𑀁, 𑀓𑁄 𑀦𑀼 𑀔𑁄 𑀅𑀚𑁆𑀚 𑀫𑀳𑁂𑀲𑀓𑁆𑀔𑁄 𑀤𑁂𑀯𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀥𑀫𑁆𑀫𑀁 𑀲𑁄𑀢𑀼𑀁 𑀉𑀧𑀲𑀗𑁆𑀓𑀫𑀦𑁆𑀢𑁄, 𑀓𑀣𑀁𑀲𑀼 ¶ 𑀦𑀸𑀫 𑀪𑁄 𑀪𑀕𑀯𑀸 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀢𑀺 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀢𑀺, 𑀮𑀸𑀪𑀸 𑀅𑀫𑁆𑀳𑀸𑀓𑀁, 𑀬𑁂𑀲𑀁 𑀦𑁄 𑀏𑀯𑀁 𑀤𑁂𑀯𑀢𑀸𑀦𑀁 𑀓𑀗𑁆𑀔𑀸𑀯𑀺𑀦𑁄𑀤𑀓𑁄 𑀲𑀢𑁆𑀣𑀸 𑀅𑀯𑀺𑀤𑀽𑀭𑁂 𑀯𑀺𑀳𑀸𑀭𑁂 𑀯𑀲𑀢𑀺, 𑀬𑁂 𑀮𑀪𑀸𑀫 𑀣𑀸𑀮𑀓𑀪𑀺𑀓𑁆𑀔𑀫𑁆𑀧𑀺 𑀓𑀝𑀘𑁆𑀙𑀼𑀪𑀺𑀓𑁆𑀔𑀫𑁆𑀧𑀺 𑀤𑀸𑀢𑀼𑀦𑁆𑀢𑀺 𑀲𑀁𑀯𑀺𑀕𑁆𑀕𑀸 𑀮𑁄𑀫𑀳𑀝𑁆𑀞𑀚𑀸𑀢𑀸 𑀉𑀤𑁆𑀥𑀕𑁆𑀕𑀮𑁄𑀫𑀸 𑀳𑀼𑀢𑁆𑀯𑀸 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀅𑀜𑁆𑀚𑀮𑀺𑀁 𑀲𑀺𑀭𑀲𑁆𑀫𑀺𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀦𑀫𑀲𑁆𑀲𑀫𑀸𑀦𑀸 𑀅𑀝𑁆𑀞𑀁𑀲𑀼.

𑁩𑁪𑁭. 𑀤𑀼𑀭𑀼𑀧𑀲𑀗𑁆𑀓𑀫𑀸𑀢𑀺 𑀤𑀼𑀧𑀬𑀺𑀭𑀼𑀧𑀸𑀲𑀺𑀬𑀸. 𑀅𑀳𑀁 𑀲𑀭𑀸𑀕𑁄 𑀲𑀤𑁄𑀲𑁄 𑀲𑀫𑁄𑀳𑁄, 𑀲𑀢𑁆𑀣𑀸 𑀯𑀻𑀢𑀭𑀸𑀕𑁄 𑀯𑀻𑀢𑀤𑁄𑀲𑁄 𑀯𑀻𑀢𑀫𑁄𑀳𑁄, 𑀢𑀲𑁆𑀫𑀸 𑀤𑀼𑀧𑀬𑀺𑀭𑀼𑀧𑀸𑀲𑀺𑀬𑀸 𑀢𑀣𑀸𑀕𑀢𑀸 𑀫𑀸𑀤𑀺𑀲𑁂𑀦. 𑀛𑀸𑀬𑀻𑀢𑀺 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀘 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀘 𑀛𑀸𑀬𑀻. 𑀢𑀲𑁆𑀫𑀺𑀜𑁆𑀜𑁂𑀯 𑀛𑀸𑀦𑁂 𑀭𑀢𑀸𑀢𑀺 𑀛𑀸𑀦𑀭𑀢𑀸. 𑀢𑀤𑀦𑁆𑀢𑀭𑀁 𑀧𑀝𑀺𑀲𑀮𑁆𑀮𑀻𑀦𑀸𑀢𑀺 𑀢𑀤𑀦𑁆𑀢𑀭𑀁 𑀧𑀝𑀺𑀲𑀮𑁆𑀮𑀻𑀦𑀸 𑀲𑀫𑁆𑀧𑀢𑀺 𑀧𑀝𑀺𑀲𑀮𑁆𑀮𑀻𑀦𑀸 𑀯𑀸. 𑀢𑀲𑁆𑀫𑀸 𑀦 𑀓𑁂𑀯𑀮𑀁 𑀛𑀸𑀬𑀻 𑀛𑀸𑀦𑀭𑀢𑀸𑀢𑀺 𑀤𑀼𑀭𑀼𑀧𑀲𑀗𑁆𑀓𑀫𑀸, 𑀇𑀤𑀸𑀦𑀺𑀫𑁂𑀯 𑀧𑀝𑀺𑀲𑀮𑁆𑀮𑀻𑀦𑀸𑀢𑀺𑀧𑀺 𑀤𑀼𑀭𑀼𑀧𑀲𑀗𑁆𑀓𑀫𑀸. 𑀧𑀲𑀸𑀤𑁂𑀬𑁆𑀬𑀸𑀲𑀻𑀢𑀺 𑀆𑀭𑀸𑀥𑁂𑀬𑁆𑀬𑀸𑀲𑀺, 𑀑𑀓𑀸𑀲𑀁 𑀫𑁂 𑀓𑀸𑀭𑁂𑀢𑁆𑀯𑀸 𑀤𑀤𑁂𑀬𑁆𑀬𑀸𑀲𑀻𑀢𑀺 𑀯𑀤𑀢𑀺. 𑀩𑁂𑀮𑀼𑀯𑀧𑀡𑁆𑀟𑀼𑀯𑀻𑀡𑀁 𑀆𑀤𑀸𑀬𑀸𑀢𑀺 𑀦𑀦𑀼 𑀧𑀼𑀩𑁆𑀩𑁂𑀯 𑀆𑀤𑀺𑀦𑁆𑀦𑀸𑀢𑀺? 𑀆𑀫 ¶ , 𑀆𑀤𑀺𑀦𑁆𑀦𑀸. 𑀫𑀕𑁆𑀕𑀕𑀫𑀦𑀯𑀲𑁂𑀦 𑀧𑀦 𑀅𑀁𑀲𑀓𑀽𑀝𑁂 𑀮𑀕𑁆𑀕𑀺𑀢𑀸, 𑀇𑀤𑀸𑀦𑀺 𑀦𑀁 𑀯𑀸𑀫𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀯𑀸𑀤𑀦𑀲𑀚𑁆𑀚𑀁 𑀓𑀢𑁆𑀯𑀸 𑀆𑀤𑀺𑀬𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀤𑀸𑀬𑀸’’𑀢𑀺.

𑀧𑀜𑁆𑀘𑀲𑀺𑀔𑀕𑀻𑀢𑀕𑀸𑀣𑀸𑀯𑀡𑁆𑀡𑀦𑀸

𑁩𑁪𑁮. 𑀅𑀲𑁆𑀲𑀸𑀯𑁂𑀲𑀻𑀢𑀺 𑀲𑀸𑀯𑁂𑀲𑀺. 𑀩𑀼𑀤𑁆𑀥𑀽𑀧𑀲𑀜𑁆𑀳𑀺𑀢𑀸𑀢𑀺 𑀩𑀼𑀤𑁆𑀥𑀁 𑀆𑀭𑀩𑁆𑀪 𑀩𑀼𑀤𑁆𑀥𑀁 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸 𑀧𑀯𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀯𑀦𑁆𑀤𑁂 𑀢𑁂 𑀧𑀺𑀢𑀭𑀁 𑀪𑀤𑁆𑀤𑁂, 𑀢𑀺𑀫𑁆𑀩𑀭𑀼𑀁 𑀲𑀽𑀭𑀺𑀬𑀯𑀘𑁆𑀙𑀲𑁂𑀢𑀺 𑀏𑀢𑁆𑀣 𑀲𑀽𑀭𑀺𑀬𑀯𑀘𑁆𑀙𑀲𑀸𑀢𑀺 𑀲𑀽𑀭𑀺𑀬𑀲𑀫𑀸𑀦𑀲𑀭𑀻𑀭𑀸. 𑀢𑀲𑁆𑀲𑀸 𑀓𑀺𑀭 𑀤𑁂𑀯𑀥𑀻𑀢𑀸𑀬 𑀧𑀸𑀤𑀦𑁆𑀢𑀢𑁄 𑀭𑀲𑁆𑀫𑀺 𑀉𑀝𑁆𑀞𑀳𑀺𑀢𑁆𑀯𑀸 𑀓𑁂𑀲𑀦𑁆𑀢𑀁 𑀆𑀭𑁄𑀳𑀢𑀺, 𑀢𑀲𑁆𑀫𑀸 𑀩𑀸𑀮𑀲𑀽𑀭𑀺𑀬𑀫𑀡𑁆𑀟𑀮𑀲𑀤𑀺𑀲𑀸 𑀔𑀸𑀬𑀢𑀺, 𑀇𑀢𑀺 𑀦𑀁 ‘‘𑀲𑀽𑀭𑀺𑀬𑀯𑀘𑁆𑀙𑀲𑀸’’𑀢𑀺 𑀲𑀜𑁆𑀚𑀸𑀦𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀪𑀤𑁆𑀤𑁂, 𑀲𑀽𑀭𑀺𑀬𑀯𑀘𑁆𑀙𑀲𑁂, 𑀢𑀯 𑀧𑀺𑀢𑀭𑀁 𑀢𑀺𑀫𑁆𑀩𑀭𑀼𑀁 𑀕𑀦𑁆𑀥𑀩𑁆𑀩𑀤𑁂𑀯𑀭𑀸𑀚𑀸𑀦𑀁 𑀯𑀦𑁆𑀤𑀸𑀫𑀻’’𑀢𑀺. 𑀬𑁂𑀦 𑀚𑀸𑀢𑀸𑀲𑀺 𑀓𑀮𑁆𑀬𑀸𑀡𑀻𑀢𑀺 𑀬𑁂𑀦 ¶ 𑀓𑀸𑀭𑀡𑀪𑀽𑀢𑁂𑀦 𑀬𑀁 𑀢𑀺𑀫𑁆𑀩𑀭𑀼𑀁 𑀤𑁂𑀯𑀭𑀸𑀚𑀸𑀦𑀁 𑀦𑀺𑀲𑁆𑀲𑀸𑀬 𑀢𑁆𑀯𑀁 𑀚𑀸𑀢𑀸, 𑀓𑀮𑁆𑀬𑀸𑀡𑀻 𑀲𑀩𑁆𑀩𑀗𑁆𑀕𑀲𑁄𑀪𑀦𑀸. 𑀆𑀦𑀦𑁆𑀤𑀚𑀦𑀦𑀻 𑀫𑀫𑀸𑀢𑀺 𑀫𑀬𑁆𑀳𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀯𑀟𑁆𑀠𑀦𑀻.

𑀯𑀸𑀢𑁄𑀯 𑀲𑁂𑀤𑀢𑀁 𑀓𑀦𑁆𑀢𑁄𑀢𑀺 𑀬𑀣𑀸 𑀲𑀜𑁆𑀚𑀸𑀢𑀲𑁂𑀤𑀸𑀦𑀁 𑀲𑁂𑀤𑀳𑀭𑀡𑀢𑁆𑀣𑀁 𑀯𑀸𑀢𑁄 𑀇𑀝𑁆𑀞𑁄 𑀳𑁄𑀢𑀺 𑀓𑀦𑁆𑀢𑁄 𑀫𑀦𑀸𑀧𑁄, 𑀏𑀯𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀦𑀻𑀬𑀁𑀯 𑀧𑀺𑀧𑀸𑀲𑀢𑁄𑀢𑀺 𑀧𑀸𑀢𑀼𑀫𑀺𑀘𑁆𑀙𑀦𑁆𑀢𑀲𑁆𑀲 𑀧𑀺𑀧𑀸𑀲𑀢𑁄 𑀧𑀺𑀧𑀸𑀲𑀸𑀪𑀺𑀪𑀽𑀢𑀲𑁆𑀲. 𑀅𑀗𑁆𑀕𑀻𑀭𑀲𑀻𑀢𑀺 𑀅𑀗𑁆𑀕𑁂 𑀭𑀲𑁆𑀫𑀺𑀬𑁄 𑀅𑀲𑁆𑀲𑀸𑀢𑀺 𑀅𑀗𑁆𑀕𑀻𑀭𑀲𑀻, 𑀢𑀫𑁂𑀯 𑀆𑀭𑀩𑁆𑀪 𑀆𑀮𑀧𑀦𑁆𑀢𑁄 𑀯𑀤𑀢𑀺. 𑀥𑀫𑁆𑀫𑁄 𑀅𑀭𑀳𑀢𑀸𑀫𑀺𑀯𑀸𑀢𑀺 𑀅𑀭𑀳𑀦𑁆𑀢𑀸𑀦𑀁 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀯𑀺𑀬.

𑀚𑀺𑀖𑀘𑁆𑀙𑀢𑁄𑀢𑀺 ¶ 𑀪𑀼𑀜𑁆𑀚𑀺𑀢𑀼𑀓𑀸𑀫𑀲𑁆𑀲 𑀔𑀼𑀤𑀸𑀪𑀺𑀪𑀽𑀢𑀲𑁆𑀲. 𑀚𑀮𑀦𑁆𑀢𑀫𑀺𑀯 𑀯𑀸𑀭𑀺𑀦𑀸𑀢𑀺 𑀬𑀣𑀸 𑀓𑁄𑀘𑀺 𑀚𑀮𑀦𑁆𑀢𑀁 𑀚𑀸𑀢𑀯𑁂𑀤𑀁 𑀉𑀤𑀓𑀓𑀼𑀫𑁆𑀪𑁂𑀦 𑀦𑀺𑀩𑁆𑀩𑀸𑀧𑁂𑀬𑁆𑀬, 𑀏𑀯𑀁 𑀢𑀯 𑀓𑀸𑀭𑀡𑀸 𑀉𑀧𑁆𑀧𑀦𑁆𑀦𑀁 𑀫𑀫 𑀓𑀸𑀫𑀭𑀸𑀕𑀧𑀭𑀺𑀴𑀸𑀳𑀁 𑀦𑀺𑀩𑁆𑀩𑀸𑀧𑁂𑀳𑀻𑀢𑀺 𑀯𑀤𑀢𑀺.

𑀬𑀼𑀢𑁆𑀢𑀁 𑀓𑀺𑀜𑁆𑀚𑀓𑁆𑀔𑀭𑁂𑀡𑀼𑀦𑀸𑀢𑀺 𑀧𑀤𑀼𑀫𑀓𑁂𑀲𑀭𑀭𑁂𑀡𑀼𑀦𑀸 𑀬𑀼𑀢𑁆𑀢𑀁. 𑀦𑀸𑀕𑁄 𑀖𑀫𑁆𑀫𑀸𑀪𑀺𑀢𑀢𑁆𑀢𑁄 𑀯𑀸𑀢𑀺 𑀖𑀫𑁆𑀫𑀸𑀪𑀺𑀢𑀢𑁆𑀢𑀳𑀢𑁆𑀣𑀻 𑀯𑀺𑀬. 𑀑𑀕𑀸𑀳𑁂 𑀢𑁂 𑀣𑀦𑀽𑀤𑀭𑀦𑁆𑀢𑀺 𑀬𑀣𑀸 𑀲𑁄 𑀦𑀸𑀕𑁄 𑀧𑁄𑀓𑁆𑀔𑀭𑀡𑀺𑀁 𑀑𑀕𑀸𑀳𑀺𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀅𑀕𑁆𑀕𑀲𑁄𑀡𑁆𑀟𑀫𑀢𑁆𑀢𑀁 𑀧𑀜𑁆𑀜𑀸𑀬𑀫𑀸𑀦𑀁 𑀓𑀢𑁆𑀯𑀸 𑀦𑀺𑀫𑀼𑀕𑁆𑀕𑁄 𑀲𑀼𑀔𑀁 𑀲𑀸𑀢𑀁 𑀯𑀺𑀦𑁆𑀤𑀢𑀺, 𑀏𑀯𑀁 𑀓𑀤𑀸 𑀦𑀼 𑀔𑁄 𑀢𑁂 𑀣𑀦𑀽𑀤𑀭𑀁 𑀣𑀦𑀯𑁂𑀫𑀚𑁆𑀛𑀁 ¶ 𑀉𑀤𑀭𑀜𑁆𑀘 𑀑𑀢𑀭𑀺𑀢𑁆𑀯𑀸 𑀅𑀳𑀁 𑀲𑀼𑀔𑀁 𑀲𑀸𑀢𑀁 𑀧𑀝𑀺𑀮𑀪𑀺𑀲𑁆𑀲𑀸𑀫𑀻𑀢𑀺 𑀯𑀤𑀢𑀺.

‘‘𑀅𑀘𑁆𑀘𑀗𑁆𑀓𑀼𑀲𑁄𑀯 𑀦𑀸𑀕𑁄𑀯, 𑀚𑀺𑀢𑀁 𑀫𑁂 𑀢𑀼𑀢𑁆𑀢𑀢𑁄𑀫𑀭𑀁;

𑀓𑀸𑀭𑀡𑀁 𑀦𑀧𑁆𑀧𑀚𑀸𑀦𑀸𑀫𑀺, 𑀲𑀫𑁆𑀫𑀢𑁆𑀢𑁄 𑀮𑀓𑁆𑀔𑀡𑀽𑀭𑀼𑀬𑀸’’𑀢𑀺. 𑁋

𑀏𑀢𑁆𑀣 𑀢𑀼𑀢𑁆𑀢𑀁 𑀯𑀼𑀘𑁆𑀘𑀢𑀺 𑀓𑀡𑁆𑀡𑀫𑀽𑀮𑁂 𑀯𑀺𑀚𑁆𑀛𑀦𑀅𑀬𑀤𑀡𑁆𑀟𑀓𑁄. 𑀢𑁄𑀫𑀭𑀦𑁆𑀢𑀺 𑀧𑀸𑀤𑀸𑀤𑀻𑀲𑀼 𑀯𑀺𑀚𑁆𑀛𑀦𑀤𑀡𑁆𑀟𑀢𑁄𑀫𑀭𑀁. 𑀅𑀗𑁆𑀓𑀼𑀲𑁄𑀢𑀺 𑀫𑀢𑁆𑀣𑀓𑁂 𑀯𑀺𑀚𑁆𑀛𑀦𑀓𑀼𑀝𑀺𑀮𑀓𑀡𑁆𑀝𑀓𑁄. 𑀬𑁄 𑀘 𑀦𑀸𑀕𑁄 𑀧𑀪𑀺𑀦𑁆𑀦𑀫𑀢𑁆𑀢𑁄 𑀅𑀘𑁆𑀘𑀗𑁆𑀓𑀼𑀲𑁄 𑀳𑁄𑀢𑀺, 𑀅𑀗𑁆𑀓𑀼𑀲𑀁 𑀅𑀢𑀻𑀢𑁄; 𑀅𑀗𑁆𑀓𑀼𑀲𑁂𑀦 𑀯𑀺𑀚𑁆𑀛𑀺𑀬𑀫𑀸𑀦𑁄𑀧𑀺 𑀯𑀲𑀁 𑀦 𑀕𑀘𑁆𑀙𑀢𑀺, 𑀲𑁄 ‘‘𑀚𑀺𑀢𑀁 𑀫𑀬𑀸 𑀢𑀼𑀢𑁆𑀢𑀢𑁄𑀫𑀭𑀁, 𑀬𑁄 𑀅𑀳𑀁 𑀅𑀗𑁆𑀓𑀼𑀲𑀲𑁆𑀲𑀧𑀺 𑀯𑀲𑀁 𑀦 𑀕𑀘𑁆𑀙𑀸𑀫𑀻’’𑀢𑀺 𑀫𑀤𑀤𑀧𑁆𑀧𑁂𑀦 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀦 𑀩𑀼𑀚𑁆𑀛𑀢𑀺. 𑀬𑀣𑀸 𑀲𑁄 𑀅𑀘𑁆𑀘𑀗𑁆𑀓𑀼𑀲𑁄 𑀦𑀸𑀕𑁄 ‘‘𑀚𑀺𑀢𑀁 𑀫𑁂 𑀢𑀼𑀢𑁆𑀢𑀢𑁄𑀫𑀭’’𑀦𑁆𑀢𑀺 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀦𑀧𑁆𑀧𑀚𑀸𑀦𑀸𑀢𑀺, 𑀏𑀯𑀁 𑀅𑀳𑀫𑁆𑀧𑀺 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀊𑀭𑀼𑀢𑀸𑀬 𑀮𑀓𑁆𑀔𑀡𑀽𑀭𑀼𑀬𑀸 𑀲𑀫𑁆𑀫𑀢𑁆𑀢𑁄 𑀫𑀢𑁆𑀢𑁄 𑀧𑀫𑀢𑁆𑀢𑁄 𑀉𑀫𑁆𑀫𑀢𑁆𑀢𑁄 𑀯𑀺𑀬 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀦𑀧𑁆𑀧𑀚𑀸𑀦𑀸𑀫𑀻𑀢𑀺 𑀯𑀤𑀢𑀺. 𑀅𑀣 𑀯𑀸 𑀅𑀘𑁆𑀘𑀗𑁆𑀓𑀼𑀲𑁄𑀯 𑀦𑀸𑀕𑁄 𑀅𑀳𑀫𑁆𑀧𑀺 𑀲𑀫𑁆𑀫𑀢𑁆𑀢𑁄 𑀮𑀓𑁆𑀔𑀡𑀽𑀭𑀼𑀬𑀸 𑀓𑀺𑀜𑁆𑀘𑀺 𑀢𑀢𑁄 ¶ 𑀯𑀺𑀭𑀸𑀕𑀓𑀸𑀭𑀡𑀁 𑀦𑀧𑁆𑀧𑀚𑀸𑀦𑀸𑀫𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀢𑁂𑀦 𑀦𑀸𑀕𑁂𑀦 𑀯𑀺𑀬 𑀚𑀺𑀢𑀁 𑀫𑁂 𑀢𑀼𑀢𑁆𑀢𑀢𑁄𑀫𑀭𑀁, 𑀦 𑀓𑀲𑁆𑀲𑀘𑀺 𑀯𑀤𑀢𑁄 𑀯𑀘𑀦𑀁 𑀆𑀤𑀺𑀬𑀸𑀫𑀺.

𑀢𑀬𑀺 𑀕𑁂𑀥𑀺𑀢𑀘𑀺𑀢𑁆𑀢𑁄𑀲𑁆𑀫𑀻𑀢𑀺 𑀪𑀤𑁆𑀤𑁂 𑀮𑀓𑁆𑀔𑀡𑀽𑀭𑀼 𑀢𑀬𑀺 𑀩𑀤𑁆𑀥𑀘𑀺𑀢𑁆𑀢𑁄𑀲𑁆𑀫𑀺. 𑀕𑁂𑀥𑀺𑀢𑀘𑀺𑀢𑁆𑀢𑁄𑀢𑀺 𑀯𑀸 𑀕𑁂𑀥𑀁 𑀅𑀚𑁆𑀛𑀼𑀧𑁂𑀢𑀘𑀺𑀢𑁆𑀢𑁄. 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀸𑀫𑀺𑀢𑀦𑁆𑀢𑀺 𑀧𑀓𑀢𑀺𑀁 𑀚𑀳𑀺𑀢𑁆𑀯𑀸 𑀞𑀺𑀢𑀁. 𑀧𑀝𑀺𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀫𑀻𑀢𑀺 𑀦𑀺𑀯𑀢𑁆𑀢𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺. 𑀯𑀗𑁆𑀓𑀖𑀲𑁆𑀢𑁄𑀯 𑀅𑀫𑁆𑀩𑀼𑀚𑁄𑀢𑀺 𑀩𑀴𑀺𑀲𑀁 𑀕𑀺𑀮𑀺𑀢𑁆𑀯𑀸 𑀞𑀺𑀢𑀫𑀘𑁆𑀙𑁄 𑀯𑀺𑀬. ‘‘𑀖𑀲𑁄’’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄.

𑀯𑀸𑀫𑀽𑀭𑀽𑀢𑀺 𑀯𑀸𑀫𑀸𑀓𑀸𑀭𑁂𑀦 𑀲𑀡𑁆𑀞𑀺𑀢𑀊𑀭𑀼, 𑀓𑀤𑀮𑀺𑀓𑁆𑀔𑀦𑁆𑀥𑀲𑀤𑀺𑀲𑀊𑀭𑀽𑀢𑀺 𑀯𑀸 𑀅𑀢𑁆𑀣𑁄. 𑀲𑀚𑀸𑀢𑀺 𑀆𑀮𑀺𑀗𑁆𑀕. 𑀫𑀦𑁆𑀤𑀮𑁄𑀘𑀦𑁂𑀢𑀺 𑀇𑀢𑁆𑀣𑀺𑀬𑁄 𑀦 𑀢𑀺𑀔𑀺𑀡𑀁 𑀦𑀺𑀚𑁆𑀛𑀸𑀬𑀦𑁆𑀢𑀺 𑀫𑀦𑁆𑀤𑀁 𑀆𑀮𑁄𑀘𑁂𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑀺, 𑀢𑀲𑁆𑀫𑀸 ¶ ‘‘𑀫𑀦𑁆𑀤𑀮𑁄𑀘𑀦𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀮𑀺𑀲𑁆𑀲𑀚𑀸𑀢𑀺 𑀲𑀩𑁆𑀩𑀢𑁄𑀪𑀸𑀕𑁂𑀦 𑀆𑀮𑀺𑀗𑁆𑀕. 𑀏𑀢𑀁 𑀫𑁂 𑀅𑀪𑀺𑀧𑀢𑁆𑀣𑀺𑀢𑀦𑁆𑀢𑀺 𑀏𑀢𑀁 𑀫𑀬𑀸 𑀅𑀪𑀺𑀡𑁆𑀳𑀁 𑀧𑀢𑁆𑀣𑀺𑀢𑀁.

𑀅𑀧𑁆𑀧𑀓𑁄 𑀯𑀢 𑀫𑁂 𑀲𑀦𑁆𑀢𑁄𑀢𑀺 𑀧𑀓𑀢𑀺𑀬𑀸𑀯 𑀫𑀦𑁆𑀤𑁄 𑀲𑀫𑀸𑀦𑁄. 𑀯𑁂𑀮𑁆𑀮𑀺𑀢𑀓𑁂𑀲𑀺𑀬𑀸𑀢𑀺 𑀓𑁂𑀲𑀸 𑀫𑀼𑀜𑁆𑀘𑀺𑀢𑁆𑀯𑀸 𑀧𑀺𑀝𑁆𑀞𑀺𑀬𑀁 𑀯𑀺𑀲𑁆𑀲𑀝𑁆𑀞𑀓𑀸𑀮𑁂 𑀲𑀧𑁆𑀧𑁄 ¶ 𑀯𑀺𑀬 𑀯𑁂𑀮𑁆𑀮𑀦𑁆𑀢𑀸 𑀕𑀘𑁆𑀙𑀦𑁆𑀢𑀸 𑀅𑀲𑁆𑀲𑀸𑀢𑀺 𑀯𑁂𑀮𑁆𑀮𑀺𑀢𑀓𑁂𑀲𑀻, 𑀢𑀲𑁆𑀲𑀸 𑀯𑁂𑀮𑁆𑀮𑀺𑀢𑀓𑁂𑀲𑀺𑀬𑀸. 𑀅𑀦𑁂𑀓𑀪𑀸𑀯𑁄 𑀲𑀫𑀼𑀧𑁆𑀧𑀸𑀤𑀻𑀢𑀺 𑀅𑀦𑁂𑀓𑀯𑀺𑀥𑁄 𑀚𑀸𑀢𑁄. 𑀅𑀦𑁂𑀓𑀪𑀸𑀕𑁄𑀢𑀺 𑀯𑀸 𑀧𑀸𑀞𑁄. 𑀅𑀭𑀳𑀦𑁆𑀢𑁂𑀯 𑀤𑀓𑁆𑀔𑀺𑀡𑀸𑀢𑀺 𑀅𑀭𑀳𑀦𑁆𑀢𑀫𑁆𑀳𑀺 𑀤𑀺𑀦𑁆𑀦𑀤𑀸𑀦𑀁 𑀯𑀺𑀬 𑀦𑀸𑀦𑀧𑁆𑀧𑀓𑀸𑀭𑀢𑁄 𑀧𑀪𑀺𑀦𑁆𑀦𑁄.

𑀬𑀁 𑀫𑁂 𑀅𑀢𑁆𑀣𑀺 𑀓𑀢𑀁 𑀧𑀼𑀜𑁆𑀜𑀦𑁆𑀢𑀺 𑀬𑀁 𑀫𑀬𑀸 𑀓𑀢𑀁 𑀧𑀼𑀜𑁆𑀜𑀫𑀢𑁆𑀣𑀺. 𑀅𑀭𑀳𑀦𑁆𑀢𑁂𑀲𑀼 𑀢𑀸𑀤𑀺𑀲𑀽𑀢𑀺 𑀢𑀸𑀤𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑁂𑀲𑀼 𑀅𑀭𑀳𑀦𑁆𑀢𑁂𑀲𑀼. 𑀢𑀬𑀸 𑀲𑀤𑁆𑀥𑀺𑀁 𑀯𑀺𑀧𑀘𑁆𑀘𑀢𑀦𑁆𑀢𑀺 𑀲𑀩𑁆𑀩𑀁 𑀢𑀬𑀸 𑀲𑀤𑁆𑀥𑀺𑀫𑁂𑀯 𑀯𑀺𑀧𑀸𑀓𑀁 𑀤𑁂𑀢𑀼.

𑀏𑀓𑁄𑀤𑀻𑀢𑀺 𑀏𑀓𑀻𑀪𑀸𑀯𑀁 𑀕𑀢𑁄. 𑀦𑀺𑀧𑀓𑁄 𑀲𑀢𑁄𑀢𑀺 𑀦𑁂𑀧𑀓𑁆𑀓𑀁 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑀦𑀺𑀧𑀓𑁄. 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀢𑁄. 𑀅𑀫𑀢𑀁 𑀫𑀼𑀦𑀺 𑀚𑀺𑀕𑀻𑀲𑀸𑀦𑁄𑀢𑀺 𑀬𑀣𑀸 𑀲𑁄 𑀩𑀼𑀤𑁆𑀥𑀫𑀼𑀦𑀺 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀚𑀺𑀕𑀻𑀲𑀢𑀺 𑀧𑀭𑀺𑀬𑁂𑀲𑀢𑀺, 𑀏𑀯𑀁 𑀢𑀁 𑀅𑀳𑀁 𑀲𑀽𑀭𑀺𑀬𑀯𑀘𑁆𑀙𑀲𑁂 𑀚𑀺𑀕𑀻𑀲𑀸𑀫𑀺 𑀧𑀭𑀺𑀬𑁂𑀲𑀸𑀫𑀺. 𑀬𑀣𑀸 𑀯𑀸 𑀲𑁄 𑀅𑀫𑀢𑀁 𑀚𑀺𑀕𑀻𑀲𑀸𑀦𑁄 𑀏𑀲𑀦𑁆𑀢𑁄 𑀕𑀯𑁂𑀲𑀦𑁆𑀢𑁄 𑀯𑀺𑀘𑀭𑀢𑀺, 𑀏𑀯𑀸𑀳𑀁 𑀢𑀁 𑀏𑀲𑀦𑁆𑀢𑁄 𑀕𑀯𑁂𑀲𑀦𑁆𑀢𑁄 𑀯𑀺𑀘𑀭𑀸𑀫𑀻𑀢𑀺𑀧𑀺 𑀅𑀢𑁆𑀣𑁄.

𑀬𑀣𑀸𑀧𑀺 𑀫𑀼𑀦𑀺 𑀦𑀦𑁆𑀤𑁂𑀬𑁆𑀬, 𑀧𑀢𑁆𑀯𑀸 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀦𑁆𑀢𑀺 𑀬𑀣𑀸 𑀩𑀼𑀤𑁆𑀥𑀫𑀼𑀦𑀺 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀢𑁆𑀯𑀸 𑀦𑀦𑁆𑀤𑁂𑀬𑁆𑀬 𑀢𑁄𑀲𑁂𑀬𑁆𑀬. 𑀏𑀯𑀁 𑀦𑀦𑁆𑀤𑁂𑀬𑁆𑀬𑀦𑁆𑀢𑀺 ¶ 𑀏𑀯𑀫𑁂𑀯 𑀅𑀳𑀫𑁆𑀧𑀺 𑀢𑀬𑀸 𑀫𑀺𑀲𑁆𑀲𑀻𑀪𑀸𑀯𑀁 𑀕𑀢𑁄 𑀦𑀦𑁆𑀤𑁂𑀬𑁆𑀬𑀁, 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀪𑀯𑁂𑀬𑁆𑀬𑀦𑁆𑀢𑀺 𑀯𑀤𑀢𑀺.

𑀢𑀸𑀳𑀁 𑀪𑀤𑁆𑀤𑁂 𑀯𑀭𑁂𑀬𑁆𑀬𑀸𑀳𑁂𑀢𑀺 𑀅𑀳𑁂𑀢𑀺 𑀆𑀫𑀦𑁆𑀢𑀦𑀁, 𑀅𑀳𑁂 𑀪𑀤𑁆𑀤𑁂 𑀲𑀽𑀭𑀺𑀬𑀯𑀘𑁆𑀙𑀲𑁂, 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 ‘‘𑀓𑀺𑀁 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑀭𑀚𑁆𑀚𑀁 𑀕𑀡𑁆𑀳𑀲𑀺, 𑀲𑀼𑀭𑀺𑀬𑀯𑀘𑁆𑀙𑀲’’𑀦𑁆𑀢𑀺, 𑀏𑀯𑀁 𑀯𑀭𑁂 𑀤𑀺𑀦𑁆𑀦𑁂 𑀤𑁂𑀯𑀭𑀚𑁆𑀚𑀁 𑀧𑀳𑀸𑀬 ‘‘𑀲𑀽𑀭𑀺𑀬𑀯𑀘𑁆𑀙𑀲𑀁 𑀕𑀡𑁆𑀳𑀸𑀫𑀻’’𑀢𑀺 𑀏𑀯𑀁 𑀢𑀁 𑀅𑀳𑀁 𑀯𑀭𑁂𑀬𑁆𑀬𑀁 𑀇𑀘𑁆𑀙𑁂𑀬𑁆𑀬𑀁 𑀕𑀡𑁆𑀳𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄.

𑀲𑀸𑀮𑀁𑀯 𑀦 𑀘𑀺𑀭𑀁 𑀨𑀼𑀮𑁆𑀮𑀦𑁆𑀢𑀺 𑀢𑀯 𑀧𑀺𑀢𑀼 𑀦𑀕𑀭𑀤𑁆𑀯𑀸𑀭𑁂 𑀦𑀘𑀺𑀭𑀁 𑀧𑀼𑀧𑁆𑀨𑀺𑀢𑁄 𑀲𑀸𑀮𑁄 𑀅𑀢𑁆𑀣𑀺. 𑀲𑁄 𑀅𑀢𑀺𑀯𑀺𑀬 𑀫𑀦𑁄𑀳𑀭𑁄. 𑀢𑀁 𑀦𑀘𑀺𑀭𑀁 𑀨𑀼𑀮𑁆𑀮𑀲𑀸𑀮𑀁 𑀯𑀺𑀬. 𑀧𑀺𑀢𑀭𑀁 𑀢𑁂 𑀲𑀼𑀫𑁂𑀥𑀲𑁂𑀢𑀺 𑀅𑀢𑀺𑀲𑀲𑁆𑀲𑀺𑀭𑀻𑀓𑀁 𑀢𑀯 𑀧𑀺𑀢𑀭𑀁 𑀯𑀦𑁆𑀤𑀫𑀸𑀦𑁄 𑀦𑀫𑀲𑁆𑀲𑀸𑀫𑀺 𑀦𑀫𑁄 𑀓𑀭𑁄𑀫𑀺. 𑀬𑀲𑁆𑀲𑀸𑀲𑁂𑀢𑀸𑀤𑀺𑀲𑀻 𑀧𑀚𑀸𑀢𑀺 𑀬𑀲𑁆𑀲 𑀆𑀲𑀺 𑀏𑀢𑀸𑀤𑀺𑀲𑀻 𑀥𑀻𑀢𑀸.

𑁩𑁪𑁯. 𑀲𑀁𑀲𑀦𑁆𑀤𑀢𑀻𑀢𑀺 ¶ 𑀓𑀲𑁆𑀫𑀸 𑀕𑀻𑀢𑀲𑀤𑁆𑀤𑀲𑁆𑀲 𑀘𑁂𑀯 𑀯𑀻𑀡𑀸𑀲𑀤𑁆𑀤𑀲𑁆𑀲 ¶ 𑀘 𑀯𑀡𑁆𑀡𑀁 𑀓𑀣𑁂𑀲𑀺? 𑀓𑀺𑀁 𑀢𑀢𑁆𑀣 𑀪𑀕𑀯𑀢𑁄 𑀲𑀸𑀭𑀸𑀕𑁄 𑀅𑀢𑁆𑀣𑀻𑀢𑀺? 𑀦𑀢𑁆𑀣𑀺. 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀬 𑀉𑀧𑁂𑀓𑁆𑀔𑀓𑁄 𑀪𑀕𑀯𑀸 𑀏𑀢𑀸𑀤𑀺𑀲𑁂𑀲𑀼 𑀞𑀸𑀦𑁂𑀲𑀼, 𑀓𑁂𑀯𑀮𑀁 𑀇𑀝𑁆𑀞𑀸𑀦𑀺𑀝𑁆𑀞𑀁 𑀚𑀸𑀦𑀸𑀢𑀺, 𑀦 𑀢𑀢𑁆𑀣 𑀭𑀚𑁆𑀚𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀲𑀁𑀯𑀺𑀚𑁆𑀚𑀢𑀺 𑀔𑁄, 𑀆𑀯𑀼𑀲𑁄, 𑀪𑀕𑀯𑀢𑁄 𑀘𑀓𑁆𑀔𑀼, 𑀧𑀲𑁆𑀲𑀢𑀺 𑀪𑀕𑀯𑀸 𑀘𑀓𑁆𑀔𑀼𑀦𑀸 𑀭𑀽𑀧𑀁, 𑀙𑀦𑁆𑀤𑀭𑀸𑀕𑁄 𑀪𑀕𑀯𑀢𑁄 𑀦𑀢𑁆𑀣𑀺, 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀪𑀕𑀯𑀸. 𑀲𑀁𑀯𑀺𑀚𑁆𑀚𑀢𑀺 𑀔𑁄, 𑀆𑀯𑀼𑀲𑁄, 𑀪𑀕𑀯𑀢𑁄 𑀲𑁄𑀢’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁪.𑁨𑁩𑁨). 𑀲𑀘𑁂 𑀧𑀦 𑀯𑀡𑁆𑀡𑀁 𑀦 𑀓𑀣𑁂𑀬𑁆𑀬, 𑀧𑀜𑁆𑀘𑀲𑀺𑀔𑁄 ‘‘𑀑𑀓𑀸𑀲𑁄 𑀫𑁂 𑀓𑀢𑁄’’𑀢𑀺 𑀦 𑀚𑀸𑀦𑁂𑀬𑁆𑀬. 𑀅𑀣 𑀲𑀓𑁆𑀓𑁄 ‘‘𑀪𑀕𑀯𑀢𑀸 𑀧𑀜𑁆𑀘𑀲𑀺𑀔𑀲𑁆𑀲 𑀑𑀓𑀸𑀲𑁄 𑀦 𑀓𑀢𑁄’’𑀢𑀺 𑀤𑁂𑀯𑀢𑀸 𑀕𑀳𑁂𑀢𑁆𑀯𑀸 𑀢𑀢𑁄𑀯 𑀧𑀝𑀺𑀦𑀺𑀯𑀢𑁆𑀢𑁂𑀬𑁆𑀬, 𑀢𑀢𑁄 𑀫𑀳𑀸𑀚𑀸𑀦𑀺𑀬𑁄 𑀪𑀯𑁂𑀬𑁆𑀬. 𑀯𑀡𑁆𑀡𑁂 𑀧𑀦 𑀓𑀣𑀺𑀢𑁂 ‘‘𑀓𑀢𑁄 𑀪𑀕𑀯𑀢𑀸 𑀧𑀜𑁆𑀘𑀲𑀺𑀔𑀲𑁆𑀲 𑀑𑀓𑀸𑀲𑁄’’𑀢𑀺 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀸𑀯𑀲𑀸𑀦𑁂 𑀅𑀲𑀻𑀢𑀺𑀬𑀸 𑀤𑁂𑀯𑀢𑀸𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀻𑀢𑀺 𑀜𑀢𑁆𑀯𑀸 𑀯𑀡𑁆𑀡𑀁 𑀓𑀣𑁂𑀲𑀺.

𑀢𑀢𑁆𑀣 𑀓𑀤𑀸 𑀲𑀁𑀬𑀽𑀴𑁆𑀳𑀸𑀢𑀺 𑀓𑀤𑀸 𑀕𑀦𑁆𑀣𑀺𑀢𑀸 𑀧𑀺𑀡𑁆𑀟𑀺𑀢𑀸. 𑀢𑁂𑀦 𑀔𑁄 𑀧𑀦𑀸𑀳𑀁, 𑀪𑀦𑁆𑀢𑁂, 𑀲𑀫𑀬𑁂𑀦𑀸𑀢𑀺 𑀢𑁂𑀦 𑀲𑀫𑀬𑁂𑀦 𑀢𑀲𑁆𑀫𑀺𑀁 𑀢𑀼𑀫𑁆𑀳𑀸𑀓𑀁 𑀲𑀫𑁆𑀩𑁄𑀥𑀺𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂. 𑀪𑀤𑁆𑀤𑀸 𑀦𑀸𑀫 𑀲𑀽𑀭𑀺𑀬𑀯𑀘𑁆𑀙𑀲𑀸𑀢𑀺 𑀦𑀸𑀫𑀢𑁄 𑀪𑀤𑁆𑀤𑀸 𑀲𑀭𑀻𑀭𑀲𑀫𑁆𑀧𑀢𑁆𑀢𑀺𑀬𑀸 𑀲𑀽𑀭𑀺𑀬𑀯𑀘𑁆𑀙𑀲𑀸. 𑀪𑀕𑀺𑀦𑀻𑀢𑀺 𑀯𑁄𑀳𑀸𑀭𑀯𑀘𑀦𑀫𑁂𑀢𑀁, 𑀤𑁂𑀯𑀥𑀻𑀢𑀸𑀢𑀺 𑀅𑀢𑁆𑀣𑁄. 𑀧𑀭𑀓𑀸𑀫𑀺𑀦𑀻𑀢𑀺 𑀧𑀭𑀁 𑀓𑀸𑀫𑁂𑀢𑀺 𑀅𑀪𑀺𑀓𑀗𑁆𑀔𑀢𑀺.

𑀉𑀧𑀦𑀘𑁆𑀘𑀦𑁆𑀢𑀺𑀬𑀸𑀢𑀺 ¶ 𑀦𑀘𑁆𑀘𑀫𑀸𑀦𑀸𑀬. 𑀲𑀸 𑀓𑀺𑀭 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑁂𑀳𑀺 𑀲𑀤𑁆𑀥𑀺𑀁 𑀲𑀓𑁆𑀓𑀲𑁆𑀲 𑀤𑁂𑀯𑀭𑀸𑀚𑀲𑁆𑀲 𑀦𑀘𑁆𑀘𑀁 𑀤𑀲𑁆𑀲𑀦𑀢𑁆𑀣𑀸𑀬 𑀕𑀢𑀸, 𑀢𑀲𑁆𑀫𑀺𑀜𑁆𑀘 𑀔𑀡𑁂 𑀲𑀓𑁆𑀓𑁄 𑀢𑀣𑀸𑀕𑀢𑀲𑁆𑀲 𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑁂 𑀕𑀼𑀡𑁂 𑀧𑀬𑀺𑀭𑀼𑀤𑀸𑀳𑀸𑀲𑀺. 𑀏𑀯𑀁 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀕𑀦𑁆𑀢𑁆𑀯𑀸 𑀦𑀘𑁆𑀘𑀦𑁆𑀢𑀻 𑀅𑀲𑁆𑀲𑁄𑀲𑀺.

𑀲𑀓𑁆𑀓𑀽𑀧𑀲𑀗𑁆𑀓𑀫𑀯𑀡𑁆𑀡𑀦𑀸

𑁩𑁫𑁦. 𑀧𑀝𑀺𑀲𑀫𑁆𑀫𑁄𑀤𑀢𑀻𑀢𑀺 ‘‘𑀲𑀁𑀲𑀦𑁆𑀤𑀢𑀺 𑀔𑁄 𑀢𑁂’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀪𑀕𑀯𑀸 𑀲𑀫𑁆𑀫𑁄𑀤𑀢𑀺, 𑀧𑀜𑁆𑀘𑀲𑀺𑀔𑁄 𑀧𑀝𑀺𑀲𑀫𑁆𑀫𑁄𑀤𑀢𑀺. 𑀕𑀸𑀣𑀸 𑀘 𑀪𑀸𑀲𑀦𑁆𑀢𑁄 𑀧𑀜𑁆𑀘𑀲𑀺𑀔𑁄 𑀲𑀫𑁆𑀫𑁄𑀤𑀢𑀺, 𑀪𑀕𑀯𑀸 𑀧𑀝𑀺𑀲𑀫𑁆𑀫𑁄𑀤𑀢𑀺. 𑀆𑀫𑀦𑁆𑀢𑁂𑀲𑀻𑀢𑀺 𑀚𑀸𑀦𑀸𑀧𑁂𑀲𑀺. 𑀢𑀲𑁆𑀲 𑀓𑀺𑀭𑁂𑀯𑀁 𑀅𑀳𑁄𑀲𑀺 ‘‘𑀅𑀬𑀁 𑀧𑀜𑁆𑀘𑀲𑀺𑀔𑁄 𑀫𑀬𑀸 𑀫𑀫 𑀓𑀫𑁆𑀫𑁂𑀦 𑀧𑁂𑀲𑀺𑀢𑁄 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀓𑀭𑁄𑀢𑀺. 𑀏𑀯𑀭𑀽𑀧𑀲𑁆𑀲 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀞𑀢𑁆𑀯𑀸 𑀓𑀸𑀫𑀕𑀼𑀡𑀽𑀧𑀲𑀜𑁆𑀳𑀺𑀢𑀁 𑀅𑀦𑀦𑀼𑀘𑁆𑀙𑀯𑀺𑀓𑀁 𑀓𑀣𑁂𑀲𑀺, 𑀦𑀝𑀸 𑀦𑀸𑀫 𑀦𑀺𑀮𑁆𑀮𑀚𑁆𑀚𑀸 𑀳𑁄𑀦𑁆𑀢𑀺, 𑀓𑀣𑁂𑀦𑁆𑀢𑁄 𑀯𑀺𑀧𑁆𑀧𑀓𑀸𑀭𑀫𑁆𑀧𑀺 𑀤𑀲𑁆𑀲𑁂𑀬𑁆𑀬, 𑀳𑀦𑁆𑀤 𑀦𑀁 𑀫𑀫 𑀓𑀫𑁆𑀫𑀁 𑀚𑀸𑀦𑀸𑀧𑁂𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀫𑀦𑁆𑀢𑁂𑀲𑀺.

𑁩𑁫𑁧. 𑀏𑀯𑀜𑁆𑀘 ¶ ¶ 𑀧𑀦 𑀢𑀣𑀸𑀕𑀢𑀸𑀢𑀺 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀞𑀧𑀺𑀢𑀯𑀘𑀦𑀁. 𑀅𑀪𑀺𑀯𑀤𑀦𑁆𑀢𑀻𑀢𑀺 𑀅𑀪𑀺𑀯𑀸𑀤𑀦𑀲𑀫𑁆𑀧𑀝𑀺𑀘𑁆𑀙𑀦𑁂𑀦 𑀯𑀟𑁆𑀠𑀺𑀢𑀯𑀘𑀦𑁂𑀦 𑀯𑀤𑀦𑁆𑀢𑀺. 𑀅𑀪𑀺𑀯𑀤𑀺𑀢𑁄𑀢𑀺 𑀯𑀟𑁆𑀠𑀺𑀢𑀯𑀘𑀦𑁂𑀦 𑀯𑀼𑀢𑁆𑀢𑁄.

𑀉𑀭𑀼𑀦𑁆𑀤𑀸 𑀲𑀫𑀧𑀸𑀤𑀻𑀢𑀺 𑀫𑀳𑀦𑁆𑀢𑀸 𑀯𑀺𑀯𑀝𑀸 𑀅𑀳𑁄𑀲𑀺, 𑀅𑀦𑁆𑀥𑀓𑀸𑀭𑁄 𑀕𑀼𑀳𑀸𑀬𑀁 𑀅𑀦𑁆𑀢𑀭𑀥𑀸𑀬𑀺. 𑀆𑀮𑁄𑀓𑁄 𑀉𑀤𑀧𑀸𑀤𑀻𑀢𑀺 𑀬𑁄 𑀧𑀓𑀢𑀺𑀬𑀸 𑀕𑀼𑀳𑀸𑀬𑀁 𑀅𑀦𑁆𑀥𑀓𑀸𑀭𑁄, 𑀲𑁄 𑀅𑀦𑁆𑀢𑀭𑀳𑀺𑀢𑁄, 𑀆𑀮𑁄𑀓𑁄 𑀚𑀸𑀢𑁄. 𑀲𑀩𑁆𑀩𑀫𑁂𑀢𑀁 𑀥𑀫𑁆𑀫𑀲𑀗𑁆𑀕𑀸𑀳𑀓𑀸𑀦𑀁 𑀯𑀘𑀦𑀁.

𑁩𑁫𑁨. 𑀘𑀺𑀭𑀧𑀝𑀺𑀓𑀸𑀳𑀁, 𑀪𑀦𑁆𑀢𑁂𑀢𑀺 𑀘𑀺𑀭𑀢𑁄 𑀅𑀳𑀁, 𑀘𑀺𑀭𑀢𑁄 𑀧𑀝𑁆𑀞𑀸𑀬𑀸𑀳𑀁 𑀤𑀲𑁆𑀲𑀦𑀓𑀸𑀫𑁄𑀢𑀺 𑀅𑀢𑁆𑀣𑁄. 𑀓𑁂𑀳𑀺𑀘𑀺 𑀓𑁂𑀳𑀺𑀘𑀺 𑀓𑀺𑀘𑁆𑀘𑀓𑀭𑀡𑀻𑀬𑁂𑀳𑀻𑀢𑀺 𑀤𑁂𑀯𑀸𑀦𑀁 𑀥𑀻𑀢𑀸 𑀘 𑀧𑀼𑀢𑁆𑀢𑀸 𑀘 𑀅𑀗𑁆𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀇𑀢𑁆𑀣𑀺𑀬𑁄 𑀲𑀬𑀦𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀢𑀸𑀲𑀁 𑀫𑀡𑁆𑀟𑀦𑀧𑀲𑀸𑀥𑀦𑀓𑀸𑀭𑀺𑀓𑀸 𑀤𑁂𑀯𑀢𑀸 𑀲𑀬𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀸 𑀅𑀦𑁆𑀢𑁄𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀏𑀢𑁂𑀲𑀁 𑀅𑀢𑁆𑀣𑀸𑀬 𑀅𑀟𑁆𑀟𑀓𑀭𑀡𑀁 𑀦𑀸𑀫 𑀦𑀢𑁆𑀣𑀺. 𑀬𑁂 𑀧𑀦 𑀲𑀻𑀫𑀦𑁆𑀢𑀭𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀢𑁂 ‘‘𑀢𑀯 𑀲𑀦𑁆𑀢𑀓𑀸, 𑀫𑀫 𑀲𑀦𑁆𑀢𑀓𑀸’’𑀢𑀺 𑀦𑀺𑀘𑁆𑀙𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀅𑀟𑁆𑀟𑀁 𑀓𑀭𑁄𑀦𑁆𑀢𑀺, 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀧𑀼𑀘𑁆𑀙𑀦𑁆𑀢𑀺. 𑀲𑁄 ‘‘𑀬𑀲𑁆𑀲 𑀯𑀺𑀫𑀸𑀦𑀁 𑀆𑀲𑀦𑁆𑀦𑀢𑀭𑀁, 𑀢𑀲𑁆𑀲 𑀲𑀦𑁆𑀢𑀓𑀸’’𑀢𑀺 𑀯𑀤𑀢𑀺. 𑀲𑀘𑁂 ¶ 𑀤𑁆𑀯𑁂𑀧𑀺 𑀲𑀫𑀝𑁆𑀞𑀸𑀦𑁂 𑀳𑁄𑀦𑁆𑀢𑀺, ‘‘𑀬𑀲𑁆𑀲 𑀯𑀺𑀫𑀸𑀦𑀁 𑀑𑀮𑁄𑀓𑁂𑀦𑁆𑀢𑀻 𑀞𑀺𑀢𑀸, 𑀢𑀲𑁆𑀲 𑀲𑀦𑁆𑀢𑀓𑀸’’𑀢𑀺 𑀯𑀤𑀢𑀺. 𑀲𑀘𑁂 𑀏𑀓𑀫𑁆𑀧𑀺 𑀦 𑀑𑀮𑁄𑀓𑁂𑀢𑀺, 𑀢𑀁 𑀉𑀪𑀺𑀦𑁆𑀦𑀁 𑀓𑀮𑀳𑀼𑀧𑀘𑁆𑀙𑁂𑀤𑀦𑀢𑁆𑀣𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀭𑁄𑀢𑀺. 𑀓𑀻𑀴𑀸𑀤𑀻𑀦𑀺𑀧𑀺 𑀓𑀺𑀘𑁆𑀘𑀸𑀦𑀺 𑀓𑀭𑀡𑀻𑀬𑀸𑀦𑁂𑀯. 𑀏𑀯𑀭𑀽𑀧𑀸𑀦𑀺 𑀢𑀸𑀦𑀺 𑀓𑀭𑀡𑀻𑀬𑀸𑀦𑀺 𑀲𑀦𑁆𑀥𑀸𑀬 ‘‘𑀓𑁂𑀳𑀺𑀘𑀺 𑀓𑁂𑀳𑀺𑀘𑀺 𑀓𑀺𑀘𑁆𑀘𑀓𑀭𑀡𑀻𑀬𑁂𑀳𑀻’’𑀢𑀺 𑀆𑀳.

𑀲𑀮𑀴𑀸𑀕𑀸𑀭𑀓𑁂𑀢𑀺 𑀲𑀮𑀴𑀫𑀬𑀕𑀦𑁆𑀥𑀓𑀼𑀝𑀺𑀬𑀁. 𑀅𑀜𑁆𑀜𑀢𑀭𑁂𑀦 𑀲𑀫𑀸𑀥𑀺𑀦𑀸𑀢𑀺 𑀢𑀤𑀸 𑀓𑀺𑀭 𑀪𑀕𑀯𑀸 𑀲𑀓𑁆𑀓𑀲𑁆𑀲𑁂𑀯 𑀅𑀧𑀭𑀺𑀧𑀸𑀓𑀕𑀢𑀁 𑀜𑀸𑀡𑀁 𑀯𑀺𑀤𑀺𑀢𑁆𑀯𑀸 𑀑𑀓𑀸𑀲𑀁 𑀅𑀓𑀸𑀭𑁂𑀢𑀼𑀓𑀸𑀫𑁄 𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑁂𑀦 𑀦𑀺𑀲𑀻𑀤𑀺. 𑀢𑀁 𑀏𑀲 𑀅𑀚𑀸𑀦𑀦𑁆𑀢𑁄 ‘‘𑀅𑀜𑁆𑀜𑀢𑀭𑁂𑀦 𑀲𑀫𑀸𑀥𑀺𑀦𑀸’’𑀢𑀺 𑀆𑀳. 𑀪𑀽𑀚𑀢𑀺 𑀘 𑀦𑀸𑀫𑀸𑀢𑀺 𑀪𑀽𑀚𑀢𑀻𑀢𑀺 𑀢𑀲𑁆𑀲𑀸 𑀦𑀸𑀫𑀁. 𑀧𑀭𑀺𑀘𑀸𑀭𑀺𑀓𑀸𑀢𑀺 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀤𑁂𑀯𑀥𑀻𑀢𑀸. 𑀲𑀸 𑀓𑀺𑀭 𑀤𑁆𑀯𑁂 𑀨𑀮𑀸𑀦𑀺 𑀧𑀢𑁆𑀢𑀸, 𑀢𑁂𑀦𑀲𑁆𑀲𑀸 𑀤𑁂𑀯𑀮𑁄𑀓𑁂 𑀅𑀪𑀺𑀭𑀢𑀺𑀬𑁂𑀯 𑀦𑀢𑁆𑀣𑀺. 𑀦𑀺𑀘𑁆𑀘𑀁 𑀪𑀕𑀯𑀢𑁄 𑀉𑀧𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀅𑀜𑁆𑀚𑀮𑀺𑀁 𑀲𑀺𑀭𑀲𑀺 𑀞𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀦𑀫𑀲𑁆𑀲𑀫𑀸𑀦𑀸 𑀢𑀺𑀝𑁆𑀞𑀢𑀺. 𑀦𑁂𑀫𑀺𑀲𑀤𑁆𑀤𑁂𑀦 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀺𑀢𑁄𑀢𑀺 ‘‘𑀲𑀫𑀸𑀧𑀦𑁆𑀦𑁄 𑀲𑀤𑁆𑀤𑀁 𑀲𑀼𑀡𑀸𑀢𑀻’’𑀢𑀺 𑀦𑁄 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂, 𑀦𑀦𑀼 𑀪𑀕𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 ¶ ‘‘𑀅𑀧𑀺𑀘𑀸𑀳𑀁 𑀆𑀬𑀲𑁆𑀫𑀢𑁄 𑀘𑀓𑁆𑀓𑀦𑁂𑀫𑀺𑀲𑀤𑁆𑀤𑁂𑀦 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀺𑀢𑁄’’𑀢𑀺 𑀪𑀡𑀢𑀻𑀢𑀺. 𑀢𑀺𑀝𑁆𑀞𑀢𑀼 𑀦𑁂𑀫𑀺𑀲𑀤𑁆𑀤𑁄, 𑀲𑀫𑀸𑀧𑀦𑁆𑀦𑁄 𑀦𑀸𑀫 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀓𑀡𑁆𑀡𑀫𑀽𑀮𑁂 𑀥𑀫𑀫𑀸𑀦𑀲𑁆𑀲 𑀲𑀗𑁆𑀔𑀬𑀼𑀕𑀴𑀲𑁆𑀲𑀸𑀧𑀺 𑀅𑀲𑀦𑀺𑀲𑀦𑁆𑀦𑀺𑀧𑀸𑀢𑀲𑁆𑀲𑀸𑀧𑀺 𑀲𑀤𑁆𑀤𑀁 𑀦 𑀲𑀼𑀡𑀸𑀢𑀺. 𑀪𑀕𑀯𑀸 𑀧𑀦 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀲𑀓𑁆𑀓𑀲𑁆𑀲 𑀑𑀓𑀸𑀲𑀁 𑀦 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀸𑀮𑀯𑀲𑁂𑀦 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑁄. 𑀲𑀓𑁆𑀓𑁄 ‘‘𑀦 𑀤𑀸𑀦𑀺 𑀫𑁂 𑀲𑀢𑁆𑀣𑀸 𑀑𑀓𑀸𑀲𑀁 𑀓𑀭𑁄𑀢𑀻’’𑀢𑀺 𑀕𑀦𑁆𑀥𑀓𑀼𑀝𑀺𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀭𑀣𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀤𑁂𑀯𑀮𑁄𑀓𑀸𑀪𑀺𑀫𑀼𑀔𑀁 𑀧𑁂𑀲𑁂𑀲𑀺. 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑀁 ¶ 𑀭𑀣𑀲𑀤𑁆𑀤𑁂𑀦 𑀲𑀫𑁄𑀳𑀺𑀢𑀁 𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀁 𑀯𑀺𑀬 𑀅𑀳𑁄𑀲𑀺. 𑀪𑀕𑀯𑀢𑁄 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀭𑀣𑀲𑀤𑁆𑀤𑁂𑀦𑁂𑀯 𑀧𑀞𑀫𑀸𑀯𑀚𑁆𑀚𑀦𑀁 𑀉𑀧𑁆𑀧𑀚𑁆𑀚𑀺, 𑀢𑀲𑁆𑀫𑀸 𑀏𑀯𑀫𑀸𑀳.

𑀕𑁄𑀧𑀓𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁫𑁩. 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑀻𑀢𑀺 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑀻. 𑀇𑀢𑁆𑀣𑀺𑀢𑁆𑀢𑀁 𑀯𑀺𑀭𑀸𑀚𑁂𑀢𑁆𑀯𑀸𑀢𑀺 𑀇𑀢𑁆𑀣𑀺𑀢𑁆𑀢𑀁 𑀦𑀸𑀫 𑀅𑀮𑀁, 𑀦 𑀳𑀺 𑀇𑀢𑁆𑀣𑀺𑀢𑁆𑀢𑁂 𑀞𑀢𑁆𑀯𑀸 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀁, 𑀦 𑀲𑀓𑁆𑀓𑀫𑀸𑀭𑀩𑁆𑀭𑀳𑁆𑀫𑀲𑀺𑀭𑀺𑀬𑁄 𑀧𑀘𑁆𑀘𑀦𑀼𑀪𑀯𑀺𑀢𑀼𑀁, 𑀦 𑀧𑀘𑁆𑀘𑁂𑀓𑀩𑁄𑀥𑀺𑀁, 𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀕𑀦𑁆𑀢𑀼𑀁 𑀲𑀓𑁆𑀓𑀸𑀢𑀺 𑀏𑀯𑀁 𑀇𑀢𑁆𑀣𑀺𑀢𑁆𑀢𑀁 𑀯𑀺𑀭𑀸𑀚𑁂𑀢𑀺 𑀦𑀸𑀫. 𑀫𑀳𑀦𑁆𑀢𑀫𑀺𑀤𑀁 𑀧𑀼𑀭𑀺𑀲𑀢𑁆𑀢𑀁 𑀦𑀸𑀫 𑀲𑁂𑀝𑁆𑀞𑀁 𑀉𑀢𑁆𑀢𑀫𑀁, 𑀏𑀢𑁆𑀣 𑀞𑀢𑁆𑀯𑀸 𑀲𑀓𑁆𑀓𑀸 𑀏𑀢𑀸 𑀲𑀫𑁆𑀧𑀢𑁆𑀢𑀺𑀬𑁄 𑀧𑀸𑀧𑀼𑀡𑀺𑀢𑀼𑀦𑁆𑀢𑀺 𑀏𑀯𑀁 ¶ 𑀧𑀦 𑀧𑀼𑀭𑀺𑀲𑀢𑁆𑀢𑀁 𑀪𑀸𑀯𑁂𑀢𑀺 𑀦𑀸𑀫. 𑀲𑀸𑀧𑀺 𑀏𑀯𑀫𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀇𑀢𑁆𑀣𑀺𑀢𑁆𑀢𑀁 𑀯𑀺𑀭𑀸𑀚𑁂𑀢𑁆𑀯𑀸 𑀧𑀼𑀭𑀺𑀲𑀢𑁆𑀢𑀁 𑀪𑀸𑀯𑁂𑀢𑁆𑀯𑀸’’𑀢𑀺. 𑀳𑀻𑀦𑀁 𑀕𑀦𑁆𑀥𑀩𑁆𑀩𑀓𑀸𑀬𑀦𑁆𑀢𑀺 𑀳𑀻𑀦𑀁 𑀮𑀸𑀫𑀓𑀁 𑀕𑀦𑁆𑀥𑀩𑁆𑀩𑀦𑀺𑀓𑀸𑀬𑀁. 𑀓𑀲𑁆𑀫𑀸 𑀧𑀦 𑀢𑁂 𑀧𑀭𑀺𑀲𑀼𑀤𑁆𑀥𑀲𑀻𑀮𑀸 𑀢𑀢𑁆𑀣 𑀉𑀧𑁆𑀧𑀦𑁆𑀦𑀸𑀢𑀺? 𑀧𑀼𑀩𑁆𑀩𑀦𑀺𑀓𑀦𑁆𑀢𑀺𑀬𑀸. 𑀧𑀼𑀩𑁆𑀩𑁂𑀧𑀺 𑀓𑀺𑀭 𑀦𑁂𑀲𑀁 𑀏𑀢𑀤𑁂𑀯 𑀯𑀲𑀺𑀢𑀝𑁆𑀞𑀸𑀦𑀁, 𑀢𑀲𑁆𑀫𑀸 𑀦𑀺𑀓𑀦𑁆𑀢𑀺𑀯𑀲𑁂𑀦 𑀢𑀢𑁆𑀣 𑀉𑀧𑁆𑀧𑀦𑁆𑀦𑀸. 𑀉𑀧𑀝𑁆𑀞𑀸𑀦𑀦𑁆𑀢𑀺 𑀉𑀧𑀝𑁆𑀞𑀸𑀦𑀲𑀸𑀮𑀁. 𑀧𑀸𑀭𑀺𑀘𑀭𑀺𑀬𑀦𑁆𑀢𑀺 𑀧𑀭𑀺𑀘𑀭𑀡𑀪𑀸𑀯𑀁. 𑀕𑀻𑀢𑀯𑀸𑀤𑀺𑀢𑁂𑀳𑀺 𑀅𑀫𑁆𑀳𑁂 𑀧𑀭𑀺𑀘𑀭𑀺𑀲𑁆𑀲𑀸𑀫𑀸𑀢𑀺 𑀆𑀕𑀘𑁆𑀙𑀦𑁆𑀢𑀺.

𑀧𑀝𑀺𑀘𑁄𑀤𑁂𑀲𑀻𑀢𑀺 𑀲𑀸𑀭𑁂𑀲𑀺. 𑀲𑁄 𑀓𑀺𑀭 𑀢𑁂 𑀤𑀺𑀲𑁆𑀯𑀸 ‘‘𑀇𑀫𑁂 𑀤𑁂𑀯𑀧𑀼𑀢𑁆𑀢𑀸 𑀅𑀢𑀺𑀯𑀺𑀬 𑀯𑀺𑀭𑁄𑀘𑁂𑀦𑁆𑀢𑀺 𑀅𑀢𑀺𑀯𑀡𑁆𑀡𑀯𑀦𑁆𑀢𑁄, 𑀓𑀺𑀁 𑀦𑀼 𑀔𑁄 𑀓𑀫𑁆𑀫𑀁 𑀓𑀢𑁆𑀯𑀸 𑀆𑀕𑀢𑀸’’𑀢𑀺 𑀆𑀯𑀚𑁆𑀚𑀦𑁆𑀢𑁄 ‘‘𑀪𑀺𑀓𑁆𑀔𑀽 𑀅𑀳𑁂𑀲𑀼’’𑀦𑁆𑀢𑀺 𑀅𑀤𑁆𑀤𑀲. 𑀢𑀢𑁄 ‘‘𑀪𑀺𑀓𑁆𑀔𑀽 𑀳𑁄𑀦𑁆𑀢𑀼, 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀧𑀭𑀺𑀧𑀽𑀭𑀓𑀸𑀭𑀺𑀦𑁄’’𑀢𑀺 𑀅𑀤𑁆𑀤𑀲. ‘‘𑀧𑀭𑀺𑀧𑀽𑀭𑀓𑀸𑀭𑀺𑀦𑁄 𑀳𑁄𑀦𑁆𑀢𑀼, 𑀅𑀜𑁆𑀜𑁄 𑀕𑀼𑀡𑁄 𑀅𑀢𑁆𑀣𑀺 ¶ 𑀦𑀢𑁆𑀣𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀛𑀸𑀦𑀮𑀸𑀪𑀺𑀦𑁄’’𑀢𑀺 𑀅𑀤𑁆𑀤𑀲. ‘‘𑀛𑀸𑀦𑀮𑀸𑀪𑀺𑀦𑁄 𑀳𑁄𑀦𑁆𑀢𑀼, 𑀓𑀼𑀳𑀺𑀁 𑀯𑀸𑀲𑀺𑀓𑀸’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀫𑀬𑁆𑀳𑀁𑀯 𑀓𑀼𑀮𑀽𑀧𑀓𑀸’’𑀢𑀺 𑀅𑀤𑁆𑀤𑀲. 𑀧𑀭𑀺𑀲𑀼𑀤𑁆𑀥𑀲𑀻𑀮𑀸 𑀦𑀸𑀫 𑀙𑀲𑀼 𑀤𑁂𑀯𑀮𑁄𑀓𑁂𑀲𑀼 𑀬𑀢𑁆𑀣𑀺𑀘𑁆𑀙𑀦𑁆𑀢𑀺, 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀇𑀫𑁂 𑀧𑀦 𑀉𑀧𑀭𑀺𑀤𑁂𑀯𑀮𑁄𑀓𑁂 𑀘 𑀦 𑀦𑀺𑀩𑁆𑀩𑀢𑁆𑀢𑀸. 𑀛𑀸𑀦𑀮𑀸𑀪𑀺𑀦𑁄 𑀦𑀸𑀫 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀇𑀫𑁂 𑀘 𑀩𑁆𑀭𑀳𑁆𑀫𑀮𑁄𑀓𑁂 𑀦 𑀦𑀺𑀩𑁆𑀩𑀢𑁆𑀢𑀸. 𑀅𑀳𑀁 𑀧𑀦 𑀏𑀢𑁂𑀲𑀁 𑀑𑀯𑀸𑀤𑁂 𑀞𑀢𑁆𑀯𑀸 𑀤𑁂𑀯𑀮𑁄𑀓𑀲𑀸𑀫𑀺𑀓𑀲𑁆𑀲 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀮𑁆𑀮𑀗𑁆𑀓𑁂 𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄, 𑀇𑀫𑁂 𑀳𑀻𑀦𑁂 𑀕𑀦𑁆𑀥𑀩𑁆𑀩𑀓𑀸𑀬𑁂 𑀦𑀺𑀩𑁆𑀩𑀢𑁆𑀢𑀸. 𑀅𑀝𑁆𑀞𑀺𑀯𑁂𑀥𑀧𑀼𑀕𑁆𑀕𑀮𑀸 𑀦𑀸𑀫𑁂𑀢𑁂 𑀯𑀝𑁆𑀝𑁂𑀢𑁆𑀯𑀸 𑀯𑀝𑁆𑀝𑁂𑀢𑁆𑀯𑀸 𑀕𑀸𑀴𑁆𑀳𑀁 𑀯𑀺𑀚𑁆𑀛𑀺𑀢𑀩𑁆𑀩𑀸𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀼𑀢𑁄𑀫𑀼𑀔𑀸 𑀦𑀸𑀫𑀸𑀢𑀺𑀆𑀤𑀻𑀳𑀺 𑀯𑀘𑀦𑁂𑀳𑀺 𑀧𑀝𑀺𑀘𑁄𑀤𑁂𑀲𑀺.

𑀢𑀢𑁆𑀣 𑀓𑀼𑀢𑁄𑀫𑀼𑀔𑀸𑀢𑀺 𑀪𑀕𑀯𑀢𑀺 𑀅𑀪𑀺𑀫𑀼𑀔𑁂 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀢𑀼𑀫𑁆𑀳𑁂 𑀓𑀼𑀢𑁄𑀫𑀼𑀔𑀸 𑀓𑀺𑀁 𑀅𑀜𑁆𑀜𑀸 𑀯𑀺𑀳𑀺𑀢𑀸 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑀬𑀫𑀸𑀦𑀸 𑀉𑀤𑀸𑀳𑀼 𑀦𑀺𑀤𑁆𑀤𑀸𑀬𑀫𑀸𑀦𑀸? 𑀤𑀼𑀤𑁆𑀤𑀺𑀝𑁆𑀞𑀭𑀽𑀧𑀦𑁆𑀢𑀺 𑀤𑀼𑀤𑁆𑀤𑀺𑀝𑁆𑀞𑀲𑀪𑀸𑀯𑀁 𑀤𑀝𑁆𑀞𑀼𑀁 𑀅𑀬𑀼𑀢𑁆𑀢𑀁 ¶ . 𑀲𑀳𑀥𑀫𑁆𑀫𑀺𑀓𑁂𑀢𑀺 𑀏𑀓𑀲𑁆𑀲 𑀲𑀢𑁆𑀣𑀼 𑀲𑀸𑀲𑀦𑁂 𑀲𑀫𑀸𑀘𑀺𑀡𑁆𑀡𑀥𑀫𑁆𑀫𑁂 𑀓𑀢𑀧𑀼𑀜𑁆𑀜𑁂. 𑀢𑁂𑀲𑀁 𑀪𑀦𑁆𑀢𑁂𑀢𑀺 𑀢𑁂𑀲𑀁 𑀕𑁄𑀧𑀓𑁂𑀦 𑀤𑁂𑀯𑀧𑀼𑀢𑁆𑀢𑁂𑀦 𑀏𑀯𑀁 𑀯𑀢𑁆𑀯𑀸 𑀧𑀼𑀦 ‘‘𑀅𑀳𑁄 𑀢𑀼𑀫𑁆𑀳𑁂 𑀦𑀺𑀮𑁆𑀮𑀚𑁆𑀚𑀸 𑀅𑀳𑀺𑀭𑀺𑀓𑀸’’𑀢𑀺𑀆𑀤𑀻𑀳𑀺 𑀯𑀘𑀦𑁂𑀳𑀺 𑀧𑀝𑀺𑀘𑁄𑀤𑀺𑀢𑀸𑀦𑀁 𑀤𑁆𑀯𑁂 𑀤𑁂𑀯𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀢𑀺𑀁 𑀧𑀝𑀺𑀮𑀪𑀺𑀁𑀲𑀼.

𑀓𑀸𑀬𑀁 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀦𑁆𑀢𑀺 𑀢𑁂 𑀓𑀺𑀭 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀦𑀝𑁂𑀳𑀺 𑀦𑀸𑀫 𑀦𑀘𑁆𑀘𑀦𑁆𑀢𑁂𑀳𑀺 𑀕𑀸𑀬𑀦𑁆𑀢𑁂𑀳𑀺 𑀯𑀸𑀤𑁂𑀦𑁆𑀢𑁂𑀳𑀺 𑀆𑀕𑀦𑁆𑀢𑁆𑀯𑀸 𑀤𑀸𑀬𑁄 𑀦𑀸𑀫 𑀮𑀪𑀺𑀢𑀩𑁆𑀩𑁄 𑀅𑀲𑁆𑀲, 𑀅𑀬𑀁 𑀧𑀦 ¶ 𑀅𑀫𑁆𑀳𑀸𑀓𑀁 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀓𑁆𑀔𑀺𑀢𑁆𑀢𑀮𑁄𑀡𑀁 𑀉𑀤𑁆𑀥𑀦𑀁 𑀯𑀺𑀬 𑀢𑀝𑀢𑀝𑀸𑀬𑀢𑁂𑀯, 𑀓𑀺𑀁 𑀦𑀼 𑀔𑁄 𑀇𑀤’’𑀦𑁆𑀢𑀺 𑀆𑀯𑀚𑁆𑀚𑀦𑁆𑀢𑀸 𑀅𑀢𑁆𑀢𑀦𑁄 𑀲𑀫𑀡𑀪𑀸𑀯𑀁 𑀧𑀭𑀺𑀲𑀼𑀤𑁆𑀥𑀲𑀻𑀮𑀢𑀁 𑀛𑀸𑀦𑀮𑀸𑀪𑀺𑀢𑀁 𑀢𑀲𑁆𑀲𑁂𑀯 𑀓𑀼𑀮𑀽𑀧𑀓𑀪𑀸𑀯𑀜𑁆𑀘 𑀤𑀺𑀲𑁆𑀯𑀸 ‘‘𑀧𑀭𑀺𑀲𑀼𑀤𑁆𑀥𑀲𑀻𑀮𑀸 𑀦𑀸𑀫 𑀙𑀲𑀼 𑀤𑁂𑀯𑀮𑁄𑀓𑁂𑀲𑀼 𑀬𑀣𑀸𑀭𑀼𑀘𑀺𑀢𑁂 𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀛𑀸𑀦𑀮𑀸𑀪𑀺𑀦𑁄 𑀩𑁆𑀭𑀳𑁆𑀫𑀮𑁄𑀓𑁂. 𑀫𑀬𑀁 𑀉𑀧𑀭𑀺𑀤𑁂𑀯𑀮𑁄𑀓𑁂𑀧𑀺 𑀩𑁆𑀭𑀳𑁆𑀫𑀮𑁄𑀓𑁂𑀧𑀺 𑀦𑀺𑀩𑁆𑀩𑀢𑁆𑀢𑀺𑀢𑀼𑀁 𑀦𑀸𑀲𑀓𑁆𑀔𑀺𑀫𑁆𑀳. 𑀅𑀫𑁆𑀳𑀸𑀓𑀁 𑀑𑀯𑀸𑀤𑁂 𑀞𑀢𑁆𑀯𑀸 𑀅𑀬𑀁 𑀇𑀢𑁆𑀣𑀺𑀓𑀸 𑀉𑀧𑀭𑀺 𑀦𑀺𑀩𑁆𑀩𑀢𑁆𑀢𑀸, 𑀫𑀬𑀁 𑀪𑀺𑀓𑁆𑀔𑀽 𑀲𑀫𑀸𑀦𑀸 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀳𑀻𑀦𑁂 𑀕𑀦𑁆𑀥𑀩𑁆𑀩𑀓𑀸𑀬𑁂 𑀦𑀺𑀩𑁆𑀩𑀢𑁆𑀢𑀸. 𑀢𑁂𑀦 𑀦𑁄 𑀅𑀬𑀁 𑀏𑀯𑀁 𑀦𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺 𑀜𑀢𑁆𑀯𑀸 𑀢𑀲𑁆𑀲 𑀓𑀣𑀁 𑀲𑀼𑀡𑀦𑁆𑀢𑀸𑀬𑁂𑀯 𑀢𑁂𑀲𑀼 𑀤𑁆𑀯𑁂 𑀚𑀦𑀸 𑀧𑀞𑀫𑀚𑁆𑀛𑀸𑀦𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑀸 𑀅𑀦𑀸𑀕𑀸𑀫𑀺𑀨𑀮𑁂𑀬𑁂𑀯 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀅𑀣 𑀦𑁂𑀲𑀁 𑀲𑁄 𑀧𑀭𑀺𑀢𑁆𑀢𑁄 ¶ 𑀓𑀸𑀫𑀸𑀯𑀘𑀭𑀢𑁆𑀢𑀪𑀸𑀯𑁄 𑀥𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀲𑁆𑀫𑀸 𑀢𑀸𑀯𑀤𑁂𑀯 𑀘𑀯𑀺𑀢𑁆𑀯𑀸 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑁂𑀲𑀼 𑀦𑀺𑀩𑁆𑀩𑀢𑁆𑀢𑀸. 𑀲𑁄 𑀘 𑀦𑁂𑀲𑀁 𑀓𑀸𑀬𑁄 𑀢𑀢𑁆𑀣 𑀞𑀺𑀢𑀸𑀦𑀁𑀬𑁂𑀯 𑀦𑀺𑀩𑁆𑀩𑀢𑁆𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑁂𑀲𑀁, 𑀪𑀦𑁆𑀢𑁂, 𑀕𑁄𑀧𑀓𑁂𑀦 𑀤𑁂𑀯𑀧𑀼𑀢𑁆𑀢𑁂𑀦 𑀧𑀝𑀺𑀘𑁄𑀤𑀺𑀢𑀸𑀦𑀁 𑀤𑁆𑀯𑁂 𑀤𑁂𑀯𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀢𑀺𑀁 𑀧𑀝𑀺𑀮𑀪𑀺𑀁𑀲𑀼 𑀓𑀸𑀬𑀁 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢’’𑀦𑁆𑀢𑀺.

𑀢𑀢𑁆𑀣 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀢𑀲𑁆𑀫𑀺𑀜𑁆𑀜𑁂𑀯 𑀅𑀢𑁆𑀢𑀪𑀸𑀯𑁂 𑀛𑀸𑀦𑀲𑀢𑀺𑀁 𑀧𑀝𑀺𑀮𑀪𑀺𑀁𑀲𑀼. 𑀢𑀢𑁆𑀣𑁂𑀯 𑀞𑀢𑁆𑀯𑀸 𑀘𑀼𑀢𑀸 𑀧𑀦 𑀓𑀸𑀬𑀁 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀁 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀲𑀭𑀻𑀭𑀁 𑀧𑀝𑀺𑀮𑀪𑀺𑀁𑀲𑀽𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀓𑁄 𑀧𑀦 𑀤𑁂𑀯𑁄𑀢𑀺 𑀏𑀓𑁄 𑀤𑁂𑀯𑀧𑀼𑀢𑁆𑀢𑁄 𑀦𑀺𑀓𑀦𑁆𑀢𑀺𑀁 𑀙𑀺𑀦𑁆𑀤𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑀸𑀫𑁂 𑀅𑀚𑁆𑀛𑀯𑀲𑀺, 𑀢𑀢𑁆𑀣𑁂𑀯 𑀆𑀯𑀸𑀲𑀺𑀓𑁄 𑀅𑀳𑁄𑀲𑀺.

𑁩𑁫𑁪. 𑀲𑀗𑁆𑀖𑀜𑁆𑀘𑀼𑀧𑀝𑁆𑀞𑀸𑀲𑀺𑀦𑁆𑀢𑀺 𑀲𑀗𑁆𑀖𑀜𑁆𑀘 𑀉𑀧𑀝𑁆𑀞𑀸𑀲𑀺𑀁.

𑀲𑀼𑀥𑀫𑁆𑀫𑀢𑀸𑀬𑀸𑀢𑀺 𑀥𑀫𑁆𑀫𑀲𑁆𑀲 𑀲𑀼𑀦𑁆𑀤𑀭𑀪𑀸𑀯𑁂𑀦. 𑀢𑀺𑀤𑀺𑀯𑀽𑀧𑀧𑀦𑁆𑀦𑁄𑀢𑀺 𑀢𑀺𑀤𑀺𑀯𑁂 𑀢𑀺𑀤𑀲𑀧𑀼𑀭𑁂 𑀉𑀧𑀧𑀦𑁆𑀦𑁄. 𑀕𑀦𑁆𑀥𑀩𑁆𑀩𑀓𑀸𑀬𑀽𑀧𑀕𑀢𑁂 𑀯𑀲𑀻𑀦𑁂𑀢𑀺 𑀕𑀦𑁆𑀥𑀩𑁆𑀩𑀓𑀸𑀬𑀁 𑀆𑀯𑀸𑀲𑀺𑀓𑁄 𑀳𑀼𑀢𑁆𑀯𑀸 𑀉𑀧𑀕𑀢𑁂. 𑀬𑁂 𑀘 𑀫𑀬𑀁 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑀸𑀢𑀺 𑀬𑁂 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑀸 𑀫𑀬𑀁 𑀅𑀦𑁆𑀦𑁂𑀦 𑀧𑀸𑀦𑁂𑀦 𑀉𑀧𑀝𑁆𑀞𑀳𑀺𑀫𑁆𑀳𑀸𑀢𑀺 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀸𑀤𑀽𑀧𑀲𑀗𑁆𑀕𑀬𑁆𑀳𑀸𑀢𑀺 ¶ 𑀧𑀸𑀤𑁂 𑀉𑀧𑀲𑀗𑁆𑀕𑀬𑁆𑀳 𑀧𑀸𑀤𑀥𑁄𑀯𑀦𑀧𑀸𑀤𑀫𑀓𑁆𑀔𑀦𑀸𑀦𑀼𑀧𑁆𑀧𑀤𑀸𑀦𑁂𑀦 𑀧𑀽𑀚𑁂𑀢𑁆𑀯𑀸 𑀘𑁂𑀯 𑀯𑀦𑁆𑀤𑀺𑀢𑁆𑀯𑀸 𑀘. 𑀲𑀓𑁂 𑀦𑀺𑀯𑁂𑀲𑀦𑁂𑀢𑀺 𑀅𑀢𑁆𑀢𑀦𑁄 𑀖𑀭𑁂. 𑀇𑀫𑀲𑁆𑀲𑀸𑀧𑀺 𑀧𑀤𑀲𑁆𑀲 𑀉𑀧𑀝𑁆𑀞𑀳𑀺𑀫𑁆𑀳𑀸𑀢𑀺 𑀇𑀫𑀺𑀦𑀸𑀯 𑀲𑀫𑁆𑀩𑀦𑁆𑀥𑁄.

𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀢𑁆𑀢𑀦𑀸𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀭𑀺𑀬𑀸𑀦 𑀲𑀼𑀪𑀸𑀲𑀺𑀢𑀸𑀦𑀻𑀢𑀺 𑀢𑀼𑀫𑁆𑀳𑁂𑀳𑀺 𑀯𑀼𑀘𑁆𑀘𑀫𑀸𑀦𑀸𑀦𑀺 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀼𑀪𑀸𑀲𑀺𑀢𑀸𑀦𑀺.

𑀢𑀼𑀫𑁆𑀳𑁂 ¶ 𑀧𑀦 𑀲𑁂𑀝𑁆𑀞𑀫𑀼𑀧𑀸𑀲𑀫𑀸𑀦𑀸𑀢𑀺 𑀉𑀢𑁆𑀢𑀫𑀁 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀉𑀧𑀸𑀲𑀫𑀸𑀦𑀸 𑀅𑀦𑀼𑀢𑁆𑀢𑀭𑁂 𑀩𑀼𑀤𑁆𑀥𑀲𑀸𑀲𑀦𑁂 𑀯𑀸. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑁂𑀝𑁆𑀞𑀘𑀭𑀺𑀬𑀁. 𑀪𑀯𑀢𑀽𑀧𑀧𑀢𑁆𑀢𑀻𑀢𑀺 𑀪𑀯𑀦𑁆𑀢𑀸𑀦𑀁 𑀉𑀧𑀧𑀢𑁆𑀢𑀺.

𑀅𑀕𑀸𑀭𑁂 𑀯𑀲𑀢𑁄 𑀫𑀬𑁆𑀳𑀦𑁆𑀢𑀺 𑀖𑀭𑀫𑀚𑁆𑀛𑁂 𑀯𑀲𑀦𑁆𑀢𑀲𑁆𑀲 𑀫𑀬𑁆𑀳𑀁.

𑀲𑁆𑀯𑀚𑁆𑀚𑀸𑀢𑀺 𑀲𑁄 𑀅𑀚𑁆𑀚. 𑀕𑁄𑀢𑀫𑀲𑀸𑀯𑀓𑁂𑀦𑀸𑀢𑀺 𑀇𑀥 𑀕𑁄𑀧𑀓𑁄 𑀕𑁄𑀢𑀫𑀲𑀸𑀯𑀓𑁄𑀢𑀺 𑀯𑀼𑀢𑁆𑀢𑁄. 𑀲𑀫𑁂𑀘𑁆𑀘𑀸𑀢𑀺 𑀲𑀫𑀸𑀕𑀦𑁆𑀢𑁆𑀯𑀸.

𑀳𑀦𑁆𑀤 ¶ 𑀯𑀺𑀬𑀸𑀬𑀸𑀫 𑀩𑁆𑀬𑀸𑀬𑀸𑀫𑀸𑀢𑀺 𑀳𑀦𑁆𑀤 𑀉𑀬𑁆𑀬𑀫𑀸𑀫 𑀩𑁆𑀬𑀸𑀬𑀫𑀸𑀫. 𑀫𑀸 𑀦𑁄 𑀫𑀬𑀁 𑀧𑀭𑀧𑁂𑀲𑁆𑀲𑀸 𑀅𑀳𑀼𑀫𑁆𑀳𑀸𑀢𑀺 𑀦𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀫𑀸 𑀫𑀬𑀁 𑀧𑀭𑀲𑁆𑀲 𑀧𑁂𑀲𑀦𑀓𑀸𑀭𑀓𑀸𑀯 𑀅𑀳𑀼𑀫𑁆𑀳𑀸𑀢𑀺 𑀅𑀢𑁆𑀣𑁄. 𑀕𑁄𑀢𑀫𑀲𑀸𑀲𑀦𑀸𑀦𑀻𑀢𑀺 𑀇𑀥 𑀧𑀓𑀢𑀺𑀬𑀸 𑀧𑀝𑀺𑀯𑀺𑀤𑁆𑀥𑀁 𑀧𑀞𑀫𑀚𑁆𑀛𑀸𑀦𑀫𑁂𑀯 𑀕𑁄𑀢𑀫𑀲𑀸𑀲𑀦𑀸𑀦𑀻𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀦𑀼𑀲𑁆𑀲𑀭𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀘𑀺𑀢𑁆𑀢𑀸𑀦𑀺 𑀯𑀺𑀭𑀸𑀚𑀬𑀺𑀢𑁆𑀯𑀸𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀘𑀺𑀢𑁆𑀢𑀸𑀦𑀺 𑀯𑀺𑀭𑀸𑀚𑀬𑀺𑀢𑁆𑀯𑀸. 𑀓𑀸𑀫𑁂𑀲𑀼 𑀆𑀤𑀻𑀦𑀯𑀦𑁆𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀞𑀫𑀚𑁆𑀛𑀸𑀦𑁂𑀦 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀅𑀤𑁆𑀤𑀲𑀁𑀲𑀼, 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀢𑀢𑀺𑀬𑀫𑀕𑁆𑀕𑁂𑀦. 𑀓𑀸𑀫𑀲𑀁𑀬𑁄𑀚𑀦𑀩𑀦𑁆𑀥𑀦𑀸𑀦𑀻𑀢𑀺 𑀓𑀸𑀫𑀲𑀜𑁆𑀜𑁄𑀚𑀦𑀸𑀦𑀺 𑀘 𑀓𑀸𑀫𑀩𑀦𑁆𑀥𑀦𑀸𑀦𑀺 𑀘. 𑀧𑀸𑀧𑀺𑀫𑀬𑁄𑀕𑀸𑀦𑀻𑀢𑀺 𑀧𑀸𑀧𑀺𑀫𑀢𑁄 𑀫𑀸𑀭𑀲𑁆𑀲 𑀬𑁄𑀕𑀪𑀽𑀢𑀸𑀦𑀺, 𑀩𑀦𑁆𑀥𑀦𑀪𑀽𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀤𑀼𑀭𑀘𑁆𑀘𑀬𑀸𑀦𑀻𑀢𑀺 𑀤𑀼𑀭𑀢𑀺𑀓𑁆𑀓𑀫𑀸𑀦𑀺. 𑀲𑀇𑀦𑁆𑀤𑀸 𑀤𑁂𑀯𑀸 𑀲𑀧𑀚𑀸𑀧𑀢𑀺𑀓𑀸𑀢𑀺 𑀇𑀦𑁆𑀤𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀉𑀧𑀯𑀺𑀝𑁆𑀞𑀸 𑀲𑀇𑀦𑁆𑀤𑀸 𑀧𑀚𑀸𑀧𑀢𑀺𑀁 𑀤𑁂𑀯𑀭𑀸𑀚𑀸𑀦𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀉𑀧𑀯𑀺𑀝𑁆𑀞𑀸 𑀲𑀧𑀚𑀸𑀧𑀢𑀺𑀓𑀸. 𑀲𑀪𑀸𑀬𑀼𑀧𑀯𑀺𑀝𑁆𑀞𑀸𑀢𑀺 𑀲𑀪𑀸𑀬𑀁 𑀉𑀧𑀯𑀺𑀝𑁆𑀞𑀸, 𑀦𑀺𑀲𑀺𑀦𑁆𑀦𑀸𑀢𑀺 𑀅𑀢𑁆𑀣𑁄.

𑀯𑀻𑀭𑀸𑀢𑀺 𑀲𑀽𑀭𑀸. 𑀯𑀺𑀭𑀸𑀕𑀸𑀢𑀺 𑀯𑀻𑀢𑀭𑀸𑀕𑀸. 𑀯𑀺𑀭𑀚𑀁 𑀓𑀭𑁄𑀦𑁆𑀢𑀸𑀢𑀺 𑀯𑀺𑀭𑀚𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑀁 𑀓𑀭𑁄𑀦𑁆𑀢𑀸 𑀉𑀧𑁆𑀧𑀸𑀤𑁂𑀦𑁆𑀢𑀸. 𑀦𑀸𑀕𑁄𑀯 𑀲𑀦𑁆𑀦𑀸𑀦𑀺 𑀕𑀼𑀡𑀸𑀦𑀻𑀢𑀺 𑀓𑀸𑀫𑀲𑀜𑁆𑀜𑁄𑀚𑀦𑀩𑀦𑁆𑀥𑀦𑀸𑀦𑀺 𑀙𑁂𑀢𑁆𑀯𑀸 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀅𑀢𑀺𑀓𑁆𑀓𑀫𑀺𑀁𑀲𑀼. 𑀲𑀁𑀯𑁂𑀕𑀚𑀸𑀢𑀲𑁆𑀲𑀸𑀢𑀺 𑀚𑀸𑀢𑀲𑀁𑀯𑁂𑀕𑀲𑁆𑀲 𑀲𑀓𑁆𑀓𑀲𑁆𑀲.

𑀓𑀸𑀫𑀸𑀪𑀺𑀪𑀽𑀢𑀺 ¶ 𑀤𑀼𑀯𑀺𑀥𑀸𑀦𑀫𑁆𑀧𑀺 𑀓𑀸𑀫𑀸𑀦𑀁 𑀅𑀪𑀺𑀪𑀽. 𑀲𑀢𑀺𑀬𑀸 𑀯𑀺𑀳𑀻𑀦𑀸𑀢𑀺 𑀛𑀸𑀦𑀲𑀢𑀺𑀯𑀺𑀭𑀳𑀺𑀢𑀸.

𑀢𑀺𑀡𑁆𑀡𑀁 𑀢𑁂𑀲𑀦𑁆𑀢𑀺 𑀢𑁂𑀲𑀼 𑀢𑀻𑀲𑀼 𑀚𑀦𑁂𑀲𑀼. 𑀆𑀯𑀲𑀺𑀦𑁂𑀢𑁆𑀣 𑀏𑀓𑁄𑀢𑀺 𑀢𑀢𑁆𑀣 𑀳𑀻𑀦𑁂 𑀓𑀸𑀬𑁂 𑀏𑀓𑁄𑀬𑁂𑀯 𑀆𑀯𑀸𑀲𑀺𑀓𑁄 𑀚𑀸𑀢𑁄. 𑀲𑀫𑁆𑀩𑁄𑀥𑀺𑀧𑀣𑀸𑀦𑀼𑀲𑀸𑀭𑀺𑀦𑁄𑀢𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑀸𑀦𑀼𑀲𑀸𑀭𑀺𑀦𑁄. 𑀤𑁂𑀯𑁂𑀧𑀺 𑀳𑀻𑀴𑁂𑀦𑁆𑀢𑀻𑀢𑀺 𑀤𑁆𑀯𑁂 𑀤𑁂𑀯𑀮𑁄𑀓𑁂 ¶ 𑀳𑀻𑀴𑁂𑀦𑁆𑀢𑀸 𑀅𑀥𑁄𑀓𑀭𑁄𑀦𑁆𑀢𑀸 𑀉𑀧𑀘𑀸𑀭𑀧𑁆𑀧𑀦𑀸𑀲𑀫𑀸𑀥𑀻𑀳𑀺 𑀲𑀫𑀸𑀳𑀺𑀢𑀢𑁆𑀢𑀸 𑀅𑀢𑁆𑀢𑀦𑁄 𑀧𑀸𑀤𑀧𑀁𑀲𑀼𑀁 𑀤𑁂𑀯𑀢𑀸𑀦𑀁 𑀫𑀢𑁆𑀣𑀓𑁂 𑀑𑀓𑀺𑀭𑀦𑁆𑀢𑀸 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀕𑀢𑀸𑀢𑀺.

𑀏𑀢𑀸𑀤𑀺𑀲𑀻 𑀥𑀫𑁆𑀫𑀧𑁆𑀧𑀓𑀸𑀲𑀦𑁂𑀢𑁆𑀣𑀸𑀢𑀺 𑀏𑀢𑁆𑀣 𑀲𑀸𑀲𑀦𑁂 𑀏𑀯𑀭𑀽𑀧𑀸 𑀥𑀫𑁆𑀫𑀧𑁆𑀧𑀓𑀸𑀲𑀦𑀸, 𑀬𑀸𑀬 𑀲𑀸𑀯𑀓𑀸 𑀏𑀢𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀳𑁄𑀦𑁆𑀢𑀺. 𑀦 ¶ 𑀢𑀢𑁆𑀣 𑀓𑀺𑀁 𑀓𑀗𑁆𑀔𑀢𑀺 𑀓𑁄𑀘𑀺 𑀲𑀸𑀯𑀓𑁄𑀢𑀺 𑀓𑀺𑀁 𑀢𑀢𑁆𑀣 𑀢𑁂𑀲𑀼 𑀲𑀸𑀯𑀓𑁂𑀲𑀼 𑀓𑁄𑀘𑀺 𑀏𑀓𑀲𑀸𑀯𑀓𑁄𑀧𑀺 𑀩𑀼𑀤𑁆𑀥𑀸𑀤𑀻𑀲𑀼 𑀯𑀸 𑀘𑀸𑀢𑀼𑀤𑁆𑀤𑀺𑀲𑀪𑀸𑀯𑁂 𑀯𑀸 𑀦 𑀓𑀗𑁆𑀔𑀢𑀺 ‘‘𑀲𑀩𑁆𑀩𑀤𑀺𑀲𑀸𑀲𑀼 𑀅𑀲𑀚𑁆𑀚𑀫𑀸𑀦𑁄 𑀅𑀕𑀬𑁆𑀳𑀫𑀸𑀦𑁄 𑀯𑀺𑀳𑀭𑀢𑀻’’𑀢𑀺. 𑀇𑀤𑀸𑀦𑀺 𑀪𑀕𑀯𑀢𑁄 𑀯𑀡𑁆𑀡𑀁 𑀪𑀡𑀦𑁆𑀢𑁄 ‘‘𑀦𑀺𑀢𑀺𑀡𑁆𑀡𑀑𑀖𑀁 𑀯𑀺𑀘𑀺𑀓𑀺𑀘𑁆𑀙𑀙𑀺𑀦𑁆𑀦𑀁, 𑀩𑀼𑀤𑁆𑀥𑀁 𑀦𑀫𑀲𑁆𑀲𑀸𑀫 𑀚𑀺𑀦𑀁 𑀚𑀦𑀺𑀦𑁆𑀤’’𑀦𑁆𑀢𑀺 𑀆𑀳. 𑀢𑀢𑁆𑀣 𑀯𑀺𑀘𑀺𑀓𑀺𑀘𑁆𑀙𑀙𑀺𑀦𑁆𑀦𑀦𑁆𑀢𑀺 𑀙𑀺𑀦𑁆𑀦𑀯𑀺𑀘𑀺𑀓𑀺𑀘𑁆𑀙𑀁. 𑀚𑀦𑀺𑀦𑁆𑀤𑀦𑁆𑀢𑀺 𑀲𑀩𑁆𑀩𑀮𑁄𑀓𑀼𑀢𑁆𑀢𑀫𑀁.

𑀬𑀁 𑀢𑁂 𑀥𑀫𑁆𑀫𑀦𑁆𑀢𑀺 𑀬𑀁 𑀢𑀯 𑀥𑀫𑁆𑀫𑀁. 𑀅𑀚𑁆𑀛𑀕𑀁𑀲𑀼 𑀢𑁂𑀢𑀺 𑀢𑁂 𑀤𑁂𑀯𑀧𑀼𑀢𑁆𑀢𑀸 𑀅𑀥𑀺𑀕𑀢𑀸. 𑀓𑀸𑀬𑀁 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀦𑁆𑀢𑀺 𑀅𑀫𑁆𑀳𑀸𑀓𑀁 𑀧𑀲𑁆𑀲𑀦𑁆𑀢𑀸𑀦𑀁𑀬𑁂𑀯 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀲𑀭𑀻𑀭𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀢𑀯 𑀥𑀫𑁆𑀫𑀁 𑀚𑀸𑀦𑀺𑀢𑁆𑀯𑀸 𑀢𑁂𑀲𑀁 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀢𑁂 𑀤𑁆𑀯𑁂 𑀯𑀺𑀲𑁂𑀲𑀕𑀽 𑀅𑀫𑁆𑀳𑀸𑀓𑀁 𑀧𑀲𑁆𑀲𑀦𑁆𑀢𑀸𑀦𑀁𑀬𑁂𑀯 𑀓𑀸𑀬𑀁 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀁 𑀅𑀥𑀺𑀕𑀦𑁆𑀢𑁆𑀯𑀸 𑀫𑀕𑁆𑀕𑀨𑀮𑀯𑀺𑀲𑁂𑀲𑀁 𑀅𑀚𑁆𑀛𑀕𑀁𑀲𑀼, 𑀫𑀬𑀫𑁆𑀧𑀺 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀧𑀢𑁆𑀢𑀺𑀬𑀸 𑀆𑀕𑀢𑀫𑁆𑀳𑀸𑀲𑀺 𑀫𑀸𑀭𑀺𑀲𑀸𑀢𑀺. 𑀆𑀕𑀢𑀫𑁆𑀳𑀲𑁂𑀢𑀺 𑀲𑀫𑁆𑀧𑀢𑁆𑀢𑀫𑁆𑀳. 𑀓𑀢𑀸𑀯𑀓𑀸𑀲𑀸 𑀪𑀕𑀯𑀢𑀸, 𑀧𑀜𑁆𑀳𑀁 𑀧𑀼𑀘𑁆𑀙𑁂𑀫𑀼 𑀫𑀸𑀭𑀺𑀲𑀸𑀢𑀺 𑀲𑀘𑁂 𑀦𑁄 𑀪𑀕𑀯𑀸 𑀑𑀓𑀸𑀲𑀁 𑀓𑀭𑁄𑀢𑀺, 𑀅𑀣 𑀪𑀕𑀯𑀢𑀸 𑀓𑀢𑀸𑀯𑀓𑀸𑀲𑀸 𑀳𑀼𑀢𑁆𑀯𑀸 𑀧𑀜𑁆𑀳𑀁, 𑀫𑀸𑀭𑀺𑀲, 𑀧𑀼𑀘𑁆𑀙𑁂𑀬𑁆𑀬𑀸𑀫𑀸𑀢𑀺 𑀅𑀢𑁆𑀣𑁄.

𑀫𑀖𑀫𑀸𑀡𑀯𑀯𑀢𑁆𑀣𑀼

𑁩𑁫𑁫. 𑀤𑀻𑀖𑀭𑀢𑁆𑀢𑀁 𑀯𑀺𑀲𑀼𑀤𑁆𑀥𑁄 𑀔𑁄 𑀅𑀬𑀁 𑀬𑀓𑁆𑀔𑁄𑀢𑀺 𑀘𑀺𑀭𑀓𑀸𑀮𑀢𑁄 𑀧𑀪𑀼𑀢𑀺 𑀯𑀺𑀲𑀼𑀤𑁆𑀥𑁄. 𑀓𑀻𑀯 𑀘𑀺𑀭𑀓𑀸𑀮𑀢𑁄? 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀫𑀕𑀥𑀭𑀝𑁆𑀞𑁂 𑀫𑀘𑀮𑀕𑀸𑀫𑀓𑁂 𑀫𑀖𑀫𑀸𑀡𑀯𑀓𑀸𑀮𑀢𑁄 𑀧𑀝𑁆𑀞𑀸𑀬. 𑀢𑀤𑀸 𑀓𑀺𑀭𑁂𑀲 𑀏𑀓𑀤𑀺𑀯𑀲𑀁 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀕𑀸𑀫𑀫𑀚𑁆𑀛𑁂 𑀫𑀦𑀼𑀲𑁆𑀲𑀸𑀦𑀁 𑀕𑀸𑀫𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀞𑀺𑀢𑀝𑁆𑀞𑀸𑀦𑀁 𑀧𑀸𑀤𑀦𑁆𑀢𑁂𑀦𑁂𑀯 𑀧𑀁𑀲𑀼𑀓𑀘𑀯𑀭𑀁 𑀅𑀧𑀦𑁂𑀢𑁆𑀯𑀸 𑀭𑀫𑀡𑀻𑀬𑀫𑀓𑀸𑀲𑀺, 𑀅𑀜𑁆𑀜𑁄 𑀆𑀕𑀦𑁆𑀢𑁆𑀯𑀸 𑀢𑀢𑁆𑀣 𑀅𑀝𑁆𑀞𑀸𑀲𑀺. 𑀲𑁄 𑀢𑀸𑀯𑀢𑀓𑁂𑀦𑁂𑀯 𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀫𑀚𑁆𑀛𑁂 𑀕𑀸𑀫𑀲𑁆𑀲 𑀔𑀮𑀫𑀡𑁆𑀟𑀮𑀫𑀢𑁆𑀢𑀁 𑀞𑀸𑀦𑀁 𑀲𑁄𑀥𑁂𑀢𑁆𑀯𑀸 𑀯𑀸𑀮𑀼𑀓𑀁 𑀑𑀓𑀺𑀭𑀺𑀢𑁆𑀯𑀸 ¶ 𑀤𑀸𑀭𑀽𑀦𑀺 𑀆𑀳𑀭𑀺𑀢𑁆𑀯𑀸 𑀲𑀻𑀢𑀓𑀸𑀮𑁂 𑀅𑀕𑁆𑀕𑀺𑀁 𑀓𑀭𑁄𑀢𑀺, 𑀤𑀳𑀭𑀸 𑀘 𑀫𑀳𑀮𑁆𑀮𑀓𑀸 𑀘 𑀆𑀕𑀦𑁆𑀢𑁆𑀯𑀸 𑀢𑀢𑁆𑀣 𑀦𑀺𑀲𑀻𑀤𑀦𑁆𑀢𑀺.

𑀅𑀣𑀲𑁆𑀲 ¶ 𑀏𑀓𑀤𑀺𑀯𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀫𑀬𑀁 𑀦𑀕𑀭𑀁 𑀕𑀦𑁆𑀢𑁆𑀯𑀸 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀬𑁄 𑀧𑀲𑁆𑀲𑀸𑀫, 𑀇𑀫𑁂𑀲𑀼𑀧𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑁂𑀲𑀼 ‘𑀘𑀦𑁆𑀤𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄, 𑀲𑀽𑀭𑀺𑀬𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄’𑀢𑀺 ¶ 𑀯𑀤𑀦𑁆𑀢𑀺. 𑀓𑀺𑀁 𑀦𑀼 𑀔𑁄 𑀓𑀢𑁆𑀯𑀸 𑀏𑀢𑁂 𑀏𑀢𑀸 𑀲𑀫𑁆𑀧𑀢𑁆𑀢𑀺𑀬𑁄 𑀅𑀥𑀺𑀕𑀢𑀸’’𑀢𑀺? 𑀢𑀢𑁄 ‘‘𑀦𑀸𑀜𑁆𑀜𑀁 𑀓𑀺𑀜𑁆𑀘𑀺, 𑀧𑀼𑀜𑁆𑀜𑀓𑀫𑁆𑀫𑀫𑁂𑀯 𑀓𑀢𑁆𑀯𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀫𑀬𑀸𑀧𑀺 𑀏𑀯𑀁𑀯𑀺𑀥𑀲𑀫𑁆𑀧𑀢𑁆𑀢𑀺𑀤𑀸𑀬𑀓𑀁 𑀧𑀼𑀜𑁆𑀜𑀓𑀫𑁆𑀫𑀫𑁂𑀯 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺.

𑀲𑁄 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀯𑀸𑀲𑀺𑀨𑀭𑀲𑀼𑀓𑀼𑀤𑀸𑀮𑀫𑀼𑀲𑀮𑀳𑀢𑁆𑀣𑁄 𑀘𑀢𑀼𑀫𑀳𑀸𑀧𑀣𑀁 𑀕𑀦𑁆𑀢𑁆𑀯𑀸 𑀫𑀼𑀲𑀮𑁂𑀦 𑀧𑀸𑀲𑀸𑀡𑁂 𑀉𑀘𑁆𑀘𑀸𑀮𑁂𑀢𑁆𑀯𑀸 𑀧𑀯𑀝𑁆𑀝𑁂𑀢𑀺, 𑀬𑀸𑀦𑀸𑀦𑀁 𑀅𑀓𑁆𑀔𑀧𑀝𑀺𑀖𑀸𑀢𑀭𑀼𑀓𑁆𑀔𑁂 𑀳𑀭𑀢𑀺, 𑀯𑀺𑀲𑀫𑀁 𑀲𑀫𑀁 𑀓𑀭𑁄𑀢𑀺, 𑀘𑀢𑀼𑀫𑀳𑀸𑀧𑀣𑁂 𑀲𑀸𑀮𑀁 𑀓𑀭𑁄𑀢𑀺, 𑀧𑁄𑀓𑁆𑀔𑀭𑀡𑀺𑀁 𑀔𑀡𑀢𑀺, 𑀲𑁂𑀢𑀼𑀁 𑀩𑀦𑁆𑀥𑀢𑀺, 𑀏𑀯𑀁 𑀤𑀺𑀯𑀲𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀖𑀭𑀁 𑀏𑀢𑀺. 𑀢𑀁 𑀅𑀜𑁆𑀜𑁄 𑀧𑀼𑀘𑁆𑀙𑀺 𑁋 ‘‘𑀪𑁄, 𑀫𑀖, 𑀢𑁆𑀯𑀁 𑀧𑀸𑀢𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀸𑀬𑀁 𑀅𑀭𑀜𑁆𑀜𑀢𑁄 𑀏𑀲𑀺, 𑀓𑀺𑀁 𑀓𑀫𑁆𑀫𑀁 𑀓𑀭𑁄𑀲𑀻’’𑀢𑀺? 𑀧𑀼𑀜𑁆𑀜𑀓𑀫𑁆𑀫𑀁 𑀓𑀭𑁄𑀫𑀺. 𑀲𑀕𑁆𑀕𑀕𑀸𑀫𑀺𑀫𑀕𑁆𑀕𑀁 𑀲𑁄𑀥𑁂𑀫𑀻𑀢𑀺. 𑀓𑀺𑀫𑀺𑀤𑀁, 𑀪𑁄, 𑀧𑀼𑀜𑁆𑀜𑀁 𑀦𑀸𑀫𑀸𑀢𑀺? 𑀢𑁆𑀯𑀁 𑀦 𑀚𑀸𑀦𑀸𑀲𑀻𑀢𑀺? 𑀆𑀫, 𑀦 𑀚𑀸𑀦𑀸𑀫𑀻𑀢𑀺. 𑀦𑀕𑀭𑀁 𑀕𑀢𑀓𑀸𑀮𑁂 𑀤𑀺𑀝𑁆𑀞𑀧𑀼𑀩𑁆𑀩𑀸 𑀢𑁂 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀬𑁄𑀢𑀺? 𑀆𑀫, 𑀤𑀺𑀝𑁆𑀞𑀧𑀼𑀩𑁆𑀩𑀸𑀢𑀺. 𑀧𑀼𑀜𑁆𑀜𑀓𑀫𑁆𑀫𑀁 𑀓𑀢𑁆𑀯𑀸 𑀢𑁂𑀳𑀺 𑀢𑀁 𑀞𑀸𑀦𑀁 𑀮𑀤𑁆𑀥𑀁, 𑀅𑀳𑀫𑁆𑀧𑀺 𑀏𑀯𑀁𑀯𑀺𑀥𑀲𑀫𑁆𑀧𑀢𑁆𑀢𑀺𑀤𑀸𑀬𑀓𑀁 𑀓𑀫𑁆𑀫𑀁 𑀓𑀭𑁄𑀫𑀺. ‘‘𑀘𑀦𑁆𑀤𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄, 𑀲𑀽𑀭𑀺𑀬𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄’’𑀢𑀺 𑀲𑀼𑀢𑀧𑀼𑀩𑁆𑀩𑀁 𑀢𑀬𑀸𑀢𑀺? 𑀆𑀫 𑀲𑀼𑀢𑀧𑀼𑀩𑁆𑀩𑀦𑁆𑀢𑀺. 𑀏𑀢𑀲𑁆𑀲 𑀲𑀕𑁆𑀕𑀲𑁆𑀲 𑀕𑀫𑀦𑀫𑀕𑁆𑀕𑀁 𑀅𑀳𑀁 𑀲𑁄𑀥𑁂𑀫𑀻𑀢𑀺. 𑀇𑀤𑀁 𑀧𑀦 𑀧𑀼𑀜𑁆𑀜𑀓𑀫𑁆𑀫𑀁 𑀓𑀺𑀁 𑀢𑀯𑁂𑀯 𑀯𑀝𑁆𑀝𑀢𑀺, 𑀅𑀜𑁆𑀜𑀲𑁆𑀲 𑀦 𑀯𑀝𑁆𑀝𑀢𑀻𑀢𑀺? 𑀦 𑀓𑀲𑁆𑀲𑀘𑁂𑀢𑀁 𑀯𑀸𑀭𑀺𑀢𑀦𑁆𑀢𑀺. 𑀬𑀤𑀺 𑀏𑀯𑀁 𑀲𑁆𑀯𑁂 𑀅𑀭𑀜𑁆𑀜𑀁 𑀕𑀫𑀦𑀓𑀸𑀮𑁂 𑀫𑀬𑁆𑀳𑀫𑁆𑀧𑀺 𑀲𑀤𑁆𑀤𑀁 𑀤𑁂𑀳𑀻𑀢𑀺. 𑀧𑀼𑀦𑀤𑀺𑀯𑀲𑁂 𑀢𑀁 𑀕𑀳𑁂𑀢𑁆𑀯𑀸 𑀕𑀢𑁄, 𑀏𑀯𑀁 𑀢𑀲𑁆𑀫𑀺𑀁 𑀕𑀸𑀫𑁂 𑀢𑁂𑀢𑁆𑀢𑀺𑀁𑀲 𑀫𑀦𑀼𑀲𑁆𑀲𑀸 𑀢𑀭𑀼𑀡𑀯𑀬𑀸 𑀲𑀩𑁆𑀩𑁂 𑀢𑀲𑁆𑀲𑁂𑀯 𑀅𑀦𑀼𑀯𑀢𑁆𑀢𑀓𑀸 𑀅𑀳𑁂𑀲𑀼𑀁. 𑀢𑁂 𑀏𑀓𑀘𑁆𑀙𑀦𑁆𑀤𑀸 𑀳𑀼𑀢𑁆𑀯𑀸 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀬𑀁 𑀤𑀺𑀲𑀁 𑀕𑀘𑁆𑀙𑀦𑁆𑀢𑀺, 𑀫𑀕𑁆𑀕𑀁 𑀲𑀫𑀁 𑀓𑀭𑁄𑀦𑁆𑀢𑀸 𑀏𑀓𑀤𑀺𑀯𑀲𑁂𑀦𑁂𑀯 𑀓𑀭𑁄𑀦𑁆𑀢𑀺, 𑀧𑁄𑀓𑁆𑀔𑀭𑀡𑀺𑀁 𑀔𑀡𑀦𑁆𑀢𑀸, 𑀲𑀸𑀮𑀁 𑀓𑀭𑁄𑀦𑁆𑀢𑀸, 𑀲𑁂𑀢𑀼𑀁 𑀩𑀦𑁆𑀥𑀦𑁆𑀢𑀸 𑀏𑀓𑀤𑀺𑀯𑀲𑁂𑀦𑁂𑀯 𑀦𑀺𑀝𑁆𑀞𑀸𑀧𑁂𑀦𑁆𑀢𑀺.

𑀅𑀣 𑀦𑁂𑀲𑀁 𑀕𑀸𑀫𑀪𑁄𑀚𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀧𑀼𑀩𑁆𑀩𑁂 𑀏𑀢𑁂𑀲𑀼 𑀲𑀼𑀭𑀁 𑀧𑀺𑀯𑀦𑁆𑀢𑁂𑀲𑀼 𑀧𑀸𑀡𑀖𑀸𑀢𑀸𑀤𑀻𑀦𑀺 𑀓𑀭𑁄𑀦𑁆𑀢𑁂𑀲𑀼 𑀘 𑀓𑀳𑀸𑀧𑀡𑀸𑀤𑀺𑀯𑀲𑁂𑀦 𑀘𑁂𑀯 𑀤𑀡𑁆𑀟𑀩𑀮𑀺𑀯𑀲𑁂𑀦 𑀘 𑀥𑀦𑀁 𑀮𑀪𑀸𑀫𑀺. 𑀇𑀤𑀸𑀦𑀺 𑀏𑀢𑁂𑀲𑀁 𑀧𑀼𑀜𑁆𑀜𑀓𑀭𑀡𑀓𑀸𑀮𑀢𑁄 𑀧𑀝𑁆𑀞𑀸𑀬 𑀏𑀢𑁆𑀢𑀓𑁄 𑀆𑀬𑁄 𑀦𑀢𑁆𑀣𑀺, 𑀳𑀦𑁆𑀤 𑀦𑁂 𑀭𑀸𑀚𑀓𑀼𑀮𑁂 𑀧𑀭𑀺𑀪𑀺𑀦𑁆𑀤𑀸𑀫𑀻’’𑀢𑀺 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ¶ 𑀘𑁄𑀭𑁂, 𑀫𑀳𑀸𑀭𑀸𑀚, 𑀧𑀲𑁆𑀲𑀸𑀫𑀻𑀢𑀺. 𑀓𑀼𑀳𑀺𑀁, 𑀢𑀸𑀢𑀸𑀢𑀺? 𑀫𑀬𑁆𑀳𑀁 𑀕𑀸𑀫𑁂𑀢𑀺. 𑀓𑀺𑀁 𑀘𑁄𑀭𑀸 𑀦𑀸𑀫, 𑀢𑀸𑀢𑀸𑀢𑀺? 𑀭𑀸𑀚𑀸𑀧𑀭𑀸𑀥𑀺𑀓𑀸 𑀤𑁂𑀯𑀸𑀢𑀺. 𑀓𑀺𑀁 𑀚𑀸𑀢𑀺𑀓𑀸𑀢𑀺? 𑀕𑀳𑀧𑀢𑀺𑀚𑀸𑀢𑀺𑀓𑀸 𑀤𑁂𑀯𑀸𑀢𑀺. 𑀕𑀳𑀧𑀢𑀺𑀓𑀸 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀢𑀬𑀸 ¶ 𑀚𑀸𑀦𑀫𑀸𑀦𑁂𑀦 𑀓𑀲𑁆𑀫𑀸 𑀫𑀬𑁆𑀳𑀁 𑀦 𑀓𑀣𑀺𑀢𑀦𑁆𑀢𑀺? 𑀪𑀬𑁂𑀦, 𑀫𑀳𑀸𑀭𑀸𑀚, 𑀦 ¶ 𑀓𑀣𑁂𑀫𑀺, 𑀇𑀤𑀸𑀦𑀺 𑀫𑀸 𑀫𑀬𑁆𑀳𑀁 𑀤𑁄𑀲𑀁 𑀓𑀭𑁂𑀬𑁆𑀬𑀸𑀣𑀸𑀢𑀺. 𑀅𑀣 𑀭𑀸𑀚𑀸 ‘‘𑀅𑀬𑀁 𑀫𑀬𑁆𑀳𑀁 𑀫𑀳𑀸𑀭𑀯𑀁 𑀭𑀯𑀢𑀻’’𑀢𑀺 𑀲𑀤𑁆𑀤𑀳𑀺𑀢𑁆𑀯𑀸 ‘‘𑀢𑁂𑀦 𑀳𑀺 𑀕𑀘𑁆𑀙, 𑀢𑁆𑀯𑀫𑁂𑀯 𑀦𑁂 𑀆𑀦𑁂𑀳𑀻’’𑀢𑀺 𑀩𑀮𑀁 𑀤𑀢𑁆𑀯𑀸 𑀧𑁂𑀲𑁂𑀲𑀺. 𑀲𑁄 𑀕𑀦𑁆𑀢𑁆𑀯𑀸 𑀤𑀺𑀯𑀲𑀁 𑀅𑀭𑀜𑁆𑀜𑁂 𑀓𑀫𑁆𑀫𑀁 𑀓𑀢𑁆𑀯𑀸 𑀲𑀸𑀬𑀫𑀸𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀕𑀸𑀫𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀲𑁆𑀯𑁂 𑀓𑀺𑀁 𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫, 𑀓𑀺𑀁 𑀫𑀕𑁆𑀕𑀁 𑀲𑀫𑀁 𑀓𑀭𑁄𑀫, 𑀧𑁄𑀓𑁆𑀔𑀭𑀡𑀺𑀁 𑀔𑀡𑀸𑀫, 𑀲𑁂𑀢𑀼𑀁 𑀩𑀦𑁆𑀥𑀸𑀫𑀸’’𑀢𑀺 𑀫𑀦𑁆𑀢𑀬𑀫𑀸𑀦𑁂𑀬𑁂𑀯 𑀢𑁂 𑀧𑀭𑀺𑀯𑀸𑀭𑁂𑀢𑁆𑀯𑀸 ‘‘𑀫𑀸 𑀨𑀦𑁆𑀤𑀺𑀢𑁆𑀣, 𑀭𑀜𑁆𑀜𑁄 𑀆𑀡𑀸’’𑀢𑀺 𑀩𑀦𑁆𑀥𑀺𑀢𑁆𑀯𑀸 𑀧𑀸𑀬𑀸𑀲𑀺. 𑀅𑀣 𑀔𑁄 𑀦𑁂𑀲𑀁 𑀇𑀢𑁆𑀣𑀺𑀬𑁄 ‘‘𑀲𑀸𑀫𑀺𑀓𑀸 𑀓𑀺𑀭 𑀯𑁄 ‘𑀭𑀸𑀚𑀸𑀧𑀭𑀸𑀥𑀺𑀓𑀸 𑀘𑁄𑀭𑀸’𑀢𑀺 𑀩𑀦𑁆𑀥𑀺𑀢𑁆𑀯𑀸 𑀦𑀺𑀬𑁆𑀬𑀦𑁆𑀢𑀻’’𑀢𑀺 𑀲𑀼𑀢𑁆𑀯𑀸 ‘‘𑀅𑀢𑀺𑀘𑀺𑀭𑁂𑀦 𑀓𑀽𑀝𑀸 𑀏𑀢𑁂 ‘𑀧𑀼𑀜𑁆𑀜𑀓𑀫𑁆𑀫𑀁 𑀓𑀭𑁄𑀫𑀸’𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀅𑀭𑀜𑁆𑀜𑁂𑀯 𑀅𑀘𑁆𑀙𑀦𑁆𑀢𑀺, 𑀲𑀩𑁆𑀩𑀓𑀫𑁆𑀫𑀦𑁆𑀢𑀸 𑀧𑀭𑀺𑀳𑀻𑀦𑀸, 𑀕𑁂𑀳𑁂 𑀦 𑀓𑀺𑀜𑁆𑀘𑀺 𑀯𑀟𑁆𑀠𑀢𑀺, 𑀲𑀼𑀝𑁆𑀞𑀼 𑀩𑀤𑁆𑀥𑀸 𑀲𑀼𑀝𑁆𑀞𑀼 𑀕𑀳𑀺𑀢𑀸’’𑀢𑀺 𑀯𑀤𑀺𑀁𑀲𑀼.

𑀕𑀸𑀫𑀪𑁄𑀚𑀓𑁄𑀧𑀺 𑀢𑁂 𑀦𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑁂𑀲𑀺. 𑀭𑀸𑀚𑀸 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸𑀬𑁂𑀯 ‘‘𑀳𑀢𑁆𑀣𑀺𑀦𑀸 𑀫𑀤𑁆𑀤𑀸𑀧𑁂𑀣𑀸’’𑀢𑀺 𑀆𑀳. 𑀢𑁂𑀲𑀼 𑀦𑀻𑀬𑀫𑀸𑀦𑁂𑀲𑀼 𑀫𑀖𑁄 𑀇𑀢𑀭𑁂 𑀆𑀳 𑁋 ‘‘𑀪𑁄, 𑀲𑀓𑁆𑀔𑀺𑀲𑁆𑀲𑀣 𑀫𑀫 𑀯𑀘𑀦𑀁 𑀓𑀸𑀢𑀼’’𑀦𑁆𑀢𑀺? 𑀢𑀯 𑀯𑀘𑀦𑀁 𑀓𑀭𑁄𑀦𑁆𑀢𑀸𑀬𑁂𑀯𑀫𑁆𑀳 𑀇𑀫𑀁 𑀪𑀬𑀁 𑀧𑀢𑁆𑀢𑀸, 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀯 𑀯𑀘𑀦𑀁 𑀓𑀭𑁄𑀫, 𑀪𑀡 𑀪𑁄, 𑀓𑀺𑀁 𑀓𑀭𑁄𑀫𑀸𑀢𑀺? 𑀏𑀢𑁆𑀣 𑀪𑁄 𑀯𑀝𑁆𑀝𑁂 𑀘𑀭𑀦𑁆𑀢𑀸𑀦𑀁 𑀦𑀸𑀫 𑀦𑀺𑀩𑀤𑁆𑀥𑀁 𑀏𑀢𑀁, 𑀓𑀺𑀁 𑀧𑀦 𑀢𑀼𑀫𑁆𑀳𑁂 𑀘𑁄𑀭𑀸𑀢𑀺? 𑀦 𑀘𑁄𑀭𑀫𑁆𑀳𑀸𑀢𑀺. 𑀇𑀫𑀲𑁆𑀲 𑀮𑁄𑀓𑀲𑁆𑀲 𑀲𑀘𑁆𑀘𑀓𑀺𑀭𑀺𑀬𑀸 𑀦𑀸𑀫 𑀅𑀯𑀲𑁆𑀲𑀬𑁄, 𑀢𑀲𑁆𑀫𑀸 𑀲𑀩𑁆𑀩𑁂𑀧𑀺 ‘‘𑀬𑀤𑀺 𑀅𑀫𑁆𑀳𑁂 𑀘𑁄𑀭𑀸, 𑀳𑀢𑁆𑀣𑀻 𑀫𑀤𑁆𑀤𑀢𑀼, 𑀅𑀣 𑀦 𑀘𑁄𑀭𑀸, 𑀫𑀸 𑀫𑀤𑁆𑀤𑀢𑀽’’𑀢𑀺 𑀲𑀘𑁆𑀘𑀓𑀺𑀭𑀺𑀬𑀁 𑀓𑀭𑁄𑀣𑀸𑀢𑀺. 𑀢𑁂 𑀢𑀣𑀸 𑀅𑀓𑀁𑀲𑀼. 𑀳𑀢𑁆𑀣𑀻 𑀉𑀧𑀕𑀦𑁆𑀢𑀼𑀫𑁆𑀧𑀺 𑀦 𑀲𑀓𑁆𑀓𑁄𑀢𑀺, 𑀯𑀺𑀭𑀯𑀦𑁆𑀢𑁄 𑀧𑀮𑀸𑀬𑀢𑀺, 𑀳𑀢𑁆𑀣𑀺𑀁 𑀢𑀼𑀢𑁆𑀢𑀢𑁄𑀫𑀭𑀗𑁆𑀓𑀼𑀲𑁂𑀳𑀺 𑀓𑁄𑀝𑁆𑀝𑁂𑀦𑁆𑀢𑀸𑀧𑀺 𑀉𑀧𑀦𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. ‘‘𑀳𑀢𑁆𑀣𑀺𑀁 𑀉𑀧𑀦𑁂𑀢𑀼𑀁 𑀦 𑀲𑀓𑁆𑀓𑁄𑀫𑀸’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀢𑁂𑀦 𑀳𑀺 𑀉𑀧𑀭𑀺 𑀓𑀝𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀫𑀤𑁆𑀤𑀸𑀧𑁂𑀣𑀸𑀢𑀺. 𑀉𑀧𑀭𑀺 𑀓𑀝𑁂 𑀤𑀺𑀦𑁆𑀦𑁂 𑀤𑀺𑀕𑀼𑀡𑀭𑀯𑀁 𑀯𑀺𑀭𑀯𑀦𑁆𑀢𑁄 𑀧𑀮𑀸𑀬𑀢𑀺.

𑀭𑀸𑀚𑀸 𑀲𑀼𑀢𑁆𑀯𑀸 𑀧𑁂𑀲𑀼𑀜𑁆𑀜𑀓𑀸𑀭𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀳 𑁋 ‘‘𑀢𑀸𑀢, 𑀳𑀢𑁆𑀣𑀻 𑀫𑀤𑁆𑀤𑀺𑀢𑀼𑀁 𑀦 𑀇𑀘𑁆𑀙𑀢𑀻’’𑀢𑀺? 𑀆𑀫, 𑀤𑁂𑀯, 𑀚𑁂𑀝𑁆𑀞𑀓𑀫𑀸𑀡𑀯𑁄 𑀫𑀦𑁆𑀢𑀁 𑀚𑀸𑀦𑀸𑀢𑀺, 𑀫𑀦𑁆𑀢𑀲𑁆𑀲𑁂𑀯 𑀅𑀬𑀫𑀸𑀦𑀼𑀪𑀸𑀯𑁄𑀢𑀺. 𑀭𑀸𑀚𑀸 𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀫𑀦𑁆𑀢𑁄 𑀓𑀺𑀭 𑀢𑁂 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺? 𑀦𑀢𑁆𑀣𑀺, 𑀤𑁂𑀯, 𑀫𑀬𑁆𑀳𑀁 ¶ 𑀫𑀦𑁆𑀢𑁄, 𑀲𑀘𑁆𑀘𑀓𑀺𑀭𑀺𑀬𑀁 𑀧𑀦 𑀫𑀬𑀁 𑀓𑀭𑀺𑀫𑁆𑀳 𑁋 ‘‘𑀬𑀤𑀺 𑀅𑀫𑁆𑀳𑁂 𑀭𑀜𑁆𑀜𑁄 𑀘𑁄𑀭𑀸, 𑀫𑀤𑁆𑀤𑀢𑀼, 𑀅𑀣 𑀦 𑀘𑁄𑀭𑀸, 𑀫𑀸 𑀫𑀤𑁆𑀤𑀢𑀽’’𑀢𑀺, 𑀲𑀘𑁆𑀘𑀓𑀺𑀭𑀺𑀬𑀸𑀬 𑀦𑁄 𑀏𑀲 𑀆𑀦𑀼𑀪𑀸𑀯𑁄𑀢𑀺. 𑀓𑀺𑀁 𑀧𑀦, 𑀢𑀸𑀢, 𑀢𑀼𑀫𑁆𑀳𑁂 𑀓𑀫𑁆𑀫𑀁 𑀓𑀭𑁄𑀣𑀸𑀢𑀺? 𑀅𑀫𑁆𑀳𑁂, 𑀤𑁂𑀯, 𑀫𑀕𑁆𑀕𑀁 𑀲𑀫𑀁 𑀓𑀭𑁄𑀫, 𑀘𑀢𑀼𑀫𑀳𑀸𑀧𑀣𑁂 𑀲𑀸𑀮𑀁 𑀓𑀭𑁄𑀫 ¶ , 𑀧𑁄𑀓𑁆𑀔𑀭𑀡𑀺𑀁 𑀔𑀡𑀸𑀫, 𑀲𑁂𑀢𑀼𑀁 𑀩𑀦𑁆𑀥𑀸𑀫, 𑀏𑀯𑀭𑀽𑀧𑀸𑀦𑀺 𑀧𑀼𑀜𑁆𑀜𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀸 𑀯𑀺𑀘𑀭𑀺𑀫𑁆𑀳𑀸𑀢𑀺.

