📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀤𑀻𑀖𑀦𑀺𑀓𑀸𑀬𑁂

𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑀅𑀪𑀺𑀦𑀯𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀬𑁄 ¶ ¶ 𑀤𑁂𑀲𑁂𑀢𑁆𑀯𑀸𑀦 𑀲𑀤𑁆𑀥𑀫𑁆𑀫𑀁, 𑀕𑀫𑁆𑀪𑀻𑀭𑀁 𑀤𑀼𑀤𑁆𑀤𑀲𑀁 𑀯𑀭𑀁;

𑀤𑀻𑀖𑀤𑀲𑁆𑀲𑀻 𑀘𑀺𑀭𑀁 𑀓𑀸𑀮𑀁, 𑀧𑀢𑀺𑀝𑁆𑀞𑀸𑀧𑁂𑀲𑀺 𑀲𑀸𑀲𑀦𑀁.𑁧.

𑀯𑀺𑀦𑁂𑀬𑁆𑀬𑀚𑁆𑀛𑀸𑀲𑀬𑁂 𑀙𑁂𑀓𑀁, 𑀫𑀳𑀸𑀫𑀢𑀺𑀁 𑀫𑀳𑀸𑀤𑀬𑀁;

𑀦𑀢𑁆𑀯𑀸𑀦 𑀢𑀁 𑀲𑀲𑀤𑁆𑀥𑀫𑁆𑀫𑀕𑀡𑀁 𑀕𑀸𑀭𑀯𑀪𑀸𑀚𑀦𑀁.𑁨.

𑀲𑀗𑁆𑀕𑀻𑀢𑀺𑀢𑁆𑀢𑀬𑀫𑀸𑀭𑀼𑀴𑁆𑀳𑀸, 𑀤𑀻𑀖𑀸𑀕𑀫𑀯𑀭𑀲𑁆𑀲 𑀬𑀸;

𑀲𑀁𑀯𑀡𑁆𑀡𑀦𑀸 𑀬𑀸 𑀘 𑀢𑀲𑁆𑀲𑀸, 𑀯𑀡𑁆𑀡𑀦𑀸 𑀲𑀸𑀥𑀼𑀯𑀡𑁆𑀡𑀺𑀢𑀸. 𑁩.

𑀆𑀘𑀭𑀺𑀬𑀥𑀫𑁆𑀫𑀧𑀸𑀮- ¶ 𑀢𑁆𑀣𑁂𑀭𑁂𑀦𑁂𑀯𑀸𑀪𑀺𑀲𑀗𑁆𑀔𑀢𑀸;

𑀲𑀫𑁆𑀫𑀸 𑀦𑀺𑀧𑀼𑀡𑀕𑀫𑁆𑀪𑀻𑀭-𑀤𑀼𑀤𑁆𑀤𑀲𑀢𑁆𑀣𑀧𑁆𑀧𑀓𑀸𑀲𑀦𑀸.𑁪.

𑀓𑀸𑀫𑀜𑁆𑀘 𑀲𑀸 𑀢𑀣𑀸𑀪𑀽𑀢𑀸, 𑀧𑀭𑀫𑁆𑀧𑀭𑀸𑀪𑀢𑀸 𑀧𑀦;

𑀧𑀸𑀞𑀢𑁄 𑀅𑀢𑁆𑀣𑀢𑁄 𑀘𑀸𑀧𑀺, 𑀩𑀳𑀼𑀧𑁆𑀧𑀫𑀸𑀤𑀮𑁂𑀔𑀦𑀸.𑁫.

𑀲𑀗𑁆𑀔𑁂𑀧𑀢𑁆𑀢𑀸 𑀘 𑀲𑁄𑀢𑀽𑀳𑀺, 𑀲𑀫𑁆𑀫𑀸 𑀜𑀸𑀢𑀼𑀁 𑀲𑀼𑀤𑀼𑀓𑁆𑀓𑀭𑀸;

𑀢𑀲𑁆𑀫𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁, 𑀬𑀸𑀘𑀦𑀁 𑀲𑀫𑀦𑀼𑀲𑁆𑀲𑀭𑀁.𑁬.

𑀬𑁄’𑀦𑁂𑀓𑀲𑁂𑀢𑀦𑀸𑀕𑀺𑀦𑁆𑀤𑁄, 𑀭𑀸𑀚𑀸 𑀦𑀸𑀦𑀸𑀭𑀝𑁆𑀞𑀺𑀲𑁆𑀲𑀭𑁄;

𑀲𑀸𑀲𑀦𑀲𑁄𑀥𑀦𑁂 𑀤𑀴𑁆𑀳𑀁, 𑀲𑀤𑀸 𑀉𑀲𑁆𑀲𑀸𑀳𑀫𑀸𑀦𑀲𑁄.𑁭.

𑀢𑀁 𑀦𑀺𑀲𑁆𑀲𑀸𑀬 ‘‘𑀫𑀫𑁂𑀲𑁄𑀧𑀺, 𑀲𑀢𑁆𑀣𑀼𑀲𑀸𑀲𑀦𑀚𑁄𑀢𑀦𑁂;

𑀅𑀧𑁆𑀧𑁂𑀯 𑀦𑀸𑀫𑀼𑀧𑀢𑁆𑀣𑀫𑁆𑀪𑁄, 𑀪𑀯𑁂𑀬𑁆𑀬𑀸’’𑀢𑀺 𑀯𑀺𑀘𑀺𑀦𑁆𑀢𑀬𑀁.𑁮.

𑀯𑀡𑁆𑀡𑀦𑀁 ¶ 𑀆𑀭𑀪𑀺𑀲𑁆𑀲𑀸𑀫𑀺, 𑀲𑀸𑀥𑀺𑀧𑁆𑀧𑀸𑀬𑀫𑀳𑀸𑀧𑀬𑀁;

𑀅𑀢𑁆𑀣𑀁 𑀢𑀫𑀼𑀧𑀦𑀺𑀲𑁆𑀲𑀸𑀬, 𑀅𑀜𑁆𑀜𑀜𑁆𑀘𑀸𑀧𑀺 𑀬𑀣𑀸𑀭𑀳𑀁.𑁯.

𑀘𑀓𑁆𑀓𑀸𑀪𑀺𑀯𑀼𑀟𑁆𑀠𑀺𑀓𑀸𑀫𑀸𑀦𑀁, 𑀥𑀻𑀭𑀸𑀦𑀁 𑀘𑀺𑀢𑁆𑀢𑀢𑁄𑀲𑀦𑀁;

𑀲𑀸𑀥𑀼𑀯𑀺𑀮𑀸𑀲𑀺𑀦𑀺𑀁 𑀦𑀸𑀫, 𑀢𑀁 𑀲𑀼𑀡𑀸𑀣 𑀲𑀫𑀸𑀳𑀺𑀢𑀸𑀢𑀺. 𑁧𑁦.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸

𑀦𑀸𑀦𑀸𑀦𑀬𑀦𑀺𑀧𑀼𑀡𑀕𑀫𑁆𑀪𑀻𑀭𑀯𑀺𑀘𑀺𑀢𑁆𑀭𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀲𑁆𑀲 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀲𑀁𑀯𑀡𑁆𑀡𑀺𑀢𑀲𑁆𑀲 𑀲𑀤𑁆𑀥𑀸𑀯𑀳𑀕𑀼𑀡𑀲𑀫𑁆𑀧𑀦𑁆𑀦𑀲𑁆𑀲 𑀤𑀻𑀖𑀸𑀕𑀫𑀯𑀭𑀲𑁆𑀲 𑀕𑀫𑁆𑀪𑀻𑀭𑀤𑀼𑀭𑀦𑀼𑀩𑁄𑀥𑀢𑁆𑀣𑀤𑀻𑀧𑀓𑀁 𑀲𑀁𑀯𑀡𑁆𑀡𑀦𑀫𑀺𑀫𑀁 𑀓𑀭𑁄𑀦𑁆𑀢𑁄 𑀲𑀓𑀲𑀫𑀬𑀲𑀫𑀬𑀦𑁆𑀢𑀭𑀕𑀳𑀦𑀚𑁆𑀛𑁄𑀕𑀸𑀳𑀦𑀲𑀫𑀢𑁆𑀣𑁄 𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁄𑀬𑀫𑀸𑀘𑀭𑀺𑀬𑁄 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀧𑀡𑀸𑀫𑀧𑀬𑁄𑀚𑀦𑀸𑀤𑀺𑀯𑀺𑀥𑀸𑀦𑀸𑀦𑀺 𑀓𑀭𑁄𑀦𑁆𑀢𑁄 𑀧𑀞𑀫𑀁 𑀢𑀸𑀯 𑀭𑀢𑀦𑀢𑁆𑀢𑀬𑀧𑀡𑀸𑀫𑀁 𑀓𑀸𑀢𑀼𑀁 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀭𑀡𑀧𑁆𑀧𑀬𑁄𑀚𑀦𑀁 𑀢𑀢𑁆𑀣 𑀢𑀢𑁆𑀣 𑀩𑀳𑀼𑀥𑀸 𑀧𑀧𑀜𑁆𑀘𑁂𑀦𑁆𑀢𑀺 𑀆𑀘𑀭𑀺𑀬𑀸. 𑀢𑀣𑀸 𑀳𑀺 𑀯𑀡𑁆𑀡𑀬𑀦𑁆𑀢𑀺 𑁋

