📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀤𑀻𑀖𑀦𑀺𑀓𑀸𑀬𑁂

𑀧𑀸𑀣𑀺𑀓𑀯𑀕𑁆𑀕𑀝𑁆𑀞𑀓𑀣𑀸

𑁧. 𑀧𑀸𑀣𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑀲𑀼𑀦𑀓𑁆𑀔𑀢𑁆𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁧. 𑀏𑀯𑀁 ¶ ¶ ¶ 𑀫𑁂 𑀲𑀼𑀢𑀁…𑀧𑁂… 𑀫𑀮𑁆𑀮𑁂𑀲𑀼 𑀯𑀺𑀳𑀭𑀢𑀻𑀢𑀺 𑀧𑀸𑀣𑀺𑀓𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸. 𑀫𑀮𑁆𑀮𑁂𑀲𑀼 𑀯𑀺𑀳𑀭𑀢𑀻𑀢𑀺 𑀫𑀮𑁆𑀮𑀸 𑀦𑀸𑀫 𑀚𑀸𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀼𑀴𑁆𑀳𑀻𑀲𑀤𑁆𑀤𑁂𑀦 ‘‘𑀫𑀮𑁆𑀮𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀫𑀮𑁆𑀮𑁂𑀲𑀼 𑀚𑀦𑀧𑀤𑁂. ‘‘𑀅𑀦𑀼𑀧𑀺𑀬𑀁 𑀦𑀸𑀫 𑀫𑀮𑁆𑀮𑀸𑀦𑀁 𑀦𑀺𑀕𑀫𑁄’’𑀢𑀺 𑀅𑀦𑀼𑀧𑀺𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁄 𑀫𑀮𑁆𑀮𑀸𑀦𑀁 𑀚𑀦𑀧𑀤𑀲𑁆𑀲 𑀏𑀓𑁄 𑀦𑀺𑀕𑀫𑁄, 𑀢𑀁 𑀕𑁄𑀘𑀭𑀕𑀸𑀫𑀁 𑀓𑀢𑁆𑀯𑀸 𑀏𑀓𑀲𑁆𑀫𑀺𑀁 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑁂 𑀯𑀦𑀲𑀡𑁆𑀟𑁂 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀅𑀦𑁄𑀧𑀺𑀬𑀦𑁆𑀢𑀺𑀧𑀺 𑀧𑀸𑀞𑁄. 𑀧𑀸𑀯𑀺𑀲𑀻𑀢𑀺 𑀧𑀯𑀺𑀝𑁆𑀞𑁄. 𑀪𑀕𑀯𑀸 𑀧𑀦 𑀦 𑀢𑀸𑀯 𑀧𑀯𑀺𑀝𑁆𑀞𑁄, 𑀧𑀯𑀺𑀲𑀺𑀲𑁆𑀲𑀸𑀫𑀻𑀢𑀺 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀧𑀦 𑀧𑀸𑀯𑀺𑀲𑀻𑀢𑀺 𑀯𑀼𑀢𑁆𑀢𑁄. 𑀬𑀣𑀸 𑀓𑀺𑀁, 𑀬𑀣𑀸 ‘‘𑀕𑀸𑀫𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀦𑁆𑀢𑁄 𑀧𑀼𑀭𑀺𑀲𑁄 𑀢𑀁 𑀕𑀸𑀫𑀁 𑀅𑀧𑀢𑁆𑀢𑁄𑀧𑀺 ‘‘𑀓𑀼𑀳𑀺𑀁 𑀇𑀢𑁆𑀣𑀦𑁆𑀦𑀸𑀫𑁄’’𑀢𑀺 ¶ 𑀯𑀼𑀢𑁆𑀢𑁂 ‘‘𑀕𑀸𑀫𑀁 𑀕𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁. 𑀏𑀢𑀤𑀳𑁄𑀲𑀻𑀢𑀺 𑀕𑀸𑀫𑀲𑀫𑀻𑀧𑁂 𑀞𑀢𑁆𑀯𑀸 𑀲𑀽𑀭𑀺𑀬𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀏𑀢𑀤𑀳𑁄𑀲𑀺. 𑀅𑀢𑀺𑀧𑁆𑀧𑀕𑁄 𑀔𑁄𑀢𑀺 𑀅𑀢𑀺𑀯𑀺𑀬 𑀧𑀕𑁄 𑀔𑁄, 𑀦 𑀢𑀸𑀯 𑀓𑀼𑀮𑁂𑀲𑀼 𑀬𑀸𑀕𑀼𑀪𑀢𑁆𑀢𑀁 𑀦𑀺𑀝𑁆𑀞𑀺𑀢𑀦𑁆𑀢𑀺. 𑀓𑀺𑀁 𑀧𑀦 𑀪𑀕𑀯𑀸 𑀓𑀸𑀮𑀁 𑀅𑀚𑀸𑀦𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄𑀢𑀺? 𑀦 𑀅𑀚𑀸𑀦𑀺𑀢𑁆𑀯𑀸. 𑀧𑀘𑁆𑀘𑀽𑀲𑀓𑀸𑀮𑁂𑀬𑁂𑀯 𑀳𑀺 𑀪𑀕𑀯𑀸 𑀜𑀸𑀡𑀚𑀸𑀮𑀁 𑀧𑀢𑁆𑀣𑀭𑀺𑀢𑁆𑀯𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄 𑀧𑀯𑀺𑀝𑁆𑀞𑀁 𑀪𑀕𑁆𑀕𑀯𑀕𑁄𑀢𑁆𑀢𑀁 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑀁 𑀤𑀺𑀲𑁆𑀯𑀸 ‘‘𑀅𑀚𑁆𑀚𑀸𑀳𑀁 𑀇𑀫𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀫𑀬𑀸 𑀧𑀼𑀩𑁆𑀩𑁂 𑀓𑀢𑀓𑀸𑀭𑀡𑀁 𑀲𑀫𑀸𑀳𑀭𑀺𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀲𑁆𑀲𑀸𑀫𑀺, 𑀲𑀸 𑀥𑀫𑁆𑀫𑀓𑀣𑀸 ¶ 𑀅𑀲𑁆𑀲 𑀫𑀬𑀺 𑀧𑀲𑀸𑀤𑀧𑁆𑀧𑀝𑀺𑀮𑀸𑀪𑀯𑀲𑁂𑀦 𑀲𑀨𑀮𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸𑀯 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀅𑀢𑀺𑀧𑁆𑀧𑀕𑁄𑀯 𑀦𑀺𑀓𑁆𑀔𑀫𑀺. 𑀢𑀲𑁆𑀫𑀸 𑀢𑀢𑁆𑀣 𑀧𑀯𑀺𑀲𑀺𑀢𑀼𑀓𑀸𑀫𑀢𑀸𑀬 𑀏𑀯𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺.

𑁨. 𑀏𑀢𑀤𑀯𑁄𑀘𑀸𑀢𑀺 ¶ 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀫𑀸𑀦𑀣𑀤𑁆𑀥𑀢𑀁 𑀅𑀓𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀏𑀢𑀁 𑀏𑀢𑀼 𑀔𑁄, 𑀪𑀦𑁆𑀢𑁂𑀢𑀺𑀆𑀤𑀺𑀓𑀁 𑀯𑀘𑀦𑀁 𑀅𑀯𑁄𑀘. 𑀇𑀫𑀁 𑀧𑀭𑀺𑀬𑀸𑀬𑀦𑁆𑀢𑀺 𑀇𑀫𑀁 𑀯𑀸𑀭𑀁, 𑀅𑀚𑁆𑀚 𑀇𑀫𑀁 𑀆𑀕𑀫𑀦𑀯𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀦 𑀪𑀕𑀯𑀸 𑀧𑀼𑀩𑁆𑀩𑁂𑀧𑀺 𑀢𑀢𑁆𑀣 𑀕𑀢𑀧𑀼𑀩𑁆𑀩𑁄𑀢𑀺? 𑀦 𑀕𑀢𑀧𑀼𑀩𑁆𑀩𑁄, 𑀮𑁄𑀓𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀧𑀦 𑀏𑀯𑀫𑀸𑀳. 𑀮𑁄𑀓𑀺𑀬𑀸 𑀳𑀺 𑀘𑀺𑀭𑀲𑁆𑀲𑀁 𑀆𑀕𑀢𑀫𑁆𑀧𑀺 𑀅𑀦𑀸𑀕𑀢𑀧𑀼𑀩𑁆𑀩𑀫𑁆𑀧𑀺 𑀫𑀦𑀸𑀧𑀚𑀸𑀢𑀺𑀓𑀁 𑀆𑀕𑀢𑀁 𑀤𑀺𑀲𑁆𑀯𑀸 ‘‘𑀓𑀼𑀢𑁄 𑀪𑀯𑀁 𑀆𑀕𑀢𑁄, 𑀘𑀺𑀭𑀲𑁆𑀲𑀁 𑀪𑀯𑀁 𑀆𑀕𑀢𑁄, 𑀓𑀣𑀁 𑀢𑁂 𑀇𑀥𑀸𑀕𑀫𑀦𑀫𑀕𑁆𑀕𑁄 𑀜𑀸𑀢𑁄, 𑀓𑀺𑀁 𑀫𑀕𑁆𑀕𑀫𑀽𑀴𑁆𑀳𑁄𑀲𑀻’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀺. 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀮𑁄𑀓𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀏𑀯𑀫𑀸𑀳𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀫𑀸𑀲𑀦𑀦𑁆𑀢𑀺 𑀅𑀢𑁆𑀢𑀦𑁄 𑀦𑀺𑀲𑀺𑀦𑁆𑀦𑀸𑀲𑀦𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑁆𑀯𑀸 𑀤𑀤𑀫𑀸𑀦𑁄 𑀏𑀯𑀫𑀸𑀳. 𑀲𑀼𑀦𑀓𑁆𑀔𑀢𑁆𑀢𑁄 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑁄𑀢𑀺 𑀲𑀼𑀦𑀓𑁆𑀔𑀢𑁆𑀢𑁄 𑀦𑀸𑀫 𑀮𑀺𑀘𑁆𑀙𑀯𑀺𑀭𑀸𑀚𑀧𑀼𑀢𑁆𑀢𑁄. 𑀲𑁄 𑀓𑀺𑀭 𑀢𑀲𑁆𑀲 𑀕𑀺𑀳𑀺𑀲𑀳𑀸𑀬𑁄 𑀳𑁄𑀢𑀺, 𑀓𑀸𑀮𑁂𑀦 𑀓𑀸𑀮𑀁 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀢𑀺. 𑀧𑀘𑁆𑀘𑀓𑁆𑀔𑀸𑀢𑁄𑀢𑀺 ‘‘𑀧𑀘𑁆𑀘𑀓𑁆𑀔𑀸𑀫𑀺 𑀤𑀸𑀦𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀦 𑀤𑀸𑀦𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀧𑀝𑀺𑀅𑀓𑁆𑀔𑀸𑀢𑁄 𑀦𑀺𑀲𑁆𑀲𑀝𑁆𑀞𑁄 𑀧𑀭𑀺𑀘𑁆𑀘𑀢𑁆𑀢𑁄.

𑁩. 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲𑀸𑀢𑀺 𑀪𑀕𑀯𑀸 𑀫𑁂 𑀲𑀢𑁆𑀣𑀸 ‘‘𑀪𑀕𑀯𑀢𑁄 𑀅𑀳𑀁 𑀑𑀯𑀸𑀤𑀁 𑀧𑀝𑀺𑀓𑀭𑁄𑀫𑀻’’𑀢𑀺 𑀏𑀯𑀁 𑀅𑀧𑀤𑀺𑀲𑀺𑀢𑁆𑀯𑀸. 𑀓𑁄 𑀲𑀦𑁆𑀢𑁄 𑀓𑀁 𑀧𑀘𑁆𑀘𑀸𑀘𑀺𑀓𑁆𑀔𑀲𑀻𑀢𑀺 𑀬𑀸𑀘𑀓𑁄 𑀯𑀸 𑀬𑀸𑀘𑀺𑀢𑀓𑀁 𑀧𑀘𑁆𑀘𑀸𑀘𑀺𑀓𑁆𑀔𑁂𑀬𑁆𑀬, 𑀬𑀸𑀘𑀺𑀢𑀓𑁄 𑀯𑀸 𑀬𑀸𑀘𑀓𑀁. 𑀢𑁆𑀯𑀁 𑀧𑀦 𑀦𑁂𑀯 𑀬𑀸𑀘𑀓𑁄 𑀦 𑀬𑀸𑀘𑀺𑀢𑀓𑁄, 𑀏𑀯𑀁 𑀲𑀦𑁆𑀢𑁂, 𑀫𑁄𑀖𑀧𑀼𑀭𑀺𑀲, 𑀓𑁄 𑀲𑀦𑁆𑀢𑁄 𑀓𑁄 𑀲𑀫𑀸𑀦𑁄 𑀓𑀁 𑀧𑀘𑁆𑀘𑀸𑀘𑀺𑀓𑁆𑀔𑀲𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀲𑁆𑀲 𑀫𑁄𑀖𑀧𑀼𑀭𑀺𑀲𑀸𑀢𑀺 𑀧𑀲𑁆𑀲 𑀢𑀼𑀘𑁆𑀙𑀧𑀼𑀭𑀺𑀲. 𑀬𑀸𑀯𑀜𑁆𑀘 𑀢𑁂 𑀇𑀤𑀁 𑀅𑀧𑀭𑀤𑁆𑀥𑀦𑁆𑀢𑀺 𑀬𑀢𑁆𑀢𑀓𑀁 𑀇𑀤𑀁 𑀢𑀯 𑀅𑀧𑀭𑀤𑁆𑀥𑀁, 𑀬𑀢𑁆𑀢𑀓𑁄 𑀢𑁂 𑀅𑀧𑀭𑀸𑀥𑁄 𑀢𑀢𑁆𑀢𑀓𑁄 𑀤𑁄𑀲𑁄𑀢𑀺 𑀏𑀯𑀸𑀳𑀁 𑀪𑀕𑁆𑀕𑀯 𑀢𑀲𑁆𑀲 𑀤𑁄𑀲𑀁 𑀆𑀭𑁄𑀧𑁂𑀲𑀺𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁪. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀢𑀺 𑀧𑀜𑁆𑀘𑀲𑀻𑀮𑀤𑀲𑀲𑀻𑀮𑀲𑀗𑁆𑀔𑀸𑀢𑀸 𑀫𑀦𑀼𑀲𑁆𑀲𑀥𑀫𑁆𑀫𑀸𑀉𑀢𑁆𑀢𑀭𑀺. 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀇𑀤𑁆𑀥𑀺𑀪𑀽𑀢𑀁 𑀧𑀸𑀝𑀺𑀳𑀸𑀭𑀺𑀬𑀁. 𑀓𑀢𑁂 𑀯𑀸𑀢𑀺 𑀓𑀢𑀫𑁆𑀳𑀺 𑀯𑀸. 𑀬𑀲𑁆𑀲𑀢𑁆𑀣𑀸𑀬𑀸𑀢𑀺 𑀬𑀲𑁆𑀲 𑀤𑀼𑀓𑁆𑀔𑀓𑁆𑀔𑀬𑀲𑁆𑀲 𑀅𑀢𑁆𑀣𑀸𑀬. 𑀲𑁄 ¶ 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲𑀸𑀢𑀺 ¶ 𑀲𑁄 𑀥𑀫𑁆𑀫𑁄 𑀢𑀓𑁆𑀓𑀭𑀲𑁆𑀲 𑀬𑀣𑀸 𑀫𑀬𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀢𑀣𑀸 𑀓𑀸𑀭𑀓𑀲𑁆𑀲 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀩𑁆𑀩𑀯𑀝𑁆𑀝𑀤𑀼𑀓𑁆𑀔𑀓𑁆𑀔𑀬𑀸𑀬 𑀅𑀫𑀢𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀬 ¶ 𑀕𑀘𑁆𑀙𑀢𑀺, 𑀦 𑀕𑀘𑁆𑀙𑀢𑀺, 𑀲𑀁𑀯𑀢𑁆𑀢𑀢𑀺, 𑀦 𑀲𑀁𑀯𑀢𑁆𑀢𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀢𑀢𑁆𑀭 𑀲𑀼𑀦𑀓𑁆𑀔𑀢𑁆𑀢𑀸𑀢𑀺 𑀢𑀲𑁆𑀫𑀺𑀁 𑀲𑀼𑀦𑀓𑁆𑀔𑀢𑁆𑀢 𑀫𑀬𑀸 𑀤𑁂𑀲𑀺𑀢𑁂 𑀥𑀫𑁆𑀫𑁂 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀫𑀸𑀦𑁂 𑀓𑀺𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑀁 𑀓𑀭𑀺𑀲𑁆𑀲𑀢𑀺, 𑀓𑁄 𑀢𑁂𑀦 𑀓𑀢𑁂𑀦 𑀅𑀢𑁆𑀣𑁄. 𑀢𑀲𑁆𑀫𑀺𑀜𑁆𑀳𑀺 𑀓𑀢𑁂𑀧𑀺 𑀅𑀓𑀢𑁂𑀧𑀺 𑀫𑀫 𑀲𑀸𑀲𑀦𑀲𑁆𑀲 𑀧𑀭𑀺𑀳𑀸𑀦𑀺 𑀦𑀢𑁆𑀣𑀺, 𑀤𑁂𑀯𑀫𑀦𑀼𑀲𑁆𑀲𑀸𑀦𑀜𑁆𑀳𑀺 𑀅𑀫𑀢𑀦𑀺𑀩𑁆𑀩𑀸𑀦𑀲𑀫𑁆𑀧𑀸𑀧𑀦𑀢𑁆𑀣𑀸𑀬 𑀅𑀳𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀲𑀺𑀁, 𑀦 𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀢𑁆𑀣𑀸𑀬𑀸𑀢𑀺 𑀧𑀸𑀝𑀺𑀳𑀸𑀭𑀺𑀬𑀲𑁆𑀲 𑀦𑀺𑀭𑀢𑁆𑀣𑀓𑀢𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀧𑀲𑁆𑀲, 𑀫𑁄𑀖𑀧𑀼𑀭𑀺𑀲𑀸’’𑀢𑀺 𑀤𑀼𑀢𑀺𑀬𑀁 𑀤𑁄𑀲𑀁 𑀆𑀭𑁄𑀧𑁂𑀲𑀺.

𑁫. 𑀅𑀕𑁆𑀕𑀜𑁆𑀜𑀦𑁆𑀢𑀺 𑀮𑁄𑀓𑀧𑀜𑁆𑀜𑀢𑁆𑀢𑀺𑀁. ‘‘𑀇𑀤𑀁 𑀦𑀸𑀫 𑀮𑁄𑀓𑀲𑁆𑀲 𑀅𑀕𑁆𑀕’’𑀦𑁆𑀢𑀺 𑀏𑀯𑀁 𑀚𑀸𑀦𑀺𑀢𑀩𑁆𑀩𑀫𑁆𑀧𑀺 𑀅𑀕𑁆𑀕𑀁 𑀫𑀭𑀺𑀬𑀸𑀤𑀁 𑀦 𑀢𑀁 𑀧𑀜𑁆𑀜𑀧𑁂𑀢𑀻𑀢𑀺 𑀯𑀤𑀢𑀺. 𑀲𑁂𑀲𑀫𑁂𑀢𑁆𑀣 𑀅𑀦𑀦𑁆𑀢𑀭𑀯𑀸𑀤𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁬. 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀔𑁄𑀢𑀺 𑀇𑀤𑀁 𑀓𑀲𑁆𑀫𑀸 𑀆𑀭𑀤𑁆𑀥𑀁. 𑀲𑀼𑀦𑀓𑁆𑀔𑀢𑁆𑀢𑁄 𑀓𑀺𑀭 ‘‘𑀪𑀕𑀯𑀢𑁄 𑀕𑀼𑀡𑀁 𑀫𑀓𑁆𑀔𑁂𑀲𑁆𑀲𑀸𑀫𑀺, ‘‘𑀤𑁄𑀲𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’’𑀢𑀺 𑀏𑀢𑁆𑀢𑀓𑀁 𑀯𑀺𑀧𑁆𑀧𑀮𑀧𑀺𑀢𑁆𑀯𑀸 𑀪𑀕𑀯𑀢𑁄 𑀓𑀣𑀁 𑀲𑀼𑀡𑀦𑁆𑀢𑁄 𑀅𑀧𑁆𑀧𑀢𑀺𑀝𑁆𑀞𑁄 𑀦𑀺𑀭𑀯𑁄 𑀅𑀝𑁆𑀞𑀸𑀲𑀺.

𑀅𑀣 𑀪𑀕𑀯𑀸 𑁋 ‘‘𑀲𑀼𑀦𑀓𑁆𑀔𑀢𑁆𑀢, 𑀏𑀯𑀁 𑀢𑁆𑀯𑀁 𑀫𑀓𑁆𑀔𑀺𑀪𑀸𑀯𑁂 𑀞𑀺𑀢𑁄 𑀲𑀬𑀫𑁂𑀯 𑀕𑀭𑀳𑀁 𑀧𑀸𑀧𑀼𑀡𑀺𑀲𑁆𑀲𑀲𑀻’’𑀢𑀺 𑀫𑀓𑁆𑀔𑀺𑀪𑀸𑀯𑁂 𑀆𑀤𑀻𑀦𑀯𑀤𑀲𑁆𑀲𑀦𑀢𑁆𑀣𑀁 𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀸𑀢𑀺 𑀅𑀦𑁂𑀓𑀓𑀸𑀭𑀡𑁂𑀦. 𑀯𑀚𑁆𑀚𑀺𑀕𑀸𑀫𑁂𑀢𑀺 𑀯𑀚𑁆𑀚𑀺𑀭𑀸𑀚𑀸𑀦𑀁 𑀕𑀸𑀫𑁂, 𑀯𑁂𑀲𑀸𑀮𑀻𑀦𑀕𑀭𑁂 𑀦𑁄 𑀯𑀺𑀲𑀳𑀻𑀢𑀺 𑀦𑀸𑀲𑀓𑁆𑀔𑀺. 𑀲𑁄 𑀅𑀯𑀺𑀲𑀳𑀦𑁆𑀢𑁄𑀢𑀺 𑀲𑁄 𑀲𑀼𑀦𑀓𑁆𑀔𑀢𑁆𑀢𑁄 𑀬𑀲𑁆𑀲 𑀧𑀼𑀩𑁆𑀩𑁂 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀯𑀡𑁆𑀡𑀁 𑀓𑀣𑁂𑀦𑁆𑀢𑀲𑁆𑀲 𑀫𑀼𑀔𑀁 𑀦𑀧𑁆𑀧𑀳𑁄𑀢𑀺, 𑀲𑁄 𑀤𑀸𑀦𑀺 𑀢𑁂𑀦𑁂𑀯 𑀫𑀼𑀔𑁂𑀦 𑀅𑀯𑀡𑁆𑀡𑀁 𑀓𑀣𑁂𑀢𑀺, 𑀅𑀤𑁆𑀥𑀸 𑀅𑀯𑀺𑀲𑀳𑀦𑁆𑀢𑁄 𑀅𑀲𑀓𑁆𑀓𑁄𑀦𑁆𑀢𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁 𑀅𑀢𑁆𑀢𑀦𑁄 𑀩𑀸𑀮𑀢𑀸𑀬 𑀅𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀳𑀻𑀦𑀸𑀬𑀸𑀯𑀢𑁆𑀢𑁄. 𑀩𑀼𑀤𑁆𑀥𑁄 𑀧𑀦 𑀲𑀼𑀩𑀼𑀤𑁆𑀥𑁄𑀯, 𑀥𑀫𑁆𑀫𑁄 𑀲𑁆𑀯𑀸𑀓𑁆𑀔𑀸𑀢𑁄𑀯, 𑀲𑀗𑁆𑀖𑁄 𑀲𑀼𑀧𑁆𑀧𑀝𑀺𑀧𑀦𑁆𑀦𑁄𑀯. 𑀏𑀯𑀁 𑀢𑀻𑀡𑀺 𑀭𑀢𑀦𑀸𑀦𑀺 𑀣𑁄𑀫𑁂𑀦𑁆𑀢𑀸 𑀫𑀦𑀼𑀲𑁆𑀲𑀸 𑀢𑀼𑀬𑁆𑀳𑁂𑀯 𑀤𑁄𑀲𑀁 𑀤𑀲𑁆𑀲𑁂𑀲𑁆𑀲𑀦𑁆𑀢𑀻𑀢𑀺. 𑀇𑀢𑀺 𑀔𑁄 𑀢𑁂𑀢𑀺 𑀏𑀯𑀁 𑀔𑁄 𑀢𑁂, 𑀲𑀼𑀦𑀓𑁆𑀔𑀢𑁆𑀢, 𑀯𑀢𑁆𑀢𑀸𑀭𑁄 𑀪𑀯𑀺𑀲𑁆𑀲𑀦𑁆𑀢𑀺. 𑀢𑀢𑁄 𑀏𑀯𑀁 𑀤𑁄𑀲𑁂 𑀉𑀧𑁆𑀧𑀦𑁆𑀦𑁂 𑀲𑀢𑁆𑀣𑀸 𑀅𑀢𑀻𑀢𑀸𑀦𑀸𑀕𑀢𑁂 𑀅𑀧𑁆𑀧𑀝𑀺𑀳𑀢𑀜𑀸𑀡𑁄, 𑀫𑀬𑁆𑀳𑀁 𑀏𑀯𑀁 𑀤𑁄𑀲𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀚𑀸𑀦𑀦𑁆𑀢𑁄𑀧𑀺 𑀧𑀼𑀭𑁂𑀢𑀭𑀁 𑀦 𑀓𑀣𑁂𑀲𑀻𑀢𑀺 𑀯𑀢𑁆𑀢𑀼𑀁 𑀦 𑀮𑀘𑁆𑀙𑀲𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀧𑀓𑁆𑀓𑀫𑁂𑀯𑀸𑀢𑀺 ¶ 𑀅𑀧𑀓𑁆𑀓𑀫𑀺𑀬𑁂𑀯, 𑀅𑀧𑀓𑁆𑀓𑀦𑁆𑀢𑁄 𑀯𑀸 𑀘𑀼𑀢𑁄𑀢𑀺 𑀅𑀢𑁆𑀣𑁄. 𑀬𑀣𑀸 ¶ 𑀢𑀁 𑀆𑀧𑀸𑀬𑀺𑀓𑁄𑀢𑀺 𑀬𑀣𑀸 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑀦𑀸𑀭𑀳𑁄 𑀲𑀢𑁆𑀢𑁄 𑀅𑀧𑀓𑁆𑀓𑀫𑁂𑀬𑁆𑀬, 𑀏𑀯𑀫𑁂𑀯 𑀅𑀧𑀓𑁆𑀓𑀫𑀻𑀢𑀺 𑀅𑀢𑁆𑀣𑁄.

𑀓𑁄𑀭𑀓𑁆𑀔𑀢𑁆𑀢𑀺𑀬𑀯𑀢𑁆𑀣𑀼𑀯𑀡𑁆𑀡𑀦𑀸

𑁭. 𑀏𑀓𑀫𑀺𑀤𑀸𑀳𑀦𑁆𑀢𑀺 ¶ 𑀇𑀫𑀺𑀦𑀸 𑀓𑀺𑀁 𑀤𑀲𑁆𑀲𑁂𑀢𑀺? 𑀇𑀤𑀁 𑀲𑀼𑀢𑁆𑀢𑀁 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀆𑀩𑀤𑁆𑀥𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀦 𑀓𑀭𑁄𑀢𑀻𑀢𑀺 𑀘 𑀅𑀕𑁆𑀕𑀜𑁆𑀜𑀁 𑀦 𑀧𑀜𑁆𑀜𑀧𑁂𑀢𑀻𑀢𑀺 𑀘. 𑀢𑀢𑁆𑀣 ‘‘𑀅𑀕𑁆𑀕𑀜𑁆𑀜𑀁 𑀦 𑀧𑀜𑁆𑀜𑀧𑁂𑀢𑀻’’𑀢𑀺 𑀇𑀤𑀁 𑀧𑀤𑀁 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀤𑀲𑁆𑀲𑁂𑀲𑁆𑀲𑀢𑀺. ‘‘𑀧𑀸𑀝𑀺𑀳𑀸𑀭𑀺𑀬𑀁 𑀦 𑀓𑀭𑁄𑀢𑀻’’𑀢𑀺 𑀇𑀫𑀲𑁆𑀲 𑀧𑀦 𑀧𑀤𑀲𑁆𑀲 𑀅𑀦𑀼𑀲𑀦𑁆𑀥𑀺𑀤𑀲𑁆𑀲𑀦𑀯𑀲𑁂𑀦 𑀅𑀬𑀁 𑀤𑁂𑀲𑀦𑀸 𑀆𑀭𑀤𑁆𑀥𑀸.

𑀢𑀢𑁆𑀣 𑀏𑀓𑀫𑀺𑀤𑀸𑀳𑀦𑁆𑀢𑀺 𑀏𑀓𑀲𑁆𑀫𑀺𑀁 𑀅𑀳𑀁. 𑀲𑀫𑀬𑀦𑁆𑀢𑀺 𑀲𑀫𑀬𑁂, 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀅𑀳𑀦𑁆𑀢𑀺 𑀅𑀢𑁆𑀣𑁄. 𑀣𑀽𑀮𑀽𑀲𑀽𑀢𑀺 𑀣𑀽𑀮𑀽 𑀦𑀸𑀫 𑀚𑀦𑀧𑀤𑁄, 𑀢𑀢𑁆𑀣 𑀯𑀺𑀳𑀭𑀸𑀫𑀺. 𑀉𑀢𑁆𑀢𑀭𑀓𑀸 𑀦𑀸𑀫𑀸𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀉𑀢𑁆𑀢𑀭𑀓𑀸𑀢𑀺 𑀏𑀯𑀁𑀦𑀸𑀫𑀓𑁄 𑀣𑀽𑀮𑀽𑀦𑀁 𑀚𑀦𑀧𑀤𑀲𑁆𑀲 𑀦𑀺𑀕𑀫𑁄, 𑀢𑀁 𑀦𑀺𑀕𑀫𑀁 𑀕𑁄𑀘𑀭𑀕𑀸𑀫𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀘𑁂𑀮𑁄𑀢𑀺 𑀦𑀕𑁆𑀕𑁄. 𑀓𑁄𑀭𑀓𑁆𑀔𑀢𑁆𑀢𑀺𑀬𑁄𑀢𑀺 𑀅𑀦𑁆𑀢𑁄𑀯𑀗𑁆𑀓𑀧𑀸𑀤𑁄 𑀔𑀢𑁆𑀢𑀺𑀬𑁄. 𑀓𑀼𑀓𑁆𑀓𑀼𑀭𑀯𑀢𑀺𑀓𑁄𑀢𑀺 𑀲𑀫𑀸𑀤𑀺𑀦𑁆𑀦𑀓𑀼𑀓𑁆𑀓𑀼𑀭𑀯𑀢𑁄 𑀲𑀼𑀦𑀔𑁄 𑀯𑀺𑀬 𑀖𑀸𑀬𑀺𑀢𑁆𑀯𑀸 𑀔𑀸𑀤𑀢𑀺, 𑀉𑀤𑁆𑀥𑀦𑀦𑁆𑀢𑀭𑁂 𑀦𑀺𑀧𑀚𑁆𑀚𑀢𑀺, 𑀅𑀜𑁆𑀜𑀫𑁆𑀧𑀺 𑀲𑀼𑀦𑀔𑀓𑀺𑀭𑀺𑀬𑀫𑁂𑀯 𑀓𑀭𑁄𑀢𑀺. 𑀘𑀢𑀼𑀓𑁆𑀓𑀼𑀡𑁆𑀟𑀺𑀓𑁄𑀢𑀺 𑀘𑀢𑀼𑀲𑀗𑁆𑀖𑀝𑁆𑀝𑀺𑀢𑁄 𑀤𑁆𑀯𑁂 𑀚𑀸𑀡𑀽𑀦𑀺 𑀤𑁆𑀯𑁂 𑀘 𑀓𑀧𑁆𑀧𑀭𑁂 𑀪𑀽𑀫𑀺𑀬𑀁 𑀞𑀧𑁂𑀢𑁆𑀯𑀸 𑀯𑀺𑀘𑀭𑀢𑀺. 𑀙𑀫𑀸𑀦𑀺𑀓𑀺𑀡𑁆𑀡𑀦𑁆𑀢𑀺 𑀪𑀽𑀫𑀺𑀬𑀁 𑀦𑀺𑀓𑀺𑀡𑁆𑀡𑀁 𑀧𑀓𑁆𑀔𑀺𑀢𑁆𑀢𑀁 𑀞𑀧𑀺𑀢𑀁. 𑀪𑀓𑁆𑀔𑀲𑀦𑁆𑀢𑀺 𑀪𑀓𑁆𑀔𑀁 𑀬𑀁𑀓𑀺𑀜𑁆𑀘𑀺 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁. 𑀫𑀼𑀔𑁂𑀦𑁂𑀯𑀸𑀢𑀺 𑀳𑀢𑁆𑀣𑁂𑀦 𑀅𑀧𑀭𑀸𑀫𑀲𑀺𑀢𑁆𑀯𑀸 𑀔𑀸𑀤𑀦𑀻𑀬𑀁 𑀫𑀼𑀔𑁂𑀦𑁂𑀯 𑀔𑀸𑀤𑀢𑀺, 𑀪𑁄𑀚𑀦𑀻𑀬𑀫𑁆𑀧𑀺 𑀫𑀼𑀔𑁂𑀦𑁂𑀯 𑀪𑀼𑀜𑁆𑀚𑀢𑀺. 𑀲𑀸𑀥𑀼𑀭𑀽𑀧𑁄𑀢𑀺 𑀲𑀼𑀦𑁆𑀤𑀭𑀭𑀽𑀧𑁄. 𑀅𑀬𑀁 𑀲𑀫𑀡𑁄𑀢𑀺 𑀅𑀬𑀁 𑀅𑀭𑀳𑀢𑀁 𑀲𑀫𑀡𑁄 𑀏𑀓𑁄𑀢𑀺. 𑀢𑀢𑁆𑀣 𑀯𑀢𑀸𑀢𑀺 𑀧𑀢𑁆𑀣𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀏𑀯𑀁 𑀓𑀺𑀭𑀲𑁆𑀲 𑀧𑀢𑁆𑀣𑀦𑀸 𑀅𑀳𑁄𑀲𑀺 ‘‘𑀇𑀫𑀺𑀦𑀸 𑀲𑀫𑀡𑁂𑀦 𑀲𑀤𑀺𑀲𑁄 𑀅𑀜𑁆𑀜𑁄 𑀲𑀫𑀡𑁄 𑀦𑀸𑀫 𑀦𑀢𑁆𑀣𑀺, 𑀅𑀬𑀜𑁆𑀳𑀺 𑀅𑀧𑁆𑀧𑀺𑀘𑁆𑀙𑀢𑀸𑀬 𑀯𑀢𑁆𑀣𑀁 𑀦 𑀦𑀺𑀯𑀸𑀲𑁂𑀢𑀺, ‘𑀏𑀲 𑀧𑀧𑀜𑁆𑀘𑁄’𑀢𑀺 𑀫𑀜𑁆𑀜𑀫𑀸𑀦𑁄 𑀪𑀺𑀓𑁆𑀔𑀸𑀪𑀸𑀚𑀦𑀫𑁆𑀧𑀺 𑀦 𑀧𑀭𑀺𑀳𑀭𑀢𑀺, 𑀙𑀫𑀸𑀦𑀺𑀓𑀺𑀡𑁆𑀡𑀫𑁂𑀯 𑀔𑀸𑀤𑀢𑀺, 𑀅𑀬𑀁 𑀲𑀫𑀡𑁄 𑀦𑀸𑀫. 𑀫𑀬𑀁 𑀧𑀦 𑀓𑀺𑀁 𑀲𑀫𑀡𑀸’’𑀢𑀺? 𑀏𑀯𑀁 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑁆𑀲 𑀧𑀘𑁆𑀙𑀢𑁄 𑀘𑀭𑀦𑁆𑀢𑁄𑀯 𑀇𑀫𑀁 𑀧𑀸𑀧𑀓𑀁 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀲𑀺.

𑀏𑀢𑀤𑀯𑁄𑀘𑀸𑀢𑀺 ¶ 𑀪𑀕𑀯𑀸 𑀓𑀺𑀭 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀲𑀼𑀦𑀓𑁆𑀔𑀢𑁆𑀢𑁄 𑀧𑀸𑀧𑀚𑁆𑀛𑀸𑀲𑀬𑁄, 𑀓𑀺𑀁 𑀦𑀼 𑀇𑀫𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀻’’𑀢𑀺? 𑀅𑀣𑁂𑀯𑀁 𑀘𑀺𑀦𑁆𑀢𑁂𑀦𑁆𑀢𑁄 𑀢𑀲𑁆𑀲 𑀅𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 ‘‘𑀅𑀬𑀁 𑀫𑁄𑀖𑀧𑀼𑀭𑀺𑀲𑁄 𑀫𑀸𑀤𑀺𑀲𑀲𑁆𑀲 𑀲𑀩𑁆𑀩𑀜𑁆𑀜𑀼𑀦𑁄 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑁄 ¶ 𑀅𑀘𑁂𑀮𑀁 𑀅𑀭𑀳𑀸𑀢𑀺 𑀫𑀜𑁆𑀜𑀢𑀺, 𑀇𑀥𑁂𑀯 𑀤𑀸𑀦𑀸𑀬𑀁 𑀩𑀸𑀮𑁄 𑀦𑀺𑀕𑁆𑀕𑀳𑀁 𑀅𑀭𑀳𑀢𑀻’’𑀢𑀺 𑀅𑀦𑀺𑀯𑀢𑁆𑀢𑀺𑀢𑁆𑀯𑀸𑀯 𑀏𑀢𑀁 𑀢𑁆𑀯𑀫𑁆𑀧𑀺 𑀦𑀸𑀫𑀸𑀢𑀺𑀆𑀤𑀺𑀯𑀘𑀦𑀫𑀯𑁄𑀘. 𑀢𑀢𑁆𑀣 𑀢𑁆𑀯𑀫𑁆𑀧𑀺 𑀦𑀸𑀫𑀸𑀢𑀺 𑀕𑀭𑀳𑀢𑁆𑀣𑁂 𑀧𑀺𑀓𑀸𑀭𑁄. 𑀕𑀭𑀳𑀦𑁆𑀢𑁄 𑀳𑀺 𑀦𑀁 𑀪𑀕𑀯𑀸 ‘‘𑀢𑁆𑀯𑀫𑁆𑀧𑀺 𑀦𑀸𑀫𑀸’’𑀢𑀺 𑀆𑀳. ‘‘𑀢𑁆𑀯𑀫𑁆𑀧𑀺 𑀦𑀸𑀫 𑀏𑀯𑀁 𑀳𑀻𑀦𑀚𑁆𑀛𑀸𑀲𑀬𑁄, 𑀅𑀳𑀁 𑀲𑀫𑀡𑁄 𑀲𑀓𑁆𑀬𑀧𑀼𑀢𑁆𑀢𑀺𑀬𑁄𑀢𑀺 𑀏𑀯𑀁 𑀧𑀝𑀺𑀚𑀸𑀦𑀺𑀲𑁆𑀲𑀲𑀻’’𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀁 𑀧𑀦 𑀫𑀁, 𑀪𑀦𑁆𑀢𑁂𑀢𑀺 𑀫𑀬𑁆𑀳𑀁, 𑀪𑀦𑁆𑀢𑁂, 𑀓𑀺𑀁 𑀕𑀸𑀭𑀬𑁆𑀳𑀁 𑀤𑀺𑀲𑁆𑀯𑀸 𑀪𑀕𑀯𑀸 ‘‘𑀏𑀯𑀫𑀸𑀳𑀸’’𑀢𑀺 𑀧𑀼𑀘𑁆𑀙𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀆𑀘𑀺𑀓𑁆𑀔𑀦𑁆𑀢𑁄 ‘‘𑀦𑀦𑀼 𑀢𑁂’’𑀢𑀺𑀆𑀤𑀺𑀫𑀸𑀳. 𑀫𑀘𑁆𑀙𑀭𑀸𑀬𑀢𑀻𑀢𑀺 ‘‘𑀫𑀸 𑀅𑀜𑁆𑀜𑀲𑁆𑀲 ¶ 𑀅𑀭𑀳𑀢𑁆𑀢𑀁 𑀳𑁄𑀢𑀽’’𑀢𑀺 𑀓𑀺𑀁 𑀪𑀕𑀯𑀸 𑀏𑀯𑀁 𑀅𑀭𑀳𑀢𑁆𑀢𑀲𑁆𑀲 𑀫𑀘𑁆𑀙𑀭𑀸𑀬𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀦 𑀔𑁄 𑀅𑀳𑀦𑁆𑀢𑀺 𑀅𑀳𑀁, 𑀫𑁄𑀖𑀧𑀼𑀭𑀺𑀲, 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀭𑀳𑀢𑁆𑀢𑀧𑁆𑀧𑀝𑀺𑀮𑀸𑀪𑀫𑁂𑀯 𑀧𑀘𑁆𑀘𑀸𑀲𑀻𑀲𑀸𑀫𑀺, 𑀏𑀢𑀤𑀢𑁆𑀣𑀫𑁂𑀯 𑀫𑁂 𑀩𑀳𑀽𑀦𑀺 𑀤𑀼𑀓𑁆𑀓𑀭𑀸𑀦𑀺 𑀓𑀭𑁄𑀦𑁆𑀢𑁂𑀦 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸, 𑀦 𑀔𑁄 𑀅𑀳𑀁, 𑀫𑁄𑀖𑀧𑀼𑀭𑀺𑀲, 𑀅𑀭𑀳𑀢𑁆𑀢𑀲𑁆𑀲 𑀫𑀘𑁆𑀙𑀭𑀸𑀬𑀸𑀫𑀺. 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀦𑁆𑀢𑀺 𑀦 𑀅𑀭𑀳𑀦𑁆𑀢𑀁 𑀅𑀭𑀳𑀸𑀢𑀺, 𑀅𑀭𑀳𑀦𑁆𑀢𑁂 𑀘 𑀅𑀦𑀭𑀳𑀦𑁆𑀢𑁄𑀢𑀺 𑀏𑀯𑀁 𑀢𑀲𑁆𑀲 𑀤𑀺𑀝𑁆𑀞𑀺 𑀉𑀧𑁆𑀧𑀦𑁆𑀦𑀸. 𑀢𑀁 𑀲𑀦𑁆𑀥𑀸𑀬 ‘‘𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢’’𑀦𑁆𑀢𑀺 𑀆𑀳. 𑀬𑀁 𑀔𑁄 𑀧𑀦𑀸𑀢𑀺 𑀬𑀁 𑀏𑀢𑀁 𑀅𑀘𑁂𑀮𑀁 𑀏𑀯𑀁 𑀫𑀜𑁆𑀜𑀲𑀺. 𑀲𑀢𑁆𑀢𑀫𑀁 𑀤𑀺𑀯𑀲𑀦𑁆𑀢𑀺 𑀲𑀢𑁆𑀢𑀫𑁂 𑀤𑀺𑀯𑀲𑁂. 𑀅𑀮𑀲𑀓𑁂𑀦𑀸𑀢𑀺 𑀅𑀮𑀲𑀓𑀩𑁆𑀬𑀸𑀥𑀺𑀦𑀸. 𑀓𑀸𑀮𑀗𑁆𑀓𑀭𑀺𑀲𑁆𑀲𑀢𑀻𑀢𑀺 𑀉𑀤𑁆𑀥𑀼𑀫𑀸𑀢𑀉𑀤𑀭𑁄 𑀫𑀭𑀺𑀲𑁆𑀲𑀢𑀺.

𑀓𑀸𑀮𑀓𑀜𑁆𑀘𑀺𑀓𑀸𑀢𑀺 𑀢𑁂𑀲𑀁 𑀅𑀲𑀼𑀭𑀸𑀦𑀁 𑀦𑀸𑀫𑀁. 𑀢𑁂𑀲𑀁 𑀓𑀺𑀭 𑀢𑀺𑀕𑀸𑀯𑀼𑀢𑁄 𑀅𑀢𑁆𑀢𑀪𑀸𑀯𑁄 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑁄 𑀧𑀼𑀭𑀸𑀡𑀧𑀡𑁆𑀡𑀲𑀤𑀺𑀲𑁄 𑀓𑀓𑁆𑀓𑀝𑀓𑀸𑀦𑀁 𑀯𑀺𑀬 𑀅𑀓𑁆𑀔𑀻𑀦𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀢𑁆𑀣𑀓𑁂 𑀢𑀺𑀝𑁆𑀞𑀦𑁆𑀢𑀺, 𑀫𑀼𑀔𑀁 𑀲𑀽𑀘𑀺𑀧𑀸𑀲𑀓𑀲𑀤𑀺𑀲𑀁 𑀫𑀢𑁆𑀣𑀓𑀲𑁆𑀫𑀺𑀁𑀬𑁂𑀯 𑀳𑁄𑀢𑀺, 𑀢𑁂𑀦 𑀑𑀡𑀫𑀺𑀢𑁆𑀯𑀸 𑀕𑁄𑀘𑀭𑀁 𑀕𑀡𑁆𑀳𑀦𑁆𑀢𑀺. 𑀩𑀻𑀭𑀡𑀢𑁆𑀣𑀫𑁆𑀩𑀓𑁂𑀢𑀺 𑀩𑀻𑀭𑀡𑀢𑀺𑀡𑀢𑁆𑀣𑀫𑁆𑀩𑁄 𑀢𑀲𑁆𑀫𑀺𑀁 𑀲𑀼𑀲𑀸𑀦𑁂 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑀁 𑀩𑀻𑀭𑀡𑀢𑁆𑀣𑀫𑁆𑀩𑀓𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀪𑀕𑀯𑀢𑀺 𑀏𑀢𑁆𑀢𑀓𑀁 𑀯𑀢𑁆𑀯𑀸 𑀢𑀲𑁆𑀫𑀺𑀁 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀢𑁂 𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀉𑀧𑀲𑀗𑁆𑀓𑀫𑀺. 𑀬𑁂𑀦 𑀢𑁆𑀯𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀢𑁆𑀯𑀁. 𑀬𑀲𑁆𑀫𑀸𑀧𑀺 𑀪𑀕𑀯𑀢𑀸 𑀩𑁆𑀬𑀸𑀓𑀢𑁄, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀫𑀢𑁆𑀢𑀁 ¶ 𑀫𑀢𑁆𑀢𑀦𑁆𑀢𑀺 𑀧𑀫𑀸𑀡𑀬𑀼𑀢𑁆𑀢𑀁 𑀧𑀫𑀸𑀡𑀬𑀼𑀢𑁆𑀢𑀁. ‘‘𑀫𑀦𑁆𑀢𑀸 𑀫𑀦𑁆𑀢𑀸’’𑀢𑀺𑀧𑀺 𑀧𑀸𑀞𑁄, 𑀧𑀜𑁆𑀜𑀸𑀬 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲𑀸𑀢𑀺 𑀬𑀣𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀫𑀺𑀘𑁆𑀙𑀸 𑀯𑀘𑀦𑀁 𑀅𑀲𑁆𑀲, 𑀢𑀣𑀸 𑀓𑀭𑁂𑀬𑁆𑀬𑀸𑀲𑀻𑀢𑀺 𑀆𑀳. 𑀏𑀯𑀁 𑀯𑀼𑀢𑁆𑀢𑁂 𑀅𑀘𑁂𑀮𑁄 𑀲𑀼𑀦𑀔𑁄 𑀯𑀺𑀬 𑀉𑀤𑁆𑀥𑀦𑀝𑁆𑀞𑀸𑀦𑁂 𑀦𑀺𑀧𑀦𑁆𑀦𑁄 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀓𑀺𑀁 𑀓𑀣𑁂𑀲𑀺 ‘‘𑀲𑀫𑀡𑁄 𑀦𑀸𑀫 ¶ 𑀕𑁄𑀢𑀫𑁄 𑀅𑀫𑁆𑀳𑀸𑀓𑀁 𑀯𑁂𑀭𑀻 𑀯𑀺𑀲𑀪𑀸𑀕𑁄, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀉𑀧𑁆𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀬𑀁 𑀲𑀽𑀭𑀺𑀬𑁂 𑀉𑀕𑁆𑀕𑀢𑁂 𑀔𑀚𑁆𑀚𑁄𑀧𑀦𑀓𑀸 𑀯𑀺𑀬 𑀚𑀸𑀢𑀸. 𑀲𑀫𑀡𑁄 𑀕𑁄𑀢𑀫𑁄 𑀅𑀫𑁆𑀳𑁂, 𑀏𑀯𑀁 𑀯𑀸𑀘𑀁 𑀯𑀤𑁂𑀬𑁆𑀬 𑀅𑀜𑁆𑀜𑀣𑀸 𑀯𑀸. 𑀯𑁂𑀭𑀺𑀦𑁄 𑀧𑀦 𑀓𑀣𑀸 𑀦𑀸𑀫 𑀢𑀘𑁆𑀙𑀸 𑀦 𑀳𑁄𑀢𑀺, 𑀕𑀘𑁆𑀙 𑀢𑁆𑀯𑀁 𑀅𑀳𑀫𑁂𑀢𑁆𑀣 𑀓𑀢𑁆𑀢𑀩𑁆𑀩𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑀼𑀦𑀤𑁂𑀯 𑀦𑀺𑀧𑀚𑁆𑀚𑀺.

𑁮. 𑀏𑀓𑀤𑁆𑀯𑀻𑀳𑀺𑀓𑀸𑀬𑀸𑀢𑀺 𑀏𑀓𑀁 𑀤𑁆𑀯𑁂𑀢𑀺 𑀯𑀢𑁆𑀯𑀸 𑀕𑀡𑁂𑀲𑀺. 𑀬𑀣𑀸 𑀢𑀦𑁆𑀢𑀺 𑀬𑀣𑀸 𑀅𑀲𑀤𑁆𑀤𑀳𑀫𑀸𑀦𑁄 𑀓𑁄𑀘𑀺 𑀕𑀡𑁂𑀬𑁆𑀬, 𑀏𑀯𑀁 𑀕𑀡𑁂𑀲𑀺. 𑀏𑀓𑀤𑀺𑀯𑀲𑀜𑁆𑀘 𑀢𑀺𑀓𑁆𑀔𑀢𑁆𑀢𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀓𑁄 𑀤𑀺𑀯𑀲𑁄 𑀅𑀢𑀻𑀢𑁄, 𑀤𑁆𑀯𑁂 𑀤𑀺𑀯𑀲𑀸 𑀅𑀢𑀻𑀢𑀸𑀢𑀺 𑀆𑀭𑁄𑀘𑁂𑀲𑀺. 𑀲𑀢𑁆𑀢𑀫𑀁 𑀤𑀺𑀯𑀲𑀦𑁆𑀢𑀺 𑀲𑁄 𑀓𑀺𑀭 𑀲𑀼𑀦𑀓𑁆𑀔𑀢𑁆𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀲𑀢𑁆𑀢𑀸𑀳𑀁 𑀦𑀺𑀭𑀸𑀳𑀸𑀭𑁄𑀯 𑀅𑀳𑁄𑀲𑀺. 𑀅𑀣𑀲𑁆𑀲 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀏𑀓𑁄 𑀉𑀧𑀝𑁆𑀞𑀸𑀓𑁄 ‘‘𑀅𑀫𑁆𑀳𑀸𑀓𑀁 𑀓𑀼𑀮𑀽𑀧𑀓𑀲𑀫𑀡𑀲𑁆𑀲 𑀅𑀚𑁆𑀚 𑀲𑀢𑁆𑀢𑀫𑁄 𑀤𑀺𑀯𑀲𑁄 𑀕𑁂𑀳𑀁 𑀅𑀦𑀸𑀕𑀘𑁆𑀙𑀦𑁆𑀢𑀲𑁆𑀲 𑀅𑀨𑀸𑀲𑀼 𑀦𑀼 𑀔𑁄 𑀚𑀸𑀢’’𑀦𑁆𑀢𑀺 𑀲𑀽𑀓𑀭𑀫𑀁𑀲𑀁 𑀧𑀘𑀸𑀧𑁂𑀢𑁆𑀯𑀸 𑀪𑀢𑁆𑀢𑀫𑀸𑀤𑀸𑀬 𑀕𑀦𑁆𑀢𑁆𑀯𑀸 𑀧𑀼𑀭𑀢𑁄 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀧𑀺. 𑀅𑀘𑁂𑀮𑁄 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀓𑀣𑀸 ¶ 𑀢𑀘𑁆𑀙𑀸 𑀯𑀸 𑀅𑀢𑀘𑁆𑀙𑀸 𑀯𑀸 𑀳𑁄𑀢𑀼, 𑀆𑀳𑀸𑀭𑀁 𑀧𑀦 𑀔𑀸𑀤𑀺𑀢𑁆𑀯𑀸 𑀲𑀼𑀳𑀺𑀢𑀲𑁆𑀲 𑀫𑁂 𑀫𑀭𑀡𑀫𑁆𑀧𑀺 𑀲𑀼𑀫𑀭𑀡’’𑀦𑁆𑀢𑀺 𑀤𑁆𑀯𑁂 𑀳𑀢𑁆𑀣𑁂 𑀚𑀡𑁆𑀡𑀼𑀓𑀸𑀦𑀺 𑀘 𑀪𑀽𑀫𑀺𑀬𑀁 𑀞𑀧𑁂𑀢𑁆𑀯𑀸 𑀓𑀼𑀘𑁆𑀙𑀺𑀧𑀽𑀭𑀁 𑀪𑀼𑀜𑁆𑀚𑀺. 𑀲𑁄 𑀭𑀢𑁆𑀢𑀺𑀪𑀸𑀕𑁂 𑀚𑀻𑀭𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀮𑀲𑀓𑁂𑀦 𑀓𑀸𑀮𑀫𑀓𑀸𑀲𑀺. 𑀲𑀘𑁂𑀧𑀺 𑀳𑀺 𑀲𑁄 ‘‘𑀦 𑀪𑀼𑀜𑁆𑀚𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀬𑁆𑀬, 𑀢𑀣𑀸𑀧𑀺 𑀢𑀁 𑀤𑀺𑀯𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀮𑀲𑀓𑁂𑀦 𑀓𑀸𑀮𑀁 𑀓𑀭𑁂𑀬𑁆𑀬. 𑀅𑀤𑁆𑀯𑁂𑀚𑁆𑀛𑀯𑀘𑀦𑀸 𑀳𑀺 𑀢𑀣𑀸𑀕𑀢𑀸𑀢𑀺.

𑀩𑀻𑀭𑀡𑀢𑁆𑀣𑀫𑁆𑀩𑀓𑁂𑀢𑀺 𑀢𑀺𑀢𑁆𑀣𑀺𑀬𑀸 𑀓𑀺𑀭 ‘‘𑀓𑀸𑀮𑀗𑁆𑀓𑀢𑁄 𑀓𑁄𑀭𑀓𑁆𑀔𑀢𑁆𑀢𑀺𑀬𑁄’’𑀢𑀺 𑀲𑀼𑀢𑁆𑀯𑀸 𑀤𑀺𑀯𑀲𑀸𑀦𑀺 𑀕𑀡𑁂𑀢𑁆𑀯𑀸 𑀇𑀤𑀁 𑀢𑀸𑀯 𑀲𑀘𑁆𑀘𑀁 𑀚𑀸𑀢𑀁, 𑀇𑀤𑀸𑀦𑀺 𑀦𑀁 𑀅𑀜𑁆𑀜𑀢𑁆𑀣 𑀙𑀟𑁆𑀟𑁂𑀢𑁆𑀯𑀸 ‘‘𑀫𑀼𑀲𑀸𑀯𑀸𑀤𑁂𑀦 𑀲𑀫𑀡𑀁 𑀕𑁄𑀢𑀫𑀁 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀲𑀭𑀻𑀭𑀁 𑀯𑀮𑁆𑀮𑀺𑀬𑀸 𑀩𑀦𑁆𑀥𑀺𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑀸 ‘‘𑀏𑀢𑁆𑀣 𑀙𑀟𑁆𑀟𑁂𑀲𑁆𑀲𑀸𑀫, 𑀏𑀢𑁆𑀣 𑀙𑀟𑁆𑀟𑁂𑀲𑁆𑀲𑀸𑀫𑀸’’𑀢𑀺 𑀕𑀘𑁆𑀙𑀦𑁆𑀢𑀺. 𑀕𑀢𑀕𑀢𑀝𑁆𑀞𑀸𑀦𑀁 𑀅𑀗𑁆𑀕𑀡𑀫𑁂𑀯 𑀳𑁄𑀢𑀺. 𑀢𑁂 𑀓𑀟𑁆𑀠𑀫𑀸𑀦𑀸 𑀩𑀻𑀭𑀡𑀢𑁆𑀣𑀫𑁆𑀩𑀓𑀲𑀼𑀲𑀸𑀦𑀁𑀬𑁂𑀯 𑀕𑀦𑁆𑀢𑁆𑀯𑀸 𑀲𑀼𑀲𑀸𑀦𑀪𑀸𑀯𑀁 𑀜𑀢𑁆𑀯𑀸 ‘‘𑀅𑀜𑁆𑀜𑀢𑁆𑀣 𑀙𑀟𑁆𑀟𑁂𑀲𑁆𑀲𑀸𑀫𑀸’’𑀢𑀺 𑀆𑀓𑀟𑁆𑀠𑀺𑀁𑀲𑀼. 𑀅𑀣 ¶ 𑀦𑁂𑀲𑀁 𑀯𑀮𑁆𑀮𑀺 𑀙𑀺𑀚𑁆𑀚𑀺𑀢𑁆𑀣, 𑀧𑀘𑁆𑀙𑀸 𑀘𑀸𑀮𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀢𑁂 𑀢𑀢𑁄𑀯 𑀧𑀓𑁆𑀓𑀦𑁆𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀩𑀻𑀭𑀡𑀢𑁆𑀣𑀫𑁆𑀩𑀓𑁂 𑀲𑀼𑀲𑀸𑀦𑁂 𑀙𑀟𑁆𑀟𑁂𑀲𑀼’’𑀦𑁆𑀢𑀺.

𑁯. 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀓𑀲𑁆𑀫𑀸 𑀉𑀧𑀲𑀗𑁆𑀓𑀫𑀺? 𑀲𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 ‘‘𑀅𑀯𑀲𑁂𑀲𑀁 𑀢𑀸𑀯 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀘𑀦𑀁 𑀲𑀫𑁂𑀢𑀺, 𑀫𑀢𑀲𑁆𑀲 𑀧𑀦 𑀉𑀝𑁆𑀞𑀸𑀬 𑀅𑀜𑁆𑀜𑁂𑀦 𑀲𑀤𑁆𑀥𑀺𑀁 𑀓𑀣𑀦𑀁 𑀦𑀸𑀫 𑀦𑀢𑁆𑀣𑀺, 𑀳𑀦𑁆𑀤𑀸𑀳𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀸𑀫𑀺. 𑀲𑀘𑁂 𑀓𑀣𑁂𑀢𑀺, 𑀲𑀼𑀦𑁆𑀤𑀭𑀁. 𑀦𑁄 ¶ 𑀘𑁂 𑀓𑀣𑁂𑀢𑀺, 𑀲𑀫𑀡𑀁 𑀕𑁄𑀢𑀫𑀁 𑀫𑀼𑀲𑀸𑀯𑀸𑀤𑁂𑀦 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀉𑀧𑀲𑀗𑁆𑀓𑀫𑀺. 𑀆𑀓𑁄𑀝𑁂𑀲𑀻𑀢𑀺 𑀧𑀳𑀭𑀺. 𑀚𑀸𑀦𑀸𑀫𑀺 𑀆𑀯𑀼𑀲𑁄𑀢𑀺 𑀫𑀢𑀲𑀭𑀻𑀭𑀁 𑀉𑀝𑁆𑀞𑀳𑀺𑀢𑁆𑀯𑀸 𑀓𑀣𑁂𑀢𑀼𑀁 𑀲𑀫𑀢𑁆𑀣𑀁 𑀦𑀸𑀫 𑀦𑀢𑁆𑀣𑀺, 𑀇𑀤𑀁 𑀓𑀣𑀁 𑀓𑀣𑁂𑀲𑀻𑀢𑀺? 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦. 𑀪𑀕𑀯𑀸 𑀓𑀺𑀭 𑀓𑁄𑀭𑀓𑁆𑀔𑀢𑁆𑀢𑀺𑀬𑀁 𑀅𑀲𑀼𑀭𑀬𑁄𑀦𑀺𑀢𑁄 𑀆𑀦𑁂𑀢𑁆𑀯𑀸 𑀲𑀭𑀻𑀭𑁂 𑀅𑀥𑀺𑀫𑁄𑀘𑁂𑀢𑁆𑀯𑀸 𑀓𑀣𑀸𑀧𑁂𑀲𑀺. 𑀢𑀫𑁂𑀯 𑀯𑀸 𑀲𑀭𑀻𑀭𑀁 𑀓𑀣𑀸𑀧𑁂𑀲𑀺, 𑀅𑀘𑀺𑀦𑁆𑀢𑁂𑀬𑁆𑀬𑁄 𑀳𑀺 𑀩𑀼𑀤𑁆𑀥𑀯𑀺𑀲𑀬𑁄.

𑁧𑁦. 𑀢𑀣𑁂𑀯 𑀢𑀁 𑀯𑀺𑀧𑀸𑀓𑀦𑁆𑀢𑀺 𑀢𑀲𑁆𑀲 𑀯𑀘𑀦𑀲𑁆𑀲 𑀯𑀺𑀧𑀸𑀓𑀁 𑀢𑀣𑁂𑀯, 𑀉𑀤𑀸𑀳𑀼 𑀦𑁄𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄 𑀓𑀢𑁄, 𑀢𑀣𑁂𑀯 𑀲𑁄 𑀯𑀺𑀧𑀸𑀓𑁄𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀧𑀦 ‘‘𑀯𑀺𑀧𑀓𑁆𑀓’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀏𑀢𑁆𑀣 𑀞𑀢𑁆𑀯𑀸 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀲𑀫𑀸𑀦𑁂𑀢𑀩𑁆𑀩𑀸𑀦𑀺. 𑀲𑀩𑁆𑀩𑀸𑀦𑁂𑀯 𑀳𑁂𑀢𑀸𑀦𑀺 𑀧𑀜𑁆𑀘 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀳𑁄𑀦𑁆𑀢𑀺. ‘‘𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀭𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁, 𑀲𑁄 𑀢𑀣𑁂𑀯 𑀫𑀢𑁄, 𑀇𑀤𑀁 𑀧𑀞𑀫𑀁 𑀧𑀸𑀝𑀺𑀳𑀸𑀭𑀺𑀬𑀁. ‘‘𑀅𑀮𑀲𑀓𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀅𑀮𑀲𑀓𑁂𑀦𑁂𑀯 𑀫𑀢𑁄, 𑀇𑀤𑀁 𑀤𑀼𑀢𑀺𑀬𑀁. ‘‘𑀓𑀸𑀮𑀓𑀜𑁆𑀘𑀺𑀓𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣𑁂𑀯 𑀦𑀺𑀩𑁆𑀩𑀢𑁆𑀢𑁄, 𑀇𑀤𑀁 𑀢𑀢𑀺𑀬𑀁. ‘‘𑀩𑀻𑀭𑀡𑀢𑁆𑀣𑀫𑁆𑀩𑀓𑁂 𑀲𑀼𑀲𑀸𑀦𑁂 𑀙𑀟𑁆𑀟𑁂𑀲𑁆𑀲𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣𑁂𑀯 𑀙𑀟𑁆𑀟𑀺𑀢𑁄 ¶ , 𑀇𑀤𑀁 𑀘𑀢𑀼𑀢𑁆𑀣𑀁. ‘‘𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀢𑁄 𑀆𑀕𑀦𑁆𑀢𑁆𑀯𑀸 𑀲𑀼𑀦𑀓𑁆𑀔𑀢𑁆𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁄, 𑀲𑁄 𑀓𑀣𑁂𑀲𑀺𑀬𑁂𑀯, 𑀇𑀤𑀁 𑀧𑀜𑁆𑀘𑀫𑀁 𑀧𑀸𑀝𑀺𑀳𑀸𑀭𑀺𑀬𑀁.

𑀅𑀘𑁂𑀮𑀓𑀴𑀸𑀭𑀫𑀝𑁆𑀝𑀓𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁧. 𑀓𑀴𑀸𑀭𑀫𑀝𑁆𑀝𑀓𑁄𑀢𑀺 𑀦𑀺𑀓𑁆𑀔𑀦𑁆𑀢𑀤𑀦𑁆𑀢𑀫𑀢𑁆𑀢𑀓𑁄. 𑀦𑀸𑀫𑀫𑁂𑀯 𑀯𑀸 𑀢𑀲𑁆𑀲𑁂𑀢𑀁. 𑀮𑀸𑀪𑀕𑁆𑀕𑀧𑁆𑀧𑀢𑁆𑀢𑁄𑀢𑀺 𑀮𑀸𑀪𑀕𑁆𑀕𑀁 𑀧𑀢𑁆𑀢𑁄, 𑀅𑀕𑁆𑀕𑀮𑀸𑀪𑀁 𑀧𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀲𑀕𑁆𑀕𑀧𑁆𑀧𑀢𑁆𑀢𑁄𑀢𑀺 𑀬𑀲𑀕𑁆𑀕𑀁 𑀅𑀕𑁆𑀕𑀧𑀭𑀺𑀯𑀸𑀭𑀁 𑀧𑀢𑁆𑀢𑁄. 𑀯𑀢𑀧𑀤𑀸𑀦𑀻𑀢𑀺 𑀯𑀢𑀸𑀦𑀺𑀬𑁂𑀯, 𑀯𑀢𑀓𑁄𑀝𑁆𑀞𑀸𑀲𑀸 𑀯𑀸. 𑀲𑀫𑀢𑁆𑀢𑀸𑀦𑀻𑀢𑀺 𑀕𑀳𑀺𑀢𑀸𑀦𑀺. 𑀲𑀫𑀸𑀤𑀺𑀦𑁆𑀦𑀸𑀦𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀼𑀭𑀢𑁆𑀣𑀺𑀫𑁂𑀦 𑀯𑁂𑀲𑀸𑀮𑀺𑀦𑁆𑀢𑀺 𑀯𑁂𑀲𑀸𑀮𑀺𑀢𑁄 𑀅𑀯𑀺𑀤𑀽𑀭𑁂 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬. 𑀘𑁂𑀢𑀺𑀬𑀦𑁆𑀢𑀺 ¶ 𑀬𑀓𑁆𑀔𑀘𑁂𑀢𑀺𑀬𑀝𑁆𑀞𑀸𑀦𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑁧𑁨. 𑀬𑁂𑀦 𑀅𑀘𑁂𑀮𑀓𑁄𑀢𑀺 𑀪𑀕𑀯𑀢𑁄 𑀯𑀢𑁆𑀢𑀁 𑀓𑀢𑁆𑀯𑀸 𑀬𑁂𑀦 𑀅𑀘𑁂𑀮𑁄 𑀓𑀴𑀸𑀭𑀫𑀝𑁆𑀝𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀧𑀜𑁆𑀳𑀁 𑀅𑀧𑀼𑀘𑁆𑀙𑀻𑀢𑀺 𑀕𑀫𑁆𑀪𑀻𑀭𑀁 𑀢𑀺𑀮𑀓𑁆𑀔𑀡𑀸𑀳𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀦 𑀲𑀫𑁆𑀧𑀸𑀬𑀸𑀲𑀻𑀢𑀺 𑀦 𑀲𑀫𑁆𑀫𑀸 𑀜𑀸𑀡𑀕𑀢𑀺𑀬𑀸 𑀧𑀸𑀬𑀸𑀲𑀺, 𑀅𑀦𑁆𑀥𑁄 𑀯𑀺𑀬 𑀯𑀺𑀲𑀫𑀝𑁆𑀞𑀸𑀦𑁂 𑀢𑀢𑁆𑀣 𑀢𑀢𑁆𑀣𑁂𑀯 𑀧𑀓𑁆𑀔𑀮𑀺. 𑀦𑁂𑀯 𑀆𑀤𑀺𑀁, 𑀦 𑀧𑀭𑀺𑀬𑁄𑀲𑀸𑀦𑀫𑀤𑁆𑀤𑀲. 𑀅𑀣 ¶ 𑀯𑀸 ‘‘𑀦 𑀲𑀫𑁆𑀧𑀸𑀬𑀸𑀲𑀻’’𑀢𑀺 𑀦 𑀲𑀫𑁆𑀧𑀸𑀤𑁂𑀲𑀺, 𑀲𑀫𑁆𑀧𑀸𑀤𑁂𑀢𑁆𑀯𑀸 𑀓𑀣𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀲𑀫𑁆𑀧𑀸𑀬𑀦𑁆𑀢𑁄𑀢𑀺 𑀓𑀩𑀭𑀓𑁆𑀔𑀻𑀦𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 ‘‘𑀅𑀲𑀺𑀓𑁆𑀔𑀺𑀢𑀓𑀲𑁆𑀲 𑀲𑀦𑁆𑀢𑀺𑀓𑁂 𑀯𑀼𑀝𑁆𑀞𑁄𑀲𑀺, 𑀅𑀦𑁄𑀓𑀸𑀲𑁂𑀧𑀺 𑀧𑀩𑁆𑀩𑀚𑀺𑀢𑁄 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 𑀯𑀺𑀘𑀭𑀲𑀺, 𑀅𑀧𑁂𑀳𑀺 𑀫𑀸 𑀏𑀢𑀲𑁆𑀫𑀺𑀁 𑀞𑀸𑀦𑁂 𑀅𑀝𑁆𑀞𑀸𑀲𑀻’’𑀢𑀺 𑀯𑀤𑀦𑁆𑀢𑁄. 𑀓𑁄𑀧𑀜𑁆𑀘 𑀤𑁄𑀲𑀜𑁆𑀘 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀢𑁆𑀯𑀸𑀓𑀸𑀲𑀻𑀢𑀺 𑀓𑀼𑀧𑁆𑀧𑀦𑀸𑀓𑀸𑀭𑀁 𑀓𑁄𑀧𑀁, 𑀤𑀼𑀲𑁆𑀲𑀦𑀸𑀓𑀸𑀭𑀁 𑀤𑁄𑀲𑀁, 𑀅𑀢𑀼𑀝𑁆𑀞𑀸𑀓𑀸𑀭𑀪𑀽𑀢𑀁 𑀤𑁄𑀫𑀦𑀲𑁆𑀲𑀲𑀗𑁆𑀔𑀸𑀢𑀁 𑀅𑀧𑁆𑀧𑀘𑁆𑀘𑀬𑀜𑁆𑀘 𑀧𑀸𑀓𑀝𑀫𑀓𑀸𑀲𑀺. 𑀆𑀲𑀸𑀤𑀺𑀫𑁆𑀳𑀲𑁂𑀢𑀺 𑀆𑀲𑀸𑀤𑀺𑀬𑀺𑀫𑁆𑀳 𑀖𑀝𑁆𑀝𑀬𑀺𑀫𑁆𑀳. 𑀫𑀸 𑀯𑀢 𑀦𑁄 𑀅𑀳𑁄𑀲𑀻𑀢𑀺 𑀅𑀳𑁄 𑀯𑀢 𑀫𑁂 𑀦 𑀪𑀯𑁂𑀬𑁆𑀬. 𑀫𑀁 𑀯𑀢 𑀦𑁄 𑀅𑀳𑁄𑀲𑀻𑀢𑀺𑀧𑀺 𑀧𑀸𑀞𑁄. 𑀢𑀢𑁆𑀣 𑀫𑀦𑁆𑀢𑀺 𑀲𑀸𑀫𑀺𑀯𑀘𑀦𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀅𑀳𑁄𑀲𑀺 𑀯𑀢 𑀦𑀼 𑀫𑀫𑀸𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀘 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀔𑀫𑀣 𑀫𑁂, 𑀪𑀦𑁆𑀢𑁂’’𑀢𑀺 𑀢𑀁 𑀔𑀫𑀸𑀧𑁂𑀲𑀺. 𑀲𑁄𑀧𑀺 𑀇𑀢𑁄 𑀧𑀝𑁆𑀞𑀸𑀬 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀧𑀜𑁆𑀳𑀁 𑀦𑀸𑀫 𑀦 𑀧𑀼𑀘𑁆𑀙𑀺𑀲𑁆𑀲𑀲𑀻𑀢𑀺. 𑀆𑀫 𑀦 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺. 𑀬𑀤𑀺 𑀏𑀯𑀁 𑀕𑀘𑁆𑀙, 𑀔𑀫𑀸𑀫𑀺 𑀢𑁂𑀢𑀺 𑀢𑀁 𑀉𑀬𑁆𑀬𑁄𑀚𑁂𑀲𑀺.

𑁧𑁪. 𑀧𑀭𑀺𑀳𑀺𑀢𑁄𑀢𑀺 𑀧𑀭𑀺𑀤𑀳𑀺𑀢𑁄 𑀦𑀺𑀯𑀢𑁆𑀣𑀯𑀢𑁆𑀣𑁄. 𑀲𑀸𑀦𑀼𑀘𑀸𑀭𑀺𑀓𑁄𑀢𑀺 𑀅𑀦𑀼𑀘𑀸𑀭𑀺𑀓𑀸 𑀯𑀼𑀘𑁆𑀘𑀢𑀺 𑀪𑀭𑀺𑀬𑀸, 𑀲𑀳 𑀅𑀦𑀼𑀘𑀸𑀭𑀺𑀓𑀸𑀬 𑀲𑀸𑀦𑀼𑀘𑀸𑀭𑀺𑀓𑁄, 𑀢𑀁 𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀳𑀸𑀬 𑀲𑀪𑀭𑀺𑀬𑁄𑀢𑀺 𑀅𑀢𑁆𑀣𑁄. 𑀑𑀤𑀦𑀓𑀼𑀫𑁆𑀫𑀸𑀲𑀦𑁆𑀢𑀺 𑀲𑀼𑀭𑀸𑀫𑀁𑀲𑀢𑁄 𑀅𑀢𑀺𑀭𑁂𑀓𑀁 𑀑𑀤𑀦𑀫𑁆𑀧𑀺 𑀓𑀼𑀫𑁆𑀫𑀸𑀲𑀫𑁆𑀧𑀺 𑀪𑀼𑀜𑁆𑀚𑀫𑀸𑀦𑁄. 𑀬𑀲𑀸 𑀦𑀺𑀳𑀻𑀦𑁄𑀢𑀺 𑀬𑀁 𑀮𑀸𑀪𑀕𑁆𑀕𑀬𑀲𑀕𑁆𑀕𑀁 𑀧𑀢𑁆𑀢𑁄, 𑀢𑀢𑁄 𑀧𑀭𑀺𑀳𑀻𑀦𑁄 𑀳𑀼𑀢𑁆𑀯𑀸. ‘‘𑀓𑀢𑀁 𑀳𑁄𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀇𑀥 𑀲𑀢𑁆𑀢𑀯𑀢𑀧𑀤𑀸𑀢𑀺𑀓𑁆𑀓𑀫𑀯𑀲𑁂𑀦 𑀲𑀢𑁆𑀢 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀅𑀘𑁂𑀮𑀧𑀸𑀣𑀺𑀓𑀧𑀼𑀢𑁆𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁫. 𑀧𑀸𑀣𑀺𑀓𑀧𑀼𑀢𑁆𑀢𑁄𑀢𑀺 ¶ 𑀧𑀸𑀣𑀺𑀓𑀲𑁆𑀲 𑀧𑀼𑀢𑁆𑀢𑁄. 𑀜𑀸𑀡𑀯𑀸𑀤𑁂𑀦𑀸𑀢𑀺 𑀜𑀸𑀡𑀯𑀸𑀤𑁂𑀦 𑀲𑀤𑁆𑀥𑀺𑀁. 𑀉𑀧𑀟𑁆𑀠𑀧𑀣𑀦𑁆𑀢𑀺 ¶ 𑀬𑁄𑀚𑀦𑀁 𑀘𑁂, 𑀦𑁄 𑀅𑀦𑁆𑀢𑀭𑁂 𑀪𑀯𑁂𑀬𑁆𑀬, 𑀕𑁄𑀢𑀫𑁄 𑀅𑀟𑁆𑀠𑀬𑁄𑀚𑀦𑀁, 𑀅𑀳𑀁 𑀅𑀟𑁆𑀠𑀬𑁄𑀚𑀦𑀁. 𑀏𑀲 𑀦𑀬𑁄 𑀅𑀟𑁆𑀠𑀬𑁄𑀚𑀦𑀸𑀤𑀻𑀲𑀼. 𑀏𑀓𑀧𑀤𑀯𑀸𑀭𑀫𑁆𑀧𑀺 𑀅𑀢𑀺𑀓𑁆𑀓𑀫𑁆𑀫 𑀕𑀘𑁆𑀙𑀢𑁄 𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀅𑀦𑀸𑀕𑀘𑁆𑀙𑀢𑁄 𑀧𑀭𑀸𑀚𑀬𑁄𑀢𑀺. 𑀢𑁂 𑀢𑀢𑁆𑀣𑀸𑀢𑀺 𑀢𑁂 𑀫𑀬𑀁 𑀢𑀢𑁆𑀣 𑀲𑀫𑀸𑀕𑀢𑀝𑁆𑀞𑀸𑀦𑁂. 𑀢𑀤𑁆𑀤𑀺𑀕𑀼𑀡𑀁 𑀢𑀤𑁆𑀤𑀺𑀕𑀼𑀡𑀸𑀳𑀦𑁆𑀢𑀺 𑀢𑀢𑁄 𑀢𑀢𑁄 𑀤𑀺𑀕𑀼𑀡𑀁 𑀤𑀺𑀕𑀼𑀡𑀁 𑀅𑀳𑀁 𑀓𑀭𑀺𑀲𑁆𑀲𑀸𑀫𑀺, 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑀁 𑀚𑀸𑀦𑀦𑁆𑀢𑁄𑀧𑀺 ‘‘𑀉𑀢𑁆𑀢𑀫𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀲𑀓𑁆𑀓𑀼𑀡𑀦𑁆𑀢𑀲𑁆𑀲𑀸𑀧𑀺 𑀧𑀸𑀲𑀁𑀲𑁄 𑀳𑁄𑀢𑀻’’𑀢𑀺 𑀜𑀢𑁆𑀯𑀸 𑀏𑀯𑀫𑀸𑀳. 𑀦𑀕𑀭𑀯𑀸𑀲𑀺𑀦𑁄𑀧𑀺 ¶ 𑀢𑀁 𑀲𑀼𑀢𑁆𑀯𑀸 ‘‘𑀅𑀲𑀫𑀢𑁆𑀣𑁄 𑀦𑀸𑀫 𑀏𑀯𑀁 𑀦 𑀕𑀚𑁆𑀚𑀢𑀺, 𑀅𑀤𑁆𑀥𑀸 𑀅𑀬𑀫𑁆𑀧𑀺 𑀅𑀭𑀳𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀲𑁆𑀲 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀫𑀓𑀁𑀲𑀼.

𑁧𑁬. 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 ‘‘𑀲𑀼𑀦𑀓𑁆𑀔𑀢𑁆𑀢𑁄 𑀓𑀺𑀭 𑀧𑀸𑀣𑀺𑀓𑀧𑀼𑀢𑁆𑀢𑁄 𑀏𑀯𑀁 𑀯𑀤𑀢𑀻’’𑀢𑀺 𑀅𑀲𑁆𑀲𑁄𑀲𑀺. 𑀅𑀣𑀲𑁆𑀲 𑀳𑀻𑀦𑀚𑁆𑀛𑀸𑀲𑀬𑀢𑁆𑀢𑀸 𑀳𑀻𑀦𑀤𑀲𑁆𑀲𑀦𑀸𑀬 𑀘𑀺𑀢𑁆𑀢𑀁 𑀉𑀤𑀧𑀸𑀤𑀺.

𑀲𑁄 𑀪𑀕𑀯𑀢𑁄 𑀯𑀢𑁆𑀢𑀁 𑀓𑀢𑁆𑀯𑀸 𑀪𑀕𑀯𑀢𑀺 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀝𑁆𑀞𑁂 𑀧𑀸𑀣𑀺𑀓𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺 ‘‘𑀢𑀼𑀫𑁆𑀳𑁂 𑀓𑀺𑀭 𑀏𑀯𑀭𑀽𑀧𑀺𑀁 𑀓𑀣𑀁 𑀓𑀣𑁂𑀣𑀸’’𑀢𑀺? ‘‘𑀆𑀫, 𑀓𑀣𑁂𑀫𑀸’’𑀢𑀺. 𑀬𑀤𑀺 𑀏𑀯𑀁 ‘‘𑀫𑀸 𑀪𑀸𑀬𑀺𑀢𑁆𑀣 𑀯𑀺𑀲𑁆𑀲𑀢𑁆𑀣𑀸 𑀧𑀼𑀦𑀧𑁆𑀧𑀼𑀦𑀁 𑀏𑀯𑀁 𑀯𑀤𑀣, 𑀅𑀳𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀉𑀧𑀝𑁆𑀞𑀸𑀓𑁄, 𑀢𑀲𑁆𑀲 𑀯𑀺𑀲𑀬𑀁 𑀯𑀺𑀚𑀸𑀦𑀸𑀫𑀺, 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀅𑀳𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀓𑀣𑁂𑀢𑁆𑀯𑀸 𑀪𑀬𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀅𑀜𑁆𑀜𑀢𑁄 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀫𑀸 𑀪𑀸𑀬𑀺𑀢𑁆𑀣𑀸’’𑀢𑀺 𑀢𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀻’’𑀢𑀺. 𑀢𑀁 𑀯𑀸𑀘𑀦𑁆𑀢𑀺𑀆𑀤𑀻𑀲𑀼 ‘‘𑀅𑀳𑀁 𑀅𑀩𑀼𑀤𑁆𑀥𑁄𑀯 𑀲𑀫𑀸𑀦𑁄 𑀩𑀼𑀤𑁆𑀥𑁄𑀫𑁆𑀳𑀻𑀢𑀺 𑀯𑀺𑀘𑀭𑀺𑀁, 𑀅𑀪𑀽𑀢𑀁 𑀫𑁂 𑀓𑀣𑀺𑀢𑀁 𑀦𑀸𑀳𑀁 𑀩𑀼𑀤𑁆𑀥𑁄’’𑀢𑀺 𑀯𑀤𑀦𑁆𑀢𑁄 𑀢𑀁 𑀯𑀸𑀘𑀁 𑀧𑀚𑀳𑀢𑀺 𑀦𑀸𑀫. 𑀭𑀳𑁄 𑀦𑀺𑀲𑀻𑀤𑀺𑀢𑁆𑀯𑀸 𑀘𑀺𑀦𑁆𑀢𑀬𑀫𑀸𑀦𑁄 ‘‘𑀅𑀳𑀁 ‘𑀏𑀢𑁆𑀢𑀓𑀁 𑀓𑀸𑀮𑀁 𑀅𑀩𑀼𑀤𑁆𑀥𑁄𑀯 𑀲𑀫𑀸𑀦𑁄 𑀩𑀼𑀤𑁆𑀥𑁄𑀫𑁆𑀳𑀻’𑀢𑀺 𑀯𑀺𑀘𑀭𑀺𑀁, 𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀦𑀸𑀳𑀁 𑀩𑀼𑀤𑁆𑀥𑁄’’𑀢𑀺 𑀘𑀺𑀦𑁆𑀢𑀬𑀦𑁆𑀢𑁄 𑀢𑀁 𑀘𑀺𑀢𑁆𑀢𑀁 𑀧𑀚𑀳𑀢𑀺 𑀦𑀸𑀫. ‘‘𑀅𑀳𑀁 ‘𑀏𑀢𑁆𑀢𑀓𑀁 𑀓𑀸𑀮𑀁 𑀅𑀩𑀼𑀤𑁆𑀥𑁄𑀯 𑀲𑀫𑀸𑀦𑁄 𑀩𑀼𑀤𑁆𑀥𑁄𑀫𑁆𑀳𑀻’𑀢𑀺 𑀧𑀸𑀧𑀓𑀁 𑀤𑀺𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀺𑀁, 𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀇𑀫𑀁 𑀤𑀺𑀝𑁆𑀞𑀺𑀁 𑀧𑀚𑀳𑀸𑀫𑀻’’𑀢𑀺 𑀧𑀚𑀳𑀦𑁆𑀢𑁄 𑀢𑀁 𑀤𑀺𑀝𑁆𑀞𑀺𑀁 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺 𑀦𑀸𑀫. 𑀏𑀯𑀁 𑀅𑀓𑀭𑁄𑀦𑁆𑀢𑁄 𑀧𑀦 𑀢𑀁 𑀯𑀸𑀘𑀁 𑀅𑀧𑁆𑀧𑀳𑀸𑀬 𑀢𑀁 𑀘𑀺𑀢𑁆𑀢𑀁 𑀅𑀧𑁆𑀧𑀳𑀸𑀬 𑀢𑀁 𑀤𑀺𑀝𑁆𑀞𑀺𑀁 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀧𑀢𑁂𑀬𑁆𑀬𑀸𑀢𑀺 𑀩𑀦𑁆𑀥𑀦𑀸 𑀫𑀼𑀢𑁆𑀢𑀢𑀸𑀮𑀧𑀓𑁆𑀓𑀁 𑀯𑀺𑀬 𑀕𑀻𑀯𑀢𑁄 𑀧𑀢𑁂𑀬𑁆𑀬, 𑀲𑀢𑁆𑀢𑀥𑀸 𑀯𑀸 𑀧𑀦 𑀨𑀮𑁂𑀬𑁆𑀬.

𑁧𑁭. 𑀭𑀓𑁆𑀔𑀢𑁂𑀢𑀦𑁆𑀢𑀺 ¶ 𑀭𑀓𑁆𑀔𑀢𑀼 𑀏𑀢𑀁. 𑀏𑀓𑀁𑀲𑁂𑀦𑀸𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦. 𑀑𑀥𑀸𑀭𑀺𑀢𑀸𑀢𑀺 𑀪𑀸𑀲𑀺𑀢𑀸. 𑀅𑀘𑁂𑀮𑁄 ¶ 𑀘, 𑀪𑀦𑁆𑀢𑁂, 𑀧𑀸𑀣𑀺𑀓𑀧𑀼𑀢𑁆𑀢𑁄𑀢𑀺 𑀏𑀯𑀁 𑀏𑀓𑀁𑀲𑁂𑀦 𑀪𑀕𑀯𑀢𑁄 𑀯𑀸𑀘𑀸𑀬 𑀑𑀥𑀸𑀭𑀺𑀢𑀸𑀬 𑀲𑀘𑁂 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄. 𑀯𑀺𑀭𑀽𑀧𑀭𑀽𑀧𑁂𑀦𑀸𑀢𑀺 𑀯𑀺𑀕𑀢𑀭𑀽𑀧𑁂𑀦 𑀯𑀺𑀕𑀘𑁆𑀙𑀺𑀢𑀲𑀪𑀸𑀯𑁂𑀦 𑀭𑀽𑀧𑁂𑀦 𑀅𑀢𑁆𑀢𑀦𑁄 𑀭𑀽𑀧𑀁 𑀧𑀳𑀸𑀬 𑀅𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦. 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀯𑀲𑁂𑀦 𑀯𑀸 𑀯𑀺𑀯𑀺𑀥𑀭𑀽𑀧𑁂𑀦 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀘𑁆𑀙𑁂𑀬𑁆𑀬. 𑀢𑀤𑀲𑁆𑀲 𑀪𑀕𑀯𑀢𑁄 𑀫𑀼𑀲𑀸𑀢𑀺 𑀏𑀯𑀁 𑀲𑀦𑁆𑀢𑁂 𑀪𑀕𑀯𑀢𑁄 𑀢𑀁 𑀯𑀘𑀦𑀁 𑀫𑀼𑀲𑀸 𑀪𑀯𑁂𑀬𑁆𑀬𑀸𑀢𑀺 𑀫𑀼𑀲𑀸𑀯𑀸𑀤𑁂𑀦 𑀦𑀺𑀕𑁆𑀕𑀡𑁆𑀳𑀸𑀢𑀺. 𑀞𑀧𑁂𑀢𑁆𑀯𑀸 𑀓𑀺𑀭 𑀏𑀢𑀁 𑀦 𑀅𑀜𑁆𑀜𑁂𑀦 𑀪𑀕𑀯𑀸 𑀫𑀼𑀲𑀸𑀯𑀸𑀤𑁂𑀦 𑀦𑀺𑀕𑁆𑀕𑀳𑀺𑀢𑀧𑀼𑀩𑁆𑀩𑁄𑀢𑀺.

𑁧𑁮. 𑀤𑁆𑀯𑀬𑀕𑀸𑀫𑀺𑀦𑀻𑀢𑀺 ¶ 𑀲𑀭𑀽𑀧𑁂𑀦 𑀅𑀢𑁆𑀣𑀺𑀪𑀸𑀯𑀁, 𑀅𑀢𑁆𑀣𑁂𑀦 𑀦𑀢𑁆𑀣𑀺𑀪𑀸𑀯𑀦𑁆𑀢𑀺 𑀏𑀯𑀁 𑀤𑁆𑀯𑀬𑀕𑀸𑀫𑀺𑀦𑀻. 𑀅𑀮𑀺𑀓𑀢𑀼𑀘𑁆𑀙𑀦𑀺𑀧𑁆𑀨𑀮𑀯𑀸𑀘𑀸𑀬 𑀏𑀢𑀁 𑀅𑀥𑀺𑀯𑀘𑀦𑀁.

𑁧𑁯. 𑀅𑀚𑀺𑀢𑁄𑀧𑀺 𑀦𑀸𑀫 𑀮𑀺𑀘𑁆𑀙𑀯𑀻𑀦𑀁 𑀲𑁂𑀦𑀸𑀧𑀢𑀻𑀢𑀺 𑀲𑁄 𑀓𑀺𑀭 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑁄 𑀅𑀳𑁄𑀲𑀺, 𑀲𑁄 𑀓𑀸𑀮𑀫𑀓𑀸𑀲𑀺. 𑀅𑀣𑀲𑁆𑀲 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀫𑀦𑀼𑀲𑁆𑀲𑀸 𑀧𑀸𑀣𑀺𑀓𑀧𑀼𑀢𑁆𑀢𑀁 𑀧𑀼𑀘𑁆𑀙𑀺𑀁𑀲𑀼 ‘‘𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑁄 𑀲𑁂𑀦𑀸𑀧𑀢𑀻’’𑀢𑀺? 𑀲𑁄 𑀆𑀳 𑁋 ‘‘𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄’’𑀢𑀺. 𑀇𑀤𑀜𑁆𑀘 𑀧𑀦 𑀯𑀢𑁆𑀯𑀸 𑀧𑀼𑀦 𑀆𑀳 ‘‘𑀢𑀼𑀫𑁆𑀳𑀸𑀓𑀁 𑀲𑁂𑀦𑀸𑀧𑀢𑀺 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀫𑁆𑀫 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀯𑀘𑀦𑀫𑀓𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀸𑀤𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄𑀫𑁆𑀳𑀻’’𑀢𑀺 𑀧𑀭𑁄𑀤𑀺𑀢𑁆𑀣𑀸𑀢𑀺. 𑀢𑁂𑀦𑀼𑀧𑀲𑀗𑁆𑀓𑀫𑀺 𑀤𑀺𑀯𑀸𑀯𑀺𑀳𑀸𑀭𑀸𑀬𑀸𑀢𑀺 𑀏𑀢𑁆𑀣 ‘‘𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀢𑁆𑀣𑀸𑀬𑀸’’𑀢𑀺 𑀓𑀲𑁆𑀫𑀸 𑀦 𑀯𑀤𑀢𑀺? 𑀅𑀪𑀸𑀯𑀸. 𑀲𑀫𑁆𑀫𑀼𑀔𑀻𑀪𑀸𑀯𑁄𑀧𑀺 𑀳𑀺𑀲𑁆𑀲 𑀢𑁂𑀦 𑀲𑀤𑁆𑀥𑀺𑀁 𑀦𑀢𑁆𑀣𑀺, 𑀓𑀼𑀢𑁄 𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀁, 𑀢𑀲𑁆𑀫𑀸 𑀢𑀣𑀸 𑀅𑀯𑀢𑁆𑀯𑀸 ‘‘𑀤𑀺𑀯𑀸𑀯𑀺𑀳𑀸𑀭𑀸𑀬𑀸’’𑀢𑀺 𑀆𑀳.

𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀓𑀣𑀸𑀯𑀡𑁆𑀡𑀦𑀸

𑁨𑁦. 𑀕𑀳𑀧𑀢𑀺𑀦𑁂𑀘𑀬𑀺𑀓𑀸𑀢𑀺 𑀕𑀳𑀧𑀢𑀺 𑀫𑀳𑀸𑀲𑀸𑀮𑀸. 𑀢𑁂𑀲𑀜𑁆𑀳𑀺 𑀫𑀳𑀸𑀥𑀦𑀥𑀜𑁆𑀜𑀦𑀺𑀘𑀬𑁄, 𑀢𑀲𑁆𑀫𑀸 ‘‘𑀦𑁂𑀘𑀬𑀺𑀓𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀦𑁂𑀓𑀲𑀳𑀲𑁆𑀲𑀸𑀢𑀺 𑀲𑀳𑀲𑁆𑀲𑁂𑀳𑀺𑀧𑀺 𑀅𑀧𑀭𑀺𑀫𑀸𑀡𑀕𑀡𑀦𑀸. 𑀏𑀯𑀁 𑀫𑀳𑀢𑀺𑀁 𑀓𑀺𑀭 𑀧𑀭𑀺𑀲𑀁 𑀞𑀧𑁂𑀢𑁆𑀯𑀸 𑀲𑀼𑀦𑀓𑁆𑀔𑀢𑁆𑀢𑀁 𑀅𑀜𑁆𑀜𑁄 𑀲𑀦𑁆𑀦𑀺𑀧𑀸𑀢𑁂𑀢𑀼𑀁 𑀲𑀫𑀢𑁆𑀣𑁄 𑀦𑀢𑁆𑀣𑀺. 𑀢𑁂𑀦𑁂𑀯 𑀪𑀕𑀯𑀸 𑀏𑀢𑁆𑀢𑀓𑀁 𑀓𑀸𑀮𑀁 𑀲𑀼𑀦𑀓𑁆𑀔𑀢𑁆𑀢𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀺.

𑁨𑁧. 𑀪𑀬𑀦𑁆𑀢𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑀁. 𑀙𑀫𑁆𑀪𑀺𑀢𑀢𑁆𑀢𑀦𑁆𑀢𑀺 𑀲𑀓𑀮𑀲𑀭𑀻𑀭𑀘𑀮𑀦𑀁. 𑀮𑁄𑀫𑀳𑀁𑀲𑁄𑀢𑀺 𑀮𑁄𑀫𑀸𑀦𑀁 𑀉𑀤𑁆𑀥𑀕𑁆𑀕𑀪𑀸𑀯𑁄. 𑀲𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 ¶ 𑀅𑀢𑀺𑀫𑀳𑀦𑁆𑀢𑀁 𑀓𑀣𑀁 𑀓𑀣𑁂𑀢𑁆𑀯𑀸 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑀧𑀝𑀺𑀯𑀺𑀭𑀼𑀤𑁆𑀥𑁄, 𑀫𑀬𑁆𑀳𑀁 𑀔𑁄 𑀧𑀦𑀩𑁆𑀪𑀦𑁆𑀢𑀭𑁂 𑀅𑀭𑀳𑀢𑁆𑀢𑀁 𑀯𑀸 𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀳𑁂𑀢𑀼 𑀯𑀸 𑀦𑀢𑁆𑀣𑀺, 𑀲𑀫𑀡𑁄 𑀧𑀦 𑀕𑁄𑀢𑀫𑁄 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀢𑀺, 𑀅𑀣𑀲𑁆𑀲 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀫𑀳𑀸𑀚𑀦𑁄 ‘𑀢𑁆𑀯𑀁 𑀤𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑀲𑁆𑀫𑀸 𑀅𑀢𑁆𑀢𑀦𑁄 𑀧𑀫𑀸𑀡𑀫𑀚𑀸𑀦𑀺𑀢𑁆𑀯𑀸 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑀧𑀝𑀺𑀫𑀮𑁆𑀮𑁄 𑀳𑀼𑀢𑁆𑀯𑀸 𑀕𑀚𑁆𑀚𑀲𑀻’𑀢𑀺 𑀓𑀝𑁆𑀞𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀯𑀺𑀳𑁂𑀞𑁂𑀲𑁆𑀲𑀢𑀻’’𑀢𑀺. 𑀢𑁂𑀦𑀲𑁆𑀲 𑀫𑀳𑀸𑀚𑀦𑀲𑀦𑁆𑀦𑀺𑀧𑀸𑀢𑀜𑁆𑀘𑁂𑀯 ¶ 𑀢𑁂𑀦 𑀪𑀕𑀯𑀢𑁄 𑀘 𑀆𑀕𑀫𑀦𑀁 𑀲𑀼𑀢𑁆𑀯𑀸 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀮𑁄𑀫𑀳𑀁𑀲𑁄 𑀯𑀸 𑀉𑀤𑀧𑀸𑀤𑀺. 𑀲𑁄 𑀢𑀢𑁄 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑁄 𑀢𑀺𑀦𑁆𑀤𑀼𑀓𑀔𑀸𑀡𑀼𑀓𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑀁 𑀅𑀕𑀫𑀸𑀲𑀺. 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀅𑀣 𑀔𑁄 𑀪𑀕𑀯𑀸𑀢𑀺𑀆𑀤𑀺𑀫𑀸𑀳 ¶ . 𑀢𑀢𑁆𑀣 𑀉𑀧𑀲𑀗𑁆𑀓𑀫𑀻𑀢𑀺 𑀦 𑀓𑁂𑀯𑀮𑀁 𑀉𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀦 𑀤𑀽𑀭𑀁 𑀅𑀟𑁆𑀠𑀬𑁄𑀚𑀦𑀦𑁆𑀢𑀭𑀁 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑀁 𑀧𑀯𑀺𑀝𑁆𑀞𑁄. 𑀢𑀢𑁆𑀣𑀧𑀺 𑀘𑀺𑀢𑁆𑀢𑀲𑁆𑀲𑀸𑀤𑀁 𑀅𑀮𑀪𑀫𑀸𑀦𑁄 𑀅𑀦𑁆𑀢𑀦𑁆𑀢𑁂𑀦 𑀆𑀯𑀺𑀚𑁆𑀛𑀺𑀢𑁆𑀯𑀸 𑀆𑀭𑀸𑀫𑀧𑀘𑁆𑀘𑀦𑁆𑀢𑁂 𑀏𑀓𑀁 𑀕𑀳𑀦𑀝𑁆𑀞𑀸𑀦𑀁 𑀉𑀧𑀥𑀸𑀭𑁂𑀢𑁆𑀯𑀸 𑀧𑀸𑀲𑀸𑀡𑀨𑀮𑀓𑁂 𑀦𑀺𑀲𑀻𑀤𑀺. 𑀅𑀣 𑀪𑀕𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀅𑀬𑀁 𑀩𑀸𑀮𑁄 𑀓𑀲𑁆𑀲𑀘𑀺𑀤𑁂𑀯 𑀓𑀣𑀁 𑀕𑀳𑁂𑀢𑁆𑀯𑀸 𑀇𑀥𑀸𑀕𑀘𑁆𑀙𑁂𑀬𑁆𑀬, 𑀫𑀸 𑀦𑀲𑁆𑀲𑀢𑀼 𑀩𑀸𑀮𑁄’’𑀢𑀺 ‘‘𑀦𑀺𑀲𑀺𑀦𑁆𑀦𑀧𑀸𑀲𑀸𑀡𑀨𑀮𑀓𑀁 𑀢𑀲𑁆𑀲 𑀲𑀭𑀻𑀭𑁂 𑀅𑀮𑁆𑀮𑀻𑀦𑀁 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀲𑀳 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑁂𑀦 𑀢𑀁 𑀢𑀲𑁆𑀲 𑀲𑀭𑀻𑀭𑁂 𑀅𑀮𑁆𑀮𑀻𑀬𑀺. 𑀲𑁄 𑀫𑀳𑀸𑀅𑀤𑁆𑀤𑀼𑀩𑀦𑁆𑀥𑀦𑀩𑀤𑁆𑀥𑁄 𑀯𑀺𑀬 𑀙𑀺𑀦𑁆𑀦𑀧𑀸𑀤𑁄 𑀯𑀺𑀬 𑀘 𑀅𑀳𑁄𑀲𑀺.

𑀅𑀲𑁆𑀲𑁄𑀲𑀻𑀢𑀺 𑀇𑀢𑁄 𑀘𑀺𑀢𑁄 𑀘 𑀧𑀸𑀣𑀺𑀓𑀧𑀼𑀢𑁆𑀢𑀁 𑀧𑀭𑀺𑀬𑁂𑀲𑀫𑀸𑀦𑀸 𑀧𑀭𑀺𑀲𑀸 𑀢𑀲𑁆𑀲 𑀅𑀦𑀼𑀧𑀤𑀁 𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀜𑀢𑁆𑀯𑀸 𑀆𑀕𑀢𑁂𑀦 𑀅𑀜𑁆𑀜𑀢𑀭𑁂𑀦 𑀧𑀼𑀭𑀺𑀲𑁂𑀦 ‘‘𑀢𑀼𑀫𑁆𑀳𑁂 𑀓𑀁 𑀧𑀭𑀺𑀬𑁂𑀲𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀸𑀣𑀺𑀓𑀧𑀼𑀢𑁆𑀢𑀦𑁆𑀢𑀺. 𑀲𑁄 ‘‘𑀢𑀺𑀦𑁆𑀤𑀼𑀓𑀔𑀸𑀡𑀼𑀓𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁂 𑀦𑀺𑀲𑀺𑀦𑁆𑀦𑁄’’𑀢𑀺 𑀯𑀼𑀢𑁆𑀢𑀯𑀘𑀦𑁂𑀦 𑀅𑀲𑁆𑀲𑁄𑀲𑀺.

𑁨𑁨. 𑀲𑀁𑀲𑀧𑁆𑀧𑀢𑀻𑀢𑀺 𑀑𑀲𑀻𑀤𑀢𑀺. 𑀢𑀢𑁆𑀣𑁂𑀯 𑀲𑀜𑁆𑀘𑀭𑀢𑀺. 𑀧𑀸𑀯𑀴𑀸 𑀯𑀼𑀘𑁆𑀘𑀢𑀺 𑀆𑀦𑀺𑀲𑀤𑀝𑁆𑀞𑀺𑀓𑀸.

𑁨𑁩. 𑀧𑀭𑀸𑀪𑀽𑀢𑀭𑀽𑀧𑁄𑀢𑀺 𑀧𑀭𑀸𑀚𑀺𑀢𑀭𑀽𑀧𑁄, 𑀯𑀺𑀦𑀝𑁆𑀞𑀭𑀽𑀧𑁄 𑀯𑀸.

𑁨𑁫. 𑀕𑁄𑀬𑀼𑀕𑁂𑀳𑀻𑀢𑀺 𑀕𑁄𑀬𑀼𑀢𑁆𑀢𑁂𑀳𑀺 𑀲𑀢𑀫𑀢𑁆𑀢𑁂𑀳𑀺 𑀯𑀸 𑀲𑀳𑀲𑁆𑀲𑀫𑀢𑁆𑀢𑁂𑀳𑀺 𑀯𑀸 𑀬𑀼𑀕𑁂𑀳𑀺. 𑀆𑀯𑀺𑀜𑁆𑀙𑁂𑀬𑁆𑀬𑀸𑀫𑀸𑀢𑀺 𑀆𑀓𑀟𑁆𑀠𑁂𑀬𑁆𑀬𑀸𑀫. 𑀙𑀺𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀙𑀺𑀦𑁆𑀤𑁂𑀬𑁆𑀬𑀼𑀁. 𑀧𑀸𑀣𑀺𑀓𑀧𑀼𑀢𑁆𑀢𑁄 ¶ 𑀯𑀸 𑀩𑀦𑁆𑀥𑀝𑁆𑀞𑀸𑀦𑁂 𑀙𑀺𑀚𑁆𑀚𑁂𑀬𑁆𑀬.

𑁨𑁬. 𑀤𑀸𑀭𑀼𑀧𑀢𑁆𑀢𑀺𑀓𑀦𑁆𑀢𑁂𑀯𑀸𑀲𑀻𑀢𑀺 𑀤𑀸𑀭𑀼𑀧𑀢𑁆𑀢𑀺𑀓𑀲𑁆𑀲 𑀅𑀦𑁆𑀢𑁂𑀯𑀸𑀲𑀻. 𑀢𑀲𑁆𑀲 𑀓𑀺𑀭 𑀏𑀢𑀤𑀳𑁄𑀲𑀺 ‘‘𑀢𑀺𑀝𑁆𑀞𑀢𑀼 𑀢𑀸𑀯 𑀧𑀸𑀝𑀺𑀳𑀸𑀭𑀺𑀬𑀁, 𑀲𑀫𑀡𑁄 𑀕𑁄𑀢𑀫𑁄 ‘𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄 𑀆𑀲𑀦𑀸𑀧𑀺 𑀦 𑀯𑀼𑀝𑁆𑀞𑀳𑀺𑀲𑁆𑀲𑀢𑀻’𑀢𑀺 𑀆𑀳. 𑀳𑀦𑁆𑀤𑀸𑀳𑀁 𑀕𑀦𑁆𑀢𑁆𑀯𑀸 𑀬𑁂𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀢𑀁 𑀆𑀲𑀦𑀸 𑀯𑀼𑀝𑁆𑀞𑀸𑀧𑁂𑀫𑀺. 𑀏𑀢𑁆𑀢𑀸𑀯𑀢𑀸 𑀘 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀭𑀸𑀚𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳.

𑁨𑁭. 𑀲𑀻𑀳𑀲𑁆𑀲𑀸𑀢𑀺 𑀘𑀢𑁆𑀢𑀸𑀭𑁄 𑀲𑀻𑀳𑀸 𑀢𑀺𑀡𑀲𑀻𑀳𑁄 𑀘 𑀓𑀸𑀴𑀲𑀻𑀳𑁄 𑀘 𑀧𑀡𑁆𑀟𑀼𑀲𑀻𑀳𑁄 𑀘 𑀓𑁂𑀲𑀭𑀲𑀻𑀳𑁄 𑀘. 𑀢𑁂𑀲𑀁 𑀘𑀢𑀼𑀦𑁆𑀦𑀁 𑀲𑀻𑀳𑀸𑀦𑀁 𑀓𑁂𑀲𑀭𑀲𑀻𑀳𑁄 𑀅𑀕𑁆𑀕𑀢𑀁 𑀕𑀢𑁄, 𑀲𑁄 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀫𑀺𑀕𑀭𑀜𑁆𑀜𑁄𑀢𑀺 𑀲𑀩𑁆𑀩𑀘𑀢𑀼𑀧𑁆𑀧𑀤𑀸𑀦𑀁 𑀭𑀜𑁆𑀜𑁄. 𑀆𑀲𑀬𑀦𑁆𑀢𑀺 𑀦𑀺𑀯𑀸𑀲𑀁. 𑀲𑀻𑀳𑀦𑀸𑀤𑀦𑁆𑀢𑀺 𑀅𑀪𑀻𑀢𑀦𑀸𑀤𑀁. 𑀕𑁄𑀘𑀭𑀸𑀬 ¶ 𑀧𑀓𑁆𑀓𑀫𑁂𑀬𑁆𑀬𑀦𑁆𑀢𑀺 𑀆𑀳𑀸𑀭𑀢𑁆𑀣𑀸𑀬 𑀧𑀓𑁆𑀓𑀫𑁂𑀬𑁆𑀬𑀁. 𑀯𑀭𑀁 𑀯𑀭𑀦𑁆𑀢𑀺 𑀉𑀢𑁆𑀢𑀫𑀼𑀢𑁆𑀢𑀫𑀁, 𑀣𑀽𑀮𑀁 𑀣𑀽𑀮𑀦𑁆𑀢𑀺 𑀅𑀢𑁆𑀣𑁄. 𑀫𑀼𑀤𑀼𑀫𑀁𑀲𑀸𑀦𑀻𑀢𑀺 𑀫𑀼𑀤𑀽𑀦𑀺 𑀫𑀁𑀲𑀸𑀦𑀺 ¶ . ‘‘𑀫𑀥𑀼𑀫𑀁𑀲𑀸𑀦𑀻’’𑀢𑀺𑀧𑀺 𑀧𑀸𑀞𑁄, 𑀫𑀥𑀼𑀭𑀫𑀁𑀲𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀚𑁆𑀛𑀼𑀧𑁂𑀬𑁆𑀬𑀦𑁆𑀢𑀺 𑀉𑀧𑀕𑀘𑁆𑀙𑁂𑀬𑁆𑀬𑀁. 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸𑀢𑀺 𑀬𑁂 𑀤𑀼𑀩𑁆𑀩𑀮𑀸 𑀧𑀸𑀡𑀸, 𑀢𑁂 𑀧𑀮𑀸𑀬𑀦𑁆𑀢𑀽𑀢𑀺 𑀅𑀢𑁆𑀢𑀦𑁄 𑀲𑀽𑀭𑀪𑀸𑀯𑀲𑀦𑁆𑀦𑀺𑀲𑁆𑀲𑀺𑀢𑁂𑀦 𑀓𑀸𑀭𑀼𑀜𑁆𑀜𑁂𑀦 𑀦𑀤𑀺𑀢𑁆𑀯𑀸.

𑁨𑁮. 𑀯𑀺𑀖𑀸𑀲𑀲𑀁𑀯𑀟𑁆𑀠𑁄𑀢𑀺 𑀯𑀺𑀖𑀸𑀲𑁂𑀦 𑀲𑀁𑀯𑀟𑁆𑀠𑁄, 𑀯𑀺𑀖𑀸𑀲𑀁 𑀪𑀓𑁆𑀔𑀺𑀢𑀸 𑀢𑀺𑀭𑀺𑀢𑁆𑀢𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀯𑀟𑁆𑀠𑀺𑀢𑁄. 𑀤𑀺𑀢𑁆𑀢𑁄𑀢𑀺 𑀤𑀧𑁆𑀧𑀺𑀢𑁄 𑀣𑀽𑀮𑀲𑀭𑀻𑀭𑁄. 𑀩𑀮𑀯𑀸𑀢𑀺 𑀩𑀮𑀲𑀫𑁆𑀧𑀦𑁆𑀦𑁄. 𑀏𑀢𑀤𑀳𑁄𑀲𑀻𑀢𑀺 𑀓𑀲𑁆𑀫𑀸 𑀅𑀳𑁄𑀲𑀺? 𑀅𑀲𑁆𑀫𑀺𑀫𑀸𑀦𑀤𑁄𑀲𑁂𑀦.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀏𑀓𑀤𑀺𑀯𑀲𑀁 𑀓𑀺𑀭 𑀲𑁄 𑀲𑀻𑀳𑁄 𑀕𑁄𑀘𑀭𑀢𑁄 𑀦𑀺𑀯𑀢𑁆𑀢𑀫𑀸𑀦𑁄 𑀢𑀁 𑀲𑀺𑀗𑁆𑀕𑀸𑀮𑀁 𑀪𑀬𑁂𑀦 𑀧𑀮𑀸𑀬𑀫𑀸𑀦𑀁 𑀤𑀺𑀲𑁆𑀯𑀸 𑀓𑀸𑀭𑀼𑀜𑁆𑀜𑀚𑀸𑀢𑁄 𑀳𑀼𑀢𑁆𑀯𑀸 ‘‘𑀯𑀬𑀲, 𑀫𑀸 𑀪𑀸𑀬𑀺, 𑀢𑀺𑀝𑁆𑀞 𑀓𑁄 𑀦𑀸𑀫 𑀢𑁆𑀯’’𑀦𑁆𑀢𑀺 𑀆𑀳. 𑀚𑀫𑁆𑀩𑀼𑀓𑁄 𑀦𑀸𑀫𑀸𑀳𑀁 𑀲𑀸𑀫𑀻𑀢𑀺. 𑀯𑀬𑀲, 𑀚𑀫𑁆𑀩𑀼𑀓, 𑀇𑀢𑁄 𑀧𑀝𑁆𑀞𑀸𑀬 𑀫𑀁 𑀉𑀧𑀝𑁆𑀞𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻𑀢𑀺. 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻𑀢𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀉𑀧𑀝𑁆𑀞𑀸𑀢𑀺. 𑀲𑀻𑀳𑁄 𑀕𑁄𑀘𑀭𑀢𑁄 𑀆𑀕𑀘𑁆𑀙𑀦𑁆𑀢𑁄 𑀫𑀳𑀦𑁆𑀢𑀁 𑀫𑀳𑀦𑁆𑀢𑀁 𑀫𑀁𑀲𑀔𑀡𑁆𑀟𑀁 𑀆𑀳𑀭𑀢𑀺. 𑀲𑁄 𑀢𑀁 𑀔𑀸𑀤𑀺𑀢𑁆𑀯𑀸 𑀅𑀯𑀺𑀤𑀽𑀭𑁂 𑀧𑀸𑀲𑀸𑀡𑀧𑀺𑀝𑁆𑀞𑁂 𑀯𑀲𑀢𑀺. 𑀲𑁄 𑀓𑀢𑀺𑀧𑀸𑀳𑀘𑁆𑀘𑀬𑁂𑀦𑁂𑀯 𑀣𑀽𑀮𑀲𑀭𑀻𑀭𑁄 𑀫𑀳𑀸𑀔𑀦𑁆𑀥𑁄 𑀚𑀸𑀢𑁄. 𑀅𑀣 𑀦𑀁 𑀲𑀻𑀳𑁄 𑀅𑀯𑁄𑀘 𑁋 ‘‘𑀯𑀬𑀲, 𑀚𑀫𑁆𑀩𑀼𑀓, 𑀫𑀫 𑀯𑀺𑀚𑀫𑁆𑀪𑀦𑀓𑀸𑀮𑁂 𑀅𑀯𑀺𑀤𑀽𑀭𑁂 𑀞𑀢𑁆𑀯𑀸 ‘𑀯𑀺𑀭𑁄𑀘 𑀲𑀸𑀫𑀻’𑀢𑀺 𑀯𑀢𑁆𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻’’𑀢𑀺. 𑀲𑀓𑁆𑀓𑁄𑀫𑀺 𑀲𑀸𑀫𑀻𑀢𑀺. 𑀲𑁄 𑀢𑀲𑁆𑀲 𑀯𑀺𑀚𑀫𑁆𑀪𑀦𑀓𑀸𑀮𑁂 𑀢𑀣𑀸 𑀓𑀭𑁄𑀢𑀺 ¶ . 𑀢𑁂𑀦 𑀲𑀻𑀳𑀲𑁆𑀲 𑀅𑀢𑀺𑀭𑁂𑀓𑁄 𑀅𑀲𑁆𑀫𑀺𑀫𑀸𑀦𑁄 𑀳𑁄𑀢𑀺.

𑀅𑀣𑁂𑀓𑀤𑀺𑀯𑀲𑀁 𑀚𑀭𑀲𑀺𑀗𑁆𑀕𑀸𑀮𑁄 𑀉𑀤𑀓𑀲𑁄𑀡𑁆𑀟𑀺𑀬𑀁 𑀧𑀸𑀦𑀻𑀬𑀁 𑀧𑀺𑀯𑀦𑁆𑀢𑁄 𑀅𑀢𑁆𑀢𑀦𑁄 𑀙𑀸𑀬𑀁 𑀑𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 𑀅𑀢𑁆𑀢𑀦𑁄 𑀣𑀽𑀮𑀲𑀭𑀻𑀭𑀢𑀜𑁆𑀘𑁂𑀯 𑀫𑀳𑀸𑀔𑀦𑁆𑀥𑀢𑀜𑁆𑀘. 𑀤𑀺𑀲𑁆𑀯𑀸 ‘𑀚𑀭𑀲𑀺𑀗𑁆𑀕𑀸𑀮𑁄𑀲𑁆𑀫𑀻’𑀢𑀺 𑀫𑀦𑀁 𑀅𑀓𑀢𑁆𑀯𑀸 ‘‘𑀅𑀳𑀫𑁆𑀧𑀺 𑀲𑀻𑀳𑁄 𑀚𑀸𑀢𑁄’’𑀢𑀺 𑀫𑀜𑁆𑀜𑀺. 𑀢𑀢𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀏𑀢𑀤𑀯𑁄𑀘 𑁋 ‘‘𑀯𑀬𑀲, 𑀚𑀫𑁆𑀩𑀼𑀓, 𑀬𑀼𑀢𑁆𑀢𑀁 𑀦𑀸𑀫 𑀢𑀯 𑀇𑀫𑀺𑀦𑀸 𑀅𑀢𑁆𑀢𑀪𑀸𑀯𑁂𑀦 𑀧𑀭𑀲𑁆𑀲 𑀉𑀘𑁆𑀙𑀺𑀝𑁆𑀞𑀫𑀁𑀲𑀁 𑀔𑀸𑀤𑀺𑀢𑀼𑀁, 𑀓𑀺𑀁 𑀢𑁆𑀯𑀁 𑀧𑀼𑀭𑀺𑀲𑁄 𑀦 𑀳𑁄𑀲𑀺, 𑀲𑀻𑀳𑀲𑁆𑀲𑀸𑀧𑀺 𑀘𑀢𑁆𑀢𑀸𑀭𑁄 𑀧𑀸𑀤𑀸 𑀤𑁆𑀯𑁂 𑀤𑀸𑀞𑀸 𑀤𑁆𑀯𑁂 𑀓𑀡𑁆𑀡𑀸 𑀏𑀓𑀁 𑀦𑀗𑁆𑀕𑀼𑀝𑁆𑀞𑀁, 𑀢𑀯𑀧𑀺 𑀲𑀩𑁆𑀩𑀁 𑀢𑀣𑁂𑀯, 𑀓𑁂𑀯𑀮𑀁 𑀢𑀯 𑀓𑁂𑀲𑀭𑀪𑀸𑀭𑀫𑀢𑁆𑀢𑀫𑁂𑀯 𑀦𑀢𑁆𑀣𑀻’’𑀢𑀺. 𑀢𑀲𑁆𑀲𑁂𑀯𑀁 𑀘𑀺𑀦𑁆𑀢𑀬𑀢𑁄 𑀅𑀲𑁆𑀫𑀺𑀫𑀸𑀦𑁄 𑀯𑀟𑁆𑀠𑀺. 𑀅𑀣𑀲𑁆𑀲 𑀢𑁂𑀦 𑀅𑀲𑁆𑀫𑀺𑀫𑀸𑀦𑀤𑁄𑀲𑁂𑀦 𑀏𑀢𑀁 ‘‘𑀓𑁄 𑀘𑀸𑀳’’𑀦𑁆𑀢𑀺𑀆𑀤𑀺 𑀫𑀜𑁆𑀜𑀺𑀢𑀫𑀳𑁄𑀲𑀺. 𑀢𑀢𑁆𑀣 𑀓𑁄 𑀘𑀸𑀳𑀦𑁆𑀢𑀺 𑀅𑀳𑀁 𑀓𑁄, 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀓𑁄, 𑀦 𑀫𑁂 𑀜𑀸𑀢𑀺, 𑀦 𑀲𑀸𑀫𑀺𑀓𑁄, 𑀓𑀺𑀫𑀳𑀁 ¶ 𑀢𑀲𑁆𑀲 𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀺𑀗𑁆𑀕𑀸𑀮𑀓𑀁𑀬𑁂𑀯𑀸𑀢𑀺 𑀲𑀺𑀗𑁆𑀕𑀸𑀮𑀭𑀯𑀫𑁂𑀯. 𑀪𑁂𑀭𑀡𑁆𑀟𑀓𑀁𑀬𑁂𑀯𑀸𑀢𑀺 𑀅𑀧𑁆𑀧𑀺𑀬𑀅𑀫𑀦𑀸𑀧𑀲𑀤𑁆𑀤𑀫𑁂𑀯. 𑀓𑁂 𑀘 𑀙𑀯𑁂 𑀲𑀺𑀗𑁆𑀕𑀸𑀮𑁂𑀢𑀺 𑀓𑁄 𑀘 𑀮𑀸𑀫𑀓𑁄 𑀲𑀺𑀗𑁆𑀕𑀸𑀮𑁄. 𑀓𑁂 𑀧𑀦 𑀲𑀻𑀳𑀦𑀸𑀤𑁂𑀢𑀺 𑀓𑁄 𑀧𑀦 𑀲𑀻𑀳𑀦𑀸𑀤𑁄 𑀲𑀺𑀗𑁆𑀕𑀸𑀮𑀲𑁆𑀲 𑀘 𑀲𑀻𑀳𑀦𑀸𑀤𑀲𑁆𑀲 𑀘 𑀓𑁄 𑀲𑀫𑁆𑀩𑀦𑁆𑀥𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀕𑀢𑀸𑀧𑀤𑀸𑀦𑁂𑀲𑀽𑀢𑀺 𑀲𑀼𑀕𑀢𑀮𑀓𑁆𑀔𑀡𑁂𑀲𑀼. 𑀲𑀼𑀕𑀢𑀲𑁆𑀲 𑀲𑀸𑀲𑀦𑀲𑀫𑁆𑀪𑀽𑀢𑀸𑀲𑀼 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼. 𑀓𑀣𑀁 𑀧𑀦𑁂𑀲 𑀢𑀢𑁆𑀣 𑀚𑀻𑀯𑀢𑀺? 𑀏𑀢𑀲𑁆𑀲 𑀳𑀺 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀤𑀤𑀫𑀸𑀦𑀸 ¶ 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑀸𑀦𑀁 𑀲𑀫𑁆𑀩𑀼𑀤𑁆𑀥𑀸𑀦𑀁 𑀤𑁂𑀫𑀸𑀢𑀺 𑀤𑁂𑀦𑁆𑀢𑀺, 𑀢𑁂𑀦 𑀏𑀲 𑀅𑀩𑀼𑀤𑁆𑀥𑁄 𑀲𑀫𑀸𑀦𑁄 𑀩𑀼𑀤𑁆𑀥𑀸𑀦𑀁 𑀦𑀺𑀬𑀸𑀫𑀺𑀢𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀲𑀼𑀕𑀢𑀸𑀧𑀤𑀸𑀦𑁂𑀲𑀼 𑀚𑀻𑀯𑀢𑀺 𑀦𑀸𑀫. 𑀲𑀼𑀕𑀢𑀸𑀢𑀺𑀭𑀺𑀢𑁆𑀢𑀸𑀦𑀻𑀢𑀺 𑀢𑁂𑀲𑀁 𑀓𑀺𑀭 𑀪𑁄𑀚𑀦𑀸𑀦𑀺 𑀤𑀤𑀫𑀸𑀦𑀸 𑀩𑀼𑀤𑁆𑀥𑀸𑀦𑀜𑁆𑀘 𑀩𑀼𑀤𑁆𑀥𑀲𑀸𑀯𑀓𑀸𑀦𑀜𑁆𑀘 𑀤𑀢𑁆𑀯𑀸 𑀧𑀘𑁆𑀙𑀸 𑀅𑀯𑀲𑁂𑀲𑀁 𑀲𑀸𑀬𑀦𑁆𑀳𑀲𑀫𑀬𑁂 𑀤𑁂𑀦𑁆𑀢𑀺. 𑀏𑀯𑀫𑁂𑀲 𑀲𑀼𑀕𑀢𑀸𑀢𑀺𑀭𑀺𑀢𑁆𑀢𑀸𑀦𑀺 𑀪𑀼𑀜𑁆𑀚𑀢𑀺 𑀦𑀸𑀫. 𑀢𑀣𑀸𑀕𑀢𑁂𑀢𑀺 𑀢𑀣𑀸𑀕𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀆𑀲𑀸𑀤𑁂𑀢𑀩𑁆𑀩𑀁 𑀖𑀝𑁆𑀝𑀬𑀺𑀢𑀩𑁆𑀩𑀁. 𑀅𑀣 𑀯𑀸 ‘‘𑀢𑀣𑀸𑀕𑀢𑁂’’𑀢𑀺𑀆𑀤𑀻𑀦𑀺 𑀉𑀧𑀬𑁄𑀕𑀩𑀳𑀼𑀯𑀘𑀦𑀸𑀦𑁂𑀯. 𑀆𑀲𑀸𑀤𑁂𑀢𑀩𑁆𑀩𑀦𑁆𑀢𑀺 𑀇𑀤𑀫𑁆𑀧𑀺 𑀩𑀳𑀼𑀯𑀘𑀦𑀫𑁂𑀯 𑀏𑀓𑀯𑀘𑀦𑀁 𑀯𑀺𑀬 𑀯𑀼𑀢𑁆𑀢𑀁. 𑀆𑀲𑀸𑀤𑀦𑀸𑀢𑀺 𑀅𑀳𑀁 𑀩𑀼𑀤𑁆𑀥𑁂𑀦 𑀲𑀤𑁆𑀥𑀺𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀖𑀝𑁆𑀝𑀦𑀸.

𑁨𑁯. 𑀲𑀫𑁂𑀓𑁆𑀔𑀺𑀬𑀸𑀦𑀸𑀢𑀺 𑀲𑀫𑁂𑀓𑁆𑀔𑀺𑀢𑁆𑀯𑀸, 𑀫𑀜𑁆𑀜𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀫𑀜𑁆𑀜𑀻𑀢𑀺 𑀧𑀼𑀦 𑀅𑀫𑀜𑁆𑀜𑀺𑀢𑁆𑀣 𑀓𑁄𑀢𑁆𑀣𑀽𑀢𑀺 ¶ 𑀲𑀺𑀗𑁆𑀕𑀸𑀮𑁄.

𑁩𑁦. 𑀅𑀢𑁆𑀢𑀸𑀦𑀁 𑀯𑀺𑀖𑀸𑀲𑁂 𑀲𑀫𑁂𑀓𑁆𑀔𑀺𑀬𑀸𑀢𑀺 𑀲𑁄𑀡𑁆𑀟𑀺𑀬𑀁 𑀉𑀘𑁆𑀙𑀺𑀝𑁆𑀞𑁄𑀤𑀓𑁂 𑀣𑀽𑀮𑀁 𑀅𑀢𑁆𑀢𑀪𑀸𑀯𑀁 𑀤𑀺𑀲𑁆𑀯𑀸. 𑀬𑀸𑀯 𑀅𑀢𑁆𑀢𑀸𑀦𑀁 𑀦 𑀧𑀲𑁆𑀲𑀢𑀻𑀢𑀺 𑀬𑀸𑀯 𑀅𑀳𑀁 𑀲𑀻𑀳𑀯𑀺𑀖𑀸𑀲𑀲𑀁𑀯𑀟𑁆𑀠𑀺𑀢𑀓𑁄 𑀚𑀭𑀲𑀺𑀗𑁆𑀕𑀸𑀮𑁄𑀢𑀺 𑀏𑀯𑀁 𑀬𑀣𑀸𑀪𑀽𑀢𑀁 𑀅𑀢𑁆𑀢𑀸𑀦𑀁 𑀦 𑀧𑀲𑁆𑀲𑀢𑀺. 𑀩𑁆𑀬𑀕𑁆𑀖𑁄𑀢𑀺 𑀫𑀜𑁆𑀜𑀢𑀻𑀢𑀺 𑀲𑀻𑀳𑁄𑀳𑀫𑀲𑁆𑀫𑀻𑀢𑀺 𑀫𑀜𑁆𑀜𑀢𑀺, 𑀲𑀻𑀳𑁂𑀦 𑀯𑀸 𑀲𑀫𑀸𑀦𑀩𑀮𑁄 𑀩𑁆𑀬𑀕𑁆𑀖𑁄𑀬𑁂𑀯 𑀅𑀳𑀦𑁆𑀢𑀺 𑀫𑀜𑁆𑀜𑀢𑀺.

𑁩𑁧. 𑀪𑀼𑀢𑁆𑀯𑀸𑀦 𑀪𑁂𑀓𑁂𑀢𑀺 𑀆𑀯𑀸𑀝𑀫𑀡𑁆𑀟𑀽𑀓𑁂 𑀔𑀸𑀤𑀺𑀢𑁆𑀯𑀸. 𑀔𑀮𑀫𑀽𑀲𑀺𑀓𑀸𑀬𑁄𑀢𑀺 𑀔𑀮𑁂𑀲𑀼 𑀫𑀽𑀲𑀺𑀓𑀸𑀬𑁄 𑀘 𑀔𑀸𑀤𑀺𑀢𑁆𑀯𑀸. 𑀓𑀝𑀲𑀻𑀲𑀼 𑀔𑀺𑀢𑁆𑀢𑀸𑀦𑀺 𑀘 𑀓𑁄𑀡𑀧𑀸𑀦𑀻𑀢𑀺 𑀲𑀼𑀲𑀸𑀦𑁂𑀲𑀼 𑀙𑀟𑁆𑀟𑀺𑀢𑀓𑀼𑀡𑀧𑀸𑀦𑀺 𑀘 𑀔𑀸𑀤𑀺𑀢𑁆𑀯𑀸. 𑀫𑀳𑀸𑀯𑀦𑁂𑀢𑀺 𑀫𑀳𑀦𑁆𑀢𑁂 𑀯𑀦𑀲𑁆𑀫𑀺𑀁. 𑀲𑀼𑀜𑁆𑀜𑀯𑀦𑁂𑀢𑀺 𑀢𑀼𑀘𑁆𑀙𑀯𑀦𑁂. 𑀯𑀺𑀯𑀟𑁆𑀠𑁄𑀢𑀺 𑀯𑀟𑁆𑀠𑀺𑀢𑁄. 𑀢𑀣𑁂𑀯 𑀲𑁄 𑀲𑀺𑀗𑁆𑀕𑀸𑀮𑀓𑀁 𑀅𑀦𑀤𑀻𑀢𑀺 𑀏𑀯𑀁 𑀲𑀁𑀯𑀟𑁆𑀠𑁄𑀧𑀺 𑀫𑀺𑀕𑀭𑀸𑀚𑀸𑀳𑀫𑀲𑁆𑀫𑀻𑀢𑀺 𑀫𑀜𑁆𑀜𑀺𑀢𑁆𑀯𑀸𑀧𑀺 𑀬𑀣𑀸 𑀧𑀼𑀩𑁆𑀩𑁂 𑀤𑀼𑀩𑁆𑀩𑀮𑀲𑀺𑀗𑁆𑀕𑀸𑀮𑀓𑀸𑀮𑁂, 𑀢𑀣𑁂𑀯 𑀲𑁄 𑀲𑀺𑀗𑁆𑀕𑀸𑀮𑀭𑀯𑀁𑀬𑁂𑀯 𑀅𑀭𑀯𑀻𑀢𑀺 ¶ . 𑀇𑀫𑀸𑀬𑀧𑀺 𑀕𑀸𑀣𑀸𑀬 𑀪𑁂𑀓𑀸𑀤𑀻𑀦𑀺 𑀪𑀼𑀢𑁆𑀯𑀸 𑀯𑀟𑁆𑀠𑀺𑀢𑀲𑀺𑀗𑁆𑀕𑀸𑀮𑁄 𑀯𑀺𑀬 𑀮𑀸𑀪𑀲𑀓𑁆𑀓𑀸𑀭𑀕𑀺𑀤𑁆𑀥𑁄 𑀢𑁆𑀯𑀦𑁆𑀢𑀺 𑀧𑀸𑀣𑀺𑀓𑀧𑀼𑀢𑁆𑀢𑀫𑁂𑀯 𑀖𑀝𑁆𑀝𑁂𑀲𑀺.

𑀦𑀸𑀕𑁂𑀳𑀻𑀢𑀺 𑀳𑀢𑁆𑀣𑀻𑀳𑀺. 𑀫𑀳𑀸𑀩𑀦𑁆𑀥𑀦𑀸𑀢𑀺 𑀫𑀳𑀢𑀸 𑀓𑀺𑀮𑁂𑀲𑀩𑀦𑁆𑀥𑀦𑀸 𑀫𑁄𑀘𑁂𑀢𑁆𑀯𑀸. 𑀫𑀳𑀸𑀯𑀺𑀤𑀼𑀕𑁆𑀕𑀸𑀢𑀺 𑀫𑀳𑀸𑀯𑀺𑀤𑀼𑀕𑁆𑀕𑀁 𑀦𑀸𑀫 𑀘𑀢𑁆𑀢𑀸𑀭𑁄 𑀑𑀖𑀸. 𑀢𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀣𑀮𑁂 𑀧𑀢𑀺𑀝𑁆𑀞𑀧𑁂𑀢𑁆𑀯𑀸.

𑀅𑀕𑁆𑀕𑀜𑁆𑀜𑀧𑀜𑁆𑀜𑀢𑁆𑀢𑀺𑀓𑀣𑀸𑀯𑀡𑁆𑀡𑀦𑀸

𑁩𑁬. 𑀇𑀢𑀺 ‘‘𑀪𑀕𑀯𑀸 𑀏𑀢𑁆𑀢𑀓𑁂𑀦 𑀓𑀣𑀸𑀫𑀕𑁆𑀕𑁂𑀦 𑀧𑀸𑀝𑀺𑀳𑀸𑀭𑀺𑀬𑀁 𑀦 𑀓𑀭𑁄𑀢𑀻’’𑀢𑀺 𑀧𑀤𑀲𑁆𑀲 𑀅𑀦𑀼𑀲𑀦𑁆𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀦 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀸𑀧𑁂𑀢𑀻’’𑀢𑀺 𑀇𑀫𑀲𑁆𑀲 𑀅𑀦𑀼𑀲𑀦𑁆𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀅𑀕𑁆𑀕𑀜𑁆𑀜𑀜𑁆𑀘𑀸𑀳𑀦𑁆𑀢𑀺 𑀤𑁂𑀲𑀦𑀁 ¶ 𑀆𑀭𑀪𑀺. 𑀢𑀢𑁆𑀣 𑀅𑀕𑁆𑀕𑀜𑁆𑀜𑀜𑁆𑀘𑀸𑀳𑀦𑁆𑀢𑀺 𑀅𑀳𑀁, 𑀪𑀕𑁆𑀕𑀯, 𑀅𑀕𑁆𑀕𑀜𑁆𑀜𑀜𑁆𑀘 𑀧𑀚𑀸𑀦𑀸𑀫𑀺 𑀮𑁄𑀓𑀼𑀧𑁆𑀧𑀢𑁆𑀢𑀺𑀘𑀭𑀺𑀬𑀯𑀁𑀲𑀜𑁆𑀘. 𑀢𑀜𑁆𑀘 𑀧𑀚𑀸𑀦𑀸𑀫𑀻𑀢𑀺 𑀦 𑀓𑁂𑀯𑀮𑀁 𑀅𑀕𑁆𑀕𑀜𑁆𑀜𑀫𑁂𑀯, 𑀢𑀜𑁆𑀘 𑀅𑀕𑁆𑀕𑀜𑁆𑀜𑀁 𑀧𑀚𑀸𑀦𑀸𑀫𑀺. 𑀢𑀢𑁄 𑀘 𑀉𑀢𑁆𑀢𑀭𑀺𑀢𑀭𑀁 𑀲𑀻𑀮𑀲𑀫𑀸𑀥𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸 𑀧𑀚𑀸𑀦𑀸𑀫𑀺. 𑀢𑀜𑁆𑀘 𑀧𑀚𑀸𑀦𑀁 𑀦 𑀧𑀭𑀸𑀫𑀲𑀸𑀫𑀻𑀢𑀺 𑀢𑀜𑁆𑀘 𑀧𑀚𑀸𑀦𑀦𑁆𑀢𑁄𑀧𑀺 𑀅𑀳𑀁 𑀇𑀤𑀁 𑀦𑀸𑀫 𑀧𑀚𑀸𑀦𑀸𑀫𑀻𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀯𑀲𑁂𑀦 𑀦 𑀧𑀭𑀸𑀫𑀲𑀸𑀫𑀺. 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀧𑀭𑀸𑀫𑀸𑀲𑁄𑀢𑀺 𑀤𑀻𑀧𑁂𑀢𑀺. 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 ¶ 𑀦𑀺𑀩𑁆𑀩𑀼𑀢𑀺 𑀯𑀺𑀤𑀺𑀢𑀸𑀢𑀺 𑀅𑀢𑁆𑀢𑀦𑀸𑀬𑁂𑀯 𑀅𑀢𑁆𑀢𑀦𑀺 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑀁 𑀯𑀺𑀤𑀺𑀢𑀁. 𑀬𑀤𑀪𑀺𑀚𑀸𑀦𑀁 𑀢𑀣𑀸𑀕𑀢𑁄𑀢𑀺 𑀬𑀁 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑀁 𑀚𑀸𑀦𑀦𑁆𑀢𑁄 𑀢𑀣𑀸𑀕𑀢𑁄. 𑀦𑁄 𑀅𑀦𑀬𑀁 𑀆𑀧𑀚𑁆𑀚𑀢𑀻𑀢𑀺 𑀅𑀯𑀺𑀤𑀺𑀢𑀦𑀺𑀩𑁆𑀩𑀸𑀦𑀸 𑀢𑀺𑀢𑁆𑀣𑀺𑀬𑀸 𑀯𑀺𑀬 𑀅𑀦𑀬𑀁 𑀤𑀼𑀓𑁆𑀔𑀁 𑀩𑁆𑀬𑀲𑀦𑀁 𑀦𑀸𑀧𑀚𑁆𑀚𑀢𑀺.

𑁩𑁭. 𑀇𑀤𑀸𑀦𑀺 𑀬𑀁 𑀢𑀁 𑀢𑀺𑀢𑁆𑀣𑀺𑀬𑀸 𑀅𑀕𑁆𑀕𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀲𑀦𑁆𑀢𑀺 𑀪𑀕𑁆𑀕𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀲𑁆𑀲𑀭𑀓𑀼𑀢𑁆𑀢𑀁 𑀩𑁆𑀭𑀳𑁆𑀫𑀓𑀼𑀢𑁆𑀢𑀦𑁆𑀢𑀺 𑀇𑀲𑁆𑀲𑀭𑀓𑀢𑀁 𑀩𑁆𑀭𑀳𑁆𑀫𑀓𑀢𑀁, 𑀇𑀲𑁆𑀲𑀭𑀦𑀺𑀫𑁆𑀫𑀺𑀢𑀁 𑀩𑁆𑀭𑀳𑁆𑀫𑀦𑀺𑀫𑁆𑀫𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀸 𑀏𑀯 𑀳𑀺 𑀏𑀢𑁆𑀣 𑀆𑀥𑀺𑀧𑀘𑁆𑀘𑀪𑀸𑀯𑁂𑀦 𑀇𑀲𑁆𑀲𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀆𑀘𑀭𑀺𑀬𑀓𑀦𑁆𑀢𑀺 𑀆𑀘𑀭𑀺𑀬𑀪𑀸𑀯𑀁 𑀆𑀘𑀭𑀺𑀬𑀯𑀸𑀤𑀁. 𑀢𑀢𑁆𑀣 𑀆𑀘𑀭𑀺𑀬𑀯𑀸𑀤𑁄 𑀅𑀕𑁆𑀕𑀜𑁆𑀜𑀁. 𑀅𑀕𑁆𑀕𑀜𑁆𑀜𑀁 𑀧𑀦 𑀏𑀢𑁆𑀣 𑀤𑁂𑀲𑀺𑀢𑀦𑁆𑀢𑀺 𑀓𑀢𑁆𑀯𑀸 𑀲𑁄 𑀅𑀕𑁆𑀕𑀜𑁆𑀜𑀁 𑀢𑁆𑀯𑁂𑀯 𑀯𑀼𑀢𑁆𑀢𑁄. 𑀓𑀣𑀁 𑀯𑀺𑀳𑀺𑀢𑀓𑀦𑁆𑀢𑀺 𑀓𑁂𑀦 𑀯𑀺𑀳𑀺𑀢𑀁 𑀓𑀺𑀦𑁆𑀢𑀺 𑀯𑀺𑀳𑀺𑀢𑀁. 𑀲𑁂𑀲𑀁 𑀩𑁆𑀭𑀳𑁆𑀫𑀚𑀸𑀮𑁂 𑀯𑀺𑀢𑁆𑀣𑀸𑀭𑀺𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁪𑁧. 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀦𑁆𑀢𑀺 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀫𑀽𑀮𑀁.

𑁪𑁭. 𑀅𑀲𑀢𑀸𑀢𑀺 ¶ 𑀅𑀯𑀺𑀚𑁆𑀚𑀫𑀸𑀦𑁂𑀦, 𑀅𑀲𑀁𑀯𑀺𑀚𑁆𑀚𑀫𑀸𑀦𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀼𑀘𑁆𑀙𑀸𑀢𑀺 𑀢𑀼𑀘𑁆𑀙𑁂𑀦 𑀅𑀦𑁆𑀢𑁄𑀲𑀸𑀭𑀯𑀺𑀭𑀳𑀺𑀢𑁂𑀦. 𑀫𑀼𑀲𑀸𑀢𑀺 𑀫𑀼𑀲𑀸𑀯𑀸𑀤𑁂𑀦. 𑀅𑀪𑀽𑀢𑁂𑀦𑀸𑀢𑀺 𑀪𑀽𑀢𑀢𑁆𑀣𑀯𑀺𑀭𑀳𑀺𑀢𑁂𑀦. 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀻𑀢𑀺 𑀅𑀪𑀺𑀆𑀘𑀺𑀓𑁆𑀔𑀦𑁆𑀢𑀺. 𑀯𑀺𑀧𑀭𑀻𑀢𑁄𑀢𑀺 𑀯𑀺𑀧𑀭𑀻𑀢𑀲𑀜𑁆𑀜𑁄 𑀯𑀺𑀧𑀭𑀻𑀢𑀘𑀺𑀢𑁆𑀢𑁄. 𑀪𑀺𑀓𑁆𑀔𑀯𑁄 𑀘𑀸𑀢𑀺 𑀦 𑀓𑁂𑀯𑀮𑀁 𑀲𑀫𑀡𑁄 𑀕𑁄𑀢𑀫𑁄𑀬𑁂𑀯, 𑀬𑁂 𑀘 𑀅𑀲𑁆𑀲 𑀅𑀦𑀼𑀲𑀺𑀝𑁆𑀞𑀺𑀁 𑀓𑀭𑁄𑀦𑁆𑀢𑀺, 𑀢𑁂 𑀪𑀺𑀓𑁆𑀔𑀽 𑀘 𑀯𑀺𑀧𑀭𑀻𑀢𑀸. 𑀅𑀣 𑀬𑀁 𑀲𑀦𑁆𑀥𑀸𑀬 𑀯𑀺𑀧𑀭𑀻𑀢𑁄𑀢𑀺 𑀯𑀤𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀲𑀫𑀡𑁄 𑀕𑁄𑀢𑀫𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀼𑀪𑀁 𑀯𑀺𑀫𑁄𑀓𑁆𑀔𑀦𑁆𑀢𑀺 𑀯𑀡𑁆𑀡𑀓𑀲𑀺𑀡𑀁. 𑀅𑀲𑀼𑀪𑀦𑁆𑀢𑁆𑀯𑁂𑀯𑀸𑀢𑀺 𑀲𑀼𑀪𑀜𑁆𑀘 𑀅𑀲𑀼𑀪𑀜𑁆𑀘 𑀲𑀩𑁆𑀩𑀁 𑀅𑀲𑀼𑀪𑀦𑁆𑀢𑀺 𑀏𑀯𑀁 𑀧𑀚𑀸𑀦𑀸𑀢𑀺. 𑀲𑀼𑀪𑀦𑁆𑀢𑁆𑀯𑁂𑀯 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀲𑀼𑀪𑀦𑁆𑀢𑀺 𑀏𑀯 𑀘 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀚𑀸𑀦𑀸𑀢𑀺, 𑀦 𑀅𑀲𑀼𑀪𑀁. 𑀪𑀺𑀓𑁆𑀔𑀯𑁄 𑀘𑀸𑀢𑀺 𑀬𑁂 𑀢𑁂 𑀏𑀯𑀁 𑀯𑀤𑀦𑁆𑀢𑀺, 𑀢𑁂𑀲𑀁 𑀪𑀺𑀓𑁆𑀔𑀯𑁄 𑀘 𑀅𑀦𑁆𑀢𑁂𑀯𑀸𑀲𑀺𑀓𑀲𑀫𑀡𑀸 𑀯𑀺𑀧𑀭𑀻𑀢𑀸. 𑀧𑀳𑁄𑀢𑀻𑀢𑀺 𑀲𑀫𑀢𑁆𑀣𑁄 𑀧𑀝𑀺𑀩𑀮𑁄.

𑁪𑁮. 𑀤𑀼𑀓𑁆𑀓𑀭𑀁 𑀔𑁄𑀢𑀺 𑀅𑀬𑀁 𑀧𑀭𑀺𑀩𑁆𑀩𑀸𑀚𑀓𑁄 𑀬𑀤𑀺𑀤𑀁 ‘‘𑀏𑀯𑀁𑀧𑀲𑀦𑁆𑀦𑁄 𑀅𑀳𑀁, 𑀪𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳, 𑀢𑀁 𑀲𑀸𑀞𑁂𑀬𑁆𑀬𑁂𑀦 𑀓𑁄𑀳𑀜𑁆𑀜𑁂𑀦 𑀆𑀳. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀲𑀫𑀡𑁄 𑀕𑁄𑀢𑀫𑁄 𑀫𑀬𑁆𑀳𑀁 𑀏𑀢𑁆𑀢𑀓𑀁 ¶ 𑀥𑀫𑁆𑀫𑀓𑀣𑀁 ¶ 𑀓𑀣𑁂𑀲𑀺, 𑀢𑀫𑀳𑀁 𑀲𑀼𑀢𑁆𑀯𑀸𑀧𑀺 𑀧𑀩𑁆𑀩𑀚𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀫𑀬𑀸 𑀏𑀢𑀲𑁆𑀲 𑀲𑀸𑀲𑀦𑀁 𑀧𑀝𑀺𑀧𑀦𑁆𑀦𑀲𑀤𑀺𑀲𑁂𑀦 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀢𑀢𑁄 𑀲𑁄 𑀲𑀸𑀞𑁂𑀬𑁆𑀬𑁂𑀦 𑀓𑁄𑀳𑀜𑁆𑀜𑁂𑀦 𑀏𑀯𑀫𑀸𑀳. 𑀢𑁂𑀦𑀲𑁆𑀲 𑀪𑀕𑀯𑀸 𑀫𑀫𑁆𑀫𑀁 𑀖𑀝𑁆𑀝𑁂𑀦𑁆𑀢𑁄 𑀯𑀺𑀬 ‘‘𑀤𑀼𑀓𑁆𑀓𑀭𑀁 𑀔𑁄 𑀏𑀢𑀁, 𑀪𑀕𑁆𑀕𑀯 𑀢𑀬𑀸 𑀅𑀜𑁆𑀜𑀤𑀺𑀝𑁆𑀞𑀺𑀓𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀁 𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑁂 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀲𑀸𑀥𑀼𑀓𑀫𑀦𑀼𑀭𑀓𑁆𑀔𑀸𑀢𑀺 𑀲𑀼𑀝𑁆𑀞𑀼 𑀅𑀦𑀼𑀭𑀓𑁆𑀔.

𑀇𑀢𑀺 𑀪𑀕𑀯𑀸 𑀧𑀲𑀸𑀤𑀫𑀢𑁆𑀢𑀸𑀦𑀼𑀭𑀓𑁆𑀔𑀡𑁂 𑀧𑀭𑀺𑀩𑁆𑀩𑀸𑀚𑀓𑀁 𑀦𑀺𑀬𑁄𑀚𑁂𑀲𑀺. 𑀲𑁄𑀧𑀺 𑀏𑀯𑀁 𑀫𑀳𑀦𑁆𑀢𑀁 𑀲𑀼𑀢𑁆𑀢𑀦𑁆𑀢𑀁 𑀲𑀼𑀢𑁆𑀯𑀸𑀧𑀺 𑀦𑀸𑀲𑀓𑁆𑀔𑀺 𑀓𑀺𑀮𑁂𑀲𑀓𑁆𑀔𑀬𑀁 𑀓𑀸𑀢𑀼𑀁. 𑀤𑁂𑀲𑀦𑀸 𑀧𑀦𑀲𑁆𑀲 𑀆𑀬𑀢𑀺𑀁 𑀯𑀸𑀲𑀦𑀸𑀬 𑀧𑀘𑁆𑀘𑀬𑁄 𑀅𑀳𑁄𑀲𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀧𑀸𑀣𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀤𑀼𑀫𑁆𑀩𑀭𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑀦𑀺𑀕𑁆𑀭𑁄𑀥𑀧𑀭𑀺𑀩𑁆𑀩𑀸𑀚𑀓𑀯𑀢𑁆𑀣𑀼𑀯𑀡𑁆𑀡𑀦𑀸

𑁪𑁯. 𑀏𑀯𑀁 ¶ ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀉𑀤𑀼𑀫𑁆𑀩𑀭𑀺𑀓𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀫𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸 𑁋 𑀧𑀭𑀺𑀩𑁆𑀩𑀸𑀚𑀓𑁄𑀢𑀺 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑁄. 𑀉𑀤𑀼𑀫𑁆𑀩𑀭𑀺𑀓𑀸𑀬 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁂𑀢𑀺 𑀉𑀤𑀼𑀫𑁆𑀩𑀭𑀺𑀓𑀸𑀬 𑀤𑁂𑀯𑀺𑀬𑀸 𑀲𑀦𑁆𑀢𑀓𑁂 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑁂. 𑀲𑀦𑁆𑀥𑀸𑀦𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀅𑀬𑀁 𑀧𑀦 𑀫𑀳𑀸𑀦𑀼𑀪𑀸𑀯𑁄 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀲𑀓𑀲𑀢𑀸𑀦𑀁 𑀅𑀕𑁆𑀕𑀧𑀼𑀭𑀺𑀲𑁄 𑀅𑀦𑀸𑀕𑀸𑀫𑀻 𑀪𑀕𑀯𑀢𑀸 𑀫𑀳𑀸𑀧𑀭𑀺𑀲𑀫𑀚𑁆𑀛𑁂 𑀏𑀯𑀁 𑀲𑀁𑀯𑀡𑁆𑀡𑀺𑀢𑁄 𑁋

‘‘𑀙𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀦𑁆𑀥𑀸𑀦𑁄 𑀕𑀳𑀧𑀢𑀺 𑀢𑀣𑀸𑀕𑀢𑁂 𑀦𑀺𑀝𑁆𑀞𑀗𑁆𑀕𑀢𑁄 𑀲𑀤𑁆𑀥𑀫𑁆𑀫𑁂 𑀇𑀭𑀺𑀬𑀢𑀺. 𑀓𑀢𑀫𑁂𑀳𑀺 𑀙𑀳𑀺? 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀥𑀫𑁆𑀫𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀗𑁆𑀖𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀅𑀭𑀺𑀬𑁂𑀦 𑀲𑀻𑀮𑁂𑀦 𑀅𑀭𑀺𑀬𑁂𑀦 𑀜𑀸𑀡𑁂𑀦 𑀅𑀭𑀺𑀬𑀸𑀬 𑀯𑀺𑀫𑀼𑀢𑁆𑀢𑀺𑀬𑀸. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀙𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀦𑁆𑀥𑀸𑀦𑁄 𑀕𑀳𑀧𑀢𑀺 𑀢𑀣𑀸𑀕𑀢𑁂 𑀦𑀺𑀝𑁆𑀞𑀗𑁆𑀕𑀢𑁄 𑀲𑀤𑁆𑀥𑀫𑁆𑀫𑁂 𑀇𑀭𑀺𑀬𑀢𑀻’’𑀢𑀺 (𑀅. 𑀦𑀺. 𑁬.𑁧𑁨𑁦-𑁧𑁩𑁯).

𑀲𑁄 𑀧𑀸𑀢𑁄𑀬𑁂𑀯 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀪𑀺𑀓𑁆𑀔𑀽𑀲𑀼 𑀯𑀺𑀳𑀸𑀭𑀁 𑀕𑀢𑁂𑀲𑀼 𑀖𑀭𑁂 𑀔𑀼𑀤𑁆𑀤𑀓𑀫𑀳𑀮𑁆𑀮𑀓𑀸𑀦𑀁 𑀤𑀸𑀭𑀓𑀸𑀦𑀁 𑀲𑀤𑁆𑀤𑁂𑀦 𑀉𑀩𑁆𑀩𑀸𑀴𑁆𑀳𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 ‘‘𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀦𑁆𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑀤𑀺𑀯𑀸 𑀤𑀺𑀯𑀲𑁆𑀲 𑀭𑀸𑀚𑀕𑀳𑀸 𑀦𑀺𑀓𑁆𑀔𑀫𑀻𑀢𑀺. 𑀢𑀢𑁆𑀣 𑀤𑀺𑀯𑀸 𑀤𑀺𑀯𑀲𑁆𑀲𑀸𑀢𑀺 𑀤𑀺𑀯𑀲𑀲𑁆𑀲 𑀤𑀺𑀯𑀸 𑀦𑀸𑀫 𑀫𑀚𑁆𑀛𑀦𑁆𑀳𑀸𑀢𑀺𑀓𑁆𑀓𑀫𑁄, 𑀢𑀲𑁆𑀫𑀺𑀁 𑀤𑀺𑀯𑀲𑀲𑁆𑀲𑀸𑀧𑀺 𑀤𑀺𑀯𑀸𑀪𑀽𑀢𑁂 𑀅𑀢𑀺𑀓𑁆𑀓𑀦𑁆𑀢𑀫𑀢𑁆𑀢𑁂 𑀫𑀚𑁆𑀛𑀦𑁆𑀳𑀺𑀓𑁂 𑀦𑀺𑀓𑁆𑀔𑀫𑀻𑀢𑀺 𑀅𑀢𑁆𑀣𑁄. 𑀧𑀝𑀺𑀲𑀮𑁆𑀮𑀻𑀦𑁄𑀢𑀺 𑀢𑀢𑁄 𑀢𑀢𑁄 𑀭𑀽𑀧𑀸𑀤𑀺𑀕𑁄𑀘𑀭𑀢𑁄 𑀘𑀺𑀢𑁆𑀢𑀁 𑀧𑀝𑀺𑀲𑀁𑀳𑀭𑀺𑀢𑁆𑀯𑀸 𑀦𑀺𑀮𑀻𑀦𑁄 𑀛𑀸𑀦𑀭𑀢𑀺𑀲𑁂𑀯𑀦𑀸𑀯𑀲𑁂𑀦 𑀏𑀓𑀻𑀪𑀸𑀯𑀁 𑀕𑀢𑁄. 𑀫𑀦𑁄𑀪𑀸𑀯𑀦𑀻𑀬𑀸𑀦𑀦𑁆𑀢𑀺 𑀫𑀦𑀯𑀟𑁆𑀠𑀓𑀸𑀦𑀁. 𑀬𑁂 𑀘 𑀆𑀯𑀚𑁆𑀚𑀢𑁄 𑀫𑀦𑀲𑀺𑀓𑀭𑁄𑀢𑁄 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀁 𑀳𑁄𑀢𑀺 𑀉𑀦𑁆𑀦𑀫𑀢𑀺 𑀯𑀟𑁆𑀠𑀢𑀺.

𑁫𑁦. 𑀉𑀦𑁆𑀦𑀸𑀤𑀺𑀦𑀺𑀬𑀸𑀢𑀺𑀆𑀤𑀻𑀦𑀺 𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑁂 𑀯𑀺𑀢𑁆𑀣𑀸𑀭𑀺𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁫𑁧. 𑀬𑀸𑀯𑀢𑀸𑀢𑀺 ¶ ¶ ¶ 𑀬𑀢𑁆𑀢𑀓𑀸. 𑀅𑀬𑀁 𑀢𑁂𑀲𑀁 𑀅𑀜𑁆𑀜𑀢𑀭𑁄𑀢𑀺 𑀅𑀬𑀁 𑀢𑁂𑀲𑀁 𑀅𑀩𑁆𑀪𑀦𑁆𑀢𑀭𑁄 𑀏𑀓𑁄 𑀲𑀸𑀯𑀓𑁄, 𑀪𑀕𑀯𑀢𑁄 𑀓𑀺𑀭 𑀲𑀸𑀯𑀓𑀸 𑀕𑀺𑀳𑀺𑀅𑀦𑀸𑀕𑀸𑀫𑀺𑀦𑁄𑀬𑁂𑀯 𑀧𑀜𑁆𑀘𑀲𑀢𑀸 𑀭𑀸𑀚𑀕𑀳𑁂 𑀧𑀝𑀺𑀯𑀲𑀦𑁆𑀢𑀺. 𑀬𑁂𑀲𑀁 𑀏𑀓𑁂𑀓𑀲𑁆𑀲 𑀧𑀜𑁆𑀘 𑀧𑀜𑁆𑀘 𑀉𑀧𑀸𑀲𑀓𑀲𑀢𑀸𑀦𑀺 𑀧𑀭𑀺𑀯𑀸𑀭𑀸, 𑀢𑁂 𑀲𑀦𑁆𑀥𑀸𑀬 ‘‘𑀅𑀬𑀁 𑀢𑁂𑀲𑀁 𑀅𑀜𑁆𑀜𑀢𑀭𑁄’’𑀢𑀺 𑀆𑀳. 𑀅𑀧𑁆𑀧𑁂𑀯 𑀦𑀸𑀫𑀸𑀢𑀺 𑀢𑀲𑁆𑀲 𑀉𑀧𑀲𑀗𑁆𑀓𑀫𑀦𑀁 𑀧𑀢𑁆𑀣𑀬𑀫𑀸𑀦𑁄 𑀆𑀳. 𑀧𑀢𑁆𑀣𑀦𑀸𑀓𑀸𑀭𑀡𑀁 𑀧𑀦 𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑁂 𑀯𑀼𑀢𑁆𑀢𑀫𑁂𑀯.

𑁫𑁨. 𑀏𑀢𑀤𑀯𑁄𑀘𑀸𑀢𑀺 𑀆𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂𑀬𑁂𑀯 𑀢𑁂𑀲𑀁 𑀓𑀣𑀸𑀬 𑀲𑀼𑀢𑀢𑁆𑀢𑀸 𑀏𑀢𑀁 𑀅𑀜𑁆𑀜𑀣𑀸 𑀔𑁄 𑀇𑀫𑁂𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀢𑀢𑁆𑀣 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀢𑀺 𑀤𑀲𑁆𑀲𑀦𑁂𑀦𑀧𑀺 𑀆𑀓𑀧𑁆𑀧𑁂𑀦𑀧𑀺 𑀓𑀼𑀢𑁆𑀢𑁂𑀦𑀧𑀺 𑀆𑀘𑀸𑀭𑁂𑀦𑀧𑀺 𑀯𑀺𑀳𑀸𑀭𑁂𑀦𑀧𑀺 𑀇𑀭𑀺𑀬𑀸𑀧𑀣𑁂𑀦𑀧𑀺 𑀅𑀜𑁆𑀜𑁂 𑀢𑀺𑀢𑁆𑀣𑀺𑀬𑀸𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸. 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫𑀸𑀢𑀺 𑀲𑀗𑁆𑀕𑀦𑁆𑀢𑁆𑀯𑀸 𑀲𑀫𑀸𑀕𑀦𑁆𑀢𑁆𑀯𑀸 𑀭𑀸𑀲𑀺 𑀳𑀼𑀢𑁆𑀯𑀸 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂. 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀻𑀢𑀺 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀕𑀸𑀫𑀽𑀧𑀘𑀸𑀭𑀢𑁄 𑀫𑀼𑀢𑁆𑀢𑀸𑀦𑀺 𑀤𑀽𑀭𑀲𑁂𑀦𑀸𑀲𑀦𑀸𑀦𑀺. 𑀧𑀦𑁆𑀢𑀸𑀦𑀻𑀢𑀺 𑀤𑀽𑀭𑀢𑀭𑀸𑀦𑀺 𑀫𑀦𑀼𑀲𑁆𑀲𑀽𑀧𑀘𑀸𑀭𑀯𑀺𑀭𑀳𑀺𑀢𑀸𑀦𑀺. 𑀅𑀧𑁆𑀧𑀲𑀤𑁆𑀤𑀸𑀦𑀻𑀢𑀺 𑀯𑀺𑀳𑀸𑀭𑀽𑀧𑀘𑀸𑀭𑁂𑀦 𑀕𑀘𑁆𑀙𑀢𑁄 𑀅𑀤𑁆𑀥𑀺𑀓𑀚𑀦𑀲𑁆𑀲𑀧𑀺 𑀲𑀤𑁆𑀤𑁂𑀦 𑀫𑀦𑁆𑀤𑀲𑀤𑁆𑀤𑀸𑀦𑀺. 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀻𑀢𑀺 𑀅𑀯𑀺𑀪𑀸𑀯𑀺𑀢𑀢𑁆𑀣𑁂𑀦 𑀦𑀺𑀕𑁆𑀖𑁄𑀲𑁂𑀦 𑀫𑀦𑁆𑀤𑀦𑀺𑀕𑁆𑀖𑁄𑀲𑀸𑀦𑀺. 𑀯𑀺𑀚𑀦𑀯𑀸𑀢𑀸𑀦𑀻𑀢𑀺 𑀅𑀦𑁆𑀢𑁄𑀲𑀜𑁆𑀘𑀸𑀭𑀺𑀦𑁄 𑀚𑀦𑀲𑁆𑀲 𑀯𑀸𑀢𑁂𑀦 𑀯𑀺𑀕𑀢𑀯𑀸𑀢𑀸𑀦𑀺. 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀻𑀢𑀺 𑀫𑀦𑀼𑀲𑁆𑀲𑀸𑀦𑀁 𑀭𑀳𑀲𑁆𑀲𑀓𑀭𑀡𑀲𑁆𑀲 𑀬𑀼𑀢𑁆𑀢𑀸𑀦𑀺 𑀅𑀦𑀼𑀘𑁆𑀙𑀯𑀺𑀓𑀸𑀦𑀺. 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀻𑀢𑀺 𑀏𑀓𑀻𑀪𑀸𑀯𑀲𑁆𑀲 𑀅𑀦𑀼𑀭𑀽𑀧𑀸𑀦𑀺. 𑀇𑀢𑀺 𑀲𑀦𑁆𑀥𑀸𑀦𑁄 𑀕𑀳𑀧𑀢𑀺 ‘‘𑀅𑀳𑁄 𑀫𑀫 𑀲𑀢𑁆𑀣𑀸 𑀬𑁄 𑀏𑀯𑀭𑀽𑀧𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀝𑀺𑀲𑁂𑀯𑀢𑀻’’𑀢𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀉𑀢𑁆𑀢𑀫𑀗𑁆𑀕𑁂 𑀲𑀺𑀭𑀲𑁆𑀫𑀺𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 𑀦𑀺𑀲𑀻𑀤𑀺.

𑁫𑁩. 𑀏𑀯𑀁 𑀯𑀼𑀢𑁆𑀢𑁂𑀢𑀺 𑀏𑀯𑀁 𑀲𑀦𑁆𑀥𑀸𑀦𑁂𑀦 𑀕𑀳𑀧𑀢𑀺𑀦𑀸 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁂𑀦 𑀯𑀼𑀢𑁆𑀢𑁂. 𑀦𑀺𑀕𑁆𑀭𑁄𑀥𑁄 𑀧𑀭𑀺𑀩𑁆𑀩𑀸𑀚𑀓𑁄 𑀅𑀬𑀁 𑀕𑀳𑀧𑀢𑀺 𑀫𑀫 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑁄𑀧𑀺 𑀅𑀢𑁆𑀢𑀦𑁄 𑀲𑀢𑁆𑀣𑀸𑀭𑀁𑀬𑁂𑀯 𑀣𑁄𑀫𑁂𑀢𑀺 𑀉𑀓𑁆𑀓𑀁𑀲𑀢𑀺, 𑀅𑀫𑁆𑀳𑁂 𑀧𑀦 𑀅𑀢𑁆𑀣𑀻𑀢𑀺𑀧𑀺 𑀦 𑀫𑀜𑁆𑀜𑀢𑀺, 𑀏𑀢𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑀓𑁄𑀧𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀉𑀧𑀭𑀺 𑀧𑀸𑀢𑁂𑀲𑁆𑀲𑀸𑀫𑀻𑀢𑀺 𑀲𑀦𑁆𑀥𑀸𑀦𑀁 𑀕𑀳𑀧𑀢𑀺𑀁 𑀏𑀢𑀤𑀯𑁄𑀘.

𑀬𑀕𑁆𑀖𑁂𑀢𑀺 𑀘𑁄𑀤𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀚𑀸𑀦𑁂𑀬𑁆𑀬𑀸𑀲𑀻𑀢𑀺 𑀩𑀼𑀚𑁆𑀛𑁂𑀬𑁆𑀬𑀸𑀲𑀺 𑀧𑀲𑁆𑀲𑁂𑀬𑁆𑀬𑀸𑀲𑀺. 𑀓𑁂𑀦 𑀲𑀫𑀡𑁄 𑀕𑁄𑀢𑀫𑁄 𑀲𑀤𑁆𑀥𑀺𑀁 𑀲𑀮𑁆𑀮𑀧𑀢𑀻𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀓𑁂𑀦 ¶ 𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑀲𑀫𑀡𑁄 𑀕𑁄𑀢𑀫𑁄 𑀲𑀮𑁆𑀮𑀧𑀢𑀺 𑀯𑀤𑀢𑀺 𑀪𑀸𑀲𑀢𑀺. 𑀓𑀺𑀁 ¶ 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀬𑀤𑀺 𑀓𑀺𑀜𑁆𑀘𑀺 𑀲𑀮𑁆𑀮𑀸𑀧𑀓𑀸𑀭𑀡𑀁 𑀪𑀯𑁂𑀬𑁆𑀬, 𑀬𑀤𑀺 𑀯𑀸 𑀓𑁄𑀘𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑀁 𑀲𑀮𑁆𑀮𑀸𑀧𑀢𑁆𑀣𑀺𑀓𑁄 𑀕𑀘𑁆𑀙𑁂𑀬𑁆𑀬, 𑀲𑀮𑁆𑀮𑀧𑁂𑀬𑁆𑀬, 𑀦 𑀧𑀦 𑀓𑀸𑀭𑀡𑀁 𑀅𑀢𑁆𑀣𑀺, 𑀦 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀓𑁄𑀘𑀺 𑀕𑀘𑁆𑀙𑀢𑀺, 𑀲𑁆𑀯𑀸𑀬𑀁 𑀓𑁂𑀦 𑀲𑀫𑀡𑁄 𑀕𑁄𑀢𑀫𑁄 𑀲𑀤𑁆𑀥𑀺𑀁 𑀲𑀮𑁆𑀮𑀧𑀢𑀺, 𑀅𑀲𑀮𑁆𑀮𑀧𑀦𑁆𑀢𑁄 𑀓𑀣𑀁 𑀉𑀦𑁆𑀦𑀸𑀤𑀻 𑀪𑀯𑀺𑀲𑁆𑀲𑀢𑀻’’𑀢𑀺.

𑀲𑀸𑀓𑀘𑁆𑀙𑀦𑁆𑀢𑀺 𑀲𑀁𑀲𑀦𑁆𑀤𑀦𑀁. 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀦𑁆𑀢𑀺 𑀉𑀢𑁆𑀢𑀭𑀧𑀘𑁆𑀘𑀼𑀢𑁆𑀢𑀭𑀦𑀬𑁂𑀦 𑀜𑀸𑀡𑀩𑁆𑀬𑀢𑁆𑀢𑀪𑀸𑀯𑀁. 𑀲𑀼𑀜𑁆𑀜𑀸𑀕𑀸𑀭𑀳𑀢𑀸𑀢𑀺 ¶ 𑀲𑀼𑀜𑁆𑀜𑀸𑀕𑀸𑀭𑁂𑀲𑀼 𑀦𑀝𑁆𑀞𑀸, 𑀲𑀫𑀡𑁂𑀦 𑀳𑀺 𑀕𑁄𑀢𑀫𑁂𑀦 𑀩𑁄𑀥𑀺𑀫𑀽𑀮𑁂 𑀅𑀧𑁆𑀧𑀫𑀢𑁆𑀢𑀺𑀓𑀸 𑀧𑀜𑁆𑀜𑀸 𑀅𑀥𑀺𑀕𑀢𑀸, 𑀲𑀸𑀧𑀺𑀲𑁆𑀲 𑀲𑀼𑀜𑁆𑀜𑀸𑀕𑀸𑀭𑁂𑀲𑀼 𑀏𑀓𑀓𑀲𑁆𑀲 𑀦𑀺𑀲𑀻𑀤𑀢𑁄 𑀦𑀝𑁆𑀞𑀸. 𑀬𑀤𑀺 𑀧𑀦 𑀫𑀬𑀁 𑀯𑀺𑀬 𑀕𑀡𑀲𑀗𑁆𑀕𑀡𑀺𑀓𑀁 𑀓𑀢𑁆𑀯𑀸 𑀦𑀺𑀲𑀻𑀤𑁂𑀬𑁆𑀬, 𑀦𑀸𑀲𑁆𑀲 𑀧𑀜𑁆𑀜𑀸 𑀦𑀲𑁆𑀲𑁂𑀬𑁆𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀧𑀭𑀺𑀲𑀸𑀯𑀘𑀭𑁄𑀢𑀺 𑀅𑀯𑀺𑀲𑀸𑀭𑀤𑀢𑁆𑀢𑀸 𑀧𑀭𑀺𑀲𑀁 𑀑𑀢𑀭𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀦𑀸𑀮𑀁 𑀲𑀮𑁆𑀮𑀸𑀧𑀸𑀬𑀸𑀢𑀺 𑀦 𑀲𑀫𑀢𑁆𑀣𑁄 𑀲𑀮𑁆𑀮𑀸𑀧𑀁 𑀓𑀸𑀢𑀼𑀁. 𑀅𑀦𑁆𑀢𑀫𑀦𑁆𑀢𑀸𑀦𑁂𑀯𑀸𑀢𑀺 𑀓𑁄𑀘𑀺 𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑁂𑀬𑁆𑀬𑀸𑀢𑀺 𑀧𑀜𑁆𑀳𑀸𑀪𑀻𑀢𑁄 𑀅𑀦𑁆𑀢𑀫𑀦𑁆𑀢𑀸𑀦𑁂𑀯 𑀧𑀦𑁆𑀢𑀲𑁂𑀦𑀸𑀲𑀦𑀸𑀦𑀺 𑀲𑁂𑀯𑀢𑀺. 𑀕𑁄𑀓𑀸𑀡𑀸𑀢𑀺 𑀏𑀓𑀓𑁆𑀔𑀺𑀳𑀢𑀸 𑀓𑀸𑀡𑀕𑀸𑀯𑀻. 𑀲𑀸 𑀓𑀺𑀭 𑀧𑀭𑀺𑀬𑀦𑁆𑀢𑀘𑀸𑀭𑀺𑀦𑀻 𑀳𑁄𑀢𑀺, 𑀅𑀦𑁆𑀢𑀫𑀦𑁆𑀢𑀸𑀦𑁂𑀯 𑀲𑁂𑀯𑀢𑀺. 𑀲𑀸 𑀓𑀺𑀭 𑀓𑀸𑀡𑀓𑁆𑀔𑀺𑀪𑀸𑀯𑁂𑀦 𑀯𑀦𑀦𑁆𑀢𑀸𑀪𑀺𑀫𑀼𑀔𑀻𑀧𑀺 𑀦 𑀲𑀓𑁆𑀓𑁄𑀢𑀺 𑀪𑀯𑀺𑀢𑀼𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀧𑀢𑁆𑀢𑁂𑀦 𑀯𑀸 𑀲𑀸𑀔𑀸𑀬 𑀯𑀸 𑀓𑀡𑁆𑀝𑀓𑁂𑀦 𑀯𑀸 𑀧𑀳𑀸𑀭𑀲𑁆𑀲 𑀪𑀸𑀬𑀢𑀺. 𑀕𑀼𑀦𑁆𑀦𑀁 𑀅𑀪𑀺𑀫𑀼𑀔𑀻𑀧𑀺 𑀦 𑀲𑀓𑁆𑀓𑁄𑀢𑀺 𑀪𑀯𑀺𑀢𑀼𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑀺𑀗𑁆𑀕𑁂𑀦 𑀯𑀸 𑀓𑀡𑁆𑀡𑁂𑀦 𑀯𑀸 𑀯𑀸𑀮𑁂𑀦 𑀯𑀸 𑀧𑀳𑀸𑀭𑀲𑁆𑀲 𑀪𑀸𑀬𑀢𑀺. 𑀇𑀗𑁆𑀖𑀸𑀢𑀺 𑀘𑁄𑀤𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀲𑀁𑀲𑀸𑀤𑁂𑀬𑁆𑀬𑀸𑀫𑀸𑀢𑀺 𑀏𑀓𑀧𑀜𑁆𑀳𑀧𑀼𑀘𑁆𑀙𑀦𑁂𑀦𑁂𑀯 𑀲𑀁𑀲𑀸𑀤𑀦𑀁 𑀯𑀺𑀲𑀸𑀤𑀫𑀸𑀧𑀦𑁆𑀦𑀁 𑀓𑀭𑁂𑀬𑁆𑀬𑀸𑀫. 𑀢𑀼𑀘𑁆𑀙𑀓𑀼𑀫𑁆𑀪𑀻𑀯 𑀦𑀦𑁆𑀢𑀺 𑀭𑀺𑀢𑁆𑀢𑀖𑀝𑀁 𑀯𑀺𑀬 𑀦𑀁. 𑀑𑀭𑁄𑀥𑁂𑀬𑁆𑀬𑀸𑀫𑀸𑀢𑀺 𑀯𑀺𑀦𑀦𑁆𑀥𑁂𑀬𑁆𑀬𑀸𑀫. 𑀧𑀽𑀭𑀺𑀢𑀖𑀝𑁄 𑀳𑀺 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀦 𑀲𑀼𑀯𑀺𑀦𑀦𑁆𑀥𑀦𑀻𑀬𑁄 𑀳𑁄𑀢𑀺. 𑀭𑀺𑀢𑁆𑀢𑀓𑁄 𑀬𑀣𑀸𑀭𑀼𑀘𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀲𑀓𑁆𑀓𑀸 𑀳𑁄𑀢𑀺 𑀯𑀺𑀦𑀦𑁆𑀥𑀺𑀢𑀼𑀁, 𑀏𑀯𑀫𑁂𑀯 𑀳𑀢𑀧𑀜𑁆𑀜𑀢𑀸𑀬 𑀭𑀺𑀢𑁆𑀢𑀓𑀼𑀫𑁆𑀪𑀺𑀲𑀤𑀺𑀲𑀁 𑀲𑀫𑀡𑀁 𑀕𑁄𑀢𑀫𑀁 𑀯𑀸𑀤𑀯𑀺𑀦𑀦𑁆𑀥𑀦𑁂𑀦 𑀲𑀫𑀦𑁆𑀢𑀸 𑀯𑀺𑀦𑀦𑁆𑀥𑀺𑀲𑁆𑀲𑀸𑀫𑀸𑀢𑀺 𑀯𑀤𑀢𑀺.

𑀇𑀢𑀺 𑀧𑀭𑀺𑀩𑁆𑀩𑀸𑀚𑀓𑁄 𑀲𑀢𑁆𑀣𑀼 𑀲𑀼𑀯𑀡𑁆𑀡𑀯𑀡𑁆𑀡𑀁 𑀦𑀮𑀸𑀝𑀫𑀡𑁆𑀟𑀮𑀁 𑀅𑀧𑀲𑁆𑀲𑀦𑁆𑀢𑁄 𑀤𑀲𑀩𑀮𑀲𑁆𑀲 𑀧𑀭𑀫𑁆𑀫𑀼𑀔𑀸 𑀅𑀢𑁆𑀢𑀦𑁄 𑀩𑀮𑀁 𑀤𑀻𑀧𑁂𑀦𑁆𑀢𑁄 𑀅𑀲𑀫𑁆𑀪𑀺𑀦𑁆𑀦𑀁 𑀔𑀢𑁆𑀢𑀺𑀬𑀓𑀼𑀫𑀸𑀭𑀁 𑀚𑀸𑀢𑀺𑀬𑀸 𑀖𑀝𑁆𑀝𑀬𑀦𑁆𑀢𑁄 𑀘𑀡𑁆𑀟𑀸𑀮𑀧𑀼𑀢𑁆𑀢𑁄 𑀯𑀺𑀬 𑀅𑀲𑀫𑁆𑀪𑀺𑀦𑁆𑀦𑀓𑁂𑀲𑀭𑀲𑀻𑀳𑀁 ¶ 𑀫𑀺𑀕𑀭𑀸𑀚𑀸𑀦𑀁 𑀣𑀸𑀫𑁂𑀦 𑀖𑀝𑁆𑀝𑁂𑀦𑁆𑀢𑁄 𑀚𑀭𑀲𑀺𑀗𑁆𑀕𑀸𑀮𑁄 𑀯𑀺𑀬 𑀘 𑀦𑀸𑀦𑀧𑁆𑀧𑀓𑀸𑀭𑀁 𑀢𑀼𑀘𑁆𑀙𑀕𑀚𑁆𑀚𑀺𑀢𑀁 𑀕𑀚𑁆𑀚𑀺. 𑀉𑀧𑀸𑀲𑀓𑁄𑀧𑀺 𑀘𑀺𑀦𑁆𑀢𑁂𑀲𑀺 ‘‘𑀅𑀬𑀁 𑀧𑀭𑀺𑀩𑁆𑀩𑀸𑀚𑀓𑁄 𑀅𑀢𑀺 𑀯𑀺𑀬 𑀕𑀚𑁆𑀚𑀢𑀺, 𑀅𑀯𑀻𑀘𑀺𑀨𑀼𑀲𑀦𑀢𑁆𑀣𑀸𑀬 𑀧𑀸𑀤𑀁, 𑀪𑀯𑀕𑁆𑀕𑀕𑁆𑀕𑀳𑀡𑀢𑁆𑀣𑀸𑀬 𑀳𑀢𑁆𑀣𑀁 𑀧𑀲𑀸𑀭𑀬𑀦𑁆𑀢𑁄 𑀯𑀺𑀬 𑀦𑀺𑀭𑀢𑁆𑀣𑀓𑀁 𑀯𑀸𑀬𑀫𑀢𑀺. 𑀲𑀘𑁂 𑀫𑁂 𑀲𑀢𑁆𑀣𑀸 𑀇𑀫𑀁 𑀞𑀸𑀦𑀫𑀸𑀕𑀘𑁆𑀙𑁂𑀬𑁆𑀬, 𑀇𑀫𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 ¶ 𑀬𑀸𑀯 𑀪𑀯𑀕𑁆𑀕𑀸 𑀉𑀲𑁆𑀲𑀺𑀢𑀁 𑀫𑀸𑀦𑀤𑁆𑀥𑀚𑀁 𑀞𑀸𑀦𑀲𑁄𑀯 𑀑𑀧𑀸𑀢𑁂𑀬𑁆𑀬𑀸’’𑀢𑀺.

𑁫𑁪. 𑀪𑀕𑀯𑀸𑀧𑀺 𑀢𑁂𑀲𑀁 𑀢𑀁 𑀓𑀣𑀸𑀲𑀮𑁆𑀮𑀸𑀧𑀁 𑀅𑀲𑁆𑀲𑁄𑀲𑀺𑀬𑁂𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀲𑁆𑀲𑁄𑀲𑀺 𑀔𑁄 𑀇𑀫𑀁 𑀓𑀣𑀸𑀲𑀮𑁆𑀮𑀸𑀧’’𑀦𑁆𑀢𑀺.

𑀲𑀼𑀫𑀸𑀕𑀥𑀸𑀬𑀸𑀢𑀺 𑀲𑀼𑀫𑀸𑀕𑀥𑀸 𑀦𑀸𑀫 𑀧𑁄𑀓𑁆𑀔𑀭𑀡𑀻, 𑀬𑀲𑁆𑀲𑀸 𑀢𑀻𑀭𑁂 𑀦𑀺𑀲𑀺𑀦𑁆𑀦𑁄 𑀅𑀜𑁆𑀜𑀢𑀭𑁄 𑀧𑀼𑀭𑀺𑀲𑁄 𑀧𑀤𑀼𑀫𑀦𑀸𑀴𑀦𑁆𑀢𑀭𑁂𑀳𑀺 𑀅𑀲𑀼𑀭𑀪𑀯𑀦𑀁 𑀧𑀯𑀺𑀲𑀦𑁆𑀢𑀁 𑀅𑀲𑀼𑀭𑀲𑁂𑀦𑀁 𑀅𑀤𑁆𑀤𑀲. 𑀫𑁄𑀭𑀦𑀺𑀯𑀸𑀧𑁄𑀢𑀺 𑀦𑀺𑀯𑀸𑀧𑁄 𑀯𑀼𑀘𑁆𑀘𑀢𑀺 𑀪𑀢𑁆𑀢𑀁, 𑀬𑀢𑁆𑀣 𑀫𑁄𑀭𑀸𑀦𑀁 𑀅𑀪𑀬𑁂𑀦 𑀲𑀤𑁆𑀥𑀺𑀁 𑀦𑀺𑀯𑀸𑀧𑁄 𑀤𑀺𑀦𑁆𑀦𑁄, 𑀢𑀁 𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀩𑁆𑀪𑁄𑀓𑀸𑀲𑁂𑀢𑀺 𑀅𑀗𑁆𑀕𑀡𑀝𑁆𑀞𑀸𑀦𑁂. 𑀅𑀲𑁆𑀲𑀸𑀲𑀧𑀢𑁆𑀢𑀸𑀢𑀺 𑀢𑀼𑀝𑁆𑀞𑀺𑀧𑀢𑁆𑀢𑀸 𑀲𑁄𑀫𑀦𑀲𑁆𑀲𑀧𑀢𑁆𑀢𑀸. 𑀅𑀚𑁆𑀛𑀸𑀲𑀬𑀦𑁆𑀢𑀺 𑀉𑀢𑁆𑀢𑀫𑀦𑀺𑀲𑁆𑀲𑀬𑀪𑀽𑀢𑀁. 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 ¶ 𑀧𑀼𑀭𑀸𑀡𑀩𑁆𑀭𑀳𑁆𑀫𑀘𑀭𑀺𑀬𑀲𑀗𑁆𑀔𑀸𑀢𑀁 𑀅𑀭𑀺𑀬𑀫𑀕𑁆𑀕𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀓𑁄 𑀦𑀸𑀫 𑀲𑁄, 𑀪𑀦𑁆𑀢𑁂, 𑀥𑀫𑁆𑀫𑁄 𑀬𑁂𑀦 𑀪𑀕𑀯𑀢𑀸 𑀲𑀸𑀯𑀓𑀸 𑀯𑀺𑀦𑀻𑀢𑀸 𑀅𑀚𑁆𑀛𑀸𑀲𑀬𑀸𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀪𑀽𑀢𑀁 𑀅𑀭𑀺𑀬𑀫𑀕𑁆𑀕𑀁 𑀧𑀽𑀭𑁂𑀢𑁆𑀯𑀸 𑀅𑀭𑀳𑀢𑁆𑀢𑀸𑀥𑀺𑀕𑀫𑀯𑀲𑁂𑀦 𑀅𑀲𑁆𑀲𑀸𑀲𑀧𑀢𑁆𑀢𑀸 𑀧𑀝𑀺𑀚𑀸𑀦𑀦𑁆𑀢𑀻’’𑀢𑀺.

𑀢𑀧𑁄𑀚𑀺𑀕𑀼𑀘𑁆𑀙𑀸𑀯𑀸𑀤𑀯𑀡𑁆𑀡𑀦𑀸

𑁫𑁫. 𑀯𑀺𑀧𑁆𑀧𑀓𑀢𑀸𑀢𑀺 𑀫𑀫𑀸𑀕𑀫𑀦𑀧𑀘𑁆𑀘𑀬𑀸 𑀅𑀦𑀺𑀝𑁆𑀞𑀺𑀢𑀸, 𑀯 𑀳𑀼𑀢𑁆𑀯𑀸 𑀞𑀺𑀢𑀸, 𑀓𑀣𑁂𑀳𑀺, 𑀅𑀳𑀫𑁂𑀢𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀫𑀻𑀢𑀺 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀺.

𑁫𑁬. 𑀤𑀼𑀚𑁆𑀚𑀸𑀦𑀁 𑀔𑁄𑀢𑀺 𑀪𑀕𑀯𑀸 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀅𑀬𑀁 𑀧𑀭𑀺𑀩𑁆𑀩𑀸𑀚𑀓𑁄 𑀫𑀬𑀸 𑀲𑀸𑀯𑀓𑀸𑀦𑀁 𑀤𑁂𑀲𑁂𑀢𑀩𑁆𑀩𑀁 𑀥𑀫𑁆𑀫𑀁 𑀢𑁂𑀳𑀺 𑀧𑀽𑀭𑁂𑀢𑀩𑁆𑀩𑀁 𑀧𑀝𑀺𑀧𑀢𑁆𑀢𑀺𑀁 𑀧𑀼𑀘𑁆𑀙𑀢𑀺, 𑀲𑀘𑀲𑁆𑀲𑀸𑀳𑀁 𑀆𑀤𑀺𑀢𑁄𑀯 𑀢𑀁 𑀓𑀣𑁂𑀲𑁆𑀲𑀸𑀫𑀺, 𑀓𑀣𑀺𑀢𑀫𑁆𑀧𑀺 𑀦𑀁 𑀦 𑀚𑀸𑀦𑀺𑀲𑁆𑀲𑀢𑀺, 𑀅𑀬𑀁 𑀧𑀦 𑀯𑀻𑀭𑀺𑀬𑁂𑀦 𑀧𑀸𑀧𑀚𑀺𑀕𑀼𑀘𑁆𑀙𑀦𑀯𑀸𑀤𑁄, 𑀳𑀦𑁆𑀤𑀸𑀳𑀁 𑀏𑀢𑀲𑁆𑀲𑁂𑀯 𑀯𑀺𑀲𑀬𑁂 𑀧𑀜𑁆𑀳𑀁 𑀧𑀼𑀘𑁆𑀙𑀸𑀧𑁂𑀢𑁆𑀯𑀸 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀮𑀤𑁆𑀥𑀺𑀬𑀸 𑀦𑀺𑀭𑀢𑁆𑀣𑀓𑀪𑀸𑀯𑀁 𑀤𑀲𑁆𑀲𑁂𑀫𑀺. 𑀅𑀣 𑀧𑀘𑁆𑀙𑀸 𑀇𑀫𑀁 𑀧𑀜𑁆𑀳𑀁 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑀼𑀚𑁆𑀚𑀸𑀦𑀁 𑀔𑁄 𑀏𑀢𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀓𑁂 𑀆𑀘𑀭𑀺𑀬𑀓𑁂𑀢𑀺 𑀅𑀢𑁆𑀢𑀦𑁄 𑀆𑀘𑀭𑀺𑀬𑀯𑀸𑀤𑁂. 𑀅𑀥𑀺𑀚𑁂𑀕𑀼𑀘𑁆𑀙𑁂𑀢𑀺 𑀯𑀻𑀭𑀺𑀬𑁂𑀦 𑀧𑀸𑀧𑀚𑀺𑀕𑀼𑀘𑁆𑀙𑀦𑀪𑀸𑀯𑁂. 𑀓𑀣𑀁 𑀲𑀦𑁆𑀢𑀸𑀢𑀺 𑀓𑀣𑀁 𑀪𑀽𑀢𑀸. 𑀢𑀧𑁄𑀚𑀺𑀕𑀼𑀘𑁆𑀙𑀸𑀢𑀺 𑀯𑀻𑀭𑀺𑀬𑁂𑀦 𑀧𑀸𑀧𑀚𑀺𑀕𑀼𑀘𑁆𑀙𑀸 𑀧𑀸𑀧𑀯𑀺𑀯𑀚𑁆𑀚𑀦𑀸. 𑀧𑀭𑀺𑀧𑀼𑀡𑁆𑀡𑀸𑀢𑀺 𑀧𑀭𑀺𑀲𑀼𑀤𑁆𑀥𑀸. 𑀓𑀣𑀁 ¶ 𑀅𑀧𑀭𑀺𑀧𑀼𑀡𑁆𑀡𑀸𑀢𑀺 𑀓𑀣𑀁 𑀅𑀧𑀭𑀺𑀲𑀼𑀤𑁆𑀥𑀸 𑀳𑁄𑀢𑀻𑀢𑀺 𑀏𑀯𑀁 𑀧𑀼𑀘𑁆𑀙𑀸𑀢𑀺. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑁄 𑀦𑀸𑀫.

𑁫𑁭. 𑀅𑀧𑁆𑀧𑀲𑀤𑁆𑀤𑁂 ¶ 𑀓𑀢𑁆𑀯𑀸𑀢𑀺 𑀦𑀺𑀭𑀯𑁂 𑀅𑀧𑁆𑀧𑀲𑀤𑁆𑀤𑁂 𑀓𑀢𑁆𑀯𑀸. 𑀲𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀫𑀡𑁄 𑀕𑁄𑀢𑀫𑁄 𑀏𑀓𑀁 𑀧𑀜𑁆𑀳𑀫𑁆𑀧𑀺 𑀦 𑀓𑀣𑁂𑀢𑀺, 𑀲𑀮𑁆𑀮𑀸𑀧𑀓𑀣𑀸𑀧𑀺𑀲𑁆𑀲 𑀅𑀢𑀺𑀩𑀳𑀼𑀓𑀸 𑀦𑀢𑁆𑀣𑀺, 𑀇𑀫𑁂 𑀧𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀫𑀡𑀁 𑀕𑁄𑀢𑀫𑀁 𑀅𑀦𑀼𑀯𑀢𑁆𑀢𑀦𑁆𑀢𑀺 𑀘𑁂𑀯 𑀧𑀲𑀁𑀲𑀦𑁆𑀢𑀺 𑀘, 𑀳𑀦𑁆𑀤𑀸𑀳𑀁 𑀇𑀫𑁂 𑀦𑀺𑀲𑁆𑀲𑀤𑁆𑀤𑁂 𑀓𑀢𑁆𑀯𑀸 𑀲𑀬𑀁 𑀓𑀣𑁂𑀫𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀧𑁆𑀧𑀲𑀤𑁆𑀤𑁂 𑀓𑀢𑁆𑀯𑀸’’𑀢𑀺. ‘‘𑀢𑀧𑁄𑀚𑀺𑀕𑀼𑀘𑁆𑀙𑀯𑀸𑀤𑀸’’𑀢𑀺𑀆𑀤𑀻𑀲𑀼 𑀢𑀧𑁄𑀚𑀺𑀕𑀼𑀘𑁆𑀙𑀁 𑀯𑀤𑀸𑀫, 𑀫𑀦𑀲𑀸𑀧𑀺 𑀢𑀫𑁂𑀯 𑀲𑀸𑀭𑀢𑁄 𑀕𑀳𑁂𑀢𑁆𑀯𑀸 𑀯𑀺𑀘𑀭𑀸𑀫, 𑀓𑀸𑀬𑁂𑀦𑀧𑀺𑀫𑁆𑀳𑀸 𑀢𑀫𑁂𑀯 𑀅𑀮𑁆𑀮𑀻𑀦𑀸, 𑀦𑀸𑀦𑀧𑁆𑀧𑀓𑀸𑀭𑀓𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀸𑀫𑀸𑀢𑀺 𑀅𑀢𑁆𑀣𑁄.

𑀉𑀧𑀓𑁆𑀓𑀺𑀮𑁂𑀲𑀯𑀡𑁆𑀡𑀦𑀸

𑁫𑁮. 𑀢𑀧𑀲𑁆𑀲𑀻𑀢𑀺 𑀢𑀧𑀦𑀺𑀲𑁆𑀲𑀺𑀢𑀓𑁄. ‘‘𑀅𑀘𑁂𑀮𑀓𑁄’’𑀢𑀺𑀆𑀤𑀻𑀦𑀺 𑀲𑀻𑀳𑀦𑀸𑀤𑁂 (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁯𑁩) ¶ 𑀯𑀺𑀢𑁆𑀣𑀸𑀭𑀺𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀧𑀁 𑀲𑀫𑀸𑀤𑀺𑀬𑀢𑀻𑀢𑀺 𑀅𑀘𑁂𑀮𑀓𑀪𑀸𑀯𑀸𑀤𑀺𑀓𑀁 𑀢𑀧𑀁 𑀲𑀫𑁆𑀫𑀸 𑀆𑀤𑀺𑀬𑀢𑀺, 𑀤𑀴𑁆𑀳𑀁 𑀕𑀡𑁆𑀳𑀸𑀢𑀺. 𑀅𑀢𑁆𑀢𑀫𑀦𑁄 𑀳𑁄𑀢𑀻𑀢𑀺 𑀓𑁄 𑀅𑀜𑁆𑀜𑁄 𑀫𑀬𑀸 𑀲𑀤𑀺𑀲𑁄 𑀇𑀫𑀲𑁆𑀫𑀺𑀁 𑀢𑀧𑁂 𑀅𑀢𑁆𑀣𑀻𑀢𑀺 𑀢𑀼𑀝𑁆𑀞𑀫𑀦𑁄 𑀳𑁄𑀢𑀺. 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄𑀢𑀺 𑀅𑀮𑀫𑁂𑀢𑁆𑀢𑀸𑀯𑀢𑀸𑀢𑀺 𑀏𑀯𑀁 𑀧𑀭𑀺𑀬𑁄𑀲𑀺𑀢𑀲𑀗𑁆𑀓𑀧𑁆𑀧𑁄, 𑀇𑀤𑀜𑁆𑀘 𑀢𑀺𑀢𑁆𑀣𑀺𑀬𑀸𑀦𑀁 𑀯𑀲𑁂𑀦 𑀆𑀕𑀢𑀁. 𑀲𑀸𑀲𑀦𑀸𑀯𑀘𑀭𑁂𑀦𑀸𑀧𑀺 𑀧𑀦 𑀤𑀻𑀧𑁂𑀢𑀩𑁆𑀩𑀁. 𑀏𑀓𑀘𑁆𑀘𑁄 𑀳𑀺 𑀥𑀼𑀢𑀗𑁆𑀕𑀁 𑀲𑀫𑀸𑀤𑀺𑀬𑀢𑀺, 𑀲𑁄 𑀢𑁂𑀦𑁂𑀯 𑀥𑀼𑀢𑀗𑁆𑀕𑁂𑀦 𑀓𑁄 𑀅𑀜𑁆𑀜𑁄 𑀫𑀬𑀸 𑀲𑀤𑀺𑀲𑁄 𑀥𑀼𑀢𑀗𑁆𑀕𑀥𑀭𑁄𑀢𑀺 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑁄. 𑀢𑀧𑀲𑁆𑀲𑀺𑀦𑁄 𑀉𑀧𑀓𑁆𑀓𑀺𑀮𑁂𑀲𑁄 𑀳𑁄𑀢𑀻𑀢𑀺 𑀤𑀼𑀯𑀺𑀥𑀲𑁆𑀲𑀸𑀧𑁂𑀢𑀲𑁆𑀲 𑀢𑀧𑀲𑁆𑀲𑀺𑀦𑁄 𑀅𑀬𑀁 𑀉𑀧𑀓𑁆𑀓𑀺𑀮𑁂𑀲𑁄 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸𑀬𑀁 𑀢𑀧𑁄 𑀉𑀧𑀓𑁆𑀓𑀺𑀮𑁂𑀲𑁄 𑀳𑁄𑀢𑀻𑀢𑀺 𑀯𑀤𑀸𑀫𑀺.

𑀅𑀢𑁆𑀢𑀸𑀦𑀼𑀓𑁆𑀓𑀁𑀲𑁂𑀢𑀻𑀢𑀺 ‘‘𑀓𑁄 𑀫𑀬𑀸 𑀲𑀤𑀺𑀲𑁄 𑀅𑀢𑁆𑀣𑀻’’𑀢𑀺 𑀅𑀢𑁆𑀢𑀸𑀦𑀁 𑀉𑀓𑁆𑀓𑀁𑀲𑀢𑀺 𑀉𑀓𑁆𑀔𑀺𑀧𑀢𑀺. 𑀧𑀭𑀁 𑀯𑀫𑁆𑀪𑁂𑀢𑀻𑀢𑀺 ‘‘𑀅𑀬𑀁 𑀦 𑀫𑀸𑀤𑀺𑀲𑁄’’𑀢𑀺 𑀧𑀭𑀁 𑀲𑀁𑀳𑀸𑀭𑁂𑀢𑀺 𑀅𑀯𑀓𑁆𑀔𑀺𑀧𑀢𑀺.

𑀫𑀚𑁆𑀚𑀢𑀻𑀢𑀺 𑀫𑀸𑀦𑀫𑀤𑀓𑀭𑀡𑁂𑀦 𑀫𑀚𑁆𑀚𑀢𑀺. 𑀫𑀼𑀘𑁆𑀙𑀢𑀻𑀢𑀺 𑀫𑀼𑀘𑁆𑀙𑀺𑀢𑁄 𑀳𑁄𑀢𑀺 𑀕𑀥𑀺𑀢𑁄 𑀅𑀚𑁆𑀛𑀸𑀧𑀦𑁆𑀦𑁄. 𑀧𑀫𑀸𑀤𑀫𑀸𑀧𑀚𑁆𑀚𑀢𑀻𑀢𑀺 𑀏𑀢𑀤𑁂𑀯 𑀲𑀸𑀭𑀦𑁆𑀢𑀺 𑀧𑀫𑀸𑀤𑀫𑀸𑀧𑀚𑁆𑀚𑀢𑀺. 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄𑀧𑀺 𑀥𑀼𑀢𑀗𑁆𑀕𑀲𑀼𑀤𑁆𑀥𑀺𑀓𑁄 𑀳𑁄𑀢𑀺, 𑀦 𑀓𑀫𑁆𑀫𑀝𑁆𑀞𑀸𑀦𑀲𑀼𑀤𑁆𑀥𑀺𑀓𑁄. 𑀥𑀼𑀢𑀗𑁆𑀕𑀫𑁂𑀯 𑀅𑀭𑀳𑀢𑁆𑀢𑀁 𑀯𑀺𑀬 𑀲𑀸𑀭𑀢𑁄 𑀧𑀘𑁆𑀘𑁂𑀢𑀺.

𑁫𑁯. 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀦𑁆𑀢𑀺 ¶ 𑀏𑀢𑁆𑀣 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀮𑀩𑁆𑀪𑀦𑁆𑀢𑀻𑀢𑀺 ¶ 𑀮𑀸𑀪𑀸, 𑀢𑁂𑀬𑁂𑀯 𑀲𑀼𑀝𑁆𑀞𑀼 𑀓𑀢𑁆𑀯𑀸 𑀧𑀝𑀺𑀲𑀗𑁆𑀔𑀭𑀺𑀢𑁆𑀯𑀸 𑀮𑀤𑁆𑀥𑀸 𑀲𑀓𑁆𑀓𑀸𑀭𑁄, 𑀯𑀡𑁆𑀡𑀪𑀡𑀦𑀁 𑀲𑀺𑀮𑁄𑀓𑁄. 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀅𑀘𑁂𑀮𑀓𑀸𑀤𑀺𑀪𑀸𑀯𑀁 𑀢𑁂𑀭𑀲𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀁 𑀯𑀸 𑀦𑀺𑀲𑁆𑀲𑀸𑀬 𑀫𑀳𑀸𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 ‘‘𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻’’𑀢𑀺 𑀯𑀼𑀢𑁆𑀢𑁄. 𑀲𑁂𑀲𑀫𑁂𑀢𑁆𑀣 𑀧𑀼𑀭𑀺𑀫𑀯𑀸𑀭𑀦𑀬𑁂𑀦𑁂𑀯 𑀤𑀼𑀯𑀺𑀥𑀲𑁆𑀲𑀸𑀧𑀺 𑀢𑀧𑀲𑁆𑀲𑀺𑀦𑁄 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁.

𑁬𑁦. 𑀯𑁄𑀤𑀸𑀲𑀁 𑀆𑀧𑀚𑁆𑀚𑀢𑀻𑀢𑀺 𑀤𑁆𑀯𑁂𑀪𑀸𑀕𑀁 𑀆𑀧𑀚𑁆𑀚𑀢𑀺, 𑀤𑁆𑀯𑁂 𑀪𑀸𑀕𑁂 𑀓𑀭𑁄𑀢𑀺. 𑀔𑀫𑀢𑀻𑀢𑀺 𑀭𑀼𑀘𑁆𑀘𑀢𑀺. 𑀦𑀓𑁆𑀔𑀫𑀢𑀻𑀢𑀺 𑀦 𑀭𑀼𑀘𑁆𑀘𑀢𑀺. 𑀲𑀸𑀧𑁂𑀓𑁆𑀔𑁄 𑀧𑀚𑀳𑀢𑀻𑀢𑀺 𑀲𑀢𑀡𑁆𑀳𑁄 𑀧𑀚𑀳𑀢𑀺. 𑀓𑀣𑀁? 𑀧𑀸𑀢𑁄𑀯 𑀔𑀻𑀭𑀪𑀢𑁆𑀢𑀁 𑀪𑀼𑀢𑁆𑀢𑁄 𑀳𑁄𑀢𑀺. 𑀅𑀣𑀲𑁆𑀲 𑀫𑀁𑀲𑀪𑁄𑀚𑀦𑀁 𑀉𑀧𑀦𑁂𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 ‘‘𑀇𑀤𑀸𑀦𑀺 𑀏𑀯𑀭𑀽𑀧𑀁 𑀓𑀤𑀸 𑀮𑀪𑀺𑀲𑁆𑀲𑀸𑀫, 𑀲𑀘𑁂 𑀚𑀸𑀦𑁂𑀬𑁆𑀬𑀸𑀫, 𑀧𑀸𑀢𑁄𑀯 𑀔𑀻𑀭𑀪𑀢𑁆𑀢𑀁 𑀦 𑀪𑀼𑀜𑁆𑀚𑁂𑀬𑁆𑀬𑀸𑀫, 𑀓𑀺𑀁 𑀫𑀬𑀸 𑀲𑀓𑁆𑀓𑀸 𑀓𑀸𑀢𑀼𑀁, 𑀕𑀘𑁆𑀙 𑀪𑁄, 𑀢𑁆𑀯𑀫𑁂𑀯 𑀪𑀼𑀜𑁆𑀚𑀸’’𑀢𑀺 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀦𑁆𑀢𑁄 𑀯𑀺𑀬 𑀲𑀸𑀧𑁂𑀓𑁆𑀔𑁄 𑀧𑀚𑀳𑀢𑀺. 𑀕𑀥𑀺𑀢𑁄𑀢𑀺 𑀕𑁂𑀥𑀚𑀸𑀢𑁄. 𑀫𑀼𑀘𑁆𑀙𑀺𑀢𑁄𑀢𑀺 𑀩𑀮𑀯𑀢𑀡𑁆𑀳𑀸𑀬 𑀫𑀼𑀘𑁆𑀙𑀺𑀢𑁄 𑀲𑀁𑀫𑀼𑀝𑁆𑀞𑀲𑁆𑀲𑀢𑀻 𑀳𑀼𑀢𑁆𑀯𑀸. 𑀅𑀚𑁆𑀛𑀸𑀧𑀦𑁆𑀦𑁄𑀢𑀺 𑀆𑀫𑀺𑀲𑁂 𑀅𑀢𑀺𑀮𑀕𑁆𑀕𑁄, ‘‘𑀪𑀼𑀜𑁆𑀚𑀺𑀲𑁆𑀲𑀣, 𑀆𑀯𑀼𑀲𑁄’’𑀢𑀺 𑀥𑀫𑁆𑀫𑀦𑀺𑀫𑀦𑁆𑀢𑀦𑀫𑀢𑁆𑀢𑀫𑁆𑀧𑀺 𑀅𑀓𑀢𑁆𑀯𑀸 𑀫𑀳𑀦𑁆𑀢𑁂 𑀫𑀳𑀦𑁆𑀢𑁂 𑀓𑀩𑀴𑁂 𑀓𑀭𑁄𑀢𑀺. 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀻𑀢𑀺𑀆𑀤𑀻𑀦𑀯𑀫𑀢𑁆𑀢𑀫𑁆𑀧𑀺 𑀦 𑀧𑀲𑁆𑀲𑀢𑀺. 𑀅𑀦𑀺𑀲𑁆𑀲𑀭𑀡𑀧𑀜𑁆𑀜𑁄𑀢𑀺 𑀇𑀥 𑀫𑀢𑁆𑀢𑀜𑁆𑀜𑀼𑀢𑀸𑀦𑀺𑀲𑁆𑀲𑀭𑀡𑀧𑀘𑁆𑀘𑀯𑁂𑀓𑁆𑀔𑀡𑀧𑀭𑀺𑀪𑁄𑀕𑀫𑀢𑁆𑀢𑀫𑁆𑀧𑀺 ¶ 𑀦 𑀓𑀭𑁄𑀢𑀺. 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀦𑀺𑀓𑀦𑁆𑀢𑀺𑀳𑁂𑀢𑀽𑀢𑀺 𑀮𑀸𑀪𑀸𑀤𑀻𑀲𑀼 𑀢𑀡𑁆𑀳𑀸𑀳𑁂𑀢𑀼.