𑀅𑀬𑀁 𑀢𑀼𑀫𑁆𑀳𑁂 𑀓𑀺𑀫𑀢𑁆𑀣𑀁 𑀧𑀺𑀲𑀼𑀡𑁂𑀲𑀻𑀢𑀺? 𑀅𑀫𑁆𑀳𑀸𑀓𑀁 𑀧𑀫𑀢𑁆𑀢𑀓𑀸𑀮𑁂 𑀇𑀤𑀜𑁆𑀘𑀺𑀤𑀜𑁆𑀘 𑀮𑀪𑀢𑀺, 𑀅𑀧𑁆𑀧𑀫𑀢𑁆𑀢𑀓𑀸𑀮𑁂 𑀢𑀁 𑀦𑀢𑁆𑀣𑀺, 𑀏𑀢𑁂𑀦 𑀓𑀸𑀭𑀡𑁂𑀦𑀸𑀢𑀺. 𑀢𑀸𑀢, 𑀅𑀬𑀁 𑀳𑀢𑁆𑀣𑀻 𑀦𑀸𑀫 𑀢𑀺𑀭𑀘𑁆𑀙𑀸𑀦𑁄, 𑀲𑁄𑀧𑀺 𑀢𑀼𑀫𑁆𑀳𑀸𑀓𑀁 ¶ 𑀕𑀼𑀡𑁂 𑀚𑀸𑀦𑀸𑀢𑀺. 𑀅𑀳𑀁 𑀫𑀦𑀼𑀲𑁆𑀲𑁄 𑀳𑀼𑀢𑁆𑀯𑀸𑀧𑀺 𑀦 𑀚𑀸𑀦𑀸𑀫𑀺, 𑀢𑀼𑀫𑁆𑀳𑀸𑀓𑀁 𑀯𑀲𑀦𑀕𑀸𑀫𑀁 𑀢𑀼𑀫𑁆𑀳𑀸𑀓𑀁𑀬𑁂𑀯 𑀧𑀼𑀦 𑀅𑀳𑀭𑀡𑀻𑀬𑀁 𑀓𑀢𑁆𑀯𑀸 𑀤𑁂𑀫𑀺, 𑀅𑀬𑀫𑁆𑀧𑀺 𑀳𑀢𑁆𑀣𑀻 𑀢𑀼𑀫𑁆𑀳𑀸𑀓𑀁𑀬𑁂𑀯 𑀳𑁄𑀢𑀼, 𑀧𑁂𑀲𑀼𑀜𑁆𑀜𑀓𑀸𑀭𑀓𑁄𑀧𑀺 𑀢𑀼𑀫𑁆𑀳𑀸𑀓𑀁𑀬𑁂𑀯 𑀤𑀸𑀲𑁄 𑀳𑁄𑀢𑀼. 𑀇𑀢𑁄 𑀧𑀝𑁆𑀞𑀸𑀬 𑀫𑀬𑁆𑀳𑀫𑁆𑀧𑀺 𑀧𑀼𑀜𑁆𑀜𑀓𑀫𑁆𑀫𑀁 𑀓𑀭𑁄𑀣𑀸𑀢𑀺 𑀥𑀦𑀁 𑀤𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑁂 𑀥𑀦𑀁 𑀕𑀳𑁂𑀢𑁆𑀯𑀸 𑀯𑀸𑀭𑁂𑀦 𑀯𑀸𑀭𑁂𑀦 𑀳𑀢𑁆𑀣𑀺𑀁 𑀆𑀭𑀼𑀬𑁆𑀳 𑀕𑀘𑁆𑀙𑀦𑁆𑀢𑀸 𑀫𑀦𑁆𑀢𑀬𑀦𑁆𑀢𑀺 ‘‘𑀪𑁄 𑀧𑀼𑀜𑁆𑀜𑀓𑀫𑁆𑀫𑀁 𑀦𑀸𑀫 𑀅𑀦𑀸𑀕𑀢𑀪𑀯𑀢𑁆𑀣𑀸𑀬 𑀓𑀭𑀺𑀬𑀢𑀺, 𑀅𑀫𑁆𑀳𑀸𑀓𑀁 𑀧𑀦 𑀅𑀦𑁆𑀢𑁄𑀉𑀤𑀓𑁂 𑀧𑀼𑀧𑁆𑀨𑀺𑀢𑀁 𑀦𑀻𑀮𑀼𑀧𑁆𑀧𑀮𑀁 𑀯𑀺𑀬 𑀇𑀫𑀲𑁆𑀫𑀺𑀜𑁆𑀜𑁂𑀯 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑁂𑀢𑀺. 𑀇𑀤𑀸𑀦𑀺 𑀅𑀢𑀺𑀭𑁂𑀓𑀁 𑀧𑀼𑀜𑁆𑀜𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺, 𑀓𑀺𑀁 𑀓𑀭𑁄𑀫𑀸𑀢𑀺? 𑀘𑀢𑀼𑀫𑀳𑀸𑀧𑀣𑁂 𑀣𑀸𑀯𑀭𑀁 𑀓𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀯𑀺𑀲𑁆𑀲𑀫𑀦𑀲𑀸𑀮𑀁 𑀓𑀭𑁄𑀫, 𑀇𑀢𑁆𑀣𑀻𑀳𑀺 𑀧𑀦 𑀲𑀤𑁆𑀥𑀺𑀁 𑀅𑀧𑀢𑁆𑀢𑀺𑀓𑀁 𑀓𑀢𑁆𑀯𑀸 𑀓𑀭𑀺𑀲𑁆𑀲𑀸𑀫, 𑀅𑀫𑁆𑀳𑁂𑀲𑀼 𑀳𑀺 ‘‘𑀘𑁄𑀭𑀸’’𑀢𑀺 𑀕𑀳𑁂𑀢𑁆𑀯𑀸 𑀦𑀻𑀬𑀫𑀸𑀦𑁂𑀲𑀼 𑀇𑀢𑁆𑀣𑀻𑀦𑀁 𑀏𑀓𑀸𑀧𑀺 𑀘𑀺𑀦𑁆𑀢𑀸𑀫𑀢𑁆𑀢𑀓𑀫𑁆𑀧𑀺 𑀅𑀓𑀢𑁆𑀯𑀸 ‘‘𑀲𑀼𑀩𑀤𑁆𑀥𑀸 𑀲𑀼𑀕𑀳𑀺𑀢𑀸’’𑀢𑀺 𑀉𑀝𑁆𑀞𑀳𑀺𑀁𑀲𑀼, 𑀢𑀲𑁆𑀫𑀸 𑀢𑀸𑀲𑀁 𑀧𑀢𑁆𑀢𑀺𑀁 𑀦 𑀤𑀲𑁆𑀲𑀸𑀫𑀸𑀢𑀺. 𑀢𑁂 𑀅𑀢𑁆𑀢𑀦𑁄 𑀕𑁂𑀳𑀸𑀦𑀺 𑀕𑀦𑁆𑀢𑁆𑀯𑀸 𑀳𑀢𑁆𑀣𑀺𑀦𑁄 𑀢𑁂𑀢𑁆𑀢𑀺𑀁𑀲𑀧𑀺𑀡𑁆𑀟𑀁 𑀤𑁂𑀦𑁆𑀢𑀺, 𑀢𑁂𑀢𑁆𑀢𑀺𑀁𑀲 𑀢𑀺𑀡𑀫𑀼𑀝𑁆𑀞𑀺𑀬𑁄 𑀆𑀳𑀭𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀳𑀢𑁆𑀣𑀺𑀲𑁆𑀲 𑀓𑀼𑀘𑁆𑀙𑀺𑀧𑀽𑀭𑀁 𑀚𑀸𑀢𑀁. 𑀢𑁂 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀭𑀼𑀓𑁆𑀔𑁂 𑀙𑀺𑀦𑁆𑀤𑀦𑁆𑀢𑀺, 𑀙𑀺𑀦𑁆𑀦𑀁 𑀙𑀺𑀦𑁆𑀦𑀁 𑀳𑀢𑁆𑀣𑀻 𑀓𑀟𑁆𑀠𑀺𑀢𑁆𑀯𑀸 𑀲𑀓𑀝𑀧𑀣𑁂 𑀞𑀧𑁂𑀲𑀺. 𑀢𑁂 𑀭𑀼𑀓𑁆𑀔𑁂 𑀢𑀘𑁆𑀙𑁂𑀢𑁆𑀯𑀸 𑀲𑀸𑀮𑀸𑀬 𑀓𑀫𑁆𑀫𑀁 𑀆𑀭𑀪𑀺𑀁𑀲𑀼.

𑀫𑀖𑀲𑁆𑀲 𑀕𑁂𑀳𑁂 𑀲𑀼𑀚𑀸𑀢𑀸, 𑀲𑀼𑀥𑀫𑁆𑀫𑀸, 𑀘𑀺𑀢𑁆𑀢𑀸, 𑀦𑀦𑁆𑀤𑀸𑀢𑀺 𑀘𑀢𑀲𑁆𑀲𑁄 𑀪𑀭𑀺𑀬𑀸𑀬𑁄 𑀅𑀳𑁂𑀲𑀼𑀁. 𑀲𑀼𑀥𑀫𑁆𑀫𑀸 𑀯𑀟𑁆𑀠𑀓𑀺𑀁 𑀧𑀼𑀘𑁆𑀙𑀢𑀺 𑁋 ‘‘𑀢𑀸𑀢, 𑀇𑀫𑁂 𑀲𑀳𑀸𑀬𑀸 𑀓𑀸𑀮𑀲𑁆𑀲𑁂𑀯 𑀕𑀦𑁆𑀢𑁆𑀯𑀸 𑀲𑀸𑀬𑀁 𑀏𑀦𑁆𑀢𑀺, 𑀓𑀺𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀻’’𑀢𑀺? ‘‘𑀲𑀸𑀮𑀁 𑀓𑀭𑁄𑀦𑁆𑀢𑀺, 𑀅𑀫𑁆𑀫𑀸’’𑀢𑀺. ‘‘𑀢𑀸𑀢, 𑀫𑀬𑁆𑀳𑀫𑁆𑀧𑀺 𑀲𑀸𑀮𑀸𑀬 𑀧𑀢𑁆𑀢𑀺𑀁 𑀓𑀢𑁆𑀯𑀸 𑀤𑁂𑀳𑀻’’𑀢𑀺. ‘‘𑀇𑀢𑁆𑀣𑀻𑀳𑀺 𑀅𑀧𑀢𑁆𑀢𑀺𑀓𑀁 ¶ 𑀓𑀭𑁄𑀫𑀸’’𑀢𑀺 𑀏𑀢𑁂 𑀯𑀤𑀦𑁆𑀢𑀻𑀢𑀺. 𑀲𑀸 𑀯𑀟𑁆𑀠𑀓𑀺𑀲𑁆𑀲 𑀅𑀝𑁆𑀞 𑀓𑀳𑀸𑀧𑀡𑁂 𑀤𑀢𑁆𑀯𑀸 ‘‘𑀢𑀸𑀢, 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀫𑀬𑁆𑀳𑀁 𑀧𑀢𑁆𑀢𑀺𑀓𑀁 𑀓𑀭𑁄𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀼 𑀅𑀫𑁆𑀫𑀸’’𑀢𑀺 𑀯𑀢𑁆𑀯𑀸 𑀧𑀼𑀭𑁂𑀢𑀭𑀁 𑀯𑀸𑀲𑀺𑀨𑀭𑀲𑀼𑀁 𑀕𑀳𑁂𑀢𑁆𑀯𑀸 𑀕𑀸𑀫𑀫𑀚𑁆𑀛𑁂 𑀞𑀢𑁆𑀯𑀸 ‘‘𑀓𑀺𑀁 𑀪𑁄 𑀅𑀚𑁆𑀚 𑀇𑀫𑀲𑁆𑀫𑀺𑀫𑁆𑀧𑀺 𑀓𑀸𑀮𑁂 𑀦 𑀦𑀺𑀓𑁆𑀔𑀫𑀣𑀸’’𑀢𑀺 𑀉𑀘𑁆𑀘𑀸𑀲𑀤𑁆𑀤𑀁 𑀓𑀢𑁆𑀯𑀸 ‘‘𑀲𑀩𑁆𑀩𑁂 𑀫𑀕𑁆𑀕𑀁 𑀆𑀭𑀼𑀴𑁆𑀳𑀸’’𑀢𑀺 𑀜𑀢𑁆𑀯𑀸 ‘‘𑀕𑀘𑁆𑀙𑀣 𑀢𑀸𑀯 𑀢𑀼𑀫𑁆𑀳𑁂, 𑀫𑀬𑁆𑀳𑀁 𑀧𑀧𑀜𑁆𑀘𑁄 𑀅𑀢𑁆𑀣𑀻’’𑀢𑀺 𑀢𑁂 ¶ 𑀧𑀼𑀭𑀢𑁄 𑀓𑀢𑁆𑀯𑀸 𑀅𑀜𑁆𑀜𑀁 𑀫𑀕𑁆𑀕𑀁 𑀆𑀭𑀼𑀬𑁆𑀳 𑀓𑀡𑁆𑀡𑀺𑀓𑀽𑀧𑀕𑀁 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀢𑀘𑁆𑀙𑁂𑀢𑁆𑀯𑀸 𑀫𑀝𑁆𑀞𑀁 𑀓𑀢𑁆𑀯𑀸 𑀆𑀳𑀭𑀺𑀢𑁆𑀯𑀸 𑀲𑀼𑀥𑀫𑁆𑀫𑀸𑀬 𑀕𑁂𑀳𑁂 𑀞𑀧𑁂𑀲𑀺 𑁋 ‘‘𑀫𑀬𑀸 𑀤𑁂𑀳𑀻𑀢𑀺 𑀯𑀼𑀢𑁆𑀢𑀤𑀺𑀯𑀲𑁂 𑀦𑀻𑀳𑀭𑀺𑀢𑁆𑀯𑀸 𑀤𑀤𑁂𑀬𑁆𑀬𑀸𑀲𑀻’’𑀢𑀺.

𑀅𑀣 𑀦𑀺𑀝𑁆𑀞𑀺𑀢𑁂 𑀤𑀩𑁆𑀩𑀲𑀫𑁆𑀪𑀸𑀭𑀓𑀫𑁆𑀫𑁂 𑀪𑀽𑀫𑀺𑀓𑀫𑁆𑀫𑀢𑁄 𑀧𑀝𑁆𑀞𑀸𑀬 𑀘𑀬𑀩𑀦𑁆𑀥𑀦𑀣𑀫𑁆𑀪𑀼𑀲𑁆𑀲𑀸𑀧𑀦 𑀲𑀗𑁆𑀖𑀸𑀝𑀬𑁄𑀚𑀦 𑀓𑀡𑁆𑀡𑀺𑀓𑀫𑀜𑁆𑀘𑀩𑀦𑁆𑀥𑀦𑁂𑀲𑀼 𑀓𑀢𑁂𑀲𑀼 𑀲𑁄 𑀯𑀟𑁆𑀠𑀓𑀻 𑀓𑀡𑁆𑀡𑀺𑀓𑀫𑀜𑁆𑀘𑁂 𑀦𑀺𑀲𑀻𑀤𑀺𑀢𑁆𑀯𑀸 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀕𑁄𑀧𑀸𑀦𑀲𑀺𑀬𑁄 𑀉𑀓𑁆𑀔𑀺𑀧𑀺𑀢𑁆𑀯𑀸 ‘‘𑀪𑁄 𑀏𑀓𑀁 𑀧𑀫𑀼𑀝𑁆𑀞𑀁 𑀅𑀢𑁆𑀣𑀻’’𑀢𑀺 𑀆𑀳. 𑀓𑀺𑀁 𑀪𑁄 𑀧𑀫𑀼𑀝𑁆𑀞𑀁, 𑀲𑀩𑁆𑀩𑀫𑁂𑀯 𑀢𑁆𑀯𑀁 𑀧𑀫𑀼𑀲𑁆𑀲𑀲𑀻𑀢𑀺. 𑀇𑀫𑀸 𑀪𑁄 𑀕𑁄𑀧𑀸𑀦𑀲𑀺𑀬𑁄 𑀓𑀢𑁆𑀣 𑀧𑀢𑀺𑀝𑁆𑀞𑀳𑀺𑀲𑁆𑀲𑀦𑁆𑀢𑀻𑀢𑀺? 𑀓𑀡𑁆𑀡𑀺𑀓𑀸 𑀦𑀸𑀫 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻𑀢𑀺. 𑀓𑀼𑀳𑀺𑀁 𑀪𑁄 𑀇𑀤𑀸𑀦𑀺 𑀲𑀓𑁆𑀓𑀸 𑀮𑀤𑁆𑀥𑀼𑀦𑁆𑀢𑀺? 𑀓𑀼𑀮𑀸𑀦𑀁 𑀕𑁂𑀳𑁂 𑀲𑀓𑁆𑀓𑀸 𑀮𑀤𑁆𑀥𑀼𑀦𑁆𑀢𑀺. 𑀆𑀳𑀺𑀡𑁆𑀟𑀦𑁆𑀢𑀸 𑀧𑀼𑀘𑁆𑀙𑀣𑀸𑀢𑀺. 𑀢𑁂 𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 𑀲𑀼𑀥𑀫𑁆𑀫𑀸𑀬 𑀖𑀭𑀤𑁆𑀯𑀸𑀭𑁂 ‘‘𑀇𑀫𑀲𑁆𑀫𑀺𑀁 𑀖𑀭𑁂 𑀓𑀡𑁆𑀡𑀺𑀓𑀸 𑀅𑀢𑁆𑀣𑀻’’𑀢𑀺 ¶ 𑀆𑀳𑀁𑀲𑀼. 𑀲𑀸 ‘‘𑀅𑀢𑁆𑀣𑀻’’𑀢𑀺 𑀆𑀳. 𑀳𑀦𑁆𑀤 𑀫𑀽𑀮𑀁 𑀕𑀡𑁆𑀳𑀸𑀳𑀻𑀢𑀺. 𑀫𑀽𑀮𑀁 𑀦 𑀕𑀡𑁆𑀳𑀸𑀫𑀺, 𑀲𑀘𑁂 𑀫𑀫 𑀧𑀢𑁆𑀢𑀺𑀁 𑀓𑀭𑁄𑀣, 𑀤𑀲𑁆𑀲𑀸𑀫𑀻𑀢𑀺. 𑀏𑀣 𑀪𑁄 𑀫𑀸𑀢𑀼𑀕𑀸𑀫𑀲𑁆𑀲 𑀧𑀢𑁆𑀢𑀺𑀁 𑀦 𑀓𑀭𑁄𑀫, 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀲𑁆𑀲𑀸𑀫𑀸𑀢𑀺 𑀦𑀺𑀓𑁆𑀔𑀫𑀺𑀁𑀲𑀼.

𑀢𑀢𑁄 𑀯𑀟𑁆𑀠𑀓𑀻 ‘‘𑀓𑀺𑀁 𑀦 𑀮𑀤𑁆𑀥𑀸, 𑀢𑀸𑀢, 𑀓𑀡𑁆𑀡𑀺𑀓𑀸’’𑀢𑀺 𑀧𑀼𑀘𑁆𑀙𑀺. 𑀢𑁂 𑀢𑀫𑀢𑁆𑀣𑀁 𑀆𑀭𑁄𑀘𑀬𑀺𑀁𑀲𑀼. 𑀯𑀟𑁆𑀠𑀓𑀻 𑀓𑀡𑁆𑀡𑀺𑀓𑀫𑀜𑁆𑀘𑁂 𑀦𑀺𑀲𑀺𑀦𑁆𑀦𑁄𑀯 𑀆𑀓𑀸𑀲𑀁 𑀉𑀮𑁆𑀮𑁄𑀓𑁂𑀢𑁆𑀯𑀸 ‘‘𑀪𑁄 𑀅𑀚𑁆𑀚 𑀦𑀓𑁆𑀔𑀢𑁆𑀢𑀁 𑀲𑀼𑀦𑁆𑀤𑀭𑀁, 𑀇𑀤𑀁 𑀅𑀜𑁆𑀜𑀁 𑀲𑀁𑀯𑀘𑁆𑀙𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀓𑁆𑀓𑀸 𑀮𑀤𑁆𑀥𑀼𑀁, 𑀢𑀼𑀫𑁆𑀳𑁂𑀳𑀺 𑀘 𑀤𑀼𑀓𑁆𑀔𑁂𑀦 𑀆𑀪𑀢𑀸 𑀤𑀩𑁆𑀩𑀲𑀫𑁆𑀪𑀸𑀭𑀸, 𑀢𑁂 𑀲𑀓𑀮𑀲𑀁𑀯𑀘𑁆𑀙𑀭𑁂𑀦 𑀇𑀫𑀲𑁆𑀫𑀺𑀜𑁆𑀜𑁂𑀯 𑀞𑀸𑀦𑁂 𑀧𑀽𑀢𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀓𑀸𑀮𑁂 𑀢𑀲𑁆𑀲𑀸𑀧𑀺 𑀏𑀓𑀲𑁆𑀫𑀺𑀁 𑀓𑁄𑀡𑁂 𑀲𑀸𑀮𑀸 𑀳𑁄𑀢𑀼, 𑀆𑀳𑀭𑀣 𑀦’’𑀦𑁆𑀢𑀺 𑀆𑀳. 𑀲𑀸𑀧𑀺 𑀬𑀸𑀯 𑀢𑁂 𑀦 𑀧𑀼𑀦 𑀆𑀕𑀘𑁆𑀙𑀦𑁆𑀢𑀺, 𑀢𑀸𑀯 𑀓𑀡𑁆𑀡𑀺𑀓𑀸𑀬 𑀳𑁂𑀝𑁆𑀞𑀺𑀫𑀢𑀮𑁂 ‘‘𑀅𑀬𑀁 𑀲𑀸𑀮𑀸 𑀲𑀼𑀥𑀫𑁆𑀫𑀸 𑀦𑀸𑀫𑀸’’𑀢𑀺 𑀅𑀓𑁆𑀔𑀭𑀸𑀦𑀺 𑀙𑀺𑀦𑁆𑀤𑀸𑀧𑁂𑀢𑁆𑀯𑀸 𑀅𑀳𑀢𑁂𑀦 𑀯𑀢𑁆𑀣𑁂𑀦 𑀯𑁂𑀞𑁂𑀢𑁆𑀯𑀸 𑀞𑀧𑁂𑀲𑀺. 𑀓𑀫𑁆𑀫𑀺𑀓𑀸 𑀆𑀕𑀦𑁆𑀢𑁆𑀯𑀸 𑁋 ‘‘𑀆𑀳𑀭, 𑀭𑁂 𑀓𑀡𑁆𑀡𑀺𑀓𑀁 ¶ , 𑀬𑀁 𑀳𑁄𑀢𑀼 𑀢𑀁 𑀳𑁄𑀢𑀼. 𑀢𑀼𑀬𑁆𑀳𑀫𑁆𑀧𑀺 𑀧𑀢𑁆𑀢𑀺𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀲𑀸 𑀦𑀻𑀳𑀭𑀺𑀢𑁆𑀯𑀸 ‘‘𑀢𑀸𑀢𑀸, 𑀬𑀸𑀯 𑀅𑀝𑁆𑀞 𑀯𑀸 𑀲𑁄𑀴𑀲 𑀯𑀸 𑀕𑁄𑀧𑀸𑀦𑀲𑀺𑀬𑁄 𑀦 𑀆𑀭𑁄𑀳𑀦𑁆𑀢𑀺, 𑀢𑀸𑀯 𑀇𑀫𑀁 𑀯𑀢𑁆𑀣𑀁 𑀫𑀸 𑀦𑀺𑀩𑁆𑀩𑁂𑀞𑀬𑀺𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀅𑀤𑀸𑀲𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀕𑀳𑁂𑀢𑁆𑀯𑀸 𑀕𑁄𑀧𑀸𑀦𑀲𑀺𑀬𑁄 𑀆𑀭𑁄𑀧𑁂𑀢𑁆𑀯𑀸𑀯 𑀯𑀢𑁆𑀣𑀁 𑀦𑀺𑀩𑁆𑀩𑁂𑀞𑁂𑀲𑀼𑀁.

𑀏𑀓𑁄 𑀫𑀳𑀸𑀕𑀸𑀫𑀺𑀓𑀫𑀦𑀼𑀲𑁆𑀲𑁄 𑀉𑀤𑁆𑀥𑀁 𑀉𑀮𑁆𑀮𑁄𑀓𑁂𑀦𑁆𑀢𑁄 𑀅𑀓𑁆𑀔𑀭𑀸𑀦𑀺 𑀤𑀺𑀲𑁆𑀯𑀸 ‘‘𑀓𑀺𑀁, 𑀪𑁄, 𑀇𑀤’’𑀦𑁆𑀢𑀺 𑀅𑀓𑁆𑀔𑀭𑀜𑁆𑀜𑀼𑀁 𑀫𑀦𑀼𑀲𑁆𑀲𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀲𑁄 ‘‘𑀲𑀼𑀥𑀫𑁆𑀫𑀸 ¶ 𑀦𑀸𑀫 𑀅𑀬𑀁 𑀲𑀸𑀮𑀸’’𑀢𑀺 𑀆𑀳. ‘‘𑀳𑀭𑀣, 𑀪𑁄, 𑀫𑀬𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀸𑀮𑀁 𑀓𑀢𑁆𑀯𑀸 𑀦𑀸𑀫𑀫𑀢𑁆𑀢𑀫𑁆𑀧𑀺 𑀦 𑀮𑀪𑀸𑀫, 𑀏𑀲𑀸 𑀭𑀢𑀦𑀫𑀢𑁆𑀢𑁂𑀦 𑀓𑀡𑁆𑀡𑀺𑀓𑀭𑀼𑀓𑁆𑀔𑁂𑀦 𑀲𑀸𑀮𑀁 𑀅𑀢𑁆𑀢𑀦𑁄 𑀦𑀸𑀫𑁂𑀦 𑀓𑀸𑀭𑁂𑀢𑀻’’𑀢𑀺 𑀯𑀺𑀭𑀯𑀦𑁆𑀢𑀺. 𑀯𑀟𑁆𑀠𑀓𑀻 𑀢𑁂𑀲𑀁 𑀯𑀺𑀭𑀯𑀦𑁆𑀢𑀸𑀦𑀁𑀬𑁂𑀯 𑀕𑁄𑀧𑀸𑀦𑀲𑀺𑀬𑁄 𑀧𑀯𑁂𑀲𑁂𑀢𑁆𑀯𑀸 𑀆𑀡𑀺𑀁 𑀤𑀢𑁆𑀯𑀸 𑀲𑀸𑀮𑀸𑀓𑀫𑁆𑀫𑀁 𑀦𑀺𑀝𑁆𑀞𑀸𑀧𑁂𑀲𑀺.

𑀲𑀸𑀮𑀁 𑀢𑀺𑀥𑀸 𑀯𑀺𑀪𑀚𑀺𑀁𑀲𑀼, 𑀏𑀓𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀇𑀲𑁆𑀲𑀭𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀅𑀓𑀁𑀲𑀼, 𑀏𑀓𑀲𑁆𑀫𑀺𑀁 𑀤𑀼𑀕𑁆𑀕𑀢𑀸𑀦𑀁, 𑀏𑀓𑀲𑁆𑀫𑀺𑀁 𑀕𑀺𑀮𑀸𑀦𑀸𑀦𑀁. 𑀢𑁂𑀢𑁆𑀢𑀺𑀁𑀲 𑀚𑀦𑀸 𑀢𑁂𑀢𑁆𑀢𑀺𑀁𑀲 𑀨𑀮𑀓𑀸𑀦𑀺 𑀧𑀜𑁆𑀜𑀧𑁂𑀢𑁆𑀯𑀸 𑀳𑀢𑁆𑀣𑀺𑀲𑁆𑀲 𑀲𑀜𑁆𑀜𑀁 𑀅𑀤𑀁𑀲𑀼 𑁋 ‘‘𑀆𑀕𑀦𑁆𑀢𑀼𑀓𑁄 𑀆𑀕𑀦𑁆𑀢𑁆𑀯𑀸 𑀬𑀲𑁆𑀲 𑀅𑀢𑁆𑀣𑀢𑁂 𑀨𑀮𑀓𑁂 𑀦𑀺𑀲𑀻𑀤𑀢𑀺, 𑀢𑀁 𑀕𑀳𑁂𑀢𑁆𑀯𑀸 𑀨𑀮𑀓𑀲𑀸𑀫𑀺𑀓𑀲𑁆𑀲𑁂𑀯 𑀕𑁂𑀳𑁂 𑀧𑀢𑀺𑀝𑁆𑀞𑀧𑁂𑀳𑀺. 𑀢𑀲𑁆𑀲 𑀧𑀸𑀤𑀧𑀭𑀺𑀓𑀫𑁆𑀫𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀲𑀬𑀦𑀸𑀦𑀺 𑀲𑀩𑁆𑀩𑀸𑀦𑀺 𑀨𑀮𑀓𑀲𑀸𑀫𑀺𑀓𑀲𑁆𑀲𑁂𑀯 𑀪𑀸𑀭𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀳𑀢𑁆𑀣𑀻 𑀆𑀕𑀢𑀸𑀕𑀢𑀁 𑀕𑀳𑁂𑀢𑁆𑀯𑀸 𑀨𑀮𑀓𑀲𑀸𑀫𑀺𑀓𑀲𑁆𑀲 𑀕𑁂𑀳𑀁 𑀦𑁂𑀢𑀺, 𑀲𑁄 𑀢𑀲𑁆𑀲 𑀢𑀁 𑀤𑀺𑀯𑀲𑀁 𑀓𑀢𑁆𑀢𑀩𑁆𑀩𑀁 𑀓𑀭𑁄𑀢𑀺.

𑀫𑀖𑀫𑀸𑀡𑀯𑁄 𑀲𑀸𑀮𑀢𑁄 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀓𑁄𑀯𑀺𑀴𑀸𑀭𑀭𑀼𑀓𑁆𑀔𑀁 𑀭𑁄𑀧𑀸𑀧𑁂𑀲𑀺, 𑀫𑀽𑀮𑁂 𑀘𑀲𑁆𑀲 𑀧𑀸𑀲𑀸𑀡𑀨𑀮𑀓𑀁 𑀅𑀢𑁆𑀣𑀭𑀺. 𑀦𑀦𑁆𑀤𑀸 𑀦𑀸𑀫𑀲𑁆𑀲 𑀪𑀭𑀺𑀬𑀸 𑀅𑀯𑀺𑀤𑀽𑀭𑁂 𑀧𑁄𑀓𑁆𑀔𑀭𑀡𑀺𑀁 𑀔𑀡𑀸𑀧𑁂𑀲𑀺, 𑀘𑀺𑀢𑁆𑀢𑀸 𑀫𑀸𑀮𑀸𑀯𑀘𑁆𑀙𑁂 ¶ 𑀭𑁄𑀧𑀸𑀧𑁂𑀲𑀺, 𑀲𑀩𑁆𑀩𑀚𑁂𑀝𑁆𑀞𑀺𑀓𑀸 𑀧𑀦 𑀆𑀤𑀸𑀲𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀪𑀸𑀯𑀁 𑀫𑀡𑁆𑀟𑀬𑀫𑀸𑀦𑀸𑀯 𑀯𑀺𑀘𑀭𑀢𑀺. 𑀫𑀖𑁄 𑀢𑀁 𑀆𑀳 𑁋 ‘‘𑀪𑀤𑁆𑀤𑁂, 𑀲𑀼𑀥𑀫𑁆𑀫𑀸, 𑀲𑀸𑀮𑀸𑀬 𑀧𑀢𑁆𑀢𑀺𑀓𑀸 𑀚𑀸𑀢𑀸, 𑀦𑀦𑁆𑀤𑀸 𑀧𑁄𑀓𑁆𑀔𑀭𑀡𑀺𑀁 𑀔𑀡𑀸𑀧𑁂𑀲𑀺, 𑀘𑀺𑀢𑁆𑀢𑀸 𑀫𑀸𑀮𑀸𑀯𑀘𑁆𑀙𑁂 𑀭𑁄𑀧𑀸𑀧𑁂𑀲𑀺. 𑀢𑀯 𑀧𑀦 𑀧𑀼𑀜𑁆𑀜𑀓𑀫𑁆𑀫𑀁 𑀦𑀸𑀫 𑀦𑀢𑁆𑀣𑀺, 𑀏𑀓𑀁 𑀧𑀼𑀜𑁆𑀜𑀁 𑀓𑀭𑁄𑀳𑀺, 𑀪𑀤𑁆𑀤𑁂’’𑀢𑀺 𑀲𑀸 ‘‘𑀢𑁆𑀯𑀁 𑀓𑀲𑁆𑀲 𑀓𑀸𑀭𑀡𑀸 𑀓𑀭𑁄𑀲𑀺, 𑀦𑀦𑀼 𑀢𑀬𑀸 𑀓𑀢𑀁 𑀫𑀬𑁆𑀳𑀫𑁂𑀯𑀸’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀪𑀸𑀯𑀫𑀡𑁆𑀟𑀦𑀫𑁂𑀯 𑀅𑀦𑀼𑀬𑀼𑀜𑁆𑀚𑀢𑀺.

𑀫𑀖𑁄 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀓𑁆𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀢𑁂𑀧𑀺 𑀢𑁂𑀢𑁆𑀢𑀺𑀁𑀲 𑀕𑀸𑀫𑀺𑀓𑀫𑀦𑀼𑀲𑁆𑀲𑀸 ¶ 𑀓𑀸𑀮𑀗𑁆𑀓𑀢𑁆𑀯𑀸 𑀢𑁂𑀢𑁆𑀢𑀺𑀁𑀲 𑀤𑁂𑀯𑀧𑀼𑀢𑁆𑀢𑀸 𑀳𑀼𑀢𑁆𑀯𑀸 𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀢𑁆𑀢𑀸. 𑀲𑀓𑁆𑀓𑀲𑁆𑀲 𑀯𑁂𑀚𑀬𑀦𑁆𑀢𑁄 𑀦𑀸𑀫 𑀧𑀸𑀲𑀸𑀤𑁄 𑀲𑀢𑁆𑀢 𑀬𑁄𑀚𑀦𑀲𑀢𑀸𑀦𑀺 𑀉𑀕𑁆𑀕𑀘𑁆𑀙𑀺, 𑀥𑀚𑁄 𑀢𑀻𑀡𑀺 𑀬𑁄𑀚𑀦𑀲𑀢𑀸𑀦𑀺 𑀉𑀕𑁆𑀕𑀘𑁆𑀙𑀺, 𑀓𑁄𑀯𑀺𑀴𑀸𑀭𑀭𑀼𑀓𑁆𑀔𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀲𑀫𑀦𑁆𑀢𑀸 𑀢𑀺𑀬𑁄𑀚𑀦𑀲𑀢𑀧𑀭𑀺𑀫𑀡𑁆𑀟𑀮𑁄 𑀧𑀜𑁆𑀘𑀤𑀲𑀬𑁄𑀚𑀦𑀧𑀭𑀺𑀡𑀸𑀳𑀓𑁆𑀔𑀦𑁆𑀥𑁄 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀦𑀺𑀩𑁆𑀩𑀢𑁆𑀢𑀺, 𑀧𑀸𑀲𑀸𑀡𑀨𑀮𑀓𑀲𑁆𑀲 ¶ 𑀦𑀺𑀲𑁆𑀲𑀦𑁆𑀤𑁂𑀦 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀲𑀝𑁆𑀞𑀺𑀬𑁄𑀚𑀦𑀺𑀓𑀸 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸 𑀦𑀺𑀩𑁆𑀩𑀢𑁆𑀢𑀺. 𑀲𑀼𑀥𑀫𑁆𑀫𑀸𑀬 𑀓𑀡𑁆𑀡𑀺𑀓𑀭𑀼𑀓𑁆𑀔𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀢𑀺𑀬𑁄𑀚𑀦𑀲𑀢𑀺𑀓𑀸 𑀲𑀼𑀥𑀫𑁆𑀫𑀸 𑀤𑁂𑀯𑀲𑀪𑀸 𑀦𑀺𑀩𑁆𑀩𑀢𑁆𑀢𑀺. 𑀦𑀦𑁆𑀤𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀦𑀺𑀲𑁆𑀲𑀦𑁆𑀤𑁂𑀦 𑀧𑀜𑁆𑀜𑀸𑀲𑀬𑁄𑀚𑀦𑀸 𑀦𑀦𑁆𑀤𑀸 𑀦𑀸𑀫 𑀧𑁄𑀓𑁆𑀔𑀭𑀡𑀻 𑀦𑀺𑀩𑁆𑀩𑀢𑁆𑀢𑀺. 𑀘𑀺𑀢𑁆𑀢𑀸𑀬 𑀫𑀸𑀮𑀸𑀯𑀘𑁆𑀙𑀯𑀢𑁆𑀣𑀼𑀦𑀺𑀲𑁆𑀲𑀦𑁆𑀤𑁂𑀦 𑀲𑀝𑁆𑀞𑀺𑀬𑁄𑀚𑀦𑀺𑀓𑀁 𑀘𑀺𑀢𑁆𑀢𑀮𑀢𑀸𑀯𑀦𑀁 𑀦𑀸𑀫 𑀉𑀬𑁆𑀬𑀸𑀦𑀁 𑀦𑀺𑀩𑁆𑀩𑀢𑁆𑀢𑀺.

𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀲𑀼𑀥𑀫𑁆𑀫𑀸𑀬 𑀤𑁂𑀯𑀲𑀪𑀸𑀬 𑀬𑁄𑀚𑀦𑀺𑀓𑁂 𑀲𑀼𑀯𑀡𑁆𑀡𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀢𑀺𑀬𑁄𑀚𑀦𑀺𑀓𑁂 𑀲𑁂𑀢𑀘𑁆𑀙𑀢𑁆𑀢𑁂 𑀥𑀸𑀭𑀺𑀬𑀫𑀸𑀦𑁂 𑀢𑁂𑀳𑀺 𑀤𑁂𑀯𑀧𑀼𑀢𑁆𑀢𑁂𑀳𑀺 𑀢𑀸𑀳𑀺 𑀤𑁂𑀯𑀓𑀜𑁆𑀜𑀸𑀳𑀺 𑀅𑀟𑁆𑀠𑀢𑀺𑀬𑀸𑀳𑀺 𑀦𑀸𑀝𑀓𑀓𑁄𑀝𑀻𑀳𑀺 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑀢𑀸𑀳𑀺 𑀘 𑀧𑀭𑀺𑀯𑀸𑀭𑀺𑀢𑁄 𑀫𑀳𑀸𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀦𑁆𑀢𑁄 𑀢𑀸 𑀢𑀺𑀲𑁆𑀲𑁄 𑀇𑀢𑁆𑀣𑀺𑀬𑁄 𑀤𑀺𑀲𑁆𑀯𑀸 ‘‘𑀇𑀫𑀸 𑀢𑀸𑀯 𑀧𑀜𑁆𑀜𑀸𑀬𑀦𑁆𑀢𑀺, 𑀲𑀼𑀚𑀸𑀢𑀸 𑀓𑀼𑀳𑀺’’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 ‘‘𑀅𑀬𑀁 𑀫𑀫 𑀯𑀘𑀦𑀁 𑀅𑀓𑀢𑁆𑀯𑀸 𑀕𑀺𑀭𑀺𑀓𑀦𑁆𑀤𑀭𑀸𑀬 𑀩𑀓𑀲𑀓𑀼𑀡𑀺𑀓𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀤𑀺𑀲𑁆𑀯𑀸 𑀤𑁂𑀯𑀮𑁄𑀓𑀢𑁄 𑀑𑀢𑀭𑀺𑀢𑁆𑀯𑀸 𑀢𑀲𑁆𑀲𑀸 𑀲𑀦𑁆𑀢𑀺𑀓𑀁 𑀕𑀢𑁄. 𑀲𑀸 𑀤𑀺𑀲𑁆𑀯𑀸𑀯 𑀲𑀜𑁆𑀚𑀸𑀦𑀺𑀢𑁆𑀯𑀸 𑀅𑀥𑁄𑀫𑀼𑀔𑀸 𑀚𑀸𑀢𑀸. ‘‘𑀩𑀸𑀮𑁂, 𑀇𑀤𑀸𑀦𑀺 𑀓𑀺𑀁 𑀲𑀻𑀲𑀁 𑀦 𑀉𑀓𑁆𑀔𑀺𑀧𑀲𑀺? 𑀢𑁆𑀯𑀁 𑀫𑀫 𑀯𑀘𑀦𑀁 𑀅𑀓𑀢𑁆𑀯𑀸 𑀅𑀢𑁆𑀢𑀪𑀸𑀯𑀫𑁂𑀯 𑀫𑀡𑁆𑀟𑀬𑀫𑀸𑀦𑀸 𑀯𑀻𑀢𑀺𑀦𑀸𑀫𑁂𑀲𑀺. 𑀲𑀼𑀥𑀫𑁆𑀫𑀸𑀬 𑀘 𑀦𑀦𑁆𑀤𑀸𑀬 𑀘 𑀘𑀺𑀢𑁆𑀢𑀸𑀬 𑀘 𑀫𑀳𑀸𑀲𑀫𑁆𑀧𑀢𑁆𑀢𑀺 𑀦𑀺𑀩𑁆𑀩𑀢𑁆𑀢𑀸, 𑀏𑀳𑀺 𑀅𑀫𑁆𑀳𑀸𑀓𑀁 𑀲𑀫𑁆𑀧𑀢𑁆𑀢𑀺𑀁 𑀧𑀲𑁆𑀲𑀸’’𑀢𑀺 𑀤𑁂𑀯𑀮𑁄𑀓𑀁 𑀦𑁂𑀢𑁆𑀯𑀸 𑀦𑀦𑁆𑀤𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺.

𑀦𑀸𑀝𑀓𑀺𑀢𑁆𑀣𑀺𑀬𑁄 ‘‘𑀓𑀼𑀳𑀺𑀁 𑀕𑀢𑀢𑁆𑀣, 𑀫𑀳𑀸𑀭𑀸𑀚𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀅𑀦𑀸𑀭𑁄𑀘𑁂𑀢𑀼𑀓𑀸𑀫𑁄𑀧𑀺 𑀢𑀸𑀳𑀺 𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑁄 ‘‘𑀲𑀼𑀚𑀸𑀢𑀸𑀬 𑀲𑀦𑁆𑀢𑀺𑀓’’𑀦𑁆𑀢𑀺 𑀆𑀳. 𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑀸, 𑀫𑀳𑀸𑀭𑀸𑀚𑀸𑀢𑀺? 𑀓𑀦𑁆𑀤𑀭𑀧𑀸𑀤𑁂𑀢𑀺. 𑀇𑀤𑀸𑀦𑀺 𑀓𑀼𑀳𑀺𑀦𑁆𑀢𑀺? 𑀦𑀦𑁆𑀤𑀸𑀧𑁄𑀓𑁆𑀔𑀭𑀡𑀺𑀬𑀁 𑀫𑁂 𑀯𑀺𑀲𑁆𑀲𑀝𑁆𑀞𑀸𑀢𑀺. 𑀏𑀣, 𑀪𑁄, 𑀅𑀫𑁆𑀳𑀸𑀓𑀁 𑀅𑀬𑁆𑀬𑀁 𑀧𑀲𑁆𑀲𑀸𑀫𑀸𑀢𑀺 𑀲𑀩𑁆𑀩𑀸 𑀢𑀢𑁆𑀣 𑀅𑀕𑀫𑀁𑀲𑀼. 𑀲𑀸 𑀧𑀼𑀩𑁆𑀩𑁂 𑀲𑀩𑁆𑀩𑀚𑁂𑀝𑁆𑀞𑀺𑀓𑀸 𑀳𑀼𑀢𑁆𑀯𑀸 𑀢𑀸 𑀅𑀯𑀫𑀜𑁆𑀜𑀺𑀢𑁆𑀣. 𑀇𑀤𑀸𑀦𑀺 ¶ 𑀢𑀸𑀧𑀺 𑀢𑀁 𑀤𑀺𑀲𑁆𑀯𑀸 𑁋 ‘‘𑀧𑀲𑁆𑀲𑀣, 𑀪𑁄 𑀅𑀫𑁆𑀳𑀸𑀓𑀁 𑀅𑀬𑁆𑀬𑀸𑀬 𑀫𑀼𑀔𑀁 𑀓𑀓𑁆𑀓𑀝𑀓𑀯𑀺𑀚𑁆𑀛𑀦𑀲𑀽𑀮𑀲𑀤𑀺𑀲’’𑀦𑁆𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀺𑀬𑁄 𑀓𑁂𑀴𑀺𑀁 𑀅𑀓𑀁𑀲𑀼. 𑀲𑀸 𑀅𑀢𑀺𑀯𑀺𑀬 𑀅𑀝𑁆𑀝𑀺𑀬𑀫𑀸𑀦𑀸 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀆𑀳 𑁋 ‘‘𑀫𑀳𑀸𑀭𑀸𑀚, 𑀇𑀫𑀸𑀦𑀺 ¶ 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀯𑀺𑀫𑀸𑀦𑀸𑀦𑀺 𑀯𑀸 𑀦𑀦𑁆𑀤𑀸𑀧𑁄𑀓𑁆𑀔𑀭𑀡𑀻 𑀯𑀸 𑀫𑀬𑁆𑀳𑀁 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀚𑀸𑀢𑀺𑀪𑀽𑀫𑀺𑀬𑁂𑀯 𑀫𑀳𑀸𑀭𑀸𑀚 𑀲𑀢𑁆𑀢𑀸𑀦𑀁 𑀲𑀼𑀔𑀸, 𑀫𑀁 𑀢𑀢𑁆𑀣𑁂𑀯 𑀓𑀦𑁆𑀤𑀭𑀧𑀸𑀤𑁂 𑀯𑀺𑀲𑁆𑀲𑀚𑁆𑀚𑁂𑀳𑀻’’𑀢𑀺. 𑀲𑀓𑁆𑀓𑁄 𑀢𑀁 𑀢𑀢𑁆𑀣 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 ‘‘𑀫𑀫 𑀯𑀘𑀦𑀁 𑀓𑀭𑀺𑀲𑁆𑀲𑀲𑀻’’𑀢𑀺 𑀆𑀳. 𑀓𑀭𑀺𑀲𑁆𑀲𑀸𑀫𑀺, 𑀫𑀳𑀸𑀭𑀸𑀚𑀸𑀢𑀺. 𑀧𑀜𑁆𑀘 𑀲𑀻𑀮𑀸𑀦𑀺 𑀕𑀳𑁂𑀢𑁆𑀯𑀸 𑀅𑀔𑀡𑁆𑀟𑀸𑀦𑀺 𑀓𑀢𑁆𑀯𑀸 𑀭𑀓𑁆𑀔, 𑀓𑀢𑀺𑀧𑀸𑀳𑁂𑀦 𑀢𑀁 𑀏𑀢𑀸𑀲𑀁 𑀚𑁂𑀝𑁆𑀞𑀺𑀓𑀁 𑀓𑀭𑀺𑀲𑁆𑀲𑀸𑀫𑀻𑀢𑀺. 𑀲𑀸 𑀢𑀣𑀸 𑀅𑀓𑀸𑀲𑀺.

𑀲𑀓𑁆𑀓𑁄 ¶ 𑀓𑀢𑀺𑀧𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 ‘‘𑀲𑀓𑁆𑀓𑀸 𑀦𑀼 𑀔𑁄 𑀲𑀻𑀮𑀁 𑀭𑀓𑁆𑀔𑀺𑀢𑀼’’𑀦𑁆𑀢𑀺 𑀕𑀦𑁆𑀢𑁆𑀯𑀸 𑀫𑀘𑁆𑀙𑀭𑀽𑀧𑁂𑀦 𑀉𑀢𑁆𑀢𑀸𑀦𑀓𑁄 𑀳𑀼𑀢𑁆𑀯𑀸 𑀢𑀲𑁆𑀲𑀸 𑀧𑀼𑀭𑀢𑁄 𑀉𑀤𑀓𑀧𑀺𑀝𑁆𑀞𑁂 𑀑𑀲𑀭𑀢𑀺, 𑀲𑀸 ‘‘𑀫𑀢𑀫𑀘𑁆𑀙𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀕𑀦𑁆𑀢𑁆𑀯𑀸 𑀲𑀻𑀲𑁂 𑀅𑀕𑁆𑀕𑀳𑁂𑀲𑀺. 𑀫𑀘𑁆𑀙𑁄 𑀦𑀗𑁆𑀕𑀼𑀝𑁆𑀞𑀁 𑀘𑀸𑀮𑁂𑀲𑀺. 𑀲𑀸 ‘‘𑀚𑀻𑀯𑀢𑀺 𑀫𑀜𑁆𑀜𑁂’’𑀢𑀺 𑀉𑀤𑀓𑁂 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑀓𑁆𑀓𑁄 𑀆𑀓𑀸𑀲𑁂 𑀞𑀢𑁆𑀯𑀸 ‘‘𑀲𑀸𑀥𑀼, 𑀲𑀸𑀥𑀼, 𑀭𑀓𑁆𑀔𑀲𑀺 𑀲𑀺𑀓𑁆𑀔𑀸𑀧𑀤𑀁, 𑀏𑀯𑀁 𑀢𑀁 𑀭𑀓𑁆𑀔𑀫𑀸𑀦𑀁 𑀓𑀢𑀺𑀧𑀸𑀳𑁂𑀦𑁂𑀯 𑀦𑀸𑀝𑀓𑀸𑀦𑀁 𑀚𑁂𑀝𑁆𑀞𑀺𑀓𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀲𑁆𑀲𑀸𑀧𑀺 𑀧𑀜𑁆𑀘 𑀯𑀲𑁆𑀲𑀲𑀢𑀸𑀦𑀺 𑀆𑀬𑀼 𑀅𑀳𑁄𑀲𑀺. 𑀏𑀓𑀤𑀺𑀯𑀲𑀫𑁆𑀧𑀺 𑀉𑀤𑀭𑀧𑀽𑀭𑀁 𑀦𑀸𑀮𑀢𑁆𑀣𑀁, 𑀲𑀼𑀓𑁆𑀔𑀺𑀢𑁆𑀯𑀸 𑀧𑀭𑀺𑀲𑀼𑀓𑁆𑀔𑀺𑀢𑁆𑀯𑀸 𑀫𑀺𑀮𑀸𑀬𑀫𑀸𑀦𑀸𑀧𑀺 𑀲𑀻𑀮𑀁 𑀅𑀔𑀡𑁆𑀟𑁂𑀢𑁆𑀯𑀸 𑀓𑀸𑀮𑀗𑁆𑀓𑀢𑁆𑀯𑀸 𑀩𑀸𑀭𑀸𑀡𑀲𑀺𑀬𑀁 𑀓𑀼𑀫𑁆𑀪𑀓𑀸𑀭𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺.

𑀲𑀓𑁆𑀓𑁄 ‘‘𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀤𑀺𑀲𑁆𑀯𑀸 ‘‘𑀢𑀢𑁄 𑀇𑀥 𑀆𑀦𑁂𑀢𑀼𑀁 𑀦 𑀲𑀓𑁆𑀓𑀸, 𑀚𑀻𑀯𑀺𑀢𑀯𑀼𑀢𑁆𑀢𑀺𑀫𑀲𑁆𑀲𑀸 𑀤𑀲𑁆𑀲𑀸𑀫𑀻’’𑀢𑀺 𑀲𑀼𑀯𑀡𑁆𑀡𑀏𑀴𑀸𑀮𑀼𑀓𑀸𑀦𑀁 𑀬𑀸𑀦𑀓𑀁 𑀧𑀽𑀭𑁂𑀢𑁆𑀯𑀸 𑀫𑀚𑁆𑀛𑁂 𑀕𑀸𑀫𑀲𑁆𑀲 𑀫𑀳𑀮𑁆𑀮𑀓𑀯𑁂𑀲𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀏𑀴𑀸𑀮𑀼𑀓𑀸𑀦𑀺 𑀕𑀡𑁆𑀳𑀣𑀸’’𑀢𑀺 𑀉𑀓𑁆𑀓𑀼𑀝𑁆𑀞𑀺𑀫𑀓𑀸𑀲𑀺. 𑀲𑀫𑀦𑁆𑀢𑀸 𑀕𑀸𑀫𑀯𑀸𑀲𑀺𑀓𑀸 𑀆𑀕𑀦𑁆𑀢𑁆𑀯𑀸 ‘‘𑀤𑁂𑀳𑀺, 𑀢𑀸𑀢𑀸’’𑀢𑀺 𑀆𑀳𑀁𑀲𑀼. 𑀅𑀳𑀁 𑀲𑀻𑀮𑀭𑀓𑁆𑀔𑀓𑀸𑀦𑀁 𑀤𑁂𑀫𑀺, 𑀢𑀼𑀫𑁆𑀳𑁂 𑀲𑀻𑀮𑀁 𑀭𑀓𑁆𑀔𑀣𑀸𑀢𑀺. 𑀢𑀸𑀢 𑀫𑀬𑀁 𑀲𑀻𑀮𑀁 𑀦𑀸𑀫 𑀓𑀻𑀤𑀺𑀲𑀦𑁆𑀢𑀺𑀧𑀺 𑀦 𑀚𑀸𑀦𑀸𑀫, 𑀫𑀽𑀮𑁂𑀦 𑀤𑁂𑀳𑀻𑀢𑀺. ‘‘𑀲𑀻𑀮𑀭𑀓𑁆𑀔𑀓𑀸𑀦𑀁𑀬𑁂𑀯 𑀤𑀫𑁆𑀫𑀻’’𑀢𑀺 𑀆𑀳. ‘‘𑀏𑀣, 𑀭𑁂 𑀓𑁄𑀲𑀺 𑀅𑀬𑀁 𑀏𑀴𑀸𑀮𑀼𑀓𑀫𑀳𑀮𑁆𑀮𑀓𑁄’’𑀢𑀺 𑀲𑀩𑁆𑀩𑁂 𑀦𑀺𑀯𑀢𑁆𑀢𑀺𑀁𑀲𑀼.

𑀲𑀸 𑀤𑀸𑀭𑀺𑀓𑀸 𑀧𑀼𑀘𑁆𑀙𑀺 𑁋 ‘‘𑀅𑀫𑁆𑀫, 𑀢𑀼𑀫𑁆𑀳𑁂 𑀏𑀴𑀸𑀮𑀼𑀓𑀢𑁆𑀣𑀸𑀬 𑀕𑀢𑀸 𑀢𑀼𑀘𑁆𑀙𑀳𑀢𑁆𑀣𑀸𑀯 𑀆𑀕𑀢𑀸’’𑀢𑀺. 𑀓𑁄𑀲𑀺, 𑀅𑀫𑁆𑀫, 𑀏𑀴𑀸𑀮𑀼𑀓𑀫𑀳𑀮𑁆𑀮𑀓𑁄 ‘‘𑀅𑀳𑀁 𑀲𑀻𑀮𑀭𑀓𑁆𑀔𑀓𑀸𑀦𑀁 𑀤𑀫𑁆𑀫𑀻’’𑀢𑀺 𑀯𑀤𑀢𑀺, 𑀦𑀽𑀦𑀺𑀫𑀲𑁆𑀲 𑀤𑀸𑀭𑀺𑀓𑀸 𑀲𑀻𑀮𑀁 𑀔𑀸𑀤𑀺𑀢𑁆𑀯𑀸 𑀯𑀢𑁆𑀢𑀦𑁆𑀢𑀺, 𑀫𑀬𑀁 𑀲𑀻𑀮𑀫𑁂𑀯 𑀦 𑀚𑀸𑀦𑀸𑀫𑀸𑀢𑀺. 𑀲𑀸 ‘‘𑀫𑀬𑁆𑀳𑀁 𑀆𑀦𑀻𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀕𑀦𑁆𑀢𑁆𑀯𑀸 ‘‘𑀏𑀴𑀸𑀮𑀼𑀓𑀁, 𑀢𑀸𑀢, 𑀤𑁂𑀳𑀻’’𑀢𑀺 𑀆𑀳. ‘‘𑀢𑁆𑀯𑀁 𑀲𑀻𑀮𑀸𑀦𑀺 𑀭𑀓𑁆𑀔𑀲𑀺 𑀅𑀫𑁆𑀫𑀸’’𑀢𑀺? ‘‘𑀆𑀫, 𑀢𑀸𑀢 𑀭𑀓𑁆𑀔𑀸𑀫𑀻’’𑀢𑀺. 𑀇𑀤𑀁 𑀫𑀬𑀸 𑀢𑀼𑀬𑁆𑀳𑀫𑁂𑀯 𑀆𑀪𑀢𑀦𑁆𑀢𑀺 𑀕𑁂𑀳𑀤𑁆𑀯𑀸𑀭𑁂 𑀬𑀸𑀦𑁂𑀦 𑀲𑀤𑁆𑀥𑀺𑀁 𑀞𑀧𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀸𑀧𑀺 𑀬𑀸𑀯𑀚𑀻𑀯𑀁 𑀲𑀻𑀮𑀁 𑀭𑀓𑁆𑀔𑀺𑀢𑁆𑀯𑀸 𑀘𑀯𑀺𑀢𑁆𑀯𑀸 𑀯𑁂𑀧𑀘𑀺𑀢𑁆𑀢𑀺𑀅𑀲𑀼𑀭𑀲𑁆𑀲 𑀥𑀻𑀢𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑀻𑀮𑀦𑀺𑀲𑁆𑀲𑀦𑁆𑀤𑁂𑀦 ¶ 𑀧𑀸𑀲𑀸𑀤𑀺𑀓𑀸 𑀅𑀳𑁄𑀲𑀺. 𑀲𑁄 ¶ ‘‘𑀥𑀻𑀢𑀼𑀯𑀺𑀯𑀸𑀳𑀫𑀗𑁆𑀕𑀮𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀲𑀼𑀭𑁂 𑀲𑀦𑁆𑀦𑀺𑀧𑀸𑀢𑁂𑀲𑀺.

𑀲𑀓𑁆𑀓𑁄 ‘‘𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀑𑀮𑁄𑀓𑁂𑀦𑁆𑀢𑁄 ‘‘𑀅𑀲𑀼𑀭𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀸, 𑀅𑀚𑁆𑀚𑀲𑁆𑀲𑀸 𑀯𑀺𑀯𑀸𑀳𑀫𑀗𑁆𑀕𑀮𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀤𑀺𑀲𑁆𑀯𑀸 ‘‘𑀇𑀤𑀸𑀦𑀺 𑀬𑀁𑀓𑀺𑀜𑁆𑀘𑀺 𑀓𑀢𑁆𑀯𑀸 𑀆𑀦𑁂𑀢𑀩𑁆𑀩𑀸 𑀫𑀬𑀸’’𑀢𑀺 𑀅𑀲𑀼𑀭𑀯𑀡𑁆𑀡𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀅𑀲𑀼𑀭𑀸𑀦𑀁 𑀅𑀦𑁆𑀢𑀭𑁂 𑀅𑀝𑁆𑀞𑀸𑀲𑀺. ‘‘𑀢𑀯 ¶ 𑀲𑀸𑀫𑀺𑀓𑀁 𑀯𑀤𑁂𑀳𑀻’’𑀢𑀺 𑀢𑀲𑁆𑀲𑀸 𑀳𑀢𑁆𑀣𑁂 𑀧𑀺𑀢𑀸 𑀧𑀼𑀧𑁆𑀨𑀤𑀸𑀫𑀁 𑀅𑀤𑀸𑀲𑀺 ‘‘𑀬𑀁 𑀇𑀘𑁆𑀙𑀲𑀺, 𑀢𑀲𑁆𑀲𑀽𑀧𑀭𑀺 𑀔𑀺𑀧𑀸𑀳𑀻’’𑀢𑀺. 𑀲𑀸 𑀑𑀮𑁄𑀓𑁂𑀦𑁆𑀢𑀻 𑀲𑀓𑁆𑀓𑀁 𑀤𑀺𑀲𑁆𑀯𑀸 𑀧𑀼𑀩𑁆𑀩𑀲𑀦𑁆𑀦𑀺𑀯𑀸𑀲𑁂𑀦 𑀲𑀜𑁆𑀚𑀸𑀢𑀲𑀺𑀦𑁂𑀳𑀸 ‘‘𑀅𑀬𑀁 𑀫𑁂 𑀲𑀸𑀫𑀺𑀓𑁄’’𑀢𑀺 𑀢𑀲𑁆𑀲𑀽𑀧𑀭𑀺 𑀤𑀸𑀫𑀁 𑀔𑀺𑀧𑀺. 𑀲𑁄 𑀢𑀁 𑀩𑀸𑀳𑀸𑀬 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂 𑀉𑀧𑁆𑀧𑀢𑀺, 𑀢𑀲𑁆𑀫𑀺𑀁 𑀔𑀡𑁂 𑀅𑀲𑀼𑀭𑀸 𑀲𑀜𑁆𑀚𑀸𑀦𑀺𑀁𑀲𑀼. 𑀢𑁂 ‘‘𑀕𑀡𑁆𑀳𑀣, 𑀕𑀡𑁆𑀳𑀣, 𑀚𑀭𑀲𑀓𑁆𑀓𑀁, 𑀯𑁂𑀭𑀺𑀓𑁄 𑀅𑀫𑁆𑀳𑀸𑀓𑀁, 𑀦 𑀫𑀬𑀁 𑀏𑀢𑀲𑁆𑀲 𑀤𑀸𑀭𑀺𑀓𑀁 𑀤𑀲𑁆𑀲𑀸𑀫𑀸’’𑀢𑀺 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀯𑁂𑀧𑀘𑀺𑀢𑁆𑀢𑀺 𑀧𑀼𑀘𑁆𑀙𑀺 ‘‘𑀓𑁂𑀦𑀸𑀳𑀝𑀸’’𑀢𑀺? ‘‘𑀚𑀭𑀲𑀓𑁆𑀓𑁂𑀦 𑀫𑀳𑀸𑀭𑀸𑀚𑀸’’𑀢𑀺. ‘‘𑀅𑀯𑀲𑁂𑀲𑁂𑀲𑀼 𑀅𑀬𑀫𑁂𑀯 𑀲𑁂𑀝𑁆𑀞𑁄, 𑀅𑀧𑁂𑀣𑀸’’𑀢𑀺 𑀆𑀳. 𑀲𑀓𑁆𑀓𑁄 𑀦𑀁 𑀦𑁂𑀢𑁆𑀯𑀸 𑀅𑀟𑁆𑀠𑀢𑀺𑀬𑀓𑁄𑀝𑀺𑀦𑀸𑀝𑀓𑀸𑀦𑀁 𑀚𑁂𑀝𑁆𑀞𑀺𑀓𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑀸 𑀲𑀓𑁆𑀓𑀁 𑀯𑀭𑀁 𑀬𑀸𑀘𑀺 𑁋 ‘‘𑀫𑀳𑀸𑀭𑀸𑀚, 𑀫𑀬𑁆𑀳𑀁 𑀇𑀫𑀲𑁆𑀫𑀺𑀁 𑀤𑁂𑀯𑀮𑁄𑀓𑁂 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀪𑀸𑀢𑀸 𑀯𑀸 𑀪𑀕𑀺𑀦𑀻 𑀯𑀸 𑀦𑀢𑁆𑀣𑀺, 𑀬𑀢𑁆𑀣 𑀬𑀢𑁆𑀣 𑀕𑀘𑁆𑀙𑀲𑀺, 𑀢𑀢𑁆𑀣 𑀢𑀢𑁆𑀣 𑀫𑀁 𑀕𑀳𑁂𑀢𑁆𑀯𑀸𑀯 𑀕𑀘𑁆𑀙 𑀫𑀳𑀸𑀭𑀸𑀚𑀸’’𑀢𑀺. 𑀲𑀓𑁆𑀓𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀜𑁆𑀜𑀁 𑀅𑀤𑀸𑀲𑀺.

𑀏𑀯𑀁 𑀫𑀘𑀮𑀕𑀸𑀫𑀓𑁂 𑀫𑀖𑀫𑀸𑀡𑀯𑀓𑀸𑀮𑀢𑁄 𑀧𑀝𑁆𑀞𑀸𑀬 𑀯𑀺𑀲𑀼𑀤𑁆𑀥𑀪𑀸𑀯𑀫𑀲𑁆𑀲 𑀲𑀫𑁆𑀧𑀲𑁆𑀲𑀦𑁆𑀢𑁄 𑀪𑀕𑀯𑀸 ‘‘𑀤𑀻𑀖𑀭𑀢𑁆𑀢𑀁 𑀯𑀺𑀲𑀼𑀤𑁆𑀥𑁄 𑀔𑁄 𑀅𑀬𑀁 𑀬𑀓𑁆𑀔𑁄’’𑀢𑀺 𑀆𑀳. 𑀅𑀢𑁆𑀣𑀲𑀜𑁆𑀳𑀺𑀢𑀦𑁆𑀢𑀺 𑀅𑀢𑁆𑀣𑀦𑀺𑀲𑁆𑀲𑀺𑀢𑀁 𑀓𑀸𑀭𑀡𑀦𑀺𑀲𑁆𑀲𑀺𑀢𑀁.

𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑀯𑀡𑁆𑀡𑀦𑀸

𑁩𑁫𑁭. 𑀓𑀺𑀁 𑀲𑀁𑀬𑁄𑀚𑀦𑀸𑀢𑀺 𑀓𑀺𑀁 𑀩𑀦𑁆𑀥𑀦𑀸, 𑀓𑁂𑀦 𑀩𑀦𑁆𑀥𑀦𑁂𑀦 𑀩𑀤𑁆𑀥𑀸 𑀳𑀼𑀢𑁆𑀯𑀸. 𑀧𑀼𑀣𑀼𑀓𑀸𑀬𑀸𑀢𑀺 𑀩𑀳𑀼𑀚𑀦𑀸. 𑀅𑀯𑁂𑀭𑀸𑀢𑀺 𑀅𑀧𑁆𑀧𑀝𑀺𑀖𑀸. 𑀅𑀤𑀡𑁆𑀟𑀸𑀢𑀺 𑀆𑀯𑀼𑀥𑀤𑀡𑁆𑀟𑀥𑀦𑀤𑀡𑁆𑀟𑀯𑀺𑀦𑀺𑀫𑀼𑀢𑁆𑀢𑀸. 𑀅𑀲𑀧𑀢𑁆𑀢𑀸𑀢𑀺 𑀅𑀧𑀘𑁆𑀘𑀢𑁆𑀣𑀺𑀓𑀸. 𑀅𑀩𑁆𑀬𑀸𑀧𑀚𑁆𑀚𑀸𑀢𑀺 𑀯𑀺𑀕𑀢𑀤𑁄𑀫𑀦𑀲𑁆𑀲𑀸. 𑀯𑀺𑀳𑀭𑁂𑀫𑀼 𑀅𑀯𑁂𑀭𑀺𑀦𑁄𑀢𑀺 𑀅𑀳𑁄 𑀯𑀢 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀅𑀯𑁂𑀭𑀺𑀦𑁄 𑀯𑀺𑀳𑀭𑁂𑀬𑁆𑀬𑀸𑀫, 𑀓𑀢𑁆𑀣𑀘𑀺 𑀓𑁄𑀧𑀁 𑀦 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀘𑁆𑀙𑀭𑀸𑀬 𑀕𑀳𑀺𑀢𑀓𑀁 𑀚𑀗𑁆𑀖𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀧𑀭𑀺𑀪𑀼𑀜𑁆𑀚𑁂𑀬𑁆𑀬𑀸𑀫𑀸𑀢𑀺 𑀤𑀸𑀦𑀁 𑀤𑀢𑁆𑀯𑀸 𑀧𑀽𑀚𑀁 𑀓𑀢𑁆𑀯𑀸 𑀘 𑀧𑀢𑁆𑀣𑀬𑀦𑁆𑀢𑀺. 𑀇𑀢𑀺 𑀘 𑀦𑁂𑀲𑀁 𑀳𑁄𑀢𑀻𑀢𑀺 𑀏𑀯𑀜𑁆𑀘 𑀦𑁂𑀲𑀁 𑀅𑀬𑀁 𑀧𑀢𑁆𑀣𑀦𑀸 𑀳𑁄𑀢𑀺. 𑀅𑀣 𑀘 𑀧𑀦𑀸𑀢𑀺 𑀏𑀯𑀁 𑀧𑀢𑁆𑀣𑀦𑀸𑀬 𑀲𑀢𑀺𑀧𑀺.

𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀲𑀁𑀬𑁄𑀚𑀦𑀸𑀢𑀺 𑀧𑀭𑀲𑀫𑁆𑀧𑀢𑁆𑀢𑀺𑀔𑀻𑀬𑀦𑀮𑀓𑁆𑀔𑀡𑀸 𑀇𑀲𑁆𑀲𑀸, 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀲𑁆𑀲 ¶ 𑀅𑀲𑀳𑀦𑀮𑀓𑁆𑀔𑀡𑀁 ¶ 𑀫𑀘𑁆𑀙𑀭𑀺𑀬𑀁, 𑀇𑀲𑁆𑀲𑀸 𑀘 𑀫𑀘𑁆𑀙𑀭𑀺𑀬𑀜𑁆𑀘 𑀲𑀁𑀬𑁄𑀚𑀦𑀁 𑀏𑀢𑁂𑀲𑀦𑁆𑀢𑀺 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀲𑀁𑀬𑁄𑀚𑀦𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀸𑀦𑀺 𑀅𑀪𑀺𑀥𑀫𑁆𑀫𑁂 𑀯𑀼𑀢𑁆𑀢𑀸𑀦𑁂𑀯.

𑀆𑀯𑀸𑀲𑀫𑀘𑁆𑀙𑀭𑀺𑀬𑁂𑀦 ¶ 𑀧𑀦𑁂𑀢𑁆𑀣 𑀬𑀓𑁆𑀔𑁄 𑀯𑀸 𑀧𑁂𑀢𑁄 𑀯𑀸 𑀳𑀼𑀢𑁆𑀯𑀸 𑀢𑀲𑁆𑀲𑁂𑀯 𑀆𑀯𑀸𑀲𑀲𑁆𑀲 𑀲𑀗𑁆𑀓𑀸𑀭𑀁 𑀲𑀻𑀲𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀘𑀭𑀢𑀺. 𑀓𑀼𑀮𑀫𑀘𑁆𑀙𑀭𑀺𑀬𑁂𑀦 𑀢𑀲𑁆𑀫𑀺𑀁 𑀓𑀼𑀮𑁂 𑀅𑀜𑁆𑀜𑁂𑀲𑀁 𑀤𑀸𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀪𑀺𑀦𑁆𑀦𑀁 𑀯𑀢𑀺𑀤𑀁 𑀓𑀼𑀮𑀁 𑀫𑀫𑀸’’𑀢𑀺 𑀘𑀺𑀦𑁆𑀢𑀬𑀢𑁄 𑀮𑁄𑀳𑀺𑀢𑀫𑁆𑀧𑀺 𑀫𑀼𑀔𑀢𑁄 𑀉𑀕𑁆𑀕𑀘𑁆𑀙𑀢𑀺, 𑀓𑀼𑀘𑁆𑀙𑀺𑀯𑀺𑀭𑁂𑀘𑀦𑀫𑁆𑀧𑀺 𑀳𑁄𑀢𑀺, 𑀅𑀦𑁆𑀢𑀸𑀦𑀺𑀧𑀺 𑀔𑀡𑁆𑀟𑀸𑀔𑀡𑁆𑀟𑀸𑀦𑀺 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀦𑁆𑀢𑀺. 𑀮𑀸𑀪𑀫𑀘𑁆𑀙𑀭𑀺𑀬𑁂𑀦 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀲𑀦𑁆𑀢𑀓𑁂 𑀮𑀸𑀪𑁂 𑀫𑀘𑁆𑀙𑀭𑀸𑀬𑀺𑀢𑁆𑀯𑀸 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀬𑀓𑁆𑀔𑁄 𑀯𑀸 𑀧𑁂𑀢𑁄 𑀯𑀸 𑀫𑀳𑀸𑀅𑀚𑀕𑀭𑁄 𑀯𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀢𑀺. 𑀲𑀭𑀻𑀭𑀯𑀡𑁆𑀡𑀕𑀼𑀡𑀯𑀡𑁆𑀡𑀫𑀘𑁆𑀙𑀭𑀺𑀬𑁂𑀦 𑀧𑀦 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀫𑀘𑁆𑀙𑀭𑀺𑀬𑁂𑀦 𑀘 𑀅𑀢𑁆𑀢𑀦𑁄𑀯 𑀯𑀡𑁆𑀡𑀁 𑀯𑀡𑁆𑀡𑁂𑀢𑀺, 𑀦 𑀧𑀭𑁂𑀲𑀁 𑀯𑀡𑁆𑀡𑀁, ‘‘𑀓𑀺𑀁 𑀯𑀡𑁆𑀡𑁄 𑀏𑀲𑁄’’𑀢𑀺 𑀢𑀁 𑀢𑀁 𑀤𑁄𑀲𑀁 𑀯𑀤𑀦𑁆𑀢𑁄 𑀧𑀭𑀺𑀬𑀢𑁆𑀢𑀺𑀜𑁆𑀘 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀅𑀤𑁂𑀦𑁆𑀢𑁄 𑀤𑀼𑀩𑁆𑀩𑀡𑁆𑀡𑁄 𑀘𑁂𑀯 𑀏𑀴𑀫𑀽𑀕𑁄 𑀘 𑀳𑁄𑀢𑀺.

𑀅𑀧𑀺𑀘 𑀆𑀯𑀸𑀲𑀫𑀘𑁆𑀙𑀭𑀺𑀬𑁂𑀦 𑀮𑁄𑀳𑀕𑁂𑀳𑁂 𑀧𑀘𑁆𑀘𑀢𑀺. 𑀓𑀼𑀮𑀫𑀘𑁆𑀙𑀭𑀺𑀬𑁂𑀦 𑀅𑀧𑁆𑀧𑀮𑀸𑀪𑁄 𑀳𑁄𑀢𑀺. 𑀮𑀸𑀪𑀫𑀘𑁆𑀙𑀭𑀺𑀬𑁂𑀦 𑀕𑀽𑀣𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀯𑀡𑁆𑀡𑀫𑀘𑁆𑀙𑀭𑀺𑀬𑁂𑀦 𑀪𑀯𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀯𑀡𑁆𑀡𑁄 𑀦𑀸𑀫 𑀦 𑀳𑁄𑀢𑀺. 𑀥𑀫𑁆𑀫𑀫𑀘𑁆𑀙𑀭𑀺𑀬𑁂𑀦 𑀓𑀼𑀓𑁆𑀓𑀼𑀴𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀇𑀤𑀁 𑀧𑀦 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀲𑀁𑀬𑁄𑀚𑀦𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀳𑀻𑀬𑀢𑀺. 𑀬𑀸𑀯 𑀢𑀁 𑀦𑀧𑁆𑀧𑀳𑀻𑀬𑀢𑀺, 𑀢𑀸𑀯 𑀤𑁂𑀯𑀫𑀦𑀼𑀲𑁆𑀲𑀸 𑀅𑀯𑁂𑀭𑀢𑀸𑀤𑀻𑀦𑀺 𑀧𑀢𑁆𑀣𑀬𑀦𑁆𑀢𑀸𑀧𑀺 𑀯𑁂𑀭𑀸𑀤𑀻𑀳𑀺 𑀦 𑀧𑀭𑀺𑀫𑀼𑀘𑁆𑀘𑀦𑁆𑀢𑀺𑀬𑁂𑀯.

𑀢𑀺𑀡𑁆𑀡𑀸 𑀫𑁂𑀢𑁆𑀣 𑀓𑀗𑁆𑀔𑀸𑀢𑀺 𑀏𑀢𑀲𑁆𑀫𑀺𑀁 𑀧𑀜𑁆𑀳𑁂 𑀫𑀬𑀸 𑀢𑀼𑀫𑁆𑀳𑀸𑀓𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀓𑀗𑁆𑀔𑀸 𑀢𑀺𑀡𑁆𑀡𑀸𑀢𑀺 𑀯𑀤𑀢𑀺, 𑀦 𑀫𑀕𑁆𑀕𑀯𑀲𑁂𑀦 𑀢𑀺𑀡𑁆𑀡𑀓𑀗𑁆𑀔𑀢𑀁 𑀤𑀻𑀧𑁂𑀢𑀺. 𑀯𑀺𑀕𑀢𑀸 𑀓𑀣𑀁𑀓𑀣𑀸𑀢𑀺 𑀇𑀤𑀁 𑀓𑀣𑀁, 𑀇𑀤𑀁 𑀓𑀣𑀦𑁆𑀢𑀺 𑀅𑀬𑀫𑁆𑀧𑀺 𑀓𑀣𑀁𑀓𑀣𑀸 𑀯𑀺𑀕𑀢𑀸.

𑁩𑁫𑁮. 𑀦𑀺𑀤𑀸𑀦𑀸𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀧𑀺𑀬𑀸𑀧𑁆𑀧𑀺𑀬𑀦𑀺𑀤𑀸𑀦𑀦𑁆𑀢𑀺 𑀧𑀺𑀬𑀲𑀢𑁆𑀢𑀲𑀗𑁆𑀔𑀸𑀭𑀦𑀺𑀤𑀸𑀦𑀁 𑀫𑀘𑁆𑀙𑀭𑀺𑀬𑀁, 𑀅𑀧𑁆𑀧𑀺𑀬𑀲𑀢𑁆𑀢𑀲𑀗𑁆𑀔𑀸𑀭𑀦𑀺𑀤𑀸𑀦𑀸 𑀇𑀲𑁆𑀲𑀸. 𑀉𑀪𑀬𑀁 𑀯𑀸 𑀉𑀪𑀬𑀦𑀺𑀤𑀸𑀦𑀁. 𑀧𑀩𑁆𑀩𑀚𑀺𑀢𑀲𑁆𑀲 𑀳𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀬𑁄, 𑀕𑀳𑀝𑁆𑀞𑀲𑁆𑀲 𑀧𑀼𑀢𑁆𑀢𑀸𑀤𑀬𑁄 𑀳𑀢𑁆𑀣𑀺𑀅𑀲𑁆𑀲𑀸𑀤𑀬𑁄 𑀯𑀸 𑀲𑀢𑁆𑀢𑀸 𑀧𑀺𑀬𑀸 𑀳𑁄𑀦𑁆𑀢𑀺 𑀓𑁂𑀴𑀸𑀬𑀺𑀢𑀸 𑀫𑀫𑀸𑀬𑀺𑀢𑀸, 𑀫𑀼𑀳𑀼𑀢𑁆𑀢𑀫𑁆𑀧𑀺 𑀢𑁂 𑀅𑀧𑀲𑁆𑀲𑀦𑁆𑀢𑁄 𑀅𑀥𑀺𑀯𑀸𑀲𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑁄 𑀅𑀜𑁆𑀜𑀁 𑀢𑀸𑀤𑀺𑀲𑀁 𑀧𑀺𑀬𑀲𑀢𑁆𑀢𑀁 𑀮𑀪𑀦𑁆𑀢𑀁 𑀤𑀺𑀲𑁆𑀯𑀸 𑀇𑀲𑁆𑀲𑀁 𑀓𑀭𑁄𑀢𑀺. ‘‘𑀇𑀫𑀺𑀦𑀸 𑀅𑀫𑁆𑀳𑀸𑀓𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀅𑀢𑁆𑀣𑀺, 𑀫𑀼𑀳𑀼𑀢𑁆𑀢𑀁 𑀢𑀸𑀯 ¶ 𑀦𑀁 𑀤𑁂𑀣𑀸’’𑀢𑀺 𑀢𑀫𑁂𑀯 𑀅𑀜𑁆𑀜𑁂𑀳𑀺 𑀬𑀸𑀘𑀺𑀢𑁄 ‘‘𑀦 𑀲𑀓𑁆𑀓𑀸 𑀤𑀸𑀢𑀼𑀁, 𑀓𑀺𑀮𑀫𑀺𑀲𑁆𑀲𑀢𑀺 𑀯𑀸 𑀉𑀓𑁆𑀓𑀡𑁆𑀞𑀺𑀲𑁆𑀲𑀢𑀺 𑀯𑀸’’𑀢𑀺𑀆𑀤𑀻𑀦𑀺 ¶ 𑀯𑀢𑁆𑀯𑀸 𑀫𑀘𑁆𑀙𑀭𑀺𑀬𑀁 𑀓𑀭𑁄𑀢𑀺. 𑀏𑀯𑀁 𑀢𑀸𑀯 𑀉𑀪𑀬𑀫𑁆𑀧𑀺 𑀧𑀺𑀬𑀲𑀢𑁆𑀢𑀦𑀺𑀤𑀸𑀦𑀁 𑀳𑁄𑀢𑀺. 𑀪𑀺𑀓𑁆𑀔𑀼𑀲𑁆𑀲 𑀧𑀦 𑀧𑀢𑁆𑀢𑀘𑀻𑀯𑀭𑀧𑀭𑀺𑀓𑁆𑀔𑀸𑀭𑀚𑀸𑀢𑀁, 𑀕𑀳𑀝𑁆𑀞𑀲𑁆𑀲 𑀯𑀸 𑀅𑀮𑀗𑁆𑀓𑀸𑀭𑀸𑀤𑀺𑀉𑀧𑀓𑀭𑀡𑀁 𑀧𑀺𑀬𑀁 𑀳𑁄𑀢𑀺 𑀫𑀦𑀸𑀧𑀁, 𑀲𑁄 𑀅𑀜𑁆𑀜𑀲𑁆𑀲 ¶ 𑀢𑀸𑀤𑀺𑀲𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀅𑀳𑁄 𑀯𑀢𑀲𑁆𑀲 𑀏𑀯𑀭𑀽𑀧𑀁 𑀦 𑀪𑀯𑁂𑀬𑁆𑀬𑀸’’𑀢𑀺 𑀇𑀲𑁆𑀲𑀁 𑀓𑀭𑁄𑀢𑀺, 𑀬𑀸𑀘𑀺𑀢𑁄 𑀯𑀸𑀧𑀺 ‘‘𑀫𑀬𑀫𑁆𑀧𑁂𑀢𑀁 𑀫𑀫𑀸𑀬𑀦𑁆𑀢𑀸 𑀦 𑀧𑀭𑀺𑀪𑀼𑀜𑁆𑀚𑀸𑀫, 𑀦 𑀲𑀓𑁆𑀓𑀸 𑀤𑀸𑀢𑀼’’𑀦𑁆𑀢𑀺 𑀫𑀘𑁆𑀙𑀭𑀺𑀬𑀁 𑀓𑀭𑁄𑀢𑀺. 𑀏𑀯𑀁 𑀉𑀪𑀬𑀫𑁆𑀧𑀺 𑀧𑀺𑀬𑀲𑀗𑁆𑀔𑀸𑀭𑀦𑀺𑀤𑀸𑀦𑀁 𑀳𑁄𑀢𑀺. 𑀅𑀧𑁆𑀧𑀺𑀬𑁂 𑀧𑀦 𑀢𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀲𑀢𑁆𑀢𑁂 𑀘 𑀲𑀗𑁆𑀔𑀸𑀭𑁂 𑀘 𑀮𑀪𑀺𑀢𑁆𑀯𑀸 𑀲𑀘𑁂𑀧𑀺𑀲𑁆𑀲 𑀢𑁂 𑀅𑀫𑀦𑀸𑀧𑀸 𑀳𑁄𑀦𑁆𑀢𑀺, 𑀢𑀣𑀸𑀧𑀺 𑀓𑀺𑀮𑁂𑀲𑀸𑀦𑀁 𑀯𑀺𑀧𑀭𑀻𑀢𑀯𑀼𑀢𑁆𑀢𑀺𑀢𑀸𑀬 ‘‘𑀞𑀧𑁂𑀢𑁆𑀯𑀸 𑀫𑀁 𑀓𑁄 𑀅𑀜𑁆𑀜𑁄 𑀏𑀯𑀭𑀽𑀧𑀲𑁆𑀲 𑀮𑀸𑀪𑀻’’𑀢𑀺 𑀇𑀲𑁆𑀲𑀁 𑀯𑀸 𑀓𑀭𑁄𑀢𑀺, 𑀬𑀸𑀘𑀺𑀢𑁄 𑀢𑀸𑀯𑀓𑀸𑀮𑀺𑀓𑀫𑁆𑀧𑀺 𑀅𑀤𑀤𑀫𑀸𑀦𑁄 𑀫𑀘𑁆𑀙𑀭𑀺𑀬𑀁 𑀯𑀸 𑀓𑀭𑁄𑀢𑀺. 𑀏𑀯𑀁 𑀉𑀪𑀬𑀫𑁆𑀧𑀺 𑀅𑀧𑁆𑀧𑀺𑀬𑀲𑀢𑁆𑀢𑀲𑀗𑁆𑀔𑀸𑀭𑀦𑀺𑀤𑀸𑀦𑀁 𑀳𑁄𑀢𑀺.

𑀙𑀦𑁆𑀤𑀦𑀺𑀤𑀸𑀦𑀦𑁆𑀢𑀺 𑀏𑀢𑁆𑀣 𑀧𑀭𑀺𑀬𑁂𑀲𑀦𑀙𑀦𑁆𑀤𑁄, 𑀧𑀝𑀺𑀮𑀸𑀪𑀙𑀦𑁆𑀤𑁄, 𑀧𑀭𑀺𑀪𑁄𑀕𑀙𑀦𑁆𑀤𑁄, 𑀲𑀦𑁆𑀦𑀺𑀥𑀺𑀙𑀦𑁆𑀤𑁄, 𑀯𑀺𑀲𑁆𑀲𑀚𑁆𑀚𑀦𑀙𑀦𑁆𑀤𑁄𑀢𑀺 𑀧𑀜𑁆𑀘𑀯𑀺𑀥𑁄 𑀙𑀦𑁆𑀤𑁄.

𑀓𑀢𑀫𑁄 𑀧𑀭𑀺𑀬𑁂𑀲𑀦𑀙𑀦𑁆𑀤𑁄? 𑀇𑀥𑁂𑀓𑀘𑁆𑀘𑁄 𑀅𑀢𑀺𑀢𑁆𑀢𑁄 𑀙𑀦𑁆𑀤𑀚𑀸𑀢𑁄 𑀭𑀽𑀧𑀁 𑀧𑀭𑀺𑀬𑁂𑀲𑀢𑀺, 𑀲𑀤𑁆𑀤𑀁. 𑀕𑀦𑁆𑀥𑀁. 𑀭𑀲𑀁. 𑀨𑁄𑀝𑁆𑀞𑀩𑁆𑀩𑀁 𑀧𑀭𑀺𑀬𑁂𑀲𑀢𑀺, 𑀥𑀦𑀁 𑀧𑀭𑀺𑀬𑁂𑀲𑀢𑀺. 𑀅𑀬𑀁 𑀧𑀭𑀺𑀬𑁂𑀲𑀦𑀙𑀦𑁆𑀤𑁄.

𑀓𑀢𑀫𑁄 𑀧𑀝𑀺𑀮𑀸𑀪𑀙𑀦𑁆𑀤𑁄? 𑀇𑀥𑁂𑀓𑀘𑁆𑀘𑁄 𑀅𑀢𑀺𑀢𑁆𑀢𑁄 𑀙𑀦𑁆𑀤𑀚𑀸𑀢𑁄 𑀭𑀽𑀧𑀁 𑀧𑀝𑀺𑀮𑀪𑀢𑀺, 𑀲𑀤𑁆𑀤𑀁. 𑀕𑀦𑁆𑀥𑀁. 𑀭𑀲𑀁. 𑀨𑁄𑀝𑁆𑀞𑀩𑁆𑀩𑀁 𑀧𑀝𑀺𑀮𑀪𑀢𑀺, 𑀥𑀦𑀁 𑀧𑀝𑀺𑀮𑀪𑀢𑀺. 𑀅𑀬𑀁 𑀧𑀝𑀺𑀮𑀸𑀪𑀙𑀦𑁆𑀤𑁄.

𑀓𑀢𑀫𑁄 𑀧𑀭𑀺𑀪𑁄𑀕𑀙𑀦𑁆𑀤𑁄? 𑀇𑀥𑁂𑀓𑀘𑁆𑀘𑁄 𑀅𑀢𑀺𑀢𑁆𑀢𑁄 𑀙𑀦𑁆𑀤𑀚𑀸𑀢𑁄 𑀭𑀽𑀧𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀲𑀤𑁆𑀤𑀁. 𑀕𑀦𑁆𑀥𑀁. 𑀭𑀲𑀁. 𑀨𑁄𑀝𑁆𑀞𑀩𑁆𑀩𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀥𑀦𑀁 𑀧𑀭𑀺𑀪𑀼𑀜𑁆𑀚𑀢𑀺. 𑀅𑀬𑀁 𑀧𑀭𑀺𑀪𑁄𑀕𑀙𑀦𑁆𑀤𑁄.

𑀓𑀢𑀫𑁄 𑀲𑀦𑁆𑀦𑀺𑀥𑀺𑀙𑀦𑁆𑀤𑁄? 𑀇𑀥𑁂𑀓𑀘𑁆𑀘𑁄 𑀅𑀢𑀺𑀢𑁆𑀢𑁄 𑀙𑀦𑁆𑀤𑀚𑀸𑀢𑁄 𑀥𑀦𑀲𑀦𑁆𑀦𑀺𑀘𑀬𑀁 𑀓𑀭𑁄𑀢𑀺 ‘‘𑀆𑀧𑀤𑀸𑀲𑀼 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀬𑀁 𑀲𑀦𑁆𑀦𑀺𑀥𑀺𑀙𑀦𑁆𑀤𑁄.

𑀓𑀢𑀫𑁄 𑀯𑀺𑀲𑁆𑀲𑀚𑁆𑀚𑀦𑀙𑀦𑁆𑀤𑁄? 𑀇𑀥𑁂𑀓𑀘𑁆𑀘𑁄 𑀅𑀢𑀺𑀢𑁆𑀢𑁄 𑀙𑀦𑁆𑀤𑀚𑀸𑀢𑁄 𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀳𑀢𑁆𑀣𑀸𑀭𑁄𑀳𑀸𑀦𑀁, 𑀅𑀲𑁆𑀲𑀸𑀭𑁄𑀳𑀸𑀦𑀁, 𑀭𑀣𑀺𑀓𑀸𑀦𑀁, 𑀥𑀦𑀼𑀕𑁆𑀕𑀳𑀸𑀦𑀁 𑁋 ‘‘𑀇𑀫𑁂 𑀫𑀁 𑀭𑀓𑁆𑀔𑀺𑀲𑁆𑀲𑀦𑁆𑀢𑀺 𑀕𑁄𑀧𑀺𑀲𑁆𑀲𑀦𑁆𑀢𑀺 𑀫𑀫𑀸𑀬𑀺𑀲𑁆𑀲𑀦𑁆𑀢𑀺 𑀲𑀫𑁆𑀧𑀭𑀺𑀯𑀸𑀭𑀬𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀬𑀁 𑀯𑀺𑀲𑁆𑀲𑀚𑁆𑀚𑀦𑀙𑀦𑁆𑀤𑁄. 𑀇𑀫𑁂 𑀧𑀜𑁆𑀘 𑀙𑀦𑁆𑀤𑀸. 𑀇𑀥 𑀢𑀡𑁆𑀳𑀸𑀫𑀢𑁆𑀢𑀫𑁂𑀯, 𑀢𑀁 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁.

𑀯𑀺𑀢𑀓𑁆𑀓𑀦𑀺𑀤𑀸𑀦𑁄𑀢𑀺 𑀏𑀢𑁆𑀣 ‘‘𑀮𑀸𑀪𑀁 𑀧𑀝𑀺𑀘𑁆𑀘 𑀯𑀺𑀦𑀺𑀘𑁆𑀙𑀬𑁄’’𑀢𑀺 (𑀤𑀻. 𑀦𑀺. 𑁨.𑁧𑁧𑁦) 𑀏𑀯𑀁 𑀯𑀼𑀢𑁆𑀢𑁄 ¶ 𑀯𑀺𑀦𑀺𑀘𑁆𑀙𑀬𑀯𑀺𑀢𑀓𑁆𑀓𑁄 𑀯𑀺𑀢𑀓𑁆𑀓𑁄 𑀦𑀸𑀫. 𑀯𑀺𑀦𑀺𑀘𑁆𑀙𑀬𑁄𑀢𑀺 𑀤𑁆𑀯𑁂 𑀯𑀺𑀦𑀺𑀘𑁆𑀙𑀬𑀸 𑀢𑀡𑁆𑀳𑀸𑀯𑀺𑀦𑀺𑀘𑁆𑀙𑀬𑁄 ¶ 𑀘, 𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑁄 𑀘. 𑀅𑀝𑁆𑀞𑀲𑀢𑀁 𑀢𑀡𑁆𑀳𑀸𑀯𑀺𑀘𑀭𑀺𑀢𑀁 𑀢𑀡𑁆𑀳𑀸𑀯𑀺𑀦𑀺𑀘𑁆𑀙𑀬𑁄 𑀦𑀸𑀫. 𑀤𑁆𑀯𑀸𑀲𑀝𑁆𑀞𑀺 ¶ 𑀤𑀺𑀝𑁆𑀞𑀺𑀬𑁄 𑀤𑀺𑀝𑁆𑀞𑀺𑀯𑀺𑀦𑀺𑀘𑁆𑀙𑀬𑁄 𑀦𑀸𑀫𑀸𑀢𑀺 𑀏𑀯𑀁 𑀯𑀼𑀢𑁆𑀢𑀢𑀡𑁆𑀳𑀸𑀯𑀺𑀦𑀺𑀘𑁆𑀙𑀬𑀯𑀲𑁂𑀦 𑀳𑀺 𑀇𑀝𑁆𑀞𑀸𑀦𑀺𑀝𑁆𑀞𑀧𑀺𑀬𑀸𑀧𑁆𑀧𑀺𑀬𑀯𑀯𑀢𑁆𑀣𑀸𑀦𑀁 𑀦 𑀳𑁄𑀢𑀺. 𑀢𑀤𑁂𑀯 𑀳𑀺 𑀏𑀓𑀘𑁆𑀘𑀲𑁆𑀲 𑀇𑀝𑁆𑀞𑀁 𑀳𑁄𑀢𑀺, 𑀏𑀓𑀘𑁆𑀘𑀲𑁆𑀲 𑀅𑀦𑀺𑀝𑁆𑀞𑀁 𑀧𑀘𑁆𑀘𑀦𑁆𑀢𑀭𑀸𑀚𑀫𑀚𑁆𑀛𑀺𑀫𑀤𑁂𑀲𑀭𑀸𑀚𑀽𑀦𑀁 𑀕𑀡𑁆𑀟𑀼𑀧𑁆𑀧𑀸𑀤𑀫𑀺𑀕𑀫𑀁𑀲𑀸𑀤𑀻𑀲𑀼 𑀯𑀺𑀬. 𑀢𑀲𑁆𑀫𑀺𑀁 𑀧𑀦 𑀢𑀡𑁆𑀳𑀸𑀯𑀺𑀦𑀺𑀘𑁆𑀙𑀬𑀯𑀺𑀦𑀺𑀘𑁆𑀙𑀺𑀢𑁂 𑀧𑀝𑀺𑀮𑀤𑁆𑀥𑀯𑀢𑁆𑀣𑀼𑀲𑁆𑀫𑀺𑀁 ‘‘𑀏𑀢𑁆𑀢𑀓𑀁 𑀭𑀽𑀧𑀲𑁆𑀲 𑀪𑀯𑀺𑀲𑁆𑀲𑀢𑀺, 𑀏𑀢𑁆𑀢𑀓𑀁 𑀲𑀤𑁆𑀤𑀲𑁆𑀲, 𑀏𑀢𑁆𑀢𑀓𑀁 𑀕𑀦𑁆𑀥𑀲𑁆𑀲, 𑀏𑀢𑁆𑀢𑀓𑀁 𑀭𑀲𑀲𑁆𑀲, 𑀏𑀢𑁆𑀢𑀓𑀁 𑀨𑁄𑀝𑁆𑀞𑀩𑁆𑀩𑀲𑁆𑀲 𑀪𑀯𑀺𑀲𑁆𑀲𑀢𑀺, 𑀏𑀢𑁆𑀢𑀓𑀁 𑀫𑀬𑁆𑀳𑀁 𑀪𑀯𑀺𑀲𑁆𑀲𑀢𑀺, 𑀏𑀢𑁆𑀢𑀓𑀁 𑀧𑀭𑀲𑁆𑀲 𑀪𑀯𑀺𑀲𑁆𑀲𑀢𑀺, 𑀏𑀢𑁆𑀢𑀓𑀁 𑀦𑀺𑀤𑀳𑀺𑀲𑁆𑀲𑀸𑀫𑀺, 𑀏𑀢𑁆𑀢𑀓𑀁 𑀧𑀭𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀯𑀯𑀢𑁆𑀣𑀸𑀦𑀁 𑀯𑀺𑀢𑀓𑁆𑀓𑀯𑀺𑀦𑀺𑀘𑁆𑀙𑀬𑁂𑀦 𑀳𑁄𑀢𑀺. 𑀢𑁂𑀦𑀸𑀳 ‘‘𑀙𑀦𑁆𑀤𑁄 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀯𑀺𑀢𑀓𑁆𑀓𑀦𑀺𑀤𑀸𑀦𑁄’’𑀢𑀺.

𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀦𑀺𑀤𑀸𑀦𑁄𑀢𑀺 𑀢𑀬𑁄 𑀧𑀧𑀜𑁆𑀘𑀸 𑀢𑀡𑁆𑀳𑀸𑀧𑀧𑀜𑁆𑀘𑁄, 𑀫𑀸𑀦𑀧𑀧𑀜𑁆𑀘𑁄, 𑀤𑀺𑀝𑁆𑀞𑀺𑀧𑀧𑀜𑁆𑀘𑁄𑀢𑀺. 𑀢𑀢𑁆𑀣 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀁 𑀢𑀡𑁆𑀳𑀸𑀧𑀧𑀜𑁆𑀘𑁄 𑀦𑀸𑀫. 𑀦𑀯𑀯𑀺𑀥𑁄 𑀫𑀸𑀦𑁄 𑀫𑀸𑀦𑀧𑀧𑀜𑁆𑀘𑁄 𑀦𑀸𑀫. 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀤𑀺𑀝𑁆𑀞𑀺𑀧𑀧𑀜𑁆𑀘𑁄 𑀦𑀸𑀫. 𑀢𑁂𑀲𑀼 𑀇𑀥 𑀢𑀡𑁆𑀳𑀸𑀧𑀧𑀜𑁆𑀘𑁄 𑀅𑀥𑀺𑀧𑁆𑀧𑁂𑀢𑁄. 𑀓𑁂𑀦𑀝𑁆𑀞𑁂𑀦 𑀧𑀧𑀜𑁆𑀘𑁄? 𑀫𑀢𑁆𑀢𑀧𑀫𑀢𑁆𑀢𑀸𑀓𑀸𑀭𑀧𑀸𑀧𑀦𑀝𑁆𑀞𑁂𑀦 𑀧𑀧𑀜𑁆𑀘𑁄. 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀲𑀜𑁆𑀜𑀸 𑀧𑀧𑀜𑁆𑀘𑀲𑀜𑁆𑀜𑀸. 𑀲𑀗𑁆𑀔𑀸 𑀯𑀼𑀘𑁆𑀘𑀢𑀺 𑀓𑁄𑀝𑁆𑀞𑀸𑀲𑁄 ‘‘𑀲𑀜𑁆𑀜𑀸𑀦𑀺𑀤𑀸𑀦𑀸 𑀳𑀺 𑀧𑀧𑀜𑁆𑀘𑀲𑀗𑁆𑀔𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀇𑀢𑀺 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀦𑀺𑀤𑀸𑀦𑁄𑀢𑀺 𑀧𑀧𑀜𑁆𑀘𑀲𑀜𑁆𑀜𑀸𑀓𑁄𑀝𑁆𑀞𑀸𑀲𑀦𑀺𑀤𑀸𑀦𑁄 𑀯𑀺𑀢𑀓𑁆𑀓𑁄𑀢𑀺 𑀅𑀢𑁆𑀣𑁄.

𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀦𑀺𑀭𑁄𑀥𑀲𑀸𑀭𑀼𑀧𑁆𑀧𑀕𑀸𑀫𑀺𑀦𑀺𑀦𑁆𑀢𑀺 𑀏𑀢𑀺𑀲𑁆𑀲𑀸 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀬 𑀔𑀬𑀸 𑀦𑀺𑀭𑁄𑀥𑁄 𑀯𑀽𑀧𑀲𑀫𑁄, 𑀢𑀲𑁆𑀲 𑀲𑀸𑀭𑀼𑀧𑁆𑀧𑀜𑁆𑀘𑁂𑀯 𑀢𑀢𑁆𑀣 𑀕𑀸𑀫𑀺𑀦𑀺𑀁 𑀘𑀸𑀢𑀺 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀁 𑀧𑀼𑀘𑁆𑀙𑀢𑀺.

𑀯𑁂𑀤𑀦𑀸𑀓𑀫𑁆𑀫𑀝𑁆𑀞𑀸𑀦𑀯𑀡𑁆𑀡𑀦𑀸

𑁩𑁫𑁯. 𑀅𑀣𑀲𑁆𑀲 𑀪𑀕𑀯𑀸 𑀲𑁄𑀫𑀦𑀲𑁆𑀲𑀁𑀧𑀸𑀳𑀦𑁆𑀢𑀺 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀆𑀭𑀪𑀺. 𑀓𑀺𑀁 𑀧𑀦 𑀪𑀕𑀯𑀢𑀸 𑀧𑀼𑀘𑁆𑀙𑀺𑀢𑀁 𑀓𑀣𑀺𑀢𑀁, 𑀅𑀧𑀼𑀘𑁆𑀙𑀺𑀢𑀁, 𑀲𑀸𑀦𑀼𑀲𑀦𑁆𑀥𑀺𑀓𑀁, 𑀅𑀦𑀦𑀼𑀲𑀦𑁆𑀥𑀺𑀓𑀦𑁆𑀢𑀺? 𑀧𑀼𑀘𑁆𑀙𑀺𑀢𑀫𑁂𑀯 𑀓𑀣𑀺𑀢𑀁, 𑀦𑁄 𑀅𑀧𑀼𑀘𑁆𑀙𑀺𑀢𑀁, 𑀲𑀸𑀦𑀼𑀲𑀦𑁆𑀥𑀺𑀓𑀫𑁂𑀯, 𑀦𑁄 𑀅𑀦𑀦𑀼𑀲𑀦𑁆𑀥𑀺𑀓𑀁. 𑀤𑁂𑀯𑀢𑀸𑀦𑀜𑁆𑀳𑀺 𑀭𑀽𑀧𑀢𑁄 𑀅𑀭𑀽𑀧𑀁 𑀧𑀸𑀓𑀝𑀢𑀭𑀁, 𑀅𑀭𑀽𑀧𑁂𑀧𑀺 𑀯𑁂𑀤𑀦𑀸 𑀧𑀸𑀓𑀝𑀢𑀭𑀸. 𑀓𑀲𑁆𑀫𑀸? 𑀤𑁂𑀯𑀢𑀸𑀦𑀜𑁆𑀳𑀺 𑀓𑀭𑀚𑀓𑀸𑀬𑀁 𑀲𑀼𑀔𑀼𑀫𑀁, 𑀓𑀫𑁆𑀫𑀚𑀁 𑀩𑀮𑀯𑀁, 𑀓𑀭𑀚𑀓𑀸𑀬𑀲𑁆𑀲 𑀲𑀼𑀔𑀼𑀫𑀢𑁆𑀢𑀸, 𑀓𑀫𑁆𑀫𑀚𑀲𑁆𑀲 𑀩𑀮𑀯𑀢𑁆𑀢𑀸 𑀏𑀓𑀸𑀳𑀸𑀭𑀫𑁆𑀧𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦 𑀢𑀺𑀝𑁆𑀞𑀦𑁆𑀢𑀺, 𑀉𑀡𑁆𑀳𑀧𑀸𑀲𑀸𑀡𑁂 ¶ 𑀞𑀧𑀺𑀢𑀲𑀧𑁆𑀧𑀺𑀧𑀺𑀡𑁆𑀟𑀺 𑀯𑀺𑀬 𑀯𑀺𑀮𑀻𑀬𑀦𑁆𑀢𑀻𑀢𑀺 𑀲𑀩𑁆𑀩𑀁 𑀩𑁆𑀭𑀳𑁆𑀫𑀚𑀸𑀮𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀸 𑀪𑀕𑀯𑀸 𑀲𑀓𑁆𑀓𑀲𑁆𑀲 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀆𑀭𑀪𑀺. 𑀤𑀼𑀯𑀺𑀥𑀜𑁆𑀳𑀺 𑀓𑀫𑁆𑀫𑀝𑁆𑀞𑀸𑀦𑀁 𑁋 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁, 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀜𑁆𑀘. 𑀭𑀽𑀧𑀧𑀭𑀺𑀕𑁆𑀕𑀳𑁄, 𑀅𑀭𑀽𑀧𑀧𑀭𑀺𑀕𑁆𑀕𑀳𑁄𑀢𑀺𑀧𑀺 𑀏𑀢𑀤𑁂𑀯 ¶ 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀪𑀕𑀯𑀸 𑀬𑀲𑁆𑀲 𑀭𑀽𑀧𑀁 ¶ 𑀧𑀸𑀓𑀝𑀁, 𑀢𑀲𑁆𑀲 𑀲𑀗𑁆𑀔𑁂𑀧𑀫𑀦𑀲𑀺𑀓𑀸𑀭𑀯𑀲𑁂𑀦 𑀯𑀸 𑀯𑀺𑀢𑁆𑀣𑀸𑀭𑀫𑀦𑀲𑀺𑀓𑀸𑀭𑀯𑀲𑁂𑀦 𑀯𑀸 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑀺. 𑀬𑀲𑁆𑀲 𑀅𑀭𑀽𑀧𑀁 𑀧𑀸𑀓𑀝𑀁, 𑀢𑀲𑁆𑀲 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑀺. 𑀓𑀣𑁂𑀦𑁆𑀢𑁄 𑀘 𑀢𑀲𑁆𑀲 𑀯𑀢𑁆𑀣𑀼𑀪𑀽𑀢𑀁 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸𑀯 𑀓𑀣𑁂𑀢𑀺, 𑀤𑁂𑀯𑀸𑀦𑀁 𑀧𑀦 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀧𑀸𑀓𑀝𑀦𑁆𑀢𑀺 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦 𑀯𑁂𑀤𑀦𑀸 𑀆𑀭𑀪𑀺.

𑀢𑀺𑀯𑀺𑀥𑁄 𑀳𑀺 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑁂 𑀅𑀪𑀺𑀦𑀺𑀯𑁂𑀲𑁄 𑁋 𑀨𑀲𑁆𑀲𑀯𑀲𑁂𑀦, 𑀯𑁂𑀤𑀦𑀸𑀯𑀲𑁂𑀦, 𑀘𑀺𑀢𑁆𑀢𑀯𑀲𑁂𑀦𑀸𑀢𑀺. 𑀓𑀣𑀁? 𑀏𑀓𑀘𑁆𑀘𑀲𑁆𑀲 𑀳𑀺 𑀲𑀗𑁆𑀔𑀺𑀢𑁆𑀢𑁂𑀦 𑀯𑀸 𑀯𑀺𑀢𑁆𑀣𑀸𑀭𑁂𑀦 𑀯𑀸 𑀧𑀭𑀺𑀕𑁆𑀕𑀳𑀺𑀢𑁂 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑁂 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀞𑀫𑀸𑀪𑀺𑀦𑀺𑀧𑀸𑀢𑁄 𑀢𑀁 𑀆𑀭𑀫𑁆𑀫𑀡𑀁 𑀨𑀼𑀲𑀦𑁆𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀨𑀲𑁆𑀲𑁄 𑀧𑀸𑀓𑀝𑁄 𑀳𑁄𑀢𑀺. 𑀏𑀓𑀘𑁆𑀘𑀲𑁆𑀲 𑀢𑀁 𑀆𑀭𑀫𑁆𑀫𑀡𑀁 𑀅𑀦𑀼𑀪𑀯𑀦𑁆𑀢𑀻 𑀉𑀧𑁆𑀧𑀚𑁆𑀚𑀫𑀸𑀦𑀸 𑀯𑁂𑀤𑀦𑀸 𑀧𑀸𑀓𑀝𑀸 𑀳𑁄𑀢𑀺. 𑀏𑀓𑀘𑁆𑀘𑀲𑁆𑀲 𑀢𑀁 𑀆𑀭𑀫𑁆𑀫𑀡𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑀁 𑀯𑀺𑀚𑀸𑀦𑀦𑁆𑀢𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀯𑀺𑀜𑁆𑀜𑀸𑀡𑀁 𑀧𑀸𑀓𑀝𑀁 𑀳𑁄𑀢𑀺.

𑀢𑀢𑁆𑀣 𑀬𑀲𑁆𑀲 𑀨𑀲𑁆𑀲𑁄 𑀧𑀸𑀓𑀝𑁄 𑀳𑁄𑀢𑀺, 𑀲𑁄𑀧𑀺 𑀦 𑀓𑁂𑀯𑀮𑀁 𑀨𑀲𑁆𑀲𑁄𑀯 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀦 𑀲𑀤𑁆𑀥𑀺𑀁 𑀢𑀤𑁂𑀯 𑀆𑀭𑀫𑁆𑀫𑀡𑀁 𑀅𑀦𑀼𑀪𑀯𑀫𑀸𑀦𑀸 𑀯𑁂𑀤𑀦𑀸𑀧𑀺 𑀉𑀧𑁆𑀧𑀚𑁆𑀚𑀢𑀺, 𑀲𑀜𑁆𑀚𑀸𑀦𑀫𑀸𑀦𑀸 𑀲𑀜𑁆𑀜𑀸𑀧𑀺, 𑀘𑁂𑀢𑀬𑀫𑀸𑀦𑀸 𑀘𑁂𑀢𑀦𑀸𑀧𑀺, 𑀯𑀺𑀚𑀸𑀦𑀫𑀸𑀦𑀁 𑀯𑀺𑀜𑁆𑀜𑀸𑀡𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀻𑀢𑀺 𑀨𑀲𑁆𑀲𑀧𑀜𑁆𑀘𑀫𑀓𑁂𑀬𑁂𑀯 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀬𑀲𑁆𑀲 𑀯𑁂𑀤𑀦𑀸 𑀧𑀸𑀓𑀝𑀸 𑀳𑁄𑀢𑀺, 𑀲𑁄𑀧𑀺 𑀦 𑀓𑁂𑀯𑀮𑀁 𑀯𑁂𑀤𑀦𑀸𑀯 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀬 𑀲𑀤𑁆𑀥𑀺𑀁 𑀢𑀤𑁂𑀯 𑀆𑀭𑀫𑁆𑀫𑀡𑀁 𑀨𑀼𑀲𑀫𑀸𑀦𑁄 𑀨𑀲𑁆𑀲𑁄𑀧𑀺 𑀉𑀧𑁆𑀧𑀚𑁆𑀚𑀢𑀺, 𑀲𑀜𑁆𑀚𑀸𑀦𑀫𑀸𑀦𑀸 𑀲𑀜𑁆𑀜𑀸𑀧𑀺, 𑀘𑁂𑀢𑀬𑀫𑀸𑀦𑀸 𑀘𑁂𑀢𑀦𑀸𑀧𑀺, 𑀯𑀺𑀚𑀸𑀦𑀫𑀸𑀦𑀁 𑀯𑀺𑀜𑁆𑀜𑀸𑀡𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀻𑀢𑀺 𑀨𑀲𑁆𑀲𑀧𑀜𑁆𑀘𑀫𑀓𑁂𑀬𑁂𑀯 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀬𑀲𑁆𑀲 𑀯𑀺𑀜𑁆𑀜𑀸𑀡𑀁 𑀧𑀸𑀓𑀝𑀁 𑀳𑁄𑀢𑀺, 𑀲𑁄𑀧𑀺 𑀦 𑀓𑁂𑀯𑀮𑀁 𑀯𑀺𑀜𑁆𑀜𑀸𑀡𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀦 𑀲𑀤𑁆𑀥𑀺𑀁 𑀢𑀤𑁂𑀯𑀸𑀭𑀫𑁆𑀫𑀡𑀁 𑀨𑀼𑀲𑀫𑀸𑀦𑁄 𑀨𑀲𑁆𑀲𑁄𑀧𑀺 𑀉𑀧𑁆𑀧𑀚𑁆𑀚𑀢𑀺, 𑀅𑀦𑀼𑀪𑀯𑀫𑀸𑀦𑀸 𑀯𑁂𑀤𑀦𑀸𑀧𑀺, 𑀲𑀜𑁆𑀚𑀸𑀦𑀫𑀸𑀦𑀸 𑀲𑀜𑁆𑀜𑀸𑀧𑀺, 𑀘𑁂𑀢𑀬𑀫𑀸𑀦𑀸 𑀘𑁂𑀢𑀦𑀸𑀧𑀺 𑀉𑀧𑁆𑀧𑀚𑁆𑀚𑀢𑀻𑀢𑀺 𑀨𑀲𑁆𑀲𑀧𑀜𑁆𑀘𑀫𑀓𑁂𑀬𑁂𑀯 𑀧𑀭𑀺𑀕𑁆𑀕𑀡𑁆𑀳𑀸𑀢𑀺.

𑀲𑁄 ‘‘𑀇𑀫𑁂 𑀨𑀲𑁆𑀲𑀧𑀜𑁆𑀘𑀫𑀓𑀸 𑀥𑀫𑁆𑀫𑀸 𑀓𑀺𑀁 𑀦𑀺𑀲𑁆𑀲𑀺𑀢𑀸’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀸’’𑀢𑀺 𑀧𑀚𑀸𑀦𑀸𑀢𑀺. 𑀯𑀢𑁆𑀣𑀼 𑀦𑀸𑀫 𑀓𑀭𑀚𑀓𑀸𑀬𑁄, 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ¶ 𑁋 ‘‘𑀇𑀤𑀜𑁆𑀘 𑀧𑀦 𑀫𑁂 𑀯𑀺𑀜𑁆𑀜𑀸𑀡𑀁 𑀏𑀢𑁆𑀣 𑀲𑀺𑀢𑀁 𑀏𑀢𑁆𑀣 𑀧𑀝𑀺𑀩𑀤𑁆𑀥’’𑀦𑁆𑀢𑀺. 𑀲𑁄 𑀅𑀢𑁆𑀣𑀢𑁄 𑀪𑀽𑀢𑀸𑀦𑀺 𑀘𑁂𑀯 𑀉𑀧𑀸𑀤𑀸𑀭𑀽𑀧𑀸𑀦𑀺 𑀘. 𑀏𑀯𑀫𑁂𑀢𑁆𑀣 𑀯𑀢𑁆𑀣𑀼 𑀭𑀽𑀧𑀁, 𑀨𑀲𑁆𑀲𑀧𑀜𑁆𑀘𑀫𑀓𑀸 𑀦𑀸𑀫𑀦𑁆𑀢𑀺 𑀦𑀸𑀫𑀭𑀽𑀧𑀫𑀢𑁆𑀢𑀫𑁂𑀯 𑀧𑀲𑁆𑀲𑀢𑀺. 𑀭𑀽𑀧𑀜𑁆𑀘𑁂𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄, 𑀦𑀸𑀫𑀁 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀫𑀢𑁆𑀢𑀁 𑀳𑁄𑀢𑀺. 𑀦𑀸𑀫𑀭𑀽𑀧𑀯𑀺𑀦𑀺𑀫𑀼𑀢𑁆𑀢𑀸 𑀳𑀺 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀧𑀜𑁆𑀘𑀓𑁆𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀁 𑀯𑀸 𑀦𑀸𑀫𑀭𑀽𑀧𑀁 𑀦𑀢𑁆𑀣𑀺. 𑀲𑁄 ‘‘𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑀸 𑀓𑀺𑀁 ¶ 𑀳𑁂𑀢𑀼𑀓𑀸’’𑀢𑀺 𑀉𑀧𑀧𑀭𑀺𑀓𑁆𑀔𑀦𑁆𑀢𑁄 ‘‘𑀅𑀯𑀺𑀚𑁆𑀚𑀸𑀤𑀺𑀳𑁂𑀢𑀼𑀓𑀸’’𑀢𑀺 𑀧𑀲𑁆𑀲𑀢𑀺. 𑀢𑀢𑁄 ‘‘𑀧𑀘𑁆𑀘𑀬𑁄 𑀘𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀜𑁆𑀘 𑀇𑀤𑀁, 𑀅𑀜𑁆𑀜𑁄 𑀲𑀢𑁆𑀢𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸 𑀦𑀢𑁆𑀣𑀺, 𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑀫𑀢𑁆𑀢𑀫𑁂𑀯𑀸’’𑀢𑀺 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀯𑀲𑁂𑀦 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀸𑀝𑀺𑀬𑀸 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸’’𑀢𑀺 𑀲𑀫𑁆𑀫𑀲𑀦𑁆𑀢𑁄 𑀯𑀺𑀘𑀭𑀢𑀺 ¶ , 𑀲𑁄 𑀅𑀚𑁆𑀚 𑀅𑀚𑁆𑀚𑀸𑀢𑀺 𑀧𑀝𑀺𑀯𑁂𑀥𑀁 𑀆𑀓𑀗𑁆𑀔𑀫𑀸𑀦𑁄 𑀢𑀣𑀸𑀭𑀽𑀧𑁂 𑀤𑀺𑀯𑀲𑁂 𑀉𑀢𑀼𑀲𑀧𑁆𑀧𑀸𑀬𑀁, 𑀧𑀼𑀕𑁆𑀕𑀮𑀲𑀧𑁆𑀧𑀸𑀬𑀁, 𑀪𑁄𑀚𑀦𑀲𑀧𑁆𑀧𑀸𑀬𑀁, 𑀥𑀫𑁆𑀫𑀲𑀯𑀦𑀲𑀧𑁆𑀧𑀸𑀬𑀁 𑀯𑀸 𑀮𑀪𑀺𑀢𑁆𑀯𑀸 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑁄𑀯 𑀯𑀺𑀧𑀲𑁆𑀲𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀢𑀺. 𑀏𑀯𑀫𑀺𑀫𑁂𑀲𑀫𑁆𑀧𑀺 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀬𑀸𑀯 𑀅𑀭𑀳𑀢𑁆𑀢𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀺𑀢𑀁 𑀳𑁄𑀢𑀺.

𑀇𑀥 𑀧𑀦 𑀪𑀕𑀯𑀸 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀦𑁆𑀢𑁄 𑀯𑁂𑀤𑀦𑀸𑀲𑀻𑀲𑁂𑀦 𑀓𑀣𑁂𑀲𑀺. 𑀨𑀲𑁆𑀲𑀯𑀲𑁂𑀦 𑀳𑀺 𑀯𑀺𑀜𑁆𑀜𑀸𑀡𑀯𑀲𑁂𑀦 𑀯𑀸 𑀓𑀣𑀺𑀬𑀫𑀸𑀦𑀁 𑀏𑀢𑀲𑁆𑀲 𑀦 𑀧𑀸𑀓𑀝𑀁 𑀳𑁄𑀢𑀺, 𑀅𑀦𑁆𑀥𑀓𑀸𑀭𑀁 𑀯𑀺𑀬 𑀔𑀸𑀬𑀢𑀺. 𑀯𑁂𑀤𑀦𑀸𑀯𑀲𑁂𑀦 𑀧𑀦 𑀧𑀸𑀓𑀝𑀁 𑀳𑁄𑀢𑀺. 𑀓𑀲𑁆𑀫𑀸? 𑀯𑁂𑀤𑀦𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀧𑀸𑀓𑀝𑀢𑀸𑀬. 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀦𑀜𑁆𑀳𑀺 𑀉𑀧𑁆𑀧𑀢𑁆𑀢𑀺 𑀧𑀸𑀓𑀝𑀸. 𑀬𑀤𑀸 𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀲𑀓𑀮𑀁 𑀲𑀭𑀻𑀭𑀁 𑀔𑁄𑀪𑁂𑀦𑁆𑀢𑀁 𑀫𑀤𑁆𑀤𑀦𑁆𑀢𑀁 𑀨𑀭𑀫𑀸𑀦𑀁 𑀅𑀪𑀺𑀲𑀦𑁆𑀤𑀬𑀫𑀸𑀦𑀁 𑀲𑀢𑀥𑁄𑀢𑀲𑀧𑁆𑀧𑀺𑀁 𑀔𑀸𑀤𑀸𑀧𑀬𑀦𑁆𑀢𑀁 𑀯𑀺𑀬, 𑀲𑀢𑀧𑀸𑀓𑀢𑁂𑀮𑀁 𑀫𑀓𑁆𑀔𑀬𑀫𑀸𑀦𑀁 𑀯𑀺𑀬, 𑀖𑀝𑀲𑀳𑀲𑁆𑀲𑁂𑀦 𑀧𑀭𑀺𑀴𑀸𑀳𑀁 𑀦𑀺𑀩𑁆𑀩𑀸𑀧𑀬𑀫𑀸𑀦𑀁 𑀯𑀺𑀬, ‘‘𑀅𑀳𑁄 𑀲𑀼𑀔𑀁, 𑀅𑀳𑁄 𑀲𑀼𑀔’’𑀦𑁆𑀢𑀺 𑀯𑀸𑀘𑀁 𑀦𑀺𑀘𑁆𑀙𑀸𑀭𑀬𑀫𑀸𑀦𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀸 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀲𑀓𑀮𑀲𑀭𑀻𑀭𑀁 𑀔𑁄𑀪𑁂𑀦𑁆𑀢𑀁 𑀫𑀤𑁆𑀤𑀦𑁆𑀢𑀁 𑀨𑀭𑀫𑀸𑀦𑀁 𑀅𑀪𑀺𑀲𑀦𑁆𑀤𑀬𑀫𑀸𑀦𑀁 𑀢𑀢𑁆𑀢𑀨𑀸𑀮𑀁 𑀧𑀯𑁂𑀲𑁂𑀦𑁆𑀢𑀁 𑀯𑀺𑀬, 𑀯𑀺𑀮𑀻𑀦𑀢𑀫𑁆𑀩𑀮𑁄𑀳𑁂𑀦 𑀆𑀲𑀺𑀜𑁆𑀘𑀦𑁆𑀢𑀁 𑀯𑀺𑀬, 𑀲𑀼𑀓𑁆𑀔𑀢𑀺𑀡𑀯𑀦𑀧𑁆𑀧𑀢𑀺𑀫𑁆𑀳𑀺 𑀅𑀭𑀜𑁆𑀜𑁂 𑀤𑀸𑀭𑀼𑀉𑀓𑁆𑀓𑀸𑀓𑀮𑀸𑀧𑀁 𑀔𑀺𑀧𑀫𑀸𑀦𑀁 𑀯𑀺𑀬 ‘‘𑀅𑀳𑁄 𑀤𑀼𑀓𑁆𑀔𑀁, 𑀅𑀳𑁄 𑀤𑀼𑀓𑁆𑀔’’𑀦𑁆𑀢𑀺 𑀯𑀺𑀧𑁆𑀧𑀮𑀸𑀧𑀬𑀫𑀸𑀦𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀦𑀁 𑀉𑀧𑁆𑀧𑀢𑁆𑀢𑀺 𑀧𑀸𑀓𑀝𑀸 𑀳𑁄𑀢𑀺.

𑀅𑀤𑀼𑀓𑁆𑀔𑀫𑀲𑀼𑀔𑀸 𑀧𑀦 𑀤𑀼𑀤𑁆𑀤𑀻𑀧𑀦𑀸 𑀅𑀦𑁆𑀥𑀓𑀸𑀭𑁂𑀦 𑀯𑀺𑀬 𑀅𑀪𑀺𑀪𑀽𑀢𑀸. 𑀲𑀸 𑀲𑀼𑀔𑀤𑀼𑀓𑁆𑀔𑀸𑀦𑀁 𑀅𑀧𑀕𑀫𑁂 𑀲𑀸𑀢𑀸𑀲𑀸𑀢𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀫𑀚𑁆𑀛𑀢𑁆𑀢𑀸𑀓𑀸𑀭𑀪𑀽𑀢𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸𑀢𑀺 𑀦𑀬𑀢𑁄 𑀕𑀡𑁆𑀳𑀦𑁆𑀢𑀲𑁆𑀲 𑀧𑀸𑀓𑀝𑀸 𑀳𑁄𑀢𑀺. 𑀬𑀣𑀸 𑀓𑀺𑀁? 𑀬𑀣𑀸 𑀅𑀦𑁆𑀢𑀭𑀸 𑀧𑀺𑀝𑁆𑀞𑀺𑀧𑀸𑀲𑀸𑀡𑀁 𑀆𑀭𑀼𑀳𑀺𑀢𑁆𑀯𑀸 𑀧𑀮𑀸𑀢𑀲𑁆𑀲 𑀫𑀺𑀕𑀲𑁆𑀲 𑀅𑀦𑀼𑀧𑀤𑀁 𑀕𑀘𑁆𑀙𑀦𑁆𑀢𑁄 ¶ 𑀫𑀺𑀕𑀮𑀼𑀤𑁆𑀤𑀓𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑀲𑁆𑀲 𑀑𑀭𑀪𑀸𑀕𑁂𑀧𑀺 𑀧𑀭𑀪𑀸𑀕𑁂𑀧𑀺 𑀧𑀤𑀁 𑀤𑀺𑀲𑁆𑀯𑀸 𑀫𑀚𑁆𑀛𑁂 𑀅𑀧𑀲𑁆𑀲𑀦𑁆𑀢𑁄𑀧𑀺 ‘‘𑀇𑀢𑁄 𑀆𑀭𑀼𑀴𑁆𑀳𑁄, 𑀇𑀢𑁄 𑀑𑀭𑀼𑀴𑁆𑀳𑁄, 𑀫𑀚𑁆𑀛𑁂 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀇𑀫𑀺𑀦𑀸 𑀧𑀤𑁂𑀲𑁂𑀦 𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀬𑀢𑁄 𑀚𑀸𑀦𑀸𑀢𑀺 ¶ . 𑀏𑀯𑀁 𑀆𑀭𑀼𑀴𑁆𑀳𑀝𑁆𑀞𑀸𑀦𑁂 𑀧𑀤𑀁 𑀯𑀺𑀬 𑀳𑀺 𑀲𑀼𑀔𑀯𑁂𑀤𑀦𑀸𑀬 𑀉𑀧𑁆𑀧𑀢𑁆𑀢𑀺 𑀧𑀸𑀓𑀝𑀸 𑀳𑁄𑀢𑀺, 𑀑𑀭𑀼𑀴𑁆𑀳𑀝𑁆𑀞𑀸𑀦𑁂 𑀧𑀤𑀁 𑀯𑀺𑀬 𑀤𑀼𑀓𑁆𑀔𑀯𑁂𑀤𑀦𑀸𑀬 𑀉𑀧𑁆𑀧𑀢𑁆𑀢𑀺 𑀧𑀸𑀓𑀝𑀸 𑀳𑁄𑀢𑀺, 𑀇𑀢𑁄 𑀆𑀭𑀼𑀬𑁆𑀳, 𑀇𑀢𑁄 𑀑𑀭𑀼𑀬𑁆𑀳, 𑀫𑀚𑁆𑀛𑁂 𑀏𑀯𑀁 𑀕𑀢𑁄𑀢𑀺 𑀦𑀬𑀢𑁄 𑀕𑀳𑀡𑀁 𑀯𑀺𑀬 𑀲𑀼𑀔𑀤𑀼𑀓𑁆𑀔𑀸𑀦𑀁 𑀅𑀧𑀕𑀫𑁂 𑀲𑀸𑀢𑀸𑀲𑀸𑀢𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀫𑀚𑁆𑀛𑀢𑁆𑀢𑀸𑀓𑀸𑀭𑀪𑀽𑀢𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸𑀢𑀺 𑀦𑀬𑀢𑁄 𑀕𑀡𑁆𑀳𑀦𑁆𑀢𑀲𑁆𑀲 𑀧𑀸𑀓𑀝𑀸 𑀳𑁄𑀢𑀺. 𑀏𑀯𑀁 𑀪𑀕𑀯𑀸 𑀧𑀞𑀫𑀁 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸 𑀧𑀘𑁆𑀙𑀸 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀯𑁂𑀤𑀦𑀸𑀯𑀲𑁂𑀦 𑀦𑀺𑀯𑀢𑁆𑀢𑁂𑀢𑁆𑀯𑀸 𑀤𑀲𑁆𑀲𑁂𑀲𑀺.

