📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀤𑀻𑀖𑀦𑀺𑀓𑀸𑀬𑁄

𑀫𑀳𑀸𑀯𑀕𑁆𑀕𑀧𑀸𑀴𑀺

𑁧. 𑀫𑀳𑀸𑀧𑀤𑀸𑀦𑀲𑀼𑀢𑁆𑀢𑀁

𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀸

𑁧. 𑀏𑀯𑀁 ¶ ¶ ¶ ¶ 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂 𑀓𑀭𑁂𑀭𑀺𑀓𑀼𑀝𑀺𑀓𑀸𑀬𑀁. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸𑀦𑀁 𑀓𑀭𑁂𑀭𑀺𑀫𑀡𑁆𑀟𑀮𑀫𑀸𑀴𑁂 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀸 𑀥𑀫𑁆𑀫𑀻 𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀇𑀢𑀺𑀧𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑁄, 𑀇𑀢𑀺𑀧𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑁄’’𑀢𑀺.

𑁨. 𑀅𑀲𑁆𑀲𑁄𑀲𑀺 𑀔𑁄 𑀪𑀕𑀯𑀸 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀯𑀺𑀲𑀼𑀤𑁆𑀥𑀸𑀬 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀺𑀓𑀸𑀬 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 ¶ 𑀇𑀫𑀁 𑀓𑀣𑀸𑀲𑀮𑁆𑀮𑀸𑀧𑀁. 𑀅𑀣 𑀔𑁄 𑀪𑀕𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀓𑀭𑁂𑀭𑀺𑀫𑀡𑁆𑀟𑀮𑀫𑀸𑀴𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺, 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀸𑀬𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸; 𑀓𑀸 𑀘 𑀧𑀦 𑀯𑁄 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸’’𑀢𑀺?

𑀏𑀯𑀁 𑀯𑀼𑀢𑁆𑀢𑁂 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀥, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀧𑀘𑁆𑀙𑀸𑀪𑀢𑁆𑀢𑀁 ¶ 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸𑀦𑀁 𑀓𑀭𑁂𑀭𑀺𑀫𑀡𑁆𑀟𑀮𑀫𑀸𑀴𑁂 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 ¶ 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀸 𑀥𑀫𑁆𑀫𑀻 𑀓𑀣𑀸 𑀉𑀤𑀧𑀸𑀤𑀺 𑁋 ‘𑀇𑀢𑀺𑀧𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑁄 𑀇𑀢𑀺𑀧𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑁄’𑀢𑀺. 𑀅𑀬𑀁 𑀔𑁄 𑀦𑁄, 𑀪𑀦𑁆𑀢𑁂, 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸. 𑀅𑀣 𑀪𑀕𑀯𑀸 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺.

𑁩. ‘‘𑀇𑀘𑁆𑀙𑁂𑀬𑁆𑀬𑀸𑀣 ¶ 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀺𑀁 𑀓𑀣𑀁 𑀲𑁄𑀢𑀼’’𑀦𑁆𑀢𑀺? ‘‘𑀏𑀢𑀲𑁆𑀲, 𑀪𑀕𑀯𑀸, 𑀓𑀸𑀮𑁄; 𑀏𑀢𑀲𑁆𑀲, 𑀲𑀼𑀕𑀢, 𑀓𑀸𑀮𑁄; 𑀬𑀁 𑀪𑀕𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁂𑀬𑁆𑀬, 𑀪𑀕𑀯𑀢𑁄 𑀲𑀼𑀢𑁆𑀯𑀸 [𑀪𑀕𑀯𑀢𑁄 𑀯𑀘𑀦𑀁 𑀲𑀼𑀢𑁆𑀯𑀸 (𑀲𑁆𑀬𑀸.)] 𑀪𑀺𑀓𑁆𑀔𑀽 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀼𑀡𑀸𑀣,𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

𑁪. ‘‘𑀇𑀢𑁄 𑀲𑁄, 𑀪𑀺𑀓𑁆𑀔𑀯𑁂, 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀬𑀁 [𑀏𑀓𑀦𑀯𑀼𑀢𑁄 𑀓𑀧𑁆𑀧𑁄 (𑀲𑁆𑀬𑀸. 𑀓𑀁. 𑀧𑀻.)] 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀤𑀧𑀸𑀤𑀺. 𑀇𑀢𑁄 𑀲𑁄, 𑀪𑀺𑀓𑁆𑀔𑀯𑁂, 𑀏𑀓𑀢𑀺𑀁𑀲𑁂 𑀓𑀧𑁆𑀧𑁂 [𑀏𑀓𑀢𑀺𑀁 𑀲𑀓𑀧𑁆𑀧𑁄 (𑀲𑀻.) 𑀏𑀓𑀢𑀺𑀁 𑀲𑁄 𑀓𑀧𑁆𑀧𑁄 (𑀲𑁆𑀬𑀸. 𑀓𑀁. 𑀧𑀻.)] 𑀬𑀁 𑀲𑀺𑀔𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀤𑀧𑀸𑀤𑀺. 𑀢𑀲𑁆𑀫𑀺𑀜𑁆𑀜𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀏𑀓𑀢𑀺𑀁𑀲𑁂 𑀓𑀧𑁆𑀧𑁂 𑀯𑁂𑀲𑁆𑀲𑀪𑀽 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀤𑀧𑀸𑀤𑀺. 𑀇𑀫𑀲𑁆𑀫𑀺𑀜𑁆𑀜𑁂𑀯 [𑀇𑀫𑀲𑁆𑀫𑀺𑀁 (𑀓𑀢𑁆𑀣𑀘𑀻)] 𑀔𑁄, 𑀪𑀺𑀓𑁆𑀔𑀯𑁂, 𑀪𑀤𑁆𑀤𑀓𑀧𑁆𑀧𑁂 𑀓𑀓𑀼𑀲𑀦𑁆𑀥𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀤𑀧𑀸𑀤𑀺. 𑀇𑀫𑀲𑁆𑀫𑀺𑀜𑁆𑀜𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀤𑁆𑀤𑀓𑀧𑁆𑀧𑁂 𑀓𑁄𑀡𑀸𑀕𑀫𑀦𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀤𑀧𑀸𑀤𑀺. 𑀇𑀫𑀲𑁆𑀫𑀺𑀜𑁆𑀜𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀤𑁆𑀤𑀓𑀧𑁆𑀧𑁂 𑀓𑀲𑁆𑀲𑀧𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀤𑀧𑀸𑀤𑀺. 𑀇𑀫𑀲𑁆𑀫𑀺𑀜𑁆𑀜𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀤𑁆𑀤𑀓𑀧𑁆𑀧𑁂 𑀅𑀳𑀁 𑀏𑀢𑀭𑀳𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄.

𑁫. ‘‘𑀯𑀺𑀧𑀲𑁆𑀲𑀻, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀔𑀢𑁆𑀢𑀺𑀬𑁄 𑀚𑀸𑀢𑀺𑀬𑀸 ¶ 𑀅𑀳𑁄𑀲𑀺, 𑀔𑀢𑁆𑀢𑀺𑀬𑀓𑀼𑀮𑁂 𑀉𑀤𑀧𑀸𑀤𑀺. 𑀲𑀺𑀔𑀻, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀔𑀢𑁆𑀢𑀺𑀬𑁄 𑀚𑀸𑀢𑀺𑀬𑀸 𑀅𑀳𑁄𑀲𑀺, 𑀔𑀢𑁆𑀢𑀺𑀬𑀓𑀼𑀮𑁂 𑀉𑀤𑀧𑀸𑀤𑀺. 𑀯𑁂𑀲𑁆𑀲𑀪𑀽, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 ¶ 𑀔𑀢𑁆𑀢𑀺𑀬𑁄 𑀚𑀸𑀢𑀺𑀬𑀸 𑀅𑀳𑁄𑀲𑀺, 𑀔𑀢𑁆𑀢𑀺𑀬𑀓𑀼𑀮𑁂 𑀉𑀤𑀧𑀸𑀤𑀺. 𑀓𑀓𑀼𑀲𑀦𑁆𑀥𑁄, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀩𑁆𑀭𑀸𑀳𑁆𑀫𑀡𑁄 𑀚𑀸𑀢𑀺𑀬𑀸 𑀅𑀳𑁄𑀲𑀺, 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀉𑀤𑀧𑀸𑀤𑀺. 𑀓𑁄𑀡𑀸𑀕𑀫𑀦𑁄, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 ¶ 𑀩𑁆𑀭𑀸𑀳𑁆𑀫𑀡𑁄 𑀚𑀸𑀢𑀺𑀬𑀸 𑀅𑀳𑁄𑀲𑀺, 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀉𑀤𑀧𑀸𑀤𑀺. 𑀓𑀲𑁆𑀲𑀧𑁄, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀩𑁆𑀭𑀸𑀳𑁆𑀫𑀡𑁄 𑀚𑀸𑀢𑀺𑀬𑀸 𑀅𑀳𑁄𑀲𑀺, 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀉𑀤𑀧𑀸𑀤𑀺. 𑀅𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀔𑀢𑁆𑀢𑀺𑀬𑁄 𑀚𑀸𑀢𑀺𑀬𑀸 𑀅𑀳𑁄𑀲𑀺𑀁, 𑀔𑀢𑁆𑀢𑀺𑀬𑀓𑀼𑀮𑁂 𑀉𑀧𑁆𑀧𑀦𑁆𑀦𑁄.

𑁬. ‘‘𑀯𑀺𑀧𑀲𑁆𑀲𑀻 ¶ , 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑁄𑀡𑁆𑀟𑀜𑁆𑀜𑁄 𑀕𑁄𑀢𑁆𑀢𑁂𑀦 𑀅𑀳𑁄𑀲𑀺. 𑀲𑀺𑀔𑀻, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑁄𑀡𑁆𑀟𑀜𑁆𑀜𑁄 𑀕𑁄𑀢𑁆𑀢𑁂𑀦 𑀅𑀳𑁄𑀲𑀺. 𑀯𑁂𑀲𑁆𑀲𑀪𑀽, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑁄𑀡𑁆𑀟𑀜𑁆𑀜𑁄 𑀕𑁄𑀢𑁆𑀢𑁂𑀦 𑀅𑀳𑁄𑀲𑀺. 𑀓𑀓𑀼𑀲𑀦𑁆𑀥𑁄, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑀲𑁆𑀲𑀧𑁄 𑀕𑁄𑀢𑁆𑀢𑁂𑀦 𑀅𑀳𑁄𑀲𑀺. 𑀓𑁄𑀡𑀸𑀕𑀫𑀦𑁄, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑀲𑁆𑀲𑀧𑁄 𑀕𑁄𑀢𑁆𑀢𑁂𑀦 𑀅𑀳𑁄𑀲𑀺. 𑀓𑀲𑁆𑀲𑀧𑁄, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑀲𑁆𑀲𑀧𑁄 𑀕𑁄𑀢𑁆𑀢𑁂𑀦 𑀅𑀳𑁄𑀲𑀺. 𑀅𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀕𑁄𑀢𑀫𑁄 𑀕𑁄𑀢𑁆𑀢𑁂𑀦 𑀅𑀳𑁄𑀲𑀺𑀁.

𑁭. ‘‘𑀯𑀺𑀧𑀲𑁆𑀲𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 ¶ 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀲𑀺𑀔𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀢𑁆𑀢𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀯𑁂𑀲𑁆𑀲𑀪𑀼𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀓𑀓𑀼𑀲𑀦𑁆𑀥𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀓𑁄𑀡𑀸𑀕𑀫𑀦𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀺𑀁𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 ¶ 𑀅𑀳𑁄𑀲𑀺. 𑀓𑀲𑁆𑀲𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀅𑀧𑁆𑀧𑀓𑀁 𑀆𑀬𑀼𑀧𑁆𑀧𑀫𑀸𑀡𑀁 𑀧𑀭𑀺𑀢𑁆𑀢𑀁 𑀮𑀳𑀼𑀓𑀁; 𑀬𑁄 𑀘𑀺𑀭𑀁 𑀚𑀻𑀯𑀢𑀺, 𑀲𑁄 𑀯𑀲𑁆𑀲𑀲𑀢𑀁 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄.

𑁮. ‘‘𑀯𑀺𑀧𑀲𑁆𑀲𑀻, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀸𑀝𑀮𑀺𑀬𑀸 𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀲𑀺𑀔𑀻, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀼𑀡𑁆𑀟𑀭𑀻𑀓𑀲𑁆𑀲 𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀯𑁂𑀲𑁆𑀲𑀪𑀽, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀸𑀮𑀲𑁆𑀲 𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀓𑀓𑀼𑀲𑀦𑁆𑀥𑁄, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀺𑀭𑀻𑀲𑀲𑁆𑀲 𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀓𑁄𑀡𑀸𑀕𑀫𑀦𑁄, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀉𑀤𑀼𑀫𑁆𑀩𑀭𑀲𑁆𑀲 𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀓𑀲𑁆𑀲𑀧𑁄, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀦𑀺𑀕𑁆𑀭𑁄𑀥𑀲𑁆𑀲 𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀅𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀲𑁆𑀲𑀢𑁆𑀣𑀲𑁆𑀲 𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄.

𑁯. ‘‘𑀯𑀺𑀧𑀲𑁆𑀲𑀺𑀲𑁆𑀲 ¶ ¶ , 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀔𑀡𑁆𑀟𑀢𑀺𑀲𑁆𑀲𑀁 ¶ 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁. 𑀲𑀺𑀔𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀪𑀺𑀪𑀽𑀲𑀫𑁆𑀪𑀯𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁. 𑀯𑁂𑀲𑁆𑀲𑀪𑀼𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑁄𑀡𑀼𑀢𑁆𑀢𑀭𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁. 𑀓𑀓𑀼𑀲𑀦𑁆𑀥𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀺𑀥𑀼𑀭𑀲𑀜𑁆𑀚𑀻𑀯𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁. 𑀓𑁄𑀡𑀸𑀕𑀫𑀦𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀪𑀺𑀬𑁆𑀬𑁄𑀲𑀼𑀢𑁆𑀢𑀭𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 ¶ 𑀪𑀤𑁆𑀤𑀬𑀼𑀕𑀁. 𑀓𑀲𑁆𑀲𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀺𑀲𑁆𑀲𑀪𑀸𑀭𑀤𑁆𑀯𑀸𑀚𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁. 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁.

𑁧𑁦. ‘‘𑀯𑀺𑀧𑀲𑁆𑀲𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀬𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁. 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁, 𑀏𑀓𑁄 ¶ 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁, 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀅𑀲𑀻𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺. 𑀯𑀺𑀧𑀲𑁆𑀲𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀇𑀫𑁂 𑀢𑀬𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁 𑀲𑀩𑁆𑀩𑁂𑀲𑀁𑀬𑁂𑀯 𑀔𑀻𑀡𑀸𑀲𑀯𑀸𑀦𑀁.

‘‘𑀲𑀺𑀔𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀬𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁. 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁, 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀅𑀲𑀻𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺, 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀲𑀢𑁆𑀢𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺. 𑀲𑀺𑀔𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀇𑀫𑁂 𑀢𑀬𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁 𑀲𑀩𑁆𑀩𑁂𑀲𑀁𑀬𑁂𑀯 𑀔𑀻𑀡𑀸𑀲𑀯𑀸𑀦𑀁.

‘‘𑀯𑁂𑀲𑁆𑀲𑀪𑀼𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀬𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁. 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀅𑀲𑀻𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺, 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀲𑀢𑁆𑀢𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺, 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 ¶ 𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺. 𑀯𑁂𑀲𑁆𑀲𑀪𑀼𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀇𑀫𑁂 𑀢𑀬𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁 𑀲𑀩𑁆𑀩𑁂𑀲𑀁𑀬𑁂𑀯 𑀔𑀻𑀡𑀸𑀲𑀯𑀸𑀦𑀁.

‘‘𑀓𑀓𑀼𑀲𑀦𑁆𑀥𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 ¶ 𑀘𑀢𑁆𑀢𑀸𑀮𑀻𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺. 𑀓𑀓𑀼𑀲𑀦𑁆𑀥𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀬𑀁 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀲𑀩𑁆𑀩𑁂𑀲𑀁𑀬𑁂𑀯 𑀔𑀻𑀡𑀸𑀲𑀯𑀸𑀦𑀁.

‘‘𑀓𑁄𑀡𑀸𑀕𑀫𑀦𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 ¶ 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀢𑀺𑀁𑀲𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺. 𑀓𑁄𑀡𑀸𑀕𑀫𑀦𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀬𑀁 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀲𑀩𑁆𑀩𑁂𑀲𑀁𑀬𑁂𑀯 𑀔𑀻𑀡𑀸𑀲𑀯𑀸𑀦𑀁.

‘‘𑀓𑀲𑁆𑀲𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀯𑀻𑀲𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺. 𑀓𑀲𑁆𑀲𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀬𑀁 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀲𑀩𑁆𑀩𑁂𑀲𑀁𑀬𑁂𑀯 𑀔𑀻𑀡𑀸𑀲𑀯𑀸𑀦𑀁.

‘‘𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀏𑀓𑁄 ¶ 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀅𑀟𑁆𑀠𑀢𑁂𑀴𑀲𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀺. 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀅𑀬𑀁 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀲𑀩𑁆𑀩𑁂𑀲𑀁𑀬𑁂𑀯 𑀔𑀻𑀡𑀸𑀲𑀯𑀸𑀦𑀁.

𑁧𑁧. ‘‘𑀯𑀺𑀧𑀲𑁆𑀲𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀲𑁄𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺 𑀅𑀕𑁆𑀕𑀼𑀧𑀝𑁆𑀞𑀸𑀓𑁄. 𑀲𑀺𑀔𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀔𑁂𑀫𑀗𑁆𑀓𑀭𑁄 𑀦𑀸𑀫 𑀪𑀺𑀓𑁆𑀔𑀼 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺 𑀅𑀕𑁆𑀕𑀼𑀧𑀝𑁆𑀞𑀸𑀓𑁄. 𑀯𑁂𑀲𑁆𑀲𑀪𑀼𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀉𑀧𑀲𑀦𑁆𑀢𑁄 𑀦𑀸𑀫 𑀪𑀺𑀓𑁆𑀔𑀼 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺 𑀅𑀕𑁆𑀕𑀼𑀧𑀝𑁆𑀞𑀸𑀓𑁄. 𑀓𑀓𑀼𑀲𑀦𑁆𑀥𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑀼𑀤𑁆𑀥𑀺𑀚𑁄 𑀦𑀸𑀫 𑀪𑀺𑀓𑁆𑀔𑀼 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺 𑀅𑀕𑁆𑀕𑀼𑀧𑀝𑁆𑀞𑀸𑀓𑁄. 𑀓𑁄𑀡𑀸𑀕𑀫𑀦𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑁄𑀢𑁆𑀣𑀺𑀚𑁄 𑀦𑀸𑀫 𑀪𑀺𑀓𑁆𑀔𑀼 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺 𑀅𑀕𑁆𑀕𑀼𑀧𑀝𑁆𑀞𑀸𑀓𑁄. 𑀓𑀲𑁆𑀲𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀩𑁆𑀩𑀫𑀺𑀢𑁆𑀢𑁄 𑀦𑀸𑀫 ¶ 𑀪𑀺𑀓𑁆𑀔𑀼 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺 𑀅𑀕𑁆𑀕𑀼𑀧𑀝𑁆𑀞𑀸𑀓𑁄. 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀆𑀦𑀦𑁆𑀤𑁄 𑀦𑀸𑀫 𑀪𑀺𑀓𑁆𑀔𑀼 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺 𑀅𑀕𑁆𑀕𑀼𑀧𑀝𑁆𑀞𑀸𑀓𑁄.

𑁧𑁨. ‘‘𑀯𑀺𑀧𑀲𑁆𑀲𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑀦𑁆𑀥𑀼𑀫𑀸 𑀦𑀸𑀫 𑀭𑀸𑀚𑀸 𑀧𑀺𑀢𑀸 𑀅𑀳𑁄𑀲𑀺. ¶ 𑀩𑀦𑁆𑀥𑀼𑀫𑀢𑀻 𑀦𑀸𑀫 𑀤𑁂𑀯𑀻 𑀫𑀸𑀢𑀸 𑀅𑀳𑁄𑀲𑀺 𑀚𑀦𑁂𑀢𑁆𑀢𑀺 [𑀚𑀦𑁂𑀢𑁆𑀢𑀻 (𑀲𑁆𑀬𑀸.)]. 𑀩𑀦𑁆𑀥𑀼𑀫𑀲𑁆𑀲 𑀭𑀜𑁆𑀜𑁄 𑀩𑀦𑁆𑀥𑀼𑀫𑀢𑀻 𑀦𑀸𑀫 𑀦𑀕𑀭𑀁 𑀭𑀸𑀚𑀥𑀸𑀦𑀻 𑀅𑀳𑁄𑀲𑀺.

‘‘𑀲𑀺𑀔𑀺𑀲𑁆𑀲 ¶ , 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀭𑀼𑀡𑁄 ¶ 𑀦𑀸𑀫 𑀭𑀸𑀚𑀸 𑀧𑀺𑀢𑀸 𑀅𑀳𑁄𑀲𑀺. 𑀧𑀪𑀸𑀯𑀢𑀻 𑀦𑀸𑀫 𑀤𑁂𑀯𑀻 𑀫𑀸𑀢𑀸 𑀅𑀳𑁄𑀲𑀺 𑀚𑀦𑁂𑀢𑁆𑀢𑀺. 𑀅𑀭𑀼𑀡𑀲𑁆𑀲 𑀭𑀜𑁆𑀜𑁄 𑀅𑀭𑀼𑀡𑀯𑀢𑀻 𑀦𑀸𑀫 𑀦𑀕𑀭𑀁 𑀭𑀸𑀚𑀥𑀸𑀦𑀻 𑀅𑀳𑁄𑀲𑀺.

‘‘𑀯𑁂𑀲𑁆𑀲𑀪𑀼𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀼𑀧𑁆𑀧𑀢𑀺𑀢𑁄 𑀦𑀸𑀫 [𑀲𑀼𑀧𑁆𑀧𑀢𑀻𑀢𑁄 𑀦𑀸𑀫 (𑀲𑁆𑀬𑀸.)] 𑀭𑀸𑀚𑀸 𑀧𑀺𑀢𑀸 𑀅𑀳𑁄𑀲𑀺. 𑀯𑀲𑁆𑀲𑀯𑀢𑀻 𑀦𑀸𑀫 [𑀬𑀲𑀯𑀢𑀻 𑀦𑀸𑀫 (𑀲𑁆𑀬𑀸. 𑀧𑀻.)] 𑀤𑁂𑀯𑀻 𑀫𑀸𑀢𑀸 𑀅𑀳𑁄𑀲𑀺 𑀚𑀦𑁂𑀢𑁆𑀢𑀺. 𑀲𑀼𑀧𑁆𑀧𑀢𑀺𑀢𑀲𑁆𑀲 𑀭𑀜𑁆𑀜𑁄 𑀅𑀦𑁄𑀫𑀁 𑀦𑀸𑀫 𑀦𑀕𑀭𑀁 𑀭𑀸𑀚𑀥𑀸𑀦𑀻 𑀅𑀳𑁄𑀲𑀺.

‘‘𑀓𑀓𑀼𑀲𑀦𑁆𑀥𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀕𑁆𑀕𑀺𑀤𑀢𑁆𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀺𑀢𑀸 𑀅𑀳𑁄𑀲𑀺. 𑀯𑀺𑀲𑀸𑀔𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻 𑀫𑀸𑀢𑀸 𑀅𑀳𑁄𑀲𑀺 𑀚𑀦𑁂𑀢𑁆𑀢𑀺. 𑀢𑁂𑀦 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀬𑁂𑀦 𑀔𑁂𑀫𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀔𑁂𑀫𑀲𑁆𑀲 𑀭𑀜𑁆𑀜𑁄 𑀔𑁂𑀫𑀯𑀢𑀻 𑀦𑀸𑀫 𑀦𑀕𑀭𑀁 𑀭𑀸𑀚𑀥𑀸𑀦𑀻 𑀅𑀳𑁄𑀲𑀺.

‘‘𑀓𑁄𑀡𑀸𑀕𑀫𑀦𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀬𑀜𑁆𑀜𑀤𑀢𑁆𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀺𑀢𑀸 𑀅𑀳𑁄𑀲𑀺. 𑀉𑀢𑁆𑀢𑀭𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻 𑀫𑀸𑀢𑀸 𑀅𑀳𑁄𑀲𑀺 𑀚𑀦𑁂𑀢𑁆𑀢𑀺. 𑀢𑁂𑀦 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀬𑁂𑀦 𑀲𑁄𑀪𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀲𑁄𑀪𑀲𑁆𑀲 𑀭𑀜𑁆𑀜𑁄 𑀲𑁄𑀪𑀯𑀢𑀻 𑀦𑀸𑀫 𑀦𑀕𑀭𑀁 𑀭𑀸𑀚𑀥𑀸𑀦𑀻 𑀅𑀳𑁄𑀲𑀺.

‘‘𑀓𑀲𑁆𑀲𑀧𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁆𑀭𑀳𑁆𑀫𑀤𑀢𑁆𑀢𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀺𑀢𑀸 𑀅𑀳𑁄𑀲𑀺. 𑀥𑀦𑀯𑀢𑀻 𑀦𑀸𑀫 𑀩𑁆𑀭𑀸𑀳𑁆𑀫𑀡𑀻 𑀫𑀸𑀢𑀸 𑀅𑀳𑁄𑀲𑀺 𑀚𑀦𑁂𑀢𑁆𑀢𑀺. 𑀢𑁂𑀦 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀬𑁂𑀦 𑀓𑀺𑀓𑀻 ¶ 𑀦𑀸𑀫 [𑀓𑀺𑀁 𑀓𑀻 𑀦𑀸𑀫 (𑀲𑁆𑀬𑀸.)] 𑀭𑀸𑀚𑀸 𑀅𑀳𑁄𑀲𑀺. 𑀓𑀺𑀓𑀺𑀲𑁆𑀲 𑀭𑀜𑁆𑀜𑁄 𑀩𑀸𑀭𑀸𑀡𑀲𑀻 𑀦𑀸𑀫 𑀦𑀕𑀭𑀁 𑀭𑀸𑀚𑀥𑀸𑀦𑀻 𑀅𑀳𑁄𑀲𑀺.

‘‘𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀲𑀼𑀤𑁆𑀥𑁄𑀤𑀦𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸 𑀅𑀳𑁄𑀲𑀺. 𑀫𑀸𑀬𑀸 𑀦𑀸𑀫 𑀤𑁂𑀯𑀻 𑀫𑀸𑀢𑀸 𑀅𑀳𑁄𑀲𑀺 𑀚𑀦𑁂𑀢𑁆𑀢𑀺. 𑀓𑀧𑀺𑀮𑀯𑀢𑁆𑀣𑀼 𑀦𑀸𑀫 𑀦𑀕𑀭𑀁 𑀭𑀸𑀚𑀥𑀸𑀦𑀻 𑀅𑀳𑁄𑀲𑀻’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸, 𑀇𑀤𑀁 𑀯𑀢𑁆𑀯𑀸𑀦 ¶ 𑀲𑀼𑀕𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺.

𑁧𑁩. 𑀅𑀣 ¶ 𑀔𑁄 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀅𑀬𑀫𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀅𑀘𑁆𑀙𑀭𑀺𑀬𑀁, 𑀆𑀯𑀼𑀲𑁄, 𑀅𑀩𑁆𑀪𑀼𑀢𑀁, 𑀆𑀯𑀼𑀲𑁄, 𑀢𑀣𑀸𑀕𑀢𑀲𑁆𑀲 𑀫𑀳𑀺𑀤𑁆𑀥𑀺𑀓𑀢𑀸 𑀫𑀳𑀸𑀦𑀼𑀪𑀸𑀯𑀢𑀸. 𑀬𑀢𑁆𑀭 𑀳𑀺 𑀦𑀸𑀫 𑀢𑀣𑀸𑀕𑀢𑁄 𑀅𑀢𑀻𑀢𑁂 𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀙𑀺𑀦𑁆𑀦𑀧𑀧𑀜𑁆𑀘𑁂 𑀙𑀺𑀦𑁆𑀦𑀯𑀝𑀼𑀫𑁂 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑁂 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑁂 ¶ 𑀚𑀸𑀢𑀺𑀢𑁄𑀧𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺, 𑀦𑀸𑀫𑀢𑁄𑀧𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺, 𑀕𑁄𑀢𑁆𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺, 𑀆𑀬𑀼𑀧𑁆𑀧𑀫𑀸𑀡𑀢𑁄𑀧𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺, 𑀲𑀸𑀯𑀓𑀬𑀼𑀕𑀢𑁄𑀧𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺, 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺 𑁋 ‘𑀏𑀯𑀁𑀚𑀘𑁆𑀘𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀺, 𑀏𑀯𑀁𑀦𑀸𑀫𑀸 𑀏𑀯𑀁𑀕𑁄𑀢𑁆𑀢𑀸 𑀏𑀯𑀁𑀲𑀻𑀮𑀸 𑀏𑀯𑀁𑀥𑀫𑁆𑀫𑀸 𑀏𑀯𑀁𑀧𑀜𑁆𑀜𑀸 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀻’’’𑀢𑀺.

‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀢𑀣𑀸𑀕𑀢𑀲𑁆𑀲𑁂𑀯 𑀦𑀼 𑀔𑁄 𑀏𑀲𑀸 𑀥𑀫𑁆𑀫𑀥𑀸𑀢𑀼 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸, 𑀬𑀲𑁆𑀲𑀸 𑀥𑀫𑁆𑀫𑀥𑀸𑀢𑀼𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀢𑀣𑀸𑀕𑀢𑁄 𑀅𑀢𑀻𑀢𑁂 𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀙𑀺𑀦𑁆𑀦𑀧𑀧𑀜𑁆𑀘𑁂 𑀙𑀺𑀦𑁆𑀦𑀯𑀝𑀼𑀫𑁂 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑁂 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑁂 𑀚𑀸𑀢𑀺𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀦𑀸𑀫𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀕𑁄𑀢𑁆𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀆𑀬𑀼𑀧𑁆𑀧𑀫𑀸𑀡𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀬𑀼𑀕𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺 𑁋 ‘𑀏𑀯𑀁𑀚𑀘𑁆𑀘𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀺, 𑀏𑀯𑀁𑀦𑀸𑀫𑀸 𑀏𑀯𑀁𑀕𑁄𑀢𑁆𑀢𑀸 𑀏𑀯𑀁𑀲𑀻𑀮𑀸 𑀏𑀯𑀁𑀥𑀫𑁆𑀫𑀸 𑀏𑀯𑀁𑀧𑀜𑁆𑀜𑀸 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑀸 𑀢𑁂 ¶ 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀻’𑀢𑀺, 𑀉𑀤𑀸𑀳𑀼 𑀤𑁂𑀯𑀢𑀸 𑀢𑀣𑀸𑀕𑀢𑀲𑁆𑀲 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁, 𑀬𑁂𑀦 𑀢𑀣𑀸𑀕𑀢𑁄 𑀅𑀢𑀻𑀢𑁂 𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀙𑀺𑀦𑁆𑀦𑀧𑀧𑀜𑁆𑀘𑁂 𑀙𑀺𑀦𑁆𑀦𑀯𑀝𑀼𑀫𑁂 ¶ 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑁂 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑁂 𑀚𑀸𑀢𑀺𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀦𑀸𑀫𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀕𑁄𑀢𑁆𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀆𑀬𑀼𑀧𑁆𑀧𑀫𑀸𑀡𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀬𑀼𑀕𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺 𑁋 ‘𑀏𑀯𑀁𑀚𑀘𑁆𑀘𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀺, 𑀏𑀯𑀁𑀦𑀸𑀫𑀸 𑀏𑀯𑀁𑀕𑁄𑀢𑁆𑀢𑀸 𑀏𑀯𑀁𑀲𑀻𑀮𑀸 𑀏𑀯𑀁𑀥𑀫𑁆𑀫𑀸 𑀏𑀯𑀁𑀧𑀜𑁆𑀜𑀸 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑀸 ¶ 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀻’’’𑀢𑀺. 𑀅𑀬𑀜𑁆𑀘 𑀳𑀺𑀤𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸 𑀳𑁄𑀢𑀺.

𑁧𑁪. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦 𑀓𑀭𑁂𑀭𑀺𑀫𑀡𑁆𑀟𑀮𑀫𑀸𑀴𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀸𑀬𑀦𑀼𑀢𑁆𑀣, 𑀪𑀺𑀓𑁆𑀔𑀯𑁂, 𑀏𑀢𑀭𑀳𑀺 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸; 𑀓𑀸 𑀘 𑀧𑀦 𑀯𑁄 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸’’𑀢𑀺?

𑀏𑀯𑀁 𑀯𑀼𑀢𑁆𑀢𑁂 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀇𑀥, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀅𑀬𑀁 𑀅𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺 𑁋 ‘𑀅𑀘𑁆𑀙𑀭𑀺𑀬𑀁, 𑀆𑀯𑀼𑀲𑁄, 𑀅𑀩𑁆𑀪𑀼𑀢𑀁, 𑀆𑀯𑀼𑀲𑁄, 𑀢𑀣𑀸𑀕𑀢𑀲𑁆𑀲 𑀫𑀳𑀺𑀤𑁆𑀥𑀺𑀓𑀢𑀸 𑀫𑀳𑀸𑀦𑀼𑀪𑀸𑀯𑀢𑀸, 𑀬𑀢𑁆𑀭 𑀳𑀺 𑀦𑀸𑀫 𑀢𑀣𑀸𑀕𑀢𑁄 𑀅𑀢𑀻𑀢𑁂 𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀙𑀺𑀦𑁆𑀦𑀧𑀧𑀜𑁆𑀘𑁂 𑀙𑀺𑀦𑁆𑀦𑀯𑀝𑀼𑀫𑁂 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑁂 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑁂 𑀚𑀸𑀢𑀺𑀢𑁄𑀧𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺, 𑀦𑀸𑀫𑀢𑁄𑀧𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺, 𑀕𑁄𑀢𑁆𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺, 𑀆𑀬𑀼𑀧𑁆𑀧𑀫𑀸𑀡𑀢𑁄𑀧𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺, 𑀲𑀸𑀯𑀓𑀬𑀼𑀕𑀢𑁄𑀧𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺, 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀢𑁄𑀧𑀺 ¶ 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺 𑁋 ‘‘𑀏𑀯𑀁𑀚𑀘𑁆𑀘𑀸 ¶ 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀺 ¶ , 𑀏𑀯𑀁𑀦𑀸𑀫𑀸 𑀏𑀯𑀁𑀕𑁄𑀢𑁆𑀢𑀸 𑀏𑀯𑀁𑀲𑀻𑀮𑀸 𑀏𑀯𑀁𑀥𑀫𑁆𑀫𑀸 𑀏𑀯𑀁𑀧𑀜𑁆𑀜𑀸 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀻’’𑀢𑀺. 𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀢𑀣𑀸𑀕𑀢𑀲𑁆𑀲𑁂𑀯 𑀦𑀼 𑀔𑁄 𑀏𑀲𑀸 𑀥𑀫𑁆𑀫𑀥𑀸𑀢𑀼 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸, 𑀬𑀲𑁆𑀲𑀸 𑀥𑀫𑁆𑀫𑀥𑀸𑀢𑀼𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀢𑀣𑀸𑀕𑀢𑁄 𑀅𑀢𑀻𑀢𑁂 𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀙𑀺𑀦𑁆𑀦𑀧𑀧𑀜𑁆𑀘𑁂 𑀙𑀺𑀦𑁆𑀦𑀯𑀝𑀼𑀫𑁂 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑁂 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑁂 𑀚𑀸𑀢𑀺𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀦𑀸𑀫𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀕𑁄𑀢𑁆𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀆𑀬𑀼𑀧𑁆𑀧𑀫𑀸𑀡𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀬𑀼𑀕𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺 𑁋 ‘‘𑀏𑀯𑀁𑀚𑀘𑁆𑀘𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀺, 𑀏𑀯𑀁𑀦𑀸𑀫𑀸 𑀏𑀯𑀁𑀕𑁄𑀢𑁆𑀢𑀸 𑀏𑀯𑀁𑀲𑀻𑀮𑀸 𑀏𑀯𑀁𑀥𑀫𑁆𑀫𑀸 𑀏𑀯𑀁𑀧𑀜𑁆𑀜𑀸 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀻’’𑀢𑀺. 𑀉𑀤𑀸𑀳𑀼 𑀤𑁂𑀯𑀢𑀸 𑀢𑀣𑀸𑀕𑀢𑀲𑁆𑀲 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁, 𑀬𑁂𑀦 𑀢𑀣𑀸𑀕𑀢𑁄 𑀅𑀢𑀻𑀢𑁂 𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀙𑀺𑀦𑁆𑀦𑀧𑀧𑀜𑁆𑀘𑁂 𑀙𑀺𑀦𑁆𑀦𑀯𑀝𑀼𑀫𑁂 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑁂 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑁂 𑀚𑀸𑀢𑀺𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀦𑀸𑀫𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀕𑁄𑀢𑁆𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀆𑀬𑀼𑀧𑁆𑀧𑀫𑀸𑀡𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀬𑀼𑀕𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺 𑁋 ‘𑀏𑀯𑀁𑀚𑀘𑁆𑀘𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀺, 𑀏𑀯𑀁𑀦𑀸𑀫𑀸 𑀏𑀯𑀁𑀕𑁄𑀢𑁆𑀢𑀸 𑀏𑀯𑀁𑀲𑀻𑀮𑀸 𑀏𑀯𑀁𑀥𑀫𑁆𑀫𑀸 𑀏𑀯𑀁𑀧𑀜𑁆𑀜𑀸 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑀸 ¶ 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀻’𑀢𑀺? 𑀅𑀬𑀁 𑀔𑁄 𑀦𑁄, 𑀪𑀦𑁆𑀢𑁂, 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸, 𑀅𑀣 𑀪𑀕𑀯𑀸 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺.

𑁧𑁫. ‘‘𑀢𑀣𑀸𑀕𑀢𑀲𑁆𑀲𑁂𑀯𑁂𑀲𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀥𑀸𑀢𑀼 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸, 𑀬𑀲𑁆𑀲𑀸 𑀥𑀫𑁆𑀫𑀥𑀸𑀢𑀼𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀢𑀣𑀸𑀕𑀢𑁄 𑀅𑀢𑀻𑀢𑁂 𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀙𑀺𑀦𑁆𑀦𑀧𑀧𑀜𑁆𑀘𑁂 𑀙𑀺𑀦𑁆𑀦𑀯𑀝𑀼𑀫𑁂 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑁂 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑁂 𑀚𑀸𑀢𑀺𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀦𑀸𑀫𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀕𑁄𑀢𑁆𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀆𑀬𑀼𑀧𑁆𑀧𑀫𑀸𑀡𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀬𑀼𑀕𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺 𑁋 ‘𑀏𑀯𑀁𑀚𑀘𑁆𑀘𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀺, 𑀏𑀯𑀁𑀦𑀸𑀫𑀸 𑀏𑀯𑀁𑀕𑁄𑀢𑁆𑀢𑀸 𑀏𑀯𑀁𑀲𑀻𑀮𑀸 𑀏𑀯𑀁𑀥𑀫𑁆𑀫𑀸 𑀏𑀯𑀁𑀧𑀜𑁆𑀜𑀸 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀻’𑀢𑀺. 𑀤𑁂𑀯𑀢𑀸𑀧𑀺 𑀢𑀣𑀸𑀕𑀢𑀲𑁆𑀲 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁, 𑀬𑁂𑀦 𑀢𑀣𑀸𑀕𑀢𑁄 𑀅𑀢𑀻𑀢𑁂 𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀙𑀺𑀦𑁆𑀦𑀧𑀧𑀜𑁆𑀘𑁂 𑀙𑀺𑀦𑁆𑀦𑀯𑀝𑀼𑀫𑁂 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑁂 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑁂 𑀚𑀸𑀢𑀺𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀦𑀸𑀫𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀕𑁄𑀢𑁆𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀆𑀬𑀼𑀧𑁆𑀧𑀫𑀸𑀡𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀬𑀼𑀕𑀢𑁄𑀧𑀺 ¶ 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺 𑁋 ‘𑀏𑀯𑀁𑀚𑀘𑁆𑀘𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀺, 𑀏𑀯𑀁𑀦𑀸𑀫𑀸 𑀏𑀯𑀁𑀕𑁄𑀢𑁆𑀢𑀸 𑀏𑀯𑀁𑀲𑀻𑀮𑀸 𑀏𑀯𑀁𑀥𑀫𑁆𑀫𑀸 𑀏𑀯𑀁𑀧𑀜𑁆𑀜𑀸 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀻’𑀢𑀺.

‘‘𑀇𑀘𑁆𑀙𑁂𑀬𑁆𑀬𑀸𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀁 ¶ 𑀥𑀫𑁆𑀫𑀺𑀁 𑀓𑀣𑀁 𑀲𑁄𑀢𑀼’’𑀦𑁆𑀢𑀺? ‘‘𑀏𑀢𑀲𑁆𑀲, 𑀪𑀕𑀯𑀸, 𑀓𑀸𑀮𑁄; 𑀏𑀢𑀲𑁆𑀲, 𑀲𑀼𑀕𑀢, 𑀓𑀸𑀮𑁄; 𑀬𑀁 𑀪𑀕𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁂𑀬𑁆𑀬, 𑀪𑀕𑀯𑀢𑁄 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂 ¶ , 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

𑁧𑁬. ‘‘𑀇𑀢𑁄 𑀲𑁄, 𑀪𑀺𑀓𑁆𑀔𑀯𑁂, 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀬𑀁 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀤𑀧𑀸𑀤𑀺. 𑀯𑀺𑀧𑀲𑁆𑀲𑀻, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀔𑀢𑁆𑀢𑀺𑀬𑁄 𑀚𑀸𑀢𑀺𑀬𑀸 𑀅𑀳𑁄𑀲𑀺, 𑀔𑀢𑁆𑀢𑀺𑀬𑀓𑀼𑀮𑁂 𑀉𑀤𑀧𑀸𑀤𑀺. 𑀯𑀺𑀧𑀲𑁆𑀲𑀻, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑁄𑀡𑁆𑀟𑀜𑁆𑀜𑁄 𑀕𑁄𑀢𑁆𑀢𑁂𑀦 𑀅𑀳𑁄𑀲𑀺. 𑀯𑀺𑀧𑀲𑁆𑀲𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀯𑀺𑀧𑀲𑁆𑀲𑀻, 𑀪𑀺𑀓𑁆𑀔𑀯𑁂, 𑀪𑀕𑀯𑀸 𑀅𑀭𑀳𑀁 ¶ 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀸𑀝𑀮𑀺𑀬𑀸 𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀯𑀺𑀧𑀲𑁆𑀲𑀺𑀲𑁆𑀲, 𑀪𑀺𑀓𑁆𑀔𑀯𑁂 ¶ , 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀔𑀡𑁆𑀟𑀢𑀺𑀲𑁆𑀲𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁. 𑀯𑀺𑀧𑀲𑁆𑀲𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀬𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁. 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁, 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁, 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀅𑀲𑀻𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺. 𑀯𑀺𑀧𑀲𑁆𑀲𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀇𑀫𑁂 𑀢𑀬𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁 𑀲𑀩𑁆𑀩𑁂𑀲𑀁𑀬𑁂𑀯 𑀔𑀻𑀡𑀸𑀲𑀯𑀸𑀦𑀁. 𑀯𑀺𑀧𑀲𑁆𑀲𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀲𑁄𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺 𑀅𑀕𑁆𑀕𑀼𑀧𑀝𑁆𑀞𑀸𑀓𑁄. 𑀯𑀺𑀧𑀲𑁆𑀲𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑀦𑁆𑀥𑀼𑀫𑀸 𑀦𑀸𑀫 𑀭𑀸𑀚𑀸 𑀧𑀺𑀢𑀸 𑀅𑀳𑁄𑀲𑀺. 𑀩𑀦𑁆𑀥𑀼𑀫𑀢𑀻 𑀦𑀸𑀫 ¶ 𑀤𑁂𑀯𑀻 𑀫𑀸𑀢𑀸 𑀅𑀳𑁄𑀲𑀺 𑀚𑀦𑁂𑀢𑁆𑀢𑀺. 𑀩𑀦𑁆𑀥𑀼𑀫𑀲𑁆𑀲 𑀭𑀜𑁆𑀜𑁄 𑀩𑀦𑁆𑀥𑀼𑀫𑀢𑀻 𑀦𑀸𑀫 𑀦𑀕𑀭𑀁 𑀭𑀸𑀚𑀥𑀸𑀦𑀻 𑀅𑀳𑁄𑀲𑀺.

𑀩𑁄𑀥𑀺𑀲𑀢𑁆𑀢𑀥𑀫𑁆𑀫𑀢𑀸

𑁧𑁭. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀺. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.

𑁧𑁮. ‘‘𑀥𑀫𑁆𑀫𑀢𑀸, 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀢𑀺. 𑀅𑀣 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀧𑁆𑀧𑀫𑀸𑀡𑁄 𑀉𑀴𑀸𑀭𑁄 𑀑𑀪𑀸𑀲𑁄 𑀧𑀸𑀢𑀼𑀪𑀯𑀢𑀺 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁. 𑀬𑀸𑀧𑀺 𑀢𑀸 𑀮𑁄𑀓𑀦𑁆𑀢𑀭𑀺𑀓𑀸 𑀅𑀖𑀸 𑀅𑀲𑀁𑀯𑀼𑀢𑀸 𑀅𑀦𑁆𑀥𑀓𑀸𑀭𑀸 𑀅𑀦𑁆𑀥𑀓𑀸𑀭𑀢𑀺𑀫𑀺𑀲𑀸 ¶ , 𑀬𑀢𑁆𑀣 𑀧𑀺𑀫𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀏𑀯𑀁𑀫𑀳𑀺𑀤𑁆𑀥𑀺𑀓𑀸 𑀏𑀯𑀁𑀫𑀳𑀸𑀦𑀼𑀪𑀸𑀯𑀸 𑀆𑀪𑀸𑀬 𑀦𑀸𑀦𑀼𑀪𑁄𑀦𑁆𑀢𑀺, 𑀢𑀢𑁆𑀣𑀧𑀺 𑀅𑀧𑁆𑀧𑀫𑀸𑀡𑁄 𑀉𑀴𑀸𑀭𑁄 𑀑𑀪𑀸𑀲𑁄 𑀧𑀸𑀢𑀼𑀪𑀯𑀢𑀺 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁. 𑀬𑁂𑀧𑀺 𑀢𑀢𑁆𑀣 𑀲𑀢𑁆𑀢𑀸 𑀉𑀧𑀧𑀦𑁆𑀦𑀸, 𑀢𑁂𑀧𑀺 𑀢𑁂𑀦𑁄𑀪𑀸𑀲𑁂𑀦 ¶ 𑀅𑀜𑁆𑀜𑀫𑀜𑁆𑀜𑀁 𑀲𑀜𑁆𑀚𑀸𑀦𑀦𑁆𑀢𑀺 𑁋 ‘𑀅𑀜𑁆𑀜𑁂𑀧𑀺 𑀓𑀺𑀭, 𑀪𑁄, 𑀲𑀦𑁆𑀢𑀺 𑀲𑀢𑁆𑀢𑀸 𑀇𑀥𑀽𑀧𑀧𑀦𑁆𑀦𑀸’𑀢𑀺. 𑀅𑀬𑀜𑁆𑀘 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀺. 𑀅𑀧𑁆𑀧𑀫𑀸𑀡𑁄 𑀘 𑀉𑀴𑀸𑀭𑁄 𑀑𑀪𑀸𑀲𑁄 𑀮𑁄𑀓𑁂 𑀧𑀸𑀢𑀼𑀪𑀯𑀢𑀺 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.

𑁧𑁯. ‘‘𑀥𑀫𑁆𑀫𑀢𑀸 ¶ 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀘𑀢𑁆𑀢𑀸𑀭𑁄 𑀦𑀁 𑀤𑁂𑀯𑀧𑀼𑀢𑁆𑀢𑀸 𑀘𑀢𑀼𑀤𑁆𑀤𑀺𑀲𑀁 [𑀘𑀸𑀢𑀼𑀤𑁆𑀤𑀺𑀲𑀁 (𑀲𑁆𑀬𑀸.)] 𑀭𑀓𑁆𑀔𑀸𑀬 𑀉𑀧𑀕𑀘𑁆𑀙𑀦𑁆𑀢𑀺 𑁋 ‘𑀫𑀸 𑀦𑀁 𑀩𑁄𑀥𑀺𑀲𑀢𑁆𑀢𑀁 𑀯𑀸 𑀩𑁄𑀥𑀺𑀲𑀢𑁆𑀢𑀫𑀸𑀢𑀭𑀁 𑀯𑀸 𑀫𑀦𑀼𑀲𑁆𑀲𑁄 𑀯𑀸 𑀅𑀫𑀦𑀼𑀲𑁆𑀲𑁄 𑀯𑀸 𑀓𑁄𑀘𑀺 𑀯𑀸 𑀯𑀺𑀳𑁂𑀞𑁂𑀲𑀻’𑀢𑀺. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.

𑁨𑁦. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀧𑀓𑀢𑀺𑀬𑀸 𑀲𑀻𑀮𑀯𑀢𑀻 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀳𑁄𑀢𑀺, 𑀯𑀺𑀭𑀢𑀸 𑀧𑀸𑀡𑀸𑀢𑀺𑀧𑀸𑀢𑀸, 𑀯𑀺𑀭𑀢𑀸 𑀅𑀤𑀺𑀦𑁆𑀦𑀸𑀤𑀸𑀦𑀸, 𑀯𑀺𑀭𑀢𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 ¶ , 𑀯𑀺𑀭𑀢𑀸 𑀫𑀼𑀲𑀸𑀯𑀸𑀤𑀸, 𑀯𑀺𑀭𑀢𑀸 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.

𑁨𑁧. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀦 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀧𑀼𑀭𑀺𑀲𑁂𑀲𑀼 𑀫𑀸𑀦𑀲𑀁 𑀉𑀧𑁆𑀧𑀚𑁆𑀚𑀢𑀺 𑀓𑀸𑀫𑀕𑀼𑀡𑀽𑀧𑀲𑀁𑀳𑀺𑀢𑀁, 𑀅𑀦𑀢𑀺𑀓𑁆𑀓𑀫𑀦𑀻𑀬𑀸 𑀘 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀳𑁄𑀢𑀺 𑀓𑁂𑀦𑀘𑀺 𑀧𑀼𑀭𑀺𑀲𑁂𑀦 𑀭𑀢𑁆𑀢𑀘𑀺𑀢𑁆𑀢𑁂𑀦. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.

𑁨𑁨. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄 ¶ 𑀳𑁄𑀢𑀺, 𑀮𑀸𑀪𑀺𑀦𑀻 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀳𑁄𑀢𑀺 𑀧𑀜𑁆𑀘𑀦𑁆𑀦𑀁 𑀓𑀸𑀫𑀕𑀼𑀡𑀸𑀦𑀁. 𑀲𑀸 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀧𑀭𑀺𑀘𑀸𑀭𑁂𑀢𑀺. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.

𑁨𑁩. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀦 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀓𑁄𑀘𑀺𑀤𑁂𑀯 𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑀢𑀺. 𑀲𑀼𑀔𑀺𑀦𑀻 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀳𑁄𑀢𑀺 𑀅𑀓𑀺𑀮𑀦𑁆𑀢𑀓𑀸𑀬𑀸, 𑀩𑁄𑀥𑀺𑀲𑀢𑁆𑀢𑀜𑁆𑀘 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀢𑀺𑀭𑁄𑀓𑀼𑀘𑁆𑀙𑀺𑀕𑀢𑀁 𑀧𑀲𑁆𑀲𑀢𑀺 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀺𑀁 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀼𑀪𑁄 𑀚𑀸𑀢𑀺𑀫𑀸 𑀅𑀝𑁆𑀞𑀁𑀲𑁄 𑀲𑀼𑀧𑀭𑀺𑀓𑀫𑁆𑀫𑀓𑀢𑁄 𑀅𑀘𑁆𑀙𑁄 𑀯𑀺𑀧𑁆𑀧𑀲𑀦𑁆𑀦𑁄 𑀅𑀦𑀸𑀯𑀺𑀮𑁄 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑁄. 𑀢𑀢𑁆𑀭𑀸𑀲𑁆𑀲 [𑀢𑀢𑁆𑀭𑀲𑁆𑀲 (𑀲𑁆𑀬𑀸.)] 𑀲𑀼𑀢𑁆𑀢𑀁 𑀆𑀯𑀼𑀢𑀁 𑀦𑀻𑀮𑀁 𑀯𑀸 𑀧𑀻𑀢𑀁 𑀯𑀸 𑀮𑁄𑀳𑀺𑀢𑀁 𑀯𑀸 𑀑𑀤𑀸𑀢𑀁 𑀯𑀸 𑀧𑀡𑁆𑀟𑀼𑀲𑀼𑀢𑁆𑀢𑀁 𑀯𑀸. 𑀢𑀫𑁂𑀦𑀁 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀳𑀢𑁆𑀣𑁂 𑀓𑀭𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑁂𑀬𑁆𑀬 𑁋 ‘𑀅𑀬𑀁 𑀔𑁄 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀼𑀪𑁄 𑀚𑀸𑀢𑀺𑀫𑀸 𑀅𑀝𑁆𑀞𑀁𑀲𑁄 𑀲𑀼𑀧𑀭𑀺𑀓𑀫𑁆𑀫𑀓𑀢𑁄 𑀅𑀘𑁆𑀙𑁄 𑀯𑀺𑀧𑁆𑀧𑀲𑀦𑁆𑀦𑁄 𑀅𑀦𑀸𑀯𑀺𑀮𑁄 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑁄. 𑀢𑀢𑁆𑀭𑀺𑀤𑀁 𑀲𑀼𑀢𑁆𑀢𑀁 𑀆𑀯𑀼𑀢𑀁 𑀦𑀻𑀮𑀁 𑀯𑀸 𑀧𑀻𑀢𑀁 𑀯𑀸 𑀮𑁄𑀳𑀺𑀢𑀁 𑀯𑀸 𑀑𑀤𑀸𑀢𑀁 𑀯𑀸 𑀧𑀡𑁆𑀟𑀼𑀲𑀼𑀢𑁆𑀢𑀁 𑀯𑀸’𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 ¶ 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀦 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀓𑁄𑀘𑀺𑀤𑁂𑀯 𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑀢𑀺, 𑀲𑀼𑀔𑀺𑀦𑀻 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀳𑁄𑀢𑀺 𑀅𑀓𑀺𑀮𑀦𑁆𑀢𑀓𑀸𑀬𑀸 ¶ , 𑀩𑁄𑀥𑀺𑀲𑀢𑁆𑀢𑀜𑁆𑀘 ¶ 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀢𑀺𑀭𑁄𑀓𑀼𑀘𑁆𑀙𑀺𑀕𑀢𑀁 𑀧𑀲𑁆𑀲𑀢𑀺 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀺𑀁 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀁. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.

𑁨𑁪. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀳𑀚𑀸𑀢𑁂 𑀩𑁄𑀥𑀺𑀲𑀢𑁆𑀢𑁂 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀓𑀸𑀮𑀗𑁆𑀓𑀭𑁄𑀢𑀺 𑀢𑀼𑀲𑀺𑀢𑀁 𑀓𑀸𑀬𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.

𑁨𑁫. ‘‘𑀥𑀫𑁆𑀫𑀢𑀸 ¶ 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀣𑀸 𑀅𑀜𑁆𑀜𑀸 𑀇𑀢𑁆𑀣𑀺𑀓𑀸 𑀦𑀯 𑀯𑀸 𑀤𑀲 𑀯𑀸 𑀫𑀸𑀲𑁂 𑀕𑀩𑁆𑀪𑀁 𑀓𑀼𑀘𑁆𑀙𑀺𑀦𑀸 𑀧𑀭𑀺𑀳𑀭𑀺𑀢𑁆𑀯𑀸 𑀯𑀺𑀚𑀸𑀬𑀦𑁆𑀢𑀺, 𑀦 𑀳𑁂𑀯𑀁 𑀩𑁄𑀥𑀺𑀲𑀢𑁆𑀢𑀁 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀯𑀺𑀚𑀸𑀬𑀢𑀺. 𑀤𑀲𑁂𑀯 𑀫𑀸𑀲𑀸𑀦𑀺 𑀩𑁄𑀥𑀺𑀲𑀢𑁆𑀢𑀁 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀓𑀼𑀘𑁆𑀙𑀺𑀦𑀸 𑀧𑀭𑀺𑀳𑀭𑀺𑀢𑁆𑀯𑀸 𑀯𑀺𑀚𑀸𑀬𑀢𑀺. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.

𑁨𑁬. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀣𑀸 𑀅𑀜𑁆𑀜𑀸 𑀇𑀢𑁆𑀣𑀺𑀓𑀸 𑀦𑀺𑀲𑀺𑀦𑁆𑀦𑀸 𑀯𑀸 𑀦𑀺𑀧𑀦𑁆𑀦𑀸 𑀯𑀸 𑀯𑀺𑀚𑀸𑀬𑀦𑁆𑀢𑀺, 𑀦 𑀳𑁂𑀯𑀁 𑀩𑁄𑀥𑀺𑀲𑀢𑁆𑀢𑀁 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀯𑀺𑀚𑀸𑀬𑀢𑀺. 𑀞𑀺𑀢𑀸𑀯 𑀩𑁄𑀥𑀺𑀲𑀢𑁆𑀢𑀁 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀯𑀺𑀚𑀸𑀬𑀢𑀺. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.

𑁨𑁭. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀺, 𑀤𑁂𑀯𑀸 𑀧𑀞𑀫𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, 𑀧𑀘𑁆𑀙𑀸 𑀫𑀦𑀼𑀲𑁆𑀲𑀸. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.

𑁨𑁮. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀺, 𑀅𑀧𑁆𑀧𑀢𑁆𑀢𑁄𑀯 𑀩𑁄𑀥𑀺𑀲𑀢𑁆𑀢𑁄 𑀧𑀣𑀯𑀺𑀁 𑀳𑁄𑀢𑀺, 𑀘𑀢𑁆𑀢𑀸𑀭𑁄 𑀦𑀁 𑀤𑁂𑀯𑀧𑀼𑀢𑁆𑀢𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀫𑀸𑀢𑀼 𑀧𑀼𑀭𑀢𑁄 𑀞𑀧𑁂𑀦𑁆𑀢𑀺 𑁋 ‘𑀅𑀢𑁆𑀢𑀫𑀦𑀸, 𑀤𑁂𑀯𑀺, 𑀳𑁄𑀳𑀺; 𑀫𑀳𑁂𑀲𑀓𑁆𑀔𑁄 𑀢𑁂 𑀧𑀼𑀢𑁆𑀢𑁄 𑀉𑀧𑁆𑀧𑀦𑁆𑀦𑁄’𑀢𑀺. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.

𑁨𑁯. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀺, 𑀯𑀺𑀲𑀤𑁄𑀯 𑀦𑀺𑀓𑁆𑀔𑀫𑀢𑀺 𑀅𑀫𑀓𑁆𑀔𑀺𑀢𑁄 𑀉𑀤𑁂𑀦 [𑀉𑀤𑁆𑀤𑁂𑀦 (𑀲𑁆𑀬𑀸.), 𑀉𑀤𑀭𑁂𑀦 (𑀓𑀢𑁆𑀣𑀘𑀺)] 𑀅𑀫𑀓𑁆𑀔𑀺𑀢𑁄 𑀲𑁂𑀫𑁆𑀳𑁂𑀦 𑀅𑀫𑀓𑁆𑀔𑀺𑀢𑁄 𑀭𑀼𑀳𑀺𑀭𑁂𑀦 𑀅𑀫𑀓𑁆𑀔𑀺𑀢𑁄 𑀓𑁂𑀦𑀘𑀺 𑀅𑀲𑀼𑀘𑀺𑀦𑀸 𑀲𑀼𑀤𑁆𑀥𑁄 [𑀯𑀺𑀲𑀼𑀤𑁆𑀥𑁄 (𑀲𑁆𑀬𑀸.)] 𑀯𑀺𑀲𑀤𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀡𑀺𑀭𑀢𑀦𑀁 𑀓𑀸𑀲𑀺𑀓𑁂 𑀯𑀢𑁆𑀣𑁂 𑀦𑀺𑀓𑁆𑀔𑀺𑀢𑁆𑀢𑀁 𑀦𑁂𑀯 𑀫𑀡𑀺𑀭𑀢𑀦𑀁 𑀓𑀸𑀲𑀺𑀓𑀁 𑀯𑀢𑁆𑀣𑀁 𑀫𑀓𑁆𑀔𑁂𑀢𑀺, 𑀦𑀸𑀧𑀺 𑀓𑀸𑀲𑀺𑀓𑀁 𑀯𑀢𑁆𑀣𑀁 𑀫𑀡𑀺𑀭𑀢𑀦𑀁 𑀫𑀓𑁆𑀔𑁂𑀢𑀺. 𑀢𑀁 𑀓𑀺𑀲𑁆𑀲 ¶ 𑀳𑁂𑀢𑀼? 𑀉𑀪𑀺𑀦𑁆𑀦𑀁 𑀲𑀼𑀤𑁆𑀥𑀢𑁆𑀢𑀸. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀺, 𑀯𑀺𑀲𑀤𑁄𑀯 𑀦𑀺𑀓𑁆𑀔𑀫𑀢𑀺 𑀅𑀫𑀓𑁆𑀔𑀺𑀢𑁄, 𑀉𑀤𑁂𑀦 𑀅𑀫𑀓𑁆𑀔𑀺𑀢𑁄 ¶ 𑀲𑁂𑀫𑁆𑀳𑁂𑀦 ¶ 𑀅𑀫𑀓𑁆𑀔𑀺𑀢𑁄 𑀭𑀼𑀳𑀺𑀭𑁂𑀦 𑀅𑀫𑀓𑁆𑀔𑀺𑀢𑁄 𑀓𑁂𑀦𑀘𑀺 𑀅𑀲𑀼𑀘𑀺𑀦𑀸 𑀲𑀼𑀤𑁆𑀥𑁄 𑀯𑀺𑀲𑀤𑁄. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.

𑁩𑁦. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀺, 𑀤𑁆𑀯𑁂 𑀉𑀤𑀓𑀲𑁆𑀲 ¶ 𑀥𑀸𑀭𑀸 𑀅𑀦𑁆𑀢𑀮𑀺𑀓𑁆𑀔𑀸 𑀧𑀸𑀢𑀼𑀪𑀯𑀦𑁆𑀢𑀺 𑁋 𑀏𑀓𑀸 𑀲𑀻𑀢𑀲𑁆𑀲 𑀏𑀓𑀸 𑀉𑀡𑁆𑀳𑀲𑁆𑀲 𑀬𑁂𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀉𑀤𑀓𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺 𑀫𑀸𑀢𑀼 𑀘. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.

𑁩𑁧. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀲𑀫𑁆𑀧𑀢𑀺𑀚𑀸𑀢𑁄 𑀩𑁄𑀥𑀺𑀲𑀢𑁆𑀢𑁄 𑀲𑀫𑁂𑀳𑀺 𑀧𑀸𑀤𑁂𑀳𑀺 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 [𑀉𑀢𑁆𑀢𑀭𑁂𑀦𑀸𑀪𑀺𑀫𑀼𑀔𑁄 (𑀲𑁆𑀬𑀸.) 𑀉𑀢𑁆𑀢𑀭𑁂𑀦𑀫𑀼𑀔𑁄 (𑀓.)] 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀘𑁆𑀙𑀢𑀺 𑀲𑁂𑀢𑀫𑁆𑀳𑀺 𑀙𑀢𑁆𑀢𑁂 𑀅𑀦𑀼𑀥𑀸𑀭𑀺𑀬𑀫𑀸𑀦𑁂, 𑀲𑀩𑁆𑀩𑀸 𑀘 𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀢𑀺, 𑀆𑀲𑀪𑀺𑀁 𑀯𑀸𑀘𑀁 𑀪𑀸𑀲𑀢𑀺 ‘𑀅𑀕𑁆𑀕𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀚𑁂𑀝𑁆𑀞𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀲𑁂𑀝𑁆𑀞𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’𑀢𑀺. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.

𑁩𑁨. ‘‘𑀥𑀫𑁆𑀫𑀢𑀸 𑀏𑀲𑀸, 𑀪𑀺𑀓𑁆𑀔𑀯𑁂, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀺, 𑀅𑀣 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀧𑁆𑀧𑀫𑀸𑀡𑁄 𑀉𑀴𑀸𑀭𑁄 𑀑𑀪𑀸𑀲𑁄 ¶ 𑀧𑀸𑀢𑀼𑀪𑀯𑀢𑀺, 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁. 𑀬𑀸𑀧𑀺 𑀢𑀸 𑀮𑁄𑀓𑀦𑁆𑀢𑀭𑀺𑀓𑀸 𑀅𑀖𑀸 𑀅𑀲𑀁𑀯𑀼𑀢𑀸 𑀅𑀦𑁆𑀥𑀓𑀸𑀭𑀸 𑀅𑀦𑁆𑀥𑀓𑀸𑀭𑀢𑀺𑀫𑀺𑀲𑀸, 𑀬𑀢𑁆𑀣 𑀧𑀺𑀫𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀏𑀯𑀁𑀫𑀳𑀺𑀤𑁆𑀥𑀺𑀓𑀸 𑀏𑀯𑀁𑀫𑀳𑀸𑀦𑀼𑀪𑀸𑀯𑀸 𑀆𑀪𑀸𑀬 𑀦𑀸𑀦𑀼𑀪𑁄𑀦𑁆𑀢𑀺, 𑀢𑀢𑁆𑀣𑀧𑀺 𑀅𑀧𑁆𑀧𑀫𑀸𑀡𑁄 𑀉𑀴𑀸𑀭𑁄 𑀑𑀪𑀸𑀲𑁄 𑀧𑀸𑀢𑀼𑀪𑀯𑀢𑀺 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁. 𑀬𑁂𑀧𑀺 𑀢𑀢𑁆𑀣 𑀲𑀢𑁆𑀢𑀸 𑀉𑀧𑀧𑀦𑁆𑀦𑀸, 𑀢𑁂𑀧𑀺 𑀢𑁂𑀦𑁄𑀪𑀸𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀲𑀜𑁆𑀚𑀸𑀦𑀦𑁆𑀢𑀺 𑁋 ‘𑀅𑀜𑁆𑀜𑁂𑀧𑀺 𑀓𑀺𑀭, 𑀪𑁄, 𑀲𑀦𑁆𑀢𑀺 𑀲𑀢𑁆𑀢𑀸 𑀇𑀥𑀽𑀧𑀧𑀦𑁆𑀦𑀸’𑀢𑀺. 𑀅𑀬𑀜𑁆𑀘 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀺 𑀅𑀧𑁆𑀧𑀫𑀸𑀡𑁄 𑀘 𑀉𑀴𑀸𑀭𑁄 𑀑𑀪𑀸𑀲𑁄 𑀮𑁄𑀓𑁂 𑀧𑀸𑀢𑀼𑀪𑀯𑀢𑀺 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸.

𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸

𑁩𑁩. ‘‘𑀚𑀸𑀢𑁂 ¶ 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀫𑁆𑀳𑀺 𑀓𑀼𑀫𑀸𑀭𑁂 𑀩𑀦𑁆𑀥𑀼𑀫𑀢𑁄 𑀭𑀜𑁆𑀜𑁄 𑀧𑀝𑀺𑀯𑁂𑀤𑁂𑀲𑀼𑀁 𑁋 ‘𑀧𑀼𑀢𑁆𑀢𑁄 𑀢𑁂, 𑀤𑁂𑀯 [𑀤𑁂𑀯 𑀢𑁂 (𑀓.)], 𑀚𑀸𑀢𑁄, 𑀢𑀁 𑀤𑁂𑀯𑁄 𑀧𑀲𑁆𑀲𑀢𑀽’𑀢𑀺. 𑀅𑀤𑁆𑀤𑀲𑀸 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀯𑀺𑀧𑀲𑁆𑀲𑀺𑀁 𑀓𑀼𑀫𑀸𑀭𑀁, 𑀤𑀺𑀲𑁆𑀯𑀸 𑀦𑁂𑀫𑀺𑀢𑁆𑀢𑁂 𑀩𑁆𑀭𑀸𑀳𑁆𑀫𑀡𑁂 ¶ 𑀆𑀫𑀦𑁆𑀢𑀸𑀧𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘𑀧𑀲𑁆𑀲𑀦𑁆𑀢𑀼 𑀪𑁄𑀦𑁆𑀢𑁄 𑀦𑁂𑀫𑀺𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑀸 𑀓𑀼𑀫𑀸𑀭’𑀦𑁆𑀢𑀺. 𑀅𑀤𑁆𑀤𑀲𑀁𑀲𑀼 𑀔𑁄, 𑀪𑀺𑀓𑁆𑀔𑀯𑁂, 𑀦𑁂𑀫𑀺𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑀸 𑀯𑀺𑀧𑀲𑁆𑀲𑀺𑀁 𑀓𑀼𑀫𑀸𑀭𑀁, 𑀤𑀺𑀲𑁆𑀯𑀸 𑀩𑀦𑁆𑀥𑀼𑀫𑀦𑁆𑀢𑀁 𑀭𑀸𑀚𑀸𑀦𑀁 𑀏𑀢𑀤𑀯𑁄𑀘𑀼𑀁 𑁋 ‘𑀅𑀢𑁆𑀢𑀫𑀦𑁄, 𑀤𑁂𑀯, 𑀳𑁄𑀳𑀺, 𑀫𑀳𑁂𑀲𑀓𑁆𑀔𑁄 𑀢𑁂 𑀧𑀼𑀢𑁆𑀢𑁄 𑀉𑀧𑁆𑀧𑀦𑁆𑀦𑁄, 𑀮𑀸𑀪𑀸 𑀢𑁂, 𑀫𑀳𑀸𑀭𑀸𑀚, 𑀲𑀼𑀮𑀤𑁆𑀥𑀁 𑀢𑁂, 𑀫𑀳𑀸𑀭𑀸𑀚, 𑀬𑀲𑁆𑀲 𑀢𑁂 𑀓𑀼𑀮𑁂 𑀏𑀯𑀭𑀽𑀧𑁄 𑀧𑀼𑀢𑁆𑀢𑁄 𑀉𑀧𑁆𑀧𑀦𑁆𑀦𑁄. 𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑁆𑀯𑁂𑀯 𑀕𑀢𑀺𑀬𑁄 𑀪𑀯𑀦𑁆𑀢𑀺 𑀅𑀦𑀜𑁆𑀜𑀸. 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄 𑀲𑀢𑁆𑀢𑀭𑀢𑀦𑀲𑀫𑀦𑁆𑀦𑀸𑀕𑀢𑁄. 𑀢𑀲𑁆𑀲𑀺𑀫𑀸𑀦𑀺 𑀲𑀢𑁆𑀢𑀭𑀢𑀦𑀸𑀦𑀺 𑀪𑀯𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀓𑁆𑀓𑀭𑀢𑀦𑀁 𑀳𑀢𑁆𑀣𑀺𑀭𑀢𑀦𑀁 𑀅𑀲𑁆𑀲𑀭𑀢𑀦𑀁 𑀫𑀡𑀺𑀭𑀢𑀦𑀁 𑀇𑀢𑁆𑀣𑀺𑀭𑀢𑀦𑀁 𑀕𑀳𑀧𑀢𑀺𑀭𑀢𑀦𑀁 𑀧𑀭𑀺𑀡𑀸𑀬𑀓𑀭𑀢𑀦𑀫𑁂𑀯 ¶ ¶ 𑀲𑀢𑁆𑀢𑀫𑀁. 𑀧𑀭𑁄𑀲𑀳𑀲𑁆𑀲𑀁 𑀔𑁄 𑀧𑀦𑀲𑁆𑀲 𑀧𑀼𑀢𑁆𑀢𑀸 𑀪𑀯𑀦𑁆𑀢𑀺 𑀲𑀽𑀭𑀸 𑀯𑀻𑀭𑀗𑁆𑀕𑀭𑀽𑀧𑀸 𑀧𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀸. 𑀲𑁄 𑀇𑀫𑀁 𑀧𑀣𑀯𑀺𑀁 𑀲𑀸𑀕𑀭𑀧𑀭𑀺𑀬𑀦𑁆𑀢𑀁 𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦 𑀥𑀫𑁆𑀫𑁂𑀦 𑀅𑀪𑀺𑀯𑀺𑀚𑀺𑀬 𑀅𑀚𑁆𑀛𑀸𑀯𑀲𑀢𑀺. 𑀲𑀘𑁂 𑀔𑁄 𑀧𑀦 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺, 𑀅𑀭𑀳𑀁 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀯𑀝𑀘𑁆𑀙𑀤𑁄.

𑁩𑁪. ‘𑀓𑀢𑀫𑁂𑀳𑀺 𑀘𑀸𑀬𑀁, 𑀤𑁂𑀯, 𑀓𑀼𑀫𑀸𑀭𑁄 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑁆𑀯𑁂𑀯 𑀕𑀢𑀺𑀬𑁄 𑀪𑀯𑀦𑁆𑀢𑀺 𑀅𑀦𑀜𑁆𑀜𑀸. 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀧𑀻 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄 𑀲𑀢𑁆𑀢𑀭𑀢𑀦𑀲𑀫𑀦𑁆𑀦𑀸𑀕𑀢𑁄. 𑀢𑀲𑁆𑀲𑀺𑀫𑀸𑀦𑀺 𑀲𑀢𑁆𑀢𑀭𑀢𑀦𑀸𑀦𑀺 𑀪𑀯𑀦𑁆𑀢𑀺 ¶ . 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀓𑁆𑀓𑀭𑀢𑀦𑀁 𑀳𑀢𑁆𑀣𑀺𑀭𑀢𑀦𑀁 𑀅𑀲𑁆𑀲𑀭𑀢𑀦𑀁 𑀫𑀡𑀺𑀭𑀢𑀦𑀁 𑀇𑀢𑁆𑀣𑀺𑀭𑀢𑀦𑀁 𑀕𑀳𑀧𑀢𑀺𑀭𑀢𑀦𑀁 𑀧𑀭𑀺𑀡𑀸𑀬𑀓𑀭𑀢𑀦𑀫𑁂𑀯 𑀲𑀢𑁆𑀢𑀫𑀁. 𑀧𑀭𑁄𑀲𑀳𑀲𑁆𑀲𑀁 𑀔𑁄 𑀧𑀦𑀲𑁆𑀲 𑀧𑀼𑀢𑁆𑀢𑀸 𑀪𑀯𑀦𑁆𑀢𑀺 𑀲𑀽𑀭𑀸 𑀯𑀻𑀭𑀗𑁆𑀕𑀭𑀽𑀧𑀸 𑀧𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀸. 𑀲𑁄 𑀇𑀫𑀁 𑀧𑀣𑀯𑀺𑀁 𑀲𑀸𑀕𑀭𑀧𑀭𑀺𑀬𑀦𑁆𑀢𑀁 𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦 𑀥𑀫𑁆𑀫𑁂𑀦 𑀅𑀪𑀺𑀯𑀺𑀚𑀺𑀬 𑀅𑀚𑁆𑀛𑀸𑀯𑀲𑀢𑀺. 𑀲𑀘𑁂 𑀔𑁄 𑀧𑀦 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺, 𑀅𑀭𑀳𑀁 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀯𑀝𑀘𑁆𑀙𑀤𑁄.

𑁩𑁫. ‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄. 𑀬𑀁 𑀧𑀸𑀬𑀁, 𑀤𑁂𑀯, 𑀓𑀼𑀫𑀸𑀭𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑁄. 𑀇𑀤𑀫𑁆𑀧𑀺𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀪𑀯𑀢𑀺.

‘𑀇𑀫𑀲𑁆𑀲, 𑀤𑁂𑀯 [𑀇𑀫𑀲𑁆𑀲 𑀳𑀺 𑀤𑁂𑀯 (?)], 𑀓𑀼𑀫𑀸𑀭𑀲𑁆𑀲 𑀳𑁂𑀝𑁆𑀞𑀸 𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀸𑀦𑀺 𑀚𑀸𑀢𑀸𑀦𑀺 𑀲𑀳𑀲𑁆𑀲𑀸𑀭𑀸𑀦𑀺 𑀲𑀦𑁂𑀫𑀺𑀓𑀸𑀦𑀺 𑀲𑀦𑀸𑀪𑀺𑀓𑀸𑀦𑀺 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀸𑀦𑀺. 𑀬𑀫𑁆𑀧𑀺, 𑀇𑀫𑀲𑁆𑀲 ¶ 𑀤𑁂𑀯, 𑀓𑀼𑀫𑀸𑀭𑀲𑁆𑀲 𑀳𑁂𑀝𑁆𑀞𑀸 𑀧𑀸𑀤𑀢𑀮𑁂𑀲𑀼 𑀘𑀓𑁆𑀓𑀸𑀦𑀺 𑀚𑀸𑀢𑀸𑀦𑀺 𑀲𑀳𑀲𑁆𑀲𑀸𑀭𑀸𑀦𑀺 𑀲𑀦𑁂𑀫𑀺𑀓𑀸𑀦𑀺 𑀲𑀦𑀸𑀪𑀺𑀓𑀸𑀦𑀺 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀸𑀦𑀺, 𑀇𑀤𑀫𑁆𑀧𑀺𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀪𑀯𑀢𑀺.

‘𑀅𑀬𑀜𑁆𑀳𑀺 ¶ 𑀤𑁂𑀯, 𑀓𑀼𑀫𑀸𑀭𑁄 𑀆𑀬𑀢𑀧𑀡𑁆𑀳𑀻…𑀧𑁂…

‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀤𑀻𑀖𑀗𑁆𑀕𑀼𑀮𑀻…

‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀫𑀼𑀤𑀼𑀢𑀮𑀼𑀦𑀳𑀢𑁆𑀣𑀧𑀸𑀤𑁄…

‘𑀅𑀬𑀜𑁆𑀳𑀺, 𑀤𑁂𑀯 𑀓𑀼𑀫𑀸𑀭𑁄 𑀚𑀸𑀮𑀳𑀢𑁆𑀣𑀧𑀸𑀤𑁄…

‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀉𑀲𑁆𑀲𑀗𑁆𑀔𑀧𑀸𑀤𑁄…

‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀏𑀡𑀺𑀚𑀗𑁆𑀖𑁄…

‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀞𑀺𑀢𑀓𑁄𑀯 𑀅𑀦𑁄𑀦𑀫𑀦𑁆𑀢𑁄 𑀉𑀪𑁄𑀳𑀺 𑀧𑀸𑀡𑀺𑀢𑀮𑁂𑀳𑀺 𑀚𑀡𑁆𑀡𑀼𑀓𑀸𑀦𑀺 𑀧𑀭𑀺𑀫𑀲𑀢𑀺 [𑀧𑀭𑀸𑀫𑀲𑀢𑀺 (𑀓.)] 𑀧𑀭𑀺𑀫𑀚𑁆𑀚𑀢𑀺…

‘𑀅𑀬𑀜𑁆𑀳𑀺 ¶ , 𑀤𑁂𑀯, 𑀓𑀼𑀫𑀸𑀭𑁄 𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑁄…

‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑁄…

‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀲𑀼𑀔𑀼𑀫𑀘𑁆𑀙𑀯𑀻; 𑀲𑀼𑀔𑀼𑀫𑀢𑁆𑀢𑀸 ¶ 𑀙𑀯𑀺𑀬𑀸 𑀭𑀚𑁄𑀚𑀮𑁆𑀮𑀁 𑀓𑀸𑀬𑁂 𑀦 𑀉𑀧𑀮𑀺𑀫𑁆𑀧𑀢𑀺 [𑀉𑀧𑀮𑀺𑀧𑁆𑀧𑀢𑀺 (𑀲𑁆𑀬𑀸.)] …

‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀏𑀓𑁂𑀓𑀮𑁄𑀫𑁄; 𑀏𑀓𑁂𑀓𑀸𑀦𑀺 𑀮𑁄𑀫𑀸𑀦𑀺 𑀮𑁄𑀫𑀓𑀽𑀧𑁂𑀲𑀼 𑀚𑀸𑀢𑀸𑀦𑀺…

‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀉𑀤𑁆𑀥𑀕𑁆𑀕𑀮𑁄𑀫𑁄; 𑀉𑀤𑁆𑀥𑀕𑁆𑀕𑀸𑀦𑀺 𑀮𑁄𑀫𑀸𑀦𑀺 𑀚𑀸𑀢𑀸𑀦𑀺 𑀦𑀻𑀮𑀸𑀦𑀺 𑀅𑀜𑁆𑀚𑀦𑀯𑀡𑁆𑀡𑀸𑀦𑀺 𑀓𑀼𑀡𑁆𑀟𑀮𑀸𑀯𑀝𑁆𑀝𑀸𑀦𑀺 𑀤𑀓𑁆𑀔𑀺𑀡𑀸𑀯𑀝𑁆𑀝𑀓𑀚𑀸𑀢𑀸𑀦𑀺…

‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑁄…

‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀲𑀢𑁆𑀢𑀼𑀲𑁆𑀲𑀤𑁄…

‘𑀅𑀬𑀜𑁆𑀳𑀺 ¶ , 𑀤𑁂𑀯, 𑀓𑀼𑀫𑀸𑀭𑁄 𑀲𑀻𑀳𑀧𑀼𑀩𑁆𑀩𑀤𑁆𑀥𑀓𑀸𑀬𑁄…

‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀘𑀺𑀢𑀦𑁆𑀢𑀭𑀁𑀲𑁄 [𑀧𑀺𑀢𑀦𑁆𑀢𑀭𑀁𑀲𑁄 (𑀲𑁆𑀬𑀸.)] …

‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄 𑀬𑀸𑀯𑀢𑀓𑁆𑀯𑀲𑁆𑀲 𑀓𑀸𑀬𑁄 𑀢𑀸𑀯𑀢𑀓𑁆𑀯𑀲𑁆𑀲 𑀩𑁆𑀬𑀸𑀫𑁄, 𑀬𑀸𑀯𑀢𑀓𑁆𑀯𑀲𑁆𑀲 𑀩𑁆𑀬𑀸𑀫𑁄, 𑀢𑀸𑀯𑀢𑀓𑁆𑀯𑀲𑁆𑀲 𑀓𑀸𑀬𑁄…

‘𑀅𑀬𑀜𑁆𑀳𑀺 ¶ , 𑀤𑁂𑀯, 𑀓𑀼𑀫𑀸𑀭𑁄 𑀲𑀫𑀯𑀝𑁆𑀝𑀓𑁆𑀔𑀦𑁆𑀥𑁄…

‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀭𑀲𑀕𑁆𑀕𑀲𑀕𑁆𑀕𑀻…

‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀲𑀻𑀳𑀳𑀦𑀼…

‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀘𑀢𑁆𑀢𑀸𑀮𑀻𑀲𑀤𑀦𑁆𑀢𑁄…

‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀲𑀫𑀤𑀦𑁆𑀢𑁄…

‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀅𑀯𑀺𑀭𑀴𑀤𑀦𑁆𑀢𑁄…

‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀲𑀼𑀲𑀼𑀓𑁆𑀓𑀤𑀸𑀞𑁄…

‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀧𑀳𑀽𑀢𑀚𑀺𑀯𑁆𑀳𑁄…

‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀩𑁆𑀭𑀳𑁆𑀫𑀲𑁆𑀲𑀭𑁄 𑀓𑀭𑀯𑀻𑀓𑀪𑀸𑀡𑀻…

‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀅𑀪𑀺𑀦𑀻𑀮𑀦𑁂𑀢𑁆𑀢𑁄…

‘𑀅𑀬𑀜𑁆𑀳𑀺, 𑀤𑁂𑀯, 𑀓𑀼𑀫𑀸𑀭𑁄 𑀕𑁄𑀧𑀔𑀼𑀫𑁄…

𑀇𑀫𑀲𑁆𑀲, 𑀤𑁂𑀯, 𑀓𑀼𑀫𑀸𑀭𑀲𑁆𑀲 𑀉𑀡𑁆𑀡𑀸 𑀪𑀫𑀼𑀓𑀦𑁆𑀢𑀭𑁂 𑀚𑀸𑀢𑀸 𑀑𑀤𑀸𑀢𑀸 𑀫𑀼𑀤𑀼𑀢𑀽𑀮𑀲𑀦𑁆𑀦𑀺𑀪𑀸. 𑀬𑀫𑁆𑀧𑀺 𑀇𑀫𑀲𑁆𑀲 𑀤𑁂𑀯 𑀓𑀼𑀫𑀸𑀭𑀲𑁆𑀲 𑀉𑀡𑁆𑀡𑀸 𑀪𑀫𑀼𑀓𑀦𑁆𑀢𑀭𑁂 𑀚𑀸𑀢𑀸 𑀑𑀤𑀸𑀢𑀸 𑀫𑀼𑀤𑀼𑀢𑀽𑀮𑀲𑀦𑁆𑀦𑀺𑀪𑀸, 𑀇𑀤𑀫𑁆𑀧𑀺𑀫𑀲𑁆𑀲 ¶ 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀪𑀯𑀢𑀺.

‘𑀅𑀬𑀜𑁆𑀳𑀺 ¶ ¶ , 𑀤𑁂𑀯, 𑀓𑀼𑀫𑀸𑀭𑁄 𑀉𑀡𑁆𑀳𑀻𑀲𑀲𑀻𑀲𑁄. 𑀬𑀁 𑀧𑀸𑀬𑀁, 𑀤𑁂𑀯, 𑀓𑀼𑀫𑀸𑀭𑁄 𑀉𑀡𑁆𑀳𑀻𑀲𑀲𑀻𑀲𑁄, 𑀇𑀤𑀫𑁆𑀧𑀺𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀪𑀯𑀢𑀺.

𑁩𑁬. ‘𑀇𑀫𑁂𑀳𑀺 𑀔𑁄 𑀅𑀬𑀁, 𑀤𑁂𑀯, 𑀓𑀼𑀫𑀸𑀭𑁄 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑁆𑀯𑁂𑀯 𑀕𑀢𑀺𑀬𑁄 𑀪𑀯𑀦𑁆𑀢𑀺 𑀅𑀦𑀜𑁆𑀜𑀸. 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺, 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄 𑀲𑀢𑁆𑀢𑀭𑀢𑀦𑀲𑀫𑀦𑁆𑀦𑀸𑀕𑀢𑁄. 𑀢𑀲𑁆𑀲𑀺𑀫𑀸𑀦𑀺 𑀲𑀢𑁆𑀢𑀭𑀢𑀦𑀸𑀦𑀺 𑀪𑀯𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀓𑁆𑀓𑀭𑀢𑀦𑀁 𑀳𑀢𑁆𑀣𑀺𑀭𑀢𑀦𑀁 𑀅𑀲𑁆𑀲𑀭𑀢𑀦𑀁 𑀫𑀡𑀺𑀭𑀢𑀦𑀁 𑀇𑀢𑁆𑀣𑀺𑀭𑀢𑀦𑀁 𑀕𑀳𑀧𑀢𑀺𑀭𑀢𑀦𑀁 𑀧𑀭𑀺𑀡𑀸𑀬𑀓𑀭𑀢𑀦𑀫𑁂𑀯 𑀲𑀢𑁆𑀢𑀫𑀁. 𑀧𑀭𑁄𑀲𑀳𑀲𑁆𑀲𑀁 𑀔𑁄 𑀧𑀦𑀲𑁆𑀲 𑀧𑀼𑀢𑁆𑀢𑀸 𑀪𑀯𑀦𑁆𑀢𑀺 𑀲𑀽𑀭𑀸 𑀯𑀻𑀭𑀗𑁆𑀕𑀭𑀽𑀧𑀸 𑀧𑀭𑀲𑁂𑀦𑀧𑁆𑀧𑀫𑀤𑁆𑀤𑀦𑀸. 𑀲𑁄 𑀇𑀫𑀁 𑀧𑀣𑀯𑀺𑀁 𑀲𑀸𑀕𑀭𑀧𑀭𑀺𑀬𑀦𑁆𑀢𑀁 𑀅𑀤𑀡𑁆𑀟𑁂𑀦 𑀅𑀲𑀢𑁆𑀣𑁂𑀦 𑀥𑀫𑁆𑀫𑁂𑀦 [𑀥𑀫𑁆𑀫𑁂𑀦 𑀲𑀫𑁂𑀦 (𑀲𑁆𑀬𑀸.)] 𑀅𑀪𑀺𑀯𑀺𑀚𑀺𑀬 𑀅𑀚𑁆𑀛𑀸𑀯𑀲𑀢𑀺. 𑀲𑀘𑁂 𑀔𑁄 𑀧𑀦 ¶ 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺, 𑀅𑀭𑀳𑀁 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀯𑀺𑀯𑀝𑀘𑁆𑀙𑀤𑁄’𑀢𑀺.

𑀯𑀺𑀧𑀲𑁆𑀲𑀻𑀲𑀫𑀜𑁆𑀜𑀸

𑁩𑁭. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀦𑁂𑀫𑀺𑀢𑁆𑀢𑁂 𑀩𑁆𑀭𑀸𑀳𑁆𑀫𑀡𑁂 𑀅𑀳𑀢𑁂𑀳𑀺 𑀯𑀢𑁆𑀣𑁂𑀳𑀺 𑀅𑀘𑁆𑀙𑀸𑀤𑀸𑀧𑁂𑀢𑁆𑀯𑀸 [𑀅𑀘𑁆𑀙𑀸𑀤𑁂𑀢𑁆𑀯𑀸 (𑀲𑁆𑀬𑀸.)] 𑀲𑀩𑁆𑀩𑀓𑀸𑀫𑁂𑀳𑀺 𑀲𑀦𑁆𑀢𑀧𑁆𑀧𑁂𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀥𑀸𑀢𑀺𑀬𑁄 𑀉𑀧𑀝𑁆𑀞𑀸𑀧𑁂𑀲𑀺. 𑀅𑀜𑁆𑀜𑀸 𑀔𑀻𑀭𑀁 𑀧𑀸𑀬𑁂𑀦𑁆𑀢𑀺, 𑀅𑀜𑁆𑀜𑀸 𑀦𑁆𑀳𑀸𑀧𑁂𑀦𑁆𑀢𑀺, 𑀅𑀜𑁆𑀜𑀸 𑀥𑀸𑀭𑁂𑀦𑁆𑀢𑀺, 𑀅𑀜𑁆𑀜𑀸 𑀅𑀗𑁆𑀓𑁂𑀦 𑀧𑀭𑀺𑀳𑀭𑀦𑁆𑀢𑀺. 𑀚𑀸𑀢𑀲𑁆𑀲 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀲𑁂𑀢𑀘𑁆𑀙𑀢𑁆𑀢𑀁 𑀥𑀸𑀭𑀬𑀺𑀢𑁆𑀣 𑀤𑀺𑀯𑀸 𑀘𑁂𑀯 𑀭𑀢𑁆𑀢𑀺𑀜𑁆𑀘 𑁋 ‘𑀫𑀸 𑀦𑀁 𑀲𑀻𑀢𑀁 𑀯𑀸 ¶ 𑀉𑀡𑁆𑀳𑀁 𑀯𑀸 𑀢𑀺𑀡𑀁 𑀯𑀸 𑀭𑀚𑁄 𑀯𑀸 𑀉𑀲𑁆𑀲𑀸𑀯𑁄 𑀯𑀸 𑀩𑀸𑀥𑀬𑀺𑀢𑁆𑀣𑀸’𑀢𑀺. 𑀚𑀸𑀢𑁄 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀩𑀳𑀼𑀦𑁄 𑀚𑀦𑀲𑁆𑀲 𑀧𑀺𑀬𑁄 𑀅𑀳𑁄𑀲𑀺 𑀫𑀦𑀸𑀧𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀉𑀧𑁆𑀧𑀮𑀁 𑀯𑀸 ¶ 𑀧𑀤𑀼𑀫𑀁 𑀯𑀸 𑀧𑀼𑀡𑁆𑀟𑀭𑀻𑀓𑀁 𑀯𑀸 𑀩𑀳𑀼𑀦𑁄 𑀚𑀦𑀲𑁆𑀲 𑀧𑀺𑀬𑀁 𑀫𑀦𑀸𑀧𑀁; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀩𑀳𑀼𑀦𑁄 𑀚𑀦𑀲𑁆𑀲 𑀧𑀺𑀬𑁄 𑀅𑀳𑁄𑀲𑀺 𑀫𑀦𑀸𑀧𑁄. 𑀲𑁆𑀯𑀸𑀲𑁆𑀲𑀼𑀤𑀁 𑀅𑀗𑁆𑀓𑁂𑀦𑁂𑀯 𑀅𑀗𑁆𑀓𑀁 𑀧𑀭𑀺𑀳𑀭𑀺𑀬𑀢𑀺.

𑁩𑁮. ‘‘𑀚𑀸𑀢𑁄 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀫𑀜𑁆𑀚𑀼𑀲𑁆𑀲𑀭𑁄 𑀘 [𑀓𑀼𑀫𑀸𑀭𑁄 𑀩𑁆𑀭𑀳𑁆𑀫𑀲𑁆𑀲𑀭𑁄 𑀫𑀜𑁆𑀚𑀼𑀲𑁆𑀲𑀭𑁄 𑀘 (𑀲𑀻. 𑀓.)] 𑀅𑀳𑁄𑀲𑀺 𑀯𑀕𑁆𑀕𑀼𑀲𑁆𑀲𑀭𑁄 𑀘 𑀫𑀥𑀼𑀭𑀲𑁆𑀲𑀭𑁄 𑀘 𑀧𑁂𑀫𑀦𑀺𑀬𑀲𑁆𑀲𑀭𑁄 𑀘. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀳𑀺𑀫𑀯𑀦𑁆𑀢𑁂 𑀧𑀩𑁆𑀩𑀢𑁂 𑀓𑀭𑀯𑀻𑀓𑀸 𑀦𑀸𑀫 𑀲𑀓𑀼𑀡𑀚𑀸𑀢𑀺 𑀫𑀜𑁆𑀚𑀼𑀲𑁆𑀲𑀭𑀸 𑀘 𑀯𑀕𑁆𑀕𑀼𑀲𑁆𑀲𑀭𑀸 𑀘 𑀫𑀥𑀼𑀭𑀲𑁆𑀲𑀭𑀸 𑀘 𑀧𑁂𑀫𑀦𑀺𑀬𑀲𑁆𑀲𑀭𑀸 𑀘; 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀫𑀜𑁆𑀚𑀼𑀲𑁆𑀲𑀭𑁄 𑀘 𑀅𑀳𑁄𑀲𑀺 𑀯𑀕𑁆𑀕𑀼𑀲𑁆𑀲𑀭𑁄 𑀘 𑀫𑀥𑀼𑀭𑀲𑁆𑀲𑀭𑁄 𑀘 𑀧𑁂𑀫𑀦𑀺𑀬𑀲𑁆𑀲𑀭𑁄 𑀘.

𑁩𑁯. ‘‘𑀚𑀸𑀢𑀲𑁆𑀲 ¶ 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑀚𑀁 𑀤𑀺𑀩𑁆𑀩𑀘𑀓𑁆𑀔𑀼 𑀧𑀸𑀢𑀼𑀭𑀳𑁄𑀲𑀺 𑀬𑁂𑀦 𑀲𑀼𑀤𑀁 [𑀬𑁂𑀦 𑀤𑀽𑀭𑀁 (𑀲𑁆𑀬𑀸.)] 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀧𑀲𑁆𑀲𑀢𑀺 𑀤𑀺𑀯𑀸 𑀘𑁂𑀯 𑀭𑀢𑁆𑀢𑀺𑀜𑁆𑀘.

𑁪𑁦. ‘‘𑀚𑀸𑀢𑁄 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀅𑀦𑀺𑀫𑀺𑀲𑀦𑁆𑀢𑁄 𑀧𑁂𑀓𑁆𑀔𑀢𑀺 𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸. ‘𑀅𑀦𑀺𑀫𑀺𑀲𑀦𑁆𑀢𑁄 𑀓𑀼𑀫𑀸𑀭𑁄 𑀧𑁂𑀓𑁆𑀔𑀢𑀻’𑀢𑀺 𑀔𑁄, 𑀪𑀺𑀓𑁆𑀔𑀯𑁂 [𑀅𑀦𑀺𑀫𑀺𑀲𑀦𑁆𑀢𑁄 𑀧𑁂𑀓𑁆𑀔𑀢𑀺, 𑀚𑀸𑀢𑀲𑁆𑀲 𑀔𑁄 𑀧𑀦 𑀪𑀺𑀓𑁆𑀔𑀯𑁂 (𑀓.)], 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 ‘𑀯𑀺𑀧𑀲𑁆𑀲𑀻 𑀯𑀺𑀧𑀲𑁆𑀲𑀻’ 𑀢𑁆𑀯𑁂𑀯 𑀲𑀫𑀜𑁆𑀜𑀸 𑀉𑀤𑀧𑀸𑀤𑀺.

𑁪𑁧. ‘‘𑀅𑀣 ¶ 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀅𑀢𑁆𑀣𑀓𑀭𑀡𑁂 [𑀅𑀝𑁆𑀝 𑀓𑀭𑀡𑁂 (𑀲𑁆𑀬𑀸.)] 𑀦𑀺𑀲𑀺𑀦𑁆𑀦𑁄 𑀯𑀺𑀧𑀲𑁆𑀲𑀺𑀁 𑀓𑀼𑀫𑀸𑀭𑀁 𑀅𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀅𑀢𑁆𑀣𑁂 𑀅𑀦𑀼𑀲𑀸𑀲𑀢𑀺 ¶ . 𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀧𑀺𑀢𑀼𑀅𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀯𑀺𑀘𑁂𑀬𑁆𑀬 ¶ 𑀯𑀺𑀘𑁂𑀬𑁆𑀬 𑀅𑀢𑁆𑀣𑁂 𑀧𑀦𑀸𑀬𑀢𑀺 𑀜𑀸𑀬𑁂𑀦 [𑀅𑀝𑁆𑀝𑁂 𑀧𑀦𑀸𑀬𑀢𑀺 𑀜𑀸𑀡𑁂𑀦 (𑀲𑁆𑀬𑀸.)]. 𑀯𑀺𑀘𑁂𑀬𑁆𑀬 𑀯𑀺𑀘𑁂𑀬𑁆𑀬 𑀓𑀼𑀫𑀸𑀭𑁄 𑀅𑀢𑁆𑀣𑁂 𑀧𑀦𑀸𑀬𑀢𑀺 𑀜𑀸𑀬𑁂𑀦𑀸𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 ‘𑀯𑀺𑀧𑀲𑁆𑀲𑀻 𑀯𑀺𑀧𑀲𑁆𑀲𑀻’ 𑀢𑁆𑀯𑁂𑀯 𑀲𑀫𑀜𑁆𑀜𑀸 𑀉𑀤𑀧𑀸𑀤𑀺.

𑁪𑁨. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀢𑀬𑁄 𑀧𑀸𑀲𑀸𑀤𑁂 𑀓𑀸𑀭𑀸𑀧𑁂𑀲𑀺, 𑀏𑀓𑀁 𑀯𑀲𑁆𑀲𑀺𑀓𑀁 𑀏𑀓𑀁 𑀳𑁂𑀫𑀦𑁆𑀢𑀺𑀓𑀁 𑀏𑀓𑀁 𑀕𑀺𑀫𑁆𑀳𑀺𑀓𑀁; 𑀧𑀜𑁆𑀘 𑀓𑀸𑀫𑀕𑀼𑀡𑀸𑀦𑀺 𑀉𑀧𑀝𑁆𑀞𑀸𑀧𑁂𑀲𑀺. 𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀯𑀲𑁆𑀲𑀺𑀓𑁂 𑀧𑀸𑀲𑀸𑀤𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 [𑀯𑀲𑁆𑀲𑀺𑀓𑁂 𑀧𑀸𑀲𑀸𑀤𑁂 𑀯𑀲𑁆𑀲𑀺𑀓𑁂] 𑀦𑀺𑀧𑁆𑀧𑀼𑀭𑀺𑀲𑁂𑀳𑀺 𑀢𑀽𑀭𑀺𑀬𑁂𑀳𑀺 𑀧𑀭𑀺𑀘𑀸𑀭𑀬𑀫𑀸𑀦𑁄 𑀦 𑀳𑁂𑀝𑁆𑀞𑀸𑀧𑀸𑀲𑀸𑀤𑀁 𑀑𑀭𑁄𑀳𑀢𑀻’’𑀢𑀺.

𑀧𑀞𑀫𑀪𑀸𑀡𑀯𑀸𑀭𑁄.

𑀚𑀺𑀡𑁆𑀡𑀧𑀼𑀭𑀺𑀲𑁄

𑁪𑁩. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀩𑀳𑀽𑀦𑀁 𑀯𑀲𑁆𑀲𑀸𑀦𑀁 𑀩𑀳𑀽𑀦𑀁 𑀯𑀲𑁆𑀲𑀲𑀢𑀸𑀦𑀁 𑀩𑀳𑀽𑀦𑀁 𑀯𑀲𑁆𑀲𑀲𑀳𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘𑀬𑁄𑀚𑁂𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀪𑀤𑁆𑀤𑀸𑀦𑀺 𑀪𑀤𑁆𑀤𑀸𑀦𑀺 𑀬𑀸𑀦𑀸𑀦𑀺 𑀉𑀬𑁆𑀬𑀸𑀦𑀪𑀽𑀫𑀺𑀁 𑀕𑀘𑁆𑀙𑀸𑀫 𑀲𑀼𑀪𑀽𑀫𑀺𑀤𑀲𑁆𑀲𑀦𑀸𑀬𑀸’𑀢𑀺. ‘𑀏𑀯𑀁, 𑀤𑁂𑀯𑀸’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀣𑀺 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀪𑀤𑁆𑀤𑀸𑀦𑀺 𑀪𑀤𑁆𑀤𑀸𑀦𑀺 𑀬𑀸𑀦𑀸𑀦𑀺 𑀬𑁄𑀚𑁂𑀢𑁆𑀯𑀸 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀯𑁂𑀤𑁂𑀲𑀺 𑁋 ‘𑀬𑀼𑀢𑁆𑀢𑀸𑀦𑀺 𑀔𑁄 𑀢𑁂, 𑀤𑁂𑀯, 𑀪𑀤𑁆𑀤𑀸𑀦𑀺 𑀪𑀤𑁆𑀤𑀸𑀦𑀺 𑀬𑀸𑀦𑀸𑀦𑀺, 𑀬𑀲𑁆𑀲 𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀻’𑀢𑀺 ¶ . 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀪𑀤𑁆𑀤𑀁 𑀪𑀤𑁆𑀤𑀁 𑀬𑀸𑀦𑀁 [𑀪𑀤𑁆𑀭𑀁 𑀬𑀸𑀦𑀁 (𑀲𑁆𑀬𑀸.), 𑀪𑀤𑁆𑀤𑀁 𑀬𑀸𑀦𑀁 (𑀧𑀻.) 𑀘𑀢𑁆𑀢𑀸𑀭𑁄 𑀫𑀸𑀲𑁂 (𑀲𑀻. 𑀧𑀻.)] 𑀅𑀪𑀺𑀭𑀼𑀳𑀺𑀢𑁆𑀯𑀸 𑀪𑀤𑁆𑀤𑁂𑀳𑀺 𑀪𑀤𑁆𑀤𑁂𑀳𑀺 𑀬𑀸𑀦𑁂𑀳𑀺 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀸𑀲𑀺.

𑁪𑁪. ‘‘𑀅𑀤𑁆𑀤𑀲𑀸 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 ¶ 𑀦𑀺𑀬𑁆𑀬𑀦𑁆𑀢𑁄 𑀧𑀼𑀭𑀺𑀲𑀁 𑀚𑀺𑀡𑁆𑀡𑀁 𑀕𑁄𑀧𑀸𑀦𑀲𑀺𑀯𑀗𑁆𑀓𑀁 𑀪𑁄𑀕𑁆𑀕𑀁 [𑀪𑀕𑁆𑀕𑀁 (𑀲𑁆𑀬𑀸.)] 𑀤𑀡𑁆𑀟𑀧𑀭𑀸𑀬𑀦𑀁 𑀧𑀯𑁂𑀥𑀫𑀸𑀦𑀁 𑀕𑀘𑁆𑀙𑀦𑁆𑀢𑀁 𑀆𑀢𑀼𑀭𑀁 ¶ 𑀕𑀢𑀬𑁄𑀩𑁆𑀩𑀦𑀁. 𑀤𑀺𑀲𑁆𑀯𑀸 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘𑀅𑀬𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀧𑀼𑀭𑀺𑀲𑁄 𑀓𑀺𑀁𑀓𑀢𑁄? 𑀓𑁂𑀲𑀸𑀧𑀺𑀲𑁆𑀲 𑀦 𑀬𑀣𑀸 𑀅𑀜𑁆𑀜𑁂𑀲𑀁, 𑀓𑀸𑀬𑁄𑀧𑀺𑀲𑁆𑀲 ¶ 𑀦 𑀬𑀣𑀸 𑀅𑀜𑁆𑀜𑁂𑀲’𑀦𑁆𑀢𑀺. ‘𑀏𑀲𑁄 𑀔𑁄, 𑀤𑁂𑀯, 𑀚𑀺𑀡𑁆𑀡𑁄 𑀦𑀸𑀫𑀸’𑀢𑀺. ‘𑀓𑀺𑀁 𑀧𑀦𑁂𑀲𑁄, 𑀲𑀫𑁆𑀫 𑀲𑀸𑀭𑀣𑀺, 𑀚𑀺𑀡𑁆𑀡𑁄 𑀦𑀸𑀫𑀸’𑀢𑀺? ‘𑀏𑀲𑁄 𑀔𑁄, 𑀤𑁂𑀯, 𑀚𑀺𑀡𑁆𑀡𑁄 𑀦𑀸𑀫. 𑀦 𑀤𑀸𑀦𑀺 𑀢𑁂𑀦 𑀘𑀺𑀭𑀁 𑀚𑀻𑀯𑀺𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀻’𑀢𑀺. ‘𑀓𑀺𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀅𑀳𑀫𑁆𑀧𑀺 𑀚𑀭𑀸𑀥𑀫𑁆𑀫𑁄, 𑀚𑀭𑀁 𑀅𑀦𑀢𑀻𑀢𑁄’𑀢𑀺? ‘𑀢𑁆𑀯𑀜𑁆𑀘, 𑀤𑁂𑀯, 𑀫𑀬𑀜𑁆𑀘𑀫𑁆𑀳 𑀲𑀩𑁆𑀩𑁂 𑀚𑀭𑀸𑀥𑀫𑁆𑀫𑀸, 𑀚𑀭𑀁 𑀅𑀦𑀢𑀻𑀢𑀸’𑀢𑀺. ‘𑀢𑁂𑀦 𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀅𑀮𑀁 𑀤𑀸𑀦𑀚𑁆𑀚 𑀉𑀬𑁆𑀬𑀸𑀦𑀪𑀽𑀫𑀺𑀬𑀸. 𑀇𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀳𑀻’𑀢𑀺. ‘𑀏𑀯𑀁, 𑀤𑁂𑀯𑀸’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀣𑀺 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀲𑀺. 𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀅𑀦𑁆𑀢𑁂𑀧𑀼𑀭𑀁 𑀕𑀢𑁄 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀧𑀚𑁆𑀛𑀸𑀬𑀢𑀺 𑁋 ‘𑀥𑀺𑀭𑀢𑁆𑀣𑀼 𑀓𑀺𑀭, 𑀪𑁄, 𑀚𑀸𑀢𑀺 𑀦𑀸𑀫, 𑀬𑀢𑁆𑀭 𑀳𑀺 𑀦𑀸𑀫 𑀚𑀸𑀢𑀲𑁆𑀲 𑀚𑀭𑀸 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’𑀢𑀺!

𑁪𑁫. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀲𑀸𑀭𑀣𑀺𑀁 𑀆𑀫𑀦𑁆𑀢𑀸𑀧𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘𑀓𑀘𑁆𑀘𑀺, 𑀲𑀫𑁆𑀫 𑀲𑀸𑀭𑀣𑀺, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀪𑀺𑀭𑀫𑀺𑀢𑁆𑀣? 𑀓𑀘𑁆𑀘𑀺, 𑀲𑀫𑁆𑀫 𑀲𑀸𑀭𑀣𑀺, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀢𑁆𑀢𑀫𑀦𑁄 𑀅𑀳𑁄𑀲𑀻’𑀢𑀺? ‘𑀦 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀪𑀺𑀭𑀫𑀺𑀢𑁆𑀣, 𑀦 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀢𑁆𑀢𑀫𑀦𑁄 𑀅𑀳𑁄𑀲𑀻’𑀢𑀺. ‘𑀓𑀺𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀅𑀤𑁆𑀤𑀲 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀦𑁆𑀢𑁄’𑀢𑀺? ‘𑀅𑀤𑁆𑀤𑀲𑀸 ¶ 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀦𑁆𑀢𑁄 𑀧𑀼𑀭𑀺𑀲𑀁 𑀚𑀺𑀡𑁆𑀡𑀁 𑀕𑁄𑀧𑀸𑀦𑀲𑀺𑀯𑀗𑁆𑀓𑀁 𑀪𑁄𑀕𑁆𑀕𑀁 𑀤𑀡𑁆𑀟𑀧𑀭𑀸𑀬𑀦𑀁 𑀧𑀯𑁂𑀥𑀫𑀸𑀦𑀁 𑀕𑀘𑁆𑀙𑀦𑁆𑀢𑀁 𑀆𑀢𑀼𑀭𑀁 𑀕𑀢𑀬𑁄𑀩𑁆𑀩𑀦𑀁. 𑀤𑀺𑀲𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀧𑀼𑀭𑀺𑀲𑁄 𑀓𑀺𑀁𑀓𑀢𑁄, 𑀓𑁂𑀲𑀸𑀧𑀺𑀲𑁆𑀲 𑀦 𑀬𑀣𑀸 𑀅𑀜𑁆𑀜𑁂𑀲𑀁, 𑀓𑀸𑀬𑁄𑀧𑀺𑀲𑁆𑀲 ¶ 𑀦 𑀬𑀣𑀸 𑀅𑀜𑁆𑀜𑁂𑀲’’𑀦𑁆𑀢𑀺? ‘‘𑀏𑀲𑁄 𑀔𑁄, 𑀤𑁂𑀯, 𑀚𑀺𑀡𑁆𑀡𑁄 𑀦𑀸𑀫𑀸’’𑀢𑀺. ‘‘𑀓𑀺𑀁 𑀧𑀦𑁂𑀲𑁄, 𑀲𑀫𑁆𑀫 𑀲𑀸𑀭𑀣𑀺, 𑀚𑀺𑀡𑁆𑀡𑁄 𑀦𑀸𑀫𑀸’’𑀢𑀺? ‘‘𑀏𑀲𑁄 𑀔𑁄, 𑀤𑁂𑀯, 𑀚𑀺𑀡𑁆𑀡𑁄 𑀦𑀸𑀫 𑀦 𑀤𑀸𑀦𑀺 𑀢𑁂𑀦 𑀘𑀺𑀭𑀁 𑀚𑀻𑀯𑀺𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀓𑀺𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀅𑀳𑀫𑁆𑀧𑀺 𑀚𑀭𑀸𑀥𑀫𑁆𑀫𑁄, 𑀚𑀭𑀁 𑀅𑀦𑀢𑀻𑀢𑁄’’𑀢𑀺? ‘‘𑀢𑁆𑀯𑀜𑁆𑀘, 𑀤𑁂𑀯, 𑀫𑀬𑀜𑁆𑀘𑀫𑁆𑀳 𑀲𑀩𑁆𑀩𑁂 𑀚𑀭𑀸𑀥𑀫𑁆𑀫𑀸, 𑀚𑀭𑀁 𑀅𑀦𑀢𑀻𑀢𑀸’’𑀢𑀺.

‘‘‘𑀢𑁂𑀦 𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀅𑀮𑀁 𑀤𑀸𑀦𑀚𑁆𑀚 𑀉𑀬𑁆𑀬𑀸𑀦𑀪𑀽𑀫𑀺𑀬𑀸, 𑀇𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀳𑀻’’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀅𑀳𑀁, 𑀤𑁂𑀯, 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀢𑁄𑀯 ¶ 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀲𑀺𑀁. 𑀲𑁄 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀅𑀦𑁆𑀢𑁂𑀧𑀼𑀭𑀁 𑀕𑀢𑁄 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀧𑀚𑁆𑀛𑀸𑀬𑀢𑀺 𑁋 ‘‘𑀥𑀺𑀭𑀢𑁆𑀣𑀼 𑀓𑀺𑀭 𑀪𑁄 𑀚𑀸𑀢𑀺 𑀦𑀸𑀫, 𑀬𑀢𑁆𑀭 𑀳𑀺 𑀦𑀸𑀫 𑀚𑀸𑀢𑀲𑁆𑀲 𑀚𑀭𑀸 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’’𑀢𑀺.

𑀩𑁆𑀬𑀸𑀥𑀺𑀢𑀧𑀼𑀭𑀺𑀲𑁄

𑁪𑁬. ‘‘𑀅𑀣 ¶ 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀲𑁆𑀲 𑀭𑀜𑁆𑀜𑁄 𑀏𑀢𑀤𑀳𑁄𑀲𑀺 𑁋

‘𑀫𑀸 𑀳𑁂𑀯 𑀔𑁄 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀫𑀸 𑀳𑁂𑀯 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺, 𑀫𑀸 𑀳𑁂𑀯 𑀦𑁂𑀫𑀺𑀢𑁆𑀢𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀘𑁆𑀘𑀁 𑀅𑀲𑁆𑀲 𑀯𑀘𑀦’𑀦𑁆𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀜𑁆𑀘 𑀓𑀸𑀫𑀕𑀼𑀡𑀸𑀦𑀺 𑀉𑀧𑀝𑁆𑀞𑀸𑀧𑁂𑀲𑀺 𑁋 ‘𑀬𑀣𑀸 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀭𑀚𑁆𑀚𑀁 𑀓𑀭𑁂𑀬𑁆𑀬, 𑀬𑀣𑀸 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀦 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬, 𑀬𑀣𑀸 𑀦𑁂𑀫𑀺𑀢𑁆𑀢𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀺𑀘𑁆𑀙𑀸 𑀅𑀲𑁆𑀲 𑀯𑀘𑀦’𑀦𑁆𑀢𑀺.

‘‘𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀩𑀳𑀽𑀦𑀁 𑀯𑀲𑁆𑀲𑀸𑀦𑀁…𑀧𑁂…

𑁪𑁭. ‘‘𑀅𑀤𑁆𑀤𑀲𑀸 ¶ 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀦𑁆𑀢𑁄 𑀧𑀼𑀭𑀺𑀲𑀁 𑀆𑀩𑀸𑀥𑀺𑀓𑀁 ¶ 𑀤𑀼𑀓𑁆𑀔𑀺𑀢𑀁 𑀩𑀸𑀴𑁆𑀳𑀕𑀺𑀮𑀸𑀦𑀁 𑀲𑀓𑁂 𑀫𑀼𑀢𑁆𑀢𑀓𑀭𑀻𑀲𑁂 𑀧𑀮𑀺𑀧𑀦𑁆𑀦𑀁 𑀲𑁂𑀫𑀸𑀦𑀁 [𑀲𑀬𑀫𑀸𑀦𑀁 (𑀲𑁆𑀬𑀸. 𑀓.)] 𑀅𑀜𑁆𑀜𑁂𑀳𑀺 𑀯𑀼𑀝𑁆𑀞𑀸𑀧𑀺𑀬𑀫𑀸𑀦𑀁 𑀅𑀜𑁆𑀜𑁂𑀳𑀺 𑀲𑀁𑀯𑁂𑀲𑀺𑀬𑀫𑀸𑀦𑀁. 𑀤𑀺𑀲𑁆𑀯𑀸 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘𑀅𑀬𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀧𑀼𑀭𑀺𑀲𑁄 𑀓𑀺𑀁𑀓𑀢𑁄? 𑀅𑀓𑁆𑀔𑀻𑀦𑀺𑀧𑀺𑀲𑁆𑀲 𑀦 𑀬𑀣𑀸 𑀅𑀜𑁆𑀜𑁂𑀲𑀁, 𑀲𑀭𑁄𑀧𑀺𑀲𑁆𑀲 [𑀲𑀺𑀭𑁄𑀧𑀺𑀲𑁆𑀲 (𑀲𑁆𑀬𑀸.)] 𑀦 𑀬𑀣𑀸 𑀅𑀜𑁆𑀜𑁂𑀲’𑀦𑁆𑀢𑀺? ‘𑀏𑀲𑁄 𑀔𑁄, 𑀤𑁂𑀯, 𑀩𑁆𑀬𑀸𑀥𑀺𑀢𑁄 𑀦𑀸𑀫𑀸’𑀢𑀺. ‘𑀓𑀺𑀁 𑀧𑀦𑁂𑀲𑁄, 𑀲𑀫𑁆𑀫 𑀲𑀸𑀭𑀣𑀺, 𑀩𑁆𑀬𑀸𑀥𑀺𑀢𑁄 𑀦𑀸𑀫𑀸’𑀢𑀺? ‘𑀏𑀲𑁄 𑀔𑁄, 𑀤𑁂𑀯, 𑀩𑁆𑀬𑀸𑀥𑀺𑀢𑁄 𑀦𑀸𑀫 𑀅𑀧𑁆𑀧𑁂𑀯 𑀦𑀸𑀫 𑀢𑀫𑁆𑀳𑀸 𑀆𑀩𑀸𑀥𑀸 𑀯𑀼𑀝𑁆𑀞𑀳𑁂𑀬𑁆𑀬𑀸’𑀢𑀺. ‘𑀓𑀺𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀅𑀳𑀫𑁆𑀧𑀺 𑀩𑁆𑀬𑀸𑀥𑀺𑀥𑀫𑁆𑀫𑁄, 𑀩𑁆𑀬𑀸𑀥𑀺𑀁 𑀅𑀦𑀢𑀻𑀢𑁄’𑀢𑀺? ‘𑀢𑁆𑀯𑀜𑁆𑀘, 𑀤𑁂𑀯, 𑀫𑀬𑀜𑁆𑀘𑀫𑁆𑀳 𑀲𑀩𑁆𑀩𑁂 𑀩𑁆𑀬𑀸𑀥𑀺𑀥𑀫𑁆𑀫𑀸, 𑀩𑁆𑀬𑀸𑀥𑀺𑀁 𑀅𑀦𑀢𑀻𑀢𑀸’𑀢𑀺. ‘𑀢𑁂𑀦 𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀅𑀮𑀁 𑀤𑀸𑀦𑀚𑁆𑀚 𑀉𑀬𑁆𑀬𑀸𑀦𑀪𑀽𑀫𑀺𑀬𑀸, 𑀇𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀳𑀻’𑀢𑀺. ‘𑀏𑀯𑀁 𑀤𑁂𑀯𑀸’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀣𑀺 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀲𑀺. 𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀅𑀦𑁆𑀢𑁂𑀧𑀼𑀭𑀁 𑀕𑀢𑁄 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀧𑀚𑁆𑀛𑀸𑀬𑀢𑀺 𑁋 ‘𑀥𑀺𑀭𑀢𑁆𑀣𑀼 𑀓𑀺𑀭 𑀪𑁄 𑀚𑀸𑀢𑀺 𑀦𑀸𑀫, 𑀬𑀢𑁆𑀭 𑀳𑀺 𑀦𑀸𑀫 𑀚𑀸𑀢𑀲𑁆𑀲 𑀚𑀭𑀸 𑀧𑀜𑁆𑀜𑀸𑀬𑀺𑀲𑁆𑀲𑀢𑀺, 𑀩𑁆𑀬𑀸𑀥𑀺 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’𑀢𑀺.

𑁪𑁮. ‘‘𑀅𑀣 ¶ 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀲𑀸𑀭𑀣𑀺𑀁 𑀆𑀫𑀦𑁆𑀢𑀸𑀧𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘𑀓𑀘𑁆𑀘𑀺, 𑀲𑀫𑁆𑀫 𑀲𑀸𑀭𑀣𑀺, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀪𑀺𑀭𑀫𑀺𑀢𑁆𑀣, 𑀓𑀘𑁆𑀘𑀺, 𑀲𑀫𑁆𑀫 ¶ 𑀲𑀸𑀭𑀣𑀺, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀢𑁆𑀢𑀫𑀦𑁄 𑀅𑀳𑁄𑀲𑀻’𑀢𑀺? ‘𑀦 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀪𑀺𑀭𑀫𑀺𑀢𑁆𑀣, 𑀦 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀢𑁆𑀢𑀫𑀦𑁄 𑀅𑀳𑁄𑀲𑀻’𑀢𑀺. ‘𑀓𑀺𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀅𑀤𑁆𑀤𑀲 𑀓𑀼𑀫𑀸𑀭𑁄 ¶ 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀦𑁆𑀢𑁄’𑀢𑀺? ‘𑀅𑀤𑁆𑀤𑀲𑀸 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀦𑁆𑀢𑁄 𑀧𑀼𑀭𑀺𑀲𑀁 𑀆𑀩𑀸𑀥𑀺𑀓𑀁 𑀤𑀼𑀓𑁆𑀔𑀺𑀢𑀁 𑀩𑀸𑀴𑁆𑀳𑀕𑀺𑀮𑀸𑀦𑀁 𑀲𑀓𑁂 𑀫𑀼𑀢𑁆𑀢𑀓𑀭𑀻𑀲𑁂 ¶ 𑀧𑀮𑀺𑀧𑀦𑁆𑀦𑀁 𑀲𑁂𑀫𑀸𑀦𑀁 𑀅𑀜𑁆𑀜𑁂𑀳𑀺 𑀯𑀼𑀝𑁆𑀞𑀸𑀧𑀺𑀬𑀫𑀸𑀦𑀁 𑀅𑀜𑁆𑀜𑁂𑀳𑀺 𑀲𑀁𑀯𑁂𑀲𑀺𑀬𑀫𑀸𑀦𑀁. 𑀤𑀺𑀲𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘‘𑀅𑀬𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀧𑀼𑀭𑀺𑀲𑁄 𑀓𑀺𑀁𑀓𑀢𑁄, 𑀅𑀓𑁆𑀔𑀻𑀦𑀺𑀧𑀺𑀲𑁆𑀲 𑀦 𑀬𑀣𑀸 𑀅𑀜𑁆𑀜𑁂𑀲𑀁, 𑀲𑀭𑁄𑀧𑀺𑀲𑁆𑀲 𑀦 𑀬𑀣𑀸 𑀅𑀜𑁆𑀜𑁂𑀲’’𑀦𑁆𑀢𑀺? ‘‘𑀏𑀲𑁄 𑀔𑁄, 𑀤𑁂𑀯, 𑀩𑁆𑀬𑀸𑀥𑀺𑀢𑁄 𑀦𑀸𑀫𑀸’’𑀢𑀺. ‘‘𑀓𑀺𑀁 𑀧𑀦𑁂𑀲𑁄, 𑀲𑀫𑁆𑀫 𑀲𑀸𑀭𑀣𑀺, 𑀩𑁆𑀬𑀸𑀥𑀺𑀢𑁄 𑀦𑀸𑀫𑀸’’𑀢𑀺? ‘‘𑀏𑀲𑁄 𑀔𑁄, 𑀤𑁂𑀯, 𑀩𑁆𑀬𑀸𑀥𑀺𑀢𑁄 𑀦𑀸𑀫 𑀅𑀧𑁆𑀧𑁂𑀯 𑀦𑀸𑀫 𑀢𑀫𑁆𑀳𑀸 𑀆𑀩𑀸𑀥𑀸 𑀯𑀼𑀝𑁆𑀞𑀳𑁂𑀬𑁆𑀬𑀸’’𑀢𑀺. ‘‘𑀓𑀺𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀅𑀳𑀫𑁆𑀧𑀺 𑀩𑁆𑀬𑀸𑀥𑀺𑀥𑀫𑁆𑀫𑁄, 𑀩𑁆𑀬𑀸𑀥𑀺𑀁 𑀅𑀦𑀢𑀻𑀢𑁄’’𑀢𑀺? ‘‘𑀢𑁆𑀯𑀜𑁆𑀘, 𑀤𑁂𑀯, 𑀫𑀬𑀜𑁆𑀘𑀫𑁆𑀳 𑀲𑀩𑁆𑀩𑁂 𑀩𑁆𑀬𑀸𑀥𑀺𑀥𑀫𑁆𑀫𑀸, 𑀩𑁆𑀬𑀸𑀥𑀺𑀁 𑀅𑀦𑀢𑀻𑀢𑀸’’𑀢𑀺. ‘‘𑀢𑁂𑀦 𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀅𑀮𑀁 𑀤𑀸𑀦𑀚𑁆𑀚 𑀉𑀬𑁆𑀬𑀸𑀦𑀪𑀽𑀫𑀺𑀬𑀸, 𑀇𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀳𑀻’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀅𑀳𑀁, 𑀤𑁂𑀯, 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀲𑀺𑀁. 𑀲𑁄 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀅𑀦𑁆𑀢𑁂𑀧𑀼𑀭𑀁 𑀕𑀢𑁄 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀧𑀚𑁆𑀛𑀸𑀬𑀢𑀺 𑁋 ‘‘‘𑀥𑀺𑀭𑀢𑁆𑀣𑀼 𑀓𑀺𑀭 𑀪𑁄 𑀚𑀸𑀢𑀺 𑀦𑀸𑀫, 𑀬𑀢𑁆𑀭 𑀳𑀺 𑀦𑀸𑀫 𑀚𑀸𑀢𑀲𑁆𑀲 𑀚𑀭𑀸 𑀧𑀜𑁆𑀜𑀸𑀬𑀺𑀲𑁆𑀲𑀢𑀺, 𑀩𑁆𑀬𑀸𑀥𑀺 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’’𑀢𑀺.

𑀓𑀸𑀮𑀗𑁆𑀓𑀢𑀧𑀼𑀭𑀺𑀲𑁄

𑁪𑁯. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀲𑁆𑀲 𑀭𑀜𑁆𑀜𑁄 𑀏𑀢𑀤𑀳𑁄𑀲𑀺 𑁋 ‘𑀫𑀸 𑀳𑁂𑀯 𑀔𑁄 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀫𑀸 𑀳𑁂𑀯 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺, 𑀫𑀸 𑀳𑁂𑀯 𑀦𑁂𑀫𑀺𑀢𑁆𑀢𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀘𑁆𑀘𑀁 𑀅𑀲𑁆𑀲 𑀯𑀘𑀦’𑀦𑁆𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀜𑁆𑀘 𑀓𑀸𑀫𑀕𑀼𑀡𑀸𑀦𑀺 𑀉𑀧𑀝𑁆𑀞𑀸𑀧𑁂𑀲𑀺 𑁋 ‘𑀬𑀣𑀸 𑀯𑀺𑀧𑀲𑁆𑀲𑀻 ¶ 𑀓𑀼𑀫𑀸𑀭𑁄 𑀭𑀚𑁆𑀚𑀁 𑀓𑀭𑁂𑀬𑁆𑀬, 𑀬𑀣𑀸 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀦 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬, 𑀬𑀣𑀸 𑀦𑁂𑀫𑀺𑀢𑁆𑀢𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀺𑀘𑁆𑀙𑀸 𑀅𑀲𑁆𑀲 𑀯𑀘𑀦’𑀦𑁆𑀢𑀺.

‘‘𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀩𑀳𑀽𑀦𑀁 𑀯𑀲𑁆𑀲𑀸𑀦𑀁…𑀧𑁂…

𑁫𑁦. ‘‘𑀅𑀤𑁆𑀤𑀲𑀸 ¶ 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀦𑁆𑀢𑁄 𑀫𑀳𑀸𑀚𑀦𑀓𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀁 ¶ 𑀦𑀸𑀦𑀸𑀭𑀢𑁆𑀢𑀸𑀦𑀜𑁆𑀘 𑀤𑀼𑀲𑁆𑀲𑀸𑀦𑀁 𑀯𑀺𑀮𑀸𑀢𑀁 𑀓𑀬𑀺𑀭𑀫𑀸𑀦𑀁. 𑀤𑀺𑀲𑁆𑀯𑀸 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘𑀓𑀺𑀁 𑀦𑀼 𑀔𑁄, 𑀲𑁄, 𑀲𑀫𑁆𑀫 𑀲𑀸𑀭𑀣𑀺, 𑀫𑀳𑀸𑀚𑀦𑀓𑀸𑀬𑁄 𑀲𑀦𑁆𑀦𑀺𑀧𑀢𑀺𑀢𑁄 𑀦𑀸𑀦𑀸𑀭𑀢𑁆𑀢𑀸𑀦𑀜𑁆𑀘 𑀤𑀼𑀲𑁆𑀲𑀸𑀦𑀁 𑀯𑀺𑀮𑀸𑀢𑀁 𑀓𑀬𑀺𑀭𑀢𑀻’𑀢𑀺? ‘𑀏𑀲𑁄 ¶ 𑀔𑁄, 𑀤𑁂𑀯, 𑀓𑀸𑀮𑀗𑁆𑀓𑀢𑁄 𑀦𑀸𑀫𑀸’𑀢𑀺. ‘𑀢𑁂𑀦 𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀬𑁂𑀦 𑀲𑁄 𑀓𑀸𑀮𑀗𑁆𑀓𑀢𑁄 𑀢𑁂𑀦 𑀭𑀣𑀁 𑀧𑁂𑀲𑁂𑀳𑀻’𑀢𑀺. ‘𑀏𑀯𑀁, 𑀤𑁂𑀯𑀸’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀣𑀺 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀲𑁄 𑀓𑀸𑀮𑀗𑁆𑀓𑀢𑁄 𑀢𑁂𑀦 𑀭𑀣𑀁 𑀧𑁂𑀲𑁂𑀲𑀺. 𑀅𑀤𑁆𑀤𑀲𑀸 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀧𑁂𑀢𑀁 𑀓𑀸𑀮𑀗𑁆𑀓𑀢𑀁, 𑀤𑀺𑀲𑁆𑀯𑀸 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘𑀓𑀺𑀁 𑀧𑀦𑀸𑀬𑀁, 𑀲𑀫𑁆𑀫 𑀲𑀸𑀭𑀣𑀺, 𑀓𑀸𑀮𑀗𑁆𑀓𑀢𑁄 𑀦𑀸𑀫𑀸’𑀢𑀺? ‘𑀏𑀲𑁄 𑀔𑁄, 𑀤𑁂𑀯, 𑀓𑀸𑀮𑀗𑁆𑀓𑀢𑁄 𑀦𑀸𑀫. 𑀦 𑀤𑀸𑀦𑀺 𑀢𑀁 𑀤𑀓𑁆𑀔𑀦𑁆𑀢𑀺 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀅𑀜𑁆𑀜𑁂 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸, 𑀲𑁄𑀧𑀺 𑀦 𑀤𑀓𑁆𑀔𑀺𑀲𑁆𑀲𑀢𑀺 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀅𑀜𑁆𑀜𑁂 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑁂’𑀢𑀺. ‘𑀓𑀺𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀅𑀳𑀫𑁆𑀧𑀺 𑀫𑀭𑀡𑀥𑀫𑁆𑀫𑁄 𑀫𑀭𑀡𑀁 𑀅𑀦𑀢𑀻𑀢𑁄; 𑀫𑀫𑁆𑀧𑀺 𑀦 𑀤𑀓𑁆𑀔𑀦𑁆𑀢𑀺 𑀤𑁂𑀯𑁄 𑀯𑀸 𑀤𑁂𑀯𑀻 𑀯𑀸 𑀅𑀜𑁆𑀜𑁂 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸; 𑀅𑀳𑀫𑁆𑀧𑀺 𑀦 𑀤𑀓𑁆𑀔𑀺𑀲𑁆𑀲𑀸𑀫𑀺 𑀤𑁂𑀯𑀁 𑀯𑀸 𑀤𑁂𑀯𑀺𑀁 𑀯𑀸 𑀅𑀜𑁆𑀜𑁂 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑁂’𑀢𑀺? ‘𑀢𑁆𑀯𑀜𑁆𑀘, 𑀤𑁂𑀯, 𑀫𑀬𑀜𑁆𑀘𑀫𑁆𑀳 𑀲𑀩𑁆𑀩𑁂 𑀫𑀭𑀡𑀥𑀫𑁆𑀫𑀸 𑀫𑀭𑀡𑀁 𑀅𑀦𑀢𑀻𑀢𑀸; 𑀢𑀫𑁆𑀧𑀺 𑀦 𑀤𑀓𑁆𑀔𑀦𑁆𑀢𑀺 𑀤𑁂𑀯𑁄 𑀯𑀸 𑀤𑁂𑀯𑀻 𑀯𑀸 𑀅𑀜𑁆𑀜𑁂 ¶ 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸; 𑀢𑁆𑀯𑀫𑁆𑀧𑀺 𑀦 𑀤𑀓𑁆𑀔𑀺𑀲𑁆𑀲𑀲𑀺 𑀤𑁂𑀯𑀁 𑀯𑀸 𑀤𑁂𑀯𑀺𑀁 𑀯𑀸 𑀅𑀜𑁆𑀜𑁂 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑁂’𑀢𑀺. ‘𑀢𑁂𑀦 𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀅𑀮𑀁 𑀤𑀸𑀦𑀚𑁆𑀚 𑀉𑀬𑁆𑀬𑀸𑀦𑀪𑀽𑀫𑀺𑀬𑀸, 𑀇𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀳𑀻’𑀢𑀺. ‘𑀏𑀯𑀁, 𑀤𑁂𑀯𑀸’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀣𑀺 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀲𑀺. 𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀅𑀦𑁆𑀢𑁂𑀧𑀼𑀭𑀁 𑀕𑀢𑁄 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀧𑀚𑁆𑀛𑀸𑀬𑀢𑀺 𑁋 ‘𑀥𑀺𑀭𑀢𑁆𑀣𑀼 𑀓𑀺𑀭, 𑀪𑁄, 𑀚𑀸𑀢𑀺 𑀦𑀸𑀫, 𑀬𑀢𑁆𑀭 𑀳𑀺 𑀦𑀸𑀫 𑀚𑀸𑀢𑀲𑁆𑀲 𑀚𑀭𑀸 𑀧𑀜𑁆𑀜𑀸𑀬𑀺𑀲𑁆𑀲𑀢𑀺, 𑀩𑁆𑀬𑀸𑀥𑀺 𑀧𑀜𑁆𑀜𑀸𑀬𑀺𑀲𑁆𑀲𑀢𑀺, 𑀫𑀭𑀡𑀁 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’𑀢𑀺.

𑁫𑁧. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀲𑀸𑀭𑀣𑀺𑀁 𑀆𑀫𑀦𑁆𑀢𑀸𑀧𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘𑀓𑀘𑁆𑀘𑀺, 𑀲𑀫𑁆𑀫 𑀲𑀸𑀭𑀣𑀺, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀪𑀺𑀭𑀫𑀺𑀢𑁆𑀣, 𑀓𑀘𑁆𑀘𑀺, 𑀲𑀫𑁆𑀫 𑀲𑀸𑀭𑀣𑀺, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀢𑁆𑀢𑀫𑀦𑁄 𑀅𑀳𑁄𑀲𑀻’𑀢𑀺? ‘𑀦 ¶ 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀪𑀺𑀭𑀫𑀺𑀢𑁆𑀣, 𑀦 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀬𑀸 𑀅𑀢𑁆𑀢𑀫𑀦𑁄 𑀅𑀳𑁄𑀲𑀻’𑀢𑀺. ‘𑀓𑀺𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀅𑀤𑁆𑀤𑀲 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀦𑁆𑀢𑁄’𑀢𑀺? ‘𑀅𑀤𑁆𑀤𑀲𑀸 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀦𑁆𑀢𑁄 𑀫𑀳𑀸𑀚𑀦𑀓𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀁 𑀦𑀸𑀦𑀸𑀭𑀢𑁆𑀢𑀸𑀦𑀜𑁆𑀘 𑀤𑀼𑀲𑁆𑀲𑀸𑀦𑀁 𑀯𑀺𑀮𑀸𑀢𑀁 𑀓𑀬𑀺𑀭𑀫𑀸𑀦𑀁. 𑀤𑀺𑀲𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄, 𑀲𑁄 ¶ , 𑀲𑀫𑁆𑀫 𑀲𑀸𑀭𑀣𑀺, 𑀫𑀳𑀸𑀚𑀦𑀓𑀸𑀬𑁄 𑀲𑀦𑁆𑀦𑀺𑀧𑀢𑀺𑀢𑁄 𑀦𑀸𑀦𑀸𑀭𑀢𑁆𑀢𑀸𑀦𑀜𑁆𑀘 𑀤𑀼𑀲𑁆𑀲𑀸𑀦𑀁 𑀯𑀺𑀮𑀸𑀢𑀁 𑀓𑀬𑀺𑀭𑀢𑀻’’𑀢𑀺? ‘‘𑀏𑀲𑁄 𑀔𑁄, 𑀤𑁂𑀯, 𑀓𑀸𑀮𑀗𑁆𑀓𑀢𑁄 𑀦𑀸𑀫𑀸’’𑀢𑀺. ‘‘𑀢𑁂𑀦 𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀬𑁂𑀦 𑀲𑁄 𑀓𑀸𑀮𑀗𑁆𑀓𑀢𑁄 𑀢𑁂𑀦 𑀭𑀣𑀁 𑀧𑁂𑀲𑁂𑀳𑀻’’𑀢𑀺. ‘‘𑀏𑀯𑀁 𑀤𑁂𑀯𑀸’’𑀢𑀺 𑀔𑁄 𑀅𑀳𑀁, 𑀤𑁂𑀯, 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀲𑁄 ¶ 𑀓𑀸𑀮𑀗𑁆𑀓𑀢𑁄 𑀢𑁂𑀦 𑀭𑀣𑀁 𑀧𑁂𑀲𑁂𑀲𑀺𑀁. 𑀅𑀤𑁆𑀤𑀲𑀸 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀧𑁂𑀢𑀁 𑀓𑀸𑀮𑀗𑁆𑀓𑀢𑀁, 𑀤𑀺𑀲𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀧𑀦𑀸𑀬𑀁, 𑀲𑀫𑁆𑀫 𑀲𑀸𑀭𑀣𑀺, 𑀓𑀸𑀮𑀗𑁆𑀓𑀢𑁄 𑀦𑀸𑀫𑀸’’𑀢𑀺 ¶ ? ‘‘𑀏𑀲𑁄 𑀔𑁄, 𑀤𑁂𑀯, 𑀓𑀸𑀮𑀗𑁆𑀓𑀢𑁄 𑀦𑀸𑀫. 𑀦 𑀤𑀸𑀦𑀺 𑀢𑀁 𑀤𑀓𑁆𑀔𑀦𑁆𑀢𑀺 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀅𑀜𑁆𑀜𑁂 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸, 𑀲𑁄𑀧𑀺 𑀦 𑀤𑀓𑁆𑀔𑀺𑀲𑁆𑀲𑀢𑀺 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀅𑀜𑁆𑀜𑁂 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑁂’’𑀢𑀺. ‘‘𑀓𑀺𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀅𑀳𑀫𑁆𑀧𑀺 𑀫𑀭𑀡𑀥𑀫𑁆𑀫𑁄 𑀫𑀭𑀡𑀁 𑀅𑀦𑀢𑀻𑀢𑁄; 𑀫𑀫𑁆𑀧𑀺 𑀦 𑀤𑀓𑁆𑀔𑀦𑁆𑀢𑀺 𑀤𑁂𑀯𑁄 𑀯𑀸 𑀤𑁂𑀯𑀻 𑀯𑀸 𑀅𑀜𑁆𑀜𑁂 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸; 𑀅𑀳𑀫𑁆𑀧𑀺 𑀦 𑀤𑀓𑁆𑀔𑀺𑀲𑁆𑀲𑀸𑀫𑀺 𑀤𑁂𑀯𑀁 𑀯𑀸 𑀤𑁂𑀯𑀺𑀁 𑀯𑀸 𑀅𑀜𑁆𑀜𑁂 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑁂’’𑀢𑀺? ‘‘𑀢𑁆𑀯𑀜𑁆𑀘, 𑀤𑁂𑀯, 𑀫𑀬𑀜𑁆𑀘𑀫𑁆𑀳 𑀲𑀩𑁆𑀩𑁂 𑀫𑀭𑀡𑀥𑀫𑁆𑀫𑀸 𑀫𑀭𑀡𑀁 𑀅𑀦𑀢𑀻𑀢𑀸; 𑀢𑀫𑁆𑀧𑀺 𑀦 𑀤𑀓𑁆𑀔𑀦𑁆𑀢𑀺 𑀤𑁂𑀯𑁄 𑀯𑀸 𑀤𑁂𑀯𑀻 𑀯𑀸 𑀅𑀜𑁆𑀜𑁂 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸, 𑀢𑁆𑀯𑀫𑁆𑀧𑀺 𑀦 𑀤𑀓𑁆𑀔𑀺𑀲𑁆𑀲𑀲𑀺 𑀤𑁂𑀯𑀁 𑀯𑀸 𑀤𑁂𑀯𑀺𑀁 𑀯𑀸 𑀅𑀜𑁆𑀜𑁂 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑁂’’𑀢𑀺. ‘‘𑀢𑁂𑀦 𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀅𑀮𑀁 𑀤𑀸𑀦𑀚𑁆𑀚 𑀉𑀬𑁆𑀬𑀸𑀦𑀪𑀽𑀫𑀺𑀬𑀸, 𑀇𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀳𑀻’𑀢𑀺. ‘‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄 𑀅𑀳𑀁, 𑀤𑁂𑀯, 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀲𑀺𑀁. 𑀲𑁄 𑀔𑁄, 𑀤𑁂𑀯, 𑀓𑀼𑀫𑀸𑀭𑁄 𑀅𑀦𑁆𑀢𑁂𑀧𑀼𑀭𑀁 𑀕𑀢𑁄 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀧𑀚𑁆𑀛𑀸𑀬𑀢𑀺 𑁋 ‘‘𑀥𑀺𑀭𑀢𑁆𑀣𑀼 𑀓𑀺𑀭 𑀪𑁄 𑀚𑀸𑀢𑀺 𑀦𑀸𑀫, 𑀬𑀢𑁆𑀭 𑀳𑀺 𑀦𑀸𑀫 𑀚𑀸𑀢𑀲𑁆𑀲 𑀚𑀭𑀸 𑀧𑀜𑁆𑀜𑀸𑀬𑀺𑀲𑁆𑀲𑀢𑀺, 𑀩𑁆𑀬𑀸𑀥𑀺 𑀧𑀜𑁆𑀜𑀸𑀬𑀺𑀲𑁆𑀲𑀢𑀺, 𑀫𑀭𑀡𑀁 𑀧𑀜𑁆𑀜𑀸𑀬𑀺𑀲𑁆𑀲𑀢𑀻’’’𑀢𑀺.

𑀧𑀩𑁆𑀩𑀚𑀺𑀢𑁄

𑁫𑁨. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀲𑁆𑀲 𑀭𑀜𑁆𑀜𑁄 𑀏𑀢𑀤𑀳𑁄𑀲𑀺 𑁋 ‘𑀫𑀸 𑀳𑁂𑀯 𑀔𑁄 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀦 𑀭𑀚𑁆𑀚𑀁 𑀓𑀸𑀭𑁂𑀲𑀺, 𑀫𑀸 𑀳𑁂𑀯 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺, 𑀫𑀸 ¶ 𑀳𑁂𑀯 𑀦𑁂𑀫𑀺𑀢𑁆𑀢𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀘𑁆𑀘𑀁 𑀅𑀲𑁆𑀲 𑀯𑀘𑀦’𑀦𑁆𑀢𑀺. 𑀅𑀣 ¶ 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀸 𑀭𑀸𑀚𑀸 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀧𑀜𑁆𑀘 𑀓𑀸𑀫𑀕𑀼𑀡𑀸𑀦𑀺 𑀉𑀧𑀝𑁆𑀞𑀸𑀧𑁂𑀲𑀺 𑁋 ‘𑀬𑀣𑀸 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀭𑀚𑁆𑀚𑀁 𑀓𑀭𑁂𑀬𑁆𑀬, 𑀬𑀣𑀸 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀦 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬, 𑀬𑀣𑀸 𑀦𑁂𑀫𑀺𑀢𑁆𑀢𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀺𑀘𑁆𑀙𑀸 𑀅𑀲𑁆𑀲 𑀯𑀘𑀦’𑀦𑁆𑀢𑀺.

‘‘𑀢𑀢𑁆𑀭 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀩𑀳𑀽𑀦𑀁 𑀯𑀲𑁆𑀲𑀸𑀦𑀁 ¶ 𑀩𑀳𑀽𑀦𑀁 𑀯𑀲𑁆𑀲𑀲𑀢𑀸𑀦𑀁 𑀩𑀳𑀽𑀦𑀁 𑀯𑀲𑁆𑀲𑀲𑀳𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘𑀬𑁄𑀚𑁂𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀪𑀤𑁆𑀤𑀸𑀦𑀺 𑀪𑀤𑁆𑀤𑀸𑀦𑀺 𑀬𑀸𑀦𑀸𑀦𑀺, 𑀉𑀬𑁆𑀬𑀸𑀦𑀪𑀽𑀫𑀺𑀁 𑀕𑀘𑁆𑀙𑀸𑀫 𑀲𑀼𑀪𑀽𑀫𑀺𑀤𑀲𑁆𑀲𑀦𑀸𑀬𑀸’𑀢𑀺. ‘𑀏𑀯𑀁, 𑀤𑁂𑀯𑀸’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀣𑀺 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀪𑀤𑁆𑀤𑀸𑀦𑀺 𑀪𑀤𑁆𑀤𑀸𑀦𑀺 𑀬𑀸𑀦𑀸𑀦𑀺 𑀬𑁄𑀚𑁂𑀢𑁆𑀯𑀸 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀯𑁂𑀤𑁂𑀲𑀺 𑁋 ‘𑀬𑀼𑀢𑁆𑀢𑀸𑀦𑀺 𑀔𑁄 𑀢𑁂, 𑀤𑁂𑀯, 𑀪𑀤𑁆𑀤𑀸𑀦𑀺 𑀪𑀤𑁆𑀤𑀸𑀦𑀺 𑀬𑀸𑀦𑀸𑀦𑀺, 𑀬𑀲𑁆𑀲 𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀻’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀪𑀤𑁆𑀤𑀁 𑀪𑀤𑁆𑀤𑀁 𑀬𑀸𑀦𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀪𑀤𑁆𑀤𑁂𑀳𑀺 𑀪𑀤𑁆𑀤𑁂𑀳𑀺 𑀬𑀸𑀦𑁂𑀳𑀺 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀸𑀲𑀺.

𑁫𑁩. ‘‘𑀅𑀤𑁆𑀤𑀲𑀸 ¶ 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀦𑁆𑀢𑁄 𑀧𑀼𑀭𑀺𑀲𑀁 𑀪𑀡𑁆𑀟𑀼𑀁 𑀧𑀩𑁆𑀩𑀚𑀺𑀢𑀁 𑀓𑀸𑀲𑀸𑀬𑀯𑀲𑀦𑀁. 𑀤𑀺𑀲𑁆𑀯𑀸 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘𑀅𑀬𑀁 𑀧𑀦, 𑀲𑀫𑁆𑀫 𑀲𑀸𑀭𑀣𑀺, 𑀧𑀼𑀭𑀺𑀲𑁄 𑀓𑀺𑀁𑀓𑀢𑁄? 𑀲𑀻𑀲𑀁𑀧𑀺𑀲𑁆𑀲 𑀦 𑀬𑀣𑀸 𑀅𑀜𑁆𑀜𑁂𑀲𑀁, 𑀯𑀢𑁆𑀣𑀸𑀦𑀺𑀧𑀺𑀲𑁆𑀲 𑀦 𑀬𑀣𑀸 𑀅𑀜𑁆𑀜𑁂𑀲’𑀦𑁆𑀢𑀺? ‘𑀏𑀲𑁄 𑀔𑁄, 𑀤𑁂𑀯, 𑀧𑀩𑁆𑀩𑀚𑀺𑀢𑁄 𑀦𑀸𑀫𑀸’𑀢𑀺. ‘𑀓𑀺𑀁 𑀧𑀦𑁂𑀲𑁄, 𑀲𑀫𑁆𑀫 𑀲𑀸𑀭𑀣𑀺, 𑀧𑀩𑁆𑀩𑀚𑀺𑀢𑁄 𑀦𑀸𑀫𑀸’𑀢𑀺? ‘𑀏𑀲𑁄 𑀔𑁄, 𑀤𑁂𑀯, 𑀧𑀩𑁆𑀩𑀚𑀺𑀢𑁄 𑀦𑀸𑀫 𑀲𑀸𑀥𑀼 𑀥𑀫𑁆𑀫𑀘𑀭𑀺𑀬𑀸 𑀲𑀸𑀥𑀼 𑀲𑀫𑀘𑀭𑀺𑀬𑀸 [𑀲𑀫𑁆𑀫𑀘𑀭𑀺𑀬𑀸 (𑀓.)] 𑀲𑀸𑀥𑀼 𑀓𑀼𑀲𑀮𑀓𑀺𑀭𑀺𑀬𑀸 [𑀓𑀼𑀲𑀮𑀘𑀭𑀺𑀬𑀸 (𑀲𑁆𑀬𑀸.)] 𑀲𑀸𑀥𑀼 𑀧𑀼𑀜𑁆𑀜𑀓𑀺𑀭𑀺𑀬𑀸 𑀲𑀸𑀥𑀼 𑀅𑀯𑀺𑀳𑀺𑀁𑀲𑀸 𑀲𑀸𑀥𑀼 𑀪𑀽𑀢𑀸𑀦𑀼𑀓𑀫𑁆𑀧𑀸’𑀢𑀺. ‘𑀲𑀸𑀥𑀼 𑀔𑁄 𑀲𑁄, 𑀲𑀫𑁆𑀫 𑀲𑀸𑀭𑀣𑀺, 𑀧𑀩𑁆𑀩𑀚𑀺𑀢𑁄 𑀦𑀸𑀫, 𑀲𑀸𑀥𑀼 ¶ 𑀥𑀫𑁆𑀫𑀘𑀭𑀺𑀬𑀸 𑀲𑀸𑀥𑀼 𑀲𑀫𑀘𑀭𑀺𑀬𑀸 𑀲𑀸𑀥𑀼 ¶ 𑀓𑀼𑀲𑀮𑀓𑀺𑀭𑀺𑀬𑀸 𑀲𑀸𑀥𑀼 𑀧𑀼𑀜𑁆𑀜𑀓𑀺𑀭𑀺𑀬𑀸 𑀲𑀸𑀥𑀼 𑀅𑀯𑀺𑀳𑀺𑀁𑀲𑀸 𑀲𑀸𑀥𑀼 𑀪𑀽𑀢𑀸𑀦𑀼𑀓𑀫𑁆𑀧𑀸. 𑀢𑁂𑀦 𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀬𑁂𑀦 𑀲𑁄 𑀧𑀩𑁆𑀩𑀚𑀺𑀢𑁄 𑀢𑁂𑀦 𑀭𑀣𑀁 𑀧𑁂𑀲𑁂𑀳𑀻’𑀢𑀺. ‘𑀏𑀯𑀁, 𑀤𑁂𑀯𑀸’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀣𑀺 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀲𑁄 𑀧𑀩𑁆𑀩𑀚𑀺𑀢𑁄 𑀢𑁂𑀦 𑀭𑀣𑀁 𑀧𑁂𑀲𑁂𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀢𑀁 𑀧𑀩𑁆𑀩𑀚𑀺𑀢𑀁 𑀏𑀢𑀤𑀯𑁄𑀘 𑁋 ‘𑀢𑁆𑀯𑀁 𑀧𑀦, 𑀲𑀫𑁆𑀫, 𑀓𑀺𑀁𑀓𑀢𑁄, 𑀲𑀻𑀲𑀫𑁆𑀧𑀺 𑀢𑁂 𑀦 𑀬𑀣𑀸 𑀅𑀜𑁆𑀜𑁂𑀲𑀁, 𑀯𑀢𑁆𑀣𑀸𑀦𑀺𑀧𑀺 𑀢𑁂 𑀦 𑀬𑀣𑀸 𑀅𑀜𑁆𑀜𑁂𑀲’𑀦𑁆𑀢𑀺? ‘𑀅𑀳𑀁 𑀔𑁄, 𑀤𑁂𑀯, 𑀧𑀩𑁆𑀩𑀚𑀺𑀢𑁄 𑀦𑀸𑀫𑀸’𑀢𑀺. ‘𑀓𑀺𑀁 𑀧𑀦 𑀢𑁆𑀯𑀁, 𑀲𑀫𑁆𑀫, 𑀧𑀩𑁆𑀩𑀚𑀺𑀢𑁄 𑀦𑀸𑀫𑀸’𑀢𑀺? ‘𑀅𑀳𑀁 𑀔𑁄, 𑀤𑁂𑀯, 𑀧𑀩𑁆𑀩𑀚𑀺𑀢𑁄 𑀦𑀸𑀫, 𑀲𑀸𑀥𑀼 𑀥𑀫𑁆𑀫𑀘𑀭𑀺𑀬𑀸 𑀲𑀸𑀥𑀼 𑀲𑀫𑀘𑀭𑀺𑀬𑀸 𑀲𑀸𑀥𑀼 𑀓𑀼𑀲𑀮𑀓𑀺𑀭𑀺𑀬𑀸 𑀲𑀸𑀥𑀼 𑀧𑀼𑀜𑁆𑀜𑀓𑀺𑀭𑀺𑀬𑀸 𑀲𑀸𑀥𑀼 𑀅𑀯𑀺𑀳𑀺𑀁𑀲𑀸 𑀲𑀸𑀥𑀼 𑀪𑀽𑀢𑀸𑀦𑀼𑀓𑀫𑁆𑀧𑀸’𑀢𑀺. ‘𑀲𑀸𑀥𑀼 𑀔𑁄 𑀢𑁆𑀯𑀁, 𑀲𑀫𑁆𑀫, 𑀧𑀩𑁆𑀩𑀚𑀺𑀢𑁄 𑀦𑀸𑀫 𑀲𑀸𑀥𑀼 𑀥𑀫𑁆𑀫𑀘𑀭𑀺𑀬𑀸 𑀲𑀸𑀥𑀼 𑀲𑀫𑀘𑀭𑀺𑀬𑀸 𑀲𑀸𑀥𑀼 𑀓𑀼𑀲𑀮𑀓𑀺𑀭𑀺𑀬𑀸 𑀲𑀸𑀥𑀼 𑀧𑀼𑀜𑁆𑀜𑀓𑀺𑀭𑀺𑀬𑀸 𑀲𑀸𑀥𑀼 𑀅𑀯𑀺𑀳𑀺𑀁𑀲𑀸 𑀲𑀸𑀥𑀼 𑀪𑀽𑀢𑀸𑀦𑀼𑀓𑀫𑁆𑀧𑀸’𑀢𑀺.

𑀩𑁄𑀥𑀺𑀲𑀢𑁆𑀢𑀧𑀩𑁆𑀩𑀚𑁆𑀚𑀸

𑁫𑁪. ‘‘𑀅𑀣 ¶ 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘𑀢𑁂𑀦 𑀳𑀺, 𑀲𑀫𑁆𑀫 𑀲𑀸𑀭𑀣𑀺, 𑀭𑀣𑀁 𑀆𑀤𑀸𑀬 𑀇𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀳𑀺. 𑀅𑀳𑀁 𑀧𑀦 𑀇𑀥𑁂𑀯 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’𑀢𑀺. ‘𑀏𑀯𑀁, 𑀤𑁂𑀯𑀸’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀣𑀺 𑀯𑀺𑀧𑀲𑁆𑀲𑀺𑀲𑁆𑀲 ¶ 𑀓𑀼𑀫𑀸𑀭𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀭𑀣𑀁 𑀆𑀤𑀸𑀬 𑀢𑀢𑁄𑀯 𑀅𑀦𑁆𑀢𑁂𑀧𑀼𑀭𑀁 𑀧𑀘𑁆𑀘𑀦𑀺𑀬𑁆𑀬𑀸𑀲𑀺. 𑀯𑀺𑀧𑀲𑁆𑀲𑀻 𑀧𑀦 𑀓𑀼𑀫𑀸𑀭𑁄 𑀢𑀢𑁆𑀣𑁂𑀯 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺.

𑀫𑀳𑀸𑀚𑀦𑀓𑀸𑀬𑀅𑀦𑀼𑀧𑀩𑁆𑀩𑀚𑁆𑀚𑀸

𑁫𑁫. ‘‘𑀅𑀲𑁆𑀲𑁄𑀲𑀺 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀫𑀳𑀸𑀚𑀦𑀓𑀸𑀬𑁄 𑀘𑀢𑀼𑀭𑀸𑀲𑀻𑀢𑀺 𑀧𑀸𑀡𑀲𑀳𑀲𑁆𑀲𑀸𑀦𑀺 𑁋 ‘𑀯𑀺𑀧𑀲𑁆𑀲𑀻 𑀓𑀺𑀭 𑀓𑀼𑀫𑀸𑀭𑁄 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 ¶ ¶ 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄’𑀢𑀺. 𑀲𑀼𑀢𑁆𑀯𑀸𑀦 𑀢𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘𑀦 𑀳𑀺 𑀦𑀽𑀦 𑀲𑁄 𑀑𑀭𑀓𑁄 𑀥𑀫𑁆𑀫𑀯𑀺𑀦𑀬𑁄, 𑀦 𑀲𑀸 𑀑𑀭𑀓𑀸 [𑀑𑀭𑀺𑀓𑀸 (𑀲𑀻. 𑀲𑁆𑀬𑀸.)] 𑀧𑀩𑁆𑀩𑀚𑁆𑀚𑀸, 𑀬𑀢𑁆𑀣 𑀯𑀺𑀧𑀲𑁆𑀲𑀻 𑀓𑀼𑀫𑀸𑀭𑁄 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄. 𑀯𑀺𑀧𑀲𑁆𑀲𑀻𑀧𑀺 𑀦𑀸𑀫 𑀓𑀼𑀫𑀸𑀭𑁄 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀓𑀺𑀫𑀗𑁆𑀕𑀁 [𑀓𑀺𑀫𑀗𑁆𑀕 (𑀲𑀻.)] 𑀧𑀦 𑀫𑀬’𑀦𑁆𑀢𑀺.

‘‘𑀅𑀣 𑀔𑁄, 𑀲𑁄 𑀪𑀺𑀓𑁆𑀔𑀯𑁂, 𑀫𑀳𑀸𑀚𑀦𑀓𑀸𑀬𑁄 [𑀫𑀳𑀸𑀚𑀦𑀓𑀸𑀬𑁄 (𑀲𑁆𑀬𑀸.)] 𑀘𑀢𑀼𑀭𑀸𑀲𑀻𑀢𑀺 𑀧𑀸𑀡𑀲𑀳𑀲𑁆𑀲𑀸𑀦𑀺 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀧𑀲𑁆𑀲𑀺𑀁 𑀩𑁄𑀥𑀺𑀲𑀢𑁆𑀢𑀁 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀁 𑀅𑀦𑀼𑀧𑀩𑁆𑀩𑀚𑀺𑀁𑀲𑀼. 𑀢𑀸𑀬 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀯𑀺𑀧𑀲𑁆𑀲𑀻 𑀩𑁄𑀥𑀺𑀲𑀢𑁆𑀢𑁄 𑀕𑀸𑀫𑀦𑀺𑀕𑀫𑀚𑀦𑀧𑀤𑀭𑀸𑀚𑀥𑀸𑀦𑀻𑀲𑀼 𑀘𑀸𑀭𑀺𑀓𑀁 𑀘𑀭𑀢𑀺.

𑁫𑁬. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀦 𑀔𑁄 𑀫𑁂𑀢𑀁 [𑀦 𑀔𑁄 𑀧𑀦𑁂𑀢𑀁 (𑀲𑁆𑀬𑀸.)] 𑀧𑀢𑀺𑀭𑀽𑀧𑀁 𑀬𑁄𑀳𑀁 𑀆𑀓𑀺𑀡𑁆𑀡𑁄 𑀯𑀺𑀳𑀭𑀸𑀫𑀺, 𑀬𑀁𑀦𑀽𑀦𑀸𑀳𑀁 𑀏𑀓𑁄 𑀕𑀡𑀫𑁆𑀳𑀸 𑀯𑀽𑀧𑀓𑀝𑁆𑀞𑁄 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀩𑁄𑀥𑀺𑀲𑀢𑁆𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀏𑀓𑁄 ¶ 𑀕𑀡𑀫𑁆𑀳𑀸 𑀯𑀽𑀧𑀓𑀝𑁆𑀞𑁄 𑀯𑀺𑀳𑀸𑀲𑀺 ¶ , 𑀅𑀜𑁆𑀜𑁂𑀦𑁂𑀯 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀧𑀩𑁆𑀩𑀚𑀺𑀢𑀲𑀳𑀲𑁆𑀲𑀸𑀦𑀺 𑀅𑀕𑀫𑀁𑀲𑀼, 𑀅𑀜𑁆𑀜𑁂𑀦 𑀫𑀕𑁆𑀕𑁂𑀦 𑀯𑀺𑀧𑀲𑁆𑀲𑀻 𑀩𑁄𑀥𑀺𑀲𑀢𑁆𑀢𑁄.

𑀩𑁄𑀥𑀺𑀲𑀢𑁆𑀢𑀅𑀪𑀺𑀦𑀺𑀯𑁂𑀲𑁄

𑁫𑁭. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀸𑀲𑀽𑀧𑀕𑀢𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀓𑀺𑀘𑁆𑀙𑀁 𑀯𑀢𑀸𑀬𑀁 𑀮𑁄𑀓𑁄 𑀆𑀧𑀦𑁆𑀦𑁄, 𑀚𑀸𑀬𑀢𑀺 𑀘 𑀚𑀻𑀬𑀢𑀺 𑀘 𑀫𑀻𑀬𑀢𑀺 𑀘 [𑀚𑀺𑀬𑁆𑀬𑀢𑀺 𑀘 𑀫𑀺𑀬𑁆𑀬𑀢𑀺 𑀘 (𑀓.)] 𑀘𑀯𑀢𑀺 𑀘 𑀉𑀧𑀧𑀚𑁆𑀚𑀢𑀺 𑀘, 𑀅𑀣 𑀘 𑀧𑀦𑀺𑀫𑀲𑁆𑀲 𑀤𑀼𑀓𑁆𑀔𑀲𑁆𑀲 ¶ 𑀦𑀺𑀲𑁆𑀲𑀭𑀡𑀁 𑀦𑀧𑁆𑀧𑀚𑀸𑀦𑀸𑀢𑀺 𑀚𑀭𑀸𑀫𑀭𑀡𑀲𑁆𑀲, 𑀓𑀼𑀤𑀸𑀲𑁆𑀲𑀼 𑀦𑀸𑀫 𑀇𑀫𑀲𑁆𑀲 𑀤𑀼𑀓𑁆𑀔𑀲𑁆𑀲 𑀦𑀺𑀲𑁆𑀲𑀭𑀡𑀁 𑀧𑀜𑁆𑀜𑀸𑀬𑀺𑀲𑁆𑀲𑀢𑀺 𑀚𑀭𑀸𑀫𑀭𑀡𑀲𑁆𑀲𑀸’𑀢𑀺?

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀚𑀭𑀸𑀫𑀭𑀡𑀁 𑀳𑁄𑀢𑀺, 𑀓𑀺𑀁𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’𑀦𑁆𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀚𑀸𑀢𑀺𑀬𑀸 𑀔𑁄 𑀲𑀢𑀺 𑀚𑀭𑀸𑀫𑀭𑀡𑀁 𑀳𑁄𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’𑀦𑁆𑀢𑀺.

‘‘𑀅𑀣 ¶ 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀚𑀸𑀢𑀺 𑀳𑁄𑀢𑀺, 𑀓𑀺𑀁𑀧𑀘𑁆𑀘𑀬𑀸 𑀚𑀸𑀢𑀻’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀪𑀯𑁂 𑀔𑁄 𑀲𑀢𑀺 𑀚𑀸𑀢𑀺 𑀳𑁄𑀢𑀺, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀪𑀯𑁄 𑀳𑁄𑀢𑀺, 𑀓𑀺𑀁𑀧𑀘𑁆𑀘𑀬𑀸 𑀪𑀯𑁄’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀉𑀧𑀸𑀤𑀸𑀦𑁂 𑀔𑁄 𑀲𑀢𑀺 𑀪𑀯𑁄 𑀳𑁄𑀢𑀺, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀉𑀧𑀸𑀤𑀸𑀦𑀁 𑀳𑁄𑀢𑀺, 𑀓𑀺𑀁𑀧𑀘𑁆𑀘𑀬𑀸 ¶ 𑀉𑀧𑀸𑀤𑀸𑀦’𑀦𑁆𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀢𑀡𑁆𑀳𑀸𑀬 𑀔𑁄 𑀲𑀢𑀺 𑀉𑀧𑀸𑀤𑀸𑀦𑀁 𑀳𑁄𑀢𑀺, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’𑀦𑁆𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀢𑀡𑁆𑀳𑀸 𑀳𑁄𑀢𑀺, 𑀓𑀺𑀁𑀧𑀘𑁆𑀘𑀬𑀸 𑀢𑀡𑁆𑀳𑀸’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 ¶ 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀯𑁂𑀤𑀦𑀸𑀬 𑀔𑁄 𑀲𑀢𑀺 𑀢𑀡𑁆𑀳𑀸 𑀳𑁄𑀢𑀺, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸’𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀯𑁂𑀤𑀦𑀸 𑀳𑁄𑀢𑀺, 𑀓𑀺𑀁𑀧𑀘𑁆𑀘𑀬𑀸 𑀯𑁂𑀤𑀦𑀸’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 ¶ 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀨𑀲𑁆𑀲𑁂 𑀔𑁄 𑀲𑀢𑀺 𑀯𑁂𑀤𑀦𑀸 𑀳𑁄𑀢𑀺, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀨𑀲𑁆𑀲𑁄 𑀳𑁄𑀢𑀺, 𑀓𑀺𑀁𑀧𑀘𑁆𑀘𑀬𑀸 𑀨𑀲𑁆𑀲𑁄’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀲𑀴𑀸𑀬𑀢𑀦𑁂 𑀔𑁄 𑀲𑀢𑀺 𑀨𑀲𑁆𑀲𑁄 𑀳𑁄𑀢𑀺, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄’𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀲𑀴𑀸𑀬𑀢𑀦𑀁 ¶ 𑀳𑁄𑀢𑀺, 𑀓𑀺𑀁𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’𑀦𑁆𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀦𑀸𑀫𑀭𑀽𑀧𑁂 𑀔𑁄 𑀲𑀢𑀺 𑀲𑀴𑀸𑀬𑀢𑀦𑀁 𑀳𑁄𑀢𑀺, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’𑀦𑁆𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀦𑀸𑀫𑀭𑀽𑀧𑀁 𑀳𑁄𑀢𑀺, 𑀓𑀺𑀁𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’𑀦𑁆𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 ¶ 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀯𑀺𑀜𑁆𑀜𑀸𑀡𑁂 𑀔𑁄 𑀲𑀢𑀺 𑀦𑀸𑀫𑀭𑀽𑀧𑀁 𑀳𑁄𑀢𑀺, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’𑀦𑁆𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺, 𑀓𑀺𑀁𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’𑀦𑁆𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀦𑀸𑀫𑀭𑀽𑀧𑁂 𑀔𑁄 𑀲𑀢𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀺, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’𑀦𑁆𑀢𑀺.

𑁫𑁮. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀧𑀘𑁆𑀘𑀼𑀤𑀸𑀯𑀢𑁆𑀢𑀢𑀺 𑀔𑁄 𑀇𑀤𑀁 𑀯𑀺𑀜𑁆𑀜𑀸𑀡𑀁 𑀦𑀸𑀫𑀭𑀽𑀧𑀫𑁆𑀳𑀸, 𑀦𑀸𑀧𑀭𑀁 𑀕𑀘𑁆𑀙𑀢𑀺. 𑀏𑀢𑁆𑀢𑀸𑀯𑀢𑀸 𑀚𑀸𑀬𑁂𑀣 ¶ 𑀯𑀸 𑀚𑀺𑀬𑁆𑀬𑁂𑀣 𑀯𑀸 𑀫𑀺𑀬𑁆𑀬𑁂𑀣 𑀯𑀸 𑀘𑀯𑁂𑀣 𑀯𑀸 𑀉𑀧𑀧𑀚𑁆𑀚𑁂𑀣 𑀯𑀸, 𑀬𑀤𑀺𑀤𑀁 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀁, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸 ¶ , 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺’.

𑁫𑁯. ‘‘‘𑀲𑀫𑀼𑀤𑀬𑁄 𑀲𑀫𑀼𑀤𑀬𑁄’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺.

𑁬𑁦. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀲𑀢𑀺 𑀚𑀭𑀸𑀫𑀭𑀡𑀁 𑀦 𑀳𑁄𑀢𑀺, 𑀓𑀺𑀲𑁆𑀲 𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 ¶ 𑁋 ‘𑀚𑀸𑀢𑀺𑀬𑀸 𑀔𑁄 𑀅𑀲𑀢𑀺 𑀚𑀭𑀸𑀫𑀭𑀡𑀁 𑀦 𑀳𑁄𑀢𑀺, 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁄’𑀢𑀺.

‘‘𑀅𑀣 ¶ 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀲𑀢𑀺 𑀚𑀸𑀢𑀺 𑀦 𑀳𑁄𑀢𑀺, 𑀓𑀺𑀲𑁆𑀲 𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀪𑀯𑁂 𑀔𑁄 𑀅𑀲𑀢𑀺 𑀚𑀸𑀢𑀺 𑀦 𑀳𑁄𑀢𑀺, 𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄’𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀲𑀢𑀺 𑀪𑀯𑁄 𑀦 𑀳𑁄𑀢𑀺, 𑀓𑀺𑀲𑁆𑀲 𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀉𑀧𑀸𑀤𑀸𑀦𑁂 𑀔𑁄 𑀅𑀲𑀢𑀺 𑀪𑀯𑁄 𑀦 𑀳𑁄𑀢𑀺, 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄’𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀲𑀢𑀺 𑀉𑀧𑀸𑀤𑀸𑀦𑀁 𑀦 𑀳𑁄𑀢𑀺, 𑀓𑀺𑀲𑁆𑀲 𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 ¶ 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀢𑀡𑁆𑀳𑀸𑀬 𑀔𑁄 𑀅𑀲𑀢𑀺 𑀉𑀧𑀸𑀤𑀸𑀦𑀁 𑀦 𑀳𑁄𑀢𑀺, 𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄’𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀲𑀢𑀺 𑀢𑀡𑁆𑀳𑀸 𑀦 𑀳𑁄𑀢𑀺, 𑀓𑀺𑀲𑁆𑀲 𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 ¶ 𑁋 ‘𑀯𑁂𑀤𑀦𑀸𑀬 𑀔𑁄 𑀅𑀲𑀢𑀺 𑀢𑀡𑁆𑀳𑀸 𑀦 𑀳𑁄𑀢𑀺, 𑀯𑁂𑀤𑀦𑀸𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄’𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀲𑀢𑀺 𑀯𑁂𑀤𑀦𑀸 𑀦 𑀳𑁄𑀢𑀺, 𑀓𑀺𑀲𑁆𑀲 𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄’𑀢𑀺? 𑀅𑀣 ¶ 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀨𑀲𑁆𑀲𑁂 𑀔𑁄 𑀅𑀲𑀢𑀺 𑀯𑁂𑀤𑀦𑀸 𑀦 𑀳𑁄𑀢𑀺, 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄’𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀲𑀢𑀺 𑀨𑀲𑁆𑀲𑁄 𑀦 𑀳𑁄𑀢𑀺, 𑀓𑀺𑀲𑁆𑀲 𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀲𑀴𑀸𑀬𑀢𑀦𑁂 𑀔𑁄 𑀅𑀲𑀢𑀺 𑀨𑀲𑁆𑀲𑁄 𑀦 𑀳𑁄𑀢𑀺, 𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄’𑀢𑀺.

‘‘𑀅𑀣 ¶ 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀲𑀢𑀺 𑀲𑀴𑀸𑀬𑀢𑀦𑀁 𑀦 𑀳𑁄𑀢𑀺, 𑀓𑀺𑀲𑁆𑀲 𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀦𑀸𑀫𑀭𑀽𑀧𑁂 𑀔𑁄 𑀅𑀲𑀢𑀺 𑀲𑀴𑀸𑀬𑀢𑀦𑀁 𑀦 𑀳𑁄𑀢𑀺, 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄’𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀲𑀢𑀺 𑀦𑀸𑀫𑀭𑀽𑀧𑀁 𑀦 𑀳𑁄𑀢𑀺, 𑀓𑀺𑀲𑁆𑀲 𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀯𑀺𑀜𑁆𑀜𑀸𑀡𑁂 𑀔𑁄 𑀅𑀲𑀢𑀺 𑀦𑀸𑀫𑀭𑀽𑀧𑀁 𑀦 𑀳𑁄𑀢𑀺, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄’𑀢𑀺.

‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀫𑁆𑀳𑀺 𑀦𑀼 𑀔𑁄 𑀅𑀲𑀢𑀺 𑀯𑀺𑀜𑁆𑀜𑀸𑀡𑀁 𑀦 𑀳𑁄𑀢𑀺, 𑀓𑀺𑀲𑁆𑀲 𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 ¶ 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄 𑁋 ‘𑀦𑀸𑀫𑀭𑀽𑀧𑁂 𑀔𑁄 𑀅𑀲𑀢𑀺 𑀯𑀺𑀜𑁆𑀜𑀸𑀡𑀁 𑀦 𑀳𑁄𑀢𑀺, 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄’𑀢𑀺.

𑁬𑁧. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀅𑀥𑀺𑀕𑀢𑁄 ¶ 𑀔𑁄 𑀫𑁆𑀬𑀸𑀬𑀁 𑀫𑀕𑁆𑀕𑁄 𑀲𑀫𑁆𑀩𑁄𑀥𑀸𑀬 ¶ 𑀬𑀤𑀺𑀤𑀁 𑁋 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄, 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀦𑀺𑀭𑁄𑀥𑁄, 𑀦𑀸𑀫𑀭𑀽𑀧𑀦𑀺𑀭𑁄𑀥𑀸 𑀲𑀴𑀸𑀬𑀢𑀦𑀦𑀺𑀭𑁄𑀥𑁄, 𑀲𑀴𑀸𑀬𑀢𑀦𑀦𑀺𑀭𑁄𑀥𑀸 𑀨𑀲𑁆𑀲𑀦𑀺𑀭𑁄𑀥𑁄, 𑀨𑀲𑁆𑀲𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄, 𑀯𑁂𑀤𑀦𑀸𑀦𑀺𑀭𑁄𑀥𑀸 𑀢𑀡𑁆𑀳𑀸𑀦𑀺𑀭𑁄𑀥𑁄, 𑀢𑀡𑁆𑀳𑀸𑀦𑀺𑀭𑁄𑀥𑀸 𑀉𑀧𑀸𑀤𑀸𑀦𑀦𑀺𑀭𑁄𑀥𑁄, 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀪𑀯𑀦𑀺𑀭𑁄𑀥𑁄, 𑀪𑀯𑀦𑀺𑀭𑁄𑀥𑀸 𑀚𑀸𑀢𑀺𑀦𑀺𑀭𑁄𑀥𑁄, 𑀚𑀸𑀢𑀺𑀦𑀺𑀭𑁄𑀥𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀺’.

𑁬𑁨. ‘‘‘𑀦𑀺𑀭𑁄𑀥𑁄 𑀦𑀺𑀭𑁄𑀥𑁄’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀺, 𑀧𑀜𑁆𑀜𑀸 𑀉𑀤𑀧𑀸𑀤𑀺, 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺.

𑁬𑁩. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀩𑁄𑀥𑀺𑀲𑀢𑁆𑀢𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀸𑀲𑀺 𑁋 ‘𑀇𑀢𑀺 𑀭𑀽𑀧𑀁, 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄; 𑀇𑀢𑀺 𑀯𑁂𑀤𑀦𑀸, 𑀇𑀢𑀺 𑀯𑁂𑀤𑀦𑀸𑀬 𑀲𑀫𑀼𑀤𑀬𑁄, 𑀇𑀢𑀺 𑀯𑁂𑀤𑀦𑀸𑀬 𑀅𑀢𑁆𑀣𑀗𑁆𑀕𑀫𑁄; 𑀇𑀢𑀺 𑀲𑀜𑁆𑀜𑀸, 𑀇𑀢𑀺 𑀲𑀜𑁆𑀜𑀸𑀬 𑀲𑀫𑀼𑀤𑀬𑁄, 𑀇𑀢𑀺 𑀲𑀜𑁆𑀜𑀸𑀬 𑀅𑀢𑁆𑀣𑀗𑁆𑀕𑀫𑁄; 𑀇𑀢𑀺 𑀲𑀗𑁆𑀔𑀸𑀭𑀸, 𑀇𑀢𑀺 𑀲𑀗𑁆𑀔𑀸𑀭𑀸𑀦𑀁 𑀲𑀫𑀼𑀤𑀬𑁄, 𑀇𑀢𑀺 𑀲𑀗𑁆𑀔𑀸𑀭𑀸𑀦𑀁 ¶ 𑀅𑀢𑁆𑀣𑀗𑁆𑀕𑀫𑁄; 𑀇𑀢𑀺 𑀯𑀺𑀜𑁆𑀜𑀸𑀡𑀁, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄’𑀢𑀺, 𑀢𑀲𑁆𑀲 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀦 𑀘𑀺𑀭𑀲𑁆𑀲𑁂𑀯 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀻’’𑀢𑀺.

𑀤𑀼𑀢𑀺𑀬𑀪𑀸𑀡𑀯𑀸𑀭𑁄.

𑀩𑁆𑀭𑀳𑁆𑀫𑀬𑀸𑀘𑀦𑀓𑀣𑀸

𑁬𑁪. ‘‘𑀅𑀣 ¶ 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’𑀦𑁆𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 ¶ 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 ¶ 𑀏𑀢𑀤𑀳𑁄𑀲𑀺 𑁋 ‘𑀅𑀥𑀺𑀕𑀢𑁄 𑀔𑁄 𑀫𑁆𑀬𑀸𑀬𑀁 𑀥𑀫𑁆𑀫𑁄 𑀕𑀫𑁆𑀪𑀻𑀭𑁄 𑀤𑀼𑀤𑁆𑀤𑀲𑁄 𑀤𑀼𑀭𑀦𑀼𑀩𑁄𑀥𑁄 𑀲𑀦𑁆𑀢𑁄 𑀧𑀡𑀻𑀢𑁄 𑀅𑀢𑀓𑁆𑀓𑀸𑀯𑀘𑀭𑁄 𑀦𑀺𑀧𑀼𑀡𑁄 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑁄. 𑀆𑀮𑀬𑀭𑀸𑀫𑀸 𑀔𑁄 𑀧𑀦𑀸𑀬𑀁 𑀧𑀚𑀸 𑀆𑀮𑀬𑀭𑀢𑀸 𑀆𑀮𑀬𑀲𑀫𑁆𑀫𑀼𑀤𑀺𑀢𑀸. 𑀆𑀮𑀬𑀭𑀸𑀫𑀸𑀬 𑀔𑁄 𑀧𑀦 𑀧𑀚𑀸𑀬 𑀆𑀮𑀬𑀭𑀢𑀸𑀬 𑀆𑀮𑀬𑀲𑀫𑁆𑀫𑀼𑀤𑀺𑀢𑀸𑀬 𑀤𑀼𑀤𑁆𑀤𑀲𑀁 𑀇𑀤𑀁 𑀞𑀸𑀦𑀁 𑀬𑀤𑀺𑀤𑀁 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀇𑀤𑀫𑁆𑀧𑀺 𑀔𑁄 𑀞𑀸𑀦𑀁 𑀤𑀼𑀤𑁆𑀤𑀲𑀁 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁, 𑀧𑀭𑁂 𑀘 𑀫𑁂 𑀦 𑀆𑀚𑀸𑀦𑁂𑀬𑁆𑀬𑀼𑀁; 𑀲𑁄 𑀫𑀫𑀲𑁆𑀲 𑀓𑀺𑀮𑀫𑀣𑁄, 𑀲𑀸 𑀫𑀫𑀲𑁆𑀲 𑀯𑀺𑀳𑁂𑀲𑀸’𑀢𑀺.

𑁬𑁫. ‘‘𑀅𑀧𑀺𑀲𑁆𑀲𑀼, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀇𑀫𑀸 𑀅𑀦𑀘𑁆𑀙𑀭𑀺𑀬𑀸 𑀕𑀸𑀣𑀸𑀬𑁄 𑀧𑀝𑀺𑀪𑀁𑀲𑀼 𑀧𑀼𑀩𑁆𑀩𑁂 𑀅𑀲𑁆𑀲𑀼𑀢𑀧𑀼𑀩𑁆𑀩𑀸 𑁋

‘𑀓𑀺𑀘𑁆𑀙𑁂𑀦 𑀫𑁂 𑀅𑀥𑀺𑀕𑀢𑀁, 𑀳𑀮𑀁 𑀤𑀸𑀦𑀺 𑀧𑀓𑀸𑀲𑀺𑀢𑀼𑀁;

𑀭𑀸𑀕𑀤𑁄𑀲𑀧𑀭𑁂𑀢𑁂𑀳𑀺, 𑀦𑀸𑀬𑀁 𑀥𑀫𑁆𑀫𑁄 𑀲𑀼𑀲𑀫𑁆𑀩𑀼𑀥𑁄.

‘𑀧𑀝𑀺𑀲𑁄𑀢𑀕𑀸𑀫𑀺𑀁 𑀦𑀺𑀧𑀼𑀡𑀁, 𑀕𑀫𑁆𑀪𑀻𑀭𑀁 𑀤𑀼𑀤𑁆𑀤𑀲𑀁 𑀅𑀡𑀼𑀁;

𑀭𑀸𑀕𑀭𑀢𑁆𑀢𑀸 𑀦 𑀤𑀓𑁆𑀔𑀦𑁆𑀢𑀺, 𑀢𑀫𑁄𑀔𑀦𑁆𑀥𑁂𑀦 𑀆𑀯𑀼𑀝𑀸’𑀢𑀺.

‘‘𑀇𑀢𑀺𑀳 ¶ , 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑁄 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑀁 𑀦𑀫𑀺, 𑀦𑁄 𑀥𑀫𑁆𑀫𑀤𑁂𑀲𑀦𑀸𑀬.

𑁬𑁬. ‘‘𑀅𑀣 ¶ 𑀔𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀲𑁆𑀲 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀏𑀢𑀤𑀳𑁄𑀲𑀺 ¶ 𑁋 ‘𑀦𑀲𑁆𑀲𑀢𑀺 𑀯𑀢 𑀪𑁄 𑀮𑁄𑀓𑁄, 𑀯𑀺𑀦𑀲𑁆𑀲𑀢𑀺 𑀯𑀢 𑀪𑁄 𑀮𑁄𑀓𑁄, 𑀬𑀢𑁆𑀭 𑀳𑀺 𑀦𑀸𑀫 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺 [𑀦𑀫𑀺 (𑀲𑁆𑀬𑀸. 𑀓.), 𑀦𑀫𑀺𑀲𑁆𑀲𑀢𑀺 (?)], 𑀦𑁄 𑀥𑀫𑁆𑀫𑀤𑁂𑀲𑀦𑀸𑀬𑀸’𑀢𑀺. 𑀅𑀣 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀩𑁆𑀭𑀳𑁆𑀫𑀸 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬; 𑀏𑀯𑀫𑁂𑀯 𑀩𑁆𑀭𑀳𑁆𑀫𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀩𑁆𑀭𑀳𑁆𑀫𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀤𑀓𑁆𑀔𑀺𑀡𑀁 𑀚𑀸𑀡𑀼𑀫𑀡𑁆𑀟𑀮𑀁 𑀧𑀣𑀯𑀺𑀬𑀁 ¶ 𑀦𑀺𑀳𑀦𑁆𑀢𑁆𑀯𑀸 [𑀦𑀺𑀤𑀳𑀦𑁆𑀢𑁄 (𑀲𑁆𑀬𑀸.)] 𑀬𑁂𑀦 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀏𑀢𑀤𑀯𑁄𑀘 𑁋 ‘𑀤𑁂𑀲𑁂𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀥𑀫𑁆𑀫𑀁, 𑀤𑁂𑀲𑁂𑀢𑀼 𑀲𑀼𑀕𑀢𑁄 𑀥𑀫𑁆𑀫𑀁, 𑀲𑀦𑁆𑀢𑀺 [𑀲𑀦𑁆𑀢𑀻 (𑀲𑁆𑀬𑀸.)] 𑀲𑀢𑁆𑀢𑀸 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸; 𑀅𑀲𑁆𑀲𑀯𑀦𑀢𑀸 𑀥𑀫𑁆𑀫𑀲𑁆𑀲 𑀧𑀭𑀺𑀳𑀸𑀬𑀦𑁆𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀢𑀸𑀭𑁄’𑀢𑀺.

𑁬𑁭. ‘‘𑀏𑀯𑀁 𑀯𑀼𑀢𑁆𑀢𑁂 [𑀅𑀣 𑀔𑁄 (𑀓.)], 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀢𑀁 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀏𑀢𑀤𑀯𑁄𑀘 𑁋 ‘𑀫𑀬𑁆𑀳𑀫𑁆𑀧𑀺 𑀔𑁄, 𑀩𑁆𑀭𑀳𑁆𑀫𑁂, 𑀏𑀢𑀤𑀳𑁄𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀩𑁆𑀭𑀳𑁆𑀫𑁂, 𑀏𑀢𑀤𑀳𑁄𑀲𑀺 𑁋 ‘‘𑀅𑀥𑀺𑀕𑀢𑁄 𑀔𑁄 𑀫𑁆𑀬𑀸𑀬𑀁 𑀥𑀫𑁆𑀫𑁄 𑀕𑀫𑁆𑀪𑀻𑀭𑁄 𑀤𑀼𑀤𑁆𑀤𑀲𑁄 𑀤𑀼𑀭𑀦𑀼𑀩𑁄𑀥𑁄 𑀲𑀦𑁆𑀢𑁄 𑀧𑀡𑀻𑀢𑁄 𑀅𑀢𑀓𑁆𑀓𑀸𑀯𑀘𑀭𑁄 𑀦𑀺𑀧𑀼𑀡𑁄 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑁄. 𑀆𑀮𑀬𑀭𑀸𑀫𑀸 𑀔𑁄 𑀧𑀦𑀸𑀬𑀁 𑀧𑀚𑀸 𑀆𑀮𑀬𑀭𑀢𑀸 𑀆𑀮𑀬𑀲𑀫𑁆𑀫𑀼𑀤𑀺𑀢𑀸. 𑀆𑀮𑀬𑀭𑀸𑀫𑀸𑀬 𑀔𑁄 𑀧𑀦 𑀧𑀚𑀸𑀬 𑀆𑀮𑀬𑀭𑀢𑀸𑀬 𑀆𑀮𑀬𑀲𑀫𑁆𑀫𑀼𑀤𑀺𑀢𑀸𑀬 ¶ 𑀤𑀼𑀤𑁆𑀤𑀲𑀁 𑀇𑀤𑀁 𑀞𑀸𑀦𑀁 𑀬𑀤𑀺𑀤𑀁 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀇𑀤𑀫𑁆𑀧𑀺 𑀔𑁄 𑀞𑀸𑀦𑀁 𑀤𑀼𑀤𑁆𑀤𑀲𑀁 𑀬𑀤𑀺𑀤𑀁 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁. 𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁, 𑀧𑀭𑁂 𑀘 𑀫𑁂 𑀦 𑀆𑀚𑀸𑀦𑁂𑀬𑁆𑀬𑀼𑀁; 𑀲𑁄 𑀫𑀫𑀲𑁆𑀲 𑀓𑀺𑀮𑀫𑀣𑁄, 𑀲𑀸 𑀫𑀫𑀲𑁆𑀲 𑀯𑀺𑀳𑁂𑀲𑀸’’𑀢𑀺. 𑀅𑀧𑀺𑀲𑁆𑀲𑀼 𑀫𑀁, 𑀩𑁆𑀭𑀳𑁆𑀫𑁂 ¶ , 𑀇𑀫𑀸 𑀅𑀦𑀘𑁆𑀙𑀭𑀺𑀬𑀸 𑀕𑀸𑀣𑀸𑀬𑁄 𑀧𑀝𑀺𑀪𑀁𑀲𑀼 𑀧𑀼𑀩𑁆𑀩𑁂 𑀅𑀲𑁆𑀲𑀼𑀢𑀧𑀼𑀩𑁆𑀩𑀸 𑁋

‘‘𑀓𑀺𑀘𑁆𑀙𑁂𑀦 𑀫𑁂 𑀅𑀥𑀺𑀕𑀢𑀁, 𑀳𑀮𑀁 𑀤𑀸𑀦𑀺 𑀧𑀓𑀸𑀲𑀺𑀢𑀼𑀁;

𑀭𑀸𑀕𑀤𑁄𑀲𑀧𑀭𑁂𑀢𑁂𑀳𑀺, 𑀦𑀸𑀬𑀁 𑀥𑀫𑁆𑀫𑁄 𑀲𑀼𑀲𑀫𑁆𑀩𑀼𑀥𑁄.

‘‘𑀧𑀝𑀺𑀲𑁄𑀢𑀕𑀸𑀫𑀺𑀁 𑀦𑀺𑀧𑀼𑀡𑀁, 𑀕𑀫𑁆𑀪𑀻𑀭𑀁 𑀤𑀼𑀤𑁆𑀤𑀲𑀁 𑀅𑀡𑀼𑀁;

𑀭𑀸𑀕𑀭𑀢𑁆𑀢𑀸 𑀦 𑀤𑀓𑁆𑀔𑀦𑁆𑀢𑀺, 𑀢𑀫𑁄𑀔𑀦𑁆𑀥𑁂𑀦 𑀆𑀯𑀼𑀝𑀸’’𑀢𑀺.

‘𑀇𑀢𑀺𑀳 ¶ 𑀫𑁂, 𑀩𑁆𑀭𑀳𑁆𑀫𑁂, 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑁄 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑀁 𑀦𑀫𑀺, 𑀦𑁄 𑀥𑀫𑁆𑀫𑀤𑁂𑀲𑀦𑀸𑀬𑀸’𑀢𑀺.

𑁬𑁮. ‘‘𑀤𑀼𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑁄 𑀫𑀳𑀸𑀩𑁆𑀭𑀳𑁆𑀫𑀸…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑁄 𑀫𑀳𑀸𑀩𑁆𑀭𑀳𑁆𑀫𑀸 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀏𑀢𑀤𑀯𑁄𑀘 𑁋 ‘𑀤𑁂𑀲𑁂𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀥𑀫𑁆𑀫𑀁, 𑀤𑁂𑀲𑁂𑀢𑀼 𑀲𑀼𑀕𑀢𑁄 𑀥𑀫𑁆𑀫𑀁, 𑀲𑀦𑁆𑀢𑀺 𑀲𑀢𑁆𑀢𑀸 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸, 𑀅𑀲𑁆𑀲𑀯𑀦𑀢𑀸 𑀥𑀫𑁆𑀫𑀲𑁆𑀲 𑀧𑀭𑀺𑀳𑀸𑀬𑀦𑁆𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀢𑀸𑀭𑁄’𑀢𑀺.

𑁬𑁯. ‘‘𑀅𑀣 ¶ 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀩𑁆𑀭𑀳𑁆𑀫𑀼𑀦𑁄 𑀘 𑀅𑀚𑁆𑀛𑁂𑀲𑀦𑀁 𑀯𑀺𑀤𑀺𑀢𑁆𑀯𑀸 𑀲𑀢𑁆𑀢𑁂𑀲𑀼 𑀘 𑀓𑀸𑀭𑀼𑀜𑁆𑀜𑀢𑀁 𑀧𑀝𑀺𑀘𑁆𑀘 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀲𑀺. 𑀅𑀤𑁆𑀤𑀲𑀸 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀲𑀢𑁆𑀢𑁂 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂 [𑀤𑀼𑀯𑀺𑀜𑁆𑀜𑀸𑀧𑀬𑁂 𑀪𑀩𑁆𑀩𑁂 𑀅𑀪𑀩𑁆𑀩𑁂 (𑀲𑁆𑀬𑀸.)] 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁂 [𑀤𑀲𑁆𑀲𑀸𑀯𑀺𑀦𑁄 (𑀲𑀻. 𑀲𑁆𑀬𑀸. 𑀓𑀁. 𑀓.)] 𑀯𑀺𑀳𑀭𑀦𑁆𑀢𑁂, 𑀅𑀧𑁆𑀧𑁂𑀓𑀘𑁆𑀘𑁂 𑀦 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁂 [𑀤𑀲𑁆𑀲𑀸𑀯𑀺𑀦𑁄 (𑀲𑀻. 𑀲𑁆𑀬𑀸. 𑀓𑀁. 𑀓.)] 𑀯𑀺𑀳𑀭𑀦𑁆𑀢𑁂. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀉𑀧𑁆𑀧𑀮𑀺𑀦𑀺𑀬𑀁 𑀯𑀸 𑀧𑀤𑀼𑀫𑀺𑀦𑀺𑀬𑀁 ¶ 𑀯𑀸 𑀧𑀼𑀡𑁆𑀟𑀭𑀻𑀓𑀺𑀦𑀺𑀬𑀁 𑀯𑀸 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀉𑀤𑀓𑀸𑀦𑀼𑀕𑁆𑀕𑀢𑀸𑀦𑀺 𑀅𑀦𑁆𑀢𑁄 𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀺. 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀲𑀫𑁄𑀤𑀓𑀁 𑀞𑀺𑀢𑀸𑀦𑀺. 𑀅𑀧𑁆𑀧𑁂𑀓𑀘𑁆𑀘𑀸𑀦𑀺 𑀉𑀧𑁆𑀧𑀮𑀸𑀦𑀺 𑀯𑀸 𑀧𑀤𑀼𑀫𑀸𑀦𑀺 𑀯𑀸 𑀧𑀼𑀡𑁆𑀟𑀭𑀻𑀓𑀸𑀦𑀺 𑀯𑀸 𑀉𑀤𑀓𑁂 𑀚𑀸𑀢𑀸𑀦𑀺 𑀉𑀤𑀓𑁂 𑀲𑀁𑀯𑀟𑁆𑀠𑀸𑀦𑀺 𑀉𑀤𑀓𑀸 𑀅𑀘𑁆𑀘𑀼𑀕𑁆𑀕𑀫𑁆𑀫 𑀞𑀺𑀢𑀸𑀦𑀺 𑀅𑀦𑀼𑀧𑀮𑀺𑀢𑁆𑀢𑀸𑀦𑀺 𑀉𑀤𑀓𑁂𑀦. 𑀏𑀯𑀫𑁂𑀯 ¶ 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 𑀲𑀢𑁆𑀢𑁂 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁂 𑀯𑀺𑀳𑀭𑀦𑁆𑀢𑁂, 𑀅𑀧𑁆𑀧𑁂𑀓𑀘𑁆𑀘𑁂 𑀦 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁂 𑀯𑀺𑀳𑀭𑀦𑁆𑀢𑁂.

𑁭𑁦. ‘‘𑀅𑀣 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀩𑁆𑀭𑀳𑁆𑀫𑀸 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀺 𑁋

‘𑀲𑁂𑀮𑁂 𑀬𑀣𑀸 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀝𑁆𑀞𑀺𑀢𑁄, 𑀬𑀣𑀸𑀧𑀺 𑀧𑀲𑁆𑀲𑁂 𑀚𑀦𑀢𑀁 𑀲𑀫𑀦𑁆𑀢𑀢𑁄;

𑀢𑀣𑀽𑀧𑀫𑀁 𑀥𑀫𑁆𑀫𑀫𑀬𑀁 𑀲𑀼𑀫𑁂𑀥, 𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀲𑀫𑀦𑁆𑀢𑀘𑀓𑁆𑀔𑀼.

‘𑀲𑁄𑀓𑀸𑀯𑀢𑀺𑀡𑁆𑀡𑀁 ¶ [𑀲𑁄𑀓𑀸𑀯𑀓𑀺𑀡𑁆𑀡𑀁 (𑀲𑁆𑀬𑀸.)] 𑀚𑀦𑀢𑀫𑀧𑁂𑀢𑀲𑁄𑀓𑁄,

𑀅𑀯𑁂𑀓𑁆𑀔𑀲𑁆𑀲𑀼 𑀚𑀸𑀢𑀺𑀚𑀭𑀸𑀪𑀺𑀪𑀽𑀢𑀁;

𑀉𑀝𑁆𑀞𑁂𑀳𑀺 ¶ 𑀯𑀻𑀭 𑀯𑀺𑀚𑀺𑀢𑀲𑀗𑁆𑀕𑀸𑀫,

𑀲𑀢𑁆𑀣𑀯𑀸𑀳 𑀅𑀡𑀡 𑀯𑀺𑀘𑀭 𑀮𑁄𑀓𑁂.

𑀤𑁂𑀲𑀲𑁆𑀲𑀼 [𑀤𑁂𑀲𑁂𑀢𑀼 (𑀲𑁆𑀬𑀸. 𑀧𑀻.)] 𑀪𑀕𑀯𑀸 𑀥𑀫𑁆𑀫𑀁,

𑀅𑀜𑁆𑀜𑀸𑀢𑀸𑀭𑁄 𑀪𑀯𑀺𑀲𑁆𑀲𑀦𑁆𑀢𑀻’𑀢𑀺.

𑁭𑁧. ‘‘𑀅𑀣 ¶ 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀢𑀁 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘𑀅𑀧𑀸𑀭𑀼𑀢𑀸 𑀢𑁂𑀲𑀁 𑀅𑀫𑀢𑀲𑁆𑀲 𑀤𑁆𑀯𑀸𑀭𑀸,

𑀬𑁂 𑀲𑁄𑀢𑀯𑀦𑁆𑀢𑁄 𑀧𑀫𑀼𑀜𑁆𑀘𑀦𑁆𑀢𑀼 𑀲𑀤𑁆𑀥𑀁;

𑀯𑀺𑀳𑀺𑀁𑀲𑀲𑀜𑁆𑀜𑀻 𑀧𑀕𑀼𑀡𑀁 𑀦 𑀪𑀸𑀲𑀺𑀁,

𑀥𑀫𑁆𑀫𑀁 𑀧𑀡𑀻𑀢𑀁 𑀫𑀦𑀼𑀚𑁂𑀲𑀼 𑀩𑁆𑀭𑀳𑁆𑀫𑁂’𑀢𑀺.

‘‘𑀅𑀣 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀩𑁆𑀭𑀳𑁆𑀫𑀸 ‘𑀓𑀢𑀸𑀯𑀓𑀸𑀲𑁄 𑀔𑁄𑀫𑁆𑀳𑀺 𑀯𑀺𑀧𑀲𑁆𑀲𑀺𑀦𑀸 𑀪𑀕𑀯𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀥𑀫𑁆𑀫𑀤𑁂𑀲𑀦𑀸𑀬𑀸’𑀢𑀺 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀅𑀭𑀳𑀦𑁆𑀢𑀁 ¶ 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀅𑀦𑁆𑀢𑀭𑀥𑀸𑀬𑀺.

𑀅𑀕𑁆𑀕𑀲𑀸𑀯𑀓𑀬𑀼𑀕𑀁

𑁭𑁨. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁, 𑀓𑁄 𑀇𑀫𑀁 𑀥𑀫𑁆𑀫𑀁 𑀔𑀺𑀧𑁆𑀧𑀫𑁂𑀯 𑀆𑀚𑀸𑀦𑀺𑀲𑁆𑀲𑀢𑀻’𑀢𑀺? 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀅𑀬𑀁 𑀔𑁄 𑀔𑀡𑁆𑀟𑁄 𑀘 𑀭𑀸𑀚𑀧𑀼𑀢𑁆𑀢𑁄 𑀢𑀺𑀲𑁆𑀲𑁄 𑀘 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀩𑀦𑁆𑀥𑀼𑀫𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀧𑀝𑀺𑀯𑀲𑀦𑁆𑀢𑀺 𑀧𑀡𑁆𑀟𑀺𑀢𑀸 𑀯𑀺𑀬𑀢𑁆𑀢𑀸 𑀫𑁂𑀥𑀸𑀯𑀺𑀦𑁄 𑀤𑀻𑀖𑀭𑀢𑁆𑀢𑀁 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸. 𑀬𑀁𑀦𑀽𑀦𑀸𑀳𑀁 𑀔𑀡𑁆𑀟𑀲𑁆𑀲 𑀘 𑀭𑀸𑀚𑀧𑀼𑀢𑁆𑀢𑀲𑁆𑀲, 𑀢𑀺𑀲𑁆𑀲𑀲𑁆𑀲 𑀘 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑀲𑁆𑀲 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁 ¶ , 𑀢𑁂 𑀇𑀫𑀁 𑀥𑀫𑁆𑀫𑀁 𑀔𑀺𑀧𑁆𑀧𑀫𑁂𑀯 𑀆𑀚𑀸𑀦𑀺𑀲𑁆𑀲𑀦𑁆𑀢𑀻’𑀢𑀺.

𑁭𑁩. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 ¶ 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬; 𑀏𑀯𑀫𑁂𑀯 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀅𑀦𑁆𑀢𑀭𑀳𑀺𑀢𑁄 𑀩𑀦𑁆𑀥𑀼𑀫𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀔𑁂𑀫𑁂 𑀫𑀺𑀕𑀤𑀸𑀬𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀤𑀸𑀬𑀧𑀸𑀮𑀁 [𑀫𑀺𑀕𑀤𑀸𑀬𑀧𑀸𑀮𑀁 (𑀲𑁆𑀬𑀸.)] 𑀆𑀫𑀦𑁆𑀢𑁂𑀲𑀺 𑁋 ‘𑀏𑀳𑀺 𑀢𑁆𑀯𑀁, 𑀲𑀫𑁆𑀫 𑀤𑀸𑀬𑀧𑀸𑀮, 𑀩𑀦𑁆𑀥𑀼𑀫𑀢𑀺𑀁 𑀭𑀸𑀚𑀥𑀸𑀦𑀺𑀁 𑀧𑀯𑀺𑀲𑀺𑀢𑁆𑀯𑀸 𑀔𑀡𑁆𑀟𑀜𑁆𑀘 𑀭𑀸𑀚𑀧𑀼𑀢𑁆𑀢𑀁 𑀢𑀺𑀲𑁆𑀲𑀜𑁆𑀘 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑀁 𑀏𑀯𑀁 𑀯𑀤𑁂𑀳𑀺 𑁋 𑀯𑀺𑀧𑀲𑁆𑀲𑀻, 𑀪𑀦𑁆𑀢𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀩𑀦𑁆𑀥𑀼𑀫𑀢𑀺𑀁 𑀭𑀸𑀚𑀥𑀸𑀦𑀺𑀁 𑀅𑀦𑀼𑀧𑁆𑀧𑀢𑁆𑀢𑁄 𑀔𑁂𑀫𑁂 𑀫𑀺𑀕𑀤𑀸𑀬𑁂 𑀯𑀺𑀳𑀭𑀢𑀺, 𑀲𑁄 ¶ 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀓𑀸𑀫𑁄’𑀢𑀺. ‘𑀏𑀯𑀁, 𑀪𑀦𑁆𑀢𑁂’𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀸𑀬𑀧𑀸𑀮𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀩𑀦𑁆𑀥𑀼𑀫𑀢𑀺𑀁 𑀭𑀸𑀚𑀥𑀸𑀦𑀺𑀁 𑀧𑀯𑀺𑀲𑀺𑀢𑁆𑀯𑀸 𑀔𑀡𑁆𑀟𑀜𑁆𑀘 𑀭𑀸𑀚𑀧𑀼𑀢𑁆𑀢𑀁 𑀢𑀺𑀲𑁆𑀲𑀜𑁆𑀘 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘𑀯𑀺𑀧𑀲𑁆𑀲𑀻, 𑀪𑀦𑁆𑀢𑁂, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀩𑀦𑁆𑀥𑀼𑀫𑀢𑀺𑀁 𑀭𑀸𑀚𑀥𑀸𑀦𑀺𑀁 𑀅𑀦𑀼𑀧𑁆𑀧𑀢𑁆𑀢𑁄 𑀔𑁂𑀫𑁂 𑀫𑀺𑀕𑀤𑀸𑀬𑁂 𑀯𑀺𑀳𑀭𑀢𑀺; 𑀲𑁄 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀓𑀸𑀫𑁄’𑀢𑀺.

𑁭𑁪. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀔𑀡𑁆𑀟𑁄 𑀘 𑀭𑀸𑀚𑀧𑀼𑀢𑁆𑀢𑁄 𑀢𑀺𑀲𑁆𑀲𑁄 𑀘 ¶ 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀪𑀤𑁆𑀤𑀸𑀦𑀺 𑀪𑀤𑁆𑀤𑀸𑀦𑀺 𑀬𑀸𑀦𑀸𑀦𑀺 𑀬𑁄𑀚𑀸𑀧𑁂𑀢𑁆𑀯𑀸 𑀪𑀤𑁆𑀤𑀁 𑀪𑀤𑁆𑀤𑀁 𑀬𑀸𑀦𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀪𑀤𑁆𑀤𑁂𑀳𑀺 𑀪𑀤𑁆𑀤𑁂𑀳𑀺 𑀬𑀸𑀦𑁂𑀳𑀺 𑀩𑀦𑁆𑀥𑀼𑀫𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀦𑀺𑀬𑁆𑀬𑀺𑀁𑀲𑀼. 𑀬𑁂𑀦 𑀔𑁂𑀫𑁄 𑀫𑀺𑀕𑀤𑀸𑀬𑁄 𑀢𑁂𑀦 𑀧𑀸𑀬𑀺𑀁𑀲𑀼. 𑀬𑀸𑀯𑀢𑀺𑀓𑀸 𑀬𑀸𑀦𑀲𑁆𑀲 𑀪𑀽𑀫𑀺, 𑀬𑀸𑀦𑁂𑀦 𑀕𑀦𑁆𑀢𑁆𑀯𑀸 𑀬𑀸𑀦𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸 𑀧𑀢𑁆𑀢𑀺𑀓𑀸𑀯 [𑀧𑀤𑀺𑀓𑀸𑀯 (𑀲𑁆𑀬𑀸.)] 𑀬𑁂𑀦 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀅𑀭𑀳𑀦𑁆𑀢𑀁 ¶ 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼.

𑁭𑁫. ‘‘𑀢𑁂𑀲𑀁 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 [𑀆𑀦𑀼𑀧𑀼𑀩𑁆𑀩𑀺𑀓𑀣𑀁 (𑀲𑀻. 𑀧𑀻.)] 𑀓𑀣𑁂𑀲𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀓𑀣𑀁 𑀲𑀻𑀮𑀓𑀣𑀁 𑀲𑀕𑁆𑀕𑀓𑀣𑀁 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺. 𑀬𑀤𑀸 𑀢𑁂 𑀪𑀕𑀯𑀸 𑀅𑀜𑁆𑀜𑀸𑀲𑀺 𑀓𑀮𑁆𑀮𑀘𑀺𑀢𑁆𑀢𑁂 𑀫𑀼𑀤𑀼𑀘𑀺𑀢𑁆𑀢𑁂 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑁂 𑀉𑀤𑀕𑁆𑀕𑀘𑀺𑀢𑁆𑀢𑁂 𑀧𑀲𑀦𑁆𑀦𑀘𑀺𑀢𑁆𑀢𑁂, 𑀅𑀣 𑀬𑀸 𑀩𑀼𑀤𑁆𑀥𑀸𑀦𑀁 𑀲𑀸𑀫𑀼𑀓𑁆𑀓𑀁𑀲𑀺𑀓𑀸 𑀥𑀫𑁆𑀫𑀤𑁂𑀲𑀦𑀸, 𑀢𑀁 𑀧𑀓𑀸𑀲𑁂𑀲𑀺 𑁋 𑀤𑀼𑀓𑁆𑀔𑀁 𑀲𑀫𑀼𑀤𑀬𑀁 𑀦𑀺𑀭𑁄𑀥𑀁 𑀫𑀕𑁆𑀕𑀁. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀼𑀤𑁆𑀥𑀁 𑀯𑀢𑁆𑀣𑀁 𑀅𑀧𑀕𑀢𑀓𑀸𑀴𑀓𑀁 𑀲𑀫𑁆𑀫𑀤𑁂𑀯 𑀭𑀚𑀦𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀏𑀯𑀫𑁂𑀯 𑀔𑀡𑁆𑀟𑀲𑁆𑀲 𑀘 𑀭𑀸𑀚𑀧𑀼𑀢𑁆𑀢𑀲𑁆𑀲 𑀢𑀺𑀲𑁆𑀲𑀲𑁆𑀲 𑀘 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑀲𑁆𑀲 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’𑀦𑁆𑀢𑀺.

𑁭𑁬. ‘‘𑀢𑁂 𑀤𑀺𑀝𑁆𑀞𑀥𑀫𑁆𑀫𑀸 𑀧𑀢𑁆𑀢𑀥𑀫𑁆𑀫𑀸 𑀯𑀺𑀤𑀺𑀢𑀥𑀫𑁆𑀫𑀸 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑀸 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀕𑀢𑀓𑀣𑀁𑀓𑀣𑀸 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸 𑀅𑀧𑀭𑀧𑁆𑀧𑀘𑁆𑀘𑀬𑀸 𑀲𑀢𑁆𑀣𑀼𑀲𑀸𑀲𑀦𑁂 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀏𑀢𑀤𑀯𑁄𑀘𑀼𑀁 𑁋 ‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 ¶ 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 ‘‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’’𑀢𑀺. 𑀏𑀯𑀫𑁂𑀯𑀁 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 ¶ 𑀧𑀓𑀸𑀲𑀺𑀢𑁄. 𑀏𑀢𑁂 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 ¶ 𑀕𑀘𑁆𑀙𑀸𑀫 𑀥𑀫𑁆𑀫𑀜𑁆𑀘. 𑀮𑀪𑁂𑀬𑁆𑀬𑀸𑀫 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤’𑀦𑁆𑀢𑀺.

𑁭𑁭. ‘‘𑀅𑀮𑀢𑁆𑀣𑀼𑀁 𑀔𑁄 ¶ , 𑀪𑀺𑀓𑁆𑀔𑀯𑁂, 𑀔𑀡𑁆𑀟𑁄 𑀘 𑀭𑀸𑀚𑀧𑀼𑀢𑁆𑀢𑁄, 𑀢𑀺𑀲𑁆𑀲𑁄 𑀘 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁 𑀅𑀮𑀢𑁆𑀣𑀼𑀁 𑀉𑀧𑀲𑀫𑁆𑀧𑀤𑀁. 𑀢𑁂 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺; 𑀲𑀗𑁆𑀔𑀸𑀭𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁 𑀦𑀺𑀩𑁆𑀩𑀸𑀦𑁂 [𑀦𑁂𑀓𑁆𑀔𑀫𑁆𑀫𑁂 (𑀲𑁆𑀬𑀸.)] 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺. 𑀢𑁂𑀲𑀁 𑀯𑀺𑀧𑀲𑁆𑀲𑀺𑀦𑀸 𑀪𑀕𑀯𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀬𑀫𑀸𑀦𑀸𑀦𑀁 𑀲𑀫𑀸𑀤𑀧𑀺𑀬𑀫𑀸𑀦𑀸𑀦𑀁 𑀲𑀫𑀼𑀢𑁆𑀢𑁂𑀚𑀺𑀬𑀫𑀸𑀦𑀸𑀦𑀁 𑀲𑀫𑁆𑀧𑀳𑀁𑀲𑀺𑀬𑀫𑀸𑀦𑀸𑀦𑀁 𑀦𑀘𑀺𑀭𑀲𑁆𑀲𑁂𑀯 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀼.

𑀫𑀳𑀸𑀚𑀦𑀓𑀸𑀬𑀧𑀩𑁆𑀩𑀚𑁆𑀚𑀸

𑁭𑁮. ‘‘𑀅𑀲𑁆𑀲𑁄𑀲𑀺 𑀔𑁄, 𑀪𑀺𑀓𑁆𑀔𑀯𑁂, 𑀩𑀦𑁆𑀥𑀼𑀫𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀫𑀳𑀸𑀚𑀦𑀓𑀸𑀬𑁄 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀺 𑁋 ‘𑀯𑀺𑀧𑀲𑁆𑀲𑀻 𑀓𑀺𑀭 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀩𑀦𑁆𑀥𑀼𑀫𑀢𑀺𑀁 𑀭𑀸𑀚𑀥𑀸𑀦𑀺𑀁 𑀅𑀦𑀼𑀧𑁆𑀧𑀢𑁆𑀢𑁄 𑀔𑁂𑀫𑁂 𑀫𑀺𑀕𑀤𑀸𑀬𑁂 𑀯𑀺𑀳𑀭𑀢𑀺. 𑀔𑀡𑁆𑀟𑁄 𑀘 𑀓𑀺𑀭 𑀭𑀸𑀚𑀧𑀼𑀢𑁆𑀢𑁄 𑀢𑀺𑀲𑁆𑀲𑁄 𑀘 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸’𑀢𑀺. 𑀲𑀼𑀢𑁆𑀯𑀸𑀦 𑀦𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘𑀦 𑀳𑀺 𑀦𑀽𑀦 𑀲𑁄 𑀑𑀭𑀓𑁄 𑀥𑀫𑁆𑀫𑀯𑀺𑀦𑀬𑁄, 𑀦 𑀲𑀸 𑀑𑀭𑀓𑀸 𑀧𑀩𑁆𑀩𑀚𑁆𑀚𑀸, 𑀬𑀢𑁆𑀣 𑀔𑀡𑁆𑀟𑁄 𑀘 𑀭𑀸𑀚𑀧𑀼𑀢𑁆𑀢𑁄 𑀢𑀺𑀲𑁆𑀲𑁄 𑀘 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸. 𑀔𑀡𑁆𑀟𑁄 𑀘 𑀭𑀸𑀚𑀧𑀼𑀢𑁆𑀢𑁄 𑀢𑀺𑀲𑁆𑀲𑁄 𑀘 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀦𑁆𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀫𑀬’𑀦𑁆𑀢𑀺. 𑀅𑀣 ¶ 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀚𑀦𑀓𑀸𑀬𑁄 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀺 𑀩𑀦𑁆𑀥𑀼𑀫𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑁂𑀦 𑀔𑁂𑀫𑁄 𑀫𑀺𑀕𑀤𑀸𑀬𑁄 𑀬𑁂𑀦 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 ¶ 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼.

𑁭𑁯. ‘‘𑀢𑁂𑀲𑀁 ¶ 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀓𑀣𑀁 𑀲𑀻𑀮𑀓𑀣𑀁 𑀲𑀕𑁆𑀕𑀓𑀣𑀁 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺. 𑀬𑀤𑀸 𑀢𑁂 𑀪𑀕𑀯𑀸 𑀅𑀜𑁆𑀜𑀸𑀲𑀺 𑀓𑀮𑁆𑀮𑀘𑀺𑀢𑁆𑀢𑁂 𑀫𑀼𑀤𑀼𑀘𑀺𑀢𑁆𑀢𑁂 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑁂 𑀉𑀤𑀕𑁆𑀕𑀘𑀺𑀢𑁆𑀢𑁂 𑀧𑀲𑀦𑁆𑀦𑀘𑀺𑀢𑁆𑀢𑁂 ¶ , 𑀅𑀣 𑀬𑀸 𑀩𑀼𑀤𑁆𑀥𑀸𑀦𑀁 𑀲𑀸𑀫𑀼𑀓𑁆𑀓𑀁𑀲𑀺𑀓𑀸 𑀥𑀫𑁆𑀫𑀤𑁂𑀲𑀦𑀸, 𑀢𑀁 𑀧𑀓𑀸𑀲𑁂𑀲𑀺 𑁋 𑀤𑀼𑀓𑁆𑀔𑀁 𑀲𑀫𑀼𑀤𑀬𑀁 𑀦𑀺𑀭𑁄𑀥𑀁 𑀫𑀕𑁆𑀕𑀁. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀼𑀤𑁆𑀥𑀁 𑀯𑀢𑁆𑀣𑀁 𑀅𑀧𑀕𑀢𑀓𑀸𑀴𑀓𑀁 𑀲𑀫𑁆𑀫𑀤𑁂𑀯 𑀭𑀚𑀦𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀏𑀯𑀫𑁂𑀯 𑀢𑁂𑀲𑀁 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀁 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’𑀦𑁆𑀢𑀺.

𑁮𑁦. ‘‘𑀢𑁂 𑀤𑀺𑀝𑁆𑀞𑀥𑀫𑁆𑀫𑀸 𑀧𑀢𑁆𑀢𑀥𑀫𑁆𑀫𑀸 𑀯𑀺𑀤𑀺𑀢𑀥𑀫𑁆𑀫𑀸 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑀸 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀕𑀢𑀓𑀣𑀁𑀓𑀣𑀸 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸 𑀅𑀧𑀭𑀧𑁆𑀧𑀘𑁆𑀘𑀬𑀸 𑀲𑀢𑁆𑀣𑀼𑀲𑀸𑀲𑀦𑁂 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀏𑀢𑀤𑀯𑁄𑀘𑀼𑀁 𑁋 ‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 ‘‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’’𑀢𑀺. 𑀏𑀯𑀫𑁂𑀯𑀁 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀢𑁂 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 [( ) 𑀦𑀢𑁆𑀣𑀺 𑀅𑀝𑁆𑀞𑀓𑀣𑀸𑀬𑀁, 𑀧𑀸𑀴𑀺𑀬𑀁 𑀧𑀦 𑀲𑀩𑁆𑀩𑀢𑁆𑀣𑀧𑀺 𑀤𑀺𑀲𑁆𑀲𑀢𑀺]. 𑀮𑀪𑁂𑀬𑁆𑀬𑀸𑀫 ¶ 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁 𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤’’𑀦𑁆𑀢𑀺.

𑁮𑁧. ‘‘𑀅𑀮𑀢𑁆𑀣𑀼𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺𑀧𑀸𑀡𑀲𑀳𑀲𑁆𑀲𑀸𑀦𑀺 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀅𑀮𑀢𑁆𑀣𑀼𑀁 𑀉𑀧𑀲𑀫𑁆𑀧𑀤𑀁. 𑀢𑁂 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺; 𑀲𑀗𑁆𑀔𑀸𑀭𑀸𑀦𑀁 ¶ 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁 𑀦𑀺𑀩𑁆𑀩𑀸𑀦𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺. 𑀢𑁂𑀲𑀁 𑀯𑀺𑀧𑀲𑁆𑀲𑀺𑀦𑀸 𑀪𑀕𑀯𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀬𑀫𑀸𑀦𑀸𑀦𑀁 𑀲𑀫𑀸𑀤𑀧𑀺𑀬𑀫𑀸𑀦𑀸𑀦𑀁 𑀲𑀫𑀼𑀢𑁆𑀢𑁂𑀚𑀺𑀬𑀫𑀸𑀦𑀸𑀦𑀁 𑀲𑀫𑁆𑀧𑀳𑀁𑀲𑀺𑀬𑀫𑀸𑀦𑀸𑀦𑀁 𑀦𑀘𑀺𑀭𑀲𑁆𑀲𑁂𑀯 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀼.

𑀧𑀼𑀭𑀺𑀫𑀧𑀩𑁆𑀩𑀚𑀺𑀢𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄

𑁮𑁨. ‘‘𑀅𑀲𑁆𑀲𑁄𑀲𑀼𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀸𑀦𑀺 𑀧𑀼𑀭𑀺𑀫𑀸𑀦𑀺 𑀘𑀢𑀼𑀭𑀸𑀲𑀻𑀢𑀺𑀧𑀩𑁆𑀩𑀚𑀺𑀢𑀲𑀳𑀲𑁆𑀲𑀸𑀦𑀺 𑁋 ‘𑀯𑀺𑀧𑀲𑁆𑀲𑀻 𑀓𑀺𑀭 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀩𑀦𑁆𑀥𑀼𑀫𑀢𑀺𑀁 𑀭𑀸𑀚𑀥𑀸𑀦𑀺𑀁 ¶ 𑀅𑀦𑀼𑀧𑁆𑀧𑀢𑁆𑀢𑁄 𑀔𑁂𑀫𑁂 𑀫𑀺𑀕𑀤𑀸𑀬𑁂 𑀯𑀺𑀳𑀭𑀢𑀺, 𑀥𑀫𑁆𑀫𑀜𑁆𑀘 𑀓𑀺𑀭 𑀤𑁂𑀲𑁂𑀢𑀻’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺𑀧𑀩𑁆𑀩𑀚𑀺𑀢𑀲𑀳𑀲𑁆𑀲𑀸𑀦𑀺 𑀬𑁂𑀦 𑀩𑀦𑁆𑀥𑀼𑀫𑀢𑀻 𑀭𑀸𑀚𑀥𑀸𑀦𑀻 𑀬𑁂𑀦 𑀔𑁂𑀫𑁄 𑀫𑀺𑀕𑀤𑀸𑀬𑁄 𑀬𑁂𑀦 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼.

𑁮𑁩. ‘‘𑀢𑁂𑀲𑀁 ¶ 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀦𑀼𑀧𑀼𑀩𑁆𑀩𑀺𑀁 𑀓𑀣𑀁 𑀓𑀣𑁂𑀲𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀸𑀦𑀓𑀣𑀁 𑀲𑀻𑀮𑀓𑀣𑀁 𑀲𑀕𑁆𑀕𑀓𑀣𑀁 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺. 𑀬𑀤𑀸 𑀢𑁂 𑀪𑀕𑀯𑀸 𑀅𑀜𑁆𑀜𑀸𑀲𑀺 𑀓𑀮𑁆𑀮𑀘𑀺𑀢𑁆𑀢𑁂 𑀫𑀼𑀤𑀼𑀘𑀺𑀢𑁆𑀢𑁂 ¶ 𑀯𑀺𑀦𑀻𑀯𑀭𑀡𑀘𑀺𑀢𑁆𑀢𑁂 𑀉𑀤𑀕𑁆𑀕𑀘𑀺𑀢𑁆𑀢𑁂 𑀧𑀲𑀦𑁆𑀦𑀘𑀺𑀢𑁆𑀢𑁂, 𑀅𑀣 𑀬𑀸 𑀩𑀼𑀤𑁆𑀥𑀸𑀦𑀁 𑀲𑀸𑀫𑀼𑀓𑁆𑀓𑀁𑀲𑀺𑀓𑀸 𑀥𑀫𑁆𑀫𑀤𑁂𑀲𑀦𑀸, 𑀢𑀁 𑀧𑀓𑀸𑀲𑁂𑀲𑀺 𑁋 𑀤𑀼𑀓𑁆𑀔𑀁 𑀲𑀫𑀼𑀤𑀬𑀁 𑀦𑀺𑀭𑁄𑀥𑀁 𑀫𑀕𑁆𑀕𑀁. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀼𑀤𑁆𑀥𑀁 𑀯𑀢𑁆𑀣𑀁 𑀅𑀧𑀕𑀢𑀓𑀸𑀴𑀓𑀁 𑀲𑀫𑁆𑀫𑀤𑁂𑀯 𑀭𑀚𑀦𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬, 𑀏𑀯𑀫𑁂𑀯 𑀢𑁂𑀲𑀁 𑀘𑀢𑀼𑀭𑀸𑀲𑀻𑀢𑀺𑀧𑀩𑁆𑀩𑀚𑀺𑀢𑀲𑀳𑀲𑁆𑀲𑀸𑀦𑀁 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’𑀦𑁆𑀢𑀺.

𑁮𑁪. ‘‘𑀢𑁂 𑀤𑀺𑀝𑁆𑀞𑀥𑀫𑁆𑀫𑀸 𑀧𑀢𑁆𑀢𑀥𑀫𑁆𑀫𑀸 𑀯𑀺𑀤𑀺𑀢𑀥𑀫𑁆𑀫𑀸 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑀸 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀸 𑀯𑀺𑀕𑀢𑀓𑀣𑀁𑀓𑀣𑀸 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸 𑀅𑀧𑀭𑀧𑁆𑀧𑀘𑁆𑀘𑀬𑀸 𑀲𑀢𑁆𑀣𑀼𑀲𑀸𑀲𑀦𑁂 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀏𑀢𑀤𑀯𑁄𑀘𑀼𑀁 𑁋 ‘𑀅𑀪𑀺𑀓𑁆𑀓𑀦𑁆𑀢𑀁 ¶ , 𑀪𑀦𑁆𑀢𑁂, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 ‘‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’’𑀢𑀺. 𑀏𑀯𑀫𑁂𑀯𑀁 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀢𑁂 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀮𑀪𑁂𑀬𑁆𑀬𑀸𑀫 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁 𑀮𑀪𑁂𑀬𑁆𑀬𑀸𑀫 𑀉𑀧𑀲𑀫𑁆𑀧𑀤’’𑀦𑁆𑀢𑀺.

𑁮𑁫. ‘‘𑀅𑀮𑀢𑁆𑀣𑀼𑀁 𑀔𑁄, 𑀪𑀺𑀓𑁆𑀔𑀯𑁂, 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺𑀧𑀩𑁆𑀩𑀚𑀺𑀢𑀲𑀳𑀲𑁆𑀲𑀸𑀦𑀺 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁 𑀅𑀮𑀢𑁆𑀣𑀼𑀁 𑀉𑀧𑀲𑀫𑁆𑀧𑀤𑀁. 𑀢𑁂 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺; 𑀲𑀗𑁆𑀔𑀸𑀭𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁 𑀦𑀺𑀩𑁆𑀩𑀸𑀦𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺. 𑀢𑁂𑀲𑀁 𑀯𑀺𑀧𑀲𑁆𑀲𑀺𑀦𑀸 𑀪𑀕𑀯𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀬𑀫𑀸𑀦𑀸𑀦𑀁 ¶ 𑀲𑀫𑀸𑀤𑀧𑀺𑀬𑀫𑀸𑀦𑀸𑀦𑀁 ¶ 𑀲𑀫𑀼𑀢𑁆𑀢𑁂𑀚𑀺𑀬𑀫𑀸𑀦𑀸𑀦𑀁 𑀲𑀫𑁆𑀧𑀳𑀁𑀲𑀺𑀬𑀫𑀸𑀦𑀸𑀦𑀁 𑀦𑀘𑀺𑀭𑀲𑁆𑀲𑁂𑀯 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀼.

𑀘𑀸𑀭𑀺𑀓𑀸𑀅𑀦𑀼𑀚𑀸𑀦𑀦𑀁

𑁮𑁬. ‘‘𑀢𑁂𑀦 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀫𑀬𑁂𑀦 𑀩𑀦𑁆𑀥𑀼𑀫𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁄 𑀧𑀝𑀺𑀯𑀲𑀢𑀺 𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀫𑀳𑀸 𑀔𑁄 𑀏𑀢𑀭𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑁄 𑀩𑀦𑁆𑀥𑀼𑀫𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀧𑀝𑀺𑀯𑀲𑀢𑀺 𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁, 𑀬𑀁𑀦𑀽𑀦𑀸𑀳𑀁 𑀪𑀺𑀓𑁆𑀔𑀽 𑀅𑀦𑀼𑀚𑀸𑀦𑁂𑀬𑁆𑀬𑀁 𑁋 ‘𑀘𑀭𑀣, 𑀪𑀺𑀓𑁆𑀔𑀯𑁂, 𑀘𑀸𑀭𑀺𑀓𑀁 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 ¶ 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁; 𑀫𑀸 𑀏𑀓𑁂𑀦 𑀤𑁆𑀯𑁂 𑀅𑀕𑀫𑀺𑀢𑁆𑀣; 𑀤𑁂𑀲𑁂𑀣, 𑀪𑀺𑀓𑁆𑀔𑀯𑁂 ¶ , 𑀥𑀫𑁆𑀫𑀁 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀣. 𑀲𑀦𑁆𑀢𑀺 𑀲𑀢𑁆𑀢𑀸 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸, 𑀅𑀲𑁆𑀲𑀯𑀦𑀢𑀸 𑀥𑀫𑁆𑀫𑀲𑁆𑀲 𑀧𑀭𑀺𑀳𑀸𑀬𑀦𑁆𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀢𑀸𑀭𑁄. 𑀅𑀧𑀺 𑀘 𑀙𑀦𑁆𑀦𑀁 𑀙𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀩𑀦𑁆𑀥𑀼𑀫𑀢𑀻 𑀭𑀸𑀚𑀥𑀸𑀦𑀻 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀬𑀸’’’𑀢𑀺.

𑁮𑁭. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑁄 𑀫𑀳𑀸𑀩𑁆𑀭𑀳𑁆𑀫𑀸 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬. 𑀏𑀯𑀫𑁂𑀯 𑀩𑁆𑀭𑀳𑁆𑀫𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀭𑀢𑁄 ¶ 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀩𑁆𑀭𑀳𑁆𑀫𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀯𑀺𑀧𑀲𑁆𑀲𑀺𑀁 𑀪𑀕𑀯𑀦𑁆𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀏𑀢𑀤𑀯𑁄𑀘 𑁋 ‘𑀏𑀯𑀫𑁂𑀢𑀁, 𑀪𑀕𑀯𑀸, 𑀏𑀯𑀫𑁂𑀢𑀁, 𑀲𑀼𑀕𑀢. 𑀫𑀳𑀸 𑀔𑁄, 𑀪𑀦𑁆𑀢𑁂, 𑀏𑀢𑀭𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑁄 𑀩𑀦𑁆𑀥𑀼𑀫𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀧𑀝𑀺𑀯𑀲𑀢𑀺 𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁, 𑀅𑀦𑀼𑀚𑀸𑀦𑀸𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽 𑁋 ‘‘𑀘𑀭𑀣, 𑀪𑀺𑀓𑁆𑀔𑀯𑁂, 𑀘𑀸𑀭𑀺𑀓𑀁 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁; 𑀫𑀸 𑀏𑀓𑁂𑀦 𑀤𑁆𑀯𑁂 𑀅𑀕𑀫𑀺𑀢𑁆𑀣; 𑀤𑁂𑀲𑁂𑀣, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀆𑀤𑀺𑀓𑀮𑁆𑀬𑀸𑀡𑀁 ¶ 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀣. 𑀲𑀦𑁆𑀢𑀺 𑀲𑀢𑁆𑀢𑀸 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸, 𑀅𑀲𑁆𑀲𑀯𑀦𑀢𑀸 𑀥𑀫𑁆𑀫𑀲𑁆𑀲 𑀧𑀭𑀺𑀳𑀸𑀬𑀦𑁆𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀢𑀸𑀭𑁄’’𑀢𑀺 [𑀅𑀜𑁆𑀜𑀸𑀢𑀸𑀭𑁄 (𑀲𑁆𑀲𑀩𑁆𑀩𑀢𑁆𑀣)]. 𑀅𑀧𑀺 𑀘, 𑀪𑀦𑁆𑀢𑁂, 𑀫𑀬𑀁 𑀢𑀣𑀸 𑀓𑀭𑀺𑀲𑁆𑀲𑀸𑀫 𑀬𑀣𑀸 𑀪𑀺𑀓𑁆𑀔𑀽 𑀙𑀦𑁆𑀦𑀁 𑀙𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀩𑀦𑁆𑀥𑀼𑀫𑀢𑀺𑀁 𑀭𑀸𑀚𑀥𑀸𑀦𑀺𑀁 𑀉𑀧𑀲𑀗𑁆𑀓𑀫𑀺𑀲𑁆𑀲𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀬𑀸’𑀢𑀺. 𑀇𑀤𑀫𑀯𑁄𑀘, 𑀪𑀺𑀓𑁆𑀔𑀯𑁂, 𑀲𑁄 𑀫𑀳𑀸𑀩𑁆𑀭𑀳𑁆𑀫𑀸, 𑀇𑀤𑀁 𑀯𑀢𑁆𑀯𑀸 𑀯𑀺𑀧𑀲𑁆𑀲𑀺𑀁 ¶ 𑀪𑀕𑀯𑀦𑁆𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀅𑀦𑁆𑀢𑀭𑀥𑀸𑀬𑀺.

𑁮𑁮. ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘𑀇𑀥 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 𑀫𑀳𑀸 𑀔𑁄 𑀏𑀢𑀭𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑁄 𑀩𑀦𑁆𑀥𑀼𑀫𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀧𑀝𑀺𑀯𑀲𑀢𑀺 𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁 ¶ . 𑀬𑀁𑀦𑀽𑀦𑀸𑀳𑀁 𑀪𑀺𑀓𑁆𑀔𑀽 𑀅𑀦𑀼𑀚𑀸𑀦𑁂𑀬𑁆𑀬𑀁 𑁋 ‘𑀘𑀭𑀣, 𑀪𑀺𑀓𑁆𑀔𑀯𑁂, 𑀘𑀸𑀭𑀺𑀓𑀁 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁; 𑀫𑀸 𑀏𑀓𑁂𑀦 𑀤𑁆𑀯𑁂 𑀅𑀕𑀫𑀺𑀢𑁆𑀣; 𑀤𑁂𑀲𑁂𑀣, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀣. 𑀲𑀦𑁆𑀢𑀺 𑀲𑀢𑁆𑀢𑀸 ¶ 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸, 𑀅𑀲𑁆𑀲𑀯𑀦𑀢𑀸 𑀥𑀫𑁆𑀫𑀲𑁆𑀲 𑀧𑀭𑀺𑀳𑀸𑀬𑀦𑁆𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀢𑀸𑀭𑁄. 𑀅𑀧𑀺 𑀘, 𑀙𑀦𑁆𑀦𑀁 𑀙𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀩𑀦𑁆𑀥𑀼𑀫𑀢𑀻 𑀭𑀸𑀚𑀥𑀸𑀦𑀻 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀬𑀸𑀢𑀺.

‘‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑁄 𑀫𑀳𑀸𑀩𑁆𑀭𑀳𑁆𑀫𑀸 𑀫𑀫 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯 𑀩𑁆𑀭𑀳𑁆𑀫𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁄 𑀫𑀫 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀩𑁆𑀭𑀳𑁆𑀫𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦𑀸𑀳𑀁 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀫𑀁 𑀏𑀢𑀤𑀯𑁄𑀘 𑁋 ‘‘𑀏𑀯𑀫𑁂𑀢𑀁, 𑀪𑀕𑀯𑀸, 𑀏𑀯𑀫𑁂𑀢𑀁, 𑀲𑀼𑀕𑀢. 𑀫𑀳𑀸 𑀔𑁄, 𑀪𑀦𑁆𑀢𑁂, 𑀏𑀢𑀭𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑁄 𑀩𑀦𑁆𑀥𑀼𑀫𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀧𑀝𑀺𑀯𑀲𑀢𑀺 𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁. 𑀅𑀦𑀼𑀚𑀸𑀦𑀸𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽 𑁋 ‘𑀘𑀭𑀣, 𑀪𑀺𑀓𑁆𑀔𑀯𑁂, 𑀘𑀸𑀭𑀺𑀓𑀁 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 ¶ 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁; 𑀫𑀸 𑀏𑀓𑁂𑀦 𑀤𑁆𑀯𑁂 𑀅𑀕𑀫𑀺𑀢𑁆𑀣; 𑀤𑁂𑀲𑁂𑀣, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁…𑀧𑁂… 𑀲𑀦𑁆𑀢𑀺 𑀲𑀢𑁆𑀢𑀸 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸 ¶ , 𑀅𑀲𑁆𑀲𑀯𑀦𑀢𑀸 𑀥𑀫𑁆𑀫𑀲𑁆𑀲 𑀧𑀭𑀺𑀳𑀸𑀬𑀦𑁆𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀢𑀸𑀭𑁄’𑀢𑀺. 𑀅𑀧𑀺 ¶ 𑀘, 𑀪𑀦𑁆𑀢𑁂, 𑀫𑀬𑀁 𑀢𑀣𑀸 𑀓𑀭𑀺𑀲𑁆𑀲𑀸𑀫, 𑀬𑀣𑀸 𑀪𑀺𑀓𑁆𑀔𑀽 𑀙𑀦𑁆𑀦𑀁 𑀙𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀩𑀦𑁆𑀥𑀼𑀫𑀢𑀺𑀁 𑀭𑀸𑀚𑀥𑀸𑀦𑀺𑀁 𑀉𑀧𑀲𑀗𑁆𑀓𑀫𑀺𑀲𑁆𑀲𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀬𑀸’’𑀢𑀺. 𑀇𑀤𑀫𑀯𑁄𑀘, 𑀪𑀺𑀓𑁆𑀔𑀯𑁂, 𑀲𑁄 𑀫𑀳𑀸𑀩𑁆𑀭𑀳𑁆𑀫𑀸, 𑀇𑀤𑀁 𑀯𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀅𑀦𑁆𑀢𑀭𑀥𑀸𑀬𑀺’.

‘‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀭𑀣 𑀘𑀸𑀭𑀺𑀓𑀁 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁; 𑀫𑀸 𑀏𑀓𑁂𑀦 𑀤𑁆𑀯𑁂 𑀅𑀕𑀫𑀺𑀢𑁆𑀣; 𑀤𑁂𑀲𑁂𑀣, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀣. 𑀲𑀦𑁆𑀢𑀺 𑀲𑀢𑁆𑀢𑀸 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸, 𑀅𑀲𑁆𑀲𑀯𑀦𑀢𑀸 𑀥𑀫𑁆𑀫𑀲𑁆𑀲 𑀧𑀭𑀺𑀳𑀸𑀬𑀦𑁆𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀢𑀸𑀭𑁄. 𑀅𑀧𑀺 𑀘, 𑀪𑀺𑀓𑁆𑀔𑀯𑁂, 𑀙𑀦𑁆𑀦𑀁 𑀙𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀩𑀦𑁆𑀥𑀼𑀫𑀢𑀻 𑀭𑀸𑀚𑀥𑀸𑀦𑀻 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀬𑀸’𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀬𑁂𑀪𑀼𑀬𑁆𑀬𑁂𑀦 𑀏𑀓𑀸𑀳𑁂𑀦𑁂𑀯 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀁𑀲𑀼.

𑁮𑁯. ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀚𑀫𑁆𑀩𑀼𑀤𑀻𑀧𑁂 𑀘𑀢𑀼𑀭𑀸𑀲𑀻𑀢𑀺 𑀆𑀯𑀸𑀲𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀏𑀓𑀫𑁆𑀳𑀺 𑀳𑀺 𑀯𑀲𑁆𑀲𑁂 𑀦𑀺𑀓𑁆𑀔𑀦𑁆𑀢𑁂 𑀤𑁂𑀯𑀢𑀸 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀼𑀁 𑁋 ‘𑀦𑀺𑀓𑁆𑀔𑀦𑁆𑀢𑀁 𑀔𑁄, 𑀫𑀸𑀭𑀺𑀲𑀸, 𑀏𑀓𑀁 𑀯𑀲𑁆𑀲𑀁; 𑀧𑀜𑁆𑀘 𑀤𑀸𑀦𑀺 𑀯𑀲𑁆𑀲𑀸𑀦𑀺 𑀲𑁂𑀲𑀸𑀦𑀺 ¶ ; 𑀧𑀜𑁆𑀘𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀩𑀦𑁆𑀥𑀼𑀫𑀢𑀻 𑀭𑀸𑀚𑀥𑀸𑀦𑀻 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀬𑀸’𑀢𑀺. 𑀤𑁆𑀯𑀻𑀲𑀼 𑀯𑀲𑁆𑀲𑁂𑀲𑀼 𑀦𑀺𑀓𑁆𑀔𑀦𑁆𑀢𑁂𑀲𑀼… ¶ 𑀢𑀻𑀲𑀼 𑀯𑀲𑁆𑀲𑁂𑀲𑀼 𑀦𑀺𑀓𑁆𑀔𑀦𑁆𑀢𑁂𑀲𑀼… 𑀘𑀢𑀽𑀲𑀼 𑀯𑀲𑁆𑀲𑁂𑀲𑀼 𑀦𑀺𑀓𑁆𑀔𑀦𑁆𑀢𑁂𑀲𑀼… 𑀧𑀜𑁆𑀘𑀲𑀼 𑀯𑀲𑁆𑀲𑁂𑀲𑀼 𑀦𑀺𑀓𑁆𑀔𑀦𑁆𑀢𑁂𑀲𑀼 𑀤𑁂𑀯𑀢𑀸 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀼𑀁 𑁋 ‘𑀦𑀺𑀓𑁆𑀔𑀦𑁆𑀢𑀸𑀦𑀺 𑀔𑁄 ¶ , 𑀫𑀸𑀭𑀺𑀲𑀸, 𑀧𑀜𑁆𑀘𑀯𑀲𑁆𑀲𑀸𑀦𑀺; 𑀏𑀓𑀁 𑀤𑀸𑀦𑀺 𑀯𑀲𑁆𑀲𑀁 𑀲𑁂𑀲𑀁; 𑀏𑀓𑀲𑁆𑀲 𑀯𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦 𑀩𑀦𑁆𑀥𑀼𑀫𑀢𑀻 𑀭𑀸𑀚𑀥𑀸𑀦𑀻 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀬𑀸’𑀢𑀺. 𑀙𑀲𑀼 𑀯𑀲𑁆𑀲𑁂𑀲𑀼 𑀦𑀺𑀓𑁆𑀔𑀦𑁆𑀢𑁂𑀲𑀼 𑀤𑁂𑀯𑀢𑀸 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀼𑀁 𑁋 ‘𑀦𑀺𑀓𑁆𑀔𑀦𑁆𑀢𑀸𑀦𑀺 𑀔𑁄, 𑀫𑀸𑀭𑀺𑀲𑀸, 𑀙𑀩𑁆𑀩𑀲𑁆𑀲𑀸𑀦𑀺, 𑀲𑀫𑀬𑁄 𑀤𑀸𑀦𑀺 𑀩𑀦𑁆𑀥𑀼𑀫𑀢𑀺𑀁 𑀭𑀸𑀚𑀥𑀸𑀦𑀺𑀁 𑀉𑀧𑀲𑀗𑁆𑀓𑀫𑀺𑀢𑀼𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀬𑀸’𑀢𑀺. 𑀅𑀣 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀧𑁆𑀧𑁂𑀓𑀘𑁆𑀘𑁂 𑀲𑀓𑁂𑀦 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀅𑀧𑁆𑀧𑁂𑀓𑀘𑁆𑀘𑁂 𑀤𑁂𑀯𑀢𑀸𑀦𑀁 𑀇𑀤𑁆𑀥𑀸𑀦𑀼𑀪𑀸𑀯𑁂𑀦 𑀏𑀓𑀸𑀳𑁂𑀦𑁂𑀯 𑀩𑀦𑁆𑀥𑀼𑀫𑀢𑀺𑀁 𑀭𑀸𑀚𑀥𑀸𑀦𑀺𑀁 𑀉𑀧𑀲𑀗𑁆𑀓𑀫𑀺𑀁𑀲𑀼 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀬𑀸𑀢𑀺 [𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀬 (?)].

𑁯𑁦. ‘‘𑀢𑀢𑁆𑀭 ¶ 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀺𑀓𑁆𑀔𑀼𑀲𑀗𑁆𑀖𑁂 𑀏𑀯𑀁 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀢𑀺 𑁋

‘𑀔𑀦𑁆𑀢𑀻 ¶ 𑀧𑀭𑀫𑀁 𑀢𑀧𑁄 𑀢𑀺𑀢𑀺𑀓𑁆𑀔𑀸,

𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀯𑀤𑀦𑁆𑀢𑀺 𑀩𑀼𑀤𑁆𑀥𑀸;

𑀦 𑀳𑀺 𑀧𑀩𑁆𑀩𑀚𑀺𑀢𑁄 𑀧𑀭𑀽𑀧𑀖𑀸𑀢𑀻,

𑀦 𑀲𑀫𑀡𑁄 [𑀲𑀫𑀡𑁄 (𑀲𑀻. 𑀲𑁆𑀬𑀸. 𑀧𑀻.)] 𑀳𑁄𑀢𑀺 𑀧𑀭𑀁 𑀯𑀺𑀳𑁂𑀞𑀬𑀦𑁆𑀢𑁄.

‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸;

𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀧𑀦𑀁, 𑀏𑀢𑀁 𑀩𑀼𑀤𑁆𑀥𑀸𑀦𑀲𑀸𑀲𑀦𑀁.

‘𑀅𑀦𑀽𑀧𑀯𑀸𑀤𑁄 𑀅𑀦𑀽𑀧𑀖𑀸𑀢𑁄 [𑀅𑀦𑀼𑀧𑀯𑀸𑀤𑁄 𑀅𑀦𑀼𑀧𑀖𑀸𑀢𑁄 (𑀧𑀻. 𑀓.)], 𑀧𑀸𑀢𑀺𑀫𑁄𑀓𑁆𑀔𑁂 𑀘 𑀲𑀁𑀯𑀭𑁄;

𑀫𑀢𑁆𑀢𑀜𑁆𑀜𑀼𑀢𑀸 ¶ 𑀘 𑀪𑀢𑁆𑀢𑀲𑁆𑀫𑀺𑀁, 𑀧𑀦𑁆𑀢𑀜𑁆𑀘 𑀲𑀬𑀦𑀸𑀲𑀦𑀁;

𑀅𑀥𑀺𑀘𑀺𑀢𑁆𑀢𑁂 𑀘 𑀆𑀬𑁄𑀕𑁄, 𑀏𑀢𑀁 𑀩𑀼𑀤𑁆𑀥𑀸𑀦𑀲𑀸𑀲𑀦’𑀦𑁆𑀢𑀺.