‘‘𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 ¶ 𑀲𑀢𑁆𑀣𑀭𑀺 𑀧𑀡𑀸𑀫𑀓𑀭𑀡𑀁 𑀥𑀫𑁆𑀫𑀲𑁆𑀲 𑀲𑁆𑀯𑀸𑀓𑁆𑀔𑀸𑀢𑀪𑀸𑀯𑁂𑀦 𑀲𑀢𑁆𑀣𑀭𑀺 𑀧𑀲𑀸𑀤𑀚𑀦𑀦𑀢𑁆𑀣𑀁, 𑀲𑀢𑁆𑀣𑀼 𑀘 𑀅𑀯𑀺𑀢𑀣𑀤𑁂𑀲𑀦𑀪𑀸𑀯𑀧𑁆𑀧𑀓𑀸𑀲𑀦𑁂𑀦 𑀥𑀫𑁆𑀫𑁂 𑀧𑀲𑀸𑀤𑀚𑀦𑀦𑀢𑁆𑀣𑀁. 𑀢𑀤𑀼𑀪𑀬𑀧𑁆𑀧𑀲𑀸𑀤𑀸 𑀳𑀺 𑀫𑀳𑀢𑁄 𑀅𑀢𑁆𑀣𑀲𑁆𑀲 𑀲𑀺𑀤𑁆𑀥𑀺 𑀳𑁄𑀢𑀻’’𑀢𑀺 (𑀥. 𑀲. 𑀝𑀻. 𑁧-𑁧).