𑁬𑁧. 𑀲𑀁𑀪𑀓𑁆𑀔𑁂𑀢𑀻𑀢𑀺 𑀲𑀁𑀔𑀸𑀤𑀢𑀺. 𑀅𑀲𑀦𑀺𑀯𑀺𑀘𑀓𑁆𑀓𑀦𑁆𑀢𑀺 𑀯𑀺𑀘𑀓𑁆𑀓𑀲𑀡𑁆𑀞𑀸𑀦𑀸 𑀅𑀲𑀦𑀺𑀬𑁂𑀯. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀅𑀲𑀦𑀺𑀯𑀺𑀘𑀓𑁆𑀓𑀁 𑀇𑀫𑀲𑁆𑀲 𑀤𑀦𑁆𑀢𑀓𑀽𑀝𑀁 𑀫𑀽𑀮𑀩𑀻𑀚𑀸𑀤𑀻𑀲𑀼 𑀦 𑀓𑀺𑀜𑁆𑀘𑀺 𑀦 𑀲𑀁𑀪𑀼𑀜𑁆𑀚𑀢𑀺. 𑀅𑀣 𑀘 𑀧𑀦 𑀦𑀁 𑀲𑀫𑀡𑀧𑁆𑀧𑀯𑀸𑀤𑁂𑀦 𑀲𑀫𑀡𑁄𑀢𑀺 𑀲𑀜𑁆𑀚𑀸𑀦𑀦𑁆𑀢𑀻’’𑀢𑀺. 𑀏𑀯𑀁 𑀅𑀧𑀲𑀸𑀤𑁂𑀢𑀺 𑀅𑀯𑀓𑁆𑀔𑀺𑀧𑀢𑀺. 𑀇𑀤𑀁 𑀢𑀺𑀢𑁆𑀣𑀺𑀬𑀯𑀲𑁂𑀦 𑀆𑀕𑀢𑀁. 𑀪𑀺𑀓𑁆𑀔𑀼𑀯𑀲𑁂𑀦 𑀧𑀦𑁂𑀢𑁆𑀣 𑀅𑀬𑀁 𑀬𑁄𑀚𑀦𑀸, 𑀅𑀢𑁆𑀢𑀦𑀸 𑀥𑀼𑀢𑀗𑁆𑀕𑀥𑀭𑁄 𑀳𑁄𑀢𑀺, 𑀲𑁄 𑀅𑀜𑁆𑀜𑀁 𑀏𑀯𑀁 𑀅𑀧𑀲𑀸𑀤𑁂𑀢𑀺 ‘‘𑀓𑀺𑀁 𑀲𑀫𑀡𑀸 𑀦𑀸𑀫 𑀇𑀫𑁂 𑀲𑀫𑀡𑀫𑁆𑀳𑀸𑀢𑀺 𑀯𑀤𑀦𑁆𑀢𑀺, 𑀥𑀼𑀢𑀗𑁆𑀕𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, 𑀉𑀤𑁆𑀤𑁂𑀲𑀪𑀢𑁆𑀢𑀸𑀤𑀻𑀦𑀺 𑀧𑀭𑀺𑀬𑁂𑀲𑀦𑁆𑀢𑀸 𑀧𑀘𑁆𑀘𑀬𑀩𑀸𑀳𑀼𑀮𑁆𑀮𑀺𑀓𑀸 𑀯𑀺𑀘𑀭𑀦𑁆𑀢𑀻’’𑀢𑀺. 𑀮𑀽𑀔𑀸𑀚𑀻𑀯𑀺𑀦𑁆𑀢𑀺 𑀅𑀘𑁂𑀮𑀓𑀸𑀤𑀺𑀯𑀲𑁂𑀦 𑀯𑀸 𑀥𑀼𑀢𑀗𑁆𑀕𑀯𑀲𑁂𑀦 𑀯𑀸 𑀮𑀽𑀔𑀸𑀚𑀻𑀯𑀺𑀁. 𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀦𑁆𑀢𑀺 𑀧𑀭𑀲𑁆𑀲 𑀲𑀓𑁆𑀓𑀸𑀭𑀸𑀤𑀺𑀲𑀫𑁆𑀧𑀢𑁆𑀢𑀺𑀔𑀻𑀬𑀦𑀮𑀓𑁆𑀔𑀡𑀁 ¶ 𑀇𑀲𑁆𑀲𑀁, 𑀲𑀓𑁆𑀓𑀸𑀭𑀸𑀤𑀺𑀓𑀭𑀡𑀅𑀓𑁆𑀔𑀫𑀦𑀮𑀓𑁆𑀔𑀡𑀁 𑀫𑀘𑁆𑀙𑀭𑀺𑀬𑀜𑁆𑀘.

𑁬𑁨. 𑀆𑀧𑀸𑀣𑀓𑀦𑀺𑀲𑀸𑀤𑀻 ¶ 𑀳𑁄𑀢𑀻𑀢𑀺 𑀫𑀦𑀼𑀲𑁆𑀲𑀸𑀦𑀁 𑀆𑀧𑀸𑀣𑁂 𑀤𑀲𑁆𑀲𑀦𑀝𑁆𑀞𑀸𑀦𑁂 𑀦𑀺𑀲𑀻𑀤𑀢𑀺. 𑀬𑀢𑁆𑀣 𑀢𑁂 𑀧𑀲𑁆𑀲𑀦𑁆𑀢𑀺, 𑀢𑀢𑁆𑀣 𑀞𑀺𑀢𑁄 𑀯𑀕𑁆𑀕𑀼𑀮𑀺𑀯𑀢𑀁 𑀘𑀭𑀢𑀺, 𑀧𑀜𑁆𑀘𑀸𑀢𑀧𑀁 𑀢𑀧𑁆𑀧𑀢𑀺, 𑀏𑀓𑀧𑀸𑀤𑁂𑀦 𑀢𑀺𑀝𑁆𑀞𑀢𑀺, 𑀲𑀽𑀭𑀺𑀬𑀁 𑀦𑀫𑀲𑁆𑀲𑀢𑀺. 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄𑀧𑀺 𑀲𑀫𑀸𑀤𑀺𑀦𑁆𑀦𑀥𑀼𑀢𑀗𑁆𑀕𑁄 𑀲𑀩𑁆𑀩𑀭𑀢𑁆𑀢𑀺𑀁 𑀲𑀬𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀘𑀓𑁆𑀔𑀼𑀧𑀣𑁂 𑀢𑀧𑀁 𑀓𑀭𑁄𑀢𑀺, 𑀫𑀳𑀸𑀲𑀸𑀬𑀦𑁆𑀳𑁂𑀬𑁂𑀯 𑀘𑀻𑀯𑀭𑀓𑀼𑀝𑀺𑀁 𑀓𑀭𑁄𑀢𑀺, 𑀲𑀽𑀭𑀺𑀬𑁂 𑀉𑀕𑁆𑀕𑀢𑁂 𑀧𑀝𑀺𑀲𑀁𑀳𑀭𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀆𑀕𑀢𑀪𑀸𑀯𑀁 𑀜𑀢𑁆𑀯𑀸 𑀖𑀡𑁆𑀟𑀺𑀁 𑀧𑀳𑀭𑀺𑀢𑁆𑀯𑀸 𑀘𑀻𑀯𑀭𑀁 𑀫𑀢𑁆𑀣𑀓𑁂 𑀞𑀧𑁂𑀢𑁆𑀯𑀸 𑀘𑀗𑁆𑀓𑀫𑀁 𑀑𑀢𑀭𑀢𑀺, 𑀲𑀫𑁆𑀫𑀼𑀜𑁆𑀚𑀦𑀺𑀁 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀗𑁆𑀕𑀡𑀁 𑀲𑀫𑁆𑀫𑀚𑁆𑀚𑀢𑀺.

𑀅𑀢𑁆𑀢𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀕𑀼𑀡𑀁 𑀅𑀤𑀲𑁆𑀲𑀬𑀫𑀸𑀦𑁄𑀢𑀺 𑀏𑀢𑁆𑀣 𑀅-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁, 𑀤𑀲𑁆𑀲𑀬𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀇𑀤𑀫𑁆𑀧𑀺 𑀫𑁂 𑀢𑀧𑀲𑁆𑀫𑀺𑀦𑁆𑀢𑀺 𑀇𑀤𑀫𑁆𑀧𑀺 𑀓𑀫𑁆𑀫𑀁 𑀫𑀫𑁂𑀯 𑀢𑀧𑀲𑁆𑀫𑀺𑀁, 𑀧𑀘𑁆𑀘𑀢𑁆𑀢𑁂 𑀯𑀸 𑀪𑀼𑀫𑁆𑀫𑀁, 𑀇𑀤𑀫𑁆𑀧𑀺 𑀫𑀫 𑀢𑀧𑁄𑀢𑀺 𑀅𑀢𑁆𑀣𑁄. 𑀲𑁄 𑀳𑀺 𑀅𑀲𑀼𑀓𑀲𑁆𑀫𑀺𑀁 𑀞𑀸𑀦𑁂 𑀅𑀘𑁂𑀮𑀓𑁄 𑀅𑀢𑁆𑀣𑀺 𑀫𑀼𑀢𑁆𑀢𑀸𑀘𑀸𑀭𑁄𑀢𑀺𑀆𑀤𑀻𑀦𑀺 𑀲𑀼𑀢𑁆𑀯𑀸 𑀅𑀫𑁆𑀳𑀸𑀓𑀁 𑀏𑀲 𑀢𑀧𑁄, 𑀅𑀫𑁆𑀳𑀸𑀓𑀁 𑀲𑁄 𑀅𑀦𑁆𑀢𑁂𑀯𑀸𑀲𑀺𑀓𑁄𑀢𑀺𑀆𑀤𑀻𑀦𑀺 𑀪𑀡𑀢𑀺. 𑀅𑀲𑀼𑀓𑀲𑁆𑀫𑀺𑀁 𑀯𑀸 𑀧𑀦 𑀞𑀸𑀦𑁂 𑀧𑀁𑀲𑀼𑀓𑀽𑀮𑀺𑀓𑁄 𑀪𑀺𑀓𑁆𑀔𑀼 𑀅𑀢𑁆𑀣𑀻𑀢𑀺𑀆𑀤𑀻𑀦𑀺 𑀲𑀼𑀢𑁆𑀯𑀸 𑀅𑀫𑁆𑀳𑀸𑀓𑀁 𑀏𑀲 𑀢𑀧𑁄, 𑀅𑀫𑁆𑀳𑀸𑀓𑀁 𑀲𑁄 𑀅𑀦𑁆𑀢𑁂𑀯𑀸𑀲𑀺𑀓𑁄𑀢𑀺𑀆𑀤𑀻𑀦𑀺 𑀪𑀡𑀢𑀺.

𑀓𑀺𑀜𑁆𑀘𑀺𑀤𑁂𑀯𑀸𑀢𑀺 𑀓𑀺𑀜𑁆𑀘𑀺 𑀯𑀚𑁆𑀚𑀁 𑀤𑀺𑀝𑁆𑀞𑀺𑀕𑀢𑀁 𑀯𑀸. 𑀧𑀝𑀺𑀘𑁆𑀙𑀦𑁆𑀦𑀁 𑀲𑁂𑀯𑀢𑀻𑀢𑀺 𑀬𑀣𑀸 𑀅𑀜𑁆𑀜𑁂 𑀦 𑀚𑀸𑀦𑀦𑁆𑀢𑀺, 𑀏𑀯𑀁 𑀲𑁂𑀯𑀢𑀺. 𑀅𑀓𑁆𑀔𑀫𑀫𑀸𑀦𑀁 𑀆𑀳 𑀔𑀫𑀢𑀻𑀢𑀺 𑀅𑀭𑀼𑀘𑁆𑀘𑀫𑀸𑀦𑀁𑀬𑁂𑀯 𑀭𑀼𑀘𑁆𑀘𑀢𑀺 𑀫𑁂𑀢𑀺 𑀯𑀤𑀢𑀺. 𑀅𑀢𑁆𑀢𑀦𑀸 𑀓𑀢𑀁 𑀅𑀢𑀺𑀫𑀳𑀦𑁆𑀢𑀫𑁆𑀧𑀺 𑀯𑀚𑁆𑀚𑀁 𑀅𑀧𑁆𑀧𑀫𑀢𑁆𑀢𑀓𑀁 𑀓𑀢𑁆𑀯𑀸 𑀧𑀜𑁆𑀜𑀧𑁂𑀢𑀺, 𑀧𑀭𑁂𑀦 𑀓𑀢𑀁 𑀤𑀼𑀓𑁆𑀓𑀝𑀫𑀢𑁆𑀢𑀁 𑀯𑀻𑀢𑀺𑀓𑁆𑀓𑀫𑀫𑁆𑀧𑀺 𑀧𑀸𑀭𑀸𑀚𑀺𑀓𑀲𑀤𑀺𑀲𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀅𑀦𑀼𑀜𑁆𑀜𑁂𑀬𑁆𑀬𑀦𑁆𑀢𑀺 𑀅𑀦𑀼𑀚𑀸𑀦𑀺𑀢𑀩𑁆𑀩𑀁 𑀅𑀦𑀼𑀫𑁄𑀤𑀺𑀢𑀩𑁆𑀩𑀁.

𑁬𑁩. 𑀓𑁄𑀥𑀦𑁄 ¶ 𑀳𑁄𑀢𑀺 𑀉𑀧𑀦𑀸𑀳𑀻𑀢𑀺 𑀓𑀼𑀚𑁆𑀛𑀦𑀮𑀓𑁆𑀔𑀡𑁂𑀦 𑀓𑁄𑀥𑁂𑀦, 𑀯𑁂𑀭𑀅𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀮𑀓𑁆𑀔𑀡𑁂𑀦 𑀉𑀧𑀦𑀸𑀳𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄. 𑀫𑀓𑁆𑀔𑀻 𑀳𑁄𑀢𑀺 𑀧𑀴𑀸𑀲𑀻𑀢𑀺 𑀧𑀭𑀕𑀼𑀡𑀫𑀓𑁆𑀔𑀦𑀮𑀓𑁆𑀔𑀡𑁂𑀦 𑀫𑀓𑁆𑀔𑁂𑀦, 𑀬𑀼𑀕𑀕𑁆𑀕𑀸𑀳𑀮𑀓𑁆𑀔𑀡𑁂𑀦 𑀧𑀴𑀸𑀲𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄.

𑀇𑀲𑁆𑀲𑀼𑀓𑀻 𑀳𑁄𑀢𑀺 𑀫𑀘𑁆𑀙𑀭𑀻𑀢𑀺 𑀧𑀭𑀲𑀓𑁆𑀓𑀸𑀭𑀸𑀤𑀻𑀲𑀼 𑀉𑀲𑀽𑀬𑀦𑀮𑀓𑁆𑀔𑀡𑀸𑀬 𑀇𑀲𑁆𑀲𑀸𑀬, 𑀆𑀯𑀸𑀲𑀓𑀼𑀮𑀮𑀸𑀪𑀯𑀡𑁆𑀡𑀥𑀫𑁆𑀫𑁂𑀲𑀼 𑀫𑀘𑁆𑀙𑀭𑀸𑀬𑀦𑀮𑀓𑁆𑀔𑀡𑁂𑀦 𑀧𑀜𑁆𑀘𑀯𑀺𑀥𑀫𑀘𑁆𑀙𑁂𑀭𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀲𑀞𑁄 𑀳𑁄𑀢𑀺 𑀫𑀸𑀬𑀸𑀯𑀻𑀢𑀺 𑀓𑁂𑀭𑀸𑀝𑀺𑀓𑀮𑀓𑁆𑀔𑀡𑁂𑀦 𑀲𑀸𑀞𑁂𑀬𑁆𑀬𑁂𑀦, 𑀓𑀢𑀧𑁆𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸𑀬 𑀫𑀸𑀬𑀸𑀬 𑀘 𑀲𑀫𑀦𑁆𑀦𑀸𑀕𑀢𑁄 ¶ 𑀳𑁄𑀢𑀺. 𑀣𑀤𑁆𑀥𑁄 ¶ 𑀳𑁄𑀢𑀺 𑀅𑀢𑀺𑀫𑀸𑀦𑀻𑀢𑀺 𑀦𑀺𑀲𑁆𑀲𑀺𑀦𑁂𑀳𑀦𑀺𑀓𑁆𑀓𑀭𑀼𑀡𑀣𑀤𑁆𑀥𑀮𑀓𑁆𑀔𑀡𑁂𑀦 𑀣𑀫𑁆𑀪𑁂𑀦, 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀜𑁆𑀜𑀦𑀮𑀓𑁆𑀔𑀡𑁂𑀦 𑀅𑀢𑀺𑀫𑀸𑀦𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀧𑀸𑀧𑀺𑀘𑁆𑀙𑁄 𑀳𑁄𑀢𑀻𑀢𑀺 𑀅𑀲𑀦𑁆𑀢𑀲𑀫𑁆𑀪𑀸𑀯𑀦𑀧𑀢𑁆𑀣𑀦𑀮𑀓𑁆𑀔𑀡𑀸𑀬 𑀧𑀸𑀧𑀺𑀘𑁆𑀙𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀧𑀸𑀧𑀺𑀓𑀸𑀦𑀦𑁆𑀢𑀺 𑀢𑀸𑀲𑀁𑀬𑁂𑀯 𑀮𑀸𑀫𑀓𑀸𑀦𑀁 𑀇𑀘𑁆𑀙𑀸𑀦𑀁 𑀯𑀲𑀁 𑀕𑀢𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄𑀢𑀺 𑀦𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀬 𑀅𑀬𑀸𑀣𑀸𑀯𑀤𑀺𑀝𑁆𑀞𑀺𑀬𑀸 𑀉𑀧𑁂𑀢𑁄. 𑀅𑀦𑁆𑀢𑀕𑁆𑀕𑀸𑀳𑀺𑀓𑀸𑀬𑀸𑀢𑀺 𑀲𑀸𑀬𑁂𑀯 𑀤𑀺𑀝𑁆𑀞𑀺 𑀉𑀘𑁆𑀙𑁂𑀤𑀦𑁆𑀢𑀲𑁆𑀲 𑀕𑀳𑀺𑀢𑀢𑁆𑀢𑀸 ‘‘𑀅𑀦𑁆𑀢𑀕𑁆𑀕𑀸𑀳𑀺𑀓𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻𑀢𑀺𑀆𑀤𑀻𑀲𑀼 𑀲𑀬𑀁 𑀤𑀺𑀝𑁆𑀞𑀺 𑀲𑀦𑁆𑀤𑀺𑀝𑁆𑀞𑀺, 𑀲𑀦𑁆𑀤𑀺𑀝𑁆𑀞𑀺𑀫𑁂𑀯 𑀧𑀭𑀸𑀫𑀲𑀢𑀺 𑀕𑀳𑁂𑀢𑁆𑀯𑀸 𑀯𑀤𑀢𑀻𑀢𑀺 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻. 𑀆𑀥𑀸𑀦𑀁 𑀯𑀼𑀘𑁆𑀘𑀢𑀺 𑀤𑀴𑁆𑀳𑀁 𑀲𑀼𑀝𑁆𑀞𑀼 𑀞𑀧𑀺𑀢𑀁, 𑀢𑀣𑀸 𑀓𑀢𑁆𑀯𑀸 𑀕𑀡𑁆𑀳𑀸𑀢𑀻𑀢𑀺 𑀆𑀥𑀸𑀦𑀕𑁆𑀕𑀸𑀳𑀻. 𑀅𑀭𑀺𑀝𑁆𑀞𑁄 𑀯𑀺𑀬 𑀦 𑀲𑀓𑁆𑀓𑀸 𑀳𑁄𑀢𑀺 𑀧𑀝𑀺𑀦𑀺𑀲𑁆𑀲𑀚𑁆𑀚𑀸𑀧𑁂𑀢𑀼𑀦𑁆𑀢𑀺 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻. 𑀬𑀤𑀺𑀫𑁂𑀢𑀺 𑀬𑀤𑀺 𑀇𑀫𑁂.

𑀧𑀭𑀺𑀲𑀼𑀤𑁆𑀥𑀧𑀧𑀝𑀺𑀓𑀧𑁆𑀧𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁬𑁪. 𑀇𑀥, 𑀦𑀺𑀕𑁆𑀭𑁄𑀥, 𑀢𑀧𑀲𑁆𑀲𑀻𑀢𑀺 𑀏𑀯𑀁 𑀪𑀕𑀯𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀳𑀺 𑀕𑀳𑀺𑀢𑀮𑀤𑁆𑀥𑀺𑀁 𑀢𑁂𑀲𑀁 𑀭𑀓𑁆𑀔𑀺𑀢𑀁 𑀢𑀧𑀁 𑀲𑀩𑁆𑀩𑀫𑁂𑀯 𑀲𑀁𑀓𑀺𑀮𑀺𑀝𑁆𑀞𑀦𑁆𑀢𑀺 𑀉𑀧𑀓𑁆𑀓𑀺𑀮𑁂𑀲𑀧𑀸𑀴𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀭𑀺𑀲𑀼𑀤𑁆𑀥𑀧𑀸𑀴𑀺𑀤𑀲𑁆𑀲𑀦𑀢𑁆𑀣𑀁 𑀤𑁂𑀲𑀦𑀫𑀸𑀭𑀪𑀦𑁆𑀢𑁄 𑀇𑀥, 𑀦𑀺𑀕𑁆𑀭𑁄𑀥𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀦 𑀅𑀢𑁆𑀢𑀫𑀦𑁄’’𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀯𑀺𑀧𑀓𑁆𑀔𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀲𑀩𑁆𑀩𑀯𑀸𑀭𑁂𑀲𑀼 𑀘 𑀮𑀽𑀔𑀢𑀧𑀲𑁆𑀲𑀺𑀦𑁄 𑀘𑁂𑀯 𑀥𑀼𑀢𑀗𑁆𑀕𑀥𑀭𑀲𑁆𑀲 𑀘 𑀯𑀲𑁂𑀦 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀲𑁄 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀻𑀢𑀺 𑀏𑀯𑀁 𑀲𑁄 𑀢𑁂𑀦 𑀦 𑀅𑀢𑁆𑀢𑀫𑀦𑀢𑀸 𑀦 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑀪𑀸𑀯𑀲𑀗𑁆𑀔𑀸𑀢𑁂𑀦 𑀓𑀸𑀭𑀡𑁂𑀦 𑀧𑀭𑀺𑀲𑀼𑀤𑁆𑀥𑁄 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑁄 𑀳𑁄𑀢𑀺, 𑀉𑀢𑁆𑀢𑀭𑀺 𑀯𑀸𑀬𑀫𑀫𑀸𑀦𑁄 𑀓𑀫𑁆𑀫𑀝𑁆𑀞𑀸𑀦𑀲𑀼𑀤𑁆𑀥𑀺𑀓𑁄 𑀳𑀼𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁬𑁯. 𑀅𑀤𑁆𑀥𑀸 𑀔𑁄, 𑀪𑀦𑁆𑀢𑁂𑀢𑀺 𑀪𑀦𑁆𑀢𑁂 𑀏𑀯𑀁 𑀲𑀦𑁆𑀢𑁂 𑀏𑀓𑀁𑀲𑁂𑀦𑁂𑀯 𑀯𑀻𑀭𑀺𑀬𑁂𑀦 𑀧𑀸𑀧𑀚𑀺𑀕𑀼𑀘𑁆𑀙𑀦𑀯𑀸𑀤𑁄 𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀻𑀢𑀺 𑀅𑀦𑀼𑀚𑀸𑀦𑀸𑀢𑀺. 𑀇𑀢𑁄 𑀧𑀭𑀜𑁆𑀘 𑀅𑀕𑁆𑀕𑀪𑀸𑀯𑀁 𑀯𑀸 𑀲𑀸𑀭𑀪𑀸𑀯𑀁 𑀯𑀸 𑀅𑀚𑀸𑀦𑀦𑁆𑀢𑁄 𑀅𑀕𑁆𑀕𑀧𑁆𑀧𑀢𑁆𑀢𑀸 𑀲𑀸𑀭𑀧𑁆𑀧𑀢𑁆𑀢𑀸 𑀘𑀸𑀢𑀺 𑀆𑀳. 𑀅𑀣𑀲𑁆𑀲 𑀪𑀕𑀯𑀸 𑀲𑀸𑀭𑀧𑁆𑀧𑀢𑁆𑀢𑀪𑀸𑀯𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 𑀦 𑀔𑁄 𑀦𑀺𑀕𑁆𑀭𑁄𑀥𑀸𑀢𑀺𑀆𑀤𑀺𑀫𑀸𑀳 ¶ . 𑀧𑀧𑀝𑀺𑀓𑀧𑁆𑀧𑀢𑁆𑀢𑀸 𑀳𑁄𑀢𑀻𑀢𑀺 𑀲𑀸𑀭𑀯𑀢𑁄 𑀭𑀼𑀓𑁆𑀔𑀲𑁆𑀲 𑀲𑀸𑀭𑀁 𑀨𑁂𑀕𑁆𑀕𑀼𑀁 𑀢𑀘𑀜𑁆𑀘 𑀅𑀢𑀺𑀓𑁆𑀓𑀫𑁆𑀫 𑀩𑀳𑀺𑀧𑀧𑀝𑀺𑀓𑀲𑀤𑀺𑀲𑀸 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀧𑀭𑀺𑀲𑀼𑀤𑁆𑀥𑀢𑀘𑀧𑁆𑀧𑀢𑁆𑀢𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁭𑁦. 𑀅𑀕𑁆𑀕𑀁 ¶ ¶ 𑀧𑀸𑀧𑁂𑀢𑀽𑀢𑀺 𑀤𑁂𑀲𑀦𑀸𑀯𑀲𑁂𑀦 𑀅𑀕𑁆𑀕𑀁 𑀧𑀸𑀧𑁂𑀢𑁆𑀯𑀸 𑀤𑁂𑀲𑁂𑀢𑀼, 𑀲𑀸𑀭𑀁 𑀧𑀸𑀧𑁂𑀢𑁆𑀯𑀸 𑀤𑁂𑀲𑁂𑀢𑀽𑀢𑀺 𑀤𑀲𑀩𑀮𑀁 𑀬𑀸𑀘𑀢𑀺. 𑀘𑀸𑀢𑀼𑀬𑀸𑀫𑀲𑀁𑀯𑀭𑀲𑀁𑀯𑀼𑀢𑁄𑀢𑀺 𑀘𑀢𑀼𑀩𑁆𑀩𑀺𑀥𑁂𑀦 𑀲𑀁𑀯𑀭𑁂𑀦 𑀧𑀺𑀳𑀺𑀢𑁄. 𑀦 𑀧𑀸𑀡𑀁 𑀅𑀢𑀺𑀧𑀸𑀢𑁂𑀢𑀻𑀢𑀺 𑀧𑀸𑀡𑀁 𑀦 𑀳𑀦𑀢𑀺. 𑀦 𑀪𑀸𑀯𑀺𑀢𑀫𑀸𑀲𑀻𑀲𑀢𑀻𑀢𑀺 𑀪𑀸𑀯𑀺𑀢𑀁 𑀦𑀸𑀫 𑀢𑁂𑀲𑀁 𑀲𑀜𑁆𑀜𑀸𑀬 𑀧𑀜𑁆𑀘 𑀓𑀸𑀫𑀕𑀼𑀡𑀸, 𑀢𑁂 𑀦 𑀆𑀲𑀻𑀲𑀢𑀺 𑀦 𑀲𑁂𑀯𑀢𑀻𑀢𑀺 𑀅𑀢𑁆𑀣𑁄.

𑀅𑀤𑀼𑀁 𑀘𑀲𑁆𑀲 𑀳𑁄𑀢𑀻𑀢𑀺 𑀏𑀢𑀜𑁆𑀘𑀲𑁆𑀲 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀁 ‘‘𑀲𑁄 𑀅𑀪𑀺𑀳𑀭𑀢𑀻’’𑀢𑀺𑀆𑀤𑀺𑀮𑀓𑁆𑀔𑀡𑀁. 𑀢𑀧𑀲𑁆𑀲𑀺𑀢𑀸𑀬𑀸𑀢𑀺 𑀢𑀧𑀲𑁆𑀲𑀺𑀪𑀸𑀯𑁂𑀦 𑀳𑁄𑀢𑀺. 𑀢𑀢𑁆𑀣 𑀲𑁄 𑀅𑀪𑀺𑀳𑀭𑀢𑀻𑀢𑀺 𑀲𑁄 𑀢𑀁 𑀲𑀻𑀮𑀁 𑀅𑀪𑀺𑀳𑀭𑀢𑀺, 𑀉𑀧𑀭𑀽𑀧𑀭𑀺 𑀯𑀟𑁆𑀠𑁂𑀢𑀺. 𑀲𑀻𑀮𑀁 𑀫𑁂 𑀧𑀭𑀺𑀧𑀼𑀡𑁆𑀡𑀁, 𑀢𑀧𑁄 𑀆𑀭𑀤𑁆𑀥𑁄, 𑀅𑀮𑀫𑁂𑀢𑁆𑀢𑀸𑀯𑀢𑀸𑀢𑀺 𑀦 𑀯𑀻𑀭𑀺𑀬𑀁 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀦𑁄 𑀳𑀻𑀦𑀸𑀬𑀸𑀯𑀢𑁆𑀢𑀢𑀻𑀢𑀺 𑀳𑀻𑀦𑀸𑀬 𑀕𑀺𑀳𑀺𑀪𑀸𑀯𑀢𑁆𑀣𑀸𑀬 𑀦 𑀆𑀯𑀢𑁆𑀢𑀢𑀺. 𑀲𑀻𑀮𑀢𑁄 𑀉𑀢𑁆𑀢𑀭𑀺 𑀯𑀺𑀲𑁂𑀲𑀸𑀥𑀺𑀕𑀫𑀢𑁆𑀣𑀸𑀬 𑀯𑀻𑀭𑀺𑀬𑀁 𑀓𑀭𑁄𑀢𑀺𑀬𑁂𑀯, 𑀏𑀯𑀁 𑀓𑀭𑁄𑀦𑁆𑀢𑁄 𑀲𑁄 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀺. ‘‘𑀅𑀭𑀜𑁆𑀜’’𑀦𑁆𑀢𑀺𑀆𑀤𑀻𑀦𑀺 𑀲𑀸𑀫𑀜𑁆𑀜𑀨𑀮𑁂 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁧𑁬) 𑀯𑀺𑀢𑁆𑀣𑀸𑀭𑀺𑀢𑀸𑀦𑁂𑀯. ‘‘𑀫𑁂𑀢𑁆𑀢𑀸𑀲𑀳𑀕𑀢𑁂𑀦𑀸’’𑀢𑀺𑀆𑀤𑀻𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀡𑁆𑀡𑀺𑀢𑀸𑀦𑀺. 𑀢𑀘𑀧𑁆𑀧𑀢𑁆𑀢𑀸𑀢𑀺 𑀧𑀧𑀝𑀺𑀓𑀢𑁄 𑀅𑀩𑁆𑀪𑀦𑁆𑀢𑀭𑀁 𑀢𑀘𑀁 𑀧𑀢𑁆𑀢𑀸. 𑀨𑁂𑀕𑁆𑀕𑀼𑀧𑁆𑀧𑀢𑁆𑀢𑀸𑀢𑀺 𑀢𑀘𑀢𑁄 𑀅𑀩𑁆𑀪𑀦𑁆𑀢𑀭𑀁 𑀨𑁂𑀕𑁆𑀕𑀼𑀁 𑀧𑀢𑁆𑀢𑀸, 𑀨𑁂𑀕𑁆𑀕𑀼𑀲𑀤𑀺𑀲𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁭𑁪. ‘‘𑀏𑀢𑁆𑀢𑀸𑀯𑀢𑀸, 𑀔𑁄 𑀦𑀺𑀕𑁆𑀭𑁄𑀥, 𑀢𑀧𑁄𑀚𑀺𑀕𑀼𑀘𑁆𑀙𑀸 𑀅𑀕𑁆𑀕𑀧𑁆𑀧𑀢𑁆𑀢𑀸 𑀘 𑀳𑁄𑀢𑀺 𑀲𑀸𑀭𑀧𑁆𑀧𑀢𑁆𑀢𑀸 𑀘𑀸’’𑀢𑀺 𑀇𑀤𑀁 𑀪𑀕𑀯𑀸 𑀢𑀺𑀢𑁆𑀣𑀺𑀬𑀸𑀦𑀁 𑀯𑀲𑁂𑀦𑀸𑀳. 𑀢𑀺𑀢𑁆𑀣𑀺𑀬𑀸𑀦𑀜𑁆𑀳𑀺 𑀮𑀸𑀪𑀲𑀓𑁆𑀓𑀸𑀭𑁄 𑀭𑀼𑀓𑁆𑀔𑀲𑁆𑀲 𑀲𑀸𑀔𑀸𑀧𑀮𑀸𑀲𑀲𑀤𑀺𑀲𑁄. 𑀧𑀜𑁆𑀘𑀲𑀻𑀮𑀫𑀢𑁆𑀢𑀓𑀁 𑀧𑀧𑀝𑀺𑀓𑀲𑀤𑀺𑀲𑀁. 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀫𑀢𑁆𑀢𑀁 𑀢𑀘𑀲𑀤𑀺𑀲𑀁. 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀸𑀯𑀲𑀸𑀦𑀸 𑀅𑀪𑀺𑀜𑁆𑀜𑀸 𑀨𑁂𑀕𑁆𑀕𑀼𑀲𑀤𑀺𑀲𑀸. 𑀤𑀺𑀩𑁆𑀩𑀘𑀓𑁆𑀔𑀼𑀁 𑀧𑀦𑁂𑀢𑁂 𑀅𑀭𑀳𑀢𑁆𑀢𑀦𑁆𑀢𑀺 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀺. 𑀢𑁂𑀦 𑀦𑁂𑀲𑀁 𑀢𑀁 𑀭𑀼𑀓𑁆𑀔𑀲𑁆𑀲 𑀲𑀸𑀭𑀲𑀤𑀺𑀲𑀁. 𑀲𑀸𑀲𑀦𑁂 𑀧𑀦 𑀮𑀸𑀪𑀲𑀓𑁆𑀓𑀸𑀭𑁄 𑀲𑀸𑀔𑀸𑀧𑀮𑀸𑀲𑀲𑀤𑀺𑀲𑁄. 𑀲𑀻𑀮𑀲𑀫𑁆𑀧𑀤𑀸 𑀧𑀧𑀝𑀺𑀓𑀲𑀤𑀺𑀲𑀸. 𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑁄 𑀢𑀘𑀲𑀤𑀺𑀲𑀸. 𑀮𑁄𑀓𑀺𑀬𑀸𑀪𑀺𑀜𑁆𑀜𑀸 𑀨𑁂𑀕𑁆𑀕𑀼𑀲𑀤𑀺𑀲𑀸. 𑀫𑀕𑁆𑀕𑀨𑀮𑀁 𑀲𑀸𑀭𑁄. 𑀇𑀢𑀺 𑀪𑀕𑀯𑀢𑀸 𑀅𑀢𑁆𑀢𑀦𑁄 𑀲𑀸𑀲𑀦𑀁 𑀑𑀦𑀢𑀯𑀺𑀦𑀢𑀨𑀮𑀪𑀸𑀭𑀪𑀭𑀺𑀢𑀭𑀼𑀓𑁆𑀔𑀽𑀧𑀫𑀸𑀬 𑀉𑀧𑀫𑀺𑀢𑀁. 𑀲𑁄 𑀤𑁂𑀲𑀦𑀸𑀓𑀼𑀲𑀮𑀢𑀸𑀬 𑀢𑀢𑁄 𑀢𑀘𑀲𑀸𑀭𑀲𑀫𑁆𑀧𑀢𑁆𑀢𑀺𑀢𑁄 𑀫𑀫 𑀲𑀸𑀲𑀦𑀁 𑀉𑀢𑁆𑀢𑀭𑀺𑀢𑀭𑀜𑁆𑀘𑁂𑀯 𑀧𑀡𑀻𑀢𑀢𑀭𑀜𑁆𑀘, 𑀢𑀁 𑀢𑀼𑀯𑀁 𑀓𑀤𑀸 𑀚𑀸𑀦𑀺𑀲𑁆𑀲𑀲𑀻𑀢𑀺 ¶ 𑀅𑀢𑁆𑀢𑀦𑁄𑀤𑁂𑀲𑀦𑀸𑀬 𑀯𑀺𑀲𑁂𑀲𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀢𑀺 𑀔𑁄 𑀦𑀺𑀕𑁆𑀭𑁄𑀥𑀸’’𑀢𑀺 𑀤𑁂𑀲𑀦𑀁 𑀆𑀭𑀪𑀺 ¶ . 𑀢𑁂 𑀧𑀭𑀺𑀩𑁆𑀩𑀸𑀚𑀓𑀸𑀢𑀺 𑀢𑁂 𑀢𑀲𑁆𑀲 𑀧𑀭𑀺𑀯𑀸𑀭𑀸 𑀢𑀺𑀁𑀲𑀲𑀢𑀲𑀗𑁆𑀔𑁆𑀬𑀸 𑀧𑀭𑀺𑀩𑁆𑀩𑀸𑀚𑀓𑀸. 𑀏𑀢𑁆𑀣 𑀫𑀬𑀁 𑀅𑀦𑀲𑁆𑀲𑀸𑀫𑀸𑀢𑀺 𑀏𑀢𑁆𑀣 𑀅𑀘𑁂𑀮𑀓𑀧𑀸𑀴𑀺𑀆𑀤𑀻𑀲𑀼, 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀅𑀫𑁆𑀳𑀸𑀓𑀁 𑀅𑀘𑁂𑀮𑀓𑀧𑀸𑀴𑀺𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺 ¶ , 𑀓𑀼𑀢𑁄 𑀧𑀭𑀺𑀲𑀼𑀤𑁆𑀥𑀧𑀸𑀴𑀺. 𑀅𑀫𑁆𑀳𑀸𑀓𑀁 𑀧𑀭𑀺𑀲𑀼𑀤𑁆𑀥𑀧𑀸𑀴𑀺𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, 𑀓𑀼𑀢𑁄 𑀘𑀸𑀢𑀼𑀬𑀸𑀫𑀲𑀁𑀯𑀭𑀸𑀤𑀻𑀦𑀺. 𑀘𑀸𑀢𑀼𑀬𑀸𑀫𑀲𑀁𑀯𑀭𑁄𑀧𑀺 𑀦𑀢𑁆𑀣𑀺, 𑀓𑀼𑀢𑁄 𑀅𑀭𑀜𑁆𑀜𑀯𑀸𑀲𑀸𑀤𑀻𑀦𑀺. 𑀅𑀭𑀜𑁆𑀜𑀯𑀸𑀲𑁄𑀧𑀺 𑀦𑀢𑁆𑀣𑀺, 𑀓𑀼𑀢𑁄 𑀦𑀻𑀯𑀭𑀡𑀧𑁆𑀧𑀳𑀸𑀦𑀸𑀤𑀻𑀦𑀺. 𑀦𑀻𑀯𑀭𑀡𑀧𑁆𑀧𑀳𑀸𑀦𑀫𑁆𑀧𑀺 𑀦𑀢𑁆𑀣𑀺, 𑀓𑀼𑀢𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀤𑀻𑀦𑀺. 𑀩𑁆𑀭𑀳𑁆𑀫𑀯𑀺𑀳𑀸𑀭𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, 𑀓𑀼𑀢𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀤𑀻𑀦𑀺. 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, 𑀓𑀼𑀢𑁄 𑀅𑀫𑁆𑀳𑀸𑀓𑀁 𑀤𑀺𑀩𑁆𑀩𑀘𑀓𑁆𑀔𑀼. 𑀏𑀢𑁆𑀣 𑀫𑀬𑀁 𑀲𑀆𑀘𑀭𑀺𑀬𑀓𑀸 𑀦𑀝𑁆𑀞𑀸’’𑀢𑀺. 𑀇𑀢𑁄 𑀪𑀺𑀬𑁆𑀬𑁄 𑀉𑀢𑁆𑀢𑀭𑀺𑀢𑀭𑀦𑁆𑀢𑀺 𑀇𑀢𑁄 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀥𑀺𑀕𑀫𑀢𑁄 𑀪𑀺𑀬𑁆𑀬𑁄 𑀅𑀜𑁆𑀜𑀁 𑀉𑀢𑁆𑀢𑀭𑀺𑀢𑀭𑀁 𑀯𑀺𑀲𑁂𑀲𑀸𑀥𑀺𑀕𑀫𑀁 𑀫𑀬𑀁 𑀲𑀼𑀢𑀺𑀯𑀲𑁂𑀦𑀸𑀧𑀺 𑀦 𑀚𑀸𑀦𑀸𑀫𑀸𑀢𑀺 𑀯𑀤𑀦𑁆𑀢𑀺.

𑀦𑀺𑀕𑁆𑀭𑁄𑀥𑀲𑁆𑀲𑀧𑀚𑁆𑀛𑀸𑀬𑀦𑀯𑀡𑁆𑀡𑀦𑀸

𑁭𑁫. 𑀅𑀣 𑀦𑀺𑀕𑁆𑀭𑁄𑀥𑀁 𑀧𑀭𑀺𑀩𑁆𑀩𑀸𑀚𑀓𑀦𑁆𑀢𑀺 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 ‘‘𑀇𑀫𑁂 𑀧𑀭𑀺𑀩𑁆𑀩𑀸𑀚𑀓𑀸 𑀇𑀤𑀸𑀦𑀺 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀲𑀼𑀲𑁆𑀲𑀽𑀲𑀦𑁆𑀢𑀺, 𑀇𑀫𑀺𑀦𑀸 𑀘 𑀦𑀺𑀕𑁆𑀭𑁄𑀥𑁂𑀦 𑀪𑀕𑀯𑀢𑁄 𑀧𑀭𑀫𑁆𑀫𑀼𑀔𑀸 𑀓𑀓𑁆𑀔𑀴𑀁 𑀤𑀼𑀭𑀸𑀲𑀤𑀯𑀘𑀦𑀁 𑀯𑀼𑀢𑁆𑀢𑀁, 𑀇𑀤𑀸𑀦𑀺 𑀅𑀬𑀫𑁆𑀧𑀺 𑀲𑁄𑀢𑀼𑀓𑀸𑀫𑁄 𑀚𑀸𑀢𑁄, 𑀓𑀸𑀮𑁄 𑀤𑀸𑀦𑀺 𑀫𑁂 𑀇𑀫𑀲𑁆𑀲 𑀫𑀸𑀦𑀤𑁆𑀥𑀚𑀁 𑀦𑀺𑀧𑀸𑀢𑁂𑀢𑁆𑀯𑀸 𑀪𑀕𑀯𑀢𑁄 𑀲𑀸𑀲𑀦𑀁 𑀉𑀓𑁆𑀔𑀺𑀧𑀺𑀢𑀼’’𑀦𑁆𑀢𑀺. 𑀅𑀣 𑀦𑀺𑀕𑁆𑀭𑁄𑀥𑀁 𑀧𑀭𑀺𑀩𑁆𑀩𑀸𑀚𑀓𑀁 𑀏𑀢𑀤𑀯𑁄𑀘. 𑀅𑀧𑀭𑀫𑁆𑀧𑀺𑀲𑁆𑀲 𑀅𑀳𑁄𑀲𑀺 ‘‘𑀅𑀬𑀁 𑀫𑀬𑀺 𑀅𑀓𑀣𑁂𑀦𑁆𑀢𑁂 𑀲𑀢𑁆𑀣𑀸𑀭𑀁 𑀦 𑀔𑀫𑀸𑀧𑁂𑀲𑁆𑀲𑀢𑀺, 𑀢𑀤𑀲𑁆𑀲 𑀅𑀦𑀸𑀕𑀢𑁂 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀺𑀲𑁆𑀲𑀢𑀺, 𑀫𑀬𑀸 𑀧𑀦 𑀓𑀣𑀺𑀢𑁂 𑀔𑀫𑀸𑀧𑁂𑀲𑁆𑀲𑀢𑀺, 𑀢𑀤𑀲𑁆𑀲 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺. 𑀅𑀣 𑀦𑀺𑀕𑁆𑀭𑁄𑀥𑀁 𑀧𑀭𑀺𑀩𑁆𑀩𑀸𑀚𑀓𑀁 𑀏𑀢𑀤𑀯𑁄𑀘. 𑀅𑀧𑀭𑀺𑀲𑀸𑀯𑀘𑀭𑀁 𑀧𑀦 𑀦𑀁 𑀓𑀭𑁄𑀣𑀸𑀢𑀺 𑀏𑀢𑁆𑀣 𑀧𑀦𑀸𑀢𑀺 𑀦𑀺𑀧𑀸𑀢𑁄, 𑀅𑀣 𑀦𑀁 𑀅𑀧𑀭𑀺𑀲𑀸𑀯𑀘𑀭𑀁 𑀓𑀭𑁄𑀣𑀸𑀢𑀺 𑀅𑀢𑁆𑀣𑁄. ‘‘𑀅𑀧𑀭𑀺𑀲𑀸𑀯𑀘𑀭𑁂𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀅𑀧𑀭𑀺𑀲𑀸𑀯𑀘𑀭𑀁 𑀯𑀸 𑀏𑀢𑀁 𑀓𑀭𑁄𑀣, 𑀕𑁄𑀓𑀸𑀡𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀦𑁆𑀢𑀺 𑀅𑀢𑁆𑀣𑁄.

𑀕𑁄𑀓𑀸𑀡𑀦𑁆𑀢𑀺 𑀏𑀢𑁆𑀣𑀸𑀧𑀺 𑀕𑁄𑀓𑀸𑀡𑀁 𑀧𑀭𑀺𑀬𑀦𑁆𑀢𑀘𑀸𑀭𑀺𑀦𑀺𑀁 𑀯𑀺𑀬 𑀓𑀭𑁄𑀣𑀸𑀢𑀺 𑀅𑀢𑁆𑀣𑁄. 𑀢𑀼𑀡𑁆𑀳𑀻𑀪𑀽𑀢𑁄𑀢𑀺 𑀢𑀼𑀡𑁆𑀳𑀻𑀪𑀸𑀯𑀁 𑀉𑀧𑀕𑀢𑁄. 𑀫𑀗𑁆𑀓𑀼𑀪𑀽𑀢𑁄𑀢𑀺 𑀦𑀺𑀢𑁆𑀢𑁂𑀚𑀢𑀁 𑀆𑀧𑀦𑁆𑀦𑁄. 𑀧𑀢𑁆𑀢𑀓𑁆𑀔𑀦𑁆𑀥𑁄𑀢𑀺 𑀑𑀦𑀢𑀕𑀻𑀯𑁄. 𑀅𑀥𑁄𑀫𑀼𑀔𑁄𑀢𑀺 𑀳𑁂𑀝𑁆𑀞𑀸𑀫𑀼𑀔𑁄.

𑁭𑁬. 𑀩𑀼𑀤𑁆𑀥𑁄 ¶ ¶ 𑀲𑁄 𑀪𑀕𑀯𑀸 𑀩𑁄𑀥𑀸𑀬𑀸𑀢𑀺 𑀲𑀬𑀁 𑀩𑀼𑀤𑁆𑀥𑁄 𑀲𑀢𑁆𑀢𑀸𑀦𑀫𑁆𑀧𑀺 𑀘𑀢𑀼𑀲𑀘𑁆𑀘𑀩𑁄𑀥𑀢𑁆𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀤𑀦𑁆𑀢𑁄𑀢𑀺 𑀘𑀓𑁆𑀔𑀼𑀢𑁄𑀧𑀺 𑀤𑀦𑁆𑀢𑁄…𑀧𑁂… 𑀫𑀦𑀢𑁄𑀧𑀺 𑀤𑀦𑁆𑀢𑁄. 𑀤𑀫𑀣𑀸𑀬𑀸𑀢𑀺 𑀅𑀜𑁆𑀜𑁂𑀲𑀫𑁆𑀧𑀺 𑀤𑀫𑀦𑀢𑁆𑀣𑀸𑀬 𑀏𑀯, 𑀦 𑀯𑀸𑀤𑀢𑁆𑀣𑀸𑀬. 𑀲𑀦𑁆𑀢𑁄𑀢𑀺 𑀭𑀸𑀕𑀲𑀦𑁆𑀢𑀢𑀸𑀬 𑀲𑀦𑁆𑀢𑁄, 𑀤𑁄𑀲𑀫𑁄𑀳𑀲𑀦𑁆𑀢𑀢𑀸𑀬 𑀲𑀩𑁆𑀩 𑀅𑀓𑀼𑀲𑀮𑀲𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀲𑀦𑁆𑀢𑀢𑀸𑀬 𑀲𑀦𑁆𑀢𑁄. 𑀲𑀫𑀣𑀸𑀬𑀸𑀢𑀺 𑀫𑀳𑀸𑀚𑀦𑀲𑁆𑀲 𑀭𑀸𑀕𑀸𑀤𑀺𑀲𑀫𑀦𑀢𑁆𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀢𑀺𑀡𑁆𑀡𑁄𑀢𑀺 𑀘𑀢𑁆𑀢𑀸𑀭𑁄 𑀑𑀖𑁂 𑀢𑀺𑀡𑁆𑀡𑁄. 𑀢𑀭𑀡𑀸𑀬𑀸𑀢𑀺 𑀫𑀳𑀸𑀚𑀦𑀲𑁆𑀲 𑀑𑀖𑀦𑀺𑀢𑁆𑀣𑀭𑀡𑀢𑁆𑀣𑀸𑀬. 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀧𑀭𑀺𑀦𑀺𑀩𑁆𑀩𑀸𑀦𑀸𑀬𑀸𑀢𑀺 𑀫𑀳𑀸𑀚𑀦𑀲𑁆𑀲𑀸𑀧𑀺 𑀲𑀩𑁆𑀩𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺.

𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀸𑀤𑀺𑀯𑀡𑁆𑀡𑀦𑀸

𑁭𑁭. 𑀅𑀘𑁆𑀘𑀬𑁄𑀢𑀺𑀆𑀤𑀻𑀦𑀺 ¶ 𑀲𑀸𑀫𑀜𑁆𑀜𑀨𑀮𑁂 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁫𑁦) 𑀯𑀼𑀢𑁆𑀢𑀸𑀦𑀺. 𑀉𑀚𑀼𑀚𑀸𑀢𑀺𑀓𑁄𑀢𑀺 𑀓𑀸𑀬𑀯𑀗𑁆𑀓𑀸𑀤𑀺𑀯𑀺𑀭𑀳𑀺𑀢𑁄 𑀉𑀚𑀼𑀲𑀪𑀸𑀯𑁄. 𑀅𑀳𑀫𑀦𑀼𑀲𑀸𑀲𑀸𑀫𑀻𑀢𑀺 𑀅𑀳𑀁 𑀢𑀸𑀤𑀺𑀲𑀁 𑀧𑀼𑀕𑁆𑀕𑀮𑀁 𑀅𑀦𑀼𑀲𑀸𑀲𑀸𑀫𑀺, 𑀥𑀫𑁆𑀫𑀁 𑀅𑀲𑁆𑀲 𑀤𑁂𑀲𑁂𑀫𑀺. 𑀲𑀢𑁆𑀢𑀸𑀳𑀦𑁆𑀢𑀺 𑀲𑀢𑁆𑀢𑀤𑀺𑀯𑀲𑀸𑀦𑀺, 𑀇𑀤𑀁 𑀲𑀩𑁆𑀩𑀫𑁆𑀧𑀺 𑀪𑀕𑀯𑀸 𑀤𑀦𑁆𑀥𑀧𑀜𑁆𑀜𑀁 𑀧𑀼𑀕𑁆𑀕𑀮𑀁 𑀲𑀦𑁆𑀥𑀸𑀬𑀸𑀳 𑀅𑀲𑀞𑁄 𑀧𑀦 𑀅𑀫𑀸𑀬𑀸𑀯𑀻 𑀉𑀚𑀼𑀚𑀸𑀢𑀺𑀓𑁄 𑀢𑀁𑀫𑀼𑀳𑀼𑀢𑁆𑀢𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺. 𑀇𑀢𑀺 𑀪𑀕𑀯𑀸 ‘‘𑀅𑀲𑀞’’𑀦𑁆𑀢𑀺𑀆𑀤𑀺𑀯𑀘𑀦𑁂𑀦 𑀲𑀞𑁄 𑀳𑀺 𑀯𑀗𑁆𑀓𑀯𑀗𑁆𑀓𑁄, 𑀫𑀬𑀸𑀧𑀺 𑀦 𑀲𑀓𑁆𑀓𑀸 𑀅𑀦𑀼𑀲𑀸𑀲𑀺𑀢𑀼𑀦𑁆𑀢𑀺 𑀤𑀻𑀧𑁂𑀦𑁆𑀢𑁄 𑀧𑀭𑀺𑀩𑁆𑀩𑀸𑀚𑀓𑀁 𑀧𑀸𑀤𑁂𑀲𑀼 𑀕𑀳𑁂𑀢𑁆𑀯𑀸 𑀫𑀳𑀸𑀫𑁂𑀭𑀼𑀧𑀸𑀤𑀢𑀮𑁂 𑀯𑀺𑀬 𑀔𑀺𑀧𑀺𑀢𑁆𑀣. 𑀓𑀲𑁆𑀫𑀸? 𑀅𑀬𑀜𑁆𑀳𑀺 𑀅𑀢𑀺𑀲𑀞𑁄, 𑀓𑀼𑀝𑀺𑀮𑀘𑀺𑀢𑁆𑀢𑁄 𑀲𑀢𑁆𑀣𑀭𑀺 𑀏𑀯𑀁 𑀓𑀣𑁂𑀦𑁆𑀢𑁂𑀧𑀺 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑁂𑀲𑀼 𑀦𑀸𑀥𑀺𑀫𑀼𑀘𑁆𑀘𑀢𑀺, 𑀅𑀥𑀺𑀫𑀼𑀘𑁆𑀘𑀦𑀢𑁆𑀣𑀸𑀬 𑀲𑁄𑀢𑀁 𑀦 𑀑𑀤𑀳𑀢𑀺, 𑀓𑁄𑀳𑀜𑁆𑀜𑁂 𑀞𑀺𑀢𑁄 𑀲𑀢𑁆𑀣𑀸𑀭𑀁 𑀔𑀫𑀸𑀧𑁂𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀢𑀲𑁆𑀲𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 ‘‘𑀏𑀢𑀼 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀅𑀲𑀞𑁄’’𑀢𑀺𑀆𑀤𑀺𑀫𑀸𑀳. 𑀲𑀞𑀁 𑀧𑀦𑀸𑀳𑀁 𑀅𑀦𑀼𑀲𑀸𑀲𑀺𑀢𑀼𑀁 𑀦 𑀲𑀓𑁆𑀓𑁄𑀫𑀻𑀢𑀺.

𑁭𑁮. 𑀅𑀦𑁆𑀢𑁂𑀯𑀸𑀲𑀺𑀓𑀫𑁆𑀬𑀢𑀸𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑀫𑁆𑀬𑀢𑀸𑀬, 𑀅𑀫𑁆𑀳𑁂 𑀅𑀦𑁆𑀢𑁂𑀯𑀸𑀲𑀺𑀓𑁂 𑀇𑀘𑁆𑀙𑀦𑁆𑀢𑁄. 𑀏𑀯𑀫𑀸𑀳𑀸𑀢𑀺 ‘‘𑀏𑀢𑀼 𑀯𑀺𑀜𑁆𑀜𑀼𑀧𑀼𑀭𑀺𑀲𑁄’’𑀢𑀺𑀆𑀤𑀺𑀫𑀸𑀳. 𑀬𑁄 𑀏𑀯 𑀯𑁄 𑀆𑀘𑀭𑀺𑀬𑁄𑀢𑀺 𑀬𑁄 𑀏𑀯 𑀢𑀼𑀫𑁆𑀳𑀸𑀓𑀁 𑀧𑀓𑀢𑀺𑀬𑀸 𑀆𑀘𑀭𑀺𑀬𑁄. 𑀉𑀤𑁆𑀤𑁂𑀲𑀸 𑀦𑁄 𑀘𑀸𑀯𑁂𑀢𑀼𑀓𑀸𑀫𑁄𑀢𑀺 𑀅𑀢𑁆𑀢𑀦𑁄 𑀅𑀦𑀼𑀲𑀸𑀲𑀦𑀺𑀁 𑀕𑀸𑀳𑀸𑀧𑁂𑀢𑁆𑀯𑀸 𑀅𑀫𑁆𑀳𑁂 𑀅𑀫𑁆𑀳𑀸𑀓𑀁 𑀉𑀤𑁆𑀤𑁂𑀲𑀢𑁄 𑀘𑀸𑀯𑁂𑀢𑀼𑀓𑀸𑀫𑁄. 𑀲𑁄 ¶ 𑀏𑀯 𑀯𑁄 𑀉𑀤𑁆𑀤𑁂𑀲𑁄 𑀳𑁄𑀢𑀽𑀢𑀺 𑀬𑁄 𑀢𑀼𑀫𑁆𑀳𑀸𑀓𑀁 𑀧𑀓𑀢𑀺𑀬𑀸 𑀉𑀤𑁆𑀤𑁂𑀲𑁄, 𑀲𑁄 𑀢𑀼𑀫𑁆𑀳𑀸𑀓𑀁𑀬𑁂𑀯 𑀳𑁄𑀢𑀼 ¶ , 𑀦 𑀫𑀬𑀁 𑀢𑀼𑀫𑁆𑀳𑀸𑀓𑀁 𑀉𑀤𑁆𑀤𑁂𑀲𑁂𑀦 𑀅𑀢𑁆𑀣𑀺𑀓𑀸. 𑀆𑀚𑀻𑀯𑀸𑀢𑀺 𑀆𑀚𑀻𑀯𑀢𑁄. 𑀅𑀓𑀼𑀲𑀮𑀲𑀗𑁆𑀔𑀸𑀢𑀸𑀢𑀺 𑀅𑀓𑀼𑀲𑀮𑀸𑀢𑀺 𑀓𑁄𑀝𑁆𑀞𑀸𑀲𑀁 𑀧𑀢𑁆𑀢𑀸. 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀥𑀫𑁆𑀫𑀸 𑀢𑀡𑁆𑀳𑀸𑀬𑁂𑀯 𑀯𑀸 𑀯𑀺𑀲𑁂𑀲𑁂𑀦. 𑀲𑀸 𑀳𑀺 𑀧𑀼𑀦𑀩𑁆𑀪𑀯𑀓𑀭𑀡𑀢𑁄 ‘‘𑀧𑁄𑀦𑁄𑀩𑁆𑀪𑀯𑀺𑀓𑀸’’𑀢𑀺 𑀯𑀼𑀢𑁆𑀢𑀸. 𑀲𑀤𑀭𑀣𑀸𑀢𑀺 𑀓𑀺𑀮𑁂𑀲𑀤𑀭𑀣𑀲𑀫𑁆𑀧𑀬𑀼𑀢𑁆𑀢𑀸. 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸𑀢𑀺 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀁 𑀧𑀘𑁆𑀘𑀬𑀪𑀽𑀢𑀸. 𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸𑀢𑀺 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸. 𑀯𑁄𑀤𑀸𑀦𑀺𑀬𑀸𑀢𑀺, 𑀲𑀫𑀣𑀯𑀺𑀧𑀲𑁆𑀲𑀦𑀸 𑀥𑀫𑁆𑀫𑀸. 𑀢𑁂 𑀳𑀺 𑀲𑀢𑁆𑀢𑁂 𑀯𑁄𑀤𑀸𑀧𑁂𑀦𑁆𑀢𑀺, 𑀢𑀲𑁆𑀫𑀸 ‘‘𑀯𑁄𑀤𑀸𑀦𑀺𑀬𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀦𑁆𑀢𑀺 𑀫𑀕𑁆𑀕𑀧𑀜𑁆𑀜𑀸𑀧𑀸𑀭𑀺𑀧𑀽𑀭𑀺𑀁. 𑀯𑁂𑀧𑀼𑀮𑁆𑀮𑀢𑁆𑀢𑀜𑁆𑀘𑀸𑀢𑀺 𑀨𑀮𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀢𑀁, 𑀉𑀪𑁄𑀧𑀺 𑀯𑀸 𑀏𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑁂𑀯. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀢𑀢𑁄 𑀢𑀼𑀫𑁆𑀳𑁂 𑀫𑀕𑁆𑀕𑀧𑀜𑁆𑀜𑀜𑁆𑀘𑁂𑀯 𑀨𑀮𑀧𑀜𑁆𑀜𑀜𑁆𑀘 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀣𑀸’’𑀢𑀺. 𑀏𑀯𑀁 𑀪𑀕𑀯𑀸 𑀧𑀭𑀺𑀩𑁆𑀩𑀸𑀚𑀓𑁂 𑀆𑀭𑀩𑁆𑀪 𑀅𑀢𑁆𑀢𑀦𑁄 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀬𑀸 𑀨𑀮𑀁 𑀤𑀲𑁆𑀲𑁂𑀦𑁆𑀢𑁄 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀺.

𑁭𑁯. 𑀬𑀣𑀸 𑀢𑀁 𑀫𑀸𑀭𑁂𑀦𑀸𑀢𑀺 𑀬𑀣𑀸 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑀸 𑀦𑀺𑀲𑀻𑀤𑀦𑁆𑀢𑀺 𑀏𑀯𑀫𑁂𑀯 𑀢𑀼𑀡𑁆𑀳𑀻𑀪𑀽𑀢𑀸…𑀧𑁂… 𑀅𑀧𑁆𑀧𑀝𑀺𑀪𑀸𑀦𑀸 𑀦𑀺𑀲𑀺𑀦𑁆𑀦𑀸.

𑀫𑀸𑀭𑁄 ¶ 𑀓𑀺𑀭 𑀲𑀢𑁆𑀣𑀸 𑀅𑀢𑀺𑀯𑀺𑀬 𑀕𑀚𑁆𑀚𑀦𑁆𑀢𑁄 𑀩𑀼𑀤𑁆𑀥𑀩𑀮𑀁 𑀤𑀻𑀧𑁂𑀢𑁆𑀯𑀸 𑀇𑀫𑁂𑀲𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀓𑀤𑀸𑀘𑀺 𑀥𑀫𑁆𑀫𑀸𑀪𑀺𑀲𑀫𑀬𑁄 𑀪𑀯𑁂𑀬𑁆𑀬, 𑀳𑀦𑁆𑀤𑀸𑀳𑀁 𑀧𑀭𑀺𑀬𑀼𑀝𑁆𑀞𑀸𑀫𑀻𑀢𑀺 𑀲𑁄 𑀢𑁂𑀲𑀁 𑀘𑀺𑀢𑁆𑀢𑀸𑀦𑀺 𑀧𑀭𑀺𑀬𑀼𑀝𑁆𑀞𑀸𑀲𑀺. 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀸𑀦𑀜𑁆𑀳𑀺 𑀘𑀺𑀢𑁆𑀢𑀁 𑀫𑀸𑀭𑀲𑁆𑀲 𑀬𑀣𑀸𑀓𑀸𑀫𑀓𑀭𑀡𑀻𑀬𑀁 𑀳𑁄𑀢𑀺. 𑀢𑁂𑀧𑀺 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑀸 𑀣𑀤𑁆𑀥𑀗𑁆𑀕𑀧𑀘𑁆𑀘𑀗𑁆𑀕𑀸 𑀯𑀺𑀬 𑀢𑀼𑀡𑁆𑀳𑀻 𑀅𑀧𑁆𑀧𑀝𑀺𑀪𑀸𑀦𑀸 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀲𑀢𑁆𑀣𑀸 𑀇𑀫𑁂 𑀧𑀭𑀺𑀩𑁆𑀩𑀸𑀚𑀓𑀸 𑀅𑀢𑀺𑀯𑀺𑀬 𑀦𑀺𑀭𑀯𑀸 𑀳𑀼𑀢𑁆𑀯𑀸 𑀦𑀺𑀲𑀺𑀦𑁆𑀦𑀸, 𑀓𑀺𑀁 𑀦𑀼 𑀔𑁄𑀢𑀺 𑀆𑀯𑀚𑁆𑀚𑀦𑁆𑀢𑁄 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀪𑀸𑀯𑀁 𑀅𑀜𑁆𑀜𑀸𑀲𑀺. 𑀲𑀘𑁂 𑀧𑀦 𑀢𑁂𑀲𑀁 𑀫𑀕𑁆𑀕𑀨𑀮𑀼𑀧𑁆𑀧𑀢𑁆𑀢𑀺𑀳𑁂𑀢𑀼 𑀪𑀯𑁂𑀬𑁆𑀬, 𑀫𑀸𑀭𑀁 𑀧𑀝𑀺𑀩𑀸𑀳𑀺𑀢𑁆𑀯𑀸𑀧𑀺 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬, 𑀲𑁄 𑀧𑀦 𑀢𑁂𑀲𑀁 𑀦𑀢𑁆𑀣𑀺. ‘‘𑀲𑀩𑁆𑀩𑁂𑀧𑀺 𑀫𑁂 𑀢𑀼𑀘𑁆𑀙𑀧𑀼𑀭𑀺𑀲𑀸’’𑀢𑀺 𑀅𑀜𑁆𑀜𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀣 𑀔𑁄 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺 𑀲𑀩𑁆𑀩𑁂𑀧𑀺 𑀫𑁂 𑀫𑁄𑀖𑀧𑀼𑀭𑀺𑀲𑀸’’𑀢𑀺𑀆𑀤𑀺.

𑀢𑀢𑁆𑀣 𑀨𑀼𑀝𑁆𑀞𑀸 𑀧𑀸𑀧𑀺𑀫𑀢𑀸𑀢𑀺 𑀧𑀸𑀧𑀺𑀫𑀢𑀸 𑀫𑀸𑀭𑁂𑀦 𑀨𑀼𑀝𑁆𑀞𑀸. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑁂𑀲𑀼 𑀦𑀸𑀫. 𑀅𑀜𑁆𑀜𑀸𑀡𑀢𑁆𑀣𑀫𑁆𑀧𑀻𑀢𑀺 ¶ 𑀚𑀸𑀦𑀦𑀢𑁆𑀣𑀫𑁆𑀧𑀺. 𑀓𑀺𑀁 𑀓𑀭𑀺𑀲𑁆𑀲𑀢𑀺 𑀲𑀢𑁆𑀢𑀸𑀳𑁄𑀢𑀺 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀲𑀢𑁆𑀢𑀸𑀳𑁄 𑀅𑀫𑁆𑀳𑀸𑀓𑀁 𑀓𑀺𑀁 𑀓𑀭𑀺𑀲𑁆𑀲𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀲𑀫𑀡𑁂𑀦 𑀕𑁄𑀢𑀫𑁂𑀦 ‘𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀢𑀺 𑀲𑀢𑁆𑀢𑀸𑀳’𑀦𑁆𑀢𑀺 𑀯𑀼𑀢𑁆𑀢𑀁, 𑀲𑁄 𑀲𑀢𑁆𑀢𑀸𑀳𑁄 𑀅𑀫𑁆𑀳𑀸𑀓𑀁 𑀓𑀺𑀁 𑀅𑀧𑁆𑀨𑀸𑀲𑀼𑀓𑀁 𑀓𑀭𑀺𑀲𑁆𑀲𑀢𑀺. ¶ 𑀳𑀦𑁆𑀤 𑀫𑀬𑀁 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀏𑀢𑀁 𑀥𑀫𑁆𑀫𑀁 𑀲𑀘𑁆𑀙𑀺𑀓𑀸𑀢𑀼𑀁 𑀲𑀓𑁆𑀓𑀸, 𑀦 𑀲𑀓𑁆𑀓𑀸𑀢𑀺 𑀅𑀜𑁆𑀜𑀸𑀡𑀢𑁆𑀣𑀫𑁆𑀧𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀲𑁆𑀲𑀸𑀫𑀸’’𑀢𑀺. 𑀅𑀣 𑀯𑀸 𑀚𑀸𑀦𑀸𑀫 𑀢𑀸𑀯𑀲𑁆𑀲 𑀥𑀫𑁆𑀫𑀦𑁆𑀢𑀺 𑀏𑀓𑀤𑀺𑀯𑀲𑁂 𑀏𑀓𑀯𑀸𑀭𑀁 𑀅𑀜𑁆𑀜𑀸𑀡𑀢𑁆𑀣𑀫𑁆𑀧𑀺 𑀏𑀢𑁂𑀲𑀁 𑀘𑀺𑀢𑁆𑀢𑀁 𑀦𑀼𑀧𑁆𑀧𑀦𑁆𑀦𑀁, 𑀲𑀢𑁆𑀢𑀸𑀳𑁄 𑀧𑀦 𑀏𑀢𑁂𑀲𑀁 𑀓𑀼𑀲𑀻𑀢𑀸𑀦𑀁 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀓𑀺𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀺 𑀢𑁂 𑀲𑀢𑁆𑀢𑀸𑀳𑀁 𑀧𑀽𑀭𑁂𑀢𑀼𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀲𑀻𑀳𑀦𑀸𑀤𑀦𑁆𑀢𑀺 𑀧𑀭𑀯𑀸𑀤𑀪𑀺𑀦𑁆𑀤𑀦𑀁 𑀲𑀓𑀯𑀸𑀤𑀲𑀫𑀼𑀲𑁆𑀲𑀸𑀧𑀦𑀜𑁆𑀘 𑀅𑀪𑀻𑀢𑀦𑀸𑀤𑀁 𑀦𑀤𑀺𑀢𑁆𑀯𑀸. 𑀧𑀘𑁆𑀘𑀼𑀧𑀝𑁆𑀞𑀸𑀲𑀻𑀢𑀺 𑀧𑀢𑀺𑀝𑁆𑀞𑀺𑀢𑁄. 𑀢𑀸𑀯𑀤𑁂𑀯𑀸𑀢𑀺 𑀢𑀲𑁆𑀫𑀺𑀜𑁆𑀜𑁂𑀯 𑀔𑀡𑁂. 𑀭𑀸𑀚𑀕𑀳𑀁 𑀧𑀸𑀯𑀺𑀲𑀻𑀢𑀺 𑀭𑀸𑀚𑀕𑀳𑀫𑁂𑀯 𑀧𑀯𑀺𑀝𑁆𑀞𑁄. 𑀢𑁂𑀲𑀁 𑀧𑀦 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀓𑀺𑀜𑁆𑀘𑀸𑀧𑀺 𑀇𑀤𑀁 𑀲𑀼𑀢𑁆𑀢𑀦𑁆𑀢𑀁 𑀲𑀼𑀢𑁆𑀯𑀸 𑀯𑀺𑀲𑁂𑀲𑁄 𑀦 𑀦𑀺𑀩𑁆𑀩𑀢𑁆𑀢𑁄, 𑀆𑀬𑀢𑀺𑀁 𑀧𑀦 𑀦𑁂𑀲𑀁 𑀯𑀸𑀲𑀦𑀸𑀬 𑀧𑀘𑁆𑀘𑀬𑁄 𑀪𑀯𑀺𑀲𑁆𑀲𑀢𑀻𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀉𑀤𑀼𑀫𑁆𑀩𑀭𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀘𑀓𑁆𑀓𑀯𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑀅𑀢𑁆𑀢𑀤𑀻𑀧𑀲𑀭𑀡𑀢𑀸𑀯𑀡𑁆𑀡𑀦𑀸

𑁮𑁦. 𑀏𑀯𑀁 ¶ ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀘𑀓𑁆𑀓𑀯𑀢𑁆𑀢𑀺𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀫𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑁋 𑀫𑀸𑀢𑀼𑀮𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀢𑀁 𑀦𑀕𑀭𑀁 𑀕𑁄𑀘𑀭𑀕𑀸𑀫𑀁 𑀓𑀢𑁆𑀯𑀸 𑀅𑀯𑀺𑀤𑀽𑀭𑁂 𑀯𑀦𑀲𑀡𑁆𑀟𑁂 𑀯𑀺𑀳𑀭𑀢𑀺. ‘‘𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻’’𑀢𑀺 𑀏𑀢𑁆𑀣 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋

𑀪𑀕𑀯𑀸 𑀓𑀺𑀭 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀫𑀼𑀝𑁆𑀞𑀸𑀦𑀲𑀫𑀬𑁂 𑀧𑀘𑁆𑀘𑀽𑀲𑀓𑀸𑀮𑁂 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀇𑀫𑀸𑀬 𑀅𑀦𑀸𑀕𑀢𑀯𑀁𑀲𑀤𑀻𑀧𑀺𑀓𑀸𑀬 𑀲𑀼𑀢𑁆𑀢𑀦𑁆𑀢𑀓𑀣𑀸𑀬 𑀫𑀸𑀢𑀼𑀮𑀦𑀕𑀭𑀯𑀸𑀲𑀻𑀦𑀁 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑀁 𑀤𑀺𑀲𑁆𑀯𑀸 𑀧𑀸𑀢𑁄𑀯 𑀯𑀻𑀲𑀢𑀺𑀪𑀺𑀓𑁆𑀔𑀼𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀫𑀸𑀢𑀼𑀮𑀦𑀕𑀭𑀁 𑀲𑀫𑁆𑀧𑀢𑁆𑀢𑁄. 𑀫𑀸𑀢𑀼𑀮𑀦𑀕𑀭𑀯𑀸𑀲𑀺𑀦𑁄 𑀔𑀢𑁆𑀢𑀺𑀬𑀸 ‘‘𑀪𑀕𑀯𑀸 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑁆𑀫 𑀤𑀲𑀩𑀮𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀫𑀳𑀸𑀲𑀓𑁆𑀓𑀸𑀭𑁂𑀦 𑀦𑀕𑀭𑀁 𑀧𑀯𑁂𑀲𑁂𑀢𑁆𑀯𑀸 𑀦𑀺𑀲𑀚𑁆𑀚𑀝𑁆𑀞𑀸𑀦𑀁 𑀲𑀁𑀯𑀺𑀥𑀸𑀬 𑀪𑀕𑀯𑀦𑁆𑀢𑀁 𑀫𑀳𑀸𑀭𑀳𑁂 𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀅𑀤𑀁𑀲𑀼. 𑀪𑀕𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀇𑀫𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀅𑀬𑀁 𑀧𑀤𑁂𑀲𑁄 𑀲𑀫𑁆𑀩𑀸𑀥𑁄, 𑀫𑀦𑀼𑀲𑁆𑀲𑀸𑀦𑀁 𑀞𑀸𑀢𑀼𑀁 𑀯𑀸 𑀦𑀺𑀲𑀻𑀤𑀺𑀢𑀼𑀁 𑀯𑀸 𑀑𑀓𑀸𑀲𑁄 𑀦 𑀪𑀯𑀺𑀲𑁆𑀲𑀢𑀺, 𑀫𑀳𑀢𑀸 𑀔𑁄 𑀧𑀦 𑀲𑀫𑀸𑀕𑀫𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺.

𑀅𑀣 𑀭𑀸𑀚𑀓𑀼𑀮𑀸𑀦𑀁 𑀪𑀢𑁆𑀢𑀸𑀦𑀼𑀫𑁄𑀤𑀦𑀁 𑀅𑀓𑀢𑁆𑀯𑀸𑀯 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺. 𑀫𑀦𑀼𑀲𑁆𑀲𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀲𑀢𑁆𑀣𑀸 𑀅𑀫𑁆𑀳𑀸𑀓𑀁 𑀅𑀦𑀼𑀫𑁄𑀤𑀦𑀫𑁆𑀧𑀺 𑀅𑀓𑀢𑁆𑀯𑀸 𑀕𑀘𑁆𑀙𑀢𑀺, 𑀅𑀤𑁆𑀥𑀸 𑀪𑀢𑁆𑀢𑀕𑁆𑀕𑀁 𑀅𑀫𑀦𑀸𑀧𑀁 𑀅𑀳𑁄𑀲𑀺, 𑀩𑀼𑀤𑁆𑀥𑀸𑀦𑀁 𑀦𑀸𑀫 𑀦 𑀲𑀓𑁆𑀓𑀸 𑀘𑀺𑀢𑁆𑀢𑀁 𑀕𑀳𑁂𑀢𑀼𑀁, 𑀩𑀼𑀤𑁆𑀥𑁂𑀳𑀺 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑀓𑀭𑀡𑀁 𑀦𑀸𑀫 𑀲𑀫𑀼𑀲𑁆𑀲𑀺𑀢𑀨𑀡𑀁 𑀆𑀲𑀻𑀯𑀺𑀲𑀁 𑀕𑀻𑀯𑀸𑀬 𑀕𑀳𑀡𑀲𑀤𑀺𑀲𑀁 𑀳𑁄𑀢𑀺; 𑀏𑀣 𑀪𑁄, 𑀢𑀣𑀸𑀕𑀢𑀁 𑀔𑀫𑀸𑀧𑁂𑀲𑁆𑀲𑀸𑀫𑀸’’𑀢𑀺. 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀪𑀕𑀯𑀢𑀸 𑀲𑀳𑁂𑀯 𑀦𑀺𑀓𑁆𑀔𑀦𑁆𑀢𑀸. 𑀪𑀕𑀯𑀸 𑀕𑀘𑁆𑀙𑀦𑁆𑀢𑁄𑀯 𑀫𑀕𑀥𑀓𑁆𑀔𑁂𑀢𑁆𑀢𑁂 𑀞𑀺𑀢𑀁 𑀲𑀸𑀔𑀸𑀯𑀺𑀝𑀧𑀲𑀫𑁆𑀧𑀦𑁆𑀦𑀁 𑀲𑀦𑁆𑀤𑀘𑁆𑀙𑀸𑀬𑀁 𑀓𑀭𑀻𑀲𑀫𑀢𑁆𑀢𑀪𑀽𑀫𑀺𑀧𑀢𑁆𑀣𑀝𑀁 𑀏𑀓𑀁 𑀫𑀸𑀢𑀼𑀮𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 𑀇𑀫𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 ¶ 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂 ‘‘𑀫𑀳𑀸𑀚𑀦𑀲𑁆𑀲 ¶ 𑀞𑀸𑀦𑀦𑀺𑀲𑀚𑁆𑀚𑀦𑁄𑀓𑀸𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀦𑀺𑀯𑀢𑁆𑀢𑀺𑀢𑁆𑀯𑀸 ¶ 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀭𑀼𑀓𑁆𑀔𑀫𑀽𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀁 𑀆𑀦𑀦𑁆𑀤𑀢𑁆𑀣𑁂𑀭𑀁 𑀑𑀮𑁄𑀓𑁂𑀲𑀺. 𑀣𑁂𑀭𑁄 𑀑𑀮𑁄𑀓𑀺𑀢𑀲𑀜𑁆𑀜𑀸𑀬 𑀏𑀯 ‘‘𑀲𑀢𑁆𑀣𑀸 𑀦𑀺𑀲𑀻𑀤𑀺𑀢𑀼𑀓𑀸𑀫𑁄’’𑀢𑀺 𑀜𑀢𑁆𑀯𑀸 𑀲𑀼𑀕𑀢𑀫𑀳𑀸𑀘𑀻𑀯𑀭𑀁 𑀧𑀜𑁆𑀜𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀅𑀣𑀲𑁆𑀲 𑀧𑀼𑀭𑀢𑁄 𑀫𑀦𑀼𑀲𑁆𑀲𑀸 𑀦𑀺𑀲𑀻𑀤𑀺𑀁𑀲𑀼. 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀧𑀘𑁆𑀙𑀢𑁄 𑀘 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀆𑀓𑀸𑀲𑁂 𑀤𑁂𑀯𑀢𑀸 𑀅𑀝𑁆𑀞𑀁𑀲𑀼, 𑀏𑀯𑀁 𑀫𑀳𑀸𑀧𑀭𑀺𑀲𑀫𑀚𑁆𑀛𑀕𑀢𑁄 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺.

𑀢𑁂 𑀪𑀺𑀓𑁆𑀔𑀽𑀢𑀺 𑀢𑀢𑁆𑀭 𑀉𑀧𑀯𑀺𑀝𑁆𑀞𑀸 𑀥𑀫𑁆𑀫𑀧𑁆𑀧𑀝𑀺𑀕𑁆𑀕𑀸𑀳𑀓𑀸 𑀪𑀺𑀓𑁆𑀔𑀽. 𑀅𑀢𑁆𑀢𑀤𑀻𑀧𑀸𑀢𑀺 𑀅𑀢𑁆𑀢𑀸𑀦𑀁 𑀤𑀻𑀧𑀁 𑀢𑀸𑀡𑀁 𑀮𑁂𑀡𑀁 𑀕𑀢𑀺𑀁 𑀧𑀭𑀸𑀬𑀡𑀁 𑀧𑀢𑀺𑀝𑁆𑀞𑀁 𑀓𑀢𑁆𑀯𑀸 𑀯𑀺𑀳𑀭𑀣𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀲𑀭𑀡𑀸𑀢𑀺 𑀇𑀤𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀦𑀜𑁆𑀜𑀲𑀭𑀡𑀸𑀢𑀺 𑀇𑀤𑀁 𑀅𑀜𑁆𑀜𑀲𑀭𑀡𑀧𑀝𑀺𑀓𑁆𑀔𑁂𑀧𑀯𑀘𑀦𑀁. 𑀦 𑀳𑀺 𑀅𑀜𑁆𑀜𑁄 𑀅𑀜𑁆𑀜𑀲𑁆𑀲 𑀲𑀭𑀡𑀁 𑀳𑁄𑀢𑀺, 𑀅𑀜𑁆𑀜𑀲𑁆𑀲 𑀯𑀸𑀬𑀸𑀫𑁂𑀦 𑀅𑀜𑁆𑀜𑀲𑁆𑀲 𑀅𑀲𑀼𑀚𑁆𑀛𑀦𑀢𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀅𑀢𑁆𑀢𑀸 𑀳𑀺 𑀅𑀢𑁆𑀢𑀦𑁄 𑀦𑀸𑀣𑁄, 𑀓𑁄 𑀳𑀺 𑀦𑀸𑀣𑁄 𑀧𑀭𑁄 𑀲𑀺𑀬𑀸’’𑀢𑀺 (𑀥. 𑀧. 𑁧𑁬𑁦). 𑀢𑁂𑀦𑀸𑀳 ‘‘𑀅𑀦𑀜𑁆𑀜𑀲𑀭𑀡𑀸’’𑀢𑀺. 𑀓𑁄 𑀧𑀦𑁂𑀢𑁆𑀣 𑀅𑀢𑁆𑀢𑀸 𑀦𑀸𑀫, 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄. 𑀢𑁂𑀦𑀸𑀳 𑁋 ‘‘𑀥𑀫𑁆𑀫𑀤𑀻𑀧𑀸 𑀥𑀫𑁆𑀫𑀲𑀭𑀡𑀸 𑀅𑀦𑀜𑁆𑀜𑀲𑀭𑀡𑀸’’𑀢𑀺. ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻’’𑀢𑀺𑀆𑀤𑀻𑀦𑀺 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑀺.

𑀕𑁄𑀘𑀭𑁂𑀢𑀺 𑀘𑀭𑀺𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂. 𑀲𑀓𑁂𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂. 𑀧𑁂𑀢𑁆𑀢𑀺𑀓𑁂 𑀯𑀺𑀲𑀬𑁂𑀢𑀺 𑀧𑀺𑀢𑀺𑀢𑁄 𑀆𑀕𑀢𑀯𑀺𑀲𑀬𑁂. 𑀘𑀭𑀢𑀦𑁆𑀢𑀺 𑀘𑀭𑀦𑁆𑀢𑀸𑀦𑀁. ‘‘𑀘𑀭𑀦𑁆𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. 𑀦 𑀮𑀘𑁆𑀙𑀢𑀻𑀢𑀺 𑀦 𑀮𑀪𑀺𑀲𑁆𑀲𑀢𑀺 𑀦 𑀧𑀲𑁆𑀲𑀺𑀲𑁆𑀲𑀢𑀺. 𑀫𑀸𑀭𑁄𑀢𑀺 𑀤𑁂𑀯𑀧𑀼𑀢𑁆𑀢𑀫𑀸𑀭𑁄𑀧𑀺, 𑀫𑀘𑁆𑀘𑀼𑀫𑀸𑀭𑁄𑀧𑀺, 𑀓𑀺𑀮𑁂𑀲𑀫𑀸𑀭𑁄𑀧𑀺. 𑀑𑀢𑀸𑀭𑀦𑁆𑀢𑀺 𑀭𑀦𑁆𑀥𑀁 𑀙𑀺𑀤𑁆𑀤𑀁 𑀯𑀺𑀯𑀭𑀁. 𑀅𑀬𑀁 𑀧𑀦𑀢𑁆𑀣𑁄 𑀮𑁂𑀟𑁆𑀟𑀼𑀝𑁆𑀞𑀸𑀦𑀢𑁄 𑀦𑀺𑀓𑁆𑀔𑀫𑁆𑀫 𑀢𑁄𑀭𑀡𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑀸𑀮𑀸𑀢𑀧𑀁 𑀢𑀧𑀦𑁆𑀢𑀁 𑀮𑀸𑀧𑀁 𑀲𑀓𑀼𑀡𑀁 𑀕𑀳𑁂𑀢𑁆𑀯𑀸. 𑀧𑀓𑁆𑀔𑀦𑁆𑀤𑀲𑁂𑀦𑀲𑀓𑀼𑀡𑀯𑀢𑁆𑀣𑀼𑀦𑀸 𑀤𑀻𑀧𑁂𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀲𑀓𑀼𑀡𑀕𑁆𑀖𑀺 𑀮𑀸𑀧𑀁 𑀲𑀓𑀼𑀡𑀁 𑀲𑀳𑀲𑀸 𑀅𑀚𑁆𑀛𑀧𑁆𑀧𑀢𑁆𑀢𑀸 𑀅𑀕𑁆𑀕𑀳𑁂𑀲𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀮𑀸𑀧𑁄 𑀲𑀓𑀼𑀡𑁄 𑀲𑀓𑀼𑀡𑀕𑁆𑀖𑀺𑀬𑀸 𑀳𑀭𑀺𑀬𑀫𑀸𑀦𑁄 𑀏𑀯𑀁 𑀧𑀭𑀺𑀤𑁂𑀯𑀲𑀺 ‘𑀫𑀬𑀫𑁂𑀯𑀫𑁆𑀳 𑀅𑀮𑀓𑁆𑀔𑀺𑀓𑀸, 𑀫𑀬𑀁 𑀅𑀧𑁆𑀧𑀧𑀼𑀜𑁆𑀜𑀸, 𑀬𑁂 ¶ 𑀫𑀬𑀁 𑀅𑀕𑁄𑀘𑀭𑁂 𑀘𑀭𑀺𑀫𑁆𑀳 𑀧𑀭𑀯𑀺𑀲𑀬𑁂, 𑀲𑀘𑁂𑀚𑁆𑀚 𑀫𑀬𑀁 𑀕𑁄𑀘𑀭𑁂 𑀘𑀭𑁂𑀬𑁆𑀬𑀸𑀫 𑀲𑀓𑁂 𑀧𑁂𑀢𑁆𑀢𑀺𑀓𑁂 𑀯𑀺𑀲𑀬𑁂, 𑀦 𑀫𑁆𑀬𑀸𑀬𑀁 𑀲𑀓𑀼𑀡𑀕𑁆𑀖𑀺 𑀅𑀮𑀁 𑀅𑀪𑀯𑀺𑀲𑁆𑀲 𑀬𑀤𑀺𑀤𑀁 𑀬𑀼𑀤𑁆𑀥𑀸𑀬𑀸’𑀢𑀺. 𑀓𑁄 𑀧𑀦 𑀢𑁂 𑀮𑀸𑀧 𑀕𑁄𑀘𑀭𑁄 𑀲𑀓𑁄 𑀧𑁂𑀢𑁆𑀢𑀺𑀓𑁄 𑀯𑀺𑀲𑀬𑁄𑀢𑀺? 𑀬𑀤𑀺𑀤𑀁 ¶ 𑀦𑀗𑁆𑀕𑀮𑀓𑀝𑁆𑀞𑀓𑀭𑀡𑀁 𑀮𑁂𑀟𑁆𑀟𑀼𑀝𑁆𑀞𑀸𑀦𑀦𑁆𑀢𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀓𑀼𑀡𑀕𑁆𑀖𑀺 𑀲𑀓𑁂 𑀩𑀮𑁂 𑀅𑀧𑀢𑁆𑀣𑀤𑁆𑀥𑀸 𑀲𑀓𑁂 𑀩𑀮𑁂 𑀅𑀲𑀁𑀯𑀤𑀫𑀸𑀦𑀸 𑀮𑀸𑀧𑀁 𑀲𑀓𑀼𑀡𑀁 𑀧𑀫𑀼𑀜𑁆𑀘𑀺 𑀕𑀘𑁆𑀙 𑀔𑁄 𑀢𑁆𑀯𑀁 𑀮𑀸𑀧, 𑀢𑀢𑁆𑀭𑀧𑀺 𑀕𑀦𑁆𑀢𑁆𑀯𑀸 𑀦 𑀫𑁄𑀓𑁆𑀔𑀲𑀻𑀢𑀺.

𑀅𑀣 𑀔𑁄 ¶ , 𑀪𑀺𑀓𑁆𑀔𑀯𑁂, 𑀮𑀸𑀧𑁄 𑀲𑀓𑀼𑀡𑁄 𑀦𑀗𑁆𑀕𑀮𑀓𑀝𑁆𑀞𑀓𑀭𑀡𑀁 𑀮𑁂𑀟𑁆𑀟𑀼𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀫𑀳𑀦𑁆𑀢𑀁 𑀮𑁂𑀟𑁆𑀟𑀼𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀓𑀼𑀡𑀕𑁆𑀖𑀺𑀁 𑀯𑀤𑀫𑀸𑀦𑁄 𑀅𑀝𑁆𑀞𑀸𑀲𑀺 ‘‘𑀏𑀳𑀺 𑀔𑁄 𑀤𑀸𑀦𑀺 𑀫𑁂 𑀲𑀓𑀼𑀡𑀕𑁆𑀖𑀺, 𑀏𑀳𑀺 𑀔𑁄 𑀤𑀸𑀦𑀺 𑀫𑁂 𑀲𑀓𑀼𑀡𑀕𑁆𑀖𑀻’’𑀢𑀺. 𑀅𑀣 𑀔𑁄 𑀲𑀸, 𑀪𑀺𑀓𑁆𑀔𑀯𑁂, 𑀲𑀓𑀼𑀡𑀕𑁆𑀖𑀺 𑀲𑀓𑁂 𑀩𑀮𑁂 𑀅𑀧𑀢𑁆𑀣𑀤𑁆𑀥𑀸 𑀲𑀓𑁂 𑀩𑀮𑁂 𑀅𑀲𑀁𑀯𑀤𑀫𑀸𑀦𑀸 𑀉𑀪𑁄 𑀧𑀓𑁆𑀔𑁂 𑀲𑀦𑁆𑀦𑀬𑁆𑀳 𑀮𑀸𑀧𑀁 𑀲𑀓𑀼𑀡𑀁 𑀲𑀳𑀲𑀸 𑀅𑀚𑁆𑀛𑀧𑁆𑀧𑀢𑁆𑀢𑀸. 𑀬𑀤𑀸 𑀔𑁄, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀸𑀲𑀺 𑀮𑀸𑀧𑁄 𑀲𑀓𑀼𑀡𑁄 𑀩𑀳𑀼𑀆𑀕𑀢𑀸 𑀔𑁄 𑀫𑁆𑀬𑀸𑀬𑀁 𑀲𑀓𑀼𑀡𑀕𑁆𑀖𑀻𑀢𑀺, 𑀅𑀣 𑀔𑁄 𑀢𑀲𑁆𑀲𑁂𑀯 𑀮𑁂𑀟𑁆𑀟𑀼𑀲𑁆𑀲 𑀅𑀦𑁆𑀢𑀭𑀁 𑀧𑀘𑁆𑀘𑀼𑀧𑀸𑀤𑀺. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀲𑀓𑀼𑀡𑀕𑁆𑀖𑀺 𑀢𑀢𑁆𑀣𑁂𑀯 𑀉𑀭𑀁 𑀧𑀘𑁆𑀘𑀢𑀸𑀴𑁂𑀲𑀺. 𑀏𑀯𑀜𑁆𑀳𑀺 𑀢𑀁, 𑀪𑀺𑀓𑁆𑀔𑀯𑁂, 𑀳𑁄𑀢𑀺 𑀬𑁄 𑀅𑀕𑁄𑀘𑀭𑁂 𑀘𑀭𑀢𑀺 𑀧𑀭𑀯𑀺𑀲𑀬𑁂.

𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀫𑀸 𑀅𑀕𑁄𑀘𑀭𑁂 𑀘𑀭𑀺𑀢𑁆𑀣 𑀧𑀭𑀯𑀺𑀲𑀬𑁂, 𑀅𑀕𑁄𑀘𑀭𑁂, 𑀪𑀺𑀓𑁆𑀔𑀯𑁂, 𑀘𑀭𑀢𑀁 𑀧𑀭𑀯𑀺𑀲𑀬𑁂 𑀮𑀘𑁆𑀙𑀢𑀺 𑀫𑀸𑀭𑁄 𑀑𑀢𑀸𑀭𑀁, 𑀮𑀘𑁆𑀙𑀢𑀺 𑀫𑀸𑀭𑁄 𑀆𑀭𑀫𑁆𑀫𑀡𑀁. 𑀓𑁄 𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀕𑁄𑀘𑀭𑁄 𑀧𑀭𑀯𑀺𑀲𑀬𑁄, 𑀬𑀤𑀺𑀤𑀁 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀓𑀢𑀫𑁂 𑀧𑀜𑁆𑀘? 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸, 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸, 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 𑀕𑀦𑁆𑀥𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸, 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸, 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸. 𑀅𑀬𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀕𑁄𑀘𑀭𑁄 𑀧𑀭𑀯𑀺𑀲𑀬𑁄.

𑀕𑁄𑀘𑀭𑁂, 𑀪𑀺𑀓𑁆𑀔𑀯𑁂, 𑀘𑀭𑀣…𑀧𑁂… 𑀦 𑀮𑀘𑁆𑀙𑀢𑀺 𑀫𑀸𑀭𑁄 𑀆𑀭𑀫𑁆𑀫𑀡𑀁. 𑀓𑁄 𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀕𑁄𑀘𑀭𑁄 𑀲𑀓𑁄 𑀧𑁂𑀢𑁆𑀢𑀺𑀓𑁄 𑀯𑀺𑀲𑀬𑁄, 𑀬𑀤𑀺𑀤𑀁 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁; 𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁; 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁; 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸, 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁 𑁋 𑀅𑀬𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀕𑁄𑀘𑀭𑁄 𑀲𑀓𑁄 𑀧𑁂𑀢𑁆𑀢𑀺𑀓𑁄 𑀯𑀺𑀲𑀬𑁄𑀢𑀺 (𑀲𑀁. 𑀦𑀺. 𑁫.𑁩𑁭𑁧).

𑀓𑀼𑀲𑀮𑀸𑀦𑀦𑁆𑀢𑀺 𑀅𑀦𑀯𑀚𑁆𑀚𑀮𑀓𑁆𑀔𑀡𑀸𑀦𑀁. 𑀲𑀫𑀸𑀤𑀸𑀦𑀳𑁂𑀢𑀽𑀢𑀺 𑀲𑀫𑀸𑀤𑀸𑀬 𑀯𑀢𑁆𑀢𑀦𑀳𑁂𑀢𑀼. 𑀏𑀯𑀫𑀺𑀤𑀁 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 ¶ 𑀏𑀯𑀁 𑀇𑀤𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀁 𑀧𑀼𑀜𑁆𑀜𑀨𑀮𑀁 𑀯𑀟𑁆𑀠𑀢𑀺, 𑀧𑀼𑀜𑁆𑀜𑀨𑀮𑀦𑁆𑀢𑀺 𑀘 𑀉𑀧𑀭𑀽𑀧𑀭𑀺 𑀧𑀼𑀜𑁆𑀜𑀫𑁆𑀧𑀺 𑀧𑀼𑀜𑁆𑀜𑀯𑀺𑀧𑀸𑀓𑁄𑀧𑀺 𑀯𑁂𑀤𑀺𑀢𑀩𑁆𑀩𑁄.

𑀤𑀴𑁆𑀳𑀦𑁂𑀫𑀺𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀓𑀣𑀸𑀯𑀡𑁆𑀡𑀦𑀸

𑁮𑁧. 𑀢𑀢𑁆𑀣 ¶ 𑀤𑀼𑀯𑀺𑀥𑀁 𑀓𑀼𑀲𑀮𑀁 ¶ 𑀯𑀝𑁆𑀝𑀕𑀸𑀫𑀻 𑀘 𑀯𑀺𑀯𑀝𑁆𑀝𑀕𑀸𑀫𑀻 𑀘. 𑀢𑀢𑁆𑀣 𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀁 𑀦𑀸𑀫 𑀫𑀸𑀢𑀸𑀧𑀺𑀢𑀽𑀦𑀁 𑀧𑀼𑀢𑁆𑀢𑀥𑀻𑀢𑀸𑀲𑀼 𑀧𑀼𑀢𑁆𑀢𑀥𑀻𑀢𑀸𑀦𑀜𑁆𑀘 𑀫𑀸𑀢𑀸𑀧𑀺𑀢𑀽𑀲𑀼 𑀲𑀺𑀦𑁂𑀳𑀯𑀲𑁂𑀦 𑀫𑀼𑀤𑀼𑀫𑀤𑁆𑀤𑀯𑀘𑀺𑀢𑁆𑀢𑀁. 𑀯𑀺𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀁 𑀦𑀸𑀫 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺𑀪𑁂𑀤𑀸 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸. 𑀢𑁂𑀲𑀼 𑀯𑀝𑁆𑀝𑀕𑀸𑀫𑀺𑀧𑀼𑀜𑁆𑀜𑀲𑁆𑀲 𑀧𑀭𑀺𑀬𑁄𑀲𑀸𑀦𑀁 𑀫𑀦𑀼𑀲𑁆𑀲𑀮𑁄𑀓𑁂 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀻𑀯𑀺𑀪𑀯𑁄. 𑀯𑀺𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀲𑁆𑀲 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺. 𑀢𑀢𑁆𑀣 𑀯𑀺𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀁 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀤𑀲𑁆𑀲𑁂𑀲𑁆𑀲𑀢𑀺.

𑀇𑀥 𑀧𑀦 𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀤𑀲𑁆𑀲𑀦𑀢𑁆𑀣𑀁, 𑀪𑀺𑀓𑁆𑀔𑀯𑁂, 𑀬𑀤𑀸 𑀧𑀼𑀢𑁆𑀢𑀥𑀻𑀢𑀭𑁄 𑀫𑀸𑀢𑀸𑀧𑀺𑀢𑀽𑀦𑀁 𑀑𑀯𑀸𑀤𑁂 𑀦 𑀅𑀝𑁆𑀞𑀁𑀲𑀼, 𑀢𑀤𑀸 𑀆𑀬𑀼𑀦𑀸𑀧𑀺 𑀯𑀡𑁆𑀡𑁂𑀦𑀸𑀧𑀺 𑀇𑀲𑁆𑀲𑀭𑀺𑀬𑁂𑀦𑀸𑀧𑀺 𑀧𑀭𑀺𑀳𑀸𑀬𑀺𑀁𑀲𑀼. 𑀬𑀤𑀸 𑀧𑀦 𑀅𑀝𑁆𑀞𑀁𑀲𑀼, 𑀢𑀤𑀸 𑀯𑀟𑁆𑀠𑀺𑀁𑀲𑀽𑀢𑀺 𑀯𑀢𑁆𑀯𑀸 𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀸𑀦𑀼𑀲𑀦𑁆𑀥𑀺𑀯𑀲𑁂𑀦 ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂’’𑀢𑀺 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀘𑀓𑁆𑀓𑀯𑀢𑁆𑀢𑀻𑀢𑀺𑀆𑀤𑀻𑀦𑀺 𑀫𑀳𑀸𑀧𑀤𑀸𑀦𑁂 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩) 𑀯𑀺𑀢𑁆𑀣𑀸𑀭𑀺𑀢𑀸𑀦𑁂𑀯.

𑁮𑁨. 𑀑𑀲𑀓𑁆𑀓𑀺𑀢𑀦𑁆𑀢𑀺 𑀈𑀲𑀓𑀫𑁆𑀧𑀺 𑀅𑀯𑀲𑀓𑁆𑀓𑀺𑀢𑀁. 𑀞𑀸𑀦𑀸 𑀘𑀼𑀢𑀦𑁆𑀢𑀺 𑀲𑀩𑁆𑀩𑀲𑁄 𑀞𑀸𑀦𑀸 𑀅𑀧𑀕𑀢𑀁. 𑀢𑀁 𑀓𑀺𑀭 𑀘𑀓𑁆𑀓𑀭𑀢𑀦𑀁 𑀅𑀦𑁆𑀢𑁂𑀧𑀼𑀭𑀤𑁆𑀯𑀸𑀭𑁂 𑀅𑀓𑁆𑀔𑀸𑀳𑀢𑀁 𑀯𑀺𑀬 𑀯𑁂𑀳𑀸𑀲𑀁 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀤𑁆𑀯𑁂 𑀔𑀤𑀺𑀭𑀢𑁆𑀣𑀫𑁆𑀪𑁂 𑀦𑀺𑀔𑀡𑀺𑀢𑁆𑀯𑀸 𑀘𑀓𑁆𑀓𑀭𑀢𑀦𑀫𑀢𑁆𑀣𑀓𑁂 𑀦𑁂𑀫𑀺𑀅𑀪𑀺𑀫𑀼𑀔𑀁 𑀏𑀓𑀁 𑀲𑀼𑀢𑁆𑀢𑀓𑀁 𑀩𑀦𑁆𑀥𑀺𑀁𑀲𑀼. 𑀅𑀥𑁄𑀪𑀸𑀕𑁂𑀧𑀺 𑀦𑁂𑀫𑀺𑀅𑀪𑀺𑀫𑀼𑀔𑀁 𑀏𑀓𑀁 𑀩𑀦𑁆𑀥𑀺𑀁𑀲𑀼. 𑀢𑁂𑀲𑀼 𑀉𑀧𑀭𑀺𑀫𑀲𑀼𑀢𑁆𑀢𑀢𑁄 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀑𑀕𑀢𑀁 𑀘𑀓𑁆𑀓𑀭𑀢𑀦𑀁 𑀑𑀲𑀓𑁆𑀓𑀺𑀢𑀁 𑀦𑀸𑀫 𑀳𑁄𑀢𑀺, 𑀳𑁂𑀝𑁆𑀞𑀸 𑀲𑀼𑀢𑁆𑀢𑀲𑁆𑀲 𑀞𑀸𑀦𑀁 𑀉𑀧𑀭𑀺𑀫𑀓𑁄𑀝𑀺𑀬𑀸 𑀅𑀢𑀺𑀓𑁆𑀓𑀦𑁆𑀢𑀕𑀢𑀁 𑀞𑀸𑀦𑀸 𑀘𑀼𑀢𑀁 𑀦𑀸𑀫 𑀳𑁄𑀢𑀺, 𑀢𑀤𑁂𑀢𑀁 𑀅𑀢𑀺𑀩𑀮𑀯𑀤𑁄𑀲𑁂 𑀲𑀢𑀺 𑀏𑀯𑀁 𑀳𑁄𑀢𑀺. 𑀲𑀼𑀢𑁆𑀢𑀫𑀢𑁆𑀢𑀫𑁆𑀧𑀺 𑀏𑀓𑀗𑁆𑀕𑀼𑀮𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀁 𑀯𑀸 𑀪𑀝𑁆𑀞𑀁 𑀞𑀸𑀦𑀸 𑀘𑀼𑀢𑀫𑁂𑀯 𑀳𑁄𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 ‘‘𑀑𑀲𑀓𑁆𑀓𑀺𑀢𑀁 𑀞𑀸𑀦𑀸 𑀘𑀼𑀢’’𑀦𑁆𑀢𑀺.

𑀅𑀣 𑀫𑁂 𑀆𑀭𑁄𑀘𑁂𑀬𑁆𑀬𑀸𑀲𑀻𑀢𑀺 𑀢𑀸𑀢, 𑀢𑁆𑀯𑀁 𑀅𑀚𑁆𑀚 𑀆𑀤𑀺𑀁 𑀓𑀢𑁆𑀯𑀸 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀘𑀓𑁆𑀓𑀭𑀢𑀦𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙, 𑀏𑀯𑀁 𑀕𑀘𑁆𑀙𑀦𑁆𑀢𑁄 𑀬𑀤𑀸 𑀘𑀓𑁆𑀓𑀭𑀢𑀦𑀁 𑀈𑀲𑀓𑀫𑁆𑀧𑀺 𑀑𑀲𑀓𑁆𑀓𑀺𑀢𑀁 𑀞𑀸𑀦𑀸 𑀘𑀼𑀢𑀁 𑀧𑀲𑁆𑀲𑀲𑀺, 𑀅𑀣 𑀫𑀬𑁆𑀳𑀁 𑀆𑀘𑀺𑀓𑁆𑀔𑁂𑀬𑁆𑀬𑀸𑀲𑀺. 𑀚𑀻𑀯𑀺𑀢𑀜𑁆𑀳𑀺 𑀫𑁂 𑀢𑀯 𑀳𑀢𑁆𑀣𑁂 𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺. 𑀅𑀤𑁆𑀤𑀲𑀸𑀢𑀺 𑀅𑀧𑁆𑀧𑀫𑀢𑁆𑀢𑁄 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀕𑀦𑁆𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀏𑀓𑀤𑀺𑀯𑀲𑀁 𑀅𑀤𑁆𑀤𑀲.

𑁮𑁩. 𑀅𑀣 ¶ 𑀔𑁄, 𑀪𑀺𑀓𑁆𑀔𑀯𑁂𑀢𑀺 𑀪𑀺𑀓𑁆𑀔𑀯𑁂, 𑀅𑀣 𑀭𑀸𑀚𑀸 𑀤𑀴𑁆𑀳𑀦𑁂𑀫𑀺 ‘‘𑀘𑀓𑁆𑀓𑀭𑀢𑀦𑀁 𑀑𑀲𑀓𑁆𑀓𑀺𑀢’’𑀦𑁆𑀢𑀺 ¶ 𑀲𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑀩𑀮𑀯𑀤𑁄𑀫𑀦𑀲𑁆𑀲𑁄 ‘‘𑀦 𑀤𑀸𑀦𑀺 𑀫𑀬𑀸 𑀘𑀺𑀭𑀁 𑀚𑀻𑀯𑀺𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺, 𑀅𑀧𑁆𑀧𑀸𑀯𑀲𑁂𑀲𑀁 𑀫𑁂 𑀆𑀬𑀼, 𑀦 𑀫𑁂 𑀤𑀸𑀦𑀺 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀦𑀓𑀸𑀮𑁄, 𑀧𑀩𑁆𑀩𑀚𑁆𑀚𑀸𑀓𑀸𑀮𑁄 𑀫𑁂 ¶ 𑀇𑀤𑀸𑀦𑀻’’𑀢𑀺 𑀭𑁄𑀤𑀺𑀢𑁆𑀯𑀸 𑀧𑀭𑀺𑀤𑁂𑀯𑀺𑀢𑁆𑀯𑀸 𑀚𑁂𑀝𑁆𑀞𑀧𑀼𑀢𑁆𑀢𑀁 𑀓𑀼𑀫𑀸𑀭𑀁 𑀆𑀫𑀦𑁆𑀢𑀸𑀧𑁂𑀢𑁆𑀯𑀸 𑀏𑀢𑀤𑀯𑁄𑀘. 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀦𑁆𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑀏𑀓𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀫𑁂𑀯. 𑀇𑀤𑀁 𑀳𑀺𑀲𑁆𑀲 𑀓𑀼𑀮𑀲𑀦𑁆𑀢𑀓𑀁. 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁 𑀧𑀦 𑀧𑀼𑀜𑁆𑀜𑀺𑀤𑁆𑀥𑀺𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀁, 𑀦 𑀢𑀁 𑀲𑀓𑁆𑀓𑀸 𑀤𑀸𑀢𑀼𑀁. 𑀓𑀼𑀮𑀲𑀦𑁆𑀢𑀓𑀁 𑀧𑀦 𑀦𑀺𑀬𑁆𑀬𑀸𑀢𑁂𑀦𑁆𑀢𑁄 ‘‘𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢’’𑀦𑁆𑀢𑀺 𑀆𑀳. 𑀓𑁂𑀲𑀫𑀲𑁆𑀲𑀼𑀦𑁆𑀢𑀺 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀦𑁆𑀢𑀸𑀧𑀺 𑀳𑀺 𑀧𑀞𑀫𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀦𑁆𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀧𑀭𑀽𑀴𑁆𑀳𑀓𑁂𑀲𑁂 𑀩𑀦𑁆𑀥𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸’’𑀢𑀺.

𑀓𑀸𑀲𑀸𑀬𑀸𑀦𑀻𑀢𑀺 𑀓𑀲𑀸𑀬𑀭𑀲𑀧𑀻𑀢𑀸𑀦𑀺. 𑀆𑀤𑀺𑀢𑁄 𑀏𑀯𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀯𑀓𑁆𑀓𑀮𑀸𑀦𑀺𑀧𑀺 𑀥𑀸𑀭𑁂𑀦𑁆𑀢𑀺. 𑀧𑀩𑁆𑀩𑀚𑀻𑀢𑀺 𑀧𑀩𑁆𑀩𑀚𑀺𑀢𑁄. 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀅𑀢𑁆𑀢𑀦𑁄 𑀫𑀗𑁆𑀕𑀮𑀯𑀦𑀼𑀬𑁆𑀬𑀸𑀦𑁂𑀬𑁂𑀯 𑀯𑀲𑀺. 𑀭𑀸𑀚𑀺𑀲𑀺𑀫𑁆𑀳𑀻𑀢𑀺 𑀭𑀸𑀚𑀈𑀲𑀺𑀫𑁆𑀳𑀺. 𑀩𑁆𑀭𑀸𑀳𑁆𑀫𑀡𑀧𑀩𑁆𑀩𑀚𑀺𑀢𑀸 𑀳𑀺 ‘‘𑀩𑁆𑀭𑀸𑀳𑁆𑀫𑀡𑀺𑀲𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑁂𑀢𑀘𑁆𑀙𑀢𑁆𑀢𑀁 𑀧𑀦 𑀧𑀳𑀸𑀬 𑀭𑀸𑀚𑀧𑀩𑁆𑀩𑀚𑀺𑀢𑀸 𑀭𑀸𑀚𑀺𑀲𑀬𑁄𑀢𑀺. 𑀅𑀦𑁆𑀢𑀭𑀥𑀸𑀬𑀻𑀢𑀺 𑀅𑀦𑁆𑀢𑀭𑀳𑀺𑀢𑀁 𑀦𑀺𑀩𑁆𑀩𑀼𑀢𑀤𑀻𑀧𑀲𑀺𑀔𑀸 𑀯𑀺𑀬 𑀅𑀪𑀸𑀯𑀁 𑀉𑀧𑀕𑀢𑀁. 𑀧𑀝𑀺𑀲𑀁𑀯𑁂𑀤𑁂𑀲𑀻𑀢𑀺 𑀓𑀦𑁆𑀤𑀦𑁆𑀢𑁄 𑀧𑀭𑀺𑀤𑁂𑀯𑀦𑁆𑀢𑁄 𑀚𑀸𑀦𑀸𑀧𑁂𑀲𑀺. 𑀧𑁂𑀢𑁆𑀢𑀺𑀓𑀦𑁆𑀢𑀺 𑀧𑀺𑀢𑀺𑀢𑁄 𑀆𑀕𑀢𑀁 𑀤𑀸𑀬𑀚𑁆𑀚𑀁 𑀦 𑀳𑁄𑀢𑀺, 𑀦 𑀲𑀓𑁆𑀓𑀸 𑀓𑀼𑀲𑀻𑀢𑁂𑀦 𑀳𑀻𑀦𑀯𑀻𑀭𑀺𑀬𑁂𑀦 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑁂 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑁂𑀦 𑀧𑀸𑀧𑀼𑀡𑀺𑀢𑀼𑀁. 𑀅𑀢𑁆𑀢𑀦𑁄 𑀧𑀦 𑀲𑀼𑀓𑀢𑀁 𑀓𑀫𑁆𑀫𑀁 𑀦𑀺𑀲𑁆𑀲𑀸𑀬 𑀤𑀲𑀯𑀺𑀥𑀁 𑀤𑁆𑀯𑀸𑀤𑀲𑀯𑀺𑀥𑀁 𑀯𑀸 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀁 𑀧𑀽𑀭𑁂𑀦𑁆𑀢𑁂𑀦𑁂𑀯𑁂𑀢𑀁 𑀧𑀢𑁆𑀢𑀩𑁆𑀩𑀦𑁆𑀢𑀺 𑀤𑀻𑀧𑁂𑀢𑀺. 𑀅𑀣 𑀦𑀁 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀁 𑀘𑁄𑀤𑁂𑀦𑁆𑀢𑁄 ‘‘𑀇𑀗𑁆𑀖 𑀢𑁆𑀯’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀭𑀺𑀬𑁂𑀢𑀺 𑀦𑀺𑀤𑁆𑀤𑁄𑀲𑁂. 𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑁂𑀢𑀺 𑀘𑀓𑁆𑀓𑀯𑀢𑁆𑀢𑀻𑀦𑀁 𑀯𑀢𑁆𑀢𑁂.

𑀘𑀓𑁆𑀓𑀯𑀢𑁆𑀢𑀺𑀅𑀭𑀺𑀬𑀯𑀢𑁆𑀢𑀯𑀡𑁆𑀡𑀦𑀸

𑁮𑁪. 𑀥𑀫𑁆𑀫𑀦𑁆𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀁. 𑀦𑀺𑀲𑁆𑀲𑀸𑀬𑀸𑀢𑀺 𑀢𑀤𑀥𑀺𑀝𑁆𑀞𑀸𑀦𑁂𑀦 𑀘𑁂𑀢𑀲𑀸 𑀢𑀫𑁂𑀯 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸. 𑀥𑀫𑁆𑀫𑀁 𑀲𑀓𑁆𑀓𑀭𑁄𑀦𑁆𑀢𑁄𑀢𑀺 𑀬𑀣𑀸 𑀓𑀢𑁄 𑀲𑁄 𑀥𑀫𑁆𑀫𑁄 𑀲𑀼𑀝𑁆𑀞𑀼 𑀓𑀢𑁄 𑀳𑁄𑀢𑀺, 𑀏𑀯𑀫𑁂𑀢𑀁 𑀓𑀭𑁄𑀦𑁆𑀢𑁄. 𑀥𑀫𑁆𑀫𑀁 𑀕𑀭𑀼𑀁 𑀓𑀭𑁄𑀦𑁆𑀢𑁄𑀢𑀺 𑀢𑀲𑁆𑀫𑀺𑀁 𑀕𑀸𑀭𑀯𑀼𑀧𑁆𑀧𑀢𑁆𑀢𑀺𑀬𑀸 𑀢𑀁 𑀕𑀭𑀼𑀁 𑀓𑀭𑁄𑀦𑁆𑀢𑁄. 𑀥𑀫𑁆𑀫𑀁 𑀫𑀸𑀦𑁂𑀦𑁆𑀢𑁄𑀢𑀺 𑀢𑀫𑁂𑀯 𑀥𑀫𑁆𑀫𑀁 𑀧𑀺𑀬𑀜𑁆𑀘 𑀪𑀸𑀯𑀦𑀻𑀬𑀜𑁆𑀘 𑀓𑀢𑁆𑀯𑀸 𑀯𑀺𑀳𑀭𑀦𑁆𑀢𑁄. 𑀥𑀫𑁆𑀫𑀁 𑀧𑀽𑀚𑁂𑀦𑁆𑀢𑁄𑀢𑀺 𑀢𑀁 𑀅𑀧𑀤𑀺𑀲𑀺𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀺𑀧𑀽𑀚𑀦𑁂𑀦𑀲𑁆𑀲 𑀧𑀽𑀚𑀁 𑀓𑀭𑁄𑀦𑁆𑀢𑁄. 𑀥𑀫𑁆𑀫𑀁 ¶ 𑀅𑀧𑀘𑀬𑀫𑀸𑀦𑁄𑀢𑀺 𑀢𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀅𑀜𑁆𑀚𑀮𑀺𑀓𑀭𑀡𑀸𑀤𑀻𑀳𑀺 𑀦𑀻𑀘𑀯𑀼𑀢𑁆𑀢𑀺𑀢𑀁 𑀓𑀭𑁄𑀦𑁆𑀢𑁄. 𑀥𑀫𑁆𑀫𑀤𑁆𑀥𑀚𑁄 ¶ 𑀥𑀫𑁆𑀫𑀓𑁂𑀢𑀽𑀢𑀺 𑀢𑀁 𑀥𑀫𑁆𑀫𑀁 𑀥𑀚𑀫𑀺𑀯 𑀧𑀼𑀭𑀓𑁆𑀔𑀢𑁆𑀯𑀸 𑀓𑁂𑀢𑀼𑀫𑀺𑀯 𑀘 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀯𑀢𑁆𑀢𑀺𑀬𑀸 𑀥𑀫𑁆𑀫𑀤𑁆𑀥𑀚𑁄 𑀥𑀫𑁆𑀫𑀓𑁂𑀢𑀼 𑀘 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑁄𑀢𑀺 𑀥𑀫𑁆𑀫𑀸𑀥𑀺𑀧𑀢𑀺𑀪𑀽𑀢𑁄 𑀆𑀕𑀢𑀪𑀸𑀯𑁂𑀦 𑀥𑀫𑁆𑀫𑀯𑀲𑁂𑀦𑁂𑀯 𑀲𑀩𑁆𑀩𑀓𑀺𑀭𑀺𑀬𑀸𑀦𑀁 𑀓𑀭𑀡𑁂𑀦 𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑁄 𑀳𑀼𑀢𑁆𑀯𑀸. 𑀥𑀫𑁆𑀫𑀺𑀓𑀁 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀁 𑀲𑀁𑀯𑀺𑀤𑀳𑀲𑁆𑀲𑀽𑀢𑀺 𑀥𑀫𑁆𑀫𑁄 𑀅𑀲𑁆𑀲𑀸 𑀅𑀢𑁆𑀣𑀻𑀢𑀺 𑀥𑀫𑁆𑀫𑀺𑀓𑀸, 𑀭𑀓𑁆𑀔𑀸 𑀘 𑀆𑀯𑀭𑀡𑀜𑁆𑀘 𑀕𑀼𑀢𑁆𑀢𑀺 𑀘 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺 ¶ . 𑀢𑀢𑁆𑀣 ‘‘𑀧𑀭𑀁 𑀭𑀓𑁆𑀔𑀦𑁆𑀢𑁄 𑀅𑀢𑁆𑀢𑀸𑀦𑀁 𑀭𑀓𑁆𑀔𑀢𑀻’’𑀢𑀺 (𑀲𑀁. 𑀦𑀺. 𑁫.𑁩𑁮𑁫) 𑀯𑀘𑀦𑀢𑁄 𑀔𑀦𑁆𑀢𑀺𑀆𑀤𑀬𑁄 𑀭𑀓𑁆𑀔𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀭𑀁 𑀭𑀓𑁆𑀔𑀦𑁆𑀢𑁄 𑀅𑀢𑁆𑀢𑀸𑀦𑀁 𑀭𑀓𑁆𑀔𑀢𑀺. 𑀔𑀦𑁆𑀢𑀺𑀬𑀸 𑀅𑀯𑀺𑀳𑀺𑀁𑀲𑀸𑀬 𑀫𑁂𑀢𑁆𑀢𑀘𑀺𑀢𑁆𑀢𑀢𑀸 𑀅𑀦𑀼𑀤𑁆𑀤𑀬𑀢𑀸’’𑀢𑀺 (𑀲𑀁. 𑀦𑀺. 𑁫.𑁩𑁮𑁫). 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀕𑁂𑀳𑀸𑀤𑀻𑀦𑀁 𑀦𑀺𑀯𑀸𑀭𑀡𑀸 𑀆𑀯𑀭𑀡𑀁, 𑀘𑁄𑀭𑀸𑀤𑀺𑀉𑀧𑀤𑁆𑀤𑀯𑀦𑀺𑀯𑀸𑀭𑀡𑀢𑁆𑀣𑀁 𑀕𑁄𑀧𑀸𑀬𑀦𑀸 𑀕𑀼𑀢𑁆𑀢𑀺, 𑀢𑀁 𑀲𑀩𑁆𑀩𑀫𑁆𑀧𑀺 𑀲𑀼𑀝𑁆𑀞𑀼 𑀲𑀁𑀯𑀺𑀤𑀳𑀲𑁆𑀲𑀼 𑀧𑀯𑀢𑁆𑀢𑀬 𑀞𑀧𑁂𑀳𑀻𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀬𑀢𑁆𑀣 𑀲𑀸 𑀲𑀁𑀯𑀺𑀤𑀳𑀺𑀢𑀩𑁆𑀩𑀸, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀅𑀦𑁆𑀢𑁄𑀚𑀦𑀲𑁆𑀫𑀺𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀅𑀦𑁆𑀢𑁄𑀚𑀦𑀲𑀗𑁆𑀔𑀸𑀢𑀁 𑀢𑀯 𑀧𑀼𑀢𑁆𑀢𑀤𑀸𑀭𑀁 𑀲𑀻𑀮𑀲𑀁𑀯𑀭𑁂 𑀧𑀢𑀺𑀝𑁆𑀞𑀧𑁂𑀳𑀺, 𑀯𑀢𑁆𑀣𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀘𑀲𑁆𑀲 𑀤𑁂𑀳𑀺, 𑀲𑀩𑁆𑀩𑁄𑀧𑀤𑁆𑀤𑀯𑁂 𑀘𑀲𑁆𑀲 𑀦𑀺𑀯𑀸𑀭𑁂𑀳𑀺. 𑀩𑀮𑀓𑀸𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀩𑀮𑀓𑀸𑀬𑁄 𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀪𑀢𑁆𑀢𑀯𑁂𑀢𑀦𑀲𑀫𑁆𑀧𑀤𑀸𑀦𑁂𑀦𑀧𑀺 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑁄. 𑀅𑀪𑀺𑀲𑀺𑀢𑁆𑀢𑀔𑀢𑁆𑀢𑀺𑀬𑀸 𑀪𑀤𑁆𑀭𑀲𑁆𑀲𑀸𑀚𑀸𑀦𑁂𑀬𑁆𑀬𑀸𑀤𑀺𑀭𑀢𑀦𑀲𑀫𑁆𑀧𑀤𑀸𑀦𑁂𑀦𑀧𑀺 𑀉𑀧𑀲𑀗𑁆𑀕𑀡𑁆𑀳𑀺𑀢𑀩𑁆𑀩𑀸. 𑀅𑀦𑀼𑀬𑀦𑁆𑀢𑀔𑀢𑁆𑀢𑀺𑀬𑀸 𑀢𑁂𑀲𑀁 𑀅𑀦𑀼𑀭𑀽𑀧𑀬𑀸𑀦𑀯𑀸𑀳𑀦𑀲𑀫𑁆𑀧𑀤𑀸𑀦𑁂𑀦𑀧𑀺 𑀧𑀭𑀺𑀢𑁄𑀲𑁂𑀢𑀩𑁆𑀩𑀸. 𑀩𑁆𑀭𑀸𑀳𑁆𑀫𑀡𑀸 𑀅𑀦𑁆𑀦𑀧𑀸𑀦𑀯𑀢𑁆𑀣𑀸𑀤𑀺𑀦𑀸 𑀤𑁂𑀬𑁆𑀬𑀥𑀫𑁆𑀫𑁂𑀦. 𑀕𑀳𑀧𑀢𑀺𑀓𑀸 𑀪𑀢𑁆𑀢𑀩𑀻𑀚𑀦𑀗𑁆𑀕𑀮𑀨𑀸𑀮𑀩𑀮𑀺𑀩𑀤𑁆𑀤𑀸𑀤𑀺𑀲𑀫𑁆𑀧𑀤𑀸𑀦𑁂𑀦. 𑀢𑀣𑀸 𑀦𑀺𑀕𑀫𑀯𑀸𑀲𑀺𑀦𑁄 𑀦𑁂𑀕𑀫𑀸, 𑀚𑀦𑀧𑀤𑀯𑀸𑀲𑀺𑀦𑁄 𑀘 𑀚𑀸𑀦𑀧𑀤𑀸. 𑀲𑀫𑀺𑀢𑀧𑀸𑀧𑀩𑀸𑀳𑀺𑀢𑀧𑀸𑀧𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀫𑀡𑀧𑀭𑀺𑀓𑁆𑀔𑀸𑀭𑀲𑀫𑁆𑀧𑀤𑀸𑀦𑁂𑀦 𑀲𑀓𑁆𑀓𑀸𑀢𑀩𑁆𑀩𑀸. 𑀫𑀺𑀕𑀧𑀓𑁆𑀔𑀺𑀦𑁄 𑀅𑀪𑀬𑀤𑀸𑀦𑁂𑀦 𑀲𑀫𑀲𑁆𑀲𑀸𑀲𑁂𑀢𑀩𑁆𑀩𑀸.

𑀯𑀺𑀚𑀺𑀢𑁂𑀢𑀺 𑀅𑀢𑁆𑀢𑀦𑁄 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑁂. 𑀅𑀥𑀫𑁆𑀫𑀓𑀸𑀭𑁄𑀢𑀺 𑀅𑀥𑀫𑁆𑀫𑀓𑀺𑀭𑀺𑀬𑀸. 𑀫𑀸 𑀧𑀯𑀢𑁆𑀢𑀺𑀢𑁆𑀣𑀸𑀢𑀺 𑀬𑀣𑀸 𑀦𑀧𑁆𑀧𑀯𑀢𑁆𑀢𑀢𑀺, 𑀢𑀣𑀸 𑀦𑀁 𑀧𑀝𑀺𑀧𑀸𑀤𑁂𑀳𑀻𑀢𑀺 𑀅𑀢𑁆𑀣𑁄. 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺 𑀲𑀫𑀺𑀢𑀧𑀸𑀧𑀩𑀸𑀳𑀺𑀢𑀧𑀸𑀧𑀸. 𑀫𑀤𑀧𑁆𑀧𑀫𑀸𑀤𑀸 ¶ 𑀧𑀝𑀺𑀯𑀺𑀭𑀢𑀸𑀢𑀺 𑀦𑀯𑀯𑀺𑀥𑀸 𑀫𑀸𑀦𑀫𑀤𑀸, 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀘𑀺𑀢𑁆𑀢𑀯𑁄𑀲𑁆𑀲𑀚𑁆𑀚𑀦𑀲𑀗𑁆𑀔𑀸𑀢𑀸 𑀧𑀫𑀸𑀤𑀸 𑀘 𑀧𑀝𑀺𑀯𑀺𑀭𑀢𑀸. 𑀔𑀦𑁆𑀢𑀺𑀲𑁄𑀭𑀘𑁆𑀘𑁂 𑀦𑀺𑀯𑀺𑀝𑁆𑀞𑀸𑀢𑀺 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀬𑀜𑁆𑀘 𑀲𑀼𑀭𑀢𑀪𑀸𑀯𑁂 𑀘 𑀧𑀢𑀺𑀝𑁆𑀞𑀺𑀢𑀸. 𑀏𑀓𑀫𑀢𑁆𑀢𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀭𑀸𑀕𑀸𑀤𑀻𑀦𑀁 𑀤𑀫𑀦𑀸𑀤𑀻𑀳𑀺 𑀏𑀓𑀫𑀢𑁆𑀢𑀸𑀦𑀁 𑀤𑀫𑁂𑀦𑁆𑀢𑀺 𑀲𑀫𑁂𑀦𑁆𑀢𑀺 𑀧𑀭𑀺𑀦𑀺𑀩𑁆𑀩𑀸𑀧𑁂𑀦𑁆𑀢𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀓𑀸𑀮𑁂𑀦 𑀓𑀸𑀮𑀦𑁆𑀢𑀺 𑀓𑀸𑀮𑁂 𑀓𑀸𑀮𑁂 ¶ . 𑀅𑀪𑀺𑀦𑀺𑀯𑀚𑁆𑀚𑁂𑀬𑁆𑀬𑀸𑀲𑀻𑀢𑀺 𑀕𑀽𑀣𑀁 𑀯𑀺𑀬 𑀯𑀺𑀲𑀁 𑀯𑀺𑀬 𑀅𑀕𑁆𑀕𑀺𑀁 𑀯𑀺𑀬 𑀘 𑀲𑀼𑀝𑁆𑀞𑀼 𑀯𑀚𑁆𑀚𑁂𑀬𑁆𑀬𑀸𑀲𑀺. 𑀲𑀫𑀸𑀤𑀸𑀬𑀸𑀢𑀺 𑀲𑀼𑀭𑀪𑀺𑀓𑀼𑀲𑀼𑀫𑀤𑀸𑀫𑀁 𑀯𑀺𑀬 𑀅𑀫𑀢𑀁 𑀯𑀺𑀬 𑀘 𑀲𑀫𑁆𑀫𑀸 𑀆𑀤𑀸𑀬 𑀧𑀯𑀢𑁆𑀢𑁂𑀬𑁆𑀬𑀸𑀲𑀺.

𑀇𑀥 𑀞𑀢𑁆𑀯𑀸 𑀯𑀢𑁆𑀢𑀁 𑀲𑀫𑀸𑀦𑁂𑀢𑀩𑁆𑀩𑀁. 𑀅𑀦𑁆𑀢𑁄𑀚𑀦𑀲𑁆𑀫𑀺𑀁 𑀩𑀮𑀓𑀸𑀬𑁂𑀧𑀺 𑀏𑀓𑀁, 𑀔𑀢𑁆𑀢𑀺𑀬𑁂𑀲𑀼 𑀏𑀓𑀁, 𑀅𑀦𑀼𑀬𑀦𑁆𑀢𑁂𑀲𑀼 𑀏𑀓𑀁, 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀲𑀼 𑀏𑀓𑀁, 𑀦𑁂𑀕𑀫𑀚𑀸𑀦𑀧𑀤𑁂𑀲𑀼 𑀏𑀓𑀁, 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼 𑀏𑀓𑀁, 𑀫𑀺𑀕𑀧𑀓𑁆𑀔𑀻𑀲𑀼 𑀏𑀓𑀁, 𑀅𑀥𑀫𑁆𑀫𑀓𑀸𑀭𑀧𑁆𑀧𑀝𑀺𑀓𑁆𑀔𑁂𑀧𑁄 𑀏𑀓𑀁, 𑀅𑀥𑀦𑀸𑀦𑀁 𑀥𑀦𑀸𑀦𑀼𑀧𑁆𑀧𑀤𑀸𑀦𑀁 𑀏𑀓𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀧𑀼𑀘𑁆𑀙𑀦𑀁 𑀏𑀓𑀦𑁆𑀢𑀺 𑀏𑀯𑀫𑁂𑀢𑀁 𑀤𑀲𑀯𑀺𑀥𑀁 𑀳𑁄𑀢𑀺. 𑀕𑀳𑀧𑀢𑀺𑀓𑁂 𑀧𑀦 𑀧𑀓𑁆𑀔𑀺𑀚𑀸𑀢𑁂 𑀘 𑀯𑀺𑀲𑀼𑀁 𑀓𑀢𑁆𑀯𑀸 𑀕𑀡𑁂𑀦𑁆𑀢𑀲𑁆𑀲 𑀤𑁆𑀯𑀸𑀤𑀲𑀯𑀺𑀥𑀁 𑀳𑁄𑀢𑀺. 𑀧𑀼𑀩𑁆𑀩𑁂 𑀅𑀯𑀼𑀢𑁆𑀢𑀁 𑀯𑀸 𑀕𑀡𑁂𑀦𑁆𑀢𑁂𑀦 𑀅𑀥𑀫𑁆𑀫𑀭𑀸𑀕𑀲𑁆𑀲 𑀘 𑀯𑀺𑀲𑀫𑀮𑁄𑀪𑀲𑁆𑀲 ¶ 𑀘 𑀧𑀳𑀸𑀦𑀯𑀲𑁂𑀦 𑀤𑁆𑀯𑀸𑀤𑀲𑀯𑀺𑀥𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀁 𑀔𑁄 𑀢𑀸𑀢 𑀢𑀦𑁆𑀢𑀺 𑀇𑀤𑀁 𑀤𑀲𑀯𑀺𑀥𑀁 𑀤𑁆𑀯𑀸𑀤𑀲𑀯𑀺𑀥𑀜𑁆𑀘 𑀅𑀭𑀺𑀬𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀁 𑀦𑀸𑀫. 𑀯𑀢𑁆𑀢𑀫𑀸𑀦𑀲𑁆𑀲𑀸𑀢𑀺 𑀧𑀽𑀭𑁂𑀢𑁆𑀯𑀸 𑀯𑀢𑁆𑀢𑀫𑀸𑀦𑀲𑁆𑀲. 𑀢𑀤𑀳𑀼𑀧𑁄𑀲𑀣𑁂𑀢𑀺𑀆𑀤𑀺 𑀫𑀳𑀸𑀲𑀼𑀤𑀲𑁆𑀲𑀦𑁂 𑀯𑀼𑀢𑁆𑀢𑀁.

𑁯𑁦. 𑀲𑀫𑀢𑁂𑀦𑀸𑀢𑀺 𑀅𑀢𑁆𑀢𑀦𑁄 𑀫𑀢𑀺𑀬𑀸. 𑀲𑀼𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀧𑀲𑀸𑀲𑀢𑀻𑀢𑀺 𑀅𑀦𑀼𑀲𑀸𑀲𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀧𑁄𑀭𑀸𑀡𑀓𑀁 𑀭𑀸𑀚𑀯𑀁𑀲𑀁 𑀭𑀸𑀚𑀧𑀯𑁂𑀡𑀺𑀁 𑀭𑀸𑀚𑀥𑀫𑁆𑀫𑀁 𑀧𑀳𑀸𑀬 𑀅𑀢𑁆𑀢𑀦𑁄 𑀫𑀢𑀺𑀫𑀢𑁆𑀢𑁂 𑀞𑀢𑁆𑀯𑀸 𑀚𑀦𑀧𑀤𑀁 𑀅𑀦𑀼𑀲𑀸𑀲𑀢𑀻𑀢𑀺. 𑀏𑀯𑀫𑀬𑀁 𑀫𑀖𑀤𑁂𑀯𑀯𑀁𑀲𑀲𑁆𑀲 𑀓𑀴𑀸𑀭𑀚𑀦𑀓𑁄 𑀯𑀺𑀬 𑀤𑀴𑁆𑀳𑀦𑁂𑀫𑀺𑀯𑀁𑀲𑀲𑁆𑀲 𑀉𑀧𑀘𑁆𑀙𑁂𑀤𑀓𑁄 𑀅𑀦𑁆𑀢𑀺𑀫𑀧𑀼𑀭𑀺𑀲𑁄 𑀳𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑁄. 𑀧𑀼𑀩𑁆𑀩𑁂𑀦𑀸𑀧𑀭𑀦𑁆𑀢𑀺 𑀧𑀼𑀩𑁆𑀩𑀓𑀸𑀮𑁂𑀦 𑀲𑀤𑀺𑀲𑀸 𑀳𑀼𑀢𑁆𑀯𑀸 𑀅𑀧𑀭𑀓𑀸𑀮𑀁. 𑀚𑀦𑀧𑀤𑀸 𑀦 𑀧𑀩𑁆𑀩𑀦𑁆𑀢𑀻𑀢𑀺 𑀦 𑀯𑀟𑁆𑀠𑀦𑁆𑀢𑀺. 𑀬𑀣𑀸 𑀢𑀁 𑀧𑀼𑀩𑁆𑀩𑀓𑀸𑀦𑀦𑁆𑀢𑀺 𑀬𑀣𑀸 𑀧𑀼𑀩𑁆𑀩𑀓𑀸𑀦𑀁 𑀭𑀸𑀚𑀽𑀦𑀁 𑀧𑀼𑀩𑁆𑀩𑁂 𑀘 𑀧𑀘𑁆𑀙𑀸 𑀘 𑀲𑀤𑀺𑀲𑀸𑀬𑁂𑀯 𑀳𑀼𑀢𑁆𑀯𑀸 𑀧𑀩𑁆𑀩𑀺𑀁𑀲𑀼, 𑀢𑀣𑀸 𑀦 𑀧𑀩𑁆𑀩𑀦𑁆𑀢𑀺. 𑀓𑀢𑁆𑀣𑀘𑀺 𑀲𑀼𑀜𑁆𑀜𑀸 𑀳𑁄𑀦𑁆𑀢𑀺 𑀳𑀢𑀯𑀺𑀮𑀼𑀢𑁆𑀢𑀸, 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀲𑀼 ¶ 𑀘𑁂𑀯 𑀬𑀸𑀕𑀼𑀪𑀢𑁆𑀢𑀸𑀤𑀻𑀲𑀼 𑀘 𑀑𑀚𑀸𑀧𑀺 𑀧𑀭𑀺𑀳𑀸𑀬𑀺𑀢𑁆𑀣𑀸𑀢𑀺 𑀅𑀢𑁆𑀣𑁄.

𑀅𑀫𑀘𑁆𑀘𑀸 𑀧𑀸𑀭𑀺𑀲𑀚𑁆𑀚𑀸𑀢𑀺 𑀅𑀫𑀘𑁆𑀘𑀸 𑀘𑁂𑀯 𑀧𑀭𑀺𑀲𑀸𑀯𑀘𑀭𑀸 𑀘. 𑀕𑀡𑀓𑀫𑀳𑀸𑀫𑀢𑁆𑀢𑀸𑀢𑀺 𑀅𑀘𑁆𑀙𑀺𑀤𑁆𑀤𑀓𑀸𑀤𑀺𑀧𑀸𑀞𑀕𑀡𑀓𑀸 𑀘𑁂𑀯 𑀫𑀳𑀸𑀅𑀫𑀘𑁆𑀘𑀸 𑀘. 𑀅𑀦𑀻𑀓𑀝𑁆𑀞𑀸𑀢𑀺 𑀳𑀢𑁆𑀣𑀺𑀆𑀘𑀭𑀺𑀬𑀸𑀤𑀬𑁄. 𑀤𑁄𑀯𑀸𑀭𑀺𑀓𑀸𑀢𑀺 𑀤𑁆𑀯𑀸𑀭𑀭𑀓𑁆𑀔𑀺𑀦𑁄. 𑀫𑀦𑁆𑀢𑀲𑁆𑀲𑀸𑀚𑀻𑀯𑀺𑀦𑁄𑀢𑀺 𑀫𑀦𑁆𑀢𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀢𑀁 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸 𑀬𑁂 𑀚𑀻𑀯𑀦𑁆𑀢𑀺 𑀧𑀡𑁆𑀟𑀺𑀢𑀸 𑀫𑀳𑀸𑀫𑀢𑁆𑀢𑀸, 𑀢𑁂𑀲𑀁 𑀏𑀢𑀁 𑀦𑀸𑀫𑀁.

𑀆𑀬𑀼𑀯𑀡𑁆𑀡𑀸𑀤𑀺𑀧𑀭𑀺𑀳𑀸𑀦𑀺𑀓𑀣𑀸𑀯𑀡𑁆𑀡𑀦𑀸

𑁯𑁧. 𑀦𑁄 ¶ 𑀘 𑀔𑁄 𑀅𑀥𑀦𑀸𑀦𑀦𑁆𑀢𑀺 𑀩𑀮𑀯𑀮𑁄𑀪𑀢𑁆𑀢𑀸 𑀧𑀦 𑀅𑀥𑀦𑀸𑀦𑀁 𑀤𑀮𑀺𑀤𑁆𑀤𑀫𑀦𑀼𑀲𑁆𑀲𑀸𑀦𑀁 𑀥𑀦𑀁 𑀦𑀸𑀦𑀼𑀧𑁆𑀧𑀤𑀸𑀲𑀺. 𑀦𑀸𑀦𑀼𑀧𑁆𑀧𑀤𑀺𑀬𑀫𑀸𑀦𑁂𑀢𑀺 𑀅𑀦𑀦𑀼𑀧𑁆𑀧𑀤𑀺𑀬𑀫𑀸𑀦𑁂, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀤𑀸𑀮𑀺𑀤𑁆𑀤𑀺𑀬𑀦𑁆𑀢𑀺 𑀤𑀮𑀺𑀤𑁆𑀤𑀪𑀸𑀯𑁄. 𑀅𑀢𑁆𑀢𑀦𑀸 𑀘 𑀚𑀻𑀯𑀸𑀳𑀻𑀢𑀺 𑀲𑀬𑀜𑁆𑀘 𑀚𑀻𑀯𑀁 𑀬𑀸𑀧𑁂𑀳𑀻𑀢𑀺 𑀅𑀢𑁆𑀣𑁄. 𑀉𑀤𑁆𑀥𑀕𑁆𑀕𑀺𑀓𑀦𑁆𑀢𑀺𑀆𑀤𑀻𑀲𑀼 𑀉𑀧𑀭𑀽𑀧𑀭𑀺𑀪𑀽𑀫𑀻𑀲𑀼 𑀨𑀮𑀤𑀸𑀦𑀯𑀲𑁂𑀦 𑀉𑀤𑁆𑀥𑀫𑀕𑁆𑀕𑀫𑀲𑁆𑀲𑀸𑀢𑀺 𑀉𑀤𑁆𑀥𑀕𑁆𑀕𑀺𑀓𑀸. 𑀲𑀕𑁆𑀕𑀲𑁆𑀲 𑀳𑀺𑀢𑀸 𑀢𑀢𑁆𑀭𑀼𑀧𑀧𑀢𑁆𑀢𑀺𑀚𑀦𑀦𑀢𑁄𑀢𑀺 𑀲𑁄𑀯𑀕𑁆𑀕𑀺𑀓𑀸. 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂 𑀲𑀼𑀔𑁄 𑀯𑀺𑀧𑀸𑀓𑁄 𑀅𑀲𑁆𑀲𑀸𑀢𑀺 𑀲𑀼𑀔𑀯𑀺𑀧𑀸𑀓𑀸. 𑀲𑀼𑀝𑁆𑀞𑀼 𑀅𑀕𑁆𑀕𑀸𑀦𑀁 𑀤𑀺𑀩𑁆𑀩𑀯𑀡𑁆𑀡𑀸𑀤𑀻𑀦𑀁 𑀤𑀲𑀦𑁆𑀦𑀁 𑀯𑀺𑀲𑁂𑀲𑀸𑀦𑀁 𑀦𑀺𑀩𑁆𑀩𑀢𑁆𑀢𑀦𑀢𑁄 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀸. 𑀏𑀯𑀭𑀽𑀧𑀁 𑀤𑀓𑁆𑀔𑀺𑀡𑀁 𑀤𑀸𑀦𑀁 𑀧𑀢𑀺𑀝𑁆𑀞𑀧𑁂𑀢𑀻𑀢𑀺 𑀅𑀢𑁆𑀣𑁄.

𑁯𑁨. 𑀧𑀯𑀟𑁆𑀠𑀺𑀲𑁆𑀲𑀢𑀻𑀢𑀺 𑀯𑀟𑁆𑀠𑀺𑀲𑁆𑀲𑀢𑀺 𑀩𑀳𑀼𑀁 𑀪𑀯𑀺𑀲𑁆𑀲𑀢𑀺. 𑀲𑀼𑀦𑀺𑀲𑁂𑀥𑀁 𑀦𑀺𑀲𑁂𑀥𑁂𑀬𑁆𑀬𑀦𑁆𑀢𑀺 𑀲𑀼𑀝𑁆𑀞𑀼 𑀦𑀺𑀲𑀺𑀤𑁆𑀥𑀁 𑀦𑀺𑀲𑁂𑀥𑁂𑀬𑁆𑀬𑀁. 𑀫𑀽𑀮𑀖𑀘𑁆𑀘𑀦𑁆𑀢𑀺 𑀫𑀽𑀮𑀳𑀢𑀁. 𑀔𑀭𑀲𑁆𑀲𑀭𑁂𑀦𑀸𑀢𑀺 𑀨𑀭𑀼𑀲𑀲𑀤𑁆𑀤𑁂𑀦. 𑀧𑀡𑀯𑁂𑀦𑀸𑀢𑀺 𑀯𑀚𑁆𑀛𑀪𑁂𑀭𑀺𑀬𑀸.

𑁯𑁩. 𑀲𑀻𑀲𑀸𑀦𑀺 ¶ 𑀦𑁂𑀲𑀁 𑀙𑀺𑀦𑁆𑀤𑀺𑀲𑁆𑀲𑀸𑀫𑀸𑀢𑀺 𑀬𑁂𑀲𑀁 𑀅𑀦𑁆𑀢𑀫𑀲𑁄 𑀫𑀽𑀮𑀓𑀫𑀼𑀝𑁆𑀞𑀺𑀫𑁆𑀧𑀺 𑀳𑀭𑀺𑀲𑁆𑀲𑀸𑀫, 𑀢𑁂𑀲𑀁 𑀢𑀣𑁂𑀯 𑀲𑀻𑀲𑀸𑀦𑀺 𑀙𑀺𑀦𑁆𑀤𑀺𑀲𑁆𑀲𑀸𑀫, 𑀬𑀣𑀸 𑀓𑁄𑀘𑀺 𑀳𑀝𑀪𑀸𑀯𑀫𑁆𑀧𑀺 𑀦 𑀚𑀸𑀦𑀺𑀲𑁆𑀲𑀢𑀺, 𑀅𑀫𑁆𑀳𑀸𑀓𑀁 𑀤𑀸𑀦𑀺 𑀓𑀺𑀫𑁂𑀢𑁆𑀣 𑀭𑀸𑀚𑀸𑀧𑀺 𑀏𑀯𑀁 𑀉𑀝𑁆𑀞𑀸𑀬 𑀧𑀭𑀁 𑀫𑀸𑀭𑁂𑀢𑀻𑀢𑀺 𑀅𑀬𑀁 𑀦𑁂𑀲𑀁 𑀅𑀥𑀺𑀧𑁆𑀧𑀸𑀬𑁄. 𑀉𑀧𑀓𑁆𑀓𑀫𑀺𑀁𑀲𑀽𑀢𑀺 𑀆𑀭𑀪𑀺𑀁𑀲𑀼. 𑀧𑀦𑁆𑀣𑀤𑀼𑀳𑀦𑀦𑁆𑀢𑀺 𑀧𑀦𑁆𑀣𑀖𑀸𑀢𑀁, 𑀧𑀦𑁆𑀣𑁂 𑀞𑀢𑁆𑀯𑀸 𑀘𑁄𑀭𑀓𑀫𑁆𑀫𑀁.

𑁯𑁪. 𑀦 𑀳𑀺, 𑀤𑁂𑀯𑀸𑀢𑀺 𑀲𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀭𑀸𑀚𑀸 𑀲𑀘𑁆𑀘𑀁 𑀤𑁂𑀯𑀸𑀢𑀺 𑀫𑀼𑀔𑀧𑀝𑀺𑀜𑁆𑀜𑀸𑀬 𑀤𑀺𑀦𑁆𑀦𑀸𑀬 𑀫𑀸𑀭𑀸𑀧𑁂𑀢𑀺, 𑀳𑀦𑁆𑀤𑀸𑀳𑀁 𑀫𑀼𑀲𑀸𑀯𑀸𑀤𑀁 𑀓𑀭𑁄𑀫𑀻’’𑀢𑀺, 𑀫𑀭𑀡𑀪𑀬𑀸 ‘‘𑀦 𑀳𑀺 𑀤𑁂𑀯𑀸’’𑀢𑀺 𑀅𑀯𑁄𑀘.

𑁯𑁬. 𑀏𑀓𑀺𑀤𑀦𑁆𑀢𑀺 ¶ 𑀏𑀢𑁆𑀣 𑀇𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀏𑀓𑁂 𑀲𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀘𑀸𑀭𑀺𑀢𑁆𑀢𑀦𑁆𑀢𑀺 𑀫𑀺𑀘𑁆𑀙𑀸𑀘𑀸𑀭𑀁. 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀸𑀢𑀺 𑀅𑀪𑀺𑀚𑁆𑀛𑀸 𑀘 𑀩𑁆𑀬𑀸𑀧𑀸𑀤𑁄 𑀘. 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀦𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺𑀆𑀤𑀺𑀓𑀸 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀧𑀘𑁆𑀘𑀦𑀻𑀓𑀤𑀺𑀝𑁆𑀞𑀺.

𑁧𑁦𑁧. 𑀅𑀥𑀫𑁆𑀫𑀭𑀸𑀕𑁄𑀢𑀺 𑀫𑀸𑀢𑀸 𑀫𑀸𑀢𑀼𑀘𑁆𑀙𑀸 𑀧𑀺𑀢𑀼𑀘𑁆𑀙𑀸 𑀫𑀸𑀢𑀼𑀮𑀸𑀦𑀻𑀢𑀺𑀆𑀤𑀺𑀓𑁂 𑀅𑀬𑀼𑀢𑁆𑀢𑀝𑁆𑀞𑀸𑀦𑁂 𑀭𑀸𑀕𑁄. 𑀯𑀺𑀲𑀫𑀮𑁄𑀪𑁄𑀢𑀺 𑀧𑀭𑀺𑀪𑁄𑀕𑀬𑀼𑀢𑁆𑀢𑁂𑀲𑀼𑀧𑀺 𑀞𑀸𑀦𑁂𑀲𑀼 𑀅𑀢𑀺𑀩𑀮𑀯𑀮𑁄𑀪𑁄. 𑀫𑀺𑀘𑁆𑀙𑀸𑀥𑀫𑁆𑀫𑁄𑀢𑀺 𑀧𑀼𑀭𑀺𑀲𑀸𑀦𑀁 𑀧𑀼𑀭𑀺𑀲𑁂𑀲𑀼 𑀇𑀢𑁆𑀣𑀻𑀦𑀜𑁆𑀘 𑀇𑀢𑁆𑀣𑀻𑀲𑀼 𑀙𑀦𑁆𑀤𑀭𑀸𑀕𑁄.

𑀅𑀫𑀢𑁆𑀢𑁂𑀬𑁆𑀬𑀢𑀸𑀢𑀺𑀆𑀤𑀻𑀲𑀼 ¶ 𑀫𑀸𑀢𑀼 𑀳𑀺𑀢𑁄 𑀫𑀢𑁆𑀢𑁂𑀬𑁆𑀬𑁄, 𑀢𑀲𑁆𑀲 𑀪𑀸𑀯𑁄 𑀫𑀢𑁆𑀢𑁂𑀬𑁆𑀬𑀢𑀸, 𑀫𑀸𑀢𑀭𑀺 𑀲𑀫𑁆𑀫𑀸 𑀧𑀝𑀺𑀧𑀢𑁆𑀢𑀺𑀬𑀸 𑀏𑀢𑀁 𑀦𑀸𑀫𑀁. 𑀢𑀲𑁆𑀲𑀸 𑀅𑀪𑀸𑀯𑁄 𑀘𑁂𑀯 𑀢𑀧𑁆𑀧𑀝𑀺𑀧𑀓𑁆𑀔𑀢𑀸 𑀘 𑀅𑀫𑀢𑁆𑀢𑁂𑀬𑁆𑀬𑀢𑀸. 𑀅𑀧𑁂𑀢𑁆𑀢𑁂𑀬𑁆𑀬𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀢𑀸𑀢𑀺 𑀓𑀼𑀮𑁂 𑀚𑁂𑀝𑁆𑀞𑀸𑀦𑀁 𑀅𑀧𑀘𑀺𑀢𑀺𑀬𑀸 𑀦𑀻𑀘𑀯𑀼𑀢𑁆𑀢𑀺𑀬𑀸 𑀅𑀓𑀭𑀡𑀪𑀸𑀯𑁄.

𑀤𑀲𑀯𑀲𑁆𑀲𑀸𑀬𑀼𑀓𑀲𑀫𑀬𑀯𑀡𑁆𑀡𑀦𑀸

𑁧𑁦𑁩. 𑀬𑀁 𑀇𑀫𑁂𑀲𑀦𑁆𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀇𑀫𑁂𑀲𑀁. 𑀅𑀮𑀁𑀧𑀢𑁂𑀬𑁆𑀬𑀸𑀢𑀺 𑀧𑀢𑀺𑀦𑁄 𑀤𑀸𑀢𑀼𑀁 𑀬𑀼𑀢𑁆𑀢𑀸. 𑀇𑀫𑀸𑀦𑀺 𑀭𑀲𑀸𑀦𑀻𑀢𑀺 𑀇𑀫𑀸𑀦𑀺 𑀮𑁄𑀓𑁂 𑀅𑀕𑁆𑀕𑀭𑀲𑀸𑀦𑀺. 𑀅𑀢𑀺𑀩𑁆𑀬𑀸𑀤𑀺𑀧𑁆𑀧𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑀺𑀯𑀺𑀬 𑀤𑀺𑀧𑁆𑀧𑀺𑀲𑁆𑀲𑀦𑁆𑀢𑀺, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀓𑀼𑀲𑀮𑀦𑁆𑀢𑀺𑀧𑀺 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀓𑀼𑀲𑀮𑀦𑁆𑀢𑀺 𑀦𑀸𑀫𑀫𑁆𑀧𑀺 𑀦 𑀪𑀯𑀺𑀲𑁆𑀲𑀢𑀺, 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀫𑁆𑀧𑀺 𑀦 𑀧𑀜𑁆𑀜𑀸𑀬𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀚𑁆𑀚𑀸 𑀘 𑀪𑀯𑀺𑀲𑁆𑀲𑀦𑁆𑀢𑀺 𑀧𑀸𑀲𑀁𑀲𑀸 𑀘𑀸𑀢𑀺 𑀧𑀽𑀚𑀸𑀭𑀳𑀸 𑀘 𑀪𑀯𑀺𑀲𑁆𑀲𑀦𑁆𑀢𑀺 𑀧𑀲𑀁𑀲𑀸𑀭𑀳𑀸 𑀘. 𑀢𑀤𑀸 𑀓𑀺𑀭 𑀫𑀦𑀼𑀲𑁆𑀲𑀸 ‘‘𑀅𑀲𑀼𑀓𑁂𑀦 𑀦𑀸𑀫 𑀫𑀸𑀢𑀸 𑀧𑀳𑀢𑀸, 𑀧𑀺𑀢𑀸 𑀧𑀳𑀢𑁄, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑀺𑀢𑀸, 𑀓𑀼𑀮𑁂 𑀚𑁂𑀝𑁆𑀞𑀸𑀦𑀁 𑀅𑀢𑁆𑀣𑀺𑀪𑀸𑀯𑀫𑁆𑀧𑀺 𑀦 𑀚𑀸𑀦𑀸𑀢𑀺, 𑀅𑀳𑁄 𑀧𑀼𑀭𑀺𑀲𑁄’’𑀢𑀺 𑀢𑀫𑁂𑀯 𑀧𑀽𑀚𑁂𑀲𑁆𑀲𑀦𑁆𑀢𑀺 𑀘𑁂𑀯 𑀧𑀲𑀁𑀲𑀺𑀲𑁆𑀲𑀦𑁆𑀢𑀺 𑀘.

𑀦 ¶ 𑀪𑀯𑀺𑀲𑁆𑀲𑀢𑀺 𑀫𑀸𑀢𑀸𑀢𑀺 𑀯𑀸𑀢𑀺 𑀅𑀬𑀁 𑀫𑀬𑁆𑀳𑀁 𑀫𑀸𑀢𑀸𑀢𑀺 𑀕𑀭𑀼𑀘𑀺𑀢𑁆𑀢𑀁 𑀦 𑀪𑀯𑀺𑀲𑁆𑀲𑀢𑀺. 𑀕𑁂𑀳𑁂 𑀫𑀸𑀢𑀼𑀕𑀸𑀫𑀁 𑀯𑀺𑀬 𑀦𑀸𑀦𑀸𑀯𑀺𑀥𑀁 𑀅𑀲𑀩𑁆𑀪𑀺𑀓𑀣𑀁 𑀓𑀣𑀬𑀫𑀸𑀦𑀸 𑀅𑀕𑀸𑀭𑀯𑀼𑀧𑀘𑀸𑀭𑁂𑀦 𑀉𑀧𑀲𑀗𑁆𑀓𑀫𑀺𑀲𑁆𑀲𑀦𑁆𑀢𑀺. 𑀫𑀸𑀢𑀼𑀘𑁆𑀙𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀫𑀸𑀢𑀼𑀘𑁆𑀙𑀸𑀢𑀺 𑀫𑀸𑀢𑀼𑀪𑀕𑀺𑀦𑀻. 𑀫𑀸𑀢𑀼𑀮𑀸𑀦𑀻𑀢𑀺 𑀫𑀸𑀢𑀼𑀮𑀪𑀭𑀺𑀬𑀸. 𑀆𑀘𑀭𑀺𑀬𑀪𑀭𑀺𑀬𑀸𑀢𑀺 𑀲𑀺𑀧𑁆𑀧𑀸𑀬𑀢𑀦𑀸𑀦𑀺 𑀲𑀺𑀓𑁆𑀔𑀸𑀧𑀓𑀲𑁆𑀲 𑀆𑀘𑀭𑀺𑀬𑀲𑁆𑀲 𑀪𑀭𑀺𑀬𑀸. 𑀕𑀭𑀽𑀦𑀁 𑀤𑀸𑀭𑀸𑀢𑀺 𑀘𑀽𑀴𑀧𑀺𑀢𑀼𑀫𑀳𑀸𑀧𑀺𑀢𑀼𑀆𑀤𑀻𑀦𑀁 𑀪𑀭𑀺𑀬𑀸. 𑀲𑀫𑁆𑀪𑁂𑀤𑀦𑁆𑀢𑀺 ¶ 𑀫𑀺𑀲𑁆𑀲𑀻𑀪𑀸𑀯𑀁, 𑀫𑀭𑀺𑀬𑀸𑀤𑀪𑁂𑀤𑀁 𑀯𑀸.

𑀢𑀺𑀩𑁆𑀩𑁄 𑀆𑀖𑀸𑀢𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑀩𑀮𑀯𑀓𑁄𑀧𑁄 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀪𑀯𑀺𑀲𑁆𑀲𑀢𑀺. 𑀅𑀧𑀭𑀸𑀦𑀺 𑀤𑁆𑀯𑁂 𑀏𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. 𑀓𑁄𑀧𑁄 𑀳𑀺 𑀘𑀺𑀢𑁆𑀢𑀁 𑀆𑀖𑀸𑀢𑁂𑀢𑀻𑀢𑀺 𑀆𑀖𑀸𑀢𑁄. 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀳𑀺𑀢𑀲𑀼𑀔𑀁 𑀩𑁆𑀬𑀸𑀧𑀸𑀤𑁂𑀢𑀻𑀢𑀺 𑀩𑁆𑀬𑀸𑀧𑀸𑀤𑁄. 𑀫𑀦𑁄𑀧𑀤𑀽𑀲𑀦𑀢𑁄 𑀫𑀦𑁄𑀧𑀤𑁄𑀲𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀺𑀩𑁆𑀩𑀁 𑀯𑀥𑀓𑀘𑀺𑀢𑁆𑀢𑀦𑁆𑀢𑀺 𑀧𑀺𑀬𑀫𑀸𑀦𑀲𑁆𑀲𑀸𑀧𑀺 𑀧𑀭𑀁 𑀫𑀸𑀭𑀡𑀢𑁆𑀣𑀸𑀬 𑀯𑀥𑀓𑀘𑀺𑀢𑁆𑀢𑀁. 𑀢𑀲𑁆𑀲 𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑀼𑀁 𑀫𑀸𑀢𑀼𑀧𑀺 𑀧𑀼𑀢𑁆𑀢𑀫𑁆𑀳𑀻𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀸𑀕𑀯𑀺𑀓𑀲𑁆𑀲𑀸𑀢𑀺 𑀫𑀺𑀕𑀮𑀼𑀤𑁆𑀤𑀓𑀲𑁆𑀲.

𑁧𑁦𑁪. 𑀲𑀢𑁆𑀣𑀦𑁆𑀢𑀭𑀓𑀧𑁆𑀧𑁄𑀢𑀺 ¶ 𑀲𑀢𑁆𑀣𑁂𑀦 𑀅𑀦𑁆𑀢𑀭𑀓𑀧𑁆𑀧𑁄. 𑀲𑀁𑀯𑀝𑁆𑀝𑀓𑀧𑁆𑀧𑀁 𑀅𑀧𑁆𑀧𑀢𑁆𑀯𑀸 𑀅𑀦𑁆𑀢𑀭𑀸𑀯 𑀮𑁄𑀓𑀯𑀺𑀦𑀸𑀲𑁄. 𑀅𑀦𑁆𑀢𑀭𑀓𑀧𑁆𑀧𑁄 𑀘 𑀦𑀸𑀫𑁂𑀲 𑀤𑀼𑀩𑁆𑀪𑀺𑀓𑁆𑀔𑀦𑁆𑀢𑀭𑀓𑀧𑁆𑀧𑁄 𑀭𑁄𑀕𑀦𑁆𑀢𑀭𑀓𑀧𑁆𑀧𑁄 𑀲𑀢𑁆𑀣𑀦𑁆𑀢𑀭𑀓𑀧𑁆𑀧𑁄𑀢𑀺 𑀢𑀺𑀯𑀺𑀥𑁄. 𑀢𑀢𑁆𑀣 𑀮𑁄𑀪𑀼𑀲𑁆𑀲𑀤𑀸𑀬 𑀧𑀚𑀸𑀬 𑀤𑀼𑀩𑁆𑀪𑀺𑀓𑁆𑀔𑀦𑁆𑀢𑀭𑀓𑀧𑁆𑀧𑁄 𑀳𑁄𑀢𑀺. 𑀫𑁄𑀳𑀼𑀲𑁆𑀲𑀤𑀸𑀬 𑀭𑁄𑀕𑀦𑁆𑀢𑀭𑀓𑀧𑁆𑀧𑁄. 𑀤𑁄𑀲𑀼𑀲𑁆𑀲𑀤𑀸𑀬 𑀲𑀢𑁆𑀣𑀦𑁆𑀢𑀭𑀓𑀧𑁆𑀧𑁄. 𑀢𑀢𑁆𑀣 𑀤𑀼𑀩𑁆𑀪𑀺𑀓𑁆𑀔𑀦𑁆𑀢𑀭𑀓𑀧𑁆𑀧𑁂𑀦 𑀦𑀝𑁆𑀞𑀸 𑀬𑁂𑀪𑀼𑀬𑁆𑀬𑁂𑀦 𑀧𑁂𑀢𑁆𑀢𑀺𑀯𑀺𑀲𑀬𑁂 𑀉𑀧𑀧𑀚𑁆𑀚𑀦𑁆𑀢𑀺. 𑀓𑀲𑁆𑀫𑀸? 𑀆𑀳𑀸𑀭𑀦𑀺𑀓𑀦𑁆𑀢𑀺𑀬𑀸 𑀩𑀮𑀯𑀢𑁆𑀢𑀸. 𑀭𑁄𑀕𑀦𑁆𑀢𑀭𑀓𑀧𑁆𑀧𑁂𑀦 𑀦𑀝𑁆𑀞𑀸 𑀬𑁂𑀪𑀼𑀬𑁆𑀬𑁂𑀦 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀓𑀲𑁆𑀫𑀸? 𑀢𑁂𑀲𑀜𑁆𑀳𑀺 ‘‘𑀅𑀳𑁄 𑀯𑀢𑀜𑁆𑀜𑁂𑀲𑀁 𑀲𑀢𑁆𑀢𑀸𑀦𑀁 𑀏𑀯𑀭𑀽𑀧𑁄 𑀭𑁄𑀕𑁄 𑀦 𑀪𑀯𑁂𑀬𑁆𑀬𑀸’’𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀲𑀢𑁆𑀣𑀦𑁆𑀢𑀭𑀓𑀧𑁆𑀧𑁂𑀦 𑀦𑀝𑁆𑀞𑀸 𑀬𑁂𑀪𑀼𑀬𑁆𑀬𑁂𑀦 𑀦𑀺𑀭𑀬𑁂 𑀉𑀧𑀧𑀚𑁆𑀚𑀦𑁆𑀢𑀺. 𑀓𑀲𑁆𑀫𑀸? 𑀅𑀜𑁆𑀜𑀫𑀜𑁆𑀜𑀁 𑀩𑀮𑀯𑀸𑀖𑀸𑀢𑀢𑀸𑀬.

𑀫𑀺𑀕𑀲𑀜𑁆𑀜𑀦𑁆𑀢𑀺 ‘‘𑀅𑀬𑀁 𑀫𑀺𑀕𑁄, 𑀅𑀬𑀁 𑀫𑀺𑀕𑁄’’𑀢𑀺 𑀲𑀜𑁆𑀜𑀁. 𑀢𑀺𑀡𑁆𑀳𑀸𑀦𑀺 𑀲𑀢𑁆𑀣𑀸𑀦𑀺 𑀳𑀢𑁆𑀣𑁂𑀲𑀼 𑀧𑀸𑀢𑀼𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀢𑁂𑀲𑀁 𑀓𑀺𑀭 𑀳𑀢𑁆𑀣𑁂𑀦 𑀨𑀼𑀝𑁆𑀞𑀫𑀢𑁆𑀢𑀁 𑀬𑀁𑀓𑀺𑀜𑁆𑀘𑀺 𑀅𑀦𑁆𑀢𑀫𑀲𑁄 𑀢𑀺𑀡𑀧𑀡𑁆𑀡𑀁 𑀉𑀧𑀸𑀤𑀸𑀬 𑀆𑀯𑀼𑀥𑀫𑁂𑀯 𑀪𑀯𑀺𑀲𑁆𑀲𑀢𑀺. 𑀫𑀸 𑀘 𑀫𑀬𑀁 𑀓𑀜𑁆𑀘𑀻𑀢𑀺 𑀫𑀬𑀁 𑀓𑀜𑁆𑀘𑀺 𑀏𑀓𑀧𑀼𑀭𑀺𑀲𑀫𑁆𑀧𑀺 𑀚𑀻𑀯𑀺𑀢𑀸 𑀫𑀸 𑀯𑁄𑀭𑁄𑀧𑀬𑀺𑀫𑁆𑀳. 𑀫𑀸 𑀘 𑀅𑀫𑁆𑀳𑁂 𑀓𑁄𑀘𑀻𑀢𑀺 𑀅𑀫𑁆𑀳𑁂𑀧𑀺 𑀓𑁄𑀘𑀺 𑀏𑀓𑀧𑀼𑀭𑀺𑀲𑁄 𑀚𑀻𑀯𑀺𑀢𑀸 𑀫𑀸 𑀯𑁄𑀭𑁄𑀧𑀬𑀺𑀢𑁆𑀣. 𑀬𑀁𑀦𑀽𑀦 𑀫𑀬𑀦𑁆𑀢𑀺 𑀅𑀬𑀁 𑀮𑁄𑀓𑀯𑀺𑀦𑀸𑀲𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄, 𑀦 𑀲𑀓𑁆𑀓𑀸 𑀤𑁆𑀯𑀻𑀳𑀺 𑀏𑀓𑀝𑁆𑀞𑀸𑀦𑁂 𑀞𑀺𑀢𑁂𑀳𑀺 𑀚𑀻𑀯𑀺𑀢𑀁 𑀮𑀤𑁆𑀥𑀼𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀏𑀯𑀁 𑀘𑀺𑀦𑁆𑀢𑀬𑀺𑀁𑀲𑀼. 𑀯𑀦𑀕𑀳𑀦𑀦𑁆𑀢𑀺 𑀯𑀦𑀲𑀗𑁆𑀔𑀸𑀢𑁂𑀳𑀺 𑀢𑀺𑀡𑀕𑀼𑀫𑁆𑀩𑀮𑀢𑀸𑀤𑀻𑀳𑀺 𑀕𑀳𑀦𑀁 𑀤𑀼𑀧𑁆𑀧𑀯𑁂𑀲𑀝𑁆𑀞𑀸𑀦𑀁. 𑀭𑀼𑀓𑁆𑀔𑀕𑀳𑀦𑀦𑁆𑀢𑀺 𑀭𑀼𑀓𑁆𑀔𑁂𑀳𑀺 𑀕𑀳𑀦𑀁 𑀤𑀼𑀧𑁆𑀧𑀯𑁂𑀲𑀝𑁆𑀞𑀸𑀦𑀁. 𑀦𑀤𑀻𑀯𑀺𑀤𑀼𑀕𑁆𑀕𑀦𑁆𑀢𑀺 ¶ 𑀦𑀤𑀻𑀦𑀁 𑀅𑀦𑁆𑀢𑀭𑀤𑀻𑀧𑀸𑀤𑀻𑀲𑀼 𑀤𑀼𑀕𑁆𑀕𑀫𑀦𑀝𑁆𑀞𑀸𑀦𑀁. 𑀧𑀩𑁆𑀩𑀢𑀯𑀺𑀲𑀫𑀦𑁆𑀢𑀺 𑀧𑀩𑁆𑀩𑀢𑁂𑀳𑀺 𑀯𑀺𑀲𑀫𑀁, 𑀧𑀩𑁆𑀩𑀢𑁂𑀲𑀼𑀧𑀺 𑀯𑀸 𑀯𑀺𑀲𑀫𑀝𑁆𑀞𑀸𑀦𑀁. 𑀲𑀪𑀸𑀕𑀸𑀬𑀺𑀲𑁆𑀲𑀦𑁆𑀢𑀻𑀢𑀺 ¶ 𑀬𑀣𑀸 𑀅𑀳𑀁 𑀚𑀻𑀯𑀸𑀫𑀺 𑀤𑀺𑀝𑁆𑀞𑀸 𑀪𑁄 𑀲𑀢𑁆𑀢𑀸, 𑀢𑁆𑀯𑀫𑁆𑀧𑀺 𑀢𑀣𑀸 𑀚𑀻𑀯𑀲𑀻𑀢𑀺 𑀏𑀯𑀁 𑀲𑀫𑁆𑀫𑁄𑀤𑀦𑀓𑀣𑀸𑀬 𑀅𑀢𑁆𑀢𑀦𑀸 𑀲𑀪𑀸𑀕𑁂 𑀓𑀭𑀺𑀲𑁆𑀲𑀦𑁆𑀢𑀺.

𑀆𑀬𑀼𑀯𑀡𑁆𑀡𑀸𑀤𑀺𑀯𑀟𑁆𑀠𑀦𑀓𑀣𑀸𑀯𑀡𑁆𑀡𑀦𑀸

𑁧𑁦𑁫. 𑀆𑀬𑀢𑀦𑁆𑀢𑀺 𑀫𑀳𑀦𑁆𑀢𑀁. 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑁂𑀬𑁆𑀬𑀸𑀫𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑀢𑁄 𑀑𑀲𑀓𑁆𑀓𑁂𑀬𑁆𑀬𑀸𑀫. 𑀧𑀸𑀡𑀸𑀢𑀺𑀧𑀸𑀢𑀁 𑀯𑀺𑀭𑀫𑁂𑀬𑁆𑀬𑀸𑀫𑀸𑀢𑀺𑀧𑀺 𑀲𑀚𑁆𑀛𑀸𑀬𑀦𑁆𑀢𑀺, 𑀢𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑀁 𑀧𑀚𑀳𑁂𑀬𑁆𑀬𑀸𑀫𑀸𑀢𑀺 𑀅𑀢𑁆𑀣𑁄. 𑀯𑀻𑀲𑀢𑀺𑀯𑀲𑁆𑀲𑀸𑀬𑀼𑀓𑀸𑀢𑀺 𑀫𑀸𑀢𑀸𑀧𑀺𑀢𑀭𑁄 ¶ 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸, 𑀧𑀼𑀢𑁆𑀢𑀸 𑀓𑀲𑁆𑀫𑀸 𑀯𑀻𑀲𑀢𑀺𑀯𑀲𑁆𑀲𑀸𑀬𑀼𑀓𑀸 𑀅𑀳𑁂𑀲𑀼𑀦𑁆𑀢𑀺 𑀔𑁂𑀢𑁆𑀢𑀯𑀺𑀲𑀼𑀤𑁆𑀥𑀺𑀬𑀸. 𑀢𑁂𑀲𑀜𑁆𑀳𑀺 𑀫𑀸𑀢𑀸𑀧𑀺𑀢𑀭𑁄 𑀲𑀻𑀮𑀯𑀦𑁆𑀢𑁄 𑀚𑀸𑀢𑀸. 𑀇𑀢𑀺 𑀲𑀻𑀮𑀕𑀩𑁆𑀪𑁂 𑀯𑀟𑁆𑀠𑀺𑀢𑀢𑁆𑀢𑀸 𑀇𑀫𑀸𑀬 𑀔𑁂𑀢𑁆𑀢𑀯𑀺𑀲𑀼𑀤𑁆𑀥𑀺𑀬𑀸 𑀤𑀻𑀖𑀸𑀬𑀼𑀓𑀸 𑀅𑀳𑁂𑀲𑀼𑀁. 𑀬𑁂 𑀧𑀦𑁂𑀢𑁆𑀣 𑀓𑀸𑀮𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀩𑁆𑀩𑀢𑁆𑀢𑀸, 𑀢𑁂 𑀅𑀢𑁆𑀢𑀦𑁄𑀯 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀤𑀻𑀖𑀸𑀬𑀼𑀓𑀸 𑀅𑀳𑁂𑀲𑀼𑀁.

𑀅𑀲𑁆𑀲𑀸𑀫𑀸𑀢𑀺 𑀪𑀯𑁂𑀬𑁆𑀬𑀸𑀫. 𑀘𑀢𑁆𑀢𑀸𑀭𑀻𑀲𑀯𑀲𑁆𑀲𑀸𑀬𑀼𑀓𑀸𑀢𑀺𑀆𑀤𑀬𑁄 𑀓𑁄𑀝𑁆𑀞𑀸𑀲𑀸 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀳𑀺 𑀧𑀝𑀺𑀯𑀺𑀭𑀢𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀲𑀗𑁆𑀔𑀭𑀸𑀚𑀉𑀧𑁆𑀧𑀢𑁆𑀢𑀺𑀯𑀡𑁆𑀡𑀦𑀸

𑁧𑁦𑁬. 𑀇𑀘𑁆𑀙𑀸𑀢𑀺 𑀫𑀬𑁆𑀳𑀁 𑀪𑀢𑁆𑀢𑀁 𑀤𑁂𑀣𑀸𑀢𑀺 𑀏𑀯𑀁 𑀉𑀧𑁆𑀧𑀚𑁆𑀚𑀦𑀓𑀢𑀡𑁆𑀳𑀸. 𑀅𑀦𑀲𑀦𑀦𑁆𑀢𑀺 𑀦 𑀅𑀲𑀦𑀁 𑀅𑀯𑀺𑀧𑁆𑀨𑀸𑀭𑀺𑀓𑀪𑀸𑀯𑁄 𑀓𑀸𑀬𑀸𑀮𑀲𑀺𑀬𑀁, 𑀪𑀢𑁆𑀢𑀁 𑀪𑀼𑀢𑁆𑀢𑀸𑀦𑀁 𑀪𑀢𑁆𑀢𑀲𑀫𑁆𑀫𑀤𑀧𑀘𑁆𑀘𑀬𑀸 𑀦𑀺𑀧𑀚𑁆𑀚𑀺𑀢𑀼𑀓𑀸𑀫𑀢𑀸𑀚𑀦𑀓𑁄 𑀓𑀸𑀬𑀤𑀼𑀩𑁆𑀩𑀮𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀚𑀭𑀸𑀢𑀺 𑀧𑀸𑀓𑀝𑀚𑀭𑀸. 𑀓𑀼𑀓𑁆𑀓𑀼𑀝𑀲𑀫𑁆𑀧𑀸𑀢𑀺𑀓𑀸𑀢𑀺 𑀏𑀓𑀕𑀸𑀫𑀲𑁆𑀲 𑀙𑀤𑀦𑀧𑀺𑀝𑁆𑀞𑀢𑁄 𑀉𑀧𑁆𑀧𑀢𑀺𑀢𑁆𑀯𑀸 𑀇𑀢𑀭𑀕𑀸𑀫𑀲𑁆𑀲 𑀙𑀤𑀦𑀧𑀺𑀝𑁆𑀞𑁂 𑀧𑀢𑀦𑀲𑀗𑁆𑀔𑀸𑀢𑁄 𑀓𑀼𑀓𑁆𑀓𑀼𑀝𑀲𑀫𑁆𑀧𑀸𑀢𑁄. 𑀏𑀢𑀸𑀲𑀼 𑀅𑀢𑁆𑀣𑀻𑀢𑀺 𑀓𑀼𑀓𑁆𑀓𑀼𑀝𑀲𑀫𑁆𑀧𑀸𑀢𑀺𑀓𑀸. ‘‘𑀓𑀼𑀓𑁆𑀓𑀼𑀝𑀲𑀫𑁆𑀧𑀸𑀤𑀺𑀓𑀸’’𑀢𑀺𑀧𑀺 𑀧𑀸𑀞𑁄, 𑀕𑀸𑀫𑀦𑁆𑀢𑀭𑀢𑁄 𑀕𑀸𑀫𑀦𑁆𑀢𑀭𑀁 𑀓𑀼𑀓𑁆𑀓𑀼𑀝𑀸𑀦𑀁 𑀧𑀤𑀲𑀸 𑀕𑀫𑀦𑀲𑀗𑁆𑀔𑀸𑀢𑁄 𑀓𑀼𑀓𑁆𑀓𑀼𑀝𑀲𑀫𑁆𑀧𑀸𑀤𑁄 𑀏𑀢𑀸𑀲𑀼 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀉𑀪𑀬𑀫𑁆𑀧𑁂𑀢𑀁 𑀖𑀦𑀦𑀺𑀯𑀸𑀲𑀢𑀁𑀬𑁂𑀯 𑀤𑀻𑀧𑁂𑀢𑀺. 𑀅𑀯𑀻𑀘𑀺 𑀫𑀜𑁆𑀜𑁂 𑀨𑀼𑀝𑁄 𑀪𑀯𑀺𑀲𑁆𑀲𑀢𑀻𑀢𑀺 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁄 𑀯𑀺𑀬 𑀦𑀺𑀭𑀦𑁆𑀢𑀭𑀧𑀽𑀭𑀺𑀢𑁄 𑀪𑀯𑀺𑀲𑁆𑀲𑀢𑀺.

𑁧𑁦𑁭. ‘‘𑀅𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑁂𑀲𑀼, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑁂𑀲𑀼 𑀫𑁂𑀢𑁆𑀢𑁂𑀬𑁆𑀬𑁄 𑀦𑀸𑀫 𑀪𑀕𑀯𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀦 𑀯𑀟𑁆𑀠𑀫𑀸𑀦𑀓𑀯𑀲𑁂𑀦 𑀯𑀼𑀢𑁆𑀢𑀁. 𑀦 𑀳𑀺 𑀩𑀼𑀤𑁆𑀥𑀸 𑀯𑀟𑁆𑀠𑀫𑀸𑀦𑁂 𑀆𑀬𑀼𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀳𑀸𑀬𑀫𑀸𑀦𑁂 𑀧𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀢𑀲𑁆𑀫𑀸 𑀬𑀤𑀸 𑀢𑀁 𑀆𑀬𑀼 𑀯𑀟𑁆𑀠𑀺𑀢𑁆𑀯𑀸 ¶ 𑀅𑀲𑀗𑁆𑀔𑁂𑀬𑁆𑀬𑀢𑀁 𑀧𑀢𑁆𑀯𑀸 𑀧𑀼𑀦 𑀳𑀸𑀬𑀫𑀸𑀦𑀁 𑀅𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀓𑀸𑀮𑁂 𑀞𑀲𑁆𑀲𑀢𑀺, 𑀢𑀤𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀳𑀭𑀺𑀲𑁆𑀲𑀢𑀻𑀢𑀺 𑀇𑀤𑀁 𑀧𑀦 𑀧𑀭𑀺𑀯𑀸𑀭𑁂𑀢𑁆𑀯𑀸 ¶ 𑀯𑀺𑀘𑀭𑀦𑁆𑀢𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀬𑀽𑀧𑁄𑀢𑀺 𑀧𑀸𑀲𑀸𑀤𑁄. 𑀭𑀜𑁆𑀜𑀸 𑀫𑀳𑀸𑀧𑀦𑀸𑀤𑁂𑀦 𑀓𑀸𑀭𑀸𑀧𑀺𑀢𑁄𑀢𑀺 𑀭𑀜𑁆𑀜𑀸 𑀳𑁂𑀢𑀼𑀪𑀽𑀢𑁂𑀦 𑀢𑀲𑁆𑀲𑀢𑁆𑀣𑀸𑀬 𑀲𑀓𑁆𑀓𑁂𑀦 𑀤𑁂𑀯𑀭𑀸𑀚𑁂𑀦 𑀯𑀺𑀲𑁆𑀲𑀓𑀫𑁆𑀫𑀤𑁂𑀯𑀧𑀼𑀢𑁆𑀢𑀁 𑀧𑁂𑀲𑁂𑀢𑁆𑀯𑀸 𑀓𑀸𑀭𑀸𑀧𑀺𑀢𑁄. 𑀧𑀼𑀩𑁆𑀩𑁂 𑀓𑀺𑀭 𑀤𑁆𑀯𑁂 𑀧𑀺𑀢𑀸𑀧𑀼𑀢𑁆𑀢𑀸 𑀦𑀴𑀓𑀸𑀭𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀦𑀴𑁂𑀳𑀺 𑀘 𑀉𑀤𑀼𑀫𑁆𑀩𑀭𑁂𑀳𑀺 ¶ 𑀘 𑀧𑀡𑁆𑀡𑀲𑀸𑀮𑀁 𑀓𑀸𑀭𑀸𑀧𑁂𑀢𑁆𑀯𑀸 𑀢𑀁 𑀢𑀢𑁆𑀣 𑀯𑀸𑀲𑀸𑀧𑁂𑀢𑁆𑀯𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀺𑀁𑀲𑀼. 𑀢𑁂 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸. 𑀢𑁂𑀲𑀼 𑀧𑀺𑀢𑀸 𑀤𑁂𑀯𑀮𑁄𑀓𑁂𑀬𑁂𑀯 𑀅𑀝𑁆𑀞𑀸𑀲𑀺. 𑀧𑀼𑀢𑁆𑀢𑁄 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀲𑀼𑀭𑀼𑀘𑀺𑀲𑁆𑀲 𑀭𑀜𑁆𑀜𑁄 𑀤𑁂𑀯𑀺𑀬𑀸 𑀲𑀼𑀫𑁂𑀥𑀸𑀬 𑀓𑀼𑀘𑁆𑀙𑀺𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑁄. 𑀫𑀳𑀸𑀧𑀦𑀸𑀤𑁄 𑀦𑀸𑀫 𑀓𑀼𑀫𑀸𑀭𑁄 𑀅𑀳𑁄𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀫𑀳𑀸𑀧𑀦𑀸𑀤𑁄 𑀦𑀸𑀫 𑀭𑀸𑀚𑀸 𑀚𑀸𑀢𑁄. 𑀅𑀣𑀲𑁆𑀲 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀯𑀺𑀲𑁆𑀲𑀓𑀫𑁆𑀫𑀤𑁂𑀯𑀧𑀼𑀢𑁆𑀢𑀁 𑀭𑀜𑁆𑀜𑁄 𑀧𑀸𑀲𑀸𑀤𑀁 𑀓𑀭𑁄𑀳𑀻𑀢𑀺 𑀧𑀳𑀺𑀡𑀺 𑀲𑁄 𑀢𑀲𑁆𑀲 𑀧𑀸𑀲𑀸𑀤𑀁 𑀦𑀺𑀫𑁆𑀫𑀺𑀦𑀺 𑀧𑀜𑁆𑀘𑀯𑀻𑀲𑀢𑀺𑀬𑁄𑀚𑀦𑀼𑀩𑁆𑀩𑁂𑀥𑀁 𑀲𑀢𑁆𑀢𑀭𑀢𑀦𑀫𑀬𑀁 𑀲𑀢𑀪𑀽𑀫𑀓𑀁. 𑀬𑀁 𑀲𑀦𑁆𑀥𑀸𑀬 𑀚𑀸𑀢𑀓𑁂 𑀯𑀼𑀢𑁆𑀢𑀁 𑁋

‘‘𑀧𑀦𑀸𑀤𑁄 𑀦𑀸𑀫 𑀲𑁄 𑀭𑀸𑀚𑀸, 𑀬𑀲𑁆𑀲 𑀬𑀽𑀧𑁄 𑀲𑀼𑀯𑀡𑁆𑀡𑀬𑁄;

𑀢𑀺𑀭𑀺𑀬𑀁 𑀲𑁄𑀴𑀲𑀼𑀩𑁆𑀩𑁂𑀥𑁄, 𑀉𑀤𑁆𑀥𑀫𑀸𑀳𑀼 𑀲𑀳𑀲𑁆𑀲𑀥𑀸.

𑀲𑀳𑀲𑁆𑀲𑀓𑀡𑁆𑀟𑁄 𑀲𑀢𑀕𑁂𑀡𑁆𑀟𑀼, 𑀥𑀚𑀸𑀮𑀼 𑀳𑀭𑀺𑀢𑀸𑀫𑀬𑁄;

𑀅𑀦𑀘𑁆𑀘𑀼𑀁 𑀢𑀢𑁆𑀣 𑀕𑀦𑁆𑀥𑀩𑁆𑀩𑀸, 𑀙 𑀲𑀳𑀲𑁆𑀲𑀸𑀦𑀺 𑀲𑀢𑁆𑀢𑀥𑀸.

𑀏𑀯𑀫𑁂𑀢𑀁 𑀢𑀤𑀸 𑀆𑀲𑀺, 𑀬𑀣𑀸 𑀪𑀸𑀲𑀲𑀺 𑀪𑀤𑁆𑀤𑀚𑀺;

𑀲𑀓𑁆𑀓𑁄 𑀅𑀳𑀁 𑀢𑀤𑀸 𑀆𑀲𑀺𑀁, 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑁄 𑀢𑀯𑀸’’𑀢𑀺. (𑀚𑀸. 𑁫.𑁩.𑁪𑁨);

𑀲𑁄 𑀭𑀸𑀚𑀸 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀯𑀲𑀺𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀲𑁆𑀫𑀺𑀁 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁂 𑀲𑁄 𑀧𑀸𑀲𑀸𑀤𑁄 𑀫𑀳𑀸𑀕𑀗𑁆𑀕𑀸𑀬 𑀅𑀦𑀼𑀲𑁄𑀢𑀁 𑀧𑀢𑀺. 𑀢𑀲𑁆𑀲 𑀥𑀼𑀭𑀲𑁄𑀧𑀸𑀦𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀧𑀬𑀸𑀕𑀧𑀢𑀺𑀝𑁆𑀞𑀸𑀦𑀁 𑀦𑀸𑀫 𑀦𑀕𑀭𑀁 𑀫𑀸𑀧𑀺𑀢𑀁. 𑀣𑀼𑀧𑀺𑀓𑀸𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀓𑁄𑀝𑀺𑀕𑀸𑀫𑁄 𑀦𑀸𑀫. 𑀅𑀧𑀭𑀪𑀸𑀕𑁂 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀲𑁄 𑀦𑀴𑀓𑀸𑀭𑀤𑁂𑀯𑀧𑀼𑀢𑁆𑀢𑁄 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑀧𑀣𑁂 𑀪𑀤𑁆𑀤𑀚𑀺𑀲𑁂𑀝𑁆𑀞𑀺 𑀦𑀸𑀫 𑀳𑀼𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑁄 𑀦𑀸𑀯𑀸𑀬 𑀕𑀗𑁆𑀕𑀸𑀢𑀭𑀡𑀤𑀺𑀯𑀲𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀢𑀁 𑀧𑀸𑀲𑀸𑀤𑀁 𑀤𑀲𑁆𑀲𑁂𑀢𑀻𑀢𑀺 𑀯𑀢𑁆𑀣𑀼 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀓𑀲𑁆𑀫𑀸 𑀧𑀦𑁂𑀲 𑀧𑀸𑀲𑀸𑀤𑁄 𑀦 𑀅𑀦𑁆𑀢𑀭𑀳𑀺𑀢𑁄𑀢𑀺? 𑀇𑀢𑀭𑀲𑁆𑀲 𑀆𑀦𑀼𑀪𑀸𑀯𑀸. 𑀢𑁂𑀦 𑀲𑀤𑁆𑀥𑀺𑀁 ¶ 𑀧𑀼𑀜𑁆𑀜𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀓𑀼𑀮𑀧𑀼𑀢𑁆𑀢𑁄 𑀅𑀦𑀸𑀕𑀢𑁂 𑀲𑀗𑁆𑀔𑁄 𑀦𑀸𑀫 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺. 𑀢𑀲𑁆𑀲 𑀧𑀭𑀺𑀪𑁄𑀕𑀢𑁆𑀣𑀸𑀬 𑀲𑁄 𑀧𑀸𑀲𑀸𑀤𑁄 𑀉𑀝𑁆𑀞𑀳𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀦 𑀅𑀦𑁆𑀢𑀭𑀳𑀺𑀢𑁄𑀢𑀺.

𑁧𑁦𑁮. 𑀉𑀲𑁆𑀲𑀸𑀧𑁂𑀢𑁆𑀯𑀸𑀢𑀺 ¶ 𑀢𑀁 𑀧𑀸𑀲𑀸𑀤𑀁 𑀉𑀝𑁆𑀞𑀸𑀧𑁂𑀢𑁆𑀯𑀸. 𑀅𑀚𑁆𑀛𑀸𑀯𑀲𑀺𑀢𑁆𑀯𑀸𑀢𑀺 𑀢𑀢𑁆𑀣 𑀯𑀲𑀺𑀢𑁆𑀯𑀸. 𑀢𑀁 𑀤𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀢𑀺 𑀢𑀁 𑀧𑀸𑀲𑀸𑀤𑀁 𑀤𑀸𑀦𑀯𑀲𑁂𑀦 𑀤𑀢𑁆𑀯𑀸 𑀦𑀺𑀭𑀧𑁂𑀓𑁆𑀔𑁄 𑀧𑀭𑀺𑀘𑁆𑀘𑀸𑀕𑀯𑀲𑁂𑀦 𑀘 𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸. 𑀓𑀲𑁆𑀲 ¶ 𑀘 𑀏𑀯𑀁 𑀤𑀢𑁆𑀯𑀸𑀢𑀺? 𑀲𑀫𑀡𑀸𑀤𑀻𑀦𑀁. 𑀢𑁂𑀦𑀸𑀳 𑁋 ‘‘𑀲𑀫𑀡𑀩𑁆𑀭𑀸𑀳𑁆𑀫𑀡𑀓𑀧𑀡𑀤𑁆𑀥𑀺𑀓𑀯𑀦𑀺𑀩𑁆𑀩𑀓𑀬𑀸𑀘𑀓𑀸𑀦𑀁 𑀤𑀸𑀦𑀁 𑀤𑀢𑁆𑀯𑀸’’𑀢𑀺. 𑀓𑀣𑀁 𑀧𑀦 𑀲𑁄 𑀏𑀓𑀁 𑀧𑀸𑀲𑀸𑀤𑀁 𑀩𑀳𑀽𑀦𑀁 𑀤𑀲𑁆𑀲𑀢𑀻𑀢𑀺? 𑀏𑀯𑀁 𑀓𑀺𑀭𑀲𑁆𑀲 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 ‘‘𑀅𑀬𑀁 𑀧𑀸𑀲𑀸𑀤𑁄 𑀯𑀺𑀧𑁆𑀧𑀓𑀺𑀭𑀺𑀬𑀢𑀽’’𑀢𑀺. 𑀲𑁄 𑀔𑀡𑁆𑀟𑀔𑀡𑁆𑀟𑀲𑁄 𑀯𑀺𑀧𑁆𑀧𑀓𑀺𑀭𑀺𑀲𑁆𑀲𑀢𑀺. 𑀲𑁄 𑀢𑀁 𑀅𑀮𑀕𑁆𑀕𑀫𑀸𑀦𑁄𑀯 𑀳𑀼𑀢𑁆𑀯𑀸 ‘‘𑀬𑁄 𑀬𑀢𑁆𑀢𑀓𑀁 𑀇𑀘𑁆𑀙𑀢𑀺, 𑀲𑁄 𑀢𑀢𑁆𑀢𑀓𑀁 𑀕𑀡𑁆𑀳𑀢𑀽’’𑀢𑀺 𑀤𑀸𑀦𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑀺𑀲𑁆𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀤𑀸𑀦𑀁 𑀤𑀢𑁆𑀯𑀸 𑀫𑁂𑀢𑁆𑀢𑁂𑀬𑁆𑀬𑀲𑁆𑀲 𑀪𑀕𑀯𑀢𑁄…𑀧𑁂… 𑀯𑀺𑀳𑀭𑀺𑀲𑁆𑀲𑀢𑀻’’𑀢𑀺. 𑀏𑀢𑁆𑀢𑀓𑁂𑀦 𑀪𑀕𑀯𑀸 𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀲𑁆𑀲 𑀅𑀦𑀼𑀲𑀦𑁆𑀥𑀺𑀁 𑀤𑀲𑁆𑀲𑁂𑀢𑀺.

𑁧𑁦𑁯. 𑀇𑀤𑀸𑀦𑀺 𑀯𑀺𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀲𑁆𑀲 𑀅𑀦𑀼𑀲𑀦𑁆𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀧𑀼𑀦 𑀅𑀢𑁆𑀢𑀤𑀻𑀧𑀸, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀣𑀸𑀢𑀺𑀆𑀤𑀺𑀫𑀸𑀳.

𑀪𑀺𑀓𑁆𑀔𑀼𑀦𑁄 𑀆𑀬𑀼𑀯𑀡𑁆𑀡𑀸𑀤𑀺𑀯𑀟𑁆𑀠𑀦𑀓𑀣𑀸𑀯𑀡𑁆𑀡𑀦𑀸

𑁧𑁧𑁦. 𑀇𑀤𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀆𑀬𑀼𑀲𑁆𑀫𑀺𑀦𑁆𑀢𑀺 𑀪𑀺𑀓𑁆𑀔𑀯𑁂 𑀬𑀁 𑀯𑁄 𑀅𑀳𑀁 𑀆𑀬𑀼𑀦𑀸𑀧𑀺 𑀯𑀟𑁆𑀠𑀺𑀲𑁆𑀲𑀣𑀸𑀢𑀺 𑀅𑀯𑁄𑀘𑀁, 𑀢𑀢𑁆𑀣 𑀇𑀤𑀁 𑀪𑀺𑀓𑁆𑀔𑀼𑀦𑁄 𑀆𑀬𑀼𑀲𑁆𑀫𑀺𑀁 𑀇𑀤𑀁 𑀆𑀬𑀼𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 𑀢𑀼𑀫𑁆𑀳𑁂𑀳𑀺 𑀆𑀬𑀼𑀦𑀸 𑀯𑀟𑁆𑀠𑀺𑀢𑀼𑀓𑀸𑀫𑁂𑀳𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀪𑀸𑀯𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺.

𑀯𑀡𑁆𑀡𑀲𑁆𑀫𑀺𑀦𑁆𑀢𑀺 𑀬𑀁 𑀯𑁄 𑀅𑀳𑀁 𑀯𑀡𑁆𑀡𑁂𑀦𑀧𑀺 𑀯𑀟𑁆𑀠𑀺𑀲𑁆𑀲𑀣𑀸𑀢𑀺 𑀅𑀯𑁄𑀘𑀁, 𑀇𑀤𑀁 𑀢𑀢𑁆𑀣 𑀯𑀡𑁆𑀡𑀓𑀸𑀭𑀡𑀁. 𑀲𑀻𑀮𑀯𑀢𑁄 𑀳𑀺 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀻𑀦𑀁 𑀯𑀲𑁂𑀦 𑀲𑀭𑀻𑀭𑀯𑀡𑁆𑀡𑁄𑀧𑀺 𑀓𑀺𑀢𑁆𑀢𑀺𑀯𑀲𑁂𑀦 𑀕𑀼𑀡𑀯𑀡𑁆𑀡𑁄𑀧𑀺 𑀯𑀟𑁆𑀠𑀢𑀺. 𑀢𑀲𑁆𑀫𑀸 𑀢𑀼𑀫𑁆𑀳𑁂𑀳𑀺 𑀯𑀡𑁆𑀡𑁂𑀦 𑀯𑀟𑁆𑀠𑀺𑀢𑀼𑀓𑀸𑀫𑁂𑀳𑀺 𑀲𑀻𑀮𑀲𑀫𑁆𑀧𑀦𑁆𑀦𑁂𑀳𑀺 𑀪𑀯𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀲𑀼𑀔𑀲𑁆𑀫𑀺𑀦𑁆𑀢𑀺 𑀬𑀁 𑀯𑁄 𑀅𑀳𑀁 𑀲𑀼𑀔𑁂𑀦𑀧𑀺 𑀯𑀟𑁆𑀠𑀺𑀲𑁆𑀲𑀣𑀸𑀢𑀺 𑀅𑀯𑁄𑀘𑀁, 𑀇𑀤𑀁 𑀢𑀢𑁆𑀣 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀓𑀁 𑀛𑀸𑀦𑀲𑀼𑀔𑀁. 𑀢𑀲𑁆𑀫𑀸 𑀢𑀼𑀫𑁆𑀳𑁂𑀳𑀺 𑀲𑀼𑀔𑁂𑀦 𑀯𑀟𑁆𑀠𑀺𑀢𑀼𑀓𑀸𑀫𑁂𑀳𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀪𑀸𑀯𑁂𑀢𑀩𑁆𑀩𑀸𑀦𑀺.

𑀪𑁄𑀕𑀲𑁆𑀫𑀺𑀦𑁆𑀢𑀺 𑀬𑀁 𑀯𑁄 𑀅𑀳𑀁 𑀪𑁄𑀕𑁂𑀦𑀧𑀺 𑀯𑀟𑁆𑀠𑀺𑀲𑁆𑀲𑀣𑀸𑀢𑀺 𑀅𑀯𑁄𑀘𑀁, 𑀅𑀬𑀁 𑀲𑁄 𑀅𑀧𑁆𑀧𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀅𑀧𑁆𑀧𑀝𑀺𑀓𑀽𑀮𑀢𑀸𑀯𑀳𑁄 𑀲𑀼𑀔𑀲𑀬𑀦𑀸𑀤𑀺 𑀏𑀓𑀸𑀤𑀲𑀸𑀦𑀺𑀲𑀁𑀲𑁄 𑀲𑀩𑁆𑀩𑀤𑀺𑀲𑀸𑀯𑀺𑀧𑁆𑀨𑀸𑀭𑀺𑀢𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑁄𑀕𑁄. 𑀢𑀲𑁆𑀫𑀸 𑀢𑀼𑀫𑁆𑀳𑁂𑀳𑀺 𑀪𑁄𑀕𑁂𑀦 𑀯𑀟𑁆𑀠𑀺𑀢𑀼𑀓𑀸𑀫𑁂𑀳𑀺 𑀇𑀫𑁂 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀪𑀸𑀯𑁂𑀢𑀩𑁆𑀩𑀸.

𑀩𑀮𑀲𑁆𑀫𑀺𑀦𑁆𑀢𑀺 ¶ 𑀬𑀁 𑀯𑁄 𑀅𑀳𑀁 𑀩𑀮𑁂𑀦𑀧𑀺 𑀯𑀟𑁆𑀠𑀺𑀲𑁆𑀲𑀣𑀸𑀢𑀺 𑀅𑀯𑁄𑀘𑀁, 𑀇𑀤𑀁 ¶ 𑀆𑀲𑀯𑀓𑁆𑀔𑀬𑀧𑀭𑀺𑀬𑁄𑀲𑀸𑀦𑁂 𑀉𑀧𑁆𑀧𑀦𑁆𑀦𑀁 ¶ 𑀅𑀭𑀳𑀢𑁆𑀢𑀨𑀮𑀲𑀗𑁆𑀔𑀸𑀢𑀁 𑀩𑀮𑀁. 𑀢𑀲𑁆𑀫𑀸 𑀢𑀼𑀫𑁆𑀳𑁂𑀳𑀺 𑀩𑀮𑁂𑀦 𑀯𑀟𑁆𑀠𑀺𑀢𑀼𑀓𑀸𑀫𑁂𑀳𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀬𑁄𑀕𑁄 𑀓𑀭𑀡𑀻𑀬𑁄.

𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀫𑀸𑀭𑀩𑀮𑀦𑁆𑀢𑀺 𑀬𑀣𑀸 𑀇𑀤𑀁 𑀤𑁂𑀯𑀧𑀼𑀢𑁆𑀢𑀫𑀸𑀭𑀫𑀘𑁆𑀘𑀼𑀫𑀸𑀭𑀓𑀺𑀮𑁂𑀲𑀫𑀸𑀭𑀸𑀦𑀁 𑀩𑀮𑀁 𑀤𑀼𑀧𑁆𑀧𑀲𑀳𑀁 𑀤𑀼𑀭𑀪𑀺𑀲𑀫𑁆𑀪𑀯𑀁, 𑀏𑀯𑀁 𑀅𑀜𑁆𑀜𑀁 𑀮𑁄𑀓𑁂 𑀏𑀓𑀩𑀮𑀫𑁆𑀧𑀺 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺. 𑀢𑀫𑁆𑀧𑀺 𑀩𑀮𑀁 𑀇𑀤𑀫𑁂𑀯 𑀅𑀭𑀳𑀢𑁆𑀢𑀨𑀮𑀁 𑀧𑀲𑀳𑀢𑀺 𑀅𑀪𑀺𑀪𑀯𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀺. 𑀢𑀲𑁆𑀫𑀸 𑀏𑀢𑁆𑀣𑁂𑀯 𑀬𑁄𑀕𑁄 𑀓𑀭𑀡𑀻𑀬𑁄𑀢𑀺 𑀤𑀲𑁆𑀲𑁂𑀢𑀺.

𑀏𑀯𑀫𑀺𑀤𑀁 𑀧𑀼𑀜𑁆𑀜𑀦𑁆𑀢𑀺 𑀏𑀯𑀁 𑀇𑀤𑀁 𑀮𑁄𑀓𑀼𑀢𑁆𑀢𑀭𑀧𑀼𑀜𑁆𑀜𑀫𑁆𑀧𑀺 𑀬𑀸𑀯 𑀆𑀲𑀯𑀓𑁆𑀔𑀬𑀸 𑀧𑀯𑀟𑁆𑀠𑀢𑀻𑀢𑀺 𑀯𑀺𑀯𑀝𑁆𑀝𑀕𑀸𑀫𑀺𑀓𑀼𑀲𑀮𑀸𑀦𑀼𑀲𑀦𑁆𑀥𑀺𑀁 𑀦𑀺𑀝𑁆𑀞𑀧𑁂𑀦𑁆𑀢𑁄 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀺. 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀯𑀻𑀲𑀢𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀘𑀢𑀼𑀭𑀸𑀲𑀻𑀢𑀺 𑀧𑀸𑀡𑀲𑀳𑀲𑁆𑀲𑀸𑀦𑀺 𑀅𑀫𑀢𑀧𑀸𑀦𑀁 𑀧𑀺𑀯𑀺𑀁𑀲𑀽𑀢𑀺.

𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀘𑀓𑁆𑀓𑀯𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸

𑀯𑀸𑀲𑁂𑀝𑁆𑀞𑀪𑀸𑀭𑀤𑁆𑀯𑀸𑀚𑀯𑀡𑁆𑀡𑀦𑀸

𑁧𑁧𑁧. 𑀏𑀯𑀁 ¶ ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀫𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑁋 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂𑀢𑀺 𑀏𑀢𑁆𑀣 𑀅𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸. 𑀅𑀢𑀻𑀢𑁂 𑀲𑀢𑀲𑀳𑀲𑁆𑀲𑀓𑀧𑁆𑀧𑀫𑀢𑁆𑀣𑀓𑁂 𑀏𑀓𑀸 𑀉𑀧𑀸𑀲𑀺𑀓𑀸 𑀧𑀤𑀼𑀫𑀼𑀢𑁆𑀢𑀭𑀁 𑀪𑀕𑀯𑀦𑁆𑀢𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀅𑀦𑀸𑀕𑀢𑁂 𑀢𑀼𑀫𑁆𑀳𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀲𑁆𑀲 𑀅𑀕𑁆𑀕𑀼𑀧𑀝𑁆𑀞𑀸𑀬𑀺𑀓𑀸 𑀳𑁄𑀫𑀻’’𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀲𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑁂𑀲𑀼 𑀘𑁂𑀯 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀁𑀲𑀭𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀪𑀤𑁆𑀤𑀺𑀬𑀦𑀕𑀭𑁂 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀦𑁄 𑀕𑁂𑀳𑁂 𑀲𑀼𑀫𑀦𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀚𑀸𑀢𑀓𑀸𑀮𑁂 𑀢𑀲𑁆𑀲𑀸 𑀯𑀺𑀲𑀸𑀔𑀸𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑀸 𑀬𑀤𑀸 𑀪𑀕𑀯𑀸 𑀪𑀤𑁆𑀤𑀺𑀬𑀦𑀕𑀭𑀁 𑀆𑀕𑀫𑀸𑀲𑀺, 𑀢𑀤𑀸 𑀧𑀜𑁆𑀘𑀤𑀸𑀲𑀺𑀲𑀢𑁂𑀳𑀺 𑀲𑀤𑁆𑀥𑀺𑀁 𑀪𑀕𑀯𑀢𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀧𑀞𑀫𑀤𑀲𑁆𑀲𑀦𑀫𑁆𑀳𑀺𑀬𑁂𑀯 𑀲𑁄𑀢𑀸𑀧𑀦𑁆𑀦𑀸 𑀅𑀳𑁄𑀲𑀺.