𑀤𑁂𑀯𑀢𑀸𑀭𑁄𑀘𑀦𑀁

𑁯𑁧. ‘‘𑀏𑀓𑀫𑀺𑀤𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑀁 𑀉𑀓𑁆𑀓𑀝𑁆𑀞𑀸𑀬𑀁 𑀯𑀺𑀳𑀭𑀸𑀫𑀺 𑀲𑀼𑀪𑀕𑀯𑀦𑁂 𑀲𑀸𑀮𑀭𑀸𑀚𑀫𑀽𑀮𑁂. 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘𑀦 𑀔𑁄 𑀲𑁄 𑀲𑀢𑁆𑀢𑀸𑀯𑀸𑀲𑁄 𑀲𑀼𑀮𑀪𑀭𑀽𑀧𑁄, 𑀬𑁄 𑀫𑀬𑀸 𑀅𑀦𑀸𑀯𑀼𑀢𑁆𑀣𑀧𑀼𑀩𑁆𑀩𑁄 [𑀅𑀦𑀚𑁆𑀛𑀸𑀯𑀼𑀝𑁆𑀞𑀧𑀼𑀩𑁆𑀩𑁄 (𑀓. 𑀲𑀻. 𑀓.)] 𑀇𑀫𑀺𑀦𑀸 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀅𑀜𑁆𑀜𑀢𑁆𑀭 𑀲𑀼𑀤𑁆𑀥𑀸𑀯𑀸𑀲𑁂𑀳𑀺 𑀤𑁂𑀯𑁂𑀳𑀺. 𑀬𑀁𑀦𑀽𑀦𑀸𑀳𑀁 𑀬𑁂𑀦 𑀲𑀼𑀤𑁆𑀥𑀸𑀯𑀸𑀲𑀸 𑀤𑁂𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬’𑀦𑁆𑀢𑀺. 𑀅𑀣 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯 𑀉𑀓𑁆𑀓𑀝𑁆𑀞𑀸𑀬𑀁 𑀲𑀼𑀪𑀕𑀯𑀦𑁂 𑀲𑀸𑀮𑀭𑀸𑀚𑀫𑀽𑀮𑁂 𑀅𑀦𑁆𑀢𑀭𑀳𑀺𑀢𑁄 𑀅𑀯𑀺𑀳𑁂𑀲𑀼 𑀤𑁂𑀯𑁂𑀲𑀼 𑀧𑀸𑀢𑀼𑀭𑀳𑁄𑀲𑀺𑀁 ¶ . 𑀢𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀤𑁂𑀯𑀦𑀺𑀓𑀸𑀬𑁂 𑀅𑀦𑁂𑀓𑀸𑀦𑀺 𑀤𑁂𑀯𑀢𑀸𑀲𑀳𑀲𑁆𑀲𑀸𑀦𑀺 𑀅𑀦𑁂𑀓𑀸𑀦𑀺 𑀤𑁂𑀯𑀢𑀸𑀲𑀢𑀲𑀳𑀲𑁆𑀲𑀸𑀦𑀺 [𑀅𑀦𑁂𑀓𑀸𑀦𑀺 𑀤𑁂𑀯𑀢𑀸𑀲𑀢𑀸𑀦𑀺 𑀅𑀦𑁂𑀓𑀸𑀦𑀺 𑀤𑁂𑀯𑀢𑀸𑀲𑀳𑀲𑁆𑀲𑀸𑀦𑀺 (𑀲𑁆𑀬𑀸.)] 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 ¶ 𑀞𑀺𑀢𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀸 𑀤𑁂𑀯𑀢𑀸 𑀫𑀁 𑀏𑀢𑀤𑀯𑁄𑀘𑀼𑀁 𑁋 ‘𑀇𑀢𑁄 𑀲𑁄, 𑀫𑀸𑀭𑀺𑀲𑀸, 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀬𑀁 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀤𑀧𑀸𑀤𑀺. 𑀯𑀺𑀧𑀲𑁆𑀲𑀻, 𑀫𑀸𑀭𑀺𑀲𑀸, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀔𑀢𑁆𑀢𑀺𑀬𑁄 𑀚𑀸𑀢𑀺𑀬𑀸 𑀅𑀳𑁄𑀲𑀺, 𑀔𑀢𑁆𑀢𑀺𑀬𑀓𑀼𑀮𑁂 𑀉𑀤𑀧𑀸𑀤𑀺. 𑀯𑀺𑀧𑀲𑁆𑀲𑀻, 𑀫𑀸𑀭𑀺𑀲𑀸, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑁄𑀡𑁆𑀟𑀜𑁆𑀜𑁄 𑀕𑁄𑀢𑁆𑀢𑁂𑀦 𑀅𑀳𑁄𑀲𑀺 ¶ . 𑀯𑀺𑀧𑀲𑁆𑀲𑀺𑀲𑁆𑀲, 𑀫𑀸𑀭𑀺𑀲𑀸, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀯𑀺𑀧𑀲𑁆𑀲𑀻, 𑀫𑀸𑀭𑀺𑀲𑀸, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀸𑀝𑀮𑀺𑀬𑀸 𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀯𑀺𑀧𑀲𑁆𑀲𑀺𑀲𑁆𑀲, 𑀫𑀸𑀭𑀺𑀲𑀸, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀔𑀡𑁆𑀟𑀢𑀺𑀲𑁆𑀲𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁. 𑀯𑀺𑀧𑀲𑁆𑀲𑀺𑀲𑁆𑀲, 𑀫𑀸𑀭𑀺𑀲𑀸, 𑀪𑀕𑀯𑀢𑁄 ¶ 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀬𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁. 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁. 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁. 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀅𑀲𑀻𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺. 𑀯𑀺𑀧𑀲𑁆𑀲𑀺𑀲𑁆𑀲, 𑀫𑀸𑀭𑀺𑀲𑀸, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀇𑀫𑁂 𑀢𑀬𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁 𑀲𑀩𑁆𑀩𑁂𑀲𑀁𑀬𑁂𑀯 𑀔𑀻𑀡𑀸𑀲𑀯𑀸𑀦𑀁. 𑀯𑀺𑀧𑀲𑁆𑀲𑀺𑀲𑁆𑀲, 𑀫𑀸𑀭𑀺𑀲𑀸, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀲𑁄𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺 𑀅𑀕𑁆𑀕𑀼𑀧𑀝𑁆𑀞𑀸𑀓𑁄. 𑀯𑀺𑀧𑀲𑁆𑀲𑀺𑀲𑁆𑀲, 𑀫𑀸𑀭𑀺𑀲, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑀦𑁆𑀥𑀼𑀫𑀸 𑀦𑀸𑀫 𑀭𑀸𑀚𑀸 𑀧𑀺𑀢𑀸 𑀅𑀳𑁄𑀲𑀺. 𑀩𑀦𑁆𑀥𑀼𑀫𑀢𑀻 𑀦𑀸𑀫 𑀤𑁂𑀯𑀻 𑀫𑀸𑀢𑀸 𑀅𑀳𑁄𑀲𑀺 𑀚𑀦𑁂𑀢𑁆𑀢𑀺. 𑀩𑀦𑁆𑀥𑀼𑀫𑀲𑁆𑀲 𑀭𑀜𑁆𑀜𑁄 𑀩𑀦𑁆𑀥𑀼𑀫𑀢𑀻 𑀦𑀸𑀫 𑀦𑀕𑀭𑀁 𑀭𑀸𑀚𑀥𑀸𑀦𑀻 𑀅𑀳𑁄𑀲𑀺. 𑀯𑀺𑀧𑀲𑁆𑀲𑀺𑀲𑁆𑀲, 𑀫𑀸𑀭𑀺𑀲𑀸 ¶ , 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀏𑀯𑀁 𑀅𑀪𑀺𑀦𑀺𑀓𑁆𑀔𑀫𑀦𑀁 𑀅𑀳𑁄𑀲𑀺 𑀏𑀯𑀁 𑀧𑀩𑁆𑀩𑀚𑁆𑀚𑀸 𑀏𑀯𑀁 𑀧𑀥𑀸𑀦𑀁 𑀏𑀯𑀁 𑀅𑀪𑀺𑀲𑀫𑁆𑀩𑁄𑀥𑀺 𑀏𑀯𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀁. 𑀢𑁂 𑀫𑀬𑀁, 𑀫𑀸𑀭𑀺𑀲𑀸, 𑀯𑀺𑀧𑀲𑁆𑀲𑀺𑀫𑁆𑀳𑀺 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑀁 𑀯𑀺𑀭𑀸𑀚𑁂𑀢𑁆𑀯𑀸 𑀇𑀥𑀽𑀧𑀧𑀦𑁆𑀦𑀸’𑀢𑀺 …𑀧𑁂…

‘‘𑀢𑀲𑁆𑀫𑀺𑀁𑀬𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀦𑀺𑀓𑀸𑀬𑁂 𑀅𑀦𑁂𑀓𑀸𑀦𑀺 𑀤𑁂𑀯𑀢𑀸𑀲𑀳𑀲𑁆𑀲𑀸𑀦𑀺 𑀅𑀦𑁂𑀓𑀸𑀦𑀺 𑀤𑁂𑀯𑀢𑀸𑀲𑀢𑀲𑀳𑀲𑁆𑀲𑀸𑀦𑀺 [𑀅𑀦𑁂𑀓𑀸𑀦𑀺 𑀤𑁂𑀯𑀢𑀸𑀲𑀢𑀸𑀦𑀺 𑀅𑀦𑁂𑀓𑀸𑀦𑀺 𑀤𑁂𑀯𑀢𑀸𑀲𑀳𑀲𑁆𑀲𑀸𑀦𑀺 (𑀲𑁆𑀬𑀸. 𑀏𑀯𑀫𑀼𑀧𑀭𑀺𑀧𑀺)] 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀸 𑀤𑁂𑀯𑀢𑀸 𑀫𑀁 𑀏𑀢𑀤𑀯𑁄𑀘𑀼𑀁 𑁋 ‘𑀇𑀫𑀲𑁆𑀫𑀺𑀁𑀬𑁂𑀯 𑀔𑁄, 𑀫𑀸𑀭𑀺𑀲𑀸, 𑀪𑀤𑁆𑀤𑀓𑀧𑁆𑀧𑁂 𑀪𑀕𑀯𑀸 𑀏𑀢𑀭𑀳𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄. 𑀪𑀕𑀯𑀸, 𑀫𑀸𑀭𑀺𑀲𑀸, 𑀔𑀢𑁆𑀢𑀺𑀬𑁄 𑀚𑀸𑀢𑀺𑀬𑀸 𑀔𑀢𑁆𑀢𑀺𑀬𑀓𑀼𑀮𑁂 𑀉𑀧𑁆𑀧𑀦𑁆𑀦𑁄. 𑀪𑀕𑀯𑀸, 𑀫𑀸𑀭𑀺𑀲𑀸, 𑀕𑁄𑀢𑀫𑁄 𑀕𑁄𑀢𑁆𑀢𑁂𑀦. 𑀪𑀕𑀯𑀢𑁄, 𑀫𑀸𑀭𑀺𑀲𑀸, 𑀅𑀧𑁆𑀧𑀓𑀁 ¶ 𑀆𑀬𑀼𑀧𑁆𑀧𑀫𑀸𑀡𑀁 𑀧𑀭𑀺𑀢𑁆𑀢𑀁 𑀮𑀳𑀼𑀓𑀁 ¶ 𑀬𑁄 𑀘𑀺𑀭𑀁 𑀚𑀻𑀯𑀢𑀺, 𑀲𑁄 𑀯𑀲𑁆𑀲𑀲𑀢𑀁 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄. 𑀪𑀕𑀯𑀸, 𑀫𑀸𑀭𑀺𑀲𑀸, 𑀅𑀲𑁆𑀲𑀢𑁆𑀣𑀲𑁆𑀲 𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀪𑀕𑀯𑀢𑁄, 𑀫𑀸𑀭𑀺𑀲𑀸, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁 ¶ . 𑀪𑀕𑀯𑀢𑁄, 𑀫𑀸𑀭𑀺𑀲𑀸, 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀅𑀟𑁆𑀠𑀢𑁂𑀴𑀲𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀺. 𑀪𑀕𑀯𑀢𑁄, 𑀫𑀸𑀭𑀺𑀲𑀸, 𑀅𑀬𑀁 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 ¶ 𑀲𑀩𑁆𑀩𑁂𑀲𑀁𑀬𑁂𑀯 𑀔𑀻𑀡𑀸𑀲𑀯𑀸𑀦𑀁. 𑀪𑀕𑀯𑀢𑁄, 𑀫𑀸𑀭𑀺𑀲𑀸, 𑀆𑀦𑀦𑁆𑀤𑁄 𑀦𑀸𑀫 𑀪𑀺𑀓𑁆𑀔𑀼 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺 𑀅𑀕𑁆𑀕𑀼𑀧𑀝𑁆𑀞𑀸𑀓𑁄. 𑀪𑀕𑀯𑀢𑁄, 𑀫𑀸𑀭𑀺𑀲𑀸, 𑀲𑀼𑀤𑁆𑀥𑁄𑀤𑀦𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸 𑀅𑀳𑁄𑀲𑀺. 𑀫𑀸𑀬𑀸 𑀦𑀸𑀫 𑀤𑁂𑀯𑀻 𑀫𑀸𑀢𑀸 𑀅𑀳𑁄𑀲𑀺 𑀚𑀦𑁂𑀢𑁆𑀢𑀺. 𑀓𑀧𑀺𑀮𑀯𑀢𑁆𑀣𑀼 𑀦𑀸𑀫 𑀦𑀕𑀭𑀁 𑀭𑀸𑀚𑀥𑀸𑀦𑀻 𑀅𑀳𑁄𑀲𑀺. 𑀪𑀕𑀯𑀢𑁄, 𑀫𑀸𑀭𑀺𑀲𑀸, 𑀏𑀯𑀁 𑀅𑀪𑀺𑀦𑀺𑀓𑁆𑀔𑀫𑀦𑀁 𑀅𑀳𑁄𑀲𑀺 𑀏𑀯𑀁 𑀧𑀩𑁆𑀩𑀚𑁆𑀚𑀸 𑀏𑀯𑀁 𑀧𑀥𑀸𑀦𑀁 𑀏𑀯𑀁 𑀅𑀪𑀺𑀲𑀫𑁆𑀩𑁄𑀥𑀺 𑀏𑀯𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀁. 𑀢𑁂 𑀫𑀬𑀁, 𑀫𑀸𑀭𑀺𑀲𑀸, 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑀁 𑀯𑀺𑀭𑀸𑀚𑁂𑀢𑁆𑀯𑀸 𑀇𑀥𑀽𑀧𑀧𑀦𑁆𑀦𑀸’𑀢𑀺.

𑁯𑁨. ‘‘𑀅𑀣 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀯𑀺𑀳𑁂𑀳𑀺 𑀤𑁂𑀯𑁂𑀳𑀺 𑀲𑀤𑁆𑀥𑀺𑀁 𑀬𑁂𑀦 𑀅𑀢𑀧𑁆𑀧𑀸 𑀤𑁂𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁…𑀧𑁂… 𑀅𑀣 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀯𑀺𑀳𑁂𑀳𑀺 𑀘 𑀤𑁂𑀯𑁂𑀳𑀺 𑀅𑀢𑀧𑁆𑀧𑁂𑀳𑀺 𑀘 𑀤𑁂𑀯𑁂𑀳𑀺 𑀲𑀤𑁆𑀥𑀺𑀁 𑀬𑁂𑀦 𑀲𑀼𑀤𑀲𑁆𑀲𑀸 𑀤𑁂𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁. 𑀅𑀣 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀯𑀺𑀳𑁂𑀳𑀺 𑀘 𑀤𑁂𑀯𑁂𑀳𑀺 𑀅𑀢𑀧𑁆𑀧𑁂𑀳𑀺 𑀘 𑀤𑁂𑀯𑁂𑀳𑀺 𑀲𑀼𑀤𑀲𑁆𑀲𑁂𑀳𑀺 𑀘 𑀤𑁂𑀯𑁂𑀳𑀺 𑀲𑀤𑁆𑀥𑀺𑀁 𑀬𑁂𑀦 𑀲𑀼𑀤𑀲𑁆𑀲𑀻 𑀤𑁂𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁. 𑀅𑀣 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀯𑀺𑀳𑁂𑀳𑀺 𑀘 𑀤𑁂𑀯𑁂𑀳𑀺 𑀅𑀢𑀧𑁆𑀧𑁂𑀳𑀺 𑀘 𑀤𑁂𑀯𑁂𑀳𑀺 𑀲𑀼𑀤𑀲𑁆𑀲𑁂𑀳𑀺 𑀘 𑀤𑁂𑀯𑁂𑀳𑀺 𑀲𑀼𑀤𑀲𑁆𑀲𑀻𑀳𑀺 𑀘 𑀤𑁂𑀯𑁂𑀳𑀺 𑀲𑀤𑁆𑀥𑀺𑀁 𑀬𑁂𑀦 𑀅𑀓𑀦𑀺𑀝𑁆𑀞𑀸 𑀤𑁂𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁. 𑀢𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀤𑁂𑀯𑀦𑀺𑀓𑀸𑀬𑁂 𑀅𑀦𑁂𑀓𑀸𑀦𑀺 𑀤𑁂𑀯𑀢𑀸𑀲𑀳𑀲𑁆𑀲𑀸𑀦𑀺 𑀅𑀦𑁂𑀓𑀸𑀦𑀺 𑀤𑁂𑀯𑀢𑀸𑀲𑀢𑀲𑀳𑀲𑁆𑀲𑀸𑀦𑀺 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼 ¶ .

‘‘𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀸 𑀤𑁂𑀯𑀢𑀸 𑀫𑀁 𑀏𑀢𑀤𑀯𑁄𑀘𑀼𑀁 𑁋 ‘𑀇𑀢𑁄 𑀲𑁄, 𑀫𑀸𑀭𑀺𑀲𑀸, 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀬𑀁 𑀯𑀺𑀧𑀲𑁆𑀲𑀻 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀤𑀧𑀸𑀤𑀺. 𑀯𑀺𑀧𑀲𑁆𑀲𑀻, 𑀫𑀸𑀭𑀺𑀲𑀸, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀔𑀢𑁆𑀢𑀺𑀬𑁄 𑀚𑀸𑀢𑀺𑀬𑀸 𑀅𑀳𑁄𑀲𑀺. 𑀔𑀢𑁆𑀢𑀺𑀬𑀓𑀼𑀮𑁂 𑀉𑀤𑀧𑀸𑀤𑀺. 𑀯𑀺𑀧𑀲𑁆𑀲𑀻, 𑀫𑀸𑀭𑀺𑀲𑀸, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑁄𑀡𑁆𑀟𑀜𑁆𑀜𑁄 𑀕𑁄𑀢𑁆𑀢𑁂𑀦 𑀅𑀳𑁄𑀲𑀺. 𑀯𑀺𑀧𑀲𑁆𑀲𑀺𑀲𑁆𑀲, 𑀫𑀸𑀭𑀺𑀲𑀸, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀆𑀬𑀼𑀧𑁆𑀧𑀫𑀸𑀡𑀁 𑀅𑀳𑁄𑀲𑀺. 𑀯𑀺𑀧𑀲𑁆𑀲𑀻, 𑀫𑀸𑀭𑀺𑀲𑀸, 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀸𑀝𑀮𑀺𑀬𑀸 𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀯𑀺𑀧𑀲𑁆𑀲𑀺𑀲𑁆𑀲, 𑀫𑀸𑀭𑀺𑀲𑀸, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀔𑀡𑁆𑀟𑀢𑀺𑀲𑁆𑀲𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁. 𑀯𑀺𑀧𑀲𑁆𑀲𑀺𑀲𑁆𑀲, 𑀫𑀸𑀭𑀺𑀲𑀸, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀬𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁. 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁. 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 ¶ 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁. 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀅𑀲𑀻𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺. 𑀯𑀺𑀧𑀲𑁆𑀲𑀺𑀲𑁆𑀲, 𑀫𑀸𑀭𑀺𑀲𑀸, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀇𑀫𑁂 𑀢𑀬𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑀸 𑀅𑀳𑁂𑀲𑀼𑀁 𑀲𑀩𑁆𑀩𑁂𑀲𑀁𑀬𑁂𑀯 𑀔𑀻𑀡𑀸𑀲𑀯𑀸𑀦𑀁. 𑀯𑀺𑀧𑀲𑁆𑀲𑀺𑀲𑁆𑀲, 𑀫𑀸𑀭𑀺𑀲𑀸, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀲𑁄𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺 𑀅𑀕𑁆𑀕𑀼𑀧𑀝𑁆𑀞𑀸𑀓𑁄. 𑀯𑀺𑀧𑀲𑁆𑀲𑀺𑀲𑁆𑀲, 𑀫𑀸𑀭𑀺𑀲𑀸, 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑀦𑁆𑀥𑀼𑀫𑀸 𑀦𑀸𑀫 𑀭𑀸𑀚𑀸 𑀧𑀺𑀢𑀸 𑀅𑀳𑁄𑀲𑀺 𑀩𑀦𑁆𑀥𑀼𑀫𑀢𑀻 𑀦𑀸𑀫 𑀤𑁂𑀯𑀻 𑀫𑀸𑀢𑀸 𑀅𑀳𑁄𑀲𑀺 ¶ 𑀚𑀦𑁂𑀢𑁆𑀢𑀺. 𑀩𑀦𑁆𑀥𑀼𑀫𑀲𑁆𑀲 𑀭𑀜𑁆𑀜𑁄 𑀩𑀦𑁆𑀥𑀼𑀫𑀢𑀻 𑀦𑀸𑀫 𑀦𑀕𑀭𑀁 𑀭𑀸𑀚𑀥𑀸𑀦𑀻 𑀅𑀳𑁄𑀲𑀺. 𑀯𑀺𑀧𑀲𑁆𑀲𑀺𑀲𑁆𑀲, 𑀫𑀸𑀭𑀺𑀲𑀸, 𑀪𑀕𑀯𑀢𑁄 𑀅𑀭𑀳𑀢𑁄 ¶ 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀏𑀯𑀁 𑀅𑀪𑀺𑀦𑀺𑀓𑁆𑀔𑀫𑀦𑀁 𑀅𑀳𑁄𑀲𑀺 𑀏𑀯𑀁 𑀧𑀩𑁆𑀩𑀚𑁆𑀚𑀸 𑀏𑀯𑀁 𑀧𑀥𑀸𑀦𑀁 𑀏𑀯𑀁 𑀅𑀪𑀺𑀲𑀫𑁆𑀩𑁄𑀥𑀺, 𑀏𑀯𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀁. 𑀢𑁂 𑀫𑀬𑀁, 𑀫𑀸𑀭𑀺𑀲𑀸, 𑀯𑀺𑀧𑀲𑁆𑀲𑀺𑀫𑁆𑀳𑀺 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑀁 𑀯𑀺𑀭𑀸𑀚𑁂𑀢𑁆𑀯𑀸 𑀇𑀥𑀽𑀧𑀧𑀦𑁆𑀦𑀸’𑀢𑀺. 𑀢𑀲𑁆𑀫𑀺𑀁𑀬𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀦𑀺𑀓𑀸𑀬𑁂 𑀅𑀦𑁂𑀓𑀸𑀦𑀺 𑀤𑁂𑀯𑀢𑀸𑀲𑀳𑀲𑁆𑀲𑀸𑀦𑀺 𑀅𑀦𑁂𑀓𑀸𑀦𑀺 𑀤𑁂𑀯𑀢𑀸𑀲𑀢𑀲𑀳𑀲𑁆𑀲𑀸𑀦𑀺 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀸 𑀤𑁂𑀯𑀢𑀸 𑀫𑀁 𑀏𑀢𑀤𑀯𑁄𑀘𑀼𑀁 𑁋 ‘𑀇𑀢𑁄 𑀲𑁄, 𑀫𑀸𑀭𑀺𑀲𑀸, 𑀏𑀓𑀢𑀺𑀁𑀲𑁂 𑀓𑀧𑁆𑀧𑁂 𑀬𑀁 𑀲𑀺𑀔𑀻 𑀪𑀕𑀯𑀸…𑀧𑁂… 𑀢𑁂 𑀫𑀬𑀁, 𑀫𑀸𑀭𑀺𑀲𑀸, 𑀲𑀺𑀔𑀺𑀫𑁆𑀳𑀺 𑀪𑀕𑀯𑀢𑀺 𑀢𑀲𑁆𑀫𑀺𑀜𑁆𑀜𑁂𑀯 𑀔𑁄 𑀫𑀸𑀭𑀺𑀲𑀸, 𑀏𑀓𑀢𑀺𑀁𑀲𑁂 𑀓𑀧𑁆𑀧𑁂 𑀬𑀁 𑀯𑁂𑀲𑁆𑀲𑀪𑀽 𑀪𑀕𑀯𑀸…𑀧𑁂… 𑀢𑁂 𑀫𑀬𑀁, 𑀫𑀸𑀭𑀺𑀲𑀸, 𑀯𑁂𑀲𑁆𑀲𑀪𑀼𑀫𑁆𑀳𑀺 𑀪𑀕𑀯𑀢𑀺…𑀧𑁂… 𑀇𑀫𑀲𑁆𑀫𑀺𑀁𑀬𑁂𑀯 𑀔𑁄, 𑀫𑀸𑀭𑀺𑀲𑀸, 𑀪𑀤𑁆𑀤𑀓𑀧𑁆𑀧𑁂 𑀓𑀓𑀼𑀲𑀦𑁆𑀥𑁄 𑀓𑁄𑀡𑀸𑀕𑀫𑀦𑁄 𑀓𑀲𑁆𑀲𑀧𑁄 𑀪𑀕𑀯𑀸…𑀧𑁂… 𑀢𑁂 𑀫𑀬𑀁, 𑀫𑀸𑀭𑀺𑀲𑀸, 𑀓𑀓𑀼𑀲𑀦𑁆𑀥𑀫𑁆𑀳𑀺 𑀓𑁄𑀡𑀸𑀕𑀫𑀦𑀫𑁆𑀳𑀺 𑀓𑀲𑁆𑀲𑀧𑀫𑁆𑀳𑀺 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑀁 𑀯𑀺𑀭𑀸𑀚𑁂𑀢𑁆𑀯𑀸 𑀇𑀥𑀽𑀧𑀧𑀦𑁆𑀦𑀸’𑀢𑀺.

𑁯𑁩. ‘‘𑀢𑀲𑁆𑀫𑀺𑀁𑀬𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀦𑀺𑀓𑀸𑀬𑁂 𑀅𑀦𑁂𑀓𑀸𑀦𑀺 𑀤𑁂𑀯𑀢𑀸𑀲𑀳𑀲𑁆𑀲𑀸𑀦𑀺 𑀅𑀦𑁂𑀓𑀸𑀦𑀺 𑀤𑁂𑀯𑀢𑀸𑀲𑀢𑀲𑀳𑀲𑁆𑀲𑀸𑀦𑀺 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 ¶ 𑀞𑀺𑀢𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀸 𑀤𑁂𑀯𑀢𑀸 𑀫𑀁 𑀏𑀢𑀤𑀯𑁄𑀘𑀼𑀁 𑁋 ‘𑀇𑀫𑀲𑁆𑀫𑀺𑀁𑀬𑁂𑀯 𑀔𑁄, 𑀫𑀸𑀭𑀺𑀲𑀸, 𑀪𑀤𑁆𑀤𑀓𑀧𑁆𑀧𑁂 𑀪𑀕𑀯𑀸 𑀏𑀢𑀭𑀳𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄. 𑀪𑀕𑀯𑀸, 𑀫𑀸𑀭𑀺𑀲𑀸, 𑀔𑀢𑁆𑀢𑀺𑀬𑁄 𑀚𑀸𑀢𑀺𑀬𑀸, 𑀔𑀢𑁆𑀢𑀺𑀬𑀓𑀼𑀮𑁂 𑀉𑀧𑁆𑀧𑀦𑁆𑀦𑁄. 𑀪𑀕𑀯𑀸, 𑀫𑀸𑀭𑀺𑀲𑀸, 𑀕𑁄𑀢𑀫𑁄 𑀕𑁄𑀢𑁆𑀢𑁂𑀦. 𑀪𑀕𑀯𑀢𑁄, 𑀫𑀸𑀭𑀺𑀲𑀸, 𑀅𑀧𑁆𑀧𑀓𑀁 𑀆𑀬𑀼𑀧𑁆𑀧𑀫𑀸𑀡𑀁 𑀧𑀭𑀺𑀢𑁆𑀢𑀁 𑀮𑀳𑀼𑀓𑀁 𑀬𑁄 𑀘𑀺𑀭𑀁 𑀚𑀻𑀯𑀢𑀺, 𑀲𑁄 𑀯𑀲𑁆𑀲𑀲𑀢𑀁 ¶ 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄. 𑀪𑀕𑀯𑀸, 𑀫𑀸𑀭𑀺𑀲𑀸, 𑀅𑀲𑁆𑀲𑀢𑁆𑀣𑀲𑁆𑀲 𑀫𑀽𑀮𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄. 𑀪𑀕𑀯𑀢𑁄, 𑀫𑀸𑀭𑀺𑀲𑀸, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀁 𑀦𑀸𑀫 𑀲𑀸𑀯𑀓𑀬𑀼𑀕𑀁 𑀅𑀳𑁄𑀲𑀺 𑀅𑀕𑁆𑀕𑀁 𑀪𑀤𑁆𑀤𑀬𑀼𑀕𑀁. 𑀪𑀕𑀯𑀢𑁄 ¶ , 𑀫𑀸𑀭𑀺𑀲𑀸, 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀅𑀟𑁆𑀠𑀢𑁂𑀴𑀲𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀺. 𑀪𑀕𑀯𑀢𑁄, 𑀫𑀸𑀭𑀺𑀲𑀸, 𑀅𑀬𑀁 𑀏𑀓𑁄 𑀲𑀸𑀯𑀓𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺 𑀲𑀩𑁆𑀩𑁂𑀲𑀁𑀬𑁂𑀯 𑀔𑀻𑀡𑀸𑀲𑀯𑀸𑀦𑀁. 𑀪𑀕𑀯𑀢𑁄, 𑀫𑀸𑀭𑀺𑀲𑀸, 𑀆𑀦𑀦𑁆𑀤𑁄 𑀦𑀸𑀫 𑀪𑀺𑀓𑁆𑀔𑀼 𑀉𑀧𑀝𑁆𑀞𑀸𑀓𑁄 𑀅𑀕𑁆𑀕𑀼𑀧𑀝𑁆𑀞𑀸𑀓𑁄 𑀅𑀳𑁄𑀲𑀺. 𑀪𑀕𑀯𑀢𑁄, 𑀫𑀸𑀭𑀺𑀲𑀸, 𑀲𑀼𑀤𑁆𑀥𑁄𑀤𑀦𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸 𑀅𑀳𑁄𑀲𑀺. 𑀫𑀸𑀬𑀸 𑀦𑀸𑀫 𑀤𑁂𑀯𑀻 𑀫𑀸𑀢𑀸 𑀅𑀳𑁄𑀲𑀺 𑀚𑀦𑁂𑀢𑁆𑀢𑀺. 𑀓𑀧𑀺𑀮𑀯𑀢𑁆𑀣𑀼 𑀦𑀸𑀫 𑀦𑀕𑀭𑀁 𑀭𑀸𑀚𑀥𑀸𑀦𑀻 𑀅𑀳𑁄𑀲𑀺. 𑀪𑀕𑀯𑀢𑁄, 𑀫𑀸𑀭𑀺𑀲𑀸, 𑀏𑀯𑀁 𑀅𑀪𑀺𑀦𑀺𑀓𑁆𑀔𑀫𑀦𑀁 𑀅𑀳𑁄𑀲𑀺, 𑀏𑀯𑀁 𑀧𑀩𑁆𑀩𑀚𑁆𑀚𑀸, 𑀏𑀯𑀁 𑀧𑀥𑀸𑀦𑀁, 𑀏𑀯𑀁 𑀅𑀪𑀺𑀲𑀫𑁆𑀩𑁄𑀥𑀺, 𑀏𑀯𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀁. 𑀢𑁂 𑀫𑀬𑀁, 𑀫𑀸𑀭𑀺𑀲𑀸, 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑀁 𑀯𑀺𑀭𑀸𑀚𑁂𑀢𑁆𑀯𑀸 𑀇𑀥𑀽𑀧𑀧𑀦𑁆𑀦𑀸’𑀢𑀺.

𑁯𑁪. ‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀯𑁂𑀲𑀸 𑀥𑀫𑁆𑀫𑀥𑀸𑀢𑀼 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸, 𑀬𑀲𑁆𑀲𑀸 𑀥𑀫𑁆𑀫𑀥𑀸𑀢𑀼𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 ¶ 𑀢𑀣𑀸𑀕𑀢𑁄 𑀅𑀢𑀻𑀢𑁂 𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀙𑀺𑀦𑁆𑀦𑀧𑀧𑀜𑁆𑀘𑁂 𑀙𑀺𑀦𑁆𑀦𑀯𑀝𑀼𑀫𑁂 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑁂 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑁂 𑀚𑀸𑀢𑀺𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀦𑀸𑀫𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀕𑁄𑀢𑁆𑀢𑀢𑁄𑀧𑀺 ¶ 𑀅𑀦𑀼𑀲𑁆𑀲𑀭𑀢𑀺, 𑀆𑀬𑀼𑀧𑁆𑀧𑀫𑀸𑀡𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀬𑀼𑀕𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺 ‘𑀏𑀯𑀁𑀚𑀘𑁆𑀘𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁’ 𑀇𑀢𑀺𑀧𑀺. ‘𑀏𑀯𑀁𑀦𑀸𑀫𑀸 𑀏𑀯𑀁𑀕𑁄𑀢𑁆𑀢𑀸 𑀏𑀯𑀁𑀲𑀻𑀮𑀸 𑀏𑀯𑀁𑀥𑀫𑁆𑀫𑀸 𑀏𑀯𑀁𑀧𑀜𑁆𑀜𑀸 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁’ 𑀇𑀢𑀺𑀧𑀻𑀢𑀺.

‘‘𑀤𑁂𑀯𑀢𑀸𑀧𑀺 𑀢𑀣𑀸𑀕𑀢𑀲𑁆𑀲 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁, 𑀬𑁂𑀦 𑀢𑀣𑀸𑀕𑀢𑁄 𑀅𑀢𑀻𑀢𑁂 𑀩𑀼𑀤𑁆𑀥𑁂 ¶ 𑀧𑀭𑀺𑀦𑀺𑀩𑁆𑀩𑀼𑀢𑁂 𑀙𑀺𑀦𑁆𑀦𑀧𑀧𑀜𑁆𑀘𑁂 𑀙𑀺𑀦𑁆𑀦𑀯𑀝𑀼𑀫𑁂 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑁂 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑁂 𑀚𑀸𑀢𑀺𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀦𑀸𑀫𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀕𑁄𑀢𑁆𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀆𑀬𑀼𑀧𑁆𑀧𑀫𑀸𑀡𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀬𑀼𑀕𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺, 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺 ‘𑀏𑀯𑀁𑀚𑀘𑁆𑀘𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁’ 𑀇𑀢𑀺𑀧𑀺. ‘𑀏𑀯𑀁𑀦𑀸𑀫𑀸 𑀏𑀯𑀁𑀕𑁄𑀢𑁆𑀢𑀸 𑀏𑀯𑀁𑀲𑀻𑀮𑀸 𑀏𑀯𑀁𑀥𑀫𑁆𑀫𑀸 𑀏𑀯𑀁𑀧𑀜𑁆𑀜𑀸 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁’ 𑀇𑀢𑀺𑀧𑀻’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀫𑀳𑀸𑀧𑀤𑀸𑀦𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀧𑀞𑀫𑀁.

𑁨. 𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑀁

𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄

𑁯𑁫. 𑀏𑀯𑀁 ¶ ¶ ¶ ¶ 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑀼𑀭𑀽𑀲𑀼 𑀯𑀺𑀳𑀭𑀢𑀺 𑀓𑀫𑁆𑀫𑀸𑀲𑀥𑀫𑁆𑀫𑀁 𑀦𑀸𑀫 [𑀓𑀫𑁆𑀫𑀸𑀲𑀤𑀫𑁆𑀫𑀁 𑀦𑀸𑀫 (𑀲𑁆𑀬𑀸.)] 𑀓𑀼𑀭𑀽𑀦𑀁 𑀦𑀺𑀕𑀫𑁄. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂! 𑀬𑀸𑀯 𑀕𑀫𑁆𑀪𑀻𑀭𑁄 𑀘𑀸𑀬𑀁, 𑀪𑀦𑁆𑀢𑁂, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀕𑀫𑁆𑀪𑀻𑀭𑀸𑀯𑀪𑀸𑀲𑁄 𑀘, 𑀅𑀣 𑀘 𑀧𑀦 𑀫𑁂 𑀉𑀢𑁆𑀢𑀸𑀦𑀓𑀼𑀢𑁆𑀢𑀸𑀦𑀓𑁄 𑀯𑀺𑀬 𑀔𑀸𑀬𑀢𑀻’’𑀢𑀺. ‘‘𑀫𑀸 𑀳𑁂𑀯𑀁, 𑀆𑀦𑀦𑁆𑀤, 𑀅𑀯𑀘, 𑀫𑀸 𑀳𑁂𑀯𑀁, 𑀆𑀦𑀦𑁆𑀤, 𑀅𑀯𑀘. 𑀕𑀫𑁆𑀪𑀻𑀭𑁄 𑀘𑀸𑀬𑀁, 𑀆𑀦𑀦𑁆𑀤, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀕𑀫𑁆𑀪𑀻𑀭𑀸𑀯𑀪𑀸𑀲𑁄 𑀘. 𑀏𑀢𑀲𑁆𑀲, 𑀆𑀦𑀦𑁆𑀤, 𑀥𑀫𑁆𑀫𑀲𑁆𑀲 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀬𑀁 𑀧𑀚𑀸 𑀢𑀦𑁆𑀢𑀸𑀓𑀼𑀮𑀓𑀚𑀸𑀢𑀸 𑀓𑀼𑀮𑀕𑀡𑁆𑀞𑀺𑀓𑀚𑀸𑀢𑀸 [𑀕𑀼𑀮𑀸𑀕𑀼𑀡𑁆𑀞𑀺𑀓𑀚𑀸𑀢𑀸 (𑀲𑀻. 𑀧𑀻.), 𑀕𑀼𑀡𑀕𑀡𑁆𑀞𑀺𑀓𑀚𑀸𑀢𑀸 (𑀲𑁆𑀬𑀸.)] 𑀫𑀼𑀜𑁆𑀚𑀧𑀩𑁆𑀩𑀚𑀪𑀽𑀢𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀺.

𑁯𑁬. ‘‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁. ‘𑀓𑀺𑀁𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’𑀦𑁆𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬, ‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’𑀦𑁆𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬𑀁.

‘‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀚𑀸𑀢𑀻’𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀅𑀢𑁆𑀣𑀻𑀢𑀺𑀲𑁆𑀲 ¶ 𑀯𑀘𑀦𑀻𑀬𑀁. ‘𑀓𑀺𑀁𑀧𑀘𑁆𑀘𑀬𑀸 𑀚𑀸𑀢𑀻’𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬, ‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬𑀁.

‘‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀪𑀯𑁄’𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁 ¶ . ‘𑀓𑀺𑀁𑀧𑀘𑁆𑀘𑀬𑀸 𑀪𑀯𑁄’𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬, ‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬𑀁.

‘‘‘𑀅𑀢𑁆𑀣𑀺 ¶ 𑀇𑀤𑀧𑁆𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁. ‘𑀓𑀺𑀁𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’𑀦𑁆𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬, ‘𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’𑀦𑁆𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬𑀁.

‘‘‘𑀅𑀢𑁆𑀣𑀺 ¶ 𑀇𑀤𑀧𑁆𑀧𑀘𑁆𑀘𑀬𑀸 𑀢𑀡𑁆𑀳𑀸’𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁. ‘𑀓𑀺𑀁𑀧𑀘𑁆𑀘𑀬𑀸 𑀢𑀡𑁆𑀳𑀸’𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬, ‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸’𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬𑀁.

‘‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀯𑁂𑀤𑀦𑀸’𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁. ‘𑀓𑀺𑀁𑀧𑀘𑁆𑀘𑀬𑀸 𑀯𑁂𑀤𑀦𑀸’𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬, ‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬𑀁.

‘‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀨𑀲𑁆𑀲𑁄’𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁. ‘𑀓𑀺𑀁𑀧𑀘𑁆𑀘𑀬𑀸 𑀨𑀲𑁆𑀲𑁄’𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬, ‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀨𑀲𑁆𑀲𑁄’𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬𑀁.

‘‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁. ‘𑀓𑀺𑀁𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’𑀦𑁆𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬, ‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’𑀦𑁆𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬𑀁.

‘‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁. ‘𑀓𑀺𑀁𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬, ‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬𑀁.

𑁯𑁭. ‘‘𑀇𑀢𑀺 𑀔𑁄, 𑀆𑀦𑀦𑁆𑀤, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁, 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄, 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺 ¶ , 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸 ¶ 𑀲𑀫𑁆𑀪𑀯𑀦𑁆𑀢𑀺. 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀺.

𑁯𑁮. ‘‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’𑀦𑁆𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁. 𑀚𑀸𑀢𑀺 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑁂𑀯𑀸𑀦𑀁 𑀯𑀸 𑀤𑁂𑀯𑀢𑁆𑀢𑀸𑀬, 𑀕𑀦𑁆𑀥𑀩𑁆𑀩𑀸𑀦𑀁 𑀯𑀸 𑀕𑀦𑁆𑀥𑀩𑁆𑀩𑀢𑁆𑀢𑀸𑀬, 𑀬𑀓𑁆𑀔𑀸𑀦𑀁 𑀯𑀸 𑀬𑀓𑁆𑀔𑀢𑁆𑀢𑀸𑀬, 𑀪𑀽𑀢𑀸𑀦𑀁 𑀯𑀸 𑀪𑀽𑀢𑀢𑁆𑀢𑀸𑀬, 𑀫𑀦𑀼𑀲𑁆𑀲𑀸𑀦𑀁 𑀯𑀸 𑀫𑀦𑀼𑀲𑁆𑀲𑀢𑁆𑀢𑀸𑀬, 𑀘𑀢𑀼𑀧𑁆𑀧𑀤𑀸𑀦𑀁 𑀯𑀸 𑀘𑀢𑀼𑀧𑁆𑀧𑀤𑀢𑁆𑀢𑀸𑀬, 𑀧𑀓𑁆𑀔𑀻𑀦𑀁 𑀯𑀸 𑀧𑀓𑁆𑀔𑀺𑀢𑁆𑀢𑀸𑀬, 𑀲𑀭𑀻𑀲𑀧𑀸𑀦𑀁 𑀯𑀸 𑀲𑀭𑀻𑀲𑀧𑀢𑁆𑀢𑀸𑀬 [𑀲𑀺𑀭𑀺𑀁𑀲𑀧𑀸𑀦𑀁 𑀲𑀺𑀭𑀺𑀁𑀲𑀧𑀢𑁆𑀢𑀸𑀬 (𑀲𑀻. 𑀲𑁆𑀬𑀸.)], 𑀢𑁂𑀲𑀁 𑀢𑁂𑀲𑀜𑁆𑀘 𑀳𑀺, 𑀆𑀦𑀦𑁆𑀤, 𑀲𑀢𑁆𑀢𑀸𑀦𑀁 𑀢𑀤𑀢𑁆𑀢𑀸𑀬 ¶ 𑀚𑀸𑀢𑀺 𑀦𑀸𑀪𑀯𑀺𑀲𑁆𑀲. 𑀲𑀩𑁆𑀩𑀲𑁄 𑀚𑀸𑀢𑀺𑀬𑀸 𑀅𑀲𑀢𑀺 𑀚𑀸𑀢𑀺𑀦𑀺𑀭𑁄𑀥𑀸 ¶ 𑀅𑀧𑀺 𑀦𑀼 𑀔𑁄 𑀚𑀭𑀸𑀫𑀭𑀡𑀁 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀚𑀭𑀸𑀫𑀭𑀡𑀲𑁆𑀲, 𑀬𑀤𑀺𑀤𑀁 𑀚𑀸𑀢𑀺’’.

𑁯𑁯. ‘‘‘𑀪𑀯𑀧𑀘𑁆𑀘𑀬𑀸 𑀚𑀸𑀢𑀻’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀪𑀯𑀧𑀘𑁆𑀘𑀬𑀸 𑀚𑀸𑀢𑀺. 𑀪𑀯𑁄 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀪𑀯𑁄 𑀯𑀸 𑀭𑀽𑀧𑀪𑀯𑁄 𑀯𑀸 𑀅𑀭𑀽𑀧𑀪𑀯𑁄 𑀯𑀸, 𑀲𑀩𑁆𑀩𑀲𑁄 𑀪𑀯𑁂 𑀅𑀲𑀢𑀺 𑀪𑀯𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀚𑀸𑀢𑀺 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀚𑀸𑀢𑀺𑀬𑀸, 𑀬𑀤𑀺𑀤𑀁 𑀪𑀯𑁄’’.

𑁧𑁦𑁦. ‘‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄. 𑀉𑀧𑀸𑀤𑀸𑀦𑀜𑁆𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺 ¶ , 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀼𑀧𑀸𑀤𑀸𑀦𑀁 𑀯𑀸 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀯𑀸 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁 𑀯𑀸 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁 𑀯𑀸, 𑀲𑀩𑁆𑀩𑀲𑁄 𑀉𑀧𑀸𑀤𑀸𑀦𑁂 𑀅𑀲𑀢𑀺 𑀉𑀧𑀸𑀤𑀸𑀦𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀪𑀯𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 ¶ 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀪𑀯𑀲𑁆𑀲, 𑀬𑀤𑀺𑀤𑀁 𑀉𑀧𑀸𑀤𑀸𑀦𑀁’’.

𑁧𑁦𑁧. ‘‘‘𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’𑀦𑁆𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀁. 𑀢𑀡𑁆𑀳𑀸 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀢𑀡𑁆𑀳𑀸 𑀲𑀤𑁆𑀤𑀢𑀡𑁆𑀳𑀸 𑀕𑀦𑁆𑀥𑀢𑀡𑁆𑀳𑀸 𑀭𑀲𑀢𑀡𑁆𑀳𑀸 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀥𑀫𑁆𑀫𑀢𑀡𑁆𑀳𑀸, 𑀲𑀩𑁆𑀩𑀲𑁄 𑀢𑀡𑁆𑀳𑀸𑀬 𑀅𑀲𑀢𑀺 𑀢𑀡𑁆𑀳𑀸𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀉𑀧𑀸𑀤𑀸𑀦𑀁 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀉𑀧𑀸𑀤𑀸𑀦𑀲𑁆𑀲, 𑀬𑀤𑀺𑀤𑀁 𑀢𑀡𑁆𑀳𑀸’’.

𑁧𑁦𑁨. ‘‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸. 𑀯𑁂𑀤𑀦𑀸 ¶ 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 ¶ 𑀓𑀺𑀫𑁆𑀳𑀺𑀘𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀲𑁄𑀢𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀖𑀸𑀦𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸, 𑀲𑀩𑁆𑀩𑀲𑁄 𑀯𑁂𑀤𑀦𑀸𑀬 𑀅𑀲𑀢𑀺 𑀯𑁂𑀤𑀦𑀸𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀢𑀡𑁆𑀳𑀸 𑀧𑀜𑁆𑀜𑀸𑀬𑁂𑀣𑀸’’𑀢𑀺 ¶ ? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀢𑀡𑁆𑀳𑀸𑀬, 𑀬𑀤𑀺𑀤𑀁 𑀯𑁂𑀤𑀦𑀸’’.

𑁧𑁦𑁩. ‘‘𑀇𑀢𑀺 𑀔𑁄 𑀧𑀦𑁂𑀢𑀁, 𑀆𑀦𑀦𑁆𑀤, 𑀯𑁂𑀤𑀦𑀁 𑀧𑀝𑀺𑀘𑁆𑀘 𑀢𑀡𑁆𑀳𑀸, 𑀢𑀡𑁆𑀳𑀁 𑀧𑀝𑀺𑀘𑁆𑀘 𑀧𑀭𑀺𑀬𑁂𑀲𑀦𑀸, 𑀧𑀭𑀺𑀬𑁂𑀲𑀦𑀁 𑀧𑀝𑀺𑀘𑁆𑀘 𑀮𑀸𑀪𑁄, 𑀮𑀸𑀪𑀁 𑀧𑀝𑀺𑀘𑁆𑀘 𑀯𑀺𑀦𑀺𑀘𑁆𑀙𑀬𑁄, 𑀯𑀺𑀦𑀺𑀘𑁆𑀙𑀬𑀁 𑀧𑀝𑀺𑀘𑁆𑀘 𑀙𑀦𑁆𑀤𑀭𑀸𑀕𑁄, 𑀙𑀦𑁆𑀤𑀭𑀸𑀕𑀁 𑀧𑀝𑀺𑀘𑁆𑀘 𑀅𑀚𑁆𑀛𑁄𑀲𑀸𑀦𑀁, 𑀅𑀚𑁆𑀛𑁄𑀲𑀸𑀦𑀁 𑀧𑀝𑀺𑀘𑁆𑀘 𑀧𑀭𑀺𑀕𑁆𑀕𑀳𑁄, 𑀧𑀭𑀺𑀕𑁆𑀕𑀳𑀁 𑀧𑀝𑀺𑀘𑁆𑀘 𑀫𑀘𑁆𑀙𑀭𑀺𑀬𑀁, 𑀫𑀘𑁆𑀙𑀭𑀺𑀬𑀁 𑀧𑀝𑀺𑀘𑁆𑀘 ¶ 𑀆𑀭𑀓𑁆𑀔𑁄. 𑀆𑀭𑀓𑁆𑀔𑀸𑀥𑀺𑀓𑀭𑀡𑀁 𑀤𑀡𑁆𑀟𑀸𑀤𑀸𑀦𑀲𑀢𑁆𑀣𑀸𑀤𑀸𑀦𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀢𑀼𑀯𑀁𑀢𑀼𑀯𑀁𑀧𑁂𑀲𑀼𑀜𑁆𑀜𑀫𑀼𑀲𑀸𑀯𑀸𑀤𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺.

𑁧𑁦𑁪. ‘‘‘𑀆𑀭𑀓𑁆𑀔𑀸𑀥𑀺𑀓𑀭𑀡𑀁 [𑀆𑀭𑀓𑁆𑀔𑀁 𑀧𑀝𑀺𑀘𑁆𑀘 𑀆𑀭𑀓𑁆𑀔𑀸𑀥𑀺𑀓𑀭𑀡𑀁 (𑀲𑁆𑀬𑀸.)] 𑀤𑀡𑁆𑀟𑀸𑀤𑀸𑀦𑀲𑀢𑁆𑀣𑀸𑀤𑀸𑀦𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀢𑀼𑀯𑀁𑀢𑀼𑀯𑀁𑀧𑁂𑀲𑀼𑀜𑁆𑀜𑀫𑀼𑀲𑀸𑀯𑀸𑀤𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀻’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀆𑀭𑀓𑁆𑀔𑀸𑀥𑀺𑀓𑀭𑀡𑀁 𑀤𑀡𑁆𑀟𑀸𑀤𑀸𑀦𑀲𑀢𑁆𑀣𑀸𑀤𑀸𑀦𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀢𑀼𑀯𑀁𑀢𑀼𑀯𑀁𑀧𑁂𑀲𑀼𑀜𑁆𑀜𑀫𑀼𑀲𑀸𑀯𑀸𑀤𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀺. 𑀆𑀭𑀓𑁆𑀔𑁄 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑀩𑁆𑀩𑀲𑁄 𑀆𑀭𑀓𑁆𑀔𑁂 𑀅𑀲𑀢𑀺 𑀆𑀭𑀓𑁆𑀔𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀤𑀡𑁆𑀟𑀸𑀤𑀸𑀦𑀲𑀢𑁆𑀣𑀸𑀤𑀸𑀦𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀢𑀼𑀯𑀁𑀢𑀼𑀯𑀁𑀧𑁂𑀲𑀼𑀜𑁆𑀜𑀫𑀼𑀲𑀸𑀯𑀸𑀤𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑁂𑀬𑁆𑀬𑀼’’𑀦𑁆𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 ¶ 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀤𑀡𑁆𑀟𑀸𑀤𑀸𑀦𑀲𑀢𑁆𑀣𑀸𑀤𑀸𑀦𑀓𑀮𑀳𑀯𑀺𑀕𑁆𑀕𑀳𑀯𑀺𑀯𑀸𑀤𑀢𑀼𑀯𑀁𑀢𑀼𑀯𑀁𑀧𑁂𑀲𑀼𑀜𑁆𑀜𑀫𑀼𑀲𑀸𑀯𑀸𑀤𑀸𑀦𑀁 𑀅𑀦𑁂𑀓𑁂𑀲𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑁆𑀪𑀯𑀸𑀬 𑀬𑀤𑀺𑀤𑀁 𑀆𑀭𑀓𑁆𑀔𑁄.

𑁧𑁦𑁫. ‘‘‘𑀫𑀘𑁆𑀙𑀭𑀺𑀬𑀁 𑀧𑀝𑀺𑀘𑁆𑀘 𑀆𑀭𑀓𑁆𑀔𑁄’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀫𑀘𑁆𑀙𑀭𑀺𑀬𑀁 𑀧𑀝𑀺𑀘𑁆𑀘 𑀆𑀭𑀓𑁆𑀔𑁄. 𑀫𑀘𑁆𑀙𑀭𑀺𑀬𑀜𑁆𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺 ¶ , 𑀲𑀩𑁆𑀩𑀲𑁄 𑀫𑀘𑁆𑀙𑀭𑀺𑀬𑁂 𑀅𑀲𑀢𑀺 𑀫𑀘𑁆𑀙𑀭𑀺𑀬𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀆𑀭𑀓𑁆𑀔𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀆𑀭𑀓𑁆𑀔𑀲𑁆𑀲, 𑀬𑀤𑀺𑀤𑀁 𑀫𑀘𑁆𑀙𑀭𑀺𑀬𑀁’’.

𑁧𑁦𑁬. ‘‘‘𑀧𑀭𑀺𑀕𑁆𑀕𑀳𑀁 𑀧𑀝𑀺𑀘𑁆𑀘 𑀫𑀘𑁆𑀙𑀭𑀺𑀬’𑀦𑁆𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀧𑀭𑀺𑀕𑁆𑀕𑀳𑀁 𑀧𑀝𑀺𑀘𑁆𑀘 𑀫𑀘𑁆𑀙𑀭𑀺𑀬𑀁. 𑀧𑀭𑀺𑀕𑁆𑀕𑀳𑁄 ¶ 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑀩𑁆𑀩𑀲𑁄 𑀧𑀭𑀺𑀕𑁆𑀕𑀳𑁂 𑀅𑀲𑀢𑀺 ¶ 𑀧𑀭𑀺𑀕𑁆𑀕𑀳𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀫𑀘𑁆𑀙𑀭𑀺𑀬𑀁 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀫𑀘𑁆𑀙𑀭𑀺𑀬𑀲𑁆𑀲, 𑀬𑀤𑀺𑀤𑀁 𑀧𑀭𑀺𑀕𑁆𑀕𑀳𑁄’’.

𑁧𑁦𑁭. ‘‘‘𑀅𑀚𑁆𑀛𑁄𑀲𑀸𑀦𑀁 𑀧𑀝𑀺𑀘𑁆𑀘 𑀧𑀭𑀺𑀕𑁆𑀕𑀳𑁄’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀅𑀚𑁆𑀛𑁄𑀲𑀸𑀦𑀁 𑀧𑀝𑀺𑀘𑁆𑀘 𑀧𑀭𑀺𑀕𑁆𑀕𑀳𑁄. 𑀅𑀚𑁆𑀛𑁄𑀲𑀸𑀦𑀜𑁆𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑀩𑁆𑀩𑀲𑁄 𑀅𑀚𑁆𑀛𑁄𑀲𑀸𑀦𑁂 𑀅𑀲𑀢𑀺 𑀅𑀚𑁆𑀛𑁄𑀲𑀸𑀦𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀧𑀭𑀺𑀕𑁆𑀕𑀳𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺 ¶ ? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀧𑀭𑀺𑀕𑁆𑀕𑀳𑀲𑁆𑀲 𑁋 𑀬𑀤𑀺𑀤𑀁 𑀅𑀚𑁆𑀛𑁄𑀲𑀸𑀦𑀁’’.

𑁧𑁦𑁮. ‘‘‘𑀙𑀦𑁆𑀤𑀭𑀸𑀕𑀁 𑀧𑀝𑀺𑀘𑁆𑀘 𑀅𑀚𑁆𑀛𑁄𑀲𑀸𑀦’𑀦𑁆𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀙𑀦𑁆𑀤𑀭𑀸𑀕𑀁 𑀧𑀝𑀺𑀘𑁆𑀘 𑀅𑀚𑁆𑀛𑁄𑀲𑀸𑀦𑀁. 𑀙𑀦𑁆𑀤𑀭𑀸𑀕𑁄 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑀩𑁆𑀩𑀲𑁄 𑀙𑀦𑁆𑀤𑀭𑀸𑀕𑁂 𑀅𑀲𑀢𑀺 𑀙𑀦𑁆𑀤𑀭𑀸𑀕𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀅𑀚𑁆𑀛𑁄𑀲𑀸𑀦𑀁 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀅𑀚𑁆𑀛𑁄𑀲𑀸𑀦𑀲𑁆𑀲, 𑀬𑀤𑀺𑀤𑀁 𑀙𑀦𑁆𑀤𑀭𑀸𑀕𑁄’’.

𑁧𑁦𑁯. ‘‘‘𑀯𑀺𑀦𑀺𑀘𑁆𑀙𑀬𑀁 𑀧𑀝𑀺𑀘𑁆𑀘 𑀙𑀦𑁆𑀤𑀭𑀸𑀕𑁄’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀯𑀺𑀦𑀺𑀘𑁆𑀙𑀬𑀁 𑀧𑀝𑀺𑀘𑁆𑀘 𑀙𑀦𑁆𑀤𑀭𑀸𑀕𑁄. 𑀯𑀺𑀦𑀺𑀘𑁆𑀙𑀬𑁄 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑀩𑁆𑀩𑀲𑁄 𑀯𑀺𑀦𑀺𑀘𑁆𑀙𑀬𑁂 𑀅𑀲𑀢𑀺 𑀯𑀺𑀦𑀺𑀘𑁆𑀙𑀬𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀙𑀦𑁆𑀤𑀭𑀸𑀕𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁 ¶ , 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀙𑀦𑁆𑀤𑀭𑀸𑀕𑀲𑁆𑀲, 𑀬𑀤𑀺𑀤𑀁 𑀯𑀺𑀦𑀺𑀘𑁆𑀙𑀬𑁄’’.

𑁧𑁧𑁦. ‘‘‘𑀮𑀸𑀪𑀁 ¶ 𑀧𑀝𑀺𑀘𑁆𑀘 𑀯𑀺𑀦𑀺𑀘𑁆𑀙𑀬𑁄’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀮𑀸𑀪𑀁 𑀧𑀝𑀺𑀘𑁆𑀘 𑀯𑀺𑀦𑀺𑀘𑁆𑀙𑀬𑁄. 𑀮𑀸𑀪𑁄 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑀩𑁆𑀩𑀲𑁄 𑀮𑀸𑀪𑁂 𑀅𑀲𑀢𑀺 𑀮𑀸𑀪𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀯𑀺𑀦𑀺𑀘𑁆𑀙𑀬𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, ¶ 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀯𑀺𑀦𑀺𑀘𑁆𑀙𑀬𑀲𑁆𑀲, 𑀬𑀤𑀺𑀤𑀁 𑀮𑀸𑀪𑁄’’.

𑁧𑁧𑁧. ‘‘‘𑀧𑀭𑀺𑀬𑁂𑀲𑀦𑀁 ¶ 𑀧𑀝𑀺𑀘𑁆𑀘 𑀮𑀸𑀪𑁄’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀧𑀭𑀺𑀬𑁂𑀲𑀦𑀁 𑀧𑀝𑀺𑀘𑁆𑀘 𑀮𑀸𑀪𑁄. 𑀧𑀭𑀺𑀬𑁂𑀲𑀦𑀸 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑀩𑁆𑀩𑀲𑁄 𑀧𑀭𑀺𑀬𑁂𑀲𑀦𑀸𑀬 𑀅𑀲𑀢𑀺 𑀧𑀭𑀺𑀬𑁂𑀲𑀦𑀸𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀮𑀸𑀪𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀮𑀸𑀪𑀲𑁆𑀲, 𑀬𑀤𑀺𑀤𑀁 𑀧𑀭𑀺𑀬𑁂𑀲𑀦𑀸’’.

𑁧𑁧𑁨. ‘‘‘𑀢𑀡𑁆𑀳𑀁 𑀧𑀝𑀺𑀘𑁆𑀘 𑀧𑀭𑀺𑀬𑁂𑀲𑀦𑀸’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀢𑀡𑁆𑀳𑀁 𑀧𑀝𑀺𑀘𑁆𑀘 𑀧𑀭𑀺𑀬𑁂𑀲𑀦𑀸. 𑀢𑀡𑁆𑀳𑀸 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀢𑀡𑁆𑀳𑀸 𑀪𑀯𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸, 𑀲𑀩𑁆𑀩𑀲𑁄 𑀢𑀡𑁆𑀳𑀸𑀬 𑀅𑀲𑀢𑀺 𑀢𑀡𑁆𑀳𑀸𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀧𑀭𑀺𑀬𑁂𑀲𑀦𑀸 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀧𑀭𑀺𑀬𑁂𑀲𑀦𑀸𑀬, 𑀬𑀤𑀺𑀤𑀁 𑀢𑀡𑁆𑀳𑀸. 𑀇𑀢𑀺 𑀔𑁄, 𑀆𑀦𑀦𑁆𑀤, 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 [𑀇𑀫𑁂 𑀥𑀫𑁆𑀫𑀸 (𑀓.)] 𑀤𑁆𑀯𑀬𑁂𑀦 𑀯𑁂𑀤𑀦𑀸𑀬 𑀏𑀓𑀲𑀫𑁄𑀲𑀭𑀡𑀸 𑀪𑀯𑀦𑁆𑀢𑀺’’.

𑁧𑁧𑁩. ‘‘‘𑀨𑀲𑁆𑀲𑀧𑀘𑁆𑀘𑀬𑀸 ¶ 𑀯𑁂𑀤𑀦𑀸’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 ‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸. 𑀨𑀲𑁆𑀲𑁄 𑀘 𑀳𑀺, 𑀆𑀦𑀦𑁆𑀤, 𑀦𑀸𑀪𑀯𑀺𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 ¶ 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀓𑀲𑁆𑀲𑀘𑀺 𑀓𑀺𑀫𑁆𑀳𑀺𑀘𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀲𑁄𑀢𑀲𑀫𑁆𑀨𑀲𑁆𑀲𑁄 𑀖𑀸𑀦𑀲𑀫𑁆𑀨𑀲𑁆𑀲𑁄 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄 𑀓𑀸𑀬𑀲𑀫𑁆𑀨𑀲𑁆𑀲𑁄 𑀫𑀦𑁄𑀲𑀫𑁆𑀨𑀲𑁆𑀲𑁄, 𑀲𑀩𑁆𑀩𑀲𑁄 𑀨𑀲𑁆𑀲𑁂 𑀅𑀲𑀢𑀺 𑀨𑀲𑁆𑀲𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀯𑁂𑀤𑀦𑀸 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤 ¶ , 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀯𑁂𑀤𑀦𑀸𑀬, 𑀬𑀤𑀺𑀤𑀁 𑀨𑀲𑁆𑀲𑁄’’.

𑁧𑁧𑁪. ‘‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀨𑀲𑁆𑀲𑁄’𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀨𑀲𑁆𑀲𑁄. 𑀬𑁂𑀳𑀺, 𑀆𑀦𑀦𑁆𑀤, 𑀆𑀓𑀸𑀭𑁂𑀳𑀺 𑀬𑁂𑀳𑀺 𑀮𑀺𑀗𑁆𑀕𑁂𑀳𑀺 𑀬𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀬𑁂𑀳𑀺 𑀉𑀤𑁆𑀤𑁂𑀲𑁂𑀳𑀺 𑀦𑀸𑀫𑀓𑀸𑀬𑀲𑁆𑀲 𑀧𑀜𑁆𑀜𑀢𑁆𑀢𑀺 𑀳𑁄𑀢𑀺, 𑀢𑁂𑀲𑀼 𑀆𑀓𑀸𑀭𑁂𑀲𑀼 𑀢𑁂𑀲𑀼 𑀮𑀺𑀗𑁆𑀕𑁂𑀲𑀼 𑀢𑁂𑀲𑀼 𑀦𑀺𑀫𑀺𑀢𑁆𑀢𑁂𑀲𑀼 𑀢𑁂𑀲𑀼 𑀉𑀤𑁆𑀤𑁂𑀲𑁂𑀲𑀼 𑀅𑀲𑀢𑀺 𑀅𑀧𑀺 𑀦𑀼 𑀔𑁄 𑀭𑀽𑀧𑀓𑀸𑀬𑁂 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀬𑁂𑀳𑀺, 𑀆𑀦𑀦𑁆𑀤, 𑀆𑀓𑀸𑀭𑁂𑀳𑀺 𑀬𑁂𑀳𑀺 𑀮𑀺𑀗𑁆𑀕𑁂𑀳𑀺 𑀬𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀺 𑀬𑁂𑀳𑀺 𑀉𑀤𑁆𑀤𑁂𑀲𑁂𑀳𑀺 𑀭𑀽𑀧𑀓𑀸𑀬𑀲𑁆𑀲 𑀧𑀜𑁆𑀜𑀢𑁆𑀢𑀺 𑀳𑁄𑀢𑀺, 𑀢𑁂𑀲𑀼 𑀆𑀓𑀸𑀭𑁂𑀲𑀼…𑀧𑁂… 𑀢𑁂𑀲𑀼 𑀉𑀤𑁆𑀤𑁂𑀲𑁂𑀲𑀼 𑀅𑀲𑀢𑀺 𑀅𑀧𑀺 𑀦𑀼 𑀔𑁄 𑀦𑀸𑀫𑀓𑀸𑀬𑁂 𑀧𑀝𑀺𑀖𑀲𑀫𑁆𑀨𑀲𑁆𑀲𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀬𑁂𑀳𑀺, 𑀆𑀦𑀦𑁆𑀤, 𑀆𑀓𑀸𑀭𑁂𑀳𑀺…𑀧𑁂… 𑀬𑁂𑀳𑀺 𑀉𑀤𑁆𑀤𑁂𑀲𑁂𑀳𑀺 𑀦𑀸𑀫𑀓𑀸𑀬𑀲𑁆𑀲 𑀘 𑀭𑀽𑀧𑀓𑀸𑀬𑀲𑁆𑀲 𑀘 𑀧𑀜𑁆𑀜𑀢𑁆𑀢𑀺 𑀳𑁄𑀢𑀺 ¶ , 𑀢𑁂𑀲𑀼 𑀆𑀓𑀸𑀭𑁂𑀲𑀼…𑀧𑁂… 𑀢𑁂𑀲𑀼 𑀉𑀤𑁆𑀤𑁂𑀲𑁂𑀲𑀼 𑀅𑀲𑀢𑀺 𑀅𑀧𑀺 𑀦𑀼 𑀔𑁄 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄 𑀯𑀸 𑀧𑀝𑀺𑀖𑀲𑀫𑁆𑀨𑀲𑁆𑀲𑁄 𑀯𑀸 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀬𑁂𑀳𑀺, 𑀆𑀦𑀦𑁆𑀤, 𑀆𑀓𑀸𑀭𑁂𑀳𑀺…𑀧𑁂… 𑀬𑁂𑀳𑀺 𑀉𑀤𑁆𑀤𑁂𑀲𑁂𑀳𑀺 𑀦𑀸𑀫𑀭𑀽𑀧𑀲𑁆𑀲 𑀧𑀜𑁆𑀜𑀢𑁆𑀢𑀺 𑀳𑁄𑀢𑀺, 𑀢𑁂𑀲𑀼 𑀆𑀓𑀸𑀭𑁂𑀲𑀼 ¶ …𑀧𑁂… 𑀢𑁂𑀲𑀼 𑀉𑀤𑁆𑀤𑁂𑀲𑁂𑀲𑀼 𑀅𑀲𑀢𑀺 𑀅𑀧𑀺 𑀦𑀼 𑀔𑁄 𑀨𑀲𑁆𑀲𑁄 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀨𑀲𑁆𑀲𑀲𑁆𑀲, 𑀬𑀤𑀺𑀤𑀁 𑀦𑀸𑀫𑀭𑀽𑀧𑀁’’.

𑁧𑁧𑁫. ‘‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’𑀦𑁆𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 ¶ 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁. 𑀯𑀺𑀜𑁆𑀜𑀸𑀡𑀜𑁆𑀘 𑀳𑀺, 𑀆𑀦𑀦𑁆𑀤, 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀦 𑀑𑀓𑁆𑀓𑀫𑀺𑀲𑁆𑀲𑀣, 𑀅𑀧𑀺 𑀦𑀼 𑀔𑁄 𑀦𑀸𑀫𑀭𑀽𑀧𑀁 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀲𑀫𑀼𑀘𑁆𑀘𑀺𑀲𑁆𑀲𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀯𑀺𑀜𑁆𑀜𑀸𑀡𑀜𑁆𑀘 𑀳𑀺, 𑀆𑀦𑀦𑁆𑀤, 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀑𑀓𑁆𑀓𑀫𑀺𑀢𑁆𑀯𑀸 𑀯𑁄𑀓𑁆𑀓𑀫𑀺𑀲𑁆𑀲𑀣, 𑀅𑀧𑀺 𑀦𑀼 𑀔𑁄 𑀦𑀸𑀫𑀭𑀽𑀧𑀁 𑀇𑀢𑁆𑀣𑀢𑁆𑀢𑀸𑀬 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀯𑀺𑀜𑁆𑀜𑀸𑀡𑀜𑁆𑀘 𑀳𑀺, 𑀆𑀦𑀦𑁆𑀤, 𑀤𑀳𑀭𑀲𑁆𑀲𑁂𑀯 𑀲𑀢𑁄 𑀯𑁄𑀘𑁆𑀙𑀺𑀚𑁆𑀚𑀺𑀲𑁆𑀲𑀣 𑀓𑀼𑀫𑀸𑀭𑀓𑀲𑁆𑀲 𑀯𑀸 𑀓𑀼𑀫𑀸𑀭𑀺𑀓𑀸𑀬 𑀯𑀸, 𑀅𑀧𑀺 𑀦𑀼 𑀔𑁄 𑀦𑀸𑀫𑀭𑀽𑀧𑀁 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀺𑀲𑁆𑀲𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀦𑀸𑀫𑀭𑀽𑀧𑀲𑁆𑀲 𑁋 𑀬𑀤𑀺𑀤𑀁 𑀯𑀺𑀜𑁆𑀜𑀸𑀡𑀁’’.

𑁧𑁧𑁬. ‘‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 ¶ 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀢𑀤𑀸𑀦𑀦𑁆𑀤, 𑀇𑀫𑀺𑀦𑀸𑀧𑁂𑀢𑀁 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀬𑀣𑀸 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁. 𑀯𑀺𑀜𑁆𑀜𑀸𑀡𑀜𑁆𑀘 𑀳𑀺, 𑀆𑀦𑀦𑁆𑀤, 𑀦𑀸𑀫𑀭𑀽𑀧𑁂 𑀧𑀢𑀺𑀝𑁆𑀞𑀁 𑀦 𑀮𑀪𑀺𑀲𑁆𑀲𑀣, 𑀅𑀧𑀺 𑀦𑀼 𑀔𑁄 𑀆𑀬𑀢𑀺𑀁 𑀚𑀸𑀢𑀺𑀚𑀭𑀸𑀫𑀭𑀡𑀁 𑀤𑀼𑀓𑁆𑀔𑀲𑀫𑀼𑀤𑀬𑀲𑀫𑁆𑀪𑀯𑁄 [𑀚𑀸𑀢𑀺𑀚𑀭𑀸𑀫𑀭𑀡𑀤𑀼𑀓𑁆𑀔𑀲𑀫𑀼𑀤𑀬𑀲𑀫𑁆𑀪𑀯𑁄 (𑀲𑀻. 𑀲𑁆𑀬𑀸. 𑀧𑀻.)] 𑀧𑀜𑁆𑀜𑀸𑀬𑁂𑀣𑀸’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀲𑁂𑀯 𑀳𑁂𑀢𑀼 𑀏𑀢𑀁 𑀦𑀺𑀤𑀸𑀦𑀁 𑀏𑀲 𑀲𑀫𑀼𑀤𑀬𑁄 𑀏𑀲 𑀧𑀘𑁆𑀘𑀬𑁄 𑀯𑀺𑀜𑁆𑀜𑀸𑀡𑀲𑁆𑀲 𑀬𑀤𑀺𑀤𑀁 𑀦𑀸𑀫𑀭𑀽𑀧𑀁. 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀦𑀦𑁆𑀤, ¶ 𑀚𑀸𑀬𑁂𑀣 𑀯𑀸 𑀚𑀻𑀬𑁂𑀣 [𑀚𑀺𑀬𑁆𑀬𑁂𑀣 (𑀓.)] 𑀯𑀸 𑀫𑀻𑀬𑁂𑀣 [𑀫𑀺𑀬𑁆𑀬𑁂𑀣 (𑀓.)] 𑀯𑀸 𑀘𑀯𑁂𑀣 𑀯𑀸 𑀉𑀧𑀧𑀚𑁆𑀚𑁂𑀣 𑀯𑀸. 𑀏𑀢𑁆𑀢𑀸𑀯𑀢𑀸 𑀅𑀥𑀺𑀯𑀘𑀦𑀧𑀣𑁄, 𑀏𑀢𑁆𑀢𑀸𑀯𑀢𑀸 𑀦𑀺𑀭𑀼𑀢𑁆𑀢𑀺𑀧𑀣𑁄, 𑀏𑀢𑁆𑀢𑀸𑀯𑀢𑀸 𑀧𑀜𑁆𑀜𑀢𑁆𑀢𑀺𑀧𑀣𑁄, 𑀏𑀢𑁆𑀢𑀸𑀯𑀢𑀸 𑀧𑀜𑁆𑀜𑀸𑀯𑀘𑀭𑀁, 𑀏𑀢𑁆𑀢𑀸𑀯𑀢𑀸 𑀯𑀝𑁆𑀝𑀁 𑀯𑀢𑁆𑀢𑀢𑀺 𑀇𑀢𑁆𑀣𑀢𑁆𑀢𑀁 ¶ 𑀧𑀜𑁆𑀜𑀸𑀧𑀦𑀸𑀬 𑀬𑀤𑀺𑀤𑀁 𑀦𑀸𑀫𑀭𑀽𑀧𑀁 𑀲𑀳 𑀯𑀺𑀜𑁆𑀜𑀸𑀡𑁂𑀦 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀢𑀸 𑀧𑀯𑀢𑁆𑀢𑀢𑀺.

𑀅𑀢𑁆𑀢𑀧𑀜𑁆𑀜𑀢𑁆𑀢𑀺

𑁧𑁧𑁭. ‘‘𑀓𑀺𑀢𑁆𑀢𑀸𑀯𑀢𑀸 𑀘, 𑀆𑀦𑀦𑁆𑀤, 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺? 𑀭𑀽𑀧𑀺𑀁 𑀯𑀸 𑀳𑀺, 𑀆𑀦𑀦𑁆𑀤, 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺 𑁋 ‘‘𑀭𑀽𑀧𑀻 𑀫𑁂 𑀧𑀭𑀺𑀢𑁆𑀢𑁄 𑀅𑀢𑁆𑀢𑀸’’𑀢𑀺. 𑀭𑀽𑀧𑀺𑀁 𑀯𑀸 𑀳𑀺 ¶ , 𑀆𑀦𑀦𑁆𑀤, 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺 𑁋 ‘𑀭𑀽𑀧𑀻 𑀫𑁂 𑀅𑀦𑀦𑁆𑀢𑁄 𑀅𑀢𑁆𑀢𑀸’𑀢𑀺. 𑀅𑀭𑀽𑀧𑀺𑀁 𑀯𑀸 𑀳𑀺, 𑀆𑀦𑀦𑁆𑀤, 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺 𑁋 ‘𑀅𑀭𑀽𑀧𑀻 𑀫𑁂 𑀧𑀭𑀺𑀢𑁆𑀢𑁄 𑀅𑀢𑁆𑀢𑀸’𑀢𑀺. 𑀅𑀭𑀽𑀧𑀺𑀁 𑀯𑀸 𑀳𑀺, 𑀆𑀦𑀦𑁆𑀤, 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺 𑁋 ‘𑀅𑀭𑀽𑀧𑀻 𑀫𑁂 𑀅𑀦𑀦𑁆𑀢𑁄 𑀅𑀢𑁆𑀢𑀸’𑀢𑀺.

𑁧𑁧𑁮. ‘‘𑀢𑀢𑁆𑀭𑀸𑀦𑀦𑁆𑀤, 𑀬𑁄 𑀲𑁄 𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺. 𑀏𑀢𑀭𑀳𑀺 𑀯𑀸 𑀲𑁄 𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺, 𑀢𑀢𑁆𑀣 𑀪𑀸𑀯𑀺𑀁 𑀯𑀸 𑀲𑁄 𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺, ‘𑀅𑀢𑀣𑀁 𑀯𑀸 𑀧𑀦 𑀲𑀦𑁆𑀢𑀁 𑀢𑀣𑀢𑁆𑀢𑀸𑀬 𑀉𑀧𑀓𑀧𑁆𑀧𑁂𑀲𑁆𑀲𑀸𑀫𑀻’𑀢𑀺 𑀇𑀢𑀺 𑀯𑀸 𑀧𑀦𑀲𑁆𑀲 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑀁 𑀔𑁄, 𑀆𑀦𑀦𑁆𑀤, 𑀭𑀽𑀧𑀺𑀁 [𑀭𑀽𑀧𑀻 (𑀓.)] 𑀧𑀭𑀺𑀢𑁆𑀢𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀅𑀦𑀼𑀲𑁂𑀢𑀻𑀢𑀺 𑀇𑀘𑁆𑀘𑀸𑀮𑀁 𑀯𑀘𑀦𑀸𑀬.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁄 𑀲𑁄 𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺. 𑀏𑀢𑀭𑀳𑀺 𑀯𑀸 𑀲𑁄 𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺, 𑀢𑀢𑁆𑀣 𑀪𑀸𑀯𑀺𑀁 𑀯𑀸 𑀲𑁄 𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺, ‘𑀅𑀢𑀣𑀁 ¶ 𑀯𑀸 𑀧𑀦 ¶ 𑀲𑀦𑁆𑀢𑀁 𑀢𑀣𑀢𑁆𑀢𑀸𑀬 𑀉𑀧𑀓𑀧𑁆𑀧𑁂𑀲𑁆𑀲𑀸𑀫𑀻’𑀢𑀺 𑀇𑀢𑀺 𑀯𑀸 𑀧𑀦𑀲𑁆𑀲 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑀁 𑀔𑁄, 𑀆𑀦𑀦𑁆𑀤, 𑀭𑀽𑀧𑀺𑀁 [𑀭𑀽𑀧𑀻 (𑀓.)] 𑀅𑀦𑀦𑁆𑀢𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀅𑀦𑀼𑀲𑁂𑀢𑀻𑀢𑀺 𑀇𑀘𑁆𑀘𑀸𑀮𑀁 𑀯𑀘𑀦𑀸𑀬.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁄 𑀲𑁄 𑀅𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺. 𑀏𑀢𑀭𑀳𑀺 𑀯𑀸 𑀲𑁄 𑀅𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺, 𑀢𑀢𑁆𑀣 𑀪𑀸𑀯𑀺𑀁 𑀯𑀸 𑀲𑁄 𑀅𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺, ‘𑀅𑀢𑀣𑀁 𑀯𑀸 𑀧𑀦 𑀲𑀦𑁆𑀢𑀁 𑀢𑀣𑀢𑁆𑀢𑀸𑀬 𑀉𑀧𑀓𑀧𑁆𑀧𑁂𑀲𑁆𑀲𑀸𑀫𑀻’𑀢𑀺 𑀇𑀢𑀺 𑀯𑀸 𑀧𑀦𑀲𑁆𑀲 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑀁 𑀔𑁄, 𑀆𑀦𑀦𑁆𑀤, 𑀅𑀭𑀽𑀧𑀺𑀁 [𑀅𑀭𑀽𑀧𑀻 (𑀓.)] 𑀧𑀭𑀺𑀢𑁆𑀢𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀅𑀦𑀼𑀲𑁂𑀢𑀻𑀢𑀺 𑀇𑀘𑁆𑀘𑀸𑀮𑀁 𑀯𑀘𑀦𑀸𑀬.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁄 𑀲𑁄 𑀅𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺. 𑀏𑀢𑀭𑀳𑀺 𑀯𑀸 𑀲𑁄 𑀅𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺, 𑀢𑀢𑁆𑀣 𑀪𑀸𑀯𑀺𑀁 𑀯𑀸 𑀲𑁄 𑀅𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺, ‘𑀅𑀢𑀣𑀁 𑀯𑀸 𑀧𑀦 𑀲𑀦𑁆𑀢𑀁 𑀢𑀣𑀢𑁆𑀢𑀸𑀬 𑀉𑀧𑀓𑀧𑁆𑀧𑁂𑀲𑁆𑀲𑀸𑀫𑀻’𑀢𑀺 𑀇𑀢𑀺 𑀯𑀸 𑀧𑀦𑀲𑁆𑀲 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑀁 𑀔𑁄, 𑀆𑀦𑀦𑁆𑀤, 𑀅𑀭𑀽𑀧𑀺𑀁 [𑀅𑀭𑀽𑀧𑀻 (𑀓.)] 𑀅𑀦𑀦𑁆𑀢𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀅𑀦𑀼𑀲𑁂𑀢𑀻𑀢𑀺 𑀇𑀘𑁆𑀘𑀸𑀮𑀁 𑀯𑀘𑀦𑀸𑀬. 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀦𑀦𑁆𑀤, 𑀅𑀢𑁆𑀢𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑁄 𑀧𑀜𑁆𑀜𑀧𑁂𑀢𑀺.

𑀦𑀅𑀢𑁆𑀢𑀧𑀜𑁆𑀜𑀢𑁆𑀢𑀺

𑁧𑁧𑁯. ‘‘𑀓𑀺𑀢𑁆𑀢𑀸𑀯𑀢𑀸 𑀘, 𑀆𑀦𑀦𑁆𑀤, 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺? 𑀭𑀽𑀧𑀺𑀁 𑀯𑀸 𑀳𑀺, 𑀆𑀦𑀦𑁆𑀤, 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺 𑁋 ‘𑀭𑀽𑀧𑀻 𑀫𑁂 𑀧𑀭𑀺𑀢𑁆𑀢𑁄 𑀅𑀢𑁆𑀢𑀸’𑀢𑀺. 𑀭𑀽𑀧𑀺𑀁 ¶ 𑀯𑀸 𑀳𑀺, 𑀆𑀦𑀦𑁆𑀤, 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺 𑁋 ‘𑀭𑀽𑀧𑀻 𑀫𑁂 𑀅𑀦𑀦𑁆𑀢𑁄 𑀅𑀢𑁆𑀢𑀸’𑀢𑀺. 𑀅𑀭𑀽𑀧𑀺𑀁 𑀯𑀸 𑀳𑀺, 𑀆𑀦𑀦𑁆𑀤, 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺 𑁋 ‘𑀅𑀭𑀽𑀧𑀻 𑀫𑁂 𑀧𑀭𑀺𑀢𑁆𑀢𑁄 𑀅𑀢𑁆𑀢𑀸’𑀢𑀺. 𑀅𑀭𑀽𑀧𑀺𑀁 𑀯𑀸 𑀳𑀺, 𑀆𑀦𑀦𑁆𑀤, 𑀅𑀦𑀦𑁆𑀢𑀁 ¶ 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺 𑁋 ‘𑀅𑀭𑀽𑀧𑀻 𑀫𑁂 𑀅𑀦𑀦𑁆𑀢𑁄 𑀅𑀢𑁆𑀢𑀸’𑀢𑀺.

𑁧𑁨𑁦. ‘‘𑀢𑀢𑁆𑀭𑀸𑀦𑀦𑁆𑀤, 𑀬𑁄 𑀲𑁄 𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺. 𑀏𑀢𑀭𑀳𑀺 𑀯𑀸 𑀲𑁄 𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺, 𑀢𑀢𑁆𑀣 𑀪𑀸𑀯𑀺𑀁 𑀯𑀸 𑀲𑁄 𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺, ‘𑀅𑀢𑀣𑀁 𑀯𑀸 𑀧𑀦 𑀲𑀦𑁆𑀢𑀁 𑀢𑀣𑀢𑁆𑀢𑀸𑀬 𑀉𑀧𑀓𑀧𑁆𑀧𑁂𑀲𑁆𑀲𑀸𑀫𑀻’𑀢𑀺 𑀇𑀢𑀺 𑀯𑀸 𑀧𑀦𑀲𑁆𑀲 ¶ 𑀦 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑀁 𑀔𑁄, 𑀆𑀦𑀦𑁆𑀤, 𑀭𑀽𑀧𑀺𑀁 𑀧𑀭𑀺𑀢𑁆𑀢𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀦𑀸𑀦𑀼𑀲𑁂𑀢𑀻𑀢𑀺 𑀇𑀘𑁆𑀘𑀸𑀮𑀁 𑀯𑀘𑀦𑀸𑀬.

‘‘𑀢𑀢𑁆𑀭𑀸𑀦𑀦𑁆𑀤 ¶ , 𑀬𑁄 𑀲𑁄 𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺. 𑀏𑀢𑀭𑀳𑀺 𑀯𑀸 𑀲𑁄 𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺, 𑀢𑀢𑁆𑀣 𑀪𑀸𑀯𑀺𑀁 𑀯𑀸 𑀲𑁄 𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺, ‘𑀅𑀢𑀣𑀁 𑀯𑀸 𑀧𑀦 𑀲𑀦𑁆𑀢𑀁 𑀢𑀣𑀢𑁆𑀢𑀸𑀬 𑀉𑀧𑀓𑀧𑁆𑀧𑁂𑀲𑁆𑀲𑀸𑀫𑀻’𑀢𑀺 𑀇𑀢𑀺 𑀯𑀸 𑀧𑀦𑀲𑁆𑀲 𑀦 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑀁 𑀔𑁄, 𑀆𑀦𑀦𑁆𑀤, 𑀭𑀽𑀧𑀺𑀁 𑀅𑀦𑀦𑁆𑀢𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀦𑀸𑀦𑀼𑀲𑁂𑀢𑀻𑀢𑀺 𑀇𑀘𑁆𑀘𑀸𑀮𑀁 𑀯𑀘𑀦𑀸𑀬.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁄 𑀲𑁄 𑀅𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺. 𑀏𑀢𑀭𑀳𑀺 𑀯𑀸 𑀲𑁄 𑀅𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺, 𑀢𑀢𑁆𑀣 𑀪𑀸𑀯𑀺𑀁 𑀯𑀸 𑀲𑁄 𑀅𑀭𑀽𑀧𑀺𑀁 𑀧𑀭𑀺𑀢𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺, ‘𑀅𑀢𑀣𑀁 𑀯𑀸 𑀧𑀦 𑀲𑀦𑁆𑀢𑀁 𑀢𑀣𑀢𑁆𑀢𑀸𑀬 𑀉𑀧𑀓𑀧𑁆𑀧𑁂𑀲𑁆𑀲𑀸𑀫𑀻’𑀢𑀺 𑀇𑀢𑀺 𑀯𑀸 𑀧𑀦𑀲𑁆𑀲 𑀦 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑀁 𑀔𑁄, 𑀆𑀦𑀦𑁆𑀤, 𑀅𑀭𑀽𑀧𑀺𑀁 𑀧𑀭𑀺𑀢𑁆𑀢𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀦𑀸𑀦𑀼𑀲𑁂𑀢𑀻𑀢𑀺 𑀇𑀘𑁆𑀘𑀸𑀮𑀁 𑀯𑀘𑀦𑀸𑀬.

‘‘𑀢𑀢𑁆𑀭𑀸𑀦𑀦𑁆𑀤, 𑀬𑁄 𑀲𑁄 𑀅𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺. 𑀏𑀢𑀭𑀳𑀺 𑀯𑀸 𑀲𑁄 𑀅𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 ¶ 𑀧𑀜𑁆𑀜𑀧𑁂𑀢𑀺, 𑀢𑀢𑁆𑀣 𑀪𑀸𑀯𑀺𑀁 𑀯𑀸 𑀲𑁄 𑀅𑀭𑀽𑀧𑀺𑀁 𑀅𑀦𑀦𑁆𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺, ‘𑀅𑀢𑀣𑀁 𑀯𑀸 𑀧𑀦 𑀲𑀦𑁆𑀢𑀁 𑀢𑀣𑀢𑁆𑀢𑀸𑀬 𑀉𑀧𑀓𑀧𑁆𑀧𑁂𑀲𑁆𑀲𑀸𑀫𑀻’𑀢𑀺 𑀇𑀢𑀺 𑀯𑀸 𑀧𑀦𑀲𑁆𑀲 𑀦 ¶ 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑀁 𑀔𑁄, 𑀆𑀦𑀦𑁆𑀤, 𑀅𑀭𑀽𑀧𑀺𑀁 𑀅𑀦𑀦𑁆𑀢𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀦𑀸𑀦𑀼𑀲𑁂𑀢𑀻𑀢𑀺 𑀇𑀘𑁆𑀘𑀸𑀮𑀁 𑀯𑀘𑀦𑀸𑀬. 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀦𑀦𑁆𑀤, 𑀅𑀢𑁆𑀢𑀸𑀦𑀁 𑀦 𑀧𑀜𑁆𑀜𑀧𑁂𑀦𑁆𑀢𑁄 𑀦 𑀧𑀜𑁆𑀜𑀧𑁂𑀢𑀺.

𑀅𑀢𑁆𑀢𑀲𑀫𑀦𑀼𑀧𑀲𑁆𑀲𑀦𑀸

𑁧𑁨𑁧. ‘‘𑀓𑀺𑀢𑁆𑀢𑀸𑀯𑀢𑀸 ¶ 𑀘, 𑀆𑀦𑀦𑁆𑀤, 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀫𑀸𑀦𑁄 𑀲𑀫𑀦𑀼𑀧𑀲𑁆𑀲𑀢𑀺? 𑀯𑁂𑀤𑀦𑀁 𑀯𑀸 𑀳𑀺, 𑀆𑀦𑀦𑁆𑀤, 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀫𑀸𑀦𑁄 𑀲𑀫𑀦𑀼𑀧𑀲𑁆𑀲𑀢𑀺 𑁋 ‘𑀯𑁂𑀤𑀦𑀸 𑀫𑁂 𑀅𑀢𑁆𑀢𑀸’𑀢𑀺. ‘𑀦 𑀳𑁂𑀯 𑀔𑁄 𑀫𑁂 𑀯𑁂𑀤𑀦𑀸 𑀅𑀢𑁆𑀢𑀸, 𑀅𑀧𑁆𑀧𑀝𑀺𑀲𑀁𑀯𑁂𑀤𑀦𑁄 𑀫𑁂 𑀅𑀢𑁆𑀢𑀸’𑀢𑀺 𑀇𑀢𑀺 𑀯𑀸 𑀳𑀺, 𑀆𑀦𑀦𑁆𑀤, 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀫𑀸𑀦𑁄 𑀲𑀫𑀦𑀼𑀧𑀲𑁆𑀲𑀢𑀺. ‘𑀦 𑀳𑁂𑀯 𑀔𑁄 𑀫𑁂 𑀯𑁂𑀤𑀦𑀸 𑀅𑀢𑁆𑀢𑀸, 𑀦𑁄𑀧𑀺 𑀅𑀧𑁆𑀧𑀝𑀺𑀲𑀁𑀯𑁂𑀤𑀦𑁄 𑀫𑁂 𑀅𑀢𑁆𑀢𑀸, 𑀅𑀢𑁆𑀢𑀸 𑀫𑁂 𑀯𑁂𑀤𑀺𑀬𑀢𑀺, 𑀯𑁂𑀤𑀦𑀸𑀥𑀫𑁆𑀫𑁄 𑀳𑀺 𑀫𑁂 𑀅𑀢𑁆𑀢𑀸’𑀢𑀺 𑀇𑀢𑀺 𑀯𑀸 𑀳𑀺, 𑀆𑀦𑀦𑁆𑀤, 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀫𑀸𑀦𑁄 𑀲𑀫𑀦𑀼𑀧𑀲𑁆𑀲𑀢𑀺.

𑁧𑁨𑁨. ‘‘𑀢𑀢𑁆𑀭𑀸𑀦𑀦𑁆𑀤, 𑀬𑁄 𑀲𑁄 𑀏𑀯𑀫𑀸𑀳 𑁋 ‘𑀯𑁂𑀤𑀦𑀸 𑀫𑁂 𑀅𑀢𑁆𑀢𑀸’𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀢𑀺𑀲𑁆𑀲𑁄 𑀔𑁄 𑀇𑀫𑀸, 𑀆𑀯𑀼𑀲𑁄, 𑀯𑁂𑀤𑀦𑀸 𑁋 𑀲𑀼𑀔𑀸 𑀯𑁂𑀤𑀦𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸. 𑀇𑀫𑀸𑀲𑀁 𑀔𑁄 𑀢𑁆𑀯𑀁 𑀢𑀺𑀲𑁆𑀲𑀦𑁆𑀦𑀁 ¶ 𑀯𑁂𑀤𑀦𑀸𑀦𑀁 𑀓𑀢𑀫𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀲𑀻’𑀢𑀺? 𑀬𑀲𑁆𑀫𑀺𑀁, 𑀆𑀦𑀦𑁆𑀤, 𑀲𑀫𑀬𑁂 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀦 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺; 𑀲𑀼𑀔𑀁𑀬𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀁 𑀯𑁂𑀤𑁂𑀢𑀺. 𑀬𑀲𑁆𑀫𑀺𑀁, 𑀆𑀦𑀦𑁆𑀤, 𑀲𑀫𑀬𑁂 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀦 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺; 𑀤𑀼𑀓𑁆𑀔𑀁𑀬𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀁 𑀯𑁂𑀤𑁂𑀢𑀺. 𑀬𑀲𑁆𑀫𑀺𑀁, 𑀆𑀦𑀦𑁆𑀤, 𑀲𑀫𑀬𑁂 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 ¶ 𑀯𑁂𑀤𑁂𑀢𑀺, 𑀦𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺, 𑀦 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑁂𑀢𑀺; 𑀅𑀤𑀼𑀓𑁆𑀔𑀫𑀲𑀼𑀔𑀁𑀬𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂 𑀯𑁂𑀤𑀦𑀁 𑀯𑁂𑀤𑁂𑀢𑀺.

𑁧𑁨𑁩. ‘‘𑀲𑀼𑀔𑀸𑀧𑀺 𑀔𑁄, 𑀆𑀦𑀦𑁆𑀤, 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸. 𑀤𑀼𑀓𑁆𑀔𑀸𑀧𑀺 𑀔𑁄, 𑀆𑀦𑀦𑁆𑀤, 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀔𑀬𑀥𑀫𑁆𑀫𑀸 ¶ 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸. 𑀅𑀤𑀼𑀓𑁆𑀔𑀫𑀲𑀼𑀔𑀸𑀧𑀺 𑀔𑁄, 𑀆𑀦𑀦𑁆𑀤, 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸. 𑀢𑀲𑁆𑀲 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑀲𑁆𑀲 ‘𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀳𑁄𑀢𑀺. 𑀢𑀲𑁆𑀲𑀸𑀬𑁂𑀯 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀦𑀺𑀭𑁄𑀥𑀸 ‘𑀩𑁆𑀬𑀕𑀸 [𑀩𑁆𑀬𑀕𑁆𑀕𑀸 (𑀲𑀻. 𑀓.)] 𑀫𑁂 𑀅𑀢𑁆𑀢𑀸’𑀢𑀺 𑀳𑁄𑀢𑀺. 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑀲𑁆𑀲 ‘𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀳𑁄𑀢𑀺. 𑀢𑀲𑁆𑀲𑀸𑀬𑁂𑀯 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀦𑀺𑀭𑁄𑀥𑀸 ‘𑀩𑁆𑀬𑀕𑀸 𑀫𑁂 𑀅𑀢𑁆𑀢𑀸’𑀢𑀺 𑀳𑁄𑀢𑀺. 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑀲𑁆𑀲 ‘𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀳𑁄𑀢𑀺. 𑀢𑀲𑁆𑀲𑀸𑀬𑁂𑀯 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀦𑀺𑀭𑁄𑀥𑀸 ‘𑀩𑁆𑀬𑀕𑀸 𑀫𑁂 𑀅𑀢𑁆𑀢𑀸’𑀢𑀺 𑀳𑁄𑀢𑀺. 𑀇𑀢𑀺 𑀲𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀦𑀺𑀘𑁆𑀘𑀲𑀼𑀔𑀤𑀼𑀓𑁆𑀔𑀯𑁄𑀓𑀺𑀡𑁆𑀡𑀁 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀫𑀸𑀦𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀬𑁄 𑀲𑁄 𑀏𑀯𑀫𑀸𑀳 𑁋 ‘𑀯𑁂𑀤𑀦𑀸 𑀫𑁂 𑀅𑀢𑁆𑀢𑀸’𑀢𑀺. 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀢𑁂𑀦 𑀧𑁂𑀢𑀁 𑀦𑀓𑁆𑀔𑀫𑀢𑀺 𑁋 ‘𑀯𑁂𑀤𑀦𑀸 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀺𑀢𑀼𑀁.

𑁧𑁨𑁪. ‘‘𑀢𑀢𑁆𑀭𑀸𑀦𑀦𑁆𑀤 ¶ , 𑀬𑁄 𑀲𑁄 𑀏𑀯𑀫𑀸𑀳 𑁋 ‘𑀦 𑀳𑁂𑀯 𑀔𑁄 𑀫𑁂 𑀯𑁂𑀤𑀦𑀸 𑀅𑀢𑁆𑀢𑀸, 𑀅𑀧𑁆𑀧𑀝𑀺𑀲𑀁𑀯𑁂𑀤𑀦𑁄 𑀫𑁂 𑀅𑀢𑁆𑀢𑀸’𑀢𑀺, 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 ‘𑀬𑀢𑁆𑀣 𑀧𑀦𑀸𑀯𑀼𑀲𑁄, 𑀲𑀩𑁆𑀩𑀲𑁄 𑀯𑁂𑀤𑀬𑀺𑀢𑀁 𑀦𑀢𑁆𑀣𑀺 𑀅𑀧𑀺 𑀦𑀼 𑀔𑁄, 𑀢𑀢𑁆𑀣 ‘‘𑀅𑀬𑀫𑀳𑀫𑀲𑁆𑀫𑀻’’𑀢𑀺 𑀲𑀺𑀬𑀸’’’𑀢𑀺 ¶ ? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀢𑁂𑀦 𑀧𑁂𑀢𑀁 𑀦𑀓𑁆𑀔𑀫𑀢𑀺 𑁋 ‘𑀦 𑀳𑁂𑀯 𑀔𑁄 𑀫𑁂 𑀯𑁂𑀤𑀦𑀸 𑀅𑀢𑁆𑀢𑀸, 𑀅𑀧𑁆𑀧𑀝𑀺𑀲𑀁𑀯𑁂𑀤𑀦𑁄 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀺𑀢𑀼𑀁.

𑁧𑁨𑁫. ‘‘𑀢𑀢𑁆𑀭𑀸𑀦𑀦𑁆𑀤 ¶ , 𑀬𑁄 𑀲𑁄 𑀏𑀯𑀫𑀸𑀳 𑁋 ‘𑀦 𑀳𑁂𑀯 𑀔𑁄 𑀫𑁂 𑀯𑁂𑀤𑀦𑀸 𑀅𑀢𑁆𑀢𑀸, 𑀦𑁄𑀧𑀺 𑀅𑀧𑁆𑀧𑀝𑀺𑀲𑀁𑀯𑁂𑀤𑀦𑁄 𑀫𑁂 𑀅𑀢𑁆𑀢𑀸, 𑀅𑀢𑁆𑀢𑀸 𑀫𑁂 𑀯𑁂𑀤𑀺𑀬𑀢𑀺, 𑀯𑁂𑀤𑀦𑀸𑀥𑀫𑁆𑀫𑁄 𑀳𑀺 𑀫𑁂 𑀅𑀢𑁆𑀢𑀸’𑀢𑀺. 𑀲𑁄 𑀏𑀯𑀫𑀲𑁆𑀲 𑀯𑀘𑀦𑀻𑀬𑁄 𑁋 𑀯𑁂𑀤𑀦𑀸 𑀘 𑀳𑀺, 𑀆𑀯𑀼𑀲𑁄, 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀩𑁆𑀩𑀣𑀸 𑀲𑀩𑁆𑀩𑀁 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑁂𑀬𑁆𑀬𑀼𑀁. 𑀲𑀩𑁆𑀩𑀲𑁄 𑀯𑁂𑀤𑀦𑀸𑀬 𑀅𑀲𑀢𑀺 𑀯𑁂𑀤𑀦𑀸𑀦𑀺𑀭𑁄𑀥𑀸 𑀅𑀧𑀺 𑀦𑀼 𑀔𑁄 𑀢𑀢𑁆𑀣 ‘𑀅𑀬𑀫𑀳𑀫𑀲𑁆𑀫𑀻’𑀢𑀺 𑀲𑀺𑀬𑀸’’𑀢𑀺? ‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀏𑀢𑁂𑀦 𑀧𑁂𑀢𑀁 𑀦𑀓𑁆𑀔𑀫𑀢𑀺 𑁋 ‘‘𑀦 𑀳𑁂𑀯 𑀔𑁄 ¶ 𑀫𑁂 𑀯𑁂𑀤𑀦𑀸 𑀅𑀢𑁆𑀢𑀸, 𑀦𑁄𑀧𑀺 𑀅𑀧𑁆𑀧𑀝𑀺𑀲𑀁𑀯𑁂𑀤𑀦𑁄 𑀫𑁂 𑀅𑀢𑁆𑀢𑀸, 𑀅𑀢𑁆𑀢𑀸 𑀫𑁂 𑀯𑁂𑀤𑀺𑀬𑀢𑀺, 𑀯𑁂𑀤𑀦𑀸𑀥𑀫𑁆𑀫𑁄 𑀳𑀺 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀺𑀢𑀼𑀁.

𑁧𑁨𑁬. ‘‘𑀬𑀢𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀦𑁂𑀯 𑀯𑁂𑀤𑀦𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀦𑁄𑀧𑀺 𑀅𑀧𑁆𑀧𑀝𑀺𑀲𑀁𑀯𑁂𑀤𑀦𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀦𑁄𑀧𑀺 ‘𑀅𑀢𑁆𑀢𑀸 𑀫𑁂 𑀯𑁂𑀤𑀺𑀬𑀢𑀺, 𑀯𑁂𑀤𑀦𑀸𑀥𑀫𑁆𑀫𑁄 𑀳𑀺 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁄 𑀏𑀯𑀁 𑀦 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀦 𑀘 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺, 𑀅𑀦𑀼𑀧𑀸𑀤𑀺𑀬𑀁 𑀦 𑀧𑀭𑀺𑀢𑀲𑁆𑀲𑀢𑀺, 𑀅𑀧𑀭𑀺𑀢𑀲𑁆𑀲𑀁 [𑀅𑀧𑀭𑀺𑀢𑀲𑁆𑀲𑀦𑀁 (𑀓.)] 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 𑀧𑀚𑀸𑀦𑀸𑀢𑀺. 𑀏𑀯𑀁 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀁 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀁 𑀬𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸 𑀇𑀢𑀺𑀲𑁆𑀲 [𑀇𑀢𑀺 𑀲𑀸 (𑀅𑀝𑁆𑀞𑀓𑀣𑀸𑀬𑀁 𑀧𑀸𑀞𑀦𑁆𑀢𑀭𑀁)] 𑀤𑀺𑀝𑁆𑀞𑀻’𑀢𑀺, 𑀢𑀤𑀓𑀮𑁆𑀮𑀁. ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸 𑀇𑀢𑀺𑀲𑁆𑀲 ¶ 𑀤𑀺𑀝𑁆𑀞𑀻’𑀢𑀺, 𑀢𑀤𑀓𑀮𑁆𑀮𑀁. ‘𑀳𑁄𑀢𑀺 𑀘 𑀦 𑀘 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸 𑀇𑀢𑀺𑀲𑁆𑀲 𑀤𑀺𑀝𑁆𑀞𑀻’𑀢𑀺, 𑀢𑀤𑀓𑀮𑁆𑀮𑀁. ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸 𑀇𑀢𑀺𑀲𑁆𑀲 𑀤𑀺𑀝𑁆𑀞𑀻’𑀢𑀺, 𑀢𑀤𑀓𑀮𑁆𑀮𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀬𑀸𑀯𑀢𑀸, 𑀆𑀦𑀦𑁆𑀤, 𑀅𑀥𑀺𑀯𑀘𑀦𑀁 𑀬𑀸𑀯𑀢𑀸 𑀅𑀥𑀺𑀯𑀘𑀦𑀧𑀣𑁄, 𑀬𑀸𑀯𑀢𑀸 𑀦𑀺𑀭𑀼𑀢𑁆𑀢𑀺 𑀬𑀸𑀯𑀢𑀸 𑀦𑀺𑀭𑀼𑀢𑁆𑀢𑀺𑀧𑀣𑁄, 𑀬𑀸𑀯𑀢𑀸 𑀧𑀜𑁆𑀜𑀢𑁆𑀢𑀺 𑀬𑀸𑀯𑀢𑀸 𑀧𑀜𑁆𑀜𑀢𑁆𑀢𑀺𑀧𑀣𑁄, 𑀬𑀸𑀯𑀢𑀸 𑀧𑀜𑁆𑀜𑀸 𑀬𑀸𑀯𑀢𑀸 𑀧𑀜𑁆𑀜𑀸𑀯𑀘𑀭𑀁, 𑀬𑀸𑀯𑀢𑀸 𑀯𑀝𑁆𑀝𑀁 [𑀬𑀸𑀯𑀢𑀸 𑀯𑀝𑁆𑀝𑀁 𑀯𑀝𑁆𑀝𑀢𑀺 (𑀓. 𑀲𑀻.)], 𑀬𑀸𑀯𑀢𑀸 𑀯𑀝𑁆𑀝𑀢𑀺 [𑀬𑀸𑀯𑀢𑀸 𑀯𑀝𑁆𑀝𑀁 𑀯𑀝𑁆𑀝𑀢𑀺 (𑀓. 𑀲𑀻.)], 𑀢𑀤𑀪𑀺𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀪𑀺𑀓𑁆𑀔𑀼, 𑀢𑀤𑀪𑀺𑀜𑁆𑀜𑀸𑀯𑀺𑀫𑀼𑀢𑁆𑀢𑀁 𑀪𑀺𑀓𑁆𑀔𑀼𑀁 ‘𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺 𑀇𑀢𑀺𑀲𑁆𑀲 𑀤𑀺𑀝𑁆𑀞𑀻’𑀢𑀺, 𑀢𑀤𑀓𑀮𑁆𑀮𑀁.

𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺

𑁧𑁨𑁭. ‘‘𑀲𑀢𑁆𑀢 𑀔𑁄, 𑀆𑀦𑀦𑁆𑀤 [𑀲𑀢𑁆𑀢 𑀔𑁄 𑀇𑀫𑀸 𑀆𑀦𑀦𑁆𑀤 (𑀓. 𑀲𑀻. 𑀲𑁆𑀬𑀸.)], 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄, 𑀤𑁆𑀯𑁂 𑀆𑀬𑀢𑀦𑀸𑀦𑀺. 𑀓𑀢𑀫𑀸 𑀲𑀢𑁆𑀢? 𑀲𑀦𑁆𑀢𑀸𑀦𑀦𑁆𑀤, 𑀲𑀢𑁆𑀢𑀸 𑀦𑀸𑀦𑀢𑁆𑀢𑀓𑀸𑀬𑀸 ¶ 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄, 𑀲𑁂𑀬𑁆𑀬𑀣𑀸𑀧𑀺 𑀫𑀦𑀼𑀲𑁆𑀲𑀸 ¶ , 𑀏𑀓𑀘𑁆𑀘𑁂 𑀘 𑀤𑁂𑀯𑀸, 𑀏𑀓𑀘𑁆𑀘𑁂 𑀘 ¶ 𑀯𑀺𑀦𑀺𑀧𑀸𑀢𑀺𑀓𑀸. 𑀅𑀬𑀁 𑀧𑀞𑀫𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀲𑀦𑁆𑀢𑀸𑀦𑀦𑁆𑀤, 𑀲𑀢𑁆𑀢𑀸 𑀦𑀸𑀦𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄, 𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑀸 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸. 𑀅𑀬𑀁 𑀤𑀼𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀲𑀦𑁆𑀢𑀸𑀦𑀦𑁆𑀤, 𑀲𑀢𑁆𑀢𑀸 𑀏𑀓𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄, 𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑀸 𑀆𑀪𑀲𑁆𑀲𑀭𑀸. 𑀅𑀬𑀁 𑀢𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀲𑀦𑁆𑀢𑀸𑀦𑀦𑁆𑀤, 𑀲𑀢𑁆𑀢𑀸 𑀏𑀓𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄, 𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑀸 𑀲𑀼𑀪𑀓𑀺𑀡𑁆𑀳𑀸. 𑀅𑀬𑀁 𑀘𑀢𑀼𑀢𑁆𑀣𑀻 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀲𑀦𑁆𑀢𑀸𑀦𑀦𑁆𑀤, 𑀲𑀢𑁆𑀢𑀸 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘𑀅𑀦𑀦𑁆𑀢𑁄 𑀆𑀓𑀸𑀲𑁄’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑀸. 𑀅𑀬𑀁 𑀧𑀜𑁆𑀘𑀫𑀻 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 ¶ . 𑀲𑀦𑁆𑀢𑀸𑀦𑀦𑁆𑀤, 𑀲𑀢𑁆𑀢𑀸 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀽𑀧𑀕𑀸. 𑀅𑀬𑀁 𑀙𑀝𑁆𑀞𑀻 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀲𑀦𑁆𑀢𑀸𑀦𑀦𑁆𑀤, 𑀲𑀢𑁆𑀢𑀸 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀦𑀢𑁆𑀣𑀺 𑀓𑀺𑀜𑁆𑀘𑀻’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀽𑀧𑀕𑀸. 𑀅𑀬𑀁 𑀲𑀢𑁆𑀢𑀫𑀻 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀅𑀲𑀜𑁆𑀜𑀲𑀢𑁆𑀢𑀸𑀬𑀢𑀦𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀫𑁂𑀯 𑀤𑀼𑀢𑀺𑀬𑀁.

𑁧𑁨𑁮. ‘‘𑀢𑀢𑁆𑀭𑀸𑀦𑀦𑁆𑀤, 𑀬𑀸𑀬𑀁 𑀧𑀞𑀫𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺 𑀦𑀸𑀦𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄, 𑀲𑁂𑀬𑁆𑀬𑀣𑀸𑀧𑀺 𑀫𑀦𑀼𑀲𑁆𑀲𑀸, 𑀏𑀓𑀘𑁆𑀘𑁂 𑀘 𑀤𑁂𑀯𑀸, 𑀏𑀓𑀘𑁆𑀘𑁂 𑀘 𑀯𑀺𑀦𑀺𑀧𑀸𑀢𑀺𑀓𑀸. 𑀬𑁄 𑀦𑀼 𑀔𑁄, 𑀆𑀦𑀦𑁆𑀤, 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀢𑀲𑁆𑀲𑀸 𑀘 𑀲𑀫𑀼𑀤𑀬𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲𑀸 𑀘 𑀅𑀢𑁆𑀣𑀗𑁆𑀕𑀫𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲𑀸 𑀘 𑀅𑀲𑁆𑀲𑀸𑀤𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲𑀸 𑀘 𑀆𑀤𑀻𑀦𑀯𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲𑀸 𑀘 𑀦𑀺𑀲𑁆𑀲𑀭𑀡𑀁 𑀧𑀚𑀸𑀦𑀸𑀢𑀺, 𑀓𑀮𑁆𑀮𑀁 𑀦𑀼 𑀢𑁂𑀦 𑀢𑀤𑀪𑀺𑀦𑀦𑁆𑀤𑀺𑀢𑀼’’𑀦𑁆𑀢𑀺? ‘‘𑀦𑁄 ¶ 𑀳𑁂𑀢𑀁, 𑀪𑀦𑁆𑀢𑁂’’…𑀧𑁂… ‘‘𑀢𑀢𑁆𑀭𑀸𑀦𑀦𑁆𑀤, 𑀬𑀫𑀺𑀤𑀁 𑀅𑀲𑀜𑁆𑀜𑀲𑀢𑁆𑀢𑀸𑀬𑀢𑀦𑀁. 𑀬𑁄 𑀦𑀼 𑀔𑁄, 𑀆𑀦𑀦𑁆𑀤, 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀢𑀲𑁆𑀲 𑀘 𑀲𑀫𑀼𑀤𑀬𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲 𑀘 𑀅𑀢𑁆𑀣𑀗𑁆𑀕𑀫𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲 𑀘 𑀅𑀲𑁆𑀲𑀸𑀤𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲 𑀘 𑀆𑀤𑀻𑀦𑀯𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲 𑀘 𑀦𑀺𑀲𑁆𑀲𑀭𑀡𑀁 𑀧𑀚𑀸𑀦𑀸𑀢𑀺, 𑀓𑀮𑁆𑀮𑀁 𑀦𑀼 𑀢𑁂𑀦 𑀢𑀤𑀪𑀺𑀦𑀦𑁆𑀤𑀺𑀢𑀼’’𑀦𑁆𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. ‘‘𑀢𑀢𑁆𑀭𑀸𑀦𑀦𑁆𑀤, 𑀬𑀫𑀺𑀤𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁. 𑀬𑁄 𑀦𑀼 𑀔𑁄, 𑀆𑀦𑀦𑁆𑀤, 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀢𑀲𑁆𑀲 𑀘 𑀲𑀫𑀼𑀤𑀬𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲 𑀘 𑀅𑀢𑁆𑀣𑀗𑁆𑀕𑀫𑀁 𑀧𑀚𑀸𑀦𑀸𑀢𑀺, ¶ 𑀢𑀲𑁆𑀲 𑀘 𑀅𑀲𑁆𑀲𑀸𑀤𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲 𑀘 𑀆𑀤𑀻𑀦𑀯𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀲 𑀘 𑀦𑀺𑀲𑁆𑀲𑀭𑀡𑀁 𑀧𑀚𑀸𑀦𑀸𑀢𑀺, 𑀓𑀮𑁆𑀮𑀁 𑀦𑀼 𑀢𑁂𑀦 𑀢𑀤𑀪𑀺𑀦𑀦𑁆𑀤𑀺𑀢𑀼’’𑀦𑁆𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’. 𑀬𑀢𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀇𑀫𑀸𑀲𑀜𑁆𑀘 𑀲𑀢𑁆𑀢𑀦𑁆𑀦𑀁 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀦𑀁 𑀇𑀫𑁂𑀲𑀜𑁆𑀘 𑀤𑁆𑀯𑀺𑀦𑁆𑀦𑀁 𑀆𑀬𑀢𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀅𑀲𑁆𑀲𑀸𑀤𑀜𑁆𑀘 𑀆𑀤𑀻𑀦𑀯𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀬𑀣𑀸𑀪𑀽𑀢𑀁 𑀯𑀺𑀤𑀺𑀢𑁆𑀯𑀸 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄.

𑀅𑀝𑁆𑀞 𑀯𑀺𑀫𑁄𑀓𑁆𑀔𑀸

𑁧𑁨𑁯. ‘‘𑀅𑀝𑁆𑀞 ¶ 𑀔𑁄 𑀇𑀫𑁂, 𑀆𑀦𑀦𑁆𑀤, 𑀯𑀺𑀫𑁄𑀓𑁆𑀔𑀸. 𑀓𑀢𑀫𑁂 𑀅𑀝𑁆𑀞? 𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀅𑀬𑀁 ¶ 𑀧𑀞𑀫𑁄 𑀯𑀺𑀫𑁄𑀓𑁆𑀔𑁄. 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺, 𑀅𑀬𑀁 𑀤𑀼𑀢𑀺𑀬𑁄 𑀯𑀺𑀫𑁄𑀓𑁆𑀔𑁄. 𑀲𑀼𑀪𑀦𑁆𑀢𑁂𑀯 ¶ 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀅𑀬𑀁 𑀢𑀢𑀺𑀬𑁄 𑀯𑀺𑀫𑁄𑀓𑁆𑀔𑁄. 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘𑀅𑀦𑀦𑁆𑀢𑁄 𑀆𑀓𑀸𑀲𑁄’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀬𑀁 𑀘𑀢𑀼𑀢𑁆𑀣𑁄 𑀯𑀺𑀫𑁄𑀓𑁆𑀔𑁄. 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀬𑀁 𑀧𑀜𑁆𑀘𑀫𑁄 𑀯𑀺𑀫𑁄𑀓𑁆𑀔𑁄. 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀦𑀢𑁆𑀣𑀺 ¶ 𑀓𑀺𑀜𑁆𑀘𑀻’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀬𑀁 𑀙𑀝𑁆𑀞𑁄 𑀯𑀺𑀫𑁄𑀓𑁆𑀔𑁄. 𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸’𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀬𑀁 𑀲𑀢𑁆𑀢𑀫𑁄 𑀯𑀺𑀫𑁄𑀓𑁆𑀔𑁄. 𑀲𑀩𑁆𑀩𑀲𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀬𑀁 𑀅𑀝𑁆𑀞𑀫𑁄 𑀯𑀺𑀫𑁄𑀓𑁆𑀔𑁄. 𑀇𑀫𑁂 𑀔𑁄, 𑀆𑀦𑀦𑁆𑀤, 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸.

𑁧𑁩𑁦. ‘‘𑀬𑀢𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀇𑀫𑁂 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀅𑀦𑀼𑀮𑁄𑀫𑀫𑁆𑀧𑀺 𑀲𑀫𑀸𑀧𑀚𑁆𑀚𑀢𑀺, 𑀧𑀝𑀺𑀮𑁄𑀫𑀫𑁆𑀧𑀺 𑀲𑀫𑀸𑀧𑀚𑁆𑀚𑀢𑀺, 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀫𑁆𑀧𑀺 𑀲𑀫𑀸𑀧𑀚𑁆𑀚𑀢𑀺, 𑀬𑀢𑁆𑀣𑀺𑀘𑁆𑀙𑀓𑀁 𑀬𑀤𑀺𑀘𑁆𑀙𑀓𑀁 𑀬𑀸𑀯𑀢𑀺𑀘𑁆𑀙𑀓𑀁 𑀲𑀫𑀸𑀧𑀚𑁆𑀚𑀢𑀺𑀧𑀺 𑀯𑀼𑀝𑁆𑀞𑀸𑀢𑀺𑀧𑀺. 𑀆𑀲𑀯𑀸𑀦𑀜𑁆𑀘 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄. 𑀇𑀫𑀸𑀬 𑀘 𑀆𑀦𑀦𑁆𑀤 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀺𑀬𑀸 𑀅𑀜𑁆𑀜𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀺 𑀉𑀢𑁆𑀢𑀭𑀺𑀢𑀭𑀸 𑀯𑀸 𑀧𑀡𑀻𑀢𑀢𑀭𑀸 𑀯𑀸 𑀦𑀢𑁆𑀣𑀻’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀻𑀢𑀺.

𑀫𑀳𑀸𑀦𑀺𑀤𑀸𑀦𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀤𑀼𑀢𑀺𑀬𑀁.

𑁩. 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀁

𑁧𑁩𑁧. 𑀏𑀯𑀁 ¶ ¶ ¶ 𑀫𑁂 ¶ 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀯𑀚𑁆𑀚𑀻 𑀅𑀪𑀺𑀬𑀸𑀢𑀼𑀓𑀸𑀫𑁄 𑀳𑁄𑀢𑀺. 𑀲𑁄 𑀏𑀯𑀫𑀸𑀳 𑁋 ‘‘𑀅𑀳𑀁 𑀳𑀺𑀫𑁂 𑀯𑀚𑁆𑀚𑀻 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀉𑀘𑁆𑀙𑁂𑀘𑁆𑀙𑀸𑀫𑀺 [𑀉𑀘𑁆𑀙𑁂𑀚𑁆𑀚𑀸𑀫𑀺 (𑀲𑁆𑀬𑀸. 𑀧𑀻.), 𑀉𑀘𑁆𑀙𑀺𑀚𑁆𑀚𑀸𑀫𑀺 (𑀓.)] 𑀯𑀚𑁆𑀚𑀻, 𑀯𑀺𑀦𑀸𑀲𑁂𑀲𑁆𑀲𑀸𑀫𑀺 𑀯𑀚𑁆𑀚𑀻, 𑀅𑀦𑀬𑀩𑁆𑀬𑀲𑀦𑀁 𑀆𑀧𑀸𑀤𑁂𑀲𑁆𑀲𑀸𑀫𑀺 𑀯𑀚𑁆𑀚𑀻’’𑀢𑀺 [𑀆𑀧𑀸𑀤𑁂𑀲𑁆𑀲𑀸𑀫𑀺 𑀯𑀚𑁆𑀚𑀻𑀢𑀺 (𑀲𑀩𑁆𑀩𑀢𑁆𑀣) 𑀅. 𑀦𑀺. 𑁭.𑁨𑁨 𑀧𑀲𑁆𑀲𑀺𑀢𑀩𑁆𑀩𑀁].

𑁧𑁩𑁨. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀯𑀲𑁆𑀲𑀓𑀸𑀭𑀁 𑀩𑁆𑀭𑀸𑀳𑁆𑀫𑀡𑀁 𑀫𑀕𑀥𑀫𑀳𑀸𑀫𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀫 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀸𑀳𑀺, 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙 𑁋 ‘𑀭𑀸𑀚𑀸, 𑀪𑀦𑁆𑀢𑁂, 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀺, 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙𑀢𑀻’𑀢𑀺. 𑀏𑀯𑀜𑁆𑀘 𑀯𑀤𑁂𑀳𑀺 𑁋 ‘𑀭𑀸𑀚𑀸, 𑀪𑀦𑁆𑀢𑁂, 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀯𑀚𑁆𑀚𑀻 𑀅𑀪𑀺𑀬𑀸𑀢𑀼𑀓𑀸𑀫𑁄. 𑀲𑁄 𑀏𑀯𑀫𑀸𑀳 𑁋 ‘‘𑀅𑀳𑀁 𑀳𑀺𑀫𑁂 𑀯𑀚𑁆𑀚𑀻 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀉𑀘𑁆𑀙𑁂𑀘𑁆𑀙𑀸𑀫𑀺 𑀯𑀚𑁆𑀚𑀻, 𑀯𑀺𑀦𑀸𑀲𑁂𑀲𑁆𑀲𑀸𑀫𑀺 𑀯𑀚𑁆𑀚𑀻, 𑀅𑀦𑀬𑀩𑁆𑀬𑀲𑀦𑀁 ¶ 𑀆𑀧𑀸𑀤𑁂𑀲𑁆𑀲𑀸𑀫𑀻’’’𑀢𑀺. 𑀬𑀣𑀸 𑀢𑁂 𑀪𑀕𑀯𑀸 𑀩𑁆𑀬𑀸𑀓𑀭𑁄𑀢𑀺, 𑀢𑀁 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀫𑀫 𑀆𑀭𑁄𑀘𑁂𑀬𑁆𑀬𑀸𑀲𑀺. 𑀦 𑀳𑀺 𑀢𑀣𑀸𑀕𑀢𑀸 𑀯𑀺𑀢𑀣𑀁 𑀪𑀡𑀦𑁆𑀢𑀻’’𑀢𑀺.

𑀯𑀲𑁆𑀲𑀓𑀸𑀭𑀩𑁆𑀭𑀸𑀳𑁆𑀫𑀡𑁄

𑁧𑁩𑁩. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀯𑀲𑁆𑀲𑀓𑀸𑀭𑁄 𑀩𑁆𑀭𑀸𑀳𑁆𑀫𑀡𑁄 𑀫𑀕𑀥𑀫𑀳𑀸𑀫𑀢𑁆𑀢𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀪𑀤𑁆𑀤𑀸𑀦𑀺 𑀪𑀤𑁆𑀤𑀸𑀦𑀺 𑀬𑀸𑀦𑀸𑀦𑀺 𑀬𑁄𑀚𑁂𑀢𑁆𑀯𑀸 𑀪𑀤𑁆𑀤𑀁 𑀪𑀤𑁆𑀤𑀁 𑀬𑀸𑀦𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 ¶ 𑀪𑀤𑁆𑀤𑁂𑀳𑀺 𑀪𑀤𑁆𑀤𑁂𑀳𑀺 𑀬𑀸𑀦𑁂𑀳𑀺 𑀭𑀸𑀚𑀕𑀳𑀫𑁆𑀳𑀸 𑀦𑀺𑀬𑁆𑀬𑀸𑀲𑀺, 𑀬𑁂𑀦 𑀕𑀺𑀚𑁆𑀛𑀓𑀽𑀝𑁄 𑀧𑀩𑁆𑀩𑀢𑁄 𑀢𑁂𑀦 𑀧𑀸𑀬𑀸𑀲𑀺. 𑀬𑀸𑀯𑀢𑀺𑀓𑀸 𑀬𑀸𑀦𑀲𑁆𑀲 𑀪𑀽𑀫𑀺, 𑀬𑀸𑀦𑁂𑀦 𑀕𑀦𑁆𑀢𑁆𑀯𑀸, 𑀬𑀸𑀦𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸 𑀧𑀢𑁆𑀢𑀺𑀓𑁄𑀯 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 ¶ 𑀏𑀓𑀫𑀦𑁆𑀢𑀁 ¶ 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀲𑁆𑀲𑀓𑀸𑀭𑁄 𑀩𑁆𑀭𑀸𑀳𑁆𑀫𑀡𑁄 𑀫𑀕𑀥𑀫𑀳𑀸𑀫𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀭𑀸𑀚𑀸, 𑀪𑁄 𑀕𑁄𑀢𑀫, 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀺, 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙𑀢𑀺. 𑀭𑀸𑀚𑀸 [𑀏𑀯𑀜𑁆𑀘 𑀯𑀤𑁂𑀢𑀺 𑀭𑀸𑀚𑀸 (𑀓.)], 𑀪𑁄 𑀕𑁄𑀢𑀫, 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀯𑀚𑁆𑀚𑀻 𑀅𑀪𑀺𑀬𑀸𑀢𑀼𑀓𑀸𑀫𑁄. 𑀲𑁄 𑀏𑀯𑀫𑀸𑀳 𑁋 ‘𑀅𑀳𑀁 𑀳𑀺𑀫𑁂 𑀯𑀚𑁆𑀚𑀻 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀉𑀘𑁆𑀙𑁂𑀘𑁆𑀙𑀸𑀫𑀺 𑀯𑀚𑁆𑀚𑀻, 𑀯𑀺𑀦𑀸𑀲𑁂𑀲𑁆𑀲𑀸𑀫𑀺 𑀯𑀚𑁆𑀚𑀻, 𑀅𑀦𑀬𑀩𑁆𑀬𑀲𑀦𑀁 𑀆𑀧𑀸𑀤𑁂𑀲𑁆𑀲𑀸𑀫𑀻’’’𑀢𑀺.

𑀭𑀸𑀚𑀅𑀧𑀭𑀺𑀳𑀸𑀦𑀺𑀬𑀥𑀫𑁆𑀫𑀸

𑁧𑁩𑁪. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀺𑀝𑁆𑀞𑀺𑀢𑁄 𑀞𑀺𑀢𑁄 𑀳𑁄𑀢𑀺 𑀪𑀕𑀯𑀦𑁆𑀢𑀁 𑀩𑀻𑀚𑀬𑀫𑀸𑀦𑁄 [𑀯𑀻𑀚𑀬𑀫𑀸𑀦𑁄 (𑀲𑀻.), 𑀯𑀻𑀚𑀺𑀬𑀫𑀸𑀦𑁄 (𑀲𑁆𑀬𑀸.)]. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀺𑀦𑁆𑀢𑀺 𑀢𑁂, 𑀆𑀦𑀦𑁆𑀤, 𑀲𑀼𑀢𑀁, ‘𑀯𑀚𑁆𑀚𑀻 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀸𑀢𑀸 𑀲𑀦𑁆𑀦𑀺𑀧𑀸𑀢𑀩𑀳𑀼𑀮𑀸’𑀢𑀺? ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂 𑁋 ‘𑀯𑀚𑁆𑀚𑀻 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀸𑀢𑀸 𑀲𑀦𑁆𑀦𑀺𑀧𑀸𑀢𑀩𑀳𑀼𑀮𑀸’’𑀢𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀆𑀦𑀦𑁆𑀤, 𑀯𑀚𑁆𑀚𑀻 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀸𑀢𑀸 𑀲𑀦𑁆𑀦𑀺𑀧𑀸𑀢𑀩𑀳𑀼𑀮𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 ¶ 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀓𑀺𑀦𑁆𑀢𑀺 𑀢𑁂, 𑀆𑀦𑀦𑁆𑀤, 𑀲𑀼𑀢𑀁 ¶ , ‘𑀯𑀚𑁆𑀚𑀻 𑀲𑀫𑀕𑁆𑀕𑀸 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀦𑁆𑀢𑀺, 𑀲𑀫𑀕𑁆𑀕𑀸 𑀯𑀚𑁆𑀚𑀺𑀓𑀭𑀡𑀻𑀬𑀸𑀦𑀺 𑀓𑀭𑁄𑀦𑁆𑀢𑀻’𑀢𑀺? ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂 𑁋 ‘𑀯𑀚𑁆𑀚𑀻 𑀲𑀫𑀕𑁆𑀕𑀸 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀦𑁆𑀢𑀺, 𑀲𑀫𑀕𑁆𑀕𑀸 𑀯𑀚𑁆𑀚𑀺𑀓𑀭𑀡𑀻𑀬𑀸𑀦𑀺 𑀓𑀭𑁄𑀦𑁆𑀢𑀻’’𑀢𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀆𑀦𑀦𑁆𑀤, 𑀯𑀚𑁆𑀚𑀻 𑀲𑀫𑀕𑁆𑀕𑀸 𑀲𑀦𑁆𑀦𑀺𑀧𑀢𑀺𑀲𑁆𑀲𑀦𑁆𑀢𑀺, 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀺𑀲𑁆𑀲𑀦𑁆𑀢𑀺, 𑀲𑀫𑀕𑁆𑀕𑀸 𑀯𑀚𑁆𑀚𑀺𑀓𑀭𑀡𑀻𑀬𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀓𑀺𑀦𑁆𑀢𑀺 𑀢𑁂, 𑀆𑀦𑀦𑁆𑀤, 𑀲𑀼𑀢𑀁, ‘𑀯𑀚𑁆𑀚𑀻 𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀧𑁂𑀦𑁆𑀢𑀺, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺, 𑀬𑀣𑀸𑀧𑀜𑁆𑀜𑀢𑁆𑀢𑁂 𑀧𑁄𑀭𑀸𑀡𑁂 𑀯𑀚𑁆𑀚𑀺𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑀻’’’𑀢𑀺? ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂 𑁋 ‘𑀯𑀚𑁆𑀚𑀻 𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀧𑁂𑀦𑁆𑀢𑀺, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺, 𑀬𑀣𑀸𑀧𑀜𑁆𑀜𑀢𑁆𑀢𑁂 𑀧𑁄𑀭𑀸𑀡𑁂 𑀯𑀚𑁆𑀚𑀺𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑀻’’’𑀢𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀆𑀦𑀦𑁆𑀤, ‘‘𑀯𑀚𑁆𑀚𑀻 𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀺, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑀺𑀲𑁆𑀲𑀦𑁆𑀢𑀺, 𑀬𑀣𑀸𑀧𑀜𑁆𑀜𑀢𑁆𑀢𑁂 𑀧𑁄𑀭𑀸𑀡𑁂 𑀯𑀚𑁆𑀚𑀺𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀓𑀺𑀦𑁆𑀢𑀺 ¶ 𑀢𑁂, 𑀆𑀦𑀦𑁆𑀤, 𑀲𑀼𑀢𑀁, ‘𑀯𑀚𑁆𑀚𑀻 𑀬𑁂 𑀢𑁂 𑀯𑀚𑁆𑀚𑀻𑀦𑀁 𑀯𑀚𑁆𑀚𑀺𑀫𑀳𑀮𑁆𑀮𑀓𑀸, 𑀢𑁂 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺 [𑀕𑀭𑀼𑀓𑀭𑁄𑀦𑁆𑀢𑀺 (𑀲𑀻. 𑀲𑁆𑀬𑀸. 𑀧𑀻.)] 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺, 𑀢𑁂𑀲𑀜𑁆𑀘 𑀲𑁄𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀻’’’𑀢𑀺? ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂 𑁋 ‘𑀯𑀚𑁆𑀚𑀻 𑀬𑁂 ¶ 𑀢𑁂 𑀯𑀚𑁆𑀚𑀻𑀦𑀁 𑀯𑀚𑁆𑀚𑀺𑀫𑀳𑀮𑁆𑀮𑀓𑀸, 𑀢𑁂 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺, 𑀢𑁂𑀲𑀜𑁆𑀘 𑀲𑁄𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀻’’’𑀢𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀆𑀦𑀦𑁆𑀤, 𑀯𑀚𑁆𑀚𑀻 𑀬𑁂 𑀢𑁂 𑀯𑀚𑁆𑀚𑀻𑀦𑀁 𑀯𑀚𑁆𑀚𑀺𑀫𑀳𑀮𑁆𑀮𑀓𑀸 ¶ , 𑀢𑁂 𑀲𑀓𑁆𑀓𑀭𑀺𑀲𑁆𑀲𑀦𑁆𑀢𑀺 𑀕𑀭𑀼𑀁 𑀓𑀭𑀺𑀲𑁆𑀲𑀦𑁆𑀢𑀺 𑀫𑀸𑀦𑁂𑀲𑁆𑀲𑀦𑁆𑀢𑀺 𑀧𑀽𑀚𑁂𑀲𑁆𑀲𑀦𑁆𑀢𑀺, 𑀢𑁂𑀲𑀜𑁆𑀘 𑀲𑁄𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀓𑀺𑀦𑁆𑀢𑀺 𑀢𑁂, 𑀆𑀦𑀦𑁆𑀤, 𑀲𑀼𑀢𑀁, ‘𑀯𑀚𑁆𑀚𑀻 𑀬𑀸 𑀢𑀸 𑀓𑀼𑀮𑀺𑀢𑁆𑀣𑀺𑀬𑁄 𑀓𑀼𑀮𑀓𑀼𑀫𑀸𑀭𑀺𑀬𑁄, 𑀢𑀸 𑀦 𑀑𑀓𑁆𑀓𑀲𑁆𑀲 𑀧𑀲𑀬𑁆𑀳 𑀯𑀸𑀲𑁂𑀦𑁆𑀢𑀻’’’𑀢𑀺? ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂 𑁋 ‘𑀯𑀚𑁆𑀚𑀻 𑀬𑀸 𑀢𑀸 𑀓𑀼𑀮𑀺𑀢𑁆𑀣𑀺𑀬𑁄 𑀓𑀼𑀮𑀓𑀼𑀫𑀸𑀭𑀺𑀬𑁄 𑀢𑀸 𑀦 𑀑𑀓𑁆𑀓𑀲𑁆𑀲 𑀧𑀲𑀬𑁆𑀳 𑀯𑀸𑀲𑁂𑀦𑁆𑀢𑀻’’’𑀢𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀆𑀦𑀦𑁆𑀤, 𑀯𑀚𑁆𑀚𑀻 𑀬𑀸 𑀢𑀸 𑀓𑀼𑀮𑀺𑀢𑁆𑀣𑀺𑀬𑁄 𑀓𑀼𑀮𑀓𑀼𑀫𑀸𑀭𑀺𑀬𑁄, 𑀢𑀸 𑀦 𑀑𑀓𑁆𑀓𑀲𑁆𑀲 𑀧𑀲𑀬𑁆𑀳 𑀯𑀸𑀲𑁂𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀓𑀺𑀦𑁆𑀢𑀺 𑀢𑁂, 𑀆𑀦𑀦𑁆𑀤, 𑀲𑀼𑀢𑀁, ‘𑀯𑀚𑁆𑀚𑀻 𑀬𑀸𑀦𑀺 𑀢𑀸𑀦𑀺

𑀯𑀚𑁆𑀚𑀻𑀦𑀁 𑀯𑀚𑁆𑀚𑀺𑀘𑁂𑀢𑀺𑀬𑀸𑀦𑀺 𑀅𑀩𑁆𑀪𑀦𑁆𑀢𑀭𑀸𑀦𑀺 𑀘𑁂𑀯 𑀩𑀸𑀳𑀺𑀭𑀸𑀦𑀺 𑀘, 𑀢𑀸𑀦𑀺 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺, 𑀢𑁂𑀲𑀜𑁆𑀘 𑀤𑀺𑀦𑁆𑀦𑀧𑀼𑀩𑁆𑀩𑀁 𑀓𑀢𑀧𑀼𑀩𑁆𑀩𑀁 𑀥𑀫𑁆𑀫𑀺𑀓𑀁 𑀩𑀮𑀺𑀁 𑀦𑁄 𑀧𑀭𑀺𑀳𑀸𑀧𑁂𑀦𑁆𑀢𑀻’’’𑀢𑀺? ‘‘𑀲𑀼𑀢𑀁 ¶ 𑀫𑁂𑀢𑀁, 𑀪𑀦𑁆𑀢𑁂 𑁋 ‘𑀯𑀚𑁆𑀚𑀻 𑀬𑀸𑀦𑀺 𑀢𑀸𑀦𑀺 𑀯𑀚𑁆𑀚𑀻𑀦𑀁 𑀯𑀚𑁆𑀚𑀺𑀘𑁂𑀢𑀺𑀬𑀸𑀦𑀺 𑀅𑀩𑁆𑀪𑀦𑁆𑀢𑀭𑀸𑀦𑀺 𑀘𑁂𑀯 𑀩𑀸𑀳𑀺𑀭𑀸𑀦𑀺 𑀘, 𑀢𑀸𑀦𑀺 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺 𑀢𑁂𑀲𑀜𑁆𑀘 𑀤𑀺𑀦𑁆𑀦𑀧𑀼𑀩𑁆𑀩𑀁 𑀓𑀢𑀧𑀼𑀩𑁆𑀩𑀁 𑀥𑀫𑁆𑀫𑀺𑀓𑀁 𑀩𑀮𑀺𑀁 𑀦𑁄 𑀧𑀭𑀺𑀳𑀸𑀧𑁂𑀦𑁆𑀢𑀻’’’𑀢𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀆𑀦𑀦𑁆𑀤, 𑀯𑀚𑁆𑀚𑀻 𑀬𑀸𑀦𑀺 𑀢𑀸𑀦𑀺 𑀯𑀚𑁆𑀚𑀻𑀦𑀁 𑀯𑀚𑁆𑀚𑀺𑀘𑁂𑀢𑀺𑀬𑀸𑀦𑀺 𑀅𑀩𑁆𑀪𑀦𑁆𑀢𑀭𑀸𑀦𑀺 𑀘𑁂𑀯 𑀩𑀸𑀳𑀺𑀭𑀸𑀦𑀺 𑀘, 𑀢𑀸𑀦𑀺 𑀲𑀓𑁆𑀓𑀭𑀺𑀲𑁆𑀲𑀦𑁆𑀢𑀺 𑀕𑀭𑀼𑀁 𑀓𑀭𑀺𑀲𑁆𑀲𑀦𑁆𑀢𑀺 𑀫𑀸𑀦𑁂𑀲𑁆𑀲𑀦𑁆𑀢𑀺 𑀧𑀽𑀚𑁂𑀲𑁆𑀲𑀦𑁆𑀢𑀺, 𑀢𑁂𑀲𑀜𑁆𑀘 𑀤𑀺𑀦𑁆𑀦𑀧𑀼𑀩𑁆𑀩𑀁 𑀓𑀢𑀧𑀼𑀩𑁆𑀩𑀁 𑀥𑀫𑁆𑀫𑀺𑀓𑀁 𑀩𑀮𑀺𑀁 𑀦𑁄 𑀧𑀭𑀺𑀳𑀸𑀧𑁂𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀓𑀺𑀦𑁆𑀢𑀺 𑀢𑁂, 𑀆𑀦𑀦𑁆𑀤, 𑀲𑀼𑀢𑀁, ‘𑀯𑀚𑁆𑀚𑀻𑀦𑀁 𑀅𑀭𑀳𑀦𑁆𑀢𑁂𑀲𑀼 𑀥𑀫𑁆𑀫𑀺𑀓𑀸 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺 𑀲𑀼𑀲𑀁𑀯𑀺𑀳𑀺𑀢𑀸, 𑀓𑀺𑀦𑁆𑀢𑀺 𑀅𑀦𑀸𑀕𑀢𑀸 𑀘 𑀅𑀭𑀳𑀦𑁆𑀢𑁄 𑀯𑀺𑀚𑀺𑀢𑀁 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀆𑀕𑀢𑀸 𑀘 𑀅𑀭𑀳𑀦𑁆𑀢𑁄 𑀯𑀺𑀚𑀺𑀢𑁂 𑀨𑀸𑀲𑀼 𑀯𑀺𑀳𑀭𑁂𑀬𑁆𑀬𑀼’’’𑀦𑁆𑀢𑀺? ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂 ‘𑀯𑀚𑁆𑀚𑀻𑀦𑀁 𑀅𑀭𑀳𑀦𑁆𑀢𑁂𑀲𑀼 𑀥𑀫𑁆𑀫𑀺𑀓𑀸 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺 𑀲𑀼𑀲𑀁𑀯𑀺𑀳𑀺𑀢𑀸 𑀓𑀺𑀦𑁆𑀢𑀺 𑀅𑀦𑀸𑀕𑀢𑀸 𑀘 𑀅𑀭𑀳𑀦𑁆𑀢𑁄 ¶ 𑀯𑀺𑀚𑀺𑀢𑀁 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀆𑀕𑀢𑀸 𑀘 𑀅𑀭𑀳𑀦𑁆𑀢𑁄 𑀯𑀺𑀚𑀺𑀢𑁂 𑀨𑀸𑀲𑀼 𑀯𑀺𑀳𑀭𑁂𑀬𑁆𑀬𑀼’’’𑀦𑁆𑀢𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀅𑀭𑀳𑀦𑁆𑀢𑁂𑀲𑀼 𑀥𑀫𑁆𑀫𑀺𑀓𑀸 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺 𑀲𑀼𑀲𑀁𑀯𑀺𑀳𑀺𑀢𑀸 𑀪𑀯𑀺𑀲𑁆𑀲𑀢𑀺, 𑀓𑀺𑀦𑁆𑀢𑀺 𑀅𑀦𑀸𑀕𑀢𑀸 𑀘 𑀅𑀭𑀳𑀦𑁆𑀢𑁄 𑀯𑀺𑀚𑀺𑀢𑀁 ¶ 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀆𑀕𑀢𑀸 𑀘 𑀅𑀭𑀳𑀦𑁆𑀢𑁄 𑀯𑀺𑀚𑀺𑀢𑁂 𑀨𑀸𑀲𑀼 𑀯𑀺𑀳𑀭𑁂𑀬𑁆𑀬𑀼𑀦𑁆𑀢𑀺. 𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻’’𑀢𑀺.

𑁧𑁩𑁫. 𑀅𑀣 ¶ 𑀔𑁄 𑀪𑀕𑀯𑀸 𑀯𑀲𑁆𑀲𑀓𑀸𑀭𑀁 𑀩𑁆𑀭𑀸𑀳𑁆𑀫𑀡𑀁 𑀫𑀕𑀥𑀫𑀳𑀸𑀫𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀓𑀫𑀺𑀤𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀲𑀫𑀬𑀁 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀸𑀫𑀺 𑀲𑀸𑀭𑀦𑁆𑀤𑀤𑁂 [𑀲𑀸𑀦𑀦𑁆𑀤𑀭𑁂 (𑀓.)] 𑀘𑁂𑀢𑀺𑀬𑁂. 𑀢𑀢𑁆𑀭𑀸𑀳𑀁 𑀯𑀚𑁆𑀚𑀻𑀦𑀁 𑀇𑀫𑁂 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑀺𑀁. 𑀬𑀸𑀯𑀓𑀻𑀯𑀜𑁆𑀘, 𑀩𑁆𑀭𑀸𑀳𑁆𑀫𑀡, 𑀇𑀫𑁂 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀯𑀚𑁆𑀚𑀻𑀲𑀼 𑀞𑀲𑁆𑀲𑀦𑁆𑀢𑀺, 𑀇𑀫𑁂𑀲𑀼 𑀘 𑀲𑀢𑁆𑀢𑀲𑀼 𑀅𑀧𑀭𑀺𑀳𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀯𑀚𑁆𑀚𑀻 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀩𑁆𑀭𑀸𑀳𑁆𑀫𑀡, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀯𑀲𑁆𑀲𑀓𑀸𑀭𑁄 𑀩𑁆𑀭𑀸𑀳𑁆𑀫𑀡𑁄 𑀫𑀕𑀥𑀫𑀳𑀸𑀫𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀓𑀫𑁂𑀓𑁂𑀦𑀧𑀺, 𑀪𑁄 𑀕𑁄𑀢𑀫, 𑀅𑀧𑀭𑀺𑀳𑀸𑀦𑀺𑀬𑁂𑀦 𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀸𑀦𑀁 𑀯𑀚𑁆𑀚𑀻𑀦𑀁 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺 ¶ . 𑀓𑁄 𑀧𑀦 𑀯𑀸𑀤𑁄 𑀲𑀢𑁆𑀢𑀳𑀺 𑀅𑀧𑀭𑀺𑀳𑀸𑀦𑀺𑀬𑁂𑀳𑀺 𑀥𑀫𑁆𑀫𑁂𑀳𑀺. 𑀅𑀓𑀭𑀡𑀻𑀬𑀸𑀯 [𑀅𑀓𑀭𑀡𑀻𑀬𑀸 𑀘 (𑀲𑁆𑀬𑀸. 𑀓.)], 𑀪𑁄 𑀕𑁄𑀢𑀫, 𑀯𑀚𑁆𑀚𑀻 [𑀯𑀚𑁆𑀚𑀻𑀦𑀁 (𑀓.)] 𑀭𑀜𑁆𑀜𑀸 𑀫𑀸𑀕𑀥𑁂𑀦 𑀅𑀚𑀸𑀢𑀲𑀢𑁆𑀢𑀼𑀦𑀸 𑀯𑁂𑀤𑁂𑀳𑀺𑀧𑀼𑀢𑁆𑀢𑁂𑀦 𑀬𑀤𑀺𑀤𑀁 𑀬𑀼𑀤𑁆𑀥𑀲𑁆𑀲, 𑀅𑀜𑁆𑀜𑀢𑁆𑀭 𑀉𑀧𑀮𑀸𑀧𑀦𑀸𑀬 𑀅𑀜𑁆𑀜𑀢𑁆𑀭 𑀫𑀺𑀣𑀼𑀪𑁂𑀤𑀸. 𑀳𑀦𑁆𑀤 𑀘 𑀤𑀸𑀦𑀺 𑀫𑀬𑀁, 𑀪𑁄 𑀕𑁄𑀢𑀫, 𑀕𑀘𑁆𑀙𑀸𑀫 ¶ , 𑀩𑀳𑀼𑀓𑀺𑀘𑁆𑀘𑀸 𑀫𑀬𑀁 𑀩𑀳𑀼𑀓𑀭𑀡𑀻𑀬𑀸’’𑀢𑀺. ‘‘𑀬𑀲𑁆𑀲𑀤𑀸𑀦𑀺 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺. 𑀅𑀣 𑀔𑁄 𑀯𑀲𑁆𑀲𑀓𑀸𑀭𑁄 𑀩𑁆𑀭𑀸𑀳𑁆𑀫𑀡𑁄 𑀫𑀕𑀥𑀫𑀳𑀸𑀫𑀢𑁆𑀢𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑀪𑀺𑀓𑁆𑀔𑀼𑀅𑀧𑀭𑀺𑀳𑀸𑀦𑀺𑀬𑀥𑀫𑁆𑀫𑀸

𑁧𑁩𑁬. 𑀅𑀣 𑀔𑁄 𑀪𑀕𑀯𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑁂 𑀯𑀲𑁆𑀲𑀓𑀸𑀭𑁂 𑀩𑁆𑀭𑀸𑀳𑁆𑀫𑀡𑁂 𑀫𑀕𑀥𑀫𑀳𑀸𑀫𑀢𑁆𑀢𑁂 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀕𑀘𑁆𑀙 𑀢𑁆𑀯𑀁, 𑀆𑀦𑀦𑁆𑀤, 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀲𑀦𑁆𑀦𑀺𑀧𑀸𑀢𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀭𑀸𑀚𑀕𑀳𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀦𑁆𑀦𑀺𑀧𑀢𑀺𑀢𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀬𑀲𑁆𑀲𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺.

𑀅𑀣 ¶ 𑀔𑁄 𑀪𑀕𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀬𑁂𑀦 𑀉𑀧𑀝𑁆𑀞𑀸𑀦𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀢𑁆𑀢 𑀯𑁄, 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀬𑀸𑀯𑀓𑀻𑀯𑀜𑁆𑀘 ¶ , 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀸𑀢𑀸 𑀲𑀦𑁆𑀦𑀺𑀧𑀸𑀢𑀩𑀳𑀼𑀮𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀲𑀫𑀕𑁆𑀕𑀸 𑀲𑀦𑁆𑀦𑀺𑀧𑀢𑀺𑀲𑁆𑀲𑀦𑁆𑀢𑀺, 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀺𑀲𑁆𑀲𑀦𑁆𑀢𑀺, 𑀲𑀫𑀕𑁆𑀕𑀸 𑀲𑀗𑁆𑀖𑀓𑀭𑀡𑀻𑀬𑀸𑀦𑀺 ¶ 𑀓𑀭𑀺𑀲𑁆𑀲𑀦𑁆𑀢𑀺 ¶ , 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀺, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑀺𑀲𑁆𑀲𑀦𑁆𑀢𑀺, 𑀬𑀣𑀸𑀧𑀜𑁆𑀜𑀢𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀫𑀸𑀤𑀸𑀬 𑀯𑀢𑁆𑀢𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀬𑁂 𑀢𑁂 𑀪𑀺𑀓𑁆𑀔𑀽 𑀣𑁂𑀭𑀸 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑀸 𑀲𑀗𑁆𑀖𑀧𑀺𑀢𑀭𑁄 𑀲𑀗𑁆𑀖𑀧𑀭𑀺𑀡𑀸𑀬𑀓𑀸, 𑀢𑁂 𑀲𑀓𑁆𑀓𑀭𑀺𑀲𑁆𑀲𑀦𑁆𑀢𑀺 𑀕𑀭𑀼𑀁 𑀓𑀭𑀺𑀲𑁆𑀲𑀦𑁆𑀢𑀺 𑀫𑀸𑀦𑁂𑀲𑁆𑀲𑀦𑁆𑀢𑀺 𑀧𑀽𑀚𑁂𑀲𑁆𑀲𑀦𑁆𑀢𑀺, 𑀢𑁂𑀲𑀜𑁆𑀘 𑀲𑁄𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀉𑀧𑁆𑀧𑀦𑁆𑀦𑀸𑀬 𑀢𑀡𑁆𑀳𑀸𑀬 𑀧𑁄𑀦𑁄𑀩𑁆𑀪𑀯𑀺𑀓𑀸𑀬 𑀦 𑀯𑀲𑀁 𑀕𑀘𑁆𑀙𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀆𑀭𑀜𑁆𑀜𑀓𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀲𑀸𑀧𑁂𑀓𑁆𑀔𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀲𑀢𑀺𑀁 𑀉𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀺 𑁋 ‘𑀓𑀺𑀦𑁆𑀢𑀺 𑀅𑀦𑀸𑀕𑀢𑀸 𑀘 𑀧𑁂𑀲𑀮𑀸 𑀲𑀩𑁆𑀭𑀳𑁆𑀫𑀘𑀸𑀭𑀻 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀆𑀕𑀢𑀸 𑀘 𑀧𑁂𑀲𑀮𑀸 𑀲𑀩𑁆𑀭𑀳𑁆𑀫𑀘𑀸𑀭𑀻 𑀨𑀸𑀲𑀼 [𑀨𑀸𑀲𑀼𑀁 (𑀲𑀻. 𑀲𑁆𑀬𑀸. 𑀧𑀻.)] 𑀯𑀺𑀳𑀭𑁂𑀬𑁆𑀬𑀼’𑀦𑁆𑀢𑀺. 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀇𑀫𑁂 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀪𑀺𑀓𑁆𑀔𑀽𑀲𑀼 𑀞𑀲𑁆𑀲𑀦𑁆𑀢𑀺, 𑀇𑀫𑁂𑀲𑀼 𑀘 𑀲𑀢𑁆𑀢𑀲𑀼 𑀅𑀧𑀭𑀺𑀳𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀽 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

𑁧𑁩𑁭. ‘‘𑀅𑀧𑀭𑁂𑀧𑀺 ¶ ¶ 𑀯𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 ¶ 𑀫𑀦𑀲𑀺𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀦 𑀓𑀫𑁆𑀫𑀸𑀭𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺 ¶ 𑀦 𑀓𑀫𑁆𑀫𑀭𑀢𑀸 𑀦 𑀓𑀫𑁆𑀫𑀸𑀭𑀸𑀫𑀢𑀫𑀦𑀼𑀬𑀼𑀢𑁆𑀢𑀸, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀦 𑀪𑀲𑁆𑀲𑀸𑀭𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺 𑀦 𑀪𑀲𑁆𑀲𑀭𑀢𑀸 𑀦 𑀪𑀲𑁆𑀲𑀸𑀭𑀸𑀫𑀢𑀫𑀦𑀼𑀬𑀼𑀢𑁆𑀢𑀸, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀦 𑀦𑀺𑀤𑁆𑀤𑀸𑀭𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺 𑀦 𑀦𑀺𑀤𑁆𑀤𑀸𑀭𑀢𑀸 𑀦 𑀦𑀺𑀤𑁆𑀤𑀸𑀭𑀸𑀫𑀢𑀫𑀦𑀼𑀬𑀼𑀢𑁆𑀢𑀸, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀦 𑀲𑀗𑁆𑀕𑀡𑀺𑀓𑀸𑀭𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺 𑀦 𑀲𑀗𑁆𑀕𑀡𑀺𑀓𑀭𑀢𑀸 𑀦 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀫𑀦𑀼𑀬𑀼𑀢𑁆𑀢𑀸, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀦 𑀧𑀸𑀧𑀺𑀘𑁆𑀙𑀸 𑀪𑀯𑀺𑀲𑁆𑀲𑀦𑁆𑀢𑀺 𑀦 𑀧𑀸𑀧𑀺𑀓𑀸𑀦𑀁 𑀇𑀘𑁆𑀙𑀸𑀦𑀁 𑀯𑀲𑀁 𑀕𑀢𑀸, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀦 𑀧𑀸𑀧𑀫𑀺𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀺 𑀦 𑀧𑀸𑀧𑀲𑀳𑀸𑀬𑀸 𑀦 𑀧𑀸𑀧𑀲𑀫𑁆𑀧𑀯𑀗𑁆𑀓𑀸, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀦 𑀑𑀭𑀫𑀢𑁆𑀢𑀓𑁂𑀦 𑀯𑀺𑀲𑁂𑀲𑀸𑀥𑀺𑀕𑀫𑁂𑀦 𑀅𑀦𑁆𑀢𑀭𑀸𑀯𑁄𑀲𑀸𑀦𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀇𑀫𑁂 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀪𑀺𑀓𑁆𑀔𑀽𑀲𑀼 ¶ 𑀞𑀲𑁆𑀲𑀦𑁆𑀢𑀺, 𑀇𑀫𑁂𑀲𑀼 𑀘 𑀲𑀢𑁆𑀢𑀲𑀼 𑀅𑀧𑀭𑀺𑀳𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀽 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

𑁧𑁩𑁮. ‘‘𑀅𑀧𑀭𑁂𑀧𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺…𑀧𑁂… ‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀲𑀤𑁆𑀥𑀸 𑀪𑀯𑀺𑀲𑁆𑀲𑀦𑁆𑀢𑀺…𑀧𑁂… 𑀳𑀺𑀭𑀺𑀫𑀦𑀸 𑀪𑀯𑀺𑀲𑁆𑀲𑀦𑁆𑀢𑀺… 𑀑𑀢𑁆𑀢𑀧𑁆𑀧𑀻 𑀪𑀯𑀺𑀲𑁆𑀲𑀦𑁆𑀢𑀺… ¶ 𑀩𑀳𑀼𑀲𑁆𑀲𑀼𑀢𑀸 𑀪𑀯𑀺𑀲𑁆𑀲𑀦𑁆𑀢𑀺… ¶ 𑀆𑀭𑀤𑁆𑀥𑀯𑀻𑀭𑀺𑀬𑀸 𑀪𑀯𑀺𑀲𑁆𑀲𑀦𑁆𑀢𑀺… 𑀉𑀧𑀝𑁆𑀞𑀺𑀢𑀲𑁆𑀲𑀢𑀻 ¶ 𑀪𑀯𑀺𑀲𑁆𑀲𑀦𑁆𑀢𑀺… 𑀧𑀜𑁆𑀜𑀯𑀦𑁆𑀢𑁄 𑀪𑀯𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺. 𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀇𑀫𑁂 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀪𑀺𑀓𑁆𑀔𑀽𑀲𑀼 𑀞𑀲𑁆𑀲𑀦𑁆𑀢𑀺, 𑀇𑀫𑁂𑀲𑀼 𑀘 𑀲𑀢𑁆𑀢𑀲𑀼 𑀅𑀧𑀭𑀺𑀳𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀽 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

𑁧𑁩𑁯. ‘‘𑀅𑀧𑀭𑁂𑀧𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺…𑀧𑁂… 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯 ¶ , 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀇𑀫𑁂 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀪𑀺𑀓𑁆𑀔𑀽𑀲𑀼 𑀞𑀲𑁆𑀲𑀦𑁆𑀢𑀺, 𑀇𑀫𑁂𑀲𑀼 𑀘 𑀲𑀢𑁆𑀢𑀲𑀼 𑀅𑀧𑀭𑀺𑀳𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀽 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸 𑀦𑁄 𑀧𑀭𑀺𑀳𑀸𑀦𑀺.

𑁧𑁪𑁦. ‘‘𑀅𑀧𑀭𑁂𑀧𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀦𑀺𑀘𑁆𑀘𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺…𑀧𑁂… 𑀅𑀦𑀢𑁆𑀢𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀅𑀲𑀼𑀪𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀆𑀤𑀻𑀦𑀯𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀧𑀳𑀸𑀦𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀯𑀺𑀭𑀸𑀕𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀦𑀺𑀭𑁄𑀥𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘 ¶ , 𑀪𑀺𑀓𑁆𑀔𑀯𑁂, 𑀇𑀫𑁂 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀪𑀺𑀓𑁆𑀔𑀽𑀲𑀼 𑀞𑀲𑁆𑀲𑀦𑁆𑀢𑀺, 𑀇𑀫𑁂𑀲𑀼 𑀘 ¶ 𑀲𑀢𑁆𑀢𑀲𑀼 𑀅𑀧𑀭𑀺𑀳𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀽 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

𑁧𑁪𑁧. ‘‘𑀙, 𑀯𑁄 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀬𑀸𑀯𑀓𑀻𑀯𑀜𑁆𑀘 ¶ , 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀆𑀯𑀺 𑀘𑁂𑀯 𑀭𑀳𑁄 𑀘, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺 ¶ …𑀧𑁂… 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀆𑀯𑀺 𑀘𑁂𑀯 𑀭𑀳𑁄 𑀘, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽, 𑀬𑁂 𑀢𑁂 𑀮𑀸𑀪𑀸 𑀥𑀫𑁆𑀫𑀺𑀓𑀸 𑀥𑀫𑁆𑀫𑀮𑀤𑁆𑀥𑀸 𑀅𑀦𑁆𑀢𑀫𑀲𑁄 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀫𑀢𑁆𑀢𑀫𑁆𑀧𑀺 𑀢𑀣𑀸𑀭𑀽𑀧𑁂𑀳𑀺 𑀮𑀸𑀪𑁂𑀳𑀺 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀻 𑀪𑀯𑀺𑀲𑁆𑀲𑀦𑁆𑀢𑀺 𑀲𑀻𑀮𑀯𑀦𑁆𑀢𑁂𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀸𑀥𑀸𑀭𑀡𑀪𑁄𑀕𑀻, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀬𑀸𑀦𑀺 𑀓𑀸𑀦𑀺 𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀪𑀼𑀚𑀺𑀲𑁆𑀲𑀸𑀦𑀺 𑀯𑀺𑀜𑁆𑀜𑀽𑀧𑀲𑀢𑁆𑀣𑀸𑀦𑀺 [𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 (𑀲𑀻.)] 𑀅𑀧𑀭𑀸𑀫𑀝𑁆𑀞𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺 𑀢𑀣𑀸𑀭𑀽𑀧𑁂𑀲𑀼 𑀲𑀻𑀮𑁂𑀲𑀼 𑀲𑀻𑀮𑀲𑀸𑀫𑀜𑁆𑀜𑀕𑀢𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀆𑀯𑀺 𑀘𑁂𑀯 𑀭𑀳𑁄 𑀘, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀬𑀸𑀬𑀁 𑀤𑀺𑀝𑁆𑀞𑀺 𑀅𑀭𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀸, 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬, 𑀢𑀣𑀸𑀭𑀽𑀧𑀸𑀬 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀆𑀯𑀺 𑀘𑁂𑀯 𑀭𑀳𑁄 𑀘, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘 ¶ , 𑀪𑀺𑀓𑁆𑀔𑀯𑁂, 𑀇𑀫𑁂 𑀙 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀪𑀺𑀓𑁆𑀔𑀽𑀲𑀼 𑀞𑀲𑁆𑀲𑀦𑁆𑀢𑀺, 𑀇𑀫𑁂𑀲𑀼 𑀘 𑀙𑀲𑀼 𑀅𑀧𑀭𑀺𑀳𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀽 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀦𑁆𑀢𑀺, 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻’’𑀢𑀺.

𑁧𑁪𑁨. 𑀢𑀢𑁆𑀭 ¶ 𑀲𑀼𑀤𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀦𑁆𑀢𑁄 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀏𑀢𑀤𑁂𑀯 𑀩𑀳𑀼𑀮𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁄𑀢𑀺 𑁋 ‘‘𑀇𑀢𑀺 𑀲𑀻𑀮𑀁, 𑀇𑀢𑀺 𑀲𑀫𑀸𑀥𑀺, 𑀇𑀢𑀺 𑀧𑀜𑁆𑀜𑀸. 𑀲𑀻𑀮𑀧𑀭𑀺𑀪𑀸𑀯𑀺𑀢𑁄 𑀲𑀫𑀸𑀥𑀺 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄. 𑀲𑀫𑀸𑀥𑀺𑀧𑀭𑀺𑀪𑀸𑀯𑀺𑀢𑀸 𑀧𑀜𑁆𑀜𑀸 ¶ 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸. 𑀧𑀜𑁆𑀜𑀸𑀧𑀭𑀺𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀲𑀫𑁆𑀫𑀤𑁂𑀯 𑀆𑀲𑀯𑁂𑀳𑀺 𑀯𑀺𑀫𑀼𑀘𑁆𑀘𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀸𑀲𑀯𑀸, 𑀪𑀯𑀸𑀲𑀯𑀸, 𑀅𑀯𑀺𑀚𑁆𑀚𑀸𑀲𑀯𑀸’’𑀢𑀺.

𑁧𑁪𑁩. 𑀅𑀣 ¶ 𑀔𑁄 𑀪𑀕𑀯𑀸 𑀭𑀸𑀚𑀕𑀳𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀅𑀫𑁆𑀩𑀮𑀝𑁆𑀞𑀺𑀓𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀅𑀫𑁆𑀩𑀮𑀝𑁆𑀞𑀺𑀓𑀸 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀁 𑀯𑀺𑀳𑀭𑀢𑀺 𑀭𑀸𑀚𑀸𑀕𑀸𑀭𑀓𑁂. 𑀢𑀢𑁆𑀭𑀸𑀧𑀺 𑀲𑀼𑀤𑀁 𑀪𑀕𑀯𑀸 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀁 𑀯𑀺𑀳𑀭𑀦𑁆𑀢𑁄 𑀭𑀸𑀚𑀸𑀕𑀸𑀭𑀓𑁂 𑀏𑀢𑀤𑁂𑀯 𑀩𑀳𑀼𑀮𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁄𑀢𑀺 𑁋 ‘‘𑀇𑀢𑀺 𑀲𑀻𑀮𑀁 𑀇𑀢𑀺 𑀲𑀫𑀸𑀥𑀺 𑀇𑀢𑀺 𑀧𑀜𑁆𑀜𑀸. 𑀲𑀻𑀮𑀧𑀭𑀺𑀪𑀸𑀯𑀺𑀢𑁄 𑀲𑀫𑀸𑀥𑀺 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄. 𑀲𑀫𑀸𑀥𑀺𑀧𑀭𑀺𑀪𑀸𑀯𑀺𑀢𑀸 𑀧𑀜𑁆𑀜𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸. 𑀧𑀜𑁆𑀜𑀸𑀧𑀭𑀺𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀲𑀫𑁆𑀫𑀤𑁂𑀯 𑀆𑀲𑀯𑁂𑀳𑀺 𑀯𑀺𑀫𑀼𑀘𑁆𑀘𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀸𑀲𑀯𑀸, 𑀪𑀯𑀸𑀲𑀯𑀸, 𑀅𑀯𑀺𑀚𑁆𑀚𑀸𑀲𑀯𑀸’’𑀢𑀺.

𑁧𑁪𑁪. 𑀅𑀣 𑀔𑁄 𑀪𑀕𑀯𑀸 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀦𑀸𑀴𑀦𑁆𑀤𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀦𑀸𑀴𑀦𑁆𑀤𑀸 𑀢𑀤𑀯𑀲𑀭𑀺, 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀦𑀸𑀴𑀦𑁆𑀤𑀸𑀬𑀁 𑀯𑀺𑀳𑀭𑀢𑀺 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑁂 ¶ .

𑀲𑀸𑀭𑀺𑀧𑀼𑀢𑁆𑀢𑀲𑀻𑀳𑀦𑀸𑀤𑁄

𑁧𑁪𑁫. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 ¶ 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀯𑀁 𑀧𑀲𑀦𑁆𑀦𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀺; 𑀦 𑀘𑀸𑀳𑀼 𑀦 𑀘 𑀪𑀯𑀺𑀲𑁆𑀲𑀢𑀺 𑀦 𑀘𑁂𑀢𑀭𑀳𑀺 𑀯𑀺𑀚𑁆𑀚𑀢𑀺 𑀅𑀜𑁆𑀜𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀪𑀕𑀯𑀢𑀸 𑀪𑀺𑀬𑁆𑀬𑁄𑀪𑀺𑀜𑁆𑀜𑀢𑀭𑁄 𑀬𑀤𑀺𑀤𑀁 𑀲𑀫𑁆𑀩𑁄𑀥𑀺𑀬’’𑀦𑁆𑀢𑀺. ‘‘𑀉𑀴𑀸𑀭𑀸 𑀔𑁄 𑀢𑁂 𑀅𑀬𑀁, 𑀲𑀸𑀭𑀺𑀧𑀼𑀢𑁆𑀢, 𑀆𑀲𑀪𑀻 𑀯𑀸𑀘𑀸 [𑀆𑀲𑀪𑀺𑀯𑀸𑀘𑀸 (𑀲𑁆𑀬𑀸.)] 𑀪𑀸𑀲𑀺𑀢𑀸, 𑀏𑀓𑀁𑀲𑁄 𑀕𑀳𑀺𑀢𑁄, 𑀲𑀻𑀳𑀦𑀸𑀤𑁄 𑀦𑀤𑀺𑀢𑁄 𑁋 ‘𑀏𑀯𑀁𑀧𑀲𑀦𑁆𑀦𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀺; 𑀦 𑀘𑀸𑀳𑀼 𑀦 𑀘 𑀪𑀯𑀺𑀲𑁆𑀲𑀢𑀺 𑀦 𑀘𑁂𑀢𑀭𑀳𑀺 𑀯𑀺𑀚𑁆𑀚𑀢𑀺 𑀅𑀜𑁆𑀜𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀪𑀕𑀯𑀢𑀸 𑀪𑀺𑀬𑁆𑀬𑁄𑀪𑀺𑀜𑁆𑀜𑀢𑀭𑁄 𑀬𑀤𑀺𑀤𑀁 𑀲𑀫𑁆𑀩𑁄𑀥𑀺𑀬’𑀦𑁆𑀢𑀺.

‘‘𑀓𑀺𑀁 ¶ ¶ 𑀢𑁂 [𑀓𑀺𑀁 𑀦𑀼 (𑀲𑁆𑀬𑀸. 𑀧𑀻. 𑀓.)], 𑀲𑀸𑀭𑀺𑀧𑀼𑀢𑁆𑀢, 𑀬𑁂 𑀢𑁂 𑀅𑀳𑁂𑀲𑀼𑀁 𑀅𑀢𑀻𑀢𑀫𑀤𑁆𑀥𑀸𑀦𑀁 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀲𑀩𑁆𑀩𑁂 𑀢𑁂 𑀪𑀕𑀯𑀦𑁆𑀢𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑀸 𑁋 ‘𑀏𑀯𑀁𑀲𑀻𑀮𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀺, 𑀏𑀯𑀁𑀥𑀫𑁆𑀫𑀸 𑀏𑀯𑀁𑀧𑀜𑁆𑀜𑀸 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀁 𑀇𑀢𑀺𑀧𑀻’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀓𑀺𑀁 𑀧𑀦 𑀢𑁂 [𑀓𑀺𑀁 𑀧𑀦 (𑀲𑁆𑀬𑀸. 𑀧𑀻. 𑀓.)], 𑀲𑀸𑀭𑀺𑀧𑀼𑀢𑁆𑀢, 𑀬𑁂 𑀢𑁂 𑀪𑀯𑀺𑀲𑁆𑀲𑀦𑁆𑀢𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀲𑀩𑁆𑀩𑁂 𑀢𑁂 𑀪𑀕𑀯𑀦𑁆𑀢𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑀸 𑁋 ‘𑀏𑀯𑀁𑀲𑀻𑀮𑀸 𑀢𑁂 𑀪𑀕𑀯𑀦𑁆𑀢𑁄 𑀪𑀯𑀺𑀲𑁆𑀲𑀦𑁆𑀢𑀺 𑀇𑀢𑀺𑀧𑀺, 𑀏𑀯𑀁𑀥𑀫𑁆𑀫𑀸 𑀏𑀯𑀁𑀧𑀜𑁆𑀜𑀸 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑀸 𑀢𑁂 𑀪𑀕𑀯𑀦𑁆𑀢𑁄 𑀪𑀯𑀺𑀲𑁆𑀲𑀦𑁆𑀢𑀺 𑀇𑀢𑀺𑀧𑀻’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀓𑀺𑀁 𑀧𑀦 𑀢𑁂, 𑀲𑀸𑀭𑀺𑀧𑀼𑀢𑁆𑀢, 𑀅𑀳𑀁 𑀏𑀢𑀭𑀳𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄 𑁋 ‘‘𑀏𑀯𑀁𑀲𑀻𑀮𑁄 𑀪𑀕𑀯𑀸 𑀇𑀢𑀺𑀧𑀺 ¶ , 𑀏𑀯𑀁𑀥𑀫𑁆𑀫𑁄 𑀏𑀯𑀁𑀧𑀜𑁆𑀜𑁄 𑀏𑀯𑀁𑀯𑀺𑀳𑀸𑀭𑀻 𑀏𑀯𑀁𑀯𑀺𑀫𑀼𑀢𑁆𑀢𑁄 𑀪𑀕𑀯𑀸 𑀇𑀢𑀺𑀧𑀻’’’𑀢𑀺? ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’.

‘‘𑀏𑀢𑁆𑀣 𑀘 𑀳𑀺 𑀢𑁂, 𑀲𑀸𑀭𑀺𑀧𑀼𑀢𑁆𑀢, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀅𑀭𑀳𑀦𑁆𑀢𑁂𑀲𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀲𑀼 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 [𑀘𑁂𑀢𑁄𑀧𑀭𑀺𑀜𑁆𑀜𑀸𑀬𑀜𑀸𑀡𑀁 (𑀲𑁆𑀬𑀸.), 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀬𑀸𑀬𑀜𑀸𑀡𑀁 (𑀓.)] 𑀦𑀢𑁆𑀣𑀺. 𑀅𑀣 𑀓𑀺𑀜𑁆𑀘𑀭𑀳𑀺 𑀢𑁂 𑀅𑀬𑀁, 𑀲𑀸𑀭𑀺𑀧𑀼𑀢𑁆𑀢, 𑀉𑀴𑀸𑀭𑀸 𑀆𑀲𑀪𑀻 ¶ 𑀯𑀸𑀘𑀸 𑀪𑀸𑀲𑀺𑀢𑀸, 𑀏𑀓𑀁𑀲𑁄 𑀕𑀳𑀺𑀢𑁄, 𑀲𑀻𑀳𑀦𑀸𑀤𑁄 𑀦𑀤𑀺𑀢𑁄 𑁋 ‘𑀏𑀯𑀁𑀧𑀲𑀦𑁆𑀦𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀺; 𑀦 𑀘𑀸𑀳𑀼 𑀦 𑀘 𑀪𑀯𑀺𑀲𑁆𑀲𑀢𑀺 𑀦 𑀘𑁂𑀢𑀭𑀳𑀺 𑀯𑀺𑀚𑁆𑀚𑀢𑀺 𑀅𑀜𑁆𑀜𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀪𑀕𑀯𑀢𑀸 𑀪𑀺𑀬𑁆𑀬𑁄𑀪𑀺𑀜𑁆𑀜𑀢𑀭𑁄 𑀬𑀤𑀺𑀤𑀁 𑀲𑀫𑁆𑀩𑁄𑀥𑀺𑀬’’’𑀦𑁆𑀢𑀺?

𑁧𑁪𑁬. ‘‘𑀦 𑀔𑁄 𑀫𑁂, 𑀪𑀦𑁆𑀢𑁂, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀅𑀭𑀳𑀦𑁆𑀢𑁂𑀲𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀲𑀼 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀅𑀢𑁆𑀣𑀺, 𑀅𑀧𑀺 𑀘 𑀫𑁂 𑀥𑀫𑁆𑀫𑀦𑁆𑀯𑀬𑁄 𑀯𑀺𑀤𑀺𑀢𑁄. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑀁 𑀦𑀕𑀭𑀁 𑀤𑀴𑁆𑀳𑀼𑀤𑁆𑀥𑀸𑀧𑀁 𑀤𑀴𑁆𑀳𑀧𑀸𑀓𑀸𑀭𑀢𑁄𑀭𑀡𑀁 𑀏𑀓𑀤𑁆𑀯𑀸𑀭𑀁, 𑀢𑀢𑁆𑀭𑀲𑁆𑀲 𑀤𑁄𑀯𑀸𑀭𑀺𑀓𑁄 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀅𑀜𑁆𑀜𑀸𑀢𑀸𑀦𑀁 𑀦𑀺𑀯𑀸𑀭𑁂𑀢𑀸 𑀜𑀸𑀢𑀸𑀦𑀁 𑀧𑀯𑁂𑀲𑁂𑀢𑀸. 𑀲𑁄 𑀢𑀲𑁆𑀲 𑀦𑀕𑀭𑀲𑁆𑀲 𑀲𑀫𑀦𑁆𑀢𑀸 𑀅𑀦𑀼𑀧𑀭𑀺𑀬𑀸𑀬𑀧𑀣𑀁 [𑀅𑀦𑀼𑀘𑀭𑀺𑀬𑀸𑀬𑀧𑀣𑀁 (𑀲𑁆𑀬𑀸.)] 𑀅𑀦𑀼𑀓𑁆𑀓𑀫𑀫𑀸𑀦𑁄 𑀦 𑀧𑀲𑁆𑀲𑁂𑀬𑁆𑀬 𑀧𑀸𑀓𑀸𑀭𑀲𑀦𑁆𑀥𑀺𑀁 𑀯𑀸 𑀧𑀸𑀓𑀸𑀭𑀯𑀺𑀯𑀭𑀁 𑀯𑀸, 𑀅𑀦𑁆𑀢𑀫𑀲𑁄 𑀩𑀺𑀴𑀸𑀭𑀦𑀺𑀓𑁆𑀔𑀫𑀦𑀫𑀢𑁆𑀢𑀫𑁆𑀧𑀺. 𑀢𑀲𑁆𑀲 𑀏𑀯𑀫𑀲𑁆𑀲 [𑀦 𑀧𑀲𑁆𑀲𑁂𑀬𑁆𑀬 𑀢𑀲𑁆𑀲 𑀏𑀯𑀫𑀲𑁆𑀲 (𑀲𑁆𑀬𑀸.)] 𑁋 ‘𑀬𑁂 𑀔𑁄 𑀓𑁂𑀘𑀺 𑀑𑀴𑀸𑀭𑀺𑀓𑀸 𑀧𑀸𑀡𑀸 𑀇𑀫𑀁 𑀦𑀕𑀭𑀁 𑀧𑀯𑀺𑀲𑀦𑁆𑀢𑀺 𑀯𑀸 𑀦𑀺𑀓𑁆𑀔𑀫𑀦𑁆𑀢𑀺 𑀯𑀸, 𑀲𑀩𑁆𑀩𑁂 𑀢𑁂 𑀇𑀫𑀺𑀦𑀸𑀯 𑀤𑁆𑀯𑀸𑀭𑁂𑀦 𑀧𑀯𑀺𑀲𑀦𑁆𑀢𑀺 𑀯𑀸 𑀦𑀺𑀓𑁆𑀔𑀫𑀦𑁆𑀢𑀺 𑀯𑀸’𑀢𑀺. 𑀏𑀯𑀫𑁂𑀯 𑀔𑁄 𑀫𑁂, 𑀪𑀦𑁆𑀢𑁂, 𑀥𑀫𑁆𑀫𑀦𑁆𑀯𑀬𑁄 𑀯𑀺𑀤𑀺𑀢𑁄 𑁋 ‘𑀬𑁂 𑀢𑁂, 𑀪𑀦𑁆𑀢𑁂, 𑀅𑀳𑁂𑀲𑀼𑀁 𑀅𑀢𑀻𑀢𑀫𑀤𑁆𑀥𑀸𑀦𑀁 ¶ 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 ¶ , 𑀲𑀩𑁆𑀩𑁂 𑀢𑁂 𑀪𑀕𑀯𑀦𑁆𑀢𑁄 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑀸 𑀲𑀢𑁆𑀢𑀩𑁄𑀚𑁆𑀛𑀗𑁆𑀕𑁂 𑀬𑀣𑀸𑀪𑀽𑀢𑀁 𑀪𑀸𑀯𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀁𑀲𑀼. 𑀬𑁂𑀧𑀺 𑀢𑁂, 𑀪𑀦𑁆𑀢𑁂, 𑀪𑀯𑀺𑀲𑁆𑀲𑀦𑁆𑀢𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 ¶ , 𑀲𑀩𑁆𑀩𑁂 𑀢𑁂 𑀪𑀕𑀯𑀦𑁆𑀢𑁄 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑀸 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀬𑀣𑀸𑀪𑀽𑀢𑀁 𑀪𑀸𑀯𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀲𑁆𑀲𑀦𑁆𑀢𑀺. 𑀪𑀕𑀯𑀸𑀧𑀺, 𑀪𑀦𑁆𑀢𑁂, 𑀏𑀢𑀭𑀳𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀜𑁆𑀘 𑀦𑀻𑀯𑀭𑀡𑁂 𑀧𑀳𑀸𑀬 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑁄 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀬𑀣𑀸𑀪𑀽𑀢𑀁 𑀪𑀸𑀯𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’’’𑀢𑀺.

𑁧𑁪𑁭. 𑀢𑀢𑁆𑀭𑀧𑀺 𑀲𑀼𑀤𑀁 𑀪𑀕𑀯𑀸 𑀦𑀸𑀴𑀦𑁆𑀤𑀸𑀬𑀁 𑀯𑀺𑀳𑀭𑀦𑁆𑀢𑁄 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑁂 ¶ 𑀏𑀢𑀤𑁂𑀯 𑀩𑀳𑀼𑀮𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁄𑀢𑀺 𑁋 ‘‘𑀇𑀢𑀺 𑀲𑀻𑀮𑀁, 𑀇𑀢𑀺 𑀲𑀫𑀸𑀥𑀺, 𑀇𑀢𑀺 𑀧𑀜𑁆𑀜𑀸. 𑀲𑀻𑀮𑀧𑀭𑀺𑀪𑀸𑀯𑀺𑀢𑁄 𑀲𑀫𑀸𑀥𑀺 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄. 𑀲𑀫𑀸𑀥𑀺𑀧𑀭𑀺𑀪𑀸𑀯𑀺𑀢𑀸 𑀧𑀜𑁆𑀜𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸. 𑀧𑀜𑁆𑀜𑀸𑀧𑀭𑀺𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀲𑀫𑁆𑀫𑀤𑁂𑀯 𑀆𑀲𑀯𑁂𑀳𑀺 𑀯𑀺𑀫𑀼𑀘𑁆𑀘𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀸𑀲𑀯𑀸, 𑀪𑀯𑀸𑀲𑀯𑀸, 𑀅𑀯𑀺𑀚𑁆𑀚𑀸𑀲𑀯𑀸’’𑀢𑀺.

𑀤𑀼𑀲𑁆𑀲𑀻𑀮𑀆𑀤𑀻𑀦𑀯𑀸

𑁧𑁪𑁮. 𑀅𑀣 𑀔𑁄 𑀪𑀕𑀯𑀸 𑀦𑀸𑀴𑀦𑁆𑀤𑀸𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀧𑀸𑀝𑀮𑀺𑀕𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺 ¶ . 𑀅𑀣 𑀔𑁄 𑀪𑀕𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀧𑀸𑀝𑀮𑀺𑀕𑀸𑀫𑁄 𑀢𑀤𑀯𑀲𑀭𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀧𑀸𑀝𑀮𑀺𑀕𑀸𑀫𑀺𑀓𑀸 𑀉𑀧𑀸𑀲𑀓𑀸 𑁋 ‘‘𑀪𑀕𑀯𑀸 𑀓𑀺𑀭 𑀧𑀸𑀝𑀮𑀺𑀕𑀸𑀫𑀁 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺. 𑀅𑀣 𑀔𑁄 𑀧𑀸𑀝𑀮𑀺𑀕𑀸𑀫𑀺𑀓𑀸 𑀉𑀧𑀸𑀲𑀓𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀧𑀸𑀝𑀮𑀺𑀕𑀸𑀫𑀺𑀓𑀸 𑀉𑀧𑀸𑀲𑀓𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀆𑀯𑀲𑀣𑀸𑀕𑀸𑀭’’𑀦𑁆𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀧𑀸𑀝𑀮𑀺𑀕𑀸𑀫𑀺𑀓𑀸 𑀉𑀧𑀸𑀲𑀓𑀸 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀬𑁂𑀦 𑀆𑀯𑀲𑀣𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀩𑁆𑀩𑀲𑀦𑁆𑀣𑀭𑀺𑀁 ¶ [𑀲𑀩𑁆𑀩𑀲𑀦𑁆𑀣𑀭𑀺𑀢𑀁 𑀲𑀢𑁆𑀣𑀢𑀁 (𑀲𑁆𑀬𑀸.), 𑀲𑀩𑁆𑀩𑀲𑀦𑁆𑀣𑀭𑀺𑀁 𑀲𑀦𑁆𑀣𑀢𑀁 (𑀓.)] 𑀆𑀯𑀲𑀣𑀸𑀕𑀸𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀢𑁆𑀯𑀸 𑀉𑀤𑀓𑀫𑀡𑀺𑀓𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑁂𑀮𑀧𑀤𑀻𑀧𑀁 𑀆𑀭𑁄𑀧𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀧𑀸𑀝𑀮𑀺𑀕𑀸𑀫𑀺𑀓𑀸 𑀉𑀧𑀸𑀲𑀓𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀲𑀩𑁆𑀩𑀲𑀦𑁆𑀣𑀭𑀺𑀲𑀦𑁆𑀣𑀢𑀁 [𑀲𑀩𑁆𑀩𑀲𑀦𑁆𑀣𑀭𑀺𑀁 𑀲𑀦𑁆𑀣𑀢𑀁 (𑀲𑀻. 𑀲𑁆𑀬𑀸. 𑀧𑀻. 𑀓.)], 𑀪𑀦𑁆𑀢𑁂, 𑀆𑀯𑀲𑀣𑀸𑀕𑀸𑀭𑀁, 𑀆𑀲𑀦𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀺, 𑀉𑀤𑀓𑀫𑀡𑀺𑀓𑁄 𑀧𑀢𑀺𑀝𑁆𑀞𑀸𑀧𑀺𑀢𑁄, 𑀢𑁂𑀮𑀧𑀤𑀻𑀧𑁄 𑀆𑀭𑁄𑀧𑀺𑀢𑁄; 𑀬𑀲𑁆𑀲𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺. 𑀅𑀣 ¶ 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 [𑀇𑀤𑀁 𑀧𑀤𑀁 𑀯𑀺𑀦𑀬𑀫𑀳𑀸𑀯𑀕𑁆𑀕 𑀦 𑀤𑀺𑀲𑁆𑀲𑀢𑀺]. 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀆𑀯𑀲𑀣𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀆𑀯𑀲𑀣𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 ¶ 𑀫𑀚𑁆𑀛𑀺𑀫𑀁 𑀣𑀫𑁆𑀪𑀁 𑀦𑀺𑀲𑁆𑀲𑀸𑀬 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 [𑀧𑀼𑀭𑀢𑁆𑀣𑀺𑀫𑀸𑀪𑀺𑀫𑀼𑀔𑁄 (𑀓.)] 𑀦𑀺𑀲𑀻𑀤𑀺. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀔𑁄 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀆𑀯𑀲𑀣𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀘𑁆𑀙𑀺𑀫𑀁 𑀪𑀺𑀢𑁆𑀢𑀺𑀁 ¶ 𑀦𑀺𑀲𑁆𑀲𑀸𑀬 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀻𑀤𑀺 𑀪𑀕𑀯𑀦𑁆𑀢𑀫𑁂𑀯 𑀧𑀼𑀭𑀓𑁆𑀔𑀢𑁆𑀯𑀸. 𑀧𑀸𑀝𑀮𑀺𑀕𑀸𑀫𑀺𑀓𑀸𑀧𑀺 𑀔𑁄 𑀉𑀧𑀸𑀲𑀓𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀆𑀯𑀲𑀣𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀁 𑀪𑀺𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀧𑀘𑁆𑀙𑀺𑀫𑀸𑀪𑀺𑀫𑀼𑀔𑀸 𑀦𑀺𑀲𑀻𑀤𑀺𑀁𑀲𑀼 𑀪𑀕𑀯𑀦𑁆𑀢𑀫𑁂𑀯 𑀧𑀼𑀭𑀓𑁆𑀔𑀢𑁆𑀯𑀸.

𑁧𑁪𑁯. 𑀅𑀣 𑀔𑁄 𑀪𑀕𑀯𑀸 𑀧𑀸𑀝𑀮𑀺𑀕𑀸𑀫𑀺𑀓𑁂 𑀉𑀧𑀸𑀲𑀓𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀧𑀜𑁆𑀘𑀺𑀫𑁂, 𑀕𑀳𑀧𑀢𑀬𑁄, 𑀆𑀤𑀻𑀦𑀯𑀸 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀕𑀳𑀧𑀢𑀬𑁄, 𑀤𑀼𑀲𑁆𑀲𑀻𑀮𑁄 𑀲𑀻𑀮𑀯𑀺𑀧𑀦𑁆𑀦𑁄 𑀧𑀫𑀸𑀤𑀸𑀥𑀺𑀓𑀭𑀡𑀁 𑀫𑀳𑀢𑀺𑀁 𑀪𑁄𑀕𑀚𑀸𑀦𑀺𑀁 𑀦𑀺𑀕𑀘𑁆𑀙𑀢𑀺. 𑀅𑀬𑀁 𑀧𑀞𑀫𑁄 𑀆𑀤𑀻𑀦𑀯𑁄 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀦𑁆𑀦𑀲𑁆𑀲 𑀧𑀸𑀧𑀓𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺. 𑀅𑀬𑀁 𑀤𑀼𑀢𑀺𑀬𑁄 𑀆𑀤𑀻𑀦𑀯𑁄 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀤𑀼𑀲𑁆𑀲𑀻𑀮𑁄 𑀲𑀻𑀮𑀯𑀺𑀧𑀦𑁆𑀦𑁄 𑀬𑀜𑁆𑀜𑀤𑁂𑀯 𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀢𑀺 𑁋 𑀬𑀤𑀺 𑀔𑀢𑁆𑀢𑀺𑀬𑀧𑀭𑀺𑀲𑀁 𑀬𑀤𑀺 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀁 𑀬𑀤𑀺 𑀕𑀳𑀧𑀢𑀺𑀧𑀭𑀺𑀲𑀁 𑀬𑀤𑀺 𑀲𑀫𑀡𑀧𑀭𑀺𑀲𑀁 𑁋 𑀅𑀯𑀺𑀲𑀸𑀭𑀤𑁄 𑀉𑀧𑀲𑀗𑁆𑀓𑀫𑀢𑀺 𑀫𑀗𑁆𑀓𑀼𑀪𑀽𑀢𑁄. 𑀅𑀬𑀁 𑀢𑀢𑀺𑀬𑁄 𑀆𑀤𑀻𑀦𑀯𑁄 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀤𑀼𑀲𑁆𑀲𑀻𑀮𑁄 𑀲𑀻𑀮𑀯𑀺𑀧𑀦𑁆𑀦𑁄 𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀗𑁆𑀓𑀭𑁄𑀢𑀺. 𑀅𑀬𑀁 𑀘𑀢𑀼𑀢𑁆𑀣𑁄 𑀆𑀤𑀻𑀦𑀯𑁄 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸.

‘‘𑀧𑀼𑀦 ¶ 𑀘𑀧𑀭𑀁, 𑀕𑀳𑀧𑀢𑀬𑁄, 𑀤𑀼𑀲𑁆𑀲𑀻𑀮𑁄 𑀲𑀻𑀮𑀯𑀺𑀧𑀦𑁆𑀦𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀁 𑀧𑀜𑁆𑀘𑀫𑁄 𑀆𑀤𑀻𑀦𑀯𑁄 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸. 𑀇𑀫𑁂 𑀔𑁄, 𑀕𑀳𑀧𑀢𑀬𑁄, 𑀧𑀜𑁆𑀘 𑀆𑀤𑀻𑀦𑀯𑀸 𑀤𑀼𑀲𑁆𑀲𑀻𑀮𑀲𑁆𑀲 𑀲𑀻𑀮𑀯𑀺𑀧𑀢𑁆𑀢𑀺𑀬𑀸.

𑀲𑀻𑀮𑀯𑀦𑁆𑀢𑀆𑀦𑀺𑀲𑀁𑀲

𑁧𑁫𑁦. ‘‘𑀧𑀜𑁆𑀘𑀺𑀫𑁂 ¶ ¶ , 𑀕𑀳𑀧𑀢𑀬𑁄, 𑀆𑀦𑀺𑀲𑀁𑀲𑀸 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀕𑀳𑀧𑀢𑀬𑁄, 𑀲𑀻𑀮𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀅𑀧𑁆𑀧𑀫𑀸𑀤𑀸𑀥𑀺𑀓𑀭𑀡𑀁 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀁 𑀅𑀥𑀺𑀕𑀘𑁆𑀙𑀢𑀺. 𑀅𑀬𑀁 𑀧𑀞𑀫𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬.

‘‘𑀧𑀼𑀦 ¶ 𑀘𑀧𑀭𑀁, 𑀕𑀳𑀧𑀢𑀬𑁄, 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀦𑁆𑀦𑀲𑁆𑀲 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺. 𑀅𑀬𑀁 𑀤𑀼𑀢𑀺𑀬𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀲𑀻𑀮𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀬𑀜𑁆𑀜𑀤𑁂𑀯 𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀢𑀺 𑁋 𑀬𑀤𑀺 𑀔𑀢𑁆𑀢𑀺𑀬𑀧𑀭𑀺𑀲𑀁 𑀬𑀤𑀺 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀁 𑀬𑀤𑀺 𑀕𑀳𑀧𑀢𑀺𑀧𑀭𑀺𑀲𑀁 𑀬𑀤𑀺 𑀲𑀫𑀡𑀧𑀭𑀺𑀲𑀁 𑀯𑀺𑀲𑀸𑀭𑀤𑁄 𑀉𑀧𑀲𑀗𑁆𑀓𑀫𑀢𑀺 𑀅𑀫𑀗𑁆𑀓𑀼𑀪𑀽𑀢𑁄. 𑀅𑀬𑀁 𑀢𑀢𑀺𑀬𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀲𑀻𑀮𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀅𑀲𑀫𑁆𑀫𑀽𑀴𑁆𑀳𑁄 𑀓𑀸𑀮𑀗𑁆𑀓𑀭𑁄𑀢𑀺. 𑀅𑀬𑀁 𑀘𑀢𑀼𑀢𑁆𑀣𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬.

‘‘𑀧𑀼𑀦 𑀘𑀧𑀭𑀁, 𑀕𑀳𑀧𑀢𑀬𑁄, 𑀲𑀻𑀮𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺. 𑀅𑀬𑀁 𑀧𑀜𑁆𑀘𑀫𑁄 𑀆𑀦𑀺𑀲𑀁𑀲𑁄 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬. 𑀇𑀫𑁂 𑀔𑁄, 𑀕𑀳𑀧𑀢𑀬𑁄, 𑀧𑀜𑁆𑀘 𑀆𑀦𑀺𑀲𑀁𑀲𑀸 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬𑀸’’𑀢𑀺.

𑁧𑁫𑁧. 𑀅𑀣 𑀔𑁄 𑀪𑀕𑀯𑀸 𑀧𑀸𑀝𑀮𑀺𑀕𑀸𑀫𑀺𑀓𑁂 𑀉𑀧𑀸𑀲𑀓𑁂 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀸 𑀔𑁄, 𑀕𑀳𑀧𑀢𑀬𑁄, 𑀭𑀢𑁆𑀢𑀺, 𑀬𑀲𑁆𑀲𑀤𑀸𑀦𑀺 𑀢𑀼𑀫𑁆𑀳𑁂 𑀓𑀸𑀮𑀁 𑀫𑀜𑁆𑀜𑀣𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀧𑀸𑀝𑀮𑀺𑀕𑀸𑀫𑀺𑀓𑀸 𑀉𑀧𑀸𑀲𑀓𑀸 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀅𑀣 𑀔𑁄 𑀪𑀕𑀯𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀲𑀼 𑀧𑀸𑀝𑀮𑀺𑀕𑀸𑀫𑀺𑀓𑁂𑀲𑀼 𑀉𑀧𑀸𑀲𑀓𑁂𑀲𑀼 ¶ 𑀲𑀼𑀜𑁆𑀜𑀸𑀕𑀸𑀭𑀁 𑀧𑀸𑀯𑀺𑀲𑀺.

𑀧𑀸𑀝𑀮𑀺𑀧𑀼𑀢𑁆𑀢𑀦𑀕𑀭𑀫𑀸𑀧𑀦𑀁

𑁧𑁫𑁨. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 [𑀲𑀼𑀦𑀻𑀥𑀯𑀲𑁆𑀲𑀓𑀸𑀭𑀸 (𑀲𑁆𑀬𑀸. 𑀓.)] 𑀫𑀕𑀥𑀫𑀳𑀸𑀫𑀢𑁆𑀢𑀸 𑀧𑀸𑀝𑀮𑀺𑀕𑀸𑀫𑁂 𑀦𑀕𑀭𑀁 𑀫𑀸𑀧𑁂𑀦𑁆𑀢𑀺 𑀯𑀚𑁆𑀚𑀻𑀦𑀁 𑀧𑀝𑀺𑀩𑀸𑀳𑀸𑀬. 𑀢𑁂𑀦 𑀲𑀫𑀬𑁂𑀦 𑀲𑀫𑁆𑀩𑀳𑀼𑀮𑀸 𑀤𑁂𑀯𑀢𑀸𑀬𑁄 ¶ 𑀲𑀳𑀲𑁆𑀲𑁂𑀯 [𑀲𑀳𑀲𑁆𑀲𑀲𑁆𑀲𑁂𑀯 (𑀲𑀻. 𑀧𑀻. 𑀓.), 𑀲𑀳𑀲𑁆𑀲𑀲𑁂𑀯 (𑀝𑀻𑀓𑀸𑀬𑀁 𑀧𑀸𑀞𑀦𑁆𑀢𑀭𑀁), 𑀲𑀳𑀲𑁆𑀲𑀲𑀳𑀲𑁆𑀲𑁂𑀯 (𑀉𑀤𑀸𑀦𑀝𑁆𑀞𑀓𑀣𑀸)] 𑀧𑀸𑀝𑀮𑀺𑀕𑀸𑀫𑁂 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀫𑀳𑁂𑀲𑀓𑁆𑀔𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀫𑀳𑁂𑀲𑀓𑁆𑀔𑀸𑀦𑀁 𑀢𑀢𑁆𑀣 𑀭𑀜𑁆𑀜𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀫𑀚𑁆𑀛𑀺𑀫𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀫𑀚𑁆𑀛𑀺𑀫𑀸𑀦𑀁 𑀢𑀢𑁆𑀣 𑀭𑀜𑁆𑀜𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀦𑀻𑀘𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀦𑀻𑀘𑀸𑀦𑀁 𑀢𑀢𑁆𑀣 𑀭𑀜𑁆𑀜𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀢𑀸 𑀤𑁂𑀯𑀢𑀸𑀬𑁄 𑀲𑀳𑀲𑁆𑀲𑁂𑀯 𑀧𑀸𑀝𑀮𑀺𑀕𑀸𑀫𑁂 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺𑀬𑁄. 𑀅𑀣 𑀔𑁄 𑀪𑀕𑀯𑀸 ¶ 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑁂 𑀦𑀼 𑀔𑁄 [𑀓𑁄 𑀦𑀼 𑀔𑁄 (𑀲𑀻. 𑀲𑁆𑀬𑀸. 𑀧𑀻. 𑀓.)], 𑀆𑀦𑀦𑁆𑀤, 𑀧𑀸𑀝𑀮𑀺𑀕𑀸𑀫𑁂 𑀦𑀕𑀭𑀁 𑀫𑀸𑀧𑁂𑀦𑁆𑀢𑀻’’𑀢𑀺 [𑀫𑀸𑀧𑁂𑀢𑀻𑀢𑀺 (𑀲𑀻. 𑀲𑁆𑀬𑀸. 𑀧𑀻. 𑀓.)]? ‘‘𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸, 𑀪𑀦𑁆𑀢𑁂, 𑀫𑀕𑀥𑀫𑀳𑀸𑀫𑀢𑁆𑀢𑀸 𑀧𑀸𑀝𑀮𑀺𑀕𑀸𑀫𑁂 𑀦𑀕𑀭𑀁 𑀫𑀸𑀧𑁂𑀦𑁆𑀢𑀺 𑀯𑀚𑁆𑀚𑀻𑀦𑀁 𑀧𑀝𑀺𑀩𑀸𑀳𑀸𑀬𑀸’’𑀢𑀺. ‘‘𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀤𑁂𑀯𑁂𑀳𑀺 𑀢𑀸𑀯𑀢𑀺𑀁𑀲𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸, 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀧𑀸𑀝𑀮𑀺𑀕𑀸𑀫𑁂 𑀦𑀕𑀭𑀁 𑀫𑀸𑀧𑁂𑀦𑁆𑀢𑀺 𑀯𑀚𑁆𑀚𑀻𑀦𑀁 𑀧𑀝𑀺𑀩𑀸𑀳𑀸𑀬. 𑀇𑀥𑀸𑀳𑀁, 𑀆𑀦𑀦𑁆𑀤, 𑀅𑀤𑁆𑀤𑀲𑀁 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀫𑁆𑀩𑀳𑀼𑀮𑀸 𑀤𑁂𑀯𑀢𑀸𑀬𑁄 𑀲𑀳𑀲𑁆𑀲𑁂𑀯 𑀧𑀸𑀝𑀮𑀺𑀕𑀸𑀫𑁂 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺𑀬𑁄. 𑀬𑀲𑁆𑀫𑀺𑀁 ¶ , 𑀆𑀦𑀦𑁆𑀤, 𑀧𑀤𑁂𑀲𑁂 𑀫𑀳𑁂𑀲𑀓𑁆𑀔𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀫𑀳𑁂𑀲𑀓𑁆𑀔𑀸𑀦𑀁 𑀢𑀢𑁆𑀣 𑀭𑀜𑁆𑀜𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀫𑀚𑁆𑀛𑀺𑀫𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀫𑀚𑁆𑀛𑀺𑀫𑀸𑀦𑀁 𑀢𑀢𑁆𑀣 𑀭𑀜𑁆𑀜𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀬𑀲𑁆𑀫𑀺𑀁 𑀧𑀤𑁂𑀲𑁂 𑀦𑀻𑀘𑀸 𑀤𑁂𑀯𑀢𑀸 𑀯𑀢𑁆𑀣𑀽𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀦𑀻𑀘𑀸𑀦𑀁 𑀢𑀢𑁆𑀣 𑀭𑀜𑁆𑀜𑀁 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀺 𑀦𑀫𑀦𑁆𑀢𑀺 𑀦𑀺𑀯𑁂𑀲𑀦𑀸𑀦𑀺 𑀫𑀸𑀧𑁂𑀢𑀼𑀁. 𑀬𑀸𑀯𑀢𑀸, 𑀆𑀦𑀦𑁆𑀤, 𑀅𑀭𑀺𑀬𑀁 𑀆𑀬𑀢𑀦𑀁 𑀬𑀸𑀯𑀢𑀸 𑀯𑀡𑀺𑀧𑁆𑀧𑀣𑁄 𑀇𑀤𑀁 𑀅𑀕𑁆𑀕𑀦𑀕𑀭𑀁 𑀪𑀯𑀺𑀲𑁆𑀲𑀢𑀺 𑀧𑀸𑀝𑀮𑀺𑀧𑀼𑀢𑁆𑀢𑀁 𑀧𑀼𑀝𑀪𑁂𑀤𑀦𑀁 ¶ . 𑀧𑀸𑀝𑀮𑀺𑀧𑀼𑀢𑁆𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀢𑀬𑁄 𑀅𑀦𑁆𑀢𑀭𑀸𑀬𑀸 𑀪𑀯𑀺𑀲𑁆𑀲𑀦𑁆𑀢𑀺 𑁋 𑀅𑀕𑁆𑀕𑀺𑀢𑁄 𑀯𑀸 𑀉𑀤𑀓𑀢𑁄 𑀯𑀸 𑀫𑀺𑀣𑀼𑀪𑁂𑀤𑀸 𑀯𑀸’’𑀢𑀺.

𑁧𑁫𑁩. 𑀅𑀣 ¶ 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼, 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼, 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀦𑁄 𑀪𑀯𑀁 𑀕𑁄𑀢𑀫𑁄 𑀅𑀚𑁆𑀚𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀬𑁂𑀦 𑀲𑀓𑁄 𑀆𑀯𑀲𑀣𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀓𑁂 𑀆𑀯𑀲𑀣𑁂 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀼𑀁 𑁋 ‘‘𑀓𑀸𑀮𑁄, 𑀪𑁄 𑀕𑁄𑀢𑀫, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸𑀦𑀁 𑀫𑀕𑀥𑀫𑀳𑀸𑀫𑀢𑁆𑀢𑀸𑀦𑀁 ¶ 𑀆𑀯𑀲𑀣𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀼𑀁 𑀲𑀫𑁆𑀧𑀯𑀸𑀭𑁂𑀲𑀼𑀁. 𑀅𑀣 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀅𑀜𑁆𑀜𑀢𑀭𑀁 𑀦𑀻𑀘𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂 𑀔𑁄 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑁂 𑀫𑀕𑀥𑀫𑀳𑀸𑀫𑀢𑁆𑀢𑁂 𑀪𑀕𑀯𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺 𑁋

‘‘𑀬𑀲𑁆𑀫𑀺𑀁 ¶ 𑀧𑀤𑁂𑀲𑁂 𑀓𑀧𑁆𑀧𑁂𑀢𑀺, 𑀯𑀸𑀲𑀁 𑀧𑀡𑁆𑀟𑀺𑀢𑀚𑀸𑀢𑀺𑀬𑁄;

𑀲𑀻𑀮𑀯𑀦𑁆𑀢𑁂𑀢𑁆𑀣 𑀪𑁄𑀚𑁂𑀢𑁆𑀯𑀸, 𑀲𑀜𑁆𑀜𑀢𑁂 𑀩𑁆𑀭𑀳𑁆𑀫𑀘𑀸𑀭𑀬𑁄 [𑀩𑁆𑀭𑀳𑁆𑀫𑀘𑀸𑀭𑀺𑀦𑁄 (𑀲𑁆𑀬𑀸.)].

‘‘𑀬𑀸 𑀢𑀢𑁆𑀣 𑀤𑁂𑀯𑀢𑀸 𑀆𑀲𑀼𑀁, 𑀢𑀸𑀲𑀁 𑀤𑀓𑁆𑀔𑀺𑀡𑀫𑀸𑀤𑀺𑀲𑁂;

𑀢𑀸 𑀧𑀽𑀚𑀺𑀢𑀸 𑀧𑀽𑀚𑀬𑀦𑁆𑀢𑀺 [𑀧𑀽𑀚𑀺𑀢𑀸 𑀧𑀽𑀚𑀬𑀦𑁆𑀢𑀺 𑀦𑀁 (𑀓.)], 𑀫𑀸𑀦𑀺𑀢𑀸 𑀫𑀸𑀦𑀬𑀦𑁆𑀢𑀺 𑀦𑀁.

‘‘𑀢𑀢𑁄 ¶ 𑀦𑀁 𑀅𑀦𑀼𑀓𑀫𑁆𑀧𑀦𑁆𑀢𑀺, 𑀫𑀸𑀢𑀸 𑀧𑀼𑀢𑁆𑀢𑀁𑀯 𑀑𑀭𑀲𑀁;

𑀤𑁂𑀯𑀢𑀸𑀦𑀼𑀓𑀫𑁆𑀧𑀺𑀢𑁄 𑀧𑁄𑀲𑁄, 𑀲𑀤𑀸 𑀪𑀤𑁆𑀭𑀸𑀦𑀺 𑀧𑀲𑁆𑀲𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑁂 𑀫𑀕𑀥𑀫𑀳𑀸𑀫𑀢𑁆𑀢𑁂 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑁧𑁫𑁪. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀲𑀼𑀦𑀺𑀥𑀯𑀲𑁆𑀲𑀓𑀸𑀭𑀸 𑀫𑀕𑀥𑀫𑀳𑀸𑀫𑀢𑁆𑀢𑀸 𑀪𑀕𑀯𑀦𑁆𑀢𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀸 𑀳𑁄𑀦𑁆𑀢𑀺 𑁋 ‘‘𑀬𑁂𑀦𑀚𑁆𑀚 𑀲𑀫𑀡𑁄 𑀕𑁄𑀢𑀫𑁄 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀲𑁆𑀲𑀢𑀺, 𑀢𑀁 𑀕𑁄𑀢𑀫𑀤𑁆𑀯𑀸𑀭𑀁 𑀦𑀸𑀫 𑀪𑀯𑀺𑀲𑁆𑀲𑀢𑀺. 𑀬𑁂𑀦 𑀢𑀺𑀢𑁆𑀣𑁂𑀦 𑀕𑀗𑁆𑀕𑀁 𑀦𑀤𑀺𑀁 𑀢𑀭𑀺𑀲𑁆𑀲𑀢𑀺, 𑀢𑀁 𑀕𑁄𑀢𑀫𑀢𑀺𑀢𑁆𑀣𑀁 𑀦𑀸𑀫 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺 ¶ , 𑀢𑀁 𑀕𑁄𑀢𑀫𑀤𑁆𑀯𑀸𑀭𑀁 𑀦𑀸𑀫 𑀅𑀳𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀬𑁂𑀦 𑀕𑀗𑁆𑀕𑀸 𑀦𑀤𑀻 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀕𑀗𑁆𑀕𑀸 𑀦𑀤𑀻 𑀧𑀽𑀭𑀸 𑀳𑁄𑀢𑀺 𑀲𑀫𑀢𑀺𑀢𑁆𑀢𑀺𑀓𑀸 𑀓𑀸𑀓𑀧𑁂𑀬𑁆𑀬𑀸. 𑀅𑀧𑁆𑀧𑁂𑀓𑀘𑁆𑀘𑁂 𑀫𑀦𑀼𑀲𑁆𑀲𑀸 𑀦𑀸𑀯𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀧𑁆𑀧𑁂𑀓𑀘𑁆𑀘𑁂 𑀉𑀴𑀼𑀫𑁆𑀧𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀅𑀧𑁆𑀧𑁂𑀓𑀘𑁆𑀘𑁂 𑀓𑀼𑀮𑁆𑀮𑀁 𑀩𑀦𑁆𑀥𑀦𑁆𑀢𑀺 𑀅𑀧𑀸𑀭𑀸 [𑀧𑀸𑀭𑀸 (𑀲𑀻. 𑀲𑁆𑀬𑀸. 𑀓.), 𑀑𑀭𑀸 (𑀯𑀺. 𑀫𑀳𑀸𑀯𑀕𑁆𑀕)], 𑀧𑀸𑀭𑀁 𑀕𑀦𑁆𑀢𑀼𑀓𑀸𑀫𑀸. 𑀅𑀣 𑀔𑁄 𑀪𑀕𑀯𑀸 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯 𑁋 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀑𑀭𑀺𑀫𑀢𑀻𑀭𑁂 𑀅𑀦𑁆𑀢𑀭𑀳𑀺𑀢𑁄 𑀧𑀸𑀭𑀺𑀫𑀢𑀻𑀭𑁂 𑀧𑀘𑁆𑀘𑀼𑀝𑁆𑀞𑀸𑀲𑀺 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀢𑁂 𑀫𑀦𑀼𑀲𑁆𑀲𑁂 𑀅𑀧𑁆𑀧𑁂𑀓𑀘𑁆𑀘𑁂 𑀦𑀸𑀯𑀁 𑀧𑀭𑀺𑀬𑁂𑀲𑀦𑁆𑀢𑁂 𑀅𑀧𑁆𑀧𑁂𑀓𑀘𑁆𑀘𑁂 𑀉𑀴𑀼𑀫𑁆𑀧𑀁 𑀧𑀭𑀺𑀬𑁂𑀲𑀦𑁆𑀢𑁂 𑀅𑀧𑁆𑀧𑁂𑀓𑀘𑁆𑀘𑁂 𑀓𑀼𑀮𑁆𑀮𑀁 𑀩𑀦𑁆𑀥𑀦𑁆𑀢𑁂 𑀅𑀧𑀸𑀭𑀸 𑀧𑀸𑀭𑀁 𑀕𑀦𑁆𑀢𑀼𑀓𑀸𑀫𑁂. 𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀬𑁂 𑀢𑀭𑀦𑁆𑀢𑀺 𑀅𑀡𑁆𑀡𑀯𑀁 𑀲𑀭𑀁, 𑀲𑁂𑀢𑀼𑀁 𑀓𑀢𑁆𑀯𑀸𑀦 𑀯𑀺𑀲𑀚𑁆𑀚 𑀧𑀮𑁆𑀮𑀮𑀸𑀦𑀺;

𑀓𑀼𑀮𑁆𑀮𑀜𑁆𑀳𑀺 𑀚𑀦𑁄 𑀩𑀦𑁆𑀥𑀢𑀺 [𑀓𑀼𑀮𑁆𑀮𑀁 𑀚𑀦𑁄 𑀘 𑀩𑀦𑁆𑀥𑀢𑀺 (𑀲𑁆𑀬𑀸.), 𑀓𑀼𑀮𑁆𑀮𑀁 𑀳𑀺 𑀚𑀦𑁄 𑀧𑀩𑀦𑁆𑀥𑀢𑀺 (𑀲𑀻. 𑀧𑀻. 𑀓.)], 𑀢𑀺𑀡𑁆𑀡𑀸 [𑀦𑀺𑀢𑀺𑀡𑁆𑀡𑀸, 𑀦 𑀢𑀺𑀡𑁆𑀡𑀸 (𑀓.)] 𑀫𑁂𑀥𑀸𑀯𑀺𑀦𑁄 𑀚𑀦𑀸’’𑀢𑀺.

𑀧𑀞𑀫𑀪𑀸𑀡𑀯𑀸𑀭𑁄.

𑀅𑀭𑀺𑀬𑀲𑀘𑁆𑀘𑀓𑀣𑀸

𑁧𑁫𑁫. 𑀅𑀣 ¶ ¶ 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀓𑁄𑀝𑀺𑀕𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀓𑁄𑀝𑀺𑀕𑀸𑀫𑁄 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 ¶ 𑀪𑀕𑀯𑀸 𑀓𑁄𑀝𑀺𑀕𑀸𑀫𑁂 𑀯𑀺𑀳𑀭𑀢𑀺. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

‘‘𑀘𑀢𑀼𑀦𑁆𑀦𑀁 ¶ , 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀘𑁆𑀘𑀸𑀦𑀁 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀺𑀤𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀁 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘. 𑀓𑀢𑀫𑁂𑀲𑀁 𑀘𑀢𑀼𑀦𑁆𑀦𑀁? 𑀤𑀼𑀓𑁆𑀔𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀘𑁆𑀘𑀲𑁆𑀲 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀺𑀤𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀁 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘. 𑀤𑀼𑀓𑁆𑀔𑀲𑀫𑀼𑀤𑀬𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀘𑁆𑀘𑀲𑁆𑀲 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀺𑀤𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀁 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘. 𑀤𑀼𑀓𑁆𑀔𑀦𑀺𑀭𑁄𑀥𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀘𑁆𑀘𑀲𑁆𑀲 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀺𑀤𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀁 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘. 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀘𑁆𑀘𑀲𑁆𑀲 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀺𑀤𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀁 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘. 𑀢𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀅𑀦𑀼𑀩𑀼𑀤𑁆𑀥𑀁 𑀧𑀝𑀺𑀯𑀺𑀤𑁆𑀥𑀁, 𑀤𑀼𑀓𑁆𑀔𑀲𑀫𑀼𑀤𑀬𑀁 [𑀤𑀼𑀓𑁆𑀔𑀲𑀫𑀼𑀤𑀬𑁄 (𑀲𑁆𑀬𑀸.)] 𑀅𑀭𑀺𑀬𑀲𑀘𑁆𑀘𑀁 𑀅𑀦𑀼𑀩𑀼𑀤𑁆𑀥𑀁 𑀧𑀝𑀺𑀯𑀺𑀤𑁆𑀥𑀁, 𑀤𑀼𑀓𑁆𑀔𑀦𑀺𑀭𑁄𑀥𑀁 [𑀤𑀼𑀓𑁆𑀔𑀦𑀺𑀭𑁄𑀥𑁄 (𑀲𑁆𑀬𑀸.)] 𑀅𑀭𑀺𑀬𑀲𑀘𑁆𑀘𑀁 𑀅𑀦𑀼𑀩𑀼𑀤𑁆𑀥𑀁 𑀧𑀝𑀺𑀯𑀺𑀤𑁆𑀥𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁 𑀅𑀦𑀼𑀩𑀼𑀤𑁆𑀥𑀁 𑀧𑀝𑀺𑀯𑀺𑀤𑁆𑀥𑀁, 𑀉𑀘𑁆𑀙𑀺𑀦𑁆𑀦𑀸 𑀪𑀯𑀢𑀡𑁆𑀳𑀸, 𑀔𑀻𑀡𑀸 𑀪𑀯𑀦𑁂𑀢𑁆𑀢𑀺, 𑀦𑀢𑁆𑀣𑀺𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀘𑀢𑀼𑀦𑁆𑀦𑀁 ¶ 𑀅𑀭𑀺𑀬𑀲𑀘𑁆𑀘𑀸𑀦𑀁, 𑀬𑀣𑀸𑀪𑀽𑀢𑀁 𑀅𑀤𑀲𑁆𑀲𑀦𑀸;

𑀲𑀁𑀲𑀺𑀢𑀁 𑀤𑀻𑀖𑀫𑀤𑁆𑀥𑀸𑀦𑀁, 𑀢𑀸𑀲𑀼 𑀢𑀸𑀲𑁆𑀯𑁂𑀯 𑀚𑀸𑀢𑀺𑀲𑀼.

𑀢𑀸𑀦𑀺 𑀏𑀢𑀸𑀦𑀺 𑀤𑀺𑀝𑁆𑀞𑀸𑀦𑀺, 𑀪𑀯𑀦𑁂𑀢𑁆𑀢𑀺 𑀲𑀫𑀽𑀳𑀢𑀸;

𑀉𑀘𑁆𑀙𑀺𑀦𑁆𑀦𑀁 𑀫𑀽𑀮𑀁 𑀤𑀼𑀓𑁆𑀔𑀲𑁆𑀲, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺.

𑀢𑀢𑁆𑀭𑀧𑀺 ¶ 𑀲𑀼𑀤𑀁 𑀪𑀕𑀯𑀸 𑀓𑁄𑀝𑀺𑀕𑀸𑀫𑁂 𑀯𑀺𑀳𑀭𑀦𑁆𑀢𑁄 𑀏𑀢𑀤𑁂𑀯 𑀩𑀳𑀼𑀮𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁄𑀢𑀺 𑁋 ‘‘𑀇𑀢𑀺 𑀲𑀻𑀮𑀁, 𑀇𑀢𑀺 𑀲𑀫𑀸𑀥𑀺, 𑀇𑀢𑀺 𑀧𑀜𑁆𑀜𑀸. 𑀲𑀻𑀮𑀧𑀭𑀺𑀪𑀸𑀯𑀺𑀢𑁄 𑀲𑀫𑀸𑀥𑀺 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄. 𑀲𑀫𑀸𑀥𑀺𑀧𑀭𑀺𑀪𑀸𑀯𑀺𑀢𑀸 𑀧𑀜𑁆𑀜𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸. 𑀧𑀜𑁆𑀜𑀸𑀧𑀭𑀺𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀲𑀫𑁆𑀫𑀤𑁂𑀯 𑀆𑀲𑀯𑁂𑀳𑀺 𑀯𑀺𑀫𑀼𑀘𑁆𑀘𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀸𑀲𑀯𑀸, 𑀪𑀯𑀸𑀲𑀯𑀸, 𑀅𑀯𑀺𑀚𑁆𑀚𑀸𑀲𑀯𑀸’’𑀢𑀺.

𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸

𑁧𑁫𑁬. 𑀅𑀣 ¶ 𑀔𑁄 𑀪𑀕𑀯𑀸 𑀓𑁄𑀝𑀺𑀕𑀸𑀫𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀦𑀸𑀢𑀺𑀓𑀸 [𑀦𑀸𑀤𑀺𑀓𑀸 (𑀲𑁆𑀬𑀸. 𑀧𑀻.)] 𑀢𑁂𑀦𑀼𑀧𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 ¶ 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀦𑀸𑀢𑀺𑀓𑀸 𑀢𑀤𑀯𑀲𑀭𑀺. 𑀢𑀢𑁆𑀭𑀧𑀺 𑀲𑀼𑀤𑀁 𑀪𑀕𑀯𑀸 𑀦𑀸𑀢𑀺𑀓𑁂 𑀯𑀺𑀳𑀭𑀢𑀺 𑀕𑀺𑀜𑁆𑀚𑀓𑀸𑀯𑀲𑀣𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀴𑁆𑀳𑁄 𑀦𑀸𑀫, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀦𑀸𑀢𑀺𑀓𑁂 𑀓𑀸𑀮𑀗𑁆𑀓𑀢𑁄, 𑀢𑀲𑁆𑀲 𑀓𑀸 𑀕𑀢𑀺, 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄? 𑀦𑀦𑁆𑀤𑀸 𑀦𑀸𑀫, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀻 𑀦𑀸𑀢𑀺𑀓𑁂 𑀓𑀸𑀮𑀗𑁆𑀓𑀢𑀸, 𑀢𑀲𑁆𑀲𑀸 𑀓𑀸 𑀕𑀢𑀺, 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄? 𑀲𑀼𑀤𑀢𑁆𑀢𑁄 ¶ 𑀦𑀸𑀫, 𑀪𑀦𑁆𑀢𑁂, 𑀉𑀧𑀸𑀲𑀓𑁄 𑀦𑀸𑀢𑀺𑀓𑁂 𑀓𑀸𑀮𑀗𑁆𑀓𑀢𑁄, 𑀢𑀲𑁆𑀲 𑀓𑀸 𑀕𑀢𑀺, 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄? 𑀲𑀼𑀚𑀸𑀢𑀸 𑀦𑀸𑀫, 𑀪𑀦𑁆𑀢𑁂, 𑀉𑀧𑀸𑀲𑀺𑀓𑀸 𑀦𑀸𑀢𑀺𑀓𑁂 𑀓𑀸𑀮𑀗𑁆𑀓𑀢𑀸, 𑀢𑀲𑁆𑀲𑀸 𑀓𑀸 𑀕𑀢𑀺 ¶ , 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄? 𑀓𑀼𑀓𑁆𑀓𑀼𑀝𑁄 [𑀓𑀓𑀼𑀥𑁄 (𑀲𑁆𑀬𑀸.)] 𑀦𑀸𑀫, 𑀪𑀦𑁆𑀢𑁂, 𑀉𑀧𑀸𑀲𑀓𑁄 𑀦𑀸𑀢𑀺𑀓𑁂 𑀓𑀸𑀮𑀗𑁆𑀓𑀢𑁄, 𑀢𑀲𑁆𑀲 𑀓𑀸 𑀕𑀢𑀺, 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄? 𑀓𑀸𑀴𑀺𑀫𑁆𑀩𑁄 [𑀓𑀸𑀮𑀺𑀗𑁆𑀕𑁄 (𑀧𑀻.), 𑀓𑀸𑀭𑀴𑀺𑀫𑁆𑀩𑁄 (𑀲𑁆𑀬𑀸.)] 𑀦𑀸𑀫, 𑀪𑀦𑁆𑀢𑁂, 𑀉𑀧𑀸𑀲𑀓𑁄…𑀧𑁂… 𑀦𑀺𑀓𑀝𑁄 𑀦𑀸𑀫, 𑀪𑀦𑁆𑀢𑁂, 𑀉𑀧𑀸𑀲𑀓𑁄… 𑀓𑀝𑀺𑀲𑁆𑀲𑀳𑁄 [𑀓𑀝𑀺𑀲𑁆𑀲𑀪𑁄 (𑀲𑀻. 𑀧𑀻.)] 𑀦𑀸𑀫, 𑀪𑀦𑁆𑀢𑁂, 𑀉𑀧𑀸𑀲𑀓𑁄… 𑀢𑀼𑀝𑁆𑀞𑁄 𑀦𑀸𑀫, 𑀪𑀦𑁆𑀢𑁂, 𑀉𑀧𑀸𑀲𑀓𑁄… 𑀲𑀦𑁆𑀢𑀼𑀝𑁆𑀞𑁄 𑀦𑀸𑀫, 𑀪𑀦𑁆𑀢𑁂, 𑀉𑀧𑀸𑀲𑀓𑁄… 𑀪𑀤𑁆𑀤𑁄 [𑀪𑀝𑁄 (𑀲𑁆𑀬𑀸.)] 𑀦𑀸𑀫, 𑀪𑀦𑁆𑀢𑁂, 𑀉𑀧𑀸𑀲𑀓𑁄… 𑀲𑀼𑀪𑀤𑁆𑀤𑁄 [𑀲𑀼𑀪𑀝𑁄 (𑀲𑁆𑀬𑀸.)] 𑀦𑀸𑀫, 𑀪𑀦𑁆𑀢𑁂, 𑀉𑀧𑀸𑀲𑀓𑁄 𑀦𑀸𑀢𑀺𑀓𑁂 𑀓𑀸𑀮𑀗𑁆𑀓𑀢𑁄, 𑀢𑀲𑁆𑀲 𑀓𑀸 𑀕𑀢𑀺, 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄’’𑀢𑀺?

𑁧𑁫𑁭. ‘‘𑀲𑀸𑀴𑁆𑀳𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. 𑀦𑀦𑁆𑀤𑀸, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑀻 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀑𑀧𑀧𑀸𑀢𑀺𑀓𑀸 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑀻 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀸 𑀢𑀲𑁆𑀫𑀸 𑀮𑁄𑀓𑀸. 𑀲𑀼𑀤𑀢𑁆𑀢𑁄, 𑀆𑀦𑀦𑁆𑀤, 𑀉𑀧𑀸𑀲𑀓𑁄 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸 𑀲𑀓𑀤𑀸𑀕𑀸𑀫𑀻 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀺. 𑀲𑀼𑀚𑀸𑀢𑀸, 𑀆𑀦𑀦𑁆𑀤, 𑀉𑀧𑀸𑀲𑀺𑀓𑀸 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑀸 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸 [𑀧𑀭𑀸𑀬𑀦𑀸 (𑀲𑀻. 𑀲𑁆𑀬𑀸. 𑀧𑀻. 𑀓.)]. 𑀓𑀼𑀓𑁆𑀓𑀼𑀝𑁄, 𑀆𑀦𑀦𑁆𑀤, 𑀉𑀧𑀸𑀲𑀓𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀑𑀧𑀧𑀸𑀢𑀺𑀓𑁄 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀢𑀲𑁆𑀫𑀸 𑀮𑁄𑀓𑀸. 𑀓𑀸𑀴𑀺𑀫𑁆𑀩𑁄, 𑀆𑀦𑀦𑁆𑀤, 𑀉𑀧𑀸𑀲𑀓𑁄…𑀧𑁂… 𑀦𑀺𑀓𑀝𑁄, 𑀆𑀦𑀦𑁆𑀤, 𑀉𑀧𑀸𑀲𑀓𑁄… 𑀓𑀝𑀺𑀲𑁆𑀲𑀳𑁄 ¶ , 𑀆𑀦𑀦𑁆𑀤, 𑀉𑀧𑀸𑀲𑀓𑁄… 𑀢𑀼𑀝𑁆𑀞𑁄, 𑀆𑀦𑀦𑁆𑀤, 𑀉𑀧𑀸𑀲𑀓𑁄 ¶ … 𑀲𑀦𑁆𑀢𑀼𑀝𑁆𑀞𑁄, 𑀆𑀦𑀦𑁆𑀤, 𑀉𑀧𑀸𑀲𑀓𑁄… 𑀪𑀤𑁆𑀤𑁄, 𑀆𑀦𑀦𑁆𑀤, 𑀉𑀧𑀸𑀲𑀓𑁄… 𑀲𑀼𑀪𑀤𑁆𑀤𑁄, 𑀆𑀦𑀦𑁆𑀤, 𑀉𑀧𑀸𑀲𑀓𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀑𑀧𑀧𑀸𑀢𑀺𑀓𑁄 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀢𑀲𑁆𑀫𑀸 𑀮𑁄𑀓𑀸 ¶ . 𑀧𑀭𑁄𑀧𑀜𑁆𑀜𑀸𑀲𑀁, 𑀆𑀦𑀦𑁆𑀤, 𑀦𑀸𑀢𑀺𑀓𑁂 𑀉𑀧𑀸𑀲𑀓𑀸 ¶ 𑀓𑀸𑀮𑀗𑁆𑀓𑀢𑀸, 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀑𑀧𑀧𑀸𑀢𑀺𑀓𑀸 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀸 𑀢𑀲𑁆𑀫𑀸 𑀮𑁄𑀓𑀸. 𑀲𑀸𑀥𑀺𑀓𑀸 𑀦𑀯𑀼𑀢𑀺 [𑀙𑀸𑀥𑀺𑀓𑀸 𑀦𑀯𑀼𑀢𑀺 (𑀲𑁆𑀬𑀸.)], 𑀆𑀦𑀦𑁆𑀤, 𑀦𑀸𑀢𑀺𑀓𑁂 𑀉𑀧𑀸𑀲𑀓𑀸 𑀓𑀸𑀮𑀗𑁆𑀓𑀢𑀸 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸 𑀲𑀓𑀤𑀸𑀕𑀸𑀫𑀺𑀦𑁄 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀲𑀸𑀢𑀺𑀭𑁂𑀓𑀸𑀦𑀺 [𑀤𑀲𑀸𑀢𑀺𑀭𑁂𑀓𑀸𑀦𑀺 (𑀲𑁆𑀬𑀸.)], 𑀆𑀦𑀦𑁆𑀤, 𑀧𑀜𑁆𑀘𑀲𑀢𑀸𑀦𑀺 𑀦𑀸𑀢𑀺𑀓𑁂 𑀉𑀧𑀸𑀲𑀓𑀸 𑀓𑀸𑀮𑀗𑁆𑀓𑀢𑀸, 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑀸 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸.

𑀥𑀫𑁆𑀫𑀸𑀤𑀸𑀲𑀥𑀫𑁆𑀫𑀧𑀭𑀺𑀬𑀸𑀬𑀸

𑁧𑁫𑁮. ‘‘𑀅𑀦𑀘𑁆𑀙𑀭𑀺𑀬𑀁 𑀔𑁄 𑀧𑀦𑁂𑀢𑀁, 𑀆𑀦𑀦𑁆𑀤, 𑀬𑀁 𑀫𑀦𑀼𑀲𑁆𑀲𑀪𑀽𑀢𑁄 𑀓𑀸𑀮𑀗𑁆𑀓𑀭𑁂𑀬𑁆𑀬. 𑀢𑀲𑁆𑀫𑀺𑀁𑀬𑁂𑀯 [𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀘𑁂 (𑀲𑀻. 𑀧𑀻.), 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀔𑁄 (𑀲𑁆𑀬𑀸.)] 𑀓𑀸𑀮𑀗𑁆𑀓𑀢𑁂 𑀢𑀣𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑀺𑀲𑁆𑀲𑀣, 𑀯𑀺𑀳𑁂𑀲𑀸 𑀳𑁂𑀲𑀸, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲. 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀥𑀫𑁆𑀫𑀸𑀤𑀸𑀲𑀁 𑀦𑀸𑀫 𑀥𑀫𑁆𑀫𑀧𑀭𑀺𑀬𑀸𑀬𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀆𑀓𑀗𑁆𑀔𑀫𑀸𑀦𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀩𑁆𑀬𑀸𑀓𑀭𑁂𑀬𑁆𑀬 𑁋 ‘𑀔𑀻𑀡𑀦𑀺𑀭𑀬𑁄𑀫𑁆𑀳𑀺 𑀔𑀻𑀡𑀢𑀺𑀭𑀘𑁆𑀙𑀸𑀦𑀬𑁄𑀦𑀺 ¶ 𑀔𑀻𑀡𑀧𑁂𑀢𑁆𑀢𑀺𑀯𑀺𑀲𑀬𑁄 𑀔𑀻𑀡𑀸𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑁄, 𑀲𑁄𑀢𑀸𑀧𑀦𑁆𑀦𑁄𑀳𑀫𑀲𑁆𑀫𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’𑀢𑀺.

𑁧𑁫𑁯. ‘‘𑀓𑀢𑀫𑁄 𑀘 𑀲𑁄, 𑀆𑀦𑀦𑁆𑀤, 𑀥𑀫𑁆𑀫𑀸𑀤𑀸𑀲𑁄 𑀥𑀫𑁆𑀫𑀧𑀭𑀺𑀬𑀸𑀬𑁄, 𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀆𑀓𑀗𑁆𑀔𑀫𑀸𑀦𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀩𑁆𑀬𑀸𑀓𑀭𑁂𑀬𑁆𑀬 𑁋 ‘𑀔𑀻𑀡𑀦𑀺𑀭𑀬𑁄𑀫𑁆𑀳𑀺 𑀔𑀻𑀡𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀔𑀻𑀡𑀧𑁂𑀢𑁆𑀢𑀺𑀯𑀺𑀲𑀬𑁄 𑀔𑀻𑀡𑀸𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑁄, 𑀲𑁄𑀢𑀸𑀧𑀦𑁆𑀦𑁄𑀳𑀫𑀲𑁆𑀫𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’𑀢𑀺?

‘‘𑀇𑀥𑀸𑀦𑀦𑁆𑀤 ¶ , 𑀅𑀭𑀺𑀬𑀲𑀸𑀯𑀓𑁄 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺.

‘‘𑀥𑀫𑁆𑀫𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 ‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’𑀢𑀺.

‘‘𑀲𑀗𑁆𑀖𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑁋 ‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀉𑀚𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀜𑀸𑀬𑀧𑁆𑀧𑀝𑀺𑀧𑀦𑁆𑀦𑁄 ¶ 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 ¶ 𑀲𑀸𑀯𑀓𑀲𑀗𑁆𑀖𑁄 𑀬𑀤𑀺𑀤𑀁 𑀘𑀢𑁆𑀢𑀸𑀭𑀺 𑀧𑀼𑀭𑀺𑀲𑀬𑀼𑀕𑀸𑀦𑀺 𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸, 𑀏𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄 𑀆𑀳𑀼𑀦𑁂𑀬𑁆𑀬𑁄 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’𑀢𑀺.

‘‘𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀅𑀔𑀡𑁆𑀟𑁂𑀳𑀺 𑀅𑀘𑁆𑀙𑀺𑀤𑁆𑀤𑁂𑀳𑀺 𑀅𑀲𑀩𑀮𑁂𑀳𑀺 𑀅𑀓𑀫𑁆𑀫𑀸𑀲𑁂𑀳𑀺 𑀪𑀼𑀚𑀺𑀲𑁆𑀲𑁂𑀳𑀺 𑀯𑀺𑀜𑁆𑀜𑀽𑀧𑀲𑀢𑁆𑀣𑁂𑀳𑀺 𑀅𑀧𑀭𑀸𑀫𑀝𑁆𑀞𑁂𑀳𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑁂𑀳𑀺.

‘‘𑀅𑀬𑀁 𑀔𑁄 𑀲𑁄, 𑀆𑀦𑀦𑁆𑀤, 𑀥𑀫𑁆𑀫𑀸𑀤𑀸𑀲𑁄 𑀥𑀫𑁆𑀫𑀧𑀭𑀺𑀬𑀸𑀬𑁄, 𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀆𑀓𑀗𑁆𑀔𑀫𑀸𑀦𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀩𑁆𑀬𑀸𑀓𑀭𑁂𑀬𑁆𑀬 𑁋 ‘𑀔𑀻𑀡𑀦𑀺𑀭𑀬𑁄𑀫𑁆𑀳𑀺 𑀔𑀻𑀡𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀔𑀻𑀡𑀧𑁂𑀢𑁆𑀢𑀺𑀯𑀺𑀲𑀬𑁄 𑀔𑀻𑀡𑀸𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑁄, 𑀲𑁄𑀢𑀸𑀧𑀦𑁆𑀦𑁄𑀳𑀫𑀲𑁆𑀫𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’’’𑀢𑀺.

𑀢𑀢𑁆𑀭𑀧𑀺 ¶ 𑀲𑀼𑀤𑀁 𑀪𑀕𑀯𑀸 𑀦𑀸𑀢𑀺𑀓𑁂 𑀯𑀺𑀳𑀭𑀦𑁆𑀢𑁄 𑀕𑀺𑀜𑁆𑀚𑀓𑀸𑀯𑀲𑀣𑁂 𑀏𑀢𑀤𑁂𑀯 𑀩𑀳𑀼𑀮𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁄𑀢𑀺 𑁋

‘‘𑀇𑀢𑀺 𑀲𑀻𑀮𑀁 𑀇𑀢𑀺 𑀲𑀫𑀸𑀥𑀺 𑀇𑀢𑀺 𑀧𑀜𑁆𑀜𑀸. 𑀲𑀻𑀮𑀧𑀭𑀺𑀪𑀸𑀯𑀺𑀢𑁄 𑀲𑀫𑀸𑀥𑀺 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄. 𑀲𑀫𑀸𑀥𑀺𑀧𑀭𑀺𑀪𑀸𑀯𑀺𑀢𑀸 𑀧𑀜𑁆𑀜𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸. 𑀧𑀜𑁆𑀜𑀸𑀧𑀭𑀺𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀲𑀫𑁆𑀫𑀤𑁂𑀯 𑀆𑀲𑀯𑁂𑀳𑀺 𑀯𑀺𑀫𑀼𑀘𑁆𑀘𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀸𑀲𑀯𑀸, 𑀪𑀯𑀸𑀲𑀯𑀸, 𑀅𑀯𑀺𑀚𑁆𑀚𑀸𑀲𑀯𑀸’’𑀢𑀺.

𑁧𑁬𑁦. 𑀅𑀣 ¶ 𑀔𑁄 𑀪𑀕𑀯𑀸 𑀦𑀸𑀢𑀺𑀓𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀯𑁂𑀲𑀸𑀮𑀻 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀯𑁂𑀲𑀸𑀮𑀻 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀅𑀫𑁆𑀩𑀧𑀸𑀮𑀺𑀯𑀦𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

‘‘𑀲𑀢𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀳𑀭𑁂𑀬𑁆𑀬 𑀲𑀫𑁆𑀧𑀚𑀸𑀦𑁄, 𑀅𑀬𑀁 𑀯𑁄 𑀅𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 ¶ 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻…𑀧𑁂… 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻…𑀧𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁄 𑀳𑁄𑀢𑀺.

‘‘𑀓𑀣𑀜𑁆𑀘 ¶ , 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀆𑀮𑁄𑀓𑀺𑀢𑁂 𑀯𑀺𑀮𑁄𑀓𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀫𑀺𑀜𑁆𑀚𑀺𑀢𑁂 ¶ 𑀧𑀲𑀸𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀅𑀲𑀺𑀢𑁂 𑀧𑀻𑀢𑁂 𑀔𑀸𑀬𑀺𑀢𑁂 𑀲𑀸𑀬𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀕𑀢𑁂 𑀞𑀺𑀢𑁂 𑀦𑀺𑀲𑀺𑀦𑁆𑀦𑁂 𑀲𑀼𑀢𑁆𑀢𑁂 𑀚𑀸𑀕𑀭𑀺𑀢𑁂 𑀪𑀸𑀲𑀺𑀢𑁂 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀲𑀢𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀳𑀭𑁂𑀬𑁆𑀬 𑀲𑀫𑁆𑀧𑀚𑀸𑀦𑁄, 𑀅𑀬𑀁 𑀯𑁄 𑀅𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻’’𑀢𑀺.

𑀅𑀫𑁆𑀩𑀧𑀸𑀮𑀻𑀕𑀡𑀺𑀓𑀸

𑁧𑁬𑁧. 𑀅𑀲𑁆𑀲𑁄𑀲𑀺 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑁋 ‘‘𑀪𑀕𑀯𑀸 𑀓𑀺𑀭 𑀯𑁂𑀲𑀸𑀮𑀺𑀁 𑀅𑀦𑀼𑀧𑁆𑀧𑀢𑁆𑀢𑁄 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀬𑁆𑀳𑀁 𑀅𑀫𑁆𑀩𑀯𑀦𑁂’’𑀢𑀺. 𑀅𑀣 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑀪𑀤𑁆𑀤𑀸𑀦𑀺 𑀪𑀤𑁆𑀤𑀸𑀦𑀺 𑀬𑀸𑀦𑀸𑀦𑀺 𑀬𑁄𑀚𑀸𑀧𑁂𑀢𑁆𑀯𑀸 𑀪𑀤𑁆𑀤𑀁 𑀪𑀤𑁆𑀤𑀁 𑀬𑀸𑀦𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀪𑀤𑁆𑀤𑁂𑀳𑀺 𑀪𑀤𑁆𑀤𑁂𑀳𑀺 𑀬𑀸𑀦𑁂𑀳𑀺 𑀯𑁂𑀲𑀸𑀮𑀺𑀬𑀸 𑀦𑀺𑀬𑁆𑀬𑀸𑀲𑀺. 𑀬𑁂𑀦 𑀲𑀓𑁄 𑀆𑀭𑀸𑀫𑁄 𑀢𑁂𑀦 𑀧𑀸𑀬𑀸𑀲𑀺. 𑀬𑀸𑀯𑀢𑀺𑀓𑀸 𑀬𑀸𑀦𑀲𑁆𑀲 𑀪𑀽𑀫𑀺, 𑀬𑀸𑀦𑁂𑀦 𑀕𑀦𑁆𑀢𑁆𑀯𑀸, 𑀬𑀸𑀦𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸 𑀧𑀢𑁆𑀢𑀺𑀓𑀸𑀯 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 ¶ 𑀦𑀺𑀲𑀺𑀦𑁆𑀦𑀁 𑀔𑁄 𑀅𑀫𑁆𑀩𑀧𑀸𑀮𑀺𑀁 𑀕𑀡𑀺𑀓𑀁 𑀪𑀕𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑀸 𑀲𑀫𑀸𑀤𑀧𑀺𑀢𑀸 𑀲𑀫𑀼𑀢𑁆𑀢𑁂𑀚𑀺𑀢𑀸 𑀲𑀫𑁆𑀧𑀳𑀁𑀲𑀺𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀅𑀲𑁆𑀲𑁄𑀲𑀼𑀁 ¶ 𑀔𑁄 𑀯𑁂𑀲𑀸𑀮𑀺𑀓𑀸 𑀮𑀺𑀘𑁆𑀙𑀯𑀻 𑁋 ‘‘𑀪𑀕𑀯𑀸 𑀓𑀺𑀭 𑀯𑁂𑀲𑀸𑀮𑀺𑀁 ¶ 𑀅𑀦𑀼𑀧𑁆𑀧𑀢𑁆𑀢𑁄 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀅𑀫𑁆𑀩𑀧𑀸𑀮𑀺𑀯𑀦𑁂’’𑀢𑀺. 𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀪𑀤𑁆𑀤𑀸𑀦𑀺 𑀪𑀤𑁆𑀤𑀸𑀦𑀺 𑀬𑀸𑀦𑀸𑀦𑀺 𑀬𑁄𑀚𑀸𑀧𑁂𑀢𑁆𑀯𑀸 𑀪𑀤𑁆𑀤𑀁 𑀪𑀤𑁆𑀤𑀁 𑀬𑀸𑀦𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀪𑀤𑁆𑀤𑁂𑀳𑀺 𑀪𑀤𑁆𑀤𑁂𑀳𑀺 𑀬𑀸𑀦𑁂𑀳𑀺 𑀯𑁂𑀲𑀸𑀮𑀺𑀬𑀸 𑀦𑀺𑀬𑁆𑀬𑀺𑀁𑀲𑀼. 𑀢𑀢𑁆𑀭 𑀏𑀓𑀘𑁆𑀘𑁂 𑀮𑀺𑀘𑁆𑀙𑀯𑀻 𑀦𑀻𑀮𑀸 𑀳𑁄𑀦𑁆𑀢𑀺 𑀦𑀻𑀮𑀯𑀡𑁆𑀡𑀸 𑀦𑀻𑀮𑀯𑀢𑁆𑀣𑀸 𑀦𑀻𑀮𑀸𑀮𑀗𑁆𑀓𑀸𑀭𑀸, 𑀏𑀓𑀘𑁆𑀘𑁂 𑀮𑀺𑀘𑁆𑀙𑀯𑀻 𑀧𑀻𑀢𑀸 𑀳𑁄𑀦𑁆𑀢𑀺 𑀧𑀻𑀢𑀯𑀡𑁆𑀡𑀸 𑀧𑀻𑀢𑀯𑀢𑁆𑀣𑀸 𑀧𑀻𑀢𑀸𑀮𑀗𑁆𑀓𑀸𑀭𑀸, 𑀏𑀓𑀘𑁆𑀘𑁂 𑀮𑀺𑀘𑁆𑀙𑀯𑀻 𑀮𑁄𑀳𑀺𑀢𑀸 𑀳𑁄𑀦𑁆𑀢𑀺 𑀮𑁄𑀳𑀺𑀢𑀯𑀡𑁆𑀡𑀸 𑀮𑁄𑀳𑀺𑀢𑀯𑀢𑁆𑀣𑀸 𑀮𑁄𑀳𑀺𑀢𑀸𑀮𑀗𑁆𑀓𑀸𑀭𑀸, 𑀏𑀓𑀘𑁆𑀘𑁂 𑀮𑀺𑀘𑁆𑀙𑀯𑀻 𑀑𑀤𑀸𑀢𑀸 𑀳𑁄𑀦𑁆𑀢𑀺 𑀑𑀤𑀸𑀢𑀯𑀡𑁆𑀡𑀸 𑀑𑀤𑀸𑀢𑀯𑀢𑁆𑀣𑀸 𑀑𑀤𑀸𑀢𑀸𑀮𑀗𑁆𑀓𑀸𑀭𑀸. 𑀅𑀣 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑀤𑀳𑀭𑀸𑀦𑀁 𑀤𑀳𑀭𑀸𑀦𑀁 𑀮𑀺𑀘𑁆𑀙𑀯𑀻𑀦𑀁 𑀅𑀓𑁆𑀔𑁂𑀦 𑀅𑀓𑁆𑀔𑀁 𑀘𑀓𑁆𑀓𑁂𑀦 𑀘𑀓𑁆𑀓𑀁 𑀬𑀼𑀕𑁂𑀦 𑀬𑀼𑀕𑀁 𑀧𑀝𑀺𑀯𑀝𑁆𑀝𑁂𑀲𑀺 [𑀧𑀭𑀺𑀯𑀢𑁆𑀢𑁂𑀲𑀺 (𑀯𑀺. 𑀫𑀳𑀸𑀯𑀕𑁆𑀕)]. 𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀅𑀫𑁆𑀩𑀧𑀸𑀮𑀺𑀁 𑀕𑀡𑀺𑀓𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀺𑀁, 𑀚𑁂 𑀅𑀫𑁆𑀩𑀧𑀸𑀮𑀺 ¶ , 𑀤𑀳𑀭𑀸𑀦𑀁 𑀤𑀳𑀭𑀸𑀦𑀁 𑀮𑀺𑀘𑁆𑀙𑀯𑀻𑀦𑀁 𑀅𑀓𑁆𑀔𑁂𑀦 𑀅𑀓𑁆𑀔𑀁 𑀘𑀓𑁆𑀓𑁂𑀦 𑀘𑀓𑁆𑀓𑀁 𑀬𑀼𑀕𑁂𑀦 𑀬𑀼𑀕𑀁 𑀧𑀝𑀺𑀯𑀝𑁆𑀝𑁂𑀲𑀻’’𑀢𑀺? ‘‘𑀢𑀣𑀸 𑀳𑀺 𑀧𑀦 𑀫𑁂, 𑀅𑀬𑁆𑀬𑀧𑀼𑀢𑁆𑀢𑀸, 𑀪𑀕𑀯𑀸 𑀦𑀺𑀫𑀦𑁆𑀢𑀺𑀢𑁄 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. ‘‘𑀤𑁂𑀳𑀺, 𑀚𑁂 𑀅𑀫𑁆𑀩𑀧𑀸𑀮𑀺, 𑀏𑀢𑀁 [𑀏𑀓𑀁 (𑀓.)] 𑀪𑀢𑁆𑀢𑀁 𑀲𑀢𑀲𑀳𑀲𑁆𑀲𑁂𑀦𑀸’’𑀢𑀺. ‘‘𑀲𑀘𑁂𑀧𑀺 𑀫𑁂, 𑀅𑀬𑁆𑀬𑀧𑀼𑀢𑁆𑀢𑀸, 𑀯𑁂𑀲𑀸𑀮𑀺𑀁 𑀲𑀸𑀳𑀸𑀭𑀁 𑀤𑀲𑁆𑀲𑀣 [𑀤𑀚𑁆𑀚𑁂𑀬𑁆𑀬𑀸𑀣 (𑀯𑀺. 𑀫𑀳𑀸𑀯𑀕𑁆𑀕)], 𑀏𑀯𑀫𑀳𑀁 𑀢𑀁 [𑀏𑀯𑀫𑁆𑀧𑀺 𑀫𑀳𑀦𑁆𑀢𑀁 (𑀲𑁆𑀬𑀸.), 𑀏𑀯𑀁 𑀫𑀳𑀦𑁆𑀢𑀁 (𑀲𑀻. 𑀧𑀻.)] 𑀪𑀢𑁆𑀢𑀁 𑀦 𑀤𑀲𑁆𑀲𑀸𑀫𑀻’’𑀢𑀺 [𑀦𑁂𑀯 𑀤𑀚𑁆𑀚𑀸𑀳𑀁 𑀢𑀁 𑀪𑀢𑁆𑀢𑀦𑁆𑀢𑀺 (𑀯𑀺. 𑀫𑀳𑀸𑀯𑀕𑁆𑀕)]. 𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀅𑀗𑁆𑀕𑀼𑀮𑀺𑀁 𑀨𑁄𑀝𑁂𑀲𑀼𑀁 𑁋 ‘‘𑀚𑀺𑀢𑀫𑁆𑀳 [𑀚𑀺𑀢𑀫𑁆𑀳𑀸 (𑀩𑀳𑀽𑀲𑀼)] 𑀯𑀢 𑀪𑁄 𑀅𑀫𑁆𑀩𑀓𑀸𑀬, 𑀚𑀺𑀢𑀫𑁆𑀳 𑀯𑀢 𑀪𑁄 𑀅𑀫𑁆𑀩𑀓𑀸𑀬𑀸’’𑀢𑀺 [‘‘𑀚𑀺𑀢𑀫𑁆𑀳𑀸 𑀯𑀢 𑀪𑁄 𑀅𑀫𑁆𑀩𑀧𑀸𑀮𑀺𑀓𑀸𑀬 𑀯𑀜𑁆𑀘𑀺𑀢𑀫𑁆𑀳𑀸 𑀯𑀢 𑀪𑁄 𑀅𑀫𑁆𑀩𑀧𑀸𑀮𑀺𑀓𑀸𑀬𑀸’’𑀢𑀺 (𑀲𑁆𑀬𑀸.)].

𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀬𑁂𑀦 ¶ 𑀅𑀫𑁆𑀩𑀧𑀸𑀮𑀺𑀯𑀦𑀁 𑀢𑁂𑀦 𑀧𑀸𑀬𑀺𑀁𑀲𑀼. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀢𑁂 𑀮𑀺𑀘𑁆𑀙𑀯𑀻 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑁂. 𑀤𑀺𑀲𑁆𑀯𑀸𑀦 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀬𑁂𑀲𑀁 ¶ [𑀬𑁂𑀳𑀺 (𑀯𑀺. 𑀫𑀳𑀸𑀯𑀕𑁆𑀕)], 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀅𑀤𑀺𑀝𑁆𑀞𑀧𑀼𑀩𑁆𑀩𑀸, 𑀑𑀮𑁄𑀓𑁂𑀣, 𑀪𑀺𑀓𑁆𑀔𑀯𑁂, 𑀮𑀺𑀘𑁆𑀙𑀯𑀺𑀧𑀭𑀺𑀲𑀁; 𑀅𑀧𑀮𑁄𑀓𑁂𑀣, 𑀪𑀺𑀓𑁆𑀔𑀯𑁂 ¶ , 𑀮𑀺𑀘𑁆𑀙𑀯𑀺𑀧𑀭𑀺𑀲𑀁; 𑀉𑀧𑀲𑀁𑀳𑀭𑀣, 𑀪𑀺𑀓𑁆𑀔𑀯𑁂, 𑀮𑀺𑀘𑁆𑀙𑀯𑀺𑀧𑀭𑀺𑀲𑀁 𑁋 𑀢𑀸𑀯𑀢𑀺𑀁𑀲𑀲𑀤𑀺𑀲’’𑀦𑁆𑀢𑀺. 𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀬𑀸𑀯𑀢𑀺𑀓𑀸 𑀬𑀸𑀦𑀲𑁆𑀲 𑀪𑀽𑀫𑀺, 𑀬𑀸𑀦𑁂𑀦 𑀕𑀦𑁆𑀢𑁆𑀯𑀸, 𑀬𑀸𑀦𑀸 𑀧𑀘𑁆𑀘𑁄𑀭𑁄𑀳𑀺𑀢𑁆𑀯𑀸 𑀧𑀢𑁆𑀢𑀺𑀓𑀸𑀯 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀪𑀕𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑀸 𑀲𑀫𑀸𑀤𑀧𑀺𑀢𑀸 𑀲𑀫𑀼𑀢𑁆𑀢𑁂𑀚𑀺𑀢𑀸 𑀲𑀫𑁆𑀧𑀳𑀁𑀲𑀺𑀢𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑁂 𑀮𑀺𑀘𑁆𑀙𑀯𑀻 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀼𑀢𑁆𑀣𑀁 [𑀅𑀥𑀺𑀯𑀸𑀲𑀺𑀢𑀁 (𑀲𑁆𑀬𑀸.)] 𑀔𑁄 𑀫𑁂, 𑀮𑀺𑀘𑁆𑀙𑀯𑀻, 𑀲𑁆𑀯𑀸𑀢𑀦𑀸𑀬 𑀅𑀫𑁆𑀩𑀧𑀸𑀮𑀺𑀬𑀸 𑀕𑀡𑀺𑀓𑀸𑀬 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀅𑀗𑁆𑀕𑀼𑀮𑀺𑀁 𑀨𑁄𑀝𑁂𑀲𑀼𑀁 𑁋 ‘‘𑀚𑀺𑀢𑀫𑁆𑀳 𑀯𑀢 𑀪𑁄 𑀅𑀫𑁆𑀩𑀓𑀸𑀬, 𑀚𑀺𑀢𑀫𑁆𑀳 𑀯𑀢 𑀪𑁄 𑀅𑀫𑁆𑀩𑀓𑀸𑀬𑀸’’𑀢𑀺. 𑀅𑀣 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑁧𑁬𑁨. 𑀅𑀣 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀲𑀓𑁂 𑀆𑀭𑀸𑀫𑁂 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀓𑀸𑀮𑀁 ¶ 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀅𑀫𑁆𑀩𑀧𑀸𑀮𑀺𑀬𑀸 𑀕𑀡𑀺𑀓𑀸𑀬 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀺 𑀲𑀫𑁆𑀧𑀯𑀸𑀭𑁂𑀲𑀺. 𑀅𑀣 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑀪𑀕𑀯𑀦𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀅𑀜𑁆𑀜𑀢𑀭𑀁 𑀦𑀻𑀘𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 ¶ 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀅𑀫𑁆𑀩𑀧𑀸𑀮𑀻 𑀕𑀡𑀺𑀓𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀫𑀸𑀳𑀁, 𑀪𑀦𑁆𑀢𑁂, 𑀆𑀭𑀸𑀫𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’’𑀢𑀺. 𑀧𑀝𑀺𑀕𑁆𑀕𑀳𑁂𑀲𑀺 𑀪𑀕𑀯𑀸 𑀆𑀭𑀸𑀫𑀁. 𑀅𑀣 𑀔𑁄 𑀪𑀕𑀯𑀸 𑀅𑀫𑁆𑀩𑀧𑀸𑀮𑀺𑀁 𑀕𑀡𑀺𑀓𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 ¶ 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺. 𑀢𑀢𑁆𑀭𑀧𑀺 𑀲𑀼𑀤𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀦𑁆𑀢𑁄 𑀅𑀫𑁆𑀩𑀧𑀸𑀮𑀺𑀯𑀦𑁂 𑀏𑀢𑀤𑁂𑀯 𑀩𑀳𑀼𑀮𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁄𑀢𑀺 ¶ 𑁋 ‘‘𑀇𑀢𑀺 𑀲𑀻𑀮𑀁, 𑀇𑀢𑀺 𑀲𑀫𑀸𑀥𑀺, 𑀇𑀢𑀺 𑀧𑀜𑁆𑀜𑀸. 𑀲𑀻𑀮𑀧𑀭𑀺𑀪𑀸𑀯𑀺𑀢𑁄 𑀲𑀫𑀸𑀥𑀺 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄. 𑀲𑀫𑀸𑀥𑀺𑀧𑀭𑀺𑀪𑀸𑀯𑀺𑀢𑀸 𑀧𑀜𑁆𑀜𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸. 𑀧𑀜𑁆𑀜𑀸𑀧𑀭𑀺𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀲𑀫𑁆𑀫𑀤𑁂𑀯 𑀆𑀲𑀯𑁂𑀳𑀺 𑀯𑀺𑀫𑀼𑀘𑁆𑀘𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀸𑀲𑀯𑀸, 𑀪𑀯𑀸𑀲𑀯𑀸, 𑀅𑀯𑀺𑀚𑁆𑀚𑀸𑀲𑀯𑀸’’𑀢𑀺.

𑀯𑁂𑀴𑀼𑀯𑀕𑀸𑀫𑀯𑀲𑁆𑀲𑀽𑀧𑀕𑀫𑀦𑀁

𑁧𑁬𑁩. 𑀅𑀣 𑀔𑁄 𑀪𑀕𑀯𑀸 𑀅𑀫𑁆𑀩𑀧𑀸𑀮𑀺𑀯𑀦𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀯𑁂𑀴𑀼𑀯𑀕𑀸𑀫𑀓𑁄 [𑀩𑁂𑀴𑀼𑀯𑀕𑀸𑀫𑀓𑁄 (𑀲𑀻. 𑀧𑀻.)] 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 ¶ 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀯𑁂𑀴𑀼𑀯𑀕𑀸𑀫𑀓𑁄 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀯𑁂𑀴𑀼𑀯𑀕𑀸𑀫𑀓𑁂 𑀯𑀺𑀳𑀭𑀢𑀺. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀣 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀲𑀫𑀦𑁆𑀢𑀸 𑀯𑁂𑀲𑀸𑀮𑀺𑀁 𑀬𑀣𑀸𑀫𑀺𑀢𑁆𑀢𑀁 𑀬𑀣𑀸𑀲𑀦𑁆𑀤𑀺𑀝𑁆𑀞𑀁 𑀬𑀣𑀸𑀲𑀫𑁆𑀪𑀢𑁆𑀢𑀁 𑀯𑀲𑁆𑀲𑀁 𑀉𑀧𑁂𑀣 [𑀉𑀧𑀕𑀘𑁆𑀙𑀣 (𑀲𑁆𑀬𑀸.)]. 𑀅𑀳𑀁 𑀧𑀦 𑀇𑀥𑁂𑀯 𑀯𑁂𑀴𑀼𑀯𑀕𑀸𑀫𑀓𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀲𑀫𑀦𑁆𑀢𑀸 𑀯𑁂𑀲𑀸𑀮𑀺𑀁 𑀬𑀣𑀸𑀫𑀺𑀢𑁆𑀢𑀁 𑀬𑀣𑀸𑀲𑀦𑁆𑀤𑀺𑀝𑁆𑀞𑀁 𑀬𑀣𑀸𑀲𑀫𑁆𑀪𑀢𑁆𑀢𑀁 ¶ 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺𑀁𑀲𑀼. 𑀪𑀕𑀯𑀸 𑀧𑀦 𑀢𑀢𑁆𑀣𑁂𑀯 𑀯𑁂𑀴𑀼𑀯𑀕𑀸𑀫𑀓𑁂 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺.

𑁧𑁬𑁪. 𑀅𑀣 𑀔𑁄 𑀪𑀕𑀯𑀢𑁄 𑀯𑀲𑁆𑀲𑀽𑀧𑀕𑀢𑀲𑁆𑀲 𑀔𑀭𑁄 𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑀺, 𑀩𑀸𑀴𑁆𑀳𑀸 𑀯𑁂𑀤𑀦𑀸 𑀯𑀢𑁆𑀢𑀦𑁆𑀢𑀺 𑀫𑀸𑀭𑀡𑀦𑁆𑀢𑀺𑀓𑀸. 𑀢𑀸 𑀲𑀼𑀤𑀁 𑀪𑀕𑀯𑀸 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀅𑀥𑀺𑀯𑀸𑀲𑁂𑀲𑀺 𑀅𑀯𑀺𑀳𑀜𑁆𑀜𑀫𑀸𑀦𑁄. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀦 𑀔𑁄 𑀫𑁂𑀢𑀁 𑀧𑀢𑀺𑀭𑀽𑀧𑀁, 𑀬𑁆𑀯𑀸𑀳𑀁 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀉𑀧𑀝𑁆𑀞𑀸𑀓𑁂 𑀅𑀦𑀧𑀮𑁄𑀓𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬𑀁. 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀆𑀩𑀸𑀥𑀁 𑀯𑀻𑀭𑀺𑀬𑁂𑀦 𑀧𑀝𑀺𑀧𑀡𑀸𑀫𑁂𑀢𑁆𑀯𑀸 𑀚𑀻𑀯𑀺𑀢𑀲𑀗𑁆𑀔𑀸𑀭𑀁 𑀅𑀥𑀺𑀝𑁆𑀞𑀸𑀬 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀁 𑀆𑀩𑀸𑀥𑀁 𑀯𑀻𑀭𑀺𑀬𑁂𑀦 𑀧𑀝𑀺𑀧𑀡𑀸𑀫𑁂𑀢𑁆𑀯𑀸 𑀚𑀻𑀯𑀺𑀢𑀲𑀗𑁆𑀔𑀸𑀭𑀁 𑀅𑀥𑀺𑀝𑁆𑀞𑀸𑀬 𑀯𑀺𑀳𑀸𑀲𑀺. 𑀅𑀣 𑀔𑁄 𑀪𑀕𑀯𑀢𑁄 𑀲𑁄 𑀆𑀩𑀸𑀥𑁄 𑀧𑀝𑀺𑀧𑀲𑁆𑀲𑀫𑁆𑀪𑀺. 𑀅𑀣 𑀔𑁄 𑀪𑀕𑀯𑀸 𑀕𑀺𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 [𑀕𑀺𑀮𑀸𑀦𑀯𑀼𑀝𑁆𑀞𑀺𑀢𑁄 (𑀲𑀤𑁆𑀤𑀦𑀻𑀢𑀺)] 𑀅𑀘𑀺𑀭𑀯𑀼𑀝𑁆𑀞𑀺𑀢𑁄 𑀕𑁂𑀮𑀜𑁆𑀜𑀸 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑁆𑀫 𑀯𑀺𑀳𑀸𑀭𑀧𑀘𑁆𑀙𑀸𑀬𑀸𑀬𑀁 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 ¶ 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 ¶ 𑀏𑀢𑀤𑀯𑁄𑀘 𑁋 ‘‘𑀤𑀺𑀝𑁆𑀞𑁄 𑀫𑁂, 𑀪𑀦𑁆𑀢𑁂, 𑀪𑀕𑀯𑀢𑁄 𑀨𑀸𑀲𑀼; 𑀤𑀺𑀝𑁆𑀞𑀁 𑀫𑁂, 𑀪𑀦𑁆𑀢𑁂, 𑀪𑀕𑀯𑀢𑁄 𑀔𑀫𑀦𑀻𑀬𑀁, 𑀅𑀧𑀺 𑀘 𑀫𑁂, 𑀪𑀦𑁆𑀢𑁂, 𑀫𑀥𑀼𑀭𑀓𑀚𑀸𑀢𑁄 𑀯𑀺𑀬 𑀓𑀸𑀬𑁄. 𑀤𑀺𑀲𑀸𑀧𑀺 𑀫𑁂 𑀦 𑀧𑀓𑁆𑀔𑀸𑀬𑀦𑁆𑀢𑀺; 𑀥𑀫𑁆𑀫𑀸𑀧𑀺 𑀫𑀁 𑀦 𑀧𑀝𑀺𑀪𑀦𑁆𑀢𑀺 𑀪𑀕𑀯𑀢𑁄 𑀕𑁂𑀮𑀜𑁆𑀜𑁂𑀦, 𑀅𑀧𑀺 𑀘 𑀫𑁂, 𑀪𑀦𑁆𑀢𑁂, 𑀅𑀳𑁄𑀲𑀺 𑀓𑀸𑀘𑀺𑀤𑁂𑀯 𑀅𑀲𑁆𑀲𑀸𑀲𑀫𑀢𑁆𑀢𑀸 ¶ 𑁋 ‘𑀦 𑀢𑀸𑀯 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺, 𑀦 𑀬𑀸𑀯 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀆𑀭𑀩𑁆𑀪 𑀓𑀺𑀜𑁆𑀘𑀺𑀤𑁂𑀯 𑀉𑀤𑀸𑀳𑀭𑀢𑀻’’’𑀢𑀺.

𑁧𑁬𑁫. ‘‘𑀓𑀺𑀁 ¶ 𑀧𑀦𑀸𑀦𑀦𑁆𑀤, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀫𑀬𑀺 𑀧𑀘𑁆𑀘𑀸𑀲𑀻𑀲𑀢𑀺 [𑀧𑀘𑁆𑀘𑀸𑀲𑀺𑀁𑀲𑀢𑀺 (𑀲𑀻. 𑀲𑁆𑀬𑀸.)]? 𑀤𑁂𑀲𑀺𑀢𑁄, 𑀆𑀦𑀦𑁆𑀤, 𑀫𑀬𑀸 𑀥𑀫𑁆𑀫𑁄 𑀅𑀦𑀦𑁆𑀢𑀭𑀁 𑀅𑀩𑀸𑀳𑀺𑀭𑀁 𑀓𑀭𑀺𑀢𑁆𑀯𑀸. 𑀦𑀢𑁆𑀣𑀸𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑁂𑀲𑀼 𑀆𑀘𑀭𑀺𑀬𑀫𑀼𑀝𑁆𑀞𑀺. 𑀬𑀲𑁆𑀲 𑀦𑀽𑀦, 𑀆𑀦𑀦𑁆𑀤, 𑀏𑀯𑀫𑀲𑁆𑀲 𑁋 ‘𑀅𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻’𑀢𑀺 𑀯𑀸 ‘𑀫𑀫𑀼𑀤𑁆𑀤𑁂𑀲𑀺𑀓𑁄 𑀪𑀺𑀓𑁆𑀔𑀼𑀲𑀗𑁆𑀖𑁄’𑀢𑀺 𑀯𑀸, 𑀲𑁄 𑀦𑀽𑀦, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀆𑀭𑀩𑁆𑀪 𑀓𑀺𑀜𑁆𑀘𑀺𑀤𑁂𑀯 𑀉𑀤𑀸𑀳𑀭𑁂𑀬𑁆𑀬. 𑀢𑀣𑀸𑀕𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀦 𑀏𑀯𑀁 𑀳𑁄𑀢𑀺 𑁋 ‘𑀅𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻’𑀢𑀺 𑀯𑀸 ‘𑀫𑀫𑀼𑀤𑁆𑀤𑁂𑀲𑀺𑀓𑁄 𑀪𑀺𑀓𑁆𑀔𑀼𑀲𑀗𑁆𑀖𑁄’𑀢𑀺 𑀯𑀸. 𑀲𑀓𑀺𑀁 [𑀓𑀺𑀁 (𑀲𑀻. 𑀧𑀻.)], 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀆𑀭𑀩𑁆𑀪 𑀓𑀺𑀜𑁆𑀘𑀺𑀤𑁂𑀯 𑀉𑀤𑀸𑀳𑀭𑀺𑀲𑁆𑀲𑀢𑀺. 𑀅𑀳𑀁 𑀔𑁄 𑀧𑀦𑀸𑀦𑀦𑁆𑀤, 𑀏𑀢𑀭𑀳𑀺 𑀚𑀺𑀡𑁆𑀡𑁄 𑀯𑀼𑀤𑁆𑀥𑁄 𑀫𑀳𑀮𑁆𑀮𑀓𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄. 𑀆𑀲𑀻𑀢𑀺𑀓𑁄 𑀫𑁂 𑀯𑀬𑁄 𑀯𑀢𑁆𑀢𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀚𑀚𑁆𑀚𑀭𑀲𑀓𑀝𑀁 𑀯𑁂𑀞𑀫𑀺𑀲𑁆𑀲𑀓𑁂𑀦 [𑀯𑁂𑀴𑀼𑀫𑀺𑀲𑁆𑀲𑀓𑁂𑀦 (𑀲𑁆𑀬𑀸.), 𑀯𑁂𑀖𑀫𑀺𑀲𑁆𑀲𑀓𑁂𑀦 (𑀧𑀻.), 𑀯𑁂𑀥𑀫𑀺𑀲𑁆𑀲𑀓𑁂𑀦, 𑀯𑁂𑀔𑀫𑀺𑀲𑁆𑀲𑀓𑁂𑀦 (𑀓.)] 𑀬𑀸𑀧𑁂𑀢𑀺, 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀯𑁂𑀞𑀫𑀺𑀲𑁆𑀲𑀓𑁂𑀦 𑀫𑀜𑁆𑀜𑁂 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄 𑀬𑀸𑀧𑁂𑀢𑀺. 𑀬𑀲𑁆𑀫𑀺𑀁, 𑀆𑀦𑀦𑁆𑀤, 𑀲𑀫𑀬𑁂 𑀢𑀣𑀸𑀕𑀢𑁄 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀏𑀓𑀘𑁆𑀘𑀸𑀦𑀁 𑀯𑁂𑀤𑀦𑀸𑀦𑀁 𑀦𑀺𑀭𑁄𑀥𑀸 𑀅𑀦𑀺𑀫𑀺𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀨𑀸𑀲𑀼𑀢𑀭𑁄, 𑀆𑀦𑀦𑁆𑀤, 𑀢𑀲𑁆𑀫𑀺𑀁 𑀲𑀫𑀬𑁂 𑀢𑀣𑀸𑀕𑀢𑀲𑁆𑀲 ¶ 𑀓𑀸𑀬𑁄 𑀳𑁄𑀢𑀺. 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀅𑀢𑁆𑀢𑀤𑀻𑀧𑀸 𑀯𑀺𑀳𑀭𑀣 𑀅𑀢𑁆𑀢𑀲𑀭𑀡𑀸 𑀅𑀦𑀜𑁆𑀜𑀲𑀭𑀡𑀸, 𑀥𑀫𑁆𑀫𑀤𑀻𑀧𑀸 𑀥𑀫𑁆𑀫𑀲𑀭𑀡𑀸 𑀅𑀦𑀜𑁆𑀜𑀲𑀭𑀡𑀸. 𑀓𑀣𑀜𑁆𑀘𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀅𑀢𑁆𑀢𑀤𑀻𑀧𑁄 𑀯𑀺𑀳𑀭𑀢𑀺 𑀅𑀢𑁆𑀢𑀲𑀭𑀡𑁄 𑀅𑀦𑀜𑁆𑀜𑀲𑀭𑀡𑁄, 𑀥𑀫𑁆𑀫𑀤𑀻𑀧𑁄 𑀥𑀫𑁆𑀫𑀲𑀭𑀡𑁄 𑀅𑀦𑀜𑁆𑀜𑀲𑀭𑀡𑁄? 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀅𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂…𑀧𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀅𑀢𑁆𑀢𑀤𑀻𑀧𑁄 𑀯𑀺𑀳𑀭𑀢𑀺 𑀅𑀢𑁆𑀢𑀲𑀭𑀡𑁄 𑀅𑀦𑀜𑁆𑀜𑀲𑀭𑀡𑁄, 𑀥𑀫𑁆𑀫𑀤𑀻𑀧𑁄 𑀥𑀫𑁆𑀫𑀲𑀭𑀡𑁄 𑀅𑀦𑀜𑁆𑀜𑀲𑀭𑀡𑁄 ¶ . 𑀬𑁂 ¶ 𑀳𑀺 𑀓𑁂𑀘𑀺, 𑀆𑀦𑀦𑁆𑀤, 𑀏𑀢𑀭𑀳𑀺 𑀯𑀸 𑀫𑀫 𑀯𑀸 𑀅𑀘𑁆𑀘𑀬𑁂𑀦 𑀅𑀢𑁆𑀢𑀤𑀻𑀧𑀸 𑀯𑀺𑀳𑀭𑀺𑀲𑁆𑀲𑀦𑁆𑀢𑀺 𑀅𑀢𑁆𑀢𑀲𑀭𑀡𑀸 𑀅𑀦𑀜𑁆𑀜𑀲𑀭𑀡𑀸, 𑀥𑀫𑁆𑀫𑀤𑀻𑀧𑀸 𑀥𑀫𑁆𑀫𑀲𑀭𑀡𑀸 𑀅𑀦𑀜𑁆𑀜𑀲𑀭𑀡𑀸, 𑀢𑀫𑀢𑀕𑁆𑀕𑁂 𑀫𑁂 𑀢𑁂, 𑀆𑀦𑀦𑁆𑀤, 𑀪𑀺𑀓𑁆𑀔𑀽 𑀪𑀯𑀺𑀲𑁆𑀲𑀦𑁆𑀢𑀺 𑀬𑁂 𑀓𑁂𑀘𑀺 𑀲𑀺𑀓𑁆𑀔𑀸𑀓𑀸𑀫𑀸’’𑀢𑀺.

𑀤𑀼𑀢𑀺𑀬𑀪𑀸𑀡𑀯𑀸𑀭𑁄.

𑀦𑀺𑀫𑀺𑀢𑁆𑀢𑁄𑀪𑀸𑀲𑀓𑀣𑀸

𑁧𑁬𑁬. 𑀅𑀣 ¶ ¶ 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑁂𑀲𑀸𑀮𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀯𑁂𑀲𑀸𑀮𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀕𑀡𑁆𑀳𑀸𑀳𑀺, 𑀆𑀦𑀦𑁆𑀤, 𑀦𑀺𑀲𑀻𑀤𑀦𑀁, 𑀬𑁂𑀦 𑀘𑀸𑀧𑀸𑀮𑀁 𑀘𑁂𑀢𑀺𑀬𑀁 [𑀧𑀸𑀯𑀸𑀮𑀁 (𑀘𑁂𑀢𑀺𑀬𑀁 (𑀲𑁆𑀬𑀸.)] 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫 𑀤𑀺𑀯𑀸 𑀯𑀺𑀳𑀸𑀭𑀸𑀬𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀦𑀺𑀲𑀻𑀤𑀦𑀁 𑀆𑀤𑀸𑀬 𑀪𑀕𑀯𑀦𑁆𑀢𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺. 𑀅𑀣 ¶ 𑀔𑁄 𑀪𑀕𑀯𑀸 𑀬𑁂𑀦 𑀘𑀸𑀧𑀸𑀮𑀁 𑀘𑁂𑀢𑀺𑀬𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀆𑀬𑀲𑁆𑀫𑀸𑀧𑀺 𑀔𑁄 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑁧𑁬𑁭. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀭𑀫𑀡𑀻𑀬𑀸, 𑀆𑀦𑀦𑁆𑀤, 𑀯𑁂𑀲𑀸𑀮𑀻, 𑀭𑀫𑀡𑀻𑀬𑀁 𑀉𑀤𑁂𑀦𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀕𑁄𑀢𑀫𑀓𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀲𑀢𑁆𑀢𑀫𑁆𑀩𑀁 [𑀲𑀢𑁆𑀢𑀫𑁆𑀩𑀓𑀁 (𑀧𑀻.)] 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀩𑀳𑀼𑀧𑀼𑀢𑁆𑀢𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀲𑀸𑀭𑀦𑁆𑀤𑀤𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀘𑀸𑀧𑀸𑀮𑀁 𑀘𑁂𑀢𑀺𑀬𑀁. 𑀬𑀲𑁆𑀲 ¶ 𑀓𑀲𑁆𑀲𑀘𑀺, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀲𑁄 𑀆𑀓𑀗𑁆𑀔𑀫𑀸𑀦𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸. 𑀢𑀣𑀸𑀕𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀲𑁄 𑀆𑀓𑀗𑁆𑀔𑀫𑀸𑀦𑁄 [𑀆𑀓𑀗𑁆𑀔𑀫𑀸𑀦𑁄 (?)], 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸’’𑀢𑀺. 𑀏𑀯𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑀸 𑀑𑀴𑀸𑀭𑀺𑀓𑁂 𑀦𑀺𑀫𑀺𑀢𑁆𑀢𑁂 𑀓𑀬𑀺𑀭𑀫𑀸𑀦𑁂 𑀑𑀴𑀸𑀭𑀺𑀓𑁂 𑀑𑀪𑀸𑀲𑁂 𑀓𑀬𑀺𑀭𑀫𑀸𑀦𑁂 𑀦𑀸𑀲𑀓𑁆𑀔𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁; 𑀦 𑀪𑀕𑀯𑀦𑁆𑀢𑀁 𑀬𑀸𑀘𑀺 𑁋 ‘‘𑀢𑀺𑀝𑁆𑀞𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀓𑀧𑁆𑀧𑀁, 𑀢𑀺𑀝𑁆𑀞𑀢𑀼 𑀲𑀼𑀕𑀢𑁄 𑀓𑀧𑁆𑀧𑀁 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺, 𑀬𑀣𑀸 𑀢𑀁 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄. 𑀤𑀼𑀢𑀺𑀬𑀫𑁆𑀧𑀺 ¶ 𑀔𑁄 𑀪𑀕𑀯𑀸…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀭𑀫𑀡𑀻𑀬𑀸, 𑀆𑀦𑀦𑁆𑀤, 𑀯𑁂𑀲𑀸𑀮𑀻, 𑀭𑀫𑀡𑀻𑀬𑀁 𑀉𑀤𑁂𑀦𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀕𑁄𑀢𑀫𑀓𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀲𑀢𑁆𑀢𑀫𑁆𑀩𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀩𑀳𑀼𑀧𑀼𑀢𑁆𑀢𑀁 ¶ 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀲𑀸𑀭𑀦𑁆𑀤𑀤𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀘𑀸𑀧𑀸𑀮𑀁 𑀘𑁂𑀢𑀺𑀬𑀁. 𑀬𑀲𑁆𑀲 𑀓𑀲𑁆𑀲𑀘𑀺, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀲𑁄 𑀆𑀓𑀗𑁆𑀔𑀫𑀸𑀦𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸. 𑀢𑀣𑀸𑀕𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀲𑁄 𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸’’𑀢𑀺. 𑀏𑀯𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑀸 𑀑𑀴𑀸𑀭𑀺𑀓𑁂 𑀦𑀺𑀫𑀺𑀢𑁆𑀢𑁂 𑀓𑀬𑀺𑀭𑀫𑀸𑀦𑁂 𑀑𑀴𑀸𑀭𑀺𑀓𑁂 𑀑𑀪𑀸𑀲𑁂 𑀓𑀬𑀺𑀭𑀫𑀸𑀦𑁂 𑀦𑀸𑀲𑀓𑁆𑀔𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 ¶ ; 𑀦 𑀪𑀕𑀯𑀦𑁆𑀢𑀁 𑀬𑀸𑀘𑀺 𑁋 ‘‘𑀢𑀺𑀝𑁆𑀞𑀢𑀼 ¶ , 𑀪𑀦𑁆𑀢𑁂, 𑀪𑀕𑀯𑀸 𑀓𑀧𑁆𑀧𑀁, 𑀢𑀺𑀝𑁆𑀞𑀢𑀼 𑀲𑀼𑀕𑀢𑁄 𑀓𑀧𑁆𑀧𑀁 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺, 𑀬𑀣𑀸 𑀢𑀁 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀕𑀘𑁆𑀙 𑀢𑁆𑀯𑀁, 𑀆𑀦𑀦𑁆𑀤, 𑀬𑀲𑁆𑀲𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺.

𑀫𑀸𑀭𑀬𑀸𑀘𑀦𑀓𑀣𑀸

𑁧𑁬𑁮. 𑀅𑀣 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑁂 𑀆𑀦𑀦𑁆𑀤𑁂 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀫𑀸𑀭𑁄 𑀧𑀸𑀧𑀺𑀫𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀧𑀭𑀺𑀦𑀺𑀩𑁆𑀩𑀸𑀢𑀼𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼 𑀲𑀼𑀕𑀢𑁄, 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄 ¶ 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑁄. 𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸, 𑀪𑀦𑁆𑀢𑁂, 𑀪𑀕𑀯𑀢𑀸 𑀯𑀸𑀘𑀸 𑁋 ‘𑀦 𑀢𑀸𑀯𑀸𑀳𑀁, 𑀧𑀸𑀧𑀺𑀫, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀬𑀸𑀯 𑀫𑁂 𑀪𑀺𑀓𑁆𑀔𑀽 𑀦 𑀲𑀸𑀯𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀺 𑀤𑁂𑀲𑁂𑀲𑁆𑀲𑀦𑁆𑀢𑀺 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀺 𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀺 𑀯𑀺𑀯𑀭𑀺𑀲𑁆𑀲𑀦𑁆𑀢𑀺 𑀯𑀺𑀪𑀚𑀺𑀲𑁆𑀲𑀦𑁆𑀢𑀺 𑀉𑀢𑁆𑀢𑀸𑀦𑀻 [𑀉𑀢𑁆𑀢𑀸𑀦𑀺𑀁 (𑀓.), 𑀉𑀢𑁆𑀢𑀸𑀦𑀺 (𑀲𑀻. 𑀧𑀻.)] 𑀓𑀭𑀺𑀲𑁆𑀲𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀻’𑀢𑀺 ¶ . 𑀏𑀢𑀭𑀳𑀺 𑀔𑁄 𑀧𑀦, 𑀪𑀦𑁆𑀢𑁂, 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀲𑀸𑀯𑀓𑀸 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 ¶ 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀦𑁆𑀢𑀺 𑀤𑁂𑀲𑁂𑀦𑁆𑀢𑀺 𑀧𑀜𑁆𑀜𑀧𑁂𑀦𑁆𑀢𑀺 𑀧𑀝𑁆𑀞𑀧𑁂𑀦𑁆𑀢𑀺 𑀯𑀺𑀯𑀭𑀦𑁆𑀢𑀺 𑀯𑀺𑀪𑀚𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀧𑀭𑀺𑀦𑀺𑀩𑁆𑀩𑀸𑀢𑀼𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼 𑀲𑀼𑀕𑀢𑁄, 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑁄.

‘‘𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸, 𑀪𑀦𑁆𑀢𑁂, 𑀪𑀕𑀯𑀢𑀸 𑀯𑀸𑀘𑀸 𑁋 ‘𑀦 𑀢𑀸𑀯𑀸𑀳𑀁, 𑀧𑀸𑀧𑀺𑀫, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀬𑀸𑀯 𑀫𑁂 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀲𑀸𑀯𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑀺𑀬𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀺 𑀤𑁂𑀲𑁂𑀲𑁆𑀲𑀦𑁆𑀢𑀺 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀺 𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀺 𑀯𑀺𑀯𑀭𑀺𑀲𑁆𑀲𑀦𑁆𑀢𑀺 𑀯𑀺𑀪𑀚𑀺𑀲𑁆𑀲𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑀺𑀲𑁆𑀲𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀻’𑀢𑀺 ¶ . 𑀏𑀢𑀭𑀳𑀺 𑀔𑁄 𑀧𑀦, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀺𑀬𑁄 𑀪𑀕𑀯𑀢𑁄 𑀲𑀸𑀯𑀺𑀓𑀸 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑀺𑀬𑁄 ¶ , 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀦𑁆𑀢𑀺 𑀤𑁂𑀲𑁂𑀦𑁆𑀢𑀺 𑀧𑀜𑁆𑀜𑀧𑁂𑀦𑁆𑀢𑀺 𑀧𑀝𑁆𑀞𑀧𑁂𑀦𑁆𑀢𑀺 𑀯𑀺𑀯𑀭𑀦𑁆𑀢𑀺 𑀯𑀺𑀪𑀚𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀧𑀭𑀺𑀦𑀺𑀩𑁆𑀩𑀸𑀢𑀼𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼 𑀲𑀼𑀕𑀢𑁄, 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑁄.

‘‘𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸, 𑀪𑀦𑁆𑀢𑁂, 𑀪𑀕𑀯𑀢𑀸 𑀯𑀸𑀘𑀸 𑁋 ‘𑀦 𑀢𑀸𑀯𑀸𑀳𑀁, 𑀧𑀸𑀧𑀺𑀫, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀬𑀸𑀯 𑀫𑁂 𑀉𑀧𑀸𑀲𑀓𑀸 𑀦 𑀲𑀸𑀯𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀺 𑀤𑁂𑀲𑁂𑀲𑁆𑀲𑀦𑁆𑀢𑀺 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀺 𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀺 𑀯𑀺𑀯𑀭𑀺𑀲𑁆𑀲𑀦𑁆𑀢𑀺 𑀯𑀺𑀪𑀚𑀺𑀲𑁆𑀲𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑀺𑀲𑁆𑀲𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀻’𑀢𑀺. 𑀏𑀢𑀭𑀳𑀺 𑀔𑁄 𑀧𑀦, 𑀪𑀦𑁆𑀢𑁂, 𑀉𑀧𑀸𑀲𑀓𑀸 𑀪𑀕𑀯𑀢𑁄 𑀲𑀸𑀯𑀓𑀸 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀦𑁆𑀢𑀺 𑀤𑁂𑀲𑁂𑀦𑁆𑀢𑀺 𑀧𑀜𑁆𑀜𑀧𑁂𑀦𑁆𑀢𑀺 𑀧𑀝𑁆𑀞𑀧𑁂𑀦𑁆𑀢𑀺 𑀯𑀺𑀯𑀭𑀦𑁆𑀢𑀺 𑀯𑀺𑀪𑀚𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀧𑀭𑀺𑀦𑀺𑀩𑁆𑀩𑀸𑀢𑀼𑀤𑀸𑀦𑀺 ¶ , 𑀪𑀦𑁆𑀢𑁂, 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼 𑀲𑀼𑀕𑀢𑁄, 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄𑀤𑀸𑀦𑀺 ¶ , 𑀪𑀦𑁆𑀢𑁂, 𑀪𑀕𑀯𑀢𑁄.

‘‘𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸, 𑀪𑀦𑁆𑀢𑁂, 𑀪𑀕𑀯𑀢𑀸 𑀯𑀸𑀘𑀸 𑁋 ‘𑀦 𑀢𑀸𑀯𑀸𑀳𑀁, 𑀧𑀸𑀧𑀺𑀫 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀬𑀸𑀯 𑀫𑁂 𑀉𑀧𑀸𑀲𑀺𑀓𑀸 𑀦 𑀲𑀸𑀯𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑀺𑀬𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀺 𑀤𑁂𑀲𑁂𑀲𑁆𑀲𑀦𑁆𑀢𑀺 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀺 𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀺 𑀯𑀺𑀯𑀭𑀺𑀲𑁆𑀲𑀦𑁆𑀢𑀺 𑀯𑀺𑀪𑀚𑀺𑀲𑁆𑀲𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑀺𑀲𑁆𑀲𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀻’𑀢𑀺. 𑀏𑀢𑀭𑀳𑀺 𑀔𑁄 𑀧𑀦, 𑀪𑀦𑁆𑀢𑁂, 𑀉𑀧𑀸𑀲𑀺𑀓𑀸 𑀪𑀕𑀯𑀢𑁄 𑀲𑀸𑀯𑀺𑀓𑀸 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑀺𑀬𑁄, 𑀲𑀓𑀁 𑀆𑀘𑀭𑀺𑀬𑀓𑀁 ¶ 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀦𑁆𑀢𑀺 𑀤𑁂𑀲𑁂𑀦𑁆𑀢𑀺 𑀧𑀜𑁆𑀜𑀧𑁂𑀦𑁆𑀢𑀺 𑀧𑀝𑁆𑀞𑀧𑁂𑀦𑁆𑀢𑀺 𑀯𑀺𑀯𑀭𑀦𑁆𑀢𑀺 𑀯𑀺𑀪𑀚𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀧𑀭𑀺𑀦𑀺𑀩𑁆𑀩𑀸𑀢𑀼𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼 𑀲𑀼𑀕𑀢𑁄, 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑁄.

‘‘𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸, 𑀪𑀦𑁆𑀢𑁂, 𑀪𑀕𑀯𑀢𑀸 𑀯𑀸𑀘𑀸 𑁋 ‘𑀦 𑀢𑀸𑀯𑀸𑀳𑀁, 𑀧𑀸𑀧𑀺𑀫, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺 ¶ , 𑀬𑀸𑀯 𑀫𑁂 𑀇𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦 𑀇𑀤𑁆𑀥𑀁 𑀘𑁂𑀯 𑀪𑀯𑀺𑀲𑁆𑀲𑀢𑀺 𑀨𑀻𑀢𑀜𑁆𑀘 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁 𑀧𑀼𑀣𑀼𑀪𑀽𑀢𑀁 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢’𑀦𑁆𑀢𑀺. 𑀏𑀢𑀭𑀳𑀺 𑀔𑁄 𑀧𑀦, 𑀪𑀦𑁆𑀢𑁂, 𑀪𑀕𑀯𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀤𑁆𑀥𑀁 𑀘𑁂𑀯 𑀨𑀻𑀢𑀜𑁆𑀘 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁 𑀧𑀼𑀣𑀼𑀪𑀽𑀢𑀁, 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢𑀁. 𑀧𑀭𑀺𑀦𑀺𑀩𑁆𑀩𑀸𑀢𑀼𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼 𑀲𑀼𑀕𑀢𑁄, 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑁄’’𑀢𑀺 ¶ .

𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑁆𑀯𑀁, 𑀧𑀸𑀧𑀺𑀫, 𑀳𑁄𑀳𑀺, 𑀦 𑀘𑀺𑀭𑀁 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀺. 𑀇𑀢𑁄 𑀢𑀺𑀡𑁆𑀡𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀢𑀣𑀸𑀕𑀢𑁄 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’’𑀢𑀺.

𑀆𑀬𑀼𑀲𑀗𑁆𑀔𑀸𑀭𑀑𑀲𑁆𑀲𑀚𑁆𑀚𑀦𑀁

𑁧𑁬𑁯. 𑀅𑀣 𑀔𑁄 𑀪𑀕𑀯𑀸 𑀘𑀸𑀧𑀸𑀮𑁂 𑀘𑁂𑀢𑀺𑀬𑁂 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑀺. 𑀑𑀲𑁆𑀲𑀝𑁆𑀞𑁂 𑀘 𑀪𑀕𑀯𑀢𑀸 𑀆𑀬𑀼𑀲𑀗𑁆𑀔𑀸𑀭𑁂 𑀫𑀳𑀸𑀪𑀽𑀫𑀺𑀘𑀸𑀮𑁄 𑀅𑀳𑁄𑀲𑀺 𑀪𑀺𑀁𑀲𑀦𑀓𑁄 𑀲𑀮𑁄𑀫𑀳𑀁𑀲𑁄 [𑀮𑁄𑀫𑀳𑀁𑀲𑁄 (𑀲𑁆𑀬𑀸.)], 𑀤𑁂𑀯𑀤𑀼𑀦𑁆𑀤𑀼𑀪𑀺𑀬𑁄 [𑀤𑁂𑀯𑀤𑀼𑀤𑁆𑀭𑀪𑀺𑀬𑁄 (𑀓.)] 𑀘 𑀨𑀮𑀺𑀁𑀲𑀼 ¶ . 𑀅𑀣 𑀔𑁄 𑀪𑀕𑀯𑀸 ¶ 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀢𑀼𑀮𑀫𑀢𑀼𑀮𑀜𑁆𑀘 𑀲𑀫𑁆𑀪𑀯𑀁, 𑀪𑀯𑀲𑀗𑁆𑀔𑀸𑀭𑀫𑀯𑀲𑁆𑀲𑀚𑀺 𑀫𑀼𑀦𑀺;

𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀸𑀳𑀺𑀢𑁄, 𑀅𑀪𑀺𑀦𑁆𑀤𑀺 𑀓𑀯𑀘𑀫𑀺𑀯𑀢𑁆𑀢𑀲𑀫𑁆𑀪𑀯’’𑀦𑁆𑀢𑀺.

𑀫𑀳𑀸𑀪𑀽𑀫𑀺𑀘𑀸𑀮𑀳𑁂𑀢𑀼

𑁧𑁭𑁦. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀅𑀩𑁆𑀪𑀼𑀢𑀁 𑀯𑀢 𑀪𑁄, 𑀫𑀳𑀸 𑀯𑀢𑀸𑀬𑀁 𑀪𑀽𑀫𑀺𑀘𑀸𑀮𑁄; 𑀲𑀼𑀫𑀳𑀸 𑀯𑀢𑀸𑀬𑀁 𑀪𑀽𑀫𑀺𑀘𑀸𑀮𑁄 𑀪𑀺𑀁𑀲𑀦𑀓𑁄 𑀲𑀮𑁄𑀫𑀳𑀁𑀲𑁄; 𑀤𑁂𑀯𑀤𑀼𑀦𑁆𑀤𑀼𑀪𑀺𑀬𑁄 𑀘 𑀨𑀮𑀺𑀁𑀲𑀼. 𑀓𑁄 𑀦𑀼 𑀔𑁄 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬𑀸’’𑀢𑀺?

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂, 𑀫𑀳𑀸 𑀯𑀢𑀸𑀬𑀁, 𑀪𑀦𑁆𑀢𑁂, 𑀪𑀽𑀫𑀺𑀘𑀸𑀮𑁄; 𑀲𑀼𑀫𑀳𑀸 𑀯𑀢𑀸𑀬𑀁 ¶ , 𑀪𑀦𑁆𑀢𑁂, 𑀪𑀽𑀫𑀺𑀘𑀸𑀮𑁄 𑀪𑀺𑀁𑀲𑀦𑀓𑁄 𑀲𑀮𑁄𑀫𑀳𑀁𑀲𑁄; 𑀤𑁂𑀯𑀤𑀼𑀦𑁆𑀤𑀼𑀪𑀺𑀬𑁄 𑀘 𑀨𑀮𑀺𑀁𑀲𑀼. 𑀓𑁄 𑀦𑀼 𑀔𑁄, 𑀪𑀦𑁆𑀢𑁂 ¶ , 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬𑀸’’𑀢𑀺?

𑁧𑁭𑁧. ‘‘𑀅𑀝𑁆𑀞 𑀔𑁄 𑀇𑀫𑁂, 𑀆𑀦𑀦𑁆𑀤, 𑀳𑁂𑀢𑀽, 𑀅𑀝𑁆𑀞 𑀧𑀘𑁆𑀘𑀬𑀸 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬. 𑀓𑀢𑀫𑁂 𑀅𑀝𑁆𑀞? 𑀅𑀬𑀁, 𑀆𑀦𑀦𑁆𑀤, 𑀫𑀳𑀸𑀧𑀣𑀯𑀻 𑀉𑀤𑀓𑁂 𑀧𑀢𑀺𑀝𑁆𑀞𑀺𑀢𑀸, 𑀉𑀤𑀓𑀁 𑀯𑀸𑀢𑁂 𑀧𑀢𑀺𑀝𑁆𑀞𑀺𑀢𑀁, 𑀯𑀸𑀢𑁄 𑀆𑀓𑀸𑀲𑀝𑁆𑀞𑁄. 𑀳𑁄𑀢𑀺 𑀔𑁄 𑀲𑁄, 𑀆𑀦𑀦𑁆𑀤, 𑀲𑀫𑀬𑁄, 𑀬𑀁 𑀫𑀳𑀸𑀯𑀸𑀢𑀸 𑀯𑀸𑀬𑀦𑁆𑀢𑀺. 𑀫𑀳𑀸𑀯𑀸𑀢𑀸 𑀯𑀸𑀬𑀦𑁆𑀢𑀸 𑀉𑀤𑀓𑀁 𑀓𑀫𑁆𑀧𑁂𑀦𑁆𑀢𑀺. 𑀉𑀤𑀓𑀁 𑀓𑀫𑁆𑀧𑀺𑀢𑀁 𑀧𑀣𑀯𑀺𑀁 𑀓𑀫𑁆𑀧𑁂𑀢𑀺. 𑀅𑀬𑀁 𑀧𑀞𑀫𑁄 ¶ 𑀳𑁂𑀢𑀼 𑀧𑀞𑀫𑁄 𑀧𑀘𑁆𑀘𑀬𑁄 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬.

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀲𑀫𑀡𑁄 𑀯𑀸 𑀳𑁄𑀢𑀺 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀇𑀤𑁆𑀥𑀺𑀫𑀸 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄, 𑀤𑁂𑀯𑁄 𑀯𑀸 𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑁄, 𑀢𑀲𑁆𑀲 𑀧𑀭𑀺𑀢𑁆𑀢𑀸 𑀧𑀣𑀯𑀻𑀲𑀜𑁆𑀜𑀸 𑀪𑀸𑀯𑀺𑀢𑀸 𑀳𑁄𑀢𑀺, 𑀅𑀧𑁆𑀧𑀫𑀸𑀡𑀸 𑀆𑀧𑁄𑀲𑀜𑁆𑀜𑀸. 𑀲𑁄 𑀇𑀫𑀁 𑀧𑀣𑀯𑀺𑀁 𑀓𑀫𑁆𑀧𑁂𑀢𑀺 𑀲𑀗𑁆𑀓𑀫𑁆𑀧𑁂𑀢𑀺 𑀲𑀫𑁆𑀧𑀓𑀫𑁆𑀧𑁂𑀢𑀺 𑀲𑀫𑁆𑀧𑀯𑁂𑀥𑁂𑀢𑀺. 𑀅𑀬𑀁 𑀤𑀼𑀢𑀺𑀬𑁄 𑀳𑁂𑀢𑀼 𑀤𑀼𑀢𑀺𑀬𑁄 𑀧𑀘𑁆𑀘𑀬𑁄 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬.

‘‘𑀧𑀼𑀦 ¶ 𑀘𑀧𑀭𑀁, 𑀆𑀦𑀦𑁆𑀤, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑀓𑀸𑀬𑀸 𑀘𑀯𑀺𑀢𑁆𑀯𑀸 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀢𑀺, 𑀢𑀤𑀸𑀬𑀁 𑀧𑀣𑀯𑀻 𑀓𑀫𑁆𑀧𑀢𑀺 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀺. 𑀅𑀬𑀁 𑀢𑀢𑀺𑀬𑁄 𑀳𑁂𑀢𑀼 𑀢𑀢𑀺𑀬𑁄 𑀧𑀘𑁆𑀘𑀬𑁄 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬.

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀬𑀤𑀸 𑀩𑁄𑀥𑀺𑀲𑀢𑁆𑀢𑁄 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀸 𑀦𑀺𑀓𑁆𑀔𑀫𑀢𑀺, 𑀢𑀤𑀸𑀬𑀁 𑀧𑀣𑀯𑀻 𑀓𑀫𑁆𑀧𑀢𑀺 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀺. 𑀅𑀬𑀁 𑀘𑀢𑀼𑀢𑁆𑀣𑁄 𑀳𑁂𑀢𑀼 𑀘𑀢𑀼𑀢𑁆𑀣𑁄 𑀧𑀘𑁆𑀘𑀬𑁄 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬.

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀬𑀤𑀸 ¶ 𑀢𑀣𑀸𑀕𑀢𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺, 𑀢𑀤𑀸𑀬𑀁 𑀧𑀣𑀯𑀻 𑀓𑀫𑁆𑀧𑀢𑀺 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀺. 𑀅𑀬𑀁 𑀧𑀜𑁆𑀘𑀫𑁄 𑀳𑁂𑀢𑀼 𑀧𑀜𑁆𑀘𑀫𑁄 𑀧𑀘𑁆𑀘𑀬𑁄 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬.

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀬𑀤𑀸 𑀢𑀣𑀸𑀕𑀢𑁄 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺, 𑀢𑀤𑀸𑀬𑀁 𑀧𑀣𑀯𑀻 𑀓𑀫𑁆𑀧𑀢𑀺 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀺. 𑀅𑀬𑀁 𑀙𑀝𑁆𑀞𑁄 𑀳𑁂𑀢𑀼 𑀙𑀝𑁆𑀞𑁄 𑀧𑀘𑁆𑀘𑀬𑁄 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬.

‘‘𑀧𑀼𑀦 ¶ 𑀘𑀧𑀭𑀁, 𑀆𑀦𑀦𑁆𑀤, 𑀬𑀤𑀸 𑀢𑀣𑀸𑀕𑀢𑁄 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑁆𑀚𑀢𑀺, 𑀢𑀤𑀸𑀬𑀁 𑀧𑀣𑀯𑀻 𑀓𑀫𑁆𑀧𑀢𑀺 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀺. 𑀅𑀬𑀁 𑀲𑀢𑁆𑀢𑀫𑁄 𑀳𑁂𑀢𑀼 𑀲𑀢𑁆𑀢𑀫𑁄 𑀧𑀘𑁆𑀘𑀬𑁄 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬.

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀬𑀤𑀸 𑀢𑀣𑀸𑀕𑀢𑁄 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 ¶ 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀢𑀤𑀸𑀬𑀁 𑀧𑀣𑀯𑀻 𑀓𑀫𑁆𑀧𑀢𑀺 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀺. 𑀅𑀬𑀁 𑀅𑀝𑁆𑀞𑀫𑁄 𑀳𑁂𑀢𑀼 𑀅𑀝𑁆𑀞𑀫𑁄 𑀧𑀘𑁆𑀘𑀬𑁄 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬. 𑀇𑀫𑁂 𑀔𑁄, 𑀆𑀦𑀦𑁆𑀤, 𑀅𑀝𑁆𑀞 𑀳𑁂𑀢𑀽, 𑀅𑀝𑁆𑀞 𑀧𑀘𑁆𑀘𑀬𑀸 𑀫𑀳𑀢𑁄 𑀪𑀽𑀫𑀺𑀘𑀸𑀮𑀲𑁆𑀲 𑀧𑀸𑀢𑀼𑀪𑀸𑀯𑀸𑀬𑀸’’𑀢𑀺.

𑀅𑀝𑁆𑀞 𑀧𑀭𑀺𑀲𑀸

𑁧𑁭𑁨. ‘‘𑀅𑀝𑁆𑀞 𑀔𑁄 𑀇𑀫𑀸, 𑀆𑀦𑀦𑁆𑀤, 𑀧𑀭𑀺𑀲𑀸. 𑀓𑀢𑀫𑀸 𑀅𑀝𑁆𑀞? 𑀔𑀢𑁆𑀢𑀺𑀬𑀧𑀭𑀺𑀲𑀸, 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀸, 𑀕𑀳𑀧𑀢𑀺𑀧𑀭𑀺𑀲𑀸, 𑀲𑀫𑀡𑀧𑀭𑀺𑀲𑀸, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀧𑀭𑀺𑀲𑀸 [𑀘𑀸𑀢𑀼𑀫𑁆𑀫𑀳𑀸𑀭𑀸𑀚𑀺𑀓𑀧𑀭𑀺𑀲𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)], 𑀢𑀸𑀯𑀢𑀺𑀁𑀲𑀧𑀭𑀺𑀲𑀸, 𑀫𑀸𑀭𑀧𑀭𑀺𑀲𑀸, 𑀩𑁆𑀭𑀳𑁆𑀫𑀧𑀭𑀺𑀲𑀸. 𑀅𑀪𑀺𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳𑀁, 𑀆𑀦𑀦𑁆𑀤 ¶ , 𑀅𑀦𑁂𑀓𑀲𑀢𑀁 𑀔𑀢𑁆𑀢𑀺𑀬𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀺𑀢𑀸. 𑀢𑀢𑁆𑀭𑀧𑀺 𑀫𑀬𑀸 𑀲𑀦𑁆𑀦𑀺𑀲𑀺𑀦𑁆𑀦𑀧𑀼𑀩𑁆𑀩𑀁 𑀘𑁂𑀯 𑀲𑀮𑁆𑀮𑀧𑀺𑀢𑀧𑀼𑀩𑁆𑀩𑀜𑁆𑀘 𑀲𑀸𑀓𑀘𑁆𑀙𑀸 𑀘 𑀲𑀫𑀸𑀧𑀚𑁆𑀚𑀺𑀢𑀧𑀼𑀩𑁆𑀩𑀸 ¶ . 𑀢𑀢𑁆𑀣 𑀬𑀸𑀤𑀺𑀲𑀓𑁄 𑀢𑁂𑀲𑀁 𑀯𑀡𑁆𑀡𑁄 𑀳𑁄𑀢𑀺, 𑀢𑀸𑀤𑀺𑀲𑀓𑁄 𑀫𑀬𑁆𑀳𑀁 𑀯𑀡𑁆𑀡𑁄 𑀳𑁄𑀢𑀺. 𑀬𑀸𑀤𑀺𑀲𑀓𑁄 𑀢𑁂𑀲𑀁 𑀲𑀭𑁄 𑀳𑁄𑀢𑀺, 𑀢𑀸𑀤𑀺𑀲𑀓𑁄 𑀫𑀬𑁆𑀳𑀁 𑀲𑀭𑁄 𑀳𑁄𑀢𑀺. 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀫𑀺 𑀲𑀫𑀸𑀤𑀧𑁂𑀫𑀺 𑀲𑀫𑀼𑀢𑁆𑀢𑁂𑀚𑁂𑀫𑀺 𑀲𑀫𑁆𑀧𑀳𑀁𑀲𑁂𑀫𑀺. 𑀪𑀸𑀲𑀫𑀸𑀦𑀜𑁆𑀘 𑀫𑀁 𑀦 𑀚𑀸𑀦𑀦𑁆𑀢𑀺 𑁋 ‘𑀓𑁄 𑀦𑀼 𑀔𑁄 𑀅𑀬𑀁 𑀪𑀸𑀲𑀢𑀺 𑀤𑁂𑀯𑁄 𑀯𑀸 𑀫𑀦𑀼𑀲𑁆𑀲𑁄 𑀯𑀸’𑀢𑀺? 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀸𑀫𑀺. 𑀅𑀦𑁆𑀢𑀭𑀳𑀺𑀢𑀜𑁆𑀘 𑀫𑀁 𑀦 𑀚𑀸𑀦𑀦𑁆𑀢𑀺 𑁋 ‘𑀓𑁄 𑀦𑀼 𑀔𑁄 𑀅𑀬𑀁 𑀅𑀦𑁆𑀢𑀭𑀳𑀺𑀢𑁄 𑀤𑁂𑀯𑁄 𑀯𑀸 𑀫𑀦𑀼𑀲𑁆𑀲𑁄 𑀯𑀸’𑀢𑀺? 𑀅𑀪𑀺𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳𑀁, 𑀆𑀦𑀦𑁆𑀤, 𑀅𑀦𑁂𑀓𑀲𑀢𑀁 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀁…𑀧𑁂… 𑀕𑀳𑀧𑀢𑀺𑀧𑀭𑀺𑀲𑀁… 𑀲𑀫𑀡𑀧𑀭𑀺𑀲𑀁… 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀧𑀭𑀺𑀲𑀁… 𑀢𑀸𑀯𑀢𑀺𑀁𑀲𑀧𑀭𑀺𑀲𑀁… 𑀫𑀸𑀭𑀧𑀭𑀺𑀲𑀁… 𑀩𑁆𑀭𑀳𑁆𑀫𑀧𑀭𑀺𑀲𑀁 𑀉𑀧𑀲𑀗𑁆𑀓𑀫𑀺𑀢𑀸. 𑀢𑀢𑁆𑀭𑀧𑀺 𑀫𑀬𑀸 𑀲𑀦𑁆𑀦𑀺𑀲𑀺𑀦𑁆𑀦𑀧𑀼𑀩𑁆𑀩𑀁 𑀘𑁂𑀯 𑀲𑀮𑁆𑀮𑀧𑀺𑀢𑀧𑀼𑀩𑁆𑀩𑀜𑁆𑀘 𑀲𑀸𑀓𑀘𑁆𑀙𑀸 𑀘 𑀲𑀫𑀸𑀧𑀚𑁆𑀚𑀺𑀢𑀧𑀼𑀩𑁆𑀩𑀸. 𑀢𑀢𑁆𑀣 𑀬𑀸𑀤𑀺𑀲𑀓𑁄 𑀢𑁂𑀲𑀁 𑀯𑀡𑁆𑀡𑁄 𑀳𑁄𑀢𑀺, 𑀢𑀸𑀤𑀺𑀲𑀓𑁄 𑀫𑀬𑁆𑀳𑀁 𑀯𑀡𑁆𑀡𑁄 𑀳𑁄𑀢𑀺. 𑀬𑀸𑀤𑀺𑀲𑀓𑁄 𑀢𑁂𑀲𑀁 𑀲𑀭𑁄 𑀳𑁄𑀢𑀺, 𑀢𑀸𑀤𑀺𑀲𑀓𑁄 𑀫𑀬𑁆𑀳𑀁 𑀲𑀭𑁄 𑀳𑁄𑀢𑀺. 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀫𑀺 𑀲𑀫𑀸𑀤𑀧𑁂𑀫𑀺 𑀲𑀫𑀼𑀢𑁆𑀢𑁂𑀚𑁂𑀫𑀺 𑀲𑀫𑁆𑀧𑀳𑀁𑀲𑁂𑀫𑀺. 𑀪𑀸𑀲𑀫𑀸𑀦𑀜𑁆𑀘 𑀫𑀁 𑀦 𑀚𑀸𑀦𑀦𑁆𑀢𑀺 𑁋 ‘𑀓𑁄 𑀦𑀼 𑀔𑁄 𑀅𑀬𑀁 𑀪𑀸𑀲𑀢𑀺 𑀤𑁂𑀯𑁄 𑀯𑀸 𑀫𑀦𑀼𑀲𑁆𑀲𑁄 𑀯𑀸’𑀢𑀺? 𑀥𑀫𑁆𑀫𑀺𑀬𑀸 ¶ 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀅𑀦𑁆𑀢𑀭𑀥𑀸𑀬𑀸𑀫𑀺. 𑀅𑀦𑁆𑀢𑀭𑀳𑀺𑀢𑀜𑁆𑀘 𑀫𑀁 𑀦 𑀚𑀸𑀦𑀦𑁆𑀢𑀺 𑁋 ‘𑀓𑁄 𑀦𑀼 𑀔𑁄 𑀅𑀬𑀁 𑀅𑀦𑁆𑀢𑀭𑀳𑀺𑀢𑁄 𑀤𑁂𑀯𑁄 𑀯𑀸 𑀫𑀦𑀼𑀲𑁆𑀲𑁄 𑀯𑀸’𑀢𑀺? 𑀇𑀫𑀸 𑀔𑁄, 𑀆𑀦𑀦𑁆𑀤, 𑀅𑀝𑁆𑀞 𑀧𑀭𑀺𑀲𑀸.

𑀅𑀝𑁆𑀞 𑀅𑀪𑀺𑀪𑀸𑀬𑀢𑀦𑀸𑀦𑀺

𑁧𑁭𑁩. ‘‘𑀅𑀝𑁆𑀞 ¶ 𑀔𑁄 𑀇𑀫𑀸𑀦𑀺, 𑀆𑀦𑀦𑁆𑀤, 𑀅𑀪𑀺𑀪𑀸𑀬𑀢𑀦𑀸𑀦𑀺. 𑀓𑀢𑀫𑀸𑀦𑀺 𑀅𑀝𑁆𑀞 ¶ ? 𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀭𑀺𑀢𑁆𑀢𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺. ‘𑀢𑀸𑀦𑀺 𑀅𑀪𑀺𑀪𑀼𑀬𑁆𑀬 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻’𑀢𑀺 𑀏𑀯𑀁𑀲𑀜𑁆𑀜𑀻 𑀳𑁄𑀢𑀺. 𑀇𑀤𑀁 𑀧𑀞𑀫𑀁 𑀅𑀪𑀺𑀪𑀸𑀬𑀢𑀦𑀁.

‘‘𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀅𑀧𑁆𑀧𑀫𑀸𑀡𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺. ‘𑀢𑀸𑀦𑀺 𑀅𑀪𑀺𑀪𑀼𑀬𑁆𑀬 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻’𑀢𑀺 𑀏𑀯𑀁𑀲𑀜𑁆𑀜𑀻 𑀳𑁄𑀢𑀺. 𑀇𑀤𑀁 𑀤𑀼𑀢𑀺𑀬𑀁 𑀅𑀪𑀺𑀪𑀸𑀬𑀢𑀦𑀁.

‘‘𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀭𑀺𑀢𑁆𑀢𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺. ‘𑀢𑀸𑀦𑀺 𑀅𑀪𑀺𑀪𑀼𑀬𑁆𑀬 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻’𑀢𑀺 𑀏𑀯𑀁𑀲𑀜𑁆𑀜𑀻 𑀳𑁄𑀢𑀺. 𑀇𑀤𑀁 𑀢𑀢𑀺𑀬𑀁 𑀅𑀪𑀺𑀪𑀸𑀬𑀢𑀦𑀁.

‘‘𑀅𑀚𑁆𑀛𑀢𑁆𑀢𑀁 ¶ 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀅𑀧𑁆𑀧𑀫𑀸𑀡𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺. ‘𑀢𑀸𑀦𑀺 𑀅𑀪𑀺𑀪𑀼𑀬𑁆𑀬 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻’𑀢𑀺 𑀏𑀯𑀁𑀲𑀜𑁆𑀜𑀻 𑀳𑁄𑀢𑀺. 𑀇𑀤𑀁 𑀘𑀢𑀼𑀢𑁆𑀣𑀁 𑀅𑀪𑀺𑀪𑀸𑀬𑀢𑀦𑀁.

‘‘𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀦𑀻𑀮𑀸𑀦𑀺 𑀦𑀻𑀮𑀯𑀡𑁆𑀡𑀸𑀦𑀺 𑀦𑀻𑀮𑀦𑀺𑀤𑀲𑁆𑀲𑀦𑀸𑀦𑀺 𑀦𑀻𑀮𑀦𑀺𑀪𑀸𑀲𑀸𑀦𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀉𑀫𑀸𑀧𑀼𑀧𑁆𑀨𑀁 𑀦𑀻𑀮𑀁 𑀦𑀻𑀮𑀯𑀡𑁆𑀡𑀁 𑀦𑀻𑀮𑀦𑀺𑀤𑀲𑁆𑀲𑀦𑀁 𑀦𑀻𑀮𑀦𑀺𑀪𑀸𑀲𑀁. 𑀲𑁂𑀬𑁆𑀬𑀣𑀸 𑀯𑀸 𑀧𑀦 𑀢𑀁 𑀯𑀢𑁆𑀣𑀁 𑀩𑀸𑀭𑀸𑀡𑀲𑁂𑀬𑁆𑀬𑀓𑀁 𑀉𑀪𑀢𑁄𑀪𑀸𑀕𑀯𑀺𑀫𑀝𑁆𑀞𑀁 𑀦𑀻𑀮𑀁 𑀦𑀻𑀮𑀯𑀡𑁆𑀡𑀁 𑀦𑀻𑀮𑀦𑀺𑀤𑀲𑁆𑀲𑀦𑀁 𑀦𑀻𑀮𑀦𑀺𑀪𑀸𑀲𑀁. 𑀏𑀯𑀫𑁂𑀯 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀦𑀻𑀮𑀸𑀦𑀺 𑀦𑀻𑀮𑀯𑀡𑁆𑀡𑀸𑀦𑀺 𑀦𑀻𑀮𑀦𑀺𑀤𑀲𑁆𑀲𑀦𑀸𑀦𑀺 𑀦𑀻𑀮𑀦𑀺𑀪𑀸𑀲𑀸𑀦𑀺. ‘𑀢𑀸𑀦𑀺 𑀅𑀪𑀺𑀪𑀼𑀬𑁆𑀬 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻’𑀢𑀺 𑀏𑀯𑀁𑀲𑀜𑁆𑀜𑀻 𑀳𑁄𑀢𑀺. 𑀇𑀤𑀁 𑀧𑀜𑁆𑀘𑀫𑀁 𑀅𑀪𑀺𑀪𑀸𑀬𑀢𑀦𑀁.

‘‘𑀅𑀚𑁆𑀛𑀢𑁆𑀢𑀁 ¶ 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀻𑀢𑀸𑀦𑀺 𑀧𑀻𑀢𑀯𑀡𑁆𑀡𑀸𑀦𑀺 𑀧𑀻𑀢𑀦𑀺𑀤𑀲𑁆𑀲𑀦𑀸𑀦𑀺 𑀧𑀻𑀢𑀦𑀺𑀪𑀸𑀲𑀸𑀦𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀓𑀡𑀺𑀓𑀸𑀭𑀧𑀼𑀧𑁆𑀨𑀁 𑀧𑀻𑀢𑀁 𑀧𑀻𑀢𑀯𑀡𑁆𑀡𑀁 𑀧𑀻𑀢𑀦𑀺𑀤𑀲𑁆𑀲𑀦𑀁 𑀧𑀻𑀢𑀦𑀺𑀪𑀸𑀲𑀁. 𑀲𑁂𑀬𑁆𑀬𑀣𑀸 ¶ 𑀯𑀸 𑀧𑀦 𑀢𑀁 𑀯𑀢𑁆𑀣𑀁 𑀩𑀸𑀭𑀸𑀡𑀲𑁂𑀬𑁆𑀬𑀓𑀁 𑀉𑀪𑀢𑁄𑀪𑀸𑀕𑀯𑀺𑀫𑀝𑁆𑀞𑀁 𑀧𑀻𑀢𑀁 𑀧𑀻𑀢𑀯𑀡𑁆𑀡𑀁 𑀧𑀻𑀢𑀦𑀺𑀤𑀲𑁆𑀲𑀦𑀁 𑀧𑀻𑀢𑀦𑀺𑀪𑀸𑀲𑀁. 𑀏𑀯𑀫𑁂𑀯 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀻𑀢𑀸𑀦𑀺 𑀧𑀻𑀢𑀯𑀡𑁆𑀡𑀸𑀦𑀺 𑀧𑀻𑀢𑀦𑀺𑀤𑀲𑁆𑀲𑀦𑀸𑀦𑀺 𑀧𑀻𑀢𑀦𑀺𑀪𑀸𑀲𑀸𑀦𑀺. ‘𑀢𑀸𑀦𑀺 𑀅𑀪𑀺𑀪𑀼𑀬𑁆𑀬 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻’𑀢𑀺 𑀏𑀯𑀁𑀲𑀜𑁆𑀜𑀻 𑀳𑁄𑀢𑀺. 𑀇𑀤𑀁 𑀙𑀝𑁆𑀞𑀁 𑀅𑀪𑀺𑀪𑀸𑀬𑀢𑀦𑀁.

‘‘𑀅𑀚𑁆𑀛𑀢𑁆𑀢𑀁 ¶ 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀮𑁄𑀳𑀺𑀢𑀓𑀸𑀦𑀺 𑀮𑁄𑀳𑀺𑀢𑀓𑀯𑀡𑁆𑀡𑀸𑀦𑀺 𑀮𑁄𑀳𑀺𑀢𑀓𑀦𑀺𑀤𑀲𑁆𑀲𑀦𑀸𑀦𑀺 𑀮𑁄𑀳𑀺𑀢𑀓𑀦𑀺𑀪𑀸𑀲𑀸𑀦𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀦𑁆𑀥𑀼𑀚𑀻𑀯𑀓𑀧𑀼𑀧𑁆𑀨𑀁 𑀮𑁄𑀳𑀺𑀢𑀓𑀁 𑀮𑁄𑀳𑀺𑀢𑀓𑀯𑀡𑁆𑀡𑀁 𑀮𑁄𑀳𑀺𑀢𑀓𑀦𑀺𑀤𑀲𑁆𑀲𑀦𑀁 𑀮𑁄𑀳𑀺𑀢𑀓𑀦𑀺𑀪𑀸𑀲𑀁. 𑀲𑁂𑀬𑁆𑀬𑀣𑀸 𑀯𑀸 𑀧𑀦 𑀢𑀁 𑀯𑀢𑁆𑀣𑀁 𑀩𑀸𑀭𑀸𑀡𑀲𑁂𑀬𑁆𑀬𑀓𑀁 𑀉𑀪𑀢𑁄𑀪𑀸𑀕𑀯𑀺𑀫𑀝𑁆𑀞𑀁 𑀮𑁄𑀳𑀺𑀢𑀓𑀁 𑀮𑁄𑀳𑀺𑀢𑀓𑀯𑀡𑁆𑀡𑀁 𑀮𑁄𑀳𑀺𑀢𑀓𑀦𑀺𑀤𑀲𑁆𑀲𑀦𑀁 𑀮𑁄𑀳𑀺𑀢𑀓𑀦𑀺𑀪𑀸𑀲𑀁. 𑀏𑀯𑀫𑁂𑀯 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀮𑁄𑀳𑀺𑀢𑀓𑀸𑀦𑀺 𑀮𑁄𑀳𑀺𑀢𑀓𑀯𑀡𑁆𑀡𑀸𑀦𑀺 𑀮𑁄𑀳𑀺𑀢𑀓𑀦𑀺𑀤𑀲𑁆𑀲𑀦𑀸𑀦𑀺 𑀮𑁄𑀳𑀺𑀢𑀓𑀦𑀺𑀪𑀸𑀲𑀸𑀦𑀺. ‘𑀢𑀸𑀦𑀺 𑀅𑀪𑀺𑀪𑀼𑀬𑁆𑀬 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻’𑀢𑀺 𑀏𑀯𑀁𑀲𑀜𑁆𑀜𑀻 𑀳𑁄𑀢𑀺. 𑀇𑀤𑀁 𑀲𑀢𑁆𑀢𑀫𑀁 𑀅𑀪𑀺𑀪𑀸𑀬𑀢𑀦𑀁.

‘‘𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀑𑀤𑀸𑀢𑀸𑀦𑀺 𑀑𑀤𑀸𑀢𑀯𑀡𑁆𑀡𑀸𑀦𑀺 𑀑𑀤𑀸𑀢𑀦𑀺𑀤𑀲𑁆𑀲𑀦𑀸𑀦𑀺 𑀑𑀤𑀸𑀢𑀦𑀺𑀪𑀸𑀲𑀸𑀦𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀑𑀲𑀥𑀺𑀢𑀸𑀭𑀓𑀸 ¶ 𑀑𑀤𑀸𑀢𑀸 𑀑𑀤𑀸𑀢𑀯𑀡𑁆𑀡𑀸 𑀑𑀤𑀸𑀢𑀦𑀺𑀤𑀲𑁆𑀲𑀦𑀸 𑀑𑀤𑀸𑀢𑀦𑀺𑀪𑀸𑀲𑀸. 𑀲𑁂𑀬𑁆𑀬𑀣𑀸 𑀯𑀸 𑀧𑀦 𑀢𑀁 𑀯𑀢𑁆𑀣𑀁 𑀩𑀸𑀭𑀸𑀡𑀲𑁂𑀬𑁆𑀬𑀓𑀁 𑀉𑀪𑀢𑁄𑀪𑀸𑀕𑀯𑀺𑀫𑀝𑁆𑀞𑀁 𑀑𑀤𑀸𑀢𑀁 𑀑𑀤𑀸𑀢𑀯𑀡𑁆𑀡𑀁 𑀑𑀤𑀸𑀢𑀦𑀺𑀤𑀲𑁆𑀲𑀦𑀁 𑀑𑀤𑀸𑀢𑀦𑀺𑀪𑀸𑀲𑀁. 𑀏𑀯𑀫𑁂𑀯 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀑𑀤𑀸𑀢𑀸𑀦𑀺 𑀑𑀤𑀸𑀢𑀯𑀡𑁆𑀡𑀸𑀦𑀺 𑀑𑀤𑀸𑀢𑀦𑀺𑀤𑀲𑁆𑀲𑀦𑀸𑀦𑀺 𑀑𑀤𑀸𑀢𑀦𑀺𑀪𑀸𑀲𑀸𑀦𑀺. ‘𑀢𑀸𑀦𑀺 𑀅𑀪𑀺𑀪𑀼𑀬𑁆𑀬 𑀚𑀸𑀦𑀸𑀫𑀺 𑀧𑀲𑁆𑀲𑀸𑀫𑀻’𑀢𑀺 𑀏𑀯𑀁𑀲𑀜𑁆𑀜𑀻 𑀳𑁄𑀢𑀺. 𑀇𑀤𑀁 𑀅𑀝𑁆𑀞𑀫𑀁 𑀅𑀪𑀺𑀪𑀸𑀬𑀢𑀦𑀁 ¶ . 𑀇𑀫𑀸𑀦𑀺 𑀔𑁄, 𑀆𑀦𑀦𑁆𑀤, 𑀅𑀝𑁆𑀞 𑀅𑀪𑀺𑀪𑀸𑀬𑀢𑀦𑀸𑀦𑀺.

𑀅𑀝𑁆𑀞 𑀯𑀺𑀫𑁄𑀓𑁆𑀔𑀸

𑁧𑁭𑁪. ‘‘𑀅𑀝𑁆𑀞 𑀔𑁄 𑀇𑀫𑁂, 𑀆𑀦𑀦𑁆𑀤, 𑀯𑀺𑀫𑁄𑀓𑁆𑀔𑀸. 𑀓𑀢𑀫𑁂 𑀅𑀝𑁆𑀞? 𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺, 𑀅𑀬𑀁 𑀧𑀞𑀫𑁄 𑀯𑀺𑀫𑁄𑀓𑁆𑀔𑁄. 𑀅𑀚𑁆𑀛𑀢𑁆𑀢𑀁 ¶ 𑀅𑀭𑀽𑀧𑀲𑀜𑁆𑀜𑀻 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺, 𑀅𑀬𑀁 𑀤𑀼𑀢𑀺𑀬𑁄 𑀯𑀺𑀫𑁄𑀓𑁆𑀔𑁄. 𑀲𑀼𑀪𑀦𑁆𑀢𑁂𑀯 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀅𑀬𑀁 𑀢𑀢𑀺𑀬𑁄 𑀯𑀺𑀫𑁄𑀓𑁆𑀔𑁄. 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘𑀅𑀦𑀦𑁆𑀢𑁄 𑀆𑀓𑀸𑀲𑁄’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀬𑀁 𑀘𑀢𑀼𑀢𑁆𑀣𑁄 𑀯𑀺𑀫𑁄𑀓𑁆𑀔𑁄. 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀬𑀁 𑀧𑀜𑁆𑀘𑀫𑁄 𑀯𑀺𑀫𑁄𑀓𑁆𑀔𑁄. 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀦𑀢𑁆𑀣𑀺 𑀓𑀺𑀜𑁆𑀘𑀻’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀬𑀁 𑀙𑀝𑁆𑀞𑁄 𑀯𑀺𑀫𑁄𑀓𑁆𑀔𑁄. 𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀲𑀢𑁆𑀢𑀫𑁄 𑀯𑀺𑀫𑁄𑀓𑁆𑀔𑁄. 𑀲𑀩𑁆𑀩𑀲𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀅𑀬𑀁 𑀅𑀝𑁆𑀞𑀫𑁄 𑀯𑀺𑀫𑁄𑀓𑁆𑀔𑁄. 𑀇𑀫𑁂 𑀔𑁄, 𑀆𑀦𑀦𑁆𑀤, 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸.

𑁧𑁭𑁫. ‘‘𑀏𑀓𑀫𑀺𑀤𑀸𑀳𑀁 ¶ , 𑀆𑀦𑀦𑁆𑀤, 𑀲𑀫𑀬𑀁 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀸𑀫𑀺 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄. 𑀅𑀣 𑀔𑁄, 𑀆𑀦𑀦𑁆𑀤, 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄, 𑀆𑀦𑀦𑁆𑀤, 𑀫𑀸𑀭𑁄 𑀧𑀸𑀧𑀺𑀫𑀸 𑀫𑀁 ¶ 𑀏𑀢𑀤𑀯𑁄𑀘 𑁋 ‘𑀧𑀭𑀺𑀦𑀺𑀩𑁆𑀩𑀸𑀢𑀼𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸; 𑀧𑀭𑀺𑀦𑀺𑀩𑁆𑀩𑀸𑀢𑀼 𑀲𑀼𑀕𑀢𑁄, 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑁄’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀅𑀳𑀁, 𑀆𑀦𑀦𑁆𑀤, 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀏𑀢𑀤𑀯𑁄𑀘𑀁 𑁋

‘‘‘𑀦 𑀢𑀸𑀯𑀸𑀳𑀁, 𑀧𑀸𑀧𑀺𑀫, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀬𑀸𑀯 𑀫𑁂 𑀪𑀺𑀓𑁆𑀔𑀽 𑀦 𑀲𑀸𑀯𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 ¶ 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀺 𑀤𑁂𑀲𑁂𑀲𑁆𑀲𑀦𑁆𑀢𑀺 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀺 𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀺 ¶ 𑀯𑀺𑀯𑀭𑀺𑀲𑁆𑀲𑀦𑁆𑀢𑀺 𑀯𑀺𑀪𑀚𑀺𑀲𑁆𑀲𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑀺𑀲𑁆𑀲𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀺.

‘‘‘𑀦 𑀢𑀸𑀯𑀸𑀳𑀁, 𑀧𑀸𑀧𑀺𑀫, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀬𑀸𑀯 𑀫𑁂 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀲𑀸𑀯𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑀺𑀬𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀺 𑀤𑁂𑀲𑁂𑀲𑁆𑀲𑀦𑁆𑀢𑀺 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀺 𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀺 𑀯𑀺𑀯𑀭𑀺𑀲𑁆𑀲𑀦𑁆𑀢𑀺 𑀯𑀺𑀪𑀚𑀺𑀲𑁆𑀲𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑀺𑀲𑁆𑀲𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 ¶ 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀺.

‘‘‘𑀦 𑀢𑀸𑀯𑀸𑀳𑀁, 𑀧𑀸𑀧𑀺𑀫, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀬𑀸𑀯 𑀫𑁂 𑀉𑀧𑀸𑀲𑀓𑀸 𑀦 𑀲𑀸𑀯𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀺 𑀤𑁂𑀲𑁂𑀲𑁆𑀲𑀦𑁆𑀢𑀺 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀺 𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀺 𑀯𑀺𑀯𑀭𑀺𑀲𑁆𑀲𑀦𑁆𑀢𑀺 𑀯𑀺𑀪𑀚𑀺𑀲𑁆𑀲𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑀺𑀲𑁆𑀲𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀺.

‘‘‘𑀦 𑀢𑀸𑀯𑀸𑀳𑀁, 𑀧𑀸𑀧𑀺𑀫, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀬𑀸𑀯 𑀫𑁂 𑀉𑀧𑀸𑀲𑀺𑀓𑀸 𑀦 𑀲𑀸𑀯𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑀺𑀬𑁄, 𑀲𑀓𑀁 𑀆𑀘𑀭𑀺𑀬𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀺 𑀤𑁂𑀲𑁂𑀲𑁆𑀲𑀦𑁆𑀢𑀺 𑀧𑀜𑁆𑀜𑀧𑁂𑀲𑁆𑀲𑀦𑁆𑀢𑀺 𑀧𑀝𑁆𑀞𑀧𑁂𑀲𑁆𑀲𑀦𑁆𑀢𑀺 𑀯𑀺𑀯𑀭𑀺𑀲𑁆𑀲𑀦𑁆𑀢𑀺 𑀯𑀺𑀪𑀚𑀺𑀲𑁆𑀲𑀦𑁆𑀢𑀺 𑀉𑀢𑁆𑀢𑀸𑀦𑀻𑀓𑀭𑀺𑀲𑁆𑀲𑀦𑁆𑀢𑀺, 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀺.

‘‘‘𑀦 ¶ 𑀢𑀸𑀯𑀸𑀳𑀁, 𑀧𑀸𑀧𑀺𑀫, 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀬𑀸𑀯 𑀫𑁂 𑀇𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦 𑀇𑀤𑁆𑀥𑀜𑁆𑀘𑁂𑀯 𑀪𑀯𑀺𑀲𑁆𑀲𑀢𑀺 𑀨𑀻𑀢𑀜𑁆𑀘 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁 𑀧𑀼𑀣𑀼𑀪𑀽𑀢𑀁 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢’𑀦𑁆𑀢𑀺.

𑁧𑁭𑁬. ‘‘𑀇𑀤𑀸𑀦𑁂𑀯 𑀔𑁄, 𑀆𑀦𑀦𑁆𑀤, 𑀅𑀚𑁆𑀚 𑀘𑀸𑀧𑀸𑀮𑁂 𑀘𑁂𑀢𑀺𑀬𑁂 𑀫𑀸𑀭𑁄 𑀧𑀸𑀧𑀺𑀫𑀸 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄, 𑀆𑀦𑀦𑁆𑀤, 𑀫𑀸𑀭𑁄 𑀧𑀸𑀧𑀺𑀫𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀧𑀭𑀺𑀦𑀺𑀩𑁆𑀩𑀸𑀢𑀼𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼 𑀲𑀼𑀕𑀢𑁄, 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑁄. 𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸, 𑀪𑀦𑁆𑀢𑁂, 𑀪𑀕𑀯𑀢𑀸 𑀯𑀸𑀘𑀸 𑁋 ‘‘𑀦 𑀢𑀸𑀯𑀸𑀳𑀁, 𑀧𑀸𑀧𑀺𑀫 ¶ , 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺 ¶ , 𑀬𑀸𑀯 𑀫𑁂 𑀪𑀺𑀓𑁆𑀔𑀽 𑀦 𑀲𑀸𑀯𑀓𑀸 𑀪𑀯𑀺𑀲𑁆𑀲𑀦𑁆𑀢𑀺…𑀧𑁂… 𑀬𑀸𑀯 𑀫𑁂 𑀪𑀺𑀓𑁆𑀔𑀼𑀦𑀺𑀬𑁄 𑀦 𑀲𑀸𑀯𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺…𑀧𑁂… 𑀬𑀸𑀯 𑀫𑁂 𑀉𑀧𑀸𑀲𑀓𑀸 𑀦 𑀲𑀸𑀯𑀓𑀸 𑀪𑀯𑀺𑀲𑁆𑀲𑀦𑁆𑀢𑀺…𑀧𑁂… 𑀬𑀸𑀯 𑀫𑁂 𑀉𑀧𑀸𑀲𑀺𑀓𑀸 𑀦 𑀲𑀸𑀯𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺…𑀧𑁂… 𑀬𑀸𑀯 𑀫𑁂 𑀇𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦 𑀇𑀤𑁆𑀥𑀜𑁆𑀘𑁂𑀯 𑀪𑀯𑀺𑀲𑁆𑀲𑀢𑀺 𑀨𑀻𑀢𑀜𑁆𑀘 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁 𑀧𑀼𑀣𑀼𑀪𑀽𑀢𑀁, 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢’’𑀦𑁆𑀢𑀺. 𑀏𑀢𑀭𑀳𑀺 𑀔𑁄 𑀧𑀦, 𑀪𑀦𑁆𑀢𑁂, 𑀪𑀕𑀯𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 ¶ 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁 𑀧𑀼𑀣𑀼𑀪𑀽𑀢𑀁, 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢𑀁. 𑀧𑀭𑀺𑀦𑀺𑀩𑁆𑀩𑀸𑀢𑀼𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼 𑀲𑀼𑀕𑀢𑁄, 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑁄’𑀢𑀺.

𑁧𑁭𑁭. ‘‘𑀏𑀯𑀁 𑀯𑀼𑀢𑁆𑀢𑁂, 𑀅𑀳𑀁, 𑀆𑀦𑀦𑁆𑀤, 𑀫𑀸𑀭𑀁 𑀧𑀸𑀧𑀺𑀫𑀦𑁆𑀢𑀁 𑀏𑀢𑀤𑀯𑁄𑀘𑀁 𑁋 ‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑁆𑀯𑀁, 𑀧𑀸𑀧𑀺𑀫, 𑀳𑁄𑀳𑀺, 𑀦𑀘𑀺𑀭𑀁 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀺. 𑀇𑀢𑁄 𑀢𑀺𑀡𑁆𑀡𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀢𑀣𑀸𑀕𑀢𑁄 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’𑀢𑀺. 𑀇𑀤𑀸𑀦𑁂𑀯 𑀔𑁄, 𑀆𑀦𑀦𑁆𑀤, 𑀅𑀚𑁆𑀚 𑀘𑀸𑀧𑀸𑀮𑁂 𑀘𑁂𑀢𑀺𑀬𑁂 𑀢𑀣𑀸𑀕𑀢𑁂𑀦 𑀲𑀢𑁂𑀦 𑀲𑀫𑁆𑀧𑀚𑀸𑀦𑁂𑀦 𑀆𑀬𑀼𑀲𑀗𑁆𑀔𑀸𑀭𑁄 𑀑𑀲𑁆𑀲𑀝𑁆𑀞𑁄’’𑀢𑀺.

𑀆𑀦𑀦𑁆𑀤𑀬𑀸𑀘𑀦𑀓𑀣𑀸

𑁧𑁭𑁮. 𑀏𑀯𑀁 ¶ 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀢𑀺𑀝𑁆𑀞𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀓𑀧𑁆𑀧𑀁, 𑀢𑀺𑀝𑁆𑀞𑀢𑀼 𑀲𑀼𑀕𑀢𑁄 𑀓𑀧𑁆𑀧𑀁 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺.

‘‘𑀅𑀮𑀁𑀤𑀸𑀦𑀺, 𑀆𑀦𑀦𑁆𑀤. 𑀫𑀸 𑀢𑀣𑀸𑀕𑀢𑀁 𑀬𑀸𑀘𑀺, 𑀅𑀓𑀸𑀮𑁄𑀤𑀸𑀦𑀺, 𑀆𑀦𑀦𑁆𑀤, 𑀢𑀣𑀸𑀕𑀢𑀁 𑀬𑀸𑀘𑀦𑀸𑀬𑀸’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀢𑀺𑀝𑁆𑀞𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀓𑀧𑁆𑀧𑀁, 𑀢𑀺𑀝𑁆𑀞𑀢𑀼 𑀲𑀼𑀕𑀢𑁄 𑀓𑀧𑁆𑀧𑀁 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺.

‘‘𑀲𑀤𑁆𑀤𑀳𑀲𑀺 ¶ 𑀢𑁆𑀯𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀩𑁄𑀥𑀺’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀅𑀣 𑀓𑀺𑀜𑁆𑀘𑀭𑀳𑀺 𑀢𑁆𑀯𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑀁 𑀬𑀸𑀯𑀢𑀢𑀺𑀬𑀓𑀁 𑀅𑀪𑀺𑀦𑀺𑀧𑁆𑀧𑀻𑀴𑁂𑀲𑀻’’𑀢𑀺? ‘‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀬𑀲𑁆𑀲 𑀓𑀲𑁆𑀲𑀘𑀺, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀲𑁄 𑀆𑀓𑀗𑁆𑀔𑀫𑀸𑀦𑁄 ¶ 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸. 𑀢𑀣𑀸𑀕𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸. 𑀲𑁄 ¶ 𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸’’’𑀢𑀺. ‘‘𑀲𑀤𑁆𑀤𑀳𑀲𑀺 𑀢𑁆𑀯𑀁, 𑀆𑀦𑀦𑁆𑀤𑀸’’𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’. ‘‘𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀢𑀼𑀬𑁆𑀳𑁂𑀯𑁂𑀢𑀁 𑀤𑀼𑀓𑁆𑀓𑀝𑀁, 𑀢𑀼𑀬𑁆𑀳𑁂𑀯𑁂𑀢𑀁 𑀅𑀧𑀭𑀤𑁆𑀥𑀁, 𑀬𑀁 𑀢𑁆𑀯𑀁 𑀢𑀣𑀸𑀕𑀢𑁂𑀦 𑀏𑀯𑀁 𑀑𑀴𑀸𑀭𑀺𑀓𑁂 𑀦𑀺𑀫𑀺𑀢𑁆𑀢𑁂 𑀓𑀬𑀺𑀭𑀫𑀸𑀦𑁂 𑀑𑀴𑀸𑀭𑀺𑀓𑁂 𑀑𑀪𑀸𑀲𑁂 𑀓𑀬𑀺𑀭𑀫𑀸𑀦𑁂 𑀦𑀸𑀲𑀓𑁆𑀔𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁, 𑀦 𑀢𑀣𑀸𑀕𑀢𑀁 𑀬𑀸𑀘𑀺 𑁋 ‘𑀢𑀺𑀝𑁆𑀞𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀓𑀧𑁆𑀧𑀁, 𑀢𑀺𑀝𑁆𑀞𑀢𑀼 𑀲𑀼𑀕𑀢𑁄 𑀓𑀧𑁆𑀧𑀁 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺. 𑀲𑀘𑁂 𑀢𑁆𑀯𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑀁 𑀬𑀸𑀘𑁂𑀬𑁆𑀬𑀸𑀲𑀺, 𑀤𑁆𑀯𑁂𑀯 𑀢𑁂 𑀯𑀸𑀘𑀸 𑀢𑀣𑀸𑀕𑀢𑁄 𑀧𑀝𑀺𑀓𑁆𑀔𑀺𑀧𑁂𑀬𑁆𑀬, 𑀅𑀣 𑀢𑀢𑀺𑀬𑀓𑀁 𑀅𑀥𑀺𑀯𑀸𑀲𑁂𑀬𑁆𑀬. 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀢𑀼𑀬𑁆𑀳𑁂𑀯𑁂𑀢𑀁 𑀤𑀼𑀓𑁆𑀓𑀝𑀁, 𑀢𑀼𑀬𑁆𑀳𑁂𑀯𑁂𑀢𑀁 𑀅𑀧𑀭𑀤𑁆𑀥𑀁.

𑁧𑁭𑁯. ‘‘𑀏𑀓𑀫𑀺𑀤𑀸𑀳𑀁, 𑀆𑀦𑀦𑁆𑀤, 𑀲𑀫𑀬𑀁 𑀭𑀸𑀚𑀕𑀳𑁂 𑀯𑀺𑀳𑀭𑀸𑀫𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀢𑀢𑁆𑀭𑀸𑀧𑀺 𑀔𑁄 𑀢𑀸𑀳𑀁, 𑀆𑀦𑀦𑁆𑀤, 𑀆𑀫𑀦𑁆𑀢𑁂𑀲𑀺𑀁 ¶ 𑁋 ‘𑀭𑀫𑀡𑀻𑀬𑀁, 𑀆𑀦𑀦𑁆𑀤, 𑀭𑀸𑀚𑀕𑀳𑀁, 𑀭𑀫𑀡𑀻𑀬𑁄, 𑀆𑀦𑀦𑁆𑀤, 𑀕𑀺𑀚𑁆𑀛𑀓𑀽𑀝𑁄 𑀧𑀩𑁆𑀩𑀢𑁄. 𑀬𑀲𑁆𑀲 𑀓𑀲𑁆𑀲𑀘𑀺, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀲𑁄 𑀆𑀓𑀗𑁆𑀔𑀫𑀸𑀦𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸. 𑀢𑀣𑀸𑀕𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀲𑁄 𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 ¶ 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸’𑀢𑀺. 𑀏𑀯𑀫𑁆𑀧𑀺 𑀔𑁄 𑀢𑁆𑀯𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑁂𑀦 𑀑𑀴𑀸𑀭𑀺𑀓𑁂 𑀦𑀺𑀫𑀺𑀢𑁆𑀢𑁂 𑀓𑀬𑀺𑀭𑀫𑀸𑀦𑁂 𑀑𑀴𑀸𑀭𑀺𑀓𑁂 𑀑𑀪𑀸𑀲𑁂 𑀓𑀬𑀺𑀭𑀫𑀸𑀦𑁂 𑀦𑀸𑀲𑀓𑁆𑀔𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁, 𑀦 𑀢𑀣𑀸𑀕𑀢𑀁 𑀬𑀸𑀘𑀺 𑁋 ‘𑀢𑀺𑀝𑁆𑀞𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀓𑀧𑁆𑀧𑀁, 𑀢𑀺𑀝𑁆𑀞𑀢𑀼 𑀲𑀼𑀕𑀢𑁄 𑀓𑀧𑁆𑀧𑀁 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’𑀦𑁆𑀢𑀺. 𑀲𑀘𑁂 𑀢𑁆𑀯𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑀁 𑀬𑀸𑀘𑁂𑀬𑁆𑀬𑀸𑀲𑀺, 𑀤𑁆𑀯𑁂 𑀢𑁂 𑀯𑀸𑀘𑀸 𑀢𑀣𑀸𑀕𑀢𑁄 𑀧𑀝𑀺𑀓𑁆𑀔𑀺𑀧𑁂𑀬𑁆𑀬, 𑀅𑀣 𑀢𑀢𑀺𑀬𑀓𑀁 𑀅𑀥𑀺𑀯𑀸𑀲𑁂𑀬𑁆𑀬. 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀢𑀼𑀬𑁆𑀳𑁂𑀯𑁂𑀢𑀁 𑀤𑀼𑀓𑁆𑀓𑀝𑀁, 𑀢𑀼𑀬𑁆𑀳𑁂𑀯𑁂𑀢𑀁 𑀅𑀧𑀭𑀤𑁆𑀥𑀁.

𑁧𑁮𑁦. ‘‘𑀏𑀓𑀫𑀺𑀤𑀸𑀳𑀁, 𑀆𑀦𑀦𑁆𑀤, 𑀲𑀫𑀬𑀁 𑀢𑀢𑁆𑀣𑁂𑀯 𑀭𑀸𑀚𑀕𑀳𑁂 𑀯𑀺𑀳𑀭𑀸𑀫𑀺 𑀕𑁄𑀢𑀫𑀦𑀺𑀕𑁆𑀭𑁄𑀥𑁂…𑀧𑁂… 𑀢𑀢𑁆𑀣𑁂𑀯 𑀭𑀸𑀚𑀕𑀳𑁂 𑀯𑀺𑀳𑀭𑀸𑀫𑀺 𑀘𑁄𑀭𑀧𑀧𑀸𑀢𑁂… 𑀢𑀢𑁆𑀣𑁂𑀯 𑀭𑀸𑀚𑀕𑀳𑁂 𑀯𑀺𑀳𑀭𑀸𑀫𑀺 𑀯𑁂𑀪𑀸𑀭𑀧𑀲𑁆𑀲𑁂 𑀲𑀢𑁆𑀢𑀧𑀡𑁆𑀡𑀺𑀕𑀼𑀳𑀸𑀬𑀁… 𑀢𑀢𑁆𑀣𑁂𑀯 𑀭𑀸𑀚𑀕𑀳𑁂 𑀯𑀺𑀳𑀭𑀸𑀫𑀺 𑀇𑀲𑀺𑀕𑀺𑀮𑀺𑀧𑀲𑁆𑀲𑁂 𑀓𑀸𑀴𑀲𑀺𑀮𑀸𑀬𑀁… 𑀢𑀢𑁆𑀣𑁂𑀯 𑀭𑀸𑀚𑀕𑀳𑁂 𑀯𑀺𑀳𑀭𑀸𑀫𑀺 ¶ 𑀲𑀻𑀢𑀯𑀦𑁂 𑀲𑀧𑁆𑀧𑀲𑁄𑀡𑁆𑀟𑀺𑀓𑀧𑀩𑁆𑀪𑀸𑀭𑁂… 𑀢𑀢𑁆𑀣𑁂𑀯 𑀭𑀸𑀚𑀕𑀳𑁂 𑀯𑀺𑀳𑀭𑀸𑀫𑀺 𑀢𑀧𑁄𑀤𑀸𑀭𑀸𑀫𑁂… 𑀢𑀢𑁆𑀣𑁂𑀯 𑀭𑀸𑀚𑀕𑀳𑁂 𑀯𑀺𑀳𑀭𑀸𑀫𑀺 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂… 𑀢𑀢𑁆𑀣𑁂𑀯 𑀭𑀸𑀚𑀕𑀳𑁂 𑀯𑀺𑀳𑀭𑀸𑀫𑀺 𑀚𑀻𑀯𑀓𑀫𑁆𑀩𑀯𑀦𑁂… 𑀢𑀢𑁆𑀣𑁂𑀯 𑀭𑀸𑀚𑀕𑀳𑁂 𑀯𑀺𑀳𑀭𑀸𑀫𑀺 𑀫𑀤𑁆𑀤𑀓𑀼𑀘𑁆𑀙𑀺𑀲𑁆𑀫𑀺𑀁 𑀫𑀺𑀕𑀤𑀸𑀬𑁂 ¶ 𑀢𑀢𑁆𑀭𑀸𑀧𑀺 𑀔𑁄 𑀢𑀸𑀳𑀁, 𑀆𑀦𑀦𑁆𑀤, 𑀆𑀫𑀦𑁆𑀢𑁂𑀲𑀺𑀁 𑁋 ‘𑀭𑀫𑀡𑀻𑀬𑀁, 𑀆𑀦𑀦𑁆𑀤, 𑀭𑀸𑀚𑀕𑀳𑀁, 𑀭𑀫𑀡𑀻𑀬𑁄 𑀕𑀺𑀚𑁆𑀛𑀓𑀽𑀝𑁄 𑀧𑀩𑁆𑀩𑀢𑁄, 𑀭𑀫𑀡𑀻𑀬𑁄 𑀕𑁄𑀢𑀫𑀦𑀺𑀕𑁆𑀭𑁄𑀥𑁄, 𑀭𑀫𑀡𑀻𑀬𑁄 𑀘𑁄𑀭𑀧𑀧𑀸𑀢𑁄, 𑀭𑀫𑀡𑀻𑀬𑀸 𑀯𑁂𑀪𑀸𑀭𑀧𑀲𑁆𑀲𑁂 𑀲𑀢𑁆𑀢𑀧𑀡𑁆𑀡𑀺𑀕𑀼𑀳𑀸, 𑀭𑀫𑀡𑀻𑀬𑀸 𑀇𑀲𑀺𑀕𑀺𑀮𑀺𑀧𑀲𑁆𑀲𑁂 𑀓𑀸𑀴𑀲𑀺𑀮𑀸, 𑀭𑀫𑀡𑀻𑀬𑁄 𑀲𑀻𑀢𑀯𑀦𑁂 𑀲𑀧𑁆𑀧𑀲𑁄𑀡𑁆𑀟𑀺𑀓𑀧𑀩𑁆𑀪𑀸𑀭𑁄 ¶ , 𑀭𑀫𑀡𑀻𑀬𑁄 𑀢𑀧𑁄𑀤𑀸𑀭𑀸𑀫𑁄, 𑀭𑀫𑀡𑀻𑀬𑁄 𑀯𑁂𑀴𑀼𑀯𑀦𑁂 ¶ 𑀓𑀮𑀦𑁆𑀤𑀓𑀦𑀺𑀯𑀸𑀧𑁄, 𑀭𑀫𑀡𑀻𑀬𑀁 𑀚𑀻𑀯𑀓𑀫𑁆𑀩𑀯𑀦𑀁, 𑀭𑀫𑀡𑀻𑀬𑁄 𑀫𑀤𑁆𑀤𑀓𑀼𑀘𑁆𑀙𑀺𑀲𑁆𑀫𑀺𑀁 𑀫𑀺𑀕𑀤𑀸𑀬𑁄. 𑀬𑀲𑁆𑀲 𑀓𑀲𑁆𑀲𑀘𑀺, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸…𑀧𑁂… 𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸’𑀢𑀺. 𑀏𑀯𑀫𑁆𑀧𑀺 𑀔𑁄 𑀢𑁆𑀯𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑁂𑀦 𑀑𑀴𑀸𑀭𑀺𑀓𑁂 𑀦𑀺𑀫𑀺𑀢𑁆𑀢𑁂 𑀓𑀬𑀺𑀭𑀫𑀸𑀦𑁂 𑀑𑀴𑀸𑀭𑀺𑀓𑁂 𑀑𑀪𑀸𑀲𑁂 𑀓𑀬𑀺𑀭𑀫𑀸𑀦𑁂 𑀦𑀸𑀲𑀓𑁆𑀔𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁, 𑀦 𑀢𑀣𑀸𑀕𑀢𑀁 𑀬𑀸𑀘𑀺 𑁋 ‘𑀢𑀺𑀝𑁆𑀞𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀓𑀧𑁆𑀧𑀁, 𑀢𑀺𑀝𑁆𑀞𑀢𑀼 𑀲𑀼𑀕𑀢𑁄 𑀓𑀧𑁆𑀧𑀁 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’𑀦𑁆𑀢𑀺. 𑀲𑀘𑁂 𑀢𑁆𑀯𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑀁 𑀬𑀸𑀘𑁂𑀬𑁆𑀬𑀸𑀲𑀺, 𑀤𑁆𑀯𑁂𑀯 𑀢𑁂 𑀯𑀸𑀘𑀸 𑀢𑀣𑀸𑀕𑀢𑁄 𑀧𑀝𑀺𑀓𑁆𑀔𑀺𑀧𑁂𑀬𑁆𑀬, 𑀅𑀣 𑀢𑀢𑀺𑀬𑀓𑀁 𑀅𑀥𑀺𑀯𑀸𑀲𑁂𑀬𑁆𑀬. 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀢𑀼𑀬𑁆𑀳𑁂𑀯𑁂𑀢𑀁 𑀤𑀼𑀓𑁆𑀓𑀝𑀁, 𑀢𑀼𑀬𑁆𑀳𑁂𑀯𑁂𑀢𑀁 𑀅𑀧𑀭𑀤𑁆𑀥𑀁.

𑁧𑁮𑁧. ‘‘𑀏𑀓𑀫𑀺𑀤𑀸𑀳𑀁, 𑀆𑀦𑀦𑁆𑀤, 𑀲𑀫𑀬𑀁 𑀇𑀥𑁂𑀯 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀸𑀫𑀺 𑀉𑀤𑁂𑀦𑁂 𑀘𑁂𑀢𑀺𑀬𑁂. 𑀢𑀢𑁆𑀭𑀸𑀧𑀺 𑀔𑁄 𑀢𑀸𑀳𑀁, 𑀆𑀦𑀦𑁆𑀤, 𑀆𑀫𑀦𑁆𑀢𑁂𑀲𑀺𑀁 𑁋 ‘𑀭𑀫𑀡𑀻𑀬𑀸, 𑀆𑀦𑀦𑁆𑀤, 𑀯𑁂𑀲𑀸𑀮𑀻, 𑀭𑀫𑀡𑀻𑀬𑀁 𑀉𑀤𑁂𑀦𑀁 𑀘𑁂𑀢𑀺𑀬𑀁. 𑀬𑀲𑁆𑀲 𑀓𑀲𑁆𑀲𑀘𑀺, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀲𑁄 𑀆𑀓𑀗𑁆𑀔𑀫𑀸𑀦𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸. 𑀢𑀣𑀸𑀕𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 ¶ 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀲𑁄 𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸’𑀢𑀺. 𑀏𑀯𑀫𑁆𑀧𑀺 𑀔𑁄 𑀢𑁆𑀯𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑁂𑀦 𑀑𑀴𑀸𑀭𑀺𑀓𑁂 𑀦𑀺𑀫𑀺𑀢𑁆𑀢𑁂 𑀓𑀬𑀺𑀭𑀫𑀸𑀦𑁂 𑀑𑀴𑀸𑀭𑀺𑀓𑁂 𑀑𑀪𑀸𑀲𑁂 𑀓𑀬𑀺𑀭𑀫𑀸𑀦𑁂 𑀦𑀸𑀲𑀓𑁆𑀔𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁, 𑀦 𑀢𑀣𑀸𑀕𑀢𑀁 𑀬𑀸𑀘𑀺 𑁋 ‘𑀢𑀺𑀝𑁆𑀞𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀓𑀧𑁆𑀧𑀁, 𑀢𑀺𑀝𑁆𑀞𑀢𑀼 𑀲𑀼𑀕𑀢𑁄 𑀓𑀧𑁆𑀧𑀁 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’𑀦𑁆𑀢𑀺. 𑀲𑀘𑁂 𑀢𑁆𑀯𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑀁 𑀬𑀸𑀘𑁂𑀬𑁆𑀬𑀸𑀲𑀺, 𑀤𑁆𑀯𑁂𑀯 𑀢𑁂 𑀯𑀸𑀘𑀸 𑀢𑀣𑀸𑀕𑀢𑁄 𑀧𑀝𑀺𑀓𑁆𑀔𑀺𑀧𑁂𑀬𑁆𑀬, 𑀅𑀣 𑀢𑀢𑀺𑀬𑀓𑀁 𑀅𑀥𑀺𑀯𑀸𑀲𑁂𑀬𑁆𑀬, 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀢𑀼𑀬𑁆𑀳𑁂𑀯𑁂𑀢𑀁 𑀤𑀼𑀓𑁆𑀓𑀝𑀁, 𑀢𑀼𑀬𑁆𑀳𑁂𑀯𑁂𑀢𑀁 𑀅𑀧𑀭𑀤𑁆𑀥𑀁.

𑁧𑁮𑁨. ‘‘𑀏𑀓𑀫𑀺𑀤𑀸𑀳𑀁 ¶ ¶ , 𑀆𑀦𑀦𑁆𑀤, 𑀲𑀫𑀬𑀁 𑀇𑀥𑁂𑀯 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀸𑀫𑀺 𑀕𑁄𑀢𑀫𑀓𑁂 𑀘𑁂𑀢𑀺𑀬𑁂 ¶ …𑀧𑁂… 𑀇𑀥𑁂𑀯 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀸𑀫𑀺 𑀲𑀢𑁆𑀢𑀫𑁆𑀩𑁂 𑀘𑁂𑀢𑀺𑀬𑁂… 𑀇𑀥𑁂𑀯 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀸𑀫𑀺 𑀩𑀳𑀼𑀧𑀼𑀢𑁆𑀢𑁂 𑀘𑁂𑀢𑀺𑀬𑁂… 𑀇𑀥𑁂𑀯 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀸𑀫𑀺 𑀲𑀸𑀭𑀦𑁆𑀤𑀤𑁂 𑀘𑁂𑀢𑀺𑀬𑁂… 𑀇𑀤𑀸𑀦𑁂𑀯 𑀔𑁄 𑀢𑀸𑀳𑀁, 𑀆𑀦𑀦𑁆𑀤, 𑀅𑀚𑁆𑀚 𑀘𑀸𑀧𑀸𑀮𑁂 𑀘𑁂𑀢𑀺𑀬𑁂 𑀆𑀫𑀦𑁆𑀢𑁂𑀲𑀺𑀁 𑁋 ‘𑀭𑀫𑀡𑀻𑀬𑀸, 𑀆𑀦𑀦𑁆𑀤, 𑀯𑁂𑀲𑀸𑀮𑀻, 𑀭𑀫𑀡𑀻𑀬𑀁 𑀉𑀤𑁂𑀦𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀕𑁄𑀢𑀫𑀓𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀲𑀢𑁆𑀢𑀫𑁆𑀩𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀩𑀳𑀼𑀧𑀼𑀢𑁆𑀢𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀲𑀸𑀭𑀦𑁆𑀤𑀤𑀁 𑀘𑁂𑀢𑀺𑀬𑀁, 𑀭𑀫𑀡𑀻𑀬𑀁 𑀘𑀸𑀧𑀸𑀮𑀁 𑀘𑁂𑀢𑀺𑀬𑀁. 𑀬𑀲𑁆𑀲 𑀓𑀲𑁆𑀲𑀘𑀺, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 ¶ 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀲𑁄 𑀆𑀓𑀗𑁆𑀔𑀫𑀸𑀦𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸. 𑀢𑀣𑀸𑀕𑀢𑀲𑁆𑀲 𑀔𑁄, 𑀆𑀦𑀦𑁆𑀤, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀬𑀸𑀦𑀻𑀓𑀢𑀸 𑀯𑀢𑁆𑀣𑀼𑀓𑀢𑀸 𑀅𑀦𑀼𑀝𑁆𑀞𑀺𑀢𑀸 𑀧𑀭𑀺𑀘𑀺𑀢𑀸 𑀲𑀼𑀲𑀫𑀸𑀭𑀤𑁆𑀥𑀸, 𑀲𑁄 𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀓𑀧𑁆𑀧𑀁 𑀯𑀸 𑀢𑀺𑀝𑁆𑀞𑁂𑀬𑁆𑀬 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸’𑀢𑀺. 𑀏𑀯𑀫𑁆𑀧𑀺 𑀔𑁄 𑀢𑁆𑀯𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑁂𑀦 𑀑𑀴𑀸𑀭𑀺𑀓𑁂 𑀦𑀺𑀫𑀺𑀢𑁆𑀢𑁂 𑀓𑀬𑀺𑀭𑀫𑀸𑀦𑁂 𑀑𑀴𑀸𑀭𑀺𑀓𑁂 𑀑𑀪𑀸𑀲𑁂 𑀓𑀬𑀺𑀭𑀫𑀸𑀦𑁂 𑀦𑀸𑀲𑀓𑁆𑀔𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁, 𑀦 𑀢𑀣𑀸𑀕𑀢𑀁 𑀬𑀸𑀘𑀺 𑁋 ‘𑀢𑀺𑀝𑁆𑀞𑀢𑀼 𑀪𑀕𑀯𑀸 𑀓𑀧𑁆𑀧𑀁, 𑀢𑀺𑀝𑁆𑀞𑀢𑀼 𑀲𑀼𑀕𑀢𑁄 𑀓𑀧𑁆𑀧𑀁 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’𑀦𑁆𑀢𑀺. 𑀲𑀘𑁂 𑀢𑁆𑀯𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑀁 𑀬𑀸𑀘𑁂𑀬𑁆𑀬𑀸𑀲𑀺, 𑀤𑁆𑀯𑁂𑀯 𑀢𑁂 𑀯𑀸𑀘𑀸 𑀢𑀣𑀸𑀕𑀢𑁄 𑀧𑀝𑀺𑀓𑁆𑀔𑀺𑀧𑁂𑀬𑁆𑀬, 𑀅𑀣 𑀢𑀢𑀺𑀬𑀓𑀁 𑀅𑀥𑀺𑀯𑀸𑀲𑁂𑀬𑁆𑀬. 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀢𑀼𑀬𑁆𑀳𑁂𑀯𑁂𑀢𑀁 𑀤𑀼𑀓𑁆𑀓𑀝𑀁, 𑀢𑀼𑀬𑁆𑀳𑁂𑀯𑁂𑀢𑀁 𑀅𑀧𑀭𑀤𑁆𑀥𑀁.

𑁧𑁮𑁩. ‘‘𑀦𑀦𑀼 𑀏𑀢𑀁 [𑀏𑀯𑀁 (𑀲𑁆𑀬𑀸. 𑀧𑀻.)], 𑀆𑀦𑀦𑁆𑀤, 𑀫𑀬𑀸 𑀧𑀝𑀺𑀓𑀘𑁆𑀘𑁂𑀯 [𑀧𑀝𑀺𑀕𑀘𑁆𑀘𑁂𑀯 (𑀲𑀻. 𑀧𑀻.)] 𑀅𑀓𑁆𑀔𑀸𑀢𑀁 𑁋 ‘𑀲𑀩𑁆𑀩𑁂𑀳𑁂𑀯 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄 𑀅𑀜𑁆𑀜𑀣𑀸𑀪𑀸𑀯𑁄. 𑀢𑀁 𑀓𑀼𑀢𑁂𑀢𑁆𑀣, 𑀆𑀦𑀦𑁆𑀤, 𑀮𑀩𑁆𑀪𑀸, 𑀬𑀁 𑀢𑀁 𑀚𑀸𑀢𑀁 𑀪𑀽𑀢𑀁 𑀲𑀗𑁆𑀔𑀢𑀁 𑀧𑀮𑁄𑀓𑀥𑀫𑁆𑀫𑀁, 𑀢𑀁 𑀯𑀢 𑀫𑀸 𑀧𑀮𑀼𑀚𑁆𑀚𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺’. 𑀬𑀁 𑀔𑁄 𑀧𑀦𑁂𑀢𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑁂𑀦 𑀘𑀢𑁆𑀢𑀁 𑀯𑀦𑁆𑀢𑀁 𑀫𑀼𑀢𑁆𑀢𑀁 𑀧𑀳𑀻𑀦𑀁 𑀧𑀝𑀺𑀦𑀺𑀲𑁆𑀲𑀝𑁆𑀞𑀁 𑀑𑀲𑁆𑀲𑀝𑁆𑀞𑁄 𑀆𑀬𑀼𑀲𑀗𑁆𑀔𑀸𑀭𑁄, 𑀏𑀓𑀁𑀲𑁂𑀦 𑀯𑀸𑀘𑀸 𑀪𑀸𑀲𑀺𑀢𑀸 𑁋 ‘𑀦 𑀘𑀺𑀭𑀁 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 ¶ 𑀪𑀯𑀺𑀲𑁆𑀲𑀢𑀺. 𑀇𑀢𑁄 𑀢𑀺𑀡𑁆𑀡𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀢𑀣𑀸𑀕𑀢𑁄 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’𑀢𑀺. 𑀢𑀜𑁆𑀘 [𑀢𑀁 𑀯𑀘𑀦𑀁 (𑀲𑀻.)] 𑀢𑀣𑀸𑀕𑀢𑁄 𑀚𑀻𑀯𑀺𑀢𑀳𑁂𑀢𑀼 𑀧𑀼𑀦 𑀧𑀘𑁆𑀘𑀸𑀯𑀫𑀺𑀲𑁆𑀲𑀢𑀻𑀢𑀺 [𑀧𑀘𑁆𑀘𑀸𑀕𑀫𑀺𑀲𑁆𑀲𑀢𑀻𑀢𑀺 (𑀲𑁆𑀬𑀸. 𑀓.)] 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀫𑀳𑀸𑀯𑀦𑀁 𑀓𑀽𑀝𑀸𑀕𑀸𑀭𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 ¶ 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺.

𑀅𑀣 𑀔𑁄 𑀪𑀕𑀯𑀸 ¶ 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀫𑀳𑀸𑀯𑀦𑀁 𑀓𑀽𑀝𑀸𑀕𑀸𑀭𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀕𑀘𑁆𑀙 𑀢𑁆𑀯𑀁, 𑀆𑀦𑀦𑁆𑀤, 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀯𑁂𑀲𑀸𑀮𑀺𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀲𑀦𑁆𑀦𑀺𑀧𑀸𑀢𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑀸𑀯𑀢𑀺𑀓𑀸 𑀪𑀺𑀓𑁆𑀔𑀽 𑀯𑁂𑀲𑀸𑀮𑀺𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ¶ 𑁋 ‘‘𑀲𑀦𑁆𑀦𑀺𑀧𑀢𑀺𑀢𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀬𑀲𑁆𑀲𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺.

𑁧𑁮𑁪. 𑀅𑀣 𑀔𑁄 𑀪𑀕𑀯𑀸 𑀬𑁂𑀦𑀼𑀧𑀝𑁆𑀞𑀸𑀦𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀬𑁂 𑀢𑁂 𑀫𑀬𑀸 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸 𑀤𑁂𑀲𑀺𑀢𑀸, 𑀢𑁂 𑀯𑁄 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀲𑁂𑀯𑀺𑀢𑀩𑁆𑀩𑀸 𑀪𑀸𑀯𑁂𑀢𑀩𑁆𑀩𑀸 𑀩𑀳𑀼𑀮𑀻𑀓𑀸𑀢𑀩𑁆𑀩𑀸, 𑀬𑀣𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀤𑁆𑀥𑀦𑀺𑀬𑀁 𑀅𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀓𑀁, 𑀢𑀤𑀲𑁆𑀲 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀓𑀢𑀫𑁂 𑀘 𑀢𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀫𑀬𑀸 𑀅𑀪𑀺𑀜𑁆𑀜𑀸 𑀤𑁂𑀲𑀺𑀢𑀸, 𑀬𑁂 𑀯𑁄 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀲𑁂𑀯𑀺𑀢𑀩𑁆𑀩𑀸 𑀪𑀸𑀯𑁂𑀢𑀩𑁆𑀩𑀸 𑀩𑀳𑀼𑀮𑀻𑀓𑀸𑀢𑀩𑁆𑀩𑀸, 𑀬𑀣𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 ¶ 𑀅𑀤𑁆𑀥𑀦𑀺𑀬𑀁 𑀅𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀓𑀁, 𑀢𑀤𑀲𑁆𑀲 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 ¶ 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀇𑀫𑁂 𑀔𑁄 𑀢𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀫𑀬𑀸 𑀅𑀪𑀺𑀜𑁆𑀜𑀸 𑀤𑁂𑀲𑀺𑀢𑀸, 𑀬𑁂 𑀯𑁄 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀲𑁂𑀯𑀺𑀢𑀩𑁆𑀩𑀸 𑀪𑀸𑀯𑁂𑀢𑀩𑁆𑀩𑀸 𑀩𑀳𑀼𑀮𑀻𑀓𑀸𑀢𑀩𑁆𑀩𑀸, 𑀬𑀣𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀤𑁆𑀥𑀦𑀺𑀬𑀁 𑀅𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀓𑀁, 𑀢𑀤𑀲𑁆𑀲 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺.

𑁧𑁮𑁫. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀳𑀦𑁆𑀤𑀤𑀸𑀦𑀺, 𑀪𑀺𑀓𑁆𑀔𑀯𑁂, 𑀆𑀫𑀦𑁆𑀢𑀬𑀸𑀫𑀺 𑀯𑁄, 𑀯𑀬𑀥𑀫𑁆𑀫𑀸 𑀲𑀗𑁆𑀔𑀸𑀭𑀸, 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣. 𑀦𑀘𑀺𑀭𑀁 𑀢𑀣𑀸𑀕𑀢𑀲𑁆𑀲 ¶ 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀺. 𑀇𑀢𑁄 𑀢𑀺𑀡𑁆𑀡𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀢𑀣𑀸𑀕𑀢𑁄 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸, 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 [𑀇𑀢𑁄 𑀧𑀭𑀁 𑀲𑁆𑀬𑀸𑀫𑀧𑁄𑀢𑁆𑀣𑀓𑁂 𑀏𑀯𑀁𑀧𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺 𑁋§𑀤𑀳𑀭𑀸𑀧𑀺 𑀘 𑀬𑁂 𑀯𑀼𑀤𑁆𑀥𑀸, 𑀬𑁂 𑀩𑀸𑀮𑀸 𑀬𑁂 𑀘 𑀧𑀡𑁆𑀟𑀺𑀢𑀸.§𑀅𑀟𑁆𑀠𑀸𑀘𑁂𑀯 𑀤𑀮𑀺𑀤𑁆𑀤𑀸 𑀘, 𑀲𑀩𑁆𑀩𑁂 𑀫𑀘𑁆𑀘𑀼𑀧𑀭𑀸𑀬𑀦𑀸.§𑀬𑀣𑀸𑀧𑀺 𑀓𑀼𑀫𑁆𑀪𑀓𑀸𑀭𑀲𑁆𑀲, 𑀓𑀢𑀁 𑀫𑀢𑁆𑀢𑀺𑀓𑀪𑀸𑀚𑀦𑀁.§𑀔𑀼𑀤𑁆𑀤𑀓𑀜𑁆𑀘 𑀫𑀳𑀦𑁆𑀢𑀜𑁆𑀘, 𑀬𑀜𑁆𑀘 𑀧𑀓𑁆𑀓𑀁 𑀬𑀜𑁆𑀘 𑀆𑀫𑀓𑀁.§𑀲𑀩𑁆𑀩𑀁 𑀪𑁂𑀤𑀧𑀭𑀺𑀬𑀦𑁆𑀢𑀁, 𑀏𑀯𑀁 𑀫𑀘𑁆𑀘𑀸𑀦 𑀚𑀻𑀯𑀺𑀢𑀁.§𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸]. 𑁋

‘‘𑀧𑀭𑀺𑀧𑀓𑁆𑀓𑁄 ¶ 𑀯𑀬𑁄 𑀫𑀬𑁆𑀳𑀁, 𑀧𑀭𑀺𑀢𑁆𑀢𑀁 𑀫𑀫 𑀚𑀻𑀯𑀺𑀢𑀁;

𑀧𑀳𑀸𑀬 𑀯𑁄 𑀕𑀫𑀺𑀲𑁆𑀲𑀸𑀫𑀺, 𑀓𑀢𑀁 𑀫𑁂 𑀲𑀭𑀡𑀫𑀢𑁆𑀢𑀦𑁄.

‘‘𑀅𑀧𑁆𑀧𑀫𑀢𑁆𑀢𑀸 𑀲𑀢𑀻𑀫𑀦𑁆𑀢𑁄, 𑀲𑀼𑀲𑀻𑀮𑀸 𑀳𑁄𑀣 𑀪𑀺𑀓𑁆𑀔𑀯𑁄;

𑀲𑀼𑀲𑀫𑀸𑀳𑀺𑀢𑀲𑀗𑁆𑀓𑀧𑁆𑀧𑀸, 𑀲𑀘𑀺𑀢𑁆𑀢𑀫𑀦𑀼𑀭𑀓𑁆𑀔𑀣.

‘‘𑀬𑁄 ¶ ¶ 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂, 𑀅𑀧𑁆𑀧𑀫𑀢𑁆𑀢𑁄 𑀯𑀺𑀳𑀲𑁆𑀲𑀢𑀺;

𑀧𑀳𑀸𑀬 𑀚𑀸𑀢𑀺𑀲𑀁𑀲𑀸𑀭𑀁, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀻’’𑀢𑀺 [𑀯𑀺𑀳𑀭𑀺𑀲𑁆𑀲𑀢𑀺 (𑀲𑁆𑀬𑀸.), 𑀯𑀺𑀳𑁂𑀲𑁆𑀲𑀢𑀺 (𑀲𑀻.)].

𑀢𑀢𑀺𑀬𑁄 𑀪𑀸𑀡𑀯𑀸𑀭𑁄.

𑀦𑀸𑀕𑀸𑀧𑀮𑁄𑀓𑀺𑀢𑀁

𑁧𑁮𑁬. 𑀅𑀣 ¶ 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑁂𑀲𑀸𑀮𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀯𑁂𑀲𑀸𑀮𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑁄 𑀦𑀸𑀕𑀸𑀧𑀮𑁄𑀓𑀺𑀢𑀁 𑀯𑁂𑀲𑀸𑀮𑀺𑀁 𑀅𑀧𑀮𑁄𑀓𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀤𑀁 𑀧𑀘𑁆𑀙𑀺𑀫𑀓𑀁, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀯𑁂𑀲𑀸𑀮𑀺𑀬𑀸 𑀤𑀲𑁆𑀲𑀦𑀁 𑀪𑀯𑀺𑀲𑁆𑀲𑀢𑀺. 𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀪𑀡𑁆𑀟𑀕𑀸𑀫𑁄 [𑀪𑀡𑁆𑀟𑀼𑀕𑀸𑀫𑁄 (𑀓.)] 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺.

𑀅𑀣 ¶ 𑀔𑁄 𑀪𑀕𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀪𑀡𑁆𑀟𑀕𑀸𑀫𑁄 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀪𑀡𑁆𑀟𑀕𑀸𑀫𑁂 𑀯𑀺𑀳𑀭𑀢𑀺. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀘𑀢𑀼𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀺𑀤𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀁 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘. 𑀓𑀢𑀫𑁂𑀲𑀁 𑀘𑀢𑀼𑀦𑁆𑀦𑀁? 𑀅𑀭𑀺𑀬𑀲𑁆𑀲, 𑀪𑀺𑀓𑁆𑀔𑀯𑁂, 𑀲𑀻𑀮𑀲𑁆𑀲 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀺𑀤𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀁 𑀫𑀫𑀁 𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘. 𑀅𑀭𑀺𑀬𑀲𑁆𑀲, 𑀪𑀺𑀓𑁆𑀔𑀯𑁂, 𑀲𑀫𑀸𑀥𑀺𑀲𑁆𑀲 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀺𑀤𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀁 ¶ 𑀫𑀫𑀁 𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘. 𑀅𑀭𑀺𑀬𑀸𑀬, 𑀪𑀺𑀓𑁆𑀔𑀯𑁂, 𑀧𑀜𑁆𑀜𑀸𑀬 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀺𑀤𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀁 𑀫𑀫𑀁 𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘. 𑀅𑀭𑀺𑀬𑀸𑀬, 𑀪𑀺𑀓𑁆𑀔𑀯𑁂, 𑀯𑀺𑀫𑀼𑀢𑁆𑀢𑀺𑀬𑀸 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀺𑀤𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀁 𑀫𑀫𑀁 𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘. 𑀢𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀁 𑀲𑀻𑀮𑀁 𑀅𑀦𑀼𑀩𑀼𑀤𑁆𑀥𑀁 ¶ 𑀧𑀝𑀺𑀯𑀺𑀤𑁆𑀥𑀁, 𑀅𑀭𑀺𑀬𑁄 𑀲𑀫𑀸𑀥𑀺 𑀅𑀦𑀼𑀩𑀼𑀤𑁆𑀥𑁄 𑀧𑀝𑀺𑀯𑀺𑀤𑁆𑀥𑁄, 𑀅𑀭𑀺𑀬𑀸 𑀧𑀜𑁆𑀜𑀸 𑀅𑀦𑀼𑀩𑀼𑀤𑁆𑀥𑀸 𑀧𑀝𑀺𑀯𑀺𑀤𑁆𑀥𑀸, 𑀅𑀭𑀺𑀬𑀸 𑀯𑀺𑀫𑀼𑀢𑁆𑀢𑀺 𑀅𑀦𑀼𑀩𑀼𑀤𑁆𑀥𑀸 𑀧𑀝𑀺𑀯𑀺𑀤𑁆𑀥𑀸, 𑀉𑀘𑁆𑀙𑀺𑀦𑁆𑀦𑀸 𑀪𑀯𑀢𑀡𑁆𑀳𑀸, 𑀔𑀻𑀡𑀸 𑀪𑀯𑀦𑁂𑀢𑁆𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸, 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀲𑀻𑀮𑀁 𑀲𑀫𑀸𑀥𑀺 𑀧𑀜𑁆𑀜𑀸 𑀘, 𑀯𑀺𑀫𑀼𑀢𑁆𑀢𑀺 𑀘 𑀅𑀦𑀼𑀢𑁆𑀢𑀭𑀸;

𑀅𑀦𑀼𑀩𑀼𑀤𑁆𑀥𑀸 𑀇𑀫𑁂 𑀥𑀫𑁆𑀫𑀸, 𑀕𑁄𑀢𑀫𑁂𑀦 𑀬𑀲𑀲𑁆𑀲𑀺𑀦𑀸.

‘‘𑀇𑀢𑀺 ¶ 𑀩𑀼𑀤𑁆𑀥𑁄 𑀅𑀪𑀺𑀜𑁆𑀜𑀸𑀬, 𑀥𑀫𑁆𑀫𑀫𑀓𑁆𑀔𑀸𑀲𑀺 𑀪𑀺𑀓𑁆𑀔𑀼𑀦𑀁;

𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀲𑀢𑁆𑀣𑀸, 𑀘𑀓𑁆𑀔𑀼𑀫𑀸 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺.

𑀢𑀢𑁆𑀭𑀸𑀧𑀺 𑀲𑀼𑀤𑀁 𑀪𑀕𑀯𑀸 𑀪𑀡𑁆𑀟𑀕𑀸𑀫𑁂 𑀯𑀺𑀳𑀭𑀦𑁆𑀢𑁄 𑀏𑀢𑀤𑁂𑀯 𑀩𑀳𑀼𑀮𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁄𑀢𑀺 𑁋 ‘‘𑀇𑀢𑀺 𑀲𑀻𑀮𑀁, 𑀇𑀢𑀺 𑀲𑀫𑀸𑀥𑀺, 𑀇𑀢𑀺 𑀧𑀜𑁆𑀜𑀸. 𑀲𑀻𑀮𑀧𑀭𑀺𑀪𑀸𑀯𑀺𑀢𑁄 𑀲𑀫𑀸𑀥𑀺 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄. 𑀲𑀫𑀸𑀥𑀺𑀧𑀭𑀺𑀪𑀸𑀯𑀺𑀢𑀸 𑀧𑀜𑁆𑀜𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸. 𑀧𑀜𑁆𑀜𑀸𑀧𑀭𑀺𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀲𑀫𑁆𑀫𑀤𑁂𑀯 𑀆𑀲𑀯𑁂𑀳𑀺 𑀯𑀺𑀫𑀼𑀘𑁆𑀘𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀸𑀲𑀯𑀸, 𑀪𑀯𑀸𑀲𑀯𑀸, 𑀅𑀯𑀺𑀚𑁆𑀚𑀸𑀲𑀯𑀸’’𑀢𑀺.

𑀘𑀢𑀼𑀫𑀳𑀸𑀧𑀤𑁂𑀲𑀓𑀣𑀸

𑁧𑁮𑁭. 𑀅𑀣 ¶ 𑀔𑁄 𑀪𑀕𑀯𑀸 𑀪𑀡𑁆𑀟𑀕𑀸𑀫𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀳𑀢𑁆𑀣𑀺𑀕𑀸𑀫𑁄, 𑀬𑁂𑀦 𑀅𑀫𑁆𑀩𑀕𑀸𑀫𑁄, 𑀬𑁂𑀦 𑀚𑀫𑁆𑀩𑀼𑀕𑀸𑀫𑁄, 𑀬𑁂𑀦 𑀪𑁄𑀕𑀦𑀕𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 ¶ 𑀪𑀕𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀪𑁄𑀕𑀦𑀕𑀭𑀁 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀪𑁄𑀕𑀦𑀕𑀭𑁂 𑀯𑀺𑀳𑀭𑀢𑀺 𑀆𑀦𑀦𑁆𑀤𑁂 [𑀲𑀸𑀦𑀦𑁆𑀤𑀭𑁂 (𑀓.)] 𑀘𑁂𑀢𑀺𑀬𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀤𑁂𑀲𑁂 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁 ¶ , 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

𑁧𑁮𑁮. ‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀆𑀯𑀼𑀲𑁄, 𑀪𑀕𑀯𑀢𑁄 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁, 𑀅𑀬𑀁 𑀥𑀫𑁆𑀫𑁄 𑀅𑀬𑀁 𑀯𑀺𑀦𑀬𑁄 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦’𑀦𑁆𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀁. 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀢𑀸𑀦𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀲𑀼𑀢𑁆𑀢𑁂 𑀑𑀲𑀸𑀭𑁂𑀢𑀩𑁆𑀩𑀸𑀦𑀺 [𑀑𑀢𑀸𑀭𑁂𑀢𑀩𑁆𑀩𑀸𑀦𑀺], 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑁂𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀘𑁂 𑀲𑀼𑀢𑁆𑀢𑁂 𑀑𑀲𑀸𑀭𑀺𑀬𑀫𑀸𑀦𑀸𑀦𑀺 [𑀑𑀢𑀸𑀭𑀺𑀬𑀫𑀸𑀦𑀸𑀦𑀺] 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑀺𑀬𑀫𑀸𑀦𑀸𑀦𑀺 𑀦 𑀘𑁂𑀯 𑀲𑀼𑀢𑁆𑀢𑁂 𑀑𑀲𑀭𑀦𑁆𑀢𑀺 [𑀑𑀢𑀭𑀦𑁆𑀢𑀺 (𑀲𑀻. 𑀧𑀻. 𑀅. 𑀦𑀺. 𑁪.𑁧𑁮𑁦], 𑀦 𑀘 𑀯𑀺𑀦𑀬𑁂 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 𑁋 ‘𑀅𑀤𑁆𑀥𑀸, 𑀇𑀤𑀁 𑀦 𑀘𑁂𑀯 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁; 𑀇𑀫𑀲𑁆𑀲 𑀘 𑀪𑀺𑀓𑁆𑀔𑀼𑀦𑁄 𑀤𑀼𑀕𑁆𑀕𑀳𑀺𑀢’𑀦𑁆𑀢𑀺. 𑀇𑀢𑀺𑀳𑁂𑀢𑀁, 𑀪𑀺𑀓𑁆𑀔𑀯𑁂, 𑀙𑀟𑁆𑀟𑁂𑀬𑁆𑀬𑀸𑀣. 𑀢𑀸𑀦𑀺 𑀘𑁂 𑀲𑀼𑀢𑁆𑀢𑁂 𑀑𑀲𑀸𑀭𑀺𑀬𑀫𑀸𑀦𑀸𑀦𑀺 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑀺𑀬𑀫𑀸𑀦𑀸𑀦𑀺 𑀲𑀼𑀢𑁆𑀢𑁂 𑀘𑁂𑀯 ¶ 𑀑𑀲𑀭𑀦𑁆𑀢𑀺, 𑀯𑀺𑀦𑀬𑁂 𑀘 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 𑁋 ‘𑀅𑀤𑁆𑀥𑀸, 𑀇𑀤𑀁 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁; 𑀇𑀫𑀲𑁆𑀲 𑀘 𑀪𑀺𑀓𑁆𑀔𑀼𑀦𑁄 𑀲𑀼𑀕𑁆𑀕𑀳𑀺𑀢’𑀦𑁆𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀫𑀳𑀸𑀧𑀤𑁂𑀲𑀁 𑀥𑀸𑀭𑁂𑀬𑁆𑀬𑀸𑀣.

‘‘𑀇𑀥 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀆𑀯𑀸𑀲𑁂 𑀲𑀗𑁆𑀖𑁄 𑀯𑀺𑀳𑀭𑀢𑀺 𑀲𑀣𑁂𑀭𑁄 𑀲𑀧𑀸𑀫𑁄𑀓𑁆𑀔𑁄. 𑀢𑀲𑁆𑀲 𑀫𑁂 𑀲𑀗𑁆𑀖𑀲𑁆𑀲 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 ¶ 𑀧𑀝𑀺𑀕𑁆𑀕𑀳𑀺𑀢𑀁, 𑀅𑀬𑀁 𑀥𑀫𑁆𑀫𑁄 𑀅𑀬𑀁 𑀯𑀺𑀦𑀬𑁄 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦’𑀦𑁆𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀁. 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀢𑀸𑀦𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀲𑀼𑀢𑁆𑀢𑁂 𑀑𑀲𑀸𑀭𑁂𑀢𑀩𑁆𑀩𑀸𑀦𑀺, 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑁂𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀘𑁂 𑀲𑀼𑀢𑁆𑀢𑁂 𑀑𑀲𑀸𑀭𑀺𑀬𑀫𑀸𑀦𑀸𑀦𑀺 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑀺𑀬𑀫𑀸𑀦𑀸𑀦𑀺 𑀦 𑀘𑁂𑀯 𑀲𑀼𑀢𑁆𑀢𑁂 𑀑𑀲𑀭𑀦𑁆𑀢𑀺, 𑀦 𑀘 𑀯𑀺𑀦𑀬𑁂 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 𑁋 ‘𑀅𑀤𑁆𑀥𑀸, 𑀇𑀤𑀁 𑀦 𑀘𑁂𑀯 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁; 𑀢𑀲𑁆𑀲 𑀘 𑀲𑀗𑁆𑀖𑀲𑁆𑀲 𑀤𑀼𑀕𑁆𑀕𑀳𑀺𑀢’𑀦𑁆𑀢𑀺. 𑀇𑀢𑀺𑀳𑁂𑀢𑀁, 𑀪𑀺𑀓𑁆𑀔𑀯𑁂, 𑀙𑀟𑁆𑀟𑁂𑀬𑁆𑀬𑀸𑀣. 𑀢𑀸𑀦𑀺 𑀘𑁂 𑀲𑀼𑀢𑁆𑀢𑁂 𑀑𑀲𑀸𑀭𑀺𑀬𑀫𑀸𑀦𑀸𑀦𑀺 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑀺𑀬𑀫𑀸𑀦𑀸𑀦𑀺 𑀲𑀼𑀢𑁆𑀢𑁂 𑀘𑁂𑀯 ¶ 𑀑𑀲𑀭𑀦𑁆𑀢𑀺 𑀯𑀺𑀦𑀬𑁂 𑀘 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 𑁋 ‘𑀅𑀤𑁆𑀥𑀸 ¶ , 𑀇𑀤𑀁 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁; 𑀢𑀲𑁆𑀲 𑀘 𑀲𑀗𑁆𑀖𑀲𑁆𑀲 𑀲𑀼𑀕𑁆𑀕𑀳𑀺𑀢’𑀦𑁆𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀁 𑀫𑀳𑀸𑀧𑀤𑁂𑀲𑀁 𑀥𑀸𑀭𑁂𑀬𑁆𑀬𑀸𑀣.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀆𑀯𑀸𑀲𑁂 𑀲𑀫𑁆𑀩𑀳𑀼𑀮𑀸 𑀣𑁂𑀭𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀥𑀫𑁆𑀫𑀥𑀭𑀸 𑀯𑀺𑀦𑀬𑀥𑀭𑀸 𑀫𑀸𑀢𑀺𑀓𑀸𑀥𑀭𑀸. 𑀢𑁂𑀲𑀁 𑀫𑁂 𑀣𑁂𑀭𑀸𑀦𑀁 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 𑀅𑀬𑀁 𑀥𑀫𑁆𑀫𑁄 𑀅𑀬𑀁 𑀯𑀺𑀦𑀬𑁄 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦’𑀦𑁆𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁…𑀧𑁂… 𑀦 𑀘 𑀯𑀺𑀦𑀬𑁂 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 𑁋 ‘𑀅𑀤𑁆𑀥𑀸, 𑀇𑀤𑀁 𑀦 𑀘𑁂𑀯 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁; 𑀢𑁂𑀲𑀜𑁆𑀘 𑀣𑁂𑀭𑀸𑀦𑀁 𑀤𑀼𑀕𑁆𑀕𑀳𑀺𑀢’𑀦𑁆𑀢𑀺. 𑀇𑀢𑀺𑀳𑁂𑀢𑀁, 𑀪𑀺𑀓𑁆𑀔𑀯𑁂, 𑀙𑀟𑁆𑀟𑁂𑀬𑁆𑀬𑀸𑀣. 𑀢𑀸𑀦𑀺 𑀘𑁂 𑀲𑀼𑀢𑁆𑀢𑁂 𑀑𑀲𑀸𑀭𑀺𑀬𑀫𑀸𑀦𑀸𑀦𑀺…𑀧𑁂… 𑀯𑀺𑀦𑀬𑁂 𑀘 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 𑁋 ‘𑀅𑀤𑁆𑀥𑀸, 𑀇𑀤𑀁 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁; 𑀢𑁂𑀲𑀜𑁆𑀘 𑀣𑁂𑀭𑀸𑀦𑀁 𑀲𑀼𑀕𑁆𑀕𑀳𑀺𑀢’𑀦𑁆𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑀁 𑀫𑀳𑀸𑀧𑀤𑁂𑀲𑀁 𑀥𑀸𑀭𑁂𑀬𑁆𑀬𑀸𑀣.

‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀆𑀯𑀸𑀲𑁂 𑀏𑀓𑁄 𑀣𑁂𑀭𑁄 𑀪𑀺𑀓𑁆𑀔𑀼 𑀯𑀺𑀳𑀭𑀢𑀺 𑀩𑀳𑀼𑀲𑁆𑀲𑀼𑀢𑁄 𑀆𑀕𑀢𑀸𑀕𑀫𑁄 𑀥𑀫𑁆𑀫𑀥𑀭𑁄 𑀯𑀺𑀦𑀬𑀥𑀭𑁄 𑀫𑀸𑀢𑀺𑀓𑀸𑀥𑀭𑁄. 𑀢𑀲𑁆𑀲 𑀫𑁂 𑀣𑁂𑀭𑀲𑁆𑀲 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 𑀅𑀬𑀁 𑀥𑀫𑁆𑀫𑁄 𑀅𑀬𑀁 𑀯𑀺𑀦𑀬𑁄 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦’𑀦𑁆𑀢𑀺. 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀁. 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀢𑀸𑀦𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀲𑀼𑀢𑁆𑀢𑁂 𑀑𑀲𑀸𑀭𑀺𑀢𑀩𑁆𑀩𑀸𑀦𑀺, 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑁂𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀘𑁂 𑀲𑀼𑀢𑁆𑀢𑁂 𑀑𑀲𑀸𑀭𑀺𑀬𑀫𑀸𑀦𑀸𑀦𑀺 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑀺𑀬𑀫𑀸𑀦𑀸𑀦𑀺 𑀦 𑀘𑁂𑀯 𑀲𑀼𑀢𑁆𑀢𑁂 𑀑𑀲𑀭𑀦𑁆𑀢𑀺, 𑀦 𑀘 𑀯𑀺𑀦𑀬𑁂 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 𑁋 ‘𑀅𑀤𑁆𑀥𑀸, 𑀇𑀤𑀁 𑀦 𑀘𑁂𑀯 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁; 𑀢𑀲𑁆𑀲 𑀘 𑀣𑁂𑀭𑀲𑁆𑀲 𑀤𑀼𑀕𑁆𑀕𑀳𑀺𑀢’𑀦𑁆𑀢𑀺. 𑀇𑀢𑀺𑀳𑁂𑀢𑀁, 𑀪𑀺𑀓𑁆𑀔𑀯𑁂, 𑀙𑀟𑁆𑀟𑁂𑀬𑁆𑀬𑀸𑀣. 𑀢𑀸𑀦𑀺 𑀘 𑀲𑀼𑀢𑁆𑀢𑁂 𑀑𑀲𑀸𑀭𑀺𑀬𑀫𑀸𑀦𑀸𑀦𑀺 𑀯𑀺𑀦𑀬𑁂 𑀲𑀦𑁆𑀤𑀲𑁆𑀲𑀺𑀬𑀫𑀸𑀦𑀸𑀦𑀺 𑀲𑀼𑀢𑁆𑀢𑁂 𑀘𑁂𑀯 𑀑𑀲𑀭𑀦𑁆𑀢𑀺, 𑀯𑀺𑀦𑀬𑁂 𑀘 𑀲𑀦𑁆𑀤𑀺𑀲𑁆𑀲𑀦𑁆𑀢𑀺 ¶ , 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 𑁋 ‘𑀅𑀤𑁆𑀥𑀸 ¶ , 𑀇𑀤𑀁 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁; 𑀢𑀲𑁆𑀲 𑀘 𑀣𑁂𑀭𑀲𑁆𑀲 𑀲𑀼𑀕𑁆𑀕𑀳𑀺𑀢’𑀦𑁆𑀢𑀺. 𑀇𑀤𑀁, 𑀪𑀺𑀓𑁆𑀔𑀯𑁂, 𑀘𑀢𑀼𑀢𑁆𑀣𑀁 𑀫𑀳𑀸𑀧𑀤𑁂𑀲𑀁 𑀥𑀸𑀭𑁂𑀬𑁆𑀬𑀸𑀣. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑁂 𑀥𑀸𑀭𑁂𑀬𑁆𑀬𑀸𑀣𑀸’’𑀢𑀺.

𑀢𑀢𑁆𑀭𑀧𑀺 𑀲𑀼𑀤𑀁 𑀪𑀕𑀯𑀸 𑀪𑁄𑀕𑀦𑀕𑀭𑁂 𑀯𑀺𑀳𑀭𑀦𑁆𑀢𑁄 ¶ 𑀆𑀦𑀦𑁆𑀤𑁂 𑀘𑁂𑀢𑀺𑀬𑁂 𑀏𑀢𑀤𑁂𑀯 𑀩𑀳𑀼𑀮𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁄𑀢𑀺 𑁋 ‘‘𑀇𑀢𑀺 𑀲𑀻𑀮𑀁, 𑀇𑀢𑀺 𑀲𑀫𑀸𑀥𑀺, 𑀇𑀢𑀺 𑀧𑀜𑁆𑀜𑀸. 𑀲𑀻𑀮𑀧𑀭𑀺𑀪𑀸𑀯𑀺𑀢𑁄 𑀲𑀫𑀸𑀥𑀺 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄 ¶ . 𑀲𑀫𑀸𑀥𑀺𑀧𑀭𑀺𑀪𑀸𑀯𑀺𑀢𑀸 𑀧𑀜𑁆𑀜𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸. 𑀧𑀜𑁆𑀜𑀸𑀧𑀭𑀺𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀲𑀫𑁆𑀫𑀤𑁂𑀯 𑀆𑀲𑀯𑁂𑀳𑀺 𑀯𑀺𑀫𑀼𑀘𑁆𑀘𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀸𑀲𑀯𑀸, 𑀪𑀯𑀸𑀲𑀯𑀸, 𑀅𑀯𑀺𑀚𑁆𑀚𑀸𑀲𑀯𑀸’’𑀢𑀺.

𑀓𑀫𑁆𑀫𑀸𑀭𑀧𑀼𑀢𑁆𑀢𑀘𑀼𑀦𑁆𑀤𑀯𑀢𑁆𑀣𑀼

𑁧𑁮𑁯. 𑀅𑀣 𑀔𑁄 𑀪𑀕𑀯𑀸 𑀪𑁄𑀕𑀦𑀕𑀭𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀧𑀸𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀧𑀸𑀯𑀸 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀧𑀸𑀯𑀸𑀬𑀁 𑀯𑀺𑀳𑀭𑀢𑀺 𑀘𑀼𑀦𑁆𑀤𑀲𑁆𑀲 𑀓𑀫𑁆𑀫𑀸𑀭𑀧𑀼𑀢𑁆𑀢𑀲𑁆𑀲 𑀅𑀫𑁆𑀩𑀯𑀦𑁂. 𑀅𑀲𑁆𑀲𑁄𑀲𑀺 𑀔𑁄 𑀘𑀼𑀦𑁆𑀤𑁄 𑀓𑀫𑁆𑀫𑀸𑀭𑀧𑀼𑀢𑁆𑀢𑁄 𑁋 ‘‘𑀪𑀕𑀯𑀸 𑀓𑀺𑀭 𑀧𑀸𑀯𑀁 𑀅𑀦𑀼𑀧𑁆𑀧𑀢𑁆𑀢𑁄, 𑀧𑀸𑀯𑀸𑀬𑀁 𑀯𑀺𑀳𑀭𑀢𑀺 𑀫𑀬𑁆𑀳𑀁 𑀅𑀫𑁆𑀩𑀯𑀦𑁂’’𑀢𑀺. 𑀅𑀣 𑀔𑁄 𑀘𑀼𑀦𑁆𑀤𑁄 𑀓𑀫𑁆𑀫𑀸𑀭𑀧𑀼𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀘𑀼𑀦𑁆𑀤𑀁 𑀓𑀫𑁆𑀫𑀸𑀭𑀧𑀼𑀢𑁆𑀢𑀁 𑀪𑀕𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀘𑀼𑀦𑁆𑀤𑁄 𑀓𑀫𑁆𑀫𑀸𑀭𑀧𑀼𑀢𑁆𑀢𑁄 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑁄 𑀲𑀫𑀸𑀤𑀧𑀺𑀢𑁄 𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀫𑁆𑀧𑀳𑀁𑀲𑀺𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀥𑀺𑀯𑀸𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢𑀁 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦. 𑀅𑀣 𑀔𑁄 𑀘𑀼𑀦𑁆𑀤𑁄 𑀓𑀫𑁆𑀫𑀸𑀭𑀧𑀼𑀢𑁆𑀢𑁄 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 ¶ 𑀯𑀺𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 ¶ 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀅𑀣 𑀔𑁄 𑀘𑀼𑀦𑁆𑀤𑁄 𑀓𑀫𑁆𑀫𑀸𑀭𑀧𑀼𑀢𑁆𑀢𑁄 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀲𑀓𑁂 𑀦𑀺𑀯𑁂𑀲𑀦𑁂 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀧𑀳𑀽𑀢𑀜𑁆𑀘 𑀲𑀽𑀓𑀭𑀫𑀤𑁆𑀤𑀯𑀁 𑀪𑀕𑀯𑀢𑁄 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺 𑁋 ‘‘𑀓𑀸𑀮𑁄, 𑀪𑀦𑁆𑀢𑁂, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀘𑀼𑀦𑁆𑀤𑀲𑁆𑀲 𑀓𑀫𑁆𑀫𑀸𑀭𑀧𑀼𑀢𑁆𑀢𑀲𑁆𑀲 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀘𑀼𑀦𑁆𑀤𑀁 𑀓𑀫𑁆𑀫𑀸𑀭𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀬𑀁 𑀢𑁂, 𑀘𑀼𑀦𑁆𑀤, 𑀲𑀽𑀓𑀭𑀫𑀤𑁆𑀤𑀯𑀁 𑀧𑀝𑀺𑀬𑀢𑁆𑀢𑀁, 𑀢𑁂𑀦 𑀫𑀁 𑀧𑀭𑀺𑀯𑀺𑀲. 𑀬𑀁 𑀧𑀦𑀜𑁆𑀜𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀢𑁆𑀢𑀁, 𑀢𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑀁 ¶ 𑀧𑀭𑀺𑀯𑀺𑀲𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀘𑀼𑀦𑁆𑀤𑁄 𑀓𑀫𑁆𑀫𑀸𑀭𑀧𑀼𑀢𑁆𑀢𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑀁 𑀅𑀳𑁄𑀲𑀺 𑀲𑀽𑀓𑀭𑀫𑀤𑁆𑀤𑀯𑀁 𑀧𑀝𑀺𑀬𑀢𑁆𑀢𑀁, 𑀢𑁂𑀦 𑀪𑀕𑀯𑀦𑁆𑀢𑀁 𑀧𑀭𑀺𑀯𑀺𑀲𑀺. 𑀬𑀁 𑀧𑀦𑀜𑁆𑀜𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀢𑁆𑀢𑀁 ¶ , 𑀢𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀺. 𑀅𑀣 𑀔𑁄 𑀪𑀕𑀯𑀸 𑀘𑀼𑀦𑁆𑀤𑀁 𑀓𑀫𑁆𑀫𑀸𑀭𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀬𑀁 𑀢𑁂, 𑀘𑀼𑀦𑁆𑀤, 𑀲𑀽𑀓𑀭𑀫𑀤𑁆𑀤𑀯𑀁 𑀅𑀯𑀲𑀺𑀝𑁆𑀞𑀁, 𑀢𑀁 𑀲𑁄𑀩𑁆𑀪𑁂 𑀦𑀺𑀔𑀡𑀸𑀳𑀺. 𑀦𑀸𑀳𑀁 𑀢𑀁, 𑀘𑀼𑀦𑁆𑀤, 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬, 𑀬𑀲𑁆𑀲 𑀢𑀁 𑀧𑀭𑀺𑀪𑀼𑀢𑁆𑀢𑀁 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑁂𑀬𑁆𑀬 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑀲𑁆𑀲𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀘𑀼𑀦𑁆𑀤𑁄 𑀓𑀫𑁆𑀫𑀸𑀭𑀧𑀼𑀢𑁆𑀢𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑀁 𑀅𑀳𑁄𑀲𑀺 𑀲𑀽𑀓𑀭𑀫𑀤𑁆𑀤𑀯𑀁 𑀅𑀯𑀲𑀺𑀝𑁆𑀞𑀁, 𑀢𑀁 𑀲𑁄𑀩𑁆𑀪𑁂 𑀦𑀺𑀔𑀡𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 ¶ 𑀔𑁄 𑀘𑀼𑀦𑁆𑀤𑀁 𑀓𑀫𑁆𑀫𑀸𑀭𑀧𑀼𑀢𑁆𑀢𑀁 𑀪𑀕𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺.

𑁧𑁯𑁦. 𑀅𑀣 𑀔𑁄 𑀪𑀕𑀯𑀢𑁄 𑀘𑀼𑀦𑁆𑀤𑀲𑁆𑀲 𑀓𑀫𑁆𑀫𑀸𑀭𑀧𑀼𑀢𑁆𑀢𑀲𑁆𑀲 𑀪𑀢𑁆𑀢𑀁 𑀪𑀼𑀢𑁆𑀢𑀸𑀯𑀺𑀲𑁆𑀲 𑀔𑀭𑁄 𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑀺, 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀸 𑀧𑀩𑀸𑀴𑁆𑀳𑀸 𑀯𑁂𑀤𑀦𑀸 𑀯𑀢𑁆𑀢𑀦𑁆𑀢𑀺 𑀫𑀸𑀭𑀡𑀦𑁆𑀢𑀺𑀓𑀸. 𑀢𑀸 𑀲𑀼𑀤𑀁 ¶ 𑀪𑀕𑀯𑀸 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀅𑀥𑀺𑀯𑀸𑀲𑁂𑀲𑀺 𑀅𑀯𑀺𑀳𑀜𑁆𑀜𑀫𑀸𑀦𑁄. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀓𑀼𑀲𑀺𑀦𑀸𑀭𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺.

𑀘𑀼𑀦𑁆𑀤𑀲𑁆𑀲 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸, 𑀓𑀫𑁆𑀫𑀸𑀭𑀲𑁆𑀲𑀸𑀢𑀺 𑀫𑁂 𑀲𑀼𑀢𑀁;

𑀆𑀩𑀸𑀥𑀁 𑀲𑀫𑁆𑀨𑀼𑀲𑀻 𑀥𑀻𑀭𑁄, 𑀧𑀩𑀸𑀴𑁆𑀳𑀁 𑀫𑀸𑀭𑀡𑀦𑁆𑀢𑀺𑀓𑀁.

𑀪𑀼𑀢𑁆𑀢𑀲𑁆𑀲 𑀘 𑀲𑀽𑀓𑀭𑀫𑀤𑁆𑀤𑀯𑁂𑀦,

𑀩𑁆𑀬𑀸𑀥𑀺𑀧𑁆𑀧𑀩𑀸𑀴𑁆𑀳𑁄 𑀉𑀤𑀧𑀸𑀤𑀺 𑀲𑀢𑁆𑀣𑀼𑀦𑁄;

𑀯𑀺𑀭𑁂𑀘𑀫𑀸𑀦𑁄 [𑀯𑀺𑀭𑀺𑀘𑁆𑀘𑀫𑀸𑀦𑁄 (𑀲𑀻. 𑀲𑁆𑀬𑀸. 𑀓.), 𑀯𑀺𑀭𑀺𑀜𑁆𑀘𑀫𑀸𑀦𑁄 (?)] 𑀪𑀕𑀯𑀸 𑀅𑀯𑁄𑀘,

𑀕𑀘𑁆𑀙𑀸𑀫𑀳𑀁 𑀓𑀼𑀲𑀺𑀦𑀸𑀭𑀁 𑀦𑀕𑀭𑀦𑁆𑀢𑀺.

𑀧𑀸𑀦𑀻𑀬𑀸𑀳𑀭𑀡𑀁

𑁧𑁯𑁧. 𑀅𑀣 𑀔𑁄 𑀪𑀕𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀬𑁂𑀦 𑀅𑀜𑁆𑀜𑀢𑀭𑀁 𑀭𑀼𑀓𑁆𑀔𑀫𑀽𑀮𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀗𑁆𑀖 𑀫𑁂 𑀢𑁆𑀯𑀁, 𑀆𑀦𑀦𑁆𑀤, 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀧𑁂𑀳𑀺, 𑀓𑀺𑀮𑀦𑁆𑀢𑁄𑀲𑁆𑀫𑀺, 𑀆𑀦𑀦𑁆𑀤, 𑀦𑀺𑀲𑀻𑀤𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 ¶ 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀧𑁂𑀲𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 ¶ ¶ 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀗𑁆𑀖 𑀫𑁂 𑀢𑁆𑀯𑀁, 𑀆𑀦𑀦𑁆𑀤, 𑀧𑀸𑀦𑀻𑀬𑀁 𑀆𑀳𑀭, 𑀧𑀺𑀧𑀸𑀲𑀺𑀢𑁄𑀲𑁆𑀫𑀺, 𑀆𑀦𑀦𑁆𑀤, 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀸𑀦𑀺, 𑀪𑀦𑁆𑀢𑁂, 𑀧𑀜𑁆𑀘𑀫𑀢𑁆𑀢𑀸𑀦𑀺 𑀲𑀓𑀝𑀲𑀢𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺, 𑀢𑀁 𑀘𑀓𑁆𑀓𑀘𑁆𑀙𑀺𑀦𑁆𑀦𑀁 𑀉𑀤𑀓𑀁 𑀧𑀭𑀺𑀢𑁆𑀢𑀁 𑀮𑀼𑀴𑀺𑀢𑀁 𑀆𑀯𑀺𑀮𑀁 𑀲𑀦𑁆𑀤𑀢𑀺. 𑀅𑀬𑀁, 𑀪𑀦𑁆𑀢𑁂, 𑀓𑀓𑀼𑀥𑀸 [𑀓𑀓𑀼𑀣𑀸 (𑀲𑀻. 𑀧𑀻.)] 𑀦𑀤𑀻 𑀅𑀯𑀺𑀤𑀽𑀭𑁂 𑀅𑀘𑁆𑀙𑁄𑀤𑀓𑀸 𑀲𑀸𑀢𑁄𑀤𑀓𑀸 ¶ 𑀲𑀻𑀢𑁄𑀤𑀓𑀸 𑀲𑁂𑀢𑁄𑀤𑀓𑀸 [𑀲𑁂𑀢𑀓𑀸 (𑀲𑀻.)] 𑀲𑀼𑀧𑁆𑀧𑀢𑀺𑀢𑁆𑀣𑀸 𑀭𑀫𑀡𑀻𑀬𑀸. 𑀏𑀢𑁆𑀣 𑀪𑀕𑀯𑀸 𑀧𑀸𑀦𑀻𑀬𑀜𑁆𑀘 𑀧𑀺𑀯𑀺𑀲𑁆𑀲𑀢𑀺, 𑀕𑀢𑁆𑀢𑀸𑀦𑀺 𑀘 𑀲𑀻𑀢𑀻 [𑀲𑀻𑀢𑀁 (𑀲𑀻. 𑀧𑀻. 𑀓.)] 𑀓𑀭𑀺𑀲𑁆𑀲𑀢𑀻’’𑀢𑀺.

𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀗𑁆𑀖 𑀫𑁂 𑀢𑁆𑀯𑀁, 𑀆𑀦𑀦𑁆𑀤, 𑀧𑀸𑀦𑀻𑀬𑀁 𑀆𑀳𑀭, 𑀧𑀺𑀧𑀸𑀲𑀺𑀢𑁄𑀲𑁆𑀫𑀺, 𑀆𑀦𑀦𑁆𑀤, 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀤𑀸𑀦𑀺, 𑀪𑀦𑁆𑀢𑁂, 𑀧𑀜𑁆𑀘𑀫𑀢𑁆𑀢𑀸𑀦𑀺 𑀲𑀓𑀝𑀲𑀢𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺, 𑀢𑀁 𑀘𑀓𑁆𑀓𑀘𑁆𑀙𑀺𑀦𑁆𑀦𑀁 𑀉𑀤𑀓𑀁 𑀧𑀭𑀺𑀢𑁆𑀢𑀁 𑀮𑀼𑀴𑀺𑀢𑀁 𑀆𑀯𑀺𑀮𑀁 𑀲𑀦𑁆𑀤𑀢𑀺. 𑀅𑀬𑀁, 𑀪𑀦𑁆𑀢𑁂, 𑀓𑀓𑀼𑀥𑀸 𑀦𑀤𑀻 𑀅𑀯𑀺𑀤𑀽𑀭𑁂 𑀅𑀘𑁆𑀙𑁄𑀤𑀓𑀸 𑀲𑀸𑀢𑁄𑀤𑀓𑀸 𑀲𑀻𑀢𑁄𑀤𑀓𑀸 𑀲𑁂𑀢𑁄𑀤𑀓𑀸 𑀲𑀼𑀧𑁆𑀧𑀢𑀺𑀢𑁆𑀣𑀸 𑀭𑀫𑀡𑀻𑀬𑀸. 𑀏𑀢𑁆𑀣 𑀪𑀕𑀯𑀸 𑀧𑀸𑀦𑀻𑀬𑀜𑁆𑀘 𑀧𑀺𑀯𑀺𑀲𑁆𑀲𑀢𑀺, 𑀕𑀢𑁆𑀢𑀸𑀦𑀺 𑀘 𑀲𑀻𑀢𑀻𑀓𑀭𑀺𑀲𑁆𑀲𑀢𑀻’’𑀢𑀺.

𑀢𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀗𑁆𑀖 𑀫𑁂 𑀢𑁆𑀯𑀁, 𑀆𑀦𑀦𑁆𑀤, 𑀧𑀸𑀦𑀻𑀬𑀁 𑀆𑀳𑀭, 𑀧𑀺𑀧𑀸𑀲𑀺𑀢𑁄𑀲𑁆𑀫𑀺, 𑀆𑀦𑀦𑁆𑀤, 𑀧𑀺𑀯𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 ¶ 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀬𑁂𑀦 𑀲𑀸 𑀦𑀤𑀺𑀓𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀣 𑀔𑁄 𑀲𑀸 𑀦𑀤𑀺𑀓𑀸 𑀘𑀓𑁆𑀓𑀘𑁆𑀙𑀺𑀦𑁆𑀦𑀸 𑀧𑀭𑀺𑀢𑁆𑀢𑀸 𑀮𑀼𑀴𑀺𑀢𑀸 𑀆𑀯𑀺𑀮𑀸 𑀲𑀦𑁆𑀤𑀫𑀸𑀦𑀸, 𑀆𑀬𑀲𑁆𑀫𑀦𑁆𑀢𑁂 𑀆𑀦𑀦𑁆𑀤𑁂 𑀉𑀧𑀲𑀗𑁆𑀓𑀫𑀦𑁆𑀢𑁂 𑀅𑀘𑁆𑀙𑀸 𑀯𑀺𑀧𑁆𑀧𑀲𑀦𑁆𑀦𑀸 𑀅𑀦𑀸𑀯𑀺𑀮𑀸 𑀲𑀦𑁆𑀤𑀺𑀢𑁆𑀣 [𑀲𑀦𑁆𑀤𑀢𑀺 (𑀲𑁆𑀬𑀸.)]. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀘𑁆𑀙𑀭𑀺𑀬𑀁 𑀯𑀢, 𑀪𑁄, 𑀅𑀩𑁆𑀪𑀼𑀢𑀁 𑀯𑀢, 𑀪𑁄, 𑀢𑀣𑀸𑀕𑀢𑀲𑁆𑀲 𑀫𑀳𑀺𑀤𑁆𑀥𑀺𑀓𑀢𑀸 𑀫𑀳𑀸𑀦𑀼𑀪𑀸𑀯𑀢𑀸. 𑀅𑀬𑀜𑁆𑀳𑀺 𑀲𑀸 𑀦𑀤𑀺𑀓𑀸 𑀘𑀓𑁆𑀓𑀘𑁆𑀙𑀺𑀦𑁆𑀦𑀸 𑀧𑀭𑀺𑀢𑁆𑀢𑀸 𑀮𑀼𑀴𑀺𑀢𑀸 𑀆𑀯𑀺𑀮𑀸 𑀲𑀦𑁆𑀤𑀫𑀸𑀦𑀸 𑀫𑀬𑀺 𑀉𑀧𑀲𑀗𑁆𑀓𑀫𑀦𑁆𑀢𑁂 𑀅𑀘𑁆𑀙𑀸 𑀯𑀺𑀧𑁆𑀧𑀲𑀦𑁆𑀦𑀸 𑀅𑀦𑀸𑀯𑀺𑀮𑀸 𑀲𑀦𑁆𑀤𑀢𑀻’’𑀢𑀺. 𑀧𑀢𑁆𑀢𑁂𑀦 𑀧𑀸𑀦𑀻𑀬𑀁 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂, 𑀢𑀣𑀸𑀕𑀢𑀲𑁆𑀲 𑀫𑀳𑀺𑀤𑁆𑀥𑀺𑀓𑀢𑀸 𑀫𑀳𑀸𑀦𑀼𑀪𑀸𑀯𑀢𑀸. 𑀇𑀤𑀸𑀦𑀺 𑀲𑀸 𑀪𑀦𑁆𑀢𑁂 𑀦𑀤𑀺𑀓𑀸 𑀘𑀓𑁆𑀓𑀘𑁆𑀙𑀺𑀦𑁆𑀦𑀸 𑀧𑀭𑀺𑀢𑁆𑀢𑀸 𑀮𑀼𑀴𑀺𑀢𑀸 𑀆𑀯𑀺𑀮𑀸 𑀲𑀦𑁆𑀤𑀫𑀸𑀦𑀸 𑀫𑀬𑀺 𑀉𑀧𑀲𑀗𑁆𑀓𑀫𑀦𑁆𑀢𑁂 𑀅𑀘𑁆𑀙𑀸 𑀯𑀺𑀧𑁆𑀧𑀲𑀦𑁆𑀦𑀸 𑀅𑀦𑀸𑀯𑀺𑀮𑀸 𑀲𑀦𑁆𑀤𑀺𑀢𑁆𑀣. 𑀧𑀺𑀯𑀢𑀼 𑀪𑀕𑀯𑀸 𑀧𑀸𑀦𑀻𑀬𑀁 𑀧𑀺𑀯𑀢𑀼 𑀲𑀼𑀕𑀢𑁄 𑀧𑀸𑀦𑀻𑀬’’𑀦𑁆𑀢𑀺. 𑀅𑀣 𑀔𑁄 𑀪𑀕𑀯𑀸 𑀧𑀸𑀦𑀻𑀬𑀁 𑀅𑀧𑀸𑀬𑀺.

𑀧𑀼𑀓𑁆𑀓𑀼𑀲𑀫𑀮𑁆𑀮𑀧𑀼𑀢𑁆𑀢𑀯𑀢𑁆𑀣𑀼

𑁧𑁯𑁨. 𑀢𑁂𑀦 ¶ ¶ ¶ 𑀭𑁄𑀔𑁄 𑀧𑀦 𑀲𑀫𑀬𑁂𑀦 𑀧𑀼𑀓𑁆𑀓𑀼𑀲𑁄 𑀫𑀮𑁆𑀮𑀧𑀼𑀢𑁆𑀢𑁄 𑀆𑀴𑀸𑀭𑀲𑁆𑀲 𑀓𑀸𑀮𑀸𑀫𑀲𑁆𑀲 𑀲𑀸𑀯𑀓𑁄 𑀓𑀼𑀲𑀺𑀦𑀸𑀭𑀸𑀬 𑀧𑀸𑀯𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀅𑀤𑁆𑀤𑀲𑀸 𑀔𑁄 𑀧𑀼𑀓𑁆𑀓𑀼𑀲𑁄 𑀫𑀮𑁆𑀮𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑀁. 𑀤𑀺𑀲𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀧𑀼𑀓𑁆𑀓𑀼𑀲𑁄 𑀫𑀮𑁆𑀮𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂, 𑀲𑀦𑁆𑀢𑁂𑀦 𑀯𑀢, 𑀪𑀦𑁆𑀢𑁂, 𑀧𑀩𑁆𑀩𑀚𑀺𑀢𑀸 𑀯𑀺𑀳𑀸𑀭𑁂𑀦 𑀯𑀺𑀳𑀭𑀦𑁆𑀢𑀺. 𑀪𑀽𑀢𑀧𑀼𑀩𑁆𑀩𑀁, 𑀪𑀦𑁆𑀢𑁂 ¶ , 𑀆𑀴𑀸𑀭𑁄 𑀓𑀸𑀮𑀸𑀫𑁄 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑁆𑀧𑀦𑁆𑀦𑁄 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀧𑀜𑁆𑀘𑀫𑀢𑁆𑀢𑀸𑀦𑀺 𑀲𑀓𑀝𑀲𑀢𑀸𑀦𑀺 𑀆𑀴𑀸𑀭𑀁 𑀓𑀸𑀮𑀸𑀫𑀁 𑀦𑀺𑀲𑁆𑀲𑀸𑀬 𑀦𑀺𑀲𑁆𑀲𑀸𑀬 𑀅𑀢𑀺𑀓𑁆𑀓𑀫𑀺𑀁𑀲𑀼. 𑀅𑀣 𑀔𑁄, 𑀪𑀦𑁆𑀢𑁂, 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀢𑀲𑁆𑀲 𑀲𑀓𑀝𑀲𑀢𑁆𑀣𑀲𑁆𑀲 [𑀲𑀓𑀝𑀲𑀢𑀲𑁆𑀲 (𑀓.)] 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀆𑀕𑀘𑁆𑀙𑀦𑁆𑀢𑁄 𑀬𑁂𑀦 𑀆𑀴𑀸𑀭𑁄 𑀓𑀸𑀮𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀴𑀸𑀭𑀁 𑀓𑀸𑀮𑀸𑀫𑀁 𑀏𑀢𑀤𑀯𑁄𑀘 𑁋 ‘𑀅𑀧𑀺, 𑀪𑀦𑁆𑀢𑁂, 𑀧𑀜𑁆𑀘𑀫𑀢𑁆𑀢𑀸𑀦𑀺 𑀲𑀓𑀝𑀲𑀢𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺 𑀅𑀤𑁆𑀤𑀲𑀸’𑀢𑀺? ‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀅𑀤𑁆𑀤𑀲’𑀦𑁆𑀢𑀺. ‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀲𑀤𑁆𑀤𑀁 𑀅𑀲𑁆𑀲𑁄𑀲𑀻’𑀢𑀺? ‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀲𑀤𑁆𑀤𑀁 𑀅𑀲𑁆𑀲𑁄𑀲𑀺’𑀦𑁆𑀢𑀺. ‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀲𑀼𑀢𑁆𑀢𑁄 𑀅𑀳𑁄𑀲𑀻’𑀢𑀺? ‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀲𑀼𑀢𑁆𑀢𑁄 𑀅𑀳𑁄𑀲𑀺’𑀦𑁆𑀢𑀺. ‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀲𑀜𑁆𑀜𑀻 𑀅𑀳𑁄𑀲𑀻’𑀢𑀺? ‘𑀏𑀯𑀫𑀸𑀯𑀼𑀲𑁄’𑀢𑀺. ‘𑀲𑁄 𑀢𑁆𑀯𑀁, 𑀪𑀦𑁆𑀢𑁂, 𑀲𑀜𑁆𑀜𑀻 𑀲𑀫𑀸𑀦𑁄 𑀚𑀸𑀕𑀭𑁄 𑀧𑀜𑁆𑀘𑀫𑀢𑁆𑀢𑀸𑀦𑀺 𑀲𑀓𑀝𑀲𑀢𑀸𑀦𑀺 𑀦𑀺𑀲𑁆𑀲𑀸𑀬 𑀦𑀺𑀲𑁆𑀲𑀸𑀬 𑀅𑀢𑀺𑀓𑁆𑀓𑀦𑁆𑀢𑀸𑀦𑀺 𑀦𑁂𑀯 𑀅𑀤𑁆𑀤𑀲, 𑀦 𑀧𑀦 𑀲𑀤𑁆𑀤𑀁 𑀅𑀲𑁆𑀲𑁄𑀲𑀺; 𑀅𑀧𑀺𑀲𑀼 [𑀅𑀧𑀺 𑀳𑀺 (𑀲𑀻. 𑀲𑁆𑀬𑀸. 𑀧𑀻.)] 𑀢𑁂, 𑀪𑀦𑁆𑀢𑁂, 𑀲𑀗𑁆𑀖𑀸𑀝𑀺 𑀭𑀚𑁂𑀦 𑀑𑀓𑀺𑀡𑁆𑀡𑀸’𑀢𑀺? ‘𑀏𑀯𑀫𑀸𑀯𑀼𑀲𑁄’𑀢𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀅𑀩𑁆𑀪𑀼𑀢𑀁 𑀯𑀢 𑀪𑁄, 𑀲𑀦𑁆𑀢𑁂𑀦 𑀯𑀢 𑀪𑁄 𑀧𑀩𑁆𑀩𑀚𑀺𑀢𑀸 𑀯𑀺𑀳𑀸𑀭𑁂𑀦 𑀯𑀺𑀳𑀭𑀦𑁆𑀢𑀺. 𑀬𑀢𑁆𑀭 𑀳𑀺 𑀦𑀸𑀫 𑀲𑀜𑁆𑀜𑀻 𑀲𑀫𑀸𑀦𑁄 ¶ 𑀚𑀸𑀕𑀭𑁄 𑀧𑀜𑁆𑀘𑀫𑀢𑁆𑀢𑀸𑀦𑀺 𑀲𑀓𑀝𑀲𑀢𑀸𑀦𑀺 𑀦𑀺𑀲𑁆𑀲𑀸𑀬 𑀦𑀺𑀲𑁆𑀲𑀸𑀬 𑀅𑀢𑀺𑀓𑁆𑀓𑀦𑁆𑀢𑀸𑀦𑀺 𑀦𑁂𑀯 𑀤𑀓𑁆𑀔𑀢𑀺, 𑀦 𑀧𑀦 𑀲𑀤𑁆𑀤𑀁 𑀲𑁄𑀲𑁆𑀲𑀢𑀻’𑀢𑀺! 𑀆𑀴𑀸𑀭𑁂 𑀓𑀸𑀮𑀸𑀫𑁂 𑀉𑀴𑀸𑀭𑀁 𑀧𑀲𑀸𑀤𑀁 𑀧𑀯𑁂𑀤𑁂𑀢𑁆𑀯𑀸 𑀧𑀓𑁆𑀓𑀸𑀫𑀻’’𑀢𑀺.

𑁧𑁯𑁩. ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀧𑀼𑀓𑁆𑀓𑀼𑀲, 𑀓𑀢𑀫𑀁 𑀦𑀼 𑀔𑁄 𑀤𑀼𑀓𑁆𑀓𑀭𑀢𑀭𑀁 𑀯𑀸 𑀤𑀼𑀭𑀪𑀺𑀲𑀫𑁆𑀪𑀯𑀢𑀭𑀁 𑀯𑀸 𑁋 𑀬𑁄 𑀯𑀸 𑀲𑀜𑁆𑀜𑀻 𑀲𑀫𑀸𑀦𑁄 𑀚𑀸𑀕𑀭𑁄 𑀧𑀜𑁆𑀘𑀫𑀢𑁆𑀢𑀸𑀦𑀺 ¶ 𑀲𑀓𑀝𑀲𑀢𑀸𑀦𑀺 𑀦𑀺𑀲𑁆𑀲𑀸𑀬 𑀦𑀺𑀲𑁆𑀲𑀸𑀬 𑀅𑀢𑀺𑀓𑁆𑀓𑀦𑁆𑀢𑀸𑀦𑀺 𑀦𑁂𑀯 𑀧𑀲𑁆𑀲𑁂𑀬𑁆𑀬, 𑀦 𑀧𑀦 𑀲𑀤𑁆𑀤𑀁 ¶ 𑀲𑀼𑀡𑁂𑀬𑁆𑀬; 𑀬𑁄 𑀯𑀸 𑀲𑀜𑁆𑀜𑀻 𑀲𑀫𑀸𑀦𑁄 𑀚𑀸𑀕𑀭𑁄 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀤𑁂𑀯𑁂 𑀕𑀴𑀕𑀴𑀸𑀬𑀦𑁆𑀢𑁂 𑀯𑀺𑀚𑁆𑀚𑀼𑀮𑁆𑀮𑀢𑀸𑀲𑀼 [𑀯𑀺𑀚𑁆𑀚𑀼𑀢𑀸𑀲𑀼 (𑀲𑀻. 𑀲𑁆𑀬𑀸. 𑀧𑀻.)] 𑀦𑀺𑀘𑁆𑀙𑀭𑀦𑁆𑀢𑀻𑀲𑀼 𑀅𑀲𑀦𑀺𑀬𑀸 𑀨𑀮𑀦𑁆𑀢𑀺𑀬𑀸 𑀦𑁂𑀯 𑀧𑀲𑁆𑀲𑁂𑀬𑁆𑀬, 𑀦 𑀧𑀦 𑀲𑀤𑁆𑀤𑀁 𑀲𑀼𑀡𑁂𑀬𑁆𑀬𑀸’’𑀢𑀺? ‘‘𑀓𑀺𑀜𑁆𑀳𑀺, 𑀪𑀦𑁆𑀢𑁂, 𑀓𑀭𑀺𑀲𑁆𑀲𑀦𑁆𑀢𑀺 𑀧𑀜𑁆𑀘 𑀯𑀸 𑀲𑀓𑀝𑀲𑀢𑀸𑀦𑀺 𑀙 𑀯𑀸 𑀲𑀓𑀝𑀲𑀢𑀸𑀦𑀺 𑀲𑀢𑁆𑀢 𑀯𑀸 𑀲𑀓𑀝𑀲𑀢𑀸𑀦𑀺 𑀅𑀝𑁆𑀞 𑀯𑀸 𑀲𑀓𑀝𑀲𑀢𑀸𑀦𑀺 𑀦𑀯 𑀯𑀸 𑀲𑀓𑀝𑀲𑀢𑀸𑀦𑀺 [𑀦𑀯 𑀯𑀸 𑀲𑀓𑀝𑀲𑀢𑀸𑀦𑀺 𑀤𑀲 𑀯𑀸 𑀲𑀓𑀝𑀲𑀢𑀸𑀦𑀺 (𑀲𑀻.)], 𑀲𑀓𑀝𑀲𑀳𑀲𑁆𑀲𑀁 𑀯𑀸 𑀲𑀓𑀝𑀲𑀢𑀲𑀳𑀲𑁆𑀲𑀁 𑀯𑀸. 𑀅𑀣 𑀔𑁄 𑀏𑀢𑀤𑁂𑀯 𑀤𑀼𑀓𑁆𑀓𑀭𑀢𑀭𑀁 𑀘𑁂𑀯 𑀤𑀼𑀭𑀪𑀺𑀲𑀫𑁆𑀪𑀯𑀢𑀭𑀜𑁆𑀘 𑀬𑁄 ¶ 𑀲𑀜𑁆𑀜𑀻 𑀲𑀫𑀸𑀦𑁄 𑀚𑀸𑀕𑀭𑁄 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀤𑁂𑀯𑁂 𑀕𑀴𑀕𑀴𑀸𑀬𑀦𑁆𑀢𑁂 𑀯𑀺𑀚𑁆𑀚𑀼𑀮𑁆𑀮𑀢𑀸𑀲𑀼 𑀦𑀺𑀘𑁆𑀙𑀭𑀦𑁆𑀢𑀻𑀲𑀼 𑀅𑀲𑀦𑀺𑀬𑀸 𑀨𑀮𑀦𑁆𑀢𑀺𑀬𑀸 𑀦𑁂𑀯 𑀧𑀲𑁆𑀲𑁂𑀬𑁆𑀬, 𑀦 𑀧𑀦 𑀲𑀤𑁆𑀤𑀁 𑀲𑀼𑀡𑁂𑀬𑁆𑀬𑀸’’𑀢𑀺.

‘‘𑀏𑀓𑀫𑀺𑀤𑀸𑀳𑀁, 𑀧𑀼𑀓𑁆𑀓𑀼𑀲, 𑀲𑀫𑀬𑀁 𑀆𑀢𑀼𑀫𑀸𑀬𑀁 𑀯𑀺𑀳𑀭𑀸𑀫𑀺 𑀪𑀼𑀲𑀸𑀕𑀸𑀭𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀤𑁂𑀯𑁂 𑀕𑀴𑀕𑀴𑀸𑀬𑀦𑁆𑀢𑁂 𑀯𑀺𑀚𑁆𑀚𑀼𑀮𑁆𑀮𑀢𑀸𑀲𑀼 𑀦𑀺𑀘𑁆𑀙𑀭𑀦𑁆𑀢𑀻𑀲𑀼 𑀅𑀲𑀦𑀺𑀬𑀸 𑀨𑀮𑀦𑁆𑀢𑀺𑀬𑀸 𑀅𑀯𑀺𑀤𑀽𑀭𑁂 𑀪𑀼𑀲𑀸𑀕𑀸𑀭𑀲𑁆𑀲 𑀤𑁆𑀯𑁂 𑀓𑀲𑁆𑀲𑀓𑀸 𑀪𑀸𑀢𑀭𑁄 𑀳𑀢𑀸 𑀘𑀢𑁆𑀢𑀸𑀭𑁄 𑀘 𑀩𑀮𑀺𑀩𑀤𑁆𑀤𑀸 [𑀩𑀮𑀺𑀩𑀤𑁆𑀤𑀸 (𑀲𑀻. 𑀧𑀻.)]. 𑀅𑀣 𑀔𑁄, 𑀧𑀼𑀓𑁆𑀓𑀼𑀲, 𑀆𑀢𑀼𑀫𑀸𑀬 𑀫𑀳𑀸𑀚𑀦𑀓𑀸𑀬𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑁂𑀦 𑀢𑁂 𑀤𑁆𑀯𑁂 𑀓𑀲𑁆𑀲𑀓𑀸 𑀪𑀸𑀢𑀭𑁄 𑀳𑀢𑀸 𑀘𑀢𑁆𑀢𑀸𑀭𑁄 𑀘 𑀩𑀮𑀺𑀩𑀤𑁆𑀤𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀢𑁂𑀦 𑀔𑁄 𑀧𑀦𑀸𑀳𑀁, 𑀧𑀼𑀓𑁆𑀓𑀼𑀲, 𑀲𑀫𑀬𑁂𑀦 𑀪𑀼𑀲𑀸𑀕𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀼𑀲𑀸𑀕𑀸𑀭𑀤𑁆𑀯𑀸𑀭𑁂 𑀅𑀩𑁆𑀪𑁄𑀓𑀸𑀲𑁂 𑀘𑀗𑁆𑀓𑀫𑀸𑀫𑀺. 𑀅𑀣 𑀔𑁄, 𑀧𑀼𑀓𑁆𑀓𑀼𑀲, 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀢𑀫𑁆𑀳𑀸 𑀫𑀳𑀸𑀚𑀦𑀓𑀸𑀬𑀸 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 ¶ 𑀞𑀺𑀢𑀁 𑀔𑁄 𑀅𑀳𑀁, 𑀧𑀼𑀓𑁆𑀓𑀼𑀲, 𑀢𑀁 𑀧𑀼𑀭𑀺𑀲𑀁 𑀏𑀢𑀤𑀯𑁄𑀘𑀁 𑁋 ‘𑀓𑀺𑀁 𑀦𑀼 𑀔𑁄 𑀏𑀲𑁄, 𑀆𑀯𑀼𑀲𑁄, 𑀫𑀳𑀸𑀚𑀦𑀓𑀸𑀬𑁄 𑀲𑀦𑁆𑀦𑀺𑀧𑀢𑀺𑀢𑁄’𑀢𑀺? ‘𑀇𑀤𑀸𑀦𑀺 ¶ , 𑀪𑀦𑁆𑀢𑁂, 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀤𑁂𑀯𑁂 𑀕𑀴𑀕𑀴𑀸𑀬𑀦𑁆𑀢𑁂 𑀯𑀺𑀚𑁆𑀚𑀼𑀮𑁆𑀮𑀢𑀸𑀲𑀼 𑀦𑀺𑀘𑁆𑀙𑀭𑀦𑁆𑀢𑀻𑀲𑀼 𑀅𑀲𑀦𑀺𑀬𑀸 𑀨𑀮𑀦𑁆𑀢𑀺𑀬𑀸 𑀤𑁆𑀯𑁂 𑀓𑀲𑁆𑀲𑀓𑀸 𑀪𑀸𑀢𑀭𑁄 𑀳𑀢𑀸 𑀘𑀢𑁆𑀢𑀸𑀭𑁄 𑀘 𑀩𑀮𑀺𑀩𑀤𑁆𑀤𑀸. 𑀏𑀢𑁆𑀣𑁂𑀲𑁄 𑀫𑀳𑀸𑀚𑀦𑀓𑀸𑀬𑁄 𑀲𑀦𑁆𑀦𑀺𑀧𑀢𑀺𑀢𑁄. 𑀢𑁆𑀯𑀁 𑀧𑀦, 𑀪𑀦𑁆𑀢𑁂, 𑀓𑁆𑀯 𑀅𑀳𑁄𑀲𑀻’𑀢𑀺? ‘𑀇𑀥𑁂𑀯 𑀔𑁄 𑀅𑀳𑀁, 𑀆𑀯𑀼𑀲𑁄, 𑀅𑀳𑁄𑀲𑀺’𑀦𑁆𑀢𑀺. ‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀅𑀤𑁆𑀤𑀲𑀸’𑀢𑀺? ‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀅𑀤𑁆𑀤𑀲’𑀦𑁆𑀢𑀺. ‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀲𑀤𑁆𑀤𑀁 𑀅𑀲𑁆𑀲𑁄𑀲𑀻’𑀢𑀺? ‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀲𑀤𑁆𑀤𑀁 𑀅𑀲𑁆𑀲𑁄𑀲𑀺’𑀦𑁆𑀢𑀺. ‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀲𑀼𑀢𑁆𑀢𑁄 𑀅𑀳𑁄𑀲𑀻’𑀢𑀺? ‘𑀦 𑀔𑁄 𑀅𑀳𑀁, 𑀆𑀯𑀼𑀲𑁄, 𑀲𑀼𑀢𑁆𑀢𑁄 𑀅𑀳𑁄𑀲𑀺’𑀦𑁆𑀢𑀺. ‘𑀓𑀺𑀁 𑀧𑀦, 𑀪𑀦𑁆𑀢𑁂, 𑀲𑀜𑁆𑀜𑀻 𑀅𑀳𑁄𑀲𑀻’𑀢𑀺? ‘𑀏𑀯𑀫𑀸𑀯𑀼𑀲𑁄’𑀢𑀺. ‘𑀲𑁄 𑀢𑁆𑀯𑀁, 𑀪𑀦𑁆𑀢𑁂, 𑀲𑀜𑁆𑀜𑀻 𑀲𑀫𑀸𑀦𑁄 𑀚𑀸𑀕𑀭𑁄 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀤𑁂𑀯𑁂 𑀕𑀴𑀕𑀴𑀸𑀬𑀦𑁆𑀢𑁂 ¶ 𑀯𑀺𑀚𑁆𑀚𑀼𑀮𑁆𑀮𑀢𑀸𑀲𑀼 𑀦𑀺𑀘𑁆𑀙𑀭𑀦𑁆𑀢𑀻𑀲𑀼 𑀅𑀲𑀦𑀺𑀬𑀸 𑀨𑀮𑀦𑁆𑀢𑀺𑀬𑀸 𑀦𑁂𑀯 𑀅𑀤𑁆𑀤𑀲, 𑀦 𑀧𑀦 𑀲𑀤𑁆𑀤𑀁 𑀅𑀲𑁆𑀲𑁄𑀲𑀻’𑀢𑀺? ‘‘𑀏𑀯𑀫𑀸𑀯𑀼𑀲𑁄’’𑀢𑀺?

‘‘𑀅𑀣 𑀔𑁄, 𑀧𑀼𑀓𑁆𑀓𑀼𑀲, 𑀧𑀼𑀭𑀺𑀲𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀅𑀩𑁆𑀪𑀼𑀢𑀁 𑀯𑀢 𑀪𑁄, 𑀲𑀦𑁆𑀢𑁂𑀦 𑀯𑀢 𑀪𑁄 𑀧𑀩𑁆𑀩𑀚𑀺𑀢𑀸 𑀯𑀺𑀳𑀸𑀭𑁂𑀦 𑀯𑀺𑀳𑀭𑀦𑁆𑀢𑀺. 𑀬𑀢𑁆𑀭 𑀳𑀺 𑀦𑀸𑀫 𑀲𑀜𑁆𑀜𑀻 𑀲𑀫𑀸𑀦𑁄 𑀚𑀸𑀕𑀭𑁄 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀤𑁂𑀯𑁂 𑀕𑀴𑀕𑀴𑀸𑀬𑀦𑁆𑀢𑁂 𑀯𑀺𑀚𑁆𑀚𑀼𑀮𑁆𑀮𑀢𑀸𑀲𑀼 𑀦𑀺𑀘𑁆𑀙𑀭𑀦𑁆𑀢𑀻𑀲𑀼 𑀅𑀲𑀦𑀺𑀬𑀸 𑀨𑀮𑀦𑁆𑀢𑀺𑀬𑀸 𑀦𑁂𑀯 𑀤𑀓𑁆𑀔𑀢𑀺, 𑀦 𑀧𑀦 𑀲𑀤𑁆𑀤𑀁 𑀲𑁄𑀲𑁆𑀲𑀢𑀻’𑀢𑀺 [𑀲𑀼𑀡𑀺𑀲𑁆𑀲𑀢𑀺 (𑀲𑁆𑀬𑀸.)]. 𑀫𑀬𑀺 𑀉𑀴𑀸𑀭𑀁 𑀧𑀲𑀸𑀤𑀁 𑀧𑀯𑁂𑀤𑁂𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀧𑀼𑀓𑁆𑀓𑀼𑀲𑁄 𑀫𑀮𑁆𑀮𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀲𑀸𑀳𑀁, 𑀪𑀦𑁆𑀢𑁂, 𑀬𑁄 𑀫𑁂 𑀆𑀴𑀸𑀭𑁂 𑀓𑀸𑀮𑀸𑀫𑁂 𑀧𑀲𑀸𑀤𑁄 𑀢𑀁 𑀫𑀳𑀸𑀯𑀸𑀢𑁂 𑀯𑀸 𑀑𑀨𑀼𑀡𑀸𑀫𑀺 𑀲𑀻𑀖𑀲𑁄𑀢𑀸𑀬 ¶ [𑀲𑀺𑀗𑁆𑀖𑀲𑁄𑀢𑀸𑀬 (𑀓.)] 𑀯𑀸 𑀦𑀤𑀺𑀬𑀸 𑀧𑀯𑀸𑀳𑁂𑀫𑀺. 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂! 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 ¶ 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 ‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’𑀢𑀺; 𑀏𑀯𑀫𑁂𑀯𑀁 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 ¶ 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀕𑀯𑀸 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺.

𑁧𑁯𑁪. 𑀅𑀣 𑀔𑁄 𑀧𑀼𑀓𑁆𑀓𑀼𑀲𑁄 𑀫𑀮𑁆𑀮𑀧𑀼𑀢𑁆𑀢𑁄 𑀅𑀜𑁆𑀜𑀢𑀭𑀁 𑀧𑀼𑀭𑀺𑀲𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀗𑁆𑀖 𑀫𑁂 𑀢𑁆𑀯𑀁, 𑀪𑀡𑁂, 𑀲𑀺𑀗𑁆𑀕𑀻𑀯𑀡𑁆𑀡𑀁 𑀬𑀼𑀕𑀫𑀝𑁆𑀞𑀁 𑀥𑀸𑀭𑀡𑀻𑀬𑀁 𑀆𑀳𑀭𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀧𑀼𑀭𑀺𑀲𑁄 𑀧𑀼𑀓𑁆𑀓𑀼𑀲𑀲𑁆𑀲 𑀫𑀮𑁆𑀮𑀧𑀼𑀢𑁆𑀢𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀁 𑀲𑀺𑀗𑁆𑀕𑀻𑀯𑀡𑁆𑀡𑀁 𑀬𑀼𑀕𑀫𑀝𑁆𑀞𑀁 𑀥𑀸𑀭𑀡𑀻𑀬𑀁 𑀆𑀳𑀭𑀺 [𑀆𑀳𑀭𑀲𑀺 (𑀓.)]. 𑀅𑀣 𑀔𑁄 𑀧𑀼𑀓𑁆𑀓𑀼𑀲𑁄 𑀫𑀮𑁆𑀮𑀧𑀼𑀢𑁆𑀢𑁄 𑀢𑀁 𑀲𑀺𑀗𑁆𑀕𑀻𑀯𑀡𑁆𑀡𑀁 𑀬𑀼𑀕𑀫𑀝𑁆𑀞𑀁 𑀥𑀸𑀭𑀡𑀻𑀬𑀁 𑀪𑀕𑀯𑀢𑁄 𑀉𑀧𑀦𑀸𑀫𑁂𑀲𑀺 𑁋 ‘‘𑀇𑀤𑀁, 𑀪𑀦𑁆𑀢𑁂, 𑀲𑀺𑀗𑁆𑀕𑀻𑀯𑀡𑁆𑀡𑀁 𑀬𑀼𑀕𑀫𑀝𑁆𑀞𑀁 𑀥𑀸𑀭𑀡𑀻𑀬𑀁, 𑀢𑀁 𑀫𑁂 𑀪𑀕𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺. ‘‘𑀢𑁂𑀦 𑀳𑀺, 𑀧𑀼𑀓𑁆𑀓𑀼𑀲, 𑀏𑀓𑁂𑀦 𑀫𑀁 𑀅𑀘𑁆𑀙𑀸𑀤𑁂𑀳𑀺, 𑀏𑀓𑁂𑀦 𑀆𑀦𑀦𑁆𑀤’’𑀦𑁆𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀧𑀼𑀓𑁆𑀓𑀼𑀲𑁄 𑀫𑀮𑁆𑀮𑀧𑀼𑀢𑁆𑀢𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀏𑀓𑁂𑀦 𑀪𑀕𑀯𑀦𑁆𑀢𑀁 𑀅𑀘𑁆𑀙𑀸𑀤𑁂𑀢𑀺, 𑀏𑀓𑁂𑀦 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁. 𑀅𑀣 𑀔𑁄 𑀪𑀕𑀯𑀸 𑀧𑀼𑀓𑁆𑀓𑀼𑀲𑀁 𑀫𑀮𑁆𑀮𑀧𑀼𑀢𑁆𑀢𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀺. 𑀅𑀣 𑀔𑁄 𑀧𑀼𑀓𑁆𑀓𑀼𑀲𑁄 𑀫𑀮𑁆𑀮𑀧𑀼𑀢𑁆𑀢𑁄 𑀪𑀕𑀯𑀢𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑀺𑀢𑁄 𑀲𑀫𑀸𑀤𑀧𑀺𑀢𑁄 𑀲𑀫𑀼𑀢𑁆𑀢𑁂𑀚𑀺𑀢𑁄 𑀲𑀫𑁆𑀧𑀳𑀁𑀲𑀺𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑁧𑁯𑁫. 𑀅𑀣 ¶ ¶ 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑁂 𑀧𑀼𑀓𑁆𑀓𑀼𑀲𑁂 𑀫𑀮𑁆𑀮𑀧𑀼𑀢𑁆𑀢𑁂 𑀢𑀁 𑀲𑀺𑀗𑁆𑀕𑀻𑀯𑀡𑁆𑀡𑀁 𑀬𑀼𑀕𑀫𑀝𑁆𑀞𑀁 𑀥𑀸𑀭𑀡𑀻𑀬𑀁 𑀪𑀕𑀯𑀢𑁄 𑀓𑀸𑀬𑀁 𑀉𑀧𑀦𑀸𑀫𑁂𑀲𑀺. 𑀢𑀁 𑀪𑀕𑀯𑀢𑁄 𑀓𑀸𑀬𑀁 𑀉𑀧𑀦𑀸𑀫𑀺𑀢𑀁 𑀳𑀢𑀘𑁆𑀘𑀺𑀓𑀁 𑀯𑀺𑀬 [𑀯𑀻𑀢𑀘𑁆𑀘𑀺𑀓𑀁𑀯𑀺𑀬 (𑀲𑀻. 𑀧𑀻.)] 𑀔𑀸𑀬𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂, 𑀬𑀸𑀯 𑀧𑀭𑀺𑀲𑀼𑀤𑁆𑀥𑁄, 𑀪𑀦𑁆𑀢𑁂, 𑀢𑀣𑀸𑀕𑀢𑀲𑁆𑀲 𑀙𑀯𑀺𑀯𑀡𑁆𑀡𑁄 𑀧𑀭𑀺𑀬𑁄𑀤𑀸𑀢𑁄. 𑀇𑀤𑀁, 𑀪𑀦𑁆𑀢𑁂, 𑀲𑀺𑀗𑁆𑀕𑀻𑀯𑀡𑁆𑀡𑀁 𑀬𑀼𑀕𑀫𑀝𑁆𑀞𑀁 𑀥𑀸𑀭𑀡𑀻𑀬𑀁 𑀪𑀕𑀯𑀢𑁄 ¶ 𑀓𑀸𑀬𑀁 𑀉𑀧𑀦𑀸𑀫𑀺𑀢𑀁 𑀳𑀢𑀘𑁆𑀘𑀺𑀓𑀁 𑀯𑀺𑀬 𑀔𑀸𑀬𑀢𑀻’’𑀢𑀺. ‘‘𑀏𑀯𑀫𑁂𑀢𑀁, 𑀆𑀦𑀦𑁆𑀤, 𑀏𑀯𑀫𑁂𑀢𑀁, 𑀆𑀦𑀦𑁆𑀤 𑀤𑁆𑀯𑀻𑀲𑀼 𑀓𑀸𑀮𑁂𑀲𑀼 𑀅𑀢𑀺𑀯𑀺𑀬 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄 𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀺 𑀙𑀯𑀺𑀯𑀡𑁆𑀡𑁄 𑀧𑀭𑀺𑀬𑁄𑀤𑀸𑀢𑁄. 𑀓𑀢𑀫𑁂𑀲𑀼 𑀤𑁆𑀯𑀻𑀲𑀼? 𑀬𑀜𑁆𑀘, 𑀆𑀦𑀦𑁆𑀤, 𑀭𑀢𑁆𑀢𑀺𑀁 𑀢𑀣𑀸𑀕𑀢𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺, 𑀬𑀜𑁆𑀘 𑀭𑀢𑁆𑀢𑀺𑀁 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀇𑀫𑁂𑀲𑀼 𑀔𑁄, 𑀆𑀦𑀦𑁆𑀤, 𑀤𑁆𑀯𑀻𑀲𑀼 𑀓𑀸𑀮𑁂𑀲𑀼 𑀅𑀢𑀺𑀯𑀺𑀬 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄 𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀺 𑀙𑀯𑀺𑀯𑀡𑁆𑀡𑁄 𑀧𑀭𑀺𑀬𑁄𑀤𑀸𑀢𑁄. ‘‘𑀅𑀚𑁆𑀚 𑀔𑁄, 𑀧𑀦𑀸𑀦𑀦𑁆𑀤, 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀓𑀼𑀲𑀺𑀦𑀸𑀭𑀸𑀬𑀁 𑀉𑀧𑀯𑀢𑁆𑀢𑀦𑁂 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑁂 𑀅𑀦𑁆𑀢𑀭𑁂𑀦 [𑀅𑀦𑁆𑀢𑀭𑁂 (𑀲𑁆𑀬𑀸.)] 𑀬𑀫𑀓𑀲𑀸𑀮𑀸𑀦𑀁 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀺 [𑀪𑀯𑀺𑀲𑁆𑀲𑀢𑀻𑀢𑀺 (𑀓.)]. 𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀓𑀓𑀼𑀥𑀸 𑀦𑀤𑀻 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺.

𑀲𑀺𑀗𑁆𑀕𑀻𑀯𑀡𑁆𑀡𑀁 ¶ 𑀬𑀼𑀕𑀫𑀝𑁆𑀞𑀁, 𑀧𑀼𑀓𑁆𑀓𑀼𑀲𑁄 𑀅𑀪𑀺𑀳𑀸𑀭𑀬𑀺;

𑀢𑁂𑀦 𑀅𑀘𑁆𑀙𑀸𑀤𑀺𑀢𑁄 𑀲𑀢𑁆𑀣𑀸, 𑀳𑁂𑀫𑀯𑀡𑁆𑀡𑁄 𑀅𑀲𑁄𑀪𑀣𑀸𑀢𑀺.

𑁧𑁯𑁬. 𑀅𑀣 𑀔𑁄 𑀪𑀕𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀓𑀓𑀼𑀥𑀸 𑀦𑀤𑀻 𑀢𑁂𑀦𑀼𑀧𑀲𑀗𑁆𑀓𑀫𑀺 ¶ ; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀓𑀼𑀥𑀁 𑀦𑀤𑀺𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀦𑁆𑀳𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀬𑁂𑀦 𑀅𑀫𑁆𑀩𑀯𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀘𑀼𑀦𑁆𑀤𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀗𑁆𑀖 𑀫𑁂 𑀢𑁆𑀯𑀁, 𑀘𑀼𑀦𑁆𑀤𑀓, 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀧𑁂𑀳𑀺, 𑀓𑀺𑀮𑀦𑁆𑀢𑁄𑀲𑁆𑀫𑀺, 𑀘𑀼𑀦𑁆𑀤𑀓, 𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺.

‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀘𑀼𑀦𑁆𑀤𑀓𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀧𑁂𑀲𑀺. 𑀅𑀣 𑀔𑁄 𑀪𑀕𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺 𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀉𑀝𑁆𑀞𑀸𑀦𑀲𑀜𑁆𑀜𑀁 ¶ 𑀫𑀦𑀲𑀺𑀓𑀭𑀺𑀢𑁆𑀯𑀸. 𑀆𑀬𑀲𑁆𑀫𑀸 𑀧𑀦 𑀘𑀼𑀦𑁆𑀤𑀓𑁄 𑀢𑀢𑁆𑀣𑁂𑀯 𑀪𑀕𑀯𑀢𑁄 𑀧𑀼𑀭𑀢𑁄 𑀦𑀺𑀲𑀻𑀤𑀺.

𑀕𑀦𑁆𑀢𑁆𑀯𑀸𑀦 ¶ 𑀩𑀼𑀤𑁆𑀥𑁄 𑀦𑀤𑀺𑀓𑀁 𑀓𑀓𑀼𑀥𑀁,

𑀅𑀘𑁆𑀙𑁄𑀤𑀓𑀁 𑀲𑀸𑀢𑀼𑀤𑀓𑀁 𑀯𑀺𑀧𑁆𑀧𑀲𑀦𑁆𑀦𑀁;

𑀑𑀕𑀸𑀳𑀺 𑀲𑀢𑁆𑀣𑀸 𑀅𑀓𑀺𑀮𑀦𑁆𑀢𑀭𑀽𑀧𑁄 [𑀲𑀼𑀓𑀺𑀮𑀦𑁆𑀢𑀭𑀽𑀧𑁄 (𑀲𑀻. 𑀧𑀻.)],

𑀢𑀣𑀸𑀕𑀢𑁄 𑀅𑀧𑁆𑀧𑀝𑀺𑀫𑁄 𑀘 [𑀅𑀧𑁆𑀧𑀝𑀺𑀫𑁄𑀥 (𑀧𑀻.)] 𑀮𑁄𑀓𑁂.

𑀦𑁆𑀳𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘𑀼𑀤𑀢𑀸𑀭𑀺 𑀲𑀢𑁆𑀣𑀸 [𑀧𑀺𑀯𑀺𑀢𑁆𑀯𑀸 𑀘𑀼𑀦𑁆𑀤𑀓𑁂𑀦, 𑀧𑀺𑀯𑀺𑀢𑁆𑀯𑀸 𑀘 𑀉𑀢𑁆𑀢𑀭𑀺 (𑀓.)],

𑀧𑀼𑀭𑀓𑁆𑀔𑀢𑁄 𑀪𑀺𑀓𑁆𑀔𑀼𑀕𑀡𑀲𑁆𑀲 𑀫𑀚𑁆𑀛𑁂;

𑀯𑀢𑁆𑀢𑀸 [𑀲𑀢𑁆𑀣𑀸 (𑀲𑀻. 𑀲𑁆𑀬𑀸. 𑀧𑀻.)] 𑀧𑀯𑀢𑁆𑀢𑀸 𑀪𑀕𑀯𑀸 𑀇𑀥 𑀥𑀫𑁆𑀫𑁂,

𑀉𑀧𑀸𑀕𑀫𑀺 𑀅𑀫𑁆𑀩𑀯𑀦𑀁 𑀫𑀳𑁂𑀲𑀺.

𑀆𑀫𑀦𑁆𑀢𑀬𑀺 𑀘𑀼𑀦𑁆𑀤𑀓𑀁 𑀦𑀸𑀫 𑀪𑀺𑀓𑁆𑀔𑀼𑀁,

𑀘𑀢𑀼𑀕𑁆𑀕𑀼𑀡𑀁 ¶ 𑀲𑀦𑁆𑀣𑀭 𑀫𑁂 𑀦𑀺𑀧𑀚𑁆𑀚𑀁;

𑀲𑁄 𑀘𑁄𑀤𑀺𑀢𑁄 𑀪𑀸𑀯𑀺𑀢𑀢𑁆𑀢𑁂𑀦 𑀘𑀼𑀦𑁆𑀤𑁄,

𑀘𑀢𑀼𑀕𑁆𑀕𑀼𑀡𑀁 𑀲𑀦𑁆𑀣𑀭𑀺 𑀔𑀺𑀧𑁆𑀧𑀫𑁂𑀯.

𑀦𑀺𑀧𑀚𑁆𑀚𑀺 𑀲𑀢𑁆𑀣𑀸 𑀅𑀓𑀺𑀮𑀦𑁆𑀢𑀭𑀽𑀧𑁄,

𑀘𑀼𑀦𑁆𑀤𑁄𑀧𑀺 𑀢𑀢𑁆𑀣 𑀧𑀫𑀼𑀔𑁂 [𑀲𑀫𑀼𑀔𑁂 (𑀓.)] 𑀦𑀺𑀲𑀻𑀤𑀻𑀢𑀺.

𑁧𑁯𑁭. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀺𑀬𑀸 𑀔𑁄 [𑀬𑁄 𑀔𑁄 (𑀓.)], 𑀧𑀦𑀸𑀦𑀦𑁆𑀤, 𑀘𑀼𑀦𑁆𑀤𑀲𑁆𑀲 ¶ 𑀓𑀫𑁆𑀫𑀸𑀭𑀧𑀼𑀢𑁆𑀢𑀲𑁆𑀲 𑀓𑁄𑀘𑀺 𑀯𑀺𑀧𑁆𑀧𑀝𑀺𑀲𑀸𑀭𑀁 𑀉𑀧𑁆𑀧𑀸𑀤𑁂𑀬𑁆𑀬 𑁋 ‘𑀢𑀲𑁆𑀲 𑀢𑁂, 𑀆𑀯𑀼𑀲𑁄 𑀘𑀼𑀦𑁆𑀤, 𑀅𑀮𑀸𑀪𑀸 𑀢𑀲𑁆𑀲 𑀢𑁂 𑀤𑀼𑀮𑁆𑀮𑀤𑁆𑀥𑀁, 𑀬𑀲𑁆𑀲 𑀢𑁂 𑀢𑀣𑀸𑀕𑀢𑁄 𑀧𑀘𑁆𑀙𑀺𑀫𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄’𑀢𑀺. 𑀘𑀼𑀦𑁆𑀤𑀲𑁆𑀲, 𑀆𑀦𑀦𑁆𑀤, 𑀓𑀫𑁆𑀫𑀸𑀭𑀧𑀼𑀢𑁆𑀢𑀲𑁆𑀲 𑀏𑀯𑀁 𑀯𑀺𑀧𑁆𑀧𑀝𑀺𑀲𑀸𑀭𑁄 𑀧𑀝𑀺𑀯𑀺𑀦𑁂𑀢𑀩𑁆𑀩𑁄 𑁋 ‘𑀢𑀲𑁆𑀲 𑀢𑁂, 𑀆𑀯𑀼𑀲𑁄 𑀘𑀼𑀦𑁆𑀤, 𑀮𑀸𑀪𑀸 𑀢𑀲𑁆𑀲 𑀢𑁂 𑀲𑀼𑀮𑀤𑁆𑀥𑀁, 𑀬𑀲𑁆𑀲 𑀢𑁂 𑀢𑀣𑀸𑀕𑀢𑁄 𑀧𑀘𑁆𑀙𑀺𑀫𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀲𑀫𑁆𑀫𑀼𑀔𑀸 𑀫𑁂𑀢𑀁, 𑀆𑀯𑀼𑀲𑁄 𑀘𑀼𑀦𑁆𑀤, 𑀪𑀕𑀯𑀢𑁄 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 𑀤𑁆𑀯𑁂 𑀫𑁂 𑀧𑀺𑀡𑁆𑀟𑀧𑀸𑀢𑀸 𑀲𑀫𑀲𑀫𑀨𑀮𑀸 ¶ [𑀲𑀫𑀸 𑀲𑀫𑀨𑀮𑀸 (𑀓.)] 𑀲𑀫𑀯𑀺𑀧𑀸𑀓𑀸 [𑀲𑀫𑀲𑀫𑀯𑀺𑀧𑀸𑀓𑀸 (𑀲𑀻. 𑀲𑁆𑀬𑀸. 𑀧𑀻.)], 𑀅𑀢𑀺𑀯𑀺𑀬 𑀅𑀜𑁆𑀜𑁂𑀳𑀺 𑀧𑀺𑀡𑁆𑀟𑀧𑀸𑀢𑁂𑀳𑀺 𑀫𑀳𑀧𑁆𑀨𑀮𑀢𑀭𑀸 𑀘 𑀫𑀳𑀸𑀦𑀺𑀲𑀁𑀲𑀢𑀭𑀸 𑀘. 𑀓𑀢𑀫𑁂 𑀤𑁆𑀯𑁂? 𑀬𑀜𑁆𑀘 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀣𑀸𑀕𑀢𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺, 𑀬𑀜𑁆𑀘 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀣𑀸𑀕𑀢𑁄 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀇𑀫𑁂 𑀤𑁆𑀯𑁂 𑀧𑀺𑀡𑁆𑀟𑀧𑀸𑀢𑀸 𑀲𑀫𑀲𑀫𑀨𑀮𑀸 𑀲𑀫𑀯𑀺𑀧𑀸𑀓𑀸 ¶ , 𑀅𑀢𑀺𑀯𑀺𑀬 𑀅𑀜𑁆𑀜𑁂𑀳𑀺 𑀧𑀺𑀡𑁆𑀟𑀧𑀸𑀢𑁂𑀳𑀺 𑀫𑀳𑀧𑁆𑀨𑀮𑀢𑀭𑀸 𑀘 𑀫𑀳𑀸𑀦𑀺𑀲𑀁𑀲𑀢𑀭𑀸 𑀘. 𑀆𑀬𑀼𑀲𑀁𑀯𑀢𑁆𑀢𑀦𑀺𑀓𑀁 𑀆𑀬𑀲𑁆𑀫𑀢𑀸 𑀘𑀼𑀦𑁆𑀤𑁂𑀦 𑀓𑀫𑁆𑀫𑀸𑀭𑀧𑀼𑀢𑁆𑀢𑁂𑀦 𑀓𑀫𑁆𑀫𑀁 𑀉𑀧𑀘𑀺𑀢𑀁, 𑀯𑀡𑁆𑀡𑀲𑀁𑀯𑀢𑁆𑀢𑀦𑀺𑀓𑀁 𑀆𑀬𑀲𑁆𑀫𑀢𑀸 𑀘𑀼𑀦𑁆𑀤𑁂𑀦 𑀓𑀫𑁆𑀫𑀸𑀭𑀧𑀼𑀢𑁆𑀢𑁂𑀦 𑀓𑀫𑁆𑀫𑀁 𑀉𑀧𑀘𑀺𑀢𑀁, 𑀲𑀼𑀔𑀲𑀁𑀯𑀢𑁆𑀢𑀦𑀺𑀓𑀁 𑀆𑀬𑀲𑁆𑀫𑀢𑀸 𑀘𑀼𑀦𑁆𑀤𑁂𑀦 𑀓𑀫𑁆𑀫𑀸𑀭𑀧𑀼𑀢𑁆𑀢𑁂𑀦 𑀓𑀫𑁆𑀫𑀁 𑀉𑀧𑀘𑀺𑀢𑀁, 𑀬𑀲𑀲𑀁𑀯𑀢𑁆𑀢𑀦𑀺𑀓𑀁 𑀆𑀬𑀲𑁆𑀫𑀢𑀸 𑀘𑀼𑀦𑁆𑀤𑁂𑀦 𑀓𑀫𑁆𑀫𑀸𑀭𑀧𑀼𑀢𑁆𑀢𑁂𑀦 𑀓𑀫𑁆𑀫𑀁 𑀉𑀧𑀘𑀺𑀢𑀁, 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀁 ¶ 𑀆𑀬𑀲𑁆𑀫𑀢𑀸 𑀘𑀼𑀦𑁆𑀤𑁂𑀦 𑀓𑀫𑁆𑀫𑀸𑀭𑀧𑀼𑀢𑁆𑀢𑁂𑀦 𑀓𑀫𑁆𑀫𑀁 𑀉𑀧𑀘𑀺𑀢𑀁, 𑀆𑀥𑀺𑀧𑀢𑁂𑀬𑁆𑀬𑀲𑀁𑀯𑀢𑁆𑀢𑀦𑀺𑀓𑀁 𑀆𑀬𑀲𑁆𑀫𑀢𑀸 𑀘𑀼𑀦𑁆𑀤𑁂𑀦 𑀓𑀫𑁆𑀫𑀸𑀭𑀧𑀼𑀢𑁆𑀢𑁂𑀦 𑀓𑀫𑁆𑀫𑀁 𑀉𑀧𑀘𑀺𑀢’𑀦𑁆𑀢𑀺. 𑀘𑀼𑀦𑁆𑀤𑀲𑁆𑀲, 𑀆𑀦𑀦𑁆𑀤, 𑀓𑀫𑁆𑀫𑀸𑀭𑀧𑀼𑀢𑁆𑀢𑀲𑁆𑀲 𑀏𑀯𑀁 𑀯𑀺𑀧𑁆𑀧𑀝𑀺𑀲𑀸𑀭𑁄 𑀧𑀝𑀺𑀯𑀺𑀦𑁂𑀢𑀩𑁆𑀩𑁄’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀤𑀤𑀢𑁄 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺,

𑀲𑀁𑀬𑀫𑀢𑁄 𑀯𑁂𑀭𑀁 𑀦 𑀘𑀻𑀬𑀢𑀺;

𑀓𑀼𑀲𑀮𑁄 𑀘 𑀚𑀳𑀸𑀢𑀺 𑀧𑀸𑀧𑀓𑀁,

𑀭𑀸𑀕𑀤𑁄𑀲𑀫𑁄𑀳𑀓𑁆𑀔𑀬𑀸 𑀲𑀦𑀺𑀩𑁆𑀩𑀼𑀢𑁄’’𑀢𑀺.

𑀘𑀢𑀼𑀢𑁆𑀣𑁄 𑀪𑀸𑀡𑀯𑀸𑀭𑁄.

𑀬𑀫𑀓𑀲𑀸𑀮𑀸

𑁧𑁯𑁮. 𑀅𑀣 ¶ 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀬𑀸𑀫𑀸𑀦𑀦𑁆𑀤, 𑀬𑁂𑀦 𑀳𑀺𑀭𑀜𑁆𑀜𑀯𑀢𑀺𑀬𑀸 𑀦𑀤𑀺𑀬𑀸 𑀧𑀸𑀭𑀺𑀫𑀁 𑀢𑀻𑀭𑀁, 𑀬𑁂𑀦 𑀓𑀼𑀲𑀺𑀦𑀸𑀭𑀸 𑀉𑀧𑀯𑀢𑁆𑀢𑀦𑀁 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’’𑀢𑀺 ¶ . ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀪𑀕𑀯𑀸 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀳𑀺𑀭𑀜𑁆𑀜𑀯𑀢𑀺𑀬𑀸 𑀦𑀤𑀺𑀬𑀸 𑀧𑀸𑀭𑀺𑀫𑀁 𑀢𑀻𑀭𑀁, 𑀬𑁂𑀦 𑀓𑀼𑀲𑀺𑀦𑀸𑀭𑀸 𑀉𑀧𑀯𑀢𑁆𑀢𑀦𑀁 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀗𑁆𑀖 𑀫𑁂 𑀢𑁆𑀯𑀁, 𑀆𑀦𑀦𑁆𑀤, 𑀅𑀦𑁆𑀢𑀭𑁂𑀦 𑀬𑀫𑀓𑀲𑀸𑀮𑀸𑀦𑀁 𑀉𑀢𑁆𑀢𑀭𑀲𑀻𑀲𑀓𑀁 𑀫𑀜𑁆𑀘𑀓𑀁 𑀧𑀜𑁆𑀜𑀧𑁂𑀳𑀺, 𑀓𑀺𑀮𑀦𑁆𑀢𑁄𑀲𑁆𑀫𑀺, 𑀆𑀦𑀦𑁆𑀤, 𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀅𑀦𑁆𑀢𑀭𑁂𑀦 𑀬𑀫𑀓𑀲𑀸𑀮𑀸𑀦𑀁 𑀉𑀢𑁆𑀢𑀭𑀲𑀻𑀲𑀓𑀁 𑀫𑀜𑁆𑀘𑀓𑀁 𑀧𑀜𑁆𑀜𑀧𑁂𑀲𑀺. 𑀅𑀣 𑀔𑁄 𑀪𑀕𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺 𑀧𑀸𑀤𑁂 ¶ 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬 𑀲𑀢𑁄 𑀲𑀫𑁆𑀧𑀚𑀸𑀦𑁄.

𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀬𑀫𑀓𑀲𑀸𑀮𑀸 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑀸 𑀳𑁄𑀦𑁆𑀢𑀺 𑀅𑀓𑀸𑀮𑀧𑀼𑀧𑁆𑀨𑁂𑀳𑀺. 𑀢𑁂 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀁 𑀑𑀓𑀺𑀭𑀦𑁆𑀢𑀺 𑀅𑀚𑁆𑀛𑁄𑀓𑀺𑀭𑀦𑁆𑀢𑀺 𑀅𑀪𑀺𑀧𑁆𑀧𑀓𑀺𑀭𑀦𑁆𑀢𑀺 𑀢𑀣𑀸𑀕𑀢𑀲𑁆𑀲 𑀧𑀽𑀚𑀸𑀬. 𑀤𑀺𑀩𑁆𑀩𑀸𑀦𑀺𑀧𑀺 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀸𑀦𑀺 𑀅𑀦𑁆𑀢𑀮𑀺𑀓𑁆𑀔𑀸 𑀧𑀧𑀢𑀦𑁆𑀢𑀺, 𑀢𑀸𑀦𑀺 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀁 𑀑𑀓𑀺𑀭𑀦𑁆𑀢𑀺 𑀅𑀚𑁆𑀛𑁄𑀓𑀺𑀭𑀦𑁆𑀢𑀺 𑀅𑀪𑀺𑀧𑁆𑀧𑀓𑀺𑀭𑀦𑁆𑀢𑀺 𑀢𑀣𑀸𑀕𑀢𑀲𑁆𑀲 𑀧𑀽𑀚𑀸𑀬. 𑀤𑀺𑀩𑁆𑀩𑀸𑀦𑀺𑀧𑀺 𑀘𑀦𑁆𑀤𑀦𑀘𑀼𑀡𑁆𑀡𑀸𑀦𑀺 𑀅𑀦𑁆𑀢𑀮𑀺𑀓𑁆𑀔𑀸 𑀧𑀧𑀢𑀦𑁆𑀢𑀺, 𑀢𑀸𑀦𑀺 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀁 𑀑𑀓𑀺𑀭𑀦𑁆𑀢𑀺 ¶ 𑀅𑀚𑁆𑀛𑁄𑀓𑀺𑀭𑀦𑁆𑀢𑀺 𑀅𑀪𑀺𑀧𑁆𑀧𑀓𑀺𑀭𑀦𑁆𑀢𑀺 𑀢𑀣𑀸𑀕𑀢𑀲𑁆𑀲 𑀧𑀽𑀚𑀸𑀬. 𑀤𑀺𑀩𑁆𑀩𑀸𑀦𑀺𑀧𑀺 𑀢𑀽𑀭𑀺𑀬𑀸𑀦𑀺 𑀅𑀦𑁆𑀢𑀮𑀺𑀓𑁆𑀔𑁂 𑀯𑀚𑁆𑀚𑀦𑁆𑀢𑀺 𑀢𑀣𑀸𑀕𑀢𑀲𑁆𑀲 𑀧𑀽𑀚𑀸𑀬. 𑀤𑀺𑀩𑁆𑀩𑀸𑀦𑀺𑀧𑀺 𑀲𑀗𑁆𑀕𑀻𑀢𑀸𑀦𑀺 𑀅𑀦𑁆𑀢𑀮𑀺𑀓𑁆𑀔𑁂 𑀯𑀢𑁆𑀢𑀦𑁆𑀢𑀺 𑀢𑀣𑀸𑀕𑀢𑀲𑁆𑀲 𑀧𑀽𑀚𑀸𑀬.

𑁧𑁯𑁯. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑀸 𑀔𑁄, 𑀆𑀦𑀦𑁆𑀤, 𑀬𑀫𑀓𑀲𑀸𑀮𑀸 𑀅𑀓𑀸𑀮𑀧𑀼𑀧𑁆𑀨𑁂𑀳𑀺. 𑀢𑁂 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀁 𑀑𑀓𑀺𑀭𑀦𑁆𑀢𑀺 𑀅𑀚𑁆𑀛𑁄𑀓𑀺𑀭𑀦𑁆𑀢𑀺 𑀅𑀪𑀺𑀧𑁆𑀧𑀓𑀺𑀭𑀦𑁆𑀢𑀺 𑀢𑀣𑀸𑀕𑀢𑀲𑁆𑀲 𑀧𑀽𑀚𑀸𑀬. 𑀤𑀺𑀩𑁆𑀩𑀸𑀦𑀺𑀧𑀺 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀸𑀦𑀺 𑀅𑀦𑁆𑀢𑀮𑀺𑀓𑁆𑀔𑀸 𑀧𑀧𑀢𑀦𑁆𑀢𑀺, 𑀢𑀸𑀦𑀺 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀁 𑀑𑀓𑀺𑀭𑀦𑁆𑀢𑀺 𑀅𑀚𑁆𑀛𑁄𑀓𑀺𑀭𑀦𑁆𑀢𑀺 𑀅𑀪𑀺𑀧𑁆𑀧𑀓𑀺𑀭𑀦𑁆𑀢𑀺 𑀢𑀣𑀸𑀕𑀢𑀲𑁆𑀲 𑀧𑀽𑀚𑀸𑀬. 𑀤𑀺𑀩𑁆𑀩𑀸𑀦𑀺𑀧𑀺 𑀘𑀦𑁆𑀤𑀦𑀘𑀼𑀡𑁆𑀡𑀸𑀦𑀺 𑀅𑀦𑁆𑀢𑀮𑀺𑀓𑁆𑀔𑀸 𑀧𑀧𑀢𑀦𑁆𑀢𑀺, 𑀢𑀸𑀦𑀺 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀁 𑀑𑀓𑀺𑀭𑀦𑁆𑀢𑀺 𑀅𑀚𑁆𑀛𑁄𑀓𑀺𑀭𑀦𑁆𑀢𑀺 𑀅𑀪𑀺𑀧𑁆𑀧𑀓𑀺𑀭𑀦𑁆𑀢𑀺 𑀢𑀣𑀸𑀕𑀢𑀲𑁆𑀲 𑀧𑀽𑀚𑀸𑀬. 𑀤𑀺𑀩𑁆𑀩𑀸𑀦𑀺𑀧𑀺 𑀢𑀽𑀭𑀺𑀬𑀸𑀦𑀺 𑀅𑀦𑁆𑀢𑀮𑀺𑀓𑁆𑀔𑁂 𑀯𑀚𑁆𑀚𑀦𑁆𑀢𑀺 𑀢𑀣𑀸𑀕𑀢𑀲𑁆𑀲 𑀧𑀽𑀚𑀸𑀬. 𑀤𑀺𑀩𑁆𑀩𑀸𑀦𑀺𑀧𑀺 𑀲𑀗𑁆𑀕𑀻𑀢𑀸𑀦𑀺 𑀅𑀦𑁆𑀢𑀮𑀺𑀓𑁆𑀔𑁂 𑀯𑀢𑁆𑀢𑀦𑁆𑀢𑀺 𑀢𑀣𑀸𑀕𑀢𑀲𑁆𑀲 𑀧𑀽𑀚𑀸𑀬. 𑀦 𑀔𑁄, 𑀆𑀦𑀦𑁆𑀤, 𑀏𑀢𑁆𑀢𑀸𑀯𑀢𑀸 𑀢𑀣𑀸𑀕𑀢𑁄 𑀲𑀓𑁆𑀓𑀢𑁄 𑀯𑀸 𑀳𑁄𑀢𑀺 𑀕𑀭𑀼𑀓𑀢𑁄 𑀯𑀸 𑀫𑀸𑀦𑀺𑀢𑁄 𑀯𑀸 𑀧𑀽𑀚𑀺𑀢𑁄 𑀯𑀸 𑀅𑀧𑀘𑀺𑀢𑁄 𑀯𑀸. 𑀬𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 ¶ 𑀯𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀉𑀧𑀸𑀲𑀓𑁄 𑀯𑀸 𑀉𑀧𑀸𑀲𑀺𑀓𑀸 𑀯𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀯𑀺𑀳𑀭𑀢𑀺 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑁄 𑀅𑀦𑀼𑀥𑀫𑁆𑀫𑀘𑀸𑀭𑀻, 𑀲𑁄 𑀢𑀣𑀸𑀕𑀢𑀁 𑀲𑀓𑁆𑀓𑀭𑁄𑀢𑀺 𑀕𑀭𑀼𑀁 𑀓𑀭𑁄𑀢𑀺 𑀫𑀸𑀦𑁂𑀢𑀺 𑀧𑀽𑀚𑁂𑀢𑀺 𑀅𑀧𑀘𑀺𑀬𑀢𑀺 [𑀇𑀤𑀁 𑀧𑀤𑀁 𑀲𑀻𑀲𑁆𑀬𑀸𑀇𑀧𑁄𑀢𑁆𑀣𑀓𑁂𑀲𑀼 𑀦 𑀤𑀺𑀲𑁆𑀲𑀢𑀺], 𑀧𑀭𑀫𑀸𑀬 𑀧𑀽𑀚𑀸𑀬. 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤, 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸 𑀯𑀺𑀳𑀭𑀺𑀲𑁆𑀲𑀸𑀫 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑁄𑀢𑀺. 𑀏𑀯𑀜𑁆𑀳𑀺 𑀯𑁄, 𑀆𑀦𑀦𑁆𑀤, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺.

𑀉𑀧𑀯𑀸𑀡𑀢𑁆𑀣𑁂𑀭𑁄

𑁨𑁦𑁦. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀉𑀧𑀯𑀸𑀡𑁄 𑀪𑀕𑀯𑀢𑁄 𑀧𑀼𑀭𑀢𑁄 𑀞𑀺𑀢𑁄 𑀳𑁄𑀢𑀺 𑀪𑀕𑀯𑀦𑁆𑀢𑀁 𑀩𑀻𑀚𑀬𑀫𑀸𑀦𑁄. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀧𑀯𑀸𑀡𑀁 𑀅𑀧𑀲𑀸𑀭𑁂𑀲𑀺 𑁋 ‘‘𑀅𑀧𑁂𑀳𑀺, 𑀪𑀺𑀓𑁆𑀔𑀼, 𑀫𑀸 𑀫𑁂 𑀧𑀼𑀭𑀢𑁄 𑀅𑀝𑁆𑀞𑀸𑀲𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 ¶ 𑀆𑀬𑀲𑁆𑀫𑀸 ¶ 𑀉𑀧𑀯𑀸𑀡𑁄 𑀤𑀻𑀖𑀭𑀢𑁆𑀢𑀁 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑁄 𑀲𑀦𑁆𑀢𑀺𑀓𑀸𑀯𑀘𑀭𑁄 𑀲𑀫𑀻𑀧𑀘𑀸𑀭𑀻. 𑀅𑀣 𑀘 𑀧𑀦 𑀪𑀕𑀯𑀸 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀆𑀬𑀲𑁆𑀫𑀦𑁆𑀢𑀁 𑀉𑀧𑀯𑀸𑀡𑀁 𑀅𑀧𑀲𑀸𑀭𑁂𑀢𑀺 𑁋 ‘𑀅𑀧𑁂𑀳𑀺 𑀪𑀺𑀓𑁆𑀔𑀼, 𑀫𑀸 𑀫𑁂 𑀧𑀼𑀭𑀢𑁄 𑀅𑀝𑁆𑀞𑀸𑀲𑀻’𑀢𑀺. 𑀓𑁄 𑀦𑀼 𑀔𑁄 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑀁 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀧𑀯𑀸𑀡𑀁 𑀅𑀧𑀲𑀸𑀭𑁂𑀢𑀺 𑁋 ‘𑀅𑀧𑁂𑀳𑀺, 𑀪𑀺𑀓𑁆𑀔𑀼, 𑀫𑀸 𑀫𑁂 𑀧𑀼𑀭𑀢𑁄 𑀅𑀝𑁆𑀞𑀸𑀲𑀻’𑀢𑀺? 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘𑀅𑀬𑀁, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀉𑀧𑀯𑀸𑀡𑁄 𑀤𑀻𑀖𑀭𑀢𑁆𑀢𑀁 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑁄 𑀲𑀦𑁆𑀢𑀺𑀓𑀸𑀯𑀘𑀭𑁄 𑀲𑀫𑀻𑀧𑀘𑀸𑀭𑀻. 𑀅𑀣 𑀘 𑀧𑀦 𑀪𑀕𑀯𑀸 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀆𑀬𑀲𑁆𑀫𑀦𑁆𑀢𑀁 𑀉𑀧𑀯𑀸𑀡𑀁 𑀅𑀧𑀲𑀸𑀭𑁂𑀢𑀺 𑁋 ‘‘𑀅𑀧𑁂𑀳𑀺, 𑀪𑀺𑀓𑁆𑀔𑀼, 𑀫𑀸 𑀫𑁂 𑀧𑀼𑀭𑀢𑁄 𑀅𑀝𑁆𑀞𑀸𑀲𑀻’’𑀢𑀺. 𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼, 𑀓𑁄 𑀧𑀘𑁆𑀘𑀬𑁄, 𑀬𑀁 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀉𑀧𑀯𑀸𑀡𑀁 𑀅𑀧𑀲𑀸𑀭𑁂𑀢𑀺 𑁋 ‘‘𑀅𑀧𑁂𑀳𑀺, 𑀪𑀺𑀓𑁆𑀔𑀼, 𑀫𑀸 𑀫𑁂 𑀧𑀼𑀭𑀢𑁄 𑀅𑀝𑁆𑀞𑀸𑀲𑀻’’𑀢𑀺? ‘‘𑀬𑁂𑀪𑀼𑀬𑁆𑀬𑁂𑀦, 𑀆𑀦𑀦𑁆𑀤, 𑀤𑀲𑀲𑀼 𑀮𑁄𑀓𑀥𑀸𑀢𑀽𑀲𑀼 𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀢𑀸 ¶ 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬. 𑀬𑀸𑀯𑀢𑀸, 𑀆𑀦𑀦𑁆𑀤, 𑀓𑀼𑀲𑀺𑀦𑀸𑀭𑀸 𑀉𑀧𑀯𑀢𑁆𑀢𑀦𑀁 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑀁 𑀲𑀫𑀦𑁆𑀢𑀢𑁄 𑀤𑁆𑀯𑀸𑀤𑀲 𑀬𑁄𑀚𑀦𑀸𑀦𑀺, 𑀦𑀢𑁆𑀣𑀺 𑀲𑁄 𑀧𑀤𑁂𑀲𑁄 𑀯𑀸𑀮𑀕𑁆𑀕𑀓𑁄𑀝𑀺𑀦𑀺𑀢𑀼𑀤𑀦𑀫𑀢𑁆𑀢𑁄𑀧𑀺 𑀫𑀳𑁂𑀲𑀓𑁆𑀔𑀸𑀳𑀺 𑀤𑁂𑀯𑀢𑀸𑀳𑀺 𑀅𑀧𑁆𑀨𑀼𑀝𑁄. 𑀤𑁂𑀯𑀢𑀸, 𑀆𑀦𑀦𑁆𑀤, 𑀉𑀚𑁆𑀛𑀸𑀬𑀦𑁆𑀢𑀺 𑁋 ‘𑀤𑀽𑀭𑀸 𑀘 𑀯𑀢𑀫𑁆𑀳 𑀆𑀕𑀢𑀸 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬. 𑀓𑀤𑀸𑀘𑀺 𑀓𑀭𑀳𑀘𑀺 𑀢𑀣𑀸𑀕𑀢𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸. 𑀅𑀚𑁆𑀚𑁂𑀯 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀺. 𑀅𑀬𑀜𑁆𑀘 𑀫𑀳𑁂𑀲𑀓𑁆𑀔𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀧𑀼𑀭𑀢𑁄 𑀞𑀺𑀢𑁄 𑀑𑀯𑀸𑀭𑁂𑀦𑁆𑀢𑁄, 𑀦 𑀫𑀬𑀁 𑀮𑀪𑀸𑀫 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬𑀸’’’𑀢𑀺.

𑁨𑁦𑁧. ‘‘𑀓𑀣𑀁𑀪𑀽𑀢𑀸 𑀧𑀦, 𑀪𑀦𑁆𑀢𑁂, 𑀪𑀕𑀯𑀸 𑀤𑁂𑀯𑀢𑀸 𑀫𑀦𑀲𑀺𑀓𑀭𑁄𑀢𑀻’’𑀢𑀺 [𑀫𑀦𑀲𑀺 𑀓𑀭𑁄𑀦𑁆𑀢𑀻𑀢𑀺 (𑀲𑁆𑀬𑀸. 𑀓.)]? ‘‘𑀲𑀦𑁆𑀢𑀸𑀦𑀦𑁆𑀤, 𑀤𑁂𑀯𑀢𑀸 𑀆𑀓𑀸𑀲𑁂 𑀧𑀣𑀯𑀻𑀲𑀜𑁆𑀜𑀺𑀦𑀺𑀬𑁄 𑀓𑁂𑀲𑁂 𑀧𑀓𑀺𑀭𑀺𑀬 𑀓𑀦𑁆𑀤𑀦𑁆𑀢𑀺, 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑀺, 𑀙𑀺𑀦𑁆𑀦𑀧𑀸𑀢𑀁 𑀧𑀧𑀢𑀦𑁆𑀢𑀺 [𑀙𑀺𑀦𑁆𑀦𑀁𑀧𑀸𑀤𑀁𑀯𑀺𑀬 𑀧𑀧𑀢𑀦𑁆𑀢𑀺 (𑀲𑁆𑀬𑀸.)], 𑀆𑀯𑀝𑁆𑀝𑀦𑁆𑀢𑀺, 𑀯𑀺𑀯𑀝𑁆𑀝𑀦𑁆𑀢𑀺 𑁋 ‘𑀅𑀢𑀺𑀔𑀺𑀧𑁆𑀧𑀁 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺, 𑀅𑀢𑀺𑀔𑀺𑀧𑁆𑀧𑀁 𑀲𑀼𑀕𑀢𑁄 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺, 𑀅𑀢𑀺𑀔𑀺𑀧𑁆𑀧𑀁 𑀘𑀓𑁆𑀔𑀼𑀁 [𑀘𑀓𑁆𑀔𑀼𑀫𑀸 (𑀲𑁆𑀬𑀸. 𑀓.)] 𑀮𑁄𑀓𑁂 𑀅𑀦𑁆𑀢𑀭𑀥𑀁𑀆𑀬𑀺𑀲𑁆𑀲𑀢𑀻’𑀢𑀺.

‘‘𑀲𑀦𑁆𑀢𑀸𑀦𑀦𑁆𑀤, 𑀤𑁂𑀯𑀢𑀸 𑀧𑀣𑀯𑀺𑀬𑀁 𑀧𑀣𑀯𑀻𑀲𑀜𑁆𑀜𑀺𑀦𑀺𑀬𑁄 𑀓𑁂𑀲𑁂 𑀧𑀓𑀺𑀭𑀺𑀬 𑀓𑀦𑁆𑀤𑀦𑁆𑀢𑀺, 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑀺, 𑀙𑀺𑀦𑁆𑀦𑀧𑀸𑀢𑀁 ¶ 𑀧𑀧𑀢𑀦𑁆𑀢𑀺, 𑀆𑀯𑀝𑁆𑀝𑀦𑁆𑀢𑀺, 𑀯𑀺𑀯𑀝𑁆𑀝𑀦𑁆𑀢𑀺 𑁋 ‘𑀅𑀢𑀺𑀔𑀺𑀧𑁆𑀧𑀁 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺, 𑀅𑀢𑀺𑀔𑀺𑀧𑁆𑀧𑀁 𑀲𑀼𑀕𑀢𑁄 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺, 𑀅𑀢𑀺𑀔𑀺𑀧𑁆𑀧𑀁 𑀘𑀓𑁆𑀔𑀼𑀁 𑀮𑁄𑀓𑁂 𑀅𑀦𑁆𑀢𑀭𑀥𑀸𑀬𑀺𑀲𑁆𑀲𑀢𑀻’’’𑀢𑀺.

‘‘𑀬𑀸 ¶ ¶ 𑀧𑀦 𑀢𑀸 𑀤𑁂𑀯𑀢𑀸 𑀯𑀻𑀢𑀭𑀸𑀕𑀸, 𑀢𑀸 𑀲𑀢𑀸 𑀲𑀫𑁆𑀧𑀚𑀸𑀦𑀸 𑀅𑀥𑀺𑀯𑀸𑀲𑁂𑀦𑁆𑀢𑀺 𑁋 ‘𑀅𑀦𑀺𑀘𑁆𑀘𑀸 𑀲𑀗𑁆𑀔𑀸𑀭𑀸, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸’𑀢𑀺.

𑀘𑀢𑀼𑀲𑀁𑀯𑁂𑀚𑀦𑀻𑀬𑀝𑁆𑀞𑀸𑀦𑀸𑀦𑀺

𑁨𑁦𑁨. ‘‘𑀧𑀼𑀩𑁆𑀩𑁂 ¶ , 𑀪𑀦𑁆𑀢𑁂, 𑀤𑀺𑀲𑀸𑀲𑀼 𑀯𑀲𑁆𑀲𑀁 𑀯𑀼𑀝𑁆𑀞𑀸 [𑀯𑀲𑁆𑀲𑀁𑀯𑀼𑀢𑁆𑀣𑀸 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬. 𑀢𑁂 𑀫𑀬𑀁 𑀮𑀪𑀸𑀫 𑀫𑀦𑁄𑀪𑀸𑀯𑀦𑀻𑀬𑁂 𑀪𑀺𑀓𑁆𑀔𑀽 𑀤𑀲𑁆𑀲𑀦𑀸𑀬, 𑀮𑀪𑀸𑀫 𑀧𑀬𑀺𑀭𑀼𑀧𑀸𑀲𑀦𑀸𑀬. 𑀪𑀕𑀯𑀢𑁄 𑀧𑀦 𑀫𑀬𑀁, 𑀪𑀦𑁆𑀢𑁂, 𑀅𑀘𑁆𑀘𑀬𑁂𑀦 𑀦 𑀮𑀪𑀺𑀲𑁆𑀲𑀸𑀫 𑀫𑀦𑁄𑀪𑀸𑀯𑀦𑀻𑀬𑁂 𑀪𑀺𑀓𑁆𑀔𑀽 𑀤𑀲𑁆𑀲𑀦𑀸𑀬, 𑀦 𑀮𑀪𑀺𑀲𑁆𑀲𑀸𑀫 𑀧𑀬𑀺𑀭𑀼𑀧𑀸𑀲𑀦𑀸𑀬𑀸’’𑀢𑀺.

‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀆𑀦𑀦𑁆𑀤, 𑀲𑀤𑁆𑀥𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀤𑀲𑁆𑀲𑀦𑀻𑀬𑀸𑀦𑀺 𑀲𑀁𑀯𑁂𑀚𑀦𑀻𑀬𑀸𑀦𑀺 𑀞𑀸𑀦𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? ‘𑀇𑀥 𑀢𑀣𑀸𑀕𑀢𑁄 𑀚𑀸𑀢𑁄’𑀢𑀺, 𑀆𑀦𑀦𑁆𑀤, 𑀲𑀤𑁆𑀥𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀤𑀲𑁆𑀲𑀦𑀻𑀬𑀁 𑀲𑀁𑀯𑁂𑀚𑀦𑀻𑀬𑀁 𑀞𑀸𑀦𑀁. ‘𑀇𑀥 𑀢𑀣𑀸𑀕𑀢𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’𑀢𑀺, 𑀆𑀦𑀦𑁆𑀤, 𑀲𑀤𑁆𑀥𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀤𑀲𑁆𑀲𑀦𑀻𑀬𑀁 𑀲𑀁𑀯𑁂𑀚𑀦𑀻𑀬𑀁 𑀞𑀸𑀦𑀁. ‘𑀇𑀥 𑀢𑀣𑀸𑀕𑀢𑁂𑀦 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢’𑀦𑁆𑀢𑀺, 𑀆𑀦𑀦𑁆𑀤, 𑀲𑀤𑁆𑀥𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀤𑀲𑁆𑀲𑀦𑀻𑀬𑀁 𑀲𑀁𑀯𑁂𑀚𑀦𑀻𑀬𑀁 𑀞𑀸𑀦𑀁. ‘𑀇𑀥 𑀢𑀣𑀸𑀕𑀢𑁄 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑁄’𑀢𑀺, 𑀆𑀦𑀦𑁆𑀤, 𑀲𑀤𑁆𑀥𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀤𑀲𑁆𑀲𑀦𑀻𑀬𑀁 𑀲𑀁𑀯𑁂𑀚𑀦𑀻𑀬𑀁 𑀞𑀸𑀦𑀁. 𑀇𑀫𑀸𑀦𑀺 𑀔𑁄 ¶ , 𑀆𑀦𑀦𑁆𑀤, 𑀘𑀢𑁆𑀢𑀸𑀭𑀺 𑀲𑀤𑁆𑀥𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀤𑀲𑁆𑀲𑀦𑀻𑀬𑀸𑀦𑀺 𑀲𑀁𑀯𑁂𑀚𑀦𑀻𑀬𑀸𑀦𑀺 𑀞𑀸𑀦𑀸𑀦𑀺.

‘‘𑀆𑀕𑀫𑀺𑀲𑁆𑀲𑀦𑁆𑀢𑀺 𑀔𑁄, 𑀆𑀦𑀦𑁆𑀤, 𑀲𑀤𑁆𑀥𑀸 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀸𑀲𑀓𑀸 𑀉𑀧𑀸𑀲𑀺𑀓𑀸𑀬𑁄 𑁋 ‘𑀇𑀥 𑀢𑀣𑀸𑀕𑀢𑁄 𑀚𑀸𑀢𑁄’𑀢𑀺𑀧𑀺, ‘𑀇𑀥 𑀢𑀣𑀸𑀕𑀢𑁄 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’𑀢𑀺𑀧𑀺, ‘𑀇𑀥 𑀢𑀣𑀸𑀕𑀢𑁂𑀦 𑀅𑀦𑀼𑀢𑁆𑀢𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢’𑀦𑁆𑀢𑀺𑀧𑀺, ‘𑀇𑀥 𑀢𑀣𑀸𑀕𑀢𑁄 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑁄’𑀢𑀺𑀧𑀺. 𑀬𑁂 𑀳𑀺 𑀓𑁂𑀘𑀺, 𑀆𑀦𑀦𑁆𑀤, 𑀘𑁂𑀢𑀺𑀬𑀘𑀸𑀭𑀺𑀓𑀁 𑀆𑀳𑀺𑀡𑁆𑀟𑀦𑁆𑀢𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀓𑀸𑀮𑀗𑁆𑀓𑀭𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺.

𑀆𑀦𑀦𑁆𑀤𑀧𑀼𑀘𑁆𑀙𑀸𑀓𑀣𑀸

𑁨𑁦𑁩. ‘‘𑀓𑀣𑀁 ¶ 𑀫𑀬𑀁, 𑀪𑀦𑁆𑀢𑁂, 𑀫𑀸𑀢𑀼𑀕𑀸𑀫𑁂 𑀧𑀝𑀺𑀧𑀚𑁆𑀚𑀸𑀫𑀸’’𑀢𑀺? ‘‘𑀅𑀤𑀲𑁆𑀲𑀦𑀁, 𑀆𑀦𑀦𑁆𑀤𑀸’’𑀢𑀺. ‘‘𑀤𑀲𑁆𑀲𑀦𑁂, 𑀪𑀕𑀯𑀸, 𑀲𑀢𑀺 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? ‘‘𑀅𑀦𑀸𑀮𑀸𑀧𑁄, 𑀆𑀦𑀦𑁆𑀤𑀸’’𑀢𑀺 ¶ . ‘‘𑀆𑀮𑀧𑀦𑁆𑀢𑁂𑀦 𑀧𑀦, 𑀪𑀦𑁆𑀢𑁂, 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? ‘‘𑀲𑀢𑀺, 𑀆𑀦𑀦𑁆𑀤, 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑀸’’𑀢𑀺.

𑁨𑁦𑁪. ‘‘𑀓𑀣𑀁 ¶ 𑀫𑀬𑀁, 𑀪𑀦𑁆𑀢𑁂, 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑁂 𑀧𑀝𑀺𑀧𑀚𑁆𑀚𑀸𑀫𑀸’’𑀢𑀺? ‘‘𑀅𑀩𑁆𑀬𑀸𑀯𑀝𑀸 𑀢𑀼𑀫𑁆𑀳𑁂, 𑀆𑀦𑀦𑁆𑀤, 𑀳𑁄𑀣 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀧𑀽𑀚𑀸𑀬. 𑀇𑀗𑁆𑀖 𑀢𑀼𑀫𑁆𑀳𑁂, 𑀆𑀦𑀦𑁆𑀤, 𑀲𑀸𑀭𑀢𑁆𑀣𑁂 𑀖𑀝𑀣 𑀅𑀦𑀼𑀬𑀼𑀜𑁆𑀚𑀣 [𑀲𑀤𑀢𑁆𑀣𑁂 𑀅𑀦𑀼𑀬𑀼𑀜𑁆𑀚𑀣 (𑀲𑀻. 𑀲𑁆𑀬𑀸.), 𑀲𑀤𑀢𑁆𑀣𑀁 𑀅𑀦𑀼𑀬𑀼𑀜𑁆𑀚𑀣 (𑀧𑀻.), 𑀲𑀸𑀭𑀢𑁆𑀣𑁂 𑀅𑀦𑀼𑀬𑀼𑀜𑁆𑀚𑀣 (𑀓.)], 𑀲𑀸𑀭𑀢𑁆𑀣𑁂 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑀣. 𑀲𑀦𑁆𑀢𑀸𑀦𑀦𑁆𑀤, 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸𑀧𑀺 𑀩𑁆𑀭𑀸𑀳𑁆𑀫𑀡𑀧𑀡𑁆𑀟𑀺𑀢𑀸𑀧𑀺 𑀕𑀳𑀧𑀢𑀺𑀧𑀡𑁆𑀟𑀺𑀢𑀸𑀧𑀺 𑀢𑀣𑀸𑀕𑀢𑁂 𑀅𑀪𑀺𑀧𑁆𑀧𑀲𑀦𑁆𑀦𑀸, 𑀢𑁂 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀧𑀽𑀚𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺.