𑀅𑀣 𑀯𑀸 ‘‘𑀭𑀢𑀦𑀢𑁆𑀢𑀬𑀧𑀡𑀸𑀫𑀯𑀘𑀦𑀁 𑀅𑀢𑁆𑀢𑀦𑁄 𑀭𑀢𑀦𑀢𑁆𑀢𑀬𑀧𑁆𑀧𑀲𑀸𑀤𑀲𑁆𑀲 𑀯𑀺𑀜𑁆𑀜𑀸𑀧𑀦𑀢𑁆𑀣𑀁, 𑀢𑀁 𑀧𑀦 𑀯𑀺𑀜𑁆𑀜𑀽𑀦𑀁 𑀘𑀺𑀢𑁆𑀢𑀸𑀭𑀸𑀥𑀦𑀢𑁆𑀣𑀁, 𑀢𑀁 𑀅𑀝𑁆𑀞𑀓𑀣𑀸𑀬 𑀕𑀸𑀳𑀡𑀢𑁆𑀣𑀁, 𑀢𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀢𑁆𑀣’’𑀦𑁆𑀢𑀺. 𑀅𑀣 𑀯𑀸 ‘‘𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀧𑀪𑀯𑀦𑀺𑀲𑁆𑀲𑀬𑀯𑀺𑀲𑀼𑀤𑁆𑀥𑀺𑀧𑀝𑀺𑀯𑁂𑀤𑀦𑀢𑁆𑀣𑀁, 𑀢𑀁 𑀧𑀦 𑀥𑀫𑁆𑀫𑀲𑀁𑀯𑀡𑁆𑀡𑀦𑀸𑀲𑀼 𑀯𑀺𑀜𑁆𑀜𑀽𑀦𑀁 𑀩𑀳𑀼𑀫𑀸𑀦𑀼𑀧𑁆𑀧𑀸𑀤𑀦𑀢𑁆𑀣𑀁, 𑀢𑀁 𑀲𑀫𑁆𑀫𑀤𑁂𑀯 𑀢𑁂𑀲𑀁 𑀉𑀕𑁆𑀕𑀳𑀡𑀥𑀸𑀭𑀡𑀸𑀤𑀺𑀓𑁆𑀓𑀫𑀮𑀤𑁆𑀥𑀩𑁆𑀩𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀲𑀩𑁆𑀩𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀢𑁆𑀣’’𑀦𑁆𑀢𑀺. 𑀅𑀣 𑀯𑀸 ‘‘𑀫𑀗𑁆𑀕𑀮𑀪𑀸𑀯𑀢𑁄, 𑀲𑀩𑁆𑀩𑀓𑀺𑀭𑀺𑀬𑀸𑀲𑀼 𑀧𑀼𑀩𑁆𑀩𑀓𑀺𑀘𑁆𑀘𑀪𑀸𑀯𑀢𑁄, 𑀧𑀡𑁆𑀟𑀺𑀢𑁂𑀳𑀺 𑀲𑀫𑀸𑀘𑀭𑀺𑀢𑀪𑀸𑀯𑀢𑁄, 𑀆𑀬𑀢𑀺𑀁 𑀧𑀭𑁂𑀲𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑀢𑁄 𑀘 𑀲𑀁𑀯𑀡𑁆𑀡𑀦𑀸𑀬𑀁 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀺𑀭𑀺𑀬𑀸’’𑀢𑀺. 𑀅𑀣 𑀯𑀸 ‘‘𑀘𑀢𑀼𑀕𑀫𑁆𑀪𑀻𑀭𑀪𑀸𑀯𑀬𑀼𑀢𑁆𑀢𑀁 𑀥𑀫𑁆𑀫𑀯𑀺𑀦𑀬𑀁 𑀲𑀁𑀯𑀡𑁆𑀡𑁂𑀢𑀼𑀓𑀸𑀫𑀲𑁆𑀲 𑀫𑀳𑀸𑀲𑀫𑀼𑀤𑁆𑀤𑀁 𑀑𑀕𑀸𑀳𑀦𑁆𑀢𑀲𑁆𑀲 𑀯𑀺𑀬 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀲𑀫𑀦𑁆𑀦𑀸𑀕𑀢𑀲𑁆𑀲𑀸𑀧𑀺 𑀫𑀳𑀦𑁆𑀢𑀁 𑀪𑀬𑀁 𑀲𑀫𑁆𑀪𑀯𑀢𑀺, 𑀪𑀬𑀓𑁆𑀔𑀬𑀸𑀯𑀳𑀜𑁆𑀘𑁂𑀢𑀁 𑀭𑀢𑀦𑀢𑁆𑀢𑀬𑀕𑀼𑀡𑀸𑀦𑀼𑀲𑁆𑀲𑀭𑀡𑀚𑀦𑀺𑀢𑀁 ¶ 𑀧𑀡𑀸𑀫𑀧𑀽𑀚𑀸𑀯𑀺𑀥𑀸𑀦𑀁, 𑀢𑀢𑁄 𑀘 𑀲𑀁𑀯𑀡𑁆𑀡𑀦𑀸𑀬𑀁 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀺𑀭𑀺𑀬𑀸’’𑀢𑀺. 𑀅𑀣 𑀯𑀸 ‘‘𑀅𑀲𑀢𑁆𑀣𑀭𑀺𑀧𑀺 𑀲𑀢𑁆𑀣𑀸𑀪𑀺𑀦𑀺𑀯𑁂𑀲𑀲𑁆𑀲 𑀮𑁄𑀓𑀲𑁆𑀲 𑀬𑀣𑀸𑀪𑀽𑀢𑀁 𑀲𑀢𑁆𑀣𑀭𑀺 𑀏𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀲𑀢𑁆𑀣𑀼𑀲𑀫𑁆𑀪𑀸𑀯𑀦𑀢𑁆𑀣𑀁, 𑀅𑀲𑀢𑁆𑀣𑀭𑀺 𑀘 𑀲𑀢𑁆𑀣𑀼𑀲𑀫𑁆𑀪𑀸𑀯𑀦𑀧𑀭𑀺𑀘𑁆𑀘𑀚𑀸𑀧𑀦𑀢𑁆𑀣𑀁, ‘𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀅𑀢𑁆𑀢𑀦𑁄 𑀤𑀳𑀢𑀻’𑀢𑀺 (𑀧𑀸𑀭𑀸. 𑁧𑁯𑁫) 𑀘 𑀯𑀼𑀢𑁆𑀢𑀤𑁄𑀲𑀧𑀭𑀺𑀳𑀭𑀡𑀢𑁆𑀣𑀁 𑀲𑀁𑀯𑀡𑁆𑀡𑀦𑀸𑀬𑀁 𑀧𑀡𑀸𑀫𑀓𑀺𑀭𑀺𑀬𑀸’’𑀢𑀺. 𑀅𑀣 𑀯𑀸 ‘‘𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀡𑀸𑀫𑀯𑀺𑀥𑀸𑀦𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑀸𑀥𑀺𑀕𑀫𑀸𑀬 𑀩𑀼𑀤𑁆𑀥𑀬𑀸𑀦𑀁 𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀁 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁, 𑀲𑀤𑁆𑀥𑀫𑁆𑀫𑀲𑁆𑀲 𑀘 𑀧𑀡𑀸𑀫𑀯𑀺𑀥𑀸𑀦𑁂𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀪𑀸𑀯𑀸𑀥𑀺𑀕𑀫𑀸𑀬 𑀧𑀘𑁆𑀘𑁂𑀓𑀩𑀼𑀤𑁆𑀥𑀬𑀸𑀦𑀁 𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀁 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁, 𑀲𑀗𑁆𑀖𑀲𑁆𑀲 𑀘 𑀧𑀡𑀸𑀫𑀯𑀺𑀥𑀸𑀦𑁂𑀦 𑀧𑀭𑀫𑀢𑁆𑀣𑀲𑀗𑁆𑀖𑀪𑀸𑀯𑀸𑀥𑀺𑀕𑀫𑀸𑀬 𑀲𑀸𑀯𑀓𑀬𑀸𑀦𑀁 𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀁 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁 𑀲𑀁𑀯𑀡𑁆𑀡𑀦𑀸𑀬𑀁 𑀧𑀡𑀸𑀫𑀓𑀺𑀭𑀺𑀬𑀸’’𑀢𑀺. 𑀅𑀣 𑀯𑀸 ‘‘𑀫𑀗𑁆𑀕𑀮𑀸𑀤𑀺𑀓𑀸𑀦𑀺 𑀲𑀢𑁆𑀣𑀸𑀦𑀺 𑀅𑀦𑀦𑁆𑀢𑀭𑀸𑀬𑀸𑀦𑀺, 𑀘𑀺𑀭𑀝𑁆𑀞𑀺𑀢𑀺𑀓𑀸𑀦𑀺, 𑀩𑀳𑀼𑀫𑀢𑀸𑀦𑀺 𑀘 𑀪𑀯𑀦𑁆𑀢𑀻𑀢𑀺 𑀏𑀯𑀁𑀮𑀤𑁆𑀥𑀺𑀓𑀸𑀦𑀁 𑀘𑀺𑀢𑁆𑀢𑀧𑀭𑀺𑀢𑁄𑀲𑀦𑀢𑁆𑀣𑀁 𑀲𑀁𑀯𑀡𑁆𑀡𑀦𑀸𑀬𑀁 𑀧𑀡𑀸𑀫𑀓𑀺𑀭𑀺𑀬𑀸’’𑀢𑀺. 𑀅𑀣 𑀯𑀸 ‘‘𑀲𑁄𑀢𑀼𑀚𑀦𑀸𑀦𑀁 𑀬𑀣𑀸𑀯𑀼𑀢𑁆𑀢𑀧𑀡𑀸𑀫𑁂𑀦 𑀅𑀦𑀦𑁆𑀢𑀭𑀸𑀬𑁂𑀦 𑀉𑀕𑁆𑀕𑀳𑀡𑀥𑀸𑀭𑀡𑀸𑀤𑀺𑀦𑀺𑀧𑁆𑀨𑀸𑀤𑀦𑀢𑁆𑀣𑀁 𑀲𑀁𑀯𑀡𑁆𑀡𑀦𑀸𑀬𑀁 𑀧𑀡𑀸𑀫𑀓𑀺𑀭𑀺𑀬𑀸. 𑀲𑁄𑀢𑀼𑀚𑀦𑀸𑀦𑀼𑀕𑁆𑀕𑀳𑀫𑁂𑀯 𑀳𑀺 𑀧𑀥𑀸𑀦𑀁 𑀓𑀢𑁆𑀯𑀸 𑀆𑀘𑀭𑀺𑀬𑁂𑀳𑀺 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀣𑀼𑀢𑀺𑀧𑀡𑀸𑀫𑀧𑀭𑀺𑀤𑀻𑀧𑀓𑀸𑀦𑀺 𑀯𑀸𑀓𑁆𑀬𑀸𑀦𑀺 𑀦𑀺𑀓𑁆𑀔𑀺𑀧𑀻𑀬𑀦𑁆𑀢𑀺, 𑀇𑀢𑀭𑀣𑀸 𑀯𑀺𑀦𑀸𑀧𑀺 𑀢𑀁 𑀦𑀺𑀓𑁆𑀔𑁂𑀧𑀁 𑀓𑀸𑀬𑀫𑀦𑁄𑀧𑀡𑀸𑀫𑁂𑀦𑁂𑀯 𑀬𑀣𑀸𑀥𑀺𑀧𑁆𑀧𑁂𑀢𑀧𑁆𑀧𑀬𑁄𑀚𑀦𑀲𑀺𑀤𑁆𑀥𑀺𑀢𑁄 𑀓𑀺𑀫𑁂𑀢𑁂𑀦 𑀕𑀦𑁆𑀣𑀕𑀸𑀭𑀯𑀓𑀭𑀡𑁂𑀦𑀸’’𑀢𑀺 𑀘 𑀏𑀯𑀫𑀸𑀤𑀺𑀦𑀸. 𑀫𑀬𑀁 𑀧𑀦 𑀇𑀥𑀸𑀥𑀺𑀧𑁆𑀧𑁂𑀢𑀫𑁂𑀯 𑀧𑀬𑁄𑀚𑀦𑀁 𑀤𑀲𑁆𑀲𑀬𑀺𑀲𑁆𑀲𑀸𑀫, 𑀢𑀲𑁆𑀫𑀸 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀭𑀡𑀁 𑀬𑀣𑀸𑀧𑀝𑀺𑀜𑁆𑀜𑀸𑀢𑀲𑀁𑀯𑀡𑁆𑀡𑀦𑀸𑀬 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀫𑁂𑀯 𑀘 𑀧𑀬𑁄𑀚𑀦𑀁 𑀆𑀘𑀭𑀺𑀬𑁂𑀦 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀇𑀢𑀺 𑀫𑁂 𑀧𑀲𑀦𑁆𑀦𑀫𑀢𑀺𑀦𑁄 ¶ …𑀧𑁂… 𑀢𑀲𑁆𑀲𑀸𑀦𑀼𑀪𑀸𑀯𑁂𑀦𑀸’’𑀢𑀺. 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀭𑀡𑀜𑁆𑀳𑀺 𑀬𑀣𑀸𑀧𑀝𑀺𑀜𑁆𑀜𑀸𑀢𑀲𑀁𑀯𑀡𑁆𑀡𑀦𑀸𑀬 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀢𑁆𑀣𑀁 𑀭𑀢𑀦𑀢𑁆𑀢𑀬𑀧𑀽𑀚𑀸𑀬 𑀧𑀜𑁆𑀜𑀸𑀧𑀸𑀝𑀯𑀪𑀸𑀯𑀢𑁄, 𑀢𑀸𑀬 𑀘 𑀧𑀜𑁆𑀜𑀸𑀧𑀸𑀝𑀯𑀁 𑀭𑀸𑀕𑀸𑀤𑀺𑀫𑀮𑀯𑀺𑀥𑀫𑀦𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑀲𑁆𑀫𑀺𑀁 𑀫𑀳𑀸𑀦𑀸𑀫 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀉𑀚𑀼𑀕𑀢𑀫𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁬.𑁧𑁦; 𑀅. 𑀦𑀺. 𑁧𑁧.𑁧𑁧).

𑀢𑀲𑁆𑀫𑀸 ¶ 𑀭𑀢𑀦𑀢𑁆𑀢𑀬𑀧𑀽𑀚𑀸𑀬 𑀯𑀺𑀓𑁆𑀔𑀸𑀮𑀺𑀢𑀫𑀮𑀸𑀬 𑀧𑀜𑁆𑀜𑀸𑀬 𑀧𑀸𑀝𑀯𑀲𑀺𑀤𑁆𑀥𑀺. 𑀅𑀣 𑀯𑀸 𑀭𑀢𑀦𑀢𑁆𑀢𑀬𑀧𑀽𑀚𑀸𑀬 𑀧𑀜𑁆𑀜𑀸𑀧𑀤𑀝𑁆𑀞𑀸𑀦𑀲𑀫𑀸𑀥𑀺𑀳𑁂𑀢𑀼𑀢𑁆𑀢𑀸 𑀧𑀜𑁆𑀜𑀸𑀧𑀸𑀝𑀯𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀉𑀚𑀼𑀕𑀢𑀘𑀺𑀢𑁆𑀢𑁄 𑀔𑁄 𑀧𑀦 𑀫𑀳𑀸𑀦𑀸𑀫 𑀅𑀭𑀺𑀬𑀲𑀸𑀯𑀓𑁄 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑁄𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚𑀁, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑀬𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻’’𑀢𑀺 (𑀅. 𑀦𑀺. 𑁬.𑁧𑁦; 𑀅. 𑀦𑀺. 𑁧𑁧.𑁧𑁧).