𑀅𑀧𑀭𑀪𑀸𑀕𑁂 𑀲𑀸𑀯𑀢𑁆𑀣𑀺𑀬𑀁 𑀫𑀺𑀕𑀸𑀭𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀧𑀼𑀡𑁆𑀡𑀯𑀟𑁆𑀠𑀦𑀓𑀼𑀫𑀸𑀭𑀲𑁆𑀲 𑀕𑁂𑀳𑀁 𑀕𑀢𑀸. 𑀢𑀢𑁆𑀣 𑀦𑀁 𑀫𑀺𑀕𑀸𑀭𑀲𑁂𑀝𑁆𑀞𑀺 𑀫𑀸𑀢𑀼𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀢𑀲𑁆𑀫𑀸 𑀫𑀺𑀕𑀸𑀭𑀫𑀸𑀢𑀸𑀢𑀺 𑀯𑀼𑀘𑁆𑀘𑀢𑀺. 𑀧𑀢𑀺𑀓𑀼𑀮𑀁 𑀕𑀘𑁆𑀙𑀦𑁆𑀢𑀺𑀬𑀸 𑀘𑀲𑁆𑀲𑀸 𑀧𑀺𑀢𑀸 𑀫𑀳𑀸𑀮𑀢𑀸𑀧𑀺𑀴𑀦𑁆𑀥𑀦𑀁 𑀦𑀸𑀫 𑀓𑀸𑀭𑀸𑀧𑁂𑀲𑀺. 𑀢𑀲𑁆𑀫𑀺𑀁 𑀧𑀺𑀴𑀦𑁆𑀥𑀦𑁂 𑀘𑀢𑀲𑁆𑀲𑁄 𑀯𑀚𑀺𑀭𑀦𑀸𑀴𑀺𑀬𑁄 𑀉𑀧𑀬𑁄𑀕𑀁 𑀅𑀕𑀫𑀁𑀲𑀼, 𑀫𑀼𑀢𑁆𑀢𑀸𑀦𑀁 𑀏𑀓𑀸𑀤𑀲 𑀦𑀸𑀴𑀺𑀬𑁄, 𑀧𑀯𑀸𑀴𑀲𑁆𑀲 𑀤𑁆𑀯𑀸𑀯𑀻𑀲𑀢𑀺 𑀦𑀸𑀴𑀺𑀬𑁄, 𑀫𑀡𑀻𑀦𑀁 𑀢𑁂𑀢𑁆𑀢𑀺𑀁𑀲 𑀦𑀸𑀴𑀺𑀬𑁄. 𑀇𑀢𑀺 𑀏𑀢𑁂𑀳𑀺 𑀘 𑀅𑀜𑁆𑀜𑁂𑀳𑀺 𑀘 𑀲𑀢𑁆𑀢𑀳𑀺 𑀭𑀢𑀦𑁂𑀳𑀺 𑀦𑀺𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀢𑀁 𑀲𑀻𑀲𑁂 𑀧𑀝𑀺𑀫𑀼𑀓𑁆𑀓𑀁 𑀬𑀸𑀯 𑀧𑀸𑀤𑀧𑀺𑀝𑁆𑀞𑀺𑀬𑀸 𑀪𑀲𑁆𑀲𑀢𑀺. 𑀧𑀜𑁆𑀘𑀦𑁆𑀦𑀁 𑀳𑀢𑁆𑀣𑀻𑀦𑀁 𑀩𑀮𑀁 𑀥𑀸𑀭𑀬𑀫𑀸𑀦𑀸𑀯 𑀦𑀁 𑀇𑀢𑁆𑀣𑀻 𑀥𑀸𑀭𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀲𑀸 𑀅𑀧𑀭𑀪𑀸𑀕𑁂 𑀤𑀲𑀩𑀮𑀲𑁆𑀲 𑀅𑀕𑁆𑀕𑀼𑀧𑀝𑁆𑀞𑀸𑀬𑀺𑀓𑀸 𑀳𑀼𑀢𑁆𑀯𑀸 𑀢𑀁 𑀧𑀲𑀸𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀯𑀳𑀺 𑀓𑁄𑀝𑀻𑀳𑀺 𑀪𑀕𑀯𑀢𑁄 𑀯𑀺𑀳𑀸𑀭𑀁 𑀓𑀸𑀭𑀬𑀫𑀸𑀦𑀸 𑀓𑀭𑀻𑀲𑀫𑀢𑁆𑀢𑁂 𑀪𑀽𑀫𑀺𑀪𑀸𑀕𑁂 𑀧𑀸𑀲𑀸𑀤𑀁 𑀓𑀸𑀭𑁂𑀲𑀺 ¶ . 𑀢𑀲𑁆𑀲 𑀉𑀧𑀭𑀺𑀪𑀽𑀫𑀺𑀬𑀁 𑀧𑀜𑁆𑀘 𑀕𑀩𑁆𑀪𑀲𑀢𑀸𑀦𑀺 𑀳𑁄𑀦𑁆𑀢𑀺, 𑀳𑁂𑀝𑁆𑀞𑀺𑀫𑀪𑀽𑀫𑀺𑀬𑀁 𑀧𑀜𑁆𑀘𑀸𑀢𑀺 𑀕𑀩𑁆𑀪𑀲𑀳𑀲𑁆𑀲𑀧𑁆𑀧𑀝𑀺𑀫𑀡𑁆𑀟𑀺𑀢𑁄 𑀅𑀳𑁄𑀲𑀺. 𑀲𑀸 ‘‘𑀲𑀼𑀤𑁆𑀥𑀧𑀸𑀲𑀸𑀤𑁄𑀯 𑀦 𑀲𑁄𑀪𑀢𑀻’’𑀢𑀺 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀧𑀜𑁆𑀘 𑀤𑀼𑀯𑀟𑁆𑀠𑀕𑁂𑀳𑀲𑀢𑀸𑀦𑀺, 𑀧𑀜𑁆𑀘 𑀘𑀽𑀴𑀧𑀸𑀲𑀸𑀤𑀲𑀢𑀸𑀦𑀺 ¶ , 𑀧𑀜𑁆𑀘 𑀤𑀻𑀖𑀲𑀸𑀮𑀲𑀢𑀸𑀦𑀺 𑀘 𑀓𑀸𑀭𑀸𑀧𑁂𑀲𑀺. 𑀯𑀺𑀳𑀸𑀭𑀫𑀳𑁄 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀦𑀺𑀝𑁆𑀞𑀸𑀦𑀁 𑀅𑀕𑀫𑀸𑀲𑀺.

𑀫𑀸𑀢𑀼𑀕𑀸𑀫𑀢𑁆𑀢𑀪𑀸𑀯𑁂 ¶ 𑀞𑀺𑀢𑀸𑀬 𑀯𑀺𑀲𑀸𑀔𑀸𑀬 𑀯𑀺𑀬 𑀅𑀜𑁆𑀜𑀺𑀲𑁆𑀲𑀸 𑀩𑀼𑀤𑁆𑀥𑀲𑀸𑀲𑀦𑁂 𑀥𑀦𑀧𑀭𑀺𑀘𑁆𑀘𑀸𑀕𑁄 𑀦𑀸𑀫 𑀦𑀢𑁆𑀣𑀺, 𑀧𑀼𑀭𑀺𑀲𑀢𑁆𑀢𑀪𑀸𑀯𑁂 𑀞𑀺𑀢𑀲𑁆𑀲 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀯𑀺𑀬 𑀅𑀜𑁆𑀜𑀲𑁆𑀲𑀸𑀢𑀺. 𑀲𑁄 𑀳𑀺 𑀘𑀢𑀼𑀧𑀡𑁆𑀡𑀸𑀲𑀓𑁄𑀝𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀸𑀯𑀢𑁆𑀣𑀺𑀬𑀸 𑀤𑀓𑁆𑀔𑀺𑀡𑀪𑀸𑀕𑁂 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀫𑀳𑀸𑀯𑀺𑀳𑀸𑀭𑀲𑀤𑀺𑀲𑁂 𑀞𑀸𑀦𑁂 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑀁 𑀦𑀸𑀫 𑀓𑀸𑀭𑁂𑀲𑀺. 𑀯𑀺𑀲𑀸𑀔𑀸 𑀲𑀸𑀯𑀢𑁆𑀣𑀺𑀬𑀸 𑀧𑀸𑀘𑀻𑀦𑀪𑀸𑀕𑁂 𑀉𑀢𑁆𑀢𑀭𑀤𑁂𑀯𑀺𑀬𑀸 𑀯𑀺𑀳𑀸𑀭𑀲𑀤𑀺𑀲𑁂 𑀞𑀸𑀦𑁂 𑀧𑀼𑀩𑁆𑀩𑀸𑀭𑀸𑀫𑀁 𑀦𑀸𑀫 𑀓𑀸𑀭𑁂𑀲𑀺. 𑀪𑀕𑀯𑀸 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀓𑀼𑀮𑀸𑀦𑀁 𑀅𑀦𑀼𑀓𑀫𑁆𑀧𑀸𑀬 𑀲𑀸𑀯𑀢𑁆𑀣𑀺𑀁 𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁄 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀯𑀺𑀳𑀸𑀭𑁂𑀲𑀼 𑀦𑀺𑀩𑀤𑁆𑀥𑀯𑀸𑀲𑀁 𑀯𑀲𑀺. 𑀏𑀓𑀁 𑀅𑀦𑁆𑀢𑁄𑀯𑀲𑁆𑀲𑀁 𑀚𑁂𑀢𑀯𑀦𑁂 𑀯𑀲𑀢𑀺, 𑀏𑀓𑀁 𑀧𑀼𑀩𑁆𑀩𑀸𑀭𑀸𑀫𑁂. 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀦 𑀪𑀕𑀯𑀸 𑀧𑀼𑀩𑁆𑀩𑀸𑀭𑀸𑀫𑁂 𑀯𑀺𑀳𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂’’𑀢𑀺.

𑀯𑀸𑀲𑁂𑀝𑁆𑀞𑀪𑀸𑀭𑀤𑁆𑀯𑀸𑀚𑀸𑀢𑀺 𑀯𑀸𑀲𑁂𑀝𑁆𑀞𑁄 𑀘 𑀲𑀸𑀫𑀡𑁂𑀭𑁄 𑀪𑀸𑀭𑀤𑁆𑀯𑀸𑀚𑁄 𑀘. 𑀪𑀺𑀓𑁆𑀔𑀽𑀲𑀼 𑀧𑀭𑀺𑀯𑀲𑀦𑁆𑀢𑀻𑀢𑀺 𑀢𑁂 𑀦𑁂𑀯 𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑀁 𑀯𑀲𑀦𑁆𑀢𑀺, 𑀦 𑀆𑀧𑀢𑁆𑀢𑀺𑀧𑀭𑀺𑀯𑀸𑀲𑀁. 𑀅𑀧𑀭𑀺𑀧𑀼𑀡𑁆𑀡𑀯𑀲𑁆𑀲𑀢𑁆𑀢𑀸 𑀧𑀦 𑀪𑀺𑀓𑁆𑀔𑀼𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑀸 𑀯𑀲𑀦𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀪𑀺𑀓𑁆𑀔𑀼𑀪𑀸𑀯𑀁 𑀆𑀓𑀗𑁆𑀔𑀫𑀸𑀦𑀸’’𑀢𑀺. 𑀉𑀪𑁄𑀧𑀺 𑀳𑁂𑀢𑁂 𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀸, 𑀘𑀢𑁆𑀢𑀸𑀮𑀻𑀲 𑀘𑀢𑁆𑀢𑀸𑀮𑀻𑀲 𑀓𑁄𑀝𑀺𑀯𑀺𑀪𑀯𑀸 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀯𑀸𑀲𑁂𑀝𑁆𑀞𑀲𑀼𑀢𑁆𑀢𑀁 𑀲𑀼𑀢𑁆𑀯𑀸 𑀲𑀭𑀡𑀁 𑀕𑀢𑀸, 𑀢𑁂𑀯𑀺𑀚𑁆𑀚𑀲𑀼𑀢𑁆𑀢𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀪𑀺𑀓𑁆𑀔𑀼𑀪𑀸𑀯𑀁 𑀆𑀓𑀗𑁆𑀔𑀫𑀸𑀦𑀸 𑀧𑀭𑀺𑀯𑀲𑀦𑁆𑀢𑀺. 𑀅𑀩𑁆𑀪𑁄𑀓𑀸𑀲𑁂 𑀘𑀗𑁆𑀓𑀫𑀢𑀻𑀢𑀺 𑀉𑀢𑁆𑀢𑀭𑀤𑀓𑁆𑀔𑀺𑀡𑁂𑀦 𑀆𑀬𑀢𑀲𑁆𑀲 𑀧𑀸𑀲𑀸𑀤𑀲𑁆𑀲 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀪𑀸𑀕𑁂 𑀧𑀸𑀲𑀸𑀤𑀘𑁆𑀙𑀸𑀬𑀸𑀬𑀁 𑀬𑀦𑁆𑀢𑀭𑀚𑁆𑀚𑀽𑀳𑀺 𑀆𑀓𑀟𑁆𑀠𑀺𑀬𑀫𑀸𑀦𑀁 𑀭𑀢𑀦𑀲𑀢𑀼𑀩𑁆𑀩𑁂𑀥𑀁 𑀲𑀼𑀯𑀡𑁆𑀡𑀅𑀕𑁆𑀖𑀺𑀓𑀁 𑀯𑀺𑀬 𑀅𑀦𑀺𑀮𑀧𑀣𑁂 𑀯𑀺𑀥𑀸𑀯𑀦𑁆𑀢𑀻𑀳𑀺 𑀙𑀩𑁆𑀩𑀡𑁆𑀡𑀸𑀳𑀺 𑀩𑀼𑀤𑁆𑀥𑀭𑀲𑁆𑀫𑀻𑀳𑀺 𑀲𑁄𑀪𑀫𑀸𑀦𑁄 𑀅𑀧𑀭𑀸𑀧𑀭𑀁 𑀘𑀗𑁆𑀓𑀫𑀢𑀺.

𑁧𑁧𑁩. 𑀅𑀦𑀼𑀘𑀗𑁆𑀓𑀫𑀺𑀁𑀲𑀽𑀢𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀑𑀦𑀢𑀲𑀭𑀻𑀭𑀸 𑀳𑀼𑀢𑁆𑀯𑀸 𑀅𑀦𑀼𑀯𑀢𑁆𑀢𑀫𑀸𑀦𑀸 𑀘𑀗𑁆𑀓𑀫𑀺𑀁𑀲𑀼. 𑀯𑀸𑀲𑁂𑀝𑁆𑀞𑀁 𑀆𑀫𑀦𑁆𑀢𑁂𑀲𑀻𑀢𑀺 𑀲𑁄 𑀢𑁂𑀲𑀁 𑀧𑀡𑁆𑀟𑀺𑀢𑀢𑀭𑁄 𑀕𑀳𑁂𑀢𑀩𑁆𑀩𑀁 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀜𑁆𑀘 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀢𑀁 𑀆𑀫𑀦𑁆𑀢𑁂𑀲𑀺. 𑀢𑀼𑀫𑁆𑀳𑁂 𑀔𑁆𑀯𑀢𑁆𑀣𑀸𑀢𑀺 𑀢𑀼𑀫𑁆𑀳𑁂 𑀔𑁄 𑀅𑀢𑁆𑀣. 𑀩𑁆𑀭𑀸𑀳𑁆𑀫𑀡𑀚𑀘𑁆𑀘𑀸𑀢𑀺, 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀓𑀸. 𑀩𑁆𑀭𑀸𑀳𑁆𑀫𑀡𑀓𑀼𑀮𑀻𑀦𑀸𑀢𑀺 𑀩𑁆𑀭𑀸𑀳𑁆𑀫𑀡𑁂𑀲𑀼 𑀓𑀼𑀮𑀻𑀦𑀸 𑀓𑀼𑀮𑀲𑀫𑁆𑀧𑀦𑁆𑀦𑀸. 𑀩𑁆𑀭𑀸𑀳𑁆𑀫𑀡𑀓𑀼𑀮𑀸𑀢𑀺 ¶ 𑀩𑁆𑀭𑀸𑀳𑁆𑀫𑀡𑀓𑀼𑀮𑀢𑁄, 𑀪𑁄𑀕𑀸𑀤𑀺𑀲𑀫𑁆𑀧𑀦𑁆𑀦𑀁 𑀩𑁆𑀭𑀸𑀳𑁆𑀫𑀡𑀓𑀼𑀮𑀁 𑀧𑀳𑀸𑀬𑀸𑀢𑀺 𑀅𑀢𑁆𑀣𑁄. 𑀦 𑀅𑀓𑁆𑀓𑁄𑀲𑀦𑁆𑀢𑀻𑀢𑀺 𑀤𑀲𑀯𑀺𑀥𑁂𑀦 𑀅𑀓𑁆𑀓𑁄𑀲𑀯𑀢𑁆𑀣𑀼𑀦𑀸 𑀦 𑀅𑀓𑁆𑀓𑁄𑀲𑀦𑁆𑀢𑀺. 𑀦 𑀧𑀭𑀺𑀪𑀸𑀲𑀦𑁆𑀢𑀻𑀢𑀺 𑀦𑀸𑀦𑀸𑀯𑀺𑀥𑀸𑀬 𑀧𑀭𑀺𑀪𑀯𑀓𑀣𑀸𑀬 𑀦 𑀧𑀭𑀺𑀪𑀸𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀺 ¶ 𑀪𑀕𑀯𑀸 ‘‘𑀩𑁆𑀭𑀸𑀳𑁆𑀫𑀡𑀸 𑀇𑀫𑁂 𑀲𑀸𑀫𑀡𑁂𑀭𑁂 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀻’’𑀢𑀺 𑀚𑀸𑀦𑀫𑀸𑀦𑁄𑀯 𑀧𑀼𑀘𑁆𑀙𑀢𑀺. 𑀓𑀲𑁆𑀫𑀸? 𑀇𑀫𑁂 𑀫𑀬𑀸 𑀅𑀧𑀼𑀘𑁆𑀙𑀺𑀢𑀸 𑀧𑀞𑀫𑀢𑀭𑀁 𑀦 𑀓𑀣𑁂𑀲𑁆𑀲𑀦𑁆𑀢𑀺, 𑀅𑀓𑀣𑀺𑀢𑁂 𑀓𑀣𑀸 𑀦 𑀲𑀫𑀼𑀝𑁆𑀞𑀸𑀢𑀻𑀢𑀺 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀸𑀬. 𑀢𑀕𑁆𑀖𑀸𑀢𑀺 ¶ 𑀏𑀓𑀁𑀲𑀯𑀘𑀦𑁂 𑀦𑀺𑀧𑀸𑀢𑁄, 𑀏𑀓𑀁𑀲𑁂𑀦𑁂𑀯 𑀦𑁄, 𑀪𑀦𑁆𑀢𑁂, 𑀩𑁆𑀭𑀸𑀳𑁆𑀫𑀡𑀸 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀢𑁆𑀢𑀭𑀽𑀧𑀸𑀬𑀸𑀢𑀺 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀸𑀬. 𑀧𑀭𑀺𑀧𑀼𑀡𑁆𑀡𑀸𑀬𑀸𑀢𑀺 𑀬𑀣𑀸𑀭𑀼𑀘𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀆𑀭𑁄𑀧𑁂𑀢𑁆𑀯𑀸 𑀆𑀭𑁄𑀧𑁂𑀢𑁆𑀯𑀸 𑀧𑀭𑀺𑀧𑀽𑀭𑀺𑀢𑀸𑀬. 𑀦𑁄 𑀅𑀧𑀭𑀺𑀧𑀼𑀡𑁆𑀡𑀸𑀬𑀸𑀢𑀺 𑀅𑀦𑁆𑀢𑀭𑀸 𑀅𑀝𑁆𑀞𑀧𑀺𑀢𑀸𑀬 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀸𑀬.

𑀓𑀲𑁆𑀫𑀸 𑀧𑀦 𑀩𑁆𑀭𑀸𑀳𑁆𑀫𑀡𑀸 𑀇𑀫𑁂 𑀲𑀸𑀫𑀡𑁂𑀭𑁂 𑀅𑀓𑁆𑀓𑁄𑀲𑀦𑁆𑀢𑀻𑀢𑀺? 𑀅𑀧𑁆𑀧𑀢𑀺𑀝𑁆𑀞𑀢𑀸𑀬. 𑀇𑀫𑁂 𑀳𑀺 𑀲𑀸𑀫𑀡𑁂𑀭𑀸 𑀅𑀕𑁆𑀕𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀢𑁆𑀢𑀸 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀧𑀸𑀭𑀕𑀽 𑀚𑀫𑁆𑀩𑀼𑀤𑀻𑀧𑁂 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀦𑁆𑀢𑀭𑁂 𑀧𑀸𑀓𑀝𑀸 𑀲𑀫𑁆𑀪𑀸𑀯𑀺𑀢𑀸 𑀢𑁂𑀲𑀁 𑀧𑀩𑁆𑀩𑀚𑀺𑀢𑀢𑁆𑀢𑀸 𑀅𑀜𑁆𑀜𑁂 𑀩𑁆𑀭𑀸𑀳𑁆𑀫𑀡𑀧𑀼𑀢𑁆𑀢𑀸 𑀧𑀩𑁆𑀩𑀚𑀺𑀁𑀲𑀼. 𑀅𑀣 𑀔𑁄 𑀩𑁆𑀭𑀸𑀳𑁆𑀫𑀡𑀸 ‘‘𑀅𑀧𑀢𑀺𑀝𑁆𑀞𑀸 𑀫𑀬𑀁 𑀚𑀸𑀢𑀸’’𑀢𑀺 𑀇𑀫𑀸𑀬 𑀅𑀧𑁆𑀧𑀢𑀺𑀝𑁆𑀞𑀢𑀸𑀬 𑀕𑀸𑀫𑀤𑁆𑀯𑀸𑀭𑁂𑀧𑀺 𑀅𑀦𑁆𑀢𑁄𑀕𑀸𑀫𑁂𑀧𑀺 𑀢𑁂 𑀤𑀺𑀲𑁆𑀯𑀸 ‘‘𑀢𑀼𑀫𑁆𑀳𑁂𑀳𑀺 𑀩𑁆𑀭𑀸𑀳𑁆𑀫𑀡𑀲𑀫𑀬𑁄 𑀪𑀺𑀦𑁆𑀦𑁄, 𑀫𑀼𑀡𑁆𑀟𑀲𑀫𑀡𑀓𑀲𑁆𑀲 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀭𑀲𑀕𑀺𑀤𑁆𑀥𑀸 𑀳𑀼𑀢𑁆𑀯𑀸 𑀯𑀺𑀘𑀭𑀣𑀸’’𑀢𑀺𑀆𑀤𑀻𑀦𑀺 𑀘𑁂𑀯 𑀧𑀸𑀴𑀺𑀬𑀁 𑀆𑀕𑀢𑀸𑀦𑀺 ‘‘𑀩𑁆𑀭𑀸𑀳𑁆𑀫𑀡𑁄𑀯 𑀲𑁂𑀝𑁆𑀞𑁄 𑀯𑀡𑁆𑀡𑁄’’𑀢𑀺𑀆𑀤𑀻𑀦𑀺 𑀘 𑀯𑀢𑁆𑀯𑀸 𑀅𑀓𑁆𑀓𑁄𑀲𑀦𑁆𑀢𑀺. 𑀲𑀸𑀫𑀡𑁂𑀭𑀸 𑀢𑁂𑀲𑀼 𑀅𑀓𑁆𑀓𑁄𑀲𑀦𑁆𑀢𑁂𑀲𑀼𑀧𑀺 𑀓𑁄𑀧𑀁 𑀯𑀸 𑀆𑀖𑀸𑀢𑀁 𑀯𑀸 𑀅𑀓𑀢𑁆𑀯𑀸 𑀓𑁂𑀯𑀮𑀁 𑀪𑀕𑀯𑀢𑀸 𑀧𑀼𑀝𑁆𑀞𑀸 ‘‘𑀢𑀕𑁆𑀖 𑀦𑁄, 𑀪𑀦𑁆𑀢𑁂, 𑀩𑁆𑀭𑀸𑀳𑁆𑀫𑀡𑀸 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀻’’𑀢𑀺 𑀆𑀭𑁄𑀘𑁂𑀲𑀼𑀁. 𑀅𑀣 𑀦𑁂 𑀪𑀕𑀯𑀸 𑀅𑀓𑁆𑀓𑁄𑀲𑀦𑀸𑀓𑀸𑀭𑀁 𑀧𑀼𑀘𑁆𑀙𑀦𑁆𑀢𑁄 𑀬𑀣𑀸 𑀓𑀣𑀁 𑀧𑀦 𑀯𑁄𑀢𑀺 𑀧𑀼𑀘𑁆𑀙𑀢𑀺. 𑀢𑁂 𑀆𑀘𑀺𑀓𑁆𑀔𑀦𑁆𑀢𑀸 𑀩𑁆𑀭𑀸𑀳𑁆𑀫𑀡𑀸 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳𑀁𑀲𑀼.

𑀢𑀢𑁆𑀣 𑀲𑁂𑀝𑁆𑀞𑁄 𑀯𑀡𑁆𑀡𑁄𑀢𑀺 𑀚𑀸𑀢𑀺𑀕𑁄𑀢𑁆𑀢𑀸𑀤𑀻𑀦𑀁 𑀧𑀜𑁆𑀜𑀸𑀧𑀦𑀝𑁆𑀞𑀸𑀦𑁂 𑀩𑁆𑀭𑀸𑀳𑁆𑀫𑀡𑁄𑀯 𑀲𑁂𑀝𑁆𑀞𑁄𑀢𑀺 𑀤𑀲𑁆𑀲𑁂𑀦𑁆𑀢𑀺. 𑀳𑀻𑀦𑀸 𑀅𑀜𑁆𑀜𑁂 𑀯𑀡𑁆𑀡𑀸𑀢𑀺 𑀇𑀢𑀭𑁂 𑀢𑀬𑁄 𑀯𑀡𑁆𑀡𑀸 𑀳𑀻𑀦𑀸 𑀮𑀸𑀫𑀓𑀸𑀢𑀺 𑀯𑀤𑀦𑁆𑀢𑀺. 𑀲𑀼𑀓𑁆𑀓𑁄𑀢𑀺 𑀧𑀡𑁆𑀟𑀭𑁄. 𑀓𑀡𑁆𑀳𑁄𑀢𑀺 𑀓𑀸𑀴𑀓𑁄. 𑀲𑀼𑀚𑁆𑀛𑀦𑁆𑀢𑀻𑀢𑀺 𑀚𑀸𑀢𑀺𑀕𑁄𑀢𑁆𑀢𑀸𑀤𑀻𑀦𑀁 𑀧𑀜𑁆𑀜𑀸𑀧𑀦𑀝𑁆𑀞𑀸𑀦𑁂 𑀲𑀼𑀚𑁆𑀛𑀦𑁆𑀢𑀺. 𑀩𑁆𑀭𑀳𑁆𑀫𑀼𑀦𑁄 𑀧𑀼𑀢𑁆𑀢𑀸𑀢𑀺 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀧𑀼𑀢𑁆𑀢𑀸. 𑀑𑀭𑀲𑀸 𑀫𑀼𑀔𑀢𑁄 𑀚𑀸𑀢𑀸𑀢𑀺 𑀉𑀭𑁂 𑀯𑀲𑀺𑀢𑁆𑀯𑀸 𑀫𑀼𑀔𑀢𑁄 𑀦𑀺𑀓𑁆𑀔𑀦𑁆𑀢𑀸, 𑀉𑀭𑁂 𑀓𑀢𑁆𑀯𑀸 𑀲𑀁𑀯𑀟𑁆𑀠𑀺𑀢𑀸𑀢𑀺 𑀯𑀸 𑀑𑀭𑀲𑀸. 𑀩𑁆𑀭𑀳𑁆𑀫𑀚𑀸𑀢𑀺 ¶ 𑀩𑁆𑀭𑀳𑁆𑀫𑀢𑁄 𑀦𑀺𑀩𑁆𑀩𑀢𑁆𑀢𑀸. 𑀩𑁆𑀭𑀳𑁆𑀫𑀦𑀺𑀫𑁆𑀫𑀺𑀢𑀸𑀢𑀺 𑀩𑁆𑀭𑀳𑁆𑀫𑀼𑀦𑀸 𑀦𑀺𑀫𑁆𑀫𑀺𑀢𑀸. 𑀩𑁆𑀭𑀳𑁆𑀫𑀤𑀸𑀬𑀸𑀤𑀸𑀢𑀺 𑀩𑁆𑀭𑀳𑁆𑀫𑀼𑀦𑁄 𑀤𑀸𑀬𑀸𑀤𑀸. 𑀳𑀻𑀦𑀫𑀢𑁆𑀣 𑀯𑀡𑁆𑀡𑀁 𑀅𑀚𑁆𑀛𑀼𑀧𑀕𑀢𑀸𑀢𑀺 𑀳𑀻𑀦𑀁 𑀯𑀡𑁆𑀡𑀁 𑀅𑀚𑁆𑀛𑀼𑀧𑀕𑀢𑀸 𑀅𑀢𑁆𑀣. 𑀫𑀼𑀡𑁆𑀟𑀓𑁂 ¶ 𑀲𑀫𑀡𑀓𑁂𑀢𑀺 𑀦𑀺𑀦𑁆𑀤𑀦𑁆𑀢𑀸 𑀚𑀺𑀕𑀼𑀘𑁆𑀙𑀦𑁆𑀢𑀸 𑀯𑀤𑀦𑁆𑀢𑀺, 𑀦 𑀫𑀼𑀡𑁆𑀟𑀓𑀫𑀢𑁆𑀢𑀜𑁆𑀘𑁂𑀯 𑀲𑀫𑀡𑀫𑀢𑁆𑀢𑀜𑁆𑀘 𑀲𑀦𑁆𑀥𑀸𑀬. 𑀇𑀩𑁆𑀪𑁂𑀢𑀺 𑀕𑀳𑀧𑀢𑀺𑀓𑁂. 𑀓𑀡𑁆𑀳𑁂𑀢𑀺 𑀓𑀸𑀴𑀓𑁂. 𑀩𑀦𑁆𑀥𑀽𑀢𑀺 𑀫𑀸𑀭𑀲𑁆𑀲 𑀩𑀦𑁆𑀥𑀼𑀪𑀽𑀢𑁂 𑀫𑀸𑀭𑀧𑀓𑁆𑀔𑀺𑀓𑁂. 𑀧𑀸𑀤𑀸𑀧𑀘𑁆𑀘𑁂𑀢𑀺 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀧𑀸𑀤𑀸𑀦𑀁 𑀅𑀧𑀘𑁆𑀘𑀪𑀽𑀢𑁂 𑀧𑀸𑀤𑀢𑁄 𑀚𑀸𑀢𑁂𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁧𑁪. ‘‘𑀢𑀕𑁆𑀖 𑀯𑁄, 𑀯𑀸𑀲𑁂𑀝𑁆𑀞, 𑀩𑁆𑀭𑀸𑀳𑁆𑀫𑀡𑀸 𑀧𑁄𑀭𑀸𑀡𑀁 𑀅𑀲𑁆𑀲𑀭𑀦𑁆𑀢𑀸 𑀏𑀯𑀫𑀸𑀳𑀁𑀲𑀽’’𑀢𑀺 𑀏𑀢𑁆𑀣 𑀯𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀲𑀸𑀫𑀺𑀯𑀘𑀦𑀁 𑀯𑀸, 𑀢𑀼𑀫𑁆𑀳𑀸𑀓𑀁 𑀩𑁆𑀭𑀸𑀳𑁆𑀫𑀡𑀸𑀢𑀺 𑀅𑀢𑁆𑀣𑁄. 𑀧𑁄𑀭𑀸𑀡𑀦𑁆𑀢𑀺 𑀧𑁄𑀭𑀸𑀡𑀓𑀁 𑀅𑀕𑁆𑀕𑀜𑁆𑀜𑀁 𑀮𑁄𑀓𑀼𑀧𑁆𑀧𑀢𑁆𑀢𑀺𑀘𑀭𑀺𑀬𑀯𑀁𑀲𑀁. 𑀅𑀲𑁆𑀲𑀭𑀦𑁆𑀢𑀸𑀢𑀺 𑀅𑀲𑁆𑀲𑀭𑀫𑀸𑀦𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺, 𑀏𑀓𑀁𑀲𑁂𑀦 𑀯𑁄, 𑀯𑀸𑀲𑁂𑀝𑁆𑀞, 𑀩𑁆𑀭𑀸𑀳𑁆𑀫𑀡𑀸 𑀧𑁄𑀭𑀸𑀡𑀁 𑀮𑁄𑀓𑀼𑀧𑁆𑀧𑀢𑁆𑀢𑀺𑀁 𑀅𑀦𑀦𑀼𑀲𑁆𑀲𑀭𑀦𑁆𑀢𑀸 𑀅𑀚𑀸𑀦𑀦𑁆𑀢𑀸 𑀏𑀯𑀁 𑀯𑀤𑀦𑁆𑀢𑀻𑀢𑀺. ‘‘𑀤𑀺𑀲𑁆𑀲𑀦𑁆𑀢𑀺 𑀔𑁄 𑀧𑀦𑀸’’𑀢𑀺 𑀏𑀯𑀫𑀸𑀤𑀺 𑀢𑁂𑀲𑀁 𑀮𑀤𑁆𑀥𑀺𑀪𑀺𑀦𑁆𑀤𑀦𑀢𑁆𑀣𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀩𑁆𑀭𑀸𑀳𑁆𑀫𑀡𑀺𑀬𑁄𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀢𑁆𑀢𑀧𑁆𑀧𑀝𑀺𑀮𑀸𑀪𑀢𑁆𑀣𑀸𑀬 ¶ 𑀆𑀯𑀸𑀳𑀯𑀺𑀯𑀸𑀳𑀯𑀲𑁂𑀦 𑀓𑀼𑀮𑀁 𑀆𑀦𑀻𑀢𑀸 𑀩𑁆𑀭𑀸𑀳𑁆𑀫𑀡𑀺𑀬𑁄 𑀤𑀺𑀲𑁆𑀲𑀦𑁆𑀢𑀺. 𑀢𑀸 𑀔𑁄 𑀧𑀦𑁂𑀢𑀸 𑀅𑀧𑀭𑁂𑀦 𑀲𑀫𑀬𑁂𑀦 𑀉𑀢𑀼𑀦𑀺𑀬𑁄𑀧𑀺 𑀳𑁄𑀦𑁆𑀢𑀺, 𑀲𑀜𑁆𑀚𑀸𑀢𑀧𑀼𑀧𑁆𑀨𑀸𑀢𑀺 𑀅𑀢𑁆𑀣𑁄. 𑀕𑀩𑁆𑀪𑀺𑀦𑀺𑀬𑁄𑀢𑀺 𑀲𑀜𑁆𑀚𑀸𑀢𑀕𑀩𑁆𑀪𑀸. 𑀯𑀺𑀚𑀸𑀬𑀫𑀸𑀦𑀸𑀢𑀺 𑀧𑀼𑀢𑁆𑀢𑀥𑀻𑀢𑀭𑁄 𑀚𑀦𑀬𑀫𑀸𑀦𑀸. 𑀧𑀸𑀬𑀫𑀸𑀦𑀸𑀢𑀺 𑀤𑀸𑀭𑀓𑁂 𑀣𑀜𑁆𑀜𑀁 𑀧𑀸𑀬𑀦𑁆𑀢𑀺𑀬𑁄. 𑀬𑁄𑀦𑀺𑀚𑀸𑀯 𑀲𑀫𑀸𑀦𑀸𑀢𑀺 𑀩𑁆𑀭𑀸𑀳𑁆𑀫𑀡𑀻𑀦𑀁 𑀧𑀲𑁆𑀲𑀸𑀯𑀫𑀕𑁆𑀕𑁂𑀦 𑀚𑀸𑀢𑀸 𑀲𑀫𑀸𑀦𑀸. 𑀏𑀯𑀫𑀸𑀳𑀁𑀲𑀽𑀢𑀺 𑀏𑀯𑀁 𑀯𑀤𑀦𑁆𑀢𑀺. 𑀓𑀣𑀁? ‘‘𑀩𑁆𑀭𑀸𑀳𑁆𑀫𑀡𑁄𑀯 𑀲𑁂𑀝𑁆𑀞𑁄 𑀯𑀡𑁆𑀡𑁄…𑀧𑁂… 𑀩𑁆𑀭𑀳𑁆𑀫𑀤𑀸𑀬𑀸𑀤𑀸’’𑀢𑀺. 𑀬𑀤𑀺 𑀧𑀦 𑀦𑁂𑀲𑀁 𑀢𑀁 𑀲𑀘𑁆𑀘𑀯𑀘𑀦𑀁 𑀲𑀺𑀬𑀸, 𑀩𑁆𑀭𑀸𑀳𑁆𑀫𑀡𑀻𑀦𑀁 𑀓𑀼𑀘𑁆𑀙𑀺 𑀫𑀳𑀸𑀩𑁆𑀭𑀳𑁆𑀫𑀲𑁆𑀲 𑀉𑀭𑁄 𑀪𑀯𑁂𑀬𑁆𑀬, 𑀩𑁆𑀭𑀸𑀳𑁆𑀫𑀡𑀻𑀦𑀁 𑀧𑀲𑁆𑀲𑀸𑀯𑀫𑀕𑁆𑀕𑁄 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀫𑀼𑀔𑀁 𑀪𑀯𑁂𑀬𑁆𑀬, 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀢𑁂 𑀘 𑀩𑁆𑀭𑀳𑁆𑀫𑀽𑀦𑀜𑁆𑀘𑁂𑀯 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀻’’𑀢𑀺𑀆𑀤𑀺.

𑀘𑀢𑀼𑀯𑀡𑁆𑀡𑀲𑀼𑀤𑁆𑀥𑀺𑀯𑀡𑁆𑀡𑀦𑀸

𑀏𑀢𑁆𑀢𑀸𑀯𑀢𑀸 ‘‘𑀫𑀬𑀁 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀉𑀭𑁂 𑀯𑀲𑀺𑀢𑁆𑀯𑀸 𑀫𑀼𑀔𑀢𑁄 𑀦𑀺𑀓𑁆𑀔𑀦𑁆𑀢𑀸𑀢𑀺 𑀯𑀢𑁆𑀢𑀼𑀁 𑀫𑀸 𑀮𑀪𑀦𑁆𑀢𑀽’’𑀢𑀺 𑀇𑀫𑀁 𑀫𑀼𑀔𑀘𑁆𑀙𑁂𑀤𑀓𑀯𑀸𑀤𑀁 𑀯𑀢𑁆𑀯𑀸 𑀧𑀼𑀦 𑀘𑀢𑁆𑀢𑀸𑀭𑁄𑀧𑀺 𑀯𑀡𑁆𑀡𑀸 𑀓𑀼𑀲𑀮𑁂 𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑀸𑀯 ¶ 𑀲𑀼𑀚𑁆𑀛𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀘𑀢𑁆𑀢𑀸𑀭𑁄𑀫𑁂, 𑀯𑀸𑀲𑁂𑀝𑁆𑀞, 𑀯𑀡𑁆𑀡𑀸𑀢𑀺𑀆𑀤𑀺𑀫𑀸𑀳. 𑀅𑀓𑀼𑀲𑀮𑀲𑀗𑁆𑀔𑀸𑀢𑀸𑀢𑀺 𑀅𑀓𑀼𑀲𑀮𑀸𑀢𑀺 𑀲𑀗𑁆𑀔𑀸𑀢𑀸 𑀅𑀓𑀼𑀲𑀮𑀓𑁄𑀝𑁆𑀞𑀸𑀲𑀪𑀽𑀢𑀸 𑀯𑀸. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀦 𑀅𑀮𑀫𑀭𑀺𑀬𑀸𑀢𑀺 𑀅𑀭𑀺𑀬𑀪𑀸𑀯𑁂 𑀅𑀲𑀫𑀢𑁆𑀣𑀸. 𑀓𑀡𑁆𑀳𑀸𑀢𑀺 𑀧𑀓𑀢𑀺𑀓𑀸𑀴𑀓𑀸. 𑀓𑀡𑁆𑀳𑀯𑀺𑀧𑀸𑀓𑀸𑀢𑀺 𑀯𑀺𑀧𑀸𑀓𑁄𑀧𑀺 ¶ 𑀦𑁂𑀲𑀁 𑀓𑀡𑁆𑀳𑁄 𑀤𑀼𑀓𑁆𑀔𑁄𑀢𑀺 𑀅𑀢𑁆𑀣𑁄. 𑀔𑀢𑁆𑀢𑀺𑀬𑁂𑀧𑀺 𑀢𑁂𑀢𑀺 𑀔𑀢𑁆𑀢𑀺𑀬𑀫𑁆𑀳𑀺𑀧𑀺 𑀢𑁂. 𑀏𑀓𑀘𑁆𑀘𑁂𑀢𑀺 𑀏𑀓𑀲𑁆𑀫𑀺𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀲𑀼𑀓𑁆𑀓𑀸𑀢𑀺 𑀦𑀺𑀓𑁆𑀓𑀺𑀮𑁂𑀲𑀪𑀸𑀯𑁂𑀦 𑀧𑀡𑁆𑀟𑀭𑀸. 𑀲𑀼𑀓𑁆𑀓𑀯𑀺𑀧𑀸𑀓𑀸𑀢𑀺 𑀯𑀺𑀧𑀸𑀓𑁄𑀧𑀺 𑀦𑁂𑀲𑀁 𑀲𑀼𑀓𑁆𑀓𑁄 𑀲𑀼𑀔𑁄𑀢𑀺 𑀅𑀢𑁆𑀣𑁄.

𑁧𑁧𑁬. 𑀉𑀪𑀬𑀯𑁄𑀓𑀺𑀡𑁆𑀡𑁂𑀲𑀼 𑀯𑀢𑁆𑀢𑀫𑀸𑀦𑁂𑀲𑀽𑀢𑀺 𑀉𑀪𑀬𑁂𑀲𑀼 𑀯𑁄𑀓𑀺𑀡𑁆𑀡𑁂𑀲𑀼 𑀫𑀺𑀲𑁆𑀲𑀻𑀪𑀽𑀢𑁂𑀲𑀼 𑀳𑀼𑀢𑁆𑀯𑀸 𑀯𑀢𑁆𑀢𑀫𑀸𑀦𑁂𑀲𑀼. 𑀓𑀢𑀫𑁂𑀲𑀼 𑀉𑀪𑀬𑁂𑀲𑀽𑀢𑀺? 𑀓𑀡𑁆𑀳𑀲𑀼𑀓𑁆𑀓𑁂𑀲𑀼 𑀥𑀫𑁆𑀫𑁂𑀲𑀼 𑀯𑀺𑀜𑁆𑀜𑀼𑀕𑀭𑀳𑀺𑀢𑁂𑀲𑀼 𑀘𑁂𑀯 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑁂𑀲𑀼 𑀘. 𑀬𑀤𑁂𑀢𑁆𑀣 𑀩𑁆𑀭𑀸𑀳𑁆𑀫𑀡𑀸 𑀏𑀯𑀫𑀸𑀳𑀁𑀲𑀽𑀢𑀺 𑀏𑀢𑁆𑀣 𑀏𑀢𑁂𑀲𑀼 𑀓𑀡𑁆𑀳𑀲𑀼𑀓𑁆𑀓𑀥𑀫𑁆𑀫𑁂𑀲𑀼 𑀯𑀢𑁆𑀢𑀫𑀸𑀦𑀸𑀧𑀺 𑀩𑁆𑀭𑀸𑀳𑁆𑀫𑀡𑀸 𑀬𑀤𑁂𑀢𑀁 𑀏𑀯𑀁 𑀯𑀤𑀦𑁆𑀢𑀺 ‘‘𑀩𑁆𑀭𑀸𑀳𑁆𑀫𑀡𑁄𑀯 𑀲𑁂𑀝𑁆𑀞𑁄 𑀯𑀡𑁆𑀡𑁄’’𑀢𑀺𑀆𑀤𑀺. 𑀢𑀁 𑀦𑁂𑀲𑀁 𑀯𑀺𑀜𑁆𑀜𑀽 𑀦𑀸𑀦𑀼𑀚𑀸𑀦𑀦𑁆𑀢𑀻𑀢𑀺 𑀬𑁂 𑀮𑁄𑀓𑁂 𑀧𑀡𑁆𑀟𑀺𑀢𑀸, 𑀢𑁂 𑀦𑀸𑀦𑀼𑀫𑁄𑀤𑀦𑁆𑀢𑀺, 𑀦 𑀧𑀲𑀁𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀇𑀫𑁂𑀲𑀜𑁆𑀳𑀺 𑀯𑀸𑀲𑁂𑀝𑁆𑀞𑀸𑀢𑀺𑀆𑀤𑀺𑀫𑁆𑀳𑀺 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄. 𑀬𑀁 𑀯𑀼𑀢𑁆𑀢𑀁 𑀦𑀸𑀦𑀼𑀚𑀸𑀦𑀦𑁆𑀢𑀻𑀢𑀺, 𑀢𑀁 𑀓𑀲𑁆𑀫𑀸𑀢𑀺 𑀘𑁂? 𑀬𑀲𑁆𑀫𑀸 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀁 𑀬𑁄 𑀪𑀺𑀓𑁆𑀔𑀼 𑀅𑀭𑀳𑀁…𑀧𑁂… 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄, 𑀲𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀢𑁂 𑀘 𑀦 𑀏𑀯𑀭𑀽𑀧𑀸. 𑀢𑀲𑁆𑀫𑀸 𑀦𑁂𑀲𑀁 𑀯𑀺𑀜𑁆𑀜𑀽 𑀦𑀸𑀦𑀼𑀚𑀸𑀦𑀦𑁆𑀢𑀺.

𑀅𑀭𑀳𑀦𑁆𑀢𑀺𑀆𑀤𑀺𑀧𑀤𑁂𑀲𑀼 𑀘𑁂𑀢𑁆𑀣 𑀓𑀺𑀮𑁂𑀲𑀸𑀦𑀁 𑀆𑀭𑀓𑀢𑁆𑀢𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀅𑀭𑀳𑀁. 𑀆𑀲𑀯𑀸𑀦𑀁 𑀔𑀻𑀡𑀢𑁆𑀢𑀸 𑀔𑀻𑀡𑀸𑀲𑀯𑁄 ¶ . 𑀲𑀢𑁆𑀢 𑀲𑁂𑀓𑁆𑀔𑀸 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀸 𑀘 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀯𑀲𑀦𑁆𑀢𑀺 𑀦𑀸𑀫. 𑀅𑀬𑀁 𑀧𑀦 𑀯𑀼𑀢𑁆𑀣𑀯𑀸𑀲𑁄𑀢𑀺 𑀯𑀼𑀲𑀺𑀢𑀯𑀸. 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀧𑀭𑀺𑀚𑀸𑀦𑀦𑀸𑀤𑀺𑀓𑀭𑀡𑀻𑀬𑀁 𑀓𑀢𑀁 𑀅𑀲𑁆𑀲𑀸𑀢𑀺 𑀓𑀢𑀓𑀭𑀡𑀻𑀬𑁄. 𑀓𑀺𑀮𑁂𑀲𑀪𑀸𑀭𑁄 𑀘 𑀔𑀦𑁆𑀥𑀪𑀸𑀭𑁄 𑀘 𑀑𑀳𑀺𑀢𑁄 𑀅𑀲𑁆𑀲𑀸𑀢𑀺 𑀑𑀳𑀺𑀢𑀪𑀸𑀭𑁄. 𑀑𑀳𑀺𑀢𑁄𑀢𑀺 𑀑𑀳𑀸𑀭𑀺𑀢𑁄. 𑀲𑀼𑀦𑁆𑀤𑀭𑁄 𑀅𑀢𑁆𑀣𑁄, 𑀲𑀓𑁄 𑀯𑀸 𑀅𑀢𑁆𑀣𑁄 𑀲𑀤𑀢𑁆𑀣𑁄, 𑀅𑀦𑀼𑀧𑁆𑀧𑀢𑁆𑀢𑁄 𑀲𑀤𑀢𑁆𑀣𑁄 𑀏𑀢𑁂𑀦𑀸𑀢𑀺 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄. 𑀪𑀯𑀲𑀁𑀬𑁄𑀚𑀦𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸, 𑀲𑀸 𑀧𑀭𑀺𑀓𑁆𑀔𑀻𑀡𑀸 𑀅𑀲𑁆𑀲𑀸𑀢𑀺 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄. 𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑁄𑀢𑀺 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀓𑀸𑀭𑀡𑁂𑀦 𑀚𑀸𑀦𑀺𑀢𑁆𑀯𑀸 𑀯𑀺𑀫𑀼𑀢𑁆𑀢𑁄. 𑀚𑀦𑁂𑀢𑀲𑁆𑀫𑀺𑀦𑁆𑀢𑀺 ¶ 𑀚𑀦𑁂 𑀏𑀢𑀲𑁆𑀫𑀺𑀁, 𑀇𑀫𑀲𑁆𑀫𑀺𑀁 𑀮𑁄𑀓𑁂𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀅𑀪𑀺𑀲𑀫𑁆𑀧𑀭𑀸𑀬𑀜𑁆𑀘𑀸𑀢𑀺 𑀇𑀥𑀢𑁆𑀢𑀪𑀸𑀯𑁂 𑀘 𑀧𑀭𑀢𑁆𑀢𑀪𑀸𑀯𑁂.

𑁧𑁧𑁭. 𑀅𑀦𑀦𑁆𑀢𑀭𑀸𑀢𑀺 ¶ 𑀅𑀦𑁆𑀢𑀭𑀯𑀺𑀭𑀳𑀺𑀢𑀸, 𑀅𑀢𑁆𑀢𑀦𑁄 𑀓𑀼𑀮𑁂𑀦 𑀲𑀤𑀺𑀲𑀸𑀢𑀺 𑀅𑀢𑁆𑀣𑁄. 𑀅𑀦𑀼𑀬𑀼𑀢𑁆𑀢𑀸𑀢𑀺 𑀯𑀲𑀯𑀢𑁆𑀢𑀺𑀦𑁄. 𑀦𑀺𑀧𑀘𑁆𑀘𑀓𑀸𑀭𑀦𑁆𑀢𑀺 𑀫𑀳𑀮𑁆𑀮𑀓𑀢𑀭𑀸 𑀦𑀺𑀧𑀘𑁆𑀘𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑀺. 𑀤𑀳𑀭𑀢𑀭𑀸 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀺. 𑀢𑀢𑁆𑀣 𑀲𑀸𑀫𑀻𑀘𑀺𑀓𑀫𑁆𑀫𑀦𑁆𑀢𑀺 𑀢𑀁𑀢𑀁𑀯𑀢𑁆𑀢𑀓𑀭𑀡𑀸𑀤𑀺 𑀅𑀦𑀼𑀘𑁆𑀙𑀯𑀺𑀓𑀓𑀫𑁆𑀫𑀁.

𑁧𑁧𑁮. 𑀦𑀺𑀯𑀺𑀝𑁆𑀞𑀸𑀢𑀺 𑀅𑀪𑀺𑀦𑀺𑀯𑀺𑀝𑁆𑀞𑀸 𑀅𑀘𑀮𑀝𑁆𑀞𑀺𑀢𑀸. 𑀓𑀲𑁆𑀲 𑀧𑀦 𑀏𑀯𑀭𑀽𑀧𑀸 𑀲𑀤𑁆𑀥𑀸 𑀳𑁄𑀢𑀻𑀢𑀺? 𑀲𑁄𑀢𑀸𑀧𑀦𑁆𑀦𑀲𑁆𑀲. 𑀲𑁄 𑀳𑀺 𑀦𑀺𑀯𑀺𑀝𑁆𑀞𑀲𑀤𑁆𑀥𑁄 𑀅𑀲𑀺𑀦𑀸 𑀲𑀻𑀲𑁂 𑀙𑁂𑀚𑁆𑀚𑀫𑀸𑀦𑁂𑀧𑀺 𑀩𑀼𑀤𑁆𑀥𑁄 𑀅𑀩𑀼𑀤𑁆𑀥𑁄𑀢𑀺 𑀯𑀸, 𑀥𑀫𑁆𑀫𑁄 𑀅𑀥𑀫𑁆𑀫𑁄𑀢𑀺 𑀯𑀸, 𑀲𑀗𑁆𑀖𑁄 𑀅𑀲𑀗𑁆𑀖𑁄𑀢𑀺 𑀯𑀸 𑀦 𑀯𑀤𑀢𑀺. 𑀧𑀢𑀺𑀝𑁆𑀞𑀺𑀢𑀲𑀤𑁆𑀥𑁄 𑀳𑁄𑀢𑀺 𑀲𑀽𑀭𑀫𑁆𑀩𑀝𑁆𑀞𑁄 𑀯𑀺𑀬.

𑀲𑁄 𑀓𑀺𑀭 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀕𑁂𑀳𑀁 𑀅𑀕𑀫𑀸𑀲𑀺. 𑀅𑀣 𑀫𑀸𑀭𑁄 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀧𑁆𑀧𑀝𑀺𑀫𑀡𑁆𑀟𑀺𑀢𑀁 𑀩𑀼𑀤𑁆𑀥𑀭𑀽𑀧𑀁 𑀫𑀸𑀧𑁂𑀢𑁆𑀯𑀸 𑀢𑀲𑁆𑀲 𑀖𑀭𑀤𑁆𑀯𑀸𑀭𑁂 𑀞𑀢𑁆𑀯𑀸 ‘‘𑀲𑀢𑁆𑀣𑀸 𑀆𑀕𑀢𑁄’’𑀢𑀺 𑀲𑀸𑀲𑀦𑀁 𑀧𑀳𑀺𑀡𑀺. 𑀲𑀽𑀭𑀫𑁆𑀩𑀝𑁆𑀞𑁄 𑀘𑀺𑀦𑁆𑀢𑁂𑀲𑀺 ‘‘𑀅𑀳𑀁 𑀇𑀤𑀸𑀦𑁂𑀯 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀆𑀕𑀢𑁄, 𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀢𑁆𑀣𑀼𑀲𑀜𑁆𑀜𑀸𑀬 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀫𑀸𑀭𑁄 𑀆𑀳 𑁋 ‘‘𑀅𑀫𑁆𑀩𑀝𑁆𑀞, 𑀬𑀁 𑀢𑁂 𑀫𑀬𑀸 ‘𑀭𑀽𑀧𑀁 𑀅𑀦𑀺𑀘𑁆𑀘𑀁…𑀧𑁂… 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀦𑁆𑀢𑀺 𑀓𑀣𑀺𑀢𑀁, 𑀢𑀁 𑀤𑀼𑀓𑁆𑀓𑀣𑀺𑀢𑀁. 𑀅𑀦𑀼𑀧𑀥𑀸𑀭𑁂𑀢𑁆𑀯𑀸𑀯 𑀳𑀺 𑀫𑀬𑀸 𑀏𑀯𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀢𑁆𑀯𑀁 ‘𑀭𑀽𑀧𑀁 𑀦𑀺𑀘𑁆𑀘𑀁…𑀧𑁂… 𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘’𑀦𑁆𑀢𑀺 𑀕𑀡𑁆𑀳𑀸𑀳𑀻’’𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀝𑁆𑀞𑀸𑀦𑀫𑁂𑀢𑀁 𑀬𑀁 𑀩𑀼𑀤𑁆𑀥𑀸 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀅𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀓𑀺𑀜𑁆𑀘𑀺 𑀓𑀣𑁂𑀬𑁆𑀬𑀼𑀁, 𑀅𑀤𑁆𑀥𑀸 𑀅𑀬𑀁 𑀫𑀬𑁆𑀳𑀁 𑀯𑀺𑀘𑁆𑀙𑀺𑀦𑁆𑀤𑀚𑀦𑀦𑀢𑁆𑀣𑀁 𑀫𑀸𑀭𑁄 𑀆𑀕𑀢𑁄’’𑀢𑀺. 𑀢𑀢𑁄 𑀦𑀁 ‘‘𑀢𑁆𑀯𑀁 𑀫𑀸𑀭𑁄𑀲𑀻’’𑀢𑀺 𑀆𑀳. 𑀲𑁄 𑀫𑀼𑀲𑀸𑀯𑀸𑀤𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺. ‘‘𑀆𑀫 𑀫𑀸𑀭𑁄𑀲𑁆𑀫𑀻’’𑀢𑀺 𑀧𑀝𑀺𑀚𑀸𑀦𑀸𑀢𑀺. ‘‘𑀓𑀲𑁆𑀫𑀸 𑀆𑀕𑀢𑁄𑀲𑀻’’𑀢𑀺? 𑀢𑀯 𑀲𑀤𑁆𑀥𑀸𑀘𑀸𑀮𑀦𑀢𑁆𑀣𑀦𑁆𑀢𑀺 𑀆𑀳. ‘‘𑀓𑀡𑁆𑀳 𑀧𑀸𑀧𑀺𑀫, 𑀢𑁆𑀯𑀁 𑀢𑀸𑀯 𑀏𑀓𑁄 𑀢𑀺𑀝𑁆𑀞, 𑀢𑀸𑀤𑀺𑀲𑀸𑀦𑀁 𑀫𑀸𑀭𑀸𑀦𑀁 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀲𑀢𑀲𑀳𑀲𑁆𑀲𑀫𑁆𑀧𑀺 𑀫𑀫 𑀲𑀤𑁆𑀥𑀁 𑀘𑀸𑀮𑁂𑀢𑀼𑀁 𑀅𑀲𑀫𑀢𑁆𑀣𑀁, 𑀫𑀕𑁆𑀕𑁂𑀦 𑀆𑀕𑀢𑀲𑀤𑁆𑀥𑀸 𑀦𑀸𑀫 𑀣𑀺𑀭𑀸 𑀲𑀺𑀮𑀸𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑀲𑀺𑀦𑁂𑀭𑀼 𑀯𑀺𑀬 𑀅𑀘𑀮𑀸 𑀳𑁄𑀢𑀺, 𑀓𑀺𑀁 𑀢𑁆𑀯𑀁 𑀏𑀢𑁆𑀣𑀸’’𑀢𑀺 𑀅𑀘𑁆𑀙𑀭𑀁 𑀧𑀳𑀭𑀺. 𑀲𑁄 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀢𑁆𑀣𑁂𑀯 𑀅𑀦𑁆𑀢𑀭𑀥𑀸𑀬𑀺. 𑀏𑀯𑀭𑀽𑀧𑀁 𑀲𑀤𑁆𑀥𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 ‘‘𑀦𑀺𑀯𑀺𑀝𑁆𑀞𑀸’’𑀢𑀺.

𑀫𑀽𑀮𑀚𑀸𑀢𑀸 ¶ 𑀧𑀢𑀺𑀝𑁆𑀞𑀺𑀢𑀸𑀢𑀺 𑀫𑀕𑁆𑀕𑀫𑀽𑀮𑀲𑁆𑀲 𑀲𑀜𑁆𑀚𑀸𑀢𑀢𑁆𑀢𑀸 𑀢𑁂𑀦 𑀫𑀕𑁆𑀕𑀫𑀽𑀮𑁂𑀦 𑀧𑀢𑀺𑀝𑁆𑀞𑀺𑀢𑀸. 𑀤𑀴𑁆𑀳𑀸𑀢𑀺 𑀣𑀺𑀭𑀸. 𑀅𑀲𑀁𑀳𑀸𑀭𑀺𑀬𑀸𑀢𑀺 ¶ 𑀲𑀼𑀦𑀺𑀔𑀸𑀢𑀇𑀦𑁆𑀤𑀔𑀻𑀮𑁄 𑀯𑀺𑀬 𑀓𑁂𑀦𑀘𑀺 𑀘𑀸𑀮𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸. 𑀢𑀲𑁆𑀲𑁂𑀢𑀁 𑀓𑀮𑁆𑀮𑀁 𑀯𑀘𑀦𑀸𑀬𑀸𑀢𑀺 𑀢𑀲𑁆𑀲 𑀅𑀭𑀺𑀬𑀲𑀸𑀯𑀓𑀲𑁆𑀲 𑀬𑀼𑀢𑁆𑀢𑀫𑁂𑀢𑀁 𑀯𑀢𑁆𑀢𑀼𑀁. 𑀓𑀺𑀦𑁆𑀢𑀺? ‘‘𑀪𑀕𑀯𑀢𑁄𑀫𑁆𑀳𑀺 𑀧𑀼𑀢𑁆𑀢𑁄 𑀑𑀭𑀲𑁄’’𑀢𑀺 ¶ 𑀏𑀯𑀫𑀸𑀤𑀺. 𑀲𑁄 𑀳𑀺 𑀪𑀕𑀯𑀦𑁆𑀢𑀁 𑀦𑀺𑀲𑁆𑀲𑀸𑀬 𑀅𑀭𑀺𑀬𑀪𑀽𑀫𑀺𑀬𑀁 𑀚𑀸𑀢𑁄𑀢𑀺 𑀪𑀕𑀯𑀢𑁄 𑀧𑀼𑀢𑁆𑀢𑁄. 𑀉𑀭𑁂 𑀯𑀲𑀺𑀢𑁆𑀯𑀸 𑀫𑀼𑀔𑀢𑁄 𑀦𑀺𑀓𑁆𑀔𑀦𑁆𑀢𑀥𑀫𑁆𑀫𑀖𑁄𑀲𑀯𑀲𑁂𑀦 𑀫𑀕𑁆𑀕𑀨𑀮𑁂𑀲𑀼 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀑𑀭𑀲𑁄 𑀫𑀼𑀔𑀢𑁄 𑀚𑀸𑀢𑁄. 𑀅𑀭𑀺𑀬𑀥𑀫𑁆𑀫𑀢𑁄 𑀚𑀸𑀢𑀢𑁆𑀢𑀸 𑀅𑀭𑀺𑀬𑀥𑀫𑁆𑀫𑁂𑀦 𑀘 𑀦𑀺𑀫𑁆𑀫𑀺𑀢𑀢𑁆𑀢𑀸 𑀥𑀫𑁆𑀫𑀚𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄. 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀤𑀸𑀬𑀚𑁆𑀚𑀁 𑀅𑀭𑀳𑀢𑀻𑀢𑀺 𑀥𑀫𑁆𑀫𑀤𑀸𑀬𑀸𑀤𑁄. 𑀢𑀁 𑀓𑀺𑀲𑁆𑀲 𑀳𑁂𑀢𑀽𑀢𑀺 𑀬𑀤𑁂𑀢𑀁 ‘‘𑀪𑀕𑀯𑀢𑁄𑀫𑁆𑀳𑀺 𑀧𑀼𑀢𑁆𑀢𑁄’’𑀢𑀺 𑀯𑀢𑁆𑀯𑀸 ‘‘𑀥𑀫𑁆𑀫𑀚𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀓𑀲𑁆𑀫𑀸𑀢𑀺 𑀘𑁂? 𑀇𑀤𑀸𑀦𑀺𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀢𑀣𑀸𑀕𑀢𑀲𑁆𑀲 𑀳𑁂𑀢𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀥𑀫𑁆𑀫𑀓𑀸𑀬𑁄 𑀇𑀢𑀺𑀧𑀻’’𑀢𑀺 𑀓𑀲𑁆𑀫𑀸 𑀢𑀣𑀸𑀕𑀢𑁄 ‘‘𑀥𑀫𑁆𑀫𑀓𑀸𑀬𑁄’’𑀢𑀺 𑀯𑀼𑀢𑁆𑀢𑁄? 𑀢𑀣𑀸𑀕𑀢𑁄 𑀳𑀺 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀳𑀤𑀬𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 𑀯𑀸𑀘𑀸𑀬 𑀅𑀪𑀺𑀦𑀻𑀳𑀭𑀺. 𑀢𑁂𑀦𑀲𑁆𑀲 𑀓𑀸𑀬𑁄 𑀥𑀫𑁆𑀫𑀫𑀬𑀢𑁆𑀢𑀸 𑀥𑀫𑁆𑀫𑁄𑀯. 𑀇𑀢𑀺 𑀥𑀫𑁆𑀫𑁄 𑀓𑀸𑀬𑁄 𑀅𑀲𑁆𑀲𑀸𑀢𑀺 𑀥𑀫𑁆𑀫𑀓𑀸𑀬𑁄. 𑀥𑀫𑁆𑀫𑀓𑀸𑀬𑀢𑁆𑀢𑀸 𑀏𑀯 𑀩𑁆𑀭𑀳𑁆𑀫𑀓𑀸𑀬𑁄. 𑀥𑀫𑁆𑀫𑁄 𑀳𑀺 𑀲𑁂𑀝𑁆𑀞𑀢𑁆𑀣𑁂𑀦 𑀩𑁆𑀭𑀳𑁆𑀫𑀸𑀢𑀺 𑀯𑀼𑀘𑁆𑀘𑀢𑀺. 𑀥𑀫𑁆𑀫𑀪𑀽𑀢𑁄𑀢𑀺 𑀥𑀫𑁆𑀫𑀲𑀪𑀸𑀯𑁄. 𑀥𑀫𑁆𑀫𑀪𑀽𑀢𑀢𑁆𑀢𑀸 𑀏𑀯 𑀩𑁆𑀭𑀳𑁆𑀫𑀪𑀽𑀢𑁄.

𑁧𑁧𑁯. 𑀏𑀢𑁆𑀢𑀸𑀯𑀢𑀸 𑀪𑀕𑀯𑀸 𑀲𑁂𑀝𑁆𑀞𑀘𑁆𑀙𑁂𑀤𑀓𑀯𑀸𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀧𑀭𑁂𑀦𑀧𑀺 𑀦𑀬𑁂𑀦 𑀲𑁂𑀝𑁆𑀞𑀘𑁆𑀙𑁂𑀤𑀓𑀯𑀸𑀤𑀫𑁂𑀯 𑀤𑀲𑁆𑀲𑁂𑀢𑀼𑀁 𑀳𑁄𑀢𑀺 𑀔𑁄 𑀲𑁄, 𑀯𑀸𑀲𑁂𑀝𑁆𑀞, 𑀲𑀫𑀬𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀣𑀸 𑀩𑁆𑀭𑀳𑁆𑀫𑀚𑀸𑀮𑁂 𑀯𑀺𑀢𑁆𑀣𑀸𑀭𑀺𑀢𑀸𑀯. 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀦𑁆𑀢𑀻𑀢𑀺 𑀇𑀢𑁆𑀣𑀪𑀸𑀯𑀁 𑀫𑀦𑀼𑀲𑁆𑀲𑀢𑁆𑀢𑀁 𑀆𑀕𑀘𑁆𑀙𑀦𑁆𑀢𑀺. 𑀢𑁂𑀥 𑀳𑁄𑀦𑁆𑀢𑀺 𑀫𑀦𑁄𑀫𑀬𑀸𑀢𑀺 𑀢𑁂 𑀇𑀥 𑀫𑀦𑀼𑀲𑁆𑀲𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀫𑀸𑀦𑀸𑀧𑀺 𑀑𑀧𑀧𑀸𑀢𑀺𑀓𑀸 𑀳𑀼𑀢𑁆𑀯𑀸 𑀫𑀦𑁂𑀦𑁂𑀯 𑀦𑀺𑀩𑁆𑀩𑀢𑁆𑀢𑀸𑀢𑀺 𑀫𑀦𑁄𑀫𑀬𑀸. 𑀩𑁆𑀭𑀳𑁆𑀫𑀮𑁄𑀓𑁂 𑀯𑀺𑀬 𑀇𑀥𑀸𑀧𑀺 𑀦𑁂𑀲𑀁 𑀧𑀻𑀢𑀺𑀬𑁂𑀯 𑀆𑀳𑀸𑀭𑀓𑀺𑀘𑁆𑀘𑀁 𑀲𑀸𑀥𑁂𑀢𑀻𑀢𑀺 𑀧𑀻𑀢𑀺𑀪𑀓𑁆𑀔𑀸. 𑀏𑀢𑁂𑀦𑁂𑀯 𑀦𑀬𑁂𑀦 𑀲𑀬𑀁𑀧𑀪𑀸𑀤𑀻𑀦𑀺𑀧𑀺 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺.

𑀭𑀲𑀧𑀣𑀯𑀺𑀧𑀸𑀢𑀼𑀪𑀸𑀯𑀯𑀡𑁆𑀡𑀦𑀸

𑁧𑁨𑁦. 𑀏𑀓𑁄𑀤𑀓𑀻𑀪𑀽𑀢𑀦𑁆𑀢𑀺 𑀲𑀩𑁆𑀩𑀁 𑀘𑀓𑁆𑀓𑀯𑀸𑀴𑀁 𑀏𑀓𑁄𑀤𑀓𑀫𑁂𑀯 𑀪𑀽𑀢𑀁. 𑀅𑀦𑁆𑀥𑀓𑀸𑀭𑁄𑀢𑀺 𑀢𑀫𑁄. 𑀅𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑁂𑀦 𑀅𑀦𑁆𑀥𑀪𑀸𑀯𑀓𑀭𑀡𑀁 𑀩𑀳𑀮𑀢𑀫𑀁. 𑀲𑀫𑀢𑀦𑀻𑀢𑀺 𑀧𑀢𑀺𑀝𑁆𑀞𑀳𑀺 𑀲𑀫𑀦𑁆𑀢𑀢𑁄 𑀧𑀢𑁆𑀣𑀭𑀺. 𑀧𑀬𑀲𑁄 ¶ 𑀢𑀢𑁆𑀢𑀲𑁆𑀲𑀸𑀢𑀺 𑀢𑀢𑁆𑀢𑀲𑁆𑀲 𑀔𑀻𑀭𑀲𑁆𑀲. 𑀯𑀡𑁆𑀡𑀲𑀫𑁆𑀧𑀦𑁆𑀦𑀸𑀢𑀺 𑀯𑀡𑁆𑀡𑁂𑀦 𑀲𑀫𑁆𑀧𑀦𑁆𑀦𑀸. 𑀓𑀡𑀺𑀓𑀸𑀭𑀧𑀼𑀧𑁆𑀨𑀲𑀤𑀺𑀲𑁄 𑀳𑀺𑀲𑁆𑀲𑀸 𑀯𑀡𑁆𑀡𑁄 𑀅𑀳𑁄𑀲𑀺. 𑀕𑀦𑁆𑀥𑀲𑀫𑁆𑀧𑀦𑁆𑀦𑀸𑀢𑀺 𑀕𑀦𑁆𑀥𑁂𑀦 𑀲𑀫𑁆𑀧𑀦𑁆𑀦𑀸 ¶ 𑀤𑀺𑀩𑁆𑀩𑀕𑀦𑁆𑀥𑀁 𑀯𑀸𑀬𑀢𑀺. 𑀭𑀲𑀲𑀫𑁆𑀧𑀦𑁆𑀦𑀸𑀢𑀺 𑀭𑀲𑁂𑀦 𑀲𑀫𑁆𑀧𑀦𑁆𑀦𑀸 𑀧𑀓𑁆𑀔𑀺𑀢𑁆𑀢𑀤𑀺𑀩𑁆𑀩𑁄𑀚𑀸 𑀯𑀺𑀬 𑀳𑁄𑀢𑀺. 𑀔𑀼𑀤𑁆𑀤𑀫𑀥𑀼𑀦𑁆𑀢𑀺 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀳𑀺 𑀓𑀢𑀫𑀥𑀼𑀁. 𑀅𑀦𑁂𑀴𑀓𑀦𑁆𑀢𑀺 𑀦𑀺𑀤𑁆𑀤𑁄𑀲𑀁 𑀫𑀓𑁆𑀔𑀺𑀓𑀡𑁆𑀟𑀓𑀯𑀺𑀭𑀳𑀺𑀢𑀁. 𑀮𑁄𑀮𑀚𑀸𑀢𑀺𑀓𑁄𑀢𑀺 𑀮𑁄𑀮𑀲𑀪𑀸𑀯𑁄. 𑀅𑀢𑀻𑀢𑀸𑀦𑀦𑁆𑀢𑀭𑁂𑀧𑀺 𑀓𑀧𑁆𑀧𑁂 𑀮𑁄𑀮𑁄𑀬𑁂𑀯. 𑀅𑀫𑁆𑀪𑁄𑀢𑀺 𑀅𑀘𑁆𑀙𑀭𑀺𑀬𑀚𑀸𑀢𑁄 𑀆𑀳. 𑀓𑀺𑀫𑁂𑀯𑀺𑀤𑀁 𑀪𑀯𑀺𑀲𑁆𑀲𑀢𑀻𑀢𑀺 ¶ 𑀯𑀡𑁆𑀡𑁄𑀧𑀺𑀲𑁆𑀲𑀸 𑀫𑀦𑀸𑀧𑁄 𑀕𑀦𑁆𑀥𑁄𑀧𑀺, 𑀭𑀲𑁄 𑀧𑀦𑀲𑁆𑀲𑀸 𑀓𑀻𑀤𑀺𑀲𑁄 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀬𑁄 𑀢𑀢𑁆𑀣 𑀉𑀧𑁆𑀧𑀦𑁆𑀦𑀮𑁄𑀪𑁄, 𑀲𑁄 𑀭𑀲𑀧𑀣𑀯𑀺𑀁 𑀅𑀗𑁆𑀕𑀼𑀮𑀺𑀬𑀸 𑀲𑀸𑀬𑀺, 𑀅𑀗𑁆𑀕𑀼𑀮𑀺𑀬𑀸 𑀕𑀳𑁂𑀢𑁆𑀯𑀸 𑀚𑀺𑀯𑁆𑀳𑀕𑁆𑀕𑁂 𑀞𑀧𑁂𑀲𑀺.

𑀅𑀘𑁆𑀙𑀸𑀤𑁂𑀲𑀻𑀢𑀺 𑀚𑀺𑀯𑁆𑀳𑀕𑁆𑀕𑁂 𑀞𑀧𑀺𑀢𑀫𑀢𑁆𑀢𑀸 𑀲𑀢𑁆𑀢 𑀭𑀲𑀳𑀭𑀡𑀻𑀲𑀳𑀲𑁆𑀲𑀸𑀦𑀺 𑀨𑀭𑀺𑀢𑁆𑀯𑀸 𑀫𑀦𑀸𑀧𑀸 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀢𑀡𑁆𑀳𑀸 𑀘𑀲𑁆𑀲 𑀑𑀓𑁆𑀓𑀫𑀻𑀢𑀺 𑀢𑀢𑁆𑀣 𑀘𑀲𑁆𑀲 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀺.

𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀤𑀺𑀧𑀸𑀢𑀼𑀪𑀸𑀯𑀯𑀡𑁆𑀡𑀦𑀸

𑁧𑁨𑁧. 𑀆𑀮𑀼𑀧𑁆𑀧𑀓𑀸𑀭𑀓𑀁 𑀉𑀧𑀓𑁆𑀓𑀫𑀺𑀁𑀲𑀼 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺 𑀆𑀮𑁄𑀧𑀁 𑀓𑀢𑁆𑀯𑀸 𑀧𑀺𑀡𑁆𑀟𑁂 𑀧𑀺𑀡𑁆𑀟𑁂 𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀆𑀭𑀪𑀺𑀁𑀲𑀼. 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀢𑀺 𑀘𑀦𑁆𑀤𑀺𑀫𑀸 𑀘 𑀲𑀽𑀭𑀺𑀬𑁄 𑀘. 𑀧𑀸𑀢𑀼𑀭𑀳𑁂𑀲𑀼𑀦𑁆𑀢𑀺 𑀧𑀸𑀢𑀼𑀪𑀯𑀺𑀁𑀲𑀼.

𑀓𑁄 𑀧𑀦 𑀢𑁂𑀲𑀁 𑀧𑀞𑀫𑀁 𑀧𑀸𑀢𑀼𑀪𑀯𑀺, 𑀓𑁄 𑀓𑀲𑁆𑀫𑀺𑀁 𑀯𑀲𑀢𑀺, 𑀓𑀲𑁆𑀲 𑀓𑀺𑀁 𑀧𑀫𑀸𑀡𑀁, 𑀓𑁄 𑀉𑀧𑀭𑀺, 𑀓𑁄 𑀲𑀻𑀖𑀁 𑀕𑀘𑁆𑀙𑀢𑀺, 𑀓𑀢𑀺 𑀦𑁂𑀲𑀁 𑀯𑀻𑀣𑀺𑀬𑁄, 𑀓𑀣𑀁 𑀘𑀭𑀦𑁆𑀢𑀺, 𑀓𑀺𑀢𑁆𑀢𑀓𑁂 𑀞𑀸𑀦𑁂 𑀆𑀮𑁄𑀓𑀁 𑀓𑀭𑁄𑀦𑁆𑀢𑀻𑀢𑀺? 𑀉𑀪𑁄 𑀏𑀓𑀢𑁄 𑀧𑀸𑀢𑀼𑀪𑀯𑀦𑁆𑀢𑀺. 𑀲𑀽𑀭𑀺𑀬𑁄 𑀧𑀞𑀫𑀢𑀭𑀁 𑀧𑀜𑁆𑀜𑀸𑀬𑀢𑀺. 𑀢𑁂𑀲𑀜𑁆𑀳𑀺 𑀲𑀢𑁆𑀢𑀸𑀦𑀁 𑀲𑀬𑀁𑀧𑀪𑀸𑀬 𑀅𑀦𑁆𑀢𑀭𑀳𑀺𑀢𑀸𑀬 𑀅𑀦𑁆𑀥𑀓𑀸𑀭𑁄 𑀅𑀳𑁄𑀲𑀺. 𑀢𑁂 𑀪𑀻𑀢𑀢𑀲𑀺𑀢𑀸 ‘‘𑀪𑀤𑁆𑀤𑀓𑀁 𑀯𑀢𑀲𑁆𑀲 𑀲𑀘𑁂 𑀆𑀮𑁄𑀓𑁄 𑀧𑀸𑀢𑀼𑀪𑀯𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑀬𑀺𑀁𑀲𑀼. 𑀢𑀢𑁄 𑀫𑀳𑀸𑀚𑀦𑀲𑁆𑀲 𑀲𑀽𑀭𑀪𑀸𑀯𑀁 𑀚𑀦𑀬𑀫𑀸𑀦𑀁 𑀲𑀽𑀭𑀺𑀬𑀫𑀡𑁆𑀟𑀮𑀁 𑀉𑀝𑁆𑀞𑀳𑀺. 𑀢𑁂𑀦𑁂𑀯𑀲𑁆𑀲 𑀲𑀽𑀭𑀺𑀬𑁄𑀢𑀺 𑀦𑀸𑀫𑀁 𑀅𑀳𑁄𑀲𑀺. 𑀢𑀲𑁆𑀫𑀺𑀁 𑀤𑀺𑀯𑀲𑀁 𑀆𑀮𑁄𑀓𑀁 𑀓𑀢𑁆𑀯𑀸 𑀅𑀢𑁆𑀣𑀗𑁆𑀕𑀢𑁂 𑀧𑀼𑀦 𑀅𑀦𑁆𑀥𑀓𑀸𑀭𑁄 𑀅𑀳𑁄𑀲𑀺. 𑀢𑁂 ‘‘𑀪𑀤𑁆𑀤𑀓𑀁 𑀯𑀢𑀲𑁆𑀲 𑀲𑀘𑁂 𑀅𑀜𑁆𑀜𑁄 𑀆𑀮𑁄𑀓𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑀬𑀺𑀁𑀲𑀼. 𑀅𑀣 𑀦𑁂𑀲𑀁 𑀙𑀦𑁆𑀤𑀁 𑀜𑀢𑁆𑀯𑀸𑀯 𑀘𑀦𑁆𑀤𑀫𑀡𑁆𑀟𑀮𑀁 𑀉𑀝𑁆𑀞𑀳𑀺. 𑀢𑁂𑀦𑁂𑀯𑀲𑁆𑀲 𑀘𑀦𑁆𑀤𑁄𑀢𑀺 𑀦𑀸𑀫𑀁 𑀅𑀳𑁄𑀲𑀺.

𑀢𑁂𑀲𑀼 𑀘𑀦𑁆𑀤𑁄 𑀅𑀦𑁆𑀢𑁄𑀫𑀡𑀺𑀯𑀺𑀫𑀸𑀦𑁂 𑀯𑀲𑀢𑀺. 𑀢𑀁 𑀩𑀳𑀺 𑀭𑀚𑀢𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀁 ¶ . 𑀉𑀪𑀬𑀫𑁆𑀧𑀺 𑀲𑀻𑀢𑀮𑀫𑁂𑀯 𑀅𑀳𑁄𑀲𑀺. 𑀲𑀽𑀭𑀺𑀬𑁄 𑀅𑀦𑁆𑀢𑁄𑀓𑀦𑀓𑀯𑀺𑀫𑀸𑀦𑁂 𑀯𑀲𑀢𑀺. 𑀢𑀁 𑀩𑀸𑀳𑀺𑀭𑀁 𑀨𑀮𑀺𑀓𑀧𑀭𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺. 𑀉𑀪𑀬𑀫𑁆𑀧𑀺 𑀉𑀡𑁆𑀳𑀫𑁂𑀯.

𑀧𑀫𑀸𑀡𑀢𑁄 ¶ 𑀘𑀦𑁆𑀤𑁄 𑀉𑀚𑀼𑀓𑀁 𑀏𑀓𑀽𑀦𑀧𑀜𑁆𑀜𑀸𑀲𑀬𑁄𑀚𑀦𑁄. 𑀧𑀭𑀺𑀫𑀡𑁆𑀟𑀮𑀢𑁄 𑀢𑀻𑀳𑀺 𑀬𑁄𑀚𑀦𑁂𑀳𑀺 𑀊𑀦𑀤𑀺𑀬𑀟𑁆𑀠𑀲𑀢𑀬𑁄𑀚𑀦𑁄. 𑀲𑀽𑀭𑀺𑀬𑁄 𑀉𑀚𑀼𑀓𑀁 𑀧𑀜𑁆𑀜𑀸𑀲𑀬𑁄𑀚𑀦𑁄, 𑀧𑀭𑀺𑀫𑀡𑁆𑀟𑀮𑀢𑁄 𑀤𑀺𑀬𑀟𑁆𑀠𑀲𑀢𑀬𑁄𑀚𑀦𑁄.

𑀘𑀦𑁆𑀤𑁄 𑀳𑁂𑀝𑁆𑀞𑀸, 𑀲𑀽𑀭𑀺𑀬𑁄 𑀉𑀧𑀭𑀺, 𑀅𑀦𑁆𑀢𑀭𑀸 𑀦𑁂𑀲𑀁 𑀬𑁄𑀚𑀦𑀁 𑀳𑁄𑀢𑀺. 𑀘𑀦𑁆𑀤𑀲𑁆𑀲 𑀳𑁂𑀝𑁆𑀞𑀺𑀫𑀦𑁆𑀢𑀢𑁄 𑀲𑀽𑀭𑀺𑀬𑀲𑁆𑀲 𑀉𑀧𑀭𑀺𑀫𑀦𑁆𑀢𑀢𑁄 𑀬𑁄𑀚𑀦𑀲𑀢𑀁 𑀳𑁄𑀢𑀺.

𑀘𑀦𑁆𑀤𑁄 ¶ 𑀉𑀚𑀼𑀓𑀁 𑀲𑀡𑀺𑀓𑀁 𑀕𑀘𑁆𑀙𑀢𑀺, 𑀢𑀺𑀭𑀺𑀬𑀁 𑀲𑀻𑀖𑀁. 𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀦𑀓𑁆𑀔𑀢𑁆𑀢𑀢𑀸𑀭𑀓𑀸 𑀕𑀘𑁆𑀙𑀦𑁆𑀢𑀺. 𑀘𑀦𑁆𑀤𑁄 𑀥𑁂𑀦𑀼 𑀯𑀺𑀬 𑀯𑀘𑁆𑀙𑀁 𑀢𑀁 𑀢𑀁 𑀦𑀓𑁆𑀔𑀢𑁆𑀢𑀁 𑀉𑀧𑀲𑀗𑁆𑀓𑀫𑀢𑀺. 𑀦𑀓𑁆𑀔𑀢𑁆𑀢𑀸𑀦𑀺 𑀧𑀦 𑀅𑀢𑁆𑀢𑀦𑁄 𑀞𑀸𑀦𑀁 𑀦 𑀯𑀺𑀚𑀳𑀦𑁆𑀢𑀺. 𑀲𑀽𑀭𑀺𑀬𑀲𑁆𑀲 𑀉𑀚𑀼𑀓𑀁 𑀕𑀫𑀦𑀁 𑀲𑀻𑀖𑀁, 𑀢𑀺𑀭𑀺𑀬𑀁 𑀕𑀫𑀦𑀁 𑀤𑀦𑁆𑀥𑀁. 𑀲𑁄 𑀓𑀸𑀴𑀧𑀓𑁆𑀔𑀉𑀧𑁄𑀲𑀣𑀢𑁄 𑀧𑀸𑀝𑀺𑀧𑀤𑀤𑀺𑀯𑀲𑁂 𑀬𑁄𑀚𑀦𑀸𑀦𑀁 𑀲𑀢𑀲𑀳𑀲𑁆𑀲𑀁 𑀘𑀦𑁆𑀤𑀫𑀡𑁆𑀟𑀮𑀁 𑀑𑀳𑀸𑀬 𑀕𑀘𑁆𑀙𑀢𑀺. 𑀅𑀣 𑀘𑀦𑁆𑀤𑁄 𑀮𑁂𑀔𑀸 𑀯𑀺𑀬 𑀧𑀜𑁆𑀜𑀸𑀬𑀢𑀺. 𑀧𑀓𑁆𑀔𑀲𑁆𑀲 𑀤𑀼𑀢𑀺𑀬𑀸𑀬 𑀲𑀢𑀲𑀳𑀲𑁆𑀲𑀦𑁆𑀢𑀺 𑀏𑀯𑀁 𑀬𑀸𑀯 𑀉𑀧𑁄𑀲𑀣𑀤𑀺𑀯𑀲𑀸 𑀲𑀢𑀲𑀳𑀲𑁆𑀲𑀁 𑀲𑀢𑀲𑀳𑀲𑁆𑀲𑀁 𑀑𑀳𑀸𑀬 𑀕𑀘𑁆𑀙𑀢𑀺. 𑀅𑀣 𑀘𑀦𑁆𑀤𑁄 𑀅𑀦𑀼𑀓𑁆𑀓𑀫𑁂𑀦 𑀯𑀟𑁆𑀠𑀺𑀢𑁆𑀯𑀸 𑀉𑀧𑁄𑀲𑀣𑀤𑀺𑀯𑀲𑁂 𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀺. 𑀧𑀼𑀦 𑀧𑀸𑀝𑀺𑀧𑀤𑀤𑀺𑀯𑀲𑁂 𑀬𑁄𑀚𑀦𑀸𑀦𑀁 𑀲𑀢𑀲𑀳𑀲𑁆𑀲𑀁 𑀥𑀸𑀯𑀺𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀤𑀼𑀢𑀺𑀬𑀸𑀬 𑀲𑀢𑀲𑀳𑀲𑁆𑀲𑀦𑁆𑀢𑀺 𑀏𑀯𑀁 𑀬𑀸𑀯 𑀉𑀧𑁄𑀲𑀣𑀤𑀺𑀯𑀲𑀸 𑀲𑀢𑀲𑀳𑀲𑁆𑀲𑀁 𑀲𑀢𑀲𑀳𑀲𑁆𑀲𑀁 𑀥𑀸𑀯𑀺𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀅𑀣 𑀘𑀦𑁆𑀤𑁄 𑀅𑀦𑀼𑀓𑁆𑀓𑀫𑁂𑀦 𑀳𑀸𑀬𑀺𑀢𑁆𑀯𑀸 𑀉𑀧𑁄𑀲𑀣𑀤𑀺𑀯𑀲𑁂 𑀲𑀩𑁆𑀩𑀲𑁄 𑀦 𑀧𑀜𑁆𑀜𑀸𑀬𑀢𑀺. 𑀘𑀦𑁆𑀤𑀁 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀲𑀽𑀭𑀺𑀬𑁄 𑀉𑀧𑀭𑀺 𑀳𑁄𑀢𑀺. 𑀫𑀳𑀢𑀺𑀬𑀸 𑀧𑀸𑀢𑀺𑀬𑀸 𑀔𑀼𑀤𑁆𑀤𑀓𑀪𑀸𑀚𑀦𑀁 𑀯𑀺𑀬 𑀘𑀦𑁆𑀤𑀫𑀡𑁆𑀟𑀮𑀁 𑀧𑀺𑀥𑀻𑀬𑀢𑀺. 𑀫𑀚𑁆𑀛𑀦𑁆𑀳𑀺𑀓𑁂 𑀕𑁂𑀳𑀘𑁆𑀙𑀸𑀬𑀸 𑀯𑀺𑀬 𑀘𑀦𑁆𑀤𑀲𑁆𑀲 𑀙𑀸𑀬𑀸 𑀦 𑀧𑀜𑁆𑀜𑀸𑀬𑀢𑀺. 𑀲𑁄 𑀙𑀸𑀬𑀸𑀬 𑀅𑀧𑀜𑁆𑀜𑀸𑀬𑀫𑀸𑀦𑀸𑀬 𑀤𑀽𑀭𑁂 𑀞𑀺𑀢𑀸𑀦𑀁 𑀤𑀺𑀯𑀸 𑀧𑀤𑀻𑀧𑁄 𑀯𑀺𑀬 𑀲𑀬𑀫𑁆𑀧𑀺 𑀦 𑀧𑀜𑁆𑀜𑀸𑀬𑀢𑀺.

𑀓𑀢𑀺 𑀦𑁂𑀲𑀁 𑀯𑀻𑀣𑀺𑀬𑁄𑀢𑀺 𑀏𑀢𑁆𑀣 𑀧𑀦 𑀅𑀚𑀯𑀻𑀣𑀺, 𑀦𑀸𑀕𑀯𑀻𑀣𑀺, 𑀕𑁄𑀯𑀻𑀣𑀻𑀢𑀺 𑀢𑀺𑀲𑁆𑀲𑁄 𑀯𑀻𑀣𑀺𑀬𑁄 𑀳𑁄𑀦𑁆𑀢𑀺. 𑀢𑀢𑁆𑀣 𑀅𑀚𑀸𑀦𑀁 𑀉𑀤𑀓𑀁 𑀧𑀝𑀺𑀓𑀽𑀮𑀁 𑀳𑁄𑀢𑀺, 𑀳𑀢𑁆𑀣𑀺𑀦𑀸𑀕𑀸𑀦𑀁 𑀫𑀦𑀸𑀧𑀁. 𑀕𑀼𑀦𑁆𑀦𑀁 𑀲𑀻𑀢𑀼𑀡𑁆𑀳𑀲𑀫𑀢𑀸𑀬 𑀨𑀸𑀲𑀼 𑀳𑁄𑀢𑀺. 𑀢𑀲𑁆𑀫𑀸 𑀬𑀁 𑀓𑀸𑀮𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀅𑀚𑀯𑀻𑀣𑀺𑀁 𑀆𑀭𑀼𑀳𑀦𑁆𑀢𑀺, 𑀢𑀤𑀸 𑀤𑁂𑀯𑁄 𑀏𑀓𑀩𑀺𑀦𑁆𑀤𑀼𑀫𑁆𑀧𑀺 𑀦 𑀯𑀲𑁆𑀲𑀢𑀺. 𑀬𑀤𑀸 𑀦𑀸𑀕𑀯𑀻𑀣𑀺𑀁 𑀆𑀭𑁄𑀳𑀦𑁆𑀢𑀺, 𑀢𑀤𑀸 𑀪𑀺𑀦𑁆𑀦𑀁 𑀯𑀺𑀬 𑀦𑀪𑀁 𑀧𑀕𑁆𑀖𑀭𑀢𑀺. 𑀬𑀤𑀸 𑀕𑁄𑀯𑀻𑀣𑀺𑀁 𑀆𑀭𑁄𑀳𑀦𑁆𑀢𑀺, 𑀢𑀤𑀸 𑀉𑀢𑀼𑀲𑀫𑀢𑀸 𑀲𑀫𑁆𑀧𑀚𑁆𑀚𑀢𑀺. 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀙𑀫𑀸𑀲𑁂 𑀲𑀺𑀦𑁂𑀭𑀼𑀢𑁄 𑀩𑀳𑀺 𑀦𑀺𑀓𑁆𑀔𑀫𑀦𑁆𑀢𑀺, 𑀙𑀫𑀸𑀲𑁂 𑀅𑀦𑁆𑀢𑁄 𑀯𑀺𑀘𑀭𑀦𑁆𑀢𑀺. 𑀢𑁂 𑀳𑀺 𑀆𑀲𑀸𑀴𑁆𑀳𑀫𑀸𑀲𑁂 𑀲𑀺𑀦𑁂𑀭𑀼𑀲𑀫𑀻𑀧𑁂𑀦 𑀯𑀺𑀘𑀭𑀦𑁆𑀢𑀺. 𑀢𑀢𑁄 𑀧𑀭𑁂 𑀤𑁆𑀯𑁂 𑀫𑀸𑀲𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀯𑀺𑀘𑀭𑀦𑁆𑀢𑀸 𑀧𑀞𑀫𑀓𑀢𑁆𑀢𑀺𑀓𑀫𑀸𑀲𑁂 𑀫𑀚𑁆𑀛𑁂𑀦 𑀕𑀘𑁆𑀙𑀦𑁆𑀢𑀺. 𑀢𑀢𑁄 𑀘𑀓𑁆𑀓𑀯𑀸𑀴𑀸𑀪𑀺𑀫𑀼𑀔𑀸 𑀕𑀦𑁆𑀢𑁆𑀯𑀸 𑀢𑀬𑁄 𑀫𑀸𑀲𑁂 𑀘𑀓𑁆𑀓𑀯𑀸𑀴𑀲𑀫𑀻𑀧𑁂𑀦 ¶ 𑀘𑀭𑀺𑀢𑁆𑀯𑀸 𑀧𑀼𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 ¶ 𑀘𑀺𑀢𑁆𑀭𑀫𑀸𑀲𑁂 𑀫𑀚𑁆𑀛𑁂𑀦 𑀕𑀦𑁆𑀢𑁆𑀯𑀸 𑀢𑀢𑁄 𑀤𑁆𑀯𑁂 𑀫𑀸𑀲𑁂 𑀲𑀺𑀦𑁂𑀭𑀼𑀪𑀺𑀫𑀼𑀔𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀼𑀦 𑀆𑀲𑀸𑀴𑁆𑀳𑁂 𑀲𑀺𑀦𑁂𑀭𑀼𑀲𑀫𑀻𑀧𑁂𑀦 𑀘𑀭𑀦𑁆𑀢𑀺.

𑀓𑀺𑀢𑁆𑀢𑀓𑁂 𑀞𑀸𑀦𑁂 𑀆𑀮𑁄𑀓𑀁 𑀓𑀭𑁄𑀦𑁆𑀢𑀻𑀢𑀺? 𑀏𑀓𑀧𑁆𑀧𑀳𑀸𑀭𑁂𑀦 𑀢𑀻𑀲𑀼 𑀤𑀻𑀧𑁂𑀲𑀼 𑀆𑀮𑁄𑀓𑀁 𑀓𑀭𑁄𑀦𑁆𑀢𑀺. 𑀓𑀣𑀁? 𑀇𑀫𑀲𑁆𑀫𑀺𑀜𑁆𑀳𑀺 𑀤𑀻𑀧𑁂 𑀲𑀽𑀭𑀺𑀬𑀼𑀕𑁆𑀕𑀫𑀦𑀓𑀸𑀮𑁄 𑀧𑀼𑀩𑁆𑀩𑀯𑀺𑀤𑁂𑀳𑁂 𑀫𑀚𑁆𑀛𑀦𑁆𑀳𑀺𑀓𑁄 𑀳𑁄𑀢𑀺, 𑀉𑀢𑁆𑀢𑀭𑀓𑀼𑀭𑀽𑀲𑀼 𑀅𑀢𑁆𑀣𑀗𑁆𑀕𑀫𑀦𑀓𑀸𑀮𑁄, 𑀅𑀧𑀭𑀕𑁄𑀬𑀸𑀦𑁂 𑀫𑀚𑁆𑀛𑀺𑀫𑀬𑀸𑀫𑁄. 𑀧𑀼𑀩𑁆𑀩𑀯𑀺𑀤𑁂𑀳𑀫𑁆𑀳𑀺 𑀉𑀕𑁆𑀕𑀫𑀦𑀓𑀸𑀮𑁄 𑀉𑀢𑁆𑀢𑀭𑀓𑀼𑀭𑀽𑀲𑀼 𑀫𑀚𑁆𑀛𑀦𑁆𑀳𑀺𑀓𑁄, 𑀅𑀧𑀭𑀕𑁄𑀬𑀸𑀦𑁂 𑀅𑀢𑁆𑀣𑀗𑁆𑀕𑀫𑀦𑀓𑀸𑀮𑁄, 𑀇𑀥 𑀫𑀚𑁆𑀛𑀺𑀫𑀬𑀸𑀫𑁄. 𑀉𑀢𑁆𑀢𑀭𑀓𑀼𑀭𑀽𑀲𑀼 𑀉𑀕𑁆𑀕𑀫𑀦𑀓𑀸𑀮𑁄 𑀅𑀧𑀭𑀕𑁄𑀬𑀸𑀦𑁂 𑀫𑀚𑁆𑀛𑀦𑁆𑀳𑀺𑀓𑁄, 𑀇𑀥 𑀅𑀢𑁆𑀣𑀗𑁆𑀕𑀫𑀦𑀓𑀸𑀮𑁄, 𑀧𑀼𑀩𑁆𑀩𑀯𑀺𑀤𑁂𑀳𑁂 𑀫𑀚𑁆𑀛𑀺𑀫𑀬𑀸𑀫𑁄. 𑀅𑀧𑀭𑀕𑁄𑀬𑀸𑀦𑀤𑀻𑀧𑁂 𑀉𑀕𑁆𑀕𑀫𑀦𑀓𑀸𑀮𑁄 𑀇𑀥 𑀫𑀚𑁆𑀛𑀦𑁆𑀳𑀺𑀓𑁄, 𑀧𑀼𑀩𑁆𑀩𑀯𑀺𑀤𑁂𑀳𑁂 𑀅𑀢𑁆𑀣𑀗𑁆𑀕𑀫𑀦𑀓𑀸𑀮𑁄, 𑀉𑀢𑁆𑀢𑀭𑀓𑀼𑀭𑀽𑀲𑀼 𑀫𑀚𑁆𑀛𑀺𑀫𑀬𑀸𑀫𑁄𑀢𑀺.

𑀦𑀓𑁆𑀔𑀢𑁆𑀢𑀸𑀦𑀺 ¶ 𑀢𑀸𑀭𑀓𑀭𑀽𑀧𑀸𑀦𑀻𑀢𑀺 𑀓𑀢𑁆𑀢𑀺𑀓𑀸𑀤𑀺𑀦𑀓𑁆𑀔𑀢𑁆𑀢𑀸𑀦𑀺 𑀘𑁂𑀯 𑀲𑁂𑀲𑀢𑀸𑀭𑀓𑀭𑀽𑀧𑀸𑀦𑀺 𑀘 𑀘𑀦𑁆𑀤𑀺𑀫𑀲𑀽𑀭𑀺𑀬𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀧𑀸𑀢𑀼𑀭𑀳𑁂𑀲𑀼𑀁. 𑀭𑀢𑁆𑀢𑀺𑀦𑁆𑀤𑀺𑀯𑀸𑀢𑀺 𑀢𑀢𑁄 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀢𑁄 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀭𑀢𑁆𑀢𑀺, 𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀬𑀸𑀯 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀸 𑀤𑀺𑀯𑀸𑀢𑀺 𑀏𑀯𑀁 𑀭𑀢𑁆𑀢𑀺𑀦𑁆𑀤𑀺𑀯𑀸 𑀧𑀜𑁆𑀜𑀸𑀬𑀺𑀁𑀲𑀼. 𑀅𑀣 𑀧𑀜𑁆𑀘𑀤𑀲 𑀭𑀢𑁆𑀢𑀺𑀬𑁄 𑀅𑀟𑁆𑀠𑀫𑀸𑀲𑁄, 𑀤𑁆𑀯𑁂 𑀅𑀟𑁆𑀠𑀫𑀸𑀲𑀸 𑀫𑀸𑀲𑁄𑀢𑀺 𑀏𑀯𑀁 𑀫𑀸𑀲𑀟𑁆𑀠𑀫𑀸𑀲𑀸 𑀧𑀜𑁆𑀜𑀸𑀬𑀺𑀁𑀲𑀼. 𑀅𑀣 𑀘𑀢𑁆𑀢𑀸𑀭𑁄 𑀫𑀸𑀲𑀸 𑀉𑀢𑀼, 𑀢𑀬𑁄 𑀉𑀢𑀽 𑀲𑀁𑀯𑀘𑁆𑀙𑀭𑁄𑀢𑀺 𑀏𑀯𑀁 𑀉𑀢𑀼𑀲𑀁𑀯𑀘𑁆𑀙𑀭𑀸 𑀧𑀜𑁆𑀜𑀸𑀬𑀺𑀁𑀲𑀼.

𑁧𑁨𑁨. 𑀯𑀡𑁆𑀡𑀯𑁂𑀯𑀡𑁆𑀡𑀢𑀸 𑀘𑀸𑀢𑀺 𑀯𑀡𑁆𑀡𑀲𑁆𑀲 𑀯𑀺𑀯𑀡𑁆𑀡𑀪𑀸𑀯𑁄. 𑀢𑁂𑀲𑀁 𑀯𑀡𑁆𑀡𑀸𑀢𑀺𑀫𑀸𑀦𑀧𑀘𑁆𑀘𑀬𑀸𑀢𑀺 𑀢𑁂𑀲𑀁 𑀯𑀡𑁆𑀡𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀅𑀢𑀺𑀫𑀸𑀦𑀧𑀘𑁆𑀘𑀬𑀸. 𑀫𑀸𑀦𑀸𑀢𑀺𑀫𑀸𑀦𑀚𑀸𑀢𑀺𑀓𑀸𑀦𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀸𑀢𑀺𑀫𑀸𑀦𑀲𑀪𑀸𑀯𑀸𑀦𑀁. 𑀭𑀲𑀸𑀬 𑀧𑀣𑀯𑀺𑀬𑀸𑀢𑀺 𑀲𑀫𑁆𑀧𑀦𑁆𑀦𑀭𑀲𑀢𑁆𑀢𑀸 𑀭𑀲𑀸𑀢𑀺 𑀮𑀤𑁆𑀥𑀦𑀸𑀫𑀸𑀬 𑀧𑀣𑀯𑀺𑀬𑀸. 𑀅𑀦𑀼𑀢𑁆𑀣𑀼𑀦𑀺𑀁𑀲𑀽𑀢𑀺 𑀅𑀦𑀼𑀪𑀸𑀲𑀺𑀁𑀲𑀼. 𑀅𑀳𑁄 𑀭𑀲𑀦𑁆𑀢𑀺 𑀅𑀳𑁄 𑀅𑀫𑁆𑀳𑀸𑀓𑀁 𑀫𑀥𑀼𑀭𑀭𑀲𑀁 𑀅𑀦𑁆𑀢𑀭𑀳𑀺𑀢𑀁. 𑀅𑀕𑁆𑀕𑀜𑁆𑀜𑀁 𑀅𑀓𑁆𑀔𑀭𑀦𑁆𑀢𑀺 𑀮𑁄𑀓𑀼𑀧𑁆𑀧𑀢𑁆𑀢𑀺𑀯𑀁𑀲𑀓𑀣𑀁. 𑀅𑀦𑀼𑀲𑀭𑀦𑁆𑀢𑀻𑀢𑀺 𑀅𑀦𑀼𑀕𑀘𑁆𑀙𑀦𑁆𑀢𑀺.

𑀪𑀽𑀫𑀺𑀧𑀧𑁆𑀧𑀝𑀓𑀧𑀸𑀢𑀼𑀪𑀸𑀯𑀸𑀤𑀺𑀯𑀡𑁆𑀡𑀦𑀸

𑁧𑁨𑁩. 𑀏𑀯𑀫𑁂𑀯 𑀧𑀸𑀢𑀼𑀭𑀳𑁄𑀲𑀻𑀢𑀺 𑀏𑀤𑀺𑀲𑁄 𑀳𑀼𑀢𑁆𑀯𑀸 𑀉𑀝𑁆𑀞𑀳𑀺, 𑀅𑀦𑁆𑀢𑁄𑀯𑀸𑀧𑀺𑀬𑀁 𑀉𑀤𑀓𑁂 𑀙𑀺𑀦𑁆𑀦𑁂 𑀲𑀼𑀓𑁆𑀔𑀓𑀮𑀮𑀧𑀝𑀮𑀁 𑀯𑀺𑀬 𑀘 𑀉𑀝𑁆𑀞𑀳𑀺.

𑁧𑁨𑁪. 𑀧𑀤𑀸𑀮𑀢𑀸𑀢𑀺 𑀏𑀓𑀸 𑀫𑀥𑀼𑀭𑀭𑀲𑀸 𑀪𑀤𑁆𑀤𑀸𑀮𑀢𑀸. 𑀓𑀮𑀫𑁆𑀩𑀼𑀓𑀸𑀢𑀺 ¶ 𑀦𑀸𑀴𑀺𑀓𑀸. 𑀅𑀳𑀼 𑀯𑀢 𑀦𑁄𑀢𑀺 𑀫𑀥𑀼𑀭𑀭𑀲𑀸 𑀯𑀢 𑀦𑁄 𑀧𑀤𑀸𑀮𑀢𑀸 𑀅𑀳𑁄𑀲𑀺. 𑀅𑀳𑀸𑀬𑀺 𑀯𑀢 𑀦𑁄𑀢𑀺 𑀲𑀸 𑀦𑁄 𑀏𑀢𑀭𑀳𑀺 𑀅𑀦𑁆𑀢𑀭𑀳𑀺𑀢𑀸𑀢𑀺.

𑁧𑁨𑁫. 𑀅𑀓𑀝𑁆𑀞𑀧𑀸𑀓𑁄𑀢𑀺 ¶ 𑀅𑀓𑀝𑁆𑀞𑁂𑀬𑁂𑀯 𑀪𑀽𑀫𑀺𑀪𑀸𑀕𑁂 𑀉𑀧𑁆𑀧𑀦𑁆𑀦𑁄. 𑀅𑀓𑀡𑁄𑀢𑀺 𑀦𑀺𑀓𑁆𑀓𑀼𑀡𑁆𑀟𑀓𑁄. 𑀅𑀣𑀼𑀲𑁄𑀢𑀺 𑀦𑀺𑀢𑁆𑀣𑀼𑀲𑁄. 𑀲𑀼𑀕𑀦𑁆𑀥𑁄𑀢𑀺 𑀤𑀺𑀩𑁆𑀩𑀕𑀦𑁆𑀥𑀁 𑀯𑀸𑀬𑀢𑀺. 𑀢𑀡𑁆𑀟𑀼𑀮𑀧𑁆𑀨𑀮𑁄𑀢𑀺 𑀲𑀼𑀧𑀭𑀺𑀲𑀼𑀤𑁆𑀥𑀁 𑀧𑀡𑁆𑀟𑀭𑀁 𑀢𑀡𑁆𑀟𑀼𑀮𑀫𑁂𑀯 𑀨𑀮𑀢𑀺. 𑀧𑀓𑁆𑀓𑀁 𑀧𑀝𑀺𑀯𑀺𑀭𑀽𑀴𑁆𑀳𑀦𑁆𑀢𑀺 𑀲𑀸𑀬𑀁 𑀕𑀳𑀺𑀢𑀝𑁆𑀞𑀸𑀦𑀁 𑀧𑀸𑀢𑁄 𑀧𑀓𑁆𑀓𑀁 𑀳𑁄𑀢𑀺, 𑀧𑀼𑀦 𑀯𑀺𑀭𑀽𑀴𑁆𑀳𑀁 𑀧𑀝𑀺𑀧𑀸𑀓𑀢𑀺𑀓𑀫𑁂𑀯 𑀕𑀳𑀺𑀢𑀝𑁆𑀞𑀸𑀦𑀁 𑀦 𑀧𑀜𑁆𑀜𑀸𑀬𑀢𑀺. 𑀦𑀸𑀧𑀤𑀸𑀦𑀁 𑀧𑀜𑁆𑀜𑀸𑀬𑀢𑀻𑀢𑀺 𑀅𑀮𑀸𑀬𑀺𑀢𑀁 𑀳𑀼𑀢𑁆𑀯𑀸 𑀅𑀦𑀽𑀦𑀫𑁂𑀯 𑀧𑀜𑁆𑀜𑀸𑀬𑀢𑀺.

𑀇𑀢𑁆𑀣𑀺𑀧𑀼𑀭𑀺𑀲𑀮𑀺𑀗𑁆𑀕𑀸𑀤𑀺𑀧𑀸𑀢𑀼𑀪𑀸𑀯𑀯𑀡𑁆𑀡𑀦𑀸

𑁧𑁨𑁬. 𑀇𑀢𑁆𑀣𑀺𑀬𑀸 𑀘𑀸𑀢𑀺 𑀬𑀸 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀓𑀸𑀮𑁂 𑀇𑀢𑁆𑀣𑀻, 𑀢𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀁 𑀧𑀸𑀢𑀼𑀪𑀯𑀢𑀺, 𑀧𑀼𑀩𑁆𑀩𑁂 𑀧𑀼𑀭𑀺𑀲𑀲𑁆𑀲 𑀧𑀼𑀭𑀺𑀲𑀮𑀺𑀗𑁆𑀕𑀁. 𑀫𑀸𑀢𑀼𑀕𑀸𑀫𑁄 𑀦𑀸𑀫 𑀳𑀺 𑀧𑀼𑀭𑀺𑀲𑀢𑁆𑀢𑀪𑀸𑀯𑀁 𑀮𑀪𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀧𑀼𑀭𑀺𑀲𑀢𑁆𑀢𑀧𑀘𑁆𑀘𑀬𑁂 𑀥𑀫𑁆𑀫𑁂 ¶ 𑀧𑀽𑀭𑁂𑀢𑁆𑀯𑀸 𑀮𑀪𑀢𑀺. 𑀧𑀼𑀭𑀺𑀲𑁄 𑀇𑀢𑁆𑀣𑀢𑁆𑀢𑀪𑀸𑀯𑀁 𑀮𑀪𑀦𑁆𑀢𑁄 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀁 𑀦𑀺𑀲𑁆𑀲𑀸𑀬 𑀮𑀪𑀢𑀺. 𑀢𑀤𑀸 𑀧𑀦 𑀧𑀓𑀢𑀺𑀬𑀸 𑀫𑀸𑀢𑀼𑀕𑀸𑀫𑀲𑁆𑀲 𑀇𑀢𑁆𑀣𑀺𑀮𑀺𑀗𑁆𑀕𑀁, 𑀧𑀼𑀭𑀺𑀲𑀲𑁆𑀲 𑀧𑀼𑀭𑀺𑀲𑀮𑀺𑀗𑁆𑀕𑀁 𑀧𑀸𑀢𑀼𑀭𑀳𑁄𑀲𑀺. 𑀉𑀧𑀦𑀺𑀚𑁆𑀛𑀸𑀬𑀢𑀦𑁆𑀢𑀺 𑀉𑀧𑀦𑀺𑀚𑁆𑀛𑀸𑀬𑀦𑁆𑀢𑀸𑀦𑀁 𑀑𑀮𑁄𑀓𑁂𑀦𑁆𑀢𑀸𑀦𑀁. 𑀧𑀭𑀺𑀴𑀸𑀳𑁄𑀢𑀺 𑀭𑀸𑀕𑀧𑀭𑀺𑀴𑀸𑀳𑁄. 𑀲𑁂𑀝𑁆𑀞𑀺𑀦𑁆𑀢𑀺 𑀙𑀸𑀭𑀺𑀓𑀁. 𑀦𑀺𑀩𑁆𑀩𑀼𑀬𑁆𑀳𑀫𑀸𑀦𑀸𑀬𑀸𑀢𑀺 𑀦𑀺𑀬𑁆𑀬𑀫𑀸𑀦𑀸𑀬.

𑁧𑁨𑁭. 𑀅𑀥𑀫𑁆𑀫𑀲𑀫𑁆𑀫𑀢𑀦𑁆𑀢𑀺 𑀢𑀁 𑀧𑀁𑀲𑀼𑀔𑀺𑀧𑀦𑀸𑀤𑀺 𑀅𑀥𑀫𑁆𑀫𑁄𑀢𑀺 𑀲𑀫𑁆𑀫𑀢𑀁. 𑀢𑀤𑁂𑀢𑀭𑀳𑀺 𑀥𑀫𑁆𑀫𑀲𑀫𑁆𑀫𑀢𑀦𑁆𑀢𑀺 𑀢𑀁 𑀇𑀤𑀸𑀦𑀺 𑀥𑀫𑁆𑀫𑁄𑀢𑀺 𑀲𑀫𑁆𑀫𑀢𑀁, 𑀥𑀫𑁆𑀫𑁄𑀢𑀺 𑀢𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀺. 𑀢𑀣𑀸 𑀳𑀺 𑀏𑀓𑀘𑁆𑀘𑁂𑀲𑀼 𑀚𑀸𑀦𑀧𑀤𑁂𑀲𑀼 𑀓𑀮𑀳𑀁 𑀓𑀼𑀭𑀼𑀫𑀸𑀦𑀸 𑀇𑀢𑁆𑀣𑀺𑀬𑁄 ‘‘𑀢𑁆𑀯𑀁 𑀓𑀲𑁆𑀫𑀸 𑀓𑀣𑁂𑀲𑀺? 𑀬𑀸 𑀕𑁄𑀫𑀬𑀧𑀺𑀡𑁆𑀟𑀫𑀢𑁆𑀢𑀫𑁆𑀧𑀺 𑀦𑀸𑀮𑀢𑁆𑀣𑀸’’𑀢𑀺 𑀯𑀤𑀦𑁆𑀢𑀺. 𑀧𑀸𑀢𑀩𑁆𑀬𑀢𑀦𑁆𑀢𑀺 𑀲𑁂𑀯𑀺𑀢𑀩𑁆𑀩𑀢𑀁. 𑀲𑀦𑁆𑀦𑀺𑀥𑀺𑀓𑀸𑀭𑀓𑀦𑁆𑀢𑀺 𑀲𑀦𑁆𑀦𑀺𑀥𑀺𑀁 𑀓𑀢𑁆𑀯𑀸. 𑀅𑀧𑀤𑀸𑀦𑀁 𑀧𑀜𑁆𑀜𑀸𑀬𑀺𑀢𑁆𑀣𑀸𑀢𑀺 𑀙𑀺𑀦𑁆𑀦𑀝𑁆𑀞𑀸𑀦𑀁 𑀊𑀦𑀫𑁂𑀯 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀺𑀢𑁆𑀣. 𑀲𑀡𑁆𑀟𑀲𑀡𑁆𑀟𑀸𑀢𑀺 𑀏𑀓𑁂𑀓𑀲𑁆𑀫𑀺𑀁 𑀞𑀸𑀦𑁂 𑀓𑀮𑀸𑀧𑀩𑀦𑁆𑀥𑀸 𑀯𑀺𑀬 𑀕𑀼𑀫𑁆𑀩𑀕𑀼𑀫𑁆𑀩𑀸 𑀳𑀼𑀢𑁆𑀯𑀸.

𑁧𑁨𑁮. 𑀫𑀭𑀺𑀬𑀸𑀤𑀁 ¶ 𑀞𑀧𑁂𑀬𑁆𑀬𑀸𑀫𑀸𑀢𑀺 𑀲𑀻𑀫𑀁 𑀞𑀧𑁂𑀬𑁆𑀬𑀸𑀫. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑁄 𑀳𑀺 𑀦𑀸𑀫. 𑀧𑀸𑀡𑀺𑀦𑀸 𑀧𑀳𑀭𑀺𑀁𑀲𑀽𑀢𑀺 𑀢𑀬𑁄 𑀯𑀸𑀭𑁂 𑀯𑀘𑀦𑀁 𑀅𑀕𑀡𑁆𑀳𑀦𑁆𑀢𑀁 𑀧𑀸𑀡𑀺𑀦𑀸 𑀧𑀳𑀭𑀺𑀁𑀲𑀼. 𑀢𑀤𑀕𑁆𑀕𑁂 𑀔𑁄𑀢𑀺 𑀢𑀁 𑀅𑀕𑁆𑀕𑀁 𑀓𑀢𑁆𑀯𑀸.

𑀫𑀳𑀸𑀲𑀫𑁆𑀫𑀢𑀭𑀸𑀚𑀯𑀡𑁆𑀡𑀦𑀸

𑁧𑁩𑁦. 𑀔𑀻𑀬𑀺𑀢𑀩𑁆𑀩𑀁 𑀔𑀻𑀬𑁂𑀬𑁆𑀬𑀸𑀢𑀺 𑀧𑀓𑀸𑀲𑁂𑀢𑀩𑁆𑀩𑀁 𑀧𑀓𑀸𑀲𑁂𑀬𑁆𑀬 𑀔𑀺𑀧𑀺𑀢𑀩𑁆𑀩𑀁 𑀔𑀺𑀧𑁂𑀬𑁆𑀬, 𑀳𑀸𑀭𑁂𑀢𑀩𑁆𑀩𑀁 𑀳𑀸𑀭𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁄 𑀦𑁂𑀲𑀁 𑀲𑀢𑁆𑀢𑁄𑀢𑀺 𑀬𑁄 ¶ 𑀢𑁂𑀲𑀁 𑀲𑀢𑁆𑀢𑁄. 𑀓𑁄 𑀧𑀦 𑀲𑁄𑀢𑀺? 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄. 𑀲𑀸𑀮𑀻𑀦𑀁 𑀪𑀸𑀕𑀁 𑀅𑀦𑀼𑀧𑀤𑀲𑁆𑀲𑀸𑀫𑀸𑀢𑀺 𑀫𑀬𑀁 𑀏𑀓𑁂𑀓𑀲𑁆𑀲 𑀔𑁂𑀢𑁆𑀢𑀢𑁄 𑀅𑀫𑁆𑀩𑀡𑀫𑁆𑀩𑀡𑀁 𑀆𑀳𑀭𑀺𑀢𑁆𑀯𑀸 𑀢𑀼𑀬𑁆𑀳𑀁 𑀲𑀸𑀮𑀺𑀪𑀸𑀕𑀁 𑀤𑀲𑁆𑀲𑀸𑀫, 𑀢𑀬𑀸 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀦 𑀓𑀸𑀢𑀩𑁆𑀩𑀁, 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀚𑁂𑀝𑁆𑀞𑀓𑀝𑁆𑀞𑀸𑀦𑁂 𑀢𑀺𑀝𑁆𑀞𑀸𑀢𑀺.

𑁧𑁩𑁧. 𑀅𑀓𑁆𑀔𑀭𑀁 𑀉𑀧𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀉𑀧𑁆𑀧𑀦𑁆𑀦𑁄. 𑀔𑀢𑁆𑀢𑀺𑀬𑁄 𑀔𑀢𑁆𑀢𑀺𑀬𑁄𑀢𑁆𑀯𑁂𑀯 𑀤𑀼𑀢𑀺𑀬𑀁 𑀅𑀓𑁆𑀔𑀭𑀦𑁆𑀢𑀺 𑀦 𑀓𑁂𑀯𑀮𑀁 𑀅𑀓𑁆𑀔𑀭𑀫𑁂𑀯, 𑀢𑁂 𑀧𑀦𑀲𑁆𑀲 𑀔𑁂𑀢𑁆𑀢𑀲𑀸𑀫𑀺𑀦𑁄 𑀢𑀻𑀳𑀺 𑀲𑀗𑁆𑀔𑁂𑀳𑀺 𑀅𑀪𑀺𑀲𑁂𑀓𑀫𑁆𑀧𑀺 𑀅𑀓𑀁𑀲𑀼. 𑀭𑀜𑁆𑀚𑁂𑀢𑀻𑀢𑀺 𑀲𑀼𑀔𑁂𑀢𑀺 𑀧𑀺𑀦𑁂𑀢𑀺. 𑀅𑀕𑁆𑀕𑀜𑁆𑀜𑁂𑀦𑀸𑀢𑀺 𑀅𑀕𑁆𑀕𑀦𑁆𑀢𑀺 𑀜𑀸𑀢𑁂𑀦, 𑀅𑀕𑁆𑀕𑁂 𑀯𑀸 𑀜𑀸𑀢𑁂𑀦 𑀮𑁄𑀓𑀼𑀧𑁆𑀧𑀢𑁆𑀢𑀺𑀲𑀫𑀬𑁂 𑀉𑀧𑁆𑀧𑀦𑁆𑀦𑁂𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀅𑀳𑁄𑀲𑀻𑀢𑀺.

𑀩𑁆𑀭𑀸𑀳𑁆𑀫𑀡𑀫𑀡𑁆𑀟𑀮𑀸𑀤𑀺𑀯𑀡𑁆𑀡𑀦𑀸

𑁧𑁩𑁨. 𑀯𑀻𑀢𑀗𑁆𑀕𑀸𑀭𑀸 ¶ 𑀯𑀻𑀢𑀥𑀽𑀫𑀸𑀢𑀺 𑀧𑀘𑀺𑀢𑁆𑀯𑀸 𑀔𑀸𑀤𑀺𑀢𑀩𑁆𑀩𑀸𑀪𑀸𑀯𑀢𑁄 𑀯𑀺𑀕𑀢𑀥𑀽𑀫𑀗𑁆𑀕𑀸𑀭𑀸. 𑀧𑀦𑁆𑀦𑀫𑀼𑀲𑀮𑀸𑀢𑀺 𑀓𑁄𑀝𑁆𑀝𑁂𑀢𑁆𑀯𑀸 𑀧𑀘𑀺𑀢𑀩𑁆𑀩𑀸𑀪𑀸𑀯𑀢𑁄 𑀧𑀢𑀺𑀢𑀫𑀼𑀲𑀮𑀸. 𑀖𑀸𑀲𑀫𑁂𑀲𑀫𑀸𑀦𑀸𑀢𑀺 𑀪𑀺𑀓𑁆𑀔𑀸𑀘𑀭𑀺𑀬𑀯𑀲𑁂𑀦 𑀬𑀸𑀕𑀼𑀪𑀢𑁆𑀢𑀁 𑀧𑀭𑀺𑀬𑁂𑀲𑀦𑁆𑀢𑀸. 𑀢𑀫𑁂𑀦𑀁 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸𑀢𑀺 𑀢𑁂 𑀏𑀢𑁂 𑀫𑀦𑀼𑀲𑁆𑀲𑀸 𑀧𑀲𑁆𑀲𑀺𑀢𑁆𑀯𑀸. 𑀅𑀦𑀪𑀺𑀲𑀫𑁆𑀪𑀼𑀡𑀫𑀸𑀦𑀸𑀢𑀺 𑀅𑀲𑀳𑀫𑀸𑀦𑀸 𑀅𑀲𑀓𑁆𑀓𑁄𑀦𑁆𑀢𑀸. 𑀕𑀦𑁆𑀣𑁂 𑀓𑀭𑁄𑀦𑁆𑀢𑀸𑀢𑀺 𑀢𑀬𑁄 𑀯𑁂𑀤𑁂 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀸 𑀘𑁂𑀯 𑀯𑀸𑀘𑁂𑀦𑁆𑀢𑀸 𑀘. 𑀅𑀘𑁆𑀙𑀦𑁆𑀢𑀻𑀢𑀺 𑀯𑀲𑀦𑁆𑀢𑀺, ‘‘𑀅𑀘𑁆𑀙𑁂𑀦𑁆𑀢𑀻’’𑀢𑀺𑀧𑀺 𑀧𑀸𑀞𑁄. 𑀏𑀲𑁂𑀯𑀢𑁆𑀣𑁄. 𑀳𑀻𑀦𑀲𑀫𑁆𑀫𑀢𑀦𑁆𑀢𑀺 ‘‘𑀫𑀦𑁆𑀢𑁂 𑀥𑀸𑀭𑁂𑀦𑁆𑀢𑀺 𑀫𑀦𑁆𑀢𑁂 𑀯𑀸𑀘𑁂𑀦𑁆𑀢𑀻’’𑀢𑀺 𑀔𑁄, 𑀯𑀸𑀲𑁂𑀝𑁆𑀞, 𑀇𑀤𑀁 𑀢𑁂𑀦 𑀲𑀫𑀬𑁂𑀦 𑀳𑀻𑀦𑀲𑀫𑁆𑀫𑀢𑀁. 𑀢𑀤𑁂𑀢𑀭𑀳𑀺 𑀲𑁂𑀝𑁆𑀞𑀲𑀫𑁆𑀫𑀢𑀦𑁆𑀢𑀺 𑀢𑀁 𑀇𑀤𑀸𑀦𑀺 ‘‘𑀏𑀢𑁆𑀢𑀓𑁂 𑀫𑀦𑁆𑀢𑁂 𑀥𑀸𑀭𑁂𑀦𑁆𑀢𑀺 𑀏𑀢𑁆𑀢𑀓𑁂 𑀫𑀦𑁆𑀢𑁂 𑀯𑀸𑀘𑁂𑀦𑁆𑀢𑀻’’𑀢𑀺 𑀲𑁂𑀝𑁆𑀞𑀲𑀫𑁆𑀫𑀢𑀁 𑀚𑀸𑀢𑀁. 𑀩𑁆𑀭𑀸𑀳𑁆𑀫𑀡𑀫𑀡𑁆𑀟𑀮𑀲𑁆𑀲𑀸𑀢𑀺 𑀩𑁆𑀭𑀸𑀳𑁆𑀫𑀡𑀕𑀡𑀲𑁆𑀲.

𑁧𑁩𑁩. 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀲𑀫𑀸𑀤𑀸𑀬𑀸𑀢𑀺 𑀫𑁂𑀣𑀼𑀦𑀥𑀫𑁆𑀫𑀁 𑀲𑀫𑀸𑀤𑀺𑀬𑀺𑀢𑁆𑀯𑀸. 𑀯𑀺𑀲𑀼𑀓𑀫𑁆𑀫𑀦𑁆𑀢𑁂 ¶ 𑀧𑀬𑁄𑀚𑁂𑀲𑀼𑀦𑁆𑀢𑀺 𑀕𑁄𑀭𑀓𑁆𑀔 𑀯𑀸𑀡𑀺𑀚𑀓𑀫𑁆𑀫𑀸𑀤𑀺𑀓𑁂 𑀯𑀺𑀲𑁆𑀲𑀼𑀢𑁂 𑀉𑀕𑁆𑀕𑀢𑁂 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀲𑀼𑀁.

𑁧𑁩𑁪. 𑀲𑀼𑀤𑁆𑀤𑀸 𑀲𑀼𑀤𑁆𑀤𑀸𑀢𑀺 𑀢𑁂𑀦 𑀮𑀼𑀤𑁆𑀤𑀸𑀘𑀸𑀭𑀓𑀫𑁆𑀫𑀔𑀼𑀤𑁆𑀤𑀸𑀘𑀸𑀭𑀓𑀫𑁆𑀫𑀼𑀦𑀸 𑀲𑀼𑀤𑁆𑀤𑀁 𑀲𑀼𑀤𑁆𑀤𑀁 𑀮𑀳𑀼𑀁 𑀮𑀳𑀼𑀁 𑀓𑀼𑀘𑁆𑀙𑀺𑀢𑀁 𑀕𑀘𑁆𑀙𑀦𑁆𑀢𑀺, 𑀯𑀺𑀦𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀳𑀼 𑀔𑁄𑀢𑀺 𑀳𑁄𑀢𑀺 𑀔𑁄.

𑁧𑁩𑁫. 𑀲𑀓𑀁 ¶ 𑀥𑀫𑁆𑀫𑀁 𑀕𑀭𑀳𑀫𑀸𑀦𑁄𑀢𑀺 𑀦 𑀲𑁂𑀢𑀘𑁆𑀙𑀢𑁆𑀢𑀁 𑀉𑀲𑁆𑀲𑀸𑀧𑀦𑀫𑀢𑁆𑀢𑁂𑀦 𑀲𑀼𑀚𑁆𑀛𑀺𑀢𑀼𑀁 𑀲𑀓𑁆𑀓𑀸𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀔𑀢𑁆𑀢𑀺𑀬𑀥𑀫𑁆𑀫𑀁 𑀦𑀺𑀦𑁆𑀤𑀫𑀸𑀦𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. ‘‘𑀇𑀫𑁂𑀳𑀺 𑀔𑁄, 𑀯𑀸𑀲𑁂𑀝𑁆𑀞, 𑀘𑀢𑀽𑀳𑀺 𑀫𑀡𑁆𑀟𑀮𑁂𑀳𑀻’’𑀢𑀺 𑀇𑀫𑀺𑀦𑀸 𑀇𑀫𑀁 𑀤𑀲𑁆𑀲𑁂𑀢𑀺 ‘‘𑀲𑀫𑀡𑀫𑀡𑁆𑀟𑀮𑀁 𑀦𑀸𑀫 𑀯𑀺𑀲𑀼𑀁 𑀦𑀢𑁆𑀣𑀺, 𑀬𑀲𑁆𑀫𑀸 𑀧𑀦 𑀦 𑀲𑀓𑁆𑀓𑀸 𑀚𑀸𑀢𑀺𑀬𑀸 𑀲𑀼𑀚𑁆𑀛𑀺𑀢𑀼𑀁, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀲𑀼𑀤𑁆𑀥𑀺 𑀳𑁄𑀢𑀺. 𑀢𑀲𑁆𑀫𑀸 𑀇𑀫𑁂𑀳𑀺 𑀘𑀢𑀽𑀳𑀺 𑀫𑀡𑁆𑀟𑀮𑁂𑀳𑀺 𑀲𑀫𑀡𑀫𑀡𑁆𑀟𑀮𑀲𑁆𑀲 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺. 𑀇𑀫𑀸𑀦𑀺 𑀫𑀡𑁆𑀟𑀮𑀸𑀦𑀺 𑀲𑀫𑀡𑀫𑀡𑁆𑀟𑀮𑀁 𑀅𑀦𑀼𑀯𑀢𑁆𑀢𑀦𑁆𑀢𑀺, 𑀅𑀦𑀼𑀯𑀢𑁆𑀢𑀦𑁆𑀢𑀸𑀦𑀺 𑀘 𑀥𑀫𑁆𑀫𑁂𑀦𑁂𑀯 𑀅𑀦𑀼𑀯𑀢𑁆𑀢𑀦𑁆𑀢𑀺, 𑀦𑁄 𑀅𑀥𑀫𑁆𑀫𑁂𑀦. 𑀲𑀫𑀡𑀫𑀡𑁆𑀟𑀮𑀜𑁆𑀳𑀺 𑀆𑀕𑀫𑁆𑀫 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀢𑁆𑀯𑀸 𑀲𑀼𑀤𑁆𑀥𑀺𑀁 𑀧𑀸𑀧𑀼𑀡𑀦𑁆𑀢𑀻’’𑀢𑀺.

𑀤𑀼𑀘𑁆𑀘𑀭𑀺𑀢𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁧𑁩𑁬. 𑀇𑀤𑀸𑀦𑀺 𑀬𑀣𑀸𑀚𑀸𑀢𑀺𑀬𑀸 𑀦 𑀲𑀓𑁆𑀓𑀸 𑀲𑀼𑀚𑁆𑀛𑀺𑀢𑀼𑀁, 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸𑀯 𑀲𑀼𑀚𑁆𑀛𑀦𑁆𑀢𑀺, 𑀢𑀫𑀢𑁆𑀣𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 𑀔𑀢𑁆𑀢𑀺𑀬𑁄𑀧𑀺 𑀔𑁄, 𑀯𑀸𑀲𑁂𑀝𑁆𑀞𑀸𑀢𑀺 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑀫𑀸𑀤𑀸𑀦𑀳𑁂𑀢𑀽𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀲𑁂𑀦 𑀲𑀫𑀸𑀤𑀺𑀦𑁆𑀦𑀓𑀫𑁆𑀫𑀳𑁂𑀢𑀼, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀫𑁆𑀫𑀲𑁆𑀲 𑀯𑀸 𑀲𑀫𑀸𑀤𑀸𑀦𑀳𑁂𑀢𑀼.

𑁧𑁩𑁭. 𑀤𑁆𑀯𑀬𑀓𑀸𑀭𑀻𑀢𑀺 ¶ 𑀓𑀸𑀮𑁂𑀦 𑀓𑀼𑀲𑀮𑀁 𑀓𑀭𑁄𑀢𑀺, 𑀓𑀸𑀮𑁂𑀦 𑀅𑀓𑀼𑀲𑀮𑀦𑁆𑀢𑀺 𑀏𑀯𑀁 𑀉𑀪𑀬𑀓𑀸𑀭𑀻. 𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀳𑁄𑀢𑀻𑀢𑀺 𑀏𑀓𑀓𑁆𑀔𑀡𑁂 𑀉𑀪𑀬𑀯𑀺𑀧𑀸𑀓𑀤𑀸𑀦𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺. 𑀬𑁂𑀦 𑀧𑀦 𑀅𑀓𑀼𑀲𑀮𑀁 𑀩𑀳𑀼𑀁 𑀓𑀢𑀁 𑀳𑁄𑀢𑀺, 𑀓𑀼𑀲𑀮𑀁 𑀫𑀦𑁆𑀤𑀁, 𑀲𑁄 𑀢𑀁 𑀓𑀼𑀲𑀮𑀁 𑀦𑀺𑀲𑁆𑀲𑀸𑀬 𑀔𑀢𑁆𑀢𑀺𑀬𑀓𑀼𑀮𑁂 𑀯𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑁂 𑀯𑀸 𑀦𑀺𑀩𑁆𑀩𑀢𑁆𑀢𑀢𑀺. 𑀅𑀣 𑀦𑀁 𑀅𑀓𑀼𑀲𑀮𑀓𑀫𑁆𑀫𑀁 𑀓𑀸𑀡𑀫𑁆𑀧𑀺 𑀓𑀭𑁄𑀢𑀺 𑀔𑀼𑀚𑁆𑀚𑀫𑁆𑀧𑀺 𑀧𑀻𑀞𑀲𑀧𑁆𑀧𑀺𑀫𑁆𑀧𑀺. 𑀲𑁄 𑀭𑀚𑁆𑀚𑀲𑁆𑀲 𑀯𑀸 𑀅𑀦𑀭𑀳𑁄 𑀳𑁄𑀢𑀺, 𑀅𑀪𑀺𑀲𑀺𑀢𑁆𑀢𑀓𑀸𑀮𑁂 𑀯𑀸 𑀏𑀯𑀁𑀪𑀽𑀢𑁄 𑀪𑁄𑀕𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀧𑀭𑀲𑁆𑀲 𑀫𑀭𑀡𑀓𑀸𑀮𑁂 𑀤𑁆𑀯𑁂 𑀩𑀮𑀯𑀫𑀮𑁆𑀮𑀸 𑀯𑀺𑀬 𑀢𑁂 𑀤𑁆𑀯𑁂𑀧𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀦𑀺 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂𑀲𑀼 𑀅𑀓𑀼𑀲𑀮𑀁 𑀩𑀮𑀯𑀢𑀭𑀁 𑀳𑁄𑀢𑀺, 𑀢𑀁 𑀓𑀼𑀲𑀮𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀸𑀧𑁂𑀢𑀺. 𑀓𑀼𑀲𑀮𑀓𑀫𑁆𑀫𑀫𑁆𑀧𑀺 𑀧𑀯𑀢𑁆𑀢𑀺𑀯𑁂𑀤𑀦𑀻𑀬𑀁 𑀳𑁄𑀢𑀺. 𑀢𑀫𑁂𑀦𑀁 𑀫𑀗𑁆𑀕𑀮𑀳𑀢𑁆𑀣𑀺𑀁 𑀯𑀸 𑀓𑀭𑁄𑀦𑁆𑀢𑀺 𑀫𑀗𑁆𑀕𑀮𑀅𑀲𑁆𑀲𑀁 𑀯𑀸 𑀫𑀗𑁆𑀕𑀮𑀉𑀲𑀪𑀁 𑀯𑀸. 𑀲𑁄 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀢𑀺 ¶ . 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀼𑀔𑀤𑀼𑀓𑁆𑀔𑀧𑁆𑀧𑀝𑀺𑀲𑀁𑀯𑁂𑀤𑀻 𑀳𑁄𑀢𑀻’’𑀢𑀺.

𑀩𑁄𑀥𑀺𑀧𑀓𑁆𑀔𑀺𑀬𑀪𑀸𑀯𑀦𑀸𑀯𑀡𑁆𑀡𑀦𑀸

𑁧𑁩𑁮. 𑀲𑀢𑁆𑀢𑀦𑁆𑀦𑀁 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀦𑁆𑀢𑀺 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀆𑀤𑀺𑀓𑁄𑀝𑁆𑀞𑀸𑀲𑀯𑀲𑁂𑀦 𑀲𑀢𑁆𑀢𑀦𑁆𑀦𑀁, 𑀧𑀝𑀺𑀧𑀸𑀝𑀺𑀬𑀸 𑀧𑀦 𑀲𑀢𑁆𑀢𑀢𑀺𑀁𑀲𑀸𑀬 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀁 𑀥𑀫𑁆𑀫𑀸𑀦𑀁 ¶ . 𑀪𑀸𑀯𑀦𑀫𑀦𑁆𑀯𑀸𑀬𑀸𑀢𑀺 𑀪𑀸𑀯𑀦𑀁 𑀅𑀦𑀼𑀕𑀦𑁆𑀢𑁆𑀯𑀸, 𑀧𑀝𑀺𑀧𑀚𑁆𑀚𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀇𑀢𑀺 𑀪𑀕𑀯𑀸 𑀘𑀢𑁆𑀢𑀸𑀭𑁄 𑀯𑀡𑁆𑀡𑁂 𑀤𑀲𑁆𑀲𑁂𑀢𑁆𑀯𑀸 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀧𑀝𑀺𑀯𑀺𑀤𑁆𑀥𑀘𑀢𑀼𑀲𑀘𑁆𑀘𑀁 𑀔𑀻𑀡𑀸𑀲𑀯𑀫𑁂𑀯 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑁂𑀝𑁆𑀞𑀁 𑀓𑀢𑁆𑀯𑀸 𑀤𑀲𑁆𑀲𑁂𑀲𑀺.

𑁧𑁪𑁦. 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀮𑁄𑀓𑀲𑀫𑁆𑀫𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄𑀧𑀺 𑀯𑀘𑀦𑀤𑀲𑁆𑀲𑀦𑀸𑀦𑀼𑀲𑀸𑀭𑁂𑀦 𑀤𑀴𑁆𑀳𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀇𑀫𑁂𑀲𑀜𑁆𑀳𑀺 𑀯𑀸𑀲𑁂𑀝𑁆𑀞 𑀘𑀢𑀼𑀦𑁆𑀦𑀁 𑀯𑀡𑁆𑀡𑀸𑀦𑀦𑁆𑀢𑀺𑀆𑀤𑀺𑀫𑀸𑀳. ‘‘𑀩𑁆𑀭𑀳𑁆𑀫𑀼𑀦𑀸𑀧𑁂𑀲𑀸’’𑀢𑀺𑀆𑀤𑀺 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑁂 𑀯𑀺𑀢𑁆𑀣𑀸𑀭𑀺𑀢𑀁. 𑀇𑀢𑀺 𑀪𑀕𑀯𑀸 𑀏𑀢𑁆𑀢𑀓𑁂𑀦 𑀇𑀫𑀺𑀦𑀸 𑀓𑀣𑀸𑀫𑀕𑁆𑀕𑁂𑀦 𑀲𑁂𑀝𑁆𑀞𑀘𑁆𑀙𑁂𑀤𑀓𑀯𑀸𑀤𑀫𑁂𑀯 𑀤𑀲𑁆𑀲𑁂𑀢𑁆𑀯𑀸 𑀲𑀼𑀢𑁆𑀢𑀦𑁆𑀢𑀁 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀅𑀢𑁆𑀢𑀫𑀦𑀸 𑀯𑀸𑀲𑁂𑀝𑁆𑀞𑀪𑀸𑀭𑀤𑁆𑀯𑀸𑀚𑀸𑀢𑀺 𑀯𑀸𑀲𑁂𑀝𑁆𑀞𑀪𑀸𑀭𑀤𑁆𑀯𑀸𑀚 𑀲𑀸𑀫𑀡𑁂𑀭𑀸𑀧𑀺 𑀳𑀺 𑀲𑀓𑀫𑀦𑀸 𑀢𑀼𑀝𑁆𑀞𑀫𑀦𑀸 ‘‘𑀲𑀸𑀥𑀼, 𑀲𑀸𑀥𑀽’’𑀢𑀺 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀁𑀲𑀼. 𑀇𑀤𑀫𑁂𑀯 𑀲𑀼𑀢𑁆𑀢𑀦𑁆𑀢𑀁 𑀆𑀯𑀚𑁆𑀚𑀦𑁆𑀢𑀸 𑀅𑀦𑀼𑀫𑀚𑁆𑀚𑀦𑁆𑀢𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀽𑀢𑀺.

𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀫𑁆𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑀲𑀸𑀭𑀺𑀧𑀼𑀢𑁆𑀢𑀲𑀻𑀳𑀦𑀸𑀤𑀯𑀡𑁆𑀡𑀦𑀸

𑁧𑁪𑁧. 𑀏𑀯𑀁 ¶ ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀲𑀫𑁆𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀫𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑁋 𑀦𑀸𑀴𑀦𑁆𑀤𑀸𑀬𑀦𑁆𑀢𑀺 𑀦𑀸𑀴𑀦𑁆𑀤𑀸𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂, 𑀢𑀁 𑀦𑀕𑀭𑀁 𑀕𑁄𑀘𑀭𑀕𑀸𑀫𑀁 𑀓𑀢𑁆𑀯𑀸. 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑁂𑀢𑀺 𑀤𑀼𑀲𑁆𑀲𑀧𑀸𑀯𑀸𑀭𑀺𑀓𑀲𑁂𑀝𑁆𑀞𑀺𑀦𑁄 𑀅𑀫𑁆𑀩𑀯𑀦𑁂. 𑀢𑀁 𑀓𑀺𑀭 𑀢𑀲𑁆𑀲 𑀉𑀬𑁆𑀬𑀸𑀦𑀁 𑀅𑀳𑁄𑀲𑀺. 𑀲𑁄 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀪𑀕𑀯𑀢𑀺 𑀧𑀲𑀦𑁆𑀦𑁄 𑀢𑀲𑁆𑀫𑀺𑀁 𑀉𑀬𑁆𑀬𑀸𑀦𑁂 𑀓𑀼𑀝𑀺𑀮𑁂𑀡𑀫𑀡𑁆𑀟𑀧𑀸𑀤𑀺𑀧𑀝𑀺𑀫𑀡𑁆𑀟𑀺𑀢𑀁 𑀪𑀕𑀯𑀢𑁄 𑀯𑀺𑀳𑀸𑀭𑀁 𑀓𑀢𑁆𑀯𑀸 𑀦𑀺𑀬𑁆𑀬𑀸𑀢𑁂𑀲𑀺. 𑀲𑁄 𑀯𑀺𑀳𑀸𑀭𑁄 𑀚𑀻𑀯𑀓𑀫𑁆𑀩𑀯𑀦𑀁 𑀯𑀺𑀬 ‘‘𑀧𑀸𑀯𑀸𑀭𑀺𑀓𑀫𑁆𑀩𑀯𑀦’’𑀦𑁆𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀢𑁄, 𑀢𑀲𑁆𑀫𑀺𑀁 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑁂 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀏𑀯𑀁𑀧𑀲𑀦𑁆𑀦𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀻’’𑀢𑀺. 𑀓𑀲𑁆𑀫𑀸 𑀏𑀯𑀁 𑀅𑀯𑁄𑀘? 𑀅𑀢𑁆𑀢𑀦𑁄 𑀉𑀧𑁆𑀧𑀦𑁆𑀦𑀲𑁄𑀫𑀦𑀲𑁆𑀲𑀧𑀯𑁂𑀤𑀦𑀢𑁆𑀣𑀁.

𑀢𑀢𑁆𑀭𑀸𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀣𑁂𑀭𑁄 𑀓𑀺𑀭 𑀢𑀁𑀤𑀺𑀯𑀲𑀁 𑀓𑀸𑀮𑀲𑁆𑀲𑁂𑀯 𑀲𑀭𑀻𑀭𑀧𑁆𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀲𑀼𑀦𑀺𑀯𑀢𑁆𑀣𑀦𑀺𑀯𑀸𑀲𑀦𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀧𑀸𑀲𑀸𑀤𑀺𑀓𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀸𑀤𑀻𑀳𑀺 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀲𑀸𑀤𑀁 𑀆𑀯𑀳𑀦𑁆𑀢𑁄 𑀦𑀸𑀴𑀦𑁆𑀤𑀯𑀸𑀲𑀻𑀦𑀁 𑀳𑀺𑀢𑀲𑀼𑀔𑀫𑀦𑀼𑀩𑁆𑀭𑀽𑀳𑀬𑀦𑁆𑀢𑁄 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀲𑀢𑁆𑀣𑀭𑀺 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀝𑁆𑀞𑁂 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀤𑀺𑀯𑀸𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀓𑁆𑀓𑀦𑁆𑀢𑁂𑀲𑀼 𑀤𑀺𑀯𑀸𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀘𑀫𑁆𑀫𑀓𑁆𑀔𑀡𑁆𑀟𑀁 𑀧𑀜𑁆𑀜𑀧𑁂𑀢𑁆𑀯𑀸 𑀉𑀤𑀓𑀢𑀼𑀫𑁆𑀩𑀢𑁄 𑀉𑀤𑀓𑁂𑀦 𑀳𑀢𑁆𑀣𑀧𑀸𑀤𑁂 𑀲𑀻𑀢𑀮𑁂 𑀓𑀢𑁆𑀯𑀸 𑀢𑀺𑀲𑀦𑁆𑀥𑀺𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺.

𑀲𑁄 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀅𑀢𑁆𑀢𑀦𑁄 𑀕𑀼𑀡𑁂 𑀅𑀦𑀼𑀲𑁆𑀲𑀭𑀺𑀢𑀼𑀫𑀸𑀭𑀤𑁆𑀥𑁄. 𑀅𑀣𑀲𑁆𑀲 𑀕𑀼𑀡𑁂 𑀅𑀦𑀼𑀲𑁆𑀲𑀭𑀢𑁄 𑀲𑀻𑀮𑀁 𑀆𑀧𑀸𑀣𑀫𑀸𑀕𑀢𑀁. 𑀢𑀢𑁄 𑀧𑀝𑀺𑀧𑀸𑀝𑀺𑀬𑀸𑀯 𑀲𑀫𑀸𑀥𑀺 𑀧𑀜𑁆𑀜𑀸 𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀧𑀞𑀫𑀁 𑀛𑀸𑀦𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀢𑀢𑀺𑀬𑀁 𑀛𑀸𑀦𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀯𑀺𑀜𑁆𑀜𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺 ¶ 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺 ¶ 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀫𑀦𑁄𑀫𑀬𑀺𑀤𑁆𑀥𑀺𑀜𑀸𑀡𑀁 𑀇𑀤𑁆𑀥𑀺𑀯𑀺𑀥𑀜𑀸𑀡𑀁 𑀤𑀺𑀩𑁆𑀩𑀲𑁄𑀢𑀜𑀸𑀡𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁…𑀧𑁂… 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀭𑀳𑀢𑁆𑀢𑀨𑀮𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁. 𑀇𑀢𑁄 𑀧𑀝𑁆𑀞𑀸𑀬 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀲𑁆𑀲 𑀉𑀧𑀭𑀺 𑀅𑀦𑁄𑀫𑀤𑀲𑁆𑀲𑀻𑀩𑀼𑀤𑁆𑀥𑀲𑁆𑀲 𑀧𑀸𑀤𑀫𑀽𑀮𑁂 𑀓𑀢𑀁 𑀅𑀪𑀺𑀦𑀻𑀳𑀸𑀭𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀕𑀼𑀡𑁂 𑀅𑀦𑀼𑀲𑁆𑀲𑀭𑀢𑁄 𑀬𑀸𑀯 𑀦𑀺𑀲𑀺𑀦𑁆𑀦𑀧𑀮𑁆𑀮𑀗𑁆𑀓𑀸 𑀕𑀼𑀡𑀸 𑀉𑀧𑀝𑁆𑀞𑀳𑀺𑀁𑀲𑀼.

𑀏𑀯𑀁 ¶ 𑀣𑁂𑀭𑁄 𑀅𑀢𑁆𑀢𑀦𑁄 𑀕𑀼𑀡𑁂 𑀅𑀦𑀼𑀲𑁆𑀲𑀭𑀫𑀸𑀦𑁄 𑀕𑀼𑀡𑀸𑀦𑀁 𑀧𑀫𑀸𑀡𑀁 𑀯𑀸 𑀧𑀭𑀺𑀘𑁆𑀙𑁂𑀤𑀁 𑀯𑀸 𑀤𑀝𑁆𑀞𑀼𑀁 𑀦𑀸𑀲𑀓𑁆𑀔𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀢𑀸𑀯 𑀧𑀤𑁂𑀲𑀜𑀸𑀡𑁂 𑀞𑀺𑀢𑀲𑁆𑀲 𑀲𑀸𑀯𑀓𑀲𑁆𑀲 𑀕𑀼𑀡𑀸𑀦𑀁 𑀧𑀫𑀸𑀡𑀁 𑀯𑀸 𑀧𑀭𑀺𑀘𑁆𑀙𑁂𑀤𑁄 𑀯𑀸 𑀦𑀢𑁆𑀣𑀺. 𑀅𑀳𑀁 𑀧𑀦 𑀬𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁄, 𑀓𑀻𑀤𑀺𑀲𑀸 𑀦𑀼 𑀔𑁄 𑀢𑀲𑁆𑀲 𑀕𑀼𑀡𑀸’’𑀢𑀺 𑀤𑀲𑀩𑀮𑀲𑁆𑀲 𑀕𑀼𑀡𑁂 𑀅𑀦𑀼𑀲𑁆𑀲𑀭𑀺𑀢𑀼𑀁 𑀆𑀭𑀤𑁆𑀥𑁄. 𑀲𑁄 𑀪𑀕𑀯𑀢𑁄 𑀲𑀻𑀮𑀁 𑀦𑀺𑀲𑁆𑀲𑀸𑀬, 𑀲𑀫𑀸𑀥𑀺𑀁 𑀧𑀜𑁆𑀜𑀁 𑀯𑀺𑀫𑀼𑀢𑁆𑀢𑀺𑀁 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀦𑀺𑀲𑁆𑀲𑀸𑀬, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀦𑀺𑀲𑁆𑀲𑀸𑀬, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑁂 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑁂 𑀘𑀢𑁆𑀢𑀸𑀭𑁄 𑀫𑀕𑁆𑀕𑁂 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁 𑀘𑀢𑁆𑀢𑀸𑀭𑁄 𑀅𑀭𑀺𑀬𑀯𑀁𑀲𑁂 𑀦𑀺𑀲𑁆𑀲𑀸𑀬 𑀤𑀲𑀩𑀮𑀲𑁆𑀲 𑀕𑀼𑀡𑁂 𑀅𑀦𑀼𑀲𑁆𑀲𑀭𑀺𑀢𑀼𑀫𑀸𑀭𑀤𑁆𑀥𑁄.

𑀢𑀣𑀸 𑀧𑀜𑁆𑀘 𑀧𑀥𑀸𑀦𑀺𑀬𑀗𑁆𑀕𑀸𑀦𑀺, 𑀧𑀜𑁆𑀘𑀗𑁆𑀕𑀺𑀓𑀁𑀲𑀫𑁆𑀫𑀸𑀲𑀫𑀸𑀥𑀺𑀁, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀧𑀜𑁆𑀘 𑀦𑀺𑀲𑁆𑀲𑀭𑀡𑀺𑀬𑀸 𑀥𑀸𑀢𑀼𑀬𑁄, 𑀧𑀜𑁆𑀘 𑀯𑀺𑀫𑀼𑀢𑁆𑀢𑀸𑀬𑀢𑀦𑀸𑀦𑀺, 𑀧𑀜𑁆𑀘 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀺𑀬𑀸 𑀧𑀜𑁆𑀜𑀸, 𑀙 𑀲𑀸𑀭𑀡𑀻𑀬𑁂 𑀥𑀫𑁆𑀫𑁂, 𑀙 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀺, 𑀙 𑀕𑀸𑀭𑀯𑁂, 𑀙 𑀦𑀺𑀲𑁆𑀲𑀭𑀡𑀺𑀬𑀸 𑀥𑀸𑀢𑀼𑀬𑁄, 𑀙 𑀲𑀢𑀢𑀯𑀺𑀳𑀸𑀭𑁂, 𑀙 𑀅𑀦𑀼𑀢𑁆𑀢𑀭𑀺𑀬𑀸𑀦𑀺, 𑀙 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸 𑀧𑀜𑁆𑀜𑀸, 𑀙 𑀅𑀪𑀺𑀜𑁆𑀜𑀸, 𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺, 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂, 𑀲𑀢𑁆𑀢 𑀅𑀭𑀺𑀬𑀥𑀦𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂, 𑀲𑀢𑁆𑀢 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂, 𑀲𑀢𑁆𑀢 𑀦𑀺𑀚𑁆𑀚𑀭𑀯𑀢𑁆𑀣𑀽𑀦𑀺, 𑀲𑀢𑁆𑀢 𑀧𑀜𑁆𑀜𑀸, 𑀲𑀢𑁆𑀢 𑀤𑀓𑁆𑀔𑀺𑀡𑁂𑀬𑁆𑀬𑀧𑀼𑀕𑁆𑀕𑀮𑁂, 𑀲𑀢𑁆𑀢 𑀔𑀻𑀡𑀸𑀲𑀯𑀩𑀮𑀸𑀦𑀺, 𑀅𑀝𑁆𑀞 𑀧𑀜𑁆𑀜𑀸𑀧𑀝𑀺𑀮𑀸𑀪𑀳𑁂𑀢𑀽, 𑀅𑀝𑁆𑀞 𑀲𑀫𑁆𑀫𑀢𑁆𑀢𑀸𑀦𑀺, 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸𑀢𑀺𑀓𑁆𑀓𑀫𑁂, 𑀅𑀝𑁆𑀞 𑀆𑀭𑀫𑁆𑀪𑀯𑀢𑁆𑀣𑀽𑀦𑀺, 𑀅𑀝𑁆𑀞 𑀅𑀓𑁆𑀔𑀡𑀤𑁂𑀲𑀦𑀸, 𑀅𑀝𑁆𑀞 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑁂, 𑀅𑀝𑁆𑀞 𑀅𑀪𑀺𑀪𑀸𑀬𑀢𑀦𑀸𑀦𑀺, 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂, 𑀦𑀯 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀫𑀽𑀮𑀓𑁂 𑀥𑀫𑁆𑀫𑁂, 𑀦𑀯 𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀸𑀦𑀺, 𑀦𑀯 𑀲𑀢𑁆𑀢𑀸𑀯𑀸𑀲𑀤𑁂𑀲𑀦𑀸, 𑀦𑀯 𑀆𑀖𑀸𑀢𑀧𑁆𑀧𑀝𑀺𑀯𑀺𑀦𑀬𑁂, 𑀦𑀯 𑀧𑀜𑁆𑀜𑀸, 𑀦𑀯 𑀦𑀸𑀦𑀢𑁆𑀢𑀸𑀦𑀺, 𑀦𑀯 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑁂, 𑀤𑀲 𑀦𑀸𑀣𑀓𑀭𑀡𑁂 𑀥𑀫𑁆𑀫𑁂, 𑀤𑀲 𑀓𑀲𑀺𑀡𑀸𑀬𑀢𑀦𑀸𑀦𑀺, 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑁂, 𑀤𑀲 𑀢𑀣𑀸𑀕𑀢𑀩𑀮𑀸𑀦𑀺, 𑀤𑀲 𑀲𑀫𑁆𑀫𑀢𑁆𑀢𑀸𑀦𑀺, 𑀤𑀲 𑀅𑀭𑀺𑀬𑀯𑀸𑀲𑁂, 𑀤𑀲 𑀅𑀲𑁂𑀓𑁆𑀔𑀥𑀫𑁆𑀫𑁂, 𑀏𑀓𑀸𑀤𑀲 𑀫𑁂𑀢𑁆𑀢𑀸𑀦𑀺𑀲𑀁𑀲𑁂, 𑀤𑁆𑀯𑀸𑀤𑀲 𑀥𑀫𑁆𑀫𑀘𑀓𑁆𑀓𑀸𑀓𑀸𑀭𑁂, 𑀢𑁂𑀭𑀲 𑀥𑀼𑀢𑀗𑁆𑀕𑀕𑀼𑀡𑁂 ¶ , 𑀘𑀼𑀤𑁆𑀤𑀲 𑀩𑀼𑀤𑁆𑀥𑀜𑀸𑀡𑀸𑀦𑀺, 𑀧𑀜𑁆𑀘𑀤𑀲 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀺𑀬𑁂 𑀥𑀫𑁆𑀫𑁂, 𑀲𑁄𑀴𑀲𑀯𑀺𑀥𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀁, 𑀅𑀝𑁆𑀞𑀸𑀭𑀲 𑀩𑀼𑀤𑁆𑀥𑀥𑀫𑁆𑀫𑁂, 𑀏𑀓𑀽𑀦𑀯𑀻𑀲𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺, 𑀘𑀢𑀼𑀘𑀢𑁆𑀢𑀸𑀮𑀻𑀲 𑀜𑀸𑀡𑀯𑀢𑁆𑀣𑀽𑀦𑀺, 𑀧𑀭𑁄𑀧𑀡𑁆𑀡𑀸𑀲 𑀓𑀼𑀲𑀮𑀥𑀫𑁆𑀫𑁂, 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀯𑀢𑁆𑀣𑀽𑀦𑀺, 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀫𑀸𑀧𑀢𑁆𑀢𑀺𑀲𑀜𑁆𑀘𑀭𑀫𑀳𑀸𑀯𑀚𑀺𑀭𑀜𑀸𑀡𑀁 ¶ 𑀦𑀺𑀲𑁆𑀲𑀸𑀬 𑀤𑀲𑀩𑀮𑀲𑁆𑀲 𑀕𑀼𑀡𑁂 𑀅𑀦𑀼𑀲𑁆𑀲𑀭𑀺𑀢𑀼𑀁 𑀆𑀭𑀪𑀺.

𑀢𑀲𑁆𑀫𑀺𑀁𑀬𑁂𑀯 ¶ 𑀘 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄𑀬𑁂𑀯 𑀉𑀧𑀭𑀺 ‘‘𑀅𑀧𑀭𑀁 𑀧𑀦, 𑀪𑀦𑁆𑀢𑁂, 𑀏𑀢𑀤𑀸𑀦𑀼𑀢𑁆𑀢𑀭𑀺𑀬’’𑀦𑁆𑀢𑀺 𑀆𑀕𑀫𑀺𑀲𑁆𑀲𑀦𑁆𑀢𑀺 𑀲𑁄𑀴𑀲 𑀅𑀧𑀭𑀫𑁆𑀧𑀭𑀺𑀬𑀥𑀫𑁆𑀫𑀸, 𑀢𑁂𑀧𑀺 𑀦𑀺𑀲𑁆𑀲𑀸𑀬 𑀅𑀦𑀼𑀲𑁆𑀲𑀭𑀺𑀢𑀼𑀁 𑀆𑀭𑀪𑀺. 𑀲𑁄 ‘‘𑀓𑀼𑀲𑀮𑀧𑀜𑁆𑀜𑀢𑁆𑀢𑀺𑀬𑀁 𑀅𑀦𑀼𑀢𑁆𑀢𑀭𑁄 𑀫𑀬𑁆𑀳𑀁 𑀲𑀢𑁆𑀣𑀸, 𑀆𑀬𑀢𑀦𑀧𑀜𑁆𑀜𑀢𑁆𑀢𑀺𑀬𑀁 𑀅𑀦𑀼𑀢𑁆𑀢𑀭𑁄, 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺𑀬𑀁 𑀅𑀦𑀼𑀢𑁆𑀢𑀭𑁄, 𑀆𑀤𑁂𑀲𑀦𑀸𑀯𑀺𑀥𑀸𑀲𑀼 𑀅𑀦𑀼𑀢𑁆𑀢𑀭𑁄, 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺𑀬𑀁 𑀅𑀦𑀼𑀢𑁆𑀢𑀭𑁄, 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀬𑀁 𑀅𑀦𑀼𑀢𑁆𑀢𑀭𑁄, 𑀧𑀥𑀸𑀦𑁂 𑀅𑀦𑀼𑀢𑁆𑀢𑀭𑁄, 𑀧𑀝𑀺𑀧𑀤𑀸𑀲𑀼 𑀅𑀦𑀼𑀢𑁆𑀢𑀭𑁄, 𑀪𑀲𑁆𑀲𑀲𑀫𑀸𑀘𑀸𑀭𑁂 𑀅𑀦𑀼𑀢𑁆𑀢𑀭𑁄, 𑀧𑀼𑀭𑀺𑀲𑀲𑀻𑀮𑀲𑀫𑀸𑀘𑀸𑀭𑁂 𑀅𑀦𑀼𑀢𑁆𑀢𑀭𑁄, 𑀅𑀦𑀼𑀲𑀸𑀲𑀦𑀻𑀯𑀺𑀥𑀸𑀲𑀼 𑀅𑀦𑀼𑀢𑁆𑀢𑀭𑁄, 𑀧𑀭𑀧𑀼𑀕𑁆𑀕𑀮𑀯𑀺𑀫𑀼𑀢𑁆𑀢𑀺𑀜𑀸𑀡𑁂 𑀅𑀦𑀼𑀢𑁆𑀢𑀭𑁄, 𑀲𑀲𑁆𑀲𑀢𑀯𑀸𑀤𑁂𑀲𑀼 𑀅𑀦𑀼𑀢𑁆𑀢𑀭𑁄, 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂 𑀅𑀦𑀼𑀢𑁆𑀢𑀭𑁄, 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂 𑀅𑀦𑀼𑀢𑁆𑀢𑀭𑁄, 𑀇𑀤𑁆𑀥𑀺𑀯𑀺𑀥𑁂 𑀅𑀦𑀼𑀢𑁆𑀢𑀭𑁄, 𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀅𑀦𑀼𑀢𑁆𑀢𑀭𑁄’’𑀢𑀺 𑀏𑀯𑀁 𑀤𑀲𑀩𑀮𑀲𑁆𑀲 𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑁄 𑀪𑀕𑀯𑀢𑁄 𑀕𑀼𑀡𑀸𑀦𑀁 𑀦𑁂𑀯 𑀅𑀦𑁆𑀢𑀁, 𑀦 𑀧𑀫𑀸𑀡𑀁 𑀧𑀲𑁆𑀲𑀺. 𑀣𑁂𑀭𑁄 𑀅𑀢𑁆𑀢𑀦𑁄𑀧𑀺 𑀢𑀸𑀯 𑀕𑀼𑀡𑀸𑀦𑀁 𑀅𑀦𑁆𑀢𑀁 𑀯𑀸 𑀧𑀫𑀸𑀡𑀁 𑀯𑀸 𑀦𑀸𑀤𑁆𑀤𑀲, 𑀪𑀕𑀯𑀢𑁄 𑀕𑀼𑀡𑀸𑀦𑀁 𑀓𑀺𑀁 𑀧𑀲𑁆𑀲𑀺𑀲𑁆𑀲𑀢𑀺? 𑀬𑀲𑁆𑀲 𑀬𑀲𑁆𑀲 𑀳𑀺 𑀧𑀜𑁆𑀜𑀸 𑀫𑀳𑀢𑀻 𑀜𑀸𑀡𑀁 𑀯𑀺𑀲𑀤𑀁, 𑀲𑁄 𑀲𑁄 𑀩𑀼𑀤𑁆𑀥𑀕𑀼𑀡𑁂 𑀫𑀳𑀦𑁆𑀢𑀢𑁄 𑀲𑀤𑁆𑀤𑀳𑀢𑀺. 𑀮𑁄𑀓𑀺𑀬𑀫𑀳𑀸𑀚𑀦𑁄 𑀉𑀓𑁆𑀓𑀸𑀲𑀺𑀢𑁆𑀯𑀸𑀧𑀺 𑀔𑀺𑀧𑀺𑀢𑁆𑀯𑀸𑀧𑀺 ‘‘𑀦𑀫𑁄 𑀩𑀼𑀤𑁆𑀥𑀸𑀦’’𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀉𑀧𑀦𑀺𑀲𑁆𑀲𑀬𑁂 𑀞𑀢𑁆𑀯𑀸 𑀩𑀼𑀤𑁆𑀥𑀸𑀦𑀁 𑀕𑀼𑀡𑁂 𑀅𑀦𑀼𑀲𑁆𑀲𑀭𑀢𑀺. 𑀲𑀩𑁆𑀩𑀮𑁄𑀓𑀺𑀬𑀫𑀳𑀸𑀚𑀦𑀢𑁄 𑀏𑀓𑁄 𑀲𑁄𑀢𑀸𑀧𑀦𑁆𑀦𑁄 𑀩𑀼𑀤𑁆𑀥𑀕𑀼𑀡𑁂 𑀫𑀳𑀦𑁆𑀢𑀢𑁄 𑀲𑀤𑁆𑀤𑀳𑀢𑀺. 𑀲𑁄𑀢𑀸𑀧𑀦𑁆𑀦𑀸𑀦𑀁 𑀲𑀢𑀢𑁄𑀧𑀺 𑀲𑀳𑀲𑁆𑀲𑀢𑁄𑀧𑀺 𑀏𑀓𑁄 𑀲𑀓𑀤𑀸𑀕𑀸𑀫𑀻. 𑀲𑀓𑀤𑀸𑀕𑀸𑀫𑀻𑀦𑀁 𑀲𑀢𑀢𑁄𑀧𑀺 𑀲𑀳𑀲𑁆𑀲𑀢𑁄𑀧𑀺 𑀏𑀓𑁄 𑀅𑀦𑀸𑀕𑀸𑀫𑀻. 𑀅𑀦𑀸𑀕𑀸𑀫𑀻𑀦𑀁 𑀲𑀢𑀢𑁄𑀧𑀺 𑀲𑀳𑀲𑁆𑀲𑀢𑁄𑀧𑀺 𑀏𑀓𑁄 𑀅𑀭𑀳𑀸 𑀩𑀼𑀤𑁆𑀥𑀕𑀼𑀡𑁂 𑀫𑀳𑀦𑁆𑀢𑀢𑁄 𑀲𑀤𑁆𑀤𑀳𑀢𑀺. 𑀅𑀯𑀲𑁂𑀲𑀅𑀭𑀳𑀦𑁆𑀢𑁂𑀳𑀺 𑀅𑀲𑀻𑀢𑀺 𑀫𑀳𑀸𑀣𑁂𑀭𑀸 𑀩𑀼𑀤𑁆𑀥𑀕𑀼𑀡𑁂 𑀫𑀳𑀦𑁆𑀢𑀢𑁄 𑀲𑀤𑁆𑀤𑀳𑀦𑁆𑀢𑀺. 𑀅𑀲𑀻𑀢𑀺𑀫𑀳𑀸𑀣𑁂𑀭𑁂𑀳𑀺 𑀘𑀢𑁆𑀢𑀸𑀭𑁄 𑀫𑀳𑀸𑀣𑁂𑀭𑀸. 𑀘𑀢𑀽𑀳𑀺 𑀫𑀳𑀸𑀣𑁂𑀭𑁂𑀳𑀺 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸. 𑀢𑁂𑀲𑀼𑀧𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀢𑁄𑀧𑀺 𑀏𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀩𑀼𑀤𑁆𑀥𑀕𑀼𑀡𑁂 𑀫𑀳𑀦𑁆𑀢𑀢𑁄 𑀲𑀤𑁆𑀤𑀳𑀢𑀺. 𑀲𑀘𑁂 𑀧𑀦 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑁂 𑀲𑀗𑁆𑀖𑀸𑀝𑀺𑀓𑀡𑁆𑀡𑁂𑀦 𑀲𑀗𑁆𑀖𑀸𑀝𑀺𑀓𑀡𑁆𑀡𑀁 ¶ 𑀧𑀳𑀭𑀺𑀬𑀫𑀸𑀦𑀸 𑀦𑀺𑀲𑀺𑀦𑁆𑀦𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀩𑀼𑀤𑁆𑀥𑀕𑀼𑀡𑁂 𑀅𑀦𑀼𑀲𑁆𑀲𑀭𑁂𑀬𑁆𑀬𑀼𑀁, 𑀢𑁂𑀳𑀺 𑀲𑀩𑁆𑀩𑁂𑀳𑀺𑀧𑀺 𑀏𑀓𑁄 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄𑀯 𑀩𑀼𑀤𑁆𑀥𑀕𑀼𑀡𑁂 𑀫𑀳𑀦𑁆𑀢𑀢𑁄 𑀲𑀤𑁆𑀤𑀳𑀢𑀺.

𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀫𑀳𑀸𑀚𑀦𑁄 ‘‘𑀫𑀳𑀸𑀲𑀫𑀼𑀤𑁆𑀤𑁄 𑀕𑀫𑁆𑀪𑀻𑀭𑁄 𑀉𑀢𑁆𑀢𑀸𑀦𑁄’’𑀢𑀺 𑀚𑀸𑀦𑀦𑀢𑁆𑀣𑀁 𑀬𑁄𑀢𑁆𑀢𑀸𑀦𑀺 𑀯𑀝𑁆𑀝𑁂𑀬𑁆𑀬, 𑀢𑀢𑁆𑀣 𑀓𑁄𑀘𑀺 𑀩𑁆𑀬𑀸𑀫𑀧𑁆𑀧𑀫𑀸𑀡𑀁 𑀬𑁄𑀢𑁆𑀢𑀁 𑀯𑀝𑁆𑀝𑁂𑀬𑁆𑀬, 𑀓𑁄𑀘𑀺 𑀤𑁆𑀯𑁂 𑀩𑁆𑀬𑀸𑀫𑀁, 𑀓𑁄𑀘𑀺 𑀤𑀲𑀩𑁆𑀬𑀸𑀫𑀁, 𑀓𑁄𑀘𑀺 𑀯𑀻𑀲𑀢𑀺𑀩𑁆𑀬𑀸𑀫𑀁, 𑀓𑁄𑀘𑀺 𑀢𑀺𑀁𑀲𑀩𑁆𑀬𑀸𑀫𑀁, 𑀓𑁄𑀘𑀺 𑀘𑀢𑁆𑀢𑀸𑀮𑀻𑀲𑀩𑁆𑀬𑀸𑀫𑀁, 𑀓𑁄𑀘𑀺 𑀧𑀜𑁆𑀜𑀸𑀲𑀩𑁆𑀬𑀸𑀫𑀁, 𑀓𑁄𑀘𑀺 𑀲𑀢𑀩𑁆𑀬𑀸𑀫𑀁, 𑀓𑁄𑀘𑀺 𑀲𑀳𑀲𑁆𑀲𑀩𑁆𑀬𑀸𑀫𑀁 ¶ , 𑀓𑁄𑀘𑀺 𑀘𑀢𑀼𑀭𑀸𑀲𑀻𑀢𑀺𑀩𑁆𑀬𑀸𑀫𑀲𑀳𑀲𑁆𑀲𑀁. 𑀢𑁂 𑀦𑀸𑀯𑀁 𑀆𑀭𑀼𑀬𑁆𑀳, 𑀲𑀫𑀼𑀤𑁆𑀤𑀫𑀚𑁆𑀛𑁂 𑀉𑀕𑁆𑀕𑀢𑀧𑀩𑁆𑀩𑀢𑀸𑀤𑀺𑀫𑁆𑀳𑀺 𑀯𑀸 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀬𑁄𑀢𑁆𑀢𑀁 𑀑𑀢𑀸𑀭𑁂𑀬𑁆𑀬𑀼𑀁, 𑀢𑁂𑀲𑀼 𑀬𑀲𑁆𑀲 𑀬𑁄𑀢𑁆𑀢𑀁 𑀩𑁆𑀬𑀸𑀫𑀫𑀢𑁆𑀢𑀁, 𑀲𑁄 𑀩𑁆𑀬𑀸𑀫𑀫𑀢𑁆𑀢𑀝𑁆𑀞𑀸𑀦𑁂𑀬𑁂𑀯 𑀉𑀤𑀓𑀁 𑀚𑀸𑀦𑀸𑀢𑀺…𑀧𑁂… 𑀬𑀲𑁆𑀲 𑀘𑀢𑀼𑀭𑀸𑀲𑀻𑀢𑀺𑀩𑁆𑀬𑀸𑀫𑀲𑀳𑀲𑁆𑀲𑀁, 𑀲𑁄 𑀘𑀢𑀼𑀭𑀸𑀲𑀻𑀢𑀺𑀩𑁆𑀬𑀸𑀫𑀲𑀳𑀲𑁆𑀲𑀝𑁆𑀞𑀸𑀦𑁂𑀬𑁂𑀯 𑀉𑀤𑀓𑀁 𑀚𑀸𑀦𑀸𑀢𑀺. 𑀧𑀭𑀢𑁄 𑀉𑀤𑀓𑀁 𑀏𑀢𑁆𑀢𑀓𑀦𑁆𑀢𑀺 𑀦 𑀚𑀸𑀦𑀸𑀢𑀺. 𑀫𑀳𑀸𑀲𑀫𑀼𑀤𑁆𑀤𑁂 ¶ 𑀧𑀦 𑀦 𑀢𑀢𑁆𑀢𑀓𑀁𑀬𑁂𑀯 𑀉𑀤𑀓𑀁, 𑀅𑀣 𑀔𑁄 𑀅𑀦𑀦𑁆𑀢𑀫𑀧𑀭𑀺𑀫𑀸𑀡𑀁. 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀁 𑀕𑀫𑁆𑀪𑀻𑀭𑁄 𑀳𑀺 𑀫𑀳𑀸𑀲𑀫𑀼𑀤𑁆𑀤𑁄, 𑀏𑀯𑀫𑁂𑀯 𑀏𑀓𑀩𑁆𑀬𑀸𑀫𑀬𑁄𑀢𑁆𑀢𑀢𑁄 𑀧𑀝𑁆𑀞𑀸𑀬 𑀦𑀯𑀩𑁆𑀬𑀸𑀫𑀬𑁄𑀢𑁆𑀢𑁂𑀦 𑀜𑀸𑀢𑀉𑀤𑀓𑀁 𑀯𑀺𑀬 𑀮𑁄𑀓𑀺𑀬𑀫𑀳𑀸𑀚𑀦𑁂𑀦 𑀤𑀺𑀝𑁆𑀞𑀩𑀼𑀤𑁆𑀥𑀕𑀼𑀡𑀸 𑀯𑁂𑀤𑀺𑀢𑀩𑁆𑀩𑀸. 𑀤𑀲𑀩𑁆𑀬𑀸𑀫𑀬𑁄𑀢𑁆𑀢𑁂𑀦 𑀤𑀲𑀩𑁆𑀬𑀸𑀫𑀝𑁆𑀞𑀸𑀦𑁂 𑀜𑀸𑀢𑀉𑀤𑀓𑀁 𑀯𑀺𑀬 𑀲𑁄𑀢𑀸𑀧𑀦𑁆𑀦𑁂𑀦 𑀤𑀺𑀝𑁆𑀞𑀩𑀼𑀤𑁆𑀥𑀕𑀼𑀡𑀸. 𑀯𑀻𑀲𑀢𑀺𑀩𑁆𑀬𑀸𑀫𑀬𑁄𑀢𑁆𑀢𑁂𑀦 𑀯𑀻𑀲𑀢𑀺𑀩𑁆𑀬𑀸𑀫𑀝𑁆𑀞𑀸𑀦𑁂 𑀜𑀸𑀢𑀉𑀤𑀓𑀁 𑀯𑀺𑀬 𑀲𑀓𑀤𑀸𑀕𑀸𑀫𑀺𑀦𑀸 𑀤𑀺𑀝𑁆𑀞𑀩𑀼𑀤𑁆𑀥𑀕𑀼𑀡𑀸. 𑀢𑀺𑀁𑀲𑀩𑁆𑀬𑀸𑀫𑀬𑁄𑀢𑁆𑀢𑁂𑀦 𑀢𑀺𑀁𑀲𑀩𑁆𑀬𑀸𑀫𑀝𑁆𑀞𑀸𑀦𑁂 𑀜𑀸𑀢𑀉𑀤𑀓𑀁 𑀯𑀺𑀬 𑀅𑀦𑀸𑀕𑀸𑀫𑀺𑀦𑀸 𑀤𑀺𑀝𑁆𑀞𑀩𑀼𑀤𑁆𑀥𑀕𑀼𑀡𑀸. 𑀘𑀢𑁆𑀢𑀸𑀮𑀻𑀲𑀩𑁆𑀬𑀸𑀫𑀬𑁄𑀢𑁆𑀢𑁂𑀦 𑀘𑀢𑁆𑀢𑀸𑀮𑀻𑀲𑀩𑁆𑀬𑀸𑀫𑀝𑁆𑀞𑀸𑀦𑁂 𑀜𑀸𑀢𑀉𑀤𑀓𑀁 𑀯𑀺𑀬 𑀅𑀭𑀳𑀢𑀸 𑀤𑀺𑀝𑁆𑀞𑀩𑀼𑀤𑁆𑀥𑀕𑀼𑀡𑀸. 𑀧𑀜𑁆𑀜𑀸𑀲𑀩𑁆𑀬𑀸𑀫𑀬𑁄𑀢𑁆𑀢𑁂𑀦 𑀧𑀜𑁆𑀜𑀸𑀲𑀩𑁆𑀬𑀸𑀫𑀝𑁆𑀞𑀸𑀦𑁂 𑀜𑀸𑀢𑀉𑀤𑀓𑀁 𑀯𑀺𑀬 𑀅𑀲𑀻𑀢𑀺𑀫𑀳𑀸𑀣𑁂𑀭𑁂𑀳𑀺 𑀤𑀺𑀝𑁆𑀞𑀩𑀼𑀤𑁆𑀥𑀕𑀼𑀡𑀸. 𑀲𑀢𑀩𑁆𑀬𑀸𑀫𑀬𑁄𑀢𑁆𑀢𑁂𑀦 𑀲𑀢𑀩𑁆𑀬𑀸𑀫𑀝𑁆𑀞𑀸𑀦𑁂 𑀜𑀸𑀢𑀉𑀤𑀓𑀁 𑀯𑀺𑀬 𑀘𑀢𑀽𑀳𑀺 𑀫𑀳𑀸𑀣𑁂𑀭𑁂𑀳𑀺 𑀤𑀺𑀝𑁆𑀞𑀩𑀼𑀤𑁆𑀥𑀕𑀼𑀡𑀸. 𑀲𑀳𑀲𑁆𑀲𑀩𑁆𑀬𑀸𑀫𑀬𑁄𑀢𑁆𑀢𑁂𑀦 𑀲𑀳𑀲𑁆𑀲𑀩𑁆𑀬𑀸𑀫𑀝𑁆𑀞𑀸𑀦𑁂 𑀜𑀸𑀢𑀉𑀤𑀓𑀁 𑀯𑀺𑀬 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁂𑀦 𑀤𑀺𑀝𑁆𑀞𑀩𑀼𑀤𑁆𑀥𑀕𑀼𑀡𑀸. 𑀘𑀢𑀼𑀭𑀸𑀲𑀻𑀢𑀺𑀩𑁆𑀬𑀸𑀫𑀲𑀳𑀲𑁆𑀲𑀬𑁄𑀢𑁆𑀢𑁂𑀦 𑀘𑀢𑀼𑀭𑀸𑀲𑀻𑀢𑀺𑀩𑁆𑀬𑀸𑀫𑀲𑀳𑀲𑁆𑀲𑀝𑁆𑀞𑀸𑀦𑁂 𑀜𑀸𑀢𑀉𑀤𑀓𑀁 𑀯𑀺𑀬 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀤𑀺𑀝𑁆𑀞𑀩𑀼𑀤𑁆𑀥𑀕𑀼𑀡𑀸. 𑀢𑀢𑁆𑀣 𑀬𑀣𑀸 𑀲𑁄 𑀧𑀼𑀭𑀺𑀲𑁄 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀦𑀸𑀫 𑀦 𑀏𑀢𑁆𑀢𑀓𑀁𑀬𑁂𑀯, 𑀅𑀦𑀦𑁆𑀢𑀫𑀧𑀭𑀺𑀫𑀸𑀡𑀦𑁆𑀢𑀺 𑀕𑀡𑁆𑀳𑀸𑀢𑀺, 𑀏𑀯𑀫𑁂𑀯 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀥𑀫𑁆𑀫𑀦𑁆𑀯𑀬𑁂𑀦 𑀅𑀦𑁆𑀯𑀬𑀩𑀼𑀤𑁆𑀥𑀺𑀬𑀸 𑀅𑀦𑀼𑀫𑀸𑀦𑁂𑀦 𑀦𑀬𑀕𑁆𑀕𑀸𑀳𑁂𑀦 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑁂 𑀞𑀢𑁆𑀯𑀸 𑀤𑀲𑀩𑀮𑀲𑁆𑀲 ¶ 𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑁄 ‘‘𑀩𑀼𑀤𑁆𑀥𑀕𑀼𑀡𑀸 𑀅𑀦𑀦𑁆𑀢𑀸 𑀅𑀧𑀭𑀺𑀫𑀸𑀡𑀸’’𑀢𑀺 𑀲𑀤𑁆𑀤𑀳𑀺.

𑀣𑁂𑀭𑁂𑀦 𑀳𑀺 𑀤𑀺𑀝𑁆𑀞𑀩𑀼𑀤𑁆𑀥𑀕𑀼𑀡𑁂𑀳𑀺 𑀥𑀫𑁆𑀫𑀦𑁆𑀯𑀬𑁂𑀦 𑀕𑀳𑁂𑀢𑀩𑁆𑀩𑀩𑀼𑀤𑁆𑀥𑀕𑀼𑀡𑀸𑀬𑁂𑀯 𑀩𑀳𑀼𑀢𑀭𑀸. 𑀬𑀣𑀸 𑀓𑀣𑀁 𑀯𑀺𑀬? 𑀬𑀣𑀸 𑀇𑀢𑁄 𑀦𑀯 𑀇𑀢𑁄 𑀦𑀯𑀸𑀢𑀺 𑀅𑀝𑁆𑀞𑀸𑀭𑀲 𑀬𑁄𑀚𑀦𑀸𑀦𑀺 𑀅𑀯𑀢𑁆𑀣𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺𑀬𑀸 𑀘𑀦𑁆𑀤𑀪𑀸𑀕𑀸𑀬 𑀫𑀳𑀸𑀦𑀤𑀺𑀬𑀸 𑀧𑀼𑀭𑀺𑀲𑁄 𑀲𑀽𑀘𑀺𑀧𑀸𑀲𑁂𑀦 𑀉𑀤𑀓𑀁 𑀕𑀡𑁆𑀳𑁂𑀬𑁆𑀬, 𑀲𑀽𑀘𑀺𑀧𑀸𑀲𑁂𑀦 𑀕𑀳𑀺𑀢𑀉𑀤𑀓𑀢𑁄 𑀅𑀕𑁆𑀕𑀳𑀺𑀢𑀫𑁂𑀯 𑀩𑀳𑀼 𑀳𑁄𑀢𑀺. 𑀬𑀣𑀸 𑀯𑀸 𑀧𑀦 𑀧𑀼𑀭𑀺𑀲𑁄 𑀫𑀳𑀸𑀧𑀣𑀯𑀺𑀢𑁄 𑀅𑀗𑁆𑀕𑀼𑀮𑀺𑀬𑀸 𑀧𑀁𑀲𑀼𑀁 𑀕𑀡𑁆𑀳𑁂𑀬𑁆𑀬, 𑀅𑀗𑁆𑀕𑀼𑀮𑀺𑀬𑀸 𑀕𑀳𑀺𑀢𑀧𑀁𑀲𑀼𑀢𑁄 𑀅𑀯𑀲𑁂𑀲𑀧𑀁𑀲𑀼𑀬𑁂𑀯 𑀩𑀳𑀼 𑀳𑁄𑀢𑀺. 𑀬𑀣𑀸 𑀯𑀸 𑀧𑀦 𑀧𑀼𑀭𑀺𑀲𑁄 𑀫𑀳𑀸𑀲𑀫𑀼𑀤𑁆𑀤𑀸𑀪𑀺𑀫𑀼𑀔𑀺𑀁 𑀅𑀗𑁆𑀕𑀼𑀮𑀺𑀁 𑀓𑀭𑁂𑀬𑁆𑀬, 𑀅𑀗𑁆𑀕𑀼𑀮𑀺𑀅𑀪𑀺𑀫𑀼𑀔𑀉𑀤𑀓𑀢𑁄 ¶ 𑀅𑀯𑀲𑁂𑀲𑀁 𑀉𑀤𑀓𑀁𑀬𑁂𑀯 𑀩𑀳𑀼 𑀳𑁄𑀢𑀺. 𑀬𑀣𑀸 𑀘 𑀧𑀼𑀭𑀺𑀲𑁄 𑀆𑀓𑀸𑀲𑀸𑀪𑀺𑀫𑀼𑀔𑀺𑀁 𑀅𑀗𑁆𑀕𑀼𑀮𑀺𑀁 𑀓𑀭𑁂𑀬𑁆𑀬, 𑀅𑀗𑁆𑀕𑀼𑀮𑀺𑀅𑀪𑀺𑀫𑀼𑀔𑀆𑀓𑀸𑀲𑀢𑁄 𑀲𑁂𑀲𑀆𑀓𑀸𑀲𑀧𑁆𑀧𑀤𑁂𑀲𑁄𑀯 𑀩𑀳𑀼 𑀳𑁄𑀢𑀺. 𑀏𑀯𑀁 𑀣𑁂𑀭𑁂𑀦 𑀤𑀺𑀝𑁆𑀞𑀩𑀼𑀤𑁆𑀥𑀕𑀼𑀡𑁂𑀳𑀺 𑀅𑀤𑀺𑀝𑁆𑀞𑀸 𑀕𑀼𑀡𑀸𑀯 𑀩𑀳𑀽𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁,

𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄;

𑀔𑀻𑀬𑁂𑀣 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂,

𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺.

𑀏𑀯𑀁 𑀣𑁂𑀭𑀲𑁆𑀲 𑀅𑀢𑁆𑀢𑀦𑁄 𑀘 𑀲𑀢𑁆𑀣𑀼 𑀘 𑀕𑀼𑀡𑁂 𑀅𑀦𑀼𑀲𑁆𑀲𑀭𑀢𑁄 𑀬𑀫𑀓𑀫𑀳𑀸𑀦𑀤𑀻𑀫𑀳𑁄𑀖𑁄 𑀯𑀺𑀬 𑀅𑀩𑁆𑀪𑀦𑁆𑀢𑀭𑁂 ¶ 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀅𑀯𑀢𑁆𑀣𑀭𑀫𑀸𑀦𑀁 𑀯𑀸𑀢𑁄 𑀯𑀺𑀬 𑀪𑀲𑁆𑀢𑀁, 𑀉𑀩𑁆𑀪𑀺𑀚𑁆𑀚𑀺𑀢𑁆𑀯𑀸 𑀉𑀕𑁆𑀕𑀢𑀉𑀤𑀓𑀁 𑀯𑀺𑀬 𑀫𑀳𑀸𑀭𑀳𑀤𑀁 𑀲𑀓𑀮𑀲𑀭𑀻𑀭𑀁 𑀧𑀽𑀭𑁂𑀢𑀺. 𑀢𑀢𑁄 𑀣𑁂𑀭𑀲𑁆𑀲 ‘‘𑀲𑀼𑀧𑀢𑁆𑀣𑀺𑀢𑀸 𑀯𑀢 𑀫𑁂 𑀧𑀢𑁆𑀣𑀦𑀸, 𑀲𑀼𑀮𑀤𑁆𑀥𑀸 𑀫𑁂 𑀧𑀩𑁆𑀩𑀚𑁆𑀚𑀸, 𑀬𑁆𑀯𑀸𑀳𑀁 𑀏𑀯𑀁𑀯𑀺𑀥𑀲𑁆𑀲 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁄’’𑀢𑀺 𑀆𑀯𑀚𑁆𑀚𑀦𑁆𑀢𑀲𑁆𑀲 𑀩𑀮𑀯𑀢𑀭𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀺.

𑀅𑀣 𑀣𑁂𑀭𑁄 ‘‘𑀓𑀲𑁆𑀲𑀸𑀳𑀁 𑀇𑀫𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀆𑀭𑁄𑀘𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀅𑀜𑁆𑀜𑁄 𑀓𑁄𑀘𑀺 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀫𑀫 𑀇𑀫𑀁 𑀧𑀲𑀸𑀤𑀁 𑀅𑀦𑀼𑀘𑁆𑀙𑀯𑀺𑀓𑀁 𑀓𑀢𑁆𑀯𑀸 𑀧𑀝𑀺𑀕𑁆𑀕𑀳𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀅𑀳𑀁 𑀇𑀫𑀁 𑀲𑁄𑀫𑀦𑀲𑁆𑀲𑀁 𑀲𑀢𑁆𑀣𑀼𑀦𑁄𑀬𑁂𑀯 𑀧𑀯𑁂𑀤𑁂𑀬𑁆𑀬𑀸𑀫𑀺, 𑀲𑀢𑁆𑀣𑀸𑀯 𑀫𑁂 𑀧𑀝𑀺𑀕𑁆𑀕𑀡𑁆𑀳𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀲𑁄 𑀳𑀺 𑀢𑀺𑀝𑁆𑀞𑀢𑀼 𑀫𑀫 𑀧𑀻𑀢𑀺𑀲𑁄𑀫𑀦𑀲𑁆𑀲𑀁, 𑀫𑀸𑀤𑀺𑀲𑀲𑁆𑀲 𑀲𑀫𑀡𑀲𑀢𑀲𑁆𑀲 𑀯𑀸 𑀲𑀫𑀡𑀲𑀳𑀲𑁆𑀲𑀲𑁆𑀲 𑀯𑀸 𑀲𑀫𑀡𑀲𑀢𑀲𑀳𑀲𑁆𑀲𑀲𑁆𑀲 𑀯𑀸 𑀲𑁄𑀫𑀦𑀲𑁆𑀲𑀁 𑀧𑀯𑁂𑀤𑁂𑀦𑁆𑀢𑀲𑁆𑀲 𑀲𑀩𑁆𑀩𑁂𑀲𑀁 𑀫𑀦𑀁 𑀕𑀡𑁆𑀳𑀦𑁆𑀢𑁄 𑀧𑀝𑀺𑀕𑁆𑀕𑀳𑁂𑀢𑀼𑀁 ¶ 𑀲𑀓𑁆𑀓𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀅𑀝𑁆𑀞𑀸𑀭𑀲 𑀬𑁄𑀚𑀦𑀸𑀦𑀺 𑀅𑀯𑀢𑁆𑀣𑀭𑀫𑀸𑀦𑀁 𑀕𑀘𑁆𑀙𑀦𑁆𑀢𑀺𑀁 𑀘𑀦𑁆𑀤𑀪𑀸𑀕𑀫𑀳𑀸𑀦𑀤𑀺𑀁 𑀓𑀼𑀲𑀼𑀫𑁆𑀪𑀸 𑀯𑀸 𑀓𑀦𑁆𑀤𑀭𑀸 𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀫𑀳𑀸𑀲𑀫𑀼𑀤𑁆𑀤𑁄𑀯 𑀢𑀁 𑀲𑀫𑁆𑀧𑀝𑀺𑀘𑁆𑀙𑀢𑀺. 𑀫𑀳𑀸𑀲𑀫𑀼𑀤𑁆𑀤𑁄 𑀳𑀺 𑀢𑀺𑀝𑁆𑀞𑀢𑀼 𑀘𑀦𑁆𑀤𑀪𑀸𑀕𑀸, 𑀏𑀯𑀭𑀽𑀧𑀸𑀦𑀁 𑀦𑀤𑀻𑀦𑀁 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀲𑀢𑀲𑀳𑀲𑁆𑀲𑀫𑁆𑀧𑀺 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀦 𑀘𑀲𑁆𑀲 𑀢𑁂𑀦 𑀊𑀦𑀢𑁆𑀢𑀁 𑀯𑀸 𑀧𑀽𑀭𑀢𑁆𑀢𑀁 𑀯𑀸 𑀧𑀜𑁆𑀜𑀸𑀬𑀢𑀺, 𑀏𑀯𑀫𑁂𑀯 𑀲𑀢𑁆𑀣𑀸 𑀫𑀸𑀤𑀺𑀲𑀲𑁆𑀲 𑀲𑀫𑀡𑀲𑀢𑀲𑁆𑀲 𑀲𑀫𑀡𑀲𑀳𑀲𑁆𑀲𑀲𑁆𑀲 𑀲𑀫𑀡𑀲𑀢𑀲𑀳𑀲𑁆𑀲𑀲𑁆𑀲 𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀧𑀯𑁂𑀤𑁂𑀦𑁆𑀢𑀲𑁆𑀲 𑀲𑀩𑁆𑀩𑁂𑀲𑀁 𑀫𑀦𑀁 𑀕𑀡𑁆𑀳𑀦𑁆𑀢𑁄 𑀧𑀝𑀺𑀕𑁆𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀲𑁂𑀲𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀘𑀦𑁆𑀤𑀪𑀸𑀕𑀁 𑀓𑀼𑀲𑀼𑀫𑁆𑀪𑀓𑀦𑁆𑀤𑀭𑀸 𑀯𑀺𑀬 𑀫𑀫 𑀲𑁄𑀫𑀦𑀲𑁆𑀲𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺 ¶ . 𑀳𑀦𑁆𑀤𑀸𑀳𑀁 𑀫𑀫 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀲𑀢𑁆𑀣𑀼𑀦𑁄𑀯 𑀆𑀭𑁄𑀘𑁂𑀫𑀻𑀢𑀺 𑀧𑀮𑁆𑀮𑀗𑁆𑀓𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀘𑀫𑁆𑀫𑀓𑁆𑀔𑀡𑁆𑀟𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀆𑀤𑀸𑀬 𑀲𑀸𑀬𑀦𑁆𑀳𑀲𑀫𑀬𑁂 𑀧𑀼𑀧𑁆𑀨𑀸𑀦𑀁 𑀯𑀡𑁆𑀝𑀢𑁄 𑀙𑀺𑀚𑁆𑀚𑀺𑀢𑁆𑀯𑀸 𑀧𑀕𑁆𑀖𑀭𑀡𑀓𑀸𑀮𑁂 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑁄𑀫𑀦𑀲𑁆𑀲𑀁 𑀧𑀯𑁂𑀤𑁂𑀦𑁆𑀢𑁄 𑀏𑀯𑀁𑀧𑀲𑀦𑁆𑀦𑁄 𑀅𑀳𑀁, 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀯𑀁𑀧𑀲𑀦𑁆𑀦𑁄𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀲𑀤𑁆𑀥𑁄, 𑀏𑀯𑀁 𑀲𑀤𑁆𑀤𑀳𑀸𑀫𑀻𑀢𑀺 𑀅𑀢𑁆𑀣𑁄. 𑀪𑀺𑀬𑁆𑀬𑁄𑀪𑀺𑀜𑁆𑀜𑀢𑀭𑁄𑀢𑀺 𑀪𑀺𑀬𑁆𑀬𑀢𑀭𑁄 𑀅𑀪𑀺𑀜𑁆𑀜𑀸𑀢𑁄, 𑀪𑀺𑀬𑁆𑀬𑀢𑀭𑀸𑀪𑀺𑀜𑁆𑀜𑁄 𑀯𑀸, 𑀉𑀢𑁆𑀢𑀭𑀺𑀢𑀭𑀜𑀸𑀡𑁄𑀢𑀺 𑀅𑀢𑁆𑀣𑁄. 𑀲𑀫𑁆𑀩𑁄𑀥𑀺𑀬𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂 𑀯𑀸, 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑁂𑀯 𑀳𑀺 𑀩𑀼𑀤𑁆𑀥𑀕𑀼𑀡𑀸 𑀦𑀺𑀧𑁆𑀧𑀤𑁂𑀲𑀸 𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀤𑁆𑀯𑁂 𑀳𑀺 𑀅𑀕𑁆𑀕𑀲𑀸𑀯𑀓𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑁂𑀯 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁 𑀧𑀝𑀺𑀮𑀪𑀦𑁆𑀢𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁. 𑀩𑀼𑀤𑁆𑀥𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘𑁂𑀯 𑀲𑀓𑀮𑁂 𑀘 𑀩𑀼𑀤𑁆𑀥𑀕𑀼𑀡𑁂. 𑀲𑀩𑁆𑀩𑀜𑁆𑀳𑀺 𑀦𑁂𑀲𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑁂𑀯 𑀇𑀚𑁆𑀛𑀢𑀺. 𑀢𑀲𑁆𑀫𑀸 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀲𑀫𑁆𑀩𑁄𑀥𑀺 𑀦𑀸𑀫 𑀳𑁄𑀢𑀺. 𑀢𑁂𑀦 𑀉𑀢𑁆𑀢𑀭𑀺𑀢𑀭𑁄 𑀪𑀕𑀯𑀢𑀸 𑀦𑀢𑁆𑀣𑀺. 𑀢𑁂𑀦𑀸𑀳 ‘‘𑀪𑀕𑀯𑀢𑀸 𑀪𑀺𑀬𑁆𑀬𑁄𑀪𑀺𑀜𑁆𑀜𑀢𑀭𑁄 𑀬𑀤𑀺𑀤𑀁 𑀲𑀫𑁆𑀩𑁄𑀥𑀺𑀬’’𑀦𑁆𑀢𑀺.

𑁧𑁪𑁨. 𑀉𑀴𑀸𑀭𑀸𑀢𑀺 𑀲𑁂𑀝𑁆𑀞𑀸. 𑀅𑀬𑀜𑁆𑀳𑀺 𑀉𑀴𑀸𑀭𑀲𑀤𑁆𑀤𑁄 ‘‘𑀉𑀴𑀸𑀭𑀸𑀦𑀺 𑀔𑀸𑀤𑀦𑀻𑀬𑀸𑀦𑀺 𑀔𑀸𑀤𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁬𑁬) 𑀫𑀥𑀼𑀭𑁂 𑀆𑀕𑀘𑁆𑀙𑀢𑀺. ‘‘𑀉𑀴𑀸𑀭𑀸𑀬 𑀔𑀮𑀼 𑀪𑀯𑀁, 𑀯𑀘𑁆𑀙𑀸𑀬𑀦𑁄 ¶ , 𑀲𑀫𑀡𑀁 𑀕𑁄𑀢𑀫𑀁 𑀧𑀲𑀁𑀲𑀸𑀬 𑀧𑀲𑀁𑀲𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁨𑁮𑁦) 𑀲𑁂𑀝𑁆𑀞𑁂. ‘‘𑀅𑀧𑁆𑀧𑀫𑀸𑀡𑁄 𑀉𑀴𑀸𑀭𑁄 𑀑𑀪𑀸𑀲𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁨) 𑀯𑀺𑀧𑀼𑀮𑁂. 𑀲𑁆𑀯𑀸𑀬𑀫𑀺𑀥 𑀲𑁂𑀝𑁆𑀞𑁂 𑀆𑀕𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀉𑀴𑀸𑀭𑀸𑀢𑀺 𑀲𑁂𑀝𑁆𑀞𑀸’’𑀢𑀺. 𑀆𑀲𑀪𑀻𑀢𑀺 𑀉𑀲𑀪𑀲𑁆𑀲 𑀯𑀸𑀘𑀸𑀲𑀤𑀺𑀲𑀻 𑀅𑀘𑀮𑀸 𑀅𑀲𑀫𑁆𑀧𑀯𑁂𑀥𑀻. 𑀏𑀓𑀁𑀲𑁄 𑀕𑀳𑀺𑀢𑁄𑀢𑀺 𑀅𑀦𑀼𑀲𑁆𑀲𑀯𑁂𑀦 𑀯𑀸 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀯𑀸 𑀇𑀢𑀺𑀓𑀺𑀭𑀸𑀬 ¶ 𑀯𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦 𑀯𑀸 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦 𑀯𑀸 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀯𑀸 𑀢𑀓𑁆𑀓𑀳𑁂𑀢𑀼 𑀯𑀸 𑀦𑀬𑀳𑁂𑀢𑀼 𑀯𑀸 𑀅𑀓𑀣𑁂𑀢𑁆𑀯𑀸 𑀧𑀘𑁆𑀘𑀓𑁆𑀔𑀢𑁄 𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀯𑀺𑀬 𑀏𑀓𑀁𑀲𑁄 𑀕𑀳𑀺𑀢𑁄, 𑀲𑀦𑁆𑀦𑀺𑀝𑁆𑀞𑀸𑀦𑀓𑀣𑀸𑀯 𑀓𑀣𑀺𑀢𑀸𑀢𑀺 𑀅𑀢𑁆𑀣𑁄.

𑀲𑀻𑀳𑀦𑀸𑀤𑁄𑀢𑀺 𑀲𑁂𑀝𑁆𑀞𑀦𑀸𑀤𑁄, 𑀦𑁂𑀯 𑀤𑀦𑁆𑀥𑀸𑀬𑀦𑁆𑀢𑁂𑀦 𑀦 𑀕𑀕𑁆𑀕𑀭𑀸𑀬𑀦𑁆𑀢𑁂𑀦 𑀲𑀻𑀳𑁂𑀦 𑀯𑀺𑀬 𑀉𑀢𑁆𑀢𑀫𑀦𑀸𑀤𑁄 𑀦𑀤𑀺𑀢𑁄𑀢𑀺 𑀅𑀢𑁆𑀣𑁄. 𑀓𑀺𑀁 𑀢𑁂 𑀲𑀸𑀭𑀺𑀧𑀼𑀢𑁆𑀢𑀸𑀢𑀺 𑀇𑀫𑀁 𑀤𑁂𑀲𑀦𑀁 𑀓𑀲𑁆𑀫𑀸 𑀆𑀭𑀪𑀻𑀢𑀺? 𑀅𑀦𑀼𑀬𑁄𑀕𑀤𑀸𑀧𑀦𑀢𑁆𑀣𑀁. 𑀏𑀓𑀘𑁆𑀘𑁄 𑀳𑀺 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀻𑀳𑀦𑀸𑀤𑁂 𑀅𑀦𑀼𑀬𑁄𑀕𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀦𑀺𑀖𑀁𑀲𑀦𑀁 𑀦𑀓𑁆𑀔𑀫𑀢𑀺, 𑀮𑁂𑀧𑁂 𑀧𑀢𑀺𑀢𑀫𑀓𑁆𑀓𑀝𑁄 𑀯𑀺𑀬 𑀳𑁄𑀢𑀺. 𑀬𑀣𑀸 𑀥𑀫𑀫𑀸𑀦𑀁 𑀅𑀧𑀭𑀺𑀲𑀼𑀤𑁆𑀥𑀮𑁄𑀳𑀁 𑀛𑀸𑀬𑀺𑀢𑁆𑀯𑀸 𑀛𑀸𑀫𑀅𑀗𑁆𑀕𑀸𑀭𑁄 𑀳𑁄𑀢𑀺, 𑀏𑀯𑀁 𑀛𑀸𑀫𑀗𑁆𑀕𑀸𑀭𑁄 𑀯𑀺𑀬 𑀳𑁄𑀢𑀺 ¶ . 𑀏𑀓𑁄 𑀲𑀻𑀳𑀦𑀸𑀤𑁂 𑀅𑀦𑀼𑀬𑁄𑀕𑀁 𑀤𑀸𑀧𑀺𑀬𑀫𑀸𑀦𑁄 𑀤𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀦𑀺𑀖𑀁𑀲𑀦𑀁 𑀔𑀫𑀢𑀺, 𑀥𑀫𑀫𑀸𑀦𑀁 𑀦𑀺𑀤𑁆𑀤𑁄𑀲𑀚𑀸𑀢𑀭𑀽𑀧𑀁 𑀯𑀺𑀬 𑀅𑀥𑀺𑀓𑀢𑀭𑀁 𑀲𑁄𑀪𑀢𑀺, 𑀢𑀸𑀤𑀺𑀲𑁄 𑀣𑁂𑀭𑁄. 𑀢𑁂𑀦 𑀦𑀁 𑀪𑀕𑀯𑀸 ‘‘𑀅𑀦𑀼𑀬𑁄𑀕𑀓𑁆𑀔𑀫𑁄 𑀅𑀬’’𑀦𑁆𑀢𑀺 𑀜𑀢𑁆𑀯𑀸 𑀲𑀻𑀳𑀦𑀸𑀤𑁂 𑀅𑀦𑀼𑀬𑁄𑀕𑀤𑀸𑀧𑀦𑀢𑁆𑀣𑀁 𑀇𑀫𑀫𑁆𑀧𑀺 𑀤𑁂𑀲𑀦𑀁 𑀆𑀭𑀪𑀺.

𑀢𑀢𑁆𑀣 𑀲𑀩𑁆𑀩𑁂 𑀢𑁂𑀢𑀺 𑀲𑀩𑁆𑀩𑁂 𑀢𑁂 𑀢𑀬𑀸. 𑀏𑀯𑀁𑀲𑀻𑀮𑀸𑀢𑀺𑀆𑀤𑀻𑀲𑀼 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀲𑁂𑀦 𑀲𑀻𑀮𑀸𑀤𑀻𑀦𑀺 𑀧𑀼𑀘𑁆𑀙𑀢𑀺. 𑀢𑁂𑀲𑀁 𑀯𑀺𑀢𑁆𑀣𑀸𑀭𑀓𑀣𑀸 𑀫𑀳𑀸𑀧𑀤𑀸𑀦𑁂 𑀓𑀣𑀺𑀢𑀸𑀯.

𑀓𑀺𑀁 𑀧𑀦 𑀢𑁂, 𑀲𑀸𑀭𑀺𑀧𑀼𑀢𑁆𑀢, 𑀬𑁂 𑀢𑁂 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑀻𑀢𑀸 𑀘 𑀢𑀸𑀯 𑀦𑀺𑀭𑀼𑀤𑁆𑀥𑀸, 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀁 𑀕𑀢𑀸 𑀤𑀻𑀧𑀲𑀺𑀔𑀸 𑀯𑀺𑀬 𑀦𑀺𑀩𑁆𑀩𑀼𑀢𑀸, 𑀏𑀯𑀁 𑀦𑀺𑀭𑀼𑀤𑁆𑀥𑁂 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀁 𑀕𑀢𑁂 𑀢𑁆𑀯𑀁 𑀓𑀣𑀁 𑀚𑀸𑀦𑀺𑀲𑁆𑀲𑀲𑀺, 𑀅𑀦𑀸𑀕𑀢𑀩𑀼𑀤𑁆𑀥𑀸𑀦𑀁 𑀧𑀦 𑀕𑀼𑀡𑀸 𑀓𑀺𑀦𑁆𑀢𑀺 𑀢𑀬𑀸 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀺𑀤𑀺𑀢𑀸𑀢𑀺 𑀧𑀼𑀘𑁆𑀙𑀦𑁆𑀢𑁄 𑀏𑀯𑀫𑀸𑀳. 𑀓𑀺𑀁 𑀧𑀦 𑀢𑁂, 𑀲𑀸𑀭𑀺𑀧𑀼𑀢𑁆𑀢, 𑀅𑀳𑀁 𑀏𑀢𑀭𑀳𑀻𑀢𑀺 𑀅𑀦𑀸𑀕𑀢𑀸𑀧𑀺 𑀩𑀼𑀤𑁆𑀥𑀸 𑀅𑀚𑀸𑀢𑀸 𑀅𑀦𑀺𑀩𑁆𑀩𑀢𑁆𑀢𑀸 𑀅𑀦𑀼𑀧𑁆𑀧𑀦𑁆𑀦𑀸, 𑀢𑁂𑀧𑀺 𑀓𑀣𑀁 𑀢𑁆𑀯𑀁 𑀚𑀸𑀦𑀺𑀲𑁆𑀲𑀲𑀺? 𑀢𑁂𑀲𑀜𑁆𑀳𑀺 𑀚𑀸𑀦𑀦𑀁 𑀅𑀧𑀤𑁂 𑀆𑀓𑀸𑀲𑁂 𑀧𑀤𑀤𑀲𑁆𑀲𑀦𑀁 𑀯𑀺𑀬 𑀳𑁄𑀢𑀺. 𑀇𑀤𑀸𑀦𑀺 𑀫𑀬𑀸 𑀲𑀤𑁆𑀥𑀺𑀁 𑀏𑀓𑀯𑀺𑀳𑀸𑀭𑁂 𑀯𑀲𑀲𑀺, 𑀏𑀓𑀢𑁄 𑀪𑀺𑀓𑁆𑀔𑀸𑀬 𑀘𑀭𑀲𑀺, 𑀥𑀫𑁆𑀫𑀤𑁂𑀲𑀦𑀸𑀓𑀸𑀮𑁂 𑀤𑀓𑁆𑀔𑀺𑀡𑀧𑀲𑁆𑀲𑁂 𑀦𑀺𑀲𑀻𑀤𑀲𑀺, 𑀓𑀺𑀁 𑀧𑀦 𑀫𑀬𑁆𑀳𑀁 𑀕𑀼𑀡𑀸 𑀅𑀢𑁆𑀢𑀦𑁄 𑀘𑁂𑀢𑀲𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀺𑀤𑀺𑀢𑀸 𑀢𑀬𑀸𑀢𑀺 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀏𑀯𑀫𑀸𑀳.