𑁨𑁦𑁫. ‘‘𑀓𑀣𑀁 𑀧𑀦, 𑀪𑀦𑁆𑀢𑁂, 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺? ‘‘𑀬𑀣𑀸 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀲𑀭𑀻𑀭𑁂 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺. ‘‘𑀓𑀣𑀁 𑀧𑀦, 𑀪𑀦𑁆𑀢𑁂, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀲𑀭𑀻𑀭𑁂 𑀧𑀝𑀺𑀧𑀚𑁆𑀚𑀦𑁆𑀢𑀻’’𑀢𑀺? ‘‘𑀭𑀜𑁆𑀜𑁄, 𑀆𑀦𑀦𑁆𑀤, 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀲𑀭𑀻𑀭𑀁 𑀅𑀳𑀢𑁂𑀦 𑀯𑀢𑁆𑀣𑁂𑀦 𑀯𑁂𑀞𑁂𑀦𑁆𑀢𑀺, 𑀅𑀳𑀢𑁂𑀦 𑀯𑀢𑁆𑀣𑁂𑀦 𑀯𑁂𑀞𑁂𑀢𑁆𑀯𑀸 𑀯𑀺𑀳𑀢𑁂𑀦 𑀓𑀧𑁆𑀧𑀸𑀲𑁂𑀦 𑀯𑁂𑀞𑁂𑀦𑁆𑀢𑀺, 𑀯𑀺𑀳𑀢𑁂𑀦 𑀓𑀧𑁆𑀧𑀸𑀲𑁂𑀦 𑀯𑁂𑀞𑁂𑀢𑁆𑀯𑀸 𑀅𑀳𑀢𑁂𑀦 𑀯𑀢𑁆𑀣𑁂𑀦 ¶ 𑀯𑁂𑀞𑁂𑀦𑁆𑀢𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀧𑀜𑁆𑀘𑀳𑀺 𑀬𑀼𑀕𑀲𑀢𑁂𑀳𑀺 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀲𑀭𑀻𑀭𑀁 [𑀲𑀭𑀻𑀭𑁂 (𑀲𑁆𑀬𑀸. 𑀓.)] 𑀯𑁂𑀞𑁂𑀢𑁆𑀯𑀸 𑀆𑀬𑀲𑀸𑀬 𑀢𑁂𑀮𑀤𑁄𑀡𑀺𑀬𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑀺𑀲𑁆𑀲𑀸 𑀆𑀬𑀲𑀸𑀬 𑀤𑁄𑀡𑀺𑀬𑀸 𑀧𑀝𑀺𑀓𑀼𑀚𑁆𑀚𑀺𑀢𑁆𑀯𑀸 𑀲𑀩𑁆𑀩𑀕𑀦𑁆𑀥𑀸𑀦𑀁 𑀘𑀺𑀢𑀓𑀁 𑀓𑀭𑀺𑀢𑁆𑀯𑀸 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀲𑀭𑀻𑀭𑀁 𑀛𑀸𑀧𑁂𑀦𑁆𑀢𑀺. 𑀘𑀸𑀢𑀼𑀫𑀳𑀸𑀧𑀣𑁂 [𑀘𑀸𑀢𑀼𑀫𑁆𑀫𑀳𑀸𑀧𑀣𑁂 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀣𑀽𑀧𑀁 𑀓𑀭𑁄𑀦𑁆𑀢𑀺 ¶ . 𑀏𑀯𑀁 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀲𑀭𑀻𑀭𑁂 𑀧𑀝𑀺𑀧𑀚𑁆𑀚𑀦𑁆𑀢𑀺. 𑀬𑀣𑀸 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀲𑀭𑀻𑀭𑁂 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀘𑀸𑀢𑀼𑀫𑀳𑀸𑀧𑀣𑁂 𑀢𑀣𑀸𑀕𑀢𑀲𑁆𑀲 𑀣𑀽𑀧𑁄 𑀓𑀸𑀢𑀩𑁆𑀩𑁄. 𑀢𑀢𑁆𑀣 𑀬𑁂 𑀫𑀸𑀮𑀁 𑀯𑀸 𑀕𑀦𑁆𑀥𑀁 𑀯𑀸 𑀘𑀼𑀡𑁆𑀡𑀓𑀁 [𑀯𑀡𑁆𑀡𑀓𑀁 (𑀲𑀻. 𑀧𑀻.)] 𑀯𑀸 𑀆𑀭𑁄𑀧𑁂𑀲𑁆𑀲𑀦𑁆𑀢𑀺 𑀯𑀸 𑀅𑀪𑀺𑀯𑀸𑀤𑁂𑀲𑁆𑀲𑀦𑁆𑀢𑀺 𑀯𑀸 𑀘𑀺𑀢𑁆𑀢𑀁 𑀯𑀸 𑀧𑀲𑀸𑀤𑁂𑀲𑁆𑀲𑀦𑁆𑀢𑀺 𑀢𑁂𑀲𑀁 𑀢𑀁 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬.

𑀣𑀽𑀧𑀸𑀭𑀳𑀧𑀼𑀕𑁆𑀕𑀮𑁄

𑁨𑁦𑁬. ‘‘𑀘𑀢𑁆𑀢𑀸𑀭𑁄𑀫𑁂, 𑀆𑀦𑀦𑁆𑀤, 𑀣𑀽𑀧𑀸𑀭𑀳𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀣𑀽𑀧𑀸𑀭𑀳𑁄, 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀣𑀽𑀧𑀸𑀭𑀳𑁄, 𑀢𑀣𑀸𑀕𑀢𑀲𑁆𑀲 𑀲𑀸𑀯𑀓𑁄 𑀣𑀽𑀧𑀸𑀭𑀳𑁄, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 [𑀘𑀓𑁆𑀓𑀯𑀢𑁆𑀢𑀺 (𑀲𑁆𑀬𑀸. 𑀓.)] 𑀣𑀽𑀧𑀸𑀭𑀳𑁄𑀢𑀺.

‘‘𑀓𑀺𑀜𑁆𑀘𑀸𑀦𑀦𑁆𑀤 ¶ , 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀣𑀽𑀧𑀸𑀭𑀳𑁄? ‘𑀅𑀬𑀁 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀣𑀽𑀧𑁄’𑀢𑀺, 𑀆𑀦𑀦𑁆𑀤, 𑀩𑀳𑀼𑀚𑀦𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀦𑁆𑀢𑀺. 𑀢𑁂 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀇𑀤𑀁 𑀔𑁄, 𑀆𑀦𑀦𑁆𑀤, 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀣𑀽𑀧𑀸𑀭𑀳𑁄.

‘‘𑀓𑀺𑀜𑁆𑀘𑀸𑀦𑀦𑁆𑀤, 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀣𑀽𑀧𑀸𑀭𑀳𑁄? ‘𑀅𑀬𑀁 𑀢𑀲𑁆𑀲 𑀪𑀕𑀯𑀢𑁄 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀲𑁆𑀲 ¶ ¶ 𑀣𑀽𑀧𑁄’𑀢𑀺, 𑀆𑀦𑀦𑁆𑀤, 𑀩𑀳𑀼𑀚𑀦𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀦𑁆𑀢𑀺. 𑀢𑁂 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀇𑀤𑀁 𑀔𑁄, 𑀆𑀦𑀦𑁆𑀤, 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁄 𑀣𑀽𑀧𑀸𑀭𑀳𑁄.

‘‘𑀓𑀺𑀜𑁆𑀘𑀸𑀦𑀦𑁆𑀤, 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀢𑀣𑀸𑀕𑀢𑀲𑁆𑀲 𑀲𑀸𑀯𑀓𑁄 ¶ 𑀣𑀽𑀧𑀸𑀭𑀳𑁄? ‘𑀅𑀬𑀁 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑀲𑁆𑀲 𑀣𑀽𑀧𑁄’𑀢𑀺 𑀆𑀦𑀦𑁆𑀤, 𑀩𑀳𑀼𑀚𑀦𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀦𑁆𑀢𑀺. 𑀢𑁂 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀇𑀤𑀁 𑀔𑁄, 𑀆𑀦𑀦𑁆𑀤, 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀢𑀣𑀸𑀕𑀢𑀲𑁆𑀲 𑀲𑀸𑀯𑀓𑁄 𑀣𑀽𑀧𑀸𑀭𑀳𑁄.

‘‘𑀓𑀺𑀜𑁆𑀘𑀸𑀦𑀦𑁆𑀤, 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀣𑀽𑀧𑀸𑀭𑀳𑁄? ‘𑀅𑀬𑀁 𑀢𑀲𑁆𑀲 𑀥𑀫𑁆𑀫𑀺𑀓𑀲𑁆𑀲 𑀥𑀫𑁆𑀫𑀭𑀜𑁆𑀜𑁄 𑀣𑀽𑀧𑁄’𑀢𑀺, 𑀆𑀦𑀦𑁆𑀤, 𑀩𑀳𑀼𑀚𑀦𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀦𑁆𑀢𑀺. 𑀢𑁂 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀇𑀤𑀁 𑀔𑁄, 𑀆𑀦𑀦𑁆𑀤, 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀣𑀽𑀧𑀸𑀭𑀳𑁄. 𑀇𑀫𑁂 𑀔𑁄, 𑀆𑀦𑀦𑁆𑀤 𑀘𑀢𑁆𑀢𑀸𑀭𑁄 𑀣𑀽𑀧𑀸𑀭𑀳𑀸’’𑀢𑀺.

𑀆𑀦𑀦𑁆𑀤𑀅𑀘𑁆𑀙𑀭𑀺𑀬𑀥𑀫𑁆𑀫𑁄

𑁨𑁦𑁭. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀓𑀧𑀺𑀲𑀻𑀲𑀁 𑀆𑀮𑀫𑁆𑀩𑀺𑀢𑁆𑀯𑀸 𑀭𑁄𑀤𑀫𑀸𑀦𑁄 𑀅𑀝𑁆𑀞𑀸𑀲𑀺 𑁋 ‘‘𑀅𑀳𑀜𑁆𑀘 𑀯𑀢𑀫𑁆𑀳𑀺 𑀲𑁂𑀔𑁄 𑀲𑀓𑀭𑀡𑀻𑀬𑁄, 𑀲𑀢𑁆𑀣𑀼 𑀘 𑀫𑁂 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀬𑁄 𑀫𑀫 𑀅𑀦𑀼𑀓𑀫𑁆𑀧𑀓𑁄’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀳𑀁 𑀦𑀼 𑀔𑁄, 𑀪𑀺𑀓𑁆𑀔𑀯𑁂, 𑀆𑀦𑀦𑁆𑀤𑁄’’𑀢𑀺? ‘‘𑀏𑀲𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀓𑀧𑀺𑀲𑀻𑀲𑀁 𑀆𑀮𑀫𑁆𑀩𑀺𑀢𑁆𑀯𑀸 𑀭𑁄𑀤𑀫𑀸𑀦𑁄 𑀞𑀺𑀢𑁄 𑁋 ‘𑀅𑀳𑀜𑁆𑀘 𑀯𑀢𑀫𑁆𑀳𑀺 𑀲𑁂𑀔𑁄 𑀲𑀓𑀭𑀡𑀻𑀬𑁄, 𑀲𑀢𑁆𑀣𑀼 𑀘 𑀫𑁂 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀬𑁄 𑀫𑀫 𑀅𑀦𑀼𑀓𑀫𑁆𑀧𑀓𑁄’’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀫𑀫 𑀯𑀘𑀦𑁂𑀦 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀳𑀺 ¶ 𑁋 ‘𑀲𑀢𑁆𑀣𑀸 𑀢𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀆𑀫𑀦𑁆𑀢𑁂𑀢𑀻’’’𑀢𑀺. ‘‘𑀏𑀯𑀁 ¶ , 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 ¶ 𑁋 ‘‘𑀲𑀢𑁆𑀣𑀸 𑀢𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀆𑀫𑀦𑁆𑀢𑁂𑀢𑀻’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀆𑀦𑀦𑁆𑀤, 𑀫𑀸 𑀲𑁄𑀘𑀺 𑀫𑀸 𑀧𑀭𑀺𑀤𑁂𑀯𑀺, 𑀦𑀦𑀼 𑀏𑀢𑀁, 𑀆𑀦𑀦𑁆𑀤, 𑀫𑀬𑀸 𑀧𑀝𑀺𑀓𑀘𑁆𑀘𑁂𑀯 𑀅𑀓𑁆𑀔𑀸𑀢𑀁 𑁋 ‘𑀲𑀩𑁆𑀩𑁂𑀳𑁂𑀯 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄 𑀅𑀜𑁆𑀜𑀣𑀸𑀪𑀸𑀯𑁄’; 𑀢𑀁 𑀓𑀼𑀢𑁂𑀢𑁆𑀣, 𑀆𑀦𑀦𑁆𑀤, 𑀮𑀩𑁆𑀪𑀸. 𑀬𑀁 𑀢𑀁 𑀚𑀸𑀢𑀁 𑀪𑀽𑀢𑀁 𑀲𑀗𑁆𑀔𑀢𑀁 ¶ 𑀧𑀮𑁄𑀓𑀥𑀫𑁆𑀫𑀁, 𑀢𑀁 𑀯𑀢 𑀢𑀣𑀸𑀕𑀢𑀲𑁆𑀲𑀸𑀧𑀺 𑀲𑀭𑀻𑀭𑀁 𑀫𑀸 𑀧𑀮𑀼𑀚𑁆𑀚𑀻’𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀤𑀻𑀖𑀭𑀢𑁆𑀢𑀁 𑀔𑁄 𑀢𑁂, 𑀆𑀦𑀦𑁆𑀤, 𑀢𑀣𑀸𑀕𑀢𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀫𑁂𑀢𑁆𑀢𑁂𑀦 𑀓𑀸𑀬𑀓𑀫𑁆𑀫𑁂𑀦 𑀳𑀺𑀢𑁂𑀦 𑀲𑀼𑀔𑁂𑀦 𑀅𑀤𑁆𑀯𑀬𑁂𑀦 𑀅𑀧𑁆𑀧𑀫𑀸𑀡𑁂𑀦, 𑀫𑁂𑀢𑁆𑀢𑁂𑀦 𑀯𑀘𑀻𑀓𑀫𑁆𑀫𑁂𑀦 𑀳𑀺𑀢𑁂𑀦 𑀲𑀼𑀔𑁂𑀦 𑀅𑀤𑁆𑀯𑀬𑁂𑀦 𑀅𑀧𑁆𑀧𑀫𑀸𑀡𑁂𑀦, 𑀫𑁂𑀢𑁆𑀢𑁂𑀦 𑀫𑀦𑁄𑀓𑀫𑁆𑀫𑁂𑀦 𑀳𑀺𑀢𑁂𑀦 𑀲𑀼𑀔𑁂𑀦 𑀅𑀤𑁆𑀯𑀬𑁂𑀦 𑀅𑀧𑁆𑀧𑀫𑀸𑀡𑁂𑀦. 𑀓𑀢𑀧𑀼𑀜𑁆𑀜𑁄𑀲𑀺 𑀢𑁆𑀯𑀁, 𑀆𑀦𑀦𑁆𑀤, 𑀧𑀥𑀸𑀦𑀫𑀦𑀼𑀬𑀼𑀜𑁆𑀚, 𑀔𑀺𑀧𑁆𑀧𑀁 𑀳𑁄𑀳𑀺𑀲𑀺 𑀅𑀦𑀸𑀲𑀯𑁄’’𑀢𑀺.

𑁨𑁦𑁮. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀬𑁂𑀧𑀺 𑀢𑁂, 𑀪𑀺𑀓𑁆𑀔𑀯𑁂, 𑀅𑀳𑁂𑀲𑀼𑀁 𑀅𑀢𑀻𑀢𑀫𑀤𑁆𑀥𑀸𑀦𑀁 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀢𑁂𑀲𑀫𑁆𑀧𑀺 𑀪𑀕𑀯𑀦𑁆𑀢𑀸𑀦𑀁 𑀏𑀢𑀧𑁆𑀧𑀭𑀫𑀸𑀬𑁂𑀯 𑀉𑀧𑀝𑁆𑀞𑀸𑀓𑀸 𑀅𑀳𑁂𑀲𑀼𑀁, 𑀲𑁂𑀬𑁆𑀬𑀣𑀸𑀧𑀺 𑀫𑀬𑁆𑀳𑀁 𑀆𑀦𑀦𑁆𑀤𑁄. 𑀬𑁂𑀧𑀺 𑀢𑁂, 𑀪𑀺𑀓𑁆𑀔𑀯𑁂, 𑀪𑀯𑀺𑀲𑁆𑀲𑀦𑁆𑀢𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀢𑁂𑀲𑀫𑁆𑀧𑀺 𑀪𑀕𑀯𑀦𑁆𑀢𑀸𑀦𑀁 𑀏𑀢𑀧𑁆𑀧𑀭𑀫𑀸𑀬𑁂𑀯 𑀉𑀧𑀝𑁆𑀞𑀸𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀬𑁆𑀳𑀁 𑀆𑀦𑀦𑁆𑀤𑁄. 𑀧𑀡𑁆𑀟𑀺𑀢𑁄, 𑀪𑀺𑀓𑁆𑀔𑀯𑁂, 𑀆𑀦𑀦𑁆𑀤𑁄; 𑀫𑁂𑀥𑀸𑀯𑀻, 𑀪𑀺𑀓𑁆𑀔𑀯𑁂, 𑀆𑀦𑀦𑁆𑀤𑁄. 𑀚𑀸𑀦𑀸𑀢𑀺 ‘𑀅𑀬𑀁 𑀓𑀸𑀮𑁄 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁 𑀪𑀺𑀓𑁆𑀔𑀽𑀦𑀁, 𑀅𑀬𑀁 𑀓𑀸𑀮𑁄 𑀪𑀺𑀓𑁆𑀔𑀼𑀦𑀻𑀦𑀁, 𑀅𑀬𑀁 𑀓𑀸𑀮𑁄 𑀉𑀧𑀸𑀲𑀓𑀸𑀦𑀁 ¶ , 𑀅𑀬𑀁 ¶ 𑀓𑀸𑀮𑁄 𑀉𑀧𑀸𑀲𑀺𑀓𑀸𑀦𑀁, 𑀅𑀬𑀁 𑀓𑀸𑀮𑁄 𑀭𑀜𑁆𑀜𑁄 𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀢𑀺𑀢𑁆𑀣𑀺𑀬𑀸𑀦𑀁 𑀢𑀺𑀢𑁆𑀣𑀺𑀬𑀲𑀸𑀯𑀓𑀸𑀦’𑀦𑁆𑀢𑀺.

𑁨𑁦𑁯. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸 [𑀅𑀩𑁆𑀪𑀼𑀢𑀥𑀫𑁆𑀫𑀸 (𑀲𑁆𑀬𑀸. 𑀓.)] 𑀆𑀦𑀦𑁆𑀤𑁂. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀲𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀧𑀭𑀺𑀲𑀸 𑀆𑀦𑀦𑁆𑀤𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀢𑀺, 𑀤𑀲𑁆𑀲𑀦𑁂𑀦 𑀲𑀸 𑀅𑀢𑁆𑀢𑀫𑀦𑀸 𑀳𑁄𑀢𑀺. 𑀢𑀢𑁆𑀭 𑀘𑁂 𑀆𑀦𑀦𑁆𑀤𑁄 𑀥𑀫𑁆𑀫𑀁 ¶ 𑀪𑀸𑀲𑀢𑀺, 𑀪𑀸𑀲𑀺𑀢𑁂𑀦𑀧𑀺 𑀲𑀸 𑀅𑀢𑁆𑀢𑀫𑀦𑀸 𑀳𑁄𑀢𑀺. 𑀅𑀢𑀺𑀢𑁆𑀢𑀸𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀧𑀭𑀺𑀲𑀸 𑀳𑁄𑀢𑀺, 𑀅𑀣 𑀔𑁄 𑀆𑀦𑀦𑁆𑀤𑁄 𑀢𑀼𑀡𑁆𑀳𑀻 𑀳𑁄𑀢𑀺. 𑀲𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻𑀧𑀭𑀺𑀲𑀸 𑀆𑀦𑀦𑁆𑀤𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀢𑀺, 𑀤𑀲𑁆𑀲𑀦𑁂𑀦 𑀲𑀸 𑀅𑀢𑁆𑀢𑀫𑀦𑀸 𑀳𑁄𑀢𑀺. 𑀢𑀢𑁆𑀭 𑀘𑁂 𑀆𑀦𑀦𑁆𑀤𑁄 𑀥𑀫𑁆𑀫𑀁 𑀪𑀸𑀲𑀢𑀺, 𑀪𑀸𑀲𑀺𑀢𑁂𑀦𑀧𑀺 𑀲𑀸 𑀅𑀢𑁆𑀢𑀫𑀦𑀸 𑀳𑁄𑀢𑀺. 𑀅𑀢𑀺𑀢𑁆𑀢𑀸𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻𑀧𑀭𑀺𑀲𑀸 𑀳𑁄𑀢𑀺, 𑀅𑀣 𑀔𑁄 𑀆𑀦𑀦𑁆𑀤𑁄 𑀢𑀼𑀡𑁆𑀳𑀻 𑀳𑁄𑀢𑀺. 𑀲𑀘𑁂, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀓𑀧𑀭𑀺𑀲𑀸 𑀆𑀦𑀦𑁆𑀤𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀢𑀺, 𑀤𑀲𑁆𑀲𑀦𑁂𑀦 𑀲𑀸 𑀅𑀢𑁆𑀢𑀫𑀦𑀸 𑀳𑁄𑀢𑀺. 𑀢𑀢𑁆𑀭 𑀘𑁂 𑀆𑀦𑀦𑁆𑀤𑁄 𑀥𑀫𑁆𑀫𑀁 𑀪𑀸𑀲𑀢𑀺, 𑀪𑀸𑀲𑀺𑀢𑁂𑀦𑀧𑀺 𑀲𑀸 𑀅𑀢𑁆𑀢𑀫𑀦𑀸 𑀳𑁄𑀢𑀺. 𑀅𑀢𑀺𑀢𑁆𑀢𑀸𑀯, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀓𑀧𑀭𑀺𑀲𑀸 𑀳𑁄𑀢𑀺, 𑀅𑀣 𑀔𑁄 𑀆𑀦𑀦𑁆𑀤𑁄 𑀢𑀼𑀡𑁆𑀳𑀻 𑀳𑁄𑀢𑀺. 𑀲𑀘𑁂, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀺𑀓𑀸𑀧𑀭𑀺𑀲𑀸 𑀆𑀦𑀦𑁆𑀤𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀢𑀺, 𑀤𑀲𑁆𑀲𑀦𑁂𑀦 𑀲𑀸 𑀅𑀢𑁆𑀢𑀫𑀦𑀸 𑀳𑁄𑀢𑀺. 𑀢𑀢𑁆𑀭 𑀘𑁂, 𑀆𑀦𑀦𑁆𑀤𑁄, 𑀥𑀫𑁆𑀫𑀁 𑀪𑀸𑀲𑀢𑀺, 𑀪𑀸𑀲𑀺𑀢𑁂𑀦𑀧𑀺 𑀲𑀸 𑀅𑀢𑁆𑀢𑀫𑀦𑀸 𑀳𑁄𑀢𑀺. 𑀅𑀢𑀺𑀢𑁆𑀢𑀸𑀯, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀺𑀓𑀸𑀧𑀭𑀺𑀲𑀸 𑀳𑁄𑀢𑀺, 𑀅𑀣 𑀔𑁄 𑀆𑀦𑀦𑁆𑀤𑁄 𑀢𑀼𑀡𑁆𑀳𑀻 𑀳𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸 𑀆𑀦𑀦𑁆𑀤𑁂.

‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸 𑀭𑀜𑁆𑀜𑁂 𑀘𑀓𑁆𑀓𑀯𑀢𑁆𑀢𑀺𑀫𑁆𑀳𑀺. 𑀓𑀢𑀫𑁂 𑀘𑀢𑁆𑀢𑀸𑀭𑁄 ¶ ? 𑀲𑀘𑁂, 𑀪𑀺𑀓𑁆𑀔𑀯𑁂, 𑀔𑀢𑁆𑀢𑀺𑀬𑀧𑀭𑀺𑀲𑀸 𑀭𑀸𑀚𑀸𑀦𑀁 𑀘𑀓𑁆𑀓𑀯𑀢𑁆𑀢𑀺𑀁 𑀤𑀲𑁆𑀲𑀦𑀸𑀬 ¶ 𑀉𑀧𑀲𑀗𑁆𑀓𑀫𑀢𑀺, 𑀤𑀲𑁆𑀲𑀦𑁂𑀦 𑀲𑀸 𑀅𑀢𑁆𑀢𑀫𑀦𑀸 𑀳𑁄𑀢𑀺. 𑀢𑀢𑁆𑀭 𑀘𑁂 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀪𑀸𑀲𑀢𑀺, 𑀪𑀸𑀲𑀺𑀢𑁂𑀦𑀧𑀺 𑀲𑀸 𑀅𑀢𑁆𑀢𑀫𑀦𑀸 𑀳𑁄𑀢𑀺. 𑀅𑀢𑀺𑀢𑁆𑀢𑀸𑀯, 𑀪𑀺𑀓𑁆𑀔𑀯𑁂, 𑀔𑀢𑁆𑀢𑀺𑀬𑀧𑀭𑀺𑀲𑀸 𑀳𑁄𑀢𑀺. 𑀅𑀣 𑀔𑁄 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀢𑀼𑀡𑁆𑀳𑀻 𑀳𑁄𑀢𑀺. 𑀲𑀘𑁂 𑀪𑀺𑀓𑁆𑀔𑀯𑁂, 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀸…𑀧𑁂… 𑀕𑀳𑀧𑀢𑀺𑀧𑀭𑀺𑀲𑀸…𑀧𑁂… 𑀲𑀫𑀡𑀧𑀭𑀺𑀲𑀸 𑀭𑀸𑀚𑀸𑀦𑀁 𑀘𑀓𑁆𑀓𑀯𑀢𑁆𑀢𑀺𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀢𑀺, 𑀤𑀲𑁆𑀲𑀦𑁂𑀦 𑀲𑀸 𑀅𑀢𑁆𑀢𑀫𑀦𑀸 𑀳𑁄𑀢𑀺. 𑀢𑀢𑁆𑀭 𑀘𑁂 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀪𑀸𑀲𑀢𑀺, 𑀪𑀸𑀲𑀺𑀢𑁂𑀦𑀧𑀺 𑀲𑀸 𑀅𑀢𑁆𑀢𑀫𑀦𑀸 𑀳𑁄𑀢𑀺. 𑀅𑀢𑀺𑀢𑁆𑀢𑀸𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑀧𑀭𑀺𑀲𑀸 𑀳𑁄𑀢𑀺, 𑀅𑀣 𑀔𑁄 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀢𑀼𑀡𑁆𑀳𑀻 𑀳𑁄𑀢𑀺. 𑀏𑀯𑀫𑁂𑀯 ¶ 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄𑀫𑁂 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸 𑀆𑀦𑀦𑁆𑀤𑁂. 𑀲𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀧𑀭𑀺𑀲𑀸 𑀆𑀦𑀦𑁆𑀤𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀢𑀺, 𑀤𑀲𑁆𑀲𑀦𑁂𑀦 𑀲𑀸 𑀅𑀢𑁆𑀢𑀫𑀦𑀸 𑀳𑁄𑀢𑀺. 𑀢𑀢𑁆𑀭 𑀘𑁂 𑀆𑀦𑀦𑁆𑀤𑁄 𑀥𑀫𑁆𑀫𑀁 𑀪𑀸𑀲𑀢𑀺, 𑀪𑀸𑀲𑀺𑀢𑁂𑀦𑀧𑀺 𑀲𑀸 𑀅𑀢𑁆𑀢𑀫𑀦𑀸 𑀳𑁄𑀢𑀺. 𑀅𑀢𑀺𑀢𑁆𑀢𑀸𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀧𑀭𑀺𑀲𑀸 𑀳𑁄𑀢𑀺. 𑀅𑀣 𑀔𑁄 𑀆𑀦𑀦𑁆𑀤𑁄 𑀢𑀼𑀡𑁆𑀳𑀻 𑀳𑁄𑀢𑀺. 𑀲𑀘𑁂, 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼𑀦𑀻𑀧𑀭𑀺𑀲𑀸…𑀧𑁂… 𑀉𑀧𑀸𑀲𑀓𑀧𑀭𑀺𑀲𑀸…𑀧𑁂… 𑀉𑀧𑀸𑀲𑀺𑀓𑀸𑀧𑀭𑀺𑀲𑀸 𑀆𑀦𑀦𑁆𑀤𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀢𑀺, 𑀤𑀲𑁆𑀲𑀦𑁂𑀦 𑀲𑀸 𑀅𑀢𑁆𑀢𑀫𑀦𑀸 ¶ 𑀳𑁄𑀢𑀺. 𑀢𑀢𑁆𑀭 𑀘𑁂 𑀆𑀦𑀦𑁆𑀤𑁄 𑀥𑀫𑁆𑀫𑀁 𑀪𑀸𑀲𑀢𑀺, 𑀪𑀸𑀲𑀺𑀢𑁂𑀦𑀧𑀺 𑀲𑀸 𑀅𑀢𑁆𑀢𑀫𑀦𑀸 𑀳𑁄𑀢𑀺. 𑀅𑀢𑀺𑀢𑁆𑀢𑀸𑀯, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀺𑀓𑀸𑀧𑀭𑀺𑀲𑀸 𑀳𑁄𑀢𑀺. 𑀅𑀣 𑀔𑁄 𑀆𑀦𑀦𑁆𑀤𑁄 𑀢𑀼𑀡𑁆𑀳𑀻 𑀳𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸 𑀆𑀦𑀦𑁆𑀤𑁂’’𑀢𑀺.

𑀫𑀳𑀸𑀲𑀼𑀤𑀲𑁆𑀲𑀦𑀲𑀼𑀢𑁆𑀢𑀤𑁂𑀲𑀦𑀸

𑁨𑁧𑁦. 𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀸, 𑀪𑀦𑁆𑀢𑁂, 𑀪𑀕𑀯𑀸 𑀇𑀫𑀲𑁆𑀫𑀺𑀁 𑀔𑀼𑀤𑁆𑀤𑀓𑀦𑀕𑀭𑀓𑁂 𑀉𑀚𑁆𑀚𑀗𑁆𑀕𑀮𑀦𑀕𑀭𑀓𑁂 𑀲𑀸𑀔𑀸𑀦𑀕𑀭𑀓𑁂 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀲𑀦𑁆𑀢𑀺, 𑀪𑀦𑁆𑀢𑁂, 𑀅𑀜𑁆𑀜𑀸𑀦𑀺 𑀫𑀳𑀸𑀦𑀕𑀭𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀫𑁆𑀧𑀸 ¶ 𑀭𑀸𑀚𑀕𑀳𑀁 𑀲𑀸𑀯𑀢𑁆𑀣𑀻 𑀲𑀸𑀓𑁂𑀢𑀁 𑀓𑁄𑀲𑀫𑁆𑀩𑀻 𑀩𑀸𑀭𑀸𑀡𑀲𑀻; 𑀏𑀢𑁆𑀣 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀼. 𑀏𑀢𑁆𑀣 𑀩𑀳𑀽 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸, 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀸 𑀢𑀣𑀸𑀕𑀢𑁂 𑀅𑀪𑀺𑀧𑁆𑀧𑀲𑀦𑁆𑀦𑀸. 𑀢𑁂 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀧𑀽𑀚𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 ‘‘𑀫𑀸𑀳𑁂𑀯𑀁, 𑀆𑀦𑀦𑁆𑀤, 𑀅𑀯𑀘; 𑀫𑀸𑀳𑁂𑀯𑀁, 𑀆𑀦𑀦𑁆𑀤, 𑀅𑀯𑀘 𑁋 ‘𑀔𑀼𑀤𑁆𑀤𑀓𑀦𑀕𑀭𑀓𑀁 𑀉𑀚𑁆𑀚𑀗𑁆𑀕𑀮𑀦𑀕𑀭𑀓𑀁 𑀲𑀸𑀔𑀸𑀦𑀕𑀭𑀓’𑀦𑁆𑀢𑀺.

‘‘𑀪𑀽𑀢𑀧𑀼𑀩𑁆𑀩𑀁, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀦𑀸𑀫 𑀅𑀳𑁄𑀲𑀺 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻 𑀚𑀦𑀧𑁆𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄 𑀲𑀢𑁆𑀢𑀭𑀢𑀦𑀲𑀫𑀦𑁆𑀦𑀸𑀕𑀢𑁄. 𑀭𑀜𑁆𑀜𑁄, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀅𑀬𑀁 𑀓𑀼𑀲𑀺𑀦𑀸𑀭𑀸 𑀓𑀼𑀲𑀸𑀯𑀢𑀻 𑀦𑀸𑀫 𑀭𑀸𑀚𑀥𑀸𑀦𑀻 𑀅𑀳𑁄𑀲𑀺, 𑀧𑀼𑀭𑀢𑁆𑀣𑀺𑀫𑁂𑀦 𑀘 𑀧𑀘𑁆𑀙𑀺𑀫𑁂𑀦 𑀘 𑀤𑁆𑀯𑀸𑀤𑀲𑀬𑁄𑀚𑀦𑀸𑀦𑀺 𑀆𑀬𑀸𑀫𑁂𑀦; 𑀉𑀢𑁆𑀢𑀭𑁂𑀦 𑀘 𑀤𑀓𑁆𑀔𑀺𑀡𑁂𑀦 𑀘 𑀲𑀢𑁆𑀢𑀬𑁄𑀚𑀦𑀸𑀦𑀺 𑀯𑀺𑀢𑁆𑀣𑀸𑀭𑁂𑀦. 𑀓𑀼𑀲𑀸𑀯𑀢𑀻, 𑀆𑀦𑀦𑁆𑀤, 𑀭𑀸𑀚𑀥𑀸𑀦𑀻 𑀇𑀤𑁆𑀥𑀸 𑀘𑁂𑀯 𑀅𑀳𑁄𑀲𑀺 𑀨𑀻𑀢𑀸 𑀘 ¶ 𑀩𑀳𑀼𑀚𑀦𑀸 𑀘 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀸 𑀘 𑀲𑀼𑀪𑀺𑀓𑁆𑀔𑀸 𑀘. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀤𑁂𑀯𑀸𑀦𑀁 𑀆𑀴𑀓𑀫𑀦𑁆𑀤𑀸 𑀦𑀸𑀫 𑀭𑀸𑀚𑀥𑀸𑀦𑀻 𑀇𑀤𑁆𑀥𑀸 𑀘𑁂𑀯 𑀳𑁄𑀢𑀺 𑀨𑀻𑀢𑀸 ¶ 𑀘 𑀩𑀳𑀼𑀚𑀦𑀸 𑀘 𑀆𑀓𑀺𑀡𑁆𑀡𑀬𑀓𑁆𑀔𑀸 𑀘 𑀲𑀼𑀪𑀺𑀓𑁆𑀔𑀸 𑀘; 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀓𑀼𑀲𑀸𑀯𑀢𑀻 𑀭𑀸𑀚𑀥𑀸𑀦𑀻 𑀇𑀤𑁆𑀥𑀸 𑀘𑁂𑀯 𑀅𑀳𑁄𑀲𑀺 𑀨𑀻𑀢𑀸 𑀘 𑀩𑀳𑀼𑀚𑀦𑀸 𑀘 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀸 𑀘 𑀲𑀼𑀪𑀺𑀓𑁆𑀔𑀸 𑀘. 𑀓𑀼𑀲𑀸𑀯𑀢𑀻, 𑀆𑀦𑀦𑁆𑀤, 𑀭𑀸𑀚𑀥𑀸𑀦𑀻 𑀤𑀲𑀳𑀺 𑀲𑀤𑁆𑀤𑁂𑀳𑀺 𑀅𑀯𑀺𑀯𑀺𑀢𑁆𑀢𑀸 𑀅𑀳𑁄𑀲𑀺 𑀤𑀺𑀯𑀸 𑀘𑁂𑀯 𑀭𑀢𑁆𑀢𑀺𑀜𑁆𑀘, 𑀲𑁂𑀬𑁆𑀬𑀣𑀺𑀤𑀁 𑁋 𑀳𑀢𑁆𑀣𑀺𑀲𑀤𑁆𑀤𑁂𑀦 𑀅𑀲𑁆𑀲𑀲𑀤𑁆𑀤𑁂𑀦 𑀭𑀣𑀲𑀤𑁆𑀤𑁂𑀦 𑀪𑁂𑀭𑀺𑀲𑀤𑁆𑀤𑁂𑀦 𑀫𑀼𑀤𑀺𑀗𑁆𑀕𑀲𑀤𑁆𑀤𑁂𑀦 𑀯𑀻𑀡𑀸𑀲𑀤𑁆𑀤𑁂𑀦 𑀕𑀻𑀢𑀲𑀤𑁆𑀤𑁂𑀦 𑀲𑀗𑁆𑀔𑀲𑀤𑁆𑀤𑁂𑀦 𑀲𑀫𑁆𑀫𑀲𑀤𑁆𑀤𑁂𑀦 𑀧𑀸𑀡𑀺𑀢𑀸𑀴𑀲𑀤𑁆𑀤𑁂𑀦 ‘𑀅𑀲𑁆𑀦𑀸𑀣 𑀧𑀺𑀯𑀣 𑀔𑀸𑀤𑀣𑀸’𑀢𑀺 𑀤𑀲𑀫𑁂𑀦 𑀲𑀤𑁆𑀤𑁂𑀦.

‘‘𑀕𑀘𑁆𑀙 𑀢𑁆𑀯𑀁, 𑀆𑀦𑀦𑁆𑀤, 𑀓𑀼𑀲𑀺𑀦𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀓𑁄𑀲𑀺𑀦𑀸𑀭𑀓𑀸𑀦𑀁 𑀫𑀮𑁆𑀮𑀸𑀦𑀁 ¶ 𑀆𑀭𑁄𑀘𑁂𑀳𑀺 𑁋 ‘𑀅𑀚𑁆𑀚 𑀔𑁄, 𑀯𑀸𑀲𑁂𑀝𑁆𑀞𑀸, 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 ¶ 𑀪𑀯𑀺𑀲𑁆𑀲𑀢𑀺. 𑀅𑀪𑀺𑀓𑁆𑀓𑀫𑀣 𑀯𑀸𑀲𑁂𑀝𑁆𑀞𑀸, 𑀅𑀪𑀺𑀓𑁆𑀓𑀫𑀣 𑀯𑀸𑀲𑁂𑀝𑁆𑀞𑀸. 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀅𑀳𑀼𑀯𑀢𑁆𑀣 𑁋 𑀅𑀫𑁆𑀳𑀸𑀓𑀜𑁆𑀘 𑀦𑁄 𑀕𑀸𑀫𑀓𑁆𑀔𑁂𑀢𑁆𑀢𑁂 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀳𑁄𑀲𑀺, 𑀦 𑀫𑀬𑀁 𑀮𑀪𑀺𑀫𑁆𑀳𑀸 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬𑀸’’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀢𑁆𑀢𑀤𑀼𑀢𑀺𑀬𑁄 𑀓𑀼𑀲𑀺𑀦𑀸𑀭𑀁 𑀧𑀸𑀯𑀺𑀲𑀺.

𑀫𑀮𑁆𑀮𑀸𑀦𑀁 𑀯𑀦𑁆𑀤𑀦𑀸

𑁨𑁧𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑁄𑀲𑀺𑀦𑀸𑀭𑀓𑀸 𑀫𑀮𑁆𑀮𑀸 𑀲𑀦𑁆𑀥𑀸𑀕𑀸𑀭𑁂 [𑀲𑀦𑁆𑀣𑀸𑀕𑀸𑀭𑁂 (𑀲𑀻. 𑀲𑁆𑀬𑀸. 𑀧𑀻.)] 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀓𑁄𑀲𑀺𑀦𑀸𑀭𑀓𑀸𑀦𑀁 𑀫𑀮𑁆𑀮𑀸𑀦𑀁 𑀲𑀦𑁆𑀥𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑁄𑀲𑀺𑀦𑀸𑀭𑀓𑀸𑀦𑀁 𑀫𑀮𑁆𑀮𑀸𑀦𑀁 𑀆𑀭𑁄𑀘𑁂𑀲𑀺 𑁋 ‘‘𑀅𑀚𑁆𑀚 𑀔𑁄, 𑀯𑀸𑀲𑁂𑀝𑁆𑀞𑀸, 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀺. 𑀅𑀪𑀺𑀓𑁆𑀓𑀫𑀣 𑀯𑀸𑀲𑁂𑀝𑁆𑀞𑀸 𑀅𑀪𑀺𑀓𑁆𑀓𑀫𑀣 𑀯𑀸𑀲𑁂𑀝𑁆𑀞𑀸. 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀅𑀳𑀼𑀯𑀢𑁆𑀣 𑁋 ‘𑀅𑀫𑁆𑀳𑀸𑀓𑀜𑁆𑀘 𑀦𑁄 𑀕𑀸𑀫𑀓𑁆𑀔𑁂𑀢𑁆𑀢𑁂 𑀢𑀣𑀸𑀕𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 ¶ 𑀅𑀳𑁄𑀲𑀺, 𑀦 𑀫𑀬𑀁 𑀮𑀪𑀺𑀫𑁆𑀳𑀸 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬𑀸’’’𑀢𑀺. 𑀇𑀤𑀫𑀸𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀫𑀮𑁆𑀮𑀸 𑀘 𑀫𑀮𑁆𑀮𑀧𑀼𑀢𑁆𑀢𑀸 𑀘 𑀫𑀮𑁆𑀮𑀲𑀼𑀡𑀺𑀲𑀸 𑀘 𑀫𑀮𑁆𑀮𑀧𑀚𑀸𑀧𑀢𑀺𑀬𑁄 𑀘 𑀅𑀖𑀸𑀯𑀺𑀦𑁄 𑀤𑀼𑀫𑁆𑀫𑀦𑀸 𑀘𑁂𑀢𑁄𑀤𑀼𑀓𑁆𑀔𑀲𑀫𑀧𑁆𑀧𑀺𑀢𑀸 𑀅𑀧𑁆𑀧𑁂𑀓𑀘𑁆𑀘𑁂 𑀓𑁂𑀲𑁂 𑀧𑀓𑀺𑀭𑀺𑀬 𑀓𑀦𑁆𑀤𑀦𑁆𑀢𑀺, 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑀺, 𑀙𑀺𑀦𑁆𑀦𑀧𑀸𑀢𑀁 𑀧𑀧𑀢𑀦𑁆𑀢𑀺, 𑀆𑀯𑀝𑁆𑀝𑀦𑁆𑀢𑀺 𑀯𑀺𑀯𑀝𑁆𑀝𑀦𑁆𑀢𑀺 𑁋 ‘𑀅𑀢𑀺𑀔𑀺𑀧𑁆𑀧𑀁 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺, 𑀅𑀢𑀺𑀔𑀺𑀧𑁆𑀧𑀁 𑀲𑀼𑀕𑀢𑁄 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺, 𑀅𑀢𑀺𑀔𑀺𑀧𑁆𑀧𑀁 𑀘𑀓𑁆𑀔𑀼𑀁 ¶ 𑀮𑁄𑀓𑁂 𑀅𑀦𑁆𑀢𑀭𑀥𑀸𑀬𑀺𑀲𑁆𑀲𑀢𑀻’𑀢𑀺. 𑀅𑀣 𑀔𑁄 𑀫𑀮𑁆𑀮𑀸 𑀘 𑀫𑀮𑁆𑀮𑀧𑀼𑀢𑁆𑀢𑀸 𑀘 𑀫𑀮𑁆𑀮𑀲𑀼𑀡𑀺𑀲𑀸 𑀘 𑀫𑀮𑁆𑀮𑀧𑀚𑀸𑀧𑀢𑀺𑀬𑁄 𑀘 𑀅𑀖𑀸𑀯𑀺𑀦𑁄 𑀤𑀼𑀫𑁆𑀫𑀦𑀸 𑀘𑁂𑀢𑁄𑀤𑀼𑀓𑁆𑀔𑀲𑀫𑀧𑁆𑀧𑀺𑀢𑀸 𑀬𑁂𑀦 𑀉𑀧𑀯𑀢𑁆𑀢𑀦𑀁 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑀁 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀔𑁄 𑀅𑀳𑀁 𑀓𑁄𑀲𑀺𑀦𑀸𑀭𑀓𑁂 𑀫𑀮𑁆𑀮𑁂 𑀏𑀓𑀫𑁂𑀓𑀁 𑀪𑀕𑀯𑀦𑁆𑀢𑀁 𑀯𑀦𑁆𑀤𑀸𑀧𑁂𑀲𑁆𑀲𑀸𑀫𑀺, 𑀅𑀯𑀦𑁆𑀤𑀺𑀢𑁄 𑀪𑀕𑀯𑀸 𑀓𑁄𑀲𑀺𑀦𑀸𑀭𑀓𑁂𑀳𑀺 𑀫𑀮𑁆𑀮𑁂𑀳𑀺 𑀪𑀯𑀺𑀲𑁆𑀲𑀢𑀺, 𑀅𑀣𑀸𑀬𑀁 𑀭𑀢𑁆𑀢𑀺 𑀯𑀺𑀪𑀸𑀬𑀺𑀲𑁆𑀲𑀢𑀺. 𑀬𑀁𑀦𑀽𑀦𑀸𑀳𑀁 𑀓𑁄𑀲𑀺𑀦𑀸𑀭𑀓𑁂 𑀫𑀮𑁆𑀮𑁂 𑀓𑀼𑀮𑀧𑀭𑀺𑀯𑀢𑁆𑀢𑀲𑁄 𑀓𑀼𑀮𑀧𑀭𑀺𑀯𑀢𑁆𑀢𑀲𑁄 ¶ 𑀞𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀸𑀧𑁂𑀬𑁆𑀬𑀁 𑁋 ‘𑀇𑀢𑁆𑀣𑀦𑁆𑀦𑀸𑀫𑁄, 𑀪𑀦𑁆𑀢𑁂, 𑀫𑀮𑁆𑀮𑁄 𑀲𑀧𑀼𑀢𑁆𑀢𑁄 𑀲𑀪𑀭𑀺𑀬𑁄 𑀲𑀧𑀭𑀺𑀲𑁄 𑀲𑀸𑀫𑀘𑁆𑀘𑁄 𑀪𑀕𑀯𑀢𑁄 𑀧𑀸𑀤𑁂 ¶ 𑀲𑀺𑀭𑀲𑀸 𑀯𑀦𑁆𑀤𑀢𑀻’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀓𑁄𑀲𑀺𑀦𑀸𑀭𑀓𑁂 𑀫𑀮𑁆𑀮𑁂 𑀓𑀼𑀮𑀧𑀭𑀺𑀯𑀢𑁆𑀢𑀲𑁄 𑀓𑀼𑀮𑀧𑀭𑀺𑀯𑀢𑁆𑀢𑀲𑁄 𑀞𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀸𑀧𑁂𑀲𑀺 𑁋 ‘𑀇𑀢𑁆𑀣𑀦𑁆𑀦𑀸𑀫𑁄, 𑀪𑀦𑁆𑀢𑁂, 𑀫𑀮𑁆𑀮𑁄 𑀲𑀧𑀼𑀢𑁆𑀢𑁄 𑀲𑀪𑀭𑀺𑀬𑁄 𑀲𑀧𑀭𑀺𑀲𑁄 𑀲𑀸𑀫𑀘𑁆𑀘𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀏𑀢𑁂𑀦 𑀉𑀧𑀸𑀬𑁂𑀦 𑀧𑀞𑀫𑁂𑀦𑁂𑀯 𑀬𑀸𑀫𑁂𑀦 𑀓𑁄𑀲𑀺𑀦𑀸𑀭𑀓𑁂 𑀫𑀮𑁆𑀮𑁂 𑀪𑀕𑀯𑀦𑁆𑀢𑀁 𑀯𑀦𑁆𑀤𑀸𑀧𑁂𑀲𑀺.

𑀲𑀼𑀪𑀤𑁆𑀤𑀧𑀭𑀺𑀩𑁆𑀩𑀸𑀚𑀓𑀯𑀢𑁆𑀣𑀼

𑁨𑁧𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀼𑀪𑀤𑁆𑀤𑁄 𑀦𑀸𑀫 𑀧𑀭𑀺𑀩𑁆𑀩𑀸𑀚𑀓𑁄 𑀓𑀼𑀲𑀺𑀦𑀸𑀭𑀸𑀬𑀁 𑀧𑀝𑀺𑀯𑀲𑀢𑀺. 𑀅𑀲𑁆𑀲𑁄𑀲𑀺 𑀔𑁄 𑀲𑀼𑀪𑀤𑁆𑀤𑁄 𑀧𑀭𑀺𑀩𑁆𑀩𑀸𑀚𑀓𑁄 𑁋 ‘‘𑀅𑀚𑁆𑀚 𑀓𑀺𑀭 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀣 ¶ 𑀔𑁄 𑀲𑀼𑀪𑀤𑁆𑀤𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀼𑀢𑀁 𑀔𑁄 𑀧𑀦 𑀫𑁂𑀢𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀯𑀼𑀟𑁆𑀠𑀸𑀦𑀁 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 𑁋 ‘𑀓𑀤𑀸𑀘𑀺 𑀓𑀭𑀳𑀘𑀺 𑀢𑀣𑀸𑀕𑀢𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸’𑀢𑀺. 𑀅𑀚𑁆𑀚𑁂𑀯 ¶ 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀺. 𑀅𑀢𑁆𑀣𑀺 𑀘 𑀫𑁂 𑀅𑀬𑀁 𑀓𑀗𑁆𑀔𑀸𑀥𑀫𑁆𑀫𑁄 𑀉𑀧𑁆𑀧𑀦𑁆𑀦𑁄, 𑀏𑀯𑀁 𑀧𑀲𑀦𑁆𑀦𑁄 𑀅𑀳𑀁 𑀲𑀫𑀡𑁂 𑀕𑁄𑀢𑀫𑁂, ‘𑀧𑀳𑁄𑀢𑀺 𑀫𑁂 𑀲𑀫𑀡𑁄 𑀕𑁄𑀢𑀫𑁄 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁, 𑀬𑀣𑀸𑀳𑀁 𑀇𑀫𑀁 𑀓𑀗𑁆𑀔𑀸𑀥𑀫𑁆𑀫𑀁 𑀧𑀚𑀳𑁂𑀬𑁆𑀬’’’𑀦𑁆𑀢𑀺. 𑀅𑀣 𑀔𑁄 𑀲𑀼𑀪𑀤𑁆𑀤𑁄 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦 𑀉𑀧𑀯𑀢𑁆𑀢𑀦𑀁 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑀁, 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀲𑀼𑀢𑀁 𑀫𑁂𑀢𑀁, 𑀪𑁄 𑀆𑀦𑀦𑁆𑀤, 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀯𑀼𑀟𑁆𑀠𑀸𑀦𑀁 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 𑁋 ‘𑀓𑀤𑀸𑀘𑀺 𑀓𑀭𑀳𑀘𑀺 𑀢𑀣𑀸𑀕𑀢𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀭𑀳𑀦𑁆𑀢𑁄 ¶ 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸’𑀢𑀺. 𑀅𑀚𑁆𑀚𑁂𑀯 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀺. 𑀅𑀢𑁆𑀣𑀺 𑀘 𑀫𑁂 𑀅𑀬𑀁 𑀓𑀗𑁆𑀔𑀸𑀥𑀫𑁆𑀫𑁄 𑀉𑀧𑁆𑀧𑀦𑁆𑀦𑁄 𑁋 𑀏𑀯𑀁 𑀧𑀲𑀦𑁆𑀦𑁄 𑀅𑀳𑀁 𑀲𑀫𑀡𑁂 𑀕𑁄𑀢𑀫𑁂 ‘𑀧𑀳𑁄𑀢𑀺 𑀫𑁂 𑀲𑀫𑀡𑁄 𑀕𑁄𑀢𑀫𑁄 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁, 𑀬𑀣𑀸𑀳𑀁 𑀇𑀫𑀁 𑀓𑀗𑁆𑀔𑀸𑀥𑀫𑁆𑀫𑀁 𑀧𑀚𑀳𑁂𑀬𑁆𑀬’𑀦𑁆𑀢𑀺. 𑀲𑀸𑀥𑀸𑀳𑀁, 𑀪𑁄 𑀆𑀦𑀦𑁆𑀤, 𑀮𑀪𑁂𑀬𑁆𑀬𑀁 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀼𑀪𑀤𑁆𑀤𑀁 𑀧𑀭𑀺𑀩𑁆𑀩𑀸𑀚𑀓𑀁 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀆𑀯𑀼𑀲𑁄 𑀲𑀼𑀪𑀤𑁆𑀤, 𑀫𑀸 𑀢𑀣𑀸𑀕𑀢𑀁 𑀯𑀺𑀳𑁂𑀞𑁂𑀲𑀺, 𑀓𑀺𑀮𑀦𑁆𑀢𑁄 𑀪𑀕𑀯𑀸’’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑀼𑀪𑀤𑁆𑀤𑁄 𑀧𑀭𑀺𑀩𑁆𑀩𑀸𑀚𑀓𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀲𑀼𑀪𑀤𑁆𑀤𑁄 𑀧𑀭𑀺𑀩𑁆𑀩𑀸𑀚𑀓𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀲𑀼𑀢𑀁 𑀫𑁂𑀢𑀁, 𑀪𑁄 𑀆𑀦𑀦𑁆𑀤, 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀯𑀼𑀟𑁆𑀠𑀸𑀦𑀁 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 𑁋 ‘𑀓𑀤𑀸𑀘𑀺 𑀓𑀭𑀳𑀘𑀺 𑀢𑀣𑀸𑀕𑀢𑀸 ¶ 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸’𑀢𑀺. 𑀅𑀚𑁆𑀚𑁂𑀯 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑁂 𑀬𑀸𑀫𑁂 𑀲𑀫𑀡𑀲𑁆𑀲 ¶ 𑀕𑁄𑀢𑀫𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀪𑀯𑀺𑀲𑁆𑀲𑀢𑀺. 𑀅𑀢𑁆𑀣𑀺 𑀘 𑀫𑁂 𑀅𑀬𑀁 𑀓𑀗𑁆𑀔𑀸𑀥𑀫𑁆𑀫𑁄 𑀉𑀧𑁆𑀧𑀦𑁆𑀦𑁄 𑁋 𑀏𑀯𑀁 𑀧𑀲𑀦𑁆𑀦𑁄 𑀅𑀳𑀁 𑀲𑀫𑀡𑁂 𑀕𑁄𑀢𑀫𑁂, ‘𑀧𑀳𑁄𑀢𑀺 𑀫𑁂 𑀲𑀫𑀡𑁄 𑀕𑁄𑀢𑀫𑁄 𑀢𑀣𑀸 ¶ 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁, 𑀬𑀣𑀸𑀳𑀁 𑀇𑀫𑀁 𑀓𑀗𑁆𑀔𑀸𑀥𑀫𑁆𑀫𑀁 𑀧𑀚𑀳𑁂𑀬𑁆𑀬’𑀦𑁆𑀢𑀺. 𑀲𑀸𑀥𑀸𑀳𑀁, 𑀪𑁄 𑀆𑀦𑀦𑁆𑀤, 𑀮𑀪𑁂𑀬𑁆𑀬𑀁 𑀲𑀫𑀡𑀁 𑀕𑁄𑀢𑀫𑀁 𑀤𑀲𑁆𑀲𑀦𑀸𑀬𑀸’’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀼𑀪𑀤𑁆𑀤𑀁 𑀧𑀭𑀺𑀩𑁆𑀩𑀸𑀚𑀓𑀁 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀆𑀯𑀼𑀲𑁄 𑀲𑀼𑀪𑀤𑁆𑀤, 𑀫𑀸 𑀢𑀣𑀸𑀕𑀢𑀁 𑀯𑀺𑀳𑁂𑀞𑁂𑀲𑀺, 𑀓𑀺𑀮𑀦𑁆𑀢𑁄 𑀪𑀕𑀯𑀸’’𑀢𑀺.

𑁨𑁧𑁩. 𑀅𑀲𑁆𑀲𑁄𑀲𑀺 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀲𑀼𑀪𑀤𑁆𑀤𑁂𑀦 𑀧𑀭𑀺𑀩𑁆𑀩𑀸𑀚𑀓𑁂𑀦 𑀲𑀤𑁆𑀥𑀺𑀁 𑀇𑀫𑀁 𑀓𑀣𑀸𑀲𑀮𑁆𑀮𑀸𑀧𑀁. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀮𑀁, 𑀆𑀦𑀦𑁆𑀤, 𑀫𑀸 𑀲𑀼𑀪𑀤𑁆𑀤𑀁 𑀯𑀸𑀭𑁂𑀲𑀺, 𑀮𑀪𑀢𑀁, 𑀆𑀦𑀦𑁆𑀤, 𑀲𑀼𑀪𑀤𑁆𑀤𑁄 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬. 𑀬𑀁 𑀓𑀺𑀜𑁆𑀘𑀺 𑀫𑀁 𑀲𑀼𑀪𑀤𑁆𑀤𑁄 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀲𑀩𑁆𑀩𑀁 𑀢𑀁 𑀅𑀜𑁆𑀜𑀸𑀧𑁂𑀓𑁆𑀔𑁄𑀯 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀦𑁄 𑀯𑀺𑀳𑁂𑀲𑀸𑀧𑁂𑀓𑁆𑀔𑁄. 𑀬𑀁 𑀘𑀲𑁆𑀲𑀸𑀳𑀁 𑀧𑀼𑀝𑁆𑀞𑁄 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀺, 𑀢𑀁 𑀔𑀺𑀧𑁆𑀧𑀫𑁂𑀯 𑀆𑀚𑀸𑀦𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀼𑀪𑀤𑁆𑀤𑀁 𑀧𑀭𑀺𑀩𑁆𑀩𑀸𑀚𑀓𑀁 𑀏𑀢𑀤𑀯𑁄𑀘 𑁋 ‘‘𑀕𑀘𑁆𑀙𑀸𑀯𑀼𑀲𑁄 𑀲𑀼𑀪𑀤𑁆𑀤, 𑀓𑀭𑁄𑀢𑀺 𑀢𑁂 𑀪𑀕𑀯𑀸 𑀑𑀓𑀸𑀲’’𑀦𑁆𑀢𑀺. 𑀅𑀣 𑀔𑁄 𑀲𑀼𑀪𑀤𑁆𑀤𑁄 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺, 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀼𑀪𑀤𑁆𑀤𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑁂𑀫𑁂, 𑀪𑁄 𑀕𑁄𑀢𑀫, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀗𑁆𑀖𑀺𑀦𑁄 𑀕𑀡𑀺𑀦𑁄 𑀕𑀡𑀸𑀘𑀭𑀺𑀬𑀸 𑀜𑀸𑀢𑀸 𑀬𑀲𑀲𑁆𑀲𑀺𑀦𑁄 𑀢𑀺𑀢𑁆𑀣𑀓𑀭𑀸 𑀲𑀸𑀥𑀼𑀲𑀫𑁆𑀫𑀢𑀸 𑀩𑀳𑀼𑀚𑀦𑀲𑁆𑀲, 𑀲𑁂𑀬𑁆𑀬𑀣𑀺𑀤𑀁 ¶ 𑁋 𑀧𑀽𑀭𑀡𑁄 𑀓𑀲𑁆𑀲𑀧𑁄, 𑀫𑀓𑁆𑀔𑀮𑀺 𑀕𑁄𑀲𑀸𑀮𑁄, 𑀅𑀚𑀺𑀢𑁄 𑀓𑁂𑀲𑀓𑀫𑁆𑀩𑀮𑁄, 𑀧𑀓𑀼𑀥𑁄 𑀓𑀘𑁆𑀘𑀸𑀬𑀦𑁄, 𑀲𑀜𑁆𑀘𑀬𑁄 𑀩𑁂𑀮𑀝𑁆𑀞𑀧𑀼𑀢𑁆𑀢𑁄, 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄, 𑀲𑀩𑁆𑀩𑁂𑀢𑁂 𑀲𑀓𑀸𑀬 𑀧𑀝𑀺𑀜𑁆𑀜𑀸𑀬 𑀅𑀩𑁆𑀪𑀜𑁆𑀜𑀺𑀁𑀲𑀼, 𑀲𑀩𑁆𑀩𑁂𑀯 𑀦 𑀅𑀩𑁆𑀪𑀜𑁆𑀜𑀺𑀁𑀲𑀼 ¶ , 𑀉𑀤𑀸𑀳𑀼 𑀏𑀓𑀘𑁆𑀘𑁂 𑀅𑀩𑁆𑀪𑀜𑁆𑀜𑀺𑀁𑀲𑀼, 𑀏𑀓𑀘𑁆𑀘𑁂 𑀦 𑀅𑀩𑁆𑀪𑀜𑁆𑀜𑀺𑀁𑀲𑀽’’𑀢𑀺? ‘‘𑀅𑀮𑀁, 𑀲𑀼𑀪𑀤𑁆𑀤, 𑀢𑀺𑀝𑁆𑀞𑀢𑁂𑀢𑀁 𑁋 ‘𑀲𑀩𑁆𑀩𑁂𑀢𑁂 𑀲𑀓𑀸𑀬 𑀧𑀝𑀺𑀜𑁆𑀜𑀸𑀬 𑀅𑀩𑁆𑀪𑀜𑁆𑀜𑀺𑀁𑀲𑀼, 𑀲𑀩𑁆𑀩𑁂𑀯 𑀦 𑀅𑀩𑁆𑀪𑀜𑁆𑀜𑀺𑀁𑀲𑀼, 𑀉𑀤𑀸𑀳𑀼 𑀏𑀓𑀘𑁆𑀘𑁂 𑀅𑀩𑁆𑀪𑀜𑁆𑀜𑀺𑀁𑀲𑀼, 𑀏𑀓𑀘𑁆𑀘𑁂 𑀦 𑀅𑀩𑁆𑀪𑀜𑁆𑀜𑀺𑀁𑀲𑀽’𑀢𑀺. 𑀥𑀫𑁆𑀫𑀁 𑀢𑁂, 𑀲𑀼𑀪𑀤𑁆𑀤, 𑀤𑁂𑀲𑁂𑀲𑁆𑀲𑀸𑀫𑀺; 𑀢𑀁 𑀲𑀼𑀡𑀸𑀳𑀺 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀳𑀺, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀲𑀼𑀪𑀤𑁆𑀤𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀪𑀕𑀯𑀸 𑀏𑀢𑀤𑀯𑁄𑀘 𑁋

𑁨𑁧𑁪. ‘‘𑀬𑀲𑁆𑀫𑀺𑀁 𑀔𑁄, 𑀲𑀼𑀪𑀤𑁆𑀤, 𑀥𑀫𑁆𑀫𑀯𑀺𑀦𑀬𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀦 𑀉𑀧𑀮𑀩𑁆𑀪𑀢𑀺, 𑀲𑀫𑀡𑁄𑀧𑀺 𑀢𑀢𑁆𑀣 𑀦 𑀉𑀧𑀮𑀩𑁆𑀪𑀢𑀺. 𑀤𑀼𑀢𑀺𑀬𑁄𑀧𑀺 𑀢𑀢𑁆𑀣 𑀲𑀫𑀡𑁄 ¶ 𑀦 𑀉𑀧𑀮𑀩𑁆𑀪𑀢𑀺. 𑀢𑀢𑀺𑀬𑁄𑀧𑀺 𑀢𑀢𑁆𑀣 𑀲𑀫𑀡𑁄 𑀦 𑀉𑀧𑀮𑀩𑁆𑀪𑀢𑀺. 𑀘𑀢𑀼𑀢𑁆𑀣𑁄𑀧𑀺 𑀢𑀢𑁆𑀣 𑀲𑀫𑀡𑁄 𑀦 𑀉𑀧𑀮𑀩𑁆𑀪𑀢𑀺. 𑀬𑀲𑁆𑀫𑀺𑀜𑁆𑀘 𑀔𑁄, 𑀲𑀼𑀪𑀤𑁆𑀤, 𑀥𑀫𑁆𑀫𑀯𑀺𑀦𑀬𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀉𑀧𑀮𑀩𑁆𑀪𑀢𑀺, 𑀲𑀫𑀡𑁄𑀧𑀺 𑀢𑀢𑁆𑀣 𑀉𑀧𑀮𑀩𑁆𑀪𑀢𑀺, 𑀤𑀼𑀢𑀺𑀬𑁄𑀧𑀺 𑀢𑀢𑁆𑀣 𑀲𑀫𑀡𑁄 𑀉𑀧𑀮𑀩𑁆𑀪𑀢𑀺, 𑀢𑀢𑀺𑀬𑁄𑀧𑀺 𑀢𑀢𑁆𑀣 𑀲𑀫𑀡𑁄 𑀉𑀧𑀮𑀩𑁆𑀪𑀢𑀺, 𑀘𑀢𑀼𑀢𑁆𑀣𑁄𑀧𑀺 𑀢𑀢𑁆𑀣 𑀲𑀫𑀡𑁄 𑀉𑀧𑀮𑀩𑁆𑀪𑀢𑀺. 𑀇𑀫𑀲𑁆𑀫𑀺𑀁 𑀔𑁄, 𑀲𑀼𑀪𑀤𑁆𑀤, 𑀥𑀫𑁆𑀫𑀯𑀺𑀦𑀬𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀉𑀧𑀮𑀩𑁆𑀪𑀢𑀺, 𑀇𑀥𑁂𑀯, 𑀲𑀼𑀪𑀤𑁆𑀤, 𑀲𑀫𑀡𑁄, 𑀇𑀥 𑀤𑀼𑀢𑀺𑀬𑁄 𑀲𑀫𑀡𑁄, 𑀇𑀥 𑀢𑀢𑀺𑀬𑁄 𑀲𑀫𑀡𑁄, 𑀇𑀥 𑀘𑀢𑀼𑀢𑁆𑀣𑁄 𑀲𑀫𑀡𑁄, 𑀲𑀼𑀜𑁆𑀜𑀸 𑀧𑀭𑀧𑁆𑀧𑀯𑀸𑀤𑀸 𑀲𑀫𑀡𑁂𑀪𑀺 ¶ 𑀅𑀜𑁆𑀜𑁂𑀳𑀺 [𑀅𑀜𑁆𑀜𑁂 (𑀧𑀻.)]. 𑀇𑀫𑁂 ¶ 𑀘 [𑀇𑀥𑁂𑀯 (𑀓.)], 𑀲𑀼𑀪𑀤𑁆𑀤, 𑀪𑀺𑀓𑁆𑀔𑀽 𑀲𑀫𑁆𑀫𑀸 𑀯𑀺𑀳𑀭𑁂𑀬𑁆𑀬𑀼𑀁, 𑀅𑀲𑀼𑀜𑁆𑀜𑁄 𑀮𑁄𑀓𑁄 𑀅𑀭𑀳𑀦𑁆𑀢𑁂𑀳𑀺 𑀅𑀲𑁆𑀲𑀸𑀢𑀺.

‘‘𑀏𑀓𑀽𑀦𑀢𑀺𑀁𑀲𑁄 𑀯𑀬𑀲𑀸 𑀲𑀼𑀪𑀤𑁆𑀤,

𑀬𑀁 𑀧𑀩𑁆𑀩𑀚𑀺𑀁 𑀓𑀺𑀁𑀓𑀼𑀲𑀮𑀸𑀦𑀼𑀏𑀲𑀻;

𑀯𑀲𑁆𑀲𑀸𑀦𑀺 𑀧𑀜𑁆𑀜𑀸𑀲 𑀲𑀫𑀸𑀥𑀺𑀓𑀸𑀦𑀺,

𑀬𑀢𑁄 𑀅𑀳𑀁 𑀧𑀩𑁆𑀩𑀚𑀺𑀢𑁄 𑀲𑀼𑀪𑀤𑁆𑀤.

𑀜𑀸𑀬𑀲𑁆𑀲 𑀥𑀫𑁆𑀫𑀲𑁆𑀲 𑀧𑀤𑁂𑀲𑀯𑀢𑁆𑀢𑀻,

𑀇𑀢𑁄 𑀩𑀳𑀺𑀤𑁆𑀥𑀸 𑀲𑀫𑀡𑁄𑀧𑀺 𑀦𑀢𑁆𑀣𑀺.

‘‘𑀤𑀼𑀢𑀺𑀬𑁄𑀧𑀺 ¶ 𑀲𑀫𑀡𑁄 𑀦𑀢𑁆𑀣𑀺. 𑀢𑀢𑀺𑀬𑁄𑀧𑀺 𑀲𑀫𑀡𑁄 𑀦𑀢𑁆𑀣𑀺. 𑀘𑀢𑀼𑀢𑁆𑀣𑁄𑀧𑀺 𑀲𑀫𑀡𑁄 𑀦𑀢𑁆𑀣𑀺. 𑀲𑀼𑀜𑁆𑀜𑀸 𑀧𑀭𑀧𑁆𑀧𑀯𑀸𑀤𑀸 𑀲𑀫𑀡𑁂𑀪𑀺 𑀅𑀜𑁆𑀜𑁂𑀳𑀺. 𑀇𑀫𑁂 𑀘, 𑀲𑀼𑀪𑀤𑁆𑀤, 𑀪𑀺𑀓𑁆𑀔𑀽 𑀲𑀫𑁆𑀫𑀸 𑀯𑀺𑀳𑀭𑁂𑀬𑁆𑀬𑀼𑀁, 𑀅𑀲𑀼𑀜𑁆𑀜𑁄 𑀮𑁄𑀓𑁄 𑀅𑀭𑀳𑀦𑁆𑀢𑁂𑀳𑀺 𑀅𑀲𑁆𑀲𑀸’’𑀢𑀺.

𑁨𑁧𑁫. 𑀏𑀯𑀁 𑀯𑀼𑀢𑁆𑀢𑁂 𑀲𑀼𑀪𑀤𑁆𑀤𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬, ‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’𑀢𑀺, 𑀏𑀯𑀫𑁂𑀯𑀁 𑀪𑀕𑀯𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀮𑀪𑁂𑀬𑁆𑀬𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀮𑀪𑁂𑀬𑁆𑀬𑀁 𑀉𑀧𑀲𑀫𑁆𑀧𑀤’’𑀦𑁆𑀢𑀺. ‘‘𑀬𑁄 𑀔𑁄, 𑀲𑀼𑀪𑀤𑁆𑀤, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 ¶ 𑀆𑀓𑀗𑁆𑀔𑀢𑀺 𑀧𑀩𑁆𑀩𑀚𑁆𑀚𑀁, 𑀆𑀓𑀗𑁆𑀔𑀢𑀺 𑀉𑀧𑀲𑀫𑁆𑀧𑀤𑀁, 𑀲𑁄 𑀘𑀢𑁆𑀢𑀸𑀭𑁄 ¶ 𑀫𑀸𑀲𑁂 𑀧𑀭𑀺𑀯𑀲𑀢𑀺. 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀆𑀭𑀤𑁆𑀥𑀘𑀺𑀢𑁆𑀢𑀸 𑀪𑀺𑀓𑁆𑀔𑀽 𑀧𑀩𑁆𑀩𑀸𑀚𑁂𑀦𑁆𑀢𑀺 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺 𑀪𑀺𑀓𑁆𑀔𑀼𑀪𑀸𑀯𑀸𑀬. 𑀅𑀧𑀺 𑀘 𑀫𑁂𑀢𑁆𑀣 𑀧𑀼𑀕𑁆𑀕𑀮𑀯𑁂𑀫𑀢𑁆𑀢𑀢𑀸 𑀯𑀺𑀤𑀺𑀢𑀸’’𑀢𑀺. ‘‘𑀲𑀘𑁂, 𑀪𑀦𑁆𑀢𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀆𑀓𑀗𑁆𑀔𑀦𑁆𑀢𑀸 𑀧𑀩𑁆𑀩𑀚𑁆𑀚𑀁 𑀆𑀓𑀗𑁆𑀔𑀦𑁆𑀢𑀸 𑀉𑀧𑀲𑀫𑁆𑀧𑀤𑀁 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀭𑀺𑀯𑀲𑀦𑁆𑀢𑀺, 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀆𑀭𑀤𑁆𑀥𑀘𑀺𑀢𑁆𑀢𑀸 𑀪𑀺𑀓𑁆𑀔𑀽 𑀧𑀩𑁆𑀩𑀸𑀚𑁂𑀦𑁆𑀢𑀺 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺 𑀪𑀺𑀓𑁆𑀔𑀼𑀪𑀸𑀯𑀸𑀬. 𑀅𑀳𑀁 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺 𑀧𑀭𑀺𑀯𑀲𑀺𑀲𑁆𑀲𑀸𑀫𑀺, 𑀘𑀢𑀼𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀆𑀭𑀤𑁆𑀥𑀘𑀺𑀢𑁆𑀢𑀸 𑀪𑀺𑀓𑁆𑀔𑀽 𑀧𑀩𑁆𑀩𑀸𑀚𑁂𑀦𑁆𑀢𑀼 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀼 𑀪𑀺𑀓𑁆𑀔𑀼𑀪𑀸𑀯𑀸𑀬𑀸’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑁂𑀦𑀳𑀸𑀦𑀦𑁆𑀤, 𑀲𑀼𑀪𑀤𑁆𑀤𑀁 𑀧𑀩𑁆𑀩𑀸𑀚𑁂𑀳𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄 𑀲𑀼𑀪𑀤𑁆𑀤𑁄 ¶ 𑀧𑀭𑀺𑀩𑁆𑀩𑀸𑀚𑀓𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀮𑀸𑀪𑀸 𑀯𑁄, 𑀆𑀯𑀼𑀲𑁄 𑀆𑀦𑀦𑁆𑀤; 𑀲𑀼𑀮𑀤𑁆𑀥𑀁 𑀯𑁄, 𑀆𑀯𑀼𑀲𑁄 𑀆𑀦𑀦𑁆𑀤, 𑀬𑁂 𑀏𑀢𑁆𑀣 𑀲𑀢𑁆𑀣𑀼 [𑀲𑀢𑁆𑀣𑀸𑀭𑀸 (𑀲𑁆𑀬𑀸.)] 𑀲𑀫𑁆𑀫𑀼𑀔𑀸 𑀅𑀦𑁆𑀢𑁂𑀯𑀸𑀲𑀺𑀓𑀸𑀪𑀺𑀲𑁂𑀓𑁂𑀦 𑀅𑀪𑀺𑀲𑀺𑀢𑁆𑀢𑀸’’𑀢𑀺. 𑀅𑀮𑀢𑁆𑀣 ¶ 𑀔𑁄 𑀲𑀼𑀪𑀤𑁆𑀤𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀅𑀮𑀢𑁆𑀣 𑀉𑀧𑀲𑀫𑁆𑀧𑀤𑀁. 𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑁄 𑀔𑁄 𑀧𑀦𑀸𑀬𑀲𑁆𑀫𑀸 𑀲𑀼𑀪𑀤𑁆𑀤𑁄 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 𑀦𑀘𑀺𑀭𑀲𑁆𑀲𑁂𑀯 𑁋 ‘𑀬𑀲𑁆𑀲𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀤𑁂𑀯 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀦𑁆𑀢𑀺’ 𑀢𑀤𑀦𑀼𑀢𑁆𑀢𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. ‘𑀔𑀻𑀡𑀸 𑀚𑀸𑀢𑀺, 𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀓𑀢𑀁 𑀓𑀭𑀡𑀻𑀬𑀁, 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸’𑀢𑀺 ¶ 𑀅𑀩𑁆𑀪𑀜𑁆𑀜𑀸𑀲𑀺. 𑀅𑀜𑁆𑀜𑀢𑀭𑁄 𑀔𑁄 𑀧𑀦𑀸𑀬𑀲𑁆𑀫𑀸 𑀲𑀼𑀪𑀤𑁆𑀤𑁄 𑀅𑀭𑀳𑀢𑀁 𑀅𑀳𑁄𑀲𑀺. 𑀲𑁄 𑀪𑀕𑀯𑀢𑁄 𑀧𑀘𑁆𑀙𑀺𑀫𑁄 𑀲𑀓𑁆𑀔𑀺𑀲𑀸𑀯𑀓𑁄 𑀅𑀳𑁄𑀲𑀻𑀢𑀺.

𑀧𑀜𑁆𑀘𑀫𑁄 𑀪𑀸𑀡𑀯𑀸𑀭𑁄.

𑀢𑀣𑀸𑀕𑀢𑀧𑀘𑁆𑀙𑀺𑀫𑀯𑀸𑀘𑀸

𑁨𑁧𑁬. 𑀅𑀣 ¶ 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀺𑀬𑀸 𑀔𑁄 𑀧𑀦𑀸𑀦𑀦𑁆𑀤, 𑀢𑀼𑀫𑁆𑀳𑀸𑀓𑀁 𑀏𑀯𑀫𑀲𑁆𑀲 𑁋 ‘𑀅𑀢𑀻𑀢𑀲𑀢𑁆𑀣𑀼𑀓𑀁 𑀧𑀸𑀯𑀘𑀦𑀁, 𑀦𑀢𑁆𑀣𑀺 𑀦𑁄 𑀲𑀢𑁆𑀣𑀸’𑀢𑀺. 𑀦 𑀔𑁄 𑀧𑀦𑁂𑀢𑀁, 𑀆𑀦𑀦𑁆𑀤, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀬𑁄 𑀯𑁄, 𑀆𑀦𑀦𑁆𑀤, 𑀫𑀬𑀸 𑀥𑀫𑁆𑀫𑁄 𑀘 𑀯𑀺𑀦𑀬𑁄 ¶ 𑀘 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄, 𑀲𑁄 𑀯𑁄 𑀫𑀫𑀘𑁆𑀘𑀬𑁂𑀦 𑀲𑀢𑁆𑀣𑀸. 𑀬𑀣𑀸 𑀔𑁄 𑀧𑀦𑀸𑀦𑀦𑁆𑀤, 𑀏𑀢𑀭𑀳𑀺 𑀪𑀺𑀓𑁆𑀔𑀽 𑀅𑀜𑁆𑀜𑀫𑀜𑁆𑀜𑀁 𑀆𑀯𑀼𑀲𑁄𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀦 𑀔𑁄 𑀫𑀫𑀘𑁆𑀘𑀬𑁂𑀦 𑀏𑀯𑀁 𑀲𑀫𑀼𑀤𑀸𑀘𑀭𑀺𑀢𑀩𑁆𑀩𑀁. 𑀣𑁂𑀭𑀢𑀭𑁂𑀦, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑀸 𑀦𑀯𑀓𑀢𑀭𑁄 𑀪𑀺𑀓𑁆𑀔𑀼 𑀦𑀸𑀫𑁂𑀦 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀆𑀯𑀼𑀲𑁄𑀯𑀸𑀤𑁂𑀦 𑀯𑀸 𑀲𑀫𑀼𑀤𑀸𑀘𑀭𑀺𑀢𑀩𑁆𑀩𑁄. 𑀦𑀯𑀓𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀣𑁂𑀭𑀢𑀭𑁄 𑀪𑀺𑀓𑁆𑀔𑀼 ‘𑀪𑀦𑁆𑀢𑁂’𑀢𑀺 𑀯𑀸 ‘𑀆𑀬𑀲𑁆𑀫𑀸’𑀢𑀺 𑀯𑀸 𑀲𑀫𑀼𑀤𑀸𑀘𑀭𑀺𑀢𑀩𑁆𑀩𑁄. 𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀲𑀗𑁆𑀖𑁄 𑀫𑀫𑀘𑁆𑀘𑀬𑁂𑀦 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀽𑀳𑀦𑀢𑀼. 𑀙𑀦𑁆𑀦𑀲𑁆𑀲, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀫𑀫𑀘𑁆𑀘𑀬𑁂𑀦 𑀩𑁆𑀭𑀳𑁆𑀫𑀤𑀡𑁆𑀟𑁄 𑀤𑀸𑀢𑀩𑁆𑀩𑁄’’𑀢𑀺. ‘‘𑀓𑀢𑀫𑁄 𑀧𑀦, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀤𑀡𑁆𑀟𑁄’’𑀢𑀺? ‘‘𑀙𑀦𑁆𑀦𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀬𑀁 𑀇𑀘𑁆𑀙𑁂𑀬𑁆𑀬, 𑀢𑀁 𑀯𑀤𑁂𑀬𑁆𑀬. 𑀲𑁄 𑀪𑀺𑀓𑁆𑀔𑀽𑀳𑀺 𑀦𑁂𑀯 𑀯𑀢𑁆𑀢𑀩𑁆𑀩𑁄, 𑀦 𑀑𑀯𑀤𑀺𑀢𑀩𑁆𑀩𑁄, 𑀦 𑀅𑀦𑀼𑀲𑀸𑀲𑀺𑀢𑀩𑁆𑀩𑁄’’𑀢𑀺.

𑁨𑁧𑁭. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀺𑀬𑀸 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀪𑀺𑀓𑁆𑀔𑀼𑀲𑁆𑀲𑀸𑀧𑀺 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 𑀩𑀼𑀤𑁆𑀥𑁂 𑀯𑀸 𑀥𑀫𑁆𑀫𑁂 𑀯𑀸 𑀲𑀗𑁆𑀖𑁂 𑀯𑀸 𑀫𑀕𑁆𑀕𑁂 𑀯𑀸 𑀧𑀝𑀺𑀧𑀤𑀸𑀬 𑀯𑀸, 𑀧𑀼𑀘𑁆𑀙𑀣, 𑀪𑀺𑀓𑁆𑀔𑀯𑁂, 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 ¶ 𑀅𑀳𑀼𑀯𑀢𑁆𑀣 𑁋 ‘𑀲𑀫𑁆𑀫𑀼𑀔𑀻𑀪𑀽𑀢𑁄 𑀦𑁄 𑀲𑀢𑁆𑀣𑀸 𑀅𑀳𑁄𑀲𑀺 ¶ , 𑀦 𑀫𑀬𑀁 𑀲𑀓𑁆𑀔𑀺𑀫𑁆𑀳𑀸 𑀪𑀕𑀯𑀦𑁆𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀧𑀼𑀘𑁆𑀙𑀺𑀢𑀼’’’ 𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀢𑁂 𑀪𑀺𑀓𑁆𑀔𑀽 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀺𑀬𑀸 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀪𑀺𑀓𑁆𑀔𑀼𑀲𑁆𑀲𑀸𑀧𑀺 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 𑀩𑀼𑀤𑁆𑀥𑁂 𑀯𑀸 𑀥𑀫𑁆𑀫𑁂 𑀯𑀸 𑀲𑀗𑁆𑀖𑁂 𑀯𑀸 𑀫𑀕𑁆𑀕𑁂 𑀯𑀸 𑀧𑀝𑀺𑀧𑀤𑀸𑀬 𑀯𑀸, 𑀧𑀼𑀘𑁆𑀙𑀣, 𑀪𑀺𑀓𑁆𑀔𑀯𑁂, 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀅𑀳𑀼𑀯𑀢𑁆𑀣 𑁋 ‘𑀲𑀫𑁆𑀫𑀼𑀔𑀻𑀪𑀽𑀢𑁄 𑀦𑁄 𑀲𑀢𑁆𑀣𑀸 𑀅𑀳𑁄𑀲𑀺 ¶ , 𑀦 𑀫𑀬𑀁 𑀲𑀓𑁆𑀔𑀺𑀫𑁆𑀳𑀸 𑀪𑀕𑀯𑀦𑁆𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀧𑀼𑀘𑁆𑀙𑀺𑀢𑀼’’’ 𑀦𑁆𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀺𑀬𑀸 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀼𑀕𑀸𑀭𑀯𑁂𑀦𑀧𑀺 𑀦 𑀧𑀼𑀘𑁆𑀙𑁂𑀬𑁆𑀬𑀸𑀣. 𑀲𑀳𑀸𑀬𑀓𑁄𑀧𑀺, 𑀪𑀺𑀓𑁆𑀔𑀯𑁂, 𑀲𑀳𑀸𑀬𑀓𑀲𑁆𑀲 𑀆𑀭𑁄𑀘𑁂𑀢𑀽’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀢𑁂 𑀪𑀺𑀓𑁆𑀔𑀽 𑀢𑀼𑀡𑁆𑀳𑀻 𑀅𑀳𑁂𑀲𑀼𑀁. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂, 𑀏𑀯𑀁 𑀧𑀲𑀦𑁆𑀦𑁄 𑀅𑀳𑀁, 𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂, ‘𑀦𑀢𑁆𑀣𑀺 𑀏𑀓𑀪𑀺𑀓𑁆𑀔𑀼𑀲𑁆𑀲𑀸𑀧𑀺 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 𑀩𑀼𑀤𑁆𑀥𑁂 𑀯𑀸 𑀥𑀫𑁆𑀫𑁂 𑀯𑀸 𑀲𑀗𑁆𑀖𑁂 𑀯𑀸 𑀫𑀕𑁆𑀕𑁂 𑀯𑀸 𑀧𑀝𑀺𑀧𑀤𑀸𑀬 𑀯𑀸’’’𑀢𑀺. ‘‘𑀧𑀲𑀸𑀤𑀸 𑀔𑁄 𑀢𑁆𑀯𑀁, 𑀆𑀦𑀦𑁆𑀤, 𑀯𑀤𑁂𑀲𑀺, 𑀜𑀸𑀡𑀫𑁂𑀯 𑀳𑁂𑀢𑁆𑀣, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲. 𑀦𑀢𑁆𑀣𑀺 𑀇𑀫𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀏𑀓𑀪𑀺𑀓𑁆𑀔𑀼𑀲𑁆𑀲𑀸𑀧𑀺 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 𑀩𑀼𑀤𑁆𑀥𑁂 𑀯𑀸 𑀥𑀫𑁆𑀫𑁂 𑀯𑀸 𑀲𑀗𑁆𑀖𑁂 𑀯𑀸 𑀫𑀕𑁆𑀕𑁂 𑀯𑀸 𑀧𑀝𑀺𑀧𑀤𑀸𑀬 𑀯𑀸. 𑀇𑀫𑁂𑀲𑀜𑁆𑀳𑀺, 𑀆𑀦𑀦𑁆𑀤, 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀬𑁄 𑀧𑀘𑁆𑀙𑀺𑀫𑀓𑁄 𑀪𑀺𑀓𑁆𑀔𑀼, 𑀲𑁄 𑀲𑁄𑀢𑀸𑀧𑀦𑁆𑀦𑁄 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’’𑀢𑀺.

𑁨𑁧𑁮. 𑀅𑀣 ¶ ¶ 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀳𑀦𑁆𑀤 ¶ 𑀤𑀸𑀦𑀺, 𑀪𑀺𑀓𑁆𑀔𑀯𑁂, 𑀆𑀫𑀦𑁆𑀢𑀬𑀸𑀫𑀺 𑀯𑁄, 𑀯𑀬𑀥𑀫𑁆𑀫𑀸 𑀲𑀗𑁆𑀔𑀸𑀭𑀸 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣𑀸’’𑀢𑀺. 𑀅𑀬𑀁 𑀢𑀣𑀸𑀕𑀢𑀲𑁆𑀲 𑀧𑀘𑁆𑀙𑀺𑀫𑀸 𑀯𑀸𑀘𑀸.

𑀧𑀭𑀺𑀦𑀺𑀩𑁆𑀩𑀼𑀢𑀓𑀣𑀸

𑁨𑁧𑁯. 𑀅𑀣 𑀔𑁄 𑀪𑀕𑀯𑀸 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺, 𑀧𑀞𑀫𑀚𑁆𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺, 𑀤𑀼𑀢𑀺𑀬𑀚𑁆𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀢𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺, 𑀢𑀢𑀺𑀬𑀚𑁆𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀘𑀢𑀼𑀢𑁆𑀣𑀚𑁆𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀏𑀢𑀤𑀯𑁄𑀘 𑁋 ‘‘𑀧𑀭𑀺𑀦𑀺𑀩𑁆𑀩𑀼𑀢𑁄, 𑀪𑀦𑁆𑀢𑁂 𑀅𑀦𑀼𑀭𑀼𑀤𑁆𑀥 ¶ , 𑀪𑀕𑀯𑀸’’𑀢𑀺. ‘‘𑀦𑀸𑀯𑀼𑀲𑁄 𑀆𑀦𑀦𑁆𑀤, 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺, 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺, 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀸𑀧𑀚𑁆𑀚𑀺, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀘𑀢𑀼𑀢𑁆𑀣𑀁 𑀛𑀸𑀦𑀁 ¶ 𑀲𑀫𑀸𑀧𑀚𑁆𑀚𑀺, 𑀘𑀢𑀼𑀢𑁆𑀣𑀚𑁆𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀢𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺, 𑀢𑀢𑀺𑀬𑀚𑁆𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺, 𑀤𑀼𑀢𑀺𑀬𑀚𑁆𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺, 𑀧𑀞𑀫𑀚𑁆𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀤𑀼𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺, 𑀤𑀼𑀢𑀺𑀬𑀚𑁆𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀢𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺, 𑀢𑀢𑀺𑀬𑀚𑁆𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺, 𑀘𑀢𑀼𑀢𑁆𑀣𑀚𑁆𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀲𑀫𑀦𑀦𑁆𑀢𑀭𑀸 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑁨𑁨𑁦. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀲𑀳 𑀧𑀭𑀺𑀦𑀺𑀩𑁆𑀩𑀸𑀦𑀸 𑀫𑀳𑀸𑀪𑀽𑀫𑀺𑀘𑀸𑀮𑁄 𑀅𑀳𑁄𑀲𑀺 𑀪𑀺𑀁𑀲𑀦𑀓𑁄 𑀲𑀮𑁄𑀫𑀳𑀁𑀲𑁄. 𑀤𑁂𑀯𑀤𑀼𑀦𑁆𑀤𑀼𑀪𑀺𑀬𑁄 𑀘 𑀨𑀮𑀺𑀁𑀲𑀼. 𑀧𑀭𑀺𑀦𑀺𑀩𑁆𑀩𑀼𑀢𑁂 ¶ 𑀪𑀕𑀯𑀢𑀺 𑀲𑀳 𑀧𑀭𑀺𑀦𑀺𑀩𑁆𑀩𑀸𑀦𑀸 𑀩𑁆𑀭𑀳𑁆𑀫𑀸𑀲𑀳𑀫𑁆𑀧𑀢𑀺 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀲𑀩𑁆𑀩𑁂𑀯 ¶ 𑀦𑀺𑀓𑁆𑀔𑀺𑀧𑀺𑀲𑁆𑀲𑀦𑁆𑀢𑀺, 𑀪𑀽𑀢𑀸 𑀮𑁄𑀓𑁂 𑀲𑀫𑀼𑀲𑁆𑀲𑀬𑀁;

𑀬𑀢𑁆𑀣 𑀏𑀢𑀸𑀤𑀺𑀲𑁄 𑀲𑀢𑁆𑀣𑀸, 𑀮𑁄𑀓𑁂 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄;

𑀢𑀣𑀸𑀕𑀢𑁄 𑀩𑀮𑀧𑁆𑀧𑀢𑁆𑀢𑁄, 𑀲𑀫𑁆𑀩𑀼𑀤𑁆𑀥𑁄 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺.

𑁨𑁨𑁧. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀲𑀳 𑀧𑀭𑀺𑀦𑀺𑀩𑁆𑀩𑀸𑀦𑀸 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸, 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄’’𑀢𑀺.

𑁨𑁨𑁨. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀲𑀳 𑀧𑀭𑀺𑀦𑀺𑀩𑁆𑀩𑀸𑀦𑀸 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀇𑀫𑀸 𑀕𑀸𑀣𑀸𑀬𑁄 𑀅𑀪𑀸𑀲𑀺 𑁋

‘‘𑀦𑀸𑀳𑀼 ¶ ¶ 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁄, 𑀞𑀺𑀢𑀘𑀺𑀢𑁆𑀢𑀲𑁆𑀲 𑀢𑀸𑀤𑀺𑀦𑁄;

𑀅𑀦𑁂𑀚𑁄 𑀲𑀦𑁆𑀢𑀺𑀫𑀸𑀭𑀩𑁆𑀪, 𑀬𑀁 𑀓𑀸𑀮𑀫𑀓𑀭𑀻 𑀫𑀼𑀦𑀺.

‘‘𑀅𑀲𑀮𑁆𑀮𑀻𑀦𑁂𑀦 𑀘𑀺𑀢𑁆𑀢𑁂𑀦, 𑀯𑁂𑀤𑀦𑀁 𑀅𑀚𑁆𑀛𑀯𑀸𑀲𑀬𑀺;

𑀧𑀚𑁆𑀚𑁄𑀢𑀲𑁆𑀲𑁂𑀯 𑀦𑀺𑀩𑁆𑀩𑀸𑀦𑀁, 𑀯𑀺𑀫𑁄𑀓𑁆𑀔𑁄 𑀘𑁂𑀢𑀲𑁄 𑀅𑀳𑀽’’𑀢𑀺.

𑁨𑁨𑁩. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀲𑀳 𑀧𑀭𑀺𑀦𑀺𑀩𑁆𑀩𑀸𑀦𑀸 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀢𑀤𑀸𑀲𑀺 𑀬𑀁 𑀪𑀺𑀁𑀲𑀦𑀓𑀁, 𑀢𑀤𑀸𑀲𑀺 𑀮𑁄𑀫𑀳𑀁𑀲𑀦𑀁;

𑀲𑀩𑁆𑀩𑀸𑀓𑀸𑀭𑀯𑀭𑀽𑀧𑁂𑀢𑁂, 𑀲𑀫𑁆𑀩𑀼𑀤𑁆𑀥𑁂 𑀧𑀭𑀺𑀦𑀺𑀩𑁆𑀩𑀼𑀢𑁂’’𑀢𑀺.

𑁨𑁨𑁪. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀬𑁂 𑀢𑁂 𑀢𑀢𑁆𑀣 𑀪𑀺𑀓𑁆𑀔𑀽 𑀅𑀯𑀻𑀢𑀭𑀸𑀕𑀸 𑀅𑀧𑁆𑀧𑁂𑀓𑀘𑁆𑀘𑁂 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑀺, 𑀙𑀺𑀦𑁆𑀦𑀧𑀸𑀢𑀁 𑀧𑀧𑀢𑀦𑁆𑀢𑀺, 𑀆𑀯𑀝𑁆𑀝𑀦𑁆𑀢𑀺 𑀯𑀺𑀯𑀝𑁆𑀝𑀦𑁆𑀢𑀺, ‘‘𑀅𑀢𑀺𑀔𑀺𑀧𑁆𑀧𑀁 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄 ¶ , 𑀅𑀢𑀺𑀔𑀺𑀧𑁆𑀧𑀁 𑀲𑀼𑀕𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀢𑀺𑀔𑀺𑀧𑁆𑀧𑀁 𑀘𑀓𑁆𑀔𑀼𑀁 𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁄’’𑀢𑀺. 𑀬𑁂 𑀧𑀦 𑀢𑁂 𑀪𑀺𑀓𑁆𑀔𑀽 𑀯𑀻𑀢𑀭𑀸𑀕𑀸, 𑀢𑁂 𑀲𑀢𑀸 𑀲𑀫𑁆𑀧𑀚𑀸𑀦𑀸 𑀅𑀥𑀺𑀯𑀸𑀲𑁂𑀦𑁆𑀢𑀺 𑁋 ‘‘𑀅𑀦𑀺𑀘𑁆𑀘𑀸 𑀲𑀗𑁆𑀔𑀸𑀭𑀸, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸’’𑀢𑀺.

𑁨𑁨𑁫. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀮𑀁, 𑀆𑀯𑀼𑀲𑁄, 𑀫𑀸 𑀲𑁄𑀘𑀺𑀢𑁆𑀣 𑀫𑀸 𑀧𑀭𑀺𑀤𑁂𑀯𑀺𑀢𑁆𑀣. 𑀦𑀦𑀼 𑀏𑀢𑀁, 𑀆𑀯𑀼𑀲𑁄, 𑀪𑀕𑀯𑀢𑀸 𑀧𑀝𑀺𑀓𑀘𑁆𑀘𑁂𑀯 𑀅𑀓𑁆𑀔𑀸𑀢𑀁 𑁋 ‘𑀲𑀩𑁆𑀩𑁂𑀳𑁂𑀯 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄 𑀅𑀜𑁆𑀜𑀣𑀸𑀪𑀸𑀯𑁄’. 𑀢𑀁 𑀓𑀼𑀢𑁂𑀢𑁆𑀣, 𑀆𑀯𑀼𑀲𑁄, 𑀮𑀩𑁆𑀪𑀸. ‘𑀬𑀁 𑀢𑀁 𑀚𑀸𑀢𑀁 𑀪𑀽𑀢𑀁 𑀲𑀗𑁆𑀔𑀢𑀁 𑀧𑀮𑁄𑀓𑀥𑀫𑁆𑀫𑀁, 𑀢𑀁 𑀯𑀢 𑀫𑀸 𑀧𑀮𑀼𑀚𑁆𑀚𑀻’𑀢𑀺, 𑀦𑁂𑀢𑀁 𑀞𑀸𑀦𑀁 ¶ 𑀯𑀺𑀚𑁆𑀚𑀢𑀺 ¶ . 𑀤𑁂𑀯𑀢𑀸, 𑀆𑀯𑀼𑀲𑁄, 𑀉𑀚𑁆𑀛𑀸𑀬𑀦𑁆𑀢𑀻’’𑀢𑀺. ‘‘𑀓𑀣𑀁𑀪𑀽𑀢𑀸 𑀧𑀦, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀤𑁂𑀯𑀢𑀸 𑀫𑀦𑀲𑀺 𑀓𑀭𑁄𑀢𑀻’’𑀢𑀺 [𑀪𑀦𑁆𑀢𑁂 𑀅𑀦𑀼𑀭𑀼𑀤𑁆𑀥 𑀤𑁂𑀯𑀢𑀸 𑀫𑀦𑀲𑀺 𑀓𑀭𑁄𑀦𑁆𑀢𑀻𑀢𑀺 (𑀲𑁆𑀬𑀸. 𑀓.)]?

‘‘𑀲𑀦𑁆𑀢𑀸𑀯𑀼𑀲𑁄 𑀆𑀦𑀦𑁆𑀤, 𑀤𑁂𑀯𑀢𑀸 𑀆𑀓𑀸𑀲𑁂 𑀧𑀣𑀯𑀻𑀲𑀜𑁆𑀜𑀺𑀦𑀺𑀬𑁄 𑀓𑁂𑀲𑁂 𑀧𑀓𑀺𑀭𑀺𑀬 𑀓𑀦𑁆𑀤𑀦𑁆𑀢𑀺, 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑀺, 𑀙𑀺𑀦𑁆𑀦𑀧𑀸𑀢𑀁 𑀧𑀧𑀢𑀦𑁆𑀢𑀺, 𑀆𑀯𑀝𑁆𑀝𑀦𑁆𑀢𑀺, 𑀯𑀺𑀯𑀝𑁆𑀝𑀦𑁆𑀢𑀺 𑁋 ‘𑀅𑀢𑀺𑀔𑀺𑀧𑁆𑀧𑀁 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀢𑀺𑀔𑀺𑀧𑁆𑀧𑀁 𑀲𑀼𑀕𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀢𑀺𑀔𑀺𑀧𑁆𑀧𑀁 𑀘𑀓𑁆𑀔𑀼𑀁 𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁄’𑀢𑀺. 𑀲𑀦𑁆𑀢𑀸𑀯𑀼𑀲𑁄 𑀆𑀦𑀦𑁆𑀤, 𑀤𑁂𑀯𑀢𑀸 𑀧𑀣𑀯𑀺𑀬𑀸 𑀧𑀣𑀯𑀻𑀲𑀜𑁆𑀜𑀺𑀦𑀺𑀬𑁄 𑀓𑁂𑀲𑁂 𑀧𑀓𑀺𑀭𑀺𑀬 𑀓𑀦𑁆𑀤𑀦𑁆𑀢𑀺, 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑀺, 𑀙𑀺𑀦𑁆𑀦𑀧𑀸𑀢𑀁 𑀧𑀧𑀢𑀦𑁆𑀢𑀺, 𑀆𑀯𑀝𑁆𑀝𑀦𑁆𑀢𑀺, 𑀯𑀺𑀯𑀝𑁆𑀝𑀦𑁆𑀢𑀺 𑁋 ‘𑀅𑀢𑀺𑀔𑀺𑀧𑁆𑀧𑀁 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄 ¶ , 𑀅𑀢𑀺𑀔𑀺𑀧𑁆𑀧𑀁 𑀲𑀼𑀕𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀢𑀺𑀔𑀺𑀧𑁆𑀧𑀁 𑀘𑀓𑁆𑀔𑀼𑀁 𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁄’𑀢𑀺. 𑀬𑀸 𑀧𑀦 𑀢𑀸 𑀤𑁂𑀯𑀢𑀸 𑀯𑀻𑀢𑀭𑀸𑀕𑀸, 𑀢𑀸 𑀲𑀢𑀸 𑀲𑀫𑁆𑀧𑀚𑀸𑀦𑀸 𑀅𑀥𑀺𑀯𑀸𑀲𑁂𑀦𑁆𑀢𑀺 𑁋 ‘𑀅𑀦𑀺𑀘𑁆𑀘𑀸 𑀲𑀗𑁆𑀔𑀸𑀭𑀸, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀘 𑀅𑀦𑀼𑀭𑀼𑀤𑁆𑀥𑁄 𑀆𑀬𑀲𑁆𑀫𑀸 𑀘 𑀆𑀦𑀦𑁆𑀤𑁄 𑀢𑀁 𑀭𑀢𑁆𑀢𑀸𑀯𑀲𑁂𑀲𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀯𑀻𑀢𑀺𑀦𑀸𑀫𑁂𑀲𑀼𑀁.

𑁨𑁨𑁬. 𑀅𑀣 𑀔𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀕𑀘𑁆𑀙𑀸𑀯𑀼𑀲𑁄 𑀆𑀦𑀦𑁆𑀤, 𑀓𑀼𑀲𑀺𑀦𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀓𑁄𑀲𑀺𑀦𑀸𑀭𑀓𑀸𑀦𑀁 𑀫𑀮𑁆𑀮𑀸𑀦𑀁 𑀆𑀭𑁄𑀘𑁂𑀳𑀺 𑁋 ‘𑀧𑀭𑀺𑀦𑀺𑀩𑁆𑀩𑀼𑀢𑁄, 𑀯𑀸𑀲𑁂𑀝𑁆𑀞𑀸, 𑀪𑀕𑀯𑀸, 𑀬𑀲𑁆𑀲𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀣𑀸’’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀆𑀬𑀲𑁆𑀫𑀢𑁄 𑀅𑀦𑀼𑀭𑀼𑀤𑁆𑀥𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀢𑁆𑀢𑀤𑀼𑀢𑀺𑀬𑁄 𑀓𑀼𑀲𑀺𑀦𑀸𑀭𑀁 𑀧𑀸𑀯𑀺𑀲𑀺. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀓𑁄𑀲𑀺𑀦𑀸𑀭𑀓𑀸 𑀫𑀮𑁆𑀮𑀸 𑀲𑀦𑁆𑀥𑀸𑀕𑀸𑀭𑁂 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺 𑀢𑁂𑀦𑁂𑀯 𑀓𑀭𑀡𑀻𑀬𑁂𑀦. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀓𑁄𑀲𑀺𑀦𑀸𑀭𑀓𑀸𑀦𑀁 𑀫𑀮𑁆𑀮𑀸𑀦𑀁 𑀲𑀦𑁆𑀥𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ¶ 𑀓𑁄𑀲𑀺𑀦𑀸𑀭𑀓𑀸𑀦𑀁 𑀫𑀮𑁆𑀮𑀸𑀦𑀁 𑀆𑀭𑁄𑀘𑁂𑀲𑀺 𑁋 ‘𑀧𑀭𑀺𑀦𑀺𑀩𑁆𑀩𑀼𑀢𑁄, 𑀯𑀸𑀲𑁂𑀝𑁆𑀞𑀸, 𑀪𑀕𑀯𑀸, 𑀬𑀲𑁆𑀲𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀣𑀸’𑀢𑀺. 𑀇𑀤𑀫𑀸𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀫𑀮𑁆𑀮𑀸 𑀘 𑀫𑀮𑁆𑀮𑀧𑀼𑀢𑁆𑀢𑀸 𑀘 𑀫𑀮𑁆𑀮𑀲𑀼𑀡𑀺𑀲𑀸 𑀘 𑀫𑀮𑁆𑀮𑀧𑀚𑀸𑀧𑀢𑀺𑀬𑁄 𑀘 𑀅𑀖𑀸𑀯𑀺𑀦𑁄 𑀤𑀼𑀫𑁆𑀫𑀦𑀸 𑀘𑁂𑀢𑁄𑀤𑀼𑀓𑁆𑀔𑀲𑀫𑀧𑁆𑀧𑀺𑀢𑀸 𑀅𑀧𑁆𑀧𑁂𑀓𑀘𑁆𑀘𑁂 𑀓𑁂𑀲𑁂 𑀧𑀓𑀺𑀭𑀺𑀬 𑀓𑀦𑁆𑀤𑀦𑁆𑀢𑀺, 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑀺, 𑀙𑀺𑀦𑁆𑀦𑀧𑀸𑀢𑀁 𑀧𑀧𑀢𑀦𑁆𑀢𑀺, 𑀆𑀯𑀝𑁆𑀝𑀦𑁆𑀢𑀺, 𑀯𑀺𑀯𑀝𑁆𑀝𑀦𑁆𑀢𑀺 𑁋 ‘‘𑀅𑀢𑀺𑀔𑀺𑀧𑁆𑀧𑀁 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀢𑀺𑀔𑀺𑀧𑁆𑀧𑀁 𑀲𑀼𑀕𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀢𑀺𑀔𑀺𑀧𑁆𑀧𑀁 𑀘𑀓𑁆𑀔𑀼𑀁 𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁄’’𑀢𑀺.

𑀩𑀼𑀤𑁆𑀥𑀲𑀭𑀻𑀭𑀧𑀽𑀚𑀸

𑁨𑁨𑁭. 𑀅𑀣 ¶ 𑀔𑁄 𑀓𑁄𑀲𑀺𑀦𑀸𑀭𑀓𑀸 𑀫𑀮𑁆𑀮𑀸 𑀧𑀼𑀭𑀺𑀲𑁂 𑀆𑀡𑀸𑀧𑁂𑀲𑀼𑀁 𑁋 ‘‘𑀢𑁂𑀦 𑀳𑀺, 𑀪𑀡𑁂, 𑀓𑀼𑀲𑀺𑀦𑀸𑀭𑀸𑀬𑀁 𑀕𑀦𑁆𑀥𑀫𑀸𑀮𑀜𑁆𑀘 𑀲𑀩𑁆𑀩𑀜𑁆𑀘 𑀢𑀸𑀴𑀸𑀯𑀘𑀭𑀁 𑀲𑀦𑁆𑀦𑀺𑀧𑀸𑀢𑁂𑀣𑀸’’𑀢𑀺. 𑀅𑀣 𑀔𑁄 𑀓𑁄𑀲𑀺𑀦𑀸𑀭𑀓𑀸 𑀫𑀮𑁆𑀮𑀸 𑀕𑀦𑁆𑀥𑀫𑀸𑀮𑀜𑁆𑀘 𑀲𑀩𑁆𑀩𑀜𑁆𑀘 𑀢𑀸𑀴𑀸𑀯𑀘𑀭𑀁 𑀧𑀜𑁆𑀘 𑀘 𑀤𑀼𑀲𑁆𑀲𑀬𑀼𑀕𑀲𑀢𑀸𑀦𑀺 𑀆𑀤𑀸𑀬 𑀬𑁂𑀦 𑀉𑀧𑀯𑀢𑁆𑀢𑀦𑀁 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑀁, 𑀬𑁂𑀦 𑀪𑀕𑀯𑀢𑁄 𑀲𑀭𑀻𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀲𑀭𑀻𑀭𑀁 𑀦𑀘𑁆𑀘𑁂𑀳𑀺 𑀕𑀻𑀢𑁂𑀳𑀺 𑀯𑀸𑀤𑀺𑀢𑁂𑀳𑀺 𑀫𑀸𑀮𑁂𑀳𑀺 𑀕𑀦𑁆𑀥𑁂𑀳𑀺 𑀲𑀓𑁆𑀓𑀭𑁄𑀦𑁆𑀢𑀸 𑀕𑀭𑀼𑀁 𑀓𑀭𑁄𑀦𑁆𑀢𑀸 𑀫𑀸𑀦𑁂𑀦𑁆𑀢𑀸 𑀧𑀽𑀚𑁂𑀦𑁆𑀢𑀸 𑀘𑁂𑀮𑀯𑀺𑀢𑀸𑀦𑀸𑀦𑀺 𑀓𑀭𑁄𑀦𑁆𑀢𑀸 𑀫𑀡𑁆𑀟𑀮𑀫𑀸𑀴𑁂 𑀧𑀝𑀺𑀬𑀸𑀤𑁂𑀦𑁆𑀢𑀸 𑀏𑀓𑀤𑀺𑀯𑀲𑀁 𑀯𑀻𑀢𑀺𑀦𑀸𑀫𑁂𑀲𑀼𑀁.

𑀅𑀣 𑀔𑁄 𑀓𑁄𑀲𑀺𑀦𑀸𑀭𑀓𑀸𑀦𑀁 𑀫𑀮𑁆𑀮𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀢𑀺𑀯𑀺𑀓𑀸𑀮𑁄 𑀔𑁄 𑀅𑀚𑁆𑀚 𑀪𑀕𑀯𑀢𑁄 𑀲𑀭𑀻𑀭𑀁 𑀛𑀸𑀧𑁂𑀢𑀼𑀁, 𑀲𑁆𑀯𑁂 𑀤𑀸𑀦𑀺 𑀫𑀬𑀁 𑀪𑀕𑀯𑀢𑁄 𑀲𑀭𑀻𑀭𑀁 𑀛𑀸𑀧𑁂𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄 𑀓𑁄𑀲𑀺𑀦𑀸𑀭𑀓𑀸 𑀫𑀮𑁆𑀮𑀸 𑀪𑀕𑀯𑀢𑁄 𑀲𑀭𑀻𑀭𑀁 𑀦𑀘𑁆𑀘𑁂𑀳𑀺 𑀕𑀻𑀢𑁂𑀳𑀺 𑀯𑀸𑀤𑀺𑀢𑁂𑀳𑀺 𑀫𑀸𑀮𑁂𑀳𑀺 𑀕𑀦𑁆𑀥𑁂𑀳𑀺 𑀲𑀓𑁆𑀓𑀭𑁄𑀦𑁆𑀢𑀸 𑀕𑀭𑀼𑀁 𑀓𑀭𑁄𑀦𑁆𑀢𑀸 𑀫𑀸𑀦𑁂𑀦𑁆𑀢𑀸 ¶ 𑀧𑀽𑀚𑁂𑀦𑁆𑀢𑀸 𑀘𑁂𑀮𑀯𑀺𑀢𑀸𑀦𑀸𑀦𑀺 𑀓𑀭𑁄𑀦𑁆𑀢𑀸 𑀫𑀡𑁆𑀟𑀮𑀫𑀸𑀴𑁂 𑀧𑀝𑀺𑀬𑀸𑀤𑁂𑀦𑁆𑀢𑀸 𑀤𑀼𑀢𑀺𑀬𑀫𑁆𑀧𑀺 𑀤𑀺𑀯𑀲𑀁 𑀯𑀻𑀢𑀺𑀦𑀸𑀫𑁂𑀲𑀼𑀁, 𑀢𑀢𑀺𑀬𑀫𑁆𑀧𑀺 ¶ 𑀤𑀺𑀯𑀲𑀁 𑀯𑀻𑀢𑀺𑀦𑀸𑀫𑁂𑀲𑀼𑀁, 𑀘𑀢𑀼𑀢𑁆𑀣𑀫𑁆𑀧𑀺 𑀤𑀺𑀯𑀲𑀁 𑀯𑀻𑀢𑀺𑀦𑀸𑀫𑁂𑀲𑀼𑀁, 𑀧𑀜𑁆𑀘𑀫𑀫𑁆𑀧𑀺 𑀤𑀺𑀯𑀲𑀁 𑀯𑀻𑀢𑀺𑀦𑀸𑀫𑁂𑀲𑀼𑀁, 𑀙𑀝𑁆𑀞𑀫𑁆𑀧𑀺 𑀤𑀺𑀯𑀲𑀁 𑀯𑀻𑀢𑀺𑀦𑀸𑀫𑁂𑀲𑀼𑀁.

𑀅𑀣 𑀔𑁄 𑀲𑀢𑁆𑀢𑀫𑀁 𑀤𑀺𑀯𑀲𑀁 𑀓𑁄𑀲𑀺𑀦𑀸𑀭𑀓𑀸𑀦𑀁 𑀫𑀮𑁆𑀮𑀸𑀦𑀁 ¶ 𑀏𑀢𑀤𑀳𑁄𑀲𑀺 𑁋 ‘‘𑀫𑀬𑀁 𑀪𑀕𑀯𑀢𑁄 𑀲𑀭𑀻𑀭𑀁 𑀦𑀘𑁆𑀘𑁂𑀳𑀺 𑀕𑀻𑀢𑁂𑀳𑀺 𑀯𑀸𑀤𑀺𑀢𑁂𑀳𑀺 𑀫𑀸𑀮𑁂𑀳𑀺 𑀕𑀦𑁆𑀥𑁂𑀳𑀺 𑀲𑀓𑁆𑀓𑀭𑁄𑀦𑁆𑀢𑀸 𑀕𑀭𑀼𑀁 𑀓𑀭𑁄𑀦𑁆𑀢𑀸 𑀫𑀸𑀦𑁂𑀦𑁆𑀢𑀸 𑀧𑀽𑀚𑁂𑀦𑁆𑀢𑀸 𑀤𑀓𑁆𑀔𑀺𑀡𑁂𑀦 𑀤𑀓𑁆𑀔𑀺𑀡𑀁 𑀦𑀕𑀭𑀲𑁆𑀲 𑀳𑀭𑀺𑀢𑁆𑀯𑀸 𑀩𑀸𑀳𑀺𑀭𑁂𑀦 𑀩𑀸𑀳𑀺𑀭𑀁 𑀤𑀓𑁆𑀔𑀺𑀡𑀢𑁄 𑀦𑀕𑀭𑀲𑁆𑀲 𑀪𑀕𑀯𑀢𑁄 𑀲𑀭𑀻𑀭𑀁 𑀛𑀸𑀧𑁂𑀲𑁆𑀲𑀸𑀫𑀸’’𑀢𑀺.

𑁨𑁨𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀝𑁆𑀞 𑀫𑀮𑁆𑀮𑀧𑀸𑀫𑁄𑀓𑁆𑀔𑀸 𑀲𑀻𑀲𑀁𑀦𑁆𑀳𑀸𑀢𑀸 𑀅𑀳𑀢𑀸𑀦𑀺 𑀯𑀢𑁆𑀣𑀸𑀦𑀺 𑀦𑀺𑀯𑀢𑁆𑀣𑀸 ‘‘𑀫𑀬𑀁 𑀪𑀕𑀯𑀢𑁄 𑀲𑀭𑀻𑀭𑀁 𑀉𑀘𑁆𑀘𑀸𑀭𑁂𑀲𑁆𑀲𑀸𑀫𑀸’’𑀢𑀺 𑀦 𑀲𑀓𑁆𑀓𑁄𑀦𑁆𑀢𑀺 𑀉𑀘𑁆𑀘𑀸𑀭𑁂𑀢𑀼𑀁. 𑀅𑀣 𑀔𑁄 𑀓𑁄𑀲𑀺𑀦𑀸𑀭𑀓𑀸 𑀫𑀮𑁆𑀮𑀸 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂 𑀅𑀦𑀼𑀭𑀼𑀤𑁆𑀥, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦𑀺𑀫𑁂 𑀅𑀝𑁆𑀞 𑀫𑀮𑁆𑀮𑀧𑀸𑀫𑁄𑀓𑁆𑀔𑀸 𑀲𑀻𑀲𑀁𑀦𑁆𑀳𑀸𑀢𑀸 𑀅𑀳𑀢𑀸𑀦𑀺 𑀯𑀢𑁆𑀣𑀸𑀦𑀺 𑀦𑀺𑀯𑀢𑁆𑀣𑀸 ‘𑀫𑀬𑀁 𑀪𑀕𑀯𑀢𑁄 𑀲𑀭𑀻𑀭𑀁 𑀉𑀘𑁆𑀘𑀸𑀭𑁂𑀲𑁆𑀲𑀸𑀫𑀸’𑀢𑀺 𑀦 𑀲𑀓𑁆𑀓𑁄𑀦𑁆𑀢𑀺 𑀉𑀘𑁆𑀘𑀸𑀭𑁂𑀢𑀼’’𑀦𑁆𑀢𑀺? ‘‘𑀅𑀜𑁆𑀜𑀣𑀸 𑀔𑁄, 𑀯𑀸𑀲𑁂𑀝𑁆𑀞𑀸, 𑀢𑀼𑀫𑁆𑀳𑀸𑀓𑀁 𑀅𑀥𑀺𑀧𑁆𑀧𑀸𑀬𑁄, 𑀅𑀜𑁆𑀜𑀣𑀸 𑀤𑁂𑀯𑀢𑀸𑀦𑀁 𑀅𑀥𑀺𑀧𑁆𑀧𑀸𑀬𑁄’’𑀢𑀺. ‘‘𑀓𑀣𑀁 𑀧𑀦, 𑀪𑀦𑁆𑀢𑁂, 𑀤𑁂𑀯𑀢𑀸𑀦𑀁 𑀅𑀥𑀺𑀧𑁆𑀧𑀸𑀬𑁄’’𑀢𑀺? ‘‘𑀢𑀼𑀫𑁆𑀳𑀸𑀓𑀁 𑀔𑁄, 𑀯𑀸𑀲𑁂𑀝𑁆𑀞𑀸, 𑀅𑀥𑀺𑀧𑁆𑀧𑀸𑀬𑁄 𑁋 ‘𑀫𑀬𑀁 𑀪𑀕𑀯𑀢𑁄 𑀲𑀭𑀻𑀭𑀁 𑀦𑀘𑁆𑀘𑁂𑀳𑀺 𑀕𑀻𑀢𑁂𑀳𑀺 𑀯𑀸𑀤𑀺𑀢𑁂𑀳𑀺 𑀫𑀸𑀮𑁂𑀳𑀺 𑀕𑀦𑁆𑀥𑁂𑀳𑀺 ¶ 𑀲𑀓𑁆𑀓𑀭𑁄𑀦𑁆𑀢𑀸 𑀕𑀭𑀼𑀁 𑀓𑀭𑁄𑀦𑁆𑀢𑀸 𑀫𑀸𑀦𑁂𑀦𑁆𑀢𑀸 𑀧𑀽𑀚𑁂𑀦𑁆𑀢𑀸 𑀤𑀓𑁆𑀔𑀺𑀡𑁂𑀦 𑀤𑀓𑁆𑀔𑀺𑀡𑀁 𑀦𑀕𑀭𑀲𑁆𑀲 𑀳𑀭𑀺𑀢𑁆𑀯𑀸 𑀩𑀸𑀳𑀺𑀭𑁂𑀦 𑀩𑀸𑀳𑀺𑀭𑀁 𑀤𑀓𑁆𑀔𑀺𑀡𑀢𑁄 𑀦𑀕𑀭𑀲𑁆𑀲 𑀪𑀕𑀯𑀢𑁄 𑀲𑀭𑀻𑀭𑀁 𑀛𑀸𑀧𑁂𑀲𑁆𑀲𑀸𑀫𑀸’𑀢𑀺; 𑀤𑁂𑀯𑀢𑀸𑀦𑀁 𑀔𑁄, 𑀯𑀸𑀲𑁂𑀝𑁆𑀞𑀸, 𑀅𑀥𑀺𑀧𑁆𑀧𑀸𑀬𑁄 𑁋 ‘𑀫𑀬𑀁 𑀪𑀕𑀯𑀢𑁄 𑀲𑀭𑀻𑀭𑀁 𑀤𑀺𑀩𑁆𑀩𑁂𑀳𑀺 𑀦𑀘𑁆𑀘𑁂𑀳𑀺 ¶ 𑀕𑀻𑀢𑁂𑀳𑀺 𑀯𑀸𑀤𑀺𑀢𑁂𑀳𑀺 𑀕𑀦𑁆𑀥𑁂𑀳𑀺 𑀲𑀓𑁆𑀓𑀭𑁄𑀦𑁆𑀢𑀸 𑀕𑀭𑀼𑀁 𑀓𑀭𑁄𑀦𑁆𑀢𑀸 𑀫𑀸𑀦𑁂𑀦𑁆𑀢𑀸 𑀧𑀽𑀚𑁂𑀦𑁆𑀢𑀸 𑀉𑀢𑁆𑀢𑀭𑁂𑀦 𑀉𑀢𑁆𑀢𑀭𑀁 𑀦𑀕𑀭𑀲𑁆𑀲 𑀳𑀭𑀺𑀢𑁆𑀯𑀸 𑀉𑀢𑁆𑀢𑀭𑁂𑀦 𑀤𑁆𑀯𑀸𑀭𑁂𑀦 𑀦𑀕𑀭𑀁 𑀧𑀯𑁂𑀲𑁂𑀢𑁆𑀯𑀸 𑀫𑀚𑁆𑀛𑁂𑀦 𑀫𑀚𑁆𑀛𑀁 𑀦𑀕𑀭𑀲𑁆𑀲 𑀳𑀭𑀺𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑁂𑀦 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀢𑁄 𑀦𑀕𑀭𑀲𑁆𑀲 𑀫𑀓𑀼𑀝𑀩𑀦𑁆𑀥𑀦𑀁 𑀦𑀸𑀫 𑀫𑀮𑁆𑀮𑀸𑀦𑀁 𑀘𑁂𑀢𑀺𑀬𑀁 𑀏𑀢𑁆𑀣 𑀪𑀕𑀯𑀢𑁄 𑀲𑀭𑀻𑀭𑀁 𑀛𑀸𑀧𑁂𑀲𑁆𑀲𑀸𑀫𑀸’𑀢𑀺. ‘‘𑀬𑀣𑀸, 𑀪𑀦𑁆𑀢𑁂, 𑀤𑁂𑀯𑀢𑀸𑀦𑀁 𑀅𑀥𑀺𑀧𑁆𑀧𑀸𑀬𑁄, 𑀢𑀣𑀸 𑀳𑁄𑀢𑀽’’𑀢𑀺.

𑁨𑁨𑁯. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀓𑀼𑀲𑀺𑀦𑀸𑀭𑀸 𑀬𑀸𑀯 𑀲𑀦𑁆𑀥𑀺𑀲𑀫𑀮𑀲𑀁𑀓𑀝𑀻𑀭𑀸 𑀚𑀡𑁆𑀡𑀼𑀫𑀢𑁆𑀢𑁂𑀦 𑀑𑀥𑀺𑀦𑀸 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑁂𑀳𑀺 𑀲𑀦𑁆𑀣𑀢𑀸 [𑀲𑀡𑁆𑀞𑀺𑀢𑀸 (𑀲𑁆𑀬𑀸.)] 𑀳𑁄𑀢𑀺. 𑀅𑀣 𑀔𑁄 𑀤𑁂𑀯𑀢𑀸 𑀘 𑀓𑁄𑀲𑀺𑀦𑀸𑀭𑀓𑀸 𑀘 𑀫𑀮𑁆𑀮𑀸 𑀪𑀕𑀯𑀢𑁄 𑀲𑀭𑀻𑀭𑀁 𑀤𑀺𑀩𑁆𑀩𑁂𑀳𑀺 𑀘 𑀫𑀸𑀦𑀼𑀲𑀓𑁂𑀳𑀺 𑀘 𑀦𑀘𑁆𑀘𑁂𑀳𑀺 ¶ 𑀕𑀻𑀢𑁂𑀳𑀺 𑀯𑀸𑀤𑀺𑀢𑁂𑀳𑀺 𑀫𑀸𑀮𑁂𑀳𑀺 𑀕𑀦𑁆𑀥𑁂𑀳𑀺 𑀲𑀓𑁆𑀓𑀭𑁄𑀦𑁆𑀢𑀸 𑀕𑀭𑀼𑀁 𑀓𑀭𑁄𑀦𑁆𑀢𑀸 𑀫𑀸𑀦𑁂𑀦𑁆𑀢𑀸 𑀧𑀽𑀚𑁂𑀦𑁆𑀢𑀸 𑀉𑀢𑁆𑀢𑀭𑁂𑀦 𑀉𑀢𑁆𑀢𑀭𑀁 𑀦𑀕𑀭𑀲𑁆𑀲 𑀳𑀭𑀺𑀢𑁆𑀯𑀸 𑀉𑀢𑁆𑀢𑀭𑁂𑀦 𑀤𑁆𑀯𑀸𑀭𑁂𑀦 𑀦𑀕𑀭𑀁 𑀧𑀯𑁂𑀲𑁂𑀢𑁆𑀯𑀸 𑀫𑀚𑁆𑀛𑁂𑀦 𑀫𑀚𑁆𑀛𑀁 𑀦𑀕𑀭𑀲𑁆𑀲 𑀳𑀭𑀺𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑁂𑀦 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀢𑁄 𑀦𑀕𑀭𑀲𑁆𑀲 𑀫𑀓𑀼𑀝𑀩𑀦𑁆𑀥𑀦𑀁 𑀦𑀸𑀫 𑀫𑀮𑁆𑀮𑀸𑀦𑀁 𑀘𑁂𑀢𑀺𑀬𑀁 𑀏𑀢𑁆𑀣 𑀘 𑀪𑀕𑀯𑀢𑁄 𑀲𑀭𑀻𑀭𑀁 𑀦𑀺𑀓𑁆𑀔𑀺𑀧𑀺𑀁𑀲𑀼.

𑁨𑁩𑁦. 𑀅𑀣 ¶ 𑀔𑁄 𑀓𑁄𑀲𑀺𑀦𑀸𑀭𑀓𑀸 𑀫𑀮𑁆𑀮𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀣𑀁 𑀫𑀬𑀁, 𑀪𑀦𑁆𑀢𑁂 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑁂 𑀧𑀝𑀺𑀧𑀚𑁆𑀚𑀸𑀫𑀸’’𑀢𑀺? ‘‘𑀬𑀣𑀸 𑀔𑁄, 𑀯𑀸𑀲𑁂𑀝𑁆𑀞𑀸, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀲𑀭𑀻𑀭𑁂 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺. ‘‘𑀓𑀣𑀁 𑀧𑀦, 𑀪𑀦𑁆𑀢𑁂 𑀆𑀦𑀦𑁆𑀤, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀲𑀭𑀻𑀭𑁂 𑀧𑀝𑀺𑀧𑀚𑁆𑀚𑀦𑁆𑀢𑀻’’𑀢𑀺? ‘‘𑀭𑀜𑁆𑀜𑁄, 𑀯𑀸𑀲𑁂𑀝𑁆𑀞𑀸, 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀲𑀭𑀻𑀭𑀁 𑀅𑀳𑀢𑁂𑀦 𑀯𑀢𑁆𑀣𑁂𑀦 𑀯𑁂𑀞𑁂𑀦𑁆𑀢𑀺, 𑀅𑀳𑀢𑁂𑀦 𑀯𑀢𑁆𑀣𑁂𑀦 𑀯𑁂𑀞𑁂𑀢𑁆𑀯𑀸 𑀯𑀺𑀳𑀢𑁂𑀦 𑀓𑀧𑁆𑀧𑀸𑀲𑁂𑀦 𑀯𑁂𑀞𑁂𑀦𑁆𑀢𑀺, 𑀯𑀺𑀳𑀢𑁂𑀦 𑀓𑀧𑁆𑀧𑀸𑀲𑁂𑀦 ¶ 𑀯𑁂𑀞𑁂𑀢𑁆𑀯𑀸 𑀅𑀳𑀢𑁂𑀦 𑀯𑀢𑁆𑀣𑁂𑀦 𑀯𑁂𑀞𑁂𑀦𑁆𑀢𑀺. 𑀏𑀢𑁂𑀦 𑀉𑀧𑀸𑀬𑁂𑀦 𑀧𑀜𑁆𑀘𑀳𑀺 𑀬𑀼𑀕𑀲𑀢𑁂𑀳𑀺 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀲𑀭𑀻𑀭𑀁 𑀯𑁂𑀞𑁂𑀢𑁆𑀯𑀸 𑀆𑀬𑀲𑀸𑀬 𑀢𑁂𑀮𑀤𑁄𑀡𑀺𑀬𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑀺𑀲𑁆𑀲𑀸 𑀆𑀬𑀲𑀸𑀬 𑀤𑁄𑀡𑀺𑀬𑀸 𑀧𑀝𑀺𑀓𑀼𑀚𑁆𑀚𑀺𑀢𑁆𑀯𑀸 𑀲𑀩𑁆𑀩𑀕𑀦𑁆𑀥𑀸𑀦𑀁 𑀘𑀺𑀢𑀓𑀁 𑀓𑀭𑀺𑀢𑁆𑀯𑀸 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀲𑀭𑀻𑀭𑀁 𑀛𑀸𑀧𑁂𑀦𑁆𑀢𑀺. 𑀘𑀸𑀢𑀼𑀫𑀳𑀸𑀧𑀣𑁂 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀣𑀽𑀧𑀁 𑀓𑀭𑁄𑀦𑁆𑀢𑀺 ¶ . 𑀏𑀯𑀁 𑀔𑁄, 𑀯𑀸𑀲𑁂𑀝𑁆𑀞𑀸, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀲𑀭𑀻𑀭𑁂 𑀧𑀝𑀺𑀧𑀚𑁆𑀚𑀦𑁆𑀢𑀺. 𑀬𑀣𑀸 𑀔𑁄, 𑀯𑀸𑀲𑁂𑀝𑁆𑀞𑀸, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀲𑀭𑀻𑀭𑁂 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀘𑀸𑀢𑀼𑀫𑀳𑀸𑀧𑀣𑁂 𑀢𑀣𑀸𑀕𑀢𑀲𑁆𑀲 𑀣𑀽𑀧𑁄 𑀓𑀸𑀢𑀩𑁆𑀩𑁄. 𑀢𑀢𑁆𑀣 𑀬𑁂 𑀫𑀸𑀮𑀁 𑀯𑀸 𑀕𑀦𑁆𑀥𑀁 𑀯𑀸 𑀘𑀼𑀡𑁆𑀡𑀓𑀁 𑀯𑀸 𑀆𑀭𑁄𑀧𑁂𑀲𑁆𑀲𑀦𑁆𑀢𑀺 𑀯𑀸 𑀅𑀪𑀺𑀯𑀸𑀤𑁂𑀲𑁆𑀲𑀦𑁆𑀢𑀺 𑀯𑀸 𑀘𑀺𑀢𑁆𑀢𑀁 𑀯𑀸 𑀧𑀲𑀸𑀤𑁂𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀢𑀁 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺. 𑀅𑀣 𑀔𑁄 𑀓𑁄𑀲𑀺𑀦𑀸𑀭𑀓𑀸 𑀫𑀮𑁆𑀮𑀸 𑀧𑀼𑀭𑀺𑀲𑁂 𑀆𑀡𑀸𑀧𑁂𑀲𑀼𑀁 𑁋 ‘‘𑀢𑁂𑀦 𑀳𑀺, 𑀪𑀡𑁂, 𑀫𑀮𑁆𑀮𑀸𑀦𑀁 𑀯𑀺𑀳𑀢𑀁 𑀓𑀧𑁆𑀧𑀸𑀲𑀁 𑀲𑀦𑁆𑀦𑀺𑀧𑀸𑀢𑁂𑀣𑀸’’𑀢𑀺.

𑀅𑀣 𑀔𑁄 𑀓𑁄𑀲𑀺𑀦𑀸𑀭𑀓𑀸 𑀫𑀮𑁆𑀮𑀸 𑀪𑀕𑀯𑀢𑁄 𑀲𑀭𑀻𑀭𑀁 𑀅𑀳𑀢𑁂𑀦 𑀯𑀢𑁆𑀣𑁂𑀦 𑀯𑁂𑀞𑁂𑀢𑁆𑀯𑀸 𑀯𑀺𑀳𑀢𑁂𑀦 𑀓𑀧𑁆𑀧𑀸𑀲𑁂𑀦 𑀯𑁂𑀞𑁂𑀲𑀼𑀁, 𑀯𑀺𑀳𑀢𑁂𑀦 𑀓𑀧𑁆𑀧𑀸𑀲𑁂𑀦 𑀯𑁂𑀞𑁂𑀢𑁆𑀯𑀸 𑀅𑀳𑀢𑁂𑀦 𑀯𑀢𑁆𑀣𑁂𑀦 ¶ 𑀯𑁂𑀞𑁂𑀲𑀼𑀁. 𑀏𑀢𑁂𑀦 𑀉𑀧𑀸𑀬𑁂𑀦 𑀧𑀜𑁆𑀘𑀳𑀺 𑀬𑀼𑀕𑀲𑀢𑁂𑀳𑀺 𑀪𑀕𑀯𑀢𑁄 𑀲𑀭𑀻𑀭𑀁 𑀯𑁂𑀞𑁂𑀢𑁆𑀯𑀸 𑀆𑀬𑀲𑀸𑀬 𑀢𑁂𑀮𑀤𑁄𑀡𑀺𑀬𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑀺𑀲𑁆𑀲𑀸 𑀆𑀬𑀲𑀸𑀬 𑀤𑁄𑀡𑀺𑀬𑀸 𑀧𑀝𑀺𑀓𑀼𑀚𑁆𑀚𑀺𑀢𑁆𑀯𑀸 𑀲𑀩𑁆𑀩𑀕𑀦𑁆𑀥𑀸𑀦𑀁 𑀘𑀺𑀢𑀓𑀁 𑀓𑀭𑀺𑀢𑁆𑀯𑀸 𑀪𑀕𑀯𑀢𑁄 𑀲𑀭𑀻𑀭𑀁 𑀘𑀺𑀢𑀓𑀁 𑀆𑀭𑁄𑀧𑁂𑀲𑀼𑀁.

𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀯𑀢𑁆𑀣𑀼

𑁨𑁩𑁧. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀧𑀸𑀯𑀸𑀬 𑀓𑀼𑀲𑀺𑀦𑀸𑀭𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑁆𑀧𑀦𑁆𑀦𑁄 𑀳𑁄𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 ¶ 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀆𑀚𑀻𑀯𑀓𑁄 𑀓𑀼𑀲𑀺𑀦𑀸𑀭𑀸𑀬 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀧𑀸𑀯𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑁆𑀧𑀦𑁆𑀦𑁄 𑀳𑁄𑀢𑀺. 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀢𑀁 𑀆𑀚𑀻𑀯𑀓𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁, 𑀤𑀺𑀲𑁆𑀯𑀸 𑀢𑀁 𑀆𑀚𑀻𑀯𑀓𑀁 𑀏𑀢𑀤𑀯𑁄𑀘 𑁋 ‘‘𑀅𑀧𑀸𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸𑀭𑀁 𑀚𑀸𑀦𑀸𑀲𑀻’’𑀢𑀺? ‘‘𑀆𑀫𑀸𑀯𑀼𑀲𑁄, 𑀚𑀸𑀦𑀸𑀫𑀺, 𑀅𑀚𑁆𑀚 𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁄 𑀲𑀫𑀡𑁄 𑀕𑁄𑀢𑀫𑁄. 𑀢𑀢𑁄 𑀫𑁂 𑀇𑀤𑀁 𑀫𑀦𑁆𑀤𑀸𑀭𑀯𑀧𑀼𑀧𑁆𑀨𑀁 𑀕𑀳𑀺𑀢’’𑀦𑁆𑀢𑀺. 𑀢𑀢𑁆𑀣 𑀬𑁂 𑀢𑁂 ¶ 𑀪𑀺𑀓𑁆𑀔𑀽 𑀅𑀯𑀻𑀢𑀭𑀸𑀕𑀸 𑀅𑀧𑁆𑀧𑁂𑀓𑀘𑁆𑀘𑁂 𑀩𑀸𑀳𑀸 𑀧𑀕𑁆𑀕𑀬𑁆𑀳 𑀓𑀦𑁆𑀤𑀦𑁆𑀢𑀺, 𑀙𑀺𑀦𑁆𑀦𑀧𑀸𑀢𑀁 𑀧𑀧𑀢𑀦𑁆𑀢𑀺, 𑀆𑀯𑀝𑁆𑀝𑀦𑁆𑀢𑀺, 𑀯𑀺𑀯𑀝𑁆𑀝𑀦𑁆𑀢𑀺 𑁋 ‘‘𑀅𑀢𑀺𑀔𑀺𑀧𑁆𑀧𑀁 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀢𑀺𑀔𑀺𑀧𑁆𑀧𑀁 𑀲𑀼𑀕𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀢𑀺𑀔𑀺𑀧𑁆𑀧𑀁 𑀘𑀓𑁆𑀔𑀼𑀁 𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁄’’𑀢𑀺. 𑀬𑁂 𑀧𑀦 𑀢𑁂 𑀪𑀺𑀓𑁆𑀔𑀽 𑀯𑀻𑀢𑀭𑀸𑀕𑀸, 𑀢𑁂 𑀲𑀢𑀸 𑀲𑀫𑁆𑀧𑀚𑀸𑀦𑀸 𑀅𑀥𑀺𑀯𑀸𑀲𑁂𑀦𑁆𑀢𑀺 𑁋 ‘‘𑀅𑀦𑀺𑀘𑁆𑀘𑀸 𑀲𑀗𑁆𑀔𑀸𑀭𑀸, 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸’’𑀢𑀺.

𑁨𑁩𑁨. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀼𑀪𑀤𑁆𑀤𑁄 𑀦𑀸𑀫 𑀯𑀼𑀤𑁆𑀥𑀧𑀩𑁆𑀩𑀚𑀺𑀢𑁄 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀣 𑀔𑁄 𑀲𑀼𑀪𑀤𑁆𑀤𑁄 𑀯𑀼𑀤𑁆𑀥𑀧𑀩𑁆𑀩𑀚𑀺𑀢𑁄 𑀢𑁂 ¶ 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 𑁋 ‘‘𑀅𑀮𑀁, 𑀆𑀯𑀼𑀲𑁄, 𑀫𑀸 𑀲𑁄𑀘𑀺𑀢𑁆𑀣, 𑀫𑀸 𑀧𑀭𑀺𑀤𑁂𑀯𑀺𑀢𑁆𑀣, 𑀲𑀼𑀫𑀼𑀢𑁆𑀢𑀸 𑀫𑀬𑀁 𑀢𑁂𑀦 𑀫𑀳𑀸𑀲𑀫𑀡𑁂𑀦. 𑀉𑀧𑀤𑁆𑀤𑀼𑀢𑀸 𑀘 𑀳𑁄𑀫 𑁋 ‘𑀇𑀤𑀁 𑀯𑁄 𑀓𑀧𑁆𑀧𑀢𑀺, 𑀇𑀤𑀁 𑀯𑁄 𑀦 𑀓𑀧𑁆𑀧𑀢𑀻’𑀢𑀺. 𑀇𑀤𑀸𑀦𑀺 𑀧𑀦 𑀫𑀬𑀁 𑀬𑀁 𑀇𑀘𑁆𑀙𑀺𑀲𑁆𑀲𑀸𑀫, 𑀢𑀁 𑀓𑀭𑀺𑀲𑁆𑀲𑀸𑀫, 𑀬𑀁 𑀦 𑀇𑀘𑁆𑀙𑀺𑀲𑁆𑀲𑀸𑀫, 𑀦 𑀢𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 ¶ 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀮𑀁, 𑀆𑀯𑀼𑀲𑁄, 𑀫𑀸 𑀲𑁄𑀘𑀺𑀢𑁆𑀣, 𑀫𑀸 𑀧𑀭𑀺𑀤𑁂𑀯𑀺𑀢𑁆𑀣. 𑀦𑀦𑀼 𑀏𑀢𑀁 ¶ , 𑀆𑀯𑀼𑀲𑁄, 𑀪𑀕𑀯𑀢𑀸 𑀧𑀝𑀺𑀓𑀘𑁆𑀘𑁂𑀯 𑀅𑀓𑁆𑀔𑀸𑀢𑀁 𑁋 ‘𑀲𑀩𑁆𑀩𑁂𑀳𑁂𑀯 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄 𑀅𑀜𑁆𑀜𑀣𑀸𑀪𑀸𑀯𑁄’. 𑀢𑀁 𑀓𑀼𑀢𑁂𑀢𑁆𑀣, 𑀆𑀯𑀼𑀲𑁄, 𑀮𑀩𑁆𑀪𑀸. ‘𑀬𑀁 𑀢𑀁 𑀚𑀸𑀢𑀁 𑀪𑀽𑀢𑀁 𑀲𑀗𑁆𑀔𑀢𑀁 𑀧𑀮𑁄𑀓𑀥𑀫𑁆𑀫𑀁, 𑀢𑀁 𑀢𑀣𑀸𑀕𑀢𑀲𑁆𑀲𑀸𑀧𑀺 𑀲𑀭𑀻𑀭𑀁 𑀫𑀸 𑀧𑀮𑀼𑀚𑁆𑀚𑀻’𑀢𑀺, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺.

𑁨𑁩𑁩. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀘𑀢𑁆𑀢𑀸𑀭𑁄 𑀫𑀮𑁆𑀮𑀧𑀸𑀫𑁄𑀓𑁆𑀔𑀸 𑀲𑀻𑀲𑀁𑀦𑁆𑀳𑀸𑀢𑀸 𑀅𑀳𑀢𑀸𑀦𑀺 𑀯𑀢𑁆𑀣𑀸𑀦𑀺 𑀦𑀺𑀯𑀢𑁆𑀣𑀸 𑁋 ‘‘𑀫𑀬𑀁 𑀪𑀕𑀯𑀢𑁄 𑀘𑀺𑀢𑀓𑀁 𑀆𑀴𑀺𑀫𑁆𑀧𑁂𑀲𑁆𑀲𑀸𑀫𑀸’’𑀢𑀺 𑀦 𑀲𑀓𑁆𑀓𑁄𑀦𑁆𑀢𑀺 𑀆𑀴𑀺𑀫𑁆𑀧𑁂𑀢𑀼𑀁. 𑀅𑀣 𑀔𑁄 𑀓𑁄𑀲𑀺𑀦𑀸𑀭𑀓𑀸 𑀫𑀮𑁆𑀮𑀸 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂 𑀅𑀦𑀼𑀭𑀼𑀤𑁆𑀥, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄, 𑀬𑁂𑀦𑀺𑀫𑁂 𑀘𑀢𑁆𑀢𑀸𑀭𑁄 𑀫𑀮𑁆𑀮𑀧𑀸𑀫𑁄𑀓𑁆𑀔𑀸 𑀲𑀻𑀲𑀁𑀦𑁆𑀳𑀸𑀢𑀸 𑀅𑀳𑀢𑀸𑀦𑀺 𑀯𑀢𑁆𑀣𑀸𑀦𑀺 𑀦𑀺𑀯𑀢𑁆𑀣𑀸 𑁋 ‘𑀫𑀬𑀁 𑀪𑀕𑀯𑀢𑁄 𑀘𑀺𑀢𑀓𑀁 𑀆𑀴𑀺𑀫𑁆𑀧𑁂𑀲𑁆𑀲𑀸𑀫𑀸’𑀢𑀺 𑀦 𑀲𑀓𑁆𑀓𑁄𑀦𑁆𑀢𑀺 𑀆𑀴𑀺𑀫𑁆𑀧𑁂𑀢𑀼’’𑀦𑁆𑀢𑀺? ‘‘𑀅𑀜𑁆𑀜𑀣𑀸 𑀔𑁄, 𑀯𑀸𑀲𑁂𑀝𑁆𑀞𑀸, 𑀤𑁂𑀯𑀢𑀸𑀦𑀁 𑀅𑀥𑀺𑀧𑁆𑀧𑀸𑀬𑁄’’𑀢𑀺. ‘‘𑀓𑀣𑀁 𑀧𑀦, 𑀪𑀦𑁆𑀢𑁂, 𑀤𑁂𑀯𑀢𑀸𑀦𑀁 𑀅𑀥𑀺𑀧𑁆𑀧𑀸𑀬𑁄’’𑀢𑀺? ‘‘𑀤𑁂𑀯𑀢𑀸𑀦𑀁 𑀔𑁄, 𑀯𑀸𑀲𑁂𑀝𑁆𑀞𑀸, 𑀅𑀥𑀺𑀧𑁆𑀧𑀸𑀬𑁄 𑁋 ‘𑀅𑀬𑀁 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀧𑀸𑀯𑀸𑀬 𑀓𑀼𑀲𑀺𑀦𑀸𑀭𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑁆𑀧𑀦𑁆𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀦 𑀢𑀸𑀯 𑀪𑀕𑀯𑀢𑁄 𑀘𑀺𑀢𑀓𑁄 𑀧𑀚𑁆𑀚𑀮𑀺𑀲𑁆𑀲𑀢𑀺, 𑀬𑀸𑀯𑀸𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀦 𑀯𑀦𑁆𑀤𑀺𑀲𑁆𑀲𑀢𑀻’’’𑀢𑀺. ‘‘𑀬𑀣𑀸, 𑀪𑀦𑁆𑀢𑁂, 𑀤𑁂𑀯𑀢𑀸𑀦𑀁 𑀅𑀥𑀺𑀧𑁆𑀧𑀸𑀬𑁄, 𑀢𑀣𑀸 𑀳𑁄𑀢𑀽’’𑀢𑀺.

𑁨𑁩𑁪. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀬𑁂𑀦 𑀓𑀼𑀲𑀺𑀦𑀸𑀭𑀸 𑀫𑀓𑀼𑀝𑀩𑀦𑁆𑀥𑀦𑀁 𑀦𑀸𑀫 𑀫𑀮𑁆𑀮𑀸𑀦𑀁 𑀘𑁂𑀢𑀺𑀬𑀁, 𑀬𑁂𑀦 𑀪𑀕𑀯𑀢𑁄 ¶ 𑀘𑀺𑀢𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀘𑀺𑀢𑀓𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀺. 𑀢𑀸𑀦𑀺𑀧𑀺 𑀔𑁄 𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑀸𑀦𑀺 𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀘𑀺𑀢𑀓𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 ¶ 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀺𑀁𑀲𑀼. 𑀯𑀦𑁆𑀤𑀺𑀢𑁂 ¶ 𑀘 𑀧𑀦𑀸𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 𑀢𑁂𑀳𑀺 𑀘 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀬𑀫𑁂𑀯 𑀪𑀕𑀯𑀢𑁄 𑀘𑀺𑀢𑀓𑁄 𑀧𑀚𑁆𑀚𑀮𑀺.

𑁨𑁩𑁫. 𑀛𑀸𑀬𑀫𑀸𑀦𑀲𑁆𑀲 ¶ 𑀔𑁄 𑀧𑀦 𑀪𑀕𑀯𑀢𑁄 𑀲𑀭𑀻𑀭𑀲𑁆𑀲 𑀬𑀁 𑀅𑀳𑁄𑀲𑀺 𑀙𑀯𑀻𑀢𑀺 𑀯𑀸 𑀘𑀫𑁆𑀫𑀦𑁆𑀢𑀺 𑀯𑀸 𑀫𑀁𑀲𑀦𑁆𑀢𑀺 𑀯𑀸 𑀦𑁆𑀳𑀸𑀭𑀽𑀢𑀺 𑀯𑀸 𑀮𑀲𑀺𑀓𑀸𑀢𑀺 𑀯𑀸, 𑀢𑀲𑁆𑀲 𑀦𑁂𑀯 𑀙𑀸𑀭𑀺𑀓𑀸 𑀧𑀜𑁆𑀜𑀸𑀬𑀺𑀢𑁆𑀣, 𑀦 𑀫𑀲𑀺; 𑀲𑀭𑀻𑀭𑀸𑀦𑁂𑀯 𑀅𑀯𑀲𑀺𑀲𑁆𑀲𑀺𑀁𑀲𑀼. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀲𑀧𑁆𑀧𑀺𑀲𑁆𑀲 𑀯𑀸 𑀢𑁂𑀮𑀲𑁆𑀲 𑀯𑀸 𑀛𑀸𑀬𑀫𑀸𑀦𑀲𑁆𑀲 𑀦𑁂𑀯 𑀙𑀸𑀭𑀺𑀓𑀸 𑀧𑀜𑁆𑀜𑀸𑀬𑀢𑀺, 𑀦 𑀫𑀲𑀺; 𑀏𑀯𑀫𑁂𑀯 𑀪𑀕𑀯𑀢𑁄 𑀲𑀭𑀻𑀭𑀲𑁆𑀲 𑀛𑀸𑀬𑀫𑀸𑀦𑀲𑁆𑀲 𑀬𑀁 𑀅𑀳𑁄𑀲𑀺 𑀙𑀯𑀻𑀢𑀺 𑀯𑀸 𑀘𑀫𑁆𑀫𑀦𑁆𑀢𑀺 𑀯𑀸 𑀫𑀁𑀲𑀦𑁆𑀢𑀺 𑀯𑀸 𑀦𑁆𑀳𑀸𑀭𑀽𑀢𑀺 𑀯𑀸 𑀮𑀲𑀺𑀓𑀸𑀢𑀺 𑀯𑀸, 𑀢𑀲𑁆𑀲 𑀦𑁂𑀯 𑀙𑀸𑀭𑀺𑀓𑀸 𑀧𑀜𑁆𑀜𑀸𑀬𑀺𑀢𑁆𑀣, 𑀦 𑀫𑀲𑀺; 𑀲𑀭𑀻𑀭𑀸𑀦𑁂𑀯 𑀅𑀯𑀲𑀺𑀲𑁆𑀲𑀺𑀁𑀲𑀼. 𑀢𑁂𑀲𑀜𑁆𑀘 𑀧𑀜𑁆𑀘𑀦𑁆𑀦𑀁 𑀤𑀼𑀲𑁆𑀲𑀬𑀼𑀕𑀲𑀢𑀸𑀦𑀁 𑀤𑁆𑀯𑁂𑀯 𑀤𑀼𑀲𑁆𑀲𑀸𑀦𑀺 𑀦 𑀟𑀬𑁆𑀳𑀺𑀁𑀲𑀼 𑀬𑀜𑁆𑀘 𑀲𑀩𑁆𑀩𑀅𑀩𑁆𑀪𑀦𑁆𑀢𑀭𑀺𑀫𑀁 𑀬𑀜𑁆𑀘 𑀩𑀸𑀳𑀺𑀭𑀁. 𑀤𑀟𑁆𑀠𑁂 𑀘 𑀔𑁄 𑀧𑀦 𑀪𑀕𑀯𑀢𑁄 𑀲𑀭𑀻𑀭𑁂 𑀅𑀦𑁆𑀢𑀮𑀺𑀓𑁆𑀔𑀸 𑀉𑀤𑀓𑀥𑀸𑀭𑀸 𑀧𑀸𑀢𑀼𑀪𑀯𑀺𑀢𑁆𑀯𑀸 𑀪𑀕𑀯𑀢𑁄 𑀘𑀺𑀢𑀓𑀁 𑀦𑀺𑀩𑁆𑀩𑀸𑀧𑁂𑀲𑀺. 𑀉𑀤𑀓𑀲𑀸𑀮𑀢𑁄𑀧𑀺 [𑀉𑀤𑀓𑀁 𑀲𑀸𑀮𑀢𑁄𑀧𑀺 (𑀲𑀻. 𑀲𑁆𑀬𑀸. 𑀓𑀁.)] 𑀅𑀩𑁆𑀪𑀼𑀦𑁆𑀦𑀫𑀺𑀢𑁆𑀯𑀸 𑀪𑀕𑀯𑀢𑁄 𑀘𑀺𑀢𑀓𑀁 𑀦𑀺𑀩𑁆𑀩𑀸𑀧𑁂𑀲𑀺. 𑀓𑁄𑀲𑀺𑀦𑀸𑀭𑀓𑀸𑀧𑀺 𑀫𑀮𑁆𑀮𑀸 𑀲𑀩𑁆𑀩𑀕𑀦𑁆𑀥𑁄𑀤𑀓𑁂𑀦 𑀪𑀕𑀯𑀢𑁄 𑀘𑀺𑀢𑀓𑀁 𑀦𑀺𑀩𑁆𑀩𑀸𑀧𑁂𑀲𑀼𑀁. 𑀅𑀣 𑀔𑁄 𑀓𑁄𑀲𑀺𑀦𑀸𑀭𑀓𑀸 𑀫𑀮𑁆𑀮𑀸 𑀪𑀕𑀯𑀢𑁄 𑀲𑀭𑀻𑀭𑀸𑀦𑀺 𑀲𑀢𑁆𑀢𑀸𑀳𑀁 𑀲𑀦𑁆𑀥𑀸𑀕𑀸𑀭𑁂 𑀲𑀢𑁆𑀢𑀺𑀧𑀜𑁆𑀚𑀭𑀁 𑀓𑀭𑀺𑀢𑁆𑀯𑀸 𑀥𑀦𑀼𑀧𑀸𑀓𑀸𑀭𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 ¶ [𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 (𑀲𑁆𑀬𑀸.)] 𑀦𑀘𑁆𑀘𑁂𑀳𑀺 𑀕𑀻𑀢𑁂𑀳𑀺 𑀯𑀸𑀤𑀺𑀢𑁂𑀳𑀺 𑀫𑀸𑀮𑁂𑀳𑀺 𑀕𑀦𑁆𑀥𑁂𑀳𑀺 𑀲𑀓𑁆𑀓𑀭𑀺𑀁𑀲𑀼 𑀕𑀭𑀼𑀁 𑀓𑀭𑀺𑀁𑀲𑀼 𑀫𑀸𑀦𑁂𑀲𑀼𑀁 𑀧𑀽𑀚𑁂𑀲𑀼𑀁.

𑀲𑀭𑀻𑀭𑀥𑀸𑀢𑀼𑀯𑀺𑀪𑀸𑀚𑀦𑀁

𑁨𑁩𑁬. 𑀅𑀲𑁆𑀲𑁄𑀲𑀺 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑁋 ‘‘𑀪𑀕𑀯𑀸 𑀓𑀺𑀭 𑀓𑀼𑀲𑀺𑀦𑀸𑀭𑀸𑀬𑀁 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀓𑁄𑀲𑀺𑀦𑀸𑀭𑀓𑀸𑀦𑀁 𑀫𑀮𑁆𑀮𑀸𑀦𑀁 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘‘𑀪𑀕𑀯𑀸𑀧𑀺 𑀔𑀢𑁆𑀢𑀺𑀬𑁄 𑀅𑀳𑀫𑁆𑀧𑀺 𑀔𑀢𑁆𑀢𑀺𑀬𑁄, 𑀅𑀳𑀫𑁆𑀧𑀺 𑀅𑀭𑀳𑀸𑀫𑀺 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀪𑀸𑀕𑀁, 𑀅𑀳𑀫𑁆𑀧𑀺 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀣𑀽𑀧𑀜𑁆𑀘 𑀫𑀳𑀜𑁆𑀘 𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑀅𑀲𑁆𑀲𑁄𑀲𑀼𑀁 𑀔𑁄 𑀯𑁂𑀲𑀸𑀮𑀺𑀓𑀸 𑀮𑀺𑀘𑁆𑀙𑀯𑀻 𑁋 ‘‘𑀪𑀕𑀯𑀸 𑀓𑀺𑀭 𑀓𑀼𑀲𑀺𑀦𑀸𑀭𑀸𑀬𑀁 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺. 𑀅𑀣 𑀔𑁄 𑀯𑁂𑀲𑀸𑀮𑀺𑀓𑀸 𑀮𑀺𑀘𑁆𑀙𑀯𑀻 𑀓𑁄𑀲𑀺𑀦𑀸𑀭𑀓𑀸𑀦𑀁 𑀫𑀮𑁆𑀮𑀸𑀦𑀁 𑀤𑀽𑀢𑀁 𑀧𑀸𑀳𑁂𑀲𑀼𑀁 𑁋 ‘‘𑀪𑀕𑀯𑀸𑀧𑀺 𑀔𑀢𑁆𑀢𑀺𑀬𑁄 𑀫𑀬𑀫𑁆𑀧𑀺 𑀔𑀢𑁆𑀢𑀺𑀬𑀸, 𑀫𑀬𑀫𑁆𑀧𑀺 𑀅𑀭𑀳𑀸𑀫 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 ¶ 𑀪𑀸𑀕𑀁, 𑀫𑀬𑀫𑁆𑀧𑀺 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀣𑀽𑀧𑀜𑁆𑀘 𑀫𑀳𑀜𑁆𑀘 𑀓𑀭𑀺𑀲𑁆𑀲𑀸𑀫𑀸’’𑀢𑀺.

𑀅𑀲𑁆𑀲𑁄𑀲𑀼𑀁 𑀔𑁄 𑀓𑀧𑀺𑀮𑀯𑀢𑁆𑀣𑀼𑀯𑀸𑀲𑀻 𑀲𑀓𑁆𑀬𑀸 𑁋 ‘‘𑀪𑀕𑀯𑀸 𑀓𑀺𑀭 𑀓𑀼𑀲𑀺𑀦𑀸𑀭𑀸𑀬𑀁 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺. 𑀅𑀣 𑀔𑁄 𑀓𑀧𑀺𑀮𑀯𑀢𑁆𑀣𑀼𑀯𑀸𑀲𑀻 𑀲𑀓𑁆𑀬𑀸 𑀓𑁄𑀲𑀺𑀦𑀸𑀭𑀓𑀸𑀦𑀁 𑀫𑀮𑁆𑀮𑀸𑀦𑀁 ¶ 𑀤𑀽𑀢𑀁 𑀧𑀸𑀳𑁂𑀲𑀼𑀁 𑁋 ‘‘𑀪𑀕𑀯𑀸 𑀅𑀫𑁆𑀳𑀸𑀓𑀁 𑀜𑀸𑀢𑀺𑀲𑁂𑀝𑁆𑀞𑁄 ¶ , 𑀫𑀬𑀫𑁆𑀧𑀺 𑀅𑀭𑀳𑀸𑀫 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀪𑀸𑀕𑀁, 𑀫𑀬𑀫𑁆𑀧𑀺 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀣𑀽𑀧𑀜𑁆𑀘 𑀫𑀳𑀜𑁆𑀘 𑀓𑀭𑀺𑀲𑁆𑀲𑀸𑀫𑀸’’𑀢𑀺.

𑀅𑀲𑁆𑀲𑁄𑀲𑀼𑀁 𑀔𑁄 𑀅𑀮𑁆𑀮𑀓𑀧𑁆𑀧𑀓𑀸 𑀩𑀼𑀮𑀬𑁄 [𑀣𑀽𑀮𑀬𑁄 (𑀲𑁆𑀬𑀸.)] 𑁋 ‘‘𑀪𑀕𑀯𑀸 𑀓𑀺𑀭 𑀓𑀼𑀲𑀺𑀦𑀸𑀭𑀸𑀬𑀁 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺. 𑀅𑀣 𑀔𑁄 𑀅𑀮𑁆𑀮𑀓𑀧𑁆𑀧𑀓𑀸 𑀩𑀼𑀮𑀬𑁄 𑀓𑁄𑀲𑀺𑀦𑀸𑀭𑀓𑀸𑀦𑀁 𑀫𑀮𑁆𑀮𑀸𑀦𑀁 𑀤𑀽𑀢𑀁 𑀧𑀸𑀳𑁂𑀲𑀼𑀁 𑁋 ‘‘𑀪𑀕𑀯𑀸𑀧𑀺 𑀔𑀢𑁆𑀢𑀺𑀬𑁄 𑀫𑀬𑀫𑁆𑀧𑀺 𑀔𑀢𑁆𑀢𑀺𑀬𑀸, 𑀫𑀬𑀫𑁆𑀧𑀺 𑀅𑀭𑀳𑀸𑀫 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀪𑀸𑀕𑀁, 𑀫𑀬𑀫𑁆𑀧𑀺 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀣𑀽𑀧𑀜𑁆𑀘 𑀫𑀳𑀜𑁆𑀘 𑀓𑀭𑀺𑀲𑁆𑀲𑀸𑀫𑀸’’𑀢𑀺 ¶ .

𑀅𑀲𑁆𑀲𑁄𑀲𑀼𑀁 𑀔𑁄 𑀭𑀸𑀫𑀕𑀸𑀫𑀓𑀸 𑀓𑁄𑀴𑀺𑀬𑀸 𑁋 ‘‘𑀪𑀕𑀯𑀸 𑀓𑀺𑀭 𑀓𑀼𑀲𑀺𑀦𑀸𑀭𑀸𑀬𑀁 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺. 𑀅𑀣 𑀔𑁄 𑀭𑀸𑀫𑀕𑀸𑀫𑀓𑀸 𑀓𑁄𑀴𑀺𑀬𑀸 𑀓𑁄𑀲𑀺𑀦𑀸𑀭𑀓𑀸𑀦𑀁 𑀫𑀮𑁆𑀮𑀸𑀦𑀁 𑀤𑀽𑀢𑀁 𑀧𑀸𑀳𑁂𑀲𑀼𑀁 𑁋 ‘‘𑀪𑀕𑀯𑀸𑀧𑀺 𑀔𑀢𑁆𑀢𑀺𑀬𑁄 𑀫𑀬𑀫𑁆𑀧𑀺 𑀔𑀢𑁆𑀢𑀺𑀬𑀸, 𑀫𑀬𑀫𑁆𑀧𑀺 𑀅𑀭𑀳𑀸𑀫 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀪𑀸𑀕𑀁, 𑀫𑀬𑀫𑁆𑀧𑀺 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀣𑀽𑀧𑀜𑁆𑀘 𑀫𑀳𑀜𑁆𑀘 𑀓𑀭𑀺𑀲𑁆𑀲𑀸𑀫𑀸’’𑀢𑀺.

𑀅𑀲𑁆𑀲𑁄𑀲𑀺 𑀔𑁄 𑀯𑁂𑀝𑁆𑀞𑀤𑀻𑀧𑀓𑁄 𑀩𑁆𑀭𑀸𑀳𑁆𑀫𑀡𑁄 𑁋 ‘‘𑀪𑀕𑀯𑀸 𑀓𑀺𑀭 𑀓𑀼𑀲𑀺𑀦𑀸𑀭𑀸𑀬𑀁 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺. 𑀅𑀣 𑀔𑁄 𑀯𑁂𑀝𑁆𑀞𑀤𑀻𑀧𑀓𑁄 𑀩𑁆𑀭𑀸𑀳𑁆𑀫𑀡𑁄 𑀓𑁄𑀲𑀺𑀦𑀸𑀭𑀓𑀸𑀦𑀁 𑀫𑀮𑁆𑀮𑀸𑀦𑀁 𑀤𑀽𑀢𑀁 𑀧𑀸𑀳𑁂𑀲𑀺 𑁋 ‘‘𑀪𑀕𑀯𑀸𑀧𑀺 𑀔𑀢𑁆𑀢𑀺𑀬𑁄 𑀅𑀳𑀁 𑀧𑀺𑀲𑁆𑀫𑀺 𑀩𑁆𑀭𑀸𑀳𑁆𑀫𑀡𑁄, 𑀅𑀳𑀫𑁆𑀧𑀺 𑀅𑀭𑀳𑀸𑀫𑀺 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀪𑀸𑀕𑀁, 𑀅𑀳𑀫𑁆𑀧𑀺 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀣𑀽𑀧𑀜𑁆𑀘 𑀫𑀳𑀜𑁆𑀘 𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑀅𑀲𑁆𑀲𑁄𑀲𑀼𑀁 𑀔𑁄 𑀧𑀸𑀯𑁂𑀬𑁆𑀬𑀓𑀸 𑀫𑀮𑁆𑀮𑀸 𑁋 ‘‘𑀪𑀕𑀯𑀸 𑀓𑀺𑀭 𑀓𑀼𑀲𑀺𑀦𑀸𑀭𑀸𑀬𑀁 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺. 𑀅𑀣 𑀔𑁄 𑀧𑀸𑀯𑁂𑀬𑁆𑀬𑀓𑀸 𑀫𑀮𑁆𑀮𑀸 𑀓𑁄𑀲𑀺𑀦𑀸𑀭𑀓𑀸𑀦𑀁 𑀫𑀮𑁆𑀮𑀸𑀦𑀁 𑀤𑀽𑀢𑀁 𑀧𑀸𑀳𑁂𑀲𑀼𑀁 𑁋 ‘‘𑀪𑀕𑀯𑀸𑀧𑀺 𑀔𑀢𑁆𑀢𑀺𑀬𑁄 𑀫𑀬𑀫𑁆𑀧𑀺 𑀔𑀢𑁆𑀢𑀺𑀬𑀸, 𑀫𑀬𑀫𑁆𑀧𑀺 𑀅𑀭𑀳𑀸𑀫 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀪𑀸𑀕𑀁, 𑀫𑀬𑀫𑁆𑀧𑀺 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀣𑀽𑀧𑀜𑁆𑀘 𑀫𑀳𑀜𑁆𑀘 𑀓𑀭𑀺𑀲𑁆𑀲𑀸𑀫𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀓𑁄𑀲𑀺𑀦𑀸𑀭𑀓𑀸 𑀫𑀮𑁆𑀮𑀸 𑀢𑁂 𑀲𑀗𑁆𑀖𑁂 𑀕𑀡𑁂 𑀏𑀢𑀤𑀯𑁄𑀘𑀼𑀁 𑁋 ‘‘𑀪𑀕𑀯𑀸 ¶ 𑀅𑀫𑁆𑀳𑀸𑀓𑀁 𑀕𑀸𑀫𑀓𑁆𑀔𑁂𑀢𑁆𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀦 𑀫𑀬𑀁 𑀤𑀲𑁆𑀲𑀸𑀫 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀪𑀸𑀕’’𑀦𑁆𑀢𑀺.

𑁨𑁩𑁭. 𑀏𑀯𑀁 𑀯𑀼𑀢𑁆𑀢𑁂 𑀤𑁄𑀡𑁄 𑀩𑁆𑀭𑀸𑀳𑁆𑀫𑀡𑁄 𑀢𑁂 𑀲𑀗𑁆𑀖𑁂 𑀕𑀡𑁂 𑀏𑀢𑀤𑀯𑁄𑀘 𑁋

‘‘𑀲𑀼𑀡𑀦𑁆𑀢𑀼 ¶ 𑀪𑁄𑀦𑁆𑀢𑁄 𑀫𑀫 𑀏𑀓𑀯𑀸𑀘𑀁,

𑀅𑀫𑁆𑀳𑀸𑀓 [𑀙𑀦𑁆𑀤𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀦𑀺𑀕𑁆𑀕𑀳𑀻𑀢𑀮𑁄𑀧𑁄]; 𑀩𑀼𑀤𑁆𑀥𑁄 𑀅𑀳𑀼 𑀔𑀦𑁆𑀢𑀺𑀯𑀸𑀤𑁄;

𑀦 ¶ ¶ 𑀳𑀺 𑀲𑀸𑀥𑀼 𑀬𑀁 𑀉𑀢𑁆𑀢𑀫𑀧𑀼𑀕𑁆𑀕𑀮𑀲𑁆𑀲,

𑀲𑀭𑀻𑀭𑀪𑀸𑀕𑁂 𑀲𑀺𑀬𑀸 𑀲𑀫𑁆𑀧𑀳𑀸𑀭𑁄.

𑀲𑀩𑁆𑀩𑁂𑀯 𑀪𑁄𑀦𑁆𑀢𑁄 𑀲𑀳𑀺𑀢𑀸 𑀲𑀫𑀕𑁆𑀕𑀸,

𑀲𑀫𑁆𑀫𑁄𑀤𑀫𑀸𑀦𑀸 𑀓𑀭𑁄𑀫𑀝𑁆𑀞𑀪𑀸𑀕𑁂;

𑀯𑀺𑀢𑁆𑀣𑀸𑀭𑀺𑀓𑀸 𑀳𑁄𑀦𑁆𑀢𑀼 𑀤𑀺𑀲𑀸𑀲𑀼 𑀣𑀽𑀧𑀸,

𑀩𑀳𑀽 𑀚𑀦𑀸 𑀘𑀓𑁆𑀔𑀼𑀫𑀢𑁄 𑀧𑀲𑀦𑁆𑀦𑀸’’𑀢𑀺.

𑁨𑁩𑁮. ‘‘𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡, 𑀢𑁆𑀯𑀜𑁆𑀜𑁂𑀯 𑀪𑀕𑀯𑀢𑁄 𑀲𑀭𑀻𑀭𑀸𑀦𑀺 𑀅𑀝𑁆𑀞𑀥𑀸 𑀲𑀫𑀁 𑀲𑀯𑀺𑀪𑀢𑁆𑀢𑀁 𑀯𑀺𑀪𑀚𑀸𑀳𑀻’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀤𑁄𑀡𑁄 𑀩𑁆𑀭𑀸𑀳𑁆𑀫𑀡𑁄 𑀢𑁂𑀲𑀁 𑀲𑀗𑁆𑀖𑀸𑀦𑀁 𑀕𑀡𑀸𑀦𑀁 𑀧𑀝𑀺𑀲𑁆𑀲𑀼𑀢𑁆𑀯𑀸 𑀪𑀕𑀯𑀢𑁄 𑀲𑀭𑀻𑀭𑀸𑀦𑀺 𑀅𑀝𑁆𑀞𑀥𑀸 𑀲𑀫𑀁 𑀲𑀼𑀯𑀺𑀪𑀢𑁆𑀢𑀁 𑀯𑀺𑀪𑀚𑀺𑀢𑁆𑀯𑀸 𑀢𑁂 𑀲𑀗𑁆𑀖𑁂 𑀕𑀡𑁂 𑀏𑀢𑀤𑀯𑁄𑀘 𑁋 ‘‘𑀇𑀫𑀁 𑀫𑁂 𑀪𑁄𑀦𑁆𑀢𑁄 𑀢𑀼𑀫𑁆𑀩𑀁 𑀤𑀤𑀦𑁆𑀢𑀼 𑀅𑀳𑀫𑁆𑀧𑀺 𑀢𑀼𑀫𑁆𑀩𑀲𑁆𑀲 𑀣𑀽𑀧𑀜𑁆𑀘 𑀫𑀳𑀜𑁆𑀘 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀅𑀤𑀁𑀲𑀼 𑀔𑁄 𑀢𑁂 𑀤𑁄𑀡𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀢𑀼𑀫𑁆𑀩𑀁.

𑀅𑀲𑁆𑀲𑁄𑀲𑀼𑀁 𑀔𑁄 𑀧𑀺𑀧𑁆𑀧𑀮𑀺𑀯𑀦𑀺𑀬𑀸 [𑀧𑀺𑀧𑁆𑀨𑀮𑀺𑀯𑀦𑀺𑀬𑀸 (𑀲𑁆𑀬𑀸.)] 𑀫𑁄𑀭𑀺𑀬𑀸 𑁋 ‘‘𑀪𑀕𑀯𑀸 𑀓𑀺𑀭 𑀓𑀼𑀲𑀺𑀦𑀸𑀭𑀸𑀬𑀁 𑀧𑀭𑀺𑀦𑀺𑀩𑁆𑀩𑀼𑀢𑁄’’𑀢𑀺. 𑀅𑀣 𑀔𑁄 𑀧𑀺𑀧𑁆𑀧𑀮𑀺𑀯𑀦𑀺𑀬𑀸 𑀫𑁄𑀭𑀺𑀬𑀸 𑀓𑁄𑀲𑀺𑀦𑀸𑀭𑀓𑀸𑀦𑀁 𑀫𑀮𑁆𑀮𑀸𑀦𑀁 𑀤𑀽𑀢𑀁 𑀧𑀸𑀳𑁂𑀲𑀼𑀁 𑁋 ‘‘𑀪𑀕𑀯𑀸𑀧𑀺 𑀔𑀢𑁆𑀢𑀺𑀬𑁄 𑀫𑀬𑀫𑁆𑀧𑀺 𑀔𑀢𑁆𑀢𑀺𑀬𑀸, 𑀫𑀬𑀫𑁆𑀧𑀺 𑀅𑀭𑀳𑀸𑀫 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀪𑀸𑀕𑀁, 𑀫𑀬𑀫𑁆𑀧𑀺 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀣𑀽𑀧𑀜𑁆𑀘 𑀫𑀳𑀜𑁆𑀘 𑀓𑀭𑀺𑀲𑁆𑀲𑀸𑀫𑀸’’𑀢𑀺. ‘‘𑀦𑀢𑁆𑀣𑀺 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀪𑀸𑀕𑁄, 𑀯𑀺𑀪𑀢𑁆𑀢𑀸𑀦𑀺 𑀪𑀕𑀯𑀢𑁄 𑀲𑀭𑀻𑀭𑀸𑀦𑀺. 𑀇𑀢𑁄 𑀅𑀗𑁆𑀕𑀸𑀭𑀁 𑀳𑀭𑀣𑀸’’𑀢𑀺. 𑀢𑁂 𑀢𑀢𑁄 𑀅𑀗𑁆𑀕𑀸𑀭𑀁 𑀳𑀭𑀺𑀁𑀲𑀼 [𑀆𑀳𑀭𑀺𑀁𑀲𑀼 (𑀲𑁆𑀬𑀸. 𑀓.)].

𑀥𑀸𑀢𑀼𑀣𑀽𑀧𑀧𑀽𑀚𑀸

𑁨𑁩𑁯. 𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀭𑀸𑀚𑀕𑀳𑁂 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀣𑀽𑀧𑀜𑁆𑀘 𑀫𑀳𑀜𑁆𑀘 𑀅𑀓𑀸𑀲𑀺. 𑀯𑁂𑀲𑀸𑀮𑀺𑀓𑀸𑀧𑀺 ¶ 𑀮𑀺𑀘𑁆𑀙𑀯𑀻 𑀯𑁂𑀲𑀸𑀮𑀺𑀬𑀁 ¶ 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀣𑀽𑀧𑀜𑁆𑀘 𑀫𑀳𑀜𑁆𑀘 𑀅𑀓𑀁𑀲𑀼. 𑀓𑀧𑀺𑀮𑀯𑀢𑁆𑀣𑀼𑀯𑀸𑀲𑀻𑀧𑀺 𑀲𑀓𑁆𑀬𑀸 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀣𑀽𑀧𑀜𑁆𑀘 𑀫𑀳𑀜𑁆𑀘 𑀅𑀓𑀁𑀲𑀼. 𑀅𑀮𑁆𑀮𑀓𑀧𑁆𑀧𑀓𑀸𑀧𑀺 𑀩𑀼𑀮𑀬𑁄 𑀅𑀮𑁆𑀮𑀓𑀧𑁆𑀧𑁂 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀣𑀽𑀧𑀜𑁆𑀘 𑀫𑀳𑀜𑁆𑀘 𑀅𑀓𑀁𑀲𑀼. 𑀭𑀸𑀫𑀕𑀸𑀫𑀓𑀸𑀧𑀺 𑀓𑁄𑀴𑀺𑀬𑀸 𑀭𑀸𑀫𑀕𑀸𑀫𑁂 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀣𑀽𑀧𑀜𑁆𑀘 𑀫𑀳𑀜𑁆𑀘 𑀅𑀓𑀁𑀲𑀼. 𑀯𑁂𑀝𑁆𑀞𑀤𑀻𑀧𑀓𑁄𑀧𑀺 𑀩𑁆𑀭𑀸𑀳𑁆𑀫𑀡𑁄 𑀯𑁂𑀝𑁆𑀞𑀤𑀻𑀧𑁂 𑀪𑀕𑀯𑀢𑁄 ¶ 𑀲𑀭𑀻𑀭𑀸𑀦𑀁 𑀣𑀽𑀧𑀜𑁆𑀘 𑀫𑀳𑀜𑁆𑀘 𑀅𑀓𑀸𑀲𑀺. 𑀧𑀸𑀯𑁂𑀬𑁆𑀬𑀓𑀸𑀧𑀺 𑀫𑀮𑁆𑀮𑀸 𑀧𑀸𑀯𑀸𑀬𑀁 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀣𑀽𑀧𑀜𑁆𑀘 𑀫𑀳𑀜𑁆𑀘 𑀅𑀓𑀁𑀲𑀼. 𑀓𑁄𑀲𑀺𑀦𑀸𑀭𑀓𑀸𑀧𑀺 𑀫𑀮𑁆𑀮𑀸 𑀓𑀼𑀲𑀺𑀦𑀸𑀭𑀸𑀬𑀁 𑀪𑀕𑀯𑀢𑁄 𑀲𑀭𑀻𑀭𑀸𑀦𑀁 𑀣𑀽𑀧𑀜𑁆𑀘 𑀫𑀳𑀜𑁆𑀘 𑀅𑀓𑀁𑀲𑀼. 𑀤𑁄𑀡𑁄𑀧𑀺 𑀩𑁆𑀭𑀸𑀳𑁆𑀫𑀡𑁄 𑀢𑀼𑀫𑁆𑀩𑀲𑁆𑀲 𑀣𑀽𑀧𑀜𑁆𑀘 𑀫𑀳𑀜𑁆𑀘 𑀅𑀓𑀸𑀲𑀺. 𑀧𑀺𑀧𑁆𑀧𑀮𑀺𑀯𑀦𑀺𑀬𑀸𑀧𑀺 𑀫𑁄𑀭𑀺𑀬𑀸 𑀧𑀺𑀧𑁆𑀧𑀮𑀺𑀯𑀦𑁂 ¶ 𑀅𑀗𑁆𑀕𑀸𑀭𑀸𑀦𑀁 𑀣𑀽𑀧𑀜𑁆𑀘 𑀫𑀳𑀜𑁆𑀘 𑀅𑀓𑀁𑀲𑀼. 𑀇𑀢𑀺 𑀅𑀝𑁆𑀞 𑀲𑀭𑀻𑀭𑀣𑀽𑀧𑀸 𑀦𑀯𑀫𑁄 𑀢𑀼𑀫𑁆𑀩𑀣𑀽𑀧𑁄 𑀤𑀲𑀫𑁄 𑀅𑀗𑁆𑀕𑀸𑀭𑀣𑀽𑀧𑁄. 𑀏𑀯𑀫𑁂𑀢𑀁 𑀪𑀽𑀢𑀧𑀼𑀩𑁆𑀩𑀦𑁆𑀢𑀺.

𑁨𑁪𑁦. 𑀅𑀝𑁆𑀞𑀤𑁄𑀡𑀁 𑀘𑀓𑁆𑀔𑀼𑀫𑀢𑁄 𑀲𑀭𑀻𑀭𑀁, 𑀲𑀢𑁆𑀢𑀤𑁄𑀡𑀁 𑀚𑀫𑁆𑀩𑀼𑀤𑀻𑀧𑁂 𑀫𑀳𑁂𑀦𑁆𑀢𑀺.

𑀏𑀓𑀜𑁆𑀘 𑀤𑁄𑀡𑀁 𑀧𑀼𑀭𑀺𑀲𑀯𑀭𑀼𑀢𑁆𑀢𑀫𑀲𑁆𑀲, 𑀭𑀸𑀫𑀕𑀸𑀫𑁂 𑀦𑀸𑀕𑀭𑀸𑀚𑀸 𑀫𑀳𑁂𑀢𑀺.

𑀏𑀓𑀸𑀳𑀺 𑀤𑀸𑀞𑀸 𑀢𑀺𑀤𑀺𑀯𑁂𑀳𑀺 𑀧𑀽𑀚𑀺𑀢𑀸, 𑀏𑀓𑀸 𑀧𑀦 𑀕𑀦𑁆𑀥𑀸𑀭𑀧𑀼𑀭𑁂 𑀫𑀳𑀻𑀬𑀢𑀺;

𑀓𑀸𑀮𑀺𑀗𑁆𑀕𑀭𑀜𑁆𑀜𑁄 𑀯𑀺𑀚𑀺𑀢𑁂 𑀧𑀼𑀦𑁂𑀓𑀁, 𑀏𑀓𑀁 𑀧𑀦 𑀦𑀸𑀕𑀭𑀸𑀚𑀸 𑀫𑀳𑁂𑀢𑀺.

𑀢𑀲𑁆𑀲𑁂𑀯 ¶ 𑀢𑁂𑀚𑁂𑀦 𑀅𑀬𑀁 𑀯𑀲𑀼𑀦𑁆𑀥𑀭𑀸,

𑀆𑀬𑀸𑀕𑀲𑁂𑀝𑁆𑀞𑁂𑀳𑀺 𑀫𑀳𑀻 𑀅𑀮𑀗𑁆𑀓𑀢𑀸;

𑀏𑀯𑀁 𑀇𑀫𑀁 𑀘𑀓𑁆𑀔𑀼𑀫𑀢𑁄 𑀲𑀭𑀻𑀭𑀁,

𑀲𑀼𑀲𑀓𑁆𑀓𑀢𑀁 𑀲𑀓𑁆𑀓𑀢𑀲𑀓𑁆𑀓𑀢𑁂𑀳𑀺.

𑀤𑁂𑀯𑀺𑀦𑁆𑀤𑀦𑀸𑀕𑀺𑀦𑁆𑀤𑀦𑀭𑀺𑀦𑁆𑀤𑀧𑀽𑀚𑀺𑀢𑁄 ¶ ,

𑀫𑀦𑀼𑀲𑁆𑀲𑀺𑀦𑁆𑀤𑀲𑁂𑀝𑁆𑀞𑁂𑀳𑀺 𑀢𑀣𑁂𑀯 𑀧𑀽𑀚𑀺𑀢𑁄;

𑀢𑀁 𑀯𑀦𑁆𑀤𑀣 [𑀢𑀁 𑀢𑀁 𑀯𑀦𑁆𑀤𑀣 (𑀲𑁆𑀬𑀸.)] 𑀧𑀜𑁆𑀚𑀮𑀺𑀓𑀸 𑀮𑀪𑀺𑀢𑁆𑀯𑀸,

𑀩𑀼𑀤𑁆𑀥𑁄 𑀳𑀯𑁂 𑀓𑀧𑁆𑀧𑀲𑀢𑁂𑀳𑀺 𑀤𑀼𑀮𑁆𑀮𑀪𑁄𑀢𑀺.

𑀘𑀢𑁆𑀢𑀸𑀮𑀻𑀲 𑀲𑀫𑀸 𑀤𑀦𑁆𑀢𑀸, 𑀓𑁂𑀲𑀸 𑀮𑁄𑀫𑀸 𑀘 𑀲𑀩𑁆𑀩𑀲𑁄;

𑀤𑁂𑀯𑀸 𑀳𑀭𑀺𑀁𑀲𑀼 𑀏𑀓𑁂𑀓𑀁, 𑀘𑀓𑁆𑀓𑀯𑀸𑀴𑀧𑀭𑀫𑁆𑀧𑀭𑀸𑀢𑀺.

𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀢𑀢𑀺𑀬𑀁.

𑁪. 𑀫𑀳𑀸𑀲𑀼𑀤𑀲𑁆𑀲𑀦𑀲𑀼𑀢𑁆𑀢𑀁

𑁨𑁪𑁧. 𑀏𑀯𑀁 ¶ ¶ ¶ ¶ 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑀼𑀲𑀺𑀦𑀸𑀭𑀸𑀬𑀁 𑀯𑀺𑀳𑀭𑀢𑀺 𑀉𑀧𑀯𑀢𑁆𑀢𑀦𑁂 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑁂 𑀅𑀦𑁆𑀢𑀭𑁂𑀦 𑀬𑀫𑀓𑀲𑀸𑀮𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀫𑀸, 𑀪𑀦𑁆𑀢𑁂, 𑀪𑀕𑀯𑀸 𑀇𑀫𑀲𑁆𑀫𑀺𑀁 𑀔𑀼𑀤𑁆𑀤𑀓𑀦𑀕𑀭𑀓𑁂 𑀉𑀚𑁆𑀚𑀗𑁆𑀕𑀮𑀦𑀕𑀭𑀓𑁂 𑀲𑀸𑀔𑀸𑀦𑀕𑀭𑀓𑁂 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀲𑀦𑁆𑀢𑀺, 𑀪𑀦𑁆𑀢𑁂, 𑀅𑀜𑁆𑀜𑀸𑀦𑀺 𑀫𑀳𑀸𑀦𑀕𑀭𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀫𑁆𑀧𑀸, 𑀭𑀸𑀚𑀕𑀳𑀁, 𑀲𑀸𑀯𑀢𑁆𑀣𑀺, 𑀲𑀸𑀓𑁂𑀢𑀁, 𑀓𑁄𑀲𑀫𑁆𑀩𑀻, 𑀩𑀸𑀭𑀸𑀡𑀲𑀻; 𑀏𑀢𑁆𑀣 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀼. 𑀏𑀢𑁆𑀣 𑀩𑀳𑀽 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑀸 𑀢𑀣𑀸𑀕𑀢𑁂 𑀅𑀪𑀺𑀧𑁆𑀧𑀲𑀦𑁆𑀦𑀸, 𑀢𑁂 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀧𑀽𑀚𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺.

𑁨𑁪𑁨. ‘‘𑀫𑀸 𑀳𑁂𑀯𑀁, 𑀆𑀦𑀦𑁆𑀤, 𑀅𑀯𑀘; 𑀫𑀸 𑀳𑁂𑀯𑀁, 𑀆𑀦𑀦𑁆𑀤, 𑀅𑀯𑀘 𑁋 𑀔𑀼𑀤𑁆𑀤𑀓𑀦𑀕𑀭𑀓𑀁 𑀉𑀚𑁆𑀚𑀗𑁆𑀕𑀮𑀦𑀕𑀭𑀓𑀁 𑀲𑀸𑀔𑀸𑀦𑀕𑀭𑀓’’𑀦𑁆𑀢𑀺.

𑀓𑀼𑀲𑀸𑀯𑀢𑀻𑀭𑀸𑀚𑀥𑀸𑀦𑀻

‘‘𑀪𑀽𑀢𑀧𑀼𑀩𑁆𑀩𑀁, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀦𑀸𑀫 𑀅𑀳𑁄𑀲𑀺 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄 [𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑁄 (𑀓.), 𑀘𑀓𑁆𑀓𑀯𑀢𑁆𑀢𑀻𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 (𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢)] 𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑁄 ¶ . 𑀭𑀜𑁆𑀜𑁄, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀅𑀬𑀁 𑀓𑀼𑀲𑀺𑀦𑀸𑀭𑀸 𑀓𑀼𑀲𑀸𑀯𑀢𑀻 𑀦𑀸𑀫 𑀭𑀸𑀚𑀥𑀸𑀦𑀻 𑀅𑀳𑁄𑀲𑀺. 𑀧𑀼𑀭𑀢𑁆𑀣𑀺𑀫𑁂𑀦 𑀘 𑀧𑀘𑁆𑀙𑀺𑀫𑁂𑀦 𑀘 𑀤𑁆𑀯𑀸𑀤𑀲𑀬𑁄𑀚𑀦𑀸𑀦𑀺 𑀆𑀬𑀸𑀫𑁂𑀦, 𑀉𑀢𑁆𑀢𑀭𑁂𑀦 𑀘 𑀤𑀓𑁆𑀔𑀺𑀡𑁂𑀦 𑀘 𑀲𑀢𑁆𑀢𑀬𑁄𑀚𑀦𑀸𑀦𑀺 𑀯𑀺𑀢𑁆𑀣𑀸𑀭𑁂𑀦. 𑀓𑀼𑀲𑀸𑀯𑀢𑀻, 𑀆𑀦𑀦𑁆𑀤, 𑀭𑀸𑀚𑀥𑀸𑀦𑀻 𑀇𑀤𑁆𑀥𑀸 𑀘𑁂𑀯 𑀅𑀳𑁄𑀲𑀺 𑀨𑀻𑀢𑀸 𑀘 𑀩𑀳𑀼𑀚𑀦𑀸 𑀘 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀸 𑀘 𑀲𑀼𑀪𑀺𑀓𑁆𑀔𑀸 𑀘. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤 ¶ , 𑀤𑁂𑀯𑀸𑀦𑀁 𑀆𑀴𑀓𑀫𑀦𑁆𑀤𑀸 𑀦𑀸𑀫 𑀭𑀸𑀚𑀥𑀸𑀦𑀻 𑀇𑀤𑁆𑀥𑀸 𑀘𑁂𑀯 𑀳𑁄𑀢𑀺 𑀨𑀻𑀢𑀸 𑀘 [𑀇𑀤𑁆𑀥𑀸 𑀘𑁂𑀯 𑀅𑀳𑁄𑀲𑀺 𑀨𑀻𑀢𑀸 𑀘 (𑀲𑁆𑀬𑀸.)] 𑀩𑀳𑀼𑀚𑀦𑀸 𑀘 𑀆𑀓𑀺𑀡𑁆𑀡𑀬𑀓𑁆𑀔𑀸 𑀘 𑀲𑀼𑀪𑀺𑀓𑁆𑀔𑀸 𑀘; 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀓𑀼𑀲𑀸𑀯𑀢𑀻 𑀭𑀸𑀚𑀥𑀸𑀦𑀻 𑀇𑀤𑁆𑀥𑀸 𑀘𑁂𑀯 𑀅𑀳𑁄𑀲𑀺 𑀨𑀻𑀢𑀸 𑀘 𑀩𑀳𑀼𑀚𑀦𑀸 𑀘 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀸 𑀘 𑀲𑀼𑀪𑀺𑀓𑁆𑀔𑀸 𑀘. 𑀓𑀼𑀲𑀸𑀯𑀢𑀻, 𑀆𑀦𑀦𑁆𑀤 ¶ , 𑀭𑀸𑀚𑀥𑀸𑀦𑀻 𑀤𑀲𑀳𑀺 𑀲𑀤𑁆𑀤𑁂𑀳𑀺 𑀅𑀯𑀺𑀯𑀺𑀢𑁆𑀢𑀸 𑀅𑀳𑁄𑀲𑀺 𑀤𑀺𑀯𑀸 𑀘𑁂𑀯 𑀭𑀢𑁆𑀢𑀺𑀜𑁆𑀘, 𑀲𑁂𑀬𑁆𑀬𑀣𑀺𑀤𑀁 𑁋 𑀳𑀢𑁆𑀣𑀺𑀲𑀤𑁆𑀤𑁂𑀦 𑀅𑀲𑁆𑀲𑀲𑀤𑁆𑀤𑁂𑀦 𑀭𑀣𑀲𑀤𑁆𑀤𑁂𑀦 𑀪𑁂𑀭𑀺𑀲𑀤𑁆𑀤𑁂𑀦 𑀫𑀼𑀤𑀺𑀗𑁆𑀕𑀲𑀤𑁆𑀤𑁂𑀦 𑀯𑀻𑀡𑀸𑀲𑀤𑁆𑀤𑁂𑀦 𑀕𑀻𑀢𑀲𑀤𑁆𑀤𑁂𑀦 𑀲𑀗𑁆𑀔𑀲𑀤𑁆𑀤𑁂𑀦 ¶ 𑀲𑀫𑁆𑀫𑀲𑀤𑁆𑀤𑁂𑀦 𑀧𑀸𑀡𑀺𑀢𑀸𑀴𑀲𑀤𑁆𑀤𑁂𑀦 ‘𑀅𑀲𑁆𑀦𑀸𑀣 𑀧𑀺𑀯𑀣 𑀔𑀸𑀤𑀣𑀸’𑀢𑀺 𑀤𑀲𑀫𑁂𑀦 𑀲𑀤𑁆𑀤𑁂𑀦.

‘‘𑀓𑀼𑀲𑀸𑀯𑀢𑀻, 𑀆𑀦𑀦𑁆𑀤, 𑀭𑀸𑀚𑀥𑀸𑀦𑀻 𑀲𑀢𑁆𑀢𑀳𑀺 𑀧𑀸𑀓𑀸𑀭𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀸 𑀅𑀳𑁄𑀲𑀺. 𑀏𑀓𑁄 𑀧𑀸𑀓𑀸𑀭𑁄 𑀲𑁄𑀯𑀡𑁆𑀡𑀫𑀬𑁄, 𑀏𑀓𑁄 𑀭𑀽𑀧𑀺𑀬𑀫𑀬𑁄, 𑀏𑀓𑁄 𑀯𑁂𑀴𑀼𑀭𑀺𑀬𑀫𑀬𑁄, 𑀏𑀓𑁄 𑀨𑀮𑀺𑀓𑀫𑀬𑁄, 𑀏𑀓𑁄 𑀮𑁄𑀳𑀺𑀢𑀗𑁆𑀓𑀫𑀬𑁄 ¶ [𑀮𑁄𑀳𑀺𑀢𑀗𑁆𑀕𑀫𑀬𑁄 (𑀓.), 𑀮𑁄𑀳𑀺𑀢𑀓𑀫𑀬𑁄 (𑀩𑁆𑀬𑀸𑀓𑀭𑀡𑁂𑀲𑀼)], 𑀏𑀓𑁄 𑀫𑀲𑀸𑀭𑀕𑀮𑁆𑀮𑀫𑀬𑁄, 𑀏𑀓𑁄 𑀲𑀩𑁆𑀩𑀭𑀢𑀦𑀫𑀬𑁄. 𑀓𑀼𑀲𑀸𑀯𑀢𑀺𑀬𑀸, 𑀆𑀦𑀦𑁆𑀤, 𑀭𑀸𑀚𑀥𑀸𑀦𑀺𑀬𑀸 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑀤𑁆𑀯𑀸𑀭𑀸𑀦𑀺 𑀅𑀳𑁂𑀲𑀼𑀁. 𑀏𑀓𑀁 𑀤𑁆𑀯𑀸𑀭𑀁 𑀲𑁄𑀯𑀡𑁆𑀡𑀫𑀬𑀁, 𑀏𑀓𑀁 𑀭𑀽𑀧𑀺𑀬𑀫𑀬𑀁, 𑀏𑀓𑀁 𑀯𑁂𑀴𑀼𑀭𑀺𑀬𑀫𑀬𑀁, 𑀏𑀓𑀁 𑀨𑀮𑀺𑀓𑀫𑀬𑀁 ¶ . 𑀏𑀓𑁂𑀓𑀲𑁆𑀫𑀺𑀁 𑀤𑁆𑀯𑀸𑀭𑁂 𑀲𑀢𑁆𑀢 𑀲𑀢𑁆𑀢 𑀏𑀲𑀺𑀓𑀸 𑀦𑀺𑀔𑀸𑀢𑀸 𑀅𑀳𑁂𑀲𑀼𑀁 𑀢𑀺𑀧𑁄𑀭𑀺𑀲𑀗𑁆𑀕𑀸 𑀢𑀺𑀧𑁄𑀭𑀺𑀲𑀦𑀺𑀔𑀸𑀢𑀸 𑀤𑁆𑀯𑀸𑀤𑀲𑀧𑁄𑀭𑀺𑀲𑀸 𑀉𑀩𑁆𑀩𑁂𑀥𑁂𑀦. 𑀏𑀓𑀸 𑀏𑀲𑀺𑀓𑀸 𑀲𑁄𑀯𑀡𑁆𑀡𑀫𑀬𑀸, 𑀏𑀓𑀸 𑀭𑀽𑀧𑀺𑀬𑀫𑀬𑀸, 𑀏𑀓𑀸 𑀯𑁂𑀴𑀼𑀭𑀺𑀬𑀫𑀬𑀸, 𑀏𑀓𑀸 𑀨𑀮𑀺𑀓𑀫𑀬𑀸, 𑀏𑀓𑀸 𑀮𑁄𑀳𑀺𑀢𑀗𑁆𑀓𑀫𑀬𑀸, 𑀏𑀓𑀸 𑀫𑀲𑀸𑀭𑀕𑀮𑁆𑀮𑀫𑀬𑀸, 𑀏𑀓𑀸 𑀲𑀩𑁆𑀩𑀭𑀢𑀦𑀫𑀬𑀸. 𑀓𑀼𑀲𑀸𑀯𑀢𑀻, 𑀆𑀦𑀦𑁆𑀤, 𑀭𑀸𑀚𑀥𑀸𑀦𑀻 𑀲𑀢𑁆𑀢𑀳𑀺 𑀢𑀸𑀮𑀧𑀦𑁆𑀢𑀻𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀸 𑀅𑀳𑁄𑀲𑀺. 𑀏𑀓𑀸 𑀢𑀸𑀮𑀧𑀦𑁆𑀢𑀺 𑀲𑁄𑀯𑀡𑁆𑀡𑀫𑀬𑀸, 𑀏𑀓𑀸 𑀭𑀽𑀧𑀺𑀬𑀫𑀬𑀸, 𑀏𑀓𑀸 𑀯𑁂𑀴𑀼𑀭𑀺𑀬𑀫𑀬𑀸, 𑀏𑀓𑀸 𑀨𑀮𑀺𑀓𑀫𑀬𑀸, 𑀏𑀓𑀸 𑀮𑁄𑀳𑀺𑀢𑀗𑁆𑀓𑀫𑀬𑀸, 𑀏𑀓𑀸 𑀫𑀲𑀸𑀭𑀕𑀮𑁆𑀮𑀫𑀬𑀸, 𑀏𑀓𑀸 𑀲𑀩𑁆𑀩𑀭𑀢𑀦𑀫𑀬𑀸. 𑀲𑁄𑀯𑀡𑁆𑀡𑀫𑀬𑀲𑁆𑀲 𑀢𑀸𑀮𑀲𑁆𑀲 𑀲𑁄𑀯𑀡𑁆𑀡𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺, 𑀭𑀽𑀧𑀺𑀬𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀭𑀽𑀧𑀺𑀬𑀫𑀬𑀲𑁆𑀲 𑀢𑀸𑀮𑀲𑁆𑀲 𑀭𑀽𑀧𑀺𑀬𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺, 𑀲𑁄𑀯𑀡𑁆𑀡𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀯𑁂𑀴𑀼𑀭𑀺𑀬𑀫𑀬𑀲𑁆𑀲 𑀢𑀸𑀮𑀲𑁆𑀲 𑀯𑁂𑀴𑀼𑀭𑀺𑀬𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺, 𑀨𑀮𑀺𑀓𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀨𑀮𑀺𑀓𑀫𑀬𑀲𑁆𑀲 𑀢𑀸𑀮𑀲𑁆𑀲 𑀨𑀮𑀺𑀓𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺, 𑀯𑁂𑀴𑀼𑀭𑀺𑀬𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀮𑁄𑀳𑀺𑀢𑀗𑁆𑀓𑀫𑀬𑀲𑁆𑀲 𑀢𑀸𑀮𑀲𑁆𑀲 𑀮𑁄𑀳𑀺𑀢𑀗𑁆𑀓𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺, 𑀫𑀲𑀸𑀭𑀕𑀮𑁆𑀮𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀫𑀲𑀸𑀭𑀕𑀮𑁆𑀮𑀫𑀬𑀲𑁆𑀲 𑀢𑀸𑀮𑀲𑁆𑀲 𑀫𑀲𑀸𑀭𑀕𑀮𑁆𑀮𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺, 𑀮𑁄𑀳𑀺𑀢𑀗𑁆𑀓𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀲𑀩𑁆𑀩𑀭𑀢𑀦𑀫𑀬𑀲𑁆𑀲 𑀢𑀸𑀮𑀲𑁆𑀲 𑀲𑀩𑁆𑀩𑀭𑀢𑀦𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺, 𑀲𑀩𑁆𑀩𑀭𑀢𑀦𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀢𑀸𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀢𑀸𑀮𑀧𑀦𑁆𑀢𑀻𑀦𑀁 𑀯𑀸𑀢𑁂𑀭𑀺𑀢𑀸𑀦𑀁 𑀲𑀤𑁆𑀤𑁄 𑀅𑀳𑁄𑀲𑀺 𑀯𑀕𑁆𑀕𑀼 𑀘 𑀭𑀚𑀦𑀻𑀬𑁄 𑀘 𑀔𑀫𑀦𑀻𑀬𑁄 [𑀓𑀫𑀦𑀻𑀬𑁄 (𑀲𑀻. 𑀲𑁆𑀬𑀸. 𑀧𑀻.)] 𑀘 𑀫𑀤𑀦𑀻𑀬𑁄 𑀘. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀧𑀜𑁆𑀘𑀗𑁆𑀕𑀺𑀓𑀲𑁆𑀲 𑀢𑀽𑀭𑀺𑀬𑀲𑁆𑀲 𑀲𑀼𑀯𑀺𑀦𑀻𑀢𑀲𑁆𑀲 𑀲𑀼𑀧𑁆𑀧𑀝𑀺𑀢𑀸𑀴𑀺𑀢𑀲𑁆𑀲 𑀲𑀼𑀓𑀼𑀲𑀮𑁂𑀳𑀺 𑀲𑀫𑀦𑁆𑀦𑀸𑀳𑀢𑀲𑁆𑀲 𑀲𑀤𑁆𑀤𑁄 𑀳𑁄𑀢𑀺 𑀯𑀕𑁆𑀕𑀼 𑀘 ¶ 𑀭𑀚𑀦𑀻𑀬𑁄 𑀘 𑀔𑀫𑀦𑀻𑀬𑁄 𑀘 𑀫𑀤𑀦𑀻𑀬𑁄 𑀘 ¶ , 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀢𑀸𑀲𑀁 𑀢𑀸𑀮𑀧𑀦𑁆𑀢𑀻𑀦𑀁 𑀯𑀸𑀢𑁂𑀭𑀺𑀢𑀸𑀦𑀁 𑀲𑀤𑁆𑀤𑁄 𑀅𑀳𑁄𑀲𑀺 𑀯𑀕𑁆𑀕𑀼 𑀘 𑀭𑀚𑀦𑀻𑀬𑁄 𑀘 𑀔𑀫𑀦𑀻𑀬𑁄 𑀘 𑀫𑀤𑀦𑀻𑀬𑁄 𑀘. 𑀬𑁂 𑀔𑁄 𑀧𑀦𑀸𑀦𑀦𑁆𑀤, 𑀢𑁂𑀦 𑀲𑀫𑀬𑁂𑀦 𑀓𑀼𑀲𑀸𑀯𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀥𑀼𑀢𑁆𑀢𑀸 𑀅𑀳𑁂𑀲𑀼𑀁 𑀲𑁄𑀡𑁆𑀟𑀸 𑀧𑀺𑀧𑀸𑀲𑀸, 𑀢𑁂 𑀢𑀸𑀲𑀁 𑀢𑀸𑀮𑀧𑀦𑁆𑀢𑀻𑀦𑀁 𑀯𑀸𑀢𑁂𑀭𑀺𑀢𑀸𑀦𑀁 𑀲𑀤𑁆𑀤𑁂𑀦 ¶ 𑀧𑀭𑀺𑀘𑀸𑀭𑁂𑀲𑀼𑀁.

𑀘𑀓𑁆𑀓𑀭𑀢𑀦𑀁

𑁨𑁪𑁩. ‘‘𑀭𑀸𑀚𑀸 ¶ , 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑁄 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀳𑁄𑀲𑀺 𑀘𑀢𑀽𑀳𑀺 𑀘 𑀇𑀤𑁆𑀥𑀻𑀳𑀺. 𑀓𑀢𑀫𑁂𑀳𑀺 𑀲𑀢𑁆𑀢𑀳𑀺? 𑀇𑀥𑀸𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀲𑀻𑀲𑀁𑀦𑁆𑀳𑀸𑀢𑀲𑁆𑀲 𑀉𑀧𑁄𑀲𑀣𑀺𑀓𑀲𑁆𑀲 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑀲𑁆𑀲 𑀤𑀺𑀩𑁆𑀩𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺 𑀲𑀳𑀲𑁆𑀲𑀸𑀭𑀁 𑀲𑀦𑁂𑀫𑀺𑀓𑀁 𑀲𑀦𑀸𑀪𑀺𑀓𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁. 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀲𑀼𑀢𑀁 𑀔𑁄 𑀧𑀦𑁂𑀢𑀁 𑁋 ‘‘𑀬𑀲𑁆𑀲 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀲𑁆𑀲 𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀲𑀻𑀲𑀁𑀦𑁆𑀳𑀸𑀢𑀲𑁆𑀲 𑀉𑀧𑁄𑀲𑀣𑀺𑀓𑀲𑁆𑀲 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑀲𑁆𑀲 𑀤𑀺𑀩𑁆𑀩𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀪𑀯𑀢𑀺 𑀲𑀳𑀲𑁆𑀲𑀸𑀭𑀁 𑀲𑀦𑁂𑀫𑀺𑀓𑀁 𑀲𑀦𑀸𑀪𑀺𑀓𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁, 𑀲𑁄 𑀳𑁄𑀢𑀺 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻’’𑀢𑀺. 𑀅𑀲𑁆𑀲𑀁 𑀦𑀼 𑀔𑁄 𑀅𑀳𑀁 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻’𑀢𑀺.

𑁨𑁪𑁪. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀯𑀸𑀫𑁂𑀦 𑀳𑀢𑁆𑀣𑁂𑀦 𑀲𑀼𑀯𑀡𑁆𑀡𑀪𑀺𑀗𑁆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀘𑀓𑁆𑀓𑀭𑀢𑀦𑀁 𑀅𑀩𑁆𑀪𑀼𑀓𑁆𑀓𑀺𑀭𑀺 𑁋 ‘𑀧𑀯𑀢𑁆𑀢𑀢𑀼 𑀪𑀯𑀁 𑀘𑀓𑁆𑀓𑀭𑀢𑀦𑀁, 𑀅𑀪𑀺𑀯𑀺𑀚𑀺𑀦𑀸𑀢𑀼 𑀪𑀯𑀁 𑀘𑀓𑁆𑀓𑀭𑀢𑀦’𑀦𑁆𑀢𑀺. 𑀅𑀣 𑀔𑁄 𑀢𑀁, 𑀆𑀦𑀦𑁆𑀤, 𑀘𑀓𑁆𑀓𑀭𑀢𑀦𑀁 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀧𑀯𑀢𑁆𑀢𑀺 [𑀧𑀯𑀢𑁆𑀢𑀢𑀺 (𑀲𑁆𑀬𑀸. 𑀓.)], 𑀅𑀦𑁆𑀯𑀤𑁂𑀯 [𑀅𑀦𑀼𑀤𑁂𑀯 (𑀲𑁆𑀬𑀸.)] 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬, 𑀬𑀲𑁆𑀫𑀺𑀁 𑀔𑁄 𑀧𑀦𑀸𑀦𑀦𑁆𑀤, 𑀧𑀤𑁂𑀲𑁂 𑀘𑀓𑁆𑀓𑀭𑀢𑀦𑀁 ¶ 𑀧𑀢𑀺𑀝𑁆𑀞𑀸𑀲𑀺, 𑀢𑀢𑁆𑀣 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀯𑀸𑀲𑀁 𑀉𑀧𑀕𑀘𑁆𑀙𑀺 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬. 𑀬𑁂 𑀔𑁄 𑀧𑀦𑀸𑀦𑀦𑁆𑀤, 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀧𑀝𑀺𑀭𑀸𑀚𑀸𑀦𑁄, 𑀢𑁂 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ¶ 𑀏𑀯𑀫𑀸𑀳𑀁𑀲𑀼 𑁋 ‘𑀏𑀳𑀺 𑀔𑁄 𑀫𑀳𑀸𑀭𑀸𑀚, 𑀲𑁆𑀯𑀸𑀕𑀢𑀁 𑀢𑁂 𑀫𑀳𑀸𑀭𑀸𑀚, 𑀲𑀓𑀁 𑀢𑁂 𑀫𑀳𑀸𑀭𑀸𑀚, 𑀅𑀦𑀼𑀲𑀸𑀲 𑀫𑀳𑀸𑀭𑀸𑀚𑀸’𑀢𑀺. 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀏𑀯𑀫𑀸𑀳 𑁋 ‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄, 𑀅𑀤𑀺𑀦𑁆𑀦𑀁 𑀦 𑀆𑀤𑀸𑀢𑀩𑁆𑀩𑀁, 𑀓𑀸𑀫𑁂𑀲𑀼 𑀫𑀺𑀘𑁆𑀙𑀸 𑀦 𑀘𑀭𑀺𑀢𑀩𑁆𑀩𑀸, 𑀫𑀼𑀲𑀸 𑀦 𑀪𑀡𑀺𑀢𑀩𑁆𑀩𑀸, 𑀫𑀚𑁆𑀚𑀁 𑀦 𑀧𑀸𑀢𑀩𑁆𑀩𑀁, 𑀬𑀣𑀸𑀪𑀼𑀢𑁆𑀢𑀜𑁆𑀘 𑀪𑀼𑀜𑁆𑀚𑀣𑀸’𑀢𑀺 ¶ . 𑀬𑁂 𑀔𑁄 𑀧𑀦𑀸𑀦𑀦𑁆𑀤, 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀧𑀝𑀺𑀭𑀸𑀚𑀸𑀦𑁄, 𑀢𑁂 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀅𑀦𑀼𑀬𑀦𑁆𑀢𑀸 𑀅𑀳𑁂𑀲𑀼𑀁. 𑀅𑀣 𑀔𑁄 𑀢𑀁, 𑀆𑀦𑀦𑁆𑀤, 𑀘𑀓𑁆𑀓𑀭𑀢𑀦𑀁 𑀧𑀼𑀭𑀢𑁆𑀣𑀺𑀫𑀁 𑀲𑀫𑀼𑀤𑁆𑀤𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀤𑀓𑁆𑀔𑀺𑀡𑀁 𑀤𑀺𑀲𑀁 𑀧𑀯𑀢𑁆𑀢𑀺…𑀧𑁂… 𑀤𑀓𑁆𑀔𑀺𑀡𑀁 𑀲𑀫𑀼𑀤𑁆𑀤𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀧𑀘𑁆𑀙𑀺𑀫𑀁 𑀤𑀺𑀲𑀁 𑀧𑀯𑀢𑁆𑀢𑀺…𑀧𑁂… 𑀧𑀘𑁆𑀙𑀺𑀫𑀁 𑀲𑀫𑀼𑀤𑁆𑀤𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀉𑀢𑁆𑀢𑀭𑀁 𑀤𑀺𑀲𑀁 𑀧𑀯𑀢𑁆𑀢𑀺, 𑀅𑀦𑁆𑀯𑀤𑁂𑀯 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬. 𑀬𑀲𑁆𑀫𑀺𑀁 𑀔𑁄 𑀧𑀦𑀸𑀦𑀦𑁆𑀤, 𑀧𑀤𑁂𑀲𑁂 𑀘𑀓𑁆𑀓𑀭𑀢𑀦𑀁 𑀧𑀢𑀺𑀝𑁆𑀞𑀸𑀲𑀺, 𑀢𑀢𑁆𑀣 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀯𑀸𑀲𑀁 𑀉𑀧𑀕𑀘𑁆𑀙𑀺 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬. 𑀬𑁂 𑀔𑁄 𑀧𑀦𑀸𑀦𑀦𑁆𑀤, 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀧𑀝𑀺𑀭𑀸𑀚𑀸𑀦𑁄, 𑀢𑁂 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀏𑀳𑀺 𑀔𑁄 𑀫𑀳𑀸𑀭𑀸𑀚, 𑀲𑁆𑀯𑀸𑀕𑀢𑀁 𑀢𑁂 𑀫𑀳𑀸𑀭𑀸𑀚, 𑀲𑀓𑀁 𑀢𑁂 𑀫𑀳𑀸𑀭𑀸𑀚, 𑀅𑀦𑀼𑀲𑀸𑀲 𑀫𑀳𑀸𑀭𑀸𑀚𑀸’𑀢𑀺. 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀏𑀯𑀫𑀸𑀳 𑁋 ‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄, 𑀅𑀤𑀺𑀦𑁆𑀦𑀁 𑀦 𑀆𑀤𑀸𑀢𑀩𑁆𑀩𑀁, 𑀓𑀸𑀫𑁂𑀲𑀼 𑀫𑀺𑀘𑁆𑀙𑀸 𑀦 𑀘𑀭𑀺𑀢𑀩𑁆𑀩𑀸, 𑀫𑀼𑀲𑀸 ¶ 𑀦 𑀪𑀡𑀺𑀢𑀩𑁆𑀩𑀸, 𑀫𑀚𑁆𑀚𑀁 𑀦 𑀧𑀸𑀢𑀩𑁆𑀩𑀁 ¶ , 𑀬𑀣𑀸𑀪𑀼𑀢𑁆𑀢𑀜𑁆𑀘 𑀪𑀼𑀜𑁆𑀚𑀣𑀸’𑀢𑀺. 𑀬𑁂 𑀔𑁄 𑀧𑀦𑀸𑀦𑀦𑁆𑀤, 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀧𑀝𑀺𑀭𑀸𑀚𑀸𑀦𑁄 ¶ , 𑀢𑁂 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀅𑀦𑀼𑀬𑀦𑁆𑀢𑀸 𑀅𑀳𑁂𑀲𑀼𑀁.

𑁨𑁪𑁫. ‘‘𑀅𑀣 𑀔𑁄 𑀢𑀁, 𑀆𑀦𑀦𑁆𑀤, 𑀘𑀓𑁆𑀓𑀭𑀢𑀦𑀁 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀧𑀣𑀯𑀺𑀁 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸 𑀓𑀼𑀲𑀸𑀯𑀢𑀺𑀁 𑀭𑀸𑀚𑀥𑀸𑀦𑀺𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀅𑀦𑁆𑀢𑁂𑀧𑀼𑀭𑀤𑁆𑀯𑀸𑀭𑁂 𑀅𑀢𑁆𑀣𑀓𑀭𑀡𑀧𑀫𑀼𑀔𑁂 𑀅𑀓𑁆𑀔𑀸𑀳𑀢𑀁 𑀫𑀜𑁆𑀜𑁂 𑀅𑀝𑁆𑀞𑀸𑀲𑀺 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀅𑀦𑁆𑀢𑁂𑀧𑀼𑀭𑀁 𑀉𑀧𑀲𑁄𑀪𑀬𑀫𑀸𑀦𑀁. 𑀭𑀜𑁆𑀜𑁄, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀯𑀭𑀽𑀧𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺.

𑀳𑀢𑁆𑀣𑀺𑀭𑀢𑀦𑀁

𑁨𑁪𑁬. ‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀳𑀢𑁆𑀣𑀺𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺 𑀲𑀩𑁆𑀩𑀲𑁂𑀢𑁄 𑀲𑀢𑁆𑀢𑀧𑁆𑀧𑀢𑀺𑀝𑁆𑀞𑁄 𑀇𑀤𑁆𑀥𑀺𑀫𑀸 𑀯𑁂𑀳𑀸𑀲𑀗𑁆𑀕𑀫𑁄 𑀉𑀧𑁄𑀲𑀣𑁄 𑀦𑀸𑀫 𑀦𑀸𑀕𑀭𑀸𑀚𑀸. 𑀢𑀁 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀘𑀺𑀢𑁆𑀢𑀁 𑀧𑀲𑀻𑀤𑀺 𑁋 ‘𑀪𑀤𑁆𑀤𑀓𑀁 𑀯𑀢 𑀪𑁄 𑀳𑀢𑁆𑀣𑀺𑀬𑀸𑀦𑀁, 𑀲𑀘𑁂 𑀤𑀫𑀣𑀁 𑀉𑀧𑁂𑀬𑁆𑀬𑀸’𑀢𑀺. 𑀅𑀣 𑀔𑁄 𑀢𑀁, 𑀆𑀦𑀦𑁆𑀤, 𑀳𑀢𑁆𑀣𑀺𑀭𑀢𑀦𑀁 𑁋 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑀦𑁆𑀥𑀳𑀢𑁆𑀣𑀸𑀚𑀸𑀦𑀺𑀬𑁄 𑀤𑀻𑀖𑀭𑀢𑁆𑀢𑀁 𑀲𑀼𑀧𑀭𑀺𑀤𑀦𑁆𑀢𑁄, 𑀏𑀯𑀫𑁂𑀯 𑀤𑀫𑀣𑀁 𑀉𑀧𑀕𑀘𑁆𑀙𑀺. 𑀪𑀽𑀢𑀧𑀼𑀩𑁆𑀩𑀁, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀢𑀫𑁂𑀯 𑀳𑀢𑁆𑀣𑀺𑀭𑀢𑀦𑀁 𑀯𑀻𑀫𑀁𑀲𑀫𑀸𑀦𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀧𑀣𑀯𑀺𑀁 𑀅𑀦𑀼𑀬𑀸𑀬𑀺𑀢𑁆𑀯𑀸 𑀓𑀼𑀲𑀸𑀯𑀢𑀺𑀁 𑀭𑀸𑀚𑀥𑀸𑀦𑀺𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀧𑀸𑀢𑀭𑀸𑀲𑀫𑀓𑀸𑀲𑀺. 𑀭𑀜𑁆𑀜𑁄, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀯𑀭𑀽𑀧𑀁 𑀳𑀢𑁆𑀣𑀺𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺.

𑀅𑀲𑁆𑀲𑀭𑀢𑀦𑀁

𑁨𑁪𑁭. ‘‘𑀧𑀼𑀦 ¶ 𑀘𑀧𑀭𑀁, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀅𑀲𑁆𑀲𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺 𑀲𑀩𑁆𑀩𑀲𑁂𑀢𑁄 𑀓𑀸𑀴𑀲𑀻𑀲𑁄 𑀫𑀼𑀜𑁆𑀚𑀓𑁂𑀲𑁄 𑀇𑀤𑁆𑀥𑀺𑀫𑀸 𑀯𑁂𑀳𑀸𑀲𑀗𑁆𑀕𑀫𑁄 𑀯𑀮𑀸𑀳𑀓𑁄 𑀦𑀸𑀫 𑀅𑀲𑁆𑀲𑀭𑀸𑀚𑀸. 𑀢𑀁 𑀤𑀺𑀲𑁆𑀯𑀸 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀘𑀺𑀢𑁆𑀢𑀁 𑀧𑀲𑀻𑀤𑀺 𑁋 ‘𑀪𑀤𑁆𑀤𑀓𑀁 𑀯𑀢 𑀪𑁄 𑀅𑀲𑁆𑀲𑀬𑀸𑀦𑀁 𑀲𑀘𑁂 𑀤𑀫𑀣𑀁 𑀉𑀧𑁂𑀬𑁆𑀬𑀸’𑀢𑀺. 𑀅𑀣 ¶ 𑀔𑁄 𑀢𑀁 ¶ , 𑀆𑀦𑀦𑁆𑀤, 𑀅𑀲𑁆𑀲𑀭𑀢𑀦𑀁 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀪𑀤𑁆𑀤𑁄 𑀅𑀲𑁆𑀲𑀸𑀚𑀸𑀦𑀺𑀬𑁄 𑀤𑀻𑀖𑀭𑀢𑁆𑀢𑀁 𑀲𑀼𑀧𑀭𑀺𑀤𑀦𑁆𑀢𑁄, 𑀏𑀯𑀫𑁂𑀯 𑀤𑀫𑀣𑀁 𑀉𑀧𑀕𑀘𑁆𑀙𑀺. 𑀪𑀽𑀢𑀧𑀼𑀩𑁆𑀩𑀁, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀢𑀫𑁂𑀯 𑀅𑀲𑁆𑀲𑀭𑀢𑀦𑀁 𑀯𑀻𑀫𑀁𑀲𑀫𑀸𑀦𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀧𑀣𑀯𑀺𑀁 𑀅𑀦𑀼𑀬𑀸𑀬𑀺𑀢𑁆𑀯𑀸 𑀓𑀼𑀲𑀸𑀯𑀢𑀺𑀁 𑀭𑀸𑀚𑀥𑀸𑀦𑀺𑀁 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀧𑀸𑀢𑀭𑀸𑀲𑀫𑀓𑀸𑀲𑀺. 𑀭𑀜𑁆𑀜𑁄, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀯𑀭𑀽𑀧𑀁 𑀅𑀲𑁆𑀲𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺.

𑀫𑀡𑀺𑀭𑀢𑀦𑀁

𑁨𑁪𑁮. ‘‘𑀧𑀼𑀦 ¶ 𑀘𑀧𑀭𑀁, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀫𑀡𑀺𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺. 𑀲𑁄 𑀅𑀳𑁄𑀲𑀺 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀼𑀪𑁄 𑀚𑀸𑀢𑀺𑀫𑀸 𑀅𑀝𑁆𑀞𑀁𑀲𑁄 𑀲𑀼𑀧𑀭𑀺𑀓𑀫𑁆𑀫𑀓𑀢𑁄 𑀅𑀘𑁆𑀙𑁄 𑀯𑀺𑀧𑁆𑀧𑀲𑀦𑁆𑀦𑁄 𑀅𑀦𑀸𑀯𑀺𑀮𑁄 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑁄. 𑀢𑀲𑁆𑀲 𑀔𑁄 𑀧𑀦𑀸𑀦𑀦𑁆𑀤, 𑀫𑀡𑀺𑀭𑀢𑀦𑀲𑁆𑀲 𑀆𑀪𑀸 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀨𑀼𑀝𑀸 𑀅𑀳𑁄𑀲𑀺. 𑀪𑀽𑀢𑀧𑀼𑀩𑁆𑀩𑀁, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀢𑀫𑁂𑀯 𑀫𑀡𑀺𑀭𑀢𑀦𑀁 𑀯𑀻𑀫𑀁𑀲𑀫𑀸𑀦𑁄 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀫𑀡𑀺𑀁 𑀥𑀚𑀕𑁆𑀕𑀁 𑀆𑀭𑁄𑀧𑁂𑀢𑁆𑀯𑀸 𑀭𑀢𑁆𑀢𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬 𑀧𑀸𑀬𑀸𑀲𑀺. 𑀬𑁂 𑀔𑁄 𑀧𑀦𑀸𑀦𑀦𑁆𑀤, 𑀲𑀫𑀦𑁆𑀢𑀸 𑀕𑀸𑀫𑀸 𑀅𑀳𑁂𑀲𑀼𑀁, 𑀢𑁂 𑀢𑁂𑀦𑁄𑀪𑀸𑀲𑁂𑀦 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀲𑀼𑀁 𑀤𑀺𑀯𑀸𑀢𑀺 𑀫𑀜𑁆𑀜𑀫𑀸𑀦𑀸. 𑀭𑀜𑁆𑀜𑁄, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀯𑀭𑀽𑀧𑀁 𑀫𑀡𑀺𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺.

𑀇𑀢𑁆𑀣𑀺𑀭𑀢𑀦𑀁

𑁨𑁪𑁯. ‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀇𑀢𑁆𑀣𑀺𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸 𑀦𑀸𑀢𑀺𑀤𑀻𑀖𑀸 𑀦𑀸𑀢𑀺𑀭𑀲𑁆𑀲𑀸 𑀦𑀸𑀢𑀺𑀓𑀺𑀲𑀸 𑀦𑀸𑀢𑀺𑀣𑀽𑀮𑀸 𑀦𑀸𑀢𑀺𑀓𑀸𑀴𑀺𑀓𑀸 𑀦𑀸𑀘𑁆𑀘𑁄𑀤𑀸𑀢𑀸 𑀅𑀢𑀺𑀓𑁆𑀓𑀦𑁆𑀢𑀸 𑀫𑀸𑀦𑀼𑀲𑀺𑀯𑀡𑁆𑀡𑀁 [𑀫𑀸𑀦𑀼𑀲𑁆𑀲𑀺𑀯𑀡𑁆𑀡𑀁 (𑀲𑁆𑀬𑀸.)] 𑀅𑀧𑁆𑀧𑀢𑁆𑀢𑀸 𑀤𑀺𑀩𑁆𑀩𑀯𑀡𑁆𑀡𑀁. 𑀢𑀲𑁆𑀲 𑀔𑁄 𑀧𑀦𑀸𑀦𑀦𑁆𑀤, 𑀇𑀢𑁆𑀣𑀺𑀭𑀢𑀦𑀲𑁆𑀲 𑀏𑀯𑀭𑀽𑀧𑁄 𑀓𑀸𑀬𑀲𑀫𑁆𑀨𑀲𑁆𑀲𑁄 ¶ 𑀳𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺 ¶ 𑀦𑀸𑀫 𑀢𑀽𑀮𑀧𑀺𑀘𑀼𑀦𑁄 𑀯𑀸 𑀓𑀧𑁆𑀧𑀸𑀲𑀧𑀺𑀘𑀼𑀦𑁄 𑀯𑀸. 𑀢𑀲𑁆𑀲 𑀔𑁄 𑀧𑀦𑀸𑀦𑀦𑁆𑀤, 𑀇𑀢𑁆𑀣𑀺𑀭𑀢𑀦𑀲𑁆𑀲 𑀲𑀻𑀢𑁂 𑀉𑀡𑁆𑀳𑀸𑀦𑀺 𑀕𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀉𑀡𑁆𑀳𑁂 𑀲𑀻𑀢𑀸𑀦𑀺. 𑀢𑀲𑁆𑀲 𑀔𑁄 𑀧𑀦𑀸𑀦𑀦𑁆𑀤, 𑀇𑀢𑁆𑀣𑀺𑀭𑀢𑀦𑀲𑁆𑀲 𑀓𑀸𑀬𑀢𑁄 𑀘𑀦𑁆𑀤𑀦𑀕𑀦𑁆𑀥𑁄 𑀯𑀸𑀬𑀢𑀺, 𑀫𑀼𑀔𑀢𑁄 𑀉𑀧𑁆𑀧𑀮𑀕𑀦𑁆𑀥𑁄. 𑀢𑀁 𑀔𑁄 𑀧𑀦𑀸𑀦𑀦𑁆𑀤, 𑀇𑀢𑁆𑀣𑀺𑀭𑀢𑀦𑀁 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀧𑀼𑀩𑁆𑀩𑀼𑀝𑁆𑀞𑀸𑀬𑀺𑀦𑀻 𑀅𑀳𑁄𑀲𑀺 𑀧𑀘𑁆𑀙𑀸𑀦𑀺𑀧𑀸𑀢𑀺𑀦𑀻 ¶ 𑀓𑀺𑀗𑁆𑀓𑀸𑀭𑀧𑀝𑀺𑀲𑁆𑀲𑀸𑀯𑀺𑀦𑀻 𑀫𑀦𑀸𑀧𑀘𑀸𑀭𑀺𑀦𑀻 𑀧𑀺𑀬𑀯𑀸𑀤𑀺𑀦𑀻. 𑀢𑀁 𑀔𑁄 𑀧𑀦𑀸𑀦𑀦𑁆𑀤, 𑀇𑀢𑁆𑀣𑀺𑀭𑀢𑀦𑀁 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀫𑀦𑀲𑀸𑀧𑀺 𑀦𑁄 𑀅𑀢𑀺𑀘𑀭𑀺 [𑀅𑀢𑀺𑀘𑀭𑀻 (𑀓.), 𑀅𑀢𑀺𑀘𑀸𑀭𑀻 (𑀲𑀻. 𑀲𑁆𑀬𑀸. 𑀧𑀻.)], 𑀓𑀼𑀢𑁄 𑀧𑀦 𑀓𑀸𑀬𑁂𑀦. 𑀭𑀜𑁆𑀜𑁄, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀯𑀭𑀽𑀧𑀁 𑀇𑀢𑁆𑀣𑀺𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺.

𑀕𑀳𑀧𑀢𑀺𑀭𑀢𑀦𑀁

𑁨𑁫𑁦. ‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀕𑀳𑀧𑀢𑀺𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺. 𑀢𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑀚𑀁 𑀤𑀺𑀩𑁆𑀩𑀘𑀓𑁆𑀔𑀼 𑀧𑀸𑀢𑀼𑀭𑀳𑁄𑀲𑀺 𑀬𑁂𑀦 𑀦𑀺𑀥𑀺𑀁 𑀧𑀲𑁆𑀲𑀢𑀺 𑀲𑀲𑁆𑀲𑀸𑀫𑀺𑀓𑀫𑁆𑀧𑀺 𑀅𑀲𑁆𑀲𑀸𑀫𑀺𑀓𑀫𑁆𑀧𑀺. 𑀲𑁄 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑁆𑀯𑀁, 𑀤𑁂𑀯, 𑀳𑁄𑀳𑀺, 𑀅𑀳𑀁 𑀢𑁂 𑀥𑀦𑁂𑀦 𑀥𑀦𑀓𑀭𑀡𑀻𑀬𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺. 𑀪𑀽𑀢𑀧𑀼𑀩𑁆𑀩𑀁, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀢𑀫𑁂𑀯 𑀕𑀳𑀧𑀢𑀺𑀭𑀢𑀦𑀁 𑀯𑀻𑀫𑀁𑀲𑀫𑀸𑀦𑁄 𑀦𑀸𑀯𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀫𑀚𑁆𑀛𑁂 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀲𑁄𑀢𑀁 𑀑𑀕𑀸𑀳𑀺𑀢𑁆𑀯𑀸 𑀕𑀳𑀧𑀢𑀺𑀭𑀢𑀦𑀁 ¶ 𑀏𑀢𑀤𑀯𑁄𑀘 𑁋 ‘𑀅𑀢𑁆𑀣𑁄 𑀫𑁂, 𑀕𑀳𑀧𑀢𑀺, 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑁂𑀦𑀸’𑀢𑀺. ‘𑀢𑁂𑀦 𑀳𑀺, 𑀫𑀳𑀸𑀭𑀸𑀚, 𑀏𑀓𑀁 𑀢𑀻𑀭𑀁 𑀦𑀸𑀯𑀸 𑀉𑀧𑁂𑀢𑀽’𑀢𑀺. ‘𑀇𑀥𑁂𑀯 𑀫𑁂, 𑀕𑀳𑀧𑀢𑀺, 𑀅𑀢𑁆𑀣𑁄 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑁂𑀦𑀸’𑀢𑀺. 𑀅𑀣 𑀔𑁄 𑀢𑀁, 𑀆𑀦𑀦𑁆𑀤, 𑀕𑀳𑀧𑀢𑀺𑀭𑀢𑀦𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀉𑀤𑀓𑀁 𑀑𑀫𑀲𑀺𑀢𑁆𑀯𑀸 𑀧𑀽𑀭𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀲𑁆𑀲 𑀓𑀼𑀫𑁆𑀪𑀺𑀁 𑀉𑀤𑁆𑀥𑀭𑀺𑀢𑁆𑀯𑀸 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀏𑀢𑀤𑀯𑁄𑀘 ¶ 𑁋 ‘𑀅𑀮𑀫𑁂𑀢𑁆𑀢𑀸𑀯𑀢𑀸 𑀫𑀳𑀸𑀭𑀸𑀚, 𑀓𑀢𑀫𑁂𑀢𑁆𑀢𑀸𑀯𑀢𑀸 𑀫𑀳𑀸𑀭𑀸𑀚, 𑀧𑀽𑀚𑀺𑀢𑀫𑁂𑀢𑁆𑀢𑀸𑀯𑀢𑀸 𑀫𑀳𑀸𑀭𑀸𑀚𑀸’𑀢𑀺? 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀏𑀯𑀫𑀸𑀳 𑁋 ‘𑀅𑀮𑀫𑁂𑀢𑁆𑀢𑀸𑀯𑀢𑀸 𑀕𑀳𑀧𑀢𑀺, 𑀓𑀢𑀫𑁂𑀢𑁆𑀢𑀸𑀯𑀢𑀸 𑀕𑀳𑀧𑀢𑀺, 𑀧𑀽𑀚𑀺𑀢𑀫𑁂𑀢𑁆𑀢𑀸𑀯𑀢𑀸 𑀕𑀳𑀧𑀢𑀻’𑀢𑀺. 𑀭𑀜𑁆𑀜𑁄 ¶ , 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀯𑀭𑀽𑀧𑀁 𑀕𑀳𑀧𑀢𑀺𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺.

𑀧𑀭𑀺𑀡𑀸𑀬𑀓𑀭𑀢𑀦𑀁

𑁨𑁫𑁧. ‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀧𑀭𑀺𑀡𑀸𑀬𑀓𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺 𑀧𑀡𑁆𑀟𑀺𑀢𑁄 𑀯𑀺𑀬𑀢𑁆𑀢𑁄 𑀫𑁂𑀥𑀸𑀯𑀻 𑀧𑀝𑀺𑀩𑀮𑁄 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 ¶ 𑀉𑀧𑀬𑀸𑀧𑁂𑀢𑀩𑁆𑀩𑀁 𑀉𑀧𑀬𑀸𑀧𑁂𑀢𑀼𑀁, 𑀅𑀧𑀬𑀸𑀧𑁂𑀢𑀩𑁆𑀩𑀁 𑀅𑀧𑀬𑀸𑀧𑁂𑀢𑀼𑀁, 𑀞𑀧𑁂𑀢𑀩𑁆𑀩𑀁 𑀞𑀧𑁂𑀢𑀼𑀁. 𑀲𑁄 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀢𑁆𑀯𑀁, 𑀤𑁂𑀯, 𑀳𑁄𑀳𑀺, 𑀅𑀳𑀫𑀦𑀼𑀲𑀸𑀲𑀺𑀲𑁆𑀲𑀸𑀫𑀻’𑀢𑀺. 𑀭𑀜𑁆𑀜𑁄, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀯𑀭𑀽𑀧𑀁 𑀧𑀭𑀺𑀡𑀸𑀬𑀓𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺.

‘‘𑀭𑀸𑀚𑀸, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑁄 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀳𑁄𑀲𑀺.

𑀘𑀢𑀼𑀇𑀤𑁆𑀥𑀺𑀲𑀫𑀦𑁆𑀦𑀸𑀕𑀢𑁄

𑁨𑁫𑁨. ‘‘𑀭𑀸𑀚𑀸, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑁄 𑀘𑀢𑀽𑀳𑀺 𑀇𑀤𑁆𑀥𑀻𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀳𑁄𑀲𑀺. 𑀓𑀢𑀫𑀸𑀳𑀺 𑀘𑀢𑀽𑀳𑀺 𑀇𑀤𑁆𑀥𑀻𑀳𑀺? 𑀇𑀥𑀸𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀅𑀪𑀺𑀭𑀽𑀧𑁄 𑀅𑀳𑁄𑀲𑀺 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀢𑀺𑀯𑀺𑀬 𑀅𑀜𑁆𑀜𑁂𑀳𑀺 𑀫𑀦𑀼𑀲𑁆𑀲𑁂𑀳𑀺. 𑀭𑀸𑀚𑀸, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑁄 𑀇𑀫𑀸𑀬 𑀧𑀞𑀫𑀸𑀬 𑀇𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀅𑀳𑁄𑀲𑀺.

‘‘𑀧𑀼𑀦 𑀘𑀧𑀭𑀁, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀤𑀻𑀖𑀸𑀬𑀼𑀓𑁄 𑀅𑀳𑁄𑀲𑀺 𑀘𑀺𑀭𑀝𑁆𑀞𑀺𑀢𑀺𑀓𑁄 𑀅𑀢𑀺𑀯𑀺𑀬 𑀅𑀜𑁆𑀜𑁂𑀳𑀺 𑀫𑀦𑀼𑀲𑁆𑀲𑁂𑀳𑀺. 𑀭𑀸𑀚𑀸, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑁄 ¶ 𑀇𑀫𑀸𑀬 𑀤𑀼𑀢𑀺𑀬𑀸𑀬 𑀇𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀅𑀳𑁄𑀲𑀺.

‘‘𑀧𑀼𑀦 ¶ 𑀘𑀧𑀭𑀁, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀅𑀧𑁆𑀧𑀸𑀩𑀸𑀥𑁄 𑀅𑀳𑁄𑀲𑀺 𑀅𑀧𑁆𑀧𑀸𑀢𑀗𑁆𑀓𑁄 𑀲𑀫𑀯𑁂𑀧𑀸𑀓𑀺𑀦𑀺𑀬𑀸 𑀕𑀳𑀡𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀦𑀸𑀢𑀺𑀲𑀻𑀢𑀸𑀬 𑀦𑀸𑀘𑁆𑀘𑀼𑀡𑁆𑀳𑀸𑀬 𑀅𑀢𑀺𑀯𑀺𑀬 𑀅𑀜𑁆𑀜𑁂𑀳𑀺 𑀫𑀦𑀼𑀲𑁆𑀲𑁂𑀳𑀺. 𑀭𑀸𑀚𑀸, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑁄 𑀇𑀫𑀸𑀬 𑀢𑀢𑀺𑀬𑀸𑀬 𑀇𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀅𑀳𑁄𑀲𑀺.

‘‘𑀧𑀼𑀦 𑀘𑀧𑀭𑀁 ¶ , 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀧𑀺𑀬𑁄 𑀅𑀳𑁄𑀲𑀺 𑀫𑀦𑀸𑀧𑁄. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀧𑀺𑀢𑀸 𑀧𑀼𑀢𑁆𑀢𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄, 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀧𑀺𑀬𑁄 𑀅𑀳𑁄𑀲𑀺 𑀫𑀦𑀸𑀧𑁄. 𑀭𑀜𑁆𑀜𑁄𑀧𑀺, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀧𑀺𑀬𑀸 𑀅𑀳𑁂𑀲𑀼𑀁 𑀫𑀦𑀸𑀧𑀸. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀧𑀺𑀢𑀼 𑀧𑀼𑀢𑁆𑀢𑀸 𑀧𑀺𑀬𑀸 𑀳𑁄𑀦𑁆𑀢𑀺 𑀫𑀦𑀸𑀧𑀸, 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄𑀧𑀺 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀧𑀺𑀬𑀸 𑀅𑀳𑁂𑀲𑀼𑀁 𑀫𑀦𑀸𑀧𑀸.

‘‘𑀪𑀽𑀢𑀧𑀼𑀩𑁆𑀩𑀁, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀉𑀬𑁆𑀬𑀸𑀦𑀪𑀽𑀫𑀺𑀁 𑀦𑀺𑀬𑁆𑀬𑀸𑀲𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀅𑀢𑀭𑀫𑀸𑀦𑁄, 𑀤𑁂𑀯, 𑀬𑀸𑀳𑀺, 𑀬𑀣𑀸 ¶ 𑀢𑀁 𑀫𑀬𑀁 𑀘𑀺𑀭𑀢𑀭𑀁 𑀧𑀲𑁆𑀲𑁂𑀬𑁆𑀬𑀸𑀫𑀸’𑀢𑀺. 𑀭𑀸𑀚𑀸𑀧𑀺, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑁄 𑀲𑀸𑀭𑀣𑀺𑀁 𑀆𑀫𑀦𑁆𑀢𑁂𑀲𑀺 𑁋 ‘𑀅𑀢𑀭𑀫𑀸𑀦𑁄, 𑀲𑀸𑀭𑀣𑀺, 𑀭𑀣𑀁 𑀧𑁂𑀲𑁂𑀳𑀺, 𑀬𑀣𑀸 𑀅𑀳𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀘𑀺𑀭𑀢𑀭𑀁 𑀧𑀲𑁆𑀲𑁂𑀬𑁆𑀬’𑀦𑁆𑀢𑀺. 𑀭𑀸𑀚𑀸, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑁄 𑀇𑀫𑀸𑀬 𑀘𑀢𑀼𑀢𑁆𑀣𑀺𑀬𑀸 [𑀘𑀢𑀼𑀢𑁆𑀣𑀸𑀬 (𑀲𑁆𑀬𑀸.)] 𑀇𑀤𑁆𑀥𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀅𑀳𑁄𑀲𑀺. 𑀭𑀸𑀚𑀸, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑁄 𑀇𑀫𑀸𑀳𑀺 ¶ 𑀘𑀢𑀽𑀳𑀺 𑀇𑀤𑁆𑀥𑀻𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀳𑁄𑀲𑀺.

𑀥𑀫𑁆𑀫𑀧𑀸𑀲𑀸𑀤𑀧𑁄𑀓𑁆𑀔𑀭𑀡𑀻

𑁨𑁫𑁩. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀇𑀫𑀸𑀲𑀼 𑀢𑀸𑀮𑀦𑁆𑀢𑀭𑀺𑀓𑀸𑀲𑀼 𑀥𑀦𑀼𑀲𑀢𑁂 𑀥𑀦𑀼𑀲𑀢𑁂 𑀧𑁄𑀓𑁆𑀔𑀭𑀡𑀺𑀬𑁄 𑀫𑀸𑀧𑁂𑀬𑁆𑀬’𑀦𑁆𑀢𑀺.

‘‘𑀫𑀸𑀧𑁂𑀲𑀺 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀢𑀸𑀲𑀼 𑀢𑀸𑀮𑀦𑁆𑀢𑀭𑀺𑀓𑀸𑀲𑀼 𑀥𑀦𑀼𑀲𑀢𑁂 𑀥𑀦𑀼𑀲𑀢𑁂 𑀧𑁄𑀓𑁆𑀔𑀭𑀡𑀺𑀬𑁄. 𑀢𑀸 𑀔𑁄 𑀧𑀦𑀸𑀦𑀦𑁆𑀤, 𑀧𑁄𑀓𑁆𑀔𑀭𑀡𑀺𑀬𑁄 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑀇𑀝𑁆𑀞𑀓𑀸𑀳𑀺 𑀘𑀺𑀢𑀸 𑀅𑀳𑁂𑀲𑀼𑀁 𑁋 𑀏𑀓𑀸 𑀇𑀝𑁆𑀞𑀓𑀸 𑀲𑁄𑀯𑀡𑁆𑀡𑀫𑀬𑀸, 𑀏𑀓𑀸 𑀭𑀽𑀧𑀺𑀬𑀫𑀬𑀸, 𑀏𑀓𑀸 𑀯𑁂𑀴𑀼𑀭𑀺𑀬𑀫𑀬𑀸, 𑀏𑀓𑀸 𑀨𑀮𑀺𑀓𑀫𑀬𑀸.

‘‘𑀢𑀸𑀲𑀼 𑀔𑁄 𑀧𑀦𑀸𑀦𑀦𑁆𑀤, 𑀧𑁄𑀓𑁆𑀔𑀭𑀡𑀻𑀲𑀼 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀲𑁄𑀧𑀸𑀦𑀸𑀦𑀺 𑀅𑀳𑁂𑀲𑀼𑀁 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁, 𑀏𑀓𑀁 𑀲𑁄𑀧𑀸𑀦𑀁 𑀲𑁄𑀯𑀡𑁆𑀡𑀫𑀬𑀁 𑀏𑀓𑀁 𑀭𑀽𑀧𑀺𑀬𑀫𑀬𑀁 𑀏𑀓𑀁 𑀯𑁂𑀴𑀼𑀭𑀺𑀬𑀫𑀬𑀁 𑀏𑀓𑀁 𑀨𑀮𑀺𑀓𑀫𑀬𑀁. 𑀲𑁄𑀯𑀡𑁆𑀡𑀫𑀬𑀲𑁆𑀲 ¶ 𑀲𑁄𑀧𑀸𑀦𑀲𑁆𑀲 𑀲𑁄𑀯𑀡𑁆𑀡𑀫𑀬𑀸 ¶ 𑀣𑀫𑁆𑀪𑀸 𑀅𑀳𑁂𑀲𑀼𑀁, 𑀭𑀽𑀧𑀺𑀬𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀭𑀽𑀧𑀺𑀬𑀫𑀬𑀲𑁆𑀲 𑀲𑁄𑀧𑀸𑀦𑀲𑁆𑀲 𑀭𑀽𑀧𑀺𑀬𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁, 𑀲𑁄𑀯𑀡𑁆𑀡𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀯𑁂𑀴𑀼𑀭𑀺𑀬𑀫𑀬𑀲𑁆𑀲 𑀲𑁄𑀧𑀸𑀦𑀲𑁆𑀲 𑀯𑁂𑀴𑀼𑀭𑀺𑀬𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁, 𑀨𑀮𑀺𑀓𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀨𑀮𑀺𑀓𑀫𑀬𑀲𑁆𑀲 𑀲𑁄𑀧𑀸𑀦𑀲𑁆𑀲 𑀨𑀮𑀺𑀓𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁, 𑀯𑁂𑀴𑀼𑀭𑀺𑀬𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀢𑀸 𑀔𑁄 𑀧𑀦𑀸𑀦𑀦𑁆𑀤, 𑀧𑁄𑀓𑁆𑀔𑀭𑀡𑀺𑀬𑁄 𑀤𑁆𑀯𑀻𑀳𑀺 𑀯𑁂𑀤𑀺𑀓𑀸𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀸 𑀅𑀳𑁂𑀲𑀼𑀁 𑀏𑀓𑀸 𑀯𑁂𑀤𑀺𑀓𑀸 𑀲𑁄𑀯𑀡𑁆𑀡𑀫𑀬𑀸, 𑀏𑀓𑀸 𑀭𑀽𑀧𑀺𑀬𑀫𑀬𑀸. 𑀲𑁄𑀯𑀡𑁆𑀡𑀫𑀬𑀸𑀬 𑀯𑁂𑀤𑀺𑀓𑀸𑀬 𑀲𑁄𑀯𑀡𑁆𑀡𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁, 𑀭𑀽𑀧𑀺𑀬𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀭𑀽𑀧𑀺𑀬𑀫𑀬𑀸𑀬 𑀯𑁂𑀤𑀺𑀓𑀸𑀬 𑀭𑀽𑀧𑀺𑀬𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁, 𑀲𑁄𑀯𑀡𑁆𑀡𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀅𑀣 𑀔𑁄, 𑀆𑀦𑀦𑁆𑀤 ¶ , 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀇𑀫𑀸𑀲𑀼 𑀧𑁄𑀓𑁆𑀔𑀭𑀡𑀻𑀲𑀼 𑀏𑀯𑀭𑀽𑀧𑀁 𑀫𑀸𑀮𑀁 𑀭𑁄𑀧𑀸𑀧𑁂𑀬𑁆𑀬𑀁 𑀉𑀧𑁆𑀧𑀮𑀁 𑀧𑀤𑀼𑀫𑀁 𑀓𑀼𑀫𑀼𑀤𑀁 𑀧𑀼𑀡𑁆𑀟𑀭𑀻𑀓𑀁 𑀲𑀩𑁆𑀩𑁄𑀢𑀼𑀓𑀁 𑀲𑀩𑁆𑀩𑀚𑀦𑀲𑁆𑀲 𑀅𑀦𑀸𑀯𑀝’𑀦𑁆𑀢𑀺. 𑀭𑁄𑀧𑀸𑀧𑁂𑀲𑀺 𑀔𑁄 ¶ , 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀢𑀸𑀲𑀼 𑀧𑁄𑀓𑁆𑀔𑀭𑀡𑀻𑀲𑀼 𑀏𑀯𑀭𑀽𑀧𑀁 𑀫𑀸𑀮𑀁 𑀉𑀧𑁆𑀧𑀮𑀁 𑀧𑀤𑀼𑀫𑀁 𑀓𑀼𑀫𑀼𑀤𑀁 𑀧𑀼𑀡𑁆𑀟𑀭𑀻𑀓𑀁 𑀲𑀩𑁆𑀩𑁄𑀢𑀼𑀓𑀁 𑀲𑀩𑁆𑀩𑀚𑀦𑀲𑁆𑀲 𑀅𑀦𑀸𑀯𑀝𑀁.

𑁨𑁫𑁪. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀇𑀫𑀸𑀲𑀁 𑀧𑁄𑀓𑁆𑀔𑀭𑀡𑀻𑀦𑀁 𑀢𑀻𑀭𑁂 𑀦𑁆𑀳𑀸𑀧𑀓𑁂 𑀧𑀼𑀭𑀺𑀲𑁂 𑀞𑀧𑁂𑀬𑁆𑀬𑀁, 𑀬𑁂 𑀆𑀕𑀢𑀸𑀕𑀢𑀁 𑀚𑀦𑀁 𑀦𑁆𑀳𑀸𑀧𑁂𑀲𑁆𑀲𑀦𑁆𑀢𑀻’𑀢𑀺. 𑀞𑀧𑁂𑀲𑀺 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀢𑀸𑀲𑀁 𑀧𑁄𑀓𑁆𑀔𑀭𑀡𑀻𑀦𑀁 𑀢𑀻𑀭𑁂 𑀦𑁆𑀳𑀸𑀧𑀓𑁂 𑀧𑀼𑀭𑀺𑀲𑁂, 𑀬𑁂 𑀆𑀕𑀢𑀸𑀕𑀢𑀁 𑀚𑀦𑀁 𑀦𑁆𑀳𑀸𑀧𑁂𑀲𑀼𑀁.