𑀲𑀫𑀸𑀥𑀺𑀲𑁆𑀲 𑀘 𑀧𑀜𑁆𑀜𑀸𑀬 𑀧𑀤𑀝𑁆𑀞𑀸𑀦𑀪𑀸𑀯𑁄 ‘‘𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺 (𑀲𑀁. 𑀦𑀺. 𑁩.𑁫; 𑁪.𑁯𑁯; 𑁫.𑁧𑁦𑁭𑁧; 𑀦𑁂𑀢𑁆𑀢𑀺. 𑁪𑁦; 𑀧𑁂𑀝𑀓𑁄. 𑁬𑁬; 𑀫𑀺. 𑀧. 𑁧𑁪) 𑀯𑀼𑀢𑁆𑀢𑁄𑀬𑁂𑀯. 𑀢𑀢𑁄 𑀏𑀯𑀁 𑀧𑀝𑀼𑀪𑀽𑀢𑀸𑀬 𑀧𑀜𑁆𑀜𑀸𑀬 𑀔𑁂𑀤𑀫𑀪𑀺𑀪𑀼𑀬𑁆𑀬 𑀧𑀝𑀺𑀜𑁆𑀜𑀸𑀢𑀁 𑀲𑀁𑀯𑀡𑁆𑀡𑀦𑀁 𑀲𑀫𑀸𑀧𑀬𑀺𑀲𑁆𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀭𑀡𑀜𑁆𑀳𑀺…𑀧𑁂… 𑀧𑀜𑁆𑀜𑀸𑀧𑀸𑀝𑀯𑀪𑀸𑀯𑀢𑁄’’𑀢𑀺. 𑀅𑀣 𑀯𑀸 𑀭𑀢𑀦𑀢𑁆𑀢𑀬𑀧𑀽𑀚𑀸𑀬 𑀆𑀬𑀼𑀯𑀡𑁆𑀡𑀲𑀼𑀔𑀩𑀮𑀯𑀟𑁆𑀠𑀦𑀢𑁄 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀭𑀢𑀦𑀢𑁆𑀢𑀬𑀧𑀡𑀸𑀫𑁂𑀦 𑀳𑀺 𑀆𑀬𑀼𑀯𑀡𑁆𑀡𑀲𑀼𑀔𑀩𑀮𑀸𑀦𑀺 𑀯𑀟𑁆𑀠𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀪𑀺𑀯𑀸𑀤𑀦𑀲𑀻𑀮𑀺𑀲𑁆𑀲, 𑀦𑀺𑀘𑁆𑀘𑀁 𑀯𑀼𑀟𑁆𑀠𑀸𑀧𑀘𑀸𑀬𑀺𑀦𑁄;

𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀯𑀟𑁆𑀠𑀦𑁆𑀢𑀺, 𑀆𑀬𑀼 𑀯𑀡𑁆𑀡𑁄 𑀲𑀼𑀔𑀁 𑀩𑀮’’𑀦𑁆𑀢𑀺. (𑀥. 𑀧. 𑁧𑁦𑁯);

𑀢𑀢𑁄 𑀆𑀬𑀼𑀯𑀡𑁆𑀡𑀲𑀼𑀔𑀩𑀮𑀯𑀼𑀤𑁆𑀥𑀺𑀬𑀸 𑀳𑁄𑀢𑁆𑀯𑁂𑀯 𑀓𑀸𑀭𑀺𑀬𑀦𑀺𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀭𑀢𑀦𑀢𑁆𑀢𑀬𑀧𑀽𑀚𑀸𑀬 𑀆𑀬𑀼…𑀧𑁂… 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺. 𑀅𑀣 𑀯𑀸 𑀭𑀢𑀦𑀢𑁆𑀢𑀬𑀧𑀽𑀚𑀸𑀬 𑀧𑀝𑀺𑀪𑀸𑀦𑀸𑀧𑀭𑀺𑀳𑀸𑀦𑀸𑀯𑀳𑀢𑁆𑀢𑀸 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀧𑀭𑀺𑀳𑀸𑀦𑀸𑀯𑀳𑀸 𑀳𑀺 𑀭𑀢𑀦𑀢𑁆𑀢𑀬𑀧𑀽𑀚𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑀢𑁆𑀢𑀺𑀫𑁂 ¶ 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀳𑀸𑀦𑀻𑀬𑀸 𑀥𑀫𑁆𑀫𑀸, 𑀓𑀢𑀫𑁂 𑀲𑀢𑁆𑀢? 𑀲𑀢𑁆𑀣𑀼𑀕𑀸𑀭𑀯𑀢𑀸, 𑀥𑀫𑁆𑀫𑀕𑀸𑀭𑀯𑀢𑀸, 𑀲𑀗𑁆𑀖𑀕𑀸𑀭𑀯𑀢𑀸, 𑀲𑀺𑀓𑁆𑀔𑀸𑀕𑀸𑀭𑀯𑀢𑀸, 𑀲𑀫𑀸𑀥𑀺𑀕𑀸𑀭𑀯𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑁄𑀯𑀘𑀲𑁆𑀲𑀢𑀸’’𑀢𑀺 (𑀅. 𑀦𑀺. 𑁭.𑁩𑁪) 𑀢𑀢𑁄 𑀧𑀝𑀺𑀪𑀸𑀦𑀸𑀧𑀭𑀺𑀳𑀸𑀦𑁂𑀦 𑀳𑁄𑀢𑁆𑀯𑁂𑀯 𑀬𑀣𑀸𑀧𑀝𑀺𑀜𑁆𑀜𑀸𑀢𑀧𑀭𑀺𑀲𑀫𑀸𑀧𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀭𑀢𑀦𑀢𑁆𑀢𑀬…𑀧𑁂… 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺. 𑀅𑀣 𑀯𑀸 𑀧𑀲𑀸𑀤𑀯𑀢𑁆𑀣𑀽𑀲𑀼 𑀧𑀽𑀚𑀸𑀬 𑀧𑀼𑀜𑁆𑀜𑀸𑀢𑀺𑀲𑀬𑀪𑀸𑀯𑀢𑁄 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀜𑁆𑀜𑀸𑀢𑀺𑀲𑀬𑀸 𑀳𑀺 𑀧𑀲𑀸𑀤𑀯𑀢𑁆𑀣𑀽𑀲𑀼 𑀧𑀽𑀚𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀧𑀽𑀚𑀸𑀭𑀳𑁂 ¶ 𑀧𑀽𑀚𑀬𑀢𑁄, 𑀩𑀼𑀤𑁆𑀥𑁂 𑀬𑀤𑀺𑀯 𑀲𑀸𑀯𑀓𑁂;

𑀧𑀧𑀜𑁆𑀘𑀲𑀫𑀢𑀺𑀓𑁆𑀓𑀦𑁆𑀢𑁂, 𑀢𑀺𑀡𑁆𑀡𑀲𑁄𑀓𑀧𑀭𑀺𑀤𑁆𑀤𑀯𑁂.