𑀣𑁂𑀭𑁄 𑀧𑀦 𑀧𑀼𑀘𑁆𑀙𑀺𑀢𑁂 𑀧𑀼𑀘𑁆𑀙𑀺𑀢𑁂 ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀣𑁂𑀭𑀲𑁆𑀲 𑀘 𑀯𑀺𑀤𑀺𑀢𑀫𑁆𑀧𑀺 𑀅𑀢𑁆𑀣𑀺 ¶ 𑀅𑀯𑀺𑀤𑀺𑀢𑀫𑁆𑀧𑀺 𑀅𑀢𑁆𑀣𑀺, 𑀓𑀺𑀁 𑀲𑁄 𑀅𑀢𑁆𑀢𑀦𑁄 𑀯𑀺𑀤𑀺𑀢𑀝𑁆𑀞𑀸𑀦𑁂 𑀧𑀝𑀺𑀓𑁆𑀔𑁂𑀧𑀁 𑀓𑀭𑁄𑀢𑀺, 𑀅𑀯𑀺𑀤𑀺𑀢𑀝𑁆𑀞𑀸𑀦𑁂𑀢𑀺? 𑀯𑀺𑀤𑀺𑀢𑀝𑁆𑀞𑀸𑀦𑁂 𑀦 𑀓𑀭𑁄𑀢𑀺, 𑀅𑀯𑀺𑀤𑀺𑀢𑀝𑁆𑀞𑀸𑀦𑁂𑀬𑁂𑀯 𑀓𑀭𑁄𑀢𑀻𑀢𑀺. 𑀣𑁂𑀭𑁄 𑀓𑀺𑀭 𑀅𑀦𑀼𑀬𑁄𑀕𑁂 𑀆𑀭𑀤𑁆𑀥𑁂𑀬𑁂𑀯 𑀅𑀜𑁆𑀜𑀸𑀲𑀺. 𑀦 𑀅𑀬𑀁 𑀅𑀦𑀼𑀬𑁄𑀕𑁄 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑁂, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂 𑀅𑀬𑀁 𑀅𑀦𑀼𑀬𑁄𑀕𑁄𑀢𑀺 𑀅𑀢𑁆𑀢𑀦𑁄 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑁂 𑀧𑀝𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸 𑀅𑀯𑀺𑀤𑀺𑀢𑀝𑁆𑀞𑀸𑀦𑁂 ¶ 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂 𑀧𑀝𑀺𑀓𑁆𑀔𑁂𑀧𑀁 𑀓𑀭𑁄𑀢𑀺. 𑀢𑁂𑀦 𑀇𑀤𑀫𑁆𑀧𑀺 𑀤𑀻𑀧𑁂𑀢𑀺 ‘‘𑀪𑀕𑀯𑀸 𑀫𑀬𑁆𑀳𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀩𑀼𑀤𑁆𑀥𑀸𑀦𑀁 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀓𑀸𑀭𑀡𑀚𑀸𑀦𑀦𑀲𑀫𑀢𑁆𑀣𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀦𑀢𑁆𑀣𑀻’’𑀢𑀺.

𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀅𑀢𑀻𑀢𑀸𑀤𑀺𑀪𑁂𑀤𑁂𑀲𑀼 𑀩𑀼𑀤𑁆𑀥𑁂𑀲𑀼. 𑀅𑀣 𑀓𑀺𑀜𑁆𑀘𑀭𑀳𑀻𑀢𑀺 𑀅𑀣 𑀓𑀲𑁆𑀫𑀸 𑀏𑀯𑀁 𑀜𑀸𑀡𑁂 𑀅𑀲𑀢𑀺 𑀢𑀬𑀸 𑀏𑀯𑀁 𑀓𑀣𑀺𑀢𑀦𑁆𑀢𑀺 𑀯𑀤𑀢𑀺.

𑁧𑁪𑁩. 𑀥𑀫𑁆𑀫𑀦𑁆𑀯𑀬𑁄𑀢𑀺 𑀥𑀫𑁆𑀫𑀲𑁆𑀲 𑀧𑀘𑁆𑀘𑀓𑁆𑀔𑀢𑁄 𑀜𑀸𑀡𑀲𑁆𑀲 𑀅𑀦𑀼𑀬𑁄𑀕𑀁 𑀅𑀦𑀼𑀕𑀦𑁆𑀢𑁆𑀯𑀸 𑀉𑀧𑁆𑀧𑀦𑁆𑀦𑀁 𑀅𑀦𑀼𑀫𑀸𑀦𑀜𑀸𑀡𑀁 𑀦𑀬𑀕𑁆𑀕𑀸𑀳𑁄 𑀯𑀺𑀤𑀺𑀢𑁄. 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑁂 𑀞𑀢𑁆𑀯𑀸𑀯 𑀇𑀫𑀺𑀦𑀸𑀯 ¶ 𑀆𑀓𑀸𑀭𑁂𑀦 𑀚𑀸𑀦𑀸𑀫𑀺 𑀪𑀕𑀯𑀸𑀢𑀺 𑀯𑀤𑀢𑀺. 𑀣𑁂𑀭𑀲𑁆𑀲 𑀳𑀺 𑀦𑀬𑀕𑁆𑀕𑀸𑀳𑁄 𑀅𑀧𑁆𑀧𑀫𑀸𑀡𑁄 𑀅𑀧𑀭𑀺𑀬𑀦𑁆𑀢𑁄. 𑀬𑀣𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀫𑀸𑀡𑀁 𑀯𑀸 𑀧𑀭𑀺𑀬𑀦𑁆𑀢𑁄 𑀯𑀸 𑀦𑀢𑁆𑀣𑀺, 𑀏𑀯𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀦𑀬𑀕𑁆𑀕𑀸𑀳𑀲𑁆𑀲. 𑀢𑁂𑀦 𑀲𑁄 ‘‘𑀇𑀫𑀺𑀦𑀸 𑀏𑀯𑀁𑀯𑀺𑀥𑁄, 𑀇𑀫𑀺𑀦𑀸 𑀅𑀦𑀼𑀢𑁆𑀢𑀭𑁄 𑀲𑀢𑁆𑀣𑀸’’𑀢𑀺 𑀚𑀸𑀦𑀸𑀢𑀺. 𑀣𑁂𑀭𑀲𑁆𑀲 𑀳𑀺 𑀦𑀬𑀕𑁆𑀕𑀸𑀳𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀕𑀢𑀺𑀓𑁄 𑀏𑀯. 𑀇𑀤𑀸𑀦𑀺 𑀢𑀁 𑀦𑀬𑀕𑁆𑀕𑀸𑀳𑀁 𑀧𑀸𑀓𑀝𑀁 𑀓𑀸𑀢𑀼𑀁 𑀉𑀧𑀫𑀸𑀬 𑀤𑀲𑁆𑀲𑁂𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑁆𑀫𑀸 𑀫𑀚𑁆𑀛𑀺𑀫𑀧𑀤𑁂𑀲𑁂 𑀦𑀕𑀭𑀲𑁆𑀲 𑀉𑀤𑁆𑀥𑀸𑀧𑀧𑀸𑀓𑀸𑀭𑀸𑀤𑀻𑀦𑀺 𑀣𑀺𑀭𑀸𑀦𑀺 𑀯𑀸 𑀳𑁄𑀦𑁆𑀢𑀼, 𑀤𑀼𑀩𑁆𑀩𑀮𑀸𑀦𑀺 𑀯𑀸, 𑀲𑀩𑁆𑀩𑀲𑁄 𑀯𑀸 𑀧𑀦 𑀫𑀸 𑀳𑁄𑀦𑁆𑀢𑀼, 𑀘𑁄𑀭𑀸𑀲𑀗𑁆𑀓𑀸 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀘𑁆𑀘𑀦𑁆𑀢𑀺𑀫𑀦𑀕𑀭𑀦𑁆𑀢𑀺 𑀆𑀳. 𑀤𑀴𑁆𑀳𑀼𑀤𑁆𑀥𑀸𑀧𑀦𑁆𑀢𑀺 𑀣𑀺𑀭𑀧𑀸𑀓𑀸𑀭𑀧𑀸𑀤𑀁. 𑀤𑀴𑁆𑀳𑀧𑀸𑀓𑀸𑀭𑀢𑁄𑀭𑀡𑀦𑁆𑀢𑀺 𑀣𑀺𑀭𑀧𑀸𑀓𑀸𑀭𑀜𑁆𑀘𑁂𑀯 𑀣𑀺𑀭𑀧𑀺𑀝𑁆𑀞𑀲𑀗𑁆𑀖𑀸𑀝𑀜𑁆𑀘. 𑀏𑀓𑀤𑁆𑀯𑀸𑀭𑀦𑁆𑀢𑀺 𑀓𑀲𑁆𑀫𑀸 𑀆𑀳? 𑀩𑀳𑀼𑀤𑁆𑀯𑀸𑀭𑁂 𑀳𑀺 𑀦𑀕𑀭𑁂 𑀩𑀳𑀽𑀳𑀺 𑀧𑀡𑁆𑀟𑀺𑀢𑀤𑁄𑀯𑀸𑀭𑀺𑀓𑁂𑀳𑀺 𑀪𑀯𑀺𑀢𑀩𑁆𑀩𑀁. 𑀏𑀓𑀤𑁆𑀯𑀸𑀭𑁂 𑀏𑀓𑁄𑀯 𑀯𑀝𑁆𑀝𑀢𑀺. 𑀣𑁂𑀭𑀲𑁆𑀲 𑀘 𑀧𑀜𑁆𑀜𑀸𑀬 𑀲𑀤𑀺𑀲𑁄 𑀅𑀜𑁆𑀜𑁄 𑀦𑀢𑁆𑀣𑀺. 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀧𑀡𑁆𑀟𑀺𑀢𑀪𑀸𑀯𑀲𑁆𑀲 𑀑𑀧𑀫𑁆𑀫𑀢𑁆𑀣𑀁 𑀏𑀓𑀁𑀬𑁂𑀯 𑀤𑁄𑀯𑀸𑀭𑀺𑀓𑀁 𑀤𑀲𑁆𑀲𑁂𑀢𑀼𑀁 𑀏𑀓𑀤𑁆𑀯𑀸𑀭’’𑀦𑁆𑀢𑀺 𑀆𑀳. 𑀧𑀡𑁆𑀟𑀺𑀢𑁄𑀢𑀺 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀩𑁆𑀬𑀢𑁆𑀢𑁄𑀢𑀺 𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀯𑀺𑀲𑀤𑀜𑀸𑀡𑁄. 𑀫𑁂𑀥𑀸𑀯𑀻𑀢𑀺 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀜𑁆𑀜𑀸𑀲𑀗𑁆𑀔𑀸𑀢𑀸𑀬 𑀫𑁂𑀥𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀅𑀦𑀼𑀧𑀭𑀺𑀬𑀸𑀬𑀧𑀣𑀦𑁆𑀢𑀺 𑀅𑀦𑀼𑀧𑀭𑀺𑀬𑀸𑀬𑀦𑀸𑀫𑀓𑀁 𑀧𑀸𑀓𑀸𑀭𑀫𑀕𑁆𑀕𑀁. 𑀧𑀸𑀓𑀸𑀭𑀲𑀦𑁆𑀥𑀺𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀇𑀝𑁆𑀞𑀓𑀸𑀦𑀁 𑀅𑀧𑀕𑀢𑀝𑁆𑀞𑀸𑀦𑀁. 𑀧𑀸𑀓𑀸𑀭𑀯𑀺𑀯𑀭𑀦𑁆𑀢𑀺 𑀧𑀸𑀓𑀸𑀭𑀲𑁆𑀲 𑀙𑀺𑀦𑁆𑀦𑀝𑁆𑀞𑀸𑀦𑀁.

𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂𑀢𑀺 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 𑀘𑀺𑀢𑁆𑀢𑀁 𑀉𑀧𑀓𑁆𑀓𑀺𑀮𑁂𑀲𑁂𑀦𑁆𑀢𑀺 𑀓𑀺𑀮𑀺𑀝𑁆𑀞𑀁 ¶ 𑀓𑀭𑁄𑀦𑁆𑀢𑀺 𑀉𑀧𑀢𑀸𑀧𑁂𑀦𑁆𑀢𑀺 𑀯𑀺𑀩𑀸𑀥𑁂𑀦𑁆𑀢𑀺, 𑀢𑀲𑁆𑀫𑀸 ‘‘𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂𑀢𑀺 𑀦𑀻𑀯𑀭𑀡𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀼𑀧𑁆𑀧𑀦𑁆𑀦𑀸𑀬 𑀧𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀤𑁂𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸𑀬 𑀧𑀜𑁆𑀜𑀸𑀬 𑀯𑀟𑁆𑀠𑀺𑀢𑀼𑀁 𑀦 ¶ 𑀤𑁂𑀦𑁆𑀢𑀺, 𑀢𑀲𑁆𑀫𑀸 ‘‘𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑀸𑀢𑀺 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀝𑁆𑀞𑀼 𑀞𑀧𑀺𑀢𑀘𑀺𑀢𑁆𑀢𑀸 𑀳𑀼𑀢𑁆𑀯𑀸. 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀬𑀣𑀸𑀪𑀽𑀢𑀦𑁆𑀢𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀬𑀣𑀸𑀲𑀪𑀸𑀯𑁂𑀦 𑀪𑀸𑀯𑁂𑀢𑁆𑀯𑀸. 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀦𑁆𑀢𑀺 𑀅𑀭𑀳𑀢𑁆𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀯𑀸 𑀧𑀝𑀺𑀯𑀺𑀚𑁆𑀛𑀺𑀁𑀲𑀽𑀢𑀺 𑀤𑀲𑁆𑀲𑁂𑀢𑀺.

𑀅𑀧𑀺𑀘𑁂𑀢𑁆𑀣 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀯𑀺𑀧𑀲𑁆𑀲𑀦𑀸. 𑀲𑀫𑁆𑀩𑁄𑀚𑁆𑀛𑀗𑁆𑀕𑀸 𑀫𑀕𑁆𑀕𑁄. 𑀅𑀦𑀼𑀢𑁆𑀢𑀭𑀸𑀲𑀫𑁆𑀫𑀸𑀲𑀫𑁆𑀩𑁄𑀥𑀺 𑀅𑀭𑀳𑀢𑁆𑀢𑀁. 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀯𑀸 𑀫𑀕𑁆𑀕𑀸𑀢𑀺 𑀯𑀸 𑀩𑁄𑀚𑁆𑀛𑀗𑁆𑀕𑀫𑀺𑀲𑁆𑀲𑀓𑀸. 𑀲𑀫𑁆𑀫𑀸𑀲𑀫𑁆𑀩𑁄𑀥𑀺 𑀅𑀭𑀳𑀢𑁆𑀢𑀫𑁂𑀯. 𑀤𑀻𑀖𑀪𑀸𑀡𑀓𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦𑀸𑀳 ‘‘𑀲𑀢𑀺𑀧𑀝𑁆𑀞𑀸𑀦𑁂 ¶ 𑀯𑀺𑀧𑀲𑁆𑀲𑀦𑀸𑀢𑀺 𑀕𑀳𑁂𑀢𑁆𑀯𑀸 𑀩𑁄𑀚𑁆𑀛𑀗𑁆𑀕𑁂 𑀫𑀕𑁆𑀕𑁄 𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘𑀸𑀢𑀺 𑀕𑀳𑀺𑀢𑁂 𑀲𑀼𑀦𑁆𑀤𑀭𑁄 𑀧𑀜𑁆𑀳𑁄 𑀪𑀯𑁂𑀬𑁆𑀬, 𑀦 𑀧𑀦𑁂𑀯𑀁 𑀕𑀳𑀺𑀢’’𑀦𑁆𑀢𑀺. 𑀇𑀢𑀺 𑀣𑁂𑀭𑁄 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁 𑀦𑀻𑀯𑀭𑀡𑀧𑁆𑀧𑀳𑀸𑀦𑁂 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀬 𑀲𑀫𑁆𑀩𑁄𑀥𑀺𑀬𑀜𑁆𑀘 𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡𑀭𑀚𑀢𑀸𑀦𑀁 𑀯𑀺𑀬 𑀦𑀸𑀦𑀢𑁆𑀢𑀸𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀇𑀥 𑀞𑀢𑁆𑀯𑀸 𑀉𑀧𑀫𑀸 𑀲𑀁𑀲𑀦𑁆𑀤𑁂𑀢𑀩𑁆𑀩𑀸 𑁋 𑀆𑀬𑀲𑁆𑀫𑀸 𑀳𑀺 𑀲𑀸𑀭𑀺𑀧𑀼𑀢𑁆𑀢𑁄 𑀧𑀘𑁆𑀘𑀦𑁆𑀢𑀦𑀕𑀭𑀁 𑀤𑀲𑁆𑀲𑁂𑀲𑀺, 𑀧𑀸𑀓𑀸𑀭𑀁 𑀤𑀲𑁆𑀲𑁂𑀲𑀺, 𑀧𑀭𑀺𑀬𑀸𑀬𑀧𑀣𑀁 𑀤𑀲𑁆𑀲𑁂𑀲𑀺, 𑀤𑁆𑀯𑀸𑀭𑀁 𑀤𑀲𑁆𑀲𑁂𑀲𑀺, 𑀧𑀡𑁆𑀟𑀺𑀢𑀤𑁄𑀯𑀸𑀭𑀺𑀓𑀁 𑀤𑀲𑁆𑀲𑁂𑀲𑀺, 𑀦𑀕𑀭𑀁 𑀧𑀯𑁂𑀲𑀦𑀓𑀦𑀺𑀓𑁆𑀔𑀫𑀦𑀓𑁂 𑀑𑀴𑀸𑀭𑀺𑀓𑁂 𑀧𑀸𑀡𑁂 𑀤𑀲𑁆𑀲𑁂𑀲𑀺, 𑀧𑀡𑁆𑀟𑀺𑀢𑀤𑁄𑀯𑀸𑀭𑀺𑀓𑀲𑁆𑀲 𑀢𑁂𑀲𑀁 𑀧𑀸𑀡𑀸𑀦𑀁 𑀧𑀸𑀓𑀝𑀪𑀸𑀯𑀜𑁆𑀘 𑀤𑀲𑁆𑀲𑁂𑀲𑀺. 𑀢𑀢𑁆𑀣 𑀓𑀺𑀁 𑀓𑁂𑀦 𑀲𑀤𑀺𑀲𑀦𑁆𑀢𑀺 𑀘𑁂. 𑀦𑀕𑀭𑀁 𑀯𑀺𑀬 𑀳𑀺 𑀦𑀺𑀩𑁆𑀩𑀸𑀦𑀁, 𑀧𑀸𑀓𑀸𑀭𑁄 𑀯𑀺𑀬 𑀲𑀻𑀮𑀁, 𑀧𑀭𑀺𑀬𑀸𑀬𑀧𑀣𑁄 𑀯𑀺𑀬 𑀳𑀺𑀭𑀻, 𑀤𑁆𑀯𑀸𑀭𑀁 𑀯𑀺𑀬 𑀅𑀭𑀺𑀬𑀫𑀕𑁆𑀕𑁄, 𑀧𑀡𑁆𑀟𑀺𑀢𑀤𑁄𑀯𑀸𑀭𑀺𑀓𑁄 𑀯𑀺𑀬 𑀥𑀫𑁆𑀫𑀲𑁂𑀦𑀸𑀧𑀢𑀺, 𑀦𑀕𑀭𑀧𑁆𑀧𑀯𑀺𑀲𑀦𑀓𑀦𑀺𑀓𑁆𑀔𑀫𑀦𑀓𑀑𑀴𑀸𑀭𑀺𑀓𑀧𑀸𑀡𑀸 𑀯𑀺𑀬 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀩𑀼𑀤𑁆𑀥𑀸, 𑀤𑁄𑀯𑀸𑀭𑀺𑀓𑀲𑁆𑀲 𑀢𑁂𑀲𑀁 𑀧𑀸𑀡𑀸𑀦𑀁 𑀧𑀸𑀓𑀝𑀪𑀸𑀯𑁄 𑀯𑀺𑀬 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀩𑀼𑀤𑁆𑀥𑀸𑀦𑀁 𑀲𑀻𑀮𑀲𑀫𑀣𑀸𑀤𑀻𑀳𑀺 𑀧𑀸𑀓𑀝𑀪𑀸𑀯𑁄. 𑀏𑀢𑁆𑀢𑀸𑀯𑀢𑀸 𑀣𑁂𑀭𑁂𑀦 𑀪𑀕𑀯𑀸 𑀏𑀯𑀫𑀳𑀁 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑁂 𑀞𑀢𑁆𑀯𑀸 𑀥𑀫𑁆𑀫𑀦𑁆𑀯𑀬𑁂𑀦 𑀦𑀬𑀕𑁆𑀕𑀸𑀳𑁂𑀦 𑀚𑀸𑀦𑀸𑀫𑀻𑀢𑀺 𑀅𑀢𑁆𑀢𑀦𑁄 𑀲𑀻𑀳𑀦𑀸𑀤𑀲𑁆𑀲 𑀅𑀦𑀼𑀬𑁄𑀕𑁄 𑀤𑀺𑀦𑁆𑀦𑁄 𑀳𑁄𑀢𑀺.

𑁧𑁪𑁪. 𑀇𑀥𑀸𑀳𑀁, 𑀪𑀦𑁆𑀢𑁂, 𑀬𑁂𑀦 𑀪𑀕𑀯𑀸𑀢𑀺 𑀇𑀫𑀁 𑀤𑁂𑀲𑀦𑀁 𑀓𑀲𑁆𑀫𑀸 𑀆𑀭𑀪𑀺 ¶ ? 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀲𑁆𑀲 𑀦𑀺𑀧𑁆𑀨𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄, 𑀪𑀕𑀯𑀸 𑀅𑀳𑀁 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁 𑀧𑀝𑀺𑀮𑀪𑀦𑁆𑀢𑁄 𑀧𑀜𑁆𑀘𑀦𑀯𑀼𑀢𑀺𑀧𑀸𑀲𑀡𑁆𑀟𑁂 𑀦 𑀅𑀜𑁆𑀜𑀁 𑀏𑀓𑀫𑁆𑀧𑀺 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀫𑁆𑀧𑀺 𑀧𑀝𑀺𑀮𑀪𑀺𑀁, 𑀢𑀼𑀫𑁆𑀳𑁂𑀬𑁂𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀼𑀫𑁆𑀳𑁂 𑀧𑀬𑀺𑀭𑀼𑀧𑀸𑀲𑀦𑁆𑀢𑁄 𑀧𑀝𑀺𑀮𑀪𑀺𑀦𑁆𑀢𑀺. 𑀢𑀢𑁆𑀣 𑀇𑀥𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀉𑀧𑀲𑀗𑁆𑀓𑀫𑀺𑀁 𑀥𑀫𑁆𑀫𑀲𑀯𑀦𑀸𑀬𑀸𑀢𑀺 𑀢𑀼𑀫𑁆𑀳𑁂 𑀉𑀧𑀲𑀗𑁆𑀓𑀫𑀦𑁆𑀢𑁄 𑀧𑀦𑀸𑀳𑀁 𑀦 𑀘𑀻𑀯𑀭𑀸𑀤𑀺𑀳𑁂𑀢𑀼 𑀉𑀧𑀲𑀗𑁆𑀓𑀫𑀦𑁆𑀢𑁄, 𑀥𑀫𑁆𑀫𑀲𑀯𑀦𑀢𑁆𑀣𑀸𑀬 𑀉𑀧𑀲𑀗𑁆𑀓𑀫𑀦𑁆𑀢𑁄. 𑀏𑀯𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁 𑀧𑀝𑀺𑀮𑀪𑀺𑀁. 𑀓𑀤𑀸 𑀧𑀦 𑀣𑁂𑀭𑁄 𑀥𑀫𑁆𑀫𑀲𑀯𑀦𑀢𑁆𑀣𑀸𑀬 𑀉𑀧𑀲𑀗𑁆𑀓𑀫𑀦𑁆𑀢𑁄𑀢𑀺. 𑀲𑀽𑀓𑀭𑀔𑀢𑀮𑁂𑀡𑁂 𑀪𑀸𑀕𑀺𑀦𑁂𑀬𑁆𑀬𑀤𑀻𑀖𑀦𑀔𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑀲𑀼𑀢𑁆𑀢𑀦𑁆𑀢𑀓𑀣𑀦𑀤𑀺𑀯𑀲𑁂 (𑀫. 𑀦𑀺. 𑁨.𑁨𑁦𑁫) ¶ 𑀉𑀧𑀲𑀗𑁆𑀓𑀫𑀦𑁆𑀢𑁄, 𑀢𑀤𑀸𑀬𑁂𑀯 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁 𑀧𑀝𑀺𑀮𑀪𑀻𑀢𑀺. 𑀢𑀁𑀤𑀺𑀯𑀲𑀜𑁆𑀳𑀺 𑀣𑁂𑀭𑁄 𑀢𑀸𑀮𑀯𑀡𑁆𑀝𑀁 𑀕𑀳𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀩𑀻𑀚𑀫𑀸𑀦𑁄 𑀞𑀺𑀢𑁄 𑀢𑀁 𑀤𑁂𑀲𑀦𑀁 𑀲𑀼𑀢𑁆𑀯𑀸 𑀢𑀢𑁆𑀣𑁂𑀯 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁 ¶ 𑀳𑀢𑁆𑀣𑀕𑀢𑀁 𑀅𑀓𑀸𑀲𑀺. 𑀉𑀢𑁆𑀢𑀭𑀼𑀢𑁆𑀢𑀭𑀁 𑀧𑀡𑀻𑀢𑀧𑀡𑀻𑀢𑀦𑁆𑀢𑀺 𑀉𑀢𑁆𑀢𑀭𑀼𑀢𑁆𑀢𑀭𑀜𑁆𑀘𑁂𑀯 𑀧𑀡𑀻𑀢𑀧𑀡𑀻𑀢𑀜𑁆𑀘 𑀓𑀢𑁆𑀯𑀸 𑀤𑁂𑀲𑁂𑀲𑀺. 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀦𑁆𑀢𑀺 𑀓𑀡𑁆𑀳𑀜𑁆𑀘𑁂𑀯 𑀲𑀼𑀓𑁆𑀓𑀜𑁆𑀘. 𑀢𑀜𑁆𑀘 𑀔𑁄 𑀲𑀧𑁆𑀧𑀝𑀺𑀪𑀸𑀕𑀁 𑀲𑀯𑀺𑀧𑀓𑁆𑀔𑀁 𑀓𑀢𑁆𑀯𑀸. 𑀓𑀡𑁆𑀳𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀲𑀼𑀓𑁆𑀓𑀁, 𑀲𑀼𑀓𑁆𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀓𑀡𑁆𑀳𑀦𑁆𑀢𑀺 𑀏𑀯𑀁 𑀲𑀧𑁆𑀧𑀝𑀺𑀪𑀸𑀕𑀁 𑀓𑀢𑁆𑀯𑀸 𑀓𑀡𑁆𑀳𑀲𑀼𑀓𑁆𑀓𑀁 𑀤𑁂𑀲𑁂𑀲𑀺, 𑀓𑀡𑁆𑀳𑀁 𑀤𑁂𑀲𑁂𑀦𑁆𑀢𑁄𑀧𑀺 𑀘 𑀲𑀉𑀲𑁆𑀲𑀸𑀳𑀁 𑀲𑀯𑀺𑀧𑀸𑀓𑀁 𑀤𑁂𑀲𑁂𑀲𑀺, 𑀲𑀼𑀓𑁆𑀓𑀁 𑀤𑁂𑀲𑁂𑀦𑁆𑀢𑁄𑀧𑀺 𑀲𑀉𑀲𑁆𑀲𑀸𑀳𑀁 𑀲𑀯𑀺𑀧𑀸𑀓𑀁 𑀤𑁂𑀲𑁂𑀲𑀺.

𑀢𑀲𑁆𑀫𑀺𑀁 𑀥𑀫𑁆𑀫𑁂 𑀅𑀪𑀺𑀜𑁆𑀜𑀸 𑀇𑀥𑁂𑀓𑀘𑁆𑀘𑀁 𑀥𑀫𑁆𑀫𑀁 𑀥𑀫𑁆𑀫𑁂𑀲𑀼 𑀦𑀺𑀝𑁆𑀞𑀫𑀕𑀫𑀦𑁆𑀢𑀺 𑀢𑀲𑁆𑀫𑀺𑀁 𑀤𑁂𑀲𑀺𑀢𑁂 𑀥𑀫𑁆𑀫𑁂 𑀏𑀓𑀘𑁆𑀘𑀁 𑀥𑀫𑁆𑀫𑀁 𑀦𑀸𑀫 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 𑀥𑀫𑁆𑀫𑁂𑀲𑀼 𑀦𑀺𑀝𑁆𑀞𑀫𑀕𑀫𑀁. 𑀓𑀢𑀫𑁂𑀲𑀼 𑀥𑀫𑁆𑀫𑁂𑀲𑀽𑀢𑀺? 𑀘𑀢𑀼𑀲𑀘𑁆𑀘𑀥𑀫𑁆𑀫𑁂𑀲𑀼. 𑀏𑀢𑁆𑀣𑀸𑀬𑀁 𑀣𑁂𑀭𑀲𑀮𑁆𑀮𑀸𑀧𑁄, 𑀓𑀸𑀴𑀯𑀮𑁆𑀮𑀯𑀸𑀲𑀻 𑀲𑀼𑀫𑀢𑁆𑀣𑁂𑀭𑁄 𑀢𑀸𑀯 𑀯𑀤𑀢𑀺 ‘‘𑀘𑀢𑀼𑀲𑀘𑁆𑀘𑀥𑀫𑁆𑀫𑁂𑀲𑀼 𑀇𑀤𑀸𑀦𑀺 𑀦𑀺𑀝𑁆𑀞𑀕𑀫𑀦𑀓𑀸𑀭𑀡𑀁 𑀦𑀢𑁆𑀣𑀺. 𑀅𑀲𑁆𑀲𑀚𑀺𑀫𑀳𑀸𑀲𑀸𑀯𑀓𑀲𑁆𑀲 𑀳𑀺 𑀤𑀺𑀝𑁆𑀞𑀤𑀺𑀯𑀲𑁂𑀬𑁂𑀯 𑀲𑁄 𑀧𑀞𑀫𑀫𑀕𑁆𑀕𑁂𑀦 𑀘𑀢𑀼𑀲𑀘𑁆𑀘𑀥𑀫𑁆𑀫𑁂𑀲𑀼 𑀦𑀺𑀝𑁆𑀞𑀁 𑀕𑀢𑁄, 𑀅𑀧𑀭𑀪𑀸𑀕𑁂 𑀲𑀽𑀓𑀭𑀔𑀢𑀮𑁂𑀡𑀤𑁆𑀯𑀸𑀭𑁂 𑀉𑀧𑀭𑀺 𑀢𑀻𑀳𑀺 𑀫𑀕𑁆𑀕𑁂𑀳𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁂𑀲𑀼 𑀦𑀺𑀝𑁆𑀞𑀁 𑀕𑀢𑁄, 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 ¶ ‘𑀥𑀫𑁆𑀫𑁂𑀲𑀽’𑀢𑀺 𑀩𑀼𑀤𑁆𑀥𑀕𑀼𑀡𑁂𑀲𑀼 𑀦𑀺𑀝𑁆𑀞𑀁 𑀕𑀢𑁄’’𑀢𑀺. 𑀮𑁄𑀓𑀦𑁆𑀢𑀭𑀯𑀸𑀲𑀻 𑀘𑀽𑀴𑀲𑀻𑀯𑀢𑁆𑀣𑁂𑀭𑁄 𑀧𑀦 ‘‘𑀲𑀩𑁆𑀩𑀁 𑀢𑀣𑁂𑀯 𑀯𑀢𑁆𑀯𑀸 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 ‘𑀥𑀫𑁆𑀫𑁂𑀲𑀽’𑀢𑀺 𑀅𑀭𑀳𑀢𑁆𑀢𑁂 𑀦𑀺𑀝𑁆𑀞𑀁 𑀕𑀢𑁄’’𑀢𑀺 𑀆𑀳. 𑀤𑀻𑀖𑀪𑀸𑀡𑀓𑀢𑀺𑀧𑀺𑀝𑀓𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦 ‘‘𑀢𑀣𑁂𑀯 𑀧𑀼𑀭𑀺𑀫𑀯𑀸𑀤𑀁 𑀯𑀢𑁆𑀯𑀸 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 ‘𑀥𑀫𑁆𑀫𑁂𑀲𑀽’𑀢𑀺 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑁂 𑀦𑀺𑀝𑁆𑀞𑀁 𑀕𑀢𑁄’’𑀢𑀺 𑀯𑀢𑁆𑀯𑀸 ‘‘𑀩𑀼𑀤𑁆𑀥𑀕𑀼𑀡𑀸 𑀧𑀦 𑀦𑀬𑀢𑁄 𑀆𑀕𑀢𑀸’’𑀢𑀺 𑀆𑀳.

𑀲𑀢𑁆𑀣𑀭𑀺 𑀧𑀲𑀻𑀤𑀺𑀦𑁆𑀢𑀺 𑀏𑀯𑀁 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀥𑀫𑁆𑀫𑁂𑀲𑀼 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸’’𑀢𑀺 𑀲𑀢𑁆𑀣𑀭𑀺 𑀧𑀲𑀻𑀤𑀺𑀁. 𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄𑀢𑀺 𑀲𑀼𑀝𑁆𑀞𑀼 𑀅𑀓𑁆𑀔𑀸𑀢𑁄 𑀲𑀼𑀓𑀣𑀺𑀢𑁄 𑀦𑀺𑀬𑁆𑀬𑀸𑀦𑀺𑀓𑁄 𑀫𑀕𑁆𑀕𑁄 𑀨𑀮𑀢𑁆𑀣𑀸𑀬 𑀦𑀺𑀬𑁆𑀬𑀸𑀢𑀺 𑀭𑀸𑀕𑀤𑁄𑀲𑀫𑁄𑀳𑀦𑀺𑀫𑁆𑀫𑀤𑀦𑀲𑀫𑀢𑁆𑀣𑁄.

𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄𑀢𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄𑀧𑀺 𑀯𑀗𑁆𑀓𑀸𑀤𑀺𑀤𑁄𑀲𑀯𑀺𑀭𑀳𑀺𑀢𑀁 𑀲𑀫𑁆𑀫𑀸𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀢𑁆𑀢𑀸 𑀲𑀼𑀧𑁆𑀧𑀝𑀺𑀧𑀦𑁆𑀦𑁄𑀢𑀺 𑀧𑀲𑀦𑁆𑀦𑁄𑀫𑁆𑀳𑀺 𑀪𑀕𑀯𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀓𑀼𑀲𑀮𑀥𑀫𑁆𑀫𑀤𑁂𑀲𑀦𑀸𑀯𑀡𑁆𑀡𑀦𑀸

𑁧𑁪𑁫. 𑀇𑀤𑀸𑀦𑀺 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀫𑀸𑀧𑀚𑁆𑀚𑀺𑀢𑁂 𑀲𑁄𑀴𑀲 𑀅𑀧𑀭𑀸𑀧𑀭𑀺𑀬𑀥𑀫𑁆𑀫𑁂 𑀤𑀲𑁆𑀲𑁂𑀢𑀼𑀁 𑀅𑀧𑀭𑀁 𑀧𑀦 𑀪𑀦𑁆𑀢𑁂 𑀏𑀢𑀤𑀸𑀦𑀼𑀢𑁆𑀢𑀭𑀺𑀬𑀦𑁆𑀢𑀺 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 ¶ 𑀅𑀦𑀼𑀢𑁆𑀢𑀭𑀺𑀬𑀦𑁆𑀢𑀺 𑀅𑀦𑀼𑀢𑁆𑀢𑀭𑀪𑀸𑀯𑁄. 𑀬𑀣𑀸 𑀪𑀕𑀯𑀸 ¶ 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀬𑀣𑀸 𑀬𑁂𑀦𑀸𑀓𑀸𑀭𑁂𑀦 𑀬𑀸𑀬 𑀤𑁂𑀲𑀦𑀸𑀬 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀲𑀸 𑀢𑀼𑀫𑁆𑀳𑀸𑀓𑀁 𑀤𑁂𑀲𑀦𑀸 𑀅𑀦𑀼𑀢𑁆𑀢𑀭𑀸𑀢𑀺 𑀯𑀤𑀢𑀺. 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀢𑀸𑀬 𑀤𑁂𑀲𑀦𑀸𑀬 𑀤𑁂𑀲𑀺𑀢𑁂𑀲𑀼 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼𑀧𑀺 𑀪𑀕𑀯𑀸𑀯 𑀅𑀦𑀼𑀢𑁆𑀢𑀭𑁄𑀢𑀺 𑀤𑀻𑀧𑁂𑀢𑀺. 𑀬𑀸 𑀯𑀸 𑀲𑀸 𑀤𑁂𑀲𑀦𑀸, 𑀢𑀲𑁆𑀲𑀸 𑀪𑀽𑀫𑀺𑀁 𑀤𑀲𑁆𑀲𑁂𑀦𑁆𑀢𑁄𑀧𑀺 ‘‘𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺 𑀆𑀳. 𑀢𑀢𑁆𑀭𑀺𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀢𑀢𑁆𑀭 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀯𑀼𑀢𑁆𑀢𑀧𑀤𑁂 𑀇𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀆𑀭𑁄𑀕𑁆𑀬𑀝𑁆𑀞𑁂𑀦, 𑀅𑀦𑀯𑀚𑁆𑀚𑀝𑁆𑀞𑁂𑀦, 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦, 𑀦𑀺𑀤𑁆𑀤𑀭𑀣𑀝𑁆𑀞𑁂𑀦, 𑀲𑀼𑀔𑀯𑀺𑀧𑀸𑀓𑀝𑁆𑀞𑁂𑀦𑀸𑀢𑀺 𑀧𑀜𑁆𑀘𑀥𑀸 𑀓𑀼𑀲𑀮𑀁 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀲𑀼 𑀚𑀸𑀢𑀓𑀧𑀭𑀺𑀬𑀸𑀬𑀁 𑀧𑀢𑁆𑀯𑀸 𑀆𑀭𑁄𑀕𑁆𑀬𑀝𑁆𑀞𑁂𑀦 𑀓𑀼𑀲𑀮𑀁 𑀯𑀝𑁆𑀝𑀢𑀺. 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑀁 𑀧𑀢𑁆𑀯𑀸 𑀅𑀦𑀯𑀚𑁆𑀚𑀝𑁆𑀞𑁂𑀦. 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑀁 𑀧𑀢𑁆𑀯𑀸 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀦𑀺𑀤𑁆𑀤𑀭𑀣𑀲𑀼𑀔𑀯𑀺𑀧𑀸𑀓𑀝𑁆𑀞𑁂𑀦. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀩𑀸𑀳𑀺𑀢𑀺𑀓𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 (𑀫. 𑀦𑀺. 𑁨.𑁩𑁫𑁮) 𑀅𑀦𑀯𑀚𑁆𑀚𑀝𑁆𑀞𑁂𑀦 𑀓𑀼𑀲𑀮𑀁 𑀤𑀝𑁆𑀞𑀩𑁆𑀩𑀁.

𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀘𑀼𑀤𑁆𑀤𑀲𑀯𑀺𑀥𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁, 𑀦𑀯𑀯𑀺𑀥𑁂𑀦 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 ¶ , 𑀲𑁄𑀴𑀲𑀯𑀺𑀥𑁂𑀦 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁, 𑀧𑀜𑁆𑀘𑀯𑀺𑀥𑁂𑀦 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀦𑁆𑀢𑀺 𑀏𑀯𑀁 𑀦𑀸𑀦𑀸𑀦𑀬𑁂𑀳𑀺 𑀯𑀺𑀪𑀚𑀺𑀢𑁆𑀯𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀯𑀲𑁂𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀤𑁂𑀲𑀺𑀢𑀸. 𑀨𑀮𑀲𑀢𑀺𑀧𑀝𑁆𑀞𑀸𑀦𑀁 𑀧𑀦 𑀇𑀥 𑀅𑀦𑀥𑀺𑀧𑁆𑀧𑁂𑀢𑀁. 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸𑀢𑀺 𑀧𑀕𑁆𑀕𑀳𑀝𑁆𑀞𑁂𑀦 𑀏𑀓𑀮𑀓𑁆𑀔𑀡𑀸, 𑀓𑀺𑀘𑁆𑀘𑀯𑀲𑁂𑀦 𑀦𑀸𑀦𑀸𑀓𑀺𑀘𑁆𑀘𑀸. ‘‘𑀇𑀥 𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀯𑀲𑁂𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀯 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀤𑁂𑀲𑀺𑀢𑀸. 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸𑀢𑀺 𑀇𑀚𑁆𑀛𑀦𑀝𑁆𑀞𑁂𑀦 𑀏𑀓𑀲𑀗𑁆𑀕𑀳𑀸, 𑀙𑀦𑁆𑀤𑀸𑀤𑀺𑀯𑀲𑁂𑀦 𑀦𑀸𑀦𑀸𑀲𑀪𑀸𑀯𑀸. ‘‘𑀇𑀥 𑀪𑀺𑀓𑁆𑀔𑀼 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑀁 𑀇𑀤𑁆𑀥𑀺𑀧𑀸𑀤𑀁 𑀪𑀸𑀯𑁂𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀯𑀲𑁂𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀯 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑀤𑁂𑀲𑀺𑀢𑀸.

𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀏𑀓𑀮𑀓𑁆𑀔𑀡𑀸𑀦𑀺, 𑀅𑀥𑀺𑀫𑁄𑀓𑁆𑀔𑀸𑀤𑀺𑀲𑀪𑀸𑀯𑀯𑀲𑁂𑀦 𑀦𑀸𑀦𑀸𑀲𑀪𑀸𑀯𑀸𑀦𑀺. 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀯𑀲𑁂𑀦𑁂𑀯 𑀘 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀦𑀺 𑀲𑀤𑁆𑀥𑀸𑀤𑀻𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀤𑁂𑀲𑀺𑀢𑀸𑀦𑀺. 𑀧𑀜𑁆𑀘 𑀩𑀮𑀸𑀦𑀻𑀢𑀺 𑀉𑀧𑀢𑁆𑀣𑀫𑁆𑀪𑀦𑀝𑁆𑀞𑁂𑀦 𑀅𑀓𑀫𑁆𑀧𑀺𑀬𑀝𑁆𑀞𑁂𑀦 𑀯𑀸 𑀏𑀓𑀲𑀗𑁆𑀕𑀳𑀸𑀦𑀺, 𑀲𑀮𑀓𑁆𑀔𑀡𑁂𑀦 𑀦𑀸𑀦𑀸𑀲𑀪𑀸𑀯𑀸𑀦𑀺 ¶ . 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀯𑀲𑁂𑀦𑁂𑀯 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀦𑀺 𑀲𑀤𑁆𑀥𑀸𑀤𑀻𑀦𑀺 𑀧𑀜𑁆𑀘 𑀩𑀮𑀸𑀦𑀺 𑀤𑁂𑀲𑀺𑀢𑀸𑀦𑀺. 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸𑀢𑀺 𑀦𑀺𑀬𑁆𑀬𑀸𑀦𑀝𑁆𑀞𑁂𑀦 𑀏𑀓𑀲𑀗𑁆𑀕𑀳𑀸, 𑀉𑀧𑀝𑁆𑀞𑀸𑀦𑀸𑀤𑀺𑀦𑀸 𑀲𑀮𑀓𑁆𑀔𑀡𑁂𑀦 𑀦𑀸𑀦𑀸𑀲𑀪𑀸𑀯𑀸. 𑀲𑀫𑀣𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑀯𑀲𑁂𑀦𑁂𑀯 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀤𑁂𑀲𑀺𑀢𑀸.

𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀳𑁂𑀢𑀼𑀝𑁆𑀞𑁂𑀦 𑀏𑀓𑀲𑀗𑁆𑀕𑀳𑁄, 𑀤𑀲𑁆𑀲𑀦𑀸𑀤𑀺𑀦𑀸 𑀲𑀮𑀓𑁆𑀔𑀡𑁂𑀦 𑀦𑀸𑀦𑀸𑀲𑀪𑀸𑀯𑁄. 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀯𑀲𑁂𑀦𑁂𑀯 ¶ 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑁄 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀤𑁂𑀲𑀺𑀢𑁄𑀢𑀺 𑀅𑀢𑁆𑀣𑁄.

𑀇𑀥, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀆𑀲𑀯𑀸𑀦𑀁 𑀔𑀬𑀸𑀢𑀺 𑀇𑀤𑀁 𑀓𑀺𑀫𑀢𑁆𑀣𑀁 𑀆𑀭𑀤𑁆𑀥𑀁? 𑀲𑀸𑀲𑀦𑀲𑁆𑀲 𑀧𑀭𑀺𑀬𑁄𑀲𑀸𑀦𑀤𑀲𑁆𑀲𑀦𑀢𑁆𑀣𑀁. 𑀲𑀸𑀲𑀦𑀲𑁆𑀲 𑀳𑀺 𑀦 𑀓𑁂𑀯𑀮𑀁 𑀫𑀕𑁆𑀕𑁂𑀦𑁂𑀯 𑀧𑀭𑀺𑀬𑁄𑀲𑀸𑀦𑀁 𑀳𑁄𑀢𑀺, 𑀅𑀭𑀳𑀢𑁆𑀢𑀨𑀮𑁂𑀦 𑀧𑀦 𑀳𑁄𑀢𑀺. 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀢𑀼𑀁 𑀇𑀤𑀫𑀸𑀭𑀤𑁆𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑀤𑀸𑀦𑀼𑀢𑁆𑀢𑀭𑀺𑀬𑀁, 𑀪𑀦𑁆𑀢𑁂, 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀪𑀦𑁆𑀢𑁂 𑀬𑀸 𑀅𑀬𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀏𑀯𑀁𑀤𑁂𑀲𑀦𑀸, 𑀏𑀢𑀤𑀸𑀦𑀼𑀢𑁆𑀢𑀭𑀺𑀬𑀁. 𑀢𑀁 ¶ 𑀪𑀕𑀯𑀸𑀢𑀺 𑀢𑀁 𑀤𑁂𑀲𑀦𑀁 𑀪𑀕𑀯𑀸 𑀅𑀲𑁂𑀲𑀁 𑀲𑀓𑀮𑀁 𑀅𑀪𑀺𑀚𑀸𑀦𑀸𑀢𑀺. 𑀢𑀁 𑀪𑀕𑀯𑀢𑁄𑀢𑀺 𑀢𑀁 𑀤𑁂𑀲𑀦𑀁 𑀪𑀕𑀯𑀢𑁄 𑀅𑀲𑁂𑀲𑀁 𑀅𑀪𑀺𑀚𑀸𑀦𑀢𑁄. 𑀉𑀢𑁆𑀢𑀭𑀺 𑀅𑀪𑀺𑀜𑁆𑀜𑁂𑀬𑁆𑀬𑀁 𑀦𑀢𑁆𑀣𑀻𑀢𑀺 𑀢𑀤𑀼𑀢𑁆𑀢𑀭𑀺 𑀅𑀪𑀺𑀚𑀸𑀦𑀺𑀢𑀩𑁆𑀩𑀁 𑀦𑀢𑁆𑀣𑀺, 𑀅𑀬𑀁 𑀦𑀸𑀫 𑀇𑀢𑁄 𑀅𑀜𑁆𑀜𑁄 𑀥𑀫𑁆𑀫𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸 𑀬𑀁 𑀪𑀕𑀯𑀸 𑀦 𑀚𑀸𑀦𑀸𑀢𑀻𑀢𑀺 𑀇𑀤𑀁 𑀦𑀢𑁆𑀣𑀺. 𑀬𑀤𑀪𑀺𑀚𑀸𑀦𑀁 𑀅𑀜𑁆𑀜𑁄 𑀲𑀫𑀡𑁄 𑀯𑀸𑀢𑀺 𑀬𑀁 𑀢𑀼𑀫𑁆𑀳𑁂𑀳𑀺 𑀅𑀦𑀪𑀺𑀜𑁆𑀜𑀸𑀢𑀁, 𑀢𑀁 𑀅𑀜𑁆𑀜𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀅𑀪𑀺𑀚𑀸𑀦𑀦𑁆𑀢𑁄 𑀪𑀕𑀯𑀢𑀸 𑀪𑀺𑀬𑁆𑀬𑁄𑀪𑀺𑀜𑁆𑀜𑀢𑀭𑁄 𑀅𑀲𑁆𑀲, 𑀅𑀥𑀺𑀓𑀢𑀭𑀧𑀜𑁆𑀜𑁄 𑀪𑀯𑁂𑀬𑁆𑀬. 𑀬𑀤𑀺𑀤𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀏𑀢𑁆𑀣 𑀬𑀤𑀺𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀪𑀕𑀯𑀢𑀸 𑀉𑀢𑁆𑀢𑀭𑀺𑀢𑀭𑁄 𑀦𑀢𑁆𑀣𑀻𑀢𑀺 𑀅𑀬𑀫𑁂𑀢𑁆𑀣𑀢𑁆𑀣𑁄. 𑀇𑀢𑀺 𑀪𑀕𑀯𑀸𑀯 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑀼𑀢𑁆𑀢𑀭𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀏𑀯𑀁𑀧𑀲𑀦𑁆𑀦𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀻’’𑀢𑀺 𑀤𑀻𑀧𑁂𑀢𑀺. 𑀇𑀢𑁄 𑀧𑀭𑁂𑀲𑀼 𑀅𑀧𑀭𑀁 𑀧𑀦𑀸𑀢𑀺𑀆𑀤𑀻𑀲𑀼 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀧𑀼𑀭𑀺𑀫𑀯𑀸𑀭𑀲𑀤𑀺𑀲𑀁 𑀧𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀆𑀬𑀢𑀦𑀧𑀡𑁆𑀡𑀢𑁆𑀢𑀺𑀤𑁂𑀲𑀦𑀸𑀯𑀡𑁆𑀡𑀦𑀸

𑁧𑁪𑁬. 𑀆𑀬𑀢𑀦𑀧𑀡𑁆𑀡𑀢𑁆𑀢𑀻𑀲𑀽𑀢𑀺 𑀆𑀬𑀢𑀦𑀧𑀜𑁆𑀜𑀸𑀧𑀦𑀸𑀲𑀼. 𑀇𑀤𑀸𑀦𑀺 𑀢𑀸 𑀆𑀬𑀢𑀦𑀧𑀜𑁆𑀜𑀢𑁆𑀢𑀺𑀬𑁄 𑀤𑀲𑁆𑀲𑁂𑀦𑁆𑀢𑁄 𑀙𑀬𑀺𑀫𑀸𑀦𑀺, 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀆𑀬𑀢𑀦𑀓𑀣𑀸 𑀧𑀦𑁂𑀲𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑁂𑀦 𑀓𑀣𑀺𑀢𑀸, 𑀢𑁂𑀦 𑀦 𑀢𑀁 𑀯𑀺𑀢𑁆𑀣𑀸𑀭𑀬𑀺𑀲𑁆𑀲𑀸𑀫, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀸 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀸.

𑀏𑀢𑀤𑀸𑀦𑀼𑀢𑁆𑀢𑀭𑀺𑀬𑀁 ¶ , 𑀪𑀦𑁆𑀢𑁂, 𑀆𑀬𑀢𑀦𑀧𑀡𑁆𑀡𑀢𑁆𑀢𑀻𑀲𑀽𑀢𑀺 𑀬𑀸𑀬𑀁 𑀆𑀬𑀢𑀦𑀧𑀡𑁆𑀡𑀢𑁆𑀢𑀻𑀲𑀼 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀯𑀢𑁆𑀣𑀸𑀦𑀸𑀤𑀺𑀯𑀲𑁂𑀦 𑀏𑀯𑀁 𑀤𑁂𑀲𑀦𑀸, 𑀏𑀢𑀤𑀸𑀦𑀼𑀢𑁆𑀢𑀭𑀺𑀬𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺𑀤𑁂𑀲𑀦𑀸𑀯𑀡𑁆𑀡𑀦𑀸

𑁧𑁪𑁭. 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀻𑀲𑀽𑀢𑀺 𑀕𑀩𑁆𑀪𑁄𑀓𑁆𑀓𑀫𑀦𑁂𑀲𑀼. 𑀢𑀸 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺𑀬𑁄 𑀤𑀲𑁆𑀲𑁂𑀦𑁆𑀢𑁄 𑀘𑀢𑀲𑁆𑀲𑁄 𑀇𑀫𑀸, 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀲𑀫𑁆𑀧𑀚𑀸𑀦𑁄𑀢𑀺 𑀅𑀚𑀸𑀦𑀦𑁆𑀢𑁄 𑀲𑀫𑁆𑀫𑀽𑀴𑁆𑀳𑁄 𑀳𑀼𑀢𑁆𑀯𑀸. 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀢𑀻𑀢𑀺 ¶ 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀯𑀺𑀲𑀢𑀺. 𑀞𑀸𑀢𑀻𑀢𑀺 𑀯𑀲𑀢𑀺. 𑀦𑀺𑀓𑁆𑀔𑀫𑀢𑀻𑀢𑀺 𑀦𑀺𑀓𑁆𑀔𑀫𑀦𑁆𑀢𑁄𑀧𑀺 𑀅𑀲𑀫𑁆𑀧𑀚𑀸𑀦𑁄 𑀲𑀫𑁆𑀫𑀽𑀴𑁆𑀳𑁄𑀯 𑀦𑀺𑀓𑁆𑀔𑀫𑀢𑀺. 𑀅𑀬𑀁 𑀧𑀞𑀫𑀸𑀢𑀺 𑀅𑀬𑀁 𑀧𑀓𑀢𑀺𑀮𑁄𑀓𑀺𑀬𑀫𑀦𑀼𑀲𑁆𑀲𑀸𑀦𑀁 𑀧𑀞𑀫𑀸 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺.

𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀢𑀻𑀢𑀺 𑀑𑀓𑁆𑀓𑀫𑀦𑁆𑀢𑁄 𑀲𑀫𑁆𑀧𑀚𑀸𑀦𑁄 𑀅𑀲𑀫𑁆𑀫𑀽𑀴𑁆𑀳𑁄 𑀳𑀼𑀢𑁆𑀯𑀸 𑀑𑀓𑁆𑀓𑀫𑀢𑀺.

𑀅𑀬𑀁 ¶ 𑀤𑀼𑀢𑀺𑀬𑀸𑀢𑀺 𑀅𑀬𑀁 𑀅𑀲𑀻𑀢𑀺𑀫𑀳𑀸𑀣𑁂𑀭𑀸𑀦𑀁 𑀲𑀸𑀯𑀓𑀸𑀦𑀁 𑀤𑀼𑀢𑀺𑀬𑀸 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺. 𑀢𑁂 𑀳𑀺 𑀧𑀯𑀺𑀲𑀦𑁆𑀢𑀸𑀯 𑀚𑀸𑀦𑀦𑁆𑀢𑀺, 𑀯𑀲𑀦𑁆𑀢𑀸 𑀘 𑀦𑀺𑀓𑁆𑀔𑀫𑀦𑁆𑀢𑀸 𑀘 𑀦 𑀚𑀸𑀦𑀦𑁆𑀢𑀺.

𑀅𑀬𑀁 𑀢𑀢𑀺𑀬𑀸𑀢𑀺 𑀅𑀬𑀁 𑀤𑁆𑀯𑀺𑀦𑁆𑀦𑀜𑁆𑀘 𑀅𑀕𑁆𑀕𑀲𑀸𑀯𑀓𑀸𑀦𑀁 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀘 𑀢𑀢𑀺𑀬𑀸 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺. 𑀢𑁂 𑀓𑀺𑀭 𑀓𑀫𑁆𑀫𑀚𑁂𑀳𑀺 𑀯𑀸𑀢𑁂𑀳𑀺 𑀅𑀥𑁄𑀲𑀺𑀭𑀸 𑀉𑀤𑁆𑀥𑀁𑀧𑀸𑀤𑀸 𑀅𑀦𑁂𑀓𑀲𑀢𑀧𑁄𑀭𑀺𑀲𑁂 𑀧𑀧𑀸𑀢𑁂 𑀯𑀺𑀬 𑀬𑁄𑀦𑀺𑀫𑀼𑀔𑁂 𑀔𑀺𑀢𑁆𑀢𑀸 𑀢𑀸𑀴𑀘𑁆𑀙𑀺𑀕𑁆𑀕𑀴𑁂𑀦 𑀳𑀢𑁆𑀣𑀻 𑀯𑀺𑀬 𑀲𑀫𑁆𑀩𑀸𑀥𑁂𑀦 𑀬𑁄𑀦𑀺𑀫𑀼𑀔𑁂𑀦 𑀦𑀺𑀓𑁆𑀔𑀫𑀫𑀸𑀦𑀸 𑀅𑀦𑀦𑁆𑀢𑀁 𑀤𑀼𑀓𑁆𑀔𑀁 𑀧𑀸𑀧𑀼𑀡𑀦𑁆𑀢𑀺. 𑀢𑁂𑀦 𑀦𑁂𑀲𑀁 ‘‘𑀫𑀬𑀁 𑀦𑀺𑀓𑁆𑀔𑀫𑀫𑁆𑀳𑀸’’𑀢𑀺 𑀲𑀫𑁆𑀧𑀚𑀸𑀦𑀢𑀸 𑀦 𑀳𑁄𑀢𑀺. 𑀏𑀯𑀁 𑀧𑀽𑀭𑀺𑀢𑀧𑀸𑀭𑀫𑀻𑀦𑀫𑁆𑀧𑀺 𑀘 𑀲𑀢𑁆𑀢𑀸𑀦𑀁 𑀏𑀯𑀭𑀽𑀧𑁂 𑀞𑀸𑀦𑁂 𑀫𑀳𑀦𑁆𑀢𑀁 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀮𑀫𑁂𑀯 𑀕𑀩𑁆𑀪𑀸𑀯𑀸𑀲𑁂 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁 𑀅𑀮𑀁 𑀯𑀺𑀭𑀚𑁆𑀚𑀺𑀢𑀼𑀁.

𑀅𑀬𑀁 𑀘𑀢𑀼𑀢𑁆𑀣𑀸𑀢𑀺 𑀅𑀬𑀁 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸𑀦𑀁 𑀯𑀲𑁂𑀦 𑀘𑀢𑀼𑀢𑁆𑀣𑀸 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺. 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸 𑀳𑀺 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀸𑀧𑀺 𑀚𑀸𑀦𑀦𑁆𑀢𑀺, 𑀢𑀢𑁆𑀣 𑀯𑀲𑀦𑁆𑀢𑀸𑀧𑀺 𑀚𑀸𑀦𑀦𑁆𑀢𑀺, 𑀦𑀺𑀓𑁆𑀔𑀫𑀦𑁆𑀢𑀸𑀧𑀺 𑀚𑀸𑀦𑀦𑁆𑀢𑀺, 𑀦𑀺𑀓𑁆𑀔𑀫𑀦𑀓𑀸𑀮𑁂𑀧𑀺 𑀘 𑀢𑁂 𑀓𑀫𑁆𑀫𑀚𑀯𑀸𑀢𑀸 𑀉𑀤𑁆𑀥𑀁𑀧𑀸𑀤𑁂 𑀅𑀥𑁄𑀲𑀺𑀭𑁂 𑀓𑀢𑁆𑀯𑀸 𑀔𑀺𑀧𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀤𑁆𑀯𑁂 𑀳𑀢𑁆𑀣𑁂 𑀧𑀲𑀸𑀭𑁂𑀢𑁆𑀯𑀸 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀞𑀺𑀢𑀓𑀸𑀯 𑀦𑀺𑀓𑁆𑀔𑀫𑀦𑁆𑀢𑀺. 𑀪𑀯𑀕𑁆𑀕𑀁 𑀉𑀧𑀸𑀤𑀸𑀬 𑀅𑀯𑀻𑀘𑀺𑀅𑀦𑁆𑀢𑀭𑁂 𑀅𑀜𑁆𑀜𑁄 𑀢𑀻𑀲𑀼 𑀓𑀸𑀮𑁂𑀲𑀼 𑀲𑀫𑁆𑀧𑀚𑀸𑀦𑁄 𑀦𑀸𑀫 𑀦𑀢𑁆𑀣𑀺 𑀞𑀧𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑁂. 𑀢𑁂𑀦𑁂𑀯 𑀦𑁂𑀲𑀁 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀦𑀓𑀸𑀮𑁂 𑀘 𑀦𑀺𑀓𑁆𑀔𑀫𑀦𑀓𑀸𑀮𑁂 ¶ 𑀘 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀓𑀫𑁆𑀧𑀢𑀻𑀢𑀺. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀆𑀤𑁂𑀲𑀦𑀯𑀺𑀥𑀸𑀤𑁂𑀲𑀦𑀸𑀯𑀡𑁆𑀡𑀦𑀸

𑁧𑁪𑁮. 𑀆𑀤𑁂𑀲𑀦𑀯𑀺𑀥𑀸𑀲𑀽𑀢𑀺 𑀆𑀤𑁂𑀲𑀦𑀓𑁄𑀝𑁆𑀞𑀸𑀲𑁂𑀲𑀼. 𑀇𑀤𑀸𑀦𑀺 𑀢𑀸 𑀆𑀤𑁂𑀲𑀦𑀯𑀺𑀥𑀸 𑀤𑀲𑁆𑀲𑁂𑀦𑁆𑀢𑁄 𑀘𑀢𑀲𑁆𑀲𑁄 𑀇𑀫𑀸𑀢𑀺𑀆𑀤𑀺𑀫𑀸𑀳. 𑀦𑀺𑀫𑀺𑀢𑁆𑀢𑁂𑀦 𑀆𑀤𑀺𑀲𑀢𑀻𑀢𑀺 𑀆𑀕𑀢𑀦𑀺𑀫𑀺𑀢𑁆𑀢𑁂𑀦 𑀕𑀢𑀦𑀺𑀫𑀺𑀢𑁆𑀢𑁂𑀦 𑀞𑀺𑀢𑀦𑀺𑀫𑀺𑀢𑁆𑀢𑁂𑀦 𑀯𑀸 𑀇𑀤𑀁 𑀦𑀸𑀫 𑀪𑀯𑀺𑀲𑁆𑀲𑀢𑀻𑀢𑀺 𑀓𑀣𑁂𑀢𑀺.

𑀢𑀢𑁆𑀭𑀺𑀤𑀁 ¶ 𑀯𑀢𑁆𑀣𑀼 𑁋 𑀏𑀓𑁄 𑀭𑀸𑀚𑀸 𑀢𑀺𑀲𑁆𑀲𑁄 𑀫𑀼𑀢𑁆𑀢𑀸 𑀕𑀳𑁂𑀢𑁆𑀯𑀸 𑀧𑀼𑀭𑁄𑀳𑀺𑀢𑀁 𑀧𑀼𑀘𑁆𑀙𑀺 ‘‘𑀓𑀺𑀁 𑀫𑁂, 𑀆𑀘𑀭𑀺𑀬, 𑀳𑀢𑁆𑀣𑁂’’𑀢𑀺? 𑀲𑁄 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀲𑀺. 𑀢𑁂𑀦 𑀘 𑀲𑀫𑀬𑁂𑀦 𑀏𑀓𑀸 𑀲𑀭𑀩𑀽 ‘‘𑀫𑀓𑁆𑀔𑀺𑀓𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀧𑀓𑁆𑀔𑀦𑁆𑀤𑀺, 𑀕𑀳𑀡𑀓𑀸𑀮𑁂 𑀫𑀓𑁆𑀔𑀺𑀓𑀸 𑀧𑀮𑀸𑀢𑀸, 𑀲𑁄 𑀫𑀓𑁆𑀔𑀺𑀓𑀸𑀬 𑀫𑀼𑀢𑁆𑀢𑀢𑁆𑀢𑀸 ‘‘𑀫𑀼𑀢𑁆𑀢𑀸 𑀫𑀳𑀸𑀭𑀸𑀚𑀸’’𑀢𑀺 𑀆𑀳. 𑀫𑀼𑀢𑁆𑀢𑀸 𑀢𑀸𑀯 𑀳𑁄𑀢𑀼, 𑀓𑀢𑀺 𑀫𑀼𑀢𑁆𑀢𑀸𑀢𑀺? 𑀲𑁄 𑀧𑀼𑀦 𑀦𑀺𑀫𑀺𑀢𑁆𑀢𑀁 𑀑𑀮𑁄𑀓𑁂𑀲𑀺. 𑀅𑀣 𑀅𑀯𑀺𑀤𑀽𑀭𑁂 𑀓𑀼𑀓𑁆𑀓𑀼𑀝𑁄 𑀢𑀺𑀓𑁆𑀔𑀢𑁆𑀢𑀼𑀁 𑀲𑀤𑁆𑀤𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀩𑁆𑀭𑀸𑀳𑁆𑀫𑀡𑁄 ‘‘𑀢𑀺𑀲𑁆𑀲𑁄 𑀫𑀳𑀸𑀭𑀸𑀚𑀸’’𑀢𑀺 𑀆𑀳. 𑀏𑀯𑀁 𑀏𑀓𑀘𑁆𑀘𑁄 𑀆𑀕𑀢𑀦𑀺𑀫𑀺𑀢𑁆𑀢𑁂𑀦 𑀓𑀣𑁂𑀢𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀕𑀢𑀞𑀺𑀢𑀦𑀺 𑀫𑀺𑀢𑁆𑀢𑁂𑀳𑀺𑀧𑀺 𑀓𑀣𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀬𑀓𑁆𑀔𑀧𑀺𑀲𑀸𑀘𑀸𑀤𑀻𑀦𑀁. 𑀤𑁂𑀯𑀢𑀸𑀦𑀦𑁆𑀢𑀺 ¶ 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀻𑀦𑀁. 𑀲𑀤𑁆𑀤𑀁 𑀲𑀼𑀢𑁆𑀯𑀸𑀢𑀺 𑀅𑀜𑁆𑀜𑀲𑁆𑀲 𑀘𑀺𑀢𑁆𑀢𑀁 𑀜𑀢𑁆𑀯𑀸 𑀓𑀣𑁂𑀦𑁆𑀢𑀸𑀦𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸. 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑀦𑁆𑀢𑀺 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀯𑀺𑀧𑁆𑀧𑀮𑀧𑀦𑁆𑀢𑀸𑀦𑀁 𑀲𑀼𑀢𑁆𑀢𑀧𑀫𑀢𑁆𑀢𑀸𑀤𑀻𑀦𑀁 𑀲𑀤𑁆𑀤𑀁. 𑀲𑀼𑀢𑁆𑀯𑀸𑀢𑀺 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸. 𑀬𑀁 𑀯𑀺𑀢𑀓𑁆𑀓𑀬𑀢𑁄 𑀢𑀲𑁆𑀲 𑀲𑁄 𑀲𑀤𑁆𑀤𑁄 𑀉𑀧𑁆𑀧𑀦𑁆𑀦𑁄, 𑀢𑀲𑁆𑀲 𑀯𑀲𑁂𑀦 ‘‘𑀏𑀯𑀫𑁆𑀧𑀺 𑀢𑁂 𑀫𑀦𑁄’’𑀢𑀺 𑀆𑀤𑀺𑀲𑀢𑀺. 𑀫𑀦𑁄𑀲𑀗𑁆𑀔𑀸𑀭𑀸 𑀧𑀡𑀺𑀳𑀺𑀢𑀸𑀢𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀲𑀼𑀝𑁆𑀞𑀧𑀺𑀢𑀸. 𑀯𑀺𑀢𑀓𑁆𑀓𑁂𑀲𑁆𑀲𑀢𑀻𑀢𑀺 𑀯𑀺𑀢𑀓𑁆𑀓𑀬𑀺𑀲𑁆𑀲𑀢𑀺 𑀧𑀯𑀢𑁆𑀢𑁂𑀲𑁆𑀲𑀢𑀻𑀢𑀺 𑀧𑀚𑀸𑀦𑀸𑀢𑀺. 𑀚𑀸𑀦𑀦𑁆𑀢𑁄 𑀘 𑀆𑀕𑀫𑀦𑁂𑀦 𑀚𑀸𑀦𑀸𑀢𑀺, 𑀧𑀼𑀩𑁆𑀩𑀪𑀸𑀕𑁂𑀦 𑀚𑀸𑀦𑀸𑀢𑀺, 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀘𑀺𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 𑀚𑀸𑀦𑀸𑀢𑀺. 𑀆𑀕𑀫𑀦𑁂𑀦 𑀚𑀸𑀦𑀸𑀢𑀺 𑀦𑀸𑀫 𑀓𑀲𑀺𑀡𑀧𑀭𑀺𑀓𑀫𑁆𑀫𑀓𑀸𑀮𑁂𑀬𑁂𑀯 𑀬𑁂𑀦𑀸𑀓𑀸𑀭𑁂𑀦 𑀏𑀲 𑀓𑀲𑀺𑀡𑀪𑀸𑀯𑀦𑀁 𑀆𑀭𑀤𑁆𑀥𑁄 𑀧𑀞𑀫𑀚𑁆𑀛𑀸𑀦𑀁 𑀯𑀸…𑀧𑁂… 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀯𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀬𑁄 𑀯𑀸 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀢𑀻𑀢𑀺 𑀚𑀸𑀦𑀸𑀢𑀺. 𑀧𑀼𑀩𑁆𑀩𑀪𑀸𑀕𑁂𑀦 𑀚𑀸𑀦𑀸𑀢𑀺 𑀦𑀸𑀫 𑀲𑀫𑀣𑀯𑀺𑀧𑀲𑁆𑀲𑀦𑀸𑀬 𑀆𑀭𑀤𑁆𑀥𑀸𑀬𑁂𑀯 𑀚𑀸𑀦𑀸𑀢𑀺, 𑀬𑁂𑀦𑀸𑀓𑀸𑀭𑁂𑀦 𑀏𑀲 𑀯𑀺𑀧𑀲𑁆𑀲𑀦𑀁 𑀆𑀭𑀤𑁆𑀥𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀯𑀸 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀢𑀺, 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀁 𑀯𑀸 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀢𑀺, 𑀅𑀦𑀸𑀕𑀸𑀫𑀺𑀫𑀕𑁆𑀕𑀁 𑀯𑀸 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀢𑀺, 𑀅𑀭𑀳𑀢𑁆𑀢𑀫𑀕𑁆𑀕𑀁 𑀯𑀸 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀢𑀻𑀢𑀺 𑀚𑀸𑀦𑀸𑀢𑀺. 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀘𑀺𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 𑀚𑀸𑀦𑀸𑀢𑀺 𑀦𑀸𑀫 𑀬𑁂𑀦𑀸𑀓𑀸𑀭𑁂𑀦 𑀇𑀫𑀲𑁆𑀲 𑀫𑀦𑁄𑀲𑀗𑁆𑀔𑀸𑀭𑀸 𑀲𑀼𑀝𑁆𑀞𑀧𑀺𑀢𑀸, 𑀇𑀫𑀲𑁆𑀲 𑀦𑀸𑀫 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀸 ¶ 𑀇𑀫𑀁 𑀦𑀸𑀫 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀲𑁆𑀲𑀢𑀺. 𑀇𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀏𑀢𑀲𑁆𑀲 𑀳𑀸𑀦𑀪𑀸𑀕𑀺𑀬𑁄 𑀯𑀸 𑀲𑀫𑀸𑀥𑀺 𑀪𑀯𑀺𑀲𑁆𑀲𑀢𑀺, 𑀞𑀺𑀢𑀺𑀪𑀸𑀕𑀺𑀬𑁄 𑀯𑀸 𑀯𑀺𑀲𑁂𑀲𑀪𑀸𑀕𑀺𑀬𑁄 𑀯𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁄 𑀯𑀸 𑀅𑀪𑀺𑀜𑁆𑀜𑀸𑀬𑁄 𑀯𑀸 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀢𑀻𑀢𑀺 𑀚𑀸𑀦𑀸𑀢𑀺.

𑀢𑀢𑁆𑀣 𑀧𑀼𑀣𑀼𑀚𑁆𑀚𑀦𑁄 𑀘𑁂𑀢𑁄𑀧𑀭𑀺𑀬𑀜𑀸𑀡𑀮𑀸𑀪𑀻 𑀧𑀼𑀣𑀼𑀚𑁆𑀚𑀦𑀸𑀦𑀁𑀬𑁂𑀯 𑀘𑀺𑀢𑁆𑀢𑀁 𑀚𑀸𑀦𑀸𑀢𑀺, 𑀦 𑀅𑀭𑀺𑀬𑀸𑀦𑀁. 𑀅𑀭𑀺𑀬𑁂𑀲𑀼𑀧𑀺 𑀳𑁂𑀝𑁆𑀞𑀺𑀫𑁄 𑀳𑁂𑀝𑁆𑀞𑀺𑀫𑁄 𑀉𑀧𑀭𑀺𑀫𑀲𑁆𑀲 𑀉𑀧𑀭𑀺𑀫𑀲𑁆𑀲 𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺, 𑀉𑀧𑀭𑀺𑀫𑁄 𑀧𑀦 𑀳𑁂𑀝𑁆𑀞𑀺𑀫𑀲𑁆𑀲 𑀚𑀸𑀦𑀸𑀢𑀺. 𑀏𑀢𑁂𑀲𑀼 𑀘 𑀲𑁄𑀢𑀸𑀧𑀦𑁆𑀦𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺. 𑀲𑀓𑀤𑀸𑀕𑀸𑀫𑀻, 𑀅𑀦𑀸𑀕𑀸𑀫𑀻, 𑀅𑀭𑀳𑀸, 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺. 𑀉𑀧𑀭𑀺𑀫𑁄 𑀳𑁂𑀝𑁆𑀞𑀺𑀫𑀁 𑀦 𑀲𑀫𑀸𑀧𑀚𑁆𑀚𑀢𑀺. 𑀢𑁂𑀲𑀜𑁆𑀳𑀺 𑀳𑁂𑀝𑁆𑀞𑀺𑀫𑀸 𑀳𑁂𑀝𑁆𑀞𑀺𑀫𑀸 𑀲𑀫𑀸𑀧𑀢𑁆𑀢𑀺 𑀢𑀢𑁆𑀭𑀼𑀧𑀧𑀢𑁆𑀢𑀺𑀬𑁂𑀯 𑀳𑁄𑀢𑀺. 𑀢𑀣𑁂𑀯 𑀢𑀁 𑀳𑁄𑀢𑀻𑀢𑀺 𑀇𑀤𑀁 𑀏𑀓𑀁𑀲𑁂𑀦 𑀢𑀣𑁂𑀯 𑀳𑁄𑀢𑀺. 𑀘𑁂𑀢𑁄𑀧𑀭𑀺𑀬𑀜𑀸𑀡𑀯𑀲𑁂𑀦 𑀜𑀸𑀢𑀜𑁆𑀳𑀺 𑀅𑀜𑁆𑀜𑀣𑀸𑀪𑀸𑀯𑀻 𑀦𑀸𑀫 𑀦𑀢𑁆𑀣𑀺. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺𑀤𑁂𑀲𑀦𑀸𑀯𑀡𑁆𑀡𑀦𑀸

𑁧𑁪𑁯. 𑀆𑀢𑀧𑁆𑀧𑀫𑀦𑁆𑀯𑀸𑀬𑀸𑀢𑀺𑀆𑀤𑀺 ¶ 𑀩𑁆𑀭𑀳𑁆𑀫𑀚𑀸𑀮𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀅𑀬𑀁 𑀧𑀦𑁂𑀢𑁆𑀣 ¶ 𑀲𑀗𑁆𑀔𑁂𑀧𑁄, 𑀆𑀢𑀧𑁆𑀧𑀦𑁆𑀢𑀺 𑀯𑀻𑀭𑀺𑀬𑀁. 𑀢𑀤𑁂𑀯 𑀧𑀤𑀳𑀺𑀢𑀩𑁆𑀩𑀢𑁄 𑀧𑀥𑀸𑀦𑀁. 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀢𑁄 𑀅𑀦𑀼𑀬𑁄𑀕𑁄. 𑀅𑀧𑁆𑀧𑀫𑀸𑀤𑀦𑁆𑀢𑀺 𑀲𑀢𑀺𑀅𑀯𑀺𑀧𑁆𑀧𑀯𑀸𑀲𑀁. 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑀦𑁆𑀢𑀺 𑀅𑀦𑀺𑀘𑁆𑀘𑁂 𑀅𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀯𑀲𑁂𑀦 𑀧𑀯𑀢𑁆𑀢𑀁 𑀉𑀧𑀸𑀬𑀫𑀦𑀲𑀺𑀓𑀸𑀭𑀁. 𑀘𑁂𑀢𑁄𑀲𑀫𑀸𑀥𑀺𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺𑀁. 𑀅𑀬𑀁 𑀧𑀞𑀫𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀻𑀢𑀺 𑀅𑀬𑀁 𑀤𑁆𑀯𑀢𑁆𑀢𑀺𑀁 𑀲𑀸𑀓𑀸𑀭𑀁 𑀧𑀝𑀺𑀓𑀽𑀮𑀢𑁄 𑀫𑀦𑀲𑀺𑀓𑀢𑁆𑀯𑀸 𑀧𑀝𑀺𑀓𑀽𑀮𑀤𑀲𑁆𑀲𑀦𑀯𑀲𑁂𑀦 𑀉𑀧𑁆𑀧𑀸𑀤𑀺𑀢𑀸 𑀧𑀞𑀫𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺 𑀧𑀞𑀫𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺 𑀦𑀸𑀫, 𑀲𑀘𑁂 𑀧𑀦 𑀢𑀁 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀺, 𑀅𑀬𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑁂𑀯 𑀧𑀞𑀫𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺.

𑀅𑀢𑀺𑀓𑁆𑀓𑀫𑁆𑀫 𑀘𑀸𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀘. 𑀙𑀯𑀺𑀫𑀁𑀲𑀮𑁄𑀳𑀺𑀢𑀦𑁆𑀢𑀺 𑀙𑀯𑀺𑀜𑁆𑀘 𑀫𑀁𑀲𑀜𑁆𑀘 𑀮𑁄𑀳𑀺𑀢𑀜𑁆𑀘. 𑀅𑀝𑁆𑀞𑀺𑀁 𑀧𑀘𑁆𑀘𑀯𑁂𑀓𑁆𑀔𑀢𑀻𑀢𑀺 𑀅𑀝𑁆𑀞𑀺 𑀅𑀝𑁆𑀞𑀻𑀢𑀺 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀅𑀝𑁆𑀞𑀺 𑀅𑀝𑁆𑀞𑀻𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀸 𑀅𑀝𑁆𑀞𑀺𑀆𑀭𑀫𑁆𑀫𑀡𑀸 𑀤𑀺𑀩𑁆𑀩𑀘𑀓𑁆𑀔𑀼𑀧𑀸𑀤𑀓𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺 𑀤𑀼𑀢𑀺𑀬𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺 𑀦𑀸𑀫. 𑀲𑀘𑁂 𑀧𑀦 𑀢𑀁 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀁 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀅𑀬𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀤𑀼𑀢𑀺𑀬𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺. 𑀓𑀸𑀴𑀯𑀮𑁆𑀮𑀯𑀸𑀲𑀻 𑀲𑀼𑀫𑀢𑁆𑀣𑁂𑀭𑁄 𑀧𑀦 ‘‘𑀬𑀸𑀯 𑀢𑀢𑀺𑀬𑀫𑀕𑁆𑀕𑀸 𑀯𑀝𑁆𑀝𑀢𑀻’’𑀢𑀺 𑀆𑀳.

𑀯𑀺𑀜𑁆𑀜𑀸𑀡𑀲𑁄𑀢𑀦𑁆𑀢𑀺 ¶ 𑀯𑀺𑀜𑁆𑀜𑀸𑀡𑀫𑁂𑀯. 𑀉𑀪𑀬𑀢𑁄 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀦𑁆𑀢𑀺 𑀤𑁆𑀯𑀻𑀳𑀺𑀧𑀺 𑀪𑀸𑀕𑁂𑀳𑀺 𑀅𑀘𑁆𑀙𑀺𑀦𑁆𑀦𑀁. 𑀇𑀥 𑀮𑁄𑀓𑁂 𑀧𑀢𑀺𑀝𑁆𑀞𑀺𑀢𑀜𑁆𑀘𑀸𑀢𑀺 𑀙𑀦𑁆𑀤𑀭𑀸𑀕𑀯𑀲𑁂𑀦 𑀇𑀫𑀲𑁆𑀫𑀺𑀜𑁆𑀘 𑀮𑁄𑀓𑁂 𑀧𑀢𑀺𑀝𑁆𑀞𑀺𑀢𑀁. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀫𑁆𑀫𑀁 𑀯𑀸 𑀓𑀫𑁆𑀫𑀢𑁄 𑀉𑀧𑀕𑀘𑁆𑀙𑀦𑁆𑀢𑀁 𑀇𑀥 𑀮𑁄𑀓𑁂 𑀧𑀢𑀺𑀝𑁆𑀞𑀺𑀢𑀁 𑀦𑀸𑀫. 𑀓𑀫𑁆𑀫𑀪𑀯𑀁 𑀆𑀓𑀟𑁆𑀠𑀦𑁆𑀢𑀁 𑀧𑀭𑀮𑁄𑀓𑁂 𑀧𑀢𑀺𑀝𑁆𑀞𑀺𑀢𑀁 𑀦𑀸𑀫. 𑀇𑀫𑀺𑀦𑀸 𑀓𑀺𑀁 𑀓𑀣𑀺𑀢𑀁? 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀓𑀣𑀺𑀢𑀁. 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀜𑁆𑀳𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀢𑀢𑀺𑀬𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺 𑀦𑀸𑀫.

𑀇𑀥 𑀮𑁄𑀓𑁂 𑀅𑀧𑁆𑀧𑀢𑀺𑀝𑁆𑀞𑀺𑀢𑀜𑁆𑀘𑀸𑀢𑀺 𑀦𑀺𑀘𑁆𑀙𑀦𑁆𑀤𑀭𑀸𑀕𑀢𑁆𑀢𑀸 𑀇𑀥𑀮𑁄𑀓𑁂 𑀘 𑀅𑀧𑁆𑀧𑀢𑀺𑀝𑁆𑀞𑀺𑀢𑀁. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀫𑁆𑀫𑀁 𑀯𑀸 𑀓𑀫𑁆𑀫𑀢𑁄 𑀦 𑀉𑀧𑀕𑀘𑁆𑀙𑀦𑁆𑀢𑀁 𑀇𑀥 𑀮𑁄𑀓𑁂 𑀅𑀧𑁆𑀧𑀢𑀺𑀝𑁆𑀞𑀺𑀢𑀁 𑀦𑀸𑀫. 𑀓𑀫𑁆𑀫𑀪𑀯𑀁 𑀅𑀦𑀸𑀓𑀟𑁆𑀠𑀦𑁆𑀢𑀁 𑀧𑀭𑀮𑁄𑀓𑁂 𑀅𑀧𑁆𑀧𑀢𑀺𑀝𑁆𑀞𑀺𑀢𑀁 𑀦𑀸𑀫. 𑀇𑀫𑀺𑀦𑀸 𑀓𑀺𑀁 𑀓𑀣𑀺𑀢𑀁? 𑀔𑀻𑀡𑀸𑀲𑀯𑀲𑁆𑀲 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀓𑀣𑀺𑀢𑀁. 𑀔𑀻𑀡𑀸𑀲𑀯𑀲𑁆𑀲 𑀳𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀘𑀢𑀼𑀢𑁆𑀣𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺 𑀦𑀸𑀫.

𑀅𑀧𑀺𑀘 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑁂 𑀆𑀭𑀤𑁆𑀥𑀯𑀺𑀧𑀲𑁆𑀲𑀦𑀸𑀧𑀺 ¶ 𑀧𑀞𑀫𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺. 𑀅𑀝𑁆𑀞𑀺𑀆𑀭𑀫𑁆𑀫𑀡𑁂 𑀆𑀭𑀤𑁆𑀥𑀯𑀺𑀧𑀲𑁆𑀲𑀦𑀸 𑀤𑀼𑀢𑀺𑀬𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺. 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀔𑀻𑀡𑀸𑀲𑀯𑀲𑁆𑀲 𑀘𑁂𑀢𑁄𑀧𑀭𑀺𑀬𑀜𑀸𑀡𑀦𑁆𑀢𑀺 𑀇𑀤𑀁 𑀧𑀤𑀤𑁆𑀯𑀬𑀁 𑀦𑀺𑀘𑁆𑀘𑀮𑀫𑁂𑀯. 𑀅𑀧𑀭𑁄 𑀦𑀬𑁄 𑀧𑀞𑀫𑀚𑁆𑀛𑀸𑀦𑀁 𑀧𑀞𑀫𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺 ¶ . 𑀤𑀼𑀢𑀺𑀬𑀚𑁆𑀛𑀸𑀦𑀁 𑀤𑀼𑀢𑀺𑀬𑀸. 𑀢𑀢𑀺𑀬𑀚𑁆𑀛𑀸𑀦𑀁 𑀢𑀢𑀺𑀬𑀸. 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀘𑀢𑀼𑀢𑁆𑀣𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺. 𑀢𑀣𑀸 𑀧𑀞𑀫𑀫𑀕𑁆𑀕𑁄 𑀧𑀞𑀫𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀺. 𑀤𑀼𑀢𑀺𑀬𑀫𑀕𑁆𑀕𑁄 𑀤𑀼𑀢𑀺𑀬𑀸. 𑀢𑀢𑀺𑀬𑀫𑀕𑁆𑀕𑁄 𑀢𑀢𑀺𑀬𑀸. 𑀘𑀢𑀼𑀢𑁆𑀣𑀫𑀕𑁆𑀕𑁄 𑀘𑀢𑀼𑀢𑁆𑀣𑀸 𑀤𑀲𑁆𑀲𑀦𑀲𑀫𑀸𑀧𑀢𑁆𑀢𑀻𑀢𑀺. 𑀲𑁂𑀲𑀫𑁂𑀢𑁆𑀣 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑀧𑀼𑀕𑁆𑀕𑀮𑀧𑀡𑁆𑀡𑀢𑁆𑀢𑀺𑀤𑁂𑀲𑀦𑀸𑀯𑀡𑁆𑀡𑀦𑀸

𑁧𑁫𑁦. 𑀧𑀼𑀕𑁆𑀕𑀮𑀧𑀡𑁆𑀡𑀢𑁆𑀢𑀻𑀲𑀽𑀢𑀺 𑀮𑁄𑀓𑀯𑁄𑀳𑀸𑀭𑀯𑀲𑁂𑀦 ‘‘𑀲𑀢𑁆𑀢𑁄 𑀧𑀼𑀕𑁆𑀕𑀮𑁄 𑀦𑀭𑁄 𑀧𑁄𑀲𑁄’’𑀢𑀺 𑀏𑀯𑀁 𑀧𑀜𑁆𑀜𑀸𑀧𑁂𑀢𑀩𑁆𑀩𑀸𑀲𑀼 𑀮𑁄𑀓𑀧𑀜𑁆𑀜𑀢𑁆𑀢𑀻𑀲𑀼. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀤𑁆𑀯𑁂 𑀓𑀣𑀸 𑀲𑀫𑁆𑀫𑀼𑀢𑀺𑀓𑀣𑀸, 𑀧𑀭𑀫𑀢𑁆𑀣𑀓𑀣𑀸𑀢𑀺 𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑁂 (𑀤𑀻. 𑀦𑀺. 𑀅𑀝𑁆𑀞. 𑁧.𑁪𑁩𑁯-𑁪𑁪𑁩) 𑀯𑀺𑀢𑁆𑀣𑀸𑀭𑀺𑀢𑀸.

𑀢𑀢𑁆𑀣 𑀧𑀼𑀕𑁆𑀕𑀮𑀧𑀡𑁆𑀡𑀢𑁆𑀢𑀻𑀲𑀽𑀢𑀺 𑀅𑀬𑀁 𑀲𑀫𑁆𑀫𑀼𑀢𑀺𑀓𑀣𑀸. 𑀇𑀤𑀸𑀦𑀺 𑀬𑁂 𑀧𑀼𑀕𑁆𑀕𑀮𑁂 𑀧𑀜𑁆𑀜𑀧𑁂𑀦𑁆𑀢𑁄 𑀧𑀼𑀕𑁆𑀕𑀮𑀧𑀡𑁆𑀡𑀢𑁆𑀢𑀻𑀲𑀼 𑀪𑀕𑀯𑀸 𑀅𑀦𑀼𑀢𑁆𑀢𑀭𑁄 𑀳𑁄𑀢𑀺, 𑀢𑁂 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀢𑀺𑀫𑁂 𑀪𑀦𑁆𑀢𑁂 𑀧𑀼𑀕𑁆𑀕𑀮𑀸. 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀢𑀺 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀯𑀺𑀫𑀼𑀢𑁆𑀢𑁄, 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀸 𑀭𑀽𑀧𑀓𑀸𑀬𑀢𑁄 ¶ 𑀯𑀺𑀫𑀼𑀢𑁆𑀢𑁄, 𑀫𑀕𑁆𑀕𑁂𑀦 𑀦𑀸𑀫𑀓𑀸𑀬𑀢𑁄. 𑀲𑁄 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀁 𑀏𑀓𑁂𑀓𑀢𑁄 𑀯𑀼𑀝𑁆𑀞𑀸𑀬 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀸𑀦𑀁, 𑀘𑀢𑀼𑀦𑁆𑀦𑀁, 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀬 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀅𑀦𑀸𑀕𑀸𑀫𑀺𑀦𑁄 𑀘 𑀯𑀲𑁂𑀦 𑀧𑀜𑁆𑀘𑀯𑀺𑀥𑁄 𑀳𑁄𑀢𑀺.

𑀧𑀸𑀴𑀺 𑀧𑀦𑁂𑀢𑁆𑀣 ‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄? 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀝𑁆𑀞𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻’’𑀢𑀺 (𑀥𑀸𑀢𑀼. 𑁨𑁪) 𑀏𑀯𑀁 𑀅𑀝𑁆𑀞𑀯𑀺𑀫𑁄𑀓𑁆𑀔𑀮𑀸𑀪𑀺𑀦𑁄 𑀯𑀲𑁂𑀦 𑀆𑀕𑀢𑀸. 𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑁄𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄. 𑀲𑁄 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀘, 𑀘𑀢𑀽𑀳𑀺 𑀛𑀸𑀦𑁂𑀳𑀺 𑀯𑀼𑀝𑁆𑀞𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸 𑀘𑀢𑁆𑀢𑀸𑀭𑁄 𑀘𑀸𑀢𑀺 𑀇𑀫𑁂𑀲𑀁 𑀯𑀲𑁂𑀦 𑀧𑀜𑁆𑀘𑀯𑀺𑀥𑁄𑀯 𑀳𑁄𑀢𑀺.

𑀧𑀸𑀴𑀺 𑀧𑀦𑁂𑀢𑁆𑀣 𑀅𑀝𑁆𑀞𑀯𑀺𑀫𑁄𑀓𑁆𑀔𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑁂𑀯 𑀆𑀕𑀢𑀸. 𑀬𑀣𑀸𑀳 ‘‘𑀦 𑀳𑁂𑀯 𑀔𑁄 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄’’𑀢𑀺 (𑀥𑀸𑀢𑀼. 𑁨𑁫).

𑀨𑀼𑀝𑁆𑀞𑀦𑁆𑀢𑀁 𑀲𑀘𑁆𑀙𑀺 𑀓𑀭𑁄𑀢𑀻𑀢𑀺 𑀓𑀸𑀬𑀲𑀓𑁆𑀔𑀺. 𑀲𑁄 𑀛𑀸𑀦𑀨𑀲𑁆𑀲𑀁 𑀧𑀞𑀫𑀁 𑀨𑀼𑀲𑀢𑀺, 𑀧𑀘𑁆𑀙𑀸 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀲𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀝𑁆𑀞𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀝𑁆𑀞𑀸 ¶ 𑀙𑀩𑁆𑀩𑀺𑀥𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑁂𑀯𑀸𑀳 ‘‘𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 ¶ 𑀘𑀲𑁆𑀲 𑀤𑀺𑀲𑁆𑀯𑀸 𑀏𑀓𑀘𑁆𑀘𑁂 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀓𑀸𑀬𑀲𑀓𑁆𑀔𑀻’’𑀢𑀺 (𑀥𑀸𑀢𑀼. 𑁨𑁬).

𑀤𑀺𑀝𑁆𑀞𑀦𑁆𑀢𑀁 𑀧𑀢𑁆𑀢𑁄𑀢𑀺 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄. 𑀢𑀢𑁆𑀭𑀺𑀤𑀁 𑀲𑀗𑁆𑀔𑁂𑀧𑀮𑀓𑁆𑀔𑀡𑀁, 𑀤𑀼𑀓𑁆𑀔𑀸 𑀲𑀗𑁆𑀔𑀸𑀭𑀸 𑀲𑀼𑀔𑁄 𑀦𑀺𑀭𑁄𑀥𑁄𑀢𑀺 𑀜𑀸𑀢𑀁 𑀳𑁄𑀢𑀺 𑀤𑀺𑀝𑁆𑀞𑀁 𑀯𑀺𑀤𑀺𑀢𑀁 𑀲𑀘𑁆𑀙𑀺𑀓𑀢𑀁 𑀧𑀲𑁆𑀲𑀺𑀢𑀁 𑀧𑀜𑁆𑀜𑀸𑀬𑀸𑀢𑀺 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀲𑁄𑀧𑀺 𑀓𑀸𑀬𑀲𑀓𑁆𑀔𑀺 𑀯𑀺𑀬 𑀙𑀩𑁆𑀩𑀺𑀥𑁄 𑀳𑁄𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺…𑀧𑁂… 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀸 𑀘𑀲𑁆𑀲 𑀥𑀫𑁆𑀫𑀸 𑀧𑀜𑁆𑀜𑀸𑀬 𑀯𑁄𑀤𑀺𑀝𑁆𑀞𑀸 𑀳𑁄𑀦𑁆𑀢𑀺 𑀯𑁄𑀘𑀭𑀺𑀢𑀸, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀏𑀓𑀘𑁆𑀘𑁂 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄’’𑀢𑀺 (𑀥𑀸𑀢𑀼. 𑁨𑁭).

𑀲𑀤𑁆𑀥𑀸𑀬 ¶ 𑀯𑀺𑀫𑀼𑀢𑁆𑀢𑁄𑀢𑀺 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄. 𑀲𑁄𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀙𑀩𑁆𑀩𑀺𑀥𑁄 𑀳𑁄𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀸 𑀘𑀲𑁆𑀲 𑀥𑀫𑁆𑀫𑀸 𑀧𑀜𑁆𑀜𑀸𑀬 𑀯𑁄𑀤𑀺𑀝𑁆𑀞𑀸 𑀳𑁄𑀦𑁆𑀢𑀺 𑀯𑁄𑀘𑀭𑀺𑀢𑀸, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀏𑀓𑀘𑁆𑀘𑁂 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺 𑀦𑁄 𑀘 𑀔𑁄 𑀬𑀣𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄’’𑀢𑀺 (𑀥𑀸𑀢𑀼. 𑁨𑁮). 𑀏𑀢𑁂𑀲𑀼 𑀳𑀺 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀤𑀳𑀦𑁆𑀢𑀲𑁆𑀲 𑀯𑀺𑀬, 𑀑𑀓𑀧𑁆𑀧𑁂𑀦𑁆𑀢𑀲𑁆𑀲 𑀯𑀺𑀬, 𑀅𑀥𑀺𑀫𑀼𑀘𑁆𑀘𑀦𑁆𑀢𑀲𑁆𑀲 𑀯𑀺𑀬 𑀘 𑀓𑀺𑀮𑁂𑀲𑀓𑁆𑀔𑀬𑁄 𑀳𑁄𑀢𑀺. 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀓𑁆𑀔𑀡𑁂 𑀓𑀺𑀮𑁂𑀲𑀘𑁆𑀙𑁂𑀤𑀓𑀁 𑀜𑀸𑀡𑀁 𑀅𑀤𑀦𑁆𑀥𑀁 𑀢𑀺𑀔𑀺𑀡𑀁 𑀲𑀽𑀭𑀁 𑀳𑀼𑀢𑁆𑀯𑀸 𑀯𑀳𑀢𑀺. 𑀢𑀲𑁆𑀫𑀸 𑀬𑀣𑀸 𑀦𑀸𑀫 𑀦𑀸𑀢𑀺𑀢𑀺𑀔𑀺𑀡𑁂𑀦 𑀅𑀲𑀺𑀦𑀸 𑀓𑀤𑀮𑀺𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀙𑀺𑀦𑁆𑀦𑀝𑁆𑀞𑀸𑀦𑀁 𑀦 𑀫𑀝𑁆𑀞𑀁 𑀳𑁄𑀢𑀺, 𑀅𑀲𑀺 𑀦 𑀲𑀻𑀖𑀁 𑀯𑀳𑀢𑀺, 𑀲𑀤𑁆𑀤𑁄 𑀲𑀼𑀬𑁆𑀬𑀢𑀺, 𑀩𑀮𑀯𑀢𑀭𑁄 𑀯𑀸𑀬𑀸𑀫𑁄 𑀓𑀸𑀢𑀩𑁆𑀩𑁄 𑀳𑁄𑀢𑀺, 𑀏𑀯𑀭𑀽𑀧𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀪𑀸𑀯𑀦𑀸. 𑀬𑀣𑀸 𑀧𑀦 𑀅𑀢𑀺𑀦𑀺𑀲𑀺𑀢𑁂𑀦 𑀅𑀲𑀺𑀦𑀸 𑀓𑀤𑀮𑀺𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀙𑀺𑀦𑁆𑀦𑀝𑁆𑀞𑀸𑀦𑀁 𑀫𑀝𑁆𑀞𑀁 𑀳𑁄𑀢𑀺, 𑀅𑀲𑀺 𑀲𑀻𑀖𑀁 𑀯𑀳𑀢𑀺, 𑀲𑀤𑁆𑀤𑁄 𑀦 𑀲𑀼𑀬𑁆𑀬𑀢𑀺, 𑀩𑀮𑀯𑀢𑀭𑀁 𑀯𑀸𑀬𑀸𑀫𑀓𑀺𑀘𑁆𑀘𑀁 𑀦 𑀳𑁄𑀢𑀺, 𑀏𑀯𑀭𑀽𑀧𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀪𑀸𑀯𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀢𑀻𑀢𑀺 𑀥𑀫𑁆𑀫𑀸𑀦𑀼𑀲𑀸𑀭𑀻. 𑀥𑀫𑁆𑀫𑁄𑀢𑀺 𑀧𑀜𑁆𑀜𑀸, 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀁 𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀤𑁆𑀥𑀸𑀦𑀼𑀲𑀸𑀭𑀺𑀫𑁆𑀳𑀺𑀧𑀺 𑀏𑀲𑁂𑀯 𑀦𑀬𑁄, 𑀉𑀪𑁄𑀧𑁂𑀢𑁂 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀸𑀬𑁂𑀯. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺, 𑀧𑀜𑁆𑀜𑀸𑀯𑀸𑀳𑀺𑀁 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀁 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀥𑀫𑁆𑀫𑀸𑀦𑀼𑀲𑀸𑀭𑀻’’𑀢𑀺.

𑀢𑀣𑀸 ¶ ‘‘𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺 ¶ , 𑀲𑀤𑁆𑀥𑀸𑀯𑀸𑀳𑀺𑀁 𑀲𑀤𑁆𑀥𑀸𑀧𑀼𑀩𑁆𑀩𑀗𑁆𑀕𑀫𑀁 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀦𑀼𑀲𑀸𑀭𑀻’’𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀲𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸𑀤𑀺𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀜𑁆𑀜𑀸𑀪𑀸𑀯𑀦𑀸𑀥𑀺𑀓𑀸𑀭𑁂 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀫𑀺𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑀧𑀥𑀸𑀦𑀤𑁂𑀲𑀦𑀸𑀯𑀡𑁆𑀡𑀦𑀸

𑁧𑁫𑁧. 𑀧𑀥𑀸𑀦𑁂𑀲𑀽𑀢𑀺 𑀇𑀥 𑀧𑀤𑀳𑀦𑀯𑀲𑁂𑀦 ‘‘𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀧𑀥𑀸𑀦𑀸’’𑀢𑀺 𑀯𑀼𑀢𑁆𑀢𑀸. 𑀢𑁂𑀲𑀁 𑀯𑀺𑀢𑁆𑀣𑀸𑀭𑀓𑀣𑀸 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀫𑀺𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑀧𑀝𑀺𑀧𑀤𑀸𑀤𑁂𑀲𑀦𑀸𑀯𑀡𑁆𑀡𑀦𑀸

𑁧𑁫𑁨. 𑀤𑀼𑀓𑁆𑀔𑀧𑀝𑀺𑀧𑀤𑀸𑀤𑀻𑀲𑀼 ¶ 𑀅𑀬𑀁 𑀯𑀺𑀢𑁆𑀣𑀸𑀭𑀦𑀬𑁄 𑁋 ‘‘𑀢𑀢𑁆𑀣 𑀓𑀢𑀫𑀸 𑀤𑀼𑀓𑁆𑀔𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀧𑀜𑁆𑀜𑀸? 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀲𑀫𑀸𑀥𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀤𑀦𑁆𑀥𑀁 𑀢𑀁 𑀞𑀸𑀦𑀁 𑀅𑀪𑀺𑀚𑀸𑀦𑀦𑁆𑀢𑀲𑁆𑀲 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀤𑀼𑀓𑁆𑀔𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀧𑀜𑁆𑀜𑀸. 𑀢𑀢𑁆𑀣 𑀓𑀢𑀫𑀸 𑀤𑀼𑀓𑁆𑀔𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀧𑀜𑁆𑀜𑀸? 𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀲𑀫𑀸𑀥𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀔𑀺𑀧𑁆𑀧𑀁 𑀢𑀁 𑀞𑀸𑀦𑀁 𑀅𑀪𑀺𑀚𑀸𑀦𑀦𑁆𑀢𑀲𑁆𑀲 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀤𑀼𑀓𑁆𑀔𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀧𑀜𑁆𑀜𑀸. 𑀢𑀢𑁆𑀣 𑀓𑀢𑀫𑀸 𑀲𑀼𑀔𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀧𑀜𑁆𑀜𑀸? 𑀅𑀓𑀺𑀘𑁆𑀙𑁂𑀦 𑀅𑀓𑀲𑀺𑀭𑁂𑀦 𑀲𑀫𑀸𑀥𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀤𑀦𑁆𑀥𑀁 𑀢𑀁 𑀞𑀸𑀦𑀁 𑀅𑀪𑀺𑀚𑀸𑀦𑀦𑁆𑀢𑀲𑁆𑀲 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀼𑀔𑀧𑀝𑀺𑀧𑀤𑀸 𑀤𑀦𑁆𑀥𑀸𑀪𑀺𑀜𑁆𑀜𑀸 𑀧𑀜𑁆𑀜𑀸. 𑀢𑀢𑁆𑀣 𑀓𑀢𑀫𑀸 𑀲𑀼𑀔𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀧𑀜𑁆𑀜𑀸? 𑀅𑀓𑀺𑀘𑁆𑀙𑁂𑀦 𑀅𑀓𑀲𑀺𑀭𑁂𑀦 𑀲𑀫𑀸𑀥𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀔𑀺𑀧𑁆𑀧𑀁 𑀢𑀁 𑀞𑀸𑀦𑀁 𑀅𑀪𑀺𑀚𑀸𑀦𑀦𑁆𑀢𑀲𑁆𑀲 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀼𑀔𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀧𑀜𑁆𑀜𑀸’’𑀢𑀺 (𑀯𑀺𑀪. 𑁮𑁦𑁧). 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑁄. 𑀲𑁂𑀲𑀫𑀺𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑀪𑀲𑁆𑀲𑀲𑀫𑀸𑀘𑀸𑀭𑀸𑀤𑀺𑀯𑀡𑁆𑀡𑀦𑀸

𑁧𑁫𑁩. 𑀦 𑀘𑁂𑀯 𑀫𑀼𑀲𑀸𑀯𑀸𑀤𑀽𑀧𑀲𑀜𑁆𑀳𑀺𑀢𑀦𑁆𑀢𑀺 𑀪𑀲𑁆𑀲𑀲𑀫𑀸𑀘𑀸𑀭𑁂 𑀞𑀺𑀢𑁄𑀧𑀺 𑀓𑀣𑀸𑀫𑀕𑁆𑀕𑀁 𑀅𑀦𑀼𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀣𑁂𑀦𑁆𑀢𑁄𑀧𑀺 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀦 𑀘𑁂𑀯 𑀫𑀼𑀲𑀸𑀯𑀸𑀤𑀽𑀧𑀲𑀜𑁆𑀳𑀺𑀢𑀁 𑀪𑀸𑀲𑀢𑀺. 𑀅𑀝𑁆𑀞 𑀅𑀦𑀭𑀺𑀬𑀯𑁄𑀳𑀸𑀭𑁂 𑀯𑀚𑁆𑀚𑁂𑀢𑁆𑀯𑀸 𑀅𑀝𑁆𑀞 𑀅𑀭𑀺𑀬𑀯𑁄𑀳𑀸𑀭𑀬𑀼𑀢𑁆𑀢𑀫𑁂𑀯 𑀪𑀸𑀲𑀢𑀺. 𑀦 ¶ 𑀘 𑀯𑁂𑀪𑀽𑀢𑀺𑀬𑀦𑁆𑀢𑀺 𑀪𑀲𑁆𑀲𑀲𑀫𑀸𑀘𑀸𑀭𑁂 𑀞𑀺𑀢𑁄𑀧𑀺 𑀪𑁂𑀤𑀓𑀭𑀯𑀸𑀘𑀁 ¶ 𑀦 𑀪𑀸𑀲𑀢𑀺. 𑀦 𑀘 𑀧𑁂𑀲𑀼𑀡𑀺𑀬𑀦𑁆𑀢𑀺 𑀢𑀲𑁆𑀲𑀸𑀬𑁂𑀯𑁂𑀢𑀁 𑀯𑁂𑀯𑀘𑀦𑀁. 𑀯𑁂𑀪𑀽𑀢𑀺𑀬𑀯𑀸𑀘𑀸 𑀳𑀺 𑀧𑀺𑀬𑀪𑀸𑀯𑀲𑁆𑀲 𑀲𑀼𑀜𑁆𑀜𑀓𑀭𑀡𑀢𑁄 ‘‘𑀧𑁂𑀲𑀼𑀡𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀦𑀸𑀫𑀫𑁂𑀯𑀲𑁆𑀲𑀸 𑀏𑀢𑀦𑁆𑀢𑀺 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀅𑀯𑁄𑀘. 𑀦 𑀘 𑀲𑀸𑀭𑀫𑁆𑀪𑀚𑀦𑁆𑀢𑀺 𑀲𑀸𑀭𑀫𑁆𑀪𑀚𑀸 𑀘 𑀬𑀸 𑀯𑀸𑀘𑀸, 𑀢𑀜𑁆𑀘 𑀦 𑀪𑀸𑀲𑀢𑀺. ‘‘𑀢𑁆𑀯𑀁 𑀤𑀼𑀲𑁆𑀲𑀻𑀮𑁄’’𑀢𑀺 𑀯𑀼𑀢𑁆𑀢𑁂, ‘‘𑀢𑁆𑀯𑀁 𑀤𑀼𑀲𑁆𑀲𑀻𑀮𑁄 𑀢𑀯𑀸𑀘𑀭𑀺𑀬𑁄 𑀤𑀼𑀲𑁆𑀲𑀻𑀮𑁄’’𑀢𑀺 𑀯𑀸, ‘‘𑀢𑀼𑀬𑁆𑀳𑀁 𑀆𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑁂, ‘‘𑀅𑀳𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀸𑀝𑀮𑀺𑀧𑀼𑀢𑁆𑀢𑀁 𑀕𑀢𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀓𑀣𑀸𑀧𑀯𑀢𑁆𑀢𑀁 𑀯𑀸 𑀓𑀭𑀡𑀼𑀢𑁆𑀢𑀭𑀺𑀬𑀯𑀸𑀘𑀁 𑀦 𑀪𑀸𑀲𑀢𑀺. 𑀚𑀬𑀸𑀧𑁂𑀓𑁆𑀔𑁄𑀢𑀺 𑀚𑀬𑀧𑀼𑀭𑁂𑀓𑁆𑀔𑀸𑀭𑁄 𑀳𑀼𑀢𑁆𑀯𑀸, 𑀬𑀣𑀸 𑀳𑀢𑁆𑀣𑀓𑁄 𑀲𑀓𑁆𑀬𑀧𑀼𑀢𑁆𑀢𑁄 𑀢𑀺𑀢𑁆𑀣𑀺𑀬𑀸 𑀦𑀸𑀫 𑀥𑀫𑁆𑀫𑁂𑀦𑀧𑀺 𑀅𑀥𑀫𑁆𑀫𑁂𑀦𑀧𑀺 𑀚𑁂𑀢𑀩𑁆𑀩𑀸𑀢𑀺 𑀲𑀘𑁆𑀘𑀸𑀮𑀺𑀓𑀁 𑀬𑀁𑀓𑀺𑀜𑁆𑀘𑀺 𑀪𑀸𑀲𑀢𑀺, 𑀏𑀯𑀁 ¶ 𑀚𑀬𑀸𑀧𑁂𑀓𑁆𑀔𑁄 𑀚𑀬𑀧𑀼𑀭𑁂𑀓𑁆𑀔𑀸𑀭𑁄 𑀳𑀼𑀢𑁆𑀯𑀸 𑀦 𑀪𑀸𑀲𑀢𑀻𑀢𑀺 𑀅𑀢𑁆𑀣𑁄. 𑀫𑀦𑁆𑀢𑀸 𑀫𑀦𑁆𑀢𑀸 𑀘 𑀯𑀸𑀘𑀁 𑀪𑀸𑀲𑀢𑀻𑀢𑀺 𑀏𑀢𑁆𑀣 𑀫𑀦𑁆𑀢𑀸𑀢𑀺 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀫𑀦𑁆𑀢𑀸𑀬 𑀧𑀜𑁆𑀜𑀸𑀬. 𑀧𑀼𑀦 𑀫𑀦𑁆𑀢𑀸𑀢𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺, 𑀪𑀲𑁆𑀲𑀲𑀫𑀸𑀘𑀸𑀭𑁂 𑀞𑀺𑀢𑁄 𑀤𑀺𑀯𑀲𑀪𑀸𑀕𑀫𑁆𑀧𑀺 𑀓𑀣𑁂𑀦𑁆𑀢𑁄 𑀧𑀜𑁆𑀜𑀸𑀬 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀬𑀼𑀢𑁆𑀢𑀓𑀣𑀫𑁂𑀯 𑀓𑀣𑁂𑀢𑀻𑀢𑀺. 𑀦𑀺𑀥𑀸𑀦𑀯𑀢𑀺𑀦𑁆𑀢𑀺 𑀳𑀤𑀬𑁂𑀧𑀺 𑀦𑀺𑀤𑀳𑀺𑀢𑀩𑁆𑀩𑀬𑀼𑀢𑁆𑀢𑀁. 𑀓𑀸𑀮𑁂𑀦𑀸𑀢𑀺 𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑁂𑀦.

𑀏𑀯𑀁 𑀪𑀸𑀲𑀺𑀢𑀸 𑀳𑀺 𑀯𑀸𑀘𑀸 𑀅𑀫𑀼𑀲𑀸 𑀘𑁂𑀯 𑀳𑁄𑀢𑀺 𑀅𑀧𑀺𑀲𑀼𑀡𑀸 𑀘 𑀅𑀨𑀭𑀼𑀲𑀸 𑀘 𑀅𑀲𑀞𑀸 𑀘 𑀅𑀲𑀫𑁆𑀨𑀧𑁆𑀧𑀮𑀸𑀧𑀸 𑀘. 𑀏𑀯𑀭𑀽𑀧𑀸 𑀘 𑀅𑀬𑀁 𑀯𑀸𑀘𑀸 𑀘𑀢𑀼𑀲𑀘𑁆𑀘𑀦𑀺𑀲𑁆𑀲𑀺𑀢𑀸𑀢𑀺𑀧𑀺 𑀲𑀺𑀓𑁆𑀔𑀢𑁆𑀢𑀬𑀦𑀺𑀲𑁆𑀲𑀺𑀢𑀸𑀢𑀺𑀧𑀺 𑀤𑀲𑀓𑀣𑀸𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀸𑀢𑀺𑀧𑀺 𑀢𑁂𑀭𑀲𑀥𑀼𑀢𑀗𑁆𑀕𑀦𑀺𑀲𑁆𑀲𑀺𑀢𑀸𑀢𑀺𑀧𑀺 𑀲𑀢𑁆𑀢𑀢𑁆𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀦𑀺𑀲𑁆𑀲𑀺𑀢𑀸𑀢𑀺𑀧𑀺 𑀫𑀕𑁆𑀕𑀦𑀺𑀲𑁆𑀲𑀺𑀢𑀸𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 𑀏𑀢𑀤𑀸𑀦𑀼𑀢𑁆𑀢𑀭𑀺𑀬𑀁, 𑀪𑀦𑁆𑀢𑁂, 𑀪𑀲𑁆𑀲𑀲𑀫𑀸𑀘𑀸𑀭𑁂𑀢𑀺 𑀢𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑀲𑀘𑁆𑀘𑁄 𑀘𑀲𑁆𑀲 𑀲𑀤𑁆𑀥𑁄 𑀘𑀸𑀢𑀺 𑀲𑀻𑀮𑀸𑀘𑀸𑀭𑁂 𑀞𑀺𑀢𑁄 𑀪𑀺𑀓𑁆𑀔𑀼 𑀲𑀘𑁆𑀘𑁄 𑀘 𑀪𑀯𑁂𑀬𑁆𑀬 𑀲𑀘𑁆𑀘𑀓𑀣𑁄 𑀲𑀤𑁆𑀥𑁄 𑀘 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄. 𑀦𑀦𑀼 𑀳𑁂𑀝𑁆𑀞𑀸 𑀲𑀘𑁆𑀘𑀁 𑀓𑀣𑀺𑀢𑀫𑁂𑀯, 𑀇𑀥 𑀓𑀲𑁆𑀫𑀸 𑀧𑀼𑀦 𑀯𑀼𑀢𑁆𑀢𑀦𑁆𑀢𑀺? 𑀳𑁂𑀝𑁆𑀞𑀸 𑀯𑀸𑀘𑀸𑀲𑀘𑁆𑀘𑀁 𑀓𑀣𑀺𑀢𑀁. 𑀲𑀻𑀮𑀸𑀘𑀸𑀭𑁂 𑀞𑀺𑀢𑁄 𑀧𑀦 𑀪𑀺𑀓𑁆𑀔𑀼 𑀅𑀦𑁆𑀢𑀫𑀲𑁄 𑀳𑀲𑀦𑀓𑀣𑀸𑀬𑀧𑀺 𑀫𑀼𑀲𑀸𑀯𑀸𑀤𑀁 𑀦 𑀓𑀭𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀇𑀥 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀲𑁄 𑀥𑀫𑁆𑀫𑁂𑀦 𑀲𑀫𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀦 𑀘 𑀓𑀼𑀳𑀓𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀓𑀼𑀳𑀓𑁄’’𑀢𑀺𑀆𑀤𑀻𑀦𑀺 𑀩𑁆𑀭𑀳𑁆𑀫𑀚𑀸𑀮𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑀺.

𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽𑀢𑀺 𑀙𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀪𑁄𑀚𑀦𑁂𑀧𑀺 𑀧𑀫𑀸𑀡𑀜𑁆𑀜𑀽. 𑀲𑀫𑀓𑀸𑀭𑀻𑀢𑀺 ¶ 𑀲𑀫𑀘𑀸𑀭𑀻, 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸 𑀘 𑀓𑀸𑀬𑀯𑀗𑁆𑀓𑀸𑀤𑀻𑀦𑀺 𑀧𑀳𑀸𑀬 𑀲𑀫𑀁 𑀘𑀭𑀢𑀻𑀢𑀺 𑀅𑀢𑁆𑀣𑁄. 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄𑀢𑀺 𑀭𑀢𑁆𑀢𑀺𑀦𑁆𑀤𑀺𑀯𑀁 𑀙 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 ‘‘𑀤𑀺𑀯𑀲𑀁 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬𑀸’’𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀁 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁄 𑀯𑀺𑀳𑀭𑀢𑀺. 𑀅𑀢𑀦𑁆𑀤𑀺𑀢𑁄𑀢𑀺 𑀦𑀺𑀢𑁆𑀢𑀦𑁆𑀤𑀻 𑀓𑀸𑀬𑀸𑀮𑀲𑀺𑀬𑀯𑀺𑀭𑀳𑀺𑀢𑁄. 𑀆𑀭𑀤𑁆𑀥𑀯𑀻𑀭𑀺𑀬𑁄𑀢𑀺 𑀓𑀸𑀬𑀺𑀓𑀯𑀻𑀭𑀺𑀬𑁂𑀦𑀸𑀧𑀺 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺, 𑀕𑀡𑀲𑀗𑁆𑀕𑀡𑀺𑀓𑀁 𑀯𑀺𑀦𑁄𑀤𑁂𑀢𑁆𑀯𑀸 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀅𑀝𑁆𑀞𑀆𑀭𑀩𑁆𑀪𑀯𑀢𑁆𑀣𑀼𑀯𑀲𑁂𑀦 𑀏𑀓𑀯𑀺𑀳𑀸𑀭𑀻. 𑀘𑁂𑀢𑀲𑀺𑀓𑀯𑀻𑀭𑀺𑀬𑁂𑀦𑀸𑀧𑀺 𑀆𑀭𑀤𑁆𑀥𑀯𑀻𑀭𑀺𑀬𑁄 ¶ 𑀳𑁄𑀢𑀺, 𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀁 𑀧𑀳𑀸𑀬 𑀯𑀺𑀦𑁄𑀤𑁂𑀢𑁆𑀯𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀏𑀓𑀯𑀺𑀳𑀸𑀭𑀻. 𑀅𑀧𑀺 𑀘 𑀬𑀣𑀸 𑀢𑀣𑀸 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀁 𑀦𑀺𑀯𑀸𑀭𑁂𑀦𑁆𑀢𑁄 𑀘𑁂𑀢𑀲𑀺𑀓𑀯𑀻𑀭𑀺𑀬𑁂𑀦 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺. 𑀛𑀸𑀬𑀻𑀢𑀺 𑀆𑀭𑀫𑁆𑀫𑀡𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀯𑀲𑁂𑀦 ¶ 𑀛𑀸𑀬𑀻. 𑀲𑀢𑀺𑀫𑀸𑀢𑀺 𑀘𑀺𑀭𑀓𑀢𑀸𑀤𑀺𑀅𑀦𑀼𑀲𑁆𑀲𑀭𑀡𑀲𑀫𑀢𑁆𑀣𑀸𑀬 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄.

𑀓𑀮𑁆𑀬𑀸𑀡𑀧𑀝𑀺𑀪𑀸𑀦𑁄𑀢𑀺 𑀯𑀸𑀓𑁆𑀓𑀭𑀡𑀲𑀫𑁆𑀧𑀦𑁆𑀦𑁄 𑀘𑁂𑀯 𑀳𑁄𑀢𑀺 𑀧𑀝𑀺𑀪𑀸𑀦𑀲𑀫𑁆𑀧𑀦𑁆𑀦𑁄 𑀘. 𑀬𑀼𑀢𑁆𑀢𑀧𑀝𑀺𑀪𑀸𑀦𑁄 𑀔𑁄 𑀧𑀦 𑀳𑁄𑀢𑀺 𑀦𑁄 𑀫𑀼𑀢𑁆𑀢𑀧𑀝𑀺𑀪𑀸𑀦𑁄. 𑀲𑀻𑀮𑀲𑀫𑀸𑀘𑀸𑀭𑀲𑁆𑀫𑀺𑀜𑁆𑀳𑀺 𑀞𑀺𑀢𑀪𑀺𑀓𑁆𑀔𑀼 𑀫𑀼𑀢𑁆𑀢𑀧𑀝𑀺𑀪𑀸𑀦𑁄 𑀦 𑀳𑁄𑀢𑀺, 𑀬𑀼𑀢𑁆𑀢𑀧𑀝𑀺𑀪𑀸𑀦𑁄 𑀧𑀦 𑀳𑁄𑀢𑀺 𑀯𑀗𑁆𑀕𑀻𑀲𑀢𑁆𑀣𑁂𑀭𑁄 𑀯𑀺𑀬. 𑀕𑀢𑀺𑀫𑀸𑀢𑀺 𑀕𑀫𑀦𑀲𑀫𑀢𑁆𑀣𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀥𑀺𑀢𑀺𑀫𑀸𑀢𑀺 𑀥𑀸𑀭𑀡𑀲𑀫𑀢𑁆𑀣𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀫𑀢𑀺𑀫𑀸𑀢𑀺 𑀏𑀢𑁆𑀣 𑀧𑀦 𑀫𑀢𑀻𑀢𑀺 𑀧𑀜𑁆𑀜𑀸𑀬 𑀦𑀸𑀫𑀫𑁂𑀯, 𑀢𑀲𑁆𑀫𑀸 𑀧𑀜𑁆𑀜𑀯𑀸𑀢𑀺 𑀅𑀢𑁆𑀣𑁄. 𑀇𑀢𑀺 𑀢𑀻𑀳𑀺𑀧𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀧𑀜𑁆𑀜𑀸𑀯 𑀓𑀣𑀺𑀢𑀸. 𑀢𑀢𑁆𑀣 𑀳𑁂𑀝𑁆𑀞𑀸 𑀲𑀫𑀡𑀥𑀫𑁆𑀫𑀓𑀭𑀡𑀯𑀻𑀭𑀺𑀬𑀁 𑀓𑀣𑀺𑀢𑀁, 𑀇𑀥 𑀩𑀼𑀤𑁆𑀥𑀯𑀘𑀦𑀕𑀡𑁆𑀳𑀦𑀯𑀻𑀭𑀺𑀬𑀁. 𑀢𑀣𑀸 𑀳𑁂𑀝𑁆𑀞𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀓𑀣𑀺𑀢𑀸, 𑀇𑀥 𑀩𑀼𑀤𑁆𑀥𑀯𑀘𑀦𑀕𑀡𑁆𑀳𑀦𑀧𑀜𑁆𑀜𑀸. 𑀦 𑀘 𑀓𑀸𑀫𑁂𑀲𑀼 𑀕𑀺𑀤𑁆𑀥𑁄𑀢𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀲𑀼 𑀅𑀕𑀺𑀤𑁆𑀥𑁄. 𑀲𑀢𑁄 𑀘 𑀦𑀺𑀧𑀓𑁄 𑀘𑀸𑀢𑀺 𑀅𑀪𑀺𑀓𑁆𑀓𑀦𑁆𑀢𑀧𑀝𑀺𑀓𑁆𑀓𑀦𑁆𑀢𑀸𑀤𑀻𑀲𑀼 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀲𑀢𑀺𑀬𑀸 𑀘𑁂𑀯 𑀜𑀸𑀡𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄 𑀘𑀭𑀢𑀻𑀢𑀺 𑀅𑀢𑁆𑀣𑁄. 𑀦𑁂𑀧𑀓𑁆𑀓𑀦𑁆𑀢𑀺 𑀧𑀜𑁆𑀜𑀸, 𑀢𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀦𑀺𑀧𑀓𑁄𑀢𑀺 𑀯𑀼𑀢𑁆𑀢𑁄. 𑀲𑁂𑀲𑀫𑀺𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑀅𑀦𑀼𑀲𑀸𑀲𑀦𑀯𑀺𑀥𑀸𑀤𑀺𑀯𑀡𑁆𑀡𑀦𑀸

𑁧𑁫𑁪. 𑀧𑀘𑁆𑀘𑀢𑁆𑀢𑀁 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸𑀢𑀺 𑀅𑀢𑁆𑀢𑀦𑁄 𑀉𑀧𑀸𑀬𑀫𑀦𑀲𑀺𑀓𑀸𑀭𑁂𑀦. 𑀬𑀣𑀸𑀦𑀼𑀲𑀺𑀝𑁆𑀞𑀁 𑀢𑀣𑀸 𑀧𑀝𑀺𑀧𑀚𑁆𑀚𑀫𑀸𑀦𑁄𑀢𑀺 𑀬𑀣𑀸 𑀫𑀬𑀸 𑀅𑀦𑀼𑀲𑀺𑀝𑁆𑀞𑀁 𑀅𑀦𑀼𑀲𑀸𑀲𑀦𑀻 𑀤𑀺𑀦𑁆𑀦𑀸, 𑀢𑀣𑀸 𑀧𑀝𑀺𑀧𑀚𑁆𑀚𑀫𑀸𑀦𑁄. 𑀢𑀺𑀡𑁆𑀡𑀁 ¶ 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸𑀢𑀺𑀆𑀤𑀺 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀲𑁂𑀲𑀫𑀺𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑁧𑁫𑁫. 𑀧𑀭𑀧𑀼𑀕𑁆𑀕𑀮𑀯𑀺𑀫𑀼𑀢𑁆𑀢𑀺𑀜𑀸𑀡𑁂𑀢𑀺 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀺𑀜𑀸𑀡𑁂. 𑀲𑁂𑀲𑀫𑀺𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑁧𑁫𑁬. 𑀅𑀫𑀼𑀢𑁆𑀭𑀸𑀲𑀺𑀁 𑀏𑀯𑀁𑀦𑀸𑀫𑁄𑀢𑀺 𑀏𑀓𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀦𑀸𑀫𑀕𑁄𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀫𑀸𑀦𑁄 𑀕𑀘𑁆𑀙𑀢𑀺. 𑀏𑀓𑁄 𑀲𑀼𑀤𑁆𑀥𑀔𑀦𑁆𑀥𑁂𑀬𑁂𑀯 𑀅𑀦𑀼𑀲𑁆𑀲𑀭𑀢𑀺, 𑀏𑀓𑁄 𑀳𑀺 𑀲𑀓𑁆𑀓𑁄𑀢𑀺, 𑀏𑀓𑁄 𑀦 𑀲𑀓𑁆𑀓𑁄𑀢𑀺. 𑀢𑀢𑁆𑀣 𑀬𑁄 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀯𑀲𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀯𑀲𑁂𑀦 𑀕𑀳𑀺𑀢𑀁. 𑀅𑀲𑀓𑁆𑀓𑁄𑀦𑁆𑀢𑁄 𑀧𑀦 𑀓𑀺𑀁 𑀓𑀭𑁄𑀢𑀺? 𑀲𑀼𑀤𑁆𑀥𑀔𑀦𑁆𑀥𑁂𑀬𑁂𑀯 𑀅𑀦𑀼𑀲𑁆𑀲𑀭𑀦𑁆𑀢𑁄 𑀕𑀦𑁆𑀢𑁆𑀯𑀸 𑀅𑀦𑁂𑀓𑀚𑀸𑀢𑀺𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀞𑀢𑁆𑀯𑀸 𑀦𑀸𑀫𑀕𑁄𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀫𑀸𑀦𑁄 𑀑𑀢𑀭𑀢𑀺. 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀁𑀦𑀸𑀫𑁄𑀢𑀺𑀆𑀤𑀺𑀫𑀸𑀳 ¶ ¶ . 𑀲𑁄 𑀏𑀯𑀫𑀸𑀳𑀸𑀢𑀺 𑀲𑁄 𑀤𑀺𑀝𑁆𑀞𑀺𑀕𑀢𑀺𑀓𑁄 𑀏𑀯𑀫𑀸𑀳. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀲𑀲𑁆𑀲𑀢𑁄𑀢𑀺 𑀯𑀢𑁆𑀯𑀸 ‘‘𑀢𑁂 𑀘 𑀲𑀢𑁆𑀢𑀸 𑀲𑀁𑀲𑀭𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀲𑁆𑀲 𑀯𑀘𑀦𑀁 𑀧𑀼𑀩𑁆𑀩𑀸𑀧𑀭𑀯𑀺𑀭𑀼𑀤𑁆𑀥𑀁 𑀳𑁄𑀢𑀺. 𑀤𑀺𑀝𑁆𑀞𑀺𑀕𑀢𑀺𑀓𑀢𑁆𑀢𑀸 𑀧𑀦𑁂𑀲 𑀏𑀢𑀁 𑀦 𑀲𑀮𑁆𑀮𑀓𑁆𑀔𑁂𑀲𑀺. 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀳𑀺 𑀞𑀸𑀦𑀁 𑀯𑀸 𑀦𑀺𑀬𑀫𑁄 𑀯𑀸 𑀦𑀢𑁆𑀣𑀺. 𑀇𑀫𑀁 𑀕𑀳𑁂𑀢𑁆𑀯𑀸 𑀇𑀫𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀇𑀫𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀇𑀫𑀁 𑀕𑀡𑁆𑀳𑀸𑀢𑀻𑀢𑀺 𑀩𑁆𑀭𑀳𑁆𑀫𑀚𑀸𑀮𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯𑁂𑀢𑀁. 𑀅𑀬𑀁 𑀢𑀢𑀺𑀬𑁄 𑀲𑀲𑁆𑀲𑀢𑀯𑀸𑀤𑁄𑀢𑀺 𑀣𑁂𑀭𑁄 𑀮𑀸𑀪𑀺𑀲𑁆𑀲𑁂𑀯 𑀯𑀲𑁂𑀦 𑀢𑀬𑁄 𑀲𑀲𑁆𑀲𑀢𑀯𑀸𑀤𑁂 𑀆𑀳. 𑀪𑀕𑀯𑀢𑀸 𑀧𑀦 𑀢𑀓𑁆𑀓𑀻𑀯𑀸𑀤𑀫𑁆𑀧𑀺 𑀕𑀳𑁂𑀢𑁆𑀯𑀸 𑀩𑁆𑀭𑀳𑁆𑀫𑀚𑀸𑀮𑁂 𑀘𑀢𑁆𑀢𑀸𑀭𑁄 𑀯𑀼𑀢𑁆𑀢𑀸. 𑀏𑀢𑁂𑀲𑀁 𑀧𑀦 𑀢𑀺𑀡𑁆𑀡𑀁 𑀯𑀸𑀤𑀸𑀦𑀁 𑀯𑀺𑀢𑁆𑀣𑀸𑀭𑀓𑀣𑀸 𑀩𑁆𑀭𑀳𑁆𑀫𑀚𑀸𑀮𑁂 (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁦) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀫𑀺𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑁧𑁫𑁭. 𑀕𑀡𑀦𑀸𑀬 𑀯𑀸𑀢𑀺 𑀧𑀺𑀡𑁆𑀟𑀕𑀡𑀦𑀸𑀬. 𑀲𑀗𑁆𑀔𑀸𑀦𑁂𑀦𑀸𑀢𑀺 𑀅𑀘𑁆𑀙𑀺𑀤𑁆𑀤𑀓𑀯𑀲𑁂𑀦 𑀫𑀦𑁄𑀕𑀡𑀦𑀸𑀬. 𑀉𑀪𑀬𑀣𑀸𑀧𑀺 𑀧𑀺𑀡𑁆𑀟𑀕𑀡𑀦𑀫𑁂𑀯 𑀤𑀲𑁆𑀲𑁂𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺, 𑀯𑀲𑁆𑀲𑀸𑀦𑀁 𑀲𑀢𑀯𑀲𑁂𑀦 𑀲𑀳𑀲𑁆𑀲𑀯𑀲𑁂𑀦 𑀲𑀢𑀲𑀳𑀲𑁆𑀲𑀯𑀲𑁂𑀦 𑀓𑁄𑀝𑀺𑀯𑀲𑁂𑀦 𑀧𑀺𑀡𑁆𑀟𑀁 𑀓𑀢𑁆𑀯𑀸𑀧𑀺 𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀲𑀢𑀸𑀦𑀻𑀢𑀺 𑀯𑀸 𑀏𑀢𑁆𑀢𑀓𑀸 𑀯𑀲𑁆𑀲𑀓𑁄𑀝𑀺𑀬𑁄𑀢𑀺 𑀯𑀸 𑀏𑀯𑀁 𑀲𑀗𑁆𑀔𑀸𑀢𑀼𑀁 𑀦 𑀲𑀓𑁆𑀓𑀸. 𑀢𑀼𑀫𑁆𑀳𑁂 𑀧𑀦 𑀅𑀢𑁆𑀢𑀦𑁄 𑀤𑀲𑀦𑁆𑀦𑀁 𑀧𑀸𑀭𑀫𑀻𑀦𑀁 𑀧𑀽𑀭𑀺𑀢𑀢𑁆𑀢𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀬𑀲𑁆𑀫𑀸 𑀯𑁄 𑀅𑀦𑀸𑀯𑀭𑀡𑀜𑀸𑀡𑀁 𑀲𑀽𑀭𑀁 𑀯𑀳𑀢𑀺. 𑀢𑀲𑁆𑀫𑀸 𑀤𑁂𑀲𑀦𑀸𑀜𑀸𑀡𑀓𑀼𑀲𑀮𑀢𑀁 𑀧𑀼𑀭𑀓𑁆𑀔𑀢𑁆𑀯𑀸 𑀯𑀲𑁆𑀲𑀕𑀡𑀦𑀸𑀬𑀧𑀺 𑀧𑀭𑀺𑀬𑀦𑁆𑀢𑀺𑀓𑀁 𑀓𑀢𑁆𑀯𑀸 𑀓𑀧𑁆𑀧𑀕𑀡𑀦𑀸𑀬𑀧𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀏𑀢𑁆𑀢𑀓𑀦𑁆𑀢𑀺 ¶ 𑀤𑀲𑁆𑀲𑁂𑀣𑀸𑀢𑀺 𑀤𑀻𑀧𑁂𑀢𑀺. 𑀧𑀸𑀴𑀺𑀬𑀢𑁆𑀣𑁄 𑀧𑀦𑁂𑀢𑁆𑀣 𑀯𑀼𑀢𑁆𑀢𑀦𑀬𑁄𑀬𑁂𑀯. 𑀲𑁂𑀲𑀫𑀺𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑁧𑁫𑁮. 𑀏𑀢𑀤𑀸𑀦𑀼𑀢𑁆𑀢𑀭𑀺𑀬𑀁, 𑀪𑀦𑁆𑀢𑁂, 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀜𑀸𑀡𑁂𑀢𑀺 𑀪𑀦𑁆𑀢𑁂 𑀬𑀸𑀧𑀺 𑀅𑀬𑀁 𑀲𑀢𑁆𑀢𑀸𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀜𑀸𑀡𑀤𑁂𑀲𑀦𑀸, 𑀲𑀸𑀧𑀺 𑀢𑀼𑀫𑁆𑀳𑀸𑀓𑀁𑀬𑁂𑀯 𑀅𑀦𑀼𑀢𑁆𑀢𑀭𑀸. 𑀅𑀢𑀻𑀢𑀩𑀼𑀤𑁆𑀥𑀸𑀧𑀺 𑀏𑀯𑀫𑁂𑀯 𑀤𑁂𑀲𑁂𑀲𑀼𑀁. 𑀅𑀦𑀸𑀕𑀢𑀸𑀧𑀺 𑀏𑀯𑀫𑁂𑀯 𑀤𑁂𑀲𑁂𑀲𑁆𑀲𑀦𑁆𑀢𑀺. 𑀢𑀼𑀫𑁆𑀳𑁂 𑀢𑁂𑀲𑀁 𑀅𑀢𑀻𑀢𑀸𑀦𑀸𑀕𑀢𑀩𑀼𑀤𑁆𑀥𑀸𑀦𑀁 𑀜𑀸𑀡𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸𑀯 𑀤𑁂𑀲𑀬𑀺𑀢𑁆𑀣. ‘‘𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀏𑀯𑀁𑀧𑀲𑀦𑁆𑀦𑁄 𑀅𑀳𑀁 𑀪𑀦𑁆𑀢𑁂 𑀪𑀕𑀯𑀢𑀻’’𑀢𑀺 𑀤𑀻𑀧𑁂𑀢𑀺. 𑀧𑀸𑀴𑀺𑀬𑀢𑁆𑀣𑁄 𑀧𑀦𑁂𑀢𑁆𑀣 𑀯𑀺𑀢𑁆𑀣𑀸𑀭𑀺𑀢𑁄𑀬𑁂𑀯.

𑁧𑁫𑁯. 𑀲𑀸𑀲𑀯𑀸 𑀲𑀉𑀧𑀥𑀺𑀓𑀸𑀢𑀺 𑀲𑀤𑁄𑀲𑀸 𑀲𑀉𑀧𑀸𑀭𑀫𑁆𑀪𑀸. 𑀦𑁄 𑀅𑀭𑀺𑀬𑀸𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀭𑀺𑀬𑀺𑀤𑁆𑀥𑀻𑀢𑀺 𑀦 𑀯𑀼𑀘𑁆𑀘𑀢𑀺. 𑀅𑀦𑀸𑀲𑀯𑀸 𑀅𑀦𑀼𑀧𑀥𑀺𑀓𑀸𑀢𑀺 𑀦𑀺𑀤𑁆𑀤𑁄𑀲𑀸 𑀅𑀦𑀼𑀧𑀸𑀭𑀫𑁆𑀪𑀸. 𑀅𑀭𑀺𑀬𑀸𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀭𑀺𑀬𑀺𑀤𑁆𑀥𑀻𑀢𑀺 𑀯𑀼𑀘𑁆𑀘𑀢𑀺. 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 ¶ 𑀢𑀢𑁆𑀣 𑀯𑀺𑀳𑀭𑀢𑀻𑀢𑀺 𑀓𑀣𑀁 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀻𑀢𑀺? 𑀧𑀝𑀺𑀓𑀽𑀮𑁂 𑀲𑀢𑁆𑀢𑁂 𑀫𑁂𑀢𑁆𑀢𑀁 𑀨𑀭𑀢𑀺, 𑀲𑀗𑁆𑀔𑀸𑀭𑁂 𑀥𑀸𑀢𑀼𑀲𑀜𑁆𑀜𑀁 𑀉𑀧𑀲𑀁𑀳𑀭𑀢𑀺. 𑀬𑀣𑀸𑀳 ‘‘𑀓𑀣𑀁 𑀧𑀝𑀺𑀓𑀽𑀮𑁂 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺 (𑀧𑀝𑀺. 𑀫. 𑁩.𑁯𑁭)? 𑀅𑀦𑀺𑀝𑁆𑀞𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀫𑁂𑀢𑁆𑀢𑀸𑀬 𑀯𑀸 𑀨𑀭𑀢𑀺, 𑀥𑀸𑀢𑀼𑀢𑁄 𑀯𑀸 𑀉𑀧𑀲𑀁𑀳𑀭𑀢𑀻’’𑀢𑀺. 𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀻𑀢𑀺 𑀅𑀧𑁆𑀧𑀝𑀺𑀓𑀽𑀮𑁂 𑀲𑀢𑁆𑀢𑁂 𑀅𑀲𑀼𑀪𑀲𑀜𑁆𑀜𑀁 𑀨𑀭𑀢𑀺, 𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀲𑀜𑁆𑀜𑀁 𑀉𑀧𑀲𑀁𑀳𑀭𑀢𑀺. 𑀬𑀣𑀸𑀳 ‘‘𑀓𑀣𑀁 𑀅𑀧𑁆𑀧𑀝𑀺𑀓𑀽𑀮𑁂 𑀧𑀝𑀺𑀓𑀽𑀮𑀲𑀜𑁆𑀜𑀻 ¶ 𑀯𑀺𑀳𑀭𑀢𑀺? 𑀇𑀝𑁆𑀞𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀲𑀼𑀪𑀸𑀬 𑀯𑀸 𑀨𑀭𑀢𑀺, 𑀅𑀦𑀺𑀘𑁆𑀘𑀢𑁄 𑀯𑀸 𑀉𑀧𑀲𑀁𑀳𑀭𑀢𑀻’’𑀢𑀺. 𑀏𑀯𑀁 𑀲𑁂𑀲𑀧𑀤𑁂𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀉𑀧𑁂𑀓𑁆𑀔𑀓𑁄 𑀢𑀢𑁆𑀣 𑀯𑀺𑀳𑀭𑀢𑀻𑀢𑀺 𑀇𑀝𑁆𑀞𑁂 𑀅𑀭𑀚𑁆𑀚𑀦𑁆𑀢𑁄 𑀅𑀦𑀺𑀝𑁆𑀞𑁂 𑀅𑀤𑀼𑀲𑁆𑀲𑀦𑁆𑀢𑁄 𑀬𑀣𑀸 𑀅𑀜𑁆𑀜𑁂 𑀅𑀲𑀫𑀧𑁂𑀓𑁆𑀔𑀦𑁂𑀦 𑀫𑁄𑀳𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀏𑀯𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁄 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀬 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺. 𑀏𑀢𑀤𑀸𑀦𑀼𑀢𑁆𑀢𑀭𑀺𑀬𑀁, 𑀪𑀦𑁆𑀢𑁂, 𑀇𑀤𑁆𑀥𑀺𑀯𑀺𑀥𑀸𑀲𑀽𑀢𑀺, 𑀪𑀦𑁆𑀢𑁂, 𑀬𑀸 𑀅𑀬𑀁 𑀤𑁆𑀯𑀻𑀲𑀼 𑀇𑀤𑁆𑀥𑀻𑀲𑀼 𑀏𑀯𑀁𑀤𑁂𑀲𑀦𑀸, 𑀏𑀢𑀤𑀸𑀦𑀼𑀢𑁆𑀢𑀭𑀺𑀬𑀁. 𑀢𑀁 𑀪𑀕𑀯𑀸𑀢𑀺 𑀢𑀁 𑀤𑁂𑀲𑀦𑀁 𑀪𑀕𑀯𑀸 𑀅𑀲𑁂𑀲𑀁 𑀲𑀓𑀮𑀁 𑀅𑀪𑀺𑀚𑀸𑀦𑀸𑀢𑀺. 𑀢𑀁 𑀪𑀕𑀯𑀢𑁄𑀢𑀺 𑀢𑀁 𑀤𑁂𑀲𑀦𑀁 𑀪𑀕𑀯𑀢𑁄 𑀅𑀲𑁂𑀲𑀁 𑀅𑀪𑀺𑀚𑀸𑀦𑀢𑁄. 𑀉𑀢𑁆𑀢𑀭𑀺 𑀅𑀪𑀺𑀜𑁆𑀜𑁂𑀬𑁆𑀬𑀁 𑀦𑀢𑁆𑀣𑀻𑀢𑀺 𑀉𑀢𑁆𑀢𑀭𑀺 𑀅𑀪𑀺𑀚𑀸𑀦𑀺𑀢𑀩𑁆𑀩𑀁 𑀦𑀢𑁆𑀣𑀺. 𑀅𑀬𑀁 𑀦𑀸𑀫 𑀇𑀢𑁄 𑀅𑀜𑁆𑀜𑁄 𑀥𑀫𑁆𑀫𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸 𑀬𑀁 𑀪𑀕𑀯𑀸 𑀦 𑀚𑀸𑀦𑀸𑀢𑀺 𑀇𑀤𑀁 𑀦𑀢𑁆𑀣𑀺. 𑀬𑀤𑀪𑀺𑀚𑀸𑀦𑀁 𑀅𑀜𑁆𑀜𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸𑀢𑀺 𑀬𑀁 𑀢𑀼𑀫𑁆𑀳𑁂𑀳𑀺 𑀅𑀦𑀪𑀺𑀜𑁆𑀜𑀸𑀢𑀁 𑀅𑀜𑁆𑀜𑁄 𑀲𑀫𑀡𑁄 𑀯𑀸 ¶ 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀅𑀪𑀺𑀚𑀸𑀦𑀦𑁆𑀢𑁄 𑀪𑀕𑀯𑀢𑀸 𑀪𑀺𑀬𑁆𑀬𑁄𑀪𑀺𑀜𑁆𑀜𑀢𑀭𑁄 𑀅𑀲𑁆𑀲, 𑀅𑀥𑀺𑀓𑀢𑀭𑀧𑀜𑁆𑀜𑁄 𑀪𑀯𑁂𑀬𑁆𑀬. 𑀬𑀤𑀺𑀤𑀁 𑀇𑀤𑁆𑀥𑀺𑀯𑀺𑀥𑀸𑀲𑀽𑀢𑀺 𑀏𑀢𑁆𑀣 𑀬𑀤𑀺𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀇𑀤𑁆𑀥𑀺𑀯𑀺𑀥𑀸𑀲𑀼 𑀪𑀕𑀯𑀢𑀸 𑀉𑀢𑁆𑀢𑀭𑀺𑀢𑀭𑁄 𑀦𑀢𑁆𑀣𑀺. 𑀅𑀢𑀻𑀢𑀩𑀼𑀤𑁆𑀥𑀸𑀧𑀺 𑀳𑀺 𑀇𑀫𑀸 𑀤𑁆𑀯𑁂 𑀇𑀤𑁆𑀥𑀺𑀬𑁄 𑀤𑁂𑀲𑁂𑀲𑀼𑀁, 𑀅𑀦𑀸𑀕𑀢𑀸𑀧𑀺 𑀇𑀫𑀸𑀯 𑀤𑁂𑀲𑁂𑀲𑁆𑀲𑀦𑁆𑀢𑀺. 𑀢𑀼𑀫𑁆𑀳𑁂𑀧𑀺 𑀢𑁂𑀲𑀁 𑀜𑀸𑀡𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸 𑀇𑀫𑀸𑀯 𑀤𑁂𑀲𑀬𑀺𑀢𑁆𑀣. 𑀇𑀢𑀺 𑀪𑀕𑀯𑀸 𑀇𑀤𑁆𑀥𑀺𑀯𑀺𑀥𑀸𑀲𑀼 𑀅𑀦𑀼𑀢𑁆𑀢𑀭𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀏𑀯𑀁𑀧𑀲𑀦𑁆𑀦𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀻’’𑀢𑀺 𑀤𑀻𑀧𑁂𑀢𑀺. 𑀏𑀢𑁆𑀢𑀸𑀯𑀢𑀸 𑀬𑁂 𑀥𑀫𑁆𑀫𑀲𑁂𑀦𑀸𑀧𑀢𑀺 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑁄𑀴𑀲 𑀅𑀧𑀭𑀫𑁆𑀧𑀭𑀺𑀬𑀥𑀫𑁆𑀫𑁂 𑀲𑀫𑁆𑀫𑀲𑀺, 𑀢𑁂𑀯 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺.

𑀅𑀜𑁆𑀜𑀣𑀸𑀲𑀢𑁆𑀣𑀼𑀕𑀼𑀡𑀤𑀲𑁆𑀲𑀦𑀸𑀤𑀺𑀯𑀡𑁆𑀡𑀦𑀸

𑁧𑁬𑁦. 𑀇𑀤𑀸𑀦𑀺 𑀅𑀧𑀭𑁂𑀦𑀧𑀺 𑀆𑀓𑀸𑀭𑁂𑀦 𑀪𑀕𑀯𑀢𑁄 𑀕𑀼𑀡𑁂 𑀤𑀲𑁆𑀲𑁂𑀦𑁆𑀢𑁄 𑀬𑀁 𑀢𑀁 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀤𑁆𑀥𑁂𑀦 𑀓𑀼𑀮𑀧𑀼𑀢𑁆𑀢𑁂𑀦𑀸𑀢𑀺 𑀲𑀤𑁆𑀥𑀸 𑀓𑀼𑀮𑀧𑀼𑀢𑁆𑀢𑀸 ¶ 𑀦𑀸𑀫 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀩𑁄𑀥𑀺𑀲𑀢𑁆𑀢𑀸. 𑀢𑀲𑁆𑀫𑀸 𑀬𑀁 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑁂𑀦 𑀧𑀢𑁆𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀁 𑀧𑀦 𑀢𑁂𑀦 𑀧𑀢𑁆𑀢𑀩𑁆𑀩𑀁? 𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸. 𑀆𑀭𑀤𑁆𑀥𑀯𑀻𑀭𑀺𑀬𑁂𑀦𑀸𑀢𑀺𑀆𑀤𑀻𑀲𑀼 ‘‘𑀯𑀻𑀭𑀺𑀬𑀁 𑀣𑀸𑀫𑁄’’𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑁂𑀯 𑀯𑀻𑀭𑀺𑀬𑀯𑁂𑀯𑀘𑀦𑀸𑀦𑀺. 𑀢𑀢𑁆𑀣 𑀆𑀭𑀤𑁆𑀥𑀯𑀻𑀭𑀺𑀬𑁂𑀦𑀸𑀢𑀺 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑁂𑀦. 𑀣𑀸𑀫𑀯𑀢𑀸𑀢𑀺 𑀣𑀸𑀫𑀲𑀫𑁆𑀧𑀦𑁆𑀦𑁂𑀦 𑀣𑀺𑀭𑀯𑀻𑀭𑀺𑀬𑁂𑀦. 𑀧𑀼𑀭𑀺𑀲𑀣𑀸𑀫𑁂𑀦𑀸𑀢𑀺 𑀢𑁂𑀦 𑀣𑀸𑀫𑀯𑀢𑀸 𑀬𑀁 𑀧𑀼𑀭𑀺𑀲𑀣𑀸𑀫𑁂𑀦 𑀧𑀢𑁆𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀦𑁆𑀢𑀭𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀭𑀺𑀲𑀥𑁄𑀭𑀬𑁆𑀳𑁂𑀦𑀸𑀢𑀺 𑀬𑀸 𑀅𑀲𑀫𑀥𑀼𑀭𑁂𑀳𑀺 𑀩𑀼𑀤𑁆𑀥𑁂𑀳𑀺 𑀯𑀳𑀺𑀢𑀩𑁆𑀩𑀸 𑀥𑀼𑀭𑀸, 𑀢𑀁 𑀥𑀼𑀭𑀁 𑀯𑀳𑀦𑀲𑀫𑀢𑁆𑀣𑁂𑀦 𑀫𑀳𑀸𑀧𑀼𑀭𑀺𑀲𑁂𑀦. 𑀅𑀦𑀼𑀧𑁆𑀧𑀢𑁆𑀢𑀁 𑀢𑀁 𑀪𑀕𑀯𑀢𑀸𑀢𑀺 𑀢𑀁 𑀲𑀩𑁆𑀩𑀁 𑀅𑀢𑀻𑀢𑀸𑀦𑀸𑀕𑀢𑀩𑀼𑀤𑁆𑀥𑁂𑀳𑀺 𑀧𑀢𑁆𑀢𑀩𑁆𑀩𑀁, 𑀲𑀩𑁆𑀩𑀫𑁂𑀯 𑀅𑀦𑀼𑀧𑁆𑀧𑀢𑁆𑀢𑀁, 𑀪𑀕𑀯𑀢𑁄 𑀏𑀓𑀕𑀼𑀡𑁄𑀧𑀺 𑀊𑀦𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀸𑀫𑁂𑀲𑀼 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀁. 𑀬𑀣𑀸 𑀅𑀜𑁆𑀜𑁂 𑀓𑁂𑀡𑀺𑀬𑀚𑀝𑀺𑀮𑀸𑀤𑀬𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 ‘‘𑀓𑁄 𑀚𑀸𑀦𑀸𑀢𑀺 𑀧𑀭𑀮𑁄𑀓𑀁 ¶ . 𑀲𑀼𑀔𑁄 𑀇𑀫𑀺𑀲𑁆𑀲𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀫𑀼𑀤𑀼𑀓𑀸𑀬 𑀮𑁄𑀫𑀲𑀸𑀬 𑀩𑀸𑀳𑀸𑀬 𑀲𑀫𑁆𑀨𑀲𑁆𑀲𑁄’’𑀢𑀺 𑀫𑁄𑀴𑀺𑀩𑀦𑁆𑀥𑀸𑀳𑀺 𑀧𑀭𑀺𑀩𑁆𑀩𑀸𑀚𑀺𑀓𑀸𑀳𑀺 𑀧𑀭𑀺𑀘𑀸𑀭𑁂𑀦𑁆𑀢𑀺 𑀲𑀫𑁆𑀧𑀢𑁆𑀢𑀁 𑀲𑀫𑁆𑀧𑀢𑁆𑀢𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀅𑀦𑀼𑀪𑀯𑀫𑀸𑀦𑀸 𑀓𑀸𑀫𑀲𑀼𑀔𑀫𑀦𑀼𑀬𑀼𑀢𑁆𑀢𑀸, 𑀦 𑀏𑀯𑀫𑀦𑀼𑀬𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺.

𑀳𑀻𑀦𑀦𑁆𑀢𑀺 𑀮𑀸𑀫𑀓𑀁. 𑀕𑀫𑁆𑀫𑀦𑁆𑀢𑀺 𑀕𑀸𑀫𑀯𑀸𑀲𑀻𑀦𑀁 𑀥𑀫𑁆𑀫𑀁. 𑀧𑁄𑀣𑀼𑀚𑁆𑀚𑀦𑀺𑀓𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑁂𑀳𑀺 𑀲𑁂𑀯𑀺𑀢𑀩𑁆𑀩𑀁. 𑀅𑀦𑀭𑀺𑀬𑀦𑁆𑀢𑀺 𑀦 𑀦𑀺𑀤𑁆𑀤𑁄𑀲𑀁. 𑀦 𑀯𑀸 𑀅𑀭𑀺𑀬𑁂𑀳𑀺 𑀲𑁂𑀯𑀺𑀢𑀩𑁆𑀩𑀁. 𑀅𑀦𑀢𑁆𑀣𑀲𑀜𑁆𑀳𑀺𑀢𑀦𑁆𑀢𑀺 𑀅𑀦𑀢𑁆𑀣𑀲𑀁𑀬𑀼𑀢𑁆𑀢𑀁. 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀦𑁆𑀢𑀺 ¶ 𑀅𑀢𑁆𑀢𑀦𑁄 𑀆𑀢𑀸𑀧𑀦𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀁. 𑀤𑀼𑀓𑁆𑀔𑀦𑁆𑀢𑀺 𑀤𑀼𑀓𑁆𑀔𑀬𑀼𑀢𑁆𑀢𑀁, 𑀤𑀼𑀓𑁆𑀔𑀫𑀁 𑀯𑀸. 𑀬𑀣𑀸 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀁 𑀧𑀭𑀺𑀯𑀚𑁆𑀚𑁂𑀲𑁆𑀲𑀸𑀫𑀸𑀢𑀺 𑀓𑀸𑀬𑀓𑀺𑀮𑀫𑀣𑀁 𑀅𑀦𑀼𑀥𑀸𑀯𑀦𑁆𑀢𑀺, 𑀢𑀢𑁄 𑀫𑀼𑀜𑁆𑀘𑀺𑀲𑁆𑀲𑀸𑀫𑀸𑀢𑀺 𑀓𑀸𑀫𑀲𑀼𑀔𑀁 𑀅𑀦𑀼𑀥𑀸𑀯𑀦𑁆𑀢𑀺, 𑀦 𑀏𑀯𑀁 𑀪𑀕𑀯𑀸. 𑀪𑀕𑀯𑀸 𑀧𑀦 𑀉𑀪𑁄 𑀏𑀢𑁂 𑀅𑀦𑁆𑀢𑁂 𑀯𑀚𑁆𑀚𑁂𑀢𑁆𑀯𑀸 𑀬𑀸 𑀲𑀸 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸 𑀘𑀓𑁆𑀔𑀼𑀓𑀭𑀡𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺, 𑀢𑀫𑁂𑀯 𑀧𑀝𑀺𑀧𑀦𑁆𑀦𑁄. 𑀢𑀲𑁆𑀫𑀸 ‘‘𑀦 𑀘 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕’’𑀦𑁆𑀢𑀺𑀆𑀤𑀺𑀫𑀸𑀳.

𑀆𑀪𑀺𑀘𑁂𑀢𑀲𑀺𑀓𑀸𑀦𑀦𑁆𑀢𑀺 𑀅𑀪𑀺𑀘𑁂𑀢𑀲𑀺𑀓𑀸𑀦𑀁, 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀦𑁆𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀲𑀼𑀔𑀯𑀺𑀳𑀸𑀭𑀸𑀦𑀁. 𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑀦𑁆𑀢𑀲𑁆𑀫𑀺𑀜𑁆𑀳𑀺 𑀲𑀧𑁆𑀧𑀻𑀢𑀺𑀓𑀤𑀼𑀢𑀺𑀬𑀚𑁆𑀛𑀸𑀦𑀨𑀮𑀲𑀫𑀸𑀧𑀢𑁆𑀢𑀺 𑀓𑀣𑀺𑀢𑀸 (𑀤𑀻. 𑀦𑀺. 𑁧.𑁪𑁩𑁨). 𑀧𑀸𑀲𑀸𑀤𑀺𑀓𑀲𑀼𑀢𑁆𑀢𑀦𑁆𑀢𑁂 𑀲𑀳 𑀫𑀕𑁆𑀕𑁂𑀦 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀚𑁆𑀛𑀸𑀦𑀁. 𑀤𑀲𑀼𑀢𑁆𑀢𑀭𑀲𑀼𑀢𑁆𑀢𑀦𑁆𑀢𑁂 ¶ 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀨𑀮𑀲𑀫𑀸𑀧𑀢𑁆𑀢𑀺. 𑀇𑀫𑀲𑁆𑀫𑀺𑀁 𑀲𑀫𑁆𑀧𑀲𑀸𑀤𑀦𑀻𑀬𑁂 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀚𑁆𑀛𑀸𑀦𑀸𑀦𑀺 𑀓𑀣𑀺𑀢𑀸𑀦𑀺. 𑀦𑀺𑀓𑀸𑀫𑀮𑀸𑀪𑀻𑀢𑀺 𑀬𑀣𑀸𑀓𑀸𑀫𑀮𑀸𑀪𑀻. 𑀅𑀓𑀺𑀘𑁆𑀙𑀮𑀸𑀪𑀻𑀢𑀺 𑀅𑀤𑀼𑀓𑁆𑀔𑀮𑀸𑀪𑀻. 𑀅𑀓𑀲𑀺𑀭𑀮𑀸𑀪𑀻𑀢𑀺 𑀯𑀺𑀧𑀼𑀮𑀮𑀸𑀪𑀻.

𑀅𑀦𑀼𑀬𑁄𑀕𑀤𑀸𑀦𑀧𑁆𑀧𑀓𑀸𑀭𑀯𑀡𑁆𑀡𑀦𑀸

𑁧𑁬𑁧. 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸𑀢𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸. 𑀢𑀻𑀡𑀺 𑀳𑀺 𑀔𑁂𑀢𑁆𑀢𑀸𑀦𑀺 𑁋 𑀚𑀸𑀢𑀺𑀔𑁂𑀢𑁆𑀢𑀁 𑀆𑀡𑀸𑀔𑁂𑀢𑁆𑀢𑀁 𑀯𑀺𑀲𑀬𑀔𑁂𑀢𑁆𑀢𑀁. 𑀢𑀢𑁆𑀣 𑀚𑀸𑀢𑀺𑀔𑁂𑀢𑁆𑀢𑀁 𑀦𑀸𑀫 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼. 𑀲𑀸 𑀳𑀺 𑀢𑀣𑀸𑀕𑀢𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀦𑀓𑀸𑀮𑁂 𑀦𑀺𑀓𑁆𑀔𑀫𑀦𑀓𑀸𑀮𑁂 𑀲𑀫𑁆𑀩𑁄𑀥𑀺𑀓𑀸𑀮𑁂 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂 𑀆𑀬𑀼𑀲𑀗𑁆𑀔𑀸𑀭𑁄𑀲𑁆𑀲𑀚𑁆𑀚𑀦𑁂 𑀧𑀭𑀺𑀦𑀺𑀩𑁆𑀩𑀸𑀦𑁂 𑀘 𑀓𑀫𑁆𑀧𑀢𑀺. 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀁 𑀧𑀦 𑀆𑀡𑀸𑀔𑁂𑀢𑁆𑀢𑀁 𑀦𑀸𑀫. 𑀆𑀝𑀸𑀦𑀸𑀝𑀺𑀬𑀫𑁄𑀭𑀧𑀭𑀺𑀢𑁆𑀢𑀥𑀚𑀕𑁆𑀕𑀧𑀭𑀺𑀢𑁆𑀢𑀭𑀢𑀦𑀧𑀭𑀺𑀢𑁆𑀢𑀸𑀤𑀻𑀦𑀜𑁆𑀳𑀺 𑀏𑀢𑁆𑀣 𑀆𑀡𑀸 𑀯𑀢𑁆𑀢𑀢𑀺. 𑀯𑀺𑀲𑀬𑀔𑁂𑀢𑁆𑀢𑀲𑁆𑀲 𑀧𑀦 𑀧𑀭𑀺𑀫𑀸𑀡𑀁 𑀦𑀢𑁆𑀣𑀺, 𑀩𑀼𑀤𑁆𑀥𑀸𑀦𑀜𑁆𑀳𑀺 ‘‘𑀬𑀸𑀯𑀢𑀓𑀁 𑀜𑀸𑀡𑀁, 𑀢𑀸𑀯𑀢𑀓𑀁 𑀜𑁂𑀬𑁆𑀬𑀁, 𑀬𑀸𑀯𑀢𑀓𑀁 𑀜𑁂𑀬𑁆𑀬𑀁 𑀢𑀸𑀯𑀢𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀜𑁂𑀬𑁆𑀬𑀁, 𑀜𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡’’𑀦𑁆𑀢𑀺 (𑀫𑀳𑀸𑀦𑀺. 𑁫𑁫) 𑀯𑀘𑀦𑀢𑁄 𑀅𑀯𑀺𑀲𑀬𑁄 𑀦𑀸𑀫 𑀦𑀢𑁆𑀣𑀺.

𑀇𑀫𑁂𑀲𑀼 ¶ 𑀧𑀦 𑀢𑀻𑀲𑀼 𑀔𑁂𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀇𑀫𑀁 𑀘𑀓𑁆𑀓𑀯𑀸𑀴𑀁 𑀅𑀜𑁆𑀜𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀼𑀢𑁆𑀢𑀁 𑀦𑀢𑁆𑀣𑀺, 𑀦𑀼𑀧𑁆𑀧𑀜𑁆𑀚𑀦𑁆𑀢𑀻𑀢𑀺 𑀧𑀦 𑀅𑀢𑁆𑀣𑀺. 𑀢𑀻𑀡𑀺 𑀧𑀺𑀝𑀓𑀸𑀦𑀺 ¶ 𑀯𑀺𑀦𑀬𑀧𑀺𑀝𑀓𑀁, 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁. 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀲𑀗𑁆𑀕𑀻𑀢𑀺, 𑀬𑀲𑀢𑁆𑀣𑁂𑀭𑀲𑁆𑀲 𑀲𑀗𑁆𑀕𑀻𑀢𑀺, 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀲𑀗𑁆𑀕𑀻𑀢𑀻𑀢𑀺. 𑀇𑀫𑀸 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 ‘‘𑀇𑀫𑀁 𑀘𑀓𑁆𑀓𑀯𑀸𑀴𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀲𑀼𑀢𑁆𑀢𑀁 𑀦𑀢𑁆𑀣𑀺, 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀦 𑀅𑀢𑁆𑀣𑀺.

𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀦𑁆𑀢𑀺 𑀅𑀧𑀼𑀭𑁂 𑀅𑀧𑀘𑁆𑀙𑀸 𑀏𑀓𑀢𑁄 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 ‘‘𑀩𑁄𑀥𑀺𑀁 𑀅𑀧𑀢𑁆𑀯𑀸 𑀦 𑀉𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀲𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀁, 𑀢𑀸𑀯 𑀧𑀼𑀩𑁆𑀩𑁂𑀢𑀺 𑀦 𑀯𑁂𑀤𑀺𑀢𑀩𑁆𑀩𑀁. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀳𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀓𑀫𑁆𑀧𑀦𑁂𑀦𑁂𑀯 𑀔𑁂𑀢𑁆𑀢𑀧𑀭𑀺𑀕𑁆𑀕𑀳𑁄 𑀓𑀢𑁄. 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀢𑁆𑀢𑀺𑀧𑀺 𑀦𑀺𑀯𑀸𑀭𑀺𑀢𑀸 𑀳𑁄𑀢𑀺. 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀧𑀝𑁆𑀞𑀸𑀬 𑀘 𑀬𑀸𑀯 𑀲𑀸𑀲𑀧𑀫𑀢𑁆𑀢𑀸𑀧𑀺 𑀥𑀸𑀢𑀼𑀬𑁄 𑀢𑀺𑀝𑁆𑀞𑀦𑁆𑀢𑀺, 𑀢𑀸𑀯 𑀧𑀘𑁆𑀙𑀸𑀢𑀺 𑀦 𑀯𑁂𑀤𑀺𑀢𑀩𑁆𑀩𑀁. 𑀥𑀸𑀢𑀽𑀲𑀼 𑀳𑀺 𑀞𑀺𑀢𑀸𑀲𑀼 ¶ 𑀩𑀼𑀤𑁆𑀥𑀸𑀧𑀺 𑀞𑀺𑀢𑀸𑀯 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀏𑀢𑁆𑀣𑀦𑁆𑀢𑀭𑁂 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦𑀺𑀯𑀸𑀭𑀺𑀢𑀸𑀯 𑀳𑁄𑀢𑀺. 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑁂 𑀧𑀦 𑀚𑀸𑀢𑁂 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦 𑀦𑀺𑀯𑀸𑀭𑀺𑀢𑀸.

𑀢𑀺𑀧𑀺𑀝𑀓𑀅𑀦𑁆𑀢𑀭𑀥𑀸𑀦𑀓𑀣𑀸

𑀢𑀻𑀡𑀺 𑀅𑀦𑁆𑀢𑀭𑀥𑀸𑀦𑀸𑀦𑀺 𑀦𑀸𑀫 𑀧𑀭𑀺𑀬𑀢𑁆𑀢𑀺𑀅𑀦𑁆𑀢𑀭𑀥𑀸𑀦𑀁, 𑀧𑀝𑀺𑀯𑁂𑀥𑀅𑀦𑁆𑀢𑀭𑀥𑀸𑀦𑀁, 𑀧𑀝𑀺𑀧𑀢𑁆𑀢𑀺𑀅𑀦𑁆𑀢𑀭𑀥𑀸𑀦𑀦𑁆𑀢𑀺. 𑀢𑀢𑁆𑀣 𑀧𑀭𑀺𑀬𑀢𑁆𑀢𑀻𑀢𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺. 𑀧𑀝𑀺𑀯𑁂𑀥𑁄𑀢𑀺 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄. 𑀧𑀝𑀺𑀧𑀢𑁆𑀢𑀻𑀢𑀺 𑀧𑀝𑀺𑀧𑀤𑀸. 𑀢𑀢𑁆𑀣 𑀧𑀝𑀺𑀯𑁂𑀥𑁄 𑀘 𑀧𑀝𑀺𑀧𑀢𑁆𑀢𑀺 𑀘 𑀳𑁄𑀢𑀺𑀧𑀺 𑀦 𑀳𑁄𑀢𑀺𑀧𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀧𑀝𑀺𑀯𑁂𑀥𑀓𑀭𑀸 𑀪𑀺𑀓𑁆𑀔𑀽 𑀩𑀳𑀽 𑀳𑁄𑀦𑁆𑀢𑀺, 𑀏𑀲 𑀪𑀺𑀓𑁆𑀔𑀼 𑀧𑀼𑀣𑀼𑀚𑁆𑀚𑀦𑁄𑀢𑀺 𑀅𑀗𑁆𑀕𑀼𑀮𑀺𑀁 𑀧𑀲𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑁄 𑀳𑁄𑀢𑀺. 𑀇𑀫𑀲𑁆𑀫𑀺𑀁𑀬𑁂𑀯 𑀤𑀻𑀧𑁂 𑀏𑀓𑀯𑀸𑀭𑀁 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀼 𑀦𑀸𑀫 𑀦𑀸𑀳𑁄𑀲𑀺. 𑀧𑀝𑀺𑀧𑀢𑁆𑀢𑀺𑀧𑀽𑀭𑀓𑀸𑀧𑀺 𑀓𑀤𑀸𑀘𑀺 𑀩𑀳𑀽 𑀳𑁄𑀦𑁆𑀢𑀺, 𑀓𑀤𑀸𑀘𑀺 𑀅𑀧𑁆𑀧𑀸. 𑀇𑀢𑀺 𑀧𑀝𑀺𑀯𑁂𑀥𑁄 𑀘 𑀧𑀝𑀺𑀧𑀢𑁆𑀢𑀺 𑀘 𑀳𑁄𑀢𑀺𑀧𑀺 𑀦 𑀳𑁄𑀢𑀺𑀧𑀺. 𑀲𑀸𑀲𑀦𑀝𑁆𑀞𑀺𑀢𑀺𑀬𑀸 𑀧𑀦 𑀧𑀭𑀺𑀬𑀢𑁆𑀢𑀺 𑀧𑀫𑀸𑀡𑀁. 𑀧𑀡𑁆𑀟𑀺𑀢𑁄 𑀳𑀺 𑀢𑁂𑀧𑀺𑀝𑀓𑀁 𑀲𑀼𑀢𑁆𑀯𑀸 𑀤𑁆𑀯𑁂𑀧𑀺 𑀧𑀽𑀭𑁂𑀢𑀺.

𑀬𑀣𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀆𑀴𑀸𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀜𑁆𑀘𑀸𑀪𑀺𑀜𑁆𑀜𑀸 𑀲𑀢𑁆𑀢 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀧𑀭𑀺𑀓𑀫𑁆𑀫𑀁 𑀧𑀼𑀘𑁆𑀙𑀺, 𑀲𑁄 𑀦 𑀚𑀸𑀦𑀸𑀫𑀻𑀢𑀺 𑀆𑀳. 𑀢𑀢𑁄 𑀉𑀤𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀥𑀺𑀕𑀢𑀯𑀺𑀲𑁂𑀲𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑁆𑀲 𑀧𑀭𑀺𑀓𑀫𑁆𑀫𑀁 𑀧𑀼𑀘𑁆𑀙𑀺, 𑀲𑁄 𑀆𑀘𑀺𑀓𑁆𑀔𑀺, 𑀢𑀲𑁆𑀲 𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯 𑀫𑀳𑀸𑀲𑀢𑁆𑀢𑁄 𑀢𑀁 𑀛𑀸𑀦𑀁 𑀲𑀫𑁆𑀧𑀸𑀤𑁂𑀲𑀺, 𑀏𑀯𑀫𑁂𑀯 ¶ 𑀧𑀜𑁆𑀜𑀯𑀸 𑀪𑀺𑀓𑁆𑀔𑀼 𑀧𑀭𑀺𑀬𑀢𑁆𑀢𑀺𑀁 𑀲𑀼𑀢𑁆𑀯𑀸 𑀤𑁆𑀯𑁂𑀧𑀺 𑀧𑀽𑀭𑁂𑀢𑀺. 𑀢𑀲𑁆𑀫𑀸 𑀧𑀭𑀺𑀬𑀢𑁆𑀢𑀺𑀬𑀸 𑀞𑀺𑀢𑀸𑀬 𑀲𑀸𑀲𑀦𑀁 𑀞𑀺𑀢𑀁 𑀳𑁄𑀢𑀺. 𑀬𑀤𑀸 𑀧𑀦 𑀲𑀸 𑀅𑀦𑁆𑀢𑀭𑀥𑀸𑀬𑀢𑀺, 𑀢𑀤𑀸 𑀧𑀞𑀫𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀦𑀲𑁆𑀲𑀢𑀺. 𑀢𑀢𑁆𑀣 𑀧𑀝𑁆𑀞𑀸𑀦𑀁 𑀲𑀩𑁆𑀩𑀧𑀞𑀫𑀁 𑀅𑀦𑁆𑀢𑀭𑀥𑀸𑀬𑀢𑀺. 𑀅𑀦𑀼𑀓𑁆𑀓𑀫𑁂𑀦 𑀧𑀘𑁆𑀙𑀸 𑀥𑀫𑁆𑀫𑀲𑀗𑁆𑀕𑀳𑁄 ¶ , 𑀢𑀲𑁆𑀫𑀺𑀁 𑀅𑀦𑁆𑀢𑀭𑀳𑀺𑀢𑁂 𑀇𑀢𑀭𑁂𑀲𑀼 𑀤𑁆𑀯𑀻𑀲𑀼 𑀧𑀺𑀝𑀓𑁂𑀲𑀼 𑀞𑀺𑀢𑁂𑀲𑀼𑀧𑀺 𑀲𑀸𑀲𑀦𑀁 𑀞𑀺𑀢𑀫𑁂𑀯 𑀳𑁄𑀢𑀺.

𑀢𑀢𑁆𑀣 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂 𑀅𑀦𑁆𑀢𑀭𑀥𑀸𑀬𑀫𑀸𑀦𑁂 𑀧𑀞𑀫𑀁 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄 𑀏𑀓𑀸𑀤𑀲𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀏𑀓𑀓𑀸 𑀅𑀦𑁆𑀢𑀭𑀥𑀸𑀬𑀢𑀺, 𑀢𑀤𑀦𑀦𑁆𑀢𑀭𑀁 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄 𑀘𑀓𑁆𑀓𑀧𑁂𑀬𑁆𑀬𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀑𑀖𑀢𑀭𑀡𑀸 𑀅𑀦𑁆𑀢𑀭𑀥𑀸𑀬𑀢𑀺. 𑀢𑀤𑀦𑀦𑁆𑀢𑀭𑀁 𑀫𑀚𑁆𑀛𑀺𑀫𑀦𑀺𑀓𑀸𑀬𑁄 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀽𑀮𑀧𑀭𑀺𑀬𑀸𑀬𑀸 𑀅𑀦𑁆𑀢𑀭𑀥𑀸𑀬𑀢𑀺. 𑀢𑀤𑀦𑀦𑁆𑀢𑀭𑀁 𑀤𑀻𑀖𑀦𑀺𑀓𑀸𑀬𑁄 𑀤𑀲𑀼𑀢𑁆𑀢𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀩𑁆𑀭𑀳𑁆𑀫𑀚𑀸𑀮𑀸 𑀅𑀦𑁆𑀢𑀭𑀥𑀸𑀬𑀢𑀺. 𑀏𑀓𑀺𑀲𑁆𑀲𑀸𑀧𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀕𑀸𑀣𑀸𑀦𑀁 𑀧𑀼𑀘𑁆𑀙𑀸 𑀅𑀤𑁆𑀥𑀸𑀦𑀁 ¶ 𑀕𑀘𑁆𑀙𑀢𑀺, 𑀲𑀸𑀲𑀦𑀁 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀲𑀪𑀺𑀬𑀧𑀼𑀘𑁆𑀙𑀸 𑀆𑀴𑀯𑀓𑀧𑀼𑀘𑁆𑀙𑀸 𑀯𑀺𑀬 𑀘. 𑀏𑀢𑀸 𑀓𑀺𑀭 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑀺𑀓𑀸 𑀅𑀦𑁆𑀢𑀭𑀸 𑀲𑀸𑀲𑀦𑀁 𑀥𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼.

𑀤𑁆𑀯𑀻𑀲𑀼 𑀧𑀦 𑀧𑀺𑀝𑀓𑁂𑀲𑀼 𑀅𑀦𑁆𑀢𑀭𑀳𑀺𑀢𑁂𑀲𑀼𑀧𑀺 𑀯𑀺𑀦𑀬𑀧𑀺𑀝𑀓𑁂 𑀞𑀺𑀢𑁂 𑀲𑀸𑀲𑀦𑀁 𑀢𑀺𑀝𑁆𑀞𑀢𑀺. 𑀧𑀭𑀺𑀯𑀸𑀭𑀓𑁆𑀔𑀦𑁆𑀥𑀓𑁂𑀲𑀼 𑀅𑀦𑁆𑀢𑀭𑀳𑀺𑀢𑁂𑀲𑀼 𑀉𑀪𑀢𑁄𑀯𑀺𑀪𑀗𑁆𑀕𑁂 𑀞𑀺𑀢𑁂 𑀞𑀺𑀢𑀫𑁂𑀯 𑀳𑁄𑀢𑀺. 𑀉𑀪𑀢𑁄𑀯𑀺𑀪𑀗𑁆𑀕𑁂 𑀅𑀦𑁆𑀢𑀭𑀳𑀺𑀢𑁂 𑀫𑀸𑀢𑀺𑀓𑀸𑀬𑀧𑀺 𑀞𑀺𑀢𑀸𑀬 𑀞𑀺𑀢𑀫𑁂𑀯 𑀳𑁄𑀢𑀺. 𑀫𑀸𑀢𑀺𑀓𑀸𑀬 𑀅𑀦𑁆𑀢𑀭𑀳𑀺𑀢𑀸𑀬 𑀧𑀸𑀢𑀺𑀫𑁄𑀓𑁆𑀔𑀧𑀩𑁆𑀩𑀚𑁆𑀚𑀸𑀉𑀧𑀲𑀫𑁆𑀧𑀤𑀸𑀲𑀼 𑀞𑀺𑀢𑀸𑀲𑀼 𑀲𑀸𑀲𑀦𑀁 𑀢𑀺𑀝𑁆𑀞𑀢𑀺. 𑀮𑀺𑀗𑁆𑀕𑀁 𑀅𑀤𑁆𑀥𑀸𑀦𑀁 𑀕𑀘𑁆𑀙𑀢𑀺. 𑀲𑁂𑀢𑀯𑀢𑁆𑀣𑀲𑀫𑀡𑀯𑀁𑀲𑁄 𑀧𑀦 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀸𑀲𑀦𑀁 𑀥𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁂𑀳𑀺 𑀯𑀲𑁆𑀲𑀲𑀳𑀲𑁆𑀲𑀁 𑀅𑀝𑁆𑀞𑀸𑀲𑀺. 𑀙𑀴𑀪𑀺𑀜𑁆𑀜𑁂𑀳𑀺 𑀯𑀲𑁆𑀲𑀲𑀳𑀲𑁆𑀲𑀁. 𑀢𑁂𑀯𑀺𑀚𑁆𑀚𑁂𑀳𑀺 𑀯𑀲𑁆𑀲𑀲𑀳𑀲𑁆𑀲𑀁. 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁂𑀳𑀺 𑀯𑀲𑁆𑀲𑀲𑀳𑀲𑁆𑀲𑀁. 𑀧𑀸𑀢𑀺𑀫𑁄𑀓𑁆𑀔𑁂𑀳𑀺 𑀯𑀲𑁆𑀲𑀲𑀳𑀲𑁆𑀲𑀁 𑀅𑀝𑁆𑀞𑀸𑀲𑀺. 𑀧𑀘𑁆𑀙𑀺𑀫𑀓𑀲𑁆𑀲 𑀧𑀦 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀢𑁄 𑀧𑀘𑁆𑀙𑀺𑀫𑀓𑀲𑁆𑀲 𑀲𑀻𑀮𑀪𑁂𑀤𑀢𑁄 𑀧𑀝𑁆𑀞𑀸𑀬 𑀲𑀸𑀲𑀦𑀁 𑀑𑀲𑀓𑁆𑀓𑀺𑀢𑀁 𑀦𑀸𑀫 𑀳𑁄𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦 𑀦𑀺𑀯𑀸𑀭𑀺𑀢𑀸.

𑀲𑀸𑀲𑀦𑀅𑀦𑁆𑀢𑀭𑀳𑀺𑀢𑀯𑀡𑁆𑀡𑀦𑀸

𑀢𑀻𑀡𑀺 𑀧𑀭𑀺𑀦𑀺𑀩𑁆𑀩𑀸𑀦𑀸𑀦𑀺 𑀦𑀸𑀫 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀁 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀁 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺. 𑀢𑀢𑁆𑀣 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀁 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀅𑀳𑁄𑀲𑀺. 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀁 𑀓𑀼𑀲𑀺𑀦𑀸𑀭𑀸𑀬𑀁. 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀦𑀸𑀕𑀢𑁂 𑀪𑀯𑀺𑀲𑁆𑀲𑀢𑀺. 𑀲𑀸𑀲𑀦𑀲𑁆𑀲 𑀓𑀺𑀭 𑀑𑀲𑀓𑁆𑀓𑀦𑀓𑀸𑀮𑁂 𑀇𑀫𑀲𑁆𑀫𑀺𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀥𑀸𑀢𑀼𑀬𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀳𑀸𑀘𑁂𑀢𑀺𑀬𑀁 𑀕𑀫𑀺𑀲𑁆𑀲𑀦𑁆𑀢𑀺. 𑀫𑀳𑀸𑀘𑁂𑀢𑀺𑀬𑀢𑁄 𑀦𑀸𑀕𑀤𑀻𑀧𑁂 𑀭𑀸𑀚𑀸𑀬𑀢𑀦𑀘𑁂𑀢𑀺𑀬𑀁. 𑀢𑀢𑁄 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀁 𑀕𑀫𑀺𑀲𑁆𑀲𑀦𑁆𑀢𑀺. 𑀦𑀸𑀕𑀪𑀯𑀦𑀢𑁄𑀧𑀺 𑀤𑁂𑀯𑀮𑁄𑀓𑀢𑁄𑀧𑀺 𑀩𑁆𑀭𑀳𑁆𑀫𑀮𑁄𑀓𑀢𑁄𑀧𑀺 𑀥𑀸𑀢𑀼𑀬𑁄 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀫𑁂𑀯 ¶ 𑀕𑀫𑀺𑀲𑁆𑀲𑀦𑁆𑀢𑀺. 𑀲𑀸𑀲𑀧𑀫𑀢𑁆𑀢𑀸𑀧𑀺 𑀥𑀸𑀢𑀼𑀬𑁄 𑀦 𑀅𑀦𑁆𑀢𑀭𑀸 𑀦𑀲𑁆𑀲𑀺𑀲𑁆𑀲𑀦𑁆𑀢𑀺. 𑀲𑀩𑁆𑀩𑀥𑀸𑀢𑀼𑀬𑁄 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀭𑀸𑀲𑀺𑀪𑀽𑀢𑀸 𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑁄 𑀯𑀺𑀬 𑀏𑀓𑀕𑁆𑀖𑀦𑀸 𑀳𑀼𑀢𑁆𑀯𑀸 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀦𑁆𑀢𑀺.

𑀢𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 ¶ 𑀨𑀭𑀺𑀲𑁆𑀲𑀦𑁆𑀢𑀺, 𑀢𑀢𑁄 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀅𑀚𑁆𑀚 𑀲𑀢𑁆𑀣𑀸 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀚𑁆𑀚 𑀲𑀸𑀲𑀦𑀁 𑀑𑀲𑀓𑁆𑀓𑀢𑀺, 𑀧𑀘𑁆𑀙𑀺𑀫𑀤𑀲𑁆𑀲𑀦𑀁 𑀤𑀸𑀦𑀺 𑀇𑀤𑀁 𑀅𑀫𑁆𑀳𑀸𑀓’’𑀦𑁆𑀢𑀺 𑀤𑀲𑀩𑀮𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀤𑀺𑀯𑀲𑀢𑁄 𑀫𑀳𑀦𑁆𑀢𑀢𑀭𑀁 𑀓𑀸𑀭𑀼𑀜𑁆𑀜𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀞𑀧𑁂𑀢𑁆𑀯𑀸 𑀅𑀦𑀸𑀕𑀸𑀫𑀺𑀔𑀻𑀡𑀸𑀲𑀯𑁂 𑀅𑀯𑀲𑁂𑀲𑀸 ¶ 𑀲𑀓𑀪𑀸𑀯𑁂𑀦 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀥𑀸𑀢𑀽𑀲𑀼 𑀢𑁂𑀚𑁄𑀥𑀸𑀢𑀼 𑀉𑀝𑁆𑀞𑀳𑀺𑀢𑁆𑀯𑀸 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀉𑀕𑁆𑀕𑀘𑁆𑀙𑀺𑀲𑁆𑀲𑀢𑀺. 𑀲𑀸𑀲𑀧𑀫𑀢𑁆𑀢𑀸𑀬𑀧𑀺 𑀥𑀸𑀢𑀼𑀬𑀸 𑀲𑀢𑀺 𑀏𑀓𑀚𑀸𑀮𑀸 𑀪𑀯𑀺𑀲𑁆𑀲𑀢𑀺. 𑀥𑀸𑀢𑀽𑀲𑀼 𑀧𑀭𑀺𑀬𑀸𑀤𑀸𑀦𑀁 𑀕𑀢𑀸𑀲𑀼 𑀉𑀧𑀘𑁆𑀙𑀺𑀚𑁆𑀚𑀺𑀲𑁆𑀲𑀢𑀺. 𑀏𑀯𑀁 𑀫𑀳𑀦𑁆𑀢𑀁 𑀆𑀦𑀼𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀥𑀸𑀢𑀽𑀲𑀼 𑀅𑀦𑁆𑀢𑀭𑀳𑀺𑀢𑀸𑀲𑀼 𑀲𑀸𑀲𑀦𑀁 𑀅𑀦𑁆𑀢𑀭𑀳𑀺𑀢𑀁 𑀦𑀸𑀫 𑀳𑁄𑀢𑀺.

𑀬𑀸𑀯 𑀦 𑀏𑀯𑀁 𑀅𑀦𑁆𑀢𑀭𑀥𑀸𑀬𑀢𑀺, 𑀢𑀸𑀯 𑀅𑀘𑀭𑀺𑀫𑀁 𑀦𑀸𑀫 𑀳𑁄𑀢𑀺. 𑀏𑀯𑀁 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀓𑀲𑁆𑀫𑀸 𑀧𑀦 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀅𑀦𑀘𑁆𑀙𑀭𑀺𑀬𑀢𑁆𑀢𑀸. 𑀩𑀼𑀤𑁆𑀥𑀸 𑀳𑀺 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑀸. 𑀬𑀣𑀸𑀳 𑁋 ‘‘𑀏𑀓𑀧𑀼𑀕𑁆𑀕𑀮𑁄, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑁄. 𑀓𑀢𑀫𑁄 𑀏𑀓𑀧𑀼𑀕𑁆𑀕𑀮𑁄? 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 (𑀅. 𑀦𑀺. 𑁧.𑁧𑁭𑁨). 𑀬𑀤𑀺 𑀘 𑀤𑁆𑀯𑁂 𑀯𑀸 𑀘𑀢𑁆𑀢𑀸𑀭𑁄 𑀯𑀸 𑀅𑀝𑁆𑀞 𑀯𑀸 𑀲𑁄𑀴𑀲 𑀯𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀅𑀦𑀘𑁆𑀙𑀭𑀺𑀬𑀸 𑀪𑀯𑁂𑀬𑁆𑀬𑀼𑀁. 𑀏𑀓𑀲𑁆𑀫𑀺𑀜𑁆𑀳𑀺 𑀯𑀺𑀳𑀸𑀭𑁂 𑀤𑁆𑀯𑀺𑀦𑁆𑀦𑀁 𑀘𑁂𑀢𑀺𑀬𑀸𑀦𑀫𑁆𑀧𑀺 𑀮𑀸𑀪𑀲𑀓𑁆𑀓𑀸𑀭𑁄 𑀉𑀴𑀸𑀭𑁄 𑀦 𑀳𑁄𑀢𑀺. 𑀪𑀺𑀓𑁆𑀔𑀽𑀧𑀺 𑀩𑀳𑀼𑀢𑀸𑀬 𑀦 𑀅𑀘𑁆𑀙𑀭𑀺𑀬𑀸 𑀚𑀸𑀢𑀸, 𑀏𑀯𑀁 𑀩𑀼𑀤𑁆𑀥𑀸𑀧𑀺 𑀪𑀯𑁂𑀬𑁆𑀬𑀼𑀁, 𑀢𑀲𑁆𑀫𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀤𑁂𑀲𑀦𑀸𑀬 𑀘 𑀯𑀺𑀲𑁂𑀲𑀸𑀪𑀸𑀯𑀢𑁄. 𑀬𑀜𑁆𑀳𑀺 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑀁 𑀥𑀫𑁆𑀫𑀁 𑀏𑀓𑁄 𑀤𑁂𑀲𑁂𑀢𑀺. 𑀅𑀜𑁆𑀜𑁂𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀧𑀺 𑀲𑁄𑀯 𑀤𑁂𑀲𑁂𑀢𑀩𑁆𑀩𑁄 𑀲𑀺𑀬𑀸, 𑀢𑀢𑁄 𑀅𑀦𑀘𑁆𑀙𑀭𑀺𑀬𑁄 𑀲𑀺𑀬𑀸. 𑀏𑀓𑀲𑁆𑀫𑀺𑀁 𑀧𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀤𑁂𑀲𑀦𑀸𑀧𑀺 𑀅𑀘𑁆𑀙𑀭𑀺𑀬𑀸 𑀳𑁄𑀢𑀺, 𑀯𑀺𑀯𑀸𑀤𑀪𑀸𑀯𑀢𑁄 𑀘. 𑀩𑀳𑀽𑀲𑀼 𑀳𑀺 𑀩𑀼𑀤𑁆𑀥𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀩𑀳𑀽𑀦𑀁 𑀆𑀘𑀭𑀺𑀬𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀯𑀺𑀬 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄 𑀧𑀸𑀲𑀸𑀤𑀺𑀓𑁄, 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄 𑀫𑀥𑀼𑀭𑀲𑁆𑀲𑀭𑁄 𑀮𑀸𑀪𑀻 𑀧𑀼𑀜𑁆𑀜𑀯𑀸𑀢𑀺 𑀯𑀺𑀯𑀤𑁂𑀬𑁆𑀬𑀼𑀁. 𑀢𑀲𑁆𑀫𑀸𑀧𑀺 𑀏𑀯𑀁 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀅𑀧𑀺 𑀘𑁂𑀢𑀁 𑀓𑀸𑀭𑀡𑀁 𑀫𑀺𑀮𑀺𑀦𑁆𑀤𑀭𑀜𑁆𑀜𑀸𑀧𑀺 𑀧𑀼𑀝𑁆𑀞𑁂𑀦 𑀦𑀸𑀕𑀲𑁂𑀦𑀢𑁆𑀣𑁂𑀭𑁂𑀦 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑁋

𑀪𑀦𑁆𑀢𑁂, 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑀺 𑀳𑁂𑀢𑀁 𑀪𑀕𑀯𑀢𑀸 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺. 𑀤𑁂𑀲𑀬𑀦𑁆𑀢𑀸 𑀘, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀩𑁆𑀩𑁂𑀧𑀺 ¶ 𑀢𑀣𑀸𑀕𑀢𑀸 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀦𑁆𑀢𑀺, 𑀓𑀣𑀬𑀫𑀸𑀦𑀸 𑀘 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀓𑀣𑁂𑀦𑁆𑀢𑀺, 𑀲𑀺𑀓𑁆𑀔𑀸𑀧𑁂𑀦𑁆𑀢𑀸 ¶ 𑀘 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀲𑀺𑀓𑁆𑀔𑀸𑀧𑁂𑀦𑁆𑀢𑀺, 𑀅𑀦𑀼𑀲𑀸𑀲𑀫𑀸𑀦𑀸 𑀘 𑀅𑀧𑁆𑀧𑀫𑀸𑀤𑀧𑁆𑀧𑀝𑀺𑀧𑀢𑁆𑀢𑀺𑀬𑀁 𑀅𑀦𑀼𑀲𑀸𑀲𑀦𑁆𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀩𑁆𑀩𑁂𑀲𑀫𑁆𑀧𑀺 𑀢𑀣𑀸𑀕𑀢𑀸𑀦𑀁 ¶ 𑀏𑀓𑀸 𑀤𑁂𑀲𑀦𑀸 𑀏𑀓𑀸 𑀓𑀣𑀸 𑀏𑀓𑀲𑀺𑀓𑁆𑀔𑀸 𑀏𑀓𑀸𑀦𑀼𑀲𑀸𑀲𑀦𑀻, 𑀓𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀢𑀣𑀸𑀕𑀢𑀸 𑀏𑀓𑀓𑁆𑀔𑀡𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀏𑀓𑁂𑀦𑀧𑀺 𑀢𑀸𑀯 𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀦 𑀅𑀬𑀁 𑀮𑁄𑀓𑁄 𑀑𑀪𑀸𑀲𑀚𑀸𑀢𑁄, 𑀬𑀤𑀺 𑀤𑀼𑀢𑀺𑀬𑁄 𑀩𑀼𑀤𑁆𑀥𑁄 𑀪𑀯𑁂𑀬𑁆𑀬, 𑀤𑁆𑀯𑀺𑀦𑁆𑀦𑀁 𑀧𑀪𑀸𑀬 𑀅𑀬𑀁 𑀮𑁄𑀓𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀑𑀪𑀸𑀲𑀚𑀸𑀢𑁄 𑀪𑀯𑁂𑀬𑁆𑀬, 𑀑𑀯𑀤𑀫𑀸𑀦𑀸 𑀘 𑀤𑁆𑀯𑁂 𑀢𑀣𑀸𑀕𑀢𑀸 𑀲𑀼𑀔𑀁 𑀑𑀯𑀤𑁂𑀬𑁆𑀬𑀼𑀁, 𑀅𑀦𑀼𑀲𑀸𑀲𑀫𑀸𑀦𑀸 𑀘 𑀲𑀼𑀔𑀁 𑀅𑀦𑀼𑀲𑀸𑀲𑁂𑀬𑁆𑀬𑀼𑀁, 𑀢𑀢𑁆𑀣 𑀫𑁂 𑀓𑀸𑀭𑀡𑀁 𑀤𑁂𑀲𑁂𑀳𑀺, 𑀬𑀣𑀸𑀳𑀁 𑀦𑀺𑀲𑁆𑀲𑀁𑀲𑀬𑁄 𑀪𑀯𑁂𑀬𑁆𑀬’’𑀦𑁆𑀢𑀺.

𑀅𑀬𑀁, 𑀫𑀳𑀸𑀭𑀸𑀚, 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀏𑀓𑀩𑀼𑀤𑁆𑀥𑀥𑀸𑀭𑀡𑀻, 𑀏𑀓𑀲𑁆𑀲𑁂𑀯 𑀢𑀣𑀸𑀕𑀢𑀲𑁆𑀲 𑀕𑀼𑀡𑀁 𑀥𑀸𑀭𑁂𑀢𑀺, 𑀬𑀤𑀺 𑀤𑀼𑀢𑀺𑀬𑁄 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀦𑀸𑀬𑀁 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀥𑀸𑀭𑁂𑀬𑁆𑀬, 𑀘𑀮𑁂𑀬𑁆𑀬, 𑀓𑀫𑁆𑀧𑁂𑀬𑁆𑀬, 𑀦𑀫𑁂𑀬𑁆𑀬, 𑀑𑀡𑀫𑁂𑀬𑁆𑀬, 𑀯𑀺𑀦𑀫𑁂𑀬𑁆𑀬, 𑀯𑀺𑀓𑀺𑀭𑁂𑀬𑁆𑀬, 𑀯𑀺𑀥𑀫𑁂𑀬𑁆𑀬, 𑀯𑀺𑀤𑁆𑀥𑀁𑀲𑁂𑀬𑁆𑀬, 𑀦 𑀞𑀸𑀦𑀫𑀼𑀧𑀕𑀘𑁆𑀙𑁂𑀬𑁆𑀬.

𑀬𑀣𑀸, 𑀫𑀳𑀸𑀭𑀸𑀚, 𑀦𑀸𑀯𑀸 𑀏𑀓𑀧𑀼𑀭𑀺𑀲𑀲𑀦𑁆𑀥𑀸𑀭𑀡𑀻 𑀪𑀯𑁂𑀬𑁆𑀬, 𑀏𑀓𑀧𑀼𑀭𑀺𑀲𑁂 𑀅𑀪𑀺𑀭𑀽𑀴𑁆𑀳𑁂 𑀲𑀸 𑀦𑀸𑀯𑀸 𑀲𑀫𑀼𑀧𑀸𑀤𑀺𑀓𑀸 𑀪𑀯𑁂𑀬𑁆𑀬, 𑀅𑀣 𑀤𑀼𑀢𑀺𑀬𑁄 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀢𑀸𑀤𑀺𑀲𑁄 𑀆𑀬𑀼𑀦𑀸 𑀯𑀡𑁆𑀡𑁂𑀦 𑀯𑀬𑁂𑀦 𑀧𑀫𑀸𑀡𑁂𑀦 𑀓𑀺𑀲𑀣𑀽𑀮𑁂𑀦 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑁂𑀦, 𑀲𑁄 𑀢𑀁 𑀦𑀸𑀯𑀁 𑀅𑀪𑀺𑀭𑀽𑀳𑁂𑀬𑁆𑀬, 𑀅𑀧𑀺 𑀦𑀼 𑀲𑀸, 𑀫𑀳𑀸𑀭𑀸𑀚, 𑀦𑀸𑀯𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀥𑀸𑀭𑁂𑀬𑁆𑀬𑀸𑀢𑀺? 𑀦 𑀳𑀺, 𑀪𑀦𑁆𑀢𑁂, 𑀘𑀮𑁂𑀬𑁆𑀬, 𑀓𑀫𑁆𑀧𑁂𑀬𑁆𑀬, 𑀦𑀫𑁂𑀬𑁆𑀬, 𑀑𑀡𑀫𑁂𑀬𑁆𑀬, 𑀯𑀺𑀦𑀫𑁂𑀬𑁆𑀬, 𑀯𑀺𑀓𑀺𑀭𑁂𑀬𑁆𑀬, 𑀯𑀺𑀥𑀫𑁂𑀬𑁆𑀬, 𑀯𑀺𑀤𑁆𑀥𑀁𑀲𑁂𑀬𑁆𑀬, 𑀦 𑀞𑀸𑀦𑀫𑀼𑀧𑀕𑀘𑁆𑀙𑁂𑀬𑁆𑀬 𑀑𑀲𑀻𑀤𑁂𑀬𑁆𑀬 𑀉𑀤𑀓𑁂𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀬𑀁 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀏𑀓𑀩𑀼𑀤𑁆𑀥𑀥𑀸𑀭𑀡𑀻, 𑀏𑀓𑀲𑁆𑀲𑁂𑀯 𑀢𑀣𑀸𑀕𑀢𑀲𑁆𑀲 𑀕𑀼𑀡𑀁 𑀥𑀸𑀭𑁂𑀢𑀺, 𑀬𑀤𑀺 𑀤𑀼𑀢𑀺𑀬𑁄 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀦𑀸𑀬𑀁 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀥𑀸𑀭𑁂𑀬𑁆𑀬…𑀧𑁂… 𑀦 𑀞𑀸𑀦𑀫𑀼𑀧𑀕𑀘𑁆𑀙𑁂𑀬𑁆𑀬.

𑀬𑀣𑀸 𑀯𑀸 𑀧𑀦, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀬𑀸𑀯𑀤𑀢𑁆𑀣𑀁 𑀪𑁄𑀚𑀦𑀁 𑀪𑀼𑀜𑁆𑀚𑁂𑀬𑁆𑀬 𑀙𑀸𑀤𑁂𑀦𑁆𑀢𑀁 𑀬𑀸𑀯 𑀓𑀡𑁆𑀞𑀫𑀪𑀺𑀧𑀽𑀭𑀬𑀺𑀢𑁆𑀯𑀸, 𑀲𑁄 𑀥𑀸𑀢𑁄 𑀧𑀻𑀡𑀺𑀢𑁄 𑀧𑀭𑀺𑀧𑀼𑀡𑁆𑀡𑁄 𑀦𑀺𑀭𑀦𑁆𑀢𑀭𑁄 𑀢𑀦𑁆𑀤𑀻𑀓𑀢𑁄 𑀅𑀦𑁄𑀡𑀫𑀺𑀢𑀤𑀡𑁆𑀟𑀚𑀸𑀢𑁄 𑀧𑀼𑀦𑀤𑁂𑀯 𑀢𑀸𑀯𑀢𑀓𑀁 𑀪𑁄𑀚𑀦𑀁 𑀪𑀼𑀜𑁆𑀚𑁂𑀬𑁆𑀬, 𑀅𑀧𑀺 𑀦𑀼 𑀔𑁄 𑀲𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀲𑀼𑀔𑀺𑀢𑁄 𑀪𑀯𑁂𑀬𑁆𑀬𑀸𑀢𑀺? 𑀦 𑀳𑀺, 𑀪𑀦𑁆𑀢𑁂 ¶ , 𑀲𑀓𑀺𑀁 𑀪𑀼𑀢𑁆𑀢𑁄𑀯 𑀫𑀭𑁂𑀬𑁆𑀬𑀸𑀢𑀺; 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀬𑀁 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀏𑀓𑀩𑀼𑀤𑁆𑀥𑀥𑀸𑀭𑀡𑀻 ¶ …𑀧𑁂… 𑀦 𑀞𑀸𑀦𑀫𑀼𑀧𑀕𑀘𑁆𑀙𑁂𑀬𑁆𑀬𑀸𑀢𑀺.

𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀢𑀺𑀥𑀫𑁆𑀫𑀪𑀸𑀭𑁂𑀦 𑀧𑀣𑀯𑀻 𑀘𑀮𑀢𑀻𑀢𑀺? 𑀇𑀥, 𑀫𑀳𑀸𑀭𑀸𑀚, 𑀤𑁆𑀯𑁂 ¶ 𑀲𑀓𑀝𑀸 𑀭𑀢𑀦𑀧𑀽𑀭𑀺𑀢𑀸 𑀪𑀯𑁂𑀬𑁆𑀬𑀼𑀁 𑀬𑀸𑀯 𑀫𑀼𑀔𑀲𑀫𑀸, 𑀏𑀓𑀲𑁆𑀫𑀸 𑀲𑀓𑀝𑀢𑁄 𑀭𑀢𑀦𑀁 𑀕𑀳𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀲𑀓𑀝𑁂 𑀆𑀓𑀺𑀭𑁂𑀬𑁆𑀬𑀼𑀁, 𑀅𑀧𑀺 𑀦𑀼 𑀔𑁄 𑀢𑀁, 𑀫𑀳𑀸𑀭𑀸𑀚, 𑀲𑀓𑀝𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀓𑀝𑀸𑀦𑀁 𑀭𑀢𑀦𑀁 𑀥𑀸𑀭𑁂𑀬𑁆𑀬𑀸𑀢𑀺? 𑀦 𑀳𑀺, 𑀪𑀦𑁆𑀢𑁂, 𑀦𑀸𑀪𑀺𑀧𑀺 𑀢𑀲𑁆𑀲 𑀨𑀮𑁂𑀬𑁆𑀬, 𑀅𑀭𑀸𑀧𑀺 𑀢𑀲𑁆𑀲 𑀪𑀺𑀚𑁆𑀚𑁂𑀬𑁆𑀬𑀼𑀁, 𑀦𑁂𑀫𑀺𑀧𑀺 𑀢𑀲𑁆𑀲 𑀑𑀧𑀢𑁂𑀬𑁆𑀬, 𑀅𑀓𑁆𑀔𑁄𑀧𑀺 𑀢𑀲𑁆𑀲 𑀪𑀺𑀚𑁆𑀚𑁂𑀬𑁆𑀬𑀸𑀢𑀺. 𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀅𑀢𑀺𑀭𑀢𑀦𑀪𑀸𑀭𑁂𑀦 𑀲𑀓𑀝𑀁 𑀪𑀺𑀚𑁆𑀚𑀢𑀻𑀢𑀺? 𑀆𑀫, 𑀪𑀦𑁆𑀢𑁂,𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀢𑀺𑀥𑀫𑁆𑀫𑀪𑀸𑀭𑁂𑀦 𑀧𑀣𑀯𑀻 𑀘𑀮𑀢𑀺.

𑀅𑀧𑀺𑀘, 𑀫𑀳𑀸𑀭𑀸𑀚, 𑀇𑀫𑀁 𑀓𑀸𑀭𑀡𑀁 𑀩𑀼𑀤𑁆𑀥𑀩𑀮𑀧𑀭𑀺𑀤𑀻𑀧𑀦𑀸𑀬 𑀑𑀲𑀸𑀭𑀺𑀢𑀁 𑀅𑀜𑁆𑀜𑀫𑁆𑀧𑀺 𑀢𑀢𑁆𑀣 𑀅𑀢𑀺𑀭𑀽𑀧𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺, 𑀬𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀬𑀤𑀺, 𑀫𑀳𑀸𑀭𑀸𑀚, 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁂𑀲𑀁 𑀧𑀭𑀺𑀲𑀸𑀬 𑀯𑀺𑀯𑀸𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 ‘‘𑀢𑀼𑀫𑁆𑀳𑀸𑀓𑀁 𑀩𑀼𑀤𑁆𑀥𑁄 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄’’𑀢𑀺, 𑀉𑀪𑀢𑁄 𑀧𑀓𑁆𑀔𑀚𑀸𑀢𑀸 𑀪𑀯𑁂𑀬𑁆𑀬𑀼𑀁. 𑀬𑀣𑀸, 𑀫𑀳𑀸𑀭𑀸𑀚, 𑀤𑁆𑀯𑀺𑀦𑁆𑀦𑀁 𑀩𑀮𑀯𑀸𑀫𑀘𑁆𑀘𑀸𑀦𑀁 𑀧𑀭𑀺𑀲𑀸𑀬 𑀯𑀺𑀯𑀸𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 ‘‘𑀢𑀼𑀫𑁆𑀳𑀸𑀓𑀁 𑀅𑀫𑀘𑁆𑀘𑁄 𑀅𑀫𑁆𑀳𑀸𑀓𑀁 𑀅𑀫𑀘𑁆𑀘𑁄’’𑀢𑀺, 𑀉𑀪𑀢𑁄 𑀧𑀓𑁆𑀔𑀚𑀸𑀢𑀸 𑀳𑁄𑀦𑁆𑀢𑀺; 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀤𑀺 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁂𑀲𑀁 𑀧𑀭𑀺𑀲𑀸𑀬 𑀯𑀺𑀯𑀸𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 ‘‘𑀢𑀼𑀫𑁆𑀳𑀸𑀓𑀁 𑀩𑀼𑀤𑁆𑀥𑁄, 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄’’𑀢𑀺, 𑀉𑀪𑀢𑁄 𑀧𑀓𑁆𑀔𑀚𑀸𑀢𑀸 𑀪𑀯𑁂𑀬𑁆𑀬𑀼𑀁, 𑀇𑀤𑀁 𑀢𑀸𑀯, 𑀫𑀳𑀸𑀭𑀸𑀚, 𑀏𑀓𑀁 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺.