𑀦 𑀓𑁂𑀯𑀮𑀜𑁆𑀘 𑀇𑀥𑁂𑀯 𑀏𑀯𑀁 𑀤𑀲𑁆𑀲𑁂𑀲𑀺, 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂, 𑀫𑀚𑁆𑀛𑀺𑀫𑀦𑀺𑀓𑀸𑀬𑀫𑁆𑀳𑀺 𑀲𑀢𑀺𑀧𑀝𑁆𑀞𑀸𑀦𑁂, 𑀘𑀽𑀴𑀢𑀡𑁆𑀳𑀸𑀲𑀗𑁆𑀔𑀬𑁂, 𑀫𑀳𑀸𑀢𑀡𑁆𑀳𑀸𑀲𑀗𑁆𑀔𑀬𑁂, 𑀘𑀽𑀴𑀯𑁂𑀤𑀮𑁆𑀮𑀲𑀼𑀢𑁆𑀢𑁂, 𑀫𑀳𑀸𑀯𑁂𑀤𑀮𑁆𑀮𑀲𑀼𑀢𑁆𑀢𑁂, 𑀭𑀝𑁆𑀞𑀧𑀸𑀮𑀲𑀼𑀢𑁆𑀢𑁂, 𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑁂, 𑀥𑀸𑀢𑀼𑀯𑀺𑀪𑀗𑁆𑀕𑁂, 𑀆𑀦𑁂𑀜𑁆𑀚𑀲𑀧𑁆𑀧𑀸𑀬𑁂, 𑀲𑀓𑀮𑁂 𑀯𑁂𑀤𑀦𑀸𑀲𑀁𑀬𑀼𑀢𑁆𑀢𑁂𑀢𑀺 𑀏𑀯𑀁 𑀅𑀦𑁂𑀓𑁂𑀲𑀼 𑀲𑀼𑀢𑁆𑀢𑀦𑁆𑀢𑁂𑀲𑀼 𑀧𑀞𑀫𑀁 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸 ¶ 𑀧𑀘𑁆𑀙𑀸 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀯𑁂𑀤𑀦𑀸𑀯𑀲𑁂𑀦 𑀦𑀺𑀯𑀢𑁆𑀢𑁂𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀬𑀣𑀸 𑀘 𑀢𑁂𑀲𑀼 𑀢𑁂𑀲𑀼, 𑀏𑀯𑀁 𑀇𑀫𑀲𑁆𑀫𑀺𑀫𑁆𑀧𑀺 𑀲𑀓𑁆𑀓𑀧𑀜𑁆𑀳𑁂 𑀧𑀞𑀫𑀁 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸 𑀧𑀘𑁆𑀙𑀸 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀯𑁂𑀤𑀦𑀸𑀯𑀲𑁂𑀦 𑀦𑀺𑀯𑀢𑁆𑀢𑁂𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀧𑀦𑁂𑀢𑁆𑀣 𑀯𑁂𑀤𑀦𑀸𑀬 𑀆𑀭𑀫𑁆𑀫𑀡𑀫𑀢𑁆𑀢𑀓𑀁𑀬𑁂𑀯 𑀲𑀗𑁆𑀔𑀺𑀢𑁆𑀢𑀁, 𑀢𑀲𑁆𑀫𑀸 𑀧𑀸𑀴𑀺𑀬𑀁 𑀦𑀸𑀭𑀼𑀴𑁆𑀳𑀁 𑀪𑀯𑀺𑀲𑁆𑀲𑀢𑀺.

𑁩𑁬𑁦. 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑁂 𑀬𑀁 𑀢𑀲𑁆𑀲 𑀧𑀸𑀓𑀝𑀁 𑀯𑁂𑀤𑀦𑀸𑀯𑀲𑁂𑀦 𑀅𑀪𑀺𑀦𑀺𑀯𑁂𑀲𑀫𑀼𑀔𑀁, 𑀢𑀫𑁂𑀯 𑀤𑀲𑁆𑀲𑁂𑀢𑀼𑀁 𑀲𑁄𑀫𑀦𑀲𑁆𑀲𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀼𑀯𑀺𑀥𑁂𑀦𑀸𑀢𑀺 𑀤𑁆𑀯𑀺𑀯𑀺𑀥𑁂𑀦, 𑀤𑁆𑀯𑀻𑀳𑀺 𑀓𑁄𑀝𑁆𑀞𑀸𑀲𑁂𑀳𑀻𑀢𑀺 𑀅𑀢𑁆𑀣𑁄. 𑀏𑀯𑀭𑀽𑀧𑀁 𑀲𑁄𑀫𑀦𑀲𑁆𑀲𑀁 𑀦 𑀲𑁂𑀯𑀺𑀢𑀩𑁆𑀩𑀦𑁆𑀢𑀺 𑀏𑀯𑀭𑀽𑀧𑀁 𑀕𑁂𑀳𑀲𑀺𑀢𑀲𑁄𑀫𑀦𑀲𑁆𑀲𑀁 𑀦 𑀲𑁂𑀯𑀺𑀢𑀩𑁆𑀩𑀁. 𑀕𑁂𑀳𑀲𑀺𑀢𑀲𑁄𑀫𑀦𑀲𑁆𑀲𑀁 𑀦𑀸𑀫 ‘‘𑀢𑀢𑁆𑀣 𑀓𑀢𑀫𑀸𑀦𑀺 𑀙 𑀕𑁂𑀳𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺? 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀭𑀽𑀧𑀸𑀦𑀁 𑀇𑀝𑁆𑀞𑀸𑀦𑀁 𑀓𑀦𑁆𑀢𑀸𑀦𑀁 𑀫𑀦𑀸𑀧𑀸𑀦𑀁 𑀫𑀦𑁄𑀭𑀫𑀸𑀦𑀁 𑀮𑁄𑀓𑀸𑀫𑀺𑀲𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁 𑀧𑀝𑀺𑀮𑀸𑀪𑀁 𑀯𑀸 𑀧𑀝𑀺𑀮𑀸𑀪𑀢𑁄 𑀲𑀫𑀦𑀼𑀧𑀲𑁆𑀲𑀢𑁄, 𑀧𑀼𑀩𑁆𑀩𑁂 𑀯𑀸 𑀧𑀝𑀺𑀮𑀤𑁆𑀥𑀧𑀼𑀩𑁆𑀩𑀁 𑀅𑀢𑀻𑀢𑀁 𑀦𑀺𑀭𑀼𑀤𑁆𑀥𑀁 𑀯𑀺𑀧𑀭𑀺𑀡𑀢𑀁 𑀲𑀫𑀦𑀼𑀲𑁆𑀲𑀭𑀢𑁄 𑀉𑀧𑁆𑀧𑀚𑁆𑀚𑀢𑀺 𑀲𑁄𑀫𑀦𑀲𑁆𑀲𑀁, 𑀬𑀁 𑀏𑀯𑀭𑀽𑀧𑀁 𑀲𑁄𑀫𑀦𑀲𑁆𑀲𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀕𑁂𑀳𑀲𑀺𑀢𑀁 𑀲𑁄𑀫𑀦𑀲𑁆𑀲’’𑀦𑁆𑀢𑀺 𑀏𑀯𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀯𑀼𑀢𑁆𑀢𑀓𑀸𑀫𑀕𑀼𑀡𑀦𑀺𑀲𑁆𑀲𑀺𑀢𑀁 𑀲𑁄𑀫𑀦𑀲𑁆𑀲𑀁 (𑀫. 𑀦𑀺. 𑁩.𑁩𑁦𑁬).

𑀏𑀯𑀭𑀽𑀧𑀁 ¶ 𑀲𑁄𑀫𑀦𑀲𑁆𑀲𑀁 𑀲𑁂𑀯𑀺𑀢𑀩𑁆𑀩𑀦𑁆𑀢𑀺 𑀏𑀯𑀭𑀽𑀧𑀁 𑀦𑁂𑀓𑁆𑀔𑀫𑁆𑀫𑀲𑀺𑀢𑀁 𑀲𑁄𑀫𑀦𑀲𑁆𑀲𑀁 𑀲𑁂𑀯𑀺𑀢𑀩𑁆𑀩𑀁. 𑀦𑁂𑀓𑁆𑀔𑀫𑁆𑀫𑀲𑀺𑀢𑀁 𑀲𑁄𑀫𑀦𑀲𑁆𑀲𑀁 𑀦𑀸𑀫 𑁋 ‘‘𑀢𑀢𑁆𑀣 𑀓𑀢𑀫𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺? 𑀭𑀽𑀧𑀸𑀦𑀁 ¶ 𑀢𑁆𑀯𑁂𑀯 𑀅𑀦𑀺𑀘𑁆𑀘𑀢𑀁 𑀯𑀺𑀤𑀺𑀢𑁆𑀯𑀸 𑀯𑀺𑀧𑀭𑀺𑀡𑀸𑀫𑀯𑀺𑀭𑀸𑀕𑀦𑀺𑀭𑁄𑀥𑀁 𑀧𑀼𑀩𑁆𑀩𑁂 𑀘𑁂𑀯 𑀭𑀽𑀧𑀸 𑀏𑀢𑀭𑀳𑀺 𑀘 𑀲𑀩𑁆𑀩𑁂 𑀢𑁂 𑀭𑀽𑀧𑀸 𑀅𑀦𑀺𑀘𑁆𑀘𑀸, 𑀤𑀼𑀓𑁆𑀔𑀸, 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄 𑀉𑀧𑁆𑀧𑀚𑁆𑀚𑀢𑀺 𑀲𑁄𑀫𑀦𑀲𑁆𑀲𑀁, 𑀬𑀁 𑀏𑀯𑀭𑀽𑀧𑀁 𑀲𑁄𑀫𑀦𑀲𑁆𑀲𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀦𑁂𑀓𑁆𑀔𑀫𑁆𑀫𑀲𑀺𑀢𑀁 𑀲𑁄𑀫𑀦𑀲𑁆𑀲’’𑀦𑁆𑀢𑀺 (𑀫. 𑀦𑀺. 𑁩.𑁩𑁦𑁮) 𑀏𑀯𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀲𑁆𑀲 ‘‘𑀉𑀲𑁆𑀲𑀼𑀓𑁆𑀓𑀺𑀢𑀸 𑀫𑁂 𑀯𑀺𑀧𑀲𑁆𑀲𑀦𑀸’’𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑀲𑁆𑀲 𑀉𑀧𑁆𑀧𑀦𑁆𑀦𑀁 𑀲𑁄𑀫𑀦𑀲𑁆𑀲𑀁. 𑀲𑁂𑀯𑀺𑀢𑀩𑁆𑀩𑀦𑁆𑀢𑀺 𑀇𑀤𑀁 𑀦𑁂𑀓𑁆𑀔𑀫𑁆𑀫𑀯𑀲𑁂𑀦, 𑀯𑀺𑀧𑀲𑁆𑀲𑀦𑀸𑀯𑀲𑁂𑀦, 𑀅𑀦𑀼𑀲𑁆𑀲𑀢𑀺𑀯𑀲𑁂𑀦, 𑀧𑀞𑀫𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀘 𑀉𑀧𑁆𑀧𑀚𑁆𑀚𑀦𑀓𑀲𑁄𑀫𑀦𑀲𑁆𑀲𑀁 𑀲𑁂𑀯𑀺𑀢𑀩𑁆𑀩𑀁 𑀦𑀸𑀫.

𑀢𑀢𑁆𑀣 𑀬𑀁 𑀘𑁂 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀦𑁆𑀢𑀺 𑀢𑀲𑁆𑀫𑀺𑀫𑁆𑀧𑀺 𑀦𑁂𑀓𑁆𑀔𑀫𑁆𑀫𑀲𑀺𑀢𑁂 𑀲𑁄𑀫𑀦𑀲𑁆𑀲𑁂 𑀬𑀁 𑀦𑁂𑀓𑁆𑀔𑀫𑁆𑀫𑀯𑀲𑁂𑀦, 𑀯𑀺𑀧𑀲𑁆𑀲𑀦𑀸𑀯𑀲𑁂𑀦, 𑀅𑀦𑀼𑀲𑁆𑀲𑀢𑀺𑀯𑀲𑁂𑀦, 𑀧𑀞𑀫𑀚𑁆𑀛𑀸𑀦𑀯𑀲𑁂𑀦 𑀘 𑀉𑀧𑁆𑀧𑀦𑁆𑀦𑀁 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀲𑁄𑀫𑀦𑀲𑁆𑀲𑀦𑁆𑀢𑀺 𑀚𑀸𑀦𑁂𑀬𑁆𑀬. 𑀬𑀁 𑀘𑁂 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀦𑁆𑀢𑀺 𑀬𑀁 𑀧𑀦 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑁄𑀫𑀦𑀲𑁆𑀲𑀦𑁆𑀢𑀺 𑀚𑀸𑀦𑁂𑀬𑁆𑀬. 𑀬𑁂 𑀅𑀯𑀺𑀢𑀓𑁆𑀓𑁂 𑀅𑀯𑀺𑀘𑀸𑀭𑁂, 𑀢𑁂 𑀧𑀡𑀻𑀢𑀢𑀭𑁂𑀢𑀺 𑀏𑀢𑁂𑀲𑀼𑀧𑀺 𑀤𑁆𑀯𑀻𑀲𑀼 𑀬𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁, 𑀢𑀁 𑀧𑀡𑀻𑀢𑀢𑀭𑀦𑁆𑀢𑀺 𑀅𑀢𑁆𑀣𑁄.

𑀇𑀫𑀺𑀦𑀸 ¶ 𑀓𑀺𑀁 𑀓𑀣𑀺𑀢𑀁 𑀳𑁄𑀢𑀺? 𑀤𑁆𑀯𑀺𑀦𑁆𑀦𑀁 𑀅𑀭𑀳𑀢𑁆𑀢𑀁 𑀓𑀣𑀺𑀢𑀁. 𑀓𑀣𑀁? 𑀏𑀓𑁄 𑀓𑀺𑀭 𑀪𑀺𑀓𑁆𑀔𑀼 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂 𑀲𑁄𑀫𑀦𑀲𑁆𑀲𑁂 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 ‘‘𑀇𑀤𑀁 𑀲𑁄𑀫𑀦𑀲𑁆𑀲𑀁 𑀓𑀺𑀁 𑀦𑀺𑀲𑁆𑀲𑀺𑀢’’𑀦𑁆𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 ‘‘𑀯𑀢𑁆𑀣𑀼𑀦𑀺𑀲𑁆𑀲𑀺𑀢’’𑀦𑁆𑀢𑀺 𑀧𑀚𑀸𑀦𑀸𑀢𑀻𑀢𑀺 𑀨𑀲𑁆𑀲𑀧𑀜𑁆𑀘𑀫𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀢𑀺. 𑀏𑀓𑁄 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁂 𑀲𑁄𑀫𑀦𑀲𑁆𑀲𑁂 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀢𑀺. 𑀢𑀢𑁆𑀣 𑀅𑀪𑀺𑀦𑀺𑀯𑀺𑀝𑁆𑀞𑀲𑁄𑀫𑀦𑀲𑁆𑀲𑁂𑀲𑀼𑀧𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀢𑁄 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁 𑀧𑀡𑀻𑀢𑀢𑀭𑀁. 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀲𑁄𑀫𑀦𑀲𑁆𑀲𑀯𑀺𑀧𑀲𑁆𑀲𑀦𑀸𑀢𑁄𑀧𑀺 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀯𑀺𑀧𑀲𑁆𑀲𑀦𑀸 𑀧𑀡𑀻𑀢𑀢𑀭𑀸. 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀲𑁄𑀫𑀦𑀲𑁆𑀲𑀨𑀮𑀲𑀫𑀸𑀧𑀢𑁆𑀢𑀺𑀢𑁄𑀧𑀺 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀲𑁄𑀫𑀦𑀲𑁆𑀲𑀨𑀮𑀲𑀫𑀸𑀧𑀢𑁆𑀢𑀺𑀬𑁂𑀯 𑀧𑀡𑀻𑀢𑀢𑀭𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑁂 𑀅𑀯𑀺𑀢𑀓𑁆𑀓𑁂 𑀅𑀯𑀺𑀘𑀸𑀭𑁂, 𑀢𑁂 𑀧𑀡𑀻𑀢𑀢𑀭𑁂’’𑀢𑀺.

𑁩𑁬𑁧. 𑀏𑀯𑀭𑀽𑀧𑀁 ¶ 𑀤𑁄𑀫𑀦𑀲𑁆𑀲𑀁 𑀦 𑀲𑁂𑀯𑀺𑀢𑀩𑁆𑀩𑀦𑁆𑀢𑀺 𑀏𑀯𑀭𑀽𑀧𑀁 𑀕𑁂𑀳𑀲𑀺𑀢𑀤𑁄𑀫𑀦𑀲𑁆𑀲𑀁 𑀦 𑀲𑁂𑀯𑀺𑀢𑀩𑁆𑀩𑀁. 𑀕𑁂𑀳𑀲𑀺𑀢𑀤𑁄𑀫𑀦𑀲𑁆𑀲𑀁 𑀦𑀸𑀫 𑁋 ‘‘𑀢𑀢𑁆𑀣 𑀓𑀢𑀫𑀸𑀦𑀺 𑀙 𑀕𑁂𑀳𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺? 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀭𑀽𑀧𑀸𑀦𑀁 𑀇𑀝𑁆𑀞𑀸𑀦𑀁 𑀓𑀦𑁆𑀢𑀸𑀦𑀁 𑀫𑀦𑀸𑀧𑀸𑀦𑀁 𑀫𑀦𑁄𑀭𑀫𑀸𑀦𑀁 𑀮𑁄𑀓𑀸𑀫𑀺𑀲𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁 𑀅𑀧𑁆𑀧𑀝𑀺𑀮𑀸𑀪𑀁 𑀯𑀸 𑀅𑀧𑁆𑀧𑀝𑀺𑀮𑀸𑀪𑀢𑁄 ¶ 𑀲𑀫𑀦𑀼𑀧𑀲𑁆𑀲𑀢𑁄 𑀧𑀼𑀩𑁆𑀩𑁂 𑀯𑀸 𑀅𑀧𑀝𑀺𑀮𑀤𑁆𑀥𑀧𑀼𑀩𑁆𑀩𑀁 𑀅𑀢𑀻𑀢𑀁 𑀦𑀺𑀭𑀼𑀤𑁆𑀥𑀁 𑀯𑀺𑀧𑀭𑀺𑀡𑀢𑀁 𑀲𑀫𑀦𑀼𑀲𑁆𑀲𑀭𑀢𑁄 𑀉𑀧𑁆𑀧𑀚𑁆𑀚𑀢𑀺 𑀤𑁄𑀫𑀦𑀲𑁆𑀲𑀁, 𑀬𑀁 𑀏𑀯𑀭𑀽𑀧𑀁 𑀤𑁄𑀫𑀦𑀲𑁆𑀲𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀕𑁂𑀳𑀲𑀺𑀢𑀤𑁄𑀫𑀦𑀲𑁆𑀲’’𑀦𑁆𑀢𑀺 (𑀫. 𑀦𑀺. 𑁩.𑁩𑁦𑁭). 𑀏𑀯𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑀁 𑀦𑀸𑀦𑀼𑀪𑀯𑀺𑀁, 𑀦𑀸𑀦𑀼𑀪𑀯𑀺𑀲𑁆𑀲𑀸𑀫𑀺, 𑀦𑀸𑀦𑀼𑀪𑀯𑀸𑀫𑀻𑀢𑀺 𑀯𑀺𑀢𑀓𑁆𑀓𑀬𑀢𑁄 𑀉𑀧𑁆𑀧𑀦𑁆𑀦𑀁 𑀓𑀸𑀫𑀕𑀼𑀡𑀦𑀺𑀲𑁆𑀲𑀺𑀢𑀁 𑀤𑁄𑀫𑀦𑀲𑁆𑀲𑀁.

𑀏𑀯𑀭𑀽𑀧𑀁 𑀤𑁄𑀫𑀦𑀲𑁆𑀲𑀁 𑀲𑁂𑀯𑀺𑀢𑀩𑁆𑀩𑀦𑁆𑀢𑀺 𑀏𑀯𑀭𑀽𑀧𑀁 𑀦𑁂𑀓𑁆𑀔𑀫𑁆𑀫𑀲𑀺𑀢𑀤𑁄𑀫𑀦𑀲𑁆𑀲𑀁 𑀲𑁂𑀯𑀺𑀢𑀩𑁆𑀩𑀁. 𑀦𑁂𑀓𑁆𑀔𑀫𑁆𑀫𑀲𑀺𑀢𑀤𑁄𑀫𑀦𑀲𑁆𑀲𑀁 𑀦𑀸𑀫 𑁋 ‘‘𑀢𑀢𑁆𑀣 𑀓𑀢𑀫𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺? 𑀭𑀽𑀧𑀸𑀦𑀁 𑀢𑁆𑀯𑁂𑀯 𑀅𑀦𑀺𑀘𑁆𑀘𑀢𑀁 𑀯𑀺𑀤𑀺𑀢𑁆𑀯𑀸 𑀯𑀺𑀧𑀭𑀺𑀡𑀸𑀫𑀯𑀺𑀭𑀸𑀕𑀦𑀺𑀭𑁄𑀥𑀁 𑀧𑀼𑀩𑁆𑀩𑁂 𑀘𑁂𑀯 𑀭𑀽𑀧𑀸 𑀏𑀢𑀭𑀳𑀺 𑀘 𑀲𑀩𑁆𑀩𑁂 𑀢𑁂 𑀭𑀽𑀧𑀸 𑀅𑀦𑀺𑀘𑁆𑀘𑀸, 𑀤𑀼𑀓𑁆𑀔𑀸, 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀧𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀼 𑀧𑀺𑀳𑀁 𑀉𑀧𑀝𑁆𑀞𑀸𑀧𑁂𑀢𑀺 ‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀁 𑀢𑀤𑀸𑀬𑀢𑀦𑀁, 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀸𑀫𑀺, 𑀬𑀤𑀭𑀺𑀬𑀸 𑀏𑀢𑀭𑀳𑀺 𑀆𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀻’𑀢𑀺. 𑀇𑀢𑀺 𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀼 𑀧𑀺𑀳𑀁 𑀉𑀧𑀝𑁆𑀞𑀸𑀧𑀬𑀢𑁄 𑀉𑀧𑁆𑀧𑀚𑁆𑀚𑀢𑀺 𑀧𑀺𑀳𑀧𑀘𑁆𑀘𑀬𑀸 𑀤𑁄𑀫𑀦𑀲𑁆𑀲𑀁, 𑀬𑀁 𑀏𑀯𑀭𑀽𑀧𑀁 𑀤𑁄𑀫𑀦𑀲𑁆𑀲𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀦𑁂𑀓𑁆𑀔𑀫𑁆𑀫𑀲𑀺𑀢𑀤𑁄𑀫𑀦𑀲𑁆𑀲’’𑀦𑁆𑀢𑀺 (𑀫. 𑀦𑀺. 𑁩.𑁩𑁦𑁭) 𑀏𑀯𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀅𑀦𑀼𑀢𑁆𑀢𑀭𑀯𑀺𑀫𑁄𑀓𑁆𑀔𑀲𑀗𑁆𑀔𑀸𑀢𑀅𑀭𑀺𑀬𑀨𑀮𑀥𑀫𑁆𑀫𑁂𑀲𑀼 𑀧𑀺𑀳𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀢𑀤𑀥𑀺𑀕𑀫𑀸𑀬 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑀼𑀫𑀲𑀓𑁆𑀓𑁄𑀦𑁆𑀢𑀲𑁆𑀲 𑀇𑀫𑀫𑁆𑀧𑀺 𑀧𑀓𑁆𑀔𑀁, 𑀇𑀫𑀫𑁆𑀧𑀺 𑀫𑀸𑀲𑀁, 𑀇𑀫𑀫𑁆𑀧𑀺 𑀲𑀁𑀯𑀘𑁆𑀙𑀭𑀁 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀺𑀬𑀪𑀽𑀫𑀺𑀁 𑀧𑀸𑀧𑀼𑀡𑀺𑀢𑀼𑀁 𑀦𑀸𑀲𑀓𑁆𑀔𑀺𑀦𑁆𑀢𑀺 𑀅𑀦𑀼𑀲𑁄𑀘𑀢𑁄 𑀉𑀧𑁆𑀧𑀦𑁆𑀦𑀁 𑀤𑁄𑀫𑀦𑀲𑁆𑀲𑀁. 𑀲𑁂𑀯𑀺𑀢𑀩𑁆𑀩𑀦𑁆𑀢𑀺 𑀇𑀤𑀁 𑀦𑁂𑀓𑁆𑀔𑀫𑁆𑀫𑀯𑀲𑁂𑀦, 𑀯𑀺𑀧𑀲𑁆𑀲𑀦𑀸𑀯𑀲𑁂𑀦, 𑀅𑀦𑀼𑀲𑁆𑀲𑀢𑀺𑀯𑀲𑁂𑀦, 𑀧𑀞𑀫𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀘 𑀉𑀧𑁆𑀧𑀚𑁆𑀚𑀦𑀓𑀤𑁄𑀫𑀦𑀲𑁆𑀲𑀁 𑀲𑁂𑀯𑀺𑀢𑀩𑁆𑀩𑀁 𑀦𑀸𑀫.

𑀢𑀢𑁆𑀣 ¶ 𑀬𑀁 𑀘𑁂 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀦𑁆𑀢𑀺 𑀢𑀲𑁆𑀫𑀺𑀫𑁆𑀧𑀺 𑀤𑀼𑀯𑀺𑀥𑁂 𑀤𑁄𑀫𑀦𑀲𑁆𑀲𑁂 𑀕𑁂𑀳𑀲𑀺𑀢𑀤𑁄𑀫𑀦𑀲𑁆𑀲𑀫𑁂𑀯 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀤𑁄𑀫𑀦𑀲𑁆𑀲𑀁 𑀦𑀸𑀫. 𑀦𑁂𑀓𑁆𑀔𑀫𑁆𑀫𑀯𑀲𑁂𑀦, 𑀯𑀺𑀧𑀲𑁆𑀲𑀦𑀸𑀯𑀲𑁂𑀦, 𑀅𑀦𑀼𑀲𑁆𑀲𑀢𑀺𑀯𑀲𑁂𑀦, 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑀯𑀲𑁂𑀦 𑀘 𑀉𑀧𑁆𑀧𑀦𑁆𑀦𑀤𑁄𑀫𑀦𑀲𑁆𑀲𑀁 𑀧𑀦 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀤𑁄𑀫𑀦𑀲𑁆𑀲𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀤𑁄𑀫𑀦𑀲𑁆𑀲𑀁 𑀦𑀸𑀫 𑀦𑀢𑁆𑀣𑀺. 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀜𑁆𑀳𑀺 𑀏𑀓𑀁𑀲𑁂𑀦 𑀅𑀓𑀼𑀲𑀮𑀜𑁆𑀘𑁂𑀯 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀜𑁆𑀘, 𑀏𑀢𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑁄 𑀫𑀜𑁆𑀜𑀦𑀯𑀲𑁂𑀦 ¶ 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀦𑁆𑀢𑀺 𑀘 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀦𑁆𑀢𑀺 𑀘 𑀯𑀼𑀢𑁆𑀢𑀁.

𑀢𑀢𑁆𑀭𑀸𑀬𑀁 ¶ 𑀦𑀬𑁄 𑁋 𑀇𑀥 𑀪𑀺𑀓𑁆𑀔𑀼 𑀤𑁄𑀫𑀦𑀲𑁆𑀲𑀧𑀘𑁆𑀘𑀬𑀪𑀽𑀢𑁂 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀥𑀫𑁆𑀫𑁂 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀥𑀫𑁆𑀫𑁂 𑀘 𑀤𑁄𑀫𑀦𑀲𑁆𑀲𑀧𑀘𑁆𑀘𑀬𑀸 𑀏𑀯 𑀉𑀧𑁆𑀧𑀦𑁆𑀦𑁂 𑀫𑀕𑁆𑀕𑀨𑀮𑀥𑀫𑁆𑀫𑁂 𑀘 𑀅𑀜𑁆𑀜𑁂𑀲𑀁 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦 𑀤𑁄𑀫𑀦𑀲𑁆𑀲𑀦𑁆𑀢𑀺 𑀕𑀳𑁂𑀢𑁆𑀯𑀸 ‘‘𑀓𑀤𑀸 𑀦𑀼 𑀔𑁄 𑀫𑁂 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀤𑁄𑀫𑀦𑀲𑁆𑀲𑁂 𑀯𑀺𑀧𑀲𑁆𑀲𑀦𑀸 𑀧𑀝𑁆𑀞𑀧𑀺𑀢𑀸 𑀪𑀯𑀺𑀲𑁆𑀲𑀢𑀺, 𑀓𑀤𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀤𑁄𑀫𑀦𑀲𑁆𑀲𑁂’’𑀢𑀺 𑀘 ‘‘𑀓𑀤𑀸 𑀦𑀼 𑀔𑁄 𑀫𑁂 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀤𑁄𑀫𑀦𑀲𑁆𑀲𑀨𑀮𑀲𑀫𑀸𑀧𑀢𑁆𑀢𑀺 𑀦𑀺𑀩𑁆𑀩𑀢𑁆𑀢𑀺𑀢𑀸 𑀪𑀯𑀺𑀲𑁆𑀲𑀢𑀺, 𑀓𑀤𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀤𑁄𑀫𑀦𑀲𑁆𑀲𑀨𑀮𑀲𑀫𑀸𑀧𑀢𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂𑀫𑀸𑀲𑀺𑀓𑀁, 𑀙𑀫𑀸𑀲𑀺𑀓𑀁, 𑀦𑀯𑀫𑀸𑀲𑀺𑀓𑀁 𑀯𑀸 𑀧𑀝𑀺𑀧𑀤𑀁 𑀕𑀡𑁆𑀳𑀸𑀢𑀺. 𑀢𑁂𑀫𑀸𑀲𑀺𑀓𑀁 𑀕𑀳𑁂𑀢𑁆𑀯𑀸 𑀧𑀞𑀫𑀫𑀸𑀲𑁂 𑀏𑀓𑀁 𑀬𑀸𑀫𑀁 𑀚𑀕𑁆𑀕𑀢𑀺, 𑀤𑁆𑀯𑁂 𑀬𑀸𑀫𑁂 𑀦𑀺𑀤𑁆𑀤𑀸𑀬 𑀑𑀓𑀸𑀲𑀁 𑀓𑀭𑁄𑀢𑀺, 𑀫𑀚𑁆𑀛𑀺𑀫𑁂 𑀫𑀸𑀲𑁂 𑀤𑁆𑀯𑁂 𑀬𑀸𑀫𑁂 𑀚𑀕𑁆𑀕𑀢𑀺, 𑀏𑀓𑀁 𑀬𑀸𑀫𑀁 𑀦𑀺𑀤𑁆𑀤𑀸𑀬 𑀑𑀓𑀸𑀲𑀁 𑀓𑀭𑁄𑀢𑀺, 𑀧𑀘𑁆𑀙𑀺𑀫𑀫𑀸𑀲𑁂 𑀘𑀗𑁆𑀓𑀫𑀦𑀺𑀲𑀚𑁆𑀚𑀸𑀬𑁂𑀯 𑀬𑀸𑀧𑁂𑀢𑀺. 𑀏𑀯𑀁 𑀘𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀧𑀸𑀧𑀼𑀡𑀸𑀢𑀺, 𑀯𑀺𑀲𑁂𑀲𑁂𑀢𑁆𑀯𑀸 𑀙𑀫𑀸𑀲𑀺𑀓𑀁 𑀕𑀡𑁆𑀳𑀸𑀢𑀺. 𑀢𑀢𑁆𑀭𑀸𑀧𑀺 𑀤𑁆𑀯𑁂 𑀤𑁆𑀯𑁂 𑀫𑀸𑀲𑁂 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀯𑀺𑀲𑁂𑀲𑁂𑀢𑁆𑀯𑀸 𑀦𑀯𑀫𑀸𑀲𑀺𑀓𑀁 𑀕𑀡𑁆𑀳𑀸𑀢𑀺. 𑀢𑀢𑁆𑀭𑀸𑀧𑀺 𑀢𑀬𑁄 𑀢𑀬𑁄 𑀫𑀸𑀲𑁂 𑀢𑀣𑁂𑀯 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 ‘‘𑀦 𑀮𑀤𑁆𑀯𑀁 𑀯𑀢 𑀫𑁂 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀁 𑀧𑀯𑀸𑀭𑁂𑀢𑀼’’𑀦𑁆𑀢𑀺 𑀆𑀯𑀚𑁆𑀚𑀢𑁄 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀲𑁆𑀲𑀼𑀥𑀸𑀭𑀸 𑀧𑀯𑀢𑁆𑀢𑀦𑁆𑀢𑀺 𑀕𑀸𑀫𑀦𑁆𑀢𑀧𑀩𑁆𑀪𑀸𑀭𑀯𑀸𑀲𑀻𑀫𑀳𑀸𑀲𑀻𑀯𑀢𑁆𑀣𑁂𑀭𑀲𑁆𑀲 𑀯𑀺𑀬.

𑀫𑀳𑀸𑀲𑀻𑀯𑀢𑁆𑀣𑁂𑀭𑀯𑀢𑁆𑀣𑀼

𑀣𑁂𑀭𑁄 𑀓𑀺𑀭 𑀅𑀝𑁆𑀞𑀸𑀭𑀲 𑀫𑀳𑀸𑀕𑀡𑁂 𑀯𑀸𑀘𑁂𑀲𑀺. 𑀢𑀲𑁆𑀲𑁄𑀯𑀸𑀤𑁂 𑀞𑀢𑁆𑀯𑀸 𑀢𑀺𑀁𑀲𑀲𑀳𑀲𑁆𑀲𑀸 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀅𑀣𑁂𑀓𑁄 𑀪𑀺𑀓𑁆𑀔𑀼 ‘‘𑀫𑀬𑁆𑀳𑀁 𑀢𑀸𑀯 𑀅𑀩𑁆𑀪𑀦𑁆𑀢𑀭𑁂 𑀕𑀼𑀡𑀸 𑀅𑀧𑁆𑀧𑀫𑀸𑀡𑀸, 𑀓𑀻𑀤𑀺𑀲𑀸 𑀦𑀼 𑀔𑁄 𑀫𑁂 𑀆𑀘𑀭𑀺𑀬𑀲𑁆𑀲 𑀕𑀼𑀡𑀸’’𑀢𑀺 𑀆𑀯𑀚𑁆𑀚𑀦𑁆𑀢𑁄 𑀧𑀼𑀣𑀼𑀚𑁆𑀚𑀦𑀪𑀸𑀯𑀁 𑀧𑀲𑁆𑀲𑀺𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀅𑀜𑁆𑀜𑁂𑀲𑀁 𑀅𑀯𑀲𑁆𑀲𑀬𑁄 𑀳𑁄𑀢𑀺, 𑀅𑀢𑁆𑀢𑀦𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀑𑀯𑀸𑀤𑀫𑀲𑁆𑀲 𑀤𑀲𑁆𑀲𑀸𑀫𑀻’’𑀢𑀺 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑀲𑀫𑀻𑀧𑁂 𑀑𑀢𑀭𑀺𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀁 𑀆𑀘𑀭𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀣𑁂𑀭𑁄 ¶ 𑁋 ‘‘𑀓𑀺𑀁 𑀓𑀸𑀭𑀡𑀸 𑀆𑀕𑀢𑁄𑀲𑀺 𑀧𑀺𑀡𑁆𑀟𑀧𑀸𑀢𑀺𑀓𑀸’’𑀢𑀺 𑀆𑀳. 𑀏𑀓𑀁 𑀅𑀦𑀼𑀫𑁄𑀤𑀦𑀁 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀆𑀕𑀢𑁄𑀲𑁆𑀫𑀺, 𑀪𑀦𑁆𑀢𑁂𑀢𑀺. 𑀑𑀓𑀸𑀲𑁄 𑀦 𑀪𑀯𑀺𑀲𑁆𑀲𑀢𑀺, 𑀆𑀯𑀼𑀲𑁄𑀢𑀺? 𑀯𑀺𑀢𑀓𑁆𑀓𑀫𑀸𑀴𑀓𑁂 𑀞𑀺𑀢𑀓𑀸𑀮𑁂 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂𑀢𑀺. 𑀢𑀲𑁆𑀫𑀺𑀁 𑀞𑀸𑀦𑁂 𑀅𑀜𑁆𑀜𑁂 ¶ 𑀧𑀼𑀘𑁆𑀙𑀦𑁆𑀢𑀻𑀢𑀺. 𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑁂, 𑀪𑀦𑁆𑀢𑁂𑀢𑀺. 𑀢𑀢𑁆𑀭𑀸𑀧𑀺 𑀅𑀜𑁆𑀜𑁂 𑀧𑀼𑀘𑁆𑀙𑀦𑁆𑀢𑀻𑀢𑀺. 𑀤𑀼𑀧𑀝𑁆𑀝𑀦𑀺𑀯𑀸𑀲𑀦𑀝𑁆𑀞𑀸𑀦𑁂, 𑀲𑀗𑁆𑀖𑀸𑀝𑀺𑀧𑀸𑀭𑀼𑀧𑀦𑀝𑁆𑀞𑀸𑀦𑁂, 𑀧𑀢𑁆𑀢𑀦𑀻𑀳𑀭𑀡𑀝𑁆𑀞𑀸𑀦𑁂, 𑀕𑀸𑀫𑁂 ¶ 𑀘𑀭𑀺𑀢𑁆𑀯𑀸 𑀆𑀲𑀦𑀲𑀸𑀮𑀸𑀬𑀁 𑀬𑀸𑀕𑀼𑀧𑀻𑀢𑀓𑀸𑀮𑁂, 𑀪𑀦𑁆𑀢𑁂𑀢𑀺. 𑀢𑀢𑁆𑀣 𑀅𑀝𑁆𑀞𑀓𑀣𑀸𑀣𑁂𑀭𑀸 𑀅𑀢𑁆𑀢𑀦𑁄 𑀓𑀗𑁆𑀔𑀁 𑀯𑀺𑀦𑁄𑀤𑁂𑀦𑁆𑀢𑀺, 𑀆𑀯𑀼𑀲𑁄𑀢𑀺. 𑀅𑀦𑁆𑀢𑁄𑀕𑀸𑀫𑀢𑁄 𑀦𑀺𑀓𑁆𑀔𑀦𑁆𑀢𑀓𑀸𑀮𑁂 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂𑀢𑀺. 𑀢𑀢𑁆𑀭𑀸𑀧𑀺 𑀅𑀜𑁆𑀜𑁂 𑀧𑀼𑀘𑁆𑀙𑀦𑁆𑀢𑀺, 𑀆𑀯𑀼𑀲𑁄𑀢𑀺. 𑀅𑀦𑁆𑀢𑀭𑀸𑀫𑀕𑁆𑀕𑁂, 𑀪𑀦𑁆𑀢𑁂, 𑀪𑁄𑀚𑀦𑀲𑀸𑀮𑀸𑀬𑀁 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂, 𑀪𑀦𑁆𑀢𑁂, 𑀤𑀺𑀯𑀸𑀝𑁆𑀞𑀸𑀦𑁂, 𑀧𑀸𑀤𑀥𑁄𑀯𑀦𑀓𑀸𑀮𑁂, 𑀫𑀼𑀔𑀥𑁄𑀯𑀦𑀓𑀸𑀮𑁂, 𑀪𑀦𑁆𑀢𑁂𑀢𑀺? 𑀢𑀤𑀸 𑀅𑀜𑁆𑀜𑁂 𑀧𑀼𑀘𑁆𑀙𑀦𑁆𑀢𑀻𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀭𑀼𑀡𑀸 𑀅𑀧𑀭𑁂 𑀧𑀼𑀘𑁆𑀙𑀦𑁆𑀢𑀺, 𑀆𑀯𑀼𑀲𑁄𑀢𑀺. 𑀤𑀦𑁆𑀢𑀓𑀝𑁆𑀞𑀁 𑀕𑀳𑁂𑀢𑁆𑀯𑀸 𑀫𑀼𑀔𑀥𑁄𑀯𑀦𑀢𑁆𑀣𑀁 𑀕𑀫𑀦𑀓𑀸𑀮𑁂, 𑀪𑀦𑁆𑀢𑁂𑀢𑀺? 𑀢𑀤𑀸 𑀅𑀜𑁆𑀜𑁂 𑀧𑀼𑀘𑁆𑀙𑀦𑁆𑀢𑀻𑀢𑀺. 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀆𑀕𑀫𑀦𑀓𑀸𑀮𑁂, 𑀪𑀦𑁆𑀢𑁂𑀢𑀺? 𑀢𑀢𑁆𑀭𑀸𑀧𑀺 𑀅𑀜𑁆𑀜𑁂 𑀧𑀼𑀘𑁆𑀙𑀦𑁆𑀢𑀻𑀢𑀺. 𑀲𑁂𑀦𑀸𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑀸𑀮𑁂, 𑀪𑀦𑁆𑀢𑁂𑀢𑀺? 𑀢𑀢𑁆𑀭𑀸𑀧𑀺 𑀅𑀜𑁆𑀜𑁂 𑀧𑀼𑀘𑁆𑀙𑀦𑁆𑀢𑀻𑀢𑀺. 𑀪𑀦𑁆𑀢𑁂, 𑀦𑀦𑀼 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀲𑁂𑀦𑀸𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀢𑀬𑁄 𑀘𑀢𑁆𑀢𑀸𑀭𑁄 𑀧𑀮𑁆𑀮𑀗𑁆𑀓𑁂 𑀉𑀲𑀼𑀫𑀁 𑀕𑀸𑀳𑀸𑀧𑁂𑀢𑁆𑀯𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀑𑀓𑀸𑀲𑀓𑀸𑀮𑁂𑀦 𑀪𑀯𑀺𑀢𑀩𑁆𑀩𑀁 𑀲𑀺𑀬𑀸, 𑀫𑀭𑀡𑀔𑀡𑀫𑁆𑀧𑀺 𑀦 𑀮𑀪𑀺𑀲𑁆𑀲𑀣, 𑀪𑀦𑁆𑀢𑁂, 𑀨𑀮𑀓𑀲𑀤𑀺𑀲𑀢𑁆𑀣 𑀪𑀦𑁆𑀢𑁂 𑀧𑀭𑀲𑁆𑀲 𑀅𑀯𑀲𑁆𑀲𑀬𑁄 𑀳𑁄𑀣, 𑀅𑀢𑁆𑀢𑀦𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀣, 𑀦 𑀫𑁂 𑀢𑀼𑀫𑁆𑀳𑀸𑀓𑀁 𑀅𑀦𑀼𑀫𑁄𑀤𑀦𑀸𑀬 𑀅𑀢𑁆𑀣𑁄𑀢𑀺 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀅𑀕𑀫𑀸𑀲𑀺.

𑀣𑁂𑀭𑁄 𑁋 ‘‘𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀬𑀢𑁆𑀢𑀺𑀬𑀸 𑀓𑀫𑁆𑀫𑀁 𑀦𑀢𑁆𑀣𑀺, 𑀫𑀬𑁆𑀳𑀁 𑀧𑀦 𑀅𑀗𑁆𑀓𑀼𑀲𑀓𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀆𑀕𑀢𑁄’’𑀢𑀺 𑀜𑀢𑁆𑀯𑀸 ‘‘𑀇𑀤𑀸𑀦𑀺 𑀑𑀓𑀸𑀲𑁄 𑀦 𑀪𑀯𑀺𑀲𑁆𑀲𑀢𑀺, 𑀧𑀘𑁆𑀘𑀽𑀲𑀓𑀸𑀮𑁂 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀧𑀢𑁆𑀢𑀘𑀻𑀯𑀭𑀁 𑀲𑀫𑀻𑀧𑁂 𑀓𑀢𑁆𑀯𑀸 𑀲𑀩𑁆𑀩𑀁 𑀤𑀺𑀯𑀲𑀪𑀸𑀕𑀁 𑀧𑀞𑀫𑀬𑀸𑀫𑀫𑀚𑁆𑀛𑀺𑀫𑀬𑀸𑀫𑀜𑁆𑀘 𑀥𑀫𑁆𑀫𑀁 𑀯𑀸𑀘𑁂𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑁂 𑀏𑀓𑀲𑁆𑀫𑀺𑀁 𑀣𑁂𑀭𑁂 𑀉𑀤𑁆𑀤𑁂𑀲𑀁 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁂 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀦𑀺𑀓𑁆𑀔𑀦𑁆𑀢𑁄. 𑀦𑀺𑀲𑀺𑀦𑁆𑀦𑀅𑀦𑁆𑀢𑁂𑀯𑀸𑀲𑀺𑀓𑀸 𑀆𑀘𑀭𑀺𑀬𑁄 𑀓𑁂𑀦𑀘𑀺 𑀧𑀧𑀜𑁆𑀘𑁂𑀦 𑀦𑀺𑀓𑁆𑀔𑀦𑁆𑀢𑁄𑀢𑀺 𑀫𑀜𑁆𑀜𑀺𑀁𑀲𑀼. 𑀦𑀺𑀓𑁆𑀔𑀦𑁆𑀢𑁄 𑀣𑁂𑀭𑁄 𑀓𑁄𑀘𑀺 𑀤𑁂𑀯 𑀲𑀫𑀸𑀦𑀸𑀘𑀭𑀺𑀬𑀪𑀺𑀓𑁆𑀔𑀽𑀢𑀺 𑀲𑀜𑁆𑀜𑀁 𑀅𑀓𑀸𑀲𑀺.

𑀣𑁂𑀭𑁄 𑀓𑀺𑀭 ‘‘𑀫𑀸𑀤𑀺𑀲𑀲𑁆𑀲 𑀅𑀭𑀳𑀢𑁆𑀢𑀁 𑀦𑀸𑀫 𑀓𑀺𑀁, 𑀤𑁆𑀯𑀻𑀳𑀢𑀻𑀳𑁂𑀦𑁂𑀯 𑀧𑀸𑀧𑀼𑀡𑀺𑀢𑁆𑀯𑀸 𑀧𑀘𑁆𑀘𑀸𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀅𑀦𑀸𑀭𑁄𑀘𑁂𑀢𑁆𑀯𑀸𑀯 𑀆𑀲𑀸𑀴𑁆𑀳𑀻𑀫𑀸𑀲𑀲𑁆𑀲 𑀚𑀼𑀡𑁆𑀳𑀧𑀓𑁆𑀔𑀢𑁂𑀭𑀲𑀺𑀬𑀸 𑀦𑀺𑀓𑁆𑀔𑀦𑁆𑀢𑁄 𑀕𑀸𑀫𑀦𑁆𑀢𑀧𑀩𑁆𑀪𑀸𑀭𑀁 𑀕𑀦𑁆𑀢𑁆𑀯𑀸 𑀘𑀗𑁆𑀓𑀫𑀁 𑀆𑀭𑀼𑀬𑁆𑀳 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀢𑀁 𑀤𑀺𑀯𑀲𑀁 𑀅𑀭𑀳𑀢𑁆𑀢𑀁 𑀕𑀳𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀉𑀧𑁄𑀲𑀣𑀤𑀺𑀯𑀲𑁂 𑀲𑀫𑁆𑀧𑀢𑁆𑀢𑁂 ‘‘𑀤𑁆𑀯𑀻𑀳𑀢𑀻𑀳𑁂𑀦 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀆𑀕𑀢𑁄 ¶ , 𑀕𑀳𑁂𑀢𑀼𑀁 𑀧𑀦 𑀦𑀸𑀲𑀓𑁆𑀔𑀺𑀁. 𑀢𑀬𑁄 𑀫𑀸𑀲𑁂 𑀧𑀦 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀯𑀺𑀬 𑀬𑀸𑀯 𑀫𑀳𑀸𑀧𑀯𑀸𑀭𑀡𑀸 𑀢𑀸𑀯 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸𑀧𑀺 𑀕𑀳𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀧𑀯𑀸𑀭𑀡𑀸𑀤𑀺𑀯𑀲𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀤𑁆𑀯𑀻𑀳𑀢𑀻𑀳𑁂𑀦 ¶ 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀆𑀕𑀢𑁄 ¶ , 𑀢𑁂𑀫𑀸𑀲𑁂𑀦𑀸𑀧𑀺 𑀦𑀸𑀲𑀓𑁆𑀔𑀺𑀁, 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀧𑀦 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀁 𑀧𑀯𑀸𑀭𑁂𑀦𑁆𑀢𑀻’’𑀢𑀺. 𑀢𑀲𑁆𑀲𑁂𑀯𑀁 𑀘𑀺𑀦𑁆𑀢𑀬𑀢𑁄 𑀅𑀲𑁆𑀲𑀼𑀥𑀸𑀭𑀸 𑀧𑀯𑀢𑁆𑀢𑀦𑁆𑀢𑀺. 𑀢𑀢𑁄 ‘‘𑀦 𑀫𑀜𑁆𑀘𑁂 𑀫𑀬𑁆𑀳𑀁 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀫𑀕𑁆𑀕𑀨𑀮𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀅𑀭𑀳𑀢𑁆𑀢𑀁 𑀅𑀧𑁆𑀧𑀢𑁆𑀯𑀸 𑀦𑁂𑀯 𑀫𑀜𑁆𑀘𑁂 𑀧𑀺𑀝𑁆𑀞𑀺𑀁 𑀧𑀲𑀸𑀭𑁂𑀲𑁆𑀲𑀸𑀫𑀺, 𑀦 𑀧𑀸𑀤𑁂 𑀥𑁄𑀯𑀺𑀲𑁆𑀲𑀸𑀫𑀻’’𑀢𑀺 𑀫𑀜𑁆𑀘𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀞𑀧𑁂𑀲𑀺. 𑀧𑀼𑀦 𑀅𑀦𑁆𑀢𑁄𑀯𑀲𑁆𑀲𑀁 𑀧𑀢𑁆𑀢𑀁, 𑀅𑀭𑀳𑀢𑁆𑀢𑀁 𑀕𑀳𑁂𑀢𑀼𑀁 𑀦𑀸𑀲𑀓𑁆𑀔𑀺𑀬𑁂𑀯. 𑀏𑀓𑀽𑀦𑀢𑀺𑀁𑀲𑀧𑀯𑀸𑀭𑀡𑀸𑀲𑀼 𑀅𑀲𑁆𑀲𑀼𑀥𑀸𑀭𑀸 𑀧𑀯𑀢𑁆𑀢𑀦𑁆𑀢𑀺. 𑀕𑀸𑀫𑀤𑀸𑀭𑀓𑀸 𑀣𑁂𑀭𑀲𑁆𑀲 𑀧𑀸𑀤𑁂𑀲𑀼 𑀨𑀸𑀮𑀺𑀢𑀝𑁆𑀞𑀸𑀦𑀸𑀦𑀺 𑀓𑀡𑁆𑀝𑀓𑁂𑀳𑀺 𑀲𑀺𑀩𑁆𑀩𑀦𑁆𑀢𑀺, 𑀤𑀯𑀁 𑀓𑀭𑁄𑀦𑁆𑀢𑀸𑀧𑀺 ‘‘𑀅𑀬𑁆𑀬𑀲𑁆𑀲 𑀫𑀳𑀸𑀲𑀻𑀯𑀢𑁆𑀣𑁂𑀭𑀲𑁆𑀲 𑀯𑀺𑀬 𑀧𑀸𑀤𑀸 𑀳𑁄𑀦𑁆𑀢𑀽’’𑀢𑀺 𑀤𑀯𑀁 𑀓𑀭𑁄𑀦𑁆𑀢𑀺.

𑀣𑁂𑀭𑁄 𑀢𑀺𑀁𑀲𑀲𑀁𑀯𑀘𑁆𑀙𑀭𑁂 𑀫𑀳𑀸𑀧𑀯𑀸𑀭𑀡𑀸𑀤𑀺𑀯𑀲𑁂 𑀆𑀮𑀫𑁆𑀩𑀡𑀨𑀮𑀓𑀁 𑀦𑀺𑀲𑁆𑀲𑀸𑀬 𑀞𑀺𑀢𑁄 ‘‘𑀇𑀤𑀸𑀦𑀺 𑀫𑁂 𑀢𑀺𑀁𑀲 𑀯𑀲𑁆𑀲𑀸𑀦𑀺 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲, 𑀦𑀸𑀲𑀓𑁆𑀔𑀺𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁, 𑀅𑀤𑁆𑀥𑀸 𑀫𑁂 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀫𑀕𑁆𑀕𑁄 𑀯𑀸 𑀨𑀮𑀁 𑀯𑀸 𑀦𑀢𑁆𑀣𑀺, 𑀦 𑀫𑁂 𑀮𑀤𑁆𑀥𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀁 𑀧𑀯𑀸𑀭𑁂𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀲𑁆𑀲𑁂𑀯𑀁 𑀘𑀺𑀦𑁆𑀢𑀬𑀢𑁄𑀯 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀺, 𑀅𑀲𑁆𑀲𑀼𑀥𑀸𑀭𑀸 𑀧𑀯𑀢𑁆𑀢𑀦𑁆𑀢𑀺. 𑀅𑀣 𑀅𑀯𑀺𑀤𑀽𑀭𑀝𑁆𑀞𑀸𑀦𑁂 𑀏𑀓𑀸 𑀤𑁂𑀯𑀥𑀻𑀢𑀸 𑀭𑁄𑀤𑀫𑀸𑀦𑀸 𑀅𑀝𑁆𑀞𑀸𑀲𑀺. ‘‘𑀓𑁄 𑀏𑀢𑁆𑀣 𑀭𑁄𑀤𑀲𑀻’’𑀢𑀺? ‘‘𑀅𑀳𑀁, 𑀪𑀦𑁆𑀢𑁂, 𑀤𑁂𑀯𑀥𑀻𑀢𑀸’’𑀢𑀺. ‘‘𑀓𑀲𑁆𑀫𑀸 𑀭𑁄𑀤𑀲𑀻’’𑀢𑀺? ‘‘𑀭𑁄𑀤𑀫𑀸𑀦𑁂𑀦 𑀫𑀕𑁆𑀕𑀨𑀮𑀁 𑀦𑀺𑀩𑁆𑀩𑀢𑁆𑀢𑀺𑀢𑀁, 𑀢𑁂𑀦 𑀅𑀳𑀫𑁆𑀧𑀺 𑀏𑀓𑀁 𑀤𑁆𑀯𑁂 𑀫𑀕𑁆𑀕𑀨𑀮𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀻𑀢𑀺 𑀭𑁄𑀤𑀸𑀫𑀺, 𑀪𑀦𑁆𑀢𑁂’’𑀢𑀺.

𑀢𑀢𑁄 𑀣𑁂𑀭𑁄 𑁋 ‘‘𑀪𑁄 𑀫𑀳𑀸𑀲𑀻𑀯𑀢𑁆𑀣𑁂𑀭, 𑀤𑁂𑀯𑀢𑀸𑀧𑀺 𑀢𑀬𑀸 𑀲𑀤𑁆𑀥𑀺𑀁 𑀓𑁂𑀴𑀺𑀁 𑀓𑀭𑁄𑀦𑁆𑀢𑀺, 𑀅𑀦𑀼𑀘𑁆𑀙𑀯𑀺𑀓𑀁 𑀦𑀼 𑀔𑁄 𑀢𑁂 𑀏𑀢’’𑀦𑁆𑀢𑀺 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀅𑀕𑁆𑀕𑀳𑁂𑀲𑀺. 𑀲𑁄 ‘‘𑀇𑀤𑀸𑀦𑀺 𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀲𑁂𑀦𑀸𑀲𑀦𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀫𑀜𑁆𑀘𑀓𑀁 𑀧𑀜𑁆𑀜𑀧𑁂𑀢𑁆𑀯𑀸 𑀉𑀤𑀓𑀝𑁆𑀞𑀸𑀦𑁂 𑀉𑀤𑀓𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 ‘‘𑀧𑀸𑀤𑁂 𑀥𑁄𑀯𑀺𑀲𑁆𑀲𑀸𑀫𑀻’’𑀢𑀺 𑀲𑁄𑀧𑀸𑀦𑀨𑀮𑀓𑁂 𑀦𑀺𑀲𑀻𑀤𑀺.

𑀅𑀦𑁆𑀢𑁂𑀯𑀸𑀲𑀺𑀓𑀸𑀧𑀺𑀲𑁆𑀲 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀲𑁆𑀲 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀕𑀘𑁆𑀙𑀦𑁆𑀢𑀲𑁆𑀲 𑀢𑀺𑀁𑀲 𑀯𑀲𑁆𑀲𑀸𑀦𑀺, 𑀲𑀓𑁆𑀔𑀺 𑀦𑀼 𑀔𑁄 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁, 𑀦𑀸𑀲𑀓𑁆𑀔𑀻’’𑀢𑀺 𑀆𑀯𑀚𑁆𑀚𑀬𑀫𑀸𑀦𑀸 ‘‘𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀸𑀤𑀥𑁄𑀯𑀦𑀢𑁆𑀣𑀁 𑀦𑀺𑀲𑀺𑀦𑁆𑀦𑁄’’𑀢𑀺 𑀤𑀺𑀲𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀅𑀫𑁆𑀳𑀸𑀤𑀺𑀲𑁂𑀲𑀼 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀢𑀺𑀝𑁆𑀞𑀦𑁆𑀢𑁂𑀲𑀼 ‘𑀅𑀢𑁆𑀢𑀦𑀸𑀯 𑀧𑀸𑀤𑁂 𑀥𑁄𑀯𑀺𑀲𑁆𑀲𑀢𑀻’𑀢𑀺 𑀅𑀝𑁆𑀞𑀸𑀦𑀫𑁂𑀢𑀁, 𑀅𑀳𑀁 𑀥𑁄𑀯𑀺𑀲𑁆𑀲𑀸𑀫𑀺 𑀅𑀳𑀁 𑀥𑁄𑀯𑀺𑀲𑁆𑀲𑀸𑀫𑀻’’𑀢𑀺 𑀢𑀺𑀁𑀲𑀲𑀳𑀲𑁆𑀲𑀸𑀦𑀺𑀧𑀺 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀧𑀸𑀤𑁂 ¶ 𑀥𑁄𑀯𑀺𑀲𑁆𑀲𑀸𑀫, 𑀪𑀦𑁆𑀢𑁂’’𑀢𑀺 ¶ 𑀆𑀳𑀁𑀲𑀼. 𑀆𑀯𑀼𑀲𑁄, 𑀇𑀤𑀸𑀦𑀺 𑀢𑀺𑀁𑀲 𑀯𑀲𑁆𑀲𑀸𑀦𑀺 𑀳𑁄𑀦𑁆𑀢𑀺 𑀫𑀫 𑀧𑀸𑀤𑀸𑀦𑀁 𑀅𑀥𑁄𑀢𑀸𑀦𑀁, 𑀢𑀺𑀝𑁆𑀞𑀣, 𑀢𑀼𑀫𑁆𑀳𑁂, 𑀅𑀳𑀫𑁂𑀯 𑀥𑁄𑀯𑀺𑀲𑁆𑀲𑀸𑀫𑀻𑀢𑀺.

𑀲𑀓𑁆𑀓𑁄𑀧𑀺 𑀆𑀯𑀚𑁆𑀚𑀦𑁆𑀢𑁄 𑁋 ‘‘𑀫𑀬𑁆𑀳𑀁 𑀅𑀬𑁆𑀬𑁄 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀢𑀺𑀁𑀲𑀲𑀳𑀲𑁆𑀲𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 ‘𑀧𑀸𑀤𑁂 𑀥𑁄𑀯𑀺𑀲𑁆𑀲𑀸𑀫𑀸’𑀢𑀺 𑀆𑀕𑀢𑀸𑀦𑀁 𑀧𑀸𑀤𑁂 𑀥𑁄𑀯𑀺𑀢𑀼𑀁 𑀦 𑀤𑁂𑀢𑀺. 𑀫𑀸𑀤𑀺𑀲𑁂 𑀧𑀦 𑀉𑀧𑀝𑁆𑀞𑀸𑀓𑁂 𑀢𑀺𑀝𑁆𑀞𑀦𑁆𑀢𑁂 ¶ ‘𑀫𑀬𑁆𑀳𑀁 𑀅𑀬𑁆𑀬𑁄 𑀲𑀬𑀁 𑀧𑀸𑀤𑁂 𑀥𑁄𑀯𑀺𑀲𑁆𑀲𑀢𑀻’𑀢𑀺 𑀅𑀝𑁆𑀞𑀸𑀦𑀫𑁂𑀢𑀁, 𑀅𑀳𑀁 𑀥𑁄𑀯𑀺𑀲𑁆𑀲𑀸𑀫𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀲𑀼𑀚𑀸𑀢𑀸𑀬 𑀤𑁂𑀯𑀺𑀬𑀸 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀦𑁆𑀢𑀺𑀓𑁂 𑀧𑀸𑀢𑀼𑀭𑀳𑁄𑀲𑀺. 𑀲𑁄 𑀲𑀼𑀚𑀁 𑀅𑀲𑀼𑀭𑀓𑀜𑁆𑀜𑀁 𑀧𑀼𑀭𑀢𑁄 𑀓𑀢𑁆𑀯𑀸 ‘‘𑀅𑀧𑁂𑀣, 𑀪𑀦𑁆𑀢𑁂, 𑀫𑀸𑀢𑀼𑀕𑀸𑀫𑁄’’𑀢𑀺 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀼𑀭𑀢𑁄 𑀉𑀓𑁆𑀓𑀼𑀝𑀺𑀓𑁄 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀧𑀸𑀤𑁂 𑀥𑁄𑀯𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂’’𑀢𑀺 𑀆𑀳. 𑀓𑁄𑀲𑀺𑀬, 𑀇𑀤𑀸𑀦𑀺 𑀫𑁂 𑀢𑀺𑀁𑀲 𑀯𑀲𑁆𑀲𑀸𑀦𑀺 𑀧𑀸𑀤𑀸𑀦𑀁 𑀅𑀥𑁄𑀢𑀸𑀦𑀁, 𑀤𑁂𑀯𑀢𑀸𑀦𑀜𑁆𑀘 𑀧𑀓𑀢𑀺𑀬𑀸𑀧𑀺 𑀫𑀦𑀼𑀲𑁆𑀲𑀲𑀭𑀻𑀭𑀕𑀦𑁆𑀥𑁄 𑀦𑀸𑀫 𑀚𑁂𑀕𑀼𑀘𑁆𑀙𑁄, 𑀬𑁄𑀚𑀦𑀲𑀢𑁂 𑀞𑀺𑀢𑀸𑀦𑀫𑁆𑀧𑀺 𑀓𑀡𑁆𑀞𑁂 𑀆𑀲𑀢𑁆𑀢𑀓𑀼𑀡𑀧𑀁 𑀯𑀺𑀬 𑀳𑁄𑀢𑀺, 𑀅𑀳𑀫𑁂𑀯 𑀥𑁄𑀯𑀺𑀲𑁆𑀲𑀸𑀫𑀻𑀢𑀺. 𑀪𑀦𑁆𑀢𑁂, 𑀅𑀬𑀁 𑀕𑀦𑁆𑀥𑁄 𑀦𑀸𑀫 𑀦 𑀧𑀜𑁆𑀜𑀸𑀬𑀢𑀺, 𑀢𑀼𑀫𑁆𑀳𑀸𑀓𑀁 𑀧𑀦 𑀲𑀻𑀮𑀕𑀦𑁆𑀥𑁄 𑀙 𑀤𑁂𑀯𑀮𑁄𑀓𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀉𑀧𑀭𑀺 𑀪𑀯𑀕𑁆𑀕𑀁 𑀧𑀢𑁆𑀯𑀸 𑀞𑀺𑀢𑁄. 𑀲𑀻𑀮𑀕𑀦𑁆𑀥𑀢𑁄 𑀅𑀜𑁆𑀜𑁄 𑀉𑀢𑁆𑀢𑀭𑀺𑀢𑀭𑁄 𑀕𑀦𑁆𑀥𑁄 𑀦𑀸𑀫 𑀦𑀢𑁆𑀣𑀺, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀲𑀻𑀮𑀕𑀦𑁆𑀥𑁂𑀦𑀫𑁆𑀳𑀺 𑀆𑀕𑀢𑁄𑀢𑀺 𑀯𑀸𑀫𑀳𑀢𑁆𑀣𑁂𑀦 𑀕𑁄𑀧𑁆𑀨𑀓𑀲𑀦𑁆𑀥𑀺𑀬𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀧𑀸𑀤𑀢𑀮𑀁 𑀧𑀭𑀺𑀫𑀚𑁆𑀚𑀺. 𑀤𑀳𑀭𑀓𑀼𑀫𑀸𑀭𑀲𑁆𑀲𑁂𑀯 𑀧𑀸𑀤𑀸 𑀅𑀳𑁂𑀲𑀼𑀁. 𑀲𑀓𑁆𑀓𑁄 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀕𑀢𑁄.

𑀏𑀯𑀁 ‘‘𑀦 𑀮𑀪𑀸𑀫𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀁 𑀧𑀯𑀸𑀭𑁂𑀢𑀼’’𑀦𑁆𑀢𑀺 𑀆𑀯𑀚𑁆𑀚𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀁 𑀤𑁄𑀫𑀦𑀲𑁆𑀲𑀁 𑀦𑀺𑀲𑁆𑀲𑀸𑀬 𑀪𑀺𑀓𑁆𑀔𑀼𑀦𑁄 𑀫𑀜𑁆𑀜𑀦𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀫𑁆𑀧𑀺 𑀯𑀺𑀧𑀲𑁆𑀲𑀦𑀸𑀧𑀺 𑀫𑀕𑁆𑀕𑁄𑀧𑀺 𑀨𑀮𑀫𑁆𑀧𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀤𑁄𑀫𑀦𑀲𑁆𑀲𑀦𑁆𑀢𑀺 𑀘 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑀤𑁄𑀫𑀦𑀲𑁆𑀲𑀦𑁆𑀢𑀺 𑀘 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀏𑀓𑁄 𑀪𑀺𑀓𑁆𑀔𑀼 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀤𑁄𑀫𑀦𑀲𑁆𑀲𑁂 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀇𑀤𑀁 𑀤𑁄𑀫𑀦𑀲𑁆𑀲𑀁 𑀓𑀺𑀁 𑀦𑀺𑀲𑁆𑀲𑀺𑀢𑀦𑁆𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀦𑁆𑀢𑀺 𑀧𑀚𑀸𑀦𑀸𑀢𑀻𑀢𑀺 𑀨𑀲𑁆𑀲𑀧𑀜𑁆𑀘𑀫𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀢𑀺. 𑀏𑀓𑁄 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑁂 𑀤𑁄𑀫𑀦𑀲𑁆𑀲𑁂 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀢𑀺. 𑀢𑀢𑁆𑀣 𑀅𑀪𑀺𑀦𑀺𑀯𑀺𑀝𑁆𑀞𑀤𑁄𑀫𑀦𑀲𑁆𑀲𑁂𑀲𑀼𑀧𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀢𑁄 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁 𑀧𑀡𑀻𑀢𑀢𑀭𑀁. 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀤𑁄𑀫𑀦𑀲𑁆𑀲𑀯𑀺𑀧𑀲𑁆𑀲𑀦𑀸𑀢𑁄𑀧𑀺 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑀤𑁄𑀫𑀦𑀲𑁆𑀲𑀯𑀺𑀧𑀲𑁆𑀲𑀦𑀸 ¶ 𑀧𑀡𑀻𑀢𑀢𑀭𑀸. 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀤𑁄𑀫𑀦𑀲𑁆𑀲𑀨𑀮𑀲𑀫𑀸𑀧𑀢𑁆𑀢𑀺𑀢𑁄𑀧𑀺 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑀤𑁄𑀫𑀦𑀲𑁆𑀲𑀨𑀮𑀲𑀫𑀸𑀧𑀢𑁆𑀢𑀺𑀬𑁂𑀯 𑀧𑀡𑀻𑀢𑀢𑀭𑀸 ¶ . 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀬𑁂 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁂 𑀢𑁂 𑀧𑀡𑀻𑀢𑀢𑀭𑁂’’𑀢𑀺.

𑁩𑁬𑁨. 𑀏𑀯𑀭𑀽𑀧𑀸 𑀉𑀧𑁂𑀓𑁆𑀔𑀸 𑀦 𑀲𑁂𑀯𑀺𑀢𑀩𑁆𑀩𑀸𑀢𑀺 𑀏𑀯𑀭𑀽𑀧𑀸 𑀕𑁂𑀳𑀲𑀺𑀢𑀉𑀧𑁂𑀓𑁆𑀔𑀸 𑀦 𑀲𑁂𑀯𑀺𑀢𑀩𑁆𑀩𑀸. 𑀕𑁂𑀳𑀲𑀺𑀢𑀉𑀧𑁂𑀓𑁆𑀔𑀸 𑀦𑀸𑀫 ‘‘𑀢𑀢𑁆𑀣 𑀓𑀢𑀫𑀸 𑀙 𑀕𑁂𑀳𑀲𑀺𑀢𑀉𑀧𑁂𑀓𑁆𑀔𑀸. 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀉𑀧𑁂𑀓𑁆𑀔𑀸 𑀩𑀸𑀮𑀲𑁆𑀲 𑀫𑀽𑀴𑁆𑀳𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀦𑁄𑀥𑀺𑀚𑀺𑀦𑀲𑁆𑀲 𑀅𑀯𑀺𑀧𑀸𑀓𑀚𑀺𑀦𑀲𑁆𑀲 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲, 𑀬𑀸 𑀏𑀯𑀭𑀽𑀧𑀸 𑀉𑀧𑁂𑀓𑁆𑀔𑀸, 𑀭𑀽𑀧𑀁 𑀲𑀸 𑀦𑀸𑀢𑀺𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀲𑀸 𑀉𑀧𑁂𑀓𑁆𑀔𑀸 𑀕𑁂𑀳𑀲𑀺𑀢𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀏𑀯𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀕𑀼𑀴𑀧𑀺𑀡𑁆𑀟𑀺𑀓𑁂 𑀦𑀺𑀮𑀻𑀦𑀫𑀓𑁆𑀔𑀺𑀓𑀸 ¶ 𑀯𑀺𑀬 𑀭𑀽𑀧𑀸𑀤𑀻𑀦𑀺 𑀅𑀦𑀢𑀺𑀯𑀢𑁆𑀢𑀫𑀸𑀦𑀸 𑀢𑀢𑁆𑀣𑁂𑀯 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀳𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑀸 𑀓𑀸𑀫𑀕𑀼𑀡𑀦𑀺𑀲𑁆𑀲𑀺𑀢𑀸 𑀉𑀧𑁂𑀓𑁆𑀔𑀸 𑀦 𑀲𑁂𑀯𑀺𑀢𑀩𑁆𑀩𑀸.

𑀏𑀯𑀭𑀽𑀧𑀸 𑀉𑀧𑁂𑀓𑁆𑀔𑀸 𑀲𑁂𑀯𑀺𑀢𑀩𑁆𑀩𑀸𑀢𑀺 𑀏𑀯𑀭𑀽𑀧𑀸 𑀦𑁂𑀓𑁆𑀔𑀫𑁆𑀫𑀲𑀺𑀢𑀸 𑀉𑀧𑁂𑀓𑁆𑀔𑀸 𑀲𑁂𑀯𑀺𑀢𑀩𑁆𑀩𑀸. 𑀦𑁂𑀓𑁆𑀔𑀫𑁆𑀫𑀲𑀺𑀢𑀸 𑀉𑀧𑁂𑀓𑁆𑀔𑀸 𑀦𑀸𑀫 𑁋 ‘‘𑀢𑀢𑁆𑀣 𑀓𑀢𑀫𑀸 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸 𑀉𑀧𑁂𑀓𑁆𑀔𑀸? 𑀭𑀽𑀧𑀸𑀦𑀁 𑀢𑁆𑀯𑁂𑀯 𑀅𑀦𑀺𑀘𑁆𑀘𑀢𑀁 𑀯𑀺𑀤𑀺𑀢𑁆𑀯𑀸 𑀯𑀺𑀧𑀭𑀺𑀡𑀸𑀫𑀯𑀺𑀭𑀸𑀕𑀦𑀺𑀭𑁄𑀥𑀁 ‘𑀧𑀼𑀩𑁆𑀩𑁂 𑀘𑁂𑀯 𑀭𑀽𑀧𑀸 𑀏𑀢𑀭𑀳𑀺 𑀘, 𑀲𑀩𑁆𑀩𑁂 𑀢𑁂 𑀭𑀽𑀧𑀸 𑀅𑀦𑀺𑀘𑁆𑀘𑀸, 𑀤𑀼𑀓𑁆𑀔𑀸, 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄 𑀉𑀧𑁆𑀧𑀚𑁆𑀚𑀢𑀺 𑀉𑀧𑁂𑀓𑁆𑀔𑀸, 𑀬𑀸 𑀏𑀯𑀭𑀽𑀧𑀸 𑀉𑀧𑁂𑀓𑁆𑀔𑀸, 𑀭𑀽𑀧𑀁 𑀲𑀸 𑀅𑀢𑀺𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀲𑀸 𑀉𑀧𑁂𑀓𑁆𑀔𑀸 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀫. 𑀦𑀺. 𑁩.𑁩𑁦𑁮). 𑀏𑀯𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀦𑀺𑀝𑁆𑀞𑀆𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀇𑀝𑁆𑀞𑁂 𑀅𑀭𑀚𑁆𑀚𑀦𑁆𑀢𑀲𑁆𑀲, 𑀅𑀦𑀺𑀝𑁆𑀞𑁂 𑀅𑀤𑀼𑀲𑁆𑀲𑀦𑁆𑀢𑀲𑁆𑀲, 𑀅𑀲𑀫𑀧𑁂𑀓𑁆𑀔𑀦𑁂𑀦 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀯𑀺𑀧𑀲𑁆𑀲𑀦𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀉𑀧𑁂𑀓𑁆𑀔𑀸. 𑀅𑀧𑀺𑀘 𑀯𑁂𑀤𑀦𑀸𑀲𑀪𑀸𑀕𑀸 𑀢𑀢𑁆𑀭 𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀧𑀺 𑀏𑀢𑁆𑀣 𑀉𑀧𑁂𑀓𑁆𑀔𑀸𑀯. 𑀢𑀲𑁆𑀫𑀸 𑀲𑁂𑀯𑀺𑀢𑀩𑁆𑀩𑀸𑀢𑀺 𑀅𑀬𑀁 𑀦𑁂𑀓𑁆𑀔𑀫𑁆𑀫𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀯𑀲𑁂𑀦 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀲𑁂𑀦 𑀘 𑀉𑀧𑁆𑀧𑀚𑁆𑀚𑀦𑀓𑀉𑀧𑁂𑀓𑁆𑀔𑀸 𑀲𑁂𑀯𑀺𑀢𑀩𑁆𑀩𑀸 𑀦𑀸𑀫.

𑀏𑀢𑁆𑀣 𑀬𑀁 𑀘𑁂 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀦𑁆𑀢𑀺 𑀢𑀸𑀬𑀧𑀺 𑀦𑁂𑀓𑁆𑀔𑀫𑁆𑀫𑀲𑀺𑀢𑀉𑀧𑁂𑀓𑁆𑀔𑀸𑀬 𑀬𑀁 𑀦𑁂𑀓𑁆𑀔𑀫𑁆𑀫𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀯𑀲𑁂𑀦 𑀧𑀞𑀫𑀚𑁆𑀛𑀸𑀦𑀯𑀲𑁂𑀦 𑀘 𑀉𑀧𑁆𑀧𑀦𑁆𑀦𑀁 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁 𑀉𑀧𑁂𑀓𑁆𑀔𑀦𑁆𑀢𑀺 𑀚𑀸𑀦𑁂𑀬𑁆𑀬. 𑀬𑀁 𑀘𑁂 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀦𑁆𑀢𑀺 𑀬𑀁 𑀧𑀦 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑀁 𑀉𑀧𑁂𑀓𑁆𑀔𑀦𑁆𑀢𑀺 𑀚𑀸𑀦𑁂𑀬𑁆𑀬. 𑀬𑁂 ¶ 𑀅𑀯𑀺𑀢𑀓𑁆𑀓𑁂 𑀅𑀯𑀺𑀘𑀸𑀭𑁂 𑀢𑁂 𑀧𑀡𑀻𑀢𑀢𑀭𑁂𑀢𑀺 𑀏𑀢𑀸𑀲𑀼 𑀤𑁆𑀯𑀻𑀲𑀼 𑀬𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸, 𑀲𑀸 𑀧𑀡𑀻𑀢𑀢𑀭𑀸𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀓𑀺𑀁 𑀓𑀣𑀺𑀢𑀁 𑀳𑁄𑀢𑀺 ¶ ? 𑀤𑁆𑀯𑀺𑀦𑁆𑀦𑀁 𑀅𑀭𑀳𑀢𑁆𑀢𑀁 𑀓𑀣𑀺𑀢𑀁. 𑀏𑀓𑁄 𑀳𑀺 𑀪𑀺𑀓𑁆𑀔𑀼 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀉𑀧𑁂𑀓𑁆𑀔𑀸𑀬 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀬𑀁 𑀉𑀧𑁂𑀓𑁆𑀔𑀸 𑀓𑀺𑀁 𑀦𑀺𑀲𑁆𑀲𑀺𑀢𑀸𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀸𑀢𑀺 𑀧𑀚𑀸𑀦𑀸𑀢𑀻𑀢𑀺 𑀨𑀲𑁆𑀲𑀧𑀜𑁆𑀘𑀫𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀢𑀺. 𑀏𑀓𑁄 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑀸𑀬 𑀉𑀧𑁂𑀓𑁆𑀔𑀸𑀬 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀢𑀺. 𑀢𑀢𑁆𑀣 𑀅𑀪𑀺𑀦𑀺𑀯𑀺𑀝𑁆𑀞𑀉𑀧𑁂𑀓𑁆𑀔𑀸𑀲𑀼𑀧𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀢𑁄 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑀸 𑀧𑀡𑀻𑀢𑀢𑀭𑀸. 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀉𑀧𑁂𑀓𑁆𑀔𑀸𑀯𑀺𑀧𑀲𑁆𑀲𑀦𑀸𑀢𑁄𑀧𑀺 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑀉𑀧𑁂𑀓𑁆𑀔𑀸𑀯𑀺𑀧𑀲𑁆𑀲𑀦𑀸𑀧𑀡𑀻𑀢𑀢𑀭𑀸. 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀉𑀧𑁂𑀓𑁆𑀔𑀸𑀨𑀮𑀲𑀫𑀸𑀧𑀢𑁆𑀢𑀺𑀢𑁄𑀧𑀺 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑀼𑀧𑁂𑀓𑁆𑀔𑀸𑀨𑀮𑀲𑀫𑀸𑀧𑀢𑁆𑀢𑀺𑀬𑁂𑀯 𑀧𑀡𑀻𑀢𑀢𑀭𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀬𑁂 𑀅𑀯𑀺𑀢𑀓𑁆𑀓𑁂 𑀅𑀯𑀺𑀘𑀸𑀭𑁂 𑀢𑁂 𑀧𑀡𑀻𑀢𑀢𑀭𑁂’’𑀢𑀺.

𑁩𑁬𑁩. 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀪𑀺𑀓𑁆𑀔𑀼 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀦𑀺𑀭𑁄𑀥𑀲𑀸𑀭𑀼𑀧𑁆𑀧𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻𑀢𑀺 𑀪𑀕𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀺. 𑀲𑀓𑁆𑀓𑁄 𑀧𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 ¶ 𑀧𑀢𑁆𑀢𑁄. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀅𑀚𑁆𑀛𑀸𑀲𑀬𑁄 𑀳𑀻𑀦𑁄 𑀦 𑀳𑁄𑀢𑀺, 𑀉𑀓𑁆𑀓𑀝𑁆𑀞𑁄𑀯 𑀳𑁄𑀢𑀺. 𑀏𑀓𑀲𑁆𑀲𑀧𑀺 𑀩𑀳𑀽𑀦𑀫𑁆𑀧𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀸 𑀅𑀭𑀳𑀢𑁆𑀢𑁂𑀦𑁂𑀯 𑀓𑀽𑀝𑀁 𑀕𑀡𑁆𑀳𑀦𑁆𑀢𑀺. 𑀲𑀢𑁆𑀢𑀸 𑀧𑀦 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑁂 𑀉𑀧𑀦𑀺𑀲𑁆𑀲𑀬𑁂 𑀞𑀺𑀢𑀸 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸 𑀳𑁄𑀦𑁆𑀢𑀺, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀻, 𑀓𑁂𑀘𑀺 𑀅𑀦𑀸𑀕𑀸𑀫𑀻, 𑀓𑁂𑀘𑀺 𑀅𑀭𑀳𑀦𑁆𑀢𑁄. 𑀭𑀸𑀚𑀸 𑀯𑀺𑀬 𑀳𑀺 𑀪𑀕𑀯𑀸, 𑀭𑀸𑀚𑀓𑀼𑀫𑀸𑀭𑀸 𑀯𑀺𑀬 𑀯𑁂𑀦𑁂𑀬𑁆𑀬𑀸. 𑀬𑀣𑀸 𑀳𑀺 𑀭𑀸𑀚𑀸 𑀪𑁄𑀚𑀦𑀓𑀸𑀮𑁂 𑀅𑀢𑁆𑀢𑀦𑁄 𑀧𑀫𑀸𑀡𑁂𑀦 𑀧𑀺𑀡𑁆𑀟𑀁 𑀉𑀤𑁆𑀥𑀭𑀺𑀢𑁆𑀯𑀸 𑀭𑀸𑀚𑀓𑀼𑀫𑀸𑀭𑀸𑀦𑀁 𑀉𑀧𑀦𑁂𑀢𑀺, 𑀢𑁂 𑀢𑀢𑁄 𑀅𑀢𑁆𑀢𑀦𑁄 𑀫𑀼𑀔𑀧𑁆𑀧𑀫𑀸𑀡𑁂𑀦𑁂𑀯 𑀓𑀩𑀴𑀁 𑀓𑀭𑁄𑀦𑁆𑀢𑀺, 𑀏𑀯𑀁 𑀪𑀕𑀯𑀸 𑀅𑀢𑁆𑀢𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀸𑀬 𑀤𑁂𑀲𑀦𑀸𑀬 𑀅𑀭𑀳𑀢𑁆𑀢𑁂𑀦𑁂𑀯 𑀓𑀽𑀝𑀁 𑀕𑀡𑁆𑀳𑀸𑀢𑀺. 𑀯𑁂𑀦𑁂𑀬𑁆𑀬𑀸 𑀅𑀢𑁆𑀢𑀦𑁄 𑀉𑀧𑀦𑀺𑀲𑁆𑀲𑀬𑀧𑁆𑀧𑀫𑀸𑀡𑁂𑀦 𑀢𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀫𑀢𑁆𑀢𑀁 𑀯𑀸 𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀅𑀭𑀳𑀢𑁆𑀢𑀨𑀮𑀫𑁂𑀯 𑀯𑀸 𑀕𑀡𑁆𑀳𑀦𑁆𑀢𑀺. 𑀲𑀓𑁆𑀓𑁄 𑀧𑀦 𑀲𑁄𑀢𑀸𑀧𑀦𑁆𑀦𑁄 𑀚𑀸𑀢𑁄. 𑀲𑁄𑀢𑀸𑀧𑀦𑁆𑀦𑁄 𑀘 𑀳𑀼𑀢𑁆𑀯𑀸 𑀪𑀕𑀯𑀢𑁄 𑀧𑀼𑀭𑀢𑁄𑀬𑁂𑀯 𑀘𑀯𑀺𑀢𑁆𑀯𑀸 𑀢𑀭𑀼𑀡𑀲𑀓𑁆𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀤𑁂𑀯𑀢𑀸𑀦𑀜𑁆𑀳𑀺 𑀘𑀯𑀫𑀸𑀦𑀸𑀦𑀁 𑀅𑀢𑁆𑀢𑀪𑀸𑀯𑀲𑁆𑀲 𑀕𑀢𑀸𑀕𑀢𑀝𑁆𑀞𑀸𑀦𑀁 𑀦𑀸𑀫 𑀦 𑀧𑀜𑁆𑀜𑀸𑀬𑀢𑀺, 𑀤𑀻𑀧𑀲𑀺𑀔𑀸𑀕𑀫𑀦𑀁 𑀯𑀺𑀬 𑀳𑁄𑀢𑀺. 𑀢𑀲𑁆𑀫𑀸 𑀲𑁂𑀲𑀤𑁂𑀯𑀢𑀸 𑀦 𑀚𑀸𑀦𑀺𑀁𑀲𑀼. 𑀲𑀓𑁆𑀓𑁄 𑀧𑀦 𑀲𑀬𑀁 𑀘𑀼𑀢𑀢𑁆𑀢𑀸 𑀪𑀕𑀯𑀸 𑀘 𑀅𑀧𑁆𑀧𑀝𑀺𑀳𑀢𑀜𑀸𑀡𑀢𑁆𑀢𑀸 𑀤𑁆𑀯𑁂𑀯 𑀚𑀦𑀸 𑀚𑀸𑀦𑀺𑀁𑀲𑀼. 𑀅𑀣 𑀲𑀓𑁆𑀓𑁄 𑀘𑀺𑀦𑁆𑀢𑁂𑀲𑀺 ¶ ‘‘𑀫𑀬𑁆𑀳𑀜𑁆𑀳𑀺 𑀪𑀕𑀯𑀢𑀸 𑀢𑀻𑀲𑀼 𑀞𑀸𑀦𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑀨𑀮𑀫𑁂𑀯 𑀓𑀣𑀺𑀢𑀁, 𑀅𑀬𑀜𑁆𑀘 𑀧𑀦 𑀫𑀕𑁆𑀕𑁄 𑀯𑀸 𑀨𑀮𑀁 𑀯𑀸 𑀲𑀓𑀼𑀡𑀺𑀓𑀸𑀬 𑀯𑀺𑀬 𑀉𑀧𑁆𑀧𑀢𑀺𑀢𑁆𑀯𑀸 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸, 𑀆𑀕𑀫𑀦𑀻𑀬𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀅𑀲𑁆𑀲 𑀪𑀯𑀺𑀢𑀩𑁆𑀩𑀁. 𑀳𑀦𑁆𑀤𑀸𑀳𑀁 𑀉𑀧𑀭𑀺 𑀔𑀻𑀡𑀸𑀲𑀯𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀧𑀼𑀘𑁆𑀙𑀸𑀫𑀻’’𑀢𑀺.

𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀯𑀡𑁆𑀡𑀦𑀸

𑁩𑁬𑁪. 𑀢𑀢𑁄 ¶ 𑀢𑀁 𑀧𑀼𑀘𑁆𑀙𑀦𑁆𑀢𑁄 𑀓𑀣𑀁 𑀧𑀝𑀺𑀧𑀦𑁆𑀦𑁄 𑀧𑀦, 𑀫𑀸𑀭𑀺𑀲𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀬𑀸𑀢𑀺 𑀉𑀢𑁆𑀢𑀫𑀚𑁂𑀝𑁆𑀞𑀓𑀲𑀻𑀮𑀲𑀁𑀯𑀭𑀸𑀬. 𑀓𑀸𑀬𑀲𑀫𑀸𑀘𑀸𑀭𑀫𑁆𑀧𑀻𑀢𑀺𑀆𑀤𑀺 𑀲𑁂𑀯𑀺𑀢𑀩𑁆𑀩𑀓𑀸𑀬𑀲𑀫𑀸𑀘𑀸𑀭𑀸𑀤𑀺𑀯𑀲𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑀻𑀮𑀓𑀣𑀸 𑀘 𑀦𑀸𑀫𑁂𑀲𑀸 𑀓𑀫𑁆𑀫𑀧𑀣𑀯𑀲𑁂𑀦 𑀯𑀸 𑀧𑀡𑁆𑀡𑀢𑁆𑀢𑀺𑀯𑀲𑁂𑀦 𑀯𑀸 𑀓𑀣𑁂𑀢𑀩𑁆𑀩𑀸 𑀳𑁄𑀢𑀺.

𑀢𑀢𑁆𑀣 𑀓𑀫𑁆𑀫𑀧𑀣𑀯𑀲𑁂𑀦 𑀓𑀣𑁂𑀦𑁆𑀢𑁂𑀦 𑀅𑀲𑁂𑀯𑀺𑀢𑀩𑁆𑀩𑀓𑀸𑀬𑀲𑀫𑀸𑀘𑀸𑀭𑁄 𑀢𑀸𑀯 𑀧𑀸𑀡𑀸𑀢𑀺𑀧𑀸𑀢𑀅𑀤𑀺𑀦𑁆𑀦𑀸𑀤𑀸𑀦𑀫𑀺𑀘𑁆𑀙𑀸𑀘𑀸𑀭𑁂𑀳𑀺 𑀓𑀣𑁂𑀢𑀩𑁆𑀩𑁄. 𑀧𑀡𑁆𑀡𑀢𑁆𑀢𑀺𑀯𑀲𑁂𑀦 𑀓𑀣𑁂𑀦𑁆𑀢𑁂𑀦 𑀓𑀸𑀬𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀓𑀣𑁂𑀢𑀩𑁆𑀩𑁄. 𑀲𑁂𑀯𑀺𑀢𑀩𑁆𑀩𑀓𑀸𑀬𑀲𑀫𑀸𑀘𑀸𑀭𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑁂𑀭𑀫𑀡𑀻𑀳𑀺 𑀘𑁂𑀯 𑀓𑀸𑀬𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀅𑀯𑀻𑀢𑀺𑀓𑁆𑀓𑀫𑁂𑀦 𑀘 𑀓𑀣𑁂𑀢𑀩𑁆𑀩𑁄. 𑀅𑀲𑁂𑀯𑀺𑀢𑀩𑁆𑀩𑀯𑀘𑀻𑀲𑀫𑀸𑀘𑀸𑀭𑁄 𑀫𑀼𑀲𑀸𑀯𑀸𑀤𑀸𑀤𑀺𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀘𑁂𑀯 𑀯𑀘𑀻𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑁂𑀦 𑀘 𑀓𑀣𑁂𑀢𑀩𑁆𑀩𑁄. 𑀲𑁂𑀯𑀺𑀢𑀩𑁆𑀩𑀯𑀘𑀻𑀲𑀫𑀸𑀘𑀸𑀭𑁄 𑀫𑀼𑀲𑀸𑀯𑀸𑀤𑀸𑀤𑀺𑀯𑁂𑀭𑀫𑀡𑀻𑀳𑀺 𑀘𑁂𑀯 𑀯𑀘𑀻𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀅𑀯𑀻𑀢𑀺𑀓𑁆𑀓𑀫𑁂𑀦 𑀘 𑀓𑀣𑁂𑀢𑀩𑁆𑀩𑁄.

𑀧𑀭𑀺𑀬𑁂𑀲𑀦𑀸 ¶ 𑀧𑀦 𑀓𑀸𑀬𑀯𑀸𑀘𑀸𑀳𑀺 𑀧𑀭𑀺𑀬𑁂𑀲𑀦𑀸𑀬𑁂𑀯. 𑀲𑀸 𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑀕𑀳𑀡𑁂𑀦 𑀕𑀳𑀺𑀢𑀸𑀧𑀺 𑀲𑀫𑀸𑀦𑀸 𑀬𑀲𑁆𑀫𑀸 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀁 𑀦𑀸𑀫 𑀏𑀢𑀲𑁆𑀫𑀺𑀜𑁆𑀜𑁂𑀯 𑀤𑁆𑀯𑀸𑀭𑀤𑁆𑀯𑀬𑁂 𑀉𑀧𑁆𑀧𑀚𑁆𑀚𑀢𑀺, 𑀦 𑀆𑀓𑀸𑀲𑁂, 𑀢𑀲𑁆𑀫𑀸 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀤𑀲𑁆𑀲𑀦𑀢𑁆𑀣𑀁 𑀯𑀺𑀲𑀼𑀁 𑀯𑀼𑀢𑁆𑀢𑀸. 𑀢𑀢𑁆𑀣 𑀦𑀲𑁂𑀯𑀺𑀢𑀩𑁆𑀩𑀧𑀭𑀺𑀬𑁂𑀲𑀦𑀸 𑀅𑀦𑀭𑀺𑀬𑀧𑀭𑀺𑀬𑁂𑀲𑀦𑀸𑀬 𑀓𑀣𑁂𑀢𑀩𑁆𑀩𑀸. 𑀲𑁂𑀯𑀺𑀢𑀩𑁆𑀩𑀧𑀭𑀺𑀬𑁂𑀲𑀦𑀸 𑀅𑀭𑀺𑀬𑀧𑀭𑀺𑀬𑁂𑀲𑀦𑀸𑀬. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀧𑀭𑀺𑀬𑁂𑀲𑀦𑀸 𑀅𑀦𑀭𑀺𑀬𑀸 𑀘 𑀧𑀭𑀺𑀬𑁂𑀲𑀦𑀸, 𑀅𑀭𑀺𑀬𑀸 𑀘 𑀧𑀭𑀺𑀬𑁂𑀲𑀦𑀸. 𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀅𑀦𑀭𑀺𑀬𑀸 𑀧𑀭𑀺𑀬𑁂𑀲𑀦𑀸? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀚𑀸𑀢𑀺𑀥𑀫𑁆𑀫𑁄 𑀲𑀫𑀸𑀦𑁄 𑀚𑀸𑀢𑀺𑀥𑀫𑁆𑀫𑀁𑀬𑁂𑀯 𑀧𑀭𑀺𑀬𑁂𑀲𑀢𑀺, 𑀅𑀢𑁆𑀢𑀦𑀸 𑀚𑀭𑀸𑀥𑀫𑁆𑀫𑁄, 𑀩𑁆𑀬𑀸𑀥𑀺𑀥𑀫𑁆𑀫𑁄, 𑀫𑀭𑀡𑀥𑀫𑁆𑀫𑁄, 𑀲𑁄𑀓𑀥𑀫𑁆𑀫𑁄, 𑀲𑀁𑀓𑀺𑀮𑁂𑀲𑀥𑀫𑁆𑀫𑁄 𑀲𑀫𑀸𑀦𑁄 𑀲𑀁𑀓𑀺𑀮𑁂𑀲𑀥𑀫𑁆𑀫𑀁𑀬𑁂𑀯 𑀧𑀭𑀺𑀬𑁂𑀲𑀢𑀺.

𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀚𑀸𑀢𑀺𑀥𑀫𑁆𑀫𑀁 𑀯𑀤𑁂𑀣? 𑀧𑀼𑀢𑁆𑀢𑀪𑀭𑀺𑀬𑀁, 𑀪𑀺𑀓𑁆𑀔𑀯𑁂 ¶ , 𑀚𑀸𑀢𑀺𑀥𑀫𑁆𑀫𑀁, 𑀤𑀸𑀲𑀺𑀤𑀸𑀲𑀁 𑀚𑀸𑀢𑀺𑀥𑀫𑁆𑀫𑀁 𑀅𑀚𑁂𑀴𑀓𑀁 𑀚𑀸𑀢𑀺𑀥𑀫𑁆𑀫𑀁, 𑀓𑀼𑀓𑁆𑀓𑀼𑀝𑀲𑀽𑀓𑀭𑀁 𑀚𑀸𑀢𑀺𑀥𑀫𑁆𑀫𑀁, 𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑀁 𑀚𑀸𑀢𑀺𑀥𑀫𑁆𑀫𑀁, 𑀚𑀸𑀢𑀭𑀽𑀧𑀭𑀚𑀢𑀁 𑀚𑀸𑀢𑀺𑀥𑀫𑁆𑀫𑀁. 𑀚𑀸𑀢𑀺𑀥𑀫𑁆𑀫𑀸 ¶ 𑀳𑁂𑀢𑁂, 𑀪𑀺𑀓𑁆𑀔𑀯𑁂, 𑀉𑀧𑀥𑀬𑁄, 𑀏𑀢𑁆𑀣𑀸𑀬𑀁 𑀕𑀣𑀺𑀢𑁄 𑀫𑀼𑀘𑁆𑀙𑀺𑀢𑁄 𑀅𑀚𑁆𑀛𑀸𑀧𑀦𑁆𑀦𑁄 𑀅𑀢𑁆𑀢𑀦𑀸 𑀚𑀸𑀢𑀺𑀥𑀫𑁆𑀫𑁄 𑀲𑀫𑀸𑀦𑁄 𑀚𑀸𑀢𑀺𑀥𑀫𑁆𑀫𑀁𑀬𑁂𑀯 𑀧𑀭𑀺𑀬𑁂𑀲𑀢𑀺.

𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀚𑀭𑀸𑀥𑀫𑁆𑀫𑀁 𑀯𑀤𑁂𑀣? 𑀧𑀼𑀢𑁆𑀢𑀪𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀚𑀭𑀸𑀥𑀫𑁆𑀫𑀁…𑀧𑁂… 𑀚𑀭𑀸𑀥𑀫𑁆𑀫𑀁𑀬𑁂𑀯 𑀧𑀭𑀺𑀬𑁂𑀲𑀢𑀺.

𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀩𑁆𑀬𑀸𑀥𑀺𑀥𑀫𑁆𑀫𑀁 𑀯𑀤𑁂𑀣? 𑀧𑀼𑀢𑁆𑀢𑀪𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀩𑁆𑀬𑀸𑀥𑀺𑀥𑀫𑁆𑀫𑀁, 𑀤𑀸𑀲𑀺𑀤𑀸𑀲𑀁 𑀩𑁆𑀬𑀸𑀥𑀺𑀥𑀫𑁆𑀫𑀁, 𑀅𑀚𑁂𑀴𑀓𑀁, 𑀓𑀼𑀓𑁆𑀓𑀼𑀝𑀲𑀽𑀓𑀭𑀁, 𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑀁 𑀩𑁆𑀬𑀸𑀥𑀺𑀥𑀫𑁆𑀫𑀁. 𑀩𑁆𑀬𑀸𑀥𑀺𑀥𑀫𑁆𑀫𑀸 𑀳𑁂𑀢𑁂, 𑀪𑀺𑀓𑁆𑀔𑀯𑁂, 𑀉𑀧𑀥𑀬𑁄, 𑀏𑀢𑁆𑀣𑀸𑀬𑀁 𑀕𑀣𑀺𑀢𑁄 𑀫𑀼𑀘𑁆𑀙𑀺𑀢𑁄 𑀅𑀚𑁆𑀛𑀸𑀧𑀦𑁆𑀦𑁄 𑀅𑀢𑁆𑀢𑀦𑀸 𑀩𑁆𑀬𑀸𑀥𑀺𑀥𑀫𑁆𑀫𑁄 𑀲𑀫𑀸𑀦𑁄 𑀩𑁆𑀬𑀸𑀥𑀺𑀥𑀫𑁆𑀫𑀁𑀬𑁂𑀯 𑀧𑀭𑀺𑀬𑁂𑀲𑀢𑀺.

𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀫𑀭𑀡𑀥𑀫𑁆𑀫𑀁 𑀯𑀤𑁂𑀣? 𑀧𑀼𑀢𑁆𑀢𑀪𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀫𑀭𑀡𑀥𑀫𑁆𑀫𑀁…𑀧𑁂… 𑀫𑀭𑀡𑀥𑀫𑁆𑀫𑀁𑀬𑁂𑀯 𑀧𑀭𑀺𑀬𑁂𑀲𑀢𑀺.

𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑁄𑀓𑀥𑀫𑁆𑀫𑀁 𑀯𑀤𑁂𑀣? 𑀧𑀼𑀢𑁆𑀢𑀪𑀭𑀺𑀬𑀁…𑀧𑁂… 𑀲𑁄𑀓𑀥𑀫𑁆𑀫𑀁𑀬𑁂𑀯 𑀧𑀭𑀺𑀬𑁂𑀲𑀢𑀺.

𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀁𑀓𑀺𑀮𑁂𑀲𑀥𑀫𑁆𑀫𑀁 𑀯𑀤𑁂𑀣…𑀧𑁂… 𑀚𑀸𑀢𑀭𑀽𑀧𑀭𑀚𑀢𑀁 𑀲𑀁𑀓𑀺𑀮𑁂𑀲𑀥𑀫𑁆𑀫𑀁. 𑀲𑀁𑀓𑀺𑀮𑁂𑀲𑀥𑀫𑁆𑀫𑀸 ¶ , 𑀳𑁂𑀢𑁂, 𑀪𑀺𑀓𑁆𑀔𑀯𑁂, 𑀉𑀧𑀥𑀬𑁄, 𑀏𑀢𑁆𑀣𑀸𑀬𑀁 𑀕𑀣𑀺𑀢𑁄 𑀫𑀼𑀘𑁆𑀙𑀺𑀢𑁄 𑀅𑀚𑁆𑀛𑀸𑀧𑀦𑁆𑀦𑁄 𑀅𑀢𑁆𑀢𑀦𑀸 𑀲𑀁𑀓𑀺𑀮𑁂𑀲𑀥𑀫𑁆𑀫𑁄 𑀲𑀫𑀸𑀦𑁄 𑀲𑀁𑀓𑀺𑀮𑁂𑀲𑀥𑀫𑁆𑀫𑀁𑀬𑁂𑀯 𑀧𑀭𑀺𑀬𑁂𑀲𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀅𑀦𑀭𑀺𑀬𑀸 𑀧𑀭𑀺𑀬𑁂𑀲𑀦𑀸𑀢𑀺 (𑀫. 𑀦𑀺. 𑁧.𑁨𑁭𑁪).

𑀅𑀧𑀺𑀘 𑀓𑀼𑀳𑀦𑀸𑀤𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑀸, 𑀅𑀕𑁄𑀘𑀭𑀯𑀲𑁂𑀦 𑀙𑀩𑁆𑀩𑀺𑀥𑀸 𑀯𑁂𑀚𑁆𑀚𑀓𑀫𑁆𑀫𑀸𑀤𑀺𑀯𑀲𑁂𑀦 𑀏𑀓𑀯𑀻𑀲𑀢𑀺𑀯𑀺𑀥𑀸, 𑀏𑀯𑀁 𑀧𑀯𑀢𑁆𑀢𑀸 𑀲𑀩𑁆𑀩𑀸𑀧𑀺 𑀅𑀦𑁂𑀲𑀦𑀸 𑀅𑀦𑀭𑀺𑀬𑀧𑀭𑀺𑀬𑁂𑀲𑀦𑀸𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀸 𑀧𑀭𑀺𑀬𑁂𑀲𑀦𑀸? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀅𑀢𑁆𑀢𑀦𑀸 𑀚𑀸𑀢𑀺𑀥𑀫𑁆𑀫𑁄 𑀲𑀫𑀸𑀦𑁄 𑀚𑀸𑀢𑀺𑀥𑀫𑁆𑀫𑁂 𑀆𑀤𑀻𑀦𑀯𑀁 𑀯𑀺𑀤𑀺𑀢𑁆𑀯𑀸 𑀅𑀚𑀸𑀢𑀁 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁂𑀲𑀢𑀺, 𑀅𑀢𑁆𑀢𑀦𑀸 𑀚𑀭𑀸𑀥𑀫𑁆𑀫𑁄, 𑀩𑁆𑀬𑀸𑀥𑀺, 𑀫𑀭𑀡, 𑀲𑁄𑀓, 𑀲𑀁𑀓𑀺𑀮𑁂𑀲𑀥𑀫𑁆𑀫𑁄 𑀲𑀫𑀸𑀦𑁄 𑀲𑀁𑀓𑀺𑀮𑁂𑀲𑀥𑀫𑁆𑀫𑁂 𑀆𑀤𑀻𑀦𑀯𑀁 𑀯𑀺𑀤𑀺𑀢𑁆𑀯𑀸 𑀅𑀲𑀁𑀓𑀺𑀮𑀺𑀝𑁆𑀞𑀁 𑀅𑀦𑀼𑀢𑁆𑀢𑀭𑀁 ¶ 𑀬𑁄𑀕𑀓𑁆𑀔𑁂𑀫𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁂𑀲𑀢𑀺. 𑀅𑀬𑀁 𑀅𑀭𑀺𑀬𑀸 𑀧𑀭𑀺𑀬𑁂𑀲𑀦𑀸𑀢𑀺 (𑀫. 𑀦𑀺. 𑁧.𑁨𑁭𑁫).

𑀅𑀧𑀺𑀘 𑀧𑀜𑁆𑀘 𑀓𑀼𑀳𑀦𑀸𑀤𑀻𑀦𑀺 𑀙 𑀅𑀕𑁄𑀘𑀭𑁂 𑀏𑀓𑀯𑀻𑀲𑀢𑀺𑀯𑀺𑀥𑀜𑁆𑀘 𑀅𑀦𑁂𑀲𑀦𑀁 𑀯𑀚𑁆𑀚𑁂𑀢𑁆𑀯𑀸 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀥𑀫𑁆𑀫𑁂𑀦 𑀲𑀫𑁂𑀦 𑀧𑀭𑀺𑀬𑁂𑀲𑀦𑀸𑀧𑀺 𑀅𑀭𑀺𑀬𑀧𑀭𑀺𑀬𑁂𑀲𑀦𑀸𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀢𑁆𑀣 𑀘 𑀬𑁄 𑀬𑁄 ¶ ‘‘𑀦 𑀲𑁂𑀯𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑁄, 𑀲𑁄 𑀲𑁄 𑀧𑀼𑀩𑁆𑀩𑀪𑀸𑀕𑁂 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀲𑀫𑁆𑀪𑀸𑀭𑀧𑀭𑀺𑀬𑁂𑀲𑀦𑀸𑀧𑀬𑁄𑀕𑀓𑀭𑀡𑀕𑀫𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀲𑁂𑀯𑀺𑀢𑀩𑁆𑀩𑁄𑀯. 𑀇𑀢𑀭𑁄 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑁂𑀯𑀺𑀢𑀩𑁆𑀩𑁄, 𑀅𑀲𑀓𑁆𑀓𑁄𑀦𑁆𑀢𑁂𑀦 𑀘𑀺𑀢𑁆𑀢𑀫𑁆𑀧𑀺 𑀉𑀧𑁆𑀧𑀸𑀤𑁂𑀢𑀩𑁆𑀩𑀁. 𑀅𑀧𑀺𑀘 𑀲𑀗𑁆𑀖𑀪𑁂𑀤𑀸𑀤𑀻𑀦𑀁 𑀅𑀢𑁆𑀣𑀸𑀬 𑀧𑀭𑀓𑁆𑀓𑀫𑀦𑁆𑀢𑀸𑀦𑀁 𑀤𑁂𑀯𑀤𑀢𑁆𑀢𑀸𑀤𑀻𑀦𑀁 𑀯𑀺𑀬 𑀓𑀸𑀬𑀲𑀫𑀸𑀘𑀸𑀭𑁄 𑀦 𑀲𑁂𑀯𑀺𑀢𑀩𑁆𑀩𑁄, 𑀤𑀺𑀯𑀲𑀲𑁆𑀲 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀉𑀧𑀝𑁆𑀞𑀸𑀦𑀕𑀫𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀸𑀤𑀻𑀦𑀁 𑀯𑀺𑀬 𑀓𑀸𑀬𑀲𑀫𑀸𑀘𑀸𑀭𑁄 𑀲𑁂𑀯𑀺𑀢𑀩𑁆𑀩𑁄. 𑀥𑀦𑀼𑀕𑁆𑀕𑀳𑀧𑁂𑀲𑀦𑀸𑀤𑀺𑀯𑀲𑁂𑀦 𑀯𑀸𑀘𑀁 𑀪𑀺𑀦𑁆𑀤𑀦𑁆𑀢𑀸𑀦𑀁 𑀤𑁂𑀯𑀤𑀢𑁆𑀢𑀸𑀤𑀻𑀦𑀁 𑀯𑀺𑀬 𑀯𑀘𑀻𑀲𑀫𑀸𑀘𑀸𑀭𑁄 𑀦 𑀲𑁂𑀯𑀺𑀢𑀩𑁆𑀩𑁄, 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑀓𑀺𑀢𑁆𑀢𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀸𑀤𑀻𑀦𑀁 𑀯𑀺𑀬 𑀯𑀘𑀻𑀲𑀫𑀸𑀘𑀸𑀭𑁄 𑀲𑁂𑀯𑀺𑀢𑀩𑁆𑀩𑁄. 𑀅𑀦𑀭𑀺𑀬𑀧𑀭𑀺𑀬𑁂𑀲𑀦𑀁 𑀧𑀭𑀺𑀬𑁂𑀲𑀦𑁆𑀢𑀸𑀦𑀁 𑀤𑁂𑀯𑀤𑀢𑁆𑀢𑀸𑀤𑀻𑀦𑀁 𑀯𑀺𑀬 𑀧𑀭𑀺𑀬𑁂𑀲𑀦𑀸 𑀦 𑀲𑁂𑀯𑀺𑀢𑀩𑁆𑀩𑀸, 𑀅𑀭𑀺𑀬𑀧𑀭𑀺𑀬𑁂𑀲𑀦𑀫𑁂𑀯 𑀧𑀭𑀺𑀬𑁂𑀲𑀦𑁆𑀢𑀸𑀦𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀸𑀤𑀻𑀦𑀁 𑀯𑀺𑀬 𑀧𑀭𑀺𑀬𑁂𑀲𑀦𑀸 𑀲𑁂𑀯𑀺𑀢𑀩𑁆𑀩𑀸.

𑀏𑀯𑀁 𑀧𑀝𑀺𑀧𑀦𑁆𑀦𑁄 𑀔𑁄𑀢𑀺 𑀏𑀯𑀁 𑀅𑀲𑁂𑀯𑀺𑀢𑀩𑁆𑀩𑀁 𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑀁 𑀧𑀭𑀺𑀬𑁂𑀲𑀦𑀜𑁆𑀘 𑀧𑀳𑀸𑀬 𑀲𑁂𑀯𑀺𑀢𑀩𑁆𑀩𑀸𑀦𑀁 𑀧𑀸𑀭𑀺𑀧𑀽𑀭𑀺𑀬𑀸 𑀧𑀝𑀺𑀧𑀦𑁆𑀦𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀪𑀺𑀓𑁆𑀔𑀼 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀬 𑀉𑀢𑁆𑀢𑀫𑀚𑁂𑀝𑁆𑀞𑀓𑀲𑀻𑀮𑀲𑀁𑀯𑀭𑀢𑁆𑀣𑀸𑀬 ¶ 𑀧𑀝𑀺𑀧𑀦𑁆𑀦𑁄 𑀦𑀸𑀫 𑀳𑁄𑀢𑀻𑀢𑀺 𑀪𑀕𑀯𑀸 𑀔𑀻𑀡𑀸𑀲𑀯𑀲𑁆𑀲 𑀆𑀕𑀫𑀦𑀻𑀬𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀓𑀣𑁂𑀲𑀺.

𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀯𑀡𑁆𑀡𑀦𑀸

𑁩𑁬𑁫. 𑀤𑀼𑀢𑀺𑀬𑀧𑀼𑀘𑁆𑀙𑀸𑀬𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀬𑀸𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀺𑀥𑀸𑀦𑀸𑀬, 𑀕𑀼𑀢𑁆𑀢𑀤𑁆𑀯𑀸𑀭𑀢𑀸𑀬 𑀲𑀁𑀯𑀼𑀢𑀤𑁆𑀯𑀸𑀭𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀯𑀺𑀲𑁆𑀲𑀚𑁆𑀚𑀦𑁂 𑀧𑀦𑀲𑁆𑀲 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁 𑀭𑀽𑀧𑀫𑁆𑀧𑀻𑀢𑀺𑀆𑀤𑀺 𑀲𑁂𑀯𑀺𑀢𑀩𑁆𑀩𑀭𑀽𑀧𑀸𑀤𑀺𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀯𑀁 𑀯𑀼𑀢𑁆𑀢𑁂𑀢𑀺 𑀳𑁂𑀝𑁆𑀞𑀸 𑀲𑁄𑀫𑀦𑀲𑁆𑀲𑀸𑀤𑀺𑀧𑀜𑁆𑀳𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀁 𑀲𑀼𑀢𑀢𑁆𑀢𑀸 𑀇𑀫𑀺𑀦𑀸𑀧𑀺 𑀏𑀯𑀭𑀽𑀧𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀲𑀜𑁆𑀚𑀸𑀢𑀧𑀝𑀺𑀪𑀸𑀦𑁄 𑀪𑀕𑀯𑀢𑀸 𑀏𑀯𑀁 𑀯𑀼𑀢𑁆𑀢𑁂 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 ¶ 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘, 𑀏𑀢𑀁 𑀇𑀫𑀲𑁆𑀲 𑀔𑁄 𑀅𑀳𑀁, 𑀪𑀦𑁆𑀢𑁂𑀢𑀺 𑀆𑀤𑀺𑀓𑀁 𑀯𑀘𑀦𑀁 𑀅𑀯𑁄𑀘. 𑀪𑀕𑀯𑀸𑀧𑀺𑀲𑁆𑀲 𑀑𑀓𑀸𑀲𑀁 𑀤𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀓𑀣𑁂𑀢𑀼𑀓𑀸𑀫𑁄𑀧𑀺 𑀳𑀺 𑀬𑁄 𑀅𑀢𑁆𑀣𑀁 𑀲𑀫𑁆𑀧𑀸𑀤𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀢𑁆𑀣𑀁 𑀲𑀫𑁆𑀧𑀸𑀤𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑁄 𑀯𑀸 𑀦 𑀓𑀣𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀦 𑀢𑀲𑁆𑀲 𑀪𑀕𑀯𑀸 𑀑𑀓𑀸𑀲𑀁 𑀓𑀭𑁄𑀢𑀺. 𑀅𑀬𑀁 𑀧𑀦 𑀬𑀲𑁆𑀫𑀸 𑀓𑀣𑁂𑀢𑀼𑀓𑀸𑀫𑁄 𑀘𑁂𑀯, 𑀲𑀓𑁆𑀓𑁄𑀢𑀺 𑀘 𑀅𑀢𑁆𑀣𑀁 𑀲𑀫𑁆𑀧𑀸𑀤𑁂𑀢𑀼𑀁 𑀢𑁂𑀦𑀲𑁆𑀲 𑀪𑀕𑀯𑀸 𑀑𑀓𑀸𑀲𑀫𑀓𑀸𑀲𑀺.

𑀢𑀢𑁆𑀣 𑀏𑀯𑀭𑀽𑀧𑀁 𑀦 𑀲𑁂𑀯𑀺𑀢𑀩𑁆𑀩𑀦𑁆𑀢𑀺 𑀆𑀤𑀻𑀲𑀼 𑀅𑀬𑀁 𑀲𑀗𑁆𑀔𑁂𑀧𑁄 𑁋 𑀬𑀁 ¶ 𑀭𑀽𑀧𑀁 𑀧𑀲𑁆𑀲𑀢𑁄 𑀭𑀸𑀕𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀁 𑀦 𑀲𑁂𑀯𑀺𑀢𑀩𑁆𑀩𑀁 𑀦 𑀤𑀝𑁆𑀞𑀩𑁆𑀩𑀁 𑀦 𑀑𑀮𑁄𑀓𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀬𑀁 𑀧𑀦 𑀧𑀲𑁆𑀲𑀢𑁄 𑀅𑀲𑀼𑀪𑀲𑀜𑁆𑀜𑀸 𑀯𑀸 𑀲𑀡𑁆𑀞𑀸𑀢𑀺, 𑀧𑀲𑀸𑀤𑁄 𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀦𑀺𑀘𑁆𑀘𑀲𑀜𑁆𑀜𑀸𑀧𑀝𑀺𑀮𑀸𑀪𑁄 𑀯𑀸 𑀳𑁄𑀢𑀺, 𑀢𑀁 𑀲𑁂𑀯𑀺𑀢𑀩𑁆𑀩𑀁.

𑀬𑀁 𑀘𑀺𑀢𑁆𑀢𑀓𑁆𑀔𑀭𑀁 𑀘𑀺𑀢𑁆𑀢𑀩𑁆𑀬𑀜𑁆𑀚𑀦𑀫𑁆𑀧𑀺 𑀲𑀤𑁆𑀤𑀁 𑀲𑀼𑀡𑀢𑁄 𑀭𑀸𑀕𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀯𑀭𑀽𑀧𑁄 𑀲𑀤𑁆𑀤𑁄 𑀦 𑀲𑁂𑀯𑀺𑀢𑀩𑁆𑀩𑁄. 𑀬𑀁 𑀧𑀦 𑀅𑀢𑁆𑀣𑀦𑀺𑀲𑁆𑀲𑀺𑀢𑀁 𑀥𑀫𑁆𑀫𑀦𑀺𑀲𑁆𑀲𑀺𑀢𑀁 𑀓𑀼𑀫𑁆𑀪𑀤𑀸𑀲𑀺𑀕𑀻𑀢𑀫𑁆𑀧𑀺 𑀲𑀼𑀡𑀦𑁆𑀢𑀲𑁆𑀲 𑀧𑀲𑀸𑀤𑁄 𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀦𑀺𑀩𑁆𑀩𑀺𑀤𑀸 𑀯𑀸 𑀲𑀡𑁆𑀞𑀸𑀢𑀺, 𑀏𑀯𑀭𑀽𑀧𑁄 𑀲𑀤𑁆𑀤𑁄 𑀲𑁂𑀯𑀺𑀢𑀩𑁆𑀩𑁄.

𑀬𑀁 𑀕𑀦𑁆𑀥𑀁 𑀖𑀸𑀬𑀢𑁄 𑀭𑀸𑀕𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀯𑀭𑀽𑀧𑁄 𑀕𑀦𑁆𑀥𑁄 𑀦 𑀲𑁂𑀯𑀺𑀢𑀩𑁆𑀩𑁄. 𑀬𑀁 𑀧𑀦 𑀕𑀦𑁆𑀥𑀁 𑀖𑀸𑀬𑀢𑁄 𑀅𑀲𑀼𑀪𑀲𑀜𑁆𑀜𑀸𑀤𑀺𑀧𑀝𑀺𑀮𑀸𑀪𑁄 𑀳𑁄𑀢𑀺, 𑀏𑀯𑀭𑀽𑀧𑁄 𑀕𑀦𑁆𑀥𑁄 𑀲𑁂𑀯𑀺𑀢𑀩𑁆𑀩𑁄.

𑀬𑀁 𑀭𑀲𑀁 𑀲𑀸𑀬𑀢𑁄 𑀭𑀸𑀕𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀯𑀭𑀽𑀧𑁄 𑀭𑀲𑁄 𑀦 𑀲𑁂𑀯𑀺𑀢𑀩𑁆𑀩𑁄. 𑀬𑀁 𑀧𑀦 𑀭𑀲𑀁 𑀲𑀸𑀬𑀢𑁄 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸 𑀘𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀲𑀸𑀬𑀺𑀢𑀧𑀘𑁆𑀘𑀬𑀸 𑀘 𑀓𑀸𑀬𑀩𑀮𑀁 𑀦𑀺𑀲𑁆𑀲𑀸𑀬 𑀅𑀭𑀺𑀬𑀪𑀽𑀫𑀺𑀁 ¶ 𑀑𑀓𑁆𑀓𑀫𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀫𑀳𑀸𑀲𑀻𑀯𑀢𑁆𑀣𑁂𑀭𑀪𑀸𑀕𑀺𑀦𑁂𑀬𑁆𑀬𑀲𑀻𑀯𑀲𑀸𑀫𑀡𑁂𑀭𑀲𑁆𑀲 𑀯𑀺𑀬 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲𑁂𑀯 𑀓𑀺𑀮𑁂𑀲𑀓𑁆𑀔𑀬𑁄 𑀯𑀸 𑀳𑁄𑀢𑀺, 𑀏𑀯𑀭𑀽𑀧𑁄 𑀭𑀲𑁄 𑀲𑁂𑀯𑀺𑀢𑀩𑁆𑀩𑁄.

𑀬𑀁 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀢𑁄 𑀭𑀸𑀕𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀯𑀭𑀽𑀧𑀁 𑀨𑁄𑀝𑁆𑀞𑀩𑁆𑀩𑀁 𑀦 𑀲𑁂𑀯𑀺𑀢𑀩𑁆𑀩𑀁. 𑀬𑀁 𑀧𑀦 𑀨𑀼𑀲𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀸𑀤𑀻𑀦𑀁 𑀯𑀺𑀬 𑀆𑀲𑀯𑀓𑁆𑀔𑀬𑁄 𑀘𑁂𑀯, 𑀯𑀻𑀭𑀺𑀬𑀜𑁆𑀘 𑀲𑀼𑀧𑀕𑁆𑀕𑀳𑀺𑀢𑀁, 𑀧𑀘𑁆𑀙𑀺𑀫𑀸 𑀘 𑀚𑀦𑀢𑀸 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀸𑀤𑀦𑁂𑀦 𑀅𑀦𑀼𑀕𑁆𑀕𑀳𑀺𑀢𑀸 𑀳𑁄𑀢𑀺, 𑀏𑀯𑀭𑀽𑀧𑀁 𑀨𑁄𑀝𑁆𑀞𑀩𑁆𑀩𑀁 𑀲𑁂𑀯𑀺𑀢𑀩𑁆𑀩𑀁. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀓𑀺𑀭 𑀢𑀺𑀁𑀲 𑀯𑀲𑁆𑀲𑀸𑀦𑀺 𑀫𑀜𑁆𑀘𑁂 𑀧𑀺𑀝𑁆𑀞𑀺𑀁 𑀦 𑀧𑀲𑀸𑀭𑁂𑀲𑀺. 𑀢𑀣𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄. 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀯𑀻𑀲𑀯𑀲𑁆𑀲𑀲𑀢𑀁 𑀫𑀜𑁆𑀘𑁂 𑀧𑀺𑀝𑁆𑀞𑀺𑀁 𑀦 𑀧𑀲𑀸𑀭𑁂𑀲𑀺. 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀧𑀜𑁆𑀜𑀸𑀲 𑀯𑀲𑁆𑀲𑀸𑀦𑀺. 𑀪𑀤𑁆𑀤𑀺𑀬𑀢𑁆𑀣𑁂𑀭𑁄 𑀢𑀺𑀁𑀲 𑀯𑀲𑁆𑀲𑀸𑀦𑀺. 𑀲𑁄𑀡𑀢𑁆𑀣𑁂𑀭𑁄 𑀅𑀝𑁆𑀞𑀸𑀭𑀲 ¶ 𑀯𑀲𑁆𑀲𑀸𑀦𑀺. 𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑁄 𑀤𑁆𑀯𑀸𑀤𑀲. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀧𑀦𑁆𑀦𑀭𑀲. 𑀭𑀸𑀳𑀼𑀮𑀢𑁆𑀣𑁂𑀭𑁄 𑀤𑁆𑀯𑀸𑀤𑀲. 𑀩𑀸𑀓𑀼𑀮𑀢𑁆𑀣𑁂𑀭𑁄 𑀅𑀲𑀻𑀢𑀺 𑀯𑀲𑁆𑀲𑀸𑀦𑀺. 𑀦𑀸𑀴𑀓𑀢𑁆𑀣𑁂𑀭𑁄 𑀬𑀸𑀯𑀧𑀭𑀺𑀦𑀺𑀩𑁆𑀩𑀸𑀦𑀸 𑀫𑀜𑁆𑀘𑁂 𑀧𑀺𑀝𑁆𑀞𑀺𑀁 𑀦 𑀧𑀲𑀸𑀭𑁂𑀲𑀻𑀢𑀺.

𑀬𑁂 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁂 𑀥𑀫𑁆𑀫𑁂 𑀲𑀫𑀦𑁆𑀦𑀸𑀳𑀭𑀦𑁆𑀢𑀲𑁆𑀲 𑀭𑀸𑀕𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, ‘‘𑀅𑀳𑁄, 𑀯𑀢 𑀬𑀁 𑀧𑀭𑁂𑀲𑀁 𑀧𑀭𑀯𑀺𑀢𑁆𑀢𑀽𑀧𑀓𑀭𑀡𑀁 𑀢𑀁 𑀫𑀫𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀸 𑀅𑀪𑀺𑀚𑁆𑀛𑀸𑀤𑀻𑀦𑀺 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀺 𑀏𑀯𑀭𑀽𑀧𑀸 𑀥𑀫𑁆𑀫𑀸 𑀦 𑀲𑁂𑀯𑀺𑀢𑀩𑁆𑀩𑀸. ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀸 𑀳𑁄𑀦𑁆𑀢𑀽’’𑀢𑀺 𑀏𑀯𑀁 𑀫𑁂𑀢𑁆𑀢𑀸𑀤𑀺𑀯𑀲𑁂𑀦, 𑀬𑁂 𑀯𑀸 𑀧𑀦 𑀢𑀺𑀡𑁆𑀡𑀁 𑀣𑁂𑀭𑀸𑀦𑀁 𑀥𑀫𑁆𑀫𑀸, 𑀏𑀯𑀭𑀽𑀧𑀸 𑀲𑁂𑀯𑀺𑀢𑀩𑁆𑀩𑀸. 𑀢𑀬𑁄 𑀓𑀺𑀭 𑀣𑁂𑀭𑀸 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 ¶ 𑀅𑀓𑀼𑀲𑀮𑀯𑀺𑀢𑀓𑁆𑀓𑀸 𑀦 𑀯𑀺𑀢𑀓𑁆𑀓𑁂𑀢𑀩𑁆𑀩𑀸𑀢𑀺 𑀓𑀢𑀺𑀓𑀁 𑀅𑀓𑀁𑀲𑀼. 𑀅𑀣 𑀧𑀯𑀸𑀭𑀡𑀤𑀺𑀯𑀲𑁂 𑀲𑀗𑁆𑀖𑀢𑁆𑀣𑁂𑀭𑁄 𑀲𑀗𑁆𑀖𑀦𑀯𑀓𑀁 𑀧𑀼𑀘𑁆𑀙𑀺 𑁋 ‘‘𑀆𑀯𑀼𑀲𑁄, 𑀇𑀫𑀲𑁆𑀫𑀺𑀁 𑀢𑁂𑀫𑀸𑀲𑁂 𑀓𑀺𑀢𑁆𑀢𑀓𑁂 𑀞𑀸𑀦𑁂 𑀘𑀺𑀢𑁆𑀢𑀲𑁆𑀲 𑀥𑀸𑀯𑀺𑀢𑀼𑀁 𑀤𑀺𑀦𑁆𑀦’’𑀦𑁆𑀢𑀺? 𑀦, 𑀪𑀦𑁆𑀢𑁂, 𑀧𑀭𑀺𑀯𑁂𑀡𑀧𑀭𑀺𑀘𑁆𑀙𑁂𑀤𑀢𑁄 𑀩𑀳𑀺 𑀥𑀸𑀯𑀺𑀢𑀼𑀁 𑀅𑀤𑀸𑀲𑀺𑀦𑁆𑀢𑀺. 𑀤𑀼𑀢𑀺𑀬𑀁 𑀧𑀼𑀘𑁆𑀙𑀺 𑁋 ‘‘𑀢𑀯 𑀆𑀯𑀼𑀲𑁄’’𑀢𑀺? 𑀦𑀺𑀯𑀸𑀲𑀕𑁂𑀳𑀢𑁄, 𑀪𑀦𑁆𑀢𑁂, 𑀩𑀳𑀺 𑀥𑀸𑀯𑀺𑀢𑀼𑀁 𑀦 𑀅𑀤𑀸𑀲𑀺𑀦𑁆𑀢𑀺. 𑀅𑀣 𑀤𑁆𑀯𑁂𑀧𑀺 𑀣𑁂𑀭𑀁 𑀧𑀼𑀘𑁆𑀙𑀺𑀁𑀲𑀼 ‘‘𑀢𑀼𑀫𑁆𑀳𑀸𑀓𑀁 𑀧𑀦, 𑀪𑀦𑁆𑀢𑁂’’𑀢𑀺? 𑀦𑀺𑀬𑀓𑀚𑁆𑀛𑀢𑁆𑀢𑀔𑀦𑁆𑀥𑀧𑀜𑁆𑀘𑀓𑀢𑁄, 𑀆𑀯𑀼𑀲𑁄, 𑀩𑀳𑀺 𑀥𑀸𑀯𑀺𑀢𑀼𑀁 𑀦 𑀅𑀤𑀸𑀲𑀺𑀦𑁆𑀢𑀺. 𑀢𑀼𑀫𑁆𑀳𑁂𑀳𑀺, 𑀪𑀦𑁆𑀢𑁂, 𑀤𑀼𑀓𑁆𑀓𑀭𑀁 𑀓𑀢𑀦𑁆𑀢𑀺. 𑀏𑀯𑀭𑀽𑀧𑁄 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁄 𑀥𑀫𑁆𑀫𑁄 𑀲𑁂𑀯𑀺𑀢𑀩𑁆𑀩𑁄.

𑁩𑁬𑁬. 𑀏𑀓𑀦𑁆𑀢𑀯𑀸𑀤𑀸𑀢𑀺 𑀏𑀓𑁄𑀬𑁂𑀯 𑀅𑀦𑁆𑀢𑁄 𑀯𑀸𑀤𑀲𑁆𑀲 𑀏𑀢𑁂𑀲𑀁, 𑀦 𑀤𑁆𑀯𑁂𑀥𑀸 𑀕𑀢𑀯𑀸𑀤𑀸𑀢𑀺 𑀏𑀓𑀦𑁆𑀢𑀯𑀸𑀤𑀸, 𑀏𑀓𑀜𑁆𑀜𑁂𑀯 𑀯𑀤𑀦𑁆𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀏𑀓𑀦𑁆𑀢𑀲𑀻𑀮𑀸𑀢𑀺 𑀏𑀓𑀸𑀘𑀸𑀭𑀸. 𑀏𑀓𑀦𑁆𑀢𑀙𑀦𑁆𑀤𑀸𑀢𑀺 𑀏𑀓𑀮𑀤𑁆𑀥𑀺𑀓𑀸. 𑀏𑀓𑀦𑁆𑀢𑀅𑀚𑁆𑀛𑁄𑀲𑀸𑀦𑀸𑀢𑀺 𑀏𑀓𑀦𑁆𑀢𑀧𑀭𑀺𑀬𑁄𑀲𑀸𑀦𑀸.