𑀢𑁂 𑀢𑀸𑀤𑀺𑀲𑁂 𑀧𑀽𑀚𑀬𑀢𑁄, 𑀦𑀺𑀩𑁆𑀩𑀼𑀢𑁂 𑀅𑀓𑀼𑀢𑁄𑀪𑀬𑁂;

𑀦 𑀲𑀓𑁆𑀓𑀸 𑀧𑀼𑀜𑁆𑀜𑀁 𑀲𑀗𑁆𑀔𑀸𑀢𑀼𑀁, 𑀇𑀫𑁂𑀢𑁆𑀢𑀫𑀧𑀺 𑀓𑁂𑀦𑀘𑀻’’𑀢𑀺. (𑀔𑀼. 𑀧𑀸. 𑁧𑁯𑁬; 𑀅𑀧. 𑁧.𑁧𑁦.𑁨);

𑀧𑀼𑀜𑁆𑀜𑀸𑀢𑀺𑀲𑀬𑁄 𑀘 𑀬𑀣𑀸𑀥𑀺𑀧𑁆𑀧𑁂𑀢𑀧𑀭𑀺𑀲𑀫𑀸𑀧𑀦𑀼𑀧𑀸𑀬𑁄. 𑀬𑀣𑀸𑀳 𑁋

‘‘𑀏𑀲 𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀲𑀩𑁆𑀩𑀓𑀸𑀫𑀤𑀤𑁄 𑀦𑀺𑀥𑀺;

𑀬𑀁 𑀬𑀤𑁂𑀯𑀸𑀪𑀺𑀧𑀢𑁆𑀣𑁂𑀦𑁆𑀢𑀺, 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀻’’𑀢𑀺. (𑀔𑀼. 𑀧𑀸. 𑁮.𑁧𑁦);

𑀉𑀧𑀸𑀬𑁂𑀲𑀼 𑀘 𑀧𑀝𑀺𑀧𑀦𑁆𑀦𑀲𑁆𑀲 𑀳𑁄𑀢𑁆𑀯𑁂𑀯 𑀓𑀸𑀭𑀺𑀬𑀦𑀺𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀧𑀲𑀸𑀤𑀯𑀢𑁆𑀣𑀽𑀲𑀼…𑀧𑁂… 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺. 𑀏𑀯𑀁 𑀭𑀢𑀦𑀢𑁆𑀢𑀬𑀧𑀽𑀚𑀸 𑀦𑀺𑀭𑀢𑀺𑀲𑀬𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀲𑀫𑁆𑀩𑀼𑀤𑁆𑀥𑀺𑀬𑀸 𑀅𑀧𑀭𑀺𑀫𑁂𑀬𑁆𑀬𑀧𑁆𑀧𑀪𑀸𑀯𑁄 𑀧𑀼𑀜𑁆𑀜𑀸𑀢𑀺𑀲𑀬𑁄𑀢𑀺 𑀩𑀳𑀼𑀯𑀺𑀥𑀦𑁆𑀢𑀭𑀸𑀬𑁂𑀧𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀅𑀦𑁆𑀢𑀭𑀸𑀬𑀦𑀺𑀩𑀦𑁆𑀥𑀦𑀲𑀓𑀮𑀲𑀁𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀸𑀬 𑀧𑀳𑁄𑀢𑀺, 𑀪𑀬𑀸𑀤𑀺𑀉𑀧𑀤𑁆𑀤𑀯𑀜𑁆𑀘 𑀦𑀺𑀯𑀸𑀭𑁂𑀢𑀺. 𑀢𑀲𑁆𑀫𑀸 𑀲𑀼𑀯𑀼𑀢𑁆𑀢𑀁 ‘‘𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀭𑀡𑀁 𑀬𑀣𑀸𑀧𑀝𑀺𑀜𑁆𑀜𑀸𑀢𑀲𑀁𑀯𑀡𑁆𑀡𑀦𑀸𑀬 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺.