‘‘𑀅𑀣 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀇𑀫𑀸𑀲𑀁 𑀧𑁄𑀓𑁆𑀔𑀭𑀡𑀻𑀦𑀁 𑀢𑀻𑀭𑁂 𑀏𑀯𑀭𑀽𑀧𑀁 𑀤𑀸𑀦𑀁 𑀧𑀝𑁆𑀞𑀧𑁂𑀬𑁆𑀬𑀁 𑁋 𑀅𑀦𑁆𑀦𑀁 𑀅𑀦𑁆𑀦𑀝𑁆𑀞𑀺𑀓𑀲𑁆𑀲 [𑀅𑀦𑁆𑀦𑀢𑁆𑀣𑀺𑀢𑀲𑁆𑀲 (𑀲𑀻. 𑀲𑁆𑀬𑀸. 𑀓𑀁. 𑀧𑀻.), 𑀏𑀯𑀁 𑀲𑀩𑁆𑀩𑀢𑁆𑀣 𑀧𑀓𑀪𑀺𑀭𑀽𑀧𑁂𑀦𑁂𑀯 𑀤𑀺𑀲𑁆𑀲𑀢𑀺], 𑀧𑀸𑀦𑀁 𑀧𑀸𑀦𑀝𑁆𑀞𑀺𑀓𑀲𑁆𑀲, 𑀯𑀢𑁆𑀣𑀁 𑀯𑀢𑁆𑀣𑀝𑁆𑀞𑀺𑀓𑀲𑁆𑀲, 𑀬𑀸𑀦𑀁 𑀬𑀸𑀦𑀝𑁆𑀞𑀺𑀓𑀲𑁆𑀲, 𑀲𑀬𑀦𑀁 𑀲𑀬𑀦𑀝𑁆𑀞𑀺𑀓𑀲𑁆𑀲, 𑀇𑀢𑁆𑀣𑀺𑀁 𑀇𑀢𑁆𑀣𑀺𑀝𑁆𑀞𑀺𑀓𑀲𑁆𑀲, 𑀳𑀺𑀭𑀜𑁆𑀜𑀁 𑀳𑀺𑀭𑀜𑁆𑀜𑀝𑁆𑀞𑀺𑀓𑀲𑁆𑀲, 𑀲𑀼𑀯𑀡𑁆𑀡𑀁 𑀲𑀼𑀯𑀡𑁆𑀡𑀝𑁆𑀞𑀺𑀓𑀲𑁆𑀲𑀸’𑀢𑀺. 𑀧𑀝𑁆𑀞𑀧𑁂𑀲𑀺 ¶ 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀢𑀸𑀲𑀁 𑀧𑁄𑀓𑁆𑀔𑀭𑀡𑀻𑀦𑀁 𑀢𑀻𑀭𑁂 𑀏𑀯𑀭𑀽𑀧𑀁 𑀤𑀸𑀦𑀁 𑁋 𑀅𑀦𑁆𑀦𑀁 𑀅𑀦𑁆𑀦𑀝𑁆𑀞𑀺𑀓𑀲𑁆𑀲, 𑀧𑀸𑀦𑀁 𑀧𑀸𑀦𑀝𑁆𑀞𑀺𑀓𑀲𑁆𑀲, 𑀯𑀢𑁆𑀣𑀁 𑀯𑀢𑁆𑀣𑀝𑁆𑀞𑀺𑀓𑀲𑁆𑀲, 𑀬𑀸𑀦𑀁 𑀬𑀸𑀦𑀝𑁆𑀞𑀺𑀓𑀲𑁆𑀲, 𑀲𑀬𑀦𑀁 𑀲𑀬𑀦𑀝𑁆𑀞𑀺𑀓𑀲𑁆𑀲, 𑀇𑀢𑁆𑀣𑀺𑀁 𑀇𑀢𑁆𑀣𑀺𑀝𑁆𑀞𑀺𑀓𑀲𑁆𑀲, 𑀳𑀺𑀭𑀜𑁆𑀜𑀁 𑀳𑀺𑀭𑀜𑁆𑀜𑀝𑁆𑀞𑀺𑀓𑀲𑁆𑀲, 𑀲𑀼𑀯𑀡𑁆𑀡𑀁 𑀲𑀼𑀯𑀡𑁆𑀡𑀝𑁆𑀞𑀺𑀓𑀲𑁆𑀲.

𑁨𑁫𑁫. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀧𑀳𑀽𑀢𑀁 𑀲𑀸𑀧𑀢𑁂𑀬𑁆𑀬𑀁 𑀆𑀤𑀸𑀬 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀇𑀤𑀁, 𑀤𑁂𑀯, 𑀧𑀳𑀽𑀢𑀁 ¶ 𑀲𑀸𑀧𑀢𑁂𑀬𑁆𑀬𑀁 𑀤𑁂𑀯𑀜𑁆𑀜𑁂𑀯 𑀉𑀤𑁆𑀤𑀺𑀲𑁆𑀲 𑀆𑀪𑀢𑀁, 𑀢𑀁 𑀤𑁂𑀯𑁄 𑀧𑀝𑀺𑀕𑁆𑀕𑀡𑁆𑀳𑀢𑀽’𑀢𑀺. ‘𑀅𑀮𑀁 𑀪𑁄, 𑀫𑀫𑀧𑀺𑀤𑀁 𑀧𑀳𑀽𑀢𑀁 𑀲𑀸𑀧𑀢𑁂𑀬𑁆𑀬𑀁 𑀥𑀫𑁆𑀫𑀺𑀓𑁂𑀦 𑀩𑀮𑀺𑀦𑀸 𑀅𑀪𑀺𑀲𑀗𑁆𑀔𑀢𑀁, 𑀢𑀜𑁆𑀘 𑀯𑁄 𑀳𑁄𑀢𑀼, 𑀇𑀢𑁄 𑀘 𑀪𑀺𑀬𑁆𑀬𑁄 𑀳𑀭𑀣𑀸’𑀢𑀺. 𑀢𑁂 𑀭𑀜𑁆𑀜𑀸 𑀧𑀝𑀺𑀓𑁆𑀔𑀺𑀢𑁆𑀢𑀸 𑀏𑀓𑀫𑀦𑁆𑀢𑀁 𑀅𑀧𑀓𑁆𑀓𑀫𑁆𑀫 ¶ 𑀏𑀯𑀁 𑀲𑀫𑀘𑀺𑀦𑁆𑀢𑁂𑀲𑀼𑀁 𑁋 ‘𑀦 𑀔𑁄 𑀏𑀢𑀁 𑀅𑀫𑁆𑀳𑀸𑀓𑀁 𑀧𑀢𑀺𑀭𑀽𑀧𑀁, 𑀬𑀁 𑀫𑀬𑀁 𑀇𑀫𑀸𑀦𑀺 𑀲𑀸𑀧𑀢𑁂𑀬𑁆𑀬𑀸𑀦𑀺 𑀧𑀼𑀦𑀤𑁂𑀯 𑀲𑀓𑀸𑀦𑀺 𑀖𑀭𑀸𑀦𑀺 𑀧𑀝𑀺𑀳𑀭𑁂𑀬𑁆𑀬𑀸𑀫. 𑀬𑀁𑀦𑀽𑀦 𑀫𑀬𑀁 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀦𑀺𑀯𑁂𑀲𑀦𑀁 𑀫𑀸𑀧𑁂𑀬𑁆𑀬𑀸𑀫𑀸’𑀢𑀺. 𑀢𑁂 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀦𑀺𑀯𑁂𑀲𑀦𑀁 𑀢𑁂 𑀤𑁂𑀯, 𑀫𑀸𑀧𑁂𑀲𑁆𑀲𑀸𑀫𑀸’𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀢𑀼𑀡𑁆𑀳𑀻𑀪𑀸𑀯𑁂𑀦.

𑁨𑁫𑁬. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀯𑀺𑀲𑁆𑀲𑀓𑀫𑁆𑀫𑀁 [𑀯𑀺𑀲𑀼𑀓𑀫𑁆𑀫𑀁 (𑀓.)] 𑀤𑁂𑀯𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘𑀏𑀳𑀺 ¶ 𑀢𑁆𑀯𑀁, 𑀲𑀫𑁆𑀫 𑀯𑀺𑀲𑁆𑀲𑀓𑀫𑁆𑀫, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀦𑀺𑀯𑁂𑀲𑀦𑀁 𑀫𑀸𑀧𑁂𑀳𑀺 𑀥𑀫𑁆𑀫𑀁 𑀦𑀸𑀫 𑀧𑀸𑀲𑀸𑀤’𑀦𑁆𑀢𑀺. ‘𑀏𑀯𑀁 𑀪𑀤𑁆𑀤𑀦𑁆𑀢𑀯𑀸’𑀢𑀺 𑀔𑁄, 𑀆𑀦𑀦𑁆𑀤, 𑀯𑀺𑀲𑁆𑀲𑀓𑀫𑁆𑀫𑁄 𑀤𑁂𑀯𑀧𑀼𑀢𑁆𑀢𑁄 ¶ 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯 𑀤𑁂𑀯𑁂𑀲𑀼 𑀢𑀸𑀯𑀢𑀺𑀁𑀲𑁂𑀲𑀼 𑀅𑀦𑁆𑀢𑀭𑀳𑀺𑀢𑁄 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀯𑀺𑀲𑁆𑀲𑀓𑀫𑁆𑀫𑁄 𑀤𑁂𑀯𑀧𑀼𑀢𑁆𑀢𑁄 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀏𑀢𑀤𑀯𑁄𑀘 𑁋 ‘𑀦𑀺𑀯𑁂𑀲𑀦𑀁 𑀢𑁂 𑀤𑁂𑀯, 𑀫𑀸𑀧𑁂𑀲𑁆𑀲𑀸𑀫𑀺 𑀥𑀫𑁆𑀫𑀁 𑀦𑀸𑀫 ¶ 𑀧𑀸𑀲𑀸𑀤’𑀦𑁆𑀢𑀺. 𑀅𑀥𑀺𑀯𑀸𑀲𑁂𑀲𑀺 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀢𑀼𑀡𑁆𑀳𑀻𑀪𑀸𑀯𑁂𑀦.

‘‘𑀫𑀸𑀧𑁂𑀲𑀺 𑀔𑁄, 𑀆𑀦𑀦𑁆𑀤, 𑀯𑀺𑀲𑁆𑀲𑀓𑀫𑁆𑀫𑁄 𑀤𑁂𑀯𑀧𑀼𑀢𑁆𑀢𑁄 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀦𑀺𑀯𑁂𑀲𑀦𑀁 𑀥𑀫𑁆𑀫𑀁 𑀦𑀸𑀫 𑀧𑀸𑀲𑀸𑀤𑀁. 𑀥𑀫𑁆𑀫𑁄, 𑀆𑀦𑀦𑁆𑀤, 𑀧𑀸𑀲𑀸𑀤𑁄 𑀧𑀼𑀭𑀢𑁆𑀣𑀺𑀫𑁂𑀦 𑀧𑀘𑁆𑀙𑀺𑀫𑁂𑀦 𑀘 𑀬𑁄𑀚𑀦𑀁 𑀆𑀬𑀸𑀫𑁂𑀦 𑀅𑀳𑁄𑀲𑀺. 𑀉𑀢𑁆𑀢𑀭𑁂𑀦 𑀤𑀓𑁆𑀔𑀺𑀡𑁂𑀦 𑀘 𑀅𑀟𑁆𑀠𑀬𑁄𑀚𑀦𑀁 𑀯𑀺𑀢𑁆𑀣𑀸𑀭𑁂𑀦. 𑀥𑀫𑁆𑀫𑀲𑁆𑀲, 𑀆𑀦𑀦𑁆𑀤, 𑀧𑀸𑀲𑀸𑀤𑀲𑁆𑀲 𑀢𑀺𑀧𑁄𑀭𑀺𑀲𑀁 𑀉𑀘𑁆𑀘𑀢𑀭𑁂𑀦 𑀯𑀢𑁆𑀣𑀼 𑀘𑀺𑀢𑀁 𑀅𑀳𑁄𑀲𑀺 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑀇𑀝𑁆𑀞𑀓𑀸𑀳𑀺 𑁋 𑀏𑀓𑀸 𑀇𑀝𑁆𑀞𑀓𑀸 𑀲𑁄𑀯𑀡𑁆𑀡𑀫𑀬𑀸, 𑀏𑀓𑀸 𑀭𑀽𑀧𑀺𑀬𑀫𑀬𑀸, 𑀏𑀓𑀸 𑀯𑁂𑀴𑀼𑀭𑀺𑀬𑀫𑀬𑀸, 𑀏𑀓𑀸 𑀨𑀮𑀺𑀓𑀫𑀬𑀸.

‘‘𑀥𑀫𑁆𑀫𑀲𑁆𑀲, 𑀆𑀦𑀦𑁆𑀤, 𑀧𑀸𑀲𑀸𑀤𑀲𑁆𑀲 𑀘𑀢𑀼𑀭𑀸𑀲𑀻𑀢𑀺 𑀣𑀫𑁆𑀪𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑁋 𑀏𑀓𑁄 𑀣𑀫𑁆𑀪𑁄 𑀲𑁄𑀯𑀡𑁆𑀡𑀫𑀬𑁄, 𑀏𑀓𑁄 𑀭𑀽𑀧𑀺𑀬𑀫𑀬𑁄, 𑀏𑀓𑁄 𑀯𑁂𑀴𑀼𑀭𑀺𑀬𑀫𑀬𑁄, 𑀏𑀓𑁄 𑀨𑀮𑀺𑀓𑀫𑀬𑁄. 𑀥𑀫𑁆𑀫𑁄, 𑀆𑀦𑀦𑁆𑀤, 𑀧𑀸𑀲𑀸𑀤𑁄 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑀨𑀮𑀓𑁂𑀳𑀺 𑀲𑀦𑁆𑀣𑀢𑁄 𑀅𑀳𑁄𑀲𑀺 𑁋 𑀏𑀓𑀁 𑀨𑀮𑀓𑀁 𑀲𑁄𑀯𑀡𑁆𑀡𑀫𑀬𑀁, 𑀏𑀓𑀁 𑀭𑀽𑀧𑀺𑀬𑀫𑀬𑀁, 𑀏𑀓𑀁 𑀯𑁂𑀴𑀼𑀭𑀺𑀬𑀫𑀬𑀁, 𑀏𑀓𑀁 𑀨𑀮𑀺𑀓𑀫𑀬𑀁.

‘‘𑀥𑀫𑁆𑀫𑀲𑁆𑀲, 𑀆𑀦𑀦𑁆𑀤, 𑀧𑀸𑀲𑀸𑀤𑀲𑁆𑀲 𑀘𑀢𑀼𑀯𑀻𑀲𑀢𑀺 𑀲𑁄𑀧𑀸𑀦𑀸𑀦𑀺 𑀅𑀳𑁂𑀲𑀼𑀁 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑁋 𑀏𑀓𑀁 𑀲𑁄𑀧𑀸𑀦𑀁 𑀲𑁄𑀯𑀡𑁆𑀡𑀫𑀬𑀁, 𑀏𑀓𑀁 𑀭𑀽𑀧𑀺𑀬𑀫𑀬𑀁, 𑀏𑀓𑀁 𑀯𑁂𑀴𑀼𑀭𑀺𑀬𑀫𑀬𑀁, 𑀏𑀓𑀁 𑀨𑀮𑀺𑀓𑀫𑀬𑀁. 𑀲𑁄𑀯𑀡𑁆𑀡𑀫𑀬𑀲𑁆𑀲 𑀲𑁄𑀧𑀸𑀦𑀲𑁆𑀲 𑀲𑁄𑀯𑀡𑁆𑀡𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁 𑀭𑀽𑀧𑀺𑀬𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀭𑀽𑀧𑀺𑀬𑀫𑀬𑀲𑁆𑀲 𑀲𑁄𑀧𑀸𑀦𑀲𑁆𑀲 𑀭𑀽𑀧𑀺𑀬𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁 𑀲𑁄𑀯𑀡𑁆𑀡𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀯𑁂𑀴𑀼𑀭𑀺𑀬𑀫𑀬𑀲𑁆𑀲 𑀲𑁄𑀧𑀸𑀦𑀲𑁆𑀲 ¶ 𑀯𑁂𑀴𑀼𑀭𑀺𑀬𑀫𑀬𑀸 ¶ 𑀣𑀫𑁆𑀪𑀸 𑀅𑀳𑁂𑀲𑀼𑀁 𑀨𑀮𑀺𑀓𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀨𑀮𑀺𑀓𑀫𑀬𑀲𑁆𑀲 𑀲𑁄𑀧𑀸𑀦𑀲𑁆𑀲 𑀨𑀮𑀺𑀓𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁 𑀯𑁂𑀴𑀼𑀭𑀺𑀬𑀫𑀬𑀸 𑀲𑀽𑀘𑀺𑀬𑁄 ¶ 𑀘 𑀉𑀡𑁆𑀳𑀻𑀲𑀜𑁆𑀘.

‘‘𑀥𑀫𑁆𑀫𑁂, 𑀆𑀦𑀦𑁆𑀤, 𑀧𑀸𑀲𑀸𑀤𑁂 𑀘𑀢𑀼𑀭𑀸𑀲𑀻𑀢𑀺 𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑁋 𑀏𑀓𑀁 𑀓𑀽𑀝𑀸𑀕𑀸𑀭𑀁 𑀲𑁄𑀯𑀡𑁆𑀡𑀫𑀬𑀁, 𑀏𑀓𑀁 𑀭𑀽𑀧𑀺𑀬𑀫𑀬𑀁, 𑀏𑀓𑀁 𑀯𑁂𑀴𑀼𑀭𑀺𑀬𑀫𑀬𑀁 ¶ , 𑀏𑀓𑀁 𑀨𑀮𑀺𑀓𑀫𑀬𑀁. 𑀲𑁄𑀯𑀡𑁆𑀡𑀫𑀬𑁂 𑀓𑀽𑀝𑀸𑀕𑀸𑀭𑁂 𑀭𑀽𑀧𑀺𑀬𑀫𑀬𑁄 𑀧𑀮𑁆𑀮𑀗𑁆𑀓𑁄 𑀧𑀜𑁆𑀜𑀢𑁆𑀢𑁄 𑀅𑀳𑁄𑀲𑀺, 𑀭𑀽𑀧𑀺𑀬𑀫𑀬𑁂 𑀓𑀽𑀝𑀸𑀕𑀸𑀭𑁂 𑀲𑁄𑀯𑀡𑁆𑀡𑀫𑀬𑁄 𑀧𑀮𑁆𑀮𑀗𑁆𑀓𑁄 𑀧𑀜𑁆𑀜𑀢𑁆𑀢𑁄 𑀅𑀳𑁄𑀲𑀺, 𑀯𑁂𑀴𑀼𑀭𑀺𑀬𑀫𑀬𑁂 𑀓𑀽𑀝𑀸𑀕𑀸𑀭𑁂 𑀤𑀦𑁆𑀢𑀫𑀬𑁄 𑀧𑀮𑁆𑀮𑀗𑁆𑀓𑁄 𑀧𑀜𑁆𑀜𑀢𑁆𑀢𑁄 𑀅𑀳𑁄𑀲𑀺, 𑀨𑀮𑀺𑀓𑀫𑀬𑁂 𑀓𑀽𑀝𑀸𑀕𑀸𑀭𑁂 𑀲𑀸𑀭𑀫𑀬𑁄 𑀧𑀮𑁆𑀮𑀗𑁆𑀓𑁄 𑀧𑀜𑁆𑀜𑀢𑁆𑀢𑁄 𑀅𑀳𑁄𑀲𑀺. 𑀲𑁄𑀯𑀡𑁆𑀡𑀫𑀬𑀲𑁆𑀲 𑀓𑀽𑀝𑀸𑀕𑀸𑀭𑀲𑁆𑀲 𑀤𑁆𑀯𑀸𑀭𑁂 𑀭𑀽𑀧𑀺𑀬𑀫𑀬𑁄 𑀢𑀸𑀮𑁄 𑀞𑀺𑀢𑁄 𑀅𑀳𑁄𑀲𑀺, 𑀢𑀲𑁆𑀲 𑀭𑀽𑀧𑀺𑀬𑀫𑀬𑁄 𑀔𑀦𑁆𑀥𑁄 𑀲𑁄𑀯𑀡𑁆𑀡𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀭𑀽𑀧𑀺𑀬𑀫𑀬𑀲𑁆𑀲 𑀓𑀽𑀝𑀸𑀕𑀸𑀭𑀲𑁆𑀲 𑀤𑁆𑀯𑀸𑀭𑁂 𑀲𑁄𑀯𑀡𑁆𑀡𑀫𑀬𑁄 𑀢𑀸𑀮𑁄 𑀞𑀺𑀢𑁄 𑀅𑀳𑁄𑀲𑀺, 𑀢𑀲𑁆𑀲 𑀲𑁄𑀯𑀡𑁆𑀡𑀫𑀬𑁄 𑀔𑀦𑁆𑀥𑁄, 𑀭𑀽𑀧𑀺𑀬𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀯𑁂𑀴𑀼𑀭𑀺𑀬𑀫𑀬𑀲𑁆𑀲 𑀓𑀽𑀝𑀸𑀕𑀸𑀭𑀲𑁆𑀲 𑀤𑁆𑀯𑀸𑀭𑁂 𑀨𑀮𑀺𑀓𑀫𑀬𑁄 𑀢𑀸𑀮𑁄 𑀞𑀺𑀢𑁄 𑀅𑀳𑁄𑀲𑀺, 𑀢𑀲𑁆𑀲 𑀨𑀮𑀺𑀓𑀫𑀬𑁄 𑀔𑀦𑁆𑀥𑁄, 𑀯𑁂𑀴𑀼𑀭𑀺𑀬𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀨𑀮𑀺𑀓𑀫𑀬𑀲𑁆𑀲 𑀓𑀽𑀝𑀸𑀕𑀸𑀭𑀲𑁆𑀲 𑀤𑁆𑀯𑀸𑀭𑁂 𑀯𑁂𑀴𑀼𑀭𑀺𑀬𑀫𑀬𑁄 𑀢𑀸𑀮𑁄 𑀞𑀺𑀢𑁄 𑀅𑀳𑁄𑀲𑀺, 𑀢𑀲𑁆𑀲 𑀯𑁂𑀴𑀼𑀭𑀺𑀬𑀫𑀬𑁄 𑀔𑀦𑁆𑀥𑁄, 𑀨𑀮𑀺𑀓𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘.

𑁨𑁫𑁭. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀫𑀳𑀸𑀯𑀺𑀬𑀽𑀳𑀲𑁆𑀲 𑀓𑀽𑀝𑀸𑀕𑀸𑀭𑀲𑁆𑀲 𑀤𑁆𑀯𑀸𑀭𑁂 𑀲𑀩𑁆𑀩𑀲𑁄𑀯𑀡𑁆𑀡𑀫𑀬𑀁 𑀢𑀸𑀮𑀯𑀦𑀁 𑀫𑀸𑀧𑁂𑀬𑁆𑀬𑀁, 𑀬𑀢𑁆𑀣 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺𑀲𑁆𑀲𑀸𑀫𑀻’𑀢𑀺. 𑀫𑀸𑀧𑁂𑀲𑀺 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀫𑀳𑀸𑀯𑀺𑀬𑀽𑀳𑀲𑁆𑀲 𑀓𑀽𑀝𑀸𑀕𑀸𑀭𑀲𑁆𑀲 𑀤𑁆𑀯𑀸𑀭𑁂 𑀲𑀩𑁆𑀩𑀲𑁄𑀯𑀡𑁆𑀡𑀫𑀬𑀁 𑀢𑀸𑀮𑀯𑀦𑀁, 𑀬𑀢𑁆𑀣 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺. 𑀥𑀫𑁆𑀫𑁄, 𑀆𑀦𑀦𑁆𑀤 ¶ , 𑀧𑀸𑀲𑀸𑀤𑁄 𑀤𑁆𑀯𑀻𑀳𑀺 𑀯𑁂𑀤𑀺𑀓𑀸𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑁄 ¶ 𑀅𑀳𑁄𑀲𑀺, 𑀏𑀓𑀸 𑀯𑁂𑀤𑀺𑀓𑀸 𑀲𑁄𑀯𑀡𑁆𑀡𑀫𑀬𑀸, 𑀏𑀓𑀸 𑀭𑀽𑀧𑀺𑀬𑀫𑀬𑀸. 𑀲𑁄𑀯𑀡𑁆𑀡𑀫𑀬𑀸𑀬 𑀯𑁂𑀤𑀺𑀓𑀸𑀬 𑀲𑁄𑀯𑀡𑁆𑀡𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁, 𑀭𑀽𑀧𑀺𑀬𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀭𑀽𑀧𑀺𑀬𑀫𑀬𑀸𑀬 𑀯𑁂𑀤𑀺𑀓𑀸𑀬 𑀭𑀽𑀧𑀺𑀬𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁, 𑀲𑁄𑀯𑀡𑁆𑀡𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘.

𑁨𑁫𑁮. ‘‘𑀥𑀫𑁆𑀫𑁄, 𑀆𑀦𑀦𑁆𑀤, 𑀧𑀸𑀲𑀸𑀤𑁄 𑀤𑁆𑀯𑀻𑀳𑀺 𑀓𑀺𑀗𑁆𑀓𑀺𑀡𑀺𑀓𑀚𑀸𑀮𑁂𑀳𑀺 [𑀓𑀺𑀗𑁆𑀓𑀡𑀺𑀓𑀚𑀸𑀮𑁂𑀳𑀺 (𑀲𑁆𑀬𑀸. 𑀓.)] 𑀧𑀭𑀺𑀓𑁆𑀔𑀺𑀢𑁆𑀢𑁄 𑀅𑀳𑁄𑀲𑀺 𑁋 𑀏𑀓𑀁 𑀚𑀸𑀮𑀁 𑀲𑁄𑀯𑀡𑁆𑀡𑀫𑀬𑀁 𑀏𑀓𑀁 𑀭𑀽𑀧𑀺𑀬𑀫𑀬𑀁. 𑀲𑁄𑀯𑀡𑁆𑀡𑀫𑀬𑀲𑁆𑀲 𑀚𑀸𑀮𑀲𑁆𑀲 𑀭𑀽𑀧𑀺𑀬𑀫𑀬𑀸 𑀓𑀺𑀗𑁆𑀓𑀺𑀡𑀺𑀓𑀸 𑀅𑀳𑁂𑀲𑀼𑀁, 𑀭𑀽𑀧𑀺𑀬𑀫𑀬𑀲𑁆𑀲 𑀚𑀸𑀮𑀲𑁆𑀲 𑀲𑁄𑀯𑀡𑁆𑀡𑀫𑀬𑀸 𑀓𑀺𑀗𑁆𑀓𑀺𑀡𑀺𑀓𑀸 𑀅𑀳𑁂𑀲𑀼𑀁. 𑀢𑁂𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀓𑀺𑀗𑁆𑀓𑀺𑀡𑀺𑀓𑀚𑀸𑀮𑀸𑀦𑀁 𑀯𑀸𑀢𑁂𑀭𑀺𑀢𑀸𑀦𑀁 𑀲𑀤𑁆𑀤𑁄 𑀅𑀳𑁄𑀲𑀺 𑀯𑀕𑁆𑀕𑀼 𑀘 𑀭𑀚𑀦𑀻𑀬𑁄 𑀘 𑀔𑀫𑀦𑀻𑀬𑁄 𑀘 𑀫𑀤𑀦𑀻𑀬𑁄 𑀘. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀧𑀜𑁆𑀘𑀗𑁆𑀕𑀺𑀓𑀲𑁆𑀲 𑀢𑀽𑀭𑀺𑀬𑀲𑁆𑀲 𑀲𑀼𑀯𑀺𑀦𑀻𑀢𑀲𑁆𑀲 𑀲𑀼𑀧𑁆𑀧𑀝𑀺𑀢𑀸𑀴𑀺𑀢𑀲𑁆𑀲 ¶ 𑀲𑀼𑀓𑀼𑀲𑀮𑁂𑀳𑀺 [𑀓𑀼𑀲𑀮𑁂𑀳𑀺 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] 𑀲𑀫𑀦𑁆𑀦𑀸𑀳𑀢𑀲𑁆𑀲 𑀲𑀤𑁆𑀤𑁄 𑀳𑁄𑀢𑀺, 𑀯𑀕𑁆𑀕𑀼 𑀘 𑀭𑀚𑀦𑀻𑀬𑁄 𑀘 𑀔𑀫𑀦𑀻𑀬𑁄 𑀘 𑀫𑀤𑀦𑀻𑀬𑁄 𑀘, 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀢𑁂𑀲𑀁 𑀓𑀺𑀗𑁆𑀓𑀺𑀡𑀺𑀓𑀚𑀸𑀮𑀸𑀦𑀁 𑀯𑀸𑀢𑁂𑀭𑀺𑀢𑀸𑀦𑀁 𑀲𑀤𑁆𑀤𑁄 𑀅𑀳𑁄𑀲𑀺 𑀯𑀕𑁆𑀕𑀼 𑀘 𑀭𑀚𑀦𑀻𑀬𑁄 𑀘 𑀔𑀫𑀦𑀻𑀬𑁄 𑀘 ¶ 𑀫𑀤𑀦𑀻𑀬𑁄 𑀘. 𑀬𑁂 𑀔𑁄 𑀧𑀦𑀸𑀦𑀦𑁆𑀤, 𑀢𑁂𑀦 𑀲𑀫𑀬𑁂𑀦 𑀓𑀼𑀲𑀸𑀯𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀥𑀼𑀢𑁆𑀢𑀸 𑀅𑀳𑁂𑀲𑀼𑀁 𑀲𑁄𑀡𑁆𑀟𑀸 𑀧𑀺𑀧𑀸𑀲𑀸, 𑀢𑁂 𑀢𑁂𑀲𑀁 𑀓𑀺𑀗𑁆𑀓𑀺𑀡𑀺𑀓𑀚𑀸𑀮𑀸𑀦𑀁 𑀯𑀸𑀢𑁂𑀭𑀺𑀢𑀸𑀦𑀁 𑀲𑀤𑁆𑀤𑁂𑀦 𑀧𑀭𑀺𑀘𑀸𑀭𑁂𑀲𑀼𑀁. 𑀦𑀺𑀝𑁆𑀞𑀺𑀢𑁄 𑀔𑁄 𑀧𑀦𑀸𑀦𑀦𑁆𑀤, 𑀥𑀫𑁆𑀫𑁄 𑀧𑀸𑀲𑀸𑀤𑁄 𑀤𑀼𑀤𑁆𑀤𑀺𑀓𑁆𑀔𑁄 𑀅𑀳𑁄𑀲𑀺 𑀫𑀼𑀲𑀢𑀺 𑀘𑀓𑁆𑀔𑀽𑀦𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀯𑀲𑁆𑀲𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀲𑀭𑀤𑀲𑀫𑀬𑁂 𑀯𑀺𑀤𑁆𑀥𑁂 𑀯𑀺𑀕𑀢𑀯𑀮𑀸𑀳𑀓𑁂 𑀤𑁂𑀯𑁂 𑀆𑀤𑀺𑀘𑁆𑀘𑁄 𑀦𑀪𑀁 𑀅𑀩𑁆𑀪𑀼𑀲𑁆𑀲𑀓𑁆𑀓𑀫𑀸𑀦𑁄 [𑀅𑀩𑁆𑀪𑀼𑀕𑁆𑀕𑀫𑀫𑀸𑀦𑁄 (𑀲𑀻. 𑀧𑀻. 𑀓.)] 𑀤𑀼𑀤𑁆𑀤𑀺𑀓𑁆𑀔𑁄 ¶ [𑀤𑀼𑀤𑀺𑀓𑁆𑀔𑁄 (𑀧𑀻.)] 𑀳𑁄𑀢𑀺 ¶ 𑀫𑀼𑀲𑀢𑀺 𑀘𑀓𑁆𑀔𑀽𑀦𑀺; 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀥𑀫𑁆𑀫𑁄 𑀧𑀸𑀲𑀸𑀤𑁄 𑀤𑀼𑀤𑁆𑀤𑀺𑀓𑁆𑀔𑁄 𑀅𑀳𑁄𑀲𑀺 𑀫𑀼𑀲𑀢𑀺 𑀘𑀓𑁆𑀔𑀽𑀦𑀺.

𑁨𑁫𑁯. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀬𑀁𑀦𑀽𑀦𑀸𑀳𑀁 𑀥𑀫𑁆𑀫𑀲𑁆𑀲 𑀧𑀸𑀲𑀸𑀤𑀲𑁆𑀲 𑀧𑀼𑀭𑀢𑁄 𑀥𑀫𑁆𑀫𑀁 𑀦𑀸𑀫 𑀧𑁄𑀓𑁆𑀔𑀭𑀡𑀺𑀁 𑀫𑀸𑀧𑁂𑀬𑁆𑀬’𑀦𑁆𑀢𑀺. 𑀫𑀸𑀧𑁂𑀲𑀺 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀥𑀫𑁆𑀫𑀲𑁆𑀲 𑀧𑀸𑀲𑀸𑀤𑀲𑁆𑀲 𑀧𑀼𑀭𑀢𑁄 𑀥𑀫𑁆𑀫𑀁 𑀦𑀸𑀫 𑀧𑁄𑀓𑁆𑀔𑀭𑀡𑀺𑀁. 𑀥𑀫𑁆𑀫𑀸, 𑀆𑀦𑀦𑁆𑀤, 𑀧𑁄𑀓𑁆𑀔𑀭𑀡𑀻 𑀧𑀼𑀭𑀢𑁆𑀣𑀺𑀫𑁂𑀦 𑀧𑀘𑁆𑀙𑀺𑀫𑁂𑀦 𑀘 𑀬𑁄𑀚𑀦𑀁 𑀆𑀬𑀸𑀫𑁂𑀦 𑀅𑀳𑁄𑀲𑀺, 𑀉𑀢𑁆𑀢𑀭𑁂𑀦 𑀤𑀓𑁆𑀔𑀺𑀡𑁂𑀦 𑀘 𑀅𑀟𑁆𑀠𑀬𑁄𑀚𑀦𑀁 𑀯𑀺𑀢𑁆𑀣𑀸𑀭𑁂𑀦. 𑀥𑀫𑁆𑀫𑀸, 𑀆𑀦𑀦𑁆𑀤, 𑀧𑁄𑀓𑁆𑀔𑀭𑀡𑀻 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑀇𑀝𑁆𑀞𑀓𑀸𑀳𑀺 𑀘𑀺𑀢𑀸 𑀅𑀳𑁄𑀲𑀺 𑁋 𑀏𑀓𑀸 𑀇𑀝𑁆𑀞𑀓𑀸 𑀲𑁄𑀯𑀡𑁆𑀡𑀫𑀬𑀸, 𑀏𑀓𑀸 𑀭𑀽𑀧𑀺𑀬𑀫𑀬𑀸, 𑀏𑀓𑀸 𑀯𑁂𑀴𑀼𑀭𑀺𑀬𑀫𑀬𑀸, 𑀏𑀓𑀸 𑀨𑀮𑀺𑀓𑀫𑀬𑀸.

‘‘𑀥𑀫𑁆𑀫𑀸𑀬, 𑀆𑀦𑀦𑁆𑀤, 𑀧𑁄𑀓𑁆𑀔𑀭𑀡𑀺𑀬𑀸 𑀘𑀢𑀼𑀯𑀻𑀲𑀢𑀺 𑀲𑁄𑀧𑀸𑀦𑀸𑀦𑀺 𑀅𑀳𑁂𑀲𑀼𑀁 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑁋 𑀏𑀓𑀁 𑀲𑁄𑀧𑀸𑀦𑀁 𑀲𑁄𑀯𑀡𑁆𑀡𑀫𑀬𑀁, 𑀏𑀓𑀁 𑀭𑀽𑀧𑀺𑀬𑀫𑀬𑀁, 𑀏𑀓𑀁 𑀯𑁂𑀴𑀼𑀭𑀺𑀬𑀫𑀬𑀁, 𑀏𑀓𑀁 𑀨𑀮𑀺𑀓𑀫𑀬𑀁. 𑀲𑁄𑀯𑀡𑁆𑀡𑀫𑀬𑀲𑁆𑀲 𑀲𑁄𑀧𑀸𑀦𑀲𑁆𑀲 𑀲𑁄𑀯𑀡𑁆𑀡𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁 𑀭𑀽𑀧𑀺𑀬𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀭𑀽𑀧𑀺𑀬𑀫𑀬𑀲𑁆𑀲 𑀲𑁄𑀧𑀸𑀦𑀲𑁆𑀲 𑀭𑀽𑀧𑀺𑀬𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁 𑀲𑁄𑀯𑀡𑁆𑀡𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀯𑁂𑀴𑀼𑀭𑀺𑀬𑀫𑀬𑀲𑁆𑀲 𑀲𑁄𑀧𑀸𑀦𑀲𑁆𑀲 𑀯𑁂𑀴𑀼𑀭𑀺𑀬𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁 𑀨𑀮𑀺𑀓𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀨𑀮𑀺𑀓𑀫𑀬𑀲𑁆𑀲 𑀲𑁄𑀧𑀸𑀦𑀲𑁆𑀲 𑀨𑀮𑀺𑀓𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁 𑀯𑁂𑀴𑀼𑀭𑀺𑀬𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘.

‘‘𑀥𑀫𑁆𑀫𑀸, 𑀆𑀦𑀦𑁆𑀤, 𑀧𑁄𑀓𑁆𑀔𑀭𑀡𑀻 𑀤𑁆𑀯𑀻𑀳𑀺 𑀯𑁂𑀤𑀺𑀓𑀸𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀸 𑀅𑀳𑁄𑀲𑀺 𑁋 𑀏𑀓𑀸 𑀯𑁂𑀤𑀺𑀓𑀸 𑀲𑁄𑀯𑀡𑁆𑀡𑀫𑀬𑀸, 𑀏𑀓𑀸 𑀭𑀽𑀧𑀺𑀬𑀫𑀬𑀸. 𑀲𑁄𑀯𑀡𑁆𑀡𑀫𑀬𑀸𑀬 𑀯𑁂𑀤𑀺𑀓𑀸𑀬 𑀲𑁄𑀯𑀡𑁆𑀡𑀫𑀬𑀸 ¶ 𑀣𑀫𑁆𑀪𑀸 𑀅𑀳𑁂𑀲𑀼𑀁 ¶ 𑀭𑀽𑀧𑀺𑀬𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘. 𑀭𑀽𑀧𑀺𑀬𑀫𑀬𑀸𑀬 𑀯𑁂𑀤𑀺𑀓𑀸𑀬 𑀭𑀽𑀧𑀺𑀬𑀫𑀬𑀸 𑀣𑀫𑁆𑀪𑀸 𑀅𑀳𑁂𑀲𑀼𑀁 𑀲𑁄𑀯𑀡𑁆𑀡𑀫𑀬𑀸 𑀲𑀽𑀘𑀺𑀬𑁄 𑀘 𑀉𑀡𑁆𑀳𑀻𑀲𑀜𑁆𑀘.

‘‘𑀥𑀫𑁆𑀫𑀸, 𑀆𑀦𑀦𑁆𑀤, 𑀧𑁄𑀓𑁆𑀔𑀭𑀡𑀻 𑀲𑀢𑁆𑀢𑀳𑀺 𑀢𑀸𑀮𑀧𑀦𑁆𑀢𑀻𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀸 𑀅𑀳𑁄𑀲𑀺 𑁋 𑀏𑀓𑀸 𑀢𑀸𑀮𑀧𑀦𑁆𑀢𑀺 𑀲𑁄𑀯𑀡𑁆𑀡𑀫𑀬𑀸, 𑀏𑀓𑀸 𑀭𑀽𑀧𑀺𑀬𑀫𑀬𑀸, 𑀏𑀓𑀸 𑀯𑁂𑀴𑀼𑀭𑀺𑀬𑀫𑀬𑀸, 𑀏𑀓𑀸 𑀨𑀮𑀺𑀓𑀫𑀬𑀸, 𑀏𑀓𑀸 𑀮𑁄𑀳𑀺𑀢𑀗𑁆𑀓𑀫𑀬𑀸, 𑀏𑀓𑀸 𑀫𑀲𑀸𑀭𑀕𑀮𑁆𑀮𑀫𑀬𑀸, 𑀏𑀓𑀸 𑀲𑀩𑁆𑀩𑀭𑀢𑀦𑀫𑀬𑀸. 𑀲𑁄𑀯𑀡𑁆𑀡𑀫𑀬𑀲𑁆𑀲 𑀢𑀸𑀮𑀲𑁆𑀲 𑀲𑁄𑀯𑀡𑁆𑀡𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺 𑀭𑀽𑀧𑀺𑀬𑀫𑀬𑀸𑀦𑀺 ¶ 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀭𑀽𑀧𑀺𑀬𑀫𑀬𑀲𑁆𑀲 𑀢𑀸𑀮𑀲𑁆𑀲 𑀭𑀽𑀧𑀺𑀬𑀫𑀬𑁄 ¶ 𑀔𑀦𑁆𑀥𑁄 𑀅𑀳𑁄𑀲𑀺 𑀲𑁄𑀯𑀡𑁆𑀡𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀯𑁂𑀴𑀼𑀭𑀺𑀬𑀫𑀬𑀲𑁆𑀲 𑀢𑀸𑀮𑀲𑁆𑀲 𑀯𑁂𑀴𑀼𑀭𑀺𑀬𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺 𑀨𑀮𑀺𑀓𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀨𑀮𑀺𑀓𑀫𑀬𑀲𑁆𑀲 𑀢𑀸𑀮𑀲𑁆𑀲 𑀨𑀮𑀺𑀓𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺 𑀯𑁂𑀴𑀼𑀭𑀺𑀬𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀮𑁄𑀳𑀺𑀢𑀗𑁆𑀓𑀫𑀬𑀲𑁆𑀲 𑀢𑀸𑀮𑀲𑁆𑀲 𑀮𑁄𑀳𑀺𑀢𑀗𑁆𑀓𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺 𑀫𑀲𑀸𑀭𑀕𑀮𑁆𑀮𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀫𑀲𑀸𑀭𑀕𑀮𑁆𑀮𑀫𑀬𑀲𑁆𑀲 𑀢𑀸𑀮𑀲𑁆𑀲 𑀫𑀲𑀸𑀭𑀕𑀮𑁆𑀮𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺 𑀮𑁄𑀳𑀺𑀢𑀗𑁆𑀓𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀲𑀩𑁆𑀩𑀭𑀢𑀦𑀫𑀬𑀲𑁆𑀲 𑀢𑀸𑀮𑀲𑁆𑀲 𑀲𑀩𑁆𑀩𑀭𑀢𑀦𑀫𑀬𑁄 𑀔𑀦𑁆𑀥𑁄 𑀅𑀳𑁄𑀲𑀺, 𑀲𑀩𑁆𑀩𑀭𑀢𑀦𑀫𑀬𑀸𑀦𑀺 𑀧𑀢𑁆𑀢𑀸𑀦𑀺 𑀘 𑀨𑀮𑀸𑀦𑀺 𑀘. 𑀢𑀸𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀢𑀸𑀮𑀧𑀦𑁆𑀢𑀻𑀦𑀁 𑀯𑀸𑀢𑁂𑀭𑀺𑀢𑀸𑀦𑀁 𑀲𑀤𑁆𑀤𑁄 𑀅𑀳𑁄𑀲𑀺, 𑀯𑀕𑁆𑀕𑀼 𑀘 𑀭𑀚𑀦𑀻𑀬𑁄 𑀘 𑀔𑀫𑀦𑀻𑀬𑁄 𑀘 𑀫𑀤𑀦𑀻𑀬𑁄 𑀘. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀧𑀜𑁆𑀘𑀗𑁆𑀕𑀺𑀓𑀲𑁆𑀲 𑀢𑀽𑀭𑀺𑀬𑀲𑁆𑀲 𑀲𑀼𑀯𑀺𑀦𑀻𑀢𑀲𑁆𑀲 𑀲𑀼𑀧𑁆𑀧𑀝𑀺𑀢𑀸𑀴𑀺𑀢𑀲𑁆𑀲 𑀲𑀼𑀓𑀼𑀲𑀮𑁂𑀳𑀺 𑀲𑀫𑀦𑁆𑀦𑀸𑀳𑀢𑀲𑁆𑀲 𑀲𑀤𑁆𑀤𑁄 𑀳𑁄𑀢𑀺 𑀯𑀕𑁆𑀕𑀼 𑀘 𑀭𑀚𑀦𑀻𑀬𑁄 𑀘 𑀔𑀫𑀦𑀻𑀬𑁄 𑀘 𑀫𑀤𑀦𑀻𑀬𑁄 𑀘, 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀢𑀸𑀲𑀁 𑀢𑀸𑀮𑀧𑀦𑁆𑀢𑀻𑀦𑀁 𑀯𑀸𑀢𑁂𑀭𑀺𑀢𑀸𑀦𑀁 𑀲𑀤𑁆𑀤𑁄 ¶ 𑀅𑀳𑁄𑀲𑀺 𑀯𑀕𑁆𑀕𑀼 𑀘 𑀭𑀚𑀦𑀻𑀬𑁄 𑀘 𑀔𑀫𑀦𑀻𑀬𑁄 𑀘 𑀫𑀤𑀦𑀻𑀬𑁄 𑀘. 𑀬𑁂 𑀔𑁄 𑀧𑀦𑀸𑀦𑀦𑁆𑀤, 𑀢𑁂𑀦 𑀲𑀫𑀬𑁂𑀦 𑀓𑀼𑀲𑀸𑀯𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀥𑀼𑀢𑁆𑀢𑀸 𑀅𑀳𑁂𑀲𑀼𑀁 𑀲𑁄𑀡𑁆𑀟𑀸 𑀧𑀺𑀧𑀸𑀲𑀸, 𑀢𑁂 𑀢𑀸𑀲𑀁 𑀢𑀸𑀮𑀧𑀦𑁆𑀢𑀻𑀦𑀁 𑀯𑀸𑀢𑁂𑀭𑀺𑀢𑀸𑀦𑀁 𑀲𑀤𑁆𑀤𑁂𑀦 𑀧𑀭𑀺𑀘𑀸𑀭𑁂𑀲𑀼𑀁.

‘‘𑀦𑀺𑀝𑁆𑀞𑀺𑀢𑁂 𑀔𑁄 𑀧𑀦𑀸𑀦𑀦𑁆𑀤, 𑀥𑀫𑁆𑀫𑁂 𑀧𑀸𑀲𑀸𑀤𑁂 𑀦𑀺𑀝𑁆𑀞𑀺𑀢𑀸𑀬 𑀥𑀫𑁆𑀫𑀸𑀬 𑀘 𑀧𑁄𑀓𑁆𑀔𑀭𑀡𑀺𑀬𑀸 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 ‘𑀬𑁂 [𑀬𑁂 𑀓𑁄 𑀧𑀦𑀸𑀦𑀦𑁆𑀤 (𑀲𑁆𑀬𑀸. 𑀓.)] 𑀢𑁂𑀦 𑀲𑀫𑀬𑁂𑀦 𑀲𑀫𑀡𑁂𑀲𑀼 𑀯𑀸 𑀲𑀫𑀡𑀲𑀫𑁆𑀫𑀢𑀸 𑀩𑁆𑀭𑀸𑀳𑁆𑀫𑀡𑁂𑀲𑀼 𑀯𑀸 𑀩𑁆𑀭𑀸𑀳𑁆𑀫𑀡𑀲𑀫𑁆𑀫𑀢𑀸’, 𑀢𑁂 𑀲𑀩𑁆𑀩𑀓𑀸𑀫𑁂𑀳𑀺 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀥𑀫𑁆𑀫𑀁 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺.

𑀧𑀞𑀫𑀪𑀸𑀡𑀯𑀸𑀭𑁄.

𑀛𑀸𑀦𑀲𑀫𑁆𑀧𑀢𑁆𑀢𑀺

𑁨𑁬𑁦. ‘‘𑀅𑀣 ¶ 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀺𑀲𑁆𑀲 𑀦𑀼 𑀔𑁄 𑀫𑁂 𑀇𑀤𑀁 𑀓𑀫𑁆𑀫𑀲𑁆𑀲 𑀨𑀮𑀁 𑀓𑀺𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁄, 𑀬𑁂𑀦𑀸𑀳𑀁 𑀏𑀢𑀭𑀳𑀺 𑀏𑀯𑀁𑀫𑀳𑀺𑀤𑁆𑀥𑀺𑀓𑁄 𑀏𑀯𑀁𑀫𑀳𑀸𑀦𑀼𑀪𑀸𑀯𑁄’𑀢𑀺? 𑀅𑀣 ¶ 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀢𑀺𑀡𑁆𑀡𑀁 𑀔𑁄 𑀫𑁂 𑀇𑀤𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀢𑀺𑀡𑁆𑀡𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑁄, 𑀬𑁂𑀦𑀸𑀳𑀁 𑀏𑀢𑀭𑀳𑀺 𑀏𑀯𑀁𑀫𑀳𑀺𑀤𑁆𑀥𑀺𑀓𑁄 𑀏𑀯𑀁𑀫𑀳𑀸𑀦𑀼𑀪𑀸𑀯𑁄, 𑀲𑁂𑀬𑁆𑀬𑀣𑀺𑀤𑀁 𑀤𑀸𑀦𑀲𑁆𑀲 𑀤𑀫𑀲𑁆𑀲 𑀲𑀁𑀬𑀫𑀲𑁆𑀲𑀸’𑀢𑀺.

‘‘𑀅𑀣 ¶ 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀬𑁂𑀦 𑀫𑀳𑀸𑀯𑀺𑀬𑀽𑀳𑀁 𑀓𑀽𑀝𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀳𑀸𑀯𑀺𑀬𑀽𑀳𑀲𑁆𑀲 𑀓𑀽𑀝𑀸𑀕𑀸𑀭𑀲𑁆𑀲 𑀤𑁆𑀯𑀸𑀭𑁂 𑀞𑀺𑀢𑁄 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘𑀢𑀺𑀝𑁆𑀞, 𑀓𑀸𑀫𑀯𑀺𑀢𑀓𑁆𑀓, 𑀢𑀺𑀝𑁆𑀞, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓, 𑀢𑀺𑀝𑁆𑀞, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓. 𑀏𑀢𑁆𑀢𑀸𑀯𑀢𑀸 𑀓𑀸𑀫𑀯𑀺𑀢𑀓𑁆𑀓, 𑀏𑀢𑁆𑀢𑀸𑀯𑀢𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓, 𑀏𑀢𑁆𑀢𑀸𑀯𑀢𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀸’𑀢𑀺.

𑁨𑁬𑁧. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀫𑀳𑀸𑀯𑀺𑀬𑀽𑀳𑀁 ¶ 𑀓𑀽𑀝𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑁄𑀯𑀡𑁆𑀡𑀫𑀬𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀸𑀲𑀺, 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀲𑀺, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺. 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺.

𑁨𑁬𑁨. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀫𑀳𑀸𑀯𑀺𑀬𑀽𑀳𑀸 𑀓𑀽𑀝𑀸𑀕𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑁄𑀯𑀡𑁆𑀡𑀫𑀬𑀁 𑀓𑀽𑀝𑀸𑀕𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀽𑀧𑀺𑀬𑀫𑀬𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀸𑀲𑀺. 𑀢𑀣𑀸 𑀤𑀼𑀢𑀺𑀬𑀁 𑀢𑀣𑀸 𑀢𑀢𑀺𑀬𑀁 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀸𑀲𑀺. 𑀓𑀭𑀼𑀡𑀸𑀲𑀳𑀕𑀢𑁂𑀦 ¶ 𑀘𑁂𑀢𑀲𑀸…𑀧𑁂… 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 ¶ 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀸𑀲𑀺 𑀢𑀣𑀸 𑀤𑀼𑀢𑀺𑀬𑀁 𑀢𑀣𑀸 𑀢𑀢𑀺𑀬𑀁 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 ¶ 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀸𑀲𑀺.

𑀘𑀢𑀼𑀭𑀸𑀲𑀻𑀢𑀺 𑀦𑀕𑀭𑀲𑀳𑀲𑁆𑀲𑀸𑀤𑀺

𑁨𑁬𑁩. ‘‘𑀭𑀜𑁆𑀜𑁄, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀘𑀢𑀼𑀭𑀸𑀲𑀻𑀢𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀓𑀼𑀲𑀸𑀯𑀢𑀻𑀭𑀸𑀚𑀥𑀸𑀦𑀺𑀧𑁆𑀧𑀫𑀼𑀔𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀥𑀫𑁆𑀫𑀧𑀸𑀲𑀸𑀤𑀧𑁆𑀧𑀫𑀼𑀔𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀫𑀳𑀸𑀯𑀺𑀬𑀽𑀳𑀓𑀽𑀝𑀸𑀕𑀸𑀭𑀧𑁆𑀧𑀫𑀼𑀔𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 𑀧𑀮𑁆𑀮𑀗𑁆𑀓𑀲𑀳𑀲𑁆𑀲𑀸𑀦𑀺 ¶ 𑀅𑀳𑁂𑀲𑀼𑀁 𑀲𑁄𑀯𑀡𑁆𑀡𑀫𑀬𑀸𑀦𑀺 𑀭𑀽𑀧𑀺𑀬𑀫𑀬𑀸𑀦𑀺 𑀤𑀦𑁆𑀢𑀫𑀬𑀸𑀦𑀺 𑀲𑀸𑀭𑀫𑀬𑀸𑀦𑀺 𑀕𑁄𑀦𑀓𑀢𑁆𑀣𑀢𑀸𑀦𑀺 𑀧𑀝𑀺𑀓𑀢𑁆𑀣𑀢𑀸𑀦𑀺 𑀧𑀝𑀮𑀺𑀓𑀢𑁆𑀣𑀢𑀸𑀦𑀺 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀸𑀦𑀺 𑀲𑀉𑀢𑁆𑀢𑀭𑀘𑁆𑀙𑀤𑀸𑀦𑀺 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 𑀦𑀸𑀕𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀉𑀧𑁄𑀲𑀣𑀦𑀸𑀕𑀭𑀸𑀚𑀧𑁆𑀧𑀫𑀼𑀔𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 𑀅𑀲𑁆𑀲𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀯𑀮𑀸𑀳𑀓𑀅𑀲𑁆𑀲𑀭𑀸𑀚𑀧𑁆𑀧𑀫𑀼𑀔𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 𑀭𑀣𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀲𑀻𑀳𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀩𑁆𑀬𑀕𑁆𑀖𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀤𑀻𑀧𑀺𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀧𑀡𑁆𑀟𑀼𑀓𑀫𑁆𑀩𑀮𑀧𑀭𑀺𑀯𑀸𑀭𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀯𑁂𑀚𑀬𑀦𑁆𑀢𑀭𑀣𑀧𑁆𑀧𑀫𑀼𑀔𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 𑀫𑀡𑀺𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀫𑀡𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀲𑀼𑀪𑀤𑁆𑀤𑀸𑀤𑁂𑀯𑀺𑀧𑁆𑀧𑀫𑀼𑀔𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 ¶ 𑀕𑀳𑀧𑀢𑀺𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀕𑀳𑀧𑀢𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 𑀔𑀢𑁆𑀢𑀺𑀬𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀅𑀦𑀼𑀬𑀦𑁆𑀢𑀸𑀦𑀺 𑀧𑀭𑀺𑀡𑀸𑀬𑀓𑀭𑀢𑀦𑀧𑁆𑀧𑀫𑀼𑀔𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 𑀥𑁂𑀦𑀼𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀤𑀼𑀳𑀲𑀦𑁆𑀤𑀦𑀸𑀦𑀺 [𑀤𑀼𑀓𑀽𑀮𑀲𑀦𑁆𑀤𑀦𑀸𑀦𑀺(𑀧𑀻.)] 𑀤𑀼𑀓𑀽𑀮𑀲𑀦𑁆𑀤𑀸𑀦𑀸𑀦𑀺 [𑀤𑀼𑀓𑀽𑀮𑀲𑀦𑁆𑀤𑀦𑀸𑀦𑀺 (𑀧𑀻.) 𑀤𑀼𑀓𑀽𑀮𑀲𑀦𑁆𑀤𑀸𑀦𑀸𑀦𑀺 (𑀲𑀁. 𑀦𑀺. 𑁩.𑁯𑁬)] 𑀓𑀁𑀲𑀽𑀧𑀥𑀸𑀭𑀡𑀸𑀦𑀺; 𑀘𑀢𑀼𑀭𑀸𑀲𑀻𑀢𑀺 𑀯𑀢𑁆𑀣𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀔𑁄𑀫𑀲𑀼𑀔𑀼𑀫𑀸𑀦𑀁 𑀓𑀧𑁆𑀧𑀸𑀲𑀺𑀓𑀲𑀼𑀔𑀼𑀫𑀸𑀦𑀁 𑀓𑁄𑀲𑁂𑀬𑁆𑀬𑀲𑀼𑀔𑀼𑀫𑀸𑀦𑀁 𑀓𑀫𑁆𑀩𑀮𑀲𑀼𑀔𑀼𑀫𑀸𑀦𑀁 ¶ ; (𑀭𑀜𑁆𑀜𑁄, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲) [( ) 𑀲𑀻. 𑀇𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀘𑀢𑀼𑀭𑀸𑀲𑀻𑀢𑀺 𑀣𑀸𑀮𑀺𑀧𑀸𑀓𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁 𑀲𑀸𑀬𑀁 𑀧𑀸𑀢𑀁 𑀪𑀢𑁆𑀢𑀸𑀪𑀺𑀳𑀸𑀭𑁄 𑀅𑀪𑀺𑀳𑀭𑀺𑀬𑀺𑀢𑁆𑀣.

𑁨𑁬𑁪. ‘‘𑀢𑁂𑀦 ¶ 𑀔𑁄 𑀧𑀦𑀸𑀦𑀦𑁆𑀤, 𑀲𑀫𑀬𑁂𑀦 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀘𑀢𑀼𑀭𑀸𑀲𑀻𑀢𑀺 𑀦𑀸𑀕𑀲𑀳𑀲𑁆𑀲𑀸𑀦𑀺 𑀲𑀸𑀬𑀁 𑀧𑀸𑀢𑀁 𑀉𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀇𑀫𑀸𑀦𑀺 𑀔𑁄 𑀫𑁂 𑀘𑀢𑀼𑀭𑀸𑀲𑀻𑀢𑀺 𑀦𑀸𑀕𑀲𑀳𑀲𑁆𑀲𑀸𑀦𑀺 𑀲𑀸𑀬𑀁 𑀧𑀸𑀢𑀁 𑀉𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀺, 𑀬𑀁𑀦𑀽𑀦 𑀯𑀲𑁆𑀲𑀲𑀢𑀲𑁆𑀲 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀁 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀁 𑀦𑀸𑀕𑀲𑀳𑀲𑁆𑀲𑀸𑀦𑀺 𑀲𑀓𑀺𑀁 𑀲𑀓𑀺𑀁 𑀉𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑁂𑀬𑁆𑀬𑀼’𑀦𑁆𑀢𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀧𑀭𑀺𑀡𑀸𑀬𑀓𑀭𑀢𑀦𑀁 𑀆𑀫𑀦𑁆𑀢𑁂𑀲𑀺 𑁋 ‘𑀇𑀫𑀸𑀦𑀺 𑀔𑁄 𑀫𑁂, 𑀲𑀫𑁆𑀫 𑀧𑀭𑀺𑀡𑀸𑀬𑀓𑀭𑀢𑀦, 𑀘𑀢𑀼𑀭𑀸𑀲𑀻𑀢𑀺 𑀦𑀸𑀕𑀲𑀳𑀲𑁆𑀲𑀸𑀦𑀺 𑀲𑀸𑀬𑀁 𑀧𑀸𑀢𑀁 𑀉𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀺, 𑀢𑁂𑀦 𑀳𑀺, 𑀲𑀫𑁆𑀫 𑀧𑀭𑀺𑀡𑀸𑀬𑀓𑀭𑀢𑀦, 𑀯𑀲𑁆𑀲𑀲𑀢𑀲𑁆𑀲 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀁 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀁 ¶ 𑀦𑀸𑀕𑀲𑀳𑀲𑁆𑀲𑀸𑀦𑀺 𑀲𑀓𑀺𑀁 𑀲𑀓𑀺𑀁 𑀉𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀽’𑀢𑀺. ‘𑀏𑀯𑀁, 𑀤𑁂𑀯𑀸’𑀢𑀺 𑀔𑁄, 𑀆𑀦𑀦𑁆𑀤, 𑀧𑀭𑀺𑀡𑀸𑀬𑀓𑀭𑀢𑀦𑀁 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀅𑀧𑀭𑁂𑀦 𑀲𑀫𑀬𑁂𑀦 𑀯𑀲𑁆𑀲𑀲𑀢𑀲𑁆𑀲 𑀯𑀲𑁆𑀲𑀲𑀢𑀲𑁆𑀲 𑀅𑀘𑁆𑀘𑀬𑁂𑀦 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀁 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀁 𑀦𑀸𑀕𑀲𑀳𑀲𑁆𑀲𑀸𑀦𑀺 𑀲𑀓𑀺𑀁 𑀲𑀓𑀺𑀁 𑀉𑀧𑀝𑁆𑀞𑀸𑀦𑀁 𑀆𑀕𑀫𑀁𑀲𑀼.

𑀲𑀼𑀪𑀤𑁆𑀤𑀸𑀤𑁂𑀯𑀺𑀉𑀧𑀲𑀗𑁆𑀓𑀫𑀦𑀁

𑁨𑁬𑁫. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀲𑀼𑀪𑀤𑁆𑀤𑀸𑀬 𑀤𑁂𑀯𑀺𑀬𑀸 𑀩𑀳𑀼𑀦𑁆𑀦𑀁 𑀯𑀲𑁆𑀲𑀸𑀦𑀁 𑀩𑀳𑀼𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀩𑀳𑀼𑀦𑁆𑀦𑀁 ¶ 𑀯𑀲𑁆𑀲𑀲𑀳𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀏𑀢𑀤𑀳𑁄𑀲𑀺 𑁋 ‘𑀘𑀺𑀭𑀁 𑀤𑀺𑀝𑁆𑀞𑁄 𑀔𑁄 𑀫𑁂 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄. 𑀬𑀁𑀦𑀽𑀦𑀸𑀳𑀁 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑁂𑀬𑁆𑀬’𑀦𑁆𑀢𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀲𑀼𑀪𑀤𑁆𑀤𑀸 𑀤𑁂𑀯𑀻 ¶ 𑀇𑀢𑁆𑀣𑀸𑀕𑀸𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘𑀏𑀣 𑀢𑀼𑀫𑁆𑀳𑁂 𑀲𑀻𑀲𑀸𑀦𑀺 𑀦𑁆𑀳𑀸𑀬𑀣 𑀧𑀻𑀢𑀸𑀦𑀺 𑀯𑀢𑁆𑀣𑀸𑀦𑀺 𑀧𑀸𑀭𑀼𑀧𑀣. 𑀘𑀺𑀭𑀁 𑀤𑀺𑀝𑁆𑀞𑁄 𑀦𑁄 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄, 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’𑀢𑀺. ‘𑀏𑀯𑀁, 𑀅𑀬𑁆𑀬𑁂’𑀢𑀺 𑀔𑁄, 𑀆𑀦𑀦𑁆𑀤, 𑀇𑀢𑁆𑀣𑀸𑀕𑀸𑀭𑀁 𑀲𑀼𑀪𑀤𑁆𑀤𑀸𑀬 𑀤𑁂𑀯𑀺𑀬𑀸 𑀧𑀝𑀺𑀲𑁆𑀲𑀼𑀢𑁆𑀯𑀸 𑀲𑀻𑀲𑀸𑀦𑀺 𑀦𑁆𑀳𑀸𑀬𑀺𑀢𑁆𑀯𑀸 𑀧𑀻𑀢𑀸𑀦𑀺 𑀯𑀢𑁆𑀣𑀸𑀦𑀺 𑀧𑀸𑀭𑀼𑀧𑀺𑀢𑁆𑀯𑀸 𑀬𑁂𑀦 𑀲𑀼𑀪𑀤𑁆𑀤𑀸 𑀤𑁂𑀯𑀻 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀲𑀼𑀪𑀤𑁆𑀤𑀸 𑀤𑁂𑀯𑀻 𑀧𑀭𑀺𑀡𑀸𑀬𑀓𑀭𑀢𑀦𑀁 𑀆𑀫𑀦𑁆𑀢𑁂𑀲𑀺 𑁋 ‘𑀓𑀧𑁆𑀧𑁂𑀳𑀺, 𑀲𑀫𑁆𑀫 𑀧𑀭𑀺𑀡𑀸𑀬𑀓𑀭𑀢𑀦, 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁, 𑀘𑀺𑀭𑀁 𑀤𑀺𑀝𑁆𑀞𑁄 𑀦𑁄 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄, 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀸’𑀢𑀺. ‘𑀏𑀯𑀁, 𑀤𑁂𑀯𑀻’𑀢𑀺 𑀔𑁄, 𑀆𑀦𑀦𑁆𑀤, 𑀧𑀭𑀺𑀡𑀸𑀬𑀓𑀭𑀢𑀦𑀁 𑀲𑀼𑀪𑀤𑁆𑀤𑀸𑀬 𑀤𑁂𑀯𑀺𑀬𑀸 𑀧𑀝𑀺𑀲𑁆𑀲𑀼𑀢𑁆𑀯𑀸 𑀘𑀢𑀼𑀭𑀗𑁆𑀕𑀺𑀦𑀺𑀁 𑀲𑁂𑀦𑀁 𑀓𑀧𑁆𑀧𑀸𑀧𑁂𑀢𑁆𑀯𑀸 𑀲𑀼𑀪𑀤𑁆𑀤𑀸𑀬 𑀤𑁂𑀯𑀺𑀬𑀸 𑀧𑀝𑀺𑀯𑁂𑀤𑁂𑀲𑀺 𑁋 ‘𑀓𑀧𑁆𑀧𑀺𑀢𑀸 𑀔𑁄, 𑀤𑁂𑀯𑀺, 𑀘𑀢𑀼𑀭𑀗𑁆𑀕𑀺𑀦𑀻 𑀲𑁂𑀦𑀸, 𑀬𑀲𑁆𑀲𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀲𑀻’𑀢𑀺. 𑀅𑀣 ¶ 𑀔𑁄, 𑀆𑀦𑀦𑁆𑀤, 𑀲𑀼𑀪𑀤𑁆𑀤𑀸 ¶ 𑀤𑁂𑀯𑀻 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀲𑀤𑁆𑀥𑀺𑀁 𑀇𑀢𑁆𑀣𑀸𑀕𑀸𑀭𑁂𑀦 𑀬𑁂𑀦 𑀥𑀫𑁆𑀫𑁄 𑀧𑀸𑀲𑀸𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀬𑁂𑀦 𑀫𑀳𑀸𑀯𑀺𑀬𑀽𑀳𑀁 𑀓𑀽𑀝𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀳𑀸𑀯𑀺𑀬𑀽𑀳𑀲𑁆𑀲 𑀓𑀽𑀝𑀸𑀕𑀸𑀭𑀲𑁆𑀲 𑀤𑁆𑀯𑀸𑀭𑀩𑀸𑀳𑀁 𑀆𑀮𑀫𑁆𑀩𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀲𑀤𑁆𑀤𑀁 𑀲𑀼𑀢𑁆𑀯𑀸 𑁋 ‘𑀓𑀺𑀁 𑀦𑀼 𑀔𑁄 𑀫𑀳𑀢𑁄 𑀯𑀺𑀬 𑀚𑀦𑀓𑀸𑀬𑀲𑁆𑀲 𑀲𑀤𑁆𑀤𑁄’𑀢𑀺 𑀫𑀳𑀸𑀯𑀺𑀬𑀽𑀳𑀸 𑀓𑀽𑀝𑀸𑀕𑀸𑀭𑀸 𑀦𑀺𑀓𑁆𑀔𑀫𑀦𑁆𑀢𑁄 𑀅𑀤𑁆𑀤𑀲 𑀲𑀼𑀪𑀤𑁆𑀤𑀁 𑀤𑁂𑀯𑀺𑀁 𑀤𑁆𑀯𑀸𑀭𑀩𑀸𑀳𑀁 𑀆𑀮𑀫𑁆𑀩𑀺𑀢𑁆𑀯𑀸 𑀞𑀺𑀢𑀁, 𑀤𑀺𑀲𑁆𑀯𑀸𑀦 𑀲𑀼𑀪𑀤𑁆𑀤𑀁 𑀤𑁂𑀯𑀺𑀁 𑀏𑀢𑀤𑀯𑁄𑀘 𑁋 ‘𑀏𑀢𑁆𑀣𑁂𑀯, 𑀤𑁂𑀯𑀺, 𑀢𑀺𑀝𑁆𑀞 𑀫𑀸 𑀧𑀸𑀯𑀺𑀲𑀻’𑀢𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀅𑀜𑁆𑀜𑀢𑀭𑀁 ¶ 𑀧𑀼𑀭𑀺𑀲𑀁 𑀆𑀫𑀦𑁆𑀢𑁂𑀲𑀺 𑁋 ‘𑀏𑀳𑀺 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀫𑀳𑀸𑀯𑀺𑀬𑀽𑀳𑀸 𑀓𑀽𑀝𑀸𑀕𑀸𑀭𑀸 𑀲𑁄𑀯𑀡𑁆𑀡𑀫𑀬𑀁 𑀧𑀮𑁆𑀮𑀗𑁆𑀓𑀁 𑀦𑀻𑀳𑀭𑀺𑀢𑁆𑀯𑀸 𑀲𑀩𑁆𑀩𑀲𑁄𑀯𑀡𑁆𑀡𑀫𑀬𑁂 𑀢𑀸𑀮𑀯𑀦𑁂 𑀧𑀜𑁆𑀜𑀧𑁂𑀳𑀻’𑀢𑀺. ‘𑀏𑀯𑀁, 𑀤𑁂𑀯𑀸’𑀢𑀺 𑀔𑁄, 𑀆𑀦𑀦𑁆𑀤, 𑀲𑁄 𑀧𑀼𑀭𑀺𑀲𑁄 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀫𑀳𑀸𑀯𑀺𑀬𑀽𑀳𑀸 𑀓𑀽𑀝𑀸𑀕𑀸𑀭𑀸 𑀲𑁄𑀯𑀡𑁆𑀡𑀫𑀬𑀁 𑀧𑀮𑁆𑀮𑀗𑁆𑀓𑀁 𑀦𑀻𑀳𑀭𑀺𑀢𑁆𑀯𑀸 𑀲𑀩𑁆𑀩𑀲𑁄𑀯𑀡𑁆𑀡𑀫𑀬𑁂 𑀢𑀸𑀮𑀯𑀦𑁂 𑀧𑀜𑁆𑀜𑀧𑁂𑀲𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀲𑀺 𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬 𑀲𑀢𑁄 𑀲𑀫𑁆𑀧𑀚𑀸𑀦𑁄.

𑁨𑁬𑁬. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀲𑀼𑀪𑀤𑁆𑀤𑀸𑀬 𑀤𑁂𑀯𑀺𑀬𑀸 𑀏𑀢𑀤𑀳𑁄𑀲𑀺 𑁋 ‘𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀔𑁄 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄 𑀧𑀭𑀺𑀬𑁄𑀤𑀸𑀢𑁄, 𑀫𑀸 𑀳𑁂𑀯 𑀔𑁄 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀓𑀸𑀮𑀫𑀓𑀸𑀲𑀻’𑀢𑀺 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀏𑀢𑀤𑀯𑁄𑀘 𑁋

‘𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 𑀓𑀼𑀲𑀸𑀯𑀢𑀻𑀭𑀸𑀚𑀥𑀸𑀦𑀺𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 ¶ 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀺 𑀥𑀫𑁆𑀫𑀧𑀸𑀲𑀸𑀤𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 ¶ 𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺 𑀫𑀳𑀸𑀯𑀺𑀬𑀽𑀳𑀓𑀽𑀝𑀸𑀕𑀸𑀭𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀧𑀮𑁆𑀮𑀗𑁆𑀓𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀫𑀬𑀸𑀦𑀺 𑀭𑀽𑀧𑀺𑀬𑀫𑀬𑀸𑀦𑀺 𑀤𑀦𑁆𑀢𑀫𑀬𑀸𑀦𑀺 𑀲𑀸𑀭𑀫𑀬𑀸𑀦𑀺 𑀕𑁄𑀦𑀓𑀢𑁆𑀣𑀢𑀸𑀦𑀺 𑀧𑀝𑀺𑀓𑀢𑁆𑀣𑀢𑀸𑀦𑀺 𑀧𑀝𑀮𑀺𑀓𑀢𑁆𑀣𑀢𑀸𑀦𑀺 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀸𑀦𑀺 𑀲𑀉𑀢𑁆𑀢𑀭𑀘𑁆𑀙𑀤𑀸𑀦𑀺 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺, 𑀚𑀻𑀯𑀺𑀢𑁂 ¶ 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀦𑀸𑀕𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀉𑀧𑁄𑀲𑀣𑀦𑀸𑀕𑀭𑀸𑀚𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯 ¶ , 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀅𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀯𑀮𑀸𑀳𑀓𑀅𑀲𑁆𑀲𑀭𑀸𑀚𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯 𑀘𑀢𑀼𑀭𑀸𑀲𑀻𑀢𑀺 𑀭𑀣𑀲𑀳𑀲𑁆𑀲𑀸𑀦𑀺 𑀲𑀻𑀳𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀩𑁆𑀬𑀕𑁆𑀖𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀤𑀻𑀧𑀺𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀧𑀡𑁆𑀟𑀼𑀓𑀫𑁆𑀩𑀮𑀧𑀭𑀺𑀯𑀸𑀭𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀯𑁂𑀚𑀬𑀦𑁆𑀢𑀭𑀣𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀫𑀡𑀺𑀲𑀳𑀲𑁆𑀲𑀸𑀦𑀺 𑀫𑀡𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀇𑀢𑁆𑀣𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀕𑀳𑀧𑀢𑀺𑀲𑀳𑀲𑁆𑀲𑀸𑀦𑀺 𑀕𑀳𑀧𑀢𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀔𑀢𑁆𑀢𑀺𑀬𑀲𑀳𑀲𑁆𑀲𑀸𑀦𑀺 𑀅𑀦𑀼𑀬𑀦𑁆𑀢𑀸𑀦𑀺 𑀧𑀭𑀺𑀡𑀸𑀬𑀓𑀭𑀢𑀦𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀥𑁂𑀦𑀼𑀲𑀳𑀲𑁆𑀲𑀸𑀦𑀺 𑀤𑀼𑀳𑀲𑀦𑁆𑀤𑀦𑀸𑀦𑀺 ¶ 𑀓𑀁𑀲𑀽𑀧𑀥𑀸𑀭𑀡𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀯𑀢𑁆𑀣𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀔𑁄𑀫𑀲𑀼𑀔𑀼𑀫𑀸𑀦𑀁 𑀓𑀧𑁆𑀧𑀸𑀲𑀺𑀓𑀲𑀼𑀔𑀼𑀫𑀸𑀦𑀁 𑀓𑁄𑀲𑁂𑀬𑁆𑀬𑀲𑀼𑀔𑀼𑀫𑀸𑀦𑀁 ¶ 𑀓𑀫𑁆𑀩𑀮𑀲𑀼𑀔𑀼𑀫𑀸𑀦𑀁. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺, 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀣𑀸𑀮𑀺𑀧𑀸𑀓𑀲𑀳𑀲𑁆𑀲𑀸𑀦𑀺 𑀲𑀸𑀬𑀁 𑀧𑀸𑀢𑀁 𑀪𑀢𑁆𑀢𑀸𑀪𑀺𑀳𑀸𑀭𑁄 𑀅𑀪𑀺𑀳𑀭𑀺𑀬𑀢𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀚𑀦𑁂𑀳𑀺 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀓𑀭𑁄𑀳𑀻’𑀢𑀺.

𑁨𑁬𑁭. ‘‘𑀏𑀯𑀁 𑀯𑀼𑀢𑁆𑀢𑁂, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀲𑀼𑀪𑀤𑁆𑀤𑀁 𑀤𑁂𑀯𑀺𑀁 𑀏𑀢𑀤𑀯𑁄𑀘 𑁋

‘𑀤𑀻𑀖𑀭𑀢𑁆𑀢𑀁 𑀔𑁄 𑀫𑀁 𑀢𑁆𑀯𑀁, 𑀤𑁂𑀯𑀺, 𑀇𑀝𑁆𑀞𑁂𑀳𑀺 𑀓𑀦𑁆𑀢𑁂𑀳𑀺 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀲𑀫𑀼𑀤𑀸𑀘𑀭𑀺𑀢𑁆𑀣; 𑀅𑀣 𑀘 𑀧𑀦 𑀫𑀁 𑀢𑁆𑀯𑀁 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀅𑀦𑀺𑀝𑁆𑀞𑁂𑀳𑀺 𑀅𑀓𑀦𑁆𑀢𑁂𑀳𑀺 𑀅𑀧𑁆𑀧𑀺𑀬𑁂𑀳𑀺 𑀅𑀫𑀦𑀸𑀧𑁂𑀳𑀺 𑀲𑀫𑀼𑀤𑀸𑀘𑀭𑀲𑀻’𑀢𑀺. ‘𑀓𑀣𑀁 𑀘𑀭𑀳𑀺 𑀢𑀁, 𑀤𑁂𑀯, 𑀲𑀫𑀼𑀤𑀸𑀘𑀭𑀸𑀫𑀻’𑀢𑀺? ‘𑀏𑀯𑀁 𑀔𑁄 𑀫𑀁 𑀢𑁆𑀯𑀁, 𑀤𑁂𑀯𑀺, 𑀲𑀫𑀼𑀤𑀸𑀘𑀭 𑁋 ‘‘𑀲𑀩𑁆𑀩𑁂𑀳𑁂𑀯, 𑀤𑁂𑀯, 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄 𑀅𑀜𑁆𑀜𑀣𑀸𑀪𑀸𑀯𑁄, 𑀫𑀸 𑀔𑁄 𑀢𑁆𑀯𑀁, 𑀤𑁂𑀯, 𑀲𑀸𑀧𑁂𑀓𑁆𑀔𑁄 𑀓𑀸𑀮𑀫𑀓𑀸𑀲𑀺, 𑀤𑀼𑀓𑁆𑀔𑀸 𑀲𑀸𑀧𑁂𑀓𑁆𑀔𑀲𑁆𑀲 𑀓𑀸𑀮𑀗𑁆𑀓𑀺𑀭𑀺𑀬𑀸, 𑀕𑀭𑀳𑀺𑀢𑀸 𑀘 𑀲𑀸𑀧𑁂𑀓𑁆𑀔𑀲𑁆𑀲 𑀓𑀸𑀮𑀗𑁆𑀓𑀺𑀭𑀺𑀬𑀸. 𑀇𑀫𑀸𑀦𑀺 ¶ 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 ¶ 𑀓𑀼𑀲𑀸𑀯𑀢𑀻𑀭𑀸𑀚𑀥𑀸𑀦𑀺𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀺 𑀥𑀫𑁆𑀫𑀧𑀸𑀲𑀸𑀤𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂 ¶ , 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺 𑀫𑀳𑀸𑀯𑀺𑀬𑀽𑀳𑀓𑀽𑀝𑀸𑀕𑀸𑀭𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀧𑀮𑁆𑀮𑀗𑁆𑀓𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀫𑀬𑀸𑀦𑀺 𑀭𑀽𑀧𑀺𑀬𑀫𑀬𑀸𑀦𑀺 𑀤𑀦𑁆𑀢𑀫𑀬𑀸𑀦𑀺 𑀲𑀸𑀭𑀫𑀬𑀸𑀦𑀺 𑀕𑁄𑀦𑀓𑀢𑁆𑀣𑀢𑀸𑀦𑀺 𑀧𑀝𑀺𑀓𑀢𑁆𑀣𑀢𑀸𑀦𑀺 𑀧𑀝𑀮𑀺𑀓𑀢𑁆𑀣𑀢𑀸𑀦𑀺 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀸𑀦𑀺 𑀲𑀉𑀢𑁆𑀢𑀭𑀘𑁆𑀙𑀤𑀸𑀦𑀺 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀦𑀸𑀕𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 ¶ 𑀉𑀧𑁄𑀲𑀣𑀦𑀸𑀕𑀭𑀸𑀚𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀅𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀯𑀮𑀸𑀳𑀓𑀅𑀲𑁆𑀲𑀭𑀸𑀚𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀭𑀣𑀲𑀳𑀲𑁆𑀲𑀸𑀦𑀺 𑀲𑀻𑀳𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀩𑁆𑀬𑀕𑁆𑀖𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀤𑀻𑀧𑀺𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀧𑀡𑁆𑀟𑀼𑀓𑀫𑁆𑀩𑀮𑀧𑀭𑀺𑀯𑀸𑀭𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀯𑁂𑀚𑀬𑀦𑁆𑀢𑀭𑀣𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀫𑀡𑀺𑀲𑀳𑀲𑁆𑀲𑀸𑀦𑀺 𑀫𑀡𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀲𑀼𑀪𑀤𑁆𑀤𑀸𑀤𑁂𑀯𑀺𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀕𑀳𑀧𑀢𑀺𑀲𑀳𑀲𑁆𑀲𑀸𑀦𑀺 𑀕𑀳𑀧𑀢𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀔𑀢𑁆𑀢𑀺𑀬𑀲𑀳𑀲𑁆𑀲𑀸𑀦𑀺 𑀅𑀦𑀼𑀬𑀦𑁆𑀢𑀸𑀦𑀺 𑀧𑀭𑀺𑀡𑀸𑀬𑀓𑀭𑀢𑀦𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀥𑁂𑀦𑀼𑀲𑀳𑀲𑁆𑀲𑀸𑀦𑀺 𑀤𑀼𑀳𑀲𑀦𑁆𑀤𑀦𑀸𑀦𑀺 𑀓𑀁𑀲𑀽𑀧𑀥𑀸𑀭𑀡𑀸𑀦𑀺. 𑀏𑀢𑁆𑀣 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 ¶ 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀯𑀢𑁆𑀣𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀔𑁄𑀫𑀲𑀼𑀔𑀼𑀫𑀸𑀦𑀁 𑀓𑀧𑁆𑀧𑀸𑀲𑀺𑀓𑀲𑀼𑀔𑀼𑀫𑀸𑀦𑀁 𑀓𑁄𑀲𑁂𑀬𑁆𑀬𑀲𑀼𑀔𑀼𑀫𑀸𑀦𑀁 𑀓𑀫𑁆𑀩𑀮𑀲𑀼𑀔𑀼𑀫𑀸𑀦𑀁. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 ¶ 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂 𑀤𑁂𑀯 𑀘𑀢𑀼𑀭𑀸𑀲𑀻𑀢𑀺 𑀣𑀸𑀮𑀺𑀧𑀸𑀓𑀲𑀳𑀲𑁆𑀲𑀸𑀦𑀺 𑀲𑀸𑀬𑀁 𑀧𑀸𑀢𑀁 𑀪𑀢𑁆𑀢𑀸𑀪𑀺𑀳𑀸𑀭𑁄 𑀅𑀪𑀺𑀳𑀭𑀺𑀬𑀢𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀻’’’𑀢𑀺.

𑁨𑁬𑁮. ‘‘𑀏𑀯𑀁 ¶ 𑀯𑀼𑀢𑁆𑀢𑁂, 𑀆𑀦𑀦𑁆𑀤, 𑀲𑀼𑀪𑀤𑁆𑀤𑀸 𑀤𑁂𑀯𑀻 𑀧𑀭𑁄𑀤𑀺 𑀅𑀲𑁆𑀲𑀽𑀦𑀺 𑀧𑀯𑀢𑁆𑀢𑁂𑀲𑀺. 𑀅𑀣 𑀔𑁄, 𑀆𑀦𑀦𑁆𑀤, 𑀲𑀼𑀪𑀤𑁆𑀤𑀸 𑀤𑁂𑀯𑀻 𑀅𑀲𑁆𑀲𑀽𑀦𑀺 𑀧𑀼𑀜𑁆𑀙𑀺𑀢𑁆𑀯𑀸 [𑀧𑀫𑀚𑁆𑀚𑀺𑀢𑁆𑀯𑀸 (𑀲𑀻. 𑀲𑁆𑀬𑀸. 𑀧𑀻.), 𑀧𑀼𑀜𑁆𑀚𑀺𑀢𑁆𑀯𑀸 (𑀓.)] 𑀭𑀸𑀚𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀁 𑀏𑀢𑀤𑀯𑁄𑀘 𑁋

‘𑀲𑀩𑁆𑀩𑁂𑀳𑁂𑀯 ¶ , 𑀤𑁂𑀯, 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄 𑀅𑀜𑁆𑀜𑀣𑀸𑀪𑀸𑀯𑁄, 𑀫𑀸 𑀔𑁄 𑀢𑁆𑀯𑀁, 𑀤𑁂𑀯, 𑀲𑀸𑀧𑁂𑀓𑁆𑀔𑁄 𑀓𑀸𑀮𑀫𑀓𑀸𑀲𑀺, 𑀤𑀼𑀓𑁆𑀔𑀸 𑀲𑀸𑀧𑁂𑀓𑁆𑀔𑀲𑁆𑀲 𑀓𑀸𑀮𑀗𑁆𑀓𑀺𑀭𑀺𑀬𑀸, 𑀕𑀭𑀳𑀺𑀢𑀸 𑀘 𑀲𑀸𑀧𑁂𑀓𑁆𑀔𑀲𑁆𑀲 𑀓𑀸𑀮𑀗𑁆𑀓𑀺𑀭𑀺𑀬𑀸. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 𑀓𑀼𑀲𑀸𑀯𑀢𑀻𑀭𑀸𑀚𑀥𑀸𑀦𑀺𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀺 𑀥𑀫𑁆𑀫𑀧𑀸𑀲𑀸𑀤𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺 𑀫𑀳𑀸𑀯𑀺𑀬𑀽𑀳𑀓𑀽𑀝𑀸𑀕𑀸𑀭𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀧𑀮𑁆𑀮𑀗𑁆𑀓𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀫𑀬𑀸𑀦𑀺 𑀭𑀽𑀧𑀺𑀬𑀫𑀬𑀸𑀦𑀺 𑀤𑀦𑁆𑀢𑀫𑀬𑀸𑀦𑀺 𑀲𑀸𑀭𑀫𑀬𑀸𑀦𑀺 𑀕𑁄𑀦𑀓𑀢𑁆𑀣𑀢𑀸𑀦𑀺 𑀧𑀝𑀺𑀓𑀢𑁆𑀣𑀢𑀸𑀦𑀺 𑀧𑀝𑀮𑀺𑀓𑀢𑁆𑀣𑀢𑀸𑀦𑀺 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀸𑀦𑀺 𑀲𑀉𑀢𑁆𑀢𑀭𑀘𑁆𑀙𑀤𑀸𑀦𑀺 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀦𑀸𑀕𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀉𑀧𑁄𑀲𑀣𑀦𑀸𑀕𑀭𑀸𑀚𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂 ¶ , 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀅𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀯𑀮𑀸𑀳𑀓𑀅𑀲𑁆𑀲𑀭𑀸𑀚𑀧𑁆𑀧𑀫𑀼𑀔𑀸𑀦𑀺 ¶ . 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳, 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀭𑀣𑀲𑀳𑀲𑁆𑀲𑀸𑀦𑀺 𑀲𑀻𑀳𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀩𑁆𑀬𑀕𑁆𑀖𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀤𑀻𑀧𑀺𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀧𑀡𑁆𑀟𑀼𑀓𑀫𑁆𑀩𑀮𑀧𑀭𑀺𑀯𑀸𑀭𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀯𑁂𑀚𑀬𑀦𑁆𑀢𑀭𑀣𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀫𑀡𑀺𑀲𑀳𑀲𑁆𑀲𑀸𑀦𑀺 𑀫𑀡𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀇𑀢𑁆𑀣𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳, 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂 ¶ , 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀕𑀳𑀧𑀢𑀺𑀲𑀳𑀲𑁆𑀲𑀸𑀦𑀺 𑀕𑀳𑀧𑀢𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀔𑀢𑁆𑀢𑀺𑀬𑀲𑀳𑀲𑁆𑀲𑀸𑀦𑀺 𑀅𑀦𑀼𑀬𑀦𑁆𑀢𑀸𑀦𑀺 𑀧𑀭𑀺𑀡𑀸𑀬𑀓𑀭𑀢𑀦𑀧𑁆𑀧𑀫𑀼𑀔𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀥𑁂𑀦𑀼𑀲𑀳𑀲𑁆𑀲𑀸𑀦𑀺 𑀤𑀼𑀳𑀲𑀦𑁆𑀤𑀦𑀸𑀦𑀺 𑀓𑀁𑀲𑀽𑀧𑀥𑀸𑀭𑀡𑀸𑀦𑀺. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀯𑀢𑁆𑀣𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀔𑁄𑀫𑀲𑀼𑀔𑀼𑀫𑀸𑀦𑀁 𑀓𑀧𑁆𑀧𑀸𑀲𑀺𑀓𑀲𑀼𑀔𑀼𑀫𑀸𑀦𑀁 𑀓𑁄𑀲𑁂𑀬𑁆𑀬𑀲𑀼𑀔𑀼𑀫𑀸𑀦𑀁 𑀓𑀫𑁆𑀩𑀮𑀲𑀼𑀔𑀼𑀫𑀸𑀦𑀁. 𑀏𑀢𑁆𑀣, 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀺. 𑀇𑀫𑀸𑀦𑀺 𑀢𑁂, 𑀤𑁂𑀯, 𑀘𑀢𑀼𑀭𑀸𑀲𑀻𑀢𑀺 𑀣𑀸𑀮𑀺𑀧𑀸𑀓𑀲𑀳𑀲𑁆𑀲𑀸𑀦𑀺 𑀲𑀸𑀬𑀁 𑀧𑀸𑀢𑀁 𑀪𑀢𑁆𑀢𑀸𑀪𑀺𑀳𑀸𑀭𑁄 𑀅𑀪𑀺𑀳𑀭𑀺𑀬𑀢𑀺. 𑀏𑀢𑁆𑀣 ¶ , 𑀤𑁂𑀯, 𑀙𑀦𑁆𑀤𑀁 𑀧𑀚𑀳 𑀚𑀻𑀯𑀺𑀢𑁂 𑀅𑀧𑁂𑀓𑁆𑀔𑀁 𑀫𑀸𑀓𑀸𑀲𑀻’𑀢𑀺.

𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑀫𑀁

𑁨𑁬𑁯. ‘‘𑀅𑀣 ¶ 𑀔𑁄, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀦𑀘𑀺𑀭𑀲𑁆𑀲𑁂𑀯 𑀓𑀸𑀮𑀫𑀓𑀸𑀲𑀺. 𑀲𑁂𑀬𑁆𑀬𑀣𑀸𑀧𑀺, 𑀆𑀦𑀦𑁆𑀤, 𑀕𑀳𑀧𑀢𑀺𑀲𑁆𑀲 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀲𑁆𑀲 𑀯𑀸 𑀫𑀦𑀼𑀜𑁆𑀜𑀁 𑀪𑁄𑀚𑀦𑀁 𑀪𑀼𑀢𑁆𑀢𑀸𑀯𑀺𑀲𑁆𑀲 𑀪𑀢𑁆𑀢𑀲𑀫𑁆𑀫𑀤𑁄 𑀳𑁄𑀢𑀺, 𑀏𑀯𑀫𑁂𑀯 𑀔𑁄, 𑀆𑀦𑀦𑁆𑀤, 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 ¶ 𑀫𑀸𑀭𑀡𑀦𑁆𑀢𑀺𑀓𑀸 𑀯𑁂𑀤𑀦𑀸 𑀅𑀳𑁄𑀲𑀺. 𑀓𑀸𑀮𑀗𑁆𑀓𑀢𑁄 𑀘, 𑀆𑀦𑀦𑁆𑀤, 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀲𑀼𑀕𑀢𑀺𑀁 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀧𑀚𑁆𑀚𑀺. 𑀭𑀸𑀚𑀸, 𑀆𑀦𑀦𑁆𑀤, 𑀫𑀳𑀸𑀲𑀼𑀤𑀲𑁆𑀲𑀦𑁄 𑀘𑀢𑀼𑀭𑀸𑀲𑀻𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀓𑀼𑀫𑀸𑀭𑀓𑀻𑀴𑀁 [𑀓𑀻𑀴𑀺𑀢𑀁 (𑀓.), 𑀓𑀻𑀴𑀺𑀓𑀁 (𑀲𑀻. 𑀧𑀻.)] 𑀓𑀻𑀴𑀺. 𑀘𑀢𑀼𑀭𑀸𑀲𑀻𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀑𑀧𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀘𑀢𑀼𑀭𑀸𑀲𑀻𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀘𑀢𑀼𑀭𑀸𑀲𑀻𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀕𑀺𑀳𑀺𑀪𑀽𑀢𑁄 [𑀕𑀺𑀳𑀻𑀪𑀽𑀢𑁄 (𑀲𑀻. 𑀧𑀻.)] 𑀥𑀫𑁆𑀫𑁂 𑀧𑀸𑀲𑀸𑀤𑁂 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺 [𑀩𑁆𑀭𑀳𑁆𑀫𑀘𑀭𑀺𑀬𑀫𑀘𑀭𑀺 (𑀓.)]. 𑀲𑁄 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀪𑀸𑀯𑁂𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀅𑀳𑁄𑀲𑀺.

𑁨𑁭𑁦. ‘‘𑀲𑀺𑀬𑀸 𑀔𑁄 𑀧𑀦𑀸𑀦𑀦𑁆𑀤, 𑀏𑀯𑀫𑀲𑁆𑀲 𑁋 ‘𑀅𑀜𑁆𑀜𑁄 𑀦𑀽𑀦 𑀢𑁂𑀦 𑀲𑀫𑀬𑁂𑀦 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀅𑀳𑁄𑀲𑀻’𑀢𑀺, 𑀦 𑀔𑁄 𑀧𑀦𑁂𑀢𑀁, 𑀆𑀦𑀦𑁆𑀤, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀅𑀳𑀁 𑀢𑁂𑀦 𑀲𑀫𑀬𑁂𑀦 𑀭𑀸𑀚𑀸 𑀫𑀳𑀸𑀲𑀼𑀤𑀲𑁆𑀲𑀦𑁄 𑀅𑀳𑁄𑀲𑀺𑀁. 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 𑀓𑀼𑀲𑀸𑀯𑀢𑀻𑀭𑀸𑀚𑀥𑀸𑀦𑀺𑀧𑁆𑀧𑀫𑀼𑀔𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀺 𑀥𑀫𑁆𑀫𑀧𑀸𑀲𑀸𑀤𑀧𑁆𑀧𑀫𑀼𑀔𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀺 𑀫𑀳𑀸𑀯𑀺𑀬𑀽𑀳𑀓𑀽𑀝𑀸𑀕𑀸𑀭𑀧𑁆𑀧𑀫𑀼𑀔𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀧𑀮𑁆𑀮𑀗𑁆𑀓𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀫𑀬𑀸𑀦𑀺 𑀭𑀽𑀧𑀺𑀬𑀫𑀬𑀸𑀦𑀺 𑀤𑀦𑁆𑀢𑀫𑀬𑀸𑀦𑀺 𑀲𑀸𑀭𑀫𑀬𑀸𑀦𑀺 𑀕𑁄𑀦𑀓𑀢𑁆𑀣𑀢𑀸𑀦𑀺 𑀧𑀝𑀺𑀓𑀢𑁆𑀣𑀢𑀸𑀦𑀺 𑀧𑀝𑀮𑀺𑀓𑀢𑁆𑀣𑀢𑀸𑀦𑀺 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀸𑀦𑀺 ¶ 𑀲𑀉𑀢𑁆𑀢𑀭𑀘𑁆𑀙𑀤𑀸𑀦𑀺 ¶ 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀦𑀸𑀕𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀉𑀧𑁄𑀲𑀣𑀦𑀸𑀕𑀭𑀸𑀚𑀧𑁆𑀧𑀫𑀼𑀔𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀅𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀯𑀮𑀸𑀳𑀓𑀅𑀲𑁆𑀲𑀭𑀸𑀚𑀧𑁆𑀧𑀫𑀼𑀔𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀭𑀣𑀲𑀳𑀲𑁆𑀲𑀸𑀦𑀺 𑀲𑀻𑀳𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 ¶ 𑀩𑁆𑀬𑀕𑁆𑀖𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀤𑀻𑀧𑀺𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀧𑀡𑁆𑀟𑀼𑀓𑀫𑁆𑀩𑀮𑀧𑀭𑀺𑀯𑀸𑀭𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀸𑀦𑀺 𑀯𑁂𑀚𑀬𑀦𑁆𑀢𑀭𑀣𑀧𑁆𑀧𑀫𑀼𑀔𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀫𑀡𑀺𑀲𑀳𑀲𑁆𑀲𑀸𑀦𑀺 𑀫𑀡𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀲𑀼𑀪𑀤𑁆𑀤𑀸𑀤𑁂𑀯𑀺𑀧𑁆𑀧𑀫𑀼𑀔𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀕𑀳𑀧𑀢𑀺𑀲𑀳𑀲𑁆𑀲𑀸𑀦𑀺 𑀕𑀳𑀧𑀢𑀺𑀭𑀢𑀦𑀧𑁆𑀧𑀫𑀼𑀔𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀔𑀢𑁆𑀢𑀺𑀬𑀲𑀳𑀲𑁆𑀲𑀸𑀦𑀺 𑀅𑀦𑀼𑀬𑀦𑁆𑀢𑀸𑀦𑀺 𑀧𑀭𑀺𑀡𑀸𑀬𑀓𑀭𑀢𑀦𑀧𑁆𑀧𑀫𑀼𑀔𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀥𑁂𑀦𑀼𑀲𑀳𑀲𑁆𑀲𑀸𑀦𑀺 𑀤𑀼𑀳𑀲𑀦𑁆𑀤𑀦𑀸𑀦𑀺 𑀓𑀁𑀲𑀽𑀧𑀥𑀸𑀭𑀡𑀸𑀦𑀺, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀯𑀢𑁆𑀣𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀔𑁄𑀫𑀲𑀼𑀔𑀼𑀫𑀸𑀦𑀁 𑀓𑀧𑁆𑀧𑀸𑀲𑀺𑀓𑀲𑀼𑀔𑀼𑀫𑀸𑀦𑀁 𑀓𑁄𑀲𑁂𑀬𑁆𑀬𑀲𑀼𑀔𑀼𑀫𑀸𑀦𑀁 𑀓𑀫𑁆𑀩𑀮𑀲𑀼𑀔𑀼𑀫𑀸𑀦𑀁, 𑀫𑀫 𑀢𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀣𑀸𑀮𑀺𑀧𑀸𑀓𑀲𑀳𑀲𑁆𑀲𑀸𑀦𑀺 𑀲𑀸𑀬𑀁 𑀧𑀸𑀢𑀁 𑀪𑀢𑁆𑀢𑀸𑀪𑀺𑀳𑀸𑀭𑁄 𑀅𑀪𑀺𑀳𑀭𑀺𑀬𑀺𑀢𑁆𑀣.

𑁨𑁭𑁧. ‘‘𑀢𑁂𑀲𑀁 ¶ 𑀔𑁄 𑀧𑀦𑀸𑀦𑀦𑁆𑀤, 𑀘𑀢𑀼𑀭𑀸𑀲𑀻𑀢𑀺𑀦𑀕𑀭𑀲𑀳𑀲𑁆𑀲𑀸𑀦𑀁 𑀏𑀓𑀜𑁆𑀜𑁂𑀯 𑀢𑀁 𑀦𑀕𑀭𑀁 𑀳𑁄𑀢𑀺, 𑀬𑀁 𑀢𑁂𑀦 𑀲𑀫𑀬𑁂𑀦 𑀅𑀚𑁆𑀛𑀸𑀯𑀲𑀸𑀫𑀺 𑀬𑀤𑀺𑀤𑀁 𑀓𑀼𑀲𑀸𑀯𑀢𑀻 𑀭𑀸𑀚𑀥𑀸𑀦𑀻. 𑀢𑁂𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀘𑀢𑀼𑀭𑀸𑀲𑀻𑀢𑀺𑀧𑀸𑀲𑀸𑀤𑀲𑀳𑀲𑁆𑀲𑀸𑀦𑀁 𑀏𑀓𑁄𑀬𑁂𑀯 𑀲𑁄 𑀧𑀸𑀲𑀸𑀤𑁄 𑀳𑁄𑀢𑀺, 𑀬𑀁 𑀢𑁂𑀦 𑀲𑀫𑀬𑁂𑀦 ¶ 𑀅𑀚𑁆𑀛𑀸𑀯𑀲𑀸𑀫𑀺 𑀬𑀤𑀺𑀤𑀁 𑀥𑀫𑁆𑀫𑁄 𑀧𑀸𑀲𑀸𑀤𑁄. 𑀢𑁂𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀘𑀢𑀼𑀭𑀸𑀲𑀻𑀢𑀺𑀓𑀽𑀝𑀸𑀕𑀸𑀭𑀲𑀳𑀲𑁆𑀲𑀸𑀦𑀁 𑀏𑀓𑀜𑁆𑀜𑁂𑀯 𑀢𑀁 𑀓𑀽𑀝𑀸𑀕𑀸𑀭𑀁 𑀳𑁄𑀢𑀺, 𑀬𑀁 𑀢𑁂𑀦 𑀲𑀫𑀬𑁂𑀦 𑀅𑀚𑁆𑀛𑀸𑀯𑀲𑀸𑀫𑀺 𑀬𑀤𑀺𑀤𑀁 𑀫𑀳𑀸𑀯𑀺𑀬𑀽𑀳𑀁 𑀓𑀽𑀝𑀸𑀕𑀸𑀭𑀁. 𑀢𑁂𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀘𑀢𑀼𑀭𑀸𑀲𑀻𑀢𑀺𑀧𑀮𑁆𑀮𑀗𑁆𑀓𑀲𑀳𑀲𑁆𑀲𑀸𑀦𑀁 𑀏𑀓𑁄𑀬𑁂𑀯 𑀲𑁄 𑀧𑀮𑁆𑀮𑀗𑁆𑀓𑁄 𑀳𑁄𑀢𑀺, 𑀬𑀁 𑀢𑁂𑀦 𑀲𑀫𑀬𑁂𑀦 𑀧𑀭𑀺𑀪𑀼𑀜𑁆𑀚𑀸𑀫𑀺 𑀬𑀤𑀺𑀤𑀁 𑀲𑁄𑀯𑀡𑁆𑀡𑀫𑀬𑁄 𑀯𑀸 𑀭𑀽𑀧𑀺𑀬𑀫𑀬𑁄 𑀯𑀸 𑀤𑀦𑁆𑀢𑀫𑀬𑁄 𑀯𑀸 𑀲𑀸𑀭𑀫𑀬𑁄 𑀯𑀸. 𑀢𑁂𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀘𑀢𑀼𑀭𑀸𑀲𑀻𑀢𑀺𑀦𑀸𑀕𑀲𑀳𑀲𑁆𑀲𑀸𑀦𑀁 𑀏𑀓𑁄𑀬𑁂𑀯 𑀲𑁄 𑀦𑀸𑀕𑁄 𑀳𑁄𑀢𑀺, 𑀬𑀁 𑀢𑁂𑀦 𑀲𑀫𑀬𑁂𑀦 𑀅𑀪𑀺𑀭𑀼𑀳𑀸𑀫𑀺 𑀬𑀤𑀺𑀤𑀁 𑀉𑀧𑁄𑀲𑀣𑁄 𑀦𑀸𑀕𑀭𑀸𑀚𑀸. 𑀢𑁂𑀲𑀁 ¶ 𑀔𑁄 𑀧𑀦𑀸𑀦𑀦𑁆𑀤, 𑀘𑀢𑀼𑀭𑀸𑀲𑀻𑀢𑀺𑀅𑀲𑁆𑀲𑀲𑀳𑀲𑁆𑀲𑀸𑀦𑀁 𑀏𑀓𑁄𑀬𑁂𑀯 𑀲𑁄 𑀅𑀲𑁆𑀲𑁄 𑀳𑁄𑀢𑀺, 𑀬𑀁 𑀢𑁂𑀦 𑀲𑀫𑀬𑁂𑀦 𑀅𑀪𑀺𑀭𑀼𑀳𑀸𑀫𑀺 𑀬𑀤𑀺𑀤𑀁 𑀯𑀮𑀸𑀳𑀓𑁄 𑀅𑀲𑁆𑀲𑀭𑀸𑀚𑀸. 𑀢𑁂𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀘𑀢𑀼𑀭𑀸𑀲𑀻𑀢𑀺𑀭𑀣𑀲𑀳𑀲𑁆𑀲𑀸𑀦𑀁 𑀏𑀓𑁄𑀬𑁂𑀯 𑀲𑁄 𑀭𑀣𑁄 𑀳𑁄𑀢𑀺, 𑀬𑀁 𑀢𑁂𑀦 𑀲𑀫𑀬𑁂𑀦 𑀅𑀪𑀺𑀭𑀼𑀳𑀸𑀫𑀺 𑀬𑀤𑀺𑀤𑀁 𑀯𑁂𑀚𑀬𑀦𑁆𑀢𑀭𑀣𑁄. 𑀢𑁂𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀘𑀢𑀼𑀭𑀸𑀲𑀻𑀢𑀺𑀇𑀢𑁆𑀣𑀺𑀲𑀳𑀲𑁆𑀲𑀸𑀦𑀁 𑀏𑀓𑀸𑀬𑁂𑀯 ¶ 𑀲𑀸 𑀇𑀢𑁆𑀣𑀻 𑀳𑁄𑀢𑀺, 𑀬𑀸 𑀢𑁂𑀦 𑀲𑀫𑀬𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀢𑀺 𑀔𑀢𑁆𑀢𑀺𑀬𑀸𑀦𑀻 𑀯𑀸 𑀯𑁂𑀲𑁆𑀲𑀺𑀦𑀻 [𑀯𑁂𑀲𑁆𑀲𑀸𑀬𑀺𑀦𑀻 (𑀲𑁆𑀬𑀸.), 𑀯𑁂𑀮𑀸𑀫𑀺𑀓𑀸𑀦𑀻 (𑀓. 𑀲𑀻. 𑀧𑀻.) 𑀯𑁂𑀮𑀸𑀫𑀺𑀓𑀸 (𑀲𑀁. 𑀦𑀺. 𑁩.𑁯𑁬)] 𑀯𑀸. 𑀢𑁂𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀯𑀸. 𑀢𑁂𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀘𑀢𑀼𑀭𑀸𑀲𑀻𑀢𑀺𑀯𑀢𑁆𑀣𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀏𑀓𑀁𑀬𑁂𑀯 𑀢𑀁 𑀤𑀼𑀲𑁆𑀲𑀬𑀼𑀕𑀁 𑀳𑁄𑀢𑀺, 𑀬𑀁 𑀢𑁂𑀦 𑀲𑀫𑀬𑁂𑀦 𑀧𑀭𑀺𑀤𑀳𑀸𑀫𑀺 𑀔𑁄𑀫𑀲𑀼𑀔𑀼𑀫𑀁 𑀯𑀸 𑀓𑀧𑁆𑀧𑀸𑀲𑀺𑀓𑀲𑀼𑀔𑀼𑀫𑀁 𑀯𑀸 𑀓𑁄𑀲𑁂𑀬𑁆𑀬𑀲𑀼𑀔𑀼𑀫𑀁 𑀯𑀸 𑀓𑀫𑁆𑀩𑀮𑀲𑀼𑀔𑀼𑀫𑀁 𑀯𑀸. 𑀢𑁂𑀲𑀁 𑀔𑁄 𑀧𑀦𑀸𑀦𑀦𑁆𑀤, 𑀘𑀢𑀼𑀭𑀸𑀲𑀻𑀢𑀺𑀣𑀸𑀮𑀺𑀧𑀸𑀓𑀲𑀳𑀲𑁆𑀲𑀸𑀦𑀁 𑀏𑀓𑁄𑀬𑁂𑀯 𑀲𑁄 𑀣𑀸𑀮𑀺𑀧𑀸𑀓𑁄 𑀳𑁄𑀢𑀺, 𑀬𑀢𑁄 𑀦𑀸𑀴𑀺𑀓𑁄𑀤𑀦𑀧𑀭𑀫𑀁 𑀪𑀼𑀜𑁆𑀚𑀸𑀫𑀺 𑀢𑀤𑀼𑀧𑀺𑀬𑀜𑁆𑀘 𑀲𑀽𑀧𑁂𑀬𑁆𑀬𑀁.

𑁨𑁭𑁨. ‘‘𑀧𑀲𑁆𑀲𑀸𑀦𑀦𑁆𑀤, 𑀲𑀩𑁆𑀩𑁂𑀢𑁂 𑀲𑀗𑁆𑀔𑀸𑀭𑀸 𑀅𑀢𑀻𑀢𑀸 𑀦𑀺𑀭𑀼𑀤𑁆𑀥𑀸 𑀯𑀺𑀧𑀭𑀺𑀡𑀢𑀸. 𑀏𑀯𑀁 𑀅𑀦𑀺𑀘𑁆𑀘𑀸 𑀔𑁄, 𑀆𑀦𑀦𑁆𑀤, 𑀲𑀗𑁆𑀔𑀸𑀭𑀸; 𑀏𑀯𑀁 𑀅𑀤𑁆𑀥𑀼𑀯𑀸 𑀔𑁄, 𑀆𑀦𑀦𑁆𑀤, 𑀲𑀗𑁆𑀔𑀸𑀭𑀸; 𑀏𑀯𑀁 𑀅𑀦𑀲𑁆𑀲𑀸𑀲𑀺𑀓𑀸 𑀔𑁄, 𑀆𑀦𑀦𑁆𑀤, 𑀲𑀗𑁆𑀔𑀸𑀭𑀸! 𑀬𑀸𑀯𑀜𑁆𑀘𑀺𑀤𑀁, 𑀆𑀦𑀦𑁆𑀤 ¶ , 𑀅𑀮𑀫𑁂𑀯 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁, 𑀅𑀮𑀁 𑀯𑀺𑀭𑀚𑁆𑀚𑀺𑀢𑀼𑀁, 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼𑀁.

‘‘𑀙𑀓𑁆𑀔𑀢𑁆𑀢𑀼𑀁 𑀔𑁄 𑀧𑀦𑀸𑀳𑀁, 𑀆𑀦𑀦𑁆𑀤, 𑀅𑀪𑀺𑀚𑀸𑀦𑀸𑀫𑀺 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀲𑀭𑀻𑀭𑀁 𑀦𑀺𑀓𑁆𑀔𑀺𑀧𑀺𑀢𑀁, 𑀢𑀜𑁆𑀘 𑀔𑁄 𑀭𑀸𑀚𑀸𑀯 𑀲𑀫𑀸𑀦𑁄 𑀘𑀓𑁆𑀓𑀯𑀢𑁆𑀢𑀻 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀘𑀸𑀢𑀼𑀭𑀦𑁆𑀢𑁄 𑀯𑀺𑀚𑀺𑀢𑀸𑀯𑀻 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑀢𑁆𑀢𑁄 𑀲𑀢𑁆𑀢𑀭𑀢𑀦𑀲𑀫𑀦𑁆𑀦𑀸𑀕𑀢𑁄, 𑀅𑀬𑀁 𑀲𑀢𑁆𑀢𑀫𑁄 𑀲𑀭𑀻𑀭𑀦𑀺𑀓𑁆𑀔𑁂𑀧𑁄. 𑀦 𑀔𑁄 𑀧𑀦𑀸𑀳𑀁, 𑀆𑀦𑀦𑁆𑀤, 𑀢𑀁 𑀧𑀤𑁂𑀲𑀁 𑀲𑀫𑀦𑀼𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 ¶ 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀬𑀢𑁆𑀣 𑀢𑀣𑀸𑀕𑀢𑁄 𑀅𑀝𑁆𑀞𑀫𑀁 𑀲𑀭𑀻𑀭𑀁 𑀦𑀺𑀓𑁆𑀔𑀺𑀧𑁂𑀬𑁆𑀬𑀸’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸, 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀅𑀦𑀺𑀘𑁆𑀘𑀸 ¶ 𑀯𑀢 𑀲𑀗𑁆𑀔𑀸𑀭𑀸, 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄’’𑀢𑀺.

𑀫𑀳𑀸𑀲𑀼𑀤𑀲𑁆𑀲𑀦𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀘𑀢𑀼𑀢𑁆𑀣𑀁.

𑁫. 𑀚𑀦𑀯𑀲𑀪𑀲𑀼𑀢𑁆𑀢𑀁

𑀦𑀸𑀢𑀺𑀓𑀺𑀬𑀸𑀤𑀺𑀩𑁆𑀬𑀸𑀓𑀭𑀡𑀁

𑁨𑁭𑁩. 𑀏𑀯𑀁 ¶ ¶ ¶ ¶ 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀦𑀸𑀢𑀺𑀓𑁂 [𑀦𑀸𑀤𑀺𑀓𑁂 (𑀲𑀻. 𑀲𑁆𑀬𑀸. 𑀧𑀻.)] 𑀯𑀺𑀳𑀭𑀢𑀺 𑀕𑀺𑀜𑁆𑀚𑀓𑀸𑀯𑀲𑀣𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀧𑀭𑀺𑀢𑁄 𑀧𑀭𑀺𑀢𑁄 𑀚𑀦𑀧𑀤𑁂𑀲𑀼 𑀧𑀭𑀺𑀘𑀸𑀭𑀓𑁂 𑀅𑀩𑁆𑀪𑀢𑀻𑀢𑁂 𑀓𑀸𑀮𑀗𑁆𑀓𑀢𑁂 𑀉𑀧𑀧𑀢𑁆𑀢𑀻𑀲𑀼 𑀩𑁆𑀬𑀸𑀓𑀭𑁄𑀢𑀺 𑀓𑀸𑀲𑀺𑀓𑁄𑀲𑀮𑁂𑀲𑀼 𑀯𑀚𑁆𑀚𑀺𑀫𑀮𑁆𑀮𑁂𑀲𑀼 𑀘𑁂𑀢𑀺𑀯𑀁𑀲𑁂𑀲𑀼 [𑀘𑁂𑀢𑀺𑀬𑀯𑀁𑀲𑁂𑀲𑀼 (𑀓.)] 𑀓𑀼𑀭𑀼𑀧𑀜𑁆𑀘𑀸𑀮𑁂𑀲𑀼 𑀫𑀚𑁆𑀛𑀲𑀽𑀭𑀲𑁂𑀦𑁂𑀲𑀼 [𑀫𑀘𑁆𑀙𑀲𑀼𑀭𑀲𑁂𑀦𑁂𑀲𑀼 (𑀲𑁆𑀬𑀸.), 𑀫𑀘𑁆𑀙𑀲𑀽𑀭𑀲𑁂𑀦𑁂𑀲𑀼 (𑀲𑀻. 𑀧𑀻.)] 𑁋 ‘‘𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄, 𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄 [𑀉𑀧𑀧𑀦𑁆𑀦𑁄𑀢𑀺 (𑀓.)]. 𑀧𑀭𑁄𑀧𑀜𑁆𑀜𑀸𑀲 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀑𑀧𑀧𑀸𑀢𑀺𑀓𑀸 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀸 𑀢𑀲𑁆𑀫𑀸 𑀮𑁄𑀓𑀸. 𑀲𑀸𑀥𑀺𑀓𑀸 𑀦𑀯𑀼𑀢𑀺 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸 𑀲𑀓𑀤𑀸𑀕𑀸𑀫𑀺𑀦𑁄, 𑀲𑀓𑀺𑀤𑁂𑀯 [𑀲𑀓𑀺𑀁𑀤𑁂𑀯 (𑀓.)] 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀲𑀸𑀢𑀺𑀭𑁂𑀓𑀸𑀦𑀺 𑀧𑀜𑁆𑀘𑀲𑀢𑀸𑀦𑀺 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑀸 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’’𑀢𑀺.

𑁨𑁭𑁪. 𑀅𑀲𑁆𑀲𑁄𑀲𑀼𑀁 ¶ 𑀔𑁄 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑁋 ‘‘𑀪𑀕𑀯𑀸 𑀓𑀺𑀭 𑀧𑀭𑀺𑀢𑁄 𑀧𑀭𑀺𑀢𑁄 𑀚𑀦𑀧𑀤𑁂𑀲𑀼 𑀧𑀭𑀺𑀘𑀸𑀭𑀓𑁂 𑀅𑀩𑁆𑀪𑀢𑀻𑀢𑁂 𑀓𑀸𑀮𑀗𑁆𑀓𑀢𑁂 𑀉𑀧𑀧𑀢𑁆𑀢𑀻𑀲𑀼 𑀩𑁆𑀬𑀸𑀓𑀭𑁄𑀢𑀺 𑀓𑀸𑀲𑀺𑀓𑁄𑀲𑀮𑁂𑀲𑀼 𑀯𑀚𑁆𑀚𑀺𑀫𑀮𑁆𑀮𑁂𑀲𑀼 𑀘𑁂𑀢𑀺𑀯𑀁𑀲𑁂𑀲𑀼 𑀓𑀼𑀭𑀼𑀧𑀜𑁆𑀘𑀸𑀮𑁂𑀲𑀼 𑀫𑀚𑁆𑀛𑀲𑀽𑀭𑀲𑁂𑀦𑁂𑀲𑀼 𑁋 ‘𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄, 𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄. 𑀧𑀭𑁄𑀧𑀜𑁆𑀜𑀸𑀲 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 ¶ 𑀑𑀧𑀧𑀸𑀢𑀺𑀓𑀸 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀸 𑀢𑀲𑁆𑀫𑀸 𑀮𑁄𑀓𑀸. 𑀲𑀸𑀥𑀺𑀓𑀸 𑀦𑀯𑀼𑀢𑀺 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸 𑀲𑀓𑀤𑀸𑀕𑀸𑀫𑀺𑀦𑁄 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀲𑀸𑀢𑀺𑀭𑁂𑀓𑀸𑀦𑀺 𑀧𑀜𑁆𑀘𑀲𑀢𑀸𑀦𑀺 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 ¶ 𑀲𑁄𑀢𑀸𑀧𑀦𑁆𑀦𑀸 ¶ 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’𑀢𑀺. 𑀢𑁂𑀦 𑀘 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀢𑁆𑀢𑀫𑀦𑀸 𑀅𑀳𑁂𑀲𑀼𑀁 𑀧𑀫𑀼𑀤𑀺𑀢𑀸 ¶ 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀪𑀕𑀯𑀢𑁄 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑀁 [𑀧𑀜𑁆𑀳𑀸𑀯𑁂𑀬𑁆𑀬𑀸𑀓𑀭𑀡𑀁 (𑀲𑁆𑀬𑀸. 𑀓.)] 𑀲𑀼𑀢𑁆𑀯𑀸.

𑁨𑁭𑁫. 𑀅𑀲𑁆𑀲𑁄𑀲𑀺 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑁋 ‘‘𑀪𑀕𑀯𑀸 𑀓𑀺𑀭 𑀧𑀭𑀺𑀢𑁄 𑀧𑀭𑀺𑀢𑁄 𑀚𑀦𑀧𑀤𑁂𑀲𑀼 𑀧𑀭𑀺𑀘𑀸𑀭𑀓𑁂 𑀅𑀩𑁆𑀪𑀢𑀻𑀢𑁂 𑀓𑀸𑀮𑀗𑁆𑀓𑀢𑁂 𑀉𑀧𑀧𑀢𑁆𑀢𑀻𑀲𑀼 𑀩𑁆𑀬𑀸𑀓𑀭𑁄𑀢𑀺 𑀓𑀸𑀲𑀺𑀓𑁄𑀲𑀮𑁂𑀲𑀼 𑀯𑀚𑁆𑀚𑀺𑀫𑀮𑁆𑀮𑁂𑀲𑀼 𑀘𑁂𑀢𑀺𑀯𑀁𑀲𑁂𑀲𑀼 𑀓𑀼𑀭𑀼𑀧𑀜𑁆𑀘𑀸𑀮𑁂𑀲𑀼 𑀫𑀚𑁆𑀛𑀲𑀽𑀭𑀲𑁂𑀦𑁂𑀲𑀼 𑁋 ‘𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄, 𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄. 𑀧𑀭𑁄𑀧𑀜𑁆𑀜𑀸𑀲 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀑𑀧𑀧𑀸𑀢𑀺𑀓𑀸 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀸 𑀢𑀲𑁆𑀫𑀸 𑀮𑁄𑀓𑀸. 𑀲𑀸𑀥𑀺𑀓𑀸 𑀦𑀯𑀼𑀢𑀺 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸 𑀲𑀓𑀤𑀸𑀕𑀸𑀫𑀺𑀦𑁄 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀲𑀸𑀢𑀺𑀭𑁂𑀓𑀸𑀦𑀺 𑀧𑀜𑁆𑀘𑀲𑀢𑀸𑀦𑀺 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑀸 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸’𑀢𑀺. 𑀢𑁂𑀦 𑀘 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀢𑁆𑀢𑀫𑀦𑀸 𑀅𑀳𑁂𑀲𑀼𑀁 𑀧𑀫𑀼𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀪𑀕𑀯𑀢𑁄 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸’’𑀢𑀺.

𑀆𑀦𑀦𑁆𑀤𑀧𑀭𑀺𑀓𑀣𑀸

𑁨𑁭𑁬. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑁂 𑀔𑁄 ¶ 𑀧𑀦𑀸𑀧𑀺 𑀅𑀳𑁂𑀲𑀼𑀁 𑀫𑀸𑀕𑀥𑀓𑀸 𑀧𑀭𑀺𑀘𑀸𑀭𑀓𑀸 𑀩𑀳𑀽 𑀘𑁂𑀯 𑀭𑀢𑁆𑀢𑀜𑁆𑀜𑀽 𑀘 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸. 𑀲𑀼𑀜𑁆𑀜𑀸 𑀫𑀜𑁆𑀜𑁂 𑀅𑀗𑁆𑀕𑀫𑀕𑀥𑀸 𑀅𑀗𑁆𑀕𑀫𑀸𑀕𑀥𑀓𑁂𑀳𑀺 [𑀅𑀗𑁆𑀕𑀫𑀸𑀕𑀥𑀺𑀓𑁂𑀳𑀺 (𑀲𑁆𑀬𑀸.)] 𑀧𑀭𑀺𑀘𑀸𑀭𑀓𑁂𑀳𑀺 𑀅𑀩𑁆𑀪𑀢𑀻𑀢𑁂𑀳𑀺 𑀓𑀸𑀮𑀗𑁆𑀓𑀢𑁂𑀳𑀺. 𑀢𑁂 𑀔𑁄 𑀧𑀦𑀸𑀧𑀺 [𑀢𑁂𑀦 𑀔𑁄 𑀧𑀦𑀸𑀧𑀺 (𑀲𑁆𑀬𑀸.)] 𑀅𑀳𑁂𑀲𑀼𑀁 𑀩𑀼𑀤𑁆𑀥𑁂 𑀧𑀲𑀦𑁆𑀦𑀸 𑀥𑀫𑁆𑀫𑁂 𑀧𑀲𑀦𑁆𑀦𑀸 𑀲𑀗𑁆𑀖𑁂 𑀧𑀲𑀦𑁆𑀦𑀸 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄. 𑀢𑁂 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀪𑀕𑀯𑀢𑀸 𑀅𑀩𑁆𑀬𑀸𑀓𑀢𑀸; 𑀢𑁂𑀲𑀫𑁆𑀧𑀺𑀲𑁆𑀲 𑀲𑀸𑀥𑀼 𑀯𑁂𑀬𑁆𑀬𑀸𑀓𑀭𑀡𑀁, 𑀩𑀳𑀼𑀚𑀦𑁄 𑀧𑀲𑀻𑀤𑁂𑀬𑁆𑀬, 𑀢𑀢𑁄 𑀕𑀘𑁆𑀙𑁂𑀬𑁆𑀬 𑀲𑀼𑀕𑀢𑀺𑀁. 𑀅𑀬𑀁 𑀔𑁄 𑀧𑀦𑀸𑀧𑀺 𑀅𑀳𑁄𑀲𑀺 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀦𑁂𑀕𑀫𑀸𑀦𑀜𑁆𑀘𑁂𑀯 𑀚𑀸𑀦𑀧𑀤𑀸𑀦𑀜𑁆𑀘. 𑀅𑀧𑀺𑀲𑁆𑀲𑀼𑀤𑀁 𑀫𑀦𑀼𑀲𑁆𑀲𑀸 𑀓𑀺𑀢𑁆𑀢𑀬𑀫𑀸𑀦𑀭𑀽𑀧𑀸 𑀯𑀺𑀳𑀭𑀦𑁆𑀢𑀺 𑁋 ‘𑀏𑀯𑀁 𑀦𑁄 𑀲𑁄 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀲𑀼𑀔𑀸𑀧𑁂𑀢𑁆𑀯𑀸 ¶ 𑀓𑀸𑀮𑀗𑁆𑀓𑀢𑁄, 𑀏𑀯𑀁 𑀫𑀬𑀁 𑀢𑀲𑁆𑀲 𑀥𑀫𑁆𑀫𑀺𑀓𑀲𑁆𑀲 𑀥𑀫𑁆𑀫𑀭𑀜𑁆𑀜𑁄 𑀯𑀺𑀚𑀺𑀢𑁂 𑀨𑀸𑀲𑀼 [𑀨𑀸𑀲𑀼𑀓𑀁 (𑀲𑁆𑀬𑀸.)] 𑀯𑀺𑀳𑀭𑀺𑀫𑁆𑀳𑀸’𑀢𑀺. 𑀲𑁄 𑀔𑁄 𑀧𑀦𑀸𑀧𑀺 𑀅𑀳𑁄𑀲𑀺 𑀩𑀼𑀤𑁆𑀥𑁂 𑀧𑀲𑀦𑁆𑀦𑁄 𑀥𑀫𑁆𑀫𑁂 𑀧𑀲𑀦𑁆𑀦𑁄 𑀲𑀗𑁆𑀖𑁂 𑀧𑀲𑀦𑁆𑀦𑁄 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻. 𑀅𑀧𑀺𑀲𑁆𑀲𑀼𑀤𑀁 𑀫𑀦𑀼𑀲𑁆𑀲𑀸 𑀏𑀯𑀫𑀸𑀳𑀁𑀲𑀼 𑁋 ‘𑀬𑀸𑀯 𑀫𑀭𑀡𑀓𑀸𑀮𑀸𑀧𑀺 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀪𑀕𑀯𑀦𑁆𑀢𑀁 𑀓𑀺𑀢𑁆𑀢𑀬𑀫𑀸𑀦𑀭𑀽𑀧𑁄 𑀓𑀸𑀮𑀗𑁆𑀓𑀢𑁄’𑀢𑀺. 𑀲𑁄 𑀅𑀩𑁆𑀪𑀢𑀻𑀢𑁄 𑀓𑀸𑀮𑀗𑁆𑀓𑀢𑁄 𑀪𑀕𑀯𑀢𑀸 𑀅𑀩𑁆𑀬𑀸𑀓𑀢𑁄. 𑀢𑀲𑁆𑀲𑀧𑀺𑀲𑁆𑀲 𑀲𑀸𑀥𑀼 𑀯𑁂𑀬𑁆𑀬𑀸𑀓𑀭𑀡𑀁 𑀩𑀳𑀼𑀚𑀦𑁄 𑀧𑀲𑀻𑀤𑁂𑀬𑁆𑀬, 𑀢𑀢𑁄 𑀕𑀘𑁆𑀙𑁂𑀬𑁆𑀬 𑀲𑀼𑀕𑀢𑀺𑀁. 𑀪𑀕𑀯𑀢𑁄 𑀔𑁄 𑀧𑀦 𑀲𑀫𑁆𑀩𑁄𑀥𑀺 𑀫𑀕𑀥𑁂𑀲𑀼. 𑀬𑀢𑁆𑀣 𑀔𑁄 𑀧𑀦 𑀪𑀕𑀯𑀢𑁄 𑀲𑀫𑁆𑀩𑁄𑀥𑀺 𑀫𑀕𑀥𑁂𑀲𑀼, 𑀓𑀣𑀁 𑀢𑀢𑁆𑀭 𑀪𑀕𑀯𑀸 ¶ 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 𑀅𑀩𑁆𑀪𑀢𑀻𑀢𑁂 𑀓𑀸𑀮𑀗𑁆𑀓𑀢𑁂 𑀉𑀧𑀧𑀢𑁆𑀢𑀻𑀲𑀼 ¶ 𑀦 𑀩𑁆𑀬𑀸𑀓𑀭𑁂𑀬𑁆𑀬. 𑀪𑀕𑀯𑀸 𑀘𑁂 𑀔𑁄 𑀧𑀦 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 𑀅𑀩𑁆𑀪𑀢𑀻𑀢𑁂 𑀓𑀸𑀮𑀗𑁆𑀓𑀢𑁂 𑀉𑀧𑀧𑀢𑁆𑀢𑀻𑀲𑀼 𑀦 𑀩𑁆𑀬𑀸𑀓𑀭𑁂𑀬𑁆𑀬, 𑀤𑀻𑀦𑀫𑀦𑀸 [𑀦𑀺𑀦𑁆𑀦𑀫𑀦𑀸 (𑀲𑁆𑀬𑀸.), 𑀤𑀻𑀦𑀫𑀸𑀦𑀸 (𑀲𑀻. 𑀧𑀻.)] 𑀢𑁂𑀦𑀲𑁆𑀲𑀼 𑀫𑀸𑀕𑀥𑀓𑀸 𑀧𑀭𑀺𑀘𑀸𑀭𑀓𑀸; 𑀬𑁂𑀦 𑀔𑁄 ¶ 𑀧𑀦𑀲𑁆𑀲𑀼 𑀤𑀻𑀦𑀫𑀦𑀸 𑀫𑀸𑀕𑀥𑀓𑀸 𑀧𑀭𑀺𑀘𑀸𑀭𑀓𑀸 𑀓𑀣𑀁 𑀢𑁂 𑀪𑀕𑀯𑀸 𑀦 𑀩𑁆𑀬𑀸𑀓𑀭𑁂𑀬𑁆𑀬𑀸’’𑀢𑀺?

𑁨𑁭𑁭. 𑀇𑀤𑀫𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 𑀆𑀭𑀩𑁆𑀪 𑀏𑀓𑁄 𑀭𑀳𑁄 𑀅𑀦𑀼𑀯𑀺𑀘𑀺𑀦𑁆𑀢𑁂𑀢𑁆𑀯𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂 𑁋 ‘𑀪𑀕𑀯𑀸 𑀓𑀺𑀭 𑀧𑀭𑀺𑀢𑁄 𑀧𑀭𑀺𑀢𑁄 𑀚𑀦𑀧𑀤𑁂𑀲𑀼 𑀧𑀭𑀺𑀘𑀸𑀭𑀓𑁂 𑀅𑀩𑁆𑀪𑀢𑀻𑀢𑁂 𑀓𑀸𑀮𑀗𑁆𑀓𑀢𑁂 𑀉𑀧𑀧𑀢𑁆𑀢𑀻𑀲𑀼 𑀩𑁆𑀬𑀸𑀓𑀭𑁄𑀢𑀺 𑀓𑀸𑀲𑀺𑀓𑁄𑀲𑀮𑁂𑀲𑀼 𑀯𑀚𑁆𑀚𑀺𑀫𑀮𑁆𑀮𑁂𑀲𑀼 𑀘𑁂𑀢𑀺𑀯𑀁𑀲𑁂𑀲𑀼 𑀓𑀼𑀭𑀼𑀧𑀜𑁆𑀘𑀸𑀮𑁂𑀲𑀼 𑀫𑀚𑁆𑀛𑀲𑀽𑀭𑀲𑁂𑀦𑁂𑀲𑀼 𑁋 ‘‘𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄, 𑀅𑀲𑀼 𑀅𑀫𑀼𑀢𑁆𑀭 𑀉𑀧𑀧𑀦𑁆𑀦𑁄. 𑀧𑀭𑁄𑀧𑀜𑁆𑀜𑀸𑀲 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀑𑀧𑀧𑀸𑀢𑀺𑀓𑀸 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀸 𑀢𑀲𑁆𑀫𑀸 𑀮𑁄𑀓𑀸. 𑀲𑀸𑀥𑀺𑀓𑀸 𑀦𑀯𑀼𑀢𑀺 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸 𑀲𑀓𑀤𑀸𑀕𑀸𑀫𑀺𑀦𑁄, 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀲𑀸𑀢𑀺𑀭𑁂𑀓𑀸𑀦𑀺 𑀧𑀜𑁆𑀘𑀲𑀢𑀸𑀦𑀺 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑀸 ¶ 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸𑀢𑀺. 𑀢𑁂𑀦 𑀘 𑀦𑀸𑀢𑀺𑀓𑀺𑀬𑀸 𑀧𑀭𑀺𑀘𑀸𑀭𑀓𑀸 𑀅𑀢𑁆𑀢𑀫𑀦𑀸 𑀅𑀳𑁂𑀲𑀼𑀁 𑀧𑀫𑀼𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀪𑀕𑀯𑀢𑁄 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸’’𑀢𑀺 ¶ . 𑀇𑀫𑁂 𑀔𑁄 𑀧𑀦𑀸𑀧𑀺, 𑀪𑀦𑁆𑀢𑁂, 𑀅𑀳𑁂𑀲𑀼𑀁 𑀫𑀸𑀕𑀥𑀓𑀸 𑀧𑀭𑀺𑀘𑀸𑀭𑀓𑀸 𑀩𑀳𑀽 𑀘𑁂𑀯 𑀭𑀢𑁆𑀢𑀜𑁆𑀜𑀽 𑀘 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸. 𑀲𑀼𑀜𑁆𑀜𑀸 𑀫𑀜𑁆𑀜𑁂 𑀅𑀗𑁆𑀕𑀫𑀕𑀥𑀸 𑀅𑀗𑁆𑀕𑀫𑀸𑀕𑀥𑀓𑁂𑀳𑀺 𑀧𑀭𑀺𑀘𑀸𑀭𑀓𑁂𑀳𑀺 𑀅𑀩𑁆𑀪𑀢𑀻𑀢𑁂𑀳𑀺 𑀓𑀸𑀮𑀗𑁆𑀓𑀢𑁂𑀳𑀺. 𑀢𑁂 𑀔𑁄 𑀧𑀦𑀸𑀧𑀺, 𑀪𑀦𑁆𑀢𑁂, 𑀅𑀳𑁂𑀲𑀼𑀁 𑀩𑀼𑀤𑁆𑀥𑁂 𑀧𑀲𑀦𑁆𑀦𑀸 𑀥𑀫𑁆𑀫𑁂 𑀧𑀲𑀦𑁆𑀦𑀸 𑀲𑀗𑁆𑀖𑁂 𑀧𑀲𑀦𑁆𑀦𑀸 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄, 𑀢𑁂 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀪𑀕𑀯𑀢𑀸 𑀅𑀩𑁆𑀬𑀸𑀓𑀢𑀸. 𑀢𑁂𑀲𑀫𑁆𑀧𑀺𑀲𑁆𑀲 𑀲𑀸𑀥𑀼 𑀯𑁂𑀬𑁆𑀬𑀸𑀓𑀭𑀡𑀁, 𑀩𑀳𑀼𑀚𑀦𑁄 𑀧𑀲𑀻𑀤𑁂𑀬𑁆𑀬, 𑀢𑀢𑁄 𑀕𑀘𑁆𑀙𑁂𑀬𑁆𑀬 𑀲𑀼𑀕𑀢𑀺𑀁. 𑀅𑀬𑀁 𑀔𑁄 𑀧𑀦𑀸𑀧𑀺, 𑀪𑀦𑁆𑀢𑁂, 𑀅𑀳𑁄𑀲𑀺 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀳𑀺𑀢𑁄 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀦𑁂𑀕𑀫𑀸𑀦𑀜𑁆𑀘𑁂𑀯 ¶ 𑀚𑀸𑀦𑀧𑀤𑀸𑀦𑀜𑁆𑀘. 𑀅𑀧𑀺𑀲𑁆𑀲𑀼𑀤𑀁 𑀫𑀦𑀼𑀲𑁆𑀲𑀸 𑀓𑀺𑀢𑁆𑀢𑀬𑀫𑀸𑀦𑀭𑀽𑀧𑀸 𑀯𑀺𑀳𑀭𑀦𑁆𑀢𑀺 𑁋 ‘𑀏𑀯𑀁 𑀦𑁄 𑀲𑁄 𑀥𑀫𑁆𑀫𑀺𑀓𑁄 𑀥𑀫𑁆𑀫𑀭𑀸𑀚𑀸 𑀲𑀼𑀔𑀸𑀧𑁂𑀢𑁆𑀯𑀸 𑀓𑀸𑀮𑀗𑁆𑀓𑀢𑁄. 𑀏𑀯𑀁 𑀫𑀬𑀁 𑀢𑀲𑁆𑀲 𑀥𑀫𑁆𑀫𑀺𑀓𑀲𑁆𑀲 𑀥𑀫𑁆𑀫𑀭𑀜𑁆𑀜𑁄 𑀯𑀺𑀚𑀺𑀢𑁂 𑀨𑀸𑀲𑀼 𑀯𑀺𑀳𑀭𑀺𑀫𑁆𑀳𑀸’𑀢𑀺. 𑀲𑁄 𑀔𑁄 𑀧𑀦𑀸𑀧𑀺, 𑀪𑀦𑁆𑀢𑁂, 𑀅𑀳𑁄𑀲𑀺 𑀩𑀼𑀤𑁆𑀥𑁂 𑀧𑀲𑀦𑁆𑀦𑁄 𑀥𑀫𑁆𑀫𑁂 𑀧𑀲𑀦𑁆𑀦𑁄 𑀲𑀗𑁆𑀖𑁂 𑀧𑀲𑀦𑁆𑀦𑁄 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻. 𑀅𑀧𑀺𑀲𑁆𑀲𑀼𑀤𑀁 𑀫𑀦𑀼𑀲𑁆𑀲𑀸 𑀏𑀯𑀫𑀸𑀳𑀁𑀲𑀼 𑁋 ‘𑀬𑀸𑀯 𑀫𑀭𑀡𑀓𑀸𑀮𑀸𑀧𑀺 𑀭𑀸𑀚𑀸 𑀫𑀸𑀕𑀥𑁄 𑀲𑁂𑀦𑀺𑀬𑁄 𑀩𑀺𑀫𑁆𑀩𑀺𑀲𑀸𑀭𑁄 𑀪𑀕𑀯𑀦𑁆𑀢𑀁 𑀓𑀺𑀢𑁆𑀢𑀬𑀫𑀸𑀦𑀭𑀽𑀧𑁄 𑀓𑀸𑀮𑀗𑁆𑀓𑀢𑁄’𑀢𑀺. 𑀲𑁄 𑀅𑀩𑁆𑀪𑀢𑀻𑀢𑁄 𑀓𑀸𑀮𑀗𑁆𑀓𑀢𑁄 𑀪𑀕𑀯𑀢𑀸 𑀅𑀩𑁆𑀬𑀸𑀓𑀢𑁄; 𑀢𑀲𑁆𑀲𑀧𑀺𑀲𑁆𑀲 𑀲𑀸𑀥𑀼 𑀯𑁂𑀬𑁆𑀬𑀸𑀓𑀭𑀡𑀁, 𑀩𑀳𑀼𑀚𑀦𑁄 𑀧𑀲𑀻𑀤𑁂𑀬𑁆𑀬, 𑀢𑀢𑁄 𑀕𑀘𑁆𑀙𑁂𑀬𑁆𑀬 𑀲𑀼𑀕𑀢𑀺𑀁. 𑀪𑀕𑀯𑀢𑁄 𑀔𑁄 𑀧𑀦, 𑀪𑀦𑁆𑀢𑁂, 𑀲𑀫𑁆𑀩𑁄𑀥𑀺 𑀫𑀕𑀥𑁂𑀲𑀼. 𑀬𑀢𑁆𑀣 𑀔𑁄 𑀧𑀦 ¶ , 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀫𑁆𑀩𑁄𑀥𑀺 𑀫𑀕𑀥𑁂𑀲𑀼, 𑀓𑀣𑀁 𑀢𑀢𑁆𑀭 𑀪𑀕𑀯𑀸 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 𑀅𑀩𑁆𑀪𑀢𑀻𑀢𑁂 ¶ 𑀓𑀸𑀮𑀗𑁆𑀓𑀢𑁂 𑀉𑀧𑀧𑀢𑁆𑀢𑀻𑀲𑀼 𑀦 𑀩𑁆𑀬𑀸𑀓𑀭𑁂𑀬𑁆𑀬? 𑀪𑀕𑀯𑀸 𑀘𑁂 𑀔𑁄 𑀧𑀦, 𑀪𑀦𑁆𑀢𑁂, 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 𑀅𑀩𑁆𑀪𑀢𑀻𑀢𑁂 𑀓𑀸𑀮𑀗𑁆𑀓𑀢𑁂 𑀉𑀧𑀧𑀢𑁆𑀢𑀻𑀲𑀼 𑀦 𑀩𑁆𑀬𑀸𑀓𑀭𑁂𑀬𑁆𑀬 𑀤𑀻𑀦𑀫𑀦𑀸 𑀢𑁂𑀦𑀲𑁆𑀲𑀼 𑀫𑀸𑀕𑀥𑀓𑀸 𑀧𑀭𑀺𑀘𑀸𑀭𑀓𑀸; 𑀬𑁂𑀦 𑀔𑁄 𑀧𑀦𑀲𑁆𑀲𑀼 𑀤𑀻𑀦𑀫𑀦𑀸 𑀫𑀸𑀕𑀥𑀓𑀸 𑀧𑀭𑀺𑀘𑀸𑀭𑀓𑀸 𑀓𑀣𑀁 𑀢𑁂 𑀪𑀕𑀯𑀸 𑀦 𑀩𑁆𑀬𑀸𑀓𑀭𑁂𑀬𑁆𑀬𑀸’’𑀢𑀺. 𑀇𑀤𑀫𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 𑀆𑀭𑀩𑁆𑀪 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀧𑀭𑀺𑀓𑀣𑀁 𑀓𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺.

𑁨𑁭𑁮. 𑀅𑀣 𑀔𑁄 𑀪𑀕𑀯𑀸 𑀅𑀘𑀺𑀭𑀧𑀓𑁆𑀓𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑁂 𑀆𑀦𑀦𑁆𑀤𑁂 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀦𑀸𑀢𑀺𑀓𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀦𑀸𑀢𑀺𑀓𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀕𑀺𑀜𑁆𑀚𑀓𑀸𑀯𑀲𑀣𑀁 𑀧𑀯𑀺𑀲𑀺𑀢𑁆𑀯𑀸 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 𑀆𑀭𑀩𑁆𑀪 𑀅𑀝𑁆𑀞𑀺𑀁 𑀓𑀢𑁆𑀯𑀸 [𑀅𑀝𑁆𑀞𑀺𑀓𑀢𑁆𑀯𑀸 (𑀲𑀻. 𑀲𑁆𑀬𑀸. 𑀧𑀻.)] 𑀫𑀦𑀲𑀺𑀓𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀲𑀸 [𑀲𑀩𑁆𑀩𑀘𑁂𑀢𑀲𑀸 (𑀧𑀻.)] 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 ¶ 𑀦𑀺𑀲𑀻𑀤𑀺 𑁋 ‘‘𑀕𑀢𑀺𑀁 𑀦𑁂𑀲𑀁 𑀚𑀸𑀦𑀺𑀲𑁆𑀲𑀸𑀫𑀺 𑀅𑀪𑀺𑀲𑀫𑁆𑀧𑀭𑀸𑀬𑀁, 𑀬𑀁𑀕𑀢𑀺𑀓𑀸 𑀢𑁂 𑀪𑀯𑀦𑁆𑀢𑁄 𑀬𑀁𑀅𑀪𑀺𑀲𑀫𑁆𑀧𑀭𑀸𑀬𑀸’’𑀢𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 ‘‘𑀬𑀁𑀕𑀢𑀺𑀓𑀸 𑀢𑁂 𑀪𑀯𑀦𑁆𑀢𑁄 ¶ 𑀬𑀁𑀅𑀪𑀺𑀲𑀫𑁆𑀧𑀭𑀸𑀬𑀸’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀕𑀺𑀜𑁆𑀚𑀓𑀸𑀯𑀲𑀣𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀳𑀸𑀭𑀧𑀘𑁆𑀙𑀸𑀬𑀸𑀬𑀁 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺.

𑁨𑁭𑁯. 𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 ¶ 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀉𑀧𑀲𑀦𑁆𑀢𑀧𑀤𑀺𑀲𑁆𑀲𑁄 [𑀉𑀧𑀲𑀦𑁆𑀢𑀧𑀢𑀺𑀲𑁄 (𑀓.)] 𑀪𑀦𑁆𑀢𑁂 𑀪𑀕𑀯𑀸 𑀪𑀸𑀢𑀺𑀭𑀺𑀯 𑀪𑀕𑀯𑀢𑁄 𑀫𑀼𑀔𑀯𑀡𑁆𑀡𑁄 𑀯𑀺𑀧𑁆𑀧𑀲𑀦𑁆𑀦𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀸𑀦𑀁. 𑀲𑀦𑁆𑀢𑁂𑀦 𑀦𑀽𑀦𑀚𑁆𑀚 𑀪𑀦𑁆𑀢𑁂 𑀪𑀕𑀯𑀸 𑀯𑀺𑀳𑀸𑀭𑁂𑀦 𑀯𑀺𑀳𑀸𑀲𑀻’’𑀢𑀺? ‘‘𑀬𑀤𑁂𑀯 𑀔𑁄 𑀫𑁂 𑀢𑁆𑀯𑀁, 𑀆𑀦𑀦𑁆𑀤, 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 𑀆𑀭𑀩𑁆𑀪 𑀲𑀫𑁆𑀫𑀼𑀔𑀸 𑀧𑀭𑀺𑀓𑀣𑀁 𑀓𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀦𑁆𑀢𑁄, 𑀢𑀤𑁂𑀯𑀸𑀳𑀁 𑀦𑀸𑀢𑀺𑀓𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀕𑀺𑀜𑁆𑀚𑀓𑀸𑀯𑀲𑀣𑀁 𑀧𑀯𑀺𑀲𑀺𑀢𑁆𑀯𑀸 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 𑀆𑀭𑀩𑁆𑀪 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺𑀓𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺𑀁 𑁋 ‘𑀕𑀢𑀺𑀁 𑀦𑁂𑀲𑀁 𑀚𑀸𑀦𑀺𑀲𑁆𑀲𑀸𑀫𑀺 𑀅𑀪𑀺𑀲𑀫𑁆𑀧𑀭𑀸𑀬𑀁, 𑀬𑀁𑀕𑀢𑀺𑀓𑀸 𑀢𑁂 𑀪𑀯𑀦𑁆𑀢𑁄 𑀬𑀁𑀅𑀪𑀺𑀲𑀫𑁆𑀧𑀭𑀸𑀬𑀸’𑀢𑀺. 𑀅𑀤𑁆𑀤𑀲𑀁 𑀔𑁄 𑀅𑀳𑀁, 𑀆𑀦𑀦𑁆𑀤, 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 ‘𑀬𑀁𑀕𑀢𑀺𑀓𑀸 𑀢𑁂 𑀪𑀯𑀦𑁆𑀢𑁄 𑀬𑀁𑀅𑀪𑀺𑀲𑀫𑁆𑀧𑀭𑀸𑀬𑀸’’’𑀢𑀺.

𑀚𑀦𑀯𑀲𑀪𑀬𑀓𑁆𑀔𑁄

𑁨𑁮𑁦. ‘‘𑀅𑀣 𑀔𑁄, 𑀆𑀦𑀦𑁆𑀤, 𑀅𑀦𑁆𑀢𑀭𑀳𑀺𑀢𑁄 𑀬𑀓𑁆𑀔𑁄 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀺 𑁋 ‘𑀚𑀦𑀯𑀲𑀪𑁄 𑀅𑀳𑀁 𑀪𑀕𑀯𑀸 ¶ ; 𑀚𑀦𑀯𑀲𑀪𑁄 𑀅𑀳𑀁 𑀲𑀼𑀕𑀢𑀸’𑀢𑀺. 𑀅𑀪𑀺𑀚𑀸𑀦𑀸𑀲𑀺 𑀦𑁄 𑀢𑁆𑀯𑀁, 𑀆𑀦𑀦𑁆𑀤, 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑀁 𑀦𑀸𑀫𑀥𑁂𑀬𑁆𑀬𑀁 𑀲𑀼𑀢𑀁 [𑀲𑀼𑀢𑁆𑀯𑀸 (𑀧𑀻.)] 𑀬𑀤𑀺𑀤𑀁 𑀚𑀦𑀯𑀲𑀪𑁄’’𑀢𑀺?

‘‘𑀦 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀪𑀺𑀚𑀸𑀦𑀸𑀫𑀺 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑀁 𑀦𑀸𑀫𑀥𑁂𑀬𑁆𑀬𑀁 𑀲𑀼𑀢𑀁 𑀬𑀤𑀺𑀤𑀁 𑀚𑀦𑀯𑀲𑀪𑁄𑀢𑀺, 𑀅𑀧𑀺 𑀘 𑀫𑁂, 𑀪𑀦𑁆𑀢𑁂, 𑀮𑁄𑀫𑀸𑀦𑀺 𑀳𑀝𑁆𑀞𑀸𑀦𑀺 ‘𑀚𑀦𑀯𑀲𑀪𑁄’𑀢𑀺 𑀦𑀸𑀫𑀥𑁂𑀬𑁆𑀬𑀁 𑀲𑀼𑀢𑁆𑀯𑀸. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀦 𑀳𑀺 ¶ 𑀦𑀽𑀦 𑀲𑁄 𑀑𑀭𑀓𑁄 𑀬𑀓𑁆𑀔𑁄 𑀪𑀯𑀺𑀲𑁆𑀲𑀢𑀺 𑀬𑀤𑀺𑀤𑀁 𑀏𑀯𑀭𑀽𑀧𑀁 𑀦𑀸𑀫𑀥𑁂𑀬𑁆𑀬𑀁 𑀲𑀼𑀧𑀜𑁆𑀜𑀢𑁆𑀢𑀁 𑀬𑀤𑀺𑀤𑀁 𑀚𑀦𑀯𑀲𑀪𑁄’’𑀢𑀺. ‘‘𑀅𑀦𑀦𑁆𑀢𑀭𑀸 𑀔𑁄, 𑀆𑀦𑀦𑁆𑀤, 𑀲𑀤𑁆𑀤𑀧𑀸𑀢𑀼𑀪𑀸𑀯𑀸 𑀉𑀴𑀸𑀭𑀯𑀡𑁆𑀡𑁄 ¶ 𑀫𑁂 𑀬𑀓𑁆𑀔𑁄 𑀲𑀫𑁆𑀫𑀼𑀔𑁂 𑀧𑀸𑀢𑀼𑀭𑀳𑁄𑀲𑀺 ¶ . 𑀤𑀼𑀢𑀺𑀬𑀫𑁆𑀧𑀺 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀺 𑁋 ‘𑀩𑀺𑀫𑁆𑀩𑀺𑀲𑀸𑀭𑁄 𑀅𑀳𑀁 𑀪𑀕𑀯𑀸; 𑀩𑀺𑀫𑁆𑀩𑀺𑀲𑀸𑀭𑁄 𑀅𑀳𑀁 𑀲𑀼𑀕𑀢𑀸𑀢𑀺. 𑀇𑀤𑀁 𑀲𑀢𑁆𑀢𑀫𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀯𑁂𑀲𑁆𑀲𑀯𑀡𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀸𑀫𑀺, 𑀲𑁄 𑀢𑀢𑁄 𑀘𑀼𑀢𑁄 𑀫𑀦𑀼𑀲𑁆𑀲𑀭𑀸𑀚𑀸 𑀪𑀯𑀺𑀢𑀼𑀁 𑀧𑀳𑁄𑀫𑀺 [𑀲𑁄 𑀢𑀢𑁄 𑀘𑀼𑀢𑁄 𑀫𑀦𑀼𑀲𑁆𑀲𑀭𑀸𑀚𑀸, 𑀅𑀫𑀦𑀼𑀲𑁆𑀲𑀭𑀸𑀚𑀸 𑀤𑀺𑀯𑀺 𑀳𑁄𑀫𑀺 (𑀲𑀻. 𑀧𑀻.)].

𑀇𑀢𑁄 𑀲𑀢𑁆𑀢 𑀢𑀢𑁄 𑀲𑀢𑁆𑀢, 𑀲𑀁𑀲𑀸𑀭𑀸𑀦𑀺 𑀘𑀢𑀼𑀤𑁆𑀤𑀲;

𑀦𑀺𑀯𑀸𑀲𑀫𑀪𑀺𑀚𑀸𑀦𑀸𑀫𑀺, 𑀬𑀢𑁆𑀣 𑀫𑁂 𑀯𑀼𑀲𑀺𑀢𑀁 𑀧𑀼𑀭𑁂.

𑁨𑁮𑁧. ‘𑀤𑀻𑀖𑀭𑀢𑁆𑀢𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀯𑀺𑀦𑀺𑀧𑀸𑀢𑁄 𑀅𑀯𑀺𑀦𑀺𑀧𑀸𑀢𑀁 𑀲𑀜𑁆𑀚𑀸𑀦𑀸𑀫𑀺, 𑀆𑀲𑀸 𑀘 𑀧𑀦 𑀫𑁂 𑀲𑀦𑁆𑀢𑀺𑀝𑁆𑀞𑀢𑀺 𑀲𑀓𑀤𑀸𑀕𑀸𑀫𑀺𑀢𑀸𑀬𑀸’𑀢𑀺. ‘𑀅𑀘𑁆𑀙𑀭𑀺𑀬𑀫𑀺𑀤𑀁 𑀆𑀬𑀲𑁆𑀫𑀢𑁄 𑀚𑀦𑀯𑀲𑀪𑀲𑁆𑀲 𑀬𑀓𑁆𑀔𑀲𑁆𑀲, 𑀅𑀩𑁆𑀪𑀼𑀢𑀫𑀺𑀤𑀁 𑀆𑀬𑀲𑁆𑀫𑀢𑁄 𑀚𑀦𑀯𑀲𑀪𑀲𑁆𑀲 𑀬𑀓𑁆𑀔𑀲𑁆𑀲. ‘‘𑀤𑀻𑀖𑀭𑀢𑁆𑀢𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀯𑀺𑀦𑀺𑀧𑀸𑀢𑁄 𑀅𑀯𑀺𑀦𑀺𑀧𑀸𑀢𑀁 𑀲𑀜𑁆𑀚𑀸𑀦𑀸𑀫𑀻’’𑀢𑀺 𑀘 𑀯𑀤𑁂𑀲𑀺, ‘‘𑀆𑀲𑀸 𑀘 𑀧𑀦 𑀫𑁂 𑀲𑀦𑁆𑀢𑀺𑀝𑁆𑀞𑀢𑀺 𑀲𑀓𑀤𑀸𑀕𑀸𑀫𑀺𑀢𑀸𑀬𑀸’’𑀢𑀺 𑀘 𑀯𑀤𑁂𑀲𑀺, 𑀓𑀼𑀢𑁄𑀦𑀺𑀤𑀸𑀦𑀁 𑀧𑀦𑀸𑀬𑀲𑁆𑀫𑀸 𑀚𑀦𑀯𑀲𑀪𑁄 𑀬𑀓𑁆𑀔𑁄 𑀏𑀯𑀭𑀽𑀧𑀁 𑀉𑀴𑀸𑀭𑀁 𑀯𑀺𑀲𑁂𑀲𑀸𑀥𑀺𑀕𑀫𑀁 𑀲𑀜𑁆𑀚𑀸𑀦𑀸𑀢𑀻𑀢𑀺? 𑀦 𑀅𑀜𑁆𑀜𑀢𑁆𑀭, 𑀪𑀕𑀯𑀸, 𑀢𑀯 𑀲𑀸𑀲𑀦𑀸, 𑀦 𑀅𑀜𑁆𑀜𑀢𑁆𑀭 [𑀅𑀜𑁆𑀜𑀢𑁆𑀣 (𑀲𑀻. 𑀧𑀻.)], 𑀲𑀼𑀕𑀢, 𑀢𑀯 𑀲𑀸𑀲𑀦𑀸; 𑀬𑀤𑀕𑁆𑀕𑁂 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀺 𑀏𑀓𑀦𑁆𑀢𑀺𑀓𑀢𑁄 [𑀏𑀓𑀦𑁆𑀢𑀢𑁄 (𑀲𑁆𑀬𑀸.), 𑀏𑀓𑀦𑁆𑀢𑀕𑀢𑁄 (𑀧𑀻.)] 𑀅𑀪𑀺𑀧𑁆𑀧𑀲𑀦𑁆𑀦𑁄, 𑀢𑀤𑀕𑁆𑀕𑁂 𑀅𑀳𑀁, 𑀪𑀦𑁆𑀢𑁂, 𑀤𑀻𑀖𑀭𑀢𑁆𑀢𑀁 ¶ 𑀅𑀯𑀺𑀦𑀺𑀧𑀸𑀢𑁄 𑀅𑀯𑀺𑀦𑀺𑀧𑀸𑀢𑀁 𑀲𑀜𑁆𑀚𑀸𑀦𑀸𑀫𑀺, 𑀆𑀲𑀸 𑀘 𑀧𑀦 𑀫𑁂 𑀲𑀦𑁆𑀢𑀺𑀝𑁆𑀞𑀢𑀺 𑀲𑀓𑀤𑀸𑀕𑀸𑀫𑀺𑀢𑀸𑀬. 𑀇𑀥𑀸𑀳𑀁, 𑀪𑀦𑁆𑀢𑁂, 𑀯𑁂𑀲𑁆𑀲𑀯𑀡𑁂𑀦 𑀫𑀳𑀸𑀭𑀸𑀚𑁂𑀦 𑀧𑁂𑀲𑀺𑀢𑁄 𑀯𑀺𑀭𑀽𑀴𑁆𑀳𑀓𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀲𑀦𑁆𑀢𑀺𑀓𑁂 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀅𑀤𑁆𑀤𑀲𑀁 𑀪𑀕𑀯𑀦𑁆𑀢𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀕𑀺𑀜𑁆𑀚𑀓𑀸𑀯𑀲𑀣𑀁 ¶ 𑀧𑀯𑀺𑀲𑀺𑀢𑁆𑀯𑀸 𑀫𑀸𑀕𑀥𑀓𑁂 𑀧𑀭𑀺𑀘𑀸𑀭𑀓𑁂 𑀆𑀭𑀩𑁆𑀪 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺𑀓𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑁋 ‘‘𑀕𑀢𑀺𑀁 𑀦𑁂𑀲𑀁 𑀚𑀸𑀦𑀺𑀲𑁆𑀲𑀸𑀫𑀺 𑀅𑀪𑀺𑀲𑀫𑁆𑀧𑀭𑀸𑀬𑀁, 𑀬𑀁𑀕𑀢𑀺𑀓𑀸 𑀢𑁂 𑀪𑀯𑀦𑁆𑀢𑁄 𑀬𑀁𑀅𑀪𑀺𑀲𑀫𑁆𑀧𑀭𑀸𑀬𑀸’’𑀢𑀺. 𑀅𑀦𑀘𑁆𑀙𑀭𑀺𑀬𑀁 𑀔𑁄 𑀧𑀦𑁂𑀢𑀁, 𑀪𑀦𑁆𑀢𑁂, 𑀬𑀁 𑀯𑁂𑀲𑁆𑀲𑀯𑀡𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀪𑀸𑀲𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘‘𑀬𑀁𑀕𑀢𑀺𑀓𑀸 𑀢𑁂 𑀪𑀯𑀦𑁆𑀢𑁄 𑀬𑀁𑀅𑀪𑀺𑀲𑀫𑁆𑀧𑀭𑀸𑀬𑀸’’𑀢𑀺. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 𑀪𑀕𑀯𑀦𑁆𑀢𑀜𑁆𑀘 𑀤𑀓𑁆𑀔𑀸𑀫𑀺, 𑀇𑀤𑀜𑁆𑀘 𑀪𑀕𑀯𑀢𑁄 𑀆𑀭𑁄𑀘𑁂𑀲𑁆𑀲𑀸𑀫𑀻𑀢𑀺. 𑀇𑀫𑁂 𑀔𑁄 𑀫𑁂, 𑀪𑀦𑁆𑀢𑁂, 𑀤𑁆𑀯𑁂𑀧𑀘𑁆𑀘𑀬𑀸 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁’.

𑀤𑁂𑀯𑀲𑀪𑀸

𑁨𑁮𑁨. ‘𑀧𑀼𑀭𑀺𑀫𑀸𑀦𑀺 ¶ ¶ , 𑀪𑀦𑁆𑀢𑁂, 𑀤𑀺𑀯𑀲𑀸𑀦𑀺 𑀧𑀼𑀭𑀺𑀫𑀢𑀭𑀸𑀦𑀺 𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀧𑀼𑀡𑁆𑀡𑀸𑀬 𑀧𑀼𑀡𑁆𑀡𑀫𑀸𑀬 𑀭𑀢𑁆𑀢𑀺𑀬𑀸 𑀓𑁂𑀯𑀮𑀓𑀧𑁆𑀧𑀸 𑀘 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀲𑀼𑀥𑀫𑁆𑀫𑀸𑀬𑀁 𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺 𑀲𑀦𑁆𑀦𑀺𑀧𑀢𑀺𑀢𑀸. 𑀫𑀳𑀢𑀻 𑀘 𑀤𑀺𑀩𑁆𑀩𑀧𑀭𑀺𑀲𑀸 [𑀤𑀺𑀩𑁆𑀩𑀸 𑀧𑀭𑀺𑀲𑀸 (𑀲𑀻. 𑀧𑀻.)] 𑀲𑀫𑀦𑁆𑀢𑀢𑁄 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺 [𑀦𑀺𑀲𑀺𑀦𑁆𑀦𑀸 𑀳𑁄𑀢𑀺 (𑀲𑀻.), 𑀲𑀦𑁆𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺 𑀲𑀦𑁆𑀦𑀺𑀧𑀢𑀺𑀢𑀸 (𑀓.)], 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀭𑀸𑀚𑀸𑀦𑁄 𑀘𑀢𑀼𑀤𑁆𑀤𑀺𑀲𑀸 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀥𑀢𑀭𑀝𑁆𑀞𑁄 𑀫𑀳𑀸𑀭𑀸𑀚𑀸 𑀧𑀘𑁆𑀙𑀺𑀫𑀸𑀪𑀺𑀫𑀼𑀔𑁄 [𑀧𑀘𑁆𑀙𑀸𑀪𑀺𑀫𑀼𑀔𑁄 (𑀓.)] 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀤𑁂𑀯𑁂 𑀧𑀼𑀭𑀓𑁆𑀔𑀢𑁆𑀯𑀸; 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀯𑀺𑀭𑀽𑀴𑁆𑀳𑀓𑁄 𑀫𑀳𑀸𑀭𑀸𑀚𑀸 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀤𑁂𑀯𑁂 𑀧𑀼𑀭𑀓𑁆𑀔𑀢𑁆𑀯𑀸; 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀯𑀺𑀭𑀽𑀧𑀓𑁆𑀔𑁄 𑀫𑀳𑀸𑀭𑀸𑀚𑀸 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀤𑁂𑀯𑁂 𑀧𑀼𑀭𑀓𑁆𑀔𑀢𑁆𑀯𑀸; 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀯𑁂𑀲𑁆𑀲𑀯𑀡𑁄 𑀫𑀳𑀸𑀭𑀸𑀚𑀸 𑀤𑀓𑁆𑀔𑀺𑀡𑀸𑀪𑀺𑀫𑀼𑀔𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀤𑁂𑀯𑁂 𑀧𑀼𑀭𑀓𑁆𑀔𑀢𑁆𑀯𑀸 ¶ . 𑀬𑀤𑀸, 𑀪𑀦𑁆𑀢𑁂, 𑀓𑁂𑀯𑀮𑀓𑀧𑁆𑀧𑀸 𑀘 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀲𑀼𑀥𑀫𑁆𑀫𑀸𑀬𑀁 𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺 𑀲𑀦𑁆𑀦𑀺𑀧𑀢𑀺𑀢𑀸, 𑀫𑀳𑀢𑀻 𑀘 𑀤𑀺𑀩𑁆𑀩𑀧𑀭𑀺𑀲𑀸 𑀲𑀫𑀦𑁆𑀢𑀢𑁄 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀭𑀸𑀚𑀸𑀦𑁄 𑀘𑀢𑀼𑀤𑁆𑀤𑀺𑀲𑀸 𑀦𑀺𑀲𑀺𑀦𑁆𑀦𑀸 ¶ 𑀳𑁄𑀦𑁆𑀢𑀺. 𑀇𑀤𑀁 𑀦𑁂𑀲𑀁 𑀳𑁄𑀢𑀺 𑀆𑀲𑀦𑀲𑁆𑀫𑀺𑀁; 𑀅𑀣 𑀧𑀘𑁆𑀙𑀸 𑀅𑀫𑁆𑀳𑀸𑀓𑀁 𑀆𑀲𑀦𑀁 𑀳𑁄𑀢𑀺. 𑀬𑁂 𑀢𑁂, 𑀪𑀦𑁆𑀢𑁂, 𑀤𑁂𑀯𑀸 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀅𑀥𑀼𑀦𑀽𑀧𑀧𑀦𑁆𑀦𑀸 𑀢𑀸𑀯𑀢𑀺𑀁𑀲𑀓𑀸𑀬𑀁, 𑀢𑁂 𑀅𑀜𑁆𑀜𑁂 𑀤𑁂𑀯𑁂 𑀅𑀢𑀺𑀭𑁄𑀘𑀦𑁆𑀢𑀺 𑀯𑀡𑁆𑀡𑁂𑀦 𑀘𑁂𑀯 𑀬𑀲𑀲𑀸 𑀘. 𑀢𑁂𑀦 𑀲𑀼𑀤𑀁, 𑀪𑀦𑁆𑀢𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺 𑀧𑀫𑀼𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 ‘‘𑀤𑀺𑀩𑁆𑀩𑀸 𑀯𑀢 𑀪𑁄 𑀓𑀸𑀬𑀸 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀳𑀸𑀬𑀦𑁆𑀢𑀺 𑀅𑀲𑀼𑀭𑀓𑀸𑀬𑀸’’𑀢𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀫𑁆𑀧𑀲𑀸𑀤𑀁 𑀯𑀺𑀤𑀺𑀢𑁆𑀯𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺 𑁋

‘‘𑀫𑁄𑀤𑀦𑁆𑀢𑀺 𑀯𑀢 𑀪𑁄 𑀤𑁂𑀯𑀸, 𑀢𑀸𑀯𑀢𑀺𑀁𑀲𑀸 𑀲𑀳𑀺𑀦𑁆𑀤𑀓𑀸 [𑀲𑀇𑀦𑁆𑀤𑀓𑀸 (𑀲𑀻.)];

𑀢𑀣𑀸𑀕𑀢𑀁 𑀦𑀫𑀲𑁆𑀲𑀦𑁆𑀢𑀸, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢𑀁.

𑀦𑀯𑁂 𑀤𑁂𑀯𑁂 𑀘 𑀧𑀲𑁆𑀲𑀦𑁆𑀢𑀸, 𑀯𑀡𑁆𑀡𑀯𑀦𑁆𑀢𑁂 𑀬𑀲𑀲𑁆𑀲𑀺𑀦𑁂 [𑀬𑀲𑀲𑁆𑀲𑀺𑀦𑁄 (𑀲𑁆𑀬𑀸.)];

𑀲𑀼𑀕𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀘𑀭𑀺𑀢𑁆𑀯𑀸𑀦 𑀇𑀥𑀸𑀕𑀢𑁂.

𑀢𑁂 𑀅𑀜𑁆𑀜𑁂 𑀅𑀢𑀺𑀭𑁄𑀘𑀦𑁆𑀢𑀺, 𑀯𑀡𑁆𑀡𑁂𑀦 𑀬𑀲𑀲𑀸𑀬𑀼𑀦𑀸;

𑀲𑀸𑀯𑀓𑀸 𑀪𑀽𑀭𑀺𑀧𑀜𑁆𑀜𑀲𑁆𑀲, 𑀯𑀺𑀲𑁂𑀲𑀽𑀧𑀕𑀢𑀸 𑀇𑀥.

𑀇𑀤𑀁 ¶ 𑀤𑀺𑀲𑁆𑀯𑀸𑀦 𑀦𑀦𑁆𑀤𑀦𑁆𑀢𑀺, 𑀢𑀸𑀯𑀢𑀺𑀁𑀲𑀸 𑀲𑀳𑀺𑀦𑁆𑀤𑀓𑀸;

𑀢𑀣𑀸𑀕𑀢𑀁 𑀦𑀫𑀲𑁆𑀲𑀦𑁆𑀢𑀸, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢’’𑀦𑁆𑀢𑀺.

‘𑀢𑁂𑀦 ¶ ¶ 𑀲𑀼𑀤𑀁, 𑀪𑀦𑁆𑀢𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺 𑀧𑀫𑀼𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 ‘‘𑀤𑀺𑀩𑁆𑀩𑀸 𑀯𑀢, 𑀪𑁄, 𑀓𑀸𑀬𑀸 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀳𑀸𑀬𑀦𑁆𑀢𑀺 𑀅𑀲𑀼𑀭𑀓𑀸𑀬𑀸’’𑀢𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀬𑁂𑀦𑀢𑁆𑀣𑁂𑀦 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀲𑀼𑀥𑀫𑁆𑀫𑀸𑀬𑀁 𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺 𑀲𑀦𑁆𑀦𑀺𑀧𑀢𑀺𑀢𑀸, 𑀢𑀁 𑀅𑀢𑁆𑀣𑀁 𑀘𑀺𑀦𑁆𑀢𑀬𑀺𑀢𑁆𑀯𑀸 𑀢𑀁 𑀅𑀢𑁆𑀣𑀁 𑀫𑀦𑁆𑀢𑀬𑀺𑀢𑁆𑀯𑀸 𑀯𑀼𑀢𑁆𑀢𑀯𑀘𑀦𑀸𑀧𑀺 𑀢𑀁 [𑀯𑀼𑀢𑁆𑀢𑀯𑀘𑀦𑀸 𑀦𑀸𑀫𑀺𑀤𑀁 (𑀓.)] 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 ¶ 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀳𑁄𑀦𑁆𑀢𑀺. 𑀧𑀘𑁆𑀘𑀸𑀦𑀼𑀲𑀺𑀝𑁆𑀞𑀯𑀘𑀦𑀸𑀧𑀺 𑀢𑀁 [𑀧𑀘𑁆𑀘𑀸𑀦𑀼𑀲𑀺𑀝𑁆𑀞𑀯𑀘𑀦𑀸 𑀦𑀸𑀫𑀺𑀤𑀁 (𑀓.)] 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀳𑁄𑀦𑁆𑀢𑀺, 𑀲𑀓𑁂𑀲𑀼 𑀲𑀓𑁂𑀲𑀼 𑀆𑀲𑀦𑁂𑀲𑀼 𑀞𑀺𑀢𑀸 𑀅𑀯𑀺𑀧𑀓𑁆𑀓𑀦𑁆𑀢𑀸 [𑀅𑀥𑀺𑀧𑀓𑁆𑀓𑀦𑁆𑀢𑀸 (𑀓.)].

𑀢𑁂 𑀯𑀼𑀢𑁆𑀢𑀯𑀸𑀓𑁆𑀬𑀸 𑀭𑀸𑀚𑀸𑀦𑁄, 𑀧𑀝𑀺𑀕𑁆𑀕𑀬𑁆𑀳𑀸𑀦𑀼𑀲𑀸𑀲𑀦𑀺𑀁;

𑀯𑀺𑀧𑁆𑀧𑀲𑀦𑁆𑀦𑀫𑀦𑀸 𑀲𑀦𑁆𑀢𑀸, 𑀅𑀝𑁆𑀞𑀁𑀲𑀼 𑀲𑀫𑁆𑀳𑀺 𑀆𑀲𑀦𑁂𑀢𑀺.

𑁨𑁮𑁩. ‘𑀅𑀣 𑀔𑁄, 𑀪𑀦𑁆𑀢𑁂, 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀉𑀴𑀸𑀭𑁄 𑀆𑀮𑁄𑀓𑁄 𑀲𑀜𑁆𑀚𑀸𑀬𑀺, 𑀑𑀪𑀸𑀲𑁄 𑀧𑀸𑀢𑀼𑀭𑀳𑁄𑀲𑀺 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁. 𑀅𑀣 𑀔𑁄, 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀬𑀣𑀸 𑀔𑁄, 𑀫𑀸𑀭𑀺𑀲𑀸, 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀉𑀴𑀸𑀭𑁄 𑀆𑀮𑁄𑀓𑁄 𑀲𑀜𑁆𑀚𑀸𑀬𑀢𑀺, 𑀑𑀪𑀸𑀲𑁄 𑀧𑀸𑀢𑀼𑀪𑀯𑀢𑀺, 𑀩𑁆𑀭𑀳𑁆𑀫𑀸 𑀧𑀸𑀢𑀼𑀪𑀯𑀺𑀲𑁆𑀲𑀢𑀺. 𑀩𑁆𑀭𑀳𑁆𑀫𑀼𑀦𑁄 𑀳𑁂𑀢𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀧𑀸𑀢𑀼𑀪𑀸𑀯𑀸𑀬 𑀬𑀤𑀺𑀤𑀁 𑀆𑀮𑁄𑀓𑁄 𑀲𑀜𑁆𑀚𑀸𑀬𑀢𑀺 𑀑𑀪𑀸𑀲𑁄 𑀧𑀸𑀢𑀼𑀪𑀯𑀢𑀻𑀢𑀺.

‘‘𑀬𑀣𑀸 𑀦𑀺𑀫𑀺𑀢𑁆𑀢𑀸 𑀤𑀺𑀲𑁆𑀲𑀦𑁆𑀢𑀺, 𑀩𑁆𑀭𑀳𑁆𑀫𑀸 𑀧𑀸𑀢𑀼𑀪𑀯𑀺𑀲𑁆𑀲𑀢𑀺;

𑀩𑁆𑀭𑀳𑁆𑀫𑀼𑀦𑁄 𑀳𑁂𑀢𑀁 𑀦𑀺𑀫𑀺𑀢𑁆𑀢𑀁, 𑀑𑀪𑀸𑀲𑁄 𑀯𑀺𑀧𑀼𑀮𑁄 𑀫𑀳𑀸’’𑀢𑀺.

𑀲𑀦𑀗𑁆𑀓𑀼𑀫𑀸𑀭𑀓𑀣𑀸

𑁨𑁮𑁪. ‘𑀅𑀣 𑀔𑁄, 𑀪𑀦𑁆𑀢𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀬𑀣𑀸𑀲𑀓𑁂𑀲𑀼 𑀆𑀲𑀦𑁂𑀲𑀼 𑀦𑀺𑀲𑀻𑀤𑀺𑀁𑀲𑀼 𑁋 ‘‘𑀑𑀪𑀸𑀲𑀫𑁂𑀢𑀁 𑀜𑀲𑁆𑀲𑀸𑀫, 𑀬𑀁𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺, 𑀲𑀘𑁆𑀙𑀺𑀓𑀢𑁆𑀯𑀸𑀯 𑀦𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺. 𑀘𑀢𑁆𑀢𑀸𑀭𑁄𑀧𑀺 𑀫𑀳𑀸𑀭𑀸𑀚𑀸𑀦𑁄 𑀬𑀣𑀸𑀲𑀓𑁂𑀲𑀼 𑀆𑀲𑀦𑁂𑀲𑀼 𑀦𑀺𑀲𑀻𑀤𑀺𑀁𑀲𑀼 𑁋 ‘‘𑀑𑀪𑀸𑀲𑀫𑁂𑀢𑀁 𑀜𑀲𑁆𑀲𑀸𑀫 𑀬𑀁𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺, 𑀲𑀘𑁆𑀙𑀺𑀓𑀢𑁆𑀯𑀸𑀯 ¶ 𑀦𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺. 𑀇𑀤𑀁 𑀲𑀼𑀢𑁆𑀯𑀸 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀏𑀓𑀕𑁆𑀕𑀸 ¶ 𑀲𑀫𑀸𑀧𑀚𑁆𑀚𑀺𑀁𑀲𑀼 𑁋 ‘‘𑀑𑀪𑀸𑀲𑀫𑁂𑀢𑀁 𑀜𑀲𑁆𑀲𑀸𑀫, 𑀬𑀁𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺, 𑀲𑀘𑁆𑀙𑀺𑀓𑀢𑁆𑀯𑀸𑀯 𑀦𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺.

‘𑀬𑀤𑀸, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀤𑁂𑀯𑀸𑀦𑀁 ¶ 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀢𑀼𑀪𑀯𑀢𑀺, 𑀑𑀴𑀸𑀭𑀺𑀓𑀁 𑀅𑀢𑁆𑀢𑀪𑀸𑀯𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀧𑀸𑀢𑀼𑀪𑀯𑀢𑀺. 𑀬𑁄 𑀔𑁄 𑀧𑀦, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀼𑀦𑁄 𑀧𑀓𑀢𑀺𑀯𑀡𑁆𑀡𑁄 𑀅𑀦𑀪𑀺𑀲𑀫𑁆𑀪𑀯𑀦𑀻𑀬𑁄 𑀲𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀘𑀓𑁆𑀔𑀼𑀧𑀣𑀲𑁆𑀫𑀺𑀁. 𑀬𑀤𑀸, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀢𑀼𑀪𑀯𑀢𑀺 ¶ , 𑀲𑁄 𑀅𑀜𑁆𑀜𑁂 𑀤𑁂𑀯𑁂 𑀅𑀢𑀺𑀭𑁄𑀘𑀢𑀺 𑀯𑀡𑁆𑀡𑁂𑀦 𑀘𑁂𑀯 𑀬𑀲𑀲𑀸 𑀘. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀲𑁄𑀯𑀡𑁆𑀡𑁄 𑀯𑀺𑀕𑁆𑀕𑀳𑁄 𑀫𑀸𑀦𑀼𑀲𑀁 𑀯𑀺𑀕𑁆𑀕𑀳𑀁 𑀅𑀢𑀺𑀭𑁄𑀘𑀢𑀺; 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀬𑀤𑀸 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀢𑀼𑀪𑀯𑀢𑀺, 𑀲𑁄 𑀅𑀜𑁆𑀜𑁂 𑀤𑁂𑀯𑁂 𑀅𑀢𑀺𑀭𑁄𑀘𑀢𑀺 𑀯𑀡𑁆𑀡𑁂𑀦 𑀘𑁂𑀯 𑀬𑀲𑀲𑀸 𑀘. 𑀬𑀤𑀸, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀢𑀼𑀪𑀯𑀢𑀺, 𑀦 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀓𑁄𑀘𑀺 𑀤𑁂𑀯𑁄 𑀅𑀪𑀺𑀯𑀸𑀤𑁂𑀢𑀺 𑀯𑀸 𑀧𑀘𑁆𑀘𑀼𑀝𑁆𑀞𑁂𑀢𑀺 𑀯𑀸 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀢𑀺. 𑀲𑀩𑁆𑀩𑁂𑀯 𑀢𑀼𑀡𑁆𑀳𑀻𑀪𑀽𑀢𑀸 𑀧𑀜𑁆𑀚𑀮𑀺𑀓𑀸 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀦𑁆𑀢𑀺 𑁋 ‘‘𑀬𑀲𑁆𑀲𑀤𑀸𑀦𑀺 𑀤𑁂𑀯𑀲𑁆𑀲 𑀧𑀮𑁆𑀮𑀗𑁆𑀓𑀁 𑀇𑀘𑁆𑀙𑀺𑀲𑁆𑀲𑀢𑀺 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄, 𑀢𑀲𑁆𑀲 𑀤𑁂𑀯𑀲𑁆𑀲 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺𑀲𑁆𑀲𑀢𑀻’’𑀢𑀺.

‘𑀬𑀲𑁆𑀲 𑀔𑁄 𑀧𑀦, 𑀪𑀦𑁆𑀢𑁂, 𑀤𑁂𑀯𑀲𑁆𑀲 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀢𑀺, 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀤𑁂𑀯𑁄 𑀯𑁂𑀤𑀧𑀝𑀺𑀮𑀸𑀪𑀁; 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀤𑁂𑀯𑁄 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀭𑀸𑀚𑀸 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄 𑀅𑀥𑀼𑀦𑀸𑀪𑀺𑀲𑀺𑀢𑁆𑀢𑁄 𑀭𑀚𑁆𑀚𑁂𑀦, 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀯𑁂𑀤𑀧𑀝𑀺𑀮𑀸𑀪𑀁, 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀁. 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀬𑀲𑁆𑀲 𑀤𑁂𑀯𑀲𑁆𑀲 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀢𑀺, 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀤𑁂𑀯𑁄 𑀯𑁂𑀤𑀧𑀝𑀺𑀮𑀸𑀪𑀁, 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀤𑁂𑀯𑁄 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀁. 𑀅𑀣 ¶ ¶ , 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀑𑀴𑀸𑀭𑀺𑀓𑀁 𑀅𑀢𑁆𑀢𑀪𑀸𑀯𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀓𑀼𑀫𑀸𑀭𑀯𑀡𑁆𑀡𑀻 [𑀓𑀼𑀫𑀸𑀭𑀯𑀡𑁆𑀡𑁄 (𑀲𑁆𑀬𑀸. 𑀓.)] 𑀳𑀼𑀢𑁆𑀯𑀸 𑀧𑀜𑁆𑀘𑀲𑀺𑀔𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀢𑀼𑀭𑀳𑁄𑀲𑀺. 𑀲𑁄 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀼𑀧𑀘𑁆𑀘𑀢𑁆𑀣𑀢𑁂 𑀯𑀸 𑀧𑀮𑁆𑀮𑀗𑁆𑀓𑁂 𑀲𑀫𑁂 𑀯𑀸 𑀪𑀽𑀫𑀺𑀪𑀸𑀕𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑁂𑀬𑁆𑀬; 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀫𑁆𑀧𑀲𑀸𑀤𑀁 𑀯𑀺𑀤𑀺𑀢𑁆𑀯𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺 𑁋

‘‘𑀫𑁄𑀤𑀦𑁆𑀢𑀺 ¶ 𑀯𑀢 𑀪𑁄 𑀤𑁂𑀯𑀸, 𑀢𑀸𑀯𑀢𑀺𑀁𑀲𑀸 𑀲𑀳𑀺𑀦𑁆𑀤𑀓𑀸;

𑀢𑀣𑀸𑀕𑀢𑀁 𑀦𑀫𑀲𑁆𑀲𑀦𑁆𑀢𑀸, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢𑀁.

‘‘𑀦𑀯𑁂 𑀤𑁂𑀯𑁂 𑀘 𑀧𑀲𑁆𑀲𑀦𑁆𑀢𑀸, 𑀯𑀡𑁆𑀡𑀯𑀦𑁆𑀢𑁂 𑀬𑀲𑀲𑁆𑀲𑀺𑀦𑁂;

𑀲𑀼𑀕𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀘𑀭𑀺𑀢𑁆𑀯𑀸𑀦 𑀇𑀥𑀸𑀕𑀢𑁂.

‘‘𑀢𑁂 𑀅𑀜𑁆𑀜𑁂 𑀅𑀢𑀺𑀭𑁄𑀘𑀦𑁆𑀢𑀺, 𑀯𑀡𑁆𑀡𑁂𑀦 𑀬𑀲𑀲𑀸𑀬𑀼𑀦𑀸;

𑀲𑀸𑀯𑀓𑀸 𑀪𑀽𑀭𑀺𑀧𑀜𑁆𑀜𑀲𑁆𑀲, 𑀯𑀺𑀲𑁂𑀲𑀽𑀧𑀕𑀢𑀸 𑀇𑀥.

‘‘𑀇𑀤𑀁 ¶ 𑀤𑀺𑀲𑁆𑀯𑀸𑀦 𑀦𑀦𑁆𑀤𑀦𑁆𑀢𑀺, 𑀢𑀸𑀯𑀢𑀺𑀁𑀲𑀸 𑀲𑀳𑀺𑀦𑁆𑀤𑀓𑀸;

𑀢𑀣𑀸𑀕𑀢𑀁 𑀦𑀫𑀲𑁆𑀲𑀦𑁆𑀢𑀸, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢’’𑀦𑁆𑀢𑀺.

𑁨𑁮𑁫. ‘𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀪𑀸𑀲𑀺𑀢𑁆𑀣; 𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀼𑀦𑁄 𑀲𑀦𑀗𑁆𑀓𑀼𑀫𑀸𑀭𑀲𑁆𑀲 𑀪𑀸𑀲𑀢𑁄 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀲𑀭𑁄 𑀳𑁄𑀢𑀺 𑀯𑀺𑀲𑁆𑀲𑀝𑁆𑀞𑁄 𑀘 𑀯𑀺𑀜𑁆𑀜𑁂𑀬𑁆𑀬𑁄 𑀘 𑀫𑀜𑁆𑀚𑀼 𑀘 𑀲𑀯𑀦𑀻𑀬𑁄 𑀘 𑀩𑀺𑀦𑁆𑀤𑀼 𑀘 𑀅𑀯𑀺𑀲𑀸𑀭𑀻 𑀘 𑀕𑀫𑁆𑀪𑀻𑀭𑁄 𑀘 𑀦𑀺𑀦𑁆𑀦𑀸𑀤𑀻 𑀘. 𑀬𑀣𑀸𑀧𑀭𑀺𑀲𑀁 𑀔𑁄 𑀧𑀦, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀢𑀺; 𑀦 𑀘𑀲𑁆𑀲 𑀩𑀳𑀺𑀤𑁆𑀥𑀸 𑀧𑀭𑀺𑀲𑀸𑀬 ¶ 𑀖𑁄𑀲𑁄 𑀦𑀺𑀘𑁆𑀙𑀭𑀢𑀺. 𑀬𑀲𑁆𑀲 𑀔𑁄 𑀧𑀦, 𑀪𑀦𑁆𑀢𑁂, 𑀏𑀯𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀲𑀭𑁄 𑀳𑁄𑀢𑀺, 𑀲𑁄 𑀯𑀼𑀘𑁆𑀘𑀢𑀺 ‘‘𑀩𑁆𑀭𑀳𑁆𑀫𑀲𑁆𑀲𑀭𑁄’’𑀢𑀺.

‘𑀅𑀣 𑀔𑁄, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀢𑁂𑀢𑁆𑀢𑀺𑀁𑀲𑁂 𑀅𑀢𑁆𑀢𑀪𑀸𑀯𑁂 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀘𑁆𑀘𑁂𑀓𑀧𑀮𑁆𑀮𑀗𑁆𑀓𑁂𑀲𑀼 ¶ 𑀧𑀮𑁆𑀮𑀗𑁆𑀓𑁂𑀦 [𑀧𑀘𑁆𑀘𑁂𑀓𑀧𑀮𑁆𑀮𑀗𑁆𑀓𑁂𑀦 (𑀓.)] 𑀦𑀺𑀲𑀻𑀤𑀺𑀢𑁆𑀯𑀸 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀁 𑀓𑀺𑀁 𑀫𑀜𑁆𑀜𑀦𑁆𑀢𑀺, 𑀪𑁄𑀦𑁆𑀢𑁄 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀬𑀸𑀯𑀜𑁆𑀘 𑀲𑁄 𑀪𑀕𑀯𑀸 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀬𑁂 𑀳𑀺 𑀓𑁂𑀘𑀺, 𑀪𑁄, 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸 𑀥𑀫𑁆𑀫𑀁 𑀲𑀭𑀡𑀁 𑀕𑀢𑀸 𑀲𑀗𑁆𑀖𑀁 𑀲𑀭𑀡𑀁 𑀕𑀢𑀸 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑁄 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀦𑁆𑀢𑀺, 𑀅𑀧𑁆𑀧𑁂𑀓𑀘𑁆𑀘𑁂 𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀦𑁆𑀢𑀺, 𑀅𑀧𑁆𑀧𑁂𑀓𑀘𑁆𑀘𑁂 𑀢𑀼𑀲𑀺𑀢𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀦𑁆𑀢𑀺, 𑀅𑀧𑁆𑀧𑁂𑀓𑀘𑁆𑀘𑁂 𑀬𑀸𑀫𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀦𑁆𑀢𑀺, 𑀅𑀧𑁆𑀧𑁂𑀓𑀘𑁆𑀘𑁂 𑀢𑀸𑀯𑀢𑀺𑀁𑀲𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀦𑁆𑀢𑀺, 𑀅𑀧𑁆𑀧𑁂𑀓𑀘𑁆𑀘𑁂 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀬𑁂 𑀲𑀩𑁆𑀩𑀦𑀺𑀳𑀻𑀦𑀁 𑀓𑀸𑀬𑀁 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀢𑁂 𑀕𑀦𑁆𑀥𑀩𑁆𑀩𑀓𑀸𑀬𑀁 𑀧𑀭𑀺𑀧𑀽𑀭𑁂𑀦𑁆𑀢𑀻’’’𑀢𑀺.

𑁨𑁮𑁬. ‘𑀇𑀫𑀫𑀢𑁆𑀣𑀁 ¶ , 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀪𑀸𑀲𑀺𑀢𑁆𑀣; 𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀼𑀦𑁄 𑀲𑀦𑀗𑁆𑀓𑀼𑀫𑀸𑀭𑀲𑁆𑀲 𑀪𑀸𑀲𑀢𑁄 𑀖𑁄𑀲𑁄𑀬𑁂𑀯 𑀤𑁂𑀯𑀸 𑀫𑀜𑁆𑀜𑀦𑁆𑀢𑀺 𑁋 ‘‘𑀬𑁆𑀯𑀸𑀬𑀁 𑀫𑀫 𑀧𑀮𑁆𑀮𑀗𑁆𑀓𑁂 𑀲𑁆𑀯𑀸𑀬𑀁 𑀏𑀓𑁄𑀯 𑀪𑀸𑀲𑀢𑀻’’𑀢𑀺.

𑀏𑀓𑀲𑁆𑀫𑀺𑀁 𑀪𑀸𑀲𑀫𑀸𑀦𑀲𑁆𑀫𑀺𑀁, 𑀲𑀩𑁆𑀩𑁂 𑀪𑀸𑀲𑀦𑁆𑀢𑀺 𑀦𑀺𑀫𑁆𑀫𑀺𑀢𑀸;

𑀏𑀓𑀲𑁆𑀫𑀺𑀁 𑀢𑀼𑀡𑁆𑀳𑀺𑀫𑀸𑀲𑀻𑀦𑁂, 𑀲𑀩𑁆𑀩𑁂 𑀢𑀼𑀡𑁆𑀳𑀻 𑀪𑀯𑀦𑁆𑀢𑀺 𑀢𑁂.

𑀢𑀤𑀸𑀲𑀼 ¶ 𑀤𑁂𑀯𑀸 𑀫𑀜𑁆𑀜𑀦𑁆𑀢𑀺, 𑀢𑀸𑀯𑀢𑀺𑀁𑀲𑀸 𑀲𑀳𑀺𑀦𑁆𑀤𑀓𑀸;

𑀬𑁆𑀯𑀸𑀬𑀁 𑀫𑀫 𑀧𑀮𑁆𑀮𑀗𑁆𑀓𑀲𑁆𑀫𑀺𑀁, 𑀲𑁆𑀯𑀸𑀬𑀁 𑀏𑀓𑁄𑀯 𑀪𑀸𑀲𑀢𑀻𑀢𑀺.

‘𑀅𑀣 ¶ 𑀔𑁄, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀏𑀓𑀢𑁆𑀢𑁂𑀦 𑀅𑀢𑁆𑀢𑀸𑀦𑀁 𑀉𑀧𑀲𑀁𑀳𑀭𑀢𑀺, 𑀏𑀓𑀢𑁆𑀢𑁂𑀦 𑀅𑀢𑁆𑀢𑀸𑀦𑀁 𑀉𑀧𑀲𑀁𑀳𑀭𑀺𑀢𑁆𑀯𑀸 𑀲𑀓𑁆𑀓𑀲𑁆𑀲 ¶ 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀮𑁆𑀮𑀗𑁆𑀓𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋

𑀪𑀸𑀯𑀺𑀢𑀇𑀤𑁆𑀥𑀺𑀧𑀸𑀤𑁄

𑁨𑁮𑁭. ‘‘‘𑀢𑀁 𑀓𑀺𑀁 𑀫𑀜𑁆𑀜𑀦𑁆𑀢𑀺, 𑀪𑁄𑀦𑁆𑀢𑁄 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀬𑀸𑀯 𑀲𑀼𑀧𑀜𑁆𑀜𑀢𑁆𑀢𑀸 𑀘𑀺𑀫𑁂 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀧𑀜𑁆𑀜𑀢𑁆𑀢𑀸 𑀇𑀤𑁆𑀥𑀺𑀧𑀳𑀼𑀢𑀸𑀬 [𑀇𑀤𑁆𑀥𑀺𑀩𑀳𑀼𑀮𑀻𑀓𑀢𑀸𑀬 (𑀲𑁆𑀬𑀸.)] 𑀇𑀤𑁆𑀥𑀺𑀯𑀺𑀲𑀯𑀺𑀢𑀸𑀬 [𑀇𑀤𑁆𑀥𑀺𑀯𑀺𑀲𑁂𑀯𑀺𑀢𑀸𑀬 (𑀲𑁆𑀬𑀸.)] 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀢𑀸𑀬. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥 𑀪𑁄 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀯𑀻𑀭𑀺𑀬𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀘𑀺𑀢𑁆𑀢𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀺. 𑀇𑀫𑁂 𑀔𑁄, 𑀪𑁄, 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀧𑀜𑁆𑀜𑀢𑁆𑀢𑀸 𑀇𑀤𑁆𑀥𑀺𑀧𑀳𑀼𑀢𑀸𑀬 𑀇𑀤𑁆𑀥𑀺𑀯𑀺𑀲𑀯𑀺𑀢𑀸𑀬 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀢𑀸𑀬.

‘‘‘𑀬𑁂 𑀳𑀺 𑀓𑁂𑀘𑀺 𑀪𑁄 𑀅𑀢𑀻𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀲𑀼𑀁, 𑀲𑀩𑁆𑀩𑁂 𑀢𑁂 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸. 𑀬𑁂𑀧𑀺 𑀳𑀺 𑀓𑁂𑀘𑀺 𑀪𑁄 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂 ¶ 𑀢𑁂 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸. 𑀬𑁂𑀧𑀺 𑀳𑀺 𑀓𑁂𑀘𑀺 𑀪𑁄 𑀏𑀢𑀭𑀳𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀁 𑀧𑀘𑁆𑀘𑀦𑀼𑀪𑁄𑀦𑁆𑀢𑀺, 𑀲𑀩𑁆𑀩𑁂 𑀢𑁂 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀁 𑀇𑀤𑁆𑀥𑀺𑀧𑀸𑀤𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸. 𑀧𑀲𑁆𑀲𑀦𑁆𑀢𑀺 𑀦𑁄 𑀪𑁄𑀦𑁆𑀢𑁄 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀫𑀫𑀧𑀺𑀫𑀁 ¶ 𑀏𑀯𑀭𑀽𑀧𑀁 𑀇𑀤𑁆𑀥𑀸𑀦𑀼𑀪𑀸𑀯’’𑀦𑁆𑀢𑀺? ‘‘𑀏𑀯𑀁 𑀫𑀳𑀸𑀩𑁆𑀭𑀳𑁆𑀫𑁂’’𑀢𑀺. ‘‘𑀅𑀳𑀫𑁆𑀧𑀺 𑀔𑁄 𑀪𑁄 𑀇𑀫𑁂𑀲𑀁𑀬𑁂𑀯 𑀘𑀢𑀼𑀦𑁆𑀦𑀜𑁆𑀘 𑀇𑀤𑁆𑀥𑀺𑀧𑀸𑀤𑀸𑀦𑀁 ¶ 𑀪𑀸𑀯𑀺𑀢𑀢𑁆𑀢𑀸 𑀩𑀳𑀼𑀮𑀻𑀓𑀢𑀢𑁆𑀢𑀸 𑀏𑀯𑀁 𑀫𑀳𑀺𑀤𑁆𑀥𑀺𑀓𑁄 𑀏𑀯𑀁𑀫𑀳𑀸𑀦𑀼𑀪𑀸𑀯𑁄’’𑀢𑀺. 𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀪𑀸𑀲𑀺𑀢𑁆𑀣. 𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀪𑀸𑀲𑀺𑀢𑁆𑀯𑀸 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋

𑀢𑀺𑀯𑀺𑀥𑁄 𑀑𑀓𑀸𑀲𑀸𑀥𑀺𑀕𑀫𑁄

𑁨𑁮𑁮. ‘‘‘𑀢𑀁 𑀓𑀺𑀁 𑀫𑀜𑁆𑀜𑀦𑁆𑀢𑀺, 𑀪𑁄𑀦𑁆𑀢𑁄 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀬𑀸𑀯𑀜𑁆𑀘𑀺𑀤𑀁 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀢𑀬𑁄 𑀑𑀓𑀸𑀲𑀸𑀥𑀺𑀕𑀫𑀸 𑀅𑀦𑀼𑀩𑀼𑀤𑁆𑀥𑀸 𑀲𑀼𑀔𑀲𑁆𑀲𑀸𑀥𑀺𑀕𑀫𑀸𑀬. 𑀓𑀢𑀫𑁂 𑀢𑀬𑁄? 𑀇𑀥 𑀪𑁄 𑀏𑀓𑀘𑁆𑀘𑁄 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀓𑀸𑀫𑁂𑀳𑀺 𑀲𑀁𑀲𑀝𑁆𑀞𑁄 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 ¶ 𑀅𑀭𑀺𑀬𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀺, 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑀢𑀺. 𑀲𑁄 𑀅𑀭𑀺𑀬𑀥𑀫𑁆𑀫𑀲𑁆𑀲𑀯𑀦𑀁 𑀆𑀕𑀫𑁆𑀫 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺𑀁 𑀅𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀓𑀸𑀫𑁂𑀳𑀺 𑀅𑀲𑀁𑀲𑀝𑁆𑀞𑁄 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺. 𑀢𑀲𑁆𑀲 𑀅𑀲𑀁𑀲𑀝𑁆𑀞𑀲𑁆𑀲 𑀓𑀸𑀫𑁂𑀳𑀺 𑀅𑀲𑀁𑀲𑀝𑁆𑀞𑀲𑁆𑀲 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁, 𑀲𑀼𑀔𑀸 𑀪𑀺𑀬𑁆𑀬𑁄 𑀲𑁄𑀫𑀦𑀲𑁆𑀲𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑁄, 𑀧𑀫𑀼𑀤𑀸 𑀧𑀸𑀫𑁄𑀚𑁆𑀚𑀁 [𑀧𑀸𑀫𑀼𑀚𑁆𑀚𑀁 (𑀧𑀻. 𑀓.)] 𑀚𑀸𑀬𑁂𑀣, 𑀏𑀯𑀫𑁂𑀯 ¶ 𑀔𑁄, 𑀪𑁄, 𑀅𑀲𑀁𑀲𑀝𑁆𑀞𑀲𑁆𑀲 𑀓𑀸𑀫𑁂𑀳𑀺 𑀅𑀲𑀁𑀲𑀝𑁆𑀞𑀲𑁆𑀲 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁, 𑀲𑀼𑀔𑀸 𑀪𑀺𑀬𑁆𑀬𑁄 𑀲𑁄𑀫𑀦𑀲𑁆𑀲𑀁. 𑀅𑀬𑀁 𑀔𑁄, 𑀪𑁄, 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀞𑀫𑁄 𑀑𑀓𑀸𑀲𑀸𑀥𑀺𑀕𑀫𑁄 𑀅𑀦𑀼𑀩𑀼𑀤𑁆𑀥𑁄 𑀲𑀼𑀔𑀲𑁆𑀲𑀸𑀥𑀺𑀕𑀫𑀸𑀬.

‘‘‘𑀧𑀼𑀦 𑀘𑀧𑀭𑀁, 𑀪𑁄, 𑀇𑀥𑁂𑀓𑀘𑁆𑀘𑀲𑁆𑀲 𑀑𑀴𑀸𑀭𑀺𑀓𑀸 𑀓𑀸𑀬𑀲𑀗𑁆𑀔𑀸𑀭𑀸 𑀅𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺, 𑀑𑀴𑀸𑀭𑀺𑀓𑀸 𑀯𑀘𑀻𑀲𑀗𑁆𑀔𑀸𑀭𑀸 𑀅𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺, 𑀑𑀴𑀸𑀭𑀺𑀓𑀸 𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀅𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀦𑁆𑀢𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀭𑀺𑀬𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀺, 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑀢𑀺. 𑀢𑀲𑁆𑀲 𑀅𑀭𑀺𑀬𑀥𑀫𑁆𑀫𑀲𑁆𑀲𑀯𑀦𑀁 𑀆𑀕𑀫𑁆𑀫 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺𑀁 𑀑𑀴𑀸𑀭𑀺𑀓𑀸 𑀓𑀸𑀬𑀲𑀗𑁆𑀔𑀸𑀭𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺, 𑀑𑀴𑀸𑀭𑀺𑀓𑀸 𑀯𑀘𑀻𑀲𑀗𑁆𑀔𑀸𑀭𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺, 𑀑𑀴𑀸𑀭𑀺𑀓𑀸 𑀘𑀺𑀢𑁆𑀢𑀲𑀗𑁆𑀔𑀸𑀭𑀸 ¶ 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺. 𑀢𑀲𑁆𑀲 𑀑𑀴𑀸𑀭𑀺𑀓𑀸𑀦𑀁 𑀓𑀸𑀬𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀑𑀴𑀸𑀭𑀺𑀓𑀸𑀦𑀁 𑀯𑀘𑀻𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀑𑀴𑀸𑀭𑀺𑀓𑀸𑀦𑀁 𑀘𑀺𑀢𑁆𑀢𑀲𑀗𑁆𑀔𑀸𑀭𑀸𑀦𑀁 ¶ 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁, 𑀲𑀼𑀔𑀸 𑀪𑀺𑀬𑁆𑀬𑁄 𑀲𑁄𑀫𑀦𑀲𑁆𑀲𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑁄, 𑀧𑀫𑀼𑀤𑀸 𑀧𑀸𑀫𑁄𑀚𑁆𑀚𑀁 𑀚𑀸𑀬𑁂𑀣, 𑀏𑀯𑀫𑁂𑀯 𑀔𑁄 𑀪𑁄 𑀑𑀴𑀸𑀭𑀺𑀓𑀸𑀦𑀁 𑀓𑀸𑀬𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀑𑀴𑀸𑀭𑀺𑀓𑀸𑀦𑀁 𑀯𑀘𑀻𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀑𑀴𑀸𑀭𑀺𑀓𑀸𑀦𑀁 𑀘𑀺𑀢𑁆𑀢𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁, 𑀲𑀼𑀔𑀸 𑀪𑀺𑀬𑁆𑀬𑁄 𑀲𑁄𑀫𑀦𑀲𑁆𑀲𑀁. 𑀅𑀬𑀁 𑀔𑁄, 𑀪𑁄, 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀤𑀼𑀢𑀺𑀬𑁄 𑀑𑀓𑀸𑀲𑀸𑀥𑀺𑀕𑀫𑁄 𑀅𑀦𑀼𑀩𑀼𑀤𑁆𑀥𑁄 𑀲𑀼𑀔𑀲𑁆𑀲𑀸𑀥𑀺𑀕𑀫𑀸𑀬.

‘‘‘𑀧𑀼𑀦 𑀘𑀧𑀭𑀁, 𑀪𑁄, 𑀇𑀥𑁂𑀓𑀘𑁆𑀘𑁄 ¶ ‘𑀇𑀤𑀁 𑀓𑀼𑀲𑀮’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺, ‘𑀇𑀤𑀁 𑀅𑀓𑀼𑀲𑀮’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. ‘𑀇𑀤𑀁 𑀲𑀸𑀯𑀚𑁆𑀚𑀁 𑀇𑀤𑀁 𑀅𑀦𑀯𑀚𑁆𑀚𑀁, 𑀇𑀤𑀁 𑀲𑁂𑀯𑀺𑀢𑀩𑁆𑀩𑀁 𑀇𑀤𑀁 𑀦 𑀲𑁂𑀯𑀺𑀢𑀩𑁆𑀩𑀁, 𑀇𑀤𑀁 𑀳𑀻𑀦𑀁 𑀇𑀤𑀁 𑀧𑀡𑀻𑀢𑀁, 𑀇𑀤𑀁 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀅𑀭𑀺𑀬𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀺, 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑀢𑀺. 𑀲𑁄 𑀅𑀭𑀺𑀬𑀥𑀫𑁆𑀫𑀲𑁆𑀲𑀯𑀦𑀁 𑀆𑀕𑀫𑁆𑀫 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺𑀁, ‘𑀇𑀤𑀁 𑀓𑀼𑀲𑀮’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀇𑀤𑀁 𑀅𑀓𑀼𑀲𑀮’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀇𑀤𑀁 𑀲𑀸𑀯𑀚𑁆𑀚𑀁 𑀇𑀤𑀁 𑀅𑀦𑀯𑀚𑁆𑀚𑀁, 𑀇𑀤𑀁 𑀲𑁂𑀯𑀺𑀢𑀩𑁆𑀩𑀁 𑀇𑀤𑀁 𑀦 𑀲𑁂𑀯𑀺𑀢𑀩𑁆𑀩𑀁, 𑀇𑀤𑀁 𑀳𑀻𑀦𑀁 𑀇𑀤𑀁 𑀧𑀡𑀻𑀢𑀁, 𑀇𑀤𑀁 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀢𑀲𑁆𑀲 𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 𑀅𑀯𑀺𑀚𑁆𑀚𑀸 𑀧𑀳𑀻𑀬𑀢𑀺, 𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀲 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀯𑀺𑀚𑁆𑀚𑀼𑀧𑁆𑀧𑀸𑀤𑀸 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁, 𑀲𑀼𑀔𑀸 𑀪𑀺𑀬𑁆𑀬𑁄 𑀲𑁄𑀫𑀦𑀲𑁆𑀲𑀁. 𑀲𑁂𑀬𑁆𑀬𑀣𑀸𑀧𑀺, 𑀪𑁄, 𑀧𑀫𑀼𑀤𑀸 𑀧𑀸𑀫𑁄𑀚𑁆𑀚𑀁 𑀚𑀸𑀬𑁂𑀣 ¶ , 𑀏𑀯𑀫𑁂𑀯 𑀔𑁄, 𑀪𑁄, 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸 𑀯𑀺𑀚𑁆𑀚𑀼𑀧𑁆𑀧𑀸𑀤𑀸 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁, 𑀲𑀼𑀔𑀸 𑀪𑀺𑀬𑁆𑀬𑁄 𑀲𑁄𑀫𑀦𑀲𑁆𑀲𑀁. 𑀅𑀬𑀁 𑀔𑁄, 𑀪𑁄, 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀢𑀢𑀺𑀬𑁄 𑀑𑀓𑀸𑀲𑀸𑀥𑀺𑀕𑀫𑁄 𑀅𑀦𑀼𑀩𑀼𑀤𑁆𑀥𑁄 𑀲𑀼𑀔𑀲𑁆𑀲𑀸𑀥𑀺𑀕𑀫𑀸𑀬. 𑀇𑀫𑁂 ¶ ¶ 𑀔𑁄, 𑀪𑁄, 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀢𑀬𑁄 𑀑𑀓𑀸𑀲𑀸𑀥𑀺𑀕𑀫𑀸 𑀅𑀦𑀼𑀩𑀼𑀤𑁆𑀥𑀸 𑀲𑀼𑀔𑀲𑁆𑀲𑀸𑀥𑀺𑀕𑀫𑀸𑀬𑀸’’𑀢𑀺. 𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀪𑀸𑀲𑀺𑀢𑁆𑀣, 𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀪𑀸𑀲𑀺𑀢𑁆𑀯𑀸 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋

𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀁

𑁨𑁮𑁯. ‘‘‘𑀢𑀁 𑀓𑀺𑀁 𑀫𑀜𑁆𑀜𑀦𑁆𑀢𑀺, 𑀪𑁄𑀦𑁆𑀢𑁄 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀬𑀸𑀯 𑀲𑀼𑀧𑀜𑁆𑀜𑀢𑁆𑀢𑀸 𑀘𑀺𑀫𑁂 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀧𑀜𑁆𑀜𑀢𑁆𑀢𑀸 𑀓𑀼𑀲𑀮𑀲𑁆𑀲𑀸𑀥𑀺𑀕𑀫𑀸𑀬. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥 ¶ , 𑀪𑁄, 𑀪𑀺𑀓𑁆𑀔𑀼 𑀅𑀚𑁆𑀛𑀢𑁆𑀢𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀅𑀚𑁆𑀛𑀢𑁆𑀢𑀁 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 𑀢𑀢𑁆𑀣 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺, 𑀲𑀫𑁆𑀫𑀸 𑀯𑀺𑀧𑁆𑀧𑀲𑀻𑀤𑀢𑀺. 𑀲𑁄 𑀢𑀢𑁆𑀣 𑀲𑀫𑁆𑀫𑀸 𑀲𑀫𑀸𑀳𑀺𑀢𑁄 𑀲𑀫𑁆𑀫𑀸 𑀯𑀺𑀧𑁆𑀧𑀲𑀦𑁆𑀦𑁄 𑀩𑀳𑀺𑀤𑁆𑀥𑀸 𑀧𑀭𑀓𑀸𑀬𑁂 𑀜𑀸𑀡𑀤𑀲𑁆𑀲𑀦𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺. 𑀅𑀚𑁆𑀛𑀢𑁆𑀢𑀁 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺…𑀧𑁂… 𑀩𑀳𑀺𑀤𑁆𑀥𑀸 𑀧𑀭𑀯𑁂𑀤𑀦𑀸𑀲𑀼 𑀜𑀸𑀡𑀤𑀲𑁆𑀲𑀦𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺. 𑀅𑀚𑁆𑀛𑀢𑁆𑀢𑀁 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺…𑀧𑁂… 𑀩𑀳𑀺𑀤𑁆𑀥𑀸 𑀧𑀭𑀘𑀺𑀢𑁆𑀢𑁂 𑀜𑀸𑀡𑀤𑀲𑁆𑀲𑀦𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺. 𑀅𑀚𑁆𑀛𑀢𑁆𑀢𑀁 ¶ 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀦𑁆𑀢𑁄 𑀢𑀢𑁆𑀣 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺, 𑀲𑀫𑁆𑀫𑀸 𑀯𑀺𑀧𑁆𑀧𑀲𑀻𑀤𑀢𑀺. 𑀲𑁄 𑀢𑀢𑁆𑀣 𑀲𑀫𑁆𑀫𑀸 𑀲𑀫𑀸𑀳𑀺𑀢𑁄 𑀲𑀫𑁆𑀫𑀸 𑀯𑀺𑀧𑁆𑀧𑀲𑀦𑁆𑀦𑁄 𑀩𑀳𑀺𑀤𑁆𑀥𑀸 𑀧𑀭𑀥𑀫𑁆𑀫𑁂𑀲𑀼 𑀜𑀸𑀡𑀤𑀲𑁆𑀲𑀦𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺. 𑀇𑀫𑁂 𑀔𑁄, 𑀪𑁄, 𑀢𑁂𑀦 𑀪𑀕𑀯𑀢𑀸 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀧𑀜𑁆𑀜𑀢𑁆𑀢𑀸 𑀓𑀼𑀲𑀮𑀲𑁆𑀲𑀸𑀥𑀺𑀕𑀫𑀸𑀬𑀸’’𑀢𑀺. 𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀪𑀸𑀲𑀺𑀢𑁆𑀣. 𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀪𑀸𑀲𑀺𑀢𑁆𑀯𑀸 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋

𑀲𑀢𑁆𑀢 𑀲𑀫𑀸𑀥𑀺𑀧𑀭𑀺𑀓𑁆𑀔𑀸𑀭𑀸

𑁨𑁯𑁦. ‘‘‘𑀢𑀁 𑀓𑀺𑀁 𑀫𑀜𑁆𑀜𑀦𑁆𑀢𑀺, 𑀪𑁄𑀦𑁆𑀢𑁄 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀬𑀸𑀯 𑀲𑀼𑀧𑀜𑁆𑀜𑀢𑁆𑀢𑀸 𑀘𑀺𑀫𑁂 𑀢𑁂𑀦 𑀪𑀕𑀯𑀢𑀸 ¶ 𑀚𑀸𑀦𑀢𑀸 𑀧𑀲𑁆𑀲𑀢𑀸 𑀅𑀭𑀳𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀢𑁆𑀢 𑀲𑀫𑀸𑀥𑀺𑀧𑀭𑀺𑀓𑁆𑀔𑀸𑀭𑀸 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀧𑀭𑀺𑀪𑀸𑀯𑀦𑀸𑀬 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸. 𑀓𑀢𑀫𑁂 𑀲𑀢𑁆𑀢? 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 ¶ 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺. 𑀬𑀸 𑀔𑁄, 𑀪𑁄, 𑀇𑀫𑁂𑀳𑀺 𑀲𑀢𑁆𑀢𑀳𑀗𑁆𑀕𑁂𑀳𑀺 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸 𑀧𑀭𑀺𑀓𑁆𑀔𑀢𑀸, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑁄, 𑀅𑀭𑀺𑀬𑁄 𑀲𑀫𑁆𑀫𑀸𑀲𑀫𑀸𑀥𑀺 𑀲𑀉𑀧𑀦𑀺𑀲𑁄 𑀇𑀢𑀺𑀧𑀺 𑀲𑀧𑀭𑀺𑀓𑁆𑀔𑀸𑀭𑁄 𑀇𑀢𑀺𑀧𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑁆𑀲 𑀪𑁄, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀳𑁄𑀢𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲 𑀲𑀫𑁆𑀫𑀸𑀯𑀸𑀘𑀸 𑀧𑀳𑁄𑀢𑀺, 𑀲𑀫𑁆𑀫𑀸𑀯𑀸𑀘𑀲𑁆𑀲 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀧𑀳𑁄𑀢𑀺. 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲 𑀲𑀫𑁆𑀫𑀸𑀆𑀚𑀻𑀯𑁄 𑀧𑀳𑁄𑀢𑀺, 𑀲𑀫𑁆𑀫𑀸𑀆𑀚𑀻𑀯𑀲𑁆𑀲 𑀲𑀫𑁆𑀫𑀸𑀯𑀸𑀬𑀸𑀫𑁄 𑀧𑀳𑁄𑀢𑀺, 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲 𑀲𑀫𑁆𑀫𑀸𑀲𑀢𑀺 𑀧𑀳𑁄𑀢𑀺 ¶ , 𑀲𑀫𑁆𑀫𑀸𑀲𑀢𑀺𑀲𑁆𑀲 𑀲𑀫𑁆𑀫𑀸𑀲𑀫𑀸𑀥𑀺 𑀧𑀳𑁄𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺𑀲𑁆𑀲 𑀲𑀫𑁆𑀫𑀸𑀜𑀸𑀡𑀁 𑀧𑀳𑁄𑀢𑀺, 𑀲𑀫𑁆𑀫𑀸𑀜𑀸𑀡𑀲𑁆𑀲 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑀧𑀳𑁄𑀢𑀺. 𑀬𑀜𑁆𑀳𑀺 𑀢𑀁, 𑀪𑁄, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀺 𑀅𑀧𑀸𑀭𑀼𑀢𑀸 𑀅𑀫𑀢𑀲𑁆𑀲 ¶ 𑀤𑁆𑀯𑀸𑀭𑀸’𑀢𑀺 𑀇𑀤𑀫𑁂𑀯 𑀢𑀁 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬. 𑀲𑁆𑀯𑀸𑀓𑁆𑀔𑀸𑀢𑁄 𑀳𑀺, 𑀪𑁄, 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄, 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀺 𑀅𑀧𑀸𑀭𑀼𑀢𑀸 𑀅𑀫𑀢𑀲𑁆𑀲 𑀤𑁆𑀯𑀸𑀭𑀸 [𑀤𑁆𑀯𑀸𑀭𑀸𑀢𑀺 (𑀲𑁆𑀬𑀸. 𑀓.)].

‘‘‘𑀬𑁂 𑀳𑀺 𑀓𑁂𑀘𑀺, 𑀪𑁄, 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀥𑀫𑁆𑀫𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀲𑀗𑁆𑀖𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀅𑀭𑀺𑀬𑀓𑀦𑁆𑀢𑁂𑀳𑀺 𑀲𑀻𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 ¶ , 𑀬𑁂 𑀘𑀺𑀫𑁂 𑀑𑀧𑀧𑀸𑀢𑀺𑀓𑀸 𑀥𑀫𑁆𑀫𑀯𑀺𑀦𑀻𑀢𑀸 𑀲𑀸𑀢𑀺𑀭𑁂𑀓𑀸𑀦𑀺 𑀘𑀢𑀼𑀯𑀻𑀲𑀢𑀺𑀲𑀢𑀲𑀳𑀲𑁆𑀲𑀸𑀦𑀺 𑀫𑀸𑀕𑀥𑀓𑀸 𑀧𑀭𑀺𑀘𑀸𑀭𑀓𑀸 𑀅𑀩𑁆𑀪𑀢𑀻𑀢𑀸 𑀓𑀸𑀮𑀗𑁆𑀓𑀢𑀸 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑀸 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸. 𑀅𑀢𑁆𑀣𑀺 𑀘𑁂𑀯𑁂𑀢𑁆𑀣 𑀲𑀓𑀤𑀸𑀕𑀸𑀫𑀺𑀦𑁄.

‘‘𑀅𑀢𑁆𑀣𑀸𑀬𑀁 [𑀅𑀣𑀸𑀬𑀁 (𑀲𑀻. 𑀲𑁆𑀬𑀸.)] 𑀇𑀢𑀭𑀸 𑀧𑀚𑀸, 𑀧𑀼𑀜𑁆𑀜𑀸𑀪𑀸𑀕𑀸𑀢𑀺 𑀫𑁂 𑀫𑀦𑁄;

𑀲𑀗𑁆𑀔𑀸𑀢𑀼𑀁 𑀦𑁄𑀧𑀺 𑀲𑀓𑁆𑀓𑁄𑀫𑀺, 𑀫𑀼𑀲𑀸𑀯𑀸𑀤𑀲𑁆𑀲 𑀑𑀢𑁆𑀢𑀧𑁆𑀧’’𑀦𑁆𑀢𑀺.

𑁨𑁯𑁧. ‘𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀪𑀸𑀲𑀺𑀢𑁆𑀣, 𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀼𑀦𑁄 𑀲𑀦𑀗𑁆𑀓𑀼𑀫𑀸𑀭𑀲𑁆𑀲 𑀪𑀸𑀲𑀢𑁄 𑀯𑁂𑀲𑁆𑀲𑀯𑀡𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 𑁋 ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀅𑀩𑁆𑀪𑀼𑀢𑀁 ¶ 𑀯𑀢 𑀪𑁄, 𑀏𑀯𑀭𑀽𑀧𑁄𑀧𑀺 𑀦𑀸𑀫 𑀉𑀴𑀸𑀭𑁄 𑀲𑀢𑁆𑀣𑀸 𑀪𑀯𑀺𑀲𑁆𑀲𑀢𑀺, 𑀏𑀯𑀭𑀽𑀧𑀁 𑀉𑀴𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁, 𑀏𑀯𑀭𑀽𑀧𑀸 𑀉𑀴𑀸𑀭𑀸 𑀯𑀺𑀲𑁂𑀲𑀸𑀥𑀺𑀕𑀫𑀸 𑀧𑀜𑁆𑀜𑀸𑀬𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀣, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀯𑁂𑀲𑁆𑀲𑀯𑀡𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀯𑁂𑀲𑁆𑀲𑀯𑀡𑀁 𑀫𑀳𑀸𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀢𑀁 𑀓𑀺𑀁 𑀫𑀜𑁆𑀜𑀢𑀺 𑀪𑀯𑀁 𑀯𑁂𑀲𑁆𑀲𑀯𑀡𑁄 𑀫𑀳𑀸𑀭𑀸𑀚𑀸 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀏𑀯𑀭𑀽𑀧𑁄 𑀉𑀴𑀸𑀭𑁄 𑀲𑀢𑁆𑀣𑀸 𑀅𑀳𑁄𑀲𑀺, 𑀏𑀯𑀭𑀽𑀧𑀁 𑀉𑀴𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁, 𑀏𑀯𑀭𑀽𑀧𑀸 𑀉𑀴𑀸𑀭𑀸 𑀯𑀺𑀲𑁂𑀲𑀸𑀥𑀺𑀕𑀫𑀸 𑀧𑀜𑁆𑀜𑀸𑀬𑀺𑀁𑀲𑀼. 𑀅𑀦𑀸𑀕𑀢𑀫𑁆𑀧𑀺 ¶ 𑀅𑀤𑁆𑀥𑀸𑀦𑀁 𑀏𑀯𑀭𑀽𑀧𑁄 𑀉𑀴𑀸𑀭𑁄 𑀲𑀢𑁆𑀣𑀸 𑀪𑀯𑀺𑀲𑁆𑀲𑀢𑀺, 𑀏𑀯𑀭𑀽𑀧𑀁 𑀉𑀴𑀸𑀭𑀁 𑀥𑀫𑁆𑀫𑀓𑁆𑀔𑀸𑀦𑀁, 𑀏𑀯𑀭𑀽𑀧𑀸 𑀉𑀴𑀸𑀭𑀸 𑀯𑀺𑀲𑁂𑀲𑀸𑀥𑀺𑀕𑀫𑀸 𑀧𑀜𑁆𑀜𑀸𑀬𑀺𑀲𑁆𑀲𑀦𑁆𑀢𑀻’’’𑀢𑀺.

𑁨𑁯𑁨. ‘‘‘𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀅𑀪𑀸𑀲𑀺, 𑀇𑀫𑀫𑀢𑁆𑀣𑀁 𑀯𑁂𑀲𑁆𑀲𑀯𑀡𑁄 𑀫𑀳𑀸𑀭𑀸𑀚𑀸 𑀩𑁆𑀭𑀳𑁆𑀫𑀼𑀦𑁄 𑀲𑀦𑀗𑁆𑀓𑀼𑀫𑀸𑀭𑀲𑁆𑀲 𑀤𑁂𑀯𑀸𑀦𑀁 ¶ 𑀢𑀸𑀯𑀢𑀺𑀁𑀲𑀸𑀦𑀁 𑀪𑀸𑀲𑀢𑁄 ¶ 𑀲𑀫𑁆𑀫𑀼𑀔𑀸 𑀲𑀼𑀢𑀁 [𑀲𑀼𑀢𑁆𑀯𑀸 (𑀲𑀻. 𑀧𑀻.)] 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑀲𑀬𑀁 𑀧𑀭𑀺𑀲𑀸𑀬𑀁 𑀆𑀭𑁄𑀘𑁂𑀲𑀺’’.

𑀇𑀫𑀫𑀢𑁆𑀣𑀁 𑀚𑀦𑀯𑀲𑀪𑁄 𑀬𑀓𑁆𑀔𑁄 𑀯𑁂𑀲𑁆𑀲𑀯𑀡𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀲𑀬𑀁 𑀧𑀭𑀺𑀲𑀸𑀬𑀁 𑀪𑀸𑀲𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 [𑀧𑀝𑀺𑀕𑁆𑀕𑀳𑁂𑀢𑁆𑀯𑀸 (𑀲𑀻. 𑀧𑀻.)] 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀇𑀫𑀫𑀢𑁆𑀣𑀁 𑀪𑀕𑀯𑀸 𑀚𑀦𑀯𑀲𑀪𑀲𑁆𑀲 𑀬𑀓𑁆𑀔𑀲𑁆𑀲 𑀲𑀫𑁆𑀫𑀼𑀔𑀸 𑀲𑀼𑀢𑁆𑀯𑀸 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀲𑀸𑀫𑀜𑁆𑀘 𑀅𑀪𑀺𑀜𑁆𑀜𑀸𑀬 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀆𑀭𑁄𑀘𑁂𑀲𑀺, 𑀇𑀫𑀫𑀢𑁆𑀣𑀫𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑁆𑀯𑀸 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀆𑀭𑁄𑀘𑁂𑀲𑀺 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 ¶ 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁. 𑀢𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘 𑀯𑀺𑀢𑁆𑀣𑀸𑀭𑀺𑀓𑀁 𑀩𑀸𑀳𑀼𑀚𑀜𑁆𑀜𑀁 𑀧𑀼𑀣𑀼𑀪𑀽𑀢𑀁 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢𑀦𑁆𑀢𑀺.

𑀚𑀦𑀯𑀲𑀪𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀧𑀜𑁆𑀘𑀫𑀁.

𑁬. 𑀫𑀳𑀸𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑀁

𑁨𑁯𑁩. 𑀏𑀯𑀁 ¶ ¶ ¶ 𑀫𑁂 ¶ 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀅𑀣 𑀔𑁄 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀧𑀼𑀢𑁆𑀢𑁄 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑁄 𑀓𑁂𑀯𑀮𑀓𑀧𑁆𑀧𑀁 𑀕𑀺𑀚𑁆𑀛𑀓𑀽𑀝𑀁 𑀧𑀩𑁆𑀩𑀢𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀬𑀁 𑀔𑁄 𑀫𑁂, 𑀪𑀦𑁆𑀢𑁂, 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁, 𑀆𑀭𑁄𑀘𑁂𑀫𑀺 𑀢𑀁 𑀪𑀕𑀯𑀢𑁄’’𑀢𑀺. ‘‘𑀆𑀭𑁄𑀘𑁂𑀳𑀺 𑀫𑁂 𑀢𑁆𑀯𑀁, 𑀧𑀜𑁆𑀘𑀲𑀺𑀔𑀸’’𑀢𑀺 𑀪𑀕𑀯𑀸 𑀅𑀯𑁄𑀘.

𑀤𑁂𑀯𑀲𑀪𑀸

𑁨𑁯𑁪. ‘‘𑀧𑀼𑀭𑀺𑀫𑀸𑀦𑀺, 𑀪𑀦𑁆𑀢𑁂, 𑀤𑀺𑀯𑀲𑀸𑀦𑀺 𑀧𑀼𑀭𑀺𑀫𑀢𑀭𑀸𑀦𑀺 𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀧𑀯𑀸𑀭𑀡𑀸𑀬 𑀧𑀼𑀡𑁆𑀡𑀸𑀬 𑀧𑀼𑀡𑁆𑀡𑀫𑀸𑀬 𑀭𑀢𑁆𑀢𑀺𑀬𑀸 𑀓𑁂𑀯𑀮𑀓𑀧𑁆𑀧𑀸 𑀘 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀲𑀼𑀥𑀫𑁆𑀫𑀸𑀬𑀁 𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺 𑀲𑀦𑁆𑀦𑀺𑀧𑀢𑀺𑀢𑀸; 𑀫𑀳𑀢𑀻 𑀘 𑀤𑀺𑀩𑁆𑀩𑀧𑀭𑀺𑀲𑀸 𑀲𑀫𑀦𑁆𑀢𑀢𑁄 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀭𑀸𑀚𑀸𑀦𑁄 𑀘𑀢𑀼𑀤𑁆𑀤𑀺𑀲𑀸 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺; 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀥𑀢𑀭𑀝𑁆𑀞𑁄 𑀫𑀳𑀸𑀭𑀸𑀚𑀸 𑀧𑀘𑁆𑀙𑀺𑀫𑀸𑀪𑀺𑀫𑀼𑀔𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀤𑁂𑀯𑁂 𑀧𑀼𑀭𑀓𑁆𑀔𑀢𑁆𑀯𑀸; 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀯𑀺𑀭𑀽𑀴𑁆𑀳𑀓𑁄 𑀫𑀳𑀸𑀭𑀸𑀚𑀸 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀤𑁂𑀯𑁂 𑀧𑀼𑀭𑀓𑁆𑀔𑀢𑁆𑀯𑀸; 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀯𑀺𑀭𑀽𑀧𑀓𑁆𑀔𑁄 ¶ 𑀫𑀳𑀸𑀭𑀸𑀚𑀸 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀤𑁂𑀯𑁂 𑀧𑀼𑀭𑀓𑁆𑀔𑀢𑁆𑀯𑀸; 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀯𑁂𑀲𑁆𑀲𑀯𑀡𑁄 𑀫𑀳𑀸𑀭𑀸𑀚𑀸 𑀤𑀓𑁆𑀔𑀺𑀡𑀸𑀪𑀺𑀫𑀼𑀔𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺 𑀤𑁂𑀯𑁂 𑀧𑀼𑀭𑀓𑁆𑀔𑀢𑁆𑀯𑀸. 𑀬𑀤𑀸 𑀪𑀦𑁆𑀢𑁂, 𑀓𑁂𑀯𑀮𑀓𑀧𑁆𑀧𑀸 𑀘 𑀤𑁂𑀯𑀸 ¶ 𑀢𑀸𑀯𑀢𑀺𑀁𑀲𑀸 𑀲𑀼𑀥𑀫𑁆𑀫𑀸𑀬𑀁 𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺 𑀲𑀦𑁆𑀦𑀺𑀧𑀢𑀺𑀢𑀸, 𑀫𑀳𑀢𑀻 𑀘 𑀤𑀺𑀩𑁆𑀩𑀧𑀭𑀺𑀲𑀸 𑀲𑀫𑀦𑁆𑀢𑀢𑁄 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀭𑀸𑀚𑀸𑀦𑁄 𑀘𑀢𑀼𑀤𑁆𑀤𑀺𑀲𑀸 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺, 𑀇𑀤𑀁 𑀦𑁂𑀲𑀁 𑀳𑁄𑀢𑀺 𑀆𑀲𑀦𑀲𑁆𑀫𑀺𑀁; 𑀅𑀣 𑀧𑀘𑁆𑀙𑀸 𑀅𑀫𑁆𑀳𑀸𑀓𑀁 𑀆𑀲𑀦𑀁 𑀳𑁄𑀢𑀺.

‘‘𑀬𑁂 𑀢𑁂, 𑀪𑀦𑁆𑀢𑁂, 𑀤𑁂𑀯𑀸 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀅𑀥𑀼𑀦𑀽𑀧𑀧𑀦𑁆𑀦𑀸 𑀢𑀸𑀯𑀢𑀺𑀁𑀲𑀓𑀸𑀬𑀁, 𑀢𑁂 𑀅𑀜𑁆𑀜𑁂 ¶ 𑀤𑁂𑀯𑁂 𑀅𑀢𑀺𑀭𑁄𑀘𑀦𑁆𑀢𑀺 𑀯𑀡𑁆𑀡𑁂𑀦 𑀘𑁂𑀯 𑀬𑀲𑀲𑀸 𑀘. 𑀢𑁂𑀦 𑀲𑀼𑀤𑀁, 𑀪𑀦𑁆𑀢𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺 𑀧𑀫𑀼𑀤𑀺𑀢𑀸 ¶ 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸; ‘𑀤𑀺𑀩𑁆𑀩𑀸 𑀯𑀢, 𑀪𑁄, 𑀓𑀸𑀬𑀸 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀳𑀸𑀬𑀦𑁆𑀢𑀺 𑀅𑀲𑀼𑀭𑀓𑀸𑀬𑀸’𑀢𑀺.

𑁨𑁯𑁫. ‘‘𑀅𑀣 𑀔𑁄, 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀫𑁆𑀧𑀲𑀸𑀤𑀁 𑀯𑀺𑀤𑀺𑀢𑁆𑀯𑀸 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺 𑁋

‘𑀫𑁄𑀤𑀦𑁆𑀢𑀺 𑀯𑀢 𑀪𑁄 𑀤𑁂𑀯𑀸, 𑀢𑀸𑀯𑀢𑀺𑀁𑀲𑀸 𑀲𑀳𑀺𑀦𑁆𑀤𑀓𑀸;

𑀢𑀣𑀸𑀕𑀢𑀁 𑀦𑀫𑀲𑁆𑀲𑀦𑁆𑀢𑀸, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢𑀁.

𑀦𑀯𑁂 𑀤𑁂𑀯𑁂 𑀘 𑀧𑀲𑁆𑀲𑀦𑁆𑀢𑀸, 𑀯𑀡𑁆𑀡𑀯𑀦𑁆𑀢𑁂 𑀬𑀲𑀲𑁆𑀲𑀺𑀦𑁂;

𑀲𑀼𑀕𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀘𑀭𑀺𑀢𑁆𑀯𑀸𑀦 𑀇𑀥𑀸𑀕𑀢𑁂.

𑀢𑁂 𑀅𑀜𑁆𑀜𑁂 𑀅𑀢𑀺𑀭𑁄𑀘𑀦𑁆𑀢𑀺, 𑀯𑀡𑁆𑀡𑁂𑀦 𑀬𑀲𑀲𑀸𑀬𑀼𑀦𑀸;

𑀲𑀸𑀯𑀓𑀸 𑀪𑀽𑀭𑀺𑀧𑀜𑁆𑀜𑀲𑁆𑀲, 𑀯𑀺𑀲𑁂𑀲𑀽𑀧𑀕𑀢𑀸 𑀇𑀥.

𑀇𑀤𑀁 𑀤𑀺𑀲𑁆𑀯𑀸𑀦 𑀦𑀦𑁆𑀤𑀦𑁆𑀢𑀺, 𑀢𑀸𑀯𑀢𑀺𑀁𑀲𑀸 𑀲𑀳𑀺𑀦𑁆𑀤𑀓𑀸;

𑀢𑀣𑀸𑀕𑀢𑀁 𑀦𑀫𑀲𑁆𑀲𑀦𑁆𑀢𑀸, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢’𑀦𑁆𑀢𑀺.

‘‘𑀢𑁂𑀦 𑀲𑀼𑀤𑀁 ¶ , 𑀪𑀦𑁆𑀢𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺 𑀧𑀫𑀼𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸; ‘𑀤𑀺𑀩𑁆𑀩𑀸 𑀯𑀢, 𑀪𑁄, 𑀓𑀸𑀬𑀸 ¶ 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀳𑀸𑀬𑀦𑁆𑀢𑀺 𑀅𑀲𑀼𑀭𑀓𑀸𑀬𑀸’’’𑀢𑀺.

𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑀯𑀡𑁆𑀡𑀸

𑁨𑁯𑁬. ‘‘𑀅𑀣 𑀔𑁄, 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀫𑁆𑀧𑀲𑀸𑀤𑀁 𑀯𑀺𑀤𑀺𑀢𑁆𑀯𑀸 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋 ‘𑀇𑀘𑁆𑀙𑁂𑀬𑁆𑀬𑀸𑀣 𑀦𑁄 𑀢𑀼𑀫𑁆𑀳𑁂, 𑀫𑀸𑀭𑀺𑀲𑀸, 𑀢𑀲𑁆𑀲 𑀪𑀕𑀯𑀢𑁄 𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀲𑁄𑀢𑀼’𑀦𑁆𑀢𑀺? ‘𑀇𑀘𑁆𑀙𑀸𑀫 𑀫𑀬𑀁, 𑀫𑀸𑀭𑀺𑀲, 𑀢𑀲𑁆𑀲 𑀪𑀕𑀯𑀢𑁄 𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀲𑁄𑀢𑀼’𑀦𑁆𑀢𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀪𑀕𑀯𑀢𑁄 𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀧𑀬𑀺𑀭𑀼𑀤𑀸𑀳𑀸𑀲𑀺 𑁋 ‘𑀢𑀁 𑀓𑀺𑀁 𑀫𑀜𑁆𑀜𑀦𑁆𑀢𑀺, 𑀪𑁄𑀦𑁆𑀢𑁄 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸? 𑀬𑀸𑀯𑀜𑁆𑀘 𑀲𑁄 𑀪𑀕𑀯𑀸 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀏𑀯𑀁 ¶ 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀁 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀲𑁆𑀯𑀸𑀓𑁆𑀔𑀸𑀢𑁄 ¶ 𑀔𑁄 𑀧𑀦 𑀢𑁂𑀦 𑀪𑀕𑀯𑀢𑀸 𑀥𑀫𑁆𑀫𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀺. 𑀏𑀯𑀁 𑀑𑀧𑀦𑁂𑀬𑁆𑀬𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀤𑁂𑀲𑁂𑀢𑀸𑀭𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀇𑀤𑀁 𑀓𑀼𑀲𑀮𑀦𑁆𑀢𑀺 𑀔𑁄 𑀧𑀦 𑀢𑁂𑀦 𑀪𑀕𑀯𑀢𑀸 𑀲𑀼𑀧𑀜𑁆𑀜𑀢𑁆𑀢𑀁, 𑀇𑀤𑀁 𑀅𑀓𑀼𑀲𑀮𑀦𑁆𑀢𑀺 𑀲𑀼𑀧𑀜𑁆𑀜𑀢𑁆𑀢𑀁. 𑀇𑀤𑀁 𑀲𑀸𑀯𑀚𑁆𑀚𑀁 ¶ 𑀇𑀤𑀁 𑀅𑀦𑀯𑀚𑁆𑀚𑀁, 𑀇𑀤𑀁 𑀲𑁂𑀯𑀺𑀢𑀩𑁆𑀩𑀁 𑀇𑀤𑀁 𑀦 𑀲𑁂𑀯𑀺𑀢𑀩𑁆𑀩𑀁, 𑀇𑀤𑀁 𑀳𑀻𑀦𑀁 𑀇𑀤𑀁 𑀧𑀡𑀻𑀢𑀁, 𑀇𑀤𑀁 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀦𑁆𑀢𑀺 𑀲𑀼𑀧𑀜𑁆𑀜𑀢𑁆𑀢𑀁. 𑀏𑀯𑀁 𑀓𑀼𑀲𑀮𑀸𑀓𑀼𑀲𑀮𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀳𑀻𑀦-𑀧𑀡𑀻𑀢𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸𑀦𑀁 ¶ 𑀥𑀫𑁆𑀫𑀸𑀦𑀁 𑀧𑀜𑁆𑀜𑀧𑁂𑀢𑀸𑀭𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀲𑀼𑀧𑀜𑁆𑀜𑀢𑁆𑀢𑀸 𑀔𑁄 𑀧𑀦 𑀢𑁂𑀦 𑀪𑀕𑀯𑀢𑀸 𑀲𑀸𑀯𑀓𑀸𑀦𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑀁𑀲𑀦𑁆𑀤𑀢𑀺 𑀦𑀺𑀩𑁆𑀩𑀸𑀦𑀜𑁆𑀘 𑀧𑀝𑀺𑀧𑀤𑀸 𑀘. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑀗𑁆𑀕𑁄𑀤𑀓𑀁 𑀬𑀫𑀼𑀦𑁄𑀤𑀓𑁂𑀦 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺, 𑀏𑀯𑀫𑁂𑀯 𑀲𑀼𑀧𑀜𑁆𑀜𑀢𑁆𑀢𑀸 𑀢𑁂𑀦 𑀪𑀕𑀯𑀢𑀸 𑀲𑀸𑀯𑀓𑀸𑀦𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻 𑀧𑀝𑀺𑀧𑀤𑀸, 𑀲𑀁𑀲𑀦𑁆𑀤𑀢𑀺 𑀦𑀺𑀩𑁆𑀩𑀸𑀦𑀜𑁆𑀘 𑀧𑀝𑀺𑀧𑀤𑀸 𑀘. 𑀏𑀯𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀧𑀜𑁆𑀜𑀧𑁂𑀢𑀸𑀭𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀅𑀪𑀺𑀦𑀺𑀧𑁆𑀨𑀦𑁆𑀦𑁄 [𑀅𑀪𑀺𑀦𑀺𑀧𑁆𑀧𑀦𑁆𑀦𑁄 (𑀧𑀻. 𑀓.)] 𑀔𑁄 𑀧𑀦 𑀢𑀲𑁆𑀲 𑀪𑀕𑀯𑀢𑁄 𑀮𑀸𑀪𑁄 𑀅𑀪𑀺𑀦𑀺𑀧𑁆𑀨𑀦𑁆𑀦𑁄 𑀲𑀺𑀮𑁄𑀓𑁄, 𑀬𑀸𑀯 𑀫𑀜𑁆𑀜𑁂 𑀔𑀢𑁆𑀢𑀺𑀬𑀸 𑀲𑀫𑁆𑀧𑀺𑀬𑀸𑀬𑀫𑀸𑀦𑀭𑀽𑀧𑀸 𑀯𑀺𑀳𑀭𑀦𑁆𑀢𑀺, 𑀯𑀺𑀕𑀢𑀫𑀤𑁄 𑀔𑁄 𑀧𑀦 𑀲𑁄 𑀪𑀕𑀯𑀸 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺. 𑀏𑀯𑀁 𑀯𑀺𑀕𑀢𑀫𑀤𑀁 𑀆𑀳𑀸𑀭𑀁 𑀆𑀳𑀭𑀬𑀫𑀸𑀦𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 ¶ 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀮𑀤𑁆𑀥𑀲𑀳𑀸𑀬𑁄 𑀔𑁄 𑀧𑀦 𑀲𑁄 𑀪𑀕𑀯𑀸 𑀲𑁂𑀔𑀸𑀦𑀜𑁆𑀘𑁂𑀯 𑀧𑀝𑀺𑀧𑀦𑁆𑀦𑀸𑀦𑀁 𑀔𑀻𑀡𑀸𑀲𑀯𑀸𑀦𑀜𑁆𑀘 𑀯𑀼𑀲𑀺𑀢𑀯𑀢𑀁. 𑀢𑁂 𑀪𑀕𑀯𑀸 𑀅𑀧𑀦𑀼𑀚𑁆𑀚 𑀏𑀓𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀏𑀯𑀁 𑀏𑀓𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀬𑀣𑀸𑀯𑀸𑀤𑀻 ¶ 𑀔𑁄 𑀧𑀦 𑀲𑁄 𑀪𑀕𑀯𑀸 𑀢𑀣𑀸𑀓𑀸𑀭𑀻, 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻, 𑀇𑀢𑀺 𑀬𑀣𑀸𑀯𑀸𑀤𑀻 𑀢𑀣𑀸𑀓𑀸𑀭𑀻, 𑀬𑀣𑀸𑀓𑀸𑀭𑀻 ¶ 𑀢𑀣𑀸𑀯𑀸𑀤𑀻. 𑀏𑀯𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 ¶ 𑀔𑁄 𑀧𑀦 𑀲𑁄 𑀪𑀕𑀯𑀸 𑀯𑀺𑀕𑀢𑀓𑀣𑀁𑀓𑀣𑁄 𑀧𑀭𑀺𑀬𑁄𑀲𑀺𑀢𑀲𑀗𑁆𑀓𑀧𑁆𑀧𑁄 𑀅𑀚𑁆𑀛𑀸𑀲𑀬𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀁. 𑀏𑀯𑀁 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀁 𑀯𑀺𑀕𑀢𑀓𑀣𑀁𑀓𑀣𑀁 𑀧𑀭𑀺𑀬𑁄𑀲𑀺𑀢𑀲𑀗𑁆𑀓𑀧𑁆𑀧𑀁 𑀅𑀚𑁆𑀛𑀸𑀲𑀬𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸’𑀢𑀺.

𑁨𑁯𑁭. ‘‘𑀇𑀫𑁂 𑀔𑁄, 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀪𑀕𑀯𑀢𑁄 𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀧𑀬𑀺𑀭𑀼𑀤𑀸𑀳𑀸𑀲𑀺. 𑀢𑁂𑀦 𑀲𑀼𑀤𑀁, 𑀪𑀦𑁆𑀢𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺 𑀧𑀫𑀼𑀤𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑀸 𑀪𑀕𑀯𑀢𑁄 𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀲𑀼𑀢𑁆𑀯𑀸. 𑀢𑀢𑁆𑀭, 𑀪𑀦𑁆𑀢𑁂, 𑀏𑀓𑀘𑁆𑀘𑁂 𑀤𑁂𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀅𑀳𑁄 𑀯𑀢, 𑀫𑀸𑀭𑀺𑀲𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀥𑀫𑁆𑀫𑀜𑁆𑀘 𑀤𑁂𑀲𑁂𑀬𑁆𑀬𑀼𑀁 𑀬𑀣𑀭𑀺𑀯 𑀪𑀕𑀯𑀸. 𑀢𑀤𑀲𑁆𑀲 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’𑀦𑁆𑀢𑀺. 𑀏𑀓𑀘𑁆𑀘𑁂 𑀤𑁂𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀢𑀺𑀝𑁆𑀞𑀦𑁆𑀢𑀼, 𑀫𑀸𑀭𑀺𑀲𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀅𑀳𑁄 𑀯𑀢, 𑀫𑀸𑀭𑀺𑀲𑀸, 𑀢𑀬𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀥𑀫𑁆𑀫𑀜𑁆𑀘 𑀤𑁂𑀲𑁂𑀬𑁆𑀬𑀼𑀁 𑀬𑀣𑀭𑀺𑀯 𑀪𑀕𑀯𑀸. 𑀢𑀤𑀲𑁆𑀲 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’𑀦𑁆𑀢𑀺. 𑀏𑀓𑀘𑁆𑀘𑁂 𑀤𑁂𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀢𑀺𑀝𑁆𑀞𑀦𑁆𑀢𑀼, 𑀫𑀸𑀭𑀺𑀲𑀸, 𑀢𑀬𑁄 ¶ 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀅𑀳𑁄 𑀯𑀢, 𑀫𑀸𑀭𑀺𑀲𑀸, 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀥𑀫𑁆𑀫𑀜𑁆𑀘 𑀤𑁂𑀲𑁂𑀬𑁆𑀬𑀼𑀁 𑀬𑀣𑀭𑀺𑀯 𑀪𑀕𑀯𑀸. 𑀢𑀤𑀲𑁆𑀲 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’𑀦𑁆𑀢𑀺.

𑁨𑁯𑁮. ‘‘𑀏𑀯𑀁 𑀯𑀼𑀢𑁆𑀢𑁂 ¶ , 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀏𑀢𑀤𑀯𑁄𑀘 𑁋 ‘𑀅𑀝𑁆𑀞𑀸𑀦𑀁 𑀔𑁄 𑀏𑀢𑀁, 𑀫𑀸𑀭𑀺𑀲𑀸, 𑀅𑀦𑀯𑀓𑀸𑀲𑁄, 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀅𑀳𑁄 𑀯𑀢, 𑀫𑀸𑀭𑀺𑀲𑀸, 𑀲𑁄 𑀪𑀕𑀯𑀸 𑀅𑀧𑁆𑀧𑀸𑀩𑀸𑀥𑁄 𑀅𑀧𑁆𑀧𑀸𑀢𑀗𑁆𑀓𑁄 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀢𑀺𑀝𑁆𑀞𑁂𑀬𑁆𑀬. 𑀢𑀤𑀲𑁆𑀲 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦’𑀦𑁆𑀢𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀬𑁂𑀦𑀢𑁆𑀣𑁂𑀦 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀲𑀼𑀥𑀫𑁆𑀫𑀸𑀬𑀁 𑀲𑀪𑀸𑀬𑀁 𑀲𑀦𑁆𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺 𑀲𑀦𑁆𑀦𑀺𑀧𑀢𑀺𑀢𑀸, 𑀢𑀁 𑀅𑀢𑁆𑀣𑀁 𑀘𑀺𑀦𑁆𑀢𑀬𑀺𑀢𑁆𑀯𑀸 𑀢𑀁 𑀅𑀢𑁆𑀣𑀁 𑀫𑀦𑁆𑀢𑀬𑀺𑀢𑁆𑀯𑀸 𑀯𑀼𑀢𑁆𑀢𑀯𑀘𑀦𑀸𑀧𑀺 𑀢𑀁 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀳𑁄𑀦𑁆𑀢𑀺. 𑀧𑀘𑁆𑀘𑀸𑀦𑀼𑀲𑀺𑀝𑁆𑀞𑀯𑀘𑀦𑀸𑀧𑀺 ¶ 𑀢𑀁 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀳𑁄𑀦𑁆𑀢𑀺, 𑀲𑀓𑁂𑀲𑀼 𑀲𑀓𑁂𑀲𑀼 𑀆𑀲𑀦𑁂𑀲𑀼 𑀞𑀺𑀢𑀸 𑀅𑀯𑀺𑀧𑀓𑁆𑀓𑀦𑁆𑀢𑀸.