𑀅𑀦𑁂𑀓𑀥𑀸𑀢𑀼 𑀦𑀸𑀦𑀸𑀥𑀸𑀢𑀼 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀮𑁄𑀓𑁄𑀢𑀺 𑀤𑁂𑀯𑀸𑀦𑀫𑀺𑀦𑁆𑀤, 𑀅𑀬𑀁 𑀮𑁄𑀓𑁄 𑀅𑀦𑁂𑀓𑀚𑁆𑀛𑀸𑀲𑀬𑁄 𑀦𑀸𑀦𑀚𑁆𑀛𑀸𑀲𑀬𑁄. 𑀏𑀓𑀲𑁆𑀫𑀺𑀁 𑀕𑀦𑁆𑀢𑀼𑀓𑀸𑀫𑁂 𑀏𑀓𑁄 𑀞𑀸𑀢𑀼𑀓𑀸𑀫𑁄 𑀳𑁄𑀢𑀺. 𑀏𑀓𑀲𑁆𑀫𑀺𑀁 𑀞𑀸𑀢𑀼𑀓𑀸𑀫𑁂 𑀏𑀓𑁄 𑀲𑀬𑀺𑀢𑀼𑀓𑀸𑀫𑁄 𑀳𑁄𑀢𑀺. 𑀤𑁆𑀯𑁂 𑀲𑀢𑁆𑀢𑀸 𑀏𑀓𑀚𑁆𑀛𑀸𑀲𑀬𑀸 𑀦𑀸𑀫 𑀤𑀼𑀮𑁆𑀮𑀪𑀸. 𑀢𑀲𑁆𑀫𑀺𑀁 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀲𑁆𑀫𑀺𑀁 ¶ 𑀮𑁄𑀓𑁂 𑀬𑀁 𑀬𑀤𑁂𑀯 𑀥𑀸𑀢𑀼𑀁 𑀬𑀁 𑀬𑀤𑁂𑀯 𑀅𑀚𑁆𑀛𑀸𑀲𑀬𑀁 𑀲𑀢𑁆𑀢𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑀺 𑀕𑀡𑁆𑀳𑀦𑁆𑀢𑀺, 𑀢𑀁 𑀢𑀤𑁂𑀯. 𑀣𑀸𑀫𑀲𑀸 𑀧𑀭𑀸𑀫𑀸𑀲𑀸𑀢𑀺 𑀣𑀸𑀫𑁂𑀦 𑀘 𑀧𑀭𑀸𑀫𑀸𑀲𑁂𑀦 𑀘. 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀦𑁆𑀢𑀻𑀢𑀺 𑀲𑀼𑀝𑁆𑀞𑀼 𑀕𑀡𑁆𑀳𑀺𑀢𑁆𑀯𑀸 𑀯𑁄𑀳𑀭𑀦𑁆𑀢𑀺, 𑀓𑀣𑁂𑀦𑁆𑀢𑀺 𑀤𑀻𑀧𑁂𑀦𑁆𑀢𑀺 𑀓𑀺𑀢𑁆𑀢𑁂𑀦𑁆𑀢𑀺. 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜𑀦𑁆𑀢𑀺 𑀇𑀤𑀁 𑀅𑀫𑁆𑀳𑀸𑀓𑀫𑁂𑀯 𑀯𑀘𑀦𑀁 𑀲𑀘𑁆𑀘𑀁, 𑀅𑀜𑁆𑀜𑁂𑀲𑀁 𑀯𑀘𑀦𑀁 𑀫𑁄𑀖𑀁 𑀢𑀼𑀘𑁆𑀙𑀁 𑀦𑀺𑀭𑀢𑁆𑀣𑀓𑀦𑁆𑀢𑀺.

𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑀸𑀢𑀺 ¶ 𑀅𑀦𑁆𑀢𑁄 𑀯𑀼𑀘𑁆𑀘𑀢𑀺 𑀯𑀺𑀦𑀸𑀲𑁄, 𑀅𑀦𑁆𑀢𑀁 𑀅𑀢𑀻𑀢𑀸 𑀦𑀺𑀝𑁆𑀞𑀸 𑀏𑀢𑁂𑀲𑀦𑁆𑀢𑀺 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑀸. 𑀬𑀸 𑀏𑀢𑁂𑀲𑀁 𑀦𑀺𑀝𑁆𑀞𑀸, 𑀬𑁄 𑀧𑀭𑀫𑀲𑁆𑀲𑀸𑀲𑁄 𑀦𑀺𑀩𑁆𑀩𑀸𑀦𑀁, 𑀢𑀁 𑀲𑀩𑁆𑀩𑁂𑀲𑀁 𑀯𑀺𑀦𑀸𑀲𑀸𑀢𑀺𑀓𑁆𑀓𑀦𑁆𑀢𑀁 𑀦𑀺𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑁄𑀕𑀓𑁆𑀔𑁂𑀫𑁄𑀢𑀺 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀦𑀸𑀫𑀁, 𑀅𑀘𑁆𑀘𑀦𑁆𑀢𑁄 𑀬𑁄𑀕𑀓𑁆𑀔𑁂𑀫𑁄 𑀏𑀢𑁂𑀲𑀦𑁆𑀢𑀺 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻. 𑀲𑁂𑀝𑁆𑀞𑀝𑁆𑀞𑁂𑀦 𑀩𑁆𑀭𑀳𑁆𑀫𑀁 𑀅𑀭𑀺𑀬𑀫𑀕𑁆𑀕𑀁 𑀘𑀭𑀦𑁆𑀢𑀻𑀢𑀺 𑀩𑁆𑀭𑀳𑁆𑀫𑀘𑀸𑀭𑀻. 𑀅𑀘𑁆𑀘𑀦𑁆𑀢𑀢𑁆𑀣𑀸𑀬 𑀩𑁆𑀭𑀳𑁆𑀫𑀘𑀸𑀭𑀻 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻. 𑀧𑀭𑀺𑀬𑁄𑀲𑀸𑀦𑀦𑁆𑀢𑀺𑀧𑀺 𑀦𑀺𑀩𑁆𑀩𑀸𑀦𑀲𑁆𑀲 𑀦𑀸𑀫𑀁. 𑀅𑀘𑁆𑀘𑀦𑁆𑀢𑀁 𑀧𑀭𑀺𑀬𑁄𑀲𑀸𑀦𑀁 𑀏𑀢𑁂𑀲𑀦𑁆𑀢𑀺 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑀸.

𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀸𑀢𑀺 ¶ 𑀢𑀡𑁆𑀳𑀸𑀲𑀗𑁆𑀔𑀬𑁄𑀢𑀺 𑀫𑀕𑁆𑀕𑁄𑀧𑀺 𑀦𑀺𑀩𑁆𑀩𑀸𑀦𑀫𑁆𑀧𑀺. 𑀫𑀕𑁆𑀕𑁄 𑀢𑀡𑁆𑀳𑀁 𑀲𑀗𑁆𑀔𑀺𑀡𑀸𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀢𑀡𑁆𑀳𑀸𑀲𑀗𑁆𑀔𑀬𑁄. 𑀦𑀺𑀩𑁆𑀩𑀸𑀦𑀁 𑀬𑀲𑁆𑀫𑀸 𑀢𑀁 𑀆𑀕𑀫𑁆𑀫 𑀢𑀡𑁆𑀳𑀸 𑀲𑀗𑁆𑀔𑀺𑀬𑀢𑀺 𑀯𑀺𑀦𑀲𑁆𑀲𑀢𑀺, 𑀢𑀲𑁆𑀫𑀸 𑀢𑀡𑁆𑀳𑀸𑀲𑀗𑁆𑀔𑀬𑁄. 𑀢𑀡𑁆𑀳𑀸𑀲𑀗𑁆𑀔𑀬𑁂𑀦 𑀫𑀕𑁆𑀕𑁂𑀦 𑀯𑀺𑀫𑀼𑀢𑁆𑀢𑀸, 𑀢𑀡𑁆𑀳𑀸𑀲𑀗𑁆𑀔𑀬𑁂 𑀦𑀺𑀩𑁆𑀩𑀸𑀦𑁂 𑀯𑀺𑀫𑀼𑀢𑁆𑀢𑀸 𑀅𑀥𑀺𑀫𑀼𑀢𑁆𑀢𑀸𑀢𑀺 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀸.

𑀏𑀢𑁆𑀢𑀸𑀯𑀢𑀸 𑀘 𑀪𑀕𑀯𑀢𑀸 𑀘𑀼𑀤𑁆𑀤𑀲𑀧𑀺 𑀫𑀳𑀸𑀧𑀜𑁆𑀳𑀸 𑀩𑁆𑀬𑀸𑀓𑀢𑀸 𑀳𑁄𑀦𑁆𑀢𑀺. 𑀘𑀼𑀤𑁆𑀤𑀲 𑀫𑀳𑀸𑀧𑀜𑁆𑀳𑀸 𑀦𑀸𑀫 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀁 𑀏𑀓𑁄 𑀧𑀜𑁆𑀳𑁄, 𑀧𑀺𑀬𑀸𑀧𑁆𑀧𑀺𑀬𑀁 𑀏𑀓𑁄, 𑀙𑀦𑁆𑀤𑁄 𑀏𑀓𑁄, 𑀯𑀺𑀢𑀓𑁆𑀓𑁄 𑀏𑀓𑁄, 𑀧𑀧𑀜𑁆𑀘𑁄 𑀏𑀓𑁄, 𑀲𑁄𑀫𑀦𑀲𑁆𑀲𑀁 𑀏𑀓𑁄, 𑀤𑁄𑀫𑀦𑀲𑁆𑀲𑀁 𑀏𑀓𑁄, 𑀉𑀧𑁂𑀓𑁆𑀔𑀸 𑀏𑀓𑁄, 𑀓𑀸𑀬𑀲𑀫𑀸𑀘𑀸𑀭𑁄 𑀏𑀓𑁄, 𑀯𑀘𑀻𑀲𑀫𑀸𑀘𑀸𑀭𑁄 𑀏𑀓𑁄, 𑀧𑀭𑀺𑀬𑁂𑀲𑀦𑀸 𑀏𑀓𑁄, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀏𑀓𑁄, 𑀅𑀦𑁂𑀓𑀥𑀸𑀢𑀼 𑀏𑀓𑁄, 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑀸 𑀏𑀓𑁄𑀢𑀺.

𑁩𑁬𑁭. 𑀏𑀚𑀸𑀢𑀺 𑀘𑀮𑀦𑀝𑁆𑀞𑁂𑀦 𑀢𑀡𑁆𑀳𑀸 𑀯𑀼𑀘𑁆𑀘𑀢𑀺. 𑀲𑀸 𑀧𑀻𑀴𑀦𑀝𑁆𑀞𑁂𑀦 𑀭𑁄𑀕𑁄, 𑀅𑀦𑁆𑀢𑁄 𑀧𑀤𑀼𑀲𑁆𑀲𑀦𑀝𑁆𑀞𑁂𑀦 𑀕𑀡𑁆𑀟𑁄, 𑀅𑀦𑀼𑀧𑁆𑀧𑀯𑀺𑀝𑁆𑀞𑀝𑁆𑀞𑁂𑀦 𑀲𑀮𑁆𑀮𑀁. 𑀢𑀲𑁆𑀫𑀸 𑀅𑀬𑀁 𑀧𑀼𑀭𑀺𑀲𑁄𑀢𑀺 𑀬𑀲𑁆𑀫𑀸 𑀏𑀚𑀸 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀸𑀦𑀼𑀭𑀽𑀧𑁂𑀦 𑀧𑀼𑀭𑀺𑀲𑀁 𑀢𑀢𑁆𑀣 𑀢𑀢𑁆𑀣 𑀅𑀪𑀺𑀦𑀺𑀩𑁆𑀩𑀢𑁆𑀢𑀢𑁆𑀣𑀸𑀬 𑀓𑀟𑁆𑀠𑀢𑀺, 𑀢𑀲𑁆𑀫𑀸 𑀅𑀬𑀁 𑀧𑀼𑀭𑀺𑀲𑁄 𑀢𑁂𑀲𑀁 𑀢𑁂𑀲𑀁 𑀪𑀯𑀸𑀦𑀁 𑀯𑀲𑁂𑀦 𑀉𑀘𑁆𑀘𑀸𑀯𑀘𑀁 𑀆𑀧𑀚𑁆𑀚𑀢𑀺. 𑀩𑁆𑀭𑀳𑁆𑀫𑀮𑁄𑀓𑁂 𑀉𑀘𑁆𑀘𑁄 𑀳𑁄𑀢𑀺, 𑀤𑁂𑀯𑀮𑁄𑀓𑁂 𑀅𑀯𑀘𑁄. 𑀤𑁂𑀯𑀮𑁄𑀓𑁂 𑀉𑀘𑁆𑀘𑁄, 𑀫𑀦𑀼𑀲𑁆𑀲𑀮𑁄𑀓𑁂 𑀅𑀯𑀘𑁄. 𑀫𑀦𑀼𑀲𑁆𑀲𑀮𑁄𑀓𑁂 𑀉𑀘𑁆𑀘𑁄, 𑀅𑀧𑀸𑀬𑁂 𑀅𑀯𑀘𑁄. 𑀬𑁂𑀲𑀸𑀳𑀁, 𑀪𑀦𑁆𑀢𑁂𑀢𑀺 𑀬𑁂𑀲𑀁 𑀅𑀳𑀁 𑀪𑀦𑁆𑀢𑁂. 𑀲𑀦𑁆𑀥𑀺𑀯𑀲𑁂𑀦 𑀧𑀦𑁂𑀢𑁆𑀣 ‘‘𑀬𑁂𑀲𑀸𑀳’’𑀦𑁆𑀢𑀺 𑀳𑁄𑀢𑀺. 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀦𑁆𑀢𑀺 𑀬𑀣𑀸 𑀫𑀬𑀸 𑀲𑀼𑀢𑁄 𑀘𑁂𑀯 𑀉𑀕𑁆𑀕𑀳𑀺𑀢𑁄 𑀘, 𑀏𑀯𑀁. 𑀥𑀫𑁆𑀫𑀁 𑀤𑁂𑀲𑁂𑀫𑀻𑀢𑀺 𑀲𑀢𑁆𑀢𑀯𑀢𑀧𑀤𑀁 𑀥𑀫𑁆𑀫𑀁 𑀤𑁂𑀲𑁂𑀫𑀺. 𑀦 𑀘𑀸𑀳𑀁 𑀢𑁂𑀲𑀦𑁆𑀢𑀺 𑀅𑀳𑀁 𑀧𑀦 𑀢𑁂𑀲𑀁 𑀲𑀸𑀯𑀓𑁄 𑀦 ¶ 𑀲𑀫𑁆𑀧𑀚𑁆𑀚𑀸𑀫𑀺. 𑀅𑀳𑀁 𑀔𑁄 𑀧𑀦, 𑀪𑀦𑁆𑀢𑁂𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀲𑁄𑀢𑀸𑀧𑀦𑁆𑀦𑀪𑀸𑀯𑀁 𑀚𑀸𑀦𑀸𑀧𑁂𑀢𑀺.

𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀓𑀣𑀸𑀯𑀡𑁆𑀡𑀦𑀸

𑁩𑁬𑁮. 𑀯𑁂𑀤𑀧𑀝𑀺𑀮𑀸𑀪𑀦𑁆𑀢𑀺 ¶ 𑀢𑀼𑀝𑁆𑀞𑀺𑀧𑀝𑀺𑀮𑀸𑀪𑀁. 𑀤𑁂𑀯𑀸𑀲𑀼𑀭𑀲𑀗𑁆𑀕𑀸𑀫𑁄𑀢𑀺 𑀤𑁂𑀯𑀸𑀦𑀜𑁆𑀘 𑀅𑀲𑀼𑀭𑀸𑀦𑀜𑁆𑀘 𑀲𑀗𑁆𑀕𑀸𑀫𑁄. 𑀲𑀫𑀼𑀧𑀩𑁆𑀬𑀽𑀴𑁆𑀳𑁄𑀢𑀺 𑀲𑀫𑀸𑀧𑀦𑁆𑀦𑁄 𑀦𑀮𑀸𑀝𑁂𑀦 𑀦𑀮𑀸𑀝𑀁 𑀧𑀳𑀭𑀡𑀸𑀓𑀸𑀭𑀧𑁆𑀧𑀢𑁆𑀢𑁄 𑀯𑀺𑀬. 𑀏𑀢𑁂𑀲𑀁 𑀓𑀺𑀭 𑀓𑀤𑀸𑀘𑀺 𑀫𑀳𑀸𑀲𑀫𑀼𑀤𑁆𑀤𑀧𑀺𑀝𑁆𑀞𑁂 𑀲𑀗𑁆𑀕𑀸𑀫𑁄 𑀳𑁄𑀢𑀺 𑀢𑀢𑁆𑀣 𑀧𑀦 𑀙𑁂𑀤𑀦𑀯𑀺𑀚𑁆𑀛𑀦𑀸𑀤𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀖𑀸𑀢𑁄 𑀦𑀸𑀫 𑀦𑀢𑁆𑀣𑀺, 𑀤𑀸𑀭𑀼𑀫𑁂𑀡𑁆𑀟𑀓𑀬𑀼𑀤𑁆𑀥𑀁 𑀯𑀺𑀬 𑀚𑀬𑀧𑀭𑀸𑀚𑀬𑀫𑀢𑁆𑀢𑀫𑁂𑀯 𑀳𑁄𑀢𑀺. 𑀓𑀤𑀸𑀘𑀺 𑀤𑁂𑀯𑀸 𑀚𑀺𑀦𑀦𑁆𑀢𑀺, 𑀓𑀤𑀸𑀘𑀺 𑀅𑀲𑀼𑀭𑀸. 𑀢𑀢𑁆𑀣 𑀬𑀲𑁆𑀫𑀺𑀁 𑀲𑀗𑁆𑀕𑀸𑀫𑁂 𑀤𑁂𑀯𑀸 𑀧𑀼𑀦 𑀅𑀧𑀘𑁆𑀘𑀸𑀕𑀫𑀦𑀸𑀬 𑀅𑀲𑀼𑀭𑁂 ¶ 𑀚𑀺𑀦𑀺𑀁𑀲𑀼, 𑀢𑀁 𑀲𑀦𑁆𑀥𑀸𑀬 𑀢𑀲𑁆𑀫𑀺𑀁 𑀔𑁄 𑀧𑀦 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀉𑀪𑀬𑀫𑁂𑀢𑀦𑁆𑀢𑀺 𑀉𑀪𑀬𑀁 𑀏𑀢𑀁. 𑀤𑀼𑀯𑀺𑀥𑀫𑁆𑀧𑀺 𑀑𑀚𑀁 𑀏𑀢𑁆𑀣 𑀤𑁂𑀯𑀮𑁄𑀓𑁂 𑀤𑁂𑀯𑀸𑀬𑁂𑀯 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀏𑀯𑀫𑀲𑁆𑀲 𑀆𑀯𑀚𑁆𑀚𑀦𑁆𑀢𑀲𑁆𑀲 𑀩𑀮𑀯𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀺. 𑀲𑀤𑀡𑁆𑀟𑀸𑀯𑀘𑀭𑁄𑀢𑀺 𑀲𑀤𑀡𑁆𑀟𑀸𑀯𑀘𑀭𑀓𑁄, 𑀤𑀡𑁆𑀟𑀕𑁆𑀕𑀳𑀡𑁂𑀦 𑀲𑀢𑁆𑀣𑀕𑁆𑀕𑀳𑀡𑁂𑀦 𑀲𑀤𑁆𑀥𑀺𑀁 𑀅𑀳𑁄𑀲𑀺, 𑀦 𑀦𑀺𑀓𑁆𑀔𑀺𑀢𑁆𑀢𑀤𑀡𑁆𑀟𑀲𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬𑀸𑀢𑀺 𑀏𑀓𑀦𑁆𑀢𑁂𑀦𑁂𑀯 𑀯𑀝𑁆𑀝𑁂 𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀣𑀸𑀬𑀸𑀢𑀺 𑀲𑀩𑁆𑀩𑀁 𑀫𑀳𑀸𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑁂 𑀯𑀼𑀢𑁆𑀢𑀫𑁂𑀯.

𑁩𑁬𑁯. 𑀧𑀯𑁂𑀤𑁂𑀲𑀻𑀢𑀺 𑀓𑀣𑁂𑀲𑀺 𑀤𑀻𑀧𑁂𑀲𑀺. 𑀇𑀥𑁂𑀯𑀸𑀢𑀺 𑀇𑀫𑀲𑁆𑀫𑀺𑀜𑁆𑀜𑁂𑀯 𑀑𑀓𑀸𑀲𑁂. 𑀤𑁂𑀯𑀪𑀽𑀢𑀲𑁆𑀲 𑀫𑁂 𑀲𑀢𑁄𑀢𑀺 𑀤𑁂𑀯𑀲𑁆𑀲 𑀫𑁂 𑀲𑀢𑁄. 𑀧𑀼𑀦𑀭𑀸𑀬𑀼 𑀘 𑀫𑁂 𑀮𑀤𑁆𑀥𑁄𑀢𑀺 𑀧𑀼𑀦 𑀅𑀜𑁆𑀜𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦 𑀫𑁂 𑀚𑀻𑀯𑀺𑀢𑀁 𑀮𑀤𑁆𑀥𑀦𑁆𑀢𑀺, 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀘𑀼𑀢𑀪𑀸𑀯𑀁 𑀘𑁂𑀯 𑀉𑀧𑀧𑀦𑁆𑀦𑀪𑀸𑀯𑀜𑁆𑀘 𑀆𑀯𑀺𑀓𑀭𑁄𑀢𑀺.

𑀤𑀺𑀯𑀺𑀬𑀸 𑀓𑀸𑀬𑀸𑀢𑀺 𑀤𑀺𑀩𑁆𑀩𑀸 𑀅𑀢𑁆𑀢𑀪𑀸𑀯𑀸. 𑀆𑀬𑀼𑀁 𑀳𑀺𑀢𑁆𑀯𑀸 𑀅𑀫𑀸𑀦𑀼𑀲𑀦𑁆𑀢𑀺 𑀤𑀺𑀩𑁆𑀩𑀁 𑀆𑀬𑀼𑀁 𑀚𑀳𑀺𑀢𑁆𑀯𑀸. 𑀅𑀫𑀽𑀴𑁆𑀳𑁄 𑀕𑀩𑁆𑀪𑀫𑁂𑀲𑁆𑀲𑀸𑀫𑀻𑀢𑀺 𑀦𑀺𑀬𑀢𑀕𑀢𑀺𑀓𑀢𑁆𑀢𑀸 𑀅𑀫𑀽𑀴𑁆𑀳𑁄 𑀳𑀼𑀢𑁆𑀯𑀸. 𑀬𑀢𑁆𑀣 𑀫𑁂 𑀭𑀫𑀢𑀻 𑀫𑀦𑁄𑀢𑀺 𑀬𑀢𑁆𑀣 𑀫𑁂 𑀫𑀦𑁄 𑀭𑀫𑀺𑀲𑁆𑀲𑀢𑀺, 𑀢𑀢𑁆𑀣𑁂𑀯 𑀔𑀢𑁆𑀢𑀺𑀬𑀓𑀼𑀮𑀸𑀤𑀻𑀲𑀼 𑀕𑀩𑁆𑀪𑀁 𑀉𑀧𑀕𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀤𑁂𑀯𑁂 𑀘 𑀫𑀸𑀦𑀼𑀲𑁂 𑀘𑀸𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺.

𑀜𑀸𑀬𑁂𑀦 𑀯𑀺𑀳𑀭𑀺𑀲𑁆𑀲𑀸𑀫𑀻𑀢𑀺 𑀫𑀦𑀼𑀲𑁆𑀲𑁂𑀲𑀼 𑀉𑀧𑀧𑀦𑁆𑀦𑁄𑀧𑀺 𑀫𑀸𑀢𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑀸𑀤𑀻𑀦𑀁 𑀅𑀪𑀩𑁆𑀩𑀢𑁆𑀢𑀸 𑀜𑀸𑀬𑁂𑀦 𑀓𑀸𑀭𑀡𑁂𑀦 𑀲𑀫𑁂𑀦 𑀯𑀺𑀳𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀲𑀫𑁆𑀩𑁄𑀥𑀺 ¶ 𑀘𑁂 𑀪𑀯𑀺𑀲𑁆𑀲𑀢𑀻𑀢𑀺 𑀇𑀤𑀁 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀁 𑀲𑀦𑁆𑀥𑀸𑀬 𑀯𑀤𑀢𑀺, 𑀲𑀘𑁂 𑀲𑀓𑀤𑀸𑀕𑀸𑀫𑀻 𑀪𑀯𑀺𑀲𑁆𑀲𑀸𑀫𑀻𑀢𑀺 𑀤𑀻𑀧𑁂𑀢𑀺. 𑀅𑀜𑁆𑀜𑀸𑀢𑀸 𑀯𑀺𑀳𑀭𑀺𑀲𑁆𑀲𑀸𑀫𑀻𑀢𑀺 𑀅𑀜𑁆𑀜𑀸𑀢𑀸 𑀆𑀚𑀸𑀦𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀸𑀫𑀺. 𑀲𑁆𑀯𑁂𑀯 𑀅𑀦𑁆𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑀲𑁄 𑀏𑀯 𑀫𑁂 𑀫𑀦𑀼𑀲𑁆𑀲𑀮𑁄𑀓𑁂 𑀅𑀦𑁆𑀢𑁄 𑀪𑀯𑀺𑀲𑁆𑀲𑀢𑀻𑀢𑀺.

𑀧𑀼𑀦 ¶ 𑀤𑁂𑀯𑁄 𑀪𑀯𑀺𑀲𑁆𑀲𑀸𑀫𑀺, 𑀤𑁂𑀯𑀮𑁄𑀓𑀲𑁆𑀫𑀺𑀁 𑀉𑀢𑁆𑀢𑀫𑁄𑀢𑀺 𑀧𑀼𑀦 𑀤𑁂𑀯𑀮𑁄𑀓𑀲𑁆𑀫𑀺𑀁 𑀉𑀢𑁆𑀢𑀫𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀯𑀤𑀢𑀺.

𑀅𑀦𑁆𑀢𑀺𑀫𑁂 𑀯𑀢𑁆𑀢𑀫𑀸𑀦𑀫𑁆𑀳𑀻𑀢𑀺 𑀅𑀦𑁆𑀢𑀺𑀫𑁂 𑀪𑀯𑁂 𑀯𑀢𑁆𑀢𑀫𑀸𑀦𑁂. 𑀲𑁄 𑀦𑀺𑀯𑀸𑀲𑁄 𑀪𑀯𑀺𑀲𑁆𑀲𑀢𑀻𑀢𑀺 𑀬𑁂 𑀢𑁂 𑀆𑀬𑀼𑀦𑀸 𑀘 𑀧𑀜𑁆𑀜𑀸𑀬 𑀘 𑀅𑀓𑀦𑀺𑀝𑁆𑀞𑀸 𑀚𑁂𑀝𑁆𑀞𑀓𑀸 𑀲𑀩𑁆𑀩𑀤𑁂𑀯𑁂𑀳𑀺 𑀧𑀡𑀻𑀢𑀢𑀭𑀸 𑀤𑁂𑀯𑀸, 𑀅𑀯𑀲𑀸𑀦𑁂 𑀫𑁂 𑀲𑁄 𑀦𑀺𑀯𑀸𑀲𑁄 𑀪𑀯𑀺𑀲𑁆𑀲𑀢𑀺 ¶ . 𑀅𑀬𑀁 𑀓𑀺𑀭 𑀢𑀢𑁄 𑀲𑀓𑁆𑀓𑀢𑁆𑀢𑀪𑀸𑀯𑀢𑁄 𑀘𑀼𑀢𑁄 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀧𑀝𑀺𑀮𑀤𑁆𑀥𑀢𑁆𑀢𑀸 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀳𑀼𑀢𑁆𑀯𑀸 𑀅𑀯𑀺𑀳𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀦𑁆𑀢𑁄 𑀅𑀯𑀲𑀸𑀦𑁂 𑀅𑀓𑀦𑀺𑀝𑁆𑀞𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺. 𑀢𑀁 𑀲𑀦𑁆𑀥𑀸𑀬 𑀏𑀯𑀫𑀸𑀳. 𑀏𑀲 𑀓𑀺𑀭 𑀅𑀯𑀺𑀳𑁂𑀲𑀼 𑀓𑀧𑁆𑀧𑀲𑀳𑀲𑁆𑀲𑀁 𑀯𑀲𑀺𑀲𑁆𑀲𑀢𑀺, 𑀅𑀢𑀧𑁆𑀧𑁂𑀲𑀼 𑀤𑁆𑀯𑁂 𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀲𑀼𑀤𑀲𑁆𑀲𑁂𑀲𑀼 𑀘𑀢𑁆𑀢𑀸𑀭𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀺, 𑀲𑀼𑀤𑀲𑁆𑀲𑀻𑀲𑀼 𑀅𑀝𑁆𑀞, 𑀅𑀓𑀦𑀺𑀝𑁆𑀞𑁂𑀲𑀼 𑀲𑁄𑀴𑀲𑀸𑀢𑀺 𑀏𑀓𑀢𑀺𑀁𑀲 𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀩𑁆𑀭𑀳𑁆𑀫𑀆𑀬𑀼𑀁 𑀅𑀦𑀼𑀪𑀯𑀺𑀲𑁆𑀲𑀢𑀺. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀯𑀺𑀲𑀸𑀔𑀸 𑀫𑀳𑀸𑀉𑀧𑀸𑀲𑀺𑀓𑀸𑀢𑀺 𑀢𑀬𑁄𑀧𑀺 𑀳𑀺 𑀇𑀫𑁂 𑀏𑀓𑀧𑁆𑀧𑀫𑀸𑀡𑀆𑀬𑀼𑀓𑀸 𑀏𑀯, 𑀯𑀝𑁆𑀝𑀸𑀪𑀺𑀭𑀢𑀲𑀢𑁆𑀢𑀸 𑀦𑀸𑀫 𑀏𑀢𑁂𑀳𑀺 𑀲𑀤𑀺𑀲𑀸 𑀲𑀼𑀔𑀪𑀸𑀕𑀺𑀦𑁄 𑀦𑀸𑀫 𑀦𑀢𑁆𑀣𑀺.

𑁩𑁭𑁦. 𑀅𑀧𑀭𑀺𑀬𑁄𑀲𑀺𑀢𑀲𑀗𑁆𑀓𑀧𑁆𑀧𑁄𑀢𑀺 𑀅𑀦𑀺𑀝𑁆𑀞𑀺𑀢𑀫𑀦𑁄𑀭𑀣𑁄. 𑀬𑀲𑁆𑀲𑀼 𑀫𑀜𑁆𑀜𑀸𑀫𑀺 𑀲𑀫𑀡𑁂𑀢𑀺 𑀬𑁂 𑀘 𑀲𑀫𑀡𑁂 𑀧𑀯𑀺𑀯𑀺𑀢𑁆𑀢𑀯𑀺𑀳𑀸𑀭𑀺𑀦𑁄𑀢𑀺 𑀫𑀜𑁆𑀜𑀸𑀫𑀺.

𑀆𑀭𑀸𑀥𑀦𑀸𑀢𑀺 𑀲𑀫𑁆𑀧𑀸𑀤𑀦𑀸. 𑀯𑀺𑀭𑀸𑀥𑀦𑀸𑀢𑀺 𑀅𑀲𑀫𑁆𑀧𑀸𑀤𑀦𑀸. 𑀦 𑀲𑀫𑁆𑀧𑀸𑀬𑀦𑁆𑀢𑀻𑀢𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺.

𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀦𑁆𑀢𑀺 𑀆𑀤𑀺𑀘𑁆𑀘𑁄𑀧𑀺 𑀕𑁄𑀢𑀫𑀕𑁄𑀢𑁆𑀢𑁄, 𑀪𑀕𑀯𑀸𑀧𑀺 𑀕𑁄𑀢𑀫𑀕𑁄𑀢𑁆𑀢𑁄, 𑀢𑀲𑁆𑀫𑀸 𑀏𑀯𑀫𑀸𑀳. 𑀬𑀁 𑀓𑀭𑁄𑀫𑀲𑀻𑀢𑀺 𑀬𑀁 𑀧𑀼𑀩𑁆𑀩𑁂 𑀩𑁆𑀭𑀳𑁆𑀫𑀼𑀦𑁄 𑀦𑀫𑀓𑁆𑀓𑀸𑀭𑀁 𑀓𑀭𑁄𑀫. 𑀲𑀫𑀁 𑀤𑁂𑀯𑁂𑀳𑀻𑀢𑀺 𑀤𑁂𑀯𑁂𑀳𑀺 𑀲𑀤𑁆𑀥𑀺𑀁, 𑀇𑀢𑁄 𑀧𑀝𑁆𑀞𑀸𑀬 𑀇𑀤𑀸𑀦𑀺 𑀅𑀫𑁆𑀳𑀸𑀓𑀁 𑀩𑁆𑀭𑀳𑁆𑀫𑀼𑀦𑁄 𑀦𑀫𑀓𑁆𑀓𑀸𑀭𑀓𑀭𑀡𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀸𑀫𑀁 𑀓𑀭𑁄𑀫𑀸𑀢𑀺 𑀦𑀫𑀓𑁆𑀓𑀸𑀭𑀁 𑀓𑀭𑁄𑀫.

𑁩𑁭𑁧. 𑀧𑀭𑀸𑀫𑀲𑀺𑀢𑁆𑀯𑀸𑀢𑀺 ¶ 𑀢𑀼𑀝𑁆𑀞𑀘𑀺𑀢𑁆𑀢𑁄 𑀲𑀳𑀸𑀬𑀁 𑀳𑀢𑁆𑀣𑁂𑀦 𑀳𑀢𑁆𑀣𑀫𑁆𑀳𑀺 𑀧𑀳𑀭𑀦𑁆𑀢𑁄 𑀯𑀺𑀬 𑀧𑀣𑀯𑀺𑀁 𑀧𑀳𑀭𑀺𑀢𑁆𑀯𑀸, 𑀲𑀓𑁆𑀔𑀺𑀪𑀸𑀯𑀢𑁆𑀣𑀸𑀬 𑀯𑀸 𑀧𑀳𑀭𑀺𑀢𑁆𑀯𑀸 ‘‘𑀬𑀣𑀸 𑀢𑁆𑀯𑀁 𑀦𑀺𑀘𑁆𑀘𑀮𑁄, 𑀏𑀯𑀫𑀳𑀁 𑀪𑀕𑀯𑀢𑀻’’𑀢𑀺. 𑀅𑀚𑁆𑀛𑀺𑀝𑁆𑀞𑀧𑀜𑁆𑀳𑀸𑀢𑀺 𑀅𑀚𑁆𑀛𑁂𑀲𑀺𑀢𑀧𑀜𑁆𑀳𑀸 𑀧𑀢𑁆𑀣𑀺𑀢𑀧𑀜𑁆𑀳𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁

𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑀉𑀤𑁆𑀤𑁂𑀲𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁩𑁭𑁩. 𑀏𑀯𑀁 ¶ ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀫𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸 𑁋 𑀏𑀓𑀸𑀬𑀦𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄𑀢𑀺 𑀓𑀲𑁆𑀫𑀸 𑀪𑀕𑀯𑀸 𑀇𑀤𑀁 𑀲𑀼𑀢𑁆𑀢𑀫𑀪𑀸𑀲𑀺? 𑀓𑀼𑀭𑀼𑀭𑀝𑁆𑀞𑀯𑀸𑀲𑀻𑀦𑀁 𑀕𑀫𑁆𑀪𑀻𑀭𑀤𑁂𑀲𑀦𑀸𑀧𑀝𑀺𑀕𑁆𑀕𑀳𑀡𑀲𑀫𑀢𑁆𑀣𑀢𑀸𑀬. 𑀓𑀼𑀭𑀼𑀭𑀝𑁆𑀞𑀯𑀸𑀲𑀺𑀦𑁄 𑀓𑀺𑀭 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀸𑀲𑀓𑀸 𑀉𑀧𑀸𑀲𑀺𑀓𑀸𑀬𑁄 𑀉𑀢𑀼𑀧𑀘𑁆𑀘𑀬𑀸𑀤𑀺𑀲𑀫𑁆𑀧𑀦𑁆𑀦𑀢𑁆𑀢𑀸 𑀢𑀲𑁆𑀲 𑀭𑀝𑁆𑀞𑀲𑁆𑀲 𑀲𑀧𑁆𑀧𑀸𑀬𑀉𑀢𑀼𑀧𑀘𑁆𑀘𑀬𑀲𑁂𑀯𑀦𑁂𑀦 𑀦𑀺𑀘𑁆𑀘𑀁 𑀓𑀮𑁆𑀮𑀲𑀭𑀻𑀭𑀸 𑀓𑀮𑁆𑀮𑀘𑀺𑀢𑁆𑀢𑀸 𑀘 𑀳𑁄𑀦𑁆𑀢𑀺. 𑀢𑁂 𑀘𑀺𑀢𑁆𑀢𑀲𑀭𑀻𑀭𑀓𑀮𑁆𑀮𑀢𑀸𑀬 𑀅𑀦𑀼𑀕𑁆𑀕𑀳𑀺𑀢𑀧𑀜𑁆𑀜𑀸𑀩𑀮𑀸 𑀕𑀫𑁆𑀪𑀻𑀭𑀓𑀣𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀲𑀫𑀢𑁆𑀣𑀸 𑀳𑁄𑀦𑁆𑀢𑀺. 𑀢𑁂𑀦 𑀦𑁂𑀲𑀁 𑀪𑀕𑀯𑀸 𑀇𑀫𑀁 𑀕𑀫𑁆𑀪𑀻𑀭𑀤𑁂𑀲𑀦𑀸𑀧𑀝𑀺𑀕𑁆𑀕𑀳𑀡𑀲𑀫𑀢𑁆𑀣𑀢𑀁 𑀲𑀫𑁆𑀧𑀲𑁆𑀲𑀦𑁆𑀢𑁄 𑀏𑀓𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀓𑀫𑁆𑀫𑀝𑁆𑀞𑀸𑀦𑀁 𑀅𑀭𑀳𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀇𑀤𑀁 𑀕𑀫𑁆𑀪𑀻𑀭𑀢𑁆𑀣𑀁 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀁 𑀅𑀪𑀸𑀲𑀺. 𑀬𑀣𑀸 𑀳𑀺 𑀧𑀼𑀭𑀺𑀲𑁄 𑀲𑀼𑀯𑀡𑁆𑀡𑀘𑀗𑁆𑀓𑁄𑀝𑀓𑀁 𑀮𑀪𑀺𑀢𑁆𑀯𑀸 𑀢𑀢𑁆𑀣 𑀦𑀸𑀦𑀸𑀧𑀼𑀧𑁆𑀨𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀲𑀼𑀯𑀡𑁆𑀡𑀫𑀜𑁆𑀚𑀽𑀲𑀁 𑀯𑀸 𑀧𑀦 𑀮𑀪𑀺𑀢𑁆𑀯𑀸 𑀲𑀢𑁆𑀢𑀭𑀢𑀦𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀏𑀯𑀁 𑀪𑀕𑀯𑀸 𑀓𑀼𑀭𑀼𑀭𑀝𑁆𑀞𑀯𑀸𑀲𑀺𑀧𑀭𑀺𑀲𑀁 𑀮𑀪𑀺𑀢𑁆𑀯𑀸 𑀕𑀫𑁆𑀪𑀻𑀭𑀤𑁂𑀲𑀦𑀁 𑀤𑁂𑀲𑁂𑀲𑀺. 𑀢𑁂𑀦𑁂𑀯𑁂𑀢𑁆𑀣 𑀅𑀜𑁆𑀜𑀸𑀦𑀺𑀧𑀺 𑀕𑀫𑁆𑀪𑀻𑀭𑀢𑁆𑀣𑀸𑀦𑀺 𑀇𑀫𑀲𑁆𑀫𑀺𑀁 𑀤𑀻𑀖𑀦𑀺𑀓𑀸𑀬𑁂 𑀫𑀳𑀸𑀦𑀺𑀤𑀸𑀦𑀁 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 ¶ 𑀲𑀢𑀺𑀧𑀝𑁆𑀞𑀸𑀦𑀁, 𑀲𑀸𑀭𑁄𑀧𑀫𑀁, 𑀭𑀼𑀓𑁆𑀔𑁄𑀧𑀫𑀁, 𑀭𑀝𑁆𑀞𑀧𑀸𑀮𑀁, 𑀫𑀸𑀕𑀡𑁆𑀟𑀺𑀬𑀁, 𑀆𑀦𑁂𑀜𑁆𑀚𑀲𑀧𑁆𑀧𑀸𑀬𑀦𑁆𑀢𑀺 𑀅𑀜𑁆𑀜𑀸𑀦𑀺𑀧𑀺 𑀲𑀼𑀢𑁆𑀢𑀸𑀦𑀺 𑀤𑁂𑀲𑁂𑀲𑀺.

𑀅𑀧𑀺𑀘 𑀢𑀲𑁆𑀫𑀺𑀁 𑀚𑀦𑀧𑀤𑁂 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀧𑀓𑀢𑀺𑀬𑀸𑀯 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀅𑀦𑁆𑀢𑀫𑀲𑁄 𑀤𑀸𑀲𑀓𑀫𑁆𑀫𑀓𑀭𑀧𑀭𑀺𑀚𑀸𑀦𑀸𑀧𑀺 𑀲𑀢𑀺𑀧𑀝𑁆𑀞𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀫𑁂𑀯 𑀓𑀣𑀁 𑀓𑀣𑁂𑀦𑁆𑀢𑀺. 𑀉𑀤𑀓𑀢𑀺𑀢𑁆𑀣𑀲𑀼𑀢𑁆𑀢𑀓𑀦𑁆𑀢𑀦𑀝𑁆𑀞𑀸𑀦𑀸𑀤𑀻𑀲𑀼𑀧𑀺 𑀦𑀺𑀭𑀢𑁆𑀣𑀓𑀓𑀣𑀸 𑀦𑀸𑀫 𑀦𑀧𑁆𑀧𑀯𑀢𑁆𑀢𑀢𑀺. 𑀲𑀘𑁂 𑀓𑀸𑀘𑀺 𑀇𑀢𑁆𑀣𑀻 ‘‘𑀅𑀫𑁆𑀫, 𑀢𑁆𑀯𑀁 𑀓𑀢𑀭𑀁 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀁 𑀫𑀦𑀲𑀺𑀓𑀭𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑀸 ‘‘𑀦 𑀓𑀺𑀜𑁆𑀘𑀻’’𑀢𑀺 𑀯𑀤𑀢𑀺, 𑀢𑀁 𑀕𑀭𑀳𑀦𑁆𑀢𑀺 ‘‘𑀥𑀺𑀭𑀢𑁆𑀣𑀼 𑀢𑀯 𑀚𑀻𑀯𑀺𑀢𑀁, 𑀚𑀻𑀯𑀫𑀸𑀦𑀸𑀧𑀺 𑀢𑁆𑀯𑀁 𑀫𑀢𑀲𑀤𑀺𑀲𑀸’’𑀢𑀺. 𑀅𑀣 𑀦𑀁 ‘‘𑀫𑀸 𑀤𑀸𑀦𑀺 𑀧𑀼𑀦 𑀏𑀯𑀫𑀓𑀸𑀲𑀻’’𑀢𑀺 𑀑𑀯𑀤𑀺𑀢𑁆𑀯𑀸 𑀅𑀜𑁆𑀜𑀢𑀭𑀁 𑀲𑀢𑀺𑀧𑀝𑁆𑀞𑀸𑀦𑀁 𑀉𑀕𑁆𑀕𑀡𑁆𑀳𑀸𑀧𑁂𑀦𑁆𑀢𑀺. 𑀬𑀸 𑀧𑀦 ‘‘𑀅𑀳𑀁 𑀅𑀲𑀼𑀓𑀲𑀢𑀺𑀧𑀝𑁆𑀞𑀸𑀦𑀁 𑀦𑀸𑀫 𑀫𑀦𑀲𑀺𑀓𑀭𑁄𑀫𑀻’’𑀢𑀺 𑀯𑀤𑀢𑀺, 𑀢𑀲𑁆𑀲𑀸 ‘‘𑀲𑀸𑀥𑀼 𑀲𑀸𑀥𑀽’’𑀢𑀺 𑀲𑀸𑀥𑀼𑀓𑀸𑀭𑀁 𑀓𑀢𑁆𑀯𑀸 ‘‘𑀢𑀯 ¶ 𑀚𑀻𑀯𑀺𑀢𑀁 𑀲𑀼𑀚𑀻𑀯𑀺𑀢𑀁, 𑀢𑁆𑀯𑀁 𑀦𑀸𑀫 𑀫𑀦𑀼𑀲𑁆𑀲𑀢𑁆𑀢𑀁 𑀧𑀢𑁆𑀢𑀸, 𑀢𑀯𑀢𑁆𑀣𑀸𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄’’𑀢𑀺𑀆𑀤𑀻𑀳𑀺 𑀧𑀲𑀁𑀲𑀦𑁆𑀢𑀺. 𑀦 𑀓𑁂𑀯𑀮𑀜𑁆𑀘𑁂𑀢𑁆𑀣 𑀫𑀦𑀼𑀲𑁆𑀲𑀚𑀸𑀢𑀺𑀓𑀸𑀯 𑀲𑀢𑀺𑀧𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀬𑀼𑀢𑁆𑀢𑀸, 𑀢𑁂 𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑀸 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑀺.

𑀢𑀢𑁆𑀭𑀺𑀤𑀁 ¶ 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀦𑀝𑀓𑁄 𑀲𑀼𑀯𑀧𑁄𑀢𑀓𑀁 𑀕𑀳𑁂𑀢𑁆𑀯𑀸 𑀲𑀺𑀓𑁆𑀔𑀸𑀧𑁂𑀦𑁆𑀢𑁄 𑀯𑀺𑀘𑀭𑀢𑀺. 𑀲𑁄 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑀺𑀢𑁆𑀯𑀸 𑀕𑀫𑀦𑀓𑀸𑀮𑁂 𑀲𑀼𑀯𑀧𑁄𑀢𑀓𑀁 𑀧𑀫𑀼𑀲𑁆𑀲𑀺𑀢𑁆𑀯𑀸 𑀕𑀢𑁄. 𑀢𑀁 𑀲𑀸𑀫𑀡𑁂𑀭𑀺𑀬𑁄 𑀕𑀳𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀁𑀲𑀼. 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀢𑀁 𑀏𑀓𑀤𑀺𑀯𑀲𑀁 𑀧𑀼𑀭𑀢𑁄 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀫𑀳𑀸𑀣𑁂𑀭𑀻 𑀆𑀳 𑁋 ‘‘𑀩𑀼𑀤𑁆𑀥𑀭𑀓𑁆𑀔𑀺𑀢𑀸’’𑀢𑀺. 𑀓𑀺𑀁, 𑀅𑀬𑁆𑀬𑁂𑀢𑀺? 𑀅𑀢𑁆𑀣𑀺 𑀢𑁂 𑀓𑁄𑀘𑀺 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑁄𑀢𑀺? 𑀦𑀢𑁆𑀣𑀺, 𑀅𑀬𑁆𑀬𑁂𑀢𑀺. 𑀆𑀯𑀼𑀲𑁄, 𑀧𑀩𑁆𑀩𑀚𑀺𑀢𑀸𑀦𑀁 𑀲𑀦𑁆𑀢𑀺𑀓𑁂 𑀯𑀲𑀦𑁆𑀢𑁂𑀦 𑀦𑀸𑀫 𑀯𑀺𑀲𑁆𑀲𑀝𑁆𑀞𑀅𑀢𑁆𑀢𑀪𑀸𑀯𑁂𑀦 𑀪𑀯𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀓𑁄𑀘𑀺𑀤𑁂𑀯 𑀫𑀦𑀲𑀺𑀓𑀸𑀭𑁄 𑀇𑀘𑁆𑀙𑀺𑀢𑀩𑁆𑀩𑁄, 𑀢𑁆𑀯𑀁 𑀧𑀦 𑀅𑀜𑁆𑀜𑀁 𑀦 𑀲𑀓𑁆𑀔𑀺𑀲𑁆𑀲𑀲𑀺, ‘‘𑀅𑀝𑁆𑀞𑀺 𑀅𑀝𑁆𑀞𑀻’’𑀢𑀺 𑀲𑀚𑁆𑀛𑀸𑀬𑀁 𑀓𑀭𑁄𑀳𑀻𑀢𑀺. 𑀲𑁄 𑀣𑁂𑀭𑀺𑀬𑀸 𑀑𑀯𑀸𑀤𑁂 𑀞𑀢𑁆𑀯𑀸 ‘‘𑀅𑀝𑁆𑀞𑀺 𑀅𑀝𑁆𑀞𑀻’’𑀢𑀺 𑀲𑀚𑁆𑀛𑀸𑀬𑀦𑁆𑀢𑁄 𑀘𑀭𑀢𑀺.

𑀢𑀁 𑀏𑀓𑀤𑀺𑀯𑀲𑀁 𑀧𑀸𑀢𑁄𑀯 𑀢𑁄𑀭𑀡𑀕𑁆𑀕𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑀸𑀮𑀸𑀢𑀧𑀁 𑀢𑀧𑀫𑀸𑀦𑀁 𑀏𑀓𑁄 𑀲𑀓𑀼𑀡𑁄 𑀦𑀔𑀧𑀜𑁆𑀚𑀭𑁂𑀦 𑀅𑀕𑁆𑀕𑀳𑁂𑀲𑀺. 𑀲𑁄 ‘‘𑀓𑀺𑀭𑀺 𑀓𑀺𑀭𑀻’’𑀢𑀺 𑀲𑀤𑁆𑀤𑀫𑀓𑀸𑀲𑀺. 𑀲𑀸𑀫𑀡𑁂𑀭𑀺𑀬𑁄 𑀲𑀼𑀢𑁆𑀯𑀸 ‘‘𑀅𑀬𑁆𑀬𑁂 𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀲𑀓𑀼𑀡𑁂𑀦 𑀕𑀳𑀺𑀢𑁄, 𑀫𑁄𑀘𑁂𑀫 𑀦’’𑀦𑁆𑀢𑀺 𑀮𑁂𑀟𑁆𑀟𑀼𑀆𑀤𑀻𑀦𑀺 𑀕𑀳𑁂𑀢𑁆𑀯𑀸 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀫𑁄𑀘𑁂𑀲𑀼𑀁 ¶ . 𑀢𑀁 𑀆𑀦𑁂𑀢𑁆𑀯𑀸 𑀧𑀼𑀭𑀢𑁄 𑀞𑀧𑀺𑀢𑀁 𑀣𑁂𑀭𑀻 𑀆𑀳 𑁋 ‘‘𑀩𑀼𑀤𑁆𑀥𑀭𑀓𑁆𑀔𑀺𑀢, 𑀲𑀓𑀼𑀡𑁂𑀦 𑀕𑀳𑀺𑀢𑀓𑀸𑀮𑁂 𑀓𑀺𑀁 𑀘𑀺𑀦𑁆𑀢𑁂𑀲𑀻’’𑀢𑀺? 𑀦, 𑀅𑀬𑁆𑀬𑁂, 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀘𑀺𑀦𑁆𑀢𑁂𑀲𑀺𑀁, 𑀅𑀝𑁆𑀞𑀺𑀧𑀼𑀜𑁆𑀚𑁄𑀯 𑀅𑀝𑁆𑀞𑀺𑀧𑀼𑀜𑁆𑀚𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀓𑀢𑀭𑀲𑁆𑀫𑀺𑀁 𑀞𑀸𑀦𑁂 𑀯𑀺𑀧𑁆𑀧𑀓𑀺𑀭𑀺𑀲𑁆𑀲𑀢𑀻𑀢𑀺, 𑀏𑀯𑀁 𑀅𑀬𑁆𑀬𑁂 𑀅𑀝𑁆𑀞𑀺𑀧𑀼𑀜𑁆𑀚𑀫𑁂𑀯 𑀘𑀺𑀦𑁆𑀢𑁂𑀲𑀺𑀦𑁆𑀢𑀺. 𑀲𑀸𑀥𑀼, 𑀲𑀸𑀥𑀼, 𑀩𑀼𑀤𑁆𑀥𑀭𑀓𑁆𑀔𑀺𑀢, 𑀅𑀦𑀸𑀕𑀢𑁂 𑀪𑀯𑀓𑁆𑀔𑀬𑀲𑁆𑀲 𑀢𑁂 𑀧𑀘𑁆𑀘𑀬𑁄 𑀪𑀯𑀺𑀲𑁆𑀲𑀢𑀻𑀢𑀺. 𑀏𑀯𑀁 𑀢𑀢𑁆𑀣 𑀢𑀺𑀭𑀘𑁆𑀙𑀸𑀦𑀕𑀢𑀸𑀧𑀺 𑀲𑀢𑀺𑀧𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀬𑀼𑀢𑁆𑀢𑀸. 𑀢𑀲𑁆𑀫𑀸 𑀦𑁂𑀲𑀁 𑀪𑀕𑀯𑀸 𑀲𑀢𑀺𑀧𑀝𑁆𑀞𑀸𑀦𑀩𑀼𑀤𑁆𑀥𑀺𑀫𑁂𑀯 𑀚𑀦𑁂𑀦𑁆𑀢𑁄 𑀇𑀤𑀁 𑀲𑀼𑀢𑁆𑀢𑀫𑀪𑀸𑀲𑀺.

𑀢𑀢𑁆𑀣 𑀏𑀓𑀸𑀬𑀦𑁄𑀢𑀺 𑀏𑀓𑀫𑀕𑁆𑀕𑁄. 𑀫𑀕𑁆𑀕𑀲𑁆𑀲 𑀳𑀺 𑁋

‘‘𑀫𑀕𑁆𑀕𑁄 𑀧𑀦𑁆𑀣𑁄 𑀧𑀣𑁄 𑀧𑀚𑁆𑀚𑁄, 𑀅𑀜𑁆𑀚𑀲𑀁 𑀯𑀝𑀼𑀫𑀸𑀬𑀦𑀁;

𑀦𑀸𑀯𑀸 𑀉𑀢𑁆𑀢𑀭𑀲𑁂𑀢𑀽 𑀘, 𑀓𑀼𑀮𑁆𑀮𑁄 𑀘 𑀪𑀺𑀲𑀺𑀲𑀗𑁆𑀓𑀫𑁄’’𑀢𑀺.

𑀩𑀳𑀽𑀦𑀺 𑀦𑀸𑀫𑀸𑀦𑀺. 𑀲𑁆𑀯𑀸𑀬𑀫𑀺𑀥 𑀅𑀬𑀦𑀦𑀸𑀫𑁂𑀦 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀏𑀓𑀸𑀬𑀦𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄𑀢𑀺 𑀏𑀢𑁆𑀣 𑀏𑀓𑀫𑀕𑁆𑀕𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄 𑀦 𑀤𑁆𑀯𑀺𑀥𑀸 𑀧𑀣𑀪𑀽𑀢𑁄𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀣 𑀯𑀸 ¶ 𑀏𑀓𑁂𑀦 𑀅𑀬𑀺𑀢𑀩𑁆𑀩𑁄𑀢𑀺 𑀏𑀓𑀸𑀬𑀦𑁄. 𑀏𑀓𑁂𑀦𑀸𑀢𑀺 𑀕𑀡𑀲𑀗𑁆𑀕𑀡𑀺𑀓𑀁 𑀧𑀳𑀸𑀬 𑀯𑀽𑀧𑀓𑀝𑁆𑀞𑁂𑀦 𑀧𑀯𑀺𑀯𑀺𑀢𑁆𑀢𑀘𑀺𑀢𑁆𑀢𑁂𑀦. 𑀅𑀬𑀺𑀢𑀩𑁆𑀩𑁄 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑁄, 𑀅𑀬𑀦𑁆𑀢𑀺 𑀯𑀸 𑀏𑀢𑁂𑀦𑀸𑀢𑀺 𑀅𑀬𑀦𑁄, 𑀲𑀁𑀲𑀸𑀭𑀢𑁄 ¶ 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀲𑁆𑀲 𑀅𑀬𑀦𑁄 𑀏𑀓𑀸𑀬𑀦𑁄. 𑀏𑀓𑀲𑁆𑀲𑀸𑀢𑀺 𑀲𑁂𑀝𑁆𑀞𑀲𑁆𑀲. 𑀲𑀩𑁆𑀩𑀲𑀢𑁆𑀢𑀲𑁂𑀝𑁆𑀞𑁄 𑀘 𑀪𑀕𑀯𑀸, 𑀢𑀲𑁆𑀫𑀸 𑀪𑀕𑀯𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀢𑁂𑀦 𑀅𑀜𑁆𑀜𑁂𑀧𑀺 𑀅𑀬𑀦𑁆𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀪𑀕𑀯𑀢𑁄𑀯 𑀲𑁄 𑀅𑀬𑀦𑁄 𑀢𑁂𑀦 𑀉𑀧𑁆𑀧𑀸𑀤𑀺𑀢𑀢𑁆𑀢𑀸. 𑀬𑀣𑀸𑀳 ‘‘𑀲𑁄 𑀳𑀺, 𑀩𑁆𑀭𑀸𑀳𑁆𑀫𑀡, 𑀪𑀕𑀯𑀸 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸’’𑀢𑀺𑀆𑀤𑀺 (𑀫. 𑀦𑀺. 𑁩.𑁭𑁯). 𑀅𑀬𑀢𑀻𑀢𑀺 𑀯𑀸 𑀅𑀬𑀦𑁄, 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀲𑁆𑀫𑀺𑀁 𑀅𑀬𑀦𑁄𑀢𑀺 𑀏𑀓𑀸𑀬𑀦𑁄, 𑀇𑀫𑀲𑁆𑀫𑀺𑀜𑁆𑀜𑁂𑀯 𑀥𑀫𑁆𑀫𑀯𑀺𑀦𑀬𑁂 𑀧𑀯𑀢𑁆𑀢𑀢𑀺, 𑀦 𑀅𑀜𑁆𑀜𑀢𑁆𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀳 𑁋 ‘‘𑀇𑀫𑀲𑁆𑀫𑀺𑀁 𑀔𑁄, 𑀲𑀼𑀪𑀤𑁆𑀤, 𑀥𑀫𑁆𑀫𑀯𑀺𑀦𑀬𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀉𑀧𑀮𑀩𑁆𑀪𑀢𑀻’’𑀢𑀺 (𑀤𑀻. 𑀦𑀺. 𑁨.𑁨𑁧𑁪). 𑀤𑁂𑀲𑀦𑀸𑀪𑁂𑀤𑁄𑀬𑁂𑀯 𑀳𑁂𑀲𑁄, 𑀅𑀢𑁆𑀣𑀢𑁄 𑀧𑀦 𑀏𑀓𑁄𑀯. 𑀅𑀧𑀺𑀘 𑀏𑀓𑀁 𑀅𑀬𑀢𑀻𑀢𑀺 𑀏𑀓𑀸𑀬𑀦𑁄. 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀫𑀼𑀔𑀪𑀸𑀯𑀦𑀸𑀦𑀬𑀧𑁆𑀧𑀯𑀢𑁆𑀢𑁄𑀧𑀺 𑀅𑀧𑀭𑀪𑀸𑀕𑁂 𑀏𑀓𑀁 𑀦𑀺𑀩𑁆𑀩𑀸𑀦𑀫𑁂𑀯 ¶ 𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀳 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑁋

𑀏𑀓𑀸𑀬𑀦𑀁 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻,

𑀫𑀕𑁆𑀕𑀁 𑀧𑀚𑀸𑀦𑀸𑀢𑀺 𑀳𑀺𑀢𑀸𑀦𑀼𑀓𑀫𑁆𑀧𑀻;

𑀏𑀢𑁂𑀦 𑀫𑀕𑁆𑀕𑁂𑀦 𑀢𑀭𑀺𑀁𑀲𑀼 𑀧𑀼𑀩𑁆𑀩𑁂,

𑀢𑀭𑀺𑀲𑁆𑀲𑀦𑁆𑀢𑀺 𑀬𑁂 𑀘 𑀢𑀭𑀦𑁆𑀢𑀺 𑀑𑀖𑀦𑁆𑀢𑀺. (𑀲𑀁. 𑀦𑀺. 𑁫.𑁪𑁦𑁯);

𑀓𑁂𑀘𑀺 𑀧𑀦 ‘‘𑀦 𑀧𑀸𑀭𑀁 𑀤𑀺𑀕𑀼𑀡𑀁 𑀬𑀦𑁆𑀢𑀻’’𑀢𑀺 𑀕𑀸𑀣𑀸𑀦𑀬𑁂𑀦 𑀬𑀲𑁆𑀫𑀸 𑀏𑀓𑀯𑀸𑀭𑀁 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 ‘‘𑀏𑀓𑀸𑀬𑀦𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀚𑁆𑀚𑀢𑀺. 𑀇𑀫𑀲𑁆𑀲 𑀳𑀺 𑀅𑀢𑁆𑀣𑀲𑁆𑀲 𑀲𑀓𑀺𑀁 𑀅𑀬𑀦𑁄𑀢𑀺 𑀇𑀫𑀺𑀦𑀸 𑀩𑁆𑀬𑀜𑁆𑀚𑀦𑁂𑀦 𑀪𑀯𑀺𑀢𑀩𑁆𑀩𑀁. 𑀬𑀤𑀺 𑀧𑀦 𑀏𑀓𑀁 𑀅𑀬𑀦𑀫𑀲𑁆𑀲 𑀏𑀓𑀸 𑀕𑀢𑀺 𑀧𑀯𑀢𑁆𑀢𑀻𑀢𑀺 𑀏𑀯𑀁 𑀅𑀢𑁆𑀣𑀁 𑀬𑁄𑀚𑁂𑀢𑁆𑀯𑀸 𑀯𑀼𑀘𑁆𑀘𑁂𑀬𑁆𑀬, 𑀩𑁆𑀬𑀜𑁆𑀚𑀦𑀁 𑀬𑀼𑀚𑁆𑀚𑁂𑀬𑁆𑀬, 𑀅𑀢𑁆𑀣𑁄 𑀧𑀦 𑀉𑀪𑀬𑀣𑀸𑀧𑀺 𑀦 𑀬𑀼𑀚𑁆𑀚𑀢𑀺. 𑀓𑀲𑁆𑀫𑀸? 𑀇𑀥 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀓𑀸𑀬𑀸𑀤𑀺𑀘𑀢𑀼𑀆𑀭𑀫𑁆𑀫𑀡𑀧𑁆𑀧𑀯𑀢𑁆𑀢𑁄 𑀳𑀺 𑀧𑀼𑀩𑁆𑀩𑀪𑀸𑀕𑀲𑀢𑀺𑀧𑀝𑁆𑀞𑀸𑀦𑀫𑀕𑁆𑀕𑁄 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀦 𑀮𑁄𑀓𑀼𑀢𑁆𑀢𑀭𑁄, 𑀲𑁄 𑀘 𑀅𑀦𑁂𑀓𑀯𑀸𑀭𑀫𑁆𑀧𑀺 𑀅𑀬𑀢𑀺, 𑀅𑀦𑁂𑀓𑀜𑁆𑀘𑀲𑁆𑀲 𑀅𑀬𑀦𑀁 𑀳𑁄𑀢𑀺.

𑀧𑀼𑀩𑁆𑀩𑁂𑀧𑀺 𑀘 𑀇𑀫𑀲𑁆𑀫𑀺𑀁 𑀧𑀤𑁂 𑀫𑀳𑀸𑀣𑁂𑀭𑀸𑀦𑀁 𑀲𑀸𑀓𑀘𑁆𑀙𑀸 𑀅𑀳𑁄𑀲𑀺𑀬𑁂𑀯. 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑁄 𑀧𑀼𑀩𑁆𑀩𑀪𑀸𑀕𑀲𑀢𑀺𑀧𑀝𑁆𑀞𑀸𑀦𑀫𑀕𑁆𑀕𑁄𑀢𑀺 𑀆𑀳. 𑀆𑀘𑀭𑀺𑀬𑁄 𑀧𑀦𑀲𑁆𑀲 𑀢𑀺𑀧𑀺𑀝𑀓𑀘𑀽𑀴𑀲𑀼𑀫𑀢𑁆𑀣𑁂𑀭𑁄 𑀫𑀺𑀲𑁆𑀲𑀓𑀫𑀕𑁆𑀕𑁄𑀢𑀺 𑀆𑀳. 𑀧𑀼𑀩𑁆𑀩𑀪𑀸𑀕𑁄 𑀪𑀦𑁆𑀢𑁂𑀢𑀺? 𑀫𑀺𑀲𑁆𑀲𑀓𑁄, 𑀆𑀯𑀼𑀲𑁄𑀢𑀺. 𑀆𑀘𑀭𑀺𑀬𑁂 𑀧𑀦 𑀧𑀼𑀦𑀧𑁆𑀧𑀼𑀦𑀁 𑀪𑀡𑀦𑁆𑀢𑁂 𑀅𑀧𑁆𑀧𑀝𑀺𑀩𑀸𑀳𑀺𑀢𑁆𑀯𑀸 ¶ 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀧𑀜𑁆𑀳𑀁 𑀅𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸𑀯 𑀉𑀝𑁆𑀞𑀳𑀺𑀁𑀲𑀼. 𑀅𑀣𑀸𑀘𑀭𑀺𑀬𑀢𑁆𑀣𑁂𑀭𑁄 𑀦𑀳𑀸𑀦𑀓𑁄𑀝𑁆𑀞𑀓𑀁 𑀕𑀘𑁆𑀙𑀦𑁆𑀢𑁄 ‘‘𑀫𑀬𑀸 𑀫𑀺𑀲𑁆𑀲𑀓𑀫𑀕𑁆𑀕𑁄 𑀓𑀣𑀺𑀢𑁄, 𑀘𑀽𑀴𑀦𑀸𑀕𑁄 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑁄𑀢𑀺 𑀆𑀤𑀸𑀬 𑀯𑁄𑀳𑀭𑀢𑀺, 𑀓𑁄 𑀦𑀼 𑀔𑁄 𑀏𑀢𑁆𑀣 𑀦𑀺𑀘𑁆𑀙𑀬𑁄’’𑀢𑀺 𑀲𑀼𑀢𑁆𑀢𑀦𑁆𑀢𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 ‘‘𑀬𑁄 𑀳𑀺 𑀓𑁄𑀘𑀺 ¶ , 𑀪𑀺𑀓𑁆𑀔𑀯𑁂, 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀏𑀯𑀁 𑀪𑀸𑀯𑁂𑀬𑁆𑀬 𑀲𑀢𑁆𑀢 𑀯𑀲𑁆𑀲𑀸𑀦𑀻’’𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀮𑁆𑀮𑀓𑁆𑀔𑁂𑀲𑀺. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀢𑀺𑀝𑁆𑀞𑀫𑀸𑀦𑁄 𑀦𑀸𑀫 𑀦𑀢𑁆𑀣𑀺, 𑀫𑀬𑀸 𑀯𑀼𑀢𑁆𑀢𑁄 𑀫𑀺𑀲𑁆𑀲𑀓𑀫𑀕𑁆𑀕𑁄 𑀦 𑀮𑀩𑁆𑀪𑀢𑀺. 𑀘𑀽𑀴𑀦𑀸𑀕𑁂𑀦 𑀤𑀺𑀝𑁆𑀞𑁄 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑁄𑀯 𑀮𑀩𑁆𑀪𑀢𑀻𑀢𑀺 𑀜𑀢𑁆𑀯𑀸 𑀅𑀝𑁆𑀞𑀫𑀺𑀬𑀁 𑀥𑀫𑁆𑀫𑀲𑀯𑀦𑁂 𑀲𑀗𑁆𑀖𑀼𑀝𑁆𑀞𑁂 𑀅𑀕𑀫𑀸𑀲𑀺.

𑀧𑁄𑀭𑀸𑀡𑀓𑀢𑁆𑀣𑁂𑀭𑀸 𑀓𑀺𑀭 𑀧𑀺𑀬𑀥𑀫𑁆𑀫𑀲𑀯𑀦𑀸 𑀳𑁄𑀦𑁆𑀢𑀺, 𑀲𑀤𑁆𑀤𑀁 𑀲𑀼𑀢𑁆𑀯𑀸𑀯 ‘‘𑀅𑀳𑀁 𑀧𑀞𑀫𑀁, 𑀅𑀳𑀁 𑀧𑀞𑀫’’𑀦𑁆𑀢𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀑𑀲𑀭𑀦𑁆𑀢𑀺. 𑀢𑀲𑁆𑀫𑀺𑀜𑁆𑀘 𑀤𑀺𑀯𑀲𑁂 𑀘𑀽𑀴𑀦𑀸𑀕𑀢𑁆𑀣𑁂𑀭𑀲𑁆𑀲 𑀯𑀸𑀭𑁄, 𑀢𑁂𑀦 ¶ 𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 𑀧𑀼𑀩𑁆𑀩𑀕𑀸𑀣𑀸𑀲𑀼 𑀯𑀼𑀢𑁆𑀢𑀸𑀲𑀼 𑀣𑁂𑀭𑀲𑁆𑀲 𑀆𑀲𑀦𑀧𑀺𑀝𑁆𑀞𑀺𑀬𑀁 𑀞𑀺𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀭𑀳𑁄 𑀦𑀺𑀲𑀻𑀤𑀺𑀢𑁆𑀯𑀸 𑀦 𑀯𑀓𑁆𑀔𑀸𑀫𑀻’’𑀢𑀺. 𑀧𑁄𑀭𑀸𑀡𑀓𑀢𑁆𑀣𑁂𑀭𑀸 𑀳𑀺 𑀅𑀦𑀼𑀲𑀽𑀬𑀓𑀸 𑀳𑁄𑀦𑁆𑀢𑀺. 𑀦 𑀅𑀢𑁆𑀢𑀦𑁄 𑀭𑀼𑀘𑀺𑀫𑁂𑀯 𑀉𑀘𑁆𑀙𑀼𑀪𑀸𑀭𑀁 𑀯𑀺𑀬 𑀏𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑀺, 𑀓𑀸𑀭𑀡𑀫𑁂𑀯 𑀕𑀡𑁆𑀳𑀦𑁆𑀢𑀺, 𑀅𑀓𑀸𑀭𑀡𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺. 𑀢𑀲𑁆𑀫𑀸 𑀣𑁂𑀭𑁄 ‘‘𑀆𑀯𑀼𑀲𑁄, 𑀘𑀽𑀴𑀦𑀸𑀕𑀸’’𑀢𑀺 𑀆𑀳. 𑀲𑁄 𑀆𑀘𑀭𑀺𑀬𑀲𑁆𑀲 𑀯𑀺𑀬 𑀲𑀤𑁆𑀤𑁄𑀢𑀺 𑀥𑀫𑁆𑀫𑀁 𑀞𑀧𑁂𑀢𑁆𑀯𑀸 ‘‘𑀓𑀺𑀁 𑀪𑀦𑁆𑀢𑁂’’𑀢𑀺 𑀆𑀳. 𑀆𑀯𑀼𑀲𑁄, 𑀘𑀽𑀴𑀦𑀸𑀕, 𑀫𑀬𑀸 𑀯𑀼𑀢𑁆𑀢𑁄 𑀫𑀺𑀲𑁆𑀲𑀓𑀫𑀕𑁆𑀕𑁄 𑀦 𑀮𑀩𑁆𑀪𑀢𑀺, 𑀢𑀬𑀸 𑀯𑀼𑀢𑁆𑀢𑁄 𑀧𑀼𑀩𑁆𑀩𑀪𑀸𑀕𑀲𑀢𑀺𑀧𑀝𑁆𑀞𑀸𑀦𑀫𑀕𑁆𑀕𑁄𑀯 𑀮𑀩𑁆𑀪𑀢𑀻𑀢𑀺. 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀲𑀩𑁆𑀩𑀧𑀭𑀺𑀬𑀢𑁆𑀢𑀺𑀓𑁄 𑀢𑁂𑀧𑀺𑀝𑀓𑁄 𑀲𑀼𑀢𑀩𑀼𑀤𑁆𑀥𑁄, 𑀏𑀯𑀭𑀽𑀧𑀲𑁆𑀲𑀸𑀧𑀺 𑀦𑀸𑀫 𑀪𑀺𑀓𑁆𑀔𑀼𑀦𑁄 𑀅𑀬𑀁 𑀧𑀜𑁆𑀳𑁄 𑀆𑀮𑀼𑀴𑁂𑀢𑀺, 𑀅𑀦𑀸𑀕𑀢𑁂 𑀫𑀫 𑀪𑀸𑀢𑀺𑀓𑀸 𑀇𑀫𑀁 𑀧𑀜𑁆𑀳𑀁 𑀆𑀮𑀼𑀴𑁂𑀲𑁆𑀲𑀦𑁆𑀢𑀻𑀢𑀺 𑀲𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀇𑀫𑀁 𑀧𑀜𑁆𑀳𑀁 𑀦𑀺𑀘𑁆𑀘𑀮𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀢𑁄 ‘‘𑀏𑀓𑀸𑀬𑀦𑀫𑀕𑁆𑀕𑁄 𑀯𑀼𑀘𑁆𑀘𑀢𑀺 𑀧𑀼𑀩𑁆𑀩𑀪𑀸𑀕𑀲𑀢𑀺𑀧𑀝𑁆𑀞𑀸𑀦𑀫𑀕𑁆𑀕𑁄’’.

𑀫𑀕𑁆𑀕𑀸𑀦𑀝𑁆𑀞𑀗𑁆𑀕𑀺𑀓𑁄 𑀲𑁂𑀝𑁆𑀞𑁄, 𑀲𑀘𑁆𑀘𑀸𑀦𑀁 𑀘𑀢𑀼𑀭𑁄 𑀧𑀤𑀸;

𑀯𑀺𑀭𑀸𑀕𑁄 𑀲𑁂𑀝𑁆𑀞𑁄 𑀥𑀫𑁆𑀫𑀸𑀦𑀁, 𑀤𑁆𑀯𑀺𑀧𑀤𑀸𑀦𑀜𑁆𑀘 𑀘𑀓𑁆𑀔𑀼𑀫𑀸.

𑀏𑀲𑁂𑀯 𑀫𑀕𑁆𑀕𑁄 𑀦𑀢𑁆𑀣𑀜𑁆𑀜𑁄, 𑀤𑀲𑁆𑀲𑀦𑀲𑁆𑀲 𑀯𑀺𑀲𑀼𑀤𑁆𑀥𑀺𑀬𑀸;

𑀏𑀢𑀜𑁆𑀳𑀺 𑀢𑀼𑀫𑁆𑀳𑁂 𑀧𑀝𑀺𑀧𑀚𑁆𑀚𑀣, 𑀫𑀸𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀁;

𑀏𑀢𑀜𑁆𑀳𑀺 𑀢𑀼𑀫𑁆𑀳𑁂 𑀧𑀝𑀺𑀧𑀦𑁆𑀦𑀸, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀣𑀸𑀢𑀺. 𑁋

𑀲𑀼𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀞𑀧𑁂𑀲𑀺.

𑀫𑀕𑁆𑀕𑁄𑀢𑀺 ¶ 𑀓𑁂𑀦𑀝𑁆𑀞𑁂𑀦 𑀫𑀕𑁆𑀕𑁄? 𑀦𑀺𑀩𑁆𑀩𑀸𑀦𑀕𑀫𑀦𑀝𑁆𑀞𑁂𑀦 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀫𑀕𑁆𑀕𑀦𑀻𑀬𑀝𑁆𑀞𑁂𑀦 𑀘. 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀭𑀸𑀕𑀸𑀤𑀻𑀳𑀺 𑀫𑀮𑁂𑀳𑀺 𑀅𑀪𑀺𑀚𑁆𑀛𑀸𑀯𑀺𑀲𑀫𑀮𑁄𑀪𑀸𑀤𑀻𑀳𑀺 𑀘 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀢𑁆𑀣𑀸𑀬. 𑀢𑀣𑀸 𑀳𑀺 𑀇𑀫𑀺𑀦𑀸𑀯 𑀫𑀕𑁆𑀕𑁂𑀦 𑀇𑀢𑁄 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀸𑀦𑀁 𑀘𑀢𑀼𑀦𑁆𑀦𑀁 ¶ 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 ¶ 𑀉𑀧𑀭𑀺 𑀏𑀓𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑁂 𑀦𑀺𑀩𑁆𑀩𑀢𑁆𑀢𑁂 𑀢𑀡𑁆𑀳𑀗𑁆𑀓𑀭𑀫𑁂𑀥𑀗𑁆𑀓𑀭𑀲𑀭𑀡𑀗𑁆𑀓𑀭𑀤𑀻𑀧𑀗𑁆𑀓𑀭𑀦𑀸𑀫𑀓𑁂 𑀩𑀼𑀤𑁆𑀥𑁂 𑀆𑀤𑀺𑀁 𑀓𑀢𑁆𑀯𑀸 𑀲𑀓𑁆𑀬𑀫𑀼𑀦𑀺𑀧𑀭𑀺𑀬𑁄𑀲𑀸𑀦𑀸 𑀅𑀦𑁂𑀓𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀅𑀦𑁂𑀓𑀲𑀢𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸 𑀅𑀭𑀺𑀬𑀲𑀸𑀯𑀓𑀸 𑀘𑀸𑀢𑀺 𑀇𑀫𑁂 𑀲𑀢𑁆𑀢𑀸 𑀲𑀩𑁆𑀩𑁂 𑀘𑀺𑀢𑁆𑀢𑀫𑀮𑀁 𑀧𑀯𑀸𑀳𑁂𑀢𑁆𑀯𑀸 𑀧𑀭𑀫𑀯𑀺𑀲𑀼𑀤𑁆𑀥𑀺𑀁 𑀧𑀢𑁆𑀢𑀸. 𑀭𑀽𑀧𑀫𑀮𑀯𑀲𑁂𑀦 𑀧𑀦 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀧𑀜𑁆𑀜𑀢𑁆𑀢𑀺𑀬𑁂𑀯 𑀦𑀢𑁆𑀣𑀺. 𑀢𑀣𑀸 𑀳𑀺 𑁋

‘‘𑀭𑀽𑀧𑁂𑀦 𑀲𑀁𑀓𑀺𑀮𑀺𑀝𑁆𑀞𑁂𑀦, 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺 𑀫𑀸𑀡𑀯𑀸;

𑀭𑀽𑀧𑁂 𑀲𑀼𑀤𑁆𑀥𑁂 𑀯𑀺𑀲𑀼𑀚𑁆𑀛𑀦𑁆𑀢𑀺, 𑀅𑀦𑀓𑁆𑀔𑀸𑀢𑀁 𑀫𑀳𑁂𑀲𑀺𑀦𑀸.

𑀘𑀺𑀢𑁆𑀢𑁂𑀦 𑀲𑀁𑀓𑀺𑀮𑀺𑀝𑁆𑀞𑁂𑀦, 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺 𑀫𑀸𑀡𑀯𑀸;

𑀘𑀺𑀢𑁆𑀢𑁂 𑀲𑀼𑀤𑁆𑀥𑁂 𑀯𑀺𑀲𑀼𑀚𑁆𑀛𑀦𑁆𑀢𑀺, 𑀇𑀢𑀺 𑀯𑀼𑀢𑁆𑀢𑀁 𑀫𑀳𑁂𑀲𑀺𑀦𑀸’’.

𑀬𑀣𑀸𑀳 𑁋 ‘‘𑀘𑀺𑀢𑁆𑀢𑀲𑀁𑀓𑀺𑀮𑁂𑀲𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺, 𑀘𑀺𑀢𑁆𑀢𑀯𑁄𑀤𑀸𑀦𑀸 𑀯𑀺𑀲𑀼𑀚𑁆𑀛𑀦𑁆𑀢𑀻’’𑀢𑀺. 𑀢𑀜𑁆𑀘 𑀘𑀺𑀢𑁆𑀢𑀯𑁄𑀤𑀸𑀦𑀁 𑀇𑀫𑀺𑀦𑀸 𑀲𑀢𑀺𑀧𑀝𑁆𑀞𑀸𑀦𑀫𑀕𑁆𑀕𑁂𑀦 𑀳𑁄𑀢𑀺. 𑀢𑁂𑀦𑀸𑀳 ‘‘𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺.

𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀬𑀸𑀢𑀺 𑀲𑁄𑀓𑀲𑁆𑀲 𑀘 𑀧𑀭𑀺𑀤𑁂𑀯𑀲𑁆𑀲 𑀘 𑀲𑀫𑀢𑀺𑀓𑁆𑀓𑀫𑀸𑀬 𑀧𑀳𑀸𑀦𑀸𑀬𑀸𑀢𑀺 𑀅𑀢𑁆𑀣𑁄, 𑀅𑀬𑀜𑁆𑀳𑀺 𑀫𑀕𑁆𑀕𑁄 𑀪𑀸𑀯𑀺𑀢𑁄 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑀸𑀤𑀻𑀦𑀁 𑀯𑀺𑀬 𑀲𑁄𑀓𑀲𑀫𑀢𑀺𑀓𑁆𑀓𑀫𑀸𑀬, 𑀧𑀝𑀸𑀘𑀸𑀭𑀸𑀤𑀻𑀦𑀁 𑀯𑀺𑀬 𑀧𑀭𑀺𑀤𑁂𑀯𑀲𑀫𑀢𑀺𑀓𑁆𑀓𑀫𑀸𑀬 𑀲𑀁𑀯𑀢𑁆𑀢𑀢𑀺. 𑀢𑁂𑀦𑀸𑀳 ‘‘𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀬𑀸’’𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑁄 𑁋

‘‘𑀬𑀁 𑀧𑀼𑀩𑁆𑀩𑁂 𑀢𑀁 𑀯𑀺𑀲𑁄𑀥𑁂𑀳𑀺, 𑀧𑀘𑁆𑀙𑀸 𑀢𑁂 𑀫𑀸𑀢𑀼 𑀓𑀺𑀜𑁆𑀘𑀦𑀁;

𑀫𑀚𑁆𑀛𑁂 𑀘𑁂 𑀦𑁄 𑀕𑀳𑁂𑀲𑁆𑀲𑀲𑀺, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀻’’𑀢𑀺. (𑀲𑀼. 𑀦𑀺. 𑁯𑁪𑁫);

𑀇𑀫𑀁 𑀕𑀸𑀣𑀁 𑀲𑀼𑀢𑁆𑀯𑀸𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀧𑀝𑀸𑀘𑀸𑀭𑀸 𑁋

‘‘𑀦 𑀲𑀦𑁆𑀢𑀺 𑀧𑀼𑀢𑁆𑀢𑀸 𑀢𑀸𑀡𑀸𑀬, 𑀦 𑀧𑀺𑀢𑀸 𑀦𑀸𑀧𑀺 𑀩𑀦𑁆𑀥𑀯𑀸;

𑀅𑀦𑁆𑀢𑀓𑁂𑀦𑀸𑀥𑀺𑀧𑀦𑁆𑀦𑀲𑁆𑀲, 𑀦𑀢𑁆𑀣𑀺 𑀜𑀸𑀢𑀻𑀲𑀼 𑀢𑀸𑀡𑀢𑀸’’𑀢𑀺. (𑀥. 𑀧. 𑁨𑁮𑁮);

𑀇𑀫𑀁 ¶ ¶ 𑀕𑀸𑀣𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑀸. 𑀬𑀲𑁆𑀫𑀸 𑀧𑀦 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑁂𑀲𑀼 𑀓𑀜𑁆𑀘𑀺 𑀥𑀫𑁆𑀫𑀁 ¶ 𑀅𑀦𑀸𑀫𑀲𑀺𑀢𑁆𑀯𑀸 𑀪𑀸𑀯𑀦𑀸 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑁂𑀧𑀺 𑀇𑀫𑀺𑀦𑀸𑀯 𑀫𑀕𑁆𑀕𑁂𑀦 𑀲𑁄𑀓𑀧𑀭𑀺𑀤𑁂𑀯𑁂 𑀲𑀫𑀢𑀺𑀓𑁆𑀓𑀦𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀬𑀸𑀢𑀺 𑀓𑀸𑀬𑀺𑀓𑀤𑀼𑀓𑁆𑀔𑀲𑁆𑀲 𑀘𑁂𑀢𑀲𑀺𑀓𑀤𑁄𑀫𑀦𑀲𑁆𑀲𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀅𑀢𑁆𑀣𑀗𑁆𑀕𑀫𑀸𑀬, 𑀦𑀺𑀭𑁄𑀥𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀳𑀺 𑀫𑀕𑁆𑀕𑁄 𑀪𑀸𑀯𑀺𑀢𑁄 𑀢𑀺𑀲𑁆𑀲𑀢𑁆𑀣𑁂𑀭𑀸𑀤𑀻𑀦𑀁 𑀯𑀺𑀬 𑀤𑀼𑀓𑁆𑀔𑀲𑁆𑀲, 𑀲𑀓𑁆𑀓𑀸𑀤𑀻𑀦𑀁 𑀯𑀺𑀬 𑀘 𑀤𑁄𑀫𑀦𑀲𑁆𑀲𑀲𑁆𑀲 𑀅𑀢𑁆𑀣𑀗𑁆𑀕𑀫𑀸𑀬 𑀲𑀁𑀯𑀢𑁆𑀢𑀢𑀺.

𑀢𑀢𑁆𑀭𑀸𑀬𑀁 𑀅𑀢𑁆𑀣𑀤𑀻𑀧𑀦𑀸 𑁋 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀢𑀺𑀲𑁆𑀲𑁄 𑀦𑀸𑀫 𑀓𑀼𑀝𑀼𑀫𑁆𑀩𑀺𑀓𑀧𑀼𑀢𑁆𑀢𑁄 𑀘𑀢𑁆𑀢𑀸𑀮𑀻𑀲 𑀳𑀺𑀭𑀜𑁆𑀜𑀓𑁄𑀝𑀺𑀬𑁄 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀅𑀕𑀸𑀫𑀓𑁂 𑀅𑀭𑀜𑁆𑀜𑁂 𑀯𑀺𑀳𑀭𑀢𑀺. 𑀢𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀼 𑀪𑀭𑀺𑀬𑀸 ‘‘𑀕𑀘𑁆𑀙𑀣, 𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀣𑀸’’𑀢𑀺 𑀧𑀜𑁆𑀘𑀲𑀢𑁂 𑀘𑁄𑀭𑁂 𑀧𑁂𑀲𑁂𑀲𑀺. 𑀢𑁂 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀣𑁂𑀭𑁄 𑀆𑀳 𑁋 ‘‘𑀓𑀲𑁆𑀫𑀸 𑀆𑀕𑀢𑀢𑁆𑀣 𑀉𑀧𑀸𑀲𑀓𑀸’’𑀢𑀺? 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑁆𑀲𑀸𑀫𑀸𑀢𑀺. 𑀧𑀸𑀝𑀺𑀪𑁄𑀕𑀁 𑀫𑁂 𑀉𑀧𑀸𑀲𑀓𑀸, 𑀕𑀳𑁂𑀢𑁆𑀯𑀸 𑀅𑀚𑁆𑀚𑁂𑀓𑀭𑀢𑁆𑀢𑀺𑀁 𑀚𑀻𑀯𑀺𑀢𑀁 𑀤𑁂𑀣𑀸𑀢𑀺. 𑀓𑁄 𑀢𑁂, 𑀲𑀫𑀡, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀸𑀝𑀺𑀪𑁄𑀕𑁄 𑀪𑀯𑀺𑀲𑁆𑀲𑀢𑀻𑀢𑀺? 𑀣𑁂𑀭𑁄 𑀫𑀳𑀦𑁆𑀢𑀁 𑀧𑀸𑀲𑀸𑀡𑀁 𑀕𑀳𑁂𑀢𑁆𑀯𑀸 𑀤𑁆𑀯𑁂 𑀊𑀭𑀼𑀝𑁆𑀞𑀻𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 ‘‘𑀯𑀝𑁆𑀝𑀢𑀺 𑀉𑀧𑀸𑀲𑀓𑀸 𑀧𑀸𑀝𑀺𑀪𑁄𑀕𑁄’’𑀢𑀺 𑀆𑀳. 𑀢𑁂 𑀅𑀧𑀓𑁆𑀓𑀫𑀺𑀢𑁆𑀯𑀸 𑀘𑀗𑁆𑀓𑀫𑀦𑀲𑀻𑀲𑁂 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀺𑀁𑀲𑀼. 𑀣𑁂𑀭𑀲𑁆𑀲 𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀧𑀭𑀺𑀲𑀼𑀤𑁆𑀥𑀁 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀺. 𑀢𑀢𑁄 𑀅𑀦𑀼𑀓𑁆𑀓𑀫𑁂𑀦 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀢𑀺𑀬𑀸𑀫𑀭𑀢𑁆𑀢𑀺𑀁 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀉𑀪𑁄 𑀧𑀸𑀤𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸, 𑀲𑀜𑁆𑀜𑀧𑁂𑀲𑁆𑀲𑀸𑀫𑀺 𑀯𑁄 𑀅𑀳𑀁;

𑀅𑀝𑁆𑀝𑀺𑀬𑀸𑀫𑀺 𑀳𑀭𑀸𑀬𑀸𑀫𑀺, 𑀲𑀭𑀸𑀕𑀫𑀭𑀡𑀁 𑀅𑀳𑀁.

𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀬𑀣𑀸𑀪𑀽𑀢𑀁 𑀯𑀺𑀧𑀲𑁆𑀲𑀺𑀲𑀁;

𑀲𑀫𑁆𑀧𑀢𑁆𑀢𑁂 𑀅𑀭𑀼𑀡𑀼𑀕𑁆𑀕𑀫𑁆𑀳𑀺, 𑀅𑀭𑀳𑀢𑁆𑀢𑀫𑀧𑀸𑀧𑀼𑀡𑀺’’𑀦𑁆𑀢𑀺.

𑀅𑀧𑀭𑁂𑀧𑀺 𑀢𑀺𑀁𑀲 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀯𑀺𑀳𑀸𑀭𑁂 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸 ‘‘𑀆𑀯𑀼𑀲𑁄, 𑀢𑀺𑀬𑀸𑀫𑀭𑀢𑁆𑀢𑀺𑀁 ¶ 𑀲𑀫𑀡𑀥𑀫𑁆𑀫𑁄𑀯 𑀓𑀸𑀢𑀩𑁆𑀩𑁄, 𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀯𑀺𑀳𑀭𑀺𑀁𑀲𑀼. 𑀢𑁂𑀲𑀁 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀧𑀘𑀮𑀸𑀬𑀦𑁆𑀢𑀸𑀦𑀁 𑀏𑀓𑁄 𑀩𑁆𑀬𑀕𑁆𑀖𑁄 𑀆𑀕𑀦𑁆𑀢𑁆𑀯𑀸 𑀏𑀓𑁂𑀓𑀁 𑀪𑀺𑀓𑁆𑀔𑀼𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀦 𑀓𑁄𑀘𑀺 ‘‘𑀫𑀁 𑀩𑁆𑀬𑀕𑁆𑀖𑁄 𑀕𑀡𑁆𑀳𑀻’’𑀢𑀺 𑀯𑀸𑀘𑀫𑁆𑀧𑀺 𑀦𑀺𑀘𑁆𑀙𑀸𑀭𑁂𑀲𑀺. 𑀏𑀯𑀁 𑀧𑀜𑁆𑀘𑀲𑀼 𑀤𑀲𑀲𑀼 𑀪𑀺𑀓𑁆𑀔𑀽𑀲𑀼 𑀔𑀸𑀤𑀺𑀢𑁂𑀲𑀼 𑀉𑀧𑁄𑀲𑀣𑀤𑀺𑀯𑀲𑁂 ‘‘𑀇𑀢𑀭𑁂, 𑀆𑀯𑀼𑀲𑁄 ¶ , 𑀓𑀼𑀳𑀺’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀜𑀢𑁆𑀯𑀸 𑀘 ‘‘𑀇𑀤𑀸𑀦𑀺 𑀕𑀳𑀺𑀢𑁂𑀦 𑀕𑀳𑀺𑀢𑁄𑀫𑁆𑀳𑀻𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀯𑀺𑀳𑀭𑀺𑀁𑀲𑀼 ¶ . 𑀅𑀣 𑀅𑀜𑁆𑀜𑀢𑀭𑀁 𑀤𑀳𑀭𑀪𑀺𑀓𑁆𑀔𑀼𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀩𑁆𑀬𑀕𑁆𑀖𑁄 𑀕𑀡𑁆𑀳𑀺. 𑀲𑁄 ‘‘𑀩𑁆𑀬𑀕𑁆𑀖𑁄 𑀪𑀦𑁆𑀢𑁂’’𑀢𑀺 𑀆𑀳. 𑀪𑀺𑀓𑁆𑀔𑀽 𑀓𑀢𑁆𑀢𑀭𑀤𑀡𑁆𑀟𑁂 𑀘 𑀉𑀓𑁆𑀓𑀸𑀬𑁄 𑀘 𑀕𑀳𑁂𑀢𑁆𑀯𑀸 𑀫𑁄𑀘𑁂𑀲𑁆𑀲𑀸𑀫𑀸𑀢𑀺 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀩𑁆𑀬𑀕𑁆𑀖𑁄 𑀪𑀺𑀓𑁆𑀔𑀽𑀦𑀁 𑀅𑀕𑀢𑀺𑀁 𑀙𑀺𑀦𑁆𑀦𑀢𑀝𑀝𑁆𑀞𑀸𑀦𑀫𑀸𑀭𑀼𑀬𑁆𑀳 𑀢𑀁 𑀪𑀺𑀓𑁆𑀔𑀼𑀁 𑀧𑀸𑀤𑀗𑁆𑀕𑀼𑀝𑁆𑀞𑀓𑀢𑁄 𑀧𑀝𑁆𑀞𑀸𑀬 𑀔𑀸𑀤𑀺𑀢𑀼𑀁 𑀆𑀭𑀪𑀺. 𑀇𑀢𑀭𑁂𑀧𑀺 ‘‘𑀇𑀤𑀸𑀦𑀺 𑀲𑀧𑁆𑀧𑀼𑀭𑀺𑀲, 𑀅𑀫𑁆𑀳𑁂𑀳𑀺 𑀓𑀢𑁆𑀢𑀩𑁆𑀩𑀁 𑀦𑀢𑁆𑀣𑀺, 𑀪𑀺𑀓𑁆𑀔𑀽𑀦𑀁 𑀯𑀺𑀲𑁂𑀲𑁄 𑀦𑀸𑀫 𑀏𑀯𑀭𑀽𑀧𑁂 𑀞𑀸𑀦𑁂 𑀧𑀜𑁆𑀜𑀸𑀬𑀢𑀻’’𑀢𑀺 𑀆𑀳𑀁𑀲𑀼. 𑀲𑁄 𑀩𑁆𑀬𑀕𑁆𑀖𑀫𑀼𑀔𑁂 𑀦𑀺𑀧𑀦𑁆𑀦𑁄𑀯 𑀢𑀁 𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀬𑀸𑀯 𑀕𑁄𑀧𑁆𑀨𑀓𑀸 𑀔𑀸𑀤𑀺𑀢𑀲𑀫𑀬𑁂 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸, 𑀬𑀸𑀯 𑀚𑀡𑁆𑀡𑀼𑀓𑀸 𑀔𑀸𑀤𑀺𑀢𑀲𑀫𑀬𑁂 𑀲𑀓𑀤𑀸𑀕𑀸𑀫𑀻, 𑀬𑀸𑀯 𑀦𑀸𑀪𑀺𑀬𑀸 𑀔𑀸𑀤𑀺𑀢𑀲𑀫𑀬𑁂 𑀅𑀦𑀸𑀕𑀸𑀫𑀻 𑀳𑀼𑀢𑁆𑀯𑀸, 𑀳𑀤𑀬𑀭𑀽𑀧𑁂 𑀅𑀔𑀸𑀤𑀺𑀢𑁂𑀬𑁂𑀯 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀲𑀻𑀮𑀯𑀸 𑀯𑀢𑀲𑀫𑁆𑀧𑀦𑁆𑀦𑁄, 𑀧𑀜𑁆𑀜𑀯𑀸 𑀲𑀼𑀲𑀫𑀸𑀳𑀺𑀢𑁄;

𑀫𑀼𑀳𑀼𑀢𑁆𑀢𑀁 𑀧𑀫𑀸𑀤𑀫𑀦𑁆𑀯𑀸𑀬, 𑀩𑁆𑀬𑀕𑁆𑀖𑁂𑀦𑁄𑀭𑀼𑀤𑁆𑀥𑀫𑀸𑀦𑀲𑁄.

𑀧𑀜𑁆𑀚𑀭𑀲𑁆𑀫𑀺𑀁 𑀕𑀳𑁂𑀢𑁆𑀯𑀸𑀦, 𑀲𑀺𑀮𑀸𑀬 𑀉𑀧𑀭𑀻 𑀓𑀢𑁄;

𑀓𑀸𑀫𑀁 𑀔𑀸𑀤𑀢𑀼 𑀫𑀁 𑀩𑁆𑀬𑀕𑁆𑀖𑁄, 𑀅𑀝𑁆𑀞𑀺𑀬𑀸 𑀘 𑀦𑁆𑀳𑀸𑀭𑀼𑀲𑁆𑀲 𑀘;

𑀓𑀺𑀮𑁂𑀲𑁂 𑀔𑁂𑀧𑀬𑀺𑀲𑁆𑀲𑀸𑀫𑀺, 𑀨𑀼𑀲𑀺𑀲𑁆𑀲𑀸𑀫𑀺 𑀯𑀺𑀫𑀼𑀢𑁆𑀢𑀺𑀬’’𑀦𑁆𑀢𑀺.

𑀅𑀧𑀭𑁄𑀧𑀺 𑀧𑀻𑀢𑀫𑀮𑁆𑀮𑀢𑁆𑀣𑁂𑀭𑁄 𑀦𑀸𑀫 𑀕𑀺𑀳𑀺𑀓𑀸𑀮𑁂 𑀢𑀻𑀲𑀼 𑀭𑀚𑁆𑀚𑁂𑀲𑀼 𑀧𑀝𑀸𑀓𑀁 𑀕𑀳𑁂𑀢𑁆𑀯𑀸 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀆𑀕𑀫𑁆𑀫 𑀭𑀸𑀚𑀸𑀦𑀁 𑀧𑀲𑁆𑀲𑀺𑀢𑁆𑀯𑀸 𑀭𑀜𑁆𑀜𑀸 ¶ 𑀓𑀢𑀸𑀦𑀼𑀕𑁆𑀕𑀳𑁄 𑀏𑀓𑀤𑀺𑀯𑀲𑀁 𑀓𑀺𑀮𑀜𑁆𑀚𑀓𑀸𑀧𑀡𑀲𑀸𑀮𑀤𑁆𑀯𑀸𑀭𑁂𑀦 𑀕𑀘𑁆𑀙𑀦𑁆𑀢𑁄 ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁, 𑀢𑀁 𑀧𑀚𑀳𑀣, 𑀢𑀁 𑀯𑁄 𑀧𑀳𑀻𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺 𑀦 𑀢𑀼𑀫𑁆𑀳𑀸𑀓𑀯𑀸𑀓𑁆𑀬𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀦𑁂𑀯 𑀓𑀺𑀭 𑀭𑀽𑀧𑀁 𑀅𑀢𑁆𑀢𑀦𑁄, 𑀦 𑀯𑁂𑀤𑀦𑀸’’𑀢𑀺. 𑀲𑁄 𑀢𑀁𑀬𑁂𑀯 𑀅𑀗𑁆𑀓𑀼𑀲𑀁 𑀓𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀳𑀸𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀉𑀧𑀲𑀫𑁆𑀧𑀦𑁆𑀦𑁄 𑀤𑁆𑀯𑁂𑀫𑀸𑀢𑀺𑀓𑀸 𑀧𑀕𑀼𑀡𑀸 𑀓𑀢𑁆𑀯𑀸 𑀢𑀺𑀁𑀲 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀕𑀩𑀮𑀯𑀸𑀮𑀺𑀬𑀅𑀗𑁆𑀕𑀡𑀁 𑀕𑀦𑁆𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀅𑀓𑀸𑀲𑀺. 𑀧𑀸𑀤𑁂𑀲𑀼 𑀅𑀯𑀳𑀦𑁆𑀢𑁂𑀲𑀼 𑀚𑀡𑁆𑀡𑀼𑀓𑁂𑀳𑀺 𑀘𑀗𑁆𑀓𑀫𑀢𑀺. 𑀢𑀫𑁂𑀦𑀁 𑀭𑀢𑁆𑀢𑀺𑀁 𑀏𑀓𑁄 𑀫𑀺𑀕𑀮𑀼𑀤𑁆𑀤𑀓𑁄 𑀫𑀺𑀕𑁄𑀢𑀺 𑀫𑀜𑁆𑀜𑀫𑀸𑀦𑁄 𑀧𑀳𑀭𑀺. 𑀲𑀢𑁆𑀢𑀺 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀢𑀸, 𑀲𑁄 𑀢𑀁 𑀲𑀢𑁆𑀢𑀺𑀁 𑀳𑀭𑀸𑀧𑁂𑀢𑁆𑀯𑀸 𑀧𑀳𑀭𑀡𑀫𑀼𑀔𑀸𑀦𑀺 𑀢𑀺𑀡𑀯𑀝𑁆𑀝𑀺𑀬𑀸 𑀧𑀽𑀭𑀸𑀧𑁂𑀢𑁆𑀯𑀸 𑀧𑀸𑀲𑀸𑀡𑀧𑀺𑀝𑁆𑀞𑀺𑀬𑀁 𑀅𑀢𑁆𑀢𑀸𑀦𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑀳 ¶ 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀉𑀓𑁆𑀓𑀸𑀲𑀺𑀢𑀲𑀤𑁆𑀤𑁂𑀦 𑀆𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀪𑀸𑀲𑀺𑀢𑀁 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲, 𑀲𑀩𑁆𑀩𑀮𑁄𑀓𑀕𑁆𑀕𑀯𑀸𑀤𑀺𑀦𑁄;

𑀦 𑀢𑀼𑀫𑁆𑀳𑀸𑀓𑀫𑀺𑀤𑀁 𑀭𑀽𑀧𑀁, 𑀢𑀁 𑀚𑀳𑁂𑀬𑁆𑀬𑀸𑀣 𑀪𑀺𑀓𑁆𑀔𑀯𑁄.

𑀅𑀦𑀺𑀘𑁆𑀘𑀸 ¶ 𑀯𑀢 𑀲𑀗𑁆𑀔𑀸𑀭𑀸, 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄’’𑀢𑀺.

𑀏𑀯𑀁 𑀢𑀸𑀯 𑀅𑀬𑀁 𑀫𑀕𑁆𑀕𑁄 𑀢𑀺𑀲𑁆𑀲𑀢𑁆𑀣𑁂𑀭𑀸𑀤𑀻𑀦𑀁 𑀯𑀺𑀬 𑀤𑀼𑀓𑁆𑀔𑀲𑁆𑀲 𑀅𑀢𑁆𑀣𑀗𑁆𑀕𑀫𑀸𑀬 𑀲𑀁𑀯𑀢𑁆𑀢𑀢𑀺.

𑀲𑀓𑁆𑀓𑁄 𑀧𑀦 𑀤𑁂𑀯𑀸𑀦𑀫𑀺𑀦𑁆𑀤𑁄 𑀅𑀢𑁆𑀢𑀦𑁄 𑀧𑀜𑁆𑀘𑀯𑀺𑀥𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀤𑀺𑀲𑁆𑀯𑀸 𑀫𑀭𑀡𑀪𑀬𑀲𑀦𑁆𑀢𑀚𑁆𑀚𑀺𑀢𑁄 𑀤𑁄𑀫𑀦𑀲𑁆𑀲𑀚𑀸𑀢𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀲𑁄 𑀉𑀧𑁂𑀓𑁆𑀔𑀸𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀸𑀯𑀲𑀸𑀦𑁂 ¶ 𑀅𑀲𑀻𑀢𑀺𑀲𑀳𑀲𑁆𑀲𑀸𑀳𑀺 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀲𑀸 𑀘𑀲𑁆𑀲 𑀉𑀧𑀧𑀢𑁆𑀢𑀺 𑀧𑀼𑀦 𑀧𑀸𑀓𑀢𑀺𑀓𑀸𑀯 𑀅𑀳𑁄𑀲𑀺.

𑀲𑀼𑀩𑁆𑀭𑀳𑁆𑀫𑀸𑀧𑀺 𑀤𑁂𑀯𑀧𑀼𑀢𑁆𑀢𑁄 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀢𑀺. 𑀢𑀢𑁆𑀣 𑀧𑀜𑁆𑀘𑀲𑀢𑀸 𑀅𑀘𑁆𑀙𑀭𑀸𑀬𑁄 𑀭𑀼𑀓𑁆𑀔𑀢𑁄 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀦𑁆𑀢𑀺𑀬𑁄 𑀘𑀯𑀺𑀢𑁆𑀯𑀸 𑀦𑀺𑀭𑀬𑁂 𑀉𑀧𑁆𑀧𑀦𑁆𑀦𑀸. 𑀲𑁄 ‘‘𑀓𑀺𑀁 𑀇𑀫𑀸 𑀘𑀺𑀭𑀸𑀬𑀦𑁆𑀢𑀻’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑀢𑀸𑀲𑀁 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀓𑀺𑀢𑁆𑀢𑀓𑀁 𑀦𑀼 𑀔𑁄 𑀫𑀫 𑀆𑀬𑀽’’𑀢𑀺 𑀉𑀧𑀧𑀭𑀺𑀓𑁆𑀔𑀦𑁆𑀢𑁄 𑀅𑀢𑁆𑀢𑀦𑁄 𑀆𑀬𑀼𑀧𑀭𑀺𑀓𑁆𑀔𑀬𑀁 𑀯𑀺𑀤𑀺𑀢𑁆𑀯𑀸 𑀘𑀯𑀺𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀦𑀪𑀸𑀯𑀁 𑀤𑀺𑀲𑁆𑀯𑀸 𑀪𑀻𑀢𑁄 𑀅𑀢𑀺𑀯𑀺𑀬 𑀤𑁄𑀫𑀦𑀲𑁆𑀲𑀚𑀸𑀢𑁄 𑀳𑀼𑀢𑁆𑀯𑀸 ‘‘𑀇𑀫𑀁 𑀫𑁂 𑀤𑁄𑀫𑀦𑀲𑁆𑀲𑀁 𑀲𑀢𑁆𑀣𑀸 𑀯𑀺𑀦𑀬𑀺𑀲𑁆𑀲𑀢𑀺, 𑀦 𑀅𑀜𑁆𑀜𑁄’’𑀢𑀺 𑀅𑀯𑀲𑁂𑀲𑀸 𑀧𑀜𑁆𑀘𑀲𑀢𑀸 𑀅𑀘𑁆𑀙𑀭𑀸𑀬𑁄 𑀕𑀳𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺 𑁋

‘‘𑀦𑀺𑀘𑁆𑀘𑀁 𑀉𑀢𑁆𑀭𑀲𑁆𑀢𑀫𑀺𑀤𑀁 𑀘𑀺𑀢𑁆𑀢𑀁, 𑀦𑀺𑀘𑁆𑀘𑀁 𑀉𑀩𑁆𑀩𑀺𑀕𑁆𑀕𑀺𑀤𑀁 𑀫𑀦𑁄;

𑀅𑀦𑀼𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀙𑁂𑀲𑀼, 𑀅𑀣𑁄 𑀉𑀧𑁆𑀧𑀢𑀺𑀢𑁂𑀲𑀼 𑀘;

𑀲𑀘𑁂 𑀅𑀢𑁆𑀣𑀺 𑀅𑀦𑀼𑀢𑁆𑀭𑀲𑁆𑀢𑀁, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄𑀢𑀺. (𑀲𑀁. 𑀦𑀺. 𑁧.𑁯𑁮);

𑀢𑀢𑁄 𑀦𑀁 𑀪𑀕𑀯𑀸 𑀆𑀳 𑁋

‘‘𑀦𑀸𑀜𑁆𑀜𑀢𑁆𑀭 𑀩𑁄𑀚𑁆𑀛𑀸 𑀢𑀧𑀲𑀸, 𑀦𑀸𑀜𑁆𑀜𑀢𑁆𑀭𑀺𑀦𑁆𑀤𑁆𑀭𑀺𑀬𑀲𑀁𑀯𑀭𑀸;

𑀦𑀸𑀜𑁆𑀜𑀢𑁆𑀭 𑀲𑀩𑁆𑀩𑀦𑀺𑀲𑁆𑀲𑀕𑁆𑀕𑀸, 𑀲𑁄𑀢𑁆𑀣𑀺𑀁 𑀧𑀲𑁆𑀲𑀸𑀫𑀺 𑀧𑀸𑀡𑀺𑀦’’𑀦𑁆𑀢𑀺. (𑀲𑀁. 𑀦𑀺. 𑁧.𑁯𑁮);

𑀲𑁄 ¶ 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀜𑁆𑀘𑀳𑀺 𑀅𑀘𑁆𑀙𑀭𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀢𑀁 𑀲𑀫𑁆𑀧𑀢𑁆𑀢𑀺𑀁 ¶ 𑀣𑀸𑀯𑀭𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀅𑀕𑀫𑀸𑀲𑀻𑀢𑀺. 𑀏𑀯𑀁 𑀅𑀬𑀁 𑀫𑀕𑁆𑀕𑁄 𑀪𑀸𑀯𑀺𑀢𑁄 𑀲𑀓𑁆𑀓𑀸𑀤𑀻𑀦𑀁 𑀯𑀺𑀬 𑀤𑁄𑀫𑀦𑀲𑁆𑀲𑀲𑁆𑀲 𑀅𑀢𑁆𑀣𑀗𑁆𑀕𑀫𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀜𑀸𑀬𑀲𑁆𑀲 𑀅𑀥𑀺𑀕𑀫𑀸𑀬𑀸𑀢𑀺 𑀜𑀸𑀬𑁄 𑀯𑀼𑀘𑁆𑀘𑀢𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀢𑀲𑁆𑀲 𑀅𑀥𑀺𑀕𑀫𑀸𑀬, 𑀧𑀢𑁆𑀢𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀜𑁆𑀳𑀺 𑀧𑀼𑀩𑁆𑀩𑀪𑀸𑀕𑁂 𑀮𑁄𑀓𑀺𑀬𑁄 𑀲𑀢𑀺𑀧𑀝𑁆𑀞𑀸𑀦𑀫𑀕𑁆𑀕𑁄 𑀪𑀸𑀯𑀺𑀢𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑁆𑀲 ¶ 𑀅𑀥𑀺𑀕𑀫𑀸𑀬 𑀲𑀁𑀯𑀢𑁆𑀢𑀢𑀺. 𑀢𑁂𑀦𑀸𑀳 ‘‘𑀜𑀸𑀬𑀲𑁆𑀲 𑀅𑀥𑀺𑀕𑀫𑀸𑀬𑀸’’𑀢𑀺. 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸𑀢𑀺 𑀢𑀡𑁆𑀳𑀸𑀯𑀸𑀦𑀯𑀺𑀭𑀳𑀺𑀢𑀢𑁆𑀢𑀸 𑀦𑀺𑀩𑁆𑀩𑀸𑀦𑀦𑁆𑀢𑀺 𑀮𑀤𑁆𑀥𑀦𑀸𑀫𑀲𑁆𑀲 𑀅𑀫𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬, 𑀅𑀢𑁆𑀢𑀧𑀘𑁆𑀘𑀓𑁆𑀔𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀜𑁆𑀳𑀺 𑀫𑀕𑁆𑀕𑁄 𑀪𑀸𑀯𑀺𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀁 𑀲𑀸𑀥𑁂𑀢𑀺. 𑀢𑁂𑀦𑀸𑀳 ‘‘𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’’𑀢𑀺.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 ‘‘𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺 𑀯𑀼𑀢𑁆𑀢𑁂 𑀲𑁄𑀓𑀲𑀫𑀢𑀺𑀓𑁆𑀓𑀫𑀸𑀤𑀻𑀦𑀺 𑀅𑀢𑁆𑀣𑀢𑁄 𑀲𑀺𑀤𑁆𑀥𑀸𑀦𑁂𑀯 𑀳𑁄𑀦𑁆𑀢𑀺, 𑀞𑀧𑁂𑀢𑁆𑀯𑀸 𑀧𑀦 𑀲𑀸𑀲𑀦𑀬𑀼𑀢𑁆𑀢𑀺𑀓𑁄𑀯𑀺𑀤𑁂 𑀅𑀜𑁆𑀜𑁂𑀲𑀁 𑀦 𑀧𑀸𑀓𑀝𑀸𑀦𑀺, 𑀦 𑀘 𑀪𑀕𑀯𑀸 𑀧𑀞𑀫𑀁 𑀲𑀸𑀲𑀦𑀬𑀼𑀢𑁆𑀢𑀺𑀓𑁄𑀯𑀺𑀤𑀁 𑀚𑀦𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀢𑁂𑀦 𑀢𑁂𑀦𑁂𑀯 𑀧𑀦 𑀲𑀼𑀢𑁆𑀢𑁂𑀦 𑀢𑀁 𑀢𑀁 𑀅𑀢𑁆𑀣𑀁 𑀜𑀸𑀧𑁂𑀢𑀺. 𑀢𑀲𑁆𑀫𑀸 𑀇𑀥 𑀬𑀁 𑀬𑀁 𑀅𑀢𑁆𑀣𑀁 𑀏𑀓𑀸𑀬𑀦𑀫𑀕𑁆𑀕𑁄 𑀲𑀸𑀥𑁂𑀢𑀺, 𑀢𑀁 𑀢𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀬𑀲𑁆𑀫𑀸 𑀯𑀸 𑀬𑀸 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺 𑀏𑀓𑀸𑀬𑀦𑀫𑀕𑁆𑀕𑁂𑀦 𑀲𑀁𑀯𑀢𑁆𑀢𑀢𑀺, 𑀲𑀸 𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑁂𑀦 𑀳𑁄𑀢𑀺. 𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑁄 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑁂𑀦, 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑁄 𑀜𑀸𑀬𑀲𑁆𑀲𑀸𑀥𑀺𑀕𑀫𑁂𑀦, 𑀜𑀸𑀬𑀲𑁆𑀲𑀸𑀥𑀺𑀕𑀫𑁄 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀢𑀲𑁆𑀫𑀸 𑀇𑀫𑀫𑁆𑀧𑀺 𑀓𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺 𑀯𑀢𑁆𑀯𑀸 ‘‘𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀬𑀸’’𑀢𑀺𑀆𑀤𑀺𑀫𑀸𑀳.

𑀅𑀧𑀺𑀘 𑀯𑀡𑁆𑀡𑀪𑀡𑀦𑀫𑁂𑀢𑀁 𑀏𑀓𑀸𑀬𑀦𑀫𑀕𑁆𑀕𑀲𑁆𑀲. 𑀬𑀣𑁂𑀯 𑀳𑀺 𑀪𑀕𑀯𑀸 𑁋 ‘‘𑀥𑀫𑁆𑀫𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀲𑁆𑀲𑀸𑀫𑀺 𑀬𑀤𑀺𑀤𑀁 𑀙𑀙𑀓𑁆𑀓𑀸𑀦𑀻’’𑀢𑀺 (𑀫. 𑀦𑀺. 𑁩.𑁪𑁨𑁦) 𑀙𑀙𑀓𑁆𑀓𑀤𑁂𑀲𑀦𑀸𑀬 𑀅𑀝𑁆𑀞𑀳𑀺 𑀧𑀤𑁂𑀳𑀺 𑀯𑀡𑁆𑀡𑀁 𑀅𑀪𑀸𑀲𑀺. 𑀬𑀣𑀸 𑀘 𑀅𑀭𑀺𑀬𑀯𑀁𑀲𑀤𑁂𑀲𑀦𑀸𑀬 ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀯𑀁𑀲𑀸 𑀅𑀕𑁆𑀕𑀜𑁆𑀜𑀸 𑀭𑀢𑁆𑀢𑀜𑁆𑀜𑀸 𑀯𑀁𑀲𑀜𑁆𑀜𑀸 𑀧𑁄𑀭𑀸𑀡𑀸 𑀅𑀲𑀁𑀓𑀺𑀡𑁆𑀡𑀸 𑀅𑀲𑀁𑀓𑀺𑀡𑁆𑀡𑀧𑀼𑀩𑁆𑀩𑀸 𑀦 ¶ 𑀲𑀗𑁆𑀓𑀻𑀬𑀦𑁆𑀢𑀺 𑀦 𑀲𑀗𑁆𑀓𑀻𑀬𑀺𑀲𑁆𑀲𑀦𑁆𑀢𑀺, 𑀅𑀧𑁆𑀧𑀝𑀺𑀓𑀼𑀝𑁆𑀞𑀸 𑀲𑀫𑀡𑁂𑀳𑀺 𑀩𑁆𑀭𑀸𑀳𑁆𑀫𑀡𑁂𑀳𑀺 𑀯𑀺𑀜𑁆𑀜𑀽𑀳𑀻’’𑀢𑀺 (𑀅. 𑀦𑀺. 𑁪.𑁨𑁮) 𑀦𑀯𑀳𑀺 𑀧𑀤𑁂𑀳𑀺 𑀯𑀡𑁆𑀡𑀁 𑀅𑀪𑀸𑀲𑀺; 𑀏𑀯𑀁 𑀇𑀫𑀲𑁆𑀲𑀸𑀧𑀺 𑀏𑀓𑀸𑀬𑀦𑀫𑀕𑁆𑀕𑀲𑁆𑀲 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸𑀢𑀺𑀆𑀤𑀻𑀳𑀺 𑀲𑀢𑁆𑀢𑀳𑀺 𑀧𑀤𑁂𑀳𑀺 𑀯𑀡𑁆𑀡𑀁 𑀅𑀪𑀸𑀲𑀺. 𑀓𑀲𑁆𑀫𑀸𑀢𑀺 𑀘𑁂, 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁. 𑀯𑀡𑁆𑀡𑀪𑀸𑀲𑀦𑀜𑁆𑀳𑀺 𑀲𑀼𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 ‘‘𑀅𑀬𑀁 𑀓𑀺𑀭 𑀫𑀕𑁆𑀕𑁄 𑀳𑀤𑀬𑀲𑀦𑁆𑀢𑀸𑀧𑀪𑀽𑀢𑀁 𑀲𑁄𑀓𑀁, 𑀯𑀸𑀘𑀸𑀯𑀺𑀧𑁆𑀧𑀮𑀸𑀧𑀪𑀽𑀢𑀁 ¶ 𑀧𑀭𑀺𑀤𑁂𑀯𑀁, 𑀓𑀸𑀬𑀺𑀓𑀅𑀲𑀸𑀢𑀪𑀽𑀢𑀁 𑀤𑀼𑀓𑁆𑀔𑀁, 𑀘𑁂𑀢𑀲𑀺𑀓𑀅𑀲𑀸𑀢𑀪𑀽𑀢𑀁 𑀤𑁄𑀫𑀦𑀲𑁆𑀲𑀦𑁆𑀢𑀺 ¶ 𑀘𑀢𑁆𑀢𑀸𑀭𑁄 𑀉𑀧𑀤𑁆𑀤𑀯𑁂 𑀳𑀦𑀢𑀺, 𑀯𑀺𑀲𑀼𑀤𑁆𑀥𑀺𑀁 𑀜𑀸𑀬𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀢𑀬𑁄 𑀯𑀺𑀲𑁂𑀲𑁂 𑀆𑀯𑀳𑀢𑀻’’𑀢𑀺 𑀉𑀲𑁆𑀲𑀸𑀳𑀚𑀸𑀢𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀉𑀕𑁆𑀕𑀳𑁂𑀢𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀁 𑀥𑀸𑀭𑁂𑀢𑀩𑁆𑀩𑀁, 𑀯𑀸𑀘𑁂𑀢𑀩𑁆𑀩𑀁, 𑀇𑀫𑀜𑁆𑀘 𑀫𑀕𑁆𑀕𑀁 𑀪𑀸𑀯𑁂𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺. 𑀇𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁 𑀯𑀡𑁆𑀡𑀁 𑀅𑀪𑀸𑀲𑀺. 𑀓𑀫𑁆𑀩𑀮𑀯𑀸𑀡𑀺𑀚𑀸𑀤𑀬𑁄 𑀓𑀫𑁆𑀩𑀮𑀸𑀤𑀻𑀦𑀁 𑀯𑀡𑁆𑀡𑀁 𑀯𑀺𑀬.

𑀬𑀣𑀸 𑀳𑀺 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀧𑀡𑁆𑀟𑀼𑀓𑀫𑁆𑀩𑀮𑀯𑀸𑀡𑀺𑀚𑁂𑀦 ‘𑀓𑀫𑁆𑀩𑀮𑀁 𑀕𑀡𑁆𑀳𑀣𑀸’𑀢𑀺 𑀉𑀕𑁆𑀖𑁄𑀲𑀺𑀢𑁂𑀧𑀺 𑀅𑀲𑀼𑀓𑀓𑀫𑁆𑀩𑀮𑁄𑀢𑀺 𑀦 𑀢𑀸𑀯 𑀫𑀦𑀼𑀲𑁆𑀲𑀸 𑀚𑀸𑀦𑀦𑁆𑀢𑀺. 𑀓𑁂𑀲𑀓𑀫𑁆𑀩𑀮𑀯𑀸𑀴𑀓𑀫𑁆𑀩𑀮𑀸𑀤𑀬𑁄𑀧𑀺 𑀳𑀺 𑀤𑀼𑀕𑁆𑀕𑀦𑁆𑀥𑀸 𑀔𑀭𑀲𑀫𑁆𑀨𑀲𑁆𑀲𑀸 𑀓𑀫𑁆𑀩𑀮𑀸𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀬𑀤𑀸 𑀧𑀦 𑀢𑁂𑀦 𑀕𑀦𑁆𑀥𑀸𑀭𑀓𑁄 𑀭𑀢𑁆𑀢𑀓𑀫𑁆𑀩𑀮𑁄 𑀲𑀼𑀔𑀼𑀫𑁄 𑀉𑀚𑁆𑀚𑀮𑁄 𑀲𑀼𑀔𑀲𑀫𑁆𑀨𑀲𑁆𑀲𑁄𑀢𑀺 𑀉𑀕𑁆𑀖𑁄𑀲𑀺𑀢𑀁 𑀳𑁄𑀢𑀺, 𑀢𑀤𑀸 𑀬𑁂 𑀧𑀳𑁄𑀦𑁆𑀢𑀺, 𑀢𑁂 𑀕𑀡𑁆𑀳𑀦𑁆𑀢𑀺. 𑀬𑁂 𑀦𑀧𑁆𑀧𑀳𑁄𑀦𑁆𑀢𑀺, 𑀢𑁂𑀧𑀺 𑀤𑀲𑁆𑀲𑀦𑀓𑀸𑀫𑀸 𑀳𑁄𑀦𑁆𑀢𑀺; 𑀏𑀯𑀫𑁂𑀯 ‘𑀏𑀓𑀸𑀬𑀦𑁄, 𑀪𑀺𑀓𑁆𑀔𑀯𑁂, 𑀅𑀬𑀁 𑀫𑀕𑁆𑀕𑁄’𑀢𑀺 𑀯𑀼𑀢𑁆𑀢𑁂𑀧𑀺 𑀅𑀲𑀼𑀓𑀫𑀕𑁆𑀕𑁄𑀢𑀺 𑀦 𑀢𑀸𑀯 𑀧𑀸𑀓𑀝𑁄 𑀳𑁄𑀢𑀺. 𑀦𑀸𑀦𑀧𑁆𑀧𑀓𑀸𑀭𑀓𑀸 𑀳𑀺 𑀅𑀦𑀺𑀬𑁆𑀬𑀸𑀦𑀺𑀓𑀫𑀕𑁆𑀕𑀸𑀧𑀺 𑀫𑀕𑁆𑀕𑀸𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺. ‘‘𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺𑀆𑀤𑀺𑀫𑁆𑀳𑀺 𑀧𑀦 𑀯𑀼𑀢𑁆𑀢𑁂 ‘‘𑀅𑀬𑀁 𑀓𑀺𑀭 𑀫𑀕𑁆𑀕𑁄 𑀘𑀢𑁆𑀢𑀸𑀭𑁄 𑀉𑀧𑀤𑁆𑀤𑀯𑁂 𑀳𑀦𑀢𑀺, 𑀢𑀬𑁄 𑀯𑀺𑀲𑁂𑀲𑁂 𑀆𑀯𑀳𑀢𑀻’’𑀢𑀺 𑀉𑀲𑁆𑀲𑀸𑀳𑀚𑀸𑀢𑀸 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀉𑀕𑁆𑀕𑀳𑁂𑀢𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀁 𑀥𑀸𑀭𑁂𑀢𑀩𑁆𑀩𑀁 𑀯𑀸𑀘𑁂𑀢𑀩𑁆𑀩𑀁, 𑀇𑀫𑀜𑁆𑀘 𑀫𑀕𑁆𑀕𑀁 𑀪𑀸𑀯𑁂𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀻𑀢𑀺 𑀯𑀡𑁆𑀡𑀁 𑀪𑀸𑀲𑀦𑁆𑀢𑁄 ‘‘𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺𑀆𑀤𑀺𑀫𑀸𑀳. 𑀬𑀣𑀸 𑀘 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀧𑀡𑁆𑀟𑀼𑀓𑀫𑁆𑀩𑀮𑀯𑀸𑀡𑀺𑀚𑀽𑀧𑀫𑀸; 𑀏𑀯𑀁 𑀭𑀢𑁆𑀢𑀚𑀫𑁆𑀩𑀼𑀦𑀤𑀲𑀼𑀯𑀡𑁆𑀡𑀉𑀤𑀓𑀧𑁆𑀧𑀲𑀸𑀤𑀓𑀫𑀡𑀺𑀭𑀢𑀦𑀲𑀼𑀯𑀺𑀲𑀼𑀤𑁆𑀥𑀫𑀼𑀢𑁆𑀢𑀭𑀢𑀦𑀧𑀯𑀸𑀴𑀸𑀤𑀺𑀯𑀸𑀡𑀺𑀚𑀽𑀧𑀫𑀸𑀤𑀬𑁄𑀧𑁂𑀢𑁆𑀣 𑀆𑀳𑀭𑀺𑀢𑀩𑁆𑀩𑀸.

𑀬𑀤𑀺𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀬𑁂 𑀇𑀫𑁂𑀢𑀺 𑀅𑀬𑀫𑀲𑁆𑀲 𑀅𑀢𑁆𑀣𑁄. 𑀘𑀢𑁆𑀢𑀸𑀭𑁄𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀢𑁂𑀦 𑀦 𑀢𑀢𑁄 𑀳𑁂𑀝𑁆𑀞𑀸, 𑀦 𑀉𑀤𑁆𑀥𑀦𑁆𑀢𑀺 𑀲𑀢𑀺𑀧𑀝𑁆𑀞𑀸𑀦𑀧𑀭𑀺𑀘𑁆𑀙𑁂𑀤𑀁 𑀤𑀻𑀧𑁂𑀢𑀺. 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸 𑀲𑀢𑀺𑀕𑁄𑀘𑀭𑁄𑀧𑀺 𑀢𑀺𑀥𑀸 𑀧𑀝𑀺𑀧𑀦𑁆𑀦𑁂𑀲𑀼 𑀲𑀸𑀯𑀓𑁂𑀲𑀼 𑀲𑀢𑁆𑀣𑀼𑀦𑁄 𑀧𑀝𑀺𑀖𑀸𑀦𑀼𑀦𑀬𑀯𑀻𑀢𑀺𑀯𑀢𑁆𑀢𑀢𑀸𑀧𑀺, 𑀲𑀢𑀺𑀧𑀺. ‘‘𑀘𑀢𑀼𑀦𑁆𑀦𑀁 ¶ , 𑀪𑀺𑀓𑁆𑀔𑀯𑁂, 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣…𑀧𑁂… 𑀓𑁄 𑀘, 𑀪𑀺𑀓𑁆𑀔𑀯𑁂, 𑀓𑀸𑀬𑀲𑁆𑀲 𑀲𑀫𑀼𑀤𑀬𑁄. 𑀆𑀳𑀸𑀭𑀲𑀫𑀼𑀤𑀬𑀸 𑀓𑀸𑀬𑀲𑁆𑀲 𑀲𑀫𑀼𑀤𑀬𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁪𑁦𑁮) 𑀳𑀺 ¶ 𑀲𑀢𑀺𑀕𑁄𑀘𑀭𑁄 𑀲𑀢𑀺𑀧𑀝𑁆𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 ‘‘𑀓𑀸𑀬𑁄 𑀉𑀧𑀝𑁆𑀞𑀸𑀦𑀁 𑀦𑁄 𑀲𑀢𑀺, 𑀲𑀢𑀺 𑀧𑀦 𑀉𑀧𑀝𑁆𑀞𑀸𑀦𑀜𑁆𑀘𑁂𑀯 𑀲𑀢𑀺 𑀘𑀸’’𑀢𑀺𑀆𑀤𑀻𑀲𑀼𑀧𑀺 (𑀧𑀝𑀺. 𑀫. 𑁩.𑁩𑁫). 𑀢𑀲𑁆𑀲𑀢𑁆𑀣𑁄 𑁋 𑀧𑀢𑀺𑀝𑁆𑀞𑀸𑀢𑀺 𑀅𑀲𑁆𑀫𑀺𑀦𑁆𑀢𑀺 𑀧𑀝𑁆𑀞𑀸𑀦𑀁. 𑀓𑀸 𑀧𑀢𑀺𑀝𑁆𑀞𑀸𑀢𑀺? 𑀲𑀢𑀺. 𑀲𑀢𑀺𑀬𑀸 𑀧𑀝𑁆𑀞𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀁, 𑀧𑀥𑀸𑀦𑀁 𑀞𑀸𑀦𑀦𑁆𑀢𑀺 𑀯𑀸 𑀧𑀝𑁆𑀞𑀸𑀦𑀁. 𑀲𑀢𑀺𑀬𑀸 𑀧𑀝𑁆𑀞𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀁 𑀳𑀢𑁆𑀣𑀺𑀝𑁆𑀞𑀸𑀦𑀅𑀲𑁆𑀲𑀝𑁆𑀞𑀸𑀦𑀸𑀤𑀻𑀦𑀺 𑀯𑀺𑀬.