𑀅𑀧𑀭𑀫𑁆𑀧𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺, 𑀬𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀬𑀤𑀺, 𑀫𑀳𑀸𑀭𑀸𑀚, 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, ‘‘𑀅𑀕𑁆𑀕𑁄 𑀩𑀼𑀤𑁆𑀥𑁄’’𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸 𑀪𑀯𑁂𑀬𑁆𑀬, ‘‘𑀚𑁂𑀝𑁆𑀞𑁄 𑀩𑀼𑀤𑁆𑀥𑁄’’𑀢𑀺, 𑀲𑁂𑀝𑁆𑀞𑁄 𑀩𑀼𑀤𑁆𑀥𑁄𑀢𑀺, 𑀯𑀺𑀲𑀺𑀝𑁆𑀞𑁄 𑀩𑀼𑀤𑁆𑀥𑁄𑀢𑀺, 𑀉𑀢𑁆𑀢𑀫𑁄 𑀩𑀼𑀤𑁆𑀥𑁄𑀢𑀺, 𑀧𑀯𑀭𑁄 𑀩𑀼𑀤𑁆𑀥𑁄𑀢𑀺, 𑀅𑀲𑀫𑁄 𑀩𑀼𑀤𑁆𑀥𑁄𑀢𑀺 ¶ , 𑀅𑀲𑀫𑀲𑀫𑁄 𑀩𑀼𑀤𑁆𑀥𑁄𑀢𑀺, 𑀅𑀧𑁆𑀧𑀝𑀺𑀫𑁄 𑀩𑀼𑀤𑁆𑀥𑁄𑀢𑀺, 𑀅𑀧𑁆𑀧𑀝𑀺𑀪𑀸𑀕𑁄 𑀩𑀼𑀤𑁆𑀥𑁄𑀢𑀺, 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄 ¶ 𑀩𑀼𑀤𑁆𑀥𑁄𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸 𑀪𑀯𑁂𑀬𑁆𑀬. 𑀇𑀫𑀫𑁆𑀧𑀺 𑀔𑁄 𑀢𑁆𑀯𑀁, 𑀫𑀳𑀸𑀭𑀸𑀚, 𑀓𑀸𑀭𑀡𑀁 𑀅𑀢𑁆𑀣𑀢𑁄 𑀲𑀫𑁆𑀧𑀝𑀺𑀘𑁆𑀙, 𑀬𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺.

𑀅𑀧𑀺𑀘 𑀔𑁄, 𑀫𑀳𑀸𑀭𑀸𑀚, 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀪𑀸𑀯𑀧𑀓𑀢𑀺 𑀏𑀲𑀸, 𑀬𑀁 𑀏𑀓𑁄𑀬𑁂𑀯 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺. 𑀓𑀲𑁆𑀫𑀸 𑀓𑀸𑀭𑀡𑀸? 𑀫𑀳𑀦𑁆𑀢𑀢𑀸𑀬 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀕𑀼𑀡𑀸𑀦𑀁, 𑀬𑀁 𑀅𑀜𑁆𑀜𑀫𑁆𑀧𑀺, 𑀫𑀳𑀸𑀭𑀸𑀚, 𑀫𑀳𑀦𑁆𑀢𑀁 𑀳𑁄𑀢𑀺, 𑀢𑀁 𑀏𑀓𑀁𑀬𑁂𑀯 𑀳𑁄𑀢𑀺. 𑀧𑀣𑀯𑀻, 𑀫𑀳𑀸𑀭𑀸𑀚, 𑀫𑀳𑀦𑁆𑀢𑀻, 𑀲𑀸 𑀏𑀓𑀸𑀬𑁂𑀯. 𑀲𑀸𑀕𑀭𑁄 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯. 𑀲𑀺𑀦𑁂𑀭𑀼 𑀕𑀺𑀭𑀺𑀭𑀸𑀚𑀸 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯. 𑀆𑀓𑀸𑀲𑁄 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯. 𑀲𑀓𑁆𑀓𑁄 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯. 𑀫𑀸𑀭𑁄 𑀫𑀳𑀦𑁆𑀢𑁄 ¶ , 𑀲𑁄 𑀏𑀓𑁄𑀬𑁂𑀯. 𑀫𑀳𑀸𑀩𑁆𑀭𑀳𑁆𑀫𑀸 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯. 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯 𑀮𑁄𑀓𑀲𑁆𑀫𑀺𑀁. 𑀬𑀢𑁆𑀣 𑀢𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀅𑀜𑁆𑀜𑁂𑀲𑀁 𑀑𑀓𑀸𑀲𑁄 𑀦 𑀳𑁄𑀢𑀺. 𑀢𑀲𑁆𑀫𑀸, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀏𑀓𑁄𑀬𑁂𑀯 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀲𑀼𑀓𑀣𑀺𑀢𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀜𑁆𑀳𑁄 𑀑𑀧𑀫𑁆𑀫𑁂𑀳𑀺 𑀓𑀸𑀭𑀡𑁂𑀳𑀻𑀢𑀺 (𑀫𑀺. 𑀧. 𑁫.𑁧.𑁧).

𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀦𑁆𑀢𑀺 𑀦𑀯𑀯𑀺𑀥𑀲𑁆𑀲 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫𑀁 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀁. 𑀲𑀳𑀥𑀫𑁆𑀫𑀺𑀓𑁄𑀢𑀺 𑀲𑀓𑀸𑀭𑀡𑁄. 𑀯𑀸𑀤𑀸𑀦𑀼𑀯𑀸𑀤𑁄𑀢𑀺 𑀯𑀸𑀤𑁄𑀬𑁂𑀯.

𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀯𑀡𑁆𑀡𑀦𑀸

𑁧𑁬𑁨. 𑀆𑀬𑀲𑁆𑀫𑀸 𑀉𑀤𑀸𑀬𑀻𑀢𑀺 𑀢𑀬𑁄 𑀣𑁂𑀭𑀸 𑀉𑀤𑀸𑀬𑀻 𑀦𑀸𑀫 𑁋 𑀮𑀸𑀴𑀼𑀤𑀸𑀬𑀻, 𑀓𑀸𑀴𑀼𑀤𑀸𑀬𑀻, 𑀫𑀳𑀸𑀉𑀤𑀸𑀬𑀻𑀢𑀺. 𑀇𑀥 𑀫𑀳𑀸𑀉𑀤𑀸𑀬𑀻 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀲 𑀓𑀺𑀭 𑀇𑀫𑀁 𑀲𑀼𑀢𑁆𑀢𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀲𑀼𑀡𑀦𑁆𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀧𑀜𑁆𑀘𑀯𑀡𑁆𑀡𑀸 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀸𑀤𑀧𑀺𑀝𑁆𑀞𑀺𑀢𑁄 𑀲𑀻𑀲𑀫𑀢𑁆𑀣𑀓𑀁 𑀕𑀘𑁆𑀙𑀢𑀺, 𑀲𑀻𑀲𑀫𑀢𑁆𑀣𑀓𑀢𑁄 𑀧𑀸𑀤𑀧𑀺𑀝𑁆𑀞𑀺𑀁 𑀆𑀕𑀘𑁆𑀙𑀢𑀺, 𑀉𑀪𑀢𑁄 𑀧𑀝𑁆𑀞𑀸𑀬 𑀫𑀚𑁆𑀛𑀁 𑀑𑀢𑀭𑀢𑀺, 𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀉𑀪𑀢𑁄 𑀕𑀘𑁆𑀙𑀢𑀺. 𑀲𑁄 𑀦𑀺𑀭𑀦𑁆𑀢𑀭𑀁 𑀧𑀻𑀢𑀺𑀬𑀸 𑀨𑀼𑀝𑀲𑀭𑀻𑀭𑁄 𑀩𑀮𑀯𑀲𑁄𑀫𑀦𑀲𑁆𑀲𑁂𑀦 𑀤𑀲𑀩𑀮𑀲𑁆𑀲 𑀕𑀼𑀡𑀁 𑀓𑀣𑁂𑀦𑁆𑀢𑁄 𑀅𑀘𑁆𑀙𑀭𑀺𑀬𑀁 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀅𑀧𑁆𑀧𑀺𑀘𑁆𑀙𑀢𑀸𑀢𑀺 𑀦𑀺𑀢𑁆𑀢𑀡𑁆𑀳𑀢𑀸. 𑀲𑀦𑁆𑀢𑀼𑀝𑁆𑀞𑀺𑀢𑀸𑀢𑀺 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀢𑀻𑀳𑀸𑀓𑀸𑀭𑁂𑀳𑀺 ¶ 𑀲𑀦𑁆𑀢𑁄𑀲𑁄. 𑀲𑀮𑁆𑀮𑁂𑀔𑀢𑀸𑀢𑀺 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀲𑀮𑁆𑀮𑀺𑀔𑀺𑀢𑀪𑀸𑀯𑁄. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑁄 𑀦𑀸𑀫. 𑀦 𑀅𑀢𑁆𑀢𑀸𑀦𑀁 𑀧𑀸𑀢𑀼𑀓𑀭𑀺𑀲𑁆𑀲𑀢𑀻𑀢𑀺 𑀅𑀢𑁆𑀢𑀦𑁄 𑀕𑀼𑀡𑁂 𑀦 𑀆𑀯𑀺 𑀓𑀭𑀺𑀲𑁆𑀲𑀢𑀺. 𑀧𑀝𑀸𑀓𑀁 𑀧𑀭𑀺𑀳𑀭𑁂𑀬𑁆𑀬𑀼𑀦𑁆𑀢𑀺 ‘‘𑀓𑁄 𑀅𑀫𑁆𑀳𑁂𑀳𑀺 𑀲𑀤𑀺𑀲𑁄 𑀅𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀸 𑀧𑀝𑀸𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀦𑀸𑀴𑀦𑁆𑀤𑀁 𑀯𑀺𑀘𑀭𑁂𑀬𑁆𑀬𑀼𑀁.

𑀧𑀲𑁆𑀲 ¶ 𑀔𑁄 𑀢𑁆𑀯𑀁, 𑀉𑀤𑀸𑀬𑀺, 𑀢𑀣𑀸𑀕𑀢𑀲𑁆𑀲 𑀅𑀧𑁆𑀧𑀺𑀘𑁆𑀙𑀢𑀸𑀢𑀺 𑀧𑀲𑁆𑀲 𑀉𑀤𑀸𑀬𑀺 𑀬𑀸𑀤𑀺𑀲𑀻 𑀢𑀣𑀸𑀕𑀢𑀲𑁆𑀲 𑀅𑀧𑁆𑀧𑀺𑀘𑁆𑀙𑀢𑀸𑀢𑀺 𑀣𑁂𑀭𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀆𑀳. 𑀓𑀺𑀁 𑀧𑀦 𑀪𑀕𑀯𑀸 𑀦𑁂𑀯 𑀅𑀢𑁆𑀢𑀸𑀦𑀁 𑀧𑀸𑀢𑀼𑀓𑀭𑁄𑀢𑀺, 𑀦 𑀅𑀢𑁆𑀢𑀦𑁄 𑀕𑀼𑀡𑀁 𑀓𑀣𑁂𑀢𑀻𑀢𑀺 𑀘𑁂? 𑀦, 𑀦 𑀓𑀣𑁂𑀢𑀺. 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀳𑀺 𑀓𑀣𑁂𑀢𑀩𑁆𑀩𑀁, 𑀘𑀻𑀯𑀭𑀸𑀤𑀺𑀳𑁂𑀢𑀼𑀁 𑀦 𑀓𑀣𑁂𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀧𑀲𑁆𑀲 𑀔𑁄 𑀢𑁆𑀯𑀁, 𑀉𑀤𑀸𑀬𑀺, 𑀢𑀣𑀸𑀕𑀢𑀲𑁆𑀲 𑀅𑀧𑁆𑀧𑀺𑀘𑁆𑀙𑀢𑀸’’𑀢𑀺𑀆𑀤𑀺. 𑀩𑀼𑀚𑁆𑀛𑀦𑀓𑀲𑀢𑁆𑀢𑀁 𑀧𑀦 𑀆𑀕𑀫𑁆𑀫 𑀯𑁂𑀦𑁂𑀬𑁆𑀬𑀯𑀲𑁂𑀦 𑀓𑀣𑁂𑀢𑀺. 𑀬𑀣𑀸𑀳 𑁋

‘‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀺;

𑀲𑀤𑁂𑀯𑀓𑀲𑁆𑀫𑀺𑀁 𑀮𑁄𑀓𑀲𑁆𑀫𑀺𑀁, 𑀦𑀢𑁆𑀣𑀺 𑀫𑁂 𑀧𑀝𑀺𑀧𑀼𑀕𑁆𑀕𑀮𑁄’’𑀢𑀺. (𑀫𑀳𑀸𑀯. 𑁧𑁧);

𑀏𑀯𑀁 ¶ 𑀢𑀣𑀸𑀕𑀢𑀲𑁆𑀲 𑀕𑀼𑀡𑀤𑀻𑀧𑀺𑀓𑀸 𑀩𑀳𑀽 𑀕𑀸𑀣𑀸𑀧𑀺 𑀲𑀼𑀢𑁆𑀢𑀦𑁆𑀢𑀸𑀧𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸.

𑁧𑁬𑁩. 𑀅𑀪𑀺𑀓𑁆𑀔𑀡𑀁 𑀪𑀸𑀲𑁂𑀬𑁆𑀬𑀸𑀲𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀪𑀸𑀲𑁂𑀬𑁆𑀬𑀸𑀲𑀺. 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀫𑁂 𑀓𑀣𑀺𑀢𑀦𑁆𑀢𑀺 𑀫𑀸 𑀫𑀚𑁆𑀛𑀦𑁆𑀳𑀺𑀓𑀸𑀤𑀻𑀲𑀼 𑀦 𑀓𑀣𑀬𑀺𑀢𑁆𑀣. 𑀅𑀚𑁆𑀚 𑀯𑀸 𑀫𑁂 𑀓𑀣𑀺𑀢𑀦𑁆𑀢𑀺 𑀫𑀸 𑀧𑀭𑀤𑀺𑀯𑀲𑀸𑀤𑀻𑀲𑀼 𑀦 𑀓𑀣𑀬𑀺𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀧𑀯𑁂𑀤𑁂𑀲𑀻𑀢𑀺 𑀓𑀣𑁂𑀲𑀺. 𑀇𑀫𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀲𑁆𑀲𑀸𑀢𑀺 𑀦𑀺𑀕𑁆𑀕𑀸𑀣𑀓𑀢𑁆𑀢𑀸 𑀇𑀤𑀁 𑀲𑀼𑀢𑁆𑀢𑀁 ‘‘𑀯𑁂𑀬𑁆𑀬𑀸𑀓𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀥𑀺𑀯𑀘𑀦𑀦𑁆𑀢𑀺 𑀦𑀸𑀫𑀁. 𑀇𑀤𑀁 𑀧𑀦 ‘‘𑀇𑀢𑀺 𑀳𑀺𑀤’’𑀦𑁆𑀢𑀺 𑀧𑀝𑁆𑀞𑀸𑀬 𑀧𑀤𑀁 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀞𑀧𑀺𑀢𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀲𑀫𑁆𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀧𑀸𑀲𑀸𑀤𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑀦𑀺𑀕𑀡𑁆𑀞𑀦𑀸𑀝𑀧𑀼𑀢𑁆𑀢𑀓𑀸𑀮𑀗𑁆𑀓𑀺𑀭𑀺𑀬𑀯𑀡𑁆𑀡𑀦𑀸

𑁧𑁬𑁪. 𑀏𑀯𑀁 ¶ ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀧𑀸𑀲𑀸𑀤𑀺𑀓𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀫𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑁋 𑀯𑁂𑀥𑀜𑁆𑀜𑀸 𑀦𑀸𑀫 𑀲𑀓𑁆𑀬𑀸𑀢𑀺 𑀥𑀦𑀼𑀫𑁆𑀳𑀺 𑀓𑀢𑀲𑀺𑀓𑁆𑀔𑀸 𑀯𑁂𑀥𑀜𑁆𑀜𑀦𑀸𑀫𑀓𑀸 𑀏𑀓𑁂 𑀲𑀓𑁆𑀬𑀸. 𑀢𑁂𑀲𑀁 𑀅𑀫𑁆𑀩𑀯𑀦𑁂 𑀧𑀸𑀲𑀸𑀤𑁂𑀢𑀺 𑀢𑁂𑀲𑀁 𑀅𑀫𑁆𑀩𑀯𑀦𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀢𑁆𑀣𑀸𑀬 𑀓𑀢𑁄 𑀤𑀻𑀖𑀧𑀸𑀲𑀸𑀤𑁄 𑀅𑀢𑁆𑀣𑀺, 𑀢𑀢𑁆𑀣 𑀯𑀺𑀳𑀭𑀢𑀺. 𑀅𑀥𑀼𑀦𑀸 𑀓𑀸𑀮𑀗𑁆𑀓𑀢𑁄𑀢𑀺 𑀲𑀫𑁆𑀧𑀢𑀺 𑀓𑀸𑀮𑀗𑁆𑀓𑀢𑁄. 𑀤𑁆𑀯𑁂𑀥𑀺𑀓𑀚𑀸𑀢𑀸𑀢𑀺 𑀤𑁆𑀯𑁂𑀚𑁆𑀛𑀚𑀸𑀢𑀸, 𑀤𑁆𑀯𑁂𑀪𑀸𑀕𑀸 𑀚𑀸𑀢𑀸. 𑀪𑀡𑁆𑀟𑀦𑀸𑀤𑀻𑀲𑀼 𑀪𑀡𑁆𑀟𑀦𑀁 𑀧𑀼𑀩𑁆𑀩𑀪𑀸𑀕𑀓𑀮𑀳𑁄, 𑀢𑀁 𑀤𑀡𑁆𑀟𑀸𑀤𑀸𑀦𑀸𑀤𑀺𑀯𑀲𑁂𑀦 𑀧𑀡𑁆𑀡𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀘 𑀯𑀟𑁆𑀠𑀺𑀢𑀁 𑀓𑀮𑀳𑁄. ‘‘𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀲𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀭𑀼𑀤𑁆𑀥𑀯𑀘𑀦𑀁 𑀯𑀺𑀯𑀸𑀤𑁄. 𑀯𑀺𑀢𑀼𑀤𑀦𑁆𑀢𑀸𑀢𑀺 𑀯𑀺𑀚𑁆𑀛𑀦𑁆𑀢𑀸. 𑀲𑀳𑀺𑀢𑀁 𑀫𑁂𑀢𑀺 𑀫𑀫 𑀯𑀘𑀦𑀁 𑀅𑀢𑁆𑀣𑀲𑀜𑁆𑀳𑀺𑀢𑀁. 𑀅𑀥𑀺𑀘𑀺𑀡𑁆𑀡𑀁 𑀢𑁂 𑀯𑀺𑀧𑀭𑀸𑀯𑀢𑁆𑀢𑀦𑁆𑀢𑀺 𑀬𑀁 𑀢𑀯 𑀅𑀥𑀺𑀘𑀺𑀡𑁆𑀡𑀁 𑀘𑀺𑀭𑀓𑀸𑀮𑀸𑀲𑁂𑀯𑀦𑀯𑀲𑁂𑀦 𑀧𑀕𑀼𑀡𑀁, 𑀢𑀁 𑀫𑀫 𑀯𑀸𑀤𑀁 𑀆𑀕𑀫𑁆𑀫 𑀦𑀺𑀯𑀢𑁆𑀢𑀁. 𑀆𑀭𑁄𑀧𑀺𑀢𑁄 𑀢𑁂 𑀯𑀸𑀤𑁄𑀢𑀺 𑀢𑀼𑀬𑁆𑀳𑀁 𑀉𑀧𑀭𑀺 𑀫𑀬𑀸 𑀤𑁄𑀲𑁄 𑀆𑀭𑁄𑀧𑀺𑀢𑁄. 𑀘𑀭 𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀬𑀸𑀢𑀺 𑀪𑀢𑁆𑀢𑀧𑀼𑀝𑀁 𑀆𑀤𑀸𑀬 𑀢𑀁 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀸𑀤𑀧𑁆𑀧𑀫𑁄𑀓𑁆𑀔𑀢𑁆𑀣𑀸𑀬 𑀉𑀢𑁆𑀢𑀭𑀺 𑀧𑀭𑀺𑀬𑁂𑀲𑀫𑀸𑀦𑁄 𑀯𑀺𑀘𑀭. 𑀦𑀺𑀩𑁆𑀩𑁂𑀞𑁂𑀳𑀺 𑀯𑀸𑀢𑀺 𑀅𑀣 𑀯𑀸 𑀫𑀬𑀸 𑀆𑀭𑁄𑀧𑀺𑀢𑀤𑁄𑀲𑀢𑁄 𑀅𑀢𑁆𑀢𑀸𑀦𑀁 𑀫𑁄𑀘𑁂𑀳𑀺. 𑀲𑀘𑁂 𑀧𑀳𑁄𑀲𑀻𑀢𑀺 𑀲𑀘𑁂 𑀲𑀓𑁆𑀓𑁄𑀲𑀺. 𑀯𑀥𑁄𑀬𑁂𑀯𑀸𑀢𑀺 𑀫𑀭𑀡𑀫𑁂𑀯. 𑀦𑀸𑀝𑀧𑀼𑀢𑁆𑀢𑀺𑀬𑁂𑀲𑀽𑀢𑀺 𑀦𑀸𑀝𑀧𑀼𑀢𑁆𑀢𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼. 𑀦𑀺𑀩𑁆𑀩𑀺𑀦𑁆𑀦𑀭𑀽𑀧𑀸𑀢𑀺 𑀉𑀓𑁆𑀓𑀡𑁆𑀞𑀺𑀢𑀲𑀪𑀸𑀯𑀸 𑀅𑀪𑀺𑀯𑀸𑀤𑀦𑀸𑀤𑀻𑀦𑀺𑀧𑀺 𑀦 𑀓𑀭𑁄𑀦𑁆𑀢𑀺. 𑀯𑀺𑀭𑀢𑁆𑀢𑀭𑀽𑀧𑀸𑀢𑀺 ¶ 𑀯𑀺𑀕𑀢𑀧𑁂𑀫𑀸. 𑀧𑀝𑀺𑀯𑀸𑀦𑀭𑀽𑀧𑀸𑀢𑀺 𑀢𑁂𑀲𑀁 𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀢𑁄 𑀦𑀺𑀯𑀢𑁆𑀢𑀦𑀲𑀪𑀸𑀯𑀸. 𑀬𑀣𑀸 𑀢𑀦𑁆𑀢𑀺 𑀬𑀣𑀸 𑀤𑀼𑀭𑀓𑁆𑀔𑀸𑀢𑀸𑀤𑀺𑀲𑀪𑀸𑀯𑁂 𑀥𑀫𑁆𑀫𑀯𑀺𑀦𑀬𑁂 𑀦𑀺𑀩𑁆𑀩𑀺𑀦𑁆𑀦𑀯𑀺𑀭𑀢𑁆𑀢𑀧𑁆𑀧𑀝𑀺𑀯𑀸𑀦𑀭𑀽𑀧𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀢𑀣𑁂𑀯 𑀚𑀸𑀢𑀸𑀢𑀺 𑀅𑀢𑁆𑀣𑁄. 𑀤𑀼𑀭𑀓𑁆𑀔𑀸𑀢𑁂𑀢𑀺 𑀤𑀼𑀓𑁆𑀓𑀣𑀺𑀢𑁂. 𑀤𑀼𑀧𑁆𑀧𑀯𑁂𑀤𑀺𑀢𑁂𑀢𑀺 𑀤𑀼𑀯𑀺𑀜𑁆𑀜𑀸𑀧𑀺𑀢𑁂. 𑀅𑀦𑀼𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁂𑀢𑀺 𑀭𑀸𑀕𑀸𑀤𑀻𑀦𑀁 𑀉𑀧𑀲𑀫𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑁂. 𑀪𑀺𑀦𑁆𑀦𑀣𑀽𑀧𑁂𑀢𑀺 𑀪𑀺𑀦𑁆𑀤𑀧𑁆𑀧𑀢𑀺𑀝𑁆𑀞𑁂. 𑀏𑀢𑁆𑀣 𑀳𑀺 𑀦𑀸𑀝𑀧𑀼𑀢𑁆𑀢𑁄𑀯 𑀦𑁂𑀲𑀁 𑀧𑀢𑀺𑀝𑁆𑀞𑀝𑁆𑀞𑁂𑀦 𑀣𑀽𑀧𑁄. 𑀲𑁄 𑀧𑀦 𑀪𑀺𑀦𑁆𑀦𑁄 𑀫𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀪𑀺𑀦𑁆𑀦𑀣𑀽𑀧𑁂’’𑀢𑀺. 𑀅𑀧𑁆𑀧𑀝𑀺𑀲𑀭𑀡𑁂𑀢𑀺 𑀢𑀲𑁆𑀲𑁂𑀯 𑀅𑀪𑀸𑀯𑁂𑀦 𑀧𑀝𑀺𑀲𑀭𑀡𑀯𑀺𑀭𑀳𑀺𑀢𑁂.

𑀦𑀦𑀼 𑀘𑀸𑀬𑀁 𑀦𑀸𑀝𑀧𑀼𑀢𑁆𑀢𑁄 𑀦𑀸𑀴𑀦𑁆𑀤𑀯𑀸𑀲𑀺𑀓𑁄, 𑀲𑁄 𑀓𑀲𑁆𑀫𑀸 𑀧𑀸𑀯𑀸𑀬𑀁 𑀓𑀸𑀮𑀗𑁆𑀓𑀢𑁄𑀢𑀺? 𑀲𑁄 𑀓𑀺𑀭 𑀉𑀧𑀸𑀮𑀺𑀦𑀸 ¶ 𑀕𑀳𑀧𑀢𑀺𑀦𑀸 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑁂𑀦 𑀤𑀲𑀳𑀺 ¶ 𑀕𑀸𑀣𑀸𑀳𑀺 𑀪𑀸𑀲𑀺𑀢𑁂 𑀩𑀼𑀤𑁆𑀥𑀕𑀼𑀡𑁂 𑀲𑀼𑀢𑁆𑀯𑀸 𑀉𑀡𑁆𑀳𑀁 𑀮𑁄𑀳𑀺𑀢𑀁 𑀙𑀟𑁆𑀟𑁂𑀲𑀺. 𑀅𑀣 𑀦𑀁 𑀅𑀨𑀸𑀲𑀼𑀓𑀁 𑀕𑀳𑁂𑀢𑁆𑀯𑀸 𑀧𑀸𑀯𑀁 𑀅𑀕𑀫𑀁𑀲𑀼. 𑀲𑁄 𑀢𑀢𑁆𑀣 𑀓𑀸𑀮𑀫𑀓𑀸𑀲𑀺. 𑀓𑀸𑀮𑀁 𑀓𑀼𑀭𑀼𑀫𑀸𑀦𑁄 𑀘 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀫 𑀮𑀤𑁆𑀥𑀺 𑀅𑀦𑀺𑀬𑁆𑀬𑀸𑀦𑀺𑀓𑀸 𑀲𑀸𑀭𑀯𑀺𑀭𑀳𑀺𑀢𑀸, 𑀫𑀬𑀁 𑀢𑀸𑀯 𑀦𑀝𑁆𑀞𑀸, 𑀅𑀯𑀲𑁂𑀲𑀚𑀦𑁄𑀧𑀺 𑀫𑀸 𑀅𑀧𑀸𑀬𑀧𑀽𑀭𑀓𑁄 𑀅𑀳𑁄𑀲𑀺, 𑀲𑀘𑁂 𑀧𑀦𑀸𑀳𑀁 ‘𑀫𑀫 𑀲𑀸𑀲𑀦𑀁 𑀅𑀦𑀺𑀬𑁆𑀬𑀸𑀦𑀺𑀓’𑀦𑁆𑀢𑀺 𑀯𑀓𑁆𑀔𑀸𑀫𑀺, 𑀦 𑀲𑀤𑁆𑀤𑀳𑀺𑀲𑁆𑀲𑀦𑁆𑀢𑀺, 𑀬𑀁𑀦𑀽𑀦𑀸𑀳𑀁 𑀤𑁆𑀯𑁂𑀧𑀺 𑀚𑀦𑁂 𑀦 𑀏𑀓𑀦𑀻𑀳𑀸𑀭𑁂𑀦 𑀉𑀕𑁆𑀕𑀡𑁆𑀳𑀸𑀧𑁂𑀬𑁆𑀬𑀁, 𑀢𑁂 𑀫𑀫𑀘𑁆𑀘𑀬𑁂𑀦 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀤𑀺𑀲𑁆𑀲𑀦𑁆𑀢𑀺, 𑀲𑀢𑁆𑀣𑀸 𑀢𑀁 𑀯𑀺𑀯𑀸𑀤𑀁 𑀧𑀝𑀺𑀘𑁆𑀘 𑀏𑀓𑀁 𑀥𑀫𑁆𑀫𑀓𑀣𑀁 𑀓𑀣𑁂𑀲𑁆𑀲𑀢𑀺, 𑀢𑀢𑁄 𑀢𑁂 𑀲𑀸𑀲𑀦𑀲𑁆𑀲 𑀫𑀳𑀦𑁆𑀢𑀪𑀸𑀯𑀁 𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺.

𑀅𑀣 𑀦𑀁 𑀏𑀓𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 𑁋 ‘‘𑀪𑀦𑁆𑀢𑁂 𑀢𑀼𑀫𑁆𑀳𑁂 𑀤𑀼𑀩𑁆𑀩𑀮𑀸, 𑀫𑀬𑁆𑀳𑀫𑁆𑀧𑀺 𑀇𑀫𑀲𑁆𑀫𑀺𑀁 𑀥𑀫𑁆𑀫𑁂 𑀲𑀸𑀭𑀁 𑀆𑀘𑀺𑀓𑁆𑀔𑀣, 𑀆𑀘𑀭𑀺𑀬𑀧𑁆𑀧𑀫𑀸𑀡’’𑀦𑁆𑀢𑀺. ‘‘𑀆𑀯𑀼𑀲𑁄, 𑀢𑁆𑀯𑀁 𑀫𑀫𑀘𑁆𑀘𑀬𑁂𑀦 𑀲𑀲𑁆𑀲𑀢𑀦𑁆𑀢𑀺 𑀕𑀡𑁆𑀳𑁂𑀬𑁆𑀬𑀸𑀲𑀻’’𑀢𑀺. 𑀅𑀧𑀭𑁄𑀧𑀺 𑀉𑀧𑀲𑀗𑁆𑀓𑀫𑀺, 𑀢𑀁 𑀉𑀘𑁆𑀙𑁂𑀤𑀁 𑀕𑀡𑁆𑀳𑀸𑀧𑁂𑀲𑀺. 𑀏𑀯𑀁 𑀤𑁆𑀯𑁂𑀧𑀺 𑀚𑀦𑁂 𑀏𑀓𑀮𑀤𑁆𑀥𑀺𑀓𑁂 𑀅𑀓𑀢𑁆𑀯𑀸 𑀩𑀳𑀽 𑀦𑀸𑀦𑀸𑀦𑀻𑀳𑀸𑀭𑁂𑀦 𑀉𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀢𑁂 𑀢𑀲𑁆𑀲 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀲𑁆𑀲𑀸𑀯𑀼𑀲𑁄, 𑀆𑀘𑀭𑀺𑀬𑁄 𑀲𑀸𑀭𑀁 𑀆𑀘𑀺𑀓𑁆𑀔𑀻’’𑀢𑀺? 𑀏𑀓𑁄 𑀉𑀝𑁆𑀞𑀳𑀺𑀢𑁆𑀯𑀸 𑀫𑀬𑁆𑀳𑀦𑁆𑀢𑀺 𑀆𑀳. 𑀓𑀺𑀁 𑀆𑀘𑀺𑀓𑁆𑀔𑀻𑀢𑀺? 𑀲𑀲𑁆𑀲𑀢𑀦𑁆𑀢𑀺. 𑀅𑀧𑀭𑁄 𑀢𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 ‘‘𑀫𑀬𑁆𑀳𑀁 𑀲𑀸𑀭𑀁 𑀆𑀘𑀺𑀓𑁆𑀔𑀻’’𑀢𑀺 𑀆𑀳. 𑀏𑀯𑀁 𑀲𑀩𑁆𑀩𑁂 ‘‘𑀫𑀬𑁆𑀳𑀁 𑀲𑀸𑀭𑀁 𑀆𑀘𑀺𑀓𑁆𑀔𑀺, 𑀅𑀳𑀁 𑀚𑁂𑀝𑁆𑀞𑀓𑁄’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀸𑀤𑀁 𑀯𑀟𑁆𑀠𑁂𑀢𑁆𑀯𑀸 𑀅𑀓𑁆𑀓𑁄𑀲𑁂 𑀘𑁂𑀯 𑀧𑀭𑀺𑀪𑀸𑀲𑁂 𑀘 𑀳𑀢𑁆𑀣𑀧𑀸𑀤𑀧𑁆𑀧𑀳𑀸𑀭𑀸𑀤𑀻𑀦𑀺 ¶ 𑀘 𑀧𑀯𑀢𑁆𑀢𑁂𑀢𑁆𑀯𑀸 𑀏𑀓𑀫𑀕𑁆𑀕𑁂𑀦 𑀤𑁆𑀯𑁂 𑀅𑀕𑀘𑁆𑀙𑀦𑁆𑀢𑀸 𑀦𑀸𑀦𑀸𑀤𑀺𑀲𑀸𑀲𑀼 𑀧𑀓𑁆𑀓𑀫𑀺𑀁𑀲𑀼.

𑁧𑁬𑁫. 𑀅𑀣 𑀔𑁄 𑀘𑀼𑀦𑁆𑀤𑁄 𑀲𑀫𑀡𑀼𑀤𑁆𑀤𑁂𑀲𑁄𑀢𑀺 𑀅𑀬𑀁 𑀣𑁂𑀭𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀺𑀓𑁄. 𑀢𑀁 𑀪𑀺𑀓𑁆𑀔𑀽 𑀅𑀦𑀼𑀧𑀲𑀫𑁆𑀧𑀦𑁆𑀦𑀓𑀸𑀮𑁂 ‘‘𑀘𑀼𑀦𑁆𑀤𑁄 𑀲𑀫𑀡𑀼𑀤𑁆𑀤𑁂𑀲𑁄’’𑀢𑀺 𑀲𑀫𑀼𑀤𑀸𑀘𑀭𑀺𑀢𑁆𑀯𑀸 𑀣𑁂𑀭𑀓𑀸𑀮𑁂𑀧𑀺 𑀢𑀣𑁂𑀯 𑀲𑀫𑀼𑀤𑀸𑀘𑀭𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀘𑀼𑀦𑁆𑀤𑁄 𑀲𑀫𑀡𑀼𑀤𑁆𑀤𑁂𑀲𑁄’’𑀢𑀺.

‘‘𑀧𑀸𑀯𑀸𑀬𑀁 𑀯𑀲𑁆𑀲𑀁𑀯𑀼𑀝𑁆𑀞𑁄 𑀬𑁂𑀦 𑀲𑀸𑀫𑀕𑀸𑀫𑁄, 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀻’’𑀢𑀺 𑀓𑀲𑁆𑀫𑀸 𑀉𑀧𑀲𑀗𑁆𑀓𑀫𑀺? 𑀦𑀸𑀝𑀧𑀼𑀢𑁆𑀢𑁂 𑀓𑀺𑀭 𑀓𑀸𑀮𑀗𑁆𑀓𑀢𑁂 𑀚𑀫𑁆𑀩𑀼𑀤𑀻𑀧𑁂 𑀫𑀦𑀼𑀲𑁆𑀲𑀸 𑀢𑀢𑁆𑀣 𑀢𑀢𑁆𑀣 𑀓𑀣𑀁 𑀧𑀯𑀢𑁆𑀢𑀬𑀺𑀁𑀲𑀼 ‘‘𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀏𑀓𑁄 𑀲𑀢𑁆𑀣𑀸𑀢𑀺 𑀧𑀜𑁆𑀜𑀸𑀬𑀺𑀢𑁆𑀣, 𑀢𑀲𑁆𑀲 𑀓𑀸𑀮𑀗𑁆𑀓𑀺𑀭𑀺𑀬𑀸𑀬 𑀲𑀸𑀯𑀓𑀸𑀦𑀁 𑀏𑀯𑀭𑀽𑀧𑁄 𑀯𑀺𑀯𑀸𑀤𑁄 𑀚𑀸𑀢𑁄. 𑀲𑀫𑀡𑁄 𑀧𑀦 𑀕𑁄𑀢𑀫𑁄 𑀚𑀫𑁆𑀩𑀼𑀤𑀻𑀧𑁂 𑀘𑀦𑁆𑀤𑁄 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀘 𑀧𑀸𑀓𑀝𑁄, 𑀲𑀸𑀯𑀓𑀸𑀧𑀺𑀲𑁆𑀲 𑀧𑀸𑀓𑀝𑀸𑀬𑁂𑀯. 𑀓𑀻𑀤𑀺𑀲𑁄 𑀦𑀼 𑀔𑁄 𑀲𑀫𑀡𑁂 𑀕𑁄𑀢𑀫𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀸𑀯𑀓𑀸𑀦𑀁 𑀯𑀺𑀯𑀸𑀤𑁄 𑀪𑀯𑀺𑀲𑁆𑀲𑀢𑀻’’𑀢𑀺 ¶ . 𑀣𑁂𑀭𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀁 𑀓𑀣𑀁 𑀕𑀳𑁂𑀢𑁆𑀯𑀸 𑀤𑀲𑀩𑀮𑀲𑁆𑀲 𑀆𑀭𑁄𑀘𑁂𑀲𑁆𑀲𑀸𑀫𑀺, 𑀲𑀢𑁆𑀣𑀸 𑀏𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀏𑀓𑀁 𑀤𑁂𑀲𑀦𑀁 𑀓𑀣𑁂𑀲𑁆𑀲𑀢𑀻’’𑀢𑀺. 𑀲𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑁂𑀦 𑀲𑀸𑀫𑀕𑀸𑀫𑁄, 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀲𑀸𑀫𑀕𑀸𑀫𑁄𑀢𑀺 ¶ 𑀲𑀸𑀫𑀸𑀓𑀸𑀦𑀁 𑀉𑀲𑁆𑀲𑀦𑁆𑀦𑀢𑁆𑀢𑀸 𑀢𑀲𑁆𑀲 𑀕𑀸𑀫𑀲𑁆𑀲 𑀦𑀸𑀫𑀁. 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄𑀢𑀺 𑀉𑀚𑀼𑀫𑁂𑀯 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀦𑁆𑀢𑁆𑀯𑀸 𑀬𑁂𑀦𑀲𑁆𑀲 𑀉𑀧𑀚𑁆𑀛𑀸𑀬𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀩𑀼𑀤𑁆𑀥𑀓𑀸𑀮𑁂 𑀓𑀺𑀭 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀘 𑀆𑀦𑀦𑁆𑀤𑀢𑁆𑀣𑁂𑀭𑁄 𑀘 𑀅𑀜𑁆𑀜𑀫𑀜𑁆𑀜𑀁 𑀫𑀫𑀸𑀬𑀺𑀁𑀲𑀼. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 ‘‘𑀫𑀬𑀸 𑀓𑀸𑀢𑀩𑁆𑀩𑀁 𑀲𑀢𑁆𑀣𑀼 𑀉𑀧𑀝𑁆𑀞𑀸𑀦𑀁 𑀓𑀭𑁄𑀢𑀻’’𑀢𑀺 𑀆𑀦𑀦𑁆𑀤𑀢𑁆𑀣𑁂𑀭𑀁 𑀫𑀫𑀸𑀬𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 ‘‘𑀪𑀕𑀯𑀢𑁄 𑀲𑀸𑀯𑀓𑀸𑀦𑀁 𑀅𑀕𑁆𑀕𑁄’’𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀫𑀫𑀸𑀬𑀺. 𑀓𑀼𑀮𑀤𑀸𑀭𑀓𑁂 𑀘 𑀧𑀩𑁆𑀩𑀸𑀚𑁂𑀢𑁆𑀯𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀉𑀧𑀚𑁆𑀛𑀁 𑀕𑀡𑁆𑀳𑀸𑀧𑁂𑀲𑀺. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀢𑀣𑁂𑀯 𑀅𑀓𑀸𑀲𑀺. 𑀏𑀯𑀁 𑀏𑀓𑀫𑁂𑀓𑁂𑀦 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀤𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀉𑀧𑀚𑁆𑀛𑀁 𑀕𑀡𑁆𑀳𑀸𑀧𑀺𑀢𑀸𑀦𑀺 𑀧𑀜𑁆𑀘 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀅𑀳𑁂𑀲𑀼𑀁. 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀧𑀡𑀻𑀢𑀸𑀦𑀺 𑀘𑀻𑀯𑀭𑀸𑀤𑀻𑀦𑀺𑀧𑀺 𑀮𑀪𑀺𑀢𑁆𑀯𑀸 𑀣𑁂𑀭𑀲𑁆𑀲 𑀅𑀤𑀸𑀲𑀺.

𑀥𑀫𑁆𑀫𑀭𑀢𑀦𑀧𑀽𑀚𑀸

𑀏𑀓𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀩𑀼𑀤𑁆𑀥𑀭𑀢𑀦𑀲𑁆𑀲 𑀘 𑀲𑀗𑁆𑀖𑀭𑀢𑀦𑀲𑁆𑀲 𑀘 𑀧𑀽𑀚𑀸 𑀧𑀜𑁆𑀜𑀸𑀬𑀢𑀺, 𑀓𑀣𑀁 𑀦𑀼 𑀔𑁄 𑀥𑀫𑁆𑀫𑀭𑀢𑀦𑀁 𑀧𑀽𑀚𑀺𑀢𑀁 𑀳𑁄𑀢𑀻’’𑀢𑀺? 𑀲𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀪𑀕𑀯𑀸 𑀆𑀳 𑁋 ‘‘𑀲𑀘𑁂𑀧𑀺 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀭𑀢𑀦𑀁 𑀧𑀽𑀚𑁂𑀢𑀼𑀓𑀸𑀫𑁄, 𑀏𑀓𑀁 ¶ 𑀩𑀳𑀼𑀲𑁆𑀲𑀼𑀢𑀁 𑀧𑀽𑀚𑁂𑀳𑀻’’𑀢𑀺. 𑀩𑀳𑀼𑀲𑁆𑀲𑀼𑀢𑀁, 𑀪𑀦𑁆𑀢𑁂, 𑀆𑀘𑀺𑀓𑁆𑀔𑀣𑀸𑀢𑀺. 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀼𑀘𑁆𑀙𑀸𑀢𑀺. 𑀲𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀩𑀳𑀼𑀲𑁆𑀲𑀼𑀢𑀁, 𑀪𑀦𑁆𑀢𑁂, 𑀆𑀘𑀺𑀓𑁆𑀔𑀣𑀸’’𑀢𑀺 𑀆𑀳. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀩𑁆𑀭𑀸𑀳𑁆𑀫𑀡𑀸𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀣𑁂𑀭𑀁 𑀲𑀳𑀲𑁆𑀲𑀕𑁆𑀖𑀦𑀺𑀓𑁂𑀦 𑀢𑀺𑀘𑀻𑀯𑀭𑁂𑀦 𑀧𑀽𑀚𑁂𑀲𑀺. 𑀣𑁂𑀭𑁄 𑀢𑀁 𑀕𑀳𑁂𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀪𑀕𑀯𑀸 ‘‘𑀓𑀼𑀢𑁄, 𑀆𑀦𑀦𑁆𑀤, 𑀮𑀤𑁆𑀥’’𑀦𑁆𑀢𑀺 𑀆𑀳? 𑀏𑀓𑁂𑀦, 𑀪𑀦𑁆𑀢𑁂, 𑀩𑁆𑀭𑀸𑀳𑁆𑀫𑀡𑁂𑀦 𑀤𑀺𑀦𑁆𑀦𑀁, 𑀇𑀤𑀁 𑀧𑀦𑀸𑀳𑀁 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀤𑀸𑀢𑀼𑀓𑀸𑀫𑁄𑀢𑀺. 𑀤𑁂𑀳𑀺, 𑀆𑀦𑀦𑁆𑀤𑀸𑀢𑀺. 𑀘𑀸𑀭𑀺𑀓𑀁 𑀧𑀓𑁆𑀓𑀦𑁆𑀢𑁄 𑀪𑀦𑁆𑀢𑁂𑀢𑀺. 𑀆𑀕𑀢𑀓𑀸𑀮𑁂 𑀤𑁂𑀳𑀻𑀢𑀺, 𑀲𑀺𑀓𑁆𑀔𑀸𑀧𑀤𑀁 𑀪𑀦𑁆𑀢𑁂, 𑀧𑀜𑁆𑀜𑀢𑁆𑀢𑀦𑁆𑀢𑀺. 𑀓𑀤𑀸 𑀧𑀦 𑀲𑀸𑀭𑀺𑀧𑀼𑀢𑁆𑀢𑁄 𑀆𑀕𑀫𑀺𑀲𑁆𑀲𑀢𑀻𑀢𑀺? 𑀤𑀲𑀸𑀳𑀫𑀢𑁆𑀢𑁂𑀦 𑀪𑀦𑁆𑀢𑁂𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀆𑀦𑀦𑁆𑀤, 𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀼’’𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀲𑀺.

𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 ¶ 𑀢𑀣𑁂𑀯 𑀬𑀁𑀓𑀺𑀜𑁆𑀘𑀺 𑀫𑀦𑀸𑀧𑀁 𑀮𑀪𑀢𑀺, 𑀢𑀁 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀤𑁂𑀢𑀺. 𑀲𑁄 𑀇𑀫𑀫𑁆𑀧𑀺 𑀅𑀢𑁆𑀢𑀦𑁄 𑀓𑀦𑀺𑀝𑁆𑀞𑀪𑀸𑀢𑀺𑀓𑀁 𑀣𑁂𑀭𑀲𑁆𑀲𑁂𑀯 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀅𑀤𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀬𑁂𑀦𑀲𑁆𑀲 𑀉𑀧𑀚𑁆𑀛𑀸𑀬𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀻’’𑀢𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀉𑀧𑀚𑁆𑀛𑀸𑀬𑁄 𑀫𑁂 𑀫𑀳𑀸𑀧𑀜𑁆𑀜𑁄, 𑀲𑁄 𑀇𑀫𑀁 𑀓𑀣𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑁆𑀲𑀢𑀺, 𑀅𑀣 𑀲𑀢𑁆𑀣𑀸 𑀢𑀤𑀦𑀼𑀭𑀽𑀧𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀢𑀻’’𑀢𑀺. 𑀓𑀣𑀸𑀧𑀸𑀪𑀢𑀦𑁆𑀢𑀺 𑀓𑀣𑀸𑀬 𑀫𑀽𑀮𑀁. 𑀫𑀽𑀮𑀜𑁆𑀳𑀺 ‘‘𑀧𑀸𑀪𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋

‘‘𑀅𑀧𑁆𑀧𑀓𑁂𑀦𑀸𑀧𑀺 ¶ 𑀫𑁂𑀥𑀸𑀯𑀻, 𑀧𑀸𑀪𑀢𑁂𑀦 𑀯𑀺𑀘𑀓𑁆𑀔𑀡𑁄;

𑀲𑀫𑀼𑀝𑁆𑀞𑀸𑀧𑁂𑀢𑀺 𑀅𑀢𑁆𑀢𑀸𑀦𑀁, 𑀅𑀡𑀼𑀁 𑀅𑀕𑁆𑀕𑀺𑀁𑀯 𑀲𑀦𑁆𑀥𑀫’’𑀦𑁆𑀢𑀺. (𑀚𑀸. 𑁧.𑁧.𑁪);

𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬𑀸𑀢𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀢𑁆𑀣𑀸𑀬. 𑀓𑀺𑀁 𑀧𑀦𑀸𑀦𑁂𑀦 𑀪𑀕𑀯𑀸 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄𑀢𑀺? 𑀦𑁄 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄. 𑀅𑀬𑀜𑁆𑀳𑀺 𑀆𑀬𑀲𑁆𑀫𑀸 𑀤𑀺𑀯𑀸 𑀦𑀯 𑀯𑀸𑀭𑁂, 𑀭𑀢𑁆𑀢𑀺𑀁 𑀦𑀯 𑀯𑀸𑀭𑁂𑀢𑀺 𑀏𑀓𑀸𑀳𑀁 𑀅𑀝𑁆𑀞𑀸𑀭𑀲 𑀯𑀸𑀭𑁂 𑀉𑀧𑀝𑁆𑀞𑀸𑀦𑀫𑁂𑀯 𑀕𑀘𑁆𑀙𑀢𑀺. 𑀤𑀺𑀯𑀲𑀲𑁆𑀲 𑀧𑀦 𑀲𑀢𑀯𑀸𑀭𑀁 𑀯𑀸 𑀲𑀳𑀲𑁆𑀲𑀯𑀸𑀭𑀁 𑀯𑀸 𑀕𑀦𑁆𑀢𑀼𑀓𑀸𑀫𑁄 𑀲𑀫𑀸𑀦𑁄𑀧𑀺 𑀦 𑀅𑀓𑀸𑀭𑀡𑀸 𑀕𑀘𑁆𑀙𑀢𑀺, 𑀏𑀓𑀁 𑀧𑀜𑁆𑀳𑀼𑀤𑁆𑀥𑀸𑀭𑀁 𑀕𑀳𑁂𑀢𑁆𑀯𑀸𑀯 𑀕𑀘𑁆𑀙𑀢𑀺. 𑀲𑁄 𑀢𑀁 𑀤𑀺𑀯𑀲𑀁 𑀢𑁂𑀦 𑀓𑀣𑀸𑀧𑀸𑀪𑀢𑁂𑀦 𑀕𑀦𑁆𑀢𑀼𑀓𑀸𑀫𑁄 𑀏𑀯𑀫𑀸𑀳.

𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑀥𑀫𑁆𑀫𑀯𑀺𑀦𑀬𑀯𑀡𑁆𑀡𑀦𑀸

𑁧𑁬𑁬. 𑀏𑀯𑀜𑁆𑀳𑁂𑀢𑀁, 𑀘𑀼𑀦𑁆𑀤, 𑀳𑁄𑀢𑀻𑀢𑀺 𑀪𑀕𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀆𑀭𑁄𑀘𑀺𑀢𑁂𑀧𑀺 𑀬𑀲𑁆𑀫𑀸 𑀦 𑀆𑀦𑀦𑁆𑀤𑀢𑁆𑀣𑁂𑀭𑁄 𑀇𑀫𑀺𑀲𑁆𑀲𑀸 𑀓𑀣𑀸𑀬 𑀲𑀸𑀫𑀺𑀓𑁄, 𑀘𑀼𑀦𑁆𑀤𑀢𑁆𑀣𑁂𑀭𑁄 𑀧𑀦 𑀲𑀸𑀫𑀺𑀓𑁄. 𑀲𑁄𑀯 𑀢𑀲𑁆𑀲𑀸 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀚𑀸𑀦𑀸𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁄 ‘‘𑀏𑀯𑀜𑁆𑀳𑁂𑀢𑀁, 𑀘𑀼𑀦𑁆𑀤, 𑀳𑁄𑀢𑀻’’𑀢𑀺𑀆𑀤𑀺𑀫𑀸𑀳 ¶ . 𑀢𑀲𑁆𑀲𑀢𑁆𑀣𑁄 𑁋 𑀘𑀼𑀦𑁆𑀤 𑀏𑀯𑀜𑁆𑀳𑁂𑀢𑀁 𑀳𑁄𑀢𑀺 𑀤𑀼𑀭𑀓𑁆𑀔𑀸𑀢𑀸𑀤𑀺𑀲𑀪𑀸𑀯𑁂 𑀥𑀫𑁆𑀫𑀯𑀺𑀦𑀬𑁂 𑀲𑀸𑀯𑀓𑀸 𑀤𑁆𑀯𑁂𑀥𑀺𑀓𑀚𑀸𑀢𑀸 𑀪𑀡𑁆𑀟𑀦𑀸𑀤𑀻𑀦𑀺 𑀓𑀢𑁆𑀯𑀸 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀢𑀼𑀤𑀦𑁆𑀢𑀸 𑀯𑀺𑀳𑀭𑀦𑁆𑀢𑀺.

𑀇𑀤𑀸𑀦𑀺 𑀬𑀲𑁆𑀫𑀸 𑀅𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂𑀦𑁂𑀯 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑀁 𑀧𑀸𑀓𑀝𑀁 𑀳𑁄𑀢𑀺, 𑀢𑀲𑁆𑀫𑀸 𑀆𑀤𑀺𑀢𑁄 𑀅𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑀫𑁂𑀯 𑀤𑀲𑁆𑀲𑁂𑀦𑁆𑀢𑁄 𑀇𑀥 𑀘𑀼𑀦𑁆𑀤 𑀲𑀢𑁆𑀣𑀸 𑀘 𑀳𑁄𑀢𑀺 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑁄𑀓𑁆𑀓𑀫𑁆𑀫 𑀘 𑀢𑀫𑁆𑀳𑀸 𑀥𑀫𑁆𑀫𑀸 𑀯𑀢𑁆𑀢𑀢𑀻𑀢𑀺 𑀦 𑀦𑀺𑀭𑀦𑁆𑀢𑀭𑀁 𑀧𑀽𑀭𑁂𑀢𑀺, 𑀑𑀓𑁆𑀓𑀫𑀺𑀢𑁆𑀯𑀸 𑀑𑀓𑁆𑀓𑀫𑀺𑀢𑁆𑀯𑀸 𑀅𑀦𑁆𑀢𑀭𑀦𑁆𑀢𑀭𑀁 𑀓𑀢𑁆𑀯𑀸 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀢𑁂, 𑀆𑀯𑀼𑀲𑁄, 𑀮𑀸𑀪𑀸𑀢𑀺 𑀢𑀲𑁆𑀲 𑀢𑀼𑀬𑁆𑀳𑀁 𑀏𑀢𑁂 ¶ 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺𑀆𑀤𑀬𑁄 𑀮𑀸𑀪𑀸. 𑀲𑀼𑀮𑀤𑁆𑀥𑀦𑁆𑀢𑀺 𑀫𑀦𑀼𑀲𑁆𑀲𑀢𑁆𑀢𑀫𑁆𑀧𑀺 𑀢𑁂 𑀲𑀼𑀮𑀤𑁆𑀥𑀁. 𑀢𑀣𑀸 𑀧𑀝𑀺𑀧𑀚𑁆𑀚𑀢𑀽𑀢𑀺 𑀏𑀯𑀁 𑀧𑀝𑀺𑀧𑀚𑁆𑀚𑀢𑀼. 𑀬𑀣𑀸 𑀢𑁂 𑀲𑀢𑁆𑀣𑀸𑀭𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄𑀢𑀺 𑀬𑁂𑀦 𑀢𑁂 𑀆𑀓𑀸𑀭𑁂𑀦 𑀲𑀢𑁆𑀣𑀸𑀭𑀸 𑀥𑀫𑁆𑀫𑁄 𑀓𑀣𑀺𑀢𑁄. 𑀬𑁄 𑀘 𑀲𑀫𑀸𑀤𑀧𑁂𑀢𑀻𑀢𑀺 𑀬𑁄 𑀘 𑀆𑀘𑀭𑀺𑀬𑁄 𑀲𑀫𑀸𑀤𑀧𑁂𑀢𑀺. 𑀬𑀜𑁆𑀘 𑀲𑀫𑀸𑀤𑀧𑁂𑀢𑀻𑀢𑀺 𑀬𑀁 𑀅𑀦𑁆𑀢𑁂𑀯𑀸𑀲𑀺𑀁 𑀲𑀫𑀸𑀤𑀧𑁂𑀢𑀺. 𑀬𑁄 𑀘 𑀲𑀫𑀸𑀤𑀧𑀺𑀢𑁄𑀢𑀺 𑀬𑁄 𑀘 𑀏𑀯𑀁 𑀲𑀫𑀸𑀤𑀧𑀺𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑁄. 𑀬𑀣𑀸 𑀆𑀘𑀭𑀺𑀬𑁂𑀦 𑀲𑀫𑀸𑀤𑀧𑀺𑀢𑀁, 𑀢𑀣𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀢𑀺. 𑀲𑀩𑁆𑀩𑁂 𑀢𑁂𑀢𑀺 𑀢𑀬𑁄𑀧𑀺 𑀢𑁂. 𑀏𑀢𑁆𑀣 𑀳𑀺 𑀆𑀘𑀭𑀺𑀬𑁄 𑀲𑀫𑀸𑀤𑀧𑀺𑀢𑀢𑁆𑀢𑀸 𑀅𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀲𑀫𑀸𑀤𑀺𑀦𑁆𑀦𑀦𑁆𑀢𑁂𑀯𑀸𑀲𑀺𑀓𑁄 𑀲𑀫𑀸𑀤𑀺𑀦𑁆𑀦𑀢𑁆𑀢𑀸, 𑀧𑀝𑀺𑀧𑀦𑁆𑀦𑀓𑁄 𑀧𑀝𑀺𑀧𑀦𑁆𑀦𑀢𑁆𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀩𑁆𑀩𑁂 𑀢𑁂 𑀩𑀳𑀼𑀁 𑀅𑀧𑀼𑀜𑁆𑀜𑀁 𑀧𑀲𑀯𑀦𑁆𑀢𑀻’’𑀢𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁬𑁭. 𑀅𑀧𑀺𑀘𑁂𑀢𑁆𑀣 ¶ 𑀜𑀸𑀬𑀧𑁆𑀧𑀝𑀺𑀧𑀦𑁆𑀦𑁄𑀢𑀺 𑀓𑀸𑀭𑀡𑀧𑁆𑀧𑀝𑀺𑀧𑀦𑁆𑀦𑁄. 𑀜𑀸𑀬𑀫𑀸𑀭𑀸𑀥𑁂𑀲𑁆𑀲𑀢𑀻𑀢𑀺 𑀓𑀸𑀭𑀡𑀁 𑀦𑀺𑀧𑁆𑀨𑀸𑀤𑁂𑀲𑁆𑀲𑀢𑀺. 𑀯𑀻𑀭𑀺𑀬𑀁 𑀆𑀭𑀪𑀢𑀻𑀢𑀺 𑀅𑀢𑁆𑀢𑀦𑁄 𑀤𑀼𑀓𑁆𑀔𑀦𑀺𑀩𑁆𑀩𑀢𑁆𑀢𑀓𑀁 𑀯𑀻𑀭𑀺𑀬𑀁 𑀓𑀭𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀤𑀼𑀭𑀓𑁆𑀔𑀸𑀢𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀯𑀺𑀦𑀬𑁂 𑀬𑁄 𑀆𑀭𑀤𑁆𑀥𑀯𑀻𑀭𑀺𑀬𑁄, 𑀲𑁄 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺. 𑀬𑁄 𑀓𑀼𑀲𑀻𑀢𑁄, 𑀲𑁄 𑀲𑀼𑀔𑀁 𑀯𑀺𑀳𑀭𑀢𑀻’’𑀢𑀺 (𑀅. 𑀦𑀺. 𑁧.𑁩𑁧𑁮).

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑀥𑀫𑁆𑀫𑀯𑀺𑀦𑀬𑀸𑀤𑀺𑀯𑀡𑁆𑀡𑀦𑀸

𑁧𑁬𑁮. 𑀏𑀯𑀁 𑀅𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 𑀇𑀥 𑀧𑀦, 𑀘𑀼𑀦𑁆𑀤, 𑀲𑀢𑁆𑀣𑀸 𑀘 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀺𑀬𑁆𑀬𑀸𑀦𑀺𑀓𑁄𑀢𑀺 𑀫𑀕𑁆𑀕𑀢𑁆𑀣𑀸𑀬 𑀨𑀮𑀢𑁆𑀣𑀸𑀬 𑀘 𑀦𑀺𑀬𑁆𑀬𑀸𑀢𑀺.

𑁧𑁬𑁯. 𑀯𑀻𑀭𑀺𑀬𑀁 𑀆𑀭𑀪𑀢𑀻𑀢𑀺 𑀅𑀢𑁆𑀢𑀦𑁄 𑀲𑀼𑀔𑀦𑀺𑀧𑁆𑀨𑀸𑀤𑀓𑀁 𑀯𑀻𑀭𑀺𑀬𑀁 𑀆𑀭𑀪𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀲𑁆𑀯𑀸𑀓𑁆𑀔𑀸𑀢𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀯𑀺𑀦𑀬𑁂 𑀬𑁄 𑀓𑀼𑀲𑀻𑀢𑁄, 𑀲𑁄 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺. 𑀬𑁄 𑀆𑀭𑀤𑁆𑀥𑀯𑀻𑀭𑀺𑀬𑁄, 𑀲𑁄 𑀲𑀼𑀔𑀁 𑀯𑀺𑀳𑀭𑀢𑀻’’𑀢𑀺 (𑀅. 𑀦𑀺. 𑁧.𑁩𑁧𑁯).

𑁧𑁭𑁦. 𑀇𑀢𑀺 𑀪𑀕𑀯𑀸 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀲𑁆𑀲 ¶ 𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀤𑁂𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀇𑀥, 𑀘𑀼𑀦𑁆𑀤, 𑀲𑀢𑁆𑀣𑀸 𑀘 𑀮𑁄𑀓𑁂 𑀉𑀤𑀧𑀸𑀤𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀯𑀺𑀜𑁆𑀜𑀸𑀧𑀺𑀢𑀢𑁆𑀣𑀸𑀢𑀺 𑀅𑀩𑁄𑀥𑀺𑀢𑀢𑁆𑀣𑀸. 𑀲𑀩𑁆𑀩𑀲𑀗𑁆𑀕𑀸𑀳𑀧𑀤𑀓𑀢𑀦𑁆𑀢𑀺 𑀲𑀩𑁆𑀩𑀲𑀗𑁆𑀕𑀳𑀧𑀤𑁂𑀳𑀺 𑀓𑀢𑀁, 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀁 𑀓𑀢𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀲𑀩𑁆𑀩𑀲𑀗𑁆𑀕𑀸𑀳𑀧𑀤𑀕𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀦 𑀲𑀩𑁆𑀩𑀲𑀗𑁆𑀕𑀸𑀳𑀧𑀤𑁂𑀲𑀼 𑀕𑀢𑀁, 𑀦 𑀏𑀓𑀲𑀗𑁆𑀕𑀳𑀚𑀸𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀧𑁆𑀧𑀸𑀝𑀺𑀳𑀻𑀭𑀓𑀢𑀦𑁆𑀢𑀺 𑀦𑀺𑀬𑁆𑀬𑀸𑀦𑀺𑀓𑀁. 𑀬𑀸𑀯 ¶ 𑀤𑁂𑀯𑀫𑀦𑀼𑀲𑁆𑀲𑁂𑀳𑀻𑀢𑀺 𑀤𑁂𑀯𑀮𑁄𑀓𑀢𑁄 𑀬𑀸𑀯 𑀫𑀦𑀼𑀲𑁆𑀲𑀮𑁄𑀓𑀸 𑀲𑀼𑀧𑁆𑀧𑀓𑀸𑀲𑀺𑀢𑀁. 𑀅𑀦𑀼𑀢𑀧𑁆𑀧𑁄 𑀳𑁄𑀢𑀻𑀢𑀺 𑀅𑀦𑀼𑀢𑀸𑀧𑀓𑀭𑁄 𑀳𑁄𑀢𑀺. 𑀲𑀢𑁆𑀣𑀸 𑀘 𑀦𑁄 𑀮𑁄𑀓𑁂𑀢𑀺 𑀇𑀤𑀁 𑀢𑁂𑀲𑀁 𑀅𑀦𑀼𑀢𑀸𑀧𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀦𑀸𑀦𑀼𑀢𑀧𑁆𑀧𑁄 𑀳𑁄𑀢𑀻𑀢𑀺 𑀲𑀢𑁆𑀣𑀸𑀭𑀁 𑀆𑀕𑀫𑁆𑀫 𑀲𑀸𑀯𑀓𑁂𑀳𑀺 𑀬𑀁 𑀧𑀢𑁆𑀢𑀩𑁆𑀩𑀁, 𑀢𑀲𑁆𑀲 𑀧𑀢𑁆𑀢𑀢𑁆𑀢𑀸 𑀅𑀦𑀼𑀢𑀸𑀧𑀓𑀭𑁄 𑀦 𑀳𑁄𑀢𑀺.

𑁧𑁭𑁨. 𑀣𑁂𑀭𑁄𑀢𑀺 𑀣𑀺𑀭𑁄 𑀣𑁂𑀭𑀓𑀸𑀭𑀓𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. ‘‘𑀭𑀢𑁆𑀢𑀜𑁆𑀜𑀽’’𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀏𑀢𑁂𑀳𑀺 𑀘𑁂 𑀧𑀻𑀢𑀺 𑀏𑀢𑁂𑀳𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀳𑀺.

𑁧𑁭𑁩. 𑀧𑀢𑁆𑀢𑀬𑁄𑀕𑀓𑁆𑀔𑁂𑀫𑀸𑀢𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀔𑁂𑀫𑀢𑁆𑀢𑀸 𑀅𑀭𑀳𑀢𑁆𑀢𑀁 𑀇𑀥 𑀬𑁄𑀕𑀓𑁆𑀔𑁂𑀫𑀁 𑀦𑀸𑀫, 𑀢𑀁 𑀧𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀮𑀁 𑀲𑀫𑀓𑁆𑀔𑀸𑀢𑀼𑀁 𑀲𑀤𑁆𑀥𑀫𑁆𑀫𑀲𑁆𑀲𑀸𑀢𑀺 𑀲𑀫𑁆𑀫𑀼𑀔𑀸 𑀕𑀳𑀺𑀢𑀢𑁆𑀢𑀸 𑀅𑀲𑁆𑀲 𑀲𑀤𑁆𑀥𑀫𑁆𑀫𑀁 𑀲𑀫𑁆𑀫𑀸 𑀆𑀘𑀺𑀓𑁆𑀔𑀺𑀢𑀼𑀁 𑀲𑀫𑀢𑁆𑀣𑀸.

𑁧𑁭𑁪. 𑀩𑁆𑀭𑀳𑁆𑀫𑀘𑀸𑀭𑀺𑀦𑁄𑀢𑀺 ¶ 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀯𑀲𑀫𑀸𑀦𑀸 𑀅𑀭𑀺𑀬𑀲𑀸𑀯𑀓𑀸. 𑀓𑀸𑀫𑀪𑁄𑀕𑀺𑀦𑁄𑀢𑀺 𑀕𑀺𑀳𑀺𑀲𑁄𑀢𑀸𑀧𑀦𑁆𑀦𑀸. ‘‘𑀇𑀤𑁆𑀥𑀜𑁆𑀘𑁂𑀯𑀸’’𑀢𑀺𑀆𑀤𑀻𑀦𑀺 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑁂𑀯. 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑀢𑁆𑀢𑀦𑁆𑀢𑀺 𑀮𑀸𑀪𑀕𑁆𑀕𑀜𑁆𑀘𑁂𑀯 𑀬𑀲𑀕𑁆𑀕𑀜𑁆𑀘 𑀧𑀢𑁆𑀢𑀁.

𑁧𑁭𑁫. 𑀲𑀦𑁆𑀢𑀺 𑀔𑁄 𑀧𑀦 𑀫𑁂, 𑀘𑀼𑀦𑁆𑀤, 𑀏𑀢𑀭𑀳𑀺 𑀣𑁂𑀭𑀸 𑀪𑀺𑀓𑁆𑀔𑀽 𑀲𑀸𑀯𑀓𑀸𑀢𑀺 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀬𑁄 𑀣𑁂𑀭𑀸. 𑀪𑀺𑀓𑁆𑀔𑀼𑀦𑀺𑀬𑁄𑀢𑀺 𑀔𑁂𑀫𑀸𑀣𑁂𑀭𑀻𑀉𑀧𑁆𑀧𑀮𑀯𑀡𑁆𑀡𑀣𑁂𑀭𑀻𑀆𑀤𑀬𑁄. 𑀉𑀧𑀸𑀲𑀓𑀸 𑀲𑀸𑀯𑀓𑀸 𑀕𑀺𑀳𑀻 𑀑𑀤𑀸𑀢𑀯𑀢𑁆𑀣𑀯𑀲𑀦𑀸 𑀩𑁆𑀭𑀳𑁆𑀫𑀘𑀸𑀭𑀺𑀦𑁄𑀢𑀺 𑀘𑀺𑀢𑁆𑀢𑀕𑀳𑀧𑀢𑀺𑀳𑀢𑁆𑀣𑀓𑀆𑀴𑀯𑀓𑀸𑀤𑀬𑁄. 𑀓𑀸𑀫𑀪𑁄𑀕𑀺𑀦𑁄𑀢𑀺 𑀘𑀽𑀴𑀅𑀦𑀸𑀣𑀧𑀺𑀡𑁆𑀟𑀺𑀓𑀫𑀳𑀸𑀅𑀦𑀸𑀣𑀧𑀺𑀡𑁆𑀟𑀺𑀓𑀸𑀤𑀬𑁄. 𑀩𑁆𑀭𑀳𑁆𑀫𑀘𑀸𑀭𑀺𑀦𑀺𑀬𑁄𑀢𑀺 𑀦𑀦𑁆𑀤𑀫𑀸𑀢𑀸𑀤𑀬𑁄. 𑀓𑀸𑀫𑀪𑁄𑀕𑀺𑀦𑀺𑀬𑁄𑀢𑀺 𑀔𑀼𑀚𑁆𑀚𑀼𑀢𑁆𑀢𑀭𑀸𑀤𑀬𑁄.

𑁧𑁭𑁬. 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀦𑁆𑀢𑀺 𑀲𑀩𑁆𑀩𑀓𑀸𑀭𑀡𑀲𑀫𑁆𑀧𑀦𑁆𑀦𑀁. 𑀇𑀤𑀫𑁂𑀯 ¶ 𑀢𑀦𑁆𑀢𑀺 𑀇𑀤𑀫𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀇𑀫𑀫𑁂𑀯 𑀥𑀫𑁆𑀫𑀁 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀦𑀬𑁂𑀦 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬. 𑀉𑀤𑀓𑀸𑀲𑁆𑀲𑀼𑀤𑀦𑁆𑀢𑀺 𑀉𑀤𑀓𑁄 𑀲𑀼𑀤𑀁. 𑀧𑀲𑁆𑀲𑀁 𑀦 𑀧𑀲𑁆𑀲𑀢𑀻𑀢𑀺 𑀧𑀲𑁆𑀲𑀦𑁆𑀢𑁄 𑀦 𑀧𑀲𑁆𑀲𑀢𑀺. 𑀲𑁄 𑀓𑀺𑀭 𑀇𑀫𑀁 𑀧𑀜𑁆𑀳𑀁 𑀫𑀳𑀸𑀚𑀦𑀁 𑀧𑀼𑀘𑁆𑀙𑀺. 𑀢𑁂𑀳𑀺 ‘‘𑀦 𑀚𑀸𑀦𑀸𑀫, 𑀆𑀘𑀭𑀺𑀬, 𑀓𑀣𑁂𑀳𑀺 𑀦𑁄’’𑀢𑀺 𑀯𑀼𑀢𑁆𑀢𑁄 𑀲𑁄 𑀆𑀳 𑁋 ‘‘𑀕𑀫𑁆𑀪𑀻𑀭𑁄 𑀅𑀬𑀁 𑀧𑀜𑁆𑀳𑁄 𑀆𑀳𑀸𑀭𑀲𑀧𑁆𑀧𑀸𑀬𑁂 𑀲𑀢𑀺 𑀣𑁄𑀓𑀁 𑀘𑀺𑀦𑁆𑀢𑁂𑀢𑁆𑀯𑀸 𑀲𑀓𑁆𑀓𑀸 𑀓𑀣𑁂𑀢𑀼’’𑀦𑁆𑀢𑀺. 𑀢𑀢𑁄 𑀢𑁂𑀳𑀺 𑀘𑀢𑁆𑀢𑀸𑀭𑁄 𑀫𑀸𑀲𑁂 ¶ 𑀫𑀳𑀸𑀲𑀓𑁆𑀓𑀸𑀭𑁂 𑀓𑀢𑁂 𑀢𑀁 𑀧𑀜𑁆𑀳𑀁 𑀓𑀣𑁂𑀦𑁆𑀢𑁄 𑀓𑀺𑀜𑁆𑀘 𑀧𑀲𑁆𑀲𑀁 𑀦 𑀧𑀲𑁆𑀲𑀢𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀸𑀥𑀼𑀦𑀺𑀲𑀺𑀢𑀲𑁆𑀲𑀸𑀢𑀺 𑀲𑀼𑀝𑁆𑀞𑀼𑀦𑀺𑀲𑀺𑀢𑀲𑁆𑀲 𑀢𑀺𑀔𑀺𑀡𑀲𑁆𑀲, 𑀲𑀼𑀦𑀺𑀲𑀺𑀢𑀔𑀼𑀭𑀲𑁆𑀲 𑀓𑀺𑀭 𑀢𑀮𑀁 𑀧𑀜𑁆𑀜𑀸𑀬𑀢𑀺, 𑀥𑀸𑀭𑀸 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀲𑀗𑁆𑀕𑀸𑀬𑀺𑀢𑀩𑁆𑀩𑀥𑀫𑁆𑀫𑀸𑀤𑀺𑀯𑀡𑁆𑀡𑀦𑀸

𑁧𑁭𑁭. 𑀲𑀗𑁆𑀕𑀫𑁆𑀫 𑀲𑀫𑀸𑀕𑀫𑁆𑀫𑀸𑀢𑀺 𑀲𑀗𑁆𑀕𑀦𑁆𑀢𑁆𑀯𑀸 𑀲𑀫𑀸𑀕𑀦𑁆𑀢𑁆𑀯𑀸. 𑀅𑀢𑁆𑀣𑁂𑀦 𑀅𑀢𑁆𑀣𑀁, 𑀩𑁆𑀬𑀜𑁆𑀚𑀦𑁂𑀦 𑀩𑁆𑀬𑀜𑁆𑀚𑀦𑀦𑁆𑀢𑀺 𑀅𑀢𑁆𑀣𑁂𑀦 𑀲𑀳 𑀅𑀢𑁆𑀣𑀁, 𑀩𑁆𑀬𑀜𑁆𑀚𑀦𑁂𑀦𑀧𑀺 𑀲𑀳 𑀩𑁆𑀬𑀜𑁆𑀚𑀦𑀁 𑀲𑀫𑀸𑀦𑁂𑀦𑁆𑀢𑁂𑀳𑀻𑀢𑀺 𑀅𑀢𑁆𑀣𑁄. 𑀲𑀗𑁆𑀕𑀸𑀬𑀺𑀢𑀩𑁆𑀩𑀦𑁆𑀢𑀺 𑀯𑀸𑀘𑁂𑀢𑀩𑁆𑀩𑀁 𑀲𑀚𑁆𑀛𑀸𑀬𑀺𑀢𑀩𑁆𑀩𑀁. 𑀬𑀣𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀬𑀣𑀸 𑀇𑀤𑀁 𑀲𑀓𑀮𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁.

𑁧𑁭𑁮. 𑀢𑀢𑁆𑀭 𑀘𑁂𑀢𑀺 𑀢𑀢𑁆𑀭 𑀲𑀗𑁆𑀖𑀫𑀚𑁆𑀛𑁂, 𑀢𑀲𑁆𑀲 𑀯𑀸 𑀪𑀸𑀲𑀺𑀢𑁂. 𑀅𑀢𑁆𑀣𑀜𑁆𑀘𑁂𑀯 𑀫𑀺𑀘𑁆𑀙𑀸 𑀕𑀡𑁆𑀳𑀸𑀢𑀺, 𑀩𑁆𑀬𑀜𑁆𑀚𑀦𑀸𑀦𑀺 𑀘 𑀫𑀺𑀘𑁆𑀙𑀸 𑀭𑁄𑀧𑁂𑀢𑀻𑀢𑀺 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀏𑀢𑁆𑀣 𑀆𑀭𑀫𑁆𑀫𑀡𑀁 ‘‘𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺 𑀅𑀢𑁆𑀣𑀁 𑀕𑀡𑁆𑀳𑀸𑀢𑀺. ‘‘𑀲𑀢𑀺𑀧𑀝𑁆𑀞𑀸𑀦𑀸𑀦𑀻’’𑀢𑀺 𑀩𑁆𑀬𑀜𑁆𑀚𑀦𑀁 𑀭𑁄𑀧𑁂𑀢𑀺. 𑀇𑀫𑀲𑁆𑀲 𑀦𑀼 𑀔𑁄, 𑀆𑀯𑀼𑀲𑁄, 𑀅𑀢𑁆𑀣𑀲𑁆𑀲𑀸𑀢𑀺 ‘‘𑀲𑀢𑀺𑀬𑁂𑀯 𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺. 𑀅𑀢𑁆𑀣𑀲𑁆𑀲 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀓𑀺𑀁 𑀦𑀼 𑀔𑁄 𑀇𑀫𑀸𑀦𑀺 𑀩𑁆𑀬𑀜𑁆𑀚𑀦𑀸𑀦𑀺, 𑀉𑀤𑀸𑀳𑀼 𑀘𑀢𑁆𑀢𑀸𑀭𑀺 𑀲𑀢𑀺𑀧𑀝𑁆𑀞𑀸𑀦𑀸𑀦𑀻’’𑀢𑀺 𑀏𑀢𑀸𑀦𑀺 𑀯𑀸 𑀩𑁆𑀬𑀜𑁆𑀚𑀦𑀸𑀦𑀺. 𑀓𑀢𑀫𑀸𑀦𑀺 𑀑𑀧𑀸𑀬𑀺𑀓𑀢𑀭𑀸𑀦𑀻𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀓𑀢𑀫𑀸𑀦𑀺 𑀩𑁆𑀬𑀜𑁆𑀚𑀦𑀸𑀦𑀺 𑀉𑀧𑀧𑀦𑁆𑀦𑀢𑀭𑀸𑀦𑀺 𑀅𑀮𑁆𑀮𑀻𑀦𑀢𑀭𑀸𑀦𑀺. 𑀇𑀫𑁂𑀲𑀜𑁆𑀘 ¶ 𑀩𑁆𑀬𑀜𑁆𑀚𑀦𑀸𑀦𑀦𑁆𑀢𑀺 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀩𑁆𑀬𑀜𑁆𑀚𑀦𑀸𑀦𑀁 ‘‘𑀲𑀢𑀺𑀬𑁂𑀯 𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺 𑀓𑀺𑀁 𑀦𑀼 𑀔𑁄 𑀅𑀬𑀁 𑀅𑀢𑁆𑀣𑁄, 𑀉𑀤𑀸𑀳𑀼 ‘‘𑀆𑀭𑀫𑁆𑀫𑀡𑀁 𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺 𑀏𑀲𑁄 𑀅𑀢𑁆𑀣𑁄𑀢𑀺? 𑀇𑀫𑀲𑁆𑀲 𑀔𑁄, 𑀆𑀯𑀼𑀲𑁄, 𑀅𑀢𑁆𑀣𑀲𑁆𑀲𑀸𑀢𑀺 ‘‘𑀆𑀭𑀫𑁆𑀫𑀡𑀁 𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲. 𑀬𑀸 𑀘𑁂𑀯 𑀏𑀢𑀸𑀦𑀻𑀢𑀺 𑀬𑀸𑀦𑀺 𑀘𑁂𑀯 𑀏𑀢𑀸𑀦𑀺 𑀫𑀬𑀸 𑀯𑀼𑀢𑁆𑀢𑀸𑀦𑀺. 𑀬𑀸 𑀘𑁂𑀯 𑀏𑀲𑁄𑀢𑀺 𑀬𑁄 𑀘𑁂𑀯 𑀏𑀲 𑀫𑀬𑀸 𑀯𑀼𑀢𑁆𑀢𑁄. 𑀲𑁄 𑀦𑁂𑀯 𑀉𑀲𑁆𑀲𑀸𑀤𑁂𑀢𑀩𑁆𑀩𑁄𑀢𑀺 𑀢𑀼𑀫𑁆𑀳𑁂𑀳𑀺 𑀢𑀸𑀯 𑀲𑀫𑁆𑀫𑀸 𑀅𑀢𑁆𑀣𑁂 𑀘 𑀲𑀫𑁆𑀫𑀸 𑀩𑁆𑀬𑀜𑁆𑀚𑀦𑁂 ¶ 𑀘 𑀞𑀸𑀢𑀩𑁆𑀩𑀁. 𑀲𑁄 𑀧𑀦 𑀦𑁂𑀯 𑀉𑀲𑁆𑀲𑀸𑀤𑁂𑀢𑀩𑁆𑀩𑁄, 𑀦 𑀅𑀧𑀲𑀸𑀤𑁂𑀢𑀩𑁆𑀩𑁄. 𑀲𑀜𑁆𑀜𑀸𑀧𑁂𑀢𑀩𑁆𑀩𑁄𑀢𑀺 𑀚𑀸𑀦𑀸𑀧𑁂𑀢𑀩𑁆𑀩𑁄. 𑀢𑀲𑁆𑀲 𑀘 𑀅𑀢𑁆𑀣𑀲𑁆𑀲𑀸𑀢𑀺 ‘‘𑀲𑀢𑀺𑀬𑁂𑀯 𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺 𑀅𑀢𑁆𑀣𑀲𑁆𑀲 𑀘. 𑀢𑁂𑀲𑀜𑁆𑀘 𑀩𑁆𑀬𑀜𑁆𑀚𑀦𑀸𑀦𑀦𑁆𑀢𑀺 ‘‘𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀩𑁆𑀬𑀜𑁆𑀚𑀦𑀸𑀦𑀁. 𑀦𑀺𑀲𑀦𑁆𑀢𑀺𑀬𑀸𑀢𑀺 𑀦𑀺𑀲𑀸𑀫𑀦𑀢𑁆𑀣𑀁 𑀥𑀸𑀭𑀡𑀢𑁆𑀣𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁮𑁧. 𑀢𑀸𑀤𑀺𑀲𑀦𑁆𑀢𑀺 𑀢𑀼𑀫𑁆𑀳𑀸𑀤𑀺𑀲𑀁. 𑀅𑀢𑁆𑀣𑀼𑀧𑁂𑀢𑀦𑁆𑀢𑀺 𑀅𑀢𑁆𑀣𑁂𑀦 𑀉𑀧𑁂𑀢𑀁 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀢𑀸𑀭𑀁. 𑀩𑁆𑀬𑀜𑁆𑀚𑀦𑀼𑀧𑁂𑀢𑀦𑁆𑀢𑀺 𑀩𑁆𑀬𑀜𑁆𑀚𑀦𑁂𑀳𑀺 𑀉𑀧𑁂𑀢𑀁 𑀩𑁆𑀬𑀜𑁆𑀚𑀦𑀸𑀦𑀁 𑀯𑀺𑀜𑁆𑀜𑀸𑀢𑀸𑀭𑀁. 𑀏𑀯𑀁 𑀏𑀢𑀁 𑀪𑀺𑀓𑁆𑀔𑀼𑀁 ¶ 𑀧𑀲𑀁𑀲𑀣. 𑀏𑀲𑁄 𑀳𑀺 𑀪𑀺𑀓𑁆𑀔𑀼 𑀦 𑀢𑀼𑀫𑁆𑀳𑀸𑀓𑀁 𑀲𑀸𑀯𑀓𑁄 𑀦𑀸𑀫, 𑀩𑀼𑀤𑁆𑀥𑁄 𑀦𑀸𑀫 𑀏𑀲 𑀘𑀼𑀦𑁆𑀤𑀸𑀢𑀺. 𑀇𑀢𑀺 𑀪𑀕𑀯𑀸 𑀩𑀳𑀼𑀲𑁆𑀲𑀼𑀢𑀁 𑀪𑀺𑀓𑁆𑀔𑀼𑀁 𑀅𑀢𑁆𑀢𑀦𑁄 𑀞𑀸𑀦𑁂 𑀞𑀧𑁂𑀲𑀺.

𑀧𑀘𑁆𑀘𑀬𑀸𑀦𑀼𑀜𑁆𑀜𑀸𑀢𑀓𑀸𑀭𑀡𑀸𑀤𑀺𑀯𑀡𑁆𑀡𑀦𑀸

𑁧𑁮𑁨. 𑀇𑀤𑀸𑀦𑀺 𑀢𑀢𑁄𑀧𑀺 𑀉𑀢𑁆𑀢𑀭𑀺𑀢𑀭𑀁 𑀤𑁂𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀦 𑀯𑁄 𑀅𑀳𑀁, 𑀘𑀼𑀦𑁆𑀤𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑀺𑀓𑀸 𑀆𑀲𑀯𑀸 𑀦𑀸𑀫 𑀇𑀥𑀮𑁄𑀓𑁂 𑀧𑀘𑁆𑀘𑀬𑀳𑁂𑀢𑀼 𑀉𑀧𑁆𑀧𑀚𑁆𑀚𑀦𑀓𑀸 𑀆𑀲𑀯𑀸. 𑀲𑀫𑁆𑀧𑀭𑀸𑀬𑀺𑀓𑀸 𑀆𑀲𑀯𑀸 𑀦𑀸𑀫 𑀧𑀭𑀮𑁄𑀓𑁂 𑀪𑀡𑁆𑀟𑀦𑀳𑁂𑀢𑀼 𑀉𑀧𑁆𑀧𑀚𑁆𑀚𑀦𑀓𑀸 𑀆𑀲𑀯𑀸. 𑀲𑀁𑀯𑀭𑀸𑀬𑀸𑀢𑀺 𑀬𑀣𑀸 𑀢𑁂 𑀦 𑀧𑀯𑀺𑀲𑀦𑁆𑀢𑀺, 𑀏𑀯𑀁 𑀧𑀺𑀤𑀳𑀦𑀸𑀬. 𑀧𑀝𑀺𑀖𑀸𑀢𑀸𑀬𑀸𑀢𑀺 𑀫𑀽𑀮𑀖𑀸𑀢𑁂𑀦 𑀧𑀝𑀺𑀳𑀦𑀦𑀸𑀬. 𑀅𑀮𑀁 𑀯𑁄 𑀢𑀁 𑀬𑀸𑀯𑀤𑁂𑀯 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬𑀸𑀢𑀺 𑀢𑀁 𑀢𑀼𑀫𑁆𑀳𑀸𑀓𑀁 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬 𑀲𑀫𑀢𑁆𑀣𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺, 𑀬𑀁 𑀯𑁄 𑀫𑀬𑀸 𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢𑀁, 𑀢𑀁 𑀧𑀸𑀭𑀼𑀧𑀺𑀢𑁆𑀯𑀸 𑀤𑀧𑁆𑀧𑀁 𑀯𑀸 𑀫𑀸𑀦𑀁 𑀯𑀸 𑀓𑀼𑀭𑀼𑀫𑀸𑀦𑀸 𑀯𑀺𑀳𑀭𑀺𑀲𑁆𑀲𑀣𑀸𑀢𑀺 𑀦 𑀅𑀦𑀼𑀜𑁆𑀜𑀸𑀢𑀁, 𑀢𑀁 𑀧𑀦 𑀧𑀸𑀭𑀼𑀧𑀺𑀢𑁆𑀯𑀸 𑀲𑀻𑀢𑀧𑁆𑀧𑀝𑀺𑀖𑀸𑀢𑀸𑀤𑀻𑀦𑀺 𑀓𑀢𑁆𑀯𑀸 𑀲𑀼𑀔𑀁 𑀲𑀫𑀡𑀥𑀫𑁆𑀫𑀁 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀁 𑀓𑀭𑀺𑀲𑁆𑀲𑀣𑀸𑀢𑀺 𑀅𑀦𑀼𑀜𑁆𑀜𑀸𑀢𑀁. 𑀬𑀣𑀸 𑀘 𑀘𑀻𑀯𑀭𑀁, 𑀏𑀯𑀁 𑀧𑀺𑀡𑁆𑀟𑀧𑀸𑀢𑀸𑀤𑀬𑁄𑀧𑀺. 𑀅𑀦𑀼𑀧𑀤𑀲𑀁𑀯𑀡𑁆𑀡𑀦𑀸 𑀧𑀦𑁂𑀢𑁆𑀣 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀸𑀤𑀺𑀯𑀡𑁆𑀡𑀦𑀸

𑁧𑁮𑁩. 𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀦𑁆𑀢𑀺 𑀲𑀼𑀔𑀮𑁆𑀮𑀺𑀬𑀦𑀸𑀦𑀼𑀬𑁄𑀕𑀁, 𑀲𑀼𑀔𑀲𑁂𑀯𑀦𑀸𑀥𑀺𑀫𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀔𑁂𑀢𑀻𑀢𑀺 𑀲𑀼𑀔𑀺𑀢𑀁 𑀓𑀭𑁄𑀢𑀺. 𑀧𑀻𑀡𑁂𑀢𑀻𑀢𑀺 𑀧𑀻𑀡𑀺𑀢𑀁 𑀣𑀽𑀮𑀁 𑀓𑀭𑁄𑀢𑀺.

𑁧𑁮𑁬. 𑀅𑀝𑁆𑀞𑀺𑀢𑀥𑀫𑁆𑀫𑀸𑀢𑀺 ¶ 𑀦𑀝𑁆𑀞𑀺𑀢𑀲𑀪𑀸𑀯𑀸. 𑀚𑀺𑀯𑁆𑀳𑀸 𑀦𑁄 𑀅𑀢𑁆𑀣𑀻𑀢𑀺 𑀬𑀁 𑀬𑀁 𑀇𑀘𑁆𑀙𑀦𑁆𑀢𑀺, 𑀢𑀁 𑀢𑀁 𑀓𑀣𑁂𑀦𑁆𑀢𑀺, 𑀓𑀤𑀸𑀘𑀺 𑀫𑀕𑁆𑀕𑀁 𑀓𑀣𑁂𑀦𑁆𑀢𑀺, 𑀓𑀤𑀸𑀘𑀺 𑀨𑀮𑀁 𑀓𑀤𑀸𑀘𑀺 𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀚𑀸𑀦𑀢𑀸𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀚𑀸𑀦𑀦𑁆𑀢𑁂𑀦. 𑀧𑀲𑁆𑀲𑀢𑀸𑀢𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀧𑀲𑁆𑀲𑀦𑁆𑀢𑁂𑀦. 𑀕𑀫𑁆𑀪𑀻𑀭𑀦𑁂𑀫𑁄𑀢𑀺 ¶ 𑀕𑀫𑁆𑀪𑀻𑀭𑀪𑀽𑀫𑀺𑀁 𑀅𑀦𑀼𑀧𑀯𑀺𑀝𑁆𑀞𑁄. 𑀲𑀼𑀦𑀺𑀔𑀸𑀢𑁄𑀢𑀺 𑀲𑀼𑀝𑁆𑀞𑀼 𑀦𑀺𑀔𑀸𑀢𑁄. 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄𑀢𑀺 𑀏𑀯𑀁 𑀔𑀻𑀡𑀸𑀲𑀯𑁄 𑀅𑀪𑀩𑁆𑀩𑁄 𑀦𑀯 𑀞𑀸𑀦𑀸𑀦𑀺 𑀅𑀚𑁆𑀛𑀸𑀘𑀭𑀺𑀢𑀼𑀁. 𑀢𑀲𑁆𑀫𑀺𑀁 𑀅𑀦𑀚𑁆𑀛𑀸𑀘𑀸𑀭𑁄 𑀅𑀘𑀮𑁄 𑀅𑀲𑀫𑁆𑀧𑀯𑁂𑀥𑀻. 𑀢𑀢𑁆𑀣 𑀲𑀜𑁆𑀘𑀺𑀘𑁆𑀘 𑀧𑀸𑀡𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑀸𑀤𑀻𑀲𑀼 𑀲𑁄𑀢𑀸𑀧𑀦𑁆𑀦𑀸𑀤𑀬𑁄𑀧𑀺 𑀅𑀪𑀩𑁆𑀩𑀸. 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑁂 𑀘 𑀓𑀺𑀮𑁂𑀲𑀓𑀸𑀫𑁂 ¶ 𑀘 𑀲𑀦𑁆𑀦𑀺𑀥𑀺𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁. 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑁂 𑀅𑀕𑀸𑀭𑀺𑀓𑀪𑀽𑀢𑁄𑀢𑀺 𑀬𑀣𑀸 𑀧𑀼𑀩𑁆𑀩𑁂 𑀕𑀺𑀳𑀺𑀪𑀽𑀢𑁄 𑀧𑀭𑀺𑀪𑀼𑀜𑁆𑀚𑀢𑀺, 𑀏𑀯𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀪𑀩𑁆𑀩𑁄.

𑀧𑀜𑁆𑀳𑀩𑁆𑀬𑀸𑀓𑀭𑀡𑀯𑀡𑁆𑀡𑀦𑀸

𑁧𑁮𑁭. 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑀸 𑀳𑀺 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀬𑀸𑀯𑀚𑀻𑀯𑀁 𑀕𑀺𑀳𑀺𑀩𑁆𑀬𑀜𑁆𑀚𑀦𑁂𑀦 𑀢𑀺𑀝𑁆𑀞𑀦𑁆𑀢𑀺. 𑀔𑀻𑀡𑀸𑀲𑀯𑁄 𑀧𑀦 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸𑀯 𑀫𑀦𑀼𑀲𑁆𑀲𑀪𑀽𑀢𑁄 𑀧𑀭𑀺𑀦𑀺𑀩𑁆𑀩𑀸𑀢𑀺 𑀯𑀸 𑀧𑀩𑁆𑀩𑀚𑀢𑀺 𑀯𑀸. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀻𑀲𑀼 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼 𑀫𑀼𑀳𑀼𑀢𑁆𑀢𑀫𑁆𑀧𑀺 𑀦 𑀢𑀺𑀝𑁆𑀞𑀢𑀺. 𑀓𑀲𑁆𑀫𑀸? 𑀯𑀺𑀯𑁂𑀓𑀝𑁆𑀞𑀸𑀦𑀲𑁆𑀲 𑀅𑀪𑀸𑀯𑀸. 𑀪𑀼𑀫𑁆𑀫𑀤𑁂𑀯𑀢𑁆𑀢𑀪𑀸𑀯𑁂 𑀧𑀦 𑀞𑀺𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸𑀧𑀺 𑀢𑀺𑀝𑁆𑀞𑀢𑀺. 𑀢𑀲𑁆𑀲 𑀯𑀲𑁂𑀦 𑀅𑀬𑀁 𑀧𑀜𑁆𑀳𑁄 𑀆𑀕𑀢𑁄. 𑀪𑀺𑀦𑁆𑀦𑀤𑁄𑀲𑀢𑁆𑀢𑀸 𑀧𑀦𑀲𑁆𑀲 𑀪𑀺𑀓𑁆𑀔𑀼𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑀻𑀭𑀓𑀦𑁆𑀢𑀺 𑀅𑀢𑀻𑀭𑀁 𑀅𑀧𑀭𑀺𑀘𑁆𑀙𑁂𑀤𑀁 𑀫𑀳𑀦𑁆𑀢𑀁. 𑀦𑁄 𑀘 𑀔𑁄 𑀅𑀦𑀸𑀕𑀢𑀦𑁆𑀢𑀺 𑀅𑀦𑀸𑀕𑀢𑀁 𑀧𑀦 𑀅𑀤𑁆𑀥𑀸𑀦𑀁 𑀆𑀭𑀩𑁆𑀪 𑀏𑀯𑀁 𑀦 𑀧𑀜𑁆𑀜𑀧𑁂𑀢𑀺, 𑀅𑀢𑀻𑀢𑀫𑁂𑀯 𑀫𑀜𑁆𑀜𑁂 𑀲𑀫𑀡𑁄 𑀕𑁄𑀢𑀫𑁄 𑀚𑀸𑀦𑀸𑀢𑀺, 𑀦 𑀅𑀦𑀸𑀕𑀢𑀁. 𑀢𑀣𑀸 𑀳𑀺𑀲𑁆𑀲 𑀅𑀢𑀻𑀢𑁂 𑀅𑀟𑁆𑀠𑀙𑀝𑁆𑀞𑀲𑀢𑀚𑀸𑀢𑀓𑀸𑀦𑀼𑀲𑁆𑀲𑀭𑀡𑀁 𑀧𑀜𑁆𑀜𑀸𑀬𑀢𑀺. 𑀅𑀦𑀸𑀕𑀢𑁂 𑀏𑀯𑀁 𑀩𑀳𑀼𑀁 𑀅𑀦𑀼𑀲𑁆𑀲𑀭𑀡𑀁 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀇𑀫𑀫𑀢𑁆𑀣𑀁 𑀫𑀜𑁆𑀜𑀫𑀸𑀦𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁. 𑀢𑀬𑀺𑀤𑀁 𑀓𑀺𑀁 𑀲𑀽𑀢𑀺 𑀅𑀦𑀸𑀕𑀢𑁂 𑀅𑀧𑀜𑁆𑀜𑀸𑀧𑀦𑀁 𑀓𑀺𑀁 𑀦𑀼 𑀔𑁄? 𑀓𑀣𑀁𑀲𑀽𑀢𑀺 𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀅𑀚𑀸𑀦𑀦𑁆𑀢𑁄𑀬𑁂𑀯 𑀦𑀼 𑀔𑁄 𑀅𑀦𑀸𑀕𑀢𑀁 𑀦𑀸𑀦𑀼𑀲𑁆𑀲𑀭𑀢𑀺, 𑀅𑀦𑀦𑀼𑀲𑁆𑀲𑀭𑀺𑀢𑀼𑀓𑀸𑀫𑀢𑀸𑀬 𑀦𑀸𑀦𑀼𑀲𑁆𑀲𑀭𑀢𑀻𑀢𑀺. 𑀅𑀜𑁆𑀜𑀯𑀺𑀳𑀺𑀢𑀓𑁂𑀦 𑀜𑀸𑀡𑀤𑀲𑁆𑀲𑀦𑁂𑀦𑀸𑀢𑀺 𑀧𑀘𑁆𑀘𑀓𑁆𑀔𑀁 𑀯𑀺𑀬 𑀓𑀢𑁆𑀯𑀸 𑀤𑀲𑁆𑀲𑀦𑀲𑀫𑀢𑁆𑀣𑀢𑀸𑀬 𑀤𑀲𑁆𑀲𑀦𑀪𑀽𑀢𑁂𑀦 𑀜𑀸𑀡𑁂𑀦 𑀅𑀜𑁆𑀜𑀢𑁆𑀣𑀯𑀺𑀳𑀺𑀢𑀓𑁂𑀦 𑀜𑀸𑀡𑁂𑀦 𑀅𑀜𑁆𑀜𑀁 𑀆𑀭𑀩𑁆𑀪 𑀧𑀯𑀢𑁆𑀢𑁂𑀦, 𑀅𑀜𑁆𑀜𑀯𑀺𑀳𑀺𑀢𑀓𑀁 𑀅𑀜𑁆𑀜𑀁 𑀆𑀭𑀩𑁆𑀪 𑀧𑀯𑀢𑁆𑀢𑀫𑀸𑀦𑀁 𑀜𑀸𑀡𑀤𑀲𑁆𑀲𑀦𑀁 𑀲𑀗𑁆𑀕𑀸𑀳𑁂𑀢𑀩𑁆𑀩𑀁 𑀧𑀜𑁆𑀜𑀸𑀧𑁂𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺. 𑀢𑁂 𑀳𑀺 𑀘𑀭𑀢𑁄 𑀘 𑀢𑀺𑀝𑁆𑀞𑀢𑁄 𑀘 𑀲𑀼𑀢𑁆𑀢𑀲𑁆𑀲 𑀘 𑀚𑀸𑀕𑀭𑀲𑁆𑀲 𑀘 𑀲𑀢𑀢𑀁 𑀲𑀫𑀺𑀢𑀁 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀫𑀜𑁆𑀜𑀦𑁆𑀢𑀺, 𑀢𑀸𑀤𑀺𑀲𑀜𑁆𑀘 𑀜𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀬𑀣𑀭𑀺𑀯 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸, 𑀏𑀯𑀁 𑀫𑀜𑁆𑀜𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀢𑀸𑀦𑀼𑀲𑀸𑀭𑀻𑀢𑀺 ¶ 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀲𑀫𑁆𑀧𑀬𑀼𑀢𑁆𑀢𑀓𑀁. 𑀬𑀸𑀯𑀢𑀓𑀁 𑀆𑀓𑀗𑁆𑀔𑀢𑀻𑀢𑀺 𑀬𑀢𑁆𑀢𑀓𑀁 𑀜𑀸𑀢𑀼𑀁 𑀇𑀘𑁆𑀙𑀢𑀺, 𑀢𑀢𑁆𑀢𑀓𑀁 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀜𑀸𑀡𑀁 𑀧𑁂𑀲𑁂𑀲𑀺. 𑀅𑀣𑀲𑁆𑀲 𑀤𑀼𑀩𑁆𑀩𑀮𑀧𑀢𑁆𑀢𑀧𑀼𑀝𑁂 𑀧𑀓𑁆𑀔𑀦𑁆𑀤𑀦𑀸𑀭𑀸𑀘𑁄 𑀯𑀺𑀬 𑀅𑀧𑁆𑀧𑀝𑀺𑀳𑀢𑀁 ¶ 𑀅𑀦𑀺𑀯𑀸𑀭𑀺𑀢𑀁 𑀜𑀸𑀡𑀁 𑀕𑀘𑁆𑀙𑀢𑀺, 𑀢𑁂𑀦 𑀬𑀸𑀯𑀢𑀓𑀁 𑀆𑀓𑀗𑁆𑀔𑀢𑀺 𑀢𑀸𑀯𑀢𑀓𑀁 𑀅𑀦𑀼𑀲𑁆𑀲𑀭𑀢𑀺. 𑀩𑁄𑀥𑀺𑀚𑀦𑁆𑀢𑀺 𑀩𑁄𑀥𑀺𑀫𑀽𑀮𑁂 𑀚𑀸𑀢𑀁. 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀘𑀢𑀼𑀫𑀕𑁆𑀕𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀻𑀢𑀺 ¶ 𑀢𑁂𑀦 𑀜𑀸𑀡𑁂𑀦 𑀚𑀸𑀢𑀺𑀫𑀽𑀮𑀲𑁆𑀲 𑀧𑀳𑀻𑀦𑀢𑁆𑀢𑀸 𑀧𑀼𑀦 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺. 𑀦𑀢𑁆𑀣𑀺𑀤𑀸𑀦𑀺 𑀧𑀼𑀦𑀩𑁆𑀪𑀯𑁄𑀢𑀺 𑀅𑀧𑀭𑀫𑁆𑀧𑀺 𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀦𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀦 𑀇𑀥𑀮𑁄𑀓𑀢𑁆𑀣𑀁 𑀯𑀸 𑀧𑀭𑀮𑁄𑀓𑀢𑁆𑀣𑀁 𑀯𑀸 𑀦𑀺𑀲𑁆𑀲𑀺𑀢𑀁. 𑀦 𑀢𑀁 𑀢𑀣𑀸𑀕𑀢𑁄 𑀩𑁆𑀬𑀸𑀓𑀭𑁄𑀢𑀻𑀢𑀺 𑀢𑀁 𑀪𑀸𑀭𑀢𑀬𑀼𑀤𑁆𑀥𑀲𑀻𑀢𑀸𑀳𑀭𑀡𑀲𑀤𑀺𑀲𑀁 𑀅𑀦𑀺𑀬𑁆𑀬𑀸𑀦𑀺𑀓𑀓𑀣𑀁 𑀢𑀣𑀸𑀕𑀢𑁄 𑀦 𑀓𑀣𑁂𑀢𑀺. 𑀪𑀽𑀢𑀁 𑀢𑀘𑁆𑀙𑀁 𑀅𑀦𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀭𑀸𑀚𑀓𑀣𑀸𑀤𑀺𑀢𑀺𑀭𑀘𑁆𑀙𑀸𑀦𑀓𑀣𑀁. 𑀓𑀸𑀮𑀜𑁆𑀜𑀽 𑀢𑀣𑀸𑀕𑀢𑁄 𑀳𑁄𑀢𑀻𑀢𑀺 𑀓𑀸𑀮𑀁 𑀚𑀸𑀦𑀸𑀢𑀺. 𑀲𑀳𑁂𑀢𑀼𑀓𑀁 𑀲𑀓𑀸𑀭𑀡𑀁 𑀓𑀢𑁆𑀯𑀸 𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑁂𑀬𑁂𑀯 𑀓𑀣𑁂𑀢𑀺.

𑁧𑁮𑁮. 𑀢𑀲𑁆𑀫𑀸 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑀣𑀸 𑀬𑀣𑀸 𑀕𑀤𑀺𑀢𑀩𑁆𑀩𑀁, 𑀢𑀣𑀸 𑀢𑀣𑁂𑀯 𑀕𑀤𑀦𑀢𑁄 𑀤𑀓𑀸𑀭𑀲𑁆𑀲 𑀢𑀓𑀸𑀭𑀁 𑀓𑀢𑁆𑀯𑀸 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀦𑁆𑀢𑀺 𑀭𑀽𑀧𑀸𑀬𑀢𑀦𑀁. 𑀲𑀼𑀢𑀦𑁆𑀢𑀺 𑀲𑀤𑁆𑀤𑀸𑀬𑀢𑀦𑀁. 𑀫𑀼𑀢𑀦𑁆𑀢𑀺 𑀫𑀼𑀢𑁆𑀯𑀸 𑀧𑀢𑁆𑀯𑀸 𑀕𑀳𑁂𑀢𑀩𑁆𑀩𑀢𑁄 𑀕𑀦𑁆𑀥𑀸𑀬𑀢𑀦𑀁 𑀭𑀲𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁. 𑀯𑀺𑀜𑁆𑀜𑀸𑀢𑀦𑁆𑀢𑀺 𑀲𑀼𑀔𑀤𑀼𑀓𑁆𑀔𑀸𑀤𑀺𑀥𑀫𑁆𑀫𑀸𑀬𑀢𑀦𑀁. 𑀧𑀢𑁆𑀢𑀦𑁆𑀢𑀺 𑀧𑀭𑀺𑀬𑁂𑀲𑀺𑀢𑁆𑀯𑀸 𑀯𑀸 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀯𑀸 𑀧𑀢𑁆𑀢𑀁. 𑀧𑀭𑀺𑀬𑁂𑀲𑀺𑀢𑀦𑁆𑀢𑀺 𑀧𑀢𑁆𑀢𑀁 𑀯𑀸 𑀅𑀧𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀢𑀁. 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸𑀢𑀺 𑀘𑀺𑀢𑁆𑀢𑁂𑀦 𑀅𑀦𑀼𑀲𑀜𑁆𑀘𑀭𑀺𑀢𑀁. ‘‘𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺 𑀇𑀫𑀺𑀦𑀸 𑀏𑀢𑀁 𑀤𑀲𑁆𑀲𑁂𑀢𑀺, 𑀬𑀜𑁆𑀳𑀺 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀇𑀫𑀲𑁆𑀲 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀦𑀻𑀮𑀁 𑀧𑀻𑀢𑀓𑀦𑁆𑀢𑀺𑀆𑀤𑀺 𑀭𑀽𑀧𑀸𑀭𑀫𑁆𑀫𑀡𑀁 𑀘𑀓𑁆𑀔𑀼𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀢𑀺, ‘‘𑀅𑀬𑀁 𑀲𑀢𑁆𑀢𑁄 𑀇𑀫𑀲𑁆𑀫𑀺𑀁 𑀔𑀡𑁂 𑀇𑀫𑀁 𑀦𑀸𑀫 𑀭𑀽𑀧𑀸𑀭𑀫𑁆𑀫𑀡𑀁 𑀤𑀺𑀲𑁆𑀯𑀸 𑀲𑀼𑀫𑀦𑁄 𑀯𑀸 𑀤𑀼𑀫𑁆𑀫𑀦𑁄 𑀯𑀸 𑀫𑀚𑁆𑀛𑀢𑁆𑀢𑁄 𑀯𑀸 𑀚𑀸𑀢𑁄’’𑀢𑀺 𑀲𑀩𑁆𑀩𑀁 𑀢𑀁 𑀢𑀣𑀸𑀕𑀢𑀲𑁆𑀲 𑀏𑀯𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀁 ¶ . 𑀢𑀣𑀸 𑀬𑀁 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀇𑀫𑀲𑁆𑀲 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀪𑁂𑀭𑀺𑀲𑀤𑁆𑀤𑁄 𑀫𑀼𑀤𑀺𑀗𑁆𑀕𑀲𑀤𑁆𑀤𑁄𑀢𑀺𑀆𑀤𑀺 𑀲𑀤𑁆𑀤𑀸𑀭𑀫𑁆𑀫𑀡𑀁 𑀲𑁄𑀢𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀢𑀺. 𑀫𑀽𑀮𑀕𑀦𑁆𑀥𑁄 𑀢𑀘𑀕𑀦𑁆𑀥𑁄𑀢𑀺𑀆𑀤𑀺 𑀕𑀦𑁆𑀥𑀸𑀭𑀫𑁆𑀫𑀡𑀁 𑀖𑀸𑀦𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀢𑀺. 𑀫𑀽𑀮𑀭𑀲𑁄 𑀔𑀦𑁆𑀥𑀭𑀲𑁄𑀢𑀺𑀆𑀤𑀺 𑀭𑀲𑀸𑀭𑀫𑁆𑀫𑀡𑀁 𑀚𑀺𑀯𑁆𑀳𑀸𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀢𑀺. 𑀓𑀓𑁆𑀔𑀴𑀁 𑀫𑀼𑀤𑀼𑀓𑀦𑁆𑀢𑀺𑀆𑀤𑀺 𑀧𑀣𑀯𑀻𑀥𑀸𑀢𑀼𑀢𑁂𑀚𑁄𑀥𑀸𑀢𑀼𑀯𑀸𑀬𑁄𑀥𑀸𑀢𑀼𑀪𑁂𑀤𑀁 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀓𑀸𑀬𑀤𑁆𑀯𑀸𑀭𑁂 𑀆𑀧𑀸𑀣𑀫𑀸𑀕𑀘𑁆𑀙𑀢𑀺. ‘‘𑀅𑀬𑀁 𑀲𑀢𑁆𑀢𑁄 𑀇𑀫𑀲𑁆𑀫𑀺𑀁 𑀔𑀡𑁂 𑀇𑀫𑀁 𑀦𑀸𑀫 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀨𑀼𑀲𑀺𑀢𑁆𑀯𑀸 𑀲𑀼𑀫𑀦𑁄 𑀯𑀸 𑀤𑀼𑀫𑁆𑀫𑀦𑁄 𑀯𑀸 𑀫𑀚𑁆𑀛𑀢𑁆𑀢𑁄 𑀯𑀸 𑀚𑀸𑀢𑁄’’𑀢𑀺 𑀲𑀩𑁆𑀩𑀁 𑀢𑀁 𑀢𑀣𑀸𑀕𑀢𑀲𑁆𑀲 𑀏𑀯𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀁. 𑀢𑀣𑀸 𑀬𑀁 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀇𑀫𑀲𑁆𑀲 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀼𑀔𑀤𑀼𑀓𑁆𑀔𑀸𑀤𑀺𑀪𑁂𑀤𑀁 𑀥𑀫𑁆𑀫𑀸𑀭𑀫𑁆𑀫𑀡𑀁 𑀫𑀦𑁄𑀤𑁆𑀯𑀸𑀭𑀲𑁆𑀲 𑀆𑀧𑀸𑀣𑀫𑀸𑀕𑀘𑁆𑀙𑀢𑀺, ‘‘𑀅𑀬𑀁 𑀲𑀢𑁆𑀢𑁄 𑀇𑀫𑀲𑁆𑀫𑀺𑀁 𑀔𑀡𑁂 𑀇𑀤𑀁 𑀦𑀸𑀫 𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀺𑀚𑀸𑀦𑀺𑀢𑁆𑀯𑀸 𑀲𑀼𑀫𑀦𑁄 𑀯𑀸 𑀤𑀼𑀫𑁆𑀫𑀦𑁄 𑀯𑀸 𑀫𑀚𑁆𑀛𑀢𑁆𑀢𑁄 𑀯𑀸 𑀚𑀸𑀢𑁄’’𑀢𑀺 𑀲𑀩𑁆𑀩𑀁 𑀢𑀁 𑀢𑀣𑀸𑀕𑀢𑀲𑁆𑀲 𑀏𑀯𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀁.

𑀬𑀜𑁆𑀳𑀺 ¶ , 𑀘𑀼𑀦𑁆𑀤, 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀢𑀢𑁆𑀣 𑀢𑀣𑀸𑀕𑀢𑁂𑀦 𑀅𑀤𑀺𑀝𑁆𑀞𑀁 𑀯𑀸 𑀅𑀲𑀼𑀢𑀁 𑀯𑀸 𑀅𑀫𑀼𑀢𑀁 𑀯𑀸 𑀅𑀯𑀺𑀜𑁆𑀜𑀸𑀢𑀁 𑀯𑀸 𑀦𑀢𑁆𑀣𑀺. 𑀇𑀫𑀲𑁆𑀲 𑀫𑀳𑀸𑀚𑀦𑀲𑁆𑀲 𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀫𑁆𑀧𑀺 𑀅𑀢𑁆𑀣𑀺, 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀧𑁆𑀧𑀢𑁆𑀢𑀫𑁆𑀧𑀺 𑀅𑀢𑁆𑀣𑀺. 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀫𑁆𑀧𑀺 𑀅𑀢𑁆𑀣𑀺, 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀧𑁆𑀧𑀢𑁆𑀢𑀫𑁆𑀧𑀺 ¶ 𑀅𑀢𑁆𑀣𑀺. 𑀲𑀩𑁆𑀩𑀫𑁆𑀧𑀺 𑀢𑀁 𑀢𑀣𑀸𑀕𑀢𑀲𑁆𑀲 𑀅𑀧𑁆𑀧𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺, 𑀜𑀸𑀡𑁂𑀦 𑀅𑀲𑀘𑁆𑀙𑀺𑀓𑀢𑀁 𑀦𑀸𑀫. ‘‘𑀢𑀲𑁆𑀫𑀸 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀬𑀁 𑀬𑀣𑀸 𑀮𑁄𑀓𑁂𑀦 𑀕𑀢𑀁 𑀢𑀲𑁆𑀲 𑀢𑀣𑁂𑀯 𑀕𑀢𑀢𑁆𑀢𑀸 ‘‘𑀢𑀣𑀸𑀕𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀸𑀴𑀺𑀬𑀁 𑀧𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀕𑀢𑀲𑀤𑁆𑀤𑁂𑀦 𑀏𑀓𑀢𑁆𑀣𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 ‘‘𑀢𑀣𑀸𑀕𑀢𑁄’’𑀢𑀺 𑀦𑀺𑀕𑀫𑀦𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀢𑀲𑁆𑀲 𑀬𑀼𑀢𑁆𑀢𑀺 𑀩𑁆𑀭𑀳𑁆𑀫𑀚𑀸𑀮𑁂 𑀢𑀣𑀸𑀕𑀢𑀲𑀤𑁆𑀤𑀯𑀺𑀢𑁆𑀣𑀸𑀭𑁂 𑀯𑀼𑀢𑁆𑀢𑀸𑀬𑁂𑀯.

𑀅𑀩𑁆𑀬𑀸𑀓𑀢𑀝𑁆𑀞𑀸𑀦𑀯𑀡𑁆𑀡𑀦𑀸

𑁧𑁮𑁯. 𑀏𑀯𑀁 𑀅𑀢𑁆𑀢𑀦𑁄 𑀅𑀲𑀫𑀢𑀁 𑀅𑀦𑀼𑀢𑁆𑀢𑀭𑀢𑀁 𑀲𑀩𑁆𑀩𑀜𑁆𑀜𑀼𑀢𑀁 𑀥𑀫𑁆𑀫𑀭𑀸𑀚𑀪𑀸𑀯𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀮𑀤𑁆𑀥𑀻𑀲𑀼 𑀫𑀬𑀸 𑀅𑀜𑁆𑀜𑀸𑀢𑀁 𑀅𑀤𑀺𑀝𑁆𑀞𑀁 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑀁 𑀫𑀫 𑀜𑀸𑀡𑀲𑁆𑀲 𑀅𑀦𑁆𑀢𑁄𑀬𑁂𑀯 𑀧𑀭𑀺𑀯𑀢𑁆𑀢𑀢𑀻’’𑀢𑀺 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀘𑀼𑀦𑁆𑀤, 𑀯𑀺𑀚𑁆𑀚𑀢𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀣𑀸𑀕𑀢𑁄𑀢𑀺 𑀲𑀢𑁆𑀢𑁄. 𑀦 𑀳𑁂𑀢𑀁, 𑀆𑀯𑀼𑀲𑁄, 𑀅𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀇𑀥𑀮𑁄𑀓𑀧𑀭𑀮𑁄𑀓𑀅𑀢𑁆𑀣𑀲𑀁𑀳𑀺𑀢𑀁 𑀦 𑀳𑁄𑀢𑀺. 𑀦 𑀘 𑀥𑀫𑁆𑀫𑀲𑀁𑀳𑀺𑀢𑀦𑁆𑀢𑀺 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀲𑁆𑀲𑀺𑀢𑀁 𑀦 𑀳𑁄𑀢𑀺. 𑀦 ¶ 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀦𑁆𑀢𑀺 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀲𑁆𑀲 𑀲𑀓𑀮𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺𑀪𑀽𑀢𑀁 𑀦 𑀳𑁄𑀢𑀺.

𑁧𑁯𑁦. 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀔𑁄𑀢𑀺𑀆𑀤𑀻𑀲𑀼 𑀢𑀡𑁆𑀳𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀢𑁂𑀪𑀼𑀫𑁆𑀫𑀓𑀸 𑀥𑀫𑁆𑀫𑀸 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀩𑁆𑀬𑀸𑀓𑀢𑀁. 𑀢𑀲𑁆𑀲𑁂𑀯 𑀤𑀼𑀓𑁆𑀔𑀲𑁆𑀲 𑀧𑀪𑀸𑀯𑀺𑀓𑀸 𑀚𑀦𑀺𑀓𑀸 𑀢𑀡𑁆𑀳𑀸 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀩𑁆𑀬𑀸𑀓𑀢𑀁. 𑀉𑀪𑀺𑀦𑁆𑀦𑀁 𑀅𑀧𑁆𑀧𑀯𑀢𑁆𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀩𑁆𑀬𑀸𑀓𑀢𑀁. 𑀤𑀼𑀓𑁆𑀔𑀧𑀭𑀺𑀚𑀸𑀦𑀦𑁄 𑀲𑀫𑀼𑀤𑀬𑀧𑀚𑀳𑀦𑁄 𑀦𑀺𑀭𑁄𑀥𑀲𑀘𑁆𑀙𑀺𑀓𑀭𑀡𑁄 𑀅𑀭𑀺𑀬𑀫𑀕𑁆𑀕𑁄 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀩𑁆𑀬𑀸𑀓𑀢𑀁. ‘‘𑀏𑀢𑀜𑁆𑀳𑀺, 𑀆𑀯𑀼𑀲𑁄, 𑀅𑀢𑁆𑀣𑀲𑀁𑀳𑀺𑀢’’𑀦𑁆𑀢𑀺𑀆𑀤𑀻𑀲𑀼 𑀏𑀢𑀁 𑀇𑀥𑀮𑁄𑀓𑀧𑀭𑀮𑁄𑀓𑀅𑀢𑁆𑀣𑀦𑀺𑀲𑁆𑀲𑀺𑀢𑀁 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀲𑁆𑀲𑀺𑀢𑀁 𑀲𑀓𑀮𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺 𑀧𑀥𑀸𑀦𑀁 𑀧𑀼𑀩𑁆𑀩𑀗𑁆𑀕𑀫𑀦𑁆𑀢𑀺 𑀅𑀬𑀫𑀢𑁆𑀣𑁄.

𑀧𑀼𑀩𑁆𑀩𑀦𑁆𑀢𑀲𑀳𑀕𑀢𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀯𑀡𑁆𑀡𑀦𑀸

𑁧𑁯𑁧. 𑀇𑀤𑀸𑀦𑀺 𑀬𑀁 𑀢𑀁 𑀫𑀬𑀸 𑀦 𑀩𑁆𑀬𑀸𑀓𑀢𑀁, 𑀢𑀁 𑀅𑀚𑀸𑀦𑀦𑁆𑀢𑁂𑀦 𑀦 𑀩𑁆𑀬𑀸𑀓𑀢𑀦𑁆𑀢𑀺 𑀫𑀸 𑀏𑀯𑀁 𑀲𑀜𑁆𑀜𑀫𑀓𑀁𑀲𑀼. 𑀚𑀸𑀦𑀦𑁆𑀢𑁄𑀯 𑀅𑀳𑀁 𑀏𑀯𑀁 ‘‘𑀏𑀢𑀲𑁆𑀫𑀺𑀁 𑀩𑁆𑀬𑀸𑀓𑀢𑁂𑀧𑀺 𑀅𑀢𑁆𑀣𑁄 𑀦𑀢𑁆𑀣𑀻’’𑀢𑀺 ¶ 𑀦 𑀩𑁆𑀬𑀸𑀓𑀭𑀺𑀁. 𑀬𑀁 𑀧𑀦 𑀬𑀣𑀸 𑀩𑁆𑀬𑀸𑀓𑀸𑀢𑀩𑁆𑀩𑀁, 𑀢𑀁 𑀫𑀬𑀸 𑀩𑁆𑀬𑀸𑀓𑀢𑀫𑁂𑀯𑀸𑀢𑀺 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀧𑀼𑀦 𑀬𑁂𑀧𑀺 𑀢𑁂, 𑀘𑀼𑀦𑁆𑀤𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀺𑀝𑁆𑀞𑀺𑀬𑁄𑀯 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀸, 𑀤𑀺𑀝𑁆𑀞𑀺𑀦𑀺𑀲𑁆𑀲𑀺𑀢𑀓𑀸 𑀤𑀺𑀝𑁆𑀞𑀺𑀕𑀢𑀺𑀓𑀸𑀢𑀺 𑀅𑀢𑁆𑀣𑁄. 𑀇𑀤𑀫𑁂𑀯 𑀲𑀘𑁆𑀘𑀦𑁆𑀢𑀺 𑀇𑀤𑀫𑁂𑀯 𑀤𑀲𑁆𑀲𑀦𑀁 𑀲𑀘𑁆𑀘𑀁. 𑀫𑁄𑀖𑀫𑀜𑁆𑀜𑀦𑁆𑀢𑀺 𑀅𑀜𑁆𑀜𑁂𑀲𑀁 𑀯𑀘𑀦𑀁 𑀫𑁄𑀖𑀁. 𑀅𑀲𑀬𑀁𑀓𑀸𑀭𑁄𑀢𑀺 𑀅𑀲𑀬𑀁 𑀓𑀢𑁄.

𑁧𑁯𑁨. 𑀢𑀢𑁆𑀭𑀸𑀢𑀺 ¶ 𑀢𑁂𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼. 𑀅𑀢𑁆𑀣𑀺 𑀦𑀼 𑀔𑁄 𑀇𑀤𑀁 𑀆𑀯𑀼𑀲𑁄 𑀯𑀼𑀘𑁆𑀘𑀢𑀻𑀢𑀺, 𑀆𑀯𑀼𑀲𑁄, 𑀬𑀁 𑀢𑀼𑀫𑁆𑀳𑁂𑀳𑀺 𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺 𑀯𑀼𑀘𑁆𑀘𑀢𑀺, 𑀇𑀤𑀫𑀢𑁆𑀣𑀺 𑀦𑀼 𑀔𑁄 𑀉𑀤𑀸𑀳𑀼 𑀦𑀢𑁆𑀣𑀻𑀢𑀺 𑀏𑀯𑀫𑀳𑀁 𑀢𑁂 𑀧𑀼𑀘𑁆𑀙𑀸𑀫𑀻𑀢𑀺 𑀅𑀢𑁆𑀣𑁄. 𑀬𑀜𑁆𑀘 𑀔𑁄 𑀢𑁂 𑀏𑀯𑀫𑀸𑀳𑀁𑀲𑀽𑀢𑀺 𑀬𑀁 𑀧𑀦 𑀢𑁂 ‘‘𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀦𑀸𑀦𑀼𑀚𑀸𑀦𑀸𑀫𑀺. 𑀧𑀜𑁆𑀜𑀢𑁆𑀢𑀺𑀬𑀸𑀢𑀺 𑀤𑀺𑀝𑁆𑀞𑀺𑀧𑀜𑁆𑀜𑀢𑁆𑀢𑀺𑀬𑀸. 𑀲𑀫𑀲𑀫𑀦𑁆𑀢𑀺 𑀲𑀫𑁂𑀦 𑀜𑀸𑀡𑁂𑀦 𑀲𑀫𑀁. 𑀬𑀤𑀺𑀤𑀁 𑀅𑀥𑀺𑀧𑀜𑁆𑀜𑀢𑁆𑀢𑀻𑀢𑀺 𑀬𑀸 𑀅𑀬𑀁 𑀅𑀥𑀺𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀏𑀢𑁆𑀣 𑀅𑀳𑀫𑁂𑀯 𑀪𑀺𑀬𑁆𑀬𑁄 𑀉𑀢𑁆𑀢𑀭𑀺𑀢𑀭𑁄 𑀦 𑀫𑀬𑀸 𑀲𑀫𑁄 𑀅𑀢𑁆𑀣𑀺. 𑀢𑀢𑁆𑀣 𑀬𑀜𑁆𑀘 𑀯𑀼𑀢𑁆𑀢𑀁 ‘‘𑀧𑀜𑁆𑀜𑀢𑁆𑀢𑀺𑀬𑀸𑀢𑀺 𑀬𑀜𑁆𑀘 𑀅𑀥𑀺𑀧𑀜𑁆𑀜𑀢𑁆𑀢𑀻’’𑀢𑀺 𑀉𑀪𑀬𑀫𑁂𑀢𑀁 𑀅𑀢𑁆𑀣𑀢𑁄 𑀏𑀓𑀁. 𑀪𑁂𑀤𑀢𑁄 𑀳𑀺 𑀧𑀜𑁆𑀜𑀢𑁆𑀢𑀺 𑀅𑀥𑀺𑀧𑀜𑁆𑀜𑀢𑁆𑀢𑀻𑀢𑀺 𑀤𑁆𑀯𑀬𑀁 𑀳𑁄𑀢𑀺. 𑀢𑀢𑁆𑀣 𑀧𑀜𑁆𑀜𑀢𑁆𑀢𑀺 𑀦𑀸𑀫 𑀤𑀺𑀝𑁆𑀞𑀺𑀧𑀜𑁆𑀜𑀢𑁆𑀢𑀺. 𑀅𑀥𑀺𑀧𑀜𑁆𑀜𑀢𑁆𑀢𑀺 𑀦𑀸𑀫 𑀔𑀦𑁆𑀥𑀧𑀜𑁆𑀜𑀢𑁆𑀢𑀺 𑀥𑀸𑀢𑀼𑀧𑀜𑁆𑀜𑀢𑁆𑀢𑀺 𑀆𑀬𑀢𑀦𑀧𑀜𑁆𑀜𑀢𑁆𑀢𑀺 𑀇𑀦𑁆𑀤𑁆𑀭𑀺𑀬𑀧𑀜𑁆𑀜𑀢𑁆𑀢𑀺 𑀲𑀘𑁆𑀘𑀧𑀜𑁆𑀜𑀢𑁆𑀢𑀺 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀸 𑀙 𑀧𑀜𑁆𑀜𑀢𑁆𑀢𑀺𑀬𑁄. 𑀇𑀥 𑀧𑀦 𑀧𑀜𑁆𑀜𑀢𑁆𑀢𑀺𑀬𑀸𑀢𑀺 𑀏𑀢𑁆𑀣𑀸𑀧𑀺 ¶ 𑀧𑀜𑁆𑀜𑀢𑁆𑀢𑀺 𑀘𑁂𑀯 𑀅𑀥𑀺𑀧𑀜𑁆𑀜𑀢𑁆𑀢𑀺 𑀘 𑀅𑀥𑀺𑀧𑁆𑀧𑁂𑀢𑀸, 𑀅𑀥𑀺𑀧𑀜𑁆𑀜𑀢𑁆𑀢𑀻𑀢𑀺 𑀏𑀢𑁆𑀣𑀸𑀧𑀺. 𑀪𑀕𑀯𑀸 𑀳𑀺 𑀧𑀜𑁆𑀜𑀢𑁆𑀢𑀺𑀬𑀸𑀧𑀺 𑀅𑀦𑀼𑀢𑁆𑀢𑀭𑁄, 𑀅𑀥𑀺𑀧𑀜𑁆𑀜𑀢𑁆𑀢𑀺𑀬𑀸𑀧𑀺 𑀅𑀦𑀼𑀢𑁆𑀢𑀭𑁄. 𑀢𑁂𑀦𑀸𑀳 𑁋 ‘‘𑀅𑀳𑀫𑁂𑀯 𑀢𑀢𑁆𑀣 𑀪𑀺𑀬𑁆𑀬𑁄 𑀬𑀤𑀺𑀤𑀁 𑀅𑀥𑀺𑀧𑀜𑁆𑀜𑀢𑁆𑀢𑀻’’𑀢𑀺.

𑁧𑁯𑁬. 𑀧𑀳𑀸𑀦𑀸𑀬𑀸𑀢𑀺 𑀧𑀚𑀳𑀦𑀢𑁆𑀣𑀁. 𑀲𑀫𑀢𑀺𑀓𑁆𑀓𑀫𑀸𑀬𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀤𑁂𑀲𑀺𑀢𑀸𑀢𑀺 𑀓𑀣𑀺𑀢𑀸. 𑀧𑀜𑁆𑀜𑀢𑁆𑀢𑀸𑀢𑀺 𑀞𑀧𑀺𑀢𑀸. 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀬 𑀳𑀺 𑀖𑀦𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸 𑀲𑀩𑁆𑀩𑀥𑀫𑁆𑀫𑁂𑀲𑀼 𑀬𑀸𑀣𑀸𑀯𑀢𑁄 𑀤𑀺𑀝𑁆𑀞𑁂𑀲𑀼 ‘‘𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑁄𑀬𑀁 𑀦𑀬𑀺𑀥 𑀲𑀢𑁆𑀢𑀽𑀧𑀮𑀩𑁆𑀪𑀢𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀢𑁄 𑀲𑀩𑁆𑀩𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀸𑀦𑀁 𑀧𑀳𑀸𑀦𑀁 𑀳𑁄𑀢𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀸𑀦𑀁 𑀧𑀳𑀸𑀦𑀸𑀬 𑀲𑀫𑀢𑀺𑀓𑁆𑀓𑀫𑀸𑀬 𑀏𑀯𑀁 𑀫𑀬𑀸 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀤𑁂𑀲𑀺𑀢𑀸 𑀧𑀜𑁆𑀜𑀢𑁆𑀢𑀸’’𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀧𑀸𑀲𑀸𑀤𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀮𑀓𑁆𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀯𑀡𑁆𑀡𑀦𑀸

𑁧𑁯𑁯. 𑀏𑀯𑀁 ¶ ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀮𑀓𑁆𑀔𑀡𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀫𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸. 𑀤𑁆𑀯𑀢𑁆𑀢𑀺𑀁𑀲𑀺𑀫𑀸𑀦𑀻𑀢𑀺 𑀤𑁆𑀯𑀢𑁆𑀢𑀺𑀁𑀲 𑀇𑀫𑀸𑀦𑀺. 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀻𑀢𑀺 𑀫𑀳𑀸𑀧𑀼𑀭𑀺𑀲𑀩𑁆𑀬𑀜𑁆𑀚𑀦𑀸𑀦𑀺 𑀫𑀳𑀸𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀸𑀦𑀺 ‘‘𑀅𑀬𑀁 𑀫𑀳𑀸𑀧𑀼𑀭𑀺𑀲𑁄’’𑀢𑀺 𑀲𑀜𑁆𑀚𑀸𑀦𑀦𑀓𑀸𑀭𑀡𑀸𑀦𑀺. ‘‘𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲𑀸’’𑀢𑀺𑀆𑀤𑀺 𑀫𑀳𑀸𑀧𑀤𑀸𑀦𑁂 𑀯𑀺𑀢𑁆𑀣𑀸𑀭𑀺𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

‘‘𑀩𑀸𑀳𑀺𑀭𑀓𑀸𑀧𑀺 𑀇𑀲𑀬𑁄 𑀥𑀸𑀭𑁂𑀦𑁆𑀢𑀺, 𑀦𑁄 𑀘 𑀔𑁄 𑀚𑀸𑀦𑀦𑁆𑀢𑀺 ‘𑀇𑀫𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀇𑀫𑀁 𑀮𑀓𑁆𑀔𑀡𑀁 𑀧𑀝𑀺𑀮𑀪𑀢𑀻’𑀢𑀺’’ 𑀓𑀲𑁆𑀫𑀸 𑀆𑀳? 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀅𑀦𑀼𑀭𑀽𑀧𑀢𑁆𑀢𑀸. 𑀇𑀤𑀜𑁆𑀳𑀺 𑀲𑀼𑀢𑁆𑀢𑀁 𑀲𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀁. 𑀲𑀸 𑀧𑀦𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺 𑀓𑀢𑁆𑀣 𑀲𑀫𑀼𑀝𑁆𑀞𑀺𑀢𑀸? 𑀅𑀦𑁆𑀢𑁄𑀕𑀸𑀫𑁂 𑀫𑀦𑀼𑀲𑁆𑀲𑀸𑀦𑀁 𑀅𑀦𑁆𑀢𑀭𑁂. 𑀢𑀤𑀸 𑀓𑀺𑀭 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑁂𑀳𑁂𑀲𑀼 𑀘 𑀕𑁂𑀳𑀤𑁆𑀯𑀸𑀭𑁂𑀲𑀼 𑀘 𑀲𑀦𑁆𑀣𑀸𑀕𑀸𑀭𑀸𑀤𑀻𑀲𑀼 𑀘 𑀦𑀺𑀲𑀻𑀤𑀺𑀢𑁆𑀯𑀸 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀼𑀁 𑁋 ‘‘𑀪𑀕𑀯𑀢𑁄 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀸𑀦𑀺 𑀩𑁆𑀬𑀸𑀫𑀧𑁆𑀧𑀪𑀸 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺, 𑀬𑁂𑀳𑀺 𑀘 𑀪𑀕𑀯𑀢𑁄 𑀓𑀸𑀬𑁄, 𑀲𑀩𑁆𑀩𑀨𑀸𑀮𑀺𑀨𑀼𑀮𑁆𑀮𑁄 𑀯𑀺𑀬 𑀧𑀸𑀭𑀺𑀘𑁆𑀙𑀢𑁆𑀢𑀓𑁄, 𑀯𑀺𑀓𑀲𑀺𑀢𑀫𑀺𑀯 𑀓𑀫𑀮𑀯𑀦𑀁, 𑀦𑀸𑀦𑀸𑀭𑀢𑀦𑀯𑀺𑀘𑀺𑀢𑁆𑀢𑀁 𑀯𑀺𑀬 𑀲𑀼𑀯𑀡𑁆𑀡𑀢𑁄𑀭𑀡𑀁, 𑀢𑀸𑀭𑀸𑀫𑀭𑀺𑀘𑀺𑀯𑀺𑀭𑁄𑀘𑀫𑀺𑀯 𑀕𑀕𑀦𑀢𑀮𑀁, 𑀇𑀢𑁄 𑀘𑀺𑀢𑁄 𑀘 𑀯𑀺𑀥𑀸𑀯𑀫𑀸𑀦𑀸 𑀯𑀺𑀧𑁆𑀨𑀦𑁆𑀤𑀫𑀸𑀦𑀸 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀫𑀼𑀜𑁆𑀘𑀦𑁆𑀢𑁄 𑀅𑀢𑀺𑀯𑀺𑀬 𑀲𑁄𑀪𑀢𑀺. 𑀪𑀕𑀯𑀢𑁄 𑀘 𑀇𑀫𑀺𑀦𑀸 𑀦𑀸𑀫 𑀓𑀫𑁆𑀫𑁂𑀦 𑀇𑀤𑀁 𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀓𑀣𑀺𑀢𑀁 𑀦𑀢𑁆𑀣𑀺, 𑀬𑀸𑀕𑀼𑀉𑀴𑀼𑀗𑁆𑀓𑀫𑀢𑁆𑀢𑀫𑁆𑀧𑀺 𑀧𑀦 𑀓𑀝𑀘𑁆𑀙𑀼𑀪𑀢𑁆𑀢𑀫𑀢𑁆𑀢𑀁 𑀯𑀸 𑀧𑀼𑀩𑁆𑀩𑁂 𑀤𑀺𑀦𑁆𑀦𑀧𑀘𑁆𑀘𑀬𑀸 𑀏𑀯𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀁. 𑀓𑀺𑀁 𑀦𑀼 𑀔𑁄 𑀲𑀢𑁆𑀣𑀸 𑀓𑀫𑁆𑀫𑀁 𑀅𑀓𑀸𑀲𑀺, 𑀬𑁂𑀦𑀲𑁆𑀲 𑀇𑀫𑀸𑀦𑀺 𑀮𑀓𑁆𑀔𑀡𑀸𑀦𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’’𑀢𑀺.

𑀅𑀣𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀦𑁆𑀢𑁄𑀕𑀸𑀫𑁂 𑀘𑀭𑀦𑁆𑀢𑁄 𑀇𑀫𑀁 𑀓𑀣𑀸𑀲𑀮𑁆𑀮𑀸𑀧𑀁 𑀲𑀼𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀯𑀢𑁆𑀢𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑁄 ‘‘𑀫𑀬𑀸, 𑀪𑀦𑁆𑀢𑁂, 𑀅𑀦𑁆𑀢𑁄𑀕𑀸𑀫𑁂 𑀏𑀓𑀸 𑀓𑀣𑀸 𑀲𑀼𑀢𑀸’’𑀢𑀺 𑀆𑀳. 𑀢𑀢𑁄 ¶ 𑀪𑀕𑀯𑀢𑀸 ‘‘𑀓𑀺𑀁 𑀢𑁂, 𑀆𑀦𑀦𑁆𑀤, 𑀲𑀼𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 𑀣𑁂𑀭𑀲𑁆𑀲 𑀯𑀘𑀦𑀁 ¶ 𑀲𑀼𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀤𑁆𑀯𑀢𑁆𑀢𑀺𑀁𑀲𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀼𑀭𑀺𑀲𑀲𑁆𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀻’’𑀢𑀺 𑀧𑀝𑀺𑀧𑀸𑀝𑀺𑀬𑀸 𑀮𑀓𑁆𑀔𑀡𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀬𑁂𑀦 𑀓𑀫𑁆𑀫𑁂𑀦 𑀬𑀁 𑀦𑀺𑀩𑁆𑀩𑀢𑁆𑀢𑀁, 𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀏𑀯𑀫𑀸𑀳.

𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀸𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁦𑁧. 𑀧𑀼𑀭𑀺𑀫𑀁 ¶ 𑀚𑀸𑀢𑀺𑀦𑁆𑀢𑀺𑀆𑀤𑀻𑀲𑀼 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀸 𑀚𑀸𑀢𑀯𑀲𑁂𑀦 ‘‘𑀚𑀸𑀢𑀻’’𑀢𑀺 𑀯𑀼𑀢𑁆𑀢𑀸. 𑀢𑀣𑀸 𑀪𑀯𑀦𑀯𑀲𑁂𑀦 ‘‘𑀪𑀯𑁄’’𑀢𑀺, 𑀦𑀺𑀯𑀼𑀢𑁆𑀣𑀯𑀲𑁂𑀦 𑀆𑀮𑀬𑀝𑁆𑀞𑁂𑀦 𑀯𑀸 ‘‘𑀦𑀺𑀓𑁂𑀢𑁄’’𑀢𑀺. 𑀢𑀺𑀡𑁆𑀡𑀫𑁆𑀧𑀺 𑀧𑀤𑀸𑀦𑀁 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀲𑀦𑁆𑀢𑀸𑀦𑁂 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀬𑀲𑁆𑀫𑀸 𑀢𑀁 𑀔𑀦𑁆𑀥𑀲𑀦𑁆𑀢𑀸𑀦𑀁 𑀤𑁂𑀯𑀮𑁄𑀓𑀸𑀤𑀻𑀲𑀼𑀧𑀺 𑀯𑀢𑁆𑀢𑀢𑀺. 𑀮𑀓𑁆𑀔𑀡𑀦𑀺𑀩𑁆𑀩𑀢𑁆𑀢𑀦𑀲𑀫𑀢𑁆𑀣𑀁 𑀧𑀦 𑀓𑀼𑀲𑀮𑀓𑀫𑁆𑀫𑀁 𑀢𑀢𑁆𑀣 𑀦 𑀲𑀼𑀓𑀭𑀁, 𑀫𑀦𑀼𑀲𑁆𑀲𑀪𑀽𑀢𑀲𑁆𑀲𑁂𑀯 𑀲𑀼𑀓𑀭𑀁. 𑀢𑀲𑁆𑀫𑀸 𑀬𑀣𑀸𑀪𑀽𑀢𑁂𑀦 𑀬𑀁 𑀓𑀫𑁆𑀫𑀁 𑀓𑀢𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄𑀢𑀺 𑀆𑀳. 𑀅𑀓𑀸𑀭𑀡𑀁 𑀯𑀸 𑀏𑀢𑀁. 𑀳𑀢𑁆𑀣𑀺𑀅𑀲𑁆𑀲𑀫𑀺𑀕𑀫𑀳𑀺𑀁𑀲𑀯𑀸𑀦𑀭𑀸𑀤𑀺𑀪𑀽𑀢𑁄𑀧𑀺 𑀫𑀳𑀸𑀧𑀼𑀭𑀺𑀲𑁄 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑀺𑀬𑁂𑀯. 𑀬𑀲𑁆𑀫𑀸 𑀧𑀦 𑀏𑀯𑀭𑀽𑀧𑁂 𑀅𑀢𑁆𑀢𑀪𑀸𑀯𑁂 𑀞𑀺𑀢𑁂𑀦 𑀓𑀢𑀓𑀫𑁆𑀫𑀁 𑀦 𑀲𑀓𑁆𑀓𑀸 𑀲𑀼𑀔𑁂𑀦 𑀤𑀻𑀧𑁂𑀢𑀼𑀁, 𑀫𑀦𑀼𑀲𑁆𑀲𑀪𑀸𑀯𑁂 𑀞𑀺𑀢𑁂𑀦 𑀓𑀢𑀓𑀫𑁆𑀫𑀁 𑀧𑀦 𑀲𑀓𑁆𑀓𑀸 𑀲𑀼𑀔𑁂𑀦 𑀤𑀻𑀧𑁂𑀢𑀼𑀁. 𑀢𑀲𑁆𑀫𑀸 ‘‘𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑁄 𑀲𑀫𑀸𑀦𑁄’’𑀢𑀺 𑀆𑀳.

𑀤𑀴𑁆𑀳𑀲𑀫𑀸𑀤𑀸𑀦𑁄𑀢𑀺 𑀣𑀺𑀭𑀕𑀳𑀡𑁄. 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑁂𑀲𑀼. 𑀅𑀯𑀢𑁆𑀣𑀺𑀢𑀲𑀫𑀸𑀤𑀸𑀦𑁄𑀢𑀺 𑀦𑀺𑀘𑁆𑀘𑀮𑀕𑀳𑀡𑁄 𑀅𑀦𑀺𑀯𑀢𑁆𑀢𑀺𑀢𑀕𑀳𑀡𑁄. 𑀫𑀳𑀸𑀲𑀢𑁆𑀢𑀲𑁆𑀲 𑀳𑀺 𑀅𑀓𑀼𑀲𑀮𑀓𑀫𑁆𑀫𑀢𑁄 𑀅𑀕𑁆𑀕𑀺𑀁 𑀧𑀢𑁆𑀯𑀸 𑀓𑀼𑀓𑁆𑀓𑀼𑀝𑀧𑀢𑁆𑀢𑀁 𑀯𑀺𑀬 𑀘𑀺𑀢𑁆𑀢𑀁 𑀧𑀝𑀺𑀓𑀼𑀝𑀢𑀺, 𑀓𑀼𑀲𑀮𑀁 𑀧𑀢𑁆𑀯𑀸 𑀯𑀺𑀢𑀸𑀦𑀁 𑀯𑀺𑀬 𑀧𑀲𑀸𑀭𑀺𑀬𑀢𑀺. 𑀢𑀲𑁆𑀫𑀸 𑀤𑀴𑁆𑀳𑀲𑀫𑀸𑀤𑀸𑀦𑁄 𑀳𑁄𑀢𑀺 𑀅𑀯𑀢𑁆𑀣𑀺𑀢𑀲𑀫𑀸𑀤𑀸𑀦𑁄. 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑀼𑀲𑀮𑀲𑀫𑀸𑀤𑀸𑀦𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑀼𑀁.

𑀢𑀢𑁆𑀭𑀺𑀫𑀸𑀦𑀺 𑀯𑀢𑁆𑀣𑀽𑀦𑀺 𑁋 𑀧𑀼𑀩𑁆𑀩𑁂 𑀓𑀺𑀭 𑀫𑀳𑀸𑀧𑀼𑀭𑀺𑀲𑁄 𑀓𑀮𑀦𑁆𑀤𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺. 𑀅𑀣 𑀤𑁂𑀯𑁂 𑀯𑀼𑀝𑁆𑀞𑁂 𑀑𑀖𑁄 𑀆𑀕𑀦𑁆𑀢𑁆𑀯𑀸 𑀓𑀼𑀮𑀸𑀯𑀓𑀁 𑀕𑀳𑁂𑀢𑁆𑀯𑀸 𑀲𑀫𑀼𑀤𑁆𑀤𑀫𑁂𑀯 𑀧𑀯𑁂𑀲𑁂𑀲𑀺. 𑀫𑀳𑀸𑀧𑀼𑀭𑀺𑀲𑁄 ‘‘𑀧𑀼𑀢𑁆𑀢𑀓𑁂 𑀦𑀻𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀦𑀗𑁆𑀕𑀼𑀝𑁆𑀞𑀁 𑀢𑁂𑀫𑁂𑀢𑁆𑀯𑀸 𑀢𑁂𑀫𑁂𑀢𑁆𑀯𑀸 𑀲𑀫𑀼𑀤𑁆𑀤𑀢𑁄 𑀉𑀤𑀓𑀁 𑀩𑀳𑀺 𑀔𑀺𑀧𑀺. 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀓𑁆𑀓𑁄 𑀆𑀯𑀚𑁆𑀚𑀺𑀢𑁆𑀯𑀸 𑀢𑀢𑁆𑀣 𑀆𑀕𑀫𑁆𑀫 ‘‘𑀓𑀺𑀁 𑀓𑀭𑁄𑀲𑀻’’𑀢𑀺 𑀧𑀼𑀘𑁆𑀙𑀺? 𑀲𑁄 𑀢𑀲𑁆𑀲 𑀆𑀭𑁄𑀘𑁂𑀲𑀺. 𑀲𑀓𑁆𑀓𑁄 𑀫𑀳𑀸𑀲𑀫𑀼𑀤𑁆𑀤𑀢𑁄 𑀉𑀤𑀓𑀲𑁆𑀲 𑀤𑀼𑀦𑁆𑀦𑀻𑀳𑀭𑀡𑀻𑀬𑀪𑀸𑀯𑀁 𑀓𑀣𑁂𑀲𑀺. 𑀩𑁄𑀥𑀺𑀲𑀢𑁆𑀢𑁄 ¶ 𑀢𑀸𑀤𑀺𑀲𑁂𑀦 𑀓𑀼𑀲𑀻𑀢𑁂𑀦 𑀲𑀤𑁆𑀥𑀺𑀁 𑀓𑀣𑁂𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀺. ‘‘𑀫𑀸 𑀇𑀥 𑀢𑀺𑀝𑁆𑀞𑀸’’𑀢𑀺 𑀅𑀧𑀲𑀸𑀭𑁂𑀲𑀺. 𑀲𑀓𑁆𑀓𑁄 ‘‘𑀅𑀦𑁄𑀫𑀧𑀼𑀭𑀺𑀲𑁂𑀦 𑀕𑀳𑀺𑀢𑀕𑀳𑀡𑀁 𑀦 𑀲𑀓𑁆𑀓𑀸 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑀼’’𑀦𑁆𑀢𑀺 𑀢𑀼𑀝𑁆𑀞𑁄 𑀢𑀲𑁆𑀲 𑀧𑀼𑀢𑁆𑀢𑀓𑁂 𑀆𑀦𑁂𑀢𑁆𑀯𑀸 𑀅𑀤𑀸𑀲𑀺. 𑀫𑀳𑀸𑀚𑀦𑀓𑀓𑀸𑀮𑁂𑀧𑀺 𑀫𑀳𑀸𑀲𑀫𑀼𑀤𑁆𑀤𑀁 𑀢𑀭𑀫𑀸𑀦𑁄 ‘‘𑀓𑀲𑁆𑀫𑀸 𑀫𑀳𑀸𑀲𑀫𑀼𑀤𑁆𑀤𑀁 𑀢𑀭𑀲𑀻’’𑀢𑀺 𑀤𑁂𑀯𑀢𑀸𑀬 𑀧𑀼𑀝𑁆𑀞𑁄 ‘‘𑀧𑀸𑀭𑀁 𑀕𑀦𑁆𑀢𑁆𑀯𑀸 𑀓𑀼𑀮𑀲𑀦𑁆𑀢𑀓𑁂 𑀭𑀝𑁆𑀞𑁂 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀤𑀸𑀦𑀁 𑀤𑀸𑀢𑀼𑀁 𑀢𑀭𑀸𑀫𑀻’’𑀢𑀺 𑀆𑀳. 𑀢𑀢𑁄 𑀤𑁂𑀯𑀢𑀸𑀬 𑁋 ‘‘𑀅𑀬𑀁 𑀫𑀳𑀸𑀲𑀫𑀼𑀤𑁆𑀤𑁄 𑀕𑀫𑁆𑀪𑀻𑀭𑁄 ¶ ¶ 𑀘𑁂𑀯 𑀧𑀼𑀣𑀼𑀮𑁄 𑀘, 𑀓𑀤𑀸 𑀦𑀁 𑀢𑀭𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁂 𑀲𑁄 𑀆𑀳 ‘‘𑀢𑀯𑁂𑀲𑁄 𑀫𑀳𑀸𑀲𑀫𑀼𑀤𑁆𑀤𑀲𑀤𑀺𑀲𑁄, 𑀫𑀬𑁆𑀳𑀁 𑀧𑀦 𑀅𑀚𑁆𑀛𑀸𑀲𑀬𑀁 𑀆𑀕𑀫𑁆𑀫 𑀔𑀼𑀤𑁆𑀤𑀓𑀫𑀸𑀢𑀺𑀓𑀸 𑀯𑀺𑀬 𑀔𑀸𑀬𑀢𑀺. 𑀢𑁆𑀯𑀁𑀬𑁂𑀯 𑀫𑀁 𑀤𑀓𑁆𑀔𑀺𑀲𑁆𑀲𑀲𑀺 𑀲𑀫𑀼𑀤𑁆𑀤𑀁 𑀢𑀭𑀺𑀢𑁆𑀯𑀸 𑀲𑀫𑀼𑀤𑁆𑀤𑀧𑀸𑀭𑀢𑁄 𑀥𑀦𑀁 𑀆𑀳𑀭𑀺𑀢𑁆𑀯𑀸 𑀓𑀼𑀮𑀲𑀦𑁆𑀢𑀓𑀁 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀤𑀸𑀦𑀁 𑀤𑀤𑀫𑀸𑀦’’𑀦𑁆𑀢𑀺. 𑀤𑁂𑀯𑀢𑀸 ‘‘𑀅𑀦𑁄𑀫𑀧𑀼𑀭𑀺𑀲𑁂𑀦 𑀕𑀳𑀺𑀢𑀕𑀳𑀡𑀁 𑀦 𑀲𑀓𑁆𑀓𑀸 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑀼’’𑀦𑁆𑀢𑀺 𑀩𑁄𑀥𑀺𑀲𑀢𑁆𑀢𑀁 𑀆𑀮𑀺𑀗𑁆𑀕𑁂𑀢𑁆𑀯𑀸 𑀳𑀭𑀺𑀢𑁆𑀯𑀸 𑀉𑀬𑁆𑀬𑀸𑀦𑁂 𑀦𑀺𑀧𑀚𑁆𑀚𑀸𑀧𑁂𑀲𑀺. 𑀲𑁄 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀜𑁆𑀘𑀲𑀢𑀲𑀳𑀲𑁆𑀲𑀧𑀭𑀺𑀘𑁆𑀘𑀸𑀕𑀁 𑀓𑀢𑁆𑀯𑀸 𑀅𑀧𑀭𑀪𑀸𑀕𑁂 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑁄. 𑀏𑀯𑀁 𑀫𑀳𑀸𑀲𑀢𑁆𑀢𑁄 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀲𑀫𑀡𑁂𑀦 𑀯𑀸…𑀧𑁂… 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑀼𑀲𑀮𑀲𑀫𑀸𑀤𑀸𑀦𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑀼𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀤𑀴𑁆𑀳𑀲𑀫𑀸𑀤𑀸𑀦𑁄 𑀅𑀳𑁄𑀲𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀯𑀢𑁆𑀣𑀺𑀢𑀲𑀫𑀸𑀤𑀸𑀦𑁄’’𑀢𑀺.

𑀇𑀤𑀸𑀦𑀺 𑀬𑁂𑀲𑀼 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀯𑀢𑁆𑀣𑀺𑀢𑀲𑀫𑀸𑀤𑀸𑀦𑁄 𑀅𑀳𑁄𑀲𑀺, 𑀢𑁂 𑀤𑀲𑁆𑀲𑁂𑀢𑀼𑀁 𑀓𑀸𑀬𑀲𑀼𑀘𑀭𑀺𑀢𑁂𑀢𑀺𑀆𑀤𑀺𑀫𑀸𑀳. 𑀤𑀸𑀦𑀲𑀁𑀯𑀺𑀪𑀸𑀕𑁂𑀢𑀺 𑀏𑀢𑁆𑀣 𑀘 𑀤𑀸𑀦𑀫𑁂𑀯 𑀤𑀺𑀬𑁆𑀬𑀦𑀯𑀲𑁂𑀦 𑀤𑀸𑀦𑀁, 𑀲𑀁𑀯𑀺𑀪𑀸𑀕𑀓𑀭𑀡𑀯𑀲𑁂𑀦 𑀲𑀁𑀯𑀺𑀪𑀸𑀕𑁄. 𑀲𑀻𑀮𑀲𑀫𑀸𑀤𑀸𑀦𑁂𑀢𑀺 𑀧𑀜𑁆𑀘𑀲𑀻𑀮𑀤𑀲𑀲𑀻𑀮𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀧𑀽𑀭𑀡𑀓𑀸𑀮𑁂. 𑀉𑀧𑁄𑀲𑀣𑀽𑀧𑀯𑀸𑀲𑁂𑀢𑀺 𑀘𑀸𑀢𑀼𑀤𑁆𑀤𑀲𑀺𑀓𑀸𑀤𑀺𑀪𑁂𑀤𑀲𑁆𑀲 𑀉𑀧𑁄𑀲𑀣𑀲𑁆𑀲 𑀉𑀧𑀯𑀲𑀦𑀓𑀸𑀮𑁂. 𑀫𑀢𑁆𑀢𑁂𑀬𑁆𑀬𑀢𑀸𑀬𑀸𑀢𑀺 𑀫𑀸𑀢𑀼𑀓𑀸𑀢𑀩𑁆𑀩𑀯𑀢𑁆𑀢𑁂. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀲𑀼 𑀘𑀸𑀢𑀺 𑀅𑀜𑁆𑀜𑁂𑀲𑀼 𑀘 𑀏𑀯𑀭𑀽𑀧𑁂𑀲𑀼. 𑀅𑀥𑀺𑀓𑀼𑀲𑀮𑁂𑀲𑀽𑀢𑀺 𑀏𑀢𑁆𑀣 𑀅𑀢𑁆𑀣𑀺 𑀓𑀼𑀲𑀮𑀸, 𑀅𑀢𑁆𑀣𑀺 𑀅𑀥𑀺𑀓𑀼𑀲𑀮𑀸. 𑀲𑀩𑁆𑀩𑁂𑀧𑀺 𑀓𑀸𑀫𑀸𑀯𑀘𑀭𑀸 𑀓𑀼𑀲𑀮𑀸 𑀓𑀼𑀲𑀮𑀸 𑀦𑀸𑀫, 𑀭𑀽𑀧𑀸𑀯𑀘𑀭𑀸 𑀅𑀥𑀺𑀓𑀼𑀲𑀮𑀸. 𑀉𑀪𑁄𑀧𑀺 𑀢𑁂 𑀓𑀼𑀲𑀮𑀸 𑀦𑀸𑀫, 𑀅𑀭𑀽𑀧𑀸𑀯𑀘𑀭𑀸 𑀅𑀥𑀺𑀓𑀼𑀲𑀮𑀸. 𑀲𑀩𑁆𑀩𑁂𑀧𑀺 𑀢𑁂 𑀓𑀼𑀲𑀮𑀸 ¶ 𑀦𑀸𑀫, 𑀲𑀸𑀯𑀓𑀧𑀸𑀭𑀫𑀻𑀧𑀝𑀺𑀮𑀸𑀪𑀧𑀘𑁆𑀘𑀬𑀸 𑀓𑀼𑀲𑀮𑀸 𑀅𑀥𑀺𑀓𑀼𑀲𑀮𑀸 𑀦𑀸𑀫. 𑀢𑁂𑀧𑀺 𑀓𑀼𑀲𑀮𑀸 𑀦𑀸𑀫, 𑀧𑀘𑁆𑀘𑁂𑀓𑀩𑁄𑀥𑀺𑀧𑀝𑀺𑀮𑀸𑀪𑀧𑀘𑁆𑀘𑀬𑀸 𑀓𑀼𑀲𑀮𑀸 𑀅𑀥𑀺𑀓𑀼𑀲𑀮𑀸. 𑀢𑁂𑀧𑀺 𑀓𑀼𑀲𑀮𑀸 𑀦𑀸𑀫, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑁆𑀧𑀝𑀺𑀮𑀸𑀪𑀧𑀘𑁆𑀘𑀬𑀸 𑀧𑀦 𑀓𑀼𑀲𑀮𑀸 𑀇𑀥 ‘‘𑀅𑀥𑀺𑀓𑀼𑀲𑀮𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀲𑀼 𑀅𑀥𑀺𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀤𑀴𑁆𑀳𑀲𑀫𑀸𑀤𑀸𑀦𑁄 𑀅𑀳𑁄𑀲𑀺 𑀅𑀯𑀢𑁆𑀣𑀺𑀢𑀲𑀫𑀸𑀤𑀸𑀦𑁄.

𑀓𑀝𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸𑀢𑀺 𑀏𑀢𑁆𑀣 𑀲𑀓𑀺𑀫𑁆𑀧𑀺 𑀓𑀢𑀁 𑀓𑀢𑀫𑁂𑀯, 𑀅𑀪𑀺𑀡𑁆𑀳𑀓𑀭𑀡𑁂𑀦 𑀧𑀦 𑀉𑀧𑀘𑀺𑀢𑀁 𑀳𑁄𑀢𑀺. 𑀉𑀲𑁆𑀲𑀦𑁆𑀦𑀢𑁆𑀢𑀸𑀢𑀺 𑀧𑀺𑀡𑁆𑀟𑀻𑀓𑀢𑀁 𑀭𑀸𑀲𑀻𑀓𑀢𑀁 𑀓𑀫𑁆𑀫𑀁 𑀉𑀲𑁆𑀲𑀦𑁆𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 ‘‘𑀉𑀲𑁆𑀲𑀦𑁆𑀦𑀢𑁆𑀢𑀸’’𑀢𑀺 𑀯𑀤𑀦𑁆𑀢𑁄 𑀫𑀬𑀸 𑀓𑀢𑀓𑀫𑁆𑀫𑀲𑁆𑀲 𑀘𑀓𑁆𑀓𑀯𑀸𑀴𑀁 𑀅𑀢𑀺𑀲𑀫𑁆𑀩𑀸𑀥𑀁, 𑀪𑀯𑀕𑁆𑀕𑀁 𑀅𑀢𑀺𑀦𑀻𑀘𑀁, 𑀏𑀯𑀁 𑀫𑁂 𑀉𑀲𑁆𑀲𑀦𑁆𑀦𑀁 𑀓𑀫𑁆𑀫𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀯𑀺𑀧𑀼𑀮𑀢𑁆𑀢𑀸𑀢𑀺 𑀅𑀧𑁆𑀧𑀫𑀸𑀡𑀢𑁆𑀢𑀸. 𑀇𑀫𑀺𑀦𑀸 ‘‘𑀅𑀦𑀦𑁆𑀢𑀁 𑀅𑀧𑀭𑀺𑀫𑀸𑀡𑀁 𑀫𑀬𑀸 𑀓𑀢𑀁 𑀓𑀫𑁆𑀫’’𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀥𑀺𑀕𑁆𑀕𑀡𑁆𑀳𑀸𑀢𑀻𑀢𑀺 ¶ 𑀅𑀥𑀺𑀪𑀯𑀢𑀺, 𑀅𑀜𑁆𑀜𑁂𑀳𑀺 𑀤𑁂𑀯𑁂𑀳𑀺 𑀅𑀢𑀺𑀭𑁂𑀓𑀁 𑀮𑀪𑀢𑀻𑀢𑀺 𑀅𑀢𑁆𑀣𑁄. 𑀧𑀝𑀺𑀮𑀪𑀢𑀻𑀢𑀺 𑀅𑀥𑀺𑀕𑀘𑁆𑀙𑀢𑀺.

𑀲𑀩𑁆𑀩𑀸𑀯𑀦𑁆𑀢𑁂𑀳𑀺 𑀧𑀸𑀤𑀢𑀮𑁂𑀳𑀻𑀢𑀺 𑀇𑀤𑀁 ‘‘𑀲𑀫𑀁 𑀧𑀸𑀤𑀁 𑀪𑀽𑀫𑀺𑀬𑀁 𑀦𑀺𑀓𑁆𑀔𑀺𑀧𑀢𑀻’’𑀢𑀺 𑀏𑀢𑀲𑁆𑀲 𑀯𑀺𑀢𑁆𑀣𑀸𑀭𑀯𑀘𑀦𑀁. 𑀢𑀢𑁆𑀣 𑀲𑀩𑁆𑀩𑀸𑀯𑀦𑁆𑀢𑁂𑀳𑀻𑀢𑀺 𑀲𑀩𑁆𑀩𑀧𑀤𑁂𑀲𑀯𑀦𑁆𑀢𑁂𑀳𑀺, 𑀦 𑀏𑀓𑁂𑀦 𑀧𑀤𑁂𑀲𑁂𑀦 𑀧𑀞𑀫𑀁 𑀨𑀼𑀲𑀢𑀺, 𑀦 𑀏𑀓𑁂𑀦 ¶ 𑀧𑀘𑁆𑀙𑀸, 𑀲𑀩𑁆𑀩𑁂𑀳𑁂𑀯 𑀧𑀸𑀤𑀢𑀮𑁂𑀳𑀺 𑀲𑀫𑀁 𑀨𑀼𑀲𑀢𑀺, 𑀲𑀫𑀁 𑀉𑀤𑁆𑀥𑀭𑀢𑀺. 𑀲𑀘𑁂𑀧𑀺 𑀳𑀺 𑀢𑀣𑀸𑀕𑀢𑁄 ‘‘𑀅𑀦𑁂𑀓𑀲𑀢𑀧𑁄𑀭𑀺𑀲𑀁 𑀦𑀭𑀓𑀁 𑀅𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺 𑀧𑀸𑀤𑀁 𑀅𑀪𑀺𑀦𑀻𑀳𑀭𑀢𑀺. 𑀢𑀸𑀯𑀤𑁂𑀯 𑀦𑀺𑀦𑁆𑀦𑀝𑁆𑀞𑀸𑀦𑀁 𑀯𑀸𑀢𑀧𑀽𑀭𑀺𑀢𑀸 𑀯𑀺𑀬 𑀓𑀫𑁆𑀫𑀸𑀭𑀪𑀲𑁆𑀢𑀸 𑀉𑀦𑁆𑀦𑀫𑀺𑀢𑁆𑀯𑀸 𑀧𑀣𑀯𑀺𑀲𑀫𑀁 𑀳𑁄𑀢𑀺. 𑀉𑀦𑁆𑀦𑀢𑀝𑁆𑀞𑀸𑀦𑀫𑁆𑀧𑀺 𑀅𑀦𑁆𑀢𑁄 𑀧𑀯𑀺𑀲𑀢𑀺. ‘‘𑀤𑀽𑀭𑁂 𑀅𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺 𑀅𑀪𑀺𑀦𑀻𑀳𑀭𑀦𑁆𑀢𑀲𑁆𑀲 𑀲𑀺𑀦𑁂𑀭𑀼𑀧𑁆𑀧𑀫𑀸𑀡𑁄𑀧𑀺 𑀧𑀩𑁆𑀩𑀢𑁄 𑀲𑀼𑀲𑁂𑀤𑀺𑀢𑀯𑁂𑀢𑁆𑀢𑀗𑁆𑀓𑀼𑀭𑁄 𑀯𑀺𑀬 𑀑𑀦𑀫𑀺𑀢𑁆𑀯𑀸 𑀧𑀸𑀤𑀲𑀫𑀻𑀧𑀁 𑀆𑀕𑀘𑁆𑀙𑀢𑀺. 𑀢𑀣𑀸 𑀳𑀺𑀲𑁆𑀲 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 ‘‘𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑀁 𑀅𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺 𑀧𑀸𑀤𑁂 𑀅𑀪𑀺𑀦𑀻𑀳𑀝𑁂 𑀧𑀩𑁆𑀩𑀢𑁄 𑀑𑀦𑀫𑀺𑀢𑁆𑀯𑀸 𑀧𑀸𑀤𑀲𑀫𑀻𑀧𑀁 𑀆𑀕𑀢𑁄. 𑀲𑁄𑀧𑀺 𑀢𑀁 𑀅𑀓𑁆𑀓𑀫𑀺𑀢𑁆𑀯𑀸 𑀤𑀼𑀢𑀺𑀬𑀧𑀸𑀤𑁂𑀦 𑀢𑀸𑀯𑀢𑀺𑀁𑀲𑀪𑀯𑀦𑀁 𑀅𑀓𑁆𑀓𑀫𑀺. 𑀦 𑀳𑀺 𑀘𑀓𑁆𑀓𑀮𑀓𑁆𑀔𑀡𑁂𑀦 𑀧𑀢𑀺𑀝𑁆𑀞𑀸𑀢𑀩𑁆𑀩𑀝𑁆𑀞𑀸𑀦𑀁 𑀯𑀺𑀲𑀫𑀁 𑀪𑀯𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀔𑀸𑀡𑀼 𑀯𑀸 𑀓𑀡𑁆𑀝𑀓𑁄 𑀯𑀸 𑀲𑀓𑁆𑀔𑀭𑀸 𑀯𑀸 𑀓𑀣𑀮𑀸 𑀯𑀸 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸𑀤𑀻𑀦𑀺 𑀯𑀸 𑀧𑀼𑀭𑀺𑀫𑀢𑀭𑀁 𑀯𑀸 𑀅𑀧𑀕𑀘𑁆𑀙𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀯𑀸 𑀧𑀣𑀯𑀺𑀁 𑀧𑀯𑀺𑀲𑀦𑁆𑀢𑀺. 𑀢𑀣𑀸𑀕𑀢𑀲𑁆𑀲 𑀳𑀺 𑀲𑀻𑀮𑀢𑁂𑀚𑁂𑀦 𑀧𑀼𑀜𑁆𑀜𑀢𑁂𑀚𑁂𑀦 𑀥𑀫𑁆𑀫𑀢𑁂𑀚𑁂𑀦 𑀤𑀲𑀦𑁆𑀦𑀁 𑀧𑀸𑀭𑀫𑀻𑀦𑀁 ¶ 𑀆𑀦𑀼𑀪𑀸𑀯𑁂𑀦 𑀅𑀬𑀁 𑀫𑀳𑀸𑀧𑀣𑀯𑀻 𑀲𑀫𑁆𑀫𑀸 𑀫𑀼𑀤𑀼𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑀸 𑀳𑁄𑀢𑀺.

𑁨𑁦𑁨. 𑀲𑀸𑀕𑀭𑀧𑀭𑀺𑀬𑀦𑁆𑀢𑀦𑁆𑀢𑀺 𑀲𑀸𑀕𑀭𑀲𑀻𑀫𑀁. 𑀦 𑀳𑀺 𑀢𑀲𑁆𑀲 𑀭𑀚𑁆𑀚𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑁆𑀢𑀭𑀸 𑀭𑀼𑀓𑁆𑀔𑁄 𑀯𑀸 𑀧𑀩𑁆𑀩𑀢𑁄 𑀯𑀸 𑀦𑀤𑀻 𑀯𑀸 𑀲𑀻𑀫𑀸 𑀳𑁄𑀢𑀺 𑀫𑀳𑀸𑀲𑀫𑀼𑀤𑁆𑀤𑁄𑀯 𑀲𑀻𑀫𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀸𑀕𑀭𑀧𑀭𑀺𑀬𑀦𑁆𑀢’’𑀦𑁆𑀢𑀺. 𑀅𑀔𑀺𑀮𑀫𑀦𑀺𑀫𑀺𑀢𑁆𑀢𑀫𑀓𑀡𑁆𑀝𑀓𑀦𑁆𑀢𑀺 𑀦𑀺𑀘𑁆𑀘𑁄𑀭𑀁. 𑀘𑁄𑀭𑀸 𑀳𑀺 𑀔𑀭𑀲𑀫𑁆𑀨𑀲𑁆𑀲𑀝𑁆𑀞𑁂𑀦 𑀔𑀺𑀮𑀸, 𑀉𑀧𑀤𑁆𑀤𑀯𑀧𑀘𑁆𑀘𑀬𑀝𑁆𑀞𑁂𑀦 𑀦𑀺𑀫𑀺𑀢𑁆𑀢𑀸, 𑀯𑀺𑀚𑁆𑀛𑀦𑀝𑁆𑀞𑁂𑀦 𑀓𑀡𑁆𑀝𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀤𑁆𑀥𑀦𑁆𑀢𑀺 𑀲𑀫𑀺𑀤𑁆𑀥𑀁. 𑀨𑀻𑀢𑀦𑁆𑀢𑀺 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀨𑀸𑀮𑀺𑀨𑀼𑀮𑁆𑀮𑀁. 𑀔𑁂𑀫𑀦𑁆𑀢𑀺 𑀦𑀺𑀩𑁆𑀪𑀬𑀁. 𑀲𑀺𑀯𑀦𑁆𑀢𑀺 𑀦𑀺𑀭𑀼𑀧𑀤𑁆𑀤𑀯𑀁. 𑀦𑀺𑀭𑀩𑁆𑀩𑀼𑀤𑀦𑁆𑀢𑀺 𑀅𑀩𑁆𑀩𑀼𑀤𑀯𑀺𑀭𑀳𑀺𑀢𑀁, 𑀕𑀼𑀫𑁆𑀩𑀁 𑀕𑀼𑀫𑁆𑀩𑀁 𑀳𑀼𑀢𑁆𑀯𑀸 𑀘𑀭𑀦𑁆𑀢𑁂𑀳𑀺 𑀘𑁄𑀭𑁂𑀳𑀺 𑀯𑀺𑀭𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀓𑁆𑀔𑀫𑁆𑀪𑀺𑀬𑁄𑀢𑀺 𑀅𑀯𑀺𑀓𑁆𑀔𑀫𑁆𑀪𑀦𑀻𑀬𑁄. 𑀦 𑀦𑀁 𑀓𑁄𑀘𑀺 𑀞𑀸𑀦𑀢𑁄 𑀘𑀸𑀮𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀧𑀘𑁆𑀘𑀢𑁆𑀣𑀺𑀓𑁂𑀦𑀸𑀢𑀺 𑀧𑀝𑀺𑀧𑀓𑁆𑀔𑀁 𑀇𑀘𑁆𑀙𑀦𑁆𑀢𑁂𑀦. 𑀧𑀘𑁆𑀘𑀸𑀫𑀺𑀢𑁆𑀢𑁂𑀦𑀸𑀢𑀺 𑀧𑀝𑀺𑀯𑀺𑀭𑀼𑀤𑁆𑀥𑁂𑀦 𑀅𑀫𑀺𑀢𑁆𑀢𑁂𑀦. 𑀉𑀪𑀬𑀫𑁆𑀧𑁂𑀢𑀁 𑀲𑀧𑀢𑁆𑀢𑀯𑁂𑀯𑀘𑀦𑀁. 𑀅𑀩𑁆𑀪𑀦𑁆𑀢𑀭𑁂𑀳𑀻𑀢𑀺 𑀅𑀦𑁆𑀢𑁄 𑀉𑀝𑁆𑀞𑀺𑀢𑁂𑀳𑀺 𑀭𑀸𑀕𑀸𑀤𑀻𑀳𑀺.

𑀩𑀸𑀳𑀺𑀭𑁂𑀳𑀻𑀢𑀺 ¶ 𑀲𑀫𑀡𑀸𑀤𑀻𑀳𑀺. 𑀢𑀣𑀸 𑀳𑀺 𑀦𑀁 𑀩𑀸𑀳𑀺𑀭𑀸 𑀤𑁂𑀯𑀤𑀢𑁆𑀢𑀓𑁄𑀓𑀸𑀮𑀺𑀓𑀸𑀤𑀬𑁄 𑀲𑀫𑀡𑀸𑀧𑀺 𑀲𑁄𑀡𑀤𑀡𑁆𑀟𑀓𑀽𑀝𑀤𑀡𑁆𑀟𑀸𑀤𑀬𑁄 𑀩𑁆𑀭𑀸𑀳𑁆𑀫𑀡𑀸𑀧𑀺 𑀲𑀓𑁆𑀓𑀲𑀤𑀺𑀲𑀸 𑀤𑁂𑀯𑀢𑀸𑀧𑀺 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀅𑀦𑀼𑀩𑀦𑁆𑀥𑀫𑀸𑀦𑁄 𑀫𑀸𑀭𑁄𑀧𑀺 𑀩𑀓𑀸𑀤𑀬𑁄 𑀩𑁆𑀭𑀳𑁆𑀫𑀸𑀦𑁄𑀧𑀺 𑀯𑀺𑀓𑁆𑀔𑀫𑁆𑀪𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼.

𑀏𑀢𑁆𑀢𑀸𑀯𑀢𑀸 𑀪𑀕𑀯𑀢𑀸 𑀓𑀫𑁆𑀫𑀜𑁆𑀘 𑀓𑀫𑁆𑀫𑀲𑀭𑀺𑀓𑁆𑀔𑀓𑀜𑁆𑀘 𑀮𑀓𑁆𑀔𑀡𑀜𑁆𑀘 𑀮𑀓𑁆𑀔𑀡𑀸𑀦𑀺𑀲𑀁𑀲𑁄 𑀘 𑀯𑀼𑀢𑁆𑀢𑁄 𑀳𑁄𑀢𑀺. 𑀓𑀫𑁆𑀫𑀁 𑀦𑀸𑀫 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀤𑀴𑁆𑀳𑀯𑀻𑀭𑀺𑀬𑁂𑀦 𑀳𑀼𑀢𑁆𑀯𑀸 𑀓𑀢𑀁 𑀓𑀫𑁆𑀫𑀁. 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀸𑀫 𑀤𑀴𑁆𑀳𑁂𑀦 𑀳𑀼𑀢𑁆𑀯𑀸 𑀓𑀢𑀪𑀸𑀯𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀚𑀸𑀦𑀸𑀢𑀽𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁. 𑀮𑀓𑁆𑀔𑀡𑀁 𑀦𑀸𑀫 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀸. 𑀮𑀓𑁆𑀔𑀡𑀸𑀦𑀺𑀲𑀁𑀲𑁄 𑀦𑀸𑀫 𑀧𑀘𑁆𑀘𑀢𑁆𑀣𑀺𑀓𑁂𑀳𑀺 𑀅𑀯𑀺𑀓𑁆𑀔𑀫𑁆𑀪𑀦𑀻𑀬𑀢𑀸.

𑁨𑁦𑁩. 𑀢𑀢𑁆𑀣𑁂𑀢𑀁 ¶ 𑀯𑀼𑀘𑁆𑀘𑀢𑀻𑀢𑀺 𑀢𑀢𑁆𑀣 𑀯𑀼𑀢𑁆𑀢𑁂 𑀓𑀫𑁆𑀫𑀸𑀤𑀺𑀪𑁂𑀤𑁂 𑀅𑀧𑀭𑀫𑁆𑀧𑀺 𑀇𑀤𑀁 𑀯𑀼𑀘𑁆𑀘𑀢𑀺, 𑀕𑀸𑀣𑀸𑀩𑀦𑁆𑀥𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀢𑀸 𑀧𑀦 𑀕𑀸𑀣𑀸 𑀧𑁄𑀭𑀸𑀡𑀓𑀢𑁆𑀣𑁂𑀭𑀸 ‘‘𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀞𑀧𑀺𑀢𑀸 𑀯𑀡𑁆𑀡𑀦𑀸𑀕𑀸𑀣𑀸’’𑀢𑀺 𑀯𑀢𑁆𑀯𑀸 𑀕𑀢𑀸. 𑀅𑀧𑀭𑀪𑀸𑀕𑁂 𑀣𑁂𑀭𑀸 ‘‘𑀏𑀓𑀧𑀤𑀺𑀓𑁄 𑀅𑀢𑁆𑀣𑀼𑀤𑁆𑀥𑀸𑀭𑁄’’𑀢𑀺 𑀆𑀳𑀁𑀲𑀼.

𑀢𑀢𑁆𑀣 ¶ 𑀲𑀘𑁆𑀘𑁂𑀢𑀺 𑀯𑀘𑀻𑀲𑀘𑁆𑀘𑁂. 𑀥𑀫𑁆𑀫𑁂𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁂. 𑀤𑀫𑁂𑀢𑀺 𑀇𑀦𑁆𑀤𑁆𑀭𑀺𑀬𑀤𑀫𑀦𑁂. 𑀲𑀁𑀬𑀫𑁂𑀢𑀺 𑀲𑀻𑀮𑀲𑀁𑀬𑀫𑁂. ‘‘𑀲𑁄𑀘𑁂𑀬𑁆𑀬𑀲𑀻𑀮𑀸𑀮𑀬𑀼𑀧𑁄𑀲𑀣𑁂𑀲𑀼 𑀘𑀸’’𑀢𑀺 𑀏𑀢𑁆𑀣 𑀓𑀸𑀬𑀲𑁄𑀘𑁂𑀬𑁆𑀬𑀸𑀤𑀺 𑀢𑀺𑀯𑀺𑀥𑀁 𑀲𑁄𑀘𑁂𑀬𑁆𑀬𑀁. 𑀆𑀮𑀬𑀪𑀽𑀢𑀁 𑀲𑀻𑀮𑀫𑁂𑀯 𑀲𑀻𑀮𑀸𑀮𑀬𑁄. 𑀉𑀧𑁄𑀲𑀣𑀓𑀫𑁆𑀫𑀁 𑀉𑀧𑁄𑀲𑀣𑁄. 𑀅𑀳𑀺𑀁𑀲𑀸𑀬𑀸𑀢𑀺 𑀅𑀯𑀺𑀳𑀺𑀁𑀲𑀸𑀬. 𑀲𑀫𑀢𑁆𑀢𑀫𑀸𑀘𑀭𑀻𑀢𑀺 𑀲𑀓𑀮𑀁 𑀅𑀘𑀭𑀺.

𑀅𑀦𑁆𑀯𑀪𑀻𑀢𑀺 𑀅𑀦𑀼𑀪𑀯𑀺. 𑀯𑁂𑀬𑁆𑀬𑀜𑁆𑀚𑀦𑀺𑀓𑀸𑀢𑀺 𑀮𑀓𑁆𑀔𑀡𑀧𑀸𑀞𑀓𑀸. 𑀧𑀭𑀸𑀪𑀺𑀪𑀽𑀢𑀺 𑀧𑀭𑁂 𑀅𑀪𑀺𑀪𑀯𑀦𑀲𑀫𑀢𑁆𑀣𑁄. 𑀲𑀢𑁆𑀢𑀼𑀪𑀻𑀢𑀺 𑀲𑀧𑀢𑁆𑀢𑁂𑀳𑀺 𑀅𑀓𑁆𑀔𑀫𑁆𑀪𑀺𑀬𑁄 𑀳𑁄𑀢𑀺.

𑀦 𑀲𑁄 𑀕𑀘𑁆𑀙𑀢𑀺 𑀚𑀸𑀢𑀼 𑀔𑀫𑁆𑀪𑀦𑀦𑁆𑀢𑀺 𑀲𑁄 𑀏𑀓𑀁𑀲𑁂𑀦𑁂𑀯 𑀅𑀕𑁆𑀕𑀧𑀼𑀕𑁆𑀕𑀮𑁄 𑀯𑀺𑀓𑁆𑀔𑀫𑁆𑀪𑁂𑀢𑀩𑁆𑀩𑀢𑀁 𑀦 𑀕𑀘𑁆𑀙𑀢𑀺. 𑀏𑀲𑀸 𑀳𑀺 𑀢𑀲𑁆𑀲 𑀥𑀫𑁆𑀫𑀢𑀸𑀢𑀺 𑀢𑀲𑁆𑀲 𑀳𑀺 𑀏𑀲𑀸 𑀥𑀫𑁆𑀫𑀢𑀸 𑀅𑀬𑀁 𑀲𑀪𑀸𑀯𑁄.

𑀧𑀸𑀤𑀢𑀮𑀘𑀓𑁆𑀓𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁦𑁪. 𑀉𑀩𑁆𑀩𑁂𑀕𑀉𑀢𑁆𑀢𑀸𑀲𑀪𑀬𑀦𑁆𑀢𑀺 𑀉𑀩𑁆𑀩𑁂𑀕𑀪𑀬𑀜𑁆𑀘𑁂𑀯 𑀉𑀢𑁆𑀢𑀸𑀲𑀪𑀬𑀜𑁆𑀘. 𑀢𑀢𑁆𑀣 𑀘𑁄𑀭𑀢𑁄 𑀯𑀸 𑀭𑀸𑀚𑀢𑁄 𑀯𑀸 𑀧𑀘𑁆𑀘𑀢𑁆𑀣𑀺𑀓𑀢𑁄 𑀯𑀸 𑀯𑀺𑀮𑁄𑀧𑀦𑀩𑀦𑁆𑀥𑀦𑀸𑀤𑀺𑀦𑀺𑀲𑁆𑀲𑀬𑀁 𑀪𑀬𑀁 𑀉𑀩𑁆𑀩𑁂𑀕𑁄 𑀦𑀸𑀫, 𑀢𑀁𑀫𑀼𑀳𑀼𑀢𑁆𑀢𑀺𑀓𑀁 𑀘𑀡𑁆𑀟𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀦𑀺 𑀯𑀸 𑀅𑀳𑀺𑀬𑀓𑁆𑀔𑀸𑀤𑀬𑁄 𑀯𑀸 𑀧𑀝𑀺𑀘𑁆𑀘 𑀮𑁄𑀫𑀳𑀁𑀲𑀦𑀓𑀭𑀁 𑀪𑀬𑀁 𑀉𑀢𑁆𑀢𑀸𑀲𑀪𑀬𑀁 𑀦𑀸𑀫. 𑀢𑀁 𑀲𑀩𑁆𑀩𑀁 𑀅𑀧𑀦𑀼𑀤𑀺𑀢𑀸 ¶ 𑀯𑀽𑀧𑀲𑀫𑁂𑀢𑀸. 𑀲𑀁𑀯𑀺𑀥𑀸𑀢𑀸𑀢𑀺 𑀲𑀁𑀯𑀺𑀤𑀳𑀺𑀢𑀸. 𑀓𑀣𑀁 𑀲𑀁𑀯𑀺𑀤𑀳𑀢𑀺? 𑀅𑀝𑀯𑀺𑀬𑀁 𑀲𑀸𑀲𑀗𑁆𑀓𑀝𑁆𑀞𑀸𑀦𑁂𑀲𑀼 𑀤𑀸𑀦𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣 𑀆𑀕𑀢𑁂 𑀪𑁄𑀚𑁂𑀢𑁆𑀯𑀸 𑀫𑀦𑀼𑀲𑁆𑀲𑁂 𑀤𑀢𑁆𑀯𑀸 𑀅𑀢𑀺𑀯𑀸𑀳𑁂𑀢𑀺, 𑀢𑀁 𑀞𑀸𑀦𑀁 𑀧𑀯𑀺𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀁 𑀫𑀦𑀼𑀲𑁆𑀲𑁂 𑀧𑁂𑀲𑁂𑀢𑁆𑀯𑀸 𑀧𑀯𑁂𑀲𑁂𑀢𑀺. 𑀦𑀕𑀭𑀸𑀤𑀻𑀲𑀼𑀧𑀺 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀆𑀭𑀓𑁆𑀔𑀁 𑀞𑀧𑁂𑀢𑀺, 𑀏𑀯𑀁 𑀲𑀁𑀯𑀺𑀤𑀳𑀢𑀺. 𑀲𑀧𑀭𑀺𑀯𑀸𑀭𑀜𑁆𑀘 𑀤𑀸𑀦𑀁 𑀅𑀤𑀸𑀲𑀻𑀢𑀺 𑀅𑀦𑁆𑀦𑀁 𑀧𑀸𑀦𑀦𑁆𑀢𑀺 𑀤𑀲𑀯𑀺𑀥𑀁 𑀤𑀸𑀦𑀯𑀢𑁆𑀣𑀼𑀁.

𑀢𑀢𑁆𑀣 𑀅𑀦𑁆𑀦𑀦𑁆𑀢𑀺 𑀬𑀸𑀕𑀼𑀪𑀢𑁆𑀢𑀁. 𑀢𑀁 𑀤𑀤𑀦𑁆𑀢𑁄 𑀦 𑀤𑁆𑀯𑀸𑀭𑁂 𑀞𑀧𑁂𑀢𑁆𑀯𑀸 𑀅𑀤𑀸𑀲𑀺, 𑀅𑀣 𑀔𑁄 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀳𑀭𑀺𑀢𑀼𑀧𑀮𑀺𑀢𑁆𑀢𑀝𑁆𑀞𑀸𑀦𑁂 𑀮𑀸𑀚𑀸 𑀘𑁂𑀯 𑀧𑀼𑀧𑁆𑀨𑀸𑀦𑀺 𑀘 𑀯𑀺𑀓𑀺𑀭𑀺𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀕𑀦𑁆𑀥𑀥𑀽𑀫𑀸𑀤𑀻𑀳𑀺 𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀁 𑀅𑀤𑀸𑀲𑀺. 𑀬𑀸𑀕𑀼𑀁 𑀤𑁂𑀦𑁆𑀢𑁄 𑀘 𑀲𑀩𑁆𑀬𑀜𑁆𑀚𑀦𑀁 𑀅𑀤𑀸𑀲𑀺. 𑀬𑀸𑀕𑀼𑀧𑀸𑀦𑀸𑀯𑀲𑀸𑀦𑁂 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀓𑀁 𑀅𑀦𑀦𑁆𑀢𑀁 𑀔𑀚𑁆𑀚𑀓𑀁 𑀤𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑁂 𑀅𑀦𑁂𑀓𑀲𑀽𑀧𑀁 𑀅𑀦𑁂𑀓𑀩𑁆𑀬𑀜𑁆𑀚𑀦𑀁 𑀧𑀡𑀻𑀢𑀪𑁄𑀚𑀦𑀁 𑀅𑀤𑀸𑀲𑀺 ¶ . 𑀧𑀸𑀦𑀁 𑀤𑁂𑀦𑁆𑀢𑁄 𑀅𑀫𑁆𑀩𑀧𑀸𑀦𑀸𑀤𑀺𑀅𑀝𑁆𑀞𑀯𑀺𑀥𑀁 ¶ 𑀧𑀸𑀦𑀁 𑀅𑀤𑀸𑀲𑀺, 𑀢𑀫𑁆𑀧𑀺 𑀬𑀸𑀕𑀼𑀪𑀢𑁆𑀢𑀁 𑀤𑀢𑁆𑀯𑀸. 𑀯𑀢𑁆𑀣𑀁 𑀤𑁂𑀦𑁆𑀢𑁄 𑀦 𑀲𑀼𑀤𑁆𑀥𑀯𑀢𑁆𑀣𑀫𑁂𑀯 𑀅𑀤𑀸𑀲𑀺, 𑀏𑀓𑀧𑀝𑁆𑀝𑀤𑀼𑀧𑀝𑁆𑀝𑀸𑀤𑀺𑀧𑀳𑁄𑀦𑀓𑀁 𑀧𑀦 𑀤𑀢𑁆𑀯𑀸 𑀲𑀼𑀘𑀺𑀫𑁆𑀧𑀺 𑀅𑀤𑀸𑀲𑀺, 𑀲𑀼𑀢𑁆𑀢𑀫𑁆𑀧𑀺 𑀅𑀤𑀸𑀲𑀺, 𑀲𑀼𑀢𑁆𑀢𑀁 𑀯𑀝𑁆𑀝𑁂𑀲𑀺, 𑀲𑀽𑀘𑀺𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑁂 𑀪𑀺𑀓𑁆𑀔𑀽𑀦𑀁 𑀆𑀲𑀦𑀸𑀦𑀺, 𑀬𑀸𑀕𑀼𑀪𑀢𑁆𑀢𑀁, 𑀧𑀸𑀤𑀫𑀓𑁆𑀔𑀦𑀁, 𑀧𑀺𑀝𑁆𑀞𑀺𑀫𑀓𑁆𑀔𑀦𑀁, 𑀭𑀚𑀦𑀁, 𑀧𑀡𑁆𑀟𑀼𑀧𑀮𑀸𑀲𑀁, 𑀭𑀚𑀦𑀤𑁄𑀡𑀺𑀓𑀁, 𑀅𑀦𑁆𑀢𑀫𑀲𑁄 𑀘𑀻𑀯𑀭𑀭𑀚𑀦𑀓𑀁 𑀓𑀧𑁆𑀧𑀺𑀬𑀓𑀸𑀭𑀓𑀫𑁆𑀧𑀺 𑀅𑀤𑀸𑀲𑀺.

𑀬𑀸𑀦𑀦𑁆𑀢𑀺 𑀉𑀧𑀸𑀳𑀦𑀁. 𑀢𑀁 𑀤𑀤𑀦𑁆𑀢𑁄𑀧𑀺 𑀉𑀧𑀸𑀳𑀦𑀢𑁆𑀣𑀯𑀺𑀓𑀁 𑀉𑀧𑀸𑀳𑀦𑀤𑀡𑁆𑀟𑀓𑀁 𑀫𑀓𑁆𑀔𑀦𑀢𑁂𑀮𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀺 𑀘 𑀅𑀦𑁆𑀦𑀸𑀤𑀻𑀦𑀺 𑀢𑀲𑁆𑀲𑁂𑀯 𑀧𑀭𑀺𑀯𑀸𑀭𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀫𑀸𑀮𑀁 𑀤𑁂𑀦𑁆𑀢𑁄𑀧𑀺 𑀦 𑀲𑀼𑀤𑁆𑀥𑀫𑀸𑀮𑀫𑁂𑀯 𑀅𑀤𑀸𑀲𑀺, 𑀅𑀣 𑀔𑁄 𑀦𑀁 𑀕𑀦𑁆𑀥𑁂𑀳𑀺 𑀫𑀺𑀲𑁆𑀲𑁂𑀢𑁆𑀯𑀸 𑀳𑁂𑀝𑁆𑀞𑀺𑀫𑀸𑀦𑀺 𑀘𑀢𑁆𑀢𑀸𑀭𑀺 𑀢𑀲𑁆𑀲𑁂𑀯 𑀧𑀭𑀺𑀯𑀸𑀭𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀩𑁄𑀥𑀺𑀘𑁂𑀢𑀺𑀬𑀆𑀲𑀦𑀧𑁄𑀢𑁆𑀣𑀓𑀸𑀤𑀺𑀧𑀽𑀚𑀦𑀢𑁆𑀣𑀸𑀬 𑀘𑁂𑀯 𑀘𑁂𑀢𑀺𑀬𑀖𑀭𑀥𑀽𑀧𑀦𑀢𑁆𑀣𑀸𑀬 𑀘 𑀕𑀦𑁆𑀥𑀁 𑀤𑁂𑀦𑁆𑀢𑁄𑀧𑀺 𑀦 𑀲𑀼𑀤𑁆𑀥𑀕𑀦𑁆𑀥𑀫𑁂𑀯 𑀅𑀤𑀸𑀲𑀺, 𑀕𑀦𑁆𑀥𑀧𑀺𑀲𑀦𑀓𑀦𑀺𑀲𑀤𑀸𑀬 𑀘𑁂𑀯 𑀧𑀓𑁆𑀔𑀺𑀧𑀦𑀓𑀪𑀸𑀚𑀦𑁂𑀦 𑀘 𑀲𑀤𑁆𑀥𑀺𑀁 𑀳𑁂𑀝𑁆𑀞𑀺𑀫𑀸𑀦𑀺 𑀧𑀜𑁆𑀘 𑀢𑀲𑁆𑀲 𑀧𑀭𑀺𑀯𑀸𑀭𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀘𑁂𑀢𑀺𑀬𑀧𑀽𑀚𑀸𑀤𑀻𑀦𑀁 𑀅𑀢𑁆𑀣𑀸𑀬 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸𑀘𑀻𑀦𑀧𑀺𑀝𑁆𑀞𑀸𑀤𑀺𑀯𑀺𑀮𑁂𑀧𑀦𑀁 𑀤𑁂𑀦𑁆𑀢𑁄𑀧𑀺 𑀦 𑀲𑀼𑀤𑁆𑀥𑀯𑀺𑀮𑁂𑀧𑀦𑀫𑁂𑀯 𑀅𑀤𑀸𑀲𑀺, 𑀯𑀺𑀮𑁂𑀧𑀦𑀪𑀸𑀚𑀦𑁂𑀦 𑀲𑀤𑁆𑀥𑀺𑀁 𑀳𑁂𑀝𑁆𑀞𑀺𑀫𑀸𑀦𑀺 𑀙 𑀢𑀲𑁆𑀲 𑀧𑀭𑀺𑀯𑀸𑀭𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀲𑁂𑀬𑁆𑀬𑀸𑀢𑀺 𑀫𑀜𑁆𑀘𑀧𑀻𑀞𑀁. 𑀢𑀁 𑀤𑁂𑀦𑁆𑀢𑁄𑀧𑀺 𑀦 𑀲𑀼𑀤𑁆𑀥𑀓𑀫𑁂𑀯 𑀅𑀤𑀸𑀲𑀺, 𑀓𑁄𑀚𑀯𑀓𑀫𑁆𑀩𑀮𑀧𑀘𑁆𑀘𑀢𑁆𑀣𑀭𑀡𑀫𑀜𑁆𑀘𑀧𑁆𑀧𑀝𑀺𑀧𑀸𑀤𑀓𑁂𑀳𑀺 𑀲𑀤𑁆𑀥𑀺𑀁 𑀅𑀦𑁆𑀢𑀫𑀲𑁄 𑀫𑀗𑁆𑀕𑀼𑀮𑀲𑁄𑀥𑀦𑀤𑀡𑁆𑀟𑀓𑀁 𑀳𑁂𑀝𑁆𑀞𑀺𑀫𑀸𑀦𑀺 𑀘 𑀲𑀢𑁆𑀢 𑀢𑀲𑁆𑀲 𑀧𑀭𑀺𑀯𑀸𑀭𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀆𑀯𑀲𑀣𑀁 ¶ 𑀤𑁂𑀦𑁆𑀢𑁄𑀧𑀺 𑀦 𑀕𑁂𑀳𑀫𑀢𑁆𑀢𑀫𑁂𑀯 𑀅𑀤𑀸𑀲𑀺, 𑀅𑀣 𑀔𑁄 𑀦𑀁 𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑀧𑀝𑀺𑀫𑀡𑁆𑀟𑀺𑀢𑀁 𑀲𑀼𑀧𑀜𑁆𑀜𑀢𑁆𑀢𑀁 𑀫𑀜𑁆𑀘𑀧𑀻𑀞𑀁 𑀓𑀸𑀭𑁂𑀢𑁆𑀯𑀸 𑀳𑁂𑀝𑁆𑀞𑀺𑀫𑀸𑀦𑀺 𑀅𑀝𑁆𑀞 𑀢𑀲𑁆𑀲 𑀧𑀭𑀺𑀯𑀸𑀭𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀧𑀤𑀻𑀧𑁂𑀬𑁆𑀬𑀦𑁆𑀢𑀺 𑀧𑀤𑀻𑀧𑀢𑁂𑀮𑀁. 𑀢𑀁 𑀤𑁂𑀦𑁆𑀢𑁄 𑀘𑁂𑀢𑀺𑀬𑀗𑁆𑀕𑀡𑁂 𑀩𑁄𑀥𑀺𑀬𑀗𑁆𑀕𑀡𑁂 𑀥𑀫𑁆𑀫𑀲𑁆𑀲𑀯𑀦𑀕𑁆𑀕𑁂 𑀯𑀲𑀦𑀕𑁂𑀳𑁂 𑀧𑁄𑀢𑁆𑀣𑀓𑀯𑀸𑀘𑀦𑀝𑁆𑀞𑀸𑀦𑁂 𑀇𑀫𑀺𑀦𑀸 𑀤𑀻𑀧𑀁 𑀚𑀸𑀮𑀸𑀧𑁂𑀣𑀸𑀢𑀺 𑀦 𑀲𑀼𑀤𑁆𑀥𑀢𑁂𑀮𑀫𑁂𑀯 𑀅𑀤𑀸𑀲𑀺, 𑀯𑀝𑁆𑀝𑀺 𑀓𑀧𑀮𑁆𑀮𑀓𑀢𑁂𑀮𑀪𑀸𑀚𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀳𑁂𑀝𑁆𑀞𑀺𑀫𑀸𑀦𑀺 𑀦𑀯 𑀢𑀲𑁆𑀲 𑀧𑀭𑀺𑀯𑀸𑀭𑀁 𑀓𑀢𑁆𑀯𑀸 𑀅𑀤𑀸𑀲𑀺. 𑀲𑀼𑀯𑀺𑀪𑀢𑁆𑀢𑀦𑁆𑀢𑀭𑀸𑀦𑀻𑀢𑀺 𑀲𑀼𑀯𑀺𑀪𑀢𑁆𑀢𑀅𑀦𑁆𑀢𑀭𑀸𑀦𑀺.

𑀭𑀸𑀚𑀸𑀦𑁄𑀢𑀺 𑀅𑀪𑀺𑀲𑀺𑀢𑁆𑀢𑀸. 𑀪𑁄𑀕𑀺𑀬𑀸𑀢𑀺 𑀪𑁄𑀚𑀓𑀸 𑀓𑀼𑀫𑀸𑀭𑀸𑀢𑀺 𑀭𑀸𑀚𑀓𑀼𑀫𑀸𑀭𑀸. 𑀇𑀥 ¶ 𑀓𑀫𑁆𑀫𑀁 𑀦𑀸𑀫 𑀲𑀧𑀭𑀺𑀯𑀸𑀭𑀁 𑀤𑀸𑀦𑀁. 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀸𑀫 𑀲𑀧𑀭𑀺𑀯𑀸𑀭𑀁 𑀓𑀢𑁆𑀯𑀸 𑀤𑀸𑀦𑀁 𑀅𑀤𑀸𑀲𑀻𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀲𑀤𑁂𑀯𑀓𑁄 𑀮𑁄𑀓𑁄 𑀚𑀸𑀦𑀸𑀢𑀽𑀢𑀺 𑀦𑀺𑀩𑁆𑀩𑀢𑁆𑀢𑀁 𑀘𑀓𑁆𑀓𑀮𑀓𑁆𑀔𑀡𑀁. 𑀮𑀓𑁆𑀔𑀡𑀁 𑀦𑀸𑀫 𑀢𑀤𑁂𑀯 𑀘𑀓𑁆𑀓𑀮𑀓𑁆𑀔𑀡𑀁. 𑀆𑀦𑀺𑀲𑀁𑀲𑁄 𑀫𑀳𑀸𑀧𑀭𑀺𑀯𑀸𑀭𑀢𑀸.

𑁨𑁦𑁫. 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀻𑀢𑀺 𑀇𑀫𑀸 𑀢𑀤𑀢𑁆𑀣𑀧𑀭𑀺𑀤𑀻𑀧𑀦𑀸 𑀕𑀸𑀣𑀸 𑀯𑀼𑀘𑁆𑀘𑀦𑁆𑀢𑀺. 𑀤𑀼𑀯𑀺𑀥𑀸 𑀳𑀺 𑀕𑀸𑀣𑀸 𑀳𑁄𑀦𑁆𑀢𑀺 𑁋 𑀢𑀤𑀢𑁆𑀣𑀧𑀭𑀺𑀤𑀻𑀧𑀦𑀸 𑀘 𑀯𑀺𑀲𑁂𑀲𑀢𑁆𑀣𑀧𑀭𑀺𑀤𑀻𑀧𑀦𑀸 𑀘. 𑀢𑀢𑁆𑀣 𑀧𑀸𑀴𑀺𑀆𑀕𑀢𑀫𑁂𑀯 𑀅𑀢𑁆𑀣𑀁 𑀧𑀭𑀺𑀤𑀻𑀧𑀦𑀸 𑀢𑀤𑀢𑁆𑀣𑀧𑀭𑀺𑀤𑀻𑀧𑀦𑀸 𑀦𑀸𑀫. 𑀧𑀸𑀴𑀺𑀬𑀁 𑀅𑀦𑀸𑀕𑀢𑀁 𑀧𑀭𑀺𑀤𑀻𑀧𑀦𑀸 𑀯𑀺𑀲𑁂𑀲𑀢𑁆𑀣𑀧𑀭𑀺𑀤𑀻𑀧𑀦𑀸 𑀦𑀸𑀫. 𑀇𑀫𑀸 𑀧𑀦 𑀢𑀤𑀢𑁆𑀣𑀧𑀭𑀺𑀤𑀻𑀧𑀦𑀸. 𑀢𑀢𑁆𑀣 𑀧𑀼𑀭𑁂𑀢𑀺 𑀧𑀼𑀩𑁆𑀩𑁂. 𑀧𑀼𑀭𑀢𑁆𑀣𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀼𑀭𑀺𑀫𑀸𑀲𑀼 𑀚𑀸𑀢𑀻𑀲𑀽𑀢𑀺 𑀇𑀫𑀺𑀲𑁆𑀲𑀸 𑀚𑀸𑀢𑀺𑀬𑀸 ¶ 𑀧𑀼𑀩𑁆𑀩𑁂𑀓𑀢𑀓𑀫𑁆𑀫𑀧𑀝𑀺𑀓𑁆𑀔𑁂𑀧𑀤𑀻𑀧𑀦𑀁. 𑀉𑀩𑁆𑀩𑁂𑀕𑀉𑀢𑁆𑀢𑀸𑀲𑀪𑀬𑀸𑀧𑀦𑀽𑀤𑀦𑁄𑀢𑀺 𑀉𑀩𑁆𑀩𑁂𑀕𑀪𑀬𑀲𑁆𑀲 𑀘 𑀉𑀢𑁆𑀢𑀸𑀲𑀪𑀬𑀲𑁆𑀲 𑀘 𑀅𑀧𑀦𑀽𑀤𑀦𑁄. 𑀉𑀲𑁆𑀲𑀼𑀓𑁄𑀢𑀺 𑀅𑀥𑀺𑀫𑀼𑀢𑁆𑀢𑁄.

𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑀦𑁆𑀢𑀺 𑀲𑀢𑁂𑀦 𑀲𑀢𑁂𑀦 𑀧𑀼𑀜𑁆𑀜𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀁 𑀏𑀓𑁂𑀓𑀁 𑀮𑀓𑁆𑀔𑀡𑀁. 𑀏𑀯𑀁 𑀲𑀦𑁆𑀢𑁂 𑀬𑁄 𑀓𑁄𑀘𑀺 𑀩𑀼𑀤𑁆𑀥𑁄 𑀪𑀯𑁂𑀬𑁆𑀬𑀸𑀢𑀺 𑀦 𑀭𑁄𑀘𑀬𑀺𑀁𑀲𑀼, 𑀅𑀦𑀦𑁆𑀢𑁂𑀲𑀼 𑀧𑀦 𑀘𑀓𑁆𑀓𑀯𑀸𑀴𑁂𑀲𑀼 𑀲𑀩𑁆𑀩𑁂 𑀲𑀢𑁆𑀢𑀸 𑀏𑀓𑁂𑀓𑀁 𑀓𑀫𑁆𑀫𑀁 𑀲𑀢𑀓𑁆𑀔𑀢𑁆𑀢𑀼𑀁 𑀓𑀭𑁂𑀬𑁆𑀬𑀼𑀁, 𑀏𑀢𑁆𑀢𑀓𑁂𑀳𑀺 𑀚𑀦𑁂𑀳𑀺 𑀓𑀢𑀁 𑀓𑀫𑁆𑀫𑀁 𑀩𑁄𑀥𑀺𑀲𑀢𑁆𑀢𑁄 𑀏𑀓𑁄𑀯 𑀏𑀓𑁂𑀓𑀁 𑀲𑀢𑀕𑀼𑀡𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄. 𑀢𑀲𑁆𑀫𑀸 ‘‘𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑁄’’𑀢𑀺 𑀇𑀫𑀫𑀢𑁆𑀣𑀁 𑀭𑁄𑀘𑀬𑀺𑀁𑀲𑀼. 𑀫𑀦𑀼𑀲𑁆𑀲𑀸𑀲𑀼𑀭𑀲𑀓𑁆𑀓𑀭𑀓𑁆𑀔𑀲𑀸𑀢𑀺 𑀫𑀦𑀼𑀲𑁆𑀲𑀸 𑀘 𑀅𑀲𑀼𑀭𑀸 𑀘 𑀲𑀓𑁆𑀓𑀸 𑀘 𑀭𑀓𑁆𑀔𑀲𑀸 𑀘.