𑀢𑁂 ¶ 𑀯𑀼𑀢𑁆𑀢𑀯𑀸𑀓𑁆𑀬𑀸 𑀭𑀸𑀚𑀸𑀦𑁄, 𑀧𑀝𑀺𑀕𑁆𑀕𑀬𑁆𑀳𑀸𑀦𑀼𑀲𑀸𑀲𑀦𑀺𑀁;

𑀯𑀺𑀧𑁆𑀧𑀲𑀦𑁆𑀦𑀫𑀦𑀸 𑀲𑀦𑁆𑀢𑀸, 𑀅𑀝𑁆𑀞𑀁𑀲𑀼 𑀲𑀫𑁆𑀳𑀺 𑀆𑀲𑀦𑁂𑀢𑀺.

𑁨𑁯𑁯. ‘‘𑀅𑀣 𑀔𑁄, 𑀪𑀦𑁆𑀢𑁂, 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀉𑀴𑀸𑀭𑁄 𑀆𑀮𑁄𑀓𑁄 𑀲𑀜𑁆𑀚𑀸𑀬𑀺, 𑀑𑀪𑀸𑀲𑁄 𑀧𑀸𑀢𑀼𑀭𑀳𑁄𑀲𑀺 𑀅𑀢𑀺𑀓𑁆𑀓𑀫𑁆𑀫𑁂𑀯 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁. 𑀅𑀣 𑀔𑁄, 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋 ‘𑀬𑀣𑀸 𑀔𑁄, 𑀫𑀸𑀭𑀺𑀲𑀸, 𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀉𑀴𑀸𑀭𑁄 𑀆𑀮𑁄𑀓𑁄 𑀲𑀜𑁆𑀚𑀸𑀬𑀢𑀺, 𑀑𑀪𑀸𑀲𑁄 𑀧𑀸𑀢𑀼𑀪𑀯𑀢𑀺 ¶ , 𑀩𑁆𑀭𑀳𑁆𑀫𑀸 𑀧𑀸𑀢𑀼𑀪𑀯𑀺𑀲𑁆𑀲𑀢𑀺; 𑀩𑁆𑀭𑀳𑁆𑀫𑀼𑀦𑁄 𑀳𑁂𑀢𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁 𑀧𑀸𑀢𑀼𑀪𑀸𑀯𑀸𑀬, 𑀬𑀤𑀺𑀤𑀁 𑀆𑀮𑁄𑀓𑁄 𑀲𑀜𑁆𑀚𑀸𑀬𑀢𑀺 𑀑𑀪𑀸𑀲𑁄 𑀧𑀸𑀢𑀼𑀪𑀯𑀢𑀻𑀢𑀺.

‘𑀬𑀣𑀸 𑀦𑀺𑀫𑀺𑀢𑁆𑀢𑀸 𑀤𑀺𑀲𑁆𑀲𑀦𑁆𑀢𑀺, 𑀩𑁆𑀭𑀳𑁆𑀫𑀸 𑀧𑀸𑀢𑀼𑀪𑀯𑀺𑀲𑁆𑀲𑀢𑀺;

𑀩𑁆𑀭𑀳𑁆𑀫𑀼𑀦𑁄 𑀳𑁂𑀢𑀁 𑀦𑀺𑀫𑀺𑀢𑁆𑀢𑀁, 𑀑𑀪𑀸𑀲𑁄 𑀯𑀺𑀧𑀼𑀮𑁄 𑀫𑀳𑀸’𑀢𑀺.

𑀲𑀦𑀗𑁆𑀓𑀼𑀫𑀸𑀭𑀓𑀣𑀸

𑁩𑁦𑁦. ‘‘𑀅𑀣 ¶ 𑀔𑁄, 𑀪𑀦𑁆𑀢𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀬𑀣𑀸𑀲𑀓𑁂𑀲𑀼 𑀆𑀲𑀦𑁂𑀲𑀼 𑀦𑀺𑀲𑀻𑀤𑀺𑀁𑀲𑀼 𑁋 ‘𑀑𑀪𑀸𑀲𑀫𑁂𑀢𑀁 𑀜𑀲𑁆𑀲𑀸𑀫, 𑀬𑀁𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺, 𑀲𑀘𑁆𑀙𑀺𑀓𑀢𑁆𑀯𑀸𑀯 𑀦𑀁 𑀕𑀫𑀺𑀲𑁆𑀲𑀸𑀫𑀸’𑀢𑀺. 𑀘𑀢𑁆𑀢𑀸𑀭𑁄𑀧𑀺 𑀫𑀳𑀸𑀭𑀸𑀚𑀸𑀦𑁄 𑀬𑀣𑀸𑀲𑀓𑁂𑀲𑀼 𑀆𑀲𑀦𑁂𑀲𑀼 𑀦𑀺𑀲𑀻𑀤𑀺𑀁𑀲𑀼 𑁋 ‘𑀑𑀪𑀸𑀲𑀫𑁂𑀢𑀁 𑀜𑀲𑁆𑀲𑀸𑀫, 𑀬𑀁𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺, 𑀲𑀘𑁆𑀙𑀺𑀓𑀢𑁆𑀯𑀸𑀯 𑀦𑀁 𑀕𑀫𑀺𑀲𑁆𑀲𑀸𑀫𑀸’𑀢𑀺. 𑀇𑀤𑀁 𑀲𑀼𑀢𑁆𑀯𑀸 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀏𑀓𑀕𑁆𑀕𑀸 𑀲𑀫𑀸𑀧𑀚𑁆𑀚𑀺𑀁𑀲𑀼 𑁋 ‘𑀑𑀪𑀸𑀲𑀫𑁂𑀢𑀁 𑀜𑀲𑁆𑀲𑀸𑀫, 𑀬𑀁𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀺, 𑀲𑀘𑁆𑀙𑀺𑀓𑀢𑁆𑀯𑀸𑀯 𑀦𑀁 𑀕𑀫𑀺𑀲𑁆𑀲𑀸𑀫𑀸’𑀢𑀺.

‘‘𑀬𑀤𑀸, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀢𑀼𑀪𑀯𑀢𑀺, 𑀑𑀴𑀸𑀭𑀺𑀓𑀁 𑀅𑀢𑁆𑀢𑀪𑀸𑀯𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀧𑀸𑀢𑀼𑀪𑀯𑀢𑀺. 𑀬𑁄 𑀔𑁄 𑀧𑀦, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀼𑀦𑁄 𑀧𑀓𑀢𑀺𑀯𑀡𑁆𑀡𑁄, 𑀅𑀦𑀪𑀺𑀲𑀫𑁆𑀪𑀯𑀦𑀻𑀬𑁄 𑀲𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀘𑀓𑁆𑀔𑀼𑀧𑀣𑀲𑁆𑀫𑀺𑀁. 𑀬𑀤𑀸, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀢𑀼𑀪𑀯𑀢𑀺, 𑀲𑁄 𑀅𑀜𑁆𑀜𑁂 𑀤𑁂𑀯𑁂 𑀅𑀢𑀺𑀭𑁄𑀘𑀢𑀺 𑀯𑀡𑁆𑀡𑁂𑀦 𑀘𑁂𑀯 𑀬𑀲𑀲𑀸 𑀘. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀲𑁄𑀯𑀡𑁆𑀡𑁄 𑀯𑀺𑀕𑁆𑀕𑀳𑁄 𑀫𑀸𑀦𑀼𑀲𑀁 𑀯𑀺𑀕𑁆𑀕𑀳𑀁 𑀅𑀢𑀺𑀭𑁄𑀘𑀢𑀺, 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀬𑀤𑀸 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀤𑁂𑀯𑀸𑀦𑀁 ¶ 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀢𑀼𑀪𑀯𑀢𑀺, 𑀲𑁄 𑀅𑀜𑁆𑀜𑁂 𑀤𑁂𑀯𑁂 𑀅𑀢𑀺𑀭𑁄𑀘𑀢𑀺 𑀯𑀡𑁆𑀡𑁂𑀦 𑀘𑁂𑀯 𑀬𑀲𑀲𑀸 𑀘. 𑀬𑀤𑀸, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀢𑀼𑀪𑀯𑀢𑀺, 𑀦 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀓𑁄𑀘𑀺 𑀤𑁂𑀯𑁄 𑀅𑀪𑀺𑀯𑀸𑀤𑁂𑀢𑀺 𑀯𑀸 𑀧𑀘𑁆𑀘𑀼𑀝𑁆𑀞𑁂𑀢𑀺 𑀯𑀸 ¶ 𑀆𑀲𑀦𑁂𑀦 𑀯𑀸 𑀦𑀺𑀫𑀦𑁆𑀢𑁂𑀢𑀺. 𑀲𑀩𑁆𑀩𑁂𑀯 𑀢𑀼𑀡𑁆𑀳𑀻𑀪𑀽𑀢𑀸 𑀧𑀜𑁆𑀚𑀮𑀺𑀓𑀸 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀦𑁆𑀢𑀺 𑁋 ‘𑀬𑀲𑁆𑀲𑀤𑀸𑀦𑀺 𑀤𑁂𑀯𑀲𑁆𑀲 𑀧𑀮𑁆𑀮𑀗𑁆𑀓𑀁 𑀇𑀘𑁆𑀙𑀺𑀲𑁆𑀲𑀢𑀺 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄, 𑀢𑀲𑁆𑀲 𑀤𑁂𑀯𑀲𑁆𑀲 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺𑀲𑁆𑀲𑀢𑀻’𑀢𑀺. 𑀬𑀲𑁆𑀲 𑀔𑁄 𑀧𑀦, 𑀪𑀦𑁆𑀢𑁂, 𑀤𑁂𑀯𑀲𑁆𑀲 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 ¶ 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀢𑀺, 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀤𑁂𑀯𑁄 𑀯𑁂𑀤𑀧𑀝𑀺𑀮𑀸𑀪𑀁, 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀤𑁂𑀯𑁄 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀁 ¶ . 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀭𑀸𑀚𑀸 𑀔𑀢𑁆𑀢𑀺𑀬𑁄 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄 𑀅𑀥𑀼𑀦𑀸𑀪𑀺𑀲𑀺𑀢𑁆𑀢𑁄 𑀭𑀚𑁆𑀚𑁂𑀦, 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀯𑁂𑀤𑀧𑀝𑀺𑀮𑀸𑀪𑀁, 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀁, 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀬𑀲𑁆𑀲 𑀤𑁂𑀯𑀲𑁆𑀲 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀢𑀺, 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀤𑁂𑀯𑁄 𑀯𑁂𑀤𑀧𑀝𑀺𑀮𑀸𑀪𑀁, 𑀉𑀴𑀸𑀭𑀁 𑀲𑁄 𑀮𑀪𑀢𑀺 𑀤𑁂𑀯𑁄 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀁. 𑀅𑀣, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀫𑁆𑀧𑀲𑀸𑀤𑀁 𑀯𑀺𑀤𑀺𑀢𑁆𑀯𑀸 𑀅𑀦𑁆𑀢𑀭𑀳𑀺𑀢𑁄 𑀇𑀫𑀸𑀳𑀺 𑀕𑀸𑀣𑀸𑀳𑀺 𑀅𑀦𑀼𑀫𑁄𑀤𑀺 𑁋

‘𑀫𑁄𑀤𑀦𑁆𑀢𑀺 𑀯𑀢 𑀪𑁄 𑀤𑁂𑀯𑀸, 𑀢𑀸𑀯𑀢𑀺𑀁𑀲𑀸 𑀲𑀳𑀺𑀦𑁆𑀤𑀓𑀸;

𑀢𑀣𑀸𑀕𑀢𑀁 𑀦𑀫𑀲𑁆𑀲𑀦𑁆𑀢𑀸, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢𑀁.

‘𑀦𑀯𑁂 𑀤𑁂𑀯𑁂 𑀘 𑀧𑀲𑁆𑀲𑀦𑁆𑀢𑀸, 𑀯𑀡𑁆𑀡𑀯𑀦𑁆𑀢𑁂 𑀬𑀲𑀲𑁆𑀲𑀺𑀦𑁂;

𑀲𑀼𑀕𑀢𑀲𑁆𑀫𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀘𑀭𑀺𑀢𑁆𑀯𑀸𑀦 𑀇𑀥𑀸𑀕𑀢𑁂.

‘𑀢𑁂 𑀅𑀜𑁆𑀜𑁂 𑀅𑀢𑀺𑀭𑁄𑀘𑀦𑁆𑀢𑀺, 𑀯𑀡𑁆𑀡𑁂𑀦 𑀬𑀲𑀲𑀸𑀬𑀼𑀦𑀸;

𑀲𑀸𑀯𑀓𑀸 𑀪𑀽𑀭𑀺𑀧𑀜𑁆𑀜𑀲𑁆𑀲, 𑀯𑀺𑀲𑁂𑀲𑀽𑀧𑀕𑀢𑀸 𑀇𑀥.

‘𑀇𑀤𑀁 𑀤𑀺𑀲𑁆𑀯𑀸𑀦 𑀦𑀦𑁆𑀤𑀦𑁆𑀢𑀺, 𑀢𑀸𑀯𑀢𑀺𑀁𑀲𑀸 𑀲𑀳𑀺𑀦𑁆𑀤𑀓𑀸;

𑀢𑀣𑀸𑀕𑀢𑀁 𑀦𑀫𑀲𑁆𑀲𑀦𑁆𑀢𑀸, 𑀥𑀫𑁆𑀫𑀲𑁆𑀲 𑀘 𑀲𑀼𑀥𑀫𑁆𑀫𑀢’𑀦𑁆𑀢𑀺.

𑁩𑁦𑁧. ‘‘𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀅𑀪𑀸𑀲𑀺𑀢𑁆𑀣. 𑀇𑀫𑀫𑀢𑁆𑀣𑀁, 𑀪𑀦𑁆𑀢𑁂 ¶ , 𑀩𑁆𑀭𑀳𑁆𑀫𑀼𑀦𑁄 𑀲𑀦𑀗𑁆𑀓𑀼𑀫𑀸𑀭𑀲𑁆𑀲 𑀪𑀸𑀲𑀢𑁄 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀲𑀭𑁄 𑀳𑁄𑀢𑀺 𑀯𑀺𑀲𑁆𑀲𑀝𑁆𑀞𑁄 𑀘 𑀯𑀺𑀜𑁆𑀜𑁂𑀬𑁆𑀬𑁄 𑀘 𑀫𑀜𑁆𑀚𑀼 𑀘 𑀲𑀯𑀦𑀻𑀬𑁄 𑀘 𑀩𑀺𑀦𑁆𑀤𑀼 𑀘 𑀅𑀯𑀺𑀲𑀸𑀭𑀻 𑀘 𑀕𑀫𑁆𑀪𑀻𑀭𑁄 𑀘 𑀦𑀺𑀦𑁆𑀦𑀸𑀤𑀻 𑀘. 𑀬𑀣𑀸𑀧𑀭𑀺𑀲𑀁 𑀔𑁄 𑀧𑀦, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀘𑀲𑁆𑀲 𑀩𑀳𑀺𑀤𑁆𑀥𑀸 𑀧𑀭𑀺𑀲𑀸𑀬 𑀖𑁄𑀲𑁄 𑀦𑀺𑀘𑁆𑀙𑀭𑀢𑀺. 𑀬𑀲𑁆𑀲 𑀔𑁄 𑀧𑀦, 𑀪𑀦𑁆𑀢𑁂, 𑀏𑀯𑀁 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀲𑀭𑁄 𑀳𑁄𑀢𑀺, 𑀲𑁄 𑀯𑀼𑀘𑁆𑀘𑀢𑀺 ‘𑀩𑁆𑀭𑀳𑁆𑀫𑀲𑁆𑀲𑀭𑁄’𑀢𑀺. 𑀅𑀣 𑀔𑁄, 𑀪𑀦𑁆𑀢𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀩𑁆𑀭𑀳𑁆𑀫𑀸𑀦𑀁 𑀲𑀦𑀗𑁆𑀓𑀼𑀫𑀸𑀭𑀁 𑀏𑀢𑀤𑀯𑁄𑀘𑀼𑀁 ¶ 𑁋 ‘𑀲𑀸𑀥𑀼, 𑀫𑀳𑀸𑀩𑁆𑀭𑀳𑁆𑀫𑁂, 𑀏𑀢𑀤𑁂𑀯 𑀫𑀬𑀁 𑀲𑀗𑁆𑀔𑀸𑀬 𑀫𑁄𑀤𑀸𑀫; 𑀅𑀢𑁆𑀣𑀺 ¶ 𑀘 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀢𑀲𑁆𑀲 𑀪𑀕𑀯𑀢𑁄 𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑀸 𑀯𑀡𑁆𑀡𑀸 𑀪𑀸𑀲𑀺𑀢𑀸; 𑀢𑁂 𑀘 𑀫𑀬𑀁 𑀲𑀗𑁆𑀔𑀸𑀬 𑀫𑁄𑀤𑀸𑀫𑀸’𑀢𑀺.

𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑀯𑀡𑁆𑀡𑀸

𑁩𑁦𑁨. ‘‘𑀅𑀣 ¶ , 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘𑀲𑀸𑀥𑀼, 𑀤𑁂𑀯𑀸𑀦𑀫𑀺𑀦𑁆𑀤, 𑀫𑀬𑀫𑁆𑀧𑀺 𑀢𑀲𑁆𑀲 𑀪𑀕𑀯𑀢𑁄 𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀲𑀼𑀡𑁂𑀬𑁆𑀬𑀸𑀫𑀸’𑀢𑀺. ‘𑀏𑀯𑀁 𑀫𑀳𑀸𑀩𑁆𑀭𑀳𑁆𑀫𑁂’𑀢𑀺 𑀔𑁄, 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀩𑁆𑀭𑀳𑁆𑀫𑀼𑀦𑁄 𑀲𑀦𑀗𑁆𑀓𑀼𑀫𑀸𑀭𑀲𑁆𑀲 𑀪𑀕𑀯𑀢𑁄 𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀧𑀬𑀺𑀭𑀼𑀤𑀸𑀳𑀸𑀲𑀺.

‘‘𑀢𑀁 𑀓𑀺𑀁 𑀫𑀜𑁆𑀜𑀢𑀺, 𑀪𑀯𑀁 𑀫𑀳𑀸𑀩𑁆𑀭𑀳𑁆𑀫𑀸? 𑀬𑀸𑀯𑀜𑁆𑀘 𑀲𑁄 𑀪𑀕𑀯𑀸 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀏𑀯𑀁 𑀩𑀳𑀼𑀚𑀦𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀁 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀲𑁆𑀯𑀸𑀓𑁆𑀔𑀸𑀢𑁄 𑀔𑁄 𑀧𑀦 𑀢𑁂𑀦 𑀪𑀕𑀯𑀢𑀸 𑀥𑀫𑁆𑀫𑁄 ¶ 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀓𑀸𑀮𑀺𑀓𑁄 𑀏𑀳𑀺𑀧𑀲𑁆𑀲𑀺𑀓𑁄 𑀑𑀧𑀦𑁂𑀬𑁆𑀬𑀺𑀓𑁄 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀺. 𑀏𑀯𑀁 𑀑𑀧𑀦𑁂𑀬𑁆𑀬𑀺𑀓𑀲𑁆𑀲 𑀥𑀫𑁆𑀫𑀲𑁆𑀲 𑀤𑁂𑀲𑁂𑀢𑀸𑀭𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀇𑀤𑀁 𑀓𑀼𑀲𑀮’𑀦𑁆𑀢𑀺 𑀔𑁄 𑀧𑀦 𑀢𑁂𑀦 𑀪𑀕𑀯𑀢𑀸 𑀲𑀼𑀧𑀜𑁆𑀜𑀢𑁆𑀢𑀁, ‘𑀇𑀤𑀁 𑀅𑀓𑀼𑀲𑀮’𑀦𑁆𑀢𑀺 𑀲𑀼𑀧𑀜𑁆𑀜𑀢𑁆𑀢𑀁, ‘𑀇𑀤𑀁 𑀲𑀸𑀯𑀚𑁆𑀚𑀁 𑀇𑀤𑀁 𑀅𑀦𑀯𑀚𑁆𑀚𑀁, 𑀇𑀤𑀁 𑀲𑁂𑀯𑀺𑀢𑀩𑁆𑀩𑀁 𑀇𑀤𑀁 𑀦 𑀲𑁂𑀯𑀺𑀢𑀩𑁆𑀩𑀁, 𑀇𑀤𑀁 𑀳𑀻𑀦𑀁 𑀇𑀤𑀁 𑀧𑀡𑀻𑀢𑀁, 𑀇𑀤𑀁 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕’𑀦𑁆𑀢𑀺 𑀲𑀼𑀧𑀜𑁆𑀜𑀢𑁆𑀢𑀁. 𑀏𑀯𑀁 𑀓𑀼𑀲𑀮𑀸𑀓𑀼𑀲𑀮𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀳𑀻𑀦𑀧𑀡𑀻𑀢𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀸𑀦𑀁 𑀥𑀫𑁆𑀫𑀸𑀦𑀁 𑀧𑀜𑁆𑀜𑀸𑀧𑁂𑀢𑀸𑀭𑀁. 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 ¶ 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀲𑀼𑀧𑀜𑁆𑀜𑀢𑁆𑀢𑀸 𑀔𑁄 𑀧𑀦 𑀢𑁂𑀦 𑀪𑀕𑀯𑀢𑀸 𑀲𑀸𑀯𑀓𑀸𑀦𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀲𑀁𑀲𑀦𑁆𑀤𑀢𑀺 𑀦𑀺𑀩𑁆𑀩𑀸𑀦𑀜𑁆𑀘 𑀧𑀝𑀺𑀧𑀤𑀸 𑀘. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑀗𑁆𑀕𑁄𑀤𑀓𑀁 𑀬𑀫𑀼𑀦𑁄𑀤𑀓𑁂𑀦 𑀲𑀁𑀲𑀦𑁆𑀤𑀢𑀺 ¶ 𑀲𑀫𑁂𑀢𑀺, 𑀏𑀯𑀫𑁂𑀯 𑀲𑀼𑀧𑀜𑁆𑀜𑀢𑁆𑀢𑀸 𑀢𑁂𑀦 𑀪𑀕𑀯𑀢𑀸 𑀲𑀸𑀯𑀓𑀸𑀦𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀲𑀁𑀲𑀦𑁆𑀤𑀢𑀺 𑀦𑀺𑀩𑁆𑀩𑀸𑀦𑀜𑁆𑀘 𑀧𑀝𑀺𑀧𑀤𑀸 𑀘. 𑀏𑀯𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀧𑀜𑁆𑀜𑀸𑀧𑁂𑀢𑀸𑀭𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀅𑀪𑀺𑀦𑀺𑀧𑁆𑀨𑀦𑁆𑀦𑁄 ¶ 𑀔𑁄 𑀧𑀦 𑀢𑀲𑁆𑀲 𑀪𑀕𑀯𑀢𑁄 𑀮𑀸𑀪𑁄 𑀅𑀪𑀺𑀦𑀺𑀧𑁆𑀨𑀦𑁆𑀦𑁄 𑀲𑀺𑀮𑁄𑀓𑁄, 𑀬𑀸𑀯 𑀫𑀜𑁆𑀜𑁂 𑀔𑀢𑁆𑀢𑀺𑀬𑀸 ¶ 𑀲𑀫𑁆𑀧𑀺𑀬𑀸𑀬𑀫𑀸𑀦𑀭𑀽𑀧𑀸 𑀯𑀺𑀳𑀭𑀦𑁆𑀢𑀺. 𑀯𑀺𑀕𑀢𑀫𑀤𑁄 𑀔𑁄 𑀧𑀦 𑀲𑁄 𑀪𑀕𑀯𑀸 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺. 𑀏𑀯𑀁 𑀯𑀺𑀕𑀢𑀫𑀤𑀁 𑀆𑀳𑀸𑀭𑀁 𑀆𑀳𑀭𑀬𑀫𑀸𑀦𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀮𑀤𑁆𑀥𑀲𑀳𑀸𑀬𑁄 𑀔𑁄 𑀧𑀦 𑀲𑁄 𑀪𑀕𑀯𑀸 𑀲𑁂𑀔𑀸𑀦𑀜𑁆𑀘𑁂𑀯 𑀧𑀝𑀺𑀧𑀦𑁆𑀦𑀸𑀦𑀁 𑀔𑀻𑀡𑀸𑀲𑀯𑀸𑀦𑀜𑁆𑀘 𑀯𑀼𑀲𑀺𑀢𑀯𑀢𑀁, 𑀢𑁂 𑀪𑀕𑀯𑀸 𑀅𑀧𑀦𑀼𑀚𑁆𑀚 𑀏𑀓𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀏𑀯𑀁 𑀏𑀓𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀬𑀣𑀸𑀯𑀸𑀤𑀻 𑀔𑁄 𑀧𑀦 𑀲𑁄 𑀪𑀕𑀯𑀸 𑀢𑀣𑀸𑀓𑀸𑀭𑀻, 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻; 𑀇𑀢𑀺 𑀬𑀣𑀸𑀯𑀸𑀤𑀻 𑀢𑀣𑀸𑀓𑀸𑀭𑀻, 𑀬𑀣𑀸𑀓𑀸𑀭𑀻 𑀢𑀣𑀸𑀯𑀸𑀤𑀻. 𑀏𑀯𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑁆𑀧𑀦𑁆𑀦𑀁 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸.

‘‘𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀔𑁄 𑀧𑀦 𑀲𑁄 𑀪𑀕𑀯𑀸 𑀯𑀺𑀕𑀢𑀓𑀣𑀁𑀓𑀣𑁄 𑀧𑀭𑀺𑀬𑁄𑀲𑀺𑀢𑀲𑀗𑁆𑀓𑀧𑁆𑀧𑁄 𑀅𑀚𑁆𑀛𑀸𑀲𑀬𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀁 ¶ . 𑀏𑀯𑀁 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑀁 𑀯𑀺𑀕𑀢𑀓𑀣𑀁𑀓𑀣𑀁 𑀧𑀭𑀺𑀬𑁄𑀲𑀺𑀢𑀲𑀗𑁆𑀓𑀧𑁆𑀧𑀁 𑀅𑀚𑁆𑀛𑀸𑀲𑀬𑀁 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀁. 𑀇𑀫𑀺𑀦𑀸𑀧𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑀁 𑀲𑀢𑁆𑀣𑀸𑀭𑀁 𑀦𑁂𑀯 𑀅𑀢𑀻𑀢𑀁𑀲𑁂 𑀲𑀫𑀦𑀼𑀧𑀲𑁆𑀲𑀸𑀫, 𑀦 𑀧𑀦𑁂𑀢𑀭𑀳𑀺, 𑀅𑀜𑁆𑀜𑀢𑁆𑀭 𑀢𑁂𑀦 𑀪𑀕𑀯𑀢𑀸’𑀢𑀺.

𑁩𑁦𑁩. ‘‘𑀇𑀫𑁂 𑀔𑁄, 𑀪𑀦𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀩𑁆𑀭𑀳𑁆𑀫𑀼𑀦𑁄 𑀲𑀦𑀗𑁆𑀓𑀼𑀫𑀸𑀭𑀲𑁆𑀲 𑀪𑀕𑀯𑀢𑁄 𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀧𑀬𑀺𑀭𑀼𑀤𑀸𑀳𑀸𑀲𑀺. 𑀢𑁂𑀦 𑀲𑀼𑀤𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀧𑀫𑀼𑀤𑀺𑀢𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄 𑀪𑀕𑀯𑀢𑁄 𑀅𑀝𑁆𑀞 𑀬𑀣𑀸𑀪𑀼𑀘𑁆𑀘𑁂 𑀯𑀡𑁆𑀡𑁂 𑀲𑀼𑀢𑁆𑀯𑀸. 𑀅𑀣, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀑𑀴𑀸𑀭𑀺𑀓𑀁 𑀅𑀢𑁆𑀢𑀪𑀸𑀯𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀓𑀼𑀫𑀸𑀭𑀯𑀡𑁆𑀡𑀻 𑀳𑀼𑀢𑁆𑀯𑀸 𑀧𑀜𑁆𑀘𑀲𑀺𑀔𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀢𑀼𑀭𑀳𑁄𑀲𑀺 ¶ . 𑀲𑁄 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀩𑀮𑀯𑀸 ¶ 𑀧𑀼𑀭𑀺𑀲𑁄 𑀲𑀼𑀧𑀘𑁆𑀘𑀢𑁆𑀣𑀢𑁂 𑀯𑀸 𑀧𑀮𑁆𑀮𑀗𑁆𑀓𑁂 𑀲𑀫𑁂 𑀯𑀸 𑀪𑀽𑀫𑀺𑀪𑀸𑀕𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑁂𑀬𑁆𑀬, 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋

𑀕𑁄𑀯𑀺𑀦𑁆𑀤𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼

𑁩𑁦𑁪. ‘‘𑀢𑀁 𑀓𑀺𑀁 𑀫𑀜𑁆𑀜𑀦𑁆𑀢𑀺, 𑀪𑁄𑀦𑁆𑀢𑁄 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀬𑀸𑀯 𑀤𑀻𑀖𑀭𑀢𑁆𑀢𑀁 𑀫𑀳𑀸𑀧𑀜𑁆𑀜𑁄𑀯 𑀲𑁄 𑀪𑀕𑀯𑀸 𑀅𑀳𑁄𑀲𑀺. 𑀪𑀽𑀢𑀧𑀼𑀩𑁆𑀩𑀁, 𑀪𑁄, 𑀭𑀸𑀚𑀸 𑀤𑀺𑀲𑀫𑁆𑀧𑀢𑀺 𑀦𑀸𑀫 𑀅𑀳𑁄𑀲𑀺. 𑀤𑀺𑀲𑀫𑁆𑀧𑀢𑀺𑀲𑁆𑀲 𑀭𑀜𑁆𑀜𑁄 𑀕𑁄𑀯𑀺𑀦𑁆𑀤𑁄 ¶ 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀧𑀼𑀭𑁄𑀳𑀺𑀢𑁄 𑀅𑀳𑁄𑀲𑀺. 𑀤𑀺𑀲𑀫𑁆𑀧𑀢𑀺𑀲𑁆𑀲 𑀭𑀜𑁆𑀜𑁄 𑀭𑁂𑀡𑀼 𑀦𑀸𑀫 𑀓𑀼𑀫𑀸𑀭𑁄 𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀚𑁄𑀢𑀺𑀧𑀸𑀮𑁄 𑀦𑀸𑀫 𑀫𑀸𑀡𑀯𑁄 𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀇𑀢𑀺 𑀭𑁂𑀡𑀼 𑀘 𑀭𑀸𑀚𑀧𑀼𑀢𑁆𑀢𑁄 𑀚𑁄𑀢𑀺𑀧𑀸𑀮𑁄 𑀘 𑀫𑀸𑀡𑀯𑁄 𑀅𑀜𑁆𑀜𑁂 𑀘 𑀙 𑀔𑀢𑁆𑀢𑀺𑀬𑀸 𑀇𑀘𑁆𑀘𑁂𑀢𑁂 𑀅𑀝𑁆𑀞 𑀲𑀳𑀸𑀬𑀸 𑀅𑀳𑁂𑀲𑀼𑀁. 𑀅𑀣 ¶ 𑀔𑁄, 𑀪𑁄, 𑀅𑀳𑁄𑀭𑀢𑁆𑀢𑀸𑀦𑀁 𑀅𑀘𑁆𑀘𑀬𑁂𑀦 𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀓𑀸𑀮𑀫𑀓𑀸𑀲𑀺. 𑀕𑁄𑀯𑀺𑀦𑁆𑀤𑁂 𑀩𑁆𑀭𑀸𑀳𑁆𑀫𑀡𑁂 𑀓𑀸𑀮𑀗𑁆𑀓𑀢𑁂 𑀭𑀸𑀚𑀸 𑀤𑀺𑀲𑀫𑁆𑀧𑀢𑀺 𑀧𑀭𑀺𑀤𑁂𑀯𑁂𑀲𑀺 𑁋 ‘‘𑀬𑀲𑁆𑀫𑀺𑀁 𑀯𑀢, 𑀪𑁄, 𑀫𑀬𑀁 𑀲𑀫𑀬𑁂 𑀕𑁄𑀯𑀺𑀦𑁆𑀤𑁂 𑀩𑁆𑀭𑀸𑀳𑁆𑀫𑀡𑁂 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀲𑀫𑁆𑀫𑀸 𑀯𑁄𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀧𑀭𑀺𑀘𑀸𑀭𑁂𑀫, 𑀢𑀲𑁆𑀫𑀺𑀁 𑀦𑁄 𑀲𑀫𑀬𑁂 𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀓𑀸𑀮𑀗𑁆𑀓𑀢𑁄’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀪𑁄 𑀭𑁂𑀡𑀼 𑀭𑀸𑀚𑀧𑀼𑀢𑁆𑀢𑁄 𑀭𑀸𑀚𑀸𑀦𑀁 𑀤𑀺𑀲𑀫𑁆𑀧𑀢𑀺𑀁 𑀏𑀢𑀤𑀯𑁄𑀘 𑁋 ‘‘𑀫𑀸 𑀔𑁄 𑀢𑁆𑀯𑀁, 𑀤𑁂𑀯, 𑀕𑁄𑀯𑀺𑀦𑁆𑀤𑁂 𑀩𑁆𑀭𑀸𑀳𑁆𑀫𑀡𑁂 𑀓𑀸𑀮𑀗𑁆𑀓𑀢𑁂 𑀅𑀢𑀺𑀩𑀸𑀴𑁆𑀳𑀁 𑀧𑀭𑀺𑀤𑁂𑀯𑁂𑀲𑀺. 𑀅𑀢𑁆𑀣𑀺, 𑀤𑁂𑀯, 𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀚𑁄𑀢𑀺𑀧𑀸𑀮𑁄 𑀦𑀸𑀫 𑀫𑀸𑀡𑀯𑁄 ¶ 𑀧𑀼𑀢𑁆𑀢𑁄 𑀧𑀡𑁆𑀟𑀺𑀢𑀢𑀭𑁄 𑀘𑁂𑀯 𑀧𑀺𑀢𑀭𑀸, 𑀅𑀮𑀫𑀢𑁆𑀣𑀤𑀲𑀢𑀭𑁄 𑀘𑁂𑀯 𑀧𑀺𑀢𑀭𑀸; 𑀬𑁂𑀧𑀺𑀲𑁆𑀲 𑀧𑀺𑀢𑀸 𑀅𑀢𑁆𑀣𑁂 𑀅𑀦𑀼𑀲𑀸𑀲𑀺, 𑀢𑁂𑀧𑀺 𑀚𑁄𑀢𑀺𑀧𑀸𑀮𑀲𑁆𑀲𑁂𑀯 𑀫𑀸𑀡𑀯𑀲𑁆𑀲 𑀅𑀦𑀼𑀲𑀸𑀲𑀦𑀺𑀬𑀸’’𑀢𑀺. ‘‘𑀏𑀯𑀁 𑀓𑀼𑀫𑀸𑀭𑀸’’𑀢𑀺? ‘‘𑀏𑀯𑀁 𑀤𑁂𑀯𑀸’’𑀢𑀺.

𑀫𑀳𑀸𑀕𑁄𑀯𑀺𑀦𑁆𑀤𑀯𑀢𑁆𑀣𑀼

𑁩𑁦𑁫. ‘‘𑀅𑀣 𑀔𑁄, 𑀪𑁄, 𑀭𑀸𑀚𑀸 𑀤𑀺𑀲𑀫𑁆𑀧𑀢𑀺 𑀅𑀜𑁆𑀜𑀢𑀭𑀁 𑀧𑀼𑀭𑀺𑀲𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀬𑁂𑀦 𑀚𑁄𑀢𑀺𑀧𑀸𑀮𑁄 𑀦𑀸𑀫 𑀫𑀸𑀡𑀯𑁄 𑀢𑁂𑀦𑀼𑀧𑀲𑀗𑁆𑀓𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀚𑁄𑀢𑀺𑀧𑀸𑀮𑀁 𑀫𑀸𑀡𑀯𑀁 𑀏𑀯𑀁 𑀯𑀤𑁂𑀳𑀺 𑁋 ‘𑀪𑀯𑀫𑀢𑁆𑀣𑀼 𑀪𑀯𑀦𑁆𑀢𑀁 𑀚𑁄𑀢𑀺𑀧𑀸𑀮𑀁, 𑀭𑀸𑀚𑀸 𑀤𑀺𑀲𑀫𑁆𑀧𑀢𑀺 𑀪𑀯𑀦𑁆𑀢𑀁 𑀚𑁄𑀢𑀺𑀧𑀸𑀮𑀁 𑀫𑀸𑀡𑀯𑀁 𑀆𑀫𑀦𑁆𑀢𑀬𑀢𑀺, 𑀭𑀸𑀚𑀸 𑀤𑀺𑀲𑀫𑁆𑀧𑀢𑀺 𑀪𑁄𑀢𑁄 𑀚𑁄𑀢𑀺𑀧𑀸𑀮𑀲𑁆𑀲 𑀫𑀸𑀡𑀯𑀲𑁆𑀲 𑀤𑀲𑁆𑀲𑀦𑀓𑀸𑀫𑁄’’’𑀢𑀺. ‘‘𑀏𑀯𑀁, 𑀤𑁂𑀯𑀸’’𑀢𑀺 𑀔𑁄, 𑀪𑁄, 𑀲𑁄 𑀧𑀼𑀭𑀺𑀲𑁄 𑀤𑀺𑀲𑀫𑁆𑀧𑀢𑀺𑀲𑁆𑀲 𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 ¶ 𑀚𑁄𑀢𑀺𑀧𑀸𑀮𑁄 𑀫𑀸𑀡𑀯𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀚𑁄𑀢𑀺𑀧𑀸𑀮𑀁 𑀫𑀸𑀡𑀯𑀁 𑀏𑀢𑀤𑀯𑁄𑀘 𑁋 ‘‘𑀪𑀯𑀫𑀢𑁆𑀣𑀼 𑀪𑀯𑀦𑁆𑀢𑀁 𑀚𑁄𑀢𑀺𑀧𑀸𑀮𑀁, 𑀭𑀸𑀚𑀸 𑀤𑀺𑀲𑀫𑁆𑀧𑀢𑀺 𑀪𑀯𑀦𑁆𑀢𑀁 𑀚𑁄𑀢𑀺𑀧𑀸𑀮𑀁 𑀫𑀸𑀡𑀯𑀁 𑀆𑀫𑀦𑁆𑀢𑀬𑀢𑀺 ¶ , 𑀭𑀸𑀚𑀸 𑀤𑀺𑀲𑀫𑁆𑀧𑀢𑀺 𑀪𑁄𑀢𑁄 𑀚𑁄𑀢𑀺𑀧𑀸𑀮𑀲𑁆𑀲 𑀫𑀸𑀡𑀯𑀲𑁆𑀲 𑀤𑀲𑁆𑀲𑀦𑀓𑀸𑀫𑁄’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀪𑁄 𑀚𑁄𑀢𑀺𑀧𑀸𑀮𑁄 𑀫𑀸𑀡𑀯𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀭𑀸𑀚𑀸 𑀤𑀺𑀲𑀫𑁆𑀧𑀢𑀺 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀤𑀺𑀲𑀫𑁆𑀧𑀢𑀺𑀦𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺; 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄, 𑀪𑁄, 𑀚𑁄𑀢𑀺𑀧𑀸𑀮𑀁 𑀫𑀸𑀡𑀯𑀁 𑀭𑀸𑀚𑀸 𑀤𑀺𑀲𑀫𑁆𑀧𑀢𑀺 𑀏𑀢𑀤𑀯𑁄𑀘 𑁋 ‘‘𑀅𑀦𑀼𑀲𑀸𑀲𑀢𑀼 𑀦𑁄 𑀪𑀯𑀁 𑀚𑁄𑀢𑀺𑀧𑀸𑀮𑁄, 𑀫𑀸 𑀦𑁄 𑀪𑀯𑀁 𑀚𑁄𑀢𑀺𑀧𑀸𑀮𑁄 𑀅𑀦𑀼𑀲𑀸𑀲𑀦𑀺𑀬𑀸 𑀧𑀘𑁆𑀘𑀩𑁆𑀬𑀸𑀳𑀸𑀲𑀺. 𑀧𑁂𑀢𑁆𑀢𑀺𑀓𑁂 𑀢𑀁 𑀞𑀸𑀦𑁂 𑀞𑀧𑁂𑀲𑁆𑀲𑀸𑀫𑀺, 𑀕𑁄𑀯𑀺𑀦𑁆𑀤𑀺𑀬𑁂 ¶ 𑀅𑀪𑀺𑀲𑀺𑀜𑁆𑀘𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄, 𑀪𑁄, 𑀲𑁄 𑀚𑁄𑀢𑀺𑀧𑀸𑀮𑁄 𑀫𑀸𑀡𑀯𑁄 𑀤𑀺𑀲𑀫𑁆𑀧𑀢𑀺𑀲𑁆𑀲 𑀭𑀜𑁆𑀜𑁄 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄, 𑀪𑁄, 𑀭𑀸𑀚𑀸 𑀤𑀺𑀲𑀫𑁆𑀧𑀢𑀺 𑀚𑁄𑀢𑀺𑀧𑀸𑀮𑀁 𑀫𑀸𑀡𑀯𑀁 𑀕𑁄𑀯𑀺𑀦𑁆𑀤𑀺𑀬𑁂 𑀅𑀪𑀺𑀲𑀺𑀜𑁆𑀘𑀺, 𑀢𑀁 𑀧𑁂𑀢𑁆𑀢𑀺𑀓𑁂 𑀞𑀸𑀦𑁂 𑀞𑀧𑁂𑀲𑀺. 𑀅𑀪𑀺𑀲𑀺𑀢𑁆𑀢𑁄 𑀚𑁄𑀢𑀺𑀧𑀸𑀮𑁄 𑀫𑀸𑀡𑀯𑁄 𑀕𑁄𑀯𑀺𑀦𑁆𑀤𑀺𑀬𑁂 𑀧𑁂𑀢𑁆𑀢𑀺𑀓𑁂 𑀞𑀸𑀦𑁂 𑀞𑀧𑀺𑀢𑁄 𑀬𑁂𑀧𑀺𑀲𑁆𑀲 𑀧𑀺𑀢𑀸 𑀅𑀢𑁆𑀣𑁂 𑀅𑀦𑀼𑀲𑀸𑀲𑀺 𑀢𑁂𑀧𑀺 𑀅𑀢𑁆𑀣𑁂 𑀅𑀦𑀼𑀲𑀸𑀲𑀢𑀺, 𑀬𑁂𑀧𑀺𑀲𑁆𑀲 𑀧𑀺𑀢𑀸 𑀅𑀢𑁆𑀣𑁂 𑀦𑀸𑀦𑀼𑀲𑀸𑀲𑀺, 𑀢𑁂𑀧𑀺 ¶ 𑀅𑀢𑁆𑀣𑁂 𑀅𑀦𑀼𑀲𑀸𑀲𑀢𑀺; 𑀬𑁂𑀧𑀺𑀲𑁆𑀲 𑀧𑀺𑀢𑀸 𑀓𑀫𑁆𑀫𑀦𑁆𑀢𑁂 𑀅𑀪𑀺𑀲𑀫𑁆𑀪𑁄𑀲𑀺, 𑀢𑁂𑀧𑀺 𑀓𑀫𑁆𑀫𑀦𑁆𑀢𑁂 𑀅𑀪𑀺𑀲𑀫𑁆𑀪𑁄𑀢𑀺, 𑀬𑁂𑀧𑀺𑀲𑁆𑀲 𑀧𑀺𑀢𑀸 𑀓𑀫𑁆𑀫𑀦𑁆𑀢𑁂 𑀦𑀸𑀪𑀺𑀲𑀫𑁆𑀪𑁄𑀲𑀺, 𑀢𑁂𑀧𑀺 𑀓𑀫𑁆𑀫𑀦𑁆𑀢𑁂 𑀅𑀪𑀺𑀲𑀫𑁆𑀪𑁄𑀢𑀺. 𑀢𑀫𑁂𑀦𑀁 𑀫𑀦𑀼𑀲𑁆𑀲𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀕𑁄𑀯𑀺𑀦𑁆𑀤𑁄 𑀯𑀢, 𑀪𑁄, 𑀩𑁆𑀭𑀸𑀳𑁆𑀫𑀡𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀯𑀢, 𑀪𑁄, 𑀩𑁆𑀭𑀸𑀳𑁆𑀫𑀡𑁄’’𑀢𑀺. 𑀇𑀫𑀺𑀦𑀸 𑀔𑁄 𑀏𑀯𑀁, 𑀪𑁄, 𑀧𑀭𑀺𑀬𑀸𑀬𑁂𑀦 𑀚𑁄𑀢𑀺𑀧𑀸𑀮𑀲𑁆𑀲 𑀫𑀸𑀡𑀯𑀲𑁆𑀲 𑀕𑁄𑀯𑀺𑀦𑁆𑀤𑁄 𑀫𑀳𑀸𑀕𑁄𑀯𑀺𑀦𑁆𑀤𑁄𑀢𑁆𑀯𑁂𑀯 𑀲𑀫𑀜𑁆𑀜𑀸 𑀉𑀤𑀧𑀸𑀤𑀺.

𑀭𑀚𑁆𑀚𑀲𑀁𑀯𑀺𑀪𑀚𑀦𑀁

𑁩𑁦𑁬. ‘‘𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀢𑁂 𑀙 𑀔𑀢𑁆𑀢𑀺𑀬𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀙 𑀔𑀢𑁆𑀢𑀺𑀬𑁂 𑀏𑀢𑀤𑀯𑁄𑀘 𑁋 ‘‘𑀤𑀺𑀲𑀫𑁆𑀧𑀢𑀺 𑀔𑁄, 𑀪𑁄, 𑀭𑀸𑀚𑀸 𑀚𑀺𑀡𑁆𑀡𑁄 𑀯𑀼𑀤𑁆𑀥𑁄 𑀫𑀳𑀮𑁆𑀮𑀓𑁄 𑀅𑀤𑁆𑀥𑀕𑀢𑁄 ¶ 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄, 𑀓𑁄 𑀦𑀼 𑀔𑁄 𑀧𑀦, 𑀪𑁄, 𑀚𑀸𑀦𑀸𑀢𑀺 𑀚𑀻𑀯𑀺𑀢𑀁? 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀤𑀺𑀲𑀫𑁆𑀧𑀢𑀺𑀫𑁆𑀳𑀺 𑀭𑀜𑁆𑀜𑁂 𑀓𑀸𑀮𑀗𑁆𑀓𑀢𑁂 𑀭𑀸𑀚𑀓𑀢𑁆𑀢𑀸𑀭𑁄 𑀭𑁂𑀡𑀼𑀁 𑀭𑀸𑀚𑀧𑀼𑀢𑁆𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑁂𑀬𑁆𑀬𑀼𑀁. 𑀆𑀬𑀦𑁆𑀢𑀼, 𑀪𑁄𑀦𑁆𑀢𑁄, 𑀬𑁂𑀦 𑀭𑁂𑀡𑀼 𑀭𑀸𑀚𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀣; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑁂𑀡𑀼𑀁 𑀭𑀸𑀚𑀧𑀼𑀢𑁆𑀢𑀁 𑀏𑀯𑀁 𑀯𑀤𑁂𑀣 𑁋 ‘‘𑀫𑀬𑀁 𑀔𑁄 𑀪𑁄𑀢𑁄 𑀭𑁂𑀡𑀼𑀲𑁆𑀲 𑀲𑀳𑀸𑀬𑀸 𑀧𑀺𑀬𑀸 𑀫𑀦𑀸𑀧𑀸 𑀅𑀧𑁆𑀧𑀝𑀺𑀓𑀽𑀮𑀸, 𑀬𑀁𑀲𑀼𑀔𑁄 𑀪𑀯𑀁 ¶ 𑀢𑀁𑀲𑀼𑀔𑀸 𑀫𑀬𑀁, 𑀬𑀁𑀤𑀼𑀓𑁆𑀔𑁄 𑀪𑀯𑀁 𑀢𑀁𑀤𑀼𑀓𑁆𑀔𑀸 𑀫𑀬𑀁. 𑀤𑀺𑀲𑀫𑁆𑀧𑀢𑀺 𑀔𑁄, 𑀪𑁄, 𑀭𑀸𑀚𑀸 𑀚𑀺𑀡𑁆𑀡𑁄 𑀯𑀼𑀤𑁆𑀥𑁄 𑀫𑀳𑀮𑁆𑀮𑀓𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄, 𑀓𑁄 𑀦𑀼 𑀔𑁄 𑀧𑀦, 𑀪𑁄, 𑀚𑀸𑀦𑀸𑀢𑀺 𑀚𑀻𑀯𑀺𑀢𑀁? 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀤𑀺𑀲𑀫𑁆𑀧𑀢𑀺𑀫𑁆𑀳𑀺 𑀭𑀜𑁆𑀜𑁂 𑀓𑀸𑀮𑀗𑁆𑀓𑀢𑁂 𑀭𑀸𑀚𑀓𑀢𑁆𑀢𑀸𑀭𑁄 𑀪𑀯𑀦𑁆𑀢𑀁 𑀭𑁂𑀡𑀼𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑁂𑀬𑁆𑀬𑀼𑀁. 𑀲𑀘𑁂 𑀪𑀯𑀁 𑀭𑁂𑀡𑀼 𑀭𑀚𑁆𑀚𑀁 𑀮𑀪𑁂𑀣, 𑀲𑀁𑀯𑀺𑀪𑀚𑁂𑀣 𑀦𑁄 𑀭𑀚𑁆𑀚𑁂𑀦𑀸’’𑀢𑀺. ‘‘𑀏𑀯𑀁 𑀪𑁄’’𑀢𑀺 𑀔𑁄, 𑀪𑁄, 𑀢𑁂 𑀙 𑀔𑀢𑁆𑀢𑀺𑀬𑀸 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀭𑁂𑀡𑀼 𑀭𑀸𑀚𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑁂𑀡𑀼𑀁 𑀭𑀸𑀚𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀫𑀬𑀁 𑀔𑁄 𑀪𑁄𑀢𑁄 𑀭𑁂𑀡𑀼𑀲𑁆𑀲 𑀲𑀳𑀸𑀬𑀸 𑀧𑀺𑀬𑀸 𑀫𑀦𑀸𑀧𑀸 𑀅𑀧𑁆𑀧𑀝𑀺𑀓𑀽𑀮𑀸 ¶ ; 𑀬𑀁𑀲𑀼𑀔𑁄 𑀪𑀯𑀁 𑀢𑀁𑀲𑀼𑀔𑀸 𑀫𑀬𑀁, 𑀬𑀁𑀤𑀼𑀓𑁆𑀔𑁄 𑀪𑀯𑀁 𑀢𑀁𑀤𑀼𑀓𑁆𑀔𑀸 𑀫𑀬𑀁. 𑀤𑀺𑀲𑀫𑁆𑀧𑀢𑀺 𑀔𑁄, 𑀪𑁄, 𑀭𑀸𑀚𑀸 𑀚𑀺𑀡𑁆𑀡𑁄 𑀯𑀼𑀤𑁆𑀥𑁄 𑀫𑀳𑀮𑁆𑀮𑀓𑁄 𑀅𑀤𑁆𑀥𑀕𑀢𑁄 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄, 𑀓𑁄 𑀦𑀼 𑀔𑁄 𑀧𑀦 𑀪𑁄 𑀚𑀸𑀦𑀸𑀢𑀺 𑀚𑀻𑀯𑀺𑀢𑀁? 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀤𑀺𑀲𑀫𑁆𑀧𑀢𑀺𑀫𑁆𑀳𑀺 𑀭𑀜𑁆𑀜𑁂 𑀓𑀸𑀮𑀗𑁆𑀓𑀢𑁂 𑀭𑀸𑀚𑀓𑀢𑁆𑀢𑀸𑀭𑁄 𑀪𑀯𑀦𑁆𑀢𑀁 𑀭𑁂𑀡𑀼𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑁂𑀬𑁆𑀬𑀼𑀁. 𑀲𑀘𑁂 𑀪𑀯𑀁 𑀭𑁂𑀡𑀼 𑀭𑀚𑁆𑀚𑀁 𑀮𑀪𑁂𑀣, 𑀲𑀁𑀯𑀺𑀪𑀚𑁂𑀣 𑀦𑁄 𑀭𑀚𑁆𑀚𑁂𑀦𑀸’’𑀢𑀺. ‘‘𑀓𑁄 𑀦𑀼 𑀔𑁄, 𑀪𑁄, 𑀅𑀜𑁆𑀜𑁄 𑀫𑀫 𑀯𑀺𑀚𑀺𑀢𑁂 𑀲𑀼𑀔𑁄 𑀪𑀯𑁂𑀣 [𑀲𑀼𑀔𑀸 𑀪𑀯𑁂𑀬𑁆𑀬𑀸𑀣 (𑀓.), 𑀲𑀼𑀔𑀁 𑀪𑀯𑁂𑀬𑁆𑀬𑀸𑀣, 𑀲𑀼𑀔𑀫𑁂𑀥𑁂𑀬𑁆𑀬𑀸𑀣 (𑀲𑀻. 𑀧𑀻.),𑀲𑀼𑀔 𑀫𑁂𑀥𑁂𑀣 (?)], 𑀅𑀜𑁆𑀜𑀢𑁆𑀭 𑀪𑀯𑀦𑁆𑀢𑁂𑀪𑀺? 𑀲𑀘𑀸𑀳𑀁, 𑀪𑁄, 𑀭𑀚𑁆𑀚𑀁 𑀮𑀪𑀺𑀲𑁆𑀲𑀸𑀫𑀺, 𑀲𑀁𑀯𑀺𑀪𑀚𑀺𑀲𑁆𑀲𑀸𑀫𑀺 𑀯𑁄 𑀭𑀚𑁆𑀚𑁂𑀦𑀸’’’𑀢𑀺.

𑁩𑁦𑁭. ‘‘𑀅𑀣 ¶ 𑀔𑁄, 𑀪𑁄, 𑀅𑀳𑁄𑀭𑀢𑁆𑀢𑀸𑀦𑀁 𑀅𑀘𑁆𑀘𑀬𑁂𑀦 𑀭𑀸𑀚𑀸 𑀤𑀺𑀲𑀫𑁆𑀧𑀢𑀺 𑀓𑀸𑀮𑀫𑀓𑀸𑀲𑀺. 𑀤𑀺𑀲𑀫𑁆𑀧𑀢𑀺𑀫𑁆𑀳𑀺 𑀭𑀜𑁆𑀜𑁂 𑀓𑀸𑀮𑀗𑁆𑀓𑀢𑁂 𑀭𑀸𑀚𑀓𑀢𑁆𑀢𑀸𑀭𑁄 𑀭𑁂𑀡𑀼𑀁 𑀭𑀸𑀚𑀧𑀼𑀢𑁆𑀢𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀁𑀲𑀼. 𑀅𑀪𑀺𑀲𑀺𑀢𑁆𑀢𑁄 𑀭𑁂𑀡𑀼 𑀭𑀚𑁆𑀚𑁂𑀦 ¶ 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺. 𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀢𑁂 𑀙 𑀔𑀢𑁆𑀢𑀺𑀬𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀙 𑀔𑀢𑁆𑀢𑀺𑀬𑁂 𑀏𑀢𑀤𑀯𑁄𑀘 ¶ 𑁋 ‘‘𑀤𑀺𑀲𑀫𑁆𑀧𑀢𑀺 𑀔𑁄, 𑀪𑁄, 𑀭𑀸𑀚𑀸 𑀓𑀸𑀮𑀗𑁆𑀓𑀢𑁄. 𑀅𑀪𑀺𑀲𑀺𑀢𑁆𑀢𑁄 𑀭𑁂𑀡𑀼 𑀭𑀚𑁆𑀚𑁂𑀦 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀻𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺. 𑀓𑁄 𑀦𑀼 𑀔𑁄 𑀧𑀦, 𑀪𑁄, 𑀚𑀸𑀦𑀸𑀢𑀺, 𑀫𑀤𑀦𑀻𑀬𑀸 𑀓𑀸𑀫𑀸? 𑀆𑀬𑀦𑁆𑀢𑀼, 𑀪𑁄𑀦𑁆𑀢𑁄, 𑀬𑁂𑀦 𑀭𑁂𑀡𑀼 𑀭𑀸𑀚𑀸 𑀢𑁂𑀦𑀼𑀧𑀲𑀗𑁆𑀓𑀫𑀣; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑁂𑀡𑀼𑀁 𑀭𑀸𑀚𑀸𑀦𑀁 𑀏𑀯𑀁 𑀯𑀤𑁂𑀣 𑁋 𑀤𑀺𑀲𑀫𑁆𑀧𑀢𑀺 𑀔𑁄, 𑀪𑁄, 𑀭𑀸𑀚𑀸 𑀓𑀸𑀮𑀗𑁆𑀓𑀢𑁄, 𑀅𑀪𑀺𑀲𑀺𑀢𑁆𑀢𑁄 𑀪𑀯𑀁 𑀭𑁂𑀡𑀼 𑀭𑀚𑁆𑀚𑁂𑀦, 𑀲𑀭𑀢𑀺 𑀪𑀯𑀁 𑀢𑀁 𑀯𑀘𑀦’’’𑀦𑁆𑀢𑀺?

𑁩𑁦𑁮. ‘‘‘𑀏𑀯𑀁 ¶ , 𑀪𑁄’’𑀢𑀺 𑀔𑁄, 𑀪𑁄, 𑀢𑁂 𑀙 𑀔𑀢𑁆𑀢𑀺𑀬𑀸 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀭𑁂𑀡𑀼 𑀭𑀸𑀚𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑁂𑀡𑀼𑀁 𑀭𑀸𑀚𑀸𑀦𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀤𑀺𑀲𑀫𑁆𑀧𑀢𑀺 𑀔𑁄, 𑀪𑁄, 𑀭𑀸𑀚𑀸 𑀓𑀸𑀮𑀗𑁆𑀓𑀢𑁄, 𑀅𑀪𑀺𑀲𑀺𑀢𑁆𑀢𑁄 𑀪𑀯𑀁 𑀭𑁂𑀡𑀼 𑀭𑀚𑁆𑀚𑁂𑀦, 𑀲𑀭𑀢𑀺 𑀪𑀯𑀁 𑀢𑀁 𑀯𑀘𑀦’’𑀦𑁆𑀢𑀺? ‘‘𑀲𑀭𑀸𑀫𑀳𑀁, 𑀪𑁄, 𑀢𑀁 𑀯𑀘𑀦𑀁 [𑀯𑀘𑀦𑀦𑁆𑀢𑀺 (𑀲𑁆𑀬𑀸. 𑀓.)]. 𑀓𑁄 𑀦𑀼 𑀔𑁄, 𑀪𑁄, 𑀧𑀳𑁄𑀢𑀺 𑀇𑀫𑀁 𑀫𑀳𑀸𑀧𑀣𑀯𑀺𑀁 𑀉𑀢𑁆𑀢𑀭𑁂𑀦 𑀆𑀬𑀢𑀁 𑀤𑀓𑁆𑀔𑀺𑀡𑁂𑀦 𑀲𑀓𑀝𑀫𑀼𑀔𑀁 𑀲𑀢𑁆𑀢𑀥𑀸 𑀲𑀫𑀁 𑀲𑀼𑀯𑀺𑀪𑀢𑁆𑀢𑀁 𑀯𑀺𑀪𑀚𑀺𑀢𑀼’’𑀦𑁆𑀢𑀺? ‘‘𑀓𑁄 𑀦𑀼 𑀔𑁄, 𑀪𑁄, 𑀅𑀜𑁆𑀜𑁄 𑀧𑀳𑁄𑀢𑀺, 𑀅𑀜𑁆𑀜𑀢𑁆𑀭 𑀫𑀳𑀸𑀕𑁄𑀯𑀺𑀦𑁆𑀤𑁂𑀦 𑀩𑁆𑀭𑀸𑀳𑁆𑀫𑀡𑁂𑀦𑀸’’𑀢𑀺? 𑀅𑀣 𑀔𑁄, 𑀪𑁄, 𑀭𑁂𑀡𑀼 𑀭𑀸𑀚𑀸 𑀅𑀜𑁆𑀜𑀢𑀭𑀁 𑀧𑀼𑀭𑀺𑀲𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀬𑁂𑀦 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀢𑁂𑀦𑀼𑀧𑀲𑀗𑁆𑀓𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀳𑀸𑀕𑁄𑀯𑀺𑀦𑁆𑀤𑀁 𑀩𑁆𑀭𑀸𑀳𑁆𑀫𑀡𑀁 𑀏𑀯𑀁 𑀯𑀤𑁂𑀳𑀺 𑁋 ‘𑀭𑀸𑀚𑀸 𑀢𑀁, 𑀪𑀦𑁆𑀢𑁂, 𑀭𑁂𑀡𑀼 𑀆𑀫𑀦𑁆𑀢𑁂𑀢𑀻’’’𑀢𑀺. ‘‘𑀏𑀯𑀁 ¶ 𑀤𑁂𑀯𑀸’’𑀢𑀺 𑀔𑁄, 𑀪𑁄, 𑀲𑁄 𑀧𑀼𑀭𑀺𑀲𑁄 𑀭𑁂𑀡𑀼𑀲𑁆𑀲 𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 ¶ 𑀬𑁂𑀦 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀳𑀸𑀕𑁄𑀯𑀺𑀦𑁆𑀤𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘 𑁋 ‘‘𑀭𑀸𑀚𑀸 𑀢𑀁, 𑀪𑀦𑁆𑀢𑁂, 𑀭𑁂𑀡𑀼 𑀆𑀫𑀦𑁆𑀢𑁂𑀢𑀻’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀭𑁂𑀡𑀼 𑀭𑀸𑀚𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑁂𑀡𑀼𑀦𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑀁 𑀩𑁆𑀭𑀸𑀳𑁆𑀫𑀡𑀁 𑀭𑁂𑀡𑀼 𑀭𑀸𑀚𑀸 𑀏𑀢𑀤𑀯𑁄𑀘 𑁋 ‘‘𑀏𑀢𑀼, 𑀪𑀯𑀁 𑀕𑁄𑀯𑀺𑀦𑁆𑀤𑁄, 𑀇𑀫𑀁 𑀫𑀳𑀸𑀧𑀣𑀯𑀺𑀁 𑀉𑀢𑁆𑀢𑀭𑁂𑀦 𑀆𑀬𑀢𑀁 𑀤𑀓𑁆𑀔𑀺𑀡𑁂𑀦 𑀲𑀓𑀝𑀫𑀼𑀔𑀁 𑀲𑀢𑁆𑀢𑀥𑀸 𑀲𑀫𑀁 𑀲𑀼𑀯𑀺𑀪𑀢𑁆𑀢𑀁 𑀯𑀺𑀪𑀚𑀢𑀽’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀭𑁂𑀡𑀼𑀲𑁆𑀲 𑀭𑀜𑁆𑀜𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀇𑀫𑀁 𑀫𑀳𑀸𑀧𑀣𑀯𑀺𑀁 𑀉𑀢𑁆𑀢𑀭𑁂𑀦 𑀆𑀬𑀢𑀁 𑀤𑀓𑁆𑀔𑀺𑀡𑁂𑀦 𑀲𑀓𑀝𑀫𑀼𑀔𑀁 𑀲𑀢𑁆𑀢𑀥𑀸 𑀲𑀫𑀁 𑀲𑀼𑀯𑀺𑀪𑀢𑁆𑀢𑀁 𑀯𑀺𑀪𑀚𑀺. 𑀲𑀩𑁆𑀩𑀸𑀦𑀺 𑀲𑀓𑀝𑀫𑀼𑀔𑀸𑀦𑀺 𑀧𑀝𑁆𑀞𑀧𑁂𑀲𑀺 [𑀅𑀝𑁆𑀞𑀧𑁂𑀲𑀺 (𑀲𑀻. 𑀧𑀻.)]. 𑀢𑀢𑁆𑀭 𑀲𑀼𑀤𑀁 𑀫𑀚𑁆𑀛𑁂 𑀭𑁂𑀡𑀼𑀲𑁆𑀲 𑀭𑀜𑁆𑀜𑁄 𑀚𑀦𑀧𑀤𑁄 𑀳𑁄𑀢𑀺.

𑁩𑁦𑁯. 𑀤𑀦𑁆𑀢𑀧𑀼𑀭𑀁 𑀓𑀮𑀺𑀗𑁆𑀕𑀸𑀦𑀁 [𑀓𑀸𑀮𑀺𑀗𑁆𑀕𑀸𑀦𑀁 (𑀲𑁆𑀬𑀸. 𑀧𑀻. 𑀓.)], 𑀅𑀲𑁆𑀲𑀓𑀸𑀦𑀜𑁆𑀘 𑀧𑁄𑀢𑀦𑀁.

𑀫𑀳𑁂𑀲𑀬𑀁 [𑀫𑀸𑀳𑀺𑀲𑁆𑀲𑀢𑀺 (𑀲𑀻. 𑀲𑁆𑀬𑀸. 𑀧𑀻.)] 𑀅𑀯𑀦𑁆𑀢𑀻𑀦𑀁, 𑀲𑁄𑀯𑀻𑀭𑀸𑀦𑀜𑁆𑀘 𑀭𑁄𑀭𑀼𑀓𑀁.

𑀫𑀺𑀣𑀺𑀮𑀸 𑀘 𑀯𑀺𑀤𑁂𑀳𑀸𑀦𑀁, 𑀘𑀫𑁆𑀧𑀸 𑀅𑀗𑁆𑀕𑁂𑀲𑀼 𑀫𑀸𑀧𑀺𑀢𑀸;

𑀩𑀸𑀭𑀸𑀡𑀲𑀻 𑀘 𑀓𑀸𑀲𑀻𑀦𑀁, 𑀏𑀢𑁂 𑀕𑁄𑀯𑀺𑀦𑁆𑀤𑀫𑀸𑀧𑀺𑀢𑀸𑀢𑀺.

𑁩𑁧𑁦. ‘‘𑀅𑀣 ¶ ¶ ¶ 𑀔𑁄, 𑀪𑁄, 𑀢𑁂 𑀙 𑀔𑀢𑁆𑀢𑀺𑀬𑀸 𑀬𑀣𑀸𑀲𑀓𑁂𑀦 𑀮𑀸𑀪𑁂𑀦 𑀅𑀢𑁆𑀢𑀫𑀦𑀸 𑀅𑀳𑁂𑀲𑀼𑀁 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑀸 𑁋 ‘‘𑀬𑀁 𑀯𑀢 𑀦𑁄 𑀅𑀳𑁄𑀲𑀺 𑀇𑀘𑁆𑀙𑀺𑀢𑀁, 𑀬𑀁 𑀆𑀓𑀗𑁆𑀔𑀺𑀢𑀁, 𑀬𑀁 𑀅𑀥𑀺𑀧𑁆𑀧𑁂𑀢𑀁, 𑀬𑀁 𑀅𑀪𑀺𑀧𑀢𑁆𑀣𑀺𑀢𑀁, 𑀢𑀁 𑀦𑁄 𑀮𑀤𑁆𑀥’’𑀦𑁆𑀢𑀺.

‘‘𑀲𑀢𑁆𑀢𑀪𑀽 ¶ 𑀩𑁆𑀭𑀳𑁆𑀫𑀤𑀢𑁆𑀢𑁄 𑀘, 𑀯𑁂𑀲𑁆𑀲𑀪𑀽 𑀪𑀭𑀢𑁄 𑀲𑀳;

𑀭𑁂𑀡𑀼 𑀤𑁆𑀯𑁂 𑀥𑀢𑀭𑀝𑁆𑀞𑀸 𑀘, 𑀢𑀤𑀸𑀲𑀼𑀁 𑀲𑀢𑁆𑀢 𑀪𑀸𑀭𑀥𑀸’𑀢𑀺.

𑀧𑀞𑀫𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑀓𑀺𑀢𑁆𑀢𑀺𑀲𑀤𑁆𑀤𑀅𑀩𑁆𑀪𑀼𑀕𑁆𑀕𑀫𑀦𑀁

𑁩𑁧𑁧. ‘‘𑀅𑀣 𑀔𑁄, 𑀪𑁄, 𑀢𑁂 𑀙 𑀔𑀢𑁆𑀢𑀺𑀬𑀸 𑀬𑁂𑀦 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀳𑀸𑀕𑁄𑀯𑀺𑀦𑁆𑀤𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀬𑀣𑀸 𑀔𑁄 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀭𑁂𑀡𑀼𑀲𑁆𑀲 𑀭𑀜𑁆𑀜𑁄 𑀲𑀳𑀸𑀬𑁄 𑀧𑀺𑀬𑁄 𑀫𑀦𑀸𑀧𑁄 𑀅𑀧𑁆𑀧𑀝𑀺𑀓𑀽𑀮𑁄. 𑀏𑀯𑀫𑁂𑀯 𑀔𑁄 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀅𑀫𑁆𑀳𑀸𑀓𑀫𑁆𑀧𑀺 𑀲𑀳𑀸𑀬𑁄 𑀧𑀺𑀬𑁄 𑀫𑀦𑀸𑀧𑁄 𑀅𑀧𑁆𑀧𑀝𑀺𑀓𑀽𑀮𑁄, 𑀅𑀦𑀼𑀲𑀸𑀲𑀢𑀼 𑀦𑁄 𑀪𑀯𑀁 𑀕𑁄𑀯𑀺𑀦𑁆𑀤𑁄; 𑀫𑀸 𑀦𑁄 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀅𑀦𑀼𑀲𑀸𑀲𑀦𑀺𑀬𑀸 𑀧𑀘𑁆𑀘𑀩𑁆𑀬𑀸𑀳𑀸𑀲𑀻’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀢𑁂𑀲𑀁 𑀙𑀦𑁆𑀦𑀁 𑀔𑀢𑁆𑀢𑀺𑀬𑀸𑀦𑀁 𑀧𑀘𑁆𑀘𑀲𑁆𑀲𑁄𑀲𑀺. 𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀲𑀢𑁆𑀢 𑀘 𑀭𑀸𑀚𑀸𑀦𑁄 𑀔𑀢𑁆𑀢𑀺𑀬𑁂 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁂 𑀭𑀚𑁆𑀚𑁂 [𑀫𑀼𑀤𑁆𑀥𑀸𑀪𑀺𑀲𑀺𑀢𑁆𑀢𑁂 𑀭𑀚𑁆𑀚𑁂𑀦 (𑀲𑁆𑀬𑀸.)] 𑀅𑀦𑀼𑀲𑀸𑀲𑀺, 𑀲𑀢𑁆𑀢 𑀘 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁂 𑀲𑀢𑁆𑀢 𑀘 𑀦𑁆𑀳𑀸𑀢𑀓𑀲𑀢𑀸𑀦𑀺 𑀫𑀦𑁆𑀢𑁂 𑀯𑀸𑀘𑁂𑀲𑀺.

𑁩𑁧𑁨. ‘‘𑀅𑀣 ¶ 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀧𑀭𑁂𑀦 𑀲𑀫𑀬𑁂𑀦 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀺 [𑀅𑀩𑁆𑀪𑀼𑀕𑁆𑀕𑀜𑁆𑀙𑀺 (𑀲𑀻. 𑀧𑀻.)] 𑁋 ‘‘𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺, 𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺 𑀲𑀮𑁆𑀮𑀧𑀢𑀺 𑀫𑀦𑁆𑀢𑁂𑀢𑀻’’𑀢𑀺. 𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀬𑁆𑀳𑀁 𑀔𑁄 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺, 𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺 ¶ 𑀲𑀮𑁆𑀮𑀧𑀢𑀺 𑀫𑀦𑁆𑀢𑁂𑀢𑀻’𑀢𑀺. 𑀦 𑀔𑁄 𑀧𑀦𑀸𑀳𑀁 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀸𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀲𑀮𑁆𑀮𑀧𑀸𑀫𑀺 ¶ , 𑀦 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀫𑀺. 𑀲𑀼𑀢𑀁 𑀔𑁄 𑀧𑀦 𑀫𑁂𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀼𑀤𑁆𑀥𑀸𑀦𑀁 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 𑁋 ‘𑀬𑁄 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑀢𑀺, 𑀓𑀭𑀼𑀡𑀁 ¶ 𑀛𑀸𑀦𑀁 𑀛𑀸𑀬𑀢𑀺, 𑀲𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺 𑀩𑁆𑀭𑀳𑁆𑀫𑀼𑀦𑀸 𑀲𑀮𑁆𑀮𑀧𑀢𑀺 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀢𑀻’𑀢𑀺. 𑀬𑀁𑀦𑀽𑀦𑀸𑀳𑀁 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑁂𑀬𑁆𑀬𑀁, 𑀓𑀭𑀼𑀡𑀁 𑀛𑀸𑀦𑀁 𑀛𑀸𑀬𑁂𑀬𑁆𑀬’’𑀦𑁆𑀢𑀺.

𑁩𑁧𑁩. ‘‘𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀭𑁂𑀡𑀼 𑀭𑀸𑀚𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑁂𑀡𑀼𑀁 𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀫𑀬𑁆𑀳𑀁 𑀔𑁄, 𑀪𑁄, 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺, 𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺 𑀲𑀮𑁆𑀮𑀧𑀢𑀺 𑀫𑀦𑁆𑀢𑁂𑀢𑀻’𑀢𑀺. 𑀦 𑀔𑁄 𑀧𑀦𑀸𑀳𑀁, 𑀪𑁄, 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀸𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀲𑀮𑁆𑀮𑀧𑀸𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀫𑀺. 𑀲𑀼𑀢𑀁 𑀔𑁄 𑀧𑀦 𑀫𑁂𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀼𑀤𑁆𑀥𑀸𑀦𑀁 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 𑁋 ‘𑀬𑁄 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑀢𑀺, 𑀓𑀭𑀼𑀡𑀁 𑀛𑀸𑀦𑀁 𑀛𑀸𑀬𑀢𑀺, 𑀲𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺, 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺 𑀩𑁆𑀭𑀳𑁆𑀫𑀼𑀦𑀸 𑀲𑀮𑁆𑀮𑀧𑀢𑀺 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀢𑀻’𑀢𑀺. 𑀇𑀘𑁆𑀙𑀸𑀫𑀳𑀁, 𑀪𑁄, 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀁, 𑀓𑀭𑀼𑀡𑀁 𑀛𑀸𑀦𑀁 𑀛𑀸𑀬𑀺𑀢𑀼𑀁; 𑀦𑀫𑁆𑀳𑀺 𑀓𑁂𑀦𑀘𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀏𑀓𑁂𑀦 𑀪𑀢𑁆𑀢𑀸𑀪𑀺𑀳𑀸𑀭𑁂𑀦𑀸’’𑀢𑀺. ‘‘𑀬𑀲𑁆𑀲𑀤𑀸𑀦𑀺 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺.

𑁩𑁧𑁪. ‘‘𑀅𑀣 ¶ 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 ¶ 𑀢𑁂 𑀙 𑀔𑀢𑁆𑀢𑀺𑀬𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀙 𑀔𑀢𑁆𑀢𑀺𑀬𑁂 𑀏𑀢𑀤𑀯𑁄𑀘 𑁋 ‘‘𑀫𑀬𑁆𑀳𑀁 𑀔𑁄, 𑀪𑁄, 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺, 𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺 𑀲𑀮𑁆𑀮𑀧𑀢𑀺 𑀫𑀦𑁆𑀢𑁂𑀢𑀻’𑀢𑀺. 𑀦 𑀔𑁄 𑀧𑀦𑀸𑀳𑀁, 𑀪𑁄, 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀸𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀲𑀮𑁆𑀮𑀧𑀸𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀫𑀺. 𑀲𑀼𑀢𑀁 𑀔𑁄 𑀧𑀦 𑀫𑁂𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀼𑀤𑁆𑀥𑀸𑀦𑀁 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁, ‘𑀬𑁄 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑀢𑀺, 𑀓𑀭𑀼𑀡𑀁 𑀛𑀸𑀦𑀁 𑀛𑀸𑀬𑀢𑀺, 𑀲𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺 𑀩𑁆𑀭𑀳𑁆𑀫𑀼𑀦𑀸 𑀲𑀮𑁆𑀮𑀧𑀢𑀺 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀢𑀻’𑀢𑀺. 𑀇𑀘𑁆𑀙𑀸𑀫𑀳𑀁, 𑀪𑁄, 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀁, 𑀓𑀭𑀼𑀡𑀁 𑀛𑀸𑀦𑀁 𑀛𑀸𑀬𑀺𑀢𑀼𑀁; 𑀦𑀫𑁆𑀳𑀺 𑀓𑁂𑀦𑀘𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀏𑀓𑁂𑀦 𑀪𑀢𑁆𑀢𑀸𑀪𑀺𑀳𑀸𑀭𑁂𑀦𑀸’’𑀢𑀺. ‘‘𑀬𑀲𑁆𑀲𑀤𑀸𑀦𑀺 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀓𑀸𑀮𑀁 𑀫𑀜𑁆𑀜𑀢𑀻’’’𑀢𑀺.

𑁩𑁧𑁫. ‘‘𑀅𑀣 ¶ 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀢𑁂 𑀲𑀢𑁆𑀢 𑀘 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀲𑀢𑁆𑀢 𑀘 𑀦𑁆𑀳𑀸𑀢𑀓𑀲𑀢𑀸𑀦𑀺 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀲𑀢𑁆𑀢 𑀘 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁂 𑀲𑀢𑁆𑀢 𑀘 𑀦𑁆𑀳𑀸𑀢𑀓𑀲𑀢𑀸𑀦𑀺 𑀏𑀢𑀤𑀯𑁄𑀘 𑁋 ‘‘𑀫𑀬𑁆𑀳𑀁 𑀔𑁄, 𑀪𑁄, 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺, 𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺 𑀲𑀮𑁆𑀮𑀧𑀢𑀺 𑀫𑀦𑁆𑀢𑁂𑀢𑀻’𑀢𑀺. 𑀦 𑀔𑁄 𑀧𑀦𑀸𑀳𑀁, 𑀪𑁄, 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀸𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 ¶ 𑀲𑀮𑁆𑀮𑀧𑀸𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀫𑀺. 𑀲𑀼𑀢𑀁 𑀔𑁄 𑀧𑀦 𑀫𑁂𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀼𑀤𑁆𑀥𑀸𑀦𑀁 ¶ 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 𑁋 ‘𑀬𑁄 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑀢𑀺, 𑀓𑀭𑀼𑀡𑀁 𑀛𑀸𑀦𑀁 𑀛𑀸𑀬𑀢𑀺, 𑀲𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺, 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺, 𑀩𑁆𑀭𑀳𑁆𑀫𑀼𑀦𑀸 𑀲𑀮𑁆𑀮𑀧𑀢𑀺, 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀢𑀻’𑀢𑀺. 𑀢𑁂𑀦 𑀳𑀺, 𑀪𑁄, 𑀬𑀣𑀸𑀲𑀼𑀢𑁂 𑀬𑀣𑀸𑀧𑀭𑀺𑀬𑀢𑁆𑀢𑁂 𑀫𑀦𑁆𑀢𑁂 𑀯𑀺𑀢𑁆𑀣𑀸𑀭𑁂𑀦 𑀲𑀚𑁆𑀛𑀸𑀬𑀁 𑀓𑀭𑁄𑀣, 𑀅𑀜𑁆𑀜𑀫𑀜𑁆𑀜𑀜𑁆𑀘 𑀫𑀦𑁆𑀢𑁂 𑀯𑀸𑀘𑁂𑀣; 𑀇𑀘𑁆𑀙𑀸𑀫𑀳𑀁, 𑀪𑁄, 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀁, 𑀓𑀭𑀼𑀡𑀁 𑀛𑀸𑀦𑀁 𑀛𑀸𑀬𑀺𑀢𑀼𑀁; 𑀦𑀫𑁆𑀳𑀺 𑀓𑁂𑀦𑀘𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀏𑀓𑁂𑀦 𑀪𑀢𑁆𑀢𑀸𑀪𑀺𑀳𑀸𑀭𑁂𑀦𑀸’’𑀢𑀺. ‘‘𑀬𑀲𑁆𑀲 𑀤𑀸𑀦𑀺 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺.

𑁩𑁧𑁬. ‘‘𑀅𑀣 ¶ 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀘𑀢𑁆𑀢𑀸𑀭𑀻𑀲𑀸 𑀪𑀭𑀺𑀬𑀸 𑀲𑀸𑀤𑀺𑀲𑀺𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘𑀢𑁆𑀢𑀸𑀭𑀻𑀲𑀸 𑀪𑀭𑀺𑀬𑀸 𑀲𑀸𑀤𑀺𑀲𑀺𑀬𑁄 𑀏𑀢𑀤𑀯𑁄𑀘 𑁋 ‘‘𑀫𑀬𑁆𑀳𑀁 𑀔𑁄, 𑀪𑁄𑀢𑀻, 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺, 𑀲𑀓𑁆𑀔𑀺 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺 𑀲𑀮𑁆𑀮𑀧𑀢𑀺 𑀫𑀦𑁆𑀢𑁂𑀢𑀻’𑀢𑀺. 𑀦 𑀔𑁄 𑀧𑀦𑀸𑀳𑀁, 𑀪𑁄𑀢𑀻, 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀸𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀲𑀮𑁆𑀮𑀧𑀸𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀫𑀺. 𑀲𑀼𑀢𑀁 𑀔𑁄 𑀧𑀦 𑀫𑁂𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀼𑀤𑁆𑀥𑀸𑀦𑀁 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 ‘𑀬𑁄 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑀢𑀺, 𑀓𑀭𑀼𑀡𑀁 𑀛𑀸𑀦𑀁 𑀛𑀸𑀬𑀢𑀺, 𑀲𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺, 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺, 𑀩𑁆𑀭𑀳𑁆𑀫𑀼𑀦𑀸 𑀲𑀮𑁆𑀮𑀧𑀢𑀺, 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀢𑀻𑀢𑀺, 𑀇𑀘𑁆𑀙𑀸𑀫𑀳𑀁, 𑀪𑁄𑀢𑀻, 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀁, 𑀓𑀭𑀼𑀡𑀁 𑀛𑀸𑀦𑀁 𑀛𑀸𑀬𑀺𑀢𑀼𑀁; 𑀦𑀫𑁆𑀳𑀺 𑀓𑁂𑀦𑀘𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀏𑀓𑁂𑀦 𑀪𑀢𑁆𑀢𑀸𑀪𑀺𑀳𑀸𑀭𑁂𑀦𑀸’’𑀢𑀺. ‘‘𑀬𑀲𑁆𑀲 𑀤𑀸𑀦𑀺 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀓𑀸𑀮𑀁 ¶ 𑀫𑀜𑁆𑀜𑀢𑀻’’’𑀢𑀺.

𑁩𑁧𑁭. ‘‘𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀧𑀼𑀭𑀢𑁆𑀣𑀺𑀫𑁂𑀦 𑀦𑀕𑀭𑀲𑁆𑀲 𑀦𑀯𑀁 𑀲𑀦𑁆𑀥𑀸𑀕𑀸𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑀺, 𑀓𑀭𑀼𑀡𑀁 ¶ 𑀛𑀸𑀦𑀁 𑀛𑀸𑀬𑀺; 𑀦𑀸𑀲𑁆𑀲𑀼𑀥 𑀓𑁄𑀘𑀺 𑀉𑀧𑀲𑀗𑁆𑀓𑀫𑀢𑀺 [𑀉𑀧𑀲𑀗𑁆𑀓𑀫𑀺 (𑀧𑀻.)] 𑀅𑀜𑁆𑀜𑀢𑁆𑀭 𑀏𑀓𑁂𑀦 𑀪𑀢𑁆𑀢𑀸𑀪𑀺𑀳𑀸𑀭𑁂𑀦. 𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑀢𑀼𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀅𑀳𑀼𑀤𑁂𑀯 𑀉𑀓𑁆𑀓𑀡𑁆𑀞𑀦𑀸 𑀅𑀳𑀼 𑀧𑀭𑀺𑀢𑀲𑁆𑀲𑀦𑀸 𑁋 ‘‘𑀲𑀼𑀢𑀁 𑀔𑁄 𑀧𑀦 𑀫𑁂𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀼𑀤𑁆𑀥𑀸𑀦𑀁 𑀫𑀳𑀮𑁆𑀮𑀓𑀸𑀦𑀁 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 𑁋 ‘𑀬𑁄 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀝𑀺𑀲𑀮𑁆𑀮𑀻𑀬𑀢𑀺, 𑀓𑀭𑀼𑀡𑀁 𑀛𑀸𑀦𑀁 𑀛𑀸𑀬𑀢𑀺, 𑀲𑁄 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀢𑀺, 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀢𑀺 𑀩𑁆𑀭𑀳𑁆𑀫𑀼𑀦𑀸 𑀲𑀮𑁆𑀮𑀧𑀢𑀺 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀢𑀻’𑀢𑀺. 𑀦 𑀔𑁄 𑀧𑀦𑀸𑀳𑀁 𑀩𑁆𑀭𑀳𑁆𑀫𑀸𑀦𑀁 𑀧𑀲𑁆𑀲𑀸𑀫𑀺, 𑀦 𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑁂𑀫𑀺 𑀦 𑀩𑁆𑀭𑀳𑁆𑀫𑀼𑀦𑀸 𑀲𑀮𑁆𑀮𑀧𑀸𑀫𑀺 𑀦 𑀩𑁆𑀭𑀳𑁆𑀫𑀼𑀦𑀸 𑀫𑀦𑁆𑀢𑁂𑀫𑀻’’’𑀢𑀺.

𑀩𑁆𑀭𑀳𑁆𑀫𑀼𑀦𑀸 𑀲𑀸𑀓𑀘𑁆𑀙𑀸

𑁩𑁧𑁮. ‘‘𑀅𑀣 ¶ 𑀔𑁄, 𑀪𑁄, 𑀩𑁆𑀭𑀳𑁆𑀫𑀸 𑀲𑀦𑀗𑁆𑀓𑀼𑀫𑀸𑀭𑁄 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 ¶ 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬, 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬, 𑀏𑀯𑀫𑁂𑀯, 𑀩𑁆𑀭𑀳𑁆𑀫𑀮𑁄𑀓𑁂 𑀅𑀦𑁆𑀢𑀭𑀳𑀺𑀢𑁄 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀫𑁆𑀫𑀼𑀔𑁂 𑀧𑀸𑀢𑀼𑀭𑀳𑁄𑀲𑀺. 𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀳𑀼𑀤𑁂𑀯 𑀪𑀬𑀁 𑀅𑀳𑀼 𑀙𑀫𑁆𑀪𑀺𑀢𑀢𑁆𑀢𑀁 𑀅𑀳𑀼 𑀮𑁄𑀫𑀳𑀁𑀲𑁄 𑀬𑀣𑀸 𑀢𑀁 𑀅𑀤𑀺𑀝𑁆𑀞𑀧𑀼𑀩𑁆𑀩𑀁 𑀭𑀽𑀧𑀁 𑀤𑀺𑀲𑁆𑀯𑀸. 𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀪𑀻𑀢𑁄 𑀲𑀁𑀯𑀺𑀕𑁆𑀕𑁄 𑀮𑁄𑀫𑀳𑀝𑁆𑀞𑀚𑀸𑀢𑁄 𑀩𑁆𑀭𑀳𑁆𑀫𑀸𑀦𑀁 𑀲𑀦𑀗𑁆𑀓𑀼𑀫𑀸𑀭𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘‘𑀯𑀡𑁆𑀡𑀯𑀸 ¶ 𑀬𑀲𑀯𑀸 𑀲𑀺𑀭𑀺𑀫𑀸, 𑀓𑁄 𑀦𑀼 𑀢𑁆𑀯𑀫𑀲𑀺 𑀫𑀸𑀭𑀺𑀲;

𑀅𑀚𑀸𑀦𑀦𑁆𑀢𑀸 𑀢𑀁 𑀧𑀼𑀘𑁆𑀙𑀸𑀫, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬’’𑀦𑁆𑀢𑀺.

‘‘𑀫𑀁 𑀯𑁂 𑀓𑀼𑀫𑀸𑀭𑀁 𑀚𑀸𑀦𑀦𑁆𑀢𑀺, 𑀩𑁆𑀭𑀳𑁆𑀫𑀮𑁄𑀓𑁂 𑀲𑀦𑀦𑁆𑀢𑀦𑀁 [𑀲𑀦𑀦𑁆𑀢𑀺𑀘 (𑀓.)];

𑀲𑀩𑁆𑀩𑁂 𑀚𑀸𑀦𑀦𑁆𑀢𑀺 𑀫𑀁 𑀤𑁂𑀯𑀸, 𑀏𑀯𑀁 𑀕𑁄𑀯𑀺𑀦𑁆𑀤 𑀚𑀸𑀦𑀳𑀺’’.

‘‘‘𑀆𑀲𑀦𑀁 𑀉𑀤𑀓𑀁 𑀧𑀚𑁆𑀚𑀁, 𑀫𑀥𑀼𑀲𑀸𑀓𑀜𑁆𑀘 [𑀫𑀥𑀼𑀧𑀸𑀓𑀜𑁆𑀘 (𑀲𑀻. 𑀲𑁆𑀬𑀸. 𑀧𑀻.)] 𑀩𑁆𑀭𑀳𑁆𑀫𑀼𑀦𑁄;

𑀅𑀕𑁆𑀖𑁂 𑀪𑀯𑀦𑁆𑀢𑀁 𑀧𑀼𑀘𑁆𑀙𑀸𑀫, 𑀅𑀕𑁆𑀖𑀁 𑀓𑀼𑀭𑀼𑀢𑀼 𑀦𑁄 𑀪𑀯𑀁’’.

‘‘𑀧𑀝𑀺𑀕𑁆𑀕𑀡𑁆𑀳𑀸𑀫 𑀢𑁂 𑀅𑀕𑁆𑀖𑀁, 𑀬𑀁 𑀢𑁆𑀯𑀁 𑀕𑁄𑀯𑀺𑀦𑁆𑀤 𑀪𑀸𑀲𑀲𑀺;

𑀤𑀺𑀝𑁆𑀞𑀥𑀫𑁆𑀫𑀳𑀺𑀢𑀢𑁆𑀣𑀸𑀬, 𑀲𑀫𑁆𑀧𑀭𑀸𑀬 𑀲𑀼𑀔𑀸𑀬 𑀘;

𑀓𑀢𑀸𑀯𑀓𑀸𑀲𑁄 𑀧𑀼𑀘𑁆𑀙𑀲𑁆𑀲𑀼, 𑀬𑀁 𑀓𑀺𑀜𑁆𑀘𑀺 𑀅𑀪𑀺𑀧𑀢𑁆𑀣𑀺𑀢’’𑀦𑁆𑀢𑀺.

𑁩𑁧𑁯. ‘‘𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀓𑀢𑀸𑀯𑀓𑀸𑀲𑁄 𑀔𑁄𑀫𑁆𑀳𑀺 𑀩𑁆𑀭𑀳𑁆𑀫𑀼𑀦𑀸 𑀲𑀦𑀗𑁆𑀓𑀼𑀫𑀸𑀭𑁂𑀦. 𑀓𑀺𑀁 𑀦𑀼 𑀔𑁄 𑀅𑀳𑀁 𑀩𑁆𑀭𑀳𑁆𑀫𑀸𑀦𑀁 𑀲𑀦𑀗𑁆𑀓𑀼𑀫𑀸𑀭𑀁 ¶ 𑀧𑀼𑀘𑁆𑀙𑁂𑀬𑁆𑀬𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀯𑀸 𑀅𑀢𑁆𑀣𑀁 𑀲𑀫𑁆𑀧𑀭𑀸𑀬𑀺𑀓𑀁 𑀯𑀸’𑀢𑀺? 𑀅𑀣 ¶ 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀓𑀼𑀲𑀮𑁄 𑀔𑁄 𑀅𑀳𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀅𑀢𑁆𑀣𑀸𑀦𑀁, 𑀅𑀜𑁆𑀜𑁂𑀧𑀺 𑀫𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀅𑀢𑁆𑀣𑀁 𑀧𑀼𑀘𑁆𑀙𑀦𑁆𑀢𑀺. 𑀬𑀁𑀦𑀽𑀦𑀸𑀳𑀁 𑀩𑁆𑀭𑀳𑁆𑀫𑀸𑀦𑀁 𑀲𑀦𑀗𑁆𑀓𑀼𑀫𑀸𑀭𑀁 𑀲𑀫𑁆𑀧𑀭𑀸𑀬𑀺𑀓𑀜𑁆𑀜𑁂𑀯 𑀅𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬’𑀦𑁆𑀢𑀺. 𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀳𑁆𑀫𑀸𑀦𑀁 𑀲𑀦𑀗𑁆𑀓𑀼𑀫𑀸𑀭𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀧𑀼𑀘𑁆𑀙𑀸𑀫𑀺 ¶ 𑀩𑁆𑀭𑀳𑁆𑀫𑀸𑀦𑀁 𑀲𑀦𑀗𑁆𑀓𑀼𑀫𑀸𑀭𑀁,

𑀓𑀗𑁆𑀔𑀻 𑀅𑀓𑀗𑁆𑀔𑀺𑀁 𑀧𑀭𑀯𑁂𑀤𑀺𑀬𑁂𑀲𑀼;

𑀓𑀢𑁆𑀣𑀝𑁆𑀞𑀺𑀢𑁄 𑀓𑀺𑀫𑁆𑀳𑀺 𑀘 𑀲𑀺𑀓𑁆𑀔𑀫𑀸𑀦𑁄,

𑀧𑀧𑁆𑀧𑁄𑀢𑀺 ¶ 𑀫𑀘𑁆𑀘𑁄 𑀅𑀫𑀢𑀁 𑀩𑁆𑀭𑀳𑁆𑀫𑀮𑁄𑀓’’𑀦𑁆𑀢𑀺.

‘‘𑀳𑀺𑀢𑁆𑀯𑀸 𑀫𑀫𑀢𑁆𑀢𑀁 𑀫𑀦𑀼𑀚𑁂𑀲𑀼 𑀩𑁆𑀭𑀳𑁆𑀫𑁂,

𑀏𑀓𑁄𑀤𑀺𑀪𑀽𑀢𑁄 𑀓𑀭𑀼𑀡𑁂𑀥𑀺𑀫𑀼𑀢𑁆𑀢𑁄 [𑀓𑀭𑀼𑀡𑀸𑀥𑀺𑀫𑀼𑀢𑁆𑀢𑁄 (𑀲𑀻. 𑀲𑁆𑀬𑀸. 𑀧𑀻.)];

𑀦𑀺𑀭𑀸𑀫𑀕𑀦𑁆𑀥𑁄 𑀯𑀺𑀭𑀢𑁄 𑀫𑁂𑀣𑀼𑀦𑀲𑁆𑀫𑀸,

𑀏𑀢𑁆𑀣𑀝𑁆𑀞𑀺𑀢𑁄 𑀏𑀢𑁆𑀣 𑀘 𑀲𑀺𑀓𑁆𑀔𑀫𑀸𑀦𑁄;

𑀧𑀧𑁆𑀧𑁄𑀢𑀺 𑀫𑀘𑁆𑀘𑁄 𑀅𑀫𑀢𑀁 𑀩𑁆𑀭𑀳𑁆𑀫𑀮𑁄𑀓’’𑀦𑁆𑀢𑀺.

𑁩𑁨𑁦. ‘‘𑀳𑀺𑀢𑁆𑀯𑀸 𑀫𑀫𑀢𑁆𑀢’𑀦𑁆𑀢𑀺 𑀅𑀳𑀁 𑀪𑁄𑀢𑁄 𑀆𑀚𑀸𑀦𑀸𑀫𑀺. 𑀇𑀥𑁂𑀓𑀘𑁆𑀘𑁄 𑀅𑀧𑁆𑀧𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀫𑀳𑀦𑁆𑀢𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀅𑀧𑁆𑀧𑀁 𑀯𑀸 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀫𑀳𑀦𑁆𑀢𑀁 𑀯𑀸 𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺, ‘𑀇𑀢𑀺 𑀳𑀺𑀢𑁆𑀯𑀸 𑀫𑀫𑀢𑁆𑀢’𑀦𑁆𑀢𑀺 𑀅𑀳𑀁 𑀪𑁄𑀢𑁄 𑀆𑀚𑀸𑀦𑀸𑀫𑀺. ‘𑀏𑀓𑁄𑀤𑀺𑀪𑀽𑀢𑁄’𑀢𑀺 ¶ 𑀅𑀳𑀁 𑀪𑁄𑀢𑁄 𑀆𑀚𑀸𑀦𑀸𑀫𑀺. 𑀇𑀥𑁂𑀓𑀘𑁆𑀘𑁄 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀺 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀁 𑀧𑀩𑁆𑀩𑀢𑀁 𑀓𑀦𑁆𑀤𑀭𑀁 𑀕𑀺𑀭𑀺𑀕𑀼𑀳𑀁 𑀲𑀼𑀲𑀸𑀦𑀁 𑀯𑀦𑀧𑀢𑁆𑀣𑀁 𑀅𑀩𑁆𑀪𑁄𑀓𑀸𑀲𑀁 𑀧𑀮𑀸𑀮𑀧𑀼𑀜𑁆𑀚𑀁, 𑀇𑀢𑀺 𑀏𑀓𑁄𑀤𑀺𑀪𑀽𑀢𑁄’𑀢𑀺 𑀅𑀳𑀁 𑀪𑁄𑀢𑁄 𑀆𑀚𑀸𑀦𑀸𑀫𑀺. ‘𑀓𑀭𑀼𑀡𑁂𑀥𑀺𑀫𑀼𑀢𑁆𑀢𑁄’𑀢𑀺 𑀅𑀳𑀁 𑀪𑁄𑀢𑁄 𑀆𑀚𑀸𑀦𑀸𑀫𑀺. 𑀇𑀥𑁂𑀓𑀘𑁆𑀘𑁄 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 ¶ 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀇𑀢𑀺 ‘𑀓𑀭𑀼𑀡𑁂𑀥𑀺𑀫𑀼𑀢𑁆𑀢𑁄’𑀢𑀺 𑀅𑀳𑀁 𑀪𑁄𑀢𑁄 𑀆𑀚𑀸𑀦𑀸𑀫𑀺. 𑀆𑀫𑀕𑀦𑁆𑀥𑁂 𑀘 𑀔𑁄 𑀅𑀳𑀁 𑀪𑁄𑀢𑁄 𑀪𑀸𑀲𑀫𑀸𑀦𑀲𑁆𑀲 𑀦 𑀆𑀚𑀸𑀦𑀸𑀫𑀺.

‘‘𑀓𑁂 ¶ 𑀆𑀫𑀕𑀦𑁆𑀥𑀸 𑀫𑀦𑀼𑀚𑁂𑀲𑀼 𑀩𑁆𑀭𑀳𑁆𑀫𑁂,

𑀏𑀢𑁂 𑀅𑀯𑀺𑀤𑁆𑀯𑀸 𑀇𑀥 𑀩𑁆𑀭𑀽𑀳𑀺 𑀥𑀻𑀭;

𑀓𑁂𑀦𑀸𑀯𑀝𑀸 [𑀓𑁂𑀦𑀸𑀯𑀼𑀝𑀸 (𑀲𑁆𑀬𑀸.)] 𑀯𑀸𑀢𑀺 𑀧𑀚𑀸 𑀓𑀼𑀭𑀼𑀢𑀼 [𑀓𑀼𑀭𑀼𑀭𑀽 (𑀲𑁆𑀬𑀸.), 𑀓𑀼𑀭𑀼𑀝𑁆𑀞𑀭𑀽 (𑀧𑀻.), 𑀓𑀼𑀭𑀽𑀭𑀼 (?)],

𑀆𑀧𑀸𑀬𑀺𑀓𑀸 𑀦𑀺𑀯𑀼𑀢𑀩𑁆𑀭𑀳𑁆𑀫𑀮𑁄𑀓𑀸’’𑀢𑀺.

‘‘𑀓𑁄𑀥𑁄 ¶ 𑀫𑁄𑀲𑀯𑀚𑁆𑀚𑀁 𑀦𑀺𑀓𑀢𑀺 𑀘 𑀤𑀼𑀩𑁆𑀪𑁄,

𑀓𑀤𑀭𑀺𑀬𑀢𑀸 𑀅𑀢𑀺𑀫𑀸𑀦𑁄 𑀉𑀲𑀽𑀬𑀸;

𑀇𑀘𑁆𑀙𑀸 ¶ 𑀯𑀺𑀯𑀺𑀘𑁆𑀙𑀸 𑀧𑀭𑀳𑁂𑀞𑀦𑀸 𑀘,

𑀮𑁄𑀪𑁄 𑀘 𑀤𑁄𑀲𑁄 𑀘 𑀫𑀤𑁄 𑀘 𑀫𑁄𑀳𑁄;

𑀏𑀢𑁂𑀲𑀼 𑀬𑀼𑀢𑁆𑀢𑀸 𑀅𑀦𑀺𑀭𑀸𑀫𑀕𑀦𑁆𑀥𑀸,

𑀆𑀧𑀸𑀬𑀺𑀓𑀸 𑀦𑀺𑀯𑀼𑀢𑀩𑁆𑀭𑀳𑁆𑀫𑀮𑁄𑀓𑀸’’𑀢𑀺.

‘‘𑀬𑀣𑀸 𑀔𑁄 𑀅𑀳𑀁 𑀪𑁄𑀢𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲 𑀆𑀚𑀸𑀦𑀸𑀫𑀺. 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸. 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬’’𑀦𑁆𑀢𑀺. ‘‘𑀬𑀲𑁆𑀲𑀤𑀸𑀦𑀺 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺.

𑀭𑁂𑀡𑀼𑀭𑀸𑀚𑀆𑀫𑀦𑁆𑀢𑀦𑀸

𑁩𑁨𑁧. ‘‘𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀭𑁂𑀡𑀼 𑀭𑀸𑀚𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑁂𑀡𑀼𑀁 𑀭𑀸𑀚𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀅𑀜𑁆𑀜𑀁 𑀤𑀸𑀦𑀺 𑀪𑀯𑀁 𑀧𑀼𑀭𑁄𑀳𑀺𑀢𑀁 𑀧𑀭𑀺𑀬𑁂𑀲𑀢𑀼, 𑀬𑁄 𑀪𑁄𑀢𑁄 𑀭𑀚𑁆𑀚𑀁 𑀅𑀦𑀼𑀲𑀸𑀲𑀺𑀲𑁆𑀲𑀢𑀺. 𑀇𑀘𑁆𑀙𑀸𑀫𑀳𑀁, 𑀪𑁄 ¶ , 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀼𑀁. 𑀬𑀣𑀸 𑀔𑁄 𑀧𑀦 𑀫𑁂 𑀲𑀼𑀢𑀁 𑀩𑁆𑀭𑀳𑁆𑀫𑀼𑀦𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲, 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸. 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬’’𑀦𑁆𑀢𑀺.

‘‘𑀆𑀫𑀦𑁆𑀢𑀬𑀸𑀫𑀺 𑀭𑀸𑀚𑀸𑀦𑀁, 𑀭𑁂𑀡𑀼𑀁 𑀪𑀽𑀫𑀺𑀧𑀢𑀺𑀁 𑀅𑀳𑀁;

𑀢𑁆𑀯𑀁 𑀧𑀚𑀸𑀦𑀲𑁆𑀲𑀼 𑀭𑀚𑁆𑀚𑁂𑀦, 𑀦𑀸𑀳𑀁 𑀧𑁄𑀭𑁄𑀳𑀺𑀘𑁆𑀘𑁂 𑀭𑀫𑁂’’.

‘‘𑀲𑀘𑁂 𑀢𑁂 𑀊𑀦𑀁 𑀓𑀸𑀫𑁂𑀳𑀺, 𑀅𑀳𑀁 𑀧𑀭𑀺𑀧𑀽𑀭𑀬𑀸𑀫𑀺 𑀢𑁂;

𑀬𑁄 𑀢𑀁 𑀳𑀺𑀁𑀲𑀢𑀺 𑀯𑀸𑀭𑁂𑀫𑀺, 𑀪𑀽𑀫𑀺𑀲𑁂𑀦𑀸𑀧𑀢𑀺 𑀅𑀳𑀁;

𑀢𑀼𑀯𑀁 𑀧𑀺𑀢𑀸 𑀅𑀳𑀁 𑀧𑀼𑀢𑁆𑀢𑁄, 𑀫𑀸 𑀦𑁄 𑀕𑁄𑀯𑀺𑀦𑁆𑀤 𑀧𑀸𑀚𑀳𑀺’’ [𑀧𑀸𑀚𑁂𑀳𑀺 (𑀅𑀝𑁆𑀞𑀓𑀣𑀸𑀬𑀁 𑀲𑀁𑀯𑀡𑁆𑀡𑀺𑀢𑀧𑀸𑀞𑀦𑁆𑀢𑀭𑀁)].

‘‘𑀦𑀫𑀢𑁆𑀣𑀺 𑀊𑀦𑀁 𑀓𑀸𑀫𑁂𑀳𑀺, 𑀳𑀺𑀁𑀲𑀺𑀢𑀸 𑀫𑁂 𑀦 𑀯𑀺𑀚𑁆𑀚𑀢𑀺;

𑀅𑀫𑀦𑀼𑀲𑁆𑀲𑀯𑀘𑁄 𑀲𑀼𑀢𑁆𑀯𑀸, 𑀢𑀲𑁆𑀫𑀸𑀳𑀁 𑀦 𑀕𑀳𑁂 𑀭𑀫𑁂’’.

‘‘𑀅𑀫𑀦𑀼𑀲𑁆𑀲𑁄 ¶ ¶ 𑀓𑀣𑀁𑀯𑀡𑁆𑀡𑁄, 𑀓𑀺𑀁 𑀢𑁂 𑀅𑀢𑁆𑀣𑀁 𑀅𑀪𑀸𑀲𑀣;

𑀬𑀜𑁆𑀘 𑀲𑀼𑀢𑁆𑀯𑀸 𑀚𑀳𑀸𑀲𑀺 𑀦𑁄, 𑀕𑁂𑀳𑁂 𑀅𑀫𑁆𑀳𑁂 𑀘 𑀓𑁂𑀯𑀮𑀻’’.

‘‘𑀉𑀧𑀯𑀼𑀢𑁆𑀣𑀲𑁆𑀲 ¶ 𑀫𑁂 𑀧𑀼𑀩𑁆𑀩𑁂, 𑀬𑀺𑀝𑁆𑀞𑀼𑀓𑀸𑀫𑀲𑁆𑀲 𑀫𑁂 𑀲𑀢𑁄;

𑀅𑀕𑁆𑀕𑀺 𑀧𑀚𑁆𑀚𑀮𑀺𑀢𑁄 𑀆𑀲𑀺, 𑀓𑀼𑀲𑀧𑀢𑁆𑀢𑀧𑀭𑀺𑀢𑁆𑀣𑀢𑁄’’.

‘‘𑀢𑀢𑁄 𑀫𑁂 𑀩𑁆𑀭𑀳𑁆𑀫𑀸 𑀧𑀸𑀢𑀼𑀭𑀳𑀼, 𑀩𑁆𑀭𑀳𑁆𑀫𑀮𑁄𑀓𑀸 𑀲𑀦𑀦𑁆𑀢𑀦𑁄;

𑀲𑁄 𑀫𑁂 𑀧𑀜𑁆𑀳𑀁 𑀯𑀺𑀬𑀸𑀓𑀸𑀲𑀺, 𑀢𑀁 𑀲𑀼𑀢𑁆𑀯𑀸 𑀦 𑀕𑀳𑁂 𑀭𑀫𑁂’’.

‘‘𑀲𑀤𑁆𑀤𑀳𑀸𑀫𑀺 𑀅𑀳𑀁 𑀪𑁄𑀢𑁄, 𑀬𑀁 𑀢𑁆𑀯𑀁 𑀕𑁄𑀯𑀺𑀦𑁆𑀤 𑀪𑀸𑀲𑀲𑀺;

𑀅𑀫𑀦𑀼𑀲𑁆𑀲𑀯𑀘𑁄 𑀲𑀼𑀢𑁆𑀯𑀸, 𑀓𑀣𑀁 𑀯𑀢𑁆𑀢𑁂𑀣 𑀅𑀜𑁆𑀜𑀣𑀸.

‘‘𑀢𑁂 𑀢𑀁 𑀅𑀦𑀼𑀯𑀢𑁆𑀢𑀺𑀲𑁆𑀲𑀸𑀫, 𑀲𑀢𑁆𑀣𑀸 𑀕𑁄𑀯𑀺𑀦𑁆𑀤 𑀦𑁄 𑀪𑀯𑀁;

𑀫𑀡𑀺 ¶ 𑀬𑀣𑀸 𑀯𑁂𑀴𑀼𑀭𑀺𑀬𑁄, 𑀅𑀓𑀸𑀘𑁄 𑀯𑀺𑀫𑀮𑁄 𑀲𑀼𑀪𑁄;

𑀏𑀯𑀁 𑀲𑀼𑀤𑁆𑀥𑀸 𑀘𑀭𑀺𑀲𑁆𑀲𑀸𑀫, 𑀕𑁄𑀯𑀺𑀦𑁆𑀤𑀲𑁆𑀲𑀸𑀦𑀼𑀲𑀸𑀲𑀦𑁂’’𑀢𑀺.

‘‘‘𑀲𑀘𑁂 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀫𑀬𑀫𑁆𑀧𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫. 𑀅𑀣 𑀬𑀸 𑀢𑁂 𑀕𑀢𑀺, 𑀲𑀸 𑀦𑁄 𑀕𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺.

𑀙 𑀔𑀢𑁆𑀢𑀺𑀬𑀆𑀫𑀦𑁆𑀢𑀦𑀸

𑁩𑁨𑁨. ‘‘𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀢𑁂 𑀙 𑀔𑀢𑁆𑀢𑀺𑀬𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀙 𑀔𑀢𑁆𑀢𑀺𑀬𑁂 𑀏𑀢𑀤𑀯𑁄𑀘 𑁋 ‘‘𑀅𑀜𑁆𑀜𑀁 𑀤𑀸𑀦𑀺 𑀪𑀯𑀦𑁆𑀢𑁄 𑀧𑀼𑀭𑁄𑀳𑀺𑀢𑀁 𑀧𑀭𑀺𑀬𑁂𑀲𑀦𑁆𑀢𑀼, 𑀬𑁄 𑀪𑀯𑀦𑁆𑀢𑀸𑀦𑀁 𑀭𑀚𑁆𑀚𑁂 𑀅𑀦𑀼𑀲𑀸𑀲𑀺𑀲𑁆𑀲𑀢𑀺. 𑀇𑀘𑁆𑀙𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀼𑀁. 𑀬𑀣𑀸 𑀔𑁄 𑀧𑀦 𑀫𑁂 𑀲𑀼𑀢𑀁 𑀩𑁆𑀭𑀳𑁆𑀫𑀼𑀦𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲, 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸. 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬’’𑀦𑁆𑀢𑀺. 𑀅𑀣 𑀔𑁄, 𑀪𑁄, 𑀢𑁂 𑀙 𑀔𑀢𑁆𑀢𑀺𑀬𑀸 𑀏𑀓𑀫𑀦𑁆𑀢𑀁 𑀅𑀧𑀓𑁆𑀓𑀫𑁆𑀫 𑀏𑀯𑀁 ¶ 𑀲𑀫𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀇𑀫𑁂 𑀔𑁄 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀥𑀦𑀮𑀼𑀤𑁆𑀥𑀸; 𑀬𑀁𑀦𑀽𑀦 𑀫𑀬𑀁 𑀫𑀳𑀸𑀕𑁄𑀯𑀺𑀦𑁆𑀤𑀁 𑀩𑁆𑀭𑀸𑀳𑁆𑀫𑀡𑀁 𑀥𑀦𑁂𑀦 𑀲𑀺𑀓𑁆𑀔𑁂𑀬𑁆𑀬𑀸𑀫𑀸’’𑀢𑀺. 𑀢𑁂 𑀫𑀳𑀸𑀕𑁄𑀯𑀺𑀦𑁆𑀤𑀁 𑀩𑁆𑀭𑀸𑀳𑁆𑀫𑀡𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀲𑀁𑀯𑀺𑀚𑁆𑀚𑀢𑀺 𑀔𑁄, 𑀪𑁄, 𑀇𑀫𑁂𑀲𑀼 𑀲𑀢𑁆𑀢𑀲𑀼 𑀭𑀚𑁆𑀚𑁂𑀲𑀼 𑀧𑀳𑀽𑀢𑀁 𑀲𑀸𑀧𑀢𑁂𑀬𑁆𑀬𑀁, 𑀢𑀢𑁄 𑀪𑁄𑀢𑁄 𑀬𑀸𑀯𑀢𑀓𑁂𑀦 𑀅𑀢𑁆𑀣𑁄, 𑀢𑀸𑀯𑀢𑀓𑀁 𑀆𑀳𑀭𑀻𑀬𑀢’’𑀦𑁆𑀢𑀺. ‘‘𑀅𑀮𑀁, 𑀪𑁄, 𑀫𑀫𑀧𑀺𑀤𑀁 𑀧𑀳𑀽𑀢𑀁 𑀲𑀸𑀧𑀢𑁂𑀬𑁆𑀬𑀁 𑀪𑀯𑀦𑁆𑀢𑀸𑀦𑀁𑀬𑁂𑀯 𑀯𑀸𑀳𑀲𑀸. 𑀢𑀫𑀳𑀁 𑀲𑀩𑁆𑀩𑀁 𑀧𑀳𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺. 𑀬𑀣𑀸 𑀔𑁄 𑀧𑀦 𑀫𑁂 𑀲𑀼𑀢𑀁 𑀩𑁆𑀭𑀳𑁆𑀫𑀼𑀦𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲, 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 ¶ 𑀅𑀚𑁆𑀛𑀸𑀯𑀲𑀢𑀸, 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬’’𑀦𑁆𑀢𑀺. 𑀅𑀣 𑀔𑁄, 𑀪𑁄, 𑀢𑁂 𑀙 𑀔𑀢𑁆𑀢𑀺𑀬𑀸 𑀏𑀓𑀫𑀦𑁆𑀢𑀁 𑀅𑀧𑀓𑁆𑀓𑀫𑁆𑀫 𑀏𑀯𑀁 𑀲𑀫𑀘𑀺𑀦𑁆𑀢𑁂𑀲𑀼𑀁 ¶ 𑁋 ‘‘𑀇𑀫𑁂 ¶ 𑀔𑁄 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀇𑀢𑁆𑀣𑀺𑀮𑀼𑀤𑁆𑀥𑀸; 𑀬𑀁𑀦𑀽𑀦 𑀫𑀬𑀁 𑀫𑀳𑀸𑀕𑁄𑀯𑀺𑀦𑁆𑀤𑀁 𑀩𑁆𑀭𑀸𑀳𑁆𑀫𑀡𑀁 𑀇𑀢𑁆𑀣𑀻𑀳𑀺 𑀲𑀺𑀓𑁆𑀔𑁂𑀬𑁆𑀬𑀸𑀫𑀸’’𑀢𑀺. 𑀢𑁂 𑀫𑀳𑀸𑀕𑁄𑀯𑀺𑀦𑁆𑀤𑀁 𑀩𑁆𑀭𑀸𑀳𑁆𑀫𑀡𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀲𑀁𑀯𑀺𑀚𑁆𑀚𑀦𑁆𑀢𑀺 𑀔𑁄, 𑀪𑁄, 𑀇𑀫𑁂𑀲𑀼 𑀲𑀢𑁆𑀢𑀲𑀼 𑀭𑀚𑁆𑀚𑁂𑀲𑀼 𑀧𑀳𑀽𑀢𑀸 𑀇𑀢𑁆𑀣𑀺𑀬𑁄, 𑀢𑀢𑁄 𑀪𑁄𑀢𑁄 𑀬𑀸𑀯𑀢𑀺𑀓𑀸𑀳𑀺 𑀅𑀢𑁆𑀣𑁄, 𑀢𑀸𑀯𑀢𑀺𑀓𑀸 𑀆𑀦𑀻𑀬𑀢’’𑀦𑁆𑀢𑀺. ‘‘𑀅𑀮𑀁, 𑀪𑁄, 𑀫𑀫𑀧𑀺𑀫𑀸 [𑀫𑀫𑀧𑀺𑀢𑀸 (𑀓.), 𑀫𑀫𑀧𑀺 (𑀲𑀻.)] 𑀘𑀢𑁆𑀢𑀸𑀭𑀻𑀲𑀸 𑀪𑀭𑀺𑀬𑀸 𑀲𑀸𑀤𑀺𑀲𑀺𑀬𑁄. 𑀢𑀸𑀧𑀸𑀳𑀁 𑀲𑀩𑁆𑀩𑀸 𑀧𑀳𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺. 𑀬𑀣𑀸 𑀔𑁄 𑀧𑀦 𑀫𑁂 𑀲𑀼𑀢𑀁 𑀩𑁆𑀭𑀳𑁆𑀫𑀼𑀦𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲, 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸, 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀦𑁆𑀢𑀺’’.

𑁩𑁨𑁩. ‘‘𑀲𑀘𑁂 ¶ 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀫𑀬𑀫𑁆𑀧𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀅𑀣 𑀬𑀸 𑀢𑁂 𑀕𑀢𑀺, 𑀲𑀸 𑀦𑁄 𑀕𑀢𑀺 𑀪𑀯𑀺𑀲𑁆𑀲𑀢𑀻𑀢𑀺.

‘‘𑀲𑀘𑁂 𑀚𑀳𑀣 𑀓𑀸𑀫𑀸𑀦𑀺, 𑀬𑀢𑁆𑀣 𑀲𑀢𑁆𑀢𑁄 𑀧𑀼𑀣𑀼𑀚𑁆𑀚𑀦𑁄;

𑀆𑀭𑀫𑁆𑀪𑀯𑁆𑀳𑁄 𑀤𑀴𑁆𑀳𑀸 𑀳𑁄𑀣, 𑀔𑀦𑁆𑀢𑀺𑀩𑀮𑀲𑀫𑀸𑀳𑀺𑀢𑀸.

‘‘𑀏𑀲 𑀫𑀕𑁆𑀕𑁄 𑀉𑀚𑀼𑀫𑀕𑁆𑀕𑁄, 𑀏𑀲 𑀫𑀕𑁆𑀕𑁄 𑀅𑀦𑀼𑀢𑁆𑀢𑀭𑁄;

𑀲𑀤𑁆𑀥𑀫𑁆𑀫𑁄 𑀲𑀩𑁆𑀪𑀺 𑀭𑀓𑁆𑀔𑀺𑀢𑁄, 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸𑀢𑀺.

‘‘𑀢𑁂𑀦 𑀳𑀺 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀆𑀕𑀫𑁂𑀢𑀼. 𑀲𑀢𑁆𑀢𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀫𑀬𑀫𑁆𑀧𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀅𑀣 𑀬𑀸 𑀢𑁂 𑀕𑀢𑀺, 𑀲𑀸 𑀦𑁄 𑀕𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺.

‘‘‘𑀅𑀢𑀺𑀘𑀺𑀭𑀁 𑀔𑁄, 𑀪𑁄, 𑀲𑀢𑁆𑀢 𑀯𑀲𑁆𑀲𑀸𑀦𑀺, 𑀦𑀸𑀳𑀁 𑀲𑀓𑁆𑀓𑁄𑀫𑀺, 𑀪𑀯𑀦𑁆𑀢𑁂, 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀆𑀕𑀫𑁂𑀢𑀼𑀁. 𑀓𑁄 ¶ 𑀦𑀼 𑀔𑁄 𑀧𑀦, 𑀪𑁄, 𑀚𑀸𑀦𑀸𑀢𑀺 𑀚𑀻𑀯𑀺𑀢𑀸𑀦𑀁! 𑀕𑀫𑀦𑀻𑀬𑁄 𑀲𑀫𑁆𑀧𑀭𑀸𑀬𑁄, 𑀫𑀦𑁆𑀢𑀸𑀬𑀁 [𑀫𑀦𑁆𑀢𑀸𑀬 (𑀩𑀳𑀽𑀲𑀼)] 𑀩𑁄𑀤𑁆𑀥𑀩𑁆𑀩𑀁, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁, 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡𑀁. 𑀬𑀣𑀸 𑀔𑁄 𑀧𑀦 𑀫𑁂 𑀲𑀼𑀢𑀁 𑀩𑁆𑀭𑀳𑁆𑀫𑀼𑀦𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲, 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸, 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬’’’𑀦𑁆𑀢𑀺. ‘‘𑀢𑁂𑀦 𑀳𑀺 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀙𑀩𑁆𑀩𑀲𑁆𑀲𑀸𑀦𑀺 𑀆𑀕𑀫𑁂𑀢𑀼…𑀧𑁂… 𑀧𑀜𑁆𑀘 𑀯𑀲𑁆𑀲𑀸𑀦𑀺 𑀆𑀕𑀫𑁂𑀢𑀼… 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺 𑀆𑀕𑀫𑁂𑀢𑀼… 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀆𑀕𑀫𑁂𑀢𑀼… 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀆𑀕𑀫𑁂𑀢𑀼… 𑀏𑀓𑀁 𑀯𑀲𑁆𑀲𑀁 ¶ 𑀆𑀕𑀫𑁂𑀢𑀼, 𑀏𑀓𑀲𑁆𑀲 𑀯𑀲𑁆𑀲𑀲𑁆𑀲 𑀅𑀘𑁆𑀘𑀬𑁂𑀦 𑀫𑀬𑀫𑁆𑀧𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀅𑀣 𑀬𑀸 𑀢𑁂 𑀕𑀢𑀺, 𑀲𑀸 𑀦𑁄 𑀕𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺.

‘‘‘𑀅𑀢𑀺𑀘𑀺𑀭𑀁 𑀔𑁄, 𑀪𑁄, 𑀏𑀓𑀁 𑀯𑀲𑁆𑀲𑀁, 𑀦𑀸𑀳𑀁 𑀲𑀓𑁆𑀓𑁄𑀫𑀺 𑀪𑀯𑀦𑁆𑀢𑁂 ¶ 𑀏𑀓𑀁 𑀯𑀲𑁆𑀲𑀁 𑀆𑀕𑀫𑁂𑀢𑀼𑀁. 𑀓𑁄 𑀦𑀼 𑀔𑁄 𑀧𑀦, 𑀪𑁄, 𑀚𑀸𑀦𑀸𑀢𑀺 𑀚𑀻𑀯𑀺𑀢𑀸𑀦𑀁! 𑀕𑀫𑀦𑀻𑀬𑁄 𑀲𑀫𑁆𑀧𑀭𑀸𑀬𑁄, 𑀫𑀦𑁆𑀢𑀸𑀬𑀁 𑀩𑁄𑀤𑁆𑀥𑀩𑁆𑀩𑀁, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁 ¶ , 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡𑀁. 𑀬𑀣𑀸 𑀔𑁄 𑀧𑀦 𑀫𑁂 𑀲𑀼𑀢𑀁 𑀩𑁆𑀭𑀳𑁆𑀫𑀼𑀦𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲, 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸, 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬’’𑀦𑁆𑀢𑀺. ‘‘𑀢𑁂𑀦 𑀳𑀺 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀲𑀢𑁆𑀢 𑀫𑀸𑀲𑀸𑀦𑀺 𑀆𑀕𑀫𑁂𑀢𑀼, 𑀲𑀢𑁆𑀢𑀦𑁆𑀦𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀫𑀬𑀫𑁆𑀧𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀅𑀣 𑀬𑀸 𑀢𑁂 𑀕𑀢𑀺, 𑀲𑀸 𑀦𑁄 𑀕𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺.

‘‘‘𑀅𑀢𑀺𑀘𑀺𑀭𑀁 𑀔𑁄, 𑀪𑁄, 𑀲𑀢𑁆𑀢 𑀫𑀸𑀲𑀸𑀦𑀺, 𑀦𑀸𑀳𑀁 𑀲𑀓𑁆𑀓𑁄𑀫𑀺 𑀪𑀯𑀦𑁆𑀢𑁂 𑀲𑀢𑁆𑀢 𑀫𑀸𑀲𑀸𑀦𑀺 𑀆𑀕𑀫𑁂𑀢𑀼𑀁. 𑀓𑁄 𑀦𑀼 𑀔𑁄 𑀧𑀦, 𑀪𑁄, 𑀚𑀸𑀦𑀸𑀢𑀺 𑀚𑀻𑀯𑀺𑀢𑀸𑀦𑀁. 𑀕𑀫𑀦𑀻𑀬𑁄 𑀲𑀫𑁆𑀧𑀭𑀸𑀬𑁄, 𑀫𑀦𑁆𑀢𑀸𑀬𑀁 𑀩𑁄𑀤𑁆𑀥𑀩𑁆𑀩𑀁 ¶ , 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁, 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡𑀁. 𑀬𑀣𑀸 𑀔𑁄 𑀧𑀦 𑀫𑁂 𑀲𑀼𑀢𑀁 𑀩𑁆𑀭𑀳𑁆𑀫𑀼𑀦𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲, 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸, 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬’’𑀦𑁆𑀢𑀺.

‘‘‘𑀢𑁂𑀦 𑀳𑀺 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀙 𑀫𑀸𑀲𑀸𑀦𑀺 𑀆𑀕𑀫𑁂𑀢𑀼…𑀧𑁂… 𑀧𑀜𑁆𑀘 𑀫𑀸𑀲𑀸𑀦𑀺 𑀆𑀕𑀫𑁂𑀢𑀼… 𑀘𑀢𑁆𑀢𑀸𑀭𑀺 𑀫𑀸𑀲𑀸𑀦𑀺 𑀆𑀕𑀫𑁂𑀢𑀼… 𑀢𑀻𑀡𑀺 𑀫𑀸𑀲𑀸𑀦𑀺 𑀆𑀕𑀫𑁂𑀢𑀼… 𑀤𑁆𑀯𑁂 𑀫𑀸𑀲𑀸𑀦𑀺 𑀆𑀕𑀫𑁂𑀢𑀼… 𑀏𑀓𑀁 𑀫𑀸𑀲𑀁 𑀆𑀕𑀫𑁂𑀢𑀼… 𑀅𑀤𑁆𑀥𑀫𑀸𑀲𑀁 𑀆𑀕𑀫𑁂𑀢𑀼, 𑀅𑀤𑁆𑀥𑀫𑀸𑀲𑀲𑁆𑀲 𑀅𑀘𑁆𑀘𑀬𑁂𑀦 𑀫𑀬𑀫𑁆𑀧𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀅𑀣 𑀬𑀸 𑀢𑁂 𑀕𑀢𑀺, 𑀲𑀸 𑀦𑁄 𑀕𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺.

‘‘‘𑀅𑀢𑀺𑀘𑀺𑀭𑀁 𑀔𑁄, 𑀪𑁄, 𑀅𑀤𑁆𑀥𑀫𑀸𑀲𑁄, 𑀦𑀸𑀳𑀁 𑀲𑀓𑁆𑀓𑁄𑀫𑀺 𑀪𑀯𑀦𑁆𑀢𑁂 𑀅𑀤𑁆𑀥𑀫𑀸𑀲𑀁 𑀆𑀕𑀫𑁂𑀢𑀼𑀁. 𑀓𑁄 𑀦𑀼 𑀔𑁄 𑀧𑀦, 𑀪𑁄, 𑀚𑀸𑀦𑀸𑀢𑀺 𑀚𑀻𑀯𑀺𑀢𑀸𑀦𑀁! 𑀕𑀫𑀦𑀻𑀬𑁄 𑀲𑀫𑁆𑀧𑀭𑀸𑀬𑁄, 𑀫𑀦𑁆𑀢𑀸𑀬𑀁 𑀩𑁄𑀤𑁆𑀥𑀩𑁆𑀩𑀁, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁, 𑀘𑀭𑀺𑀢𑀩𑁆𑀩𑀁 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀦𑀢𑁆𑀣𑀺 𑀚𑀸𑀢𑀲𑁆𑀲 𑀅𑀫𑀭𑀡𑀁. 𑀬𑀣𑀸 𑀔𑁄 𑀧𑀦 𑀫𑁂 𑀲𑀼𑀢𑀁 𑀩𑁆𑀭𑀳𑁆𑀫𑀼𑀦𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲, 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸, 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬’’𑀦𑁆𑀢𑀺. ‘‘𑀢𑁂𑀦 ¶ 𑀳𑀺 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀲𑀢𑁆𑀢𑀸𑀳𑀁 𑀆𑀕𑀫𑁂𑀢𑀼, 𑀬𑀸𑀯 𑀫𑀬𑀁 𑀲𑀓𑁂 𑀧𑀼𑀢𑁆𑀢𑀪𑀸𑀢𑀭𑁄 𑀭𑀚𑁆𑀚𑁂𑀦 [𑀭𑀚𑁆𑀚𑁂 (𑀲𑁆𑀬𑀸.)] 𑀅𑀦𑀼𑀲𑀸𑀲𑀺𑀲𑁆𑀲𑀸𑀫, 𑀲𑀢𑁆𑀢𑀸𑀳𑀲𑁆𑀲 ¶ 𑀅𑀘𑁆𑀘𑀬𑁂𑀦 𑀫𑀬𑀫𑁆𑀧𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀅𑀣 𑀬𑀸 𑀢𑁂 𑀕𑀢𑀺, 𑀲𑀸 𑀦𑁄 𑀕𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺. ‘‘𑀦 𑀘𑀺𑀭𑀁 𑀔𑁄, 𑀪𑁄, 𑀲𑀢𑁆𑀢𑀸𑀳𑀁, 𑀆𑀕𑀫𑁂𑀲𑁆𑀲𑀸𑀫𑀳𑀁 𑀪𑀯𑀦𑁆𑀢𑁂 𑀲𑀢𑁆𑀢𑀸𑀳’’𑀦𑁆𑀢𑀺.

𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸𑀤𑀻𑀦𑀁 𑀆𑀫𑀦𑁆𑀢𑀦𑀸

𑁩𑁨𑁪. ‘‘𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀢𑁂 𑀲𑀢𑁆𑀢 𑀘 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 ¶ 𑀲𑀢𑁆𑀢 𑀘 𑀦𑁆𑀳𑀸𑀢𑀓𑀲𑀢𑀸𑀦𑀺 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂 𑀲𑀢𑁆𑀢 𑀘 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑁂 𑀲𑀢𑁆𑀢 𑀘 𑀦𑁆𑀳𑀸𑀢𑀓𑀲𑀢𑀸𑀦𑀺 ¶ 𑀏𑀢𑀤𑀯𑁄𑀘 𑁋 ‘‘𑀅𑀜𑁆𑀜𑀁 𑀤𑀸𑀦𑀺 𑀪𑀯𑀦𑁆𑀢𑁄 𑀆𑀘𑀭𑀺𑀬𑀁 𑀧𑀭𑀺𑀬𑁂𑀲𑀦𑁆𑀢𑀼, 𑀬𑁄 𑀪𑀯𑀦𑁆𑀢𑀸𑀦𑀁 𑀫𑀦𑁆𑀢𑁂 𑀯𑀸𑀘𑁂𑀲𑁆𑀲𑀢𑀺. 𑀇𑀘𑁆𑀙𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀼𑀁. 𑀬𑀣𑀸 𑀔𑁄 𑀧𑀦 𑀫𑁂 𑀲𑀼𑀢𑀁 𑀩𑁆𑀭𑀳𑁆𑀫𑀼𑀦𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲. 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸, 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬’’𑀦𑁆𑀢𑀺. ‘‘𑀫𑀸 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺. 𑀧𑀩𑁆𑀩𑀚𑁆𑀚𑀸, 𑀪𑁄, 𑀅𑀧𑁆𑀧𑁂𑀲𑀓𑁆𑀔𑀸 𑀘 𑀅𑀧𑁆𑀧𑀮𑀸𑀪𑀸 𑀘; 𑀩𑁆𑀭𑀳𑁆𑀫𑀜𑁆𑀜𑀁 𑀫𑀳𑁂𑀲𑀓𑁆𑀔𑀜𑁆𑀘 𑀫𑀳𑀸𑀮𑀸𑀪𑀜𑁆𑀘𑀸’’𑀢𑀺. ‘‘𑀫𑀸 𑀪𑀯𑀦𑁆𑀢𑁄 𑀏𑀯𑀁 𑀅𑀯𑀘𑀼𑀢𑁆𑀣 𑁋 ‘‘𑀧𑀩𑁆𑀩𑀚𑁆𑀚𑀸 𑀅𑀧𑁆𑀧𑁂𑀲𑀓𑁆𑀔𑀸 𑀘 𑀅𑀧𑁆𑀧𑀮𑀸𑀪𑀸 𑀘, 𑀩𑁆𑀭𑀳𑁆𑀫𑀜𑁆𑀜𑀁 𑀫𑀳𑁂𑀲𑀓𑁆𑀔𑀜𑁆𑀘 𑀫𑀳𑀸𑀮𑀸𑀪𑀜𑁆𑀘𑀸’’𑀢𑀺. 𑀓𑁄 𑀦𑀼 𑀔𑁄, 𑀪𑁄, 𑀅𑀜𑁆𑀜𑀢𑁆𑀭 𑀫𑀬𑀸 𑀫𑀳𑁂𑀲𑀓𑁆𑀔𑀢𑀭𑁄 𑀯𑀸 𑀫𑀳𑀸𑀮𑀸𑀪𑀢𑀭𑁄 𑀯𑀸! 𑀅𑀳𑀜𑁆𑀳𑀺, 𑀪𑁄, 𑀏𑀢𑀭𑀳𑀺 𑀭𑀸𑀚𑀸𑀯 𑀭𑀜𑁆𑀜𑀁 𑀩𑁆𑀭𑀳𑁆𑀫𑀸𑀯 𑀩𑁆𑀭𑀸𑀳𑁆𑀫𑀡𑀸𑀦𑀁 [𑀩𑁆𑀭𑀳𑁆𑀫𑀸𑀦𑀁 (𑀲𑀻. 𑀧𑀻. 𑀓.)] 𑀤𑁂𑀯𑀢𑀸𑀯 𑀕𑀳𑀧𑀢𑀺𑀓𑀸𑀦𑀁. 𑀢𑀫𑀳𑀁 𑀲𑀩𑁆𑀩𑀁 𑀧𑀳𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫𑀺. 𑀬𑀣𑀸 𑀔𑁄 𑀧𑀦 𑀫𑁂 𑀲𑀼𑀢𑀁 𑀩𑁆𑀭𑀳𑁆𑀫𑀼𑀦𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲, 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 ¶ 𑀅𑀚𑁆𑀛𑀸𑀯𑀲𑀢𑀸. 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬’’𑀦𑁆𑀢𑀺. ‘‘𑀲𑀘𑁂 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀫𑀬𑀫𑁆𑀧𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀅𑀣 𑀬𑀸 𑀢𑁂 𑀕𑀢𑀺, 𑀲𑀸 𑀦𑁄 𑀕𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺.

𑀪𑀭𑀺𑀬𑀸𑀦𑀁 𑀆𑀫𑀦𑁆𑀢𑀦𑀸

𑁩𑁨𑁫. ‘‘𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀘𑀢𑁆𑀢𑀸𑀭𑀻𑀲𑀸 𑀪𑀭𑀺𑀬𑀸 ¶ 𑀲𑀸𑀤𑀺𑀲𑀺𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘𑀢𑁆𑀢𑀸𑀭𑀻𑀲𑀸 𑀪𑀭𑀺𑀬𑀸 𑀲𑀸𑀤𑀺𑀲𑀺𑀬𑁄 𑀏𑀢𑀤𑀯𑁄𑀘 𑁋 ‘‘𑀬𑀸 𑀪𑁄𑀢𑀻𑀦𑀁 𑀇𑀘𑁆𑀙𑀢𑀺, 𑀲𑀓𑀸𑀦𑀺 𑀯𑀸 𑀜𑀸𑀢𑀺𑀓𑀼𑀮𑀸𑀦𑀺 𑀕𑀘𑁆𑀙𑀢𑀼 𑀅𑀜𑁆𑀜𑀁 𑀯𑀸 𑀪𑀢𑁆𑀢𑀸𑀭𑀁 𑀧𑀭𑀺𑀬𑁂𑀲𑀢𑀼. 𑀇𑀘𑁆𑀙𑀸𑀫𑀳𑀁, 𑀪𑁄𑀢𑀻, 𑀅𑀕𑀸𑀭𑀲𑁆𑀫𑀸 ¶ 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀼𑀁. 𑀬𑀣𑀸 𑀔𑁄 𑀧𑀦 𑀫𑁂 𑀲𑀼𑀢𑀁 𑀩𑁆𑀭𑀳𑁆𑀫𑀼𑀦𑁄 𑀆𑀫𑀕𑀦𑁆𑀥𑁂 𑀪𑀸𑀲𑀫𑀸𑀦𑀲𑁆𑀲, 𑀢𑁂 𑀦 𑀲𑀼𑀦𑀺𑀫𑁆𑀫𑀤𑀬𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸. 𑀧𑀩𑁆𑀩𑀚𑀺𑀲𑁆𑀲𑀸𑀫𑀳𑀁, 𑀪𑁄𑀢𑀻, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬’’𑀦𑁆𑀢𑀺. ‘‘𑀢𑁆𑀯𑀜𑁆𑀜𑁂𑀯 𑀦𑁄 𑀜𑀸𑀢𑀺 𑀜𑀸𑀢𑀺𑀓𑀸𑀫𑀸𑀦𑀁, 𑀢𑁆𑀯𑀁 𑀧𑀦 𑀪𑀢𑁆𑀢𑀸 𑀪𑀢𑁆𑀢𑀼𑀓𑀸𑀫𑀸𑀦𑀁. 𑀲𑀘𑁂 𑀪𑀯𑀁 𑀕𑁄𑀯𑀺𑀦𑁆𑀤𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀫𑀬𑀫𑁆𑀧𑀺 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀅𑀣 𑀬𑀸 𑀢𑁂 𑀕𑀢𑀺, 𑀲𑀸 𑀦𑁄 𑀕𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺.

𑀫𑀳𑀸𑀕𑁄𑀯𑀺𑀦𑁆𑀤𑀧𑀩𑁆𑀩𑀚𑁆𑀚𑀸

𑁩𑁨𑁬. ‘‘𑀅𑀣 𑀔𑁄, 𑀪𑁄, 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀢𑀲𑁆𑀲 𑀲𑀢𑁆𑀢𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺. 𑀧𑀩𑁆𑀩𑀚𑀺𑀢𑀁 𑀧𑀦 𑀫𑀳𑀸𑀕𑁄𑀯𑀺𑀦𑁆𑀤𑀁 𑀩𑁆𑀭𑀸𑀳𑁆𑀫𑀡𑀁 𑀲𑀢𑁆𑀢 𑀘 𑀭𑀸𑀚𑀸𑀦𑁄 𑀔𑀢𑁆𑀢𑀺𑀬𑀸 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀸 𑀲𑀢𑁆𑀢 𑀘 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀲𑀢𑁆𑀢 𑀘 𑀦𑁆𑀳𑀸𑀢𑀓𑀲𑀢𑀸𑀦𑀺 𑀘𑀢𑁆𑀢𑀸𑀭𑀻𑀲𑀸 𑀘 𑀪𑀭𑀺𑀬𑀸 𑀲𑀸𑀤𑀺𑀲𑀺𑀬𑁄 𑀅𑀦𑁂𑀓𑀸𑀦𑀺 𑀘 𑀔𑀢𑁆𑀢𑀺𑀬𑀲𑀳𑀲𑁆𑀲𑀸𑀦𑀺 𑀅𑀦𑁂𑀓𑀸𑀦𑀺 ¶ 𑀘 𑀩𑁆𑀭𑀸𑀳𑁆𑀫𑀡𑀲𑀳𑀲𑁆𑀲𑀸𑀦𑀺 𑀅𑀦𑁂𑀓𑀸𑀦𑀺 𑀘 𑀕𑀳𑀧𑀢𑀺𑀲𑀳𑀲𑁆𑀲𑀸𑀦𑀺 𑀅𑀦𑁂𑀓𑁂𑀳𑀺 𑀘 𑀇𑀢𑁆𑀣𑀸𑀕𑀸𑀭𑁂𑀳𑀺 𑀇𑀢𑁆𑀣𑀺𑀬𑁄 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀫𑀳𑀸𑀕𑁄𑀯𑀺𑀦𑁆𑀤𑀁 𑀩𑁆𑀭𑀸𑀳𑁆𑀫𑀡𑀁 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀁 𑀅𑀦𑀼𑀧𑀩𑁆𑀩𑀚𑀺𑀁𑀲𑀼. 𑀢𑀸𑀬 𑀲𑀼𑀤𑀁, 𑀪𑁄, 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 ¶ 𑀘𑀸𑀭𑀺𑀓𑀁 𑀘𑀭𑀢𑀺. 𑀬𑀁 𑀔𑁄 𑀧𑀦, 𑀪𑁄, 𑀢𑁂𑀦 𑀲𑀫𑀬𑁂𑀦 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 ¶ 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀉𑀧𑀲𑀗𑁆𑀓𑀫𑀢𑀺, 𑀢𑀢𑁆𑀣 𑀭𑀸𑀚𑀸𑀯 𑀳𑁄𑀢𑀺 𑀭𑀜𑁆𑀜𑀁, 𑀩𑁆𑀭𑀳𑁆𑀫𑀸𑀯 𑀩𑁆𑀭𑀸𑀳𑁆𑀫𑀡𑀸𑀦𑀁, 𑀤𑁂𑀯𑀢𑀸𑀯 𑀕𑀳𑀧𑀢𑀺𑀓𑀸𑀦𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀫𑀦𑀼𑀲𑁆𑀲𑀸 𑀔𑀺𑀧𑀦𑁆𑀢𑀺 𑀯𑀸 𑀉𑀧𑀓𑁆𑀔𑀮𑀦𑁆𑀢𑀺 𑀯𑀸 𑀢𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀦𑀫𑀢𑁆𑀣𑀼 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲, 𑀦𑀫𑀢𑁆𑀣𑀼 𑀲𑀢𑁆𑀢 𑀧𑀼𑀭𑁄𑀳𑀺𑀢𑀲𑁆𑀲𑀸’’’𑀢𑀺.

𑁩𑁨𑁭. ‘‘𑀫𑀳𑀸𑀕𑁄𑀯𑀺𑀦𑁆𑀤𑁄, 𑀪𑁄, 𑀩𑁆𑀭𑀸𑀳𑁆𑀫𑀡𑁄 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀸𑀲𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁, 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀸𑀲𑀺. 𑀓𑀭𑀼𑀡𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀫𑀼𑀤𑀺𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦 𑀘𑁂𑀢𑀲𑀸…𑀧𑁂… 𑀅𑀩𑁆𑀬𑀸𑀧𑀚𑁆𑀚𑁂𑀦 𑀨𑀭𑀺𑀢𑁆𑀯𑀸 𑀯𑀺𑀳𑀸𑀲𑀺 𑀲𑀸𑀯𑀓𑀸𑀦𑀜𑁆𑀘 𑀩𑁆𑀭𑀳𑁆𑀫𑀮𑁄𑀓𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑀁 𑀤𑁂𑀲𑁂𑀲𑀺.

𑁩𑁨𑁮. ‘‘𑀬𑁂 ¶ 𑀔𑁄 𑀧𑀦, 𑀪𑁄, 𑀢𑁂𑀦 𑀲𑀫𑀬𑁂𑀦 𑀫𑀳𑀸𑀕𑁄𑀯𑀺𑀦𑁆𑀤𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀸𑀯𑀓𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀸𑀲𑀦𑀁 𑀆𑀚𑀸𑀦𑀺𑀁𑀲𑀼. 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀩𑁆𑀭𑀳𑁆𑀫𑀮𑁄𑀓𑀁 𑀉𑀧𑀧𑀚𑁆𑀚𑀺𑀁𑀲𑀼. 𑀬𑁂 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀸𑀲𑀦𑀁 𑀆𑀚𑀸𑀦𑀺𑀁𑀲𑀼, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑁆𑀧𑁂𑀓𑀘𑁆𑀘𑁂 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺𑀁𑀲𑀼; 𑀅𑀧𑁆𑀧𑁂𑀓𑀘𑁆𑀘𑁂 𑀦𑀺𑀫𑁆𑀫𑀸𑀦𑀭𑀢𑀻𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺𑀁𑀲𑀼; 𑀅𑀧𑁆𑀧𑁂𑀓𑀘𑁆𑀘𑁂 𑀢𑀼𑀲𑀺𑀢𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺𑀁𑀲𑀼; 𑀅𑀧𑁆𑀧𑁂𑀓𑀘𑁆𑀘𑁂 𑀬𑀸𑀫𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 ¶ 𑀉𑀧𑀧𑀚𑁆𑀚𑀺𑀁𑀲𑀼; 𑀅𑀧𑁆𑀧𑁂𑀓𑀘𑁆𑀘𑁂 𑀢𑀸𑀯𑀢𑀺𑀁𑀲𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺𑀁𑀲𑀼; 𑀅𑀧𑁆𑀧𑁂𑀓𑀘𑁆𑀘𑁂 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺𑀁𑀲𑀼; 𑀬𑁂 𑀲𑀩𑁆𑀩𑀦𑀺𑀳𑀻𑀦𑀁 𑀓𑀸𑀬𑀁 𑀧𑀭𑀺𑀧𑀽𑀭𑁂𑀲𑀼𑀁 ¶ 𑀢𑁂 𑀕𑀦𑁆𑀥𑀩𑁆𑀩𑀓𑀸𑀬𑀁 𑀧𑀭𑀺𑀧𑀽𑀭𑁂𑀲𑀼𑀁. 𑀇𑀢𑀺 𑀔𑁄, 𑀪𑁄 [𑀧𑀦 (𑀲𑁆𑀬𑀸. 𑀓.)], 𑀲𑀩𑁆𑀩𑁂𑀲𑀁𑀬𑁂𑀯 𑀢𑁂𑀲𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀅𑀫𑁄𑀖𑀸 𑀧𑀩𑁆𑀩𑀚𑁆𑀚𑀸 𑀅𑀳𑁄𑀲𑀺 𑀅𑀯𑀜𑁆𑀛𑀸 𑀲𑀨𑀮𑀸 𑀲𑀉𑀤𑁆𑀭𑀬𑀸’’’𑀢𑀺.

𑁩𑁨𑁯. ‘‘𑀲𑀭𑀢𑀺 𑀢𑀁 𑀪𑀕𑀯𑀸’’𑀢𑀺? ‘‘𑀲𑀭𑀸𑀫𑀳𑀁, 𑀧𑀜𑁆𑀘𑀲𑀺𑀔. 𑀅𑀳𑀁 𑀢𑁂𑀦 𑀲𑀫𑀬𑁂𑀦 𑀫𑀳𑀸𑀕𑁄𑀯𑀺𑀦𑁆𑀤𑁄 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺𑀁. 𑀅𑀳𑀁 𑀢𑁂𑀲𑀁 𑀲𑀸𑀯𑀓𑀸𑀦𑀁 𑀩𑁆𑀭𑀳𑁆𑀫𑀮𑁄𑀓𑀲𑀳𑀩𑁆𑀬𑀢𑀸𑀬 𑀫𑀕𑁆𑀕𑀁 𑀤𑁂𑀲𑁂𑀲𑀺𑀁. 𑀢𑀁 𑀔𑁄 𑀧𑀦 𑀫𑁂, 𑀧𑀜𑁆𑀘𑀲𑀺𑀔, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦 𑀦𑀺𑀩𑁆𑀩𑀺𑀤𑀸𑀬 𑀦 𑀯𑀺𑀭𑀸𑀕𑀸𑀬 𑀦 𑀦𑀺𑀭𑁄𑀥𑀸𑀬 𑀦 𑀉𑀧𑀲𑀫𑀸𑀬 𑀦 𑀅𑀪𑀺𑀜𑁆𑀜𑀸𑀬 𑀦 𑀲𑀫𑁆𑀩𑁄𑀥𑀸𑀬 𑀦 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺, 𑀬𑀸𑀯𑀤𑁂𑀯 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀬𑀸.

𑀇𑀤𑀁 ¶ 𑀔𑁄 𑀧𑀦 𑀫𑁂, 𑀧𑀜𑁆𑀘𑀲𑀺𑀔, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀓𑀢𑀫𑀜𑁆𑀘 𑀢𑀁, 𑀧𑀜𑁆𑀘𑀲𑀺𑀔, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺. 𑀇𑀤𑀁 𑀔𑁄 𑀢𑀁, 𑀧𑀜𑁆𑀘𑀲𑀺𑀔, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺.

𑁩𑁩𑁦. ‘‘𑀬𑁂 𑀔𑁄 𑀧𑀦 𑀫𑁂, 𑀧𑀜𑁆𑀘𑀲𑀺𑀔, 𑀲𑀸𑀯𑀓𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀸𑀲𑀦𑀁 𑀆𑀚𑀸𑀦𑀦𑁆𑀢𑀺, 𑀢𑁂 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 ¶ 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀺; 𑀬𑁂 𑀦 𑀲𑀩𑁆𑀩𑁂𑀦 ¶ 𑀲𑀩𑁆𑀩𑀁 𑀲𑀸𑀲𑀦𑀁 𑀆𑀚𑀸𑀦𑀦𑁆𑀢𑀺, 𑀢𑁂 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 ¶ 𑀑𑀧𑀧𑀸𑀢𑀺𑀓𑀸 𑀳𑁄𑀦𑁆𑀢𑀺 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑀸 𑀢𑀲𑁆𑀫𑀸 𑀮𑁄𑀓𑀸. 𑀬𑁂 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀸𑀲𑀦𑀁 𑀆𑀚𑀸𑀦𑀦𑁆𑀢𑀺, 𑀅𑀧𑁆𑀧𑁂𑀓𑀘𑁆𑀘𑁂 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸 𑀲𑀓𑀤𑀸𑀕𑀸𑀫𑀺𑀦𑁄 𑀳𑁄𑀦𑁆𑀢𑀺 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺 [𑀓𑀭𑁄𑀦𑁆𑀢𑀺 (𑀲𑀻. 𑀧𑀻.)]. 𑀬𑁂 𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀲𑀸𑀲𑀦𑀁 𑀆𑀚𑀸𑀦𑀦𑁆𑀢𑀺, 𑀅𑀧𑁆𑀧𑁂𑀓𑀘𑁆𑀘𑁂 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑀸 𑀳𑁄𑀦𑁆𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀸 𑀦𑀺𑀬𑀢𑀸 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀸. 𑀇𑀢𑀺 𑀔𑁄, 𑀧𑀜𑁆𑀘𑀲𑀺𑀔, 𑀲𑀩𑁆𑀩𑁂𑀲𑀁𑀬𑁂𑀯 𑀇𑀫𑁂𑀲𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀅𑀫𑁄𑀖𑀸 𑀧𑀩𑁆𑀩𑀚𑁆𑀚𑀸 [𑀧𑀩𑁆𑀩𑀚𑀸 𑀅𑀳𑁄𑀲𑀺 (𑀓.)] 𑀅𑀯𑀜𑁆𑀛𑀸 𑀲𑀨𑀮𑀸 𑀲𑀉𑀤𑁆𑀭𑀬𑀸’’𑀢𑀺.

𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑁄 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀧𑀼𑀢𑁆𑀢𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀻𑀢𑀺.

𑀫𑀳𑀸𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀙𑀝𑁆𑀞𑀁.

𑁭. 𑀫𑀳𑀸𑀲𑀫𑀬𑀲𑀼𑀢𑁆𑀢𑀁

𑁩𑁩𑁧. 𑀏𑀯𑀁 ¶ ¶ ¶ 𑀫𑁂 ¶ 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀫𑀳𑀸𑀯𑀦𑁂 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀩𑁆𑀩𑁂𑀳𑁂𑀯 𑀅𑀭𑀳𑀦𑁆𑀢𑁂𑀳𑀺; 𑀤𑀲𑀳𑀺 𑀘 𑀮𑁄𑀓𑀥𑀸𑀢𑀽𑀳𑀺 𑀤𑁂𑀯𑀢𑀸 𑀬𑁂𑀪𑀼𑀬𑁆𑀬𑁂𑀦 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀅𑀣 𑀔𑁄 𑀘𑀢𑀼𑀦𑁆𑀦𑀁 𑀲𑀼𑀤𑁆𑀥𑀸𑀯𑀸𑀲𑀓𑀸𑀬𑀺𑀓𑀸𑀦𑀁 𑀤𑁂𑀯𑀢𑀸𑀦𑀁 [𑀤𑁂𑀯𑀸𑀦𑀁 (𑀲𑀻. 𑀲𑁆𑀬𑀸. 𑀧𑀻.)] 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀔𑁄 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀫𑀳𑀸𑀯𑀦𑁂 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀩𑁆𑀩𑁂𑀳𑁂𑀯 𑀅𑀭𑀳𑀦𑁆𑀢𑁂𑀳𑀺; 𑀤𑀲𑀳𑀺 𑀘 𑀮𑁄𑀓𑀥𑀸𑀢𑀽𑀳𑀺 𑀤𑁂𑀯𑀢𑀸 𑀬𑁂𑀪𑀼𑀬𑁆𑀬𑁂𑀦 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀬𑀁𑀦𑀽𑀦 𑀫𑀬𑀫𑁆𑀧𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀸𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀘𑁆𑀘𑁂𑀓𑀁 𑀕𑀸𑀣𑀁 [𑀧𑀘𑁆𑀘𑁂𑀓𑀕𑀸𑀣𑀁 (𑀲𑀻. 𑀲𑁆𑀬𑀸. 𑀧𑀻.), 𑀧𑀘𑁆𑀘𑁂𑀓𑀕𑀸𑀣𑀸 (𑀓. 𑀲𑀻.)] 𑀪𑀸𑀲𑁂𑀬𑁆𑀬𑀸𑀫𑀸’’𑀢𑀺.

𑁩𑁩𑁨. 𑀅𑀣 𑀔𑁄 𑀢𑀸 𑀤𑁂𑀯𑀢𑀸 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬 ¶ , 𑀏𑀯𑀫𑁂𑀯 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀤𑁂𑀯𑁂𑀲𑀼 𑀅𑀦𑁆𑀢𑀭𑀳𑀺𑀢𑀸 𑀪𑀕𑀯𑀢𑁄 𑀧𑀼𑀭𑀢𑁄 𑀧𑀸𑀢𑀼𑀭𑀳𑁂𑀲𑀼𑀁. 𑀅𑀣 𑀔𑁄 𑀢𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄 𑀏𑀓𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀫𑀳𑀸𑀲𑀫𑀬𑁄 𑀧𑀯𑀦𑀲𑁆𑀫𑀺𑀁, 𑀤𑁂𑀯𑀓𑀸𑀬𑀸 𑀲𑀫𑀸𑀕𑀢𑀸;

𑀆𑀕𑀢𑀫𑁆𑀳 ¶ 𑀇𑀫𑀁 𑀥𑀫𑁆𑀫𑀲𑀫𑀬𑀁, 𑀤𑀓𑁆𑀔𑀺𑀢𑀸𑀬𑁂 𑀅𑀧𑀭𑀸𑀚𑀺𑀢𑀲𑀗𑁆𑀖’’𑀦𑁆𑀢𑀺.

𑀅𑀣 𑀔𑁄 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀢𑀢𑁆𑀭 𑀪𑀺𑀓𑁆𑀔𑀯𑁄 𑀲𑀫𑀸𑀤𑀳𑀁𑀲𑀼, 𑀘𑀺𑀢𑁆𑀢𑀫𑀢𑁆𑀢𑀦𑁄 𑀉𑀚𑀼𑀓𑀁 𑀅𑀓𑀁𑀲𑀼 [𑀉𑀚𑀼𑀓𑀫𑀓𑀁𑀲𑀼 (𑀲𑀻. 𑀲𑁆𑀬𑀸. 𑀧𑀻.)];

𑀲𑀸𑀭𑀣𑀻𑀯 𑀦𑁂𑀢𑁆𑀢𑀸𑀦𑀺 𑀕𑀳𑁂𑀢𑁆𑀯𑀸, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀭𑀓𑁆𑀔𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺.

𑀅𑀣 ¶ 𑀔𑁄 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀙𑁂𑀢𑁆𑀯𑀸 𑀔𑀻𑀮𑀁 𑀙𑁂𑀢𑁆𑀯𑀸 𑀧𑀮𑀺𑀖𑀁, 𑀇𑀦𑁆𑀤𑀔𑀻𑀮𑀁 𑀊𑀳𑀘𑁆𑀘 [𑀉𑀳𑀘𑁆𑀘 (𑀓.)] 𑀫𑀦𑁂𑀚𑀸;

𑀢𑁂 𑀘𑀭𑀦𑁆𑀢𑀺 𑀲𑀼𑀤𑁆𑀥𑀸 𑀯𑀺𑀫𑀮𑀸, 𑀘𑀓𑁆𑀔𑀼𑀫𑀢𑀸 𑀲𑀼𑀤𑀦𑁆𑀢𑀸 𑀲𑀼𑀲𑀼𑀦𑀸𑀕𑀸’’𑀢𑀺.

𑀅𑀣 ¶ ¶ 𑀔𑁄 𑀅𑀧𑀭𑀸 𑀤𑁂𑀯𑀢𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀬𑁂𑀓𑁂𑀘𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸𑀲𑁂, 𑀦 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺 𑀅𑀧𑀸𑀬𑀪𑀽𑀫𑀺𑀁;

𑀧𑀳𑀸𑀬 𑀫𑀸𑀦𑀼𑀲𑀁 𑀤𑁂𑀳𑀁, 𑀤𑁂𑀯𑀓𑀸𑀬𑀁 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻’’𑀢𑀺.

𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑀸

𑁩𑁩𑁩. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀬𑁂𑀪𑀼𑀬𑁆𑀬𑁂𑀦, 𑀪𑀺𑀓𑁆𑀔𑀯𑁂, 𑀤𑀲𑀲𑀼 𑀮𑁄𑀓𑀥𑀸𑀢𑀽𑀲𑀼 𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀺 [( ) 𑀲𑀻. 𑀇𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺], 𑀢𑀣𑀸𑀕𑀢𑀁 𑀤𑀲𑁆𑀲𑀦𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 ¶ . 𑀬𑁂𑀧𑀺 𑀢𑁂, 𑀪𑀺𑀓𑁆𑀔𑀯𑁂, 𑀅𑀳𑁂𑀲𑀼𑀁 𑀅𑀢𑀻𑀢𑀫𑀤𑁆𑀥𑀸𑀦𑀁 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀢𑁂𑀲𑀫𑁆𑀧𑀺 𑀪𑀕𑀯𑀦𑁆𑀢𑀸𑀦𑀁 𑀏𑀢𑀁𑀧𑀭𑀫𑀸𑀬𑁂𑀯 [𑀏𑀢𑀧𑀭𑀫𑀸𑀬𑁂𑀯 (𑀲𑀻. 𑀲𑁆𑀬𑀸. 𑀧𑀻.)] 𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀢𑀸 𑀅𑀳𑁂𑀲𑀼𑀁 𑀲𑁂𑀬𑁆𑀬𑀣𑀸𑀧𑀺 𑀫𑀬𑁆𑀳𑀁 𑀏𑀢𑀭𑀳𑀺. 𑀬𑁂𑀧𑀺 𑀢𑁂, 𑀪𑀺𑀓𑁆𑀔𑀯𑁂, 𑀪𑀯𑀺𑀲𑁆𑀲𑀦𑁆𑀢𑀺 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀢𑁂𑀲𑀫𑁆𑀧𑀺 𑀪𑀕𑀯𑀦𑁆𑀢𑀸𑀦𑀁 𑀏𑀢𑀁𑀧𑀭𑀫𑀸𑀬𑁂𑀯 𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀢𑀸 𑀪𑀯𑀺𑀲𑁆𑀲𑀦𑁆𑀢𑀺 𑀲𑁂𑀬𑁆𑀬𑀣𑀸𑀧𑀺 𑀫𑀬𑁆𑀳𑀁 𑀏𑀢𑀭𑀳𑀺. 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑁂𑀯𑀓𑀸𑀬𑀸𑀦𑀁 𑀦𑀸𑀫𑀸𑀦𑀺; 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑁂𑀯𑀓𑀸𑀬𑀸𑀦𑀁 𑀦𑀸𑀫𑀸𑀦𑀺; 𑀤𑁂𑀲𑁂𑀲𑁆𑀲𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑁂𑀯𑀓𑀸𑀬𑀸𑀦𑀁 𑀦𑀸𑀫𑀸𑀦𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺𑀓𑀭𑁄𑀣, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁.

𑁩𑁩𑁪. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀲𑀺𑀮𑁄𑀓𑀫𑀦𑀼𑀓𑀲𑁆𑀲𑀸𑀫𑀺, 𑀬𑀢𑁆𑀣 𑀪𑀼𑀫𑁆𑀫𑀸 𑀢𑀤𑀲𑁆𑀲𑀺𑀢𑀸;

𑀬𑁂 𑀲𑀺𑀢𑀸 𑀕𑀺𑀭𑀺𑀕𑀩𑁆𑀪𑀭𑀁, 𑀧𑀳𑀺𑀢𑀢𑁆𑀢𑀸 𑀲𑀫𑀸𑀳𑀺𑀢𑀸.

‘‘𑀧𑀼𑀣𑀽𑀲𑀻𑀳𑀸𑀯 𑀲𑀮𑁆𑀮𑀻𑀦𑀸, 𑀮𑁄𑀫𑀳𑀁𑀲𑀸𑀪𑀺𑀲𑀫𑁆𑀪𑀼𑀦𑁄;

𑀑𑀤𑀸𑀢𑀫𑀦𑀲𑀸 𑀲𑀼𑀤𑁆𑀥𑀸, 𑀯𑀺𑀧𑁆𑀧𑀲𑀦𑁆𑀦𑀫𑀦𑀸𑀯𑀺𑀮𑀸’’ [𑀯𑀺𑀧𑁆𑀧𑀲𑀦𑁆𑀦𑀸𑀫𑀦𑀸𑀯𑀺𑀮𑀸 (𑀧𑀻. 𑀓.)].

𑀪𑀺𑀬𑁆𑀬𑁄 ¶ ¶ 𑀧𑀜𑁆𑀘𑀲𑀢𑁂 𑀜𑀢𑁆𑀯𑀸, 𑀯𑀦𑁂 𑀓𑀸𑀧𑀺𑀮𑀯𑀢𑁆𑀣𑀯𑁂;

𑀢𑀢𑁄 𑀆𑀫𑀦𑁆𑀢𑀬𑀻 𑀲𑀢𑁆𑀣𑀸, 𑀲𑀸𑀯𑀓𑁂 𑀲𑀸𑀲𑀦𑁂 𑀭𑀢𑁂.

‘‘𑀤𑁂𑀯𑀓𑀸𑀬𑀸 𑀅𑀪𑀺𑀓𑁆𑀓𑀦𑁆𑀢𑀸, 𑀢𑁂 𑀯𑀺𑀚𑀸𑀦𑀸𑀣 𑀪𑀺𑀓𑁆𑀔𑀯𑁄’’;

𑀢𑁂 𑀘 𑀆𑀢𑀧𑁆𑀧𑀫𑀓𑀭𑀼𑀁, 𑀲𑀼𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁.

𑀢𑁂𑀲𑀁 𑀧𑀸𑀢𑀼𑀭𑀳𑀼 𑀜𑀸𑀡𑀁, 𑀅𑀫𑀦𑀼𑀲𑁆𑀲𑀸𑀦𑀤𑀲𑁆𑀲𑀦𑀁;

𑀅𑀧𑁆𑀧𑁂𑀓𑁂 𑀲𑀢𑀫𑀤𑁆𑀤𑀓𑁆𑀔𑀼𑀁, 𑀲𑀳𑀲𑁆𑀲𑀁 𑀅𑀣 𑀲𑀢𑁆𑀢𑀭𑀺𑀁.

𑀲𑀢𑀁 ¶ 𑀏𑀓𑁂 𑀲𑀳𑀲𑁆𑀲𑀸𑀦𑀁, 𑀅𑀫𑀦𑀼𑀲𑁆𑀲𑀸𑀦𑀫𑀤𑁆𑀤𑀲𑀼𑀁;

𑀅𑀧𑁆𑀧𑁂𑀓𑁂𑀦𑀦𑁆𑀢𑀫𑀤𑁆𑀤𑀓𑁆𑀔𑀼𑀁 ¶ , 𑀤𑀺𑀲𑀸 𑀲𑀩𑁆𑀩𑀸 𑀨𑀼𑀝𑀸 𑀅𑀳𑀼𑀁.

𑀢𑀜𑁆𑀘 𑀲𑀩𑁆𑀩𑀁 𑀅𑀪𑀺𑀜𑁆𑀜𑀸𑀬, 𑀯𑀯𑀢𑁆𑀣𑀺𑀢𑁆𑀯𑀸𑀦 [𑀯𑀯𑀓𑁆𑀔𑀺𑀢𑁆𑀯𑀸𑀦 (𑀲𑀻. 𑀲𑁆𑀬𑀸. 𑀧𑀻.), 𑀅𑀯𑁂𑀓𑁆𑀔𑀺𑀢𑁆𑀯𑀸𑀦 (𑀝𑀻𑀓𑀸)] 𑀘𑀓𑁆𑀔𑀼𑀫𑀸;

𑀢𑀢𑁄 𑀆𑀫𑀦𑁆𑀢𑀬𑀻 𑀲𑀢𑁆𑀣𑀸, 𑀲𑀸𑀯𑀓𑁂 𑀲𑀸𑀲𑀦𑁂 𑀭𑀢𑁂.

‘‘𑀤𑁂𑀯𑀓𑀸𑀬𑀸 𑀅𑀪𑀺𑀓𑁆𑀓𑀦𑁆𑀢𑀸, 𑀢𑁂 𑀯𑀺𑀚𑀸𑀦𑀸𑀣 𑀪𑀺𑀓𑁆𑀔𑀯𑁄;

𑀬𑁂 𑀯𑁄𑀳𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀕𑀺𑀭𑀸𑀳𑀺 𑀅𑀦𑀼𑀧𑀼𑀩𑁆𑀩𑀲𑁄.

𑁩𑁩𑁫. ‘‘𑀲𑀢𑁆𑀢𑀲𑀳𑀲𑁆𑀲𑀸 𑀢𑁂 𑀬𑀓𑁆𑀔𑀸, 𑀪𑀼𑀫𑁆𑀫𑀸 𑀓𑀸𑀧𑀺𑀮𑀯𑀢𑁆𑀣𑀯𑀸.

𑀇𑀤𑁆𑀥𑀺𑀫𑀦𑁆𑀢𑁄 𑀚𑀼𑀢𑀺𑀫𑀦𑁆𑀢𑁄, 𑀯𑀡𑁆𑀡𑀯𑀦𑁆𑀢𑁄 𑀬𑀲𑀲𑁆𑀲𑀺𑀦𑁄;

𑀫𑁄𑀤𑀫𑀸𑀦𑀸 𑀅𑀪𑀺𑀓𑁆𑀓𑀸𑀫𑀼𑀁, 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀯𑀦𑀁.

‘‘𑀙𑀲𑀳𑀲𑁆𑀲𑀸 𑀳𑁂𑀫𑀯𑀢𑀸, 𑀬𑀓𑁆𑀔𑀸 𑀦𑀸𑀦𑀢𑁆𑀢𑀯𑀡𑁆𑀡𑀺𑀦𑁄;

𑀇𑀤𑁆𑀥𑀺𑀫𑀦𑁆𑀢𑁄 𑀚𑀼𑀢𑀻𑀫𑀦𑁆𑀢𑁄 [𑀚𑀼𑀢𑀻𑀫𑀦𑁆𑀢𑁄 (𑀲𑀻. 𑀧𑀻.)], 𑀯𑀡𑁆𑀡𑀯𑀦𑁆𑀢𑁄 𑀬𑀲𑀲𑁆𑀲𑀺𑀦𑁄;

𑀫𑁄𑀤𑀫𑀸𑀦𑀸 𑀅𑀪𑀺𑀓𑁆𑀓𑀸𑀫𑀼𑀁, 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀯𑀦𑀁.

‘‘𑀲𑀸𑀢𑀸𑀕𑀺𑀭𑀸 𑀢𑀺𑀲𑀳𑀲𑁆𑀲𑀸, 𑀬𑀓𑁆𑀔𑀸 𑀦𑀸𑀦𑀢𑁆𑀢𑀯𑀡𑁆𑀡𑀺𑀦𑁄;

𑀇𑀤𑁆𑀥𑀺𑀫𑀦𑁆𑀢𑁄 𑀚𑀼𑀢𑀺𑀫𑀦𑁆𑀢𑁄, 𑀯𑀡𑁆𑀡𑀯𑀦𑁆𑀢𑁄 𑀬𑀲𑀲𑁆𑀲𑀺𑀦𑁄;

𑀫𑁄𑀤𑀫𑀸𑀦𑀸 𑀅𑀪𑀺𑀓𑁆𑀓𑀸𑀫𑀼𑀁, 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀯𑀦𑀁.

‘‘𑀇𑀘𑁆𑀘𑁂𑀢𑁂 ¶ 𑀲𑁄𑀴𑀲𑀲𑀳𑀲𑁆𑀲𑀸, 𑀬𑀓𑁆𑀔𑀸 𑀦𑀸𑀦𑀢𑁆𑀢𑀯𑀡𑁆𑀡𑀺𑀦𑁄;

𑀇𑀤𑁆𑀥𑀺𑀫𑀦𑁆𑀢𑁄 𑀚𑀼𑀢𑀺𑀫𑀦𑁆𑀢𑁄, 𑀯𑀡𑁆𑀡𑀯𑀦𑁆𑀢𑁄 𑀬𑀲𑀲𑁆𑀲𑀺𑀦𑁄;

𑀫𑁄𑀤𑀫𑀸𑀦𑀸 𑀅𑀪𑀺𑀓𑁆𑀓𑀸𑀫𑀼𑀁, 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀯𑀦𑀁.

‘‘𑀯𑁂𑀲𑁆𑀲𑀸𑀫𑀺𑀢𑁆𑀢𑀸 ¶ 𑀧𑀜𑁆𑀘𑀲𑀢𑀸, 𑀬𑀓𑁆𑀔𑀸 𑀦𑀸𑀦𑀢𑁆𑀢𑀯𑀡𑁆𑀡𑀺𑀦𑁄;

𑀇𑀤𑁆𑀥𑀺𑀫𑀦𑁆𑀢𑁄 𑀚𑀼𑀢𑀺𑀫𑀦𑁆𑀢𑁄, 𑀯𑀡𑁆𑀡𑀯𑀦𑁆𑀢𑁄 𑀬𑀲𑀲𑁆𑀲𑀺𑀦𑁄;

𑀫𑁄𑀤𑀫𑀸𑀦𑀸 ¶ 𑀅𑀪𑀺𑀓𑁆𑀓𑀸𑀫𑀼𑀁, 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀯𑀦𑀁.

‘‘𑀓𑀼𑀫𑁆𑀪𑀻𑀭𑁄 𑀭𑀸𑀚𑀕𑀳𑀺𑀓𑁄, 𑀯𑁂𑀧𑀼𑀮𑁆𑀮𑀲𑁆𑀲 𑀦𑀺𑀯𑁂𑀲𑀦𑀁;

𑀪𑀺𑀬𑁆𑀬𑁄 𑀦𑀁 𑀲𑀢𑀲𑀳𑀲𑁆𑀲𑀁, 𑀬𑀓𑁆𑀔𑀸𑀦𑀁 𑀧𑀬𑀺𑀭𑀼𑀧𑀸𑀲𑀢𑀺;

𑀓𑀼𑀫𑁆𑀪𑀻𑀭𑁄 𑀭𑀸𑀚𑀕𑀳𑀺𑀓𑁄, 𑀲𑁄𑀧𑀸𑀕𑀸 𑀲𑀫𑀺𑀢𑀺𑀁 𑀯𑀦𑀁.

𑁩𑁩𑁬. ‘‘𑀧𑀼𑀭𑀺𑀫𑀜𑁆𑀘 𑀤𑀺𑀲𑀁 𑀭𑀸𑀚𑀸, 𑀥𑀢𑀭𑀝𑁆𑀞𑁄 𑀧𑀲𑀸𑀲𑀢𑀺.

𑀕𑀦𑁆𑀥𑀩𑁆𑀩𑀸𑀦𑀁 𑀅𑀥𑀺𑀧𑀢𑀺, 𑀫𑀳𑀸𑀭𑀸𑀚𑀸 𑀬𑀲𑀲𑁆𑀲𑀺𑀲𑁄.

‘‘𑀧𑀼𑀢𑁆𑀢𑀸𑀧𑀺 ¶ 𑀢𑀲𑁆𑀲 𑀩𑀳𑀯𑁄, 𑀇𑀦𑁆𑀤𑀦𑀸𑀫𑀸 𑀫𑀳𑀩𑁆𑀩𑀮𑀸;

𑀇𑀤𑁆𑀥𑀺𑀫𑀦𑁆𑀢𑁄 𑀚𑀼𑀢𑀺𑀫𑀦𑁆𑀢𑁄, 𑀯𑀡𑁆𑀡𑀯𑀦𑁆𑀢𑁄 𑀬𑀲𑀲𑁆𑀲𑀺𑀦𑁄;

𑀫𑁄𑀤𑀫𑀸𑀦𑀸 𑀅𑀪𑀺𑀓𑁆𑀓𑀸𑀫𑀼𑀁, 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀯𑀦𑀁.

‘‘𑀤𑀓𑁆𑀔𑀺𑀡𑀜𑁆𑀘 𑀤𑀺𑀲𑀁 𑀭𑀸𑀚𑀸, 𑀯𑀺𑀭𑀽𑀴𑁆𑀳𑁄 𑀢𑀁 𑀧𑀲𑀸𑀲𑀢𑀺 [𑀢𑀧𑁆𑀧𑀲𑀸𑀲𑀢𑀺 (𑀲𑁆𑀬𑀸.)];

𑀓𑀼𑀫𑁆𑀪𑀡𑁆𑀟𑀸𑀦𑀁 𑀅𑀥𑀺𑀧𑀢𑀺, 𑀫𑀳𑀸𑀭𑀸𑀚𑀸 𑀬𑀲𑀲𑁆𑀲𑀺𑀲𑁄.

‘‘𑀧𑀼𑀢𑁆𑀢𑀸𑀧𑀺 𑀢𑀲𑁆𑀲 𑀩𑀳𑀯𑁄, 𑀇𑀦𑁆𑀤𑀦𑀸𑀫𑀸 𑀫𑀳𑀩𑁆𑀩𑀮𑀸;

𑀇𑀤𑁆𑀥𑀺𑀫𑀦𑁆𑀢𑁄 𑀚𑀼𑀢𑀺𑀫𑀦𑁆𑀢𑁄, 𑀯𑀡𑁆𑀡𑀯𑀦𑁆𑀢𑁄 𑀬𑀲𑀲𑁆𑀲𑀺𑀦𑁄;

𑀫𑁄𑀤𑀫𑀸𑀦𑀸 𑀅𑀪𑀺𑀓𑁆𑀓𑀸𑀫𑀼𑀁, 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀯𑀦𑀁.

‘‘𑀧𑀘𑁆𑀙𑀺𑀫𑀜𑁆𑀘 𑀤𑀺𑀲𑀁 𑀭𑀸𑀚𑀸, 𑀯𑀺𑀭𑀽𑀧𑀓𑁆𑀔𑁄 𑀧𑀲𑀸𑀲𑀢𑀺;

𑀦𑀸𑀕𑀸𑀦𑀜𑁆𑀘 𑀅𑀥𑀺𑀧𑀢𑀺, 𑀫𑀳𑀸𑀭𑀸𑀚𑀸 𑀬𑀲𑀲𑁆𑀲𑀺𑀲𑁄.

‘‘𑀧𑀼𑀢𑁆𑀢𑀸𑀧𑀺 ¶ ¶ 𑀢𑀲𑁆𑀲 𑀩𑀳𑀯𑁄, 𑀇𑀦𑁆𑀤𑀦𑀸𑀫𑀸 𑀫𑀳𑀩𑁆𑀩𑀮𑀸;

𑀇𑀤𑁆𑀥𑀺𑀫𑀦𑁆𑀢𑁄 𑀚𑀼𑀢𑀺𑀫𑀦𑁆𑀢𑁄, 𑀯𑀡𑁆𑀡𑀯𑀦𑁆𑀢𑁄 𑀬𑀲𑀲𑁆𑀲𑀺𑀦𑁄;

𑀫𑁄𑀤𑀫𑀸𑀦𑀸 ¶ 𑀅𑀪𑀺𑀓𑁆𑀓𑀸𑀫𑀼𑀁, 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀯𑀦𑀁.

‘‘𑀉𑀢𑁆𑀢𑀭𑀜𑁆𑀘 𑀤𑀺𑀲𑀁 𑀭𑀸𑀚𑀸, 𑀓𑀼𑀯𑁂𑀭𑁄 𑀢𑀁 𑀧𑀲𑀸𑀲𑀢𑀺;

𑀬𑀓𑁆𑀔𑀸𑀦𑀜𑁆𑀘 𑀅𑀥𑀺𑀧𑀢𑀺, 𑀫𑀳𑀸𑀭𑀸𑀚𑀸 𑀬𑀲𑀲𑁆𑀲𑀺𑀲𑁄.

‘‘𑀧𑀼𑀢𑁆𑀢𑀸𑀧𑀺 𑀢𑀲𑁆𑀲 𑀩𑀳𑀯𑁄, 𑀇𑀦𑁆𑀤𑀦𑀸𑀫𑀸 𑀫𑀳𑀩𑁆𑀩𑀮𑀸;

𑀇𑀤𑁆𑀥𑀺𑀫𑀦𑁆𑀢𑁄 𑀚𑀼𑀢𑀺𑀫𑀦𑁆𑀢𑁄, 𑀯𑀡𑁆𑀡𑀯𑀦𑁆𑀢𑁄 𑀬𑀲𑀲𑁆𑀲𑀺𑀦𑁄;

𑀫𑁄𑀤𑀫𑀸𑀦𑀸 𑀅𑀪𑀺𑀓𑁆𑀓𑀸𑀫𑀼𑀁, 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀯𑀦𑀁.

‘‘𑀧𑀼𑀭𑀺𑀫𑀁 𑀤𑀺𑀲𑀁 𑀥𑀢𑀭𑀝𑁆𑀞𑁄, 𑀤𑀓𑁆𑀔𑀺𑀡𑁂𑀦 𑀯𑀺𑀭𑀽𑀴𑁆𑀳𑀓𑁄;

𑀧𑀘𑁆𑀙𑀺𑀫𑁂𑀦 𑀯𑀺𑀭𑀽𑀧𑀓𑁆𑀔𑁄, 𑀓𑀼𑀯𑁂𑀭𑁄 𑀉𑀢𑁆𑀢𑀭𑀁 𑀤𑀺𑀲𑀁.

‘‘𑀘𑀢𑁆𑀢𑀸𑀭𑁄 𑀢𑁂 𑀫𑀳𑀸𑀭𑀸𑀚𑀸, 𑀲𑀫𑀦𑁆𑀢𑀸 𑀘𑀢𑀼𑀭𑁄 𑀤𑀺𑀲𑀸;

𑀤𑀤𑁆𑀤𑀮𑁆𑀮𑀫𑀸𑀦𑀸 [𑀤𑀤𑁆𑀤𑀴𑁆𑀳𑀫𑀸𑀦𑀸 (𑀓.)] 𑀅𑀝𑁆𑀞𑀁𑀲𑀼, 𑀯𑀦𑁂 𑀓𑀸𑀧𑀺𑀮𑀯𑀢𑁆𑀣𑀯𑁂.

𑁩𑁩𑁭. ‘‘𑀢𑁂𑀲𑀁 𑀫𑀸𑀬𑀸𑀯𑀺𑀦𑁄 𑀤𑀸𑀲𑀸, 𑀆𑀕𑀼𑀁 [𑀆𑀕𑀽 (𑀲𑁆𑀬𑀸.), 𑀆𑀕𑀼 (𑀲𑀻. 𑀧𑀻.) 𑀏𑀯𑀫𑀼𑀧𑀭𑀺𑀧𑀺] 𑀯𑀜𑁆𑀘𑀦𑀺𑀓𑀸 𑀲𑀞𑀸.

𑀫𑀸𑀬𑀸 𑀓𑀼𑀝𑁂𑀡𑁆𑀟𑀼 𑀯𑀺𑀝𑁂𑀡𑁆𑀟𑀼 [𑀯𑁂𑀝𑁂𑀡𑁆𑀟𑀼 (𑀲𑀻. 𑀲𑁆𑀬𑀸. 𑀧𑀻.)], 𑀯𑀺𑀝𑀼𑀘𑁆𑀘 [𑀯𑀺𑀝𑀽 𑀘 (𑀲𑁆𑀬𑀸.)] 𑀯𑀺𑀝𑀼𑀝𑁄 𑀲𑀳.

‘‘𑀘𑀦𑁆𑀤𑀦𑁄 𑀓𑀸𑀫𑀲𑁂𑀝𑁆𑀞𑁄 𑀘, 𑀓𑀺𑀦𑁆𑀦𑀺𑀖𑀡𑁆𑀟𑀼 [𑀓𑀺𑀦𑁆𑀦𑀼𑀖𑀡𑁆𑀟𑀼 (𑀲𑀻. 𑀲𑁆𑀬𑀸. 𑀧𑀻.)] 𑀦𑀺𑀖𑀡𑁆𑀟𑀼 𑀘;

𑀧𑀦𑀸𑀤𑁄 𑀑𑀧𑀫𑀜𑁆𑀜𑁄 𑀘, 𑀤𑁂𑀯𑀲𑀽𑀢𑁄 𑀘 𑀫𑀸𑀢𑀮𑀺.

‘‘𑀘𑀺𑀢𑁆𑀢𑀲𑁂𑀦𑁄 ¶ 𑀘 𑀕𑀦𑁆𑀥𑀩𑁆𑀩𑁄, 𑀦𑀴𑁄𑀭𑀸𑀚𑀸 𑀚𑀦𑁂𑀲𑀪𑁄 [𑀚𑀦𑁄𑀲𑀪𑁄 (𑀲𑁆𑀬𑀸.)];

𑀆𑀕𑀸 𑀧𑀜𑁆𑀘𑀲𑀺𑀔𑁄 𑀘𑁂𑀯, 𑀢𑀺𑀫𑁆𑀩𑀭𑀽 𑀲𑀽𑀭𑀺𑀬𑀯𑀘𑁆𑀘𑀲𑀸 [𑀲𑀼𑀭𑀺𑀬𑀯𑀘𑁆𑀘𑀲𑀸 (𑀲𑀻. 𑀧𑀻.)].

‘‘𑀏𑀢𑁂 𑀘𑀜𑁆𑀜𑁂 𑀘 𑀭𑀸𑀚𑀸𑀦𑁄, 𑀕𑀦𑁆𑀥𑀩𑁆𑀩𑀸 𑀲𑀳 𑀭𑀸𑀚𑀼𑀪𑀺;

𑀫𑁄𑀤𑀫𑀸𑀦𑀸 𑀅𑀪𑀺𑀓𑁆𑀓𑀸𑀫𑀼𑀁, 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀯𑀦𑀁.

𑁩𑁩𑁮. ‘‘𑀅𑀣𑀸𑀕𑀼𑀁 ¶ 𑀦𑀸𑀕𑀲𑀸 𑀦𑀸𑀕𑀸, 𑀯𑁂𑀲𑀸𑀮𑀸 𑀲𑀳𑀢𑀘𑁆𑀙𑀓𑀸.

𑀓𑀫𑁆𑀩𑀮𑀲𑁆𑀲𑀢𑀭𑀸 ¶ 𑀆𑀕𑀼𑀁, 𑀧𑀸𑀬𑀸𑀕𑀸 𑀲𑀳 𑀜𑀸𑀢𑀺𑀪𑀺.

‘‘𑀬𑀸𑀫𑀼𑀦𑀸 𑀥𑀢𑀭𑀝𑁆𑀞𑀸 𑀘, 𑀆𑀕𑀽 𑀦𑀸𑀕𑀸 𑀬𑀲𑀲𑁆𑀲𑀺𑀦𑁄;

𑀏𑀭𑀸𑀯𑀡𑁄 𑀫𑀳𑀸𑀦𑀸𑀕𑁄, 𑀲𑁄𑀧𑀸𑀕𑀸 𑀲𑀫𑀺𑀢𑀺𑀁 𑀯𑀦𑀁.

‘‘𑀬𑁂 𑀦𑀸𑀕𑀭𑀸𑀚𑁂 𑀲𑀳𑀲𑀸 𑀳𑀭𑀦𑁆𑀢𑀺, 𑀤𑀺𑀩𑁆𑀩𑀸 𑀤𑀺𑀚𑀸 𑀧𑀓𑁆𑀔𑀺 𑀯𑀺𑀲𑀼𑀤𑁆𑀥𑀘𑀓𑁆𑀔𑀽;

𑀯𑁂𑀳𑀸𑀬𑀲𑀸 ¶ [𑀯𑁂𑀳𑀸𑀲𑀬𑀸 (𑀲𑀻. 𑀧𑀻.)] 𑀢𑁂 𑀯𑀦𑀫𑀚𑁆𑀛𑀧𑀢𑁆𑀢𑀸, 𑀘𑀺𑀢𑁆𑀭𑀸 𑀲𑀼𑀧𑀡𑁆𑀡𑀸 𑀇𑀢𑀺 𑀢𑁂𑀲 𑀦𑀸𑀫𑀁.

‘‘𑀅𑀪𑀬𑀁 𑀢𑀤𑀸 𑀦𑀸𑀕𑀭𑀸𑀚𑀸𑀦𑀫𑀸𑀲𑀺, 𑀲𑀼𑀧𑀡𑁆𑀡𑀢𑁄 𑀔𑁂𑀫𑀫𑀓𑀸𑀲𑀺 𑀩𑀼𑀤𑁆𑀥𑁄;

𑀲𑀡𑁆𑀳𑀸𑀳𑀺 𑀯𑀸𑀘𑀸𑀳𑀺 𑀉𑀧𑀯𑁆𑀳𑀬𑀦𑁆𑀢𑀸, 𑀦𑀸𑀕𑀸 𑀲𑀼𑀧𑀡𑁆𑀡𑀸 𑀲𑀭𑀡𑀫𑀓𑀁𑀲𑀼 𑀩𑀼𑀤𑁆𑀥𑀁.

𑁩𑁩𑁯. ‘‘𑀚𑀺𑀢𑀸 𑀯𑀚𑀺𑀭𑀳𑀢𑁆𑀣𑁂𑀦, 𑀲𑀫𑀼𑀤𑁆𑀤𑀁 𑀅𑀲𑀼𑀭𑀸𑀲𑀺𑀢𑀸.

𑀪𑀸𑀢𑀭𑁄 𑀯𑀸𑀲𑀯𑀲𑁆𑀲𑁂𑀢𑁂, 𑀇𑀤𑁆𑀥𑀺𑀫𑀦𑁆𑀢𑁄 𑀬𑀲𑀲𑁆𑀲𑀺𑀦𑁄.

‘‘𑀓𑀸𑀮𑀓𑀜𑁆𑀘𑀸 𑀫𑀳𑀸𑀪𑀺𑀲𑁆𑀫𑀸 [𑀓𑀸𑀮𑀓𑀜𑁆𑀚𑀸 𑀫𑀳𑀸𑀪𑀺𑀁𑀲𑀸 (𑀲𑀻. 𑀧𑀻.)], 𑀅𑀲𑀼𑀭𑀸 𑀤𑀸𑀦𑀯𑁂𑀖𑀲𑀸;

𑀯𑁂𑀧𑀘𑀺𑀢𑁆𑀢𑀺 𑀲𑀼𑀘𑀺𑀢𑁆𑀢𑀺 𑀘, 𑀧𑀳𑀸𑀭𑀸𑀤𑁄 𑀦𑀫𑀼𑀘𑀻 𑀲𑀳.

‘‘𑀲𑀢𑀜𑁆𑀘 𑀩𑀮𑀺𑀧𑀼𑀢𑁆𑀢𑀸𑀦𑀁, 𑀲𑀩𑁆𑀩𑁂 𑀯𑁂𑀭𑁄𑀘𑀦𑀸𑀫𑀓𑀸;

𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀩𑀮𑀺𑀲𑁂𑀦𑀁 [𑀩𑀮𑀻𑀲𑁂𑀦𑀁 (𑀲𑁆𑀬𑀸.)], 𑀭𑀸𑀳𑀼𑀪𑀤𑁆𑀤𑀫𑀼𑀧𑀸𑀕𑀫𑀼𑀁;

𑀲𑀫𑀬𑁄𑀤𑀸𑀦𑀺 𑀪𑀤𑁆𑀤𑀦𑁆𑀢𑁂, 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀯𑀦𑀁.

𑁩𑁪𑁦. ‘‘𑀆𑀧𑁄 𑀘 𑀤𑁂𑀯𑀸 𑀧𑀣𑀯𑀻, 𑀢𑁂𑀚𑁄 𑀯𑀸𑀬𑁄 𑀢𑀤𑀸𑀕𑀫𑀼𑀁.

𑀯𑀭𑀼𑀡𑀸 𑀯𑀸𑀭𑀡𑀸 [𑀯𑀸𑀭𑀼𑀡𑀸 (𑀲𑁆𑀬𑀸.)] 𑀤𑁂𑀯𑀸, 𑀲𑁄𑀫𑁄 𑀘 𑀬𑀲𑀲𑀸 𑀲𑀳.

‘‘𑀫𑁂𑀢𑁆𑀢𑀸 ¶ 𑀓𑀭𑀼𑀡𑀸 𑀓𑀸𑀬𑀺𑀓𑀸, 𑀆𑀕𑀼𑀁 𑀤𑁂𑀯𑀸 𑀬𑀲𑀲𑁆𑀲𑀺𑀦𑁄;

𑀤𑀲𑁂𑀢𑁂 𑀤𑀲𑀥𑀸 𑀓𑀸𑀬𑀸, 𑀲𑀩𑁆𑀩𑁂 𑀦𑀸𑀦𑀢𑁆𑀢𑀯𑀡𑁆𑀡𑀺𑀦𑁄.

‘‘𑀇𑀤𑁆𑀥𑀺𑀫𑀦𑁆𑀢𑁄 ¶ 𑀚𑀼𑀢𑀺𑀫𑀦𑁆𑀢𑁄, 𑀯𑀡𑁆𑀡𑀯𑀦𑁆𑀢𑁄 𑀬𑀲𑀲𑁆𑀲𑀺𑀦𑁄;

𑀫𑁄𑀤𑀫𑀸𑀦𑀸 𑀅𑀪𑀺𑀓𑁆𑀓𑀸𑀫𑀼𑀁, 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀯𑀦𑀁.

‘‘𑀯𑁂𑀡𑁆𑀟𑀼𑀤𑁂𑀯𑀸 ¶ 𑀲𑀳𑀮𑀺 𑀘 [𑀯𑁂𑀡𑁆𑀳𑀽𑀘 𑀤𑁂𑀯𑀸 𑀲𑀳𑀮𑀻𑀘 (𑀲𑀻. 𑀧𑀻.)], 𑀅𑀲𑀫𑀸 𑀘 𑀤𑀼𑀯𑁂 𑀬𑀫𑀸;

𑀘𑀦𑁆𑀤𑀲𑁆𑀲𑀽𑀧𑀦𑀺𑀲𑀸 𑀤𑁂𑀯𑀸, 𑀘𑀦𑁆𑀤𑀫𑀸𑀕𑀼𑀁 𑀧𑀼𑀭𑀓𑁆𑀔𑀢𑁆𑀯𑀸.

‘‘𑀲𑀽𑀭𑀺𑀬𑀲𑁆𑀲𑀽𑀧𑀦𑀺𑀲𑀸 [𑀲𑀼𑀭𑀺𑀬𑀲𑁆𑀲𑀽𑀧𑀦𑀺𑀲𑀸 (𑀲𑀻. 𑀲𑁆𑀬𑀸. 𑀧𑀻.)] 𑀤𑁂𑀯𑀸, 𑀲𑀽𑀭𑀺𑀬𑀫𑀸𑀕𑀼𑀁 𑀧𑀼𑀭𑀓𑁆𑀔𑀢𑁆𑀯𑀸;

𑀦𑀓𑁆𑀔𑀢𑁆𑀢𑀸𑀦𑀺 𑀧𑀼𑀭𑀓𑁆𑀔𑀢𑁆𑀯𑀸, 𑀆𑀕𑀼𑀁 𑀫𑀦𑁆𑀤𑀯𑀮𑀸𑀳𑀓𑀸.

‘‘𑀯𑀲𑀽𑀦𑀁 ¶ 𑀯𑀸𑀲𑀯𑁄 𑀲𑁂𑀝𑁆𑀞𑁄, 𑀲𑀓𑁆𑀓𑁄𑀧𑀸𑀕𑀸 𑀧𑀼𑀭𑀺𑀦𑁆𑀤𑀤𑁄;

𑀤𑀲𑁂𑀢𑁂 𑀤𑀲𑀥𑀸 𑀓𑀸𑀬𑀸, 𑀲𑀩𑁆𑀩𑁂 𑀦𑀸𑀦𑀢𑁆𑀢𑀯𑀡𑁆𑀡𑀺𑀦𑁄.

‘‘𑀇𑀤𑁆𑀥𑀺𑀫𑀦𑁆𑀢𑁄 𑀚𑀼𑀢𑀺𑀫𑀦𑁆𑀢𑁄, 𑀯𑀡𑁆𑀡𑀯𑀦𑁆𑀢𑁄 𑀬𑀲𑀲𑁆𑀲𑀺𑀦𑁄;

𑀫𑁄𑀤𑀫𑀸𑀦𑀸 𑀅𑀪𑀺𑀓𑁆𑀓𑀸𑀫𑀼𑀁, 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀯𑀦𑀁.

‘‘𑀅𑀣𑀸𑀕𑀼𑀁 𑀲𑀳𑀪𑀽 𑀤𑁂𑀯𑀸, 𑀚𑀮𑀫𑀕𑁆𑀕𑀺𑀲𑀺𑀔𑀸𑀭𑀺𑀯;

𑀅𑀭𑀺𑀝𑁆𑀞𑀓𑀸 𑀘 𑀭𑁄𑀚𑀸 𑀘, 𑀉𑀫𑀸𑀧𑀼𑀧𑁆𑀨𑀦𑀺𑀪𑀸𑀲𑀺𑀦𑁄.

‘‘𑀯𑀭𑀼𑀡𑀸 𑀲𑀳𑀥𑀫𑁆𑀫𑀸 𑀘, 𑀅𑀘𑁆𑀘𑀼𑀢𑀸 𑀘 𑀅𑀦𑁂𑀚𑀓𑀸;

𑀲𑀽𑀮𑁂𑀬𑁆𑀬𑀭𑀼𑀘𑀺𑀭𑀸 𑀆𑀕𑀼𑀁, 𑀆𑀕𑀼𑀁 𑀯𑀸𑀲𑀯𑀦𑁂𑀲𑀺𑀦𑁄;

𑀤𑀲𑁂𑀢𑁂 𑀤𑀲𑀥𑀸 𑀓𑀸𑀬𑀸, 𑀲𑀩𑁆𑀩𑁂 𑀦𑀸𑀦𑀢𑁆𑀢𑀯𑀡𑁆𑀡𑀺𑀦𑁄.

‘‘𑀇𑀤𑁆𑀥𑀺𑀫𑀦𑁆𑀢𑁄 𑀚𑀼𑀢𑀺𑀫𑀦𑁆𑀢𑁄, 𑀯𑀡𑁆𑀡𑀯𑀦𑁆𑀢𑁄 𑀬𑀲𑀲𑁆𑀲𑀺𑀦𑁄;

𑀫𑁄𑀤𑀫𑀸𑀦𑀸 𑀅𑀪𑀺𑀓𑁆𑀓𑀸𑀫𑀼𑀁, 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀯𑀦𑀁.

‘‘𑀲𑀫𑀸𑀦𑀸 𑀫𑀳𑀸𑀲𑀫𑀦𑀸, 𑀫𑀸𑀦𑀼𑀲𑀸 𑀫𑀸𑀦𑀼𑀲𑀼𑀢𑁆𑀢𑀫𑀸;

𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸 ¶ 𑀆𑀕𑀼𑀁, 𑀆𑀕𑀼𑀁 𑀫𑀦𑁄𑀧𑀤𑁄𑀲𑀺𑀓𑀸.

‘‘𑀅𑀣𑀸𑀕𑀼𑀁 𑀳𑀭𑀬𑁄 𑀤𑁂𑀯𑀸, 𑀬𑁂 𑀘 𑀮𑁄𑀳𑀺𑀢𑀯𑀸𑀲𑀺𑀦𑁄;

𑀧𑀸𑀭𑀕𑀸 𑀫𑀳𑀸𑀧𑀸𑀭𑀕𑀸, 𑀆𑀕𑀼𑀁 𑀤𑁂𑀯𑀸 𑀬𑀲𑀲𑁆𑀲𑀺𑀦𑁄;

𑀤𑀲𑁂𑀢𑁂 𑀤𑀲𑀥𑀸 𑀓𑀸𑀬𑀸, 𑀲𑀩𑁆𑀩𑁂 𑀦𑀸𑀦𑀢𑁆𑀢𑀯𑀡𑁆𑀡𑀺𑀦𑁄.

‘‘𑀇𑀤𑁆𑀥𑀺𑀫𑀦𑁆𑀢𑁄 ¶ 𑀚𑀼𑀢𑀺𑀫𑀦𑁆𑀢𑁄, 𑀯𑀡𑁆𑀡𑀯𑀦𑁆𑀢𑁄 𑀬𑀲𑀲𑁆𑀲𑀺𑀦𑁄;

𑀫𑁄𑀤𑀫𑀸𑀦𑀸 𑀅𑀪𑀺𑀓𑁆𑀓𑀸𑀫𑀼𑀁, 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀯𑀦𑀁.

‘‘𑀲𑀼𑀓𑁆𑀓𑀸 𑀓𑀭𑀫𑁆𑀪𑀸 [𑀓𑀭𑀼𑀫𑁆𑀳𑀸 (𑀲𑀻. 𑀲𑁆𑀬𑀸. 𑀧𑀻.)] 𑀅𑀭𑀼𑀡𑀸, 𑀆𑀕𑀼𑀁 𑀯𑁂𑀖𑀦𑀲𑀸 𑀲𑀳;

𑀑𑀤𑀸𑀢𑀕𑀬𑁆𑀳𑀸 𑀧𑀸𑀫𑁄𑀓𑁆𑀔𑀸, 𑀆𑀕𑀼𑀁 𑀤𑁂𑀯𑀸 𑀯𑀺𑀘𑀓𑁆𑀔𑀡𑀸.

‘‘𑀲𑀤𑀸𑀫𑀢𑁆𑀢𑀸 ¶ 𑀳𑀸𑀭𑀕𑀚𑀸, 𑀫𑀺𑀲𑁆𑀲𑀓𑀸 𑀘 𑀬𑀲𑀲𑁆𑀲𑀺𑀦𑁄;

𑀣𑀦𑀬𑀁 𑀆𑀕 𑀧𑀚𑁆𑀚𑀼𑀦𑁆𑀦𑁄, 𑀬𑁄 𑀤𑀺𑀲𑀸 𑀅𑀪𑀺𑀯𑀲𑁆𑀲𑀢𑀺.

‘‘𑀤𑀲𑁂𑀢𑁂 𑀤𑀲𑀥𑀸 𑀓𑀸𑀬𑀸, 𑀲𑀩𑁆𑀩𑁂 𑀦𑀸𑀦𑀢𑁆𑀢𑀯𑀡𑁆𑀡𑀺𑀦𑁄;

𑀇𑀤𑁆𑀥𑀺𑀫𑀦𑁆𑀢𑁄 𑀚𑀼𑀢𑀺𑀫𑀦𑁆𑀢𑁄, 𑀯𑀡𑁆𑀡𑀯𑀦𑁆𑀢𑁄 𑀬𑀲𑀲𑁆𑀲𑀺𑀦𑁄;

𑀫𑁄𑀤𑀫𑀸𑀦𑀸 𑀅𑀪𑀺𑀓𑁆𑀓𑀸𑀫𑀼𑀁, 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀯𑀦𑀁.

‘‘𑀔𑁂𑀫𑀺𑀬𑀸 ¶ 𑀢𑀼𑀲𑀺𑀢𑀸 𑀬𑀸𑀫𑀸, 𑀓𑀝𑁆𑀞𑀓𑀸 𑀘 𑀬𑀲𑀲𑁆𑀲𑀺𑀦𑁄;

𑀮𑀫𑁆𑀩𑀻𑀢𑀓𑀸 𑀮𑀸𑀫𑀲𑁂𑀝𑁆𑀞𑀸, 𑀚𑁄𑀢𑀺𑀦𑀸𑀫𑀸 𑀘 𑀆𑀲𑀯𑀸;

𑀦𑀺𑀫𑁆𑀫𑀸𑀦𑀭𑀢𑀺𑀦𑁄 𑀆𑀕𑀼𑀁, 𑀅𑀣𑀸𑀕𑀼𑀁 𑀧𑀭𑀦𑀺𑀫𑁆𑀫𑀺𑀢𑀸.

‘‘𑀤𑀲𑁂𑀢𑁂 𑀤𑀲𑀥𑀸 𑀓𑀸𑀬𑀸, 𑀲𑀩𑁆𑀩𑁂 𑀦𑀸𑀦𑀢𑁆𑀢𑀯𑀡𑁆𑀡𑀺𑀦𑁄;

𑀇𑀤𑁆𑀥𑀺𑀫𑀦𑁆𑀢𑁄 𑀚𑀼𑀢𑀺𑀫𑀦𑁆𑀢𑁄, 𑀯𑀡𑁆𑀡𑀯𑀦𑁆𑀢𑁄 𑀬𑀲𑀲𑁆𑀲𑀺𑀦𑁄;

𑀫𑁄𑀤𑀫𑀸𑀦𑀸 𑀅𑀪𑀺𑀓𑁆𑀓𑀸𑀫𑀼𑀁, 𑀪𑀺𑀓𑁆𑀔𑀽𑀦𑀁 𑀲𑀫𑀺𑀢𑀺𑀁 𑀯𑀦𑀁.

‘‘𑀲𑀝𑁆𑀞𑁂𑀢𑁂 ¶ 𑀤𑁂𑀯𑀦𑀺𑀓𑀸𑀬𑀸, 𑀲𑀩𑁆𑀩𑁂 𑀦𑀸𑀦𑀢𑁆𑀢𑀯𑀡𑁆𑀡𑀺𑀦𑁄;

𑀦𑀸𑀫𑀦𑁆𑀯𑀬𑁂𑀦 𑀆𑀕𑀘𑁆𑀙𑀼𑀁 [𑀆𑀕𑀜𑁆𑀙𑀼𑀁 (𑀲𑀻. 𑀲𑁆𑀬𑀸. 𑀧𑀻.)], 𑀬𑁂 𑀘𑀜𑁆𑀜𑁂 𑀲𑀤𑀺𑀲𑀸 𑀲𑀳.

‘‘‘𑀧𑀯𑀼𑀝𑁆𑀞𑀚𑀸𑀢𑀺𑀫𑀔𑀺𑀮𑀁 [𑀧𑀯𑀼𑀢𑁆𑀣𑀚𑀸𑀢𑀺𑀁 𑀅𑀔𑀺𑀮𑀁 (𑀲𑀻. 𑀧𑀻.)], 𑀑𑀖𑀢𑀺𑀡𑁆𑀡𑀫𑀦𑀸𑀲𑀯𑀁;

𑀤𑀓𑁆𑀔𑁂𑀫𑁄𑀖𑀢𑀭𑀁 𑀦𑀸𑀕𑀁, 𑀘𑀦𑁆𑀤𑀁𑀯 𑀅𑀲𑀺𑀢𑀸𑀢𑀺𑀕𑀁’.

𑁩𑁪𑁧. ‘‘𑀲𑀼𑀩𑁆𑀭𑀳𑁆𑀫𑀸 𑀧𑀭𑀫𑀢𑁆𑀢𑁄 𑀘 [𑀧𑀭𑀫𑀢𑁆𑀣𑁄 𑀘 (𑀓.)], 𑀧𑀼𑀢𑁆𑀢𑀸 𑀇𑀤𑁆𑀥𑀺𑀫𑀢𑁄 𑀲𑀳.

𑀲𑀦𑀗𑁆𑀓𑀼𑀫𑀸𑀭𑁄 𑀢𑀺𑀲𑁆𑀲𑁄 𑀘, 𑀲𑁄𑀧𑀸𑀕 𑀲𑀫𑀺𑀢𑀺𑀁 𑀯𑀦𑀁.

‘‘𑀲𑀳𑀲𑁆𑀲𑀁 ¶ 𑀩𑁆𑀭𑀳𑁆𑀫𑀮𑁄𑀓𑀸𑀦𑀁, 𑀫𑀳𑀸𑀩𑁆𑀭𑀳𑁆𑀫𑀸𑀪𑀺𑀢𑀺𑀝𑁆𑀞𑀢𑀺;

𑀉𑀧𑀧𑀦𑁆𑀦𑁄 𑀚𑀼𑀢𑀺𑀫𑀦𑁆𑀢𑁄, 𑀪𑀺𑀲𑁆𑀫𑀸𑀓𑀸𑀬𑁄 𑀬𑀲𑀲𑁆𑀲𑀺𑀲𑁄.

‘‘𑀤𑀲𑁂𑀢𑁆𑀣 𑀇𑀲𑁆𑀲𑀭𑀸 𑀆𑀕𑀼𑀁, 𑀧𑀘𑁆𑀘𑁂𑀓𑀯𑀲𑀯𑀢𑁆𑀢𑀺𑀦𑁄;

𑀢𑁂𑀲𑀜𑁆𑀘 𑀫𑀚𑁆𑀛𑀢𑁄 𑀆𑀕, 𑀳𑀸𑀭𑀺𑀢𑁄 𑀧𑀭𑀺𑀯𑀸𑀭𑀺𑀢𑁄.

𑁩𑁪𑁨. ‘‘𑀢𑁂 𑀘 𑀲𑀩𑁆𑀩𑁂 𑀅𑀪𑀺𑀓𑁆𑀓𑀦𑁆𑀢𑁂, 𑀲𑀇𑀦𑁆𑀤𑁂 [𑀲𑀺𑀦𑁆𑀤𑁂 (𑀲𑁆𑀬𑀸.)] 𑀤𑁂𑀯𑁂 𑀲𑀩𑁆𑀭𑀳𑁆𑀫𑀓𑁂.

𑀫𑀸𑀭𑀲𑁂𑀦𑀸 𑀅𑀪𑀺𑀓𑁆𑀓𑀸𑀫𑀺, 𑀧𑀲𑁆𑀲 𑀓𑀡𑁆𑀳𑀲𑁆𑀲 𑀫𑀦𑁆𑀤𑀺𑀬𑀁.

‘‘‘𑀏𑀣 ¶ 𑀕𑀡𑁆𑀳𑀣 𑀩𑀦𑁆𑀥𑀣, 𑀭𑀸𑀕𑁂𑀦 𑀩𑀤𑁆𑀥𑀫𑀢𑁆𑀣𑀼 𑀯𑁄;

𑀲𑀫𑀦𑁆𑀢𑀸 𑀧𑀭𑀺𑀯𑀸𑀭𑁂𑀣, 𑀫𑀸 𑀯𑁄 𑀫𑀼𑀜𑁆𑀘𑀺𑀢𑁆𑀣 𑀓𑁄𑀘𑀺 𑀦𑀁’.

‘‘𑀇𑀢𑀺 ¶ 𑀢𑀢𑁆𑀣 𑀫𑀳𑀸𑀲𑁂𑀦𑁄, 𑀓𑀡𑁆𑀳𑁄 𑀲𑁂𑀦𑀁 𑀅𑀧𑁂𑀲𑀬𑀺;

𑀧𑀸𑀡𑀺𑀦𑀸 𑀢𑀮𑀫𑀸𑀳𑀘𑁆𑀘, 𑀲𑀭𑀁 𑀓𑀢𑁆𑀯𑀸𑀦 𑀪𑁂𑀭𑀯𑀁.

‘‘𑀬𑀣𑀸 𑀧𑀸𑀯𑀼𑀲𑁆𑀲𑀓𑁄 𑀫𑁂𑀖𑁄, 𑀣𑀦𑀬𑀦𑁆𑀢𑁄 𑀲𑀯𑀺𑀚𑁆𑀚𑀼𑀓𑁄; +

𑀢𑀤𑀸 𑀲𑁄 𑀧𑀘𑁆𑀘𑀼𑀤𑀸𑀯𑀢𑁆𑀢𑀺, 𑀲𑀗𑁆𑀓𑀼𑀤𑁆𑀥𑁄 𑀅𑀲𑀬𑀁𑀯𑀲𑁂 [𑀅𑀲𑀬𑀁𑀯𑀲𑀻 (𑀲𑀻. 𑀧𑀻.)].

𑁩𑁪𑁩. 𑀢𑀜𑁆𑀘 𑀲𑀩𑁆𑀩𑀁 𑀅𑀪𑀺𑀜𑁆𑀜𑀸𑀬, 𑀯𑀯𑀢𑁆𑀣𑀺𑀢𑁆𑀯𑀸𑀦 𑀘𑀓𑁆𑀔𑀼𑀫𑀸.

𑀢𑀢𑁄 ¶ 𑀆𑀫𑀦𑁆𑀢𑀬𑀻 𑀲𑀢𑁆𑀣𑀸, 𑀲𑀸𑀯𑀓𑁂 𑀲𑀸𑀲𑀦𑁂 𑀭𑀢𑁂.

‘‘𑀫𑀸𑀭𑀲𑁂𑀦𑀸 𑀅𑀪𑀺𑀓𑁆𑀓𑀦𑁆𑀢𑀸, 𑀢𑁂 𑀯𑀺𑀚𑀸𑀦𑀸𑀣 𑀪𑀺𑀓𑁆𑀔𑀯𑁄;

𑀢𑁂 𑀘 𑀆𑀢𑀧𑁆𑀧𑀫𑀓𑀭𑀼𑀁, 𑀲𑀼𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;

𑀯𑀻𑀢𑀭𑀸𑀕𑁂𑀳𑀺 𑀧𑀓𑁆𑀓𑀸𑀫𑀼𑀁, 𑀦𑁂𑀲𑀁 𑀮𑁄𑀫𑀸𑀧𑀺 𑀇𑀜𑁆𑀚𑀬𑀼𑀁.

‘‘‘𑀲𑀩𑁆𑀩𑁂 𑀯𑀺𑀚𑀺𑀢𑀲𑀗𑁆𑀕𑀸𑀫𑀸, 𑀪𑀬𑀸𑀢𑀻𑀢𑀸 𑀬𑀲𑀲𑁆𑀲𑀺𑀦𑁄;

𑀫𑁄𑀤𑀦𑁆𑀢𑀺 𑀲𑀳 𑀪𑀽𑀢𑁂𑀳𑀺, 𑀲𑀸𑀯𑀓𑀸 𑀢𑁂 𑀚𑀦𑁂𑀲𑀼𑀢𑀸’’𑀢𑀺.

𑀫𑀳𑀸𑀲𑀫𑀬𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀲𑀢𑁆𑀢𑀫𑀁.

𑁮. 𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑀁

𑁩𑁪𑁪. 𑀏𑀯𑀁 ¶ ¶ ¶ ¶ 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀫𑀕𑀥𑁂𑀲𑀼 𑀯𑀺𑀳𑀭𑀢𑀺, 𑀧𑀸𑀘𑀻𑀦𑀢𑁄 𑀭𑀸𑀚𑀕𑀳𑀲𑁆𑀲 𑀅𑀫𑁆𑀩𑀲𑀡𑁆𑀟𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄, 𑀢𑀲𑁆𑀲𑀼𑀢𑁆𑀢𑀭𑀢𑁄 𑀯𑁂𑀤𑀺𑀬𑀓𑁂 𑀧𑀩𑁆𑀩𑀢𑁂 𑀇𑀦𑁆𑀤𑀲𑀸𑀮𑀕𑀼𑀳𑀸𑀬𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀉𑀲𑁆𑀲𑀼𑀓𑁆𑀓𑀁 𑀉𑀤𑀧𑀸𑀤𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬. 𑀅𑀣 𑀔𑁄 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀓𑀳𑀁 𑀦𑀼 𑀔𑁄 𑀪𑀕𑀯𑀸 𑀏𑀢𑀭𑀳𑀺 𑀯𑀺𑀳𑀭𑀢𑀺 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺? 𑀅𑀤𑁆𑀤𑀲𑀸 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀦𑁆𑀢𑀁 𑀫𑀕𑀥𑁂𑀲𑀼 𑀯𑀺𑀳𑀭𑀦𑁆𑀢𑀁 𑀧𑀸𑀘𑀻𑀦𑀢𑁄 𑀭𑀸𑀚𑀕𑀳𑀲𑁆𑀲 𑀅𑀫𑁆𑀩𑀲𑀡𑁆𑀟𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄, 𑀢𑀲𑁆𑀲𑀼𑀢𑁆𑀢𑀭𑀢𑁄 𑀯𑁂𑀤𑀺𑀬𑀓𑁂 𑀧𑀩𑁆𑀩𑀢𑁂 𑀇𑀦𑁆𑀤𑀲𑀸𑀮𑀕𑀼𑀳𑀸𑀬𑀁. 𑀤𑀺𑀲𑁆𑀯𑀸𑀦 𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀬𑀁, 𑀫𑀸𑀭𑀺𑀲𑀸, 𑀪𑀕𑀯𑀸 𑀫𑀕𑀥𑁂𑀲𑀼 𑀯𑀺𑀳𑀭𑀢𑀺, 𑀧𑀸𑀘𑀻𑀦𑀢𑁄 𑀭𑀸𑀚𑀕𑀳𑀲𑁆𑀲 𑀅𑀫𑁆𑀩𑀲𑀡𑁆𑀟𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄, 𑀢𑀲𑁆𑀲𑀼𑀢𑁆𑀢𑀭𑀢𑁄 𑀯𑁂𑀤𑀺𑀬𑀓𑁂 𑀧𑀩𑁆𑀩𑀢𑁂 𑀇𑀦𑁆𑀤𑀲𑀸𑀮𑀕𑀼𑀳𑀸𑀬𑀁. 𑀬𑀤𑀺 𑀧𑀦, 𑀫𑀸𑀭𑀺𑀲𑀸, 𑀫𑀬𑀁 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺? ‘‘𑀏𑀯𑀁 𑀪𑀤𑁆𑀤𑀦𑁆𑀢𑀯𑀸’’𑀢𑀺 𑀔𑁄 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀼𑀁.

𑁩𑁪𑁫. 𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀜𑁆𑀘𑀲𑀺𑀔𑀁 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑀁 [𑀕𑀦𑁆𑀥𑀩𑁆𑀩𑀧𑀼𑀢𑁆𑀢𑀁 (𑀲𑁆𑀬𑀸.)] 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀬𑀁, 𑀢𑀸𑀢 𑀧𑀜𑁆𑀘𑀲𑀺𑀔, 𑀪𑀕𑀯𑀸 𑀫𑀕𑀥𑁂𑀲𑀼 𑀯𑀺𑀳𑀭𑀢𑀺 𑀧𑀸𑀘𑀻𑀦𑀢𑁄 𑀭𑀸𑀚𑀕𑀳𑀲𑁆𑀲 𑀅𑀫𑁆𑀩𑀲𑀡𑁆𑀟𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄, 𑀢𑀲𑁆𑀲𑀼𑀢𑁆𑀢𑀭𑀢𑁄 𑀯𑁂𑀤𑀺𑀬𑀓𑁂 𑀧𑀩𑁆𑀩𑀢𑁂 𑀇𑀦𑁆𑀤𑀲𑀸𑀮𑀕𑀼𑀳𑀸𑀬𑀁. 𑀬𑀤𑀺 𑀧𑀦 ¶ , 𑀢𑀸𑀢 𑀧𑀜𑁆𑀘𑀲𑀺𑀔, 𑀫𑀬𑀁 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺? ‘‘𑀏𑀯𑀁 𑀪𑀤𑁆𑀤𑀦𑁆𑀢𑀯𑀸’’𑀢𑀺 𑀔𑁄 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑁄 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀩𑁂𑀮𑀼𑀯𑀧𑀡𑁆𑀟𑀼𑀯𑀻𑀡𑀁 𑀆𑀤𑀸𑀬 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀅𑀦𑀼𑀘𑀭𑀺𑀬𑀁 𑀉𑀧𑀸𑀕𑀫𑀺.

𑁩𑁪𑁬. 𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑁂𑀯𑁂𑀳𑀺 𑀢𑀸𑀯𑀢𑀺𑀁𑀲𑁂𑀳𑀺 𑀧𑀭𑀺𑀯𑀼𑀢𑁄 𑀧𑀜𑁆𑀘𑀲𑀺𑀔𑁂𑀦 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑁂𑀦 𑀧𑀼𑀭𑀓𑁆𑀔𑀢𑁄 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀩𑀮𑀯𑀸 𑀧𑀼𑀭𑀺𑀲𑁄 𑀲𑀫𑀺𑀜𑁆𑀚𑀺𑀢𑀁 𑀯𑀸 𑀩𑀸𑀳𑀁 𑀧𑀲𑀸𑀭𑁂𑀬𑁆𑀬 𑀧𑀲𑀸𑀭𑀺𑀢𑀁 𑀯𑀸 𑀩𑀸𑀳𑀁 𑀲𑀫𑀺𑀜𑁆𑀚𑁂𑀬𑁆𑀬; 𑀏𑀯𑀫𑁂𑀯 𑀤𑁂𑀯𑁂𑀲𑀼 𑀢𑀸𑀯𑀢𑀺𑀁𑀲𑁂𑀲𑀼 𑀅𑀦𑁆𑀢𑀭𑀳𑀺𑀢𑁄 𑀫𑀕𑀥𑁂𑀲𑀼 𑀧𑀸𑀘𑀻𑀦𑀢𑁄 𑀭𑀸𑀚𑀕𑀳𑀲𑁆𑀲 𑀅𑀫𑁆𑀩𑀲𑀡𑁆𑀟𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄, 𑀢𑀲𑁆𑀲𑀼𑀢𑁆𑀢𑀭𑀢𑁄 𑀯𑁂𑀤𑀺𑀬𑀓𑁂 𑀧𑀩𑁆𑀩𑀢𑁂 𑀧𑀘𑁆𑀘𑀼𑀝𑁆𑀞𑀸𑀲𑀺. 𑀢𑁂𑀦 𑀔𑁄 𑀧𑀦 ¶ 𑀲𑀫𑀬𑁂𑀦 𑀯𑁂𑀤𑀺𑀬𑀓𑁄 𑀧𑀩𑁆𑀩𑀢𑁄 ¶ 𑀅𑀢𑀺𑀭𑀺𑀯 𑀑𑀪𑀸𑀲𑀚𑀸𑀢𑁄 𑀳𑁄𑀢𑀺 𑀅𑀫𑁆𑀩𑀲𑀡𑁆𑀟𑀸 𑀘 𑀩𑁆𑀭𑀸𑀳𑁆𑀫𑀡𑀕𑀸𑀫𑁄 𑀬𑀣𑀸 𑀢𑀁 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑁂𑀦. 𑀅𑀧𑀺𑀲𑁆𑀲𑀼𑀤𑀁 𑀧𑀭𑀺𑀢𑁄 𑀕𑀸𑀫𑁂𑀲𑀼 𑀫𑀦𑀼𑀲𑁆𑀲𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀆𑀤𑀺𑀢𑁆𑀢𑀲𑁆𑀲𑀼 𑀦𑀸𑀫𑀚𑁆𑀚 𑀯𑁂𑀤𑀺𑀬𑀓𑁄 𑀧𑀩𑁆𑀩𑀢𑁄 𑀛𑀸𑀬𑀢𑀺𑀲𑀼 [𑀛𑀸𑀬𑀢𑀲𑁆𑀲𑀼 (𑀲𑁆𑀬𑀸.), 𑀧𑀚𑁆𑀛𑀸𑀬𑀺𑀢𑀲𑁆𑀲𑀼 (𑀲𑀻. 𑀧𑀻.)] 𑀦𑀸𑀫𑀚𑁆𑀚 𑀯𑁂𑀤𑀺𑀬𑀓𑁄 𑀧𑀩𑁆𑀩𑀢𑁄 𑀚𑀮𑀢𑀺𑀲𑀼 [𑀚𑀮𑀢𑀲𑁆𑀲𑀼 (𑀲𑁆𑀬𑀸.), 𑀚𑀮𑀺𑀢𑀲𑁆𑀲𑀼 (𑀲𑀻. 𑀧𑀻.)] 𑀦𑀸𑀫𑀚𑁆𑀚 𑀯𑁂𑀤𑀺𑀬𑀓𑁄 𑀧𑀩𑁆𑀩𑀢𑁄 𑀓𑀺𑀁𑀲𑀼 𑀦𑀸𑀫𑀚𑁆𑀚 𑀯𑁂𑀤𑀺𑀬𑀓𑁄 𑀧𑀩𑁆𑀩𑀢𑁄 𑀅𑀢𑀺𑀭𑀺𑀯 𑀑𑀪𑀸𑀲𑀚𑀸𑀢𑁄 𑀅𑀫𑁆𑀩𑀲𑀡𑁆𑀟𑀸 𑀘 𑀩𑁆𑀭𑀸𑀳𑁆𑀫𑀡𑀕𑀸𑀫𑁄’’𑀢𑀺 𑀲𑀁𑀯𑀺𑀕𑁆𑀕𑀸 𑀮𑁄𑀫𑀳𑀝𑁆𑀞𑀚𑀸𑀢𑀸 𑀅𑀳𑁂𑀲𑀼𑀁.

𑁩𑁪𑁭. 𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀜𑁆𑀘𑀲𑀺𑀔𑀁 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀤𑀼𑀭𑀼𑀧𑀲𑀗𑁆𑀓𑀫𑀸 ¶ 𑀔𑁄, 𑀢𑀸𑀢 𑀧𑀜𑁆𑀘𑀲𑀺𑀔, 𑀢𑀣𑀸𑀕𑀢𑀸 𑀫𑀸𑀤𑀺𑀲𑁂𑀦, 𑀛𑀸𑀬𑀻 𑀛𑀸𑀦𑀭𑀢𑀸, 𑀢𑀤𑀦𑁆𑀢𑀭𑀁 [𑀢𑀤𑀦𑀦𑁆𑀢𑀭𑀁 (𑀲𑀻. 𑀲𑁆𑀬𑀸. 𑀧𑀻. 𑀓.)] 𑀧𑀝𑀺𑀲𑀮𑁆𑀮𑀻𑀦𑀸. 𑀬𑀤𑀺 𑀧𑀦 𑀢𑁆𑀯𑀁, 𑀢𑀸𑀢 𑀧𑀜𑁆𑀘𑀲𑀺𑀔, 𑀪𑀕𑀯𑀦𑁆𑀢𑀁 𑀧𑀞𑀫𑀁 𑀧𑀲𑀸𑀤𑁂𑀬𑁆𑀬𑀸𑀲𑀺, 𑀢𑀬𑀸, 𑀢𑀸𑀢, 𑀧𑀞𑀫𑀁 𑀧𑀲𑀸𑀤𑀺𑀢𑀁 𑀧𑀘𑁆𑀙𑀸 𑀫𑀬𑀁 ¶ 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺. ‘‘𑀏𑀯𑀁 𑀪𑀤𑁆𑀤𑀦𑁆𑀢𑀯𑀸’’𑀢𑀺 𑀔𑁄 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑁄 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀩𑁂𑀮𑀼𑀯𑀧𑀡𑁆𑀟𑀼𑀯𑀻𑀡𑀁 𑀆𑀤𑀸𑀬 𑀬𑁂𑀦 𑀇𑀦𑁆𑀤𑀲𑀸𑀮𑀕𑀼𑀳𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀏𑀢𑁆𑀢𑀸𑀯𑀢𑀸 𑀫𑁂 𑀪𑀕𑀯𑀸 𑀦𑁂𑀯 𑀅𑀢𑀺𑀤𑀽𑀭𑁂 𑀪𑀯𑀺𑀲𑁆𑀲𑀢𑀺 𑀦𑀸𑀘𑁆𑀘𑀸𑀲𑀦𑁆𑀦𑁂, 𑀲𑀤𑁆𑀤𑀜𑁆𑀘 𑀫𑁂 𑀲𑁄𑀲𑁆𑀲𑀢𑀻’’𑀢𑀺 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺.

𑀧𑀜𑁆𑀘𑀲𑀺𑀔𑀕𑀻𑀢𑀕𑀸𑀣𑀸

𑁩𑁪𑁮. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑁄 𑀩𑁂𑀮𑀼𑀯𑀧𑀡𑁆𑀟𑀼𑀯𑀻𑀡𑀁 [𑀯𑁂𑀴𑀼𑀯𑀧𑀡𑁆𑀟𑀼𑀯𑀻𑀡𑀁 𑀆𑀤𑀸𑀬 (𑀲𑁆𑀬𑀸.)] 𑀅𑀲𑁆𑀲𑀸𑀯𑁂𑀲𑀺, 𑀇𑀫𑀸 𑀘 𑀕𑀸𑀣𑀸 𑀅𑀪𑀸𑀲𑀺 𑀩𑀼𑀤𑁆𑀥𑀽𑀧𑀲𑀜𑁆𑀳𑀺𑀢𑀸 𑀥𑀫𑁆𑀫𑀽𑀧𑀲𑀜𑁆𑀳𑀺𑀢𑀸 𑀲𑀗𑁆𑀖𑀽𑀧𑀲𑀜𑁆𑀳𑀺𑀢𑀸 𑀅𑀭𑀳𑀦𑁆𑀢𑀽𑀧𑀲𑀜𑁆𑀳𑀺𑀢𑀸 𑀓𑀸𑀫𑀽𑀧𑀲𑀜𑁆𑀳𑀺𑀢𑀸 𑁋

‘‘𑀯𑀦𑁆𑀤𑁂 𑀢𑁂 𑀧𑀺𑀢𑀭𑀁 𑀪𑀤𑁆𑀤𑁂, 𑀢𑀺𑀫𑁆𑀩𑀭𑀼𑀁 𑀲𑀽𑀭𑀺𑀬𑀯𑀘𑁆𑀙𑀲𑁂;

𑀬𑁂𑀦 𑀚𑀸𑀢𑀸𑀲𑀺 𑀓𑀮𑁆𑀬𑀸𑀡𑀻, 𑀆𑀦𑀦𑁆𑀤𑀚𑀦𑀦𑀻 𑀫𑀫.

‘‘𑀯𑀸𑀢𑁄𑀯 𑀲𑁂𑀤𑀢𑀁 𑀓𑀦𑁆𑀢𑁄, 𑀧𑀸𑀦𑀻𑀬𑀁𑀯 𑀧𑀺𑀧𑀸𑀲𑀢𑁄;

𑀅𑀗𑁆𑀕𑀻𑀭𑀲𑀺 𑀧𑀺𑀬𑀸𑀫𑁂𑀲𑀺, 𑀥𑀫𑁆𑀫𑁄 𑀅𑀭𑀳𑀢𑀸𑀫𑀺𑀯.

‘‘𑀆𑀢𑀼𑀭𑀲𑁆𑀲𑁂𑀯 ¶ 𑀪𑁂𑀲𑀚𑁆𑀚𑀁, 𑀪𑁄𑀚𑀦𑀁𑀯 𑀚𑀺𑀖𑀘𑁆𑀙𑀢𑁄;

𑀧𑀭𑀺𑀦𑀺𑀩𑁆𑀩𑀸𑀧𑀬 𑀫𑀁 𑀪𑀤𑁆𑀤𑁂, 𑀚𑀮𑀦𑁆𑀢𑀫𑀺𑀯 𑀯𑀸𑀭𑀺𑀦𑀸.

‘‘𑀲𑀻𑀢𑁄𑀤𑀓𑀁 ¶ ¶ 𑀧𑁄𑀓𑁆𑀔𑀭𑀡𑀺𑀁, 𑀬𑀼𑀢𑁆𑀢𑀁 𑀓𑀺𑀜𑁆𑀚𑀓𑁆𑀔𑀭𑁂𑀡𑀼𑀦𑀸;

𑀦𑀸𑀕𑁄 𑀖𑀫𑁆𑀫𑀸𑀪𑀺𑀢𑀢𑁆𑀢𑁄𑀯, 𑀑𑀕𑀸𑀳𑁂 𑀢𑁂 𑀣𑀦𑀽𑀤𑀭𑀁.

‘‘𑀅𑀘𑁆𑀘𑀗𑁆𑀓𑀼𑀲𑁄𑀯 𑀦𑀸𑀕𑁄𑀯, 𑀚𑀺𑀢𑀁 𑀫𑁂 𑀢𑀼𑀢𑁆𑀢𑀢𑁄𑀫𑀭𑀁;

𑀓𑀸𑀭𑀡𑀁 𑀦𑀧𑁆𑀧𑀚𑀸𑀦𑀸𑀫𑀺, 𑀲𑀫𑁆𑀫𑀢𑁆𑀢𑁄 𑀮𑀓𑁆𑀔𑀡𑀽𑀭𑀼𑀬𑀸.

‘‘𑀢𑀬𑀺 ¶ 𑀕𑁂𑀥𑀺𑀢𑀘𑀺𑀢𑁆𑀢𑁄𑀲𑁆𑀫𑀺, 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀸𑀫𑀺𑀢𑀁;

𑀧𑀝𑀺𑀕𑀦𑁆𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀯𑀗𑁆𑀓𑀖𑀲𑁆𑀢𑁄𑀯 𑀅𑀫𑁆𑀩𑀼𑀚𑁄.

‘‘𑀯𑀸𑀫𑀽𑀭𑀼 𑀲𑀚 𑀫𑀁 𑀪𑀤𑁆𑀤𑁂, 𑀲𑀚 𑀫𑀁 𑀫𑀦𑁆𑀤𑀮𑁄𑀘𑀦𑁂;

𑀧𑀮𑀺𑀲𑁆𑀲𑀚 𑀫𑀁 𑀓𑀮𑁆𑀬𑀸𑀡𑀺, 𑀏𑀢𑀁 𑀫𑁂 𑀅𑀪𑀺𑀧𑀢𑁆𑀣𑀺𑀢𑀁.

‘‘𑀅𑀧𑁆𑀧𑀓𑁄 𑀯𑀢 𑀫𑁂 𑀲𑀦𑁆𑀢𑁄, 𑀓𑀸𑀫𑁄 𑀯𑁂𑀮𑁆𑀮𑀺𑀢𑀓𑁂𑀲𑀺𑀬𑀸;

𑀅𑀦𑁂𑀓𑀪𑀸𑀯𑁄 𑀲𑀫𑀼𑀧𑁆𑀧𑀸𑀤𑀺, 𑀅𑀭𑀳𑀦𑁆𑀢𑁂𑀯 𑀤𑀓𑁆𑀔𑀺𑀡𑀸.

‘‘𑀬𑀁 𑀫𑁂 𑀅𑀢𑁆𑀣𑀺 𑀓𑀢𑀁 𑀧𑀼𑀜𑁆𑀜𑀁, 𑀅𑀭𑀳𑀦𑁆𑀢𑁂𑀲𑀼 𑀢𑀸𑀤𑀺𑀲𑀼;

𑀢𑀁 𑀫𑁂 𑀲𑀩𑁆𑀩𑀗𑁆𑀕𑀓𑀮𑁆𑀬𑀸𑀡𑀺, 𑀢𑀬𑀸 𑀲𑀤𑁆𑀥𑀺𑀁 𑀯𑀺𑀧𑀘𑁆𑀘𑀢𑀁.

‘‘𑀬𑀁 ¶ 𑀫𑁂 𑀅𑀢𑁆𑀣𑀺 𑀓𑀢𑀁 𑀧𑀼𑀜𑁆𑀜𑀁, 𑀅𑀲𑁆𑀫𑀺𑀁 𑀧𑀣𑀯𑀺𑀫𑀡𑁆𑀟𑀮𑁂;

𑀢𑀁 𑀫𑁂 𑀲𑀩𑁆𑀩𑀗𑁆𑀕𑀓𑀮𑁆𑀬𑀸𑀡𑀺, 𑀢𑀬𑀸 𑀲𑀤𑁆𑀥𑀺𑀁 𑀯𑀺𑀧𑀘𑁆𑀘𑀢𑀁.

‘‘𑀲𑀓𑁆𑀬𑀧𑀼𑀢𑁆𑀢𑁄𑀯 𑀛𑀸𑀦𑁂𑀦, 𑀏𑀓𑁄𑀤𑀺 𑀦𑀺𑀧𑀓𑁄 𑀲𑀢𑁄;

𑀅𑀫𑀢𑀁 𑀫𑀼𑀦𑀺 𑀚𑀺𑀕𑀻𑀲𑀸𑀦𑁄 [𑀚𑀺𑀕𑀺𑀁𑀲𑀸𑀦𑁄 (𑀲𑀻. 𑀲𑁆𑀬𑀸. 𑀧𑀻.)], 𑀢𑀫𑀳𑀁 𑀲𑀽𑀭𑀺𑀬𑀯𑀘𑁆𑀙𑀲𑁂.

‘‘𑀬𑀣𑀸𑀧𑀺 𑀫𑀼𑀦𑀺 𑀦𑀦𑁆𑀤𑁂𑀬𑁆𑀬, 𑀧𑀢𑁆𑀯𑀸 𑀲𑀫𑁆𑀩𑁄𑀥𑀺𑀫𑀼𑀢𑁆𑀢𑀫𑀁;

𑀏𑀯𑀁 𑀦𑀦𑁆𑀤𑁂𑀬𑁆𑀬𑀁 𑀓𑀮𑁆𑀬𑀸𑀡𑀺, 𑀫𑀺𑀲𑁆𑀲𑀻𑀪𑀸𑀯𑀁 𑀕𑀢𑁄 𑀢𑀬𑀸.

‘‘𑀲𑀓𑁆𑀓𑁄 𑀘𑁂 𑀫𑁂 𑀯𑀭𑀁 𑀤𑀚𑁆𑀚𑀸, 𑀢𑀸𑀯𑀢𑀺𑀁𑀲𑀸𑀦𑀫𑀺𑀲𑁆𑀲𑀭𑁄;

𑀢𑀸𑀳𑀁 𑀪𑀤𑁆𑀤𑁂 𑀯𑀭𑁂𑀬𑁆𑀬𑀸𑀳𑁂, 𑀏𑀯𑀁 𑀓𑀸𑀫𑁄 𑀤𑀴𑁆𑀳𑁄 𑀫𑀫.

‘‘𑀲𑀸𑀮𑀁𑀯 ¶ 𑀦 𑀘𑀺𑀭𑀁 𑀨𑀼𑀮𑁆𑀮𑀁, 𑀧𑀺𑀢𑀭𑀁 𑀢𑁂 𑀲𑀼𑀫𑁂𑀥𑀲𑁂;

𑀯𑀦𑁆𑀤𑀫𑀸𑀦𑁄 𑀦𑀫𑀲𑁆𑀲𑀸𑀫𑀺, 𑀬𑀲𑁆𑀲𑀸 𑀲𑁂𑀢𑀸𑀤𑀺𑀲𑀻 𑀧𑀚𑀸’’𑀢𑀺.

𑁩𑁪𑁯. 𑀏𑀯𑀁 𑀯𑀼𑀢𑁆𑀢𑁂 𑀪𑀕𑀯𑀸 𑀧𑀜𑁆𑀘𑀲𑀺𑀔𑀁 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀁𑀲𑀦𑁆𑀤𑀢𑀺 ¶ 𑀔𑁄 𑀢𑁂, 𑀧𑀜𑁆𑀘𑀲𑀺𑀔, 𑀢𑀦𑁆𑀢𑀺𑀲𑁆𑀲𑀭𑁄 𑀕𑀻𑀢𑀲𑁆𑀲𑀭𑁂𑀦, 𑀕𑀻𑀢𑀲𑁆𑀲𑀭𑁄 𑀘 𑀢𑀦𑁆𑀢𑀺𑀲𑁆𑀲𑀭𑁂𑀦; 𑀦 𑀘 𑀧𑀦 [𑀦𑁂𑀯 𑀧𑀦 (𑀲𑁆𑀬𑀸.)] 𑀢𑁂 𑀧𑀜𑁆𑀘𑀲𑀺𑀔, 𑀢𑀦𑁆𑀢𑀺𑀲𑁆𑀲𑀭𑁄 𑀕𑀻𑀢𑀲𑁆𑀲𑀭𑀁 𑀅𑀢𑀺𑀯𑀢𑁆𑀢𑀢𑀺, 𑀕𑀻𑀢𑀲𑁆𑀲𑀭𑁄 𑀘 𑀢𑀦𑁆𑀢𑀺𑀲𑁆𑀲𑀭𑀁. 𑀓𑀤𑀸 𑀲𑀁𑀬𑀽𑀴𑁆𑀳𑀸 𑀧𑀦 𑀢𑁂, 𑀧𑀜𑁆𑀘𑀲𑀺𑀔, 𑀇𑀫𑀸 𑀕𑀸𑀣𑀸 𑀩𑀼𑀤𑁆𑀥𑀽𑀧𑀲𑀜𑁆𑀳𑀺𑀢𑀸 𑀥𑀫𑁆𑀫𑀽𑀧𑀲𑀜𑁆𑀳𑀺𑀢𑀸 ¶ 𑀲𑀗𑁆𑀖𑀽𑀧𑀲𑀜𑁆𑀳𑀺𑀢𑀸 𑀅𑀭𑀳𑀦𑁆𑀢𑀽𑀧𑀲𑀜𑁆𑀳𑀺𑀢𑀸 𑀓𑀸𑀫𑀽𑀧𑀲𑀜𑁆𑀳𑀺𑀢𑀸’’𑀢𑀺? ‘‘𑀏𑀓𑀫𑀺𑀤𑀁, 𑀪𑀦𑁆𑀢𑁂, 𑀲𑀫𑀬𑀁 𑀪𑀕𑀯𑀸 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀢𑀺 𑀦𑀚𑁆𑀚𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄 ¶ . 𑀢𑁂𑀦 𑀔𑁄 𑀧𑀦𑀸𑀳𑀁, 𑀪𑀦𑁆𑀢𑁂, 𑀲𑀫𑀬𑁂𑀦 𑀪𑀤𑁆𑀤𑀸 𑀦𑀸𑀫 𑀲𑀽𑀭𑀺𑀬𑀯𑀘𑁆𑀙𑀲𑀸 𑀢𑀺𑀫𑁆𑀩𑀭𑀼𑀦𑁄 𑀕𑀦𑁆𑀥𑀩𑁆𑀩𑀭𑀜𑁆𑀜𑁄 𑀥𑀻𑀢𑀸, 𑀢𑀫𑀪𑀺𑀓𑀗𑁆𑀔𑀸𑀫𑀺. 𑀲𑀸 𑀔𑁄 𑀧𑀦, 𑀪𑀦𑁆𑀢𑁂, 𑀪𑀕𑀺𑀦𑀻 𑀧𑀭𑀓𑀸𑀫𑀺𑀦𑀻 𑀳𑁄𑀢𑀺; 𑀲𑀺𑀔𑀡𑁆𑀟𑀻 𑀦𑀸𑀫 𑀫𑀸𑀢𑀮𑀺𑀲𑁆𑀲 𑀲𑀗𑁆𑀕𑀸𑀳𑀓𑀲𑁆𑀲 𑀧𑀼𑀢𑁆𑀢𑁄, 𑀢𑀫𑀪𑀺𑀓𑀗𑁆𑀔𑀢𑀺. 𑀬𑀢𑁄 𑀔𑁄 𑀅𑀳𑀁, 𑀪𑀦𑁆𑀢𑁂, 𑀢𑀁 𑀪𑀕𑀺𑀦𑀺𑀁 𑀦𑀸𑀮𑀢𑁆𑀣𑀁 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦. 𑀅𑀣𑀸𑀳𑀁 𑀩𑁂𑀮𑀼𑀯𑀧𑀡𑁆𑀟𑀼𑀯𑀻𑀡𑀁 𑀆𑀤𑀸𑀬 𑀬𑁂𑀦 𑀢𑀺𑀫𑁆𑀩𑀭𑀼𑀦𑁄 𑀕𑀦𑁆𑀥𑀩𑁆𑀩𑀭𑀜𑁆𑀜𑁄 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑁂𑀮𑀼𑀯𑀧𑀡𑁆𑀟𑀼𑀯𑀻𑀡𑀁 𑀅𑀲𑁆𑀲𑀸𑀯𑁂𑀲𑀺𑀁, 𑀇𑀫𑀸 𑀘 𑀕𑀸𑀣𑀸 𑀅𑀪𑀸𑀲𑀺𑀁 𑀩𑀼𑀤𑁆𑀥𑀽𑀧𑀲𑀜𑁆𑀳𑀺𑀢𑀸 𑀥𑀫𑁆𑀫𑀽𑀧𑀲𑀜𑁆𑀳𑀺𑀢𑀸 𑀲𑀗𑁆𑀖𑀽𑀧𑀲𑀜𑁆𑀳𑀺𑀢𑀸 𑀅𑀭𑀳𑀦𑁆𑀢𑀽𑀧𑀲𑀜𑁆𑀳𑀺𑀢𑀸 𑀓𑀸𑀫𑀽𑀧𑀲𑀜𑁆𑀳𑀺𑀢𑀸 𑁋

‘‘𑀯𑀦𑁆𑀤𑁂 𑀢𑁂 𑀧𑀺𑀢𑀭𑀁 𑀪𑀤𑁆𑀤𑁂, 𑀢𑀺𑀫𑁆𑀩𑀭𑀼𑀁 𑀲𑀽𑀭𑀺𑀬𑀯𑀘𑁆𑀙𑀲𑁂;

𑀬𑁂𑀦 𑀚𑀸𑀢𑀸𑀲𑀺 𑀓𑀮𑁆𑀬𑀸𑀡𑀻, 𑀆𑀦𑀦𑁆𑀤𑀚𑀦𑀦𑀻 𑀫𑀫. …𑀧𑁂…

𑀲𑀸𑀮𑀁𑀯 𑀦 𑀘𑀺𑀭𑀁 𑀨𑀼𑀮𑁆𑀮𑀁, 𑀧𑀺𑀢𑀭𑀁 𑀢𑁂 𑀲𑀼𑀫𑁂𑀥𑀲𑁂;

𑀯𑀦𑁆𑀤𑀫𑀸𑀦𑁄 𑀦𑀫𑀲𑁆𑀲𑀸𑀫𑀺, 𑀬𑀲𑁆𑀲𑀸 𑀲𑁂𑀢𑀸𑀤𑀺𑀲𑀻 𑀧𑀚𑀸’’𑀢𑀺.

‘‘𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀪𑀤𑁆𑀤𑀸 𑀲𑀽𑀭𑀺𑀬𑀯𑀘𑁆𑀙𑀲𑀸 𑀫𑀁 𑀏𑀢𑀤𑀯𑁄𑀘 𑁋 ‘𑀦 𑀔𑁄 𑀫𑁂, 𑀫𑀸𑀭𑀺𑀲, 𑀲𑁄 𑀪𑀕𑀯𑀸 𑀲𑀫𑁆𑀫𑀼𑀔𑀸 𑀤𑀺𑀝𑁆𑀞𑁄 𑀅𑀧𑀺 𑀘 𑀲𑀼𑀢𑁄𑀬𑁂𑀯 𑀫𑁂 𑀲𑁄 𑀪𑀕𑀯𑀸 ¶ 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀼𑀥𑀫𑁆𑀫𑀸𑀬𑀁 𑀲𑀪𑀸𑀬𑀁 𑀉𑀧𑀦𑀘𑁆𑀘𑀦𑁆𑀢𑀺𑀬𑀸. 𑀬𑀢𑁄 𑀔𑁄 𑀢𑁆𑀯𑀁, 𑀫𑀸𑀭𑀺𑀲, 𑀢𑀁 𑀪𑀕𑀯𑀦𑁆𑀢𑀁 𑀓𑀺𑀢𑁆𑀢𑁂𑀲𑀺, 𑀳𑁄𑀢𑀼 𑀦𑁄 𑀅𑀚𑁆𑀚 𑀲𑀫𑀸𑀕𑀫𑁄’𑀢𑀺. 𑀲𑁄𑀬𑁂𑀯 ¶ 𑀦𑁄, 𑀪𑀦𑁆𑀢𑁂, 𑀢𑀲𑁆𑀲𑀸 𑀪𑀕𑀺𑀦𑀺𑀬𑀸 𑀲𑀤𑁆𑀥𑀺𑀁 𑀲𑀫𑀸𑀕𑀫𑁄 𑀅𑀳𑁄𑀲𑀺. 𑀦 𑀘 𑀤𑀸𑀦𑀺 𑀢𑀢𑁄 𑀧𑀘𑁆𑀙𑀸’’𑀢𑀺.

𑀲𑀓𑁆𑀓𑀽𑀧𑀲𑀗𑁆𑀓𑀫

𑁩𑁫𑁦. 𑀅𑀣 ¶ 𑀔𑁄 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀧𑀝𑀺𑀲𑀫𑁆𑀫𑁄𑀤𑀢𑀺 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀢𑀸, 𑀪𑀕𑀯𑀸 𑀘 𑀧𑀜𑁆𑀘𑀲𑀺𑀔𑁂𑀦𑀸’’𑀢𑀺. 𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀜𑁆𑀘𑀲𑀺𑀔𑀁 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀅𑀪𑀺𑀯𑀸𑀤𑁂𑀳𑀺 𑀫𑁂 𑀢𑁆𑀯𑀁, 𑀢𑀸𑀢 𑀧𑀜𑁆𑀘𑀲𑀺𑀔, 𑀪𑀕𑀯𑀦𑁆𑀢𑀁 𑁋 ‘𑀲𑀓𑁆𑀓𑁄, 𑀪𑀦𑁆𑀢𑁂, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀸𑀫𑀘𑁆𑀘𑁄 𑀲𑀧𑀭𑀺𑀚𑀦𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’𑀢𑀺’’. ‘‘𑀏𑀯𑀁 𑀪𑀤𑁆𑀤𑀦𑁆𑀢𑀯𑀸’’𑀢𑀺 𑀔𑁄 𑀧𑀜𑁆𑀘𑀲𑀺𑀔𑁄 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑁄 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑀺 𑁋 ‘‘𑀲𑀓𑁆𑀓𑁄, 𑀪𑀦𑁆𑀢𑁂, 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀸𑀫𑀘𑁆𑀘𑁄 𑀲𑀧𑀭𑀺𑀚𑀦𑁄 𑀪𑀕𑀯𑀢𑁄 ¶ 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’’𑀢𑀺. ‘‘𑀏𑀯𑀁 𑀲𑀼𑀔𑀻 𑀳𑁄𑀢𑀼, 𑀧𑀜𑁆𑀘𑀲𑀺𑀔, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀲𑀸𑀫𑀘𑁆𑀘𑁄 𑀲𑀧𑀭𑀺𑀚𑀦𑁄; 𑀲𑀼𑀔𑀓𑀸𑀫𑀸 𑀳𑀺 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀅𑀲𑀼𑀭𑀸 𑀦𑀸𑀕𑀸 𑀕𑀦𑁆𑀥𑀩𑁆𑀩𑀸 𑀬𑁂 𑀘𑀜𑁆𑀜𑁂 𑀲𑀦𑁆𑀢𑀺 𑀧𑀼𑀣𑀼𑀓𑀸𑀬𑀸’’𑀢𑀺.