𑀏𑀯𑀁 𑀧𑀦 𑀲𑀧𑀬𑁄𑀚𑀦𑀁 𑀭𑀢𑀦𑀢𑁆𑀢𑀬𑀧𑀡𑀸𑀫𑀁 𑀓𑀢𑁆𑀢𑀼𑀓𑀸𑀫𑁄 𑀩𑀼𑀤𑁆𑀥𑀭𑀢𑀦𑀫𑀽𑀮𑀓𑀢𑁆𑀢𑀸 𑀲𑁂𑀲𑀭𑀢𑀦𑀸𑀦𑀁 𑀧𑀞𑀫𑀁 𑀢𑀲𑁆𑀲 𑀧𑀡𑀸𑀫𑀁 𑀓𑀸𑀢𑀼𑀫𑀸𑀳 𑁋 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑀁…𑀧𑁂… 𑀕𑀢𑀺𑀯𑀺𑀫𑀼𑀢𑁆𑀢’’𑀦𑁆𑀢𑀺. 𑀩𑀼𑀤𑁆𑀥𑀭𑀢𑀦𑀫𑀽𑀮𑀓𑀸𑀦𑀺 𑀳𑀺 𑀥𑀫𑁆𑀫𑀲𑀗𑁆𑀖𑀭𑀢𑀦𑀸𑀦𑀺, 𑀢𑁂𑀲𑀼 𑀘 𑀥𑀫𑁆𑀫𑀭𑀢𑀦𑀫𑀽𑀮𑀓𑀁 𑀲𑀗𑁆𑀖𑀭𑀢𑀦𑀁, 𑀢𑀣𑀸𑀪𑀸𑀯𑁄 𑀘 ‘‘𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀪𑀕𑀯𑀸, 𑀘𑀦𑁆𑀤𑀓𑀺𑀭𑀡𑀦𑀺𑀓𑀭𑁄 𑀯𑀺𑀬 𑀢𑁂𑀦 𑀤𑁂𑀲𑀺𑀢𑁄 𑀥𑀫𑁆𑀫𑁄, 𑀘𑀦𑁆𑀤𑀓𑀺𑀭𑀡𑀲𑀫𑀼𑀧𑁆𑀧𑀸𑀤𑀺𑀢𑀧𑀻𑀡𑀺𑀢𑁄 𑀮𑁄𑀓𑁄 𑀯𑀺𑀬 𑀲𑀗𑁆𑀖𑁄’’𑀢𑀺 𑀏𑀯𑀫𑀸𑀤𑀻𑀳𑀺 𑀅𑀝𑁆𑀞𑀓𑀣𑀸𑀬𑀫𑀸𑀕𑀢𑀉𑀧𑀫𑀸𑀳𑀺 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀅𑀣 𑀯𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀕𑁆𑀕𑁄𑀢𑀺 𑀓𑀢𑁆𑀯𑀸 𑀧𑀞𑀫𑀁 𑀩𑀼𑀤𑁆𑀥𑁄, 𑀢𑀧𑁆𑀧𑀪𑀯𑀢𑁄, 𑀢𑀤𑀼𑀧𑀤𑁂𑀲𑀺𑀢𑀢𑁄 𑀘 𑀢𑀤𑀦𑀦𑁆𑀢𑀭𑀁 𑀥𑀫𑁆𑀫𑁄, 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀲𑀸𑀥𑀸𑀭𑀡𑀢𑁄 ¶ , 𑀢𑀤𑀸𑀲𑁂𑀯𑀦𑀢𑁄 𑀘 𑀢𑀤𑀦𑀦𑁆𑀢𑀭𑀁 𑀲𑀗𑁆𑀖𑁄 𑀯𑀼𑀢𑁆𑀢𑁄. ‘‘𑀲𑀩𑁆𑀩𑀲𑀢𑁆𑀢𑀸𑀦𑀁 𑀯𑀸 𑀳𑀺𑀢𑁂 𑀯𑀺𑀦𑀺𑀬𑁄𑀚𑀓𑁄𑀢𑀺 𑀓𑀢𑁆𑀯𑀸 𑀧𑀞𑀫𑀁 𑀩𑀼𑀤𑁆𑀥𑁄, 𑀲𑀩𑁆𑀩𑀲𑀢𑁆𑀢𑀳𑀺𑀢𑀢𑁆𑀢𑀸 𑀢𑀤𑀦𑀦𑁆𑀢𑀭𑀁 𑀥𑀫𑁆𑀫𑁄, 𑀳𑀺𑀢𑀸𑀥𑀺𑀕𑀫𑀸𑀬 𑀧𑀝𑀺𑀧𑀦𑁆𑀦𑁄 𑀅𑀥𑀺𑀕𑀢𑀳𑀺𑀢𑁄 𑀘𑀸𑀢𑀺 𑀓𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀲𑀗𑁆𑀖𑁄 𑀯𑀼𑀢𑁆𑀢𑁄’’𑀢𑀺 𑀅𑀝𑁆𑀞𑀓𑀣𑀸𑀕𑀢𑀦𑀬𑁂𑀦 𑀅𑀦𑀼𑀧𑀼𑀩𑁆𑀩𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀩𑀼𑀤𑁆𑀥𑀭𑀢𑀦𑀧𑀡𑀸𑀫𑀜𑁆𑀘 ¶ 𑀓𑀭𑁄𑀦𑁆𑀢𑁄 𑀓𑁂𑀯𑀮𑀧𑀡𑀸𑀫𑀢𑁄 𑀣𑁄𑀫𑀦𑀸𑀧𑀼𑀩𑁆𑀩𑀗𑁆𑀕𑀫𑁄𑀯𑀲𑀸𑀢𑀺𑀲𑀬𑁄𑀢𑀺 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺𑀆𑀤𑀺𑀧𑀤𑁂𑀳𑀺 𑀣𑁄𑀫𑀦𑀸𑀧𑀼𑀩𑁆𑀩𑀗𑁆𑀕𑀫𑀢𑀁 𑀤𑀲𑁆𑀲𑁂𑀢𑀺. 𑀣𑁄𑀫𑀦𑀸𑀧𑀼𑀩𑁆𑀩𑀗𑁆𑀕𑀫𑁂𑀦 𑀳𑀺 𑀧𑀡𑀸𑀫𑁂𑀦 𑀲𑀢𑁆𑀣𑀼 𑀕𑀼𑀡𑀸𑀢𑀺𑀲𑀬𑀬𑁄𑀕𑁄, 𑀢𑀢𑁄 𑀘𑀲𑁆𑀲 𑀅𑀦𑀼𑀢𑁆𑀢𑀭𑀯𑀦𑁆𑀤𑀦𑀻𑀬𑀪𑀸𑀯𑁄, 𑀢𑁂𑀦 𑀘 𑀅𑀢𑁆𑀢𑀦𑁄 𑀧𑀡𑀸𑀫𑀲𑁆𑀲 𑀔𑁂𑀢𑁆𑀢𑀗𑁆𑀕𑀢𑀪𑀸𑀯𑁄, 𑀢𑁂𑀦 𑀘𑀲𑁆𑀲 𑀔𑁂𑀢𑁆𑀢𑀗𑁆𑀕𑀢𑀲𑁆𑀲 𑀧𑀡𑀸𑀫𑀲𑁆𑀲 𑀬𑀣𑀸𑀥𑀺𑀧𑁆𑀧𑁂𑀢𑀦𑀺𑀧𑁆𑀨𑀢𑁆𑀢𑀺𑀳𑁂𑀢𑀼𑀪𑀸𑀯𑁄 𑀤𑀲𑁆𑀲𑀺𑀢𑁄𑀢𑀺. 𑀣𑁄𑀫𑀦𑀸𑀧𑀼𑀩𑁆𑀩𑀗𑁆𑀕𑀫𑀢𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀬𑀲𑁆𑀲𑀸 𑀲𑀁𑀯𑀡𑁆𑀡𑀦𑀁 𑀓𑀢𑁆𑀢𑀼𑀓𑀸𑀫𑁄, 𑀲𑀸 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸 𑀓𑀭𑀼𑀡𑀸𑀧𑀜𑁆𑀜𑀸𑀧𑁆𑀧𑀥𑀸𑀦𑀸𑀬𑁂𑀯, 𑀦 𑀯𑀺𑀦𑀬𑀤𑁂𑀲𑀦𑀸 𑀯𑀺𑀬 𑀓𑀭𑀼𑀡𑀸𑀧𑁆𑀧𑀥𑀸𑀦𑀸, 𑀦𑀸𑀧𑀺 𑀅𑀪𑀺𑀥𑀫𑁆𑀫𑀤𑁂𑀲𑀦𑀸 𑀯𑀺𑀬 𑀧𑀜𑁆𑀜𑀸𑀧𑁆𑀧𑀥𑀸𑀦𑀸𑀢𑀺 𑀢𑀤𑀼𑀪𑀬𑀧𑁆𑀧𑀥𑀸𑀦𑀫𑁂𑀯 𑀣𑁄𑀫𑀦𑀫𑀸𑀭𑀪𑀢𑀺. 𑀏𑀲𑀸 𑀳𑀺 𑀆𑀘𑀭𑀺𑀬𑀲𑁆𑀲 𑀧𑀓𑀢𑀺, 𑀬𑀤𑀺𑀤𑀁 𑀆𑀭𑀫𑁆𑀪𑀸𑀦𑀼𑀭𑀽𑀧𑀣𑁄𑀫𑀦𑀸. 𑀢𑁂𑀦𑁂𑀯 𑀘 𑀯𑀺𑀦𑀬𑀤𑁂𑀲𑀦𑀸𑀬 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 ‘‘𑀬𑁄 𑀓𑀧𑁆𑀧𑀓𑁄𑀝𑀻𑀳𑀺𑀧𑀺…𑀧𑁂… 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀢𑀲𑁆𑀲𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀓𑀭𑀼𑀡𑀸𑀧𑁆𑀧𑀥𑀸𑀦𑀁, 𑀅𑀪𑀺𑀥𑀫𑁆𑀫𑀤𑁂𑀲𑀦𑀸𑀬 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 ‘‘𑀓𑀭𑀼𑀡𑀸 𑀯𑀺𑀬…𑀧𑁂… 𑀬𑀣𑀸𑀭𑀼𑀘𑀻’’𑀢𑀺 (𑀥. 𑀲. 𑀅𑀝𑁆𑀞. 𑁧) 𑀧𑀜𑁆𑀜𑀸𑀧𑁆𑀧𑀥𑀸𑀦𑀜𑁆𑀘 𑀣𑁄𑀫𑀦𑀫𑀸𑀭𑀤𑁆𑀥𑀁. 𑀯𑀺𑀦𑀬𑀤𑁂𑀲𑀦𑀸 𑀳𑀺 𑀆𑀲𑀬𑀸𑀤𑀺𑀦𑀺𑀭𑀧𑁂𑀓𑁆𑀔𑀓𑁂𑀯𑀮𑀓𑀭𑀼𑀡𑀸𑀬 𑀧𑀸𑀓𑀢𑀺𑀓𑀲𑀢𑁆𑀢𑁂𑀦𑀸𑀧𑀺 𑀅𑀲𑁄𑀢𑀩𑁆𑀩𑀸𑀭𑀳𑀁 𑀲𑀼𑀡𑀦𑁆𑀢𑁄, 𑀅𑀧𑀼𑀘𑁆𑀙𑀺𑀢𑀩𑁆𑀩𑀸𑀭𑀳𑀁 𑀧𑀼𑀘𑁆𑀙𑀦𑁆𑀢𑁄, 𑀅𑀯𑀢𑁆𑀢𑀩𑁆𑀩𑀸𑀭𑀳𑀜𑁆𑀘 𑀯𑀤𑀦𑁆𑀢𑁄 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀻𑀢𑀺 𑀓𑀭𑀼𑀡𑀸𑀧𑁆𑀧𑀥𑀸𑀦𑀸. 𑀢𑀣𑀸 𑀳𑀺 𑀉𑀓𑁆𑀓𑀁𑀲𑀧𑀭𑀺𑀬𑀦𑁆𑀢𑀕𑀢𑀳𑀺𑀭𑁄𑀢𑁆𑀢𑀧𑁆𑀧𑁄𑀧𑀺 𑀪𑀕𑀯𑀸 𑀮𑁄𑀓𑀺𑀬𑀲𑀸𑀥𑀼𑀚𑀦𑁂𑀳𑀺𑀧𑀺 𑀧𑀭𑀺𑀳𑀭𑀺𑀢𑀩𑁆𑀩𑀸𑀦𑀺 ‘‘𑀲𑀺𑀔𑀭𑀡𑀻, 𑀲𑀫𑁆𑀪𑀺𑀦𑁆𑀦𑀸’’𑀢𑀺𑀆𑀤𑀺𑀯𑀘𑀦𑀸𑀦𑀺, (𑀧𑀸𑀭𑀸. 𑁧𑁮𑁫) 𑀬𑀣𑀸𑀧𑀭𑀸𑀥𑀜𑁆𑀘 𑀕𑀭𑀳𑀯𑀘𑀦𑀸𑀦𑀺 𑀫𑀳𑀸𑀓𑀭𑀼𑀡𑀸𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀫𑀳𑀸𑀧𑀭𑀺𑀲𑀫𑀚𑁆𑀛𑁂 𑀅𑀪𑀸𑀲𑀺, 𑀢𑀁𑀢𑀁𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺 𑀓𑀸𑀭𑀡𑀸𑀧𑁂𑀓𑁆𑀔𑀸𑀬 𑀘 𑀯𑁂𑀭𑀜𑁆𑀚𑀸𑀤𑀻𑀲𑀼 𑀲𑀸𑀭𑀻𑀭𑀺𑀓𑀁 𑀔𑁂𑀤𑀫𑀦𑀼𑀪𑁄𑀲𑀺. 𑀢𑀲𑁆𑀫𑀸 𑀓𑀺𑀜𑁆𑀘𑀸𑀧𑀺 𑀪𑀽𑀫𑀦𑁆𑀢𑀭𑀧𑀘𑁆𑀘𑀬𑀸𑀓𑀸𑀭𑀲𑀫𑀬𑀦𑁆𑀢𑀭𑀓𑀣𑀸𑀦𑀁 𑀯𑀺𑀬 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀧𑀺 𑀲𑀫𑀼𑀝𑁆𑀞𑀸𑀧𑀺𑀓𑀸 𑀧𑀜𑁆𑀜𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀅𑀢𑀺𑀲𑀬𑀓𑀺𑀘𑁆𑀘𑀯𑀢𑀻, 𑀓𑀭𑀼𑀡𑀸𑀬 𑀓𑀺𑀘𑁆𑀘𑀁 𑀧𑀦 𑀢𑀢𑁄𑀧𑀺 𑀅𑀥𑀺𑀓𑀦𑁆𑀢𑀺 𑀯𑀺𑀦𑀬𑀤𑁂𑀲𑀦𑀸𑀬 𑀓𑀭𑀼𑀡𑀸𑀧𑁆𑀧𑀥𑀸𑀦𑀢𑀸 𑀯𑀼𑀢𑁆𑀢𑀸. 𑀓𑀭𑀼𑀡𑀸𑀩𑁆𑀬𑀸𑀧𑀸𑀭𑀸𑀥𑀺𑀓𑀢𑀸𑀬 𑀳𑀺 𑀤𑁂𑀲𑀦𑀸𑀬 𑀓𑀭𑀼𑀡𑀸𑀧𑀥𑀸𑀦𑀢𑀸, 𑀅𑀪𑀺𑀥𑀫𑁆𑀫𑀤𑁂𑀲𑀦𑀸 𑀧𑀦 𑀓𑁂𑀯𑀮𑀧𑀜𑁆𑀜𑀸𑀧𑁆𑀧𑀥𑀸𑀦𑀸 𑀧𑀭𑀫𑀢𑁆𑀣𑀥𑀫𑁆𑀫𑀸𑀦𑀁 𑀬𑀣𑀸𑀲𑀪𑀸𑀯𑀧𑀝𑀺𑀯𑁂𑀥𑀲𑀫𑀢𑁆𑀣𑀸𑀬 𑀧𑀜𑁆𑀜𑀸𑀬 𑀢𑀢𑁆𑀣 𑀲𑀸𑀢𑀺𑀲𑀬𑀧𑁆𑀧𑀯𑀢𑁆𑀢𑀺𑀢𑁄. 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸 𑀧𑀦 𑀓𑀭𑀼𑀡𑀸𑀧𑀜𑁆𑀜𑀸𑀧𑁆𑀧𑀥𑀸𑀦𑀸 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀆𑀲𑀬𑀸𑀦𑀼𑀲𑀬𑀸𑀥𑀺𑀫𑀼𑀢𑁆𑀢𑀺𑀘𑀭𑀺𑀢𑀸𑀤𑀺𑀪𑁂𑀤𑀧𑀭𑀺𑀘𑁆𑀙𑀺𑀦𑁆𑀤𑀦𑀲𑀫𑀢𑁆𑀣𑀸𑀬 𑀧𑀜𑁆𑀜𑀸𑀬 𑀲𑀢𑁆𑀢𑁂𑀲𑀼 𑀘 𑀫𑀳𑀸𑀓𑀭𑀼𑀡𑀸𑀬 𑀢𑀢𑁆𑀣 𑀲𑀸𑀢𑀺𑀲𑀬𑀧𑁆𑀧𑀯𑀢𑁆𑀢𑀺𑀢𑁄. 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 𑀳𑀺 𑀫𑀳𑀸𑀓𑀭𑀼𑀡𑀸𑀬 𑀲𑀫𑀸𑀧𑀢𑁆𑀢𑀺𑀩𑀳𑀼𑀮𑁄 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑁂 𑀢𑀤𑀚𑁆𑀛𑀸𑀲𑀬𑀸𑀦𑀼𑀮𑁄𑀫𑁂𑀦 ¶ 𑀕𑀫𑁆𑀪𑀻𑀭𑀫𑀢𑁆𑀣𑀧𑀤𑀁 𑀧𑀢𑀺𑀝𑁆𑀞𑀧𑁂𑀲𑀺. 𑀢𑀲𑁆𑀫𑀸 𑀆𑀭𑀫𑁆𑀪𑀸𑀦𑀼𑀭𑀽𑀧𑀁 𑀓𑀭𑀼𑀡𑀸𑀧𑀜𑁆𑀜𑀸𑀧𑁆𑀧𑀥𑀸𑀦𑀫𑁂𑀯 𑀣𑁄𑀫𑀦𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀅𑀬𑀫𑁂𑀢𑁆𑀣 𑀲𑀫𑀼𑀤𑀸𑀬𑀢𑁆𑀣𑁄.