𑀆𑀬𑀢𑀧𑀡𑁆𑀳𑀺𑀢𑀸𑀤𑀺𑀢𑀺𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁦𑁬. 𑀅𑀦𑁆𑀢𑀭𑀸𑀢𑀺 𑀧𑀝𑀺𑀲𑀦𑁆𑀥𑀺𑀢𑁄 𑀲𑀭𑀲𑀘𑀼𑀢𑀺𑀬𑀸 𑀅𑀦𑁆𑀢𑀭𑁂. 𑀇𑀥 𑀓𑀫𑁆𑀫𑀁 𑀦𑀸𑀫 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀺. 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀸𑀫 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑁄𑀦𑁆𑀢𑁄 𑀧𑀤𑀲𑀤𑁆𑀤𑀲𑀯𑀦𑀪𑀬𑀸 ¶ 𑀅𑀕𑁆𑀕𑀕𑁆𑀕𑀧𑀸𑀤𑁂𑀳𑀺 𑀅𑀓𑁆𑀓𑀫𑀦𑁆𑀢𑀸 𑀕𑀦𑁆𑀢𑁆𑀯𑀸 𑀧𑀭𑀁 𑀧𑀸𑀢𑁂𑀦𑁆𑀢𑀺. 𑀅𑀣 𑀢𑁂 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀢𑁂𑀲𑀁 𑀢𑀁 𑀓𑀫𑁆𑀫𑀁 𑀚𑀦𑁄 𑀚𑀸𑀦𑀸𑀢𑀽𑀢𑀺 𑀅𑀦𑁆𑀢𑁄𑀯𑀗𑁆𑀓𑀧𑀸𑀤𑀸 𑀯𑀸 𑀩𑀳𑀺𑀯𑀗𑁆𑀓𑀧𑀸𑀤𑀸 𑀯𑀸 𑀉𑀓𑁆𑀓𑀼𑀝𑀺𑀓𑀧𑀸𑀤𑀸 𑀯𑀸 𑀅𑀕𑁆𑀕𑀓𑁄𑀡𑁆𑀟𑀸 𑀯𑀸 𑀧𑀡𑁆𑀳𑀺𑀓𑁄𑀡𑁆𑀟𑀸 𑀯𑀸 𑀪𑀯𑀦𑁆𑀢𑀺. 𑀅𑀕𑁆𑀕𑀧𑀸𑀤𑁂𑀳𑀺 𑀕𑀦𑁆𑀢𑁆𑀯𑀸 𑀧𑀭𑀲𑁆𑀲 𑀅𑀫𑀸𑀭𑀺𑀢𑀪𑀸𑀯𑀁 𑀧𑀦 𑀢𑀣𑀸𑀕𑀢𑀲𑁆𑀲 𑀲𑀤𑁂𑀯𑀓𑁄 𑀮𑁄𑀓𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀚𑀸𑀦𑀸𑀢𑀽𑀢𑀺 𑀆𑀬𑀢𑀧𑀡𑁆𑀳𑀺 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀢𑀺 ¶ . 𑀢𑀣𑀸 𑀧𑀭𑀁 𑀖𑀸𑀢𑁂𑀦𑁆𑀢𑀸 𑀉𑀦𑁆𑀦𑀢𑀓𑀸𑀬𑁂𑀦 𑀕𑀘𑁆𑀙𑀦𑁆𑀢𑀸 𑀅𑀜𑁆𑀜𑁂 𑀧𑀲𑁆𑀲𑀺𑀲𑁆𑀲𑀦𑁆𑀢𑀻𑀢𑀺 𑀑𑀦𑀢𑀸 𑀕𑀦𑁆𑀢𑁆𑀯𑀸 𑀧𑀭𑀁 𑀖𑀸𑀢𑁂𑀦𑁆𑀢𑀺. 𑀅𑀣 𑀢𑁂 𑀏𑀯𑀫𑀺𑀫𑁂 𑀕𑀦𑁆𑀢𑁆𑀯𑀸 𑀧𑀭𑀁 𑀖𑀸𑀢𑀬𑀺𑀁𑀲𑀽𑀢𑀺 𑀦𑁂𑀲𑀁 𑀢𑀁 𑀓𑀫𑁆𑀫𑀁 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀧𑀭𑁄 𑀚𑀸𑀦𑀸𑀢𑀽𑀢𑀺 𑀔𑀼𑀚𑁆𑀚𑀸 𑀯𑀸 𑀯𑀸𑀫𑀦𑀸 𑀯𑀸 𑀧𑀻𑀞𑀲𑀧𑁆𑀧𑀺 𑀯𑀸 𑀪𑀯𑀦𑁆𑀢𑀺. 𑀢𑀣𑀸𑀕𑀢𑀲𑁆𑀲 𑀧𑀦 𑀏𑀯𑀁 𑀕𑀦𑁆𑀢𑁆𑀯𑀸 𑀧𑀭𑁂𑀲𑀁 𑀅𑀖𑀸𑀢𑀺𑀢𑀪𑀸𑀯𑀁 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀲𑀤𑁂𑀯𑀓𑁄 𑀮𑁄𑀓𑁄 𑀚𑀸𑀦𑀸𑀢𑀽𑀢𑀺 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀢𑀺. 𑀢𑀣𑀸 𑀧𑀭𑀁 𑀖𑀸𑀢𑁂𑀦𑁆𑀢𑀸 𑀆𑀯𑀼𑀥𑀁 𑀯𑀸 𑀫𑀼𑀕𑁆𑀕𑀭𑀁 𑀯𑀸 𑀕𑀡𑁆𑀳𑀺𑀢𑁆𑀯𑀸 𑀫𑀼𑀝𑁆𑀞𑀺𑀓𑀢𑀳𑀢𑁆𑀣𑀸 𑀧𑀭𑀁 𑀖𑀸𑀢𑁂𑀦𑁆𑀢𑀺. 𑀢𑁂 𑀏𑀯𑀁 𑀢𑁂𑀲𑀁 𑀧𑀭𑀲𑁆𑀲 𑀖𑀸𑀢𑀺𑀢𑀪𑀸𑀯𑀁 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀚𑀦𑁄 𑀚𑀸𑀦𑀸𑀢𑀽𑀢𑀺 𑀭𑀲𑁆𑀲𑀗𑁆𑀕𑀼𑀮𑀻 𑀯𑀸 𑀭𑀲𑁆𑀲𑀳𑀢𑁆𑀣𑀸 𑀯𑀸 𑀯𑀗𑁆𑀓𑀗𑁆𑀕𑀼𑀮𑀻 𑀯𑀸 𑀨𑀡𑀳𑀢𑁆𑀣𑀓𑀸 𑀯𑀸 𑀪𑀯𑀦𑁆𑀢𑀺. 𑀢𑀣𑀸𑀕𑀢𑀲𑁆𑀲 𑀧𑀦 𑀏𑀯𑀁 𑀧𑀭𑁂𑀲𑀁 𑀅𑀖𑀸𑀢𑀺𑀢𑀪𑀸𑀯𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀚𑀸𑀦𑀸𑀢𑀽𑀢𑀺 𑀤𑀻𑀖𑀗𑁆𑀕𑀼𑀮𑀺𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀢𑀺. 𑀇𑀤𑀫𑁂𑀢𑁆𑀣 𑀓𑀫𑁆𑀫𑀲𑀭𑀺𑀓𑁆𑀔𑀓𑀁. 𑀇𑀤𑀫𑁂𑀯 𑀧𑀦 𑀮𑀓𑁆𑀔𑀡𑀢𑁆𑀢𑀬𑀁 𑀮𑀓𑁆𑀔𑀡𑀁 𑀦𑀸𑀫. 𑀤𑀻𑀖𑀸𑀬𑀼𑀓𑀪𑀸𑀯𑁄 𑀮𑀓𑁆𑀔𑀡𑀸𑀦𑀺𑀲𑀁𑀲𑁄.

𑁨𑁦𑁭. 𑀫𑀭𑀡𑀯𑀥𑀪𑀬𑀢𑁆𑀢𑀦𑁄𑀢𑀺 𑀏𑀢𑁆𑀣 𑀫𑀭𑀡𑀲𑀗𑁆𑀔𑀸𑀢𑁄 𑀯𑀥𑁄 𑀫𑀭𑀡𑀯𑀥𑁄, 𑀫𑀭𑀡𑀯𑀥𑀢𑁄 𑀪𑀬𑀁 𑀫𑀭𑀡𑀯𑀥𑀪𑀬𑀁, 𑀢𑀁 𑀅𑀢𑁆𑀢𑀦𑁄 𑀚𑀸𑀦𑀺𑀢𑁆𑀯𑀸. 𑀧𑀝𑀺𑀯𑀺𑀭𑀢𑁄 𑀧𑀭𑀁𑀫𑀸𑀭𑀡𑀸𑀬𑀸𑀢𑀺 𑀬𑀣𑀸 𑀫𑀬𑁆𑀳𑀁 𑀫𑀭𑀡𑀢𑁄 𑀪𑀬𑀁 𑀫𑀫 𑀚𑀻𑀯𑀺𑀢𑀁 ¶ 𑀧𑀺𑀬𑀁, 𑀏𑀯𑀁 𑀧𑀭𑁂𑀲𑀫𑁆𑀧𑀻𑀢𑀺 𑀜𑀢𑁆𑀯𑀸 𑀧𑀭𑀁 𑀫𑀸𑀭𑀡𑀢𑁄 𑀧𑀝𑀺𑀯𑀺𑀭𑀢𑁄 𑀅𑀳𑁄𑀲𑀺. 𑀲𑀼𑀘𑀭𑀺𑀢𑁂𑀦𑀸𑀢𑀺 𑀲𑀼𑀘𑀺𑀡𑁆𑀡𑁂𑀦. 𑀲𑀕𑁆𑀕𑀫𑀕𑀫𑀸𑀢𑀺 𑀲𑀕𑁆𑀕𑀁 𑀕𑀢𑁄.

𑀘𑀯𑀺𑀬 𑀧𑀼𑀦𑀭𑀺𑀥𑀸𑀕𑀢𑁄𑀢𑀺 𑀘𑀯𑀺𑀢𑁆𑀯𑀸 𑀧𑀼𑀦 𑀇𑀥𑀸𑀕𑀢𑁄. 𑀤𑀻𑀖𑀧𑀸𑀲𑀡𑁆𑀳𑀺𑀓𑁄𑀢𑀺 𑀤𑀻𑀖𑀧𑀡𑁆𑀳𑀺𑀓𑁄. 𑀩𑁆𑀭𑀳𑁆𑀫𑀸𑀯 𑀲𑀼𑀚𑀽𑀢𑀺 𑀩𑁆𑀭𑀳𑁆𑀫𑀸 𑀯𑀺𑀬 𑀲𑀼𑀝𑁆𑀞𑀼 𑀉𑀚𑀼.

𑀲𑀼𑀪𑀼𑀚𑁄𑀢𑀺 𑀲𑀼𑀦𑁆𑀤𑀭𑀪𑀼𑀚𑁄. 𑀲𑀼𑀲𑀽𑀢𑀺 𑀫𑀳𑀮𑁆𑀮𑀓𑀓𑀸𑀮𑁂𑀧𑀺 𑀢𑀭𑀼𑀡𑀭𑀽𑀧𑁄. 𑀲𑀼𑀲𑀡𑁆𑀞𑀺𑀢𑁄𑀢𑀺 𑀲𑀼𑀲𑀡𑁆𑀞𑀸𑀦𑀲𑀫𑁆𑀧𑀦𑁆𑀦𑁄. 𑀫𑀼𑀤𑀼𑀢𑀮𑀼𑀦𑀗𑁆𑀕𑀼𑀮𑀺𑀬𑀲𑁆𑀲𑀸𑀢𑀺 𑀫𑀼𑀤𑀽 𑀘 𑀢𑀮𑀼𑀦𑀸 𑀘 𑀅𑀗𑁆𑀕𑀼𑀮𑀺𑀬𑁄 𑀅𑀲𑁆𑀲. 𑀢𑀻𑀪𑀻𑀢𑀺 𑀢𑀻𑀳𑀺. 𑀧𑀼𑀭𑀺𑀲𑀯𑀭𑀕𑁆𑀕𑀮𑀓𑁆𑀔𑀡𑁂𑀳𑀻𑀢𑀺 𑀧𑀼𑀭𑀺𑀲𑀯𑀭𑀲𑁆𑀲 ¶ 𑀅𑀕𑁆𑀕𑀮𑀓𑁆𑀔𑀡𑁂𑀳𑀺. 𑀘𑀺𑀭𑀬𑀧𑀦𑀸𑀬𑀸𑀢𑀺 𑀘𑀺𑀭𑀁 𑀬𑀸𑀧𑀦𑀸𑀬, 𑀤𑀻𑀖𑀸𑀬𑀼𑀓𑀪𑀸𑀯𑀸𑀬.

𑀘𑀺𑀭𑀁 𑀬𑀧𑁂𑀢𑀻𑀢𑀺 𑀘𑀺𑀭𑀁 𑀬𑀸𑀧𑁂𑀢𑀺. 𑀘𑀺𑀭𑀢𑀭𑀁 𑀧𑀩𑁆𑀩𑀚𑀢𑀺 𑀬𑀤𑀺 𑀢𑀢𑁄𑀢𑀺 𑀢𑀢𑁄 𑀘𑀺𑀭𑀢𑀭𑀁 𑀬𑀸𑀧𑁂𑀢𑀺, 𑀬𑀤𑀺 𑀧𑀩𑁆𑀩𑀚𑀢𑀻𑀢𑀺 𑀅𑀢𑁆𑀣𑁄. 𑀬𑀸𑀧𑀬𑀢𑀺 ¶ 𑀘 𑀯𑀲𑀺𑀤𑁆𑀥𑀺𑀪𑀸𑀯𑀦𑀸𑀬𑀸𑀢𑀺 𑀯𑀲𑀺𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀇𑀤𑁆𑀥𑀺𑀪𑀸𑀯𑀦𑀸𑀬 𑀬𑀸𑀧𑁂𑀢𑀺.

𑀲𑀢𑁆𑀢𑀼𑀲𑁆𑀲𑀤𑀢𑀸𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁦𑁮. 𑀭𑀲𑀺𑀢𑀸𑀦𑀦𑁆𑀢𑀺 𑀭𑀲𑀲𑀫𑁆𑀧𑀦𑁆𑀦𑀸𑀦𑀁. ‘‘𑀔𑀸𑀤𑀦𑀻𑀬𑀸𑀦’’𑀦𑁆𑀢𑀺𑀆𑀤𑀻𑀲𑀼 𑀔𑀸𑀤𑀦𑀻𑀬𑀸𑀦𑀺 𑀦𑀸𑀫 𑀧𑀺𑀝𑁆𑀞𑀔𑀚𑁆𑀚𑀓𑀸𑀤𑀻𑀦𑀺. 𑀪𑁄𑀚𑀦𑀻𑀬𑀸𑀦𑀻𑀢𑀺 𑀧𑀜𑁆𑀘 𑀪𑁄𑀚𑀦𑀸𑀦𑀺. 𑀲𑀸𑀬𑀦𑀻𑀬𑀸𑀦𑀻𑀢𑀺 𑀲𑀸𑀬𑀺𑀢𑀩𑁆𑀩𑀸𑀦𑀺 𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀻𑀦𑀺. 𑀮𑁂𑀳𑀦𑀻𑀬𑀸𑀦𑀻𑀢𑀺 𑀦𑀺𑀮𑁆𑀮𑁂𑀳𑀺𑀢𑀩𑁆𑀩𑀸𑀦𑀺 𑀧𑀺𑀝𑁆𑀞𑀧𑀸𑀬𑀸𑀲𑀸𑀤𑀻𑀦𑀺. 𑀧𑀸𑀦𑀸𑀦𑀻𑀢𑀺 𑀅𑀝𑁆𑀞 𑀧𑀸𑀦𑀓𑀸𑀦𑀺.

𑀇𑀥 𑀓𑀫𑁆𑀫𑀁 𑀦𑀸𑀫 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀤𑀺𑀦𑁆𑀦𑀁 𑀇𑀤𑀁 𑀧𑀡𑀻𑀢𑀪𑁄𑀚𑀦𑀤𑀸𑀦𑀁. 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀸𑀫 𑀮𑀽𑀔𑀪𑁄𑀚𑀦𑁂 𑀓𑀼𑀘𑁆𑀙𑀺𑀕𑀢𑁂 𑀮𑁄𑀳𑀺𑀢𑀁 𑀲𑀼𑀲𑁆𑀲𑀢𑀺, 𑀫𑀁𑀲𑀁 𑀫𑀺𑀮𑀸𑀬𑀢𑀺. 𑀢𑀲𑁆𑀫𑀸 𑀮𑀽𑀔𑀤𑀸𑀬𑀓𑀸 𑀲𑀢𑁆𑀢𑀸 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀦𑁂𑀲𑀁 𑀮𑀽𑀔𑀪𑁄𑀚𑀦𑀲𑁆𑀲 𑀤𑀺𑀦𑁆𑀦𑀪𑀸𑀯𑀁 𑀚𑀦𑁄 𑀚𑀸𑀦𑀸𑀢𑀽𑀢𑀺 𑀅𑀧𑁆𑀧𑀫𑀁𑀲𑀸 𑀅𑀧𑁆𑀧𑀮𑁄𑀳𑀺𑀢𑀸 𑀫𑀦𑀼𑀲𑁆𑀲𑀧𑁂𑀢𑀸 𑀯𑀺𑀬 𑀤𑀼𑀮𑁆𑀮𑀪𑀦𑁆𑀦𑀧𑀸𑀦𑀸 𑀪𑀯𑀦𑁆𑀢𑀺. 𑀧𑀡𑀻𑀢𑀪𑁄𑀚𑀦𑁂 𑀧𑀦 𑀓𑀼𑀘𑁆𑀙𑀺𑀕𑀢𑁂 𑀫𑀁𑀲𑀮𑁄𑀳𑀺𑀢𑀁 𑀯𑀟𑁆𑀠𑀢𑀺, 𑀧𑀭𑀺𑀧𑀼𑀡𑁆𑀡𑀓𑀸𑀬𑀸 𑀧𑀸𑀲𑀸𑀤𑀺𑀓𑀸 𑀅𑀪𑀺𑀭𑀽𑀧𑀤𑀲𑁆𑀲𑀦𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑀣𑀸𑀕𑀢𑀲𑁆𑀲 𑀤𑀻𑀖𑀭𑀢𑁆𑀢𑀁 𑀧𑀡𑀻𑀢𑀪𑁄𑀚𑀦𑀤𑀸𑀬𑀓𑀢𑁆𑀢𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀚𑀸𑀦𑀸𑀢𑀽𑀢𑀺 𑀲𑀢𑁆𑀢𑀼𑀲𑁆𑀲𑀤𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀢𑀺. 𑀮𑀓𑁆𑀔𑀡𑀁 𑀦𑀸𑀫 𑀲𑀢𑁆𑀢𑀼𑀲𑁆𑀲𑀤𑀮𑀓𑁆𑀔𑀡𑀫𑁂𑀯. 𑀧𑀡𑀻𑀢𑀮𑀸𑀪𑀺𑀢𑀸 𑀆𑀦𑀺𑀲𑀁𑀲𑁄.

𑁨𑁦𑁯. 𑀔𑀚𑁆𑀚𑀪𑁄𑀚𑁆𑀚𑀫𑀣𑀮𑁂𑀬𑁆𑀬𑀲𑀸𑀬𑀺𑀢𑀦𑁆𑀢𑀺 ¶ 𑀔𑀚𑁆𑀚𑀓𑀜𑁆𑀘 𑀪𑁄𑀚𑀦𑀜𑁆𑀘 𑀮𑁂𑀳𑀦𑀻𑀬𑀜𑁆𑀘 𑀲𑀸𑀬𑀦𑀻𑀬𑀜𑁆𑀘. 𑀉𑀢𑁆𑀢𑀫𑀕𑁆𑀕𑀭𑀲𑀤𑀸𑀬𑀓𑁄𑀢𑀺 𑀉𑀢𑁆𑀢𑀫𑁄 𑀅𑀕𑁆𑀕𑀭𑀲𑀤𑀸𑀬𑀓𑁄, 𑀉𑀢𑁆𑀢𑀫𑀸𑀦𑀁 𑀯𑀸 𑀅𑀕𑁆𑀕𑀭𑀲𑀸𑀦𑀁 𑀤𑀸𑀬𑀓𑁄.

𑀲𑀢𑁆𑀢 𑀘𑀼𑀲𑁆𑀲𑀤𑁂𑀢𑀺 𑀲𑀢𑁆𑀢 𑀘 𑀉𑀲𑁆𑀲𑀤𑁂. 𑀢𑀤𑀢𑁆𑀣𑀚𑁄𑀢𑀓𑀦𑁆𑀢𑀺 𑀔𑀚𑁆𑀚𑀪𑁄𑀚𑁆𑀚𑀸𑀤𑀺𑀚𑁄𑀢𑀓𑀁, 𑀢𑁂𑀲𑀁 𑀮𑀸𑀪𑀲𑀁𑀯𑀢𑁆𑀢𑀦𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀧𑀩𑁆𑀩𑀚𑀫𑁆𑀧𑀺 𑀘𑀸𑀢𑀺 𑀧𑀩𑁆𑀩𑀚𑀫𑀸𑀦𑁄𑀧𑀺 𑀘. 𑀢𑀤𑀸𑀥𑀺𑀕𑀘𑁆𑀙𑀢𑀻𑀢𑀺 𑀢𑀁 𑀅𑀥𑀺𑀕𑀘𑁆𑀙𑀢𑀺. 𑀮𑀸𑀪𑀺𑀭𑀼𑀢𑁆𑀢𑀫𑀦𑁆𑀢𑀺 𑀮𑀸𑀪𑀺 𑀉𑀢𑁆𑀢𑀫𑀁.

𑀓𑀭𑀘𑀭𑀡𑀸𑀤𑀺𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁧𑁦. 𑀤𑀸𑀦𑁂𑀦𑀸𑀢𑀺𑀆𑀤𑀻𑀲𑀼 ¶ 𑀏𑀓𑀘𑁆𑀘𑁄 𑀤𑀸𑀦𑁂𑀦𑁂𑀯 𑀲𑀗𑁆𑀕𑀡𑁆𑀳𑀺𑀢𑀩𑁆𑀩𑁄 𑀳𑁄𑀢𑀺, 𑀢𑀁 𑀤𑀸𑀦𑁂𑀦 𑀲𑀗𑁆𑀕𑀳𑁂𑀲𑀺. 𑀧𑀩𑁆𑀩𑀚𑀺𑀢𑀸𑀦𑀁 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑀁, 𑀕𑀺𑀳𑀻𑀦𑀁 𑀕𑀺𑀳𑀺𑀧𑀭𑀺𑀓𑁆𑀔𑀸𑀭𑀁 𑀅𑀤𑀸𑀲𑀺.

𑀧𑁂𑀬𑁆𑀬𑀯𑀚𑁆𑀚𑁂𑀦𑀸𑀢𑀺 𑀏𑀓𑀘𑁆𑀘𑁄 𑀳𑀺 ‘‘𑀅𑀬𑀁 𑀤𑀸𑀢𑀩𑁆𑀩𑀁 𑀦𑀸𑀫 𑀤𑁂𑀢𑀺, 𑀏𑀓𑁂𑀦 𑀧𑀦 𑀯𑀘𑀦𑁂𑀦 𑀲𑀩𑁆𑀩𑀁 𑀫𑀓𑁆𑀔𑁂𑀢𑁆𑀯𑀸 𑀦𑀸𑀲𑁂𑀢𑀺, 𑀓𑀺𑀁 𑀏𑀢𑀲𑁆𑀲 𑀤𑀸𑀦’’𑀦𑁆𑀢𑀺 𑀯𑀢𑁆𑀢𑀸 𑀳𑁄𑀢𑀺. 𑀏𑀓𑀘𑁆𑀘𑁄 ‘‘𑀅𑀬𑀁 𑀓𑀺𑀜𑁆𑀘𑀸𑀧𑀺 𑀤𑀸𑀦𑀁 𑀦 𑀤𑁂𑀢𑀺, 𑀓𑀣𑁂𑀦𑁆𑀢𑁄 𑀧𑀦 𑀢𑁂𑀮𑁂𑀦 𑀯𑀺𑀬 𑀫𑀓𑁆𑀔𑁂𑀢𑀺. 𑀏𑀲𑁄 𑀤𑁂𑀢𑀼 𑀯𑀸 𑀫𑀸 𑀯𑀸, 𑀯𑀘𑀦𑀫𑁂𑀯 ¶ 𑀢𑀲𑁆𑀲 𑀲𑀳𑀲𑁆𑀲𑀁 𑀅𑀕𑁆𑀖𑀢𑀻’’𑀢𑀺 𑀯𑀢𑁆𑀢𑀸 𑀳𑁄𑀢𑀺. 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀤𑀸𑀦𑀁 𑀦 𑀧𑀘𑁆𑀘𑀸𑀲𑀻𑀲𑀢𑀺, 𑀧𑀺𑀬𑀯𑀘𑀦𑀫𑁂𑀯 𑀧𑀘𑁆𑀘𑀸𑀲𑀻𑀲𑀢𑀺. 𑀢𑀁 𑀧𑀺𑀬𑀯𑀘𑀦𑁂𑀦 𑀲𑀗𑁆𑀕𑀳𑁂𑀲𑀺.

𑀅𑀢𑁆𑀣𑀘𑀭𑀺𑀬𑀸𑀬𑀸𑀢𑀺 𑀅𑀢𑁆𑀣𑀲𑀁𑀯𑀟𑁆𑀠𑀦𑀓𑀣𑀸𑀬. 𑀏𑀓𑀘𑁆𑀘𑁄 𑀳𑀺 𑀦𑁂𑀯 𑀤𑀸𑀦𑀁, 𑀦 𑀧𑀺𑀬𑀯𑀘𑀦𑀁 𑀧𑀘𑁆𑀘𑀸𑀲𑀻𑀲𑀢𑀺. 𑀅𑀢𑁆𑀢𑀦𑁄 𑀳𑀺𑀢𑀓𑀣𑀁 𑀯𑀟𑁆𑀠𑀺𑀢𑀓𑀣𑀫𑁂𑀯 𑀧𑀘𑁆𑀘𑀸𑀲𑀻𑀲𑀢𑀺. 𑀏𑀯𑀭𑀽𑀧𑀁 𑀧𑀼𑀕𑁆𑀕𑀮𑀁 ‘‘𑀇𑀤𑀁 𑀢𑁂 𑀓𑀸𑀢𑀩𑁆𑀩𑀁, 𑀇𑀤𑀁 𑀢𑁂 𑀦 𑀓𑀸𑀢𑀩𑁆𑀩𑀁. 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀲𑁂𑀯𑀺𑀢𑀩𑁆𑀩𑁄, 𑀏𑀯𑀭𑀽𑀧𑁄 𑀧𑀼𑀕𑁆𑀕𑀮𑁄 𑀦 𑀲𑁂𑀯𑀺𑀢𑀩𑁆𑀩𑁄’’𑀢𑀺 𑀏𑀯𑀁 𑀅𑀢𑁆𑀣𑀘𑀭𑀺𑀬𑀸𑀬 𑀲𑀗𑁆𑀕𑀳𑁂𑀲𑀺.

𑀲𑀫𑀸𑀦𑀢𑁆𑀢𑀢𑀸𑀬𑀸𑀢𑀺 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑀪𑀸𑀯𑁂𑀦. 𑀏𑀓𑀘𑁆𑀘𑁄 𑀳𑀺 𑀤𑀸𑀦𑀸𑀤𑀻𑀲𑀼 𑀏𑀓𑀫𑁆𑀧𑀺 𑀦 𑀧𑀘𑁆𑀘𑀸𑀲𑀻𑀲𑀢𑀺, 𑀏𑀓𑀸𑀲𑀦𑁂 𑀦𑀺𑀲𑀚𑁆𑀚𑀁, 𑀏𑀓𑀧𑀮𑁆𑀮𑀗𑁆𑀓𑁂 𑀲𑀬𑀦𑀁, 𑀏𑀓𑀢𑁄 𑀪𑁄𑀚𑀦𑀦𑁆𑀢𑀺 𑀏𑀯𑀁 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑀢𑀁 𑀧𑀘𑁆𑀘𑀸𑀲𑀻𑀲𑀢𑀺. 𑀢𑀢𑁆𑀣 𑀚𑀸𑀢𑀺𑀬𑀸 𑀳𑀻𑀦𑁄 𑀪𑁄𑀕𑁂𑀦 𑀅𑀥𑀺𑀓𑁄 𑀤𑀼𑀲𑁆𑀲𑀗𑁆𑀕𑀳𑁄 𑀳𑁄𑀢𑀺. 𑀦 𑀳𑀺 𑀲𑀓𑁆𑀓𑀸 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀧𑀭𑀺𑀪𑁄𑀕𑁄 𑀓𑀸𑀢𑀼𑀁, 𑀢𑀣𑀸 𑀅𑀓𑀭𑀺𑀬𑀫𑀸𑀦𑁂 𑀘 𑀲𑁄 𑀓𑀼𑀚𑁆𑀛𑀢𑀺. 𑀪𑁄𑀕𑁂𑀦 𑀳𑀻𑀦𑁄 𑀚𑀸𑀢𑀺𑀬𑀸 𑀅𑀥𑀺𑀓𑁄𑀧𑀺 𑀤𑀼𑀲𑁆𑀲𑀗𑁆𑀕𑀳𑁄 𑀳𑁄𑀢𑀺. 𑀲𑁄 𑀳𑀺 ‘‘𑀅𑀳𑀁 𑀚𑀸𑀢𑀺𑀫𑀸’’𑀢𑀺 𑀪𑁄𑀕𑀲𑀫𑁆𑀧𑀦𑁆𑀦𑁂𑀦 𑀲𑀤𑁆𑀥𑀺𑀁 𑀏𑀓𑀧𑀭𑀺𑀪𑁄𑀕𑀁 𑀦 𑀇𑀘𑁆𑀙𑀢𑀺, 𑀢𑀲𑁆𑀫𑀺𑀁 𑀅𑀓𑀭𑀺𑀬𑀫𑀸𑀦𑁂 𑀓𑀼𑀚𑁆𑀛𑀢𑀺. 𑀉𑀪𑁄𑀳𑀺𑀧𑀺 𑀳𑀻𑀦𑁄 𑀧𑀦 𑀲𑀼𑀲𑀗𑁆𑀕𑀳𑁄 𑀳𑁄𑀢𑀺. 𑀦 𑀳𑀺 𑀲𑁄 𑀇𑀢𑀭𑁂𑀦 𑀲𑀤𑁆𑀥𑀺𑀁 𑀏𑀓𑀧𑀭𑀺𑀪𑁄𑀕𑀁 𑀇𑀘𑁆𑀙𑀢𑀺, 𑀦 𑀅𑀓𑀭𑀺𑀬𑀫𑀸𑀦𑁂 𑀘 𑀓𑀼𑀚𑁆𑀛𑀢𑀺. 𑀉𑀪𑁄𑀳𑀺 ¶ 𑀲𑀤𑀺𑀲𑁄𑀧𑀺 𑀲𑀼𑀲𑀗𑁆𑀕𑀳𑁄𑀬𑁂𑀯. 𑀪𑀺𑀓𑁆𑀔𑀽𑀲𑀼 𑀤𑀼𑀲𑁆𑀲𑀻𑀮𑁄 𑀤𑀼𑀲𑁆𑀲𑀗𑁆𑀕𑀳𑁄 𑀳𑁄𑀢𑀺. 𑀦 𑀳𑀺 𑀲𑀓𑁆𑀓𑀸 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀧𑀭𑀺𑀪𑁄𑀕𑁄 𑀓𑀸𑀢𑀼𑀁, 𑀢𑀣𑀸 𑀅𑀓𑀭𑀺𑀬𑀫𑀸𑀦𑁂 𑀘 𑀓𑀼𑀚𑁆𑀛𑀢𑀺. 𑀲𑀻𑀮𑀯𑀸 𑀲𑀼𑀲𑀗𑁆𑀕𑀳𑁄 𑀳𑁄𑀢𑀺. 𑀲𑀻𑀮𑀯𑀸 𑀳𑀺 𑀅𑀤𑀻𑀬𑀫𑀸𑀦𑁂𑀧𑀺 𑀅𑀓𑀭𑀺𑀬𑀫𑀸𑀦𑁂𑀧𑀺 𑀦 𑀓𑀼𑀚𑁆𑀛𑀢𑀺. 𑀅𑀜𑁆𑀜𑀁 𑀅𑀢𑁆𑀢𑀦𑀸 ¶ 𑀲𑀤𑁆𑀥𑀺𑀁 𑀧𑀭𑀺𑀪𑁄𑀕𑀁 𑀅𑀓𑀭𑁄𑀦𑁆𑀢𑀫𑁆𑀧𑀺 𑀦 𑀧𑀸𑀧𑀓𑁂𑀦 𑀘𑀺𑀢𑁆𑀢𑁂𑀦 𑀧𑀲𑁆𑀲𑀢𑀺. 𑀧𑀭𑀺𑀪𑁄𑀕𑁄𑀧𑀺 𑀢𑁂𑀦 𑀲𑀤𑁆𑀥𑀺𑀁 𑀲𑀼𑀓𑀭𑁄 𑀳𑁄𑀢𑀺. 𑀢𑀲𑁆𑀫𑀸 𑀏𑀯𑀭𑀽𑀧𑀁 𑀧𑀼𑀕𑁆𑀕𑀮𑀁 𑀏𑀯𑀁 𑀲𑀫𑀸𑀦𑀢𑁆𑀢𑀢𑀸𑀬 𑀲𑀗𑁆𑀕𑀳𑁂𑀲𑀺.

𑀲𑀼𑀲𑀗𑁆𑀕𑀳𑀺𑀢𑀸𑀲𑁆𑀲 𑀳𑁄𑀦𑁆𑀢𑀻𑀢𑀺 𑀲𑀼𑀲𑀗𑁆𑀕𑀳𑀺𑀢𑀸 𑀅𑀲𑁆𑀲 𑀳𑁄𑀦𑁆𑀢𑀺. 𑀤𑁂𑀢𑀼 𑀯𑀸 𑀫𑀸 𑀯𑀸 𑀤𑁂𑀢𑀼, 𑀓𑀭𑁄𑀢𑀼 𑀯𑀸 𑀫𑀸 𑀯𑀸 𑀓𑀭𑁄𑀢𑀼, 𑀲𑀼𑀲𑀗𑁆𑀕𑀳𑀺𑀢𑀸𑀯 𑀳𑁄𑀦𑁆𑀢𑀺, 𑀦 𑀪𑀺𑀚𑁆𑀚𑀦𑁆𑀢𑀺. ‘‘𑀬𑀤𑀸𑀲𑁆𑀲 𑀤𑀸𑀢𑀩𑁆𑀩𑀁 𑀳𑁄𑀢𑀺, 𑀢𑀤𑀸 𑀤𑁂𑀢𑀺. 𑀇𑀤𑀸𑀦𑀺 𑀫𑀜𑁆𑀜𑁂 𑀦𑀢𑁆𑀣𑀺, 𑀢𑁂𑀦 𑀦 𑀤𑁂𑀢𑀺. 𑀓𑀺𑀁 𑀫𑀬𑀁 𑀤𑀤𑀫𑀸𑀦𑀫𑁂𑀯 𑀉𑀧𑀝𑁆𑀞𑀳𑀸𑀫? 𑀅𑀤𑁂𑀦𑁆𑀢𑀁 𑀅𑀓𑀭𑁄𑀦𑁆𑀢𑀁 𑀦 𑀉𑀧𑀝𑁆𑀞𑀳𑀸𑀫𑀸’’𑀢𑀺 𑀏𑀯𑀁 𑀘𑀺𑀦𑁆𑀢𑁂𑀦𑁆𑀢𑀺.

𑀇𑀥 𑀓𑀫𑁆𑀫𑀁 𑀦𑀸𑀫 𑀤𑀻𑀖𑀭𑀢𑁆𑀢𑀁 𑀓𑀢𑀁 𑀤𑀸𑀦𑀸𑀤𑀺𑀲𑀗𑁆𑀕𑀳𑀓𑀫𑁆𑀫𑀁. 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀸𑀫 𑀬𑁄 𑀏𑀯𑀁 𑀅𑀲𑀗𑁆𑀕𑀸𑀳𑀓𑁄 𑀳𑁄𑀢𑀺, 𑀲𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦𑀲𑁆𑀲 𑀅𑀲𑀗𑁆𑀕𑀸𑀳𑀓𑀪𑀸𑀯𑀁 𑀚𑀦𑁄 𑀚𑀸𑀦𑀸𑀢𑀽𑀢𑀺 𑀣𑀤𑁆𑀥𑀳𑀢𑁆𑀣𑀧𑀸𑀤𑁄 𑀘𑁂𑀯 𑀳𑁄𑀢𑀺, 𑀯𑀺𑀲𑀫𑀝𑁆𑀞𑀺𑀢𑀸𑀯𑀬𑀯𑀮𑀓𑁆𑀔𑀡𑁄 𑀘. 𑀢𑀣𑀸𑀕𑀢𑀲𑁆𑀲 𑀧𑀦 𑀤𑀻𑀖𑀭𑀢𑁆𑀢𑀁 𑀲𑀗𑁆𑀕𑀸𑀳𑀓𑀪𑀸𑀯𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀚𑀸𑀦𑀸𑀢𑀽𑀢𑀺 𑀇𑀫𑀸𑀦𑀺 𑀤𑁆𑀯𑁂 ¶ 𑀮𑀓𑁆𑀔𑀡𑀸𑀦𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀮𑀓𑁆𑀔𑀡𑀁 𑀦𑀸𑀫 𑀇𑀤𑀫𑁂𑀯 𑀮𑀓𑁆𑀔𑀡𑀤𑁆𑀯𑀬𑀁. 𑀲𑀼𑀲𑀗𑁆𑀕𑀳𑀺𑀢𑀧𑀭𑀺𑀚𑀦𑀢𑀸 𑀆𑀦𑀺𑀲𑀁𑀲𑁄.

𑁨𑁧𑁧. 𑀓𑀭𑀺𑀬𑀸𑀢𑀺 𑀓𑀭𑀺𑀢𑁆𑀯𑀸. 𑀘𑀭𑀺𑀬𑀸𑀢𑀺 𑀘𑀭𑀺𑀢𑁆𑀯𑀸. 𑀅𑀦𑀯𑀫𑀢𑁂𑀦𑀸𑀢𑀺 𑀅𑀦𑀯𑀜𑁆𑀜𑀸𑀢𑁂𑀦. ‘‘𑀅𑀦𑀧𑀫𑁄𑀤𑁂𑀦𑀸’’𑀢𑀺𑀧𑀺 𑀧𑀸𑀞𑁄, 𑀦 𑀅𑀧𑁆𑀧𑀫𑁄𑀤𑁂𑀦, 𑀦 𑀤𑀻𑀦𑁂𑀦 𑀦 𑀕𑀩𑁆𑀪𑀺𑀢𑁂𑀦𑀸𑀢𑀺 𑀅𑀢𑁆𑀣𑁄.

𑀘𑀯𑀺𑀬𑀸𑀢𑀺 𑀘𑀯𑀺𑀢𑁆𑀯𑀸. 𑀅𑀢𑀺𑀭𑀼𑀘𑀺𑀭 𑀲𑀼𑀯𑀕𑁆𑀕𑀼 𑀤𑀲𑁆𑀲𑀦𑁂𑀬𑁆𑀬𑀦𑁆𑀢𑀺 𑀅𑀢𑀺𑀭𑀼𑀘𑀺𑀭𑀜𑁆𑀘 𑀲𑀼𑀧𑀸𑀲𑀸𑀤𑀺𑀓𑀁 𑀲𑀼𑀯𑀕𑁆𑀕𑀼 𑀘 𑀲𑀼𑀝𑁆𑀞𑀼 𑀙𑁂𑀓𑀁 𑀤𑀲𑁆𑀲𑀦𑁂𑀬𑁆𑀬𑀜𑁆𑀘 𑀤𑀝𑁆𑀞𑀩𑁆𑀩𑀬𑀼𑀢𑁆𑀢𑀁. 𑀲𑀼𑀲𑀼 𑀓𑀼𑀫𑀸𑀭𑁄𑀢𑀺 𑀲𑀼𑀝𑁆𑀞𑀼 𑀲𑀼𑀓𑀼𑀫𑀸𑀭𑁄.

𑀧𑀭𑀺𑀚𑀦𑀲𑁆𑀲𑀯𑁄𑀢𑀺 𑀧𑀭𑀺𑀚𑀦𑁄 𑀅𑀲𑁆𑀲𑀯𑁄 𑀯𑀘𑀦𑀓𑀭𑁄. 𑀯𑀺𑀥𑁂𑀬𑁆𑀬𑁄𑀢𑀺 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑁂𑀲𑀼 𑀬𑀣𑀸𑀭𑀼𑀘𑀺 𑀯𑀺𑀥𑀸𑀢𑀩𑁆𑀩𑁄. 𑀫𑀳𑀺𑀫𑀦𑁆𑀢𑀺 𑀫𑀳𑀺𑀁 𑀇𑀫𑀁. 𑀧𑀺𑀬𑀯𑀤𑀽 𑀳𑀺𑀢𑀲𑀼𑀔𑀢𑀁 𑀚𑀺𑀕𑀻𑀲𑀫𑀸𑀦𑁄𑀢𑀺 𑀧𑀺𑀬𑀯𑀤𑁄 𑀳𑀼𑀢𑁆𑀯𑀸 𑀳𑀺𑀢𑀜𑁆𑀘 𑀲𑀼𑀔𑀜𑁆𑀘 𑀧𑀭𑀺𑀬𑁂𑀲𑀫𑀸𑀦𑁄. 𑀯𑀘𑀦𑀧𑀝𑀺𑀓𑀭𑀲𑁆𑀲𑀸 𑀪𑀺𑀧𑁆𑀧𑀲𑀦𑁆𑀦𑀸𑀢𑀺 𑀯𑀘𑀦𑀧𑀝𑀺𑀓𑀭𑀸 𑀅𑀲𑁆𑀲 𑀅𑀪𑀺𑀧𑁆𑀧𑀲𑀦𑁆𑀦𑀸. 𑀥𑀫𑁆𑀫𑀸𑀦𑀼𑀥𑀫𑁆𑀫𑀦𑁆𑀢𑀺 𑀥𑀫𑁆𑀫𑀜𑁆𑀘 𑀅𑀦𑀼𑀥𑀫𑁆𑀫𑀜𑁆𑀘.

𑀉𑀲𑁆𑀲𑀗𑁆𑀔𑀧𑀸𑀤𑀸𑀤𑀺𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁧𑁨. 𑀅𑀢𑁆𑀣𑀽𑀧𑀲𑀁𑀳𑀺𑀢𑀦𑁆𑀢𑀺 ¶ ¶ 𑀇𑀥𑀮𑁄𑀓𑀧𑀭𑀮𑁄𑀓𑀢𑁆𑀣𑀦𑀺𑀲𑁆𑀲𑀺𑀢𑀁. 𑀥𑀫𑁆𑀫𑀽𑀧𑀲𑀁𑀳𑀺𑀢𑀦𑁆𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀦𑀺𑀲𑁆𑀲𑀺𑀢𑀁. 𑀩𑀳𑀼𑀚𑀦𑀁 𑀦𑀺𑀤𑀁𑀲𑁂𑀲𑀻𑀢𑀺 𑀩𑀳𑀼𑀚𑀦𑀲𑁆𑀲 𑀦𑀺𑀤𑀁𑀲𑀦𑀓𑀣𑀁 𑀓𑀣𑁂𑀲𑀺. 𑀧𑀸𑀡𑀻𑀦𑀦𑁆𑀢𑀺 𑀲𑀢𑁆𑀢𑀸𑀦𑀁. ‘‘𑀅𑀕𑁆𑀕𑁄’’𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀺. 𑀇𑀥 𑀓𑀫𑁆𑀫𑀁 𑀦𑀸𑀫 𑀤𑀻𑀖𑀭𑀢𑁆𑀢𑀁 𑀪𑀸𑀲𑀺𑀢𑀸 𑀉𑀤𑁆𑀥𑀗𑁆𑀕𑀫𑀦𑀻𑀬𑀸 𑀅𑀢𑁆𑀣𑀽𑀧𑀲𑀁𑀳𑀺𑀢𑀸 𑀯𑀸𑀘𑀸. 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀸𑀫 𑀬𑁄 𑀏𑀯𑀭𑀽𑀧𑀁 𑀉𑀕𑁆𑀕𑀢𑀯𑀸𑀘𑀁 𑀦 𑀪𑀸𑀲𑀢𑀺, 𑀲𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀉𑀕𑁆𑀕𑀢𑀯𑀸𑀘𑀸𑀬 𑀅𑀪𑀸𑀲𑀦𑀁 𑀚𑀦𑁄 𑀚𑀸𑀦𑀸𑀢𑀽𑀢𑀺 𑀅𑀥𑁄𑀲𑀗𑁆𑀔𑀧𑀸𑀤𑁄 𑀘 𑀳𑁄𑀢𑀺 𑀅𑀥𑁄𑀦𑀢𑀮𑁄𑀫𑁄 𑀘. 𑀢𑀣𑀸𑀕𑀢𑀲𑁆𑀲 𑀧𑀦 𑀤𑀻𑀖𑀭𑀢𑁆𑀢𑀁 𑀏𑀯𑀭𑀽𑀧𑀸𑀬 𑀉𑀕𑁆𑀕𑀢𑀯𑀸𑀘𑀸𑀬 𑀪𑀸𑀲𑀺𑀢𑀪𑀸𑀯𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀚𑀸𑀦𑀸𑀢𑀽𑀢𑀺 𑀉𑀲𑁆𑀲𑀗𑁆𑀔𑀧𑀸𑀤𑀮𑀓𑁆𑀔𑀡𑀜𑁆𑀘 𑀉𑀤𑁆𑀥𑀕𑁆𑀕𑀮𑁄𑀫𑀮𑀓𑁆𑀔𑀡𑀜𑁆𑀘 𑀦𑀺𑀩𑁆𑀩𑀢𑁆𑀢𑀢𑀺. 𑀮𑀓𑁆𑀔𑀡𑀁 𑀦𑀸𑀫 𑀇𑀤𑀫𑁂𑀯 𑀮𑀓𑁆𑀔𑀡𑀤𑁆𑀯𑀬𑀁. 𑀉𑀢𑁆𑀢𑀫𑀪𑀸𑀯𑁄 𑀆𑀦𑀺𑀲𑀁𑀲𑁄.

𑁨𑁧𑁩. 𑀏𑀭𑀬𑀦𑁆𑀢𑀺 ¶ 𑀪𑀡𑀦𑁆𑀢𑁄. 𑀩𑀳𑀼𑀚𑀦𑀁 𑀦𑀺𑀤𑀁𑀲𑀬𑀻𑀢𑀺 𑀩𑀳𑀼𑀚𑀦𑀲𑁆𑀲 𑀳𑀺𑀢𑀁 𑀤𑀲𑁆𑀲𑁂𑀢𑀺. 𑀥𑀫𑁆𑀫𑀬𑀸𑀕𑀦𑁆𑀢𑀺 𑀥𑀫𑁆𑀫𑀤𑀸𑀦𑀬𑀜𑁆𑀜𑀁.

𑀉𑀩𑁆𑀪𑀫𑀼𑀧𑁆𑀧𑀢𑀺𑀢𑀮𑁄𑀫𑀯𑀸 𑀲𑀲𑁄𑀢𑀺 𑀲𑁄 𑀏𑀲 𑀉𑀤𑁆𑀥𑀕𑁆𑀕𑀢𑀮𑁄𑀫𑀯𑀸 𑀳𑁄𑀢𑀺. 𑀧𑀸𑀤𑀕𑀡𑁆𑀞𑀺𑀭𑀳𑀽𑀢𑀺 𑀧𑀸𑀤𑀕𑁄𑀧𑁆𑀨𑀓𑀸 𑀅𑀳𑁂𑀲𑀼𑀁. 𑀲𑀸𑀥𑀼𑀲𑀡𑁆𑀞𑀺𑀢𑀸𑀢𑀺 𑀲𑀼𑀝𑁆𑀞𑀼 𑀲𑀡𑁆𑀞𑀺𑀢𑀸. 𑀫𑀁𑀲𑀮𑁄𑀳𑀺𑀢𑀸𑀘𑀺𑀢𑀸𑀢𑀺 𑀫𑀁𑀲𑁂𑀦 𑀘 𑀮𑁄𑀳𑀺𑀢𑁂𑀦 𑀘 𑀆𑀘𑀺𑀢𑀸. 𑀢𑀘𑁄𑀢𑁆𑀣𑀢𑀸𑀢𑀺 𑀢𑀘𑁂𑀦 𑀧𑀭𑀺𑀬𑁄𑀦𑀤𑁆𑀥𑀸 𑀦𑀺𑀕𑀼𑀴𑁆𑀳𑀸. 𑀯𑀚𑀢𑀻𑀢𑀺 𑀕𑀘𑁆𑀙𑀢𑀺. 𑀅𑀦𑁄𑀫𑀦𑀺𑀓𑁆𑀓𑀫𑁄𑀢𑀺 𑀅𑀦𑁄𑀫𑀯𑀺𑀳𑀸𑀭𑀻 𑀲𑁂𑀝𑁆𑀞𑀯𑀺𑀳𑀸𑀭𑀻.

𑀏𑀡𑀺𑀚𑀗𑁆𑀖𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁧𑁪. 𑀲𑀺𑀧𑁆𑀧𑀁 𑀯𑀸𑀢𑀺𑀆𑀤𑀻𑀲𑀼 𑀲𑀺𑀧𑁆𑀧𑀁 𑀦𑀸𑀫 𑀤𑁆𑀯𑁂 𑀲𑀺𑀧𑁆𑀧𑀸𑀦𑀺 𑁋 𑀳𑀻𑀦𑀜𑁆𑀘 𑀲𑀺𑀧𑁆𑀧𑀁, 𑀉𑀓𑁆𑀓𑀝𑁆𑀞𑀜𑁆𑀘 𑀲𑀺𑀧𑁆𑀧𑀁. 𑀳𑀻𑀦𑀁 𑀦𑀸𑀫 𑀲𑀺𑀧𑁆𑀧𑀁 𑀦𑀴𑀓𑀸𑀭𑀲𑀺𑀧𑁆𑀧𑀁, 𑀓𑀼𑀫𑁆𑀪𑀓𑀸𑀭𑀲𑀺𑀧𑁆𑀧𑀁 𑀧𑁂𑀲𑀓𑀸𑀭𑀲𑀺𑀧𑁆𑀧𑀁 𑀦𑀳𑀸𑀧𑀺𑀢𑀲𑀺𑀧𑁆𑀧𑀁. 𑀉𑀓𑁆𑀓𑀝𑁆𑀞𑀁 𑀦𑀸𑀫 𑀲𑀺𑀧𑁆𑀧𑀁 𑀮𑁂𑀔𑀸 𑀫𑀼𑀤𑁆𑀤𑀸 𑀕𑀡𑀦𑀸. 𑀯𑀺𑀚𑁆𑀚𑀸𑀢𑀺 𑀅𑀳𑀺𑀯𑀺𑀚𑁆𑀚𑀸𑀤𑀺𑀅𑀦𑁂𑀓𑀯𑀺𑀥𑀸. 𑀘𑀭𑀡𑀦𑁆𑀢𑀺 𑀧𑀜𑁆𑀘𑀲𑀻𑀮𑀁 𑀤𑀲𑀲𑀻𑀮𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁. 𑀓𑀫𑁆𑀫𑀦𑁆𑀢𑀺 𑀓𑀫𑁆𑀫𑀲𑁆𑀲𑀓𑀢𑀸𑀚𑀸𑀦𑀦𑀧𑀜𑁆𑀜𑀸. 𑀓𑀺𑀮𑀺𑀲𑁆𑀲𑁂𑀬𑁆𑀬𑀼𑀦𑁆𑀢𑀺 𑀓𑀺𑀮𑀫𑁂𑀬𑁆𑀬𑀼𑀁. 𑀅𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀁 𑀦𑀸𑀫 𑀤𑀼𑀓𑁆𑀔𑀁, 𑀢𑀁 𑀦𑁂𑀲𑀁 𑀫𑀸 𑀘𑀺𑀭𑀫𑀳𑁄𑀲𑀻𑀢𑀺 𑀘𑀺𑀦𑁆𑀢𑁂𑀲𑀺.

𑀭𑀸𑀚𑀸𑀭𑀳𑀸𑀦𑀻𑀢𑀺 𑀭𑀜𑁆𑀜𑁄 𑀅𑀦𑀼𑀭𑀽𑀧𑀸𑀦𑀺 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀦𑀺, 𑀢𑀸𑀦𑀺𑀬𑁂𑀯 𑀭𑀜𑁆𑀜𑁄 𑀲𑁂𑀦𑀸𑀬 𑀅𑀗𑁆𑀕𑀪𑀽𑀢𑀢𑁆𑀢𑀸 𑀭𑀸𑀚𑀗𑁆𑀕𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀭𑀸𑀚𑀽𑀧𑀪𑁄𑀕𑀸𑀦𑀻𑀢𑀺 𑀭𑀜𑁆𑀜𑁄 ¶ 𑀉𑀧𑀪𑁄𑀕𑀧𑀭𑀺𑀪𑁄𑀕𑀪𑀡𑁆𑀟𑀸𑀦𑀺, 𑀢𑀸𑀦𑀺 𑀘𑁂𑀯 𑀲𑀢𑁆𑀢𑀭𑀢𑀦𑀸𑀦𑀺 𑀘. 𑀭𑀸𑀚𑀸𑀦𑀼𑀘𑁆𑀙𑀯𑀺𑀓𑀸𑀦𑀻𑀢𑀺 𑀭𑀜𑁆𑀜𑁄 𑀅𑀦𑀼𑀘𑁆𑀙𑀯𑀺𑀓𑀸𑀦𑀺. 𑀢𑁂𑀲𑀁𑀬𑁂𑀯 𑀲𑀩𑁆𑀩𑁂𑀲𑀁 𑀇𑀤𑀁 𑀕𑀳𑀡𑀁. 𑀲𑀫𑀡𑀸𑀭𑀳𑀸𑀦𑀻𑀢𑀺 ¶ 𑀲𑀫𑀡𑀸𑀦𑀁 𑀅𑀦𑀼𑀭𑀽𑀧𑀸𑀦𑀺 𑀘𑀻𑀯𑀭𑀸𑀤𑀻𑀦𑀺. 𑀲𑀫𑀡𑀗𑁆𑀕𑀸𑀦𑀻𑀢𑀺 𑀲𑀫𑀡𑀸𑀦𑀁 𑀓𑁄𑀝𑁆𑀞𑀸𑀲𑀪𑀽𑀢𑀸 𑀘𑀢𑀲𑁆𑀲𑁄 𑀧𑀭𑀺𑀲𑀸. 𑀲𑀫𑀡𑀽𑀧𑀪𑁄𑀕𑀸𑀦𑀻𑀢𑀺 𑀲𑀫𑀡𑀸𑀦𑀁 𑀉𑀧𑀪𑁄𑀕𑀧𑀭𑀺𑀓𑁆𑀔𑀸𑀭𑀸. 𑀲𑀫𑀡𑀸𑀦𑀼𑀘𑁆𑀙𑀯𑀺𑀓𑀸𑀦𑀻𑀢𑀺 𑀢𑁂𑀲𑀁𑀬𑁂𑀯 𑀅𑀥𑀺𑀯𑀘𑀦𑀁.

𑀇𑀥 𑀧𑀦 𑀓𑀫𑁆𑀫𑀁 𑀦𑀸𑀫 𑀤𑀻𑀖𑀭𑀢𑁆𑀢𑀁 𑀲𑀓𑁆𑀓𑀘𑁆𑀘𑀁 𑀲𑀺𑀧𑁆𑀧𑀸𑀤𑀺𑀯𑀸𑀘𑀦𑀁. 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀸𑀫 𑀬𑁄 𑀏𑀯𑀁 𑀲𑀓𑁆𑀓𑀘𑁆𑀘𑀁 𑀲𑀺𑀧𑁆𑀧𑀁 𑀅𑀯𑀸𑀘𑁂𑀦𑁆𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑁂 𑀉𑀓𑁆𑀓𑀼𑀝𑀺𑀓𑀸𑀲𑀦𑀚𑀗𑁆𑀖𑀧𑁂𑀲𑀦𑀺𑀓𑀸𑀤𑀻𑀳𑀺 𑀓𑀺𑀮𑀫𑁂𑀢𑀺, 𑀢𑀲𑁆𑀲 𑀚𑀗𑁆𑀖𑀫𑀁𑀲𑀁 𑀮𑀺𑀔𑀺𑀢𑁆𑀯𑀸 𑀧𑀸𑀢𑀺𑀢𑀁 𑀯𑀺𑀬 𑀳𑁄𑀢𑀺. 𑀢𑀣𑀸𑀕𑀢𑀲𑁆𑀲 𑀧𑀦 𑀲𑀓𑁆𑀓𑀘𑁆𑀘𑀁 𑀯𑀸𑀘𑀺𑀢𑀪𑀸𑀯𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀚𑀸𑀦𑀸𑀢𑀽𑀢𑀺 𑀅𑀦𑀼𑀧𑀼𑀩𑁆𑀩𑀉𑀕𑁆𑀕𑀢𑀯𑀝𑁆𑀝𑀺𑀢𑀁 𑀏𑀡𑀺𑀚𑀗𑁆𑀖𑀮𑀓𑁆𑀔𑀡𑀁 ¶ 𑀦𑀺𑀩𑁆𑀩𑀢𑁆𑀢𑀢𑀺. 𑀮𑀓𑁆𑀔𑀡𑀁 𑀦𑀸𑀫 𑀇𑀤𑀫𑁂𑀯 𑀮𑀓𑁆𑀔𑀡𑀁. 𑀅𑀦𑀼𑀘𑁆𑀙𑀯𑀺𑀓𑀮𑀸𑀪𑀺𑀢𑀸 𑀆𑀦𑀺𑀲𑀁𑀲𑁄.

𑁨𑁧𑁫. 𑀬𑀤𑀽𑀧𑀖𑀸𑀢𑀸𑀬𑀸𑀢𑀺 𑀬𑀁 𑀲𑀺𑀧𑁆𑀧𑀁 𑀓𑀲𑁆𑀲𑀘𑀺 𑀉𑀧𑀖𑀸𑀢𑀸𑀬 𑀦 𑀳𑁄𑀢𑀺. 𑀓𑀺𑀮𑀺𑀲𑁆𑀲𑀢𑀻𑀢𑀺 𑀓𑀺𑀮𑀫𑀺𑀲𑁆𑀲𑀢𑀺. 𑀲𑀼𑀔𑀼𑀫𑀢𑁆𑀢𑀘𑁄𑀢𑁆𑀣𑀢𑀸𑀢𑀺 𑀲𑀼𑀔𑀼𑀫𑀢𑁆𑀢𑀘𑁂𑀦 𑀧𑀭𑀺𑀬𑁄𑀦𑀤𑁆𑀥𑀸. 𑀓𑀺𑀁 𑀧𑀦 𑀅𑀜𑁆𑀜𑁂𑀦 𑀓𑀫𑁆𑀫𑁂𑀦 𑀅𑀜𑁆𑀜𑀁 𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀢𑀻𑀢𑀺? 𑀦 𑀦𑀺𑀩𑁆𑀩𑀢𑁆𑀢𑀢𑀺. 𑀬𑀁 𑀧𑀦 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀁 𑀅𑀦𑀼𑀩𑁆𑀬𑀜𑁆𑀚𑀦𑀁 𑀳𑁄𑀢𑀺, 𑀢𑀲𑁆𑀫𑀸 𑀇𑀥 𑀯𑀼𑀢𑁆𑀢𑀁.

𑀲𑀼𑀔𑀼𑀫𑀘𑁆𑀙𑀯𑀺𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁧𑁬. 𑀲𑀫𑀡𑀁 𑀯𑀸𑀢𑀺 𑀲𑀫𑀺𑀢𑀧𑀸𑀧𑀝𑁆𑀞𑁂𑀦 𑀲𑀫𑀡𑀁. 𑀩𑁆𑀭𑀸𑀳𑁆𑀫𑀡𑀁 𑀯𑀸𑀢𑀺 𑀩𑀸𑀳𑀺𑀢𑀧𑀸𑀧𑀝𑁆𑀞𑁂𑀦 𑀩𑁆𑀭𑀸𑀳𑁆𑀫𑀡𑀁.

𑀫𑀳𑀸𑀧𑀜𑁆𑀜𑁄𑀢𑀺𑀆𑀤𑀻𑀲𑀼 𑀫𑀳𑀸𑀧𑀜𑁆𑀜𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀭𑀺𑀤𑀁 𑀫𑀳𑀸𑀧𑀜𑁆𑀜𑀸𑀤𑀻𑀦𑀁 𑀦𑀸𑀦𑀢𑁆𑀢𑀁.

𑀢𑀢𑁆𑀣 𑀓𑀢𑀫𑀸 𑀫𑀳𑀸𑀧𑀜𑁆𑀜𑀸? 𑀫𑀳𑀦𑁆𑀢𑁂 𑀲𑀻𑀮𑀓𑁆𑀔𑀦𑁆𑀥𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀫𑀳𑀸𑀧𑀜𑁆𑀜𑀸, 𑀫𑀳𑀦𑁆𑀢𑁂 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑀸𑀦𑀺 𑀞𑀸𑀦𑀸𑀞𑀸𑀦𑀸𑀦𑀺 𑀫𑀳𑀦𑁆𑀢𑀸 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑁄 𑀫𑀳𑀦𑁆𑀢𑀸𑀦𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀫𑀳𑀦𑁆𑀢𑁂 𑀲𑀢𑀺𑀧𑀝𑁆𑀞𑀸𑀦𑁂 𑀲𑀫𑁆𑀫𑀧𑁆𑀧𑀥𑀸𑀦𑁂 𑀇𑀤𑁆𑀥𑀺𑀧𑀸𑀤𑁂 𑀫𑀳𑀦𑁆𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀩𑀮𑀸𑀦𑀺 𑀫𑀳𑀦𑁆𑀢𑁂 𑀩𑁄𑀚𑁆𑀛𑀗𑁆𑀕𑁂 𑀫𑀳𑀦𑁆𑀢𑁂 𑀅𑀭𑀺𑀬𑀫𑀕𑁆𑀕𑁂 𑀫𑀳𑀦𑁆𑀢𑀸𑀦𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀫𑀳𑀦𑁆𑀢𑀸 𑀅𑀪𑀺𑀜𑁆𑀜𑀸𑀬𑁄 𑀫𑀳𑀦𑁆𑀢𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀫𑀳𑀸𑀧𑀜𑁆𑀜𑀸.

𑀓𑀢𑀫𑀸 ¶ 𑀧𑀼𑀣𑀼𑀧𑀜𑁆𑀜𑀸? 𑀧𑀼𑀣𑀼𑀦𑀸𑀦𑀸𑀔𑀦𑁆𑀥𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼𑀦𑀸𑀦𑀸𑀥𑀸𑀢𑀽𑀲𑀼 𑀧𑀼𑀣𑀼𑀦𑀸𑀦𑀸𑀆𑀬𑀢𑀦𑁂𑀲𑀼 ¶ 𑀧𑀼𑀣𑀼𑀦𑀸𑀦𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀲𑀼 𑀧𑀼𑀣𑀼𑀦𑀸𑀦𑀸𑀲𑀼𑀜𑁆𑀜𑀢𑀫𑀦𑀼𑀧𑀮𑀩𑁆𑀪𑁂𑀲𑀼 𑀧𑀼𑀣𑀼𑀦𑀸𑀦𑀸𑀅𑀢𑁆𑀣𑁂𑀲𑀼 𑀥𑀫𑁆𑀫𑁂𑀲𑀼 𑀦𑀺𑀭𑀼𑀢𑁆𑀢𑀻𑀲𑀼 𑀧𑀝𑀺𑀪𑀸𑀦𑁂𑀲𑀼. 𑀧𑀼𑀣𑀼𑀦𑀸𑀦𑀸𑀲𑀻𑀮𑀓𑁆𑀔𑀦𑁆𑀥𑁂𑀲𑀼 𑀧𑀼𑀣𑀼𑀦𑀸𑀦𑀸𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀲𑀼 𑀧𑀼𑀣𑀼𑀦𑀸𑀦𑀸𑀞𑀸𑀦𑀸𑀞𑀸𑀦𑁂𑀲𑀼 𑀧𑀼𑀣𑀼𑀦𑀸𑀦𑀸𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀲𑀼 𑀧𑀼𑀣𑀼𑀦𑀸𑀦𑀸𑀅𑀭𑀺𑀬𑀲𑀘𑁆𑀘𑁂𑀲𑀼 𑀧𑀼𑀣𑀼𑀦𑀸𑀦𑀸𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀼 𑀇𑀤𑁆𑀥𑀺𑀧𑀸𑀤𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀩𑀮𑁂𑀲𑀼 𑀩𑁄𑀚𑁆𑀛𑀗𑁆𑀕𑁂𑀲𑀼 𑀧𑀼𑀣𑀼𑀦𑀸𑀦𑀸𑀅𑀭𑀺𑀬𑀫𑀕𑁆𑀕𑁂𑀲𑀼 𑀲𑀸𑀫𑀜𑁆𑀜𑀨𑀮𑁂𑀲𑀼 𑀅𑀪𑀺𑀜𑁆𑀜𑀸𑀲𑀼 𑀧𑀼𑀣𑀼𑀚𑁆𑀚𑀦𑀲𑀸𑀥𑀸𑀭𑀡𑁂 𑀥𑀫𑁆𑀫𑁂 𑀲𑀫𑀢𑀺𑀓𑁆𑀓𑀫𑁆𑀫 𑀧𑀭𑀫𑀢𑁆𑀣𑁂 𑀦𑀺𑀩𑁆𑀩𑀸𑀦𑁂 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀧𑀼𑀣𑀼𑀧𑀜𑁆𑀜𑀸.

𑀓𑀢𑀫𑀸 𑀳𑀸𑀲𑀧𑀜𑁆𑀜𑀸? 𑀇𑀥𑁂𑀓𑀘𑁆𑀘𑁄 𑀳𑀸𑀲𑀩𑀳𑀼𑀮𑁄 𑀯𑁂𑀤𑀩𑀳𑀼𑀮𑁄 𑀢𑀼𑀝𑁆𑀞𑀺𑀩𑀳𑀼𑀮𑁄 𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀲𑀻𑀮𑀁 𑀧𑀭𑀺𑀧𑀽𑀭𑁂𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀧𑀭𑀺𑀧𑀽𑀭𑁂𑀢𑀺 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀁 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀁 𑀲𑀻𑀮𑀓𑁆𑀔𑀦𑁆𑀥𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑀁 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀁 ¶ 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑀳𑀸𑀲𑀧𑀜𑁆𑀜𑀸. 𑀳𑀸𑀲𑀩𑀳𑀼𑀮𑁄…𑀧𑁂… 𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀞𑀸𑀦𑀸𑀞𑀸𑀦𑀁 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀳𑀸𑀲𑀧𑀜𑁆𑀜𑀸. 𑀳𑀸𑀲𑀩𑀳𑀼𑀮𑁄 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑁄 𑀧𑀭𑀺𑀧𑀽𑀭𑁂𑀢𑀻𑀢𑀺 𑀳𑀸𑀲𑀧𑀜𑁆𑀜𑀸. 𑀳𑀸𑀲𑀩𑀳𑀼𑀮𑁄 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀳𑀸𑀲𑀧𑀜𑁆𑀜𑀸. 𑀲𑀢𑀺𑀧𑀝𑁆𑀞𑀸𑀦𑁂 𑀲𑀫𑁆𑀫𑀧𑁆𑀧𑀥𑀸𑀦𑁂 𑀇𑀤𑁆𑀥𑀺𑀧𑀸𑀤𑁂 𑀇𑀦𑁆𑀤𑁆𑀭𑀺𑀬𑀸𑀦𑀺 𑀩𑀮𑀸𑀦𑀺 𑀩𑁄𑀚𑁆𑀛𑀗𑁆𑀕𑁂 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺 𑀳𑀸𑀲𑀧𑀜𑁆𑀜𑀸. 𑀳𑀸𑀲𑀩𑀳𑀼𑀮𑁄 𑀲𑀸𑀫𑀜𑁆𑀜𑀨𑀮𑀸𑀦𑀺 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀳𑀸𑀲𑀧𑀜𑁆𑀜𑀸. 𑀅𑀪𑀺𑀜𑁆𑀜𑀸𑀬𑁄 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀳𑀸𑀲𑀧𑀜𑁆𑀜𑀸. 𑀳𑀸𑀲𑀩𑀳𑀼𑀮𑁄 𑀯𑁂𑀤𑀢𑀼𑀝𑁆𑀞𑀺𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀳𑀸𑀲𑀧𑀜𑁆𑀜𑀸.

𑀓𑀢𑀫𑀸 𑀚𑀯𑀦𑀧𑀜𑁆𑀜𑀸? 𑀬𑀁𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀢𑀁 𑀭𑀽𑀧𑀁 𑀅𑀦𑀺𑀘𑁆𑀘𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀤𑀼𑀓𑁆𑀔𑀢𑁄 𑀔𑀺𑀧𑁆𑀧𑀁 𑀅𑀦𑀢𑁆𑀢𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀬𑀸 𑀓𑀸𑀘𑀺 𑀯𑁂𑀤𑀦𑀸…𑀧𑁂… 𑀬𑀁𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁, 𑀲𑀩𑁆𑀩𑀁 𑀢𑀁 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀘𑀓𑁆𑀔𑀼…𑀧𑁂… 𑀚𑀭𑀸𑀫𑀭𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦 𑀤𑀼𑀓𑁆𑀔𑀁 𑀪𑀬𑀝𑁆𑀞𑁂𑀦 𑀅𑀦𑀢𑁆𑀢𑀸 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀭𑀽𑀧𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑁂 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼…𑀧𑁂… 𑀚𑀭𑀸𑀫𑀭𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦…𑀧𑁂… 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑁂 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 ¶ . 𑀘𑀓𑁆𑀔𑀼𑀁…𑀧𑁂… 𑀚𑀭𑀸𑀫𑀭𑀡𑀁 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑁂 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸.

𑀓𑀢𑀫𑀸 ¶ 𑀢𑀺𑀓𑁆𑀔𑀧𑀜𑁆𑀜𑀸? 𑀔𑀺𑀧𑁆𑀧𑀁 𑀓𑀺𑀮𑁂𑀲𑁂 𑀙𑀺𑀦𑁆𑀤𑀢𑀻𑀢𑀺 𑀢𑀺𑀓𑁆𑀔𑀧𑀜𑁆𑀜𑀸. 𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀺, 𑀉𑀧𑁆𑀧𑀦𑁆𑀦𑀁 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁, 𑀉𑀧𑁆𑀧𑀦𑁆𑀦𑀁 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁, 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀉𑀧𑁆𑀧𑀦𑁆𑀦𑀁 𑀭𑀸𑀕𑀁 𑀤𑁄𑀲𑀁 𑀫𑁄𑀳𑀁 𑀓𑁄𑀥𑀁 𑀉𑀧𑀦𑀸𑀳𑀁 𑀫𑀓𑁆𑀔𑀁 𑀧𑀴𑀸𑀲𑀁 𑀇𑀲𑁆𑀲𑀁 𑀫𑀘𑁆𑀙𑀭𑀺𑀬𑀁 𑀫𑀸𑀬𑀁 𑀲𑀸𑀞𑁂𑀬𑁆𑀬𑀁 𑀣𑀫𑁆𑀪𑀁 𑀲𑀸𑀭𑀫𑁆𑀪𑀁 ¶ 𑀫𑀸𑀦𑀁 𑀅𑀢𑀺𑀫𑀸𑀦𑀁 𑀫𑀤𑀁 𑀧𑀫𑀸𑀤𑀁 𑀲𑀩𑁆𑀩𑁂 𑀓𑀺𑀮𑁂𑀲𑁂 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑁂 𑀲𑀩𑁆𑀩𑁂 𑀅𑀪𑀺𑀲𑀗𑁆𑀔𑀸𑀭𑁂 𑀲𑀩𑁆𑀩𑁂 𑀪𑀯𑀕𑀸𑀫𑀺𑀓𑀫𑁆𑀫𑁂 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻 𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀻𑀢𑀺 𑀢𑀺𑀓𑁆𑀔𑀧𑀜𑁆𑀜𑀸. 𑀏𑀓𑀲𑁆𑀫𑀺𑀁 𑀆𑀲𑀦𑁂 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀬𑁄 𑀙 𑀅𑀪𑀺𑀜𑁆𑀜𑀸𑀬𑁄 𑀅𑀥𑀺𑀕𑀢𑀸 𑀳𑁄𑀦𑁆𑀢𑀺 𑀲𑀘𑁆𑀙𑀺𑀓𑀢𑀸 𑀨𑀲𑁆𑀲𑀺𑀢𑀸 𑀧𑀜𑁆𑀜𑀸𑀬𑀸𑀢𑀺 𑀢𑀺𑀓𑁆𑀔𑀧𑀜𑁆𑀜𑀸.

𑀓𑀢𑀫𑀸 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸? 𑀇𑀥𑁂𑀓𑀘𑁆𑀘𑁄 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀉𑀩𑁆𑀩𑁂𑀕𑀩𑀳𑀼𑀮𑁄 𑀳𑁄𑀢𑀺 𑀉𑀢𑁆𑀢𑀸𑀲𑀩𑀳𑀼𑀮𑁄 𑀉𑀓𑁆𑀓𑀡𑁆𑀞𑀦𑀩𑀳𑀼𑀮𑁄 𑀅𑀭𑀢𑀺𑀩𑀳𑀼𑀮𑁄 𑀅𑀦𑀪𑀺𑀭𑀢𑀺𑀩𑀳𑀼𑀮𑁄 𑀩𑀳𑀺𑀫𑀼𑀔𑁄 𑀦 𑀭𑀫𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼, 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀮𑁄𑀪𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀺𑀚𑁆𑀛𑀢𑀺 𑀧𑀤𑀸𑀮𑁂𑀢𑀻𑀢𑀺 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸. 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀤𑁄𑀲𑀓𑁆𑀔𑀦𑁆𑀥𑀁 𑀫𑁄𑀳𑀓𑁆𑀔𑀦𑁆𑀥𑀁 𑀓𑁄𑀥𑀁 𑀉𑀧𑀦𑀸𑀳𑀁…𑀧𑁂… 𑀲𑀩𑁆𑀩𑁂 𑀪𑀯𑀕𑀸𑀫𑀺𑀓𑀫𑁆𑀫𑁂 𑀦𑀺𑀩𑁆𑀩𑀺𑀚𑁆𑀛𑀢𑀺 𑀧𑀤𑀸𑀮𑁂𑀢𑀻𑀢𑀺 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸𑀢𑀺 (𑀧𑀝𑀺. 𑀫. 𑁩.𑁩).

𑁨𑁧𑁭. 𑀧𑀩𑁆𑀩𑀚𑀺𑀢𑀁 𑀉𑀧𑀸𑀲𑀺𑀢𑀸𑀢𑀺 𑀧𑀡𑁆𑀟𑀺𑀢𑀁 𑀧𑀩𑁆𑀩𑀚𑀺𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀬𑀺𑀭𑀼𑀧𑀸𑀲𑀺𑀢𑀸. 𑀅𑀢𑁆𑀣𑀦𑁆𑀢𑀭𑁄𑀢𑀺 𑀬𑀣𑀸 𑀏𑀓𑁂 𑀭𑀦𑁆𑀥𑀕𑀯𑁂𑀲𑀺𑀦𑁄 𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑀢𑀸𑀬 𑀤𑁄𑀲𑀁 𑀅𑀩𑁆𑀪𑀦𑁆𑀢𑀭𑀁 𑀓𑀭𑀺𑀢𑁆𑀯𑀸 𑀦𑀺𑀲𑀸𑀫𑀬𑀦𑁆𑀢𑀺, 𑀏𑀯𑀁 𑀅𑀦𑀺𑀲𑀸𑀫𑁂𑀢𑁆𑀯𑀸 𑀅𑀢𑁆𑀣𑀁 𑀅𑀩𑁆𑀪𑀦𑁆𑀢𑀭𑀁 𑀓𑀢𑁆𑀯𑀸 𑀅𑀢𑁆𑀣𑀬𑀼𑀢𑁆𑀢𑀁 𑀓𑀣𑀁 𑀦𑀺𑀲𑀸𑀫𑀬𑀺 𑀉𑀧𑀥𑀸𑀭𑀬𑀺.

𑀧𑀝𑀺𑀮𑀸𑀪𑀕𑀢𑁂𑀦𑀸𑀢𑀺 𑀧𑀝𑀺𑀮𑀸𑀪𑀢𑁆𑀣𑀸𑀬 𑀕𑀢𑁂𑀦. 𑀉𑀧𑁆𑀧𑀸𑀤𑀦𑀺𑀫𑀺𑀢𑁆𑀢𑀓𑁄𑀯𑀺𑀤𑀸𑀢𑀺 𑀉𑀧𑁆𑀧𑀸𑀤𑁂 𑀘 𑀦𑀺𑀫𑀺𑀢𑁆𑀢𑁂 𑀘 𑀙𑁂𑀓𑀸. 𑀅𑀯𑁂𑀘𑁆𑀘 𑀤𑀓𑁆𑀔𑀺𑀢𑀻𑀢𑀺 𑀜𑀢𑁆𑀯𑀸 𑀧𑀲𑁆𑀲𑀺𑀲𑁆𑀲𑀢𑀺.

𑀅𑀢𑁆𑀣𑀸𑀦𑀼𑀲𑀺𑀝𑁆𑀞𑀻𑀲𑀼 𑀧𑀭𑀺𑀕𑁆𑀕𑀳𑁂𑀲𑀼 𑀘𑀸𑀢𑀺 𑀬𑁂 𑀅𑀢𑁆𑀣𑀸𑀦𑀼𑀲𑀸𑀲𑀦𑁂𑀲𑀼 𑀧𑀭𑀺𑀕𑁆𑀕𑀳𑀸 𑀅𑀢𑁆𑀣𑀸𑀦𑀢𑁆𑀣𑀁 𑀧𑀭𑀺𑀕𑁆𑀕𑀸𑀳𑀓𑀸𑀦𑀺 𑀜𑀸𑀡𑀸𑀦𑀺, 𑀢𑁂𑀲𑀽𑀢𑀺 𑀅𑀢𑁆𑀣𑁄.

𑀲𑀼𑀯𑀡𑁆𑀡𑀯𑀡𑁆𑀡𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁧𑁮. 𑀅𑀓𑁆𑀓𑁄𑀥𑀦𑁄𑀢𑀺 ¶ 𑀦 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀓𑁄𑀥𑀲𑁆𑀲 𑀧𑀳𑀻𑀦𑀢𑁆𑀢𑀸, 𑀅𑀣 𑀔𑁄 𑀲𑀘𑁂𑀧𑀺 𑀫𑁂 𑀓𑁄𑀥𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀔𑀺𑀧𑁆𑀧𑀫𑁂𑀯 𑀦𑀁 𑀧𑀝𑀺𑀯𑀺𑀦𑁄𑀤𑁂𑀬𑁆𑀬𑀦𑁆𑀢𑀺 𑀏𑀯𑀁 𑀅𑀓𑁆𑀓𑁄𑀥𑀯𑀲𑀺𑀓𑀢𑁆𑀢𑀸. 𑀦𑀸𑀪𑀺𑀲𑀚𑁆𑀚𑀻𑀢𑀺 𑀓𑀼𑀝𑀺𑀮𑀓𑀡𑁆𑀝𑀓𑁄 𑀯𑀺𑀬 𑀢𑀢𑁆𑀣 𑀢𑀢𑁆𑀣 𑀫𑀫𑁆𑀫𑀁 𑀢𑀼𑀤𑀦𑁆𑀢𑁄 𑀯𑀺𑀬 𑀦 𑀮𑀕𑁆𑀕𑀺. 𑀦 𑀓𑀼𑀧𑁆𑀧𑀺 𑀦 𑀩𑁆𑀬𑀸𑀧𑀚𑁆𑀚𑀻𑀢𑀺𑀆𑀤𑀻𑀲𑀼 ¶ 𑀧𑀼𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑁄 𑀓𑁄𑀧𑁄. 𑀢𑀢𑁄 𑀩𑀮𑀯𑀢𑀭𑁄 𑀩𑁆𑀬𑀸𑀧𑀸𑀤𑁄. 𑀢𑀢𑁄 𑀩𑀮𑀯𑀢𑀭𑀸 𑀧𑀢𑀺𑀢𑁆𑀣𑀺𑀬𑀦𑀸. 𑀢𑀁 𑀲𑀩𑁆𑀩𑀁 𑀅𑀓𑀭𑁄𑀦𑁆𑀢𑁄 𑀦 𑀓𑀼𑀧𑁆𑀧𑀺 𑀦 𑀩𑁆𑀬𑀸𑀧𑀚𑁆𑀚𑀺 𑀦 𑀧𑀢𑀺𑀢𑁆𑀣𑀺𑀬𑀺. 𑀅𑀧𑁆𑀧𑀘𑁆𑀘𑀬𑀦𑁆𑀢𑀺 𑀤𑁄𑀫𑀦𑀲𑁆𑀲𑀁. 𑀦 𑀧𑀸𑀢𑁆𑀯𑀸𑀓𑀸𑀲𑀻𑀢𑀺 𑀦 𑀓𑀸𑀬𑀯𑀺𑀓𑀸𑀭𑁂𑀦 𑀯𑀸 𑀯𑀘𑀻𑀯𑀺𑀓𑀸𑀭𑁂𑀦 𑀯𑀸 𑀧𑀸𑀓𑀝𑀫𑀓𑀸𑀲𑀺.

𑀇𑀥 𑀓𑀫𑁆𑀫𑀁 𑀦𑀸𑀫 𑀤𑀻𑀖𑀭𑀢𑁆𑀢𑀁 𑀅𑀓𑁆𑀓𑁄𑀥𑀦𑀢𑀸 𑀘𑁂𑀯 ¶ 𑀲𑀼𑀔𑀼𑀫𑀢𑁆𑀣𑀭𑀡𑀸𑀤𑀺𑀤𑀸𑀦𑀜𑁆𑀘. 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀸𑀫 𑀓𑁄𑀥𑀦𑀲𑁆𑀲 𑀙𑀯𑀺𑀯𑀡𑁆𑀡𑁄 𑀆𑀯𑀺𑀮𑁄 𑀳𑁄𑀢𑀺 𑀫𑀼𑀔𑀁 𑀤𑀼𑀤𑁆𑀤𑀲𑀺𑀬𑀁 𑀯𑀢𑁆𑀣𑀘𑁆𑀙𑀸𑀤𑀦𑀲𑀤𑀺𑀲𑀜𑁆𑀘 𑀫𑀡𑁆𑀟𑀦𑀁 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀬𑁄 𑀓𑁄𑀥𑀦𑁄 𑀘𑁂𑀯 𑀯𑀢𑁆𑀣𑀘𑁆𑀙𑀸𑀤𑀦𑀸𑀦𑀜𑁆𑀘 𑀅𑀤𑀸𑀢𑀸, 𑀲𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦𑀲𑁆𑀲 𑀚𑀦𑁄 𑀓𑁄𑀥𑀦𑀸𑀤𑀺𑀪𑀸𑀯𑀁 𑀚𑀸𑀦𑀸𑀢𑀽𑀢𑀺 𑀤𑀼𑀩𑁆𑀩𑀡𑁆𑀡𑁄 𑀳𑁄𑀢𑀺 𑀤𑀼𑀲𑁆𑀲𑀡𑁆𑀞𑀸𑀦𑁄. 𑀅𑀓𑁆𑀓𑁄𑀥𑀦𑀲𑁆𑀲 𑀧𑀦 𑀫𑀼𑀔𑀁 𑀯𑀺𑀭𑁄𑀘𑀢𑀺, 𑀙𑀯𑀺𑀯𑀡𑁆𑀡𑁄 𑀯𑀺𑀧𑁆𑀧𑀲𑀻𑀤𑀢𑀺. 𑀲𑀢𑁆𑀢𑀸 𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀧𑀸𑀲𑀸𑀤𑀺𑀓𑀸 𑀳𑁄𑀦𑁆𑀢𑀺 𑀆𑀫𑀺𑀲𑀤𑀸𑀦𑁂𑀦 𑀯𑀸 𑀯𑀢𑁆𑀣𑀤𑀸𑀦𑁂𑀦 𑀯𑀸 𑀲𑀫𑁆𑀫𑀚𑁆𑀚𑀦𑁂𑀦 𑀯𑀸 𑀅𑀓𑁆𑀓𑁄𑀥𑀦𑀢𑀸𑀬 𑀯𑀸. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺𑀧𑀺 𑀓𑀸𑀭𑀡𑀸𑀦𑀺 𑀤𑀻𑀖𑀭𑀢𑁆𑀢𑀁 𑀢𑀣𑀸𑀕𑀢𑁂𑀦 𑀓𑀢𑀸𑀦𑁂𑀯. 𑀢𑁂𑀦𑀲𑁆𑀲 𑀇𑀫𑁂𑀲𑀁 𑀓𑀢𑀪𑀸𑀯𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀚𑀸𑀦𑀸𑀢𑀽𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑀁 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀢𑀺. 𑀮𑀓𑁆𑀔𑀡𑀁 𑀦𑀸𑀫 𑀇𑀤𑀫𑁂𑀯 𑀮𑀓𑁆𑀔𑀡𑀁. 𑀲𑀼𑀔𑀼𑀫𑀢𑁆𑀣𑀭𑀡𑀸𑀤𑀺𑀮𑀸𑀪𑀺𑀢𑀸 𑀆𑀦𑀺𑀲𑀁𑀲𑁄.

𑁨𑁧𑁯. 𑀅𑀪𑀺𑀯𑀺𑀲𑁆𑀲𑀚𑀻𑀢𑀺 𑀅𑀪𑀺𑀯𑀺𑀲𑁆𑀲𑀚𑁆𑀚𑁂𑀲𑀺. 𑀫𑀳𑀺𑀫𑀺𑀯 𑀲𑀼𑀭𑁄 𑀅𑀪𑀺𑀯𑀲𑁆𑀲𑀦𑁆𑀢𑀺 𑀲𑀼𑀭𑁄 𑀯𑀼𑀘𑁆𑀘𑀢𑀺 𑀤𑁂𑀯𑁄, 𑀫𑀳𑀸𑀧𑀣𑀯𑀺𑀁 𑀅𑀪𑀺𑀯𑀲𑁆𑀲𑀦𑁆𑀢𑁄 𑀤𑁂𑀯𑁄 𑀯𑀺𑀬.

𑀲𑀼𑀭𑀯𑀭𑀢𑀭𑁄𑀭𑀺𑀯 𑀇𑀦𑁆𑀤𑁄𑀢𑀺 𑀲𑀼𑀭𑀸𑀦𑀁 𑀯𑀭𑀢𑀭𑁄 𑀇𑀦𑁆𑀤𑁄 𑀯𑀺𑀬.

𑀅𑀧𑀩𑁆𑀩𑀚𑁆𑀚𑀫𑀺𑀘𑁆𑀙𑀦𑁆𑀢𑀺 𑀅𑀧𑀩𑁆𑀩𑀚𑁆𑀚𑀁 𑀕𑀺𑀳𑀺𑀪𑀸𑀯𑀁 𑀇𑀘𑁆𑀙𑀦𑁆𑀢𑁄. 𑀫𑀳𑀢𑀺𑀫𑀳𑀺𑀦𑁆𑀢𑀺 𑀫𑀳𑀦𑁆𑀢𑀺𑀁 𑀧𑀣𑀯𑀺𑀁.

𑀅𑀘𑁆𑀙𑀸𑀤𑀦𑀯𑀢𑁆𑀣𑀫𑁄𑀓𑁆𑀔𑀧𑀸𑀯𑀼𑀭𑀡𑀸𑀦𑀦𑁆𑀢𑀺 𑀅𑀘𑁆𑀙𑀸𑀤𑀦𑀸𑀦𑀜𑁆𑀘𑁂𑀯 𑀯𑀢𑁆𑀣𑀸𑀦𑀜𑁆𑀘 𑀉𑀢𑁆𑀢𑀫𑀧𑀸𑀯𑀼𑀭𑀡𑀸𑀦𑀜𑁆𑀘. 𑀧𑀦𑀸𑀲𑁄𑀢𑀺 𑀯𑀺𑀦𑀸𑀲𑁄.

𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁨𑁦. 𑀫𑀸𑀢𑀭𑀫𑁆𑀧𑀺 ¶ 𑀧𑀼𑀢𑁆𑀢𑁂𑀦 𑀲𑀫𑀸𑀦𑁂𑀢𑀸 𑀅𑀳𑁄𑀲𑀻𑀢𑀺 𑀇𑀫𑀁 𑀓𑀫𑁆𑀫𑀁 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑁂𑀦 𑀲𑀓𑁆𑀓𑀸 𑀓𑀸𑀢𑀼𑀁. 𑀢𑀲𑁆𑀫𑀸 𑀩𑁄𑀥𑀺𑀲𑀢𑁆𑀢𑁄𑀧𑀺 𑀭𑀚𑁆𑀚𑀁 𑀓𑀸𑀭𑀬𑀫𑀸𑀦𑁄 𑀅𑀦𑁆𑀢𑁄𑀦𑀕𑀭𑁂 𑀘𑀢𑀼𑀓𑁆𑀓𑀸𑀤𑀻𑀲𑀼 𑀘𑀢𑀽𑀲𑀼 𑀦𑀕𑀭𑀤𑁆𑀯𑀸𑀭𑁂𑀲𑀼 𑀩𑀳𑀺𑀦𑀕𑀭𑁂 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀇𑀫𑀁 𑀓𑀫𑁆𑀫𑀁 𑀓𑀭𑁄𑀣𑀸𑀢𑀺 𑀫𑀦𑀼𑀲𑁆𑀲𑁂 𑀞𑀧𑁂𑀲𑀺. 𑀢𑁂 𑀫𑀸𑀢𑀭𑀁 𑀓𑀼𑀳𑀺𑀁 𑀫𑁂 𑀧𑀼𑀢𑁆𑀢𑁄 𑀧𑀼𑀢𑁆𑀢𑀁 ¶ 𑀦 𑀧𑀲𑁆𑀲𑀸𑀫𑀻𑀢𑀺 𑀯𑀺𑀮𑀧𑀦𑁆𑀢𑀺𑀁 𑀧𑀭𑀺𑀬𑁂𑀲𑀫𑀸𑀦𑀁 𑀤𑀺𑀲𑁆𑀯𑀸 𑀏𑀳𑀺, 𑀅𑀫𑁆𑀫, 𑀧𑀼𑀢𑁆𑀢𑀁 𑀤𑀓𑁆𑀔𑀲𑀻𑀢𑀺 𑀢𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀦𑀳𑀸𑀧𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀧𑀼𑀢𑁆𑀢𑀫𑀲𑁆𑀲𑀸 𑀧𑀭𑀺𑀬𑁂𑀲𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀇𑀥 𑀓𑀫𑁆𑀫𑀁 𑀦𑀸𑀫 𑀤𑀻𑀖𑀭𑀢𑁆𑀢𑀁 𑀜𑀸𑀢𑀻𑀦𑀁 𑀲𑀫𑀗𑁆𑀕𑀺𑀪𑀸𑀯𑀓𑀭𑀡𑀁. 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀸𑀫 𑀜𑀸𑀢𑀬𑁄 𑀳𑀺 𑀲𑀫𑀗𑁆𑀕𑀻𑀪𑀽𑀢𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀯𑀚𑁆𑀚𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀢𑁂 𑀓𑀮𑀳𑀓𑀸𑀮𑁂 𑀓𑀮𑀳𑀁 𑀓𑀭𑁄𑀦𑁆𑀢𑀺, 𑀏𑀓𑀲𑁆𑀲 𑀧𑀦 𑀤𑁄𑀲𑁂 𑀉𑀧𑁆𑀧𑀦𑁆𑀦𑁂 𑀅𑀜𑁆𑀜𑀁 𑀚𑀸𑀦𑀸𑀧𑁂𑀢𑀼𑀁 𑀦 𑀇𑀘𑁆𑀙𑀦𑁆𑀢𑀺. 𑀅𑀬𑀁 𑀦𑀸𑀫 𑀏𑀢𑀲𑁆𑀲 𑀤𑁄𑀲𑁄𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑁂 𑀉𑀝𑁆𑀞𑀳𑀺𑀢𑁆𑀯𑀸 ¶ 𑀓𑁂𑀦 𑀤𑀺𑀝𑁆𑀞𑀁 𑀓𑁂𑀦 𑀲𑀼𑀢𑀁, 𑀅𑀫𑁆𑀳𑀸𑀓𑀁 𑀜𑀸𑀢𑀻𑀲𑀼 𑀏𑀯𑀭𑀽𑀧𑀁 𑀓𑀢𑁆𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺. 𑀢𑀣𑀸𑀕𑀢𑁂𑀦 𑀘 𑀢𑀁 𑀜𑀸𑀢𑀺𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑁂𑀦 𑀤𑀻𑀖𑀭𑀢𑁆𑀢𑀁 𑀇𑀤𑀁 𑀯𑀚𑁆𑀚𑀧𑁆𑀧𑀝𑀺𑀘𑁆𑀙𑀸𑀤𑀦𑀓𑀫𑁆𑀫𑀁 𑀦𑀸𑀫 𑀓𑀢𑀁 𑀳𑁄𑀢𑀺. 𑀅𑀣𑀲𑁆𑀲 𑀲𑀤𑁂𑀯𑀓𑁄 𑀮𑁄𑀓𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀏𑀯𑀭𑀽𑀧𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀪𑀸𑀯𑀁 𑀚𑀸𑀦𑀸𑀢𑀽𑀢𑀺 𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀢𑀺. 𑀮𑀓𑁆𑀔𑀡𑀁 𑀦𑀸𑀫 𑀇𑀤𑀫𑁂𑀯 𑀮𑀓𑁆𑀔𑀡𑀁. 𑀧𑀳𑀽𑀢𑀧𑀼𑀢𑁆𑀢𑀢𑀸 𑀆𑀦𑀺𑀲𑀁𑀲𑁄.

𑁨𑁨𑁧. 𑀯𑀢𑁆𑀣𑀙𑀸𑀤𑀺𑀬𑀦𑁆𑀢𑀺 𑀯𑀢𑁆𑀣𑁂𑀦 𑀙𑀸𑀤𑁂𑀢𑀩𑁆𑀩𑀁 𑀯𑀢𑁆𑀣𑀕𑀼𑀬𑁆𑀳𑀁.

𑀅𑀫𑀺𑀢𑁆𑀢𑀢𑀸𑀧𑀦𑀸𑀢𑀺 𑀅𑀫𑀺𑀢𑁆𑀢𑀸𑀦𑀁 𑀧𑀢𑀸𑀧𑀦𑀸. 𑀕𑀺𑀳𑀺𑀲𑁆𑀲 𑀧𑀻𑀢𑀺𑀁 𑀚𑀦𑀦𑀸𑀢𑀺 𑀕𑀺𑀳𑀺𑀪𑀽𑀢𑀲𑁆𑀲 𑀲𑀢𑁄 𑀧𑀻𑀢𑀺𑀚𑀦𑀦𑀸.

𑀧𑀭𑀺𑀫𑀡𑁆𑀟𑀮𑀸𑀤𑀺𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁨𑁨. 𑀲𑀫𑀁 𑀚𑀸𑀦𑀸𑀢𑀻𑀢𑀺 ‘‘𑀅𑀬𑀁 𑀢𑀸𑀭𑀼𑀓𑁆𑀔𑀲𑀫𑁄 𑀅𑀬𑀁 𑀧𑁄𑀓𑁆𑀔𑀭𑀲𑀸𑀢𑀺𑀲𑀫𑁄’’𑀢𑀺 𑀏𑀯𑀁 𑀢𑁂𑀦 𑀢𑁂𑀦 𑀲𑀫𑀁 𑀚𑀸𑀦𑀸𑀢𑀺. 𑀲𑀸𑀫𑀁 𑀚𑀸𑀦𑀸𑀢𑀻𑀢𑀺 𑀲𑀬𑀁 𑀚𑀸𑀦𑀸𑀢𑀺. 𑀧𑀼𑀭𑀺𑀲𑀁 𑀚𑀸𑀦𑀸𑀢𑀻𑀢𑀺 ‘‘𑀅𑀬𑀁 𑀲𑁂𑀝𑁆𑀞𑀲𑀫𑁆𑀫𑀢𑁄’’𑀢𑀺 𑀧𑀼𑀭𑀺𑀲𑀁 𑀚𑀸𑀦𑀸𑀢𑀺. 𑀧𑀼𑀭𑀺𑀲𑀯𑀺𑀲𑁂𑀲𑀁 𑀚𑀸𑀦𑀸𑀢𑀻𑀢𑀺 𑀫𑀼𑀕𑁆𑀕𑀁 𑀫𑀸𑀲𑁂𑀦 𑀲𑀫𑀁 𑀅𑀓𑀢𑁆𑀯𑀸 𑀕𑀼𑀡𑀯𑀺𑀲𑀺𑀝𑁆𑀞𑀲𑁆𑀲 𑀯𑀺𑀲𑁂𑀲𑀁 𑀚𑀸𑀦𑀸𑀢𑀺. 𑀅𑀬𑀫𑀺𑀤𑀫𑀭𑀳𑀢𑀻𑀢𑀺 𑀅𑀬𑀁 𑀧𑀼𑀭𑀺𑀲𑁄 𑀇𑀤𑀁 𑀦𑀸𑀫 𑀤𑀸𑀦𑀲𑀓𑁆𑀓𑀸𑀭𑀁 𑀅𑀭𑀳𑀢𑀺 ¶ . 𑀧𑀼𑀭𑀺𑀲𑀯𑀺𑀲𑁂𑀲𑀓𑀭𑁄 𑀅𑀳𑁄𑀲𑀻𑀢𑀺 𑀧𑀼𑀭𑀺𑀲𑀯𑀺𑀲𑁂𑀲𑀁 𑀜𑀢𑁆𑀯𑀸 𑀓𑀸𑀭𑀓𑁄 𑀅𑀳𑁄𑀲𑀺. 𑀬𑁄 𑀬𑀁 𑀅𑀭𑀳𑀢𑀺, 𑀢𑀲𑁆𑀲𑁂𑀯 𑀢𑀁 𑀅𑀤𑀸𑀲𑀺. 𑀬𑁄 𑀳𑀺 𑀓𑀳𑀸𑀧𑀡𑀸𑀭𑀳𑀲𑁆𑀲 𑀅𑀟𑁆𑀠𑀁 𑀤𑁂𑀢𑀺, 𑀲𑁄 𑀧𑀭𑀲𑁆𑀲 𑀅𑀟𑁆𑀠𑀁 𑀦𑀸𑀲𑁂𑀢𑀺. 𑀬𑁄 𑀤𑁆𑀯𑁂 𑀓𑀳𑀸𑀧𑀡𑁂 𑀤𑁂𑀢𑀺, 𑀲𑁄 𑀅𑀢𑁆𑀢𑀦𑁄 𑀓𑀳𑀸𑀧𑀡𑀁 𑀦𑀸𑀲𑁂𑀢𑀺. 𑀢𑀲𑁆𑀫𑀸 𑀇𑀤𑀁 𑀉𑀪𑀬𑀫𑁆𑀧𑀺 𑀅𑀓𑀢𑁆𑀯𑀸 𑀬𑁄 𑀬𑀁 𑀅𑀭𑀳𑀢𑀺, 𑀢𑀲𑁆𑀲 𑀢𑀤𑁂𑀯 𑀅𑀤𑀸𑀲𑀺. 𑀲𑀤𑁆𑀥𑀸𑀥𑀦𑀦𑁆𑀢𑀺𑀆𑀤𑀻𑀲𑀼 𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑀝𑁆𑀞𑁂𑀦 𑀲𑀤𑁆𑀥𑀸𑀤𑀻𑀦𑀁 𑀥𑀦𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀥 𑀓𑀫𑁆𑀫𑀁 𑀦𑀸𑀫 𑀤𑀻𑀖𑀭𑀢𑁆𑀢𑀁 𑀧𑀼𑀭𑀺𑀲𑀯𑀺𑀲𑁂𑀲𑀁 𑀜𑀢𑁆𑀯𑀸 𑀓𑀢𑀁 𑀲𑀫𑀲𑀗𑁆𑀕𑀳𑀓𑀫𑁆𑀫𑀁. 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀸𑀫 𑀢𑀤𑀲𑁆𑀲 ¶ 𑀓𑀫𑁆𑀫𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀚𑀸𑀦𑀸𑀢𑀽𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀮𑀓𑁆𑀔𑀡𑀸𑀦𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀮𑀓𑁆𑀔𑀡𑀁 𑀦𑀸𑀫 𑀇𑀤𑀫𑁂𑀯 𑀮𑀓𑁆𑀔𑀡𑀤𑁆𑀯𑀬𑀁. 𑀥𑀦𑀲𑀫𑁆𑀧𑀢𑁆𑀢𑀺 𑀆𑀦𑀺𑀲𑀁𑀲𑁄.

𑁨𑁨𑁩. 𑀢𑀼𑀮𑀺𑀬𑀸𑀢𑀺 𑀢𑀼𑀮𑀬𑀺𑀢𑁆𑀯𑀸. 𑀧𑀝𑀺𑀯𑀺𑀘𑀬𑀸𑀢𑀺 𑀧𑀝𑀺𑀯𑀺𑀘𑀺𑀦𑀺𑀢𑁆𑀯𑀸. 𑀫𑀳𑀸𑀚𑀦𑀲𑀗𑁆𑀕𑀸𑀳𑀓𑀦𑁆𑀢𑀺 𑀫𑀳𑀸𑀚𑀦𑀲𑀗𑁆𑀕𑀳𑀡𑀁. 𑀲𑀫𑁂𑀓𑁆𑀔𑀫𑀸𑀦𑁄𑀢𑀺 𑀲𑀫𑀁 𑀧𑁂𑀓𑁆𑀔𑀫𑀸𑀦𑁄. 𑀅𑀢𑀺𑀦𑀺𑀧𑀼𑀡𑀸 ¶ 𑀫𑀦𑀼𑀚𑀸𑀢𑀺 𑀅𑀢𑀺𑀦𑀺𑀧𑀼𑀡𑀸 𑀲𑀼𑀔𑀼𑀫𑀧𑀜𑁆𑀜𑀸 𑀮𑀓𑁆𑀔𑀡𑀧𑀸𑀞𑀓𑀫𑀦𑀼𑀲𑁆𑀲𑀸. 𑀩𑀳𑀼𑀯𑀺𑀯𑀺𑀥𑀸 𑀕𑀺𑀳𑀻𑀦𑀁 𑀅𑀭𑀳𑀸𑀦𑀻𑀢𑀺 𑀩𑀳𑀽 𑀯𑀺𑀯𑀺𑀥𑀸𑀦𑀺 𑀕𑀺𑀳𑀻𑀦𑀁 𑀅𑀦𑀼𑀘𑁆𑀙𑀯𑀺𑀓𑀸𑀦𑀺 𑀧𑀝𑀺𑀮𑀪𑀢𑀺. 𑀤𑀳𑀭𑁄 𑀲𑀼𑀲𑀼 𑀓𑀼𑀫𑀸𑀭𑁄 ‘‘𑀅𑀬𑀁 𑀤𑀳𑀭𑁄 𑀓𑀼𑀫𑀸𑀭𑁄 𑀧𑀝𑀺𑀮𑀪𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀁𑀲𑀼 𑀫𑀳𑀻𑀧𑀢𑀺𑀲𑁆𑀲𑀸𑀢𑀺 𑀭𑀜𑁆𑀜𑁄.

𑀲𑀻𑀳𑀧𑀼𑀩𑁆𑀩𑀤𑁆𑀥𑀓𑀸𑀬𑀸𑀤𑀺𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁨𑁪. 𑀬𑁄𑀕𑀓𑁆𑀔𑁂𑀫𑀓𑀸𑀫𑁄𑀢𑀺 𑀬𑁄𑀕𑀢𑁄 𑀔𑁂𑀫𑀓𑀸𑀫𑁄. 𑀧𑀜𑁆𑀜𑀸𑀬𑀸𑀢𑀺 𑀓𑀫𑁆𑀫𑀲𑁆𑀲𑀓𑀢𑀧𑀜𑁆𑀜𑀸𑀬. 𑀇𑀥 𑀓𑀫𑁆𑀫𑀁 𑀦𑀸𑀫 𑀫𑀳𑀸𑀚𑀦𑀲𑁆𑀲 𑀅𑀢𑁆𑀣𑀓𑀸𑀫𑀢𑀸. 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀸𑀫 𑀢𑀁 𑀫𑀳𑀸𑀚𑀦𑀲𑁆𑀲 𑀅𑀢𑁆𑀣𑀓𑀸𑀫𑀢𑀸𑀬 𑀯𑀟𑁆𑀠𑀺𑀫𑁂𑀯 𑀧𑀘𑁆𑀘𑀸𑀲𑀻𑀲𑀺𑀢𑀪𑀸𑀯𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀚𑀸𑀦𑀸𑀢𑀽𑀢𑀺 𑀇𑀫𑀸𑀦𑀺 𑀲𑀫𑀦𑁆𑀢𑀧𑀭𑀺𑀧𑀽𑀭𑀸𑀦𑀺 𑀅𑀧𑀭𑀺𑀳𑀻𑀦𑀸𑀦𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀮𑀓𑁆𑀔𑀡𑀁 𑀦𑀸𑀫 𑀇𑀤𑀫𑁂𑀯 𑀮𑀓𑁆𑀔𑀡𑀢𑁆𑀢𑀬𑀁. 𑀥𑀦𑀸𑀤𑀻𑀳𑀺 𑀘𑁂𑀯 𑀲𑀤𑁆𑀥𑀸𑀤𑀻𑀳𑀺 𑀘 𑀅𑀧𑀭𑀺𑀳𑀸𑀦𑀺 𑀆𑀦𑀺𑀲𑀁𑀲𑁄.

𑁨𑁨𑁫. 𑀲𑀤𑁆𑀥𑀸𑀬𑀸𑀢𑀺 𑀑𑀓𑀧𑁆𑀧𑀦𑀲𑀤𑁆𑀥𑀸𑀬 𑀧𑀲𑀸𑀤𑀲𑀤𑁆𑀥𑀸𑀬. 𑀲𑀻𑀮𑁂𑀦𑀸𑀢𑀺 𑀧𑀜𑁆𑀘𑀲𑀻𑀮𑁂𑀦 𑀤𑀲𑀲𑀻𑀮𑁂𑀦. 𑀲𑀼𑀢𑁂𑀦𑀸𑀢𑀺 𑀧𑀭𑀺𑀬𑀢𑁆𑀢𑀺𑀲𑀯𑀦𑁂𑀦. 𑀩𑀼𑀤𑁆𑀥𑀺𑀬𑀸𑀢𑀺 𑀏𑀢𑁂𑀲𑀁 𑀩𑀼𑀤𑁆𑀥𑀺𑀬𑀸 ¶ , ‘‘𑀓𑀺𑀦𑁆𑀢𑀺 𑀏𑀢𑁂𑀳𑀺 𑀯𑀟𑁆𑀠𑁂𑀬𑁆𑀬𑀼’’𑀦𑁆𑀢𑀺 𑀏𑀯𑀁 𑀘𑀺𑀦𑁆𑀢𑁂𑀲𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁂𑀦𑀸𑀢𑀺 𑀮𑁄𑀓𑀺𑀬𑀥𑀫𑁆𑀫𑁂𑀦. 𑀩𑀳𑀽𑀳𑀺 𑀲𑀸𑀥𑀽𑀳𑀻𑀢𑀺 𑀅𑀜𑁆𑀜𑁂𑀳𑀺𑀧𑀺 𑀩𑀳𑀽𑀳𑀺 𑀉𑀢𑁆𑀢𑀫𑀕𑀼𑀡𑁂𑀳𑀺. 𑀅𑀲𑀳𑀸𑀦𑀥𑀫𑁆𑀫𑀢𑀦𑁆𑀢𑀺 𑀅𑀧𑀭𑀺𑀳𑀻𑀦𑀥𑀫𑁆𑀫𑀁.

𑀭𑀲𑀕𑁆𑀕𑀲𑀕𑁆𑀕𑀺𑀢𑀸𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁨𑁬. 𑀲𑀫𑀸𑀪𑀺𑀯𑀸𑀳𑀺𑀦𑀺𑀬𑁄𑀢𑀺 𑀬𑀣𑀸 𑀢𑀺𑀮𑀨𑀮𑀫𑀢𑁆𑀢𑀫𑁆𑀧𑀺 𑀚𑀺𑀯𑁆𑀳𑀕𑁆𑀕𑁂 𑀞𑀧𑀺𑀢𑀁 𑀲𑀩𑁆𑀩𑀢𑁆𑀣 𑀨𑀭𑀢𑀺, 𑀏𑀯𑀁 𑀲𑀫𑀸 𑀳𑀼𑀢𑁆𑀯𑀸 𑀯𑀳𑀦𑁆𑀢𑀺. 𑀇𑀥 𑀓𑀫𑁆𑀫𑀁 𑀦𑀸𑀫 𑀅𑀯𑀺𑀳𑁂𑀞𑀦𑀓𑀫𑁆𑀫𑀁. 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀸𑀫 𑀧𑀸𑀡𑀺𑀆𑀤𑀻𑀳𑀺 𑀧𑀳𑀸𑀭𑀁 𑀮𑀤𑁆𑀥𑀲𑁆𑀲 𑀢𑀢𑁆𑀣 𑀢𑀢𑁆𑀣 𑀮𑁄𑀳𑀺𑀢𑀁 𑀲𑀡𑁆𑀞𑀸𑀢𑀺, 𑀕𑀡𑁆𑀞𑀺 𑀕𑀡𑁆𑀞𑀺 𑀳𑀼𑀢𑁆𑀯𑀸 𑀅𑀦𑁆𑀢𑁄𑀯 𑀧𑀼𑀩𑁆𑀩𑀁 𑀕𑀡𑁆𑀳𑀸𑀢𑀺, 𑀅𑀦𑁆𑀢𑁄𑀯 𑀪𑀺𑀚𑁆𑀚𑀢𑀺, 𑀏𑀯𑀁 𑀲𑁄 𑀩𑀳𑀼𑀭𑁄𑀕𑁄 𑀳𑁄𑀢𑀺. 𑀢𑀣𑀸𑀕𑀢𑁂𑀦 𑀧𑀦 𑀤𑀻𑀖𑀭𑀢𑁆𑀢𑀁 𑀇𑀫𑀁 𑀆𑀭𑁄𑀕𑁆𑀬𑀓𑀭𑀡𑀓𑀫𑁆𑀫𑀁 𑀓𑀢𑀁. 𑀢𑀤𑀲𑁆𑀲 𑀲𑀤𑁂𑀯𑀓𑁄 𑀮𑁄𑀓𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀚𑀸𑀦𑀸𑀢𑀽𑀢𑀺 𑀆𑀭𑁄𑀕𑁆𑀬𑀓𑀭𑀁 𑀭𑀲𑀕𑁆𑀕𑀲𑀕𑁆𑀕𑀺𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀢𑀺. 𑀮𑀓𑁆𑀔𑀡𑀁 𑀦𑀸𑀫 𑀇𑀤𑀫𑁂𑀯 𑀮𑀓𑁆𑀔𑀡𑀁. 𑀅𑀧𑁆𑀧𑀸𑀩𑀸𑀥𑀢𑀸 𑀆𑀦𑀺𑀲𑀁𑀲𑁄.

𑁨𑁨𑁭. 𑀫𑀭𑀡𑀯𑀥𑁂𑀦𑀸𑀢𑀺 ¶ ‘‘𑀏𑀢𑀁 𑀫𑀸𑀭𑁂𑀣 𑀏𑀢𑀁 𑀖𑀸𑀢𑁂𑀣𑀸’’𑀢𑀺 𑀏𑀯𑀁 𑀆𑀡𑀢𑁆𑀢𑁂𑀦 𑀫𑀭𑀡𑀯𑀥𑁂𑀦. 𑀉𑀩𑁆𑀩𑀸𑀥𑀦𑀸𑀬𑀸𑀢𑀺 ¶ 𑀩𑀦𑁆𑀥𑀦𑀸𑀕𑀸𑀭𑀧𑁆𑀧𑀯𑁂𑀲𑀦𑁂𑀦.

𑀅𑀪𑀺𑀦𑀻𑀮𑀦𑁂𑀢𑁆𑀢𑀸𑀤𑀺𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁨𑁮. 𑀦 𑀘 𑀯𑀺𑀲𑀝𑀦𑁆𑀢𑀺 𑀓𑀓𑁆𑀓𑀝𑀓𑁄 𑀯𑀺𑀬 𑀅𑀓𑁆𑀔𑀻𑀦𑀺 𑀦𑀻𑀳𑀭𑀺𑀢𑁆𑀯𑀸 𑀦 𑀓𑁄𑀥𑀯𑀲𑁂𑀦 𑀧𑁂𑀓𑁆𑀔𑀺𑀢𑀸 𑀅𑀳𑁄𑀲𑀺. 𑀦 𑀘 𑀯𑀺𑀲𑀸𑀘𑀻𑀢𑀺 𑀯𑀗𑁆𑀓𑀓𑁆𑀔𑀺𑀓𑁄𑀝𑀺𑀬𑀸 𑀧𑁂𑀓𑁆𑀔𑀺𑀢𑀸𑀧𑀺 𑀦𑀸𑀳𑁄𑀲𑀺. 𑀦 𑀘 𑀧𑀦 𑀯𑀺𑀘𑁂𑀬𑁆𑀬 𑀧𑁂𑀓𑁆𑀔𑀺𑀢𑀸𑀢𑀺 𑀯𑀺𑀘𑁂𑀬𑁆𑀬 𑀧𑁂𑀓𑁆𑀔𑀺𑀢𑀸 𑀦𑀸𑀫 𑀬𑁄 𑀓𑀼𑀚𑁆𑀛𑀺𑀢𑁆𑀯𑀸 𑀬𑀤𑀸 𑀦𑀁 𑀧𑀭𑁄 𑀑𑀮𑁄𑀓𑁂𑀢𑀺, 𑀢𑀤𑀸 𑀦𑀺𑀫𑁆𑀫𑀻𑀮𑁂𑀢𑀺 𑀦 𑀑𑀮𑁄𑀓𑁂𑀢𑀺, 𑀧𑀼𑀦 𑀕𑀘𑁆𑀙𑀦𑁆𑀢𑀁 𑀓𑀼𑀚𑁆𑀛𑀺𑀢𑁆𑀯𑀸 𑀑𑀮𑁄𑀓𑁂𑀢𑀺, 𑀏𑀯𑀭𑀽𑀧𑁄 𑀦𑀸𑀳𑁄𑀲𑀺. ‘‘𑀯𑀺𑀦𑁂𑀬𑁆𑀬𑀧𑁂𑀓𑁆𑀔𑀺𑀢𑀸’’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. 𑀉𑀚𑀼𑀁 𑀢𑀣𑀸 𑀧𑀲𑀝𑀫𑀼𑀚𑀼𑀫𑀦𑁄𑀢𑀺 𑀉𑀚𑀼𑀫𑀦𑁄 𑀳𑀼𑀢𑁆𑀯𑀸 𑀉𑀚𑀼 𑀧𑁂𑀓𑁆𑀔𑀺𑀢𑀸 𑀳𑁄𑀢𑀺, 𑀬𑀣𑀸 𑀘 𑀉𑀚𑀼𑀁, 𑀢𑀣𑀸 𑀧𑀲𑀝𑀁 𑀯𑀺𑀧𑀼𑀮𑀁 𑀯𑀺𑀢𑁆𑀣𑀢𑀁 𑀧𑁂𑀓𑁆𑀔𑀺𑀢𑀸 𑀳𑁄𑀢𑀺. 𑀧𑀺𑀬𑀤𑀲𑁆𑀲𑀦𑁄𑀢𑀺 𑀧𑀺𑀬𑀸𑀬𑀫𑀸𑀦𑁂𑀳𑀺 𑀧𑀲𑁆𑀲𑀺𑀢𑀩𑁆𑀩𑁄.

𑀇𑀥 𑀓𑀫𑁆𑀫𑀁 𑀦𑀸𑀫 𑀤𑀻𑀖𑀭𑀢𑁆𑀢𑀁 𑀫𑀳𑀸𑀚𑀦𑀲𑁆𑀲 𑀧𑀺𑀬𑀘𑀓𑁆𑀔𑀼𑀦𑀸 𑀑𑀮𑁄𑀓𑀦𑀓𑀫𑁆𑀫𑀁. 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀸𑀫 𑀓𑀼𑀚𑁆𑀛𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀓𑀸𑀡𑁄 𑀯𑀺𑀬 𑀓𑀸𑀓𑀓𑁆𑀔𑀺 𑀯𑀺𑀬 𑀳𑁄𑀢𑀺, 𑀯𑀗𑁆𑀓𑀓𑁆𑀔𑀺 𑀧𑀦 𑀆𑀯𑀺𑀮𑀓𑁆𑀔𑀺 𑀘 𑀳𑁄𑀢𑀺𑀬𑁂𑀯. 𑀧𑀲𑀦𑁆𑀦𑀘𑀺𑀢𑁆𑀢𑀲𑁆𑀲 𑀧𑀦 𑀑𑀮𑁄𑀓𑀬𑀢𑁄 ¶ 𑀅𑀓𑁆𑀔𑀻𑀦𑀁 𑀧𑀜𑁆𑀘𑀯𑀡𑁆𑀡𑁄 𑀧𑀲𑀸𑀤𑁄 𑀧𑀜𑁆𑀜𑀸𑀬𑀢𑀺. 𑀢𑀣𑀸𑀕𑀢𑁄 𑀘 𑀢𑀣𑀸 𑀑𑀮𑁄𑀓𑁂𑀲𑀺. 𑀅𑀣𑀲𑁆𑀲 𑀢𑀁 𑀤𑀻𑀖𑀭𑀢𑁆𑀢𑀁 𑀧𑀺𑀬𑀘𑀓𑁆𑀔𑀼𑀦𑀸 𑀑𑀮𑁄𑀓𑀺𑀢𑀪𑀸𑀯𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀚𑀸𑀦𑀸𑀢𑀽𑀢𑀺 𑀇𑀫𑀸𑀦𑀺 𑀦𑁂𑀢𑁆𑀢𑀲𑀫𑁆𑀧𑀢𑁆𑀢𑀺𑀓𑀭𑀸𑀦𑀺 𑀤𑁆𑀯𑁂 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀮𑀓𑁆𑀔𑀡𑀁 𑀦𑀸𑀫 𑀇𑀤𑀫𑁂𑀯 𑀮𑀓𑁆𑀔𑀡𑀤𑁆𑀯𑀬𑀁. 𑀧𑀺𑀬𑀤𑀲𑁆𑀲𑀦𑀢𑀸 𑀆𑀦𑀺𑀲𑀁𑀲𑁄. 𑀅𑀪𑀺𑀬𑁄𑀕𑀺𑀦𑁄𑀢𑀺 𑀮𑀓𑁆𑀔𑀡𑀲𑀢𑁆𑀣𑁂 𑀬𑀼𑀢𑁆𑀢𑀸.

𑀉𑀡𑁆𑀳𑀻𑀲𑀲𑀻𑀲𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁩𑁦. 𑀩𑀳𑀼𑀚𑀦𑀧𑀼𑀩𑁆𑀩𑀗𑁆𑀕𑀫𑁄 𑀅𑀳𑁄𑀲𑀻𑀢𑀺 𑀩𑀳𑀼𑀚𑀦𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑁄 𑀅𑀳𑁄𑀲𑀺 𑀕𑀡𑀚𑁂𑀝𑁆𑀞𑀓𑁄. 𑀢𑀲𑁆𑀲 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀅𑀜𑁆𑀜𑁂 𑀆𑀧𑀚𑁆𑀚𑀺𑀁𑀲𑀼. 𑀇𑀥 𑀓𑀫𑁆𑀫𑀁 𑀦𑀸𑀫 𑀧𑀼𑀩𑁆𑀩𑀗𑁆𑀕𑀫𑀢𑀸. 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀸𑀫 𑀬𑁄 𑀧𑀼𑀩𑁆𑀩𑀗𑁆𑀕𑀫𑁄 𑀳𑀼𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀓𑀼𑀲𑀮𑀓𑀫𑁆𑀫𑀸𑀦𑀺 𑀓𑀭𑁄𑀢𑀺, 𑀲𑁄 𑀅𑀫𑀗𑁆𑀓𑀼𑀪𑀽𑀢𑁄 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀧𑀭𑀺𑀧𑀼𑀡𑁆𑀡𑀲𑀻𑀲𑁄 𑀯𑀺𑀘𑀭𑀢𑀺, 𑀫𑀳𑀸𑀧𑀼𑀭𑀺𑀲𑁄 𑀘 𑀳𑁄𑀢𑀺. 𑀢𑀣𑀸𑀕𑀢𑁄 𑀘 𑀢𑀣𑀸 𑀅𑀓𑀸𑀲𑀺. 𑀅𑀣𑀲𑁆𑀲 𑀲𑀤𑁂𑀯𑀓𑁄 𑀮𑁄𑀓𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀇𑀤𑀁 𑀧𑀼𑀩𑁆𑀩𑀗𑁆𑀕𑀫𑀓𑀫𑁆𑀫𑀁 𑀚𑀸𑀦𑀸𑀢𑀽𑀢𑀺 𑀉𑀡𑁆𑀳𑀻𑀲𑀲𑀻𑀲𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀢𑀺. 𑀮𑀓𑁆𑀔𑀡𑀁 𑀦𑀸𑀫 𑀇𑀤𑀫𑁂𑀯 𑀮𑀓𑁆𑀔𑀡𑀁. 𑀫𑀳𑀸𑀚𑀦𑀸𑀦𑀼𑀯𑀢𑁆𑀢𑀦𑀢𑀸 𑀆𑀦𑀺𑀲𑀁𑀲𑁄.

𑁨𑁩𑁧. 𑀩𑀳𑀼𑀚𑀦𑀁 ¶ 𑀳𑁂𑀲𑁆𑀲𑀢𑀻𑀢𑀺 𑀩𑀳𑀼𑀚𑀦𑀲𑁆𑀲 𑀪𑀯𑀺𑀲𑁆𑀲𑀢𑀺. 𑀧𑀝𑀺𑀪𑁄𑀕𑀺𑀬𑀸𑀢𑀺 ¶ 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀸, 𑀏𑀢𑀲𑁆𑀲 𑀩𑀳𑀽 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀪𑀺𑀳𑀭𑀦𑁆𑀢𑀺 𑀢𑀤𑀸𑀢𑀺 𑀤𑀳𑀭𑀓𑀸𑀮𑁂𑀬𑁂𑀯 𑀢𑀤𑀸 𑀏𑀯𑀁 𑀩𑁆𑀬𑀸𑀓𑀭𑁄𑀦𑁆𑀢𑀺. 𑀧𑀝𑀺𑀳𑀸𑀭𑀓𑀦𑁆𑀢𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀪𑀸𑀯𑀁. 𑀯𑀺𑀲𑀯𑀻𑀢𑀺 𑀘𑀺𑀡𑁆𑀡𑀯𑀲𑀻.

𑀏𑀓𑁂𑀓𑀮𑁄𑀫𑀢𑀸𑀤𑀺𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁩𑁨. 𑀉𑀧𑀯𑀢𑁆𑀢𑀢𑀻𑀢𑀺 𑀅𑀚𑁆𑀛𑀸𑀲𑀬𑀁 𑀅𑀦𑀼𑀯𑀢𑁆𑀢𑀢𑀺, 𑀇𑀥 𑀓𑀫𑁆𑀫𑀁 𑀦𑀸𑀫 𑀤𑀻𑀖𑀭𑀢𑁆𑀢𑀁 𑀲𑀘𑁆𑀘𑀓𑀣𑀦𑀁. 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀸𑀫 𑀤𑀻𑀖𑀭𑀢𑁆𑀢𑀁 𑀅𑀤𑁆𑀯𑁂𑀚𑁆𑀛𑀓𑀣𑀸𑀬 𑀧𑀭𑀺𑀲𑀼𑀤𑁆𑀥𑀓𑀣𑀸𑀬 𑀓𑀣𑀺𑀢𑀪𑀸𑀯𑀫𑀲𑁆𑀲 𑀲𑀤𑁂𑀯𑀓𑁄 𑀮𑁄𑀓𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀚𑀸𑀦𑀸𑀢𑀽𑀢𑀺 𑀏𑀓𑁂𑀓𑀮𑁄𑀫𑀮𑀓𑁆𑀔𑀡𑀜𑁆𑀘 𑀉𑀡𑁆𑀡𑀸𑀮𑀓𑁆𑀔𑀡𑀜𑁆𑀘 𑀦𑀺𑀩𑁆𑀩𑀢𑁆𑀢𑀢𑀺. 𑀮𑀓𑁆𑀔𑀡𑀁 𑀦𑀸𑀫 𑀇𑀤𑀫𑁂𑀯 𑀮𑀓𑁆𑀔𑀡𑀤𑁆𑀯𑀬𑀁. 𑀫𑀳𑀸𑀚𑀦𑀲𑁆𑀲 𑀅𑀚𑁆𑀛𑀸𑀲𑀬𑀸𑀦𑀼𑀓𑀽𑀮𑁂𑀦 𑀅𑀦𑀼𑀯𑀢𑁆𑀢𑀦𑀢𑀸 𑀆𑀦𑀺𑀲𑀁𑀲𑁄. 𑀏𑀓𑁂𑀓𑀮𑁄𑀫𑀽𑀧𑀘𑀺𑀢𑀗𑁆𑀕𑀯𑀸𑀢𑀺 𑀏𑀓𑁂𑀓𑁂𑀳𑀺 𑀮𑁄𑀫𑁂𑀳𑀺 𑀉𑀧𑀘𑀺𑀢𑀲𑀭𑀻𑀭𑁄.

𑀘𑀢𑁆𑀢𑀸𑀮𑀻𑀲𑀸𑀤𑀺𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁩𑁪. 𑀅𑀪𑁂𑀚𑁆𑀚𑀧𑀭𑀺𑀲𑁄𑀢𑀺 ¶ 𑀅𑀪𑀺𑀦𑁆𑀤𑀺𑀢𑀩𑁆𑀩𑀧𑀭𑀺𑀲𑁄. 𑀇𑀥 𑀓𑀫𑁆𑀫𑀁 𑀦𑀸𑀫 𑀤𑀻𑀖𑀭𑀢𑁆𑀢𑀁 𑀅𑀧𑀺𑀲𑀼𑀡𑀯𑀸𑀘𑀸𑀬 𑀓𑀣𑀦𑀁. 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀸𑀫 𑀧𑀺𑀲𑀼𑀡𑀯𑀸𑀘𑀲𑁆𑀲 𑀓𑀺𑀭 𑀲𑀫𑀕𑁆𑀕𑀪𑀸𑀯𑀁 𑀪𑀺𑀦𑁆𑀤𑀦𑀢𑁄 𑀤𑀦𑁆𑀢𑀸 𑀅𑀧𑀭𑀺𑀧𑀼𑀡𑁆𑀡𑀸 𑀘𑁂𑀯 𑀳𑁄𑀦𑁆𑀢𑀺 𑀯𑀺𑀭𑀴𑀸 𑀘. 𑀢𑀣𑀸𑀕𑀢𑀲𑁆𑀲 𑀧𑀦 𑀤𑀻𑀖𑀭𑀢𑁆𑀢𑀁 𑀅𑀧𑀺𑀲𑀼𑀡𑀯𑀸𑀘𑀢𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀚𑀸𑀦𑀸𑀢𑀽𑀢𑀺 𑀇𑀤𑀁 𑀮𑀓𑁆𑀔𑀡𑀤𑁆𑀯𑀬𑀁 𑀦𑀺𑀩𑁆𑀩𑀢𑁆𑀢𑀢𑀺. 𑀮𑀓𑁆𑀔𑀡𑀁 𑀦𑀸𑀫 𑀇𑀤𑀫𑁂𑀯 𑀮𑀓𑁆𑀔𑀡𑀤𑁆𑀯𑀬𑀁. 𑀅𑀪𑁂𑀚𑁆𑀚𑀧𑀭𑀺𑀲𑀢𑀸 𑀆𑀦𑀺𑀲𑀁𑀲𑁄. 𑀘𑀢𑀼𑀭𑁄 𑀤𑀲𑀸𑀢𑀺 𑀘𑀢𑁆𑀢𑀸𑀭𑁄 𑀤𑀲 𑀘𑀢𑁆𑀢𑀸𑀮𑀻𑀲𑀁.

𑀧𑀳𑀽𑀢𑀚𑀺𑀯𑁆𑀳𑀸𑀤𑀺𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁩𑁬. 𑀆𑀤𑁂𑀬𑁆𑀬𑀯𑀸𑀘𑁄 𑀳𑁄𑀢𑀻𑀢𑀺 𑀕𑀳𑁂𑀢𑀩𑁆𑀩𑀯𑀘𑀦𑁄 𑀳𑁄𑀢𑀺. 𑀇𑀥 𑀓𑀫𑁆𑀫𑀁 𑀦𑀸𑀫 𑀤𑀻𑀖𑀭𑀢𑁆𑀢𑀁 𑀅𑀨𑀭𑀼𑀲𑀯𑀸𑀤𑀺𑀢𑀸. 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀸𑀫 𑀬𑁂 𑀨𑀭𑀼𑀲𑀯𑀸𑀘𑀸 𑀳𑁄𑀦𑁆𑀢𑀺, 𑀢𑁂 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀦𑁂𑀲𑀁 𑀚𑀺𑀯𑁆𑀳𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀨𑀭𑀼𑀲𑀯𑀸𑀘𑀸𑀬 𑀓𑀣𑀺𑀢𑀪𑀸𑀯𑀁 𑀚𑀦𑁄 𑀚𑀸𑀦𑀸𑀢𑀽𑀢𑀺 𑀩𑀤𑁆𑀥𑀚𑀺𑀯𑁆𑀳𑀸 𑀯𑀸 𑀳𑁄𑀦𑁆𑀢𑀺, 𑀕𑀽𑀴𑁆𑀳𑀚𑀺𑀯𑁆𑀳𑀸 𑀯𑀸 𑀤𑁆𑀯𑀺𑀚𑀺𑀯𑁆𑀳𑀸 𑀯𑀸 𑀫𑀫𑁆𑀫𑀦𑀸 𑀯𑀸. 𑀬𑁂 𑀧𑀦 𑀚𑀺𑀯𑁆𑀳𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀨𑀭𑀼𑀲𑀯𑀸𑀘𑀁 𑀦 𑀯𑀤𑀦𑁆𑀢𑀺, 𑀢𑁂 𑀩𑀤𑁆𑀥𑀚𑀺𑀯𑁆𑀳𑀸 𑀕𑀽𑀴𑁆𑀳𑀚𑀺𑀯𑁆𑀳𑀸 𑀤𑁆𑀯𑀺𑀚𑀺𑀯𑁆𑀳𑀸 𑀦 𑀳𑁄𑀦𑁆𑀢𑀺. 𑀫𑀼𑀤𑀼 𑀦𑁂𑀲𑀁 𑀚𑀺𑀯𑁆𑀳𑀸 𑀳𑁄𑀢𑀺 𑀭𑀢𑁆𑀢𑀓𑀫𑁆𑀩𑀮𑀯𑀡𑁆𑀡𑀸. 𑀢𑀲𑁆𑀫𑀸 𑀢𑀣𑀸𑀕𑀢𑀲𑁆𑀲 𑀤𑀻𑀖𑀭𑀢𑁆𑀢𑀁 𑀚𑀺𑀯𑁆𑀳𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀨𑀭𑀼𑀲𑀸𑀬 𑀯𑀸𑀘𑀸𑀬 𑀅𑀓𑀣𑀺𑀢𑀪𑀸𑀯𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀚𑀸𑀦𑀸𑀢𑀽𑀢𑀺 𑀧𑀳𑀽𑀢𑀚𑀺𑀯𑁆𑀳𑀸𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀢𑀺. 𑀨𑀭𑀼𑀲𑀯𑀸𑀘𑀁 𑀓𑀣𑁂𑀦𑁆𑀢𑀸𑀦𑀜𑁆𑀘 𑀲𑀤𑁆𑀤𑁄 𑀪𑀺𑀚𑁆𑀚𑀢𑀺. 𑀢𑁂 𑀲𑀤𑁆𑀤𑀪𑁂𑀤𑀁 𑀓𑀢𑁆𑀯𑀸 𑀨𑀭𑀼𑀲𑀯𑀸𑀘𑀸𑀬 𑀓𑀣𑀺𑀢𑀪𑀸𑀯𑀁 𑀚𑀦𑁄 𑀚𑀸𑀦𑀸𑀢𑀽𑀢𑀺 ¶ ¶ 𑀙𑀺𑀦𑁆𑀦𑀲𑁆𑀲𑀭𑀸 𑀯𑀸 𑀳𑁄𑀦𑁆𑀢𑀺 𑀪𑀺𑀦𑁆𑀦𑀲𑁆𑀲𑀭𑀸 𑀯𑀸 𑀓𑀸𑀓𑀲𑁆𑀲𑀭𑀸 𑀯𑀸. 𑀬𑁂 𑀧𑀦 𑀲𑀭𑀪𑁂𑀤𑀓𑀭𑀁 𑀨𑀭𑀼𑀲𑀯𑀸𑀘𑀁 𑀦 𑀓𑀣𑁂𑀦𑁆𑀢𑀺, 𑀢𑁂𑀲𑀁 𑀲𑀤𑁆𑀤𑁄 𑀫𑀥𑀼𑀭𑁄 𑀘 𑀳𑁄𑀢𑀺 𑀧𑁂𑀫𑀦𑀻𑀬𑁄. 𑀢𑀲𑁆𑀫𑀸 𑀢𑀣𑀸𑀕𑀢𑀲𑁆𑀲 𑀤𑀻𑀖𑀭𑀢𑁆𑀢𑀁 𑀲𑀭𑀪𑁂𑀤𑀓𑀭𑀸𑀬 𑀨𑀭𑀼𑀲𑀯𑀸𑀘𑀸𑀬 𑀅𑀓𑀣𑀺𑀢𑀪𑀸𑀯𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀚𑀸𑀦𑀸𑀢𑀽𑀢𑀺 𑀩𑁆𑀭𑀳𑁆𑀫𑀲𑁆𑀲𑀭𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀢𑀺. 𑀮𑀓𑁆𑀔𑀡𑀁 𑀦𑀸𑀫 𑀇𑀤𑀫𑁂𑀯 𑀮𑀓𑁆𑀔𑀡𑀤𑁆𑀯𑀬𑀁. 𑀆𑀤𑁂𑀬𑁆𑀬𑀯𑀘𑀦𑀢𑀸 𑀆𑀦𑀺𑀲𑀁𑀲𑁄.

𑁨𑁩𑁭. 𑀉𑀩𑁆𑀩𑀸𑀥𑀺𑀓𑀦𑁆𑀢𑀺 𑀅𑀓𑁆𑀓𑁄𑀲𑀬𑀼𑀢𑁆𑀢𑀢𑁆𑀢𑀸 𑀆𑀩𑀸𑀥𑀓𑀭𑀺𑀁 𑀩𑀳𑀼𑀚𑀦𑀧𑁆𑀧𑀫𑀤𑁆𑀤𑀦𑀦𑁆𑀢𑀺 𑀩𑀳𑀼𑀚𑀦𑀸𑀦𑀁 𑀧𑀫𑀤𑁆𑀤𑀦𑀺𑀁 𑀅𑀩𑀸𑀴𑁆𑀳𑀁 𑀕𑀺𑀭𑀁 𑀲𑁄 𑀦 𑀪𑀡𑀺 𑀨𑀭𑀼𑀲𑀦𑁆𑀢𑀺 𑀏𑀢𑁆𑀣 𑀅𑀓𑀸𑀭𑁄 𑀧𑀭𑀢𑁄 𑀪𑀡𑀺𑀲𑀤𑁆𑀤𑁂𑀦 𑀬𑁄𑀚𑁂𑀢𑀩𑁆𑀩𑁄. 𑀩𑀸𑀴𑁆𑀳𑀦𑁆𑀢𑀺 𑀩𑀮𑀯𑀁 𑀅𑀢𑀺𑀨𑀭𑀼𑀲𑀁. 𑀩𑀸𑀴𑁆𑀳𑀁 𑀕𑀺𑀭𑀁 𑀲𑁄 𑀦 𑀅𑀪𑀡𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀲𑀼𑀲𑀁𑀳𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀧𑁂𑀫𑀲𑀜𑁆𑀳𑀺𑀢𑀁. 𑀲𑀔𑀺𑀮𑀦𑁆𑀢𑀺 ¶ 𑀫𑀼𑀤𑀼𑀓𑀁. 𑀯𑀸𑀘𑀸𑀢𑀺 𑀯𑀸𑀘𑀸𑀬𑁄. 𑀓𑀡𑁆𑀡𑀲𑀼𑀔𑀸𑀢𑀺 𑀓𑀡𑁆𑀡𑀲𑀼𑀔𑀸𑀬𑁄. ‘‘𑀓𑀡𑁆𑀡𑀲𑀼𑀔’’𑀦𑁆𑀢𑀺𑀧𑀺 𑀧𑀸𑀞𑁄, 𑀬𑀣𑀸 𑀓𑀡𑁆𑀡𑀸𑀦𑀁 𑀲𑀼𑀔𑀁 𑀳𑁄𑀢𑀺, 𑀏𑀯𑀁 𑀏𑀭𑀬𑀢𑀻𑀢𑀺 𑀅𑀢𑁆𑀣𑁄. 𑀯𑁂𑀤𑀬𑀣𑀸𑀢𑀺 𑀯𑁂𑀤𑀬𑀺𑀢𑁆𑀣. 𑀩𑁆𑀭𑀳𑁆𑀫𑀲𑁆𑀲𑀭𑀢𑁆𑀢𑀦𑁆𑀢𑀺 𑀩𑁆𑀭𑀳𑁆𑀫𑀲𑁆𑀲𑀭𑀢𑀁. 𑀩𑀳𑀼𑀦𑁄 𑀩𑀳𑀼𑀦𑁆𑀢𑀺 𑀩𑀳𑀼𑀚𑀦𑀲𑁆𑀲 𑀩𑀳𑀼𑀁. ‘‘𑀩𑀳𑀽𑀦𑀁 𑀩𑀳𑀼𑀦𑁆𑀢𑀺’’𑀧𑀺 𑀧𑀸𑀞𑁄, 𑀩𑀳𑀼𑀚𑀦𑀸𑀦𑀁 𑀩𑀳𑀼𑀦𑁆𑀢𑀺 𑀅𑀢𑁆𑀣𑁄.

𑀲𑀻𑀳𑀳𑀦𑀼𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁩𑁮. 𑀅𑀧𑁆𑀧𑀥𑀁𑀲𑀺𑀓𑁄 𑀳𑁄𑀢𑀻𑀢𑀺 𑀕𑀼𑀡𑀢𑁄 𑀯𑀸 𑀞𑀸𑀦𑀢𑁄 𑀯𑀸 𑀧𑀥𑀁𑀲𑁂𑀢𑀼𑀁 𑀘𑀸𑀯𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄. 𑀇𑀥 𑀓𑀫𑁆𑀫𑀁 𑀦𑀸𑀫 𑀧𑀮𑀸𑀧𑀓𑀣𑀸𑀬 𑀅𑀓𑀣𑀦𑀁. 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀸𑀫 𑀬𑁂 𑀢𑀁 𑀓𑀣𑁂𑀦𑁆𑀢𑀺, 𑀢𑁂 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀦𑁂𑀲𑀁 𑀳𑀦𑀼𑀓𑀁 𑀘𑀸𑀮𑁂𑀢𑁆𑀯𑀸 𑀘𑀸𑀮𑁂𑀢𑁆𑀯𑀸 𑀧𑀮𑀸𑀧𑀓𑀣𑀸𑀬 𑀓𑀣𑀺𑀢𑀪𑀸𑀯𑀁 𑀚𑀦𑁄 𑀚𑀸𑀦𑀸𑀢𑀽𑀢𑀺 𑀅𑀦𑁆𑀢𑁄𑀧𑀯𑀺𑀝𑁆𑀞𑀳𑀦𑀼𑀓𑀸 𑀯𑀸 𑀯𑀗𑁆𑀓𑀳𑀦𑀼𑀓𑀸 𑀯𑀸 𑀧𑀩𑁆𑀪𑀸𑀭𑀳𑀦𑀼𑀓𑀸 𑀯𑀸 𑀳𑁄𑀦𑁆𑀢𑀺. 𑀢𑀣𑀸𑀕𑀢𑁄 𑀧𑀦 𑀢𑀣𑀸 𑀦 𑀓𑀣𑁂𑀲𑀺. 𑀢𑁂𑀦𑀲𑁆𑀲 𑀳𑀦𑀼𑀓𑀁 𑀘𑀸𑀮𑁂𑀢𑁆𑀯𑀸 𑀘𑀸𑀮𑁂𑀢𑁆𑀯𑀸 𑀤𑀻𑀖𑀭𑀢𑁆𑀢𑀁 𑀧𑀮𑀸𑀧𑀓𑀣𑀸𑀬 𑀅𑀓𑀣𑀺𑀢𑀪𑀸𑀯𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀚𑀸𑀦𑀸𑀢𑀽𑀢𑀺 𑀲𑀻𑀳𑀳𑀦𑀼𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀢𑀺. 𑀮𑀓𑁆𑀔𑀡𑀁 𑀦𑀸𑀫 𑀇𑀤𑀫𑁂𑀯 𑀮𑀓𑁆𑀔𑀡𑀁. 𑀅𑀧𑁆𑀧𑀥𑀁𑀲𑀺𑀓𑀢𑀸 𑀆𑀦𑀺𑀲𑀁𑀲𑁄.

𑁨𑁩𑁯. 𑀅𑀯𑀺𑀓𑀺𑀡𑁆𑀡𑀯𑀘𑀦𑀩𑁆𑀬𑀧𑁆𑀧𑀣𑁄 𑀘𑀸𑀢𑀺 𑀅𑀯𑀺𑀓𑀺𑀡𑁆𑀡𑀯𑀘𑀦𑀸𑀦𑀁 𑀯𑀺𑀬 𑀧𑀼𑀭𑀺𑀫𑀩𑁄𑀥𑀺𑀲𑀢𑁆𑀢𑀸𑀦𑀁 𑀯𑀘𑀦𑀧𑀣𑁄 𑀅𑀲𑁆𑀲𑀸𑀢𑀺 𑀅𑀯𑀺𑀓𑀺𑀡𑁆𑀡𑀯𑀘𑀦𑀩𑁆𑀬𑀧𑁆𑀧𑀣𑁄. 𑀤𑁆𑀯𑀺𑀤𑀼𑀕𑀫𑀯𑀭𑀢𑀭𑀳𑀦𑀼𑀢𑁆𑀢𑀫𑀮𑀢𑁆𑀣𑀸𑀢𑀺 𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀕𑀘𑁆𑀙𑀢𑀻𑀢𑀺 ¶ 𑀤𑁆𑀯𑀺𑀤𑀼𑀕𑀫𑁄, 𑀤𑁆𑀯𑀻𑀳𑀺 𑀤𑁆𑀯𑀻𑀳𑀻𑀢𑀺 𑀘𑀢𑀽𑀳𑀺, 𑀘𑀢𑀼𑀧𑁆𑀧𑀤𑀸𑀦𑀁 𑀯𑀭𑀢𑀭𑀲𑁆𑀲 𑀲𑀻𑀳𑀲𑁆𑀲𑁂𑀯 𑀳𑀦𑀼𑀪𑀸𑀯𑀁 𑀅𑀮𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀫𑀦𑀼𑀚𑀸𑀥𑀺𑀧𑀢𑀻𑀢𑀺 𑀫𑀦𑀼𑀚𑀸𑀦𑀁 𑀅𑀥𑀺𑀧𑀢𑀺. 𑀢𑀣𑀢𑁆𑀢𑁄𑀢𑀺 𑀢𑀣𑀲𑀪𑀸𑀯𑁄.

𑀲𑀫𑀤𑀦𑁆𑀢𑀸𑀤𑀺𑀮𑀓𑁆𑀔𑀡𑀯𑀡𑁆𑀡𑀦𑀸

𑁨𑁪𑁦. 𑀲𑀼𑀘𑀺𑀧𑀭𑀺𑀯𑀸𑀭𑁄𑀢𑀺 ¶ 𑀧𑀭𑀺𑀲𑀼𑀤𑁆𑀥𑀧𑀭𑀺𑀯𑀸𑀭𑁄. 𑀇𑀥 𑀓𑀫𑁆𑀫𑀁 𑀦𑀸𑀫 𑀲𑀫𑁆𑀫𑀸𑀚𑀻𑀯𑀢𑀸. 𑀓𑀫𑁆𑀫𑀲𑀭𑀺𑀓𑁆𑀔𑀓𑀁 𑀦𑀸𑀫 𑀬𑁄 𑀯𑀺𑀲𑀫𑁂𑀦 𑀲𑀁𑀓𑀺𑀮𑀺𑀝𑁆𑀞𑀸𑀚𑀻𑀯𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑁂𑀢𑀺, 𑀢𑀲𑁆𑀲 𑀤𑀦𑁆𑀢𑀸𑀧𑀺 𑀯𑀺𑀲𑀫𑀸 𑀳𑁄𑀦𑁆𑀢𑀺 𑀤𑀸𑀞𑀸𑀧𑀺 𑀓𑀺𑀮𑀺𑀝𑁆𑀞𑀸. 𑀢𑀣𑀸𑀕𑀢𑀲𑁆𑀲 𑀧𑀦 𑀲𑀫𑁂𑀦 𑀲𑀼𑀤𑁆𑀥𑀸𑀚𑀻𑀯𑁂𑀦 𑀚𑀻𑀯𑀺𑀢𑀁 𑀓𑀧𑁆𑀧𑀺𑀢𑀪𑀸𑀯𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀚𑀸𑀦𑀸𑀢𑀽𑀢𑀺 𑀲𑀫𑀤𑀦𑁆𑀢𑀮𑀓𑁆𑀔𑀡𑀜𑁆𑀘 𑀲𑀼𑀲𑀼𑀓𑁆𑀓𑀤𑀸𑀞𑀸𑀮𑀓𑁆𑀔𑀡𑀜𑁆𑀘 𑀦𑀺𑀩𑁆𑀩𑀢𑁆𑀢𑀢𑀺. 𑀮𑀓𑁆𑀔𑀡𑀁 𑀦𑀸𑀫 𑀇𑀤𑀫𑁂𑀯 𑀮𑀓𑁆𑀔𑀡𑀤𑁆𑀯𑀬𑀁. 𑀲𑀼𑀘𑀺𑀧𑀭𑀺𑀯𑀸𑀭𑀢𑀸 𑀆𑀦𑀺𑀲𑀁𑀲𑁄.

𑁨𑁪𑁧. 𑀅𑀯𑀲𑁆𑀲𑀚𑀻𑀢𑀺 ¶ 𑀧𑀳𑀸𑀲𑀺 𑀢𑀺𑀤𑀺𑀯𑀧𑀼𑀭𑀯𑀭𑀲𑀫𑁄𑀢𑀺 𑀢𑀺𑀤𑀺𑀯𑀧𑀼𑀭𑀯𑀭𑁂𑀦 𑀲𑀓𑁆𑀓𑁂𑀦 𑀲𑀫𑁄. 𑀮𑀧𑀦𑀚𑀦𑁆𑀢𑀺 𑀫𑀼𑀔𑀚𑀁, 𑀤𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀤𑀺𑀚𑀲𑀫𑀲𑀼𑀓𑁆𑀓𑀲𑀼𑀘𑀺𑀲𑁄𑀪𑀦𑀤𑀦𑁆𑀢𑁄𑀢𑀺 𑀤𑁆𑀯𑁂 𑀯𑀸𑀭𑁂 𑀚𑀸𑀢𑀢𑁆𑀢𑀸 𑀤𑀺𑀚𑀦𑀸𑀫𑀓𑀸 𑀲𑀼𑀓𑁆𑀓𑀸 𑀲𑀼𑀘𑀺 𑀲𑁄𑀪𑀦𑀸 𑀘 𑀤𑀦𑁆𑀢𑀸 𑀅𑀲𑁆𑀲𑀸𑀢𑀺 𑀤𑀺𑀚𑀲𑀫𑀲𑀼𑀓𑁆𑀓𑀲𑀼𑀘𑀺𑀲𑁄𑀪𑀦𑀤𑀦𑁆𑀢𑁄. 𑀦 𑀘 𑀚𑀦𑀧𑀤𑀢𑀼𑀤𑀦𑀦𑁆𑀢𑀺 𑀬𑁄 𑀢𑀲𑁆𑀲 𑀘𑀓𑁆𑀓𑀯𑀸𑀴𑀧𑀭𑀺𑀘𑁆𑀙𑀺𑀦𑁆𑀦𑁄 𑀚𑀦𑀧𑀤𑁄, 𑀢𑀲𑁆𑀲 𑀅𑀜𑁆𑀜𑁂𑀦 𑀢𑀼𑀤𑀦𑀁 𑀧𑀻𑀴𑀸 𑀯𑀸 𑀆𑀩𑀸𑀥𑁄 𑀯𑀸 𑀦𑀢𑁆𑀣𑀺. 𑀳𑀺𑀢𑀫𑀧𑀺 𑀘 𑀩𑀳𑀼𑀚𑀦 𑀲𑀼𑀔𑀜𑁆𑀘 𑀘𑀭𑀦𑁆𑀢𑀻𑀢𑀺 𑀩𑀳𑀼𑀚𑀦𑀸 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑀸 𑀳𑀼𑀢𑁆𑀯𑀸 𑀢𑀲𑁆𑀫𑀺𑀁 𑀚𑀦𑀧𑀤𑁂 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀺𑀢𑀜𑁆𑀘𑁂𑀯 𑀲𑀼𑀔𑀜𑁆𑀘 𑀘𑀭𑀦𑁆𑀢𑀺. 𑀯𑀺𑀧𑀸𑀧𑁄𑀢𑀺 𑀯𑀺𑀕𑀢𑀧𑀸𑀧𑁄. 𑀯𑀺𑀕𑀢𑀤𑀭𑀣𑀓𑀺𑀮𑀫𑀣𑁄𑀢𑀺 𑀯𑀺𑀕𑀢𑀓𑀸𑀬𑀺𑀓𑀤𑀭𑀣𑀓𑀺𑀮𑀫𑀣𑁄. 𑀫𑀮𑀔𑀺𑀮𑀓𑀮𑀺𑀓𑀺𑀮𑁂𑀲𑁂 𑀧𑀦𑀼𑀤𑁂𑀳𑀻𑀢𑀺 𑀭𑀸𑀕𑀸𑀤𑀺𑀫𑀮𑀸𑀦𑀜𑁆𑀘𑁂𑀯 𑀭𑀸𑀕𑀸𑀤𑀺𑀔𑀺𑀮𑀸𑀦𑀜𑁆𑀘 𑀤𑁄𑀲𑀓𑀮𑀻𑀦𑀜𑁆𑀘 𑀲𑀩𑁆𑀩𑀓𑀺𑀮𑁂𑀲𑀸𑀦𑀜𑁆𑀘 𑀅𑀧𑀦𑀼𑀤𑁂𑀳𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀮𑀓𑁆𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀺𑀗𑁆𑀕𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑀦𑀺𑀤𑀸𑀦𑀯𑀡𑁆𑀡𑀦𑀸

𑁨𑁪𑁨. 𑀏𑀯𑀁 ¶ ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀲𑀺𑀗𑁆𑀕𑀸𑀮𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀫𑀦𑀼𑀢𑁆𑀢𑀸𑀦𑀧𑀤𑀯𑀡𑁆𑀡𑀦𑀸 𑁋 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂𑀢𑀺 𑀯𑁂𑀴𑀼𑀯𑀦𑀦𑁆𑀢𑀺 𑀢𑀲𑁆𑀲 𑀉𑀬𑁆𑀬𑀸𑀦𑀲𑁆𑀲 𑀦𑀸𑀫𑀁. 𑀢𑀁 𑀓𑀺𑀭 𑀯𑁂𑀴𑀽𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀁 𑀅𑀳𑁄𑀲𑀺 𑀅𑀝𑁆𑀞𑀸𑀭𑀲𑀳𑀢𑁆𑀣𑁂𑀦 𑀘 𑀧𑀸𑀓𑀸𑀭𑁂𑀦 𑀕𑁄𑀧𑀼𑀭𑀝𑁆𑀝𑀸𑀮𑀓𑀬𑀼𑀢𑁆𑀢𑀁 𑀦𑀻𑀮𑁄𑀪𑀸𑀲𑀁 𑀫𑀦𑁄𑀭𑀫𑀁, 𑀢𑁂𑀦 𑀯𑁂𑀴𑀼𑀯𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀮𑀦𑁆𑀤𑀓𑀸𑀦𑀜𑁆𑀘𑁂𑀢𑁆𑀣 𑀦𑀺𑀯𑀸𑀧𑀁 𑀅𑀤𑀁𑀲𑀼, 𑀢𑁂𑀦 𑀓𑀮𑀦𑁆𑀤𑀓𑀦𑀺𑀯𑀸𑀧𑁄𑀢𑀺 𑀯𑀼𑀘𑁆𑀘𑀢𑀺.

𑀧𑀼𑀩𑁆𑀩𑁂 𑀓𑀺𑀭 𑀅𑀜𑁆𑀜𑀢𑀭𑁄 𑀭𑀸𑀚𑀸 𑀢𑀢𑁆𑀣 𑀉𑀬𑁆𑀬𑀸𑀦𑀓𑀻𑀴𑀦𑀢𑁆𑀣𑀁 𑀆𑀕𑀢𑁄 𑀲𑀼𑀭𑀸𑀫𑀤𑁂𑀦 𑀫𑀢𑁆𑀢𑁄 𑀤𑀺𑀯𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀧𑀭𑀺𑀚𑀦𑁄𑀧𑀺𑀲𑁆𑀲 ‘‘𑀲𑀼𑀢𑁆𑀢𑁄 𑀭𑀸𑀚𑀸’’𑀢𑀺 𑀧𑀼𑀧𑁆𑀨𑀨𑀮𑀸𑀤𑀻𑀳𑀺 𑀧𑀮𑁄𑀪𑀺𑀬𑀫𑀸𑀦𑁄 𑀇𑀢𑁄 𑀘𑀺𑀢𑁄 𑀘 𑀧𑀓𑁆𑀓𑀸𑀫𑀺. 𑀅𑀣 𑀲𑀼𑀭𑀸𑀕𑀦𑁆𑀥𑁂𑀦 𑀅𑀜𑁆𑀜𑀢𑀭𑀲𑁆𑀫𑀸 𑀲𑀼𑀲𑀺𑀭𑀭𑀼𑀓𑁆𑀔𑀸 𑀓𑀡𑁆𑀳𑀲𑀧𑁆𑀧𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀜𑁆𑀜𑁄 𑀅𑀪𑀺𑀫𑀼𑀔𑁄 𑀆𑀕𑀘𑁆𑀙𑀢𑀺, 𑀢𑀁 𑀤𑀺𑀲𑁆𑀯𑀸 𑀭𑀼𑀓𑁆𑀔𑀤𑁂𑀯𑀢𑀸 ‘‘𑀭𑀜𑁆𑀜𑁄 𑀚𑀻𑀯𑀺𑀢𑀁 𑀤𑀫𑁆𑀫𑀻’’𑀢𑀺 𑀓𑀸𑀴𑀓𑀯𑁂𑀲𑁂𑀦 𑀆𑀕𑀦𑁆𑀢𑁆𑀯𑀸 𑀓𑀡𑁆𑀡𑀫𑀽𑀮𑁂 𑀲𑀤𑁆𑀤𑀫𑀓𑀸𑀲𑀺. 𑀭𑀸𑀚𑀸 𑀧𑀝𑀺𑀩𑀼𑀚𑁆𑀛𑀺. 𑀓𑀡𑁆𑀳𑀲𑀧𑁆𑀧𑁄 𑀦𑀺𑀯𑀢𑁆𑀢𑁄. 𑀲𑁄 𑀢𑀁 𑀤𑀺𑀲𑁆𑀯𑀸 ‘‘𑀇𑀫𑀸𑀬 𑀓𑀸𑀴𑀓𑀸𑀬 𑀫𑀫 𑀚𑀻𑀯𑀺𑀢𑀁 𑀤𑀺𑀦𑁆𑀦’’𑀦𑁆𑀢𑀺 𑀓𑀸𑀴𑀓𑀸𑀦𑀁 𑀢𑀢𑁆𑀣 𑀦𑀺𑀯𑀸𑀧𑀁 𑀧𑀝𑁆𑀞𑀧𑁂𑀲𑀺, 𑀅𑀪𑀬𑀖𑁄𑀲𑀜𑁆𑀘 𑀖𑁄𑀲𑀸𑀧𑁂𑀲𑀺. 𑀢𑀲𑁆𑀫𑀸 𑀢𑀁 𑀢𑀢𑁄 𑀧𑀪𑀼𑀢𑀺 ‘‘𑀓𑀮𑀦𑁆𑀤𑀓𑀦𑀺𑀯𑀸𑀧𑁄’’𑀢𑀺 𑀲𑀗𑁆𑀔𑁆𑀬𑀁 𑀕𑀢𑀁. 𑀓𑀮𑀦𑁆𑀤𑀓𑀸𑀢𑀺 𑀳𑀺 𑀓𑀸𑀴𑀓𑀸𑀦𑀁 𑀏𑀢𑀁 𑀦𑀸𑀫𑀁.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀪𑀕𑀯𑀸 𑀭𑀸𑀚𑀕𑀳𑀁 𑀕𑁄𑀘𑀭𑀕𑀸𑀫𑀁 𑀓𑀢𑁆𑀯𑀸 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂 𑀯𑀺𑀳𑀭𑀢𑀺, 𑀢𑁂𑀦 𑀲𑀫𑀬𑁂𑀦. 𑀲𑀺𑀗𑁆𑀕𑀸𑀮𑀓𑁄 𑀕𑀳𑀧𑀢𑀺𑀧𑀼𑀢𑁆𑀢𑁄𑀢𑀺 𑀲𑀺𑀗𑁆𑀕𑀸𑀮𑀓𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀕𑀳𑀧𑀢𑀺𑀧𑀼𑀢𑁆𑀢𑁄𑀢𑀺 𑀕𑀳𑀧𑀢𑀺𑀲𑁆𑀲 𑀧𑀼𑀢𑁆𑀢𑁄 𑀕𑀳𑀧𑀢𑀺𑀧𑀼𑀢𑁆𑀢𑁄. 𑀢𑀲𑁆𑀲 𑀓𑀺𑀭 𑀧𑀺𑀢𑀸 𑀕𑀳𑀧𑀢𑀺𑀫𑀳𑀸𑀲𑀸𑀮𑁄, 𑀦𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑀸 𑀘𑀲𑁆𑀲 𑀕𑁂𑀳𑁂 𑀘𑀢𑁆𑀢𑀸𑀮𑀻𑀲 𑀥𑀦𑀓𑁄𑀝𑀺𑀬𑁄 ¶ 𑀅𑀢𑁆𑀣𑀺. 𑀲𑁄 𑀪𑀕𑀯𑀢𑀺 𑀦𑀺𑀝𑁆𑀞𑀗𑁆𑀕𑀢𑁄 𑀉𑀧𑀸𑀲𑀓𑁄 𑀲𑁄𑀢𑀸𑀧𑀦𑁆𑀦𑁄, 𑀪𑀭𑀺𑀬𑀸𑀧𑀺𑀲𑁆𑀲 𑀲𑁄𑀢𑀸𑀧𑀦𑁆𑀦𑀸𑀬𑁂𑀯. 𑀧𑀼𑀢𑁆𑀢𑁄 𑀧𑀦𑀲𑁆𑀲 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄. 𑀅𑀣 𑀦𑀁 𑀫𑀸𑀢𑀸𑀧𑀺𑀢𑀭𑁄 𑀅𑀪𑀺𑀓𑁆𑀔𑀡𑀁 𑀏𑀯𑀁 𑀑𑀯𑀤𑀦𑁆𑀢𑀺 𑁋 ‘‘𑀢𑀸𑀢 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫, 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 ¶ 𑀫𑀳𑀸𑀓𑀲𑁆𑀲𑀧𑀁 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑁂 𑀉𑀧𑀲𑀗𑁆𑀓𑀫𑀸’’𑀢𑀺. 𑀲𑁄 𑀏𑀯𑀫𑀸𑀳 𑁋 ‘‘𑀦𑀢𑁆𑀣𑀺 𑀫𑀫 𑀢𑀼𑀫𑁆𑀳𑀸𑀓𑀁 𑀲𑀫𑀡𑀸𑀦𑀁 𑀉𑀧𑀲𑀗𑁆𑀓𑀫𑀦𑀓𑀺𑀘𑁆𑀘𑀁, 𑀲𑀫𑀡𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑀩𑁆𑀩𑀁 𑀳𑁄𑀢𑀺, 𑀑𑀦𑀫𑀺𑀢𑁆𑀯𑀸 𑀯𑀦𑁆𑀤𑀦𑁆𑀢𑀲𑁆𑀲 𑀧𑀺𑀝𑁆𑀞𑀺 𑀭𑀼𑀚𑁆𑀚𑀢𑀺, 𑀚𑀸𑀡𑀼𑀓𑀸𑀦𑀺 𑀔𑀭𑀸𑀦𑀺 𑀳𑁄𑀦𑁆𑀢𑀺, 𑀪𑀽𑀫𑀺𑀬𑀁 𑀦𑀺𑀲𑀻𑀤𑀺𑀢𑀩𑁆𑀩𑀁 ¶ 𑀳𑁄𑀢𑀺, 𑀢𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲 𑀯𑀢𑁆𑀣𑀸𑀦𑀺 𑀓𑀺𑀮𑀺𑀲𑁆𑀲𑀦𑁆𑀢𑀺 𑀚𑀻𑀭𑀦𑁆𑀢𑀺, 𑀲𑀫𑀻𑀧𑁂 𑀦𑀺𑀲𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑀣𑀸𑀲𑀮𑁆𑀮𑀸𑀧𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀲𑀢𑀺 𑀯𑀺𑀲𑁆𑀲𑀸𑀲𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁄 𑀦𑀺𑀫𑀦𑁆𑀢𑁂𑀢𑁆𑀯𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀸𑀤𑀻𑀦𑀺 𑀤𑀸𑀢𑀩𑁆𑀩𑀸𑀦𑀺 𑀳𑁄𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂 𑀅𑀢𑁆𑀣𑁄 𑀧𑀭𑀺𑀳𑀸𑀬𑀢𑀺, 𑀦𑀢𑁆𑀣𑀺 𑀫𑀬𑁆𑀳𑀁 𑀢𑀼𑀫𑁆𑀳𑀸𑀓𑀁 𑀲𑀫𑀡𑀸𑀦𑀁 𑀉𑀧𑀲𑀗𑁆𑀓𑀫𑀦𑀓𑀺𑀘𑁆𑀘’’𑀦𑁆𑀢𑀺. 𑀇𑀢𑀺 𑀦𑀁 𑀬𑀸𑀯𑀚𑀻𑀯𑀁 𑀑𑀯𑀤𑀦𑁆𑀢𑀸𑀧𑀺 𑀫𑀸𑀢𑀸𑀧𑀺𑀢𑀭𑁄 𑀲𑀸𑀲𑀦𑁂 𑀉𑀧𑀦𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼.

𑀅𑀣𑀲𑁆𑀲 𑀧𑀺𑀢𑀸 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑁄 ‘‘𑀫𑀫 𑀧𑀼𑀢𑁆𑀢𑀲𑁆𑀲 𑀑𑀯𑀸𑀤𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀤𑀺𑀲𑀸 𑀢𑀸𑀢 𑀦𑀫𑀲𑁆𑀲𑀸𑀳𑀻’’𑀢𑀺 𑀏𑀯𑀫𑀲𑁆𑀲 𑀑𑀯𑀸𑀤𑀁 𑀤𑀲𑁆𑀲𑀸𑀫𑀺, 𑀲𑁄 𑀅𑀢𑁆𑀣𑀁 𑀅𑀚𑀸𑀦𑀦𑁆𑀢𑁄 𑀤𑀺𑀲𑀸 𑀦𑀫𑀲𑁆𑀲𑀺𑀲𑁆𑀲𑀢𑀺, 𑀅𑀣 𑀦𑀁 𑀲𑀢𑁆𑀣𑀸 𑀯𑀸 𑀲𑀸𑀯𑀓𑀸 𑀯𑀸 𑀧𑀲𑁆𑀲𑀺𑀢𑁆𑀯𑀸 ‘‘𑀓𑀺𑀁 𑀓𑀭𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺. 𑀢𑀢𑁄 ‘‘𑀫𑀬𑁆𑀳𑀁 𑀧𑀺𑀢𑀸 𑀤𑀺𑀲𑀸 𑀦𑀫𑀲𑁆𑀲𑀦𑀁 𑀓𑀭𑁄𑀳𑀻𑀢𑀺 𑀫𑀁 𑀑𑀯𑀤𑀻’’𑀢𑀺 𑀯𑀓𑁆𑀔𑀢𑀺. 𑀅𑀣𑀲𑁆𑀲 𑀢𑁂 ‘‘𑀦 𑀢𑀼𑀬𑁆𑀳𑀁 𑀧𑀺𑀢𑀸 𑀏𑀢𑀸 𑀤𑀺𑀲𑀸 𑀦𑀫𑀲𑁆𑀲𑀸𑀧𑁂𑀢𑀺, 𑀇𑀫𑀸 𑀧𑀦 𑀤𑀺𑀲𑀸 𑀦𑀫𑀲𑁆𑀲𑀸𑀧𑁂𑀢𑀻’’𑀢𑀺 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀺. 𑀲𑁄 𑀩𑀼𑀤𑁆𑀥𑀲𑀸𑀲𑀦𑁂 𑀕𑀼𑀡𑀁 𑀜𑀢𑁆𑀯𑀸 ‘‘𑀧𑀼𑀜𑁆𑀜𑀓𑀫𑁆𑀫𑀁 𑀓𑀭𑀺𑀲𑁆𑀲𑀢𑀻’’𑀢𑀺. 𑀅𑀣 𑀦𑀁 𑀆𑀫𑀦𑁆𑀢𑀸𑀧𑁂𑀢𑁆𑀯𑀸 ‘‘𑀢𑀸𑀢, 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀙 𑀤𑀺𑀲𑀸 𑀦𑀫𑀲𑁆𑀲𑁂𑀬𑁆𑀬𑀸𑀲𑀻’’𑀢𑀺 𑀆𑀳. 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑀲𑁆𑀲 𑀓𑀣𑀸 𑀦𑀸𑀫 𑀬𑀸𑀯𑀚𑀻𑀯𑀁 𑀅𑀦𑀼𑀲𑁆𑀲𑀭𑀡𑀻𑀬𑀸 𑀳𑁄𑀢𑀺. 𑀢𑀲𑁆𑀫𑀸 𑀲𑁄 𑀕𑀳𑀧𑀢𑀺𑀧𑀼𑀢𑁆𑀢𑁄 𑀢𑀁 𑀧𑀺𑀢𑀼𑀯𑀘𑀦𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀢𑀣𑀸 𑀅𑀓𑀸𑀲𑀺. 𑀢𑀲𑁆𑀫𑀸 ‘‘𑀓𑀸𑀮𑀲𑁆𑀲𑁂𑀯 𑀉𑀝𑁆𑀞𑀸𑀬 𑀭𑀸𑀚𑀕𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁨𑁪𑁩. 𑀧𑀼𑀣𑀼𑀤𑀺𑀲𑀸𑀢𑀺 𑀩𑀳𑀼𑀤𑀺𑀲𑀸. 𑀇𑀤𑀸𑀦𑀺 𑀢𑀸 𑀤𑀲𑁆𑀲𑁂𑀦𑁆𑀢𑁄 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀦𑁆𑀢𑀺𑀆𑀤𑀺𑀫𑀸𑀳. 𑀧𑀸𑀯𑀺𑀲𑀻𑀢𑀺 𑀦 𑀢𑀸𑀯 𑀧𑀯𑀺𑀝𑁆𑀞𑁄, 𑀧𑀯𑀺𑀲𑀺𑀲𑁆𑀲𑀸𑀫𑀻𑀢𑀺 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀧𑀦 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀢𑁆𑀢𑀫𑀸𑀦𑁄𑀧𑀺 𑀏𑀯𑀁 𑀯𑀼𑀘𑁆𑀘𑀢𑀺. 𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸𑀢𑀺 𑀦 𑀇𑀤𑀸𑀦𑁂𑀯 𑀅𑀤𑁆𑀤𑀲, 𑀧𑀘𑁆𑀘𑀽𑀲𑀲𑀫𑀬𑁂𑀧𑀺 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀏𑀢𑀁 𑀤𑀺𑀲𑀸 𑀦𑀫𑀲𑁆𑀲𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀅𑀚𑁆𑀚 𑀅𑀳𑀁 𑀲𑀺𑀗𑁆𑀕𑀸𑀮𑀲𑁆𑀲 𑀕𑀳𑀧𑀢𑀺𑀧𑀼𑀢𑁆𑀢𑀲𑁆𑀲 𑀕𑀺𑀳𑀺𑀯𑀺𑀦𑀬𑀁 𑀲𑀺𑀗𑁆𑀕𑀸𑀮𑀲𑀼𑀢𑁆𑀢𑀦𑁆𑀢𑀁 𑀓𑀣𑁂𑀲𑁆𑀲𑀸𑀫𑀺, 𑀫𑀳𑀸𑀚𑀦𑀲𑁆𑀲 𑀲𑀸 𑀓𑀣𑀸 𑀲𑀨𑀮𑀸 𑀪𑀯𑀺𑀲𑁆𑀲𑀢𑀺, 𑀕𑀦𑁆𑀢𑀩𑁆𑀩𑀁 𑀫𑀬𑀸 𑀏𑀢𑁆𑀣𑀸’’𑀢𑀺. 𑀢𑀲𑁆𑀫𑀸 ¶ 𑀧𑀸𑀢𑁄𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺, 𑀧𑀯𑀺𑀲𑀦𑁆𑀢𑁄 𑀘 𑀦𑀁 𑀢𑀣𑁂𑀯 𑀅𑀤𑁆𑀤𑀲. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸’’𑀢𑀺. 𑀏𑀢𑀤𑀯𑁄𑀘𑀸𑀢𑀺 𑀲𑁄 𑀓𑀺𑀭 𑀅𑀯𑀺𑀤𑀽𑀭𑁂 𑀞𑀺𑀢𑀫𑁆𑀧𑀺 𑀲𑀢𑁆𑀣𑀸𑀭𑀁 𑀦 𑀧𑀲𑁆𑀲𑀢𑀺, 𑀤𑀺𑀲𑀸𑀬𑁂𑀯 𑀦𑀫𑀲𑁆𑀲𑀢𑀺. 𑀅𑀣𑀁 𑀦𑀁 𑀪𑀕𑀯𑀸 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑁆𑀨𑀲𑁆𑀲𑁂𑀦 𑀯𑀺𑀓𑀲𑀫𑀸𑀦𑀁 𑀫𑀳𑀸𑀧𑀤𑀼𑀫𑀁 𑀯𑀺𑀬 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀢𑁆𑀯𑀁, 𑀕𑀳𑀧𑀢𑀺𑀧𑀼𑀢𑁆𑀢𑀸’’𑀢𑀺𑀆𑀤𑀺𑀓𑀁 𑀏𑀢𑀤𑀯𑁄𑀘.

𑀙𑀤𑀺𑀲𑀸𑀤𑀺𑀯𑀡𑁆𑀡𑀦𑀸

𑁨𑁪𑁪. 𑀬𑀣𑀸 ¶ ¶ 𑀓𑀣𑀁 𑀧𑀦, 𑀪𑀦𑁆𑀢𑁂𑀢𑀺 𑀲𑁄 𑀓𑀺𑀭 𑀢𑀁 𑀪𑀕𑀯𑀢𑁄 𑀯𑀘𑀦𑀁 𑀲𑀼𑀢𑁆𑀯𑀸𑀯 𑀘𑀺𑀦𑁆𑀢𑁂𑀲𑀺 ‘‘𑀬𑀸 𑀓𑀺𑀭 𑀫𑀫 𑀧𑀺𑀢𑀭𑀸 𑀙 𑀤𑀺𑀲𑀸 𑀦𑀫𑀲𑁆𑀲𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀸, 𑀦 𑀓𑀺𑀭 𑀢𑀸 𑀏𑀢𑀸, 𑀅𑀜𑁆𑀜𑀸 𑀓𑀺𑀭 𑀅𑀭𑀺𑀬𑀲𑀸𑀯𑀓𑁂𑀦 𑀙 𑀤𑀺𑀲𑀸 𑀦𑀫𑀲𑁆𑀲𑀺𑀢𑀩𑁆𑀩𑀸. 𑀳𑀦𑁆𑀤𑀸𑀳𑀁 𑀅𑀭𑀺𑀬𑀲𑀸𑀯𑀓𑁂𑀦 𑀦𑀫𑀲𑁆𑀲𑀺𑀢𑀩𑁆𑀩𑀸 𑀤𑀺𑀲𑀸𑀬𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀦𑀫𑀲𑁆𑀲𑀸𑀫𑀻𑀢𑀺. 𑀲𑁄 𑀢𑀸 𑀧𑀼𑀘𑁆𑀙𑀦𑁆𑀢𑁄 𑀬𑀣𑀸 𑀓𑀣𑀁 𑀧𑀦, 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀓𑀣𑀁 𑀧𑀦𑀸𑀢𑀺 𑀇𑀤𑀫𑁂𑀯 𑀧𑀼𑀘𑁆𑀙𑀸𑀧𑀤𑀁. 𑀓𑀫𑁆𑀫𑀓𑀺𑀮𑁂𑀲𑀸𑀢𑀺 𑀢𑁂𑀳𑀺 𑀓𑀫𑁆𑀫𑁂𑀳𑀺 𑀲𑀢𑁆𑀢𑀸 𑀓𑀺𑀮𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀓𑀫𑁆𑀫𑀓𑀺𑀮𑁂𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀞𑀸𑀦𑁂𑀳𑀻𑀢𑀺 𑀓𑀸𑀭𑀡𑁂𑀳𑀺. 𑀅𑀧𑀸𑀬𑀫𑀼𑀔𑀸𑀦𑀻𑀢𑀺 𑀯𑀺𑀦𑀸𑀲𑀫𑀼𑀔𑀸𑀦𑀺. 𑀲𑁄𑀢𑀺 𑀲𑁄 𑀲𑁄𑀢𑀸𑀧𑀦𑁆𑀦𑁄 𑀅𑀭𑀺𑀬𑀲𑀸𑀯𑀓𑁄. 𑀘𑀼𑀤𑁆𑀤𑀲 𑀧𑀸𑀧𑀓𑀸𑀧𑀕𑀢𑁄𑀢𑀺 𑀏𑀢𑁂𑀳𑀺 𑀘𑀼𑀤𑁆𑀤𑀲𑀳𑀺 𑀧𑀸𑀧𑀓𑁂𑀳𑀺 𑀮𑀸𑀫𑀓𑁂𑀳𑀺 𑀅𑀧𑀕𑀢𑁄. 𑀙𑀤𑁆𑀤𑀺𑀲𑀸𑀧𑀝𑀺𑀘𑁆𑀙𑀸𑀤𑀻𑀢𑀺 𑀙 𑀤𑀺𑀲𑀸 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄. 𑀉𑀪𑁄𑀮𑁄𑀓𑀯𑀺𑀚𑀬𑀸𑀬𑀸𑀢𑀺 𑀉𑀪𑀺𑀦𑁆𑀦𑀁 𑀇𑀥𑀮𑁄𑀓𑀧𑀭𑀮𑁄𑀓𑀸𑀦𑀁 𑀯𑀺𑀚𑀺𑀦𑀦𑀢𑁆𑀣𑀸𑀬. 𑀅𑀬𑀜𑁆𑀘𑁂𑀯 𑀮𑁄𑀓𑁄 𑀆𑀭𑀤𑁆𑀥𑁄 𑀳𑁄𑀢𑀻𑀢𑀺 𑀏𑀯𑀭𑀽𑀧𑀲𑁆𑀲 𑀳𑀺 𑀇𑀥 𑀮𑁄𑀓𑁂 𑀧𑀜𑁆𑀘 𑀯𑁂𑀭𑀸𑀦𑀺 𑀦 𑀳𑁄𑀦𑁆𑀢𑀺, 𑀢𑁂𑀦𑀲𑁆𑀲 𑀅𑀬𑀜𑁆𑀘𑁂𑀯 𑀮𑁄𑀓𑁄 𑀆𑀭𑀤𑁆𑀥𑁄 𑀳𑁄𑀢𑀺 𑀧𑀭𑀺𑀢𑁄𑀲𑀺𑀢𑁄 𑀘𑁂𑀯 𑀦𑀺𑀧𑁆𑀨𑀸𑀤𑀺𑀢𑁄 𑀘. 𑀧𑀭𑀮𑁄𑀓𑁂𑀧𑀺 𑀧𑀜𑁆𑀘 𑀯𑁂𑀭𑀸𑀦𑀺 𑀦 𑀳𑁄𑀦𑁆𑀢𑀺, 𑀢𑁂𑀦𑀲𑁆𑀲 𑀧𑀭𑁄 𑀘 𑀮𑁄𑀓𑁄 𑀆𑀭𑀸𑀥𑀺𑀢𑁄 𑀳𑁄𑀢𑀺. 𑀢𑀲𑁆𑀫𑀸 𑀲𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀫𑁆𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀢𑀺.

𑁨𑁪𑁫. 𑀇𑀢𑀺 𑀪𑀕𑀯𑀸 𑀲𑀗𑁆𑀔𑁂𑀧𑁂𑀦 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀓𑀢𑀫𑀲𑁆𑀲 𑀘𑀢𑁆𑀢𑀸𑀭𑁄 𑀓𑀫𑁆𑀫𑀓𑀺𑀮𑁂𑀲𑀸𑀢𑀺𑀆𑀤𑀺𑀫𑀸𑀳. 𑀓𑀫𑁆𑀫𑀓𑀺𑀮𑁂𑀲𑁄𑀢𑀺 𑀓𑀫𑁆𑀫𑀜𑁆𑀘 𑀢𑀁 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀓𑀺𑀮𑁂𑀲𑁄 𑀘𑀸𑀢𑀺 𑀓𑀫𑁆𑀫𑀓𑀺𑀮𑁂𑀲𑁄. 𑀲𑀓𑀺𑀮𑁂𑀲𑁄𑀬𑁂𑀯 𑀳𑀺 𑀧𑀸𑀡𑀁 𑀳𑀦𑀢𑀺, 𑀦𑀺𑀓𑁆𑀓𑀺𑀮𑁂𑀲𑁄 𑀦 𑀳𑀦𑀢𑀺, 𑀢𑀲𑁆𑀫𑀸 𑀧𑀸𑀡𑀸𑀢𑀺𑀧𑀸𑀢𑁄 ‘‘𑀓𑀫𑁆𑀫𑀓𑀺𑀮𑁂𑀲𑁄’’𑀢𑀺 𑀯𑀼𑀢𑁆𑀢𑁄. 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀣𑀸𑀧𑀭𑀦𑁆𑀢𑀺 𑀅𑀧𑀭𑀫𑁆𑀧𑀺 𑀏𑀢𑀤𑀢𑁆𑀣𑀧𑀭𑀺𑀤𑀻𑀧𑀓𑀫𑁂𑀯 𑀕𑀸𑀣𑀸𑀩𑀦𑁆𑀥𑀁 𑀅𑀯𑁄𑀘𑀸𑀢𑀺 𑀅𑀢𑁆𑀣𑁄.

𑀘𑀢𑀼𑀞𑀸𑀦𑀸𑀤𑀺𑀯𑀡𑁆𑀡𑀦𑀸

𑁨𑁪𑁬. 𑀧𑀸𑀧𑀓𑀫𑁆𑀫𑀁 ¶ 𑀓𑀭𑁄𑀢𑀻𑀢𑀺 𑀇𑀤𑀁 𑀪𑀕𑀯𑀸 𑀬𑀲𑁆𑀫𑀸 𑀓𑀸𑀭𑀓𑁂 𑀤𑀲𑁆𑀲𑀺𑀢𑁂 𑀅𑀓𑀸𑀭𑀓𑁄 𑀧𑀸𑀓𑀝𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀻’’𑀢𑀺 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸𑀧𑀺 𑀤𑁂𑀲𑀦𑀸𑀓𑀼𑀲𑀮𑀢𑀸𑀬 𑀧𑀞𑀫𑀢𑀭𑀁 𑀓𑀸𑀭𑀓𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ¶ . 𑀢𑀢𑁆𑀣 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄𑀢𑀺 𑀙𑀦𑁆𑀤𑁂𑀦 𑀧𑁂𑀫𑁂𑀦 𑀅𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀅𑀓𑀢𑁆𑀢𑀩𑁆𑀩𑀁 𑀓𑀭𑁄𑀦𑁆𑀢𑁄. 𑀧𑀭𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀬𑁄 ‘‘𑀅𑀬𑀁 𑀫𑁂 𑀫𑀺𑀢𑁆𑀢𑁄 𑀯𑀸 𑀲𑀫𑁆𑀪𑀢𑁆𑀢𑁄 𑀯𑀸 𑀲𑀦𑁆𑀤𑀺𑀝𑁆𑀞𑁄 𑀯𑀸 𑀜𑀸𑀢𑀓𑁄 𑀯𑀸 𑀮𑀜𑁆𑀚𑀁 𑀯𑀸 𑀧𑀦 𑀫𑁂 𑀤𑁂𑀢𑀻’’𑀢𑀺 𑀙𑀦𑁆𑀤𑀯𑀲𑁂𑀦 𑀅𑀲𑁆𑀲𑀸𑀫𑀺𑀓𑀁 𑀲𑀸𑀫𑀺𑀓𑀁 𑀓𑀭𑁄𑀢𑀺, 𑀅𑀬𑀁 𑀙𑀦𑁆𑀤𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺 𑀦𑀸𑀫. 𑀬𑁄 ‘‘𑀅𑀬𑀁 𑀫𑁂 𑀯𑁂𑀭𑀻’’𑀢𑀺 𑀧𑀓𑀢𑀺𑀯𑁂𑀭𑀯𑀲𑁂𑀦 𑀢𑀗𑁆𑀔𑀡𑀼𑀧𑁆𑀧𑀦𑁆𑀦𑀓𑁄𑀥𑀯𑀲𑁂𑀦 ¶ 𑀯𑀸 𑀲𑀸𑀫𑀺𑀓𑀁 𑀅𑀲𑁆𑀲𑀸𑀫𑀺𑀓𑀁 𑀓𑀭𑁄𑀢𑀺, 𑀅𑀬𑀁 𑀤𑁄𑀲𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺 𑀦𑀸𑀫. 𑀬𑁄 𑀧𑀦 𑀫𑀦𑁆𑀤𑀢𑁆𑀢𑀸 𑀫𑁄𑀫𑀽𑀳𑀢𑁆𑀢𑀸 𑀬𑀁 𑀯𑀸 𑀢𑀁 𑀯𑀸 𑀯𑀢𑁆𑀯𑀸 𑀅𑀲𑁆𑀲𑀸𑀫𑀺𑀓𑀁 𑀲𑀸𑀫𑀺𑀓𑀁 𑀓𑀭𑁄𑀢𑀺, 𑀅𑀬𑀁 𑀫𑁄𑀳𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺 𑀦𑀸𑀫. 𑀬𑁄 𑀧𑀦 ‘‘𑀅𑀬𑀁 𑀭𑀸𑀚𑀯𑀮𑁆𑀮𑀪𑁄 𑀯𑀸 𑀯𑀺𑀲𑀫𑀦𑀺𑀲𑁆𑀲𑀺𑀢𑁄 𑀯𑀸 𑀅𑀦𑀢𑁆𑀣𑀫𑁆𑀧𑀺 𑀫𑁂 𑀓𑀭𑁂𑀬𑁆𑀬𑀸’’𑀢𑀺 𑀪𑀻𑀢𑁄 𑀅𑀲𑁆𑀲𑀸𑀫𑀺𑀓𑀁 𑀲𑀸𑀫𑀺𑀓𑀁 𑀓𑀭𑁄𑀢𑀺, 𑀅𑀬𑀁 𑀪𑀬𑀸𑀕𑀢𑀺𑀁 𑀕𑀘𑁆𑀙𑀦𑁆𑀢𑁄 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺 𑀦𑀸𑀫. 𑀬𑁄 𑀧𑀦 𑀬𑀁𑀓𑀺𑀜𑁆𑀘𑀺 𑀪𑀸𑀚𑁂𑀦𑁆𑀢𑁄 ‘‘𑀅𑀬𑀁 𑀫𑁂 𑀲𑀦𑁆𑀤𑀺𑀝𑁆𑀞𑁄 𑀯𑀸 𑀲𑀫𑁆𑀪𑀢𑁆𑀢𑁄 𑀯𑀸’’𑀢𑀺 𑀧𑁂𑀫𑀯𑀲𑁂𑀦 𑀅𑀢𑀺𑀭𑁂𑀓𑀁 𑀤𑁂𑀢𑀺, ‘‘𑀅𑀬𑀁 𑀫𑁂 𑀯𑁂𑀭𑀻’’𑀢𑀺 𑀤𑁄𑀲𑀯𑀲𑁂𑀦 𑀊𑀦𑀓𑀁 𑀤𑁂𑀢𑀺, 𑀫𑁄𑀫𑀽𑀳𑀢𑁆𑀢𑀸 𑀤𑀺𑀦𑁆𑀦𑀸𑀤𑀺𑀦𑁆𑀦𑀁 𑀅𑀚𑀸𑀦𑀫𑀸𑀦𑁄 𑀓𑀲𑁆𑀲𑀘𑀺 𑀊𑀦𑀁 𑀓𑀲𑁆𑀲𑀘𑀺 𑀅𑀥𑀺𑀓𑀁 𑀤𑁂𑀢𑀺, ‘‘𑀅𑀬𑀁 𑀇𑀫𑀲𑁆𑀫𑀺𑀁 𑀅𑀤𑀺𑀬𑁆𑀬𑀫𑀸𑀦𑁂 𑀫𑀬𑁆𑀳𑀁 𑀅𑀦𑀢𑁆𑀣𑀫𑁆𑀧𑀺 𑀓𑀭𑁂𑀬𑁆𑀬𑀸’’𑀢𑀺 𑀪𑀻𑀢𑁄 𑀓𑀲𑁆𑀲𑀘𑀺 𑀅𑀢𑀺𑀭𑁂𑀓𑀁 𑀤𑁂𑀢𑀺, 𑀲𑁄 𑀘𑀢𑀼𑀩𑁆𑀩𑀺𑀥𑁄𑀧𑀺 𑀬𑀣𑀸𑀦𑀼𑀓𑁆𑀓𑀫𑁂𑀦 𑀙𑀦𑁆𑀤𑀸𑀕𑀢𑀺𑀆𑀤𑀻𑀦𑀺 𑀕𑀘𑁆𑀙𑀦𑁆𑀢𑁄 𑀧𑀸𑀧𑀓𑀫𑁆𑀫𑀁 𑀓𑀭𑁄𑀢𑀺 𑀦𑀸𑀫.

𑀅𑀭𑀺𑀬𑀲𑀸𑀯𑀓𑁄 𑀧𑀦 𑀚𑀻𑀯𑀺𑀢𑀓𑁆𑀔𑀬𑀁 𑀧𑀸𑀧𑀼𑀡𑀦𑁆𑀢𑁄𑀧𑀺 𑀙𑀦𑁆𑀤𑀸𑀕𑀢𑀺𑀆𑀤𑀻𑀦𑀺 𑀦 𑀕𑀘𑁆𑀙𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀇𑀫𑁂𑀳𑀺 𑀘𑀢𑀽𑀳𑀺 𑀞𑀸𑀦𑁂𑀳𑀺 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀻’’𑀢𑀺.

𑀦𑀺𑀳𑀻𑀬𑀢𑀺 𑀬𑀲𑁄 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀅𑀕𑀢𑀺𑀕𑀸𑀫𑀺𑀦𑁄 𑀓𑀺𑀢𑁆𑀢𑀺𑀬𑀲𑁄𑀧𑀺 𑀧𑀭𑀺𑀯𑀸𑀭𑀬𑀲𑁄𑀧𑀺 𑀦𑀺𑀳𑀻𑀬𑀢𑀺 𑀧𑀭𑀺𑀳𑀸𑀬𑀢𑀺.

𑀙𑀅𑀧𑀸𑀬𑀫𑀼𑀔𑀸𑀤𑀺𑀯𑀡𑁆𑀡𑀦𑀸

𑁨𑁪𑁭. 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸𑀦𑀼𑀬𑁄𑀕𑁄𑀢𑀺 𑀏𑀢𑁆𑀣 𑀲𑀼𑀭𑀸𑀢𑀺 𑀧𑀺𑀝𑁆𑀞𑀲𑀼𑀭𑀸 𑀧𑀽𑀯𑀲𑀼𑀭𑀸 𑀑𑀤𑀦𑀲𑀼𑀭𑀸 𑀓𑀺𑀡𑁆𑀡𑀧𑀓𑁆𑀔𑀺𑀢𑁆𑀢𑀸 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑀸𑀢𑀺 𑀧𑀜𑁆𑀘 𑀲𑀼𑀭𑀸. 𑀫𑁂𑀭𑀬𑀦𑁆𑀢𑀺 𑀧𑀼𑀧𑁆𑀨𑀸𑀲𑀯𑁄 𑀨𑀮𑀸𑀲𑀯𑁄 𑀫𑀥𑁆𑀯𑀸𑀲𑀯𑁄 𑀕𑀼𑀴𑀸𑀲𑀯𑁄 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑁄𑀢𑀺 𑀧𑀜𑁆𑀘 𑀆𑀲𑀯𑀸. 𑀢𑀁 𑀲𑀩𑁆𑀩𑀫𑁆𑀧𑀺 𑀫𑀤𑀓𑀭𑀡𑀯𑀲𑁂𑀦 𑀫𑀚𑁆𑀚𑀁. 𑀧𑀫𑀸𑀤𑀝𑁆𑀞𑀸𑀦𑀦𑁆𑀢𑀺 𑀧𑀫𑀸𑀤𑀓𑀸𑀭𑀡𑀁. 𑀬𑀸𑀬 𑀘𑁂𑀢𑀦𑀸𑀬 𑀢𑀁 𑀫𑀚𑁆𑀚𑀁 𑀧𑀺𑀯𑀢𑀺, 𑀢𑀲𑁆𑀲 𑀏𑀢𑀁 𑀅𑀥𑀺𑀯𑀘𑀦𑀁. 𑀅𑀦𑀼𑀬𑁄𑀕𑁄𑀢𑀺 𑀢𑀲𑁆𑀲 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀲𑁆𑀲 𑀅𑀦𑀼𑀅𑀦𑀼𑀬𑁄𑀕𑁄 𑀧𑀼𑀦𑀧𑁆𑀧𑀼𑀦𑀁 𑀓𑀭𑀡𑀁. 𑀬𑀲𑁆𑀫𑀸 𑀧𑀦𑁂𑀢𑀁 𑀅𑀦𑀼𑀬𑀼𑀢𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀘𑁂𑀯 ¶ 𑀪𑁄𑀕𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀅𑀦𑀼𑀧𑁆𑀧𑀦𑁆𑀦𑀸 𑀘 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 ‘‘𑀪𑁄𑀕𑀸𑀦𑀁 𑀅𑀧𑀸𑀬𑀫𑀼𑀔’’𑀦𑁆𑀢𑀺 ¶ 𑀯𑀼𑀢𑁆𑀢𑀁. 𑀯𑀺𑀓𑀸𑀮𑀯𑀺𑀲𑀺𑀔𑀸𑀘𑀭𑀺𑀬𑀸𑀦𑀼𑀬𑁄𑀕𑁄𑀢𑀺 𑀅𑀯𑁂𑀮𑀸𑀬 𑀯𑀺𑀲𑀺𑀔𑀸𑀲𑀼 𑀘𑀭𑀺𑀬𑀸𑀦𑀼𑀬𑀼𑀢𑁆𑀢𑀢𑀸.

𑀲𑀫𑀚𑁆𑀚𑀸𑀪𑀺𑀘𑀭𑀡𑀦𑁆𑀢𑀺 𑀦𑀘𑁆𑀘𑀸𑀤𑀺𑀤𑀲𑁆𑀲𑀦𑀯𑀲𑁂𑀦 𑀲𑀫𑀚𑁆𑀚𑀸𑀕𑀫𑀦𑀁. 𑀆𑀮𑀲𑁆𑀬𑀸𑀦𑀼𑀬𑁄𑀕𑁄𑀢𑀺 𑀓𑀸𑀬𑀸𑀮𑀲𑀺𑀬𑀢𑀸𑀬 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀢𑀸.

𑀲𑀼𑀭𑀸𑀫𑁂𑀭𑀬𑀲𑁆𑀲 𑀙𑀆𑀤𑀻𑀦𑀯𑀸𑀤𑀺𑀯𑀡𑁆𑀡𑀦𑀸

𑁨𑁪𑁮. 𑀏𑀯𑀁 ¶ 𑀙𑀦𑁆𑀦𑀁 𑀅𑀧𑀸𑀬𑀫𑀼𑀔𑀸𑀦𑀁 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀇𑀤𑀸𑀦𑀺 𑀢𑀸𑀦𑀺 𑀯𑀺𑀪𑀚𑀦𑁆𑀢𑁄 𑀙 𑀔𑁄 𑀫𑁂, 𑀕𑀳𑀧𑀢𑀺𑀧𑀼𑀢𑁆𑀢 𑀆𑀤𑀻𑀦𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀦𑁆𑀤𑀺𑀝𑁆𑀞𑀺𑀓𑀸𑀢𑀺 𑀲𑀸𑀫𑀁 𑀧𑀲𑁆𑀲𑀺𑀢𑀩𑁆𑀩𑀸, 𑀇𑀥𑀮𑁄𑀓𑀪𑀸𑀯𑀺𑀦𑀻. 𑀥𑀦𑀚𑀸𑀦𑀻𑀢𑀺 𑀥𑀦𑀳𑀸𑀦𑀺. 𑀓𑀮𑀳𑀧𑁆𑀧𑀯𑀟𑁆𑀠𑀦𑀻𑀢𑀺 𑀯𑀸𑀘𑀸𑀓𑀮𑀳𑀲𑁆𑀲 𑀘𑁂𑀯 𑀳𑀢𑁆𑀣𑀧𑀭𑀸𑀫𑀸𑀲𑀸𑀤𑀺𑀓𑀸𑀬𑀓𑀮𑀳𑀲𑁆𑀲 𑀘 𑀯𑀟𑁆𑀠𑀦𑀻. 𑀭𑁄𑀕𑀸𑀦𑀁 𑀆𑀬𑀢𑀦𑀦𑁆𑀢𑀺 𑀢𑁂𑀲𑀁 𑀢𑁂𑀲𑀁 𑀅𑀓𑁆𑀔𑀺𑀭𑁄𑀕𑀸𑀤𑀻𑀦𑀁 𑀔𑁂𑀢𑁆𑀢𑀁. 𑀅𑀓𑀺𑀢𑁆𑀢𑀺𑀲𑀜𑁆𑀚𑀦𑀦𑀻𑀢𑀺 𑀲𑀼𑀭𑀁 𑀧𑀺𑀯𑀺𑀢𑁆𑀯𑀸 𑀳𑀺 𑀫𑀸𑀢𑀭𑀫𑁆𑀧𑀺 𑀧𑀳𑀭𑀦𑁆𑀢𑀺 𑀧𑀺𑀢𑀭𑀫𑁆𑀧𑀺, 𑀅𑀜𑁆𑀜𑀁 𑀩𑀳𑀼𑀫𑁆𑀧𑀺 𑀅𑀯𑀢𑁆𑀢𑀩𑁆𑀩𑀁 𑀯𑀤𑀦𑁆𑀢𑀺, 𑀅𑀓𑀢𑁆𑀢𑀩𑁆𑀩𑀁 𑀓𑀭𑁄𑀦𑁆𑀢𑀺. 𑀢𑁂𑀦 𑀕𑀭𑀳𑀫𑁆𑀧𑀺 𑀤𑀡𑁆𑀟𑀫𑁆𑀧𑀺 𑀳𑀢𑁆𑀣𑀧𑀸𑀤𑀸𑀤𑀺𑀙𑁂𑀤𑀫𑁆𑀧𑀺 𑀧𑀸𑀧𑀼𑀡𑀦𑁆𑀢𑀺, 𑀇𑀥𑀮𑁄𑀓𑁂𑀧𑀺 𑀧𑀭𑀮𑁄𑀓𑁂𑀧𑀺 𑀅𑀓𑀺𑀢𑁆𑀢𑀺𑀁 𑀧𑀸𑀧𑀼𑀡𑀦𑁆𑀢𑀺, 𑀇𑀢𑀺 𑀢𑁂𑀲𑀁 𑀲𑀸 𑀲𑀼𑀭𑀸 𑀅𑀓𑀺𑀢𑁆𑀢𑀺𑀲𑀜𑁆𑀚𑀦𑀦𑀻 𑀦𑀸𑀫 𑀳𑁄𑀢𑀺. 𑀓𑁄𑀧𑀻𑀦𑀦𑀺𑀤𑀁𑀲𑀦𑀻𑀢𑀺 𑀕𑀼𑀬𑁆𑀳𑀝𑁆𑀞𑀸𑀦𑀜𑁆𑀳𑀺 𑀯𑀺𑀯𑀭𑀺𑀬𑀫𑀸𑀦𑀁 𑀳𑀺𑀭𑀺𑀁 𑀓𑁄𑀧𑁂𑀢𑀺 𑀯𑀺𑀦𑀸𑀲𑁂𑀢𑀺, 𑀢𑀲𑁆𑀫𑀸 ‘‘𑀓𑁄𑀧𑀻𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀲𑀼𑀭𑀸𑀫𑀤𑀫𑀢𑁆𑀢𑀸 𑀘 𑀢𑀁 𑀢𑀁 𑀅𑀗𑁆𑀕𑀁 𑀯𑀺𑀯𑀭𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑀺, 𑀢𑁂𑀦 𑀦𑁂𑀲𑀁 𑀲𑀸 𑀲𑀼𑀭𑀸 𑀓𑁄𑀧𑀻𑀦𑀲𑁆𑀲 𑀦𑀺𑀤𑀁𑀲𑀦𑀢𑁄 ‘‘𑀓𑁄𑀧𑀻𑀦𑀦𑀺𑀤𑀁𑀲𑀦𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀺𑀓𑀭𑀡𑀻𑀢𑀺 𑀲𑀸𑀕𑀢𑀢𑁆𑀣𑁂𑀭𑀲𑁆𑀲 𑀯𑀺𑀬 𑀓𑀫𑁆𑀫𑀲𑁆𑀲𑀓𑀢𑀧𑀜𑁆𑀜𑀁 𑀤𑀼𑀩𑁆𑀩𑀮𑀁 𑀓𑀭𑁄𑀢𑀺, 𑀢𑀲𑁆𑀫𑀸 ‘‘𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀺𑀓𑀭𑀡𑀻’’𑀢𑀺 𑀯𑀼𑀘𑁆𑀘𑀢𑀺. 𑀫𑀕𑁆𑀕𑀧𑀜𑁆𑀜𑀁 𑀧𑀦 𑀤𑀼𑀩𑁆𑀩𑀮𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀥𑀺𑀕𑀢𑀫𑀕𑁆𑀕𑀸𑀦𑀜𑁆𑀳𑀺 𑀲𑀸 𑀅𑀦𑁆𑀢𑁄𑀫𑀼𑀔𑀫𑁂𑀯 𑀦 𑀧𑀯𑀺𑀲𑀢𑀺. 𑀙𑀝𑁆𑀞𑀁 𑀧𑀤𑀦𑁆𑀢𑀺 𑀙𑀝𑁆𑀞𑀁 𑀓𑀸𑀭𑀡𑀁.

𑁨𑁪𑁯. 𑀅𑀢𑁆𑀢𑀸𑀧𑀺𑀲𑁆𑀲 𑀅𑀕𑀼𑀢𑁆𑀢𑁄 𑀅𑀭𑀓𑁆𑀔𑀺𑀢𑁄 𑀳𑁄𑀢𑀻𑀢𑀺 𑀅𑀯𑁂𑀮𑀸𑀬 𑀘𑀭𑀦𑁆𑀢𑁄 𑀳𑀺 𑀔𑀸𑀡𑀼𑀓𑀡𑁆𑀝𑀓𑀸𑀤𑀻𑀦𑀺𑀧𑀺 𑀅𑀓𑁆𑀓𑀫𑀢𑀺, 𑀅𑀳𑀺𑀦𑀸𑀧𑀺 𑀬𑀓𑁆𑀔𑀸𑀤𑀻𑀳𑀺𑀧𑀺 𑀲𑀫𑀸𑀕𑀘𑁆𑀙𑀢𑀺, 𑀢𑀁 𑀢𑀁 𑀞𑀸𑀦𑀁 𑀕𑀘𑁆𑀙𑀢𑀻𑀢𑀺 𑀜𑀢𑁆𑀯𑀸 𑀯𑁂𑀭𑀺𑀦𑁄𑀧𑀺 𑀦𑀁 𑀦𑀺𑀮𑀻𑀬𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀺 𑀯𑀸 𑀳𑀦𑀦𑁆𑀢𑀺 𑀯𑀸. 𑀏𑀯𑀁 𑀅𑀢𑁆𑀢𑀸𑀧𑀺𑀲𑁆𑀲 𑀅𑀕𑀼𑀢𑁆𑀢𑁄 𑀳𑁄𑀢𑀺 𑀅𑀭𑀓𑁆𑀔𑀺𑀢𑁄. 𑀧𑀼𑀢𑁆𑀢𑀤𑀸𑀭𑀸𑀧𑀺 ‘‘𑀅𑀫𑁆𑀳𑀸𑀓𑀁 𑀧𑀺𑀢𑀸 𑀅𑀫𑁆𑀳𑀸𑀓𑀁 𑀲𑀸𑀫𑀺 𑀭𑀢𑁆𑀢𑀺𑀁 𑀯𑀺𑀘𑀭𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀫𑀬’’𑀦𑁆𑀢𑀺 𑀇𑀢𑀺𑀲𑁆𑀲 𑀧𑀼𑀢𑁆𑀢𑀥𑀻𑀢𑀭𑁄𑀧𑀺 𑀪𑀭𑀺𑀬𑀸𑀧𑀺 ¶ 𑀩𑀳𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀭𑀢𑁆𑀢𑀺𑀁 𑀘𑀭𑀦𑁆𑀢𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑀦𑁆𑀢𑀺. 𑀏𑀯𑀁 𑀧𑀼𑀢𑁆𑀢𑀤𑀸𑀭𑁄𑀧𑀺𑀲𑁆𑀲 𑀅𑀕𑀼𑀢𑁆𑀢𑁄 𑀅𑀭𑀓𑁆𑀔𑀺𑀢𑁄 𑀳𑁄𑀢𑀺. 𑀲𑀸𑀧𑀢𑁂𑀬𑁆𑀬𑀦𑁆𑀢𑀺 𑀢𑀲𑁆𑀲 𑀧𑀼𑀢𑁆𑀢𑀤𑀸𑀭𑀧𑀭𑀺𑀚𑀦𑀲𑁆𑀲 𑀭𑀢𑁆𑀢𑀺𑀁 𑀘𑀭𑀡𑀓𑀪𑀸𑀯𑀁 𑀜𑀢𑁆𑀯𑀸 𑀘𑁄𑀭𑀸 𑀲𑀼𑀜𑁆𑀜𑀁 ¶ 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀬𑀁 𑀇𑀘𑁆𑀙𑀦𑁆𑀢𑀺, 𑀢𑀁 𑀳𑀭𑀦𑁆𑀢𑀺. 𑀏𑀯𑀁 𑀲𑀸𑀧𑀢𑁂𑀬𑁆𑀬𑀫𑁆𑀧𑀺𑀲𑁆𑀲 𑀅𑀕𑀼𑀢𑁆𑀢𑀁 𑀅𑀭𑀓𑁆𑀔𑀺𑀢𑀁 𑀳𑁄𑀢𑀺. 𑀲𑀗𑁆𑀓𑀺𑀬𑁄 𑀘 𑀳𑁄𑀢𑀻𑀢𑀺 𑀅𑀜𑁆𑀜𑁂𑀳𑀺 𑀓𑀢𑀧𑀸𑀧𑀓𑀫𑁆𑀫𑁂𑀲𑀼𑀧𑀺 ‘‘𑀇𑀫𑀺𑀦𑀸 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀗𑁆𑀓𑀺𑀢𑀩𑁆𑀩𑁄 𑀳𑁄𑀢𑀺. 𑀬𑀲𑁆𑀲 𑀬𑀲𑁆𑀲 𑀖𑀭𑀤𑁆𑀯𑀸𑀭𑁂𑀦 𑀬𑀸𑀢𑀺, 𑀢𑀢𑁆𑀣 𑀬𑀁 𑀅𑀜𑁆𑀜𑁂𑀦 𑀘𑁄𑀭𑀓𑀫𑁆𑀫𑀁 𑀧𑀭𑀤𑀸𑀭𑀺𑀓𑀓𑀫𑁆𑀫𑀁 𑀯𑀸 𑀓𑀢𑀁, 𑀢𑀁 ‘‘𑀇𑀫𑀺𑀦𑀸 𑀓𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀪𑀽𑀢𑀁 𑀅𑀲𑀦𑁆𑀢𑀫𑁆𑀧𑀺 𑀢𑀲𑁆𑀫𑀺𑀁 𑀭𑀽𑀳𑀢𑀺 𑀧𑀢𑀺𑀝𑁆𑀞𑀸𑀢𑀺. 𑀩𑀳𑀽𑀦𑀜𑁆𑀘 𑀤𑀼𑀓𑁆𑀔𑀥𑀫𑁆𑀫𑀸𑀦𑀦𑁆𑀢𑀺 𑀏𑀢𑁆𑀢𑀓𑀁 𑀤𑀼𑀓𑁆𑀔𑀁, 𑀏𑀢𑁆𑀢𑀓𑀁 𑀤𑁄𑀫𑀦𑀲𑁆𑀲𑀦𑁆𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸, 𑀅𑀜𑁆𑀜𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀅𑀲𑀢𑀺 𑀲𑀩𑁆𑀩𑀁 𑀯𑀺𑀓𑀸𑀮𑀘𑀸𑀭𑀺𑀫𑁆𑀳𑀺 𑀆𑀳𑀭𑀺𑀢𑀩𑁆𑀩𑀁 𑀳𑁄𑀢𑀺, 𑀇𑀢𑀺 𑀲𑁄 𑀩𑀳𑀽𑀦𑀁 𑀤𑀼𑀓𑁆𑀔𑀥𑀫𑁆𑀫𑀸𑀦𑀁 𑀧𑀼𑀭𑀓𑁆𑀔𑀢𑁄 𑀧𑀼𑀭𑁂𑀕𑀸𑀫𑀻 𑀳𑁄𑀢𑀺.