‘‘𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸 𑀬𑀤𑀭𑀺𑀬𑁄 𑀲𑁂𑀯𑀢𑀺, 𑀬𑀤𑀭𑀺𑀬𑁄 𑀲𑁂𑀯𑀫𑀸𑀦𑁄 𑀲𑀢𑁆𑀣𑀸 𑀕𑀡𑀫𑀦𑀼𑀲𑀸𑀲𑀺𑀢𑀼𑀁 𑀅𑀭𑀳𑀢𑀻’’𑀢𑀺 (𑀫. 𑀦𑀺. 𑁩.𑁩𑁧𑁧) 𑀏𑀢𑁆𑀣 𑀢𑀺𑀥𑀸 𑀧𑀝𑀺𑀧𑀦𑁆𑀦𑁂𑀲𑀼 𑀲𑀸𑀯𑀓𑁂𑀲𑀼 𑀲𑀢𑁆𑀣𑀼𑀦𑁄 𑀧𑀝𑀺𑀖𑀸𑀦𑀼𑀦𑀬𑀯𑀻𑀢𑀺𑀯𑀢𑁆𑀢𑀢𑀸 ‘‘𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀸. 𑀢𑀲𑁆𑀲𑀢𑁆𑀣𑁄 𑁋 𑀧𑀝𑁆𑀞𑀧𑁂𑀢𑀩𑁆𑀩𑀢𑁄 𑀧𑀝𑁆𑀞𑀸𑀦𑀁, 𑀧𑀯𑀢𑁆𑀢𑀬𑀺𑀢𑀩𑁆𑀩𑀢𑁄𑀢𑀺 ¶ 𑀅𑀢𑁆𑀣𑁄. 𑀓𑁂𑀦 𑀧𑀝𑁆𑀞𑀧𑁂𑀢𑀩𑁆𑀩𑀢𑁄𑀢𑀺? 𑀲𑀢𑀺𑀬𑀸. 𑀲𑀢𑀺𑀬𑀸 𑀧𑀝𑁆𑀞𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀁. ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀲𑀢𑁆𑀢 𑀲𑀫𑁆𑀩𑁄𑀚𑁆𑀛𑀗𑁆𑀕𑁂 𑀧𑀭𑀺𑀧𑀽𑀭𑁂𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁪𑁭) 𑀧𑀦 𑀲𑀢𑀺𑀬𑁂𑀯 ‘‘𑀲𑀢𑀺𑀧𑀝𑁆𑀞𑀸𑀦𑀁’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀧𑀝𑁆𑀞𑀸𑀢𑀻𑀢𑀺 𑀧𑀝𑁆𑀞𑀸𑀦𑀁, 𑀉𑀧𑀝𑁆𑀞𑀸𑀢𑀺 𑀑𑀓𑁆𑀓𑀦𑁆𑀤𑀺𑀢𑁆𑀯𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀢𑁆𑀣𑀭𑀺𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀲𑀢𑀺𑀬𑁂𑀯 𑀲𑀢𑀺𑀧𑀝𑁆𑀞𑀸𑀦𑀁. 𑀅𑀣 𑀯𑀸 𑀲𑀭𑀡𑀝𑁆𑀞𑁂𑀦 𑀲𑀢𑀺, 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀧𑀝𑁆𑀞𑀸𑀦𑀁. 𑀇𑀢𑀺 𑀲𑀢𑀺 𑀘 𑀲𑀸 𑀧𑀝𑁆𑀞𑀸𑀦𑀁 𑀘𑀸𑀢𑀺𑀧𑀺 𑀲𑀢𑀺𑀧𑀝𑁆𑀞𑀸𑀦𑀁. 𑀇𑀤𑀫𑀺𑀥𑀸𑀥𑀺𑀧𑁆𑀧𑁂𑀢𑀁.

𑀬𑀤𑀺 𑀏𑀯𑀁 𑀓𑀲𑁆𑀫𑀸 ‘‘𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀩𑀳𑀼𑀯𑀘𑀦𑀁? 𑀲𑀢𑀺𑀩𑀳𑀼𑀢𑁆𑀢𑀸. 𑀆𑀭𑀫𑁆𑀫𑀡𑀪𑁂𑀤𑁂𑀦 𑀳𑀺 𑀩𑀳𑀼𑀓𑀸 𑀏𑀢𑀸 𑀲𑀢𑀺𑀬𑁄. 𑀅𑀣 𑀫𑀕𑁆𑀕𑁄𑀢𑀺 𑀓𑀲𑁆𑀫𑀸 𑀏𑀓𑀯𑀘𑀦𑀁? 𑀫𑀕𑁆𑀕𑀝𑁆𑀞𑁂𑀦 𑀏𑀓𑀢𑁆𑀢𑀸. 𑀘𑀢𑀲𑁆𑀲𑁄𑀧𑀺 𑀳𑀺 𑀏𑀢𑀸 𑀲𑀢𑀺𑀬𑁄 𑀫𑀕𑁆𑀕𑀝𑁆𑀞𑁂𑀦 𑀏𑀓𑀢𑁆𑀢𑀁 𑀕𑀘𑁆𑀙𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀫𑀕𑁆𑀕𑁄𑀢𑀺 𑀓𑁂𑀦𑀝𑁆𑀞𑁂𑀦 𑀫𑀕𑁆𑀕𑁄? 𑀦𑀺𑀩𑁆𑀩𑀸𑀦𑀕𑀫𑀦𑀝𑁆𑀞𑁂𑀦. 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀫𑀕𑁆𑀕𑀦𑀻𑀬𑀝𑁆𑀞𑁂𑀦 𑀘𑀸’’𑀢𑀺. 𑀘𑀢𑀲𑁆𑀲𑁄𑀧𑀺 𑀘𑁂𑀢𑀸 𑀅𑀧𑀭𑀪𑀸𑀕𑁂 𑀓𑀸𑀬𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀘 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀫𑀕𑁆𑀕𑀺𑀬𑀦𑁆𑀢𑀺, 𑀢𑀲𑁆𑀫𑀸 𑀘𑀢𑀲𑁆𑀲𑁄𑀧𑀺 𑀏𑀓𑁄 𑀫𑀕𑁆𑀕𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀜𑁆𑀘 𑀲𑀢𑀺 𑀯𑀘𑀦𑀸𑀦𑀼𑀲𑀦𑁆𑀥𑀺𑀦𑀸 𑀲𑀸𑀦𑀼𑀲𑀦𑁆𑀥𑀺𑀓𑀸𑀯 𑀤𑁂𑀲𑀦𑀸 𑀳𑁄𑀢𑀺, ‘‘𑀫𑀸𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀁, 𑀯𑁄 𑀪𑀺𑀓𑁆𑀔𑀯𑁂, 𑀫𑀕𑁆𑀕𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣…𑀧𑁂… 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀫𑀸𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑁄 𑀫𑀕𑁆𑀕𑁄? 𑀬𑀤𑀺𑀤𑀁 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁨𑁨𑁪) 𑀯𑀺𑀬. 𑀬𑀣𑀸 𑀫𑀸𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑁄𑀢𑀺 𑀘, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸𑀢𑀺 𑀘 𑀅𑀢𑁆𑀣𑀢𑁄 𑀏𑀓𑀁, 𑀩𑁆𑀬𑀜𑁆𑀚𑀦𑀫𑁂𑀯𑁂𑀢𑁆𑀣 𑀦𑀸𑀦𑀁 ¶ . 𑀏𑀯𑀁 ‘‘𑀏𑀓𑀸𑀬𑀦𑀫𑀕𑁆𑀕𑁄’’𑀢𑀺 ¶ 𑀘 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀘 𑀅𑀢𑁆𑀣𑀢𑁄 𑀏𑀓𑀁, 𑀩𑁆𑀬𑀜𑁆𑀚𑀦𑀫𑁂𑀯𑁂𑀢𑁆𑀣 𑀦𑀸𑀦𑀁, 𑀢𑀲𑁆𑀫𑀸 𑀫𑀕𑁆𑀕𑀝𑁆𑀞𑁂𑀦 𑀏𑀓𑀢𑁆𑀢𑀸 𑀏𑀓𑀯𑀘𑀦𑀁. 𑀆𑀭𑀫𑁆𑀫𑀡𑀪𑁂𑀤𑁂𑀦 𑀲𑀢𑀺𑀩𑀳𑀼𑀢𑁆𑀢𑀸 𑀩𑀳𑀼𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀓𑀲𑁆𑀫𑀸 𑀧𑀦 𑀪𑀕𑀯𑀢𑀸 𑀘𑀢𑁆𑀢𑀸𑀭𑁄𑀯 𑀲𑀢𑀺𑀧𑀝𑁆𑀞𑀸𑀦𑀸 𑀯𑀼𑀢𑁆𑀢𑀸 𑀅𑀦𑀽𑀦𑀸 𑀅𑀦𑀥𑀺𑀓𑀸𑀢𑀺? 𑀯𑁂𑀦𑁂𑀬𑁆𑀬𑀳𑀺𑀢𑀢𑁆𑀢𑀸. 𑀢𑀡𑁆𑀳𑀸𑀘𑀭𑀺𑀢𑀤𑀺𑀝𑁆𑀞𑀺𑀘𑀭𑀺𑀢𑀲𑀫𑀣𑀬𑀸𑀦𑀺𑀓𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑁂𑀲𑀼 𑀳𑀺 𑀫𑀦𑁆𑀤𑀢𑀺𑀓𑁆𑀔𑀯𑀲𑁂𑀦 𑀤𑁆𑀯𑁂𑀥𑀸 𑀤𑁆𑀯𑁂𑀥𑀸 𑀧𑀯𑀢𑁆𑀢𑁂𑀲𑀼 𑀯𑁂𑀦𑁂𑀬𑁆𑀬𑁂𑀲𑀼 𑀫𑀦𑁆𑀤𑀲𑁆𑀲 𑀢𑀡𑁆𑀳𑀸𑀘𑀭𑀺𑀢𑀲𑁆𑀲 𑀑𑀴𑀸𑀭𑀺𑀓𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄, 𑀢𑀺𑀓𑁆𑀔𑀲𑁆𑀲 𑀲𑀼𑀔𑀼𑀫𑀁 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁. 𑀤𑀺𑀝𑁆𑀞𑀺𑀘𑀭𑀺𑀢𑀲𑁆𑀲𑀧𑀺 𑀫𑀦𑁆𑀤𑀲𑁆𑀲 𑀦𑀸𑀢𑀺𑀧𑁆𑀧𑀪𑁂𑀤𑀕𑀢𑀁 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄, 𑀢𑀺𑀓𑁆𑀔𑀲𑁆𑀲 𑀅𑀢𑀺𑀧𑁆𑀧𑀪𑁂𑀤𑀕𑀢𑀁 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄. 𑀲𑀫𑀣𑀬𑀸𑀦𑀺𑀓𑀲𑁆𑀲 𑀘 𑀫𑀦𑁆𑀤𑀲𑁆𑀲 𑀅𑀓𑀺𑀘𑁆𑀙𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀦𑀺𑀫𑀺𑀢𑁆𑀢𑀁 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄, 𑀢𑀺𑀓𑁆𑀔𑀲𑁆𑀲 𑀑𑀴𑀸𑀭𑀺𑀓𑀸𑀭𑀫𑁆𑀫𑀡𑁂 𑀅𑀲𑀡𑁆𑀞𑀳𑀦𑀢𑁄 𑀤𑀼𑀢𑀺𑀬𑀁. 𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑀲𑁆𑀲𑀧𑀺 𑀫𑀦𑁆𑀤𑀲𑁆𑀲 𑀦𑀸𑀢𑀺𑀧𑁆𑀧𑀪𑁂𑀤𑀕𑀢𑀸𑀭𑀫𑁆𑀫𑀡𑀁 𑀢𑀢𑀺𑀬𑀁, 𑀢𑀺𑀓𑁆𑀔𑀲𑁆𑀲 𑀅𑀢𑀺𑀧𑁆𑀧𑀪𑁂𑀤𑀕𑀢𑀸𑀭𑀫𑁆𑀫𑀡𑀁 𑀘𑀢𑀼𑀢𑁆𑀣𑀁. 𑀇𑀢𑀺 𑀘𑀢𑁆𑀢𑀸𑀭𑁄𑀯 𑀯𑀼𑀢𑁆𑀢𑀸 𑀅𑀦𑀽𑀦𑀸 𑀅𑀦𑀥𑀺𑀓𑀸𑀢𑀺.

𑀲𑀼𑀪𑀲𑀼𑀔𑀦𑀺𑀘𑁆𑀘𑀅𑀢𑁆𑀢𑀪𑀸𑀯𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀢𑁆𑀣𑀁 ¶ 𑀯𑀸. 𑀓𑀸𑀬𑁄 𑀳𑀺 𑀅𑀲𑀼𑀪𑁄, 𑀢𑀢𑁆𑀣 𑀘 𑀲𑀼𑀪𑀯𑀺𑀧𑀮𑁆𑀮𑀸𑀲𑀯𑀺𑀧𑀮𑁆𑀮𑀢𑁆𑀣𑀸 𑀲𑀢𑁆𑀢𑀸. 𑀢𑁂𑀲𑀁 𑀢𑀢𑁆𑀣 𑀅𑀲𑀼𑀪𑀪𑀸𑀯𑀤𑀲𑁆𑀲𑀦𑁂𑀦 𑀢𑀲𑁆𑀲 𑀯𑀺𑀧𑀮𑁆𑀮𑀸𑀲𑀲𑁆𑀲 𑀧𑀳𑀸𑀦𑀢𑁆𑀣𑀁 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁 𑀯𑀼𑀢𑁆𑀢𑀁. 𑀲𑀼𑀔𑀁 𑀦𑀺𑀘𑁆𑀘𑀁 𑀅𑀢𑁆𑀢𑀸𑀢𑀺 𑀕𑀳𑀺𑀢𑁂𑀲𑀼𑀧𑀺 𑀘 𑀯𑁂𑀤𑀦𑀸𑀤𑀻𑀲𑀼 𑀯𑁂𑀤𑀦𑀸 𑀤𑀼𑀓𑁆𑀔𑀸, 𑀘𑀺𑀢𑁆𑀢𑀁 𑀅𑀦𑀺𑀘𑁆𑀘𑀁, 𑀥𑀫𑁆𑀫𑀸 𑀅𑀦𑀢𑁆𑀢𑀸, 𑀢𑁂𑀲𑀼 𑀘 𑀲𑀼𑀔𑀦𑀺𑀘𑁆𑀘𑀅𑀢𑁆𑀢𑀯𑀺𑀧𑀮𑁆𑀮𑀸𑀲𑀯𑀺𑀧𑀮𑁆𑀮𑀢𑁆𑀣𑀸 𑀲𑀢𑁆𑀢𑀸. 𑀢𑁂𑀲𑀁 𑀢𑀢𑁆𑀣 𑀤𑀼𑀓𑁆𑀔𑀸𑀤𑀺𑀪𑀸𑀯𑀤𑀲𑁆𑀲𑀦𑁂𑀦 𑀢𑁂𑀲𑀁 𑀯𑀺𑀧𑀮𑁆𑀮𑀸𑀲𑀸𑀦𑀁 𑀧𑀳𑀸𑀦𑀢𑁆𑀣𑀁 𑀲𑁂𑀲𑀸𑀦𑀺 𑀢𑀻𑀡𑀺 𑀯𑀼𑀢𑁆𑀢𑀸𑀦𑀻𑀢𑀺 𑀏𑀯𑀁 𑀲𑀼𑀪𑀲𑀼𑀔𑀦𑀺𑀘𑁆𑀘𑀅𑀢𑁆𑀢𑀪𑀸𑀯𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀢𑁆𑀣𑀁 𑀯𑀸 𑀘𑀢𑁆𑀢𑀸𑀭𑁄𑀯 𑀯𑀼𑀢𑁆𑀢𑀸 𑀅𑀦𑀽𑀦𑀸 𑀅𑀦𑀥𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀦 𑀓𑁂𑀯𑀮𑀜𑁆𑀘 𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀢𑁆𑀣𑀫𑁂𑀯, 𑀅𑀣 𑀔𑁄 𑀘𑀢𑀼𑀭𑁄𑀖𑀬𑁄𑀕𑀸𑀲𑀯𑀕𑀦𑁆𑀣𑀉𑀧𑀸𑀤𑀸𑀦𑀅𑀕𑀢𑀺𑀧𑀳𑀸𑀦𑀢𑁆𑀣𑀫𑁆𑀧𑀺 𑀘𑀢𑀼𑀩𑁆𑀩𑀺𑀥𑀸𑀳𑀸𑀭𑀧𑀭𑀺𑀜𑁆𑀜𑀢𑁆𑀣𑀜𑁆𑀘 𑀘𑀢𑁆𑀢𑀸𑀭𑁄𑀯 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀢𑀸𑀯 𑀧𑀓𑀭𑀡𑀦𑀬𑁄.

𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑀭𑀡𑀯𑀲𑁂𑀦 𑀘𑁂𑀯 𑀏𑀓𑀢𑁆𑀢𑀲𑀫𑁄𑀲𑀭𑀡𑀯𑀲𑁂𑀦 𑀘 𑀏𑀓𑀫𑁂𑀯 𑀲𑀢𑀺𑀧𑀝𑁆𑀞𑀸𑀦𑀁 𑀆𑀭𑀫𑁆𑀫𑀡𑀯𑀲𑁂𑀦 𑀘𑀢𑁆𑀢𑀸𑀭𑁄𑀢𑀺 𑀏𑀢𑀤𑁂𑀯 𑀯𑀼𑀢𑁆𑀢𑀁. 𑀬𑀣𑀸 ¶ 𑀳𑀺 𑀘𑀢𑀼𑀤𑁆𑀯𑀸𑀭𑁂 𑀦𑀕𑀭𑁂 𑀧𑀸𑀘𑀻𑀦𑀢𑁄 𑀆𑀕𑀘𑁆𑀙𑀦𑁆𑀢𑀸 𑀧𑀸𑀘𑀻𑀦𑀤𑀺𑀲𑀸𑀬 𑀉𑀝𑁆𑀞𑀸𑀦𑀓𑀁 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀦𑀕𑀭𑀫𑁂𑀯 𑀧𑀯𑀺𑀲𑀦𑁆𑀢𑀺, 𑀤𑀓𑁆𑀔𑀺𑀡𑀢𑁄. 𑀧𑀘𑁆𑀙𑀺𑀫𑀢𑁄. 𑀉𑀢𑁆𑀢𑀭𑀢𑁄 𑀆𑀕𑀘𑁆𑀙𑀦𑁆𑀢𑀸 𑀉𑀢𑁆𑀢𑀭𑀤𑀺𑀲𑀸𑀬 𑀉𑀝𑁆𑀞𑀸𑀦𑀓𑀁 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀉𑀢𑁆𑀢𑀭𑀤𑁆𑀯𑀸𑀭𑁂𑀦 𑀦𑀕𑀭𑀫𑁂𑀯 𑀧𑀯𑀺𑀲𑀦𑁆𑀢𑀺; 𑀏𑀯𑀁 𑁋 𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀦𑀕𑀭𑀁 𑀯𑀺𑀬 ¶ 𑀳𑀺 𑀦𑀺𑀩𑁆𑀩𑀸𑀦𑀫𑀳𑀸𑀦𑀕𑀭𑀁, 𑀤𑁆𑀯𑀸𑀭𑀁 𑀯𑀺𑀬 𑀅𑀝𑁆𑀞𑀗𑁆𑀕𑀺𑀓𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄, 𑀧𑀸𑀘𑀻𑀦𑀤𑀺𑀲𑀸𑀤𑀬𑁄 𑀯𑀺𑀬 𑀓𑀸𑀬𑀸𑀤𑀬𑁄.

𑀬𑀣𑀸 𑀧𑀸𑀘𑀻𑀦𑀢𑁄 𑀆𑀕𑀘𑁆𑀙𑀦𑁆𑀢𑀸 𑀧𑀸𑀘𑀻𑀦𑀤𑀺𑀲𑀸𑀬 𑀉𑀝𑁆𑀞𑀸𑀦𑀓𑀁 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀦𑀕𑀭𑀫𑁂𑀯 𑀧𑀯𑀺𑀲𑀦𑁆𑀢𑀺, 𑀏𑀯𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀫𑀼𑀔𑁂𑀦 𑀆𑀕𑀘𑁆𑀙𑀦𑁆𑀢𑀸 𑀘𑀼𑀤𑁆𑀤𑀲𑀯𑀺𑀥𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀢𑁆𑀯𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀪𑀸𑀯𑀦𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀏𑀓𑀁 𑀦𑀺𑀩𑁆𑀩𑀸𑀦𑀫𑁂𑀯 𑀑𑀲𑀭𑀦𑁆𑀢𑀺. 𑀬𑀣𑀸 𑀤𑀓𑁆𑀔𑀺𑀡𑀢𑁄 𑀆𑀕𑀘𑁆𑀙𑀦𑁆𑀢𑀸 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀉𑀝𑁆𑀞𑀸𑀦𑀓𑀁 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀕𑀭𑀫𑁂𑀯 𑀧𑀯𑀺𑀲𑀦𑁆𑀢𑀺, 𑀏𑀯𑀁 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀫𑀼𑀔𑁂𑀦 𑀆𑀕𑀘𑁆𑀙𑀦𑁆𑀢𑀸 𑀦𑀯𑀯𑀺𑀥𑁂𑀦 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀢𑁆𑀯𑀸 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀪𑀸𑀯𑀦𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀏𑀓𑀁 𑀦𑀺𑀩𑁆𑀩𑀸𑀦𑀫𑁂𑀯 𑀑𑀲𑀭𑀦𑁆𑀢𑀺. 𑀬𑀣𑀸 𑀧𑀘𑁆𑀙𑀺𑀫𑀢𑁄 𑀆𑀕𑀘𑁆𑀙𑀦𑁆𑀢𑀸 𑀧𑀘𑁆𑀙𑀺𑀫𑀤𑀺𑀲𑀸𑀬 𑀉𑀝𑁆𑀞𑀸𑀦𑀓𑀁 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀧𑀘𑁆𑀙𑀺𑀫𑀤𑁆𑀯𑀸𑀭𑁂𑀦 𑀦𑀕𑀭𑀫𑁂𑀯 𑀧𑀯𑀺𑀲𑀦𑁆𑀢𑀺, 𑀏𑀯𑀁 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀫𑀼𑀔𑁂𑀦 𑀆𑀕𑀘𑁆𑀙𑀦𑁆𑀢𑀸 𑀲𑁄𑀴𑀲𑀯𑀺𑀥𑁂𑀦 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀢𑁆𑀯𑀸 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀪𑀸𑀯𑀦𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀏𑀓𑀁 𑀦𑀺𑀩𑁆𑀩𑀸𑀦𑀫𑁂𑀯 𑀑𑀲𑀭𑀦𑁆𑀢𑀺. 𑀬𑀣𑀸 𑀉𑀢𑁆𑀢𑀭𑀢𑁄 𑀆𑀕𑀘𑁆𑀙𑀦𑁆𑀢𑀸 𑀉𑀢𑁆𑀢𑀭𑀤𑀺𑀲𑀸𑀬 𑀉𑀝𑁆𑀞𑀸𑀦𑀓𑀁 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀉𑀢𑁆𑀢𑀭𑀤𑁆𑀯𑀸𑀭𑁂𑀦 𑀦𑀕𑀭𑀫𑁂𑀯 𑀧𑀯𑀺𑀲𑀦𑁆𑀢𑀺, 𑀏𑀯𑀁 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀫𑀼𑀔𑁂𑀦 𑀆𑀕𑀘𑁆𑀙𑀦𑁆𑀢𑀸 𑀧𑀜𑁆𑀘𑀯𑀺𑀥𑁂𑀦 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀢𑁆𑀯𑀸 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀪𑀸𑀯𑀦𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀏𑀓𑀁 𑀦𑀺𑀩𑁆𑀩𑀸𑀦𑀫𑁂𑀯 𑀑𑀲𑀭𑀦𑁆𑀢𑀺. 𑀏𑀯𑀁 𑀲𑀭𑀡𑀯𑀲𑁂𑀦 𑀘𑁂𑀯 𑀏𑀓𑀢𑁆𑀢𑀲𑀫𑁄𑀲𑀭𑀡𑀯𑀲𑁂𑀦 𑀘 𑀏𑀓𑀫𑁂𑀯 𑀲𑀢𑀺𑀧𑀝𑁆𑀞𑀸𑀦𑀁 𑀆𑀭𑀫𑁆𑀫𑀡𑀯𑀲𑁂𑀦 𑀘𑀢𑁆𑀢𑀸𑀭𑁄𑀯 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀢𑀫𑁂 ¶ 𑀘𑀢𑁆𑀢𑀸𑀭𑁄𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸 𑀧𑀼𑀘𑁆𑀙𑀸. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀪𑀺𑀓𑁆𑀔𑀯𑁂𑀢𑀺 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀧𑀼𑀕𑁆𑀕𑀮𑀸𑀮𑀧𑀦𑀫𑁂𑀢𑀁. 𑀪𑀺𑀓𑁆𑀔𑀽𑀢𑀺 𑀧𑀝𑀺𑀧𑀢𑁆𑀢𑀺𑀲𑀫𑁆𑀧𑀸𑀤𑀓𑀧𑀼𑀕𑁆𑀕𑀮𑀦𑀺𑀤𑀲𑁆𑀲𑀦𑀫𑁂𑀢𑀁. 𑀅𑀜𑁆𑀜𑁂𑀧𑀺 𑀘 𑀤𑁂𑀯𑀫𑀦𑀼𑀲𑁆𑀲𑀸 𑀧𑀝𑀺𑀧𑀢𑁆𑀢𑀺𑀁 𑀲𑀫𑁆𑀧𑀸𑀤𑁂𑀦𑁆𑀢𑀺𑀬𑁂𑀯, 𑀲𑁂𑀝𑁆𑀞𑀢𑁆𑀢𑀸 𑀧𑀦 𑀧𑀝𑀺𑀧𑀢𑁆𑀢𑀺𑀬𑀸 𑀪𑀺𑀓𑁆𑀔𑀼𑀪𑀸𑀯𑀤𑀲𑁆𑀲𑀦𑀢𑁄 𑀘 ‘‘𑀪𑀺𑀓𑁆𑀔𑀽’’𑀢𑀺 𑀆𑀳. 𑀪𑀕𑀯𑀢𑁄 𑀳𑀺 𑀅𑀦𑀼𑀲𑀸𑀲𑀦𑀺𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁂𑀲𑀼 𑀪𑀺𑀓𑁆𑀔𑀼 𑀲𑁂𑀝𑁆𑀞𑁄, 𑀲𑀩𑁆𑀩𑀧𑁆𑀧𑀓𑀸𑀭𑀸𑀬 𑀅𑀦𑀼𑀲𑀸𑀲𑀦𑀺𑀬𑀸 𑀪𑀸𑀚𑀦𑀪𑀸𑀯𑀢𑁄. 𑀢𑀲𑁆𑀫𑀸 𑀲𑁂𑀝𑁆𑀞𑀢𑁆𑀢𑀸 ‘‘𑀪𑀺𑀓𑁆𑀔𑀽’’𑀢𑀺 ¶ 𑀆𑀳. 𑀢𑀲𑁆𑀫𑀺𑀁 𑀕𑀳𑀺𑀢𑁂 𑀧𑀦 𑀲𑁂𑀲𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺, 𑀭𑀸𑀚𑀕𑀫𑀦𑀸𑀤𑀻𑀲𑀼 𑀭𑀸𑀚𑀕𑁆𑀕𑀳𑀡𑁂𑀦 𑀲𑁂𑀲𑀧𑀭𑀺𑀲𑀸 𑀯𑀺𑀬. 𑀬𑁄 𑀘 𑀇𑀫𑀁 𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀚𑁆𑀚𑀢𑀺, 𑀲𑁄 𑀪𑀺𑀓𑁆𑀔𑀼 𑀦𑀸𑀫 𑀳𑁄𑀢𑀻𑀢𑀺 𑀧𑀝𑀺𑀧𑀢𑁆𑀢𑀺𑀬𑀸 𑀪𑀺𑀓𑁆𑀔𑀼𑀪𑀸𑀯𑀤𑀲𑁆𑀲𑀦𑀢𑁄𑀧𑀺 ‘‘𑀪𑀺𑀓𑁆𑀔𑀽’’𑀢𑀺 𑀆𑀳. 𑀧𑀝𑀺𑀧𑀦𑁆𑀦𑀓𑁄 𑀳𑀺 𑀤𑁂𑀯𑁄 𑀯𑀸 𑀳𑁄𑀢𑀼 𑀫𑀦𑀼𑀲𑁆𑀲𑁄 𑀯𑀸, 𑀪𑀺𑀓𑁆𑀔𑀽𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺𑀬𑁂𑀯 𑀬𑀣𑀸𑀳 𑁋

‘‘𑀅𑀮𑀗𑁆𑀓𑀢𑁄 ¶ 𑀘𑁂𑀧𑀺 𑀲𑀫𑀁 𑀘𑀭𑁂𑀬𑁆𑀬,

𑀲𑀦𑁆𑀢𑁄 𑀤𑀦𑁆𑀢𑁄 𑀦𑀺𑀬𑀢𑁄 𑀩𑁆𑀭𑀳𑁆𑀫𑀘𑀸𑀭𑀻;

𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁,

𑀲𑁄 𑀩𑁆𑀭𑀸𑀳𑁆𑀫𑀡𑁄 𑀲𑁄 𑀲𑀫𑀡𑁄 𑀲 𑀪𑀺𑀓𑁆𑀔𑀽’’𑀢𑀺. (𑀥. 𑀧. 𑁧𑁪𑁨);

𑀓𑀸𑀬𑁂𑀢𑀺 𑀭𑀽𑀧𑀓𑀸𑀬𑁂. 𑀭𑀽𑀧𑀓𑀸𑀬𑁄 𑀳𑀺 𑀇𑀥 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀓𑁂𑀲𑀸𑀤𑀻𑀦𑀜𑁆𑀘 𑀥𑀫𑁆𑀫𑀸𑀦𑀁 𑀲𑀫𑀽𑀳𑀝𑁆𑀞𑁂𑀦 𑀳𑀢𑁆𑀣𑀺𑀓𑀸𑀬𑀭𑀣𑀓𑀸𑀬𑀸𑀤𑀬𑁄 𑀯𑀺𑀬 𑀓𑀸𑀬𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀬𑀣𑀸 𑀘 𑀲𑀫𑀽𑀳𑀝𑁆𑀞𑁂𑀦, 𑀏𑀯𑀁 𑀓𑀼𑀘𑁆𑀙𑀺𑀢𑀸𑀦𑀁 𑀆𑀬𑀝𑁆𑀞𑁂𑀦. 𑀓𑀼𑀘𑁆𑀙𑀺𑀢𑀸𑀦𑀜𑁆𑀳𑀺 𑀧𑀭𑀫𑀚𑁂𑀕𑀼𑀘𑁆𑀙𑀸𑀦𑀁 𑀲𑁄 𑀆𑀬𑁄𑀢𑀺𑀧𑀺 𑀓𑀸𑀬𑁄. 𑀆𑀬𑁄𑀢𑀺 𑀉𑀧𑁆𑀧𑀢𑁆𑀢𑀺𑀤𑁂𑀲𑁄. 𑀢𑀢𑁆𑀣𑀸𑀬𑀁 𑀯𑀘𑀦𑀢𑁆𑀣𑁄. 𑀆𑀬𑀦𑁆𑀢𑀺 𑀢𑀢𑁄𑀢𑀺 𑀆𑀬𑁄. 𑀓𑁂 𑀆𑀬𑀦𑁆𑀢𑀺? 𑀓𑀼𑀘𑁆𑀙𑀺𑀢𑀸 𑀓𑁂𑀲𑀸𑀤𑀬𑁄. 𑀇𑀢𑀺 𑀓𑀼𑀘𑁆𑀙𑀺𑀢𑀸𑀦𑀁 𑀆𑀬𑁄𑀢𑀺 𑀓𑀸𑀬𑁄.

𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺 𑀓𑀸𑀬𑁂 𑀅𑀦𑀼𑀧𑀲𑁆𑀲𑀦𑀲𑀻𑀮𑁄 𑀓𑀸𑀬𑀁 𑀯𑀸 𑀅𑀦𑀼𑀧𑀲𑁆𑀲𑀫𑀸𑀦𑁄. 𑀓𑀸𑀬𑁂𑀢𑀺 𑀘 𑀯𑀢𑁆𑀯𑀸𑀧𑀺 𑀧𑀼𑀦 𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺 𑀤𑀼𑀢𑀺𑀬𑀓𑀸𑀬𑀕𑁆𑀕𑀳𑀡𑀁 𑀅𑀲𑀫𑁆𑀫𑀺𑀲𑁆𑀲𑀢𑁄 𑀯𑀯𑀢𑁆𑀣𑀸𑀦𑀖𑀦𑀯𑀺𑀦𑀺𑀩𑁆𑀪𑁄𑀕𑀸𑀤𑀺𑀤𑀲𑁆𑀲𑀦𑀢𑁆𑀣𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦 𑀦 𑀓𑀸𑀬𑁂 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀸, 𑀘𑀺𑀢𑁆𑀢𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸, 𑀅𑀣 𑀔𑁄 𑀓𑀸𑀬𑀸𑀦𑀼𑀧𑀲𑁆𑀲𑀻𑀬𑁂𑀯𑀸𑀢𑀺 𑀓𑀸𑀬𑀲𑀗𑁆𑀔𑀸𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀓𑀸𑀭𑀲𑁆𑀲𑁂𑀯 𑀤𑀲𑁆𑀲𑀦𑁂𑀦 𑀅𑀲𑀫𑁆𑀫𑀺𑀲𑁆𑀲𑀢𑁄 𑀯𑀯𑀢𑁆𑀣𑀸𑀦𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑀣𑀸 𑀦 𑀓𑀸𑀬𑁂 𑀅𑀗𑁆𑀕𑀧𑀘𑁆𑀘𑀗𑁆𑀕𑀯𑀺𑀦𑀺𑀫𑀼𑀢𑁆𑀢𑀏𑀓𑀥𑀫𑁆𑀫𑀸𑀦𑀼𑀧𑀲𑁆𑀲𑀻, 𑀦𑀸𑀧𑀺 𑀓𑁂𑀲𑀮𑁄𑀫𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀼𑀧𑀲𑁆𑀲𑀻, 𑀬𑁄𑀧𑀺 𑀘𑁂𑀢𑁆𑀣 𑀓𑁂𑀲𑀮𑁄𑀫𑀸𑀤𑀺𑀓𑁄 𑀪𑀽𑀢𑀼𑀧𑀸𑀤𑀸𑀬𑀲𑀫𑀽𑀳𑀲𑀗𑁆𑀔𑀸𑀢𑁄 𑀓𑀸𑀬𑁄, 𑀢𑀢𑁆𑀣𑀧𑀺 𑀦 𑀪𑀽𑀢𑀼𑀧𑀸𑀤𑀸𑀬𑀯𑀺𑀦𑀺𑀫𑀼𑀢𑁆𑀢𑀏𑀓𑀥𑀫𑁆𑀫𑀸𑀦𑀼𑀧𑀲𑁆𑀲𑀻, 𑀅𑀣 𑀔𑁄 𑀭𑀣𑀲𑀫𑁆𑀪𑀸𑀭𑀸𑀦𑀼𑀧𑀲𑁆𑀲𑀓𑁄 𑀯𑀺𑀬 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀫𑀽𑀳𑀸𑀦𑀼𑀧𑀲𑁆𑀲𑀻, 𑀦𑀕𑀭𑀸𑀯𑀬𑀯𑀸𑀦𑀼𑀧𑀲𑁆𑀲𑀓𑁄 𑀯𑀺𑀬 𑀓𑁂𑀲𑀮𑁄𑀫𑀸𑀤𑀺𑀲𑀫𑀽𑀳𑀸𑀦𑀼𑀧𑀲𑁆𑀲𑀻, 𑀓𑀤𑀮𑀺𑀓𑁆𑀔𑀦𑁆𑀥𑀧𑀢𑁆𑀢𑀯𑀝𑁆𑀝𑀺𑀯𑀺𑀦𑀺𑀩𑁆𑀪𑀼𑀚𑀓𑁄 𑀯𑀺𑀬 𑀭𑀺𑀢𑁆𑀢𑀫𑀼𑀝𑁆𑀞𑀺𑀯𑀺𑀦𑀺𑀯𑁂𑀞𑀓𑁄 𑀯𑀺𑀬 𑀘 𑀪𑀽𑀢𑀼𑀧𑀸𑀤𑀸𑀬𑀲𑀫𑀽𑀳𑀸𑀦𑀼𑀧𑀲𑁆𑀲𑀻𑀬𑁂𑀯𑀸𑀢𑀺 𑀦𑀸𑀦𑀧𑁆𑀧𑀓𑀸𑀭𑀢𑁄 𑀲𑀫𑀽𑀳𑀯𑀲𑁂𑀦𑁂𑀯 𑀓𑀸𑀬𑀲𑀗𑁆𑀔𑀸𑀢𑀲𑁆𑀲 𑀯𑀢𑁆𑀣𑀼𑀦𑁄 𑀤𑀲𑁆𑀲𑀦𑁂𑀦 𑀖𑀦𑀯𑀺𑀦𑀺𑀩𑁆𑀪𑁄𑀕𑁄 ¶ 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀦 𑀳𑁂𑀢𑁆𑀣 ¶ 𑀬𑀣𑀸𑀯𑀼𑀢𑁆𑀢𑀲𑀫𑀽𑀳𑀯𑀺𑀦𑀺𑀫𑀼𑀢𑁆𑀢𑁄 𑀓𑀸𑀬𑁄 𑀯𑀸 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀥𑀫𑁆𑀫𑁄 𑀤𑀺𑀲𑁆𑀲𑀢𑀺, 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀲𑀫𑀽𑀳𑀫𑀢𑁆𑀢𑁂𑀬𑁂𑀯 𑀧𑀦 𑀢𑀣𑀸 𑀢𑀣𑀸 𑀲𑀢𑁆𑀢𑀸 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀁 𑀓𑀭𑁄𑀦𑁆𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀬𑀁 𑀧𑀲𑁆𑀲𑀢𑀺 𑀦 𑀢𑀁 𑀤𑀺𑀝𑁆𑀞𑀁, 𑀬𑀁 𑀤𑀺𑀝𑁆𑀞𑀁 𑀢𑀁 𑀦 𑀧𑀲𑁆𑀲𑀢𑀺;

𑀅𑀧𑀲𑁆𑀲𑀁 𑀩𑀚𑁆𑀛𑀢𑁂 𑀫𑀽𑀴𑁆𑀳𑁄, 𑀩𑀚𑁆𑀛𑀫𑀸𑀦𑁄 𑀦 𑀫𑀼𑀘𑁆𑀘𑀢𑀻’’𑀢𑀺.

𑀖𑀦𑀯𑀺𑀦𑀺𑀩𑁆𑀪𑁄𑀕𑀸𑀤𑀺𑀤𑀲𑁆𑀲𑀦𑀢𑁆𑀣𑀦𑁆𑀢𑀺 ¶ 𑀯𑀼𑀢𑁆𑀢𑀁, 𑀆𑀤𑀺𑀲𑀤𑁆𑀤𑁂𑀦 𑀘𑁂𑀢𑁆𑀣 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀜𑁆𑀳𑀺 𑀏𑀢𑀲𑁆𑀫𑀺𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻𑀬𑁂𑀯, 𑀦 𑀅𑀜𑁆𑀜 𑀥𑀫𑁆𑀫𑀸𑀦𑀼𑀧𑀲𑁆𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸 𑀅𑀦𑀼𑀤𑀓𑀪𑀽𑀢𑀸𑀬𑀧𑀺 𑀫𑀭𑀻𑀘𑀺𑀬𑀸 𑀉𑀤𑀓𑀸𑀦𑀼𑀧𑀲𑁆𑀲𑀺𑀦𑁄 𑀳𑁄𑀦𑁆𑀢𑀺, 𑀦 𑀏𑀯𑀁 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀅𑀲𑀼𑀪𑀪𑀽𑀢𑁂𑀬𑁂𑀯 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀦𑀺𑀘𑁆𑀘𑀲𑀼𑀔𑀅𑀢𑁆𑀢𑀲𑀼𑀪𑀪𑀸𑀯𑀸𑀦𑀼𑀧𑀲𑁆𑀲𑀻, 𑀅𑀣 𑀔𑁄 𑀓𑀸𑀬𑀸𑀦𑀼𑀧𑀲𑁆𑀲𑀻 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀅𑀲𑀼𑀪𑀸𑀓𑀸𑀭𑀲𑀫𑀽𑀳𑀸𑀦𑀼𑀧𑀲𑁆𑀲𑀻𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀬𑁆𑀯𑀸𑀬𑀁 𑀧𑀭𑀢𑁄 ‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀜𑁆𑀜𑀕𑀢𑁄 𑀯𑀸…𑀧𑁂… 𑀲𑁄 𑀲𑀢𑁄𑀯 𑀅𑀲𑁆𑀲𑀲𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀤𑀺𑀘𑀼𑀡𑁆𑀡𑀺𑀓𑀚𑀸𑀢𑀅𑀝𑁆𑀞𑀺𑀓𑀧𑀭𑀺𑀬𑁄𑀲𑀸𑀦𑁄 𑀓𑀸𑀬𑁄 𑀯𑀼𑀢𑁆𑀢𑁄, 𑀬𑁄 𑀘 ‘‘𑀇𑀥𑁂𑀓𑀘𑁆𑀘𑁄 𑀧𑀣𑀯𑀻𑀓𑀸𑀬𑀁 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀆𑀧𑁄𑀓𑀸𑀬𑀁 𑀢𑁂𑀚𑁄𑀓𑀸𑀬𑀁 𑀯𑀸𑀬𑁄𑀓𑀸𑀬𑀁 𑀓𑁂𑀲𑀓𑀸𑀬𑀁 𑀮𑁄𑀫𑀓𑀸𑀬𑀁 𑀙𑀯𑀺𑀓𑀸𑀬𑀁 𑀘𑀫𑁆𑀫𑀓𑀸𑀬𑀁 𑀫𑀁𑀲𑀓𑀸𑀬𑀁 𑀭𑀼𑀥𑀺𑀭𑀓𑀸𑀬𑀁 𑀦𑁆𑀳𑀸𑀭𑀼𑀓𑀸𑀬𑀁 𑀅𑀝𑁆𑀞𑀺𑀓𑀸𑀬𑀁 𑀅𑀝𑁆𑀞𑀺𑀫𑀺𑀜𑁆𑀚𑀓𑀸𑀬’’𑀦𑁆𑀢𑀺 (𑀧𑀝𑀺. 𑀫. 𑁩.𑁩𑁫) 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀓𑀸𑀬𑁄 𑀯𑀼𑀢𑁆𑀢𑁄, 𑀢𑀲𑁆𑀲 𑀲𑀩𑁆𑀩𑀲𑁆𑀲 𑀇𑀫𑀲𑁆𑀫𑀺𑀜𑁆𑀜𑁂𑀯 𑀓𑀸𑀬𑁂 𑀅𑀦𑀼𑀧𑀲𑁆𑀲𑀦𑀢𑁄 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺 𑀏𑀯𑀫𑁆𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀣 𑀯𑀸 𑀓𑀸𑀬𑁂 𑀅𑀳𑀦𑁆𑀢𑀺 𑀯𑀸 𑀫𑀫𑀦𑁆𑀢𑀺 𑀯𑀸 𑀏𑀯𑀁 𑀕𑀳𑁂𑀢𑀩𑁆𑀩𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀦𑀦𑀼𑀧𑀲𑁆𑀲𑀦𑀢𑁄, 𑀢𑀲𑁆𑀲 𑀢𑀲𑁆𑀲𑁂𑀯 𑀧𑀦 𑀓𑁂𑀲𑀮𑁄𑀫𑀸𑀤𑀺𑀓𑀲𑁆𑀲 𑀦𑀸𑀦𑀸𑀥𑀫𑁆𑀫𑀲𑀫𑀽𑀳𑀲𑁆𑀲 𑀅𑀦𑀼𑀧𑀲𑁆𑀲𑀦𑀢𑁄 𑀓𑀸𑀬𑁂 𑀓𑁂𑀲𑀸𑀤𑀺𑀥𑀫𑁆𑀫𑀲𑀫𑀽𑀳𑀲𑀗𑁆𑀔𑀸𑀢𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀧𑀺𑀘 ‘‘𑀇𑀫𑀲𑁆𑀫𑀺𑀁 𑀓𑀸𑀬𑁂 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀦𑀺𑀘𑁆𑀘𑀢𑁄’’𑀢𑀺𑀆𑀤𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀆𑀕𑀢𑀦𑀬𑀲𑁆𑀲 𑀲𑀩𑁆𑀩𑀲𑁆𑀲𑁂𑀯 𑀅𑀦𑀺𑀘𑁆𑀘𑀮𑀓𑁆𑀔𑀡𑀸𑀤𑀺𑀦𑁄 𑀆𑀓𑀸𑀭𑀲𑀫𑀽𑀳𑀲𑀗𑁆𑀔𑀸𑀢𑀲𑁆𑀲 𑀓𑀸𑀬𑀲𑁆𑀲 𑀅𑀦𑀼𑀧𑀲𑁆𑀲𑀦𑀢𑁄𑀧𑀺 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺 𑀏𑀯𑀫𑁆𑀧𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 ¶ 𑀳𑀺 𑀅𑀬𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀪𑀺𑀓𑁆𑀔𑀼 𑀇𑀫𑀁 𑀓𑀸𑀬𑀁 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀦𑀁 𑀲𑀢𑁆𑀢𑀦𑁆𑀦𑀁 𑀅𑀦𑀼𑀧𑀲𑁆𑀲𑀦𑀸𑀦𑀁 𑀯𑀲𑁂𑀦 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀦𑀺𑀘𑁆𑀘𑀢𑁄. 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀲𑀼𑀔𑀢𑁄. 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀅𑀢𑁆𑀢𑀢𑁄. 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑁄 𑀦𑀦𑁆𑀤𑀢𑀺, 𑀯𑀺𑀭𑀚𑁆𑀚𑀢𑀺, 𑀦𑁄 𑀭𑀚𑁆𑀚𑀢𑀺, 𑀦𑀺𑀭𑁄𑀥𑁂𑀢𑀺. 𑀦𑁄 𑀲𑀫𑀼𑀤𑁂𑀢𑀺, 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀦𑁄 𑀆𑀤𑀺𑀬𑀢𑀺. 𑀲𑁄 𑀢𑀁 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀺 ¶ , 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀲𑀼𑀔𑀲𑀜𑁆𑀜𑀁 𑀧𑀚𑀳𑀢𑀺, 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀅𑀢𑁆𑀢𑀲𑀜𑁆𑀜𑀁 𑀧𑀚𑀳𑀢𑀺, 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀦𑀦𑁆𑀤𑀺𑀁 𑀧𑀚𑀳𑀢𑀺 ¶ , 𑀯𑀺𑀭𑀚𑁆𑀚𑀦𑁆𑀢𑁄 𑀭𑀸𑀕𑀁 𑀧𑀚𑀳𑀢𑀺, 𑀦𑀺𑀭𑁄𑀥𑁂𑀦𑁆𑀢𑁄 𑀲𑀫𑀼𑀤𑀬𑀁 𑀧𑀚𑀳𑀢𑀺, 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀆𑀤𑀸𑀦𑀁 𑀧𑀚𑀳𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀳𑀭𑀢𑀻𑀢𑀺 𑀇𑀭𑀺𑀬𑀢𑀺. 𑀆𑀢𑀸𑀧𑀻𑀢𑀺 𑀢𑀻𑀲𑀼 𑀪𑀯𑁂𑀲𑀼 𑀓𑀺𑀮𑁂𑀲𑁂 𑀆𑀢𑀸𑀧𑁂𑀢𑀻𑀢𑀺 𑀆𑀢𑀸𑀧𑁄, 𑀯𑀻𑀭𑀺𑀬𑀲𑁆𑀲𑁂𑀢𑀁 𑀦𑀸𑀫𑀁. 𑀆𑀢𑀸𑀧𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀆𑀢𑀸𑀧𑀻. 𑀲𑀫𑁆𑀧𑀚𑀸𑀦𑁄𑀢𑀺 𑀲𑀫𑁆𑀧𑀚𑀜𑁆𑀜𑀲𑀗𑁆𑀔𑀸𑀢𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑀢𑀺𑀫𑀸𑀢𑀺 𑀓𑀸𑀬𑀧𑀭𑀺𑀕𑁆𑀕𑀸𑀳𑀺𑀓𑀸𑀬 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀅𑀬𑀁 𑀧𑀦 𑀬𑀲𑁆𑀫𑀸 𑀲𑀢𑀺𑀬𑀸 𑀆𑀭𑀫𑁆𑀫𑀡𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀜𑁆𑀜𑀸𑀬 𑀅𑀦𑀼𑀧𑀲𑁆𑀲𑀢𑀺, 𑀦 𑀳𑀺 𑀲𑀢𑀺𑀯𑀺𑀭𑀳𑀺𑀢𑀲𑁆𑀲 𑀅𑀦𑀼𑀧𑀲𑁆𑀲𑀦𑀸 𑀦𑀸𑀫 𑀅𑀢𑁆𑀣𑀺, 𑀢𑁂𑀦𑁂𑀯𑀸𑀳 𑁋 ‘‘𑀲𑀢𑀺𑀜𑁆𑀘 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀢𑁆𑀣𑀺𑀓𑀁 𑀯𑀤𑀸𑀫𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁪). 𑀢𑀲𑁆𑀫𑀸 𑀏𑀢𑁆𑀣 ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻’’𑀢𑀺 𑀏𑀢𑁆𑀢𑀸𑀯𑀢𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀬𑀲𑁆𑀫𑀸 𑀅𑀦𑀸𑀢𑀸𑀧𑀺𑀦𑁄 𑀅𑀦𑁆𑀢𑁄𑀲𑀗𑁆𑀔𑁂𑀧𑁄 𑀅𑀦𑁆𑀢𑀭𑀸𑀬𑀓𑀭𑁄 𑀳𑁄𑀢𑀺, 𑀅𑀲𑀫𑁆𑀧𑀚𑀸𑀦𑁄 𑀉𑀧𑀸𑀬𑀧𑀭𑀺𑀕𑁆𑀕𑀳𑁂 𑀅𑀦𑀼𑀧𑀸𑀬𑀧𑀭𑀺𑀯𑀚𑁆𑀚𑀦𑁂 𑀘 𑀲𑀫𑁆𑀫𑀼𑀬𑁆𑀳𑀢𑀺, 𑀫𑀼𑀝𑁆𑀞𑀲𑁆𑀲𑀢𑀺 𑀉𑀧𑀸𑀬𑀸𑀧𑀭𑀺𑀘𑁆𑀘𑀸𑀕𑁂 𑀅𑀦𑀼𑀧𑀸𑀬𑀸𑀧𑀭𑀺𑀕𑁆𑀕𑀳𑁂 𑀘 𑀅𑀲𑀫𑀢𑁆𑀣𑁄 𑀳𑁄𑀢𑀺, 𑀢𑁂𑀦𑀲𑁆𑀲 𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀲𑀫𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀆𑀦𑀼𑀪𑀸𑀯𑁂𑀦 𑀢𑀁 𑀲𑀫𑁆𑀧𑀚𑁆𑀚𑀢𑀺, 𑀢𑁂𑀲𑀁 𑀤𑀲𑁆𑀲𑀦𑀢𑁆𑀣𑀁 ‘‘𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸’’𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀲𑀫𑁆𑀧𑀬𑁄𑀕𑀗𑁆𑀕𑀜𑁆𑀘𑀲𑁆𑀲 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀳𑀸𑀦𑀗𑁆𑀕𑀁 𑀤𑀲𑁆𑀲𑁂𑀢𑀼𑀁 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀺𑀦𑁂𑀬𑁆𑀬𑀸𑀢𑀺 𑀢𑀤𑀗𑁆𑀕𑀯𑀺𑀦𑀬𑁂𑀦 𑀯𑀸 𑀯𑀺𑀓𑁆𑀔𑀫𑁆𑀪𑀦𑀯𑀺𑀦𑀬𑁂𑀦 𑀯𑀸 𑀯𑀺𑀦𑀬𑀺𑀢𑁆𑀯𑀸. 𑀮𑁄𑀓𑁂𑀢𑀺 𑀢𑀲𑁆𑀫𑀺𑀜𑁆𑀜𑁂𑀯 𑀓𑀸𑀬𑁂. 𑀓𑀸𑀬𑁄 𑀳𑀺 𑀇𑀥 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀬𑀲𑁆𑀫𑀸 𑀧𑀦𑀲𑁆𑀲 𑀦 𑀓𑀸𑀬𑀫𑀢𑁆𑀢𑁂𑀬𑁂𑀯 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁 𑀧𑀳𑀻𑀬𑀢𑀺, 𑀯𑁂𑀤𑀦𑀸𑀤𑀻𑀲𑀼𑀧𑀺 𑀧𑀳𑀻𑀬𑀢𑀺𑀬𑁂𑀯. 𑀢𑀲𑁆𑀫𑀸 𑀧𑀜𑁆𑀘𑀧𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀮𑁄𑀓𑁄𑀢𑀺 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀁. 𑀮𑁄𑀓𑀲𑀗𑁆𑀔𑀸𑀢𑀢𑁆𑀢𑀸 ¶ 𑀯𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀼𑀤𑁆𑀥𑀸𑀭𑀦𑀬𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀬𑀁 𑀧𑀦𑀸𑀳 𑁋 ‘‘𑀢𑀢𑁆𑀣 𑀓𑀢𑀫𑁄 𑀮𑁄𑀓𑁄? 𑀲𑁆𑀯𑁂𑀯 𑀓𑀸𑀬𑁄 𑀮𑁄𑀓𑁄’’𑀢𑀺, 𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄. 𑀢𑀲𑁆𑀫𑀺𑀁 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁 𑀯𑀺𑀦𑁂𑀬𑁆𑀬𑀸𑀢𑀺 𑀏𑀯𑀁 𑀲𑀫𑁆𑀩𑀦𑁆𑀥𑁄 𑀤𑀝𑁆𑀞𑀩𑁆𑀩𑁄. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀅𑀪𑀺𑀚𑁆𑀛𑀸𑀕𑁆𑀕𑀳𑀡𑁂𑀦 𑀓𑀸𑀫𑀘𑁆𑀙𑀦𑁆𑀤𑁄, 𑀤𑁄𑀫𑀦𑀲𑁆𑀲𑀕𑁆𑀕𑀳𑀡𑁂𑀦 𑀩𑁆𑀬𑀸𑀧𑀸𑀤𑁄 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀦𑀻𑀯𑀭𑀡𑀧𑀭𑀺𑀬𑀸𑀧𑀦𑁆𑀦𑀩𑀮𑀯𑀥𑀫𑁆𑀫𑀤𑁆𑀯𑀬𑀤𑀲𑁆𑀲𑀦𑁂𑀦 𑀦𑀻𑀯𑀭𑀡𑀧𑁆𑀧𑀳𑀸𑀦𑀁 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀲𑁂𑀲𑁂𑀦 ¶ 𑀘𑁂𑀢𑁆𑀣 𑀅𑀪𑀺𑀚𑁆𑀛𑀸𑀯𑀺𑀦𑀬𑁂𑀦 𑀓𑀸𑀬𑀲𑀫𑁆𑀧𑀢𑁆𑀢𑀺𑀫𑀽𑀮𑀓𑀲𑁆𑀲 𑀅𑀦𑀼𑀭𑁄𑀥𑀲𑁆𑀲, 𑀤𑁄𑀫𑀦𑀲𑁆𑀲𑀯𑀺𑀦𑀬𑁂𑀦 𑀓𑀸𑀬𑀯𑀺𑀧𑀢𑁆𑀢𑀺𑀫𑀽𑀮𑀓𑀲𑁆𑀲 𑀯𑀺𑀭𑁄𑀥𑀲𑁆𑀲, 𑀅𑀪𑀺𑀚𑁆𑀛𑀸𑀯𑀺𑀦𑀬𑁂𑀦 𑀘 𑀓𑀸𑀬𑁂 𑀅𑀪𑀺𑀭𑀢𑀺𑀬𑀸, 𑀤𑁄𑀫𑀦𑀲𑁆𑀲𑀯𑀺𑀦𑀬𑁂𑀦 𑀓𑀸𑀬𑀪𑀸𑀯𑀦𑀸𑀬 𑀅𑀦𑀪𑀺𑀭𑀢𑀺𑀬𑀸, 𑀅𑀪𑀺𑀚𑁆𑀛𑀸𑀯𑀺𑀦𑀬𑁂𑀦 𑀓𑀸𑀬𑁂 𑀅𑀪𑀽𑀢𑀸𑀦𑀁 𑀲𑀼𑀪𑀲𑀼𑀔𑀪𑀸𑀯𑀸𑀤𑀻𑀦𑀁 𑀧𑀓𑁆𑀔𑁂𑀧𑀲𑁆𑀲, 𑀤𑁄𑀫𑀦𑀲𑁆𑀲𑀯𑀺𑀦𑀬𑁂𑀦 ¶ 𑀓𑀸𑀬𑁂 𑀪𑀽𑀢𑀸𑀦𑀁 𑀅𑀲𑀼𑀪𑀸𑀲𑀼𑀔𑀪𑀸𑀯𑀸𑀤𑀻𑀦𑀁 𑀅𑀧𑀦𑀬𑀦𑀲𑁆𑀲 𑀘 𑀧𑀳𑀸𑀦𑀁 𑀯𑀼𑀢𑁆𑀢𑀁. 𑀢𑁂𑀦 𑀬𑁄𑀕𑀸𑀯𑀘𑀭𑀲𑁆𑀲 𑀬𑁄𑀕𑀸𑀦𑀼𑀪𑀸𑀯𑁄 𑀬𑁄𑀕𑀲𑀫𑀢𑁆𑀣𑀢𑀸 𑀘 𑀤𑀻𑀧𑀺𑀢𑀸 𑀳𑁄𑀢𑀺. 𑀬𑁄𑀕𑀸𑀦𑀼𑀪𑀸𑀯𑁄 𑀳𑀺 𑀏𑀲, 𑀬𑀤𑀺𑀤𑀁 𑀅𑀦𑀼𑀭𑁄𑀥𑀯𑀺𑀭𑁄𑀥𑀯𑀺𑀧𑁆𑀧𑀫𑀼𑀢𑁆𑀢𑁄 𑀅𑀭𑀢𑀺𑀭𑀢𑀺𑀲𑀳𑁄 𑀅𑀪𑀽𑀢𑀧𑀓𑁆𑀔𑁂𑀧𑀪𑀽𑀢𑀸𑀧𑀦𑀬𑀦𑀯𑀺𑀭𑀳𑀺𑀢𑁄 𑀘 𑀳𑁄𑀢𑀺. 𑀅𑀦𑀼𑀭𑁄𑀥𑀯𑀺𑀭𑁄𑀥𑀯𑀺𑀧𑁆𑀧𑀫𑀼𑀢𑁆𑀢𑁄 𑀘𑁂𑀲 𑀅𑀭𑀢𑀺𑀭𑀢𑀺𑀲𑀳𑁄 𑀅𑀪𑀽𑀢𑀁 𑀅𑀧𑀓𑁆𑀔𑀺𑀧𑀦𑁆𑀢𑁄 𑀪𑀽𑀢𑀜𑁆𑀘 𑀅𑀦𑀧𑀦𑀬𑀦𑁆𑀢𑁄 𑀬𑁄𑀕𑀲𑀫𑀢𑁆𑀣𑁄 𑀳𑁄𑀢𑀻𑀢𑀺.

𑀅𑀧𑀭𑁄 𑀦𑀬𑁄 ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻’’𑀢𑀺 𑀏𑀢𑁆𑀣 𑀅𑀦𑀼𑀧𑀲𑁆𑀲𑀦𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀯𑀼𑀢𑁆𑀢𑀁. ‘‘𑀯𑀺𑀳𑀭𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀯𑀺𑀳𑀸𑀭𑁂𑀦 𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲 𑀓𑀸𑀬𑀧𑀭𑀺𑀳𑀭𑀡𑀁, ‘‘𑀆𑀢𑀸𑀧𑀻’’𑀢𑀺𑀆𑀤𑀻𑀲𑀼 𑀧𑀦 𑀆𑀢𑀸𑀧𑁂𑀦 𑀲𑀫𑁆𑀫𑀧𑁆𑀧𑀥𑀸𑀦𑀁, 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀩𑁆𑀩𑀢𑁆𑀣𑀓𑀓𑀫𑁆𑀫𑀝𑁆𑀞𑀸𑀦𑀁, 𑀓𑀫𑁆𑀫𑀝𑁆𑀞𑀸𑀦𑀧𑀭𑀺𑀳𑀭𑀡𑀽𑀧𑀸𑀬𑁄 𑀯𑀸. 𑀲𑀢𑀺𑀬𑀸 𑀯𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀧𑀝𑀺𑀮𑀤𑁆𑀥𑀲𑀫𑀣𑁄, 𑀲𑀫𑁆𑀧𑀚𑀜𑁆𑀜𑁂𑀦 𑀯𑀺𑀧𑀲𑁆𑀲𑀦𑀸 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀯𑀺𑀦𑀬𑁂𑀦 𑀪𑀸𑀯𑀦𑀸𑀩𑀮𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀪𑀗𑁆𑀕𑁂 𑀧𑀦 𑀅𑀦𑀼𑀧𑀲𑁆𑀲𑀻𑀢𑀺 𑀢𑀢𑁆𑀣 ‘‘𑀓𑀢𑀫𑀸 𑀅𑀦𑀼𑀧𑀲𑁆𑀲𑀦𑀸? 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸 𑀯𑀺𑀘𑀬𑁄 𑀧𑀯𑀺𑀘𑀬𑁄 𑀥𑀫𑁆𑀫𑀯𑀺𑀘𑀬𑁄 𑀲𑀮𑁆𑀮𑀓𑁆𑀔𑀡𑀸 𑀉𑀧𑀮𑀓𑁆𑀔𑀡𑀸 𑀧𑀘𑁆𑀘𑀼𑀧𑀮𑀓𑁆𑀔𑀡𑀸 𑀧𑀡𑁆𑀟𑀺𑀘𑁆𑀘𑀁 𑀓𑁄𑀲𑀮𑁆𑀮𑀁 𑀦𑁂𑀧𑀼𑀜𑁆𑀜𑀁 𑀯𑁂𑀪𑀩𑁆𑀬𑀸 𑀘𑀺𑀦𑁆𑀢𑀸 𑀉𑀧𑀧𑀭𑀺𑀓𑁆𑀔𑀸 𑀪𑀽𑀭𑀻𑀫𑁂𑀥𑀸 𑀧𑀭𑀺𑀡𑀸𑀬𑀺𑀓𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀧𑀚𑀜𑁆𑀜𑀁 𑀧𑀢𑁄𑀤𑁄 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁 𑀧𑀜𑁆𑀜𑀸𑀲𑀢𑁆𑀣𑀁 𑀧𑀜𑁆𑀜𑀸𑀧𑀸𑀲𑀸𑀤𑁄 𑀧𑀜𑁆𑀜𑀸𑀆𑀮𑁄𑀓𑁄 𑀧𑀜𑁆𑀜𑀸𑀑𑀪𑀸𑀲𑁄 𑀧𑀜𑁆𑀜𑀸𑀧𑀚𑁆𑀚𑁄𑀢𑁄 𑀧𑀜𑁆𑀜𑀸𑀭𑀢𑀦𑀁 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀦𑀼𑀧𑀲𑁆𑀲𑀦𑀸. 𑀇𑀫𑀸𑀬 𑀅𑀦𑀼𑀧𑀲𑁆𑀲𑀦𑀸𑀬 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄 𑀉𑀧𑀕𑀢𑁄 𑀲𑀫𑀼𑀧𑀕𑀢𑁄 𑀉𑀧𑀧𑀦𑁆𑀦𑁄 𑀲𑀫𑀦𑁆𑀦𑀸𑀕𑀢𑁄, 𑀢𑁂𑀦 𑀯𑀼𑀘𑁆𑀘𑀢𑀺 𑀅𑀦𑀼𑀧𑀲𑁆𑀲𑀻𑀢𑀺. 𑀯𑀺𑀳𑀭𑀢𑀻𑀢𑀺 𑀇𑀭𑀺𑀬𑀢𑀺 𑀧𑀯𑀢𑁆𑀢𑀢𑀺 𑀧𑀸𑀮𑁂𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺 𑀘𑀭𑀢𑀺 𑀯𑀺𑀳𑀭𑀢𑀺, 𑀢𑁂𑀦 𑀯𑀼𑀘𑁆𑀘𑀢𑀺 𑀯𑀺𑀳𑀭𑀢𑀻𑀢𑀺. 𑀆𑀢𑀸𑀧𑀻𑀢𑀺 𑀢𑀢𑁆𑀣 𑀓𑀢𑀫𑀁 𑀆𑀢𑀸𑀧𑀁? 𑀬𑁄 𑀘𑁂𑀢𑀲𑀺𑀓𑁄 𑀯𑀻𑀭𑀺𑀬𑀸𑀭𑀫𑁆𑀪𑁄 𑀦𑀺𑀓𑀫𑁆𑀫𑁄 𑀧𑀭𑀓𑁆𑀓𑀫𑁄 𑀉𑀬𑁆𑀬𑀸𑀫𑁄 𑀯𑀸𑀬𑀸𑀫𑁄 𑀉𑀲𑁆𑀲𑀸𑀳𑁄 𑀉𑀲𑁆𑀲𑁄𑀴𑁆𑀳𑀻 𑀣𑀸𑀫𑁄 𑀥𑀺𑀢𑀺 𑀅𑀲𑀺𑀣𑀺𑀮𑀧𑀭𑀓𑁆𑀓𑀫𑀢𑀸 𑀅𑀦𑀺𑀓𑁆𑀔𑀺𑀢𑁆𑀢𑀤𑁆𑀤𑀦𑁆𑀤𑀢𑀸 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸 𑀥𑀼𑀭𑀲𑀫𑁆𑀧𑀕𑁆𑀕𑀸𑀳𑀻 𑀯𑀻𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀩𑀮𑀁 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀇𑀤𑀁 𑀯𑀼𑀘𑁆𑀘𑀢𑀺 𑀆𑀢𑀸𑀧𑀁. 𑀇𑀫𑀺𑀦𑀸 𑀆𑀢𑀸𑀧𑁂𑀦 𑀉𑀧𑁂𑀢𑁄 𑀳𑁄𑀢𑀺…𑀧𑁂… 𑀲𑀫𑀦𑁆𑀦𑀸𑀕𑀢𑁄 ¶ , 𑀢𑁂𑀦 𑀯𑀼𑀘𑁆𑀘𑀢𑀺 𑀆𑀢𑀸𑀧𑀻𑀢𑀺. 𑀲𑀫𑁆𑀧𑀚𑀸𑀦𑁄𑀢𑀺 𑀢𑀢𑁆𑀣 𑀓𑀢𑀫𑀁 𑀲𑀫𑁆𑀧𑀚𑀜𑁆𑀜𑀁? 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸 𑀯𑀺𑀘𑀬𑁄 𑀧𑀯𑀺𑀘𑀬𑁄 𑀥𑀫𑁆𑀫𑀯𑀺𑀘𑀬𑁄 𑀲𑀮𑁆𑀮𑀓𑁆𑀔𑀡𑀸 𑀉𑀧𑀮𑀓𑁆𑀔𑀡𑀸 𑀧𑀘𑁆𑀘𑀼𑀧𑀮𑀓𑁆𑀔𑀡𑀸 𑀧𑀡𑁆𑀟𑀺𑀘𑁆𑀘𑀁 𑀓𑁄𑀲𑀮𑁆𑀮𑀁 𑀦𑁂𑀧𑀼𑀜𑁆𑀜𑀁 𑀯𑁂𑀪𑀩𑁆𑀬𑀸 𑀘𑀺𑀦𑁆𑀢𑀸 𑀉𑀧𑀧𑀭𑀺𑀓𑁆𑀔𑀸 𑀪𑀽𑀭𑀻𑀫𑁂𑀥𑀸 𑀧𑀭𑀺𑀡𑀸𑀬𑀺𑀓𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀧𑀚𑀜𑁆𑀜𑀁 𑀧𑀢𑁄𑀤𑁄 𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀸𑀩𑀮𑀁 𑀧𑀜𑁆𑀜𑀸𑀲𑀢𑁆𑀣𑀁 𑀧𑀜𑁆𑀜𑀸𑀧𑀸𑀲𑀸𑀤𑁄 𑀧𑀜𑁆𑀜𑀸𑀆𑀮𑁄𑀓𑁄 𑀧𑀜𑁆𑀜𑀸𑀑𑀪𑀸𑀲𑁄 𑀧𑀜𑁆𑀜𑀸𑀧𑀚𑁆𑀚𑁄𑀢𑁄 𑀧𑀜𑁆𑀜𑀸𑀭𑀢𑀦𑀁 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀲𑀫𑁆𑀧𑀚𑀜𑁆𑀜𑀁. 𑀇𑀫𑀺𑀦𑀸 𑀲𑀫𑁆𑀧𑀚𑀜𑁆𑀜𑁂𑀦 𑀉𑀧𑁂𑀢𑁄 𑀳𑁄𑀢𑀺 ¶ …𑀧𑁂… 𑀲𑀫𑀦𑁆𑀦𑀸𑀕𑀢𑁄, 𑀢𑁂𑀦 𑀯𑀼𑀘𑁆𑀘𑀢𑀺 𑀲𑀫𑁆𑀧𑀚𑀸𑀦𑁄𑀢𑀺. 𑀲𑀢𑀺𑀫𑀸𑀢𑀺 𑀢𑀢𑁆𑀣 𑀓𑀢𑀫𑀸 𑀲𑀢𑀺? 𑀬𑀸 𑀲𑀢𑀺 𑀅𑀦𑀼𑀲𑁆𑀲𑀢𑀺 𑀧𑀝𑀺𑀲𑁆𑀲𑀢𑀺 𑀲𑀢𑀺 𑀲𑀭𑀡𑀢𑀸 𑀥𑀸𑀭𑀡𑀢𑀸 𑀅𑀧𑀺𑀮𑀸𑀧𑀦𑀢𑀸 𑀅𑀲𑀫𑁆𑀫𑀼𑀲𑀦𑀢𑀸 𑀲𑀢𑀺 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀩𑀮𑀁 𑀲𑀫𑁆𑀫𑀸𑀲𑀢𑀺 ¶ , 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀢𑀺. 𑀇𑀫𑀸𑀬 𑀲𑀢𑀺𑀬𑀸 𑀉𑀧𑁂𑀢𑁄 𑀳𑁄𑀢𑀺…𑀧𑁂… 𑀲𑀫𑀦𑁆𑀦𑀸𑀕𑀢𑁄, 𑀢𑁂𑀦 𑀯𑀼𑀘𑁆𑀘𑀢𑀺 𑀲𑀢𑀺𑀫𑀸𑀢𑀺.

𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀦𑁆𑀢𑀺 𑀢𑀢𑁆𑀣 𑀓𑀢𑀫𑁄 𑀮𑁄𑀓𑁄? 𑀲𑁆𑀯𑁂𑀯 𑀓𑀸𑀬𑁄 𑀮𑁄𑀓𑁄. 𑀧𑀜𑁆𑀘𑀧𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀮𑁄𑀓𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀮𑁄𑀓𑁄. 𑀢𑀢𑁆𑀣 𑀓𑀢𑀫𑀸 𑀅𑀪𑀺𑀚𑁆𑀛𑀸? 𑀬𑁄 𑀭𑀸𑀕𑁄 𑀲𑀸𑀭𑀸𑀕𑁄 𑀅𑀦𑀼𑀦𑀬𑁄 𑀅𑀦𑀼𑀭𑁄𑀥𑁄 𑀦𑀦𑁆𑀤𑀻 𑀦𑀦𑁆𑀤𑀺𑀭𑀸𑀕𑁄 𑀘𑀺𑀢𑁆𑀢𑀲𑁆𑀲 𑀲𑀸𑀭𑀸𑀕𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀪𑀺𑀚𑁆𑀛𑀸. 𑀢𑀢𑁆𑀣 𑀓𑀢𑀫𑀁 𑀤𑁄𑀫𑀦𑀲𑁆𑀲𑀁? 𑀬𑀁 𑀘𑁂𑀢𑀲𑀺𑀓𑀁 𑀅𑀲𑀸𑀢𑀁 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀘𑁂𑀢𑁄𑀲𑀫𑁆𑀨𑀲𑁆𑀲𑀚𑀸 𑀅𑀲𑀸𑀢𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀇𑀤𑀁 𑀯𑀼𑀘𑁆𑀘𑀢𑀺 𑀤𑁄𑀫𑀦𑀲𑁆𑀲𑀁. 𑀇𑀢𑀺 𑀅𑀬𑀜𑁆𑀘 𑀅𑀪𑀺𑀚𑁆𑀛𑀸, 𑀇𑀤𑀜𑁆𑀘 𑀤𑁄𑀫𑀦𑀲𑁆𑀲𑀁 𑀇𑀫𑀫𑁆𑀳𑀺 𑀮𑁄𑀓𑁂 𑀯𑀺𑀦𑀻𑀢𑀸 𑀳𑁄𑀦𑁆𑀢𑀺 𑀧𑀝𑀺𑀯𑀺𑀦𑀻𑀢𑀸 𑀲𑀦𑁆𑀢𑀸 𑀲𑀫𑀺𑀢𑀸 𑀯𑀽𑀧𑀲𑀫𑀺𑀢𑀸 𑀅𑀢𑁆𑀣𑀗𑁆𑀕𑀢𑀸 𑀅𑀩𑁆𑀪𑀢𑁆𑀣𑀗𑁆𑀕𑀢𑀸 𑀅𑀧𑁆𑀧𑀺𑀢𑀸 𑀩𑁆𑀬𑀧𑁆𑀧𑀺𑀢𑀸 𑀲𑁄𑀲𑀺𑀢𑀸 𑀯𑀺𑀲𑁄𑀲𑀺𑀢𑀸 𑀩𑁆𑀬𑀦𑁆𑀢𑀻𑀓𑀢𑀸, 𑀢𑁂𑀦 𑀯𑀼𑀘𑁆𑀘𑀢𑀺 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲’’𑀦𑁆𑀢𑀺 (𑀯𑀺𑀪. 𑁩𑁫𑁭-𑁩𑁬𑁨).

𑀏𑀯𑀫𑁂𑀢𑁂𑀲𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀢𑁂𑀦 𑀲𑀳 𑀅𑀬𑀁 𑀅𑀝𑁆𑀞𑀓𑀣𑀸𑀦𑀬𑁄 𑀬𑀣𑀸 𑀲𑀁𑀲𑀦𑁆𑀤𑀢𑀺, 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀢𑀸𑀯 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀼𑀤𑁆𑀤𑁂𑀲𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸.

𑀇𑀤𑀸𑀦𑀺 𑀯𑁂𑀤𑀦𑀸𑀲𑀼. 𑀘𑀺𑀢𑁆𑀢𑁂. 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺…𑀧𑁂… 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀦𑁆𑀢𑀺 𑀏𑀢𑁆𑀣 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻𑀢𑀺 𑀏𑀯𑀫𑀸𑀤𑀻𑀲𑀼 𑀯𑁂𑀤𑀦𑀸𑀤𑀻𑀦𑀁 𑀧𑀼𑀦 𑀯𑀘𑀦𑁂 𑀧𑀬𑁄𑀚𑀦𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻. 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻. 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻𑀢𑀺 𑀏𑀢𑁆𑀣 𑀧𑀦 𑀯𑁂𑀤𑀦𑀸𑀢𑀺 𑀢𑀺𑀲𑁆𑀲𑁄 𑀯𑁂𑀤𑀦𑀸, 𑀢𑀸 𑀘 𑀮𑁄𑀓𑀺𑀬𑀸 𑀏𑀯. 𑀘𑀺𑀢𑁆𑀢𑀫𑁆𑀧𑀺 𑀮𑁄𑀓𑀺𑀬𑀁, 𑀢𑀣𑀸 𑀥𑀫𑁆𑀫𑀸. 𑀢𑁂𑀲𑀁 𑀯𑀺𑀪𑀸𑀕𑁄 𑀦𑀺𑀤𑁆𑀤𑁂𑀲𑀯𑀸𑀭𑁂 𑀧𑀸𑀓𑀝𑁄 𑀪𑀯𑀺𑀲𑁆𑀲𑀢𑀺. 𑀓𑁂𑀯𑀮𑀁 𑀧𑀦𑀺𑀥 𑀬𑀣𑀸 𑀯𑁂𑀤𑀦𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸, 𑀢𑀣𑀸 𑀢𑀸 𑀅𑀦𑀼𑀧𑀲𑁆𑀲𑀦𑁆𑀢𑁄 ‘‘𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀲 𑀦𑀬𑁄 𑀘𑀺𑀢𑁆𑀢𑀥𑀫𑁆𑀫𑁂𑀲𑀼𑀧𑀺. 𑀓𑀣𑀜𑁆𑀘 𑀯𑁂𑀤𑀦𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸𑀢𑀺? 𑀲𑀼𑀔𑀸 𑀢𑀸𑀯 𑀯𑁂𑀤𑀦𑀸 𑀤𑀼𑀓𑁆𑀔𑀢𑁄, 𑀤𑀼𑀓𑁆𑀔𑀸 𑀲𑀮𑁆𑀮𑀢𑁄, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀅𑀦𑀺𑀘𑁆𑀘𑀢𑁄. 𑀬𑀣𑀸𑀳 𑁋

‘‘𑀬𑁄 ¶ ¶ 𑀲𑀼𑀔𑀁 𑀤𑀼𑀓𑁆𑀔𑀢𑁄 𑀅𑀤𑁆𑀤, 𑀤𑀼𑀓𑁆𑀔𑀫𑀤𑁆𑀤𑀓𑁆𑀔𑀺 𑀲𑀮𑁆𑀮𑀢𑁄;

𑀅𑀤𑀼𑀓𑁆𑀔𑀫𑀲𑀼𑀔𑀁 𑀲𑀦𑁆𑀢𑀁, 𑀅𑀤𑁆𑀤𑀓𑁆𑀔𑀺 𑀦𑀁 𑀅𑀦𑀺𑀘𑁆𑀘𑀢𑁄;

𑀲 𑀯𑁂 𑀲𑀫𑁆𑀫𑀤𑁆𑀤𑀲𑁄 𑀪𑀺𑀓𑁆𑀔𑀼, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀢𑀻’’𑀢𑀺. (𑀲𑀁. 𑀦𑀺. 𑁪.𑁨𑁫𑁩);

𑀲𑀩𑁆𑀩𑀸 ¶ 𑀏𑀯 𑀘𑁂𑀢𑀸 ‘‘𑀤𑀼𑀓𑁆𑀔𑀸’’𑀢𑀺𑀧𑀺 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀢𑀁 𑀤𑀼𑀓𑁆𑀔𑀲𑁆𑀫𑀺𑀦𑁆𑀢𑀺 𑀯𑀤𑀸𑀫𑀻’’𑀢𑀺 (𑀲𑀁. 𑀦𑀺. 𑁪.𑁨𑁫𑁯). 𑀲𑀼𑀔𑀤𑀼𑀓𑁆𑀔𑀢𑁄𑀧𑀺 𑀘 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸. 𑀬𑀣𑀸𑀳 ‘‘𑀲𑀼𑀔𑀸 𑀯𑁂𑀤𑀦𑀸 𑀞𑀺𑀢𑀺𑀲𑀼𑀔𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀸’’𑀢𑀺 (𑀫. 𑀦𑀺. 𑁧.𑁪𑁬𑁫) 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀅𑀧𑀺𑀘 𑀅𑀦𑀺𑀘𑁆𑀘𑀸𑀤𑀺𑀲𑀢𑁆𑀢𑀅𑀦𑀼𑀧𑀲𑁆𑀲𑀦𑀸𑀯𑀲𑁂𑀦𑀧𑀺 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸. 𑀲𑁂𑀲𑀁 𑀦𑀺𑀤𑁆𑀤𑁂𑀲𑀯𑀸𑀭𑁂𑀬𑁂𑀯 𑀧𑀸𑀓𑀝𑀁 𑀪𑀯𑀺𑀲𑁆𑀲𑀢𑀺.

𑀘𑀺𑀢𑁆𑀢𑀥𑀫𑁆𑀫𑁂𑀲𑀼𑀧𑀺 𑀘𑀺𑀢𑁆𑀢𑀁 𑀢𑀸𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀲𑀳𑀚𑀸𑀢𑀪𑀽𑀫𑀺𑀓𑀫𑁆𑀫𑀯𑀺𑀧𑀸𑀓𑀓𑀺𑀭𑀺𑀬𑀸𑀤𑀺𑀦𑀸𑀦𑀢𑁆𑀢𑀪𑁂𑀤𑀸𑀦𑀁 𑀅𑀦𑀺𑀘𑁆𑀘𑀸𑀤𑀺𑀅𑀦𑀼𑀧𑀲𑁆𑀲𑀦𑀸𑀦𑀁 𑀦𑀺𑀤𑁆𑀤𑁂𑀲𑀯𑀸𑀭𑁂 𑀆𑀕𑀢𑀲𑀭𑀸𑀕𑀸𑀤𑀺𑀪𑁂𑀤𑀸𑀦𑀜𑁆𑀘 𑀯𑀲𑁂𑀦 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀁. 𑀥𑀫𑁆𑀫𑀸 𑀲𑀮𑀓𑁆𑀔𑀡𑀲𑀸𑀫𑀜𑁆𑀜𑀮𑀓𑁆𑀔𑀡𑀸𑀦𑀁 𑀲𑀼𑀜𑁆𑀜𑀢𑀥𑀫𑁆𑀫𑀲𑁆𑀲 𑀅𑀦𑀺𑀘𑁆𑀘𑀸𑀤𑀺𑀲𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀦𑀁 𑀦𑀺𑀤𑁆𑀤𑁂𑀲𑀯𑀸𑀭𑁂 𑀆𑀕𑀢𑀲𑀦𑁆𑀢𑀸𑀤𑀺𑀪𑁂𑀤𑀸𑀦𑀜𑁆𑀘 𑀯𑀲𑁂𑀦 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀓𑀸𑀫𑀜𑁆𑀘𑁂𑀢𑁆𑀣 𑀬𑀲𑁆𑀲 𑀓𑀸𑀬𑀲𑀗𑁆𑀔𑀸𑀢𑁂 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁 𑀧𑀳𑀻𑀦𑀁, 𑀢𑀲𑁆𑀲 𑀯𑁂𑀤𑀦𑀸𑀤𑀻𑀲𑀼𑀧𑀺 𑀢𑀁 𑀧𑀳𑀻𑀦𑀫𑁂𑀯. 𑀦𑀸𑀦𑀸𑀧𑀼𑀕𑁆𑀕𑀮𑀯𑀲𑁂𑀦 𑀧𑀦 𑀦𑀸𑀦𑀸𑀘𑀺𑀢𑁆𑀢𑀓𑁆𑀔𑀡𑀺𑀓𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀯𑀲𑁂𑀦 𑀘 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀁. 𑀬𑀢𑁄 𑀯𑀸 𑀏𑀓𑀢𑁆𑀣 𑀧𑀳𑀻𑀦𑀁 𑀲𑁂𑀲𑁂𑀲𑀼𑀧𑀺 𑀧𑀳𑀻𑀦𑀁 𑀳𑁄𑀢𑀺, 𑀢𑁂𑀦𑁂𑀯𑀲𑁆𑀲 𑀢𑀢𑁆𑀣 𑀧𑀳𑀸𑀦𑀤𑀲𑁆𑀲𑀦𑀢𑁆𑀣𑀫𑁆𑀧𑀺 𑀏𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀉𑀤𑁆𑀤𑁂𑀲𑀯𑀸𑀭𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀆𑀦𑀸𑀧𑀸𑀦𑀧𑀩𑁆𑀩𑀯𑀡𑁆𑀡𑀦𑀸

𑁩𑁭𑁪. 𑀇𑀤𑀸𑀦𑀺 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀙𑁂𑀓𑁄 𑀯𑀺𑀮𑀻𑀯𑀓𑀸𑀭𑀓𑁄 𑀣𑀽𑀮𑀓𑀺𑀮𑀜𑁆𑀚𑀲𑀡𑁆𑀳𑀓𑀺𑀮𑀜𑁆𑀚𑀘𑀗𑁆𑀓𑁄𑀝𑀓𑀧𑁂𑀴𑀸𑀧𑀼𑀝𑀸𑀤𑀻𑀦𑀺 𑀉𑀧𑀓𑀭𑀡𑀸𑀦𑀺 𑀓𑀢𑁆𑀢𑀼𑀓𑀸𑀫𑁄 𑀏𑀓𑀁 𑀫𑀳𑀸𑀯𑁂𑀡𑀼𑀁 𑀮𑀪𑀺𑀢𑁆𑀯𑀸 𑀘𑀢𑀼𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀢𑀢𑁄 𑀏𑀓𑁂𑀓𑀁 𑀯𑁂𑀡𑀼𑀔𑀡𑁆𑀟𑀁 𑀕𑀳𑁂𑀢𑁆𑀯𑀸 𑀨𑀸𑀮𑁂𑀢𑁆𑀯𑀸 𑀢𑀁 𑀢𑀁 𑀉𑀧𑀓𑀭𑀡𑀁 𑀓𑀭𑁂𑀬𑁆𑀬, 𑀏𑀯𑀫𑁂𑀯 𑀪𑀕𑀯𑀸 𑀲𑀢𑀺𑀧𑀝𑁆𑀞𑀸𑀦𑀤𑁂𑀲𑀦𑀸𑀬 𑀲𑀢𑁆𑀢𑀸𑀦𑀁 𑀅𑀦𑁂𑀓𑀧𑁆𑀧𑀓𑀸𑀭𑀁 ¶ 𑀯𑀺𑀲𑁂𑀲𑀸𑀥𑀺𑀕𑀫𑀁 𑀓𑀢𑁆𑀢𑀼𑀓𑀸𑀫𑁄 𑀏𑀓𑀫𑁂𑀯 𑀲𑀫𑁆𑀫𑀸𑀲𑀢𑀺𑀁 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸. 𑀓𑀢𑀫𑁂 ¶ 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀭𑀫𑁆𑀫𑀡𑀯𑀲𑁂𑀦 𑀘𑀢𑀼𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀢𑀢𑁄 𑀏𑀓𑁂𑀓𑀁 𑀲𑀢𑀺𑀧𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀓𑀸𑀬𑀁 𑀯𑀺𑀪𑀚𑀦𑁆𑀢𑁄 ‘‘𑀓𑀣𑀜𑁆𑀘 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀺𑀤𑁆𑀤𑁂𑀲𑀯𑀸𑀭𑀁 𑀯𑀢𑁆𑀢𑀼𑀫𑀸𑀭𑀤𑁆𑀥𑁄.

𑀢𑀢𑁆𑀣 𑀓𑀣𑀜𑁆𑀘𑀸𑀢𑀺𑀆𑀤𑀺 𑀯𑀺𑀢𑁆𑀣𑀸𑀭𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀪𑀺𑀓𑁆𑀔𑀯𑁂, 𑀓𑁂𑀦 𑀘 ¶ 𑀧𑀓𑀸𑀭𑁂𑀦 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻𑀢𑀺? 𑀏𑀲 𑀦𑀬𑁄 𑀲𑀩𑁆𑀩𑀧𑀼𑀘𑁆𑀙𑀸𑀯𑀸𑀭𑁂𑀲𑀼. 𑀇𑀥 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀽𑀢𑀺 𑀪𑀺𑀓𑁆𑀔𑀯𑁂 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀪𑀺𑀓𑁆𑀔𑀼. 𑀅𑀬𑀜𑁆𑀳𑁂𑀢𑁆𑀣 𑀇𑀥𑀲𑀤𑁆𑀤𑁄 𑀲𑀩𑁆𑀩𑀧𑁆𑀧𑀓𑀸𑀭𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀦𑀺𑀲𑁆𑀲𑀬𑀪𑀽𑀢𑀲𑀸𑀲𑀦𑀧𑀭𑀺𑀤𑀻𑀧𑀦𑁄 𑀅𑀜𑁆𑀜𑀲𑀸𑀲𑀦𑀲𑁆𑀲 𑀢𑀣𑀸𑀪𑀸𑀯𑀧𑀝𑀺𑀲𑁂𑀥𑀦𑁄 𑀘. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀇𑀥𑁂𑀯 𑀪𑀺𑀓𑁆𑀔𑀯𑁂, 𑀲𑀫𑀡𑁄…𑀧𑁂… 𑀲𑀼𑀜𑁆𑀜𑀸 𑀧𑀭𑀧𑁆𑀧𑀯𑀸𑀤𑀸 𑀲𑀫𑀡𑁂𑀪𑀺 𑀅𑀜𑁆𑀜𑁂𑀳𑀻’’𑀢𑀺 (𑀫. 𑀦𑀺. 𑁧.𑁧𑁩𑁯). 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀪𑀺𑀓𑁆𑀔𑀽’’𑀢𑀺.

𑀅𑀭𑀜𑁆𑀜𑀕𑀢𑁄 𑀯𑀸 𑀭𑀼𑀓𑁆𑀔𑀫𑀽𑀮𑀕𑀢𑁄 𑀯𑀸 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀯𑀸𑀢𑀺 𑀇𑀤𑀫𑀲𑁆𑀲 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀦𑀼𑀭𑀽𑀧𑀲𑁂𑀦𑀸𑀲𑀦𑀧𑀭𑀺𑀕𑁆𑀕𑀳𑀧𑀭𑀺𑀤𑀻𑀧𑀦𑀁. 𑀇𑀫𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄 𑀤𑀻𑀖𑀭𑀢𑁆𑀢𑀁 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀅𑀦𑀼𑀯𑀺𑀲𑀝𑀁 𑀘𑀺𑀢𑁆𑀢𑀁 𑀓𑀫𑁆𑀫𑀝𑁆𑀞𑀸𑀦𑀯𑀻𑀣𑀺𑀁 𑀑𑀢𑀭𑀺𑀢𑀼𑀁 𑀦 𑀇𑀘𑁆𑀙𑀢𑀺, 𑀓𑀽𑀝𑀕𑁄𑀡𑀬𑀼𑀢𑁆𑀢𑀭𑀣𑁄 𑀯𑀺𑀬 𑀉𑀧𑁆𑀧𑀣𑀫𑁂𑀯 𑀥𑀸𑀯𑀢𑀺. 𑀢𑀲𑁆𑀫𑀸 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑁄𑀧𑁄 𑀓𑀽𑀝𑀥𑁂𑀦𑀼𑀬𑀸 𑀲𑀩𑁆𑀩𑀁 𑀔𑀻𑀭𑀁 𑀧𑀺𑀯𑀺𑀢𑁆𑀯𑀸 𑀯𑀟𑁆𑀠𑀺𑀢𑀁 𑀓𑀽𑀝𑀯𑀘𑁆𑀙𑀁 𑀤𑀫𑁂𑀢𑀼𑀓𑀸𑀫𑁄 𑀥𑁂𑀦𑀼𑀢𑁄 𑀅𑀧𑀦𑁂𑀢𑁆𑀯𑀸 𑀏𑀓𑀫𑀦𑁆𑀢𑁂 𑀫𑀳𑀦𑁆𑀢𑀁 𑀣𑀫𑁆𑀪𑀁 𑀦𑀺𑀔𑀡𑀺𑀢𑁆𑀯𑀸 𑀢𑀢𑁆𑀣 𑀬𑁄𑀢𑁆𑀢𑁂𑀦 𑀩𑀦𑁆𑀥𑁂𑀬𑁆𑀬. 𑀅𑀣𑀲𑁆𑀲 𑀲𑁄 𑀯𑀘𑁆𑀙𑁄 𑀇𑀢𑁄 𑀘𑀺𑀢𑁄 𑀘 𑀯𑀺𑀧𑁆𑀨𑀦𑁆𑀤𑀺𑀢𑁆𑀯𑀸 𑀧𑀮𑀸𑀬𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀫𑁂𑀯 𑀣𑀫𑁆𑀪𑀁 𑀉𑀧𑀦𑀺𑀲𑀻𑀤𑁂𑀬𑁆𑀬 𑀯𑀸 𑀉𑀧𑀦𑀺𑀧𑀚𑁆𑀚𑁂𑀬𑁆𑀬 𑀯𑀸, 𑀏𑀯𑀫𑁂𑀯 𑀇𑀫𑀺𑀦𑀸𑀧𑀺 𑀪𑀺𑀓𑁆𑀔𑀼𑀦𑀸 𑀤𑀻𑀖𑀭𑀢𑁆𑀢𑀁 𑀭𑀽𑀧𑀸𑀭𑀫𑁆𑀫𑀡𑀸𑀤𑀺𑀭𑀲𑀧𑀸𑀦𑀯𑀟𑁆𑀠𑀺𑀢𑀁 𑀤𑀼𑀝𑁆𑀞𑀘𑀺𑀢𑁆𑀢𑀁 𑀤𑀫𑁂𑀢𑀼𑀓𑀸𑀫𑁂𑀦 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀢𑁄 𑀅𑀧𑀦𑁂𑀢𑁆𑀯𑀸 𑀅𑀭𑀜𑁆𑀜𑀁 𑀯𑀸 𑀭𑀼𑀓𑁆𑀔𑀫𑀽𑀮𑀁 𑀯𑀸 𑀲𑀼𑀜𑁆𑀜𑀸𑀕𑀸𑀭𑀁 𑀯𑀸 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀲𑀢𑀺𑀧𑀝𑁆𑀞𑀸𑀦𑀸𑀭𑀫𑁆𑀫𑀡𑀢𑁆𑀣𑀫𑁆𑀪𑁂 𑀲𑀢𑀺𑀬𑁄𑀢𑁆𑀢𑁂𑀦 ¶ 𑀩𑀦𑁆𑀥𑀺𑀢𑀩𑁆𑀩𑀁. 𑀏𑀯𑀫𑀲𑁆𑀲 𑀢𑀁 𑀘𑀺𑀢𑁆𑀢𑀁 𑀇𑀢𑁄 𑀘𑀺𑀢𑁄 𑀘 𑀯𑀺𑀧𑁆𑀨𑀦𑁆𑀤𑀺𑀢𑁆𑀯𑀸𑀧𑀺 𑀧𑀼𑀩𑁆𑀩𑁂 𑀆𑀘𑀺𑀡𑁆𑀡𑀸𑀭𑀫𑁆𑀫𑀡𑀁 𑀅𑀮𑀪𑀫𑀸𑀦𑀁 𑀲𑀢𑀺𑀬𑁄𑀢𑁆𑀢𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀮𑀸𑀬𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 𑀢𑀫𑁂𑀯𑀸𑀭𑀫𑁆𑀫𑀡𑀁 𑀉𑀧𑀘𑀸𑀭𑀧𑁆𑀧𑀦𑀸𑀯𑀲𑁂𑀦 𑀉𑀧𑀦𑀺𑀲𑀻𑀤𑀢𑀺 𑀘𑁂𑀯 𑀉𑀧𑀦𑀺𑀧𑀚𑁆𑀚𑀢𑀺 𑀘. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀬𑀣𑀸 𑀣𑀫𑁆𑀪𑁂 𑀦𑀺𑀩𑀦𑁆𑀥𑁂𑀬𑁆𑀬, 𑀯𑀘𑁆𑀙𑀁 𑀤𑀫𑀁 𑀦𑀭𑁄 𑀇𑀥;

𑀩𑀦𑁆𑀥𑁂𑀬𑁆𑀬𑁂𑀯𑀁 𑀲𑀓𑀁 𑀘𑀺𑀢𑁆𑀢𑀁, 𑀲𑀢𑀺𑀬𑀸𑀭𑀫𑁆𑀫𑀡𑁂 𑀤𑀴𑁆𑀳’’𑀦𑁆𑀢𑀺.

𑀏𑀯𑀫𑀲𑁆𑀲𑁂𑀢𑀁 ¶ 𑀲𑁂𑀦𑀸𑀲𑀦𑀁 𑀪𑀸𑀯𑀦𑀸𑀦𑀼𑀭𑀽𑀧𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀤𑀫𑀲𑁆𑀲 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀦𑀼𑀭𑀽𑀧𑀲𑁂𑀦𑀸𑀲𑀦𑀧𑀭𑀺𑀕𑁆𑀕𑀳𑀧𑀭𑀺𑀤𑀻𑀧𑀦’’𑀦𑁆𑀢𑀺.

𑀅𑀧𑀺𑀘 𑀬𑀲𑁆𑀫𑀸 𑀇𑀤𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬 𑀫𑀼𑀤𑁆𑀥𑀪𑀽𑀢𑀁 𑀲𑀩𑁆𑀩𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀯𑀺𑀲𑁂𑀲𑀸𑀥𑀺𑀕𑀫𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀧𑀤𑀝𑁆𑀞𑀸𑀦𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀇𑀢𑁆𑀣𑀺𑀧𑀼𑀭𑀺𑀲𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀲𑀤𑁆𑀤𑀲𑀫𑀸𑀓𑀼𑀮𑀁 𑀕𑀸𑀫𑀦𑁆𑀢𑀁 𑀅𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀦 𑀲𑀼𑀓𑀭𑀁 𑀲𑀫𑁆𑀧𑀸𑀤𑁂𑀢𑀼𑀁, 𑀲𑀤𑁆𑀤𑀓𑀡𑁆𑀟𑀓𑀢𑁆𑀢𑀸 𑀛𑀸𑀦𑀲𑁆𑀲. 𑀅𑀕𑀸𑀫𑀓𑁂 𑀧𑀦 𑀅𑀭𑀜𑁆𑀜𑁂 𑀲𑀼𑀓𑀭𑀁 𑀬𑁄𑀕𑀸𑀯𑀘𑀭𑁂𑀦 𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀤𑁂𑀯 ¶ 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁, 𑀢𑀲𑁆𑀫𑀸𑀲𑁆𑀲 𑀅𑀦𑀼𑀭𑀽𑀧𑀲𑁂𑀦𑀸𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸, ‘‘𑀅𑀭𑀜𑁆𑀜𑀕𑀢𑁄 𑀯𑀸’’𑀢𑀺𑀆𑀤𑀺𑀫𑀸𑀳.

𑀯𑀢𑁆𑀣𑀼𑀯𑀺𑀚𑁆𑀚𑀸𑀘𑀭𑀺𑀬𑁄 𑀯𑀺𑀬 𑀳𑀺 𑀪𑀕𑀯𑀸. 𑀲𑁄 𑀬𑀣𑀸 𑀯𑀢𑁆𑀣𑀼𑀯𑀺𑀚𑁆𑀚𑀸𑀘𑀭𑀺𑀬𑁄 𑀦𑀕𑀭𑀪𑀽𑀫𑀺𑀁 𑀧𑀲𑁆𑀲𑀺𑀢𑁆𑀯𑀸 𑀲𑀼𑀝𑁆𑀞𑀼 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 ‘‘𑀏𑀢𑁆𑀣 𑀦𑀕𑀭𑀁 𑀫𑀸𑀧𑁂𑀣𑀸’’𑀢𑀺 𑀉𑀧𑀤𑀺𑀲𑀢𑀺, 𑀲𑁄𑀢𑁆𑀣𑀺𑀦𑀸 𑀘 𑀦𑀕𑀭𑁂 𑀦𑀺𑀝𑁆𑀞𑀺𑀢𑁂 𑀭𑀸𑀚𑀓𑀼𑀮𑀢𑁄 𑀫𑀳𑀸𑀲𑀓𑁆𑀓𑀸𑀭𑀁 𑀮𑀪𑀢𑀺, 𑀏𑀯𑀫𑁂𑀯 𑀬𑁄𑀕𑀸𑀯𑀘𑀭𑀲𑁆𑀲 𑀅𑀦𑀼𑀭𑀽𑀧𑀲𑁂𑀦𑀸𑀲𑀦𑀁 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 ‘‘𑀏𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑀫𑀦𑀼𑀬𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀉𑀧𑀤𑀺𑀲𑀢𑀺, 𑀢𑀢𑁄 𑀢𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑁂𑀦 𑀬𑁄𑀕𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑁂 𑀧𑀢𑁆𑀢𑁂 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸’’𑀢𑀺 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀮𑀪𑀢𑀺.

𑀅𑀬𑀁 𑀧𑀦 𑀪𑀺𑀓𑁆𑀔𑀼 𑀤𑀻𑀧𑀺𑀲𑀤𑀺𑀲𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀳𑀺 𑀫𑀳𑀸𑀤𑀻𑀧𑀺𑀭𑀸𑀚𑀸 𑀅𑀭𑀜𑁆𑀜𑁂 𑀢𑀺𑀡𑀕𑀳𑀦𑀁 𑀯𑀸 𑀯𑀦𑀕𑀳𑀦𑀁 𑀯𑀸 𑀧𑀩𑁆𑀩𑀢𑀕𑀳𑀦𑀁 𑀯𑀸 𑀦𑀺𑀲𑁆𑀲𑀸𑀬 𑀦𑀺𑀮𑀻𑀬𑀺𑀢𑁆𑀯𑀸 𑀯𑀦𑀫𑀳𑀺𑀁𑀲𑀕𑁄𑀓𑀡𑁆𑀡𑀲𑀽𑀓𑀭𑀸𑀤𑀬𑁄 𑀫𑀺𑀕𑁂 𑀕𑀡𑁆𑀳𑀸𑀢𑀺, 𑀏𑀯𑀫𑁂𑀯 𑀅𑀬𑀁 𑀅𑀭𑀜𑁆𑀜𑀸𑀤𑀻𑀲𑀼 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 ¶ 𑀪𑀺𑀓𑁆𑀔𑀼 𑀬𑀣𑀸𑀓𑁆𑀓𑀫𑁂𑀦 𑀘𑀢𑁆𑀢𑀸𑀭𑁄 𑀫𑀕𑁆𑀕𑁂 𑀘𑁂𑀯 𑀘𑀢𑁆𑀢𑀸𑀭𑀺 𑀅𑀭𑀺𑀬𑀨𑀮𑀸𑀦𑀺 𑀘 𑀕𑀡𑁆𑀳𑀸𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀬𑀣𑀸𑀧𑀺 𑀤𑀻𑀧𑀺𑀓𑁄 𑀦𑀸𑀫, 𑀦𑀺𑀮𑀻𑀬𑀺𑀢𑁆𑀯𑀸 𑀕𑀡𑁆𑀳𑀢𑀻 𑀫𑀺𑀕𑁂;

𑀢𑀣𑁂𑀯𑀸𑀬𑀁 𑀩𑀼𑀤𑁆𑀥𑀧𑀼𑀢𑁆𑀢𑁄, 𑀬𑀼𑀢𑁆𑀢𑀬𑁄𑀕𑁄 𑀯𑀺𑀧𑀲𑁆𑀲𑀓𑁄;

𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸𑀦, 𑀕𑀡𑁆𑀳𑀸𑀢𑀺 𑀨𑀮𑀫𑀼𑀢𑁆𑀢𑀫’’𑀦𑁆𑀢𑀺.

𑀢𑁂𑀦𑀲𑁆𑀲 𑀧𑀭𑀓𑁆𑀓𑀫𑀚𑀯𑀬𑁄𑀕𑁆𑀕𑀪𑀽𑀫𑀺𑀁 𑀅𑀭𑀜𑁆𑀜𑀲𑁂𑀦𑀸𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀅𑀭𑀜𑁆𑀜𑀕𑀢𑁄 𑀯𑀸’’𑀢𑀺𑀆𑀤𑀺𑀫𑀸𑀳. 𑀇𑀢𑁄 𑀧𑀭𑀁 𑀇𑀫𑀲𑁆𑀫𑀺𑀁 𑀆𑀦𑀸𑀧𑀸𑀦𑀧𑀩𑁆𑀩𑁂 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀫𑁂𑀯. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑁄 𑀪𑀫𑀓𑀸𑀭𑁄 𑀯𑀸𑀢𑀺 𑀇𑀤𑀜𑁆𑀳𑀺 𑀉𑀧𑀫𑀸𑀫𑀢𑁆𑀢𑀫𑁂𑀯 𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀓𑀸𑀬𑁂𑀢𑀺 𑀇𑀤𑀁 𑀅𑀧𑁆𑀧𑀦𑀸𑀫𑀢𑁆𑀢𑀫𑁂𑀯 𑀘 𑀢𑀢𑁆𑀣 𑀅𑀦𑀸𑀕𑀢𑀁, 𑀲𑁂𑀲𑀁 𑀆𑀕𑀢𑀫𑁂𑀯.

𑀬𑀁 ¶ 𑀧𑀦 𑀅𑀦𑀸𑀕𑀢𑀁, 𑀢𑀢𑁆𑀣 𑀤𑀓𑁆𑀔𑁄𑀢𑀺 𑀙𑁂𑀓𑁄. 𑀤𑀻𑀖𑀁 𑀯𑀸 𑀅𑀜𑁆𑀙𑀦𑁆𑀢𑁄𑀢𑀺 𑀫𑀳𑀦𑁆𑀢𑀸𑀦𑀁 𑀪𑁂𑀭𑀻𑀧𑁄𑀓𑁆𑀔𑀭𑀸𑀤𑀻𑀦𑀁 𑀮𑀺𑀔𑀦𑀓𑀸𑀮𑁂 𑀳𑀢𑁆𑀣𑁂 𑀘 𑀧𑀸𑀤𑁂 𑀘 𑀧𑀲𑀸𑀭𑁂𑀢𑁆𑀯𑀸 𑀤𑀻𑀖𑀁 𑀓𑀟𑁆𑀠𑀦𑁆𑀢𑁄. 𑀭𑀲𑁆𑀲𑀁 𑀯𑀸 𑀅𑀜𑁆𑀙𑀦𑁆𑀢𑁄𑀢𑀺 𑀔𑀼𑀤𑁆𑀤𑀓𑀸𑀦𑀁 𑀤𑀦𑁆𑀢𑀲𑀽𑀘𑀺𑀯𑁂𑀥𑀓𑀸𑀤𑀻𑀦𑀁 𑀮𑀺𑀔𑀦𑀓𑀸𑀮𑁂 𑀫𑀦𑁆𑀤𑀫𑀦𑁆𑀤𑀁 𑀭𑀲𑁆𑀲𑀁 𑀓𑀟𑁆𑀠𑀦𑁆𑀢𑁄. 𑀏𑀯𑀫𑁂𑀯 𑀔𑁄𑀢𑀺 𑀏𑀯𑀁 𑀅𑀬𑀫𑁆𑀧𑀺 𑀪𑀺𑀓𑁆𑀔𑀼 𑀅𑀤𑁆𑀥𑀸𑀦𑀯𑀲𑁂𑀦 𑀇𑀢𑁆𑀢𑀭𑀯𑀲𑁂𑀦 𑀘 𑀧𑀯𑀢𑁆𑀢𑀸𑀦𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀯𑀲𑁂𑀦 𑀤𑀻𑀖𑀁 𑀯𑀸 𑀅𑀲𑁆𑀲𑀲𑀦𑁆𑀢𑁄 𑀤𑀻𑀖𑀁 𑀅𑀲𑁆𑀲𑀲𑀸𑀫𑀻𑀢𑀺 𑀧𑀚𑀸𑀦𑀸𑀢𑀺…𑀧𑁂… 𑀧𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀢𑀻𑀢𑀺. 𑀢𑀲𑁆𑀲𑁂𑀯𑀁 𑀲𑀺𑀓𑁆𑀔𑀢𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀫𑀺𑀢𑁆𑀢𑁂 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑁄 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀯𑀸 𑀧𑀭𑀺𑀕𑁆𑀕𑀡𑁆𑀳𑀸𑀢𑀺 𑀛𑀸𑀦𑀗𑁆𑀕𑀸𑀦𑀺 𑀯𑀸.

𑀢𑀢𑁆𑀣 ¶ 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀫𑁆𑀫𑀺𑀓𑁄 ‘‘𑀇𑀫𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀓𑀺𑀁 𑀦𑀺𑀲𑁆𑀲𑀺𑀢𑀸? 𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀸. 𑀯𑀢𑁆𑀣𑀼 𑀦𑀸𑀫 𑀓𑀭𑀚𑀓𑀸𑀬𑁄, 𑀓𑀭𑀚𑀓𑀸𑀬𑁄 𑀦𑀸𑀫 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀉𑀧𑀸𑀤𑀸𑀭𑀽𑀧𑀜𑁆𑀘𑁂’’𑀢𑀺 𑀏𑀯𑀁 𑀭𑀽𑀧𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀢𑀢𑁄 𑀢𑀤𑀸𑀭𑀫𑁆𑀫𑀡𑁂 𑀨𑀲𑁆𑀲𑀧𑀜𑁆𑀘𑀫𑀓𑁂 𑀦𑀸𑀫𑀦𑁆𑀢𑀺. 𑀏𑀯𑀁 𑀦𑀸𑀫𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑀲𑁆𑀲 𑀧𑀘𑁆𑀘𑀬𑀁 𑀧𑀭𑀺𑀬𑁂𑀲𑀦𑁆𑀢𑁄 𑀅𑀯𑀺𑀚𑁆𑀚𑀸𑀤𑀺𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀤𑀺𑀲𑁆𑀯𑀸 ‘‘𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀫𑀢𑁆𑀢𑀫𑁂𑀯𑁂𑀢𑀁, 𑀅𑀜𑁆𑀜𑁄 𑀲𑀢𑁆𑀢𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸 𑀦𑀢𑁆𑀣𑀻’’𑀢𑀺 ¶ 𑀯𑀺𑀢𑀺𑀡𑁆𑀡𑀓𑀗𑁆𑀔𑁄 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑁂 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀇𑀤𑀁 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀸𑀯 𑀅𑀭𑀳𑀢𑁆𑀢𑀸 𑀦𑀺𑀬𑁆𑀬𑀸𑀦𑀫𑀼𑀔𑀁.

𑀛𑀸𑀦𑀓𑀫𑁆𑀫𑀺𑀓𑁄𑀧𑀺 ‘‘𑀇𑀫𑀸𑀦𑀺 𑀛𑀸𑀦𑀗𑁆𑀕𑀸𑀦𑀺 𑀓𑀺𑀁 𑀦𑀺𑀲𑁆𑀲𑀺𑀢𑀸𑀦𑀺, 𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀸𑀦𑀺, 𑀯𑀢𑁆𑀣𑀼 𑀦𑀸𑀫 𑀓𑀭𑀚𑀓𑀸𑀬𑁄 𑀛𑀸𑀦𑀗𑁆𑀕𑀸𑀦𑀺 𑀦𑀸𑀫𑀁, 𑀓𑀭𑀚𑀓𑀸𑀬𑁄 𑀭𑀽𑀧’’𑀦𑁆𑀢𑀺 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑀲𑁆𑀲 𑀧𑀘𑁆𑀘𑀬𑀁 𑀧𑀭𑀺𑀬𑁂𑀲𑀦𑁆𑀢𑁄 𑀅𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬𑀸𑀓𑀸𑀭𑀁 𑀤𑀺𑀲𑁆𑀯𑀸 ‘‘𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀫𑀢𑁆𑀢𑀫𑁂𑀯𑁂𑀢𑀁, 𑀅𑀜𑁆𑀜𑁄 𑀲𑀢𑁆𑀢𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸 𑀦𑀢𑁆𑀣𑀻’’𑀢𑀺 𑀯𑀺𑀢𑀺𑀡𑁆𑀡𑀓𑀗𑁆𑀔𑁄 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑁂 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀇𑀤𑀫𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀸𑀯 𑀅𑀭𑀳𑀢𑁆𑀢𑀸 𑀦𑀺𑀬𑁆𑀬𑀸𑀦𑀫𑀼𑀔𑀁.

𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀯𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀩𑀳𑀺𑀤𑁆𑀥𑀸 𑀯𑀸𑀢𑀺 𑀧𑀭𑀲𑁆𑀲 𑀯𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑁂. 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸𑀢𑀺 𑀓𑀸𑀮𑁂𑀦 𑀅𑀢𑁆𑀢𑀦𑁄, 𑀓𑀸𑀮𑁂𑀦 𑀧𑀭𑀲𑁆𑀲 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑁂. 𑀏𑀢𑁂𑀦𑀲𑁆𑀲 𑀧𑀕𑀼𑀡𑀓𑀫𑁆𑀫𑀝𑁆𑀞𑀸𑀦𑀁 𑀅𑀝𑁆𑀞𑀧𑁂𑀢𑁆𑀯𑀸 𑀅𑀧𑀭𑀸𑀧𑀭𑀁 𑀲𑀜𑁆𑀘𑀭𑀡𑀓𑀸𑀮𑁄 𑀓𑀣𑀺𑀢𑁄. 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀧𑀦𑀺𑀤𑀁 𑀉𑀪𑀬𑀁 𑀦 𑀮𑀩𑁆𑀪𑀢𑀺.

𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 ¶ 𑀯𑀸𑀢𑀺 𑀬𑀣𑀸 𑀦𑀸𑀫 𑀓𑀫𑁆𑀫𑀸𑀭𑀲𑁆𑀲 𑀪𑀲𑁆𑀢𑀜𑁆𑀘 𑀕𑀕𑁆𑀕𑀭𑀦𑀸𑀴𑀺𑀜𑁆𑀘 𑀢𑀚𑁆𑀚𑀜𑁆𑀘 𑀯𑀸𑀬𑀸𑀫𑀁 𑀧𑀝𑀺𑀘𑁆𑀘 𑀯𑀸𑀢𑁄 𑀅𑀧𑀭𑀸𑀧𑀭𑀁 𑀲𑀜𑁆𑀘𑀭𑀢𑀺, 𑀏𑀯𑀁 𑀪𑀺𑀓𑁆𑀔𑀼𑀦𑁄 𑀓𑀭𑀚𑀓𑀸𑀬𑀜𑁆𑀘 𑀦𑀸𑀲𑀧𑀼𑀝𑀜𑁆𑀘 𑀘𑀺𑀢𑁆𑀢𑀜𑁆𑀘 𑀧𑀝𑀺𑀘𑁆𑀘 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑁄 𑀅𑀧𑀭𑀸𑀧𑀭𑀁 𑀲𑀜𑁆𑀘𑀭𑀢𑀺. 𑀓𑀸𑀬𑀸𑀤𑀬𑁄 𑀥𑀫𑁆𑀫𑀸 𑀲𑀫𑀼𑀤𑀬𑀥𑀫𑁆𑀫𑀸, 𑀢𑁂 𑀧𑀲𑁆𑀲𑀦𑁆𑀢𑁄 ‘‘𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀓𑀸𑀬𑀲𑁆𑀫𑀺𑀁 𑀯𑀺𑀳𑀭𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸𑀢𑀺 𑀬𑀣𑀸 𑀪𑀲𑁆𑀢𑀸𑀬 𑀅𑀧𑀦𑀻𑀢𑀸𑀬 𑀕𑀕𑁆𑀕𑀭𑀦𑀸𑀴𑀺𑀬𑀸 𑀪𑀺𑀦𑁆𑀦𑀸𑀬 𑀢𑀚𑁆𑀚𑁂 𑀘 𑀯𑀸𑀬𑀸𑀫𑁂 𑀅𑀲𑀢𑀺 𑀲𑁄 𑀯𑀸𑀢𑁄 𑀦𑀧𑁆𑀧𑀯𑀢𑁆𑀢𑀢𑀺, 𑀏𑀯𑀫𑁂𑀯 𑀓𑀸𑀬𑁂 𑀪𑀺𑀦𑁆𑀦𑁂 𑀦𑀸𑀲𑀧𑀼𑀝𑁂 𑀯𑀺𑀤𑁆𑀥𑀲𑁆𑀢𑁂 𑀘𑀺𑀢𑁆𑀢𑁂 𑀘 𑀦𑀺𑀭𑀼𑀤𑁆𑀥𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑁄 𑀦𑀸𑀫 𑀦𑀧𑁆𑀧𑀯𑀢𑁆𑀢𑀢𑀻𑀢𑀺 𑀓𑀸𑀬𑀸𑀤𑀺𑀦𑀺𑀭𑁄𑀥𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀭𑁄𑀥𑁄𑀢𑀺 𑀏𑀯𑀁 𑀧𑀲𑁆𑀲𑀦𑁆𑀢𑁄 ‘‘𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀓𑀸𑀬𑀲𑁆𑀫𑀺𑀁 𑀯𑀺𑀳𑀭𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸𑀢𑀺 𑀓𑀸𑀮𑁂𑀦 𑀲𑀫𑀼𑀤𑀬𑀁 𑀓𑀸𑀮𑁂𑀦 𑀯𑀬𑀁 𑀅𑀦𑀼𑀧𑀲𑁆𑀲𑀦𑁆𑀢𑁄. 𑀅𑀢𑁆𑀣𑀺 𑀓𑀸𑀬𑁄𑀢𑀺 𑀯𑀸 𑀧𑀦𑀲𑁆𑀲𑀸𑀢𑀺 𑀓𑀸𑀬𑁄𑀯 𑀅𑀢𑁆𑀣𑀺, 𑀦 𑀲𑀢𑁆𑀢𑁄, 𑀦 𑀧𑀼𑀕𑁆𑀕𑀮𑁄, 𑀦 𑀇𑀢𑁆𑀣𑀻, 𑀦 𑀧𑀼𑀭𑀺𑀲𑁄, 𑀦 𑀅𑀢𑁆𑀢𑀸, 𑀦 𑀅𑀢𑁆𑀢𑀦𑀺𑀬𑀁, 𑀦𑀸𑀳𑀁, 𑀦 𑀫𑀫, 𑀦 𑀓𑁄𑀘𑀺, 𑀦 𑀓𑀲𑁆𑀲𑀘𑀻𑀢𑀺 𑀏𑀯𑀫𑀲𑁆𑀲 𑀲𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺.

𑀬𑀸𑀯𑀤𑁂𑀯𑀸𑀢𑀺 ¶ ¶ 𑀧𑀬𑁄𑀚𑀦𑀧𑀭𑀺𑀘𑁆𑀙𑁂𑀤𑀯𑀯𑀢𑁆𑀣𑀸𑀧𑀦𑀫𑁂𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀸 𑀲𑀸 𑀲𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺, 𑀲𑀸 𑀦 𑀅𑀜𑁆𑀜𑀤𑀢𑁆𑀣𑀸𑀬. 𑀅𑀣 𑀔𑁄 𑀬𑀸𑀯𑀤𑁂𑀯 𑀜𑀸𑀡𑀫𑀢𑁆𑀢𑀸𑀬 𑀅𑀧𑀭𑀸𑀧𑀭𑀁 𑀉𑀢𑁆𑀢𑀭𑀼𑀢𑁆𑀢𑀭𑀺 𑀜𑀸𑀡𑀧𑀫𑀸𑀡𑀢𑁆𑀣𑀸𑀬 𑀘𑁂𑀯 𑀲𑀢𑀺𑀧𑀫𑀸𑀡𑀢𑁆𑀣𑀸𑀬 𑀘, 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀦𑀁 𑀯𑀼𑀟𑁆𑀠𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀦𑀺𑀲𑁆𑀲𑀺𑀢𑁄 𑀘 𑀯𑀺𑀳𑀭𑀢𑀻𑀢𑀺 𑀢𑀡𑁆𑀳𑀸𑀦𑀺𑀲𑁆𑀲𑀬𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀸𑀦𑀁 𑀯𑀲𑁂𑀦 𑀅𑀦𑀺𑀲𑁆𑀲𑀺𑀢𑁄𑀯 𑀯𑀺𑀳𑀭𑀢𑀺. 𑀦 𑀘 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀻𑀢𑀺 𑀮𑁄𑀓𑀲𑁆𑀫𑀺𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀯𑀸…𑀧𑁂… 𑀯𑀺𑀜𑁆𑀜𑀸𑀡𑀁 𑀯𑀸 ‘‘𑀅𑀬𑀁 𑀫𑁂 𑀅𑀢𑁆𑀢𑀸 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸’’𑀢𑀺 𑀦 𑀕𑀡𑁆𑀳𑀸𑀢𑀺. 𑀏𑀯𑀫𑁆𑀧𑀻𑀢𑀺 𑀉𑀧𑀭𑀺 𑀅𑀢𑁆𑀣𑀁 𑀉𑀧𑀸𑀤𑀸𑀬 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 𑀧𑀺-𑀓𑀸𑀭𑁄. 𑀇𑀫𑀺𑀦𑀸 𑀧𑀦 𑀧𑀤𑁂𑀦 𑀪𑀕𑀯𑀸 𑀆𑀦𑀸𑀧𑀸𑀦𑀧𑀩𑁆𑀩𑀤𑁂𑀲𑀦𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀤𑀲𑁆𑀲𑁂𑀢𑀺.

𑀢𑀢𑁆𑀣 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺 𑀤𑀼𑀓𑁆𑀔𑀲𑀘𑁆𑀘𑀁, 𑀢𑀲𑁆𑀲𑀸 𑀲𑀫𑀼𑀝𑁆𑀞𑀸𑀧𑀺𑀓𑀸 𑀧𑀼𑀭𑀺𑀫𑀢𑀡𑁆𑀳𑀸 𑀲𑀫𑀼𑀤𑀬𑀲𑀘𑁆𑀘𑀁 𑀉𑀪𑀺𑀦𑁆𑀦𑀁 𑀅𑀧𑁆𑀧𑀯𑀢𑁆𑀢𑀺 𑀦𑀺𑀭𑁄𑀥𑀲𑀘𑁆𑀘𑀁, 𑀤𑀼𑀓𑁆𑀔𑀧𑀭𑀺𑀚𑀸𑀦𑀦𑁄 𑀲𑀫𑀼𑀤𑀬𑀧𑀚𑀳𑀦𑁄 𑀦𑀺𑀭𑁄𑀥𑀸𑀭𑀫𑁆𑀫𑀡𑁄 𑀅𑀭𑀺𑀬𑀫𑀕𑁆𑀕𑁄 𑀫𑀕𑁆𑀕𑀲𑀘𑁆𑀘𑀁. 𑀏𑀯𑀁 𑀘𑀢𑀼𑀲𑀘𑁆𑀘𑀯𑀲𑁂𑀦 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀦𑀺𑀩𑁆𑀩𑀼𑀢𑀺𑀁 𑀧𑀸𑀧𑀼𑀡𑀸𑀢𑀻𑀢𑀺 𑀇𑀤𑀫𑁂𑀓𑀲𑁆𑀲 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀸𑀯 𑀅𑀭𑀳𑀢𑁆𑀢𑀸 𑀦𑀺𑀬𑁆𑀬𑀸𑀦𑀫𑀼𑀔𑀦𑁆𑀢𑀺.

𑀆𑀦𑀸𑀧𑀸𑀦𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀇𑀭𑀺𑀬𑀸𑀧𑀣𑀧𑀩𑁆𑀩𑀯𑀡𑁆𑀡𑀦𑀸

𑁩𑁭𑁫. 𑀏𑀯𑀁 ¶ 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀯𑀲𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀁 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀇𑀭𑀺𑀬𑀸𑀧𑀣𑀯𑀲𑁂𑀦 𑀯𑀺𑀪𑀚𑀺𑀢𑀼𑀁 𑀧𑀼𑀦 𑀘𑀧𑀭𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀸𑀫𑀁 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀬𑁄𑀧𑀺 𑀕𑀘𑁆𑀙𑀦𑁆𑀢𑀸 ‘‘𑀕𑀘𑁆𑀙𑀸𑀫𑀸’’𑀢𑀺 𑀚𑀸𑀦𑀦𑁆𑀢𑀺, 𑀦 𑀧𑀦𑁂𑀢𑀁 𑀏𑀯𑀭𑀽𑀧𑀁 𑀚𑀸𑀦𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀯𑀭𑀽𑀧𑀜𑁆𑀳𑀺 𑀚𑀸𑀦𑀦𑀁 𑀲𑀢𑁆𑀢𑀽𑀧𑀮𑀤𑁆𑀥𑀺𑀁 𑀦 𑀧𑀚𑀳𑀢𑀺, 𑀅𑀢𑁆𑀢𑀲𑀜𑁆𑀜𑀁 𑀦 𑀉𑀕𑁆𑀖𑀸𑀝𑁂𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀯𑀸 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸 𑀯𑀸 𑀦 𑀳𑁄𑀢𑀺. 𑀇𑀫𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑁄 𑀚𑀸𑀦𑀦𑀁 𑀲𑀢𑁆𑀢𑀽𑀧𑀮𑀤𑁆𑀥𑀺𑀁 𑀧𑀚𑀳𑀢𑀺, 𑀅𑀢𑁆𑀢𑀲𑀜𑁆𑀜𑀁 𑀉𑀕𑁆𑀖𑀸𑀝𑁂𑀢𑀺 𑀓𑀫𑁆𑀫𑀝𑁆𑀞𑀸𑀦𑀜𑁆𑀘𑁂𑀯 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸 𑀘 𑀳𑁄𑀢𑀺. 𑀇𑀤𑀜𑁆𑀳𑀺 ‘‘𑀓𑁄 𑀕𑀘𑁆𑀙𑀢𑀺, 𑀓𑀲𑁆𑀲 𑀕𑀫𑀦𑀁, 𑀓𑀺𑀁 𑀓𑀸𑀭𑀡𑀸 𑀕𑀘𑁆𑀙𑀢𑀻’’𑀢𑀺 𑀏𑀯𑀁 𑀲𑀫𑁆𑀧𑀚𑀸𑀦𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀞𑀸𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 𑀓𑁄 𑀕𑀘𑁆𑀙𑀢𑀻𑀢𑀺? 𑀦 𑀓𑁄𑀘𑀺 𑀲𑀢𑁆𑀢𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸 𑀕𑀘𑁆𑀙𑀢𑀺. 𑀓𑀲𑁆𑀲 𑀕𑀫𑀦𑀦𑁆𑀢𑀺? 𑀦 𑀓𑀲𑁆𑀲𑀘𑀺 𑀲𑀢𑁆𑀢𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀕𑀫𑀦𑀁. 𑀓𑀺𑀁 𑀓𑀸𑀭𑀡𑀸 𑀕𑀘𑁆𑀙𑀢𑀻𑀢𑀺 ¶ ? 𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦 𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀏𑀲 𑀏𑀯𑀁 𑀧𑀚𑀸𑀦𑀸𑀢𑀺 𑁋 ‘‘𑀕𑀘𑁆𑀙𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 ¶ , 𑀢𑀁 𑀯𑀸𑀬𑀁 𑀚𑀦𑁂𑀢𑀺, 𑀯𑀸𑀬𑁄 𑀯𑀺𑀜𑁆𑀜𑀢𑁆𑀢𑀺𑀁 𑀚𑀦𑁂𑀢𑀺, 𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦 𑀲𑀓𑀮𑀓𑀸𑀬𑀲𑁆𑀲 𑀧𑀼𑀭𑀢𑁄 𑀅𑀪𑀺𑀦𑀻𑀳𑀸𑀭𑁄 𑀕𑀫𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀞𑀸𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀭𑀸𑀧𑀺 𑀳𑀺 ‘‘𑀢𑀺𑀝𑁆𑀞𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀯𑀸𑀬𑀁 𑀚𑀦𑁂𑀢𑀺, 𑀯𑀸𑀬𑁄 𑀯𑀺𑀜𑁆𑀜𑀢𑁆𑀢𑀺𑀁 𑀚𑀦𑁂𑀢𑀺, 𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦 𑀲𑀓𑀮𑀓𑀸𑀬𑀲𑁆𑀲 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀉𑀲𑁆𑀲𑀺𑀢𑀪𑀸𑀯𑁄 𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀦𑀺𑀲𑀻𑀤𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀯𑀸𑀬𑀁 𑀚𑀦𑁂𑀢𑀺, 𑀯𑀸𑀬𑁄 𑀯𑀺𑀜𑁆𑀜𑀢𑁆𑀢𑀺𑀁 𑀚𑀦𑁂𑀢𑀺, 𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦 𑀳𑁂𑀝𑁆𑀞𑀺𑀫𑀓𑀸𑀬𑀲𑁆𑀲 𑀲𑀫𑀺𑀜𑁆𑀚𑀦𑀁 𑀉𑀧𑀭𑀺𑀫𑀓𑀸𑀬𑀲𑁆𑀲 𑀉𑀲𑁆𑀲𑀺𑀢𑀪𑀸𑀯𑁄 𑀦𑀺𑀲𑀚𑁆𑀚𑀸𑀢𑀺 𑀯𑀼𑀘𑁆𑀘𑀢𑀺. ‘‘𑀲𑀬𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀯𑀸𑀬𑀁 𑀚𑀦𑁂𑀢𑀺, 𑀯𑀸𑀬𑁄 𑀯𑀺𑀜𑁆𑀜𑀢𑁆𑀢𑀺𑀁 𑀚𑀦𑁂𑀢𑀺, 𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦 𑀲𑀓𑀮𑀲𑀭𑀻𑀭𑀲𑁆𑀲 𑀢𑀺𑀭𑀺𑀬𑀢𑁄 𑀧𑀲𑀸𑀭𑀡𑀁 𑀲𑀬𑀦𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀢𑀲𑁆𑀲 𑀏𑀯𑀁 𑀧𑀚𑀸𑀦𑀢𑁄 𑀏𑀯𑀁 𑀳𑁄𑀢𑀺 ‘‘𑀲𑀢𑁆𑀢𑁄 𑀕𑀘𑁆𑀙𑀢𑀺, 𑀲𑀢𑁆𑀢𑁄 𑀢𑀺𑀝𑁆𑀞𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀅𑀢𑁆𑀣𑀢𑁄 𑀧𑀦 𑀓𑁄𑀘𑀺 𑀲𑀢𑁆𑀢𑁄 𑀕𑀘𑁆𑀙𑀦𑁆𑀢𑁄 𑀯𑀸 𑀞𑀺𑀢𑁄 𑀯𑀸 𑀦𑀢𑁆𑀣𑀺. 𑀬𑀣𑀸 𑀧𑀦 ‘‘𑀲𑀓𑀝𑀁 𑀕𑀘𑁆𑀙𑀢𑀺, 𑀲𑀓𑀝𑀁 𑀢𑀺𑀝𑁆𑀞𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀦 𑀘 𑀓𑀺𑀜𑁆𑀘𑀺 𑀲𑀓𑀝𑀁 𑀦𑀸𑀫 𑀕𑀘𑁆𑀙𑀦𑁆𑀢𑀁 𑀯𑀸 𑀞𑀺𑀢𑀁 𑀯𑀸 𑀅𑀢𑁆𑀣𑀺, 𑀘𑀢𑁆𑀢𑀸𑀭𑁄 𑀧𑀦 𑀕𑁄𑀡𑁂 𑀬𑁄𑀚𑁂𑀢𑁆𑀯𑀸 𑀙𑁂𑀓𑀫𑁆𑀳𑀺 𑀲𑀸𑀭𑀣𑀺𑀫𑁆𑀳𑀺 𑀧𑀸𑀚𑁂𑀦𑁆𑀢𑁂 ‘‘𑀲𑀓𑀝𑀁 𑀕𑀘𑁆𑀙𑀢𑀺, 𑀲𑀓𑀝𑀁 𑀢𑀺𑀝𑁆𑀞𑀢𑀻’’𑀢𑀺 𑀯𑁄𑀳𑀸𑀭𑀫𑀢𑁆𑀢𑀫𑁂𑀯 ¶ 𑀳𑁄𑀢𑀺, 𑀏𑀯𑀫𑁂𑀯 𑀅𑀚𑀸𑀦𑀦𑀝𑁆𑀞𑁂𑀦 𑀲𑀓𑀝𑀁 𑀯𑀺𑀬 𑀓𑀸𑀬𑁄, 𑀕𑁄𑀡𑀸 𑀯𑀺𑀬 𑀘𑀺𑀢𑁆𑀢𑀚𑀯𑀸𑀢𑀸, 𑀲𑀸𑀭𑀣𑀺 𑀯𑀺𑀬 𑀘𑀺𑀢𑁆𑀢𑀁. ‘‘𑀕𑀘𑁆𑀙𑀸𑀫𑀺 𑀢𑀺𑀝𑁆𑀞𑀸𑀫𑀻’’𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀯𑀸𑀬𑁄𑀥𑀸𑀢𑀼 𑀯𑀺𑀜𑁆𑀜𑀢𑁆𑀢𑀺𑀁 𑀚𑀦𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦 𑀕𑀫𑀦𑀸𑀤𑀻𑀦𑀺 𑀧𑀯𑀢𑁆𑀢𑀦𑁆𑀢𑀺, 𑀢𑀢𑁄 ‘‘𑀲𑀢𑁆𑀢𑁄 𑀕𑀘𑁆𑀙𑀢𑀺, 𑀲𑀢𑁆𑀢𑁄 𑀢𑀺𑀝𑁆𑀞𑀢𑀺, 𑀅𑀳𑀁 𑀕𑀘𑁆𑀙𑀸𑀫𑀺, 𑀅𑀳𑀁 𑀢𑀺𑀝𑁆𑀞𑀸𑀫𑀻’’𑀢𑀺 𑀯𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 𑁋

‘‘𑀦𑀸𑀯𑀸 𑀫𑀸𑀮𑀼𑀢𑀯𑁂𑀕𑁂𑀦, 𑀚𑀺𑀬𑀸𑀯𑁂𑀕𑁂𑀦 𑀢𑁂𑀚𑀦𑀁;

𑀬𑀣𑀸 𑀬𑀸𑀢𑀺 𑀢𑀣𑀸 𑀓𑀸𑀬𑁄, 𑀬𑀸𑀢𑀺 𑀯𑀸𑀢𑀸𑀳𑀢𑁄 𑀅𑀬𑀁.