𑀅𑀬𑀁 ¶ 𑀧𑀦 𑀅𑀯𑀬𑀯𑀢𑁆𑀣𑁄 𑁋 𑀓𑀺𑀭𑀢𑀻𑀢𑀺 𑀓𑀭𑀼𑀡𑀸, 𑀧𑀭𑀤𑀼𑀓𑁆𑀔𑀁 𑀯𑀺𑀓𑁆𑀔𑀺𑀧𑀢𑀺 𑀧𑀘𑁆𑀘𑀬𑀯𑁂𑀓𑀮𑁆𑀮𑀓𑀭𑀡𑁂𑀦 𑀅𑀧𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀺𑀢𑁂𑀲𑀼 𑀯𑀸 𑀓𑀺𑀭𑀺𑀬𑀢𑀺 𑀧𑀲𑀸𑀭𑀺𑀬𑀢𑀻𑀢𑀺 𑀓𑀭𑀼𑀡𑀸. 𑀅𑀣 𑀯𑀸 𑀓𑀺𑀡𑀸𑀢𑀻𑀢𑀺 𑀓𑀭𑀼𑀡𑀸, 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀓𑀸𑀭𑀼𑀡𑀺𑀓𑀁 𑀳𑀺𑀁𑀲𑀢𑀺 𑀯𑀺𑀩𑀸𑀥𑀢𑀺, 𑀧𑀭𑀤𑀼𑀓𑁆𑀔𑀁 𑀯𑀸 𑀯𑀺𑀦𑀸𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀲𑀸𑀥𑀽𑀦𑀁 𑀓𑀫𑁆𑀧𑀦𑀁 𑀳𑀤𑀬𑀔𑁂𑀤𑀁 𑀓𑀭𑁄𑀢𑀻𑀢𑀺 𑀯𑀸 𑀓𑀭𑀼𑀡𑀸. 𑀅𑀣 𑀯𑀸 𑀓𑀫𑀺𑀢𑀺 𑀲𑀼𑀔𑀁, 𑀢𑀁 𑀭𑀼𑀦𑁆𑀥𑀢𑀻𑀢𑀺 𑀓𑀭𑀼𑀡𑀸. 𑀏𑀲𑀸 𑀳𑀺 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸𑀮𑀓𑁆𑀔𑀡𑀸 𑀅𑀢𑁆𑀢𑀲𑀼𑀔𑀦𑀺𑀭𑀧𑁂𑀓𑁆𑀔𑀢𑀸𑀬 𑀓𑀸𑀭𑀼𑀡𑀺𑀓𑀸𑀦𑀁 𑀲𑀼𑀔𑀁 𑀭𑀼𑀦𑁆𑀥𑀢𑀺 𑀯𑀺𑀩𑀦𑁆𑀥𑀢𑀻𑀢𑀺, 𑀲𑀩𑁆𑀩𑀢𑁆𑀣 𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑁂𑀦 𑀧𑀤𑀦𑀺𑀧𑁆𑀨𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀉𑀡𑁆𑀳𑀸𑀪𑀺𑀢𑀢𑁆𑀢𑁂𑀳𑀺 𑀲𑁂𑀯𑀻𑀬𑀢𑀻𑀢𑀺 𑀲𑀻𑀢𑀁, 𑀉𑀡𑁆𑀳𑀸𑀪𑀺𑀲𑀫𑀦𑀁. 𑀢𑀁 𑀮𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀲𑀻𑀢𑀮𑀁, ‘‘𑀘𑀺𑀢𑁆𑀢𑀁 𑀯𑀸 𑀢𑁂 𑀔𑀺𑀧𑀺𑀲𑁆𑀲𑀸𑀫𑀺, 𑀳𑀤𑀬𑀁 𑀯𑀸 𑀢𑁂 𑀨𑀸𑀮𑁂𑀲𑁆𑀲𑀸𑀫𑀻’’𑀢𑀺 (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑀆𑀴𑀯𑀓𑀲𑀼𑀢𑁆𑀢) 𑀏𑀢𑁆𑀣 𑀉𑀭𑁄 ‘‘𑀳𑀤𑀬’’𑀦𑁆𑀢𑀺 𑀯𑀼𑀢𑁆𑀢𑀁, ‘‘𑀯𑀓𑁆𑀓𑀁 𑀳𑀤𑀬’’𑀦𑁆𑀢𑀺 (𑀫. 𑀦𑀺. 𑁧.𑁧𑁧𑁦; 𑁨.𑁧𑁧𑁪; 𑁩.𑁧𑁫𑁪) 𑀏𑀢𑁆𑀣 𑀳𑀤𑀬𑀯𑀢𑁆𑀣𑀼, ‘‘𑀳𑀤𑀬𑀸 𑀳𑀤𑀬𑀁 𑀫𑀜𑁆𑀜𑁂 𑀅𑀜𑁆𑀜𑀸𑀬 𑀢𑀘𑁆𑀙𑀢𑀻’’𑀢𑀺 (𑀫. 𑀦𑀺. 𑁧.𑁬𑁩) 𑀏𑀢𑁆𑀣 𑀘𑀺𑀢𑁆𑀢𑀁, 𑀇𑀥𑀸𑀧𑀺 𑀘𑀺𑀢𑁆𑀢𑀫𑁂𑀯 𑀅𑀩𑁆𑀪𑀦𑁆𑀢𑀭𑀝𑁆𑀞𑁂𑀦 𑀳𑀤𑀬𑀁. 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀯𑀸 𑀳𑀭𑀢𑀻𑀢𑀺 𑀳𑀤𑀬𑀁, 𑀭-𑀓𑀸𑀭𑀲𑁆𑀲 𑀤-𑀓𑀸𑀭𑀁 𑀓𑀢𑁆𑀯𑀸𑀢𑀺 𑀦𑁂𑀭𑀼𑀢𑁆𑀢𑀺𑀓𑀸. 𑀓𑀭𑀼𑀡𑀸𑀬 𑀲𑀻𑀢𑀮𑀁 𑀳𑀤𑀬𑀫𑀲𑁆𑀲𑀸𑀢𑀺 𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑁄, 𑀢𑀁 𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑀁.