𑁩𑁫𑁧. 𑀏𑀯𑀜𑁆𑀘 𑀧𑀦 𑀢𑀣𑀸𑀕𑀢𑀸 𑀏𑀯𑀭𑀽𑀧𑁂 𑀫𑀳𑁂𑀲𑀓𑁆𑀔𑁂 𑀬𑀓𑁆𑀔𑁂 𑀅𑀪𑀺𑀯𑀤𑀦𑁆𑀢𑀺. 𑀅𑀪𑀺𑀯𑀤𑀺𑀢𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑁄 𑀇𑀦𑁆𑀤𑀲𑀸𑀮𑀕𑀼𑀳𑀁 𑀧𑀯𑀺𑀲𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀤𑁂𑀯𑀸𑀧𑀺 𑀢𑀸𑀯𑀢𑀺𑀁𑀲𑀸 𑀇𑀦𑁆𑀤𑀲𑀸𑀮𑀕𑀼𑀳𑀁 𑀧𑀯𑀺𑀲𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀧𑀜𑁆𑀘𑀲𑀺𑀔𑁄𑀧𑀺 𑀕𑀦𑁆𑀥𑀩𑁆𑀩𑀤𑁂𑀯𑀧𑀼𑀢𑁆𑀢𑁄 𑀇𑀦𑁆𑀤𑀲𑀸𑀮𑀕𑀼𑀳𑀁 𑀧𑀯𑀺𑀲𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀇𑀦𑁆𑀤𑀲𑀸𑀮𑀕𑀼𑀳𑀸 ¶ 𑀯𑀺𑀲𑀫𑀸 𑀲𑀦𑁆𑀢𑀻 𑀲𑀫𑀸 𑀲𑀫𑀧𑀸𑀤𑀺, 𑀲𑀫𑁆𑀩𑀸𑀥𑀸 𑀲𑀦𑁆𑀢𑀻 𑀉𑀭𑀼𑀦𑁆𑀤𑀸 [𑀉𑀭𑀼𑀤𑁆𑀤𑀸 (𑀓.)] 𑀲𑀫𑀧𑀸𑀤𑀺, 𑀅𑀦𑁆𑀥𑀓𑀸𑀭𑁄 𑀕𑀼𑀳𑀸𑀬𑀁 𑀅𑀦𑁆𑀢𑀭𑀥𑀸𑀬𑀺, 𑀆𑀮𑁄𑀓𑁄 𑀉𑀤𑀧𑀸𑀤𑀺 𑀬𑀣𑀸 𑀢𑀁 𑀤𑁂𑀯𑀸𑀦𑀁 ¶ 𑀤𑁂𑀯𑀸𑀦𑀼𑀪𑀸𑀯𑁂𑀦.

𑁩𑁫𑁨. 𑀅𑀣 𑀔𑁄 𑀪𑀕𑀯𑀸 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀅𑀘𑁆𑀙𑀭𑀺𑀬𑀫𑀺𑀤𑀁 𑀆𑀬𑀲𑁆𑀫𑀢𑁄 𑀓𑁄𑀲𑀺𑀬𑀲𑁆𑀲, 𑀅𑀩𑁆𑀪𑀼𑀢𑀫𑀺𑀤𑀁 𑀆𑀬𑀲𑁆𑀫𑀢𑁄 𑀓𑁄𑀲𑀺𑀬𑀲𑁆𑀲 𑀢𑀸𑀯 𑀩𑀳𑀼𑀓𑀺𑀘𑁆𑀘𑀲𑁆𑀲 𑀩𑀳𑀼𑀓𑀭𑀡𑀻𑀬𑀲𑁆𑀲 𑀬𑀤𑀺𑀤𑀁 𑀇𑀥𑀸𑀕𑀫𑀦’’𑀦𑁆𑀢𑀺. ‘‘𑀘𑀺𑀭𑀧𑀝𑀺𑀓𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀓𑀸𑀫𑁄; 𑀅𑀧𑀺 𑀘 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀓𑁂𑀳𑀺𑀘𑀺 𑀓𑁂𑀳𑀺𑀘𑀺 [𑀓𑁂𑀳𑀺𑀘𑀺 (𑀲𑁆𑀬𑀸.)] 𑀓𑀺𑀘𑁆𑀘𑀓𑀭𑀡𑀻𑀬𑁂𑀳𑀺 𑀩𑁆𑀬𑀸𑀯𑀝𑁄; 𑀏𑀯𑀸𑀳𑀁 𑀦𑀸𑀲𑀓𑁆𑀔𑀺𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁. 𑀏𑀓𑀫𑀺𑀤𑀁, 𑀪𑀦𑁆𑀢𑁂, 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀲𑀮𑀴𑀸𑀕𑀸𑀭𑀓𑁂. 𑀅𑀣 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀲𑀸𑀯𑀢𑁆𑀣𑀺𑀁 𑀅𑀕𑀫𑀸𑀲𑀺𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬. 𑀢𑁂𑀦 𑀔𑁄 𑀧𑀦, 𑀪𑀦𑁆𑀢𑁂, 𑀲𑀫𑀬𑁂𑀦 𑀪𑀕𑀯𑀸 𑀅𑀜𑁆𑀜𑀢𑀭𑁂𑀦 𑀲𑀫𑀸𑀥𑀺𑀦𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀪𑀽𑀚𑀢𑀺 [𑀪𑀼𑀜𑁆𑀚𑀢𑀻 𑀘 (𑀲𑀻. 𑀧𑀻.), 𑀪𑀼𑀚𑀕𑀻 (𑀲𑁆𑀬𑀸.)] 𑀘 𑀦𑀸𑀫 𑀯𑁂𑀲𑁆𑀲𑀯𑀡𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀧𑀭𑀺𑀘𑀸𑀭𑀺𑀓𑀸 𑀪𑀕𑀯𑀦𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺, 𑀧𑀜𑁆𑀚𑀮𑀺𑀓𑀸 𑀦𑀫𑀲𑁆𑀲𑀫𑀸𑀦𑀸 𑀢𑀺𑀝𑁆𑀞𑀢𑀺. 𑀅𑀣 𑀔𑁆𑀯𑀸𑀳𑀁, 𑀪𑀦𑁆𑀢𑁂, 𑀪𑀽𑀚𑀢𑀺𑀁 𑀏𑀢𑀤𑀯𑁄𑀘𑀁 ¶ 𑁋 ‘𑀅𑀪𑀺𑀯𑀸𑀤𑁂𑀳𑀺 𑀫𑁂 𑀢𑁆𑀯𑀁, 𑀪𑀕𑀺𑀦𑀺, 𑀪𑀕𑀯𑀦𑁆𑀢𑀁 𑁋 ‘‘𑀲𑀓𑁆𑀓𑁄, 𑀪𑀦𑁆𑀢𑁂, 𑀤𑁂𑀯𑀸𑀦𑀫𑀺𑀦𑁆𑀤𑁄 ¶ 𑀲𑀸𑀫𑀘𑁆𑀘𑁄 𑀲𑀧𑀭𑀺𑀚𑀦𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂, 𑀪𑀦𑁆𑀢𑁂, 𑀲𑀸 𑀪𑀽𑀚𑀢𑀺 𑀫𑀁 𑀏𑀢𑀤𑀯𑁄𑀘 𑁋 ‘𑀅𑀓𑀸𑀮𑁄 𑀔𑁄, 𑀫𑀸𑀭𑀺𑀲, 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬; 𑀧𑀝𑀺𑀲𑀮𑁆𑀮𑀻𑀦𑁄 𑀪𑀕𑀯𑀸’𑀢𑀺. ‘𑀢𑁂𑀦 ¶ 𑀳𑀻, 𑀪𑀕𑀺𑀦𑀺, 𑀬𑀤𑀸 𑀪𑀕𑀯𑀸 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀺𑀢𑁄 𑀳𑁄𑀢𑀺, 𑀅𑀣 𑀫𑀫 𑀯𑀘𑀦𑁂𑀦 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀳𑀺 𑁋 ‘‘𑀲𑀓𑁆𑀓𑁄, 𑀪𑀦𑁆𑀢𑁂, 𑀤𑁂𑀯𑀸𑀦𑀫𑀺𑀦𑁆𑀤𑁄 ¶ 𑀲𑀸𑀫𑀘𑁆𑀘𑁄 𑀲𑀧𑀭𑀺𑀚𑀦𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀻’’𑀢𑀺. 𑀓𑀘𑁆𑀘𑀺 𑀫𑁂 𑀲𑀸, 𑀪𑀦𑁆𑀢𑁂, 𑀪𑀕𑀺𑀦𑀻 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀲𑀺? 𑀲𑀭𑀢𑀺 𑀪𑀕𑀯𑀸 𑀢𑀲𑁆𑀲𑀸 𑀪𑀕𑀺𑀦𑀺𑀬𑀸 𑀯𑀘𑀦’’𑀦𑁆𑀢𑀺? ‘‘𑀅𑀪𑀺𑀯𑀸𑀤𑁂𑀲𑀺 𑀫𑀁 𑀲𑀸, 𑀤𑁂𑀯𑀸𑀦𑀫𑀺𑀦𑁆𑀤, 𑀪𑀕𑀺𑀦𑀻, 𑀲𑀭𑀸𑀫𑀳𑀁 𑀢𑀲𑁆𑀲𑀸 𑀪𑀕𑀺𑀦𑀺𑀬𑀸 𑀯𑀘𑀦𑀁. 𑀅𑀧𑀺 𑀘𑀸𑀳𑀁 𑀆𑀬𑀲𑁆𑀫𑀢𑁄 𑀦𑁂𑀫𑀺𑀲𑀤𑁆𑀤𑁂𑀦 [𑀘𑀓𑁆𑀓𑀦𑁂𑀫𑀺𑀲𑀤𑁆𑀤𑁂𑀦 (𑀲𑁆𑀬𑀸.)] 𑀢𑀫𑁆𑀳𑀸 𑀲𑀫𑀸𑀥𑀺𑀫𑁆𑀳𑀸 𑀯𑀼𑀝𑁆𑀞𑀺𑀢𑁄’’𑀢𑀺. ‘‘𑀬𑁂 𑀢𑁂, 𑀪𑀦𑁆𑀢𑁂, 𑀤𑁂𑀯𑀸 𑀅𑀫𑁆𑀳𑁂𑀳𑀺 𑀧𑀞𑀫𑀢𑀭𑀁 𑀢𑀸𑀯𑀢𑀺𑀁𑀲𑀓𑀸𑀬𑀁 𑀉𑀧𑀧𑀦𑁆𑀦𑀸, 𑀢𑁂𑀲𑀁 𑀫𑁂 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀬𑀤𑀸 𑀢𑀣𑀸𑀕𑀢𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸, 𑀤𑀺𑀩𑁆𑀩𑀸 𑀓𑀸𑀬𑀸 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀳𑀸𑀬𑀦𑁆𑀢𑀺 𑀅𑀲𑀼𑀭𑀓𑀸𑀬𑀸’𑀢𑀺. 𑀢𑀁 𑀫𑁂 𑀇𑀤𑀁, 𑀪𑀦𑁆𑀢𑁂, 𑀲𑀓𑁆𑀔𑀺𑀤𑀺𑀝𑁆𑀞𑀁 𑀬𑀢𑁄 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀤𑀺𑀩𑁆𑀩𑀸 𑀓𑀸𑀬𑀸 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀳𑀸𑀬𑀦𑁆𑀢𑀺 𑀅𑀲𑀼𑀭𑀓𑀸𑀬𑀸𑀢𑀺.

𑀕𑁄𑀧𑀓𑀯𑀢𑁆𑀣𑀼

𑁩𑁫𑁩. ‘‘𑀇𑀥𑁂𑀯, 𑀪𑀦𑁆𑀢𑁂, 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀕𑁄𑀧𑀺𑀓𑀸 𑀦𑀸𑀫 𑀲𑀓𑁆𑀬𑀥𑀻𑀢𑀸 𑀅𑀳𑁄𑀲𑀺 𑀩𑀼𑀤𑁆𑀥𑁂 𑀧𑀲𑀦𑁆𑀦𑀸 𑀥𑀫𑁆𑀫𑁂 𑀧𑀲𑀦𑁆𑀦𑀸 𑀲𑀗𑁆𑀖𑁂 𑀧𑀲𑀦𑁆𑀦𑀸 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑀻. 𑀲𑀸 𑀇𑀢𑁆𑀣𑀺𑀢𑁆𑀢𑀁 [𑀇𑀢𑁆𑀣𑀺𑀘𑀺𑀢𑁆𑀢𑀁 (𑀲𑁆𑀬𑀸.)] 𑀯𑀺𑀭𑀸𑀚𑁂𑀢𑁆𑀯𑀸 𑀧𑀼𑀭𑀺𑀲𑀢𑁆𑀢𑀁 [𑀧𑀼𑀭𑀺𑀲𑀘𑀺𑀢𑁆𑀢𑀁 (𑀲𑁆𑀬𑀸.)] 𑀪𑀸𑀯𑁂𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸. 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀳𑀩𑁆𑀬𑀢𑀁 𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀢𑁆𑀢𑀁 𑀅𑀚𑁆𑀛𑀼𑀧𑀕𑀢𑀸. 𑀢𑀢𑁆𑀭𑀧𑀺 𑀦𑀁 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀕𑁄𑀧𑀓𑁄 𑀤𑁂𑀯𑀧𑀼𑀢𑁆𑀢𑁄, 𑀕𑁄𑀧𑀓𑁄 𑀤𑁂𑀯𑀧𑀼𑀢𑁆𑀢𑁄’𑀢𑀺. 𑀅𑀜𑁆𑀜𑁂𑀧𑀺, 𑀪𑀦𑁆𑀢𑁂, 𑀢𑀬𑁄 𑀪𑀺𑀓𑁆𑀔𑀽 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀳𑀻𑀦𑀁 𑀕𑀦𑁆𑀥𑀩𑁆𑀩𑀓𑀸𑀬𑀁 𑀉𑀧𑀧𑀦𑁆𑀦𑀸. 𑀢𑁂 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀧𑀭𑀺𑀘𑀸𑀭𑀬𑀫𑀸𑀦𑀸 𑀅𑀫𑁆𑀳𑀸𑀓𑀁 𑀉𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀺 𑀅𑀫𑁆𑀳𑀸𑀓𑀁 𑀧𑀸𑀭𑀺𑀘𑀭𑀺𑀬𑀁. 𑀢𑁂 𑀅𑀫𑁆𑀳𑀸𑀓𑀁 𑀉𑀧𑀝𑁆𑀞𑀸𑀦𑀁 𑀆𑀕𑀢𑁂 𑀅𑀫𑁆𑀳𑀸𑀓𑀁 𑀧𑀸𑀭𑀺𑀘𑀭𑀺𑀬𑀁 𑀕𑁄𑀧𑀓𑁄 𑀤𑁂𑀯𑀧𑀼𑀢𑁆𑀢𑁄 𑀧𑀝𑀺𑀘𑁄𑀤𑁂𑀲𑀺 ¶ 𑁋 ‘𑀓𑀼𑀢𑁄𑀫𑀼𑀔𑀸 𑀦𑀸𑀫 𑀢𑀼𑀫𑁆𑀳𑁂 ¶ , 𑀫𑀸𑀭𑀺𑀲𑀸, 𑀢𑀲𑁆𑀲 𑀪𑀕𑀯𑀢𑁄 𑀥𑀫𑁆𑀫𑀁 𑀅𑀲𑁆𑀲𑀼𑀢𑁆𑀣 [𑀆𑀬𑀼𑀳𑀺𑀢𑁆𑀣 (𑀲𑁆𑀬𑀸.)] 𑁋 𑀅𑀳𑀜𑁆𑀳𑀺 𑀦𑀸𑀫 𑀇𑀢𑁆𑀣𑀺𑀓𑀸 𑀲𑀫𑀸𑀦𑀸 𑀩𑀼𑀤𑁆𑀥𑁂 𑀧𑀲𑀦𑁆𑀦𑀸 𑀥𑀫𑁆𑀫𑁂 𑀧𑀲𑀦𑁆𑀦𑀸 𑀲𑀗𑁆𑀖𑁂 𑀧𑀲𑀦𑁆𑀦𑀸 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀺𑀦𑀻 𑀇𑀢𑁆𑀣𑀺𑀢𑁆𑀢𑀁 𑀯𑀺𑀭𑀸𑀚𑁂𑀢𑁆𑀯𑀸 𑀧𑀼𑀭𑀺𑀲𑀢𑁆𑀢𑀁 𑀪𑀸𑀯𑁂𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸, 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀳𑀩𑁆𑀬𑀢𑀁 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀼𑀢𑁆𑀢𑀢𑁆𑀢𑀁 𑀅𑀚𑁆𑀛𑀼𑀧𑀕𑀢𑀸. 𑀇𑀥𑀸𑀧𑀺 𑀫𑀁 𑀏𑀯𑀁 𑀚𑀸𑀦𑀦𑁆𑀢𑀺 ‘‘𑀕𑁄𑀧𑀓𑁄 𑀤𑁂𑀯𑀧𑀼𑀢𑁆𑀢𑁄 𑀕𑁄𑀧𑀓𑁄 𑀤𑁂𑀯𑀧𑀼𑀢𑁆𑀢𑁄’𑀢𑀺. 𑀢𑀼𑀫𑁆𑀳𑁂 𑀧𑀦, 𑀫𑀸𑀭𑀺𑀲𑀸, 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀳𑀻𑀦𑀁 𑀕𑀦𑁆𑀥𑀩𑁆𑀩𑀓𑀸𑀬𑀁 𑀉𑀧𑀧𑀦𑁆𑀦𑀸. 𑀤𑀼𑀤𑁆𑀤𑀺𑀝𑁆𑀞𑀭𑀽𑀧𑀁 𑀯𑀢, 𑀪𑁄, 𑀅𑀤𑁆𑀤𑀲𑀸𑀫, 𑀬𑁂 𑀫𑀬𑀁 𑀅𑀤𑁆𑀤𑀲𑀸𑀫 ¶ 𑀲𑀳𑀥𑀫𑁆𑀫𑀺𑀓𑁂 𑀳𑀻𑀦𑀁 𑀕𑀦𑁆𑀥𑀩𑁆𑀩𑀓𑀸𑀬𑀁 𑀉𑀧𑀧𑀦𑁆𑀦𑁂’𑀢𑀺. 𑀢𑁂𑀲𑀁, 𑀪𑀦𑁆𑀢𑁂, 𑀕𑁄𑀧𑀓𑁂𑀦 𑀤𑁂𑀯𑀧𑀼𑀢𑁆𑀢𑁂𑀦 𑀧𑀝𑀺𑀘𑁄𑀤𑀺𑀢𑀸𑀦𑀁 𑀤𑁆𑀯𑁂 ¶ 𑀤𑁂𑀯𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀢𑀺𑀁 𑀧𑀝𑀺𑀮𑀪𑀺𑀁𑀲𑀼 𑀓𑀸𑀬𑀁 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀁, 𑀏𑀓𑁄 𑀧𑀦 𑀤𑁂𑀯𑁄 𑀓𑀸𑀫𑁂 𑀅𑀚𑁆𑀛𑀸𑀯𑀲𑀺.

𑁩𑁫𑁪. ‘‘‘𑀉𑀧𑀸𑀲𑀺𑀓𑀸 𑀘𑀓𑁆𑀔𑀼𑀫𑀢𑁄 𑀅𑀳𑁄𑀲𑀺𑀁,

𑀦𑀸𑀫𑀫𑁆𑀧𑀺 𑀫𑀬𑁆𑀳𑀁 𑀅𑀳𑀼 ‘𑀕𑁄𑀧𑀺𑀓𑀸’𑀢𑀺;

𑀩𑀼𑀤𑁆𑀥𑁂 𑀘 𑀥𑀫𑁆𑀫𑁂 𑀘 𑀅𑀪𑀺𑀧𑁆𑀧𑀲𑀦𑁆𑀦𑀸,

𑀲𑀗𑁆𑀖𑀜𑁆𑀘𑀼𑀧𑀝𑁆𑀞𑀸𑀲𑀺𑀁 𑀧𑀲𑀦𑁆𑀦𑀘𑀺𑀢𑁆𑀢𑀸.

‘‘‘𑀢𑀲𑁆𑀲𑁂𑀯 𑀩𑀼𑀤𑁆𑀥𑀲𑁆𑀲 𑀲𑀼𑀥𑀫𑁆𑀫𑀢𑀸𑀬,

𑀲𑀓𑁆𑀓𑀲𑁆𑀲 𑀧𑀼𑀢𑁆𑀢𑁄𑀫𑁆𑀳𑀺 𑀫𑀳𑀸𑀦𑀼𑀪𑀸𑀯𑁄;

𑀫𑀳𑀸𑀚𑀼𑀢𑀻𑀓𑁄 𑀢𑀺𑀤𑀺𑀯𑀽𑀧𑀧𑀦𑁆𑀦𑁄,

𑀚𑀸𑀦𑀦𑁆𑀢𑀺 𑀫𑀁 𑀇𑀥𑀸𑀧𑀺 ‘𑀕𑁄𑀧𑀓𑁄’𑀢𑀺.

‘‘‘𑀅𑀣𑀤𑁆𑀤𑀲𑀁 ¶ 𑀪𑀺𑀓𑁆𑀔𑀯𑁄 𑀤𑀺𑀝𑁆𑀞𑀧𑀼𑀩𑁆𑀩𑁂,

𑀕𑀦𑁆𑀥𑀩𑁆𑀩𑀓𑀸𑀬𑀽𑀧𑀕𑀢𑁂 𑀯𑀲𑀻𑀦𑁂;

𑀇𑀫𑁂𑀳𑀺 𑀢𑁂 𑀕𑁄𑀢𑀫𑀲𑀸𑀯𑀓𑀸𑀲𑁂,

𑀬𑁂 𑀘 𑀫𑀬𑀁 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑀸.

‘‘‘𑀅𑀦𑁆𑀦𑁂𑀦 𑀧𑀸𑀦𑁂𑀦 𑀉𑀧𑀝𑁆𑀞𑀳𑀺𑀫𑁆𑀳𑀸,

𑀧𑀸𑀤𑀽𑀧𑀲𑀗𑁆𑀕𑀬𑁆𑀳 𑀲𑀓𑁂 𑀦𑀺𑀯𑁂𑀲𑀦𑁂;

𑀓𑀼𑀢𑁄𑀫𑀼𑀔𑀸 ¶ 𑀦𑀸𑀫 𑀇𑀫𑁂 𑀪𑀯𑀦𑁆𑀢𑁄,

𑀩𑀼𑀤𑁆𑀥𑀲𑁆𑀲 𑀥𑀫𑁆𑀫𑀸𑀦𑀺 𑀧𑀝𑀺𑀕𑁆𑀕𑀳𑁂𑀲𑀼𑀁 [𑀩𑀼𑀤𑁆𑀥𑀲𑁆𑀲 𑀥𑀫𑁆𑀫𑀁 𑀦 𑀧𑀝𑀺𑀕𑁆𑀕𑀳𑁂𑀲𑀼𑀁 (𑀲𑁆𑀬𑀸.)].

‘‘‘𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀳𑀺 𑀥𑀫𑁆𑀫𑁄,

𑀲𑀼𑀤𑁂𑀲𑀺𑀢𑁄 𑀘𑀓𑁆𑀔𑀼𑀫𑀢𑀸𑀦𑀼𑀩𑀼𑀤𑁆𑀥𑁄;

𑀅𑀳𑀜𑁆𑀳𑀺 𑀢𑀼𑀫𑁆𑀳𑁂𑀯 𑀉𑀧𑀸𑀲𑀫𑀸𑀦𑁄,

𑀲𑀼𑀢𑁆𑀯𑀸𑀦 𑀅𑀭𑀺𑀬𑀸𑀦 𑀲𑀼𑀪𑀸𑀲𑀺𑀢𑀸𑀦𑀺.

‘‘‘𑀲𑀓𑁆𑀓𑀲𑁆𑀲 ¶ 𑀧𑀼𑀢𑁆𑀢𑁄𑀫𑁆𑀳𑀺 𑀫𑀳𑀸𑀦𑀼𑀪𑀸𑀯𑁄,

𑀫𑀳𑀸𑀚𑀼𑀢𑀻𑀓𑁄 𑀢𑀺𑀤𑀺𑀯𑀽𑀧𑀧𑀦𑁆𑀦𑁄;

𑀢𑀼𑀫𑁆𑀳𑁂 𑀧𑀦 𑀲𑁂𑀝𑁆𑀞𑀫𑀼𑀧𑀸𑀲𑀫𑀸𑀦𑀸,

𑀅𑀦𑀼𑀢𑁆𑀢𑀭𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸.

‘‘‘𑀳𑀻𑀦𑀁 ¶ 𑀓𑀸𑀬𑀁 𑀉𑀧𑀧𑀦𑁆𑀦𑀸 𑀪𑀯𑀦𑁆𑀢𑁄,

𑀅𑀦𑀸𑀦𑀼𑀮𑁄𑀫𑀸 𑀪𑀯𑀢𑀽𑀧𑀧𑀢𑁆𑀢𑀺;

𑀤𑀼𑀤𑁆𑀤𑀺𑀝𑁆𑀞𑀭𑀽𑀧𑀁 𑀯𑀢 𑀅𑀤𑁆𑀤𑀲𑀸𑀫,

𑀲𑀳𑀥𑀫𑁆𑀫𑀺𑀓𑁂 𑀳𑀻𑀦𑀓𑀸𑀬𑀽𑀧𑀧𑀦𑁆𑀦𑁂.

‘‘‘𑀕𑀦𑁆𑀥𑀩𑁆𑀩𑀓𑀸𑀬𑀽𑀧𑀕𑀢𑀸 ¶ 𑀪𑀯𑀦𑁆𑀢𑁄,

𑀤𑁂𑀯𑀸𑀦𑀫𑀸𑀕𑀘𑁆𑀙𑀣 𑀧𑀸𑀭𑀺𑀘𑀭𑀺𑀬𑀁;

𑀅𑀕𑀸𑀭𑁂 𑀯𑀲𑀢𑁄 𑀫𑀬𑁆𑀳𑀁,

𑀇𑀫𑀁 𑀧𑀲𑁆𑀲 𑀯𑀺𑀲𑁂𑀲𑀢𑀁.

‘‘‘𑀇𑀢𑁆𑀣𑀻 𑀳𑀼𑀢𑁆𑀯𑀸 𑀲𑁆𑀯𑀚𑁆𑀚 𑀧𑀼𑀫𑁄𑀫𑁆𑀳𑀺 𑀤𑁂𑀯𑁄,

𑀤𑀺𑀩𑁆𑀩𑁂𑀳𑀺 𑀓𑀸𑀫𑁂𑀳𑀺 𑀲𑀫𑀗𑁆𑀕𑀺𑀪𑀽𑀢𑁄’;

𑀢𑁂 𑀘𑁄𑀤𑀺𑀢𑀸 𑀕𑁄𑀢𑀫𑀲𑀸𑀯𑀓𑁂𑀦,

𑀲𑀁𑀯𑁂𑀕𑀫𑀸𑀧𑀸𑀤𑀼 𑀲𑀫𑁂𑀘𑁆𑀘 𑀕𑁄𑀧𑀓𑀁.

‘‘‘𑀳𑀦𑁆𑀤 𑀯𑀺𑀬𑀸𑀬𑀸𑀫 [𑀯𑀺𑀕𑀸𑀬𑀸𑀫 (𑀲𑁆𑀬𑀸.), 𑀯𑀺𑀢𑀸𑀬𑀸𑀫 (𑀧𑀻.)] 𑀩𑁆𑀬𑀸𑀬𑀸𑀫 [𑀯𑀺𑀬𑀸𑀬𑀫𑀸𑀫 (𑀲𑀻. 𑀧𑀻.)],

𑀫𑀸 𑀦𑁄 𑀫𑀬𑀁 𑀧𑀭𑀧𑁂𑀲𑁆𑀲𑀸 𑀅𑀳𑀼𑀫𑁆𑀳𑀸’;

𑀢𑁂𑀲𑀁 ¶ 𑀤𑀼𑀯𑁂 𑀯𑀻𑀭𑀺𑀬𑀫𑀸𑀭𑀪𑀺𑀁𑀲𑀼,

𑀅𑀦𑀼𑀲𑁆𑀲𑀭𑀁 𑀕𑁄𑀢𑀫𑀲𑀸𑀲𑀦𑀸𑀦𑀺.

‘‘𑀇𑀥𑁂𑀯 𑀘𑀺𑀢𑁆𑀢𑀸𑀦𑀺 𑀯𑀺𑀭𑀸𑀚𑀬𑀺𑀢𑁆𑀯𑀸,

𑀓𑀸𑀫𑁂𑀲𑀼 𑀆𑀤𑀻𑀦𑀯𑀫𑀤𑁆𑀤𑀲𑀁𑀲𑀼;

𑀢𑁂 𑀓𑀸𑀫𑀲𑀁𑀬𑁄𑀚𑀦𑀩𑀦𑁆𑀥𑀦𑀸𑀦𑀺,

𑀧𑀸𑀧𑀺𑀫𑀬𑁄𑀕𑀸𑀦𑀺 𑀤𑀼𑀭𑀘𑁆𑀘𑀬𑀸𑀦𑀺.

‘‘𑀦𑀸𑀕𑁄𑀯 ¶ 𑀲𑀦𑁆𑀦𑀸𑀦𑀺 𑀕𑀼𑀡𑀸𑀦𑀺 [𑀲𑀦𑁆𑀤𑀸𑀦𑀕𑀼𑀡𑀸𑀦𑀺 (𑀲𑀻. 𑀧𑀻.), 𑀲𑀦𑁆𑀢𑀸𑀦𑀺 𑀕𑀼𑀡𑀸𑀦𑀺 (𑀲𑁆𑀬𑀸.)] 𑀙𑁂𑀢𑁆𑀯𑀸,

𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀅𑀢𑀺𑀓𑁆𑀓𑀫𑀺𑀁𑀲𑀼;

𑀲𑀇𑀦𑁆𑀤𑀸 𑀤𑁂𑀯𑀸 𑀲𑀧𑀚𑀸𑀧𑀢𑀺𑀓𑀸,

𑀲𑀩𑁆𑀩𑁂 𑀲𑀼𑀥𑀫𑁆𑀫𑀸𑀬 𑀲𑀪𑀸𑀬𑀼𑀧𑀯𑀺𑀝𑁆𑀞𑀸.

‘‘𑀢𑁂𑀲𑀁 ¶ 𑀦𑀺𑀲𑀺𑀦𑁆𑀦𑀸𑀦𑀁 𑀅𑀪𑀺𑀓𑁆𑀓𑀫𑀺𑀁𑀲𑀼,

𑀯𑀻𑀭𑀸 𑀯𑀺𑀭𑀸𑀕𑀸 𑀯𑀺𑀭𑀚𑀁 𑀓𑀭𑁄𑀦𑁆𑀢𑀸;

𑀢𑁂 𑀤𑀺𑀲𑁆𑀯𑀸 𑀲𑀁𑀯𑁂𑀕𑀫𑀓𑀸𑀲𑀺 𑀯𑀸𑀲𑀯𑁄,

𑀤𑁂𑀯𑀸𑀪𑀺𑀪𑀽 𑀤𑁂𑀯𑀕𑀡𑀲𑁆𑀲 𑀫𑀚𑁆𑀛𑁂.

‘‘‘𑀇𑀫𑁂𑀳𑀺 ¶ 𑀢𑁂 𑀳𑀻𑀦𑀓𑀸𑀬𑀽𑀧𑀧𑀦𑁆𑀦𑀸,

𑀤𑁂𑀯𑁂 𑀢𑀸𑀯𑀢𑀺𑀁𑀲𑁂 𑀅𑀪𑀺𑀓𑁆𑀓𑀫𑀦𑁆𑀢𑀺’;

𑀲𑀁𑀯𑁂𑀕𑀚𑀸𑀢𑀲𑁆𑀲 𑀯𑀘𑁄 𑀦𑀺𑀲𑀫𑁆𑀫,

𑀲𑁄 𑀕𑁄𑀧𑀓𑁄 𑀯𑀸𑀲𑀯𑀫𑀚𑁆𑀛𑀪𑀸𑀲𑀺.

‘‘‘𑀩𑀼𑀤𑁆𑀥𑁄 𑀚𑀦𑀺𑀦𑁆𑀤𑀢𑁆𑀣𑀺 𑀫𑀦𑀼𑀲𑁆𑀲𑀮𑁄𑀓𑁂,

𑀓𑀸𑀫𑀸𑀪𑀺𑀪𑀽 𑀲𑀓𑁆𑀬𑀫𑀼𑀦𑀻𑀢𑀺 𑀜𑀸𑀬𑀢𑀺;

𑀢𑀲𑁆𑀲𑁂𑀯 𑀢𑁂 𑀧𑀼𑀢𑁆𑀢𑀸 𑀲𑀢𑀺𑀬𑀸 𑀯𑀺𑀳𑀻𑀦𑀸,

𑀘𑁄𑀤𑀺𑀢𑀸 𑀫𑀬𑀸 𑀢𑁂 𑀲𑀢𑀺𑀫𑀚𑁆𑀛𑀮𑀢𑁆𑀣𑀼𑀁.

‘‘‘𑀢𑀺𑀡𑁆𑀡𑀁 ¶ 𑀢𑁂𑀲𑀁 𑀆𑀯𑀲𑀺𑀦𑁂𑀢𑁆𑀣 [𑀅𑀯𑀲𑀻𑀦𑁂𑀢𑁆𑀣 (𑀧𑀻.)] 𑀏𑀓𑁄,

𑀕𑀦𑁆𑀥𑀩𑁆𑀩𑀓𑀸𑀬𑀽𑀧𑀕𑀢𑁄 𑀯𑀲𑀻𑀦𑁄;

𑀤𑁆𑀯𑁂 𑀘 𑀲𑀫𑁆𑀩𑁄𑀥𑀺𑀧𑀣𑀸𑀦𑀼𑀲𑀸𑀭𑀺𑀦𑁄,

𑀤𑁂𑀯𑁂𑀧𑀺 𑀳𑀻𑀴𑁂𑀦𑁆𑀢𑀺 𑀲𑀫𑀸𑀳𑀺𑀢𑀢𑁆𑀢𑀸.

‘‘‘𑀏𑀢𑀸𑀤𑀺𑀲𑀻 𑀥𑀫𑁆𑀫𑀧𑁆𑀧𑀓𑀸𑀲𑀦𑁂𑀢𑁆𑀣,

𑀦 𑀢𑀢𑁆𑀣 𑀓𑀺𑀁𑀓𑀗𑁆𑀔𑀢𑀺 𑀓𑁄𑀘𑀺 𑀲𑀸𑀯𑀓𑁄;

𑀦𑀺𑀢𑀺𑀡𑁆𑀡𑀑𑀖𑀁 𑀯𑀺𑀘𑀺𑀓𑀺𑀘𑁆𑀙𑀙𑀺𑀦𑁆𑀦𑀁,

𑀩𑀼𑀤𑁆𑀥𑀁 𑀦𑀫𑀲𑁆𑀲𑀸𑀫 𑀚𑀺𑀦𑀁 𑀚𑀦𑀺𑀦𑁆𑀤𑀁’.

‘‘𑀬𑀁 ¶ ¶ 𑀢𑁂 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬,

𑀯𑀺𑀲𑁂𑀲𑀁 𑀅𑀚𑁆𑀛𑀕𑀁𑀲𑀼 [𑀅𑀚𑁆𑀛𑀕𑀫𑀁𑀲𑀼 (𑀲𑁆𑀬𑀸.)] 𑀢𑁂;

𑀓𑀸𑀬𑀁 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀁,

𑀤𑀼𑀯𑁂 𑀢𑁂𑀲𑀁 𑀯𑀺𑀲𑁂𑀲𑀕𑀽.

‘‘𑀢𑀲𑁆𑀲 𑀥𑀫𑁆𑀫𑀲𑁆𑀲 𑀧𑀢𑁆𑀢𑀺𑀬𑀸,

𑀆𑀕𑀢𑀫𑁆𑀳𑀸𑀲𑀺 𑀫𑀸𑀭𑀺𑀲;

𑀓𑀢𑀸𑀯𑀓𑀸𑀲𑀸 𑀪𑀕𑀯𑀢𑀸,

𑀧𑀜𑁆𑀳𑀁 𑀧𑀼𑀘𑁆𑀙𑁂𑀫𑀼 𑀫𑀸𑀭𑀺𑀲𑀸’’𑀢𑀺.

𑁩𑁫𑁫. 𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑁋 ‘‘𑀤𑀻𑀖𑀭𑀢𑁆𑀢𑀁 𑀯𑀺𑀲𑀼𑀤𑁆𑀥𑁄 𑀔𑁄 𑀅𑀬𑀁 𑀬𑀓𑁆𑀔𑁄 [𑀲𑀓𑁆𑀓𑁄 (𑀲𑀻. 𑀲𑁆𑀬𑀸. 𑀧𑀻.)], 𑀬𑀁 𑀓𑀺𑀜𑁆𑀘𑀺 𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀲𑀩𑁆𑀩𑀁 𑀢𑀁 𑀅𑀢𑁆𑀣𑀲𑀜𑁆𑀳𑀺𑀢𑀁𑀬𑁂𑀯 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀦𑁄 𑀅𑀦𑀢𑁆𑀣𑀲𑀜𑁆𑀳𑀺𑀢𑀁. 𑀬𑀜𑁆𑀘𑀲𑁆𑀲𑀸𑀳𑀁 𑀧𑀼𑀝𑁆𑀞𑁄 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀺, 𑀢𑀁 𑀔𑀺𑀧𑁆𑀧𑀫𑁂𑀯 𑀆𑀚𑀸𑀦𑀺𑀲𑁆𑀲𑀢𑀻’’𑀢𑀺.

𑁩𑁫𑁬. 𑀅𑀣 ¶ 𑀔𑁄 𑀪𑀕𑀯𑀸 𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺 𑁋

‘‘𑀧𑀼𑀘𑁆𑀙 𑀯𑀸𑀲𑀯 𑀫𑀁 𑀧𑀜𑁆𑀳𑀁, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺;

𑀢𑀲𑁆𑀲 𑀢𑀲𑁆𑀲𑁂𑀯 𑀧𑀜𑁆𑀳𑀲𑁆𑀲, 𑀅𑀳𑀁 𑀅𑀦𑁆𑀢𑀁 𑀓𑀭𑁄𑀫𑀺 𑀢𑁂’’𑀢𑀺.

𑀧𑀞𑀫𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑁩𑁫𑁭. 𑀓𑀢𑀸𑀯𑀓𑀸𑀲𑁄 ¶ 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑀸 𑀇𑀫𑀁 𑀪𑀕𑀯𑀦𑁆𑀢𑀁 [𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀦𑁆𑀢𑀁 𑀇𑀫𑀁 (𑀲𑀻. 𑀧𑀻.)] 𑀧𑀞𑀫𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋

‘‘𑀓𑀺𑀁 𑀲𑀁𑀬𑁄𑀚𑀦𑀸 𑀦𑀼 𑀔𑁄, 𑀫𑀸𑀭𑀺𑀲, 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀅𑀲𑀼𑀭𑀸 𑀦𑀸𑀕𑀸 𑀕𑀦𑁆𑀥𑀩𑁆𑀩𑀸 𑀬𑁂 ¶ 𑀘𑀜𑁆𑀜𑁂 𑀲𑀦𑁆𑀢𑀺 𑀧𑀼𑀣𑀼𑀓𑀸𑀬𑀸, 𑀢𑁂 𑁋 ‘𑀅𑀯𑁂𑀭𑀸 𑀅𑀤𑀡𑁆𑀟𑀸 𑀅𑀲𑀧𑀢𑁆𑀢𑀸 𑀅𑀩𑁆𑀬𑀸𑀧𑀚𑁆𑀚𑀸 𑀯𑀺𑀳𑀭𑁂𑀫𑀼 𑀅𑀯𑁂𑀭𑀺𑀦𑁄’𑀢𑀺 𑀇𑀢𑀺 𑀘 𑀦𑁂𑀲𑀁 𑀳𑁄𑀢𑀺, 𑀅𑀣 𑀘 𑀧𑀦 𑀲𑀯𑁂𑀭𑀸 𑀲𑀤𑀡𑁆𑀟𑀸 𑀲𑀲𑀧𑀢𑁆𑀢𑀸 𑀲𑀩𑁆𑀬𑀸𑀧𑀚𑁆𑀚𑀸 𑀯𑀺𑀳𑀭𑀦𑁆𑀢𑀺 𑀲𑀯𑁂𑀭𑀺𑀦𑁄’’𑀢𑀺? 𑀇𑀢𑁆𑀣𑀁 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 [𑀇𑀫𑀁 𑀧𑀞𑀫𑀁 𑀧𑀜𑁆𑀳𑀁 (𑀲𑀻. 𑀧𑀻.)] 𑀅𑀧𑀼𑀘𑁆𑀙𑀺. 𑀢𑀲𑁆𑀲 𑀪𑀕𑀯𑀸 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀩𑁆𑀬𑀸𑀓𑀸𑀲𑀺 𑁋

‘‘𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀲𑀁𑀬𑁄𑀚𑀦𑀸 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀅𑀲𑀼𑀭𑀸 𑀦𑀸𑀕𑀸 𑀕𑀦𑁆𑀥𑀩𑁆𑀩𑀸 𑀬𑁂 𑀘𑀜𑁆𑀜𑁂 ¶ 𑀲𑀦𑁆𑀢𑀺 𑀧𑀼𑀣𑀼𑀓𑀸𑀬𑀸, 𑀢𑁂 𑁋 ‘𑀅𑀯𑁂𑀭𑀸 𑀅𑀤𑀡𑁆𑀟𑀸 𑀅𑀲𑀧𑀢𑁆𑀢𑀸 𑀅𑀩𑁆𑀬𑀸𑀧𑀚𑁆𑀚𑀸 𑀯𑀺𑀳𑀭𑁂𑀫𑀼 𑀅𑀯𑁂𑀭𑀺𑀦𑁄’𑀢𑀺 𑀇𑀢𑀺 𑀘 𑀦𑁂𑀲𑀁 𑀳𑁄𑀢𑀺, 𑀅𑀣 𑀘 𑀧𑀦 𑀲𑀯𑁂𑀭𑀸 𑀲𑀤𑀡𑁆𑀟𑀸 𑀲𑀲𑀧𑀢𑁆𑀢𑀸 𑀲𑀩𑁆𑀬𑀸𑀧𑀚𑁆𑀚𑀸 𑀯𑀺𑀳𑀭𑀦𑁆𑀢𑀺 𑀲𑀯𑁂𑀭𑀺𑀦𑁄’’𑀢𑀺. 𑀇𑀢𑁆𑀣𑀁 𑀪𑀕𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀩𑁆𑀬𑀸𑀓𑀸𑀲𑀺. 𑀅𑀢𑁆𑀢𑀫𑀦𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺 𑀅𑀦𑀼𑀫𑁄𑀤𑀺 𑁋 ‘‘𑀏𑀯𑀫𑁂𑀢𑀁, 𑀪𑀕𑀯𑀸, 𑀏𑀯𑀫𑁂𑀢𑀁, 𑀲𑀼𑀕𑀢. 𑀢𑀺𑀡𑁆𑀡𑀸 𑀫𑁂𑀢𑁆𑀣 𑀓𑀗𑁆𑀔𑀸 𑀯𑀺𑀕𑀢𑀸 𑀓𑀣𑀁𑀓𑀣𑀸 𑀪𑀕𑀯𑀢𑁄 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸’’𑀢𑀺.

𑁩𑁫𑁮. 𑀇𑀢𑀺𑀳 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 ¶ 𑀅𑀦𑀼𑀫𑁄𑀤𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀢𑁆𑀢𑀭𑀺𑀁 [𑀉𑀢𑁆𑀢𑀭𑀺𑀁 (𑀲𑀻. 𑀲𑁆𑀬𑀸. 𑀧𑀻.)] 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋

‘‘𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀁 𑀧𑀦, 𑀫𑀸𑀭𑀺𑀲, 𑀓𑀺𑀁𑀦𑀺𑀤𑀸𑀦𑀁 𑀓𑀺𑀁𑀲𑀫𑀼𑀤𑀬𑀁 𑀓𑀺𑀁𑀚𑀸𑀢𑀺𑀓𑀁 𑀓𑀺𑀁𑀧𑀪𑀯𑀁; 𑀓𑀺𑀲𑁆𑀫𑀺𑀁 𑀲𑀢𑀺 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀁 𑀳𑁄𑀢𑀺; 𑀓𑀺𑀲𑁆𑀫𑀺𑀁 𑀅𑀲𑀢𑀺 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀁 𑀦 𑀳𑁄𑀢𑀻’’𑀢𑀺? ‘‘𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀁 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀧𑀺𑀬𑀸𑀧𑁆𑀧𑀺𑀬𑀦𑀺𑀤𑀸𑀦𑀁 𑀧𑀺𑀬𑀸𑀧𑁆𑀧𑀺𑀬𑀲𑀫𑀼𑀤𑀬𑀁 𑀧𑀺𑀬𑀸𑀧𑁆𑀧𑀺𑀬𑀚𑀸𑀢𑀺𑀓𑀁 𑀧𑀺𑀬𑀸𑀧𑁆𑀧𑀺𑀬𑀧𑀪𑀯𑀁; 𑀧𑀺𑀬𑀸𑀧𑁆𑀧𑀺𑀬𑁂 𑀲𑀢𑀺 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀁 𑀳𑁄𑀢𑀺, 𑀧𑀺𑀬𑀸𑀧𑁆𑀧𑀺𑀬𑁂 𑀅𑀲𑀢𑀺 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀁 𑀦 𑀳𑁄𑀢𑀻’’𑀢𑀺.

‘‘𑀧𑀺𑀬𑀸𑀧𑁆𑀧𑀺𑀬𑀁 ¶ 𑀔𑁄 𑀧𑀦, 𑀫𑀸𑀭𑀺𑀲, 𑀓𑀺𑀁𑀦𑀺𑀤𑀸𑀦𑀁 𑀓𑀺𑀁𑀲𑀫𑀼𑀤𑀬𑀁 𑀓𑀺𑀁𑀚𑀸𑀢𑀺𑀓𑀁 𑀓𑀺𑀁𑀧𑀪𑀯𑀁; 𑀓𑀺𑀲𑁆𑀫𑀺𑀁 𑀲𑀢𑀺 𑀧𑀺𑀬𑀸𑀧𑁆𑀧𑀺𑀬𑀁 𑀳𑁄𑀢𑀺; 𑀓𑀺𑀲𑁆𑀫𑀺𑀁 𑀅𑀲𑀢𑀺 𑀧𑀺𑀬𑀸𑀧𑁆𑀧𑀺𑀬𑀁 𑀦 𑀳𑁄𑀢𑀻’’𑀢𑀺? ‘‘𑀧𑀺𑀬𑀸𑀧𑁆𑀧𑀺𑀬𑀁 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀙𑀦𑁆𑀤𑀦𑀺𑀤𑀸𑀦𑀁 𑀙𑀦𑁆𑀤𑀲𑀫𑀼𑀤𑀬𑀁 𑀙𑀦𑁆𑀤𑀚𑀸𑀢𑀺𑀓𑀁 𑀙𑀦𑁆𑀤𑀧𑀪𑀯𑀁; 𑀙𑀦𑁆𑀤𑁂 𑀲𑀢𑀺 𑀧𑀺𑀬𑀸𑀧𑁆𑀧𑀺𑀬𑀁 𑀳𑁄𑀢𑀺; 𑀙𑀦𑁆𑀤𑁂 𑀅𑀲𑀢𑀺 𑀧𑀺𑀬𑀸𑀧𑁆𑀧𑀺𑀬𑀁 𑀦 𑀳𑁄𑀢𑀻’’𑀢𑀺.

‘‘𑀙𑀦𑁆𑀤𑁄 𑀔𑁄 𑀧𑀦, 𑀫𑀸𑀭𑀺𑀲, 𑀓𑀺𑀁𑀦𑀺𑀤𑀸𑀦𑁄 𑀓𑀺𑀁𑀲𑀫𑀼𑀤𑀬𑁄 𑀓𑀺𑀁𑀚𑀸𑀢𑀺𑀓𑁄 𑀓𑀺𑀁𑀧𑀪𑀯𑁄; 𑀓𑀺𑀲𑁆𑀫𑀺𑀁 𑀲𑀢𑀺 𑀙𑀦𑁆𑀤𑁄 ¶ 𑀳𑁄𑀢𑀺; 𑀓𑀺𑀲𑁆𑀫𑀺𑀁 𑀅𑀲𑀢𑀺 𑀙𑀦𑁆𑀤𑁄 𑀦 𑀳𑁄𑀢𑀻’’𑀢𑀺? ‘‘𑀙𑀦𑁆𑀤𑁄 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀯𑀺𑀢𑀓𑁆𑀓𑀦𑀺𑀤𑀸𑀦𑁄 𑀯𑀺𑀢𑀓𑁆𑀓𑀲𑀫𑀼𑀤𑀬𑁄 𑀯𑀺𑀢𑀓𑁆𑀓𑀚𑀸𑀢𑀺𑀓𑁄 𑀯𑀺𑀢𑀓𑁆𑀓𑀧𑀪𑀯𑁄; 𑀯𑀺𑀢𑀓𑁆𑀓𑁂 𑀲𑀢𑀺 𑀙𑀦𑁆𑀤𑁄 𑀳𑁄𑀢𑀺; 𑀯𑀺𑀢𑀓𑁆𑀓𑁂 𑀅𑀲𑀢𑀺 𑀙𑀦𑁆𑀤𑁄 𑀦 𑀳𑁄𑀢𑀻’’𑀢𑀺.

‘‘𑀯𑀺𑀢𑀓𑁆𑀓𑁄 𑀔𑁄 𑀧𑀦, 𑀫𑀸𑀭𑀺𑀲, 𑀓𑀺𑀁𑀦𑀺𑀤𑀸𑀦𑁄 𑀓𑀺𑀁𑀲𑀫𑀼𑀤𑀬𑁄 𑀓𑀺𑀁𑀚𑀸𑀢𑀺𑀓𑁄 𑀓𑀺𑀁𑀧𑀪𑀯𑁄; 𑀓𑀺𑀲𑁆𑀫𑀺𑀁 𑀲𑀢𑀺 𑀯𑀺𑀢𑀓𑁆𑀓𑁄 𑀳𑁄𑀢𑀺; 𑀓𑀺𑀲𑁆𑀫𑀺𑀁 𑀅𑀲𑀢𑀺 𑀯𑀺𑀢𑀓𑁆𑀓𑁄 𑀦 𑀳𑁄𑀢𑀻’’𑀢𑀺? ‘‘𑀯𑀺𑀢𑀓𑁆𑀓𑁄 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀦𑀺𑀤𑀸𑀦𑁄 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀲𑀫𑀼𑀤𑀬𑁄 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀚𑀸𑀢𑀺𑀓𑁄 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀧𑀪𑀯𑁄; 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀬 𑀲𑀢𑀺 𑀯𑀺𑀢𑀓𑁆𑀓𑁄 𑀳𑁄𑀢𑀺; 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀬 𑀅𑀲𑀢𑀺 𑀯𑀺𑀢𑀓𑁆𑀓𑁄 𑀦 𑀳𑁄𑀢𑀻’’𑀢𑀺.

‘‘𑀓𑀣𑀁 ¶ 𑀧𑀝𑀺𑀧𑀦𑁆𑀦𑁄 𑀧𑀦, 𑀫𑀸𑀭𑀺𑀲, 𑀪𑀺𑀓𑁆𑀔𑀼 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀦𑀺𑀭𑁄𑀥𑀲𑀸𑀭𑀼𑀧𑁆𑀧𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺?

𑀯𑁂𑀤𑀦𑀸𑀓𑀫𑁆𑀫𑀝𑁆𑀞𑀸𑀦𑀁

𑁩𑁫𑁯. ‘‘𑀲𑁄𑀫𑀦𑀲𑁆𑀲𑀁𑀧𑀸𑀳𑀁 ¶ [𑀧𑀳𑀁 (𑀲𑀻. 𑀧𑀻.), 𑀘𑀸𑀳𑀁 (𑀲𑁆𑀬𑀸. 𑀓𑀁.)], 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀺. 𑀤𑁄𑀫𑀦𑀲𑁆𑀲𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀺. 𑀉𑀧𑁂𑀓𑁆𑀔𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀺.

𑁩𑁬𑁦. ‘‘𑀲𑁄𑀫𑀦𑀲𑁆𑀲𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀲𑁄𑀫𑀦𑀲𑁆𑀲𑀁 ‘𑀇𑀫𑀁 𑀔𑁄 𑀫𑁂 𑀲𑁄𑀫𑀦𑀲𑁆𑀲𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀻’𑀢𑀺, 𑀏𑀯𑀭𑀽𑀧𑀁 𑀲𑁄𑀫𑀦𑀲𑁆𑀲𑀁 𑀦 𑀲𑁂𑀯𑀺𑀢𑀩𑁆𑀩𑀁. 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀲𑁄𑀫𑀦𑀲𑁆𑀲𑀁 ‘𑀇𑀫𑀁 𑀔𑁄 ¶ 𑀫𑁂 𑀲𑁄𑀫𑀦𑀲𑁆𑀲𑀁 𑀲𑁂𑀯𑀢𑁄 ¶ 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’𑀢𑀺, 𑀏𑀯𑀭𑀽𑀧𑀁 𑀲𑁄𑀫𑀦𑀲𑁆𑀲𑀁 𑀲𑁂𑀯𑀺𑀢𑀩𑁆𑀩𑀁. 𑀢𑀢𑁆𑀣 𑀬𑀁 𑀘𑁂 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁, 𑀬𑀁 𑀘𑁂 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁, 𑀬𑁂 𑀅𑀯𑀺𑀢𑀓𑁆𑀓𑁂 𑀅𑀯𑀺𑀘𑀸𑀭𑁂, 𑀢𑁂 [𑀲𑁂 (𑀲𑀻. 𑀧𑀻.)] 𑀧𑀡𑀻𑀢𑀢𑀭𑁂. 𑀲𑁄𑀫𑀦𑀲𑁆𑀲𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻𑀢𑀺. 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

𑁩𑁬𑁧. ‘‘𑀤𑁄𑀫𑀦𑀲𑁆𑀲𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺 ¶ , 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻𑀢𑀺. 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀤𑁄𑀫𑀦𑀲𑁆𑀲𑀁 ‘𑀇𑀫𑀁 𑀔𑁄 𑀫𑁂 𑀤𑁄𑀫𑀦𑀲𑁆𑀲𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀻’𑀢𑀺, 𑀏𑀯𑀭𑀽𑀧𑀁 𑀤𑁄𑀫𑀦𑀲𑁆𑀲𑀁 𑀦 𑀲𑁂𑀯𑀺𑀢𑀩𑁆𑀩𑀁. 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀤𑁄𑀫𑀦𑀲𑁆𑀲𑀁 ‘𑀇𑀫𑀁 𑀔𑁄 𑀫𑁂 𑀤𑁄𑀫𑀦𑀲𑁆𑀲𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’𑀢𑀺, 𑀏𑀯𑀭𑀽𑀧𑀁 𑀤𑁄𑀫𑀦𑀲𑁆𑀲𑀁 𑀲𑁂𑀯𑀺𑀢𑀩𑁆𑀩𑀁. 𑀢𑀢𑁆𑀣 𑀬𑀁 𑀘𑁂 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁, 𑀬𑀁 𑀘𑁂 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁, 𑀬𑁂 𑀅𑀯𑀺𑀢𑀓𑁆𑀓𑁂 𑀅𑀯𑀺𑀘𑀸𑀭𑁂, 𑀢𑁂 𑀧𑀡𑀻𑀢𑀢𑀭𑁂. 𑀤𑁄𑀫𑀦𑀲𑁆𑀲𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻’𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

𑁩𑁬𑁨. ‘‘𑀉𑀧𑁂𑀓𑁆𑀔𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀉𑀧𑁂𑀓𑁆𑀔𑀁 ‘𑀇𑀫𑀁 𑀔𑁄 𑀫𑁂 𑀉𑀧𑁂𑀓𑁆𑀔𑀁 𑀲𑁂𑀯𑀢𑁄 ¶ 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀻’𑀢𑀺, 𑀏𑀯𑀭𑀽𑀧𑀸 𑀉𑀧𑁂𑀓𑁆𑀔𑀸 ¶ 𑀦 𑀲𑁂𑀯𑀺𑀢𑀩𑁆𑀩𑀸. 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀉𑀧𑁂𑀓𑁆𑀔𑀁 ‘𑀇𑀫𑀁 𑀔𑁄 𑀫𑁂 𑀉𑀧𑁂𑀓𑁆𑀔𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’𑀢𑀺, 𑀏𑀯𑀭𑀽𑀧𑀸 𑀉𑀧𑁂𑀓𑁆𑀔𑀸 𑀲𑁂𑀯𑀺𑀢𑀩𑁆𑀩𑀸. 𑀢𑀢𑁆𑀣 𑀬𑀁 𑀘𑁂 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁, 𑀬𑀁 𑀘𑁂 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁, 𑀬𑁂 𑀅𑀯𑀺𑀢𑀓𑁆𑀓𑁂 𑀅𑀯𑀺𑀘𑀸𑀭𑁂, 𑀢𑁂 𑀧𑀡𑀻𑀢𑀢𑀭𑁂. 𑀉𑀧𑁂𑀓𑁆𑀔𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

𑁩𑁬𑁩. ‘‘𑀏𑀯𑀁 𑀧𑀝𑀺𑀧𑀦𑁆𑀦𑁄 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀪𑀺𑀓𑁆𑀔𑀼 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀦𑀺𑀭𑁄𑀥𑀲𑀸𑀭𑀼𑀧𑁆𑀧𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺. 𑀇𑀢𑁆𑀣𑀁 𑀪𑀕𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀩𑁆𑀬𑀸𑀓𑀸𑀲𑀺. 𑀅𑀢𑁆𑀢𑀫𑀦𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 ¶ 𑀅𑀪𑀺𑀦𑀦𑁆𑀤𑀺 𑀅𑀦𑀼𑀫𑁄𑀤𑀺 𑁋 ‘‘𑀏𑀯𑀫𑁂𑀢𑀁, 𑀪𑀕𑀯𑀸, 𑀏𑀯𑀫𑁂𑀢𑀁, 𑀲𑀼𑀕𑀢, 𑀢𑀺𑀡𑁆𑀡𑀸 𑀫𑁂𑀢𑁆𑀣 𑀓𑀗𑁆𑀔𑀸 𑀯𑀺𑀕𑀢𑀸 𑀓𑀣𑀁𑀓𑀣𑀸 𑀪𑀕𑀯𑀢𑁄 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸’’𑀢𑀺.

𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄

𑁩𑁬𑁪. 𑀇𑀢𑀺𑀳 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋

‘‘𑀓𑀣𑀁 𑀧𑀝𑀺𑀧𑀦𑁆𑀦𑁄 𑀧𑀦, 𑀫𑀸𑀭𑀺𑀲, 𑀪𑀺𑀓𑁆𑀔𑀼 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺? ‘‘𑀓𑀸𑀬𑀲𑀫𑀸𑀘𑀸𑀭𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀺. 𑀯𑀘𑀻𑀲𑀫𑀸𑀘𑀸𑀭𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀺. 𑀧𑀭𑀺𑀬𑁂𑀲𑀦𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩’’𑀫𑁆𑀧𑀺.

‘‘𑀓𑀸𑀬𑀲𑀫𑀸𑀘𑀸𑀭𑀁𑀧𑀸𑀳𑀁 ¶ , 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀓𑀸𑀬𑀲𑀫𑀸𑀘𑀸𑀭𑀁 ‘𑀇𑀫𑀁 𑀔𑁄 𑀫𑁂 𑀓𑀸𑀬𑀲𑀫𑀸𑀘𑀸𑀭𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀻’𑀢𑀺, 𑀏𑀯𑀭𑀽𑀧𑁄 𑀓𑀸𑀬𑀲𑀫𑀸𑀘𑀸𑀭𑁄 𑀦 𑀲𑁂𑀯𑀺𑀢𑀩𑁆𑀩𑁄. 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀓𑀸𑀬𑀲𑀫𑀸𑀘𑀸𑀭𑀁 ‘𑀇𑀫𑀁 𑀔𑁄 𑀫𑁂 𑀓𑀸𑀬𑀲𑀫𑀸𑀘𑀸𑀭𑀁 ¶ 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’𑀢𑀺, 𑀏𑀯𑀭𑀽𑀧𑁄 𑀓𑀸𑀬𑀲𑀫𑀸𑀘𑀸𑀭𑁄 𑀲𑁂𑀯𑀺𑀢𑀩𑁆𑀩𑁄. 𑀓𑀸𑀬𑀲𑀫𑀸𑀘𑀸𑀭𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘𑀯𑀘𑀻𑀲𑀫𑀸𑀘𑀸𑀭𑀁𑀧𑀸𑀳𑀁 ¶ , 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻’𑀢𑀺. 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀯𑀘𑀻𑀲𑀫𑀸𑀘𑀸𑀭𑀁 ‘𑀇𑀫𑀁 𑀔𑁄 𑀫𑁂 𑀯𑀘𑀻𑀲𑀫𑀸𑀘𑀸𑀭𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀻’𑀢𑀺, 𑀏𑀯𑀭𑀽𑀧𑁄 𑀯𑀘𑀻𑀲𑀫𑀸𑀘𑀸𑀭𑁄 𑀦 𑀲𑁂𑀯𑀺𑀢𑀩𑁆𑀩𑁄. 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀯𑀘𑀻𑀲𑀫𑀸𑀘𑀸𑀭𑀁 ‘𑀇𑀫𑀁 𑀔𑁄 𑀫𑁂 𑀯𑀘𑀻𑀲𑀫𑀸𑀘𑀸𑀭𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’𑀢𑀺, 𑀏𑀯𑀭𑀽𑀧𑁄 𑀯𑀘𑀻𑀲𑀫𑀸𑀘𑀸𑀭𑁄 𑀲𑁂𑀯𑀺𑀢𑀩𑁆𑀩𑁄. 𑀯𑀘𑀻𑀲𑀫𑀸𑀘𑀸𑀭𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘𑀧𑀭𑀺𑀬𑁂𑀲𑀦𑀁𑀧𑀸𑀳𑀁 ¶ , 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀧𑀭𑀺𑀬𑁂𑀲𑀦𑀁 ‘𑀇𑀫𑀁 𑀔𑁄 𑀫𑁂 𑀧𑀭𑀺𑀬𑁂𑀲𑀦𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀻’𑀢𑀺, 𑀏𑀯𑀭𑀽𑀧𑀸 𑀧𑀭𑀺𑀬𑁂𑀲𑀦𑀸 𑀦 𑀲𑁂𑀯𑀺𑀢𑀩𑁆𑀩𑀸. 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀧𑀭𑀺𑀬𑁂𑀲𑀦𑀁 ‘𑀇𑀫𑀁 ¶ 𑀔𑁄 𑀫𑁂 𑀧𑀭𑀺𑀬𑁂𑀲𑀦𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’𑀢𑀺, 𑀏𑀯𑀭𑀽𑀧𑀸 𑀧𑀭𑀺𑀬𑁂𑀲𑀦𑀸 𑀲𑁂𑀯𑀺𑀢𑀩𑁆𑀩𑀸. 𑀧𑀭𑀺𑀬𑁂𑀲𑀦𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻𑀢𑀺 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘𑀏𑀯𑀁 ¶ 𑀧𑀝𑀺𑀧𑀦𑁆𑀦𑁄 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀪𑀺𑀓𑁆𑀔𑀼 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺. 𑀇𑀢𑁆𑀣𑀁 𑀪𑀕𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀩𑁆𑀬𑀸𑀓𑀸𑀲𑀺. 𑀅𑀢𑁆𑀢𑀫𑀦𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺 𑀅𑀦𑀼𑀫𑁄𑀤𑀺 𑁋 ‘‘𑀏𑀯𑀫𑁂𑀢𑀁, 𑀪𑀕𑀯𑀸, 𑀏𑀯𑀫𑁂𑀢𑀁, 𑀲𑀼𑀕𑀢. 𑀢𑀺𑀡𑁆𑀡𑀸 𑀫𑁂𑀢𑁆𑀣 𑀓𑀗𑁆𑀔𑀸 𑀯𑀺𑀕𑀢𑀸 𑀓𑀣𑀁𑀓𑀣𑀸 𑀪𑀕𑀯𑀢𑁄 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸’’𑀢𑀺.

𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄

𑁩𑁬𑁫. 𑀇𑀢𑀺𑀳 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋

‘‘𑀓𑀣𑀁 𑀧𑀝𑀺𑀧𑀦𑁆𑀦𑁄 𑀧𑀦, 𑀫𑀸𑀭𑀺𑀲, 𑀪𑀺𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺? ‘‘𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁 𑀭𑀽𑀧𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀺. 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀁 𑀲𑀤𑁆𑀤𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀺. 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀁 𑀕𑀦𑁆𑀥𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀺. 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀁 ¶ 𑀭𑀲𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀺. 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀁 𑀨𑁄𑀝𑁆𑀞𑀩𑁆𑀩𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀺. 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀁 𑀥𑀫𑁆𑀫𑀁𑀧𑀸𑀳𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺, 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀇𑀫𑀲𑁆𑀲 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀲𑀗𑁆𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀸𑀫𑀺. 𑀬𑀣𑀸𑀭𑀽𑀧𑀁, 𑀪𑀦𑁆𑀢𑁂, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁 𑀭𑀽𑀧𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀏𑀯𑀭𑀽𑀧𑀁 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁 𑀭𑀽𑀧𑀁 ¶ 𑀦 𑀲𑁂𑀯𑀺𑀢𑀩𑁆𑀩𑀁 ¶ . 𑀬𑀣𑀸𑀭𑀽𑀧𑀜𑁆𑀘 𑀔𑁄, 𑀪𑀦𑁆𑀢𑁂, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁 𑀭𑀽𑀧𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀏𑀯𑀭𑀽𑀧𑀁 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁 𑀭𑀽𑀧𑀁 𑀲𑁂𑀯𑀺𑀢𑀩𑁆𑀩𑀁. 𑀬𑀣𑀸𑀭𑀽𑀧𑀜𑁆𑀘 𑀔𑁄, 𑀪𑀦𑁆𑀢𑁂, 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀁 ¶ 𑀲𑀤𑁆𑀤𑀁 𑀲𑁂𑀯𑀢𑁄…𑀧𑁂… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀁 𑀕𑀦𑁆𑀥𑀁 𑀲𑁂𑀯𑀢𑁄… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀁 𑀭𑀲𑀁 𑀲𑁂𑀯𑀢𑁄… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀁 𑀨𑁄𑀝𑁆𑀞𑀩𑁆𑀩𑀁 𑀲𑁂𑀯𑀢𑁄… 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀁 𑀥𑀫𑁆𑀫𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀏𑀯𑀭𑀽𑀧𑁄 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁄 𑀥𑀫𑁆𑀫𑁄 𑀦 𑀲𑁂𑀯𑀺𑀢𑀩𑁆𑀩𑁄. 𑀬𑀣𑀸𑀭𑀽𑀧𑀜𑁆𑀘 𑀔𑁄, 𑀪𑀦𑁆𑀢𑁂, 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑀁 𑀥𑀫𑁆𑀫𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀏𑀯𑀭𑀽𑀧𑁄 𑀫𑀦𑁄𑀯𑀺𑀜𑁆𑀜𑁂𑀬𑁆𑀬𑁄 𑀥𑀫𑁆𑀫𑁄 𑀲𑁂𑀯𑀺𑀢𑀩𑁆𑀩𑁄.

‘‘𑀇𑀫𑀲𑁆𑀲 𑀔𑁄 𑀫𑁂, 𑀪𑀦𑁆𑀢𑁂, 𑀪𑀕𑀯𑀢𑀸 𑀲𑀗𑁆𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑀢𑁄 𑀢𑀺𑀡𑁆𑀡𑀸 𑀫𑁂𑀢𑁆𑀣 𑀓𑀗𑁆𑀔𑀸 𑀯𑀺𑀕𑀢𑀸 𑀓𑀣𑀁𑀓𑀣𑀸 𑀪𑀕𑀯𑀢𑁄 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸’’𑀢𑀺.

𑁩𑁬𑁬. 𑀇𑀢𑀺𑀳 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀢𑁆𑀢𑀭𑀺𑀁 𑀧𑀜𑁆𑀳𑀁 𑀅𑀧𑀼𑀘𑁆𑀙𑀺 𑁋

‘‘𑀲𑀩𑁆𑀩𑁂𑀯 𑀦𑀼 𑀔𑁄, 𑀫𑀸𑀭𑀺𑀲, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀓𑀦𑁆𑀢𑀯𑀸𑀤𑀸 𑀏𑀓𑀦𑁆𑀢𑀲𑀻𑀮𑀸 𑀏𑀓𑀦𑁆𑀢𑀙𑀦𑁆𑀤𑀸 𑀏𑀓𑀦𑁆𑀢𑀅𑀚𑁆𑀛𑁄𑀲𑀸𑀦𑀸’’𑀢𑀺? ‘‘𑀦 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀲𑀩𑁆𑀩𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀓𑀦𑁆𑀢𑀯𑀸𑀤𑀸 𑀏𑀓𑀦𑁆𑀢𑀲𑀻𑀮𑀸 𑀏𑀓𑀦𑁆𑀢𑀙𑀦𑁆𑀤𑀸 𑀏𑀓𑀦𑁆𑀢𑀅𑀚𑁆𑀛𑁄𑀲𑀸𑀦𑀸’’𑀢𑀺.

‘‘𑀓𑀲𑁆𑀫𑀸 𑀧𑀦, 𑀫𑀸𑀭𑀺𑀲, 𑀦 𑀲𑀩𑁆𑀩𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀓𑀦𑁆𑀢𑀯𑀸𑀤𑀸 𑀏𑀓𑀦𑁆𑀢𑀲𑀻𑀮𑀸 𑀏𑀓𑀦𑁆𑀢𑀙𑀦𑁆𑀤𑀸 𑀏𑀓𑀦𑁆𑀢𑀅𑀚𑁆𑀛𑁄𑀲𑀸𑀦𑀸’’𑀢𑀺? ‘‘𑀅𑀦𑁂𑀓𑀥𑀸𑀢𑀼 𑀦𑀸𑀦𑀸𑀥𑀸𑀢𑀼 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀮𑁄𑀓𑁄. 𑀢𑀲𑁆𑀫𑀺𑀁 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀲𑁆𑀫𑀺𑀁 𑀮𑁄𑀓𑁂 𑀬𑀁 𑀬𑀤𑁂𑀯 𑀲𑀢𑁆𑀢𑀸 𑀥𑀸𑀢𑀼𑀁 𑀅𑀪𑀺𑀦𑀺𑀯𑀺𑀲𑀦𑁆𑀢𑀺, 𑀢𑀁 𑀢𑀤𑁂𑀯 𑀣𑀸𑀫𑀲𑀸 𑀧𑀭𑀸𑀫𑀸𑀲𑀸 ¶ 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀦𑁆𑀢𑀺 𑁋 ‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’𑀦𑁆𑀢𑀺. 𑀢𑀲𑁆𑀫𑀸 ¶ 𑀦 𑀲𑀩𑁆𑀩𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀓𑀦𑁆𑀢𑀯𑀸𑀤𑀸 𑀏𑀓𑀦𑁆𑀢𑀲𑀻𑀮𑀸 𑀏𑀓𑀦𑁆𑀢𑀙𑀦𑁆𑀤𑀸 𑀏𑀓𑀦𑁆𑀢𑀅𑀚𑁆𑀛𑁄𑀲𑀸𑀦𑀸’’𑀢𑀺.

‘‘𑀲𑀩𑁆𑀩𑁂𑀯 𑀦𑀼 𑀔𑁄, 𑀫𑀸𑀭𑀺𑀲, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑀸 ¶ 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑀸’’𑀢𑀺? ‘‘𑀦 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀲𑀩𑁆𑀩𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑀸 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑀸’’𑀢𑀺.

‘‘𑀓𑀲𑁆𑀫𑀸 ¶ 𑀧𑀦, 𑀫𑀸𑀭𑀺𑀲, 𑀦 𑀲𑀩𑁆𑀩𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑀸 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑀸’’𑀢𑀺? ‘‘𑀬𑁂 𑀔𑁄, 𑀤𑁂𑀯𑀸𑀦𑀫𑀺𑀦𑁆𑀤, 𑀪𑀺𑀓𑁆𑀔𑀽 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀸 𑀢𑁂 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑀸 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑀸. 𑀢𑀲𑁆𑀫𑀸 𑀦 𑀲𑀩𑁆𑀩𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑀸 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑀸’’𑀢𑀺.

𑀇𑀢𑁆𑀣𑀁 𑀪𑀕𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀩𑁆𑀬𑀸𑀓𑀸𑀲𑀺. 𑀅𑀢𑁆𑀢𑀫𑀦𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺 𑀅𑀦𑀼𑀫𑁄𑀤𑀺 𑁋 ‘‘𑀏𑀯𑀫𑁂𑀢𑀁, 𑀪𑀕𑀯𑀸, 𑀏𑀯𑀫𑁂𑀢𑀁, 𑀲𑀼𑀕𑀢. 𑀢𑀺𑀡𑁆𑀡𑀸 𑀫𑁂𑀢𑁆𑀣 𑀓𑀗𑁆𑀔𑀸 𑀯𑀺𑀕𑀢𑀸 𑀓𑀣𑀁𑀓𑀣𑀸 𑀪𑀕𑀯𑀢𑁄 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸’’𑀢𑀺.

𑁩𑁬𑁭. 𑀇𑀢𑀺𑀳 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀏𑀚𑀸, 𑀪𑀦𑁆𑀢𑁂, 𑀭𑁄𑀕𑁄, 𑀏𑀚𑀸 𑀕𑀡𑁆𑀟𑁄, 𑀏𑀚𑀸 𑀲𑀮𑁆𑀮𑀁, 𑀏𑀚𑀸 𑀇𑀫𑀁 𑀧𑀼𑀭𑀺𑀲𑀁 𑀧𑀭𑀺𑀓𑀟𑁆𑀠𑀢𑀺 𑀢𑀲𑁆𑀲 𑀢𑀲𑁆𑀲𑁂𑀯 𑀪𑀯𑀲𑁆𑀲 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸. 𑀢𑀲𑁆𑀫𑀸 𑀅𑀬𑀁 𑀧𑀼𑀭𑀺𑀲𑁄 𑀉𑀘𑁆𑀘𑀸𑀯𑀘𑀫𑀸𑀧𑀚𑁆𑀚𑀢𑀺 ¶ . 𑀬𑁂𑀲𑀸𑀳𑀁, 𑀪𑀦𑁆𑀢𑁂, 𑀧𑀜𑁆𑀳𑀸𑀦𑀁 𑀇𑀢𑁄 𑀩𑀳𑀺𑀤𑁆𑀥𑀸 𑀅𑀜𑁆𑀜𑁂𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀑𑀓𑀸𑀲𑀓𑀫𑁆𑀫𑀫𑁆𑀧𑀺 𑀦𑀸𑀮𑀢𑁆𑀣𑀁, 𑀢𑁂 𑀫𑁂 𑀪𑀕𑀯𑀢𑀸 𑀩𑁆𑀬𑀸𑀓𑀢𑀸. 𑀤𑀻𑀖𑀭𑀢𑁆𑀢𑀸𑀦𑀼𑀲𑀬𑀺𑀢𑀜𑁆𑀘 𑀧𑀦 [𑀤𑀻𑀖𑀭𑀢𑁆𑀢𑀸𑀦𑀼𑀧𑀲𑁆𑀲𑀢𑀸, 𑀬𑀜𑁆𑀘 𑀧𑀦 (𑀲𑁆𑀬𑀸.), 𑀤𑀻𑀖𑀭𑀢𑁆𑀢𑀸𑀦𑀼𑀲𑀬𑀺𑀦𑁄, 𑀬𑀜𑁆𑀘 𑀧𑀦 (𑀲𑀻. 𑀧𑀻.)] 𑀫𑁂 𑀯𑀺𑀘𑀺𑀓𑀺𑀘𑁆𑀙𑀸𑀓𑀣𑀁𑀓𑀣𑀸𑀲𑀮𑁆𑀮𑀁, 𑀢𑀜𑁆𑀘 𑀪𑀕𑀯𑀢𑀸 𑀅𑀩𑁆𑀩𑀼𑀴𑁆𑀳’’𑀦𑁆𑀢𑀺.

‘‘𑀅𑀪𑀺𑀚𑀸𑀦𑀸𑀲𑀺 ¶ 𑀦𑁄 𑀢𑁆𑀯𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀇𑀫𑁂 𑀧𑀜𑁆𑀳𑁂 𑀅𑀜𑁆𑀜𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀧𑀼𑀘𑁆𑀙𑀺𑀢𑀸’’𑀢𑀺? ‘‘𑀅𑀪𑀺𑀚𑀸𑀦𑀸𑀫𑀳𑀁, 𑀪𑀦𑁆𑀢𑁂, 𑀇𑀫𑁂 𑀧𑀜𑁆𑀳𑁂 𑀅𑀜𑁆𑀜𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀧𑀼𑀘𑁆𑀙𑀺𑀢𑀸’’𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑁂, 𑀤𑁂𑀯𑀸𑀦𑀫𑀺𑀦𑁆𑀤, 𑀩𑁆𑀬𑀸𑀓𑀁𑀲𑀼? 𑀲𑀘𑁂 𑀢𑁂 𑀅𑀕𑀭𑀼 𑀪𑀸𑀲𑀲𑁆𑀲𑀽’’𑀢𑀺. ‘‘𑀦 𑀔𑁄 𑀫𑁂, 𑀪𑀦𑁆𑀢𑁂, 𑀕𑀭𑀼 𑀬𑀢𑁆𑀣𑀲𑁆𑀲 𑀪𑀕𑀯𑀸 𑀦𑀺𑀲𑀺𑀦𑁆𑀦𑁄 𑀪𑀕𑀯𑀦𑁆𑀢𑀭𑀽𑀧𑁄 𑀯𑀸’’𑀢𑀺. ‘‘𑀢𑁂𑀦 𑀳𑀺, 𑀤𑁂𑀯𑀸𑀦𑀫𑀺𑀦𑁆𑀤, 𑀪𑀸𑀲𑀲𑁆𑀲𑀽’’𑀢𑀺. ‘‘𑀬𑁂𑀲𑁆𑀯𑀸𑀳𑀁 [𑀬𑁂𑀲𑀸𑀳𑀁 (𑀲𑀻. 𑀲𑁆𑀬𑀸. 𑀧𑀻.)], 𑀪𑀦𑁆𑀢𑁂 ¶ , 𑀫𑀜𑁆𑀜𑀸𑀫𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀆𑀭𑀜𑁆𑀜𑀺𑀓𑀸 𑀧𑀦𑁆𑀢𑀲𑁂𑀦𑀸𑀲𑀦𑀸𑀢𑀺, 𑀢𑁆𑀬𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀇𑀫𑁂 𑀧𑀜𑁆𑀳𑁂 𑀧𑀼𑀘𑁆𑀙𑀸𑀫𑀺, 𑀢𑁂 𑀫𑀬𑀸 𑀧𑀼𑀝𑁆𑀞𑀸 𑀦 𑀲𑀫𑁆𑀧𑀸𑀬𑀦𑁆𑀢𑀺, 𑀅𑀲𑀫𑁆𑀧𑀸𑀬𑀦𑁆𑀢𑀸 𑀫𑀫𑀁𑀬𑁂𑀯 𑀧𑀝𑀺𑀧𑀼𑀘𑁆𑀙𑀦𑁆𑀢𑀺 𑁋 ‘𑀓𑁄 𑀦𑀸𑀫𑁄 𑀆𑀬𑀲𑁆𑀫𑀸’𑀢𑀺? 𑀢𑁂𑀲𑀸𑀳𑀁 𑀧𑀼𑀝𑁆𑀞𑁄 𑀩𑁆𑀬𑀸𑀓𑀭𑁄𑀫𑀺 𑁋 ‘𑀅𑀳𑀁 𑀔𑁄, 𑀫𑀸𑀭𑀺𑀲, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄’𑀢𑀺. 𑀢𑁂 𑀫𑀫𑀁𑀬𑁂𑀯 𑀉𑀢𑁆𑀢𑀭𑀺 𑀧𑀝𑀺𑀧𑀼𑀘𑁆𑀙𑀦𑁆𑀢𑀺 𑁋 ‘𑀓𑀺𑀁 𑀧𑀦𑀸𑀬𑀲𑁆𑀫𑀸, 𑀤𑁂𑀯𑀸𑀦𑀫𑀺𑀦𑁆𑀤 [𑀤𑁂𑀯𑀸𑀦𑀫𑀺𑀦𑁆𑀤𑁄 (𑀲𑀻. 𑀧𑀻.)], 𑀓𑀫𑁆𑀫𑀁 𑀓𑀢𑁆𑀯𑀸 𑀇𑀫𑀁 𑀞𑀸𑀦𑀁 𑀧𑀢𑁆𑀢𑁄’𑀢𑀺? 𑀢𑁂𑀲𑀸𑀳𑀁 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀤𑁂𑀲𑁂𑀫𑀺. 𑀢𑁂 𑀢𑀸𑀯𑀢𑀓𑁂𑀦𑁂𑀯 𑀅𑀢𑁆𑀢𑀫𑀦𑀸 ¶ 𑀳𑁄𑀦𑁆𑀢𑀺 𑁋 ‘𑀲𑀓𑁆𑀓𑁄 𑀘 𑀦𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀤𑀺𑀝𑁆𑀞𑁄, 𑀬𑀜𑁆𑀘 𑀦𑁄 𑀅𑀧𑀼𑀘𑁆𑀙𑀺𑀫𑁆𑀳𑀸, 𑀢𑀜𑁆𑀘 𑀦𑁄 𑀩𑁆𑀬𑀸𑀓𑀸𑀲𑀻’𑀢𑀺. 𑀢𑁂 𑀅𑀜𑁆𑀜𑀤𑀢𑁆𑀣𑀼 𑀫𑀫𑀁𑀬𑁂𑀯 𑀲𑀸𑀯𑀓𑀸 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀦 𑀘𑀸𑀳𑀁 𑀢𑁂𑀲𑀁. 𑀅𑀳𑀁 𑀔𑁄 𑀧𑀦, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀸𑀯𑀓𑁄 𑀲𑁄𑀢𑀸𑀧𑀦𑁆𑀦𑁄 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’’𑀢𑀺 ¶ .

𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀓𑀣𑀸

𑁩𑁬𑁮. ‘‘𑀅𑀪𑀺𑀚𑀸𑀦𑀸𑀲𑀺 𑀦𑁄 𑀢𑁆𑀯𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑀁 𑀯𑁂𑀤𑀧𑀝𑀺𑀮𑀸𑀪𑀁 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪’’𑀦𑁆𑀢𑀺? ‘‘𑀅𑀪𑀺𑀚𑀸𑀦𑀸𑀫𑀳𑀁 ¶ , 𑀪𑀦𑁆𑀢𑁂, 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑀁 𑀯𑁂𑀤𑀧𑀝𑀺𑀮𑀸𑀪𑀁 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪’’𑀦𑁆𑀢𑀺. ‘‘𑀬𑀣𑀸 𑀓𑀣𑀁 𑀧𑀦 𑀢𑁆𑀯𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀅𑀪𑀺𑀚𑀸𑀦𑀸𑀲𑀺 𑀇𑀢𑁄 𑀧𑀼𑀩𑁆𑀩𑁂 𑀏𑀯𑀭𑀽𑀧𑀁 𑀯𑁂𑀤𑀧𑀝𑀺𑀮𑀸𑀪𑀁 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪’’𑀦𑁆𑀢𑀺?

‘‘𑀪𑀽𑀢𑀧𑀼𑀩𑁆𑀩𑀁, 𑀪𑀦𑁆𑀢𑁂, 𑀤𑁂𑀯𑀸𑀲𑀼𑀭𑀲𑀗𑁆𑀕𑀸𑀫𑁄 𑀲𑀫𑀼𑀧𑀩𑁆𑀬𑀽𑀴𑁆𑀳𑁄 [𑀲𑀫𑀽𑀧𑀩𑁆𑀩𑀼𑀴𑁆𑀳𑁄 (𑀲𑀻. 𑀧𑀻.)] 𑀅𑀳𑁄𑀲𑀺. 𑀢𑀲𑁆𑀫𑀺𑀁 𑀔𑁄 𑀧𑀦, 𑀪𑀦𑁆𑀢𑁂, 𑀲𑀗𑁆𑀕𑀸𑀫𑁂 𑀤𑁂𑀯𑀸 𑀚𑀺𑀦𑀺𑀁𑀲𑀼, 𑀅𑀲𑀼𑀭𑀸 𑀧𑀭𑀸𑀚𑀬𑀺𑀁𑀲𑀼 [𑀧𑀭𑀸𑀚𑀺𑀁𑀲𑀼 (𑀲𑀻. 𑀧𑀻.)]. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀢𑀁 𑀲𑀗𑁆𑀕𑀸𑀫𑀁 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸 𑀯𑀺𑀚𑀺𑀢𑀲𑀗𑁆𑀕𑀸𑀫𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀬𑀸 𑀘𑁂𑀯 𑀤𑀸𑀦𑀺 𑀤𑀺𑀩𑁆𑀩𑀸 𑀑𑀚𑀸 𑀬𑀸 𑀘 𑀅𑀲𑀼𑀭𑀸 𑀑𑀚𑀸, 𑀉𑀪𑀬𑀫𑁂𑀢𑀁 [𑀉𑀪𑀬𑀫𑁂𑀢𑁆𑀣 (𑀲𑁆𑀬𑀸.)] 𑀤𑁂𑀯𑀸 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀻’𑀢𑀺. 𑀲𑁄 𑀔𑁄 𑀧𑀦 𑀫𑁂, 𑀪𑀦𑁆𑀢𑁂, 𑀯𑁂𑀤𑀧𑀝𑀺𑀮𑀸𑀪𑁄 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑁄 𑀲𑀤𑀡𑁆𑀟𑀸𑀯𑀘𑀭𑁄 𑀲𑀲𑀢𑁆𑀣𑀸𑀯𑀘𑀭𑁄 𑀦 𑀦𑀺𑀩𑁆𑀩𑀺𑀤𑀸𑀬 𑀦 𑀯𑀺𑀭𑀸𑀕𑀸𑀬 𑀦 𑀦𑀺𑀭𑁄𑀥𑀸𑀬 𑀦 𑀉𑀧𑀲𑀫𑀸𑀬 𑀦 𑀅𑀪𑀺𑀜𑁆𑀜𑀸𑀬 𑀦 𑀲𑀫𑁆𑀩𑁄𑀥𑀸𑀬 𑀦 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀺. 𑀬𑁄 𑀔𑁄 𑀧𑀦 𑀫𑁂 𑀅𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀯𑁂𑀤𑀧𑀝𑀺𑀮𑀸𑀪𑁄 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑁄, 𑀲𑁄 𑀅𑀤𑀡𑁆𑀟𑀸𑀯𑀘𑀭𑁄 𑀅𑀲𑀢𑁆𑀣𑀸𑀯𑀘𑀭𑁄 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺.

𑁩𑁬𑁯. ‘‘𑀓𑀺𑀁 𑀧𑀦 𑀢𑁆𑀯𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀏𑀯𑀭𑀽𑀧𑀁 𑀯𑁂𑀤𑀧𑀝𑀺𑀮𑀸𑀪𑀁 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀁 𑀧𑀯𑁂𑀤𑁂𑀲𑀻’’𑀢𑀺? ‘‘𑀙 𑀔𑁄 𑀅𑀳𑀁, 𑀪𑀦𑁆𑀢𑁂, 𑀅𑀢𑁆𑀣𑀯𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑁄 𑀏𑀯𑀭𑀽𑀧𑀁 𑀯𑁂𑀤𑀧𑀝𑀺𑀮𑀸𑀪𑀁 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀁 𑀧𑀯𑁂𑀤𑁂𑀫𑀺.

‘‘𑀇𑀥𑁂𑀯 ¶ ¶ 𑀢𑀺𑀝𑁆𑀞𑀫𑀸𑀦𑀲𑁆𑀲, 𑀤𑁂𑀯𑀪𑀽𑀢𑀲𑁆𑀲 𑀫𑁂 𑀲𑀢𑁄;

𑀧𑀼𑀦𑀭𑀸𑀬𑀼 𑀘 𑀫𑁂 𑀮𑀤𑁆𑀥𑁄, 𑀏𑀯𑀁 𑀚𑀸𑀦𑀸𑀳𑀺 𑀫𑀸𑀭𑀺𑀲.

‘‘𑀇𑀫𑀁 ¶ 𑀔𑁄 𑀅𑀳𑀁, 𑀪𑀦𑁆𑀢𑁂, 𑀧𑀞𑀫𑀁 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 ¶ 𑀏𑀯𑀭𑀽𑀧𑀁 𑀯𑁂𑀤𑀧𑀝𑀺𑀮𑀸𑀪𑀁 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀁 𑀧𑀯𑁂𑀤𑁂𑀫𑀺.

‘‘𑀘𑀼𑀢𑀸𑀳𑀁 𑀤𑀺𑀯𑀺𑀬𑀸 𑀓𑀸𑀬𑀸, 𑀆𑀬𑀼𑀁 𑀳𑀺𑀢𑁆𑀯𑀸 𑀅𑀫𑀸𑀦𑀼𑀲𑀁;

𑀅𑀫𑀽𑀴𑁆𑀳𑁄 𑀕𑀩𑁆𑀪𑀫𑁂𑀲𑁆𑀲𑀸𑀫𑀺, 𑀬𑀢𑁆𑀣 𑀫𑁂 𑀭𑀫𑀢𑀻 𑀫𑀦𑁄.

‘‘𑀇𑀫𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀤𑀼𑀢𑀺𑀬𑀁 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀏𑀯𑀭𑀽𑀧𑀁 𑀯𑁂𑀤𑀧𑀝𑀺𑀮𑀸𑀪𑀁 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀁 𑀧𑀯𑁂𑀤𑁂𑀫𑀺.

‘‘𑀲𑁆𑀯𑀸𑀳𑀁 𑀅𑀫𑀽𑀴𑁆𑀳𑀧𑀜𑁆𑀜𑀲𑁆𑀲 [𑀅𑀫𑀽𑀴𑁆𑀳𑀧𑀜𑁆𑀳𑀲𑁆𑀲 (?)], 𑀯𑀺𑀳𑀭𑀁 𑀲𑀸𑀲𑀦𑁂 𑀭𑀢𑁄;

𑀜𑀸𑀬𑁂𑀦 𑀯𑀺𑀳𑀭𑀺𑀲𑁆𑀲𑀸𑀫𑀺, 𑀲𑀫𑁆𑀧𑀚𑀸𑀦𑁄 𑀧𑀝𑀺𑀲𑁆𑀲𑀢𑁄.

‘‘𑀇𑀫𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀢𑀢𑀺𑀬𑀁 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀏𑀯𑀭𑀽𑀧𑀁 𑀯𑁂𑀤𑀧𑀝𑀺𑀮𑀸𑀪𑀁 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀁 𑀧𑀯𑁂𑀤𑁂𑀫𑀺.

‘‘𑀜𑀸𑀬𑁂𑀦 𑀫𑁂 𑀘𑀭𑀢𑁄 𑀘, 𑀲𑀫𑁆𑀩𑁄𑀥𑀺 𑀘𑁂 𑀪𑀯𑀺𑀲𑁆𑀲𑀢𑀺;

𑀅𑀜𑁆𑀜𑀸𑀢𑀸 𑀯𑀺𑀳𑀭𑀺𑀲𑁆𑀲𑀸𑀫𑀺, 𑀲𑁆𑀯𑁂𑀯 𑀅𑀦𑁆𑀢𑁄 𑀪𑀯𑀺𑀲𑁆𑀲𑀢𑀺.

‘‘𑀇𑀫𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀘𑀢𑀼𑀢𑁆𑀣𑀁 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀏𑀯𑀭𑀽𑀧𑀁 𑀯𑁂𑀤𑀧𑀝𑀺𑀮𑀸𑀪𑀁 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀁 𑀧𑀯𑁂𑀤𑁂𑀫𑀺.

‘‘𑀘𑀼𑀢𑀸𑀳𑀁 𑀫𑀸𑀦𑀼𑀲𑀸 𑀓𑀸𑀬𑀸, 𑀆𑀬𑀼𑀁 𑀳𑀺𑀢𑁆𑀯𑀸𑀦 𑀫𑀸𑀦𑀼𑀲𑀁;

𑀧𑀼𑀦 𑀤𑁂𑀯𑁄 𑀪𑀯𑀺𑀲𑁆𑀲𑀸𑀫𑀺, 𑀤𑁂𑀯𑀮𑁄𑀓𑀫𑁆𑀳𑀺 𑀉𑀢𑁆𑀢𑀫𑁄.

‘‘𑀇𑀫𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀧𑀜𑁆𑀘𑀫𑀁 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀏𑀯𑀭𑀽𑀧𑀁 𑀯𑁂𑀤𑀧𑀝𑀺𑀮𑀸𑀪𑀁 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀁 𑀧𑀯𑁂𑀤𑁂𑀫𑀺.

‘‘𑀢𑁂 ¶ ¶ [𑀬𑁂 (?)] 𑀧𑀡𑀻𑀢𑀢𑀭𑀸 𑀤𑁂𑀯𑀸, 𑀅𑀓𑀦𑀺𑀝𑁆𑀞𑀸 𑀬𑀲𑀲𑁆𑀲𑀺𑀦𑁄;

𑀅𑀦𑁆𑀢𑀺𑀫𑁂 𑀯𑀢𑁆𑀢𑀫𑀸𑀦𑀫𑁆𑀳𑀺, 𑀲𑁄 𑀦𑀺𑀯𑀸𑀲𑁄 𑀪𑀯𑀺𑀲𑁆𑀲𑀢𑀺.

‘‘𑀇𑀫𑀁 ¶ 𑀔𑁄 𑀅𑀳𑀁, 𑀪𑀦𑁆𑀢𑁂, 𑀙𑀝𑁆𑀞𑀁 𑀅𑀢𑁆𑀣𑀯𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀏𑀯𑀭𑀽𑀧𑀁 𑀯𑁂𑀤𑀧𑀝𑀺𑀮𑀸𑀪𑀁 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀁 𑀧𑀯𑁂𑀤𑁂𑀫𑀺.

‘‘𑀇𑀫𑁂 𑀔𑁄 𑀅𑀳𑀁, 𑀪𑀦𑁆𑀢𑁂, 𑀙 𑀅𑀢𑁆𑀣𑀯𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑁄 𑀏𑀯𑀭𑀽𑀧𑀁 𑀯𑁂𑀤𑀧𑀝𑀺𑀮𑀸𑀪𑀁 𑀲𑁄𑀫𑀦𑀲𑁆𑀲𑀧𑀝𑀺𑀮𑀸𑀪𑀁 𑀧𑀯𑁂𑀤𑁂𑀫𑀺.

𑁩𑁭𑁦. ‘‘𑀅𑀧𑀭𑀺𑀬𑁄𑀲𑀺𑀢𑀲𑀗𑁆𑀓𑀧𑁆𑀧𑁄 ¶ , 𑀯𑀺𑀘𑀺𑀓𑀺𑀘𑁆𑀙𑁄 𑀓𑀣𑀁𑀓𑀣𑀻.

𑀯𑀺𑀘𑀭𑀺𑀁 𑀤𑀻𑀖𑀫𑀤𑁆𑀥𑀸𑀦𑀁, 𑀅𑀦𑁆𑀯𑁂𑀲𑀦𑁆𑀢𑁄 𑀢𑀣𑀸𑀕𑀢𑀁.

‘‘𑀬𑀲𑁆𑀲𑀼 𑀫𑀜𑁆𑀜𑀸𑀫𑀺 𑀲𑀫𑀡𑁂, 𑀧𑀯𑀺𑀯𑀺𑀢𑁆𑀢𑀯𑀺𑀳𑀸𑀭𑀺𑀦𑁄;

𑀲𑀫𑁆𑀩𑀼𑀤𑁆𑀥𑀸 𑀇𑀢𑀺 𑀫𑀜𑁆𑀜𑀸𑀦𑁄, 𑀕𑀘𑁆𑀙𑀸𑀫𑀺 𑀢𑁂 𑀉𑀧𑀸𑀲𑀺𑀢𑀼𑀁.

‘‘‘𑀓𑀣𑀁 𑀆𑀭𑀸𑀥𑀦𑀸 𑀳𑁄𑀢𑀺, 𑀓𑀣𑀁 𑀳𑁄𑀢𑀺 𑀯𑀺𑀭𑀸𑀥𑀦𑀸’;

𑀇𑀢𑀺 𑀧𑀼𑀝𑁆𑀞𑀸 𑀦 𑀲𑀫𑁆𑀧𑀸𑀬𑀦𑁆𑀢𑀺 [𑀲𑀫𑁆𑀪𑁄𑀦𑁆𑀢𑀺 (𑀲𑁆𑀬𑀸.)], 𑀫𑀕𑁆𑀕𑁂 𑀧𑀝𑀺𑀧𑀤𑀸𑀲𑀼 𑀘.

‘‘𑀢𑁆𑀬𑀲𑁆𑀲𑀼 𑀬𑀤𑀸 𑀫𑀁 𑀚𑀸𑀦𑀦𑁆𑀢𑀺, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀸𑀕𑀢𑁄;

𑀢𑁆𑀬𑀲𑁆𑀲𑀼 𑀫𑀫𑁂𑀯 𑀧𑀼𑀘𑁆𑀙𑀦𑁆𑀢𑀺, ‘𑀓𑀺𑀁 𑀓𑀢𑁆𑀯𑀸 𑀧𑀸𑀧𑀼𑀡𑀻 𑀇𑀤𑀁’.

‘‘𑀢𑁂𑀲𑀁 𑀬𑀣𑀸𑀲𑀼𑀢𑀁 𑀥𑀫𑁆𑀫𑀁, 𑀤𑁂𑀲𑀬𑀸𑀫𑀺 𑀚𑀦𑁂 𑀲𑀼𑀢𑀁 [𑀚𑀦𑁂𑀲𑀼𑀢 (𑀓. 𑀲𑀻.)];

𑀢𑁂𑀦 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺, ‘𑀤𑀺𑀝𑁆𑀞𑁄 𑀦𑁄 𑀯𑀸𑀲𑀯𑁄𑀢𑀺 𑀘’.

‘‘𑀬𑀤𑀸 𑀘 𑀩𑀼𑀤𑁆𑀥𑀫𑀤𑁆𑀤𑀓𑁆𑀔𑀺𑀁, 𑀯𑀺𑀘𑀺𑀓𑀺𑀘𑁆𑀙𑀸𑀯𑀺𑀢𑀸𑀭𑀡𑀁;

𑀲𑁄𑀫𑁆𑀳𑀺 𑀯𑀻𑀢𑀪𑀬𑁄 𑀅𑀚𑁆𑀚, 𑀲𑀫𑁆𑀩𑀼𑀤𑁆𑀥𑀁 𑀧𑀬𑀺𑀭𑀼𑀧𑀸𑀲𑀺𑀬 [𑀧𑀬𑀺𑀭𑀼𑀧𑀸𑀲𑀬𑀺𑀁 (𑀲𑁆𑀬𑀸. 𑀓.)].

‘‘𑀢𑀡𑁆𑀳𑀸𑀲𑀮𑁆𑀮𑀲𑁆𑀲 𑀳𑀦𑁆𑀢𑀸𑀭𑀁, 𑀩𑀼𑀤𑁆𑀥𑀁 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑀁;

𑀅𑀳𑀁 ¶ 𑀯𑀦𑁆𑀤𑁂 𑀫𑀳𑀸𑀯𑀻𑀭𑀁, 𑀩𑀼𑀤𑁆𑀥𑀫𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀁.

‘‘𑀬𑀁 ¶ ¶ 𑀓𑀭𑁄𑀫𑀲𑀺 𑀩𑁆𑀭𑀳𑁆𑀫𑀼𑀦𑁄, 𑀲𑀫𑀁 𑀤𑁂𑀯𑁂𑀳𑀺 𑀫𑀸𑀭𑀺𑀲;

𑀢𑀤𑀚𑁆𑀚 𑀢𑀼𑀬𑁆𑀳𑀁 𑀓𑀲𑁆𑀲𑀸𑀫 [𑀤𑀲𑁆𑀲𑀸𑀫 (𑀲𑁆𑀬𑀸. 𑀓.)], 𑀳𑀦𑁆𑀤 𑀲𑀸𑀫𑀁 𑀓𑀭𑁄𑀫 𑀢𑁂.

‘‘𑀢𑁆𑀯𑀫𑁂𑀯 𑀅𑀲𑀺 [𑀢𑀼𑀯𑀫𑁂𑀯𑀲𑀺 (𑀧𑀻.)] 𑀲𑀫𑁆𑀩𑀼𑀤𑁆𑀥𑁄, 𑀢𑀼𑀯𑀁 𑀲𑀢𑁆𑀣𑀸 𑀅𑀦𑀼𑀢𑁆𑀢𑀭𑁄;

𑀲𑀤𑁂𑀯𑀓𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀦𑀢𑁆𑀣𑀺 𑀢𑁂 𑀧𑀝𑀺𑀧𑀼𑀕𑁆𑀕𑀮𑁄’’𑀢𑀺.

𑁩𑁭𑁧. 𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀜𑁆𑀘𑀲𑀺𑀔𑀁 𑀕𑀦𑁆𑀥𑀩𑁆𑀩𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀩𑀳𑀽𑀧𑀓𑀸𑀭𑁄 𑀔𑁄 𑀫𑁂𑀲𑀺 𑀢𑁆𑀯𑀁, 𑀢𑀸𑀢 𑀧𑀜𑁆𑀘𑀲𑀺𑀔, 𑀬𑀁 𑀢𑁆𑀯𑀁 𑀪𑀕𑀯𑀦𑁆𑀢𑀁 𑀧𑀞𑀫𑀁 𑀧𑀲𑀸𑀤𑁂𑀲𑀺. 𑀢𑀬𑀸, 𑀢𑀸𑀢, 𑀧𑀞𑀫𑀁 𑀧𑀲𑀸𑀤𑀺𑀢𑀁 𑀧𑀘𑁆𑀙𑀸 𑀫𑀬𑀁 𑀢𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀫𑁆𑀳𑀸 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁. 𑀧𑁂𑀢𑁆𑀢𑀺𑀓𑁂 𑀯𑀸 𑀞𑀸𑀦𑁂 𑀞𑀧𑀬𑀺𑀲𑁆𑀲𑀸𑀫𑀺 ¶ , 𑀕𑀦𑁆𑀥𑀩𑁆𑀩𑀭𑀸𑀚𑀸 𑀪𑀯𑀺𑀲𑁆𑀲𑀲𑀺, 𑀪𑀤𑁆𑀤𑀜𑁆𑀘 𑀢𑁂 𑀲𑀽𑀭𑀺𑀬𑀯𑀘𑁆𑀙𑀲𑀁 𑀤𑀫𑁆𑀫𑀺, 𑀲𑀸 𑀳𑀺 𑀢𑁂 𑀅𑀪𑀺𑀧𑀢𑁆𑀣𑀺𑀢𑀸’’𑀢𑀺.

𑀅𑀣 𑀔𑁄 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 𑀧𑀸𑀡𑀺𑀦𑀸 𑀧𑀣𑀯𑀺𑀁 𑀧𑀭𑀸𑀫𑀲𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋 ‘‘𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺.

𑀇𑀫𑀲𑁆𑀫𑀺𑀜𑁆𑀘 𑀧𑀦 𑀯𑁂𑀬𑁆𑀬𑀸𑀓𑀭𑀡𑀲𑁆𑀫𑀺𑀁 𑀪𑀜𑁆𑀜𑀫𑀸𑀦𑁂 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑁋 ‘‘𑀬𑀁 𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺. 𑀅𑀜𑁆𑀜𑁂𑀲𑀜𑁆𑀘 𑀅𑀲𑀻𑀢𑀺𑀬𑀸 𑀤𑁂𑀯𑀢𑀸𑀲𑀳𑀲𑁆𑀲𑀸𑀦𑀁 ¶ , 𑀇𑀢𑀺 𑀬𑁂 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀅𑀚𑁆𑀛𑀺𑀝𑁆𑀞𑀧𑀜𑁆𑀳𑀸 𑀧𑀼𑀝𑁆𑀞𑀸 ¶ , 𑀢𑁂 𑀪𑀕𑀯𑀢𑀸 𑀩𑁆𑀬𑀸𑀓𑀢𑀸. 𑀢𑀲𑁆𑀫𑀸 𑀇𑀫𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀲𑁆𑀲 𑀲𑀓𑁆𑀓𑀧𑀜𑁆𑀳𑀸𑀢𑁆𑀯𑁂𑀯 𑀅𑀥𑀺𑀯𑀘𑀦𑀦𑁆𑀢𑀺.

𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀅𑀝𑁆𑀞𑀫𑀁.

𑁯. 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀁

𑁩𑁭𑁨. 𑀏𑀯𑀁 ¶ ¶ ¶ 𑀫𑁂 ¶ 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀓𑀼𑀭𑀽𑀲𑀼 𑀯𑀺𑀳𑀭𑀢𑀺 𑀓𑀫𑁆𑀫𑀸𑀲𑀥𑀫𑁆𑀫𑀁 𑀦𑀸𑀫 𑀓𑀼𑀭𑀽𑀦𑀁 𑀦𑀺𑀕𑀫𑁄. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑁆𑀤𑀦𑁆𑀢𑁂’’𑀢𑀺 [𑀪𑀤𑀦𑁆𑀢𑁂𑀢𑀺 (𑀲𑀻. 𑀲𑁆𑀬𑀸. 𑀧𑀻.)] 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

𑀉𑀤𑁆𑀤𑁂𑀲𑁄

𑁩𑁭𑁩. ‘‘𑀏𑀓𑀸𑀬𑀦𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸, 𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀬 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀬 𑀜𑀸𑀬𑀲𑁆𑀲 𑀅𑀥𑀺𑀕𑀫𑀸𑀬 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬, 𑀬𑀤𑀺𑀤𑀁 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸.

‘‘𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁, 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁, 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁, 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁.

𑀉𑀤𑁆𑀤𑁂𑀲𑁄 𑀦𑀺𑀝𑁆𑀞𑀺𑀢𑁄.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀆𑀦𑀸𑀧𑀸𑀦𑀧𑀩𑁆𑀩𑀁

𑁩𑁭𑁪. ‘‘𑀓𑀣𑀜𑁆𑀘 ¶ ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀜𑁆𑀜𑀕𑀢𑁄 𑀯𑀸 𑀭𑀼𑀓𑁆𑀔𑀫𑀽𑀮𑀕𑀢𑁄 𑀯𑀸 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀯𑀸 𑀦𑀺𑀲𑀻𑀤𑀢𑀺 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸. 𑀲𑁄 𑀲𑀢𑁄𑀯 𑀅𑀲𑁆𑀲𑀲𑀢𑀺, 𑀲𑀢𑁄𑀯 𑀧𑀲𑁆𑀲𑀲𑀢𑀺. 𑀤𑀻𑀖𑀁 ¶ 𑀯𑀸 𑀅𑀲𑁆𑀲𑀲𑀦𑁆𑀢𑁄 ‘𑀤𑀻𑀖𑀁 𑀅𑀲𑁆𑀲𑀲𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺, 𑀤𑀻𑀖𑀁 𑀯𑀸 𑀧𑀲𑁆𑀲𑀲𑀦𑁆𑀢𑁄 ‘𑀤𑀻𑀖𑀁 𑀧𑀲𑁆𑀲𑀲𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. 𑀭𑀲𑁆𑀲𑀁 𑀯𑀸 𑀅𑀲𑁆𑀲𑀲𑀦𑁆𑀢𑁄 ‘𑀭𑀲𑁆𑀲𑀁 𑀅𑀲𑁆𑀲𑀲𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺, 𑀭𑀲𑁆𑀲𑀁 𑀯𑀸 𑀧𑀲𑁆𑀲𑀲𑀦𑁆𑀢𑁄 ‘𑀭𑀲𑁆𑀲𑀁 𑀧𑀲𑁆𑀲𑀲𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. ‘𑀲𑀩𑁆𑀩𑀓𑀸𑀬𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀲𑀺𑀲𑁆𑀲𑀸𑀫𑀻’𑀢𑀺 𑀲𑀺𑀓𑁆𑀔𑀢𑀺 ¶ , ‘𑀲𑀩𑁆𑀩𑀓𑀸𑀬𑀧𑀝𑀺𑀲𑀁𑀯𑁂𑀤𑀻 𑀧𑀲𑁆𑀲𑀲𑀺𑀲𑁆𑀲𑀸𑀫𑀻’𑀢𑀺 𑀲𑀺𑀓𑁆𑀔𑀢𑀺. ‘𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀻’𑀢𑀺 𑀲𑀺𑀓𑁆𑀔𑀢𑀺, ‘𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀧𑀲𑁆𑀲𑀲𑀺𑀲𑁆𑀲𑀸𑀫𑀻’𑀢𑀺 𑀲𑀺𑀓𑁆𑀔𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀤𑀓𑁆𑀔𑁄 𑀪𑀫𑀓𑀸𑀭𑁄 𑀯𑀸 𑀪𑀫𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀤𑀻𑀖𑀁 𑀯𑀸 𑀅𑀜𑁆𑀙𑀦𑁆𑀢𑁄 ‘𑀤𑀻𑀖𑀁 𑀅𑀜𑁆𑀙𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺, 𑀭𑀲𑁆𑀲𑀁 𑀯𑀸 𑀅𑀜𑁆𑀙𑀦𑁆𑀢𑁄 ‘𑀭𑀲𑁆𑀲𑀁 𑀅𑀜𑁆𑀙𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀤𑀻𑀖𑀁 𑀯𑀸 𑀅𑀲𑁆𑀲𑀲𑀦𑁆𑀢𑁄 ‘𑀤𑀻𑀖𑀁 𑀅𑀲𑁆𑀲𑀲𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺, 𑀤𑀻𑀖𑀁 𑀯𑀸 𑀧𑀲𑁆𑀲𑀲𑀦𑁆𑀢𑁄 ‘𑀤𑀻𑀖𑀁 𑀧𑀲𑁆𑀲𑀲𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺, 𑀭𑀲𑁆𑀲𑀁 𑀯𑀸 𑀅𑀲𑁆𑀲𑀲𑀦𑁆𑀢𑁄 ‘𑀭𑀲𑁆𑀲𑀁 𑀅𑀲𑁆𑀲𑀲𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺, 𑀭𑀲𑁆𑀲𑀁 𑀯𑀸 𑀧𑀲𑁆𑀲𑀲𑀦𑁆𑀢𑁄 ‘𑀭𑀲𑁆𑀲𑀁 𑀧𑀲𑁆𑀲𑀲𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. ‘𑀲𑀩𑁆𑀩𑀓𑀸𑀬𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀲𑀺𑀲𑁆𑀲𑀸𑀫𑀻’𑀢𑀺 𑀲𑀺𑀓𑁆𑀔𑀢𑀺, ‘𑀲𑀩𑁆𑀩𑀓𑀸𑀬𑀧𑀝𑀺𑀲𑀁𑀯𑁂𑀤𑀻 𑀧𑀲𑁆𑀲𑀲𑀺𑀲𑁆𑀲𑀸𑀫𑀻’𑀢𑀺 𑀲𑀺𑀓𑁆𑀔𑀢𑀺, ‘𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀲𑁆𑀲𑀲𑀺𑀲𑁆𑀲𑀸𑀫𑀻’𑀢𑀺 𑀲𑀺𑀓𑁆𑀔𑀢𑀺, ‘𑀧𑀲𑁆𑀲𑀫𑁆𑀪𑀬𑀁 𑀓𑀸𑀬𑀲𑀗𑁆𑀔𑀸𑀭𑀁 𑀧𑀲𑁆𑀲𑀲𑀺𑀲𑁆𑀲𑀸𑀫𑀻’𑀢𑀺 𑀲𑀺𑀓𑁆𑀔𑀢𑀺. 𑀇𑀢𑀺 ¶ 𑀅𑀚𑁆𑀛𑀢𑁆𑀢𑀁 𑀯𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 𑀯𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀓𑀸𑀬𑀲𑁆𑀫𑀺𑀁 𑀯𑀺𑀳𑀭𑀢𑀺, 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀓𑀸𑀬𑀲𑁆𑀫𑀺𑀁 𑀯𑀺𑀳𑀭𑀢𑀺, 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀓𑀸𑀬𑀲𑁆𑀫𑀺𑀁 𑀯𑀺𑀳𑀭𑀢𑀺. ‘𑀅𑀢𑁆𑀣𑀺 𑀓𑀸𑀬𑁄’𑀢𑀺 𑀯𑀸 ¶ 𑀧𑀦𑀲𑁆𑀲 𑀲𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺 𑀬𑀸𑀯𑀤𑁂𑀯 𑀜𑀸𑀡𑀫𑀢𑁆𑀢𑀸𑀬 𑀧𑀝𑀺𑀲𑁆𑀲𑀢𑀺𑀫𑀢𑁆𑀢𑀸𑀬 𑀅𑀦𑀺𑀲𑁆𑀲𑀺𑀢𑁄 𑀘 𑀯𑀺𑀳𑀭𑀢𑀺, 𑀦 𑀘 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺. 𑀏𑀯𑀫𑁆𑀧𑀺 𑀔𑁄 [𑀏𑀯𑀫𑁆𑀧𑀺 (𑀲𑀻. 𑀲𑁆𑀬𑀸. 𑀧𑀻.)], 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

𑀆𑀦𑀸𑀧𑀸𑀦𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀇𑀭𑀺𑀬𑀸𑀧𑀣𑀧𑀩𑁆𑀩𑀁

𑁩𑁭𑁫. ‘‘𑀧𑀼𑀦 ¶ 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀘𑁆𑀙𑀦𑁆𑀢𑁄 𑀯𑀸 ‘𑀕𑀘𑁆𑀙𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺, 𑀞𑀺𑀢𑁄 𑀯𑀸 ‘𑀞𑀺𑀢𑁄𑀫𑁆𑀳𑀻’𑀢𑀺 𑀧𑀚𑀸𑀦𑀸𑀢𑀺, 𑀦𑀺𑀲𑀺𑀦𑁆𑀦𑁄 𑀯𑀸 ‘𑀦𑀺𑀲𑀺𑀦𑁆𑀦𑁄𑀫𑁆𑀳𑀻’𑀢𑀺 𑀧𑀚𑀸𑀦𑀸𑀢𑀺, 𑀲𑀬𑀸𑀦𑁄 𑀯𑀸 ‘𑀲𑀬𑀸𑀦𑁄𑀫𑁆𑀳𑀻’𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀬𑀣𑀸 𑀯𑀸 𑀧𑀦𑀲𑁆𑀲 𑀓𑀸𑀬𑁄 𑀧𑀡𑀺𑀳𑀺𑀢𑁄 𑀳𑁄𑀢𑀺, 𑀢𑀣𑀸 𑀢𑀣𑀸 𑀦𑀁 𑀧𑀚𑀸𑀦𑀸𑀢𑀺. 𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 𑀯𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 ¶ 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀓𑀸𑀬𑀲𑁆𑀫𑀺𑀁 𑀯𑀺𑀳𑀭𑀢𑀺, 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀓𑀸𑀬𑀲𑁆𑀫𑀺𑀁 𑀯𑀺𑀳𑀭𑀢𑀺, 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀓𑀸𑀬𑀲𑁆𑀫𑀺𑀁 𑀯𑀺𑀳𑀭𑀢𑀺. ‘𑀅𑀢𑁆𑀣𑀺 𑀓𑀸𑀬𑁄’𑀢𑀺 𑀯𑀸 𑀧𑀦𑀲𑁆𑀲 𑀲𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺 𑀬𑀸𑀯𑀤𑁂𑀯 𑀜𑀸𑀡𑀫𑀢𑁆𑀢𑀸𑀬 𑀧𑀝𑀺𑀲𑁆𑀲𑀢𑀺𑀫𑀢𑁆𑀢𑀸𑀬 𑀅𑀦𑀺𑀲𑁆𑀲𑀺𑀢𑁄 𑀘 𑀯𑀺𑀳𑀭𑀢𑀺, 𑀦 𑀘 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

𑀇𑀭𑀺𑀬𑀸𑀧𑀣𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀲𑀫𑁆𑀧𑀚𑀸𑀦𑀧𑀩𑁆𑀩𑀁

𑁩𑁭𑁬. ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀆𑀮𑁄𑀓𑀺𑀢𑁂 𑀯𑀺𑀮𑁄𑀓𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀫𑀺𑀜𑁆𑀚𑀺𑀢𑁂 𑀧𑀲𑀸𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 ¶ 𑀳𑁄𑀢𑀺, 𑀅𑀲𑀺𑀢𑁂 𑀧𑀻𑀢𑁂 𑀔𑀸𑀬𑀺𑀢𑁂 𑀲𑀸𑀬𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀕𑀢𑁂 𑀞𑀺𑀢𑁂 𑀦𑀺𑀲𑀺𑀦𑁆𑀦𑁂 𑀲𑀼𑀢𑁆𑀢𑁂 𑀚𑀸𑀕𑀭𑀺𑀢𑁂 𑀪𑀸𑀲𑀺𑀢𑁂 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺. 𑀇𑀢𑀺 ¶ 𑀅𑀚𑁆𑀛𑀢𑁆𑀢𑀁 𑀯𑀸…𑀧𑁂… 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

𑀲𑀫𑁆𑀧𑀚𑀸𑀦𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀧𑀩𑁆𑀩𑀁

𑁩𑁭𑁭. ‘‘𑀧𑀼𑀦 ¶ 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀫𑀫𑁂𑀯 𑀓𑀸𑀬𑀁 𑀉𑀤𑁆𑀥𑀁 𑀧𑀸𑀤𑀢𑀮𑀸 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸 𑀢𑀘𑀧𑀭𑀺𑀬𑀦𑁆𑀢𑀁 𑀧𑀽𑀭𑀁 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀅𑀲𑀼𑀘𑀺𑀦𑁄 𑀧𑀘𑁆𑀘𑀯𑁂𑀓𑁆𑀔𑀢𑀺 𑁋 ‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸 𑀮𑁄𑀫𑀸 𑀦𑀔𑀸 𑀤𑀦𑁆𑀢𑀸 𑀢𑀘𑁄, 𑀫𑀁𑀲𑀁 𑀦𑁆𑀳𑀸𑀭𑀼 𑀅𑀝𑁆𑀞𑀺 𑀅𑀝𑁆𑀞𑀺𑀫𑀺𑀜𑁆𑀚𑀁 𑀯𑀓𑁆𑀓𑀁, 𑀳𑀤𑀬𑀁 𑀬𑀓𑀦𑀁 𑀓𑀺𑀮𑁄𑀫𑀓𑀁 𑀧𑀺𑀳𑀓𑀁 𑀧𑀧𑁆𑀨𑀸𑀲𑀁, 𑀅𑀦𑁆𑀢𑀁 𑀅𑀦𑁆𑀢𑀕𑀼𑀡𑀁 ¶ 𑀉𑀤𑀭𑀺𑀬𑀁 𑀓𑀭𑀻𑀲𑀁 [𑀓𑀭𑀻𑀲𑀁 𑀫𑀢𑁆𑀣𑀮𑀼𑀗𑁆𑀕𑀁 (𑀓.)], 𑀧𑀺𑀢𑁆𑀢𑀁 𑀲𑁂𑀫𑁆𑀳𑀁 𑀧𑀼𑀩𑁆𑀩𑁄 𑀮𑁄𑀳𑀺𑀢𑀁 𑀲𑁂𑀤𑁄 𑀫𑁂𑀤𑁄, 𑀅𑀲𑁆𑀲𑀼 𑀯𑀲𑀸 𑀔𑁂𑀴𑁄 𑀲𑀺𑀗𑁆𑀖𑀸𑀡𑀺𑀓𑀸 𑀮𑀲𑀺𑀓𑀸 𑀫𑀼𑀢𑁆𑀢’𑀦𑁆𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀉𑀪𑀢𑁄𑀫𑀼𑀔𑀸 𑀧𑀼𑀢𑁄𑀴𑀺 [𑀫𑀽𑀢𑁄𑀴𑀻 (𑀲𑁆𑀬𑀸.), 𑀫𑀼𑀢𑁄𑀮𑀺 (𑀧𑀻.)] 𑀧𑀽𑀭𑀸 𑀦𑀸𑀦𑀸𑀯𑀺𑀳𑀺𑀢𑀲𑁆𑀲 𑀥𑀜𑁆𑀜𑀲𑁆𑀲, 𑀲𑁂𑀬𑁆𑀬𑀣𑀺𑀤𑀁 𑀲𑀸𑀮𑀻𑀦𑀁 𑀯𑀻𑀳𑀻𑀦𑀁 𑀫𑀼𑀕𑁆𑀕𑀸𑀦𑀁 𑀫𑀸𑀲𑀸𑀦𑀁 𑀢𑀺𑀮𑀸𑀦𑀁 ¶ 𑀢𑀡𑁆𑀟𑀼𑀮𑀸𑀦𑀁. 𑀢𑀫𑁂𑀦𑀁 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀫𑀼𑀜𑁆𑀘𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑁂𑀬𑁆𑀬 𑁋 ‘𑀇𑀫𑁂 𑀲𑀸𑀮𑀻, 𑀇𑀫𑁂 𑀯𑀻𑀳𑀻 𑀇𑀫𑁂 𑀫𑀼𑀕𑁆𑀕𑀸 𑀇𑀫𑁂 𑀫𑀸𑀲𑀸 𑀇𑀫𑁂 𑀢𑀺𑀮𑀸 𑀇𑀫𑁂 𑀢𑀡𑁆𑀟𑀼𑀮𑀸’𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀫𑀫𑁂𑀯 𑀓𑀸𑀬𑀁 𑀉𑀤𑁆𑀥𑀁 𑀧𑀸𑀤𑀢𑀮𑀸 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸 𑀢𑀘𑀧𑀭𑀺𑀬𑀦𑁆𑀢𑀁 𑀧𑀽𑀭𑀁 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀅𑀲𑀼𑀘𑀺𑀦𑁄 𑀧𑀘𑁆𑀘𑀯𑁂𑀓𑁆𑀔𑀢𑀺 𑁋 ‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸 𑀮𑁄𑀫𑀸…𑀧𑁂… ¶ 𑀫𑀼𑀢𑁆𑀢’𑀦𑁆𑀢𑀺.

𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸…𑀧𑁂… 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀥𑀸𑀢𑀼𑀫𑀦𑀲𑀺𑀓𑀸𑀭𑀧𑀩𑁆𑀩𑀁

𑁩𑁭𑁮. ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀫𑀫𑁂𑀯 𑀓𑀸𑀬𑀁 𑀬𑀣𑀸𑀞𑀺𑀢𑀁 𑀬𑀣𑀸𑀧𑀡𑀺𑀳𑀺𑀢𑀁 𑀥𑀸𑀢𑀼𑀲𑁄 𑀧𑀘𑁆𑀘𑀯𑁂𑀓𑁆𑀔𑀢𑀺 𑁋 ‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’𑀢𑀺.

‘‘𑀲𑁂𑀬𑁆𑀬𑀣𑀸𑀧𑀺 ¶ , 𑀪𑀺𑀓𑁆𑀔𑀯𑁂, 𑀤𑀓𑁆𑀔𑁄 𑀕𑁄𑀖𑀸𑀢𑀓𑁄 𑀯𑀸 𑀕𑁄𑀖𑀸𑀢𑀓𑀦𑁆𑀢𑁂𑀯𑀸𑀲𑀻 𑀯𑀸 𑀕𑀸𑀯𑀺𑀁 𑀯𑀥𑀺𑀢𑁆𑀯𑀸 𑀘𑀢𑀼𑀫𑀳𑀸𑀧𑀣𑁂 𑀩𑀺𑀮𑀲𑁄 ¶ 𑀯𑀺𑀪𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀅𑀲𑁆𑀲, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀇𑀫𑀫𑁂𑀯 𑀓𑀸𑀬𑀁 𑀬𑀣𑀸𑀞𑀺𑀢𑀁 𑀬𑀣𑀸𑀧𑀡𑀺𑀳𑀺𑀢𑀁 𑀥𑀸𑀢𑀼𑀲𑁄 𑀧𑀘𑁆𑀘𑀯𑁂𑀓𑁆𑀔𑀢𑀺 𑁋 ‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀼 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽’𑀢𑀺.

‘‘𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺…𑀧𑁂… ¶ 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

𑀥𑀸𑀢𑀼𑀫𑀦𑀲𑀺𑀓𑀸𑀭𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀦𑀯𑀲𑀺𑀯𑀣𑀺𑀓𑀧𑀩𑁆𑀩𑀁

𑁩𑁭𑁯. ‘‘𑀧𑀼𑀦 ¶ 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑁂𑀬𑁆𑀬𑀣𑀸𑀧𑀺 𑀧𑀲𑁆𑀲𑁂𑀬𑁆𑀬 𑀲𑀭𑀻𑀭𑀁 𑀲𑀺𑀯𑀣𑀺𑀓𑀸𑀬 𑀙𑀟𑁆𑀟𑀺𑀢𑀁 𑀏𑀓𑀸𑀳𑀫𑀢𑀁 𑀯𑀸 𑀤𑁆𑀯𑀻𑀳𑀫𑀢𑀁 𑀯𑀸 𑀢𑀻𑀳𑀫𑀢𑀁 𑀯𑀸 𑀉𑀤𑁆𑀥𑀼𑀫𑀸𑀢𑀓𑀁 𑀯𑀺𑀦𑀻𑀮𑀓𑀁 𑀯𑀺𑀧𑀼𑀩𑁆𑀩𑀓𑀚𑀸𑀢𑀁. 𑀲𑁄 𑀇𑀫𑀫𑁂𑀯 𑀓𑀸𑀬𑀁 𑀉𑀧𑀲𑀁𑀳𑀭𑀢𑀺 𑁋 ‘𑀅𑀬𑀫𑁆𑀧𑀺 𑀔𑁄 𑀓𑀸𑀬𑁄 𑀏𑀯𑀁𑀥𑀫𑁆𑀫𑁄 𑀏𑀯𑀁𑀪𑀸𑀯𑀻 𑀏𑀯𑀁𑀅𑀦𑀢𑀻𑀢𑁄’𑀢𑀺.

‘‘𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 ¶ …𑀧𑁂… 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑁂𑀬𑁆𑀬𑀣𑀸𑀧𑀺 𑀧𑀲𑁆𑀲𑁂𑀬𑁆𑀬 𑀲𑀭𑀻𑀭𑀁 𑀲𑀺𑀯𑀣𑀺𑀓𑀸𑀬 𑀙𑀟𑁆𑀟𑀺𑀢𑀁 𑀓𑀸𑀓𑁂𑀳𑀺 𑀯𑀸 ¶ 𑀔𑀚𑁆𑀚𑀫𑀸𑀦𑀁 𑀓𑀼𑀮𑀮𑁂𑀳𑀺 𑀯𑀸 𑀔𑀚𑁆𑀚𑀫𑀸𑀦𑀁 𑀕𑀺𑀚𑁆𑀛𑁂𑀳𑀺 𑀯𑀸 𑀔𑀚𑁆𑀚𑀫𑀸𑀦𑀁 𑀓𑀗𑁆𑀓𑁂𑀳𑀺 𑀯𑀸 𑀔𑀚𑁆𑀚𑀫𑀸𑀦𑀁 𑀲𑀼𑀦𑀔𑁂𑀳𑀺 𑀯𑀸 𑀔𑀚𑁆𑀚𑀫𑀸𑀦𑀁 𑀩𑁆𑀬𑀕𑁆𑀖𑁂𑀳𑀺 𑀯𑀸 𑀔𑀚𑁆𑀚𑀫𑀸𑀦𑀁 𑀤𑀻𑀧𑀻𑀳𑀺 𑀯𑀸 𑀔𑀚𑁆𑀚𑀫𑀸𑀦𑀁 𑀲𑀺𑀗𑁆𑀕𑀸𑀮𑁂𑀳𑀺 𑀯𑀸 [𑀕𑀺𑀚𑁆𑀛𑁂𑀳𑀺 𑀯𑀸 𑀔𑀚𑁆𑀚𑀫𑀸𑀦𑀁, 𑀲𑀼𑀯𑀸𑀦𑁂𑀳𑀺 𑀯𑀸 𑀔𑀚𑁆𑀚𑀫𑀸𑀦𑀁, 𑀲𑀺𑀕𑀸𑀮𑁂𑀳𑀺 𑀯𑀸 𑀔𑀚𑁆𑀚𑀫𑀸𑀦𑀁, (𑀲𑁆𑀬𑀸. 𑀧𑀻.)] 𑀔𑀚𑁆𑀚𑀫𑀸𑀦𑀁 𑀯𑀺𑀯𑀺𑀥𑁂𑀳𑀺 𑀯𑀸 𑀧𑀸𑀡𑀓𑀚𑀸𑀢𑁂𑀳𑀺 𑀔𑀚𑁆𑀚𑀫𑀸𑀦𑀁. 𑀲𑁄 𑀇𑀫𑀫𑁂𑀯 𑀓𑀸𑀬𑀁 𑀉𑀧𑀲𑀁𑀳𑀭𑀢𑀺 𑁋 ‘𑀅𑀬𑀫𑁆𑀧𑀺 𑀔𑁄 𑀓𑀸𑀬𑁄 𑀏𑀯𑀁𑀥𑀫𑁆𑀫𑁄 𑀏𑀯𑀁𑀪𑀸𑀯𑀻 𑀏𑀯𑀁𑀅𑀦𑀢𑀻𑀢𑁄’𑀢𑀺.

‘‘𑀇𑀢𑀺 ¶ 𑀅𑀚𑁆𑀛𑀢𑁆𑀢𑀁 𑀯𑀸…𑀧𑁂… 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑁂𑀬𑁆𑀬𑀣𑀸𑀧𑀺 𑀧𑀲𑁆𑀲𑁂𑀬𑁆𑀬 𑀲𑀭𑀻𑀭𑀁 𑀲𑀺𑀯𑀣𑀺𑀓𑀸𑀬 𑀙𑀟𑁆𑀟𑀺𑀢𑀁 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀁 𑀲𑀫𑀁𑀲𑀮𑁄𑀳𑀺𑀢𑀁 𑀦𑁆𑀳𑀸𑀭𑀼𑀲𑀫𑁆𑀩𑀦𑁆𑀥𑀁…𑀧𑁂… 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀁 𑀦𑀺𑀫𑀁𑀲𑀮𑁄𑀳𑀺𑀢𑀫𑀓𑁆𑀔𑀺𑀢𑀁 𑀦𑁆𑀳𑀸𑀭𑀼𑀲𑀫𑁆𑀩𑀦𑁆𑀥𑀁…𑀧𑁂… 𑀅𑀝𑁆𑀞𑀺𑀓𑀲𑀗𑁆𑀔𑀮𑀺𑀓𑀁 𑀅𑀧𑀕𑀢𑀫𑀁𑀲𑀮𑁄𑀳𑀺𑀢𑀁 𑀦𑁆𑀳𑀸𑀭𑀼𑀲𑀫𑁆𑀩𑀦𑁆𑀥𑀁…𑀧𑁂… 𑀅𑀝𑁆𑀞𑀺𑀓𑀸𑀦𑀺 𑀅𑀧𑀕𑀢𑀲𑀫𑁆𑀩𑀦𑁆𑀥𑀸𑀦𑀺 [𑀅𑀧𑀕𑀢𑀦𑁆𑀳𑀸𑀭𑀼𑀲𑀫𑁆𑀩𑀦𑁆𑀥𑀸𑀦𑀺 (𑀲𑁆𑀬𑀸.)] 𑀤𑀺𑀲𑀸 𑀯𑀺𑀤𑀺𑀲𑀸 𑀯𑀺𑀓𑁆𑀔𑀺𑀢𑁆𑀢𑀸𑀦𑀺, 𑀅𑀜𑁆𑀜𑁂𑀦 𑀳𑀢𑁆𑀣𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀧𑀸𑀤𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀕𑁄𑀧𑁆𑀨𑀓𑀝𑁆𑀞𑀺𑀓𑀁 [‘‘𑀅𑀜𑁆𑀜𑁂𑀦 𑀕𑁄𑀧𑁆𑀨𑀓𑀝𑁆𑀞𑀺𑀓’’𑀦𑁆𑀢𑀺 𑀇𑀤𑀁 𑀲𑀻. 𑀲𑁆𑀬𑀸. 𑀧𑀻. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] 𑀅𑀜𑁆𑀜𑁂𑀦 𑀚𑀗𑁆𑀖𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀊𑀭𑀼𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀓𑀝𑀺𑀝𑁆𑀞𑀺𑀓𑀁 [𑀅𑀜𑁆𑀜𑁂𑀦 𑀓𑀝𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀧𑀺𑀝𑁆𑀞𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀓𑀡𑁆𑀟𑀓𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀨𑀸𑀲𑀼𑀓𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀉𑀭𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀅𑀁𑀲𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀩𑀸𑀳𑀼𑀝𑁆𑀞𑀺𑀓𑀁 (𑀲𑁆𑀬𑀸.)] 𑀅𑀜𑁆𑀜𑁂𑀦 𑀨𑀸𑀲𑀼𑀓𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 ¶ 𑀧𑀺𑀝𑁆𑀞𑀺𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀔𑀦𑁆𑀥𑀝𑁆𑀞𑀺𑀓𑀁 [𑀅𑀜𑁆𑀜𑁂𑀦 𑀓𑀝𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀧𑀺𑀝𑁆𑀞𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀓𑀡𑁆𑀟𑀓𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀨𑀸𑀲𑀼𑀓𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀉𑀭𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀅𑀁𑀲𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀩𑀸𑀳𑀼𑀝𑁆𑀞𑀺𑀓𑀁 (𑀲𑁆𑀬𑀸.)] 𑀅𑀜𑁆𑀜𑁂𑀦 𑀕𑀻𑀯𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀳𑀦𑀼𑀓𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀤𑀦𑁆𑀢𑀝𑁆𑀞𑀺𑀓𑀁 𑀅𑀜𑁆𑀜𑁂𑀦 𑀲𑀻𑀲𑀓𑀝𑀸𑀳𑀁. 𑀲𑁄 𑀇𑀫𑀫𑁂𑀯 𑀓𑀸𑀬𑀁 𑀉𑀧𑀲𑀁𑀳𑀭𑀢𑀺 𑁋 ‘𑀅𑀬𑀫𑁆𑀧𑀺 𑀔𑁄 𑀓𑀸𑀬𑁄 𑀏𑀯𑀁𑀥𑀫𑁆𑀫𑁄 𑀏𑀯𑀁𑀪𑀸𑀯𑀻 𑀏𑀯𑀁𑀅𑀦𑀢𑀻𑀢𑁄’𑀢𑀺.

‘‘𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 ¶ …𑀧𑁂… 𑀯𑀺𑀳𑀭𑀢𑀺.

‘‘𑀧𑀼𑀦 ¶ 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑁂𑀬𑁆𑀬𑀣𑀸𑀧𑀺 𑀧𑀲𑁆𑀲𑁂𑀬𑁆𑀬 𑀲𑀭𑀻𑀭𑀁 𑀲𑀺𑀯𑀣𑀺𑀓𑀸𑀬 𑀙𑀟𑁆𑀟𑀺𑀢𑀁 𑀅𑀝𑁆𑀞𑀺𑀓𑀸𑀦𑀺 𑀲𑁂𑀢𑀸𑀦𑀺 𑀲𑀗𑁆𑀔𑀯𑀡𑁆𑀡𑀧𑀝𑀺𑀪𑀸𑀕𑀸𑀦𑀺…𑀧𑁂… 𑀅𑀝𑁆𑀞𑀺𑀓𑀸𑀦𑀺 𑀧𑀼𑀜𑁆𑀚𑀓𑀺𑀢𑀸𑀦𑀺 𑀢𑁂𑀭𑁄𑀯𑀲𑁆𑀲𑀺𑀓𑀸𑀦𑀺 ¶ …𑀧𑁂… 𑀅𑀝𑁆𑀞𑀺𑀓𑀸𑀦𑀺 𑀧𑀽𑀢𑀻𑀦𑀺 𑀘𑀼𑀡𑁆𑀡𑀓𑀚𑀸𑀢𑀸𑀦𑀺. 𑀲𑁄 𑀇𑀫𑀫𑁂𑀯 𑀓𑀸𑀬𑀁 𑀉𑀧𑀲𑀁𑀳𑀭𑀢𑀺 𑁋 ‘𑀅𑀬𑀫𑁆𑀧𑀺 𑀔𑁄 𑀓𑀸𑀬𑁄 𑀏𑀯𑀁𑀥𑀫𑁆𑀫𑁄 𑀏𑀯𑀁𑀪𑀸𑀯𑀻 𑀏𑀯𑀁𑀅𑀦𑀢𑀻𑀢𑁄’𑀢𑀺. 𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 𑀯𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 ¶ 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀓𑀸𑀬𑀲𑁆𑀫𑀺𑀁 𑀯𑀺𑀳𑀭𑀢𑀺, 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀓𑀸𑀬𑀲𑁆𑀫𑀺𑀁 𑀯𑀺𑀳𑀭𑀢𑀺, 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀓𑀸𑀬𑀲𑁆𑀫𑀺𑀁 𑀯𑀺𑀳𑀭𑀢𑀺. ‘𑀅𑀢𑁆𑀣𑀺 𑀓𑀸𑀬𑁄’𑀢𑀺 𑀯𑀸 𑀧𑀦𑀲𑁆𑀲 𑀲𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺 𑀬𑀸𑀯𑀤𑁂𑀯 𑀜𑀸𑀡𑀫𑀢𑁆𑀢𑀸𑀬 𑀧𑀝𑀺𑀲𑁆𑀲𑀢𑀺𑀫𑀢𑁆𑀢𑀸𑀬 𑀅𑀦𑀺𑀲𑁆𑀲𑀺𑀢𑁄 𑀘 𑀯𑀺𑀳𑀭𑀢𑀺, 𑀦 𑀘 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

𑀦𑀯𑀲𑀺𑀯𑀣𑀺𑀓𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀘𑀼𑀤𑁆𑀤𑀲 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀦𑀺𑀝𑁆𑀞𑀺𑀢𑀸.

𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸

𑁩𑁮𑁦. ‘‘𑀓𑀣𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀼𑀔𑀁 𑀯𑀸 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺 ¶ . 𑀤𑀼𑀓𑁆𑀔𑀁 𑀯𑀸 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. 𑀲𑀸𑀫𑀺𑀲𑀁 𑀯𑀸 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀲𑀸𑀫𑀺𑀲𑀁 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺, 𑀦𑀺𑀭𑀸𑀫𑀺𑀲𑀁 𑀯𑀸 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀦𑀺𑀭𑀸𑀫𑀺𑀲𑀁 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. 𑀲𑀸𑀫𑀺𑀲𑀁 𑀯𑀸 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀲𑀸𑀫𑀺𑀲𑀁 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺, 𑀦𑀺𑀭𑀸𑀫𑀺𑀲𑀁 𑀯𑀸 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀦𑀺𑀭𑀸𑀫𑀺𑀲𑀁 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. 𑀲𑀸𑀫𑀺𑀲𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀲𑀸𑀫𑀺𑀲𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺, 𑀦𑀺𑀭𑀸𑀫𑀺𑀲𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 ‘𑀦𑀺𑀭𑀸𑀫𑀺𑀲𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’𑀢𑀺 𑀧𑀚𑀸𑀦𑀸𑀢𑀺. 𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 𑀯𑀸 𑀯𑁂𑀤𑀦𑀸𑀲𑀼 ¶ 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀯𑁂𑀤𑀦𑀸𑀲𑀼 𑀯𑀺𑀳𑀭𑀢𑀺, 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 ¶ 𑀯𑀸 𑀯𑁂𑀤𑀦𑀸𑀲𑀼 𑀯𑀺𑀳𑀭𑀢𑀺, 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀯𑁂𑀤𑀦𑀸𑀲𑀼 𑀯𑀺𑀳𑀭𑀢𑀺. ‘𑀅𑀢𑁆𑀣𑀺 𑀯𑁂𑀤𑀦𑀸’𑀢𑀺 𑀯𑀸 𑀧𑀦𑀲𑁆𑀲 𑀲𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺 ¶ 𑀬𑀸𑀯𑀤𑁂𑀯 𑀜𑀸𑀡𑀫𑀢𑁆𑀢𑀸𑀬 𑀧𑀝𑀺𑀲𑁆𑀲𑀢𑀺𑀫𑀢𑁆𑀢𑀸𑀬 𑀅𑀦𑀺𑀲𑁆𑀲𑀺𑀢𑁄 𑀘 𑀯𑀺𑀳𑀭𑀢𑀺, 𑀦 𑀘 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸

𑁩𑁮𑁧. ‘‘𑀓𑀣𑀜𑁆𑀘 ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 ‘𑀲𑀭𑀸𑀕𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀯𑀻𑀢𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 ‘𑀯𑀻𑀢𑀭𑀸𑀕𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀲𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁 ‘𑀲𑀤𑁄𑀲𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀯𑀻𑀢𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁 ‘𑀯𑀻𑀢𑀤𑁄𑀲𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀲𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁 ‘𑀲𑀫𑁄𑀳𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀯𑀻𑀢𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁 ‘𑀯𑀻𑀢𑀫𑁄𑀳𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀲𑀗𑁆𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 ‘𑀲𑀗𑁆𑀔𑀺𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀯𑀺𑀓𑁆𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 ‘𑀯𑀺𑀓𑁆𑀔𑀺𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁 ‘𑀫𑀳𑀕𑁆𑀕𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀅𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁 ‘𑀅𑀫𑀳𑀕𑁆𑀕𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀲𑀉𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁 ‘𑀲𑀉𑀢𑁆𑀢𑀭𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀅𑀦𑀼𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁 ‘𑀅𑀦𑀼𑀢𑁆𑀢𑀭𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 ‘𑀲𑀫𑀸𑀳𑀺𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁 ‘𑀅𑀲𑀫𑀸𑀳𑀺𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 ‘𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀅𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁 ‘𑀅𑀯𑀺𑀫𑀼𑀢𑁆𑀢𑀁 𑀘𑀺𑀢𑁆𑀢’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 𑀯𑀸 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀘𑀺𑀢𑁆𑀢𑀲𑁆𑀫𑀺𑀁 𑀯𑀺𑀳𑀭𑀢𑀺, 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀘𑀺𑀢𑁆𑀢𑀲𑁆𑀫𑀺𑀁 𑀯𑀺𑀳𑀭𑀢𑀺, 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀘𑀺𑀢𑁆𑀢𑀲𑁆𑀫𑀺𑀁 𑀯𑀺𑀳𑀭𑀢𑀺, ‘𑀅𑀢𑁆𑀣𑀺 𑀘𑀺𑀢𑁆𑀢’𑀦𑁆𑀢𑀺 𑀯𑀸 𑀧𑀦𑀲𑁆𑀲 𑀲𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺 ¶ 𑀬𑀸𑀯𑀤𑁂𑀯 𑀜𑀸𑀡𑀫𑀢𑁆𑀢𑀸𑀬 𑀧𑀝𑀺𑀲𑁆𑀲𑀢𑀺𑀫𑀢𑁆𑀢𑀸𑀬 𑀅𑀦𑀺𑀲𑁆𑀲𑀺𑀢𑁄 𑀘 𑀯𑀺𑀳𑀭𑀢𑀺, 𑀦 𑀘 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺 ¶ . 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺.

𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀦𑀻𑀯𑀭𑀡𑀧𑀩𑁆𑀩𑀁

𑁩𑁮𑁨. ‘‘𑀓𑀣𑀜𑁆𑀘 ¶ ¶ 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀧𑀜𑁆𑀘𑀲𑀼 𑀦𑀻𑀯𑀭𑀡𑁂𑀲𑀼. 𑀓𑀣𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀧𑀜𑁆𑀘𑀲𑀼 𑀦𑀻𑀯𑀭𑀡𑁂𑀲𑀼?

‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀓𑀸𑀫𑀘𑁆𑀙𑀦𑁆𑀤𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀓𑀸𑀫𑀘𑁆𑀙𑀦𑁆𑀤𑁄’𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀓𑀸𑀫𑀘𑁆𑀙𑀦𑁆𑀤𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀓𑀸𑀫𑀘𑁆𑀙𑀦𑁆𑀤𑁄’𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀧𑀳𑀻𑀦𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀩𑁆𑀬𑀸𑀧𑀸𑀤𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀩𑁆𑀬𑀸𑀧𑀸𑀤𑁄’𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀩𑁆𑀬𑀸𑀧𑀸𑀤𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀩𑁆𑀬𑀸𑀧𑀸𑀤𑁄’𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀩𑁆𑀬𑀸𑀧𑀸𑀤𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀧𑀳𑀻𑀦𑀲𑁆𑀲 𑀩𑁆𑀬𑀸𑀧𑀸𑀤𑀲𑁆𑀲 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀣𑀺𑀦𑀫𑀺𑀤𑁆𑀥𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀣𑀺𑀦𑀫𑀺𑀤𑁆𑀥’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀣𑀺𑀦𑀫𑀺𑀤𑁆𑀥𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀣𑀺𑀦𑀫𑀺𑀤𑁆𑀥’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀣𑀺𑀦𑀫𑀺𑀤𑁆𑀥𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀣𑀺𑀦𑀫𑀺𑀤𑁆𑀥𑀲𑁆𑀲 ¶ 𑀧𑀳𑀸𑀦𑀁 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀧𑀳𑀻𑀦𑀲𑁆𑀲 𑀣𑀺𑀦𑀫𑀺𑀤𑁆𑀥𑀲𑁆𑀲 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 ¶ 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀧𑀳𑀻𑀦𑀲𑁆𑀲 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀲𑀦𑁆𑀢𑀁 ¶ 𑀯𑀸 𑀅𑀚𑁆𑀛𑀢𑁆𑀢𑀁 𑀯𑀺𑀘𑀺𑀓𑀺𑀘𑁆𑀙𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀯𑀺𑀘𑀺𑀓𑀺𑀘𑁆𑀙𑀸’𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀯𑀺𑀘𑀺𑀓𑀺𑀘𑁆𑀙𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀯𑀺𑀘𑀺𑀓𑀺𑀘𑁆𑀙𑀸’𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 ¶ 𑀘 𑀉𑀧𑁆𑀧𑀦𑁆𑀦𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀳𑀸𑀦𑀁 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀧𑀳𑀻𑀦𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺, 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺, 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺 ‘𑀅𑀢𑁆𑀣𑀺 𑀥𑀫𑁆𑀫𑀸’𑀢𑀺 𑀯𑀸 𑀧𑀦𑀲𑁆𑀲 𑀲𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺 𑀬𑀸𑀯𑀤𑁂𑀯 𑀜𑀸𑀡𑀫𑀢𑁆𑀢𑀸𑀬 𑀧𑀝𑀺𑀲𑁆𑀲𑀢𑀺𑀫𑀢𑁆𑀢𑀸𑀬 𑀅𑀦𑀺𑀲𑁆𑀲𑀺𑀢𑁄 𑀘 𑀯𑀺𑀳𑀭𑀢𑀺, 𑀦 𑀘 𑀓𑀺𑀜𑁆𑀘𑀺 ¶ 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀧𑀜𑁆𑀘𑀲𑀼 𑀦𑀻𑀯𑀭𑀡𑁂𑀲𑀼.

𑀦𑀻𑀯𑀭𑀡𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀔𑀦𑁆𑀥𑀧𑀩𑁆𑀩𑀁

𑁩𑁮𑁩. ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼. 𑀓𑀣𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑁋 ‘𑀇𑀢𑀺 𑀭𑀽𑀧𑀁, 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄; 𑀇𑀢𑀺 𑀯𑁂𑀤𑀦𑀸, 𑀇𑀢𑀺 𑀯𑁂𑀤𑀦𑀸𑀬 𑀲𑀫𑀼𑀤𑀬𑁄, 𑀇𑀢𑀺 𑀯𑁂𑀤𑀦𑀸𑀬 𑀅𑀢𑁆𑀣𑀗𑁆𑀕𑀫𑁄; 𑀇𑀢𑀺 𑀲𑀜𑁆𑀜𑀸, 𑀇𑀢𑀺 𑀲𑀜𑁆𑀜𑀸𑀬 𑀲𑀫𑀼𑀤𑀬𑁄, 𑀇𑀢𑀺 𑀲𑀜𑁆𑀜𑀸𑀬 𑀅𑀢𑁆𑀣𑀗𑁆𑀕𑀫𑁄; 𑀇𑀢𑀺 𑀲𑀗𑁆𑀔𑀸𑀭𑀸, 𑀇𑀢𑀺 ¶ 𑀲𑀗𑁆𑀔𑀸𑀭𑀸𑀦𑀁 𑀲𑀫𑀼𑀤𑀬𑁄, 𑀇𑀢𑀺 𑀲𑀗𑁆𑀔𑀸𑀭𑀸𑀦𑀁 𑀅𑀢𑁆𑀣𑀗𑁆𑀕𑀫𑁄, 𑀇𑀢𑀺 𑀯𑀺𑀜𑁆𑀜𑀸𑀡𑀁, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑀼𑀤𑀬𑁄, 𑀇𑀢𑀺 𑀯𑀺𑀜𑁆𑀜𑀸𑀡𑀲𑁆𑀲 𑀅𑀢𑁆𑀣𑀗𑁆𑀕𑀫𑁄’𑀢𑀺, 𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺, 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺, 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺. ‘𑀅𑀢𑁆𑀣𑀺 𑀥𑀫𑁆𑀫𑀸’𑀢𑀺 𑀯𑀸 𑀧𑀦𑀲𑁆𑀲 𑀲𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺 𑀬𑀸𑀯𑀤𑁂𑀯 𑀜𑀸𑀡𑀫𑀢𑁆𑀢𑀸𑀬 𑀧𑀝𑀺𑀲𑁆𑀲𑀢𑀺𑀫𑀢𑁆𑀢𑀸𑀬, 𑀅𑀦𑀺𑀲𑁆𑀲𑀺𑀢𑁄 𑀘 𑀯𑀺𑀳𑀭𑀢𑀺, 𑀦 𑀘 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺 ¶ . 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼.

𑀔𑀦𑁆𑀥𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀆𑀬𑀢𑀦𑀧𑀩𑁆𑀩𑀁

𑁩𑁮𑁪. ‘‘𑀧𑀼𑀦 ¶ ¶ 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼. 𑀓𑀣𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼?

‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀘𑀓𑁆𑀔𑀼𑀜𑁆𑀘 𑀧𑀚𑀸𑀦𑀸𑀢𑀺, 𑀭𑀽𑀧𑁂 𑀘 𑀧𑀚𑀸𑀦𑀸𑀢𑀺, 𑀬𑀜𑁆𑀘 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀁𑀬𑁄𑀚𑀦𑀁 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀧𑀳𑀻𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀲𑁄𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀲𑀤𑁆𑀤𑁂 𑀘 𑀧𑀚𑀸𑀦𑀸𑀢𑀺, 𑀬𑀜𑁆𑀘 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀁𑀬𑁄𑀚𑀦𑀁 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀧𑀳𑀻𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀖𑀸𑀦𑀜𑁆𑀘 𑀧𑀚𑀸𑀦𑀸𑀢𑀺, 𑀕𑀦𑁆𑀥𑁂 𑀘 𑀧𑀚𑀸𑀦𑀸𑀢𑀺, 𑀬𑀜𑁆𑀘 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀁𑀬𑁄𑀚𑀦𑀁 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀧𑀳𑀻𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀚𑀺𑀯𑁆𑀳𑀜𑁆𑀘 𑀧𑀚𑀸𑀦𑀸𑀢𑀺, 𑀭𑀲𑁂 𑀘 𑀧𑀚𑀸𑀦𑀸𑀢𑀺, 𑀬𑀜𑁆𑀘 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀁𑀬𑁄𑀚𑀦𑀁 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺 ¶ , 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀧𑀳𑀻𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀓𑀸𑀬𑀜𑁆𑀘 𑀧𑀚𑀸𑀦𑀸𑀢𑀺, 𑀨𑁄𑀝𑁆𑀞𑀩𑁆𑀩𑁂 𑀘 𑀧𑀚𑀸𑀦𑀸𑀢𑀺, 𑀬𑀜𑁆𑀘 𑀢𑀤𑀼𑀪𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀁𑀬𑁄𑀚𑀦𑀁 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀧𑀳𑀻𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀫𑀦𑀜𑁆𑀘 ¶ 𑀧𑀚𑀸𑀦𑀸𑀢𑀺, 𑀥𑀫𑁆𑀫𑁂 𑀘 𑀧𑀚𑀸𑀦𑀸𑀢𑀺, 𑀬𑀜𑁆𑀘 𑀢𑀤𑀼𑀪𑀬𑀁 ¶ 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀁𑀬𑁄𑀚𑀦𑀁 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀧𑀳𑀸𑀦𑀁 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀧𑀳𑀻𑀦𑀲𑁆𑀲 𑀲𑀁𑀬𑁄𑀚𑀦𑀲𑁆𑀲 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺, 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺, 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺. ‘𑀅𑀢𑁆𑀣𑀺 ¶ 𑀥𑀫𑁆𑀫𑀸’𑀢𑀺 𑀯𑀸 𑀧𑀦𑀲𑁆𑀲 𑀲𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺 𑀬𑀸𑀯𑀤𑁂𑀯 𑀜𑀸𑀡𑀫𑀢𑁆𑀢𑀸𑀬 𑀧𑀝𑀺𑀲𑁆𑀲𑀢𑀺𑀫𑀢𑁆𑀢𑀸𑀬, 𑀅𑀦𑀺𑀲𑁆𑀲𑀺𑀢𑁄 𑀘 𑀯𑀺𑀳𑀭𑀢𑀺, 𑀦 𑀘 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼.

𑀆𑀬𑀢𑀦𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀩𑁄𑀚𑁆𑀛𑀗𑁆𑀕𑀧𑀩𑁆𑀩𑀁

𑁩𑁮𑁫. ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀲𑀢𑁆𑀢𑀲𑀼 𑀩𑁄𑀚𑁆𑀛𑀗𑁆𑀕𑁂𑀲𑀼. 𑀓𑀣𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀲𑀢𑁆𑀢𑀲𑀼 𑀩𑁄𑀚𑁆𑀛𑀗𑁆𑀕𑁂𑀲𑀼? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 ¶ 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀻 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 ¶ 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀻 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀻 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀻 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀲𑀦𑁆𑀢𑀁 ¶ 𑀯𑀸 𑀅𑀚𑁆𑀛𑀢𑁆𑀢𑀁 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀻 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀻 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺 ¶ , 𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 ‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄’𑀢𑀺 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 ¶ 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑁄 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺, 𑀬𑀣𑀸 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀻 𑀳𑁄𑀢𑀺 𑀢𑀜𑁆𑀘 𑀧𑀚𑀸𑀦𑀸𑀢𑀺.

‘‘𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 ¶ 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺, 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺, 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺 ‘𑀅𑀢𑁆𑀣𑀺 𑀥𑀫𑁆𑀫𑀸’𑀢𑀺 𑀯𑀸 𑀧𑀦𑀲𑁆𑀲 𑀲𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺 𑀬𑀸𑀯𑀤𑁂𑀯 𑀜𑀸𑀡𑀫𑀢𑁆𑀢𑀸𑀬 𑀧𑀝𑀺𑀲𑁆𑀲𑀢𑀺𑀫𑀢𑁆𑀢𑀸𑀬 𑀅𑀦𑀺𑀲𑁆𑀲𑀺𑀢𑁄 𑀘 𑀯𑀺𑀳𑀭𑀢𑀺, 𑀦 𑀘 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀲𑀢𑁆𑀢𑀲𑀼 𑀩𑁄𑀚𑁆𑀛𑀗𑁆𑀕𑁂𑀲𑀼.

𑀩𑁄𑀚𑁆𑀛𑀗𑁆𑀕𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁. [𑀩𑁄𑀚𑁆𑀛𑀗𑁆𑀕𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁, 𑀧𑀞𑀫𑀪𑀸𑀡𑀯𑀸𑀭𑀁 (𑀲𑁆𑀬𑀸.)]

𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀲𑀘𑁆𑀘𑀧𑀩𑁆𑀩𑀁

𑁩𑁮𑁬. ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼. 𑀓𑀣𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 ‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺.

𑀧𑀞𑀫𑀪𑀸𑀡𑀯𑀸𑀭𑁄 𑀦𑀺𑀝𑁆𑀞𑀺𑀢𑁄.

𑀤𑀼𑀓𑁆𑀔𑀲𑀘𑁆𑀘𑀦𑀺𑀤𑁆𑀤𑁂𑀲𑁄

𑁩𑁮𑁭. ‘‘𑀓𑀢𑀫𑀜𑁆𑀘 ¶ ¶ ¶ , 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁? 𑀚𑀸𑀢𑀺𑀧𑀺 𑀤𑀼𑀓𑁆𑀔𑀸, 𑀚𑀭𑀸𑀧𑀺 𑀤𑀼𑀓𑁆𑀔𑀸, 𑀫𑀭𑀡𑀫𑁆𑀧𑀺 𑀤𑀼𑀓𑁆𑀔𑀁, 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀸𑀧𑀺 𑀤𑀼𑀓𑁆𑀔𑀸, 𑀅𑀧𑁆𑀧𑀺𑀬𑁂𑀳𑀺 𑀲𑀫𑁆𑀧𑀬𑁄𑀕𑁄𑀧𑀺 𑀤𑀼𑀓𑁆𑀔𑁄, 𑀧𑀺𑀬𑁂𑀳𑀺 𑀯𑀺𑀧𑁆𑀧𑀬𑁄𑀕𑁄𑀧𑀺 𑀤𑀼𑀓𑁆𑀔𑁄 [𑀅𑀧𑁆𑀧𑀺𑀬𑁂𑀳𑀺…𑀧𑁂… 𑀯𑀺𑀧𑁆𑀧𑀬𑁄𑀕𑁄 𑀤𑀼𑀓𑁆𑀔𑁄𑀢𑀺𑀧𑀸𑀞𑁄 𑀘𑁂𑀯 𑀢𑀁𑀦𑀺𑀤𑁆𑀤𑁂𑀲𑁄 𑀘 𑀓𑀢𑁆𑀣𑀘𑀺 𑀦 𑀤𑀺𑀲𑁆𑀲𑀢𑀺, 𑀅𑀝𑁆𑀞𑀓𑀣𑀸𑀬𑀁𑀧𑀺 𑀢𑀁𑀲𑀁𑀯𑀡𑁆𑀡𑀦𑀸 𑀦𑀢𑁆𑀣𑀺], 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁, 𑀲𑀗𑁆𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 [𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀧𑀺 (𑀓.)] 𑀤𑀼𑀓𑁆𑀔𑀸.

𑁩𑁮𑁮. ‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀚𑀸𑀢𑀺? 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂 𑀚𑀸𑀢𑀺 𑀲𑀜𑁆𑀚𑀸𑀢𑀺 𑀑𑀓𑁆𑀓𑀦𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀔𑀦𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑁄 𑀆𑀬𑀢𑀦𑀸𑀦𑀁 𑀧𑀝𑀺𑀮𑀸𑀪𑁄, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀚𑀸𑀢𑀺.

𑁩𑁮𑁯. ‘‘𑀓𑀢𑀫𑀸 ¶ 𑀘, 𑀪𑀺𑀓𑁆𑀔𑀯𑁂, 𑀚𑀭𑀸? 𑀬𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂 𑀚𑀭𑀸 𑀚𑀻𑀭𑀡𑀢𑀸 𑀔𑀡𑁆𑀟𑀺𑀘𑁆𑀘𑀁 𑀧𑀸𑀮𑀺𑀘𑁆𑀘𑀁 𑀯𑀮𑀺𑀢𑁆𑀢𑀘𑀢𑀸 𑀆𑀬𑀼𑀦𑁄 𑀲𑀁𑀳𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑁄, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀚𑀭𑀸.

𑁩𑁯𑁦. ‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀫𑀭𑀡𑀁? 𑀬𑀁 [𑀅𑀝𑁆𑀞𑀓𑀣𑀸 𑀑𑀮𑁄𑀓𑁂𑀢𑀩𑁆𑀩𑀸] 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀫𑁆𑀳𑀸 𑀢𑀫𑁆𑀳𑀸 𑀲𑀢𑁆𑀢𑀦𑀺𑀓𑀸𑀬𑀸 𑀘𑀼𑀢𑀺 𑀘𑀯𑀦𑀢𑀸 𑀪𑁂𑀤𑁄 𑀅𑀦𑁆𑀢𑀭𑀥𑀸𑀦𑀁 𑀫𑀘𑁆𑀘𑀼 𑀫𑀭𑀡𑀁 𑀓𑀸𑀮𑀓𑀺𑀭𑀺𑀬𑀸 𑀔𑀦𑁆𑀥𑀸𑀦𑀁 𑀪𑁂𑀤𑁄 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑀼𑀧𑀘𑁆𑀙𑁂𑀤𑁄, 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀫𑀭𑀡𑀁.

𑁩𑁯𑁧. ‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑁄𑀓𑁄? 𑀬𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀩𑁆𑀬𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 ¶ 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑀲𑁆𑀲 𑀲𑁄𑀓𑁄 𑀲𑁄𑀘𑀦𑀸 𑀲𑁄𑀘𑀺𑀢𑀢𑁆𑀢𑀁 𑀅𑀦𑁆𑀢𑁄𑀲𑁄𑀓𑁄 𑀅𑀦𑁆𑀢𑁄𑀧𑀭𑀺𑀲𑁄𑀓𑁄, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑁄𑀓𑁄.

𑁩𑁯𑁨. ‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀭𑀺𑀤𑁂𑀯𑁄? 𑀬𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀩𑁆𑀬𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑀲𑁆𑀲 𑀆𑀤𑁂𑀯𑁄 𑀧𑀭𑀺𑀤𑁂𑀯𑁄 𑀆𑀤𑁂𑀯𑀦𑀸 𑀧𑀭𑀺𑀤𑁂𑀯𑀦𑀸 𑀆𑀤𑁂𑀯𑀺𑀢𑀢𑁆𑀢𑀁 𑀧𑀭𑀺𑀤𑁂𑀯𑀺𑀢𑀢𑁆𑀢𑀁, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂 𑀧𑀭𑀺𑀤𑁂𑀯𑁄.

𑁩𑁯𑁩. ‘‘𑀓𑀢𑀫𑀜𑁆𑀘 ¶ , 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁? 𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀓𑀸𑀬𑀺𑀓𑀁 𑀤𑀼𑀓𑁆𑀔𑀁 𑀓𑀸𑀬𑀺𑀓𑀁 𑀅𑀲𑀸𑀢𑀁 𑀓𑀸𑀬𑀲𑀫𑁆𑀨𑀲𑁆𑀲𑀚𑀁 𑀤𑀼𑀓𑁆𑀔𑀁 𑀅𑀲𑀸𑀢𑀁 𑀯𑁂𑀤𑀬𑀺𑀢𑀁, 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁.

𑁩𑁯𑁪. ‘‘𑀓𑀢𑀫𑀜𑁆𑀘 ¶ , 𑀪𑀺𑀓𑁆𑀔𑀯𑁂, 𑀤𑁄𑀫𑀦𑀲𑁆𑀲𑀁? 𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀘𑁂𑀢𑀲𑀺𑀓𑀁 𑀤𑀼𑀓𑁆𑀔𑀁 𑀘𑁂𑀢𑀲𑀺𑀓𑀁 𑀅𑀲𑀸𑀢𑀁 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀤𑀼𑀓𑁆𑀔𑀁 𑀅𑀲𑀸𑀢𑀁 𑀯𑁂𑀤𑀬𑀺𑀢𑀁, 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑁄𑀫𑀦𑀲𑁆𑀲𑀁.

𑁩𑁯𑁫. ‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀉𑀧𑀸𑀬𑀸𑀲𑁄? 𑀬𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀩𑁆𑀬𑀲𑀦𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀤𑀼𑀓𑁆𑀔𑀥𑀫𑁆𑀫𑁂𑀦 𑀨𑀼𑀝𑁆𑀞𑀲𑁆𑀲 𑀆𑀬𑀸𑀲𑁄 𑀉𑀧𑀸𑀬𑀸𑀲𑁄 𑀆𑀬𑀸𑀲𑀺𑀢𑀢𑁆𑀢𑀁 𑀉𑀧𑀸𑀬𑀸𑀲𑀺𑀢𑀢𑁆𑀢𑀁, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀉𑀧𑀸𑀬𑀸𑀲𑁄.

𑁩𑁯𑁬. ‘‘𑀓𑀢𑀫𑁄 ¶ 𑀘, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀺𑀬𑁂𑀳𑀺 𑀲𑀫𑁆𑀧𑀬𑁄𑀕𑁄 𑀤𑀼𑀓𑁆𑀔𑁄? 𑀇𑀥 𑀬𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀅𑀦𑀺𑀝𑁆𑀞𑀸 𑀅𑀓𑀦𑁆𑀢𑀸 𑀅𑀫𑀦𑀸𑀧𑀸 𑀭𑀽𑀧𑀸 𑀲𑀤𑁆𑀤𑀸 𑀕𑀦𑁆𑀥𑀸 𑀭𑀲𑀸 𑀨𑁄𑀝𑁆𑀞𑀩𑁆𑀩𑀸 𑀥𑀫𑁆𑀫𑀸, 𑀬𑁂 𑀯𑀸 𑀧𑀦𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀅𑀦𑀢𑁆𑀣𑀓𑀸𑀫𑀸 𑀅𑀳𑀺𑀢𑀓𑀸𑀫𑀸 𑀅𑀨𑀸𑀲𑀼𑀓𑀓𑀸𑀫𑀸 𑀅𑀬𑁄𑀕𑀓𑁆𑀔𑁂𑀫𑀓𑀸𑀫𑀸, 𑀬𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀗𑁆𑀕𑀢𑀺 𑀲𑀫𑀸𑀕𑀫𑁄 𑀲𑀫𑁄𑀥𑀸𑀦𑀁 𑀫𑀺𑀲𑁆𑀲𑀻𑀪𑀸𑀯𑁄, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀺𑀬𑁂𑀳𑀺 𑀲𑀫𑁆𑀧𑀬𑁄𑀕𑁄 𑀤𑀼𑀓𑁆𑀔𑁄.

𑁩𑁯𑁭. ‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀺𑀬𑁂𑀳𑀺 𑀯𑀺𑀧𑁆𑀧𑀬𑁄𑀕𑁄 𑀤𑀼𑀓𑁆𑀔𑁄? 𑀇𑀥 𑀬𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀭𑀽𑀧𑀸 𑀲𑀤𑁆𑀤𑀸 𑀕𑀦𑁆𑀥𑀸 𑀭𑀲𑀸 𑀨𑁄𑀝𑁆𑀞𑀩𑁆𑀩𑀸 𑀥𑀫𑁆𑀫𑀸, 𑀬𑁂 𑀯𑀸 𑀧𑀦𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀅𑀢𑁆𑀣𑀓𑀸𑀫𑀸 𑀳𑀺𑀢𑀓𑀸𑀫𑀸 𑀨𑀸𑀲𑀼𑀓𑀓𑀸𑀫𑀸 𑀬𑁄𑀕𑀓𑁆𑀔𑁂𑀫𑀓𑀸𑀫𑀸 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀪𑀸𑀢𑀸 𑀯𑀸 𑀪𑀕𑀺𑀦𑀻 𑀯𑀸 𑀫𑀺𑀢𑁆𑀢𑀸 𑀯𑀸 𑀅𑀫𑀘𑁆𑀘𑀸 𑀯𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀯𑀸, 𑀬𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀲𑀗𑁆𑀕𑀢𑀺 𑀅𑀲𑀫𑀸𑀕𑀫𑁄 𑀅𑀲𑀫𑁄𑀥𑀸𑀦𑀁 𑀅𑀫𑀺𑀲𑁆𑀲𑀻𑀪𑀸𑀯𑁄, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀺𑀬𑁂𑀳𑀺 𑀯𑀺𑀧𑁆𑀧𑀬𑁄𑀕𑁄 𑀤𑀼𑀓𑁆𑀔𑁄.

𑁩𑁯𑁮. ‘‘𑀓𑀢𑀫𑀜𑁆𑀘 ¶ ¶ , 𑀪𑀺𑀓𑁆𑀔𑀯𑁂, 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁? 𑀚𑀸𑀢𑀺𑀥𑀫𑁆𑀫𑀸𑀦𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 𑁋 ‘𑀅𑀳𑁄 𑀯𑀢 𑀫𑀬𑀁 𑀦 𑀚𑀸𑀢𑀺𑀥𑀫𑁆𑀫𑀸 𑀅𑀲𑁆𑀲𑀸𑀫, 𑀦 𑀘 𑀯𑀢 𑀦𑁄 𑀚𑀸𑀢𑀺 𑀆𑀕𑀘𑁆𑀙𑁂𑀬𑁆𑀬𑀸’𑀢𑀺. 𑀦 𑀔𑁄 𑀧𑀦𑁂𑀢𑀁 𑀇𑀘𑁆𑀙𑀸𑀬 𑀧𑀢𑁆𑀢𑀩𑁆𑀩𑀁, 𑀇𑀤𑀫𑁆𑀧𑀺 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁. 𑀚𑀭𑀸𑀥𑀫𑁆𑀫𑀸𑀦𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 𑁋 ‘𑀅𑀳𑁄 𑀯𑀢 𑀫𑀬𑀁 𑀦 𑀚𑀭𑀸𑀥𑀫𑁆𑀫𑀸 𑀅𑀲𑁆𑀲𑀸𑀫, 𑀦 𑀘 𑀯𑀢 𑀦𑁄 𑀚𑀭𑀸 𑀆𑀕𑀘𑁆𑀙𑁂𑀬𑁆𑀬𑀸’𑀢𑀺. 𑀦 𑀔𑁄 𑀧𑀦𑁂𑀢𑀁 𑀇𑀘𑁆𑀙𑀸𑀬 𑀧𑀢𑁆𑀢𑀩𑁆𑀩𑀁, 𑀇𑀤𑀫𑁆𑀧𑀺 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁. 𑀩𑁆𑀬𑀸𑀥𑀺𑀥𑀫𑁆𑀫𑀸𑀦𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 ‘𑀅𑀳𑁄 𑀯𑀢 𑀫𑀬𑀁 𑀦 𑀩𑁆𑀬𑀸𑀥𑀺𑀥𑀫𑁆𑀫𑀸 𑀅𑀲𑁆𑀲𑀸𑀫, 𑀦 𑀘 𑀯𑀢 𑀦𑁄 𑀩𑁆𑀬𑀸𑀥𑀺 𑀆𑀕𑀘𑁆𑀙𑁂𑀬𑁆𑀬𑀸’𑀢𑀺. 𑀦 𑀔𑁄 𑀧𑀦𑁂𑀢𑀁 𑀇𑀘𑁆𑀙𑀸𑀬 𑀧𑀢𑁆𑀢𑀩𑁆𑀩𑀁, 𑀇𑀤𑀫𑁆𑀧𑀺 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁. 𑀫𑀭𑀡𑀥𑀫𑁆𑀫𑀸𑀦𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 ‘𑀅𑀳𑁄 𑀯𑀢 𑀫𑀬𑀁 𑀦 𑀫𑀭𑀡𑀥𑀫𑁆𑀫𑀸 𑀅𑀲𑁆𑀲𑀸𑀫, 𑀦 𑀘 𑀯𑀢 𑀦𑁄 𑀫𑀭𑀡𑀁 𑀆𑀕𑀘𑁆𑀙𑁂𑀬𑁆𑀬𑀸’𑀢𑀺. 𑀦 𑀔𑁄 𑀧𑀦𑁂𑀢𑀁 𑀇𑀘𑁆𑀙𑀸𑀬 𑀧𑀢𑁆𑀢𑀩𑁆𑀩𑀁, 𑀇𑀤𑀫𑁆𑀧𑀺 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁. 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀸𑀦𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀏𑀯𑀁 ¶ 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 ‘𑀅𑀳𑁄 𑀯𑀢 𑀫𑀬𑀁 𑀦 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀸 𑀅𑀲𑁆𑀲𑀸𑀫, 𑀦 𑀘 𑀯𑀢 𑀦𑁄 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀸 𑀆𑀕𑀘𑁆𑀙𑁂𑀬𑁆𑀬𑀼’𑀦𑁆𑀢𑀺. 𑀦 𑀔𑁄 𑀧𑀦𑁂𑀢𑀁 𑀇𑀘𑁆𑀙𑀸𑀬 𑀧𑀢𑁆𑀢𑀩𑁆𑀩𑀁, 𑀇𑀤𑀫𑁆𑀧𑀺 𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺 𑀢𑀫𑁆𑀧𑀺 𑀤𑀼𑀓𑁆𑀔𑀁.

𑁩𑁯𑁯. ‘‘𑀓𑀢𑀫𑁂 ¶ 𑀘, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸? 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑁂𑀤𑀦𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀜𑁆𑀜𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄. 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁.

𑀲𑀫𑀼𑀤𑀬𑀲𑀘𑁆𑀘𑀦𑀺𑀤𑁆𑀤𑁂𑀲𑁄

𑁪𑁦𑁦. ‘‘𑀓𑀢𑀫𑀜𑁆𑀘 ¶ , 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀲𑀫𑀼𑀤𑀬𑀁 [𑀤𑀼𑀓𑁆𑀔𑀲𑀫𑀼𑀤𑀬𑁄 (𑀲𑁆𑀬𑀸.)] 𑀅𑀭𑀺𑀬𑀲𑀘𑁆𑀘𑀁? 𑀬𑀸𑀬𑀁 𑀢𑀡𑁆𑀳𑀸 𑀧𑁄𑀦𑁄𑀩𑁆𑀪𑀯𑀺𑀓𑀸 [𑀧𑁄𑀦𑁄𑀪𑀯𑀺𑀓𑀸 (𑀲𑀻. 𑀧𑀻.)] 𑀦𑀦𑁆𑀤𑀻𑀭𑀸𑀕𑀲𑀳𑀕𑀢𑀸 [𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸 (𑀲𑀻. 𑀲𑁆𑀬𑀸. 𑀧𑀻.)] 𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀺𑀦𑀻, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀢𑀡𑁆𑀳𑀸 𑀪𑀯𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸.

‘‘𑀲𑀸 𑀔𑁄 𑀧𑀦𑁂𑀲𑀸, 𑀪𑀺𑀓𑁆𑀔𑀯𑁂, 𑀢𑀡𑁆𑀳𑀸 𑀓𑀢𑁆𑀣 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀓𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺? 𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 ¶ 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

‘‘𑀓𑀺𑀜𑁆𑀘 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁? 𑀘𑀓𑁆𑀔𑀼 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺. 𑀲𑁄𑀢𑀁 𑀮𑁄𑀓𑁂…𑀧𑁂… 𑀖𑀸𑀦𑀁 𑀮𑁄𑀓𑁂… 𑀚𑀺𑀯𑁆𑀳𑀸 𑀮𑁄𑀓𑁂… 𑀓𑀸𑀬𑁄 𑀮𑁄𑀓𑁂… 𑀫𑀦𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

‘‘𑀭𑀽𑀧𑀸 𑀮𑁄𑀓𑁂… 𑀲𑀤𑁆𑀤𑀸 𑀮𑁄𑀓𑁂… 𑀕𑀦𑁆𑀥𑀸 𑀮𑁄𑀓𑁂… 𑀭𑀲𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀸 𑀮𑁄𑀓𑁂… 𑀥𑀫𑁆𑀫𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀲𑁄𑀢𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀖𑀸𑀦𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀓𑀸𑀬𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 ¶ 𑀮𑁄𑀓𑁂… 𑀲𑁄𑀢𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀖𑀸𑀦𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄 ¶ 𑀮𑁄𑀓𑁂… 𑀓𑀸𑀬𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀫𑀦𑁄𑀲𑀫𑁆𑀨𑀲𑁆𑀲𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 ¶ 𑀯𑁂𑀤𑀦𑀸 𑀮𑁄𑀓𑁂… 𑀲𑁄𑀢𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂… 𑀖𑀸𑀦𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂… 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 ¶ 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

‘‘𑀭𑀽𑀧𑀲𑀜𑁆𑀜𑀸 𑀮𑁄𑀓𑁂… 𑀲𑀤𑁆𑀤𑀲𑀜𑁆𑀜𑀸 𑀮𑁄𑀓𑁂… 𑀕𑀦𑁆𑀥𑀲𑀜𑁆𑀜𑀸 𑀮𑁄𑀓𑁂… 𑀭𑀲𑀲𑀜𑁆𑀜𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀲𑀜𑁆𑀜𑀸 𑀮𑁄𑀓𑁂… 𑀥𑀫𑁆𑀫𑀲𑀜𑁆𑀜𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

‘‘𑀭𑀽𑀧𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀲𑀤𑁆𑀤𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀕𑀦𑁆𑀥𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀭𑀲𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀥𑀫𑁆𑀫𑀲𑀜𑁆𑀘𑁂𑀢𑀦𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

‘‘𑀭𑀽𑀧𑀢𑀡𑁆𑀳𑀸 𑀮𑁄𑀓𑁂… 𑀲𑀤𑁆𑀤𑀢𑀡𑁆𑀳𑀸 𑀮𑁄𑀓𑁂… 𑀕𑀦𑁆𑀥𑀢𑀡𑁆𑀳𑀸 𑀮𑁄𑀓𑁂… 𑀭𑀲𑀢𑀡𑁆𑀳𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀮𑁄𑀓𑁂… 𑀥𑀫𑁆𑀫𑀢𑀡𑁆𑀳𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

‘‘𑀭𑀽𑀧𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀲𑀤𑁆𑀤𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀕𑀦𑁆𑀥𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀭𑀲𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀥𑀫𑁆𑀫𑀯𑀺𑀢𑀓𑁆𑀓𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺.

‘‘𑀭𑀽𑀧𑀯𑀺𑀘𑀸𑀭𑁄 𑀮𑁄𑀓𑁂… 𑀲𑀤𑁆𑀤𑀯𑀺𑀘𑀸𑀭𑁄 𑀮𑁄𑀓𑁂… 𑀕𑀦𑁆𑀥𑀯𑀺𑀘𑀸𑀭𑁄 𑀮𑁄𑀓𑁂… 𑀭𑀲𑀯𑀺𑀘𑀸𑀭𑁄 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀯𑀺𑀘𑀸𑀭𑁄 𑀮𑁄𑀓𑁂… 𑀥𑀫𑁆𑀫𑀯𑀺𑀘𑀸𑀭𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 ¶ 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀣 𑀦𑀺𑀯𑀺𑀲𑀫𑀸𑀦𑀸 𑀦𑀺𑀯𑀺𑀲𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀲𑀫𑀼𑀤𑀬𑀁 𑀅𑀭𑀺𑀬𑀲𑀘𑁆𑀘𑀁.

𑀦𑀺𑀭𑁄𑀥𑀲𑀘𑁆𑀘𑀦𑀺𑀤𑁆𑀤𑁂𑀲𑁄

𑁪𑁦𑁧. ‘‘𑀓𑀢𑀫𑀜𑁆𑀘 ¶ , 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑀺𑀭𑁄𑀥𑀁 [𑀤𑀼𑀓𑁆𑀔𑀦𑀺𑀭𑁄𑀥𑁄 (𑀲𑁆𑀬𑀸.)] 𑀅𑀭𑀺𑀬𑀲𑀘𑁆𑀘𑀁? 𑀬𑁄 𑀢𑀲𑁆𑀲𑀸𑀬𑁂𑀯 ¶ 𑀢𑀡𑁆𑀳𑀸𑀬 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄 𑀘𑀸𑀕𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀫𑀼𑀢𑁆𑀢𑀺 𑀅𑀦𑀸𑀮𑀬𑁄.

‘‘𑀲𑀸 ¶ 𑀔𑁄 𑀧𑀦𑁂𑀲𑀸, 𑀪𑀺𑀓𑁆𑀔𑀯𑁂, 𑀢𑀡𑁆𑀳𑀸 𑀓𑀢𑁆𑀣 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀓𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺? 𑀬𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

‘‘𑀓𑀺𑀜𑁆𑀘 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁? 𑀘𑀓𑁆𑀔𑀼 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺. 𑀲𑁄𑀢𑀁 𑀮𑁄𑀓𑁂…𑀧𑁂… 𑀖𑀸𑀦𑀁 𑀮𑁄𑀓𑁂… 𑀚𑀺𑀯𑁆𑀳𑀸 𑀮𑁄𑀓𑁂… 𑀓𑀸𑀬𑁄 𑀮𑁄𑀓𑁂… 𑀫𑀦𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

‘‘𑀭𑀽𑀧𑀸 𑀮𑁄𑀓𑁂… 𑀲𑀤𑁆𑀤𑀸 𑀮𑁄𑀓𑁂… 𑀕𑀦𑁆𑀥𑀸 𑀮𑁄𑀓𑁂… 𑀭𑀲𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀸 𑀮𑁄𑀓𑁂… 𑀥𑀫𑁆𑀫𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀲𑁄𑀢𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀖𑀸𑀦𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀓𑀸𑀬𑀯𑀺𑀜𑁆𑀜𑀸𑀡𑀁 𑀮𑁄𑀓𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀲𑁄𑀢𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀖𑀸𑀦𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀓𑀸𑀬𑀲𑀫𑁆𑀨𑀲𑁆𑀲𑁄 𑀮𑁄𑀓𑁂… 𑀫𑀦𑁄𑀲𑀫𑁆𑀨𑀲𑁆𑀲𑁄 ¶ 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂… 𑀲𑁄𑀢𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂 ¶ … 𑀖𑀸𑀦𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂… 𑀚𑀺𑀯𑁆𑀳𑀸𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂… 𑀓𑀸𑀬𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

‘‘𑀭𑀽𑀧𑀲𑀜𑁆𑀜𑀸 ¶ 𑀮𑁄𑀓𑁂… 𑀲𑀤𑁆𑀤𑀲𑀜𑁆𑀜𑀸 𑀮𑁄𑀓𑁂… 𑀕𑀦𑁆𑀥𑀲𑀜𑁆𑀜𑀸 𑀮𑁄𑀓𑁂… 𑀭𑀲𑀲𑀜𑁆𑀜𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀲𑀜𑁆𑀜𑀸 𑀮𑁄𑀓𑁂… 𑀥𑀫𑁆𑀫𑀲𑀜𑁆𑀜𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

‘‘𑀭𑀽𑀧𑀲𑀜𑁆𑀘𑁂𑀢𑀦𑀸 ¶ 𑀮𑁄𑀓𑁂… 𑀲𑀤𑁆𑀤𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀕𑀦𑁆𑀥𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀭𑀲𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀲𑀜𑁆𑀘𑁂𑀢𑀦𑀸 𑀮𑁄𑀓𑁂… 𑀥𑀫𑁆𑀫𑀲𑀜𑁆𑀘𑁂𑀢𑀦𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

‘‘𑀭𑀽𑀧𑀢𑀡𑁆𑀳𑀸 𑀮𑁄𑀓𑁂… 𑀲𑀤𑁆𑀤𑀢𑀡𑁆𑀳𑀸 𑀮𑁄𑀓𑁂… 𑀕𑀦𑁆𑀥𑀢𑀡𑁆𑀳𑀸 𑀮𑁄𑀓𑁂… 𑀭𑀲𑀢𑀡𑁆𑀳𑀸 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀮𑁄𑀓𑁂… 𑀥𑀫𑁆𑀫𑀢𑀡𑁆𑀳𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

‘‘𑀭𑀽𑀧𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀲𑀤𑁆𑀤𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀕𑀦𑁆𑀥𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀭𑀲𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀯𑀺𑀢𑀓𑁆𑀓𑁄 𑀮𑁄𑀓𑁂… 𑀥𑀫𑁆𑀫𑀯𑀺𑀢𑀓𑁆𑀓𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺.

‘‘𑀭𑀽𑀧𑀯𑀺𑀘𑀸𑀭𑁄 𑀮𑁄𑀓𑁂… 𑀲𑀤𑁆𑀤𑀯𑀺𑀘𑀸𑀭𑁄 𑀮𑁄𑀓𑁂… 𑀕𑀦𑁆𑀥𑀯𑀺𑀘𑀸𑀭𑁄 𑀮𑁄𑀓𑁂… 𑀭𑀲𑀯𑀺𑀘𑀸𑀭𑁄 𑀮𑁄𑀓𑁂… 𑀨𑁄𑀝𑁆𑀞𑀩𑁆𑀩𑀯𑀺𑀘𑀸𑀭𑁄 𑀮𑁄𑀓𑁂… 𑀥𑀫𑁆𑀫𑀯𑀺𑀘𑀸𑀭𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 ¶ , 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀺, 𑀏𑀢𑁆𑀣 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑀺𑀭𑁄𑀥𑀁 𑀅𑀭𑀺𑀬𑀲𑀘𑁆𑀘𑀁.

𑀫𑀕𑁆𑀕𑀲𑀘𑁆𑀘𑀦𑀺𑀤𑁆𑀤𑁂𑀲𑁄

𑁪𑁦𑁨. ‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸𑀲𑀫𑀸𑀥𑀺.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀤𑀺𑀝𑁆𑀞𑀺? 𑀬𑀁 ¶ 𑀔𑁄, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑁂 𑀜𑀸𑀡𑀁, 𑀤𑀼𑀓𑁆𑀔𑀲𑀫𑀼𑀤𑀬𑁂 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑁂 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀜𑀸𑀡𑀁, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀤𑀺𑀝𑁆𑀞𑀺.

‘‘𑀓𑀢𑀫𑁄 ¶ 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄? 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑁄 𑀅𑀩𑁆𑀬𑀸𑀧𑀸𑀤𑀲𑀗𑁆𑀓𑀧𑁆𑀧𑁄 𑀅𑀯𑀺𑀳𑀺𑀁𑀲𑀸𑀲𑀗𑁆𑀓𑀧𑁆𑀧𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄.

‘‘𑀓𑀢𑀫𑀸 ¶ 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀯𑀸𑀘𑀸? 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻 [𑀯𑁂𑀭𑀫𑀡𑀺 (𑀓.)] 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀯𑁂𑀭𑀫𑀡𑀻 𑀲𑀫𑁆𑀨𑀧𑁆𑀧𑀮𑀸𑀧𑀸 𑀯𑁂𑀭𑀫𑀡𑀻, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀯𑀸𑀘𑀸.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄? 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀻 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀻, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀆𑀚𑀻𑀯𑁄? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀫𑀺𑀘𑁆𑀙𑀸𑀆𑀚𑀻𑀯𑀁 𑀧𑀳𑀸𑀬 𑀲𑀫𑁆𑀫𑀸𑀆𑀚𑀻𑀯𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀆𑀚𑀻𑀯𑁄.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀯𑀸𑀬𑀸𑀫𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 ¶ 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺; 𑀉𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺; 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺; 𑀉𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀪𑀺𑀬𑁆𑀬𑁄𑀪𑀸𑀯𑀸𑀬 ¶ 𑀯𑁂𑀧𑀼𑀮𑁆𑀮𑀸𑀬 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀯𑀸𑀬𑀸𑀫𑁄.

‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁; 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁; 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁; 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀢𑀺.

‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀫𑀸𑀥𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 ¶ 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 ¶ 𑀅𑀯𑀺𑀘𑀸𑀭𑀁 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀓𑁄 𑀘 𑀯𑀺𑀳𑀭𑀢𑀺, 𑀲𑀢𑁄 𑀘 𑀲𑀫𑁆𑀧𑀚𑀸𑀦𑁄, 𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂 ¶ , 𑀲𑀫𑁆𑀫𑀸𑀲𑀫𑀸𑀥𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁.

𑁪𑁦𑁩. ‘‘𑀇𑀢𑀺 𑀅𑀚𑁆𑀛𑀢𑁆𑀢𑀁 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀩𑀳𑀺𑀤𑁆𑀥𑀸 ¶ 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺, 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺, 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸 𑀥𑀫𑁆𑀫𑁂𑀲𑀼 𑀯𑀺𑀳𑀭𑀢𑀺. ‘𑀅𑀢𑁆𑀣𑀺 𑀥𑀫𑁆𑀫𑀸’𑀢𑀺 𑀯𑀸 𑀧𑀦𑀲𑁆𑀲 𑀲𑀢𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺 𑀬𑀸𑀯𑀤𑁂𑀯 𑀜𑀸𑀡𑀫𑀢𑁆𑀢𑀸𑀬 𑀧𑀝𑀺𑀲𑁆𑀲𑀢𑀺𑀫𑀢𑁆𑀢𑀸𑀬 𑀅𑀦𑀺𑀲𑁆𑀲𑀺𑀢𑁄 𑀘 𑀯𑀺𑀳𑀭𑀢𑀺, 𑀦 𑀘 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀺. 𑀏𑀯𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼.

𑀲𑀘𑁆𑀘𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀦𑀺𑀝𑁆𑀞𑀺𑀢𑀸.

𑁪𑁦𑁪. ‘‘𑀬𑁄 𑀳𑀺 𑀓𑁄𑀘𑀺, 𑀪𑀺𑀓𑁆𑀔𑀯𑁂, 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀏𑀯𑀁 𑀪𑀸𑀯𑁂𑀬𑁆𑀬 𑀲𑀢𑁆𑀢𑀯𑀲𑁆𑀲𑀸𑀦𑀺, 𑀢𑀲𑁆𑀲 𑀤𑁆𑀯𑀺𑀦𑁆𑀦𑀁 𑀨𑀮𑀸𑀦𑀁 𑀅𑀜𑁆𑀜𑀢𑀭𑀁 𑀨𑀮𑀁 𑀧𑀸𑀝𑀺𑀓𑀗𑁆𑀔𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀜𑁆𑀜𑀸; 𑀲𑀢𑀺 𑀯𑀸 𑀉𑀧𑀸𑀤𑀺𑀲𑁂𑀲𑁂 ¶ 𑀅𑀦𑀸𑀕𑀸𑀫𑀺𑀢𑀸.

‘‘𑀢𑀺𑀝𑁆𑀞𑀦𑁆𑀢𑀼, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀯𑀲𑁆𑀲𑀸𑀦𑀺. 𑀬𑁄 𑀳𑀺 𑀓𑁄𑀘𑀺, 𑀪𑀺𑀓𑁆𑀔𑀯𑁂, 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀏𑀯𑀁 𑀪𑀸𑀯𑁂𑀬𑁆𑀬 𑀙 𑀯𑀲𑁆𑀲𑀸𑀦𑀺…𑀧𑁂… 𑀧𑀜𑁆𑀘 𑀯𑀲𑁆𑀲𑀸𑀦𑀺… 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺… 𑀢𑀻𑀡𑀺 𑀯𑀲𑁆𑀲𑀸𑀦𑀺… 𑀤𑁆𑀯𑁂 𑀯𑀲𑁆𑀲𑀸𑀦𑀺… 𑀏𑀓𑀁 𑀯𑀲𑁆𑀲𑀁… 𑀢𑀺𑀝𑁆𑀞𑀢𑀼, 𑀪𑀺𑀓𑁆𑀔𑀯𑁂, 𑀏𑀓𑀁 𑀯𑀲𑁆𑀲𑀁. 𑀬𑁄 𑀳𑀺 𑀓𑁄𑀘𑀺, 𑀪𑀺𑀓𑁆𑀔𑀯𑁂, 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀏𑀯𑀁 𑀪𑀸𑀯𑁂𑀬𑁆𑀬 𑀲𑀢𑁆𑀢𑀫𑀸𑀲𑀸𑀦𑀺, 𑀢𑀲𑁆𑀲 𑀤𑁆𑀯𑀺𑀦𑁆𑀦𑀁 𑀨𑀮𑀸𑀦𑀁 𑀅𑀜𑁆𑀜𑀢𑀭𑀁 𑀨𑀮𑀁 𑀧𑀸𑀝𑀺𑀓𑀗𑁆𑀔𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀜𑁆𑀜𑀸; 𑀲𑀢𑀺 𑀯𑀸 𑀉𑀧𑀸𑀤𑀺𑀲𑁂𑀲𑁂 𑀅𑀦𑀸𑀕𑀸𑀫𑀺𑀢𑀸.

‘‘𑀢𑀺𑀝𑁆𑀞𑀦𑁆𑀢𑀼 ¶ , 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀫𑀸𑀲𑀸𑀦𑀺. 𑀬𑁄 𑀳𑀺 𑀓𑁄𑀘𑀺, 𑀪𑀺𑀓𑁆𑀔𑀯𑁂, 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀏𑀯𑀁 𑀪𑀸𑀯𑁂𑀬𑁆𑀬 𑀙 𑀫𑀸𑀲𑀸𑀦𑀺…𑀧𑁂… 𑀧𑀜𑁆𑀘 𑀫𑀸𑀲𑀸𑀦𑀺… 𑀘𑀢𑁆𑀢𑀸𑀭𑀺 𑀫𑀸𑀲𑀸𑀦𑀺… 𑀢𑀻𑀡𑀺 𑀫𑀸𑀲𑀸𑀦𑀺 ¶ … 𑀤𑁆𑀯𑁂 𑀫𑀸𑀲𑀸𑀦𑀺… 𑀏𑀓𑀁 ¶ 𑀫𑀸𑀲𑀁… 𑀅𑀟𑁆𑀠𑀫𑀸𑀲𑀁… 𑀢𑀺𑀝𑁆𑀞𑀢𑀼, 𑀪𑀺𑀓𑁆𑀔𑀯𑁂, 𑀅𑀟𑁆𑀠𑀫𑀸𑀲𑁄. 𑀬𑁄 𑀳𑀺 𑀓𑁄𑀘𑀺, 𑀪𑀺𑀓𑁆𑀔𑀯𑁂, 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀏𑀯𑀁 𑀪𑀸𑀯𑁂𑀬𑁆𑀬 𑀲𑀢𑁆𑀢𑀸𑀳𑀁, 𑀢𑀲𑁆𑀲 𑀤𑁆𑀯𑀺𑀦𑁆𑀦𑀁 𑀨𑀮𑀸𑀦𑀁 𑀅𑀜𑁆𑀜𑀢𑀭𑀁 𑀨𑀮𑀁 𑀧𑀸𑀝𑀺𑀓𑀗𑁆𑀔𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀜𑁆𑀜𑀸; 𑀲𑀢𑀺 𑀯𑀸 𑀉𑀧𑀸𑀤𑀺𑀲𑁂𑀲𑁂 𑀅𑀦𑀸𑀕𑀸𑀫𑀺𑀢𑀸𑀢𑀺.

𑁪𑁦𑁫. ‘‘𑀏𑀓𑀸𑀬𑀦𑁄 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸 𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀬 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀬 𑀜𑀸𑀬𑀲𑁆𑀲 𑀅𑀥𑀺𑀕𑀫𑀸𑀬 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀬𑀤𑀺𑀤𑀁 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸𑀢𑀺. 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺.

𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀦𑀯𑀫𑀁.

𑁧𑁦. 𑀧𑀸𑀬𑀸𑀲𑀺𑀲𑀼𑀢𑁆𑀢𑀁

𑁪𑁦𑁬. 𑀏𑀯𑀁 ¶ ¶ ¶ ¶ 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀬𑁂𑀦 𑀲𑁂𑀢𑀩𑁆𑀬𑀸 𑀦𑀸𑀫 𑀓𑁄𑀲𑀮𑀸𑀦𑀁 𑀦𑀕𑀭𑀁 𑀢𑀤𑀯𑀲𑀭𑀺. 𑀢𑀢𑁆𑀭 𑀲𑀼𑀤𑀁 𑀆𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀲𑁂𑀢𑀩𑁆𑀬𑀸𑀬𑀁 𑀯𑀺𑀳𑀭𑀢𑀺 𑀉𑀢𑁆𑀢𑀭𑁂𑀦 𑀲𑁂𑀢𑀩𑁆𑀬𑀁 𑀲𑀺𑀁𑀲𑀧𑀸𑀯𑀦𑁂 [𑀲𑀻𑀲𑀧𑀸𑀯𑀦𑁂 (𑀲𑁆𑀬𑀸.)]. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 𑀲𑁂𑀢𑀩𑁆𑀬𑀁 𑀅𑀚𑁆𑀛𑀸𑀯𑀲𑀢𑀺 𑀲𑀢𑁆𑀢𑀼𑀲𑁆𑀲𑀤𑀁 𑀲𑀢𑀺𑀡𑀓𑀝𑁆𑀞𑁄𑀤𑀓𑀁 𑀲𑀥𑀜𑁆𑀜𑀁 𑀭𑀸𑀚𑀪𑁄𑀕𑁆𑀕𑀁 𑀭𑀜𑁆𑀜𑀸 𑀧𑀲𑁂𑀦𑀤𑀺𑀦𑀸 𑀓𑁄𑀲𑀮𑁂𑀦 𑀤𑀺𑀦𑁆𑀦𑀁 𑀭𑀸𑀚𑀤𑀸𑀬𑀁 𑀩𑁆𑀭𑀳𑁆𑀫𑀤𑁂𑀬𑁆𑀬𑀁.

𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑀯𑀢𑁆𑀣𑀼

𑁪𑁦𑁭. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀧𑀸𑀬𑀸𑀲𑀺𑀲𑁆𑀲 𑀭𑀸𑀚𑀜𑁆𑀜𑀲𑁆𑀲 𑀏𑀯𑀭𑀽𑀧𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑁋 ‘‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 ¶ [𑀲𑀼𑀓𑀝𑀓𑁆𑀓𑀝𑀸𑀦𑀁 (𑀲𑀻. 𑀧𑀻.)] 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’𑀢𑀺. 𑀅𑀲𑁆𑀲𑁄𑀲𑀼𑀁 𑀔𑁄 𑀲𑁂𑀢𑀩𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑁋 ‘‘𑀲𑀫𑀡𑁄 𑀔𑀮𑀼 𑀪𑁄 𑀓𑀼𑀫𑀸𑀭𑀓𑀲𑁆𑀲𑀧𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑁄 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑁂𑀢𑀩𑁆𑀬𑀁 𑀅𑀦𑀼𑀧𑁆𑀧𑀢𑁆𑀢𑁄 𑀲𑁂𑀢𑀩𑁆𑀬𑀸𑀬𑀁 𑀯𑀺𑀳𑀭𑀢𑀺 𑀉𑀢𑁆𑀢𑀭𑁂𑀦 𑀲𑁂𑀢𑀩𑁆𑀬𑀁 𑀲𑀺𑀁𑀲𑀧𑀸𑀯𑀦𑁂. 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀓𑀼𑀫𑀸𑀭𑀓𑀲𑁆𑀲𑀧𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀩𑀳𑀼𑀲𑁆𑀲𑀼𑀢𑁄 𑀘𑀺𑀢𑁆𑀢𑀓𑀣𑀻 𑀓𑀮𑁆𑀬𑀸𑀡𑀧𑀝𑀺𑀪𑀸𑀦𑁄 𑀯𑀼𑀤𑁆𑀥𑁄 [𑀩𑀼𑀤𑁆𑀥𑁄 (𑀲𑁆𑀬𑀸. 𑀓.)] 𑀘𑁂𑀯 𑀅𑀭𑀳𑀸 𑀘. 𑀲𑀸𑀥𑀼 𑀔𑁄 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻’’’𑀢𑀺. 𑀅𑀣 𑀔𑁄 𑀲𑁂𑀢𑀩𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀲𑁂𑀢𑀩𑁆𑀬𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 ¶ 𑀲𑀗𑁆𑀖𑀲𑀗𑁆𑀖𑀻 𑀕𑀡𑀻𑀪𑀽𑀢𑀸 𑀉𑀢𑁆𑀢𑀭𑁂𑀦𑀫𑀼𑀔𑀸 𑀕𑀘𑁆𑀙𑀦𑁆𑀢𑀺 𑀬𑁂𑀦 𑀲𑀺𑀁𑀲𑀧𑀸𑀯𑀦𑀁 [𑀬𑁂𑀦 𑀲𑀺𑀁𑀲𑀧𑀸𑀯𑀦𑀁, 𑀢𑁂𑀦𑀼𑀧𑀲𑀗𑁆𑀓𑀫𑀦𑁆𑀢𑀺 (𑀲𑀻. 𑀧𑀻.)].

𑁪𑁦𑁮. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 𑀉𑀧𑀭𑀺𑀧𑀸𑀲𑀸𑀤𑁂 𑀤𑀺𑀯𑀸𑀲𑁂𑀬𑁆𑀬𑀁 𑀉𑀧𑀕𑀢𑁄 𑀳𑁄𑀢𑀺. 𑀅𑀤𑁆𑀤𑀲𑀸 𑀔𑁄 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 𑀲𑁂𑀢𑀩𑁆𑀬𑀓𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀲𑁂𑀢𑀩𑁆𑀬𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀗𑁆𑀖𑀲𑀗𑁆𑀖𑀻 𑀕𑀡𑀻𑀪𑀽𑀢𑁂 𑀉𑀢𑁆𑀢𑀭𑁂𑀦𑀫𑀼𑀔𑁂 𑀕𑀘𑁆𑀙𑀦𑁆𑀢𑁂 𑀬𑁂𑀦 𑀲𑀺𑀁𑀲𑀧𑀸𑀯𑀦𑀁 [𑀬𑁂𑀦 𑀲𑀺𑀁𑀲𑀧𑀸𑀯𑀦𑀁, 𑀢𑁂𑀦𑀼𑀧𑀲𑀗𑁆𑀓𑀫𑀦𑁆𑀢𑁂 (𑀲𑀻. 𑀧𑀻.)], 𑀤𑀺𑀲𑁆𑀯𑀸 𑀔𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 ¶ 𑁋 ‘‘𑀓𑀺𑀁 𑀦𑀼 ¶ 𑀔𑁄, 𑀪𑁄 𑀔𑀢𑁆𑀢𑁂, 𑀲𑁂𑀢𑀩𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀲𑁂𑀢𑀩𑁆𑀬𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀗𑁆𑀖𑀲𑀗𑁆𑀖𑀻 𑀕𑀡𑀻𑀪𑀽𑀢𑀸 𑀉𑀢𑁆𑀢𑀭𑁂𑀦𑀫𑀼𑀔𑀸 𑀕𑀘𑁆𑀙𑀦𑁆𑀢𑀺 𑀬𑁂𑀦 𑀲𑀺𑀁𑀲𑀧𑀸𑀯𑀦’’𑀦𑁆𑀢𑀺 [𑀏𑀢𑁆𑀣 𑀧𑀦 𑀲𑀩𑁆𑀩𑀢𑁆𑀣𑀧𑀺 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺, 𑀦𑀢𑁆𑀣𑀺 𑀧𑀸𑀞𑀦𑁆𑀢𑀭𑀁]?

‘‘𑀅𑀢𑁆𑀣𑀺 ¶ 𑀔𑁄, 𑀪𑁄, 𑀲𑀫𑀡𑁄 𑀓𑀼𑀫𑀸𑀭𑀓𑀲𑁆𑀲𑀧𑁄, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑁄 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑁂𑀢𑀩𑁆𑀬𑀁 𑀅𑀦𑀼𑀧𑁆𑀧𑀢𑁆𑀢𑁄 𑀲𑁂𑀢𑀩𑁆𑀬𑀸𑀬𑀁 𑀯𑀺𑀳𑀭𑀢𑀺 𑀉𑀢𑁆𑀢𑀭𑁂𑀦 𑀲𑁂𑀢𑀩𑁆𑀬𑀁 𑀲𑀺𑀁𑀲𑀧𑀸𑀯𑀦𑁂. 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀓𑀼𑀫𑀸𑀭𑀓𑀲𑁆𑀲𑀧𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑁋 ‘𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻 𑀩𑀳𑀼𑀲𑁆𑀲𑀼𑀢𑁄 𑀘𑀺𑀢𑁆𑀢𑀓𑀣𑀻 𑀓𑀮𑁆𑀬𑀸𑀡𑀧𑀝𑀺𑀪𑀸𑀦𑁄 𑀯𑀼𑀤𑁆𑀥𑁄 𑀘𑁂𑀯 𑀅𑀭𑀳𑀸 𑀘𑀸’𑀢𑀺 [𑀅𑀭𑀳𑀸 𑀘 (𑀲𑁆𑀬𑀸. 𑀓.)]. 𑀢𑀫𑁂𑀢𑁂 [𑀢𑀫𑁂𑀦𑀁 𑀢𑁂 (𑀲𑀻. 𑀓.), 𑀢𑀫𑁂𑀦𑀁 (𑀧𑀻.)] 𑀪𑀯𑀦𑁆𑀢𑀁 𑀓𑀼𑀫𑀸𑀭𑀓𑀲𑁆𑀲𑀧𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀦𑁆𑀢𑀻’’𑀢𑀺. ‘‘𑀢𑁂𑀦 𑀳𑀺, 𑀪𑁄 𑀔𑀢𑁆𑀢𑁂, 𑀬𑁂𑀦 𑀲𑁂𑀢𑀩𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀢𑁂𑀦𑀼𑀧𑀲𑀗𑁆𑀓𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑁂𑀢𑀩𑁆𑀬𑀓𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀏𑀯𑀁 𑀯𑀤𑁂𑀳𑀺 𑁋 ‘𑀧𑀸𑀬𑀸𑀲𑀺, 𑀪𑁄, 𑀭𑀸𑀚𑀜𑁆𑀜𑁄 𑀏𑀯𑀫𑀸𑀳 ¶ 𑁋 𑀆𑀕𑀫𑁂𑀦𑁆𑀢𑀼 𑀓𑀺𑀭 𑀪𑀯𑀦𑁆𑀢𑁄, 𑀧𑀸𑀬𑀸𑀲𑀺𑀧𑀺 𑀭𑀸𑀚𑀜𑁆𑀜𑁄 𑀲𑀫𑀡𑀁 𑀓𑀼𑀫𑀸𑀭𑀓𑀲𑁆𑀲𑀧𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀢𑀻’𑀢𑀺. 𑀧𑀼𑀭𑀸 𑀲𑀫𑀡𑁄 𑀓𑀼𑀫𑀸𑀭𑀓𑀲𑁆𑀲𑀧𑁄 𑀲𑁂𑀢𑀩𑁆𑀬𑀓𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀩𑀸𑀮𑁂 𑀅𑀩𑁆𑀬𑀢𑁆𑀢𑁂 𑀲𑀜𑁆𑀜𑀸𑀧𑁂𑀢𑀺 𑁋 ‘𑀇𑀢𑀺𑀧𑀺 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’𑀢𑀺. 𑀦𑀢𑁆𑀣𑀺 𑀳𑀺, 𑀪𑁄 𑀔𑀢𑁆𑀢𑁂, 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’𑀢𑀺. ‘‘𑀏𑀯𑀁 𑀪𑁄’’𑀢𑀺 𑀔𑁄 𑀲𑁄 𑀔𑀢𑁆𑀢𑀸 𑀧𑀸𑀬𑀸𑀲𑀺𑀲𑁆𑀲 𑀭𑀸𑀚𑀜𑁆𑀜𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀲𑁂𑀢𑀩𑁆𑀬𑀓𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑁂𑀢𑀩𑁆𑀬𑀓𑁂 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂 𑀏𑀢𑀤𑀯𑁄𑀘 𑁋 ‘‘𑀧𑀸𑀬𑀸𑀲𑀺, 𑀪𑁄, 𑀭𑀸𑀚𑀜𑁆𑀜𑁄 𑀏𑀯𑀫𑀸𑀳, 𑀆𑀕𑀫𑁂𑀦𑁆𑀢𑀼 𑀓𑀺𑀭 𑀪𑀯𑀦𑁆𑀢𑁄, 𑀧𑀸𑀬𑀸𑀲𑀺𑀧𑀺 𑀭𑀸𑀚𑀜𑁆𑀜𑁄 𑀲𑀫𑀡𑀁 𑀓𑀼𑀫𑀸𑀭𑀓𑀲𑁆𑀲𑀧𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀢𑀻’’𑀢𑀺.

𑁪𑁦𑁯. 𑀅𑀣 𑀔𑁄 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 𑀲𑁂𑀢𑀩𑁆𑀬𑀓𑁂𑀳𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀳𑀺 𑀧𑀭𑀺𑀯𑀼𑀢𑁄 𑀬𑁂𑀦 𑀲𑀺𑀁𑀲𑀧𑀸𑀯𑀦𑀁 𑀬𑁂𑀦𑀸𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀓𑀼𑀫𑀸𑀭𑀓𑀲𑁆𑀲𑀧𑁂𑀦 𑀲𑀤𑁆𑀥𑀺𑀁 ¶ 𑀲𑀫𑁆𑀫𑁄𑀤𑀺, 𑀲𑀫𑁆𑀫𑁄𑀤𑀦𑀻𑀬𑀁 ¶ 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀲𑁂𑀢𑀩𑁆𑀬𑀓𑀸𑀧𑀺 𑀔𑁄 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀅𑀧𑁆𑀧𑁂𑀓𑀘𑁆𑀘𑁂 𑀆𑀬𑀲𑁆𑀫𑀦𑁆𑀢𑀁 𑀓𑀼𑀫𑀸𑀭𑀓𑀲𑁆𑀲𑀧𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 ¶ 𑀦𑀺𑀲𑀻𑀤𑀺𑀁𑀲𑀼; 𑀅𑀧𑁆𑀧𑁂𑀓𑀘𑁆𑀘𑁂 𑀆𑀬𑀲𑁆𑀫𑀢𑀸 𑀓𑀼𑀫𑀸𑀭𑀓𑀲𑁆𑀲𑀧𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼; 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀧𑁆𑀧𑁂𑀓𑀘𑁆𑀘𑁂 𑀬𑁂𑀦𑀸𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀧𑁆𑀧𑁂𑀓𑀘𑁆𑀘𑁂 𑀦𑀸𑀫𑀕𑁄𑀢𑁆𑀢𑀁 𑀲𑀸𑀯𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀅𑀧𑁆𑀧𑁂𑀓𑀘𑁆𑀘𑁂 𑀢𑀼𑀡𑁆𑀳𑀻𑀪𑀽𑀢𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼.

𑀦𑀢𑁆𑀣𑀺𑀓𑀯𑀸𑀤𑁄

𑁪𑁧𑁦. 𑀏𑀓𑀫𑀦𑁆𑀢𑀁 ¶ 𑀦𑀺𑀲𑀺𑀦𑁆𑀦𑁄 𑀔𑁄 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 𑀆𑀬𑀲𑁆𑀫𑀦𑁆𑀢𑀁 𑀓𑀼𑀫𑀸𑀭𑀓𑀲𑁆𑀲𑀧𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀜𑁆𑀳𑀺, 𑀪𑁄 𑀓𑀲𑁆𑀲𑀧, 𑀏𑀯𑀁𑀯𑀸𑀤𑀻 𑀏𑀯𑀁𑀤𑀺𑀝𑁆𑀞𑀻 𑁋 ‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺. ‘‘𑀦𑀸𑀳𑀁, 𑀭𑀸𑀚𑀜𑁆𑀜, 𑀏𑀯𑀁𑀯𑀸𑀤𑀺𑀁 𑀏𑀯𑀁𑀤𑀺𑀝𑁆𑀞𑀺𑀁 𑀅𑀤𑁆𑀤𑀲𑀁 𑀯𑀸 𑀅𑀲𑁆𑀲𑁄𑀲𑀺𑀁 𑀯𑀸. 𑀓𑀣𑀜𑁆𑀳𑀺 𑀦𑀸𑀫 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’𑀢𑀺?

𑀘𑀦𑁆𑀤𑀺𑀫𑀲𑀽𑀭𑀺𑀬𑀉𑀧𑀫𑀸

𑁪𑁧𑁧. ‘‘𑀢𑁂𑀦 𑀳𑀺, 𑀭𑀸𑀚𑀜𑁆𑀜, 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀬𑀣𑀸 𑀢𑁂 𑀔𑀫𑁂𑀬𑁆𑀬, 𑀢𑀣𑀸 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀭𑀸𑀚𑀜𑁆𑀜, 𑀇𑀫𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀇𑀫𑀲𑁆𑀫𑀺𑀁 𑀯𑀸 𑀮𑁄𑀓𑁂 𑀧𑀭𑀲𑁆𑀫𑀺𑀁 𑀯𑀸, 𑀤𑁂𑀯𑀸 𑀯𑀸 𑀢𑁂 𑀫𑀦𑀼𑀲𑁆𑀲𑀸 𑀯𑀸’’𑀢𑀺? ‘‘𑀇𑀫𑁂, 𑀪𑁄 𑀓𑀲𑁆𑀲𑀧, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀲𑁆𑀫𑀺𑀁 𑀮𑁄𑀓𑁂, 𑀦 𑀇𑀫𑀲𑁆𑀫𑀺𑀁; 𑀤𑁂𑀯𑀸 𑀢𑁂 𑀦 𑀫𑀦𑀼𑀲𑁆𑀲𑀸’’𑀢𑀺. ‘‘𑀇𑀫𑀺𑀦𑀸𑀧𑀺 𑀔𑁄 𑀢𑁂, 𑀭𑀸𑀚𑀜𑁆𑀜, 𑀧𑀭𑀺𑀬𑀸𑀬𑁂𑀦 𑀏𑀯𑀁 𑀳𑁄𑀢𑀼 𑁋 𑀇𑀢𑀺𑀧𑀺 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’𑀢𑀺.

𑁪𑁧𑁨. ‘‘𑀓𑀺𑀜𑁆𑀘𑀸𑀧𑀺 𑀪𑀯𑀁 𑀓𑀲𑁆𑀲𑀧𑁄 𑀏𑀯𑀫𑀸𑀳, 𑀅𑀣 𑀔𑁄 𑀏𑀯𑀁 𑀫𑁂 𑀏𑀢𑁆𑀣 𑀳𑁄𑀢𑀺 𑁋 ‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 ¶ 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺. ‘‘𑀅𑀢𑁆𑀣𑀺 𑀧𑀦, 𑀭𑀸𑀚𑀜𑁆𑀜, 𑀧𑀭𑀺𑀬𑀸𑀬𑁄, 𑀬𑁂𑀦 𑀢𑁂 𑀧𑀭𑀺𑀬𑀸𑀬𑁂𑀦 𑀏𑀯𑀁 𑀳𑁄𑀢𑀺 𑁋 ‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺? ‘‘𑀅𑀢𑁆𑀣𑀺 ¶ , 𑀪𑁄 𑀓𑀲𑁆𑀲𑀧, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑁂 𑀧𑀭𑀺𑀬𑀸𑀬𑁂𑀦 𑀏𑀯𑀁 ¶ 𑀳𑁄𑀢𑀺 𑁋 ‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺. ‘‘𑀬𑀣𑀸 𑀓𑀣𑀁 𑀯𑀺𑀬, 𑀭𑀸𑀚𑀜𑁆𑀜𑀸’’𑀢𑀺? ‘‘𑀇𑀥 𑀫𑁂, 𑀪𑁄 𑀓𑀲𑁆𑀲𑀧, 𑀫𑀺𑀢𑁆𑀢𑀸𑀫𑀘𑁆𑀘𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀧𑀸𑀡𑀸𑀢𑀺𑀧𑀸𑀢𑀻 𑀅𑀤𑀺𑀦𑁆𑀦𑀸𑀤𑀸𑀬𑀻 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀫𑀼𑀲𑀸𑀯𑀸𑀤𑀻 𑀧𑀺𑀲𑀼𑀡𑀯𑀸𑀘𑀸 𑀨𑀭𑀼𑀲𑀯𑀸𑀘𑀸 𑀲𑀫𑁆𑀨𑀧𑁆𑀧𑀮𑀸𑀧𑀻 𑀅𑀪𑀺𑀚𑁆𑀛𑀸𑀮𑀽 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀻. 𑀢𑁂 𑀅𑀧𑀭𑁂𑀦 𑀲𑀫𑀬𑁂𑀦 𑀆𑀩𑀸𑀥𑀺𑀓𑀸 𑀳𑁄𑀦𑁆𑀢𑀺 𑀤𑀼𑀓𑁆𑀔𑀺𑀢𑀸 𑀩𑀸𑀴𑁆𑀳𑀕𑀺𑀮𑀸𑀦𑀸. 𑀬𑀤𑀸𑀳𑀁 𑀚𑀸𑀦𑀸𑀫𑀺 𑁋 ‘𑀦 𑀤𑀸𑀦𑀺𑀫𑁂 𑀇𑀫𑀫𑁆𑀳𑀸 𑀆𑀩𑀸𑀥𑀸 𑀯𑀼𑀝𑁆𑀞𑀳𑀺𑀲𑁆𑀲𑀦𑁆𑀢𑀻’𑀢𑀺 𑀢𑁆𑀬𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀸𑀫𑀺 𑁋 ‘𑀲𑀦𑁆𑀢𑀺 𑀔𑁄, 𑀪𑁄, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 𑀬𑁂 𑀢𑁂 𑀧𑀸𑀡𑀸𑀢𑀺𑀧𑀸𑀢𑀻 𑀅𑀤𑀺𑀦𑁆𑀦𑀸𑀤𑀸𑀬𑀻 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀫𑀼𑀲𑀸𑀯𑀸𑀤𑀻 𑀧𑀺𑀲𑀼𑀡𑀯𑀸𑀘𑀸 𑀨𑀭𑀼𑀲𑀯𑀸𑀘𑀸 𑀲𑀫𑁆𑀨𑀧𑁆𑀧𑀮𑀸𑀧𑀻 𑀅𑀪𑀺𑀚𑁆𑀛𑀸𑀮𑀽 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀻, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 ¶ 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀻’𑀢𑀺. 𑀪𑀯𑀦𑁆𑀢𑁄 𑀔𑁄 𑀧𑀸𑀡𑀸𑀢𑀺𑀧𑀸𑀢𑀻 𑀅𑀤𑀺𑀦𑁆𑀦𑀸𑀤𑀸𑀬𑀻 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀫𑀼𑀲𑀸𑀯𑀸𑀤𑀻 𑀧𑀺𑀲𑀼𑀡𑀯𑀸𑀘𑀸 𑀨𑀭𑀼𑀲𑀯𑀸𑀘𑀸 𑀲𑀫𑁆𑀨𑀧𑁆𑀧𑀮𑀸𑀧𑀻 𑀅𑀪𑀺𑀚𑁆𑀛𑀸𑀮𑀽 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀻. 𑀲𑀘𑁂 𑀢𑁂𑀲𑀁 𑀪𑀯𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀘𑁆𑀘𑀁 𑀯𑀘𑀦𑀁, 𑀪𑀯𑀦𑁆𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀲𑀘𑁂, 𑀪𑁄, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑁂𑀬𑁆𑀬𑀸𑀣, 𑀬𑁂𑀦 𑀫𑁂 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀬𑁆𑀬𑀸𑀣 𑁋 ‘𑀇𑀢𑀺𑀧𑀺 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’𑀢𑀺 ¶ . 𑀪𑀯𑀦𑁆𑀢𑁄 𑀔𑁄 𑀧𑀦 𑀫𑁂 𑀲𑀤𑁆𑀥𑀸𑀬𑀺𑀓𑀸 𑀧𑀘𑁆𑀘𑀬𑀺𑀓𑀸, 𑀬𑀁 𑀪𑀯𑀦𑁆𑀢𑁂𑀳𑀺 𑀤𑀺𑀝𑁆𑀞𑀁, 𑀬𑀣𑀸 𑀲𑀸𑀫𑀁 𑀤𑀺𑀝𑁆𑀞𑀁 𑀏𑀯𑀫𑁂𑀢𑀁 𑀪𑀯𑀺𑀲𑁆𑀲𑀢𑀻’𑀢𑀺. 𑀢𑁂 𑀫𑁂 ‘𑀲𑀸𑀥𑀽’𑀢𑀺 𑀧𑀝𑀺𑀲𑁆𑀲𑀼𑀢𑁆𑀯𑀸 ¶ 𑀦𑁂𑀯 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺, 𑀦 𑀧𑀦 𑀤𑀽𑀢𑀁 𑀧𑀳𑀺𑀡𑀦𑁆𑀢𑀺. 𑀅𑀬𑀫𑁆𑀧𑀺 𑀔𑁄, 𑀪𑁄 𑀓𑀲𑁆𑀲𑀧, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑁂 𑀧𑀭𑀺𑀬𑀸𑀬𑁂𑀦 𑀏𑀯𑀁 𑀳𑁄𑀢𑀺 𑁋 ‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺.

𑀘𑁄𑀭𑀉𑀧𑀫𑀸

𑁪𑁧𑁩. ‘‘𑀢𑁂𑀦 𑀳𑀺, 𑀭𑀸𑀚𑀜𑁆𑀜, 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺. 𑀬𑀣𑀸 𑀢𑁂 𑀔𑀫𑁂𑀬𑁆𑀬 𑀢𑀣𑀸 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀺. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀭𑀸𑀚𑀜𑁆𑀜, 𑀇𑀥 𑀢𑁂 𑀧𑀼𑀭𑀺𑀲𑀸 𑀘𑁄𑀭𑀁 𑀆𑀕𑀼𑀘𑀸𑀭𑀺𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀬𑁆𑀬𑀼𑀁 𑁋 ‘𑀅𑀬𑀁 𑀢𑁂, 𑀪𑀦𑁆𑀢𑁂, 𑀘𑁄𑀭𑁄 𑀆𑀕𑀼𑀘𑀸𑀭𑀻; 𑀇𑀫𑀲𑁆𑀲 𑀬𑀁 𑀇𑀘𑁆𑀙𑀲𑀺, 𑀢𑀁 𑀤𑀡𑁆𑀟𑀁 𑀧𑀡𑁂𑀳𑀻’𑀢𑀺. 𑀢𑁂 𑀢𑁆𑀯𑀁 𑀏𑀯𑀁 𑀯𑀤𑁂𑀬𑁆𑀬𑀸𑀲𑀺 𑁋 ‘𑀢𑁂𑀦 𑀳𑀺, 𑀪𑁄, 𑀇𑀫𑀁 𑀧𑀼𑀭𑀺𑀲𑀁 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀧𑀘𑁆𑀙𑀸𑀩𑀸𑀳𑀁 𑀕𑀸𑀴𑁆𑀳𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 ¶ 𑀔𑀼𑀭𑀫𑀼𑀡𑁆𑀟𑀁 𑀓𑀭𑀺𑀢𑁆𑀯𑀸 [𑀓𑀸𑀭𑁂𑀢𑁆𑀯𑀸 (𑀲𑁆𑀬𑀸. 𑀓.)] 𑀔𑀭𑀲𑁆𑀲𑀭𑁂𑀦 𑀧𑀡𑀯𑁂𑀦 𑀭𑀣𑀺𑀓𑀸𑀬 𑀭𑀣𑀺𑀓𑀁 [𑀭𑀣𑀺𑀬𑀸𑀬 𑀭𑀣𑀺𑀬𑀁 (𑀩𑀳𑀽𑀲𑀽)] 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀧𑀭𑀺𑀦𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀓𑁆𑀔𑀺𑀡𑀢𑁄 𑀦𑀕𑀭𑀲𑁆𑀲 𑀆𑀖𑀸𑀢𑀦𑁂 𑀲𑀻𑀲𑀁 𑀙𑀺𑀦𑁆𑀤𑀣𑀸’𑀢𑀺. 𑀢𑁂 ‘𑀲𑀸𑀥𑀽’𑀢𑀺 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀁 𑀧𑀼𑀭𑀺𑀲𑀁 𑀤𑀴𑁆𑀳𑀸𑀬 𑀭𑀚𑁆𑀚𑀼𑀬𑀸 𑀧𑀘𑁆𑀙𑀸𑀩𑀸𑀳𑀁 𑀕𑀸𑀴𑁆𑀳𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀔𑀼𑀭𑀫𑀼𑀡𑁆𑀟𑀁 𑀓𑀭𑀺𑀢𑁆𑀯𑀸 𑀔𑀭𑀲𑁆𑀲𑀭𑁂𑀦 𑀧𑀡𑀯𑁂𑀦 𑀭𑀣𑀺𑀓𑀸𑀬 𑀭𑀣𑀺𑀓𑀁 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀧𑀭𑀺𑀦𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀓𑁆𑀔𑀺𑀡𑀢𑁄 𑀦𑀕𑀭𑀲𑁆𑀲 𑀆𑀖𑀸𑀢𑀦𑁂 𑀦𑀺𑀲𑀻𑀤𑀸𑀧𑁂𑀬𑁆𑀬𑀼𑀁. 𑀮𑀪𑁂𑀬𑁆𑀬 𑀦𑀼 𑀔𑁄 𑀲𑁄 𑀘𑁄𑀭𑁄 𑀘𑁄𑀭𑀖𑀸𑀢𑁂𑀲𑀼 𑁋 ‘𑀆𑀕𑀫𑁂𑀦𑁆𑀢𑀼 𑀢𑀸𑀯 𑀪𑀯𑀦𑁆𑀢𑁄 𑀘𑁄𑀭𑀖𑀸𑀢𑀸, 𑀅𑀫𑀼𑀓𑀲𑁆𑀫𑀺𑀁 ¶ 𑀫𑁂 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀫𑀺𑀢𑁆𑀢𑀸𑀫𑀘𑁆𑀘𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸, 𑀬𑀸𑀯𑀸𑀳𑀁 𑀢𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀆𑀕𑀘𑁆𑀙𑀸𑀫𑀻’𑀢𑀺 ¶ , 𑀉𑀤𑀸𑀳𑀼 𑀯𑀺𑀧𑁆𑀧𑀮𑀧𑀦𑁆𑀢𑀲𑁆𑀲𑁂𑀯 𑀘𑁄𑀭𑀖𑀸𑀢𑀸 𑀲𑀻𑀲𑀁 𑀙𑀺𑀦𑁆𑀤𑁂𑀬𑁆𑀬𑀼’’𑀦𑁆𑀢𑀺? ‘‘𑀦 𑀳𑀺 𑀲𑁄, 𑀪𑁄 𑀓𑀲𑁆𑀲𑀧, 𑀘𑁄𑀭𑁄 𑀮𑀪𑁂𑀬𑁆𑀬 𑀘𑁄𑀭𑀖𑀸𑀢𑁂𑀲𑀼 𑁋 ‘𑀆𑀕𑀫𑁂𑀦𑁆𑀢𑀼 𑀢𑀸𑀯 𑀪𑀯𑀦𑁆𑀢𑁄 𑀘𑁄𑀭𑀖𑀸𑀢𑀸 𑀅𑀫𑀼𑀓𑀲𑁆𑀫𑀺𑀁 𑀫𑁂 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀫𑀺𑀢𑁆𑀢𑀸𑀫𑀘𑁆𑀘𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸, 𑀬𑀸𑀯𑀸𑀳𑀁 𑀢𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀆𑀕𑀘𑁆𑀙𑀸𑀫𑀻’𑀢𑀺. 𑀅𑀣 𑀔𑁄 𑀦𑀁 𑀯𑀺𑀧𑁆𑀧𑀮𑀧𑀦𑁆𑀢𑀲𑁆𑀲𑁂𑀯 𑀘𑁄𑀭𑀖𑀸𑀢𑀸 𑀲𑀻𑀲𑀁 𑀙𑀺𑀦𑁆𑀤𑁂𑀬𑁆𑀬𑀼’’𑀦𑁆𑀢𑀺. ‘‘𑀲𑁄 𑀳𑀺 𑀦𑀸𑀫, 𑀭𑀸𑀚𑀜𑁆𑀜, 𑀘𑁄𑀭𑁄 𑀫𑀦𑀼𑀲𑁆𑀲𑁄 𑀫𑀦𑀼𑀲𑁆𑀲𑀪𑀽𑀢𑁂𑀲𑀼 𑀘𑁄𑀭𑀖𑀸𑀢𑁂𑀲𑀼 𑀦 𑀮𑀪𑀺𑀲𑁆𑀲𑀢𑀺 𑁋 ‘𑀆𑀕𑀫𑁂𑀦𑁆𑀢𑀼 𑀢𑀸𑀯 𑀪𑀯𑀦𑁆𑀢𑁄 𑀘𑁄𑀭𑀖𑀸𑀢𑀸, 𑀅𑀫𑀼𑀓𑀲𑁆𑀫𑀺𑀁 𑀫𑁂 𑀕𑀸𑀫𑁂 ¶ 𑀯𑀸 𑀦𑀺𑀕𑀫𑁂 𑀯𑀸 𑀫𑀺𑀢𑁆𑀢𑀸𑀫𑀘𑁆𑀘𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸, 𑀬𑀸𑀯𑀸𑀳𑀁 𑀢𑁂𑀲𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀆𑀕𑀘𑁆𑀙𑀸𑀫𑀻’𑀢𑀺. 𑀓𑀺𑀁 𑀧𑀦 𑀢𑁂 𑀫𑀺𑀢𑁆𑀢𑀸𑀫𑀘𑁆𑀘𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀧𑀸𑀡𑀸𑀢𑀺𑀧𑀸𑀢𑀻 𑀅𑀤𑀺𑀦𑁆𑀦𑀸𑀤𑀸𑀬𑀻 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀻 𑀫𑀼𑀲𑀸𑀯𑀸𑀤𑀻 𑀧𑀺𑀲𑀼𑀡𑀯𑀸𑀘𑀸 𑀨𑀭𑀼𑀲𑀯𑀸𑀘𑀸 𑀲𑀫𑁆𑀨𑀧𑁆𑀧𑀮𑀸𑀧𑀻 𑀅𑀪𑀺𑀚𑁆𑀛𑀸𑀮𑀽 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀻, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸 𑀮𑀪𑀺𑀲𑁆𑀲𑀦𑁆𑀢𑀺 𑀦𑀺𑀭𑀬𑀧𑀸𑀮𑁂𑀲𑀼 𑁋 ‘𑀆𑀕𑀫𑁂𑀦𑁆𑀢𑀼 𑀢𑀸𑀯 𑀪𑀯𑀦𑁆𑀢𑁄 𑀦𑀺𑀭𑀬𑀧𑀸𑀮𑀸, 𑀬𑀸𑀯 𑀫𑀬𑀁 𑀧𑀸𑀬𑀸𑀲𑀺𑀲𑁆𑀲 𑀭𑀸𑀚𑀜𑁆𑀜𑀲𑁆𑀲 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀫 𑁋 ‘‘𑀇𑀢𑀺𑀧𑀺 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺? 𑀇𑀫𑀺𑀦𑀸𑀧𑀺 𑀔𑁄 𑀢𑁂, 𑀭𑀸𑀚𑀜𑁆𑀜, 𑀧𑀭𑀺𑀬𑀸𑀬𑁂𑀦 𑀏𑀯𑀁 𑀳𑁄𑀢𑀼 𑁋 ‘𑀇𑀢𑀺𑀧𑀺 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺.

𑁪𑁧𑁪. ‘‘𑀓𑀺𑀜𑁆𑀘𑀸𑀧𑀺 ¶ 𑀪𑀯𑀁 𑀓𑀲𑁆𑀲𑀧𑁄 𑀏𑀯𑀫𑀸𑀳, 𑀅𑀣 𑀔𑁄 𑀏𑀯𑀁 𑀫𑁂 𑀏𑀢𑁆𑀣 𑀳𑁄𑀢𑀺 𑁋 ‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 ¶ 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’𑀢𑀺. ‘‘𑀅𑀢𑁆𑀣𑀺 𑀧𑀦, 𑀭𑀸𑀚𑀜𑁆𑀜, 𑀧𑀭𑀺𑀬𑀸𑀬𑁄 𑀬𑁂𑀦 𑀢𑁂 𑀧𑀭𑀺𑀬𑀸𑀬𑁂𑀦 𑀏𑀯𑀁 𑀳𑁄𑀢𑀺 𑁋 ‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺? ‘‘𑀅𑀢𑁆𑀣𑀺, 𑀪𑁄 𑀓𑀲𑁆𑀲𑀧, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑁂 𑀧𑀭𑀺𑀬𑀸𑀬𑁂𑀦 𑀏𑀯𑀁 𑀳𑁄𑀢𑀺 𑁋 ‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺. ‘‘𑀬𑀣𑀸 𑀓𑀣𑀁 𑀯𑀺𑀬, 𑀭𑀸𑀚𑀜𑁆𑀜𑀸’’𑀢𑀺? ‘‘𑀇𑀥 𑀫𑁂, 𑀪𑁄 𑀓𑀲𑁆𑀲𑀧, 𑀫𑀺𑀢𑁆𑀢𑀸𑀫𑀘𑁆𑀘𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 ¶ 𑀧𑀝𑀺𑀯𑀺𑀭𑀢𑀸 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑀸 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑀸 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑀸 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑀸 𑀅𑀦𑀪𑀺𑀚𑁆𑀛𑀸𑀮𑀽 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀻. 𑀢𑁂 𑀅𑀧𑀭𑁂𑀦 𑀲𑀫𑀬𑁂𑀦 𑀆𑀩𑀸𑀥𑀺𑀓𑀸 𑀳𑁄𑀦𑁆𑀢𑀺 𑀤𑀼𑀓𑁆𑀔𑀺𑀢𑀸 𑀩𑀸𑀴𑁆𑀳𑀕𑀺𑀮𑀸𑀦𑀸. 𑀬𑀤𑀸𑀳𑀁 𑀚𑀸𑀦𑀸𑀫𑀺 𑁋 ‘𑀦 𑀤𑀸𑀦𑀺𑀫𑁂 𑀇𑀫𑀫𑁆𑀳𑀸 𑀆𑀩𑀸𑀥𑀸 𑀯𑀼𑀝𑁆𑀞𑀳𑀺𑀲𑁆𑀲𑀦𑁆𑀢𑀻’𑀢𑀺 𑀢𑁆𑀬𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀸𑀫𑀺 𑁋 ‘𑀲𑀦𑁆𑀢𑀺 𑀔𑁄, 𑀪𑁄, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 𑀬𑁂 𑀢𑁂 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑀸 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑀸 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑀸 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑀸 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑀸 𑀅𑀦𑀪𑀺𑀚𑁆𑀛𑀸𑀮𑀽 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀻 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀻𑀢𑀺 ¶ . 𑀪𑀯𑀦𑁆𑀢𑁄 𑀔𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑀸 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑀸 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑀸 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑀸 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑀸 𑀅𑀦𑀪𑀺𑀚𑁆𑀛𑀸𑀮𑀽 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀻. 𑀲𑀘𑁂 𑀢𑁂𑀲𑀁 𑀪𑀯𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀘𑁆𑀘𑀁 𑀯𑀘𑀦𑀁, 𑀪𑀯𑀦𑁆𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀲𑀘𑁂, 𑀪𑁄, 𑀓𑀸𑀬𑀲𑁆𑀲 𑀪𑁂𑀤𑀸 ¶ 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑁂𑀬𑁆𑀬𑀸𑀣, 𑀬𑁂𑀦 𑀫𑁂 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀬𑁆𑀬𑀸𑀣 𑁋 ‘𑀇𑀢𑀺𑀧𑀺 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’𑀢𑀺. 𑀪𑀯𑀦𑁆𑀢𑁄 𑀔𑁄 𑀧𑀦 𑀫𑁂 𑀲𑀤𑁆𑀥𑀸𑀬𑀺𑀓𑀸 𑀧𑀘𑁆𑀘𑀬𑀺𑀓𑀸, 𑀬𑀁 𑀪𑀯𑀦𑁆𑀢𑁂𑀳𑀺 𑀤𑀺𑀝𑁆𑀞𑀁, 𑀬𑀣𑀸 𑀲𑀸𑀫𑀁 𑀤𑀺𑀝𑁆𑀞𑀁 𑀏𑀯𑀫𑁂𑀢𑀁 𑀪𑀯𑀺𑀲𑁆𑀲𑀢𑀻’𑀢𑀺. 𑀢𑁂 𑀫𑁂 ‘𑀲𑀸𑀥𑀽’𑀢𑀺 𑀧𑀝𑀺𑀲𑁆𑀲𑀼𑀢𑁆𑀯𑀸 𑀦𑁂𑀯 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺, 𑀦 𑀧𑀦 𑀤𑀽𑀢𑀁 𑀧𑀳𑀺𑀡𑀦𑁆𑀢𑀺. 𑀅𑀬𑀫𑁆𑀧𑀺 𑀔𑁄, 𑀪𑁄 𑀓𑀲𑁆𑀲𑀧, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑁂 𑀧𑀭𑀺𑀬𑀸𑀬𑁂𑀦 𑀏𑀯𑀁 𑀳𑁄𑀢𑀺 𑁋 ‘𑀇𑀢𑀺𑀧𑀺 ¶ 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺.

𑀕𑀽𑀣𑀓𑀽𑀧𑀧𑀼𑀭𑀺𑀲𑀉𑀧𑀫𑀸

𑁪𑁧𑁫. ‘‘𑀢𑁂𑀦 ¶ 𑀳𑀺, 𑀭𑀸𑀚𑀜𑁆𑀜, 𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺. 𑀉𑀧𑀫𑀸𑀬 𑀫𑀺𑀥𑁂𑀓𑀘𑁆𑀘𑁂 [𑀉𑀧𑀫𑀸𑀬𑀧𑀺𑀥𑁂𑀓𑀘𑁆𑀘𑁂 (𑀲𑀻. 𑀲𑁆𑀬𑀸.), 𑀉𑀧𑀫𑀸𑀬𑀧𑀺𑀇𑀥𑁂𑀓𑀘𑁆𑀘𑁂 (𑀧𑀻.)] 𑀯𑀺𑀜𑁆𑀜𑀽 𑀧𑀼𑀭𑀺𑀲𑀸 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀭𑀸𑀚𑀜𑁆𑀜, 𑀧𑀼𑀭𑀺𑀲𑁄 𑀕𑀽𑀣𑀓𑀽𑀧𑁂 𑀲𑀲𑀻𑀲𑀓𑀁 [𑀲𑀲𑀻𑀲𑀓𑁄 (𑀲𑁆𑀬𑀸.)] 𑀦𑀺𑀫𑀼𑀕𑁆𑀕𑁄 𑀅𑀲𑁆𑀲. 𑀅𑀣 𑀢𑁆𑀯𑀁 𑀧𑀼𑀭𑀺𑀲𑁂 𑀆𑀡𑀸𑀧𑁂𑀬𑁆𑀬𑀸𑀲𑀺 𑁋 ‘𑀢𑁂𑀦 𑀳𑀺, 𑀪𑁄, 𑀢𑀁 𑀧𑀼𑀭𑀺𑀲𑀁 𑀢𑀫𑁆𑀳𑀸 𑀕𑀽𑀣𑀓𑀽𑀧𑀸 𑀉𑀤𑁆𑀥𑀭𑀣𑀸’𑀢𑀺. 𑀢𑁂 ‘𑀲𑀸𑀥𑀽’𑀢𑀺 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀁 𑀧𑀼𑀭𑀺𑀲𑀁 𑀢𑀫𑁆𑀳𑀸 𑀕𑀽𑀣𑀓𑀽𑀧𑀸 𑀉𑀤𑁆𑀥𑀭𑁂𑀬𑁆𑀬𑀼𑀁. 𑀢𑁂 𑀢𑁆𑀯𑀁 𑀏𑀯𑀁 𑀯𑀤𑁂𑀬𑁆𑀬𑀸𑀲𑀺 𑁋 ‘𑀢𑁂𑀦 𑀳𑀺, 𑀪𑁄, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀓𑀸𑀬𑀸 ¶ 𑀯𑁂𑀴𑀼𑀧𑁂𑀲𑀺𑀓𑀸𑀳𑀺 𑀕𑀽𑀣𑀁 𑀲𑀼𑀦𑀺𑀫𑁆𑀫𑀚𑁆𑀚𑀺𑀢𑀁 𑀦𑀺𑀫𑁆𑀫𑀚𑁆𑀚𑀣𑀸’𑀢𑀺. 𑀢𑁂 ‘𑀲𑀸𑀥𑀽’𑀢𑀺 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀓𑀸𑀬𑀸 𑀯𑁂𑀴𑀼𑀧𑁂𑀲𑀺𑀓𑀸𑀳𑀺 𑀕𑀽𑀣𑀁 𑀲𑀼𑀦𑀺𑀫𑁆𑀫𑀚𑁆𑀚𑀺𑀢𑀁 𑀦𑀺𑀫𑁆𑀫𑀚𑁆𑀚𑁂𑀬𑁆𑀬𑀼𑀁. 𑀢𑁂 𑀢𑁆𑀯𑀁 𑀏𑀯𑀁 𑀯𑀤𑁂𑀬𑁆𑀬𑀸𑀲𑀺 𑁋 ‘𑀢𑁂𑀦 𑀳𑀺, 𑀪𑁄, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀓𑀸𑀬𑀁 𑀧𑀡𑁆𑀟𑀼𑀫𑀢𑁆𑀢𑀺𑀓𑀸𑀬 𑀢𑀺𑀓𑁆𑀔𑀢𑁆𑀢𑀼𑀁 𑀲𑀼𑀩𑁆𑀩𑀝𑁆𑀝𑀺𑀢𑀁 𑀉𑀩𑁆𑀩𑀝𑁆𑀝𑁂𑀣𑀸’𑀢𑀺 [𑀲𑀼𑀧𑁆𑀧𑀝𑁆𑀝𑀺𑀢𑀁 𑀉𑀧𑁆𑀧𑀝𑁆𑀝𑁂𑀣𑀸𑀢𑀺 (𑀓.)]. 𑀢𑁂 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀓𑀸𑀬𑀁 𑀧𑀡𑁆𑀟𑀼𑀫𑀢𑁆𑀢𑀺𑀓𑀸𑀬 𑀢𑀺𑀓𑁆𑀔𑀢𑁆𑀢𑀼𑀁 𑀲𑀼𑀩𑁆𑀩𑀝𑁆𑀝𑀺𑀢𑀁 𑀉𑀩𑁆𑀩𑀝𑁆𑀝𑁂𑀬𑁆𑀬𑀼𑀁. 𑀢𑁂 𑀢𑁆𑀯𑀁 𑀏𑀯𑀁 𑀯𑀤𑁂𑀬𑁆𑀬𑀸𑀲𑀺 𑁋 ‘𑀢𑁂𑀦 𑀳𑀺, 𑀪𑁄, 𑀢𑀁 𑀧𑀼𑀭𑀺𑀲𑀁 𑀢𑁂𑀮𑁂𑀦 𑀅𑀩𑁆𑀪𑀜𑁆𑀚𑀺𑀢𑁆𑀯𑀸 𑀲𑀼𑀔𑀼𑀫𑁂𑀦 𑀘𑀼𑀡𑁆𑀡𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀲𑀼𑀧𑁆𑀧𑀥𑁄𑀢𑀁 𑀓𑀭𑁄𑀣𑀸’𑀢𑀺. 𑀢𑁂 𑀢𑀁 𑀧𑀼𑀭𑀺𑀲𑀁 𑀢𑁂𑀮𑁂𑀦 𑀅𑀩𑁆𑀪𑀜𑁆𑀚𑀺𑀢𑁆𑀯𑀸 𑀲𑀼𑀔𑀼𑀫𑁂𑀦 𑀘𑀼𑀡𑁆𑀡𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀲𑀼𑀧𑁆𑀧𑀥𑁄𑀢𑀁 𑀓𑀭𑁂𑀬𑁆𑀬𑀼𑀁. 𑀢𑁂 𑀢𑁆𑀯𑀁 𑀏𑀯𑀁 𑀯𑀤𑁂𑀬𑁆𑀬𑀸𑀲𑀺 𑁋 ‘𑀢𑁂𑀦 𑀳𑀺, 𑀪𑁄, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀓𑁂𑀲𑀫𑀲𑁆𑀲𑀼𑀁 𑀓𑀧𑁆𑀧𑁂𑀣𑀸’𑀢𑀺. 𑀢𑁂 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀓𑁂𑀲𑀫𑀲𑁆𑀲𑀼𑀁 𑀓𑀧𑁆𑀧𑁂𑀬𑁆𑀬𑀼𑀁. 𑀢𑁂 𑀢𑁆𑀯𑀁 𑀏𑀯𑀁 𑀯𑀤𑁂𑀬𑁆𑀬𑀸𑀲𑀺 𑁋 ‘𑀢𑁂𑀦 𑀳𑀺, 𑀪𑁄, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀫𑀳𑀕𑁆𑀖𑀜𑁆𑀘 𑀫𑀸𑀮𑀁 𑀫𑀳𑀕𑁆𑀖𑀜𑁆𑀘 𑀯𑀺𑀮𑁂𑀧𑀦𑀁 𑀫𑀳𑀕𑁆𑀖𑀸𑀦𑀺 𑀘 𑀯𑀢𑁆𑀣𑀸𑀦𑀺 𑀉𑀧𑀳𑀭𑀣𑀸’𑀢𑀺. 𑀢𑁂 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀫𑀳𑀕𑁆𑀖𑀜𑁆𑀘 𑀫𑀸𑀮𑀁 𑀫𑀳𑀕𑁆𑀖𑀜𑁆𑀘 𑀯𑀺𑀮𑁂𑀧𑀦𑀁 ¶ 𑀫𑀳𑀕𑁆𑀖𑀸𑀦𑀺 𑀘 𑀯𑀢𑁆𑀣𑀸𑀦𑀺 𑀉𑀧𑀳𑀭𑁂𑀬𑁆𑀬𑀼𑀁. 𑀢𑁂 𑀢𑁆𑀯𑀁 𑀏𑀯𑀁 𑀯𑀤𑁂𑀬𑁆𑀬𑀸𑀲𑀺 𑁋 ‘𑀢𑁂𑀦 𑀳𑀺, 𑀪𑁄, 𑀢𑀁 𑀧𑀼𑀭𑀺𑀲𑀁 𑀧𑀸𑀲𑀸𑀤𑀁 𑀆𑀭𑁄𑀧𑁂𑀢𑁆𑀯𑀸 𑀧𑀜𑁆𑀘𑀓𑀸𑀫𑀕𑀼𑀡𑀸𑀦𑀺 𑀉𑀧𑀝𑁆𑀞𑀸𑀧𑁂𑀣𑀸’𑀢𑀺. 𑀢𑁂 𑀢𑀁 𑀧𑀼𑀭𑀺𑀲𑀁 𑀧𑀸𑀲𑀸𑀤𑀁 𑀆𑀭𑁄𑀧𑁂𑀢𑁆𑀯𑀸 𑀧𑀜𑁆𑀘𑀓𑀸𑀫𑀕𑀼𑀡𑀸𑀦𑀺 𑀉𑀧𑀝𑁆𑀞𑀸𑀧𑁂𑀬𑁆𑀬𑀼𑀁.

‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀭𑀸𑀚𑀜𑁆𑀜, 𑀅𑀧𑀺 𑀦𑀼 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀼𑀦𑁆𑀳𑀸𑀢𑀲𑁆𑀲 𑀲𑀼𑀯𑀺𑀮𑀺𑀢𑁆𑀢𑀲𑁆𑀲 𑀲𑀼𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀼𑀲𑁆𑀲 𑀆𑀫𑀼𑀓𑁆𑀓𑀫𑀸𑀮𑀸𑀪𑀭𑀡𑀲𑁆𑀲 𑀑𑀤𑀸𑀢𑀯𑀢𑁆𑀣𑀯𑀲𑀦𑀲𑁆𑀲 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑀲𑁆𑀲 𑀧𑀜𑁆𑀘𑀳𑀺 ¶ 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀲𑁆𑀲 𑀲𑀫𑀗𑁆𑀕𑀻𑀪𑀽𑀢𑀲𑁆𑀲 ¶ 𑀧𑀭𑀺𑀘𑀸𑀭𑀬𑀫𑀸𑀦𑀲𑁆𑀲 𑀧𑀼𑀦𑀤𑁂𑀯 𑀢𑀲𑁆𑀫𑀺𑀁 𑀕𑀽𑀣𑀓𑀽𑀧𑁂 𑀦𑀺𑀫𑀼𑀚𑁆𑀚𑀺𑀢𑀼𑀓𑀸𑀫𑀢𑀸 [𑀦𑀺𑀫𑀼𑀚𑁆𑀚𑀺𑀢𑀼𑀓𑀸𑀫𑁆𑀬𑀢𑀸 (𑀲𑁆𑀬𑀸. 𑀓.)] 𑀅𑀲𑁆𑀲𑀸’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀓𑀲𑁆𑀲𑀧’’. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼’’? ‘‘𑀅𑀲𑀼𑀘𑀺, 𑀪𑁄 𑀓𑀲𑁆𑀲𑀧, 𑀕𑀽𑀣𑀓𑀽𑀧𑁄 𑀅𑀲𑀼𑀘𑀺 𑀘𑁂𑀯 𑀅𑀲𑀼𑀘𑀺𑀲𑀗𑁆𑀔𑀸𑀢𑁄 𑀘 𑀤𑀼𑀕𑁆𑀕𑀦𑁆𑀥𑁄 𑀘 𑀤𑀼𑀕𑁆𑀕𑀦𑁆𑀥𑀲𑀗𑁆𑀔𑀸𑀢𑁄 𑀘 𑀚𑁂𑀕𑀼𑀘𑁆𑀙𑁄 𑀘 𑀚𑁂𑀕𑀼𑀘𑁆𑀙𑀲𑀗𑁆𑀔𑀸𑀢𑁄 ¶ 𑀘 𑀧𑀝𑀺𑀓𑀽𑀮𑁄 𑀘 𑀧𑀝𑀺𑀓𑀽𑀮𑀲𑀗𑁆𑀔𑀸𑀢𑁄 𑀘𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀭𑀸𑀚𑀜𑁆𑀜, 𑀫𑀦𑀼𑀲𑁆𑀲𑀸 𑀤𑁂𑀯𑀸𑀦𑀁 𑀅𑀲𑀼𑀘𑀻 𑀘𑁂𑀯 𑀅𑀲𑀼𑀘𑀺𑀲𑀗𑁆𑀔𑀸𑀢𑀸 𑀘, 𑀤𑀼𑀕𑁆𑀕𑀦𑁆𑀥𑀸 𑀘 𑀤𑀼𑀕𑁆𑀕𑀦𑁆𑀥𑀲𑀗𑁆𑀔𑀸𑀢𑀸 𑀘, 𑀚𑁂𑀕𑀼𑀘𑁆𑀙𑀸 𑀘 𑀚𑁂𑀕𑀼𑀘𑁆𑀙𑀲𑀗𑁆𑀔𑀸𑀢𑀸 𑀘, 𑀧𑀝𑀺𑀓𑀽𑀮𑀸 𑀘 𑀧𑀝𑀺𑀓𑀽𑀮𑀲𑀗𑁆𑀔𑀸𑀢𑀸 𑀘. 𑀬𑁄𑀚𑀦𑀲𑀢𑀁 𑀔𑁄, 𑀭𑀸𑀚𑀜𑁆𑀜, 𑀫𑀦𑀼𑀲𑁆𑀲𑀕𑀦𑁆𑀥𑁄 𑀤𑁂𑀯𑁂 𑀉𑀩𑁆𑀩𑀸𑀥𑀢𑀺. 𑀓𑀺𑀁 𑀧𑀦 𑀢𑁂 𑀫𑀺𑀢𑁆𑀢𑀸𑀫𑀘𑁆𑀘𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑀸 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑀸 𑀧𑀺𑀲𑀼𑀡𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑀸 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀧𑀝𑀺𑀯𑀺𑀭𑀢𑀸 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑀸 𑀅𑀦𑀪𑀺𑀚𑁆𑀛𑀸𑀮𑀽 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀻, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸 𑀢𑁂 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀲𑁆𑀲𑀦𑁆𑀢𑀺 𑁋 ‘𑀇𑀢𑀺𑀧𑀺 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 ¶ 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’𑀢𑀺? 𑀇𑀫𑀺𑀦𑀸𑀧𑀺 𑀔𑁄 𑀢𑁂, 𑀭𑀸𑀚𑀜𑁆𑀜, 𑀧𑀭𑀺𑀬𑀸𑀬𑁂𑀦 𑀏𑀯𑀁 𑀳𑁄𑀢𑀼 𑁋 ‘𑀇𑀢𑀺𑀧𑀺 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺.

𑁪𑁧𑁬. ‘‘𑀓𑀺𑀜𑁆𑀘𑀸𑀧𑀺 𑀪𑀯𑀁 𑀓𑀲𑁆𑀲𑀧𑁄 𑀏𑀯𑀫𑀸𑀳, 𑀅𑀣 𑀔𑁄 𑀏𑀯𑀁 𑀫𑁂 𑀏𑀢𑁆𑀣 𑀳𑁄𑀢𑀺 𑁋 ‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺. ‘‘𑀅𑀢𑁆𑀣𑀺 𑀧𑀦, 𑀭𑀸𑀚𑀜𑁆𑀜, 𑀧𑀭𑀺𑀬𑀸𑀬𑁄 ¶ …𑀧𑁂… ‘‘𑀅𑀢𑁆𑀣𑀺, 𑀪𑁄 𑀓𑀲𑁆𑀲𑀧, 𑀧𑀭𑀺𑀬𑀸𑀬𑁄…𑀧𑁂… ``𑀬𑀣𑀸 𑀓𑀣𑀁 𑀯𑀺𑀬, 𑀭𑀸𑀚𑀜𑁆𑀜𑀸𑀢𑀺? ‘‘𑀇𑀥 𑀫𑁂, 𑀪𑁄 𑀓𑀲𑁆𑀲𑀧, 𑀫𑀺𑀢𑁆𑀢𑀸𑀫𑀘𑁆𑀘𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑀸 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑀸 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑀸, 𑀢𑁂 𑀅𑀧𑀭𑁂𑀦 𑀲𑀫𑀬𑁂𑀦 𑀆𑀩𑀸𑀥𑀺𑀓𑀸 𑀳𑁄𑀦𑁆𑀢𑀺 𑀤𑀼𑀓𑁆𑀔𑀺𑀢𑀸 𑀩𑀸𑀴𑁆𑀳𑀕𑀺𑀮𑀸𑀦𑀸. 𑀬𑀤𑀸𑀳𑀁 𑀚𑀸𑀦𑀸𑀫𑀺 𑁋 ‘𑀦 𑀤𑀸𑀦𑀺𑀫𑁂 𑀇𑀫𑀫𑁆𑀳𑀸 𑀆𑀩𑀸𑀥𑀸 𑀯𑀼𑀝𑁆𑀞𑀳𑀺𑀲𑁆𑀲𑀦𑁆𑀢𑀻’𑀢𑀺 𑀢𑁆𑀬𑀸𑀳𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀯𑀤𑀸𑀫𑀺 𑁋 ‘𑀲𑀦𑁆𑀢𑀺 𑀔𑁄, 𑀪𑁄, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀁𑀯𑀸𑀤𑀺𑀦𑁄 𑀏𑀯𑀁𑀤𑀺𑀝𑁆𑀞𑀺𑀦𑁄 𑁋 𑀬𑁂 𑀢𑁂 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑀸 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑀸 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀳𑀩𑁆𑀬𑀢𑀦𑁆𑀢𑀺. 𑀪𑀯𑀦𑁆𑀢𑁄 𑀔𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑀸 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑀸 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑀸. 𑀲𑀘𑁂 𑀢𑁂𑀲𑀁 𑀪𑀯𑀢𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀘𑁆𑀘𑀁 𑀯𑀘𑀦𑀁, 𑀪𑀯𑀦𑁆𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 ¶ 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀳𑀩𑁆𑀬𑀢𑀁. 𑀲𑀘𑁂, 𑀪𑁄, 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑁂𑀬𑁆𑀬𑀸𑀣 ¶ 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀳𑀩𑁆𑀬𑀢𑀁, 𑀬𑁂𑀦 𑀫𑁂 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀬𑁆𑀬𑀸𑀣 𑁋 `𑀇𑀢𑀺𑀧𑀺 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄𑀢𑀺. 𑀪𑀯𑀦𑁆𑀢𑁄 𑀔𑁄 ¶ 𑀧𑀦 𑀫𑁂 𑀲𑀤𑁆𑀥𑀸𑀬𑀺𑀓𑀸 𑀧𑀘𑁆𑀘𑀬𑀺𑀓𑀸, 𑀬𑀁 𑀪𑀯𑀦𑁆𑀢𑁂𑀳𑀺 𑀤𑀺𑀝𑁆𑀞𑀁, 𑀬𑀣𑀸 𑀲𑀸𑀫𑀁 ¶ 𑀤𑀺𑀝𑁆𑀞𑀁 𑀏𑀯𑀫𑁂𑀢𑀁 𑀪𑀯𑀺𑀲𑁆𑀲𑀢𑀻𑀢𑀺. 𑀢𑁂 𑀫𑁂 ‘𑀲𑀸𑀥𑀽’𑀢𑀺 𑀧𑀝𑀺𑀲𑁆𑀲𑀼𑀢𑁆𑀯𑀸 𑀦𑁂𑀯 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀦𑁆𑀢𑀺, 𑀦 𑀧𑀦 𑀤𑀽𑀢𑀁 𑀧𑀳𑀺𑀡𑀦𑁆𑀢𑀺. 𑀅𑀬𑀫𑁆𑀧𑀺 𑀔𑁄, 𑀪𑁄 𑀓𑀲𑁆𑀲𑀧, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑁂 𑀧𑀭𑀺𑀬𑀸𑀬𑁂𑀦 𑀏𑀯𑀁 𑀳𑁄𑀢𑀺 𑁋 ‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺.

𑀢𑀸𑀯𑀢𑀺𑀁𑀲𑀤𑁂𑀯𑀉𑀧𑀫𑀸

𑁪𑁧𑁭. ‘‘𑀢𑁂𑀦 𑀳𑀺, 𑀭𑀸𑀚𑀜𑁆𑀜, 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺; 𑀬𑀣𑀸 𑀢𑁂 𑀔𑀫𑁂𑀬𑁆𑀬, 𑀢𑀣𑀸 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀺. 𑀬𑀁 𑀔𑁄 𑀧𑀦, 𑀭𑀸𑀚𑀜𑁆𑀜, 𑀫𑀸𑀦𑀼𑀲𑁆𑀲𑀓𑀁 𑀯𑀲𑁆𑀲𑀲𑀢𑀁, 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀏𑀲𑁄 𑀏𑀓𑁄 𑀭𑀢𑁆𑀢𑀺𑀦𑁆𑀤𑀺𑀯𑁄 [𑀭𑀢𑁆𑀢𑀺𑀤𑀺𑀯𑁄 (𑀓.)], 𑀢𑀸𑀬 𑀭𑀢𑁆𑀢𑀺𑀬𑀸 𑀢𑀺𑀁𑀲𑀭𑀢𑁆𑀢𑀺𑀬𑁄 𑀫𑀸𑀲𑁄, 𑀢𑁂𑀦 𑀫𑀸𑀲𑁂𑀦 𑀤𑁆𑀯𑀸𑀤𑀲𑀫𑀸𑀲𑀺𑀬𑁄 𑀲𑀁𑀯𑀘𑁆𑀙𑀭𑁄, 𑀢𑁂𑀦 𑀲𑀁𑀯𑀘𑁆𑀙𑀭𑁂𑀦 𑀤𑀺𑀩𑁆𑀩𑀁 𑀯𑀲𑁆𑀲𑀲𑀳𑀲𑁆𑀲𑀁 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀁. 𑀬𑁂 𑀢𑁂 𑀫𑀺𑀢𑁆𑀢𑀸𑀫𑀘𑁆𑀘𑀸 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀧𑀝𑀺𑀯𑀺𑀭𑀢𑀸 𑀫𑀼𑀲𑀸𑀯𑀸𑀤𑀸 𑀧𑀝𑀺𑀯𑀺𑀭𑀢𑀸 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑀸, 𑀢𑁂 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑀸 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀳𑀩𑁆𑀬𑀢𑀁. 𑀲𑀘𑁂 𑀧𑀦 𑀢𑁂𑀲𑀁 𑀏𑀯𑀁 𑀪𑀯𑀺𑀲𑁆𑀲𑀢𑀺 𑁋 ‘𑀬𑀸𑀯 𑀫𑀬𑀁 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀭𑀢𑁆𑀢𑀺𑀦𑁆𑀤𑀺𑀯𑀸 𑀤𑀺𑀩𑁆𑀩𑁂𑀳𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀧𑀭𑀺𑀘𑀸𑀭𑁂𑀫, 𑀅𑀣 𑀫𑀬𑀁 𑀧𑀸𑀬𑀸𑀲𑀺𑀲𑁆𑀲 𑀭𑀸𑀚𑀜𑁆𑀜𑀲𑁆𑀲 𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀬𑁆𑀬𑀸𑀫 𑁋 ‘‘𑀇𑀢𑀺𑀧𑀺 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’𑀢𑀺. 𑀅𑀧𑀺 𑀦𑀼 𑀢𑁂 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀬𑁆𑀬𑀼𑀁 ¶ 𑁋 ‘𑀇𑀢𑀺𑀧𑀺 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 𑀓𑀲𑁆𑀲𑀧. 𑀅𑀧𑀺 𑀳𑀺 𑀫𑀬𑀁, 𑀪𑁄 𑀓𑀲𑁆𑀲𑀧, 𑀘𑀺𑀭𑀁 𑀓𑀸𑀮𑀗𑁆𑀓𑀢𑀸𑀧𑀺 𑀪𑀯𑁂𑀬𑁆𑀬𑀸𑀫. 𑀓𑁄 𑀧𑀦𑁂𑀢𑀁 𑀪𑁄𑀢𑁄 𑀓𑀲𑁆𑀲𑀧𑀲𑁆𑀲 𑀆𑀭𑁄𑀘𑁂𑀢𑀺 ¶ 𑁋 ‘𑀅𑀢𑁆𑀣𑀺 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸’𑀢𑀺 𑀯𑀸 ‘𑀏𑀯𑀁𑀤𑀻𑀖𑀸𑀬𑀼𑀓𑀸 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸’𑀢𑀺 𑀯𑀸. 𑀦 𑀫𑀬𑀁 𑀪𑁄𑀢𑁄 ¶ 𑀓𑀲𑁆𑀲𑀧𑀲𑁆𑀲 𑀲𑀤𑁆𑀤𑀳𑀸𑀫 𑁋 ‘𑀅𑀢𑁆𑀣𑀺 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸’𑀢𑀺 𑀯𑀸 ‘𑀏𑀯𑀁𑀤𑀻𑀖𑀸𑀬𑀼𑀓𑀸 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸’𑀢𑀺 𑀯𑀸’’𑀢𑀺.

𑀚𑀘𑁆𑀘𑀦𑁆𑀥𑀉𑀧𑀫𑀸

𑁪𑁧𑁮. ‘‘𑀲𑁂𑀬𑁆𑀬𑀣𑀸𑀧𑀺, 𑀭𑀸𑀚𑀜𑁆𑀜, 𑀚𑀘𑁆𑀘𑀦𑁆𑀥𑁄 𑀧𑀼𑀭𑀺𑀲𑁄 𑀦 𑀧𑀲𑁆𑀲𑁂𑀬𑁆𑀬 𑀓𑀡𑁆𑀳 𑁋 𑀲𑀼𑀓𑁆𑀓𑀸𑀦𑀺 𑀭𑀽𑀧𑀸𑀦𑀺 ¶ , 𑀦 𑀧𑀲𑁆𑀲𑁂𑀬𑁆𑀬 𑀦𑀻𑀮𑀓𑀸𑀦𑀺 𑀭𑀽𑀧𑀸𑀦𑀺, 𑀦 𑀧𑀲𑁆𑀲𑁂𑀬𑁆𑀬 𑀧𑀻𑀢𑀓𑀸𑀦𑀺 [𑀫𑀜𑁆𑀚𑁂𑀝𑁆𑀞𑀓𑀸𑀦𑀺 (𑀲𑁆𑀬𑀸.)] 𑀭𑀽𑀧𑀸𑀦𑀺, 𑀦 𑀧𑀲𑁆𑀲𑁂𑀬𑁆𑀬 𑀮𑁄𑀳𑀺𑀢𑀓𑀸𑀦𑀺 𑀭𑀽𑀧𑀸𑀦𑀺, 𑀦 𑀧𑀲𑁆𑀲𑁂𑀬𑁆𑀬 𑀫𑀜𑁆𑀚𑀺𑀝𑁆𑀞𑀓𑀸𑀦𑀺 𑀭𑀽𑀧𑀸𑀦𑀺, 𑀦 𑀧𑀲𑁆𑀲𑁂𑀬𑁆𑀬 𑀲𑀫𑀯𑀺𑀲𑀫𑀁, 𑀦 𑀧𑀲𑁆𑀲𑁂𑀬𑁆𑀬 𑀢𑀸𑀭𑀓𑀸𑀦𑀺 𑀭𑀽𑀧𑀸𑀦𑀺, 𑀦 𑀧𑀲𑁆𑀲𑁂𑀬𑁆𑀬 𑀘𑀦𑁆𑀤𑀺𑀫𑀲𑀽𑀭𑀺𑀬𑁂. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀦𑀢𑁆𑀣𑀺 𑀓𑀡𑁆𑀳𑀲𑀼𑀓𑁆𑀓𑀸𑀦𑀺 𑀭𑀽𑀧𑀸𑀦𑀺, 𑀦𑀢𑁆𑀣𑀺 𑀓𑀡𑁆𑀳𑀲𑀼𑀓𑁆𑀓𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀸𑀯𑀻. 𑀦𑀢𑁆𑀣𑀺 𑀦𑀻𑀮𑀓𑀸𑀦𑀺 𑀭𑀽𑀧𑀸𑀦𑀺, 𑀦𑀢𑁆𑀣𑀺 𑀦𑀻𑀮𑀓𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀸𑀯𑀻. 𑀦𑀢𑁆𑀣𑀺 𑀧𑀻𑀢𑀓𑀸𑀦𑀺 𑀭𑀽𑀧𑀸𑀦𑀺, 𑀦𑀢𑁆𑀣𑀺 𑀧𑀻𑀢𑀓𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀸𑀯𑀻. 𑀦𑀢𑁆𑀣𑀺 𑀮𑁄𑀳𑀺𑀢𑀓𑀸𑀦𑀺 𑀭𑀽𑀧𑀸𑀦𑀺, 𑀦𑀢𑁆𑀣𑀺 𑀮𑁄𑀳𑀺𑀢𑀓𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀸𑀯𑀻. 𑀦𑀢𑁆𑀣𑀺 𑀫𑀜𑁆𑀚𑀺𑀝𑁆𑀞𑀓𑀸𑀦𑀺 𑀭𑀽𑀧𑀸𑀦𑀺, 𑀦𑀢𑁆𑀣𑀺 𑀫𑀜𑁆𑀚𑀺𑀝𑁆𑀞𑀓𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀸𑀯𑀻. 𑀦𑀢𑁆𑀣𑀺 𑀲𑀫𑀯𑀺𑀲𑀫𑀁, 𑀦𑀢𑁆𑀣𑀺 𑀲𑀫𑀯𑀺𑀲𑀫𑀲𑁆𑀲 𑀤𑀲𑁆𑀲𑀸𑀯𑀻. 𑀦𑀢𑁆𑀣𑀺 𑀢𑀸𑀭𑀓𑀸𑀦𑀺 𑀭𑀽𑀧𑀸𑀦𑀺, 𑀦𑀢𑁆𑀣𑀺 𑀢𑀸𑀭𑀓𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀸𑀯𑀻. 𑀦𑀢𑁆𑀣𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸, 𑀦𑀢𑁆𑀣𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀤𑀲𑁆𑀲𑀸𑀯𑀻. 𑀅𑀳𑀫𑁂𑀢𑀁 𑀦 𑀚𑀸𑀦𑀸𑀫𑀺, 𑀅𑀳𑀫𑁂𑀢𑀁 𑀦 𑀧𑀲𑁆𑀲𑀸𑀫𑀺, 𑀢𑀲𑁆𑀫𑀸 𑀢𑀁 𑀦𑀢𑁆𑀣𑀻’𑀢𑀺. 𑀲𑀫𑁆𑀫𑀸 𑀦𑀼 𑀔𑁄 𑀲𑁄, 𑀭𑀸𑀚𑀜𑁆𑀜, 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑀺𑀤𑀁, 𑀪𑁄 ¶ 𑀓𑀲𑁆𑀲𑀧. 𑀅𑀢𑁆𑀣𑀺 𑀓𑀡𑁆𑀳𑀲𑀼𑀓𑁆𑀓𑀸𑀦𑀺 𑀭𑀽𑀧𑀸𑀦𑀺, 𑀅𑀢𑁆𑀣𑀺 𑀓𑀡𑁆𑀳𑀲𑀼𑀓𑁆𑀓𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀸𑀯𑀻. 𑀅𑀢𑁆𑀣𑀺 𑀦𑀻𑀮𑀓𑀸𑀦𑀺 𑀭𑀽𑀧𑀸𑀦𑀺, 𑀅𑀢𑁆𑀣𑀺 𑀦𑀻𑀮𑀓𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀸𑀯𑀻…𑀧𑁂… ¶ 𑀅𑀢𑁆𑀣𑀺 𑀲𑀫𑀯𑀺𑀲𑀫𑀁, 𑀅𑀢𑁆𑀣𑀺 𑀲𑀫𑀯𑀺𑀲𑀫𑀲𑁆𑀲 𑀤𑀲𑁆𑀲𑀸𑀯𑀻. 𑀅𑀢𑁆𑀣𑀺 𑀢𑀸𑀭𑀓𑀸𑀦𑀺 𑀭𑀽𑀧𑀸𑀦𑀺, 𑀅𑀢𑁆𑀣𑀺 𑀢𑀸𑀭𑀓𑀸𑀦𑀁 𑀭𑀽𑀧𑀸𑀦𑀁 𑀤𑀲𑁆𑀲𑀸𑀯𑀻. 𑀅𑀢𑁆𑀣𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸, 𑀅𑀢𑁆𑀣𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀤𑀲𑁆𑀲𑀸𑀯𑀻. ‘𑀅𑀳𑀫𑁂𑀢𑀁 𑀦 𑀚𑀸𑀦𑀸𑀫𑀺, 𑀅𑀳𑀫𑁂𑀢𑀁 𑀦 𑀧𑀲𑁆𑀲𑀸𑀫𑀺, 𑀢𑀲𑁆𑀫𑀸 𑀢𑀁 𑀦𑀢𑁆𑀣𑀻’𑀢𑀺. 𑀦 𑀳𑀺 𑀲𑁄, 𑀪𑁄 𑀓𑀲𑁆𑀲𑀧, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬𑀸’’𑀢𑀺. ‘‘𑀏𑀯𑀫𑁂𑀯 𑀔𑁄 𑀢𑁆𑀯𑀁, 𑀭𑀸𑀚𑀜𑁆𑀜, 𑀚𑀘𑁆𑀘𑀦𑁆𑀥𑀽𑀧𑀫𑁄 𑀫𑀜𑁆𑀜𑁂 𑀧𑀝𑀺𑀪𑀸𑀲𑀺 𑀬𑀁 𑀫𑀁 𑀢𑁆𑀯𑀁 𑀏𑀯𑀁 𑀯𑀤𑁂𑀲𑀺’’.

‘‘𑀓𑁄 𑀧𑀦𑁂𑀢𑀁 𑀪𑁄𑀢𑁄 𑀓𑀲𑁆𑀲𑀧𑀲𑁆𑀲 𑀆𑀭𑁄𑀘𑁂𑀢𑀺 𑁋 ‘𑀅𑀢𑁆𑀣𑀺 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸’’𑀢𑀺 𑀯𑀸, ‘𑀏𑀯𑀁𑀤𑀻𑀖𑀸𑀬𑀼𑀓𑀸 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸’𑀢𑀺 𑀯𑀸? 𑀦 𑀫𑀬𑀁 𑀪𑁄𑀢𑁄 𑀓𑀲𑁆𑀲𑀧𑀲𑁆𑀲 𑀲𑀤𑁆𑀤𑀳𑀸𑀫 𑁋 ‘𑀅𑀢𑁆𑀣𑀺 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸’𑀢𑀺 𑀯𑀸 ‘𑀏𑀯𑀁𑀤𑀻𑀖𑀸𑀬𑀼𑀓𑀸 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸’𑀢𑀺 𑀯𑀸’’𑀢𑀺. ‘‘𑀦 𑀔𑁄, 𑀭𑀸𑀚𑀜𑁆𑀜, 𑀏𑀯𑀁 𑀧𑀭𑁄 𑀮𑁄𑀓𑁄 𑀤𑀝𑁆𑀞𑀩𑁆𑀩𑁄, 𑀬𑀣𑀸 𑀢𑁆𑀯𑀁 𑀫𑀜𑁆𑀜𑀲𑀺 𑀇𑀫𑀺𑀦𑀸 𑀫𑀁𑀲𑀘𑀓𑁆𑀔𑀼𑀦𑀸. 𑀬𑁂 𑀔𑁄 𑀢𑁂 𑀭𑀸𑀚𑀜𑁆𑀜 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀦𑁆𑀢𑀺 ¶ , 𑀢𑁂 𑀢𑀢𑁆𑀣 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑁄 𑀧𑀳𑀺𑀢𑀢𑁆𑀢𑀸 𑀯𑀺𑀳𑀭𑀦𑁆𑀢𑀸 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑁂𑀦𑁆𑀢𑀺. 𑀢𑁂 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀇𑀫𑀁 𑀘𑁂𑀯 𑀮𑁄𑀓𑀁 𑀧𑀲𑁆𑀲𑀦𑁆𑀢𑀺 𑀧𑀭𑀜𑁆𑀘 𑀲𑀢𑁆𑀢𑁂 𑀘 𑀑𑀧𑀧𑀸𑀢𑀺𑀓𑁂. 𑀏𑀯𑀜𑁆𑀘 𑀔𑁄, 𑀭𑀸𑀚𑀜𑁆𑀜, 𑀧𑀭𑁄 𑀮𑁄𑀓𑁄 𑀤𑀝𑁆𑀞𑀩𑁆𑀩𑁄; 𑀦𑀢𑁆𑀯𑁂𑀯 𑀬𑀣𑀸 𑀢𑁆𑀯𑀁 𑀫𑀜𑁆𑀜𑀲𑀺 𑀇𑀫𑀺𑀦𑀸 𑀫𑀁𑀲𑀘𑀓𑁆𑀔𑀼𑀦𑀸. 𑀇𑀫𑀺𑀦𑀸𑀧𑀺 𑀔𑁄 𑀢𑁂, 𑀭𑀸𑀚𑀜𑁆𑀜, 𑀧𑀭𑀺𑀬𑀸𑀬𑁂𑀦 𑀏𑀯𑀁 𑀳𑁄𑀢𑀼 𑁋 ‘𑀇𑀢𑀺𑀧𑀺 ¶ 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺.

𑁪𑁧𑁯. ‘‘𑀓𑀺𑀜𑁆𑀘𑀸𑀧𑀺 𑀪𑀯𑀁 𑀓𑀲𑁆𑀲𑀧𑁄 𑀏𑀯𑀫𑀸𑀳, 𑀅𑀣 𑀔𑁄 𑀏𑀯𑀁 ¶ 𑀫𑁂 𑀏𑀢𑁆𑀣 𑀳𑁄𑀢𑀺 𑁋 ‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’𑀢𑀺 ¶ . ‘‘𑀅𑀢𑁆𑀣𑀺 𑀧𑀦, 𑀭𑀸𑀚𑀜𑁆𑀜, 𑀧𑀭𑀺𑀬𑀸𑀬𑁄…𑀧𑁂… 𑀅𑀢𑁆𑀣𑀺, 𑀪𑁄 𑀓𑀲𑁆𑀲𑀧, 𑀧𑀭𑀺𑀬𑀸𑀬𑁄…𑀧𑁂… 𑀬𑀣𑀸 𑀓𑀣𑀁 𑀯𑀺𑀬, 𑀭𑀸𑀚𑀜𑁆𑀜𑀸’’𑀢𑀺? ‘‘𑀇𑀥𑀸𑀳𑀁, 𑀪𑁄 𑀓𑀲𑁆𑀲𑀧, 𑀧𑀲𑁆𑀲𑀸𑀫𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀲𑀻𑀮𑀯𑀦𑁆𑀢𑁂 𑀓𑀮𑁆𑀬𑀸𑀡𑀥𑀫𑁆𑀫𑁂 𑀚𑀻𑀯𑀺𑀢𑀼𑀓𑀸𑀫𑁂 𑀅𑀫𑀭𑀺𑀢𑀼𑀓𑀸𑀫𑁂 𑀲𑀼𑀔𑀓𑀸𑀫𑁂 𑀤𑀼𑀓𑁆𑀔𑀧𑀝𑀺𑀓𑀽𑀮𑁂. 𑀢𑀲𑁆𑀲 𑀫𑀬𑁆𑀳𑀁, 𑀪𑁄 𑀓𑀲𑁆𑀲𑀧, 𑀏𑀯𑀁 𑀳𑁄𑀢𑀺 𑁋 𑀲𑀘𑁂 𑀔𑁄 𑀇𑀫𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸 𑀏𑀯𑀁 𑀚𑀸𑀦𑁂𑀬𑁆𑀬𑀼𑀁 𑁋 ‘𑀇𑀢𑁄 𑀦𑁄 𑀫𑀢𑀸𑀦𑀁 𑀲𑁂𑀬𑁆𑀬𑁄 𑀪𑀯𑀺𑀲𑁆𑀲𑀢𑀻’𑀢𑀺. 𑀇𑀤𑀸𑀦𑀺𑀫𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸 𑀯𑀺𑀲𑀁 𑀯𑀸 𑀔𑀸𑀤𑁂𑀬𑁆𑀬𑀼𑀁, 𑀲𑀢𑁆𑀣𑀁 𑀯𑀸 𑀆𑀳𑀭𑁂𑀬𑁆𑀬𑀼𑀁, 𑀉𑀩𑁆𑀩𑀦𑁆𑀥𑀺𑀢𑁆𑀯𑀸 𑀯𑀸 𑀓𑀸𑀮𑀗𑁆𑀓𑀭𑁂𑀬𑁆𑀬𑀼𑀁, 𑀧𑀧𑀸𑀢𑁂 𑀯𑀸 𑀧𑀧𑀢𑁂𑀬𑁆𑀬𑀼𑀁. 𑀬𑀲𑁆𑀫𑀸 𑀘 𑀔𑁄 𑀇𑀫𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸 𑀦 𑀏𑀯𑀁 𑀚𑀸𑀦𑀦𑁆𑀢𑀺 𑁋 ‘𑀇𑀢𑁄 𑀦𑁄 𑀫𑀢𑀸𑀦𑀁 𑀲𑁂𑀬𑁆𑀬𑁄 𑀪𑀯𑀺𑀲𑁆𑀲𑀢𑀻’𑀢𑀺, 𑀢𑀲𑁆𑀫𑀸 𑀇𑀫𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸 𑀚𑀻𑀯𑀺𑀢𑀼𑀓𑀸𑀫𑀸 𑀅𑀫𑀭𑀺𑀢𑀼𑀓𑀸𑀫𑀸 𑀲𑀼𑀔𑀓𑀸𑀫𑀸 𑀤𑀼𑀓𑁆𑀔𑀧𑀝𑀺𑀓𑀽𑀮𑀸 𑀅𑀢𑁆𑀢𑀸𑀦𑀁 𑀦 𑀫𑀸𑀭𑁂𑀦𑁆𑀢𑀺 [( ) 𑀦𑀢𑁆𑀣𑀺 (𑀲𑁆𑀬𑀸. 𑀧𑀻.)]. 𑀅𑀬𑀫𑁆𑀧𑀺 𑀔𑁄, 𑀪𑁄 𑀓𑀲𑁆𑀲𑀧, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑁂 𑀧𑀭𑀺𑀬𑀸𑀬𑁂𑀦 𑀏𑀯𑀁 𑀳𑁄𑀢𑀺 𑁋 ‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺.

𑀕𑀩𑁆𑀪𑀺𑀦𑀻𑀉𑀧𑀫𑀸

𑁪𑁨𑁦. ‘‘𑀢𑁂𑀦 ¶ 𑀳𑀺, 𑀭𑀸𑀚𑀜𑁆𑀜, 𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺. 𑀉𑀧𑀫𑀸𑀬 𑀫𑀺𑀥𑁂𑀓𑀘𑁆𑀘𑁂 𑀯𑀺𑀜𑁆𑀜𑀽 𑀧𑀼𑀭𑀺𑀲𑀸 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀦𑁆𑀢𑀺. 𑀪𑀽𑀢𑀧𑀼𑀩𑁆𑀩𑀁, 𑀭𑀸𑀚𑀜𑁆𑀜, 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 ¶ 𑀤𑁆𑀯𑁂 𑀧𑀚𑀸𑀧𑀢𑀺𑀬𑁄 𑀅𑀳𑁂𑀲𑀼𑀁. 𑀏𑀓𑀺𑀲𑁆𑀲𑀸 𑀧𑀼𑀢𑁆𑀢𑁄 𑀅𑀳𑁄𑀲𑀺 𑀤𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄 𑀯𑀸 𑀤𑁆𑀯𑀸𑀤𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄 𑀯𑀸, 𑀏𑀓𑀸 𑀕𑀩𑁆𑀪𑀺𑀦𑀻 𑀉𑀧𑀯𑀺𑀚𑀜𑁆𑀜𑀸. 𑀅𑀣 𑀔𑁄 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀓𑀸𑀮𑀫𑀓𑀸𑀲𑀺. 𑀅𑀣 𑀔𑁄 𑀲𑁄 𑀫𑀸𑀡𑀯𑀓𑁄 𑀫𑀸𑀢𑀼𑀲𑀧𑀢𑁆𑀢𑀺𑀁 [𑀫𑀸𑀢𑀼𑀲𑀧𑀢𑀺𑀁 (𑀲𑁆𑀬𑀸.)] 𑀏𑀢𑀤𑀯𑁄𑀘 𑁋 ‘𑀬𑀫𑀺𑀤𑀁, 𑀪𑁄𑀢𑀺, 𑀥𑀦𑀁 𑀯𑀸 𑀥𑀜𑁆𑀜𑀁 𑀯𑀸 𑀭𑀚𑀢𑀁 𑀯𑀸 𑀚𑀸𑀢𑀭𑀽𑀧𑀁 𑀯𑀸, 𑀲𑀩𑁆𑀩𑀁 𑀢𑀁 𑀫𑀬𑁆𑀳𑀁 ¶ ; 𑀦𑀢𑁆𑀣𑀺 𑀢𑀼𑀬𑁆𑀳𑁂𑀢𑁆𑀣 𑀓𑀺𑀜𑁆𑀘𑀺. 𑀧𑀺𑀢𑀼 𑀫𑁂 [𑀧𑀺𑀢𑀼 𑀫𑁂 𑀲𑀦𑁆𑀢𑀓𑁄 (𑀲𑁆𑀬𑀸.)] 𑀪𑁄𑀢𑀺, 𑀤𑀸𑀬𑀚𑁆𑀚𑀁 𑀦𑀺𑀬𑁆𑀬𑀸𑀤𑁂𑀳𑀻’𑀢𑀺 [𑀦𑀻𑀬𑁆𑀬𑀸𑀢𑁂𑀳𑀻𑀢𑀺 (𑀲𑀻. 𑀧𑀻.)]. 𑀏𑀯𑀁 𑀯𑀼𑀢𑁆𑀢𑁂 𑀲𑀸 𑀩𑁆𑀭𑀸𑀳𑁆𑀫𑀡𑀻 𑀢𑀁 𑀫𑀸𑀡𑀯𑀓𑀁 𑀏𑀢𑀤𑀯𑁄𑀘 𑁋 ‘𑀆𑀕𑀫𑁂𑀳𑀺 𑀢𑀸𑀯, 𑀢𑀸𑀢, 𑀬𑀸𑀯 𑀯𑀺𑀚𑀸𑀬𑀸𑀫𑀺. 𑀲𑀘𑁂 𑀓𑀼𑀫𑀸𑀭𑀓𑁄 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲𑀧𑀺 𑀏𑀓𑀤𑁂𑀲𑁄 𑀪𑀯𑀺𑀲𑁆𑀲𑀢𑀺; 𑀲𑀘𑁂 𑀓𑀼𑀫𑀸𑀭𑀺𑀓𑀸 𑀪𑀯𑀺𑀲𑁆𑀲𑀢𑀺, 𑀲𑀸𑀧𑀺 𑀢𑁂 𑀑𑀧𑀪𑁄𑀕𑁆𑀕𑀸 [𑀉𑀧𑀪𑁄𑀕𑁆𑀕𑀸 (𑀲𑁆𑀬𑀸.)] 𑀪𑀯𑀺𑀲𑁆𑀲𑀢𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀫𑀸𑀡𑀯𑀓𑁄 𑀫𑀸𑀢𑀼𑀲𑀧𑀢𑁆𑀢𑀺𑀁 𑀏𑀢𑀤𑀯𑁄𑀘 𑁋 ‘𑀬𑀫𑀺𑀤𑀁, 𑀪𑁄𑀢𑀺, 𑀥𑀦𑀁 𑀯𑀸 𑀥𑀜𑁆𑀜𑀁 𑀯𑀸 𑀭𑀚𑀢𑀁 𑀯𑀸 𑀚𑀸𑀢𑀭𑀽𑀧𑀁 𑀯𑀸, 𑀲𑀩𑁆𑀩𑀁 𑀢𑀁 𑀫𑀬𑁆𑀳𑀁; 𑀦𑀢𑁆𑀣𑀺 𑀢𑀼𑀬𑁆𑀳𑁂𑀢𑁆𑀣 𑀓𑀺𑀜𑁆𑀘𑀺. 𑀧𑀺𑀢𑀼 𑀫𑁂, 𑀪𑁄𑀢𑀺, 𑀤𑀸𑀬𑀚𑁆𑀚𑀁 𑀦𑀺𑀬𑁆𑀬𑀸𑀤𑁂𑀳𑀻’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑀸 𑀩𑁆𑀭𑀸𑀳𑁆𑀫𑀡𑀻 𑀢𑀁 𑀫𑀸𑀡𑀯𑀓𑀁 𑀏𑀢𑀤𑀯𑁄𑀘 𑁋 ‘𑀆𑀕𑀫𑁂𑀳𑀺 𑀢𑀸𑀯, 𑀢𑀸𑀢, 𑀬𑀸𑀯 𑀯𑀺𑀚𑀸𑀬𑀸𑀫𑀺. 𑀲𑀘𑁂 𑀓𑀼𑀫𑀸𑀭𑀓𑁄 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀲𑀧𑀺 𑀏𑀓𑀤𑁂𑀲𑁄 𑀪𑀯𑀺𑀲𑁆𑀲𑀢𑀺; 𑀲𑀘𑁂 𑀓𑀼𑀫𑀸𑀭𑀺𑀓𑀸 𑀪𑀯𑀺𑀲𑁆𑀲𑀢𑀺 𑀲𑀸𑀧𑀺 𑀢𑁂 𑀑𑀧𑀪𑁄𑀕𑁆𑀕𑀸 [𑀉𑀧𑀪𑁄𑀕𑁆𑀕𑀸 (𑀲𑁆𑀬𑀸.)] 𑀪𑀯𑀺𑀲𑁆𑀲𑀢𑀻’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄 𑀲𑁄 𑀫𑀸𑀡𑀯𑀓𑁄 𑀫𑀸𑀢𑀼𑀲𑀧𑀢𑁆𑀢𑀺𑀁 𑀏𑀢𑀤𑀯𑁄𑀘 𑁋 ‘𑀬𑀫𑀺𑀤𑀁, 𑀪𑁄𑀢𑀺, 𑀥𑀦𑀁 𑀯𑀸 𑀥𑀜𑁆𑀜𑀁 𑀯𑀸 𑀭𑀚𑀢𑀁 𑀯𑀸 𑀚𑀸𑀢𑀭𑀽𑀧𑀁 ¶ 𑀯𑀸 ¶ , 𑀲𑀩𑁆𑀩𑀁 𑀢𑀁 𑀫𑀬𑁆𑀳𑀁; 𑀦𑀢𑁆𑀣𑀺 𑀢𑀼𑀬𑁆𑀳𑁂𑀢𑁆𑀣 𑀓𑀺𑀜𑁆𑀘𑀺. 𑀧𑀺𑀢𑀼 𑀫𑁂, 𑀪𑁄𑀢𑀺, 𑀤𑀸𑀬𑀚𑁆𑀚𑀁 𑀦𑀺𑀬𑁆𑀬𑀸𑀤𑁂𑀳𑀻’𑀢𑀺.

‘‘𑀅𑀣 𑀔𑁄 𑀲𑀸 𑀩𑁆𑀭𑀸𑀳𑁆𑀫𑀡𑀻 𑀲𑀢𑁆𑀣𑀁 𑀕𑀳𑁂𑀢𑁆𑀯𑀸 𑀑𑀯𑀭𑀓𑀁 𑀧𑀯𑀺𑀲𑀺𑀢𑁆𑀯𑀸 𑀉𑀤𑀭𑀁 𑀑𑀧𑀸𑀤𑁂𑀲𑀺 [𑀉𑀧𑁆𑀧𑀸𑀢𑁂𑀲𑀺 (𑀲𑁆𑀬𑀸.)] 𑁋 ‘𑀬𑀸𑀯 𑀯𑀺𑀚𑀸𑀬𑀸𑀫𑀺 𑀬𑀤𑀺 𑀯𑀸 𑀓𑀼𑀫𑀸𑀭𑀓𑁄 𑀬𑀤𑀺 𑀯𑀸 𑀓𑀼𑀫𑀸𑀭𑀺𑀓𑀸’𑀢𑀺. 𑀲𑀸 𑀅𑀢𑁆𑀢𑀸𑀦𑀁 𑀘𑁂𑀯 𑀚𑀻𑀯𑀺𑀢𑀜𑁆𑀘 𑀕𑀩𑁆𑀪𑀜𑁆𑀘 𑀲𑀸𑀧𑀢𑁂𑀬𑁆𑀬𑀜𑁆𑀘 𑀯𑀺𑀦𑀸𑀲𑁂𑀲𑀺. 𑀬𑀣𑀸 𑀢𑀁 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀅𑀦𑀬𑀩𑁆𑀬𑀲𑀦𑀁 𑀆𑀧𑀦𑁆𑀦𑀸 𑀅𑀬𑁄𑀦𑀺𑀲𑁄 𑀤𑀸𑀬𑀚𑁆𑀚𑀁 𑀕𑀯𑁂𑀲𑀦𑁆𑀢𑀻, 𑀏𑀯𑀫𑁂𑀯 𑀔𑁄 𑀢𑁆𑀯𑀁, 𑀭𑀸𑀚𑀜𑁆𑀜, 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀺𑀲𑁆𑀲𑀲𑀺 𑀅𑀬𑁄𑀦𑀺𑀲𑁄 𑀧𑀭𑀮𑁄𑀓𑀁 𑀕𑀯𑁂𑀲𑀦𑁆𑀢𑁄 ¶ ; 𑀲𑁂𑀬𑁆𑀬𑀣𑀸𑀧𑀺 𑀲𑀸 𑀩𑁆𑀭𑀸𑀳𑁆𑀫𑀡𑀻 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀅𑀦𑀬𑀩𑁆𑀬𑀲𑀦𑀁 𑀆𑀧𑀦𑁆𑀦𑀸 𑀅𑀬𑁄𑀦𑀺𑀲𑁄 𑀤𑀸𑀬𑀚𑁆𑀚𑀁 𑀕𑀯𑁂𑀲𑀦𑁆𑀢𑀻. 𑀦 𑀔𑁄, 𑀭𑀸𑀚𑀜𑁆𑀜, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸 𑀅𑀧𑀓𑁆𑀓𑀁 𑀧𑀭𑀺𑀧𑀸𑀘𑁂𑀦𑁆𑀢𑀺; 𑀅𑀧𑀺 𑀘 𑀧𑀭𑀺𑀧𑀸𑀓𑀁 𑀆𑀕𑀫𑁂𑀦𑁆𑀢𑀺. 𑀧𑀡𑁆𑀟𑀺𑀢𑀸𑀦𑀁 𑀅𑀢𑁆𑀣𑁄 𑀳𑀺, 𑀭𑀸𑀚𑀜𑁆𑀜, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀻𑀮𑀯𑀦𑁆𑀢𑀸𑀦𑀁 𑀓𑀮𑁆𑀬𑀸𑀡𑀥𑀫𑁆𑀫𑀸𑀦𑀁 𑀚𑀻𑀯𑀺𑀢𑁂𑀦. 𑀬𑀣𑀸 𑀬𑀣𑀸 𑀔𑁄, 𑀭𑀸𑀚𑀜𑁆𑀜, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀻𑀮𑀯𑀦𑁆𑀢𑁄 𑀓𑀮𑁆𑀬𑀸𑀡𑀥𑀫𑁆𑀫𑀸 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀁 𑀢𑀺𑀝𑁆𑀞𑀦𑁆𑀢𑀺, 𑀢𑀣𑀸 ¶ 𑀢𑀣𑀸 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀺, 𑀩𑀳𑀼𑀚𑀦𑀳𑀺𑀢𑀸𑀬 𑀘 𑀧𑀝𑀺𑀧𑀚𑁆𑀚𑀦𑁆𑀢𑀺 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁. 𑀇𑀫𑀺𑀦𑀸𑀧𑀺 𑀔𑁄 𑀢𑁂, 𑀭𑀸𑀚𑀜𑁆𑀜, 𑀧𑀭𑀺𑀬𑀸𑀬𑁂𑀦 𑀏𑀯𑀁 𑀳𑁄𑀢𑀼 𑁋 ‘𑀇𑀢𑀺𑀧𑀺 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺.

𑁪𑁨𑁧. ‘‘𑀓𑀺𑀜𑁆𑀘𑀸𑀧𑀺 𑀪𑀯𑀁 𑀓𑀲𑁆𑀲𑀧𑁄 𑀏𑀯𑀫𑀸𑀳, 𑀅𑀣 𑀔𑁄 𑀏𑀯𑀁 𑀫𑁂 𑀏𑀢𑁆𑀣 𑀳𑁄𑀢𑀺 𑁋 ‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺. ‘‘𑀅𑀢𑁆𑀣𑀺 𑀧𑀦, 𑀭𑀸𑀚𑀜𑁆𑀜, 𑀧𑀭𑀺𑀬𑀸𑀬𑁄…𑀧𑁂… 𑀅𑀢𑁆𑀣𑀺, 𑀪𑁄 𑀓𑀲𑁆𑀲𑀧, 𑀧𑀭𑀺𑀬𑀸𑀬𑁄…𑀧𑁂… 𑀬𑀣𑀸 𑀓𑀣𑀁 𑀯𑀺𑀬, 𑀭𑀸𑀚𑀜𑁆𑀜𑀸’’𑀢𑀺? ‘‘𑀇𑀥 𑀫𑁂, 𑀪𑁄 𑀓𑀲𑁆𑀲𑀧, 𑀧𑀼𑀭𑀺𑀲𑀸 𑀘𑁄𑀭𑀁 ¶ 𑀆𑀕𑀼𑀘𑀸𑀭𑀺𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀺 𑁋 ‘𑀅𑀬𑀁 𑀢𑁂, 𑀪𑀦𑁆𑀢𑁂, 𑀘𑁄𑀭𑁄 𑀆𑀕𑀼𑀘𑀸𑀭𑀻; 𑀇𑀫𑀲𑁆𑀲 𑀬𑀁 𑀇𑀘𑁆𑀙𑀲𑀺, 𑀢𑀁 𑀤𑀡𑁆𑀟𑀁 𑀧𑀡𑁂𑀳𑀻’𑀢𑀺. 𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀢𑁂𑀦 𑀳𑀺, 𑀪𑁄, 𑀇𑀫𑀁 𑀧𑀼𑀭𑀺𑀲𑀁 𑀚𑀻𑀯𑀦𑁆𑀢𑀁𑀬𑁂𑀯 𑀓𑀼𑀫𑁆𑀪𑀺𑀬𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀼𑀔𑀁 𑀧𑀺𑀤𑀳𑀺𑀢𑁆𑀯𑀸 𑀅𑀮𑁆𑀮𑁂𑀦 𑀘𑀫𑁆𑀫𑁂𑀦 𑀑𑀦𑀦𑁆𑀥𑀺𑀢𑁆𑀯𑀸 𑀅𑀮𑁆𑀮𑀸𑀬 𑀫𑀢𑁆𑀢𑀺𑀓𑀸𑀬 𑀩𑀳𑀮𑀸𑀯𑀮𑁂𑀧𑀦𑀁 [𑀩𑀳𑀮𑀯𑀺𑀮𑁂𑀧𑀦𑀁 (𑀲𑁆𑀬𑀸. 𑀓.)] 𑀓𑀭𑀺𑀢𑁆𑀯𑀸 ¶ 𑀉𑀤𑁆𑀥𑀦𑀁 𑀆𑀭𑁄𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀤𑁂𑀣𑀸’𑀢𑀺. 𑀢𑁂 𑀫𑁂 ‘𑀲𑀸𑀥𑀽’𑀢𑀺 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀁 𑀧𑀼𑀭𑀺𑀲𑀁 𑀚𑀻𑀯𑀦𑁆𑀢𑀁𑀬𑁂𑀯 𑀓𑀼𑀫𑁆𑀪𑀺𑀬𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀼𑀔𑀁 𑀧𑀺𑀤𑀳𑀺𑀢𑁆𑀯𑀸 𑀅𑀮𑁆𑀮𑁂𑀦 𑀘𑀫𑁆𑀫𑁂𑀦 𑀑𑀦𑀦𑁆𑀥𑀺𑀢𑁆𑀯𑀸 𑀅𑀮𑁆𑀮𑀸𑀬 𑀫𑀢𑁆𑀢𑀺𑀓𑀸𑀬 𑀩𑀳𑀮𑀸𑀯𑀮𑁂𑀧𑀦𑀁 𑀓𑀭𑀺𑀢𑁆𑀯𑀸 𑀉𑀤𑁆𑀥𑀦𑀁 𑀆𑀭𑁄𑀧𑁂𑀢𑁆𑀯𑀸 𑀅𑀕𑁆𑀕𑀺𑀁 𑀤𑁂𑀦𑁆𑀢𑀺. 𑀬𑀤𑀸 𑀫𑀬𑀁 𑀚𑀸𑀦𑀸𑀫 ‘𑀓𑀸𑀮𑀗𑁆𑀓𑀢𑁄 𑀲𑁄 𑀧𑀼𑀭𑀺𑀲𑁄’𑀢𑀺, 𑀅𑀣 𑀦𑀁 𑀓𑀼𑀫𑁆𑀪𑀺𑀁 𑀑𑀭𑁄𑀧𑁂𑀢𑁆𑀯𑀸 𑀉𑀩𑁆𑀪𑀺𑀦𑁆𑀤𑀺𑀢𑁆𑀯𑀸 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀲𑀡𑀺𑀓𑀁 𑀦𑀺𑀮𑁆𑀮𑁄𑀓𑁂𑀫 [𑀯𑀺𑀮𑁄𑀓𑁂𑀫 (𑀲𑁆𑀬𑀸.)] 𑁋 ‘𑀅𑀧𑁆𑀧𑁂𑀯 𑀦𑀸𑀫𑀲𑁆𑀲 𑀚𑀻𑀯𑀁 𑀦𑀺𑀓𑁆𑀔𑀫𑀦𑁆𑀢𑀁 𑀧𑀲𑁆𑀲𑁂𑀬𑁆𑀬𑀸𑀫𑀸’𑀢𑀺. 𑀦𑁂𑀯𑀲𑁆𑀲 𑀫𑀬𑀁 𑀚𑀻𑀯𑀁 𑀦𑀺𑀓𑁆𑀔𑀫𑀦𑁆𑀢𑀁 𑀧𑀲𑁆𑀲𑀸𑀫. 𑀅𑀬𑀫𑁆𑀧𑀺 𑀔𑁄, 𑀪𑁄 𑀓𑀲𑁆𑀲𑀧, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑁂 𑀧𑀭𑀺𑀬𑀸𑀬𑁂𑀦 𑀏𑀯𑀁 𑀳𑁄𑀢𑀺 𑁋 ‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺.

𑀲𑀼𑀧𑀺𑀦𑀓𑀉𑀧𑀫𑀸

𑁪𑁨𑁨. ‘‘𑀢𑁂𑀦 ¶ 𑀳𑀺, 𑀭𑀸𑀚𑀜𑁆𑀜, 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀬𑀣𑀸 𑀢𑁂 𑀔𑀫𑁂𑀬𑁆𑀬, 𑀢𑀣𑀸 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀲𑀺. 𑀅𑀪𑀺𑀚𑀸𑀦𑀸𑀲𑀺 𑀦𑁄 𑀢𑁆𑀯𑀁, 𑀭𑀸𑀚𑀜𑁆𑀜, 𑀤𑀺𑀯𑀸 𑀲𑁂𑀬𑁆𑀬𑀁 𑀉𑀧𑀕𑀢𑁄 𑀲𑀼𑀧𑀺𑀦𑀓𑀁 𑀧𑀲𑁆𑀲𑀺𑀢𑀸 𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀓𑀁 𑀯𑀦𑀭𑀸𑀫𑀡𑁂𑀬𑁆𑀬𑀓𑀁 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓𑀁 𑀧𑁄𑀓𑁆𑀔𑀭𑀡𑀻𑀭𑀸𑀫𑀡𑁂𑀬𑁆𑀬𑀓’’𑀦𑁆𑀢𑀺? ‘‘𑀅𑀪𑀺𑀚𑀸𑀦𑀸𑀫𑀳𑀁, 𑀪𑁄 𑀓𑀲𑁆𑀲𑀧, 𑀤𑀺𑀯𑀸𑀲𑁂𑀬𑁆𑀬𑀁 𑀉𑀧𑀕𑀢𑁄 𑀲𑀼𑀧𑀺𑀦𑀓𑀁 𑀧𑀲𑁆𑀲𑀺𑀢𑀸 𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀓𑀁 𑀯𑀦𑀭𑀸𑀫𑀡𑁂𑀬𑁆𑀬𑀓𑀁 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓𑀁 𑀧𑁄𑀓𑁆𑀔𑀭𑀡𑀻𑀭𑀸𑀫𑀡𑁂𑀬𑁆𑀬𑀓’’𑀦𑁆𑀢𑀺. ‘‘𑀭𑀓𑁆𑀔𑀦𑁆𑀢𑀺 𑀢𑀁 ¶ 𑀢𑀫𑁆𑀳𑀺 𑀲𑀫𑀬𑁂 𑀔𑀼𑀚𑁆𑀚𑀸𑀧𑀺 ¶ 𑀯𑀸𑀫𑀦𑀓𑀸𑀧𑀺 𑀯𑁂𑀮𑀸𑀲𑀺𑀓𑀸𑀧𑀺 [𑀘𑁂𑀮𑀸𑀯𑀺𑀓𑀸𑀧𑀺 (𑀲𑁆𑀬𑀸.), 𑀓𑁂𑀴𑀸𑀬𑀺𑀓𑀸𑀧𑀺 (𑀲𑀻.)] 𑀓𑁄𑀫𑀸𑀭𑀺𑀓𑀸𑀧𑀻’’𑀢𑀺? ‘‘𑀏𑀯𑀁, 𑀪𑁄 𑀓𑀲𑁆𑀲𑀧, 𑀭𑀓𑁆𑀔𑀦𑁆𑀢𑀺 𑀫𑀁 𑀢𑀫𑁆𑀳𑀺 𑀲𑀫𑀬𑁂 𑀔𑀼𑀚𑁆𑀚𑀸𑀧𑀺 𑀯𑀸𑀫𑀦𑀓𑀸𑀧𑀺 𑀯𑁂𑀮𑀸𑀲𑀺𑀓𑀸𑀧𑀺 [𑀘𑁂𑀮𑀸𑀯𑀺𑀓𑀸𑀧𑀺 (𑀲𑁆𑀬𑀸.), 𑀓𑁂𑀴𑀸𑀬𑀺𑀓𑀸𑀧𑀺 (𑀲𑀻.)] 𑀓𑁄𑀫𑀸𑀭𑀺𑀓𑀸𑀧𑀻’’𑀢𑀺. ‘‘𑀅𑀧𑀺 𑀦𑀼 𑀢𑀸 𑀢𑀼𑀬𑁆𑀳𑀁 𑀚𑀻𑀯𑀁 𑀧𑀲𑁆𑀲𑀦𑁆𑀢𑀺 𑀧𑀯𑀺𑀲𑀦𑁆𑀢𑀁 𑀯𑀸 𑀦𑀺𑀓𑁆𑀔𑀫𑀦𑁆𑀢𑀁 𑀯𑀸’’𑀢𑀺? ‘‘𑀦𑁄 ¶ 𑀳𑀺𑀤𑀁, 𑀪𑁄 𑀓𑀲𑁆𑀲𑀧’’. ‘‘𑀢𑀸 𑀳𑀺 𑀦𑀸𑀫, 𑀭𑀸𑀚𑀜𑁆𑀜, 𑀢𑀼𑀬𑁆𑀳𑀁 𑀚𑀻𑀯𑀦𑁆𑀢𑀲𑁆𑀲 𑀚𑀻𑀯𑀦𑁆𑀢𑀺𑀬𑁄 𑀚𑀻𑀯𑀁 𑀦 𑀧𑀲𑁆𑀲𑀺𑀲𑁆𑀲𑀦𑁆𑀢𑀺 𑀧𑀯𑀺𑀲𑀦𑁆𑀢𑀁 𑀯𑀸 𑀦𑀺𑀓𑁆𑀔𑀫𑀦𑁆𑀢𑀁 𑀯𑀸. 𑀓𑀺𑀁 𑀧𑀦 𑀢𑁆𑀯𑀁 𑀓𑀸𑀮𑀗𑁆𑀓𑀢𑀲𑁆𑀲 𑀚𑀻𑀯𑀁 𑀧𑀲𑁆𑀲𑀺𑀲𑁆𑀲𑀲𑀺 𑀧𑀯𑀺𑀲𑀦𑁆𑀢𑀁 𑀯𑀸 𑀦𑀺𑀓𑁆𑀔𑀫𑀦𑁆𑀢𑀁 𑀯𑀸. 𑀇𑀫𑀺𑀦𑀸𑀧𑀺 𑀔𑁄 𑀢𑁂, 𑀭𑀸𑀚𑀜𑁆𑀜, 𑀧𑀭𑀺𑀬𑀸𑀬𑁂𑀦 𑀏𑀯𑀁 𑀳𑁄𑀢𑀼 𑁋 ‘‘𑀇𑀢𑀺𑀧𑀺 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺.

𑁪𑁨𑁩. ‘‘𑀓𑀺𑀜𑁆𑀘𑀸𑀧𑀺 𑀪𑀯𑀁 𑀓𑀲𑁆𑀲𑀧𑁄 𑀏𑀯𑀫𑀸𑀳, 𑀅𑀣 𑀔𑁄 𑀏𑀯𑀁 𑀫𑁂 𑀏𑀢𑁆𑀣 𑀳𑁄𑀢𑀺 𑁋 ‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺. ‘‘𑀅𑀢𑁆𑀣𑀺 𑀧𑀦, 𑀭𑀸𑀚𑀜𑁆𑀜, 𑀧𑀭𑀺𑀬𑀸𑀬𑁄…𑀧𑁂… ‘‘𑀅𑀢𑁆𑀣𑀺, 𑀪𑁄 𑀓𑀲𑁆𑀲𑀧, 𑀧𑀭𑀺𑀬𑀸𑀬𑁄…𑀧𑁂… 𑀬𑀣𑀸 𑀓𑀣𑀁 𑀯𑀺𑀬 𑀭𑀸𑀚𑀜𑁆𑀜𑀸’’𑀢𑀺? ‘‘𑀇𑀥 𑀫𑁂, 𑀪𑁄 𑀓𑀲𑁆𑀲𑀧, 𑀧𑀼𑀭𑀺𑀲𑀸 𑀘𑁄𑀭𑀁 𑀆𑀕𑀼𑀘𑀸𑀭𑀺𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀺 𑁋 ‘𑀅𑀬𑀁 𑀢𑁂, 𑀪𑀦𑁆𑀢𑁂, 𑀘𑁄𑀭𑁄 𑀆𑀕𑀼𑀘𑀸𑀭𑀻; 𑀇𑀫𑀲𑁆𑀲 𑀬𑀁 𑀇𑀘𑁆𑀙𑀲𑀺, 𑀢𑀁 𑀤𑀡𑁆𑀟𑀁 𑀧𑀡𑁂𑀳𑀻’𑀢𑀺. 𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀢𑁂𑀦 𑀳𑀺, 𑀪𑁄, 𑀇𑀫𑀁 𑀧𑀼𑀭𑀺𑀲𑀁 𑀚𑀻𑀯𑀦𑁆𑀢𑀁𑀬𑁂𑀯 𑀢𑀼𑀮𑀸𑀬 𑀢𑀼𑀮𑁂𑀢𑁆𑀯𑀸 𑀚𑀺𑀬𑀸𑀬 𑀅𑀦𑀲𑁆𑀲𑀸𑀲𑀓𑀁 𑀫𑀸𑀭𑁂𑀢𑁆𑀯𑀸 𑀧𑀼𑀦𑀤𑁂𑀯 𑀢𑀼𑀮𑀸𑀬 𑀢𑀼𑀮𑁂𑀣𑀸’𑀢𑀺. 𑀢𑁂 𑀫𑁂 ‘𑀲𑀸𑀥𑀽’𑀢𑀺 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀁 𑀧𑀼𑀭𑀺𑀲𑀁 𑀚𑀻𑀯𑀦𑁆𑀢𑀁𑀬𑁂𑀯 𑀢𑀼𑀮𑀸𑀬 𑀢𑀼𑀮𑁂𑀢𑁆𑀯𑀸 𑀚𑀺𑀬𑀸𑀬 𑀅𑀦𑀲𑁆𑀲𑀸𑀲𑀓𑀁 𑀫𑀸𑀭𑁂𑀢𑁆𑀯𑀸 𑀧𑀼𑀦𑀤𑁂𑀯 𑀢𑀼𑀮𑀸𑀬 𑀢𑀼𑀮𑁂𑀦𑁆𑀢𑀺. 𑀬𑀤𑀸 𑀲𑁄 𑀚𑀻𑀯𑀢𑀺, 𑀢𑀤𑀸 𑀮𑀳𑀼𑀢𑀭𑁄 𑀘 𑀳𑁄𑀢𑀺 𑀫𑀼𑀤𑀼𑀢𑀭𑁄 ¶ 𑀘 𑀓𑀫𑁆𑀫𑀜𑁆𑀜𑀢𑀭𑁄 𑀘. 𑀬𑀤𑀸 𑀧𑀦 𑀲𑁄 𑀓𑀸𑀮𑀗𑁆𑀓𑀢𑁄 𑀳𑁄𑀢𑀺 𑀢𑀤𑀸 𑀕𑀭𑀼𑀢𑀭𑁄 𑀘 𑀳𑁄𑀢𑀺 𑀧𑀢𑁆𑀣𑀺𑀦𑁆𑀦𑀢𑀭𑁄 𑀘 𑀅𑀓𑀫𑁆𑀫𑀜𑁆𑀜𑀢𑀭𑁄 𑀘. 𑀅𑀬𑀫𑁆𑀧𑀺 𑀔𑁄, 𑀪𑁄 𑀓𑀲𑁆𑀲𑀧, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑁂 𑀧𑀭𑀺𑀬𑀸𑀬𑁂𑀦 𑀏𑀯𑀁 𑀳𑁄𑀢𑀺 𑁋 ‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺.

𑀲𑀦𑁆𑀢𑀢𑁆𑀢𑀅𑀬𑁄𑀕𑀼𑀴𑀉𑀧𑀫𑀸

𑁪𑁨𑁪. ‘‘𑀢𑁂𑀦 ¶ 𑀳𑀺, 𑀭𑀸𑀚𑀜𑁆𑀜, 𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺. 𑀉𑀧𑀫𑀸𑀬 𑀫𑀺𑀥𑁂𑀓𑀘𑁆𑀘𑁂 ¶ 𑀯𑀺𑀜𑁆𑀜𑀽 𑀧𑀼𑀭𑀺𑀲𑀸 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀭𑀸𑀚𑀜𑁆𑀜, 𑀧𑀼𑀭𑀺𑀲𑁄 𑀤𑀺𑀯𑀲𑀁 𑀲𑀦𑁆𑀢𑀢𑁆𑀢𑀁 ¶ 𑀅𑀬𑁄𑀕𑀼𑀴𑀁 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁 𑀢𑀼𑀮𑀸𑀬 𑀢𑀼𑀮𑁂𑀬𑁆𑀬. 𑀢𑀫𑁂𑀦𑀁 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀻𑀢𑀁 𑀦𑀺𑀩𑁆𑀩𑀼𑀢𑀁 𑀢𑀼𑀮𑀸𑀬 𑀢𑀼𑀮𑁂𑀬𑁆𑀬. 𑀓𑀤𑀸 𑀦𑀼 𑀔𑁄 𑀲𑁄 𑀅𑀬𑁄𑀕𑀼𑀴𑁄 𑀮𑀳𑀼𑀢𑀭𑁄 𑀯𑀸 𑀳𑁄𑀢𑀺 𑀫𑀼𑀤𑀼𑀢𑀭𑁄 𑀯𑀸 𑀓𑀫𑁆𑀫𑀜𑁆𑀜𑀢𑀭𑁄 𑀯𑀸, 𑀬𑀤𑀸 𑀯𑀸 𑀆𑀤𑀺𑀢𑁆𑀢𑁄 𑀲𑀫𑁆𑀧𑀚𑁆𑀚𑀮𑀺𑀢𑁄 𑀲𑀚𑁄𑀢𑀺𑀪𑀽𑀢𑁄, 𑀬𑀤𑀸 𑀯𑀸 𑀲𑀻𑀢𑁄 𑀦𑀺𑀩𑁆𑀩𑀼𑀢𑁄’’𑀢𑀺? ‘‘𑀬𑀤𑀸 𑀲𑁄, 𑀪𑁄 𑀓𑀲𑁆𑀲𑀧, 𑀅𑀬𑁄𑀕𑀼𑀴𑁄 𑀢𑁂𑀚𑁄𑀲𑀳𑀕𑀢𑁄 𑀘 𑀳𑁄𑀢𑀺 𑀯𑀸𑀬𑁄𑀲𑀳𑀕𑀢𑁄 𑀘 𑀆𑀤𑀺𑀢𑁆𑀢𑁄 𑀲𑀫𑁆𑀧𑀚𑁆𑀚𑀮𑀺𑀢𑁄 𑀲𑀚𑁄𑀢𑀺𑀪𑀽𑀢𑁄, 𑀢𑀤𑀸 𑀮𑀳𑀼𑀢𑀭𑁄 𑀘 𑀳𑁄𑀢𑀺 𑀫𑀼𑀤𑀼𑀢𑀭𑁄 𑀘 𑀓𑀫𑁆𑀫𑀜𑁆𑀜𑀢𑀭𑁄 𑀘. 𑀬𑀤𑀸 𑀧𑀦 𑀲𑁄 𑀅𑀬𑁄𑀕𑀼𑀴𑁄 𑀦𑁂𑀯 𑀢𑁂𑀚𑁄𑀲𑀳𑀕𑀢𑁄 𑀳𑁄𑀢𑀺 𑀦 𑀯𑀸𑀬𑁄𑀲𑀳𑀕𑀢𑁄 𑀲𑀻𑀢𑁄 𑀦𑀺𑀩𑁆𑀩𑀼𑀢𑁄, 𑀢𑀤𑀸 𑀕𑀭𑀼𑀢𑀭𑁄 𑀘 𑀳𑁄𑀢𑀺 𑀧𑀢𑁆𑀣𑀺𑀦𑁆𑀦𑀢𑀭𑁄 𑀘 𑀅𑀓𑀫𑁆𑀫𑀜𑁆𑀜𑀢𑀭𑁄 𑀘𑀸’’𑀢𑀺. ‘‘𑀏𑀯𑀫𑁂𑀯 𑀔𑁄, 𑀭𑀸𑀚𑀜𑁆𑀜, 𑀬𑀤𑀸𑀬𑀁 𑀓𑀸𑀬𑁄 𑀆𑀬𑀼𑀲𑀳𑀕𑀢𑁄 𑀘 𑀳𑁄𑀢𑀺 𑀉𑀲𑁆𑀫𑀸𑀲𑀳𑀕𑀢𑁄 𑀘 𑀯𑀺𑀜𑁆𑀜𑀸𑀡𑀲𑀳𑀕𑀢𑁄 𑀘, 𑀢𑀤𑀸 𑀮𑀳𑀼𑀢𑀭𑁄 𑀘 𑀳𑁄𑀢𑀺 𑀫𑀼𑀤𑀼𑀢𑀭𑁄 𑀘 𑀓𑀫𑁆𑀫𑀜𑁆𑀜𑀢𑀭𑁄 𑀘. 𑀬𑀤𑀸 𑀧𑀦𑀸𑀬𑀁 𑀓𑀸𑀬𑁄 𑀦𑁂𑀯 𑀆𑀬𑀼𑀲𑀳𑀕𑀢𑁄 𑀳𑁄𑀢𑀺 𑀦 𑀉𑀲𑁆𑀫𑀸𑀲𑀳𑀕𑀢𑁄 𑀦 𑀯𑀺𑀜𑁆𑀜𑀸𑀡𑀲𑀳𑀕𑀢𑁄 𑀢𑀤𑀸 ¶ 𑀕𑀭𑀼𑀢𑀭𑁄 𑀘 𑀳𑁄𑀢𑀺 𑀧𑀢𑁆𑀣𑀺𑀦𑁆𑀦𑀢𑀭𑁄 𑀘 𑀅𑀓𑀫𑁆𑀫𑀜𑁆𑀜𑀢𑀭𑁄 𑀘. 𑀇𑀫𑀺𑀦𑀸𑀧𑀺 𑀔𑁄 𑀢𑁂, 𑀭𑀸𑀚𑀜𑁆𑀜, 𑀧𑀭𑀺𑀬𑀸𑀬𑁂𑀦 𑀏𑀯𑀁 𑀳𑁄𑀢𑀼 𑁋 ‘𑀇𑀢𑀺𑀧𑀺 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺.

𑁪𑁨𑁫. ‘‘𑀓𑀺𑀜𑁆𑀘𑀸𑀧𑀺 𑀪𑀯𑀁 𑀓𑀲𑁆𑀲𑀧𑁄 𑀏𑀯𑀫𑀸𑀳, 𑀅𑀣 𑀔𑁄 𑀏𑀯𑀁 𑀫𑁂 𑀏𑀢𑁆𑀣 𑀳𑁄𑀢𑀺 𑁋 ‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺. ‘‘𑀅𑀢𑁆𑀣𑀺 𑀧𑀦, 𑀭𑀸𑀚𑀜𑁆𑀜, 𑀧𑀭𑀺𑀬𑀸𑀬𑁄…𑀧𑁂… 𑀅𑀢𑁆𑀣𑀺, 𑀪𑁄 𑀓𑀲𑁆𑀲𑀧, 𑀧𑀭𑀺𑀬𑀸𑀬𑁄…𑀧𑁂… 𑀬𑀣𑀸 𑀓𑀣𑀁 𑀯𑀺𑀬 𑀭𑀸𑀚𑀜𑁆𑀜𑀸’’𑀢𑀺? ‘‘𑀇𑀥 𑀫𑁂, 𑀪𑁄 𑀓𑀲𑁆𑀲𑀧, 𑀧𑀼𑀭𑀺𑀲𑀸 𑀘𑁄𑀭𑀁 𑀆𑀕𑀼𑀘𑀸𑀭𑀺𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀺 𑁋 ‘𑀅𑀬𑀁 𑀢𑁂, 𑀪𑀦𑁆𑀢𑁂, 𑀘𑁄𑀭𑁄 𑀆𑀕𑀼𑀘𑀸𑀭𑀻; 𑀇𑀫𑀲𑁆𑀲 𑀬𑀁 𑀇𑀘𑁆𑀙𑀲𑀺 ¶ , 𑀢𑀁 𑀤𑀡𑁆𑀟𑀁 𑀧𑀡𑁂𑀳𑀻’𑀢𑀺. 𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀢𑁂𑀦 𑀳𑀺, 𑀪𑁄, 𑀇𑀫𑀁 𑀧𑀼𑀭𑀺𑀲𑀁 𑀅𑀦𑀼𑀧𑀳𑀘𑁆𑀘 𑀙𑀯𑀺𑀜𑁆𑀘 𑀘𑀫𑁆𑀫𑀜𑁆𑀘 𑀫𑀁𑀲𑀜𑁆𑀘 𑀦𑁆𑀳𑀸𑀭𑀼𑀜𑁆𑀘 𑀅𑀝𑁆𑀞𑀺𑀜𑁆𑀘 𑀅𑀝𑁆𑀞𑀺𑀫𑀺𑀜𑁆𑀚𑀜𑁆𑀘 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀣, 𑀅𑀧𑁆𑀧𑁂𑀯 𑀦𑀸𑀫𑀲𑁆𑀲 𑀚𑀻𑀯𑀁 𑀦𑀺𑀓𑁆𑀔𑀫𑀦𑁆𑀢𑀁 𑀧𑀲𑁆𑀲𑁂𑀬𑁆𑀬𑀸𑀫𑀸’𑀢𑀺. 𑀢𑁂 𑀫𑁂 ‘𑀲𑀸𑀥𑀽’𑀢𑀺 𑀧𑀝𑀺𑀲𑁆𑀲𑀼𑀢𑁆𑀯𑀸 𑀢𑀁 𑀧𑀼𑀭𑀺𑀲𑀁 𑀅𑀦𑀼𑀧𑀳𑀘𑁆𑀘 𑀙𑀯𑀺𑀜𑁆𑀘…𑀧𑁂… 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀺. 𑀬𑀤𑀸 𑀲𑁄 𑀆𑀫𑀢𑁄 𑀳𑁄𑀢𑀺, 𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀢𑁂𑀦 𑀳𑀺, 𑀪𑁄, 𑀇𑀫𑀁 𑀧𑀼𑀭𑀺𑀲𑀁 𑀉𑀢𑁆𑀢𑀸𑀦𑀁 𑀦𑀺𑀧𑀸𑀢𑁂𑀣, 𑀅𑀧𑁆𑀧𑁂𑀯 𑀦𑀸𑀫𑀲𑁆𑀲 𑀚𑀻𑀯𑀁 𑀦𑀺𑀓𑁆𑀔𑀫𑀦𑁆𑀢𑀁 𑀧𑀲𑁆𑀲𑁂𑀬𑁆𑀬𑀸𑀫𑀸’𑀢𑀺. 𑀢𑁂 𑀢𑀁 𑀧𑀼𑀭𑀺𑀲𑀁 𑀉𑀢𑁆𑀢𑀸𑀦𑀁 𑀦𑀺𑀧𑀸𑀢𑁂𑀦𑁆𑀢𑀺. 𑀦𑁂𑀯𑀲𑁆𑀲 𑀫𑀬𑀁 𑀚𑀻𑀯𑀁 𑀦𑀺𑀓𑁆𑀔𑀫𑀦𑁆𑀢𑀁 𑀧𑀲𑁆𑀲𑀸𑀫. 𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀢𑁂𑀦 𑀳𑀺, 𑀪𑁄, 𑀇𑀫𑀁 𑀧𑀼𑀭𑀺𑀲𑀁 𑀅𑀯𑀓𑀼𑀚𑁆𑀚𑀁 𑀦𑀺𑀧𑀸𑀢𑁂𑀣… 𑀧𑀲𑁆𑀲𑁂𑀦 𑀦𑀺𑀧𑀸𑀢𑁂𑀣… 𑀤𑀼𑀢𑀺𑀬𑁂𑀦 𑀧𑀲𑁆𑀲𑁂𑀦 ¶ ¶ 𑀦𑀺𑀧𑀸𑀢𑁂𑀣… 𑀉𑀤𑁆𑀥𑀁 𑀞𑀧𑁂𑀣… 𑀑𑀫𑀼𑀤𑁆𑀥𑀓𑀁 𑀞𑀧𑁂𑀣… 𑀧𑀸𑀡𑀺𑀦𑀸 𑀆𑀓𑁄𑀝𑁂𑀣… 𑀮𑁂𑀟𑁆𑀟𑀼𑀦𑀸 𑀆𑀓𑁄𑀝𑁂𑀣… 𑀤𑀡𑁆𑀟𑁂𑀦 𑀆𑀓𑁄𑀝𑁂𑀣… 𑀲𑀢𑁆𑀣𑁂𑀦 𑀆𑀓𑁄𑀝𑁂𑀣… 𑀑𑀥𑀼𑀦𑀸𑀣 𑀲𑀦𑁆𑀥𑀼𑀦𑀸𑀣 ¶ 𑀦𑀺𑀤𑁆𑀥𑀼𑀦𑀸𑀣, 𑀅𑀧𑁆𑀧𑁂𑀯 𑀦𑀸𑀫𑀲𑁆𑀲 𑀚𑀻𑀯𑀁 𑀦𑀺𑀓𑁆𑀔𑀫𑀦𑁆𑀢𑀁 𑀧𑀲𑁆𑀲𑁂𑀬𑁆𑀬𑀸𑀫𑀸’𑀢𑀺. 𑀢𑁂 𑀢𑀁 𑀧𑀼𑀭𑀺𑀲𑀁 𑀑𑀥𑀼𑀦𑀦𑁆𑀢𑀺 𑀲𑀦𑁆𑀥𑀼𑀦𑀦𑁆𑀢𑀺 𑀦𑀺𑀤𑁆𑀥𑀼𑀦𑀦𑁆𑀢𑀺. 𑀦𑁂𑀯𑀲𑁆𑀲 𑀫𑀬𑀁 𑀚𑀻𑀯𑀁 𑀦𑀺𑀓𑁆𑀔𑀫𑀦𑁆𑀢𑀁 𑀧𑀲𑁆𑀲𑀸𑀫. 𑀢𑀲𑁆𑀲 𑀢𑀤𑁂𑀯 𑀘𑀓𑁆𑀔𑀼 𑀳𑁄𑀢𑀺 𑀢𑁂 𑀭𑀽𑀧𑀸, 𑀢𑀜𑁆𑀘𑀸𑀬𑀢𑀦𑀁 𑀦𑀧𑁆𑀧𑀝𑀺𑀲𑀁𑀯𑁂𑀤𑁂𑀢𑀺. 𑀢𑀤𑁂𑀯 𑀲𑁄𑀢𑀁 𑀳𑁄𑀢𑀺 𑀢𑁂 𑀲𑀤𑁆𑀤𑀸, 𑀢𑀜𑁆𑀘𑀸𑀬𑀢𑀦𑀁 𑀦𑀧𑁆𑀧𑀝𑀺𑀲𑀁𑀯𑁂𑀤𑁂𑀢𑀺. 𑀢𑀤𑁂𑀯 𑀖𑀸𑀦𑀁 𑀳𑁄𑀢𑀺 𑀢𑁂 𑀕𑀦𑁆𑀥𑀸, 𑀢𑀜𑁆𑀘𑀸𑀬𑀢𑀦𑀁 𑀦𑀧𑁆𑀧𑀝𑀺𑀲𑀁𑀯𑁂𑀤𑁂𑀢𑀺 ¶ . 𑀲𑀸𑀯 𑀚𑀺𑀯𑁆𑀳𑀸 𑀳𑁄𑀢𑀺 𑀢𑁂 𑀭𑀲𑀸, 𑀢𑀜𑁆𑀘𑀸𑀬𑀢𑀦𑀁 𑀦𑀧𑁆𑀧𑀝𑀺𑀲𑀁𑀯𑁂𑀤𑁂𑀢𑀺. 𑀲𑁆𑀯𑁂𑀯 𑀓𑀸𑀬𑁄 𑀳𑁄𑀢𑀺 𑀢𑁂 𑀨𑁄𑀝𑁆𑀞𑀩𑁆𑀩𑀸, 𑀢𑀜𑁆𑀘𑀸𑀬𑀢𑀦𑀁 𑀦𑀧𑁆𑀧𑀝𑀺𑀲𑀁𑀯𑁂𑀤𑁂𑀢𑀺. 𑀅𑀬𑀫𑁆𑀧𑀺 𑀔𑁄, 𑀪𑁄 𑀓𑀲𑁆𑀲𑀧, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑁂 𑀧𑀭𑀺𑀬𑀸𑀬𑁂𑀦 𑀏𑀯𑀁 𑀳𑁄𑀢𑀺 𑁋 ‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺.

𑀲𑀗𑁆𑀔𑀥𑀫𑀉𑀧𑀫𑀸

𑁪𑁨𑁬. ‘‘𑀢𑁂𑀦 𑀳𑀺, 𑀭𑀸𑀚𑀜𑁆𑀜, 𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺. 𑀉𑀧𑀫𑀸𑀬 𑀫𑀺𑀥𑁂𑀓𑀘𑁆𑀘𑁂 𑀯𑀺𑀜𑁆𑀜𑀽 𑀧𑀼𑀭𑀺𑀲𑀸 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀦𑁆𑀢𑀺. 𑀪𑀽𑀢𑀧𑀼𑀩𑁆𑀩𑀁, 𑀭𑀸𑀚𑀜𑁆𑀜, 𑀅𑀜𑁆𑀜𑀢𑀭𑁄 𑀲𑀗𑁆𑀔𑀥𑀫𑁄 𑀲𑀗𑁆𑀔𑀁 𑀆𑀤𑀸𑀬 𑀧𑀘𑁆𑀘𑀦𑁆𑀢𑀺𑀫𑀁 𑀚𑀦𑀧𑀤𑀁 𑀅𑀕𑀫𑀸𑀲𑀺. 𑀲𑁄 𑀬𑁂𑀦 𑀅𑀜𑁆𑀜𑀢𑀭𑁄 𑀕𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀚𑁆𑀛𑁂 𑀕𑀸𑀫𑀲𑁆𑀲 𑀞𑀺𑀢𑁄 𑀢𑀺𑀓𑁆𑀔𑀢𑁆𑀢𑀼𑀁 𑀲𑀗𑁆𑀔𑀁 𑀉𑀧𑀮𑀸𑀧𑁂𑀢𑁆𑀯𑀸 𑀲𑀗𑁆𑀔𑀁 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀔𑁄, 𑀭𑀸𑀚𑀜𑁆𑀜, 𑀢𑁂𑀲𑀁 𑀧𑀘𑁆𑀘𑀦𑁆𑀢𑀚𑀦𑀧𑀤𑀸𑀦𑀁 [𑀧𑀘𑁆𑀘𑀦𑁆𑀢𑀚𑀸𑀦𑀁 (𑀲𑀻.)] 𑀫𑀦𑀼𑀲𑁆𑀲𑀸𑀦𑀁 𑀏𑀢𑀤𑀳𑁄𑀲𑀺 ¶ 𑁋 ‘𑀅𑀫𑁆𑀪𑁄 𑀓𑀲𑁆𑀲 𑀦𑀼 𑀔𑁄 [𑀏𑀢𑀤𑀳𑁄𑀲𑀺 ‘‘𑀓𑀺𑀲𑁆𑀲 𑀤𑀼𑀔𑁄 (𑀧𑀻.)] 𑀏𑀲𑁄 𑀲𑀤𑁆𑀤𑁄 𑀏𑀯𑀁𑀭𑀚𑀦𑀻𑀬𑁄 𑀏𑀯𑀁𑀓𑀫𑀦𑀻𑀬𑁄 𑀏𑀯𑀁𑀫𑀤𑀦𑀻𑀬𑁄 𑀏𑀯𑀁𑀩𑀦𑁆𑀥𑀦𑀻𑀬𑁄 𑀏𑀯𑀁𑀫𑀼𑀘𑁆𑀙𑀦𑀻𑀬𑁄’𑀢𑀺. 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀢𑀁 𑀲𑀗𑁆𑀔𑀥𑀫𑀁 𑀏𑀢𑀤𑀯𑁄𑀘𑀼𑀁 𑁋 ‘𑀅𑀫𑁆𑀪𑁄, 𑀓𑀲𑁆𑀲 𑀦𑀼 𑀔𑁄 𑀏𑀲𑁄 𑀲𑀤𑁆𑀤𑁄 𑀏𑀯𑀁𑀭𑀚𑀦𑀻𑀬𑁄 𑀏𑀯𑀁𑀓𑀫𑀦𑀻𑀬𑁄 𑀏𑀯𑀁𑀫𑀤𑀦𑀻𑀬𑁄 𑀏𑀯𑀁𑀩𑀦𑁆𑀥𑀦𑀻𑀬𑁄 𑀏𑀯𑀁𑀫𑀼𑀘𑁆𑀙𑀦𑀻𑀬𑁄’𑀢𑀺. ‘𑀏𑀲𑁄 𑀔𑁄, 𑀪𑁄, 𑀲𑀗𑁆𑀔𑁄 𑀦𑀸𑀫 𑀬𑀲𑁆𑀲𑁂𑀲𑁄 𑀲𑀤𑁆𑀤𑁄 𑀏𑀯𑀁𑀭𑀚𑀦𑀻𑀬𑁄 𑀏𑀯𑀁𑀓𑀫𑀦𑀻𑀬𑁄 𑀏𑀯𑀁𑀫𑀤𑀦𑀻𑀬𑁄 𑀏𑀯𑀁𑀩𑀦𑁆𑀥𑀦𑀻𑀬𑁄 𑀏𑀯𑀁𑀫𑀼𑀘𑁆𑀙𑀦𑀻𑀬𑁄’𑀢𑀺. 𑀢𑁂 𑀢𑀁 𑀲𑀗𑁆𑀔𑀁 𑀉𑀢𑁆𑀢𑀸𑀦𑀁 𑀦𑀺𑀧𑀸𑀢𑁂𑀲𑀼𑀁 𑁋 ‘𑀯𑀤𑁂𑀳𑀺, 𑀪𑁄 𑀲𑀗𑁆𑀔, 𑀯𑀤𑁂𑀳𑀺, 𑀪𑁄 𑀲𑀗𑁆𑀔𑀸’𑀢𑀺. 𑀦𑁂𑀯 𑀲𑁄 𑀲𑀗𑁆𑀔𑁄 𑀲𑀤𑁆𑀤𑀫𑀓𑀸𑀲𑀺. 𑀢𑁂 𑀢𑀁 𑀲𑀗𑁆𑀔𑀁 𑀅𑀯𑀓𑀼𑀚𑁆𑀚𑀁 𑀦𑀺𑀧𑀸𑀢𑁂𑀲𑀼𑀁, 𑀧𑀲𑁆𑀲𑁂𑀦 𑀦𑀺𑀧𑀸𑀢𑁂𑀲𑀼𑀁, 𑀤𑀼𑀢𑀺𑀬𑁂𑀦 𑀧𑀲𑁆𑀲𑁂𑀦 𑀦𑀺𑀧𑀸𑀢𑁂𑀲𑀼𑀁, 𑀉𑀤𑁆𑀥𑀁 𑀞𑀧𑁂𑀲𑀼𑀁, 𑀑𑀫𑀼𑀤𑁆𑀥𑀓𑀁 𑀞𑀧𑁂𑀲𑀼𑀁, 𑀧𑀸𑀡𑀺𑀦𑀸 ¶ 𑀆𑀓𑁄𑀝𑁂𑀲𑀼𑀁, 𑀮𑁂𑀟𑁆𑀟𑀼𑀦𑀸 𑀆𑀓𑁄𑀝𑁂𑀲𑀼𑀁, 𑀤𑀡𑁆𑀟𑁂𑀦 𑀆𑀓𑁄𑀝𑁂𑀲𑀼𑀁, 𑀲𑀢𑁆𑀣𑁂𑀦 𑀆𑀓𑁄𑀝𑁂𑀲𑀼𑀁, 𑀑𑀥𑀼𑀦𑀺𑀁𑀲𑀼 ¶ 𑀲𑀦𑁆𑀥𑀼𑀦𑀺𑀁𑀲𑀼 𑀦𑀺𑀤𑁆𑀥𑀼𑀦𑀺𑀁𑀲𑀼 𑁋 ‘𑀯𑀤𑁂𑀳𑀺, 𑀪𑁄 𑀲𑀗𑁆𑀔, 𑀯𑀤𑁂𑀳𑀺, 𑀪𑁄 𑀲𑀗𑁆𑀔𑀸’𑀢𑀺. 𑀦𑁂𑀯 𑀲𑁄 𑀲𑀗𑁆𑀔𑁄 𑀲𑀤𑁆𑀤𑀫𑀓𑀸𑀲𑀺.

‘‘𑀅𑀣 𑀔𑁄, 𑀭𑀸𑀚𑀜𑁆𑀜, 𑀢𑀲𑁆𑀲 𑀲𑀗𑁆𑀔𑀥𑀫𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀬𑀸𑀯 𑀩𑀸𑀮𑀸 𑀇𑀫𑁂 𑀧𑀘𑁆𑀘𑀦𑁆𑀢𑀚𑀦𑀧𑀤𑀸𑀫𑀦𑀼𑀲𑁆𑀲𑀸, 𑀓𑀣𑀜𑁆𑀳𑀺 𑀦𑀸𑀫 𑀅𑀬𑁄𑀦𑀺𑀲𑁄 𑀲𑀗𑁆𑀔𑀲𑀤𑁆𑀤𑀁 𑀕𑀯𑁂𑀲𑀺𑀲𑁆𑀲𑀦𑁆𑀢𑀻’𑀢𑀺. 𑀢𑁂𑀲𑀁 𑀧𑁂𑀓𑁆𑀔𑀫𑀸𑀦𑀸𑀦𑀁 𑀲𑀗𑁆𑀔𑀁 𑀕𑀳𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀗𑁆𑀔𑀁 𑀉𑀧𑀮𑀸𑀧𑁂𑀢𑁆𑀯𑀸 𑀲𑀗𑁆𑀔𑀁 𑀆𑀤𑀸𑀬 𑀧𑀓𑁆𑀓𑀸𑀫𑀺. 𑀅𑀣 𑀔𑁄, 𑀭𑀸𑀚𑀜𑁆𑀜, 𑀢𑁂𑀲𑀁 𑀧𑀘𑁆𑀘𑀦𑁆𑀢𑀚𑀦𑀧𑀤𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘𑀬𑀤𑀸 𑀓𑀺𑀭, 𑀪𑁄, 𑀅𑀬𑀁 𑀲𑀗𑁆𑀔𑁄 𑀦𑀸𑀫 𑀧𑀼𑀭𑀺𑀲𑀲𑀳𑀕𑀢𑁄 ¶ 𑀘 𑀳𑁄𑀢𑀺 𑀯𑀸𑀬𑀸𑀫𑀲𑀳𑀕𑀢𑁄 [𑀯𑀸𑀬𑁄𑀲𑀳𑀕𑀢𑁄 (𑀲𑁆𑀬𑀸.)] 𑀘 𑀯𑀸𑀬𑀼𑀲𑀳𑀕𑀢𑁄 𑀘, 𑀢𑀤𑀸𑀬𑀁 𑀲𑀗𑁆𑀔𑁄 𑀲𑀤𑁆𑀤𑀁 𑀓𑀭𑁄𑀢𑀺, 𑀬𑀤𑀸 𑀧𑀦𑀸𑀬𑀁 𑀲𑀗𑁆𑀔𑁄 𑀦𑁂𑀯 𑀧𑀼𑀭𑀺𑀲𑀲𑀳𑀕𑀢𑁄 𑀳𑁄𑀢𑀺 𑀦 𑀯𑀸𑀬𑀸𑀫𑀲𑀳𑀕𑀢𑁄 𑀦 𑀯𑀸𑀬𑀼𑀲𑀳𑀕𑀢𑁄, 𑀦𑀸𑀬𑀁 𑀲𑀗𑁆𑀔𑁄 𑀲𑀤𑁆𑀤𑀁 𑀓𑀭𑁄𑀢𑀻’𑀢𑀺 ¶ . 𑀏𑀯𑀫𑁂𑀯 𑀔𑁄, 𑀭𑀸𑀚𑀜𑁆𑀜, 𑀬𑀤𑀸𑀬𑀁 𑀓𑀸𑀬𑁄 𑀆𑀬𑀼𑀲𑀳𑀕𑀢𑁄 𑀘 𑀳𑁄𑀢𑀺 𑀉𑀲𑁆𑀫𑀸𑀲𑀳𑀕𑀢𑁄 𑀘 𑀯𑀺𑀜𑁆𑀜𑀸𑀡𑀲𑀳𑀕𑀢𑁄 𑀘, 𑀢𑀤𑀸 𑀅𑀪𑀺𑀓𑁆𑀓𑀫𑀢𑀺𑀧𑀺 𑀧𑀝𑀺𑀓𑁆𑀓𑀫𑀢𑀺𑀧𑀺 𑀢𑀺𑀝𑁆𑀞𑀢𑀺𑀧𑀺 𑀦𑀺𑀲𑀻𑀤𑀢𑀺𑀧𑀺 𑀲𑁂𑀬𑁆𑀬𑀫𑁆𑀧𑀺 𑀓𑀧𑁆𑀧𑁂𑀢𑀺, 𑀘𑀓𑁆𑀔𑀼𑀦𑀸𑀧𑀺 𑀭𑀽𑀧𑀁 𑀧𑀲𑁆𑀲𑀢𑀺, 𑀲𑁄𑀢𑁂𑀦𑀧𑀺 𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀖𑀸𑀦𑁂𑀦𑀧𑀺 𑀕𑀦𑁆𑀥𑀁 𑀖𑀸𑀬𑀢𑀺, 𑀚𑀺𑀯𑁆𑀳𑀸𑀬𑀧𑀺 𑀭𑀲𑀁 𑀲𑀸𑀬𑀢𑀺, 𑀓𑀸𑀬𑁂𑀦𑀧𑀺 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀢𑀺, 𑀫𑀦𑀲𑀸𑀧𑀺 𑀥𑀫𑁆𑀫𑀁 𑀯𑀺𑀚𑀸𑀦𑀸𑀢𑀺. 𑀬𑀤𑀸 𑀧𑀦𑀸𑀬𑀁 𑀓𑀸𑀬𑁄 𑀦𑁂𑀯 𑀆𑀬𑀼𑀲𑀳𑀕𑀢𑁄 𑀳𑁄𑀢𑀺, 𑀦 𑀉𑀲𑁆𑀫𑀸𑀲𑀳𑀕𑀢𑁄, 𑀦 𑀯𑀺𑀜𑁆𑀜𑀸𑀡𑀲𑀳𑀕𑀢𑁄, 𑀢𑀤𑀸 𑀦𑁂𑀯 𑀅𑀪𑀺𑀓𑁆𑀓𑀫𑀢𑀺 𑀦 𑀧𑀝𑀺𑀓𑁆𑀓𑀫𑀢𑀺 𑀦 𑀢𑀺𑀝𑁆𑀞𑀢𑀺 𑀦 𑀦𑀺𑀲𑀻𑀤𑀢𑀺 𑀦 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀘𑀓𑁆𑀔𑀼𑀦𑀸𑀧𑀺 𑀭𑀽𑀧𑀁 𑀦 𑀧𑀲𑁆𑀲𑀢𑀺, 𑀲𑁄𑀢𑁂𑀦𑀧𑀺 𑀲𑀤𑁆𑀤𑀁 𑀦 𑀲𑀼𑀡𑀸𑀢𑀺, 𑀖𑀸𑀦𑁂𑀦𑀧𑀺 𑀕𑀦𑁆𑀥𑀁 𑀦 𑀖𑀸𑀬𑀢𑀺, 𑀚𑀺𑀯𑁆𑀳𑀸𑀬𑀧𑀺 𑀭𑀲𑀁 𑀦 𑀲𑀸𑀬𑀢𑀺, 𑀓𑀸𑀬𑁂𑀦𑀧𑀺 𑀨𑁄𑀝𑁆𑀞𑀩𑁆𑀩𑀁 𑀦 𑀨𑀼𑀲𑀢𑀺, 𑀫𑀦𑀲𑀸𑀧𑀺 𑀥𑀫𑁆𑀫𑀁 𑀦 𑀯𑀺𑀚𑀸𑀦𑀸𑀢𑀺. 𑀇𑀫𑀺𑀦𑀸𑀧𑀺 𑀔𑁄 𑀢𑁂, 𑀭𑀸𑀚𑀜𑁆𑀜, 𑀧𑀭𑀺𑀬𑀸𑀬𑁂𑀦 𑀏𑀯𑀁 𑀳𑁄𑀢𑀼 𑁋 ‘𑀇𑀢𑀺𑀧𑀺 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀅𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀅𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’𑀢𑀺 [𑀯𑀺𑀧𑀸𑀓𑁄𑀢𑀺, 𑀧𑀞𑀫𑀪𑀸𑀡𑀯𑀸𑀭𑀁 (𑀲𑁆𑀬𑀸.)].

𑁪𑁨𑁭. ‘‘𑀓𑀺𑀜𑁆𑀘𑀸𑀧𑀺 𑀪𑀯𑀁 𑀓𑀲𑁆𑀲𑀧𑁄 𑀏𑀯𑀫𑀸𑀳, 𑀅𑀣 𑀔𑁄 𑀏𑀯𑀁 ¶ 𑀫𑁂 𑀏𑀢𑁆𑀣 𑀳𑁄𑀢𑀺 𑁋 ‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺. ‘‘𑀅𑀢𑁆𑀣𑀺 𑀧𑀦, 𑀭𑀸𑀚𑀜𑁆𑀜, 𑀧𑀭𑀺𑀬𑀸𑀬𑁄…𑀧𑁂… 𑀅𑀢𑁆𑀣𑀺, 𑀪𑁄 𑀓𑀲𑁆𑀲𑀧, 𑀧𑀭𑀺𑀬𑀸𑀬𑁄…𑀧𑁂… 𑀬𑀣𑀸 𑀓𑀣𑀁 𑀯𑀺𑀬 𑀭𑀸𑀚𑀜𑁆𑀜𑀸’’𑀢𑀺? ‘‘𑀇𑀥 𑀫𑁂, 𑀪𑁄 𑀓𑀲𑁆𑀲𑀧, 𑀧𑀼𑀭𑀺𑀲𑀸 𑀘𑁄𑀭𑀁 𑀆𑀕𑀼𑀘𑀸𑀭𑀺𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀺 𑁋 ‘𑀅𑀬𑀁 𑀢𑁂, 𑀪𑀦𑁆𑀢𑁂, 𑀘𑁄𑀭𑁄 𑀆𑀕𑀼𑀘𑀸𑀭𑀻, 𑀇𑀫𑀲𑁆𑀲 𑀬𑀁 𑀇𑀘𑁆𑀙𑀲𑀺, 𑀢𑀁 ¶ 𑀤𑀡𑁆𑀟𑀁 𑀧𑀡𑁂𑀳𑀻’𑀢𑀺. 𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀢𑁂𑀦 𑀳𑀺, 𑀪𑁄, 𑀇𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀙𑀯𑀺𑀁 𑀙𑀺𑀦𑁆𑀤𑀣 ¶ , 𑀅𑀧𑁆𑀧𑁂𑀯 𑀦𑀸𑀫𑀲𑁆𑀲 𑀚𑀻𑀯𑀁 𑀧𑀲𑁆𑀲𑁂𑀬𑁆𑀬𑀸𑀫𑀸’𑀢𑀺. 𑀢𑁂 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀙𑀯𑀺𑀁 𑀙𑀺𑀦𑁆𑀤𑀦𑁆𑀢𑀺. 𑀦𑁂𑀯𑀲𑁆𑀲 𑀫𑀬𑀁 𑀚𑀻𑀯𑀁 𑀧𑀲𑁆𑀲𑀸𑀫. 𑀢𑁆𑀬𑀸𑀳𑀁 𑀏𑀯𑀁 𑀯𑀤𑀸𑀫𑀺 𑁋 ‘𑀢𑁂𑀦 𑀳𑀺, 𑀪𑁄, 𑀇𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀘𑀫𑁆𑀫𑀁 𑀙𑀺𑀦𑁆𑀤𑀣, 𑀫𑀁𑀲𑀁 𑀙𑀺𑀦𑁆𑀤𑀣, 𑀦𑁆𑀳𑀸𑀭𑀼𑀁 𑀙𑀺𑀦𑁆𑀤𑀣, 𑀅𑀝𑁆𑀞𑀺𑀁 𑀙𑀺𑀦𑁆𑀤𑀣, 𑀅𑀝𑁆𑀞𑀺𑀫𑀺𑀜𑁆𑀚𑀁 𑀙𑀺𑀦𑁆𑀤𑀣, 𑀅𑀧𑁆𑀧𑁂𑀯 𑀦𑀸𑀫𑀲𑁆𑀲 𑀚𑀻𑀯𑀁 𑀧𑀲𑁆𑀲𑁂𑀬𑁆𑀬𑀸𑀫𑀸’𑀢𑀺. 𑀢𑁂 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀝𑁆𑀞𑀺𑀫𑀺𑀜𑁆𑀚𑀁 𑀙𑀺𑀦𑁆𑀤𑀦𑁆𑀢𑀺, 𑀦𑁂𑀯𑀲𑁆𑀲 𑀫𑀬𑀁 𑀚𑀻𑀯𑀁 𑀧𑀲𑁆𑀲𑁂𑀬𑁆𑀬𑀸𑀫. 𑀅𑀬𑀫𑁆𑀧𑀺 𑀔𑁄, 𑀪𑁄 𑀓𑀲𑁆𑀲𑀧, 𑀧𑀭𑀺𑀬𑀸𑀬𑁄, 𑀬𑁂𑀦 𑀫𑁂 𑀧𑀭𑀺𑀬𑀸𑀬𑁂𑀦 𑀏𑀯𑀁 𑀳𑁄𑀢𑀺 𑁋 ‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺.

𑀅𑀕𑁆𑀕𑀺𑀓𑀚𑀝𑀺𑀮𑀉𑀧𑀫𑀸

𑁪𑁨𑁮. ‘‘𑀢𑁂𑀦 𑀳𑀺, 𑀭𑀸𑀚𑀜𑁆𑀜, 𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺. 𑀉𑀧𑀫𑀸𑀬 𑀫𑀺𑀥𑁂𑀓𑀘𑁆𑀘𑁂 𑀯𑀺𑀜𑁆𑀜𑀽 𑀧𑀼𑀭𑀺𑀲𑀸 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀦𑁆𑀢𑀺. 𑀪𑀽𑀢𑀧𑀼𑀩𑁆𑀩𑀁, 𑀭𑀸𑀚𑀜𑁆𑀜, 𑀅𑀜𑁆𑀜𑀢𑀭𑁄 𑀅𑀕𑁆𑀕𑀺𑀓𑁄 𑀚𑀝𑀺𑀮𑁄 𑀅𑀭𑀜𑁆𑀜𑀸𑀬𑀢𑀦𑁂 ¶ 𑀧𑀡𑁆𑀡𑀓𑀼𑀝𑀺𑀬𑀸 𑀲𑀫𑁆𑀫𑀢𑀺 [𑀯𑀲𑀢𑀺 (𑀲𑀻. 𑀧𑀻.)]. 𑀅𑀣 𑀔𑁄, 𑀭𑀸𑀚𑀜𑁆𑀜, 𑀅𑀜𑁆𑀜𑀢𑀭𑁄 𑀚𑀦𑀧𑀤𑁂 𑀲𑀢𑁆𑀣𑁄 [𑀲𑀢𑁆𑀣𑁄 𑀚𑀦𑀧𑀤𑀧𑀤𑁂𑀲𑀸 (𑀲𑀻.), 𑀚𑀦𑀧𑀤𑁄 𑀲𑀢𑁆𑀣𑀯𑀸𑀲𑁄 (𑀲𑁆𑀬𑀸.), 𑀚𑀦𑀧𑀤𑀧𑀤𑁂𑀲𑁄 (𑀧𑀻.)] 𑀯𑀼𑀝𑁆𑀞𑀸𑀲𑀺. 𑀅𑀣 𑀔𑁄 𑀲𑁄 𑀲𑀢𑁆𑀣𑁄 [𑀲𑀢𑁆𑀣𑀯𑀸𑀲𑁄 (𑀲𑁆𑀬𑀸.)] 𑀢𑀲𑁆𑀲 𑀅𑀕𑁆𑀕𑀺𑀓𑀲𑁆𑀲 𑀚𑀝𑀺𑀮𑀲𑁆𑀲 𑀅𑀲𑁆𑀲𑀫𑀲𑁆𑀲 𑀲𑀸𑀫𑀦𑁆𑀢𑀸 𑀏𑀓𑀭𑀢𑁆𑀢𑀺𑀁 𑀯𑀲𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄, 𑀭𑀸𑀚𑀜𑁆𑀜, 𑀢𑀲𑁆𑀲 𑀅𑀕𑁆𑀕𑀺𑀓𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 ¶ 𑁋 ‘𑀬𑀁𑀦𑀽𑀦𑀸𑀳𑀁 𑀬𑁂𑀦 𑀲𑁄 𑀲𑀢𑁆𑀣𑀯𑀸𑀲𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬𑀁, 𑀅𑀧𑁆𑀧𑁂𑀯 𑀦𑀸𑀫𑁂𑀢𑁆𑀣 𑀓𑀺𑀜𑁆𑀘𑀺 𑀉𑀧𑀓𑀭𑀡𑀁 𑀅𑀥𑀺𑀕𑀘𑁆𑀙𑁂𑀬𑁆𑀬’𑀦𑁆𑀢𑀺. 𑀅𑀣 𑀔𑁄 𑀲𑁄 𑀅𑀕𑁆𑀕𑀺𑀓𑁄 𑀚𑀝𑀺𑀮𑁄 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀬𑁂𑀦 𑀲𑁄 𑀲𑀢𑁆𑀣𑀯𑀸𑀲𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀤𑁆𑀤𑀲 𑀢𑀲𑁆𑀫𑀺𑀁 𑀲𑀢𑁆𑀣𑀯𑀸𑀲𑁂 𑀤𑀳𑀭𑀁 𑀓𑀼𑀫𑀸𑀭𑀁 𑀫𑀦𑁆𑀤𑀁 ¶ 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑀁 𑀙𑀟𑁆𑀟𑀺𑀢𑀁. 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀦 𑀔𑁄 𑀫𑁂 𑀢𑀁 𑀧𑀢𑀺𑀭𑀽𑀧𑀁 𑀬𑀁 𑀫𑁂 𑀧𑁂𑀓𑁆𑀔𑀫𑀸𑀦𑀲𑁆𑀲 𑀫𑀦𑀼𑀲𑁆𑀲𑀪𑀽𑀢𑁄 𑀓𑀸𑀮𑀗𑁆𑀓𑀭𑁂𑀬𑁆𑀬; 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀤𑀸𑀭𑀓𑀁 𑀅𑀲𑁆𑀲𑀫𑀁 𑀦𑁂𑀢𑁆𑀯𑀸 𑀆𑀧𑀸𑀤𑁂𑀬𑁆𑀬𑀁 𑀧𑁄𑀲𑁂𑀬𑁆𑀬𑀁 𑀯𑀟𑁆𑀠𑁂𑀬𑁆𑀬’𑀦𑁆𑀢𑀺. 𑀅𑀣 𑀔𑁄 𑀲𑁄 𑀅𑀕𑁆𑀕𑀺𑀓𑁄 𑀚𑀝𑀺𑀮𑁄 𑀢𑀁 𑀤𑀸𑀭𑀓𑀁 𑀅𑀲𑁆𑀲𑀫𑀁 𑀦𑁂𑀢𑁆𑀯𑀸 𑀆𑀧𑀸𑀤𑁂𑀲𑀺 𑀧𑁄𑀲𑁂𑀲𑀺 𑀯𑀟𑁆𑀠𑁂𑀲𑀺. 𑀬𑀤𑀸 𑀲𑁄 𑀤𑀸𑀭𑀓𑁄 𑀤𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄 𑀯𑀸 𑀳𑁄𑀢𑀺 [𑀅𑀳𑁄𑀲𑀺 (?)] 𑀤𑁆𑀯𑀸𑀤𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄 𑀯𑀸, 𑀅𑀣 𑀔𑁄 𑀢𑀲𑁆𑀲 𑀅𑀕𑁆𑀕𑀺𑀓𑀲𑁆𑀲 𑀚𑀝𑀺𑀮𑀲𑁆𑀲 𑀚𑀦𑀧𑀤𑁂 𑀓𑀜𑁆𑀘𑀺𑀤𑁂𑀯 𑀓𑀭𑀡𑀻𑀬𑀁 𑀉𑀧𑁆𑀧𑀚𑁆𑀚𑀺. 𑀅𑀣 𑀔𑁄 𑀲𑁄 𑀅𑀕𑁆𑀕𑀺𑀓𑁄 𑀚𑀝𑀺𑀮𑁄 𑀢𑀁 𑀤𑀸𑀭𑀓𑀁 𑀏𑀢𑀤𑀯𑁄𑀘 𑁋 ‘𑀇𑀘𑁆𑀙𑀸𑀫𑀳𑀁, 𑀢𑀸𑀢, 𑀚𑀦𑀧𑀤𑀁 [𑀦𑀕𑀭𑀁 (𑀓.)] 𑀕𑀦𑁆𑀢𑀼𑀁; 𑀅𑀕𑁆𑀕𑀺𑀁, 𑀢𑀸𑀢, 𑀧𑀭𑀺𑀘𑀭𑁂𑀬𑁆𑀬𑀸𑀲𑀺. 𑀫𑀸 𑀘 𑀢𑁂 𑀅𑀕𑁆𑀕𑀺 𑀦𑀺𑀩𑁆𑀩𑀸𑀬𑀺. 𑀲𑀘𑁂 𑀘 𑀢𑁂 𑀅𑀕𑁆𑀕𑀺 𑀦𑀺𑀩𑁆𑀩𑀸𑀬𑁂𑀬𑁆𑀬, 𑀅𑀬𑀁 𑀯𑀸𑀲𑀻 𑀇𑀫𑀸𑀦𑀺 𑀓𑀝𑁆𑀞𑀸𑀦𑀺 𑀇𑀤𑀁 𑀅𑀭𑀡𑀺𑀲𑀳𑀺𑀢𑀁, 𑀅𑀕𑁆𑀕𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀕𑁆𑀕𑀺𑀁 ¶ 𑀧𑀭𑀺𑀘𑀭𑁂𑀬𑁆𑀬𑀸𑀲𑀻’𑀢𑀺. 𑀅𑀣 𑀔𑁄 𑀲𑁄 𑀅𑀕𑁆𑀕𑀺𑀓𑁄 𑀚𑀝𑀺𑀮𑁄 𑀢𑀁 𑀤𑀸𑀭𑀓𑀁 𑀏𑀯𑀁 𑀅𑀦𑀼𑀲𑀸𑀲𑀺𑀢𑁆𑀯𑀸 𑀚𑀦𑀧𑀤𑀁 𑀅𑀕𑀫𑀸𑀲𑀺. 𑀢𑀲𑁆𑀲 𑀔𑀺𑀟𑁆𑀟𑀸𑀧𑀲𑀼𑀢𑀲𑁆𑀲 𑀅𑀕𑁆𑀕𑀺 𑀦𑀺𑀩𑁆𑀩𑀸𑀬𑀺.

‘‘𑀅𑀣 𑀔𑁄 𑀢𑀲𑁆𑀲 𑀤𑀸𑀭𑀓𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀧𑀺𑀢𑀸 𑀔𑁄 𑀫𑀁 𑀏𑀯𑀁 𑀅𑀯𑀘 𑁋 ‘‘𑀅𑀕𑁆𑀕𑀺𑀁, 𑀢𑀸𑀢, 𑀧𑀭𑀺𑀘𑀭𑁂𑀬𑁆𑀬𑀸𑀲𑀺. 𑀫𑀸 𑀘 𑀢𑁂 𑀅𑀕𑁆𑀕𑀺 𑀦𑀺𑀩𑁆𑀩𑀸𑀬𑀺. 𑀲𑀘𑁂 𑀘 𑀢𑁂 𑀅𑀕𑁆𑀕𑀺 𑀦𑀺𑀩𑁆𑀩𑀸𑀬𑁂𑀬𑁆𑀬, 𑀅𑀬𑀁 𑀯𑀸𑀲𑀻 𑀇𑀫𑀸𑀦𑀺 𑀓𑀝𑁆𑀞𑀸𑀦𑀺 𑀇𑀤𑀁 𑀅𑀭𑀡𑀺𑀲𑀳𑀺𑀢𑀁, 𑀅𑀕𑁆𑀕𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀕𑁆𑀕𑀺𑀁 𑀧𑀭𑀺𑀘𑀭𑁂𑀬𑁆𑀬𑀸𑀲𑀻’’𑀢𑀺. 𑀬𑀁𑀦𑀽𑀦𑀸𑀳𑀁 𑀅𑀕𑁆𑀕𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀕𑁆𑀕𑀺𑀁 𑀧𑀭𑀺𑀘𑀭𑁂𑀬𑁆𑀬’𑀦𑁆𑀢𑀺. 𑀅𑀣 ¶ 𑀔𑁄 𑀲𑁄 𑀤𑀸𑀭𑀓𑁄 𑀅𑀭𑀡𑀺𑀲𑀳𑀺𑀢𑀁 𑀯𑀸𑀲𑀺𑀬𑀸 𑀢𑀘𑁆𑀙𑀺 𑁋 ‘𑀅𑀧𑁆𑀧𑁂𑀯 𑀦𑀸𑀫 𑀅𑀕𑁆𑀕𑀺𑀁 𑀅𑀥𑀺𑀕𑀘𑁆𑀙𑁂𑀬𑁆𑀬’𑀦𑁆𑀢𑀺. 𑀦𑁂𑀯 𑀲𑁄 𑀅𑀕𑁆𑀕𑀺𑀁 𑀅𑀥𑀺𑀕𑀘𑁆𑀙𑀺. 𑀅𑀭𑀡𑀺𑀲𑀳𑀺𑀢𑀁 𑀤𑁆𑀯𑀺𑀥𑀸 𑀨𑀸𑀮𑁂𑀲𑀺, 𑀢𑀺𑀥𑀸 𑀨𑀸𑀮𑁂𑀲𑀺, 𑀘𑀢𑀼𑀥𑀸 𑀨𑀸𑀮𑁂𑀲𑀺, 𑀧𑀜𑁆𑀘𑀥𑀸 𑀨𑀸𑀮𑁂𑀲𑀺, 𑀤𑀲𑀥𑀸 𑀨𑀸𑀮𑁂𑀲𑀺, 𑀲𑀢𑀥𑀸 [𑀯𑀻𑀲𑀢𑀺𑀥𑀸 (𑀲𑁆𑀬𑀸.)] 𑀨𑀸𑀮𑁂𑀲𑀺, 𑀲𑀓𑀮𑀺𑀓𑀁 𑀲𑀓𑀮𑀺𑀓𑀁 𑀅𑀓𑀸𑀲𑀺, 𑀲𑀓𑀮𑀺𑀓𑀁 𑀲𑀓𑀮𑀺𑀓𑀁 𑀓𑀭𑀺𑀢𑁆𑀯𑀸 𑀉𑀤𑀼𑀓𑁆𑀔𑀮𑁂 𑀓𑁄𑀝𑁆𑀝𑁂𑀲𑀺, 𑀉𑀤𑀼𑀓𑁆𑀔𑀮𑁂 𑀓𑁄𑀝𑁆𑀝𑁂𑀢𑁆𑀯𑀸 𑀫𑀳𑀸𑀯𑀸𑀢𑁂 𑀑𑀧𑀼𑀦𑀺 [𑀑𑀨𑀼𑀦𑀺 (𑀲𑁆𑀬𑀸. 𑀓.)] 𑁋 ‘𑀅𑀧𑁆𑀧𑁂𑀯 𑀦𑀸𑀫 𑀅𑀕𑁆𑀕𑀺𑀁 𑀅𑀥𑀺𑀕𑀘𑁆𑀙𑁂𑀬𑁆𑀬’𑀦𑁆𑀢𑀺. 𑀦𑁂𑀯 𑀲𑁄 𑀅𑀕𑁆𑀕𑀺𑀁 𑀅𑀥𑀺𑀕𑀘𑁆𑀙𑀺.

‘‘𑀅𑀣 𑀔𑁄 𑀲𑁄 𑀅𑀕𑁆𑀕𑀺𑀓𑁄 𑀚𑀝𑀺𑀮𑁄 𑀚𑀦𑀧𑀤𑁂 𑀢𑀁 𑀓𑀭𑀡𑀻𑀬𑀁 𑀢𑀻𑀭𑁂𑀢𑁆𑀯𑀸 𑀬𑁂𑀦 𑀲𑀓𑁄 𑀅𑀲𑁆𑀲𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀤𑀸𑀭𑀓𑀁 𑀏𑀢𑀤𑀯𑁄𑀘 𑁋 ‘𑀓𑀘𑁆𑀘𑀺 𑀢𑁂, 𑀢𑀸𑀢, 𑀅𑀕𑁆𑀕𑀺 𑀦 𑀦𑀺𑀩𑁆𑀩𑀼𑀢𑁄’𑀢𑀺? ‘𑀇𑀥 𑀫𑁂, 𑀢𑀸𑀢, 𑀔𑀺𑀟𑁆𑀟𑀸𑀧𑀲𑀼𑀢𑀲𑁆𑀲 𑀅𑀕𑁆𑀕𑀺 𑀦𑀺𑀩𑁆𑀩𑀸𑀬𑀺. 𑀢𑀲𑁆𑀲 𑀫𑁂 𑀏𑀢𑀤𑀳𑁄𑀲𑀺 𑁋 ‘‘𑀧𑀺𑀢𑀸 𑀔𑁄 𑀫𑀁 𑀏𑀯𑀁 𑀅𑀯𑀘 𑀅𑀕𑁆𑀕𑀺𑀁, 𑀢𑀸𑀢, 𑀧𑀭𑀺𑀘𑀭𑁂𑀬𑁆𑀬𑀸𑀲𑀺. 𑀫𑀸 𑀘 𑀢𑁂, 𑀢𑀸𑀢, 𑀅𑀕𑁆𑀕𑀺 𑀦𑀺𑀩𑁆𑀩𑀸𑀬𑀺. 𑀲𑀘𑁂 ¶ 𑀘 𑀢𑁂 𑀅𑀕𑁆𑀕𑀺 𑀦𑀺𑀩𑁆𑀩𑀸𑀬𑁂𑀬𑁆𑀬, 𑀅𑀬𑀁 𑀯𑀸𑀲𑀻 𑀇𑀫𑀸𑀦𑀺 𑀓𑀝𑁆𑀞𑀸𑀦𑀺 𑀇𑀤𑀁 𑀅𑀭𑀡𑀺𑀲𑀳𑀺𑀢𑀁, 𑀅𑀕𑁆𑀕𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀕𑁆𑀕𑀺𑀁 𑀧𑀭𑀺𑀘𑀭𑁂𑀬𑁆𑀬𑀸𑀲𑀻𑀢𑀺. 𑀬𑀁𑀦𑀽𑀦𑀸𑀳𑀁 𑀅𑀕𑁆𑀕𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀕𑁆𑀕𑀺𑀁 𑀧𑀭𑀺𑀘𑀭𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁆𑀯𑀸𑀳𑀁, 𑀢𑀸𑀢, 𑀅𑀭𑀡𑀺𑀲𑀳𑀺𑀢𑀁 𑀯𑀸𑀲𑀺𑀬𑀸 𑀢𑀘𑁆𑀙𑀺𑀁 𑁋 ‘‘𑀅𑀧𑁆𑀧𑁂𑀯 𑀦𑀸𑀫 𑀅𑀕𑁆𑀕𑀺𑀁 𑀅𑀥𑀺𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀦𑁂𑀯𑀸𑀳𑀁 𑀅𑀕𑁆𑀕𑀺𑀁 𑀅𑀥𑀺𑀕𑀘𑁆𑀙𑀺𑀁. 𑀅𑀭𑀡𑀺𑀲𑀳𑀺𑀢𑀁 𑀤𑁆𑀯𑀺𑀥𑀸 𑀨𑀸𑀮𑁂𑀲𑀺𑀁, 𑀢𑀺𑀥𑀸 𑀨𑀸𑀮𑁂𑀲𑀺𑀁, 𑀘𑀢𑀼𑀥𑀸 𑀨𑀸𑀮𑁂𑀲𑀺𑀁, 𑀧𑀜𑁆𑀘𑀥𑀸 𑀨𑀸𑀮𑁂𑀲𑀺𑀁, 𑀤𑀲𑀥𑀸 𑀨𑀸𑀮𑁂𑀲𑀺𑀁 ¶ , 𑀲𑀢𑀥𑀸 𑀨𑀸𑀮𑁂𑀲𑀺𑀁, 𑀲𑀓𑀮𑀺𑀓𑀁 𑀲𑀓𑀮𑀺𑀓𑀁 𑀅𑀓𑀸𑀲𑀺𑀁, 𑀲𑀓𑀮𑀺𑀓𑀁 𑀲𑀓𑀮𑀺𑀓𑀁 𑀓𑀭𑀺𑀢𑁆𑀯𑀸 𑀉𑀤𑀼𑀓𑁆𑀔𑀮𑁂 𑀓𑁄𑀝𑁆𑀝𑁂𑀲𑀺𑀁, 𑀉𑀤𑀼𑀓𑁆𑀔𑀮𑁂 𑀓𑁄𑀝𑁆𑀝𑁂𑀢𑁆𑀯𑀸 𑀫𑀳𑀸𑀯𑀸𑀢𑁂 𑀑𑀧𑀼𑀦𑀺𑀁 𑁋 ‘‘𑀅𑀧𑁆𑀧𑁂𑀯 𑀦𑀸𑀫 𑀅𑀕𑁆𑀕𑀺𑀁 𑀅𑀥𑀺𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀦𑁂𑀯𑀸𑀳𑀁 𑀅𑀕𑁆𑀕𑀺𑀁 𑀅𑀥𑀺𑀕𑀘𑁆𑀙𑀺’’’𑀦𑁆𑀢𑀺. 𑀅𑀣 𑀔𑁄 𑀢𑀲𑁆𑀲 𑀅𑀕𑁆𑀕𑀺𑀓𑀲𑁆𑀲 𑀚𑀝𑀺𑀮𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀬𑀸𑀯 𑀩𑀸𑀮𑁄 𑀅𑀬𑀁 𑀤𑀸𑀭𑀓𑁄 𑀅𑀩𑁆𑀬𑀢𑁆𑀢𑁄, 𑀓𑀣𑀜𑁆𑀳𑀺 𑀦𑀸𑀫 𑀅𑀬𑁄𑀦𑀺𑀲𑁄 𑀅𑀕𑁆𑀕𑀺𑀁 𑀕𑀯𑁂𑀲𑀺𑀲𑁆𑀲𑀢𑀻’𑀢𑀺. 𑀢𑀲𑁆𑀲 𑀧𑁂𑀓𑁆𑀔𑀫𑀸𑀦𑀲𑁆𑀲 𑀅𑀭𑀡𑀺𑀲𑀳𑀺𑀢𑀁 𑀕𑀳𑁂𑀢𑁆𑀯𑀸 ¶ 𑀅𑀕𑁆𑀕𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀁 𑀤𑀸𑀭𑀓𑀁 𑀏𑀢𑀤𑀯𑁄𑀘 ¶ 𑁋 ‘𑀏𑀯𑀁 𑀔𑁄, 𑀢𑀸𑀢, 𑀅𑀕𑁆𑀕𑀺 ¶ 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑁄. 𑀦 𑀢𑁆𑀯𑁂𑀯 𑀬𑀣𑀸 𑀢𑁆𑀯𑀁 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 𑀅𑀬𑁄𑀦𑀺𑀲𑁄 𑀅𑀕𑁆𑀕𑀺𑀁 𑀕𑀯𑁂𑀲𑀻’𑀢𑀺. 𑀏𑀯𑀫𑁂𑀯 𑀔𑁄 𑀢𑁆𑀯𑀁, 𑀭𑀸𑀚𑀜𑁆𑀜, 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 𑀅𑀬𑁄𑀦𑀺𑀲𑁄 𑀧𑀭𑀮𑁄𑀓𑀁 𑀕𑀯𑁂𑀲𑀺𑀲𑁆𑀲𑀲𑀺. 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀁, 𑀭𑀸𑀚𑀜𑁆𑀜, 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁, 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀁, 𑀭𑀸𑀚𑀜𑁆𑀜, 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁, 𑀫𑀸 𑀢𑁂 𑀅𑀳𑁄𑀲𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’’𑀢𑀺.

𑁪𑁨𑁯. ‘‘𑀓𑀺𑀜𑁆𑀘𑀸𑀧𑀺 𑀪𑀯𑀁 𑀓𑀲𑁆𑀲𑀧𑁄 𑀏𑀯𑀫𑀸𑀳, 𑀅𑀣 𑀔𑁄 𑀦𑁂𑀯𑀸𑀳𑀁 𑀲𑀓𑁆𑀓𑁄𑀫𑀺 𑀇𑀤𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑀼𑀁. 𑀭𑀸𑀚𑀸𑀧𑀺 𑀫𑀁 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀚𑀸𑀦𑀸𑀢𑀺 𑀢𑀺𑀭𑁄𑀭𑀸𑀚𑀸𑀦𑁄𑀧𑀺 𑁋 ‘𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 𑀏𑀯𑀁𑀯𑀸𑀤𑀻 𑀏𑀯𑀁𑀤𑀺𑀝𑁆𑀞𑀻 𑁋 ‘‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’𑀢𑀺. 𑀲𑀘𑀸𑀳𑀁, 𑀪𑁄 𑀓𑀲𑁆𑀲𑀧, 𑀇𑀤𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀲𑁆𑀲𑀸𑀫𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀫𑁂 𑀯𑀢𑁆𑀢𑀸𑀭𑁄 𑁋 ‘𑀬𑀸𑀯 𑀩𑀸𑀮𑁄 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 𑀅𑀩𑁆𑀬𑀢𑁆𑀢𑁄 𑀤𑀼𑀕𑁆𑀕𑀳𑀺𑀢𑀕𑀸𑀳𑀻’𑀢𑀺. 𑀓𑁄𑀧𑁂𑀦𑀧𑀺 𑀦𑀁 𑀳𑀭𑀺𑀲𑁆𑀲𑀸𑀫𑀺, 𑀫𑀓𑁆𑀔𑁂𑀦𑀧𑀺 𑀦𑀁 𑀳𑀭𑀺𑀲𑁆𑀲𑀸𑀫𑀺, 𑀧𑀮𑀸𑀲𑁂𑀦𑀧𑀺 𑀦𑀁 𑀳𑀭𑀺𑀲𑁆𑀲𑀸𑀫𑀻’’𑀢𑀺.

𑀤𑁆𑀯𑁂 𑀲𑀢𑁆𑀣𑀯𑀸𑀳𑀉𑀧𑀫𑀸

𑁪𑁩𑁦. ‘‘𑀢𑁂𑀦 𑀳𑀺, 𑀭𑀸𑀚𑀜𑁆𑀜, 𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺. 𑀉𑀧𑀫𑀸𑀬 𑀫𑀺𑀥𑁂𑀓𑀘𑁆𑀘𑁂 𑀯𑀺𑀜𑁆𑀜𑀽 𑀧𑀼𑀭𑀺𑀲𑀸 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀦𑁆𑀢𑀺. 𑀪𑀽𑀢𑀧𑀼𑀩𑁆𑀩𑀁, 𑀭𑀸𑀚𑀜𑁆𑀜, 𑀫𑀳𑀸𑀲𑀓𑀝𑀲𑀢𑁆𑀣𑁄 𑀲𑀓𑀝𑀲𑀳𑀲𑁆𑀲𑀁 𑀧𑀼𑀭𑀢𑁆𑀣𑀺𑀫𑀸 𑀚𑀦𑀧𑀤𑀸 𑀧𑀘𑁆𑀙𑀺𑀫𑀁 𑀚𑀦𑀧𑀤𑀁 𑀅𑀕𑀫𑀸𑀲𑀺. 𑀲𑁄 𑀬𑁂𑀦 𑀬𑁂𑀦 𑀕𑀘𑁆𑀙𑀺, 𑀔𑀺𑀧𑁆𑀧𑀁𑀬𑁂𑀯 𑀧𑀭𑀺𑀬𑀸𑀤𑀺𑀬𑀢𑀺 𑀢𑀺𑀡𑀓𑀝𑁆𑀞𑁄𑀤𑀓𑀁 𑀳𑀭𑀺𑀢𑀓𑀧𑀡𑁆𑀡𑀁. 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀢𑁆𑀣𑁂 𑀤𑁆𑀯𑁂 𑀲𑀢𑁆𑀣𑀯𑀸𑀳𑀸 𑀅𑀳𑁂𑀲𑀼𑀁 𑀏𑀓𑁄 ¶ 𑀧𑀜𑁆𑀘𑀦𑁆𑀦𑀁 ¶ 𑀲𑀓𑀝𑀲𑀢𑀸𑀦𑀁, 𑀏𑀓𑁄 𑀧𑀜𑁆𑀘𑀦𑁆𑀦𑀁 𑀲𑀓𑀝𑀲𑀢𑀸𑀦𑀁. 𑀅𑀣 𑀔𑁄 𑀢𑁂𑀲𑀁 𑀲𑀢𑁆𑀣𑀯𑀸𑀳𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘𑀅𑀬𑀁 𑀔𑁄 𑀫𑀳𑀸𑀲𑀓𑀝𑀲𑀢𑁆𑀣𑁄 𑀲𑀓𑀝𑀲𑀳𑀲𑁆𑀲𑀁; 𑀢𑁂 𑀫𑀬𑀁 𑀬𑁂𑀦 𑀬𑁂𑀦 𑀕𑀘𑁆𑀙𑀸𑀫, 𑀔𑀺𑀧𑁆𑀧𑀫𑁂𑀯 𑀧𑀭𑀺𑀬𑀸𑀤𑀺𑀬𑀢𑀺 𑀢𑀺𑀡𑀓𑀝𑁆𑀞𑁄𑀤𑀓𑀁 ¶ 𑀳𑀭𑀺𑀢𑀓𑀧𑀡𑁆𑀡𑀁. 𑀬𑀁𑀦𑀽𑀦 𑀫𑀬𑀁 𑀇𑀫𑀁 𑀲𑀢𑁆𑀣𑀁 𑀤𑁆𑀯𑀺𑀥𑀸 𑀯𑀺𑀪𑀚𑁂𑀬𑁆𑀬𑀸𑀫 𑁋 𑀏𑀓𑀢𑁄 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀏𑀓𑀢𑁄 𑀧𑀜𑁆𑀘 𑀲𑀓𑀝𑀲𑀢𑀸𑀦𑀻’𑀢𑀺. 𑀢𑁂 𑀢𑀁 𑀲𑀢𑁆𑀣𑀁 𑀤𑁆𑀯𑀺𑀥𑀸 𑀯𑀺𑀪𑀚𑀺𑀁𑀲𑀼 [𑀯𑀺𑀪𑀚𑁂𑀲𑀼𑀁 (𑀓.)] 𑀏𑀓𑀢𑁄 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺, 𑀏𑀓𑀢𑁄 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺. 𑀏𑀓𑁄 𑀲𑀢𑁆𑀣𑀯𑀸𑀳𑁄 𑀩𑀳𑀼𑀁 𑀢𑀺𑀡𑀜𑁆𑀘 𑀓𑀝𑁆𑀞𑀜𑁆𑀘 𑀉𑀤𑀓𑀜𑁆𑀘 𑀆𑀭𑁄𑀧𑁂𑀢𑁆𑀯𑀸 𑀲𑀢𑁆𑀣𑀁 𑀧𑀬𑀸𑀧𑁂𑀲𑀺 [𑀧𑀸𑀬𑀸𑀧𑁂𑀲𑀺 (𑀲𑀻. 𑀧𑀻.)]. 𑀤𑁆𑀯𑀻𑀳𑀢𑀻𑀳𑀧𑀬𑀸𑀢𑁄 𑀔𑁄 𑀧𑀦 𑀲𑁄 𑀲𑀢𑁆𑀣𑁄 𑀅𑀤𑁆𑀤𑀲 𑀧𑀼𑀭𑀺𑀲𑀁 𑀓𑀸𑀴𑀁 𑀮𑁄𑀳𑀺𑀢𑀓𑁆𑀔𑀁 [𑀮𑁄𑀳𑀺𑀢𑀓𑁆𑀔𑀺𑀁 (𑀲𑁆𑀬𑀸.)] 𑀲𑀦𑁆𑀦𑀤𑁆𑀥𑀓𑀮𑀸𑀧𑀁 [𑀆𑀲𑀦𑁆𑀦𑀤𑁆𑀥𑀓𑀮𑀸𑀧𑀁 (𑀲𑁆𑀬𑀸.)] 𑀓𑀼𑀫𑀼𑀤𑀫𑀸𑀮𑀺𑀁 𑀅𑀮𑁆𑀮𑀯𑀢𑁆𑀣𑀁 𑀅𑀮𑁆𑀮𑀓𑁂𑀲𑀁 𑀓𑀤𑁆𑀤𑀫𑀫𑀓𑁆𑀔𑀺𑀢𑁂𑀳𑀺 𑀘𑀓𑁆𑀓𑁂𑀳𑀺 ¶ 𑀪𑀤𑁆𑀭𑁂𑀦 𑀭𑀣𑁂𑀦 𑀧𑀝𑀺𑀧𑀣𑀁 𑀆𑀕𑀘𑁆𑀙𑀦𑁆𑀢𑀁’, 𑀤𑀺𑀲𑁆𑀯𑀸 𑀏𑀢𑀤𑀯𑁄𑀘 𑁋 ‘𑀓𑀼𑀢𑁄, 𑀪𑁄, 𑀆𑀕𑀘𑁆𑀙𑀲𑀻’𑀢𑀺? ‘𑀅𑀫𑀼𑀓𑀫𑁆𑀳𑀸 𑀚𑀦𑀧𑀤𑀸’𑀢𑀺. ‘𑀓𑀼𑀳𑀺𑀁 𑀕𑀫𑀺𑀲𑁆𑀲𑀲𑀻’𑀢𑀺? ‘𑀅𑀫𑀼𑀓𑀁 𑀦𑀸𑀫 𑀚𑀦𑀧𑀤’𑀦𑁆𑀢𑀺. ‘𑀓𑀘𑁆𑀘𑀺, 𑀪𑁄, 𑀧𑀼𑀭𑀢𑁄 𑀓𑀦𑁆𑀢𑀸𑀭𑁂 𑀫𑀳𑀸𑀫𑁂𑀖𑁄 𑀅𑀪𑀺𑀧𑁆𑀧𑀯𑀼𑀝𑁆𑀞𑁄’𑀢𑀺? ‘𑀏𑀯𑀁, 𑀪𑁄, 𑀧𑀼𑀭𑀢𑁄 𑀓𑀦𑁆𑀢𑀸𑀭𑁂 𑀫𑀳𑀸𑀫𑁂𑀖𑁄 𑀅𑀪𑀺𑀧𑁆𑀧𑀯𑀼𑀝𑁆𑀞𑁄, 𑀆𑀲𑀺𑀢𑁆𑀢𑁄𑀤𑀓𑀸𑀦𑀺 𑀯𑀝𑀼𑀫𑀸𑀦𑀺, 𑀩𑀳𑀼 𑀢𑀺𑀡𑀜𑁆𑀘 𑀓𑀝𑁆𑀞𑀜𑁆𑀘 ¶ 𑀉𑀤𑀓𑀜𑁆𑀘. 𑀙𑀟𑁆𑀟𑁂𑀣, 𑀪𑁄, 𑀧𑀼𑀭𑀸𑀡𑀸𑀦𑀺 𑀢𑀺𑀡𑀸𑀦𑀺 𑀓𑀝𑁆𑀞𑀸𑀦𑀺 𑀉𑀤𑀓𑀸𑀦𑀺, 𑀮𑀳𑀼𑀪𑀸𑀭𑁂𑀳𑀺 𑀲𑀓𑀝𑁂𑀳𑀺 𑀲𑀻𑀖𑀁 𑀲𑀻𑀖𑀁 𑀕𑀘𑁆𑀙𑀣, 𑀫𑀸 𑀬𑁄𑀕𑁆𑀕𑀸𑀦𑀺 𑀓𑀺𑀮𑀫𑀺𑀢𑁆𑀣𑀸’𑀢𑀺.

‘‘𑀅𑀣 𑀔𑁄 𑀲𑁄 𑀲𑀢𑁆𑀣𑀯𑀸𑀳𑁄 𑀲𑀢𑁆𑀣𑀺𑀓𑁂 𑀆𑀫𑀦𑁆𑀢𑁂𑀲𑀺 𑁋 ‘𑀅𑀬𑀁, 𑀪𑁄, 𑀧𑀼𑀭𑀺𑀲𑁄 𑀏𑀯𑀫𑀸𑀳 𑁋 ‘‘𑀧𑀼𑀭𑀢𑁄 𑀓𑀦𑁆𑀢𑀸𑀭𑁂 𑀫𑀳𑀸𑀫𑁂𑀖𑁄 𑀅𑀪𑀺𑀧𑁆𑀧𑀯𑀼𑀝𑁆𑀞𑁄, 𑀆𑀲𑀺𑀢𑁆𑀢𑁄𑀤𑀓𑀸𑀦𑀺 𑀯𑀝𑀼𑀫𑀸𑀦𑀺, 𑀩𑀳𑀼 𑀢𑀺𑀡𑀜𑁆𑀘 𑀓𑀝𑁆𑀞𑀜𑁆𑀘 𑀉𑀤𑀓𑀜𑁆𑀘. 𑀙𑀟𑁆𑀟𑁂𑀣, 𑀪𑁄, 𑀧𑀼𑀭𑀸𑀡𑀸𑀦𑀺 𑀢𑀺𑀡𑀸𑀦𑀺 𑀓𑀝𑁆𑀞𑀸𑀦𑀺 𑀉𑀤𑀓𑀸𑀦𑀺, 𑀮𑀳𑀼𑀪𑀸𑀭𑁂𑀳𑀺 𑀲𑀓𑀝𑁂𑀳𑀺 𑀲𑀻𑀖𑀁 𑀲𑀻𑀖𑀁 𑀕𑀘𑁆𑀙𑀣, 𑀫𑀸 ¶ 𑀬𑁄𑀕𑁆𑀕𑀸𑀦𑀺 𑀓𑀺𑀮𑀫𑀺𑀢𑁆𑀣𑀸’’𑀢𑀺. 𑀙𑀟𑁆𑀟𑁂𑀣, 𑀪𑁄, 𑀧𑀼𑀭𑀸𑀡𑀸𑀦𑀺 𑀢𑀺𑀡𑀸𑀦𑀺 𑀓𑀝𑁆𑀞𑀸𑀦𑀺 𑀉𑀤𑀓𑀸𑀦𑀺, 𑀮𑀳𑀼𑀪𑀸𑀭𑁂𑀳𑀺 𑀲𑀓𑀝𑁂𑀳𑀺 𑀲𑀢𑁆𑀣𑀁 𑀧𑀬𑀸𑀧𑁂𑀣𑀸’𑀢𑀺. ‘𑀏𑀯𑀁, 𑀪𑁄’𑀢𑀺 𑀔𑁄 𑀢𑁂 𑀲𑀢𑁆𑀣𑀺𑀓𑀸 𑀢𑀲𑁆𑀲 𑀲𑀢𑁆𑀣𑀯𑀸𑀳𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀙𑀟𑁆𑀟𑁂𑀢𑁆𑀯𑀸 𑀧𑀼𑀭𑀸𑀡𑀸𑀦𑀺 𑀢𑀺𑀡𑀸𑀦𑀺 𑀓𑀝𑁆𑀞𑀸𑀦𑀺 𑀉𑀤𑀓𑀸𑀦𑀺 𑀮𑀳𑀼𑀪𑀸𑀭𑁂𑀳𑀺 𑀲𑀓𑀝𑁂𑀳𑀺 𑀲𑀢𑁆𑀣𑀁 𑀧𑀬𑀸𑀧𑁂𑀲𑀼𑀁. 𑀢𑁂 𑀧𑀞𑀫𑁂𑀧𑀺 𑀲𑀢𑁆𑀣𑀯𑀸𑀲𑁂 𑀦 𑀅𑀤𑁆𑀤𑀲𑀁𑀲𑀼 𑀢𑀺𑀡𑀁 𑀯𑀸 𑀓𑀝𑁆𑀞𑀁 𑀯𑀸 𑀉𑀤𑀓𑀁 𑀯𑀸. 𑀤𑀼𑀢𑀺𑀬𑁂𑀧𑀺 𑀲𑀢𑁆𑀣𑀯𑀸𑀲𑁂… 𑀢𑀢𑀺𑀬𑁂𑀧𑀺 𑀲𑀢𑁆𑀣𑀯𑀸𑀲𑁂… 𑀘𑀢𑀼𑀢𑁆𑀣𑁂𑀧𑀺 𑀲𑀢𑁆𑀣𑀯𑀸𑀲𑁂… 𑀧𑀜𑁆𑀘𑀫𑁂𑀧𑀺 𑀲𑀢𑁆𑀣𑀯𑀸𑀲𑁂… 𑀙𑀝𑁆𑀞𑁂𑀧𑀺 𑀲𑀢𑁆𑀣𑀯𑀸𑀲𑁂… 𑀲𑀢𑁆𑀢𑀫𑁂𑀧𑀺 𑀲𑀢𑁆𑀣𑀯𑀸𑀲𑁂 𑀦 𑀅𑀤𑁆𑀤𑀲𑀁𑀲𑀼 𑀢𑀺𑀡𑀁 𑀯𑀸 𑀓𑀝𑁆𑀞𑀁 𑀯𑀸 𑀉𑀤𑀓𑀁 𑀯𑀸. 𑀲𑀩𑁆𑀩𑁂𑀯 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀺𑀁𑀲𑀼. 𑀬𑁂 𑀘 𑀢𑀲𑁆𑀫𑀺𑀁 𑀲𑀢𑁆𑀣𑁂 𑀅𑀳𑁂𑀲𑀼𑀁 𑀫𑀦𑀼𑀲𑁆𑀲𑀸 𑀯𑀸 𑀧𑀲𑀽 𑀯𑀸, 𑀲𑀩𑁆𑀩𑁂 𑀲𑁄 𑀬𑀓𑁆𑀔𑁄 𑀅𑀫𑀦𑀼𑀲𑁆𑀲𑁄 𑀪𑀓𑁆𑀔𑁂𑀲𑀺. 𑀅𑀝𑁆𑀞𑀺𑀓𑀸𑀦𑁂𑀯 𑀲𑁂𑀲𑀸𑀦𑀺.

‘‘𑀬𑀤𑀸 𑀅𑀜𑁆𑀜𑀸𑀲𑀺 𑀤𑀼𑀢𑀺𑀬𑁄 𑀲𑀢𑁆𑀣𑀯𑀸𑀳𑁄 𑁋 ‘𑀩𑀳𑀼𑀦𑀺𑀓𑁆𑀔𑀦𑁆𑀢𑁄 𑀔𑁄, 𑀪𑁄, 𑀤𑀸𑀦𑀺 𑀲𑁄 𑀲𑀢𑁆𑀣𑁄’𑀢𑀺 𑀩𑀳𑀼𑀁 𑀢𑀺𑀡𑀜𑁆𑀘 𑀓𑀝𑁆𑀞𑀜𑁆𑀘 𑀉𑀤𑀓𑀜𑁆𑀘 𑀆𑀭𑁄𑀧𑁂𑀢𑁆𑀯𑀸 𑀲𑀢𑁆𑀣𑀁 𑀧𑀬𑀸𑀧𑁂𑀲𑀺. 𑀤𑁆𑀯𑀻𑀳𑀢𑀻𑀳𑀧𑀬𑀸𑀢𑁄 𑀔𑁄 𑀧𑀦 𑀲𑁄 𑀲𑀢𑁆𑀣𑁄 𑀅𑀤𑁆𑀤𑀲 𑀧𑀼𑀭𑀺𑀲𑀁 𑀓𑀸𑀴𑀁 𑀮𑁄𑀳𑀺𑀢𑀓𑁆𑀔𑀁 𑀲𑀦𑁆𑀦𑀤𑁆𑀥𑀓𑀮𑀸𑀧𑀁 ¶ 𑀓𑀼𑀫𑀼𑀤𑀫𑀸𑀮𑀺𑀁 𑀅𑀮𑁆𑀮𑀯𑀢𑁆𑀣𑀁 𑀅𑀮𑁆𑀮𑀓𑁂𑀲𑀁 𑀓𑀤𑁆𑀤𑀫𑀫𑀓𑁆𑀔𑀺𑀢𑁂𑀳𑀺 𑀘𑀓𑁆𑀓𑁂𑀳𑀺 𑀪𑀤𑁆𑀭𑁂𑀦 𑀭𑀣𑁂𑀦 𑀧𑀝𑀺𑀧𑀣𑀁 𑀆𑀕𑀘𑁆𑀙𑀦𑁆𑀢𑀁, 𑀤𑀺𑀲𑁆𑀯𑀸 𑀏𑀢𑀤𑀯𑁄𑀘 𑁋 ‘𑀓𑀼𑀢𑁄, 𑀪𑁄, 𑀆𑀕𑀘𑁆𑀙𑀲𑀻’𑀢𑀺? ‘𑀅𑀫𑀼𑀓𑀫𑁆𑀳𑀸 𑀚𑀦𑀧𑀤𑀸’𑀢𑀺. ‘𑀓𑀼𑀳𑀺𑀁 𑀕𑀫𑀺𑀲𑁆𑀲𑀲𑀻’𑀢𑀺? ‘𑀅𑀫𑀼𑀓𑀁 𑀦𑀸𑀫 𑀚𑀦𑀧𑀤’𑀦𑁆𑀢𑀺. ‘𑀓𑀘𑁆𑀘𑀺, 𑀪𑁄, 𑀧𑀼𑀭𑀢𑁄 𑀓𑀦𑁆𑀢𑀸𑀭𑁂 𑀫𑀳𑀸𑀫𑁂𑀖𑁄 𑀅𑀪𑀺𑀧𑁆𑀧𑀯𑀼𑀝𑁆𑀞𑁄’𑀢𑀺? ‘𑀏𑀯𑀁, 𑀪𑁄, 𑀧𑀼𑀭𑀢𑁄 𑀓𑀦𑁆𑀢𑀸𑀭𑁂 𑀫𑀳𑀸𑀫𑁂𑀖𑁄 𑀅𑀪𑀺𑀧𑁆𑀧𑀯𑀼𑀝𑁆𑀞𑁄. 𑀆𑀲𑀺𑀢𑁆𑀢𑁄𑀤𑀓𑀸𑀦𑀺 𑀯𑀝𑀼𑀫𑀸𑀦𑀺, 𑀩𑀳𑀼 ¶ 𑀢𑀺𑀡𑀜𑁆𑀘 𑀓𑀝𑁆𑀞𑀜𑁆𑀘 𑀉𑀤𑀓𑀜𑁆𑀘. 𑀙𑀟𑁆𑀟𑁂𑀣 ¶ ¶ , 𑀪𑁄, 𑀧𑀼𑀭𑀸𑀡𑀸𑀦𑀺 𑀢𑀺𑀡𑀸𑀦𑀺 𑀓𑀝𑁆𑀞𑀸𑀦𑀺 𑀉𑀤𑀓𑀸𑀦𑀺, 𑀮𑀳𑀼𑀪𑀸𑀭𑁂𑀳𑀺 𑀲𑀓𑀝𑁂𑀳𑀺 𑀲𑀻𑀖𑀁 𑀲𑀻𑀖𑀁 𑀕𑀘𑁆𑀙𑀣, 𑀫𑀸 𑀬𑁄𑀕𑁆𑀕𑀸𑀦𑀺 𑀓𑀺𑀮𑀫𑀺𑀢𑁆𑀣𑀸’𑀢𑀺.

‘‘𑀅𑀣 𑀔𑁄 𑀲𑁄 𑀲𑀢𑁆𑀣𑀯𑀸𑀳𑁄 𑀲𑀢𑁆𑀣𑀺𑀓𑁂 𑀆𑀫𑀦𑁆𑀢𑁂𑀲𑀺 𑁋 ‘𑀅𑀬𑀁, 𑀪𑁄, ‘‘𑀧𑀼𑀭𑀺𑀲𑁄 𑀏𑀯𑀫𑀸𑀳 𑁋 𑀧𑀼𑀭𑀢𑁄 𑀓𑀦𑁆𑀢𑀸𑀭𑁂 𑀫𑀳𑀸𑀫𑁂𑀖𑁄 𑀅𑀪𑀺𑀧𑁆𑀧𑀯𑀼𑀝𑁆𑀞𑁄, 𑀆𑀲𑀺𑀢𑁆𑀢𑁄𑀤𑀓𑀸𑀦𑀺 𑀯𑀝𑀼𑀫𑀸𑀦𑀺, 𑀩𑀳𑀼 𑀢𑀺𑀡𑀜𑁆𑀘 𑀓𑀝𑁆𑀞𑀜𑁆𑀘 𑀉𑀤𑀓𑀜𑁆𑀘. 𑀙𑀟𑁆𑀟𑁂𑀣, 𑀪𑁄, 𑀧𑀼𑀭𑀸𑀡𑀸𑀦𑀺 𑀢𑀺𑀡𑀸𑀦𑀺 𑀓𑀝𑁆𑀞𑀸𑀦𑀺 𑀉𑀤𑀓𑀸𑀦𑀺, 𑀮𑀳𑀼𑀪𑀸𑀭𑁂𑀳𑀺 𑀲𑀓𑀝𑁂𑀳𑀺 𑀲𑀻𑀖𑀁 𑀲𑀻𑀖𑀁 𑀕𑀘𑁆𑀙𑀣; 𑀫𑀸 𑀬𑁄𑀕𑁆𑀕𑀸𑀦𑀺 𑀓𑀺𑀮𑀫𑀺𑀢𑁆𑀣𑀸’’𑀢𑀺. 𑀅𑀬𑀁 𑀪𑁄 𑀧𑀼𑀭𑀺𑀲𑁄 𑀦𑁂𑀯 𑀅𑀫𑁆𑀳𑀸𑀓𑀁 𑀫𑀺𑀢𑁆𑀢𑁄, 𑀦 𑀜𑀸𑀢𑀺𑀲𑀸𑀮𑁄𑀳𑀺𑀢𑁄, 𑀓𑀣𑀁 𑀫𑀬𑀁 𑀇𑀫𑀲𑁆𑀲 𑀲𑀤𑁆𑀥𑀸𑀬 𑀕𑀫𑀺𑀲𑁆𑀲𑀸𑀫. 𑀦 𑀯𑁄 𑀙𑀟𑁆𑀟𑁂𑀢𑀩𑁆𑀩𑀸𑀦𑀺 𑀧𑀼𑀭𑀸𑀡𑀸𑀦𑀺 𑀢𑀺𑀡𑀸𑀦𑀺 𑀓𑀝𑁆𑀞𑀸𑀦𑀺 𑀉𑀤𑀓𑀸𑀦𑀺, 𑀬𑀣𑀸𑀪𑀢𑁂𑀦 𑀪𑀡𑁆𑀟𑁂𑀦 𑀲𑀢𑁆𑀣𑀁 𑀧𑀬𑀸𑀧𑁂𑀣. 𑀦 𑀦𑁄 𑀧𑀼𑀭𑀸𑀡𑀁 𑀙𑀟𑁆𑀟𑁂𑀲𑁆𑀲𑀸𑀫𑀸’𑀢𑀺. ‘𑀏𑀯𑀁, 𑀪𑁄’𑀢𑀺 𑀔𑁄 𑀢𑁂 𑀲𑀢𑁆𑀣𑀺𑀓𑀸 𑀢𑀲𑁆𑀲 𑀲𑀢𑁆𑀣𑀯𑀸𑀳𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑀣𑀸𑀪𑀢𑁂𑀦 𑀪𑀡𑁆𑀟𑁂𑀦 𑀲𑀢𑁆𑀣𑀁 𑀧𑀬𑀸𑀧𑁂𑀲𑀼𑀁. 𑀢𑁂 𑀧𑀞𑀫𑁂𑀧𑀺 𑀲𑀢𑁆𑀣𑀯𑀸𑀲𑁂 𑀦 𑀅𑀤𑁆𑀤𑀲𑀁𑀲𑀼 𑀢𑀺𑀡𑀁 𑀯𑀸 𑀓𑀝𑁆𑀞𑀁 ¶ 𑀯𑀸 𑀉𑀤𑀓𑀁 𑀯𑀸. 𑀤𑀼𑀢𑀺𑀬𑁂𑀧𑀺 𑀲𑀢𑁆𑀣𑀯𑀸𑀲𑁂… 𑀢𑀢𑀺𑀬𑁂𑀧𑀺 𑀲𑀢𑁆𑀣𑀯𑀸𑀲𑁂… 𑀘𑀢𑀼𑀢𑁆𑀣𑁂𑀧𑀺 𑀲𑀢𑁆𑀣𑀯𑀸𑀲𑁂… 𑀧𑀜𑁆𑀘𑀫𑁂𑀧𑀺 𑀲𑀢𑁆𑀣𑀯𑀸𑀲𑁂… 𑀙𑀝𑁆𑀞𑁂𑀧𑀺 𑀲𑀢𑁆𑀣𑀯𑀸𑀲𑁂… 𑀲𑀢𑁆𑀢𑀫𑁂𑀧𑀺 𑀲𑀢𑁆𑀣𑀯𑀸𑀲𑁂 𑀦 𑀅𑀤𑁆𑀤𑀲𑀁𑀲𑀼 𑀢𑀺𑀡𑀁 𑀯𑀸 𑀓𑀝𑁆𑀞𑀁 𑀯𑀸 𑀉𑀤𑀓𑀁 𑀯𑀸. 𑀢𑀜𑁆𑀘 𑀲𑀢𑁆𑀣𑀁 𑀅𑀤𑁆𑀤𑀲𑀁𑀲𑀼 𑀅𑀦𑀬𑀩𑁆𑀬𑀲𑀦𑀁 𑀆𑀧𑀦𑁆𑀦𑀁. 𑀬𑁂 𑀘 𑀢𑀲𑁆𑀫𑀺𑀁 𑀲𑀢𑁆𑀣𑁂𑀧𑀺 𑀅𑀳𑁂𑀲𑀼𑀁 𑀫𑀦𑀼𑀲𑁆𑀲𑀸 𑀯𑀸 𑀧𑀲𑀽 𑀯𑀸, 𑀢𑁂𑀲𑀜𑁆𑀘 𑀅𑀝𑁆𑀞𑀺𑀓𑀸𑀦𑁂𑀯 𑀅𑀤𑁆𑀤𑀲𑀁𑀲𑀼 𑀢𑁂𑀦 𑀬𑀓𑁆𑀔𑁂𑀦 𑀅𑀫𑀦𑀼𑀲𑁆𑀲𑁂𑀦 𑀪𑀓𑁆𑀔𑀺𑀢𑀸𑀦𑀁.

‘‘𑀅𑀣 𑀔𑁄 𑀲𑁄 𑀲𑀢𑁆𑀣𑀯𑀸𑀳𑁄 𑀲𑀢𑁆𑀣𑀺𑀓𑁂 𑀆𑀫𑀦𑁆𑀢𑁂𑀲𑀺 𑁋 ‘𑀅𑀬𑀁 𑀔𑁄, 𑀪𑁄, 𑀲𑀢𑁆𑀣𑁄 𑀅𑀦𑀬𑀩𑁆𑀬𑀲𑀦𑀁 𑀆𑀧𑀦𑁆𑀦𑁄, 𑀬𑀣𑀸 𑀢𑀁 𑀢𑁂𑀦 𑀩𑀸𑀮𑁂𑀦 ¶ 𑀲𑀢𑁆𑀣𑀯𑀸𑀳𑁂𑀦 𑀧𑀭𑀺𑀡𑀸𑀬𑀓𑁂𑀦. 𑀢𑁂𑀦 𑀳𑀺, 𑀪𑁄, 𑀬𑀸𑀦𑀫𑁆𑀳𑀸𑀓𑀁 𑀲𑀢𑁆𑀣𑁂 𑀅𑀧𑁆𑀧𑀲𑀸𑀭𑀸𑀦𑀺 𑀧𑀡𑀺𑀬𑀸𑀦𑀺, 𑀢𑀸𑀦𑀺 𑀙𑀟𑁆𑀟𑁂𑀢𑁆𑀯𑀸, 𑀬𑀸𑀦𑀺 𑀇𑀫𑀲𑁆𑀫𑀺𑀁 𑀲𑀢𑁆𑀣𑁂 𑀫𑀳𑀸𑀲𑀸𑀭𑀸𑀦𑀺 𑀧𑀡𑀺𑀬𑀸𑀦𑀺, 𑀢𑀸𑀦𑀺 𑀆𑀤𑀺𑀬𑀣𑀸’𑀢𑀺. ‘𑀏𑀯𑀁, 𑀪𑁄’𑀢𑀺 𑀔𑁄 𑀢𑁂 𑀲𑀢𑁆𑀣𑀺𑀓𑀸 𑀢𑀲𑁆𑀲 𑀲𑀢𑁆𑀣𑀯𑀸𑀳𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑀸𑀦𑀺 𑀲𑀓𑀲𑁆𑀫𑀺𑀁 𑀲𑀢𑁆𑀣𑁂 𑀅𑀧𑁆𑀧𑀲𑀸𑀭𑀸𑀦𑀺 𑀧𑀡𑀺𑀬𑀸𑀦𑀺, 𑀢𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀬𑀸𑀦𑀺 𑀢𑀲𑁆𑀫𑀺𑀁 𑀲𑀢𑁆𑀣𑁂 𑀫𑀳𑀸𑀲𑀸𑀭𑀸𑀦𑀺 𑀧𑀡𑀺𑀬𑀸𑀦𑀺, 𑀢𑀸𑀦𑀺 𑀆𑀤𑀺𑀬𑀺𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀢𑀁 𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀭𑀺𑀁𑀲𑀼, 𑀬𑀣𑀸 𑀢𑀁 𑀧𑀡𑁆𑀟𑀺𑀢𑁂𑀦 𑀲𑀢𑁆𑀣𑀯𑀸𑀳𑁂𑀦 𑀧𑀭𑀺𑀡𑀸𑀬𑀓𑁂𑀦. 𑀏𑀯𑀫𑁂𑀯 𑀔𑁄 𑀢𑁆𑀯𑀁, 𑀭𑀸𑀚𑀜𑁆𑀜, 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀺𑀲𑁆𑀲𑀲𑀺 𑀅𑀬𑁄𑀦𑀺𑀲𑁄 𑀧𑀭𑀮𑁄𑀓𑀁 𑀕𑀯𑁂𑀲𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀺 𑀲𑁄 𑀧𑀼𑀭𑀺𑀫𑁄 𑀲𑀢𑁆𑀣𑀯𑀸𑀳𑁄. 𑀬𑁂𑀧𑀺 𑀢𑀯 [𑀢𑁂 (𑀓.)] 𑀲𑁄𑀢𑀩𑁆𑀩𑀁 𑀲𑀤𑁆𑀥𑀸𑀢𑀩𑁆𑀩𑀁 [𑀲𑀤𑁆𑀤𑀳𑀸𑀢𑀩𑁆𑀩𑀁 (𑀧𑀻. 𑀓.)] 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀢𑁂𑀧𑀺 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀢𑁂 𑀲𑀢𑁆𑀣𑀺𑀓𑀸. 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀁, 𑀭𑀸𑀚𑀜𑁆𑀜 ¶ , 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁; 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀁, 𑀭𑀸𑀚𑀜𑁆𑀜, 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁. 𑀫𑀸 𑀢𑁂 𑀅𑀳𑁄𑀲𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’’𑀢𑀺.

𑁪𑁩𑁧. ‘‘𑀓𑀺𑀜𑁆𑀘𑀸𑀧𑀺 𑀪𑀯𑀁 𑀓𑀲𑁆𑀲𑀧𑁄 𑀏𑀯𑀫𑀸𑀳, 𑀅𑀣 𑀔𑁄 𑀦𑁂𑀯𑀸𑀳𑀁 𑀲𑀓𑁆𑀓𑁄𑀫𑀺 𑀇𑀤𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑀼𑀁. 𑀭𑀸𑀚𑀸𑀧𑀺 𑀫𑀁 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀚𑀸𑀦𑀸𑀢𑀺 𑀢𑀺𑀭𑁄𑀭𑀸𑀚𑀸𑀦𑁄𑀧𑀺 𑁋 ‘𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 ¶ 𑀏𑀯𑀁𑀯𑀸𑀤𑀻 𑀏𑀯𑀁𑀤𑀺𑀝𑁆𑀞𑀻 𑁋 ‘‘𑀇𑀢𑀺𑀧𑀺 ¶ 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄…𑀧𑁂… 𑀯𑀺𑀧𑀸𑀓𑁄’’’𑀢𑀺. 𑀲𑀘𑀸𑀳𑀁, 𑀪𑁄 𑀓𑀲𑁆𑀲𑀧, 𑀇𑀤𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀲𑁆𑀲𑀸𑀫𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀫𑁂 𑀯𑀢𑁆𑀢𑀸𑀭𑁄 𑁋 ‘𑀬𑀸𑀯 𑀩𑀸𑀮𑁄 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄, 𑀅𑀩𑁆𑀬𑀢𑁆𑀢𑁄 𑀤𑀼𑀕𑁆𑀕𑀳𑀺𑀢𑀕𑀸𑀳𑀻’𑀢𑀺. 𑀓𑁄𑀧𑁂𑀦𑀧𑀺 ¶ 𑀦𑀁 𑀳𑀭𑀺𑀲𑁆𑀲𑀸𑀫𑀺, 𑀫𑀓𑁆𑀔𑁂𑀦𑀧𑀺 𑀦𑀁 𑀳𑀭𑀺𑀲𑁆𑀲𑀸𑀫𑀺, 𑀧𑀮𑀸𑀲𑁂𑀦𑀧𑀺 𑀦𑀁 𑀳𑀭𑀺𑀲𑁆𑀲𑀸𑀫𑀻’’𑀢𑀺.

𑀕𑀽𑀣𑀪𑀸𑀭𑀺𑀓𑀉𑀧𑀫𑀸

𑁪𑁩𑁨. ‘‘𑀢𑁂𑀦 𑀳𑀺, 𑀭𑀸𑀚𑀜𑁆𑀜, 𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺. 𑀉𑀧𑀫𑀸𑀬 𑀫𑀺𑀥𑁂𑀓𑀘𑁆𑀘𑁂 𑀯𑀺𑀜𑁆𑀜𑀽 𑀧𑀼𑀭𑀺𑀲𑀸 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀦𑁆𑀢𑀺. 𑀪𑀽𑀢𑀧𑀼𑀩𑁆𑀩𑀁, 𑀭𑀸𑀚𑀜𑁆𑀜, 𑀅𑀜𑁆𑀜𑀢𑀭𑁄 𑀲𑀽𑀓𑀭𑀧𑁄𑀲𑀓𑁄 𑀧𑀼𑀭𑀺𑀲𑁄 𑀲𑀓𑀫𑁆𑀳𑀸 𑀕𑀸𑀫𑀸 𑀅𑀜𑁆𑀜𑀁 𑀕𑀸𑀫𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀅𑀤𑁆𑀤𑀲 𑀧𑀳𑀽𑀢𑀁 𑀲𑀼𑀓𑁆𑀔𑀕𑀽𑀣𑀁 𑀙𑀟𑁆𑀟𑀺𑀢𑀁. 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘𑀅𑀬𑀁 𑀔𑁄 𑀧𑀳𑀼𑀢𑁄 𑀲𑀼𑀓𑁆𑀔𑀕𑀽𑀣𑁄 𑀙𑀟𑁆𑀟𑀺𑀢𑁄, 𑀫𑀫 𑀘 𑀲𑀽𑀓𑀭𑀪𑀢𑁆𑀢𑀁 [𑀲𑀽𑀓𑀭𑀸𑀦𑀁 𑀪𑀓𑁆𑀔𑁄 (𑀲𑁆𑀬𑀸.)]; 𑀬𑀁𑀦𑀽𑀦𑀸𑀳𑀁 𑀇𑀢𑁄 𑀲𑀼𑀓𑁆𑀔𑀕𑀽𑀣𑀁 𑀳𑀭𑁂𑀬𑁆𑀬’𑀦𑁆𑀢𑀺. 𑀲𑁄 𑀉𑀢𑁆𑀢𑀭𑀸𑀲𑀗𑁆𑀕𑀁 𑀧𑀢𑁆𑀣𑀭𑀺𑀢𑁆𑀯𑀸 𑀧𑀳𑀽𑀢𑀁 𑀲𑀼𑀓𑁆𑀔𑀕𑀽𑀣𑀁 𑀆𑀓𑀺𑀭𑀺𑀢𑁆𑀯𑀸 𑀪𑀡𑁆𑀟𑀺𑀓𑀁 𑀩𑀦𑁆𑀥𑀺𑀢𑁆𑀯𑀸 𑀲𑀻𑀲𑁂 𑀉𑀩𑁆𑀩𑀸𑀳𑁂𑀢𑁆𑀯𑀸 [𑀉𑀘𑁆𑀘𑀸𑀭𑁄𑀧𑁂𑀢𑁆𑀯𑀸 (𑀓. 𑀲𑀻. 𑀓.)] 𑀅𑀕𑀫𑀸𑀲𑀺. 𑀢𑀲𑁆𑀲 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀳𑀸𑀅𑀓𑀸𑀮𑀫𑁂𑀖𑁄 𑀧𑀸𑀯𑀲𑁆𑀲𑀺. 𑀲𑁄 𑀉𑀕𑁆𑀖𑀭𑀦𑁆𑀢𑀁 𑀧𑀕𑁆𑀖𑀭𑀦𑁆𑀢𑀁 𑀬𑀸𑀯 𑀅𑀕𑁆𑀕𑀦𑀔𑀸 𑀕𑀽𑀣𑁂𑀦 𑀫𑀓𑁆𑀔𑀺𑀢𑁄 𑀕𑀽𑀣𑀪𑀸𑀭𑀁 𑀆𑀤𑀸𑀬 𑀅𑀕𑀫𑀸𑀲𑀺. 𑀢𑀫𑁂𑀦𑀁 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘𑀓𑀘𑁆𑀘𑀺 𑀦𑁄 𑀢𑁆𑀯𑀁, 𑀪𑀡𑁂, 𑀉𑀫𑁆𑀫𑀢𑁆𑀢𑁄, 𑀓𑀘𑁆𑀘𑀺 𑀯𑀺𑀘𑁂𑀢𑁄, 𑀓𑀣𑀜𑁆𑀳𑀺 𑀦𑀸𑀫 𑀉𑀕𑁆𑀖𑀭𑀦𑁆𑀢𑀁 𑀧𑀕𑁆𑀖𑀭𑀦𑁆𑀢𑀁 𑀬𑀸𑀯 𑀅𑀕𑁆𑀕𑀦𑀔𑀸 𑀕𑀽𑀣𑁂𑀦 𑀫𑀓𑁆𑀔𑀺𑀢𑁄 𑀕𑀽𑀣𑀪𑀸𑀭𑀁 𑀳𑀭𑀺𑀲𑁆𑀲𑀲𑀻’𑀢𑀺. ‘𑀢𑀼𑀫𑁆𑀳𑁂 𑀔𑁆𑀯𑁂𑀢𑁆𑀣, 𑀪𑀡𑁂, 𑀉𑀫𑁆𑀫𑀢𑁆𑀢𑀸, 𑀢𑀼𑀫𑁆𑀳𑁂 𑀯𑀺𑀘𑁂𑀢𑀸, 𑀢𑀣𑀸 ¶ 𑀳𑀺 𑀧𑀦 𑀫𑁂 𑀲𑀽𑀓𑀭𑀪𑀢𑁆𑀢’𑀦𑁆𑀢𑀺. 𑀏𑀯𑀫𑁂𑀯 𑀔𑁄 𑀢𑁆𑀯𑀁, 𑀭𑀸𑀚𑀜𑁆𑀜, 𑀕𑀽𑀣𑀪𑀸𑀭𑀺𑀓𑀽𑀧𑀫𑁄 [𑀕𑀽𑀣𑀳𑀸𑀭𑀺𑀓𑀽𑀧𑀫𑁄 (𑀲𑀻. 𑀧𑀻.)] 𑀫𑀜𑁆𑀜𑁂 𑀧𑀝𑀺𑀪𑀸𑀲𑀺. 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀁, 𑀭𑀸𑀚𑀜𑁆𑀜, 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁. 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀁, 𑀭𑀸𑀚𑀜𑁆𑀜, 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁. 𑀫𑀸 𑀢𑁂 𑀅𑀳𑁄𑀲𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’’𑀢𑀺.

𑁪𑁩𑁩. ‘‘𑀓𑀺𑀜𑁆𑀘𑀸𑀧𑀺 ¶ 𑀪𑀯𑀁 𑀓𑀲𑁆𑀲𑀧𑁄 𑀏𑀯𑀫𑀸𑀳, 𑀅𑀣 𑀔𑁄 𑀦𑁂𑀯𑀸𑀳𑀁 𑀲𑀓𑁆𑀓𑁄𑀫𑀺 𑀇𑀤𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑀼𑀁. 𑀭𑀸𑀚𑀸𑀧𑀺 𑀫𑀁 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀚𑀸𑀦𑀸𑀢𑀺 𑀢𑀺𑀭𑁄𑀭𑀸𑀚𑀸𑀦𑁄𑀧𑀺 𑁋 ‘𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 𑀏𑀯𑀁𑀯𑀸𑀤𑀻 𑀏𑀯𑀁𑀤𑀺𑀝𑁆𑀞𑀻 𑁋 ‘‘𑀇𑀢𑀺𑀧𑀺 𑀦𑀢𑁆𑀣𑀺 ¶ 𑀧𑀭𑁄 𑀮𑁄𑀓𑁄…𑀧𑁂… 𑀯𑀺𑀧𑀸𑀓𑁄’’𑀢𑀺. 𑀲𑀘𑀸𑀳𑀁, 𑀪𑁄 𑀓𑀲𑁆𑀲𑀧, 𑀇𑀤𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀲𑁆𑀲𑀸𑀫𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀫𑁂 𑀯𑀢𑁆𑀢𑀸𑀭𑁄 𑁋 ‘𑀬𑀸𑀯 𑀩𑀸𑀮𑁄 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 𑀅𑀩𑁆𑀬𑀢𑁆𑀢𑁄 𑀤𑀼𑀕𑁆𑀕𑀳𑀺𑀢𑀕𑀸𑀳𑀻’𑀢𑀺. 𑀓𑁄𑀧𑁂𑀦𑀧𑀺 𑀦𑀁 𑀳𑀭𑀺𑀲𑁆𑀲𑀸𑀫𑀺, 𑀫𑀓𑁆𑀔𑁂𑀦𑀧𑀺 𑀦𑀁 𑀳𑀭𑀺𑀲𑁆𑀲𑀸𑀫𑀺, 𑀧𑀮𑀸𑀲𑁂𑀦𑀧𑀺 𑀦𑀁 𑀳𑀭𑀺𑀲𑁆𑀲𑀸𑀫𑀻’’𑀢𑀺.

𑀅𑀓𑁆𑀔𑀥𑀼𑀢𑁆𑀢𑀓𑀉𑀧𑀫𑀸

𑁪𑁩𑁪. ‘‘𑀢𑁂𑀦 ¶ 𑀳𑀺, 𑀭𑀸𑀚𑀜𑁆𑀜, 𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺, 𑀉𑀧𑀫𑀸𑀬 𑀫𑀺𑀥𑁂𑀓𑀘𑁆𑀘𑁂 𑀯𑀺𑀜𑁆𑀜𑀽 𑀧𑀼𑀭𑀺𑀲𑀸 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀦𑁆𑀢𑀺. 𑀪𑀽𑀢𑀧𑀼𑀩𑁆𑀩𑀁, 𑀭𑀸𑀚𑀜𑁆𑀜, 𑀤𑁆𑀯𑁂 𑀅𑀓𑁆𑀔𑀥𑀼𑀢𑁆𑀢𑀸 𑀅𑀓𑁆𑀔𑁂𑀳𑀺 𑀤𑀺𑀩𑁆𑀩𑀺𑀁𑀲𑀼. 𑀏𑀓𑁄 𑀅𑀓𑁆𑀔𑀥𑀼𑀢𑁆𑀢𑁄 𑀆𑀕𑀢𑀸𑀕𑀢𑀁 𑀓𑀮𑀺𑀁 𑀕𑀺𑀮𑀢𑀺. 𑀅𑀤𑁆𑀤𑀲𑀸 𑀔𑁄 𑀤𑀼𑀢𑀺𑀬𑁄 𑀅𑀓𑁆𑀔𑀥𑀼𑀢𑁆𑀢𑁄 𑀢𑀁 𑀅𑀓𑁆𑀔𑀥𑀼𑀢𑁆𑀢𑀁 𑀆𑀕𑀢𑀸𑀕𑀢𑀁 𑀓𑀮𑀺𑀁 𑀕𑀺𑀮𑀦𑁆𑀢𑀁, 𑀤𑀺𑀲𑁆𑀯𑀸 𑀢𑀁 𑀅𑀓𑁆𑀔𑀥𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘𑀢𑁆𑀯𑀁 𑀔𑁄, 𑀲𑀫𑁆𑀫, 𑀏𑀓𑀦𑁆𑀢𑀺𑀓𑁂𑀦 𑀚𑀺𑀦𑀸𑀲𑀺, 𑀤𑁂𑀳𑀺 𑀫𑁂, 𑀲𑀫𑁆𑀫, 𑀅𑀓𑁆𑀔𑁂 𑀧𑀚𑁄𑀳𑀺𑀲𑁆𑀲𑀸𑀫𑀻’𑀢𑀺. ‘𑀏𑀯𑀁 𑀲𑀫𑁆𑀫𑀸’𑀢𑀺 𑀔𑁄 𑀲𑁄 𑀅𑀓𑁆𑀔𑀥𑀼𑀢𑁆𑀢𑁄 𑀢𑀲𑁆𑀲 𑀅𑀓𑁆𑀔𑀥𑀼𑀢𑁆𑀢𑀲𑁆𑀲 𑀅𑀓𑁆𑀔𑁂 𑀧𑀸𑀤𑀸𑀲𑀺. 𑀅𑀣 𑀔𑁄 𑀲𑁄 𑀅𑀓𑁆𑀔𑀥𑀼𑀢𑁆𑀢𑁄 𑀅𑀓𑁆𑀔𑁂 𑀯𑀺𑀲𑁂𑀦 𑀧𑀭𑀺𑀪𑀸𑀯𑁂𑀢𑁆𑀯𑀸 𑀢𑀁 𑀅𑀓𑁆𑀔𑀥𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘𑀏𑀳𑀺 𑀔𑁄, 𑀲𑀫𑁆𑀫, 𑀅𑀓𑁆𑀔𑁂𑀳𑀺 𑀤𑀺𑀩𑁆𑀩𑀺𑀲𑁆𑀲𑀸𑀫𑀸’𑀢𑀺. ‘𑀏𑀯𑀁 𑀲𑀫𑁆𑀫𑀸’𑀢𑀺 𑀔𑁄 𑀲𑁄 𑀅𑀓𑁆𑀔𑀥𑀼𑀢𑁆𑀢𑁄 𑀢𑀲𑁆𑀲 𑀅𑀓𑁆𑀔𑀥𑀼𑀢𑁆𑀢𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀢𑁂 𑀅𑀓𑁆𑀔𑀥𑀼𑀢𑁆𑀢𑀸 𑀅𑀓𑁆𑀔𑁂𑀳𑀺 𑀤𑀺𑀩𑁆𑀩𑀺𑀁𑀲𑀼. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀲𑁄 ¶ 𑀅𑀓𑁆𑀔𑀥𑀼𑀢𑁆𑀢𑁄 𑀆𑀕𑀢𑀸𑀕𑀢𑀁 ¶ 𑀓𑀮𑀺𑀁 𑀕𑀺𑀮𑀢𑀺. 𑀅𑀤𑁆𑀤𑀲𑀸 𑀔𑁄 𑀤𑀼𑀢𑀺𑀬𑁄 𑀅𑀓𑁆𑀔𑀥𑀼𑀢𑁆𑀢𑁄 𑀢𑀁 𑀅𑀓𑁆𑀔𑀥𑀼𑀢𑁆𑀢𑀁 𑀤𑀼𑀢𑀺𑀬𑀫𑁆𑀧𑀺 𑀆𑀕𑀢𑀸𑀕𑀢𑀁 𑀓𑀮𑀺𑀁 𑀕𑀺𑀮𑀦𑁆𑀢𑀁, 𑀤𑀺𑀲𑁆𑀯𑀸 𑀢𑀁 𑀅𑀓𑁆𑀔𑀥𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀮𑀺𑀢𑁆𑀢𑀁 𑀧𑀭𑀫𑁂𑀦 𑀢𑁂𑀚𑀲𑀸, 𑀕𑀺𑀮𑀫𑀓𑁆𑀔𑀁 𑀧𑀼𑀭𑀺𑀲𑁄 𑀦 𑀩𑀼𑀚𑁆𑀛𑀢𑀺;

𑀕𑀺𑀮 𑀭𑁂 𑀕𑀺𑀮 𑀧𑀸𑀧𑀥𑀼𑀢𑁆𑀢𑀓 [𑀕𑀺𑀮𑀺 𑀭𑁂 𑀧𑀸𑀧𑀥𑀼𑀢𑁆𑀢𑀓 (𑀓.)], 𑀧𑀘𑁆𑀙𑀸 𑀢𑁂 𑀓𑀝𑀼𑀓𑀁 𑀪𑀯𑀺𑀲𑁆𑀲𑀢𑀻𑀢𑀺.

‘‘𑀏𑀯𑀫𑁂𑀯 𑀔𑁄 𑀢𑁆𑀯𑀁, 𑀭𑀸𑀚𑀜𑁆𑀜, 𑀅𑀓𑁆𑀔𑀥𑀼𑀢𑁆𑀢𑀓𑀽𑀧𑀫𑁄 𑀫𑀜𑁆𑀜𑁂 𑀧𑀝𑀺𑀪𑀸𑀲𑀺. 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀁, 𑀭𑀸𑀚𑀜𑁆𑀜, 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁; 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀁, 𑀭𑀸𑀚𑀜𑁆𑀜, 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁. 𑀫𑀸 𑀢𑁂 𑀅𑀳𑁄𑀲𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’’𑀢𑀺.

𑁪𑁩𑁫. ‘‘𑀓𑀺𑀜𑁆𑀘𑀸𑀧𑀺 𑀪𑀯𑀁 𑀓𑀲𑁆𑀲𑀧𑁄 𑀏𑀯𑀫𑀸𑀳, 𑀅𑀣 𑀔𑁄 𑀦𑁂𑀯𑀸𑀳𑀁 𑀲𑀓𑁆𑀓𑁄𑀫𑀺 𑀇𑀤𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑀼𑀁. 𑀭𑀸𑀚𑀸𑀧𑀺 𑀫𑀁 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀚𑀸𑀦𑀸𑀢𑀺 𑀢𑀺𑀭𑁄𑀭𑀸𑀚𑀸𑀦𑁄𑀧𑀺 𑁋 ‘𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 𑀏𑀯𑀁𑀯𑀸𑀤𑀻 𑀏𑀯𑀁𑀤𑀺𑀝𑁆𑀞𑀻 𑁋 ‘‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄…𑀧𑁂… 𑀯𑀺𑀧𑀸𑀓𑁄’’𑀢𑀺. 𑀲𑀘𑀸𑀳𑀁, 𑀪𑁄 𑀓𑀲𑁆𑀲𑀧, 𑀇𑀤𑀁 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 ¶ 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀲𑁆𑀲𑀸𑀫𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀫𑁂 𑀯𑀢𑁆𑀢𑀸𑀭𑁄 𑁋 ‘𑀬𑀸𑀯 𑀩𑀸𑀮𑁄 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 𑀅𑀩𑁆𑀬𑀢𑁆𑀢𑁄 𑀤𑀼𑀕𑁆𑀕𑀳𑀺𑀢𑀕𑀸𑀳𑀻’𑀢𑀺. 𑀓𑁄𑀧𑁂𑀦𑀧𑀺 𑀦𑀁 𑀳𑀭𑀺𑀲𑁆𑀲𑀸𑀫𑀺, 𑀫𑀓𑁆𑀔𑁂𑀦𑀧𑀺 𑀦𑀁 𑀳𑀭𑀺𑀲𑁆𑀲𑀸𑀫𑀺, 𑀧𑀮𑀸𑀲𑁂𑀦𑀧𑀺 𑀦𑀁 𑀳𑀭𑀺𑀲𑁆𑀲𑀸𑀫𑀻’’𑀢𑀺.

𑀲𑀸𑀡𑀪𑀸𑀭𑀺𑀓𑀉𑀧𑀫𑀸

𑁪𑁩𑁬. ‘‘𑀢𑁂𑀦 ¶ 𑀳𑀺, 𑀭𑀸𑀚𑀜𑁆𑀜, 𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺, 𑀉𑀧𑀫𑀸𑀬 𑀫𑀺𑀥𑁂𑀓𑀘𑁆𑀘𑁂 𑀯𑀺𑀜𑁆𑀜𑀽 ¶ 𑀧𑀼𑀭𑀺𑀲𑀸 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀦𑁆𑀢𑀺. 𑀪𑀽𑀢𑀧𑀼𑀩𑁆𑀩𑀁, 𑀭𑀸𑀚𑀜𑁆𑀜, 𑀅𑀜𑁆𑀜𑀢𑀭𑁄 𑀚𑀦𑀧𑀤𑁄 𑀯𑀼𑀝𑁆𑀞𑀸𑀲𑀺. 𑀅𑀣 𑀔𑁄 𑀲𑀳𑀸𑀬𑀓𑁄 𑀲𑀳𑀸𑀬𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘𑀆𑀬𑀸𑀫, 𑀲𑀫𑁆𑀫, 𑀬𑁂𑀦 𑀲𑁄 𑀚𑀦𑀧𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫, 𑀅𑀧𑁆𑀧𑁂𑀯 𑀦𑀸𑀫𑁂𑀢𑁆𑀣 𑀓𑀺𑀜𑁆𑀘𑀺 𑀥𑀦𑀁 𑀅𑀥𑀺𑀕𑀘𑁆𑀙𑁂𑀬𑁆𑀬𑀸𑀫𑀸’𑀢𑀺. ‘𑀏𑀯𑀁 𑀲𑀫𑁆𑀫𑀸’𑀢𑀺 𑀔𑁄 𑀲𑀳𑀸𑀬𑀓𑁄 𑀲𑀳𑀸𑀬𑀓𑀲𑁆𑀲 𑀧𑀘𑁆𑀘𑀲𑁆𑀲𑁄𑀲𑀺. 𑀢𑁂 𑀬𑁂𑀦 𑀲𑁄 𑀚𑀦𑀧𑀤𑁄, 𑀬𑁂𑀦 𑀅𑀜𑁆𑀜𑀢𑀭𑀁 𑀕𑀸𑀫𑀧𑀝𑁆𑀝𑀁 [𑀕𑀸𑀫𑀧𑀚𑁆𑀚𑀁 (𑀲𑁆𑀬𑀸.), 𑀕𑀸𑀫𑀧𑀢𑁆𑀢𑀁 (𑀲𑀻.)] 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼 ¶ , 𑀢𑀢𑁆𑀣 𑀅𑀤𑁆𑀤𑀲𑀁𑀲𑀼 𑀧𑀳𑀽𑀢𑀁 𑀲𑀸𑀡𑀁 𑀙𑀟𑁆𑀟𑀺𑀢𑀁, 𑀤𑀺𑀲𑁆𑀯𑀸 𑀲𑀳𑀸𑀬𑀓𑁄 𑀲𑀳𑀸𑀬𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘𑀇𑀤𑀁 𑀔𑁄, 𑀲𑀫𑁆𑀫, 𑀧𑀳𑀽𑀢𑀁 𑀲𑀸𑀡𑀁 𑀙𑀟𑁆𑀟𑀺𑀢𑀁, 𑀢𑁂𑀦 𑀳𑀺, 𑀲𑀫𑁆𑀫, 𑀢𑁆𑀯𑀜𑁆𑀘 𑀲𑀸𑀡𑀪𑀸𑀭𑀁 𑀩𑀦𑁆𑀥, 𑀅𑀳𑀜𑁆𑀘 𑀲𑀸𑀡𑀪𑀸𑀭𑀁 𑀩𑀦𑁆𑀥𑀺𑀲𑁆𑀲𑀸𑀫𑀺, 𑀉𑀪𑁄 𑀲𑀸𑀡𑀪𑀸𑀭𑀁 𑀆𑀤𑀸𑀬 𑀕𑀫𑀺𑀲𑁆𑀲𑀸𑀫𑀸’𑀢𑀺. ‘𑀏𑀯𑀁 𑀲𑀫𑁆𑀫𑀸’𑀢𑀺 𑀔𑁄 𑀲𑀳𑀸𑀬𑀓𑁄 𑀲𑀳𑀸𑀬𑀓𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀲𑀸𑀡𑀪𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀢𑁂 𑀉𑀪𑁄 𑀲𑀸𑀡𑀪𑀸𑀭𑀁 𑀆𑀤𑀸𑀬 𑀬𑁂𑀦 𑀅𑀜𑁆𑀜𑀢𑀭𑀁 𑀕𑀸𑀫𑀧𑀝𑁆𑀝𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀢𑀢𑁆𑀣 𑀅𑀤𑁆𑀤𑀲𑀁𑀲𑀼 𑀧𑀳𑀽𑀢𑀁 𑀲𑀸𑀡𑀲𑀼𑀢𑁆𑀢𑀁 𑀙𑀟𑁆𑀟𑀺𑀢𑀁, 𑀤𑀺𑀲𑁆𑀯𑀸 𑀲𑀳𑀸𑀬𑀓𑁄 𑀲𑀳𑀸𑀬𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘𑀬𑀲𑁆𑀲 𑀔𑁄, 𑀲𑀫𑁆𑀫, 𑀅𑀢𑁆𑀣𑀸𑀬 𑀇𑀘𑁆𑀙𑁂𑀬𑁆𑀬𑀸𑀫 𑀲𑀸𑀡𑀁, 𑀇𑀤𑀁 𑀧𑀳𑀽𑀢𑀁 𑀲𑀸𑀡𑀲𑀼𑀢𑁆𑀢𑀁 𑀙𑀟𑁆𑀟𑀺𑀢𑀁. 𑀢𑁂𑀦 𑀳𑀺, 𑀲𑀫𑁆𑀫, 𑀢𑁆𑀯𑀜𑁆𑀘 𑀲𑀸𑀡𑀪𑀸𑀭𑀁 𑀙𑀟𑁆𑀟𑁂𑀳𑀺, 𑀅𑀳𑀜𑁆𑀘 𑀲𑀸𑀡𑀪𑀸𑀭𑀁 𑀙𑀟𑁆𑀟𑁂𑀲𑁆𑀲𑀸𑀫𑀺, 𑀉𑀪𑁄 𑀲𑀸𑀡𑀲𑀼𑀢𑁆𑀢𑀪𑀸𑀭𑀁 𑀆𑀤𑀸𑀬 𑀕𑀫𑀺𑀲𑁆𑀲𑀸𑀫𑀸’𑀢𑀺. ‘𑀅𑀬𑀁 𑀔𑁄 𑀫𑁂, 𑀲𑀫𑁆𑀫, 𑀲𑀸𑀡𑀪𑀸𑀭𑁄 𑀤𑀽𑀭𑀸𑀪𑀢𑁄 𑀘 𑀲𑀼𑀲𑀦𑁆𑀦𑀤𑁆𑀥𑁄 𑀘, 𑀅𑀮𑀁 𑀫𑁂 𑀢𑁆𑀯𑀁 𑀧𑀚𑀸𑀦𑀸𑀳𑀻’𑀢𑀺. 𑀅𑀣 𑀔𑁄 𑀲𑁄 𑀲𑀳𑀸𑀬𑀓𑁄 𑀲𑀸𑀡𑀪𑀸𑀭𑀁 𑀙𑀟𑁆𑀟𑁂𑀢𑁆𑀯𑀸 𑀲𑀸𑀡𑀲𑀼𑀢𑁆𑀢𑀪𑀸𑀭𑀁 𑀆𑀤𑀺𑀬𑀺.

‘‘𑀢𑁂 𑀬𑁂𑀦 𑀅𑀜𑁆𑀜𑀢𑀭𑀁 𑀕𑀸𑀫𑀧𑀝𑁆𑀝𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀢𑀢𑁆𑀣 𑀅𑀤𑁆𑀤𑀲𑀁𑀲𑀼 𑀧𑀳𑀽𑀢𑀸 𑀲𑀸𑀡𑀺𑀬𑁄 𑀙𑀟𑁆𑀟𑀺𑀢𑀸, 𑀤𑀺𑀲𑁆𑀯𑀸 𑀲𑀳𑀸𑀬𑀓𑁄 𑀲𑀳𑀸𑀬𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘𑀬𑀲𑁆𑀲 𑀔𑁄 ¶ , 𑀲𑀫𑁆𑀫, 𑀅𑀢𑁆𑀣𑀸𑀬 𑀇𑀘𑁆𑀙𑁂𑀬𑁆𑀬𑀸𑀫 𑀲𑀸𑀡𑀁 𑀯𑀸 𑀲𑀸𑀡𑀲𑀼𑀢𑁆𑀢𑀁 𑀯𑀸, 𑀇𑀫𑀸 𑀧𑀳𑀽𑀢𑀸 𑀲𑀸𑀡𑀺𑀬𑁄 𑀙𑀟𑁆𑀟𑀺𑀢𑀸. 𑀢𑁂𑀦 𑀳𑀺, 𑀲𑀫𑁆𑀫, 𑀢𑁆𑀯𑀜𑁆𑀘 𑀲𑀸𑀡𑀪𑀸𑀭𑀁 𑀙𑀟𑁆𑀟𑁂𑀳𑀺, 𑀅𑀳𑀜𑁆𑀘 𑀲𑀸𑀡𑀲𑀼𑀢𑁆𑀢𑀪𑀸𑀭𑀁 𑀙𑀟𑁆𑀟𑁂𑀲𑁆𑀲𑀸𑀫𑀺, 𑀉𑀪𑁄 𑀲𑀸𑀡𑀺𑀪𑀸𑀭𑀁 𑀆𑀤𑀸𑀬 𑀕𑀫𑀺𑀲𑁆𑀲𑀸𑀫𑀸’𑀢𑀺 ¶ . ‘𑀅𑀬𑀁 𑀔𑁄 𑀫𑁂, 𑀲𑀫𑁆𑀫, 𑀲𑀸𑀡𑀪𑀸𑀭𑁄 𑀤𑀽𑀭𑀸𑀪𑀢𑁄 𑀘 𑀲𑀼𑀲𑀦𑁆𑀦𑀤𑁆𑀥𑁄 𑀘, 𑀅𑀮𑀁 𑀫𑁂, 𑀢𑁆𑀯𑀁 𑀧𑀚𑀸𑀦𑀸𑀳𑀻’𑀢𑀺. 𑀅𑀣 𑀔𑁄 𑀲𑁄 𑀲𑀳𑀸𑀬𑀓𑁄 𑀲𑀸𑀡𑀲𑀼𑀢𑁆𑀢𑀪𑀸𑀭𑀁 𑀙𑀟𑁆𑀟𑁂𑀢𑁆𑀯𑀸 𑀲𑀸𑀡𑀺𑀪𑀸𑀭𑀁 𑀆𑀤𑀺𑀬𑀺.

‘‘𑀢𑁂 ¶ 𑀬𑁂𑀦 𑀅𑀜𑁆𑀜𑀢𑀭𑀁 𑀕𑀸𑀫𑀧𑀝𑁆𑀝𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀢𑀢𑁆𑀣 𑀅𑀤𑁆𑀤𑀲𑀁𑀲𑀼 𑀧𑀳𑀽𑀢𑀁 𑀔𑁄𑀫𑀁 𑀙𑀟𑁆𑀟𑀺𑀢𑀁, 𑀤𑀺𑀲𑁆𑀯𑀸…𑀧𑁂… 𑀧𑀳𑀽𑀢𑀁 𑀔𑁄𑀫𑀲𑀼𑀢𑁆𑀢𑀁 𑀙𑀟𑁆𑀟𑀺𑀢𑀁, 𑀤𑀺𑀲𑁆𑀯𑀸… 𑀧𑀳𑀽𑀢𑀁 𑀔𑁄𑀫𑀤𑀼𑀲𑁆𑀲𑀁 𑀙𑀟𑁆𑀟𑀺𑀢𑀁, 𑀤𑀺𑀲𑁆𑀯𑀸… 𑀧𑀳𑀽𑀢𑀁 𑀓𑀧𑁆𑀧𑀸𑀲𑀁 𑀙𑀟𑁆𑀟𑀺𑀢𑀁, 𑀤𑀺𑀲𑁆𑀯𑀸… 𑀧𑀳𑀽𑀢𑀁 𑀓𑀧𑁆𑀧𑀸𑀲𑀺𑀓𑀲𑀼𑀢𑁆𑀢𑀁 𑀙𑀟𑁆𑀟𑀺𑀢𑀁, 𑀤𑀺𑀲𑁆𑀯𑀸… 𑀧𑀳𑀽𑀢𑀁 𑀓𑀧𑁆𑀧𑀸𑀲𑀺𑀓𑀤𑀼𑀲𑁆𑀲𑀁 𑀙𑀟𑁆𑀟𑀺𑀢𑀁, 𑀤𑀺𑀲𑁆𑀯𑀸… 𑀧𑀳𑀽𑀢𑀁 𑀅𑀬𑀁 [𑀅𑀬𑀲𑀁 (𑀲𑁆𑀬𑀸.)] 𑀙𑀟𑁆𑀟𑀺𑀢𑀁, 𑀤𑀺𑀲𑁆𑀯𑀸… 𑀧𑀳𑀽𑀢𑀁 𑀮𑁄𑀳𑀁 𑀙𑀟𑁆𑀟𑀺𑀢𑀁, 𑀤𑀺𑀲𑁆𑀯𑀸… 𑀧𑀳𑀽𑀢𑀁 𑀢𑀺𑀧𑀼𑀁 𑀙𑀟𑁆𑀟𑀺𑀢𑀁, 𑀤𑀺𑀲𑁆𑀯𑀸… 𑀧𑀳𑀽𑀢𑀁 𑀲𑀻𑀲𑀁 𑀙𑀟𑁆𑀟𑀺𑀢𑀁, 𑀤𑀺𑀲𑁆𑀯𑀸… 𑀧𑀳𑀽𑀢𑀁 𑀲𑀚𑁆𑀛𑀁 [𑀲𑀚𑁆𑀛𑀼𑀁 (𑀲𑀻. 𑀲𑁆𑀬𑀸. 𑀧𑀻.)] 𑀙𑀟𑁆𑀟𑀺𑀢𑀁, 𑀤𑀺𑀲𑁆𑀯𑀸… 𑀧𑀳𑀽𑀢𑀁 𑀲𑀼𑀯𑀡𑁆𑀡𑀁 𑀙𑀟𑁆𑀟𑀺𑀢𑀁, 𑀤𑀺𑀲𑁆𑀯𑀸 𑀲𑀳𑀸𑀬𑀓𑁄 𑀲𑀳𑀸𑀬𑀓𑀁 𑀆𑀫𑀦𑁆𑀢𑁂𑀲𑀺 𑁋 ‘𑀬𑀲𑁆𑀲 𑀔𑁄, 𑀲𑀫𑁆𑀫, 𑀅𑀢𑁆𑀣𑀸𑀬 𑀇𑀘𑁆𑀙𑁂𑀬𑁆𑀬𑀸𑀫 ¶ 𑀲𑀸𑀡𑀁 𑀯𑀸 𑀲𑀸𑀡𑀲𑀼𑀢𑁆𑀢𑀁 𑀯𑀸 𑀲𑀸𑀡𑀺𑀬𑁄 𑀯𑀸 𑀔𑁄𑀫𑀁 𑀯𑀸 𑀔𑁄𑀫𑀲𑀼𑀢𑁆𑀢𑀁 𑀯𑀸 𑀔𑁄𑀫𑀤𑀼𑀲𑁆𑀲𑀁 𑀯𑀸 𑀓𑀧𑁆𑀧𑀸𑀲𑀁 𑀯𑀸 𑀓𑀧𑁆𑀧𑀸𑀲𑀺𑀓𑀲𑀼𑀢𑁆𑀢𑀁 𑀯𑀸 𑀓𑀧𑁆𑀧𑀸𑀲𑀺𑀓𑀤𑀼𑀲𑁆𑀲𑀁 𑀯𑀸 𑀅𑀬𑀁 𑀯𑀸 𑀮𑁄𑀳𑀁 𑀯𑀸 𑀢𑀺𑀧𑀼𑀁 𑀯𑀸 𑀲𑀻𑀲𑀁 𑀯𑀸 𑀲𑀚𑁆𑀛𑀁 𑀯𑀸, 𑀇𑀤𑀁 𑀧𑀳𑀽𑀢𑀁 𑀲𑀼𑀯𑀡𑁆𑀡𑀁 𑀙𑀟𑁆𑀟𑀺𑀢𑀁. 𑀢𑁂𑀦 𑀳𑀺, 𑀲𑀫𑁆𑀫, 𑀢𑁆𑀯𑀜𑁆𑀘 𑀲𑀸𑀡𑀪𑀸𑀭𑀁 𑀙𑀟𑁆𑀟𑁂𑀳𑀺, 𑀅𑀳𑀜𑁆𑀘 𑀲𑀚𑁆𑀛𑀪𑀸𑀭𑀁 [𑀲𑀚𑁆𑀛𑀼𑀪𑀸𑀭𑀁 (𑀲𑀻. 𑀲𑁆𑀬𑀸. 𑀧𑀻.)] 𑀙𑀟𑁆𑀟𑁂𑀲𑁆𑀲𑀸𑀫𑀺, 𑀉𑀪𑁄 𑀲𑀼𑀯𑀡𑁆𑀡𑀪𑀸𑀭𑀁 𑀆𑀤𑀸𑀬 𑀕𑀫𑀺𑀲𑁆𑀲𑀸𑀫𑀸’𑀢𑀺. ‘𑀅𑀬𑀁 𑀔𑁄 𑀫𑁂, 𑀲𑀫𑁆𑀫, 𑀲𑀸𑀡𑀪𑀸𑀭𑁄 𑀤𑀽𑀭𑀸𑀪𑀢𑁄 𑀘 𑀲𑀼𑀲𑀦𑁆𑀦𑀤𑁆𑀥𑁄 ¶ 𑀘, 𑀅𑀮𑀁 𑀫𑁂 𑀢𑁆𑀯𑀁 𑀧𑀚𑀸𑀦𑀸𑀳𑀻’𑀢𑀺. 𑀅𑀣 𑀔𑁄 𑀲𑁄 𑀲𑀳𑀸𑀬𑀓𑁄 𑀲𑀚𑁆𑀛𑀪𑀸𑀭𑀁 𑀙𑀟𑁆𑀟𑁂𑀢𑁆𑀯𑀸 𑀲𑀼𑀯𑀡𑁆𑀡𑀪𑀸𑀭𑀁 𑀆𑀤𑀺𑀬𑀺.

‘‘𑀢𑁂 𑀬𑁂𑀦 𑀲𑀓𑁄 𑀕𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀢𑀢𑁆𑀣 𑀬𑁄 𑀲𑁄 𑀲𑀳𑀸𑀬𑀓𑁄 𑀲𑀸𑀡𑀪𑀸𑀭𑀁 𑀆𑀤𑀸𑀬 𑀅𑀕𑀫𑀸𑀲𑀺, 𑀢𑀲𑁆𑀲 𑀦𑁂𑀯 𑀫𑀸𑀢𑀸𑀧𑀺𑀢𑀭𑁄 𑀅𑀪𑀺𑀦𑀦𑁆𑀤𑀺𑀁𑀲𑀼, 𑀦 𑀧𑀼𑀢𑁆𑀢𑀤𑀸𑀭𑀸 𑀅𑀪𑀺𑀦𑀦𑁆𑀤𑀺𑀁𑀲𑀼, 𑀦 𑀫𑀺𑀢𑁆𑀢𑀸𑀫𑀘𑁆𑀘𑀸 𑀅𑀪𑀺𑀦𑀦𑁆𑀤𑀺𑀁𑀲𑀼, 𑀦 𑀘 𑀢𑀢𑁄𑀦𑀺𑀤𑀸𑀦𑀁 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 ¶ 𑀅𑀥𑀺𑀕𑀘𑁆𑀙𑀺. 𑀬𑁄 𑀧𑀦 𑀲𑁄 𑀲𑀳𑀸𑀬𑀓𑁄 𑀲𑀼𑀯𑀡𑁆𑀡𑀪𑀸𑀭𑀁 𑀆𑀤𑀸𑀬 𑀅𑀕𑀫𑀸𑀲𑀺, 𑀢𑀲𑁆𑀲 𑀫𑀸𑀢𑀸𑀧𑀺𑀢𑀭𑁄𑀧𑀺 𑀅𑀪𑀺𑀦𑀦𑁆𑀤𑀺𑀁𑀲𑀼, 𑀧𑀼𑀢𑁆𑀢𑀤𑀸𑀭𑀸𑀧𑀺 𑀅𑀪𑀺𑀦𑀦𑁆𑀤𑀺𑀁𑀲𑀼, 𑀫𑀺𑀢𑁆𑀢𑀸𑀫𑀘𑁆𑀘𑀸𑀧𑀺 𑀅𑀪𑀺𑀦𑀦𑁆𑀤𑀺𑀁𑀲𑀼, 𑀢𑀢𑁄𑀦𑀺𑀤𑀸𑀦𑀜𑁆𑀘 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀅𑀥𑀺𑀕𑀘𑁆𑀙𑀺. ‘‘𑀏𑀯𑀫𑁂𑀯 𑀔𑁄 𑀢𑁆𑀯𑀁, 𑀭𑀸𑀚𑀜𑁆𑀜, 𑀲𑀸𑀡𑀪𑀸𑀭𑀺𑀓𑀽𑀧𑀫𑁄 𑀫𑀜𑁆𑀜𑁂 𑀧𑀝𑀺𑀪𑀸𑀲𑀺. 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀁, 𑀭𑀸𑀚𑀜𑁆𑀜, 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁; 𑀧𑀝𑀺𑀦𑀺𑀲𑁆𑀲𑀚𑁆𑀚𑁂𑀢𑀁, 𑀭𑀸𑀚𑀜𑁆𑀜, 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁. 𑀫𑀸 𑀢𑁂 𑀅𑀳𑁄𑀲𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’’𑀢𑀺.

𑀲𑀭𑀡𑀕𑀫𑀦𑀁

𑁪𑁩𑁭. ‘‘𑀧𑀼𑀭𑀺𑀫𑁂𑀦𑁂𑀯 ¶ 𑀅𑀳𑀁 𑀑𑀧𑀫𑁆𑀫𑁂𑀦 𑀪𑁄𑀢𑁄 𑀓𑀲𑁆𑀲𑀧𑀲𑁆𑀲 𑀅𑀢𑁆𑀢𑀫𑀦𑁄 𑀅𑀪𑀺𑀭𑀤𑁆𑀥𑁄. 𑀅𑀧𑀺 𑀘𑀸𑀳𑀁 𑀇𑀫𑀸𑀦𑀺 𑀯𑀺𑀘𑀺𑀢𑁆𑀭𑀸𑀦𑀺 𑀧𑀜𑁆𑀳𑀸𑀧𑀝𑀺𑀪𑀸𑀦𑀸𑀦𑀺 𑀲𑁄𑀢𑀼𑀓𑀸𑀫𑁄 𑀏𑀯𑀸𑀳𑀁 𑀪𑀯𑀦𑁆𑀢𑀁 𑀓𑀲𑁆𑀲𑀧𑀁 𑀧𑀘𑁆𑀘𑀦𑀻𑀓𑀁 𑀓𑀸𑀢𑀩𑁆𑀩𑀁 𑀅𑀫𑀜𑁆𑀜𑀺𑀲𑁆𑀲𑀁. 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀓𑀲𑁆𑀲𑀧, 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀓𑀲𑁆𑀲𑀧. 𑀲𑁂𑀬𑁆𑀬𑀣𑀸𑀧𑀺, 𑀪𑁄 𑀓𑀲𑁆𑀲𑀧, 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀯𑀸 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀧𑀝𑀺𑀘𑁆𑀙𑀦𑁆𑀦𑀁 𑀯𑀸 𑀯𑀺𑀯𑀭𑁂𑀬𑁆𑀬, 𑀫𑀽𑀴𑁆𑀳𑀲𑁆𑀲 𑀯𑀸 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀅𑀦𑁆𑀥𑀓𑀸𑀭𑁂 𑀯𑀸 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬 ‘𑀘𑀓𑁆𑀔𑀼𑀫𑀦𑁆𑀢𑁄 𑀭𑀽𑀧𑀸𑀦𑀺 𑀤𑀓𑁆𑀔𑀦𑁆𑀢𑀻’𑀢𑀺 𑀏𑀯𑀫𑁂𑀯𑀁 𑀪𑁄𑀢𑀸 𑀓𑀲𑁆𑀲𑀧𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄. 𑀏𑀲𑀸𑀳𑀁, 𑀪𑁄 𑀓𑀲𑁆𑀲𑀧, 𑀢𑀁 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺, 𑀥𑀫𑁆𑀫𑀜𑁆𑀘, 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘. 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀓𑀲𑁆𑀲𑀧𑁄 𑀥𑀸𑀭𑁂𑀢𑀼 ¶ 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢𑀁.

‘‘𑀇𑀘𑁆𑀙𑀸𑀫𑀺 𑀘𑀸𑀳𑀁, 𑀪𑁄 𑀓𑀲𑁆𑀲𑀧, 𑀫𑀳𑀸𑀬𑀜𑁆𑀜𑀁 𑀬𑀚𑀺𑀢𑀼𑀁, 𑀅𑀦𑀼𑀲𑀸𑀲𑀢𑀼 𑀫𑀁 𑀪𑀯𑀁 𑀓𑀲𑁆𑀲𑀧𑁄, 𑀬𑀁 𑀫𑀫𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺.

𑀬𑀜𑁆𑀜𑀓𑀣𑀸

𑁪𑁩𑁮. ‘‘𑀬𑀣𑀸𑀭𑀽𑀧𑁂 ¶ 𑀔𑁄, 𑀭𑀸𑀚𑀜𑁆𑀜, 𑀬𑀜𑁆𑀜𑁂 𑀕𑀸𑀯𑁄 𑀯𑀸 𑀳𑀜𑁆𑀜𑀦𑁆𑀢𑀺 𑀅𑀚𑁂𑀴𑀓𑀸 𑀯𑀸 𑀳𑀜𑁆𑀜𑀦𑁆𑀢𑀺, 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀯𑀸 𑀳𑀜𑁆𑀜𑀦𑁆𑀢𑀺, 𑀯𑀺𑀯𑀺𑀥𑀸 𑀯𑀸 𑀧𑀸𑀡𑀸 𑀲𑀁𑀖𑀸𑀢𑀁 𑀆𑀧𑀚𑁆𑀚𑀦𑁆𑀢𑀺, 𑀧𑀝𑀺𑀕𑁆𑀕𑀸𑀳𑀓𑀸 𑀘 𑀳𑁄𑀦𑁆𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀻 ¶ 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸 𑀫𑀺𑀘𑁆𑀙𑀸𑀯𑀸𑀘𑀸 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀸 𑀫𑀺𑀘𑁆𑀙𑀸𑀆𑀚𑀻𑀯𑀸 𑀫𑀺𑀘𑁆𑀙𑀸𑀯𑀸𑀬𑀸𑀫𑀸 𑀫𑀺𑀘𑁆𑀙𑀸𑀲𑀢𑀻 𑀫𑀺𑀘𑁆𑀙𑀸𑀲𑀫𑀸𑀥𑀻, 𑀏𑀯𑀭𑀽𑀧𑁄 𑀔𑁄, 𑀭𑀸𑀚𑀜𑁆𑀜, 𑀬𑀜𑁆𑀜𑁄 𑀦 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀦 𑀫𑀳𑀸𑀦𑀺𑀲𑀁𑀲𑁄 𑀦 𑀫𑀳𑀸𑀚𑀼𑀢𑀺𑀓𑁄 𑀦 𑀫𑀳𑀸𑀯𑀺𑀧𑁆𑀨𑀸𑀭𑁄. 𑀲𑁂𑀬𑁆𑀬𑀣𑀸𑀧𑀺, 𑀭𑀸𑀚𑀜𑁆𑀜, 𑀓𑀲𑁆𑀲𑀓𑁄 𑀩𑀻𑀚𑀦𑀗𑁆𑀕𑀮𑀁 𑀆𑀤𑀸𑀬 𑀯𑀦𑀁 𑀧𑀯𑀺𑀲𑁂𑀬𑁆𑀬. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑁂𑀢𑁆𑀢𑁂 𑀤𑀼𑀩𑁆𑀪𑀽𑀫𑁂 𑀅𑀯𑀺𑀳𑀢𑀔𑀸𑀡𑀼𑀓𑀡𑁆𑀝𑀓𑁂 𑀩𑀻𑀚𑀸𑀦𑀺 𑀧𑀢𑀺𑀝𑁆𑀞𑀸𑀧𑁂𑀬𑁆𑀬 𑀔𑀡𑁆𑀟𑀸𑀦𑀺 𑀧𑀽𑀢𑀻𑀦𑀺 𑀯𑀸𑀢𑀸𑀢𑀧𑀳𑀢𑀸𑀦𑀺 𑀅𑀲𑀸𑀭𑀤𑀸𑀦𑀺 𑀅𑀲𑀼𑀔𑀲𑀬𑀺𑀢𑀸𑀦𑀺. 𑀤𑁂𑀯𑁄 𑀘 𑀦 𑀓𑀸𑀮𑁂𑀦 𑀓𑀸𑀮𑀁 𑀲𑀫𑁆𑀫𑀸𑀥𑀸𑀭𑀁 𑀅𑀦𑀼𑀧𑁆𑀧𑀯𑁂𑀘𑁆𑀙𑁂𑀬𑁆𑀬. 𑀅𑀧𑀺 𑀦𑀼 𑀢𑀸𑀦𑀺 𑀩𑀻𑀚𑀸𑀦𑀺 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 [𑀯𑀺𑀭𑀼𑀴𑁆𑀳𑀺𑀁 (𑀫𑁄𑀕𑁆𑀕𑀮𑀸𑀦𑁂)] 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑁂𑀬𑁆𑀬𑀼𑀁, 𑀓𑀲𑁆𑀲𑀓𑁄 𑀯𑀸 𑀯𑀺𑀧𑀼𑀮𑀁 𑀨𑀮𑀁 𑀅𑀥𑀺𑀕𑀘𑁆𑀙𑁂𑀬𑁆𑀬𑀸’’𑀢𑀺? ‘‘𑀦𑁄 𑀳𑀺𑀤𑀁 [𑀦 𑀏𑀯𑀁 (𑀲𑁆𑀬𑀸. 𑀓.)] 𑀪𑁄 𑀓𑀲𑁆𑀲𑀧’’. ‘‘𑀏𑀯𑀫𑁂𑀯 𑀔𑁄, 𑀭𑀸𑀚𑀜𑁆𑀜, 𑀬𑀣𑀸𑀭𑀽𑀧𑁂 𑀬𑀜𑁆𑀜𑁂 𑀕𑀸𑀯𑁄 𑀯𑀸 𑀳𑀜𑁆𑀜𑀦𑁆𑀢𑀺, 𑀅𑀚𑁂𑀴𑀓𑀸 𑀯𑀸 𑀳𑀜𑁆𑀜𑀦𑁆𑀢𑀺, 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀯𑀸 𑀳𑀜𑁆𑀜𑀦𑁆𑀢𑀺, 𑀯𑀺𑀯𑀺𑀥𑀸 𑀯𑀸 𑀧𑀸𑀡𑀸 𑀲𑀁𑀖𑀸𑀢𑀁 𑀆𑀧𑀚𑁆𑀚𑀦𑁆𑀢𑀺, 𑀧𑀝𑀺𑀕𑁆𑀕𑀸𑀳𑀓𑀸 𑀘 𑀳𑁄𑀦𑁆𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀻 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸 𑀫𑀺𑀘𑁆𑀙𑀸𑀯𑀸𑀘𑀸 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀸 𑀫𑀺𑀘𑁆𑀙𑀸𑀆𑀚𑀻𑀯𑀸 𑀫𑀺𑀘𑁆𑀙𑀸𑀯𑀸𑀬𑀸𑀫𑀸 𑀫𑀺𑀘𑁆𑀙𑀸𑀲𑀢𑀻 ¶ 𑀫𑀺𑀘𑁆𑀙𑀸𑀲𑀫𑀸𑀥𑀻, 𑀏𑀯𑀭𑀽𑀧𑁄 𑀔𑁄 ¶ , 𑀭𑀸𑀚𑀜𑁆𑀜, 𑀬𑀜𑁆𑀜𑁄 𑀦 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀦 𑀫𑀳𑀸𑀦𑀺𑀲𑀁𑀲𑁄 𑀦 𑀫𑀳𑀸𑀚𑀼𑀢𑀺𑀓𑁄 𑀦 𑀫𑀳𑀸𑀯𑀺𑀧𑁆𑀨𑀸𑀭𑁄.

‘‘𑀬𑀣𑀸𑀭𑀽𑀧𑁂 𑀘 𑀔𑁄, 𑀭𑀸𑀚𑀜𑁆𑀜, 𑀬𑀜𑁆𑀜𑁂 𑀦𑁂𑀯 𑀕𑀸𑀯𑁄 𑀳𑀜𑁆𑀜𑀦𑁆𑀢𑀺, 𑀦 𑀅𑀚𑁂𑀴𑀓𑀸 𑀳𑀜𑁆𑀜𑀦𑁆𑀢𑀺, 𑀦 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀳𑀜𑁆𑀜𑀦𑁆𑀢𑀺, 𑀦 𑀯𑀺𑀯𑀺𑀥𑀸 𑀯𑀸 𑀧𑀸𑀡𑀸 𑀲𑀁𑀖𑀸𑀢𑀁 𑀆𑀧𑀚𑁆𑀚𑀦𑁆𑀢𑀺, 𑀧𑀝𑀺𑀕𑁆𑀕𑀸𑀳𑀓𑀸 𑀘 𑀳𑁄𑀦𑁆𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀻 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀸 𑀲𑀫𑁆𑀫𑀸𑀆𑀚𑀻𑀯𑀸 𑀲𑀫𑁆𑀫𑀸𑀯𑀸𑀬𑀸𑀫𑀸 𑀲𑀫𑁆𑀫𑀸𑀲𑀢𑀻 𑀲𑀫𑁆𑀫𑀸𑀲𑀫𑀸𑀥𑀻, 𑀏𑀯𑀭𑀽𑀧𑁄 𑀔𑁄, 𑀭𑀸𑀚𑀜𑁆𑀜, 𑀬𑀜𑁆𑀜𑁄 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄 𑀫𑀳𑀸𑀚𑀼𑀢𑀺𑀓𑁄 𑀫𑀳𑀸𑀯𑀺𑀧𑁆𑀨𑀸𑀭𑁄. 𑀲𑁂𑀬𑁆𑀬𑀣𑀸𑀧𑀺, 𑀭𑀸𑀚𑀜𑁆𑀜, 𑀓𑀲𑁆𑀲𑀓𑁄 𑀩𑀻𑀚𑀦𑀗𑁆𑀕𑀮𑀁 𑀆𑀤𑀸𑀬 𑀯𑀦𑀁 𑀧𑀯𑀺𑀲𑁂𑀬𑁆𑀬. 𑀲𑁄 𑀢𑀢𑁆𑀣 𑀲𑀼𑀔𑁂𑀢𑁆𑀢𑁂 𑀲𑀼𑀪𑀽𑀫𑁂 𑀲𑀼𑀯𑀺𑀳𑀢𑀔𑀸𑀡𑀼𑀓𑀡𑁆𑀝𑀓𑁂 𑀩𑀻𑀚𑀸𑀦𑀺 𑀧𑀢𑀺𑀝𑁆𑀞𑀧𑁂𑀬𑁆𑀬 ¶ 𑀅𑀔𑀡𑁆𑀟𑀸𑀦𑀺 𑀅𑀧𑀽𑀢𑀻𑀦𑀺 𑀅𑀯𑀸𑀢𑀸𑀢𑀧𑀳𑀢𑀸𑀦𑀺 𑀲𑀸𑀭𑀤𑀸𑀦𑀺 𑀲𑀼𑀔𑀲𑀬𑀺𑀢𑀸𑀦𑀺. 𑀤𑁂𑀯𑁄 𑀘 𑀓𑀸𑀮𑁂𑀦 𑀓𑀸𑀮𑀁 𑀲𑀫𑁆𑀫𑀸𑀥𑀸𑀭𑀁 𑀅𑀦𑀼𑀧𑁆𑀧𑀯𑁂𑀘𑁆𑀙𑁂𑀬𑁆𑀬. 𑀅𑀧𑀺 𑀦𑀼 𑀢𑀸𑀦𑀺 𑀩𑀻𑀚𑀸𑀦𑀺 𑀯𑀼𑀤𑁆𑀥𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑁂𑀬𑁆𑀬𑀼𑀁, 𑀓𑀲𑁆𑀲𑀓𑁄 𑀯𑀸 𑀯𑀺𑀧𑀼𑀮𑀁 𑀨𑀮𑀁 𑀅𑀥𑀺𑀕𑀘𑁆𑀙𑁂𑀬𑁆𑀬𑀸’’𑀢𑀺? ‘‘𑀏𑀯𑀁, 𑀪𑁄 𑀓𑀲𑁆𑀲𑀧’’. ‘‘𑀏𑀯𑀫𑁂𑀯 𑀔𑁄, 𑀭𑀸𑀚𑀜𑁆𑀜, 𑀬𑀣𑀸𑀭𑀽𑀧𑁂 𑀬𑀜𑁆𑀜𑁂 𑀦𑁂𑀯 𑀕𑀸𑀯𑁄 𑀳𑀜𑁆𑀜𑀦𑁆𑀢𑀺, 𑀦 𑀅𑀚𑁂𑀴𑀓𑀸 𑀳𑀜𑁆𑀜𑀦𑁆𑀢𑀺, 𑀦 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀳𑀜𑁆𑀜𑀦𑁆𑀢𑀺, 𑀦 𑀯𑀺𑀯𑀺𑀥𑀸 𑀯𑀸 𑀧𑀸𑀡𑀸 𑀲𑀁𑀖𑀸𑀢𑀁 𑀆𑀧𑀚𑁆𑀚𑀦𑁆𑀢𑀺, 𑀧𑀝𑀺𑀕𑁆𑀕𑀸𑀳𑀓𑀸 𑀘 𑀳𑁄𑀦𑁆𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀻 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀸 𑀲𑀫𑁆𑀫𑀸𑀆𑀚𑀻𑀯𑀸 𑀲𑀫𑁆𑀫𑀸𑀯𑀸𑀬𑀸𑀫𑀸 𑀲𑀫𑁆𑀫𑀸𑀲𑀢𑀻 𑀲𑀫𑁆𑀫𑀸𑀲𑀫𑀸𑀥𑀻, 𑀏𑀯𑀭𑀽𑀧𑁄 𑀔𑁄, 𑀭𑀸𑀚𑀜𑁆𑀜, 𑀬𑀜𑁆𑀜𑁄 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄 𑀫𑀳𑀸𑀚𑀼𑀢𑀺𑀓𑁄 𑀫𑀳𑀸𑀯𑀺𑀧𑁆𑀨𑀸𑀭𑁄’’𑀢𑀺.

𑀉𑀢𑁆𑀢𑀭𑀫𑀸𑀡𑀯𑀯𑀢𑁆𑀣𑀼

𑁪𑁩𑁯. 𑀅𑀣 ¶ 𑀔𑁄 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 𑀤𑀸𑀦𑀁 𑀧𑀝𑁆𑀞𑀧𑁂𑀲𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀓𑀧𑀡𑀤𑁆𑀥𑀺𑀓𑀯𑀡𑀺𑀩𑁆𑀩𑀓𑀬𑀸𑀘𑀓𑀸𑀦𑀁 ¶ . 𑀢𑀲𑁆𑀫𑀺𑀁 𑀔𑁄 𑀧𑀦 𑀤𑀸𑀦𑁂 𑀏𑀯𑀭𑀽𑀧𑀁 𑀪𑁄𑀚𑀦𑀁 𑀤𑀻𑀬𑀢𑀺 𑀓𑀡𑀸𑀚𑀓𑀁 𑀩𑀺𑀮𑀗𑁆𑀕𑀤𑀼𑀢𑀺𑀬𑀁, 𑀥𑁄𑀭𑀓𑀸𑀦𑀺 [𑀣𑁄𑀭𑀓𑀸𑀦𑀺 (𑀲𑀻. 𑀧𑀻.), 𑀘𑁄𑀭𑀓𑀸𑀦𑀺 (𑀲𑁆𑀬𑀸.)] 𑀘 𑀯𑀢𑁆𑀣𑀸𑀦𑀺 𑀕𑀼𑀴𑀯𑀸𑀮𑀓𑀸𑀦𑀺 [𑀕𑀼𑀴𑀕𑀸𑀴𑀓𑀸𑀦𑀺 (𑀓.)]. 𑀢𑀲𑁆𑀫𑀺𑀁 𑀔𑁄 𑀧𑀦 𑀤𑀸𑀦𑁂 𑀉𑀢𑁆𑀢𑀭𑁄 𑀦𑀸𑀫 𑀫𑀸𑀡𑀯𑁄 𑀯𑀸𑀯𑀝𑁄 [𑀩𑁆𑀬𑀸𑀯𑀝𑁄 (𑀲𑀻. 𑀧𑀻.)] 𑀅𑀳𑁄𑀲𑀺. 𑀲𑁄 𑀤𑀸𑀦𑀁 𑀤𑀢𑁆𑀯𑀸 𑀏𑀯𑀁 𑀅𑀦𑀼𑀤𑁆𑀤𑀺𑀲𑀢𑀺 𑁋 ‘‘𑀇𑀫𑀺𑀦𑀸𑀳𑀁 𑀤𑀸𑀦𑁂𑀦 𑀧𑀸𑀬𑀸𑀲𑀺𑀁 𑀭𑀸𑀚𑀜𑁆𑀜𑀫𑁂𑀯 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀫𑀸𑀕𑀘𑁆𑀙𑀺𑀁, 𑀫𑀸 𑀧𑀭𑀲𑁆𑀫𑀺’’𑀦𑁆𑀢𑀺. 𑀅𑀲𑁆𑀲𑁄𑀲𑀺 𑀔𑁄 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 𑁋 ‘‘𑀉𑀢𑁆𑀢𑀭𑁄 ¶ 𑀓𑀺𑀭 𑀫𑀸𑀡𑀯𑁄 𑀤𑀸𑀦𑀁 𑀤𑀢𑁆𑀯𑀸 𑀏𑀯𑀁 𑀅𑀦𑀼𑀤𑁆𑀤𑀺𑀲𑀢𑀺 𑁋 ‘𑀇𑀫𑀺𑀦𑀸𑀳𑀁 𑀤𑀸𑀦𑁂𑀦 𑀧𑀸𑀬𑀸𑀲𑀺𑀁 𑀭𑀸𑀚𑀜𑁆𑀜𑀫𑁂𑀯 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀫𑀸𑀕𑀘𑁆𑀙𑀺𑀁, 𑀫𑀸 𑀧𑀭𑀲𑁆𑀫𑀺’’’𑀦𑁆𑀢𑀺. 𑀅𑀣 ¶ 𑀔𑁄 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 𑀉𑀢𑁆𑀢𑀭𑀁 𑀫𑀸𑀡𑀯𑀁 𑀆𑀫𑀦𑁆𑀢𑀸𑀧𑁂𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁, 𑀢𑀸𑀢 𑀉𑀢𑁆𑀢𑀭, 𑀤𑀸𑀦𑀁 𑀤𑀢𑁆𑀯𑀸 𑀏𑀯𑀁 𑀅𑀦𑀼𑀤𑁆𑀤𑀺𑀲𑀲𑀺 𑁋 ‘𑀇𑀫𑀺𑀦𑀸𑀳𑀁 𑀤𑀸𑀦𑁂𑀦 𑀧𑀸𑀬𑀸𑀲𑀺𑀁 𑀭𑀸𑀚𑀜𑁆𑀜𑀫𑁂𑀯 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀫𑀸𑀕𑀘𑁆𑀙𑀺𑀁, 𑀫𑀸 𑀧𑀭𑀲𑁆𑀫𑀺’’’𑀦𑁆𑀢𑀺? ‘‘𑀏𑀯𑀁, 𑀪𑁄’’. ‘‘𑀓𑀺𑀲𑁆𑀲 𑀧𑀦 𑀢𑁆𑀯𑀁, 𑀢𑀸𑀢 𑀉𑀢𑁆𑀢𑀭, 𑀤𑀸𑀦𑀁 𑀤𑀢𑁆𑀯𑀸 𑀏𑀯𑀁 𑀅𑀦𑀼𑀤𑁆𑀤𑀺𑀲𑀲𑀺 𑁋 ‘𑀇𑀫𑀺𑀦𑀸𑀳𑀁 𑀤𑀸𑀦𑁂𑀦 𑀧𑀸𑀬𑀸𑀲𑀺𑀁 𑀭𑀸𑀚𑀜𑁆𑀜𑀫𑁂𑀯 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀲𑀫𑀸𑀕𑀘𑁆𑀙𑀺𑀁, 𑀫𑀸 𑀧𑀭𑀲𑁆𑀫𑀺’𑀦𑁆𑀢𑀺? 𑀦𑀦𑀼 𑀫𑀬𑀁, 𑀢𑀸𑀢 𑀉𑀢𑁆𑀢𑀭, 𑀧𑀼𑀜𑁆𑀜𑀢𑁆𑀣𑀺𑀓𑀸 𑀤𑀸𑀦𑀲𑁆𑀲𑁂𑀯 𑀨𑀮𑀁 𑀧𑀸𑀝𑀺𑀓𑀗𑁆𑀔𑀺𑀦𑁄’’𑀢𑀺? ‘‘𑀪𑁄𑀢𑁄 𑀔𑁄 𑀤𑀸𑀦𑁂 𑀏𑀯𑀭𑀽𑀧𑀁 𑀪𑁄𑀚𑀦𑀁 𑀤𑀻𑀬𑀢𑀺 𑀓𑀡𑀸𑀚𑀓𑀁 𑀩𑀺𑀮𑀗𑁆𑀕𑀤𑀼𑀢𑀺𑀬𑀁, 𑀬𑀁 𑀪𑀯𑀁 𑀧𑀸𑀤𑀸𑀧𑀺 [𑀧𑀸𑀤𑀸𑀲𑀺 (𑀓.)] 𑀦 𑀇𑀘𑁆𑀙𑁂𑀬𑁆𑀬 𑀲𑀫𑁆𑀨𑀼𑀲𑀺𑀢𑀼𑀁 [𑀙𑀼𑀧𑀺𑀢𑀼𑀁 (𑀧𑀻. 𑀓.)], 𑀓𑀼𑀢𑁄 𑀪𑀼𑀜𑁆𑀚𑀺𑀢𑀼𑀁, 𑀥𑁄𑀭𑀓𑀸𑀦𑀺 𑀘 𑀯𑀢𑁆𑀣𑀸𑀦𑀺 𑀕𑀼𑀴𑀯𑀸𑀮𑀓𑀸𑀦𑀺, 𑀬𑀸𑀦𑀺 𑀪𑀯𑀁 𑀧𑀸𑀤𑀸𑀧𑀺 [𑀅𑀘𑀺𑀢𑁆𑀢𑀺𑀓𑀢𑀁 (𑀓.)] 𑀦 𑀇𑀘𑁆𑀙𑁂𑀬𑁆𑀬 𑀲𑀫𑁆𑀨𑀼𑀲𑀺𑀢𑀼𑀁, 𑀓𑀼𑀢𑁄 𑀧𑀭𑀺𑀤𑀳𑀺𑀢𑀼𑀁. 𑀪𑀯𑀁 𑀔𑁄 𑀧𑀦𑀫𑁆𑀳𑀸𑀓𑀁 𑀧𑀺𑀬𑁄 𑀫𑀦𑀸𑀧𑁄, 𑀓𑀣𑀁 𑀫𑀬𑀁 𑀫𑀦𑀸𑀧𑀁 𑀅𑀫𑀦𑀸𑀧𑁂𑀦 𑀲𑀁𑀬𑁄𑀚𑁂𑀫𑀸’’𑀢𑀺? ‘‘𑀢𑁂𑀦 𑀳𑀺 𑀢𑁆𑀯𑀁, 𑀢𑀸𑀢 𑀉𑀢𑁆𑀢𑀭, 𑀬𑀸𑀤𑀺𑀲𑀸𑀳𑀁 𑀪𑁄𑀚𑀦𑀁 𑀪𑀼𑀜𑁆𑀚𑀸𑀫𑀺, 𑀢𑀸𑀤𑀺𑀲𑀁 𑀪𑁄𑀚𑀦𑀁 ¶ 𑀧𑀝𑁆𑀞𑀧𑁂𑀳𑀺. 𑀬𑀸𑀤𑀺𑀲𑀸𑀦𑀺 𑀘𑀸𑀳𑀁 𑀯𑀢𑁆𑀣𑀸𑀦𑀺 𑀧𑀭𑀺𑀤𑀳𑀸𑀫𑀺, 𑀢𑀸𑀤𑀺𑀲𑀸𑀦𑀺 𑀘 𑀯𑀢𑁆𑀣𑀸𑀦𑀺 𑀧𑀝𑁆𑀞𑀧𑁂𑀳𑀻’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀉𑀢𑁆𑀢𑀭𑁄 𑀫𑀸𑀡𑀯𑁄 𑀧𑀸𑀬𑀸𑀲𑀺𑀲𑁆𑀲 𑀭𑀸𑀚𑀜𑁆𑀜𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑀸𑀤𑀺𑀲𑀁 𑀪𑁄𑀚𑀦𑀁 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 𑀪𑀼𑀜𑁆𑀚𑀢𑀺, 𑀢𑀸𑀤𑀺𑀲𑀁 𑀪𑁄𑀚𑀦𑀁 𑀧𑀝𑁆𑀞𑀧𑁂𑀲𑀺. 𑀬𑀸𑀤𑀺𑀲𑀸𑀦𑀺 𑀘 𑀯𑀢𑁆𑀣𑀸𑀦𑀺 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 𑀧𑀭𑀺𑀤𑀳𑀢𑀺, 𑀢𑀸𑀤𑀺𑀲𑀸𑀦𑀺 𑀘 𑀯𑀢𑁆𑀣𑀸𑀦𑀺 𑀧𑀝𑁆𑀞𑀧𑁂𑀲𑀺.

𑁪𑁪𑁦. 𑀅𑀣 ¶ 𑀔𑁄 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 𑀅𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀤𑀢𑁆𑀯𑀸 𑀅𑀲𑀳𑀢𑁆𑀣𑀸 𑀤𑀸𑀦𑀁 𑀤𑀢𑁆𑀯𑀸 𑀅𑀘𑀺𑀢𑁆𑀢𑀻𑀓𑀢𑀁 𑀤𑀸𑀦𑀁 𑀤𑀢𑁆𑀯𑀸 𑀅𑀧𑀯𑀺𑀤𑁆𑀥𑀁 𑀤𑀸𑀦𑀁 𑀤𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀺 𑀲𑀼𑀜𑁆𑀜𑀁 𑀲𑁂𑀭𑀻𑀲𑀓𑀁 𑀯𑀺𑀫𑀸𑀦𑀁. 𑀬𑁄 𑀧𑀦 𑀢𑀲𑁆𑀲 𑀤𑀸𑀦𑁂 𑀯𑀸𑀯𑀝𑁄 𑀅𑀳𑁄𑀲𑀺 𑀉𑀢𑁆𑀢𑀭𑁄 𑀦𑀸𑀫 𑀫𑀸𑀡𑀯𑁄. 𑀲𑁄 𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀤𑀢𑁆𑀯𑀸 𑀲𑀳𑀢𑁆𑀣𑀸 𑀤𑀸𑀦𑀁 𑀤𑀢𑁆𑀯𑀸 𑀘𑀺𑀢𑁆𑀢𑀻𑀓𑀢𑀁 𑀤𑀸𑀦𑀁 𑀤𑀢𑁆𑀯𑀸 𑀅𑀦𑀧𑀯𑀺𑀤𑁆𑀥𑀁 𑀤𑀸𑀦𑀁 𑀤𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀺 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀳𑀩𑁆𑀬𑀢𑀁.

𑀧𑀸𑀬𑀸𑀲𑀺𑀤𑁂𑀯𑀧𑀼𑀢𑁆𑀢𑁄

𑁪𑁪𑁧. 𑀢𑁂𑀦 ¶ 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀕𑀯𑀫𑁆𑀧𑀢𑀺 𑀅𑀪𑀺𑀓𑁆𑀔𑀡𑀁 𑀲𑀼𑀜𑁆𑀜𑀁 𑀲𑁂𑀭𑀻𑀲𑀓𑀁 𑀯𑀺𑀫𑀸𑀦𑀁 𑀤𑀺𑀯𑀸𑀯𑀺𑀳𑀸𑀭𑀁 𑀕𑀘𑁆𑀙𑀢𑀺. 𑀅𑀣 𑀔𑁄 𑀧𑀸𑀬𑀸𑀲𑀺 𑀤𑁂𑀯𑀧𑀼𑀢𑁆𑀢𑁄 𑀬𑁂𑀦𑀸𑀬𑀲𑁆𑀫𑀸 𑀕𑀯𑀫𑁆𑀧𑀢𑀺 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀕𑀯𑀫𑁆𑀧𑀢𑀺𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 ¶ 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑀁 𑀔𑁄 𑀧𑀸𑀬𑀸𑀲𑀺𑀁 𑀤𑁂𑀯𑀧𑀼𑀢𑁆𑀢𑀁 𑀆𑀬𑀲𑁆𑀫𑀸 𑀕𑀯𑀫𑁆𑀧𑀢𑀺 𑀏𑀢𑀤𑀯𑁄𑀘 𑁋 ‘‘𑀓𑁄𑀲𑀺 𑀢𑁆𑀯𑀁, 𑀆𑀯𑀼𑀲𑁄’’𑀢𑀺? ‘‘𑀅𑀳𑀁, 𑀪𑀦𑁆𑀢𑁂, 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄’’𑀢𑀺. ‘‘𑀦𑀦𑀼 𑀢𑁆𑀯𑀁, 𑀆𑀯𑀼𑀲𑁄, 𑀏𑀯𑀁𑀤𑀺𑀝𑁆𑀞𑀺𑀓𑁄 𑀅𑀳𑁄𑀲𑀺 𑁋 ‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 ¶ 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’’𑀢𑀺? ‘‘𑀲𑀘𑁆𑀘𑀸𑀳𑀁, 𑀪𑀦𑁆𑀢𑁂, 𑀏𑀯𑀁𑀤𑀺𑀝𑁆𑀞𑀺𑀓𑁄 𑀅𑀳𑁄𑀲𑀺𑀁 𑁋 ‘𑀇𑀢𑀺𑀧𑀺 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’𑀢𑀺. 𑀅𑀧𑀺 𑀘𑀸𑀳𑀁 𑀅𑀬𑁆𑀬𑁂𑀦 ¶ 𑀓𑀼𑀫𑀸𑀭𑀓𑀲𑁆𑀲𑀧𑁂𑀦 𑀏𑀢𑀲𑁆𑀫𑀸 𑀧𑀸𑀧𑀓𑀸 𑀤𑀺𑀝𑁆𑀞𑀺𑀕𑀢𑀸 𑀯𑀺𑀯𑁂𑀘𑀺𑀢𑁄’’𑀢𑀺. ‘‘𑀬𑁄 𑀧𑀦 𑀢𑁂, 𑀆𑀯𑀼𑀲𑁄, 𑀤𑀸𑀦𑁂 𑀯𑀸𑀯𑀝𑁄 𑀅𑀳𑁄𑀲𑀺 𑀉𑀢𑁆𑀢𑀭𑁄 𑀦𑀸𑀫 𑀫𑀸𑀡𑀯𑁄, 𑀲𑁄 𑀓𑀼𑀳𑀺𑀁 𑀉𑀧𑀧𑀦𑁆𑀦𑁄’’𑀢𑀺? ‘‘𑀬𑁄 𑀫𑁂, 𑀪𑀦𑁆𑀢𑁂, 𑀤𑀸𑀦𑁂 𑀯𑀸𑀯𑀝𑁄 𑀅𑀳𑁄𑀲𑀺 𑀉𑀢𑁆𑀢𑀭𑁄 𑀦𑀸𑀫 𑀫𑀸𑀡𑀯𑁄, 𑀲𑁄 𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀤𑀢𑁆𑀯𑀸 𑀲𑀳𑀢𑁆𑀣𑀸 𑀤𑀸𑀦𑀁 𑀤𑀢𑁆𑀯𑀸 𑀘𑀺𑀢𑁆𑀢𑀻𑀓𑀢𑀁 𑀤𑀸𑀦𑀁 𑀤𑀢𑁆𑀯𑀸 𑀅𑀦𑀧𑀯𑀺𑀤𑁆𑀥𑀁 𑀤𑀸𑀦𑀁 𑀤𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀳𑀩𑁆𑀬𑀢𑀁. 𑀅𑀳𑀁 𑀧𑀦, 𑀪𑀦𑁆𑀢𑁂, 𑀅𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀤𑀢𑁆𑀯𑀸 𑀅𑀲𑀳𑀢𑁆𑀣𑀸 𑀤𑀸𑀦𑀁 𑀤𑀢𑁆𑀯𑀸 𑀅𑀘𑀺𑀢𑁆𑀢𑀻𑀓𑀢𑀁 𑀤𑀸𑀦𑀁 𑀤𑀢𑁆𑀯𑀸 𑀅𑀧𑀯𑀺𑀤𑁆𑀥𑀁 𑀤𑀸𑀦𑀁 𑀤𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀦𑁆𑀦𑁄 𑀲𑀼𑀜𑁆𑀜𑀁 𑀲𑁂𑀭𑀻𑀲𑀓𑀁 𑀯𑀺𑀫𑀸𑀦𑀁. 𑀢𑁂𑀦 𑀳𑀺, 𑀪𑀦𑁆𑀢𑁂 𑀕𑀯𑀫𑁆𑀧𑀢𑀺, 𑀫𑀦𑀼𑀲𑁆𑀲𑀮𑁄𑀓𑀁 𑀕𑀦𑁆𑀢𑁆𑀯𑀸 𑀏𑀯𑀫𑀸𑀭𑁄𑀘𑁂𑀳𑀺 𑁋 ‘𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀤𑁂𑀣, 𑀲𑀳𑀢𑁆𑀣𑀸 𑀤𑀸𑀦𑀁 𑀤𑁂𑀣, 𑀘𑀺𑀢𑁆𑀢𑀻𑀓𑀢𑀁 𑀤𑀸𑀦𑀁 𑀤𑁂𑀣, 𑀅𑀦𑀧𑀯𑀺𑀤𑁆𑀥𑀁 𑀤𑀸𑀦𑀁 𑀤𑁂𑀣. 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 𑀅𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀤𑀢𑁆𑀯𑀸 𑀅𑀲𑀳𑀢𑁆𑀣𑀸 𑀤𑀸𑀦𑀁 𑀤𑀢𑁆𑀯𑀸 𑀅𑀘𑀺𑀢𑁆𑀢𑀻𑀓𑀢𑀁 𑀤𑀸𑀦𑀁 𑀤𑀢𑁆𑀯𑀸 𑀅𑀧𑀯𑀺𑀤𑁆𑀥𑀁 𑀤𑀸𑀦𑀁 𑀤𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀦𑁆𑀦𑁄 𑀲𑀼𑀜𑁆𑀜𑀁 𑀲𑁂𑀭𑀻𑀲𑀓𑀁 𑀯𑀺𑀫𑀸𑀦𑀁. 𑀬𑁄 𑀧𑀦 𑀢𑀲𑁆𑀲 𑀤𑀸𑀦𑁂 𑀯𑀸𑀯𑀝𑁄 𑀅𑀳𑁄𑀲𑀺 𑀉𑀢𑁆𑀢𑀭𑁄 𑀦𑀸𑀫 𑀫𑀸𑀡𑀯𑁄, 𑀲𑁄 𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀤𑀢𑁆𑀯𑀸 𑀲𑀳𑀢𑁆𑀣𑀸 𑀤𑀸𑀦𑀁 𑀤𑀢𑁆𑀯𑀸 𑀘𑀺𑀢𑁆𑀢𑀻𑀓𑀢𑀁 𑀤𑀸𑀦𑀁 𑀤𑀢𑁆𑀯𑀸 𑀅𑀦𑀧𑀯𑀺𑀤𑁆𑀥𑀁 𑀤𑀸𑀦𑀁 𑀤𑀢𑁆𑀯𑀸 ¶ 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀳𑀩𑁆𑀬𑀢’’’𑀦𑁆𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀕𑀯𑀫𑁆𑀧𑀢𑀺 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀏𑀯𑀫𑀸𑀭𑁄𑀘𑁂𑀲𑀺 𑁋 ‘‘𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀤𑁂𑀣, 𑀲𑀳𑀢𑁆𑀣𑀸 𑀤𑀸𑀦𑀁 𑀤𑁂𑀣, 𑀘𑀺𑀢𑁆𑀢𑀻𑀓𑀢𑀁 𑀤𑀸𑀦𑀁 𑀤𑁂𑀣, 𑀅𑀦𑀧𑀯𑀺𑀤𑁆𑀥𑀁 𑀤𑀸𑀦𑀁 𑀤𑁂𑀣. 𑀧𑀸𑀬𑀸𑀲𑀺 𑀭𑀸𑀚𑀜𑁆𑀜𑁄 𑀅𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀤𑀢𑁆𑀯𑀸 𑀅𑀲𑀳𑀢𑁆𑀣𑀸 𑀤𑀸𑀦𑀁 𑀤𑀢𑁆𑀯𑀸 𑀅𑀘𑀺𑀢𑁆𑀢𑀻𑀓𑀢𑀁 𑀤𑀸𑀦𑀁 𑀤𑀢𑁆𑀯𑀸 𑀅𑀧𑀯𑀺𑀤𑁆𑀥𑀁 𑀤𑀸𑀦𑀁 𑀤𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀦𑁆𑀦𑁄 𑀲𑀼𑀜𑁆𑀜𑀁 𑀲𑁂𑀭𑀻𑀲𑀓𑀁 𑀯𑀺𑀫𑀸𑀦𑀁. 𑀬𑁄 𑀧𑀦 𑀢𑀲𑁆𑀲 𑀤𑀸𑀦𑁂 𑀯𑀸𑀯𑀝𑁄 𑀅𑀳𑁄𑀲𑀺 𑀉𑀢𑁆𑀢𑀭𑁄 ¶ 𑀦𑀸𑀫 𑀫𑀸𑀡𑀯𑁄, 𑀲𑁄 𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀤𑀢𑁆𑀯𑀸 ¶ 𑀲𑀳𑀢𑁆𑀣𑀸 𑀤𑀸𑀦𑀁 𑀤𑀢𑁆𑀯𑀸 𑀘𑀺𑀢𑁆𑀢𑀻𑀓𑀢𑀁 𑀤𑀸𑀦𑀁 𑀤𑀢𑁆𑀯𑀸 𑀅𑀦𑀧𑀯𑀺𑀤𑁆𑀥𑀁 ¶ 𑀤𑀸𑀦𑀁 𑀤𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀦𑁆𑀦𑁄 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀲𑀳𑀩𑁆𑀬𑀢’’𑀦𑁆𑀢𑀺.

𑀧𑀸𑀬𑀸𑀲𑀺𑀲𑀼𑀢𑁆𑀢𑀁 𑀦𑀺𑀝𑁆𑀞𑀺𑀢𑀁 𑀤𑀲𑀫𑀁.

𑀫𑀳𑀸𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀫𑀳𑀸𑀧𑀤𑀸𑀦 𑀦𑀺𑀤𑀸𑀦𑀁, 𑀦𑀺𑀩𑁆𑀩𑀸𑀦𑀜𑁆𑀘 𑀲𑀼𑀤𑀲𑁆𑀲𑀦𑀁;

𑀚𑀦𑀯𑀲𑀪 𑀕𑁄𑀯𑀺𑀦𑁆𑀤𑀁, 𑀲𑀫𑀬𑀁 𑀲𑀓𑁆𑀓𑀧𑀜𑁆𑀳𑀓𑀁;

𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀜𑁆𑀘, 𑀧𑀸𑀬𑀸𑀲𑀺 𑀤𑀲𑀫𑀁 𑀪𑀯𑁂 [𑀲𑀢𑀺𑀧𑀝𑁆𑀞𑀸𑀦𑀧𑀸𑀬𑀸𑀲𑀺, 𑀫𑀳𑀸𑀯𑀕𑁆𑀕𑀲𑁆𑀲 𑀲𑀗𑁆𑀕𑀳𑁄 (𑀲𑀻. 𑀧𑀻.) 𑀲𑀢𑀺𑀧𑀝𑁆𑀞𑀸𑀦𑀧𑀸𑀬𑀸𑀲𑀺, 𑀫𑀳𑀸𑀯𑀕𑁆𑀕𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 (𑀲𑁆𑀬𑀸.)].

𑀫𑀳𑀸𑀯𑀕𑁆𑀕𑀧𑀸𑀴𑀺 𑀦𑀺𑀝𑁆𑀞𑀺𑀢𑀸.