𑀬𑀦𑁆𑀢𑀁 ¶ 𑀲𑀼𑀢𑁆𑀢𑀯𑀲𑁂𑀦𑁂𑀯, 𑀘𑀺𑀢𑁆𑀢𑀲𑀼𑀢𑁆𑀢𑀯𑀲𑁂𑀦𑀺𑀤𑀁;

𑀧𑀬𑀼𑀢𑁆𑀢𑀁 𑀓𑀸𑀬𑀬𑀦𑁆𑀢𑀫𑁆𑀧𑀺, 𑀬𑀸𑀢𑀺 𑀞𑀸𑀢𑀺 𑀦𑀺𑀲𑀻𑀤𑀢𑀺.

𑀓𑁄 𑀦𑀸𑀫 𑀏𑀢𑁆𑀣 𑀲𑁄 𑀲𑀢𑁆𑀢𑁄, 𑀬𑁄 𑀯𑀺𑀦𑀸 𑀳𑁂𑀢𑀼𑀧𑀘𑁆𑀘𑀬𑁂;

𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦, 𑀢𑀺𑀝𑁆𑀞𑁂 𑀯𑀸 𑀬𑀤𑀺 𑀯𑀸 𑀯𑀚𑁂’’𑀢𑀺.

𑀢𑀲𑁆𑀫𑀸 𑀏𑀯𑀁 𑀳𑁂𑀢𑀼𑀧𑀘𑁆𑀘𑀬𑀯𑀲𑁂𑀦𑁂𑀯 𑀧𑀯𑀢𑁆𑀢𑀸𑀦𑀺 𑀕𑀫𑀦𑀸𑀤𑀻𑀦𑀺 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀏𑀲 ‘‘𑀕𑀘𑁆𑀙𑀦𑁆𑀢𑁄 𑀯𑀸 𑀕𑀘𑁆𑀙𑀸𑀫𑀻𑀢𑀺 ¶ 𑀧𑀚𑀸𑀦𑀸𑀢𑀺, 𑀞𑀺𑀢𑁄 𑀯𑀸, 𑀦𑀺𑀲𑀺𑀦𑁆𑀦𑁄 𑀯𑀸, 𑀲𑀬𑀸𑀦𑁄 𑀯𑀸 𑀲𑀬𑀸𑀦𑁄𑀫𑁆𑀳𑀻𑀢𑀺 𑀧𑀚𑀸𑀦𑀸𑀢𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀬𑀣𑀸 𑀬𑀣𑀸 𑀯𑀸 𑀧𑀦𑀲𑁆𑀲 𑀓𑀸𑀬𑁄 𑀧𑀡𑀺𑀳𑀺𑀢𑁄 𑀳𑁄𑀢𑀺, 𑀢𑀣𑀸 𑀢𑀣𑀸 𑀦𑀁 𑀧𑀚𑀸𑀦𑀸𑀢𑀻𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀘𑀦𑀫𑁂𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁂𑀦 𑀬𑁂𑀦 𑀯𑀸 𑀆𑀓𑀸𑀭𑁂𑀦𑀲𑁆𑀲 𑀓𑀸𑀬𑁄 𑀞𑀺𑀢𑁄 𑀳𑁄𑀢𑀺, 𑀢𑁂𑀦 𑀢𑁂𑀦 𑀦𑀁 𑀧𑀚𑀸𑀦𑀸𑀢𑀺. 𑀕𑀫𑀦𑀸𑀓𑀸𑀭𑁂𑀦 𑀞𑀺𑀢𑀁 𑀕𑀘𑁆𑀙𑀢𑀻𑀢𑀺 𑀧𑀚𑀸𑀦𑀸𑀢𑀺. 𑀞𑀸𑀦𑀦𑀺𑀲𑀚𑁆𑀚𑀲𑀬𑀦𑀸𑀓𑀸𑀭𑁂𑀦 𑀞𑀺𑀢𑀁 𑀲𑀬𑀸𑀦𑁄𑀢𑀺 𑀧𑀚𑀸𑀦𑀸𑀢𑀻𑀢𑀺.

𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀯𑀸 𑀘𑀢𑀼𑀇𑀭𑀺𑀬𑀸𑀧𑀣𑀧𑀭𑀺𑀕𑁆𑀕𑀡𑁆𑀳𑀦𑁂𑀦 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀩𑀳𑀺𑀤𑁆𑀥𑀸 𑀯𑀸𑀢𑀺 𑀧𑀭𑀲𑁆𑀲 𑀯𑀸 𑀘𑀢𑀼𑀇𑀭𑀺𑀬𑀸𑀧𑀣𑀧𑀭𑀺𑀕𑁆𑀕𑀡𑁆𑀳𑀦𑁂𑀦. 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸𑀢𑀺 𑀓𑀸𑀮𑁂𑀦 𑀅𑀢𑁆𑀢𑀦𑁄, 𑀓𑀸𑀮𑁂𑀦 𑀧𑀭𑀲𑁆𑀲 𑀘𑀢𑀼𑀇𑀭𑀺𑀬𑀸𑀧𑀣𑀧𑀭𑀺𑀕𑁆𑀕𑀡𑁆𑀳𑀦𑁂𑀦 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸𑀢𑀺𑀆𑀤𑀻𑀲𑀼 𑀧𑀦 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀘 𑀯𑀬𑁄 𑀘 𑀦𑀻𑀳𑀭𑀺𑀢𑀩𑁆𑀩𑁄. 𑀢𑀜𑁆𑀳𑀺 𑀲𑀦𑁆𑀥𑀸𑀬 𑀇𑀥 ‘‘𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀺 𑀓𑀸𑀬𑁄𑀢𑀺 𑀯𑀸 𑀧𑀦𑀲𑁆𑀲𑀸𑀢𑀺𑀆𑀤𑀺 𑀯𑀼𑀢𑁆𑀢𑀲𑀤𑀺𑀲𑀫𑁂𑀯.

𑀇𑀥𑀸𑀧𑀺 ¶ 𑀘𑀢𑀼𑀇𑀭𑀺𑀬𑀸𑀧𑀣𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺 𑀤𑀼𑀓𑁆𑀔𑀲𑀘𑁆𑀘𑀁, 𑀢𑀲𑁆𑀲𑀸 𑀲𑀫𑀼𑀝𑁆𑀞𑀸𑀧𑀺𑀓𑀸 𑀧𑀼𑀭𑀺𑀫𑀢𑀡𑁆𑀳𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀉𑀪𑀺𑀦𑁆𑀦𑀁 𑀅𑀧𑁆𑀧𑀯𑀢𑁆𑀢𑀺 𑀦𑀺𑀭𑁄𑀥𑀲𑀘𑁆𑀘𑀁, 𑀤𑀼𑀓𑁆𑀔𑀧𑀭𑀺𑀚𑀸𑀦𑀦𑁄 𑀲𑀫𑀼𑀤𑀬𑀧𑀚𑀳𑀦𑁄 𑀦𑀺𑀭𑁄𑀥𑀸𑀭𑀫𑁆𑀫𑀡𑁄 𑀅𑀭𑀺𑀬𑀫𑀕𑁆𑀕𑁄 𑀫𑀕𑁆𑀕𑀲𑀘𑁆𑀘𑀁. 𑀏𑀯𑀁 𑀘𑀢𑀼𑀲𑀘𑁆𑀘𑀯𑀲𑁂𑀦 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀦𑀺𑀩𑁆𑀩𑀼𑀢𑀺𑀁 𑀧𑀸𑀧𑀼𑀡𑀸𑀢𑀻𑀢𑀺 𑀇𑀤𑀫𑁂𑀓𑀲𑁆𑀲 𑀘𑀢𑀼𑀇𑀭𑀺𑀬𑀸𑀧𑀣𑀧𑀭𑀺𑀕𑁆𑀕𑀸𑀳𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀸𑀯 𑀅𑀭𑀳𑀢𑁆𑀢𑀸 𑀦𑀺𑀬𑁆𑀬𑀸𑀦𑀫𑀼𑀔𑀦𑁆𑀢𑀺.

𑀇𑀭𑀺𑀬𑀸𑀧𑀣𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀘𑀢𑀼𑀲𑀫𑁆𑀧𑀚𑀜𑁆𑀜𑀧𑀩𑁆𑀩𑀯𑀡𑁆𑀡𑀦𑀸

𑁩𑁭𑁬. 𑀏𑀯𑀁 𑀇𑀭𑀺𑀬𑀸𑀧𑀣𑀯𑀲𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀁 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀘𑀢𑀼𑀲𑀫𑁆𑀧𑀚𑀜𑁆𑀜𑀯𑀲𑁂𑀦 𑀯𑀺𑀪𑀚𑀺𑀢𑀼𑀁 𑀧𑀼𑀦 𑀘𑀧𑀭𑀦𑁆𑀢𑀺𑀆𑀤𑀺𑀫𑀸𑀳 ¶ . 𑀢𑀢𑁆𑀣 𑀅𑀪𑀺𑀓𑁆𑀓𑀦𑁆𑀢𑁂𑀢𑀺𑀆𑀤𑀻𑀦𑀺 𑀲𑀸𑀫𑀜𑁆𑀜𑀨𑀮𑁂 𑀯𑀡𑁆𑀡𑀺𑀢𑀸𑀦𑀺. 𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸𑀢𑀺 𑀏𑀯𑀁 𑀘𑀢𑀼𑀲𑀫𑁆𑀧𑀚𑀜𑁆𑀜𑀧𑀭𑀺𑀕𑁆𑀕𑀡𑁆𑀳𑀦𑁂𑀦 𑀅𑀢𑁆𑀢𑀦𑁄 𑀯𑀸 𑀓𑀸𑀬𑁂, 𑀧𑀭𑀲𑁆𑀲 𑀯𑀸 𑀓𑀸𑀬𑁂, 𑀓𑀸𑀮𑁂𑀦 𑀯𑀸 𑀅𑀢𑁆𑀢𑀦𑁄, 𑀓𑀸𑀮𑁂𑀦 𑀯𑀸 𑀧𑀭𑀲𑁆𑀲 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀇𑀥𑀸𑀧𑀺 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻𑀢𑀺𑀆𑀤𑀻𑀲𑀼 ¶ 𑀭𑀽𑀧𑀓𑁆𑀔𑀦𑁆𑀥𑀲𑁆𑀲𑁂𑀯 𑀲𑀫𑀼𑀤𑀬𑁄 𑀘 𑀯𑀬𑁄 𑀘 𑀦𑀻𑀳𑀭𑀺𑀢𑀩𑁆𑀩𑁄. 𑀲𑁂𑀲𑀁 𑀯𑀼𑀢𑁆𑀢𑀲𑀤𑀺𑀲𑀫𑁂𑀯.

𑀇𑀥 𑀘𑀢𑀼𑀲𑀫𑁆𑀧𑀚𑀜𑁆𑀜𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺 𑀤𑀼𑀓𑁆𑀔𑀲𑀘𑁆𑀘𑀁, 𑀢𑀲𑁆𑀲𑀸 𑀲𑀫𑀼𑀝𑁆𑀞𑀸𑀧𑀺𑀓𑀸 𑀧𑀼𑀭𑀺𑀫𑀢𑀡𑁆𑀳𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀉𑀪𑀺𑀦𑁆𑀦𑀁 𑀅𑀧𑁆𑀧𑀯𑀢𑁆𑀢𑀺 𑀦𑀺𑀭𑁄𑀥𑀲𑀘𑁆𑀘𑀁, 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀅𑀭𑀺𑀬𑀫𑀕𑁆𑀕𑁄 𑀫𑀕𑁆𑀕𑀲𑀘𑁆𑀘𑀁. 𑀏𑀯𑀁 𑀘𑀢𑀼𑀲𑀘𑁆𑀘𑀯𑀲𑁂𑀦 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀦𑀺𑀩𑁆𑀩𑀼𑀢𑀺𑀁 𑀧𑀸𑀧𑀼𑀡𑀸𑀢𑀻𑀢𑀺 𑀇𑀤𑀫𑁂𑀓𑀲𑁆𑀲 𑀘𑀢𑀼𑀲𑀫𑁆𑀧𑀚𑀜𑁆𑀜𑀧𑀭𑀺𑀕𑁆𑀕𑀸𑀳𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀲𑁂𑀦 𑀬𑀸𑀯 𑀅𑀭𑀳𑀢𑁆𑀢𑀸 𑀦𑀺𑀬𑁆𑀬𑀸𑀦𑀫𑀼𑀔𑀦𑁆𑀢𑀺.

𑀘𑀢𑀼𑀲𑀫𑁆𑀧𑀚𑀜𑁆𑀜𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀧𑀩𑁆𑀩𑀯𑀡𑁆𑀡𑀦𑀸

𑁩𑁭𑁭. 𑀏𑀯𑀁 𑀘𑀢𑀼𑀲𑀫𑁆𑀧𑀚𑀜𑁆𑀜𑀯𑀲𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀁 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀯𑀲𑁂𑀦 𑀯𑀺𑀪𑀚𑀺𑀢𑀼𑀁 𑀧𑀼𑀦 𑀘𑀧𑀭𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀫𑀫𑁂𑀯 𑀓𑀸𑀬𑀦𑁆𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀢𑁆𑀣𑀸𑀭𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀓𑀸𑀬𑀕𑀢𑀸𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑁂 𑀯𑀼𑀢𑁆𑀢𑀁. 𑀉𑀪𑀢𑁄𑀫𑀼𑀔𑀸𑀢𑀺 𑀳𑁂𑀝𑁆𑀞𑀸 𑀘 𑀉𑀧𑀭𑀺 𑀘𑀸𑀢𑀺 𑀤𑁆𑀯𑀻𑀳𑀺 𑀫𑀼𑀔𑁂𑀳𑀺 𑀬𑀼𑀢𑁆𑀢𑀸. 𑀦𑀸𑀦𑀸𑀯𑀺𑀳𑀺𑀢𑀲𑁆𑀲𑀸𑀢𑀺 𑀦𑀸𑀦𑀸𑀯𑀺𑀥𑀲𑁆𑀲.

𑀇𑀤𑀁 ¶ 𑀧𑀦𑁂𑀢𑁆𑀣 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀉𑀪𑀢𑁄𑀫𑀼𑀔𑀸 𑀧𑀼𑀢𑁄𑀴𑀺 𑀯𑀺𑀬 𑀳𑀺 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄 𑀓𑀸𑀬𑁄, 𑀢𑀢𑁆𑀣 𑀫𑀺𑀲𑁆𑀲𑁂𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑀦𑀸𑀦𑀸𑀯𑀺𑀥𑀥𑀜𑁆𑀜𑀁 𑀯𑀺𑀬 𑀓𑁂𑀲𑀸𑀤𑀬𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀸, 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄, 𑀢𑀲𑁆𑀲 𑀢𑀁 𑀧𑀼𑀢𑁄𑀴𑀺𑀁 𑀫𑀼𑀜𑁆𑀘𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀢𑁄 𑀦𑀸𑀦𑀸𑀯𑀺𑀥𑀥𑀜𑁆𑀜𑀲𑁆𑀲 𑀧𑀸𑀓𑀝𑀓𑀸𑀮𑁄 𑀯𑀺𑀬 𑀬𑁄𑀕𑀺𑀦𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀲𑁆𑀲 𑀯𑀺𑀪𑀽𑀢𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸𑀢𑀺 𑀏𑀯𑀁 𑀓𑁂𑀲𑀸𑀤𑀺𑀧𑀭𑀺𑀕𑁆𑀕𑀡𑁆𑀳𑀦𑁂𑀦 𑀅𑀢𑁆𑀢𑀦𑁄 𑀯𑀸 𑀓𑀸𑀬𑁂, 𑀧𑀭𑀲𑁆𑀲 𑀯𑀸 𑀓𑀸𑀬𑁂, 𑀓𑀸𑀮𑁂𑀦 𑀯𑀸 𑀅𑀢𑁆𑀢𑀦𑁄, 𑀓𑀸𑀮𑁂𑀦 𑀯𑀸 𑀧𑀭𑀲𑁆𑀲 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀇𑀢𑁄 𑀧𑀭𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀓𑁂𑀯𑀮𑀜𑁆𑀳𑀺 𑀇𑀥 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺 ¶ 𑀏𑀯𑀁 𑀬𑁄𑀚𑀦𑀁 𑀓𑀢𑁆𑀯𑀸 𑀦𑀺𑀬𑁆𑀬𑀸𑀦𑀫𑀼𑀔𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺.

𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀥𑀸𑀢𑀼𑀫𑀦𑀲𑀺𑀓𑀸𑀭𑀧𑀩𑁆𑀩𑀯𑀡𑁆𑀡𑀦𑀸

𑁩𑁭𑁮. 𑀏𑀯𑀁 ¶ 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀯𑀲𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀁 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀥𑀸𑀢𑀼𑀫𑀦𑀲𑀺𑀓𑀸𑀭𑀯𑀲𑁂𑀦 𑀯𑀺𑀪𑀚𑀺𑀢𑀼𑀁 𑀧𑀼𑀦 𑀘𑀧𑀭𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀸𑀬𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑁂𑀦 𑀲𑀤𑁆𑀥𑀺𑀁 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀬𑀣𑀸 𑀓𑁄𑀘𑀺 𑀕𑁄𑀖𑀸𑀢𑀓𑁄 𑀯𑀸 𑀢𑀲𑁆𑀲𑁂𑀯 𑀯𑀸 𑀪𑀢𑁆𑀢𑀯𑁂𑀢𑀦𑀪𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀕𑀸𑀯𑀺𑀁 𑀯𑀥𑀺𑀢𑁆𑀯𑀸 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀘𑀢𑀲𑁆𑀲𑁄 𑀤𑀺𑀲𑀸 𑀕𑀢𑀸𑀦𑀁 𑀫𑀳𑀸𑀧𑀣𑀸𑀦𑀁 𑀯𑁂𑀫𑀚𑁆𑀛𑀝𑁆𑀞𑀸𑀦𑀲𑀗𑁆𑀔𑀸𑀢𑁂 𑀘𑀢𑀼𑀫𑀳𑀸𑀧𑀣𑁂 𑀓𑁄𑀝𑁆𑀞𑀸𑀲𑀁 𑀓𑁄𑀝𑁆𑀞𑀸𑀲𑀁 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀅𑀲𑁆𑀲, 𑀏𑀯𑀫𑁂𑀯 𑀪𑀺𑀓𑁆𑀔𑀼 𑀘𑀢𑀼𑀦𑁆𑀦𑀁 𑀇𑀭𑀺𑀬𑀸𑀧𑀣𑀸𑀦𑀁 𑀬𑁂𑀦 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀞𑀺𑀢𑀢𑁆𑀢𑀸 𑀬𑀣𑀸𑀞𑀺𑀢𑀁, 𑀬𑀣𑀸𑀞𑀺𑀢𑀢𑁆𑀢𑀸 𑀘 𑀬𑀣𑀸𑀧𑀡𑀺𑀳𑀺𑀢𑀁 𑀓𑀸𑀬𑀁 ‘‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀧𑀣𑀯𑀻𑀥𑀸𑀢𑀼…𑀧𑁂… 𑀯𑀸𑀬𑁄𑀥𑀸𑀢𑀽’’𑀢𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀢𑀺.

𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀕𑁄𑀖𑀸𑀢𑀓𑀲𑁆𑀲 𑀕𑀸𑀯𑀺𑀁 𑀧𑁄𑀲𑁂𑀦𑁆𑀢𑀲𑁆𑀲𑀸𑀧𑀺 𑀆𑀖𑀸𑀢𑀦𑀁 𑀆𑀳𑀭𑀦𑁆𑀢𑀲𑁆𑀲𑀸𑀧𑀺 𑀆𑀳𑀭𑀺𑀢𑁆𑀯𑀸 𑀢𑀢𑁆𑀣 𑀩𑀦𑁆𑀥𑀺𑀢𑁆𑀯𑀸 𑀞𑀧𑁂𑀦𑁆𑀢𑀲𑁆𑀲𑀧𑀺 𑀯𑀥𑁂𑀦𑁆𑀢𑀲𑁆𑀲𑀸𑀧𑀺 𑀯𑀥𑀺𑀢𑀁 𑀫𑀢𑀁 𑀧𑀲𑁆𑀲𑀦𑁆𑀢𑀲𑁆𑀲𑀸𑀧𑀺 𑀢𑀸𑀯𑀤𑁂𑀯 𑀕𑀸𑀯𑀻𑀢𑀺 𑀲𑀜𑁆𑀜𑀸 𑀦 𑀅𑀦𑁆𑀢𑀭𑀥𑀸𑀬𑀢𑀺, 𑀬𑀸𑀯 𑀦𑀁 𑀧𑀤𑀸𑀮𑁂𑀢𑁆𑀯𑀸 𑀩𑀺𑀮𑀲𑁄 𑀦 𑀯𑀺𑀪𑀚𑀢𑀺. 𑀯𑀺𑀪𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀧𑀦𑀲𑁆𑀲 𑀕𑀸𑀯𑀻𑀢𑀺 𑀲𑀜𑁆𑀜𑀸 𑀅𑀦𑁆𑀢𑀭𑀥𑀸𑀬𑀢𑀺, 𑀫𑀁𑀲𑀲𑀜𑁆𑀜𑀸 𑀧𑀯𑀢𑁆𑀢𑀢𑀺. 𑀦𑀸𑀲𑁆𑀲 𑀏𑀯𑀁 ¶ 𑀳𑁄𑀢𑀺 𑁋 ‘‘𑀅𑀳𑀁 𑀕𑀸𑀯𑀺𑀁 𑀯𑀺𑀓𑁆𑀓𑀺𑀡𑀸𑀫𑀺, 𑀇𑀫𑁂 𑀕𑀸𑀯𑀺𑀁 𑀳𑀭𑀦𑁆𑀢𑀻’’𑀢𑀺. 𑀅𑀣 𑀔𑁆𑀯𑀲𑁆𑀲 ‘‘𑀅𑀳𑀁 𑀫𑀁𑀲𑀁 𑀯𑀺𑀓𑁆𑀓𑀺𑀡𑀸𑀫𑀺, 𑀇𑀫𑁂 𑀫𑀁𑀲𑀁 𑀳𑀭𑀦𑁆𑀢𑀺’’ 𑀘𑁆𑀘𑁂𑀯 𑀳𑁄𑀢𑀺; 𑀏𑀯𑀫𑁂𑀯 𑀇𑀫𑀲𑁆𑀲𑀸𑀧𑀺 𑀪𑀺𑀓𑁆𑀔𑀼𑀦𑁄 𑀧𑀼𑀩𑁆𑀩𑁂 𑀩𑀸𑀮𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀕𑀺𑀳𑀺𑀪𑀽𑀢𑀲𑁆𑀲𑀸𑀧𑀺 𑀧𑀩𑁆𑀩𑀚𑀺𑀢𑀲𑁆𑀲𑀸𑀧𑀺 𑀢𑀸𑀯𑀤𑁂𑀯 𑀲𑀢𑁆𑀢𑁄𑀢𑀺 𑀯𑀸 𑀧𑀼𑀕𑁆𑀕𑀮𑁄𑀢𑀺 𑀯𑀸 𑀲𑀜𑁆𑀜𑀸 𑀦 𑀅𑀦𑁆𑀢𑀭𑀥𑀸𑀬𑀢𑀺, 𑀬𑀸𑀯 𑀇𑀫𑀫𑁂𑀯 𑀓𑀸𑀬𑀁 𑀬𑀣𑀸𑀞𑀺𑀢𑀁 𑀬𑀣𑀸𑀧𑀡𑀺𑀳𑀺𑀢𑀁 𑀖𑀦𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸 𑀥𑀸𑀢𑀼𑀲𑁄 𑀦 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀥𑀸𑀢𑀼𑀲𑁄 𑀧𑀘𑁆𑀘𑀯𑁂𑀓𑁆𑀔𑀢𑁄 𑀧𑀦𑀲𑁆𑀲 𑀲𑀢𑁆𑀢𑀲𑀜𑁆𑀜𑀸 𑀅𑀦𑁆𑀢𑀭𑀥𑀸𑀬𑀢𑀺, 𑀥𑀸𑀢𑀼𑀯𑀲𑁂𑀦𑁂𑀯 𑀘𑀺𑀢𑁆𑀢𑀁 𑀲𑀦𑁆𑀢𑀺𑀝𑁆𑀞𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘‘𑀇𑀫𑀫𑁂𑀯 𑀓𑀸𑀬𑀁 𑀬𑀣𑀸𑀞𑀺𑀢𑀁 𑀬𑀣𑀸𑀧𑀡𑀺𑀳𑀺𑀢𑀁 𑀥𑀸𑀢𑀼𑀲𑁄 𑀧𑀘𑁆𑀘𑀯𑁂𑀓𑁆𑀔𑀢𑀺 ‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑁄 𑀕𑁄𑀖𑀸𑀢𑀓𑁄 𑀯𑀸…𑀧𑁂… 𑀯𑀸𑀬𑁄𑀥𑀸𑀢𑀽’’𑀢𑀺. 𑀕𑁄𑀖𑀸𑀢𑀓𑁄 𑀯𑀺𑀬 𑀳𑀺 𑀬𑁄𑀕𑀻, 𑀕𑀸𑀯𑀻𑀢𑀺 𑀲𑀜𑁆𑀜𑀸 𑀯𑀺𑀬 𑀲𑀢𑁆𑀢𑀲𑀜𑁆𑀜𑀸, 𑀘𑀢𑀼𑀫𑀳𑀸𑀧𑀣𑁄 𑀯𑀺𑀬 𑀘𑀢𑀼𑀇𑀭𑀺𑀬𑀸𑀧𑀣𑁄, 𑀩𑀺𑀮𑀲𑁄 𑀯𑀺𑀪𑀚𑀺𑀢𑁆𑀯𑀸 ¶ 𑀦𑀺𑀲𑀺𑀦𑁆𑀦𑀪𑀸𑀯𑁄 𑀯𑀺𑀬 𑀥𑀸𑀢𑀼𑀲𑁄 𑀧𑀘𑁆𑀘𑀯𑁂𑀓𑁆𑀔𑀡𑀦𑁆𑀢𑀺 𑀅𑀬𑀫𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸. 𑀓𑀫𑁆𑀫𑀝𑁆𑀞𑀸𑀦𑀓𑀣𑀸 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀸.

𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸𑀢𑀺 𑀏𑀯𑀁 𑀘𑀢𑀼𑀥𑀸𑀢𑀼𑀧𑀭𑀺𑀕𑁆𑀕𑀡𑁆𑀳𑀦𑁂𑀦 𑀅𑀢𑁆𑀢𑀦𑁄 𑀯𑀸 𑀓𑀸𑀬𑁂, 𑀧𑀭𑀲𑁆𑀲 𑀯𑀸 𑀓𑀸𑀬𑁂, 𑀓𑀸𑀮𑁂𑀦 𑀯𑀸 𑀅𑀢𑁆𑀢𑀦𑁄, 𑀓𑀸𑀮𑁂𑀦 𑀯𑀸 𑀧𑀭𑀲𑁆𑀲 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀇𑀢𑁄 𑀧𑀭𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀓𑁂𑀯𑀮𑀜𑁆𑀳𑀺 𑀇𑀥 𑀘𑀢𑀼𑀥𑀸𑀢𑀼𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺 𑀏𑀯𑀁 𑀬𑁄𑀚𑀦𑀁 𑀓𑀢𑁆𑀯𑀸 𑀦𑀺𑀬𑁆𑀬𑀸𑀦𑀫𑀼𑀔𑀁 𑀯𑁂𑀤𑀺𑀢𑀩𑁆𑀩𑀁, 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺.

𑀥𑀸𑀢𑀼𑀫𑀦𑀲𑀺𑀓𑀸𑀭𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀦𑀯𑀲𑀺𑀯𑀣𑀺𑀓𑀧𑀩𑁆𑀩𑀯𑀡𑁆𑀡𑀦𑀸

𑁩𑁭𑁯. 𑀏𑀯𑀁 ¶ 𑀥𑀸𑀢𑀼𑀫𑀦𑀲𑀺𑀓𑀸𑀭𑀯𑀲𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀁 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀦𑀯𑀳𑀺 𑀲𑀺𑀯𑀣𑀺𑀓𑀧𑀩𑁆𑀩𑁂𑀳𑀺 𑀯𑀺𑀪𑀚𑀺𑀢𑀼𑀁 𑀧𑀼𑀦 𑀘𑀧𑀭𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁂𑀬𑁆𑀬𑀣𑀸𑀧𑀺 𑀧𑀲𑁆𑀲𑁂𑀬𑁆𑀬𑀸𑀢𑀺 𑀬𑀣𑀸 𑀧𑀲𑁆𑀲𑁂𑀬𑁆𑀬. 𑀲𑀭𑀻𑀭𑀦𑁆𑀢𑀺 𑀫𑀢𑀲𑀭𑀻𑀭𑀁. 𑀲𑀺𑀯𑀣𑀺𑀓𑀸𑀬 𑀙𑀟𑁆𑀟𑀺𑀢𑀦𑁆𑀢𑀺 𑀲𑀼𑀲𑀸𑀦𑁂 𑀅𑀧𑀯𑀺𑀤𑁆𑀥𑀁. 𑀏𑀓𑀸𑀳𑀁 𑀫𑀢𑀲𑁆𑀲 𑀅𑀲𑁆𑀲𑀸𑀢𑀺 𑀏𑀓𑀸𑀳𑀫𑀢𑀁. 𑀤𑁆𑀯𑀻𑀳𑀁 𑀫𑀢𑀲𑁆𑀲 𑀅𑀲𑁆𑀲𑀸𑀢𑀺 𑀤𑁆𑀯𑀻𑀳𑀫𑀢𑀁. 𑀢𑀻𑀳𑀁 𑀫𑀢𑀲𑁆𑀲 𑀅𑀲𑁆𑀲𑀸𑀢𑀺 𑀢𑀻𑀳𑀫𑀢𑀁. 𑀓𑀫𑁆𑀫𑀸𑀭𑀪𑀲𑁆𑀢𑀸 𑀯𑀺𑀬 𑀯𑀸𑀬𑀼𑀦𑀸 𑀉𑀤𑁆𑀥𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸 𑀬𑀣𑀸𑀦𑀼𑀓𑁆𑀓𑀫𑀁 𑀲𑀫𑀼𑀕𑁆𑀕𑀢𑁂𑀦 𑀲𑀽𑀦𑀪𑀸𑀯𑁂𑀦 𑀉𑀤𑁆𑀥𑀼𑀫𑀸𑀢𑀢𑁆𑀢𑀸 𑀉𑀤𑁆𑀥𑀼𑀫𑀸𑀢𑀁, 𑀉𑀤𑁆𑀥𑀼𑀫𑀸𑀢𑀫𑁂𑀯 𑀉𑀤𑁆𑀥𑀼𑀫𑀸𑀢𑀓𑀁. 𑀧𑀝𑀺𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀉𑀤𑁆𑀥𑀼𑀫𑀸𑀢𑀦𑁆𑀢𑀺 𑀉𑀤𑁆𑀥𑀼𑀫𑀸𑀢𑀓𑀁. 𑀯𑀺𑀦𑀻𑀮𑀁 𑀯𑀼𑀘𑁆𑀘𑀢𑀺 ¶ 𑀯𑀺𑀧𑀭𑀺𑀪𑀺𑀦𑁆𑀦𑀯𑀡𑁆𑀡𑀁, 𑀯𑀺𑀦𑀻𑀮𑀫𑁂𑀯 𑀯𑀺𑀦𑀻𑀮𑀓𑀁. 𑀧𑀝𑀺𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀯𑀺𑀦𑀻𑀮𑀦𑁆𑀢𑀺 𑀯𑀺𑀦𑀻𑀮𑀓𑀁. 𑀫𑀁𑀲𑀼𑀲𑁆𑀲𑀤𑀝𑁆𑀞𑀸𑀦𑁂𑀲𑀼 𑀭𑀢𑁆𑀢𑀯𑀡𑁆𑀡𑀲𑁆𑀲 𑀧𑀼𑀩𑁆𑀩𑀲𑀦𑁆𑀦𑀺𑀘𑀬𑀝𑁆𑀞𑀸𑀦𑁂𑀲𑀼 𑀲𑁂𑀢𑀯𑀡𑁆𑀡𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀘 𑀦𑀻𑀮𑀯𑀡𑁆𑀡𑀲𑁆𑀲 𑀦𑀻𑀮𑀝𑁆𑀞𑀸𑀦𑁂𑀲𑀼 𑀦𑀻𑀮𑀲𑀸𑀝𑀓𑀧𑀸𑀭𑀼𑀢𑀲𑁆𑀲𑁂𑀯 𑀙𑀯𑀲𑀭𑀻𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀭𑀺𑀪𑀺𑀦𑁆𑀦𑀝𑁆𑀞𑀸𑀦𑁂𑀳𑀺 𑀦𑀯𑀳𑀺 𑀯𑀸 𑀯𑀡𑀫𑀼𑀔𑁂𑀳𑀺 𑀯𑀺𑀲𑁆𑀲𑀦𑁆𑀤𑀫𑀸𑀦𑀧𑀼𑀩𑁆𑀩𑀁 𑀯𑀺𑀧𑀼𑀩𑁆𑀩𑀁, 𑀯𑀺𑀧𑀼𑀩𑁆𑀩𑀫𑁂𑀯 𑀯𑀺𑀧𑀼𑀩𑁆𑀩𑀓𑀁. 𑀧𑀝𑀺𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀯𑀺𑀧𑀼𑀩𑁆𑀩𑀦𑁆𑀢𑀺 𑀯𑀺𑀧𑀼𑀩𑁆𑀩𑀓𑀁. 𑀯𑀺𑀧𑀼𑀩𑁆𑀩𑀓𑀁 𑀚𑀸𑀢𑀁 𑀢𑀣𑀸𑀪𑀸𑀯𑀁 𑀕𑀢𑀦𑁆𑀢𑀺 𑀯𑀺𑀧𑀼𑀩𑁆𑀩𑀓𑀚𑀸𑀢𑀁.

𑀲𑁄 𑀇𑀫𑀫𑁂𑀯 𑀓𑀸𑀬𑀦𑁆𑀢𑀺 𑀲𑁄 𑀪𑀺𑀓𑁆𑀔𑀼 𑀇𑀫𑀁 𑀅𑀢𑁆𑀢𑀦𑁄 𑀓𑀸𑀬𑀁 𑀢𑁂𑀦 𑀓𑀸𑀬𑁂𑀦 𑀲𑀤𑁆𑀥𑀺𑀁 𑀜𑀸𑀡𑁂𑀦 𑀉𑀧𑀲𑀁𑀳𑀭𑀢𑀺 𑀉𑀧𑀦𑁂𑀢𑀺. 𑀓𑀣𑀁? 𑀅𑀬𑀫𑁆𑀧𑀺 𑀔𑁄 𑀓𑀸𑀬𑁄 𑀏𑀯𑀁𑀥𑀫𑁆𑀫𑁄 𑀏𑀯𑀁𑀪𑀸𑀯𑀻 𑀏𑀯𑀁𑀅𑀦𑀢𑀻𑀢𑁄𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀆𑀬𑀼, 𑀉𑀲𑁆𑀫𑀸, 𑀯𑀺𑀜𑁆𑀜𑀸𑀡𑀦𑁆𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀺𑀢𑀸𑀬 𑀅𑀬𑀁 ¶ 𑀓𑀸𑀬𑁄 𑀞𑀸𑀦𑀕𑀫𑀦𑀸𑀤𑀺𑀔𑀫𑁄 𑀳𑁄𑀢𑀺, 𑀇𑀫𑁂𑀲𑀁 𑀧𑀦 𑀯𑀺𑀕𑀫𑀸 𑀅𑀬𑀫𑁆𑀧𑀺 𑀔𑁄 𑀓𑀸𑀬𑁄 𑀏𑀯𑀁𑀥𑀫𑁆𑀫𑁄 𑀏𑀯𑀁 𑀧𑀽𑀢𑀺𑀓𑀲𑀪𑀸𑀯𑁄𑀬𑁂𑀯, 𑀏𑀯𑀁𑀪𑀸𑀯𑀻 𑀏𑀯𑀁 𑀉𑀤𑁆𑀥𑀼𑀫𑀸𑀢𑀸𑀤𑀺𑀪𑁂𑀤𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀁𑀅𑀦𑀢𑀻𑀢𑁄 𑀏𑀯𑀁 𑀉𑀤𑁆𑀥𑀼𑀫𑀸𑀢𑀸𑀤𑀺𑀪𑀸𑀯𑀁 𑀅𑀦𑀢𑀺𑀓𑁆𑀓𑀦𑁆𑀢𑁄𑀢𑀺. 𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸𑀢𑀺 𑀏𑀯𑀁 𑀉𑀤𑁆𑀥𑀼𑀫𑀸𑀢𑀸𑀤𑀺𑀧𑀭𑀺𑀕𑁆𑀕𑀡𑁆𑀳𑀦𑁂𑀦 𑀅𑀢𑁆𑀢𑀦𑁄 𑀯𑀸 𑀓𑀸𑀬𑁂, 𑀧𑀭𑀲𑁆𑀲 𑀯𑀸 𑀓𑀸𑀬𑁂, 𑀓𑀸𑀮𑁂𑀦 𑀯𑀸 𑀅𑀢𑁆𑀢𑀦𑁄, 𑀓𑀸𑀮𑁂𑀦 𑀯𑀸 𑀧𑀭𑀲𑁆𑀲 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

𑀔𑀚𑁆𑀚𑀫𑀸𑀦𑀦𑁆𑀢𑀺 𑀉𑀤𑀭𑀸𑀤𑀻𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 𑀉𑀤𑀭𑀫𑀁𑀲𑀑𑀝𑁆𑀞𑀫𑀁𑀲𑀅𑀓𑁆𑀔𑀺𑀓𑀽𑀝𑀸𑀤𑀻𑀦𑀺 𑀮𑀼𑀜𑁆𑀘𑀺𑀢𑁆𑀯𑀸 𑀮𑀼𑀜𑁆𑀘𑀺𑀢𑁆𑀯𑀸 𑀔𑀸𑀤𑀺𑀬𑀫𑀸𑀦𑀁. 𑀲𑀫𑀁𑀲𑀮𑁄𑀳𑀺𑀢𑀦𑁆𑀢𑀺 𑀲𑀸𑀯𑀲𑁂𑀲𑀫𑀁𑀲𑀮𑁄𑀳𑀺𑀢𑀬𑀼𑀢𑁆𑀢𑀁. 𑀦𑀺𑀫𑀁𑀲𑀮𑁄𑀳𑀺𑀢𑀫𑀓𑁆𑀔𑀺𑀢𑀦𑁆𑀢𑀺 𑀫𑀁𑀲𑁂 𑀔𑀻𑀡𑁂𑀧𑀺 𑀮𑁄𑀳𑀺𑀢𑀁 𑀦 𑀲𑀼𑀲𑁆𑀲𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀦𑀺𑀫𑀁𑀲𑀮𑁄𑀳𑀺𑀢𑀫𑀓𑁆𑀔𑀺𑀢’’𑀦𑁆𑀢𑀺. 𑀅𑀜𑁆𑀜𑁂𑀦𑀸𑀢𑀺 𑀅𑀜𑁆𑀜𑁂𑀦 𑀤𑀺𑀲𑀸𑀪𑀸𑀕𑁂𑀦. 𑀳𑀢𑁆𑀣𑀝𑁆𑀞𑀺𑀓𑀦𑁆𑀢𑀺 𑀘𑀢𑀼𑀲𑀝𑁆𑀞𑀺𑀪𑁂𑀤𑀫𑁆𑀧𑀺 𑀳𑀢𑁆𑀣𑀝𑁆𑀞𑀺𑀓𑀁 𑀧𑀸𑀝𑀺𑀬𑁂𑀓𑁆𑀓𑀁 𑀧𑀸𑀝𑀺𑀬𑁂𑀓𑁆𑀓𑀁 𑀯𑀺𑀧𑁆𑀧𑀓𑀺𑀡𑁆𑀡𑀁. 𑀧𑀸𑀤𑀝𑁆𑀞𑀺𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑁂𑀭𑁄𑀯𑀲𑁆𑀲𑀺𑀓𑀸𑀦𑀻𑀢𑀺 𑀅𑀢𑀺𑀓𑁆𑀓𑀦𑁆𑀢𑀲𑀁𑀯𑀘𑁆𑀙𑀭𑀸𑀦𑀺. 𑀧𑀽𑀢𑀻𑀦𑀻𑀢𑀺 𑀅𑀩𑁆𑀪𑁄𑀓𑀸𑀲𑁂 𑀞𑀺𑀢𑀸𑀦𑀺 𑀯𑀸𑀢𑀸𑀢𑀧𑀯𑀼𑀝𑁆𑀞𑀺𑀲𑀫𑁆𑀨𑀲𑁆𑀲𑁂𑀦 ¶ 𑀢𑁂𑀭𑁄𑀯𑀲𑁆𑀲𑀺𑀓𑀸𑀦𑁂𑀯 𑀧𑀽𑀢𑀻𑀦𑀺 𑀳𑁄𑀦𑁆𑀢𑀺, 𑀅𑀦𑁆𑀢𑁄𑀪𑀽𑀫𑀺𑀕𑀢𑀸𑀦𑀺 𑀧𑀦 𑀘𑀺𑀭𑀢𑀭𑀁 𑀢𑀺𑀝𑁆𑀞𑀦𑁆𑀢𑀺. 𑀘𑀼𑀡𑁆𑀡𑀓𑀚𑀸𑀢𑀸𑀦𑀻𑀢𑀺 𑀘𑀼𑀡𑁆𑀡𑀁 𑀘𑀼𑀡𑁆𑀡𑀁 𑀳𑀼𑀢𑁆𑀯𑀸 𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀺. 𑀲𑀩𑁆𑀩𑀢𑁆𑀣 𑀲𑁄 𑀇𑀫𑀫𑁂𑀯𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀔𑀚𑁆𑀚𑀫𑀸𑀦𑀸𑀤𑀻𑀦𑀁 𑀯𑀲𑁂𑀦 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸𑀢𑀺 𑀏𑀯𑀁 𑀔𑀚𑁆𑀚𑀫𑀸𑀦𑀸𑀤𑀺𑀧𑀭𑀺𑀕𑁆𑀕𑀡𑁆𑀳𑀦𑁂𑀦 𑀬𑀸𑀯 𑀘𑀼𑀡𑁆𑀡𑀓𑀪𑀸𑀯𑀸 𑀅𑀢𑁆𑀢𑀦𑁄 𑀯𑀸 𑀓𑀸𑀬𑁂, 𑀧𑀭𑀲𑁆𑀲 𑀯𑀸 𑀓𑀸𑀬𑁂 𑀓𑀸𑀮𑁂𑀦 𑀯𑀸 𑀅𑀢𑁆𑀢𑀦𑁄, 𑀓𑀸𑀮𑁂𑀦 𑀯𑀸 𑀧𑀭𑀲𑁆𑀲 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

𑀇𑀥 ¶ 𑀧𑀦 𑀞𑀢𑁆𑀯𑀸 𑀦𑀯𑀲𑀺𑀯𑀣𑀺𑀓𑀸 𑀲𑀫𑁄𑀥𑀸𑀦𑁂𑀢𑀩𑁆𑀩𑀸. 𑀏𑀓𑀸𑀳𑀫𑀢𑀁 𑀯𑀸𑀢𑀺 𑀳𑀺 𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸 𑀲𑀩𑁆𑀩𑀸𑀧𑀺 𑀏𑀓𑀸, 𑀓𑀸𑀓𑁂𑀳𑀺 𑀯𑀸 𑀔𑀚𑁆𑀚𑀫𑀸𑀦𑀦𑁆𑀢𑀺𑀆𑀤𑀺𑀓𑀸 𑀏𑀓𑀸, 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀁 𑀲𑀫𑀁𑀲𑀮𑁄𑀳𑀺𑀢𑀁 𑀦𑁆𑀳𑀸𑀭𑀼𑀲𑀫𑁆𑀩𑀦𑁆𑀥𑀦𑁆𑀢𑀺 𑀏𑀓𑀸, 𑀦𑀺𑀫𑀁𑀲𑀮𑁄𑀳𑀺𑀢𑀫𑀓𑁆𑀔𑀺𑀢𑀁 𑀦𑁆𑀳𑀸𑀭𑀼𑀲𑀫𑁆𑀩𑀦𑁆𑀥𑀦𑁆𑀢𑀺 𑀏𑀓𑀸, 𑀅𑀧𑀕𑀢𑀫𑀁𑀲𑀮𑁄𑀳𑀺𑀢𑀁 𑀦𑁆𑀳𑀸𑀭𑀼𑀲𑀫𑁆𑀩𑀦𑁆𑀥𑀦𑁆𑀢𑀺 𑀏𑀓𑀸, 𑀅𑀝𑁆𑀞𑀺𑀓𑀸𑀦𑀺 𑀅𑀧𑀕𑀢𑀲𑀫𑁆𑀩𑀦𑁆𑀥𑀸𑀦𑀻𑀢𑀺𑀆𑀤𑀺𑀓𑀸 𑀏𑀓𑀸 𑀅𑀝𑁆𑀞𑀺𑀓𑀸𑀦𑀺 𑀲𑁂𑀢𑀸𑀦𑀺 𑀲𑀗𑁆𑀔𑀯𑀡𑁆𑀡𑀧𑀝𑀺𑀪𑀸𑀕𑀸𑀦𑀻𑀢𑀺 𑀏𑀓𑀸, 𑀧𑀼𑀜𑁆𑀚𑀓𑀺𑀢𑀸𑀦𑀺 𑀢𑁂𑀭𑁄𑀯𑀲𑁆𑀲𑀺𑀓𑀸𑀦𑀻𑀢𑀺 𑀏𑀓𑀸, 𑀧𑀽𑀢𑀻𑀦𑀺 𑀘𑀼𑀡𑁆𑀡𑀓𑀚𑀸𑀢𑀸𑀦𑀻𑀢𑀺 𑀏𑀓𑀸𑀢𑀺.

𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂𑀢𑀺 𑀇𑀤𑀁 𑀦𑀯𑀲𑀺𑀯𑀣𑀺𑀓𑀸 𑀤𑀲𑁆𑀲𑁂𑀢𑁆𑀯𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀁 𑀦𑀺𑀝𑁆𑀞𑀧𑁂𑀦𑁆𑀢𑁄 𑀆𑀳. 𑀢𑀢𑁆𑀣 𑀦𑀯𑀲𑀺𑀯𑀣𑀺𑀓𑀧𑀭𑀺𑀕𑁆𑀕𑀸𑀳𑀺𑀓𑀸 ¶ 𑀲𑀢𑀺 𑀤𑀼𑀓𑁆𑀔𑀲𑀘𑁆𑀘𑀁, 𑀢𑀲𑁆𑀲𑀸 𑀲𑀫𑀼𑀝𑁆𑀞𑀸𑀧𑀺𑀓𑀸 𑀧𑀼𑀭𑀺𑀫𑀢𑀡𑁆𑀳𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀉𑀪𑀺𑀦𑁆𑀦𑀁 𑀅𑀧𑁆𑀧𑀯𑀢𑁆𑀢𑀺 𑀦𑀺𑀭𑁄𑀥𑀲𑀘𑁆𑀘𑀁, 𑀤𑀼𑀓𑁆𑀔𑀧𑀭𑀺𑀚𑀸𑀦𑀦𑁄 𑀲𑀫𑀼𑀤𑀬𑀧𑀚𑀳𑀦𑁄 𑀦𑀺𑀭𑁄𑀥𑀸𑀭𑀫𑁆𑀫𑀡𑁄 𑀅𑀭𑀺𑀬𑀫𑀕𑁆𑀕𑁄 𑀫𑀕𑁆𑀕𑀲𑀘𑁆𑀘𑀁. 𑀏𑀯𑀁 𑀘𑀢𑀼𑀲𑀘𑁆𑀘𑀯𑀲𑁂𑀦 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀦𑀺𑀩𑁆𑀩𑀼𑀢𑀺𑀁 𑀧𑀸𑀧𑀼𑀡𑀸𑀢𑀻𑀢𑀺 𑀇𑀤𑀁 𑀦𑀯𑀲𑀺𑀯𑀣𑀺𑀓𑀧𑀭𑀺𑀕𑁆𑀕𑀸𑀳𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀬𑀸𑀯 𑀅𑀭𑀳𑀢𑁆𑀢𑀸 𑀦𑀺𑀬𑁆𑀬𑀸𑀦𑀫𑀼𑀔𑀦𑁆𑀢𑀺.

𑀦𑀯𑀲𑀺𑀯𑀣𑀺𑀓𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀏𑀢𑁆𑀢𑀸𑀯𑀢𑀸 𑀘 𑀆𑀦𑀸𑀧𑀸𑀦𑀧𑀩𑁆𑀩𑀁, 𑀇𑀭𑀺𑀬𑀸𑀧𑀣𑀧𑀩𑁆𑀩𑀁, 𑀘𑀢𑀼𑀲𑀫𑁆𑀧𑀚𑀜𑁆𑀜𑀧𑀩𑁆𑀩𑀁, 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀧𑀩𑁆𑀩𑀁, 𑀥𑀸𑀢𑀼𑀫𑀦𑀲𑀺𑀓𑀸𑀭𑀧𑀩𑁆𑀩𑀁, 𑀦𑀯𑀲𑀺𑀯𑀣𑀺𑀓𑀧𑀩𑁆𑀩𑀸𑀦𑀻𑀢𑀺 𑀘𑀼𑀤𑁆𑀤𑀲𑀧𑀩𑁆𑀩𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀦𑀺𑀝𑁆𑀞𑀺𑀢𑀸 𑀳𑁄𑀢𑀺. 𑀢𑀢𑁆𑀣 𑀆𑀦𑀸𑀧𑀸𑀦𑀧𑀩𑁆𑀩𑀁, 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀧𑀩𑁆𑀩𑀦𑁆𑀢𑀺 𑀇𑀫𑀸𑀦𑁂𑀯 𑀤𑁆𑀯𑁂 𑀅𑀧𑁆𑀧𑀦𑀸𑀓𑀫𑁆𑀫𑀝𑁆𑀞𑀸𑀦𑀸𑀦𑀺, 𑀲𑀺𑀯𑀣𑀺𑀓𑀸𑀦𑀁 𑀧𑀦 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀲𑁂𑀲𑀸𑀦𑀺 𑀤𑁆𑀯𑀸𑀤𑀲𑀸𑀧𑀺 𑀉𑀧𑀘𑀸𑀭𑀓𑀫𑁆𑀫𑀝𑁆𑀞𑀸𑀦𑀸𑀦𑁂𑀯𑀸𑀢𑀺.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀦𑀺𑀝𑁆𑀞𑀺𑀢𑀸.

𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀯𑀡𑁆𑀡𑀦𑀸

𑁩𑁮𑁦. 𑀏𑀯𑀁 ¶ 𑀪𑀕𑀯𑀸 𑀘𑀼𑀤𑁆𑀤𑀲𑀯𑀺𑀥𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀦𑀯𑀯𑀺𑀥𑁂𑀦 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀁 𑀓𑀣𑁂𑀢𑀼𑀁 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀔𑀁 𑀯𑁂𑀤𑀦𑀦𑁆𑀢𑀺 𑀓𑀸𑀬𑀺𑀓𑀁 𑀯𑀸 𑀘𑁂𑀢𑀲𑀺𑀓𑀁 𑀯𑀸 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘‘𑀅𑀳𑀁 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 ¶ 𑀓𑀸𑀫𑀁 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑀸𑀧𑀺 𑀤𑀸𑀭𑀓𑀸 𑀣𑀜𑁆𑀜𑀧𑀺𑀯𑀦𑀸𑀤𑀺𑀓𑀸𑀮𑁂 𑀲𑀼𑀔𑀁 𑀯𑁂𑀤𑀬𑀫𑀸𑀦𑀸 ‘‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀸’’𑀢𑀺 𑀧𑀚𑀸𑀦𑀦𑁆𑀢𑀺, 𑀦 𑀧𑀦𑁂𑀢𑀁 𑀏𑀯𑀭𑀽𑀧𑀁 𑀚𑀸𑀦𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀯𑀭𑀽𑀧𑀜𑁆𑀳𑀺 𑀚𑀸𑀦𑀦𑀁 𑀲𑀢𑁆𑀢𑀽𑀧𑀮𑀤𑁆𑀥𑀺𑀁 𑀦 𑀚𑀳𑀢𑀺, 𑀅𑀢𑁆𑀢𑀲𑀜𑁆𑀜𑀁 𑀦 𑀉𑀕𑁆𑀖𑀸𑀝𑁂𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀯𑀸 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸 𑀯𑀸 𑀦 𑀳𑁄𑀢𑀺. 𑀇𑀫𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑁄 𑀚𑀸𑀦𑀦𑀁 𑀲𑀢𑁆𑀢𑀽𑀧𑀮𑀤𑁆𑀥𑀺𑀁 𑀚𑀳𑀢𑀺, 𑀅𑀢𑁆𑀢𑀲𑀜𑁆𑀜𑀁 𑀉𑀕𑁆𑀖𑀸𑀝𑁂𑀢𑀺, 𑀓𑀫𑁆𑀫𑀝𑁆𑀞𑀸𑀦𑀜𑁆𑀘𑁂𑀯 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸 𑀘 𑀳𑁄𑀢𑀺. 𑀇𑀤𑀜𑁆𑀳𑀺 ‘‘𑀓𑁄 𑀯𑁂𑀤𑀬𑀢𑀺, 𑀓𑀲𑁆𑀲 𑀯𑁂𑀤𑀦𑀸, 𑀓𑀺𑀁 𑀓𑀸𑀭𑀡𑀸 𑀯𑁂𑀤𑀦𑀸’’𑀢𑀺 𑀏𑀯𑀁 𑀲𑀫𑁆𑀧𑀚𑀸𑀦𑀯𑁂𑀤𑀺𑀬𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀢𑀢𑁆𑀣 𑀓𑁄 𑀯𑁂𑀤𑀬𑀢𑀻𑀢𑀺 𑀦 𑀓𑁄𑀘𑀺 𑀲𑀢𑁆𑀢𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸 𑀯𑁂𑀤𑀬𑀢𑀺. 𑀓𑀲𑁆𑀲 𑀯𑁂𑀤𑀦𑀸𑀢𑀺 𑀦 𑀓𑀲𑁆𑀲𑀘𑀺 𑀲𑀢𑁆𑀢𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀯𑁂𑀤𑀦𑀸. 𑀓𑀺𑀁 𑀓𑀸𑀭𑀡𑀸 𑀯𑁂𑀤𑀦𑀸𑀢𑀺 𑀯𑀢𑁆𑀣𑀼𑀆𑀭𑀫𑁆𑀫𑀡𑀸𑀯 𑀧𑀦𑀲𑁆𑀲 𑀯𑁂𑀤𑀦𑀸, 𑀢𑀲𑁆𑀫𑀸 𑀏𑀲 𑀏𑀯𑀁 𑀧𑀚𑀸𑀦𑀸𑀢𑀺 ‘‘𑀢𑀁 𑀢𑀁 𑀲𑀼𑀔𑀸𑀤𑀻𑀦𑀁 𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑁂𑀤𑀦𑀸𑀯 𑀯𑁂𑀤𑀬𑀢𑀺 𑀢𑀁 𑀧𑀦 𑀯𑁂𑀤𑀦𑀸𑀬 𑀧𑀯𑀢𑁆𑀢𑀺𑀁 ¶ 𑀉𑀧𑀸𑀤𑀸𑀬’𑀅𑀳𑀁 𑀯𑁂𑀤𑀬𑀸𑀫𑀻’𑀢𑀺 𑀯𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀻’’𑀢𑀺. 𑀏𑀯𑀁 𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑁂𑀤𑀦𑀸𑀯 𑀯𑁂𑀤𑀬𑀢𑀻𑀢𑀺 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀏𑀲 ‘‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻𑀢𑀺 𑀧𑀚𑀸𑀦𑀸𑀢𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄 𑀘𑀺𑀢𑁆𑀢𑀮𑀧𑀩𑁆𑀩𑀢𑁂 𑀅𑀜𑁆𑀜𑀢𑀭𑀢𑁆𑀣𑁂𑀭𑁄 𑀯𑀺𑀬.

𑀣𑁂𑀭𑁄 𑀓𑀺𑀭 𑀅𑀨𑀸𑀲𑀼𑀓𑀓𑀸𑀮𑁂 𑀩𑀮𑀯𑀯𑁂𑀤𑀦𑀸𑀬 𑀦𑀺𑀢𑁆𑀣𑀼𑀦𑀦𑁆𑀢𑁄 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑀢𑀺, 𑀢𑀫𑁂𑀓𑁄 𑀤𑀳𑀭𑁄 𑀆𑀳 𑁋 ‘‘𑀓𑀢𑀭𑀁 𑀯𑁄, 𑀪𑀦𑁆𑀢𑁂, 𑀞𑀸𑀦𑀁 𑀭𑀼𑀚𑁆𑀚𑀢𑀻’’𑀢𑀺. 𑀆𑀯𑀼𑀲𑁄, 𑀧𑀸𑀝𑀺𑀬𑁂𑀓𑁆𑀓𑀁 𑀭𑀼𑀚𑁆𑀚𑀦𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑁂𑀤𑀦𑀸𑀯 𑀯𑁂𑀤𑀬𑀢𑀻𑀢𑀺. 𑀏𑀯𑀁 𑀚𑀸𑀦𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀥𑀺𑀯𑀸𑀲𑁂𑀢𑀼𑀁 𑀯𑀝𑁆𑀝𑀢𑀺 𑀦𑁄, 𑀪𑀦𑁆𑀢𑁂,𑀢𑀺. 𑀅𑀥𑀺𑀯𑀸𑀲𑁂𑀫𑀺, 𑀆𑀯𑀼𑀲𑁄𑀢𑀺. 𑀅𑀥𑀺𑀯𑀸𑀲𑀦𑀸, 𑀪𑀦𑁆𑀢𑁂, 𑀲𑁂𑀬𑁆𑀬𑁄𑀢𑀺. 𑀣𑁂𑀭𑁄 𑀅𑀥𑀺𑀯𑀸𑀲𑁂𑀲𑀺. 𑀯𑀸𑀢𑁄 𑀬𑀸𑀯 𑀳𑀤𑀬𑀸 𑀨𑀸𑀮𑁂𑀲𑀺, 𑀫𑀜𑁆𑀘𑀓𑁂 𑀅𑀦𑁆𑀢𑀸𑀦𑀺 𑀭𑀸𑀲𑀺𑀓𑀢𑀸𑀦𑀺 𑀅𑀳𑁂𑀲𑀼𑀁. 𑀣𑁂𑀭𑁄 𑀤𑀳𑀭𑀲𑁆𑀲 𑀤𑀲𑁆𑀲𑁂𑀲𑀺 ‘‘𑀯𑀝𑁆𑀝𑀢𑀸𑀯𑀼𑀲𑁄, 𑀏𑀢𑁆𑀢𑀓𑀸 𑀅𑀥𑀺𑀯𑀸𑀲𑀦𑀸’’𑀢𑀺. 𑀤𑀳𑀭𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀣𑁂𑀭𑁄 𑀯𑀻𑀭𑀺𑀬𑀲𑀫𑀢𑀁 𑀬𑁄𑀚𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑁆𑀯𑀸 𑀲𑀫𑀲𑀻𑀲𑀻 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀬𑀣𑀸 𑀘 𑀲𑀼𑀔𑀁, 𑀏𑀯𑀁 𑀤𑀼𑀓𑁆𑀔𑀁…𑀧𑁂… 𑀦𑀺𑀭𑀸𑀫𑀺𑀲𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘‘𑀦𑀺𑀭𑀸𑀫𑀺𑀲𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀺. 𑀇𑀢𑀺 𑀪𑀕𑀯𑀸 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀦𑁆𑀢𑁄 𑀬𑀲𑁆𑀫𑀸 𑀨𑀲𑁆𑀲𑀯𑀲𑁂𑀦 𑀘𑀺𑀢𑁆𑀢𑀯𑀲𑁂𑀦 𑀯𑀸 𑀓𑀣𑀺𑀬𑀫𑀸𑀦𑀁 𑀧𑀸𑀓𑀝𑀁 𑀦 𑀳𑁄𑀢𑀺 ¶ , 𑀅𑀦𑁆𑀥𑀓𑀸𑀭𑀁 𑀯𑀺𑀬 𑀔𑀸𑀬𑀢𑀺, 𑀯𑁂𑀤𑀦𑀸𑀦𑀁 𑀧𑀦 𑀉𑀧𑁆𑀧𑀢𑁆𑀢𑀺𑀧𑀸𑀓𑀝𑀢𑀸𑀬 𑀯𑁂𑀤𑀦𑀸𑀯𑀲𑁂𑀦 𑀧𑀸𑀓𑀝𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀓𑁆𑀓𑀧𑀜𑁆𑀳𑁂 𑀯𑀺𑀬 𑀇𑀥𑀸𑀧𑀺 𑀯𑁂𑀤𑀦𑀸𑀯𑀲𑁂𑀦 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑀺. 𑀢𑀢𑁆𑀣 ‘‘𑀤𑀼𑀯𑀺𑀥𑀜𑁆𑀳𑀺 ¶ 𑀓𑀫𑁆𑀫𑀝𑁆𑀞𑀸𑀦𑀁 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀜𑁆𑀘𑀸’’𑀢𑀺𑀆𑀤𑀺 𑀓𑀣𑀸𑀫𑀕𑁆𑀕𑁄 𑀲𑀓𑁆𑀓𑀧𑀜𑁆𑀳𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀲𑀼𑀔𑀁 𑀯𑁂𑀤𑀦𑀦𑁆𑀢𑀺𑀆𑀤𑀻𑀲𑀼 𑀅𑀬𑀁 𑀅𑀧𑀭𑁄𑀧𑀺 𑀧𑀚𑀸𑀦𑀦𑀧𑀭𑀺𑀬𑀸𑀬𑁄, 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻𑀢𑀺 𑀧𑀚𑀸𑀦𑀸𑀢𑀻𑀢𑀺 𑀲𑀼𑀔𑀯𑁂𑀤𑀦𑀸𑀓𑁆𑀔𑀡𑁂 𑀤𑀼𑀓𑁆𑀔𑀯𑁂𑀤𑀦𑀸𑀬 𑀅𑀪𑀸𑀯𑀢𑁄 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘‘𑀲𑀼𑀔𑀁 𑀯𑁂𑀤𑀦𑀁𑀬𑁂𑀯 𑀯𑁂𑀤𑀬𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀺. 𑀢𑁂𑀦 𑀬𑀸 ¶ 𑀧𑀼𑀩𑁆𑀩𑁂 𑀪𑀽𑀢𑀧𑀼𑀩𑁆𑀩𑀸 𑀤𑀼𑀓𑁆𑀔𑀯𑁂𑀤𑀦𑀸, 𑀢𑀲𑁆𑀲 𑀇𑀤𑀸𑀦𑀺 𑀅𑀪𑀸𑀯𑀢𑁄 𑀇𑀫𑀺𑀲𑁆𑀲𑀸 𑀘 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀇𑀢𑁄 𑀧𑀞𑀫𑀁 𑀅𑀪𑀸𑀯𑀢𑁄 𑀯𑁂𑀤𑀦𑀸 𑀦𑀸𑀫 𑀅𑀦𑀺𑀘𑁆𑀘𑀸 𑀅𑀥𑀼𑀯𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸, 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀪𑀕𑀯𑀢𑀸 𑁋

‘‘𑀬𑀲𑁆𑀫𑀺𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀲𑀫𑀬𑁂 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀦 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀲𑀼𑀔𑀁𑀬𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀁 𑀯𑁂𑀤𑁂𑀢𑀺. 𑀬𑀲𑁆𑀫𑀺𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀲𑀫𑀬𑁂 𑀤𑀼𑀓𑁆𑀔𑀁…𑀧𑁂… 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀦 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀁𑀬𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀁 𑀯𑁂𑀤𑁂𑀢𑀺. 𑀲𑀼𑀔𑀸𑀧𑀺, 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸. 𑀤𑀼𑀓𑁆𑀔𑀸𑀧𑀺, 𑀔𑁄…𑀧𑁂… 𑀅𑀤𑀼𑀓𑁆𑀔𑀫𑀲𑀼𑀔𑀸𑀧𑀺 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸…𑀧𑁂… 𑀦𑀺𑀭𑁄𑀥𑀥𑀫𑁆𑀫𑀸. 𑀏𑀯𑀁 𑀧𑀲𑁆𑀲𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄 𑀲𑀼𑀔𑀸𑀬𑀧𑀺 𑀯𑁂𑀤𑀦𑀸𑀬 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀤𑀼𑀓𑁆𑀔𑀸𑀬𑀧𑀺 𑀯𑁂𑀤𑀦𑀸𑀬 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀅𑀤𑀼𑀓𑁆𑀔𑀫𑀲𑀼𑀔𑀸𑀬𑀧𑀺 𑀯𑁂𑀤𑀦𑀸𑀬 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀺, 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀺, 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 ‘𑀯𑀺𑀫𑀼𑀢𑁆𑀢𑀫𑀻’𑀢𑀺 𑀜𑀸𑀡𑀁 𑀳𑁄𑀢𑀺, ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀻’’𑀢𑀺 (𑀫. 𑀦𑀺. 𑁨.𑁨𑁦𑁫).

𑀲𑀸𑀫𑀺𑀲𑀁 𑀯𑀸 𑀲𑀼𑀔𑀦𑁆𑀢𑀺𑀆𑀤𑀻𑀲𑀼 𑀲𑀸𑀫𑀺𑀲𑀸 𑀲𑀼𑀔𑀸 𑀦𑀸𑀫 𑀧𑀜𑁆𑀘𑀓𑀸𑀫𑀕𑀼𑀡𑀸𑀫𑀺𑀲𑀲𑀦𑁆𑀦𑀺𑀲𑁆𑀲𑀺𑀢𑀸 𑀙 𑀕𑁂𑀳𑀲𑀺𑀢𑀲𑁄𑀫𑀦𑀲𑁆𑀲𑀯𑁂𑀤𑀦𑀸. 𑀦𑀺𑀭𑀸𑀫𑀺𑀲𑀸 𑀲𑀼𑀔𑀸 𑀦𑀸𑀫 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀲𑁄𑀫𑀦𑀲𑁆𑀲𑀯𑁂𑀤𑀦𑀸. 𑀲𑀸𑀫𑀺𑀲𑀸 𑀤𑀼𑀓𑁆𑀔𑀸 𑀦𑀸𑀫 𑀙 𑀕𑁂𑀳𑀲𑀺𑀢𑀤𑁄𑀫𑀦𑀲𑁆𑀲𑀯𑁂𑀤𑀦𑀸. 𑀦𑀺𑀭𑀸𑀫𑀺𑀲𑀸 𑀤𑀼𑀓𑁆𑀔𑀸 𑀦𑀸𑀫 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀤𑁄𑀫𑀦𑀲𑁆𑀲𑀯𑁂𑀤𑀦𑀸. 𑀲𑀸𑀫𑀺𑀲𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀦𑀸𑀫 𑀙 𑀕𑁂𑀳𑀲𑀺𑀢𑀉𑀧𑁂𑀓𑁆𑀔𑀸𑀯𑁂𑀤𑀦𑀸. 𑀦𑀺𑀭𑀸𑀫𑀺𑀲𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 ¶ 𑀦𑀸𑀫 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀉𑀧𑁂𑀓𑁆𑀔𑀸𑀯𑁂𑀤𑀦𑀸. 𑀢𑀸𑀲𑀁 𑀯𑀺𑀪𑀸𑀕𑁄 𑀲𑀓𑁆𑀓𑀧𑀜𑁆𑀳𑁂 𑀯𑀼𑀢𑁆𑀢𑁄𑀬𑁂𑀯.

𑀇𑀢𑀺 ¶ 𑀅𑀚𑁆𑀛𑀢𑁆𑀢𑀁 𑀯𑀸𑀢𑀺 𑀏𑀯𑀁 𑀲𑀼𑀔𑀯𑁂𑀤𑀦𑀸𑀤𑀺𑀧𑀭𑀺𑀕𑁆𑀕𑀡𑁆𑀳𑀦𑁂𑀦 𑀅𑀢𑁆𑀢𑀦𑁄 𑀯𑀸 𑀯𑁂𑀤𑀦𑀸𑀲𑀼, 𑀧𑀭𑀲𑁆𑀲 𑀯𑀸 𑀯𑁂𑀤𑀦𑀸𑀲𑀼, 𑀓𑀸𑀮𑁂𑀦 𑀯𑀸 𑀅𑀢𑁆𑀢𑀦𑁄, 𑀓𑀸𑀮𑁂𑀦 𑀯𑀸 𑀧𑀭𑀲𑁆𑀲 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸𑀢𑀺 𑀏𑀢𑁆𑀣 𑀧𑀦 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄𑀢𑀺𑀆𑀤𑀻𑀳𑀺 𑀧𑀜𑁆𑀘𑀳𑀺 𑀧𑀜𑁆𑀘𑀳𑀺 𑀆𑀓𑀸𑀭𑁂𑀳𑀺 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 ¶ 𑀯𑀬𑀜𑁆𑀘 𑀧𑀲𑁆𑀲𑀦𑁆𑀢𑁄 ‘‘𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀯𑁂𑀤𑀦𑀸𑀲𑀼 𑀯𑀺𑀳𑀭𑀢𑀺, 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀯𑁂𑀤𑀦𑀸𑀲𑀼 𑀯𑀺𑀳𑀭𑀢𑀺, 𑀓𑀸𑀮𑁂𑀦 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀯𑁂𑀤𑀦𑀸𑀲𑀼, 𑀓𑀸𑀮𑁂𑀦 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀯𑁂𑀤𑀦𑀸𑀲𑀼 𑀯𑀺𑀳𑀭𑀢𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀢𑁄 𑀧𑀭𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀓𑁂𑀯𑀮𑀜𑁆𑀳𑀺 𑀇𑀥 𑀯𑁂𑀤𑀦𑀸𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺 𑀏𑀯𑀁 𑀬𑁄𑀚𑀦𑀁 𑀓𑀢𑁆𑀯𑀸 𑀯𑁂𑀤𑀦𑀸𑀧𑀭𑀺𑀕𑁆𑀕𑀸𑀳𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑁆𑀬𑀸𑀦𑀫𑀼𑀔𑀁 𑀯𑁂𑀤𑀺𑀢𑀩𑁆𑀩𑀁, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺.

𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀯𑀡𑁆𑀡𑀦𑀸

𑁩𑁮𑁧. 𑀏𑀯𑀁 𑀦𑀯𑀯𑀺𑀥𑁂𑀦 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀲𑁄𑀴𑀲𑀯𑀺𑀥𑁂𑀦 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀁 𑀓𑀣𑁂𑀢𑀼𑀁 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀭𑀸𑀕𑀦𑁆𑀢𑀺 𑀅𑀝𑁆𑀞𑀯𑀺𑀥𑀮𑁄𑀪𑀲𑀳𑀕𑀢𑀁. 𑀯𑀻𑀢𑀭𑀸𑀕𑀦𑁆𑀢𑀺 𑀮𑁄𑀓𑀺𑀬𑀓𑀼𑀲𑀮𑀸𑀩𑁆𑀬𑀸𑀓𑀢𑀁. 𑀇𑀤𑀁 𑀧𑀦 𑀬𑀲𑁆𑀫𑀸 𑀲𑀫𑁆𑀫𑀲𑀦𑀁 𑀦 𑀥𑀫𑁆𑀫𑀲𑀫𑁄𑀥𑀸𑀦𑀁 𑀢𑀲𑁆𑀫𑀸 𑀇𑀥 𑀏𑀓𑀧𑀤𑁂𑀧𑀺 𑀮𑁄𑀓𑀼𑀢𑁆𑀢𑀭𑀁 𑀦 𑀮𑀩𑁆𑀪𑀢𑀺. 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀦𑁂𑀯 𑀧𑀼𑀭𑀺𑀫𑀧𑀤𑀁 𑀦 𑀧𑀘𑁆𑀙𑀺𑀫𑀧𑀤𑀁 𑀪𑀚𑀦𑁆𑀢𑀺. 𑀲𑀤𑁄𑀲𑀦𑁆𑀢𑀺 𑀤𑀼𑀯𑀺𑀥𑀤𑁄𑀫𑀦𑀲𑁆𑀲𑀲𑀳𑀕𑀢𑀁. 𑀯𑀻𑀢𑀤𑁄𑀲𑀦𑁆𑀢𑀺 𑀮𑁄𑀓𑀺𑀬𑀓𑀼𑀲𑀮𑀸𑀩𑁆𑀬𑀸𑀓𑀢𑀁. 𑀲𑁂𑀲𑀸𑀦𑀺 𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀦𑁂𑀯 𑀧𑀼𑀭𑀺𑀫𑀧𑀤𑀁, 𑀦 𑀧𑀘𑁆𑀙𑀺𑀫𑀧𑀤𑀁 𑀪𑀚𑀦𑁆𑀢𑀺. 𑀲𑀫𑁄𑀳𑀦𑁆𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀜𑁆𑀘𑁂𑀯, 𑀉𑀤𑁆𑀥𑀘𑁆𑀘𑀲𑀳𑀕𑀢𑀜𑁆𑀘𑀸𑀢𑀺 𑀤𑀼𑀯𑀺𑀥𑀁. 𑀬𑀲𑁆𑀫𑀸 𑀧𑀦 𑀫𑁄𑀳𑁄 𑀲𑀩𑁆𑀩𑀸𑀓𑀼𑀲𑀮𑁂𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀲𑁂𑀲𑀸𑀦𑀺𑀧𑀺 𑀇𑀥 𑀯𑀝𑁆𑀝𑀦𑁆𑀢𑀺𑀬𑁂𑀯. 𑀇𑀫𑀲𑁆𑀫𑀺𑀜𑁆𑀜𑁂𑀯 𑀳𑀺 𑀤𑀼𑀓𑁂 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀧𑀭𑀺𑀬𑀸𑀤𑀺𑀦𑁆𑀦𑀸𑀦𑀻𑀢𑀺. 𑀯𑀻𑀢𑀫𑁄𑀳𑀦𑁆𑀢𑀺 𑀮𑁄𑀓𑀺𑀬𑀓𑀼𑀲𑀮𑀸𑀩𑁆𑀬𑀸𑀓𑀢𑀁. 𑀲𑀗𑁆𑀔𑀺𑀢𑁆𑀢𑀦𑁆𑀢𑀺 𑀣𑀺𑀦𑀫𑀺𑀤𑁆𑀥𑀸𑀦𑀼𑀧𑀢𑀺𑀢𑀁. 𑀏𑀢𑀜𑁆𑀳𑀺 𑀲𑀗𑁆𑀓𑀼𑀝𑀺𑀢𑀘𑀺𑀢𑁆𑀢𑀁 𑀦𑀸𑀫. 𑀯𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀁, 𑀏𑀢𑀜𑁆𑀳𑀺 𑀧𑀲𑀝𑀘𑀺𑀢𑁆𑀢𑀁 𑀦𑀸𑀫.

𑀫𑀳𑀕𑁆𑀕𑀢𑀦𑁆𑀢𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑀁. 𑀅𑀫𑀳𑀕𑁆𑀕𑀢𑀦𑁆𑀢𑀺 𑀓𑀸𑀫𑀸𑀯𑀘𑀭𑀁. 𑀲𑀉𑀢𑁆𑀢𑀭𑀦𑁆𑀢𑀺 𑀓𑀸𑀫𑀸𑀯𑀘𑀭𑀁. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀜𑁆𑀘. 𑀢𑀢𑁆𑀭𑀸𑀧𑀺 𑀲𑀉𑀢𑁆𑀢𑀭𑀁 𑀭𑀽𑀧𑀸𑀯𑀘𑀭𑀁, 𑀅𑀦𑀼𑀢𑁆𑀢𑀭𑀁 ¶ 𑀅𑀭𑀽𑀧𑀸𑀯𑀘𑀭𑀫𑁂𑀯. 𑀲𑀫𑀸𑀳𑀺𑀢𑀦𑁆𑀢𑀺 𑀬𑀲𑁆𑀲 𑀅𑀧𑁆𑀧𑀦𑀸𑀲𑀫𑀸𑀥𑀺 𑀉𑀧𑀘𑀸𑀭𑀲𑀫𑀸𑀥𑀺 𑀯𑀸 𑀅𑀢𑁆𑀣𑀺. 𑀅𑀲𑀫𑀸𑀳𑀺𑀢𑀦𑁆𑀢𑀺 𑀉𑀪𑀬𑀲𑀫𑀸𑀥𑀺𑀯𑀺𑀭𑀳𑀺𑀢𑀁 ¶ . 𑀯𑀺𑀫𑀼𑀢𑁆𑀢𑀦𑁆𑀢𑀺 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀻𑀳𑀺 𑀯𑀺𑀫𑀼𑀢𑁆𑀢𑀁. 𑀅𑀯𑀺𑀫𑀼𑀢𑁆𑀢𑀦𑁆𑀢𑀺 𑀉𑀪𑀬𑀯𑀺𑀫𑀼𑀢𑁆𑀢𑀺𑀯𑀺𑀭𑀳𑀺𑀢𑀁. 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀻𑀦𑀁 𑀧𑀦 𑀇𑀥 𑀑𑀓𑀸𑀲𑁄𑀯 𑀦𑀢𑁆𑀣𑀺.

𑀇𑀢𑀺 ¶ 𑀅𑀚𑁆𑀛𑀢𑁆𑀢𑀁 𑀯𑀸𑀢𑀺 𑀏𑀯𑀁 𑀲𑀭𑀸𑀕𑀸𑀤𑀺𑀧𑀭𑀺𑀕𑁆𑀕𑀡𑁆𑀳𑀦𑁂𑀦 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀔𑀡𑁂 𑀬𑀁 𑀬𑀁 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀺, 𑀢𑀁 𑀢𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀅𑀢𑁆𑀢𑀦𑁄 𑀯𑀸 𑀘𑀺𑀢𑁆𑀢𑁂, 𑀧𑀭𑀲𑁆𑀲 𑀯𑀸 𑀘𑀺𑀢𑁆𑀢𑁂, 𑀓𑀸𑀮𑁂𑀦 𑀯𑀸 𑀅𑀢𑁆𑀢𑀦𑁄, 𑀓𑀸𑀮𑁂𑀦 𑀯𑀸 𑀧𑀭𑀲𑁆𑀲 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻𑀢𑀺 𑀏𑀢𑁆𑀣 𑀧𑀦 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀯𑀺𑀜𑁆𑀜𑀸𑀡𑀲𑀫𑀼𑀤𑀬𑁄𑀢𑀺 𑀏𑀯𑀁 𑀧𑀜𑁆𑀘𑀳𑀺 𑀧𑀜𑁆𑀘𑀳𑀺 𑀆𑀓𑀸𑀭𑁂𑀳𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑁄 𑀘 𑀯𑀬𑁄 𑀘 𑀦𑀻𑀳𑀭𑀺𑀢𑀩𑁆𑀩𑁄. 𑀇𑀢𑁄 𑀧𑀭𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀓𑁂𑀯𑀮𑀜𑁆𑀳𑀺 𑀇𑀥 𑀘𑀺𑀢𑁆𑀢𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺 𑀏𑀯𑀁 𑀧𑀤𑀬𑁄𑀚𑀦𑀁 𑀓𑀢𑁆𑀯𑀸 𑀘𑀺𑀢𑁆𑀢𑀧𑀭𑀺𑀕𑁆𑀕𑀸𑀳𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑁆𑀬𑀸𑀦𑀫𑀼𑀔𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺.

𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀦𑀻𑀯𑀭𑀡𑀧𑀩𑁆𑀩𑀯𑀡𑁆𑀡𑀦𑀸

𑁩𑁮𑁨. 𑀏𑀯𑀁 𑀲𑁄𑀴𑀲𑀯𑀺𑀥𑁂𑀦 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀧𑀜𑁆𑀘𑀯𑀺𑀥𑁂𑀦 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀁 𑀓𑀣𑁂𑀢𑀼𑀁 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀅𑀧𑀺𑀘 𑀪𑀕𑀯𑀢𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬 𑀲𑀼𑀤𑁆𑀥𑀭𑀽𑀧𑀧𑀭𑀺𑀕𑁆𑀕𑀳𑁄 𑀓𑀣𑀺𑀢𑁄, 𑀯𑁂𑀤𑀦𑀸𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀳𑀺 𑀲𑀼𑀤𑁆𑀥𑀅𑀭𑀽𑀧𑀧𑀭𑀺𑀕𑁆𑀕𑀳𑁄. 𑀇𑀤𑀸𑀦𑀺 𑀭𑀽𑀧𑀸𑀭𑀽𑀧𑀫𑀺𑀲𑁆𑀲𑀓𑀧𑀭𑀺𑀕𑁆𑀕𑀳𑀁 𑀓𑀣𑁂𑀢𑀼𑀁 ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳. 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬 𑀯𑀸 𑀭𑀽𑀧𑀓𑁆𑀔𑀦𑁆𑀥𑀧𑀭𑀺𑀕𑁆𑀕𑀳𑁄𑀯 𑀓𑀣𑀺𑀢𑁄, 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀬 𑀯𑁂𑀤𑀦𑀸𑀓𑁆𑀔𑀦𑁆𑀥𑀧𑀭𑀺𑀕𑁆𑀕𑀳𑁄𑀯, 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀧𑀭𑀺𑀕𑁆𑀕𑀳𑁄𑀯 𑀇𑀤𑀸𑀦𑀺 𑀲𑀜𑁆𑀜𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀕𑁆𑀕𑀳𑀫𑁆𑀧𑀺 𑀓𑀣𑁂𑀢𑀼𑀁 ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀲𑀦𑁆𑀢𑀦𑁆𑀢𑀺 𑀅𑀪𑀺𑀡𑁆𑀳𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀲𑀁𑀯𑀺𑀚𑁆𑀚𑀫𑀸𑀦𑀁. 𑀅𑀲𑀦𑁆𑀢𑀦𑁆𑀢𑀺 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀯𑀸 𑀧𑀳𑀻𑀦𑀢𑁆𑀢𑀸 𑀯𑀸 𑀅𑀲𑀁𑀯𑀺𑀚𑁆𑀚𑀫𑀸𑀦𑀁. 𑀬𑀣𑀸 𑀘𑀸𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀢𑀜𑁆𑀘 𑀧𑀚𑀸𑀦𑀸𑀢𑀻𑀢𑀺 𑀢𑀜𑁆𑀘 𑀓𑀸𑀭𑀡𑀁 𑀧𑀚𑀸𑀦𑀸𑀢𑀺. 𑀇𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀲𑀼𑀪𑀦𑀺𑀫𑀺𑀢𑁆𑀢𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀲𑀼𑀪𑀦𑀺𑀫𑀺𑀢𑁆𑀢𑀁 𑀦𑀸𑀫 ¶ 𑀲𑀼𑀪𑀫𑁆𑀧𑀺 𑀲𑀼𑀪𑀦𑀺𑀫𑀺𑀢𑁆𑀢𑀁, 𑀲𑀼𑀪𑀸𑀭𑀫𑁆𑀫𑀡𑀫𑁆𑀧𑀺 𑀲𑀼𑀪𑀦𑀺𑀫𑀺𑀢𑁆𑀢𑀁. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 ¶ 𑀦𑀸𑀫 𑀅𑀦𑀼𑀧𑀸𑀬𑀫𑀦𑀲𑀺𑀓𑀸𑀭𑁄 𑀉𑀧𑁆𑀧𑀣𑀫𑀦𑀲𑀺𑀓𑀸𑀭𑁄 𑀅𑀦𑀺𑀘𑁆𑀘𑁂 𑀦𑀺𑀘𑁆𑀘𑀦𑁆𑀢𑀺 𑀯𑀸, 𑀤𑀼𑀓𑁆𑀔𑁂 𑀲𑀼𑀔𑀦𑁆𑀢𑀺 𑀯𑀸, 𑀅𑀦𑀢𑁆𑀢𑀦𑀺 𑀅𑀢𑁆𑀢𑀸𑀢𑀺 𑀯𑀸, 𑀅𑀲𑀼𑀪𑁂 𑀲𑀼𑀪𑀦𑁆𑀢𑀺 𑀯𑀸 𑀫𑀦𑀲𑀺𑀓𑀸𑀭𑁄. 𑀢𑀁 𑀢𑀢𑁆𑀣 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀓𑀸𑀫𑀘𑁆𑀙𑀦𑁆𑀤𑁄 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀼𑀪𑀦𑀺𑀫𑀺𑀢𑁆𑀢𑀁, 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀧𑁆𑀧𑀸𑀤𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬𑀸’’𑀢𑀺 ¶ (𑀲𑀁. 𑀦𑀺. 𑁫.𑁨𑁩𑁨).

𑀅𑀲𑀼𑀪𑀦𑀺𑀫𑀺𑀢𑁆𑀢𑁂 𑀧𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀦𑀸𑀫 𑀅𑀲𑀼𑀪𑀫𑁆𑀧𑀺 𑀅𑀲𑀼𑀪𑀸𑀭𑀫𑁆𑀫𑀡𑀫𑁆𑀧𑀺. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀦𑀸𑀫 𑀉𑀧𑀸𑀬𑀫𑀦𑀲𑀺𑀓𑀸𑀭𑁄 𑀧𑀣𑀫𑀦𑀲𑀺𑀓𑀸𑀭𑁄 𑀅𑀦𑀺𑀘𑁆𑀘𑁂 𑀅𑀦𑀺𑀘𑁆𑀘𑀦𑁆𑀢𑀺 𑀯𑀸, 𑀤𑀼𑀓𑁆𑀔𑁂 𑀤𑀼𑀓𑁆𑀔𑀦𑁆𑀢𑀺 𑀯𑀸, 𑀅𑀦𑀢𑁆𑀢𑀦𑀺 𑀅𑀦𑀢𑁆𑀢𑀸𑀢𑀺 𑀯𑀸, 𑀅𑀲𑀼𑀪𑁂 𑀅𑀲𑀼𑀪𑀦𑁆𑀢𑀺 𑀯𑀸 𑀫𑀦𑀲𑀺𑀓𑀸𑀭𑁄. 𑀢𑀁 𑀢𑀢𑁆𑀣 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀲𑀼𑀪𑀦𑀺𑀫𑀺𑀢𑁆𑀢𑀁, 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀅𑀦𑀼𑀧𑁆𑀧𑀸𑀤𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀅𑀧𑀺𑀘 𑀙 𑀥𑀫𑁆𑀫𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑁄, 𑀅𑀲𑀼𑀪𑀪𑀸𑀯𑀦𑀸𑀦𑀼𑀬𑁄𑀕𑁄, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺. 𑀤𑀲𑀯𑀺𑀥𑀜𑁆𑀳𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀺, 𑀪𑀸𑀯𑁂𑀦𑁆𑀢𑀲𑁆𑀲𑀸𑀧𑀺 𑀇𑀦𑁆𑀤𑁆𑀭𑀺𑀬𑁂𑀲𑀼 𑀧𑀺𑀳𑀺𑀢𑀤𑁆𑀯𑀸𑀭𑀲𑁆𑀲𑀸𑀧𑀺 𑀘𑀢𑀼𑀦𑁆𑀦𑀁 𑀧𑀜𑁆𑀘𑀦𑁆𑀦𑀁 𑀆𑀮𑁄𑀧𑀸𑀦𑀁 𑀑𑀓𑀸𑀲𑁂 𑀲𑀢𑀺 𑀉𑀤𑀓𑀁 𑀧𑀺𑀯𑀺𑀢𑁆𑀯𑀸 𑀬𑀸𑀧𑀦𑀲𑀻𑀮𑀢𑀸𑀬 𑀪𑁄𑀚𑀦𑀫𑀢𑁆𑀢𑀜𑁆𑀜𑀼𑀦𑁄𑀧𑀺. 𑀢𑁂𑀦𑁂𑀯 𑀯𑀼𑀢𑁆𑀢𑀁 𑁋

‘‘𑀘𑀢𑁆𑀢𑀸𑀭𑁄 𑀧𑀜𑁆𑀘 𑀆𑀮𑁄𑀧𑁂, 𑀅𑀪𑀼𑀢𑁆𑀯𑀸 𑀉𑀤𑀓𑀁 𑀧𑀺𑀯𑁂;

𑀅𑀮𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺. (𑀣𑁂𑀭𑀕𑀸. 𑁯𑁮𑁩);

𑀅𑀲𑀼𑀪𑀓𑀫𑁆𑀫𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑀲𑀤𑀺𑀲𑁂 𑀅𑀲𑀼𑀪𑀪𑀸𑀯𑀦𑀸𑀭𑀢𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀧𑀺 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀤𑀲𑀅𑀲𑀼𑀪𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬 𑀧𑀳𑀻𑀬𑀢𑀺, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀙 𑀥𑀫𑁆𑀫𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀇𑀫𑁂𑀳𑀺 𑀧𑀦 𑀙𑀳𑀺 𑀥𑀫𑁆𑀫𑁂𑀳𑀺 𑀧𑀳𑀻𑀦𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀧𑀝𑀺𑀖𑀦𑀺𑀫𑀺𑀢𑁆𑀢𑁂 ¶ 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀧𑀦 𑀩𑁆𑀬𑀸𑀧𑀸𑀤𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀢𑀢𑁆𑀣 𑀧𑀝𑀺𑀖𑀫𑁆𑀧𑀺 𑀧𑀝𑀺𑀖𑀦𑀺𑀫𑀺𑀢𑁆𑀢𑀁 ¶ , 𑀧𑀝𑀺𑀖𑀸𑀭𑀫𑁆𑀫𑀡𑀫𑁆𑀧𑀺 𑀧𑀝𑀺𑀖𑀦𑀺𑀫𑀺𑀢𑁆𑀢𑀁. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀲𑀩𑁆𑀩𑀢𑁆𑀣 𑀏𑀓𑀮𑀓𑁆𑀔𑀡𑁄𑀯. 𑀢𑀁 𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀩𑁆𑀬𑀸𑀧𑀸𑀤𑁄 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀧𑀝𑀺𑀖𑀦𑀺𑀫𑀺𑀢𑁆𑀢𑀁 ¶ , 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀩𑁆𑀬𑀸𑀧𑀸𑀤𑀲𑁆𑀲 𑀉𑀧𑁆𑀧𑀸𑀤𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀩𑁆𑀬𑀸𑀧𑀸𑀤𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀫𑁂𑀢𑁆𑀢𑀸𑀬 𑀧𑀦 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀢𑀢𑁆𑀣 𑀫𑁂𑀢𑁆𑀢𑀸𑀢𑀺 𑀯𑀼𑀢𑁆𑀢𑁂 𑀅𑀧𑁆𑀧𑀦𑀸𑀧𑀺 𑀉𑀧𑀘𑀸𑀭𑁄𑀧𑀺 𑀯𑀝𑁆𑀝𑀢𑀺. 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀅𑀧𑁆𑀧𑀦𑀸𑀯. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀯𑀼𑀢𑁆𑀢𑀮𑀓𑁆𑀔𑀡𑁄𑀯. 𑀢𑀁 𑀢𑀢𑁆𑀣 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀩𑁆𑀬𑀸𑀧𑀸𑀤𑁄 𑀧𑀳𑀻𑀬𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀫𑁂𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀩𑁆𑀬𑀸𑀧𑀸𑀤𑀲𑁆𑀲 𑀅𑀦𑀼𑀧𑁆𑀧𑀸𑀤𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀅𑀧𑀺𑀘 𑀙 𑀥𑀫𑁆𑀫𑀸 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀫𑁂𑀢𑁆𑀢𑀸𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑁄 𑀫𑁂𑀢𑁆𑀢𑀸𑀪𑀸𑀯𑀦𑀸𑀦𑀼𑀬𑁄𑀕𑁄 𑀓𑀫𑁆𑀫𑀲𑁆𑀲𑀓𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀸 𑀧𑀝𑀺𑀲𑀗𑁆𑀔𑀸𑀦𑀩𑀳𑀼𑀮𑀢𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀲𑀧𑁆𑀧𑀸𑀬𑀓𑀣𑀸𑀢𑀺. 𑀑𑀤𑀺𑀲𑁆𑀲𑀓𑀅𑀦𑁄𑀤𑀺𑀲𑁆𑀲𑀓𑀤𑀺𑀲𑀸𑀨𑀭𑀡𑀸𑀦𑀜𑁆𑀳𑀺 𑀅𑀜𑁆𑀜𑀢𑀭𑀯𑀲𑁂𑀦 𑀫𑁂𑀢𑁆𑀢𑀁 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀩𑁆𑀬𑀸𑀧𑀸𑀤𑁄 𑀧𑀳𑀻𑀬𑀢𑀺, 𑀑𑀥𑀺𑀲𑁄𑀅𑀦𑁄𑀥𑀺𑀲𑁄𑀨𑀭𑀡𑀯𑀲𑁂𑀦 𑀫𑁂𑀢𑁆𑀢𑀁 𑀪𑀸𑀯𑁂𑀦𑁆𑀢𑀲𑁆𑀲𑀸𑀧𑀺. ‘‘𑀢𑁆𑀯𑀁 𑀏𑀢𑀲𑁆𑀲 𑀓𑀼𑀤𑁆𑀥𑁄 𑀓𑀺𑀁 𑀓𑀭𑀺𑀲𑁆𑀲𑀲𑀺, 𑀓𑀺𑀫𑀲𑁆𑀲 𑀲𑀻𑀮𑀸𑀤𑀻𑀦𑀺 𑀯𑀺𑀦𑀸𑀲𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀦𑀦𑀼 𑀢𑁆𑀯𑀁 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦𑁂𑀯 𑀕𑀫𑀺𑀲𑁆𑀲𑀲𑀺, 𑀧𑀭𑀲𑁆𑀲 𑀓𑀼𑀚𑁆𑀛𑀦𑀁 𑀦𑀸𑀫 𑀯𑀻𑀢𑀘𑁆𑀘𑀺𑀢𑀗𑁆𑀕𑀸𑀭 𑀢𑀢𑁆𑀢𑀅𑀬 𑀲𑀮𑀸𑀓𑀕𑀽𑀣𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀧𑀭𑀁 𑀧𑀳𑀭𑀺𑀢𑀼𑀓𑀸𑀫𑀢𑀸𑀲𑀤𑀺𑀲𑀁 𑀳𑁄𑀢𑀺. 𑀏𑀲𑁄𑀧𑀺 𑀢𑀯 𑀓𑀼𑀤𑁆𑀥𑁄 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀓𑀺𑀁 𑀢𑁂 𑀲𑀻𑀮𑀸𑀤𑀻𑀦𑀺 𑀯𑀺𑀦𑀸𑀲𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀏𑀲 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦𑁂𑀯 𑀕𑀫𑀺𑀲𑁆𑀲𑀢𑀺, 𑀅𑀧𑁆𑀧𑀝𑀺𑀘𑁆𑀙𑀺𑀢𑀧𑀳𑁂𑀡𑀓𑀁 𑀯𑀺𑀬 𑀧𑀝𑀺𑀯𑀸𑀢𑀁 𑀔𑀺𑀢𑁆𑀢𑀭𑀚𑁄𑀫𑀼𑀝𑁆𑀞𑀺 𑀯𑀺𑀬 𑀘 𑀏𑀢𑀲𑁆𑀲𑁂𑀯𑁂𑀲 𑀓𑁄𑀥𑁄 𑀫𑀢𑁆𑀣𑀓𑁂 𑀧𑀢𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀓𑀫𑁆𑀫𑀲𑁆𑀲𑀓𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺, 𑀉𑀪𑀬𑀓𑀫𑁆𑀫𑀲𑁆𑀲𑀓𑀢𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀝𑀺𑀲𑀗𑁆𑀔𑀸𑀦𑁂 𑀞𑀺𑀢𑀲𑁆𑀲𑀸𑀧𑀺, 𑀅𑀲𑁆𑀲𑀕𑀼𑀢𑁆𑀢𑀢𑁆𑀣𑁂𑀭𑀲𑀤𑀺𑀲𑁂 𑀫𑁂𑀢𑁆𑀢𑀸𑀪𑀸𑀯𑀦𑀸𑀭𑀢𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀩𑁆𑀬𑀸𑀧𑀸𑀤𑁄 𑀧𑀳𑀻𑀬𑀢𑀺. 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀫𑁂𑀢𑁆𑀢𑀸𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀙 ¶ 𑀥𑀫𑁆𑀫𑀸 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀇𑀫𑁂𑀳𑀺 𑀧𑀦 𑀙𑀳𑀺 𑀥𑀫𑁆𑀫𑁂𑀳𑀺 ¶ 𑀧𑀳𑀻𑀦𑀲𑁆𑀲 𑀩𑁆𑀬𑀸𑀧𑀸𑀤𑀲𑁆𑀲 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀅𑀭𑀢𑀺𑀆𑀤𑀻𑀲𑀼 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀣𑀺𑀦𑀫𑀺𑀤𑁆𑀥𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀢𑀦𑁆𑀤𑀻 𑀦𑀸𑀫 𑀓𑀸𑀬𑀸𑀮𑀲𑀺𑀬𑀢𑀸. 𑀯𑀺𑀚𑀫𑁆𑀪𑀺𑀢𑀸 𑀦𑀸𑀫 𑀓𑀸𑀬𑀯𑀺𑀦𑀫𑀦𑀸. 𑀪𑀢𑁆𑀢𑀲𑀫𑁆𑀫𑀤𑁄 𑀦𑀸𑀫 𑀪𑀢𑁆𑀢𑀫𑀼𑀘𑁆𑀙𑀸 𑀪𑀢𑁆𑀢𑀧𑀭𑀺𑀴𑀸𑀳𑁄. 𑀘𑁂𑀢𑀲𑁄 𑀮𑀻𑀦𑀢𑁆𑀢𑀁 𑀦𑀸𑀫 𑀘𑀺𑀢𑁆𑀢𑀲𑁆𑀲 𑀮𑀻𑀦𑀸𑀓𑀸𑀭𑁄. 𑀇𑀫𑁂𑀲𑀼 𑀅𑀭𑀢𑀺𑀆𑀤𑀻𑀲𑀼 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 ¶ 𑀣𑀺𑀦𑀫𑀺𑀤𑁆𑀥𑀁 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀸𑀳 𑁋 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀅𑀭𑀢𑀺 𑀢𑀦𑁆𑀤𑀻 𑀯𑀺𑀚𑀫𑁆𑀪𑀺𑀢𑀸 𑀪𑀢𑁆𑀢𑀲𑀫𑁆𑀫𑀤𑁄 𑀘𑁂𑀢𑀲𑁄 𑀮𑀻𑀦𑀢𑁆𑀢𑀁, 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀆𑀭𑀫𑁆𑀪𑀥𑀸𑀢𑀼𑀆𑀤𑀻𑀲𑀼 𑀧𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀆𑀭𑀫𑁆𑀪𑀥𑀸𑀢𑀼 𑀦𑀸𑀫 𑀧𑀞𑀫𑀸𑀭𑀫𑁆𑀪𑀯𑀻𑀭𑀺𑀬𑀁. 𑀦𑀺𑀓𑁆𑀓𑀫𑀥𑀸𑀢𑀼 𑀦𑀸𑀫 𑀓𑁄𑀲𑀚𑁆𑀚𑀢𑁄 𑀦𑀺𑀓𑁆𑀔𑀦𑁆𑀢𑀢𑀸𑀬 𑀢𑀢𑁄 𑀩𑀮𑀯𑀢𑀭𑀁. 𑀧𑀭𑀓𑁆𑀓𑀫𑀥𑀸𑀢𑀼 𑀦𑀸𑀫 𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀦𑀢𑁄 𑀢𑀢𑁄𑀧𑀺 𑀩𑀮𑀯𑀢𑀭𑀁. 𑀇𑀫𑀲𑁆𑀫𑀺𑀁 𑀢𑀺𑀧𑁆𑀧𑀪𑁂𑀤𑁂 𑀯𑀻𑀭𑀺𑀬𑁂 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀣𑀺𑀦𑀫𑀺𑀤𑁆𑀥𑀁 𑀧𑀳𑀻𑀬𑀢𑀺. 𑀢𑁂𑀦𑀸𑀳 𑁋 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀆𑀭𑀫𑁆𑀪𑀥𑀸𑀢𑀼 𑀦𑀺𑀓𑁆𑀓𑀫𑀥𑀸𑀢𑀼 𑀧𑀭𑀓𑁆𑀓𑀫𑀥𑀸𑀢𑀼, 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀅𑀦𑀼𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀅𑀧𑀺𑀘 𑀙 𑀥𑀫𑁆𑀫𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀅𑀢𑀺𑀪𑁄𑀚𑀦𑁂 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄, 𑀇𑀭𑀺𑀬𑀸𑀧𑀣𑀲𑀫𑁆𑀧𑀭𑀺𑀯𑀢𑁆𑀢𑀦𑀢𑀸, 𑀆𑀮𑁄𑀓𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑁄, 𑀅𑀩𑁆𑀪𑁄𑀓𑀸𑀲𑀯𑀸𑀲𑁄, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺. 𑀆𑀳𑀭𑀳𑀢𑁆𑀣𑀓 𑀢𑀢𑁆𑀭𑀯𑀝𑁆𑀝𑀓 𑀅𑀮𑀁𑀲𑀸𑀝𑀓 𑀓𑀸𑀓𑀫𑀸𑀲𑀓 𑀪𑀼𑀢𑁆𑀢𑀯𑀫𑀺𑀢𑀓𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀳𑀺 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑁄 𑀣𑀺𑀦𑀫𑀺𑀤𑁆𑀥𑀁 𑀫𑀳𑀸𑀳𑀢𑁆𑀣𑀻 𑀯𑀺𑀬 𑀑𑀢𑁆𑀣𑀭𑀦𑁆𑀢𑀁 𑀆𑀕𑀘𑁆𑀙𑀢𑀺, 𑀘𑀢𑀼𑀧𑀜𑁆𑀘𑀆𑀮𑁄𑀧𑀑𑀓𑀸𑀲𑀁 𑀧𑀦 𑀞𑀧𑁂𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀬𑀸𑀧𑀦𑀲𑀻𑀮𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀁 𑀦 𑀳𑁄𑀢𑀻𑀢𑀺 𑀏𑀯𑀁 𑀅𑀢𑀺𑀪𑁄𑀚𑀦𑁂 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀣𑀺𑀦𑀫𑀺𑀤𑁆𑀥𑀁 𑀧𑀳𑀻𑀬𑀢𑀺. 𑀬𑀲𑁆𑀫𑀺𑀁 𑀇𑀭𑀺𑀬𑀸𑀧𑀣𑁂 𑀣𑀺𑀦𑀫𑀺𑀤𑁆𑀥𑀁 𑀑𑀓𑁆𑀓𑀫𑀢𑀺, 𑀢𑀢𑁄 𑀅𑀜𑁆𑀜𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀲𑁆𑀲𑀸𑀧𑀺, 𑀭𑀢𑁆𑀢𑀺𑀁 𑀘𑀦𑁆𑀤𑀸𑀮𑁄𑀓𑀤𑀻𑀧𑀸𑀮𑁄𑀓𑀉𑀓𑁆𑀓𑀸𑀮𑁄𑀓𑁂 ¶ 𑀤𑀺𑀯𑀸 𑀲𑀽𑀭𑀺𑀬𑀸𑀮𑁄𑀓𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲𑀸𑀧𑀺, 𑀅𑀩𑁆𑀪𑁄𑀓𑀸𑀲𑁂 ¶ 𑀯𑀲𑀦𑁆𑀢𑀲𑁆𑀲𑀸𑀧𑀺, 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑀤𑀺𑀲𑁂 𑀧𑀳𑀻𑀦𑀣𑀺𑀦𑀫𑀺𑀤𑁆𑀥𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀣𑀺𑀦𑀫𑀺𑀤𑁆𑀥𑀁 𑀧𑀳𑀻𑀬𑀢𑀺. 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀥𑀼𑀢𑀗𑁆𑀕𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀙 𑀥𑀫𑁆𑀫𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀇𑀫𑁂𑀳𑀺 𑀧𑀦 𑀙𑀳𑀺 𑀥𑀫𑁆𑀫𑁂𑀳𑀺 𑀧𑀳𑀻𑀦𑀲𑁆𑀲 𑀣𑀺𑀦𑀫𑀺𑀤𑁆𑀥𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀘𑁂𑀢𑀲𑁄 𑀅𑀯𑀽𑀧𑀲𑀫𑁂 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀅𑀯𑀽𑀧𑀲𑀫𑁄 𑀦𑀸𑀫 𑀅𑀯𑀽𑀧𑀲𑀦𑁆𑀢𑀸𑀓𑀸𑀭𑁄, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀫𑁂𑀯𑁂𑀢𑀁 𑀅𑀢𑁆𑀣𑀢𑁄. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀸𑀳 𑁋 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀘𑁂𑀢𑀲𑁄 𑀅𑀯𑀽𑀧𑀲𑀫𑁄, 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 ¶ 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬𑀸’’𑀢𑀺.

𑀲𑀫𑀸𑀥𑀺𑀲𑀗𑁆𑀔𑀸𑀢𑁂 𑀧𑀦 𑀘𑁂𑀢𑀲𑁄 𑀯𑀽𑀧𑀲𑀫𑁂 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺. 𑀢𑁂𑀦𑀸𑀳 𑁋 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀘𑁂𑀢𑀲𑁄 𑀯𑀽𑀧𑀲𑀫𑁄, 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀅𑀦𑀼𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺.

𑀅𑀧𑀺𑀘 𑀙 𑀥𑀫𑁆𑀫𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀢𑀸 𑀧𑀭𑀺𑀧𑀼𑀘𑁆𑀙𑀓𑀢𑀸 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀸 𑀯𑀼𑀤𑁆𑀥𑀲𑁂𑀯𑀺𑀢𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀲𑀧𑁆𑀧𑀸𑀬𑀓𑀣𑀸𑀢𑀺. 𑀩𑀸𑀳𑀼𑀲𑁆𑀲𑀘𑁆𑀘𑁂𑀦𑀧𑀺 𑀳𑀺 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀘𑀢𑁆𑀢𑀸𑀭𑁄 𑀯𑀸 𑀧𑀜𑁆𑀘 𑀯𑀸 𑀦𑀺𑀓𑀸𑀬𑁂 𑀧𑀸𑀴𑀺𑀯𑀲𑁂𑀦 𑀅𑀢𑁆𑀣𑀯𑀲𑁂𑀦 𑀘 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀬𑀢𑀺. 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀧𑀭𑀺𑀧𑀼𑀘𑁆𑀙𑀸𑀩𑀳𑀼𑀮𑀲𑁆𑀲𑀸𑀧𑀺, 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀁 𑀘𑀺𑀡𑁆𑀡𑀯𑀲𑀺𑀪𑀸𑀯𑀢𑀸𑀬 𑀧𑀓𑀢𑀜𑁆𑀜𑀼𑀦𑁄𑀧𑀺, 𑀯𑀼𑀟𑁆𑀠𑁂 𑀫𑀳𑀮𑁆𑀮𑀓𑀢𑁆𑀣𑁂𑀭𑁂 𑀉𑀧𑀲𑀗𑁆𑀓𑀫𑀦𑁆𑀢𑀲𑁆𑀲𑀸𑀧𑀺, 𑀉𑀧𑀸𑀮𑀺𑀢𑁆𑀣𑁂𑀭𑀲𑀤𑀺𑀲𑁂 𑀯𑀺𑀦𑀬𑀥𑀭𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀬𑀢𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀙 𑀥𑀫𑁆𑀫𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀇𑀫𑁂𑀳𑀺 𑀧𑀦 𑀙𑀳𑀺 𑀥𑀫𑁆𑀫𑁂𑀳𑀺 𑀧𑀳𑀻𑀦𑁂 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑁂 𑀉𑀤𑁆𑀥𑀘𑁆𑀘𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 ¶ , 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀯𑀺𑀘𑀺𑀓𑀺𑀘𑁆𑀙𑀸𑀞𑀸𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀼 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀯𑀺𑀘𑀺𑀓𑀺𑀘𑁆𑀙𑀸𑀬 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀯𑀺𑀘𑀺𑀓𑀺𑀘𑁆𑀙𑀸𑀞𑀸𑀦𑀻𑀬𑀸 𑀥𑀫𑁆𑀫𑀸 𑀦𑀸𑀫 𑀧𑀼𑀦𑀧𑁆𑀧𑀼𑀦𑀁 𑀯𑀺𑀘𑀺𑀓𑀺𑀘𑁆𑀙𑀸𑀬 𑀓𑀸𑀭𑀡𑀢𑁆𑀢𑀸 ¶ 𑀯𑀺𑀘𑀺𑀓𑀺𑀘𑁆𑀙𑀸𑀯. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀸𑀳 𑁋 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀯𑀺𑀘𑀺𑀓𑀺𑀘𑁆𑀙𑀸𑀞𑀸𑀦𑀻𑀬𑀸 𑀥𑀫𑁆𑀫𑀸, 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀸𑀬 𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀸𑀬 𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬𑀸’’𑀢𑀺 (𑀲𑀁. 𑀦𑀺. 𑁫.𑁨𑁩𑁨).

𑀓𑀼𑀲𑀮𑀸𑀤𑀺𑀥𑀫𑁆𑀫𑁂𑀲𑀼 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀧𑀦𑀲𑁆𑀲𑀸 𑀧𑀳𑀸𑀦𑀁 𑀳𑁄𑀢𑀺, 𑀢𑁂𑀦𑀸𑀳 𑁋 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀸 𑀥𑀫𑁆𑀫𑀸 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀸 𑀥𑀫𑁆𑀫𑀸 𑀳𑀻𑀦𑀧𑀡𑀻𑀢𑀸 𑀥𑀫𑁆𑀫𑀸 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸 𑀥𑀫𑁆𑀫𑀸. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄, 𑀅𑀦𑀼𑀧𑁆𑀧𑀦𑁆𑀦𑀸𑀬 𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀅𑀦𑀼𑀧𑁆𑀧𑀸𑀤𑀸𑀬; 𑀉𑀧𑁆𑀧𑀦𑁆𑀦𑀸𑀬 𑀯𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀳𑀸𑀦𑀸𑀬𑀸’’𑀢𑀺.

𑀅𑀧𑀺𑀘 ¶ 𑀙 𑀥𑀫𑁆𑀫𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀢𑀸, 𑀧𑀭𑀺𑀧𑀼𑀘𑁆𑀙𑀓𑀢𑀸, 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀸, 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺. 𑀩𑀸𑀳𑀼𑀲𑁆𑀲𑀘𑁆𑀘𑁂𑀦𑀧𑀺 𑀳𑀺 𑀏𑀓𑀁 𑀯𑀸…𑀧𑁂… 𑀧𑀜𑁆𑀘 𑀯𑀸 𑀦𑀺𑀓𑀸𑀬𑁂 𑀧𑀸𑀴𑀺𑀯𑀲𑁂𑀦 𑀘 𑀅𑀢𑁆𑀣𑀯𑀲𑁂𑀦 𑀘 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀢𑀺, 𑀢𑀻𑀡𑀺 𑀭𑀢𑀦𑀸𑀦𑀺 𑀆𑀭𑀩𑁆𑀪 𑀧𑀭𑀺𑀧𑀼𑀘𑁆𑀙𑀸𑀩𑀳𑀼𑀮𑀲𑁆𑀲𑀸𑀧𑀺, 𑀯𑀺𑀦𑀬𑁂 𑀘𑀺𑀡𑁆𑀡𑀯𑀲𑀻𑀪𑀸𑀯𑀲𑁆𑀲𑀸𑀧𑀺, 𑀢𑀻𑀲𑀼 𑀭𑀢𑀦𑁂𑀲𑀼 𑀑𑀓𑀧𑁆𑀧𑀦𑀺𑀬𑀲𑀤𑁆𑀥𑀸𑀲𑀗𑁆𑀔𑀸𑀢𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀲𑁆𑀲𑀸𑀧𑀺, 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁂 𑀯𑀓𑁆𑀓𑀮𑀺𑀢𑁆𑀣𑁂𑀭𑀲𑀤𑀺𑀲𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀢𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀙 𑀥𑀫𑁆𑀫𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀇𑀫𑁂𑀳𑀺 𑀧𑀦 𑀙𑀳𑀺 𑀥𑀫𑁆𑀫𑁂𑀳𑀺 𑀧𑀳𑀻𑀦𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸𑀢𑀺 𑀏𑀯𑀁 𑀧𑀜𑁆𑀘𑀦𑀻𑀯𑀭𑀡𑀧𑀭𑀺𑀕𑁆𑀕𑀡𑁆𑀳𑀦𑁂𑀦 𑀅𑀢𑁆𑀢𑀦𑁄 𑀯𑀸 𑀥𑀫𑁆𑀫𑁂𑀲𑀼, 𑀧𑀭𑀲𑁆𑀲 𑀯𑀸 𑀥𑀫𑁆𑀫𑁂𑀲𑀼, 𑀓𑀸𑀮𑁂𑀦 𑀯𑀸 𑀅𑀢𑁆𑀢𑀦𑁄, 𑀓𑀸𑀮𑁂𑀦 𑀯𑀸 𑀧𑀭𑀲𑁆𑀲 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀯𑀬𑀸 𑀧𑀦𑁂𑀢𑁆𑀣 𑀲𑀼𑀪𑀦𑀺𑀫𑀺𑀢𑁆𑀢𑀅𑀲𑀼𑀪𑀦𑀺𑀫𑀺𑀢𑁆𑀢𑀸𑀤𑀻𑀲𑀼 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀲𑁂𑀦 ¶ 𑀧𑀜𑁆𑀘𑀲𑀼 𑀦𑀻𑀯𑀭𑀡𑁂𑀲𑀼 𑀯𑀼𑀢𑁆𑀢𑀸𑀬𑁂𑀯 𑀦𑀻𑀳𑀭𑀺𑀢𑀩𑁆𑀩𑀸. 𑀇𑀢𑁄 𑀧𑀭𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀓𑁂𑀯𑀮𑀜𑁆𑀳𑀺 𑀇𑀥 𑀦𑀻𑀯𑀭𑀡𑀧𑀭𑀺𑀕𑁆𑀕𑀸𑀳𑀺𑀓𑀸 ¶ 𑀲𑀢𑀺 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺 𑀏𑀯𑀁 𑀬𑁄𑀚𑀦𑀁 𑀓𑀢𑁆𑀯𑀸 𑀦𑀻𑀯𑀭𑀡𑀧𑀭𑀺𑀕𑁆𑀕𑀸𑀳𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑁆𑀬𑀸𑀦𑀫𑀼𑀔𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺.

𑀦𑀻𑀯𑀭𑀡𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀔𑀦𑁆𑀥𑀧𑀩𑁆𑀩𑀯𑀡𑁆𑀡𑀦𑀸

𑁩𑁮𑁩. 𑀏𑀯𑀁 𑀧𑀜𑁆𑀘𑀦𑀻𑀯𑀭𑀡𑀯𑀲𑁂𑀦 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀁 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀧𑀜𑁆𑀘𑀓𑁆𑀔𑀦𑁆𑀥𑀯𑀲𑁂𑀦 𑀯𑀺𑀪𑀚𑀺𑀢𑀼𑀁 𑀧𑀼𑀦 𑀘𑀧𑀭𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀽𑀢𑀺 𑀉𑀧𑀸𑀤𑀸𑀦𑀲𑁆𑀲 𑀔𑀦𑁆𑀥𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸, 𑀉𑀧𑀸𑀤𑀸𑀦𑀲𑁆𑀲 𑀧𑀘𑁆𑀘𑀬𑀪𑀽𑀢𑀸 𑀥𑀫𑁆𑀫𑀧𑀼𑀜𑁆𑀚𑀸 𑀥𑀫𑁆𑀫𑀭𑀸𑀲𑀬𑁄𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀔𑀦𑁆𑀥𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀸.

𑀇𑀢𑀺 𑀭𑀽𑀧𑀦𑁆𑀢𑀺 𑀇𑀤𑀁 𑀭𑀽𑀧𑀁, 𑀏𑀢𑁆𑀢𑀓𑀁 𑀭𑀽𑀧𑀁, 𑀦 𑀇𑀢𑁄 𑀧𑀭𑀁 𑀭𑀽𑀧𑀁 𑀅𑀢𑁆𑀣𑀻𑀢𑀺 𑀲𑀪𑀸𑀯𑀢𑁄 𑀭𑀽𑀧𑀁 𑀧𑀚𑀸𑀦𑀸𑀢𑀺. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁂𑀦 𑀧𑀦 𑀭𑀽𑀧𑀸𑀤𑀻𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 ¶ 𑀔𑀦𑁆𑀥𑀓𑀣𑀸𑀬𑀫𑁂𑀯 𑀯𑀼𑀢𑁆𑀢𑀸𑀦𑀺. 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄𑀢𑀺 𑀏𑀯𑀁 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸𑀤𑀺𑀯𑀲𑁂𑀦 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄. 𑀇𑀢𑀺 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄𑀢𑀺 𑀏𑀯𑀁 𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸𑀤𑀺𑀯𑀲𑁂𑀦 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀉𑀤𑀬𑀩𑁆𑀩𑀬𑀜𑀸𑀡𑀓𑀣𑀸𑀬 𑀯𑀼𑀢𑁆𑀢𑁄.

𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸𑀢𑀺 𑀏𑀯𑀁 𑀧𑀜𑁆𑀘𑀓𑁆𑀔𑀦𑁆𑀥𑀧𑀭𑀺𑀕𑁆𑀕𑀡𑁆𑀳𑀦𑁂𑀦 𑀅𑀢𑁆𑀢𑀦𑁄 𑀯𑀸 𑀥𑀫𑁆𑀫𑁂𑀲𑀼, 𑀧𑀭𑀲𑁆𑀲 𑀯𑀸 𑀥𑀫𑁆𑀫𑁂𑀲𑀼, 𑀓𑀸𑀮𑁂𑀦 𑀯𑀸 𑀅𑀢𑁆𑀢𑀦𑁄, 𑀓𑀸𑀮𑁂𑀦 𑀯𑀸 𑀧𑀭𑀲𑁆𑀲 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀯𑀬𑀸 𑀧𑀦𑁂𑀢𑁆𑀣 ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄’’𑀢𑀺𑀆𑀤𑀻𑀦𑀁 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀯𑀼𑀢𑁆𑀢𑀸𑀦𑀁 𑀧𑀜𑁆𑀜𑀸𑀲𑀸𑀬 𑀮𑀓𑁆𑀔𑀡𑀸𑀦𑀁 𑀯𑀲𑁂𑀦 𑀦𑀻𑀳𑀭𑀺𑀢𑀩𑁆𑀩𑀸. 𑀇𑀢𑁄 𑀧𑀭𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀓𑁂𑀯𑀮𑀜𑁆𑀳𑀺 𑀇𑀥 𑀔𑀦𑁆𑀥𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺 𑀏𑀯𑀁 𑀬𑁄𑀚𑀦𑀁 𑀓𑀢𑁆𑀯𑀸 𑀔𑀦𑁆𑀥𑀧𑀭𑀺𑀕𑁆𑀕𑀸𑀳𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑁆𑀬𑀸𑀦𑀫𑀼𑀔𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺.

𑀔𑀦𑁆𑀥𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀆𑀬𑀢𑀦𑀧𑀩𑁆𑀩𑀯𑀡𑁆𑀡𑀦𑀸

𑁩𑁮𑁪. 𑀏𑀯𑀁 ¶ ¶ 𑀧𑀜𑁆𑀘𑀓𑁆𑀔𑀦𑁆𑀥𑀯𑀲𑁂𑀦 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀁 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀆𑀬𑀢𑀦𑀯𑀲𑁂𑀦 𑀯𑀺𑀪𑀚𑀺𑀢𑀼𑀁 𑀧𑀼𑀦 𑀘𑀧𑀭𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀽𑀢𑀺 𑀘𑀓𑁆𑀔𑀼 𑀲𑁄𑀢𑀁 𑀖𑀸𑀦𑀁 𑀚𑀺𑀯𑁆𑀳𑀸 𑀓𑀸𑀬𑁄 𑀫𑀦𑁄𑀢𑀺 𑀇𑀫𑁂𑀲𑀼 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑁂𑀲𑀼, 𑀭𑀽𑀧𑀁 𑀲𑀤𑁆𑀤𑁄 𑀕𑀦𑁆𑀥𑁄 𑀭𑀲𑁄 𑀨𑁄𑀝𑁆𑀞𑀩𑁆𑀩𑁄 𑀥𑀫𑁆𑀫𑁄𑀢𑀺 𑀇𑀫𑁂𑀲𑀼 𑀙𑀲𑀼 𑀩𑀸𑀳𑀺𑀭𑁂𑀲𑀼. 𑀘𑀓𑁆𑀔𑀼𑀜𑁆𑀘 𑀧𑀚𑀸𑀦𑀸𑀢𑀻𑀢𑀺 𑀘𑀓𑁆𑀔𑀼𑀧𑀲𑀸𑀤𑀁 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀯𑀲𑁂𑀦 𑀧𑀚𑀸𑀦𑀸𑀢𑀺. 𑀭𑀽𑀧𑁂 𑀘 𑀧𑀚𑀸𑀦𑀸𑀢𑀻𑀢𑀺 𑀩𑀳𑀺𑀤𑁆𑀥𑀸 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀜𑁆𑀘 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀯𑀲𑁂𑀦 𑀧𑀚𑀸𑀦𑀸𑀢𑀺. 𑀬𑀜𑁆𑀘 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀁𑀬𑁄𑀚𑀦𑀦𑁆𑀢𑀺 𑀬𑀜𑁆𑀘 𑀢𑀁 𑀘𑀓𑁆𑀔𑀼𑀁 𑀘𑁂𑀯 𑀭𑀽𑀧𑁂 𑀘𑀸𑀢𑀺 𑀉𑀪𑀬𑀁 𑀧𑀝𑀺𑀘𑁆𑀘. 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁 𑀧𑀝𑀺𑀖, 𑀫𑀸𑀦, 𑀤𑀺𑀝𑁆𑀞𑀺, 𑀯𑀺𑀘𑀺𑀓𑀺𑀘𑁆𑀙𑀸, 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲, 𑀪𑀯𑀭𑀸𑀕, 𑀇𑀲𑁆𑀲𑀸, 𑀫𑀘𑁆𑀙𑀭𑀺𑀬, 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀦𑁆𑀢𑀺 𑀤𑀲𑀯𑀺𑀥𑀁 𑀲𑀁𑀬𑁄𑀚𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀜𑁆𑀘 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀯𑀲𑁂𑀦 𑀧𑀚𑀸𑀦𑀸𑀢𑀺.

𑀓𑀣𑀁 𑀧𑀦𑁂𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀘𑀓𑁆𑀔𑀼𑀤𑁆𑀯𑀸𑀭𑁂 𑀢𑀸𑀯 𑀆𑀧𑀸𑀣𑀕𑀢𑀁 𑀇𑀝𑁆𑀞𑀸𑀭𑀫𑁆𑀫𑀡𑀁 𑀓𑀸𑀫𑀲𑁆𑀲𑀸𑀤𑀯𑀲𑁂𑀦 𑀅𑀲𑁆𑀲𑀸𑀤𑀬𑀢𑁄 𑀅𑀪𑀺𑀦𑀦𑁆𑀤𑀢𑁄 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑁂 𑀓𑀼𑀚𑁆𑀛𑀢𑁄 𑀧𑀝𑀺𑀖𑀲𑀁𑀬𑁄𑀚𑀦𑀁 ¶ 𑀉𑀧𑁆𑀧𑀚𑁆𑀚𑀢𑀺. ‘‘𑀞𑀧𑁂𑀢𑁆𑀯𑀸 𑀫𑀁 𑀓𑁄 𑀅𑀜𑁆𑀜𑁄 𑀏𑀢𑀁 𑀆𑀭𑀫𑁆𑀫𑀡𑀁 𑀯𑀺𑀪𑀸𑀯𑁂𑀢𑀼𑀁 𑀲𑀫𑀢𑁆𑀣𑁄 𑀅𑀢𑁆𑀣𑀻’’𑀢𑀺 𑀫𑀜𑁆𑀜𑀢𑁄 𑀫𑀸𑀦𑀲𑀁𑀬𑁄𑀚𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀏𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀦𑀺𑀘𑁆𑀘𑀁 𑀥𑀼𑀯𑀦𑁆𑀢𑀺 𑀕𑀡𑁆𑀳𑀢𑁄 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁 𑀉𑀧𑁆𑀧𑀚𑁆𑀚𑀢𑀺. ‘‘𑀏𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀲𑀢𑁆𑀢𑁄 𑀦𑀼 𑀔𑁄, 𑀲𑀢𑁆𑀢𑀲𑁆𑀲 𑀦𑀼 𑀔𑁄’’𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑁄 𑀯𑀺𑀘𑀺𑀓𑀺𑀘𑁆𑀙𑀸𑀲𑀁𑀬𑁄𑀚𑀦𑀁 𑀉𑀧𑁆𑀧𑀚𑁆𑀚𑀢𑀺. ‘‘𑀲𑀫𑁆𑀧𑀢𑁆𑀢𑀺𑀪𑀯𑁂 𑀯𑀢 𑀦𑁄 𑀇𑀤𑀁 𑀲𑀼𑀮𑀪𑀁 𑀚𑀸𑀢’’𑀦𑁆𑀢𑀺 𑀪𑀯𑀁 𑀧𑀢𑁆𑀣𑁂𑀦𑁆𑀢𑀲𑁆𑀲 𑀪𑀯𑀭𑀸𑀕𑀲𑀁𑀬𑁄𑀚𑀦𑀁 𑀉𑀧𑁆𑀧𑀚𑁆𑀚𑀢𑀺. ‘‘𑀆𑀬𑀢𑀺𑀫𑁆𑀧𑀺 𑀏𑀯𑀭𑀽𑀧𑀁 𑀲𑀻𑀮𑀩𑁆𑀩𑀢𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀓𑁆𑀓𑀸 𑀮𑀤𑁆𑀥𑀼’’𑀦𑁆𑀢𑀺 𑀲𑀻𑀮𑀩𑁆𑀩𑀢𑀁 𑀲𑀫𑀸𑀤𑀺𑀬𑀦𑁆𑀢𑀲𑁆𑀲 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀲𑀁𑀬𑁄𑀚𑀦𑀁 𑀉𑀧𑁆𑀧𑀚𑁆𑀚𑀢𑀺. ‘‘𑀅𑀳𑁄 𑀯𑀢 𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀅𑀜𑁆𑀜𑁂 𑀦 𑀮𑀪𑁂𑀬𑁆𑀬𑀼’’𑀦𑁆𑀢𑀺 𑀉𑀲𑀽𑀬𑀢𑁄 𑀇𑀲𑁆𑀲𑀸𑀲𑀁𑀬𑁄𑀚𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀭𑀽𑀧𑀸𑀭𑀫𑁆𑀫𑀡𑀁 𑀅𑀜𑁆𑀜𑀲𑁆𑀲 𑀫𑀘𑁆𑀙𑀭𑀸𑀬𑀢𑁄 𑀫𑀘𑁆𑀙𑀭𑀺𑀬𑀲𑀁𑀬𑁄𑀚𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀲𑀩𑁆𑀩𑁂𑀳𑁂𑀯 𑀲𑀳𑀚𑀸𑀢𑀅𑀜𑁆𑀜𑀸𑀡𑀯𑀲𑁂𑀦 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀁 𑀉𑀧𑁆𑀧𑀚𑁆𑀚𑀢𑀺.

𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲𑀸𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀢𑀲𑁆𑀲 𑀤𑀲𑀯𑀺𑀥𑀲𑁆𑀲𑀸𑀧𑀺 𑀲𑀁𑀬𑁄𑀚𑀦𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺, 𑀢𑀜𑁆𑀘 𑀓𑀸𑀭𑀡𑀁 𑀧𑀚𑀸𑀦𑀸𑀢𑀺. 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲𑀸𑀢𑀺 ¶ 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀧𑀦 𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀯𑀸 𑀉𑀧𑁆𑀧𑀦𑁆𑀦𑀲𑁆𑀲 𑀢𑀲𑁆𑀲 𑀤𑀲𑀯𑀺𑀥𑀲𑁆𑀲𑀸𑀧𑀺 𑀲𑀁𑀬𑁄𑀚𑀦𑀲𑁆𑀲 𑀬𑁂𑀦 𑀓𑀸𑀭𑀡𑁂𑀦 𑀧𑀳𑀸𑀦𑀁 𑀳𑁄𑀢𑀺, 𑀢𑀜𑁆𑀘 𑀓𑀸𑀭𑀡𑀁 𑀧𑀚𑀸𑀦𑀸𑀢𑀺. 𑀬𑀣𑀸 𑀘 𑀧𑀳𑀻𑀦𑀲𑁆𑀲𑀸𑀢𑀺 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀯𑀲𑁂𑀦 𑀧𑀳𑀻𑀦𑀲𑁆𑀲𑀸𑀧𑀺 𑀢𑀲𑁆𑀲 𑀤𑀲𑀯𑀺𑀥𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 ¶ 𑀬𑁂𑀦 𑀓𑀸𑀭𑀡𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺, 𑀢𑀜𑁆𑀘 𑀧𑀚𑀸𑀦𑀸𑀢𑀺. 𑀓𑁂𑀦 𑀓𑀸𑀭𑀡𑁂𑀦 𑀧𑀦𑀲𑁆𑀲 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺? 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀪𑁂𑀤𑀲𑁆𑀲 𑀢𑀸𑀯 𑀧𑀜𑁆𑀘𑀯𑀺𑀥𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺. 𑀓𑀸𑀫𑀭𑀸𑀕𑀧𑀝𑀺𑀖𑀲𑀁𑀬𑁄𑀚𑀦𑀤𑁆𑀯𑀬𑀲𑁆𑀲 𑀑𑀴𑀸𑀭𑀺𑀓𑀲𑁆𑀲 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦, 𑀅𑀡𑀼𑀲𑀳𑀕𑀢𑀲𑁆𑀲 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦, 𑀫𑀸𑀦𑀪𑀯𑀭𑀸𑀕𑀸𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀢𑁆𑀢𑀬𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺. 𑀲𑁄𑀢𑀜𑁆𑀘 𑀧𑀚𑀸𑀦𑀸𑀢𑀺 𑀲𑀤𑁆𑀤𑁂 𑀘𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀧𑀺𑀘𑁂𑀢𑁆𑀣 𑀆𑀬𑀢𑀦𑀓𑀣𑀸 𑀯𑀺𑀢𑁆𑀣𑀸𑀭𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀆𑀬𑀢𑀦𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸𑀢𑀺 𑀏𑀯𑀁 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀧𑀭𑀺𑀕𑁆𑀕𑀡𑁆𑀳𑀦𑁂𑀦 𑀅𑀢𑁆𑀢𑀦𑁄 𑀯𑀸 𑀥𑀫𑁆𑀫𑁂𑀲𑀼 𑀩𑀸𑀳𑀺𑀭𑀸𑀬𑀢𑀦𑀧𑀭𑀺𑀕𑁆𑀕𑀡𑁆𑀳𑀦𑁂𑀦 𑀧𑀭𑀲𑁆𑀲 𑀯𑀸 𑀥𑀫𑁆𑀫𑁂𑀲𑀼, 𑀓𑀸𑀮𑁂𑀦 𑀯𑀸 𑀅𑀢𑁆𑀢𑀦𑁄, 𑀓𑀸𑀮𑁂𑀦 𑀯𑀸 𑀧𑀭𑀲𑁆𑀲 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀯𑀬𑀸 𑀧𑀦𑁂𑀢𑁆𑀣 ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀘𑀓𑁆𑀔𑀼𑀲𑀫𑀼𑀤𑀬𑁄’’𑀢𑀺 𑀭𑀽𑀧𑀸𑀬𑀢𑀦𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑁂, 𑀅𑀭𑀽𑀧𑀸𑀬𑀢𑀦𑁂𑀲𑀼 𑀫𑀦𑀸𑀬𑀢𑀦𑀲𑁆𑀲 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂, 𑀥𑀫𑁆𑀫𑀸𑀬𑀢𑀦𑀲𑁆𑀲 𑀲𑁂𑀲𑀓𑁆𑀔𑀦𑁆𑀥𑁂𑀲𑀼 𑀯𑀼𑀢𑁆𑀢𑀦𑀬𑁂𑀦 𑀦𑀻𑀳𑀭𑀺𑀢𑀩𑁆𑀩𑀸. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀦 𑀕𑀳𑁂𑀢𑀩𑁆𑀩𑀸. 𑀇𑀢𑁄 𑀧𑀭𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀓𑁂𑀯𑀮𑀜𑁆𑀳𑀺 𑀇𑀥 𑀆𑀬𑀢𑀦𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺 𑀏𑀯𑀁 𑀬𑁄𑀚𑀦𑀁 𑀓𑀢𑁆𑀯𑀸 𑀆𑀬𑀢𑀦𑀧𑀭𑀺𑀕𑁆𑀕𑀸𑀳𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑁆𑀬𑀸𑀦𑀫𑀼𑀔𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺.

𑀆𑀬𑀢𑀦𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀩𑁄𑀚𑁆𑀛𑀗𑁆𑀕𑀧𑀩𑁆𑀩𑀯𑀡𑁆𑀡𑀦𑀸

𑁩𑁮𑁫. 𑀏𑀯𑀁 ¶ 𑀙 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀬𑀢𑀦𑀯𑀲𑁂𑀦 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀁 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀩𑁄𑀚𑁆𑀛𑀗𑁆𑀕𑀯𑀲𑁂𑀦 𑀯𑀺𑀪𑀚𑀺𑀢𑀼𑀁 𑀧𑀼𑀦 𑀘𑀧𑀭𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑁄𑀚𑁆𑀛𑀗𑁆𑀕𑁂𑀲𑀽𑀢𑀺 𑀩𑀼𑀚𑁆𑀛𑀦𑀓𑀲𑀢𑁆𑀢𑀲𑁆𑀲 𑀅𑀗𑁆𑀕𑁂𑀲𑀼. 𑀲𑀦𑁆𑀢𑀦𑁆𑀢𑀺 𑀧𑀝𑀺𑀮𑀸𑀪𑀯𑀲𑁂𑀦 𑀲𑀁𑀯𑀺𑀚𑁆𑀚𑀫𑀸𑀦𑀁. 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀦𑁆𑀢𑀺 𑀲𑀢𑀺𑀲𑀗𑁆𑀔𑀸𑀢𑀁 𑀲𑀫𑁆𑀩𑁄𑀚𑁆𑀛𑀗𑁆𑀕𑀁. 𑀏𑀢𑁆𑀣 𑀳𑀺 𑀲𑀫𑁆𑀩𑀼𑀚𑁆𑀛𑀢𑀺 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀢𑁄 𑀧𑀝𑁆𑀞𑀸𑀬 𑀬𑁄𑀕𑀸𑀯𑀘𑀭𑁄𑀢𑀺 𑀲𑀫𑁆𑀩𑁄𑀥𑀺. 𑀬𑀸𑀬 𑀯𑀸 𑀲𑁄 𑀲𑀢𑀺𑀆𑀤𑀺𑀓𑀸𑀬 𑀲𑀢𑁆𑀢𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀲𑀫𑁆𑀩𑀼𑀚𑁆𑀛𑀢𑀺 ¶ 𑀓𑀺𑀮𑁂𑀲𑀦𑀺𑀤𑁆𑀤𑀸𑀢𑁄 𑀉𑀝𑁆𑀞𑀸𑀢𑀺, 𑀲𑀘𑁆𑀘𑀸𑀦𑀺 𑀯𑀸 𑀧𑀝𑀺𑀯𑀺𑀚𑁆𑀛𑀢𑀺, 𑀲𑀸 𑀥𑀫𑁆𑀫𑀲𑀸𑀫𑀕𑁆𑀕𑀻 𑀲𑀫𑁆𑀩𑁄𑀥𑀺. 𑀢𑀲𑁆𑀲 𑀲𑀫𑁆𑀩𑁄𑀥𑀺𑀲𑁆𑀲, 𑀢𑀲𑁆𑀲𑀸 𑀯𑀸 𑀲𑀫𑁆𑀩𑁄𑀥𑀺𑀬𑀸 𑀅𑀗𑁆𑀕𑀦𑁆𑀢𑀺 𑀲𑀫𑁆𑀩𑁄𑀚𑁆𑀛𑀗𑁆𑀕𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀢𑀺𑀲𑀗𑁆𑀔𑀸𑀢𑀁 𑀲𑀫𑁆𑀩𑁄𑀚𑁆𑀛𑀗𑁆𑀕’’𑀦𑁆𑀢𑀺. 𑀲𑁂𑀲𑀲𑀫𑁆𑀩𑁄𑀚𑁆𑀛𑀗𑁆𑀕𑁂𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀯𑀘𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀲𑀦𑁆𑀢𑀦𑁆𑀢𑀺 ¶ 𑀅𑀧𑁆𑀧𑀝𑀺𑀮𑀸𑀪𑀯𑀲𑁂𑀦 𑀅𑀯𑀺𑀚𑁆𑀚𑀫𑀸𑀦𑀁. 𑀬𑀣𑀸 𑀘 𑀅𑀦𑀼𑀧𑀦𑁆𑀦𑀲𑁆𑀲𑀸𑀢𑀺𑀆𑀤𑀻𑀲𑀼 𑀧𑀦 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀢𑀸𑀯 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸, 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁨) 𑀏𑀯𑀁 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀢𑀢𑁆𑀣 𑀲𑀢𑀺𑀬𑁂𑀯 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀯𑀼𑀢𑁆𑀢𑀮𑀓𑁆𑀔𑀡𑁄𑀬𑁂𑀯. 𑀢𑀁 𑀢𑀢𑁆𑀣 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀺.

𑀅𑀧𑀺𑀘 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀫𑀼𑀝𑁆𑀞𑀲𑁆𑀲𑀢𑀺𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀧𑀼𑀕𑁆𑀕𑀮𑀲𑁂𑀯𑀦𑀢𑀸 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀅𑀪𑀺𑀓𑁆𑀓𑀦𑁆𑀢𑀸𑀤𑀻𑀲𑀼 𑀳𑀺 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦, 𑀪𑀢𑁆𑀢𑀦𑀺𑀓𑁆𑀔𑀺𑀢𑁆𑀢𑀓𑀸𑀓𑀲𑀤𑀺𑀲𑁂 𑀫𑀼𑀝𑁆𑀞𑀲𑁆𑀲𑀢𑀺𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀦𑁂𑀦, 𑀢𑀺𑀲𑁆𑀲𑀤𑀢𑁆𑀢𑀢𑁆𑀣𑁂𑀭𑀅𑀪𑀬𑀢𑁆𑀣𑁂𑀭𑀲𑀤𑀺𑀲𑁂 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀧𑀼𑀕𑁆𑀕𑀮𑁂 𑀲𑁂𑀯𑀦𑁂𑀦, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀲𑀢𑀺𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀢𑀸𑀬 𑀘 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀧𑀦 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸…𑀧𑁂… 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸 𑀥𑀫𑁆𑀫𑀸, 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻’’𑀢𑀺 𑀏𑀯𑀁 𑀉𑀧𑁆𑀧𑀸𑀤𑁄 𑀳𑁄𑀢𑀺.

𑀅𑀧𑀺𑀘 ¶ 𑀲𑀢𑁆𑀢 𑀥𑀫𑁆𑀫𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀧𑀭𑀺𑀧𑀼𑀘𑁆𑀙𑀓𑀢𑀸 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸 ¶ 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀸 𑀤𑀼𑀧𑁆𑀧𑀜𑁆𑀜𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸 𑀧𑀜𑁆𑀜𑀯𑀦𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀸 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀧𑀘𑁆𑀘𑀯𑁂𑀓𑁆𑀔𑀡𑀸 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀢𑀢𑁆𑀣 𑀧𑀭𑀺𑀧𑀼𑀘𑁆𑀙𑀓𑀢𑀸𑀢𑀺 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀛𑀸𑀦𑀗𑁆𑀕𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀅𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀧𑀭𑀺𑀧𑀼𑀘𑁆𑀙𑀸𑀩𑀳𑀼𑀮𑀢𑀸. 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀁 𑀯𑀢𑁆𑀣𑀽𑀦𑀁 𑀯𑀺𑀲𑀤𑀪𑀸𑀯𑀓𑀭𑀡𑀁. 𑀬𑀤𑀸 𑀳𑀺𑀲𑁆𑀲 𑀓𑁂𑀲𑀦𑀔𑀮𑁄𑀫𑀸𑀦𑀺 𑀤𑀻𑀖𑀸𑀦𑀺 𑀳𑁄𑀦𑁆𑀢𑀺, 𑀲𑀭𑀻𑀭𑀁 𑀯𑀸 𑀉𑀲𑁆𑀲𑀦𑁆𑀦𑀤𑁄𑀲𑀜𑁆𑀘𑁂𑀯 𑀲𑁂𑀤𑀫𑀮𑀫𑀓𑁆𑀔𑀺𑀢𑀜𑁆𑀘, 𑀢𑀤𑀸 𑀅𑀚𑁆𑀛𑀢𑁆𑀢𑀺𑀓𑀁 𑀯𑀢𑁆𑀣𑀼 𑀅𑀯𑀺𑀲𑀤𑀁 𑀳𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀁. 𑀬𑀤𑀸 𑀧𑀦 𑀘𑀻𑀯𑀭𑀁 𑀚𑀺𑀡𑁆𑀡𑀁 𑀓𑀺𑀮𑀺𑀝𑁆𑀞𑀁 ¶ 𑀤𑀼𑀕𑁆𑀕𑀦𑁆𑀥𑀁 𑀳𑁄𑀢𑀺, 𑀲𑁂𑀦𑀸𑀲𑀦𑀁 𑀯𑀸 𑀉𑀓𑁆𑀮𑀸𑀧𑀁, 𑀢𑀤𑀸 𑀩𑀸𑀳𑀺𑀭𑀯𑀢𑁆𑀣𑀼 𑀅𑀯𑀺𑀲𑀤𑀁 𑀳𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀁. 𑀢𑀲𑁆𑀫𑀸 𑀓𑁂𑀲𑀸𑀤𑀺𑀙𑁂𑀤𑀸𑀧𑀦𑁂𑀦 𑀉𑀤𑁆𑀥𑀁𑀯𑀺𑀭𑁂𑀘𑀦𑀅𑀥𑁄𑀯𑀺𑀭𑁂𑀘𑀦𑀸𑀤𑀻𑀳𑀺 𑀲𑀭𑀻𑀭𑀲𑀮𑁆𑀮𑀳𑀼𑀓𑀪𑀸𑀯𑀓𑀭𑀡𑁂𑀦 𑀉𑀘𑁆𑀙𑀸𑀤𑀦𑀦𑀳𑀸𑀧𑀦𑁂𑀦 𑀘 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼 𑀯𑀺𑀲𑀤𑀁 𑀓𑀸𑀢𑀩𑁆𑀩𑀁. 𑀲𑀽𑀘𑀺𑀓𑀫𑁆𑀫𑀥𑁄𑀯𑀦𑀭𑀚𑀦𑀧𑀭𑀺𑀪𑀡𑁆𑀟𑀓𑀭𑀡𑀸𑀤𑀻𑀳𑀺 𑀩𑀸𑀳𑀺𑀭𑀯𑀢𑁆𑀣𑀼 𑀯𑀺𑀲𑀤𑀁 𑀓𑀸𑀢𑀩𑁆𑀩𑀁. 𑀏𑀢𑀲𑁆𑀫𑀺𑀜𑁆𑀳𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂 𑀯𑀢𑁆𑀣𑀼𑀫𑁆𑀳𑀺 𑀅𑀯𑀺𑀲𑀤𑁂 𑀉𑀧𑁆𑀧𑀦𑁆𑀦𑁂𑀲𑀼 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑀼 𑀜𑀸𑀡𑀫𑁆𑀧𑀺 𑀅𑀯𑀺𑀲𑀤𑀁 𑀳𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀁 𑀅𑀧𑀭𑀺𑀲𑀼𑀤𑁆𑀥𑀸𑀦𑀺 𑀤𑀻𑀧𑀓𑀧𑀮𑁆𑀮𑀯𑀝𑁆𑀝𑀺𑀢𑁂𑀮𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀤𑀻𑀧𑀲𑀺𑀔𑀸𑀬 𑀑𑀪𑀸𑀲𑁄 𑀯𑀺𑀬. 𑀯𑀺𑀲𑀤𑁂 𑀧𑀦 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂 𑀯𑀢𑁆𑀣𑀼𑀫𑁆𑀳𑀺 𑀉𑀧𑁆𑀧𑀦𑁆𑀦𑁂𑀲𑀼 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑀼 𑀜𑀸𑀡𑀫𑁆𑀧𑀺 𑀯𑀺𑀲𑀤𑀁 𑀳𑁄𑀢𑀺 𑀧𑀭𑀺𑀲𑀼𑀤𑁆𑀥𑀸𑀦𑀺 𑀤𑀻𑀧𑀓𑀧𑀮𑁆𑀮𑀯𑀝𑁆𑀝𑀺𑀢𑁂𑀮𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀤𑀻𑀧𑀲𑀺𑀔𑀸𑀬 𑀑𑀪𑀸𑀲𑁄 𑀯𑀺𑀬. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺.

𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀸 𑀦𑀸𑀫 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀫𑀪𑀸𑀯𑀓𑀭𑀡𑀁. 𑀲𑀘𑁂 𑀳𑀺𑀲𑁆𑀲 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀳𑁄𑀢𑀺, 𑀇𑀢𑀭𑀸𑀦𑀺 𑀫𑀦𑁆𑀤𑀸𑀦𑀺, 𑀢𑀢𑁄 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀧𑀕𑁆𑀕𑀳𑀓𑀺𑀘𑁆𑀘𑀁, 𑀲𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑀝𑁆𑀞𑀸𑀦𑀓𑀺𑀘𑁆𑀘𑀁, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀅𑀯𑀺𑀓𑁆𑀔𑁂𑀧𑀓𑀺𑀘𑁆𑀘𑀁, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀤𑀲𑁆𑀲𑀦𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀢𑀁 𑀥𑀫𑁆𑀫𑀲𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀯𑀸, 𑀬𑀣𑀸 𑀯𑀸 𑀫𑀦𑀲𑀺𑀓𑀭𑁄𑀢𑁄 𑀩𑀮𑀯𑀁 𑀚𑀸𑀢𑀁, 𑀢𑀣𑀸 𑀅𑀫𑀦𑀲𑀺𑀓𑀸𑀭𑁂𑀦 𑀳𑀸𑀧𑁂𑀢𑀩𑁆𑀩𑀁. 𑀯𑀓𑁆𑀓𑀮𑀺𑀢𑁆𑀣𑁂𑀭𑀯𑀢𑁆𑀣𑀼 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀲𑀘𑁂 𑀧𑀦 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀳𑁄𑀢𑀺, 𑀅𑀣 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑁄𑀓𑁆𑀔𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀦 𑀇𑀢𑀭𑀸𑀦𑀺 𑀇𑀢𑀭𑀓𑀺𑀘𑁆𑀘𑀪𑁂𑀤𑀁. 𑀢𑀲𑁆𑀫𑀸 𑀢𑀁 ¶ 𑀧𑀲𑁆𑀲𑀤𑁆𑀥𑀸𑀤𑀺𑀪𑀸𑀯𑀦𑀸𑀬 𑀳𑀸𑀧𑁂𑀢𑀩𑁆𑀩𑀁. 𑀢𑀢𑁆𑀭𑀸𑀧𑀺 𑀲𑁄𑀡𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼 𑀤𑀲𑁆𑀲𑁂𑀢𑀩𑁆𑀩𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀏𑀓𑀲𑁆𑀲 𑀩𑀮𑀯𑀪𑀸𑀯𑁂 𑀲𑀢𑀺 𑀇𑀢𑀭𑁂𑀲𑀁 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂𑀲𑀼 𑀅𑀲𑀫𑀢𑁆𑀣𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀯𑀺𑀲𑁂𑀲𑀢𑁄 𑀧𑀦𑁂𑀢𑁆𑀣 𑀲𑀤𑁆𑀥𑀸𑀧𑀜𑁆𑀜𑀸𑀦𑀁 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀜𑁆𑀘 𑀲𑀫𑀢𑀁 𑀧𑀲𑀁𑀲𑀦𑁆𑀢𑀺. 𑀩𑀮𑀯𑀲𑀤𑁆𑀥𑁄 𑀳𑀺 𑀫𑀦𑁆𑀤𑀧𑀜𑁆𑀜𑁄 𑀫𑀼𑀥𑀧𑁆𑀧𑀲𑀦𑁆𑀦𑁄 𑀳𑁄𑀢𑀺, 𑀅𑀯𑀢𑁆𑀣𑀼𑀲𑁆𑀫𑀺𑀁 𑀧𑀲𑀻𑀤𑀢𑀺. 𑀩𑀮𑀯𑀧𑀜𑁆𑀜𑁄 𑀫𑀦𑁆𑀤𑀲𑀤𑁆𑀥𑁄 𑀓𑁂𑀭𑀸𑀝𑀺𑀓𑀧𑀓𑁆𑀔𑀁 𑀪𑀚𑀢𑀺, 𑀪𑁂𑀲𑀚𑁆𑀚𑀲𑀫𑀼𑀝𑁆𑀞𑀺𑀢𑁄 𑀯𑀺𑀬 𑀭𑁄𑀕𑁄 𑀅𑀢𑁂𑀓𑀺𑀘𑁆𑀙𑁄 𑀳𑁄𑀢𑀺. 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦𑁂𑀯 𑀓𑀼𑀲𑀮𑀁 𑀳𑁄𑀢𑀻𑀢𑀺 𑀅𑀢𑀺𑀥𑀸𑀯𑀺𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀅𑀓𑀭𑁄𑀦𑁆𑀢𑁄 𑀦𑀺𑀭𑀬𑁂 𑀉𑀧𑁆𑀧𑀚𑁆𑀚𑀢𑀺. 𑀉𑀪𑀺𑀦𑁆𑀦𑀁 𑀲𑀫𑀢𑀸𑀬 𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 𑀧𑀲𑀻𑀤𑀢𑀺. 𑀩𑀮𑀯𑀲𑀫𑀸𑀥𑀺𑀁 𑀧𑀦 𑀫𑀦𑁆𑀤𑀯𑀻𑀭𑀺𑀬𑀁 𑀲𑀫𑀸𑀥𑀺𑀲𑁆𑀲 𑀓𑁄𑀲𑀚𑁆𑀚𑀧𑀓𑁆𑀔𑀢𑁆𑀢𑀸 𑀓𑁄𑀲𑀚𑁆𑀚𑀁 𑀅𑀪𑀺𑀪𑀯𑀢𑀺. 𑀩𑀮𑀯𑀯𑀻𑀭𑀺𑀬𑀁 ¶ 𑀫𑀦𑁆𑀤𑀲𑀫𑀸𑀥𑀺𑀁 𑀯𑀻𑀭𑀺𑀬𑀲𑁆𑀲 𑀉𑀤𑁆𑀥𑀘𑁆𑀘𑀧𑀓𑁆𑀔𑀢𑁆𑀢𑀸 𑀉𑀤𑁆𑀥𑀘𑁆𑀘𑀁 𑀅𑀪𑀺𑀪𑀯𑀢𑀺. 𑀲𑀫𑀸𑀥𑀺 𑀧𑀦 𑀯𑀻𑀭𑀺𑀬𑁂𑀦 𑀲𑀁𑀬𑁄𑀚𑀺𑀢𑁄 𑀓𑁄𑀲𑀚𑁆𑀚𑁂 𑀧𑀢𑀺𑀢𑀼𑀁 𑀦 𑀮𑀪𑀢𑀺, 𑀯𑀻𑀭𑀺𑀬𑀁 𑀲𑀫𑀸𑀥𑀺𑀦𑀸 𑀲𑀁𑀬𑁄𑀚𑀺𑀢𑀁 𑀉𑀤𑁆𑀥𑀘𑁆𑀘𑁂 𑀧𑀢𑀺𑀢𑀼𑀁 ¶ 𑀦 𑀮𑀪𑀢𑀺. 𑀢𑀲𑁆𑀫𑀸 𑀢𑀤𑀼𑀪𑀬𑀁 𑀲𑀫𑀁 𑀓𑀸𑀢𑀩𑁆𑀩𑀁. 𑀉𑀪𑀬𑀲𑀫𑀢𑀸𑀬 𑀳𑀺 𑀅𑀧𑁆𑀧𑀦𑀸 𑀳𑁄𑀢𑀺.

𑀅𑀧𑀺𑀘 𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲 𑀩𑀮𑀯𑀢𑀻𑀧𑀺 𑀲𑀤𑁆𑀥𑀸 𑀯𑀝𑁆𑀝𑀢𑀺. 𑀏𑀯𑀁 𑀲𑀤𑁆𑀤𑀳𑀦𑁆𑀢𑁄 𑀑𑀓𑀧𑁆𑀧𑁂𑀦𑁆𑀢𑁄 𑀅𑀧𑁆𑀧𑀦𑀁 𑀧𑀸𑀧𑀼𑀡𑀺𑀲𑁆𑀲𑀢𑀺. 𑀲𑀫𑀸𑀥𑀺𑀧𑀜𑁆𑀜𑀸𑀲𑀼 𑀧𑀦 𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲 𑀏𑀓𑀕𑁆𑀕𑀢𑀸 𑀩𑀮𑀯𑀢𑀻 𑀯𑀝𑁆𑀝𑀢𑀺. 𑀏𑀯𑀜𑁆𑀳𑀺 𑀲𑁄 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀺. 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀺𑀓𑀲𑁆𑀲 𑀧𑀜𑁆𑀜𑀸 𑀩𑀮𑀯𑀢𑀻 𑀯𑀝𑁆𑀝𑀢𑀺. 𑀏𑀯𑀜𑁆𑀳𑀺 𑀲𑁄 𑀮𑀓𑁆𑀔𑀡𑀧𑀝𑀺𑀯𑁂𑀥𑀁 𑀧𑀸𑀧𑀼𑀡𑀸𑀢𑀺. 𑀉𑀪𑀺𑀦𑁆𑀦𑀁 𑀧𑀦 𑀲𑀫𑀢𑀸𑀬𑀧𑀺 𑀅𑀧𑁆𑀧𑀦𑀸 𑀳𑁄𑀢𑀺𑀬𑁂𑀯. 𑀲𑀢𑀺 𑀧𑀦 𑀲𑀩𑁆𑀩𑀢𑁆𑀣 𑀩𑀮𑀯𑀢𑀻 𑀯𑀝𑁆𑀝𑀢𑀺. 𑀲𑀢𑀺 𑀳𑀺 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀸𑀦𑀁 𑀲𑀤𑁆𑀥𑀸𑀯𑀻𑀭𑀺𑀬𑀧𑀜𑁆𑀜𑀸𑀦𑀁 𑀯𑀲𑁂𑀦 𑀉𑀤𑁆𑀥𑀘𑁆𑀘𑀧𑀸𑀢𑀢𑁄, 𑀓𑁄𑀲𑀚𑁆𑀚𑀧𑀓𑁆𑀔𑀺𑀓𑁂𑀦 𑀘 𑀲𑀫𑀸𑀥𑀺𑀦𑀸 𑀓𑁄𑀲𑀚𑁆𑀚𑀧𑀸𑀢𑀢𑁄 𑀭𑀓𑁆𑀔𑀢𑀺. 𑀢𑀲𑁆𑀫𑀸 𑀲𑀸 𑀮𑁄𑀡𑀥𑀽𑀧𑀦𑀁 𑀯𑀺𑀬 𑀲𑀩𑁆𑀩𑀩𑁆𑀬𑀜𑁆𑀚𑀦𑁂𑀲𑀼, 𑀲𑀩𑁆𑀩𑀓𑀫𑁆𑀫𑀺𑀓𑀅𑀫𑀘𑁆𑀘𑁄 𑀯𑀺𑀬 𑀘, 𑀲𑀩𑁆𑀩𑀭𑀸𑀚𑀓𑀺𑀘𑁆𑀘𑁂𑀲𑀼 𑀲𑀩𑁆𑀩𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑀸. 𑀢𑁂𑀦𑀸𑀳 𑁋 ‘‘𑀲𑀢𑀺 𑀘 𑀧𑀦 𑀲𑀩𑁆𑀩𑀢𑁆𑀣𑀺𑀓𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀓𑀺𑀁 𑀓𑀸𑀭𑀡𑀸? 𑀘𑀺𑀢𑁆𑀢𑀜𑁆𑀳𑀺 𑀲𑀢𑀺𑀧𑀝𑀺𑀲𑀭𑀡𑀁, 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀘 𑀲𑀢𑀺, 𑀦 𑀯𑀺𑀦𑀸 𑀲𑀢𑀺𑀬𑀸 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀳𑀦𑀺𑀕𑁆𑀕𑀳𑁄 𑀳𑁄𑀢𑀻’’ 𑀢𑀺. 𑀤𑀼𑀧𑁆𑀧𑀜𑁆𑀜𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸 𑀦𑀸𑀫 𑀔𑀦𑁆𑀥𑀸𑀤𑀺𑀪𑁂𑀤𑁂 𑀅𑀦𑁄𑀕𑀸𑀴𑁆𑀳𑀧𑀜𑁆𑀜𑀸𑀦𑀁 𑀤𑀼𑀫𑁆𑀫𑁂𑀥𑀧𑀼𑀕𑁆𑀕𑀮𑀸𑀦𑀁 𑀆𑀭𑀓𑀸 𑀧𑀭𑀺𑀯𑀚𑁆𑀚𑀦𑀁. 𑀧𑀜𑁆𑀜𑀯𑀦𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀸 𑀦𑀸𑀫 𑀲𑀫𑀧𑀜𑁆𑀜𑀸𑀲𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀺𑀓𑀸𑀬 ¶ 𑀉𑀤𑀬𑀩𑁆𑀩𑀬𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀧𑀼𑀕𑁆𑀕𑀮𑀲𑁂𑀯𑀦𑀸. 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀸𑀫 𑀕𑀫𑁆𑀪𑀻𑀭𑁂𑀲𑀼 𑀔𑀦𑁆𑀥𑀸𑀤𑀻𑀲𑀼 𑀧𑀯𑀢𑁆𑀢𑀸𑀬 𑀕𑀫𑁆𑀪𑀻𑀭𑀧𑀜𑁆𑀜𑀸𑀬 𑀧𑀪𑁂𑀤𑀧𑀘𑁆𑀘𑀯𑁂𑀓𑁆𑀔𑀡𑀸. 𑀢𑀤𑀥𑀺𑀫𑀼𑀢𑁆𑀢𑀢𑀸 𑀦𑀸𑀫 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀢𑀸. 𑀏𑀯𑀁 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦𑁆𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀆𑀭𑀫𑁆𑀪𑀥𑀸𑀢𑀼 𑀦𑀺𑀓𑁆𑀓𑀫𑀥𑀸𑀢𑀼 𑀧𑀭𑀓𑁆𑀓𑀫𑀥𑀸𑀢𑀼, 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻’’𑀢𑀺 𑀏𑀯𑀁 𑀉𑀧𑁆𑀧𑀸𑀤𑁄 𑀳𑁄𑀢𑀺.

𑀅𑀧𑀺𑀘 𑀏𑀓𑀸𑀤𑀲 𑀥𑀫𑁆𑀫𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀅𑀧𑀸𑀬𑀪𑀬𑀧𑀘𑁆𑀘𑀯𑁂𑀓𑁆𑀔𑀡𑀢𑀸 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸 𑀕𑀫𑀦𑀯𑀻𑀣𑀺𑀧𑀘𑁆𑀘𑀯𑁂𑀓𑁆𑀔𑀡𑀢𑀸 𑀧𑀺𑀡𑁆𑀟𑀧𑀸𑀢𑀸𑀧𑀘𑀸𑀬𑀦𑀢𑀸 𑀤𑀸𑀬𑀚𑁆𑀚𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸 𑀲𑀢𑁆𑀣𑀼𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸 𑀚𑀸𑀢𑀺𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸 𑀲𑀩𑁆𑀭𑀳𑁆𑀫𑀘𑀸𑀭𑀺𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸 𑀓𑀼𑀲𑀻𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸 𑀆𑀭𑀤𑁆𑀥𑀯𑀻𑀭𑀺𑀬𑀧𑀼𑀕𑁆𑀕𑀮𑀲𑁂𑀯𑀦𑀢𑀸 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺.

𑀢𑀢𑁆𑀣 ¶ ¶ 𑀦𑀺𑀭𑀬𑁂𑀲𑀼 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀓𑀫𑁆𑀫𑀓𑀸𑀭𑀡𑀢𑁄 𑀧𑀝𑁆𑀞𑀸𑀬 𑀫𑀳𑀸𑀤𑀼𑀓𑁆𑀔𑀸𑀦𑀼𑀪𑀯𑀦𑀓𑀸𑀮𑁂𑀧𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀚𑀸𑀮𑀔𑀺𑀧𑀦𑀓𑀼𑀫𑀻𑀦𑀸𑀤𑀻𑀳𑀺 𑀕𑀳𑀺𑀢𑀓𑀸𑀮𑁂𑀧𑀺, 𑀧𑀸𑀚𑀦𑀓𑀡𑁆𑀝𑀓𑀸𑀤𑀺𑀧𑁆𑀧𑀳𑀸𑀭𑀢𑀼𑀦𑁆𑀦𑀲𑁆𑀲 𑀲𑀓𑀝𑀯𑀳𑀦𑀸𑀤𑀺𑀓𑀸𑀮𑁂𑀧𑀺, 𑀧𑁂𑀢𑁆𑀢𑀺𑀯𑀺𑀲𑀬𑁂 𑀅𑀦𑁂𑀓𑀸𑀦𑀺𑀧𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀫𑁆𑀧𑀺 𑀔𑀼𑀧𑁆𑀧𑀺𑀧𑀸𑀲𑀸𑀳𑀺 𑀆𑀢𑀼𑀭𑀻𑀪𑀽𑀢𑀓𑀸𑀮𑁂𑀧𑀺, 𑀓𑀸𑀮𑀓𑀜𑁆𑀘𑀺𑀓𑀅𑀲𑀼𑀭𑁂𑀲𑀼 𑀲𑀝𑁆𑀞𑀺𑀳𑀢𑁆𑀣𑀅𑀲𑀻𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑁂𑀦 𑀅𑀝𑁆𑀞𑀺𑀘𑀫𑁆𑀫𑀫𑀢𑁆𑀢𑁂𑀦𑁂𑀯 𑀅𑀢𑁆𑀢𑀪𑀸𑀯𑁂𑀦 𑀯𑀸𑀢𑀸𑀢𑀧𑀸𑀤𑀺𑀤𑀼𑀓𑁆𑀔𑀸𑀦𑀼𑀪𑀯𑀦𑀓𑀸𑀮𑁂𑀧𑀺 𑀦 𑀲𑀓𑁆𑀓𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀉𑀧𑁆𑀧𑀸𑀤𑁂𑀢𑀼𑀁, 𑀅𑀬𑀫𑁂𑀯 𑀢𑁂 𑀪𑀺𑀓𑁆𑀔𑀼 𑀓𑀸𑀮𑁄 𑀯𑀻𑀭𑀺𑀬𑀓𑀭𑀡𑀸𑀬𑀸𑀢𑀺 𑀏𑀯𑀁 𑀅𑀧𑀸𑀬𑀪𑀬𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀺.

𑀦 𑀲𑀓𑁆𑀓𑀸 𑀓𑀼𑀲𑀻𑀢𑁂𑀦 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀮𑀤𑁆𑀥𑀼𑀁, 𑀆𑀭𑀤𑁆𑀥𑀯𑀻𑀭𑀺𑀬𑁂𑀦𑁂𑀯 𑀲𑀓𑁆𑀓𑀸 𑀅𑀬𑀫𑀸𑀦𑀺𑀲𑀁𑀲𑁄 𑀯𑀻𑀭𑀺𑀬𑀲𑁆𑀲𑀸𑀢𑀺 ¶ 𑀏𑀯𑀁 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀦𑁄𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀲𑀩𑁆𑀩𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀫𑀳𑀸𑀲𑀸𑀯𑀓𑁂𑀳𑀺 𑀢𑁂 𑀕𑀢𑀫𑀕𑁆𑀕𑁄 𑀕𑀦𑁆𑀢𑀩𑁆𑀩𑁄, 𑀲𑁄 𑀘 𑀦 𑀲𑀓𑁆𑀓𑀸 𑀓𑀼𑀲𑀻𑀢𑁂𑀦 𑀕𑀦𑁆𑀢𑀼𑀦𑁆𑀢𑀺 𑀏𑀯𑀁 𑀕𑀫𑀦𑀯𑀻𑀣𑀺𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀬𑁂 𑀢𑀁 𑀧𑀺𑀡𑁆𑀟𑀧𑀸𑀢𑀸𑀤𑀻𑀳𑀺 𑀉𑀧𑀝𑁆𑀞𑀳𑀦𑁆𑀢𑀺, 𑀇𑀫𑁂 𑀢𑁂 𑀫𑀦𑀼𑀲𑁆𑀲𑀸 𑀦𑁂𑀯 𑀜𑀸𑀢𑀓𑀸, 𑀦 𑀤𑀸𑀲𑀓𑀫𑁆𑀫𑀓𑀭𑀸, 𑀦𑀸𑀧𑀺 𑀢𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀲𑁆𑀲𑀸𑀫𑀸𑀢𑀺 𑀢𑁂 𑀧𑀡𑀻𑀢𑀸𑀦𑀺 𑀘𑀻𑀯𑀭𑀸𑀤𑀻𑀦𑀺 𑀤𑁂𑀦𑁆𑀢𑀺. 𑀅𑀣 𑀔𑁄 𑀅𑀢𑁆𑀢𑀦𑁄 𑀓𑀸𑀭𑀸𑀦𑀁 𑀫𑀳𑀧𑁆𑀨𑀮𑀢𑀁 𑀧𑀘𑁆𑀘𑀸𑀲𑀻𑀲𑀫𑀸𑀦𑀸 𑀤𑁂𑀦𑁆𑀢𑀺. 𑀲𑀢𑁆𑀣𑀸𑀭𑀸𑀧𑀺 ‘‘𑀅𑀬𑀁 𑀇𑀫𑁂 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑁄 𑀲𑀼𑀔𑀁 𑀯𑀺𑀳𑀭𑀺𑀲𑁆𑀲𑀢𑀻’’𑀢𑀺 𑀦 𑀏𑀯𑀁 𑀲𑀫𑁆𑀧𑀲𑁆𑀲𑀢𑀸 𑀢𑀼𑀬𑁆𑀳𑀁 𑀧𑀘𑁆𑀘𑀬𑀸 𑀅𑀦𑀼𑀜𑁆𑀜𑀸𑀢𑀸. 𑀅𑀣 𑀔𑁄 ‘‘𑀅𑀬𑀁 𑀇𑀫𑁂 𑀧𑀭𑀺𑀪𑀼𑀜𑁆𑀚𑀫𑀸𑀦𑁄 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀯𑀝𑁆𑀝𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀺𑀲𑁆𑀲𑀢𑀻’’𑀢𑀺 𑀢𑁂 𑀧𑀘𑁆𑀘𑀬𑀸 𑀅𑀦𑀼𑀜𑁆𑀜𑀸𑀢𑀸, 𑀲𑁄 𑀤𑀸𑀦𑀺 𑀢𑁆𑀯𑀁 𑀓𑀼𑀲𑀻𑀢𑁄 𑀯𑀺𑀳𑀭𑀦𑁆𑀢𑁄 𑀦 𑀢𑀁 𑀧𑀺𑀡𑁆𑀟𑀁 𑀅𑀧𑀘𑀸𑀬𑀺𑀲𑁆𑀲𑀢𑀺. 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲𑁂𑀯 𑀳𑀺 𑀧𑀺𑀡𑁆𑀟𑀧𑀸𑀢𑀸𑀧𑀘𑀸𑀬𑀦𑀁 𑀦𑀸𑀫 𑀳𑁄𑀢𑀻𑀢𑀺 𑀏𑀯𑀁 𑀧𑀺𑀡𑁆𑀟𑀧𑀸𑀢𑀸𑀧𑀘𑀸𑀬𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺 𑀅𑀬𑁆𑀬𑀫𑀺𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀺𑀬.

𑀣𑁂𑀭𑁄 𑀓𑀺𑀭 𑀓𑀲𑁆𑀲𑀓𑀮𑁂𑀡𑁂 𑀦𑀸𑀫 𑀧𑀝𑀺𑀯𑀲𑀢𑀺. 𑀢𑀲𑁆𑀲 𑀘 𑀕𑁄𑀘𑀭𑀕𑀸𑀫𑁂 𑀏𑀓𑀸 𑀫𑀳𑀸𑀉𑀧𑀸𑀲𑀺𑀓𑀸 𑀣𑁂𑀭𑀁 𑀧𑀼𑀢𑁆𑀢𑀁 𑀓𑀢𑁆𑀯𑀸 𑀧𑀝𑀺𑀚𑀕𑁆𑀕𑀢𑀺. 𑀲𑀸 𑀏𑀓𑀤𑀺𑀯𑀲𑀁 𑀅𑀭𑀜𑁆𑀜𑀁 𑀕𑀘𑁆𑀙𑀦𑁆𑀢𑀻 𑀥𑀻𑀢𑀭𑀁 𑀆𑀳 𑁋 ‘‘𑀅𑀫𑁆𑀫, 𑀅𑀲𑀼𑀓𑀲𑁆𑀫𑀺𑀁 𑀞𑀸𑀦𑁂 𑀧𑀼𑀭𑀸𑀡𑀢𑀡𑁆𑀟𑀼𑀮𑀸, 𑀅𑀲𑀼𑀓𑀲𑁆𑀫𑀺𑀁 𑀲𑀧𑁆𑀧𑀺, 𑀅𑀲𑀼𑀓𑀲𑁆𑀫𑀺𑀁 𑀔𑀻𑀭𑀁, 𑀅𑀲𑀼𑀓𑀲𑁆𑀫𑀺𑀁 𑀨𑀸𑀡𑀺𑀢𑀁, 𑀢𑀯 𑀪𑀸𑀢𑀺𑀓𑀲𑁆𑀲 𑀅𑀬𑁆𑀬𑀫𑀺𑀢𑁆𑀢𑀲𑁆𑀲 𑀆𑀕𑀢𑀓𑀸𑀮𑁂 𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀔𑀻𑀭𑀲𑀧𑁆𑀧𑀺𑀨𑀸𑀡𑀺𑀢𑁂𑀳𑀺 𑀲𑀤𑁆𑀥𑀺𑀁 𑀤𑁂𑀳𑀺, 𑀢𑁆𑀯𑀜𑁆𑀘 𑀪𑀼𑀜𑁆𑀚𑁂𑀬𑁆𑀬𑀸𑀲𑀺. 𑀅𑀳𑀁 𑀧𑀦 𑀳𑀺𑀬𑁆𑀬𑁄 𑀧𑀓𑁆𑀓𑀧𑀸𑀭𑀺𑀯𑀸𑀲𑀺𑀓𑀪𑀢𑁆𑀢𑀁 𑀓𑀜𑁆𑀚𑀺𑀬𑁂𑀦 𑀪𑀼𑀢𑁆𑀢𑀸𑀫𑁆𑀳𑀻’’𑀢𑀺. 𑀤𑀺𑀯𑀸 𑀓𑀺𑀁 𑀪𑀼𑀜𑁆𑀚𑀺𑀲𑁆𑀲𑀲𑀺 𑀅𑀫𑁆𑀫𑀸,𑀢𑀺? 𑀲𑀸𑀓𑀧𑀡𑁆𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀡𑀢𑀡𑁆𑀟𑀼𑀮𑁂𑀳𑀺 𑀅𑀫𑁆𑀩𑀺𑀮𑀬𑀸𑀕𑀼𑀁 𑀧𑀘𑀺𑀢𑁆𑀯𑀸 𑀞𑀧𑁂𑀳𑀺 𑀅𑀫𑁆𑀫𑀸,𑀢𑀺.

𑀣𑁂𑀭𑁄 ¶ 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀁 𑀦𑀻𑀳𑀭𑀦𑁆𑀢𑁄𑀯 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀅𑀢𑁆𑀢𑀸𑀦𑀁 𑀑𑀯𑀤𑀺 ‘‘𑀫𑀳𑀸𑀉𑀧𑀸𑀲𑀺𑀓𑀸 𑀓𑀺𑀭 𑀓𑀜𑁆𑀚𑀺𑀬𑁂𑀦 𑀧𑀸𑀭𑀺𑀯𑀸𑀲𑀺𑀓𑀪𑀢𑁆𑀢𑀁 𑀪𑀼𑀜𑁆𑀚𑀺, 𑀤𑀺𑀯𑀸𑀧𑀺 𑀓𑀡𑀧𑀡𑁆𑀡𑀫𑁆𑀩𑀺𑀮𑀬𑀸𑀕𑀼𑀁 𑀪𑀼𑀜𑁆𑀚𑀺𑀲𑁆𑀲𑀢𑀺 ¶ , 𑀢𑀼𑀬𑁆𑀳𑀁 𑀅𑀢𑁆𑀣𑀸𑀬 𑀧𑀦 𑀧𑀼𑀭𑀸𑀡𑀢𑀡𑁆𑀟𑀼𑀮𑀸𑀤𑀻𑀦𑀺 𑀆𑀘𑀺𑀓𑁆𑀔𑀢𑀺, 𑀢𑀁 𑀦𑀺𑀲𑁆𑀲𑀸𑀬 𑀔𑁄 𑀧𑀦𑁂𑀲𑀸 𑀦𑁂𑀯 𑀔𑁂𑀢𑁆𑀢𑀁 𑀦 𑀯𑀢𑁆𑀣𑀼𑀁 𑀦 𑀪𑀢𑁆𑀢𑀁 𑀦 𑀯𑀢𑁆𑀣𑀁 𑀧𑀘𑁆𑀘𑀸𑀲𑀻𑀲𑀢𑀺, 𑀢𑀺𑀲𑁆𑀲𑁄 𑀧𑀦 𑀲𑀫𑁆𑀧𑀢𑁆𑀢𑀺𑀬𑁄 𑀧𑀢𑁆𑀣𑀬𑀫𑀸𑀦𑀸 𑀤𑁂𑀢𑀺, 𑀢𑁆𑀯𑀁 𑀏𑀢𑀺𑀲𑁆𑀲𑀸 𑀢𑀸 𑀲𑀫𑁆𑀧𑀢𑁆𑀢𑀺𑀬𑁄 𑀤𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀦 𑀲𑀓𑁆𑀔𑀺𑀲𑁆𑀲𑀲𑀻𑀢𑀺, 𑀅𑀬𑀁 𑀔𑁄 𑀧𑀦 𑀧𑀺𑀡𑁆𑀟𑀧𑀸𑀢𑁄 𑀢𑀬𑀸 𑀲𑀭𑀸𑀕𑁂𑀦 𑀲𑀤𑁄𑀲𑁂𑀦 ¶ 𑀲𑀫𑁄𑀳𑁂𑀦 𑀦 𑀲𑀓𑁆𑀓𑀸 𑀕𑀡𑁆𑀳𑀺𑀢𑀼’’𑀦𑁆𑀢𑀺 𑀧𑀢𑁆𑀢𑀁 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀞𑀺𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀓𑀲𑁆𑀲𑀓𑀮𑁂𑀡𑀫𑁂𑀯 𑀕𑀦𑁆𑀢𑁆𑀯𑀸 𑀧𑀢𑁆𑀢𑀁 𑀳𑁂𑀝𑁆𑀞𑀸𑀫𑀜𑁆𑀘𑁂 𑀘𑀻𑀯𑀭𑀁 𑀘𑀻𑀯𑀭𑀯𑀁𑀲𑁂 𑀞𑀧𑁂𑀢𑁆𑀯𑀸 ‘‘𑀅𑀭𑀳𑀢𑁆𑀢𑀁 𑀅𑀧𑀸𑀧𑀼𑀡𑀺𑀢𑁆𑀯𑀸 𑀦 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀤𑀻𑀖𑀭𑀢𑁆𑀢𑀁 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀯𑀼𑀢𑁆𑀣𑀪𑀺𑀓𑁆𑀔𑀼 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀧𑀼𑀭𑁂𑀪𑀢𑁆𑀢𑀫𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀯𑀺𑀓𑀲𑀫𑀸𑀦𑀫𑀺𑀯 𑀧𑀤𑀼𑀫𑀁 𑀫𑀳𑀸𑀔𑀻𑀡𑀸𑀲𑀯𑁄 𑀲𑀺𑀢𑀁 𑀓𑀭𑁄𑀦𑁆𑀢𑁄𑀯 𑀦𑀺𑀲𑀻𑀤𑀺. 𑀮𑁂𑀡𑀤𑁆𑀯𑀸𑀭𑁂 𑀭𑀼𑀓𑁆𑀔𑀫𑁆𑀳𑀺 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑁋

‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀬𑀲𑁆𑀲 𑀢𑁂 𑀆𑀲𑀯𑀸 𑀔𑀻𑀡𑀸, 𑀤𑀓𑁆𑀔𑀺𑀡𑁂𑀬𑁆𑀬𑁄𑀲𑀺 𑀫𑀸𑀭𑀺𑀲𑀸’’𑀢𑀺. 𑁋

𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀸𑀦𑀁 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀪𑀺𑀓𑁆𑀔𑀁 𑀤𑀢𑁆𑀯𑀸 𑀫𑀳𑀮𑁆𑀮𑀓𑀺𑀢𑁆𑀣𑀺𑀬𑁄 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀳. 𑀣𑁂𑀭𑁄 𑀉𑀝𑁆𑀞𑀳𑀺𑀢𑁆𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀓𑀸𑀮𑀁 𑀑𑀮𑁄𑀓𑁂𑀦𑁆𑀢𑁄 ‘‘𑀧𑀸𑀢𑁄𑀬𑁂𑀯𑀸’’𑀢𑀺 𑀜𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀕𑀸𑀫𑀁 𑀧𑀸𑀯𑀺𑀲𑀺.

𑀤𑀸𑀭𑀺𑀓𑀸𑀧𑀺 𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀫𑁂 𑀪𑀸𑀢𑀸 𑀆𑀕𑀫𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀤𑁆𑀯𑀸𑀭𑀁 𑀑𑀮𑁄𑀓𑀬𑀫𑀸𑀦𑀸 𑀦𑀺𑀲𑀻𑀤𑀺. 𑀲𑀸 𑀣𑁂𑀭𑁂 𑀖𑀭𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑁂 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀧𑁆𑀧𑀺𑀨𑀸𑀡𑀺𑀢𑀬𑁄𑀚𑀺𑀢𑀲𑁆𑀲 𑀔𑀻𑀭𑀧𑀺𑀡𑁆𑀟𑀧𑀸𑀢𑀲𑁆𑀲 𑀧𑀽𑀭𑁂𑀢𑁆𑀯𑀸 𑀳𑀢𑁆𑀣𑁂 𑀞𑀧𑁂𑀲𑀺. 𑀣𑁂𑀭𑁄 ‘‘𑀲𑀼𑀔𑀁 𑀳𑁄𑀢𑀽’’𑀢𑀺 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀸𑀧𑀺 𑀢𑀁 𑀑𑀮𑁄𑀓𑀬𑀫𑀸𑀦𑀸 𑀅𑀝𑁆𑀞𑀸𑀲𑀺. 𑀣𑁂𑀭𑀲𑁆𑀲 𑀳𑀺 𑀢𑀤𑀸 𑀅𑀢𑀺𑀯𑀺𑀬 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄 𑀅𑀳𑁄𑀲𑀺, 𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀫𑀼𑀔𑀁 𑀩𑀦𑁆𑀥𑀦𑀸 𑀧𑀯𑀼𑀢𑁆𑀢𑀢𑀸𑀮𑀧𑀓𑁆𑀓𑀁 𑀯𑀺𑀬 𑀅𑀢𑀺𑀯𑀺𑀬 𑀯𑀺𑀭𑁄𑀘𑀺𑀢𑁆𑀣.

𑀫𑀳𑀸𑀉𑀧𑀸𑀲𑀺𑀓𑀸 𑀅𑀭𑀜𑁆𑀜𑀸 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁, 𑀅𑀫𑁆𑀫, 𑀪𑀸𑀢𑀺𑀓𑁄 𑀢𑁂 𑀆𑀕𑀢𑁄’’𑀢𑀺 𑀧𑀼𑀘𑁆𑀙𑀺. 𑀲𑀸 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀉𑀧𑀸𑀲𑀺𑀓𑀸 ‘‘𑀅𑀚𑁆𑀚 ¶ 𑀫𑀫 𑀧𑀼𑀢𑁆𑀢𑀲𑁆𑀲 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀢𑁆𑀢’’𑀦𑁆𑀢𑀺 𑀜𑀢𑁆𑀯𑀸 ‘‘𑀅𑀪𑀺𑀭𑀫𑀢𑀺 𑀢𑁂, 𑀅𑀫𑁆𑀫, 𑀪𑀸𑀢𑀸 𑀩𑀼𑀤𑁆𑀥𑀲𑀸𑀲𑀦𑁂, 𑀦 𑀉𑀓𑁆𑀓𑀡𑁆𑀞𑀢𑀻’’𑀢𑀺 𑀆𑀳.

𑀫𑀳𑀦𑁆𑀢𑀁 𑀔𑁄 𑀧𑀦𑁂𑀢𑀁 𑀲𑀢𑁆𑀣𑀼𑀤𑀸𑀬𑀚𑁆𑀚𑀁 𑀬𑀤𑀺𑀤𑀁 𑀲𑀢𑁆𑀢 𑀅𑀭𑀺𑀬𑀥𑀦𑀸𑀦𑀺 𑀦𑀸𑀫, 𑀢𑀁 𑀦 𑀲𑀓𑁆𑀓𑀸 𑀓𑀼𑀲𑀻𑀢𑁂𑀦 𑀕𑀳𑁂𑀢𑀼𑀁. 𑀬𑀣𑀸 𑀳𑀺 𑀯𑀺𑀧𑁆𑀧𑀝𑀺𑀧𑀦𑁆𑀦𑀁 𑀧𑀼𑀢𑁆𑀢𑀁 𑀫𑀸𑀢𑀸𑀧𑀺𑀢𑀭𑁄 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀅𑀧𑀼𑀢𑁆𑀢𑁄’’𑀢𑀺 ¶ 𑀧𑀭𑀺𑀩𑀸𑀳𑀺𑀭𑀁 ¶ 𑀓𑀭𑁄𑀦𑁆𑀢𑀺, 𑀲𑁄 𑀢𑁂𑀲𑀁 𑀅𑀘𑁆𑀘𑀬𑁂𑀦 𑀤𑀸𑀬𑀚𑁆𑀚𑀁 𑀦 𑀮𑀪𑀢𑀺, 𑀏𑀯𑀁 𑀓𑀼𑀲𑀻𑀢𑁄𑀧𑀺 𑀇𑀤𑀁 𑀅𑀭𑀺𑀬𑀥𑀦𑀤𑀸𑀬𑀚𑁆𑀚𑀁 𑀦 𑀮𑀪𑀢𑀺, 𑀆𑀭𑀤𑁆𑀥𑀯𑀻𑀭𑀺𑀬𑁄𑀯 𑀮𑀪𑀢𑀻𑀢𑀺 𑀤𑀸𑀬𑀚𑁆𑀚𑀫𑀳𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺 𑀉𑀧𑁆𑀧𑀚𑁆𑀚𑀢𑀺.

𑀫𑀳𑀸 𑀔𑁄 𑀧𑀦 𑀢𑁂 𑀲𑀢𑁆𑀣𑀸, 𑀲𑀢𑁆𑀣𑀼𑀦𑁄 𑀳𑀺 𑀢𑁂 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀕𑀡𑁆𑀳𑀦𑀓𑀸𑀮𑁂𑀧𑀺 𑀅𑀪𑀺𑀦𑀺𑀓𑁆𑀔𑀫𑀦𑁂𑀧𑀺 𑀅𑀪𑀺𑀲𑀫𑁆𑀩𑁄𑀥𑀺𑀬𑀫𑁆𑀧𑀺 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀤𑁂𑀯𑁄𑀭𑁄𑀳𑀦𑀆𑀬𑀼𑀲𑀗𑁆𑀔𑀸𑀭𑀯𑁄𑀲𑁆𑀲𑀚𑁆𑀚𑀦𑁂𑀲𑀼𑀧𑀺 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂𑀧𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀅𑀓𑀫𑁆𑀧𑀺𑀢𑁆𑀣, 𑀬𑀼𑀢𑁆𑀢𑀁 𑀦𑀼 𑀢𑁂 𑀏𑀯𑀭𑀽𑀧𑀲𑁆𑀲 𑀲𑀢𑁆𑀣𑀼 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀼𑀲𑀻𑀢𑁂𑀦 𑀪𑀯𑀺𑀢𑀼𑀦𑁆𑀢𑀺 𑀏𑀯𑀁 𑀲𑀢𑁆𑀣𑀼𑀫𑀳𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺 𑀉𑀧𑁆𑀧𑀚𑁆𑀚𑀢𑀺.

𑀚𑀸𑀢𑀺𑀬𑀸𑀧𑀺 𑀢𑁆𑀯𑀁 𑀇𑀤𑀸𑀦𑀺 𑀦 𑀮𑀸𑀫𑀓𑀚𑀸𑀢𑀺𑀓𑁄, 𑀅𑀲𑀫𑁆𑀪𑀺𑀦𑁆𑀦𑀸𑀬 𑀫𑀳𑀸𑀲𑀫𑁆𑀫𑀢𑀧𑀯𑁂𑀡𑀺𑀬𑀸 𑀆𑀕𑀢𑀉𑀓𑁆𑀓𑀸𑀓𑀭𑀸𑀚𑀯𑀁𑀲𑁂 𑀚𑀸𑀢𑁄𑀲𑀺, 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀘 𑀫𑀳𑀸𑀫𑀸𑀬𑀸𑀤𑁂𑀯𑀺𑀬𑀸 𑀘 𑀦𑀢𑁆𑀢𑀸, 𑀭𑀸𑀳𑀼𑀮𑀪𑀤𑁆𑀤𑀲𑁆𑀲 𑀓𑀦𑀺𑀝𑁆𑀞𑁄, 𑀢𑀬𑀸 𑀦𑀸𑀫 𑀏𑀯𑀭𑀽𑀧𑁂𑀦 𑀚𑀺𑀦𑀧𑀼𑀢𑁆𑀢𑁂𑀦 𑀳𑀼𑀢𑁆𑀯𑀸 𑀦 𑀬𑀼𑀢𑁆𑀢𑀁 𑀓𑀼𑀲𑀻𑀢𑁂𑀦 𑀯𑀺𑀳𑀭𑀺𑀢𑀼𑀦𑁆𑀢𑀺 𑀏𑀯𑀁 𑀚𑀸𑀢𑀺𑀫𑀳𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺 𑀉𑀧𑁆𑀧𑀚𑁆𑀚𑀢𑀺.

𑀲𑀸𑀭𑀺𑀧𑀼𑀢𑁆𑀢𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀸 𑀘𑁂𑀯 𑀅𑀲𑀻𑀢𑀺 𑀘 𑀫𑀳𑀸𑀲𑀸𑀯𑀓𑀸 𑀯𑀻𑀭𑀺𑀬𑁂𑀦𑁂𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀁𑀲𑀼, 𑀢𑁆𑀯𑀁 𑀏𑀢𑁂𑀲𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀲𑀺, 𑀦 𑀧𑀝𑀺𑀧𑀚𑁆𑀚𑀲𑀻𑀢𑀺 𑀏𑀯𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀫𑀳𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺 𑀉𑀧𑁆𑀧𑀚𑁆𑀚𑀢𑀺.

𑀓𑀼𑀘𑁆𑀙𑀺𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑀅𑀚𑀕𑀭𑀲𑀤𑀺𑀲𑁂 𑀯𑀺𑀲𑁆𑀲𑀝𑁆𑀞𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑁂 𑀓𑀼𑀲𑀻𑀢𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀦𑁆𑀢𑀲𑁆𑀲𑀸𑀧𑀺 𑀆𑀭𑀤𑁆𑀥𑀯𑀻𑀭𑀺𑀬𑁂 𑀧𑀳𑀺𑀢𑀢𑁆𑀢𑁂 𑀧𑀼𑀕𑁆𑀕𑀮𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀯𑀻𑀭𑀺𑀬𑀼𑀧𑁆𑀧𑀸𑀤𑀦𑀢𑁆𑀣𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸, 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻’’𑀢𑀺 𑀏𑀯𑀁 𑀉𑀧𑁆𑀧𑀸𑀤𑁄 𑀳𑁄𑀢𑀺 ¶ . 𑀢𑀢𑁆𑀣 𑀧𑀻𑀢𑀺𑀬𑁂𑀯 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀦𑀸𑀫. 𑀢𑀲𑁆𑀲𑀸 𑀉𑀧𑁆𑀧𑀸𑀤𑀓𑀫𑀦𑀲𑀺𑀓𑀸𑀭𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀦𑀸𑀫.

𑀅𑀧𑀺𑀘 𑀏𑀓𑀸𑀤𑀲 𑀥𑀫𑁆𑀫𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺, 𑀥𑀫𑁆𑀫, 𑀲𑀗𑁆𑀖 ¶ , 𑀲𑀻𑀮, 𑀘𑀸𑀕, 𑀤𑁂𑀯𑀢𑀸𑀦𑀼𑀲𑁆𑀲𑀢𑀺 ¶ 𑀉𑀧𑀲𑀫𑀸𑀦𑀼𑀲𑁆𑀲𑀢𑀺 𑀮𑀽𑀔𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸 𑀲𑀺𑀦𑀺𑀤𑁆𑀥𑀧𑀼𑀕𑁆𑀕𑀮𑀲𑁂𑀯𑀦𑀢𑀸 𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀦𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀩𑀼𑀤𑁆𑀥𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲𑀸𑀧𑀺 𑀳𑀺 𑀬𑀸𑀯 𑀉𑀧𑀘𑀸𑀭𑀸 𑀲𑀓𑀮𑀲𑀭𑀻𑀭𑀁 𑀨𑀭𑀫𑀸𑀦𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀥𑀫𑁆𑀫𑀲𑀗𑁆𑀖𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲𑀸𑀧𑀺, 𑀤𑀻𑀖𑀭𑀢𑁆𑀢𑀁 𑀅𑀔𑀡𑁆𑀟𑀁 𑀓𑀢𑁆𑀯𑀸 𑀭𑀓𑁆𑀔𑀺𑀢𑀁 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀕𑀺𑀳𑀺𑀦𑁄𑀧𑀺 𑀤𑀲𑀲𑀻𑀮𑀁 𑀧𑀜𑁆𑀘𑀲𑀻𑀮𑀁 𑀧𑀜𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀤𑀼𑀩𑁆𑀪𑀺𑀓𑁆𑀔𑀪𑀬𑀸𑀤𑀻𑀲𑀼 𑀧𑀡𑀻𑀢𑀪𑁄𑀚𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀤𑀢𑁆𑀯𑀸 ‘‘𑀏𑀯𑀁 𑀦𑀸𑀫 𑀅𑀤𑀫𑁆𑀳𑀸’’𑀢𑀺 𑀘𑀸𑀕𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀕𑀺𑀳𑀺𑀦𑁄𑀧𑀺 𑀏𑀯𑀭𑀽𑀧𑁂 𑀓𑀸𑀮𑁂 𑀲𑀻𑀮𑀯𑀦𑁆𑀢𑀸𑀦𑀁 𑀤𑀺𑀦𑁆𑀦𑀤𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀬𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀤𑁂𑀯𑀢𑀸 𑀤𑁂𑀯𑀢𑁆𑀢𑀁 𑀧𑀢𑁆𑀢𑀸, 𑀢𑀣𑀸𑀭𑀽𑀧𑀸𑀦𑀁 𑀕𑀼𑀡𑀸𑀦𑀁 𑀅𑀢𑁆𑀢𑀦𑀺 𑀅𑀢𑁆𑀣𑀺𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀓𑁆𑀔𑀫𑁆𑀪𑀺𑀢𑀸 𑀓𑀺𑀮𑁂𑀲𑀸 𑀲𑀝𑁆𑀞𑀺𑀧𑀺 𑀲𑀢𑁆𑀢𑀢𑀺𑀧𑀺 𑀯𑀲𑁆𑀲𑀸𑀦𑀺 𑀦 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀘𑁂𑀢𑀺𑀬𑀤𑀲𑁆𑀲𑀦𑀩𑁄𑀥𑀺𑀤𑀲𑁆𑀲𑀦𑀣𑁂𑀭𑀤𑀲𑁆𑀲𑀦𑁂𑀲𑀼 𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸𑀬 𑀲𑀁𑀲𑀽𑀘𑀺𑀢𑀮𑀽𑀔𑀪𑀸𑀯𑁂 𑀩𑀼𑀤𑁆𑀥𑀸𑀤𑀻𑀲𑀼 𑀧𑀲𑀸𑀤𑀲𑀺𑀦𑁂𑀳𑀸𑀪𑀸𑀯𑁂𑀦 𑀕𑀤𑁆𑀭𑀪𑀧𑀺𑀝𑁆𑀞𑁂 𑀭𑀚𑀲𑀤𑀺𑀲𑁂 𑀮𑀽𑀔𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀦𑁆𑀢𑀲𑁆𑀲𑀸𑀧𑀺, 𑀩𑀼𑀤𑁆𑀥𑀸𑀤𑀻𑀲𑀼 𑀧𑀲𑀸𑀤𑀩𑀳𑀼𑀮𑁂 𑀫𑀼𑀤𑀼𑀘𑀺𑀢𑁆𑀢𑁂 𑀲𑀺𑀦𑀺𑀤𑁆𑀥𑀧𑀼𑀕𑁆𑀕𑀮𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺, 𑀭𑀢𑀦𑀢𑁆𑀢𑀬𑀕𑀼𑀡𑀧𑀭𑀺𑀤𑀻𑀧𑀓𑁂 𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀦𑁆𑀢𑁂 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀧𑀻𑀢𑀺𑀉𑀧𑁆𑀧𑀸𑀤𑀦𑀢𑁆𑀣𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀸𑀬𑀧𑀲𑁆𑀲𑀤𑁆𑀥𑀺 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺, 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻’’𑀢𑀺 𑀏𑀯𑀁 𑀉𑀧𑁆𑀧𑀸𑀤𑁄 𑀳𑁄𑀢𑀺.

𑀅𑀧𑀺𑀘 𑀲𑀢𑁆𑀢 𑀥𑀫𑁆𑀫𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀧𑀡𑀻𑀢𑀪𑁄𑀚𑀦𑀲𑁂𑀯𑀦𑀢𑀸 𑀉𑀢𑀼𑀲𑀼𑀔𑀲𑁂𑀯𑀦𑀢𑀸 𑀇𑀭𑀺𑀬𑀸𑀧𑀣𑀲𑀼𑀔𑀲𑁂𑀯𑀦𑀢𑀸 𑀫𑀚𑁆𑀛𑀢𑁆𑀢𑀧𑀬𑁄𑀕𑀢𑀸 𑀲𑀸𑀭𑀤𑁆𑀥𑀓𑀸𑀬𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸 𑀧𑀲𑁆𑀲𑀤𑁆𑀥𑀓𑀸𑀬𑀧𑀼𑀕𑁆𑀕𑀮𑀲𑁂𑀯𑀦𑀢𑀸 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀧𑀡𑀻𑀢𑀜𑁆𑀳𑀺 𑀲𑀺𑀦𑀺𑀤𑁆𑀥𑀁 𑀲𑀧𑁆𑀧𑀸𑀬𑀪𑁄𑀚𑀦𑀁 𑀪𑀼𑀜𑁆𑀚𑀦𑁆𑀢𑀲𑁆𑀲𑀸𑀧𑀺, 𑀲𑀻𑀢𑀼𑀡𑁆𑀳𑁂𑀲𑀼 ¶ 𑀘 𑀉𑀢𑀽𑀲𑀼 𑀞𑀸𑀦𑀸𑀤𑀻𑀲𑀼 𑀘 𑀇𑀭𑀺𑀬𑀸𑀧𑀣𑁂𑀲𑀼 𑀲𑀧𑁆𑀧𑀸𑀬𑀉𑀢𑀼𑀜𑁆𑀘 𑀇𑀭𑀺𑀬𑀸𑀧𑀣𑀜𑁆𑀘 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 ¶ 𑀧𑀲𑁆𑀲𑀤𑁆𑀥𑀺 𑀉𑀧𑁆𑀧𑀚𑁆𑀚𑀢𑀺. 𑀬𑁄 𑀧𑀦 𑀫𑀳𑀸𑀧𑀼𑀭𑀺𑀲𑀚𑀸𑀢𑀺𑀓𑁄 𑀲𑀩𑁆𑀩𑀉𑀢𑀼𑀇𑀭𑀺𑀬𑀸𑀧𑀣𑀓𑁆𑀔𑀫𑁄 𑀳𑁄𑀢𑀺, 𑀦 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀬𑀲𑁆𑀲 𑀲𑀪𑀸𑀕𑀯𑀺𑀲𑀪𑀸𑀕𑀢𑀸 𑀅𑀢𑁆𑀣𑀺, 𑀢𑀲𑁆𑀲𑁂𑀯 𑀯𑀺𑀲𑀪𑀸𑀕𑁂 𑀉𑀢𑀼𑀇𑀭𑀺𑀬𑀸𑀧𑀣𑁂 𑀯𑀚𑁆𑀚𑁂𑀢𑁆𑀯𑀸 𑀲𑀪𑀸𑀕𑁂 𑀲𑁂𑀯𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺. 𑀫𑀚𑁆𑀛𑀢𑁆𑀢𑀧𑀬𑁄𑀕𑁄 𑀯𑀼𑀘𑁆𑀘𑀢𑀺 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀓𑀫𑁆𑀫𑀲𑁆𑀲𑀓𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀸. 𑀇𑀫𑀺𑀦𑀸 𑀫𑀚𑁆𑀛𑀢𑁆𑀢𑀧𑀬𑁄𑀕𑁂𑀦 𑀉𑀧𑁆𑀧𑀚𑁆𑀚𑀢𑀺. 𑀬𑁄 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀧𑀭𑀁 𑀯𑀺𑀳𑁂𑀞𑀬𑀫𑀸𑀦𑁄 𑀯𑀺𑀘𑀭𑀢𑀺, 𑀏𑀯𑀭𑀽𑀧𑀁 𑀲𑀸𑀭𑀤𑁆𑀥𑀓𑀸𑀬𑀁 𑀧𑀼𑀕𑁆𑀕𑀮𑀁 𑀧𑀭𑀺𑀯𑀚𑁆𑀚𑀦𑁆𑀢𑀲𑁆𑀲𑀸𑀧𑀺, 𑀲𑀁𑀬𑀢𑀧𑀸𑀤𑀧𑀸𑀡𑀺𑀁 𑀧𑀲𑁆𑀲𑀤𑁆𑀥𑀓𑀸𑀬𑀁 𑀧𑀼𑀕𑁆𑀕𑀮𑀁 𑀲𑁂𑀯𑀦𑁆𑀢𑀲𑁆𑀲𑀸𑀧𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀧𑀲𑁆𑀲𑀤𑁆𑀥𑀺𑀉𑀧𑁆𑀧𑀸𑀤𑀦𑀢𑁆𑀣𑀸𑀬 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀲𑁆𑀲𑀸𑀧𑀺 ¶ 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀫𑀣𑀦𑀺𑀫𑀺𑀢𑁆𑀢𑀁 𑀅𑀩𑁆𑀬𑀕𑁆𑀕𑀦𑀺𑀫𑀺𑀢𑁆𑀢𑀁, 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄, 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻’’𑀢𑀺 𑀏𑀯𑀁 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀢𑀢𑁆𑀣 𑀲𑀫𑀣𑁄𑀯 𑀲𑀫𑀣𑀦𑀺𑀫𑀺𑀢𑁆𑀢𑀁 𑀅𑀯𑀺𑀓𑁆𑀔𑁂𑀧𑀝𑁆𑀞𑁂𑀦 𑀘 𑀅𑀩𑁆𑀬𑀕𑁆𑀕𑀦𑀺𑀫𑀺𑀢𑁆𑀢𑀦𑁆𑀢𑀺.

𑀅𑀧𑀺𑀘 𑀏𑀓𑀸𑀤𑀲 𑀥𑀫𑁆𑀫𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀢𑀸 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀢𑀸 𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑀸 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀡𑁆𑀳𑀦𑀢𑀸 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀦𑀺𑀕𑁆𑀕𑀡𑁆𑀳𑀦𑀢𑀸 𑀲𑀫𑀬𑁂 𑀲𑀫𑁆𑀧𑀳𑀁𑀲𑀦𑀢𑀸 𑀲𑀫𑀬𑁂 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑀸 𑀅𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸 𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀲𑁂𑀯𑀦𑀢𑀸 𑀛𑀸𑀦𑀯𑀺𑀫𑁄𑀓𑁆𑀔𑀧𑀘𑁆𑀘𑀯𑁂𑀓𑁆𑀔𑀡𑀢𑀸 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀢𑀢𑁆𑀣 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀢𑀸 𑀘 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀢𑀸 𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑀸 𑀦𑀸𑀫 𑀓𑀲𑀺𑀡𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑀡𑀓𑀼𑀲𑀮𑀢𑀸. 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀡𑁆𑀳𑀦𑀢𑀸𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀢𑀺𑀲𑀺𑀣𑀺𑀮𑀯𑀻𑀭𑀺𑀬𑀢𑀸𑀤𑀻𑀳𑀺 𑀮𑀻𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀯𑀺𑀘𑀬𑀯𑀻𑀭𑀺𑀬𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀫𑀼𑀝𑁆𑀞𑀸𑀧𑀦𑁂𑀦 𑀢𑀲𑁆𑀲 𑀧𑀕𑁆𑀕𑀡𑁆𑀳𑀦𑀁. 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀡𑁆𑀳𑀦𑀢𑀸𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀆𑀭𑀤𑁆𑀥𑀯𑀻𑀭𑀺𑀬𑀢𑀸𑀤𑀻𑀳𑀺 𑀉𑀤𑁆𑀥𑀢𑀁 ¶ 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀫𑀼𑀝𑁆𑀞𑀸𑀧𑀦𑁂𑀦 𑀢𑀲𑁆𑀲 𑀦𑀺𑀕𑁆𑀕𑀡𑁆𑀳𑀦𑀁. 𑀲𑀫𑀬𑁂 𑀲𑀫𑁆𑀧𑀳𑀁𑀲𑀦𑀢𑀸𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀧𑀜𑁆𑀜𑀸𑀧𑀬𑁄𑀕𑀫𑀦𑁆𑀤𑀢𑀸𑀬 𑀯𑀸 𑀉𑀧𑀲𑀫𑀲𑀼𑀔𑀸𑀦𑀥𑀺𑀕𑀫𑁂𑀦 𑀯𑀸 𑀦𑀺𑀭𑀲𑁆𑀲𑀸𑀤𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀝𑁆𑀞𑀲𑀁𑀯𑁂𑀕𑀯𑀢𑁆𑀣𑀼𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀲𑀁𑀯𑁂𑀚𑁂𑀢𑀺 ¶ . 𑀅𑀝𑁆𑀞 𑀲𑀁𑀯𑁂𑀕𑀯𑀢𑁆𑀣𑀽𑀦𑀺 𑀦𑀸𑀫 𑀚𑀸𑀢𑀺 𑀚𑀭𑀸 𑀩𑁆𑀬𑀸𑀥𑀺 𑀫𑀭𑀡𑀸𑀦𑀺 𑀘𑀢𑁆𑀢𑀸𑀭𑀺, 𑀅𑀧𑀸𑀬𑀤𑀼𑀓𑁆𑀔𑀁 𑀧𑀜𑁆𑀘𑀫𑀁, 𑀅𑀢𑀻𑀢𑁂 𑀯𑀝𑁆𑀝𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀅𑀦𑀸𑀕𑀢𑁂 𑀯𑀝𑁆𑀝𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀆𑀳𑀸𑀭𑀧𑀭𑀺𑀬𑁂𑀝𑁆𑀞𑀺𑀫𑀽𑀮𑀓𑀁 𑀤𑀼𑀓𑁆𑀔𑀦𑁆𑀢𑀺. 𑀭𑀢𑀦𑀢𑁆𑀢𑀬𑀕𑀼𑀡𑀸𑀦𑀼𑀲𑁆𑀲𑀭𑀡𑁂𑀦 𑀘 𑀧𑀲𑀸𑀤𑀁 𑀚𑀦𑁂𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀫𑀬𑁂 𑀲𑀫𑁆𑀧𑀳𑀁𑀲𑀦𑀢𑀸’’𑀢𑀺.

𑀲𑀫𑀬𑁂 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑀸 𑀦𑀸𑀫 𑀬𑀲𑁆𑀫𑀺𑀁 𑀲𑀫𑀬𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀆𑀕𑀫𑁆𑀫 𑀅𑀮𑀻𑀦𑀁 𑀅𑀦𑀼𑀤𑁆𑀥𑀢𑀁 𑀅𑀦𑀺𑀭𑀲𑁆𑀲𑀸𑀤𑀁 𑀆𑀭𑀫𑁆𑀫𑀡𑁂 𑀲𑀫𑀧𑁆𑀧𑀯𑀢𑁆𑀢𑀁 𑀲𑀫𑀣𑀯𑀻𑀣𑀺𑀧𑀝𑀺𑀧𑀦𑁆𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀤𑀸𑀲𑁆𑀲 𑀧𑀕𑁆𑀕𑀳𑀦𑀺𑀕𑁆𑀕𑀳𑀲𑀫𑁆𑀧𑀳𑀁𑀲𑀦𑁂𑀲𑀼 𑀦 𑀩𑁆𑀬𑀸𑀧𑀸𑀭𑀁 𑀆𑀧𑀚𑁆𑀚𑀢𑀺, 𑀲𑀸𑀭𑀣𑀺 𑀯𑀺𑀬 𑀲𑀫𑀧𑁆𑀧𑀯𑀢𑁆𑀢𑁂𑀲𑀼 𑀅𑀲𑁆𑀲𑁂𑀲𑀼. 𑀅𑀬𑀁 𑀯𑀼𑀘𑁆𑀘𑀢𑀺 𑁋 ‘‘𑀲𑀫𑀬𑁂 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑀸’’𑀢𑀺. 𑀅𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸 𑀦𑀸𑀫 𑀉𑀧𑀘𑀸𑀭𑀁 𑀯𑀸 𑀅𑀧𑁆𑀧𑀦𑀁 ¶ 𑀯𑀸 𑀅𑀧𑁆𑀧𑀢𑁆𑀢𑀸𑀦𑀁 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀆𑀭𑀓𑀸 𑀧𑀭𑀺𑀯𑀚𑁆𑀚𑀦𑀁. 𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀲𑁂𑀯𑀦𑀸 𑀦𑀸𑀫 𑀉𑀧𑀘𑀸𑀭𑁂𑀦 𑀯𑀸 𑀅𑀧𑁆𑀧𑀦𑀸𑀬 𑀯𑀸 𑀲𑀫𑀸𑀳𑀺𑀢𑀘𑀺𑀢𑁆𑀢𑀸𑀦𑀁 𑀲𑁂𑀯𑀦𑀸 𑀪𑀚𑀦𑀸 𑀧𑀬𑀺𑀭𑀼𑀧𑀸𑀲𑀦𑀸. 𑀢𑀤𑀥𑀺𑀫𑀼𑀢𑁆𑀢𑀢𑀸 𑀦𑀸𑀫 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀲𑀫𑀸𑀥𑀺𑀉𑀧𑁆𑀧𑀸𑀤𑀦𑀢𑁆𑀣𑀁𑀬𑁂𑀯 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀢𑀸. 𑀏𑀯𑀜𑁆𑀳𑀺 𑀧𑀝𑀺𑀧𑀚𑁆𑀚𑀢𑁄 𑀏𑀲 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸, 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄, 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀲𑁆𑀲 𑀯𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻’’𑀢𑀺 𑀏𑀯𑀁 𑀉𑀧𑁆𑀧𑀸𑀤𑁄 𑀳𑁄𑀢𑀺. 𑀢𑀢𑁆𑀣 𑀉𑀧𑁂𑀓𑁆𑀔𑀸𑀯 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀦𑀸𑀫.

𑀅𑀧𑀺𑀘 𑀧𑀜𑁆𑀘 𑀥𑀫𑁆𑀫𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀲𑀢𑁆𑀢𑀫𑀚𑁆𑀛𑀢𑁆𑀢𑀢𑀸 𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀢𑀸 𑀲𑀢𑁆𑀢𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸 ¶ 𑀲𑀢𑁆𑀢𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀢𑀸 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀢𑀢𑁆𑀣 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀲𑀢𑁆𑀢𑀫𑀚𑁆𑀛𑀢𑁆𑀢𑀢𑀁 𑀲𑀫𑀼𑀝𑁆𑀞𑀸𑀧𑁂𑀢𑀺 ‘‘𑀢𑁆𑀯𑀁 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄𑀯 𑀓𑀫𑁆𑀫𑁂𑀦 𑀕𑀫𑀺𑀲𑁆𑀲𑀲𑀺, 𑀏𑀲𑁄𑀧𑀺 𑀅𑀢𑁆𑀢𑀦𑁄𑀯 𑀓𑀫𑁆𑀫𑁂𑀦 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄𑀯 𑀓𑀫𑁆𑀫𑁂𑀦 𑀕𑀫𑀺𑀲𑁆𑀲𑀢𑀺, 𑀢𑁆𑀯𑀁 𑀓𑀁 𑀓𑁂𑀮𑀸𑀬𑀲𑀻’’𑀢𑀺 𑀏𑀯𑀁 𑀓𑀫𑁆𑀫𑀲𑁆𑀲𑀓𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑁂𑀦, ‘‘𑀧𑀭𑀫𑀢𑁆𑀣𑀢𑁄 𑀲𑀢𑁆𑀢𑁄𑀬𑁂𑀯 𑀦𑀢𑁆𑀣𑀺, 𑀲𑁄 𑀢𑁆𑀯𑀁 𑀓𑀁 𑀓𑁂𑀮𑀸𑀬𑀲𑀻’’𑀢𑀺 𑀏𑀯𑀁 𑀦𑀺𑀲𑁆𑀲𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀘𑀸𑀢𑀺. 𑀤𑁆𑀯𑀻𑀳𑁂𑀯𑀸𑀓𑀸𑀭𑁂𑀳𑀺 𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀢𑀁 𑀲𑀫𑀼𑀝𑁆𑀞𑀸𑀧𑁂𑀢𑀺 𑁋 ‘‘𑀇𑀤𑀁 𑀘𑀻𑀯𑀭𑀁 𑀅𑀦𑀼𑀧𑀼𑀩𑁆𑀩𑁂𑀦 𑀯𑀡𑁆𑀡𑀯𑀺𑀓𑀸𑀭𑀢𑀜𑁆𑀘𑁂𑀯 𑀚𑀺𑀡𑁆𑀡𑀪𑀸𑀯𑀜𑁆𑀘 𑀉𑀧𑀕𑀦𑁆𑀢𑁆𑀯𑀸 𑀧𑀸𑀤𑀧𑀼𑀜𑁆𑀙𑀦𑀘𑁄𑀴𑀓𑀁 𑀳𑀼𑀢𑁆𑀯𑀸 𑀬𑀝𑁆𑀞𑀺𑀓𑁄𑀝𑀺𑀬𑀸 𑀙𑀟𑁆𑀟𑀦𑀻𑀬𑀁 𑀪𑀯𑀺𑀲𑁆𑀲𑀢𑀺, 𑀲𑀘𑁂 𑀧𑀦𑀲𑁆𑀲 𑀲𑀸𑀫𑀺𑀓𑁄 ¶ 𑀪𑀯𑁂𑀬𑁆𑀬, 𑀦𑀸𑀲𑁆𑀲 𑀏𑀯𑀁 𑀯𑀺𑀦𑀲𑁆𑀲𑀺𑀢𑀼𑀁 𑀤𑀤𑁂𑀬𑁆𑀬𑀸’’𑀢𑀺 𑀏𑀯𑀁 𑀅𑀲𑁆𑀲𑀸𑀫𑀺𑀓𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀘, ‘‘𑀅𑀦𑀤𑁆𑀥𑀦𑀺𑀬𑀁 𑀇𑀤𑀁 𑀢𑀸𑀯𑀓𑀸𑀮𑀺𑀓’’𑀦𑁆𑀢𑀺 𑀏𑀯𑀁 𑀢𑀸𑀯𑀓𑀸𑀮𑀺𑀓𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀘𑀸𑀢𑀺. 𑀬𑀣𑀸 𑀘 𑀘𑀻𑀯𑀭𑁂, 𑀏𑀯𑀁 𑀧𑀢𑁆𑀢𑀸𑀤𑀻𑀲𑀼𑀧𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀲𑀢𑁆𑀢𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸𑀢𑀺 𑀏𑀢𑁆𑀣 𑀬𑁄 𑀧𑀼𑀕𑁆𑀕𑀮𑁄 𑀕𑀺𑀳𑀺 𑀯𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀥𑀻𑀢𑀸𑀤𑀺𑀓𑁂, 𑀧𑀩𑁆𑀩𑀚𑀺𑀢𑁄 𑀯𑀸 𑀅𑀢𑁆𑀢𑀦𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀸𑀤𑀺𑀓𑁂 𑀫𑀫𑀸𑀬𑀢𑀺, 𑀲𑀳𑀢𑁆𑀣𑁂𑀦𑁂𑀯 𑀦𑁂𑀲𑀁 𑀓𑁂𑀲𑀘𑁆𑀙𑁂𑀤𑀦𑀲𑀽𑀘𑀺𑀓𑀫𑁆𑀫𑀘𑀻𑀯𑀭𑀥𑁄𑀯𑀦𑀭𑀚𑀦𑀧𑀢𑁆𑀢𑀧𑀘𑀦𑀸𑀤𑀻𑀦𑀺 𑀓𑀭𑁄𑀢𑀺, 𑀫𑀼𑀳𑀼𑀢𑁆𑀢𑀫𑁆𑀧𑀺 𑀅𑀧𑀲𑁆𑀲𑀦𑁆𑀢𑁄 ‘‘𑀅𑀲𑀼𑀓𑁄 𑀲𑀸𑀫𑀡𑁂𑀭𑁄 𑀓𑀼𑀳𑀺𑀁 𑀅𑀲𑀼𑀓𑁄 𑀤𑀳𑀭𑁄 𑀓𑀼𑀳𑀺’’𑀦𑁆𑀢𑀺 𑀪𑀦𑁆𑀢𑀫𑀺𑀕𑁄 𑀯𑀺𑀬 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀢𑀺, 𑀅𑀜𑁆𑀜𑁂𑀦 𑀓𑁂𑀲𑀘𑁆𑀙𑁂𑀤𑀦𑀸𑀤𑀻𑀦𑀁 𑀅𑀢𑁆𑀣𑀸𑀬 ‘‘𑀫𑀼𑀳𑀼𑀢𑁆𑀢𑀁 𑀅𑀲𑀼𑀓𑀁 𑀧𑁂𑀲𑁂𑀣𑀸’’𑀢𑀺 𑀬𑀸𑀘𑀺𑀬𑀫𑀸𑀦𑁄𑀧𑀺 ‘‘𑀅𑀫𑁆𑀳𑁂𑀧𑀺 𑀢𑀁 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀦 𑀓𑀸𑀭𑁂𑀫, 𑀢𑀼𑀫𑁆𑀳𑁂 𑀦𑀁 𑀕𑀳𑁂𑀢𑁆𑀯𑀸 𑀓𑀺𑀮𑀫𑁂𑀲𑁆𑀲𑀣𑀸’’𑀢𑀺 𑀦 𑀤𑁂𑀢𑀺, 𑀅𑀬𑀁 𑀲𑀢𑁆𑀢𑀓𑁂𑀮𑀸𑀬𑀦𑁄 𑀦𑀸𑀫.

𑀬𑁄 ¶ 𑀧𑀦 𑀘𑀻𑀯𑀭𑀧𑀢𑁆𑀢𑀣𑀸𑀮𑀓𑀓𑀢𑁆𑀢𑀭𑀬𑀝𑁆𑀞𑀺𑀆𑀤𑀻𑀦𑀺 𑀫𑀫𑀸𑀬𑀢𑀺, 𑀅𑀜𑁆𑀜𑀲𑁆𑀲 𑀳𑀢𑁆𑀣𑁂𑀦 𑀧𑀭𑀸𑀫𑀲𑀺𑀢𑀼𑀫𑁆𑀧𑀺 𑀦 𑀤𑁂𑀢𑀺, 𑀢𑀸𑀯𑀓𑀸𑀮𑀺𑀓𑀁 𑀬𑀸𑀘𑀺𑀢𑁄 ‘‘𑀫𑀬𑀫𑁆𑀧𑀺 𑀇𑀤𑀁 𑀫𑀫𑀸𑀬𑀦𑁆𑀢𑀸 𑀦 𑀧𑀭𑀺𑀪𑀼𑀜𑁆𑀚𑀸𑀫, 𑀢𑀼𑀫𑁆𑀳𑀸𑀓𑀁 𑀓𑀺𑀁 𑀤𑀲𑁆𑀲𑀸𑀫𑀸’’𑀢𑀺 𑀯𑀤𑀢𑀺, 𑀅𑀬𑀁 𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑁄 𑀦𑀸𑀫. 𑀬𑁄 𑀧𑀦 𑀢𑁂𑀲𑀼 𑀤𑁆𑀯𑀻𑀲𑀼𑀧𑀺 𑀯𑀢𑁆𑀣𑀽𑀲𑀼 𑀫𑀚𑁆𑀛𑀢𑁆𑀢𑁄 𑀉𑀤𑀸𑀲𑀺𑀦𑁄, 𑀅𑀬𑀁 𑀲𑀢𑁆𑀢𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑁄 𑀦𑀸𑀫. 𑀇𑀢𑀺 𑀅𑀬𑀁 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀏𑀯𑀭𑀽𑀧𑀁 𑀲𑀢𑁆𑀢𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑀧𑀼𑀕𑁆𑀕𑀮𑀁 𑀆𑀭𑀓𑀸 𑀧𑀭𑀺𑀯𑀚𑁆𑀚𑀦𑁆𑀢𑀲𑁆𑀲𑀸𑀧𑀺, 𑀲𑀢𑁆𑀢𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀧𑀼𑀕𑁆𑀕𑀮𑀁 𑀲𑁂𑀯𑀦𑁆𑀢𑀲𑁆𑀲𑀸𑀧𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀢𑀤𑀼𑀧𑁆𑀧𑀸𑀤𑀦𑀢𑁆𑀣𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀲𑁆𑀲𑀸𑀧𑀺 ¶ 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺 𑀳𑁄𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀯𑀸 𑀲𑀢𑁆𑀢 𑀲𑀫𑁆𑀩𑁄𑀚𑁆𑀛𑀗𑁆𑀕𑁂 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸, 𑀧𑀭𑀲𑁆𑀲 𑀯𑀸, 𑀓𑀸𑀮𑁂𑀦 𑀯𑀸 𑀅𑀢𑁆𑀢𑀦𑁄, 𑀓𑀸𑀮𑁂𑀦 𑀯𑀸 𑀧𑀭𑀲𑁆𑀲 𑀲𑀫𑁆𑀩𑁄𑀚𑁆𑀛𑀗𑁆𑀕𑁂 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀯𑀬𑀸 𑀧𑀦𑁂𑀢𑁆𑀣 𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀦𑀺𑀭𑁄𑀥𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀇𑀢𑁄 𑀧𑀭𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀓𑁂𑀯𑀮𑀜𑁆𑀳𑀺 𑀇𑀥 𑀩𑁄𑀚𑁆𑀛𑀗𑁆𑀕𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺 𑀏𑀯𑀁 𑀬𑁄𑀚𑀦𑀁 𑀓𑀢𑁆𑀯𑀸 𑀩𑁄𑀚𑁆𑀛𑀗𑁆𑀕𑀧𑀭𑀺𑀕𑁆𑀕𑀸𑀳𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑁆𑀬𑀸𑀦𑀫𑀼𑀔𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺.

𑀩𑁄𑀚𑁆𑀛𑀗𑁆𑀕𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀘𑀢𑀼𑀲𑀘𑁆𑀘𑀧𑀩𑁆𑀩𑀯𑀡𑁆𑀡𑀦𑀸

𑁩𑁮𑁬. 𑀏𑀯𑀁 ¶ 𑀲𑀢𑁆𑀢𑀩𑁄𑀚𑁆𑀛𑀗𑁆𑀕𑀯𑀲𑁂𑀦 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀁 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀘𑀢𑀼𑀲𑀘𑁆𑀘𑀯𑀲𑁂𑀦 𑀯𑀺𑀪𑀚𑀺𑀢𑀼𑀁 𑀧𑀼𑀦 𑀘𑀧𑀭𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺 𑀞𑀧𑁂𑀢𑁆𑀯𑀸 𑀢𑀡𑁆𑀳𑀁 𑀢𑁂𑀪𑀽𑀫𑀓𑀥𑀫𑁆𑀫𑁂 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀬𑀣𑀸𑀲𑀪𑀸𑀯𑀢𑁄 𑀧𑀚𑀸𑀦𑀸𑀢𑀺, 𑀢𑀲𑁆𑀲𑁂𑀯 𑀔𑁄 𑀧𑀦 𑀤𑀼𑀓𑁆𑀔𑀲𑁆𑀲 𑀚𑀦𑀺𑀓𑀁 𑀲𑀫𑀼𑀝𑁆𑀞𑀸𑀧𑀺𑀓𑀁 𑀧𑀼𑀭𑀺𑀫𑀢𑀡𑁆𑀳𑀁 ‘‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺, 𑀉𑀪𑀺𑀦𑁆𑀦𑀁 𑀅𑀧𑁆𑀧𑀯𑀢𑁆𑀢𑀺𑀦𑀺𑀩𑁆𑀩𑀸𑀦𑀁 ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺, 𑀤𑀼𑀓𑁆𑀔𑀧𑀭𑀺𑀚𑀸𑀦𑀦𑀁 𑀲𑀫𑀼𑀤𑀬𑀧𑀚𑀳𑀦𑀁 𑀦𑀺𑀭𑁄𑀥𑀲𑀘𑁆𑀙𑀺𑀓𑀭𑀡𑀁 𑀅𑀭𑀺𑀬𑀫𑀕𑁆𑀕𑀁 ‘‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸’’𑀢𑀺 𑀬𑀣𑀸𑀲𑀪𑀸𑀯𑀢𑁄 𑀧𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀅𑀯𑀲𑁂𑀲𑀸 𑀅𑀭𑀺𑀬𑀲𑀘𑁆𑀘𑀓𑀣𑀸 𑀞𑀧𑁂𑀢𑁆𑀯𑀸 𑀚𑀸𑀢𑀺𑀆𑀤𑀻𑀦𑀁 𑀧𑀤𑀪𑀸𑀚𑀦𑀓𑀣𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀸𑀬𑁂𑀯.

𑀤𑀼𑀓𑁆𑀔𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁩𑁮𑁮. 𑀧𑀤𑀪𑀸𑀚𑀦𑁂 ¶ 𑀧𑀦 𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀚𑀸𑀢𑀻𑀢𑀺 𑀪𑀺𑀓𑁆𑀔𑀯𑁂, 𑀬𑀸 𑀚𑀸𑀢𑀺𑀧𑀺 𑀤𑀼𑀓𑁆𑀔𑀸𑀢𑀺 𑀏𑀯𑀁 𑀯𑀼𑀢𑁆𑀢𑀸 𑀚𑀸𑀢𑀺, 𑀲𑀸 𑀓𑀢𑀫𑀸𑀢𑀺 𑀏𑀯𑀁 𑀲𑀩𑁆𑀩𑀧𑀼𑀘𑁆𑀙𑀸𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀦𑁆𑀢𑀺 𑀇𑀤𑀁 ‘‘𑀇𑀫𑁂𑀲𑀁 𑀦𑀸𑀫𑀸’’𑀢𑀺 𑀦𑀺𑀬𑀫𑀸𑀪𑀸𑀯𑀢𑁄 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀭𑀺𑀬𑀸𑀤𑀸𑀦𑀯𑀘𑀦𑀁. 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂𑀢𑀺 𑀇𑀤𑀫𑁆𑀧𑀺 𑀲𑀩𑁆𑀩𑀲𑀢𑁆𑀢𑀦𑀺𑀓𑀸𑀬𑀧𑀭𑀺𑀬𑀸𑀤𑀸𑀦𑀯𑀘𑀦𑀁 𑀚𑀦𑀦𑀁 𑀚𑀸𑀢𑀺 𑀲𑀯𑀺𑀓𑀸𑀭𑀸𑀦𑀁 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀜𑁆𑀚𑀸𑀢𑀻𑀢𑀺 𑀇𑀤𑀁 𑀢𑀲𑁆𑀲𑀸 𑀏𑀯 𑀉𑀧𑀲𑀕𑁆𑀕𑀫𑀡𑁆𑀟𑀺𑀢𑀯𑁂𑀯𑀘𑀦𑀁. 𑀲𑀸 𑀏𑀯 𑀅𑀦𑀼𑀧𑀯𑀺𑀝𑁆𑀞𑀸𑀓𑀸𑀭𑁂𑀦 𑀑𑀓𑁆𑀓𑀫𑀦𑀝𑁆𑀞𑁂𑀦 𑀑𑀓𑁆𑀓𑀦𑁆𑀢𑀺. 𑀦𑀺𑀩𑁆𑀩𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀦𑀝𑁆𑀞𑁂𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀺. 𑀇𑀢𑀺 𑀅𑀬𑀁 𑀘𑀢𑀼𑀩𑁆𑀩𑀺𑀥𑀸𑀧𑀺 𑀲𑀫𑁆𑀫𑀼𑀢𑀺𑀓𑀣𑀸 𑀦𑀸𑀫 ¶ . 𑀔𑀦𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑁄𑀢𑀺 𑀅𑀬𑀁 𑀧𑀦 𑀧𑀭𑀫𑀢𑁆𑀣𑀓𑀣𑀸. 𑀏𑀓𑀯𑁄𑀓𑀸𑀭𑀪𑀯𑀸𑀤𑀻𑀲𑀼 𑀏𑀓𑀘𑀢𑀼𑀧𑀜𑁆𑀘𑀪𑁂𑀤𑀸𑀦𑀁 𑀔𑀦𑁆𑀥𑀸𑀦𑀁𑀬𑁂𑀯 𑀧𑀸𑀢𑀼𑀪𑀸𑀯𑁄, 𑀦 𑀧𑀼𑀕𑁆𑀕𑀮𑀲𑁆𑀲, 𑀢𑀲𑁆𑀫𑀺𑀁 𑀧𑀦 𑀲𑀢𑀺 𑀧𑀼𑀕𑁆𑀕𑀮𑁄 𑀧𑀸𑀢𑀼𑀪𑀽𑀢𑁄𑀢𑀺 𑀯𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀺. 𑀆𑀬𑀢𑀦𑀸𑀦𑀁 𑀧𑀝𑀺𑀮𑀸𑀪𑁄𑀢𑀺 𑀆𑀬𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀸𑀦𑁂𑀯 𑀧𑀝𑀺𑀮𑀤𑁆𑀥𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀲𑁄 𑀢𑁂𑀲𑀁 𑀧𑀸𑀢𑀼𑀪𑀸𑀯𑀲𑀗𑁆𑀔𑀸𑀢𑁄 𑀧𑀝𑀺𑀮𑀸𑀪𑁄𑀢𑀺 𑀅𑀢𑁆𑀣𑁄.

𑁩𑁮𑁯. 𑀚𑀭𑀸𑀢𑀺 𑀲𑀪𑀸𑀯𑀦𑀺𑀤𑁆𑀤𑁂𑀲𑁄. 𑀚𑀻𑀭𑀡𑀢𑀸𑀢𑀺 𑀆𑀓𑀸𑀭𑀪𑀸𑀯𑀦𑀺𑀤𑁆𑀤𑁂𑀲𑁄. 𑀔𑀡𑁆𑀟𑀺𑀘𑁆𑀘𑀦𑁆𑀢𑀺𑀆𑀤𑀺 𑀯𑀺𑀓𑀸𑀭𑀦𑀺𑀤𑁆𑀤𑁂𑀲𑁄. 𑀤𑀳𑀭𑀓𑀸𑀮𑀲𑁆𑀫𑀺𑀜𑁆𑀳𑀺 𑀤𑀦𑁆𑀢𑀸 𑀲𑀫𑀲𑁂𑀢𑀸 𑀳𑁄𑀦𑁆𑀢𑀺. 𑀢𑁂𑀬𑁂𑀯 𑀧𑀭𑀺𑀧𑀘𑁆𑀘𑀦𑁆𑀢𑁂 𑀅𑀦𑀼𑀓𑁆𑀓𑀫𑁂𑀦 𑀯𑀡𑁆𑀡𑀯𑀺𑀓𑀸𑀭𑀁 𑀆𑀧𑀚𑁆𑀚𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀧𑀢𑁆𑀢𑀦𑁆𑀢𑀺. 𑀅𑀣 𑀧𑀢𑀺𑀢𑀜𑁆𑀘 𑀞𑀺𑀢𑀜𑁆𑀘 𑀉𑀧𑀸𑀤𑀸𑀬 𑀔𑀡𑁆𑀟𑀺𑀢𑀤𑀦𑁆𑀢𑀸 𑀔𑀡𑁆𑀟𑀺𑀢𑀸 ¶ 𑀦𑀸𑀫. 𑀔𑀡𑁆𑀟𑀺𑀢𑀸𑀦𑀁 𑀪𑀸𑀯𑁄 𑀔𑀡𑁆𑀟𑀺𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀼𑀓𑁆𑀓𑀫𑁂𑀦 𑀧𑀡𑁆𑀟𑀭𑀪𑀽𑀢𑀸𑀦𑀺 𑀓𑁂𑀲𑀮𑁄𑀫𑀸𑀦𑀺 𑀧𑀮𑀺𑀢𑀸𑀦𑀺 𑀦𑀸𑀫. 𑀧𑀮𑀺𑀢𑀸𑀦𑀺 𑀲𑀜𑁆𑀚𑀸𑀢𑀸𑀦𑀺 𑀅𑀲𑁆𑀲𑀸𑀢𑀺 𑀧𑀮𑀺𑀢𑁄, 𑀧𑀮𑀺𑀢𑀲𑁆𑀲 𑀪𑀸𑀯𑁄 𑀧𑀸𑀮𑀺𑀘𑁆𑀘𑀁. 𑀚𑀭𑀸𑀯𑀸𑀢𑀧𑁆𑀧𑀳𑀸𑀭𑁂𑀦 𑀲𑁄𑀲𑀺𑀢𑀫𑀁𑀲𑀮𑁄𑀳𑀺𑀢𑀢𑀸𑀬 𑀯𑀮𑀺𑀬𑁄 𑀢𑀘𑀲𑁆𑀫𑀺𑀁 𑀅𑀲𑁆𑀲𑀸𑀢𑀺 𑀯𑀮𑀺𑀢𑁆𑀢𑀘𑁄, 𑀢𑀲𑁆𑀲 𑀪𑀸𑀯𑁄 𑀯𑀮𑀺𑀢𑁆𑀢𑀘𑀢𑀸. 𑀏𑀢𑁆𑀢𑀸𑀯𑀢𑀸 𑀤𑀦𑁆𑀢𑀓𑁂𑀲𑀮𑁄𑀫𑀢𑀘𑁂𑀲𑀼 𑀯𑀺𑀓𑀸𑀭𑀤𑀲𑁆𑀲𑀦𑀯𑀲𑁂𑀦 𑀧𑀸𑀓𑀝𑀻𑀪𑀽𑀢𑀸 𑀧𑀸𑀓𑀝𑀚𑀭𑀸 𑀤𑀲𑁆𑀲𑀺𑀢𑀸.

𑀬𑀣𑁂𑀯 𑀳𑀺 𑀉𑀤𑀓𑀲𑁆𑀲 𑀯𑀸 𑀯𑀸𑀢𑀲𑁆𑀲 𑀯𑀸 𑀅𑀕𑁆𑀕𑀺𑀦𑁄 𑀯𑀸 𑀢𑀺𑀡𑀭𑀼𑀓𑁆𑀔𑀸𑀤𑀻𑀦𑀁 𑀲𑀁𑀪𑀕𑁆𑀕𑀧𑀮𑀺𑀪𑀕𑁆𑀕𑀢𑀸𑀬 𑀯𑀸 𑀛𑀸𑀫𑀢𑀸𑀬 𑀯𑀸 𑀕𑀢𑀫𑀕𑁆𑀕𑁄 𑀧𑀸𑀓𑀝𑁄 𑀳𑁄𑀢𑀺, 𑀦 𑀘 𑀲𑁄 𑀕𑀢𑀫𑀕𑁆𑀕𑁄 𑀢𑀸𑀦𑁂𑀯 𑀉𑀤𑀓𑀸𑀤𑀻𑀦𑀺, 𑀏𑀯𑀫𑁂𑀯 𑀚𑀭𑀸𑀬 𑀤𑀦𑁆𑀢𑀸𑀤𑀻𑀦𑀁 𑀔𑀡𑁆𑀟𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀢𑀫𑀕𑁆𑀕𑁄 𑀧𑀸𑀓𑀝𑁄, 𑀘𑀓𑁆𑀔𑀼𑀁 𑀉𑀫𑁆𑀫𑀺𑀮𑁂𑀢𑁆𑀯𑀸𑀧𑀺 𑀕𑀬𑁆𑀳𑀢𑀺, 𑀦 𑀘 𑀔𑀡𑁆𑀟𑀺𑀘𑁆𑀘𑀸𑀤𑀻𑀦𑁂𑀯 𑀚𑀭𑀸. 𑀦 𑀳𑀺 𑀚𑀭𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀳𑁄𑀢𑀺. 𑀬𑀲𑁆𑀫𑀸 𑀧𑀦 𑀚𑀭𑀁 𑀧𑀢𑁆𑀢𑀲𑁆𑀲 𑀆𑀬𑀼 𑀳𑀸𑀬𑀢𑀺, 𑀢𑀲𑁆𑀫𑀸 𑀚𑀭𑀸 ‘‘𑀆𑀬𑀼𑀦𑁄 𑀲𑀁𑀳𑀸𑀦𑀻’’𑀢𑀺 𑀨𑀮𑀽𑀧𑀘𑀸𑀭𑁂𑀦 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀤𑀳𑀭𑀓𑀸𑀮𑁂 𑀲𑀼𑀧𑁆𑀧𑀲𑀦𑁆𑀦𑀸𑀦𑀺 𑀲𑀼𑀔𑀼𑀫𑀫𑁆𑀧𑀺 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀲𑀼𑀔𑁂𑀦𑁂𑀯 𑀘 𑀕𑀡𑁆𑀳𑀦𑀲𑀫𑀢𑁆𑀣𑀸𑀦𑀺 𑀘𑀓𑁆𑀔𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀚𑀭𑀁 𑀧𑀢𑁆𑀢𑀲𑁆𑀲 𑀧𑀭𑀺𑀧𑀓𑁆𑀓𑀸𑀦𑀺 𑀆𑀮𑀼𑀮𑀺𑀢𑀸𑀦𑀺 𑀅𑀯𑀺𑀲𑀤𑀸𑀦𑀺 𑀑𑀴𑀸𑀭𑀺𑀓𑀫𑁆𑀧𑀺 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀕𑀳𑁂𑀢𑀼𑀁 𑀅𑀲𑀫𑀢𑁆𑀣𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑁄’’𑀢𑀺𑀧𑀺 𑀨𑀮𑀽𑀧𑀘𑀸𑀭𑁂𑀦𑁂𑀯 𑀯𑀼𑀢𑁆𑀢𑀸.

𑁩𑁯𑁦. 𑀫𑀭𑀡𑀦𑀺𑀤𑁆𑀤𑁂𑀲𑁂 ¶ 𑀬𑀦𑁆𑀢𑀺 𑀫𑀭𑀡𑀁 𑀲𑀦𑁆𑀥𑀸𑀬 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀬𑀁 𑀫𑀭𑀡𑀁 𑀘𑀼𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀘𑀯𑀦𑀢𑀸𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀬𑀫𑁂𑀢𑁆𑀣 𑀬𑁄𑀚𑀦𑀸. 𑀢𑀢𑁆𑀣 𑀘𑀼𑀢𑀻𑀢𑀺 𑀲𑀪𑀸𑀯𑀦𑀺𑀤𑁆𑀤𑁂𑀲𑁄. 𑀘𑀯𑀦𑀢𑀸𑀢𑀺 𑀆𑀓𑀸𑀭𑀪𑀸𑀯𑀦𑀺𑀤𑁆𑀤𑁂𑀲𑁄. 𑀫𑀭𑀡𑀁 𑀧𑀢𑁆𑀢𑀲𑁆𑀲 𑀔𑀦𑁆𑀥𑀸 𑀪𑀺𑀚𑁆𑀚𑀦𑁆𑀢𑀺 𑀘𑁂𑀯 𑀅𑀦𑁆𑀢𑀭𑀥𑀸𑀬𑀦𑁆𑀢𑀺 𑀘 𑀅𑀤𑀲𑁆𑀲𑀦𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀪𑁂𑀤𑁄 𑀅𑀦𑁆𑀢𑀭𑀥𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀫𑀘𑁆𑀘𑀼𑀫𑀭𑀡𑀦𑁆𑀢𑀺 𑀫𑀘𑁆𑀘𑀼𑀫𑀭𑀡𑀁, 𑀦 𑀔𑀡𑀺𑀓𑀫𑀭𑀡𑀁. 𑀓𑀸𑀮𑀓𑀺𑀭𑀺𑀬𑀸𑀢𑀺 𑀫𑀭𑀡𑀓𑀸𑀮𑀓𑀺𑀭𑀺𑀬𑀸. 𑀅𑀬𑀁 𑀲𑀩𑁆𑀩𑀸𑀧𑀺 𑀲𑀫𑁆𑀫𑀼𑀢𑀺𑀓𑀣𑀸𑀯. 𑀔𑀦𑁆𑀥𑀸𑀦𑀁 𑀪𑁂𑀤𑁄𑀢𑀺 𑀅𑀬𑀁 𑀧𑀦 𑀧𑀭𑀫𑀢𑁆𑀣𑀓𑀣𑀸. 𑀏𑀓𑀯𑁄𑀓𑀸𑀭𑀪𑀯𑀸𑀤𑀻𑀲𑀼 𑀏𑀓𑀘𑀢𑀼𑀧𑀜𑁆𑀘𑀪𑁂𑀤𑀸𑀦𑀁 𑀔𑀦𑁆𑀥𑀸𑀦𑀁𑀬𑁂𑀯 𑀪𑁂𑀤𑁄, 𑀦 ¶ 𑀧𑀼𑀕𑁆𑀕𑀮𑀲𑁆𑀲, 𑀢𑀲𑁆𑀫𑀺𑀁 𑀧𑀦 𑀲𑀢𑀺 𑀧𑀼𑀕𑁆𑀕𑀮𑁄 𑀫𑀢𑁄𑀢𑀺 𑀯𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀺.

𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄𑀢𑀺 𑀅𑀢𑁆𑀢𑀪𑀸𑀯𑀲𑁆𑀲 𑀦𑀺𑀓𑁆𑀔𑁂𑀧𑁄. 𑀫𑀭𑀡𑀁 𑀧𑀢𑁆𑀢𑀲𑁆𑀲 𑀳𑀺 𑀦𑀺𑀭𑀢𑁆𑀣𑀁𑀯 𑀓𑀮𑀺𑀗𑁆𑀕𑀭𑀁 𑀅𑀢𑁆𑀢𑀪𑀸𑀯𑁄 𑀧𑀢𑀢𑀺, 𑀢𑀲𑁆𑀫𑀸 𑀢𑀁 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄𑀢𑀺 𑀯𑀼𑀢𑁆𑀢𑀁. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀘𑁆𑀙𑁂𑀤𑁄 𑀧𑀦 𑀲𑀩𑁆𑀩𑀸𑀓𑀸𑀭𑀢𑁄 𑀧𑀭𑀫𑀢𑁆𑀣𑀢𑁄 𑀫𑀭𑀡𑀁. 𑀏𑀢𑀤𑁂𑀯 ¶ 𑀲𑀫𑁆𑀫𑀼𑀢𑀺𑀫𑀭𑀡𑀦𑁆𑀢𑀺 𑀧𑀺 𑀯𑀼𑀘𑁆𑀘𑀢𑀺. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀫𑁂𑀯 𑀳𑀺 𑀕𑀳𑁂𑀢𑁆𑀯𑀸 𑀮𑁄𑀓𑀺𑀬𑀸 ‘‘𑀢𑀺𑀲𑁆𑀲𑁄 𑀫𑀢𑁄, 𑀨𑀼𑀲𑁆𑀲𑁄 𑀫𑀢𑁄’’𑀢𑀺 𑀯𑀤𑀦𑁆𑀢𑀺.

𑁩𑁯𑁧. 𑀩𑁆𑀬𑀲𑀦𑁂𑀦𑀸𑀢𑀺 𑀜𑀸𑀢𑀺𑀩𑁆𑀬𑀲𑀦𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀩𑁆𑀬𑀲𑀦𑁂𑀦. 𑀤𑀼𑀓𑁆𑀔𑀥𑀫𑁆𑀫𑁂𑀦𑀸𑀢𑀺 𑀯𑀥𑀩𑀦𑁆𑀥𑀸𑀤𑀺𑀦𑀸 𑀤𑀼𑀓𑁆𑀔𑀓𑀸𑀭𑀡𑁂𑀦. 𑀨𑀼𑀝𑁆𑀞𑀲𑁆𑀲𑀸𑀢𑀺 𑀅𑀚𑁆𑀛𑁄𑀢𑁆𑀣𑀝𑀲𑁆𑀲 𑀅𑀪𑀺𑀪𑀽𑀢𑀲𑁆𑀲. 𑀲𑁄𑀓𑁄𑀢𑀺 𑀬𑁄 𑀜𑀸𑀢𑀺𑀩𑁆𑀬𑀲𑀦𑀸𑀤𑀻𑀲𑀼 𑀯𑀸 𑀯𑀥𑀩𑀦𑁆𑀥𑀦𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀢𑀺 𑀢𑁂𑀦 𑀅𑀪𑀺𑀪𑀽𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺 𑀲𑁄𑀘𑀦𑀮𑀓𑁆𑀔𑀡𑁄 𑀲𑁄𑀓𑁄. 𑀲𑁄𑀘𑀺𑀢𑀢𑁆𑀢𑀦𑁆𑀢𑀺 𑀲𑁄𑀘𑀺𑀢𑀪𑀸𑀯𑁄. 𑀬𑀲𑁆𑀫𑀸 𑀧𑀦𑁂𑀲 𑀅𑀩𑁆𑀪𑀦𑁆𑀢𑀭𑁂 𑀲𑁄𑀲𑁂𑀦𑁆𑀢𑁄 𑀧𑀭𑀺𑀲𑁄𑀲𑁂𑀦𑁆𑀢𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀅𑀦𑁆𑀢𑁄𑀲𑁄𑀓𑁄 𑀅𑀦𑁆𑀢𑁄𑀧𑀭𑀺𑀲𑁄𑀓𑁄𑀢𑀺 𑀯𑀼𑀘𑁆𑀘𑀢𑀺.

𑁩𑁯𑁨. ‘‘𑀫𑀬𑁆𑀳𑀁 𑀥𑀻𑀢𑀸, 𑀫𑀬𑁆𑀳𑀁 𑀧𑀼𑀢𑁆𑀢𑁄’’𑀢𑀺 𑀏𑀯𑀁 𑀆𑀤𑀺𑀲𑁆𑀲 𑀆𑀤𑀺𑀲𑁆𑀲 𑀤𑁂𑀯𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑀺 𑀏𑀢𑁂𑀦𑀸𑀢𑀺 𑀆𑀤𑁂𑀯𑁄. 𑀢𑀁 𑀢𑀁 𑀯𑀡𑁆𑀡𑀁 𑀧𑀭𑀺𑀓𑀺𑀢𑁆𑀢𑁂𑀢𑁆𑀯𑀸 𑀤𑁂𑀯𑀦𑁆𑀢𑀺 𑀏𑀢𑁂𑀦𑀸𑀢𑀺 𑀧𑀭𑀺𑀤𑁂𑀯𑁄. 𑀢𑀢𑁄 𑀧𑀭𑀸 𑀤𑁆𑀯𑁂 𑀢𑀲𑁆𑀲𑁂𑀯 𑀪𑀸𑀯𑀦𑀺𑀤𑁆𑀤𑁂𑀲𑀸.

𑁩𑁯𑁩. 𑀓𑀸𑀬𑀺𑀓𑀦𑁆𑀢𑀺 𑀓𑀸𑀬𑀧𑀲𑀸𑀤𑀯𑀢𑁆𑀣𑀼𑀓𑀁. 𑀤𑀼𑀓𑁆𑀔𑀫𑀦𑀝𑁆𑀞𑁂𑀦 𑀤𑀼𑀓𑁆𑀔𑀁. 𑀅𑀲𑀸𑀢𑀦𑁆𑀢𑀺 𑀅𑀫𑀥𑀼𑀭𑀁. 𑀓𑀸𑀬𑀲𑀫𑁆𑀨𑀲𑁆𑀲𑀚𑀁 𑀤𑀼𑀓𑁆𑀔𑀦𑁆𑀢𑀺 𑀓𑀸𑀬𑀲𑀫𑁆𑀨𑀲𑁆𑀲𑀢𑁄 𑀚𑀸𑀢𑀁 𑀤𑀼𑀓𑁆𑀔𑀁. 𑀅𑀲𑀸𑀢𑀁 𑀯𑁂𑀤𑀬𑀺𑀢𑀦𑁆𑀢𑀺 𑀅𑀫𑀥𑀼𑀭𑀁 𑀯𑁂𑀤𑀬𑀺𑀢𑀁.

𑁩𑁯𑁪. 𑀘𑁂𑀢𑀲𑀺𑀓𑀦𑁆𑀢𑀺 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀁. 𑀲𑁂𑀲𑀁 𑀤𑀼𑀓𑁆𑀔𑁂 𑀯𑀼𑀢𑁆𑀢𑀦𑀬𑀫𑁂𑀯.

𑁩𑁯𑁫. 𑀆𑀬𑀸𑀲𑁄𑀢𑀺 𑀲𑀁𑀲𑀻𑀤𑀦𑀯𑀺𑀲𑀻𑀤𑀦𑀸𑀓𑀸𑀭𑀧𑁆𑀧𑀢𑁆𑀢𑁄 𑀘𑀺𑀢𑁆𑀢𑀓𑀺𑀮𑀫𑀣𑁄. 𑀩𑀮𑀯𑀢𑀭𑀁 𑀆𑀬𑀸𑀲𑁄 𑀉𑀧𑀸𑀬𑀸𑀲𑁄. 𑀢𑀢𑁄 𑀧𑀭𑀸 𑀤𑁆𑀯𑁂 𑀅𑀢𑁆𑀢𑀢𑁆𑀢𑀦𑀺𑀬𑀸𑀪𑀸𑀯𑀤𑀻𑀧𑀓𑀸 𑀪𑀸𑀯𑀦𑀺𑀤𑁆𑀤𑁂𑀲𑀸.

𑁩𑁯𑁮. 𑀚𑀸𑀢𑀺𑀥𑀫𑁆𑀫𑀸𑀦𑀦𑁆𑀢𑀺 ¶ 𑀚𑀸𑀢𑀺𑀲𑀪𑀸𑀯𑀸𑀦𑀁. 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀢𑀺. 𑀅𑀳𑁄 𑀯𑀢𑀸𑀢𑀺 𑀧𑀢𑁆𑀣𑀦𑀸. 𑀦 𑀔𑁄 𑀧𑀦𑁂𑀢𑀁 𑀇𑀘𑁆𑀙𑀸𑀬𑀸𑀢𑀺 𑀏𑀯𑀁 𑀚𑀸𑀢𑀺𑀬𑀸 𑀅𑀦𑀸𑀕𑀫𑀦𑀁 𑀯𑀺𑀦𑀸 𑀫𑀕𑁆𑀕𑀪𑀸𑀯𑀦𑀁 𑀦 𑀇𑀘𑁆𑀙𑀸𑀬 𑀧𑀢𑁆𑀢𑀩𑁆𑀩𑀁. 𑀇𑀤𑀫𑁆𑀧𑀻𑀢𑀺 𑀏𑀢𑀫𑁆𑀧𑀺 𑀉𑀧𑀭𑀺 𑀲𑁂𑀲𑀸𑀦𑀺 𑀉𑀧𑀸𑀤𑀸𑀬 𑀧𑀺𑀓𑀸𑀭𑁄. 𑀬𑀫𑁆𑀧𑀺𑀘𑁆𑀙𑀦𑁆𑀢𑀺 𑀬𑁂𑀦𑀧𑀺 𑀥𑀫𑁆𑀫𑁂𑀦 𑀅𑀮𑀩𑁆𑀪𑀦𑁂𑀬𑁆𑀬𑀯𑀢𑁆𑀣𑀼𑀁 𑀇𑀘𑁆𑀙𑀦𑁆𑀢𑁄 𑀦 𑀮𑀪𑀢𑀺, 𑀢𑀁 𑀅𑀮𑀩𑁆𑀪𑀦𑁂𑀬𑁆𑀬 𑀯𑀢𑁆𑀣𑀼𑀫𑁆𑀳𑀺 𑀇𑀘𑁆𑀙𑀦𑀁 𑀤𑀼𑀓𑁆𑀔𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑁩𑁯𑁯. 𑀔𑀦𑁆𑀥𑀦𑀺𑀤𑁆𑀤𑁂𑀲𑁂 ¶ 𑀭𑀽𑀧𑀜𑁆𑀘 𑀢𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁄 𑀘𑀸𑀢𑀺 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄 𑀏𑀯𑀁 𑀲𑀩𑁆𑀩𑀢𑁆𑀣.

𑀲𑀫𑀼𑀤𑀬𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪𑁦𑁦. 𑀬𑀸𑀬𑀁 𑀢𑀡𑁆𑀳𑀸𑀢𑀺 𑀬𑀸 𑀅𑀬𑀁 𑀢𑀡𑁆𑀳𑀸. 𑀧𑁄𑀦𑁄𑀩𑁆𑀪𑀯𑀺𑀓𑀸𑀢𑀺 𑀧𑀼𑀦𑀩𑁆𑀪𑀯𑀓𑀭𑀡𑀁 𑀧𑀼𑀦𑁄𑀩𑁆𑀪𑀯𑁄, 𑀧𑀼𑀦𑁄𑀩𑁆𑀪𑀯𑁄 𑀲𑀻𑀮𑀁 𑀅𑀲𑁆𑀲𑀸𑀢𑀺 𑀧𑁄𑀦𑁄𑀩𑁆𑀪𑀯𑀺𑀓𑀸. 𑀦𑀦𑁆𑀤𑀻𑀭𑀸𑀕𑁂𑀦 𑀲𑀳 𑀕𑀢𑀸𑀢𑀺 𑀦𑀦𑁆𑀤𑀻𑀭𑀸𑀕𑀲𑀳𑀕𑀢𑀸. 𑀦𑀦𑁆𑀤𑀻𑀭𑀸𑀕𑁂𑀦 𑀲𑀤𑁆𑀥𑀺𑀁 𑀅𑀢𑁆𑀣𑀢𑁄 𑀏𑀓𑀢𑁆𑀢𑀫𑁂𑀯 𑀕𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀺𑀦𑀻𑀢𑀺 ¶ 𑀬𑀢𑁆𑀭 𑀬𑀢𑁆𑀭 𑀅𑀢𑁆𑀢𑀪𑀸𑀯𑁄, 𑀢𑀢𑁆𑀭 𑀢𑀢𑁆𑀭 𑀅𑀪𑀺𑀦𑀦𑁆𑀤𑀺𑀦𑀻. 𑀭𑀽𑀧𑀸𑀤𑀻𑀲𑀼 𑀯𑀸 𑀆𑀭𑀫𑁆𑀫𑀡𑁂𑀲𑀼 𑀢𑀢𑁆𑀭 𑀢𑀢𑁆𑀭 𑀅𑀪𑀺𑀦𑀦𑁆𑀤𑀺𑀦𑀻, 𑀭𑀽𑀧𑀸𑀪𑀺𑀦𑀦𑁆𑀤𑀺𑀦𑀻 𑀲𑀤𑁆𑀤, 𑀕𑀦𑁆𑀥, 𑀭𑀲, 𑀨𑁄𑀝𑁆𑀞𑀩𑁆𑀩, 𑀥𑀫𑁆𑀫𑀸𑀪𑀺𑀦𑀦𑁆𑀤𑀺𑀦𑀻𑀢𑀺 𑀅𑀢𑁆𑀣𑁄. 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀦𑀺𑀧𑀸𑀢𑁄. 𑀢𑀲𑁆𑀲 𑀲𑀸 𑀓𑀢𑀫𑀸 𑀘𑁂𑀢𑀺 𑀅𑀢𑁆𑀣𑁄. 𑀓𑀸𑀫𑁂 𑀢𑀡𑁆𑀳𑀸 𑀓𑀸𑀫𑀢𑀡𑁆𑀳𑀸, 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀲𑁆𑀲𑁂𑀢𑀁 𑀦𑀸𑀫𑀁. 𑀪𑀯𑁂 𑀢𑀡𑁆𑀳𑀸 𑀪𑀯𑀢𑀡𑁆𑀳𑀸, 𑀪𑀯𑀧𑀢𑁆𑀣𑀦𑀸𑀯𑀲𑁂𑀦 𑀉𑀧𑁆𑀧𑀦𑁆𑀦𑀲𑁆𑀲 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑀲𑁆𑀲 𑀭𑀽𑀧𑀸𑀭𑀽𑀧𑀪𑀯𑀭𑀸𑀕𑀲𑁆𑀲 𑀘 𑀛𑀸𑀦𑀦𑀺𑀓𑀦𑁆𑀢𑀺𑀬𑀸 𑀘𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀺𑀪𑀯𑁂 𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀳𑀕𑀢𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.