𑁨𑁫𑁦. 𑀓𑁆𑀯 ¶ 𑀦𑀘𑁆𑀘𑀦𑁆𑀢𑀺 ‘‘𑀓𑀲𑁆𑀫𑀺𑀁 𑀞𑀸𑀦𑁂 𑀦𑀝𑀦𑀸𑀝𑀓𑀸𑀤𑀺𑀦𑀘𑁆𑀘𑀁 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀬𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀢𑀁 𑀅𑀢𑁆𑀣𑀺, 𑀢𑀢𑁆𑀣 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺, 𑀢𑀲𑁆𑀲 ‘‘𑀲𑁆𑀯𑁂 𑀦𑀘𑁆𑀘𑀤𑀲𑁆𑀲𑀦𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀅𑀚𑁆𑀚 𑀯𑀢𑁆𑀣𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀧𑀝𑀺𑀬𑀸𑀤𑁂𑀦𑁆𑀢𑀲𑁆𑀲𑁂𑀯 𑀲𑀓𑀮𑀤𑀺𑀯𑀲𑀫𑁆𑀧𑀺 𑀓𑀫𑁆𑀫𑀘𑁆𑀙𑁂𑀤𑁄 𑀳𑁄𑀢𑀺, 𑀦𑀘𑁆𑀘𑀤𑀲𑁆𑀲𑀦𑁂𑀦 𑀏𑀓𑀸𑀳𑀫𑁆𑀧𑀺 𑀤𑁆𑀯𑀻𑀳𑀫𑁆𑀧𑀺 𑀢𑀻𑀳𑀫𑁆𑀧𑀺 𑀢𑀢𑁆𑀣𑁂𑀯 𑀳𑁄𑀢𑀺, 𑀅𑀣 𑀯𑀼𑀝𑁆𑀞𑀺𑀲𑀫𑁆𑀧𑀢𑁆𑀢𑀺𑀬𑀸𑀤𑀻𑀦𑀺 𑀮𑀪𑀺𑀢𑁆𑀯𑀸𑀧𑀺 𑀯𑀧𑁆𑀧𑀸𑀤𑀺𑀓𑀸𑀮𑁂 𑀯𑀧𑁆𑀧𑀸𑀤𑀻𑀦𑀺 𑀅𑀓𑀭𑁄𑀦𑁆𑀢𑀲𑁆𑀲 𑀅𑀦𑀼𑀧𑁆𑀧𑀦𑁆𑀦𑀸 𑀪𑁄𑀕𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀲 𑀩𑀳𑀺 𑀕𑀢𑀪𑀸𑀯𑀁 𑀜𑀢𑁆𑀯𑀸 𑀅𑀦𑀸𑀭𑀓𑁆𑀔𑁂 𑀕𑁂𑀳𑁂 𑀘𑁄𑀭𑀸 𑀬𑀁 𑀇𑀘𑁆𑀙𑀦𑁆𑀢𑀺, 𑀢𑀁 𑀓𑀭𑁄𑀦𑁆𑀢𑀺, 𑀢𑁂𑀦𑀲𑁆𑀲 𑀉𑀧𑁆𑀧𑀦𑁆𑀦𑀸𑀧𑀺 𑀪𑁄𑀕𑀸 𑀯𑀺𑀦𑀲𑁆𑀲𑀦𑁆𑀢𑀺. 𑀓𑁆𑀯 𑀕𑀻𑀢𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀲𑀁 𑀦𑀸𑀦𑀸𑀓𑀭𑀡𑀁 𑀩𑁆𑀭𑀳𑁆𑀫𑀚𑀸𑀮𑁂 𑀯𑀼𑀢𑁆𑀢𑀫𑁂𑀯.

𑁨𑁫𑁧. 𑀚𑀬𑀁 𑀯𑁂𑀭𑀦𑁆𑀢𑀺 ‘‘𑀚𑀺𑀢𑀁 𑀫𑀬𑀸’’𑀢𑀺 𑀧𑀭𑀺𑀲𑀫𑀚𑁆𑀛𑁂 𑀧𑀭𑀲𑁆𑀲 𑀲𑀸𑀝𑀓𑀁 𑀯𑀸 𑀯𑁂𑀞𑀦𑀁 𑀯𑀸 𑀕𑀡𑁆𑀳𑀸𑀢𑀺, 𑀲𑁄 ‘‘𑀧𑀭𑀺𑀲𑀫𑀚𑁆𑀛𑁂 𑀫𑁂 𑀅𑀯𑀫𑀸𑀦𑀁 𑀓𑀭𑁄𑀲𑀺, 𑀳𑁄𑀢𑀼, 𑀲𑀺𑀓𑁆𑀔𑀸𑀧𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀢𑀢𑁆𑀣 𑀯𑁂𑀭𑀁 𑀩𑀦𑁆𑀥𑀢𑀺, 𑀏𑀯𑀁 𑀚𑀺𑀦𑀦𑁆𑀢𑁄 𑀲𑀬𑀁 𑀯𑁂𑀭𑀁 𑀧𑀲𑀯𑀢𑀺. 𑀚𑀺𑀦𑁄𑀢𑀺 𑀅𑀜𑁆𑀜𑁂𑀦 𑀚𑀺𑀢𑁄 𑀲𑀫𑀸𑀦𑁄 𑀬𑀁 𑀢𑁂𑀦 𑀢𑀲𑁆𑀲 𑀯𑁂𑀞𑀦𑀁 𑀯𑀸 𑀲𑀸𑀝𑀓𑁄 𑀯𑀸 𑀅𑀜𑁆𑀜𑀁 𑀯𑀸 𑀧𑀦 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀯𑀺𑀢𑁆𑀢𑀁 𑀕𑀳𑀺𑀢𑀁, 𑀢𑀁 𑀅𑀦𑀼𑀲𑁄𑀘𑀢𑀺 ‘‘𑀅𑀳𑁄𑀲𑀺 𑀯𑀢 𑀫𑁂, 𑀢𑀁 𑀢𑀁 𑀯𑀢 𑀫𑁂 𑀦𑀢𑁆𑀣𑀻’’𑀢𑀺 𑀢𑀧𑁆𑀧𑀘𑁆𑀘𑀬𑀸 𑀲𑁄𑀘𑀢𑀺. 𑀏𑀯𑀁 𑀲𑁄 𑀚𑀺𑀦𑁄 𑀯𑀺𑀢𑁆𑀢𑀁 𑀅𑀦𑀼𑀲𑁄𑀘𑀢𑀺. 𑀲𑀪𑀸𑀕𑀢𑀲𑁆𑀲 𑀯𑀘𑀦𑀁 𑀦 𑀭𑀽𑀳𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀲𑀓𑁆𑀔𑀺𑀧𑀼𑀝𑁆𑀞𑀲𑁆𑀲 𑀲𑀢𑁄 𑀯𑀘𑀦𑀁 𑀦 𑀭𑀽𑀳𑀢𑀺, 𑀦 𑀧𑀢𑀺𑀝𑁆𑀞𑀸𑀢𑀺, ‘‘𑀅𑀬𑀁 𑀅𑀓𑁆𑀔𑀲𑁄𑀡𑁆𑀟𑁄 𑀚𑀽𑀢𑀓𑀭𑁄, 𑀫𑀸 𑀢𑀲𑁆𑀲 𑀯𑀘𑀦𑀁 𑀕𑀡𑁆𑀳𑀺𑀢𑁆𑀣𑀸’’𑀢𑀺 𑀯𑀢𑁆𑀢𑀸𑀭𑁄 𑀪𑀯𑀦𑁆𑀢𑀺. 𑀫𑀺𑀢𑁆𑀢𑀸𑀫𑀘𑁆𑀘𑀸𑀦𑀁 ¶ 𑀧𑀭𑀺𑀪𑀽𑀢𑁄 𑀳𑁄𑀢𑀻𑀢𑀺 𑀢𑀜𑁆𑀳𑀺 𑀫𑀺𑀢𑀸𑀫𑀘𑁆𑀘𑀸 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀲𑀫𑁆𑀫, 𑀢𑁆𑀯𑀫𑁆𑀧𑀺 𑀦𑀸𑀫 𑀓𑀼𑀮𑀧𑀼𑀢𑁆𑀢𑁄 𑀚𑀽𑀢𑀓𑀭𑁄 𑀙𑀺𑀦𑁆𑀦𑀪𑀺𑀦𑁆𑀦𑀓𑁄 𑀳𑀼𑀢𑁆𑀯𑀸 𑀯𑀺𑀘𑀭𑀲𑀺, 𑀦 𑀢𑁂 𑀇𑀤𑀁 𑀚𑀸𑀢𑀺𑀕𑁄𑀢𑁆𑀢𑀸𑀦𑀁 𑀅𑀦𑀼𑀭𑀽𑀧𑀁, 𑀇𑀢𑁄 𑀧𑀝𑁆𑀞𑀸𑀬 𑀫𑀸 𑀏𑀯𑀁 𑀓𑀭𑁂𑀬𑁆𑀬𑀸𑀲𑀻’’𑀢𑀺. 𑀲𑁄 𑀏𑀯𑀁 𑀯𑀼𑀢𑁆𑀢𑁄𑀧𑀺 𑀢𑁂𑀲𑀁 𑀯𑀘𑀦𑀁 𑀦 𑀓𑀭𑁄𑀢𑀺. 𑀢𑀢𑁄 𑀢𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀦 𑀢𑀺𑀝𑁆𑀞𑀦𑁆𑀢𑀺 ¶ 𑀦 𑀦𑀺𑀲𑀻𑀤𑀦𑁆𑀢𑀺. 𑀢𑀲𑁆𑀲 𑀓𑀸𑀭𑀡𑀸 𑀲𑀓𑁆𑀔𑀺𑀧𑀼𑀝𑁆𑀞𑀸𑀧𑀺 𑀦 𑀓𑀣𑁂𑀦𑁆𑀢𑀺. 𑀏𑀯𑀁 𑀫𑀺𑀢𑁆𑀢𑀸𑀫𑀘𑁆𑀘𑀸𑀦𑀁 𑀧𑀭𑀺𑀪𑀽𑀢𑁄 𑀳𑁄𑀢𑀺.

𑀆𑀯𑀸𑀳𑀯𑀺𑀯𑀸𑀳𑀓𑀸𑀦𑀦𑁆𑀢𑀺 𑀆𑀯𑀸𑀳𑀓𑀸 𑀦𑀸𑀫 𑀬𑁂 𑀢𑀲𑁆𑀲 𑀖𑀭𑀢𑁄 𑀤𑀸𑀭𑀺𑀓𑀁 𑀕𑀳𑁂𑀢𑀼𑀓𑀸𑀫𑀸. 𑀯𑀺𑀯𑀸𑀳𑀓𑀸 𑀦𑀸𑀫 𑀬𑁂 𑀢𑀲𑁆𑀲 𑀕𑁂𑀳𑁂 𑀤𑀸𑀭𑀺𑀓𑀁 𑀤𑀸𑀢𑀼𑀓𑀸𑀫𑀸. 𑀅𑀧𑀢𑁆𑀣𑀺𑀢𑁄 𑀳𑁄𑀢𑀻𑀢𑀺 𑀅𑀦𑀺𑀘𑁆𑀙𑀺𑀢𑁄 𑀳𑁄𑀢𑀺. 𑀦𑀸𑀮𑀁 𑀤𑀸𑀭𑀪𑀭𑀡𑀸𑀬𑀸𑀢𑀺 𑀤𑀸𑀭𑀪𑀭𑀡𑀸𑀬 𑀦 𑀲𑀫𑀢𑁆𑀣𑁄. 𑀏𑀢𑀲𑁆𑀲 𑀕𑁂𑀳𑁂 𑀤𑀸𑀭𑀺𑀓𑀸 𑀤𑀺𑀦𑁆𑀦𑀸𑀧𑀺 𑀏𑀢𑀲𑁆𑀲 𑀕𑁂𑀳𑀢𑁄 𑀆𑀕𑀢𑀸𑀧𑀺 𑀅𑀫𑁆𑀳𑁂𑀳𑀺 𑀏𑀯 𑀧𑁄𑀲𑀺𑀢𑀩𑁆𑀩𑀸 𑀪𑀯𑀺𑀲𑁆𑀲𑀢𑀺𑀬𑁂𑀯.

𑀧𑀸𑀧𑀫𑀺𑀢𑁆𑀢𑀢𑀸𑀬 𑀙𑀆𑀤𑀻𑀦𑀯𑀸𑀤𑀺𑀯𑀡𑁆𑀡𑀦𑀸

𑁨𑁫𑁨. 𑀥𑀼𑀢𑁆𑀢𑀸𑀢𑀺 𑀅𑀓𑁆𑀔𑀥𑀼𑀢𑁆𑀢𑀸. 𑀲𑁄𑀡𑁆𑀟𑀸𑀢𑀺 𑀇𑀢𑁆𑀣𑀺𑀲𑁄𑀡𑁆𑀟𑀸 𑀪𑀢𑁆𑀢𑀲𑁄𑀡𑁆𑀟𑀸 𑀧𑀽𑀯𑀲𑁄𑀡𑁆𑀟𑀸 𑀫𑀽𑀮𑀓𑀲𑁄𑀡𑁆𑀟𑀸. 𑀧𑀺𑀧𑀸𑀲𑀸𑀢𑀺 𑀧𑀸𑀦𑀲𑁄𑀡𑁆𑀟𑀸. 𑀦𑁂𑀓𑀢𑀺𑀓𑀸𑀢𑀺 𑀧𑀢𑀺𑀭𑀽𑀧𑀓𑁂𑀦 𑀯𑀜𑁆𑀘𑀦𑀓𑀸. 𑀯𑀜𑁆𑀘𑀦𑀺𑀓𑀸𑀢𑀺 𑀲𑀫𑁆𑀫𑀼𑀔𑀸𑀯𑀜𑁆𑀘𑀦𑀸𑀳𑀺 ¶ 𑀯𑀜𑁆𑀘𑀦𑀺𑀓𑀸. 𑀲𑀸𑀳𑀲𑀺𑀓𑀸𑀢𑀺 𑀏𑀓𑀸𑀕𑀸𑀭𑀺𑀓𑀸𑀤𑀺𑀲𑀸𑀳𑀲𑀺𑀓𑀓𑀫𑁆𑀫𑀓𑀸𑀭𑀺𑀦𑁄. 𑀢𑁆𑀬𑀸𑀲𑁆𑀲 𑀫𑀺𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀢𑁂 𑀅𑀲𑁆𑀲 𑀫𑀺𑀢𑁆𑀢𑀸 𑀳𑁄𑀦𑁆𑀢𑀺. 𑀅𑀜𑁆𑀜𑁂𑀳𑀺 𑀲𑀧𑁆𑀧𑀼𑀭𑀺𑀲𑁂𑀳𑀺 𑀲𑀤𑁆𑀥𑀺𑀁 𑀦 𑀭𑀫𑀢𑀺 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀯𑀭𑀲𑀬𑀦𑀁 𑀆𑀭𑁄𑀧𑀺𑀢𑀲𑀽𑀓𑀭𑁄 𑀕𑀽𑀣𑀓𑀽𑀧𑀫𑀺𑀯, 𑀢𑁂 𑀧𑀸𑀧𑀫𑀺𑀢𑁆𑀢𑁂𑀬𑁂𑀯 𑀉𑀧𑀲𑀗𑁆𑀓𑀫𑀢𑀺. 𑀢𑀲𑁆𑀫𑀸 𑀤𑀺𑀝𑁆𑀞𑁂 𑀘𑁂𑀯 𑀥𑀫𑁆𑀫𑁂 𑀲𑀫𑁆𑀧𑀭𑀸𑀬𑀜𑁆𑀘 𑀩𑀳𑀼𑀁 𑀅𑀦𑀢𑁆𑀣𑀁 𑀦𑀺𑀕𑀘𑁆𑀙𑀢𑀺.

𑁨𑁫𑁩. 𑀅𑀢𑀺𑀲𑀻𑀢𑀦𑁆𑀢𑀺 𑀓𑀫𑁆𑀫𑀁 𑀦 𑀓𑀭𑁄𑀢𑀻𑀢𑀺 𑀫𑀦𑀼𑀲𑁆𑀲𑁂𑀳𑀺 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 ‘‘𑀏𑀣 𑀪𑁄 𑀓𑀫𑁆𑀫𑀦𑁆𑀢𑀁 𑀕𑀘𑁆𑀙𑀸𑀫𑀸’’𑀢𑀺 𑀯𑀼𑀢𑁆𑀢𑁄 ‘‘𑀅𑀢𑀺𑀲𑀻𑀢𑀁 𑀢𑀸𑀯, 𑀅𑀝𑁆𑀞𑀻𑀦𑀺 𑀪𑀺𑀚𑁆𑀚𑀦𑁆𑀢𑀺 𑀯𑀺𑀬, 𑀕𑀘𑁆𑀙𑀣 𑀢𑀼𑀫𑁆𑀳𑁂 𑀧𑀘𑁆𑀙𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀅𑀕𑁆𑀕𑀺𑀁 𑀢𑀧𑀦𑁆𑀢𑁄 𑀦𑀺𑀲𑀻𑀤𑀢𑀺. 𑀢𑁂 𑀕𑀦𑁆𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀇𑀢𑀭𑀲𑁆𑀲 𑀓𑀫𑁆𑀫𑀁 𑀧𑀭𑀺𑀳𑀸𑀬𑀢𑀺. 𑀅𑀢𑀺𑀉𑀡𑁆𑀳𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀳𑁄𑀢𑀺 𑀧𑀸𑀦𑀲𑀔𑀸 𑀦𑀸𑀫𑀸𑀢𑀺 𑀏𑀓𑀘𑁆𑀘𑁄 𑀧𑀸𑀦𑀝𑁆𑀞𑀸𑀦𑁂 𑀲𑀼𑀭𑀸𑀕𑁂𑀳𑁂𑀬𑁂𑀯 𑀲𑀳𑀸𑀬𑁄 𑀳𑁄𑀢𑀺. ‘‘𑀧𑀦𑁆𑀦𑀲𑀔𑀸’’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. 𑀲𑀫𑁆𑀫𑀺𑀬𑀲𑀫𑁆𑀫𑀺𑀬𑁄𑀢𑀺 𑀲𑀫𑁆𑀫 𑀲𑀫𑁆𑀫𑀸𑀢𑀺 𑀯𑀤𑀦𑁆𑀢𑁄 𑀲𑀫𑁆𑀫𑀼𑀔𑁂𑀬𑁂𑀯 𑀲𑀳𑀸𑀬𑁄 𑀳𑁄𑀢𑀺, 𑀧𑀭𑀫𑁆𑀫𑀼𑀔𑁂 𑀯𑁂𑀭𑀻𑀲𑀤𑀺𑀲𑁄 𑀑𑀢𑀸𑀭𑀫𑁂𑀯 𑀕𑀯𑁂𑀲𑀢𑀺. 𑀅𑀢𑁆𑀣𑁂𑀲𑀼 ¶ 𑀚𑀸𑀢𑁂𑀲𑀽𑀢𑀺 𑀢𑀣𑀸𑀭𑀽𑀧𑁂𑀲𑀼 𑀓𑀺𑀘𑁆𑀘𑁂𑀲𑀼 𑀲𑀫𑀼𑀧𑁆𑀧𑀦𑁆𑀦𑁂𑀲𑀼. 𑀯𑁂𑀭𑀧𑁆𑀧𑀲𑀯𑁄𑀢𑀺 𑀯𑁂𑀭𑀩𑀳𑀼𑀮𑀢𑀸. 𑀅𑀦𑀢𑁆𑀣𑀢𑀸𑀢𑀺 𑀅𑀦𑀢𑁆𑀣𑀓𑀸𑀭𑀺𑀢𑀸. 𑀲𑀼𑀓𑀤𑀭𑀺𑀬𑀢𑀸𑀢𑀺 𑀲𑀼𑀝𑁆𑀞𑀼 𑀓𑀤𑀭𑀺𑀬𑀢𑀸 𑀣𑀤𑁆𑀥𑀫𑀘𑁆𑀙𑀭𑀺𑀬𑀪𑀸𑀯𑁄 ¶ . 𑀉𑀤𑀓𑀫𑀺𑀯 𑀇𑀡𑀁 𑀯𑀺𑀕𑀸𑀳𑀢𑀻𑀢𑀺 𑀧𑀸𑀲𑀸𑀡𑁄 𑀉𑀤𑀓𑀁 𑀯𑀺𑀬 𑀲𑀁𑀲𑀻𑀤𑀦𑁆𑀢𑁄 𑀇𑀡𑀁 𑀯𑀺𑀕𑀸𑀳𑀢𑀺.

𑀭𑀢𑁆𑀢𑀺𑀦𑀼𑀝𑁆𑀞𑀸𑀦𑀤𑁂𑀲𑁆𑀲𑀺𑀦𑀸𑀢𑀺 𑀭𑀢𑁆𑀢𑀺𑀁 𑀅𑀦𑀼𑀝𑁆𑀞𑀸𑀦𑀲𑀻𑀮𑁂𑀦. 𑀅𑀢𑀺𑀲𑀸𑀬𑀫𑀺𑀤𑀁 𑀅𑀳𑀽𑀢𑀺 𑀇𑀤𑀁 𑀅𑀢𑀺𑀲𑀸𑀬𑀁 𑀚𑀸𑀢𑀦𑁆𑀢𑀺 𑀬𑁂 𑀏𑀯𑀁 𑀯𑀢𑁆𑀯𑀸 𑀓𑀫𑁆𑀫𑀁 𑀦 𑀓𑀭𑁄𑀦𑁆𑀢𑀺. 𑀇𑀢𑀺 𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀦𑁆𑀢𑁂𑀢𑀺 𑀏𑀯𑀁 𑀯𑀢𑁆𑀯𑀸 𑀧𑀭𑀺𑀘𑁆𑀘𑀢𑁆𑀢𑀓𑀫𑁆𑀫𑀦𑁆𑀢𑁂. 𑀅𑀢𑁆𑀣𑀸 𑀅𑀘𑁆𑀘𑁂𑀦𑁆𑀢𑀺 𑀫𑀸𑀡𑀯𑁂𑀢𑀺 𑀏𑀯𑀭𑀽𑀧𑁂 𑀧𑀼𑀕𑁆𑀕𑀮𑁂 𑀅𑀢𑁆𑀣𑀸 𑀅𑀢𑀺𑀓𑁆𑀓𑀫𑀦𑁆𑀢𑀺, 𑀢𑁂𑀲𑀼 𑀦 𑀢𑀺𑀝𑁆𑀞𑀦𑁆𑀢𑀺.

𑀢𑀺𑀡𑀸 𑀪𑀺𑀬𑁆𑀬𑁄𑀢𑀺 𑀢𑀺𑀡𑀢𑁄𑀧𑀺 𑀉𑀢𑁆𑀢𑀭𑀺. 𑀲𑁄 𑀲𑀼𑀔𑀁 𑀦 𑀯𑀺𑀳𑀸𑀬𑀢𑀻𑀢𑀺 𑀲𑁄 𑀧𑀼𑀭𑀺𑀲𑁄 𑀲𑀼𑀔𑀁 𑀦 𑀚𑀳𑀸𑀢𑀺, 𑀲𑀼𑀔𑀲𑀫𑀗𑁆𑀕𑀻𑀬𑁂𑀯 𑀳𑁄𑀢𑀺. 𑀇𑀫𑀺𑀦𑀸 𑀓𑀣𑀸𑀫𑀕𑁆𑀕𑁂𑀦 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀕𑀺𑀳𑀺𑀪𑀽𑀢𑁂𑀦 𑀲𑀢𑀸 𑀏𑀢𑁆𑀢𑀓𑀁 𑀓𑀫𑁆𑀫𑀁 𑀦 𑀓𑀸𑀢𑀩𑁆𑀩𑀁, 𑀓𑀭𑁄𑀦𑁆𑀢𑀲𑁆𑀲 𑀯𑀟𑁆𑀠𑀺 𑀦𑀸𑀫 𑀦𑀢𑁆𑀣𑀺. 𑀇𑀥𑀮𑁄𑀓𑁂 𑀧𑀭𑀮𑁄𑀓𑁂 𑀕𑀭𑀳𑀫𑁂𑀯 𑀧𑀸𑀧𑀼𑀡𑀸𑀢𑀻’’𑀢𑀺.

𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑀸𑀤𑀺𑀯𑀡𑁆𑀡𑀦𑀸

𑁨𑁫𑁪. 𑀇𑀤𑀸𑀦𑀺 ¶ 𑀬𑁄 𑀏𑀯𑀁 𑀓𑀭𑁄𑀢𑁄 𑀅𑀦𑀢𑁆𑀣𑁄 𑀉𑀧𑁆𑀧𑀚𑁆𑀚𑀢𑀺, 𑀅𑀜𑁆𑀜𑀸𑀦𑀺 𑀯𑀸 𑀧𑀦 𑀬𑀸𑀦𑀺 𑀓𑀸𑀦𑀺𑀘𑀺 𑀪𑀬𑀸𑀦𑀺 𑀬𑁂𑀓𑁂𑀘𑀺 𑀉𑀧𑀤𑁆𑀤𑀯𑀸 𑀬𑁂𑀓𑁂𑀘𑀺 𑀉𑀧𑀲𑀕𑁆𑀕𑀸, 𑀲𑀩𑁆𑀩𑁂 𑀢𑁂 𑀩𑀸𑀮𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 ‘‘𑀏𑀯𑀭𑀽𑀧𑀸 𑀩𑀸𑀮𑀸 𑀦 𑀲𑁂𑀯𑀺𑀢𑀩𑁆𑀩𑀸’’𑀢𑀺 𑀩𑀸𑀮𑁂 𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑁂 𑀅𑀫𑀺𑀢𑁆𑀢𑁂 𑀤𑀲𑁆𑀲𑁂𑀢𑀼𑀁 𑀘𑀢𑁆𑀢𑀸𑀭𑁄𑀫𑁂, 𑀕𑀳𑀧𑀢𑀺𑀧𑀼𑀢𑁆𑀢 𑀅𑀫𑀺𑀢𑁆𑀢𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀜𑁆𑀜𑀤𑀢𑁆𑀣𑀼𑀳𑀭𑁄𑀢𑀺 𑀲𑀬𑀁 𑀢𑀼𑀘𑁆𑀙𑀳𑀢𑁆𑀣𑁄 𑀆𑀕𑀦𑁆𑀢𑁆𑀯𑀸 𑀏𑀓𑀁𑀲𑁂𑀦 𑀬𑀁𑀓𑀺𑀜𑁆𑀘𑀺 𑀳𑀭𑀢𑀺𑀬𑁂𑀯. 𑀯𑀘𑀻𑀧𑀭𑀫𑁄𑀢𑀺 𑀯𑀘𑀦𑀧𑀭𑀫𑁄 𑀯𑀘𑀦𑀫𑀢𑁆𑀢𑁂𑀦𑁂𑀯 𑀤𑀸𑀬𑀓𑁄 𑀓𑀸𑀭𑀓𑁄 𑀯𑀺𑀬 𑀳𑁄𑀢𑀺. 𑀅𑀦𑀼𑀧𑁆𑀧𑀺𑀬𑀪𑀸𑀡𑀻𑀢𑀺 𑀅𑀦𑀼𑀧𑁆𑀧𑀺𑀬𑀁 𑀪𑀡𑀢𑀺. 𑀅𑀧𑀸𑀬𑀲𑀳𑀸𑀬𑁄𑀢𑀺 𑀪𑁄𑀕𑀸𑀦𑀁 𑀅𑀧𑀸𑀬𑁂𑀲𑀼 𑀲𑀳𑀸𑀬𑁄 𑀳𑁄𑀢𑀺.

𑁨𑁫𑁫. 𑀏𑀯𑀁 𑀘𑀢𑁆𑀢𑀸𑀭𑁄 𑀅𑀫𑀺𑀢𑁆𑀢𑁂 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀢𑀢𑁆𑀣 𑀏𑀓𑁂𑀓𑀁 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀯𑀺𑀪𑀚𑀦𑁆𑀢𑁄 𑀘𑀢𑀽𑀳𑀺 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀜𑁆𑀜𑀤𑀢𑁆𑀣𑀼𑀳𑀭𑁄 𑀳𑁄𑀢𑀻𑀢𑀺 𑀏𑀓𑀁𑀲𑁂𑀦 𑀳𑀸𑀭𑀓𑁄𑀬𑁂𑀯 𑀳𑁄𑀢𑀺. 𑀲𑀳𑀸𑀬𑀲𑁆𑀲 𑀕𑁂𑀳𑀁 𑀭𑀺𑀢𑁆𑀢𑀳𑀢𑁆𑀣𑁄 𑀆𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀣𑀲𑀸𑀝𑀓𑀸𑀤𑀻𑀦𑀁 𑀯𑀡𑁆𑀡𑀁 𑀪𑀸𑀲𑀢𑀺, 𑀲𑁄 ‘‘𑀅𑀢𑀺𑀯𑀺𑀬 𑀢𑁆𑀯𑀁 𑀲𑀫𑁆𑀫 𑀇𑀫𑀲𑁆𑀲 𑀯𑀡𑁆𑀡𑀁 𑀪𑀸𑀲𑀲𑀻’’𑀢𑀺 𑀅𑀜𑁆𑀜𑀁 𑀦𑀺𑀯𑀸𑀲𑁂𑀢𑁆𑀯𑀸 𑀢𑀁 𑀤𑁂𑀢𑀺. 𑀅𑀧𑁆𑀧𑁂𑀦 𑀩𑀳𑀼𑀫𑀺𑀘𑁆𑀙𑀢𑀻𑀢𑀺 𑀬𑀁𑀓𑀺𑀜𑁆𑀘𑀺 𑀅𑀧𑁆𑀧𑀓𑀁 𑀤𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀸 𑀩𑀳𑀼𑀁 𑀧𑀢𑁆𑀣𑁂𑀢𑀺. 𑀪𑀬𑀲𑁆𑀲 ¶ 𑀓𑀺𑀘𑁆𑀘𑀁 𑀓𑀭𑁄𑀢𑀻𑀢𑀺 𑀅𑀢𑁆𑀢𑀦𑁄 𑀪𑀬𑁂 𑀉𑀧𑁆𑀧𑀦𑁆𑀦𑁂 𑀢𑀲𑁆𑀲 𑀤𑀸𑀲𑁄 𑀯𑀺𑀬 𑀳𑀼𑀢𑁆𑀯𑀸 𑀢𑀁 𑀢𑀁 𑀓𑀺𑀘𑁆𑀘𑀁 𑀓𑀭𑁄𑀢𑀺, 𑀅𑀬𑀁 𑀲𑀩𑁆𑀩𑀤𑀸 𑀦 𑀓𑀭𑁄𑀢𑀺, 𑀪𑀬𑁂 ¶ 𑀉𑀧𑁆𑀧𑀦𑁆𑀦𑁂 𑀓𑀭𑁄𑀢𑀺, 𑀦 𑀧𑁂𑀫𑁂𑀦𑀸𑀢𑀺 𑀅𑀫𑀺𑀢𑁆𑀢𑁄 𑀦𑀸𑀫 𑀚𑀸𑀢𑁄. 𑀲𑁂𑀯𑀢𑀺 𑀅𑀢𑁆𑀣𑀓𑀸𑀭𑀡𑀸𑀢𑀺 𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦 𑀦 𑀲𑁂𑀯𑀢𑀺, 𑀅𑀢𑁆𑀢𑀦𑁄 𑀅𑀢𑁆𑀣𑀫𑁂𑀯 𑀧𑀘𑁆𑀘𑀸𑀲𑀻𑀲𑀦𑁆𑀢𑁄 𑀲𑁂𑀯𑀢𑀺.

𑁨𑁫𑁬. 𑀅𑀢𑀻𑀢𑁂𑀦 𑀧𑀝𑀺𑀲𑀦𑁆𑀣𑀭𑀢𑀻𑀢𑀺 𑀲𑀳𑀸𑀬𑁂 𑀆𑀕𑀢𑁂 ‘‘𑀳𑀺𑀬𑁆𑀬𑁄 𑀯𑀸 𑀧𑀭𑁂 𑀯𑀸 𑀦 𑀆𑀕𑀢𑁄𑀲𑀺, 𑀅𑀫𑁆𑀳𑀸𑀓𑀁 𑀇𑀫𑀲𑁆𑀫𑀺𑀁 𑀯𑀸𑀭𑁂 𑀲𑀲𑁆𑀲𑀁 𑀅𑀢𑀺𑀯𑀺𑀬 𑀦𑀺𑀧𑁆𑀨𑀦𑁆𑀦𑀁, 𑀩𑀳𑀽𑀦𑀺 𑀲𑀸𑀮𑀺𑀬𑀯𑀩𑀻𑀚𑀸𑀤𑀻𑀦𑀺 𑀞𑀧𑁂𑀢𑁆𑀯𑀸 𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑀸 𑀦𑀺𑀲𑀻𑀤𑀺𑀫𑁆𑀳, 𑀅𑀚𑁆𑀚 𑀧𑀦 𑀲𑀩𑁆𑀩𑀁 𑀔𑀻𑀡’’𑀦𑁆𑀢𑀺 𑀏𑀯𑀁 𑀅𑀢𑀻𑀢𑁂𑀦 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑀸𑀕𑀢𑁂𑀦𑀸𑀢𑀺 ‘‘𑀇𑀫𑀲𑁆𑀫𑀺𑀁 𑀯𑀸𑀭𑁂 𑀅𑀫𑁆𑀳𑀸𑀓𑀁 𑀲𑀲𑁆𑀲𑀁 𑀫𑀦𑀸𑀧𑀁 𑀪𑀯𑀺𑀲𑁆𑀲𑀢𑀺, 𑀨𑀮𑀪𑀸𑀭𑀪𑀭𑀺𑀢𑀸 𑀲𑀸𑀮𑀺𑀆𑀤𑀬𑁄, 𑀲𑀲𑁆𑀲𑀲𑀗𑁆𑀕𑀳𑁂 𑀓𑀢𑁂 𑀢𑀼𑀫𑁆𑀳𑀸𑀓𑀁 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀲𑀫𑀢𑁆𑀣𑀸 𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀏𑀯𑀁 𑀅𑀦𑀸𑀕𑀢𑁂𑀦 𑀲𑀗𑁆𑀕𑀡𑁆𑀳𑀸𑀢𑀺. 𑀦𑀺𑀭𑀢𑁆𑀣𑀓𑁂𑀦𑀸𑀢𑀺 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀯𑀸 𑀅𑀲𑁆𑀲𑀧𑀺𑀝𑁆𑀞𑁂 𑀯𑀸 𑀦𑀺𑀲𑀺𑀦𑁆𑀦𑁄 𑀲𑀳𑀸𑀬𑀁 𑀤𑀺𑀲𑁆𑀯𑀸 ‘‘𑀏𑀳𑀺, 𑀪𑁄, 𑀇𑀥 𑀦𑀺𑀲𑀻𑀤𑀸’’𑀢𑀺 𑀯𑀤𑀢𑀺. 𑀫𑀦𑀸𑀧𑀁 𑀲𑀸𑀝𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 ‘‘𑀲𑀳𑀸𑀬𑀓𑀲𑁆𑀲 𑀯𑀢 𑀫𑁂 𑀅𑀦𑀼𑀘𑁆𑀙𑀯𑀺𑀓𑁄 𑀅𑀜𑁆𑀜𑁄 𑀧𑀦 𑀫𑀬𑁆𑀳𑀁 𑀦𑀢𑁆𑀣𑀻’’𑀢𑀺 𑀯𑀤𑀢𑀺, 𑀏𑀯𑀁 𑀦𑀺𑀭𑀢𑁆𑀣𑀓𑁂𑀦 𑀲𑀗𑁆𑀕𑀡𑁆𑀳𑀸𑀢𑀺 𑀦𑀸𑀫. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀘𑁂𑀲𑀼 𑀩𑁆𑀬𑀲𑀦𑀁 𑀤𑀲𑁆𑀲𑁂𑀢𑀻𑀢𑀺 ‘‘𑀲𑀓𑀝𑁂𑀦 𑀫𑁂 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑁂 ‘‘𑀘𑀓𑁆𑀓𑀫𑀲𑁆𑀲 𑀪𑀺𑀦𑁆𑀦𑀁, 𑀅𑀓𑁆𑀔𑁄 𑀙𑀺𑀦𑁆𑀦𑁄’’𑀢𑀺𑀆𑀤𑀻𑀦𑀺 𑀯𑀤𑀢𑀺.

𑁨𑁫𑁭. 𑀧𑀸𑀧𑀓𑀫𑁆𑀧𑀺𑀲𑁆𑀲 𑀅𑀦𑀼𑀚𑀸𑀦𑀸𑀢𑀻𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀓𑀭𑁄𑀫𑀸𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀼 𑀲𑀫𑁆𑀫 ¶ 𑀓𑀭𑁄𑀫𑀸’’𑀢𑀺 𑀅𑀦𑀼𑀚𑀸𑀦𑀸𑀢𑀺. 𑀓𑀮𑁆𑀬𑀸𑀡𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀳𑀸𑀬𑁄 𑀳𑁄𑀢𑀻𑀢𑀺 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀲𑀼𑀭𑀁 𑀧𑀺𑀯𑀦𑁆𑀢𑀺, 𑀏𑀳𑀺 𑀢𑀢𑁆𑀣 𑀕𑀘𑁆𑀙𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀲𑀸𑀥𑀽𑀢𑀺 𑀕𑀘𑁆𑀙𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀇𑀢𑀺 𑀯𑀺𑀜𑁆𑀜𑀸𑀬𑀸𑀢𑀺 ‘‘𑀫𑀺𑀢𑁆𑀢𑀧𑀢𑀺𑀭𑀽𑀧𑀓𑀸 𑀏𑀢𑁂’’𑀢𑀺 𑀏𑀯𑀁 𑀚𑀸𑀦𑀺𑀢𑁆𑀯𑀸.

𑀲𑀼𑀳𑀤𑀫𑀺𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁬𑁦. 𑀏𑀯𑀁 𑀦 𑀲𑁂𑀯𑀺𑀢𑀩𑁆𑀩𑁂 𑀧𑀸𑀧𑀫𑀺𑀢𑁆𑀢𑁂 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑁂𑀯𑀺𑀢𑀩𑁆𑀩𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀤𑀲𑁆𑀲𑁂𑀦𑁆𑀢𑁄 𑀧𑀼𑀦 𑀘𑀢𑁆𑀢𑀸𑀭𑁄𑀫𑁂, 𑀕𑀳𑀧𑀢𑀺𑀧𑀼𑀢𑁆𑀢𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀳𑀤𑀸𑀢𑀺 𑀲𑀼𑀦𑁆𑀤𑀭𑀳𑀤𑀬𑀸.

𑁨𑁬𑁧. 𑀧𑀫𑀢𑁆𑀢𑀁 𑀭𑀓𑁆𑀔𑀢𑀻𑀢𑀺 𑀫𑀚𑁆𑀚𑀁 𑀧𑀺𑀯𑀺𑀢𑁆𑀯𑀸 𑀕𑀸𑀫𑀫𑀚𑁆𑀛𑁂 𑀯𑀸 𑀕𑀸𑀫𑀤𑁆𑀯𑀸𑀭𑁂 𑀯𑀸 𑀫𑀕𑁆𑀕𑁂 𑀯𑀸 𑀦𑀺𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀏𑀯𑀁𑀦𑀺𑀧𑀦𑁆𑀦𑀲𑁆𑀲 𑀓𑁄𑀘𑀺𑀤𑁂𑀯 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀫𑁆𑀧𑀺 𑀳𑀭𑁂𑀬𑁆𑀬𑀸’’𑀢𑀺 𑀲𑀫𑀻𑀧𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀩𑀼𑀤𑁆𑀥𑀓𑀸𑀮𑁂 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀧𑀫𑀢𑁆𑀢𑀲𑁆𑀲 ¶ 𑀲𑀸𑀧𑀢𑁂𑀬𑁆𑀬𑀦𑁆𑀢𑀺 𑀲𑀳𑀸𑀬𑁄 ¶ 𑀩𑀳𑀺𑀕𑀢𑁄 𑀯𑀸 𑀳𑁄𑀢𑀺 𑀲𑀼𑀭𑀁 𑀧𑀺𑀯𑀺𑀢𑁆𑀯𑀸 𑀯𑀸 𑀧𑀫𑀢𑁆𑀢𑁄, 𑀕𑁂𑀳𑀁 𑀅𑀦𑀸𑀭𑀓𑁆𑀔𑀁 ‘‘𑀓𑁄𑀘𑀺𑀤𑁂𑀯 𑀬𑀁𑀓𑀺𑀜𑁆𑀘𑀺 𑀳𑀭𑁂𑀬𑁆𑀬𑀸’’𑀢𑀺 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀢𑀲𑁆𑀲 𑀥𑀦𑀁 𑀭𑀓𑁆𑀔𑀢𑀺. 𑀪𑀻𑀢𑀲𑁆𑀲𑀸𑀢𑀺 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀪𑀬𑁂 𑀉𑀧𑁆𑀧𑀦𑁆𑀦𑁂 ‘‘𑀫𑀸 𑀪𑀸𑀬𑀺, 𑀫𑀸𑀤𑀺𑀲𑁂 𑀲𑀳𑀸𑀬𑁂 𑀞𑀺𑀢𑁂 𑀓𑀺𑀁 𑀪𑀸𑀬𑀲𑀻’’𑀢𑀺 𑀢𑀁 𑀪𑀬𑀁 𑀳𑀭𑀦𑁆𑀢𑁄 𑀧𑀝𑀺𑀲𑀭𑀡𑀁 𑀳𑁄𑀢𑀺. 𑀢𑀤𑁆𑀤𑀺𑀕𑀼𑀡𑀁 𑀪𑁄𑀕𑀦𑁆𑀢𑀺 𑀓𑀺𑀘𑁆𑀘𑀓𑀭𑀡𑀻𑀬𑁂 𑀉𑀧𑁆𑀧𑀦𑁆𑀦𑁂 𑀲𑀳𑀸𑀬𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀁 𑀤𑀺𑀲𑁆𑀯𑀸 𑀯𑀤𑀢𑀺 ‘‘𑀓𑀲𑁆𑀫𑀸 𑀆𑀕𑀢𑁄𑀲𑀻’’𑀢𑀺? 𑀭𑀸𑀚𑀓𑀼𑀮𑁂 𑀓𑀫𑁆𑀫𑀁 𑀅𑀢𑁆𑀣𑀻𑀢𑀺. 𑀓𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻𑀢𑀺? 𑀏𑀓𑁄 𑀓𑀳𑀸𑀧𑀡𑁄𑀢𑀺. ‘‘𑀦𑀕𑀭𑁂 𑀓𑀫𑁆𑀫𑀁 𑀦𑀸𑀫 𑀦 𑀏𑀓𑀓𑀳𑀸𑀧𑀡𑁂𑀦 𑀦𑀺𑀧𑁆𑀨𑀚𑁆𑀚𑀢𑀺, 𑀤𑁆𑀯𑁂 𑀕𑀡𑁆𑀳𑀸𑀳𑀻’’𑀢𑀺 𑀏𑀯𑀁 𑀬𑀢𑁆𑀢𑀓𑀁 𑀯𑀤𑀢𑀺, 𑀢𑀢𑁄 𑀤𑀺𑀕𑀼𑀡𑀁 𑀤𑁂𑀢𑀺.

𑁨𑁬𑁨. 𑀕𑀼𑀬𑁆𑀳𑀫𑀲𑁆𑀲 𑀆𑀘𑀺𑀓𑁆𑀔𑀢𑀻𑀢𑀺 𑀅𑀢𑁆𑀢𑀦𑁄 𑀕𑀼𑀬𑁆𑀳𑀁 𑀦𑀺𑀕𑀽𑀳𑀺𑀢𑀼𑀁 𑀬𑀼𑀢𑁆𑀢𑀓𑀣𑀁 𑀅𑀜𑁆𑀜𑀲𑁆𑀲 𑀅𑀓𑀣𑁂𑀢𑁆𑀯𑀸 𑀢𑀲𑁆𑀲𑁂𑀯 𑀆𑀘𑀺𑀓𑁆𑀔𑀢𑀺. 𑀕𑀼𑀬𑁆𑀳𑀫𑀲𑁆𑀲 𑀧𑀭𑀺𑀕𑀽𑀳𑀢𑀻𑀢𑀺 𑀢𑁂𑀦 𑀓𑀣𑀺𑀢𑀁 𑀕𑀼𑀬𑁆𑀳𑀁 𑀬𑀣𑀸 𑀅𑀜𑁆𑀜𑁄 𑀦 𑀚𑀸𑀦𑀸𑀢𑀺, 𑀏𑀯𑀁 𑀭𑀓𑁆𑀔𑀢𑀺. 𑀆𑀧𑀤𑀸𑀲𑀼 𑀦 𑀯𑀺𑀚𑀳𑀢𑀻𑀢𑀺 𑀉𑀧𑁆𑀧𑀦𑁆𑀦𑁂 𑀪𑀬𑁂 𑀦 𑀧𑀭𑀺𑀘𑁆𑀘𑀚𑀢𑀺. 𑀚𑀻𑀯𑀺𑀢𑀫𑁆𑀧𑀺𑀲𑁆𑀲 𑀅𑀢𑁆𑀣𑀸𑀬𑀸𑀢𑀺 𑀅𑀢𑁆𑀢𑀦𑁄 𑀚𑀻𑀯𑀺𑀢𑀫𑁆𑀧𑀺 𑀢𑀲𑁆𑀲 𑀲𑀳𑀸𑀬𑀲𑁆𑀲 𑀅𑀢𑁆𑀣𑀸𑀬 𑀧𑀭𑀺𑀘𑁆𑀘𑀢𑁆𑀢𑀫𑁂𑀯 𑀳𑁄𑀢𑀺, 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀅𑀕𑀡𑁂𑀢𑁆𑀯𑀸𑀧𑀺 𑀢𑀲𑁆𑀲 𑀓𑀫𑁆𑀫𑀁 𑀓𑀭𑁄𑀢𑀺𑀬𑁂𑀯.

𑁨𑁬𑁩. 𑀧𑀸𑀧𑀸 𑀦𑀺𑀯𑀸𑀭𑁂𑀢𑀻𑀢𑀺 𑀅𑀫𑁆𑀳𑁂𑀲𑀼 𑀧𑀲𑁆𑀲𑀦𑁆𑀢𑁂𑀲𑀼 𑀧𑀲𑁆𑀲𑀦𑁆𑀢𑁂𑀲𑀼 𑀢𑁆𑀯𑀁 𑀏𑀯𑀁 𑀓𑀸𑀢𑀼𑀁 𑀦 𑀮𑀪𑀲𑀺, 𑀧𑀜𑁆𑀘 𑀯𑁂𑀭𑀸𑀦𑀺 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑁂 𑀫𑀸 𑀓𑀭𑁄𑀳𑀻𑀢𑀺 𑀦𑀺𑀯𑀸𑀭𑁂𑀢𑀺. 𑀓𑀮𑁆𑀬𑀸𑀡𑁂 𑀦𑀺𑀯𑁂𑀲𑁂𑀢𑀻𑀢𑀺 𑀓𑀮𑁆𑀬𑀸𑀡𑀓𑀫𑁆𑀫𑁂 𑀢𑀻𑀲𑀼 𑀲𑀭𑀡𑁂𑀲𑀼 𑀧𑀜𑁆𑀘𑀲𑀻𑀮𑁂𑀲𑀼 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑁂𑀲𑀼 𑀯𑀢𑁆𑀢𑀲𑁆𑀲𑀼, 𑀤𑀸𑀦𑀁 𑀤𑁂𑀳𑀺 𑀧𑀼𑀜𑁆𑀜𑀁 𑀓𑀭𑁄𑀳𑀺 𑀥𑀫𑁆𑀫𑀁 𑀲𑀼𑀡𑀸𑀳𑀻𑀢𑀺 𑀏𑀯𑀁 𑀓𑀮𑁆𑀬𑀸𑀡𑁂 𑀦𑀺𑀬𑁄𑀚𑁂𑀢𑀺. 𑀅𑀲𑁆𑀲𑀼𑀢𑀁 𑀲𑀸𑀯𑁂𑀢𑀻𑀢𑀺 𑀅𑀲𑁆𑀲𑀼𑀢𑀧𑀼𑀩𑁆𑀩𑀁 𑀲𑀼𑀔𑀼𑀫𑀁 𑀦𑀺𑀧𑀼𑀡𑀁 ¶ 𑀓𑀸𑀭𑀡𑀁 𑀲𑀸𑀯𑁂𑀢𑀺. 𑀲𑀕𑁆𑀕𑀲𑁆𑀲 𑀫𑀕𑁆𑀕𑀦𑁆𑀢𑀺 𑀇𑀤𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 𑀏𑀯𑀁 𑀲𑀕𑁆𑀕𑀲𑁆𑀲 𑀫𑀕𑁆𑀕𑀁 𑀆𑀘𑀺𑀓𑁆𑀔𑀢𑀺.

𑁨𑁬𑁪. 𑀅𑀪𑀯𑁂𑀦𑀲𑁆𑀲 𑀦 𑀦𑀦𑁆𑀤𑀢𑀻𑀢𑀺 𑀢𑀲𑁆𑀲 𑀅𑀪𑀯𑁂𑀦 𑀅𑀯𑀼𑀟𑁆𑀠𑀺𑀬𑀸 𑀧𑀼𑀢𑁆𑀢𑀤𑀸𑀭𑀲𑁆𑀲 𑀯𑀸 𑀧𑀭𑀺𑀚𑀦𑀲𑁆𑀲 𑀯𑀸 𑀢𑀣𑀸𑀭𑀽𑀧𑀁 𑀧𑀸𑀭𑀺𑀚𑀼𑀜𑁆𑀜𑀁 𑀤𑀺𑀲𑁆𑀯𑀸 𑀯𑀸 𑀲𑀼𑀢𑁆𑀯𑀸 𑀯𑀸 𑀦 𑀦𑀦𑁆𑀤𑀢𑀺, 𑀅𑀦𑀢𑁆𑀢𑀫𑀦𑁄 𑀳𑁄𑀢𑀺. 𑀪𑀯𑁂𑀦𑀸𑀢𑀺 𑀯𑀼𑀟𑁆𑀠𑀺𑀬𑀸 𑀢𑀣𑀸𑀭𑀽𑀧𑀲𑁆𑀲 𑀲𑀫𑁆𑀧𑀢𑁆𑀢𑀺𑀁 𑀯𑀸 ¶ 𑀇𑀲𑁆𑀲𑀭𑀺𑀬𑀧𑁆𑀧𑀝𑀺𑀮𑀸𑀪𑀁 𑀯𑀸 𑀤𑀺𑀲𑁆𑀯𑀸 𑀯𑀸 𑀲𑀼𑀢𑁆𑀯𑀸 𑀯𑀸 𑀦𑀦𑁆𑀤𑀢𑀺, 𑀅𑀢𑁆𑀢𑀫𑀦𑁄 𑀳𑁄𑀢𑀺. 𑀅𑀯𑀡𑁆𑀡𑀁 𑀪𑀡𑀫𑀸𑀦𑀁 𑀦𑀺𑀯𑀸𑀭𑁂𑀢𑀻𑀢𑀺 ‘‘𑀅𑀲𑀼𑀓𑁄 𑀯𑀺𑀭𑀽𑀧𑁄 𑀦 𑀧𑀸𑀲𑀸𑀤𑀺𑀓𑁄 𑀤𑀼𑀚𑁆𑀚𑀸𑀢𑀺𑀓𑁄 𑀤𑀼𑀲𑁆𑀲𑀻𑀮𑁄’’𑀢𑀺 𑀯𑀸 𑀯𑀼𑀢𑁆𑀢𑁂 ‘‘𑀏𑀯𑀁 𑀫𑀸 𑀪𑀡𑀺, 𑀭𑀽𑀧𑀯𑀸 𑀘 𑀲𑁄 𑀧𑀸𑀲𑀸𑀤𑀺𑀓𑁄 ¶ 𑀘 𑀲𑀼𑀚𑀸𑀢𑁄 𑀘 𑀲𑀻𑀮𑀲𑀫𑁆𑀧𑀦𑁆𑀦𑁄 𑀘𑀸’’𑀢𑀺𑀆𑀤𑀻𑀳𑀺 𑀯𑀘𑀦𑁂𑀳𑀺 𑀧𑀭𑀁 𑀅𑀢𑁆𑀢𑀦𑁄 𑀲𑀳𑀸𑀬𑀲𑁆𑀲 𑀅𑀯𑀡𑁆𑀡𑀁 𑀪𑀡𑀫𑀸𑀦𑀁 𑀦𑀺𑀯𑀸𑀭𑁂𑀢𑀺. 𑀯𑀡𑁆𑀡𑀁 𑀪𑀡𑀫𑀸𑀦𑀁 𑀧𑀲𑀁𑀲𑀢𑀻𑀢𑀺 ‘‘𑀅𑀲𑀼𑀓𑁄 𑀭𑀽𑀧𑀯𑀸 𑀧𑀸𑀲𑀸𑀤𑀺𑀓𑁄 𑀲𑀼𑀚𑀸𑀢𑁄 𑀲𑀻𑀮𑀲𑀫𑁆𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁂 ‘‘𑀅𑀳𑁄 𑀲𑀼𑀝𑁆𑀞𑀼 𑀯𑀤𑀲𑀺, 𑀲𑀼𑀪𑀸𑀲𑀺𑀢𑀁 𑀢𑀬𑀸, 𑀏𑀯𑀫𑁂𑀢𑀁, 𑀏𑀲 𑀧𑀼𑀭𑀺𑀲𑁄 𑀭𑀽𑀧𑀯𑀸 𑀧𑀸𑀲𑀸𑀤𑀺𑀓𑁄 𑀲𑀼𑀚𑀸𑀢𑁄 𑀲𑀻𑀮𑀲𑀫𑁆𑀧𑀦𑁆𑀦𑁄’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀲𑀳𑀸𑀬𑀓𑀲𑁆𑀲 𑀧𑀭𑀁 𑀯𑀡𑁆𑀡𑀁 𑀪𑀡𑀫𑀸𑀦𑀁 𑀧𑀲𑀁𑀲𑀢𑀺.

𑁨𑁬𑁫. 𑀚𑀮𑀁 𑀅𑀕𑁆𑀕𑀻𑀯 𑀪𑀸𑀲𑀢𑀻𑀢𑀺 𑀭𑀢𑁆𑀢𑀺𑀁 𑀧𑀩𑁆𑀩𑀢𑀫𑀢𑁆𑀣𑀓𑁂 𑀚𑀮𑀫𑀸𑀦𑁄 𑀅𑀕𑁆𑀕𑀺 𑀯𑀺𑀬 𑀯𑀺𑀭𑁄𑀘𑀢𑀺.

𑀪𑁄𑀕𑁂 𑀲𑀁𑀳𑀭𑀫𑀸𑀦𑀲𑁆𑀲𑀸𑀢𑀺 𑀅𑀢𑁆𑀢𑀸𑀦𑀫𑁆𑀧𑀺 𑀧𑀭𑀫𑁆𑀧𑀺 𑀅𑀧𑀻𑀴𑁂𑀢𑁆𑀯𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀪𑁄𑀕𑁂 𑀲𑀫𑁆𑀧𑀺𑀡𑁆𑀟𑁂𑀦𑁆𑀢𑀲𑁆𑀲 𑀭𑀸𑀲𑀺𑀁 𑀓𑀭𑁄𑀦𑁆𑀢𑀲𑁆𑀲. 𑀪𑀫𑀭𑀲𑁆𑀲𑁂𑀯 𑀇𑀭𑀻𑀬𑀢𑁄𑀢𑀺 𑀬𑀣𑀸 𑀪𑀫𑀭𑁄 𑀧𑀼𑀧𑁆𑀨𑀸𑀦𑀁 𑀯𑀡𑁆𑀡𑀕𑀦𑁆𑀥𑀁 𑀅𑀧𑁄𑀣𑀬𑀁 𑀢𑀼𑀡𑁆𑀟𑁂𑀦𑀧𑀺 𑀧𑀓𑁆𑀔𑁂𑀳𑀺𑀧𑀺 𑀭𑀲𑀁 𑀆𑀳𑀭𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀓𑁆𑀓𑀧𑁆𑀧𑀫𑀸𑀡𑀁 𑀫𑀥𑀼𑀧𑀝𑀮𑀁 𑀓𑀭𑁄𑀢𑀺, 𑀏𑀯𑀁 𑀅𑀦𑀼𑀧𑀼𑀩𑁆𑀩𑁂𑀦 𑀫𑀳𑀦𑁆𑀢𑀁 𑀪𑁄𑀕𑀭𑀸𑀲𑀺𑀁 𑀓𑀭𑁄𑀦𑁆𑀢𑀲𑁆𑀲. 𑀪𑁄𑀕𑀸 𑀲𑀦𑁆𑀦𑀺𑀘𑀬𑀁 𑀬𑀦𑁆𑀢𑀻𑀢𑀺 𑀢𑀲𑁆𑀲 𑀪𑁄𑀕𑀸 𑀦𑀺𑀘𑀬𑀁 𑀕𑀘𑁆𑀙𑀦𑁆𑀢𑀺. 𑀓𑀣𑀁? 𑀅𑀦𑀼𑀧𑀼𑀩𑁆𑀩𑁂𑀦 𑀉𑀧𑀘𑀺𑀓𑀸𑀳𑀺 𑀲𑀁𑀯𑀟𑁆𑀠𑀺𑀬𑀫𑀸𑀦𑁄 𑀯𑀫𑁆𑀫𑀺𑀓𑁄 𑀯𑀺𑀬. 𑀢𑁂𑀦𑀸𑀳 ‘‘𑀯𑀫𑁆𑀫𑀺𑀓𑁄𑀯𑀼𑀧𑀘𑀻𑀬𑀢𑀻’’𑀢𑀺. 𑀬𑀣𑀸 𑀯𑀫𑁆𑀫𑀺𑀓𑁄 𑀉𑀧𑀘𑀺𑀬𑀢𑀺, 𑀏𑀯𑀁 𑀦𑀺𑀘𑀬𑀁 𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀲𑀫𑀸𑀳𑀢𑁆𑀯𑀸𑀢𑀺 𑀲𑀫𑀸𑀳𑀭𑀺𑀢𑁆𑀯𑀸. 𑀅𑀮𑀫𑀢𑁆𑀣𑁄𑀢𑀺 𑀬𑀼𑀢𑁆𑀢𑀲𑀪𑀸𑀯𑁄 𑀲𑀫𑀢𑁆𑀣𑁄 𑀯𑀸 𑀧𑀭𑀺𑀬𑀢𑁆𑀢𑀭𑀽𑀧𑁄 𑀖𑀭𑀸𑀯𑀸𑀲𑀁 𑀲𑀡𑁆𑀞𑀸𑀧𑁂𑀢𑀼𑀁.

𑀇𑀤𑀸𑀦𑀺 𑀬𑀣𑀸 𑀯𑀸 𑀖𑀭𑀸𑀯𑀸𑀲𑁄 𑀲𑀡𑁆𑀞𑀧𑁂𑀢𑀩𑁆𑀩𑁄, 𑀢𑀣𑀸 𑀑𑀯𑀤𑀦𑁆𑀢𑁄 𑀘𑀢𑀼𑀥𑀸 𑀯𑀺𑀪𑀚𑁂 𑀪𑁄𑀕𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲 𑀯𑁂 𑀫𑀺𑀢𑁆𑀢𑀸𑀦𑀺 𑀕𑀦𑁆𑀣𑀢𑀻𑀢𑀺 𑀲𑁄 𑀏𑀯𑀁 𑀯𑀺𑀪𑀚𑀦𑁆𑀢𑁄 𑀫𑀺𑀢𑁆𑀢𑀸𑀦𑀺 𑀕𑀦𑁆𑀣𑀢𑀺 𑀦𑀸𑀫 𑀅𑀪𑁂𑀚𑁆𑀚𑀫𑀸𑀦𑀸𑀦𑀺 𑀞𑀧𑁂𑀢𑀺. 𑀬𑀲𑁆𑀲 𑀳𑀺 𑀪𑁄𑀕𑀸 𑀲𑀦𑁆𑀢𑀺, 𑀲𑁄 𑀏𑀯 𑀫𑀺𑀢𑁆𑀢𑁂 𑀞𑀧𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀇𑀢𑀭𑁄.

𑀏𑀓𑁂𑀦 ¶ 𑀪𑁄𑀕𑁂 𑀪𑀼𑀜𑁆𑀚𑁂𑀬𑁆𑀬𑀸𑀢𑀺 𑀏𑀓𑁂𑀦 𑀓𑁄𑀝𑁆𑀞𑀸𑀲𑁂𑀦 𑀪𑁄𑀕𑁂 𑀪𑀼𑀜𑁆𑀚𑁂𑀬𑁆𑀬. 𑀤𑁆𑀯𑀻𑀳𑀺 𑀓𑀫𑁆𑀫𑀁 𑀧𑀬𑁄𑀚𑀬𑁂𑀢𑀺 𑀤𑁆𑀯𑀻𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀁 𑀧𑀬𑁄𑀚𑁂𑀬𑁆𑀬. 𑀘𑀢𑀼𑀢𑁆𑀣𑀜𑁆𑀘 𑀦𑀺𑀥𑀸𑀧𑁂𑀬𑁆𑀬𑀸𑀢𑀺 𑀘𑀢𑀼𑀢𑁆𑀣𑀁 𑀓𑁄𑀝𑁆𑀞𑀸𑀲𑀁 𑀦𑀺𑀥𑀸𑀧𑁂𑀢𑁆𑀯𑀸 𑀞𑀧𑁂𑀬𑁆𑀬. 𑀆𑀧𑀤𑀸𑀲𑀼 𑀪𑀯𑀺𑀲𑁆𑀲𑀢𑀻𑀢𑀺 𑀓𑀼𑀮𑀸𑀦𑀜𑁆𑀳𑀺 𑀦 𑀲𑀩𑁆𑀩𑀓𑀸𑀮𑀁 𑀏𑀓𑀲𑀤𑀺𑀲𑀁 𑀯𑀢𑁆𑀢𑀢𑀺, 𑀓𑀤𑀸𑀘𑀺 𑀭𑀸𑀚𑀸𑀤𑀺𑀯𑀲𑁂𑀦 𑀆𑀧𑀤𑀸𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 ¶ 𑀏𑀯𑀁 𑀆𑀧𑀤𑀸𑀲𑀼 𑀉𑀧𑁆𑀧𑀦𑁆𑀦𑀸𑀲𑀼 𑀪𑀯𑀺𑀲𑁆𑀲𑀢𑀻𑀢𑀺 ‘‘𑀏𑀓𑀁 𑀓𑁄𑀝𑁆𑀞𑀸𑀲𑀁 𑀦𑀺𑀥𑀸𑀧𑁂𑀬𑁆𑀬𑀸’’𑀢𑀺 𑀆𑀳 ¶ . 𑀇𑀫𑁂𑀲𑀼 𑀧𑀦 𑀘𑀢𑀽𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀓𑀢𑀭𑀓𑁄𑀝𑁆𑀞𑀸𑀲𑀁 𑀕𑀳𑁂𑀢𑁆𑀯𑀸 𑀓𑀼𑀲𑀮𑀁 𑀓𑀸𑀢𑀩𑁆𑀩𑀦𑁆𑀢𑀺? ‘‘𑀪𑁄𑀕𑁂 𑀪𑀼𑀜𑁆𑀚𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀓𑁄𑀝𑁆𑀞𑀸𑀲𑀁. 𑀢𑀢𑁄 𑀕𑀡𑁆𑀳𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀫𑁆𑀧𑀺 𑀓𑀧𑀡𑀤𑁆𑀥𑀺𑀓𑀸𑀤𑀻𑀦𑀫𑁆𑀧𑀺 𑀤𑀸𑀢𑀩𑁆𑀩𑀁, 𑀧𑁂𑀲𑀓𑀸𑀭𑀦𑁆𑀳𑀸𑀧𑀺𑀢𑀸𑀤𑀻𑀦𑀫𑁆𑀧𑀺 𑀯𑁂𑀢𑀦𑀁 𑀤𑀸𑀢𑀩𑁆𑀩𑀁.

𑀙𑀤𑁆𑀤𑀺𑀲𑀸𑀧𑀝𑀺𑀘𑁆𑀙𑀸𑀤𑀦𑀓𑀡𑁆𑀟𑀯𑀡𑁆𑀡𑀦𑀸

𑁨𑁬𑁬. 𑀇𑀢𑀺 𑀪𑀕𑀯𑀸 𑀏𑀢𑁆𑀢𑀓𑁂𑀦 𑀓𑀣𑀸𑀫𑀕𑁆𑀕𑁂𑀦 𑀏𑀯𑀁 𑀕𑀳𑀧𑀢𑀺𑀧𑀼𑀢𑁆𑀢𑀲𑁆𑀲 𑀅𑀭𑀺𑀬𑀲𑀸𑀯𑀓𑁄 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀅𑀓𑀼𑀲𑀮𑀁 𑀧𑀳𑀸𑀬 𑀙𑀳𑀺 𑀓𑀸𑀭𑀡𑁂𑀳𑀺 𑀪𑁄𑀕𑀸𑀦𑀁 𑀅𑀧𑀸𑀬𑀫𑀼𑀔𑀁 𑀯𑀚𑁆𑀚𑁂𑀢𑁆𑀯𑀸 𑀲𑁄𑀴𑀲 𑀫𑀺𑀢𑁆𑀢𑀸𑀦𑀺 𑀲𑁂𑀯𑀦𑁆𑀢𑁄 𑀖𑀭𑀸𑀯𑀸𑀲𑀁 𑀲𑀡𑁆𑀞𑀧𑁂𑀢𑁆𑀯𑀸 𑀤𑀸𑀭𑀪𑀭𑀡𑀁 𑀓𑀭𑁄𑀦𑁆𑀢𑁄 𑀥𑀫𑁆𑀫𑀺𑀓𑁂𑀦 𑀆𑀚𑀻𑀯𑁂𑀦 𑀚𑀻𑀯𑀢𑀺, 𑀤𑁂𑀯𑀫𑀦𑀼𑀲𑁆𑀲𑀸𑀦𑀜𑁆𑀘 𑀅𑀦𑁆𑀢𑀭𑁂 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀯𑀺𑀬 𑀯𑀺𑀭𑁄𑀘𑀢𑀻𑀢𑀺 𑀯𑀚𑁆𑀚𑀦𑀻𑀬𑀥𑀫𑁆𑀫𑀯𑀚𑁆𑀚𑀦𑀢𑁆𑀣𑀁 𑀲𑁂𑀯𑀺𑀢𑀩𑁆𑀩𑀥𑀫𑁆𑀫𑀲𑁂𑀯𑀦𑀢𑁆𑀣𑀜𑁆𑀘 𑀑𑀯𑀸𑀤𑀁 𑀤𑀢𑁆𑀯𑀸 𑀇𑀤𑀸𑀦𑀺 𑀦𑀫𑀲𑁆𑀲𑀺𑀢𑀩𑁆𑀩𑀸 𑀙 𑀤𑀺𑀲𑀸 𑀤𑀲𑁆𑀲𑁂𑀦𑁆𑀢𑁄 𑀓𑀣𑀜𑁆𑀘 𑀕𑀳𑀧𑀢𑀺𑀧𑀼𑀢𑁆𑀢𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀙𑀤𑁆𑀤𑀺𑀲𑀸𑀧𑀝𑀺𑀘𑁆𑀙𑀸𑀤𑀻𑀢𑀺 𑀬𑀣𑀸 𑀙𑀳𑀺 𑀤𑀺𑀲𑀸𑀳𑀺 𑀆𑀕𑀫𑀦𑀪𑀬𑀁 𑀦 𑀆𑀕𑀘𑁆𑀙𑀢𑀺, 𑀔𑁂𑀫𑀁 𑀳𑁄𑀢𑀺 𑀦𑀺𑀩𑁆𑀪𑀬𑀁 𑀏𑀯𑀁 𑀯𑀺𑀳𑀭𑀦𑁆𑀢𑁄 ‘‘𑀙𑀤𑁆𑀤𑀺𑀲𑀸𑀧𑀝𑀺𑀘𑁆𑀙𑀸𑀤𑀻’’𑀢𑀺 𑀯𑀼𑀘𑁆𑀘𑀢𑀺. ‘‘𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀫𑀸𑀢𑀸𑀧𑀺𑀢𑀭𑁄 𑀯𑁂𑀤𑀺𑀢𑀩𑁆𑀩𑀸’’𑀢𑀺𑀆𑀤𑀻𑀲𑀼 𑀫𑀸𑀢𑀸𑀧𑀺𑀢𑀭𑁄 𑀧𑀼𑀩𑁆𑀩𑀼𑀧𑀓𑀸𑀭𑀺𑀢𑀸𑀬 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀆𑀘𑀭𑀺𑀬𑀸 𑀤𑀓𑁆𑀔𑀺𑀡𑁂𑀬𑁆𑀬𑀢𑀸𑀬 𑀤𑀓𑁆𑀔𑀺𑀡𑀸 𑀤𑀺𑀲𑀸𑀢𑀺. 𑀧𑀼𑀢𑁆𑀢𑀤𑀸𑀭𑀸 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀦𑀯𑀲𑁂𑀦 𑀧𑀘𑁆𑀙𑀺𑀫𑀸 𑀤𑀺𑀲𑀸𑀢𑀺. 𑀫𑀺𑀢𑁆𑀢𑀸𑀫𑀘𑁆𑀘𑀸 𑀬𑀲𑁆𑀫𑀸 𑀲𑁄 𑀫𑀺𑀢𑁆𑀢𑀸𑀫𑀘𑁆𑀘𑁂 𑀦𑀺𑀲𑁆𑀲𑀸𑀬 𑀢𑁂 𑀢𑁂 𑀤𑀼𑀓𑁆𑀔𑀯𑀺𑀲𑁂𑀲𑁂 𑀉𑀢𑁆𑀢𑀭𑀢𑀺, 𑀢𑀲𑁆𑀫𑀸 𑀉𑀢𑁆𑀢𑀭𑀸 𑀤𑀺𑀲𑀸𑀢𑀺. 𑀤𑀸𑀲𑀓𑀫𑁆𑀫𑀓𑀭𑀸 𑀧𑀸𑀤𑀫𑀽𑀮𑁂 𑀧𑀢𑀺𑀝𑁆𑀞𑀸𑀦𑀯𑀲𑁂𑀦 𑀳𑁂𑀝𑁆𑀞𑀺𑀫𑀸 𑀤𑀺𑀲𑀸𑀢𑀺. 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀕𑀼𑀡𑁂𑀳𑀺 𑀉𑀧𑀭𑀺 𑀞𑀺𑀢𑀪𑀸𑀯𑁂𑀦 𑀉𑀧𑀭𑀺𑀫𑀸 𑀤𑀺𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁨𑁬𑁭. 𑀪𑀢𑁄 𑀦𑁂 𑀪𑀭𑀺𑀲𑁆𑀲𑀸𑀫𑀻𑀢𑀺 𑀅𑀳𑀁 𑀫𑀸𑀢𑀸𑀧𑀺𑀢𑀽𑀳𑀺 𑀣𑀜𑁆𑀜𑀁 𑀧𑀸𑀬𑁂𑀢𑁆𑀯𑀸 𑀳𑀢𑁆𑀣𑀧𑀸𑀤𑁂 𑀯𑀟𑁆𑀠𑁂𑀢𑁆𑀯𑀸 𑀫𑀼𑀔𑁂𑀦 𑀲𑀺𑀗𑁆𑀖𑀸𑀡𑀺𑀓𑀁 𑀅𑀧𑀦𑁂𑀢𑁆𑀯𑀸 𑀦𑀳𑀸𑀧𑁂𑀢𑁆𑀯𑀸 𑀫𑀡𑁆𑀟𑁂𑀢𑁆𑀯𑀸 𑀪𑀢𑁄 𑀪𑀭𑀺𑀢𑁄 𑀚𑀕𑁆𑀕𑀺𑀢𑁄, 𑀲𑁆𑀯𑀸𑀳𑀁 𑀅𑀚𑁆𑀚 𑀢𑁂 𑀫𑀳𑀮𑁆𑀮𑀓𑁂 𑀧𑀸𑀤𑀥𑁄𑀯𑀦𑀦𑁆𑀳𑀸𑀧𑀦𑀬𑀸𑀕𑀼𑀪𑀢𑁆𑀢𑀤𑀸𑀦𑀸𑀤𑀻𑀳𑀺 𑀪𑀭𑀺𑀲𑁆𑀲𑀸𑀫𑀺.

𑀓𑀺𑀘𑁆𑀘𑀁 𑀦𑁂𑀲𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀞𑀧𑁂𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀭𑀸𑀚𑀓𑀼𑀮𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑀁 𑀓𑀺𑀘𑁆𑀘𑀁 ¶ 𑀕𑀦𑁆𑀢𑁆𑀯𑀸 𑀓𑀭𑀺𑀲𑁆𑀲𑀸𑀫𑀺. 𑀓𑀼𑀮𑀯𑀁𑀲𑀁 𑀲𑀡𑁆𑀞𑀧𑁂𑀲𑁆𑀲𑀸𑀫𑀻𑀢𑀺 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀓𑀁 𑀔𑁂𑀢𑁆𑀢𑀯𑀢𑁆𑀣𑀼𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀁 𑀅𑀯𑀺𑀦𑀸𑀲𑁂𑀢𑁆𑀯𑀸 𑀭𑀓𑁆𑀔𑀦𑁆𑀢𑁄𑀧𑀺 ¶ 𑀓𑀼𑀮𑀯𑀁𑀲𑀁 𑀲𑀡𑁆𑀞𑀧𑁂𑀢𑀺 𑀦𑀸𑀫. 𑀫𑀸𑀢𑀸𑀧𑀺𑀢𑀭𑁄 𑀅𑀥𑀫𑁆𑀫𑀺𑀓𑀯𑀁𑀲𑀢𑁄 𑀳𑀸𑀭𑁂𑀢𑁆𑀯𑀸 ¶ 𑀥𑀫𑁆𑀫𑀺𑀓𑀯𑀁𑀲𑁂 𑀞𑀧𑁂𑀦𑁆𑀢𑁄𑀧𑀺, 𑀓𑀼𑀮𑀯𑀁𑀲𑁂𑀦 𑀆𑀕𑀢𑀸𑀦𑀺 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀅𑀦𑀼𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑁂𑀦𑁆𑀢𑁄𑀧𑀺 𑀓𑀼𑀮𑀯𑀁𑀲𑀁 𑀲𑀡𑁆𑀞𑀧𑁂𑀢𑀺 𑀦𑀸𑀫. 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀓𑀼𑀮𑀯𑀁𑀲𑀁 𑀲𑀡𑁆𑀞𑀧𑁂𑀲𑁆𑀲𑀸𑀫𑀻’’𑀢𑀺.

𑀤𑀸𑀬𑀚𑁆𑀚𑀁 𑀧𑀝𑀺𑀧𑀚𑁆𑀚𑀸𑀫𑀻𑀢𑀺 𑀫𑀸𑀢𑀸𑀧𑀺𑀢𑀭𑁄 𑀅𑀢𑁆𑀢𑀦𑁄 𑀑𑀯𑀸𑀤𑁂 𑀅𑀯𑀢𑁆𑀢𑀫𑀸𑀦𑁂 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑁂 𑀤𑀸𑀭𑀓𑁂 𑀯𑀺𑀦𑀺𑀘𑁆𑀙𑀬𑀁 𑀧𑀢𑁆𑀯𑀸 𑀅𑀧𑀼𑀢𑁆𑀢𑁂 𑀓𑀭𑁄𑀦𑁆𑀢𑀺, 𑀢𑁂 𑀤𑀸𑀬𑀚𑁆𑀚𑀸𑀭𑀳𑀸 𑀦 𑀳𑁄𑀦𑁆𑀢𑀺. 𑀑𑀯𑀸𑀤𑁂 𑀯𑀢𑁆𑀢𑀫𑀸𑀦𑁂 𑀧𑀦 𑀓𑀼𑀮𑀲𑀦𑁆𑀢𑀓𑀲𑁆𑀲 𑀲𑀸𑀫𑀺𑀓𑁂 𑀓𑀭𑁄𑀦𑁆𑀢𑀺, 𑀅𑀳𑀁 𑀏𑀯𑀁 𑀯𑀢𑁆𑀢𑀺𑀲𑁆𑀲𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀤𑀸𑀬𑀚𑁆𑀚𑀁 𑀧𑀝𑀺𑀧𑀚𑁆𑀚𑀸𑀫𑀻’’𑀢𑀺 𑀯𑀼𑀢𑁆𑀢𑀁.

𑀤𑀓𑁆𑀔𑀺𑀡𑀁 𑀅𑀦𑀼𑀧𑁆𑀧𑀤𑀲𑁆𑀲𑀸𑀫𑀻𑀢𑀺 𑀢𑁂𑀲𑀁 𑀧𑀢𑁆𑀢𑀺𑀤𑀸𑀦𑀁 𑀓𑀢𑁆𑀯𑀸 𑀢𑀢𑀺𑀬𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀤𑀸𑀦𑀁 𑀅𑀦𑀼𑀧𑁆𑀧𑀤𑀲𑁆𑀲𑀸𑀫𑀺. 𑀧𑀸𑀧𑀸 𑀦𑀺𑀯𑀸𑀭𑁂𑀦𑁆𑀢𑀻𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀁 𑀆𑀤𑀻𑀦𑀯𑀁 𑀯𑀢𑁆𑀯𑀸, ‘‘𑀢𑀸𑀢, 𑀫𑀸 𑀏𑀯𑀭𑀽𑀧𑀁 𑀓𑀭𑀻’’𑀢𑀺 𑀦𑀺𑀯𑀸𑀭𑁂𑀦𑁆𑀢𑀺, 𑀓𑀢𑀫𑁆𑀧𑀺 𑀕𑀭𑀳𑀦𑁆𑀢𑀺. 𑀓𑀮𑁆𑀬𑀸𑀡𑁂 𑀦𑀺𑀯𑁂𑀲𑁂𑀦𑁆𑀢𑀻𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀯𑀺𑀬 𑀮𑀜𑁆𑀚𑀁 𑀤𑀢𑁆𑀯𑀸𑀧𑀺 𑀲𑀻𑀮𑀲𑀫𑀸𑀤𑀸𑀦𑀸𑀤𑀻𑀲𑀼 𑀦𑀺𑀯𑁂𑀲𑁂𑀦𑁆𑀢𑀺. 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀑𑀯𑀸𑀤𑁂 𑀞𑀺𑀢𑀪𑀸𑀯𑀁 𑀜𑀢𑁆𑀯𑀸 𑀯𑀁𑀲𑀸𑀦𑀼𑀕𑀢𑀁 𑀫𑀼𑀤𑁆𑀤𑀸𑀕𑀡𑀦𑀸𑀤𑀺𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑀺. 𑀧𑀢𑀺𑀭𑀽𑀧𑁂𑀦𑀸𑀢𑀺 𑀓𑀼𑀮𑀲𑀻𑀮𑀭𑀽𑀧𑀸𑀤𑀻𑀳𑀺 𑀅𑀦𑀼𑀭𑀽𑀧𑁂𑀦.

𑀲𑀫𑀬𑁂 𑀤𑀸𑀬𑀚𑁆𑀚𑀁 𑀦𑀺𑀬𑁆𑀬𑀸𑀤𑁂𑀦𑁆𑀢𑀻𑀢𑀺 𑀲𑀫𑀬𑁂 𑀥𑀦𑀁 𑀤𑁂𑀦𑁆𑀢𑀺. 𑀢𑀢𑁆𑀣 𑀦𑀺𑀘𑁆𑀘𑀲𑀫𑀬𑁄 𑀓𑀸𑀮𑀲𑀫𑀬𑁄𑀢𑀺 𑀤𑁆𑀯𑁂 𑀲𑀫𑀬𑀸. 𑀦𑀺𑀘𑁆𑀘𑀲𑀫𑀬𑁂 𑀤𑁂𑀦𑁆𑀢𑀺 𑀦𑀸𑀫 ‘‘𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀇𑀫𑀁 𑀕𑀡𑁆𑀳𑀺𑀢𑀩𑁆𑀩𑀁 𑀕𑀡𑁆𑀳, 𑀅𑀬𑀁 𑀢𑁂 𑀧𑀭𑀺𑀩𑁆𑀩𑀬𑁄 𑀳𑁄𑀢𑀼, 𑀇𑀫𑀺𑀦𑀸 𑀓𑀼𑀲𑀮𑀁 𑀓𑀭𑁄𑀳𑀻’’𑀢𑀺 𑀤𑁂𑀦𑁆𑀢𑀺. 𑀓𑀸𑀮𑀲𑀫𑀬𑁂 𑀤𑁂𑀦𑁆𑀢𑀺 𑀦𑀸𑀫 𑀲𑀺𑀔𑀸𑀞𑀧𑀦𑀆𑀯𑀸𑀳𑀯𑀺𑀯𑀸𑀳𑀸𑀤𑀺𑀲𑀫𑀬𑁂 𑀤𑁂𑀦𑁆𑀢𑀺. 𑀅𑀧𑀺𑀘 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑀲𑁆𑀲 ‘‘𑀇𑀫𑀺𑀦𑀸 𑀓𑀼𑀲𑀮𑀁 𑀓𑀭𑁄𑀳𑀻’’𑀢𑀺 𑀤𑁂𑀦𑁆𑀢𑀸𑀧𑀺 𑀲𑀫𑀬𑁂 𑀤𑁂𑀦𑁆𑀢𑀺 𑀦𑀸𑀫. 𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀻𑀢𑀺 𑀬𑀁 𑀧𑀼𑀭𑀢𑁆𑀣𑀺𑀫𑀤𑀺𑀲𑀢𑁄 𑀪𑀬𑀁 𑀆𑀕𑀘𑁆𑀙𑁂𑀬𑁆𑀬, 𑀬𑀣𑀸 𑀢𑀁 𑀦𑀸𑀕𑀘𑁆𑀙𑀢𑀺, 𑀏𑀯𑀁 𑀧𑀺𑀳𑀺𑀢𑀸 𑀳𑁄𑀢𑀺. 𑀲𑀘𑁂 𑀳𑀺 𑀧𑀼𑀢𑁆𑀢𑀸 𑀯𑀺𑀧𑁆𑀧𑀝𑀺𑀧𑀦𑁆𑀦𑀸, 𑀅𑀲𑁆𑀲𑀼, 𑀫𑀸𑀢𑀸𑀧𑀺𑀢𑀭𑁄 𑀤𑀳𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀚𑀕𑁆𑀕𑀦𑀸𑀤𑀻𑀳𑀺 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀸, 𑀏𑀢𑁂 𑀤𑀸𑀭𑀓𑀸, 𑀫𑀸𑀢𑀸𑀧𑀺𑀢𑀽𑀦𑀁 𑀅𑀧𑁆𑀧𑀢𑀺𑀭𑀽𑀧𑀸𑀢𑀺 𑀏𑀢𑀁 𑀪𑀬𑀁 𑀆𑀕𑀘𑁆𑀙𑁂𑀬𑁆𑀬. 𑀧𑀼𑀢𑁆𑀢𑀸 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀸, 𑀫𑀸𑀢𑀸𑀧𑀺𑀢𑀭𑁄 𑀯𑀺𑀧𑁆𑀧𑀝𑀺𑀧𑀦𑁆𑀦𑀸, 𑀫𑀸𑀢𑀸𑀧𑀺𑀢𑀭𑁄 𑀧𑀼𑀢𑁆𑀢𑀸𑀦𑀁 𑀦𑀸𑀦𑀼𑀭𑀽𑀧𑀸𑀢𑀺 𑀏𑀢𑀁 𑀪𑀬𑀁 𑀆𑀕𑀘𑁆𑀙𑁂𑀬𑁆𑀬. 𑀉𑀪𑁄𑀲𑀼 𑀯𑀺𑀧𑁆𑀧𑀝𑀺𑀧𑀦𑁆𑀦𑁂𑀲𑀼 𑀤𑀼𑀯𑀺𑀥𑀫𑁆𑀧𑀺 𑀢𑀁 𑀪𑀬𑀁 𑀳𑁄𑀢𑀺. 𑀲𑀫𑁆𑀫𑀸 ¶ 𑀧𑀝𑀺𑀧𑀦𑁆𑀦𑁂𑀲𑀼 𑀲𑀩𑁆𑀩𑀁 𑀦 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀝𑀺𑀘𑁆𑀙𑀦𑁆𑀦𑀸 𑀳𑁄𑀢𑀺 𑀔𑁂𑀫𑀸 𑀅𑀧𑁆𑀧𑀝𑀺𑀪𑀬𑀸’’𑀢𑀺.

𑀏𑀯𑀜𑁆𑀘 ¶ 𑀧𑀦 𑀯𑀢𑁆𑀯𑀸 𑀪𑀕𑀯𑀸 𑀲𑀺𑀗𑁆𑀕𑀸𑀮𑀓𑀁 𑀏𑀢𑀤𑀯𑁄𑀘 𑁋 ‘‘𑀦 𑀔𑁄 𑀢𑁂, 𑀕𑀳𑀧𑀢𑀺𑀧𑀼𑀢𑁆𑀢, 𑀧𑀺𑀢𑀸 𑀮𑁄𑀓𑀲𑀫𑁆𑀫𑀢𑀁 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀦𑀫𑀲𑁆𑀲𑀸𑀧𑁂𑀢𑀺. 𑀫𑀸𑀢𑀸𑀧𑀺𑀢𑀭𑁄 𑀧𑀦 ¶ 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀲𑀤𑀺𑀲𑁂 𑀓𑀢𑁆𑀯𑀸 𑀦𑀫𑀲𑁆𑀲𑀸𑀧𑁂𑀢𑀺. 𑀅𑀬𑀜𑁆𑀳𑀺 𑀢𑁂 𑀧𑀺𑀢𑀭𑀸 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀅𑀓𑁆𑀔𑀸𑀢𑀸, 𑀦𑁄 𑀅𑀜𑁆𑀜𑀸’’𑀢𑀺.

𑁨𑁬𑁮. 𑀉𑀝𑁆𑀞𑀸𑀦𑁂𑀦𑀸𑀢𑀺 𑀆𑀲𑀦𑀸 𑀉𑀝𑁆𑀞𑀸𑀦𑁂𑀦. 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀳𑀺 𑀆𑀘𑀭𑀺𑀬𑀁 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀆𑀲𑀦𑀸 𑀯𑀼𑀝𑁆𑀞𑀸𑀬 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀳𑀢𑁆𑀣𑀢𑁄 𑀪𑀡𑁆𑀟𑀓𑀁 𑀕𑀳𑁂𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀩𑀻𑀚𑀦𑀧𑀸𑀤𑀥𑁄𑀯𑀦𑀧𑀸𑀤𑀫𑀓𑁆𑀔𑀦𑀸𑀦𑀺 𑀓𑀸𑀢𑀩𑁆𑀩𑀸𑀦𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀉𑀝𑁆𑀞𑀸𑀦𑁂𑀦𑀸’’𑀢𑀺. 𑀉𑀧𑀝𑁆𑀞𑀸𑀦𑁂𑀦𑀸𑀢𑀺 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀉𑀧𑀝𑁆𑀞𑀸𑀦𑀕𑀫𑀦𑁂𑀦. 𑀲𑀺𑀧𑁆𑀧𑀼𑀕𑁆𑀕𑀳𑀡𑀓𑀸𑀮𑁂 𑀧𑀦 𑀅𑀯𑀲𑁆𑀲𑀓𑀫𑁂𑀯 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺. 𑀲𑀼𑀲𑁆𑀲𑀽𑀲𑀸𑀬𑀸𑀢𑀺 𑀲𑀤𑁆𑀤𑀳𑀺𑀢𑁆𑀯𑀸 𑀲𑀯𑀦𑁂𑀦. 𑀅𑀲𑀤𑁆𑀤𑀳𑀺𑀢𑁆𑀯𑀸 𑀲𑀼𑀡𑀦𑁆𑀢𑁄 𑀳𑀺 𑀯𑀺𑀲𑁂𑀲𑀁 𑀦𑀸𑀥𑀺𑀕𑀘𑁆𑀙𑀢𑀺. 𑀧𑀸𑀭𑀺𑀘𑀭𑀺𑀬𑀸𑀬𑀸𑀢𑀺 𑀅𑀯𑀲𑁂𑀲𑀔𑀼𑀤𑁆𑀤𑀓𑀧𑀸𑀭𑀺𑀘𑀭𑀺𑀬𑀸𑀬. 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀳𑀺 𑀆𑀘𑀭𑀺𑀬𑀲𑁆𑀲 𑀧𑀸𑀢𑁄𑀯 𑀯𑀼𑀝𑁆𑀞𑀸𑀬 𑀫𑀼𑀔𑁄𑀤𑀓𑀤𑀦𑁆𑀢𑀓𑀝𑁆𑀞𑀁 𑀤𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀓𑀸𑀮𑁂𑀧𑀺 𑀧𑀸𑀦𑀻𑀬𑀁 𑀕𑀳𑁂𑀢𑁆𑀯𑀸 𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀤𑀻𑀦𑀺 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀓𑀺𑀮𑀺𑀝𑁆𑀞𑀯𑀢𑁆𑀣𑀸𑀤𑀻𑀦𑀺 𑀥𑁄𑀯𑀺𑀢𑀩𑁆𑀩𑀸𑀦𑀺, 𑀲𑀸𑀬𑀁 𑀦𑀳𑀸𑀦𑁄𑀤𑀓𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀩𑁆𑀩𑀁. 𑀅𑀨𑀸𑀲𑀼𑀓𑀸𑀮𑁂 𑀉𑀧𑀝𑁆𑀞𑀸𑀢𑀩𑁆𑀩𑀁. 𑀧𑀩𑁆𑀩𑀚𑀺𑀢𑁂𑀦𑀧𑀺 𑀲𑀩𑁆𑀩𑀁 𑀅𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀁 𑀓𑀸𑀢𑀩𑁆𑀩𑀁. 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀧𑀸𑀭𑀺𑀘𑀭𑀺𑀬𑀸𑀬𑀸’’𑀢𑀺. 𑀲𑀓𑁆𑀓𑀘𑁆𑀘𑀁 𑀲𑀺𑀧𑁆𑀧𑀧𑀝𑀺𑀕𑁆𑀕𑀳𑀡𑁂𑀦𑀸𑀢𑀺 𑀲𑀓𑁆𑀓𑀘𑁆𑀘𑀁 𑀧𑀝𑀺𑀕𑁆𑀕𑀳𑀡𑀁 𑀦𑀸𑀫 𑀣𑁄𑀓𑀁 𑀕𑀳𑁂𑀢𑁆𑀯𑀸 𑀩𑀳𑀼𑀯𑀸𑀭𑁂 𑀲𑀚𑁆𑀛𑀸𑀬𑀓𑀭𑀡𑀁, 𑀏𑀓𑀧𑀤𑀫𑁆𑀧𑀺 𑀯𑀺𑀲𑀼𑀤𑁆𑀥𑀫𑁂𑀯 𑀕𑀳𑁂𑀢𑀩𑁆𑀩𑀁.

𑀲𑀼𑀯𑀺𑀦𑀻𑀢𑀁 𑀯𑀺𑀦𑁂𑀦𑁆𑀢𑀻𑀢𑀺 ‘‘𑀏𑀯𑀁 𑀢𑁂 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀏𑀯𑀁 𑀞𑀸𑀢𑀩𑁆𑀩𑀁, 𑀏𑀯𑀁 𑀔𑀸𑀤𑀺𑀢𑀩𑁆𑀩𑀁, 𑀏𑀯𑀁 𑀪𑀼𑀜𑁆𑀚𑀺𑀢𑀩𑁆𑀩𑀁, 𑀧𑀸𑀧𑀫𑀺𑀢𑁆𑀢𑀸 𑀯𑀚𑁆𑀚𑁂𑀢𑀩𑁆𑀩𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀸 𑀲𑁂𑀯𑀺𑀢𑀩𑁆𑀩𑀸’’𑀢𑀺 𑀏𑀯𑀁 𑀆𑀘𑀸𑀭𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑀺 𑀯𑀺𑀦𑁂𑀦𑁆𑀢𑀺. 𑀲𑀼𑀕𑁆𑀕𑀳𑀺𑀢𑀁 𑀕𑀸𑀳𑀸𑀧𑁂𑀦𑁆𑀢𑀻𑀢𑀺 𑀬𑀣𑀸 𑀲𑀼𑀕𑁆𑀕𑀳𑀺𑀢𑀁 𑀕𑀡𑁆𑀳𑀸𑀢𑀺, 𑀏𑀯𑀁 𑀅𑀢𑁆𑀣𑀜𑁆𑀘 𑀩𑁆𑀬𑀜𑁆𑀚𑀦𑀜𑁆𑀘 𑀲𑁄𑀥𑁂𑀢𑁆𑀯𑀸 𑀧𑀬𑁄𑀕𑀁 𑀤𑀲𑁆𑀲𑁂𑀢𑁆𑀯𑀸 𑀕𑀡𑁆𑀳𑀸𑀧𑁂𑀦𑁆𑀢𑀺. 𑀫𑀺𑀢𑁆𑀢𑀸𑀫𑀘𑁆𑀘𑁂𑀲𑀼 𑀧𑀝𑀺𑀬𑀸𑀤𑁂𑀦𑁆𑀢𑀻𑀢𑀺 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀅𑀦𑁆𑀢𑁂𑀯𑀸𑀲𑀺𑀓𑁄 𑀩𑁆𑀬𑀢𑁆𑀢𑁄 𑀩𑀳𑀼𑀲𑁆𑀲𑀼𑀢𑁄 𑀫𑀬𑀸 𑀲𑀫𑀲𑀫𑁄, 𑀏𑀢𑀁 𑀲𑀮𑁆𑀮𑀓𑁆𑀔𑁂𑀬𑁆𑀬𑀸𑀣𑀸’’𑀢𑀺 𑀏𑀯𑀁 𑀕𑀼𑀡𑀁 𑀓𑀣𑁂𑀢𑁆𑀯𑀸 𑀫𑀺𑀢𑁆𑀢𑀸𑀫𑀘𑁆𑀘𑁂𑀲𑀼 𑀧𑀢𑀺𑀝𑁆𑀞𑀧𑁂𑀦𑁆𑀢𑀺.

𑀤𑀺𑀲𑀸𑀲𑀼 𑀧𑀭𑀺𑀢𑁆𑀢𑀸𑀡𑀁 𑀓𑀭𑁄𑀦𑁆𑀢𑀻𑀢𑀺 𑀲𑀺𑀧𑁆𑀧𑀲𑀺𑀓𑁆𑀔𑀸𑀧𑀦𑁂𑀦𑁂𑀯𑀲𑁆𑀲 𑀲𑀩𑁆𑀩𑀤𑀺𑀲𑀸𑀲𑀼 ¶ 𑀭𑀓𑁆𑀔𑀁 𑀓𑀭𑁄𑀦𑁆𑀢𑀺. 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀳𑀺 𑀬𑀁 𑀬𑀁 𑀤𑀺𑀲𑀁 𑀕𑀦𑁆𑀢𑁆𑀯𑀸 𑀲𑀺𑀧𑁆𑀧𑀁 𑀤𑀲𑁆𑀲𑁂𑀢𑀺, 𑀢𑀢𑁆𑀣 𑀢𑀢𑁆𑀣𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀆𑀘𑀭𑀺𑀬𑁂𑀦 𑀓𑀢𑁄 𑀦𑀸𑀫 𑀳𑁄𑀢𑀺, 𑀕𑀼𑀡𑀁 𑀓𑀣𑁂𑀦𑁆𑀢𑁄𑀧𑀺𑀲𑁆𑀲 𑀫𑀳𑀸𑀚𑀦𑁄 𑀆𑀘𑀭𑀺𑀬𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀯𑀲𑀺𑀢𑀅𑀦𑁆𑀢𑁂𑀯𑀸𑀲𑀺𑀓𑁄 ¶ 𑀯𑀢 𑀅𑀬𑀦𑁆𑀢𑀺 𑀧𑀞𑀫𑀁 𑀆𑀘𑀭𑀺𑀬𑀲𑁆𑀲𑁂𑀯 𑀕𑀼𑀡𑀁 𑀓𑀣𑁂𑀦𑁆𑀢𑀺, 𑀩𑁆𑀭𑀳𑁆𑀫𑀮𑁄𑀓𑀧𑁆𑀧𑀫𑀸𑀡𑁄𑀧𑀺𑀲𑁆𑀲 𑀮𑀸𑀪𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀆𑀘𑀭𑀺𑀬𑀲𑀦𑁆𑀢𑀓𑁄𑀯 𑀳𑁄𑀢𑀺. 𑀅𑀧𑀺𑀘 𑀬𑀁 𑀯𑀺𑀚𑁆𑀚𑀁 𑀧𑀭𑀺𑀚𑀧𑁆𑀧𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀁 𑀅𑀝𑀯𑀺𑀬𑀁 𑀘𑁄𑀭𑀸 𑀦 𑀧𑀲𑁆𑀲𑀦𑁆𑀢𑀺, 𑀅𑀫𑀦𑀼𑀲𑁆𑀲𑀸 𑀯𑀸 𑀤𑀻𑀖𑀚𑀸𑀢𑀺𑀆𑀤𑀬𑁄 𑀯𑀸 𑀦 𑀯𑀺𑀳𑁂𑀞𑁂𑀦𑁆𑀢𑀺, 𑀢𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑀸𑀧𑀺 𑀤𑀺𑀲𑀸𑀲𑀼 𑀧𑀭𑀺𑀢𑁆𑀢𑀸𑀡𑀁 𑀓𑀭𑁄𑀦𑁆𑀢𑀺. 𑀬𑀁 𑀯𑀸 𑀲𑁄 𑀤𑀺𑀲𑀁 𑀕𑀢𑁄 𑀳𑁄𑀢𑀺, 𑀢𑀢𑁄 ¶ 𑀓𑀗𑁆𑀔𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀫𑀦𑀼𑀲𑁆𑀲𑁂 ‘‘𑀏𑀢𑀺𑀲𑁆𑀲𑀁 𑀤𑀺𑀲𑀸𑀬𑀁 𑀅𑀫𑁆𑀳𑀸𑀓𑀁 𑀅𑀦𑁆𑀢𑁂𑀯𑀸𑀲𑀺𑀓𑁄 𑀯𑀲𑀢𑀺, 𑀢𑀲𑁆𑀲 𑀘 𑀫𑀬𑁆𑀳𑀜𑁆𑀘 𑀇𑀫𑀲𑁆𑀫𑀺𑀁 𑀲𑀺𑀧𑁆𑀧𑁂 𑀦𑀸𑀦𑀸𑀓𑀭𑀡𑀁 𑀦𑀢𑁆𑀣𑀺, 𑀕𑀘𑁆𑀙𑀣 𑀢𑀫𑁂𑀯 𑀧𑀼𑀘𑁆𑀙𑀣𑀸’’𑀢𑀺 𑀏𑀯𑀁 𑀅𑀦𑁆𑀢𑁂𑀯𑀸𑀲𑀺𑀓𑀁 𑀧𑀕𑁆𑀕𑀡𑁆𑀳𑀦𑁆𑀢𑀸𑀧𑀺 𑀢𑀲𑁆𑀲 𑀢𑀢𑁆𑀣 𑀮𑀸𑀪𑀲𑀓𑁆𑀓𑀸𑀭𑀼𑀧𑁆𑀧𑀢𑁆𑀢𑀺𑀬𑀸 𑀧𑀭𑀺𑀢𑁆𑀢𑀸𑀡𑀁 𑀓𑀭𑁄𑀦𑁆𑀢𑀺 𑀦𑀸𑀫, 𑀧𑀢𑀺𑀝𑁆𑀞𑀁 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑁨𑁬𑁯. 𑀢𑀢𑀺𑀬𑀤𑀺𑀲𑀸𑀯𑀸𑀭𑁂 𑀲𑀫𑁆𑀫𑀸𑀦𑀦𑀸𑀬𑀸𑀢𑀺 𑀤𑁂𑀯𑀫𑀸𑀢𑁂 𑀢𑀺𑀲𑁆𑀲𑀫𑀸𑀢𑁂𑀢𑀺 𑀏𑀯𑀁 𑀲𑀫𑁆𑀪𑀸𑀯𑀺𑀢𑀓𑀣𑀸𑀓𑀣𑀦𑁂𑀦. 𑀅𑀦𑀯𑀫𑀸𑀦𑀦𑀸𑀬𑀸𑀢𑀺 𑀬𑀣𑀸 𑀤𑀸𑀲𑀓𑀫𑁆𑀫𑀓𑀭𑀸𑀤𑀬𑁄 𑀧𑁄𑀣𑁂𑀢𑁆𑀯𑀸 𑀯𑀺𑀳𑁂𑀞𑁂𑀢𑁆𑀯𑀸 𑀓𑀣𑁂𑀦𑁆𑀢𑀺, 𑀏𑀯𑀁 𑀳𑀻𑀴𑁂𑀢𑁆𑀯𑀸 𑀯𑀺𑀫𑀸𑀦𑁂𑀢𑁆𑀯𑀸 𑀅𑀓𑀣𑀦𑁂𑀦. 𑀅𑀦𑀢𑀺𑀘𑀭𑀺𑀬𑀸𑀬𑀸𑀢𑀺 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀩𑀳𑀺 𑀅𑀜𑁆𑀜𑀸𑀬 𑀇𑀢𑁆𑀣𑀺𑀬𑀸 𑀲𑀤𑁆𑀥𑀺𑀁 𑀧𑀭𑀺𑀘𑀭𑀦𑁆𑀢𑁄 𑀢𑀁 𑀅𑀢𑀺𑀘𑀭𑀢𑀺 𑀦𑀸𑀫, 𑀢𑀣𑀸 𑀅𑀓𑀭𑀡𑁂𑀦. 𑀇𑀲𑁆𑀲𑀭𑀺𑀬𑀯𑁄𑀲𑁆𑀲𑀕𑁆𑀕𑁂𑀦𑀸𑀢𑀺 𑀇𑀢𑁆𑀣𑀺𑀬𑁄 𑀳𑀺 𑀫𑀳𑀸𑀮𑀢𑀸𑀲𑀤𑀺𑀲𑀫𑁆𑀧𑀺 𑀆𑀪𑀭𑀡𑀁 𑀮𑀪𑀺𑀢𑁆𑀯𑀸 𑀪𑀢𑁆𑀢𑀁 𑀯𑀺𑀘𑀸𑀭𑁂𑀢𑀼𑀁 𑀅𑀮𑀪𑀫𑀸𑀦𑀸 𑀓𑀼𑀚𑁆𑀛𑀦𑁆𑀢𑀺, 𑀓𑀝𑀘𑁆𑀙𑀼𑀁 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀢𑀯 𑀭𑀼𑀘𑀺𑀬𑀸 𑀓𑀭𑁄𑀳𑀻𑀢𑀺 𑀪𑀢𑁆𑀢𑀕𑁂𑀳𑁂 𑀯𑀺𑀲𑁆𑀲𑀝𑁆𑀞𑁂 𑀲𑀩𑁆𑀩𑀁 𑀇𑀲𑁆𑀲𑀭𑀺𑀬𑀁 𑀯𑀺𑀲𑁆𑀲𑀝𑁆𑀞𑀁 𑀦𑀸𑀫 𑀳𑁄𑀢𑀺, 𑀏𑀯𑀁 𑀓𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀮𑀗𑁆𑀓𑀸𑀭𑀸𑀦𑀼𑀧𑁆𑀧𑀤𑀸𑀦𑁂𑀦𑀸𑀢𑀺 𑀅𑀢𑁆𑀢𑀦𑁄 𑀯𑀺𑀪𑀯𑀸𑀦𑀼𑀭𑀽𑀧𑁂𑀦 𑀅𑀮𑀗𑁆𑀓𑀸𑀭𑀤𑀸𑀦𑁂𑀦. 𑀲𑀼𑀲𑀁𑀯𑀺𑀳𑀺𑀢𑀓𑀫𑁆𑀫𑀦𑁆𑀢𑀸𑀢𑀺 𑀬𑀸𑀕𑀼𑀪𑀢𑁆𑀢𑀧𑀘𑀦𑀓𑀸𑀮𑀸𑀤𑀻𑀦𑀺 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀲𑁆𑀲 𑀢𑀲𑁆𑀲 𑀲𑀸𑀥𑀼𑀓𑀁 𑀓𑀭𑀡𑁂𑀦 𑀲𑀼𑀝𑁆𑀞𑀼 𑀲𑀁𑀯𑀺𑀳𑀺𑀢𑀓𑀫𑁆𑀫𑀦𑁆𑀢𑀸. 𑀲𑀗𑁆𑀕𑀳𑀺𑀢𑀧𑀭𑀺𑀚𑀦𑀸𑀢𑀺 𑀲𑀫𑁆𑀫𑀸𑀦𑀦𑀸𑀤𑀻𑀳𑀺 𑀘𑁂𑀯 𑀧𑀳𑁂𑀡𑀓𑀧𑁂𑀲𑀦𑀸𑀤𑀻𑀳𑀺 𑀘 𑀲𑀗𑁆𑀕𑀳𑀺𑀢𑀧𑀭𑀺𑀚𑀦𑀸. 𑀇𑀥 𑀧𑀭𑀺𑀚𑀦𑁄 𑀦𑀸𑀫 𑀲𑀸𑀫𑀺𑀓𑀲𑁆𑀲 𑀘𑁂𑀯 𑀅𑀢𑁆𑀢𑀦𑁄 𑀘 𑀜𑀸𑀢𑀺𑀚𑀦𑁄. 𑀅𑀦𑀢𑀺𑀘𑀸𑀭𑀺𑀦𑀻𑀢𑀺 𑀲𑀸𑀫𑀺𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀫𑀦𑀲𑀸𑀧𑀺 𑀦 𑀧𑀢𑁆𑀣𑁂𑀢𑀺. 𑀲𑀫𑁆𑀪𑀢𑀦𑁆𑀢𑀺 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀻𑀦𑀺 𑀓𑀢𑁆𑀯𑀸 𑀆𑀪𑀢𑀥𑀦𑀁. 𑀤𑀓𑁆𑀔𑀸 ¶ 𑀘 𑀳𑁄𑀢𑀻𑀢𑀺 𑀬𑀸𑀕𑀼𑀪𑀢𑁆𑀢𑀲𑀫𑁆𑀧𑀸𑀤𑀦𑀸𑀤𑀻𑀲𑀼 𑀙𑁂𑀓𑀸 𑀦𑀺𑀧𑀼𑀡𑀸 𑀳𑁄𑀢𑀺. 𑀅𑀦𑀮𑀲𑀸𑀢𑀺 𑀦𑀺𑀓𑁆𑀓𑁄𑀲𑀚𑁆𑀚𑀸. 𑀬𑀣𑀸 𑀅𑀜𑁆𑀜𑀸 𑀓𑀼𑀲𑀻𑀢𑀸 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀸𑀯 𑀳𑁄𑀦𑁆𑀢𑀺 𑀞𑀺𑀢𑀝𑁆𑀞𑀸𑀦𑁂 𑀞𑀺𑀢𑀸𑀯, 𑀏𑀯𑀁 𑀅𑀳𑀼𑀢𑁆𑀯𑀸 𑀯𑀺𑀧𑁆𑀨𑀸𑀭𑀺𑀢𑁂𑀦 𑀘𑀺𑀢𑁆𑀢𑁂𑀦 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀦𑀺𑀧𑁆𑀨𑀸𑀤𑁂𑀢𑀺. 𑀲𑁂𑀲𑀫𑀺𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑁨𑁭𑁦. 𑀘𑀢𑀼𑀢𑁆𑀣𑀤𑀺𑀲𑀸𑀯𑀸𑀭𑁂 ¶ 𑀅𑀯𑀺𑀲𑀁𑀯𑀸𑀤𑀦𑀢𑀸𑀬𑀸𑀢𑀺 𑀬𑀲𑁆𑀲 𑀬𑀲𑁆𑀲 𑀦𑀸𑀫𑀁 𑀕𑀡𑁆𑀳𑀸𑀢𑀺, 𑀢𑀁 𑀢𑀁 𑀅𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀇𑀤𑀫𑁆𑀧𑀺 𑀅𑀫𑁆𑀳𑀸𑀓𑀁 𑀕𑁂𑀳𑁂 𑀅𑀢𑁆𑀣𑀺, 𑀇𑀤𑀫𑁆𑀧𑀺 𑀅𑀢𑁆𑀣𑀺, 𑀕𑀳𑁂𑀢𑁆𑀯𑀸 𑀕𑀘𑁆𑀙𑀸𑀳𑀻𑀢𑀺 𑀏𑀯𑀁 𑀅𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀤𑀸𑀦𑁂𑀦. 𑀅𑀧𑀭𑀧𑀚𑀸 𑀘𑀲𑁆𑀲 𑀧𑀝𑀺𑀧𑀽𑀚𑁂𑀦𑁆𑀢𑀻𑀢𑀺 𑀲𑀳𑀸𑀬𑀲𑁆𑀲 𑀧𑀼𑀢𑁆𑀢𑀥𑀻𑀢𑀭𑁄 𑀧𑀚𑀸 𑀦𑀸𑀫, 𑀢𑁂𑀲𑀁 𑀧𑀦 𑀧𑀼𑀢𑁆𑀢𑀥𑀻𑀢𑀭𑁄 𑀘 𑀦𑀢𑁆𑀢𑀼𑀧𑀦𑀢𑁆𑀢𑀓𑀸 𑀘 𑀅𑀧𑀭𑀧𑀚𑀸 𑀦𑀸𑀫. 𑀢𑁂 𑀧𑀝𑀺𑀧𑀽𑀚𑁂𑀦𑁆𑀢𑀺 𑀓𑁂𑀴𑀸𑀬𑀦𑁆𑀢𑀺 𑀫𑀫𑀸𑀬𑀦𑁆𑀢𑀺 𑀫𑀗𑁆𑀕𑀮𑀓𑀸𑀮𑀸𑀤𑀻𑀲𑀼 𑀢𑁂𑀲𑀁 𑀫𑀗𑁆𑀕𑀮𑀸𑀤𑀻𑀦𑀺 𑀓𑀭𑁄𑀦𑁆𑀢𑀺. 𑀲𑁂𑀲𑀫𑀺𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁨𑁭𑁧. 𑀬𑀣𑀸𑀩𑀮𑀁 𑀓𑀫𑁆𑀫𑀦𑁆𑀢𑀲𑀁𑀯𑀺𑀥𑀸𑀦𑁂𑀦𑀸𑀢𑀺 𑀤𑀳𑀭𑁂𑀳𑀺 𑀓𑀸𑀢𑀩𑁆𑀩𑀁 𑀫𑀳𑀮𑁆𑀮𑀓𑁂𑀳𑀺, 𑀫𑀳𑀮𑁆𑀮𑀓𑁂𑀳𑀺 𑀯𑀸 𑀓𑀸𑀢𑀩𑁆𑀩𑀁 𑀤𑀳𑀭𑁂𑀳𑀺, 𑀇𑀢𑁆𑀣𑀻𑀳𑀺 𑀓𑀸𑀢𑀩𑁆𑀩𑀁 𑀧𑀼𑀭𑀺𑀲𑁂𑀳𑀺, 𑀧𑀼𑀭𑀺𑀲𑁂𑀳𑀺 𑀯𑀸 𑀓𑀸𑀢𑀩𑁆𑀩𑀁 𑀇𑀢𑁆𑀣𑀻𑀳𑀺 𑀅𑀓𑀸𑀭𑁂𑀢𑁆𑀯𑀸 𑀢𑀲𑁆𑀲 𑀢𑀲𑁆𑀲 𑀩𑀮𑀸𑀦𑀼𑀭𑀽𑀧𑁂𑀦𑁂𑀯 𑀓𑀫𑁆𑀫𑀦𑁆𑀢𑀲𑀁𑀯𑀺𑀥𑀸𑀦𑁂𑀦. 𑀪𑀢𑁆𑀢𑀯𑁂𑀢𑀦𑀸𑀦𑀼𑀧𑁆𑀧𑀤𑀸𑀦𑁂𑀦𑀸𑀢𑀺 𑀅𑀬𑀁 𑀔𑀼𑀤𑁆𑀤𑀓𑀧𑀼𑀢𑁆𑀢𑁄, 𑀅𑀬𑀁 𑀏𑀓𑀯𑀺𑀳𑀸𑀭𑀻𑀢𑀺 ¶ 𑀢𑀲𑁆𑀲 𑀢𑀲𑁆𑀲 𑀅𑀦𑀼𑀭𑀽𑀧𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀪𑀢𑁆𑀢𑀤𑀸𑀦𑁂𑀦 𑀘𑁂𑀯 𑀧𑀭𑀺𑀩𑁆𑀩𑀬𑀤𑀸𑀦𑁂𑀦 𑀘. 𑀕𑀺𑀮𑀸𑀦𑀼𑀧𑀝𑁆𑀞𑀸𑀦𑁂𑀦𑀸𑀢𑀺 𑀅𑀨𑀸𑀲𑀼𑀓𑀓𑀸𑀮𑁂 𑀓𑀫𑁆𑀫𑀁 𑀅𑀓𑀸𑀭𑁂𑀢𑁆𑀯𑀸 𑀲𑀧𑁆𑀧𑀸𑀬𑀪𑁂𑀲𑀚𑁆𑀚𑀸𑀤𑀻𑀦𑀺 𑀤𑀢𑁆𑀯𑀸 𑀧𑀝𑀺𑀚𑀕𑁆𑀕𑀦𑁂𑀦. 𑀅𑀘𑁆𑀙𑀭𑀺𑀬𑀸𑀦𑀁 𑀭𑀲𑀸𑀦𑀁 𑀲𑀁𑀯𑀺𑀪𑀸𑀕𑁂𑀦𑀸𑀢𑀺 𑀅𑀘𑁆𑀙𑀭𑀺𑀬𑁂 𑀫𑀥𑀼𑀭𑀭𑀲𑁂 𑀮𑀪𑀺𑀢𑁆𑀯𑀸 𑀲𑀬𑀫𑁂𑀯 𑀅𑀔𑀸𑀤𑀺𑀢𑁆𑀯𑀸 𑀢𑁂𑀲𑀫𑁆𑀧𑀺 𑀢𑀢𑁄 𑀲𑀁𑀯𑀺𑀪𑀸𑀕𑀓𑀭𑀡𑁂𑀦. 𑀲𑀫𑀬𑁂 𑀯𑁄𑀲𑁆𑀲𑀕𑁆𑀕𑁂𑀦𑀸𑀢𑀺 𑀦𑀺𑀘𑁆𑀘𑀲𑀫𑀬𑁂 𑀘 𑀓𑀸𑀮𑀲𑀫𑀬𑁂 𑀘 𑀯𑁄𑀲𑁆𑀲𑀚𑁆𑀚𑀦𑁂𑀦. 𑀦𑀺𑀘𑁆𑀘𑀲𑀫𑀬𑁂 𑀯𑁄𑀲𑁆𑀲𑀚𑁆𑀚𑀦𑀁 𑀦𑀸𑀫 𑀲𑀓𑀮𑀤𑀺𑀯𑀲𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀓𑀺𑀮𑀫𑀦𑁆𑀢𑀺. 𑀢𑀲𑁆𑀫𑀸 𑀬𑀣𑀸 𑀦 𑀓𑀺𑀮𑀫𑀦𑁆𑀢𑀺, 𑀏𑀯𑀁 𑀯𑁂𑀮𑀁 𑀜𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁. 𑀓𑀸𑀮𑀲𑀫𑀬𑁂 𑀯𑁄𑀲𑁆𑀲𑀕𑁆𑀕𑁄 𑀦𑀸𑀫 𑀙𑀡𑀦𑀓𑁆𑀔𑀢𑁆𑀢𑀓𑀻𑀴𑀸𑀤𑀻𑀲𑀼 𑀅𑀮𑀗𑁆𑀓𑀸𑀭𑀪𑀡𑁆𑀟𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀤𑀻𑀦𑀺 𑀤𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀁. 𑀤𑀺𑀦𑁆𑀦𑀸𑀤𑀸𑀬𑀺𑀦𑁄𑀢𑀺 𑀘𑁄𑀭𑀺𑀓𑀸𑀬 𑀓𑀺𑀜𑁆𑀘𑀺 𑀅𑀕𑀳𑁂𑀢𑁆𑀯𑀸 𑀲𑀸𑀫𑀺𑀓𑁂𑀳𑀺 𑀤𑀺𑀦𑁆𑀦𑀲𑁆𑀲𑁂𑀯 𑀆𑀤𑀸𑀬𑀺𑀦𑁄. 𑀲𑀼𑀓𑀢𑀓𑀫𑁆𑀫𑀓𑀭𑀸𑀢𑀺 ‘‘𑀓𑀺𑀁 𑀏𑀢𑀲𑁆𑀲 𑀓𑀫𑁆𑀫𑁂𑀦 𑀓𑀢𑁂𑀦, 𑀦 𑀫𑀬𑀁 ¶ 𑀓𑀺𑀜𑁆𑀘𑀺 𑀮𑀪𑀸𑀫𑀸’’𑀢𑀺 𑀅𑀦𑀼𑀚𑁆𑀛𑀸𑀬𑀺𑀢𑁆𑀯𑀸 𑀢𑀼𑀝𑁆𑀞𑀳𑀤𑀬𑀸 𑀬𑀣𑀸 𑀢𑀁 𑀓𑀫𑁆𑀫𑀁 𑀲𑀼𑀓𑀢𑀁 𑀳𑁄𑀢𑀺, 𑀏𑀯𑀁 𑀓𑀸𑀭𑀓𑀸. 𑀓𑀺𑀢𑁆𑀢𑀺𑀯𑀡𑁆𑀡𑀳𑀭𑀸𑀢𑀺 𑀧𑀭𑀺𑀲𑀫𑀚𑁆𑀛𑁂 𑀓𑀣𑀸𑀬 𑀲𑀫𑁆𑀧𑀢𑁆𑀢𑀸𑀬 ‘‘𑀓𑁄 𑀅𑀫𑁆𑀳𑀸𑀓𑀁 𑀲𑀸𑀫𑀺𑀓𑁂𑀳𑀺 𑀲𑀤𑀺𑀲𑁄 𑀅𑀢𑁆𑀣𑀺, 𑀫𑀬𑀁 𑀅𑀢𑁆𑀢𑀦𑁄 𑀤𑀸𑀲𑀪𑀸𑀯𑀫𑁆𑀧𑀺 𑀦 𑀚𑀸𑀦𑀸𑀫, 𑀢𑁂𑀲𑀁 𑀲𑀸𑀫𑀺𑀓𑀪𑀸𑀯𑀫𑁆𑀧𑀺 𑀦 𑀚𑀸𑀦𑀸𑀫, 𑀏𑀯𑀁 𑀦𑁄 𑀅𑀦𑀼𑀓𑀫𑁆𑀧𑀦𑁆𑀢𑀻’’𑀢𑀺 𑀕𑀼𑀡𑀓𑀣𑀸𑀳𑀸𑀭𑀓𑀸. 𑀲𑁂𑀲𑀫𑀺𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑁨𑁭𑁨. 𑀫𑁂𑀢𑁆𑀢𑁂𑀦 𑀓𑀸𑀬𑀓𑀫𑁆𑀫𑁂𑀦𑀸𑀢𑀺𑀆𑀤𑀻𑀲𑀼 𑀫𑁂𑀢𑁆𑀢𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀓𑀢𑀸𑀦𑀺 𑀓𑀸𑀬𑀓𑀫𑁆𑀫𑀸𑀤𑀻𑀦𑀺 𑀫𑁂𑀢𑁆𑀢𑀸𑀦𑀺 𑀦𑀸𑀫 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑁂𑀲𑁆𑀲𑀸𑀫𑀻𑀢𑀺 𑀯𑀺𑀳𑀸𑀭𑀕𑀫𑀦𑀁 ¶ , 𑀥𑀫𑀓𑀭𑀡𑀁 𑀕𑀳𑁂𑀢𑁆𑀯𑀸 𑀉𑀤𑀓𑀧𑀭𑀺𑀲𑁆𑀲𑀸𑀯𑀦𑀁, 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀧𑀸𑀤𑀧𑀭𑀺𑀓𑀫𑁆𑀫𑀸𑀤𑀺𑀓𑀭𑀡𑀜𑁆𑀘 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀪𑀺𑀓𑁆𑀔𑀽 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁂 𑀤𑀺𑀲𑁆𑀯𑀸 ‘‘𑀲𑀓𑁆𑀓𑀘𑁆𑀘𑀁 𑀬𑀸𑀕𑀼𑀁 𑀤𑁂𑀣, 𑀪𑀢𑁆𑀢𑀁 𑀤𑁂𑀣𑀸’’𑀢𑀺𑀆𑀤𑀺𑀯𑀘𑀦𑀜𑁆𑀘𑁂𑀯, 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀥𑀫𑁆𑀫𑀲𑀯𑀦𑀜𑁆𑀘 𑀲𑀓𑁆𑀓𑀘𑁆𑀘𑀁 𑀧𑀝𑀺𑀲𑀦𑁆𑀣𑀸𑀭𑀓𑀭𑀡𑀸𑀤𑀻𑀦𑀺 𑀘 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫. ‘‘𑀅𑀫𑁆𑀳𑀸𑀓𑀁 𑀓𑀼𑀮𑀽𑀧𑀓𑀢𑁆𑀣𑁂𑀭𑀸 𑀅𑀯𑁂𑀭𑀸 𑀳𑁄𑀦𑁆𑀢𑀼 𑀅𑀩𑁆𑀬𑀸𑀧𑀚𑁆𑀚𑀸’’𑀢𑀺 𑀏𑀯𑀁 𑀘𑀺𑀦𑁆𑀢𑀦𑀁 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫. 𑀅𑀦𑀸𑀯𑀝𑀤𑁆𑀯𑀸𑀭𑀢𑀸𑀬𑀸𑀢𑀺 𑀅𑀧𑀺𑀳𑀺𑀢𑀤𑁆𑀯𑀸𑀭𑀢𑀸𑀬. 𑀢𑀢𑁆𑀣 𑀲𑀩𑁆𑀩𑀤𑁆𑀯𑀸𑀭𑀸𑀦𑀺 𑀯𑀺𑀯𑀭𑀺𑀢𑁆𑀯𑀸𑀧𑀺 𑀲𑀻𑀮𑀯𑀦𑁆𑀢𑀸𑀦𑀁 𑀅𑀤𑀸𑀬𑀓𑁄 𑀅𑀓𑀸𑀭𑀓𑁄 𑀧𑀺𑀳𑀺𑀢𑀤𑁆𑀯𑀸𑀭𑁄𑀬𑁂𑀯. 𑀲𑀩𑁆𑀩𑀤𑁆𑀯𑀸𑀭𑀸𑀦𑀺 𑀧𑀦 𑀧𑀺𑀤𑀳𑀺𑀢𑁆𑀯𑀸𑀧𑀺 𑀢𑁂𑀲𑀁 𑀤𑀸𑀬𑀓𑁄 𑀓𑀸𑀭𑀓𑁄 𑀯𑀺𑀯𑀝𑀤𑁆𑀯𑀸𑀭𑁄𑀬𑁂𑀯. 𑀇𑀢𑀺 𑀲𑀻𑀮𑀯𑀦𑁆𑀢𑁂𑀲𑀼 𑀕𑁂𑀳𑀤𑁆𑀯𑀸𑀭𑀁 𑀆𑀕𑀢𑁂𑀲𑀼 𑀲𑀦𑁆𑀢𑀁𑀬𑁂𑀯 𑀦𑀢𑁆𑀣𑀻𑀢𑀺 𑀅𑀯𑀢𑁆𑀯𑀸 𑀤𑀸𑀢𑀩𑁆𑀩𑀁. 𑀏𑀯𑀁 𑀅𑀦𑀸𑀯𑀝𑀤𑁆𑀯𑀸𑀭𑀢𑀸 𑀦𑀸𑀫 𑀳𑁄𑀢𑀺.

𑀆𑀫𑀺𑀲𑀸𑀦𑀼𑀧𑁆𑀧𑀤𑀸𑀦𑁂𑀦𑀸𑀢𑀺 𑀧𑀼𑀭𑁂𑀪𑀢𑁆𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀓𑀁 𑀆𑀫𑀺𑀲𑀁 𑀦𑀸𑀫, 𑀢𑀲𑁆𑀫𑀸 𑀲𑀻𑀮𑀯𑀦𑁆𑀢𑀸𑀦𑀁 𑀬𑀸𑀕𑀼𑀪𑀢𑁆𑀢𑀲𑀫𑁆𑀧𑀤𑀸𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀓𑀮𑁆𑀬𑀸𑀡𑁂𑀦 𑀫𑀦𑀲𑀸 𑀅𑀦𑀼𑀓𑀫𑁆𑀧𑀦𑁆𑀢𑀻𑀢𑀺 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀲𑀼𑀔𑀺𑀢𑀸 𑀳𑁄𑀦𑁆𑀢𑀼 𑀅𑀯𑁂𑀭𑀸 𑀅𑀭𑁄𑀕𑀸 𑀅𑀩𑁆𑀬𑀸𑀧𑀚𑁆𑀚𑀸’’𑀢𑀺 𑀏𑀯𑀁 𑀳𑀺𑀢𑀨𑀭𑀡𑁂𑀦. 𑀅𑀧𑀺𑀘 𑀉𑀧𑀝𑁆𑀞𑀸𑀓𑀸𑀦𑀁 𑀕𑁂𑀳𑀁 𑀅𑀜𑁆𑀜𑁂 𑀲𑀻𑀮𑀯𑀦𑁆𑀢𑁂 𑀲𑀩𑁆𑀭𑀳𑁆𑀫𑀘𑀸𑀭𑀻 𑀕𑀳𑁂𑀢𑁆𑀯𑀸 𑀧𑀯𑀺𑀲𑀦𑁆𑀢𑀸𑀧𑀺 𑀓𑀮𑁆𑀬𑀸𑀡𑁂𑀦 𑀘𑁂𑀢𑀲𑀸 𑀅𑀦𑀼𑀓𑀫𑁆𑀧𑀦𑁆𑀢𑀺 𑀦𑀸𑀫. 𑀲𑀼𑀢𑀁 𑀧𑀭𑀺𑀬𑁄𑀤𑀸𑀧𑁂𑀦𑁆𑀢𑀻𑀢𑀺 𑀬𑀁 𑀢𑁂𑀲𑀁 𑀧𑀓𑀢𑀺𑀬𑀸 𑀲𑀼𑀢𑀁 𑀅𑀢𑁆𑀣𑀺, 𑀢𑀲𑁆𑀲 𑀅𑀢𑁆𑀣𑀁 𑀓𑀣𑁂𑀢𑁆𑀯𑀸 𑀓𑀗𑁆𑀔𑀁 𑀯𑀺𑀦𑁄𑀤𑁂𑀦𑁆𑀢𑀺, 𑀢𑀣𑀢𑁆𑀢𑀸𑀬 𑀯𑀸 𑀧𑀝𑀺𑀧𑀚𑁆𑀚𑀸𑀧𑁂𑀦𑁆𑀢𑀺. 𑀲𑁂𑀲𑀫𑀺𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑁨𑁭𑁩. 𑀅𑀮𑀫𑀢𑁆𑀢𑁄𑀢𑀺 ¶ 𑀧𑀼𑀢𑁆𑀢𑀤𑀸𑀭𑀪𑀭𑀡𑀁 𑀓𑀢𑁆𑀯𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀦𑀲𑀫𑀢𑁆𑀣𑁄. 𑀧𑀡𑁆𑀟𑀺𑀢𑁄𑀢𑀺 𑀤𑀺𑀲𑀸𑀦𑀫𑀲𑁆𑀲𑀦𑀝𑁆𑀞𑀸𑀦𑁂 𑀧𑀡𑁆𑀟𑀺𑀢𑁄 𑀳𑀼𑀢𑁆𑀯𑀸. 𑀲𑀡𑁆𑀳𑁄𑀢𑀺 ¶ 𑀲𑀼𑀔𑀼𑀫𑀢𑁆𑀣𑀤𑀲𑁆𑀲𑀦𑁂𑀦 𑀲𑀡𑁆𑀳𑀯𑀸𑀘𑀸𑀪𑀡𑀦𑁂𑀦 𑀯𑀸 𑀲𑀡𑁆𑀳𑁄 𑀳𑀼𑀢𑁆𑀯𑀸. 𑀧𑀝𑀺𑀪𑀸𑀦𑀯𑀸𑀢𑀺 𑀤𑀺𑀲𑀸𑀦𑀫𑀲𑁆𑀲𑀦𑀝𑁆𑀞𑀸𑀦𑁂 𑀧𑀝𑀺𑀪𑀸𑀦𑀯𑀸 𑀳𑀼𑀢𑁆𑀯𑀸 𑀦𑀺𑀯𑀸𑀢𑀯𑀼𑀢𑁆𑀢𑀻𑀢𑀺 𑀦𑀻𑀘𑀯𑀼𑀢𑁆𑀢𑀺. 𑀅𑀢𑁆𑀣𑀤𑁆𑀥𑁄𑀢𑀺 𑀣𑀫𑁆𑀪𑀭𑀳𑀺𑀢𑁄. 𑀉𑀝𑁆𑀞𑀸𑀦𑀓𑁄𑀢𑀺 𑀉𑀝𑁆𑀞𑀸𑀦𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑁄. 𑀅𑀦𑀮𑀲𑁄𑀢𑀺 𑀦𑀺𑀓𑁆𑀓𑁄𑀲𑀚𑁆𑀚𑁄. 𑀅𑀘𑁆𑀙𑀺𑀦𑁆𑀦𑀯𑀼𑀢𑁆𑀢𑀻𑀢𑀺 𑀦𑀺𑀭𑀦𑁆𑀢𑀭𑀓𑀭𑀡𑀯𑀲𑁂𑀦 𑀅𑀔𑀡𑁆𑀟𑀯𑀼𑀢𑁆𑀢𑀺. 𑀫𑁂𑀥𑀸𑀯𑀻𑀢𑀺 𑀞𑀸𑀦𑀼𑀧𑁆𑀧𑀢𑁆𑀢𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄.

𑀲𑀗𑁆𑀕𑀸𑀳𑀓𑁄𑀢𑀺 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀲𑀗𑁆𑀕𑀳𑀓𑀭𑁄. 𑀫𑀺𑀢𑁆𑀢𑀓𑀭𑁄𑀢𑀺 𑀫𑀺𑀢𑁆𑀢𑀕𑀯𑁂𑀲𑀦𑁄. 𑀯𑀤𑀜𑁆𑀜𑀽𑀢𑀺 𑀧𑀼𑀩𑁆𑀩𑀓𑀸𑀭𑀺𑀦𑀸, 𑀯𑀼𑀢𑁆𑀢𑀯𑀘𑀦𑀁 𑀚𑀸𑀦𑀸𑀢𑀺. 𑀲𑀳𑀸𑀬𑀓𑀲𑁆𑀲 𑀖𑀭𑀁 𑀕𑀢𑀓𑀸𑀮𑁂 ‘‘𑀫𑀬𑁆𑀳𑀁 𑀲𑀳𑀸𑀬𑀓𑀲𑁆𑀲 𑀯𑁂𑀞𑀦𑀁 𑀤𑁂𑀣, 𑀲𑀸𑀝𑀓𑀁 𑀤𑁂𑀣, 𑀫𑀦𑀼𑀲𑁆𑀲𑀸𑀦𑀁 𑀪𑀢𑁆𑀢𑀯𑁂𑀢𑀦𑀁 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑀯𑀘𑀦𑀫𑀦𑀼𑀲𑁆𑀲𑀭𑀦𑁆𑀢𑁄 𑀢𑀲𑁆𑀲 𑀅𑀢𑁆𑀢𑀦𑁄 𑀕𑁂𑀳𑀁 ¶ 𑀆𑀕𑀢𑀲𑁆𑀲 𑀢𑀢𑁆𑀢𑀓𑀁 𑀯𑀸 𑀢𑀢𑁄 𑀅𑀢𑀺𑀭𑁂𑀓𑀁 𑀯𑀸 𑀧𑀝𑀺𑀓𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀲𑀳𑀸𑀬𑀓𑀲𑁆𑀲 𑀖𑀭𑀁 𑀕𑀦𑁆𑀢𑁆𑀯𑀸 𑀇𑀫𑀁 𑀦𑀸𑀫 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀆𑀕𑀢𑀁 𑀲𑀳𑀸𑀬𑀓𑀁 𑀮𑀚𑁆𑀚𑀸𑀬 𑀕𑀡𑁆𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 𑀅𑀦𑀺𑀘𑁆𑀙𑀸𑀭𑀺𑀢𑀫𑁆𑀧𑀺 𑀢𑀲𑁆𑀲 𑀯𑀸𑀘𑀁 𑀜𑀢𑁆𑀯𑀸 𑀬𑁂𑀦 𑀅𑀢𑁆𑀣𑁂𑀦 𑀲𑁄 𑀆𑀕𑀢𑁄, 𑀢𑀁 𑀦𑀺𑀧𑁆𑀨𑀸𑀤𑁂𑀦𑁆𑀢𑁄 𑀯𑀤𑀜𑁆𑀜𑀽 𑀦𑀸𑀫. 𑀬𑁂𑀦 𑀬𑁂𑀦 𑀯𑀸 𑀧𑀦 𑀲𑀳𑀸𑀬𑀓𑀲𑁆𑀲 𑀊𑀦𑀁 𑀳𑁄𑀢𑀺, 𑀑𑀮𑁄𑀓𑁂𑀢𑁆𑀯𑀸 𑀢𑀁 𑀢𑀁 𑀤𑁂𑀦𑁆𑀢𑁄𑀧𑀺 𑀯𑀤𑀜𑁆𑀜𑀽𑀬𑁂𑀯. 𑀦𑁂𑀢𑀸𑀢𑀺 𑀢𑀁 𑀢𑀁 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀧𑀜𑁆𑀜𑀸𑀬 𑀦𑁂𑀢𑀸. 𑀯𑀺𑀯𑀺𑀥𑀸𑀦𑀺 𑀓𑀸𑀭𑀡𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀦𑁂𑀢𑀻𑀢𑀺 𑀯𑀺𑀦𑁂𑀢𑀸. 𑀧𑀼𑀦𑀧𑁆𑀧𑀼𑀦𑀁 𑀦𑁂𑀢𑀻𑀢𑀺 𑀅𑀦𑀼𑀦𑁂𑀢𑀸.

𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂. 𑀭𑀣𑀲𑁆𑀲𑀸𑀡𑀻𑀯 𑀬𑀸𑀬𑀢𑁄𑀢𑀺 𑀬𑀣𑀸 𑀆𑀡𑀺𑀬𑀸 𑀲𑀢𑀺𑀬𑁂𑀯 𑀭𑀣𑁄 𑀬𑀸𑀢𑀺, 𑀅𑀲𑀢𑀺 𑀦 𑀬𑀸𑀢𑀺, 𑀏𑀯𑀁 𑀇𑀫𑁂𑀲𑀼 𑀲𑀗𑁆𑀕𑀳𑁂𑀲𑀼 𑀲𑀢𑀺𑀬𑁂𑀯 𑀮𑁄𑀓𑁄 𑀯𑀢𑁆𑀢𑀢𑀺, 𑀅𑀲𑀢𑀺 𑀦 𑀯𑀢𑁆𑀢𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀏𑀢𑁂 𑀔𑁄 𑀲𑀗𑁆𑀕𑀳𑀸 𑀮𑁄𑀓𑁂, 𑀭𑀣𑀲𑁆𑀲𑀸𑀡𑀻𑀯 𑀬𑀸𑀬𑀢𑁄’’𑀢𑀺.

𑀦 𑀫𑀸𑀢𑀸 𑀧𑀼𑀢𑁆𑀢𑀓𑀸𑀭𑀡𑀸𑀢𑀺 𑀬𑀤𑀺 𑀫𑀸𑀢𑀸 𑀏𑀢𑁂 𑀲𑀗𑁆𑀕𑀳𑁂 𑀧𑀼𑀢𑁆𑀢𑀲𑁆𑀲 𑀦 𑀓𑀭𑁂𑀬𑁆𑀬, 𑀧𑀼𑀢𑁆𑀢𑀓𑀸𑀭𑀡𑀸 𑀫𑀸𑀦𑀁 𑀯𑀸 𑀧𑀽𑀚𑀁 𑀯𑀸 𑀦 𑀮𑀪𑁂𑀬𑁆𑀬.

𑀲𑀗𑁆𑀕𑀳𑀸 𑀏𑀢𑁂𑀢𑀺 𑀉𑀧𑀬𑁄𑀕𑀯𑀘𑀦𑁂 𑀧𑀘𑁆𑀘𑀢𑁆𑀢𑀁. ‘‘𑀲𑀗𑁆𑀕𑀳𑁂 𑀏𑀢𑁂’’𑀢𑀺 𑀯𑀸 𑀧𑀸𑀞𑁄. 𑀲𑀫𑁆𑀫𑀧𑁂𑀓𑁆𑀔𑀦𑁆𑀢𑀻𑀢𑀺 𑀲𑀫𑁆𑀫𑀸 𑀧𑁂𑀓𑁆𑀔𑀦𑁆𑀢𑀺. 𑀧𑀸𑀲𑀁𑀲𑀸 𑀘 𑀪𑀯𑀦𑁆𑀢𑀻𑀢𑀺 𑀧𑀲𑀁𑀲𑀦𑀻𑀬𑀸 𑀘 𑀪𑀯𑀦𑁆𑀢𑀺.

𑁨𑁭𑁪. 𑀇𑀢𑀺 𑀪𑀕𑀯𑀸 𑀬𑀸 𑀤𑀺𑀲𑀸 𑀲𑀦𑁆𑀥𑀸𑀬 𑀢𑁂 𑀕𑀳𑀧𑀢𑀺𑀧𑀼𑀢𑁆𑀢 𑀧𑀺𑀢𑀸 𑀆𑀳 ‘‘𑀤𑀺𑀲𑀸 𑀦𑀫𑀲𑁆𑀲𑁂𑀬𑁆𑀬𑀸𑀲𑀻’’𑀢𑀺, 𑀇𑀫𑀸 𑀢𑀸 𑀙 𑀤𑀺𑀲𑀸. 𑀬𑀤𑀺 𑀢𑁆𑀯𑀁 𑀧𑀺𑀢𑀼 𑀯𑀘𑀦𑀁 𑀓𑀭𑁄𑀲𑀺, 𑀇𑀫𑀸 𑀤𑀺𑀲𑀸 𑀦𑀫𑀲𑁆𑀲𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀲𑀺𑀗𑁆𑀕𑀸𑀮𑀲𑁆𑀲 𑀧𑀼𑀘𑁆𑀙𑀸𑀬 𑀞𑀢𑁆𑀯𑀸 𑀤𑁂𑀲𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀭𑀸𑀚𑀕𑀳𑀁 𑀧𑀺𑀡𑁆𑀟𑀸𑀬 ¶ 𑀧𑀸𑀯𑀺𑀲𑀺 ¶ . 𑀲𑀺𑀗𑁆𑀕𑀸𑀮𑀓𑁄𑀧𑀺 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀥𑀦𑀁 𑀩𑀼𑀤𑁆𑀥𑀲𑀸𑀲𑀦𑁂 𑀯𑀺𑀓𑀺𑀭𑀺𑀢𑁆𑀯𑀸 𑀧𑀼𑀜𑁆𑀜𑀓𑀫𑁆𑀫𑀁 𑀓𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑁄 𑀅𑀳𑁄𑀲𑀺. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀲𑀼𑀢𑁆𑀢𑁂 𑀬𑀁 𑀕𑀺𑀳𑀻𑀳𑀺 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁 𑀦𑀸𑀫, 𑀢𑀁 𑀅𑀓𑀣𑀺𑀢𑀁 𑀦𑀢𑁆𑀣𑀺, 𑀕𑀺𑀳𑀺𑀯𑀺𑀦𑀬𑁄 𑀦𑀸𑀫𑀸𑀬𑀁 𑀲𑀼𑀢𑁆𑀢𑀦𑁆𑀢𑁄. 𑀢𑀲𑁆𑀫𑀸 𑀇𑀫𑀁 𑀲𑀼𑀢𑁆𑀯𑀸 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑀲𑁆𑀲 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻𑀢𑀺.

𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀲𑀺𑀗𑁆𑀕𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀆𑀝𑀸𑀦𑀸𑀝𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑀧𑀞𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸

𑁨𑁭𑁫. 𑀏𑀯𑀁 ¶ ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀆𑀝𑀸𑀦𑀸𑀝𑀺𑀬𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀫𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸 𑁋 𑀘𑀢𑀼𑀤𑁆𑀤𑀺𑀲𑀁 𑀭𑀓𑁆𑀔𑀁 𑀞𑀧𑁂𑀢𑁆𑀯𑀸𑀢𑀺 𑀅𑀲𑀼𑀭𑀲𑁂𑀦𑀸𑀬 𑀦𑀺𑀯𑀸𑀭𑀡𑀢𑁆𑀣𑀁 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸. 𑀕𑀼𑀫𑁆𑀩𑀁 𑀞𑀧𑁂𑀢𑁆𑀯𑀸𑀢𑀺 𑀩𑀮𑀕𑀼𑀫𑁆𑀩𑀁 𑀞𑀧𑁂𑀢𑁆𑀯𑀸. 𑀑𑀯𑀭𑀡𑀁 𑀞𑀧𑁂𑀢𑁆𑀯𑀸𑀢𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀆𑀭𑀓𑁆𑀔𑀓𑁂 𑀞𑀧𑁂𑀢𑁆𑀯𑀸. 𑀏𑀯𑀁 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀆𑀭𑀓𑁆𑀔𑀁 𑀲𑀼𑀲𑀁𑀯𑀺𑀳𑀺𑀢𑀁 𑀓𑀢𑁆𑀯𑀸 𑀆𑀝𑀸𑀦𑀸𑀝𑀦𑀕𑀭𑁂 𑀦𑀺𑀲𑀺𑀦𑁆𑀦𑀸 𑀲𑀢𑁆𑀢 𑀩𑀼𑀤𑁆𑀥𑁂 𑀆𑀭𑀩𑁆𑀪 𑀇𑀫𑀁 𑀧𑀭𑀺𑀢𑁆𑀢𑀁 𑀩𑀦𑁆𑀥𑀺𑀢𑁆𑀯𑀸 ‘‘𑀬𑁂 𑀲𑀢𑁆𑀣𑀼 𑀥𑀫𑁆𑀫𑀆𑀡𑀁 𑀅𑀫𑁆𑀳𑀸𑀓𑀜𑁆𑀘 𑀭𑀸𑀚𑀆𑀡𑀁 𑀦 𑀲𑀼𑀡𑀦𑁆𑀢𑀺, 𑀢𑁂𑀲𑀁 𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀸𑀯𑀦𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄𑀧𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀫𑀳𑀢𑀺𑀬𑀸 𑀘 𑀬𑀓𑁆𑀔𑀲𑁂𑀦𑀸𑀬𑀸𑀢𑀺𑀆𑀤𑀻𑀳𑀺 𑀘𑀢𑀽𑀳𑀺 𑀲𑁂𑀦𑀸𑀳𑀺 𑀆𑀭𑀓𑁆𑀔𑀁 𑀲𑀁𑀯𑀺𑀤𑀳𑀺𑀢𑁆𑀯𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼.

𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁄 𑀔𑀬𑀲𑀼𑀦𑁆𑀤𑀭𑀸𑀪𑀺𑀭𑀽𑀧𑀅𑀩𑁆𑀪𑀦𑀼𑀫𑁄𑀤𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀢𑁆𑀣 ‘‘𑀅𑀪𑀺𑀓𑁆𑀓𑀦𑁆𑀢𑀸, 𑀪𑀦𑁆𑀢𑁂 𑀭𑀢𑁆𑀢𑀺, 𑀦𑀺𑀓𑁆𑀔𑀦𑁆𑀢𑁄 𑀧𑀞𑀫𑁄 𑀬𑀸𑀫𑁄, 𑀘𑀺𑀭𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 (𑀅. 𑀦𑀺. 𑁮.𑁨𑁦) 𑀏𑀯𑀫𑀸𑀤𑀻𑀲𑀼 𑀔𑀬𑁂 𑀤𑀺𑀲𑁆𑀲𑀢𑀺. ‘‘𑀅𑀬𑀁 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀧𑀡𑀻𑀢𑀢𑀭𑁄 𑀘𑀸’’𑀢𑀺 (𑀅. 𑀦𑀺. 𑁪.𑁧𑁦𑁦) 𑀏𑀯𑀫𑀸𑀤𑀻𑀲𑀼 𑀲𑀼𑀦𑁆𑀤𑀭𑁂.

‘‘𑀓𑁄 ¶ 𑀫𑁂 𑀯𑀦𑁆𑀤𑀢𑀺 𑀧𑀸𑀤𑀸𑀦𑀺, 𑀇𑀤𑁆𑀥𑀺𑀬𑀸 𑀬𑀲𑀲𑀸 𑀚𑀮𑀁;

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸’’𑀢𑀺. (𑀯𑀺. 𑀯. 𑁮𑁫𑁭);

𑀏𑀯𑀫𑀸𑀤𑀻𑀲𑀼 𑀅𑀪𑀺𑀭𑀽𑀧𑁂. ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫𑀸𑀢𑀺 (𑀧𑀸𑀭𑀸. 𑁧𑁫) 𑀏𑀯𑀫𑀸𑀤𑀻𑀲𑀼 𑀅𑀩𑁆𑀪𑀦𑀼𑀫𑁄𑀤𑀦𑁂 ¶ . 𑀇𑀥 𑀧𑀦 𑀔𑀬𑁂. 𑀢𑁂𑀦 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸, 𑀧𑀭𑀺𑀓𑁆𑀔𑀻𑀡𑀸𑀬 𑀭𑀢𑁆𑀢𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸𑀢𑀺 𑀇𑀥 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁄 𑀅𑀪𑀺𑀭𑀽𑀧𑁂. 𑀯𑀡𑁆𑀡𑀲𑀤𑁆𑀤𑁄 𑀧𑀦 𑀙𑀯𑀺𑀣𑀼𑀢𑀺𑀓𑀼𑀮𑀯𑀕𑁆𑀕𑀓𑀸𑀭𑀡𑀲𑀡𑁆𑀞𑀸𑀦𑀧𑀫𑀸𑀡𑀭𑀽𑀧𑀸𑀬𑀢𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀢𑁆𑀣 ‘‘𑀲𑀼𑀯𑀡𑁆𑀡𑀯𑀡𑁆𑀡𑁄𑀲𑀺 𑀪𑀕𑀯𑀸’’𑀢𑀺 (𑀫. 𑀦𑀺. 𑁨.𑁩𑁯𑁯) 𑀏𑀯𑀫𑀸𑀤𑀻𑀲𑀼 𑀙𑀯𑀺𑀬𑀁. ‘‘𑀓𑀤𑀸 𑀲𑀜𑁆𑀜𑀽𑀴𑁆𑀳𑀸 𑀧𑀦 𑀢𑁂, 𑀕𑀳𑀧𑀢𑀺, 𑀇𑀫𑁂 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀡𑁆𑀡𑀸’’𑀢𑀺 (𑀫. 𑀦𑀺. 𑁨.𑁭𑁭) 𑀏𑀯𑀫𑀸𑀤𑀻𑀲𑀼 𑀣𑀼𑀢𑀺𑀬𑀁. ‘‘𑀘𑀢𑁆𑀢𑀸𑀭𑁄𑀫𑁂 ¶ , 𑀪𑁄 𑀕𑁄𑀢𑀫, 𑀯𑀡𑁆𑀡𑀸’’𑀢𑀺 (𑀤𑀻. 𑀦𑀺. 𑁧.𑁨𑁬𑁬) 𑀏𑀯𑀫𑀸𑀤𑀻𑀲𑀼 𑀓𑀼𑀮𑀯𑀕𑁆𑀕𑁂. ‘‘𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦 𑀕𑀦𑁆𑀥𑀣𑁂𑀦𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁩𑁪) 𑀓𑀸𑀭𑀡𑁂. ‘‘𑀫𑀳𑀦𑁆𑀢𑀁 𑀳𑀢𑁆𑀣𑀺𑀭𑀸𑀚𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸’’𑀢𑀺 (𑀲𑀁. 𑀦𑀺. 𑁧.𑁧𑁩𑁮) 𑀏𑀯𑀫𑀸𑀤𑀻𑀲𑀼 𑀲𑀡𑁆𑀞𑀸𑀦𑁂. ‘‘𑀢𑀬𑁄 𑀧𑀢𑁆𑀢𑀲𑁆𑀲 𑀯𑀡𑁆𑀡𑀸’’𑀢𑀺 (𑀧𑀸𑀭𑀸. 𑁬𑁦𑁨) 𑀏𑀯𑀫𑀸𑀤𑀻𑀲𑀼 𑀧𑀫𑀸𑀡𑁂. ‘‘𑀯𑀡𑁆𑀡𑁄 𑀕𑀦𑁆𑀥𑁄 𑀭𑀲𑁄 𑀑𑀚𑀸’’𑀢𑀺 𑀏𑀯𑀫𑀸𑀤𑀻𑀲𑀼 𑀭𑀽𑀧𑀸𑀬𑀢𑀦𑁂. 𑀲𑁄 𑀇𑀥 𑀙𑀯𑀺𑀬𑀁 𑀤𑀝𑁆𑀞𑀩𑁆𑀩𑁄. 𑀢𑁂𑀦 ‘‘𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀅𑀪𑀺𑀭𑀽𑀧𑀘𑁆𑀙𑀯𑀻’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑁂𑀯𑀮𑀓𑀧𑁆𑀧𑀦𑁆𑀢𑀺 𑀏𑀢𑁆𑀣 𑀓𑁂𑀯𑀮𑀲𑀤𑁆𑀤𑁄 𑀅𑀦𑀯𑀲𑁂𑀲𑀬𑁂𑀪𑀼𑀬𑁆𑀬𑀅𑀩𑁆𑀬𑀸𑀫𑀺𑀲𑁆𑀲𑀸𑀦𑀢𑀺𑀭𑁂𑀓𑀤𑀴𑁆𑀳𑀢𑁆𑀣𑀯𑀺𑀲𑀁𑀬𑁄𑀕𑀸𑀤𑀺𑀅𑀦𑁂𑀓𑀢𑁆𑀣𑁄. 𑀢𑀣𑀸 𑀳𑀺𑀲𑁆𑀲 ‘‘𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 (𑀧𑀸𑀭𑀸. 𑁧) 𑀏𑀯𑀫𑀸𑀤𑀻𑀲𑀼 𑀅𑀦𑀯𑀲𑁂𑀲𑀢𑀸 𑀅𑀢𑁆𑀣𑁄. ‘‘𑀓𑁂𑀯𑀮𑀓𑀧𑁆𑀧𑀸 𑀘 𑀅𑀗𑁆𑀕𑀫𑀸𑀕𑀥𑀸 𑀧𑀳𑀽𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀆𑀤𑀸𑀬 𑀅𑀪𑀺𑀓𑁆𑀓𑀫𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀻’’𑀢𑀺 (𑀫𑀳𑀸𑀯. 𑁪𑁩) 𑀏𑀯𑀫𑀸𑀤𑀻𑀲𑀼 𑀬𑁂𑀪𑀼𑀬𑁆𑀬𑀢𑀸. ‘‘𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺 (𑀫𑀳𑀸𑀯. 𑁧) 𑀏𑀯𑀫𑀸𑀤𑀻𑀲𑀼 𑀅𑀩𑁆𑀬𑀸𑀫𑀺𑀲𑁆𑀲𑀢𑀸. ‘‘𑀓𑁂𑀯𑀮𑀁 𑀲𑀤𑁆𑀥𑀸𑀫𑀢𑁆𑀢𑀓𑀁 𑀦𑀽𑀦 𑀅𑀬𑀫𑀸𑀬𑀲𑁆𑀫𑀸’’𑀢𑀺 (𑀅. 𑀦𑀺. 𑁬.𑁫𑁫) 𑀏𑀯𑀫𑀸𑀤𑀻𑀲𑀼 𑀅𑀦𑀢𑀺𑀭𑁂𑀓𑀢𑀸. ‘‘𑀆𑀬𑀲𑁆𑀫𑀢𑁄, 𑀪𑀦𑁆𑀢𑁂, 𑀅𑀦𑀼𑀭𑀼𑀤𑁆𑀥𑀲𑁆𑀲 𑀩𑀸𑀳𑀺𑀓𑁄 𑀦𑀸𑀫 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀓𑁂𑀯𑀮𑀓𑀧𑁆𑀧𑀁 𑀲𑀗𑁆𑀖𑀪𑁂𑀤𑀸𑀬 𑀞𑀺𑀢𑁄’’𑀢𑀺 (𑀅. 𑀦𑀺. 𑁪.𑁨𑁪𑁩) 𑀏𑀯𑀫𑀸𑀤𑀻𑀲𑀼 𑀤𑀴𑁆𑀳𑀢𑁆𑀣𑀢𑀸. ‘‘𑀓𑁂𑀯𑀮𑀻 𑀯𑀼𑀲𑀺𑀢𑀯𑀸 𑀉𑀢𑁆𑀢𑀫𑀧𑀼𑀭𑀺𑀲𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀅. 𑀦𑀺. 𑁧𑁦.𑁧𑁨) 𑀏𑀯𑀫𑀸𑀤𑀻𑀲𑀼 𑀯𑀺𑀲𑀁𑀬𑁄𑀕𑁄. 𑀇𑀥 𑀧𑀦𑀲𑁆𑀲 𑀅𑀦𑀯𑀲𑁂𑀲𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄.

𑀓𑀧𑁆𑀧𑀲𑀤𑁆𑀤𑁄 𑀧𑀦𑀸𑀬𑀁 𑀅𑀪𑀺𑀲𑀤𑁆𑀤𑀳𑀦𑀯𑁄𑀳𑀸𑀭𑀓𑀸𑀮𑀧𑀜𑁆𑀜𑀢𑁆𑀢𑀺𑀙𑁂𑀤𑀦𑀯𑀺𑀓𑀧𑁆𑀧𑀮𑁂𑀲𑀲𑀫𑀦𑁆𑀢𑀪𑀸𑀯𑀸𑀤𑀺𑀅𑀦𑁂𑀓𑀢𑁆𑀣𑁄. 𑀢𑀣𑀸 𑀳𑀺𑀲𑁆𑀲 ‘‘𑀑𑀓𑀧𑁆𑀧𑀦𑀺𑀬𑀫𑁂𑀢𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲. 𑀬𑀣𑀸 𑀢𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺 (𑀫. 𑀦𑀺. 𑁧.𑁩𑁮𑁭) 𑀏𑀯𑀫𑀸𑀤𑀻𑀲𑀼 𑀅𑀪𑀺𑀲𑀤𑁆𑀤𑀳𑀦𑀫𑀢𑁆𑀣𑁄. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀺 ¶ 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁫𑁦) 𑀏𑀯𑀫𑀸𑀤𑀻𑀲𑀼 𑀯𑁄𑀳𑀸𑀭𑁄. ‘‘𑀬𑁂𑀦 𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’𑀢𑀺 (𑀫. 𑀦𑀺. 𑁧.𑁩𑁮𑁭) 𑀏𑀯𑀫𑀸𑀤𑀻𑀲𑀼 𑀓𑀸𑀮𑁄. ‘‘𑀇𑀘𑁆𑀘𑀸𑀬𑀲𑁆𑀫𑀸 𑀓𑀧𑁆𑀧𑁄’’𑀢𑀺 (𑀲𑀼. 𑀦𑀺. 𑁧𑁦𑁯𑁮) ¶ 𑀏𑀯𑀫𑀸𑀤𑀻𑀲𑀼 𑀧𑀜𑁆𑀜𑀢𑁆𑀢𑀺. ‘‘𑀅𑀮𑀗𑁆𑀓𑀢𑁄 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽’’𑀢𑀺 (𑀯𑀺. 𑀯. 𑁧𑁦𑁯𑁪) 𑀏𑀯𑀫𑀸𑀤𑀻𑀲𑀼 𑀙𑁂𑀤𑀦𑀁. ‘‘𑀓𑀧𑁆𑀧𑀢𑀺 𑀤𑁆𑀯𑀗𑁆𑀕𑀼𑀮𑀓𑀧𑁆𑀧𑁄’’𑀢𑀺 (𑀘𑀽𑀴𑀯. 𑁪𑁪𑁬) 𑀏𑀯𑀫𑀸𑀤𑀻𑀲𑀼 𑀯𑀺𑀓𑀧𑁆𑀧𑁄, 𑀅𑀢𑁆𑀣𑀺 𑀓𑀧𑁆𑀧𑁄 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺 (𑀅. 𑀦𑀺. 𑁮.𑁮𑁦) 𑀏𑀯𑀫𑀸𑀤𑀻𑀲𑀼 𑀮𑁂𑀲𑁄. ‘‘𑀓𑁂𑀯𑀮𑀓𑀧𑁆𑀧𑀁 𑀯𑁂𑀴𑀼𑀯𑀦𑀁 𑀑𑀪𑀸𑀲𑁂𑀢𑁆𑀯𑀸’’𑀢𑀺 (𑀲𑀁. 𑀦𑀺. 𑁧.𑁯𑁪) 𑀏𑀯𑀫𑀸𑀤𑀻𑀲𑀼 ¶ 𑀲𑀫𑀦𑁆𑀢𑀪𑀸𑀯𑁄. 𑀇𑀥 𑀧𑀦 𑀲𑀫𑀦𑁆𑀢𑀪𑀸𑀯𑁄 𑀅𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀫𑀸 ‘‘𑀓𑁂𑀯𑀮𑀓𑀧𑁆𑀧𑀁 𑀕𑀺𑀚𑁆𑀛𑀓𑀽𑀝’’𑀦𑁆𑀢𑀺 𑀏𑀢𑁆𑀣 𑀅𑀦𑀯𑀲𑁂𑀲𑀁 𑀲𑀫𑀦𑁆𑀢𑀢𑁄 𑀕𑀺𑀚𑁆𑀛𑀓𑀽𑀝𑀦𑁆𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀑𑀪𑀸𑀲𑁂𑀢𑁆𑀯𑀸𑀢𑀺 𑀯𑀢𑁆𑀣𑀫𑀸𑀮𑀸𑀮𑀗𑁆𑀓𑀸𑀭𑀲𑀭𑀻𑀭𑀲𑀫𑀼𑀝𑁆𑀞𑀺𑀢𑀸𑀬 𑀆𑀪𑀸𑀬 𑀨𑀭𑀺𑀢𑁆𑀯𑀸, 𑀘𑀦𑁆𑀤𑀺𑀫𑀸 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀘 𑀏𑀓𑁄𑀪𑀸𑀲𑀁 𑀏𑀓𑀧𑀚𑁆𑀚𑁄𑀢𑀁 𑀓𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀽𑀢𑀺 𑀤𑁂𑀯𑀢𑀸𑀦𑀁 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀦𑀸𑀫 𑀦 𑀩𑀳𑀼, 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀧𑀭𑀺𑀢𑁆𑀢𑀕𑀸𑀭𑀯𑀯𑀲𑁂𑀦 𑀦𑀺𑀲𑀻𑀤𑀺𑀁𑀲𑀼.

𑁨𑁭𑁬. 𑀯𑁂𑀲𑁆𑀲𑀯𑀡𑁄𑀢𑀺 𑀓𑀺𑀜𑁆𑀘𑀸𑀧𑀺 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀆𑀕𑀢𑀸, 𑀯𑁂𑀲𑁆𑀲𑀯𑀡𑁄 𑀧𑀦 𑀤𑀲𑀩𑀮𑀲𑁆𑀲 𑀯𑀺𑀲𑁆𑀲𑀸𑀲𑀺𑀓𑁄 𑀓𑀣𑀸𑀧𑀯𑀢𑁆𑀢𑀦𑁂 𑀩𑁆𑀬𑀢𑁆𑀢𑁄 𑀲𑀼𑀲𑀺𑀓𑁆𑀔𑀺𑀢𑁄, 𑀢𑀲𑁆𑀫𑀸 𑀯𑁂𑀲𑁆𑀲𑀯𑀡𑁄 𑀫𑀳𑀸𑀭𑀸𑀚𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘. 𑀉𑀴𑀸𑀭𑀸𑀢𑀺 𑀫𑀳𑁂𑀲𑀓𑁆𑀔𑀸𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑀸. 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀬𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑁂 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀁 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀢𑀢𑁄 𑀯𑁂𑀭𑀫𑀡𑀺𑀬𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀲𑀦𑁆𑀢𑀺 𑀉𑀴𑀸𑀭𑀸 𑀬𑀓𑁆𑀔𑀸 𑀦𑀺𑀯𑀸𑀲𑀺𑀦𑁄𑀢𑀺 𑀢𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀲𑀦𑁆𑀢𑀺 𑀉𑀴𑀸𑀭𑀸 𑀬𑀓𑁆𑀔𑀸 𑀦𑀺𑀩𑀤𑁆𑀥𑀯𑀸𑀲𑀺𑀦𑁄. 𑀆𑀝𑀸𑀦𑀸𑀝𑀺𑀬𑀦𑁆𑀢𑀺 𑀆𑀝𑀸𑀦𑀸𑀝𑀦𑀕𑀭𑁂 𑀩𑀤𑁆𑀥𑀢𑁆𑀢𑀸 𑀏𑀯𑀁𑀦𑀸𑀫𑀁. 𑀓𑀺𑀁 𑀧𑀦 𑀪𑀕𑀯𑀢𑁄 𑀅𑀧𑀘𑁆𑀘𑀓𑁆𑀔𑀥𑀫𑁆𑀫𑁄 𑀦𑀸𑀫 𑀅𑀢𑁆𑀣𑀻𑀢𑀺, 𑀦𑀢𑁆𑀣𑀺. 𑀅𑀣 𑀓𑀲𑁆𑀫𑀸 𑀯𑁂𑀲𑁆𑀲𑀯𑀡𑁄 ‘‘𑀉𑀕𑁆𑀕𑀡𑁆𑀳𑀸𑀢𑀼, 𑀪𑀦𑁆𑀢𑁂, 𑀪𑀕𑀯𑀸’’𑀢𑀺𑀆𑀤𑀺𑀫𑀸𑀳? 𑀑𑀓𑀸𑀲𑀓𑀭𑀡𑀢𑁆𑀣𑀁. 𑀲𑁄 𑀳𑀺 𑀪𑀕𑀯𑀦𑁆𑀢𑀁 𑀇𑀫𑀁 𑀧𑀭𑀺𑀢𑁆𑀢𑀁 𑀲𑀸𑀯𑁂𑀢𑀼𑀁 𑀑𑀓𑀸𑀲𑀁 𑀓𑀸𑀭𑁂𑀦𑁆𑀢𑁄 𑀏𑀯𑀫𑀸𑀳. 𑀲𑀢𑁆𑀣𑀼 𑀓𑀣𑀺𑀢𑁂 𑀇𑀫𑀁 𑀧𑀭𑀺𑀢𑁆𑀢𑀁 𑀕𑀭𑀼 𑀪𑀯𑀺𑀲𑁆𑀲𑀢𑀻𑀢𑀺𑀧𑀺 𑀆𑀳. 𑀨𑀸𑀲𑀼𑀯𑀺𑀳𑀸𑀭𑀸𑀬𑀸𑀢𑀺 𑀕𑀫𑀦𑀝𑁆𑀞𑀸𑀦𑀸𑀤𑀻𑀲𑀼 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀲𑀼𑀔𑀯𑀺𑀳𑀸𑀭𑀸𑀬.

𑁨𑁭𑁭. 𑀘𑀓𑁆𑀔𑀼𑀫𑀦𑁆𑀢𑀲𑁆𑀲𑀸𑀢𑀺 𑀦 𑀯𑀺𑀧𑀲𑁆𑀲𑀻𑀬𑁂𑀯 𑀘𑀓𑁆𑀔𑀼𑀫𑀸, 𑀲𑀢𑁆𑀢𑀧𑀺 𑀩𑀼𑀤𑁆𑀥𑀸 𑀘𑀓𑁆𑀔𑀼𑀫𑀦𑁆𑀢𑁄, 𑀢𑀲𑁆𑀫𑀸 𑀏𑀓𑁂𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀏𑀢𑀸𑀦𑀺 𑀲𑀢𑁆𑀢 𑀲𑀢𑁆𑀢 𑀦𑀸𑀫𑀸𑀦𑀺 𑀳𑁄𑀦𑁆𑀢𑀺. 𑀲𑀩𑁆𑀩𑁂𑀧𑀺 𑀩𑀼𑀤𑁆𑀥𑀸 𑀘𑀓𑁆𑀔𑀼𑀫𑀦𑁆𑀢𑁄, 𑀲𑀩𑁆𑀩𑁂 𑀲𑀩𑁆𑀩𑀪𑀽𑀢𑀸𑀦𑀼𑀓𑀫𑁆𑀧𑀺𑀦𑁄, 𑀲𑀩𑁆𑀩𑁂 𑀦𑁆𑀳𑀸𑀢𑀓𑀺𑀮𑁂𑀲𑀢𑁆𑀢𑀸 𑀦𑁆𑀳𑀸𑀢𑀓𑀸. 𑀲𑀩𑁆𑀩𑁂 ¶ 𑀫𑀸𑀭𑀲𑁂𑀦𑀸𑀧𑀫𑀤𑁆𑀤𑀺𑀦𑁄, 𑀲𑀩𑁆𑀩𑁂 𑀯𑀼𑀲𑀺𑀢𑀯𑀦𑁆𑀢𑁄, 𑀲𑀩𑁆𑀩𑁂 𑀯𑀺𑀫𑀼𑀢𑁆𑀢𑀸, 𑀲𑀩𑁆𑀩𑁂 𑀅𑀗𑁆𑀕𑀢𑁄 𑀭𑀲𑁆𑀫𑀻𑀦𑀁 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀅𑀗𑁆𑀕𑀻𑀭𑀲𑀸. 𑀦 𑀓𑁂𑀯𑀮𑀜𑁆𑀘 𑀩𑀼𑀤𑁆𑀥𑀸𑀦𑀁 𑀏𑀢𑀸𑀦𑁂𑀯 𑀲𑀢𑁆𑀢 𑀦𑀸𑀫𑀸𑀦𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀦𑀸𑀫𑀸𑀦𑀺 𑀲𑀕𑀼𑀡𑁂𑀦 𑀫𑀳𑁂𑀲𑀺𑀦𑁄𑀢𑀺 𑀯𑀼𑀢𑁆𑀢𑀁.

𑀯𑁂𑀲𑁆𑀲𑀯𑀡𑁄 𑀧𑀦 𑀅𑀢𑁆𑀢𑀦𑁄 𑀧𑀸𑀓𑀝𑀦𑀸𑀫𑀯𑀲𑁂𑀦 𑀏𑀯𑀫𑀸𑀳. 𑀢𑁂 𑀚𑀦𑀸𑀢𑀺 𑀇𑀥 𑀔𑀻𑀡𑀸𑀲𑀯𑀸 𑀚𑀦𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀅𑀧𑀺𑀲𑀼𑀡𑀸𑀣𑀸𑀢𑀺 𑀤𑁂𑀲𑀦𑀸𑀲𑀻𑀲𑀫𑀢𑁆𑀢𑀫𑁂𑀢𑀁, 𑀅𑀫𑀼𑀲𑀸 𑀅𑀧𑀺𑀲𑀼𑀡𑀸 𑀅𑀨𑀭𑀼𑀲𑀸 𑀫𑀦𑁆𑀢𑀪𑀸𑀡𑀺𑀦𑁄𑀢𑀺 𑀅𑀢𑁆𑀣𑁄 ¶ . 𑀫𑀳𑀢𑁆𑀢𑀸𑀢𑀺 ¶ 𑀫𑀳𑀦𑁆𑀢𑀪𑀸𑀯𑀁 𑀧𑀢𑁆𑀢𑀸. ‘‘𑀫𑀳𑀦𑁆𑀢𑀸’’𑀢𑀺𑀧𑀺 𑀧𑀸𑀞𑁄, 𑀫𑀳𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀯𑀻𑀢𑀲𑀸𑀭𑀤𑀸𑀢𑀺 𑀦𑀺𑀲𑁆𑀲𑀸𑀭𑀤𑀸 𑀯𑀺𑀕𑀢𑀮𑁄𑀫𑀳𑀁𑀲𑀸.

𑀳𑀺𑀢𑀦𑁆𑀢𑀺 𑀫𑁂𑀢𑁆𑀢𑀸𑀨𑀭𑀡𑁂𑀦 𑀳𑀺𑀢𑀁. 𑀬𑀁 𑀦𑀫𑀲𑁆𑀲𑀦𑁆𑀢𑀻𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀫𑀳𑀢𑁆𑀢𑀦𑁆𑀢𑀺 𑀫𑀳𑀦𑁆𑀢𑀁. 𑀅𑀬𑀫𑁂𑀯 𑀯𑀸 𑀧𑀸𑀞𑁄, 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀬𑁂 𑀘𑀸𑀧𑀺 𑀮𑁄𑀓𑁂 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀼𑀢𑀸 𑀬𑀣𑀸𑀪𑀽𑀢𑀁 𑀯𑀺𑀧𑀲𑁆𑀲𑀺𑀲𑀼𑀁, 𑀯𑀺𑀚𑁆𑀚𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑀜𑁆𑀘 𑀳𑀺𑀢𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀕𑁄𑀢𑀫𑀁 𑀦𑀫𑀲𑁆𑀲𑀦𑁆𑀢𑀺, 𑀢𑁂 𑀚𑀦𑀸 𑀅𑀧𑀺𑀲𑀼𑀡𑀸, 𑀢𑁂𑀲𑀫𑁆𑀧𑀺 𑀦𑀫𑀢𑁆𑀣𑀽’’𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀢𑁂 𑀚𑀦𑀸 𑀅𑀧𑀺𑀲𑀼𑀡𑀸𑀢𑀺 𑀢𑁂 𑀩𑀼𑀤𑁆𑀥𑀸 𑀅𑀧𑀺𑀲𑀼𑀡𑀸𑀢𑀺 𑀏𑀯𑀁 𑀧𑀞𑀫𑀕𑀸𑀣𑀸𑀬 𑀩𑀼𑀤𑁆𑀥𑀸𑀦𑀁𑀬𑁂𑀯 𑀯𑀡𑁆𑀡𑁄 𑀓𑀣𑀺𑀢𑁄, 𑀢𑀲𑁆𑀫𑀸 𑀧𑀞𑀫𑀕𑀸𑀣𑀸 𑀲𑀢𑁆𑀢𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀸. 𑀤𑀼𑀢𑀺𑀬𑀕𑀸𑀣𑀸𑀬 ‘‘𑀕𑁄𑀢𑀫’’𑀦𑁆𑀢𑀺 𑀤𑁂𑀲𑀦𑀸𑀫𑀼𑀔𑀫𑀢𑁆𑀢𑀫𑁂𑀢𑀁. 𑀅𑀬𑀫𑁆𑀧𑀺 𑀳𑀺 𑀲𑀢𑁆𑀢𑀦𑁆𑀦𑀁𑀬𑁂𑀯 𑀯𑀲𑁂𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀮𑁄𑀓𑁂 𑀧𑀡𑁆𑀟𑀺𑀢𑀸 𑀤𑁂𑀯𑀫𑀦𑀼𑀲𑁆𑀲𑀸 𑀬𑀁 𑀦𑀫𑀲𑁆𑀲𑀦𑁆𑀢𑀺 𑀕𑁄𑀢𑀫𑀁, 𑀢𑀲𑁆𑀲 𑀘 𑀢𑀢𑁄 𑀧𑀼𑀭𑀺𑀫𑀸𑀦𑀜𑁆𑀘 𑀩𑀼𑀤𑁆𑀥𑀸𑀦𑀁 𑀦𑀫𑀢𑁆𑀣𑀽𑀢𑀺.

𑁨𑁭𑁮. 𑀬𑀢𑁄 𑀉𑀕𑁆𑀕𑀘𑁆𑀙𑀢𑀻𑀢𑀺 𑀬𑀢𑁄 𑀞𑀸𑀦𑀢𑁄 𑀉𑀤𑁂𑀢𑀺. 𑀆𑀤𑀺𑀘𑁆𑀘𑁄𑀢𑀺 𑀅𑀤𑀺𑀢𑀺𑀬𑀸 𑀧𑀼𑀢𑁆𑀢𑁄, 𑀯𑁂𑀯𑀘𑀦𑀫𑀢𑁆𑀢𑀁 𑀯𑀸 𑀏𑀢𑀁 𑀲𑀽𑀭𑀺𑀬𑀲𑀤𑁆𑀤𑀲𑁆𑀲. 𑀫𑀳𑀦𑁆𑀢𑀁 𑀫𑀡𑁆𑀟𑀮𑀁 𑀅𑀲𑁆𑀲𑀸𑀢𑀺 𑀫𑀡𑁆𑀟𑀮𑀻𑀫𑀳𑀸. 𑀬𑀲𑁆𑀲 𑀘𑀼𑀕𑁆𑀕𑀘𑁆𑀙𑀫𑀸𑀦𑀲𑁆𑀲𑀸𑀢𑀺 𑀬𑀫𑁆𑀳𑀺 𑀉𑀕𑁆𑀕𑀘𑁆𑀙𑀫𑀸𑀦𑁂. 𑀲𑀁𑀯𑀭𑀻𑀧𑀺 𑀦𑀺𑀭𑀼𑀚𑁆𑀛𑀢𑀻𑀢𑀺 𑀭𑀢𑁆𑀢𑀺 𑀅𑀦𑁆𑀢𑀭𑀥𑀸𑀬𑀢𑀺. 𑀬𑀲𑁆𑀲 𑀘𑀼𑀕𑁆𑀕𑀢𑁂𑀢𑀺 𑀬𑀲𑁆𑀫𑀺𑀁 𑀉𑀕𑁆𑀕𑀢𑁂.

𑀭𑀳𑀤𑁄𑀢𑀺 𑀉𑀤𑀓𑀭𑀳𑀤𑁄. 𑀢𑀢𑁆𑀣𑀸𑀢𑀺 𑀬𑀢𑁄 𑀉𑀕𑁆𑀕𑀘𑁆𑀙𑀢𑀺 𑀲𑀽𑀭𑀺𑀬𑁄, 𑀢𑀲𑁆𑀫𑀺𑀁 𑀞𑀸𑀦𑁂. 𑀲𑀫𑀼𑀤𑁆𑀤𑁄𑀢𑀺 𑀬𑁄 𑀲𑁄 𑀭𑀳𑀤𑁄𑀢𑀺 𑀯𑀼𑀢𑁆𑀢𑁄, 𑀲𑁄 𑀦 𑀅𑀜𑁆𑀜𑁄, 𑀅𑀣 𑀔𑁄 𑀲𑀫𑀼𑀤𑁆𑀤𑁄. 𑀲𑀭𑀺𑀢𑁄𑀤𑀓𑁄𑀢𑀺 𑀯𑀺𑀲𑀝𑁄𑀤𑀓𑁄, 𑀲𑀭𑀺𑀢𑀸 𑀦𑀸𑀦𑀧𑁆𑀧𑀓𑀸𑀭𑀸 𑀦𑀤𑀺𑀬𑁄 𑀅𑀲𑁆𑀲 𑀉𑀤𑀓𑁂 𑀧𑀯𑀺𑀝𑁆𑀞𑀸𑀢𑀺 𑀯𑀸 𑀲𑀭𑀺𑀢𑁄𑀤𑀓𑁄. 𑀏𑀯𑀁 𑀢𑀁 𑀢𑀢𑁆𑀣 𑀚𑀸𑀦𑀦𑁆𑀢𑀻𑀢𑀺 𑀢𑀁 𑀭𑀳𑀤𑀁 𑀢𑀢𑁆𑀣 𑀏𑀯𑀁 𑀚𑀸𑀦𑀦𑁆𑀢𑀺 ¶ . 𑀓𑀺𑀦𑁆𑀢𑀺 𑀚𑀸𑀦𑀦𑁆𑀢𑀺? 𑀲𑀫𑀼𑀤𑁆𑀤𑁄 𑀲𑀭𑀺𑀢𑁄𑀤𑀓𑁄𑀢𑀺 𑀏𑀯𑀁 𑀚𑀸𑀦𑀦𑁆𑀢𑀺.

𑀇𑀢𑁄𑀢𑀺 𑀲𑀺𑀦𑁂𑀭𑀼𑀢𑁄 𑀯𑀸 𑀢𑁂𑀲𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀢𑁄 𑀯𑀸. 𑀚𑀦𑁄𑀢𑀺 𑀅𑀬𑀁 𑀫𑀳𑀸𑀚𑀦𑁄. 𑀏𑀓𑀦𑀸𑀫𑀸𑀢𑀺 𑀇𑀦𑁆𑀤𑀦𑀸𑀫𑁂𑀦 𑀏𑀓𑀦𑀸𑀫𑀸. 𑀲𑀩𑁆𑀩𑁂𑀲𑀁 𑀓𑀺𑀭 𑀢𑁂𑀲𑀁 𑀲𑀓𑁆𑀓𑀲𑁆𑀲 𑀤𑁂𑀯𑀭𑀜𑁆𑀜𑁄 𑀦𑀸𑀫𑀫𑁂𑀯 𑀦𑀸𑀫𑀫𑀓𑀁𑀲𑀼. 𑀅𑀲𑀻𑀢𑀺 𑀤𑀲 𑀏𑀓𑁄 𑀘𑀸𑀢𑀺 𑀏𑀓𑀦𑀯𑀼𑀢𑀺𑀚𑀦𑀸. 𑀇𑀦𑁆𑀤𑀦𑀸𑀫𑀸𑀢𑀺 𑀇𑀦𑁆𑀤𑁄𑀢𑀺 𑀏𑀯𑀁𑀦𑀸𑀫𑀸. 𑀩𑀼𑀤𑁆𑀥𑀁 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀦𑁆𑀢𑀺 𑀓𑀺𑀮𑁂𑀲𑀦𑀺𑀤𑁆𑀤𑀸𑀧𑀕𑀫𑀦𑁂𑀦𑀸𑀧𑀺 𑀩𑀼𑀤𑁆𑀥𑀁. 𑀆𑀤𑀺𑀘𑁆𑀘𑁂𑀦 𑀲𑀫𑀸𑀦𑀕𑁄𑀢𑁆𑀢𑀢𑀸𑀬𑀧𑀺 𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀁. 𑀓𑀼𑀲𑀮𑁂𑀦 𑀲𑀫𑁂𑀓𑁆𑀔𑀲𑀻𑀢𑀺 𑀅𑀦𑀯𑀚𑁆𑀚𑁂𑀦 𑀦𑀺𑀧𑀼𑀡𑁂𑀦 𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀫𑀳𑀸𑀚𑀦𑀁 𑀑𑀮𑁄𑀓𑁂𑀲𑀺. 𑀅𑀫𑀦𑀼𑀲𑁆𑀲𑀸𑀧𑀺 𑀢𑀁 𑀯𑀦𑁆𑀤𑀦𑁆𑀢𑀻𑀢𑀺 𑀅𑀫𑀦𑀼𑀲𑁆𑀲𑀸𑀧𑀺 𑀢𑀁 ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 ¶ 𑀫𑀳𑀸𑀚𑀦𑀁 𑀑𑀮𑁄𑀓𑁂𑀲𑀻’’𑀢𑀺 𑀯𑀢𑁆𑀯𑀸 𑀯𑀦𑁆𑀤𑀦𑁆𑀢𑀺. 𑀲𑀼𑀢𑀁 𑀦𑁂𑀢𑀁 𑀅𑀪𑀺𑀡𑁆𑀳𑀲𑁄𑀢𑀺 𑀏𑀢𑀁 𑀅𑀫𑁆𑀳𑁂𑀳𑀺 𑀅𑀪𑀺𑀓𑁆𑀔𑀡𑀁 𑀲𑀼𑀢𑀁. 𑀚𑀺𑀦𑀁 𑀯𑀦𑁆𑀤𑀣 𑀕𑁄𑀢𑀫𑀁, 𑀚𑀺𑀦𑀁 𑀯𑀦𑁆𑀤𑀸𑀫 𑀕𑁄𑀢𑀫𑀦𑁆𑀢𑀺 𑀅𑀫𑁆𑀳𑁂𑀳𑀺 𑀧𑀼𑀝𑁆𑀞𑀸 𑀚𑀺𑀦𑀁 𑀯𑀦𑁆𑀤𑀸𑀫 𑀕𑁄𑀢𑀫𑀦𑁆𑀢𑀺 𑀯𑀤𑀦𑁆𑀢𑀺.

𑁨𑁭𑁯. 𑀬𑁂𑀦 ¶ 𑀧𑁂𑀢𑀸 𑀧𑀯𑀼𑀘𑁆𑀘𑀦𑁆𑀢𑀻𑀢𑀺 𑀧𑁂𑀢𑀸 𑀦𑀸𑀫 𑀓𑀸𑀮𑀗𑁆𑀓𑀢𑀸, 𑀢𑁂 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦 𑀦𑀻𑀳𑀭𑀺𑀬𑀦𑁆𑀢𑀽𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀺𑀲𑀼𑀡𑀸 𑀧𑀺𑀝𑁆𑀞𑀺𑀫𑀁𑀲𑀺𑀓𑀸𑀢𑀺 𑀧𑀺𑀲𑀼𑀡𑀸𑀯𑀸𑀘𑀸 𑀘𑁂𑀯 𑀧𑀺𑀝𑁆𑀞𑀺𑀫𑀁𑀲𑀁 𑀔𑀸𑀤𑀦𑁆𑀢𑀸 𑀯𑀺𑀬 𑀧𑀭𑀫𑁆𑀫𑀼𑀔𑀸 𑀕𑀭𑀳𑀓𑀸 𑀘. 𑀏𑀢𑁂 𑀘 𑀬𑁂𑀦 𑀦𑀻𑀳𑀭𑀺𑀬𑀦𑁆𑀢𑀽𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀲𑀩𑁆𑀩𑁂𑀧𑀺 𑀳𑁂𑀢𑁂 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀻𑀳𑀭𑀺𑀢𑁆𑀯𑀸 𑀤𑀓𑁆𑀔𑀺𑀡𑀢𑁄 𑀦𑀕𑀭𑀲𑁆𑀲 𑀟𑀬𑁆𑀳𑀦𑁆𑀢𑀼 𑀯𑀸 𑀙𑀺𑀚𑁆𑀚𑀦𑁆𑀢𑀼 𑀯𑀸 𑀳𑀜𑁆𑀜𑀦𑁆𑀢𑀼 𑀯𑀸𑀢𑀺 𑀏𑀯𑀁 𑀯𑀼𑀘𑁆𑀘𑀦𑁆𑀢𑀺. 𑀇𑀢𑁄 𑀲𑀸 𑀤𑀓𑁆𑀔𑀺𑀡𑀸 𑀤𑀺𑀲𑀸𑀢𑀺 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦 𑀢𑁂 𑀧𑁂𑀢𑀸 𑀘 𑀧𑀺𑀲𑀼𑀡𑀸𑀤𑀺𑀓𑀸 𑀘 𑀦𑀻𑀳𑀭𑀺𑀬𑀦𑁆𑀢𑀽𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀇𑀢𑁄 𑀲𑀸 𑀤𑀓𑁆𑀔𑀺𑀡𑀸 𑀤𑀺𑀲𑀸. 𑀇𑀢𑁄𑀢𑀺 𑀲𑀺𑀦𑁂𑀭𑀼𑀢𑁄 𑀯𑀸 𑀢𑁂𑀲𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀢𑁄 𑀯𑀸. 𑀓𑀼𑀫𑁆𑀪𑀡𑁆𑀟𑀸𑀦𑀦𑁆𑀢𑀺 𑀢𑁂 𑀓𑀺𑀭 𑀤𑁂𑀯𑀸 𑀫𑀳𑁄𑀤𑀭𑀸 𑀳𑁄𑀦𑁆𑀢𑀺, 𑀭𑀳𑀲𑁆𑀲𑀗𑁆𑀕𑀫𑁆𑀧𑀺 𑀘 𑀦𑁂𑀲𑀁 𑀓𑀼𑀫𑁆𑀪𑁄 𑀯𑀺𑀬 𑀫𑀳𑀦𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀓𑀼𑀫𑁆𑀪𑀡𑁆𑀟𑀸𑀢𑀺 𑀯𑀼𑀘𑁆𑀘𑀦𑁆𑀢𑀺.

𑁨𑁮𑁦. 𑀬𑀢𑁆𑀣 𑀘𑁄𑀕𑁆𑀕𑀘𑁆𑀙𑀢𑀺 𑀲𑀽𑀭𑀺𑀬𑁄𑀢𑀺 𑀬𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂 𑀲𑀽𑀭𑀺𑀬𑁄 𑀅𑀢𑁆𑀣𑀁 𑀕𑀘𑁆𑀙𑀢𑀺.

𑁨𑁮𑁧. 𑀬𑁂𑀦𑀸𑀢𑀺 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦. 𑀫𑀳𑀸𑀦𑁂𑀭𑀽𑀢𑀺 𑀫𑀳𑀸𑀲𑀺𑀦𑁂𑀭𑀼 𑀧𑀩𑁆𑀩𑀢𑀭𑀸𑀚𑀸. 𑀲𑀼𑀤𑀲𑁆𑀲𑀦𑁄𑀢𑀺 𑀲𑁄𑀯𑀡𑁆𑀡𑀫𑀬𑀢𑁆𑀢𑀸 𑀲𑀼𑀦𑁆𑀤𑀭𑀤𑀲𑁆𑀲𑀦𑁄. 𑀲𑀺𑀦𑁂𑀭𑀼𑀲𑁆𑀲 𑀳𑀺 𑀧𑀸𑀘𑀻𑀦𑀧𑀲𑁆𑀲𑀁 𑀭𑀚𑀢𑀫𑀬𑀁, 𑀤𑀓𑁆𑀔𑀺𑀡𑀧𑀲𑁆𑀲𑀁 𑀫𑀡𑀺𑀫𑀬𑀁 ¶ , 𑀧𑀘𑁆𑀙𑀺𑀫𑀧𑀲𑁆𑀲𑀁 𑀨𑀮𑀺𑀓𑀫𑀬𑀁, 𑀉𑀢𑁆𑀢𑀭𑀧𑀲𑁆𑀲𑀁 𑀲𑁄𑀯𑀡𑁆𑀡𑀫𑀬𑀁, 𑀢𑀁 𑀫𑀦𑀼𑀜𑁆𑀜𑀤𑀲𑁆𑀲𑀦𑀁 𑀳𑁄𑀢𑀺. 𑀢𑀲𑁆𑀫𑀸 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦 𑀲𑀺𑀦𑁂𑀭𑀼 𑀲𑀼𑀤𑀲𑁆𑀲𑀦𑁄𑀢𑀺 𑀅𑀬𑀫𑁂𑀢𑁆𑀣𑀢𑁆𑀣𑁄. 𑀫𑀦𑀼𑀲𑁆𑀲𑀸 𑀢𑀢𑁆𑀣 𑀚𑀸𑀬𑀦𑁆𑀢𑀻𑀢𑀺 𑀢𑀢𑁆𑀣 𑀉𑀢𑁆𑀢𑀭𑀓𑀼𑀭𑀼𑀫𑁆𑀳𑀺 𑀫𑀦𑀼𑀲𑁆𑀲𑀸 𑀚𑀸𑀬𑀦𑁆𑀢𑀺. 𑀅𑀫𑀫𑀸𑀢𑀺 𑀯𑀢𑁆𑀣𑀸𑀪𑀭𑀡𑀧𑀸𑀦𑀪𑁄𑀚𑀦𑀸𑀤𑀻𑀲𑀼𑀧𑀺 𑀫𑀫𑀢𑁆𑀢𑀯𑀺𑀭𑀳𑀺𑀢𑀸. 𑀅𑀧𑀭𑀺𑀕𑁆𑀕𑀳𑀸𑀢𑀺 𑀇𑀢𑁆𑀣𑀺𑀧𑀭𑀺𑀕𑁆𑀕𑀳𑁂𑀦 𑀅𑀧𑀭𑀺𑀕𑁆𑀕𑀳𑀸. 𑀢𑁂𑀲𑀁 𑀓𑀺𑀭 ‘‘𑀅𑀬𑀁 𑀫𑀬𑁆𑀳𑀁 𑀪𑀭𑀺𑀬𑀸’’𑀢𑀺 𑀫𑀫𑀢𑁆𑀢𑀁 𑀦 𑀳𑁄𑀢𑀺, 𑀫𑀸𑀢𑀭𑀁 𑀯𑀸 𑀪𑀕𑀺𑀦𑀺𑀁 𑀯𑀸 𑀤𑀺𑀲𑁆𑀯𑀸 𑀙𑀦𑁆𑀤𑀭𑀸𑀕𑁄 𑀦𑀼𑀧𑁆𑀧𑀚𑁆𑀚𑀢𑀺.

𑀦𑀧𑀺 𑀦𑀻𑀬𑀦𑁆𑀢𑀺 𑀦𑀗𑁆𑀕𑀮𑀸𑀢𑀺 𑀦𑀗𑁆𑀕𑀮𑀸𑀦𑀺𑀧𑀺 𑀢𑀢𑁆𑀣 ‘‘𑀓𑀲𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀦 𑀔𑁂𑀢𑁆𑀢𑀁 𑀦𑀻𑀬𑀦𑁆𑀢𑀺. 𑀅𑀓𑀝𑁆𑀞𑀧𑀸𑀓𑀺𑀫𑀦𑁆𑀢𑀺 𑀅𑀓𑀝𑁆𑀞𑁂 𑀪𑀽𑀫𑀺𑀪𑀸𑀕𑁂 𑀅𑀭𑀜𑁆𑀜𑁂 𑀲𑀬𑀫𑁂𑀯 𑀚𑀸𑀢𑀁. 𑀢𑀡𑁆𑀟𑀼𑀮𑀧𑁆𑀨𑀮𑀦𑁆𑀢𑀺 𑀢𑀡𑁆𑀟𑀼𑀮𑀸𑀯 𑀢𑀲𑁆𑀲 𑀨𑀮𑀁 𑀳𑁄𑀢𑀺.

𑀢𑀼𑀡𑁆𑀟𑀺𑀓𑀻𑀭𑁂 𑀧𑀘𑀺𑀢𑁆𑀯𑀸𑀦𑀸𑀢𑀺 𑀉𑀓𑁆𑀔𑀮𑀺𑀬𑀁 𑀆𑀓𑀺𑀭𑀺𑀢𑁆𑀯𑀸 𑀦𑀺𑀤𑁆𑀥𑀼𑀫𑀗𑁆𑀕𑀸𑀭𑁂𑀦 𑀅𑀕𑁆𑀕𑀺𑀦𑀸 𑀧𑀘𑀺𑀢𑁆𑀯𑀸. 𑀢𑀢𑁆𑀣 𑀓𑀺𑀭 𑀚𑁄𑀢𑀺𑀓𑀧𑀸𑀲𑀸𑀡𑀸 𑀦𑀸𑀫 𑀳𑁄𑀦𑁆𑀢𑀺. 𑀅𑀣 ¶ 𑀔𑁄 𑀢𑁂 𑀢𑀬𑁄 𑀧𑀸𑀲𑀸𑀡𑁂 𑀞𑀧𑁂𑀢𑁆𑀯𑀸 𑀢𑀁 𑀉𑀓𑁆𑀔𑀮𑀺𑀁 𑀆𑀭𑁄𑀧𑁂𑀦𑁆𑀢𑀺. 𑀧𑀸𑀲𑀸𑀡𑁂𑀳𑀺 𑀢𑁂𑀚𑁄 𑀲𑀫𑀼𑀝𑁆𑀞𑀳𑀺𑀢𑁆𑀯𑀸 𑀢𑀁 𑀧𑀘𑀢𑀺. 𑀢𑀢𑁄 𑀪𑀼𑀜𑁆𑀚𑀦𑁆𑀢𑀺 𑀪𑁄𑀚𑀦𑀦𑁆𑀢𑀺 𑀢𑀢𑁄 𑀉𑀓𑁆𑀔𑀮𑀺𑀢𑁄 𑀪𑁄𑀚𑀦𑀫𑁂𑀯 𑀪𑀼𑀜𑁆𑀚𑀦𑁆𑀢𑀺, 𑀅𑀜𑁆𑀜𑁄 𑀲𑀽𑀧𑁄 𑀯𑀸 𑀩𑁆𑀬𑀜𑁆𑀚𑀦𑀁 𑀯𑀸 𑀦 𑀳𑁄𑀢𑀺, 𑀪𑀼𑀜𑁆𑀚𑀦𑁆𑀢𑀸𑀦𑀁 𑀘𑀺𑀢𑁆𑀢𑀸𑀦𑀼𑀓𑀽𑀮𑁄𑀬𑁂𑀯𑀲𑁆𑀲 𑀭𑀲𑁄 𑀳𑁄𑀢𑀺. 𑀢𑁂 𑀢𑀁 𑀞𑀸𑀦𑀁 𑀲𑀫𑁆𑀧𑀢𑁆𑀢𑀸𑀦𑀁 𑀤𑁂𑀦𑁆𑀢𑀺𑀬𑁂𑀯, 𑀫𑀘𑁆𑀙𑀭𑀺𑀬𑀘𑀺𑀢𑁆𑀢𑀁 𑀦𑀸𑀫 𑀦 𑀳𑁄𑀢𑀺. 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀬𑁄𑀧𑀺 𑀫𑀳𑀺𑀤𑁆𑀥𑀺𑀓𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀕𑀡𑁆𑀳𑀦𑁆𑀢𑀺.

𑀕𑀸𑀯𑀺𑀁 ¶ 𑀏𑀓𑀔𑀼𑀭𑀁 𑀓𑀢𑁆𑀯𑀸𑀢𑀺 𑀕𑀸𑀯𑀺𑀁 𑀕𑀳𑁂𑀢𑁆𑀯𑀸 𑀏𑀓𑀔𑀼𑀭𑀁 𑀯𑀸𑀳𑀦𑀫𑁂𑀯 𑀓𑀢𑁆𑀯𑀸. 𑀢𑀁 𑀅𑀪𑀺𑀭𑀼𑀬𑁆𑀳 𑀯𑁂𑀲𑁆𑀲𑀯𑀡𑀲𑁆𑀲 𑀧𑀭𑀺𑀘𑀸𑀭𑀓𑀸 𑀬𑀓𑁆𑀔𑀸. 𑀅𑀦𑀼𑀬𑀦𑁆𑀢𑀺 𑀤𑀺𑀲𑁄𑀤𑀺𑀲𑀦𑁆𑀢𑀺 𑀢𑀸𑀬 𑀢𑀸𑀬 𑀤𑀺𑀲𑀸𑀬 𑀘𑀭𑀦𑁆𑀢𑀺. 𑀧𑀲𑀼𑀁 𑀏𑀓𑀔𑀼𑀭𑀁 𑀓𑀢𑁆𑀯𑀸𑀢𑀺 𑀞𑀧𑁂𑀢𑁆𑀯𑀸 𑀕𑀸𑀯𑀺𑀁 𑀅𑀯𑀲𑁂𑀲𑀘𑀢𑀼𑀧𑁆𑀧𑀤𑀚𑀸𑀢𑀺𑀓𑀁 𑀧𑀲𑀼𑀁 𑀏𑀓𑀔𑀼𑀭𑀁 𑀯𑀸𑀳𑀦𑀫𑁂𑀯 𑀓𑀢𑁆𑀯𑀸 𑀤𑀺𑀲𑁄𑀤𑀺𑀲𑀁 𑀅𑀦𑀼𑀬𑀦𑁆𑀢𑀺.

𑀇𑀢𑁆𑀣𑀺𑀁 𑀯𑀸 𑀯𑀸𑀳𑀦𑀁 𑀓𑀢𑁆𑀯𑀸𑀢𑀺 𑀬𑁂𑀪𑀼𑀬𑁆𑀬𑁂𑀦 𑀕𑀩𑁆𑀪𑀺𑀦𑀺𑀁 𑀫𑀸𑀢𑀼𑀕𑀸𑀫𑀁 𑀯𑀸𑀳𑀦𑀁 𑀓𑀭𑀺𑀢𑁆𑀯𑀸. 𑀢𑀲𑁆𑀲𑀸 𑀧𑀺𑀝𑁆𑀞𑀺𑀬𑀸 𑀦𑀺𑀲𑀻𑀤𑀺𑀢𑁆𑀯𑀸 𑀘𑀭𑀦𑁆𑀢𑀺. 𑀢𑀲𑁆𑀲𑀸 𑀓𑀺𑀭 𑀧𑀺𑀝𑁆𑀞𑀺 𑀑𑀦𑀫𑀺𑀢𑀼𑀁 𑀲𑀳𑀢𑀺. 𑀇𑀢𑀭𑀸 𑀧𑀦 𑀇𑀢𑁆𑀣𑀺𑀬𑁄 𑀬𑀸𑀦𑁂 𑀬𑁄𑀚𑁂𑀦𑁆𑀢𑀺. 𑀧𑀼𑀭𑀺𑀲𑀁 𑀯𑀸𑀳𑀦𑀁 𑀓𑀢𑁆𑀯𑀸𑀢𑀺 𑀧𑀼𑀭𑀺𑀲𑁂 𑀕𑀳𑁂𑀢𑁆𑀯𑀸 𑀬𑀸𑀦𑁂 𑀬𑁄𑀚𑁂𑀦𑁆𑀢𑀺. 𑀕𑀡𑁆𑀳𑀦𑁆𑀢𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁂 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀬𑁂𑀪𑀼𑀬𑁆𑀬𑁂𑀦 𑀧𑀘𑁆𑀘𑀦𑁆𑀢𑀺𑀫𑀫𑀺𑀮𑀓𑁆𑀔𑀼𑀯𑀸𑀲𑀺𑀓𑁂 𑀕𑀡𑁆𑀳𑀦𑁆𑀢𑀺. 𑀅𑀜𑁆𑀜𑀢𑀭𑁄 𑀓𑀺𑀭𑁂𑀢𑁆𑀣 ¶ 𑀚𑀸𑀦𑀧𑀤𑁄 𑀏𑀓𑀲𑁆𑀲 𑀣𑁂𑀭𑀲𑁆𑀲 𑀲𑀫𑀻𑀧𑁂 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀢𑀺, 𑀣𑁂𑀭𑁄 ‘‘𑀉𑀧𑀸𑀲𑀓 𑀅𑀢𑀺𑀯𑀺𑀬 𑀦𑀺𑀤𑁆𑀤𑀸𑀬𑀲𑀻’’𑀢𑀺 𑀧𑀼𑀘𑁆𑀙𑀺. ‘‘𑀅𑀚𑁆𑀚, 𑀪𑀦𑁆𑀢𑁂, 𑀲𑀩𑁆𑀩𑀭𑀢𑁆𑀢𑀺𑀁 𑀯𑁂𑀲𑁆𑀲𑀯𑀡𑀤𑀸𑀲𑁂𑀳𑀺 𑀓𑀺𑀮𑀫𑀺𑀢𑁄𑀫𑁆𑀳𑀻’’𑀢𑀺 𑀆𑀳.

𑀓𑀼𑀫𑀸𑀭𑀺𑀁 𑀯𑀸𑀳𑀦𑀁 𑀓𑀢𑁆𑀯𑀸𑀢𑀺 𑀓𑀼𑀫𑀸𑀭𑀺𑀬𑁄 𑀕𑀳𑁂𑀢𑁆𑀯𑀸 𑀏𑀓𑀔𑀼𑀭𑀁 𑀯𑀸𑀳𑀦𑀁 𑀓𑀢𑁆𑀯𑀸 𑀭𑀣𑁂 𑀬𑁄𑀚𑁂𑀦𑁆𑀢𑀺. 𑀓𑀼𑀫𑀸𑀭𑀯𑀸𑀳𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀘𑀸𑀭𑀸 𑀢𑀲𑁆𑀲 𑀭𑀸𑀚𑀺𑀦𑁄𑀢𑀺 𑀢𑀲𑁆𑀲 𑀭𑀜𑁆𑀜𑁄 𑀧𑀭𑀺𑀘𑀸𑀭𑀺𑀓𑀸. 𑀳𑀢𑁆𑀣𑀺𑀬𑀸𑀦𑀁 𑀅𑀲𑁆𑀲𑀬𑀸𑀦𑀦𑁆𑀢𑀺 𑀦 𑀓𑁂𑀯𑀮𑀁 𑀕𑁄𑀬𑀸𑀦𑀸𑀤𑀻𑀦𑀺𑀬𑁂𑀯, 𑀳𑀢𑁆𑀣𑀺𑀅𑀲𑁆𑀲𑀬𑀸𑀦𑀸𑀤𑀻𑀦𑀺𑀧𑀺 𑀅𑀪𑀺𑀭𑀼𑀳𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑀺. 𑀤𑀺𑀩𑁆𑀩𑀁 𑀬𑀸𑀦𑀦𑁆𑀢𑀺 𑀅𑀜𑁆𑀜𑀫𑁆𑀧𑀺 𑀦𑁂𑀲𑀁 𑀩𑀳𑀼𑀯𑀺𑀥𑀁 𑀤𑀺𑀩𑁆𑀩𑀬𑀸𑀦𑀁 𑀉𑀧𑀝𑁆𑀞𑀺𑀢𑀫𑁂𑀯 𑀳𑁄𑀢𑀺, 𑀏𑀢𑀸𑀦𑀺 𑀢𑀸𑀯 𑀦𑁂𑀲𑀁 𑀉𑀧𑀓𑀧𑁆𑀧𑀦𑀬𑀸𑀦𑀸𑀦𑀺. 𑀢𑁂 𑀧𑀦 𑀧𑀸𑀲𑀸𑀤𑁂 𑀯𑀭𑀲𑀬𑀦𑀫𑁆𑀳𑀺 𑀦𑀺𑀧𑀦𑁆𑀦𑀸𑀧𑀺 𑀧𑀻𑀞𑀲𑀺𑀯𑀺𑀓𑀸𑀤𑀻𑀲𑀼 𑀘 𑀦𑀺𑀲𑀺𑀦𑁆𑀦𑀸𑀧𑀺 𑀯𑀺𑀘𑀭𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀸𑀲𑀸𑀤𑀸 𑀲𑀺𑀯𑀺𑀓𑀸 𑀘𑁂𑀯𑀸’’𑀢𑀺. 𑀫𑀳𑀸𑀭𑀸𑀚𑀲𑁆𑀲 𑀬𑀲𑀲𑁆𑀲𑀺𑀦𑁄𑀢𑀺 𑀏𑀯𑀁 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑀲𑁆𑀲 𑀬𑀲𑀲𑁆𑀲𑀺𑀦𑁄 𑀫𑀳𑀸𑀭𑀸𑀚𑀲𑁆𑀲 𑀏𑀢𑀸𑀦𑀺 𑀬𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺.

𑀢𑀲𑁆𑀲 ¶ 𑀘 𑀦𑀕𑀭𑀸 𑀅𑀳𑀼 𑀅𑀦𑁆𑀢𑀮𑀺𑀓𑁆𑀔𑁂 𑀲𑀼𑀫𑀸𑀧𑀺𑀢𑀸𑀢𑀺 𑀢𑀲𑁆𑀲 𑀭𑀜𑁆𑀜𑁄 𑀆𑀓𑀸𑀲𑁂 𑀲𑀼𑀝𑁆𑀞𑀼 𑀫𑀸𑀧𑀺𑀢𑀸 𑀏𑀢𑁂 𑀆𑀝𑀸𑀦𑀸𑀝𑀸𑀤𑀺𑀓𑀸 𑀦𑀕𑀭𑀸 𑀅𑀳𑁂𑀲𑀼𑀁, 𑀦𑀕𑀭𑀸𑀦𑀺 𑀪𑀯𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀏𑀓𑀜𑁆𑀳𑀺𑀲𑁆𑀲 𑀦𑀕𑀭𑀁 𑀆𑀝𑀸𑀦𑀸𑀝𑀸 𑀦𑀸𑀫 𑀆𑀲𑀺, 𑀏𑀓𑀁 𑀓𑀼𑀲𑀺𑀦𑀸𑀝𑀸 𑀦𑀸𑀫, 𑀏𑀓𑀁 𑀧𑀭𑀓𑀼𑀲𑀺𑀦𑀸𑀝𑀸 𑀦𑀸𑀫, 𑀏𑀓𑀁 𑀦𑀸𑀝𑀲𑀽𑀭𑀺𑀬𑀸 𑀦𑀸𑀫, 𑀏𑀓𑀁 𑀧𑀭𑀓𑀼𑀲𑀺𑀝𑀦𑀸𑀝𑀸 𑀦𑀸𑀫.

𑀉𑀢𑁆𑀢𑀭𑁂𑀦 𑀓𑀲𑀺𑀯𑀦𑁆𑀢𑁄𑀢𑀺 𑀢𑀲𑁆𑀫𑀺𑀁 𑀞𑀢𑁆𑀯𑀸 𑀉𑀚𑀼𑀁 𑀉𑀢𑁆𑀢𑀭𑀤𑀺𑀲𑀸𑀬 𑀓𑀲𑀺𑀯𑀦𑁆𑀢𑁄 𑀦𑀸𑀫 𑀅𑀜𑁆𑀜𑀁 𑀦𑀕𑀭𑀁. 𑀚𑀦𑁄𑀖𑀫𑀧𑀭𑁂𑀦 𑀘𑀸𑀢𑀺 𑀏𑀢𑀲𑁆𑀲 𑀅𑀧𑀭𑀪𑀸𑀕𑁂 𑀚𑀦𑁄𑀖𑀁 𑀦𑀸𑀫 𑀅𑀜𑁆𑀜𑀁 𑀦𑀕𑀭𑀁. 𑀦𑀯𑀦𑀯𑀢𑀺𑀬𑁄𑀢𑀺 𑀅𑀜𑁆𑀜𑀫𑁆𑀧𑀺 𑀦𑀯𑀦𑀯𑀢𑀺𑀬𑁄 𑀦𑀸𑀫 𑀏𑀓𑀁 𑀦𑀕𑀭𑀁. 𑀅𑀧𑀭𑀁 𑀅𑀫𑁆𑀩𑀭𑀅𑀫𑁆𑀩𑀭𑀯𑀢𑀺𑀬𑁄 𑀦𑀸𑀫. 𑀆𑀴𑀓𑀫𑀦𑁆𑀤𑀸𑀢𑀺 𑀅𑀧𑀭𑀫𑁆𑀧𑀺 𑀆𑀴𑀓𑀫𑀦𑁆𑀤𑀸 𑀦𑀸𑀫 𑀭𑀸𑀚𑀥𑀸𑀦𑀻.

𑀢𑀲𑁆𑀫𑀸 ¶ 𑀓𑀼𑀯𑁂𑀭𑁄 𑀫𑀳𑀸𑀭𑀸𑀚𑀸𑀢𑀺 𑀅𑀬𑀁 𑀓𑀺𑀭 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀓𑀼𑀯𑁂𑀭𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀳𑀼𑀢𑁆𑀯𑀸 𑀉𑀘𑁆𑀙𑀼𑀯𑀧𑁆𑀧𑀁 𑀓𑀸𑀭𑁂𑀢𑁆𑀯𑀸 𑀲𑀢𑁆𑀢 𑀬𑀦𑁆𑀢𑀸𑀦𑀺 𑀬𑁄𑀚𑁂𑀲𑀺. 𑀏𑀓𑀺𑀲𑁆𑀲𑀸𑀬 𑀬𑀦𑁆𑀢𑀲𑀸𑀮𑀸𑀬 𑀉𑀝𑁆𑀞𑀺𑀢𑀁 𑀆𑀬𑀁 𑀆𑀕𑀢𑀸𑀕𑀢𑀲𑁆𑀲 𑀫𑀳𑀸𑀚𑀦𑀲𑁆𑀲 𑀤𑀢𑁆𑀯𑀸 𑀧𑀼𑀜𑁆𑀜𑀁 𑀅𑀓𑀸𑀲𑀺. 𑀅𑀯𑀲𑁂𑀲𑀲𑀸𑀮𑀸𑀳𑀺 𑀢𑀢𑁆𑀣𑁂𑀯 𑀩𑀳𑀼𑀢𑀭𑁄 𑀆𑀬𑁄 𑀉𑀝𑁆𑀞𑀸𑀲𑀺, 𑀲𑁄 𑀢𑁂𑀦 𑀧𑀲𑀻𑀤𑀺𑀢𑁆𑀯𑀸 𑀅𑀯𑀲𑁂𑀲𑀲𑀸𑀮𑀸𑀲𑀼𑀧𑀺 𑀉𑀧𑁆𑀧𑀚𑁆𑀚𑀦𑀓𑀁 𑀕𑀳𑁂𑀢𑁆𑀯𑀸 𑀯𑀻𑀲𑀢𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀤𑀸𑀦𑀁 𑀅𑀤𑀸𑀲𑀺. 𑀲𑁄 𑀓𑀸𑀮𑀁 𑀓𑀢𑁆𑀯𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂𑀲𑀼 𑀓𑀼𑀯𑁂𑀭𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀚𑀸𑀢𑁄. 𑀅𑀧𑀭𑀪𑀸𑀕𑁂 𑀯𑀺𑀲𑀸𑀡𑀸𑀬 𑀭𑀸𑀚𑀥𑀸𑀦𑀺𑀬𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀯𑁂𑀲𑁆𑀲𑀯𑀡𑁄𑀢𑀺 𑀯𑀼𑀘𑁆𑀘𑀢𑀺.

𑀧𑀘𑁆𑀘𑁂𑀲𑀦𑁆𑀢𑁄 𑀧𑀓𑀸𑀲𑁂𑀦𑁆𑀢𑀻𑀢𑀺 𑀧𑀝𑀺𑀏𑀲𑀦𑁆𑀢𑁄 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀢𑁆𑀣𑁂 𑀉𑀧𑀧𑀭𑀺𑀓𑁆𑀔𑀫𑀸𑀦𑀸 ¶ 𑀅𑀦𑀼𑀲𑀸𑀲𑀫𑀸𑀦𑀸 𑀅𑀜𑁆𑀜𑁂 𑀤𑁆𑀯𑀸𑀤𑀲 𑀬𑀓𑁆𑀔𑀭𑀝𑁆𑀞𑀺𑀓𑀸 𑀧𑀓𑀸𑀲𑁂𑀦𑁆𑀢𑀺. 𑀢𑁂 𑀓𑀺𑀭 𑀬𑀓𑁆𑀔𑀭𑀝𑁆𑀞𑀺𑀓𑀸 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀤𑁆𑀯𑀸𑀤𑀲𑀦𑁆𑀦𑀁 𑀬𑀓𑁆𑀔𑀤𑁄𑀯𑀸𑀭𑀺𑀓𑀸𑀦𑀁 𑀦𑀺𑀯𑁂𑀤𑁂𑀦𑁆𑀢𑀺. 𑀬𑀓𑁆𑀔𑀤𑁄𑀯𑀸𑀭𑀺𑀓𑀸 𑀢𑀁 𑀲𑀸𑀲𑀦𑀁 𑀫𑀳𑀸𑀭𑀸𑀚𑀲𑁆𑀲 𑀦𑀺𑀯𑁂𑀤𑁂𑀦𑁆𑀢𑀺. 𑀇𑀤𑀸𑀦𑀺 𑀢𑁂𑀲𑀁 𑀬𑀓𑁆𑀔𑀭𑀝𑁆𑀞𑀺𑀓𑀸𑀦𑀁 𑀦𑀸𑀫𑀁 𑀤𑀲𑁆𑀲𑁂𑀦𑁆𑀢𑁄 𑀢𑀢𑁄𑀮𑀸𑀢𑀺𑀆𑀤𑀺𑀫𑀸𑀳. 𑀢𑁂𑀲𑀼 𑀓𑀺𑀭 𑀏𑀓𑁄 𑀢𑀢𑁄𑀮𑀸 𑀦𑀸𑀫, 𑀏𑀓𑁄 𑀢𑀢𑁆𑀢𑀮𑀸 𑀦𑀸𑀫, 𑀏𑀓𑁄 𑀢𑀢𑁄𑀢𑀮𑀸 𑀦𑀸𑀫, 𑀏𑀓𑁄 𑀑𑀚𑀲𑀺 𑀦𑀸𑀫, 𑀏𑀓𑁄 𑀢𑁂𑀚𑀲𑀺 𑀦𑀸𑀫, 𑀏𑀓𑁄 𑀢𑀢𑁄𑀚𑀲𑀻 𑀦𑀸𑀫. 𑀲𑀽𑀭𑁄 𑀭𑀸𑀚𑀸𑀢𑀺 𑀏𑀓𑁄 𑀲𑀽𑀭𑁄 𑀦𑀸𑀫, 𑀏𑀓𑁄 𑀭𑀸𑀚𑀸 𑀦𑀸𑀫, 𑀏𑀓𑁄 𑀲𑀽𑀭𑁄𑀭𑀸𑀚𑀸 𑀦𑀸𑀫, 𑀅𑀭𑀺𑀝𑁆𑀞𑁄 𑀦𑁂𑀫𑀻𑀢𑀺 𑀏𑀓𑁄 𑀅𑀭𑀺𑀝𑁆𑀞𑁄 𑀦𑀸𑀫, 𑀏𑀓𑁄 𑀦𑁂𑀫𑀺 𑀦𑀸𑀫, 𑀏𑀓𑁄 𑀅𑀭𑀺𑀝𑁆𑀞𑀦𑁂𑀫𑀺 𑀦𑀸𑀫.

𑀭𑀳𑀤𑁄𑀧𑀺 ¶ 𑀢𑀢𑁆𑀣 𑀥𑀭𑀡𑀻 𑀦𑀸𑀫𑀸𑀢𑀺 𑀢𑀢𑁆𑀣 𑀧𑀦𑁂𑀓𑁄 𑀦𑀸𑀫𑁂𑀦 𑀥𑀭𑀡𑀻 𑀦𑀸𑀫 𑀉𑀤𑀓𑀭𑀳𑀤𑁄 𑀅𑀢𑁆𑀣𑀺, 𑀧𑀡𑁆𑀡𑀸𑀲𑀬𑁄𑀚𑀦𑀸 𑀫𑀳𑀸𑀧𑁄𑀓𑁆𑀔𑀭𑀡𑀻 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀢𑁄 𑀫𑁂𑀖𑀸 𑀧𑀯𑀲𑁆𑀲𑀦𑁆𑀢𑀻𑀢𑀺 𑀬𑀢𑁄 𑀧𑁄𑀓𑁆𑀔𑀭𑀡𑀺𑀢𑁄 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀫𑁂𑀖𑀸 𑀧𑀯𑀲𑁆𑀲𑀦𑁆𑀢𑀺. 𑀯𑀲𑁆𑀲𑀸 𑀬𑀢𑁄 𑀧𑀢𑀸𑀬𑀦𑁆𑀢𑀻𑀢𑀺 𑀬𑀢𑁄 𑀯𑀼𑀝𑁆𑀞𑀺𑀬𑁄 𑀅𑀯𑀢𑁆𑀣𑀭𑀫𑀸𑀦𑀸 𑀦𑀺𑀕𑀘𑁆𑀙𑀦𑁆𑀢𑀺. 𑀫𑁂𑀖𑁂𑀲𑀼 𑀓𑀺𑀭 𑀉𑀝𑁆𑀞𑀺𑀢𑁂𑀲𑀼 𑀢𑀢𑁄 𑀧𑁄𑀓𑁆𑀔𑀭𑀡𑀺𑀢𑁄 𑀧𑀼𑀭𑀸𑀡𑀉𑀤𑀓𑀁 𑀪𑀲𑁆𑀲𑀢𑀺. 𑀉𑀧𑀭𑀺 𑀫𑁂𑀖𑁄 𑀉𑀝𑁆𑀞𑀳𑀺𑀢𑁆𑀯𑀸 𑀢𑀁 𑀧𑁄𑀓𑁆𑀔𑀭𑀡𑀺𑀁 𑀦𑀯𑁄𑀤𑀓𑁂𑀦 𑀧𑀽𑀭𑁂𑀢𑀺. 𑀧𑀼𑀭𑀸𑀡𑁄𑀤𑀓𑀁 𑀳𑁂𑀝𑁆𑀞𑀺𑀫𑀁 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀢𑀺. 𑀧𑀭𑀺𑀧𑀼𑀡𑁆𑀡𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀯𑀮𑀸𑀳𑀓𑀸 𑀯𑀺𑀕𑀘𑁆𑀙𑀦𑁆𑀢𑀺. 𑀲𑀪𑀸𑀧𑀻𑀢𑀺 𑀲𑀪𑀸. 𑀢𑀲𑁆𑀲𑀸 𑀓𑀺𑀭 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀲𑀸𑀮𑀯𑀢𑀺𑀬𑀸 𑀦𑀸𑀫 𑀮𑀢𑀸𑀬 𑀧𑀭𑀺𑀓𑁆𑀔𑀺𑀢𑁆𑀢𑁄 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑁄 𑀭𑀢𑀦𑀫𑀡𑁆𑀟𑀧𑁄 𑀅𑀢𑁆𑀣𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀧𑀬𑀺𑀭𑀼𑀧𑀸𑀲𑀦𑁆𑀢𑀻𑀢𑀺 𑀦𑀺𑀲𑀻𑀤𑀦𑁆𑀢𑀺. 𑀢𑀢𑁆𑀣 𑀦𑀺𑀘𑁆𑀘𑀨𑀮𑀸 𑀭𑀼𑀓𑁆𑀔𑀸𑀢𑀺 𑀢𑀲𑁆𑀫𑀺𑀁 𑀞𑀸𑀦𑁂 𑀢𑀁 𑀫𑀡𑁆𑀟𑀧𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀲𑀤𑀸 𑀨𑀮𑀺𑀢𑀸 𑀅𑀫𑁆𑀩𑀚𑀫𑁆𑀩𑀼𑀆𑀤𑀬𑁄 𑀭𑀼𑀓𑁆𑀔𑀸 𑀦𑀺𑀘𑁆𑀘𑀧𑀼𑀧𑁆𑀨𑀺𑀢𑀸 𑀘 𑀘𑀫𑁆𑀧𑀓𑀫𑀸𑀮𑀸𑀤𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀦𑀸𑀦𑀸𑀤𑀺𑀚𑀕𑀡𑀸𑀬𑀼𑀢𑀸𑀢𑀺 𑀯𑀺𑀯𑀺𑀥𑀧𑀓𑁆𑀔𑀺𑀲𑀗𑁆𑀖𑀲𑀫𑀸𑀓𑀼𑀮𑀸. 𑀫𑀬𑀽𑀭𑀓𑁄𑀜𑁆𑀘𑀸𑀪𑀺𑀭𑀼𑀤𑀸𑀢𑀺 𑀫𑀬𑀽𑀭𑁂𑀳𑀺 𑀓𑁄𑀜𑁆𑀘𑀲𑀓𑀼𑀡𑁂𑀳𑀺 𑀘 𑀅𑀪𑀺𑀭𑀼𑀤𑀸 𑀉𑀧𑀕𑀻𑀢𑀸.

𑀚𑀻𑀯𑀜𑁆𑀚𑀻𑀯𑀓𑀲𑀤𑁆𑀤𑁂𑀢𑁆𑀣𑀸𑀢𑀺 ‘‘𑀚𑀻𑀯 𑀚𑀻𑀯𑀸’’𑀢𑀺 𑀏𑀯𑀁 𑀯𑀺𑀭𑀯𑀦𑁆𑀢𑀸𑀦𑀁 𑀚𑀻𑀯𑀜𑁆𑀚𑀻𑀯𑀓𑀲𑀓𑀼𑀡𑀸𑀦𑀫𑁆𑀧𑀺 𑀏𑀢𑁆𑀣 𑀲𑀤𑁆𑀤𑁄 ¶ 𑀅𑀢𑁆𑀣𑀺. 𑀑𑀝𑁆𑀞𑀯𑀘𑀺𑀢𑁆𑀢𑀓𑀸𑀢𑀺 ‘‘𑀉𑀝𑁆𑀞𑁂𑀳𑀺, 𑀘𑀺𑀢𑁆𑀢, 𑀉𑀝𑁆𑀞𑁂𑀳𑀺 𑀘𑀺𑀢𑁆𑀢𑀸’’𑀢𑀺 𑀏𑀯𑀁 𑀯𑀲𑁆𑀲𑀫𑀸𑀦𑀸 𑀉𑀝𑁆𑀞𑀯𑀘𑀺𑀢𑁆𑀢𑀓𑀲𑀓𑀼𑀡𑀸𑀧𑀺 𑀢𑀢𑁆𑀣 𑀯𑀺𑀘𑀭𑀦𑁆𑀢𑀺. 𑀓𑀼𑀓𑁆𑀓𑀼𑀝𑀓𑀸𑀢𑀺 𑀯𑀦𑀓𑀼𑀓𑁆𑀓𑀼𑀝𑀓𑀸. 𑀓𑀼𑀴𑀻𑀭𑀓𑀸𑀢𑀺 ¶ 𑀲𑀼𑀯𑀡𑁆𑀡𑀓𑀓𑁆𑀓𑀝𑀓𑀸. 𑀯𑀦𑁂𑀢𑀺 𑀧𑀤𑀼𑀫𑀯𑀦𑁂. 𑀧𑁄𑀓𑁆𑀔𑀭𑀲𑀸𑀢𑀓𑀸𑀢𑀺 𑀧𑁄𑀓𑁆𑀔𑀭𑀲𑀸𑀢𑀓𑀸 𑀦𑀸𑀫 𑀲𑀓𑀼𑀡𑀸.

𑀲𑀼𑀓𑀲𑀸𑀴𑀺𑀓𑀲𑀤𑁆𑀤𑁂𑀢𑁆𑀣𑀸𑀢𑀺 𑀲𑀼𑀓𑀸𑀦𑀜𑁆𑀘 𑀲𑀸𑀴𑀺𑀓𑀸𑀦𑀜𑁆𑀘 𑀲𑀤𑁆𑀤𑁄 𑀏𑀢𑁆𑀣. 𑀤𑀡𑁆𑀟𑀫𑀸𑀡𑀯𑀓𑀸𑀦𑀺 𑀘𑀸𑀢𑀺 𑀫𑀦𑀼𑀲𑁆𑀲𑀫𑀼𑀔𑀲𑀓𑀼𑀡𑀸. 𑀢𑁂 𑀓𑀺𑀭 𑀤𑁆𑀯𑀻𑀳𑀺 𑀳𑀢𑁆𑀣𑁂𑀳𑀺 𑀲𑀼𑀯𑀡𑁆𑀡𑀤𑀡𑁆𑀟𑀁 𑀕𑀳𑁂𑀢𑁆𑀯𑀸 𑀏𑀓𑀁 𑀧𑁄𑀓𑁆𑀔𑀭𑀧𑀢𑁆𑀢𑀁 𑀅𑀓𑁆𑀓𑀫𑀺𑀢𑁆𑀯𑀸 𑀅𑀦𑀦𑁆𑀢𑀭𑁂 𑀧𑁄𑀓𑁆𑀔𑀭𑀧𑀢𑁆𑀢𑁂 𑀲𑀼𑀯𑀡𑁆𑀡𑀤𑀡𑁆𑀟𑀁 𑀦𑀺𑀓𑁆𑀔𑀺𑀧𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀲𑁄𑀪𑀢𑀺 𑀲𑀩𑁆𑀩𑀓𑀸𑀮𑀁 𑀲𑀸𑀢𑀺 𑀲𑀸 𑀧𑁄𑀓𑁆𑀔𑀭𑀡𑀻 𑀲𑀩𑁆𑀩𑀓𑀸𑀮𑀁 𑀲𑁄𑀪𑀢𑀺. 𑀓𑀼𑀯𑁂𑀭𑀦𑀴𑀺𑀦𑀻𑀢𑀺 𑀓𑀼𑀯𑁂𑀭𑀲𑁆𑀲 𑀦𑀴𑀺𑀦𑀻 𑀧𑀤𑀼𑀫𑀲𑀭𑀪𑀽𑀢𑀸, 𑀲𑀸 𑀥𑀭𑀡𑀻 𑀦𑀸𑀫 𑀧𑁄𑀓𑁆𑀔𑀭𑀡𑀻 𑀲𑀤𑀸 𑀦𑀺𑀭𑀦𑁆𑀢𑀭𑀁 𑀲𑁄𑀪𑀢𑀺.

𑁨𑁮𑁨. 𑀬𑀲𑁆𑀲 𑀓𑀲𑁆𑀲𑀘𑀻𑀢𑀺 𑀇𑀤𑀁 𑀯𑁂𑀲𑁆𑀲𑀯𑀡𑁄 𑀆𑀝𑀸𑀦𑀸𑀝𑀺𑀬𑀁 𑀭𑀓𑁆𑀔𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀢𑀲𑁆𑀲𑀸 𑀧𑀭𑀺𑀓𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀢𑀢𑁆𑀣 𑀲𑀼𑀕𑁆𑀕𑀳𑀺𑀢𑀸𑀢𑀺 𑀅𑀢𑁆𑀣𑀜𑁆𑀘 𑀩𑁆𑀬𑀜𑁆𑀚𑀦𑀜𑁆𑀘 𑀧𑀭𑀺𑀲𑁄𑀥𑁂𑀢𑁆𑀯𑀸 𑀲𑀼𑀝𑁆𑀞𑀼 𑀉𑀕𑁆𑀕𑀳𑀺𑀢𑀸. 𑀲𑀫𑀢𑁆𑀢𑀸 𑀧𑀭𑀺𑀬𑀸𑀧𑀼𑀢𑀸𑀢𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀅𑀳𑀸𑀧𑁂𑀢𑁆𑀯𑀸 ¶ 𑀧𑀭𑀺𑀧𑀼𑀡𑁆𑀡𑀁 𑀉𑀕𑁆𑀕𑀳𑀺𑀢𑀸. 𑀅𑀢𑁆𑀣𑀫𑁆𑀧𑀺 𑀧𑀸𑀴𑀺𑀫𑁆𑀧𑀺 𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀲𑀩𑁆𑀩𑀲𑁄 𑀯𑀸 𑀧𑀦 𑀅𑀧𑁆𑀧𑀕𑀼𑀡𑀁 𑀓𑀢𑁆𑀯𑀸 𑀪𑀡𑀦𑁆𑀢𑀲𑁆𑀲 𑀳𑀺 𑀧𑀭𑀺𑀢𑁆𑀢𑀁 𑀢𑁂𑀚𑀯𑀦𑁆𑀢𑀁 𑀦 𑀳𑁄𑀢𑀺, 𑀲𑀩𑁆𑀩𑀲𑁄 𑀧𑀕𑀼𑀡𑀁 𑀓𑀢𑁆𑀯𑀸 𑀪𑀡𑀦𑁆𑀢𑀲𑁆𑀲𑁂𑀯 𑀢𑁂𑀚𑀯𑀦𑁆𑀢𑀁 𑀳𑁄𑀢𑀺. 𑀮𑀸𑀪𑀳𑁂𑀢𑀼 𑀉𑀕𑁆𑀕𑀳𑁂𑀢𑁆𑀯𑀸 𑀪𑀡𑀦𑁆𑀢𑀲𑁆𑀲𑀸𑀧𑀺 𑀅𑀢𑁆𑀣𑀁 𑀦 𑀲𑀸𑀥𑁂𑀢𑀺, 𑀦𑀺𑀲𑁆𑀲𑀭𑀡𑀧𑀓𑁆𑀔𑁂 𑀞𑀢𑁆𑀯𑀸 𑀫𑁂𑀢𑁆𑀢𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸 𑀪𑀡𑀦𑁆𑀢𑀲𑁆𑀲𑁂𑀯 𑀅𑀢𑁆𑀣𑀸𑀬 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀬𑀓𑁆𑀔𑀧𑀘𑀸𑀭𑁄𑀢𑀺 𑀬𑀓𑁆𑀔𑀧𑀭𑀺𑀘𑀸𑀭𑀓𑁄.

𑀯𑀢𑁆𑀣𑀼𑀁 𑀯𑀸𑀢𑀺 𑀖𑀭𑀯𑀢𑁆𑀣𑀼𑀁 𑀯𑀸. 𑀯𑀸𑀲𑀁 𑀯𑀸𑀢𑀺 𑀢𑀢𑁆𑀣 𑀦𑀺𑀩𑀤𑁆𑀥𑀯𑀸𑀲𑀁 𑀯𑀸. 𑀲𑀫𑀺𑀢𑀺𑀦𑁆𑀢𑀺 𑀲𑀫𑀸𑀕𑀫𑀁. 𑀅𑀦𑀸𑀯𑀬𑁆𑀳𑀦𑁆𑀢𑀺 𑀦 𑀆𑀯𑀸𑀳𑀬𑀼𑀢𑁆𑀢𑀁. 𑀅𑀯𑀺𑀯𑀬𑁆𑀳𑀦𑁆𑀢𑀺 𑀦 𑀯𑀺𑀯𑀸𑀳𑀬𑀼𑀢𑁆𑀢𑀁. 𑀢𑁂𑀦 𑀲𑀳 𑀆𑀯𑀸𑀳𑀯𑀺𑀯𑀸𑀳𑀁 𑀦 𑀓𑀭𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀸𑀳𑀺𑀧𑀺 𑀧𑀭𑀺𑀧𑀼𑀡𑁆𑀡𑀸𑀳𑀻𑀢𑀺 ‘‘𑀓𑀴𑀸𑀭𑀓𑁆𑀔𑀺 𑀓𑀴𑀸𑀭𑀤𑀦𑁆𑀢𑀸’’𑀢𑀺 𑀏𑀯𑀁 𑀏𑀢𑁂𑀲𑀁 𑀅𑀢𑁆𑀢𑀪𑀸𑀯𑀁 𑀉𑀧𑀦𑁂𑀢𑁆𑀯𑀸 𑀯𑀼𑀢𑁆𑀢𑀸𑀳𑀺 𑀧𑀭𑀺𑀧𑀼𑀡𑁆𑀡𑀩𑁆𑀬𑀜𑁆𑀚𑀦𑀸𑀳𑀺 𑀧𑀭𑀺𑀪𑀸𑀲𑀸𑀳𑀺 𑀧𑀭𑀺𑀪𑀸𑀲𑁂𑀬𑁆𑀬𑀼𑀁 𑀬𑀓𑁆𑀔𑀅𑀓𑁆𑀓𑁄𑀲𑁂𑀳𑀺 𑀦𑀸𑀫 𑀅𑀓𑁆𑀓𑁄𑀲𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀭𑀺𑀢𑁆𑀢𑀫𑁆𑀧𑀺𑀲𑁆𑀲 𑀧𑀢𑁆𑀢𑀦𑁆𑀢𑀺 𑀪𑀺𑀓𑁆𑀔𑀽𑀦𑀁 𑀧𑀢𑁆𑀢𑀲𑀤𑀺𑀲𑀫𑁂𑀯 𑀮𑁄𑀳𑀧𑀢𑁆𑀢𑀁 𑀳𑁄𑀢𑀺. 𑀢𑀁 𑀲𑀻𑀲𑁂 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀬𑀸𑀯 𑀕𑀮𑀯𑀸𑀝𑀓𑀸 𑀪𑀲𑁆𑀲𑀢𑀺. 𑀅𑀣 𑀦𑀁 𑀫𑀚𑁆𑀛𑁂 𑀅𑀬𑁄𑀔𑀻𑀮𑁂𑀦 𑀆𑀓𑁄𑀝𑁂𑀦𑁆𑀢𑀺.

𑀘𑀡𑁆𑀟𑀸𑀢𑀺 ¶ 𑀓𑁄𑀥𑀦𑀸. 𑀭𑀼𑀤𑁆𑀥𑀸𑀢𑀺 𑀯𑀺𑀭𑀼𑀤𑁆𑀥𑀸. 𑀭𑀪𑀲𑀸𑀢𑀺 𑀓𑀭𑀡𑀼𑀢𑁆𑀢𑀭𑀺𑀬𑀸. 𑀦𑁂𑀯 𑀫𑀳𑀸𑀭𑀸𑀚𑀸𑀦𑀁 𑀆𑀤𑀺𑀬𑀦𑁆𑀢𑀻𑀢𑀺 𑀯𑀘𑀦𑀁 𑀦 𑀕𑀡𑁆𑀳𑀦𑁆𑀢𑀺, 𑀆𑀡𑀁 𑀦 𑀓𑀭𑁄𑀦𑁆𑀢𑀺. 𑀫𑀳𑀸𑀭𑀸𑀚𑀸𑀦𑀁 𑀧𑀼𑀭𑀺𑀲𑀓𑀸𑀦𑀦𑁆𑀢𑀺 𑀅𑀝𑁆𑀞𑀯𑀻𑀲𑀢𑀺𑀬𑀓𑁆𑀔𑀲𑁂𑀦𑀸𑀧𑀢𑀻𑀦𑀁. 𑀧𑀼𑀭𑀺𑀲𑀓𑀸𑀦𑀦𑁆𑀢𑀺 𑀬𑀓𑁆𑀔𑀲𑁂𑀦𑀸𑀧𑀢𑀻𑀦𑀁 𑀬𑁂 𑀫𑀦𑀲𑁆𑀲𑀸 𑀢𑁂𑀲𑀁. 𑀅𑀯𑀭𑀼𑀤𑁆𑀥𑀸 𑀦𑀸𑀫𑀸𑀢𑀺 𑀧𑀘𑁆𑀘𑀸𑀫𑀺𑀢𑁆𑀢𑀸 𑀯𑁂𑀭𑀺𑀦𑁄. 𑀉𑀚𑁆𑀛𑀸𑀧𑁂𑀢𑀩𑁆𑀩𑀦𑁆𑀢𑀺 𑀧𑀭𑀺𑀢𑁆𑀢𑀁 𑀯𑀢𑁆𑀯𑀸 𑀅𑀫𑀦𑀼𑀲𑁆𑀲𑁂 𑀧𑀝𑀺𑀓𑁆𑀓𑀫𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀏𑀢𑁂𑀲𑀁 𑀬𑀓𑁆𑀔𑀸𑀦𑀁 𑀉𑀚𑁆𑀛𑀸𑀧𑁂𑀢𑀩𑁆𑀩𑀁, 𑀏𑀢𑁂 𑀚𑀸𑀦𑀸𑀧𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀧𑀭𑀺𑀢𑁆𑀢𑀧𑀭𑀺𑀓𑀫𑁆𑀫𑀓𑀣𑀸

𑀇𑀥 ¶ 𑀧𑀦 𑀞𑀢𑁆𑀯𑀸 𑀧𑀭𑀺𑀢𑁆𑀢𑀲𑁆𑀲 𑀧𑀭𑀺𑀓𑀫𑁆𑀫𑀁 𑀓𑀣𑁂𑀢𑀩𑁆𑀩𑀁. 𑀧𑀞𑀫𑀫𑁂𑀯 𑀳𑀺 𑀆𑀝𑀸𑀦𑀸𑀝𑀺𑀬𑀲𑀼𑀢𑁆𑀢𑀁 𑀦 𑀪𑀡𑀺𑀢𑀩𑁆𑀩𑀁, 𑀫𑁂𑀢𑁆𑀢𑀲𑀼𑀢𑁆𑀢𑀁 𑀥𑀚𑀕𑁆𑀕𑀲𑀼𑀢𑁆𑀢𑀁 𑀭𑀢𑀦𑀲𑀼𑀢𑁆𑀢𑀦𑁆𑀢𑀺 𑀇𑀫𑀸𑀦𑀺 𑀲𑀢𑁆𑀢𑀸𑀳𑀁 𑀪𑀡𑀺𑀢𑀩𑁆𑀩𑀸𑀦𑀺. 𑀲𑀘𑁂 𑀫𑀼𑀜𑁆𑀘𑀢𑀺, 𑀲𑀼𑀦𑁆𑀤𑀭𑀁. 𑀦𑁄 𑀘𑁂 𑀫𑀼𑀜𑁆𑀘𑀢𑀺, 𑀆𑀝𑀸𑀦𑀸𑀝𑀺𑀬𑀲𑀼𑀢𑁆𑀢𑀁 𑀪𑀡𑀺𑀢𑀩𑁆𑀩𑀁, 𑀢𑀁 𑀪𑀡𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀺𑀝𑁆𑀞𑀁 𑀯𑀸 𑀫𑀁𑀲𑀁 𑀯𑀸 𑀦 𑀔𑀸𑀤𑀺𑀢𑀩𑁆𑀩𑀁, 𑀲𑀼𑀲𑀸𑀦𑁂 𑀦 𑀯𑀲𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀅𑀫𑀦𑀼𑀲𑁆𑀲𑀸 𑀑𑀓𑀸𑀲𑀁 𑀮𑀪𑀦𑁆𑀢𑀺. 𑀧𑀭𑀺𑀢𑁆𑀢𑀓𑀭𑀡𑀝𑁆𑀞𑀸𑀦𑀁 𑀳𑀭𑀺𑀢𑀼𑀧𑀮𑀺𑀢𑁆𑀢𑀁 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣 𑀧𑀭𑀺𑀲𑀼𑀤𑁆𑀥𑀁 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁.

𑀧𑀭𑀺𑀢𑁆𑀢𑀓𑀸𑀭𑀓𑁄 ¶ 𑀪𑀺𑀓𑁆𑀔𑀼 𑀯𑀺𑀳𑀸𑀭𑀢𑁄 𑀖𑀭𑀁 𑀦𑁂𑀦𑁆𑀢𑁂𑀳𑀺 𑀨𑀮𑀓𑀸𑀯𑀼𑀥𑁂𑀳𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑁂𑀢𑀩𑁆𑀩𑁄. 𑀅𑀩𑁆𑀪𑁄𑀓𑀸𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 𑀦 𑀯𑀢𑁆𑀢𑀩𑁆𑀩𑀁, 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀦𑀺 𑀧𑀺𑀤𑀳𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀦 𑀆𑀯𑀼𑀥𑀳𑀢𑁆𑀣𑁂𑀳𑀺 𑀲𑀁𑀧𑀭𑀺𑀯𑀸𑀭𑀺𑀢𑁂𑀦 𑀫𑁂𑀢𑁆𑀢𑀘𑀺𑀢𑁆𑀢𑀁 𑀧𑀼𑀭𑁂𑀘𑀸𑀭𑀺𑀓𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀁. 𑀧𑀞𑀫𑀁 𑀲𑀺𑀓𑁆𑀔𑀸𑀧𑀤𑀸𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀧𑀭𑀺𑀢𑁆𑀢𑀁 𑀓𑀸𑀢𑀩𑁆𑀩𑀁. 𑀏𑀯𑀫𑁆𑀧𑀺 𑀫𑁄𑀘𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀯𑀺𑀳𑀸𑀭𑀁 𑀆𑀦𑁂𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀆𑀲𑀦𑀧𑀽𑀚𑀁 𑀓𑀸𑀭𑁂𑀢𑁆𑀯𑀸 𑀤𑀻𑀧𑁂 𑀚𑀸𑀮𑀸𑀧𑁂𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀫𑀗𑁆𑀕𑀮𑀓𑀣𑀸 𑀯𑀢𑁆𑀢𑀩𑁆𑀩𑀸. 𑀲𑀩𑁆𑀩𑀲𑀦𑁆𑀦𑀺𑀧𑀸𑀢𑁄 𑀖𑁄𑀲𑁂𑀢𑀩𑁆𑀩𑁄. 𑀯𑀺𑀳𑀸𑀭𑀲𑁆𑀲 𑀉𑀧𑀯𑀦𑁂 𑀚𑁂𑀝𑁆𑀞𑀓𑀭𑀼𑀓𑁆𑀔𑁄 𑀦𑀸𑀫 𑀳𑁄𑀢𑀺, 𑀢𑀢𑁆𑀣 𑀪𑀺𑀓𑁆𑀔𑀼𑀲𑀗𑁆𑀖𑁄 𑀢𑀼𑀫𑁆𑀳𑀸𑀓𑀁 𑀆𑀕𑀫𑀦𑀁 𑀧𑀝𑀺𑀫𑀸𑀦𑁂𑀢𑀻𑀢𑀺 𑀧𑀳𑀺𑀡𑀺𑀢𑀩𑁆𑀩𑀁. 𑀲𑀩𑁆𑀩𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑁂 𑀅𑀦𑀸𑀕𑀦𑁆𑀢𑀼𑀁 𑀦𑀸𑀫 𑀦 𑀮𑀩𑁆𑀪𑀢𑀺. 𑀢𑀢𑁄 𑀅𑀫𑀦𑀼𑀲𑁆𑀲𑀕𑀳𑀺𑀢𑀓𑁄 ‘‘𑀢𑁆𑀯𑀁 𑀓𑁄 𑀦𑀸𑀫𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀦𑀸𑀫𑁂 𑀓𑀣𑀺𑀢𑁂 𑀦𑀸𑀫𑁂𑀦𑁂𑀯 𑀆𑀮𑀧𑀺𑀢𑀩𑁆𑀩𑁄. 𑀇𑀢𑁆𑀣𑀦𑁆𑀦𑀸𑀫 𑀢𑀼𑀬𑁆𑀳𑀁 𑀫𑀸𑀮𑀸𑀕𑀦𑁆𑀥𑀸𑀤𑀻𑀲𑀼 𑀧𑀢𑁆𑀢𑀺 𑀆𑀲𑀦𑀧𑀽𑀚𑀸𑀬 𑀧𑀢𑁆𑀢𑀺 𑀧𑀺𑀡𑁆𑀟𑀧𑀸𑀢𑁂 𑀧𑀢𑁆𑀢𑀺, 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀢𑀼𑀬𑁆𑀳𑀁 𑀧𑀡𑁆𑀡𑀸𑀓𑀸𑀭𑀢𑁆𑀣𑀸𑀬 𑀫𑀳𑀸𑀫𑀗𑁆𑀕𑀮𑀓𑀣𑀸 𑀯𑀼𑀢𑁆𑀢𑀸, 𑀪𑀺𑀓𑁆𑀔𑀼𑀲𑀗𑁆𑀖𑁂 ¶ 𑀕𑀸𑀭𑀯𑁂𑀦 𑀏𑀢𑀁 𑀫𑀼𑀜𑁆𑀘𑀸𑀳𑀻𑀢𑀺 𑀫𑁄𑀘𑁂𑀢𑀩𑁆𑀩𑁄. 𑀲𑀘𑁂 𑀦 𑀫𑀼𑀜𑁆𑀘𑀢𑀺, 𑀤𑁂𑀯𑀢𑀸𑀦𑀁 𑀆𑀭𑁄𑀘𑁂𑀢𑀩𑁆𑀩𑀁 ‘‘𑀢𑀼𑀫𑁆𑀳𑁂 𑀚𑀸𑀦𑀸𑀣, 𑀅𑀬𑀁 𑀅𑀫𑀦𑀼𑀲𑁆𑀲𑁄 𑀅𑀫𑁆𑀳𑀸𑀓𑀁 𑀯𑀘𑀦𑀁 𑀦 𑀓𑀭𑁄𑀢𑀺, 𑀫𑀬𑀁 𑀩𑀼𑀤𑁆𑀥𑀆𑀡𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀧𑀭𑀺𑀢𑁆𑀢𑀁 𑀓𑀸𑀢𑀩𑁆𑀩𑀁. 𑀏𑀢𑀁 𑀢𑀸𑀯 𑀕𑀺𑀳𑀻𑀦𑀁 𑀧𑀭𑀺𑀓𑀫𑁆𑀫𑀁. 𑀲𑀘𑁂 𑀧𑀦 𑀪𑀺𑀓𑁆𑀔𑀼 𑀅𑀫𑀦𑀼𑀲𑁆𑀲𑁂𑀦 𑀕𑀳𑀺𑀢𑁄 𑀳𑁄𑀢𑀺, 𑀆𑀲𑀦𑀸𑀦𑀺 𑀥𑁄𑀯𑀺𑀢𑁆𑀯𑀸 𑀲𑀩𑁆𑀩𑀲𑀦𑁆𑀦𑀺𑀧𑀸𑀢𑀁 𑀖𑁄𑀲𑀸𑀧𑁂𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀲𑀼 𑀧𑀢𑁆𑀢𑀺𑀁 𑀤𑀢𑁆𑀯𑀸 𑀧𑀭𑀺𑀢𑁆𑀢𑀁 𑀪𑀡𑀺𑀢𑀩𑁆𑀩𑀁. 𑀇𑀤𑀁 𑀪𑀺𑀓𑁆𑀔𑀽𑀦𑀁 𑀧𑀭𑀺𑀓𑀫𑁆𑀫𑀁.

𑀯𑀺𑀓𑁆𑀓𑀦𑁆𑀤𑀺𑀢𑀩𑁆𑀩𑀦𑁆𑀢𑀺 𑀲𑀩𑁆𑀩𑀲𑀦𑁆𑀦𑀺𑀧𑀸𑀢𑀁 𑀖𑁄𑀲𑀸𑀧𑁂𑀢𑁆𑀯𑀸 𑀅𑀝𑁆𑀞𑀯𑀻𑀲𑀢𑀺 𑀬𑀓𑁆𑀔𑀲𑁂𑀦𑀸𑀧𑀢𑀬𑁄 𑀓𑀦𑁆𑀤𑀺𑀢𑀩𑁆𑀩𑀸. 𑀯𑀺𑀭𑀯𑀺𑀢𑀩𑁆𑀩𑀦𑁆𑀢𑀺 ‘‘𑀅𑀬𑀁 𑀬𑀓𑁆𑀔𑁄 𑀕𑀡𑁆𑀳𑀸𑀢𑀻’’𑀢𑀺𑀆𑀤𑀻𑀦𑀺 𑀪𑀡𑀦𑁆𑀢𑁂𑀦 𑀢𑁂𑀳𑀺 𑀲𑀤𑁆𑀥𑀺𑀁 𑀓𑀣𑁂𑀢𑀩𑁆𑀩𑀁. 𑀢𑀢𑁆𑀣 𑀕𑀡𑁆𑀳𑀸𑀢𑀻𑀢𑀺 𑀲𑀭𑀻𑀭𑁂 𑀅𑀥𑀺𑀫𑀼𑀘𑁆𑀘𑀢𑀺. 𑀆𑀯𑀺𑀲𑀢𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀣 𑀯𑀸 𑀮𑀕𑁆𑀕𑀢𑀺 𑀦 𑀅𑀧𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑁂𑀞𑁂𑀢𑀻𑀢𑀺 𑀉𑀧𑁆𑀧𑀦𑁆𑀦𑀁 𑀭𑁄𑀕𑀁 𑀯𑀟𑁆𑀠𑁂𑀦𑁆𑀢𑁄 𑀩𑀸𑀥𑀢𑀺. 𑀯𑀺𑀳𑁂𑀞𑁂𑀢𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀳𑀺𑀁𑀲𑀢𑀻𑀢𑀺 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑀁 𑀓𑀭𑁄𑀦𑁆𑀢𑁄 𑀤𑀼𑀓𑁆𑀔𑀸𑀧𑁂𑀢𑀺. 𑀯𑀺𑀳𑀺𑀁𑀲𑀢𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀦 𑀫𑀼𑀜𑁆𑀘𑀢𑀻𑀢𑀺 𑀅𑀧𑁆𑀧𑀫𑀸𑀤𑀕𑀸𑀳𑁄 𑀳𑀼𑀢𑁆𑀯𑀸 𑀫𑀼𑀜𑁆𑀘𑀺𑀢𑀼𑀁 𑀦 𑀇𑀘𑁆𑀙𑀢𑀺, 𑀏𑀯𑀁 𑀏𑀢𑁂𑀲𑀁 𑀯𑀺𑀭𑀯𑀺𑀢𑀩𑁆𑀩𑀁.

𑁨𑁮𑁩. 𑀇𑀤𑀸𑀦𑀺 ¶ 𑀬𑁂𑀲𑀁 𑀏𑀯𑀁 𑀯𑀺𑀭𑀯𑀺𑀢𑀩𑁆𑀩𑀁, 𑀢𑁂 𑀤𑀲𑁆𑀲𑁂𑀢𑀼𑀁 𑀓𑀢𑀫𑁂𑀲𑀁 𑀬𑀓𑁆𑀔𑀸𑀦𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀦𑁆𑀤𑁄 𑀲𑁄𑀫𑁄𑀢𑀺𑀆𑀤𑀻𑀦𑀺 𑀢𑁂𑀲𑀁 𑀦𑀸𑀫𑀸𑀦𑀺. 𑀢𑁂𑀲𑀼 𑀯𑁂𑀲𑁆𑀲𑀸𑀫𑀺𑀢𑁆𑀢𑁄𑀢𑀺 ¶ 𑀯𑁂𑀲𑁆𑀲𑀸𑀫𑀺𑀢𑁆𑀢𑀧𑀩𑁆𑀩𑀢𑀯𑀸𑀲𑀻 𑀏𑀓𑁄 𑀬𑀓𑁆𑀔𑁄. 𑀬𑀼𑀕𑀦𑁆𑀥𑀭𑁄𑀧𑀺 𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑀯𑀸𑀲𑀻𑀬𑁂𑀯. 𑀳𑀺𑀭𑀺 𑀦𑁂𑀢𑁆𑀢𑀺 𑀘 𑀫𑀦𑁆𑀤𑀺𑀬𑁄𑀢𑀺 𑀳𑀺𑀭𑀺 𑀘 𑀦𑁂𑀢𑁆𑀢𑀺 𑀘 𑀫𑀦𑁆𑀤𑀺𑀬𑁄 𑀘. 𑀫𑀡𑀺 𑀫𑀸𑀡𑀺 𑀯𑀭𑁄 𑀤𑀻𑀖𑁄𑀢𑀺 𑀫𑀡𑀺 𑀘 𑀫𑀸𑀡𑀺 𑀘 𑀯𑀭𑁄 𑀘 𑀤𑀻𑀖𑁄 𑀘. 𑀅𑀣𑁄 𑀲𑁂𑀭𑀻𑀲𑀓𑁄 𑀲𑀳𑀸𑀢𑀺 𑀢𑁂𑀳𑀺 𑀲𑀳 𑀅𑀜𑁆𑀜𑁄 𑀲𑁂𑀭𑀻𑀲𑀓𑁄 𑀦𑀸𑀫. ‘‘𑀇𑀫𑁂𑀲𑀁 𑀬𑀓𑁆𑀔𑀸𑀦𑀁…𑀧𑁂… 𑀉𑀚𑁆𑀛𑀸𑀧𑁂𑀢𑀩𑁆𑀩’’𑀦𑁆𑀢𑀺 𑀅𑀬𑀁 𑀬𑀓𑁆𑀔𑁄 𑀇𑀫𑀁 𑀳𑁂𑀞𑁂𑀢𑀺 𑀯𑀺𑀳𑁂𑀞𑁂𑀢𑀺 𑀦 𑀫𑀼𑀜𑁆𑀘𑀢𑀻𑀢𑀺 𑀏𑀯𑀁 𑀏𑀢𑁂𑀲𑀁 𑀬𑀓𑁆𑀔𑀲𑁂𑀦𑀸𑀧𑀢𑀻𑀦𑀁 𑀆𑀭𑁄𑀘𑁂𑀢𑀩𑁆𑀩𑀁. 𑀢𑀢𑁄 𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀢𑁆𑀢𑀦𑁄 𑀥𑀫𑁆𑀫𑀆𑀡𑀁 𑀓𑀭𑁄𑀢𑀺, 𑀫𑀬𑀫𑁆𑀧𑀺 𑀅𑀫𑁆𑀳𑀸𑀓𑀁 𑀬𑀓𑁆𑀔𑀭𑀸𑀚𑀆𑀡𑀁 𑀓𑀭𑁄𑀫𑀸𑀢𑀺 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀅𑀫𑀦𑀼𑀲𑁆𑀲𑀸𑀦𑀁 𑀑𑀓𑀸𑀲𑁄 𑀦 𑀪𑀯𑀺𑀲𑁆𑀲𑀢𑀺, 𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀨𑀸𑀲𑀼𑀯𑀺𑀳𑀸𑀭𑁄 𑀘 𑀪𑀯𑀺𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀁 𑀔𑁄 𑀲𑀸, 𑀫𑀸𑀭𑀺𑀲, 𑀆𑀝𑀸𑀦𑀸𑀝𑀺𑀬𑀸 𑀭𑀓𑁆𑀔𑀸’’𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀁, 𑀢𑀢𑁄 𑀧𑀭𑀜𑁆𑀘 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀆𑀝𑀸𑀦𑀸𑀝𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀗𑁆𑀕𑀻𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯𑁬. 𑀏𑀯𑀁 ¶ ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀲𑀗𑁆𑀕𑀻𑀢𑀺𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀫𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸 𑁋 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄𑀢𑀺 𑀦𑀺𑀩𑀤𑁆𑀥𑀘𑀸𑀭𑀺𑀓𑀁 𑀘𑀭𑀫𑀸𑀦𑁄. 𑀢𑀤𑀸 𑀓𑀺𑀭 𑀲𑀢𑁆𑀣𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀜𑀸𑀡𑀚𑀸𑀮𑀁 𑀧𑀢𑁆𑀣𑀭𑀺𑀢𑁆𑀯𑀸 𑀮𑁄𑀓𑀁 𑀯𑁄𑀮𑁄𑀓𑀬𑀫𑀸𑀦𑁄 𑀧𑀸𑀯𑀸𑀦𑀕𑀭𑀯𑀸𑀲𑀺𑀦𑁄 𑀫𑀮𑁆𑀮𑀭𑀸𑀚𑀸𑀦𑁄 𑀤𑀺𑀲𑁆𑀯𑀸 𑀇𑀫𑁂 𑀭𑀸𑀚𑀸𑀦𑁄 𑀫𑀬𑁆𑀳𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀚𑀸𑀮𑀲𑁆𑀲 𑀅𑀦𑁆𑀢𑁄 𑀧𑀜𑁆𑀜𑀸𑀬𑀦𑁆𑀢𑀺, 𑀓𑀺𑀁 𑀦𑀼 𑀔𑁄𑀢𑀺 𑀆𑀯𑀚𑁆𑀚𑀦𑁆𑀢𑁄 ‘‘𑀭𑀸𑀚𑀸𑀦𑁄 𑀏𑀓𑀁 𑀲𑀦𑁆𑀥𑀸𑀕𑀸𑀭𑀁 𑀓𑀸𑀭𑁂𑀲𑀼𑀁, 𑀫𑀬𑀺 𑀕𑀢𑁂 𑀫𑀗𑁆𑀕𑀮𑀁 𑀪𑀡𑀸𑀧𑁂𑀲𑁆𑀲𑀦𑁆𑀢𑀺, 𑀅𑀳𑀁 𑀢𑁂𑀲𑀁 𑀫𑀗𑁆𑀕𑀮𑀁 𑀯𑀢𑁆𑀯𑀸 𑀉𑀬𑁆𑀬𑁄𑀚𑁂𑀢𑁆𑀯𑀸 ‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀥𑀫𑁆𑀫𑀓𑀣𑀁 𑀓𑀣𑁂𑀳𑀻’𑀢𑀺 𑀲𑀸𑀭𑀺𑀧𑀼𑀢𑁆𑀢𑀁 𑀯𑀓𑁆𑀔𑀸𑀫𑀺, 𑀲𑀸𑀭𑀺𑀧𑀼𑀢𑁆𑀢𑁄 𑀢𑀻𑀳𑀺 𑀧𑀺𑀝𑀓𑁂𑀳𑀺 𑀲𑀫𑁆𑀫𑀲𑀺𑀢𑁆𑀯𑀸 𑀘𑀼𑀤𑁆𑀤𑀲𑀧𑀜𑁆𑀳𑀸𑀥𑀺𑀓𑁂𑀦 𑀧𑀜𑁆𑀳𑀲𑀳𑀲𑁆𑀲𑁂𑀦 𑀧𑀝𑀺𑀫𑀡𑁆𑀟𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀗𑁆𑀕𑀻𑀢𑀺𑀲𑀼𑀢𑁆𑀢𑀁 𑀦𑀸𑀫 𑀓𑀣𑁂𑀲𑁆𑀲𑀢𑀺, 𑀲𑀼𑀢𑁆𑀢𑀦𑁆𑀢𑀁 𑀆𑀯𑀚𑁆𑀚𑁂𑀢𑁆𑀯𑀸 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀻’’𑀢𑀺 𑀇𑀫𑀫𑀢𑁆𑀣𑀁 𑀤𑀺𑀲𑁆𑀯𑀸 𑀘𑀸𑀭𑀺𑀓𑀁 𑀧𑀓𑁆𑀓𑀦𑁆𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀫𑀮𑁆𑀮𑁂𑀲𑀼 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄’’𑀢𑀺.

𑀉𑀩𑁆𑀪𑀢𑀓𑀦𑀯𑀲𑀦𑁆𑀥𑀸𑀕𑀸𑀭𑀯𑀡𑁆𑀡𑀦𑀸

𑁨𑁯𑁭. 𑀉𑀩𑁆𑀪𑀢𑀓𑀦𑁆𑀢𑀺 𑀢𑀲𑁆𑀲 𑀦𑀸𑀫𑀁, 𑀉𑀘𑁆𑀘𑀢𑁆𑀢𑀸 𑀯𑀸 𑀏𑀯𑀁 𑀯𑀼𑀢𑁆𑀢𑀁. 𑀲𑀦𑁆𑀥𑀸𑀕𑀸𑀭𑀦𑁆𑀢𑀺 𑀦𑀕𑀭𑀫𑀚𑁆𑀛𑁂 𑀲𑀦𑁆𑀥𑀸𑀕𑀸𑀭𑀲𑀸𑀮𑀸. 𑀲𑀫𑀡𑁂𑀦 𑀯𑀸𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀖𑀭𑀯𑀢𑁆𑀣𑀼𑀧𑀭𑀺𑀕𑁆𑀕𑀳𑀓𑀸𑀮𑁂𑀬𑁂𑀯 𑀤𑁂𑀯𑀢𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀡𑁆𑀳𑀦𑁆𑀢𑀺. 𑀢𑀲𑁆𑀫𑀸 𑀤𑁂𑀯𑁂𑀦 𑀯𑀸𑀢𑀺 𑀅𑀯𑀢𑁆𑀯𑀸 ‘‘𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀓𑁂𑀦𑀘𑀺 𑀯𑀸 𑀫𑀦𑀼𑀲𑁆𑀲𑀪𑀽𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀽𑀢𑀺 𑀪𑀕𑀯𑀢𑁄 𑀆𑀕𑀫𑀦𑀁 𑀲𑀼𑀢𑁆𑀯𑀸 ‘‘𑀅𑀫𑁆𑀳𑁂𑀳𑀺 𑀕𑀦𑁆𑀢𑁆𑀯𑀸𑀧𑀺 𑀦 𑀪𑀕𑀯𑀸 𑀆𑀦𑀻𑀢𑁄, 𑀤𑀽𑀢𑀁 𑀧𑁂𑀲𑁂𑀢𑁆𑀯𑀸𑀧𑀺 𑀦 𑀧𑀓𑁆𑀓𑁄𑀲𑀸𑀧𑀺𑀢𑁄, 𑀲𑀬𑀫𑁂𑀯 𑀧𑀦 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀅𑀫𑁆𑀳𑀸𑀓𑀁 𑀯𑀲𑀦𑀝𑁆𑀞𑀸𑀦𑀁 𑀲𑀫𑁆𑀧𑀢𑁆𑀢𑁄, 𑀅𑀫𑁆𑀳𑁂𑀳𑀺 𑀘 𑀲𑀦𑁆𑀥𑀸𑀕𑀸𑀭𑀲𑀸𑀮𑀸 𑀓𑀸𑀭𑀺𑀢𑀸, 𑀏𑀢𑁆𑀣 𑀫𑀬𑀁 𑀤𑀲𑀩𑀮𑀁 𑀆𑀦𑁂𑀢𑁆𑀯𑀸 𑀫𑀗𑁆𑀕𑀮𑀁 𑀪𑀡𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀁𑀲𑀼.

𑁨𑁯𑁮. 𑀬𑁂𑀦 𑀲𑀦𑁆𑀥𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀽𑀢𑀺 𑀢𑀁 𑀤𑀺𑀯𑀲𑀁 𑀓𑀺𑀭 ¶ 𑀲𑀦𑁆𑀥𑀸𑀕𑀸𑀭𑁂 𑀘𑀺𑀢𑁆𑀢𑀓𑀫𑁆𑀫𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀅𑀝𑁆𑀝𑀓𑀸 𑀫𑀼𑀢𑁆𑀢𑀫𑀢𑁆𑀢𑀸 𑀳𑁄𑀦𑁆𑀢𑀺, 𑀩𑀼𑀤𑁆𑀥𑀸 𑀘 𑀦𑀸𑀫 𑀅𑀭𑀜𑁆𑀜𑀚𑁆𑀛𑀸𑀲𑀬𑀸 𑀅𑀭𑀜𑁆𑀜𑀸𑀭𑀸𑀫𑀸, 𑀅𑀦𑁆𑀢𑁄𑀕𑀸𑀫𑁂 𑀯𑀲𑁂𑀬𑁆𑀬𑀼𑀁 𑀯𑀸 ¶ 𑀦𑁄 𑀯𑀸. 𑀢𑀲𑁆𑀫𑀸 𑀪𑀕𑀯𑀢𑁄 𑀫𑀦𑀁 𑀚𑀸𑀦𑀺𑀢𑁆𑀯𑀸𑀯 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀸𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀇𑀤𑀸𑀦𑀺 𑀧𑀦 𑀫𑀦𑀁 𑀮𑀪𑀺𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀢𑀼𑀓𑀸𑀫𑀸 𑀬𑁂𑀦 𑀲𑀦𑁆𑀥𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼 ¶ . 𑀲𑀩𑁆𑀩𑀲𑀦𑁆𑀣𑀭𑀺𑀦𑁆𑀢𑀺 𑀬𑀣𑀸 𑀲𑀩𑁆𑀩𑀁 𑀲𑀦𑁆𑀣𑀢𑀁 𑀳𑁄𑀢𑀺, 𑀏𑀯𑀁. 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀽𑀢𑀺 𑀏𑀢𑁆𑀣 𑀧𑀦 𑀢𑁂 𑀫𑀮𑁆𑀮𑀭𑀸𑀚𑀸𑀦𑁄 𑀲𑀦𑁆𑀥𑀸𑀕𑀸𑀭𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀦𑀕𑀭𑀯𑀻𑀣𑀺𑀬𑁄𑀧𑀺 𑀲𑀫𑁆𑀫𑀚𑁆𑀚𑀸𑀧𑁂𑀢𑁆𑀯𑀸 𑀥𑀚𑁂 𑀉𑀲𑁆𑀲𑀸𑀧𑁂𑀢𑁆𑀯𑀸 𑀕𑁂𑀳𑀤𑁆𑀯𑀸𑀭𑁂𑀲𑀼 𑀧𑀼𑀡𑁆𑀡𑀖𑀝𑁂 𑀘 𑀓𑀤𑀮𑀺𑀬𑁄 𑀘 𑀞𑀧𑀸𑀧𑁂𑀢𑁆𑀯𑀸 𑀲𑀓𑀮𑀦𑀕𑀭𑀁 𑀤𑀻𑀧𑀫𑀸𑀮𑀸𑀤𑀻𑀳𑀺 𑀯𑀺𑀧𑁆𑀧𑀓𑀺𑀡𑁆𑀡𑀢𑀸𑀭𑀓𑀁 𑀯𑀺𑀬 𑀓𑀢𑁆𑀯𑀸 𑀔𑀻𑀭𑀧𑀸𑀬𑀓𑁂 𑀤𑀸𑀭𑀓𑁂 𑀔𑀻𑀭𑀁 𑀧𑀸𑀬𑁆𑀬𑁂𑀣, 𑀤𑀳𑀭𑁂 𑀓𑀼𑀫𑀸𑀭𑁂 𑀮𑀳𑀼𑀁 𑀮𑀳𑀼𑀁 𑀪𑁄𑀚𑀸𑀧𑁂𑀢𑁆𑀯𑀸 𑀲𑀬𑀸𑀧𑁂𑀣, 𑀉𑀘𑁆𑀘𑀸𑀲𑀤𑁆𑀤𑀁 𑀫𑀸 𑀓𑀭𑀺𑀢𑁆𑀣, 𑀅𑀚𑁆𑀚 𑀏𑀓𑀭𑀢𑁆𑀢𑀺𑀁 𑀲𑀢𑁆𑀣𑀸 𑀅𑀦𑁆𑀢𑁄𑀕𑀸𑀫𑁂 𑀯𑀲𑀺𑀲𑁆𑀲𑀢𑀺, 𑀩𑀼𑀤𑁆𑀥𑀸 𑀦𑀸𑀫 𑀅𑀧𑁆𑀧𑀲𑀤𑁆𑀤𑀓𑀸𑀫𑀸 𑀳𑁄𑀦𑁆𑀢𑀻𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀲𑀬𑀁 𑀤𑀡𑁆𑀟𑀤𑀻𑀧𑀺𑀓𑀁 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼.

𑁨𑁯𑁯. 𑀪𑀕𑀯𑀦𑁆𑀢𑀁𑀬𑁂𑀯 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀪𑀕𑀯𑀦𑁆𑀢𑀁 𑀧𑀼𑀭𑀢𑁄 𑀓𑀢𑁆𑀯𑀸. 𑀢𑀢𑁆𑀣 𑀪𑀕𑀯𑀸 𑀪𑀺𑀓𑁆𑀔𑀽𑀦𑀜𑁆𑀘𑁂𑀯 𑀉𑀧𑀸𑀲𑀓𑀸𑀦𑀜𑁆𑀘 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀅𑀢𑀺𑀯𑀺𑀬 𑀯𑀺𑀭𑁄𑀘𑀢𑀺, 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄. 𑀧𑀼𑀭𑀺𑀫𑀓𑀸𑀬𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀸 𑀭𑀲𑁆𑀫𑀺 𑀉𑀝𑁆𑀞𑀳𑀺𑀢𑁆𑀯𑀸 𑀅𑀲𑀻𑀢𑀺𑀳𑀢𑁆𑀣𑀁 𑀞𑀸𑀦𑀁 𑀕𑀡𑁆𑀳𑀸𑀢𑀺. 𑀧𑀘𑁆𑀙𑀺𑀫𑀓𑀸𑀬𑀢𑁄. 𑀤𑀓𑁆𑀔𑀺𑀡𑀳𑀢𑁆𑀣𑀢𑁄. 𑀯𑀸𑀫𑀳𑀢𑁆𑀣𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀸 𑀭𑀲𑁆𑀫𑀺 𑀉𑀝𑁆𑀞𑀳𑀺𑀢𑁆𑀯𑀸 𑀅𑀲𑀻𑀢𑀺𑀳𑀢𑁆𑀣𑀁 𑀞𑀸𑀦𑀁 𑀕𑀡𑁆𑀳𑀸𑀢𑀺. 𑀉𑀧𑀭𑀺 𑀓𑁂𑀲𑀦𑁆𑀢𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀓𑁂𑀲𑀸𑀯𑀝𑁆𑀝𑁂𑀳𑀺 𑀫𑁄𑀭𑀕𑀻𑀯𑀯𑀡𑁆𑀡𑀸 𑀭𑀲𑁆𑀫𑀺 𑀉𑀝𑁆𑀞𑀳𑀺𑀢𑁆𑀯𑀸 𑀕𑀕𑀦𑀢𑀮𑁂 𑀅𑀲𑀻𑀢𑀺𑀳𑀢𑁆𑀣𑀁 𑀞𑀸𑀦𑀁 𑀕𑀡𑁆𑀳𑀸𑀢𑀺. 𑀳𑁂𑀝𑁆𑀞𑀸 𑀧𑀸𑀤𑀢𑀮𑁂𑀳𑀺 𑀧𑀯𑀸𑀴𑀯𑀡𑁆𑀡𑀸 𑀭𑀲𑁆𑀫𑀺 𑀉𑀝𑁆𑀞𑀳𑀺𑀢𑁆𑀯𑀸 𑀖𑀦𑀧𑀣𑀯𑀺𑀬𑀁 𑀅𑀲𑀻𑀢𑀺𑀳𑀢𑁆𑀣𑀁 𑀞𑀸𑀦𑀁 𑀕𑀡𑁆𑀳𑀸𑀢𑀺. 𑀏𑀯𑀁 𑀲𑀫𑀦𑁆𑀢𑀸 𑀅𑀲𑀻𑀢𑀺 𑀳𑀢𑁆𑀣𑀫𑀢𑁆𑀢𑀁 𑀞𑀸𑀦𑀁 𑀙𑀩𑁆𑀩𑀡𑁆𑀡𑀸 𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀚𑁆𑀚𑁄𑀢𑀫𑀸𑀦𑀸 𑀯𑀺𑀧𑁆𑀨𑀦𑁆𑀤𑀫𑀸𑀦𑀸 𑀯𑀺𑀥𑀸𑀯𑀦𑁆𑀢𑀺. 𑀲𑀩𑁆𑀩𑁂 𑀤𑀺𑀲𑀸𑀪𑀸𑀕𑀸 𑀲𑀼𑀯𑀡𑁆𑀡𑀘𑀫𑁆𑀧𑀓𑀧𑀼𑀧𑁆𑀨𑁂𑀳𑀺 𑀯𑀺𑀓𑀺𑀭𑀺𑀬𑀫𑀸𑀦𑀸 𑀯𑀺𑀬 𑀲𑀼𑀯𑀡𑁆𑀡𑀖𑀝𑀢𑁄 𑀦𑀺𑀓𑁆𑀔𑀦𑁆𑀢𑀲𑀼𑀯𑀡𑁆𑀡𑀭𑀲𑀥𑀸𑀭𑀸𑀳𑀺 𑀲𑀺𑀜𑁆𑀘𑀫𑀸𑀦𑀸 𑀯𑀺𑀬 𑀧𑀲𑀸𑀭𑀺𑀢𑀲𑀼𑀯𑀡𑁆𑀡𑀧𑀝𑀧𑀭𑀺𑀓𑁆𑀔𑀺𑀢𑁆𑀢𑀸 𑀯𑀺𑀬 𑀯𑁂𑀭𑀫𑁆𑀪𑀯𑀸𑀢𑀲𑀫𑀼𑀝𑁆𑀞𑀺𑀢𑀓𑀺𑀁𑀲𑀼𑀓𑀓𑀡𑀺𑀓𑀸𑀭𑀧𑀼𑀧𑁆𑀨𑀘𑀼𑀡𑁆𑀡𑀲𑀫𑀸𑀓𑀺𑀡𑁆𑀡𑀸 𑀯𑀺𑀬 𑀘 𑀯𑀺𑀧𑁆𑀧𑀓𑀸𑀲𑀦𑁆𑀢𑀺.

𑀪𑀕𑀯𑀢𑁄𑀧𑀺 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀲𑀫𑀼𑀚𑁆𑀚𑀮𑀁 𑀲𑀭𑀻𑀭𑀁 𑀲𑀫𑀼𑀕𑁆𑀕𑀢𑀢𑀸𑀭𑀓𑀁 𑀯𑀺𑀬 𑀕𑀕𑀦𑀢𑀮𑀁, 𑀯𑀺𑀓𑀲𑀺𑀢𑀫𑀺𑀯 𑀧𑀤𑀼𑀫𑀯𑀦𑀁 ¶ , 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑁄 𑀯𑀺𑀬 𑀬𑁄𑀚𑀦𑀲𑀢𑀺𑀓𑁄 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀧𑀝𑀺𑀧𑀸𑀝𑀺𑀬𑀸 𑀞𑀧𑀺𑀢𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀘𑀦𑁆𑀤𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀲𑀽𑀭𑀺𑀬𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀤𑁂𑀯𑀭𑀸𑀚𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀲𑀺𑀭𑀺𑀬𑀸 𑀲𑀺𑀭𑀺𑀁 𑀅𑀪𑀺𑀪𑀯𑀫𑀸𑀦𑀁 𑀯𑀺𑀬 𑀯𑀺𑀭𑁄𑀘𑀢𑀺. 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀪𑀺𑀓𑁆𑀔𑀽𑀧𑀺 𑀲𑀩𑁆𑀩𑁂𑀯 𑀅𑀧𑁆𑀧𑀺𑀘𑁆𑀙𑀸 𑀲𑀦𑁆𑀢𑀼𑀝𑁆𑀞𑀸 𑀧𑀯𑀺𑀯𑀺𑀢𑁆𑀢𑀸 𑀅𑀲𑀁𑀲𑀝𑁆𑀞𑀸 𑀆𑀭𑀤𑁆𑀥𑀯𑀻𑀭𑀺𑀬𑀸 𑀯𑀢𑁆𑀢𑀸𑀭𑁄 𑀯𑀘𑀦𑀓𑁆𑀔𑀫𑀸 𑀘𑁄𑀤𑀓𑀸 𑀧𑀸𑀧𑀕𑀭𑀳𑀺𑀦𑁄 𑀲𑀻𑀮𑀲𑀫𑁆𑀧𑀦𑁆𑀦𑀸 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀸 ¶ 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀸. 𑀢𑁂𑀳𑀺 𑀧𑀭𑀺𑀯𑀸𑀭𑀺𑀢𑁄 𑀪𑀕𑀯𑀸 𑀭𑀢𑁆𑀢𑀓𑀫𑁆𑀩𑀮𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀺𑀬 𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑁄 ¶ , 𑀭𑀢𑁆𑀢𑀧𑀤𑀼𑀫𑀯𑀦𑀲𑀡𑁆𑀟𑀫𑀚𑁆𑀛𑀕𑀢𑀸 𑀯𑀺𑀬 𑀲𑀼𑀯𑀡𑁆𑀡𑀦𑀸𑀯𑀸, 𑀧𑀯𑀸𑀴𑀯𑁂𑀤𑀺𑀓𑀸𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀺𑀬 𑀲𑀼𑀯𑀡𑁆𑀡𑀧𑀸𑀲𑀸𑀤𑁄 𑀯𑀺𑀭𑁄𑀘𑀺𑀢𑁆𑀣.

𑀅𑀲𑀻𑀢𑀺𑀫𑀳𑀸𑀣𑁂𑀭𑀸𑀧𑀺 𑀦𑀁 𑀫𑁂𑀖𑀯𑀡𑁆𑀡𑀁 𑀧𑀁𑀲𑀼𑀓𑀽𑀮𑀁 𑀧𑀸𑀭𑀼𑀧𑀺𑀢𑁆𑀯𑀸 𑀫𑀡𑀺𑀯𑀫𑁆𑀫𑀯𑀫𑁆𑀫𑀺𑀢𑀸 𑀯𑀺𑀬 𑀫𑀳𑀸𑀦𑀸𑀕𑀸 𑀧𑀭𑀺𑀯𑀸𑀭𑀬𑀺𑀁𑀲𑀼 𑀯𑀦𑁆𑀢𑀭𑀸𑀕𑀸 𑀪𑀺𑀦𑁆𑀦𑀓𑀺𑀮𑁂𑀲𑀸 𑀯𑀺𑀚𑀝𑀺𑀢𑀚𑀝𑀸 𑀙𑀺𑀦𑁆𑀦𑀩𑀦𑁆𑀥𑀦𑀸 𑀓𑀼𑀮𑁂 𑀯𑀸 𑀕𑀡𑁂 𑀯𑀸 𑀅𑀮𑀕𑁆𑀕𑀸. 𑀇𑀢𑀺 𑀪𑀕𑀯𑀸 𑀲𑀬𑀁 𑀯𑀻𑀢𑀭𑀸𑀕𑁄 𑀯𑀻𑀢𑀭𑀸𑀕𑁂𑀳𑀺, 𑀯𑀻𑀢𑀤𑁄𑀲𑁄 𑀯𑀻𑀢𑀤𑁄𑀲𑁂𑀳𑀺, 𑀯𑀻𑀢𑀫𑁄𑀳𑁄 𑀯𑀻𑀢𑀫𑁄𑀳𑁂𑀳𑀺, 𑀦𑀺𑀢𑁆𑀢𑀡𑁆𑀳𑁄 𑀦𑀺𑀢𑁆𑀢𑀡𑁆𑀳𑁂𑀳𑀺, 𑀦𑀺𑀓𑁆𑀓𑀺𑀮𑁂𑀲𑁄 𑀦𑀺𑀓𑁆𑀓𑀺𑀮𑁂𑀲𑁂𑀳𑀺, 𑀲𑀬𑀁 𑀩𑀼𑀤𑁆𑀥𑁄 𑀩𑀳𑀼𑀲𑁆𑀲𑀼𑀢𑀩𑀼𑀤𑁆𑀥𑁂𑀳𑀺 𑀧𑀭𑀺𑀯𑀸𑀭𑀺𑀢𑁄 𑀧𑀢𑁆𑀢𑀧𑀭𑀺𑀯𑀸𑀭𑀺𑀢𑀁 𑀯𑀺𑀬 𑀓𑁂𑀲𑀭𑀁, 𑀓𑁂𑀲𑀭𑀧𑀭𑀺𑀯𑀸𑀭𑀺𑀢𑀸 𑀯𑀺𑀬 𑀓𑀡𑁆𑀡𑀺𑀓𑀸, 𑀅𑀝𑁆𑀞𑀦𑀸𑀕𑀲𑀳𑀲𑁆𑀲𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀙𑀤𑁆𑀤𑀦𑁆𑀢𑁄 𑀦𑀸𑀕𑀭𑀸𑀚𑀸, 𑀦𑀯𑀼𑀢𑀺𑀳𑀁𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀥𑀢𑀭𑀝𑁆𑀞𑁄 𑀳𑀁𑀲𑀭𑀸𑀚𑀸, 𑀲𑁂𑀦𑀗𑁆𑀕𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸, 𑀫𑀭𑀼𑀕𑀡𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸, 𑀩𑁆𑀭𑀳𑁆𑀫𑀕𑀡𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀳𑀸𑀭𑀺𑀢𑁄 𑀫𑀳𑀸𑀩𑁆𑀭𑀳𑁆𑀫𑀸, 𑀅𑀲𑀫𑁂𑀦 𑀩𑀼𑀤𑁆𑀥𑀯𑁂𑀲𑁂𑀦 𑀅𑀧𑀭𑀺𑀫𑀸𑀡𑁂𑀦 𑀩𑀼𑀤𑁆𑀥𑀯𑀺𑀮𑀸𑀲𑁂𑀦 𑀢𑀲𑁆𑀲𑀁 𑀧𑀭𑀺𑀲𑀢𑀺 𑀦𑀺𑀲𑀺𑀦𑁆𑀦𑁄 𑀧𑀸𑀯𑁂𑀬𑁆𑀬𑀓𑁂 𑀫𑀮𑁆𑀮𑁂 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀉𑀬𑁆𑀬𑁄𑀚𑁂𑀲𑀺.

𑀏𑀢𑁆𑀣 𑀘 𑀥𑀫𑁆𑀫𑀺𑀓𑀣𑀸 𑀦𑀸𑀫 𑀲𑀦𑁆𑀥𑀸𑀕𑀸𑀭𑀅𑀦𑀼𑀫𑁄𑀤𑀦𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸 𑀧𑀓𑀺𑀡𑁆𑀡𑀓𑀓𑀣𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀤𑀸 𑀳𑀺 𑀪𑀕𑀯𑀸 𑀆𑀓𑀸𑀲𑀕𑀗𑁆𑀕𑀁 𑀑𑀢𑀸𑀭𑁂𑀦𑁆𑀢𑁄 𑀯𑀺𑀬 𑀧𑀣𑀯𑁄𑀚𑀁 𑀆𑀓𑀟𑁆𑀠𑀦𑁆𑀢𑁄 𑀯𑀺𑀬 𑀫𑀳𑀸𑀚𑀫𑁆𑀩𑀼𑀁 𑀫𑀢𑁆𑀣𑀓𑁂 𑀕𑀳𑁂𑀢𑁆𑀯𑀸 𑀘𑀸𑀮𑁂𑀦𑁆𑀢𑁄 𑀯𑀺𑀬 𑀬𑁄𑀚𑀦𑀺𑀬𑀫𑀥𑀼𑀕𑀡𑁆𑀟𑀁 𑀘𑀓𑁆𑀓𑀬𑀦𑁆𑀢𑁂𑀦 𑀧𑀻𑀴𑁂𑀢𑁆𑀯𑀸 𑀫𑀥𑀼𑀧𑀸𑀦𑀁 𑀧𑀸𑀬𑀫𑀸𑀦𑁄 𑀯𑀺𑀬 𑀘 𑀧𑀸𑀯𑁂𑀬𑁆𑀬𑀓𑀸𑀦𑀁 𑀫𑀮𑁆𑀮𑀸𑀦𑀁 𑀳𑀺𑀢𑀲𑀼𑀔𑀸𑀯𑀳𑀁 𑀧𑀓𑀺𑀡𑁆𑀡𑀓𑀓𑀣𑀁 𑀓𑀣𑁂𑀲𑀺.

𑁩𑁦𑁦. 𑀢𑀼𑀡𑁆𑀳𑀻𑀪𑀽𑀢𑀁 𑀢𑀼𑀡𑁆𑀳𑀻𑀪𑀽𑀢𑀦𑁆𑀢𑀺 𑀬𑀁 𑀬𑀁 𑀤𑀺𑀲𑀁 𑀅𑀦𑀼𑀯𑀺𑀮𑁄𑀓𑁂𑀢𑀺, 𑀢𑀢𑁆𑀣 𑀢𑀢𑁆𑀣 𑀢𑀼𑀡𑁆𑀳𑀻𑀪𑀽𑀢𑀫𑁂𑀯. 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸𑀢𑀺 ¶ 𑀫𑀁𑀲𑀘𑀓𑁆𑀔𑀼𑀦𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀢𑀺 𑀤𑁆𑀯𑀻𑀳𑀺 𑀘𑀓𑁆𑀔𑀽𑀳𑀺 𑀢𑀢𑁄 𑀢𑀢𑁄 𑀯𑀺𑀮𑁄𑀓𑁂𑀢𑁆𑀯𑀸. 𑀫𑀁𑀲𑀘𑀓𑁆𑀔𑀼𑀦𑀸 𑀳𑀺 𑀦𑁂𑀲𑀁 𑀩𑀳𑀺𑀤𑁆𑀥𑀸 𑀇𑀭𑀺𑀬𑀸𑀧𑀣𑀁 𑀧𑀭𑀺𑀕𑁆𑀕𑀳𑁂𑀲𑀺. 𑀢𑀢𑁆𑀣 𑀏𑀓𑀪𑀺𑀓𑁆𑀔𑀼𑀲𑁆𑀲𑀸𑀧𑀺 𑀦𑁂𑀯 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀁 𑀦 𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀁 𑀅𑀳𑁄𑀲𑀺, 𑀦 𑀓𑁄𑀘𑀺 𑀲𑀻𑀲𑀫𑀼𑀓𑁆𑀔𑀺𑀧𑀺, 𑀦 𑀓𑀣𑀁 𑀓𑀣𑁂𑀲𑀺, 𑀦 𑀦𑀺𑀤𑁆𑀤𑀸𑀬𑀦𑁆𑀢𑁄 𑀦𑀺𑀲𑀻𑀤𑀺. 𑀲𑀩𑁆𑀩𑁂𑀧𑀺 𑀢𑀻𑀳𑀺 𑀲𑀺𑀓𑁆𑀔𑀸𑀳𑀺 𑀲𑀺𑀓𑁆𑀔𑀺𑀢𑀸 𑀦𑀺𑀯𑀸𑀢𑁂 𑀧𑀤𑀻𑀧𑀲𑀺𑀔𑀸 𑀯𑀺𑀬 𑀦𑀺𑀘𑁆𑀘𑀮𑀸 𑀦𑀺𑀲𑀻𑀤𑀺𑀁𑀲𑀼. 𑀇𑀢𑀺 𑀦𑁂𑀲𑀁 𑀇𑀫𑀁 𑀇𑀭𑀺𑀬𑀸𑀧𑀣𑀁 𑀫𑀁𑀲𑀘𑀓𑁆𑀔𑀼𑀦𑀸 𑀧𑀭𑀺𑀕𑁆𑀕𑀳𑁂𑀲𑀺. 𑀆𑀮𑁄𑀓𑀁 𑀧𑀦 ¶ 𑀯𑀟𑁆𑀠𑀬𑀺𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀳𑀤𑀬𑀭𑀽𑀧𑀁 𑀤𑀺𑀲𑁆𑀯𑀸 𑀅𑀩𑁆𑀪𑀦𑁆𑀢𑀭𑀕𑀢𑀁 𑀲𑀻𑀮𑀁 𑀑𑀮𑁄𑀓𑁂𑀲𑀺. 𑀲𑁄 𑀅𑀦𑁂𑀓𑀲𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑁄𑀓𑀼𑀫𑁆𑀪𑀺𑀬𑀁 𑀚𑀮𑀫𑀸𑀦𑀁 𑀧𑀤𑀻𑀧𑀁 𑀯𑀺𑀬 𑀅𑀭𑀳𑀢𑁆𑀢𑀼𑀧𑀕𑀁 𑀲𑀻𑀮𑀁 𑀅𑀤𑁆𑀤𑀲. 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀸 𑀳𑀺 𑀢𑁂 𑀪𑀺𑀓𑁆𑀔𑀽. 𑀇𑀢𑀺 𑀦𑁂𑀲𑀁 𑀲𑀻𑀮𑀁 𑀤𑀺𑀲𑁆𑀯𑀸 ‘‘𑀇𑀫𑁂𑀧𑀺 𑀪𑀺𑀓𑁆𑀔𑀽 𑀫𑀬𑁆𑀳𑀁 𑀅𑀦𑀼𑀘𑁆𑀙𑀯𑀺𑀓𑀸, 𑀅𑀳𑀫𑁆𑀧𑀺 𑀇𑀫𑁂𑀲𑀁 𑀅𑀦𑀼𑀘𑁆𑀙𑀯𑀺𑀓𑁄’’𑀢𑀺 𑀘𑀓𑁆𑀔𑀼𑀢𑀮𑁂𑀲𑀼 𑀦𑀺𑀫𑀺𑀢𑁆𑀢𑀁 𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀑𑀮𑁄𑀓𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 ‘‘𑀧𑀺𑀝𑁆𑀞𑀺 𑀫𑁂 𑀆𑀕𑀺𑀮𑀸𑀬𑀢𑀻’’𑀢𑀺. 𑀓𑀲𑁆𑀫𑀸 𑀆𑀕𑀺𑀮𑀸𑀬𑀢𑀺? 𑀪𑀕𑀯𑀢𑁄 𑀳𑀺 𑀙𑀩𑁆𑀩𑀲𑁆𑀲𑀸𑀦𑀺 𑀫𑀳𑀸𑀧𑀥𑀸𑀦𑀁 ¶ 𑀧𑀤𑀳𑀦𑁆𑀢𑀲𑁆𑀲 𑀫𑀳𑀦𑁆𑀢𑀁 𑀓𑀸𑀬𑀤𑀼𑀓𑁆𑀔𑀁 𑀅𑀳𑁄𑀲𑀺. 𑀅𑀣𑀲𑁆𑀲 𑀅𑀧𑀭𑀪𑀸𑀕𑁂 𑀫𑀳𑀮𑁆𑀮𑀓𑀓𑀸𑀮𑁂 𑀧𑀺𑀝𑁆𑀞𑀺𑀯𑀸𑀢𑁄 𑀉𑀧𑁆𑀧𑀚𑁆𑀚𑀺.

𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀲𑀦𑁆𑀥𑀸𑀕𑀸𑀭𑀲𑁆𑀲 𑀓𑀺𑀭 𑀏𑀓𑀧𑀲𑁆𑀲𑁂 𑀢𑁂 𑀭𑀸𑀚𑀸𑀦𑁄 𑀓𑀧𑁆𑀧𑀺𑀬𑀫𑀜𑁆𑀘𑀓𑀁 𑀧𑀜𑁆𑀜𑀧𑁂𑀲𑀼𑀁 ‘‘𑀅𑀧𑁆𑀧𑁂𑀯 𑀦𑀸𑀫 𑀲𑀢𑁆𑀣𑀸 𑀦𑀺𑀧𑀚𑁆𑀚𑁂𑀬𑁆𑀬𑀸’’𑀢𑀺. 𑀲𑀢𑁆𑀣𑀸𑀧𑀺 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀧𑀭𑀺𑀪𑀼𑀢𑁆𑀢𑀁 𑀇𑀫𑁂𑀲𑀁 𑀫𑀳𑀧𑁆𑀨𑀮𑀁 𑀪𑀯𑀺𑀲𑁆𑀲𑀢𑀻𑀢𑀺 𑀢𑀢𑁆𑀣 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀦𑀺𑀧𑀚𑁆𑀚𑀺.

𑀪𑀺𑀦𑁆𑀦𑀦𑀺𑀕𑀡𑁆𑀞𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁦𑁧. 𑀢𑀲𑁆𑀲 𑀓𑀸𑀮𑀗𑁆𑀓𑀺𑀭𑀺𑀬𑀸𑀬𑀸𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑁩𑁦𑁨. 𑀆𑀫𑀦𑁆𑀢𑁂𑀲𑀻𑀢𑀺 𑀪𑀡𑁆𑀟𑀦𑀸𑀤𑀺𑀯𑀽𑀧𑀲𑀫𑀓𑀭𑀁 𑀲𑁆𑀯𑀸𑀔𑁆𑀬𑀸𑀢𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼𑀓𑀸𑀫𑁄 𑀆𑀫𑀦𑁆𑀢𑁂𑀲𑀺.

𑀏𑀓𑀓𑀯𑀡𑁆𑀡𑀦𑀸

𑁩𑁦𑁩. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀥𑀫𑁆𑀫𑁂. 𑀲𑀗𑁆𑀕𑀸𑀬𑀺𑀢𑀩𑁆𑀩𑀦𑁆𑀢𑀺 𑀲𑀫𑀕𑁆𑀕𑁂𑀳𑀺 𑀕𑀸𑀬𑀺𑀢𑀩𑁆𑀩𑀁, 𑀏𑀓𑀯𑀘𑀦𑁂𑀳𑀺 𑀅𑀯𑀺𑀭𑀼𑀤𑁆𑀥𑀯𑀘𑀦𑁂𑀳𑀺 𑀪𑀡𑀺𑀢𑀩𑁆𑀩𑀁. 𑀦 𑀯𑀺𑀯𑀤𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁂 𑀯𑀸 𑀩𑁆𑀬𑀜𑁆𑀚𑀦𑁂 𑀯𑀸 𑀯𑀺𑀯𑀸𑀤𑁄 𑀦 𑀓𑀸𑀢𑀩𑁆𑀩𑁄. 𑀏𑀓𑁄 𑀥𑀫𑁆𑀫𑁄𑀢𑀺 𑀏𑀓𑀓𑀤𑀼𑀓𑀢𑀺𑀓𑀸𑀤𑀺𑀯𑀲𑁂𑀦 𑀩𑀳𑀼𑀥𑀸 𑀲𑀸𑀫𑀕𑁆𑀕𑀺𑀭𑀲𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 𑀧𑀞𑀫𑀁 𑀢𑀸𑀯 ‘‘𑀏𑀓𑁄 𑀥𑀫𑁆𑀫𑁄’’𑀢𑀺 𑀆𑀳. 𑀲𑀩𑁆𑀩𑁂 𑀲𑀢𑁆𑀢𑀸𑀢𑀺 𑀓𑀸𑀫𑀪𑀯𑀸𑀤𑀻𑀲𑀼 𑀲𑀜𑁆𑀜𑀸𑀪𑀯𑀸𑀤𑀻𑀲𑀼 𑀏𑀓𑀯𑁄𑀓𑀸𑀭𑀪𑀯𑀸𑀤𑀻𑀲𑀼 𑀘 𑀲𑀩𑁆𑀩𑀪𑀯𑁂𑀲𑀼 𑀲𑀩𑁆𑀩𑁂 𑀲𑀢𑁆𑀢𑀸. 𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺 𑀆𑀳𑀸𑀭𑀢𑁄 𑀞𑀺𑀢𑀺 𑀏𑀢𑁂𑀲𑀦𑁆𑀢𑀺 𑀆𑀳𑀸𑀭𑀝𑁆𑀞𑀺𑀢𑀺𑀓𑀸. 𑀇𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀞𑀺𑀢𑀺 𑀳𑁂𑀢𑀼 𑀆𑀳𑀸𑀭𑁄 𑀦𑀸𑀫 𑀏𑀓𑁄 𑀥𑀫𑁆𑀫𑁄 𑀅𑀫𑁆𑀳𑀸𑀓𑀁 ¶ 𑀲𑀢𑁆𑀣𑀸𑀭𑀸 𑀬𑀸𑀣𑀸𑀯𑀢𑁄 𑀜𑀢𑁆𑀯𑀸 𑀲𑀫𑁆𑀫𑀤𑀓𑁆𑀔𑀸𑀢𑁄 𑀆𑀯𑀼𑀲𑁄𑀢𑀺 𑀤𑀻𑀧𑁂𑀢𑀺.

𑀦𑀦𑀼 ¶ 𑀘 𑀏𑀯𑀁 𑀲𑀦𑁆𑀢𑁂 𑀬𑀁 𑀯𑀼𑀢𑁆𑀢𑀁 ‘‘𑀅𑀲𑀜𑁆𑀜𑀲𑀢𑁆𑀢𑀸 𑀤𑁂𑀯𑀸 𑀅𑀳𑁂𑀢𑀼𑀓𑀸 𑀅𑀦𑀸𑀳𑀸𑀭𑀸 𑀅𑀨𑀲𑁆𑀲𑀓𑀸’’𑀢𑀺𑀆𑀤𑀺, (𑀯𑀺𑀪. 𑁧𑁦𑁧𑁭) 𑀢𑀁 𑀯𑀘𑀦𑀁 𑀯𑀺𑀭𑀼𑀚𑁆𑀛𑀢𑀻𑀢𑀺, 𑀦 𑀯𑀺𑀭𑀼𑀚𑁆𑀛𑀢𑀺. 𑀢𑁂𑀲𑀜𑁆𑀳𑀺 𑀛𑀸𑀦𑀁 𑀆𑀳𑀸𑀭𑁄 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑀸 𑀪𑀽𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀲𑀫𑁆𑀪𑀯𑁂𑀲𑀻𑀦𑀁 𑀯𑀸 𑀅𑀦𑀼𑀕𑁆𑀕𑀳𑀸𑀬. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀑𑀴𑀸𑀭𑀺𑀓𑁄 𑀯𑀸 𑀲𑀼𑀔𑀼𑀫𑁄 𑀯𑀸, 𑀨𑀲𑁆𑀲𑁄 𑀤𑀼𑀢𑀺𑀬𑁄, 𑀫𑀦𑁄𑀲𑀜𑁆𑀘𑁂𑀢𑀦𑀸 𑀢𑀢𑀺𑀬𑀸, 𑀯𑀺𑀜𑁆𑀜𑀸𑀡𑀁 𑀘𑀢𑀼𑀢𑁆𑀣’’𑀦𑁆𑀢𑀺 (𑀲𑀁. 𑀦𑀺. 𑁨.𑁧𑁧) 𑀇𑀤𑀫𑁆𑀧𑀺 𑀯𑀺𑀭𑀼𑀚𑁆𑀛𑀢𑀻𑀢𑀺, 𑀇𑀤𑀫𑁆𑀧𑀺 𑀦 𑀯𑀺𑀭𑀼𑀚𑁆𑀛𑀢𑀺. 𑀏𑀢𑀲𑁆𑀫𑀺𑀜𑁆𑀳𑀺 𑀲𑀼𑀢𑁆𑀢𑁂 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀆𑀳𑀸𑀭𑀮𑀓𑁆𑀔𑀡𑀸𑀯 𑀥𑀫𑁆𑀫𑀸 𑀆𑀳𑀸𑀭𑀸𑀢𑀺 𑀯𑀼𑀢𑁆𑀢𑀸. 𑀇𑀥 𑀧𑀦 𑀧𑀭𑀺𑀬𑀸𑀬𑁂𑀦 𑀧𑀘𑁆𑀘𑀬𑁄 𑀆𑀳𑀸𑀭𑁄𑀢𑀺 𑀯𑀼𑀢𑁆𑀢𑁄. 𑀲𑀩𑁆𑀩𑀥𑀫𑁆𑀫𑀸𑀦𑀜𑁆𑀳𑀺 ¶ 𑀧𑀘𑁆𑀘𑀬𑁄 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺. 𑀲𑁄 𑀘 𑀬𑀁 𑀬𑀁 𑀨𑀮𑀁 𑀚𑀦𑁂𑀢𑀺, 𑀢𑀁 𑀢𑀁 𑀆𑀳𑀭𑀢𑀺 𑀦𑀸𑀫, 𑀢𑀲𑁆𑀫𑀸 𑀆𑀳𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯𑀸𑀳 ‘‘𑀅𑀯𑀺𑀚𑁆𑀚𑀫𑁆𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑀁 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑀁. 𑀓𑁄 𑀘, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀬 𑀆𑀳𑀸𑀭𑁄? 𑀧𑀜𑁆𑀘𑀦𑀻𑀯𑀭𑀡𑀸𑀢𑀺𑀲𑁆𑀲 𑀯𑀘𑀦𑀻𑀬𑀁. 𑀧𑀜𑁆𑀘𑀦𑀻𑀯𑀭𑀡𑁂𑀧𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀸𑀳𑀸𑀭𑁂 𑀯𑀤𑀸𑀫𑀺, 𑀦𑁄 𑀅𑀦𑀸𑀳𑀸𑀭𑁂. 𑀓𑁄 𑀘, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑀁 𑀦𑀻𑀯𑀭𑀡𑀸𑀦𑀁 𑀆𑀳𑀸𑀭𑁄? 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄𑀢𑀺𑀲𑁆𑀲 𑀯𑀘𑀦𑀻𑀬’’𑀦𑁆𑀢𑀺 (𑀅. 𑀦𑀺. 𑁧𑁦.𑁬𑁧). 𑀅𑀬𑀁 𑀇𑀥 𑀅𑀥𑀺𑀧𑁆𑀧𑁂𑀢𑁄.

𑀏𑀢𑀲𑁆𑀫𑀺𑀜𑁆𑀳𑀺 𑀧𑀘𑁆𑀘𑀬𑀸𑀳𑀸𑀭𑁂 𑀕𑀳𑀺𑀢𑁂 𑀧𑀭𑀺𑀬𑀸𑀬𑀸𑀳𑀸𑀭𑁄𑀧𑀺 𑀦𑀺𑀧𑁆𑀧𑀭𑀺𑀬𑀸𑀬𑀸𑀳𑀸𑀭𑁄𑀧𑀺 𑀲𑀩𑁆𑀩𑁄 𑀕𑀳𑀺𑀢𑁄𑀯 𑀳𑁄𑀢𑀺. 𑀢𑀢𑁆𑀣 𑀅𑀲𑀜𑁆𑀜𑀪𑀯𑁂 𑀧𑀘𑁆𑀘𑀬𑀸𑀳𑀸𑀭𑁄 𑀮𑀩𑁆𑀪𑀢𑀺. 𑀅𑀦𑀼𑀧𑁆𑀧𑀦𑁆𑀦𑁂 𑀳𑀺 𑀩𑀼𑀤𑁆𑀥𑁂 𑀢𑀺𑀢𑁆𑀣𑀸𑀬𑀢𑀦𑁂 𑀧𑀩𑁆𑀩𑀚𑀺𑀢𑀸 𑀯𑀸𑀬𑁄𑀓𑀲𑀺𑀡𑁂 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀥𑀻 𑀘𑀺𑀢𑁆𑀢𑀁, 𑀥𑀺𑀩𑁆𑀩𑀢𑁂𑀢𑀁 𑀘𑀺𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀦𑀸𑀫 𑀅𑀪𑀸𑀯𑁄𑀬𑁂𑀯 𑀲𑀸𑀥𑀼, 𑀘𑀺𑀢𑁆𑀢𑀜𑁆𑀳𑀺 𑀦𑀺𑀲𑁆𑀲𑀸𑀬𑁂𑀯 𑀯𑀥𑀩𑀦𑁆𑀥𑀸𑀤𑀺𑀧𑀘𑁆𑀘𑀬𑀁 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺. 𑀘𑀺𑀢𑁆𑀢𑁂 𑀅𑀲𑀢𑀺 𑀦𑀢𑁆𑀣𑁂𑀢𑀦𑁆𑀢𑀺 𑀔𑀦𑁆𑀢𑀺𑀁 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀸 𑀓𑀸𑀮𑀗𑁆𑀓𑀢𑁆𑀯𑀸 𑀅𑀲𑀜𑁆𑀜𑀪𑀯𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀬𑁄 𑀬𑀲𑁆𑀲 𑀇𑀭𑀺𑀬𑀸𑀧𑀣𑁄 𑀫𑀦𑀼𑀲𑁆𑀲𑀮𑁄𑀓𑁂 𑀧𑀡𑀺𑀳𑀺𑀢𑁄 𑀅𑀳𑁄𑀲𑀺, 𑀲𑁄 𑀢𑁂𑀦 𑀇𑀭𑀺𑀬𑀸𑀧𑀣𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀜𑁆𑀘 𑀓𑀧𑁆𑀧𑀲𑀢𑀸𑀦𑀺 𑀞𑀺𑀢𑁄 𑀯𑀸 𑀦𑀺𑀲𑀺𑀦𑁆𑀦𑁄 𑀯𑀸 𑀦𑀺𑀧𑀦𑁆𑀦𑁄 𑀯𑀸 𑀳𑁄𑀢𑀺. 𑀏𑀯𑀭𑀽𑀧𑀸𑀦𑀫𑁆𑀧𑀺 𑀲𑀢𑁆𑀢𑀸𑀦𑀁 𑀧𑀘𑁆𑀘𑀬𑀸𑀳𑀸𑀭𑁄 𑀮𑀩𑁆𑀪𑀢𑀺. 𑀢𑁂 𑀳𑀺 𑀬𑀁 𑀛𑀸𑀦𑀁 𑀪𑀸𑀯𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸, 𑀢𑀤𑁂𑀯 𑀦𑁂𑀲𑀁 𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀣𑀸 𑀚𑀺𑀬𑀸𑀯𑁂𑀕𑁂𑀦 𑀔𑀺𑀢𑁆𑀢𑀲𑀭𑁄 𑀬𑀸𑀯 𑀚𑀺𑀬𑀸𑀯𑁂𑀕𑁄 𑀅𑀢𑁆𑀣𑀺, 𑀢𑀸𑀯 𑀕𑀘𑁆𑀙𑀢𑀺, 𑀏𑀯𑀁 𑀬𑀸𑀯 𑀛𑀸𑀦𑀧𑀘𑁆𑀘𑀬𑁄 𑀅𑀢𑁆𑀣𑀺, 𑀢𑀸𑀯 𑀢𑀺𑀝𑁆𑀞𑀦𑁆𑀢𑀺. 𑀢𑀲𑁆𑀫𑀺𑀁 𑀦𑀺𑀝𑁆𑀞𑀺𑀢𑁂 𑀔𑀻𑀡𑀯𑁂𑀕𑁄 𑀲𑀭𑁄 𑀯𑀺𑀬 𑀧𑀢𑀦𑁆𑀢𑀺. 𑀬𑁂 𑀧𑀦 𑀢𑁂 𑀦𑁂𑀭𑀬𑀺𑀓𑀸 𑀦𑁂𑀯 𑀉𑀝𑁆𑀞𑀸𑀦𑀨𑀮𑀽𑀧𑀚𑀻𑀯𑀻 𑀦 𑀧𑀼𑀜𑁆𑀜𑀨𑀮𑀽𑀧𑀚𑀻𑀯𑀻𑀢𑀺 𑀯𑀼𑀢𑁆𑀢𑀸, 𑀢𑁂𑀲𑀁 𑀓𑁄 𑀆𑀳𑀸𑀭𑁄𑀢𑀺 ¶ ? 𑀢𑁂𑀲𑀁 𑀓𑀫𑁆𑀫𑀫𑁂𑀯 𑀆𑀳𑀸𑀭𑁄. 𑀓𑀺𑀁 𑀧𑀜𑁆𑀘 𑀆𑀳𑀸𑀭𑀸 𑀅𑀢𑁆𑀣𑀻𑀢𑀺 ¶ 𑀘𑁂. 𑀧𑀜𑁆𑀘, 𑀦 𑀧𑀜𑁆𑀘𑀸𑀢𑀺 𑀇𑀤𑀁 𑀦 𑀯𑀢𑁆𑀢𑀩𑁆𑀩𑀁. 𑀦𑀦𑀼 𑀧𑀘𑁆𑀘𑀬𑁄 𑀆𑀳𑀸𑀭𑁄𑀢𑀺 𑀯𑀼𑀢𑁆𑀢𑀫𑁂𑀢𑀁. 𑀢𑀲𑁆𑀫𑀸 𑀬𑁂𑀦 𑀓𑀫𑁆𑀫𑁂𑀦 𑀢𑁂 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀸, 𑀢𑀤𑁂𑀯 𑀢𑁂𑀲𑀁 𑀞𑀺𑀢𑀺𑀧𑀘𑁆𑀘𑀬𑀢𑁆𑀢𑀸 𑀆𑀳𑀸𑀭𑁄 𑀳𑁄𑀢𑀺. 𑀬𑀁 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 ‘‘𑀦 𑀘 𑀢𑀸𑀯 𑀓𑀸𑀮𑀗𑁆𑀓𑀭𑁄𑀢𑀺, 𑀬𑀸𑀯 𑀦 𑀢𑀁 𑀧𑀸𑀧𑀓𑀫𑁆𑀫𑀁 𑀩𑁆𑀬𑀦𑁆𑀢𑀻 𑀳𑁄𑀢𑀻’’𑀢𑀺 (𑀫. 𑀦𑀺. 𑁩.𑁨𑁫𑁦).

𑀓𑀩𑀴𑀻𑀓𑀸𑀭𑀁 𑀆𑀳𑀸𑀭𑀁 𑀆𑀭𑀩𑁆𑀪 𑀘𑁂𑀢𑁆𑀣 𑀯𑀺𑀯𑀸𑀤𑁄 𑀦 𑀓𑀸𑀢𑀩𑁆𑀩𑁄. 𑀫𑀼𑀔𑁂 𑀉𑀧𑁆𑀧𑀦𑁆𑀦𑁄 𑀔𑁂𑀴𑁄𑀧𑀺 𑀳𑀺 𑀢𑁂𑀲𑀁 𑀆𑀳𑀸𑀭𑀓𑀺𑀘𑁆𑀘𑀁 𑀲𑀸𑀥𑁂𑀢𑀺. 𑀔𑁂𑀴𑁄𑀧𑀺 𑀳𑀺 𑀦𑀺𑀭𑀬𑁂 𑀤𑀼𑀓𑁆𑀔𑀯𑁂𑀤𑀦𑀺𑀬𑁄 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀲𑀕𑁆𑀕𑁂 𑀲𑀼𑀔𑀯𑁂𑀤𑀦𑀺𑀬𑁄. 𑀇𑀢𑀺 𑀓𑀸𑀫𑀪𑀯𑁂 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸. 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀞𑀧𑁂𑀢𑁆𑀯𑀸 𑀅𑀲𑀜𑁆𑀜𑀁 𑀲𑁂𑀲𑀸𑀦𑀁 𑀢𑀬𑁄. 𑀅𑀲𑀜𑁆𑀜𑀸𑀦𑀜𑁆𑀘𑁂𑀯 𑀅𑀯𑀲𑁂𑀲𑀸𑀦𑀜𑁆𑀘 𑀧𑀘𑁆𑀘𑀬𑀸𑀳𑀸𑀭𑁄𑀢𑀺 𑀇𑀫𑀺𑀦𑀸 𑀆𑀳𑀸𑀭𑁂𑀦 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 𑀏𑀢𑀁 𑀧𑀜𑁆𑀳𑀁 𑀓𑀣𑁂𑀢𑁆𑀯𑀸 ‘‘𑀅𑀬𑀁 𑀔𑁄 𑀆𑀯𑀼𑀲𑁄’’𑀢𑀺 𑀏𑀯𑀁 𑀦𑀺𑀬𑁆𑀬𑀸𑀢𑀦𑀫𑁆𑀧𑀺 ‘‘𑀅𑀢𑁆𑀣𑀺 𑀔𑁄 𑀆𑀯𑀼𑀲𑁄’’𑀢𑀺 𑀧𑀼𑀦 𑀉𑀤𑁆𑀥𑀭𑀡𑀫𑁆𑀧𑀺 𑀅𑀓𑀢𑁆𑀯𑀸 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀲𑀗𑁆𑀔𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 𑀤𑀼𑀢𑀺𑀬𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑀺.

𑀓𑀲𑁆𑀫𑀸 ¶ 𑀧𑀦 𑀦 𑀦𑀺𑀬𑁆𑀬𑀸𑀢𑁂𑀲𑀺 𑀦 𑀉𑀤𑁆𑀥𑀭𑀺𑀢𑁆𑀣? 𑀢𑀢𑁆𑀣 𑀢𑀢𑁆𑀣 𑀦𑀺𑀬𑁆𑀬𑀸𑀢𑀺𑀬𑀫𑀸𑀦𑁂𑀧𑀺 𑀉𑀤𑁆𑀥𑀭𑀺𑀬𑀫𑀸𑀦𑁂𑀧𑀺 𑀧𑀭𑀺𑀬𑀸𑀧𑀼𑀡𑀺𑀢𑀼𑀁 𑀯𑀸𑀘𑁂𑀢𑀼𑀁 𑀤𑀼𑀓𑁆𑀔𑀁 𑀳𑁄𑀢𑀺, 𑀢𑀲𑁆𑀫𑀸 𑀤𑁆𑀯𑁂 𑀏𑀓𑀸𑀩𑀤𑁆𑀥𑁂 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀇𑀫𑀲𑁆𑀫𑀺𑀫𑁆𑀧𑀺 𑀯𑀺𑀲𑁆𑀲𑀚𑁆𑀚𑀦𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑀘𑁆𑀘𑀬𑁄𑀯 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀲𑀗𑁆𑀔𑀭𑀡𑀢𑁄 𑀲𑀗𑁆𑀔𑀸𑀭𑁄𑀢𑀺 𑀯𑀼𑀢𑁆𑀢𑁄. 𑀇𑀢𑀺 𑀳𑁂𑀝𑁆𑀞𑀸 𑀆𑀳𑀸𑀭𑀧𑀘𑁆𑀘𑀬𑁄 𑀓𑀣𑀺𑀢𑁄, 𑀇𑀥 𑀲𑀗𑁆𑀔𑀸𑀭𑀧𑀘𑁆𑀘𑀬𑁄𑀢𑀺 𑀅𑀬𑀫𑁂𑀢𑁆𑀣 𑀳𑁂𑀝𑁆𑀞𑀺𑀫𑀢𑁄 𑀯𑀺𑀲𑁂𑀲𑁄. ‘‘𑀳𑁂𑀝𑁆𑀞𑀸 𑀦𑀺𑀧𑁆𑀧𑀭𑀺𑀬𑀸𑀬𑀸𑀳𑀸𑀭𑁄 𑀕𑀳𑀺𑀢𑁄, 𑀇𑀥 𑀧𑀭𑀺𑀬𑀸𑀬𑀸𑀳𑀸𑀭𑁄𑀢𑀺 𑀏𑀯𑀁 𑀕𑀳𑀺𑀢𑁂 𑀯𑀺𑀲𑁂𑀲𑁄 𑀧𑀸𑀓𑀝𑁄 𑀪𑀯𑁂𑀬𑁆𑀬, 𑀦𑁄 𑀘 𑀕𑀡𑁆𑀳𑀺𑀁𑀲𑀽’𑀢𑀺 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀆𑀳. 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑁆𑀲𑀧𑀺 𑀳𑀺 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑁆𑀲𑀧𑀺 𑀧𑀘𑁆𑀘𑀬𑁄 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺. 𑀯𑀺𑀦𑀸 𑀧𑀘𑁆𑀘𑀬𑁂𑀦 𑀥𑀫𑁆𑀫𑁄 𑀦𑀸𑀫 𑀦𑀢𑁆𑀣𑀺. 𑀢𑀢𑁆𑀣 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑁆𑀲 𑀢𑀺𑀡𑀭𑀼𑀓𑁆𑀔𑀮𑀢𑀸𑀤𑀺𑀦𑁄 𑀧𑀣𑀯𑀻𑀭𑀲𑁄 𑀆𑀧𑁄𑀭𑀲𑁄 𑀘 𑀧𑀘𑁆𑀘𑀬𑁄 𑀳𑁄𑀢𑀺. 𑀤𑁂𑀯𑁂 𑀅𑀯𑀲𑁆𑀲𑀦𑁆𑀢𑁂 𑀳𑀺 𑀢𑀺𑀡𑀸𑀤𑀻𑀦𑀺 𑀫𑀺𑀮𑀸𑀬𑀦𑁆𑀢𑀺, 𑀯𑀲𑁆𑀲𑀦𑁆𑀢𑁂 𑀘 𑀧𑀦 𑀳𑀭𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀇𑀢𑀺 𑀢𑁂𑀲𑀁 𑀧𑀣𑀯𑀻𑀭𑀲𑁄 𑀆𑀧𑁄𑀭𑀲𑁄 𑀘 𑀧𑀘𑁆𑀘𑀬𑁄 𑀳𑁄𑀢𑀺. 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑁆𑀲 𑀅𑀯𑀺𑀚𑁆𑀚𑀸 𑀢𑀡𑁆𑀳𑀸 𑀓𑀫𑁆𑀫𑀁 𑀆𑀳𑀸𑀭𑁄𑀢𑀺 𑀏𑀯𑀫𑀸𑀤𑀬𑁄 𑀧𑀘𑁆𑀘𑀬𑀸, 𑀇𑀢𑀺 𑀳𑁂𑀝𑁆𑀞𑀸 𑀧𑀘𑁆𑀘𑀬𑁄𑀬𑁂𑀯 𑀆𑀳𑀸𑀭𑁄𑀢𑀺 𑀓𑀣𑀺𑀢𑁄, 𑀇𑀥 𑀲𑀗𑁆𑀔𑀸𑀭𑁄𑀢𑀺. 𑀅𑀬𑀫𑁂𑀯𑁂𑀢𑁆𑀣 𑀯𑀺𑀲𑁂𑀲𑁄.

𑀅𑀬𑀁 ¶ 𑀔𑁄, 𑀆𑀯𑀼𑀲𑁄𑀢𑀺 𑀆𑀯𑀼𑀲𑁄 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸𑀭𑀸 𑀫𑀳𑀸𑀩𑁄𑀥𑀺𑀫𑀡𑁆𑀟𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀬𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀘𑁆𑀙𑀺𑀓𑀢𑁆𑀯𑀸 𑀅𑀬𑀁 𑀏𑀓𑀥𑀫𑁆𑀫𑁄 𑀤𑁂𑀲𑀺𑀢𑁄. 𑀢𑀢𑁆𑀣 𑀏𑀓𑀥𑀫𑁆𑀫𑁂 𑀢𑀼𑀫𑁆𑀳𑁂𑀳𑀺 𑀲𑀩𑁆𑀩𑁂𑀳𑁂𑀯 𑀲𑀗𑁆𑀕𑀸𑀬𑀺𑀢𑀩𑁆𑀩𑀁 𑀦 𑀯𑀺𑀯𑀤𑀺𑀢𑀩𑁆𑀩𑀁. 𑀬𑀣𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀬𑀣𑀸 𑀲𑀗𑁆𑀕𑀸𑀬𑀫𑀸𑀦𑀸𑀦𑀁 𑀢𑀼𑀫𑁆𑀳𑀸𑀓𑀁 𑀇𑀤𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀤𑁆𑀥𑀦𑀺𑀬𑀁 𑀅𑀲𑁆𑀲. 𑀏𑀓𑁂𑀦 𑀳𑀺 𑀪𑀺𑀓𑁆𑀔𑀼𑀦𑀸 ¶ ‘‘𑀅𑀢𑁆𑀣𑀺, 𑀔𑁄 𑀆𑀯𑀼𑀲𑁄, 𑀏𑀓𑁄 𑀥𑀫𑁆𑀫𑁄 𑀲𑀫𑁆𑀫𑀤𑀓𑁆𑀔𑀸𑀢𑁄. 𑀓𑀢𑀫𑁄 𑀏𑀓𑁄 𑀥𑀫𑁆𑀫𑁄? 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸. 𑀲𑀩𑁆𑀩𑁂 𑀲𑀢𑁆𑀢𑀸 𑀲𑀗𑁆𑀔𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 𑀓𑀣𑀺𑀢𑁂 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀅𑀜𑁆𑀜𑁄 𑀓𑀣𑁂𑀲𑁆𑀲𑀢𑀺. 𑀢𑀲𑁆𑀲𑀧𑀺 𑀅𑀜𑁆𑀜𑁄𑀢𑀺 𑀏𑀯𑀁 𑀧𑀭𑀫𑁆𑀧𑀭𑀓𑀣𑀸𑀦𑀺𑀬𑀫𑁂𑀦 𑀇𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀭𑀁 𑀢𑀺𑀝𑁆𑀞𑀫𑀸𑀦𑀁 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀪𑀯𑀺𑀲𑁆𑀲𑀢𑀻𑀢𑀺 𑀏𑀓𑀓𑀯𑀲𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀲𑀸𑀫𑀕𑁆𑀕𑀺𑀭𑀲𑀁 𑀤𑀲𑁆𑀲𑁂𑀲𑀻𑀢𑀺.

𑀏𑀓𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀓𑀯𑀡𑁆𑀡𑀦𑀸

𑁩𑁦𑁪. 𑀇𑀢𑀺 𑀏𑀓𑀓𑀯𑀲𑁂𑀦 𑀲𑀸𑀫𑀕𑁆𑀕𑀺𑀭𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀤𑀼𑀓𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀦𑀸𑀫𑀭𑀽𑀧𑀤𑀼𑀓𑁂 𑀦𑀸𑀫𑀦𑁆𑀢𑀺 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀦𑀺𑀩𑁆𑀩𑀸𑀦𑀜𑁆𑀘. 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀦𑀸𑀫𑀦𑀝𑁆𑀞𑁂𑀦 𑀦𑀸𑀫𑀁. 𑀦𑀸𑀫𑀦𑀝𑁆𑀞𑁂𑀦𑀸𑀢𑀺 𑀦𑀸𑀫𑀓𑀭𑀡𑀝𑁆𑀞𑁂𑀦. 𑀬𑀣𑀸 𑀳𑀺 𑀫𑀳𑀸𑀚𑀦𑀲𑀫𑁆𑀫𑀢𑀢𑁆𑀢𑀸 𑀫𑀳𑀸𑀲𑀫𑁆𑀫𑀢𑀲𑁆𑀲 ¶ ‘‘𑀫𑀳𑀸𑀲𑀫𑁆𑀫𑀢𑁄’’𑀢𑀺 𑀦𑀸𑀫𑀁 𑀅𑀳𑁄𑀲𑀺, 𑀬𑀣𑀸 𑀫𑀸𑀢𑀸𑀧𑀺𑀢𑀭𑁄 ‘‘𑀅𑀬𑀁 𑀢𑀺𑀲𑁆𑀲𑁄 𑀦𑀸𑀫 𑀳𑁄𑀢𑀼, 𑀨𑀼𑀲𑁆𑀲𑁄 𑀦𑀸𑀫 𑀳𑁄𑀢𑀽’’𑀢𑀺 𑀏𑀯𑀁 𑀧𑀼𑀢𑁆𑀢𑀲𑁆𑀲 𑀓𑀺𑀢𑁆𑀢𑀺𑀫𑀦𑀸𑀫𑀁 𑀓𑀭𑁄𑀦𑁆𑀢𑀺, 𑀬𑀣𑀸 𑀯𑀸 ‘‘𑀥𑀫𑁆𑀫𑀓𑀣𑀺𑀓𑁄 𑀯𑀺𑀦𑀬𑀥𑀭𑁄’’𑀢𑀺 𑀕𑀼𑀡𑀢𑁄 𑀦𑀸𑀫𑀁 𑀆𑀕𑀘𑁆𑀙𑀢𑀺, 𑀦 𑀏𑀯𑀁 𑀯𑁂𑀤𑀦𑀸𑀤𑀻𑀦𑀁. 𑀯𑁂𑀤𑀦𑀸𑀤𑀬𑁄 𑀳𑀺 𑀫𑀳𑀸𑀧𑀣𑀯𑀻𑀆𑀤𑀬𑁄 𑀯𑀺𑀬 𑀅𑀢𑁆𑀢𑀦𑁄 𑀦𑀸𑀫𑀁 𑀓𑀭𑁄𑀦𑁆𑀢𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀢𑁂𑀲𑀁 𑀦𑀸𑀫𑀁 𑀉𑀧𑁆𑀧𑀦𑁆𑀦𑀫𑁂𑀯 𑀳𑁄𑀢𑀺. 𑀦 𑀳𑀺 𑀯𑁂𑀤𑀦𑀁 𑀉𑀧𑁆𑀧𑀦𑁆𑀦𑀁 ‘‘𑀢𑁆𑀯𑀁 𑀯𑁂𑀤𑀦𑀸 𑀦𑀸𑀫 𑀳𑁄𑀳𑀻’’𑀢𑀺, 𑀓𑁄𑀘𑀺 𑀪𑀡𑀢𑀺, 𑀦 𑀘𑀲𑁆𑀲𑀸 𑀬𑁂𑀦 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀦𑀸𑀫𑀕𑁆𑀕𑀳𑀡𑀓𑀺𑀘𑁆𑀘𑀁 𑀅𑀢𑁆𑀣𑀺, 𑀬𑀣𑀸 𑀧𑀣𑀯𑀺𑀬𑀸 𑀉𑀧𑁆𑀧𑀦𑁆𑀦𑀸𑀬 ‘‘𑀢𑁆𑀯𑀁 𑀧𑀣𑀯𑀻 𑀦𑀸𑀫 𑀳𑁄𑀳𑀻’’𑀢𑀺 𑀦𑀸𑀫𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀘𑀓𑁆𑀓𑀯𑀸𑀴𑀲𑀺𑀦𑁂𑀭𑀼𑀫𑁆𑀳𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀦𑀓𑁆𑀔𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 ‘‘𑀢𑁆𑀯𑀁 𑀘𑀓𑁆𑀓𑀯𑀸𑀴𑀁 𑀦𑀸𑀫, 𑀢𑁆𑀯𑀁 𑀦𑀓𑁆𑀔𑀢𑁆𑀢𑀁 𑀦𑀸𑀫 𑀳𑁄𑀳𑀻’’𑀢𑀺 𑀦𑀸𑀫𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀦𑀸𑀫𑀁 𑀉𑀧𑁆𑀧𑀦𑁆𑀦𑀫𑁂𑀯 𑀳𑁄𑀢𑀺, 𑀑𑀧𑀧𑀸𑀢𑀺𑀓𑀸 𑀧𑀜𑁆𑀜𑀢𑁆𑀢𑀺 𑀦𑀺𑀧𑀢𑀢𑀺, 𑀏𑀯𑀁 𑀯𑁂𑀤𑀦𑀸𑀬 𑀉𑀧𑁆𑀧𑀦𑁆𑀦𑀸𑀬 ‘‘𑀢𑁆𑀯𑀁 𑀯𑁂𑀤𑀦𑀸 𑀦𑀸𑀫 𑀳𑁄𑀳𑀻’’𑀢𑀺 𑀦𑀸𑀫𑀕𑁆𑀕𑀳𑀡𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀢𑀸𑀬 𑀉𑀧𑁆𑀧𑀦𑁆𑀦𑀸𑀬 𑀯𑁂𑀤𑀦𑀸𑀢𑀺 ¶ 𑀦𑀸𑀫𑀁 𑀉𑀧𑁆𑀧𑀦𑁆𑀦𑀫𑁂𑀯 𑀳𑁄𑀢𑀺. 𑀲𑀜𑁆𑀜𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄 𑀅𑀢𑀻𑀢𑁂𑀧𑀺 𑀳𑀺 𑀯𑁂𑀤𑀦𑀸 𑀯𑁂𑀤𑀦𑀸𑀬𑁂𑀯. 𑀲𑀜𑁆𑀜𑀸. 𑀲𑀗𑁆𑀔𑀸𑀭𑀸. 𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀫𑁂𑀯. 𑀅𑀦𑀸𑀕𑀢𑁂𑀧𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀧𑀺. 𑀦𑀺𑀩𑁆𑀩𑀸𑀦𑀁 𑀧𑀦 𑀲𑀤𑀸𑀧𑀺 𑀦𑀺𑀩𑁆𑀩𑀸𑀦𑀫𑁂𑀯𑀸𑀢𑀺. 𑀦𑀸𑀫𑀦𑀝𑁆𑀞𑁂𑀦 𑀦𑀸𑀫𑀁. 𑀦𑀫𑀦𑀝𑁆𑀞𑁂𑀦𑀸𑀧𑀺 𑀘𑁂𑀢𑁆𑀣 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀦𑀸𑀫𑀁. 𑀢𑁂 𑀳𑀺 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁 𑀦𑀫𑀦𑁆𑀢𑀺. 𑀦𑀸𑀫𑀦𑀝𑁆𑀞𑁂𑀦 𑀲𑀩𑁆𑀩𑀫𑁆𑀧𑀺 𑀦𑀸𑀫𑀁. 𑀘𑀢𑁆𑀢𑀸𑀭𑁄 𑀳𑀺 𑀔𑀦𑁆𑀥𑀸 𑀆𑀭𑀫𑁆𑀫𑀡𑁂 𑀅𑀜𑁆𑀜𑀫𑀜𑁆𑀜𑀁 𑀦𑀸𑀫𑁂𑀦𑁆𑀢𑀺 ¶ , 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑀢𑀸𑀬 𑀅𑀢𑁆𑀢𑀦𑀺 𑀅𑀦𑀯𑀚𑁆𑀚𑀥𑀫𑁆𑀫𑁂 𑀦𑀸𑀫𑁂𑀢𑀺.

𑀭𑀽𑀧𑀦𑁆𑀢𑀺 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀭𑀽𑀧𑀁, 𑀢𑀁 𑀲𑀩𑁆𑀩𑀫𑁆𑀧𑀺 𑀭𑀼𑀧𑁆𑀧𑀦𑀝𑁆𑀞𑁂𑀦 𑀭𑀽𑀧𑀁. 𑀢𑀲𑁆𑀲 𑀯𑀺𑀢𑁆𑀣𑀸𑀭𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀅𑀯𑀺𑀚𑁆𑀚𑀸𑀢𑀺 𑀤𑀼𑀓𑁆𑀔𑀸𑀤𑀻𑀲𑀼 𑀅𑀜𑁆𑀜𑀸𑀡𑀁. 𑀅𑀬𑀫𑁆𑀧𑀺 𑀯𑀺𑀢𑁆𑀣𑀸𑀭𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀓𑀣𑀺𑀢𑀸𑀬𑁂𑀯. 𑀪𑀯𑀢𑀡𑁆𑀳𑀸𑀢𑀺 𑀪𑀯𑀧𑀢𑁆𑀣𑀦𑀸. 𑀬𑀣𑀸𑀳 ‘‘𑀢𑀢𑁆𑀣 𑀓𑀢𑀫𑀸 𑀪𑀯𑀢𑀡𑁆𑀳𑀸? 𑀬𑁄 𑀪𑀯𑁂𑀲𑀼 𑀪𑀯𑀘𑁆𑀙𑀦𑁆𑀤𑁄’’𑀢𑀺𑀆𑀤𑀺 (𑀥. 𑀲. 𑁧𑁩𑁧𑁯).

𑀪𑀯𑀤𑀺𑀝𑁆𑀞𑀻𑀢𑀺 𑀪𑀯𑁄 𑀯𑀼𑀘𑁆𑀘𑀢𑀺 𑀲𑀲𑁆𑀲𑀢𑀁, 𑀲𑀲𑁆𑀲𑀢𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀤𑀺𑀝𑁆𑀞𑀺. 𑀲𑀸 ‘‘𑀢𑀢𑁆𑀣 𑀓𑀢𑀫𑀸 𑀪𑀯𑀤𑀺𑀝𑁆𑀞𑀺? ‘𑀪𑀯𑀺𑀲𑁆𑀲𑀢𑀺 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’𑀢𑀺 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢’’𑀦𑁆𑀢𑀺𑀆𑀤𑀺𑀦𑀸 (𑀥. 𑀲. 𑁧𑁩𑁨𑁦) 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 𑀯𑀺𑀢𑁆𑀣𑀸𑀭𑀺𑀢𑀸. 𑀯𑀺𑀪𑀯𑀤𑀺𑀝𑁆𑀞𑀻𑀢𑀺 𑀯𑀺𑀪𑀯𑁄 𑀯𑀼𑀘𑁆𑀘𑀢𑀺 𑀉𑀘𑁆𑀙𑁂𑀤𑀁, 𑀉𑀘𑁆𑀙𑁂𑀤𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀤𑀺𑀝𑁆𑀞𑀺. 𑀲𑀸𑀧𑀺 ‘‘𑀢𑀢𑁆𑀣 𑀓𑀢𑀫𑀸 𑀯𑀺𑀪𑀯𑀤𑀺𑀝𑁆𑀞𑀺? ‘𑀦 𑀪𑀯𑀺𑀲𑁆𑀲𑀢𑀺 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’𑀢𑀺 (𑀥. 𑀲. 𑁨𑁮𑁫). 𑀬𑀸 𑀏𑀯𑀭𑀽𑀧𑀸 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀕𑀢’’𑀦𑁆𑀢𑀺𑀆𑀤𑀺𑀦𑀸 (𑀥. 𑀲. 𑁧𑁩𑁨𑁧) 𑀦𑀬𑁂𑀦 𑀢𑀢𑁆𑀣𑁂𑀯 𑀯𑀺𑀢𑁆𑀣𑀸𑀭𑀺𑀢𑀸.

𑀅𑀳𑀺𑀭𑀺𑀓𑀦𑁆𑀢𑀺 ¶ ‘‘𑀬𑀁 𑀦 𑀳𑀺𑀭𑀻𑀬𑀢𑀺 𑀳𑀺𑀭𑀻𑀬𑀺𑀢𑀩𑁆𑀩𑁂𑀦𑀸’’𑀢𑀺 (𑀥. 𑀲. 𑁧𑁩𑁨𑁮) 𑀏𑀯𑀁 𑀯𑀺𑀢𑁆𑀣𑀸𑀭𑀺𑀢𑀸 𑀦𑀺𑀮𑁆𑀮𑀚𑁆𑀚𑀢𑀸. 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺 ‘‘𑀬𑀁 𑀦 𑀑𑀢𑁆𑀢𑀧𑁆𑀧𑀢𑀺 𑀑𑀢𑁆𑀢𑀧𑁆𑀧𑀺𑀢𑀩𑁆𑀩𑁂𑀦𑀸’’𑀢𑀺 (𑀥. 𑀲. 𑁧𑁩𑁨𑁯) 𑀏𑀯𑀁 𑀯𑀺𑀢𑁆𑀣𑀸𑀭𑀺𑀢𑁄 𑀅𑀪𑀸𑀬𑀦𑀓𑀆𑀓𑀸𑀭𑁄.

𑀳𑀺𑀭𑀻 𑀘 𑀑𑀢𑁆𑀢𑀧𑁆𑀧𑀜𑁆𑀘𑀸𑀢𑀺 ‘‘𑀬𑀁 𑀳𑀺𑀭𑀻𑀬𑀢𑀺 𑀳𑀺𑀭𑀻𑀬𑀺𑀢𑀩𑁆𑀩𑁂𑀦, 𑀑𑀢𑁆𑀢𑀧𑁆𑀧𑀢𑀺 𑀑𑀢𑁆𑀢𑀧𑁆𑀧𑀺𑀢𑀩𑁆𑀩𑁂𑀦𑀸’’𑀢𑀺 (𑀥. 𑀲. 𑁧𑁩𑁩𑁦-𑁩𑁧) 𑀏𑀯𑀁 𑀯𑀺𑀢𑁆𑀣𑀸𑀭𑀺𑀢𑀸𑀦𑀺 𑀳𑀺𑀭𑀺𑀑𑀢𑁆𑀢𑀧𑁆𑀧𑀸𑀦𑀺. 𑀅𑀧𑀺 𑀘𑁂𑀢𑁆𑀣 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀳𑀺𑀭𑀻, 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑀁 𑀑𑀢𑁆𑀢𑀧𑁆𑀧𑀁. 𑀅𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀸 𑀳𑀺𑀭𑀻, 𑀮𑁄𑀓𑀸𑀥𑀺𑀧𑀢𑁂𑀬𑁆𑀬𑀁 𑀑𑀢𑁆𑀢𑀧𑁆𑀧𑀁. 𑀮𑀚𑁆𑀚𑀸𑀲𑀪𑀸𑀯𑀲𑀡𑁆𑀞𑀺𑀢𑀸 𑀳𑀺𑀭𑀻, 𑀪𑀬𑀲𑀪𑀸𑀯𑀲𑀡𑁆𑀞𑀺𑀢𑀁 𑀑𑀢𑁆𑀢𑀧𑁆𑀧𑀁. 𑀯𑀺𑀢𑁆𑀣𑀸𑀭𑀓𑀣𑀸 𑀧𑀦𑁂𑀢𑁆𑀣 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀸.

𑀤𑁄𑀯𑀘𑀲𑁆𑀲𑀢𑀸𑀢𑀺 ¶ 𑀤𑀼𑀓𑁆𑀔𑀁 𑀯𑀘𑁄 𑀏𑀢𑀲𑁆𑀫𑀺𑀁 𑀯𑀺𑀧𑁆𑀧𑀝𑀺𑀓𑀽𑀮𑀕𑀸𑀳𑀺𑀫𑁆𑀳𑀺 𑀯𑀺𑀧𑀘𑁆𑀘𑀦𑀻𑀓𑀲𑀸𑀢𑁂 𑀅𑀦𑀸𑀤𑀭𑁂 𑀧𑀼𑀕𑁆𑀕𑀮𑁂𑀢𑀺 𑀤𑀼𑀩𑁆𑀩𑀘𑁄, 𑀢𑀲𑁆𑀲 𑀓𑀫𑁆𑀫𑀁 𑀤𑁄𑀯𑀘𑀲𑁆𑀲𑀁, 𑀢𑀲𑁆𑀲 𑀪𑀸𑀯𑁄 𑀤𑁄𑀯𑀘𑀲𑁆𑀲𑀢𑀸. 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀲𑀸 ‘‘𑀢𑀢𑁆𑀣 𑀓𑀢𑀫𑀸 𑀤𑁄𑀯𑀘𑀲𑁆𑀲𑀢𑀸? 𑀲𑀳𑀥𑀫𑁆𑀫𑀺𑀓𑁂 𑀯𑀼𑀘𑁆𑀘𑀫𑀸𑀦𑁂 𑀤𑁄𑀯𑀘𑀲𑁆𑀲𑀸𑀬’’𑀦𑁆𑀢𑀺 (𑀥. 𑀲. 𑁧𑁩𑁩𑁨) 𑀅𑀪𑀺𑀥𑀫𑁆𑀫𑁂 𑀆𑀕𑀢𑀸. 𑀲𑀸 𑀅𑀢𑁆𑀣𑀢𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀳𑁄𑀢𑀺. ‘‘𑀘𑀢𑀼𑀦𑁆𑀦𑀜𑁆𑀘 𑀔𑀦𑁆𑀥𑀸𑀦𑀁 𑀏𑀢𑁂𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀯𑀤𑀦𑁆𑀢𑀺. 𑀧𑀸𑀧𑀫𑀺𑀢𑁆𑀢𑀢𑀸𑀢𑀺 ¶ 𑀧𑀸𑀧𑀸 𑀅𑀲𑁆𑀲𑀤𑁆𑀥𑀸𑀤𑀬𑁄 𑀧𑀼𑀕𑁆𑀕𑀮𑀸 𑀏𑀢𑀲𑁆𑀲 𑀫𑀺𑀢𑁆𑀢𑀸𑀢𑀺 𑀧𑀸𑀧𑀫𑀺𑀢𑁆𑀢𑁄, 𑀢𑀲𑁆𑀲 𑀪𑀸𑀯𑁄 𑀧𑀸𑀧𑀫𑀺𑀢𑁆𑀢𑀢𑀸. 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀲𑀸 𑁋 ‘‘𑀢𑀢𑁆𑀣 𑀓𑀢𑀫𑀸 𑀧𑀸𑀧𑀫𑀺𑀢𑁆𑀢𑀢𑀸? 𑀬𑁂 𑀢𑁂 𑀧𑀼𑀕𑁆𑀕𑀮𑀸 𑀅𑀲𑁆𑀲𑀤𑁆𑀥𑀸 𑀤𑀼𑀲𑁆𑀲𑀻𑀮𑀸 𑀅𑀧𑁆𑀧𑀲𑁆𑀲𑀼𑀢𑀸 𑀫𑀘𑁆𑀙𑀭𑀺𑀦𑁄 𑀤𑀼𑀧𑁆𑀧𑀜𑁆𑀜𑀸. 𑀬𑀸 𑀢𑁂𑀲𑀁 𑀲𑁂𑀯𑀦𑀸 𑀦𑀺𑀲𑁂𑀯𑀦𑀸 𑀲𑀁𑀲𑁂𑀯𑀦𑀸 𑀪𑀚𑀦𑀸 𑀲𑀁𑀪𑀚𑀦𑀸 𑀪𑀢𑁆𑀢𑀺 𑀲𑀁𑀪𑀢𑁆𑀢𑀺 𑀢𑀁𑀲𑀫𑁆𑀧𑀯𑀗𑁆𑀓𑀢𑀸’’𑀢𑀺 (𑀥. 𑀲. 𑁧𑁩𑁩𑁩) 𑀏𑀯𑀁 𑀆𑀕𑀢𑀸. 𑀲𑀸𑀧𑀺 𑀅𑀢𑁆𑀣𑀢𑁄 𑀤𑁄𑀯𑀘𑀲𑁆𑀲𑀢𑀸 𑀯𑀺𑀬 𑀤𑀝𑁆𑀞𑀩𑁆𑀩𑀸.

𑀲𑁄𑀯𑀘𑀲𑁆𑀲𑀢𑀸 𑀘 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀘 𑀯𑀼𑀢𑁆𑀢𑀧𑁆𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀉𑀪𑁄𑀧𑀺 𑀧𑀦𑁂𑀢𑀸 𑀇𑀥 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀓𑀣𑀺𑀢𑀸.

𑀆𑀧𑀢𑁆𑀢𑀺𑀓𑀼𑀲𑀮𑀢𑀸𑀢𑀺 ‘‘𑀧𑀜𑁆𑀘𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀺𑀬𑁄, 𑀲𑀢𑁆𑀢𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀺𑀬𑁄. 𑀬𑀸 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀆𑀧𑀢𑁆𑀢𑀺𑀓𑀼𑀲𑀮𑀢𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸’’𑀢𑀺 (𑀥. 𑀲. 𑁧𑁩𑁩𑁬) 𑀏𑀯𑀁 𑀯𑀼𑀢𑁆𑀢𑁄 𑀆𑀧𑀢𑁆𑀢𑀺𑀓𑀼𑀲𑀮𑀪𑀸𑀯𑁄.

𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸𑀢𑀺 ‘‘𑀬𑀸 𑀢𑀸𑀳𑀺 𑀆𑀧𑀢𑁆𑀢𑀻𑀳𑀺 𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸’’𑀢𑀺 (𑀥. 𑀲. 𑁧𑁩𑁩𑁭) 𑀏𑀯𑀁 𑀯𑀼𑀢𑁆𑀢𑀸 𑀲𑀳 𑀓𑀫𑁆𑀫𑀯𑀸𑀘𑀸𑀬 𑀆𑀧𑀢𑁆𑀢𑀻𑀳𑀺 𑀯𑀼𑀝𑁆𑀞𑀸𑀦𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑀸 𑀧𑀜𑁆𑀜𑀸.

𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑀢𑀸𑀢𑀺 ¶ ‘‘𑀅𑀢𑁆𑀣𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸 𑀲𑀫𑀸𑀧𑀢𑁆𑀢𑀺, 𑀅𑀢𑁆𑀣𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀲𑀫𑀸𑀧𑀢𑁆𑀢𑀺, 𑀅𑀢𑁆𑀣𑀺 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸 𑀲𑀫𑀸𑀧𑀢𑁆𑀢𑀺. 𑀬𑀸 𑀢𑀸𑀲𑀁 𑀲𑀫𑀸𑀧𑀢𑁆𑀢𑀻𑀦𑀁 𑀓𑀼𑀲𑀮𑀢𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸’’𑀢𑀺 (𑀥. 𑀲. 𑁧𑁩𑁩𑁮) 𑀏𑀯𑀁 𑀯𑀼𑀢𑁆𑀢𑀸 𑀲𑀳 𑀧𑀭𑀺𑀓𑀫𑁆𑀫𑁂𑀦 𑀅𑀧𑁆𑀧𑀦𑀸𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑀸 𑀧𑀜𑁆𑀜𑀸. 𑀲𑀫𑀸𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸𑀢𑀺 ‘‘𑀬𑀸 𑀢𑀸𑀳𑀺 𑀲𑀫𑀸𑀧𑀢𑁆𑀢𑀻𑀳𑀺 𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸’’𑀢𑀺 (𑀥. 𑀲. 𑁧𑁩𑁩𑁯) 𑀏𑀯𑀁 𑀯𑀼𑀢𑁆𑀢𑀸 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀲𑀫𑀬𑀯𑀲𑁂𑀦𑁂𑀯 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀲𑀫𑀢𑁆𑀣𑀸 ‘‘𑀏𑀢𑁆𑀢𑀓𑀁 𑀕𑀢𑁂 𑀲𑀽𑀭𑀺𑀬𑁂 𑀉𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀝𑁆𑀞𑀸𑀦𑀓𑀸𑀮𑀧𑀭𑀺𑀘𑁆𑀙𑁂𑀤𑀓𑀸 𑀧𑀜𑁆𑀜𑀸.

𑀥𑀸𑀢𑀼𑀓𑀼𑀲𑀮𑀢𑀸𑀢𑀺 ‘‘𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀘𑀓𑁆𑀔𑀼𑀥𑀸𑀢𑀼…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼. 𑀬𑀸 𑀢𑀸𑀲𑀁 𑀥𑀸𑀢𑀽𑀦𑀁 𑀓𑀼𑀲𑀮𑀢𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸’’𑀢𑀺 (𑀥. 𑀲. 𑁧𑁩𑁪𑁦) 𑀏𑀯𑀁 𑀯𑀼𑀢𑁆𑀢𑀸 𑀅𑀝𑁆𑀞𑀸𑀭𑀲𑀦𑁆𑀦𑀁 ¶ 𑀥𑀸𑀢𑀽𑀦𑀁 𑀲𑀪𑀸𑀯𑀧𑀭𑀺𑀘𑁆𑀙𑁂𑀤𑀓𑀸 𑀲𑀯𑀦𑀥𑀸𑀭𑀡𑀲𑀫𑁆𑀫𑀲𑀦𑀧𑀝𑀺𑀯𑁂𑀥𑀧𑀜𑁆𑀜𑀸. 𑀫𑀦𑀲𑀺𑀓𑀸𑀭𑀓𑀼𑀲𑀮𑀢𑀸𑀢𑀺 ‘‘𑀬𑀸 𑀢𑀸𑀲𑀁 𑀥𑀸𑀢𑀽𑀦𑀁 𑀫𑀦𑀲𑀺𑀓𑀸𑀭𑀓𑀼𑀲𑀮𑀢𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸’’𑀢𑀺 (𑀥. 𑀲. 𑁧𑁩𑁪𑁧) 𑀏𑀯𑀁 𑀯𑀼𑀢𑁆𑀢𑀸 𑀢𑀸𑀲𑀁𑀬𑁂𑀯 𑀥𑀸𑀢𑀽𑀦𑀁 𑀲𑀫𑁆𑀫𑀲𑀦𑀧𑀝𑀺𑀯𑁂𑀥𑀧𑀘𑁆𑀘𑀯𑁂𑀓𑁆𑀔𑀡𑀧𑀜𑁆𑀜𑀸.

𑀆𑀬𑀢𑀦𑀓𑀼𑀲𑀮𑀢𑀸𑀢𑀺 ‘‘𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀥𑀫𑁆𑀫𑀸𑀬𑀢𑀦𑀁. 𑀬𑀸 𑀢𑁂𑀲𑀁 𑀆𑀬𑀢𑀦𑀸𑀦𑀁 𑀆𑀬𑀢𑀦𑀓𑀼𑀲𑀮𑀢𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸’’𑀢𑀺 (𑀥. 𑀲. 𑁧𑁩𑁪𑁨) 𑀏𑀯𑀁 𑀯𑀼𑀢𑁆𑀢𑀸 𑀤𑁆𑀯𑀸𑀤𑀲𑀦𑁆𑀦𑀁 𑀆𑀬𑀢𑀦𑀸𑀦𑀁 𑀉𑀕𑁆𑀕𑀳𑀫𑀦𑀲𑀺𑀓𑀸𑀭𑀧𑀚𑀸𑀦𑀦𑀸 𑀧𑀜𑁆𑀜𑀸. 𑀅𑀧𑀺𑀘 𑀥𑀸𑀢𑀼𑀓𑀼𑀲𑀮𑀢𑀸𑀧𑀺 𑀉𑀕𑁆𑀕𑀳𑀫𑀦𑀲𑀺𑀓𑀸𑀭𑀲𑀯𑀦𑀲𑀫𑁆𑀫𑀲𑀦𑀧𑀝𑀺𑀯𑁂𑀥𑀧𑀘𑁆𑀘𑀯𑁂𑀓𑁆𑀔𑀡𑁂𑀲𑀼 ¶ 𑀯𑀢𑁆𑀢𑀢𑀺 𑀫𑀦𑀲𑀺𑀓𑀸𑀭𑀓𑀼𑀲𑀮𑀢𑀸𑀧𑀺 𑀆𑀬𑀢𑀦𑀓𑀼𑀲𑀮𑀢𑀸𑀧𑀺. 𑀅𑀬𑀁 𑀧𑀦𑁂𑀢𑁆𑀣 𑀯𑀺𑀲𑁂𑀲𑁄, 𑀲𑀯𑀦𑀉𑀕𑁆𑀕𑀳𑀧𑀘𑁆𑀘𑀯𑁂𑀓𑁆𑀔𑀡𑀸 𑀮𑁄𑀓𑀺𑀬𑀸, 𑀧𑀝𑀺𑀯𑁂𑀥𑁄 𑀮𑁄𑀓𑀼𑀢𑁆𑀢𑀭𑁄, 𑀲𑀫𑁆𑀫𑀲𑀦𑀫𑀦𑀲𑀺𑀓𑀸𑀭𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑀢𑀸𑀢𑀺 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸…𑀧𑁂… 𑀲𑀫𑀼𑀤𑀬𑁄 𑀳𑁄𑀢𑀻𑀢𑀺 𑀬𑀸 𑀢𑀢𑁆𑀣 𑀧𑀜𑁆𑀜𑀸 𑀧𑀚𑀸𑀦𑀦𑀸’’𑀢𑀺 (𑀥. 𑀲. 𑁧𑁩𑁪𑁩) 𑀏𑀯𑀁 𑀯𑀼𑀢𑁆𑀢𑀸 𑀤𑁆𑀯𑀸𑀤𑀲𑀦𑁆𑀦𑀁 𑀧𑀘𑁆𑀘𑀬𑀸𑀓𑀸𑀭𑀸𑀦𑀁 𑀉𑀕𑁆𑀕𑀳𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀧𑀜𑁆𑀜𑀸.

𑀞𑀸𑀦𑀓𑀼𑀲𑀮𑀢𑀸𑀢𑀺 ‘‘𑀬𑁂 𑀬𑁂 𑀥𑀫𑁆𑀫𑀸 𑀬𑁂𑀲𑀁 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀸 𑀉𑀧𑁆𑀧𑀸𑀤𑀸𑀬 𑀢𑀁 𑀢𑀁 𑀞𑀸𑀦𑀦𑁆𑀢𑀺 𑀬𑀸 𑀢𑀢𑁆𑀣 𑀧𑀜𑁆𑀜𑀸 𑀧𑀚𑀸𑀦𑀦𑀸’’𑀢𑀺 (𑀥. 𑀲. 𑁧𑁩𑁪𑁪) 𑀏𑀯𑀁 𑀯𑀼𑀢𑁆𑀢𑀸 ‘‘𑀘𑀓𑁆𑀔𑀼𑀁 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀭𑀽𑀧𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀲𑁆𑀲 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀘𑀓𑁆𑀔𑀼𑀭𑀽𑀧𑀁 (𑀥. 𑀲. 𑀅𑀝𑁆𑀞. 𑁧𑁩𑁪𑁪) 𑀞𑀸𑀦𑀜𑁆𑀘𑁂𑀯 𑀓𑀸𑀭𑀡𑀜𑁆𑀘𑀸’’𑀢𑀺 𑀏𑀯𑀁 𑀞𑀸𑀦𑀧𑀭𑀺𑀘𑁆𑀙𑀺𑀦𑁆𑀤𑀦𑀲𑀫𑀢𑁆𑀣𑀸 𑀧𑀜𑁆𑀜𑀸. 𑀅𑀝𑁆𑀞𑀸𑀦𑀓𑀼𑀲𑀮𑀢𑀸𑀢𑀺 ‘‘𑀬𑁂 𑀬𑁂 𑀥𑀫𑁆𑀫𑀸 𑀬𑁂𑀲𑀁 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀦 𑀳𑁂𑀢𑀽 𑀦 𑀧𑀘𑁆𑀘𑀬𑀸 𑀉𑀧𑁆𑀧𑀸𑀤𑀸𑀬 𑀢𑀁 𑀢𑀁 𑀅𑀝𑁆𑀞𑀸𑀦𑀦𑁆𑀢𑀺 𑀬𑀸 𑀢𑀢𑁆𑀣 𑀧𑀜𑁆𑀜𑀸 𑀧𑀚𑀸𑀦𑀦𑀸’’𑀢𑀺 (𑀥. 𑀲. 𑁧𑁩𑁪𑁫) 𑀏𑀯𑀁 𑀯𑀼𑀢𑁆𑀢𑀸 ‘‘𑀘𑀓𑁆𑀔𑀼𑀁 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀭𑀽𑀧𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀘𑀓𑁆𑀔𑀼𑀭𑀽𑀧𑀁 𑀦 𑀞𑀸𑀦𑀁 𑀦 𑀓𑀸𑀭𑀡’’𑀦𑁆𑀢𑀺 𑀏𑀯𑀁 𑀅𑀝𑁆𑀞𑀸𑀦𑀧𑀭𑀺𑀘𑁆𑀙𑀺𑀦𑁆𑀤𑀦𑀲𑀫𑀢𑁆𑀣𑀸 𑀧𑀜𑁆𑀜𑀸 𑀅𑀧𑀺𑀘 𑀏𑀢𑀲𑁆𑀫𑀺𑀁 𑀤𑀼𑀓𑁂 ‘‘𑀓𑀺𑀢𑁆𑀢𑀸𑀯𑀢𑀸 𑀧𑀦, 𑀪𑀦𑁆𑀢𑁂, 𑀞𑀸𑀦𑀸𑀞𑀸𑀦𑀓𑀼𑀲𑀮𑁄 ¶ 𑀪𑀺𑀓𑁆𑀔𑀽𑀢𑀺 𑀅𑀮𑀁 𑀯𑀘𑀦𑀸𑀬𑀸𑀢𑀺. 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄, 𑀬𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀦𑀺𑀘𑁆𑀘𑀢𑁄 𑀉𑀧𑀕𑀘𑁆𑀙𑁂𑀬𑁆𑀬, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺 𑀧𑀚𑀸𑀦𑀸𑀢𑀺. 𑀞𑀸𑀦𑀜𑁆𑀘 𑀔𑁄 𑀏𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀧𑀼𑀣𑀼𑀚𑁆𑀚𑀦𑁄 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀦𑀺𑀘𑁆𑀘𑀢𑁄 𑀉𑀧𑀕𑀘𑁆𑀙𑁂𑀬𑁆𑀬𑀸’’𑀢𑀺 (𑀫. 𑀦𑀺. 𑁩.𑁧𑁨𑁭) 𑀇𑀫𑀺𑀦𑀸𑀧𑀺 𑀲𑀼𑀢𑁆𑀢𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀚𑁆𑀚𑀯𑀦𑁆𑀢𑀺 ¶ 𑀕𑁄𑀫𑀼𑀢𑁆𑀢𑀯𑀗𑁆𑀓𑀢𑀸 𑀘𑀦𑁆𑀤𑀯𑀗𑁆𑀓𑀢𑀸 𑀦𑀗𑁆𑀕𑀮𑀓𑁄𑀝𑀺𑀯𑀗𑁆𑀓𑀢𑀸𑀢𑀺 𑀢𑀬𑁄 𑀅𑀦𑀚𑁆𑀚𑀯𑀸. 𑀏𑀓𑀘𑁆𑀘𑁄 𑀳𑀺 𑀪𑀺𑀓𑁆𑀔𑀼 𑀧𑀞𑀫𑀯𑀬𑁂 𑀏𑀓𑀯𑀻𑀲𑀢𑀺𑀬𑀸 𑀅𑀦𑁂𑀲𑀦𑀸𑀲𑀼 𑀙𑀲𑀼 𑀘 𑀅𑀕𑁄𑀘𑀭𑁂𑀲𑀼 𑀘𑀭𑀢𑀺, 𑀫𑀚𑁆𑀛𑀺𑀫𑀧𑀘𑁆𑀙𑀺𑀫𑀯𑀬𑁂𑀲𑀼 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄 𑀳𑁄𑀢𑀺, 𑀅𑀬𑀁 𑀕𑁄𑀫𑀼𑀢𑁆𑀢𑀯𑀗𑁆𑀓𑀢𑀸 𑀦𑀸𑀫. 𑀏𑀓𑁄 𑀧𑀞𑀫𑀯𑀬𑁂𑀧𑀺 𑀧𑀘𑁆𑀙𑀺𑀫𑀯𑀬𑁂𑀧𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀧𑀽𑀭𑁂𑀢𑀺, 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄 𑀳𑁄𑀢𑀺, 𑀫𑀚𑁆𑀛𑀺𑀫𑀯𑀬𑁂 𑀧𑀼𑀭𑀺𑀫𑀲𑀤𑀺𑀲𑁄, 𑀅𑀬𑀁 𑀘𑀦𑁆𑀤𑀯𑀗𑁆𑀓𑀢𑀸 𑀦𑀸𑀫. 𑀏𑀓𑁄 𑀧𑀞𑀫𑀯𑀬𑁂𑀧𑀺 𑀫𑀚𑁆𑀛𑀺𑀫𑀯𑀬𑁂𑀧𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀧𑀽𑀭𑁂𑀢𑀺, 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄 𑀳𑁄𑀢𑀺, 𑀧𑀘𑁆𑀙𑀺𑀫𑀯𑀬𑁂 𑀧𑀼𑀭𑀺𑀫𑀲𑀤𑀺𑀲𑁄 𑀅𑀬𑀁 𑀦𑀗𑁆𑀕𑀮𑀓𑁄𑀝𑀺𑀯𑀗𑁆𑀓𑀢𑀸 𑀦𑀸𑀫. 𑀏𑀓𑁄 𑀲𑀩𑁆𑀩𑀫𑁂𑀢𑀁 𑀯𑀗𑁆𑀓𑀢𑀁 𑀧𑀳𑀸𑀬 𑀢𑀻𑀲𑀼𑀧𑀺 𑀯𑀬𑁂𑀲𑀼 𑀧𑁂𑀲𑀮𑁄 𑀮𑀚𑁆𑀚𑀻 ¶ 𑀓𑀼𑀓𑁆𑀓𑀼𑀘𑁆𑀘𑀓𑁄 𑀲𑀺𑀓𑁆𑀔𑀸𑀓𑀸𑀫𑁄 𑀳𑁄𑀢𑀺. 𑀢𑀲𑁆𑀲 𑀬𑁄 𑀲𑁄 𑀉𑀚𑀼𑀪𑀸𑀯𑁄, 𑀇𑀤𑀁 𑀅𑀚𑁆𑀚𑀯𑀁 𑀦𑀸𑀫. 𑀅𑀪𑀺𑀥𑀫𑁆𑀫𑁂𑀧𑀺 𑀯𑀼𑀢𑁆𑀢𑀁 𑁋 ‘‘𑀢𑀢𑁆𑀣 𑀓𑀢𑀫𑁄 𑀅𑀚𑁆𑀚𑀯𑁄. 𑀬𑀸 𑀅𑀚𑁆𑀚𑀯𑀢𑀸 𑀅𑀚𑀺𑀫𑁆𑀳𑀢𑀸 𑀅𑀯𑀗𑁆𑀓𑀢𑀸 𑀅𑀓𑀼𑀝𑀺𑀮𑀢𑀸, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀚𑁆𑀚𑀯𑁄’’𑀢𑀺 (𑀥. 𑀲. 𑁧𑁩𑁪𑁬). 𑀮𑀚𑁆𑀚𑀯𑀦𑁆𑀢𑀺 ‘‘𑀢𑀢𑁆𑀣 𑀓𑀢𑀫𑁄 𑀮𑀚𑁆𑀚𑀯𑁄? 𑀬𑁄 𑀳𑀺𑀭𑀻𑀬𑀢𑀺 𑀳𑀺𑀭𑀻𑀬𑀺𑀢𑀩𑁆𑀩𑁂𑀦 𑀳𑀺𑀭𑀻𑀬𑀢𑀺 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸. 𑀅𑀬𑀁 𑀯𑀼𑀘𑁆𑀘𑀢𑀺 𑀮𑀚𑁆𑀚𑀯𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑁄 𑀮𑀚𑁆𑀚𑀻𑀪𑀸𑀯𑁄.

𑀔𑀦𑁆𑀢𑀻𑀢𑀺 ‘‘𑀢𑀢𑁆𑀣 𑀓𑀢𑀫𑀸 𑀔𑀦𑁆𑀢𑀺? 𑀬𑀸 𑀔𑀦𑁆𑀢𑀺 𑀔𑀫𑀦𑀢𑀸 𑀅𑀥𑀺𑀯𑀸𑀲𑀦𑀢𑀸 𑀅𑀘𑀡𑁆𑀟𑀺𑀓𑁆𑀓𑀁 𑀅𑀦𑀲𑁆𑀲𑀼𑀭𑁄𑀧𑁄 𑀅𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲𑀸’’𑀢𑀺 (𑀥. 𑀲. 𑁧𑁩𑁪𑁮) 𑀏𑀯𑀁 𑀯𑀼𑀢𑁆𑀢𑀸 𑀅𑀥𑀺𑀯𑀸𑀲𑀦𑀔𑀦𑁆𑀢𑀺. 𑀲𑁄𑀭𑀘𑁆𑀘𑀦𑁆𑀢𑀺 ‘‘𑀢𑀢𑁆𑀣 𑀓𑀢𑀫𑀁 𑀲𑁄𑀭𑀘𑁆𑀘𑀁? 𑀬𑁄 𑀓𑀸𑀬𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄, 𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄, 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄. 𑀇𑀤𑀁 𑀯𑀼𑀘𑁆𑀘𑀢𑀺 𑀲𑁄𑀭𑀘𑁆𑀘𑀁. 𑀲𑀩𑁆𑀩𑁄𑀧𑀺 𑀲𑀻𑀮𑀲𑀁𑀯𑀭𑁄 𑀲𑁄𑀭𑀘𑁆𑀘’’𑀦𑁆𑀢𑀺 (𑀥. 𑀲. 𑁧𑁩𑁪𑁯) 𑀏𑀯𑀁 𑀯𑀼𑀢𑁆𑀢𑁄 𑀲𑀼𑀭𑀢𑀪𑀸𑀯𑁄.

𑀲𑀸𑀔𑀮𑁆𑀬𑀦𑁆𑀢𑀺 ‘‘𑀢𑀢𑁆𑀣 𑀓𑀢𑀫𑀁 𑀲𑀸𑀔𑀮𑁆𑀬𑀁? 𑀬𑀸 𑀲𑀸 𑀯𑀸𑀘𑀸 𑀅𑀡𑁆𑀟𑀓𑀸 𑀓𑀓𑁆𑀓𑀲𑀸 𑀧𑀭𑀓𑀝𑀼𑀓𑀸 𑀧𑀭𑀸𑀪𑀺𑀲𑀚𑁆𑀚𑀦𑀻 𑀓𑁄𑀥𑀲𑀸𑀫𑀦𑁆𑀢𑀸 𑀅𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸, 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀧𑀳𑀸𑀬 𑀬𑀸 𑀲𑀸 𑀯𑀸𑀘𑀸 𑀦𑁂𑀴𑀸 𑀓𑀡𑁆𑀡𑀲𑀼𑀔𑀸 𑀧𑁂𑀫𑀦𑀻𑀬𑀸 𑀳𑀤𑀬𑀗𑁆𑀕𑀫𑀸 𑀧𑁄𑀭𑀻 𑀩𑀳𑀼𑀚𑀦𑀓𑀦𑁆𑀢𑀸 𑀩𑀳𑀼𑀚𑀦𑀫𑀦𑀸𑀧𑀸, 𑀢𑀣𑀸𑀭𑀽𑀧𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀬𑀸 𑀢𑀢𑁆𑀣 𑀲𑀡𑁆𑀳𑀯𑀸𑀘𑀢𑀸 𑀲𑀔𑀺𑀮𑀯𑀸𑀘𑀢𑀸 𑀅𑀨𑀭𑀼𑀲𑀯𑀸𑀘𑀢𑀸. 𑀇𑀤𑀁 𑀯𑀼𑀘𑁆𑀘𑀢𑀺 𑀲𑀸𑀔𑀮𑁆𑀬’’𑀦𑁆𑀢𑀺 (𑀥. 𑀲. 𑁧𑁩𑁫𑁦) 𑀏𑀯𑀁 𑀯𑀼𑀢𑁆𑀢𑁄 𑀲𑀫𑁆𑀫𑁄𑀤𑀓𑀫𑀼𑀤𑀼𑀓𑀪𑀸𑀯𑁄. 𑀧𑀝𑀺𑀲𑀦𑁆𑀣𑀸𑀭𑁄𑀢𑀺 𑀅𑀬𑀁 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀆𑀫𑀺𑀲𑁂𑀦 𑀥𑀫𑁆𑀫𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀙𑀺𑀤𑁆𑀤𑁄, 𑀢𑀲𑁆𑀲 𑀢𑀁 𑀙𑀺𑀤𑁆𑀤𑀁 𑀬𑀣𑀸 𑀦 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀧𑀻𑀞𑀲𑁆𑀲 𑀯𑀺𑀬 ¶ 𑀧𑀘𑁆𑀘𑀢𑁆𑀣𑀭𑀡𑁂𑀦 𑀆𑀫𑀺𑀲𑁂𑀦 𑀥𑀫𑁆𑀫𑁂𑀦 𑀘 𑀧𑀝𑀺𑀲𑀦𑁆𑀣𑀭𑀡𑀁. 𑀅𑀪𑀺𑀥𑀫𑁆𑀫𑁂𑀧𑀺 𑀯𑀼𑀢𑁆𑀢𑀁 ‘‘𑀢𑀢𑁆𑀣 𑀓𑀢𑀫𑁄 𑀧𑀝𑀺𑀲𑀦𑁆𑀣𑀸𑀭𑁄 ¶ ? 𑀆𑀫𑀺𑀲𑀧𑀝𑀺𑀲𑀦𑁆𑀣𑀸𑀭𑁄 𑀘 𑀥𑀫𑁆𑀫𑀧𑀝𑀺𑀲𑀦𑁆𑀣𑀸𑀭𑁄 𑀘. 𑀇𑀥𑁂𑀓𑀘𑁆𑀘𑁄 𑀧𑀝𑀺𑀲𑀦𑁆𑀣𑀸𑀭𑀓𑁄 𑀳𑁄𑀢𑀺 𑀆𑀫𑀺𑀲𑀧𑀝𑀺𑀲𑀦𑁆𑀣𑀸𑀭𑁂𑀦 𑀯𑀸 𑀥𑀫𑁆𑀫𑀧𑀝𑀺𑀲𑀦𑁆𑀣𑀸𑀭𑁂𑀦 𑀯𑀸. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀝𑀺𑀲𑀦𑁆𑀣𑀸𑀭𑁄’’𑀢𑀺 (𑀥. 𑀲. 𑁧𑁩𑁫𑁧). 𑀏𑀢𑁆𑀣 𑀘 𑀆𑀫𑀺𑀲𑁂𑀦 𑀲𑀗𑁆𑀕𑀳𑁄 𑀆𑀫𑀺𑀲𑀧𑀝𑀺𑀲𑀦𑁆𑀣𑀸𑀭𑁄 𑀦𑀸𑀫. 𑀢𑀁 𑀓𑀭𑁄𑀦𑁆𑀢𑁂𑀦 𑀫𑀸𑀢𑀸𑀧𑀺𑀢𑀽𑀦𑀁 𑀪𑀺𑀓𑁆𑀔𑀼𑀕𑀢𑀺𑀓𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀲𑁆𑀲 𑀭𑀜𑁆𑀜𑁄 𑀘𑁄𑀭𑀸𑀦𑀜𑁆𑀘 𑀅𑀕𑁆𑀕𑀁 𑀅𑀕𑁆𑀕𑀳𑁂𑀢𑁆𑀯𑀸𑀧𑀺 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀆𑀫𑀲𑀺𑀢𑁆𑀯𑀸 𑀤𑀺𑀦𑁆𑀦𑁂 𑀳𑀺 𑀭𑀸𑀚𑀸𑀦𑁄 𑀘 𑀘𑁄𑀭𑀸 𑀘 𑀅𑀦𑀢𑁆𑀣𑀫𑁆𑀧𑀺 𑀓𑀭𑁄𑀦𑁆𑀢𑀺 𑀚𑀻𑀯𑀺𑀢𑀓𑁆𑀔𑀬𑀫𑁆𑀧𑀺 𑀧𑀸𑀧𑁂𑀦𑁆𑀢𑀺, 𑀅𑀦𑀸𑀫𑀲𑀺𑀢𑁆𑀯𑀸 𑀤𑀺𑀦𑁆𑀦𑁂 𑀅𑀢𑁆𑀢𑀫𑀦𑀸 𑀳𑁄𑀦𑁆𑀢𑀺. 𑀘𑁄𑀭𑀦𑀸𑀕𑀯𑀢𑁆𑀣𑀼𑀆𑀤𑀻𑀦𑀺 𑀘𑁂𑀢𑁆𑀣 𑀯𑀢𑁆𑀣𑀽𑀦𑀺 𑀓𑀣𑁂𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 ¶ (𑀧𑀸𑀘𑀺. 𑀅𑀝𑁆𑀞. 𑁧𑁮𑁫-𑁭) 𑀯𑀺𑀢𑁆𑀣𑀸𑀭𑀺𑀢𑀸𑀦𑀺. 𑀲𑀓𑁆𑀓𑀘𑁆𑀘𑀁 𑀉𑀤𑁆𑀤𑁂𑀲𑀤𑀸𑀦𑀁 𑀧𑀸𑀴𑀺𑀯𑀡𑁆𑀡𑀦𑀸 𑀥𑀫𑁆𑀫𑀓𑀣𑀸𑀓𑀣𑀦𑀦𑁆𑀢𑀺 𑀏𑀯𑀁 𑀥𑀫𑁆𑀫𑁂𑀦 𑀲𑀗𑁆𑀕𑀳𑁄 𑀥𑀫𑁆𑀫𑀧𑀝𑀺𑀲𑀦𑁆𑀣𑀸𑀭𑁄 𑀦𑀸𑀫.

𑀅𑀯𑀺𑀳𑀺𑀁𑀲𑀸𑀢𑀺 𑀓𑀭𑀼𑀡𑀸𑀧𑀺 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄𑀧𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀢𑀢𑁆𑀣 𑀓𑀢𑀫𑀸 𑀅𑀯𑀺𑀳𑀺𑀁𑀲𑀸? 𑀬𑀸 𑀲𑀢𑁆𑀢𑁂𑀲𑀼 𑀓𑀭𑀼𑀡𑀸 𑀓𑀭𑀼𑀡𑀸𑀬𑀦𑀸 𑀓𑀭𑀼𑀡𑀸𑀬𑀺𑀢𑀢𑁆𑀢𑀁 𑀓𑀭𑀼𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀯𑀺𑀳𑀺𑀁𑀲𑀸’’𑀢𑀺. 𑀲𑁄𑀘𑁂𑀬𑁆𑀬𑀦𑁆𑀢𑀺 𑀫𑁂𑀢𑁆𑀢𑀸𑀬 𑀘 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀲𑁆𑀲 𑀘 𑀯𑀲𑁂𑀦 𑀲𑀼𑀘𑀺𑀪𑀸𑀯𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀢𑀢𑁆𑀣 𑀓𑀢𑀫𑀁 𑀲𑁄𑀘𑁂𑀬𑁆𑀬𑀁? 𑀬𑀸 𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀺 𑀫𑁂𑀢𑁆𑀢𑀸𑀬𑀦𑀸 𑀫𑁂𑀢𑁆𑀢𑀸𑀬𑀺𑀢𑀢𑁆𑀢𑀁 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀲𑁄𑀘𑁂𑀬𑁆𑀬’’𑀦𑁆𑀢𑀺.

𑀫𑀼𑀝𑁆𑀞𑀲𑁆𑀲𑀘𑁆𑀘𑀦𑁆𑀢𑀺 𑀲𑀢𑀺𑀯𑀺𑀧𑁆𑀧𑀯𑀸𑀲𑁄, 𑀬𑀣𑀸𑀳 ‘‘𑀢𑀢𑁆𑀣 𑀓𑀢𑀫𑀁 𑀫𑀼𑀝𑁆𑀞𑀲𑁆𑀲𑀘𑁆𑀘𑀁? 𑀬𑀸 𑀅𑀲𑀢𑀺 𑀅𑀦𑀦𑀼𑀲𑁆𑀲𑀢𑀺 𑀅𑀧𑁆𑀧𑀝𑀺𑀲𑁆𑀲𑀢𑀺 𑀅𑀲𑁆𑀲𑀭𑀡𑀢𑀸 𑀅𑀥𑀸𑀭𑀡𑀢𑀸 𑀧𑀺𑀮𑀸𑀧𑀦𑀢𑀸 𑀲𑀫𑁆𑀫𑀼𑀲𑁆𑀲𑀦𑀢𑀸, 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀼𑀝𑁆𑀞𑀲𑁆𑀲𑀘𑁆𑀘𑀁’’ (𑀥. 𑀲. 𑁧𑁩𑁫𑁬). 𑀅𑀲𑀫𑁆𑀧𑀚𑀜𑁆𑀜𑀦𑁆𑀢𑀺, ‘‘𑀢𑀢𑁆𑀣 𑀓𑀢𑀫𑀁 𑀅𑀲𑀫𑁆𑀧𑀚𑀜𑁆𑀜𑀁? 𑀬𑀁 𑀅𑀜𑁆𑀜𑀸𑀡𑀁 𑀅𑀤𑀲𑁆𑀲𑀦𑀁 𑀅𑀯𑀺𑀚𑁆𑀚𑀸𑀮𑀗𑁆𑀕𑀻 𑀫𑁄𑀳𑁄 𑀅𑀓𑀼𑀲𑀮𑀫𑀽𑀮’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀸 𑀅𑀯𑀺𑀚𑁆𑀚𑀸𑀬𑁂𑀯. 𑀲𑀢𑀺 𑀲𑀢𑀺𑀬𑁂𑀯. 𑀲𑀫𑁆𑀧𑀚𑀜𑁆𑀜𑀁 𑀜𑀸𑀡𑀁.

𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀸𑀢𑀺 ‘‘𑀢𑀢𑁆𑀣 𑀓𑀢𑀫𑀸 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀸? 𑀇𑀥𑁂𑀓𑀘𑁆𑀘𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁩𑁫𑁨) 𑀦𑀬𑁂𑀦 𑀯𑀺𑀢𑁆𑀣𑀸𑀭𑀺𑀢𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀪𑁂𑀤𑁄. 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀼𑀢𑀸𑀢𑀺 ‘‘𑀢𑀢𑁆𑀣 𑀓𑀢𑀫𑀸 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀼𑀢𑀸? 𑀇𑀥𑁂𑀓𑀘𑁆𑀘𑁄 𑀅𑀧𑁆𑀧𑀝𑀺𑀲𑀗𑁆𑀔𑀸 𑀅𑀬𑁄𑀦𑀺𑀲𑁄 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺 𑀤𑀯𑀸𑀬 𑀫𑀤𑀸𑀬 𑀫𑀡𑁆𑀟𑀦𑀸𑀬 𑀯𑀺𑀪𑀽𑀲𑀦𑀸𑀬. 𑀬𑀸 𑀢𑀢𑁆𑀣 𑀅𑀲𑀦𑁆𑀢𑀼𑀝𑁆𑀞𑀺𑀢𑀸 𑀅𑀫𑀢𑁆𑀢𑀜𑁆𑀜𑀼𑀢𑀸 𑀅𑀧𑁆𑀧𑀝𑀺𑀲𑀗𑁆𑀔𑀸 𑀪𑁄𑀚𑀦𑁂’’𑀢𑀺 𑀏𑀯𑀁 𑀆𑀕𑀢𑁄 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀼𑀪𑀸𑀯𑁄. 𑀅𑀦𑀦𑁆𑀢𑀭𑀤𑀼𑀓𑁄 𑀯𑀼𑀢𑁆𑀢𑀧𑁆𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀧𑀝𑀺𑀲𑀗𑁆𑀔𑀸𑀦𑀩𑀮𑀦𑁆𑀢𑀺 ¶ ‘‘𑀢𑀢𑁆𑀣 𑀓𑀢𑀫𑀁 𑀧𑀝𑀺𑀲𑀗𑁆𑀔𑀸𑀦𑀩𑀮𑀁? 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸’’𑀢𑀺 𑀏𑀯𑀁 𑀯𑀺𑀢𑁆𑀣𑀸𑀭𑀺𑀢𑀁 ¶ 𑀅𑀧𑁆𑀧𑀝𑀺𑀲𑀗𑁆𑀔𑀸𑀬 𑀅𑀓𑀫𑁆𑀧𑀦𑀜𑀸𑀡𑀁. 𑀪𑀸𑀯𑀦𑀸𑀩𑀮𑀦𑁆𑀢𑀺 𑀪𑀸𑀯𑁂𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀁 𑀩𑀮𑀁. 𑀅𑀢𑁆𑀣𑀢𑁄 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀻𑀲𑁂𑀦 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀳𑁄𑀦𑁆𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀢𑀢𑁆𑀣 𑀓𑀢𑀫𑀁 𑀪𑀸𑀯𑀦𑀸𑀩𑀮𑀁? 𑀬𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀆𑀲𑁂𑀯𑀦𑀸 𑀪𑀸𑀯𑀦𑀸 𑀩𑀳𑀼𑀮𑀻𑀓𑀫𑁆𑀫𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀪𑀸𑀯𑀦𑀸𑀩𑀮𑀁. 𑀲𑀢𑁆𑀢𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀦𑀸𑀩𑀮’’𑀦𑁆𑀢𑀺.

𑀲𑀢𑀺𑀩𑀮𑀦𑁆𑀢𑀺 𑀅𑀲𑁆𑀲𑀢𑀺𑀬𑀸 𑀅𑀓𑀫𑁆𑀧𑀦𑀯𑀲𑁂𑀦 𑀲𑀢𑀺𑀬𑁂𑀯. 𑀲𑀫𑀸𑀥𑀺𑀩𑀮𑀦𑁆𑀢𑀺 𑀉𑀤𑁆𑀥𑀘𑁆𑀘𑁂 𑀅𑀓𑀫𑁆𑀧𑀦𑀯𑀲𑁂𑀦 𑀲𑀫𑀸𑀥𑀺𑀬𑁂𑀯. 𑀲𑀫𑀣𑁄 ¶ 𑀲𑀫𑀸𑀥𑀺. 𑀯𑀺𑀧𑀲𑁆𑀲𑀦𑀸 𑀧𑀜𑁆𑀜𑀸. 𑀲𑀫𑀣𑁄𑀯 𑀢𑀁 𑀆𑀓𑀸𑀭𑀁 𑀕𑀳𑁂𑀢𑁆𑀯𑀸 𑀧𑀼𑀦 𑀧𑀯𑀢𑁆𑀢𑁂𑀢𑀩𑁆𑀩𑀲𑁆𑀲 𑀲𑀫𑀣𑀲𑁆𑀲 𑀦𑀺𑀫𑀺𑀢𑁆𑀢𑀯𑀲𑁂𑀦 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀕𑁆𑀕𑀸𑀳𑀦𑀺𑀫𑀺𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀕𑁆𑀕𑀸𑀳𑁄 𑀯𑀻𑀭𑀺𑀬𑀁. 𑀅𑀯𑀺𑀓𑁆𑀔𑁂𑀧𑁄 𑀏𑀓𑀕𑁆𑀕𑀢𑀸. 𑀇𑀫𑁂𑀳𑀺 𑀧𑀦 𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀧𑀝𑀺𑀲𑀗𑁆𑀔𑀸𑀦𑀩𑀮𑀜𑁆𑀘 𑀪𑀸𑀯𑀦𑀸𑀩𑀮𑀜𑁆𑀘 𑀲𑀢𑀺𑀩𑀮𑀜𑁆𑀘 𑀲𑀫𑀸𑀥𑀺𑀩𑀮𑀜𑁆𑀘 𑀲𑀫𑀣𑁄 𑀘 𑀯𑀺𑀧𑁆𑀧𑀲𑁆𑀲𑀦𑀸 𑀘 𑀲𑀫𑀣𑀦𑀺𑀫𑀺𑀢𑁆𑀢𑀜𑁆𑀘 𑀧𑀕𑁆𑀕𑀸𑀳𑀦𑀺𑀫𑀺𑀢𑁆𑀢𑀜𑁆𑀘 𑀧𑀕𑁆𑀕𑀸𑀳𑁄 𑀘 𑀅𑀯𑀺𑀓𑁆𑀔𑁂𑀧𑁄 𑀘𑀸𑀢𑀺 𑀙𑀳𑀺 𑀤𑀼𑀓𑁂𑀳𑀺 𑀧𑀭𑀢𑁄 𑀲𑀻𑀮𑀤𑀺𑀝𑁆𑀞𑀺𑀲𑀫𑁆𑀧𑀤𑀸𑀤𑀼𑀓𑁂𑀦 𑀘 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀥𑀫𑁆𑀫𑀸 𑀓𑀣𑀺𑀢𑀸.

𑀲𑀻𑀮𑀯𑀺𑀧𑀢𑁆𑀢𑀻𑀢𑀺 ‘‘𑀢𑀢𑁆𑀣 𑀓𑀢𑀫𑀸 𑀲𑀻𑀮𑀯𑀺𑀧𑀢𑁆𑀢𑀺? 𑀓𑀸𑀬𑀺𑀓𑁄 𑀯𑀻𑀢𑀺𑀓𑁆𑀓𑀫𑁄…𑀧𑁂… 𑀲𑀩𑁆𑀩𑀫𑁆𑀧𑀺 𑀤𑀼𑀲𑁆𑀲𑀻𑀮𑁆𑀬𑀁 𑀲𑀻𑀮𑀯𑀺𑀧𑀢𑁆𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑁄 𑀲𑀻𑀮𑀯𑀺𑀦𑀸𑀲𑀓𑁄 𑀅𑀲𑀁𑀯𑀭𑁄. 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀻𑀢𑀺 ‘‘𑀢𑀢𑁆𑀣 𑀓𑀢𑀫𑀸 𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺? 𑀦𑀢𑁆𑀣𑀺 𑀤𑀺𑀦𑁆𑀦𑀁 𑀦𑀢𑁆𑀣𑀺 𑀬𑀺𑀝𑁆𑀞’’𑀦𑁆𑀢𑀺 𑀏𑀯𑀁 𑀆𑀕𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀯𑀺𑀦𑀸𑀲𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺.

𑀲𑀻𑀮𑀲𑀫𑁆𑀧𑀤𑀸𑀢𑀺 ‘‘𑀢𑀢𑁆𑀣 𑀓𑀢𑀫𑀸 𑀲𑀻𑀮𑀲𑀫𑁆𑀧𑀤𑀸? 𑀓𑀸𑀬𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄’’𑀢𑀺 𑀏𑀯𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑁄𑀭𑀘𑁆𑀘𑀫𑁂𑀯 𑀲𑀻𑀮𑀲𑁆𑀲 𑀲𑀫𑁆𑀧𑀸𑀤𑀦𑀢𑁄 𑀧𑀭𑀺𑀧𑀽𑀭𑀡𑀢𑁄 ‘‘𑀲𑀻𑀮𑀲𑀫𑁆𑀧𑀤𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 ‘‘𑀲𑀩𑁆𑀩𑁄𑀧𑀺 𑀲𑀻𑀮𑀲𑀁𑀯𑀭𑁄 𑀲𑀻𑀮𑀲𑀫𑁆𑀧𑀤𑀸’’𑀢𑀺 𑀇𑀤𑀁 𑀫𑀸𑀦𑀲𑀺𑀓𑀧𑀭𑀺𑀬𑀸𑀤𑀸𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀺𑀲𑀫𑁆𑀧𑀤𑀸𑀢𑀺 ‘‘𑀢𑀢𑁆𑀣 𑀓𑀢𑀫𑀸 𑀤𑀺𑀝𑁆𑀞𑀺𑀲𑀫𑁆𑀧𑀤𑀸? 𑀅𑀢𑁆𑀣𑀺 𑀤𑀺𑀦𑁆𑀦𑀁 𑀅𑀢𑁆𑀣𑀺 𑀬𑀺𑀝𑁆𑀞𑀁…𑀧𑁂… 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻𑀢𑀺 𑀬𑀸 𑀏𑀯𑀭𑀽𑀧𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸’’𑀢𑀺 𑀏𑀯𑀁 𑀆𑀕𑀢𑀁 𑀤𑀺𑀝𑁆𑀞𑀺𑀧𑀸𑀭𑀺𑀧𑀽𑀭𑀺𑀪𑀽𑀢𑀁 𑀜𑀸𑀡𑀁.

𑀲𑀻𑀮𑀯𑀺𑀲𑀼𑀤𑁆𑀥𑀻𑀢𑀺 𑀯𑀺𑀲𑀼𑀤𑁆𑀥𑀺𑀁 𑀧𑀸𑀧𑁂𑀢𑀼𑀁 𑀲𑀫𑀢𑁆𑀣𑀁 𑀲𑀻𑀮𑀁. 𑀅𑀪𑀺𑀥𑀫𑁆𑀫𑁂 𑀧𑀦𑀸𑀬𑀁 ‘‘𑀢𑀢𑁆𑀣 𑀓𑀢𑀫𑀸 𑀲𑀻𑀮𑀯𑀺𑀲𑀼𑀤𑁆𑀥𑀺? 𑀓𑀸𑀬𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄 𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀻𑀮𑀯𑀺𑀲𑀼𑀤𑁆𑀥𑀻’’𑀢𑀺 𑀏𑀯𑀁 𑀯𑀺𑀪𑀢𑁆𑀢𑀸. 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀻𑀢𑀺 𑀯𑀺𑀲𑀼𑀤𑁆𑀥𑀺𑀁 𑀧𑀸𑀧𑁂𑀢𑀼𑀁 𑀲𑀫𑀢𑁆𑀣𑀁 𑀤𑀲𑁆𑀲𑀦𑀁. 𑀅𑀪𑀺𑀥𑀫𑁆𑀫𑁂 𑀧𑀦𑀸𑀬𑀁 ‘‘𑀢𑀢𑁆𑀣 𑀓𑀢𑀫𑀸 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺? 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀁 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡𑀁 𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲𑀜𑀸𑀡𑀁 𑀨𑀮𑀲𑀫𑀗𑁆𑀕𑀺𑀲𑁆𑀲𑀜𑀸𑀡’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀸. 𑀏𑀢𑁆𑀣 𑀘 𑀢𑀺𑀯𑀺𑀥𑀁 𑀤𑀼𑀘𑁆𑀘𑀭𑀺𑀢𑀁 𑀅𑀢𑁆𑀢𑀦𑀸 ¶ 𑀓𑀢𑀫𑁆𑀧𑀺 𑀧𑀭𑁂𑀦 𑀓𑀢𑀫𑁆𑀧𑀺 𑀲𑀓𑀁 𑀦𑀸𑀫 𑀦 𑀳𑁄𑀢𑀺 𑀅𑀢𑁆𑀣𑀪𑀜𑁆𑀚𑀦𑀢𑁄. 𑀲𑀼𑀘𑀭𑀺𑀢𑀁 𑀲𑀓𑀁 𑀦𑀸𑀫 𑀅𑀢𑁆𑀣𑀚𑀦𑀦𑀢𑁄𑀢𑀺 𑀏𑀯𑀁 𑀚𑀸𑀦𑀦𑀁 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀁 ¶ 𑀦𑀸𑀫. 𑀢𑀲𑁆𑀫𑀺𑀁 𑀞𑀢𑁆𑀯𑀸 𑀩𑀳𑀼𑀁 𑀯𑀝𑁆𑀝𑀕𑀸𑀫𑀺𑀓𑀫𑁆𑀫𑀁 𑀆𑀬𑀽𑀳𑀺𑀢𑁆𑀯𑀸 ¶ 𑀲𑀼𑀔𑀢𑁄 𑀲𑀼𑀔𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸. 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀧𑀦 𑀯𑀘𑀻𑀲𑀘𑁆𑀘𑀜𑁆𑀘 𑀅𑀦𑀼𑀮𑁄𑀫𑁂𑀢𑀺, 𑀧𑀭𑀫𑀢𑁆𑀣𑀲𑀘𑁆𑀘𑀜𑁆𑀘 𑀦 𑀯𑀺𑀮𑁄𑀫𑁂𑀢𑀻𑀢𑀺 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀁 𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑀁.

‘‘𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀔𑁄 𑀧𑀦 𑀬𑀣𑀸𑀤𑀺𑀝𑁆𑀞𑀺𑀲𑁆𑀲 𑀘 𑀧𑀥𑀸𑀦’’𑀦𑁆𑀢𑀺 𑀏𑀢𑁆𑀣 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀻𑀢𑀺 𑀜𑀸𑀡𑀤𑀲𑁆𑀲𑀦𑀁 𑀓𑀣𑀺𑀢𑀁. 𑀬𑀣𑀸𑀤𑀺𑀝𑁆𑀞𑀺𑀲𑁆𑀲 𑀘 𑀧𑀥𑀸𑀦𑀦𑁆𑀢𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀯𑀻𑀭𑀺𑀬𑀁. 𑀅𑀧𑀺 𑀘 𑀧𑀼𑀭𑀺𑀫𑀧𑀤𑁂𑀦 𑀘𑀢𑀼𑀫𑀕𑁆𑀕𑀜𑀸𑀡𑀁. 𑀧𑀘𑁆𑀙𑀺𑀫𑀧𑀤𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀯𑀻𑀭𑀺𑀬𑀁. 𑀅𑀪𑀺𑀥𑀫𑁆𑀫𑁂 𑀧𑀦 ‘‘𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀔𑁄 𑀧𑀦𑀸𑀢𑀺 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸 𑀅𑀫𑁄𑀳𑁄 𑀥𑀫𑁆𑀫𑀯𑀺𑀘𑀬𑁄 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀬𑀣𑀸𑀤𑀺𑀝𑁆𑀞𑀺𑀲𑁆𑀲 𑀘 𑀧𑀥𑀸𑀦𑀦𑁆𑀢𑀺 𑀬𑁄 𑀘𑁂𑀢𑀲𑀺𑀓𑁄 𑀯𑀻𑀭𑀺𑀬𑀸𑀭𑀫𑁆𑀪𑁄 𑀲𑀫𑁆𑀫𑀸𑀯𑀸𑀬𑀸𑀫𑁄’’𑀢𑀺 𑀏𑀯𑀁 𑀅𑀬𑀁 𑀤𑀼𑀓𑁄 𑀯𑀺𑀪𑀢𑁆𑀢𑁄.

‘‘𑀲𑀁𑀯𑁂𑀕𑁄 𑀘 𑀲𑀁𑀯𑁂𑀚𑀦𑀻𑀬𑁂𑀲𑀼 𑀞𑀸𑀦𑁂𑀲𑀽’’𑀢𑀺 𑀏𑀢𑁆𑀣 ‘‘𑀲𑀁𑀯𑁂𑀕𑁄𑀢𑀺 𑀚𑀸𑀢𑀺𑀪𑀬𑀁 𑀚𑀭𑀸𑀪𑀬𑀁 𑀩𑁆𑀬𑀸𑀥𑀺𑀪𑀬𑀁 𑀫𑀭𑀡𑀪𑀬’’𑀦𑁆𑀢𑀺 𑀏𑀯𑀁 𑀚𑀸𑀢𑀺𑀆𑀤𑀻𑀦𑀺 𑀪𑀬𑀢𑁄 𑀤𑀲𑁆𑀲𑀦𑀜𑀸𑀡𑀁. 𑀲𑀁𑀯𑁂𑀚𑀦𑀻𑀬𑀁 𑀞𑀸𑀦𑀦𑁆𑀢𑀺 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀁. 𑀏𑀢𑀸𑀦𑀺 𑀳𑀺 𑀘𑀢𑁆𑀢𑀸𑀭𑀺 𑀚𑀸𑀢𑀺 𑀤𑀼𑀓𑁆𑀔𑀸, 𑀚𑀭𑀸 𑀤𑀼𑀓𑁆𑀔𑀸, 𑀩𑁆𑀬𑀸𑀥𑀺 𑀤𑀼𑀓𑁆𑀔𑁄, 𑀫𑀭𑀡𑀁 𑀤𑀼𑀓𑁆𑀔𑀦𑁆𑀢𑀺 𑀏𑀯𑀁 𑀲𑀁𑀯𑁂𑀕𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀢𑁆𑀢𑀸 𑀲𑀁𑀯𑁂𑀚𑀦𑀻𑀬𑀁 𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀸𑀦𑀺. 𑀲𑀁𑀯𑀺𑀕𑁆𑀕𑀲𑁆𑀲 𑀘 𑀬𑁄𑀦𑀺𑀲𑁄 𑀧𑀥𑀸𑀦𑀦𑁆𑀢𑀺 𑀏𑀯𑀁 𑀲𑀁𑀯𑁂𑀕𑀚𑀸𑀢𑀲𑁆𑀲 𑀉𑀧𑀸𑀬𑀧𑀥𑀸𑀦𑀁. ‘‘𑀇𑀥 𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬 𑀙𑀦𑁆𑀤𑀁 𑀚𑀦𑁂𑀢𑀻’’𑀢𑀺 𑀏𑀯𑀁 𑀆𑀕𑀢𑀯𑀻𑀭𑀺𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.

𑀅𑀲𑀦𑁆𑀢𑀼𑀝𑁆𑀞𑀺𑀢𑀸 𑀘 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀬𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀅𑀲𑀦𑁆𑀢𑀼𑀝𑁆𑀞𑀲𑁆𑀲 𑀪𑀺𑀬𑁆𑀬𑁄𑀓𑀫𑁆𑀬𑀢𑀸, 𑀢𑀸𑀬 𑀳𑀺 𑀲𑀫𑀗𑁆𑀕𑀻𑀪𑀽𑀢𑁄 𑀧𑀼𑀕𑁆𑀕𑀮𑁄 𑀲𑀻𑀮𑀁 𑀧𑀽𑀭𑁂𑀢𑁆𑀯𑀸 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑀺. 𑀛𑀸𑀦𑀁 𑀮𑀪𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀢𑀺. 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄 𑀅𑀭𑀳𑀢𑁆𑀢𑀁 𑀅𑀕𑀳𑁂𑀢𑁆𑀯𑀸 𑀅𑀦𑁆𑀢𑀭𑀸 𑀯𑁄𑀲𑀸𑀦𑀁 𑀦𑀸𑀧𑀚𑁆𑀚𑀢𑀺. 𑀅𑀧𑁆𑀧𑀝𑀺𑀯𑀸𑀦𑀺𑀢𑀸 𑀘 𑀧𑀥𑀸𑀦𑀲𑁆𑀫𑀺𑀦𑁆𑀢𑀺 ‘‘𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀬 𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀢𑀸 𑀲𑀸𑀢𑀘𑁆𑀘𑀓𑀺𑀭𑀺𑀬𑀢𑀸 𑀅𑀝𑁆𑀞𑀺𑀢𑀓𑀺𑀭𑀺𑀬𑀢𑀸 𑀅𑀦𑁄𑀮𑀻𑀦𑀯𑀼𑀢𑁆𑀢𑀺𑀢𑀸 𑀅𑀦𑀺𑀓𑁆𑀔𑀺𑀢𑁆𑀢𑀙𑀦𑁆𑀤𑀢𑀸 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸 𑀆𑀲𑁂𑀯𑀦𑀸 𑀪𑀸𑀯𑀦𑀸 𑀩𑀳𑀼𑀮𑀻𑀓𑀫𑁆𑀫’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀸 𑀭𑀢𑁆𑀢𑀺𑀦𑁆𑀤𑀺𑀯𑀁 𑀙 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀯𑀲𑁂𑀦 𑀆𑀭𑀤𑁆𑀥𑁂 𑀧𑀥𑀸𑀦𑀲𑁆𑀫𑀺𑀁 𑀅𑀭𑀳𑀢𑁆𑀢𑀁 𑀅𑀧𑀢𑁆𑀯𑀸 𑀅𑀦𑀺𑀯𑀢𑁆𑀢𑀦𑀢𑀸.

𑀯𑀺𑀚𑁆𑀚𑀸𑀢𑀺 ¶ 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸. 𑀯𑀺𑀫𑀼𑀢𑁆𑀢𑀻𑀢𑀺 𑀤𑁆𑀯𑁂 𑀯𑀺𑀫𑀼𑀢𑁆𑀢𑀺𑀬𑁄, 𑀘𑀺𑀢𑁆𑀢𑀲𑁆𑀲 𑀘 𑀅𑀥𑀺𑀫𑀼𑀢𑁆𑀢𑀺, 𑀦𑀺𑀩𑁆𑀩𑀸𑀦𑀜𑁆𑀘. 𑀏𑀢𑁆𑀣 𑀘 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀻𑀯𑀭𑀡𑀸𑀤𑀻𑀳𑀺 𑀲𑀼𑀝𑁆𑀞𑀼 𑀫𑀼𑀢𑁆𑀢𑀢𑁆𑀢𑀸 𑀅𑀥𑀺𑀫𑀼𑀢𑁆𑀢𑀺 ¶ 𑀦𑀸𑀫. 𑀦𑀺𑀩𑁆𑀩𑀸𑀦𑀁 𑀲𑀩𑁆𑀩𑀲𑀗𑁆𑀔𑀢𑀢𑁄 𑀫𑀼𑀢𑁆𑀢𑀢𑁆𑀢𑀸 𑀯𑀺𑀫𑀼𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀔𑀬𑁂 𑀜𑀸𑀡𑀦𑁆𑀢𑀺 𑀓𑀺𑀮𑁂𑀲𑀓𑁆𑀔𑀬𑀓𑀭𑁂 𑀅𑀭𑀺𑀬𑀫𑀕𑁆𑀕𑁂 𑀜𑀸𑀡𑀁. 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀦𑀼𑀧𑁆𑀧𑀸𑀤𑀪𑀽𑀢𑁂 𑀢𑀁𑀢𑀁𑀫𑀕𑁆𑀕𑀯𑀚𑁆𑀛𑀓𑀺𑀮𑁂𑀲𑀸𑀦𑀁 𑀯𑀸 𑀅𑀦𑀼𑀧𑁆𑀧𑀸𑀤𑀧𑀭𑀺𑀬𑁄𑀲𑀸𑀦𑁂 𑀉𑀧𑁆𑀧𑀦𑁆𑀦𑁂 𑀅𑀭𑀺𑀬𑀨𑀮𑁂 𑀜𑀸𑀡𑀁. 𑀢𑁂𑀦𑁂𑀯𑀸𑀳 ¶ ‘‘𑀔𑀬𑁂 𑀜𑀸𑀡𑀦𑁆𑀢𑀺 𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀜𑀸𑀡𑀁. 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀦𑁆𑀢𑀺 𑀨𑀮𑀲𑀫𑀗𑁆𑀕𑀺𑀲𑁆𑀲 𑀜𑀸𑀡’’𑀦𑁆𑀢𑀺. 𑀇𑀫𑁂 𑀔𑁄, 𑀆𑀯𑀼𑀲𑁄𑀢𑀺𑀆𑀤𑀺 𑀏𑀓𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀇𑀢𑀺 𑀧𑀜𑁆𑀘𑀢𑀺𑀁𑀲𑀸𑀬 𑀤𑀼𑀓𑀸𑀦𑀁 𑀯𑀲𑁂𑀦 𑀣𑁂𑀭𑁄 𑀲𑀸𑀫𑀕𑁆𑀕𑀺𑀭𑀲𑀁 𑀤𑀲𑁆𑀲𑁂𑀲𑀻𑀢𑀺.

𑀤𑀼𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀺𑀓𑀯𑀡𑁆𑀡𑀦𑀸

𑁩𑁦𑁫. 𑀇𑀢𑀺 𑀤𑀼𑀓𑀯𑀲𑁂𑀦 𑀲𑀸𑀫𑀕𑁆𑀕𑀺𑀭𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀺𑀓𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀆𑀭𑀪𑀺. 𑀢𑀢𑁆𑀣 𑀮𑀼𑀩𑁆𑀪𑀢𑀻𑀢𑀺 𑀮𑁄𑀪𑁄. 𑀅𑀓𑀼𑀲𑀮𑀜𑁆𑀘 𑀢𑀁 𑀫𑀽𑀮𑀜𑁆𑀘, 𑀅𑀓𑀼𑀲𑀮𑀸𑀦𑀁 𑀯𑀸 𑀫𑀽𑀮𑀦𑁆𑀢𑀺 𑀅𑀓𑀼𑀲𑀮𑀫𑀽𑀮𑀁. 𑀤𑀼𑀲𑁆𑀲𑀢𑀻𑀢𑀺 𑀤𑁄𑀲𑁄. 𑀫𑀼𑀬𑁆𑀳𑀢𑀻𑀢𑀺 𑀫𑁄𑀳𑁄. 𑀢𑁂𑀲𑀁 𑀧𑀝𑀺𑀧𑀓𑁆𑀔𑀦𑀬𑁂𑀦 𑀅𑀮𑁄𑀪𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸.

𑀤𑀼𑀝𑁆𑀞𑀼 𑀘𑀭𑀺𑀢𑀸𑀦𑀺, 𑀯𑀺𑀭𑀽𑀧𑀸𑀦𑀺 𑀯𑀸 𑀘𑀭𑀺𑀢𑀸𑀦𑀻𑀢𑀺 𑀤𑀼𑀘𑁆𑀘𑀭𑀺𑀢𑀸𑀦𑀺. 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁, 𑀓𑀸𑀬𑀢𑁄 𑀯𑀸 𑀧𑀯𑀢𑁆𑀢𑀁 𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀼𑀝𑁆𑀞𑀼 𑀘𑀭𑀺𑀢𑀸𑀦𑀺, 𑀲𑀼𑀦𑁆𑀤𑀭𑀸𑀦𑀺 𑀯𑀸 𑀘𑀭𑀺𑀢𑀸𑀦𑀻𑀢𑀺 𑀲𑀼𑀘𑀭𑀺𑀢𑀸𑀦𑀺. 𑀤𑁆𑀯𑁂𑀧𑀺 𑀘𑁂𑀢𑁂 𑀢𑀺𑀓𑀸 𑀧𑀡𑁆𑀡𑀢𑁆𑀢𑀺𑀬𑀸 𑀯𑀸 𑀓𑀫𑁆𑀫𑀧𑀣𑁂𑀳𑀺 𑀯𑀸 𑀓𑀣𑁂𑀢𑀩𑁆𑀩𑀸. 𑀧𑀜𑁆𑀜𑀢𑁆𑀢𑀺𑀬𑀸 𑀢𑀸𑀯 𑀓𑀸𑀬𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀻𑀢𑀺𑀓𑁆𑀓𑀫𑁄 𑀓𑀸𑀬𑀤𑀼𑀘𑁆𑀘𑀭𑀺𑀢𑀁. 𑀅𑀯𑀻𑀢𑀺𑀓𑁆𑀓𑀫𑁄 𑀓𑀸𑀬𑀲𑀼𑀘𑀭𑀺𑀢𑀁. 𑀯𑀘𑀻𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀻𑀢𑀺𑀓𑁆𑀓𑀫𑁄 𑀯𑀘𑀻𑀤𑀼𑀘𑁆𑀘𑀭𑀺𑀢𑀁, 𑀅𑀯𑀻𑀢𑀺𑀓𑁆𑀓𑀫𑁄 𑀯𑀘𑀻𑀲𑀼𑀘𑀭𑀺𑀢𑀁. 𑀉𑀪𑀬𑀢𑁆𑀣 𑀧𑀜𑁆𑀜𑀢𑁆𑀢𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀻𑀢𑀺𑀓𑁆𑀓𑀫𑁄𑀯 𑀫𑀦𑁄𑀤𑀼𑀘𑁆𑀘𑀭𑀺𑀢𑀁, 𑀅𑀯𑀻𑀢𑀺𑀓𑁆𑀓𑀫𑁄 𑀫𑀦𑁄𑀲𑀼𑀘𑀭𑀺𑀢𑀁. 𑀅𑀬𑀁 𑀧𑀡𑁆𑀡𑀢𑁆𑀢𑀺𑀓𑀣𑀸. 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀧𑀦 𑀢𑀺𑀲𑁆𑀲𑁄 𑀘𑁂𑀢𑀦𑀸 𑀓𑀸𑀬𑀤𑁆𑀯𑀸𑀭𑁂𑀧𑀺 𑀯𑀘𑀻𑀤𑁆𑀯𑀸𑀭𑁂𑀧𑀺 𑀉𑀧𑁆𑀧𑀦𑁆𑀦𑀸 𑀓𑀸𑀬𑀤𑀼𑀘𑁆𑀘𑀭𑀺𑀢𑀁. 𑀘𑀢𑀲𑁆𑀲𑁄 𑀫𑀼𑀲𑀸𑀯𑀸𑀤𑀸𑀤𑀺𑀘𑁂𑀢𑀦𑀸 𑀯𑀘𑀻𑀤𑀼𑀘𑁆𑀘𑀭𑀺𑀢𑀁. 𑀅𑀪𑀺𑀚𑁆𑀛𑀸 𑀩𑁆𑀬𑀸𑀧𑀸𑀤𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀢𑀬𑁄 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀫𑀦𑁄𑀤𑀼𑀘𑁆𑀘𑀭𑀺𑀢𑀁. 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀺𑀭𑀫𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀢𑀺𑀲𑁆𑀲𑁄 ¶ 𑀘𑁂𑀢𑀦𑀸𑀧𑀺 𑀯𑀺𑀭𑀢𑀺𑀬𑁄𑀧𑀺 𑀓𑀸𑀬𑀲𑀼𑀘𑀭𑀺𑀢𑀁. 𑀫𑀼𑀲𑀸𑀯𑀸𑀤𑀸𑀤𑀻𑀳𑀺 𑀯𑀺𑀭𑀫𑀦𑁆𑀢𑀲𑁆𑀲 𑀘𑀢𑀲𑁆𑀲𑁄 𑀘𑁂𑀢𑀦𑀸𑀧𑀺 𑀯𑀺𑀭𑀢𑀺𑀬𑁄𑀧𑀺 𑀯𑀘𑀻𑀲𑀼𑀘𑀭𑀺𑀢𑀁. 𑀅𑀦𑀪𑀺𑀚𑁆𑀛𑀸 𑀅𑀩𑁆𑀬𑀸𑀧𑀸𑀤𑁄 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀢𑀬𑁄 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 ¶ 𑀫𑀦𑁄𑀲𑀼𑀘𑀭𑀺𑀢𑀦𑁆𑀢𑀺 𑀅𑀬𑀁 𑀓𑀫𑁆𑀫𑀧𑀣𑀓𑀣𑀸.

𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀓𑀸𑀫𑀯𑀺𑀢𑀓𑁆𑀓𑁄. 𑀩𑁆𑀬𑀸𑀧𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄. 𑀯𑀺𑀳𑀺𑀁𑀲𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄. 𑀢𑁂𑀲𑀼 𑀤𑁆𑀯𑁂 𑀲𑀢𑁆𑀢𑁂𑀲𑀼𑀧𑀺 𑀲𑀗𑁆𑀔𑀸𑀭𑁂𑀲𑀼𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀓𑀸𑀫𑀯𑀺𑀢𑀓𑁆𑀓𑁄 𑀳𑀺 𑀧𑀺𑀬𑁂 𑀫𑀦𑀸𑀧𑁂 𑀲𑀢𑁆𑀢𑁂 𑀯𑀸 𑀲𑀗𑁆𑀔𑀸𑀭𑁂 𑀯𑀸 𑀯𑀺𑀢𑀓𑁆𑀓𑁂𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺. 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄 ¶ 𑀅𑀧𑁆𑀧𑀺𑀬𑁂 𑀅𑀫𑀦𑀸𑀧𑁂 𑀲𑀢𑁆𑀢𑁂 𑀯𑀸 𑀲𑀗𑁆𑀔𑀸𑀭𑁂 𑀯𑀸 𑀓𑀼𑀚𑁆𑀛𑀺𑀢𑁆𑀯𑀸 𑀑𑀮𑁄𑀓𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀯𑀺𑀦𑀸𑀲𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄 𑀲𑀗𑁆𑀔𑀸𑀭𑁂𑀲𑀼 𑀦𑀼𑀧𑁆𑀧𑀚𑁆𑀚𑀢𑀺. 𑀲𑀗𑁆𑀔𑀸𑀭𑁄 𑀳𑀺 𑀤𑀼𑀓𑁆𑀔𑀸𑀧𑁂𑀢𑀩𑁆𑀩𑁄 𑀦𑀸𑀫 𑀦𑀢𑁆𑀣𑀺. 𑀇𑀫𑁂 𑀲𑀢𑁆𑀢𑀸 𑀳𑀜𑁆𑀜𑀦𑁆𑀢𑀼 𑀯𑀸 𑀉𑀘𑁆𑀙𑀺𑀚𑁆𑀚𑀦𑁆𑀢𑀼 𑀯𑀸 𑀯𑀺𑀦𑀲𑁆𑀲𑀦𑁆𑀢𑀼 𑀯𑀸 𑀫𑀸 𑀯𑀸 𑀅𑀳𑁂𑀲𑀼𑀦𑁆𑀢𑀺 𑀘𑀺𑀦𑁆𑀢𑀦𑀓𑀸𑀮𑁂 𑀧𑀦 𑀲𑀢𑁆𑀢𑁂𑀲𑀼 𑀉𑀧𑁆𑀧𑀚𑁆𑀚𑀢𑀺.

𑀦𑁂𑀓𑁆𑀔𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄. 𑀲𑁄 𑀅𑀲𑀼𑀪𑀧𑀼𑀩𑁆𑀩𑀪𑀸𑀕𑁂 𑀓𑀸𑀫𑀸𑀯𑀘𑀭𑁄 𑀳𑁄𑀢𑀺. 𑀅𑀲𑀼𑀪𑀚𑁆𑀛𑀸𑀦𑁂 𑀭𑀽𑀧𑀸𑀯𑀘𑀭𑁄. 𑀢𑀁 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀫𑀕𑁆𑀕𑀨𑀮𑀓𑀸𑀮𑁂 𑀮𑁄𑀓𑀼𑀢𑁆𑀢𑀭𑁄. 𑀅𑀩𑁆𑀬𑀸𑀧𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄. 𑀲𑁄 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑁂 𑀓𑀸𑀫𑀸𑀯𑀘𑀭𑁄 𑀳𑁄𑀢𑀺. 𑀫𑁂𑀢𑁆𑀢𑀸𑀛𑀸𑀦𑁂 𑀭𑀽𑀧𑀸𑀯𑀘𑀭𑁄. 𑀢𑀁 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀫𑀕𑁆𑀕𑀨𑀮𑀓𑀸𑀮𑁂 𑀮𑁄𑀓𑀼𑀢𑁆𑀢𑀭𑁄. 𑀅𑀯𑀺𑀳𑀺𑀁𑀲𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄. 𑀲𑁄 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁂 𑀓𑀸𑀫𑀸𑀯𑀘𑀭𑁄. 𑀓𑀭𑀼𑀡𑀸𑀛𑀸𑀦𑁂 𑀭𑀽𑀧𑀸𑀯𑀘𑀭𑁄. 𑀢𑀁 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀫𑀕𑁆𑀕𑀨𑀮𑀓𑀸𑀮𑁂 𑀮𑁄𑀓𑀼𑀢𑁆𑀢𑀭𑁄. 𑀬𑀤𑀸 𑀅𑀮𑁄𑀪𑁄 𑀲𑀻𑀲𑀁 𑀳𑁄𑀢𑀺, 𑀢𑀤𑀸 𑀇𑀢𑀭𑁂 𑀤𑁆𑀯𑁂 𑀢𑀤𑀦𑁆𑀯𑀸𑀬𑀺𑀓𑀸 𑀪𑀯𑀦𑁆𑀢𑀺. 𑀬𑀤𑀸 𑀫𑁂𑀢𑁆𑀢𑀸 𑀲𑀻𑀲𑀁 𑀳𑁄𑀢