𑀇𑀤𑀸𑀦𑀺 𑀢𑀲𑁆𑀲𑀸 𑀢𑀡𑁆𑀳𑀸𑀬 𑀯𑀢𑁆𑀣𑀼𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 𑀲𑀸 𑀔𑁄 𑀧𑀦𑁂𑀲𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀧𑁆𑀧𑀚𑁆𑀚𑀢𑀻𑀢𑀺 𑀚𑀸𑀬𑀢𑀺. 𑀦𑀺𑀯𑀺𑀲𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑀺𑀯𑀲𑁂𑀦 𑀧𑀢𑀺𑀝𑁆𑀞𑀳𑀢𑀺. 𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀦𑁆𑀢𑀺 𑀬𑀁 𑀮𑁄𑀓𑀲𑁆𑀫𑀺𑀁 𑀧𑀺𑀬𑀲𑀪𑀸𑀯𑀜𑁆𑀘𑁂𑀯 𑀫𑀥𑀼𑀭𑀲𑀪𑀸𑀯𑀜𑁆𑀘. 𑀘𑀓𑁆𑀔𑀼 𑀮𑁄𑀓𑁂𑀢𑀺𑀆𑀤𑀻𑀲𑀼 𑀮𑁄𑀓𑀲𑁆𑀫𑀺𑀜𑁆𑀳𑀺 𑀘𑀓𑁆𑀔𑀸𑀤𑀻𑀲𑀼 𑀫𑀫𑀢𑁆𑀢𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑀸 𑀲𑀢𑁆𑀢𑀸 𑀲𑀫𑁆𑀧𑀢𑁆𑀢𑀺𑀬𑀁 𑀧𑀢𑀺𑀝𑁆𑀞𑀺𑀢𑀸 𑀅𑀢𑁆𑀢𑀦𑁄 𑀘𑀓𑁆𑀔𑀼𑀁 𑀆𑀤𑀸𑀲𑀢𑀮𑀸𑀤𑀻𑀲𑀼 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀸𑀦𑀼𑀲𑀸𑀭𑁂𑀦 𑀯𑀺𑀧𑁆𑀧𑀲𑀦𑁆𑀦𑀁 𑀧𑀜𑁆𑀘𑀧𑀲𑀸𑀤𑀁 𑀲𑀼𑀯𑀡𑁆𑀡𑀯𑀺𑀫𑀸𑀦𑁂 𑀉𑀕𑁆𑀖𑀸𑀝𑀺𑀢𑀫𑀡𑀺𑀲𑀻𑀳𑀧𑀜𑁆𑀚𑀭𑀁 𑀯𑀺𑀬 𑀫𑀜𑁆𑀜𑀦𑁆𑀢𑀺, 𑀲𑁄𑀢𑀁 𑀭𑀚𑀢𑀧𑀦𑀸𑀴𑀺𑀓𑀁 𑀯𑀺𑀬, 𑀧𑀸𑀫𑀗𑁆𑀕𑀲𑀼𑀢𑁆𑀢𑀁 𑀯𑀺𑀬 𑀘 𑀫𑀜𑁆𑀜𑀦𑁆𑀢𑀺, ‘‘𑀢𑀼𑀗𑁆𑀕𑀦𑀸𑀲𑀸’’𑀢𑀺 𑀮𑀤𑁆𑀥𑀯𑁄𑀳𑀸𑀭𑀁 𑀖𑀸𑀦𑀁 𑀯𑀝𑁆𑀝𑀺𑀢𑁆𑀯𑀸 𑀞𑀧𑀺𑀢𑀳𑀭𑀺𑀢𑀸𑀮𑀯𑀝𑁆𑀝𑀁 𑀯𑀺𑀬 𑀫𑀜𑁆𑀜𑀦𑁆𑀢𑀺, 𑀚𑀺𑀯𑁆𑀳𑀁 𑀭𑀢𑁆𑀢𑀓𑀫𑁆𑀩𑀮𑀧𑀝𑀮𑀁 𑀯𑀺𑀬 𑀫𑀼𑀤𑀼𑀲𑀺𑀦𑀺𑀤𑁆𑀥𑀫𑀥𑀼𑀭𑀲𑀤𑀁 𑀫𑀜𑁆𑀜𑀦𑁆𑀢𑀺, 𑀓𑀸𑀬𑀁 𑀲𑀸𑀮𑀮𑀝𑁆𑀞𑀺𑀁 𑀯𑀺𑀬, 𑀲𑀼𑀯𑀡𑁆𑀡𑀢𑁄𑀭𑀡𑀁 𑀯𑀺𑀬 𑀘 𑀫𑀜𑁆𑀜𑀦𑁆𑀢𑀺, 𑀫𑀦𑀁 𑀅𑀜𑁆𑀜𑁂𑀲𑀁 𑀫𑀦𑁂𑀦 𑀅𑀲𑀤𑀺𑀲𑀁 𑀉𑀴𑀸𑀭𑀁 𑀫𑀜𑁆𑀜𑀦𑁆𑀢𑀺. 𑀭𑀽𑀧𑀁 𑀲𑀼𑀯𑀡𑁆𑀡𑀓𑀡𑀺𑀓𑀸𑀭𑀧𑀼𑀧𑁆𑀨𑀸𑀤𑀺𑀯𑀡𑁆𑀡𑀁 𑀯𑀺𑀬, 𑀲𑀤𑁆𑀤𑀁 𑀫𑀢𑁆𑀢𑀓𑀭𑀯𑀻𑀓 𑀓𑁄𑀓𑀺𑀮𑀫𑀦𑁆𑀤𑀥𑀫𑀺𑀢𑀫𑀡𑀺𑀯𑀁𑀲𑀦𑀺𑀕𑁆𑀖𑁄𑀲𑀁 𑀯𑀺𑀬, 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀸𑀦𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀕𑀦𑁆𑀥𑀸𑀭𑀫𑁆𑀫𑀡𑀸𑀤𑀻𑀦𑀺 ¶ ‘‘𑀓𑀲𑁆𑀲𑀜𑁆𑀜𑀲𑁆𑀲 𑀏𑀯𑀭𑀽𑀧𑀸𑀦𑀺 𑀅𑀢𑁆𑀣𑀻’’𑀢𑀺 𑀫𑀜𑁆𑀜𑀦𑁆𑀢𑀺. 𑀢𑁂𑀲𑀁 𑀏𑀯𑀁 𑀫𑀜𑁆𑀜𑀫𑀸𑀦𑀸𑀦𑀁 𑀢𑀸𑀦𑀺 𑀘𑀓𑁆𑀔𑀸𑀤𑀻𑀦𑀺 𑀧𑀺𑀬𑀭𑀽𑀧𑀸𑀦𑀺 𑀘𑁂𑀯 𑀲𑀸𑀢𑀭𑀽𑀧𑀸𑀦𑀺 𑀘 𑀳𑁄𑀦𑁆𑀢𑀺. 𑀅𑀣 𑀦𑁂𑀲𑀁 𑀢𑀢𑁆𑀣 𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀢𑀺 ¶ , 𑀉𑀧𑁆𑀧𑀦𑁆𑀦𑀸 𑀘 𑀢𑀡𑁆𑀳𑀸 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑀺𑀯𑀲𑁂𑀦 𑀦𑀺𑀯𑀺𑀲𑀢𑀺. 𑀢𑀲𑁆𑀫𑀸 𑀪𑀕𑀯𑀸 ‘‘𑀘𑀓𑁆𑀔𑀼 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀧𑁆𑀧𑀚𑁆𑀚𑀫𑀸𑀦𑀸𑀢𑀺 𑀬𑀤𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀳𑁄𑀢𑀺, 𑀢𑀤𑀸 𑀏𑀢𑁆𑀣 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀦𑀺𑀭𑁄𑀥𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪𑁦𑁧. 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀦𑀺𑀩𑁆𑀩𑀸𑀦𑀯𑁂𑀯𑀘𑀦𑀸𑀦𑁂𑀯. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀆𑀕𑀫𑁆𑀫 𑀢𑀡𑁆𑀳𑀸 𑀅𑀲𑁂𑀲𑀸 𑀯𑀺𑀭𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀢𑀁 ‘‘𑀢𑀲𑁆𑀲𑀸𑀬𑁂𑀯 𑀢𑀡𑁆𑀳𑀸𑀬 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄’’𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀩𑁆𑀩𑀸𑀦𑀜𑁆𑀘 𑀆𑀕𑀫𑁆𑀫 𑀢𑀡𑁆𑀳𑀸 𑀘𑀚𑀺𑀬𑀢𑀺 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀬𑀢𑀺 𑀯𑀺𑀫𑀼𑀘𑁆𑀘𑀢𑀺 𑀦 ¶ 𑀅𑀮𑁆𑀮𑀻𑀬𑀢𑀺, 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑀁 ‘‘𑀘𑀸𑀕𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀫𑀼𑀢𑁆𑀢𑀺 𑀅𑀦𑀸𑀮𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀓𑀫𑁂𑀯 𑀳𑀺 𑀦𑀺𑀩𑁆𑀩𑀸𑀦𑀁, 𑀦𑀸𑀫𑀸𑀦𑀺 𑀧𑀦𑀲𑁆𑀲 𑀲𑀩𑁆𑀩𑀲𑀗𑁆𑀔𑀢𑀸𑀦𑀁 𑀦𑀸𑀫𑀧𑀝𑀺𑀧𑀓𑁆𑀔𑀯𑀲𑁂𑀦 𑀅𑀦𑁂𑀓𑀸𑀦𑀺 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁, 𑀅𑀲𑁂𑀲𑀯𑀺𑀭𑀸𑀕𑁄 𑀅𑀲𑁂𑀲𑀦𑀺𑀭𑁄𑀥𑁄 𑀘𑀸𑀕𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀫𑀼𑀢𑁆𑀢𑀺 𑀅𑀦𑀸𑀮𑀬𑁄 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄 𑀢𑀡𑁆𑀳𑀓𑁆𑀔𑀬𑁄 𑀅𑀦𑀼𑀧𑁆𑀧𑀸𑀤𑁄 𑀅𑀧𑁆𑀧𑀯𑀢𑁆𑀢𑀁 𑀅𑀦𑀺𑀫𑀺𑀢𑁆𑀢𑀁 𑀅𑀧𑁆𑀧𑀡𑀺𑀳𑀺𑀢𑀁 𑀅𑀦𑀸𑀬𑀽𑀳𑀦𑀁 𑀅𑀧𑁆𑀧𑀝𑀺𑀲𑀦𑁆𑀥𑀺 𑀅𑀦𑀼𑀧𑀧𑀢𑁆𑀢𑀺 𑀅𑀕𑀢𑀺 𑀅𑀚𑀸𑀢𑀁 𑀅𑀚𑀭𑀁 𑀅𑀩𑁆𑀬𑀸𑀥𑀺 𑀅𑀫𑀢𑀁 𑀅𑀲𑁄𑀓𑀁 𑀅𑀧𑀭𑀺𑀤𑁂𑀯𑀁 𑀅𑀦𑀼𑀧𑀸𑀬𑀸𑀲𑀁 𑀅𑀲𑀁𑀓𑀺𑀮𑀺𑀝𑁆𑀞𑀦𑁆𑀢𑀺.

𑀇𑀤𑀸𑀦𑀺 𑀫𑀕𑁆𑀕𑁂𑀦 𑀙𑀺𑀦𑁆𑀦𑀸𑀬 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀅𑀧𑁆𑀧𑀯𑀢𑁆𑀢𑀺𑀧𑀢𑁆𑀢𑀸𑀬𑀧𑀺 𑀘 𑀢𑀡𑁆𑀳𑀸𑀬 𑀬𑁂𑀲𑀼 𑀯𑀢𑁆𑀣𑀽𑀲𑀼 𑀢𑀲𑁆𑀲𑀸 𑀉𑀧𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸, 𑀢𑀢𑁆𑀣𑁂𑀯 𑀅𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀲𑀸 𑀔𑁄 𑀧𑀦𑁂𑀲𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸 𑀧𑀼𑀭𑀺𑀲𑁄 𑀔𑁂𑀢𑁆𑀢𑁂 𑀚𑀸𑀢𑀁 𑀢𑀺𑀢𑁆𑀢𑀅𑀮𑀸𑀩𑀼𑀯𑀮𑁆𑀮𑀺𑀁 𑀤𑀺𑀲𑁆𑀯𑀸 𑀅𑀕𑁆𑀕𑀢𑁄 𑀧𑀝𑁆𑀞𑀸𑀬 𑀫𑀽𑀮𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀙𑀺𑀦𑁆𑀤𑁂𑀬𑁆𑀬, 𑀲𑀸 𑀅𑀦𑀼𑀧𑀼𑀩𑁆𑀩𑁂𑀦 𑀫𑀺𑀮𑀸𑀬𑀺𑀢𑁆𑀯𑀸 𑀅𑀧𑀜𑁆𑀜𑀢𑁆𑀢𑀺𑀁 𑀕𑀘𑁆𑀙𑁂𑀬𑁆𑀬. 𑀢𑀢𑁄 𑀢𑀲𑁆𑀫𑀺𑀁 𑀔𑁂𑀢𑁆𑀢𑁂 𑀢𑀺𑀢𑁆𑀢𑀅𑀮𑀸𑀩𑀼 𑀦𑀺𑀭𑀼𑀤𑁆𑀥𑀸 𑀧𑀳𑀻𑀦𑀸𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀏𑀯𑀫𑁂𑀯 𑀔𑁂𑀢𑁆𑀢𑁂 𑀢𑀺𑀢𑁆𑀢𑀅𑀮𑀸𑀩𑀼 𑀯𑀺𑀬 𑀘𑀓𑁆𑀔𑀸𑀤𑀻𑀲𑀼 𑀢𑀡𑁆𑀳𑀸. 𑀲𑀸 𑀅𑀭𑀺𑀬𑀫𑀕𑁆𑀕𑁂𑀦 𑀫𑀽𑀮𑀘𑁆𑀙𑀺𑀦𑁆𑀦𑀸 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀅𑀧𑁆𑀧𑀯𑀢𑁆𑀢𑀺𑀁 𑀕𑀘𑁆𑀙𑀢𑀺. 𑀏𑀯𑀁 𑀕𑀢𑀸 𑀧𑀦 𑀢𑁂𑀲𑀼 𑀯𑀢𑁆𑀣𑀽𑀲𑀼 𑀔𑁂𑀢𑁆𑀢𑁂 𑀢𑀺𑀢𑁆𑀢𑀅𑀮𑀸𑀩𑀼 𑀯𑀺𑀬 𑀦 𑀧𑀜𑁆𑀜𑀸𑀬𑀢𑀺.

𑀬𑀣𑀸 𑀘 𑀅𑀝𑀯𑀺𑀢𑁄 𑀘𑁄𑀭𑁂 𑀆𑀦𑁂𑀢𑁆𑀯𑀸 𑀦𑀕𑀭𑀲𑁆𑀲 𑀤𑀓𑁆𑀔𑀺𑀡𑀤𑁆𑀯𑀸𑀭𑁂 𑀖𑀸𑀢𑁂𑀬𑁆𑀬𑀼𑀁, 𑀢𑀢𑁄 𑀅𑀝𑀯𑀺𑀬𑀁 𑀘𑁄𑀭𑀸 𑀫𑀢𑀸𑀢𑀺 𑀯𑀸 𑀫𑀸𑀭𑀺𑀢𑀸𑀢𑀺 𑀯𑀸 𑀯𑀼𑀘𑁆𑀘𑁂𑀬𑁆𑀬𑀼𑀁, 𑀏𑀯𑀁 𑀅𑀝𑀯𑀺𑀬𑀁 𑀘𑁄𑀭𑀸 𑀯𑀺𑀬 𑀘𑀓𑁆𑀔𑀸𑀤𑀻𑀲𑀼 𑀢𑀡𑁆𑀳𑀸. 𑀲𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑁂 𑀘𑁄𑀭𑀸 𑀯𑀺𑀬 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀦𑀺𑀭𑀼𑀤𑁆𑀥𑀢𑁆𑀢𑀸 𑀦𑀺𑀩𑁆𑀩𑀸𑀦𑁂 𑀦𑀺𑀭𑀼𑀤𑁆𑀥𑀸. 𑀏𑀯𑀁 𑀦𑀺𑀭𑀼𑀤𑁆𑀥𑀸 𑀧𑀦𑁂𑀢𑁂𑀲𑀼 ¶ 𑀯𑀢𑁆𑀣𑀽𑀲𑀼 𑀅𑀝𑀯𑀺𑀬𑀁 𑀘𑁄𑀭𑀸 𑀯𑀺𑀬 𑀦 𑀧𑀜𑁆𑀜𑀸𑀬𑀢𑀺, 𑀢𑁂𑀦𑀲𑁆𑀲𑀸 𑀢𑀢𑁆𑀣𑁂𑀯 𑀦𑀺𑀭𑁄𑀥𑀁 𑀤𑀲𑁆𑀲𑁂𑀦𑁆𑀢𑁄 ¶ ‘‘𑀘𑀓𑁆𑀔𑀼 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺𑀆𑀤𑀺𑀫𑀸𑀳.

𑀫𑀕𑁆𑀕𑀲𑀘𑁆𑀘𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁪𑁦𑁨. 𑀅𑀬𑀫𑁂𑀯𑀸𑀢𑀺 𑀅𑀜𑁆𑀜𑀫𑀕𑁆𑀕𑀧𑀝𑀺𑀓𑁆𑀔𑁂𑀧𑀦𑀢𑁆𑀣𑀁 𑀦𑀺𑀬𑀫𑀦𑀁. 𑀅𑀭𑀺𑀬𑁄𑀢𑀺 𑀢𑀁 𑀢𑀁 𑀫𑀕𑁆𑀕𑀯𑀚𑁆𑀛𑁂𑀳𑀺 𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸 𑀅𑀭𑀺𑀬𑀪𑀸𑀯𑀓𑀭𑀢𑁆𑀢𑀸 𑀘 𑀅𑀭𑀺𑀬𑁄. 𑀤𑀼𑀓𑁆𑀔𑁂 𑀜𑀸𑀡𑀦𑁆𑀢𑀺𑀆𑀤𑀺𑀦𑀸 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀁 𑀤𑀲𑁆𑀲𑀺𑀢𑀁. 𑀢𑀢𑁆𑀣 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀯𑀝𑁆𑀝𑀁, 𑀧𑀘𑁆𑀙𑀺𑀫𑀸𑀦𑀺 𑀯𑀺𑀯𑀝𑁆𑀝𑀁. 𑀢𑁂𑀲𑀼 𑀪𑀺𑀓𑁆𑀔𑀼𑀦𑁄 𑀯𑀝𑁆𑀝𑁂 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀺, 𑀯𑀺𑀯𑀝𑁆𑀝𑁂 𑀦𑀢𑁆𑀣𑀺 𑀅𑀪𑀺𑀦𑀺𑀯𑁂𑀲𑁄. 𑀧𑀼𑀭𑀺𑀫𑀸𑀦𑀺 𑀳𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀁, 𑀢𑀡𑁆𑀳𑀸 𑀲𑀫𑀼𑀤𑀬𑁄’’𑀢𑀺 𑀏𑀯𑀁 𑀲𑀗𑁆𑀔𑁂𑀧𑁂𑀦 𑀘 ‘‘𑀓𑀢𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀢𑁆𑀣𑀸𑀭𑁂𑀦 𑀘 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀸𑀘𑀸𑀬 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑀬𑁄𑀕𑀸𑀯𑀘𑀭𑁄 𑀓𑀫𑁆𑀫𑀁 𑀓𑀭𑁄𑀢𑀺. 𑀇𑀢𑀭𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀲𑀘𑁆𑀘𑁂𑀲𑀼 𑀦𑀺𑀭𑁄𑀥𑀲𑀘𑁆𑀘𑀁 𑀇𑀝𑁆𑀞𑀁 𑀓𑀦𑁆𑀢𑀁 𑀫𑀦𑀸𑀧𑀁, 𑀫𑀕𑁆𑀕𑀲𑀘𑁆𑀘𑀁 𑀇𑀝𑁆𑀞𑀁 𑀓𑀦𑁆𑀢𑀁 𑀫𑀦𑀸𑀧𑀦𑁆𑀢𑀺 𑀏𑀯𑀁 𑀲𑀯𑀦𑁂𑀦 𑀓𑀫𑁆𑀫𑀁 ¶ 𑀓𑀭𑁄𑀢𑀺. 𑀲𑁄 𑀏𑀯𑀁 𑀓𑀭𑁄𑀦𑁆𑀢𑁄 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑀝𑀺𑀯𑁂𑀥𑁂𑀦𑁂𑀯 𑀧𑀝𑀺𑀯𑀺𑀚𑁆𑀛𑀢𑀺 𑀏𑀓𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺. 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀢𑀺, 𑀲𑀫𑀼𑀤𑀬𑀁 𑀧𑀳𑀸𑀦𑀧𑀝𑀺𑀯𑁂𑀥𑁂𑀦, 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀝𑀺𑀯𑁂𑀥𑁂𑀦, 𑀫𑀕𑁆𑀕𑀁 𑀪𑀸𑀯𑀦𑀸𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀢𑀺. 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦…𑀧𑁂… 𑀫𑀕𑁆𑀕𑀁 𑀪𑀸𑀯𑀦𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺. 𑀏𑀯𑀫𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀤𑁆𑀯𑀻𑀲𑀼 𑀲𑀘𑁆𑀘𑁂𑀲𑀼 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀲𑀯𑀦𑀥𑀸𑀭𑀡𑀲𑀫𑁆𑀫𑀲𑀦𑀧𑀝𑀺𑀯𑁂𑀥𑁄 𑀳𑁄𑀢𑀺, 𑀤𑁆𑀯𑀻𑀲𑀼 𑀧𑀦 𑀲𑀯𑀦𑀧𑀝𑀺𑀯𑁂𑀥𑁄𑀬𑁂𑀯. 𑀅𑀧𑀭𑀪𑀸𑀕𑁂 𑀢𑀻𑀲𑀼 𑀓𑀺𑀘𑁆𑀘𑀢𑁄 𑀧𑀝𑀺𑀯𑁂𑀥𑁄 𑀳𑁄𑀢𑀺, 𑀦𑀺𑀭𑁄𑀥𑁂 𑀆𑀭𑀫𑁆𑀫𑀡𑀧𑀝𑀺𑀯𑁂𑀥𑁄. 𑀧𑀘𑁆𑀘𑀯𑁂𑀓𑁆𑀔𑀡𑀸 𑀧𑀦 𑀧𑀢𑁆𑀢𑀲𑀘𑁆𑀘𑀲𑁆𑀲 𑀳𑁄𑀢𑀺. 𑀅𑀬𑀜𑁆𑀘 𑀆𑀤𑀺𑀓𑀫𑁆𑀫𑀺𑀓𑁄, 𑀢𑀲𑁆𑀫𑀸 𑀲𑀸 𑀇𑀥 𑀦 𑀯𑀼𑀢𑁆𑀢𑀸.

𑀇𑀫𑀲𑁆𑀲 𑀘 𑀪𑀺𑀓𑁆𑀔𑀼𑀦𑁄 𑀧𑀼𑀩𑁆𑀩𑁂 𑀧𑀭𑀺𑀕𑁆𑀕𑀳𑀢𑁄 ‘‘𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀸𑀫𑀺, 𑀲𑀫𑀼𑀤𑀬𑀁 𑀧𑀚𑀳𑀸𑀫𑀺, 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁄𑀫𑀺, 𑀫𑀕𑁆𑀕𑀁 𑀪𑀸𑀯𑁂𑀫𑀻’’𑀢𑀺 𑀆𑀪𑁄𑀕𑀲𑀫𑀦𑁆𑀦𑀸𑀳𑀸𑀭𑀫𑀦𑀲𑀺𑀓𑀸𑀭𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀢𑁆𑀣𑀺, 𑀧𑀭𑀺𑀕𑁆𑀕𑀳𑀢𑁄 𑀧𑀝𑁆𑀞𑀸𑀬 𑀳𑁄𑀢𑀺. 𑀅𑀧𑀭𑀪𑀸𑀕𑁂 𑀧𑀦 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀢𑀫𑁂𑀯…𑀧𑁂… 𑀫𑀕𑁆𑀕𑁄 𑀪𑀸𑀯𑀺𑀢𑁄𑀯 𑀳𑁄𑀢𑀺. 𑀢𑀢𑁆𑀣 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀤𑀼𑀤𑁆𑀤𑀲𑀢𑁆𑀢𑀸 𑀕𑀫𑁆𑀪𑀻𑀭𑀸𑀦𑀺, 𑀤𑁆𑀯𑁂 𑀕𑀫𑁆𑀪𑀻𑀭𑀢𑁆𑀢𑀸 𑀤𑀼𑀤𑁆𑀤𑀲𑀸𑀦𑀺. 𑀤𑀼𑀓𑁆𑀔𑀲𑀘𑁆𑀘𑀜𑁆𑀳𑀺 𑀉𑀧𑁆𑀧𑀢𑁆𑀢𑀺𑀢𑁄 𑀧𑀸𑀓𑀝𑀁, 𑀔𑀸𑀡𑀼𑀓𑀡𑁆𑀝𑀓𑀧𑀳𑀸𑀭𑀸𑀤𑀻𑀲𑀼 ‘‘𑀅𑀳𑁄 𑀤𑀼𑀓𑁆𑀔’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀫𑁆𑀧𑀺 𑀆𑀧𑀚𑁆𑀚𑀢𑀺. 𑀲𑀫𑀼𑀤𑀬𑀫𑁆𑀧𑀺 𑀔𑀸𑀤𑀺𑀢𑀼𑀓𑀸𑀫𑀢𑀸𑀪𑀼𑀜𑁆𑀚𑀺𑀢𑀼𑀓𑀸𑀫𑀢𑀸𑀤𑀺𑀯𑀲𑁂𑀦 𑀉𑀧𑁆𑀧𑀢𑁆𑀢𑀺𑀢𑁄 𑀧𑀸𑀓𑀝𑀁. 𑀮𑀓𑁆𑀔𑀡𑀧𑀝𑀺𑀯𑁂𑀥𑀢𑁄 𑀧𑀦 𑀉𑀪𑀬𑀫𑁆𑀧𑀺 𑀕𑀫𑁆𑀪𑀻𑀭𑀁. 𑀇𑀢𑀺 𑀢𑀸𑀦𑀺 𑀤𑀼𑀤𑁆𑀤𑀲𑀢𑁆𑀢𑀸 𑀕𑀫𑁆𑀪𑀻𑀭𑀸𑀦𑀺. 𑀇𑀢𑀭𑁂𑀲𑀁 𑀧𑀦 𑀤𑁆𑀯𑀺𑀦𑁆𑀦𑀁 𑀤𑀲𑁆𑀲𑀦𑀢𑁆𑀣𑀸𑀬 𑀧𑀬𑁄𑀕𑁄 𑀪𑀯𑀕𑁆𑀕𑀕𑀳𑀡𑀢𑁆𑀣𑀁 𑀳𑀢𑁆𑀣𑀧𑁆𑀧𑀲𑀸𑀭𑀡𑀁 ¶ 𑀯𑀺𑀬 𑀅𑀯𑀻𑀘𑀺𑀨𑀼𑀲𑀦𑀢𑁆𑀣𑀁 𑀧𑀸𑀤𑀧𑁆𑀧𑀲𑀸𑀭𑀡𑀁 𑀯𑀺𑀬 𑀲𑀢𑀥𑀸 𑀪𑀺𑀦𑁆𑀦𑀲𑁆𑀲 𑀯𑀸𑀮𑀲𑁆𑀲 𑀓𑁄𑀝𑀺𑀬𑀸 ¶ 𑀓𑁄𑀝𑀺𑀧𑀸𑀤𑀦𑀁 𑀯𑀺𑀬 𑀘 𑀳𑁄𑀢𑀺. 𑀇𑀢𑀺 𑀢𑀸𑀦𑀺 𑀕𑀫𑁆𑀪𑀻𑀭𑀢𑁆𑀢𑀸 𑀤𑀼𑀤𑁆𑀤𑀲𑀸𑀦𑀺. 𑀏𑀯𑀁 𑀤𑀼𑀤𑁆𑀤𑀲𑀢𑁆𑀢𑀸 𑀕𑀫𑁆𑀪𑀻𑀭𑁂𑀲𑀼 𑀕𑀫𑁆𑀪𑀻𑀭𑀢𑁆𑀢𑀸 𑀘 𑀤𑀼𑀤𑁆𑀤𑀲𑁂𑀲𑀼 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀉𑀕𑁆𑀕𑀳𑀸𑀤𑀺𑀯𑀲𑁂𑀦 𑀧𑀼𑀩𑁆𑀩𑀪𑀸𑀕𑀜𑀸𑀡𑀼𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀇𑀤𑀁 𑀤𑀼𑀓𑁆𑀔𑁂 𑀜𑀸𑀡𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀝𑀺𑀯𑁂𑀥𑀓𑁆𑀔𑀡𑁂 𑀧𑀦 𑀏𑀓𑀫𑁂𑀯 𑀢𑀁 𑀜𑀸𑀡𑀁 𑀳𑁄𑀢𑀺.

𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀸𑀤𑀬𑁄 𑀓𑀸𑀫𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀯𑀺𑀭𑀫𑀡𑀲𑀜𑁆𑀜𑀸𑀦𑀁 𑀦𑀸𑀦𑀢𑁆𑀢𑀸 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀉𑀧𑁆𑀧𑀦𑁆𑀦𑀲𑁆𑀲 𑀅𑀓𑀼𑀲𑀮𑀲𑀗𑁆𑀓𑀧𑁆𑀧𑀲𑁆𑀲 𑀧𑀤𑀧𑀘𑁆𑀙𑁂𑀤𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀲𑀸𑀥𑀦𑀯𑀲𑁂𑀦 𑀫𑀕𑁆𑀕𑀗𑁆𑀕𑀁 𑀧𑀽𑀭𑀬𑀫𑀸𑀦𑁄 𑀏𑀓𑁄𑀯 𑀓𑀼𑀲𑀮𑀲𑀗𑁆𑀓𑀧𑁆𑀧𑁄 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀦𑀸𑀫.

𑀫𑀼𑀲𑀸𑀯𑀸𑀤𑀸𑀯𑁂𑀭𑀫𑀡𑀺𑀆𑀤𑀬𑁄𑀧𑀺 𑀫𑀼𑀲𑀸𑀯𑀸𑀤𑀸𑀤𑀻𑀳𑀺 𑀯𑀺𑀭𑀫𑀡𑀲𑀜𑁆𑀜𑀸𑀦𑀁 𑀦𑀸𑀦𑀢𑁆𑀢𑀸 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀇𑀫𑁂𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀉𑀧𑁆𑀧𑀦𑁆𑀦𑀸𑀬 𑀅𑀓𑀼𑀲𑀮𑀤𑀼𑀲𑁆𑀲𑀻𑀮𑁆𑀬𑀘𑁂𑀢𑀦𑀸𑀬 𑀧𑀤𑀧𑀘𑁆𑀙𑁂𑀤𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀲𑀸𑀥𑀦𑀯𑀲𑁂𑀦 𑀫𑀕𑁆𑀕𑀗𑁆𑀕𑀁 𑀧𑀽𑀭𑀬𑀫𑀸𑀦𑀸 𑀏𑀓𑀸𑀯 𑀓𑀼𑀲𑀮𑀯𑁂𑀭𑀫𑀡𑀻 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀲𑀫𑁆𑀫𑀸𑀯𑀸𑀘𑀸 𑀦𑀸𑀫 ¶ .

𑀧𑀸𑀡𑀸𑀢𑀺𑀧𑀸𑀢𑀸𑀯𑁂𑀭𑀫𑀡𑀺𑀆𑀤𑀬𑁄𑀧𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀺𑀭𑀫𑀡𑀲𑀜𑁆𑀜𑀸𑀦𑀁 𑀦𑀸𑀦𑀢𑁆𑀢𑀸 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀉𑀧𑁆𑀧𑀦𑁆𑀦𑀸𑀬 𑀅𑀓𑀼𑀲𑀮𑀤𑀼𑀲𑁆𑀲𑀻𑀮𑁆𑀬𑀘𑁂𑀢𑀦𑀸𑀬 𑀅𑀓𑀺𑀭𑀺𑀬𑀢𑁄 𑀧𑀤𑀧𑀘𑁆𑀙𑁂𑀤𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀲𑀸𑀥𑀦𑀯𑀲𑁂𑀦 𑀫𑀕𑁆𑀕𑀗𑁆𑀕𑀁 𑀧𑀽𑀭𑀬𑀫𑀸𑀦𑀸 𑀏𑀓𑀸𑀯 𑀓𑀼𑀲𑀮𑀯𑁂𑀭𑀫𑀡𑀻 𑀉𑀧𑁆𑀧𑀚𑁆𑀚𑀢𑀺, 𑀅𑀬𑀁 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀦𑀸𑀫.

𑀫𑀺𑀘𑁆𑀙𑀸𑀆𑀚𑀻𑀯𑀦𑁆𑀢𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀤𑀻𑀦𑀁 𑀅𑀢𑁆𑀣𑀸𑀬 𑀧𑀯𑀢𑁆𑀢𑀺𑀢𑀁 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀁. 𑀧𑀳𑀸𑀬𑀸𑀢𑀺 𑀯𑀚𑁆𑀚𑁂𑀢𑁆𑀯𑀸. 𑀲𑀫𑁆𑀫𑀸𑀆𑀚𑀻𑀯𑁂𑀦𑀸𑀢𑀺 𑀩𑀼𑀤𑁆𑀥𑀧𑀲𑀢𑁆𑀣𑁂𑀦 𑀆𑀚𑀻𑀯𑁂𑀦. 𑀚𑀻𑀯𑀺𑀢𑀁 𑀓𑀧𑁆𑀧𑁂𑀢𑀻𑀢𑀺 𑀚𑀻𑀯𑀺𑀢𑀧𑁆𑀧𑀯𑀢𑁆𑀢𑀺𑀁 𑀧𑀯𑀢𑁆𑀢𑁂𑀢𑀺. 𑀲𑀫𑁆𑀫𑀸𑀆𑀚𑀻𑀯𑁄𑀧𑀺 𑀓𑀼𑀳𑀦𑀸𑀤𑀻𑀳𑀺 𑀯𑀺𑀭𑀫𑀡𑀲𑀜𑁆𑀜𑀸𑀦𑀁 𑀦𑀸𑀦𑀢𑁆𑀢𑀸 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀇𑀫𑁂𑀲𑀼𑀬𑁂𑀯 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀉𑀧𑁆𑀧𑀦𑁆𑀦𑀸𑀬 𑀫𑀺𑀘𑁆𑀙𑀸𑀚𑀻𑀯𑀤𑀼𑀲𑁆𑀲𑀻𑀮𑁆𑀬𑀘𑁂𑀢𑀦𑀸𑀬 𑀧𑀤𑀧𑀘𑁆𑀙𑁂𑀤𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀲𑀸𑀥𑀦𑀯𑀲𑁂𑀦 𑀫𑀕𑁆𑀕𑀗𑁆𑀕𑀁 𑀧𑀽𑀭𑀬𑀫𑀸𑀦𑀸 𑀏𑀓𑀸𑀯 𑀓𑀼𑀲𑀮𑀯𑁂𑀭𑀫𑀡𑀻 𑀉𑀧𑁆𑀧𑀚𑁆𑀚𑀢𑀺, 𑀅𑀬𑀁 𑀲𑀫𑁆𑀫𑀸𑀆𑀚𑀻𑀯𑁄 𑀦𑀸𑀫.

𑀅𑀦𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀏𑀓𑀲𑁆𑀫𑀺𑀁 𑀯𑀸 𑀪𑀯𑁂 𑀢𑀣𑀸𑀭𑀽𑀧𑁂 𑀯𑀸 𑀆𑀭𑀫𑁆𑀫𑀡𑁂 𑀅𑀢𑁆𑀢𑀦𑁄 𑀦 𑀉𑀧𑁆𑀧𑀦𑁆𑀦𑀸𑀦𑀁. 𑀧𑀭𑀲𑁆𑀲 𑀧𑀦 𑀉𑀧𑁆𑀧𑀚𑁆𑀚𑀫𑀸𑀦𑁂 𑀤𑀺𑀲𑁆𑀯𑀸 ‘‘𑀅𑀳𑁄 𑀯𑀢 𑀫𑁂 𑀏𑀯𑀭𑀽𑀧𑀸 𑀧𑀸𑀧𑀓𑀸 𑀅𑀓𑀼𑀲𑀮𑀥𑀫𑁆𑀫𑀸 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺 𑀏𑀯𑀁 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 ¶ 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬. 𑀙𑀦𑁆𑀤𑀁 𑀚𑀦𑁂𑀢𑀻𑀢𑀺 𑀢𑁂𑀲𑀁 𑀅𑀦𑀼𑀧𑁆𑀧𑀸𑀤𑀓𑀧𑀝𑀺𑀧𑀢𑁆𑀢𑀺𑀲𑀸𑀥𑀓𑀁 𑀯𑀻𑀭𑀺𑀬𑀙𑀦𑁆𑀤𑀁 𑀚𑀦𑁂𑀢𑀺. 𑀯𑀸𑀬𑀫𑀢𑀻𑀢𑀺 𑀯𑀸𑀬𑀸𑀫𑀁 𑀓𑀭𑁄𑀢𑀺. 𑀯𑀻𑀭𑀺𑀬𑀁 𑀆𑀭𑀪𑀢𑀻𑀢𑀺 ¶ 𑀯𑀻𑀭𑀺𑀬𑀁 𑀧𑀯𑀢𑁆𑀢𑁂𑀢𑀺. 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀻𑀢𑀺 𑀯𑀻𑀭𑀺𑀬𑁂𑀦 𑀘𑀺𑀢𑁆𑀢𑀁 𑀧𑀕𑁆𑀕𑀳𑀺𑀢𑀁 𑀓𑀭𑁄𑀢𑀺. 𑀧𑀤𑀳𑀢𑀻𑀢𑀺 𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘 𑀅𑀝𑁆𑀞𑀺 𑀘 𑀅𑀯𑀲𑀺𑀲𑁆𑀲𑀢𑀽𑀢𑀺 𑀧𑀤𑀳𑀦𑀁 𑀧𑀯𑀢𑁆𑀢𑁂𑀢𑀺.

𑀉𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀅𑀢𑁆𑀢𑀦𑁄 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀸𑀦𑀁. 𑀇𑀤𑀸𑀦𑀺 𑀢𑀸𑀤𑀺𑀲𑁂 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀢𑁂𑀲𑀁 𑀧𑀳𑀸𑀦𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺. 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀦𑁆𑀢𑀺 𑀅𑀧𑁆𑀧𑀝𑀺𑀮𑀤𑁆𑀥𑀸𑀦𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁. 𑀉𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀢𑁂𑀲𑀁𑀬𑁂𑀯 𑀧𑀝𑀺𑀮𑀤𑁆𑀥𑀸𑀦𑀁. 𑀞𑀺𑀢𑀺𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀢𑁆𑀢𑀺𑀧𑀩𑀦𑁆𑀥𑀯𑀲𑁂𑀦 𑀞𑀺𑀢𑀢𑁆𑀣𑀁. 𑀅𑀲𑀫𑁆𑀫𑁄𑀲𑀸𑀬𑀸𑀢𑀺 𑀅𑀯𑀺𑀦𑀸𑀲𑀦𑀢𑁆𑀣𑀁. 𑀪𑀺𑀬𑁆𑀬𑁄𑀪𑀸𑀯𑀸𑀬𑀸𑀢𑀺 𑀉𑀧𑀭𑀺𑀪𑀸𑀯𑀸𑀬. 𑀯𑁂𑀧𑀼𑀮𑁆𑀮𑀸𑀬𑀸𑀢𑀺 𑀯𑀺𑀧𑀼𑀮𑀪𑀸𑀯𑀸𑀬. 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀪𑀸𑀯𑀦𑀸𑀬 𑀧𑀭𑀺𑀧𑀽𑀭𑀡𑀢𑁆𑀣𑀁. 𑀅𑀬𑀫𑁆𑀧𑀺 𑀲𑀫𑁆𑀫𑀸𑀯𑀸𑀬𑀸𑀫𑁄 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀅𑀓𑀼𑀲𑀮𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀸𑀤𑀺𑀘𑀺𑀢𑁆𑀢𑀸𑀦𑀁 𑀦𑀸𑀦𑀢𑁆𑀢𑀸 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀇𑀫𑁂𑀲𑀼𑀬𑁂𑀯 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀫𑀕𑁆𑀕𑀗𑁆𑀕𑀁 𑀧𑀽𑀭𑀬𑀫𑀸𑀦𑀁 𑀏𑀓𑀫𑁂𑀯 𑀓𑀼𑀲𑀮𑀯𑀻𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀲𑀫𑁆𑀫𑀸𑀯𑀸𑀬𑀸𑀫𑁄 𑀦𑀸𑀫.

𑀲𑀫𑁆𑀫𑀸𑀲𑀢𑀺𑀧𑀺 𑀓𑀸𑀬𑀸𑀤𑀺𑀧𑀭𑀺𑀕𑁆𑀕𑀸𑀳𑀓𑀘𑀺𑀢𑁆𑀢𑀸𑀦𑀁 𑀦𑀸𑀦𑀢𑁆𑀢𑀸 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀫𑀕𑁆𑀕𑀗𑁆𑀕𑀁 𑀧𑀽𑀭𑀬𑀫𑀸𑀦𑀸 𑀏𑀓𑀸𑀯 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀲𑀫𑁆𑀫𑀸𑀲𑀢𑀺 𑀦𑀸𑀫.

𑀛𑀸𑀦𑀸𑀦𑀺 𑀧𑀼𑀩𑁆𑀩𑀪𑀸𑀕𑁂𑀧𑀺 𑀫𑀕𑁆𑀕𑀓𑁆𑀔𑀡𑁂𑀧𑀺 ¶ 𑀦𑀸𑀦𑀸, 𑀧𑀼𑀩𑁆𑀩𑀪𑀸𑀕𑁂 𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀦𑀸𑀦𑀸, 𑀫𑀕𑁆𑀕𑀓𑁆𑀔𑀡𑁂 𑀦𑀸𑀦𑀸𑀫𑀕𑁆𑀕𑀯𑀲𑁂𑀦. 𑀏𑀓𑀲𑁆𑀲 𑀳𑀺 𑀧𑀞𑀫𑀫𑀕𑁆𑀕𑁄 𑀧𑀞𑀫𑀚𑁆𑀛𑀸𑀦𑀺𑀓𑁄 𑀳𑁄𑀢𑀺, 𑀤𑀼𑀢𑀺𑀬𑀫𑀕𑁆𑀕𑀸𑀤𑀬𑁄𑀧𑀺 𑀧𑀞𑀫𑀚𑁆𑀛𑀸𑀦𑀺𑀓𑀸 𑀯𑀸 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀛𑀸𑀦𑀺𑀓𑀸 𑀯𑀸. 𑀏𑀓𑀲𑁆𑀲𑀧𑀺 𑀧𑀞𑀫𑀫𑀕𑁆𑀕𑁄 𑀤𑀼𑀢𑀺𑀬𑀸𑀤𑀻𑀦𑀁 𑀅𑀜𑁆𑀜𑀢𑀭𑀛𑀸𑀦𑀺𑀓𑁄 𑀳𑁄𑀢𑀺, 𑀤𑀼𑀢𑀺𑀬𑀸𑀤𑀬𑁄𑀧𑀺 𑀤𑀼𑀢𑀺𑀬𑀸𑀤𑀻𑀦𑀁 𑀅𑀜𑁆𑀜𑀢𑀭𑀚𑁆𑀛𑀸𑀦𑀺𑀓𑀸 𑀯𑀸 𑀧𑀞𑀫𑀚𑁆𑀛𑀸𑀦𑀺𑀓𑀸 𑀯𑀸. 𑀏𑀯𑀁 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀛𑀸𑀦𑀯𑀲𑁂𑀦 𑀲𑀤𑀺𑀲𑀸 𑀯𑀸 𑀅𑀲𑀤𑀺𑀲𑀸 𑀯𑀸 𑀏𑀓𑀘𑁆𑀘𑀲𑀤𑀺𑀲𑀸 𑀯𑀸 𑀳𑁄𑀦𑁆𑀢𑀺. 𑀅𑀬𑀁 𑀧𑀦𑀲𑁆𑀲 𑀯𑀺𑀲𑁂𑀲𑁄 𑀧𑀸𑀤𑀓𑀚𑁆𑀛𑀸𑀦𑀦𑀺𑀬𑀫𑁂𑀦 𑀳𑁄𑀢𑀺.

𑀧𑀸𑀤𑀓𑀚𑁆𑀛𑀸𑀦𑀦𑀺𑀬𑀫𑁂𑀦 𑀢𑀸𑀯 𑀧𑀞𑀫𑀚𑁆𑀛𑀸𑀦𑀮𑀸𑀪𑀺𑀦𑁄 𑀧𑀞𑀫𑀚𑁆𑀛𑀸𑀦𑀸 𑀯𑀼𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑁄 𑀫𑀕𑁆𑀕𑁄 𑀧𑀞𑀫𑀚𑁆𑀛𑀸𑀦𑀺𑀓𑁄 𑀳𑁄𑀢𑀺. 𑀫𑀕𑁆𑀕𑀗𑁆𑀕𑀩𑁄𑀚𑁆𑀛𑀗𑁆𑀕𑀸𑀦𑀺 𑀧𑀦𑁂𑀢𑁆𑀣 𑀧𑀭𑀺𑀧𑀼𑀡𑁆𑀡𑀸𑀦𑁂𑀯 𑀳𑁄𑀦𑁆𑀢𑀺. 𑀤𑀼𑀢𑀺𑀬𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑁄 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑁄 𑀳𑁄𑀢𑀺. 𑀫𑀕𑁆𑀕𑀗𑁆𑀕𑀸𑀦𑀺 𑀧𑀦𑁂𑀢𑁆𑀣 𑀲𑀢𑁆𑀢 𑀳𑁄𑀦𑁆𑀢𑀺. 𑀢𑀢𑀺𑀬𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑁄 𑀢𑀢𑀺𑀬𑀚𑁆𑀛𑀸𑀦𑀺𑀓𑁄. 𑀫𑀕𑁆𑀕𑀗𑁆𑀕𑀸𑀦𑀺 𑀧𑀦𑁂𑀢𑁆𑀣 𑀲𑀢𑁆𑀢 ¶ , 𑀩𑁄𑀚𑁆𑀛𑀗𑁆𑀕𑀸𑀦𑀺 𑀙 𑀳𑁄𑀦𑁆𑀢𑀺. 𑀏𑀲 𑀦𑀬𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀬𑀸𑀯 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁.

𑀆𑀭𑀼𑀧𑁆𑀧𑁂 ¶ 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀜𑁆𑀘 𑀮𑁄𑀓𑀼𑀢𑁆𑀢𑀭𑀁, 𑀦𑁄 𑀮𑁄𑀓𑀺𑀬𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀢𑁆𑀣 𑀓𑀣𑀦𑁆𑀢𑀺? 𑀏𑀢𑁆𑀣𑀸𑀧𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀬𑀢𑁄 𑀯𑀼𑀝𑁆𑀞𑀸𑀬 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀝𑀺𑀮𑀪𑀺𑀢𑁆𑀯𑀸 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀢𑁆𑀯𑀸 𑀲𑁄 𑀆𑀭𑀼𑀧𑁆𑀧𑁂 𑀉𑀧𑁆𑀧𑀦𑁆𑀦𑁄, 𑀢𑀁 𑀛𑀸𑀦𑀺𑀓𑀸𑀯𑀲𑁆𑀲 𑀢𑀢𑁆𑀣 𑀢𑀬𑁄 𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀁 𑀧𑀸𑀤𑀓𑀚𑁆𑀛𑀸𑀦𑀫𑁂𑀯 𑀦𑀺𑀬𑀫𑁂𑀢𑀺.

𑀓𑁂𑀘𑀺 𑀧𑀦 𑀣𑁂𑀭𑀸 ‘‘𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀸 𑀔𑀦𑁆𑀥𑀸 𑀦𑀺𑀬𑀫𑁂𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 ‘‘𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁄 𑀦𑀺𑀬𑀫𑁂𑀢𑀻’’𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 ‘‘𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸 𑀦𑀺𑀬𑀫𑁂𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑁂𑀲𑀁 𑀯𑀸𑀤𑀯𑀺𑀦𑀺𑀘𑁆𑀙𑀬𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀥𑀺𑀓𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑀅𑀬𑀁 𑀧𑀼𑀩𑁆𑀩𑀪𑀸𑀕𑁂 𑀮𑁄𑀓𑀺𑀬𑁄 𑀅𑀧𑀭𑀪𑀸𑀕𑁂 𑀮𑁄𑀓𑀼𑀢𑁆𑀢𑀭𑁄 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑀯𑀼𑀘𑁆𑀘𑀢𑀺.

𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀯𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸, 𑀧𑀭𑀲𑁆𑀲 𑀯𑀸, 𑀓𑀸𑀮𑁂𑀦 𑀯𑀸 𑀅𑀢𑁆𑀢𑀦𑁄, 𑀓𑀸𑀮𑁂𑀦 𑀯𑀸 𑀧𑀭𑀲𑁆𑀲 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀯𑀬𑀸 𑀧𑀦𑁂𑀢𑁆𑀣 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀬𑀣𑀸𑀲𑀫𑁆𑀪𑀸𑀯𑀢𑁄 𑀉𑀧𑁆𑀧𑀢𑁆𑀢𑀺𑀦𑀺𑀯𑀢𑁆𑀢𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀇𑀢𑁄 𑀧𑀭𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀓𑁂𑀯𑀮𑀜𑁆𑀳𑀺 𑀇𑀥 𑀘𑀢𑀼𑀲𑀘𑁆𑀘𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺 𑀏𑀯𑀁 ¶ 𑀬𑁄𑀚𑀦𑀁 𑀓𑀢𑁆𑀯𑀸 𑀲𑀘𑁆𑀘𑀧𑀭𑀺𑀕𑁆𑀕𑀸𑀳𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑁆𑀬𑀸𑀦𑀫𑀼𑀔𑀁 𑀯𑁂𑀤𑀺𑀢𑀩𑁆𑀩𑀁, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺.

𑀘𑀢𑀼𑀲𑀘𑁆𑀘𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑁪𑁦𑁪. 𑀏𑀢𑁆𑀢𑀸𑀯𑀢𑀸 𑀆𑀦𑀸𑀧𑀸𑀦𑀧𑀩𑁆𑀩𑀁 𑀘𑀢𑀼𑀇𑀭𑀺𑀬𑀸𑀧𑀣𑀧𑀩𑁆𑀩𑀁 𑀘𑀢𑀼𑀲𑀫𑁆𑀧𑀚𑀜𑁆𑀜𑀧𑀩𑁆𑀩𑀁 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀁 𑀦𑀯𑀲𑀺𑀯𑀣𑀺𑀓𑀸 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀦𑀻𑀯𑀭𑀡𑀧𑀭𑀺𑀕𑁆𑀕𑀳𑁄 𑀔𑀦𑁆𑀥𑀧𑀭𑀺𑀕𑁆𑀕𑀳𑁄 𑀆𑀬𑀢𑀦𑀧𑀭𑀺𑀕𑁆𑀕𑀳𑁄 𑀩𑁄𑀚𑁆𑀛𑀗𑁆𑀕𑀧𑀭𑀺𑀕𑁆𑀕𑀳𑁄 𑀲𑀘𑁆𑀘𑀧𑀭𑀺𑀕𑁆𑀕𑀳𑁄𑀢𑀺 𑀏𑀓𑀯𑀻𑀲𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀺. 𑀢𑁂𑀲𑀼 𑀆𑀦𑀸𑀧𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀦𑀯𑀲𑀺𑀯𑀣𑀺𑀓𑀸𑀢𑀺 𑀏𑀓𑀸𑀤𑀲 𑀅𑀧𑁆𑀧𑀦𑀸𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀳𑁄𑀦𑁆𑀢𑀺. 𑀤𑀻𑀖𑀪𑀸𑀡𑀓𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦 ‘‘𑀦𑀯𑀲𑀺𑀯𑀣𑀺𑀓𑀸 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀯𑀼𑀢𑁆𑀢𑀸’’𑀢𑀺 𑀆𑀳. 𑀢𑀲𑁆𑀫𑀸 𑀢𑀲𑁆𑀲 𑀫𑀢𑁂𑀦 𑀤𑁆𑀯𑁂𑀬𑁂𑀯 𑀅𑀧𑁆𑀧𑀦𑀸𑀓𑀫𑁆𑀫𑀝𑁆𑀞𑀸𑀦𑀸𑀦𑀺, 𑀲𑁂𑀲𑀸𑀦𑀺 𑀉𑀧𑀘𑀸𑀭𑀓𑀫𑁆𑀫𑀝𑁆𑀞𑀸𑀦𑀸𑀦𑀺. 𑀓𑀺𑀁 𑀧𑀦𑁂𑀢𑁂𑀲𑀼 𑀲𑀩𑁆𑀩𑁂𑀲𑀼 𑀅𑀪𑀺𑀦𑀺𑀯𑁂𑀲𑁄 ¶ 𑀚𑀸𑀬𑀢𑀻𑀢𑀺? 𑀦 𑀚𑀸𑀬𑀢𑀺. 𑀇𑀭𑀺𑀬𑀸𑀧𑀣𑀲𑀫𑁆𑀧𑀚𑀜𑁆𑀜𑀦𑀻𑀯𑀭𑀡𑀩𑁄𑀚𑁆𑀛𑀗𑁆𑀕𑁂𑀲𑀼 𑀳𑀺 𑀅𑀪𑀺𑀦𑀺𑀯𑁂𑀲𑁄 𑀦 𑀚𑀸𑀬𑀢𑀺, 𑀲𑁂𑀲𑁂𑀲𑀼 𑀚𑀸𑀬𑀢𑀻𑀢𑀺. 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦𑀸𑀳 ‘‘𑀏𑀢𑁂𑀲𑀼𑀧𑀺 𑀅𑀪𑀺𑀦𑀺𑀯𑁂𑀲𑁄 𑀚𑀸𑀬𑀢𑀺. 𑀅𑀬𑀜𑁆𑀳𑀺 ‘𑀅𑀢𑁆𑀣𑀺 𑀦𑀼 𑀔𑁄 𑀫𑁂 𑀘𑀢𑁆𑀢𑀸𑀭𑁄 𑀇𑀭𑀺𑀬𑀸𑀧𑀣𑀸 𑀉𑀤𑀸𑀳𑀼 𑀦𑀢𑁆𑀣𑀺, 𑀅𑀢𑁆𑀣𑀺 𑀦𑀼 𑀔𑁄 𑀫𑁂 𑀘𑀢𑀼𑀲𑀫𑁆𑀧𑀚𑀜𑁆𑀜𑀁 𑀉𑀤𑀸𑀳𑀼 ¶ 𑀦𑀢𑁆𑀣𑀺, 𑀅𑀢𑁆𑀣𑀺 𑀦𑀼 𑀔𑁄 𑀫𑁂 𑀧𑀜𑁆𑀘𑀦𑀻𑀯𑀭𑀡𑀸 𑀉𑀤𑀸𑀳𑀼 𑀦𑀢𑁆𑀣𑀺, 𑀅𑀢𑁆𑀣𑀺 𑀦𑀼 𑀔𑁄 𑀫𑁂 𑀲𑀢𑁆𑀢𑀩𑁄𑀚𑁆𑀛𑀗𑁆𑀕𑀸 𑀉𑀤𑀸𑀳𑀼 𑀦𑀢𑁆𑀣𑀻’𑀢𑀺 𑀏𑀯𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀢𑁆𑀣 𑀅𑀪𑀺𑀦𑀺𑀯𑁂𑀲𑁄 𑀚𑀸𑀬𑀢𑀻’’𑀢𑀺.

𑀬𑁄 𑀳𑀺 𑀓𑁄𑀘𑀺, 𑀪𑀺𑀓𑁆𑀔𑀯𑁂𑀢𑀺 𑀬𑁄 𑀳𑀺 𑀓𑁄𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀉𑀧𑀸𑀲𑀓𑁄 𑀯𑀸 𑀉𑀧𑀸𑀲𑀺𑀓𑀸 𑀯𑀸. 𑀏𑀯𑀁 𑀪𑀸𑀯𑁂𑀬𑁆𑀬𑀸𑀢𑀺𑀆𑀤𑀺𑀢𑁄 𑀧𑀝𑁆𑀞𑀸𑀬 𑀯𑀼𑀢𑁆𑀢𑁂𑀦 𑀪𑀸𑀯𑀦𑀸𑀦𑀼𑀓𑁆𑀓𑀫𑁂𑀦 𑀪𑀸𑀯𑁂𑀬𑁆𑀬. 𑀧𑀸𑀝𑀺𑀓𑀗𑁆𑀔𑀦𑁆𑀢𑀺 𑀧𑀝𑀺𑀓𑀗𑁆𑀔𑀺𑀢𑀩𑁆𑀩𑀁 𑀇𑀘𑁆𑀙𑀺𑀢𑀩𑁆𑀩𑀁 𑀅𑀯𑀲𑁆𑀲𑀁𑀪𑀸𑀯𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀸𑀢𑀺 𑀅𑀭𑀳𑀢𑁆𑀢𑀁. 𑀲𑀢𑀺 𑀯𑀸 𑀉𑀧𑀸𑀤𑀺𑀲𑁂𑀲𑁂𑀢𑀺 𑀉𑀧𑀸𑀤𑀸𑀦𑀲𑁂𑀲𑁂 𑀯𑀸 𑀲𑀢𑀺 𑀅𑀧𑀭𑀺𑀓𑁆𑀔𑀻𑀡𑁂. 𑀅𑀦𑀸𑀕𑀸𑀫𑀺𑀢𑀸𑀢𑀺 𑀅𑀦𑀸𑀕𑀸𑀫𑀺𑀪𑀸𑀯𑁄.

𑀏𑀯𑀁 𑀲𑀢𑁆𑀢𑀦𑁆𑀦𑀁 𑀯𑀲𑁆𑀲𑀸𑀦𑀁 𑀯𑀲𑁂𑀦 𑀲𑀸𑀲𑀦𑀲𑁆𑀲 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀢𑀢𑁄 𑀅𑀧𑁆𑀧𑀢𑀭𑁂𑀧𑀺 𑀓𑀸𑀮𑁂 𑀤𑀲𑁆𑀲𑁂𑀦𑁆𑀢𑁄 𑀢𑀺𑀝𑁆𑀞𑀦𑁆𑀢𑀼, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀲𑀩𑁆𑀩𑀫𑁆𑀧𑀺 𑀘𑁂𑀢𑀁 𑀫𑀚𑁆𑀛𑀺𑀫𑀲𑁆𑀲 𑀯𑁂𑀦𑁂𑀬𑁆𑀬𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀺𑀓𑁆𑀔𑀧𑀜𑁆𑀜𑀁 𑀧𑀦 𑀲𑀦𑁆𑀥𑀸𑀬 ‘‘𑀧𑀸𑀢𑁄𑀯 𑀅𑀦𑀼𑀲𑀺𑀝𑁆𑀞𑁄 𑀲𑀸𑀬𑀁 𑀯𑀺𑀲𑁂𑀲𑀁 𑀅𑀥𑀺𑀕𑀫𑀺𑀲𑁆𑀲𑀢𑀺, 𑀲𑀸𑀬𑀁 ¶ 𑀅𑀦𑀼𑀲𑀺𑀝𑁆𑀞𑁄 𑀧𑀸𑀢𑁄 𑀯𑀺𑀲𑁂𑀲𑀁 𑀅𑀥𑀺𑀕𑀫𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀇𑀢𑀺 𑀪𑀕𑀯𑀸 ‘‘𑀏𑀯𑀁 𑀦𑀺𑀬𑁆𑀬𑀸𑀦𑀺𑀓𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀲𑀦’’𑀦𑁆𑀢𑀺 𑀤𑀲𑁆𑀲𑁂𑀢𑁆𑀯𑀸 𑀏𑀓𑀯𑀻𑀲𑀢𑀺𑀬𑀸𑀧𑀺 𑀞𑀸𑀦𑁂𑀲𑀼 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀺𑀢𑀁 𑀤𑁂𑀲𑀦𑀁 𑀦𑀺𑀬𑁆𑀬𑀸𑀢𑁂𑀦𑁆𑀢𑁄 ‘‘𑀏𑀓𑀸𑀬𑀦𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄…𑀧𑁂… 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺 𑀆𑀳. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀦 𑀢𑀺𑀁𑀲 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀽𑀢𑀺.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁

𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁦𑁬. 𑀏𑀯𑀁 ¶ ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀫𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸 𑁋 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀫𑁂𑀢𑀁. 𑀓𑀼𑀫𑀸𑀭𑀓𑀲𑁆𑀲𑀧𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀓𑀼𑀫𑀸𑀭𑀓𑀸𑀮𑁂 𑀧𑀩𑁆𑀩𑀚𑀺𑀢𑀢𑁆𑀢𑀸 𑀧𑀦 𑀪𑀕𑀯𑀢𑀸 ‘‘𑀓𑀲𑁆𑀲𑀧𑀁 𑀧𑀓𑁆𑀓𑁄𑀲𑀣, 𑀇𑀤𑀁 𑀨𑀮𑀁 𑀯𑀸 𑀔𑀸𑀤𑀦𑀻𑀬𑀁 𑀯𑀸 𑀓𑀲𑁆𑀲𑀧𑀲𑁆𑀲 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀓𑀢𑀭𑀓𑀲𑁆𑀲𑀧𑀲𑁆𑀲𑀸’’𑀢𑀺. ‘‘𑀓𑀼𑀫𑀸𑀭𑀓𑀲𑁆𑀲𑀧𑀲𑁆𑀲𑀸’’𑀢𑀺 𑀏𑀯𑀁 𑀕𑀳𑀺𑀢𑀦𑀸𑀫𑀢𑁆𑀢𑀸 𑀢𑀢𑁄 𑀧𑀝𑁆𑀞𑀸𑀬 𑀯𑀼𑀟𑁆𑀠𑀓𑀸𑀮𑁂𑀧𑀺 ‘‘𑀓𑀼𑀫𑀸𑀭𑀓𑀲𑁆𑀲𑀧𑁄’’ 𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀅𑀧𑀺𑀘 𑀭𑀜𑁆𑀜𑁄 𑀧𑁄𑀲𑀸𑀯𑀦𑀺𑀓𑀧𑀼𑀢𑁆𑀢𑀢𑁆𑀢𑀸𑀧𑀺 𑀢𑀁 𑀓𑀼𑀫𑀸𑀭𑀓𑀲𑁆𑀲𑀧𑁄𑀢𑀺 𑀲𑀜𑁆𑀚𑀸𑀦𑀺𑀁𑀲𑀼.

𑀅𑀬𑀁 𑀧𑀦𑀲𑁆𑀲 𑀧𑀼𑀩𑁆𑀩𑀬𑁄𑀕𑀢𑁄 𑀧𑀝𑁆𑀞𑀸𑀬 𑀆𑀯𑀺𑀪𑀸𑀯𑀓𑀣𑀸 𑁋 𑀣𑁂𑀭𑁄 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀪𑀕𑀯𑀦𑁆𑀢𑀁 𑀘𑀺𑀢𑁆𑀭𑀓𑀣𑀺𑀁 𑀏𑀓𑀁 𑀅𑀢𑁆𑀢𑀦𑁄 𑀲𑀸𑀯𑀓𑀁 𑀏𑀢𑀤𑀕𑁆𑀕𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀪𑀕𑀯𑀢𑁄 𑀲𑀢𑁆𑀢𑀸𑀳𑀁 𑀤𑀸𑀦𑀁 𑀤𑀢𑁆𑀯𑀸 ‘‘𑀅𑀳𑀫𑁆𑀧𑀺 𑀪𑀕𑀯𑀸 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀅𑀬𑀁 𑀣𑁂𑀭𑁄 𑀯𑀺𑀬 𑀘𑀺𑀢𑁆𑀭𑀓𑀣𑀻 𑀲𑀸𑀯𑀓𑁄 𑀪𑀯𑀸𑀫𑀻’’𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀤𑀸 𑀓𑀺𑀭 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀑𑀲𑀓𑁆𑀓𑀦𑁆𑀢𑁂 𑀧𑀜𑁆𑀘 𑀪𑀺𑀓𑁆𑀔𑀽 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀧𑀩𑁆𑀩𑀢𑀁 𑀆𑀭𑀼𑀬𑁆𑀳 𑀲𑀫𑀡𑀥𑀫𑁆𑀫𑀁 𑀅𑀓𑀁𑀲𑀼. 𑀲𑀗𑁆𑀖𑀢𑁆𑀣𑁂𑀭𑁄 𑀢𑀢𑀺𑀬𑀤𑀺𑀯𑀲𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄, 𑀅𑀦𑀼𑀣𑁂𑀭𑁄 𑀘𑀢𑀼𑀢𑁆𑀣𑀤𑀺𑀯𑀲𑁂 𑀅𑀦𑀸𑀕𑀸𑀫𑀻 𑀅𑀳𑁄𑀲𑀺, 𑀇𑀢𑀭𑁂 𑀢𑀬𑁄 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸.

𑀢𑁂𑀲𑀁 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀸𑀦𑀁 𑀏𑀓𑁄 𑀢𑀓𑁆𑀓𑀲𑀺𑀮𑀸𑀬𑀁 𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀓𑁆𑀓𑀼𑀲𑀸𑀢𑀺 𑀦𑀸𑀫 𑀭𑀸𑀚𑀸 𑀳𑀼𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁆𑀯𑀸 𑀭𑀸𑀚𑀕𑀳𑀁 𑀉𑀤𑁆𑀤𑀺𑀲𑁆𑀲 𑀆𑀕𑀘𑁆𑀙𑀦𑁆𑀢𑁄 𑀓𑀼𑀫𑁆𑀪𑀓𑀸𑀭𑀲𑀸𑀮𑀸𑀬𑀁 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀢𑁄. 𑀏𑀓𑁄 ¶ 𑀏𑀓𑀲𑁆𑀫𑀺𑀁 𑀲𑀫𑀼𑀤𑁆𑀤𑀧𑀝𑁆𑀝𑀦𑁂 𑀓𑀼𑀮𑀖𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀦𑀸𑀯𑀁 𑀆𑀭𑀼𑀬𑁆𑀳 𑀪𑀺𑀦𑁆𑀦𑀦𑀸𑀯𑁄 𑀤𑀸𑀭𑀼𑀘𑀻𑀭𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀮𑀸𑀪𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀢𑁄 ‘‘𑀅𑀳𑀁 𑀅𑀭𑀳𑀸’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀦 𑀢𑁆𑀯𑀁 𑀅𑀭𑀳𑀸, 𑀕𑀘𑁆𑀙, 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀸’’𑀢𑀺 𑀅𑀢𑁆𑀣𑀓𑀸𑀫𑀸𑀬 𑀤𑁂𑀯𑀢𑀸𑀬 𑀘𑁄𑀤𑀺𑀢𑁄 𑀢𑀣𑀸 𑀓𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑀁 𑀧𑀢𑁆𑀢𑁄.

𑀏𑀓𑁄 ¶ 𑀭𑀸𑀚𑀕𑀳𑁂 𑀏𑀓𑀺𑀲𑁆𑀲𑀸 𑀓𑀼𑀮𑀤𑀸𑀭𑀺𑀓𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀉𑀧𑁆𑀧𑀦𑁆𑀦𑁄. 𑀲𑀸 𑀘 𑀧𑀞𑀫𑀁 𑀫𑀸𑀢𑀸𑀧𑀺𑀢𑀭𑁄 𑀬𑀸𑀘𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀅𑀮𑀪𑀫𑀸𑀦𑀸 𑀓𑀼𑀮𑀖𑀭𑀁 𑀕𑀦𑁆𑀢𑁆𑀯𑀸 𑀕𑀩𑁆𑀪𑀁 𑀕𑀡𑁆𑀳𑀺 ¶ . 𑀕𑀩𑁆𑀪𑀲𑀡𑁆𑀞𑀺𑀢𑀫𑁆𑀧𑀺 𑀅𑀚𑀸𑀦𑀦𑁆𑀢𑀺 𑀲𑀸𑀫𑀺𑀓𑀁 𑀆𑀭𑀸𑀥𑁂𑀢𑁆𑀯𑀸 𑀢𑁂𑀦 𑀅𑀦𑀼𑀜𑁆𑀜𑀸𑀢𑀸 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀢𑀸, 𑀢𑀲𑁆𑀲𑀸 𑀕𑀩𑁆𑀪𑀦𑀺𑀫𑀺𑀢𑁆𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀤𑁂𑀯𑀤𑀢𑁆𑀢𑀁 𑀧𑀼𑀘𑁆𑀙𑀺𑀁𑀲𑀼. 𑀲𑁄 ‘‘𑀅𑀲𑁆𑀲𑀫𑀡𑀻’’𑀢𑀺 𑀆𑀳. 𑀤𑀲𑀩𑀮𑀁 𑀧𑀼𑀘𑁆𑀙𑀺𑀁𑀲𑀼. 𑀲𑀢𑁆𑀣𑀸 𑀉𑀧𑀸𑀮𑀺𑀢𑁆𑀣𑁂𑀭𑀁 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀲𑀺. 𑀣𑁂𑀭𑁄 𑀲𑀸𑀯𑀢𑁆𑀣𑀺𑀦𑀕𑀭𑀯𑀸𑀲𑀻𑀦𑀺 𑀓𑀼𑀮𑀸𑀦𑀺 𑀯𑀺𑀲𑀸𑀔𑀜𑁆𑀘 𑀉𑀧𑀸𑀲𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑁄𑀥𑁂𑀦𑁆𑀢𑁄 ‘‘𑀧𑀼𑀭𑁂 𑀮𑀤𑁆𑀥𑁄 𑀕𑀩𑁆𑀪𑁄, 𑀧𑀩𑁆𑀩𑀚𑁆𑀚𑀸 𑀅𑀭𑁄𑀕𑀸’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀲𑀼𑀯𑀺𑀦𑀺𑀘𑁆𑀙𑀺𑀢𑀁 𑀅𑀥𑀺𑀓𑀭𑀡’’𑀦𑁆𑀢𑀺 𑀣𑁂𑀭𑀲𑁆𑀲 𑀲𑀸𑀥𑀼𑀓𑀸𑀭𑀫𑀤𑀸𑀲𑀺. 𑀲𑀸 𑀪𑀺𑀓𑁆𑀔𑀼𑀦𑀻 𑀲𑀼𑀯𑀡𑁆𑀡𑀩𑀺𑀫𑁆𑀩𑀲𑀤𑀺𑀲𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺. 𑀢𑀁 𑀕𑀳𑁂𑀢𑁆𑀯𑀸 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀧𑁄𑀲𑀸𑀧𑁂𑀲𑀺. ‘‘𑀓𑀲𑁆𑀲𑀧𑁄’’𑀢𑀺 𑀘𑀲𑁆𑀲 𑀦𑀸𑀫𑀁 𑀓𑀢𑁆𑀯𑀸 𑀅𑀧𑀭𑀪𑀸𑀕𑁂 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀇𑀢𑀺 𑀦𑀁 𑀭𑀜𑁆𑀜𑁄 𑀧𑁄𑀲𑀸𑀯𑀦𑀺𑀓𑀧𑀼𑀢𑁆𑀢𑀢𑁆𑀢𑀸𑀧𑀺 ‘‘𑀓𑀼𑀫𑀸𑀭𑀓𑀲𑁆𑀲𑀧𑁄’’𑀢𑀺 𑀲𑀜𑁆𑀚𑀸𑀦𑀺𑀁𑀲𑀽𑀢𑀺. 𑀢𑀁 𑀏𑀓𑀤𑀺𑀯𑀲𑀁 𑀅𑀦𑁆𑀥𑀯𑀦𑁂 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀁 𑀅𑀢𑁆𑀣𑀓𑀸𑀫𑀸 𑀤𑁂𑀯𑀢𑀸 𑀧𑀜𑁆𑀳𑁂 𑀉𑀕𑁆𑀕𑀳𑀸𑀧𑁂𑀢𑁆𑀯𑀸 ‘‘𑀇𑀫𑁂 𑀧𑀜𑁆𑀳𑁂 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀸’’𑀢𑀺 𑀆𑀳. 𑀣𑁂𑀭𑁄 𑀧𑀜𑁆𑀳𑁂 𑀧𑀼𑀘𑁆𑀙𑀺𑀢𑁆𑀯𑀸 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀸𑀯𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀪𑀕𑀯𑀸𑀧𑀺 𑀢𑀁 𑀘𑀺𑀢𑁆𑀭𑀓𑀣𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺.

𑀲𑁂𑀢𑀩𑁆𑀬𑀸𑀢𑀺 𑀢𑀲𑁆𑀲 𑀦𑀕𑀭𑀲𑁆𑀲 𑀦𑀸𑀫𑀁. 𑀉𑀢𑁆𑀢𑀭𑁂𑀦 𑀲𑁂𑀢𑀩𑁆𑀬𑀦𑁆𑀢𑀺 𑀲𑁂𑀢𑀩𑁆𑀬𑀢𑁄 𑀉𑀢𑁆𑀢𑀭𑀤𑀺𑀲𑀸𑀬. 𑀭𑀸𑀚𑀜𑁆𑀜𑁄𑀢𑀺 𑀅𑀦𑀪𑀺𑀲𑀺𑀢𑁆𑀢𑀓𑀭𑀸𑀚𑀸. 𑀤𑀺𑀝𑁆𑀞𑀺𑀕𑀢𑀦𑁆𑀢𑀺 𑀤𑀺𑀝𑁆𑀞𑀺𑀬𑁂𑀯. 𑀬𑀣𑀸 𑀕𑀽𑀣𑀕𑀢𑀁 𑀫𑀼𑀢𑁆𑀢𑀕𑀢𑀦𑁆𑀢𑀺 𑀯𑀼𑀢𑁆𑀢𑁂 𑀦 𑀕𑀽𑀣𑀸𑀤𑀺𑀢𑁄 𑀅𑀜𑁆𑀜𑀁 𑀅𑀢𑁆𑀣𑀺, 𑀏𑀯𑀁 𑀤𑀺𑀝𑁆𑀞𑀺𑀬𑁂𑀯 𑀤𑀺𑀝𑁆𑀞𑀺𑀕𑀢𑀁. 𑀇𑀢𑀺𑀧𑀺 𑀦𑀢𑁆𑀣𑀻𑀢𑀺 𑀢𑀁 𑀢𑀁 𑀓𑀸𑀭𑀡𑀁 𑀅𑀧𑀤𑀺𑀲𑀺𑀢𑁆𑀯𑀸 𑀏𑀯𑀫𑁆𑀧𑀺 𑀦𑀢𑁆𑀣𑀻𑀢𑀺 𑀯𑀤𑀢𑀺. 𑀧𑀼𑀭𑀸…𑀧𑁂… 𑀲𑀜𑁆𑀜𑀸𑀧𑁂𑀢𑀻𑀢𑀺 𑀬𑀸𑀯 𑀦 𑀲𑀜𑁆𑀜𑀸𑀧𑁂𑀢𑀺.

𑀘𑀦𑁆𑀤𑀺𑀫𑀲𑀽𑀭𑀺𑀬𑀉𑀧𑀫𑀸𑀯𑀡𑁆𑀡𑀦𑀸

𑁪𑁧𑁧. 𑀇𑀫𑁂 𑀪𑁄, 𑀓𑀲𑁆𑀲𑀧, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀢𑀺 𑀲𑁄 𑀓𑀺𑀭 𑀣𑁂𑀭𑁂𑀦 𑀧𑀼𑀘𑁆𑀙𑀺𑀢𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀲𑀫𑀡𑁄 𑀧𑀞𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀉𑀧𑀫𑀁 𑀆𑀳𑀭𑀺, 𑀘𑀦𑁆𑀤𑀺𑀫𑀲𑀽𑀭𑀺𑀬𑀲𑀤𑀺𑀲𑁄 𑀪𑀯𑀺𑀲𑁆𑀲𑀢𑀺 𑀧𑀜𑁆𑀜𑀸𑀬, 𑀅𑀦𑀪𑀺𑀪𑀯𑀦𑀻𑀬𑁄 ¶ 𑀅𑀜𑁆𑀜𑁂𑀦, 𑀲𑀘𑁂 𑀧𑀦𑀸𑀳𑀁 ‘𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀇𑀫𑀲𑁆𑀫𑀺𑀁 𑀮𑁄𑀓𑁂’𑀢𑀺 𑀪𑀡𑀺𑀲𑁆𑀲𑀸𑀫𑀺, ‘𑀓𑀺𑀁 𑀦𑀺𑀲𑁆𑀲𑀺𑀢𑀸 𑀏𑀢𑁂, 𑀓𑀺𑀢𑁆𑀢𑀓𑀧𑀫𑀸𑀡𑀸, 𑀓𑀺𑀢𑁆𑀢𑀓𑀁 𑀉𑀘𑁆𑀘𑀸’𑀢𑀺𑀆𑀤𑀻𑀳𑀺 𑀧𑀮𑀺𑀯𑁂𑀞𑁂𑀲𑁆𑀲𑀢𑀺. 𑀅𑀳𑀁 𑀔𑁄 𑀧𑀦𑁂𑀢𑀁 𑀦𑀺𑀩𑁆𑀩𑁂𑀞𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, ‘𑀧𑀭𑀲𑁆𑀫𑀺𑀁 𑀮𑁄𑀓𑁂’ 𑀇𑀘𑁆𑀘𑁂𑀯𑀲𑁆𑀲 𑀓𑀣𑁂𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳.

𑀪𑀕𑀯𑀸 ¶ 𑀧𑀦 𑀢𑀢𑁄 𑀧𑀼𑀩𑁆𑀩𑁂 𑀦 𑀘𑀺𑀭𑀲𑁆𑀲𑁂𑀯 𑀲𑀼𑀥𑀸𑀪𑁄𑀚𑀦𑀻𑀬𑀚𑀸𑀢𑀓𑀁 𑀓𑀣𑁂𑀲𑀺. 𑀢𑀢𑁆𑀣 ‘‘𑀘𑀦𑁆𑀤𑁂 𑀘𑀦𑁆𑀤𑁄 𑀤𑁂𑀯𑀧𑀼𑀢𑁆𑀢𑁄, 𑀲𑀽𑀭𑀺𑀬𑁂 𑀲𑀽𑀭𑀺𑀬𑁄 𑀤𑁂𑀯𑀧𑀼𑀢𑁆𑀢𑁄’’𑀢𑀺 𑀆𑀕𑀢𑀁. 𑀪𑀕𑀯𑀢𑀸 𑀘 𑀓𑀣𑀺𑀢𑀁 𑀚𑀸𑀢𑀓𑀁 𑀯𑀸 𑀲𑀼𑀢𑁆𑀢𑀦𑁆𑀢𑀁 𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 ¶ 𑀧𑀢𑁆𑀣𑀝𑀁 𑀳𑁄𑀢𑀺, 𑀢𑁂𑀦 𑀲𑁄 ‘‘𑀏𑀢𑁆𑀣 𑀦𑀺𑀯𑀸𑀲𑀺𑀦𑁄 𑀤𑁂𑀯𑀧𑀼𑀢𑁆𑀢𑀸 𑀦𑀢𑁆𑀣𑀻’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑁂𑀯𑀸 𑀢𑁂 𑀦 𑀫𑀦𑀼𑀲𑁆𑀲𑀸𑀢𑀺 𑀆𑀳.

𑁪𑁧𑁨. 𑀅𑀢𑁆𑀣𑀺 𑀧𑀦, 𑀭𑀸𑀚𑀜𑁆𑀜, 𑀧𑀭𑀺𑀬𑀸𑀬𑁄𑀢𑀺 𑀅𑀢𑁆𑀣𑀺 𑀧𑀦 𑀓𑀸𑀭𑀡𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀆𑀩𑀸𑀥𑀺𑀓𑀸𑀢𑀺 𑀯𑀺𑀲𑀪𑀸𑀕𑀯𑁂𑀤𑀦𑀸𑀲𑀗𑁆𑀔𑀸𑀢𑁂𑀦 𑀆𑀩𑀸𑀥𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀤𑀼𑀓𑁆𑀔𑀺𑀢𑀸𑀢𑀺 𑀤𑀼𑀓𑁆𑀔𑀧𑁆𑀧𑀢𑁆𑀢𑀸. 𑀩𑀸𑀴𑁆𑀳𑀕𑀺𑀮𑀸𑀦𑀸𑀢𑀺 𑀅𑀥𑀺𑀫𑀢𑁆𑀢𑀕𑀺𑀮𑀸𑀦𑀸. 𑀲𑀤𑁆𑀥𑀸𑀬𑀺𑀓𑀸𑀢𑀺 𑀅𑀳𑀁 𑀢𑀼𑀫𑁆𑀳𑁂 𑀲𑀤𑁆𑀤𑀳𑀸𑀫𑀺, 𑀢𑀼𑀫𑁆𑀳𑁂 𑀫𑀬𑁆𑀳𑀁 𑀲𑀤𑁆𑀥𑀸𑀬𑀺𑀓𑀸 𑀲𑀤𑁆𑀥𑀸𑀬𑀺𑀢𑀩𑁆𑀩𑀯𑀘𑀦𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀺𑀓𑀸𑀢𑀺 𑀅𑀳𑀁 𑀢𑀼𑀫𑁆𑀳𑁂 𑀧𑀢𑁆𑀢𑀺𑀬𑀸𑀫𑀺, 𑀢𑀼𑀫𑁆𑀳𑁂 𑀫𑀬𑁆𑀳𑀁 𑀧𑀘𑁆𑀘𑀬𑀺𑀓𑀸 𑀧𑀢𑁆𑀢𑀺𑀬𑀸𑀬𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀘𑁄𑀭𑀸𑀤𑀺𑀉𑀧𑀫𑀸𑀯𑀡𑁆𑀡𑀦𑀸

𑁪𑁧𑁩. 𑀉𑀤𑁆𑀤𑀺𑀲𑀺𑀢𑁆𑀯𑀸𑀢𑀺 𑀢𑁂𑀲𑀁 𑀅𑀢𑁆𑀢𑀸𑀦𑀜𑁆𑀘 𑀧𑀝𑀺𑀲𑀸𑀫𑀺𑀢𑀪𑀡𑁆𑀟𑀓𑀜𑁆𑀘 𑀤𑀲𑁆𑀲𑁂𑀢𑁆𑀯𑀸, 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀧𑁆𑀧𑀮𑀧𑀦𑁆𑀢𑀲𑁆𑀲𑀸𑀢𑀺 ‘‘𑀧𑀼𑀢𑁆𑀢𑁄 𑀫𑁂, 𑀥𑀻𑀢𑀸 𑀫𑁂, 𑀥𑀦𑀁 𑀫𑁂’’𑀢𑀺 𑀯𑀺𑀯𑀺𑀥𑀁 𑀧𑀮𑀧𑀦𑁆𑀢𑀲𑁆𑀲. 𑀦𑀺𑀭𑀬𑀧𑀸𑀮𑁂𑀲𑀽𑀢𑀺 𑀦𑀺𑀭𑀬𑁂 𑀓𑀫𑁆𑀫𑀓𑀸𑀭𑀡𑀺𑀓𑀲𑀢𑁆𑀢𑁂𑀲𑀼. 𑀬𑁂 𑀧𑀦 ‘‘𑀓𑀫𑁆𑀫𑀫𑁂𑀯 𑀓𑀫𑁆𑀫𑀓𑀸𑀭𑀡𑀁 𑀓𑀭𑁄𑀢𑀺, 𑀦𑀢𑁆𑀣𑀺 𑀦𑀺𑀭𑀬𑀧𑀸𑀮𑀸’’𑀢𑀺 𑀯𑀤𑀦𑁆𑀢𑀺. 𑀢𑁂 ‘‘𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸’’𑀢𑀺 𑀤𑁂𑀯𑀤𑀽𑀢𑀲𑀼𑀢𑁆𑀢𑀁 𑀧𑀝𑀺𑀩𑀸𑀳𑀦𑁆𑀢𑀺. 𑀫𑀦𑀼𑀲𑁆𑀲𑀮𑁄𑀓𑁂 𑀭𑀸𑀚𑀓𑀼𑀮𑁂𑀲𑀼 𑀓𑀸𑀭𑀡𑀺𑀓𑀫𑀦𑀼𑀲𑁆𑀲𑀸 𑀯𑀺𑀬 𑀳𑀺 𑀦𑀺𑀭𑀬𑁂 𑀦𑀺𑀭𑀬𑀧𑀸𑀮𑀸 𑀳𑁄𑀦𑁆𑀢𑀺.

𑁪𑁧𑁫. 𑀯𑁂𑀴𑀼𑀧𑁂𑀲𑀺𑀓𑀸𑀳𑀻𑀢𑀺 𑀯𑁂𑀴𑀼𑀯𑀺𑀮𑀻𑀯𑁂𑀳𑀺. 𑀲𑀼𑀦𑀺𑀫𑁆𑀫𑀚𑁆𑀚𑀣𑀸𑀢𑀺 𑀬𑀣𑀸 𑀲𑀼𑀝𑁆𑀞𑀼 𑀦𑀺𑀫𑁆𑀫𑀚𑁆𑀚𑀺𑀢𑀁 𑀳𑁄𑀢𑀺, 𑀏𑀯𑀁 𑀦𑀺𑀫𑁆𑀫𑀚𑁆𑀚𑀣, 𑀅𑀧𑀦𑁂𑀣𑀸𑀢𑀺 𑀅𑀢𑁆𑀣𑁄.

𑀅𑀲𑀼𑀘𑀻𑀢𑀺 𑀅𑀫𑀦𑀸𑀧𑁄. 𑀅𑀲𑀼𑀘𑀺𑀲𑀗𑁆𑀔𑀸𑀢𑁄𑀢𑀺 𑀅𑀲𑀼𑀘𑀺𑀓𑁄𑀝𑁆𑀞𑀸𑀲𑀪𑀽𑀢𑁄 𑀅𑀲𑀼𑀘𑀻𑀢𑀺 𑀜𑀸𑀢𑁄 𑀯𑀸. 𑀤𑀼𑀕𑁆𑀕𑀦𑁆𑀥𑁄𑀢𑀺 ¶ 𑀓𑀼𑀡𑀧𑀕𑀦𑁆𑀥𑁄. 𑀚𑁂𑀕𑀼𑀘𑁆𑀙𑁄𑀢𑀺 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑀬𑀼𑀢𑁆𑀢𑁄. 𑀧𑀝𑀺𑀓𑀽𑀮𑁄𑀢𑀺 𑀤𑀲𑁆𑀲𑀦𑁂𑀦𑁂𑀯 𑀧𑀝𑀺𑀖𑀸𑀯𑀳𑁄. 𑀉𑀩𑁆𑀩𑀸𑀥𑀢𑀻𑀢𑀺 𑀤𑀺𑀯𑀲𑀲𑁆𑀲 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀦𑁆𑀳𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀢𑁆𑀣𑀸𑀦𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀮𑀗𑁆𑀓𑀢𑀧𑀝𑀺𑀫𑀡𑁆𑀟𑀺𑀢𑀸𑀦𑀁 𑀘𑀓𑁆𑀓𑀯𑀢𑁆𑀢𑀺𑀆𑀤𑀻𑀦𑀫𑁆𑀧𑀺 𑀫𑀦𑀼𑀲𑁆𑀲𑀸𑀦𑀁 𑀕𑀦𑁆𑀥𑁄 𑀬𑁄𑀚𑀦𑀲𑀢𑁂 𑀞𑀺𑀢𑀸𑀦𑀁 𑀤𑁂𑀯𑀢𑀸𑀦𑀁 𑀓𑀡𑁆𑀞𑁂 𑀆𑀲𑀢𑁆𑀢𑀓𑀼𑀡𑀧𑀁 𑀯𑀺𑀬 𑀩𑀸𑀥𑀢𑀺.

𑁪𑁧𑁬. 𑀧𑀼𑀦 ¶ 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀜𑁆𑀘𑀲𑀻𑀮𑀸𑀦𑀺 𑀲𑀫𑀸𑀤𑀸𑀬𑀯𑀢𑁆𑀢𑁂𑀦𑁆𑀢𑀸𑀦𑀁 𑀯𑀲𑁂𑀦 𑀯𑀤𑀢𑀺. 𑀢𑀸𑀯𑀢𑀺𑀁𑀲𑀸𑀦𑀦𑁆𑀢𑀺 𑀇𑀤𑀜𑁆𑀘 𑀤𑀽𑀭𑁂 𑀦𑀺𑀩𑁆𑀩𑀢𑁆𑀢𑀸 𑀢𑀸𑀯 𑀫𑀸 𑀆𑀕𑀘𑁆𑀙𑀦𑁆𑀢𑀼, 𑀇𑀫𑁂 𑀓𑀲𑁆𑀫𑀸 𑀦 𑀏𑀦𑁆𑀢𑀻𑀢𑀺 𑀯𑀤𑀢𑀺.

𑁪𑁧𑁮. 𑀚𑀘𑁆𑀘𑀦𑁆𑀥𑀽𑀧𑀫𑁄 ¶ 𑀫𑀜𑁆𑀜𑁂 𑀧𑀝𑀺𑀪𑀸𑀲𑀻𑀢𑀺 𑀚𑀘𑁆𑀘𑀦𑁆𑀥𑁄 𑀯𑀺𑀬 𑀉𑀧𑀝𑁆𑀞𑀸𑀲𑀺. 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀻𑀢𑀺 𑀅𑀭𑀜𑁆𑀜𑀓𑀗𑁆𑀕𑀬𑀼𑀢𑁆𑀢𑀢𑀸𑀬 𑀅𑀭𑀜𑁆𑀜𑀸𑀦𑀺, 𑀫𑀳𑀸𑀯𑀦𑀲𑀡𑁆𑀟𑀢𑀸𑀬 𑀯𑀦𑀧𑀢𑁆𑀣𑀸𑀦𑀺. 𑀧𑀦𑁆𑀢𑀸𑀦𑀻𑀢𑀺 𑀤𑀽𑀭𑀸𑀦𑀺.

𑁪𑁧𑁯. 𑀓𑀮𑁆𑀬𑀸𑀡𑀥𑀫𑁆𑀫𑁂𑀢𑀺 𑀢𑁂𑀦𑁂𑀯 𑀲𑀻𑀮𑁂𑀦 𑀲𑀼𑀦𑁆𑀤𑀭𑀥𑀫𑁆𑀫𑁂. 𑀤𑀼𑀓𑁆𑀔𑀧𑀝𑀺𑀓𑀽𑀮𑁂𑀢𑀺 𑀤𑀼𑀓𑁆𑀔𑀁 𑀅𑀧𑀢𑁆𑀣𑁂𑀦𑁆𑀢𑁂. 𑀲𑁂𑀬𑁆𑀬𑁄 𑀪𑀯𑀺𑀲𑁆𑀲𑀢𑀻𑀢𑀺 𑀧𑀭𑀮𑁄𑀓𑁂 𑀲𑀼𑀕𑀢𑀺𑀲𑀼𑀔𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁨𑁦. 𑀉𑀧𑀯𑀺𑀚𑀜𑁆𑀜𑀸𑀢𑀺 𑀉𑀧𑀕𑀢𑀯𑀺𑀚𑀸𑀬𑀦𑀓𑀸𑀮𑀸, 𑀧𑀭𑀺𑀧𑀓𑁆𑀓𑀕𑀩𑁆𑀪𑀸 𑀦 𑀘𑀺𑀭𑀲𑁆𑀲𑁂𑀯 𑀯𑀺𑀚𑀸𑀬𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀑𑀧𑀪𑁄𑀕𑁆𑀕𑀸 𑀪𑀯𑀺𑀲𑁆𑀲𑀢𑀻𑀢𑀺 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀪𑀯𑀺𑀲𑁆𑀲𑀢𑀺. 𑀅𑀦𑀬𑀩𑁆𑀬𑀲𑀦𑀦𑁆𑀢𑀺 𑀫𑀳𑀸𑀤𑀼𑀓𑁆𑀔𑀁. 𑀅𑀬𑁄𑀢𑀺 𑀲𑀼𑀔𑀁, 𑀦 𑀅𑀬𑁄 𑀅𑀦𑀬𑁄, 𑀤𑀼𑀓𑁆𑀔𑀁. 𑀢𑀤𑁂𑀢𑀁 𑀲𑀩𑁆𑀩𑀲𑁄 𑀲𑀼𑀔𑀁 𑀩𑁆𑀬𑀲𑀢𑀺 𑀯𑀺𑀓𑁆𑀔𑀺𑀧𑀢𑀻𑀢𑀺 𑀩𑁆𑀬𑀲𑀦𑀁. 𑀇𑀢𑀺 𑀅𑀦𑀬𑁄𑀯 𑀩𑁆𑀬𑀲𑀦𑀁 𑀅𑀦𑀬𑀩𑁆𑀬𑀲𑀦𑀁, 𑀫𑀳𑀸𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀅𑀬𑁄𑀦𑀺𑀲𑁄𑀢𑀺 𑀅𑀦𑀼𑀧𑀸𑀬𑁂𑀦. 𑀅𑀧𑀓𑁆𑀓𑀁 𑀦 𑀧𑀭𑀺𑀧𑀸𑀘𑁂𑀦𑁆𑀢𑀻𑀢𑀺 𑀅𑀧𑀭𑀺𑀡𑀢𑀁 𑀅𑀔𑀻𑀡𑀁 𑀆𑀬𑀼𑀁 𑀅𑀦𑁆𑀢𑀭𑀸𑀯 𑀦 𑀉𑀧𑀘𑁆𑀙𑀺𑀦𑁆𑀤𑀦𑁆𑀢𑀺. 𑀧𑀭𑀺𑀧𑀸𑀓𑀁 𑀆𑀕𑀫𑁂𑀦𑁆𑀢𑀻𑀢𑀺 𑀆𑀬𑀼𑀧𑀭𑀺𑀧𑀸𑀓𑀓𑀸𑀮𑀁 𑀆𑀕𑀫𑁂𑀦𑁆𑀢𑀺. 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸𑀧𑁂𑀢𑀁 𑀯𑀼𑀢𑁆𑀢𑀁 𑁋

‘‘𑀦𑀸𑀪𑀺𑀦𑀦𑁆𑀤𑀸𑀫𑀺 𑀫𑀭𑀡𑀁, 𑀦𑀸𑀪𑀺𑀦𑀦𑁆𑀤𑀸𑀫𑀺 𑀚𑀻𑀯𑀺𑀢𑀁;

𑀓𑀸𑀮𑀜𑁆𑀘 𑀧𑀝𑀺𑀓𑀗𑁆𑀔𑀸𑀫𑀺, 𑀦𑀺𑀩𑁆𑀩𑀺𑀲𑀁 𑀪𑀢𑀓𑁄 𑀬𑀣𑀸𑀢𑀺. (𑀣𑁂𑀭𑀕𑀸. 𑁧𑁦𑁦𑁧)

𑁪𑁨𑁧. 𑀉𑀩𑁆𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀫𑀢𑁆𑀢𑀺𑀓𑀸𑀮𑁂𑀧𑀁 𑀪𑀺𑀦𑁆𑀤𑀺𑀢𑁆𑀯𑀸.

𑁪𑁨𑁨. 𑀭𑀸𑀫𑀡𑁂𑀬𑁆𑀬𑀓𑀦𑁆𑀢𑀺 ¶ 𑀭𑀫𑀡𑀻𑀬𑀪𑀸𑀯𑀁. 𑀯𑁂𑀮𑀸𑀲𑀺𑀓𑀸𑀢𑀺 𑀔𑀺𑀟𑁆𑀟𑀸𑀧𑀭𑀸𑀥𑀺𑀓𑀸. 𑀓𑁄𑀫𑀸𑀭𑀺𑀓𑀸𑀢𑀺 𑀢𑀭𑀼𑀡𑀤𑀸𑀭𑀺𑀓𑀸. 𑀢𑀼𑀬𑁆𑀳𑀁 𑀚𑀻𑀯𑀦𑁆𑀢𑀺 𑀲𑀼𑀧𑀺𑀦𑀤𑀲𑁆𑀲𑀦𑀓𑀸𑀮𑁂 𑀦𑀺𑀓𑁆𑀔𑀫𑀦𑁆𑀢𑀁 𑀯𑀸 𑀧𑀯𑀺𑀲𑀦𑁆𑀢𑀁 𑀯𑀸 𑀚𑀻𑀯𑀁 𑀅𑀧𑀺 𑀦𑀼 𑀧𑀲𑁆𑀲𑀦𑁆𑀢𑀺. 𑀇𑀥 𑀘𑀺𑀢𑁆𑀢𑀸𑀘𑀸𑀭𑀁 ‘‘𑀚𑀻𑀯’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀆𑀳. 𑀲𑁄 𑀳𑀺 𑀢𑀢𑁆𑀣 𑀚𑀻𑀯𑀲𑀜𑁆𑀜𑀻𑀢𑀺.

𑁪𑁨𑁩. 𑀚𑀺𑀬𑀸𑀬𑀸𑀢𑀺 𑀥𑀦𑀼𑀚𑀺𑀬𑀸𑀬, 𑀕𑀻𑀯𑀁 𑀯𑁂𑀞𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀢𑁆𑀣𑀺𑀦𑁆𑀦𑀢𑀭𑁄𑀢𑀺 𑀣𑀤𑁆𑀥𑀢𑀭𑁄. 𑀇𑀫𑀺𑀦𑀸 𑀓𑀺𑀁 𑀤𑀲𑁆𑀲𑁂𑀢𑀺? 𑀢𑀼𑀫𑁆𑀳𑁂 𑀚𑀻𑀯𑀓𑀸𑀮𑁂 𑀲𑀢𑁆𑀢𑀲𑁆𑀲 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺 ¶ 𑀯𑀤𑀦𑁆𑀢𑀺, 𑀘𑀯𑀦𑀓𑀸𑀮𑁂 𑀧𑀦 𑀭𑀽𑀧𑀓𑁆𑀔𑀦𑁆𑀥𑀫𑀢𑁆𑀢𑀫𑁂𑀯 𑀅𑀯𑀲𑀺𑀲𑁆𑀲𑀢𑀺, 𑀢𑀬𑁄 𑀔𑀦𑁆𑀥𑀸 𑀅𑀧𑁆𑀧𑀯𑀢𑁆𑀢𑀸 𑀳𑁄𑀦𑁆𑀢𑀺, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀕𑀘𑁆𑀙𑀢𑀺. 𑀅𑀯𑀲𑀺𑀝𑁆𑀞𑁂𑀦 𑀭𑀽𑀧𑀓𑁆𑀔𑀦𑁆𑀥𑁂𑀦 𑀮𑀳𑀼𑀢𑀭𑁂𑀦 𑀪𑀯𑀺𑀢𑀩𑁆𑀩𑀁, 𑀕𑀭𑀼𑀓𑀢𑀭𑁄 𑀘 𑀳𑁄𑀢𑀺. 𑀢𑀲𑁆𑀫𑀸 𑀦𑀢𑁆𑀣𑀺 𑀓𑁄𑀘𑀺 𑀓𑀼𑀳𑀺𑀁 𑀕𑀦𑁆𑀢𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺.

𑁪𑁨𑁪. 𑀦𑀺𑀩𑁆𑀩𑀼𑀢𑀦𑁆𑀢𑀺 𑀯𑀽𑀧𑀲𑀦𑁆𑀢𑀢𑁂𑀚𑀁.

𑁪𑁨𑁫. 𑀅𑀦𑀼𑀧𑀳𑀘𑁆𑀘𑀸𑀢𑀺 ¶ 𑀅𑀯𑀺𑀦𑀸𑀲𑁂𑀢𑁆𑀯𑀸. 𑀆𑀫𑀢𑁄 𑀳𑁄𑀢𑀻𑀢𑀺 𑀅𑀤𑁆𑀥𑀫𑀢𑁄 𑀫𑀭𑀺𑀢𑀼𑀁 𑀆𑀭𑀤𑁆𑀥𑁄 𑀳𑁄𑀢𑀺. 𑀑𑀥𑀼𑀦𑀸𑀣𑀸𑀢𑀺 𑀑𑀭𑀢𑁄 𑀓𑀭𑁄𑀣. 𑀲𑀦𑁆𑀥𑀼𑀦𑀸𑀣𑀸𑀢𑀺 𑀧𑀭𑀢𑁄 𑀓𑀭𑁄𑀣. 𑀦𑀺𑀤𑁆𑀥𑀼𑀦𑀸𑀣𑀸𑀢𑀺 𑀅𑀧𑀭𑀸𑀧𑀭𑀁 𑀓𑀭𑁄𑀣. 𑀢𑀜𑁆𑀘𑀸𑀬𑀢𑀦𑀁 𑀦 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀢𑁂𑀦 𑀘𑀓𑁆𑀔𑀼𑀦𑀸 𑀢𑀁 𑀭𑀽𑀧𑀸𑀬𑀢𑀦𑀁 𑀦 𑀯𑀺𑀪𑀸𑀯𑁂𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑁪𑁨𑁬. 𑀲𑀗𑁆𑀔𑀥𑀫𑁄𑀢𑀺 𑀲𑀗𑁆𑀔𑀥𑀫𑀓𑁄. 𑀉𑀧𑀮𑀸𑀧𑁂𑀢𑁆𑀯𑀸𑀢𑀺 𑀥𑀫𑀺𑀢𑁆𑀯𑀸.

𑁪𑁨𑁮. 𑀅𑀕𑁆𑀕𑀺𑀓𑁄𑀢𑀺 𑀅𑀕𑁆𑀕𑀺𑀧𑀭𑀺𑀘𑀸𑀭𑀓𑁄. 𑀆𑀧𑀸𑀤𑁂𑀬𑁆𑀬𑀦𑁆𑀢𑀺 𑀦𑀺𑀧𑁆𑀨𑀸𑀤𑁂𑀬𑁆𑀬𑀁, 𑀆𑀬𑀼𑀁 𑀯𑀸 𑀧𑀸𑀧𑀼𑀡𑀸𑀧𑁂𑀬𑁆𑀬𑀁. 𑀧𑁄𑀲𑁂𑀬𑁆𑀬𑀦𑁆𑀢𑀺 𑀪𑁄𑀚𑀦𑀸𑀤𑀻𑀳𑀺 𑀪𑀭𑁂𑀬𑁆𑀬𑀁. 𑀯𑀟𑁆𑀠𑁂𑀬𑁆𑀬𑀦𑁆𑀢𑀺 𑀯𑀟𑁆𑀠𑀺𑀁 𑀕𑀫𑁂𑀬𑁆𑀬𑀁. 𑀅𑀭𑀡𑀻𑀲𑀳𑀺𑀢𑀦𑁆𑀢𑀺 𑀅𑀭𑀡𑀻𑀬𑀼𑀕𑀴𑀁.

𑁪𑁨𑁯. 𑀢𑀺𑀭𑁄𑀭𑀸𑀚𑀸𑀦𑁄𑀧𑀻𑀢𑀺 𑀢𑀺𑀭𑁄𑀭𑀝𑁆𑀞𑁂 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀚𑀦𑀧𑀤𑁂 𑀭𑀸𑀚𑀸𑀦𑁄 𑀚𑀸𑀦𑀦𑁆𑀢𑀺. 𑀅𑀩𑁆𑀬𑀢𑁆𑀢𑁄𑀢𑀺 𑀅𑀯𑀺𑀲𑀤𑁄 𑀅𑀙𑁂𑀓𑁄. 𑀓𑁄𑀧𑁂𑀦𑀧𑀻𑀢𑀺 𑀬𑁂 𑀫𑀁 𑀏𑀯𑀁 𑀯𑀓𑁆𑀔𑀦𑁆𑀢𑀺, 𑀢𑁂𑀲𑀼 𑀉𑀧𑁆𑀧𑀚𑁆𑀚𑀦𑀓𑁂𑀦 𑀓𑁄𑀧𑁂𑀦𑀧𑀺 𑀏𑀢𑀁 𑀤𑀺𑀝𑁆𑀞𑀺𑀕𑀢𑀁 𑀳𑀭𑀺𑀲𑁆𑀲𑀸𑀫𑀺 𑀧𑀭𑀺𑀳𑀭𑀺𑀲𑁆𑀲𑀸𑀫𑀻𑀢𑀺 𑀕𑀳𑁂𑀢𑁆𑀯𑀸 𑀯𑀺𑀘𑀭𑀺𑀲𑁆𑀲𑀸𑀫𑀺. 𑀫𑀓𑁆𑀔𑁂𑀦𑀸𑀢𑀺 𑀢𑀬𑀸 𑀯𑀼𑀢𑁆𑀢𑀬𑀼𑀢𑁆𑀢𑀓𑀸𑀭𑀡𑀫𑀓𑁆𑀔𑀮𑀓𑁆𑀔𑀡𑁂𑀦 𑀫𑀓𑁆𑀔𑁂𑀦𑀸𑀧𑀺. 𑀧𑀮𑀸𑀲𑁂𑀦𑀸𑀢𑀺 𑀢𑀬𑀸 𑀲𑀤𑁆𑀥𑀺𑀁 𑀬𑀼𑀕𑀕𑁆𑀕𑀸𑀳𑀮𑀓𑁆𑀔𑀡𑁂𑀦 𑀧𑀮𑀸𑀲𑁂𑀦𑀸𑀧𑀺.

𑁪𑁩𑁦. 𑀳𑀭𑀺𑀢𑀓𑀧𑀡𑁆𑀡𑀦𑁆𑀢𑀺 ¶ 𑀬𑀁 𑀓𑀺𑀜𑁆𑀘𑀺 𑀳𑀭𑀺𑀢𑀓𑀁, 𑀅𑀦𑁆𑀢𑀫𑀲𑁄 𑀅𑀮𑁆𑀮𑀢𑀺𑀡𑀧𑀡𑁆𑀡𑀫𑁆𑀧𑀺 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀦𑁆𑀦𑀤𑁆𑀥𑀓𑀮𑀸𑀧𑀦𑁆𑀢𑀺 𑀲𑀦𑁆𑀦𑀤𑁆𑀥𑀥𑀦𑀼𑀓𑀮𑀸𑀧𑀁. 𑀆𑀲𑀺𑀢𑁆𑀢𑁄𑀤𑀓𑀸𑀦𑀺 𑀯𑀝𑀼𑀫𑀸𑀦𑀻𑀢𑀺 𑀧𑀭𑀺𑀧𑀼𑀡𑁆𑀡𑀲𑀮𑀺𑀮𑀸 𑀫𑀕𑁆𑀕𑀸 𑀘 𑀓𑀦𑁆𑀤𑀭𑀸 𑀘. 𑀬𑁄𑀕𑁆𑀕𑀸𑀦𑀻𑀢𑀺 𑀩𑀮𑀺𑀩𑀤𑁆𑀤𑁂.

𑀩𑀳𑀼𑀦𑀺𑀓𑁆𑀔𑀦𑁆𑀢𑀭𑁄𑀢𑀺 𑀩𑀳𑀼𑀦𑀺𑀓𑁆𑀔𑀦𑁆𑀢𑁄 𑀘𑀺𑀭𑀦𑀺𑀓𑁆𑀔𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀬𑀣𑀸𑀪𑀢𑁂𑀦 𑀪𑀡𑁆𑀟𑁂𑀦𑀸𑀢𑀺 𑀬𑀁 𑀯𑁄 𑀢𑀺𑀡𑀓𑀝𑁆𑀞𑁄𑀤𑀓𑀪𑀡𑁆𑀟𑀓𑀁 𑀆𑀭𑁄𑀧𑀺𑀢𑀁, 𑀢𑁂𑀦 𑀬𑀣𑀸𑀪𑀢𑁂𑀦 𑀬𑀣𑀸𑀭𑁄𑀧𑀺𑀢𑁂𑀦, 𑀬𑀣𑀸𑀕𑀳𑀺𑀢𑁂𑀦𑀸𑀢𑀺 𑀅𑀢𑁆𑀣𑁄.

𑀅𑀧𑁆𑀧𑀲𑀸𑀭𑀸𑀦𑀻𑀢𑀺 𑀅𑀧𑁆𑀧𑀕𑁆𑀖𑀸𑀦𑀺. 𑀧𑀡𑀺𑀬𑀸𑀦𑀻𑀢𑀺 𑀪𑀡𑁆𑀟𑀸𑀦𑀺.

𑀕𑀽𑀣𑀪𑀸𑀭𑀺𑀓𑀸𑀤𑀺𑀉𑀧𑀫𑀸𑀯𑀡𑁆𑀡𑀦𑀸

𑁪𑁩𑁨. 𑀫𑀫 ¶ 𑀘 𑀲𑀽𑀓𑀭𑀪𑀢𑁆𑀢𑀦𑁆𑀢𑀺 𑀫𑀫 𑀘 𑀲𑀽𑀓𑀭𑀸𑀦𑀁 𑀇𑀤𑀁 𑀪𑀢𑁆𑀢𑀁. 𑀉𑀕𑁆𑀖𑀭𑀦𑁆𑀢𑀦𑁆𑀢𑀺 𑀉𑀧𑀭𑀺 𑀖𑀭𑀦𑁆𑀢𑀁. 𑀧𑀕𑁆𑀖𑀭𑀦𑁆𑀢𑀦𑁆𑀢𑀺 ¶ 𑀳𑁂𑀝𑁆𑀞𑀸 𑀧𑀭𑀺𑀲𑁆𑀲𑀯𑀦𑁆𑀢𑀁. 𑀢𑀼𑀫𑁆𑀳𑁂 𑀔𑁆𑀯𑁂𑀢𑁆𑀣 𑀪𑀡𑁂𑀢𑀺 𑀢𑀼𑀫𑁆𑀳𑁂 𑀔𑁄 𑀏𑀢𑁆𑀣 𑀪𑀡𑁂. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀢𑀣𑀸 𑀳𑀺 𑀧𑀦 𑀫𑁂 𑀲𑀽𑀓𑀭𑀪𑀢𑁆𑀢𑀦𑁆𑀢𑀺 𑀢𑀣𑀸 𑀳𑀺 𑀧𑀦 𑀫𑁂 𑀅𑀬𑀁 𑀕𑀽𑀣𑁄 𑀲𑀽𑀓𑀭𑀸𑀦𑀁 𑀪𑀢𑁆𑀢𑀁.

𑁪𑁩𑁪. 𑀆𑀕𑀢𑀸𑀕𑀢𑀁 𑀓𑀮𑀺𑀁 𑀕𑀺𑀮𑀢𑀻𑀢𑀺 𑀆𑀕𑀢𑀸𑀕𑀢𑀁 𑀧𑀭𑀸𑀚𑀬𑀕𑀼𑀴𑀁 𑀕𑀺𑀮𑀢𑀺. 𑀧𑀚𑁆𑀚𑁄𑀳𑀺𑀲𑁆𑀲𑀸𑀫𑀻𑀢𑀺 𑀧𑀚𑁆𑀚𑁄𑀳𑀦𑀁 𑀓𑀭𑀺𑀲𑁆𑀲𑀸𑀫𑀺, 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀅𑀓𑁆𑀔𑁂𑀳𑀺 𑀤𑀺𑀩𑁆𑀩𑀺𑀲𑁆𑀲𑀸𑀫𑀸𑀢𑀺 𑀕𑀼𑀴𑁂𑀳𑀺 𑀓𑀻𑀴𑀺𑀲𑁆𑀲𑀸𑀫. 𑀮𑀺𑀢𑁆𑀢𑀁 𑀧𑀭𑀫𑁂𑀦 𑀢𑁂𑀚𑀲𑀸𑀢𑀺 𑀧𑀭𑀫𑀢𑁂𑀚𑁂𑀦 𑀯𑀺𑀲𑁂𑀦 𑀮𑀺𑀢𑁆𑀢𑀁.

𑁪𑁩𑁬. 𑀕𑀸𑀫𑀧𑀝𑁆𑀝𑀦𑁆𑀢𑀺 𑀯𑀼𑀝𑁆𑀞𑀺𑀢𑀕𑀸𑀫𑀧𑀤𑁂𑀲𑁄 𑀯𑀼𑀘𑁆𑀘𑀢𑀺. ‘‘𑀕𑀸𑀫𑀧𑀤’’𑀦𑁆𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. 𑀲𑀸𑀡𑀪𑀸𑀭𑀦𑁆𑀢𑀺 𑀲𑀸𑀡𑀯𑀸𑀓𑀪𑀸𑀭𑀁. 𑀲𑀼𑀲𑀦𑁆𑀦𑀤𑁆𑀥𑁄𑀢𑀺 𑀲𑀼𑀩𑀤𑁆𑀥𑁄. 𑀢𑁆𑀯𑀁 𑀧𑀚𑀸𑀦𑀸𑀳𑀻𑀢𑀺 𑀢𑁆𑀯𑀁 𑀚𑀸𑀦. 𑀲𑀘𑁂 𑀕𑀡𑁆𑀳𑀺𑀢𑀼𑀓𑀸𑀫𑁄𑀲𑀺, 𑀕𑀡𑁆𑀳𑀸𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀔𑁄𑀫𑀦𑁆𑀢𑀺 𑀔𑁄𑀫𑀯𑀸𑀓𑀁. 𑀅𑀬𑀦𑁆𑀢𑀺 𑀓𑀸𑀴𑀮𑁄𑀳𑀁. 𑀮𑁄𑀳𑀦𑁆𑀢𑀺 𑀢𑀫𑁆𑀩𑀮𑁄𑀳𑀁. 𑀲𑀚𑁆𑀛𑀦𑁆𑀢𑀺 𑀭𑀚𑀢𑀁. 𑀲𑀼𑀯𑀡𑁆𑀡𑀦𑁆𑀢𑀺 ¶ 𑀲𑀼𑀯𑀡𑁆𑀡𑀫𑀸𑀲𑀓𑀁. 𑀅𑀪𑀺𑀦𑀦𑁆𑀤𑀺𑀁𑀲𑀽𑀢𑀺 𑀢𑀼𑀲𑁆𑀲𑀺𑀁𑀲𑀼.

𑁪𑁩𑁭. 𑀅𑀢𑁆𑀢𑀫𑀦𑁄𑀢𑀺 𑀲𑀓𑀫𑀦𑁄 𑀢𑀼𑀝𑁆𑀞𑀘𑀺𑀢𑁆𑀢𑁄. 𑀅𑀪𑀺𑀭𑀤𑁆𑀥𑁄𑀢𑀺 𑀅𑀪𑀺𑀧𑁆𑀧𑀲𑀦𑁆𑀦𑁄. 𑀧𑀜𑁆𑀳𑀸𑀧𑀝𑀺𑀪𑀸𑀦𑀸𑀦𑀻𑀢𑀺 𑀧𑀜𑁆𑀳𑀼𑀧𑀝𑁆𑀞𑀸𑀦𑀸𑀦𑀺. 𑀧𑀘𑁆𑀘𑀦𑀻𑀓𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀧𑀘𑁆𑀘𑀦𑀻𑀓𑀁 𑀧𑀝𑀺𑀯𑀺𑀭𑀼𑀤𑁆𑀥𑀁 𑀯𑀺𑀬 𑀓𑀢𑁆𑀢𑀩𑁆𑀩𑀁 𑀅𑀫𑀜𑁆𑀜𑀺𑀲𑁆𑀲𑀁, 𑀧𑀝𑀺𑀮𑁄𑀫𑀕𑀸𑀳𑀁 𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁪𑁩𑁮. 𑀲𑀗𑁆𑀖𑀸𑀢𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀲𑀗𑁆𑀖𑀸𑀢𑀁 𑀯𑀺𑀦𑀸𑀲𑀁 𑀫𑀭𑀡𑀁 𑀆𑀧𑀚𑁆𑀚𑀦𑁆𑀢𑀺. 𑀦 𑀫𑀳𑀧𑁆𑀨𑀮𑁄𑀢𑀺 𑀯𑀺𑀧𑀸𑀓𑀨𑀮𑁂𑀦 𑀦 𑀫𑀳𑀧𑁆𑀨𑀮𑁄 𑀳𑁄𑀢𑀺. 𑀦 𑀫𑀳𑀸𑀦𑀺𑀲𑀁𑀲𑁄𑀢𑀺 𑀕𑀼𑀡𑀸𑀦𑀺𑀲𑀁𑀲𑁂𑀦 𑀫𑀳𑀸𑀦𑀺𑀲𑀁𑀲𑁄 𑀦 𑀳𑁄𑀢𑀺. 𑀦 𑀫𑀳𑀸𑀚𑀼𑀢𑀺𑀓𑁄𑀢𑀺 𑀆𑀦𑀼𑀪𑀸𑀯𑀚𑀼𑀢𑀺𑀬𑀸 𑀫𑀳𑀸𑀚𑀼𑀢𑀺𑀓𑁄 𑀦 𑀳𑁄𑀢𑀺. 𑀦 𑀫𑀳𑀸𑀯𑀺𑀧𑁆𑀨𑀸𑀭𑁄𑀢𑀺 𑀯𑀺𑀧𑀸𑀓𑀯𑀺𑀧𑁆𑀨𑀸𑀭𑀢𑀸𑀬 𑀫𑀳𑀸𑀯𑀺𑀧𑁆𑀨𑀸𑀭𑁄 𑀦 𑀳𑁄𑀢𑀺. 𑀩𑀻𑀚𑀦𑀗𑁆𑀕𑀮𑀦𑁆𑀢𑀺 𑀩𑀻𑀚𑀜𑁆𑀘 𑀦𑀗𑁆𑀕𑀮𑀜𑁆𑀘. 𑀤𑀼𑀓𑁆𑀔𑁂𑀢𑁆𑀢𑁂𑀢𑀺 𑀤𑀼𑀝𑁆𑀞𑀼𑀔𑁂𑀢𑁆𑀢𑁂 𑀦𑀺𑀲𑁆𑀲𑀸𑀭𑀔𑁂𑀢𑁆𑀢𑁂. 𑀤𑀼𑀩𑁆𑀪𑀽𑀫𑁂𑀢𑀺 𑀯𑀺𑀲𑀫𑀪𑀽𑀫𑀺𑀪𑀸𑀕𑁂. 𑀧𑀢𑀺𑀝𑁆𑀞𑀸𑀧𑁂𑀬𑁆𑀬𑀸𑀢𑀺 𑀞𑀧𑁂𑀬𑁆𑀬. 𑀔𑀡𑁆𑀟𑀸𑀦𑀻𑀢𑀺 𑀙𑀺𑀦𑁆𑀦𑀪𑀺𑀦𑁆𑀦𑀸𑀦𑀺. 𑀧𑀽𑀢𑀻𑀦𑀻𑀢𑀺 𑀦𑀺𑀲𑁆𑀲𑀸𑀭𑀸𑀦𑀺. 𑀯𑀸𑀢𑀸𑀢𑀧𑀳𑀢𑀸𑀦𑀻𑀢𑀺 ¶ 𑀯𑀸𑀢𑁂𑀦 𑀘 𑀆𑀢𑀧𑁂𑀦 𑀘 𑀳𑀢𑀸𑀦𑀺 𑀧𑀭𑀺𑀬𑀸𑀤𑀺𑀦𑁆𑀦𑀢𑁂𑀚𑀸𑀦𑀺. 𑀅𑀲𑀸𑀭𑀸𑀤𑀸𑀦𑀻𑀢𑀺 𑀢𑀡𑁆𑀟𑀼𑀮𑀲𑀸𑀭𑀸𑀤𑀸𑀦𑀭𑀳𑀺𑀢𑀸𑀦𑀺 𑀧𑀮𑀸𑀮𑀸𑀦𑀺. 𑀅𑀲𑀼𑀔𑀲𑀬𑀺𑀢𑀸𑀦𑀻𑀢𑀺 𑀬𑀸𑀦𑀺 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀓𑁄𑀝𑁆𑀞𑁂 𑀆𑀓𑀺𑀭𑀺𑀢𑁆𑀯𑀸 𑀞𑀧𑀺𑀢𑀸𑀦𑀺, 𑀢𑀸𑀦𑀺 𑀲𑀼𑀔𑀲𑀬𑀺𑀢𑀸𑀦𑀺 𑀦𑀸𑀫. 𑀏𑀢𑀸𑀦𑀺 𑀧𑀦 𑀦 𑀢𑀸𑀤𑀺𑀲𑀸𑀦𑀺. 𑀅𑀦𑀼𑀧𑁆𑀧𑀯𑁂𑀘𑁆𑀙𑁂𑀬𑁆𑀬𑀸𑀢𑀺 𑀅𑀦𑀼𑀧𑀯𑁂𑀲𑁂𑀬𑁆𑀬, 𑀦 𑀲𑀫𑁆𑀫𑀸 𑀯𑀲𑁆𑀲𑁂𑀬𑁆𑀬, 𑀅𑀦𑁆𑀯𑀤𑁆𑀥𑀫𑀸𑀲𑀁 𑀅𑀦𑀼𑀤𑀲𑀸𑀳𑀁 𑀅𑀦𑀼𑀧𑀜𑁆𑀘𑀸𑀳𑀁 𑀦 𑀯𑀲𑁆𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀧𑀺 𑀦𑀼 𑀢𑀸𑀦𑀻𑀢𑀺 𑀅𑀧𑀺 𑀦𑀼 𑀏𑀯𑀁 𑀔𑁂𑀢𑁆𑀢𑀩𑀻𑀚𑀯𑀼𑀝𑁆𑀞𑀺𑀤𑁄𑀲𑁂 𑀲𑀢𑀺 𑀢𑀸𑀦𑀺 𑀩𑀻𑀚𑀸𑀦𑀺 𑀅𑀗𑁆𑀓𑀼𑀭𑀫𑀽𑀮𑀧𑀢𑁆𑀢𑀸𑀤𑀻𑀳𑀺 𑀉𑀤𑁆𑀥𑀁 𑀯𑀼𑀤𑁆𑀥𑀺𑀁 𑀳𑁂𑀝𑁆𑀞𑀸 𑀯𑀺𑀭𑀽𑀴𑁆𑀳𑀺𑀁 𑀲𑀫𑀦𑁆𑀢𑀢𑁄 𑀘 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑁂𑀬𑁆𑀬𑀼𑀦𑁆𑀢𑀺 ¶ . 𑀏𑀯𑀭𑀽𑀧𑁄 𑀔𑁄 𑀭𑀸𑀚𑀜𑁆𑀜 𑀬𑀜𑁆𑀜𑁄𑀢𑀺 𑀏𑀯𑀭𑀽𑀧𑀁 𑀭𑀸𑀚𑀜𑁆𑀜 𑀤𑀸𑀦𑀁 𑀧𑀭𑀽𑀧𑀖𑀸𑀢𑁂𑀦 𑀉𑀧𑁆𑀧𑀸𑀤𑀺𑀢𑀧𑀘𑁆𑀘𑀬𑀢𑁄𑀧𑀺 𑀤𑀸𑀬𑀓𑀢𑁄𑀧𑀺 𑀧𑀭𑀺𑀕𑁆𑀕𑀸𑀳𑀓𑀢𑁄𑀧𑀺 𑀅𑀯𑀺𑀲𑀼𑀤𑁆𑀥𑀢𑁆𑀢𑀸 𑀦 𑀫𑀳𑀧𑁆𑀨𑀮𑀁 𑀳𑁄𑀢𑀺.

𑀏𑀯𑀭𑀽𑀧𑁄 𑀔𑁄 𑀭𑀸𑀚𑀜𑁆𑀜 𑀬𑀜𑁆𑀜𑁄𑀢𑀺 𑀏𑀯𑀭𑀽𑀧𑀁 𑀭𑀸𑀚𑀜𑁆𑀜𑀤𑀸𑀦𑀁 𑀅𑀧𑀭𑀽𑀧𑀖𑀸𑀢𑁂𑀦 𑀉𑀧𑁆𑀧𑀦𑁆𑀦𑀧𑀘𑁆𑀘𑀬𑀢𑁄𑀧𑀺 𑀅𑀧𑀭𑀽𑀧𑀖𑀸𑀢𑀺𑀢𑀸𑀬 𑀲𑀻𑀮𑀯𑀦𑁆𑀢𑀤𑀸𑀬𑀓𑀢𑁄𑀧𑀺 ¶ 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑀧𑀝𑀺𑀕𑁆𑀕𑀸𑀳𑀓𑀢𑁄𑀧𑀺 𑀫𑀳𑀧𑁆𑀨𑀮𑀁 𑀳𑁄𑀢𑀺. 𑀲𑀘𑁂 𑀧𑀦 𑀕𑀼𑀡𑀸𑀢𑀺𑀭𑁂𑀓𑀁 𑀦𑀺𑀭𑁄𑀥𑀸 𑀯𑀼𑀝𑁆𑀞𑀺𑀢𑀁 𑀧𑀝𑀺𑀕𑁆𑀕𑀸𑀳𑀓𑀁 𑀮𑀪𑀢𑀺, 𑀘𑁂𑀢𑀦𑀸 𑀘 𑀯𑀺𑀧𑀼𑀮𑀸 𑀳𑁄𑀢𑀺, 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀯𑀺𑀧𑀸𑀓𑀁 𑀤𑁂𑀢𑀻𑀢𑀺.

𑁪𑁩𑁯. 𑀇𑀫𑀁 𑀧𑀦 𑀣𑁂𑀭𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑁄 𑀣𑁂𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀣𑁂𑀭𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀫𑀳𑀸𑀚𑀦𑀲𑁆𑀲 𑀤𑀸𑀦𑀁 𑀧𑀝𑁆𑀞𑀧𑁂𑀲𑀺. 𑀢𑀁 𑀲𑀦𑁆𑀥𑀸𑀬 𑀅𑀣 𑀔𑁄 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀡𑀸𑀚𑀓𑀦𑁆𑀢𑀺 𑀲𑀓𑀼𑀡𑁆𑀟𑀓𑀁 𑀉𑀢𑁆𑀢𑀡𑁆𑀟𑀼𑀮𑀪𑀢𑁆𑀢𑀁. 𑀩𑀺𑀮𑀗𑁆𑀕𑀤𑀼𑀢𑀺𑀬𑀦𑁆𑀢𑀺 𑀓𑀜𑁆𑀚𑀺𑀓𑀤𑀼𑀢𑀺𑀬𑀁. 𑀥𑁄𑀭𑀓𑀸𑀦𑀺 𑀘 𑀯𑀢𑁆𑀣𑀸𑀦𑀻𑀢𑀺 𑀣𑀽𑀮𑀸𑀦𑀺 𑀘 𑀯𑀢𑁆𑀣𑀸𑀦𑀺. 𑀕𑀼𑀴𑀯𑀸𑀮𑀓𑀸𑀦𑀻𑀢𑀺 𑀕𑀼𑀴𑀤𑀲𑀸𑀦𑀺, 𑀧𑀼𑀜𑁆𑀚𑀧𑀼𑀜𑁆𑀚𑀯𑀲𑁂𑀦 𑀞𑀺𑀢𑀫𑀳𑀦𑁆𑀢𑀤𑀲𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀅𑀦𑀼𑀤𑁆𑀤𑀺𑀲𑀢𑀻𑀢𑀺 𑀏𑀯𑀁 𑀉𑀧𑀤𑀺𑀲𑀢𑀺. 𑀧𑀸𑀤𑀸𑀧𑀻𑀢𑀺 𑀧𑀸𑀤𑁂𑀦𑀧𑀺.

𑁪𑁪𑁦. 𑀅𑀲𑀓𑁆𑀓𑀘𑁆𑀘𑀦𑁆𑀢𑀺 𑀲𑀤𑁆𑀥𑀸𑀯𑀺𑀭𑀳𑀺𑀢𑀁 𑀅𑀲𑁆𑀲𑀤𑁆𑀥𑀤𑀸𑀦𑀁. 𑀅𑀲𑀳𑀢𑁆𑀣𑀸𑀢𑀺 𑀦 𑀲𑀳𑀢𑁆𑀣𑁂𑀦. 𑀅𑀘𑀺𑀢𑁆𑀢𑀻𑀓𑀢𑀦𑁆𑀢𑀺 𑀘𑀺𑀢𑁆𑀢𑀻𑀓𑀸𑀭𑀯𑀺𑀭𑀳𑀺𑀢𑀁, 𑀦 𑀘𑀺𑀢𑁆𑀢𑀻𑀓𑀸𑀭𑀫𑁆𑀧𑀺 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀦 𑀧𑀡𑀻𑀢𑀘𑀺𑀢𑁆𑀢𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀅𑀧𑀯𑀺𑀤𑁆𑀥𑀦𑁆𑀢𑀺 𑀙𑀟𑁆𑀟𑀺𑀢𑀁 𑀯𑀺𑀧𑁆𑀧𑀢𑀺𑀢𑀁. 𑀲𑀼𑀜𑁆𑀜𑀁 𑀲𑁂𑀭𑀻𑀲𑀓𑀦𑁆𑀢𑀺 𑀲𑁂𑀭𑀻𑀲𑀓𑀁 𑀦𑀸𑀫 𑀏𑀓𑀁 𑀢𑀼𑀘𑁆𑀙𑀁 𑀭𑀚𑀢𑀯𑀺𑀫𑀸𑀦𑀁 𑀉𑀧𑀕𑀢𑁄. 𑀢𑀲𑁆𑀲 𑀓𑀺𑀭 𑀤𑁆𑀯𑀸𑀭𑁂 𑀫𑀳𑀸𑀲𑀺𑀭𑀻𑀲𑀭𑀼𑀓𑁆𑀔𑁄, 𑀢𑁂𑀦 𑀢𑀁 ‘‘𑀲𑁂𑀭𑀻𑀲𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁪𑁪𑁧. 𑀆𑀬𑀲𑁆𑀫𑀸 ¶ 𑀕𑀯𑀁𑀧𑀢𑀻𑀢𑀺 𑀣𑁂𑀭𑁄 𑀓𑀺𑀭 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀓𑀸𑀮𑁂 𑀕𑁄𑀧𑀸𑀮𑀤𑀸𑀭𑀓𑀸𑀦𑀁 𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸 𑀫𑀳𑀢𑁄 𑀲𑀺𑀭𑀻𑀲𑀲𑁆𑀲 𑀫𑀽𑀮𑀁 𑀲𑁄𑀥𑁂𑀢𑁆𑀯𑀸 𑀯𑀸𑀮𑀺𑀓𑀁 𑀑𑀓𑀺𑀭𑀺𑀢𑁆𑀯𑀸 𑀏𑀓𑀁 𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀣𑁂𑀭𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀆𑀳𑀸𑀭𑀁 𑀤𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀢𑀲𑁆𑀫𑀺𑀁 𑀭𑀚𑀢𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀲𑀺𑀭𑀻𑀲𑀭𑀼𑀓𑁆𑀔𑁄 𑀯𑀺𑀫𑀸𑀦𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀲𑁄 𑀧𑀜𑁆𑀜𑀸𑀲𑀸𑀬 𑀯𑀲𑁆𑀲𑁂𑀳𑀺 𑀨𑀮𑀢𑀺, 𑀢𑀢𑁄 𑀧𑀜𑁆𑀜𑀸𑀲 𑀯𑀲𑁆𑀲𑀸𑀦𑀺 𑀕𑀢𑀸𑀦𑀻𑀢𑀺 𑀤𑁂𑀯𑀧𑀼𑀢𑁆𑀢𑁄 𑀲𑀁𑀯𑁂𑀕𑀁 𑀆𑀧𑀚𑁆𑀚𑀢𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀫𑀦𑀼𑀲𑁆𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀧𑀼𑀩𑁆𑀩𑀸𑀘𑀺𑀡𑁆𑀡𑀯𑀲𑁂𑀦 𑀧𑀦 𑀤𑀺𑀯𑀸𑀯𑀺𑀳𑀸𑀭𑀢𑁆𑀣𑀸𑀬 𑀢𑀤𑁂𑀯 𑀯𑀺𑀫𑀸𑀦𑀁 𑀅𑀪𑀺𑀡𑁆𑀳𑀁 𑀕𑀘𑁆𑀙𑀢𑀺, 𑀢𑀁 𑀓𑀺𑀭𑀲𑁆𑀲 𑀉𑀢𑀼𑀲𑀼𑀔𑀁 𑀳𑁄𑀢𑀺. 𑀢𑀁 𑀲𑀦𑁆𑀥𑀸𑀬 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀕𑀯𑀁𑀧𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑁄 ¶ ¶ 𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀤𑀢𑁆𑀯𑀸𑀢𑀺 𑀲𑁄 𑀧𑀭𑀲𑁆𑀲 𑀲𑀦𑁆𑀢𑀓𑀫𑁆𑀧𑀺 𑀤𑀸𑀦𑀁 𑀲𑀓𑁆𑀓𑀘𑁆𑀘𑀁 𑀤𑀢𑁆𑀯𑀸. 𑀏𑀯𑀫𑀸𑀭𑁄𑀘𑁂𑀲𑀻𑀢𑀺 ‘‘𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀤𑁂𑀣𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀭𑁄𑀘𑁂𑀲𑀺. 𑀢𑀜𑁆𑀘 𑀧𑀦 𑀣𑁂𑀭𑀲𑁆𑀲 𑀆𑀭𑁄𑀘𑀦𑀁 𑀲𑀼𑀢𑁆𑀯𑀸 𑀫𑀳𑀸𑀚𑀦𑁄 𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀤𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄. 𑀧𑀸𑀬𑀸𑀲𑀺𑀲𑁆𑀲 𑀧𑀦 𑀭𑀸𑀚𑀜𑁆𑀜𑀲𑁆𑀲 𑀧𑀭𑀺𑀘𑀸𑀭𑀓𑀸 𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀤𑀢𑁆𑀯𑀸𑀧𑀺 𑀦𑀺𑀓𑀦𑁆𑀢𑀺𑀯𑀲𑁂𑀦 𑀕𑀦𑁆𑀢𑁆𑀯𑀸 𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀢𑁆𑀢𑀸. 𑀢𑀁 𑀓𑀺𑀭 𑀤𑀺𑀲𑀸𑀘𑀸𑀭𑀺𑀓𑀯𑀺𑀫𑀸𑀦𑀁 𑀯𑀝𑁆𑀝𑀦𑀺𑀅𑀝𑀯𑀺𑀬𑀁 𑀅𑀳𑁄𑀲𑀺. 𑀧𑀸𑀬𑀸𑀲𑀺𑀤𑁂𑀯𑀧𑀼𑀢𑁆𑀢𑁄 𑀘 𑀏𑀓𑀤𑀺𑀯𑀲𑀁 𑀯𑀸𑀡𑀺𑀚𑀓𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀓𑀢𑀓𑀫𑁆𑀫𑀁 𑀓𑀣𑁂𑀲𑀻𑀢𑀺.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁

𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀫𑀳𑀸𑀯𑀕𑁆𑀕𑀲𑁆𑀲𑀢𑁆𑀣𑀯𑀡𑁆𑀡𑀦𑀸.

𑀫𑀳𑀸𑀯𑀕𑁆𑀕𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.