𑀓𑀸𑀫𑀜𑁆𑀘𑁂𑀢𑁆𑀣 𑀧𑀭𑁂𑀲𑀁 𑀳𑀺𑀢𑁄𑀧𑀲𑀁𑀳𑀸𑀭𑀲𑀼𑀔𑀸𑀤𑀺𑀅𑀧𑀭𑀺𑀳𑀸𑀦𑀺𑀚𑁆𑀛𑀸𑀦𑀲𑀪𑀸𑀯𑀢𑀸𑀬, 𑀩𑁆𑀬𑀸𑀧𑀸𑀤𑀸𑀤𑀻𑀦𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑀸𑀬 𑀘 𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑀲𑀦𑁆𑀢𑀸𑀧𑀯𑀺𑀘𑁆𑀙𑁂𑀤𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀫𑁂𑀢𑁆𑀢𑀸𑀫𑀼𑀤𑀺𑀢𑀸𑀦𑀫𑁆𑀧𑀺 𑀘𑀺𑀢𑁆𑀢𑀲𑀻𑀢𑀮𑀪𑀸𑀯𑀓𑀸𑀭𑀡𑀢𑀸 𑀉𑀧𑀮𑀩𑁆𑀪𑀢𑀺, 𑀢𑀣𑀸𑀧𑀺 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀧𑀭𑀽𑀧𑀢𑀸𑀧𑀸𑀲𑀳𑀦𑀭𑀲𑀸 𑀅𑀯𑀺𑀳𑀺𑀁𑀲𑀸𑀪𑀽𑀢𑀸 𑀓𑀭𑀼𑀡𑀸𑀯 𑀯𑀺𑀲𑁂𑀲𑁂𑀦 𑀪𑀕𑀯𑀢𑁄 𑀘𑀺𑀢𑁆𑀢𑀲𑁆𑀲 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺 𑀯𑀺𑀬 𑀲𑀻𑀢𑀺𑀪𑀸𑀯𑀦𑀺𑀫𑀺𑀢𑁆𑀢𑀦𑁆𑀢𑀺 𑀢𑀲𑁆𑀲𑀸𑀬𑁂𑀯 𑀘𑀺𑀢𑁆𑀢𑀲𑀻𑀢𑀮𑀪𑀸𑀯𑀓𑀸𑀭𑀡𑀢𑀸 𑀯𑀼𑀢𑁆𑀢𑀸. 𑀓𑀭𑀼𑀡𑀸𑀫𑀼𑀔𑁂𑀦 𑀯𑀸 𑀫𑁂𑀢𑁆𑀢𑀸𑀫𑀼𑀤𑀺𑀢𑀸𑀦𑀫𑁆𑀧𑀺 𑀳𑀤𑀬𑀲𑀻𑀢𑀮𑀪𑀸𑀯𑀓𑀸𑀭𑀡𑀢𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀲𑀩𑁆𑀩𑀢𑁆𑀣 𑀦𑀺𑀭𑀯𑀲𑁂𑀲𑀢𑁆𑀣𑁄 𑀉𑀧𑀤𑀺𑀲𑀻𑀬𑀢𑀺, 𑀧𑀥𑀸𑀦𑀲𑀳𑀘𑀭𑀡𑀸𑀯𑀺𑀦𑀸𑀪𑀸𑀯𑀸𑀤𑀺𑀦𑀬𑁂𑀳𑀺𑀧𑀺 𑀬𑀣𑀸𑀮𑀩𑁆𑀪𑀫𑀸𑀦𑀁 𑀕𑀬𑁆𑀳𑀫𑀸𑀦𑀢𑁆𑀢𑀸. 𑀅𑀧𑀺𑀘𑁂𑀢𑁆𑀣 𑀢𑀁𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑀲𑁆𑀲 𑀙𑀅𑀲𑀸𑀥𑀸𑀭𑀡𑀜𑀸𑀡𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀅𑀲𑀸𑀥𑀸𑀭𑀡𑀜𑀸𑀡𑀯𑀺𑀲𑁂𑀲𑀦𑀺𑀩𑀦𑁆𑀥𑀦𑀪𑀽𑀢𑀸 𑀲𑀸𑀢𑀺𑀲𑀬𑀁, 𑀦𑀺𑀭𑀯𑀲𑁂𑀲𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 ¶ 𑀯𑀺𑀬 𑀲𑀯𑀺𑀲𑀬𑀩𑁆𑀬𑀸𑀧𑀺𑀢𑀸𑀬 𑀫𑀳𑀸𑀓𑀭𑀼𑀡𑀸𑀪𑀸𑀯𑀫𑀼𑀧𑀕𑀢𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀲𑀸𑀢𑀺𑀲𑀬𑀪𑀸𑀯𑀧𑁆𑀧𑀢𑁆𑀢𑀸 𑀓𑀭𑀼𑀡𑀸𑀯 𑀳𑀤𑀬𑀲𑀻𑀢𑀮𑀢𑁆𑀢𑀳𑁂𑀢𑀼𑀪𑀸𑀯𑁂𑀦 𑀯𑀼𑀢𑁆𑀢𑀸. 𑀅𑀣 𑀯𑀸 𑀲𑀢𑀺𑀧𑀺 𑀫𑁂𑀢𑁆𑀢𑀸𑀫𑀼𑀤𑀺𑀢𑀸𑀦𑀁 𑀧𑀭𑁂𑀲𑀁 𑀳𑀺𑀢𑁄𑀧𑀲𑀁𑀳𑀸𑀭𑀲𑀼𑀔𑀸𑀤𑀺𑀅𑀧𑀭𑀺𑀳𑀸𑀦𑀺𑀚𑁆𑀛𑀸𑀦𑀲𑀪𑀸𑀯𑀢𑀸𑀬 𑀲𑀸𑀢𑀺𑀲𑀬𑁂 𑀳𑀤𑀬𑀲𑀻𑀢𑀮𑀪𑀸𑀯𑀦𑀺𑀩𑀦𑁆𑀥𑀦𑀢𑁆𑀢𑁂 𑀲𑀓𑀮𑀩𑀼𑀤𑁆𑀥𑀕𑀼𑀡𑀯𑀺𑀲𑁂𑀲𑀓𑀸𑀭𑀡𑀢𑀸𑀬 𑀢𑀸𑀲𑀫𑁆𑀧𑀺 𑀓𑀸𑀭𑀡𑀦𑁆𑀢𑀺 𑀓𑀭𑀼𑀡𑀸𑀬 𑀏𑀯 𑀳𑀤𑀬𑀲𑀻𑀢𑀮𑀪𑀸𑀯𑀓𑀸𑀭𑀡𑀢𑀸 𑀯𑀼𑀢𑁆𑀢𑀸. 𑀓𑀭𑀼𑀡𑀸𑀦𑀺𑀤𑀸𑀦𑀸 𑀳𑀺 𑀲𑀩𑁆𑀩𑁂𑀧𑀺 𑀩𑀼𑀤𑁆𑀥𑀕𑀼𑀡𑀸. 𑀓𑀭𑀼𑀡𑀸𑀦𑀼𑀪𑀸𑀯𑀦𑀺𑀩𑁆𑀩𑀸𑀧𑀺𑀬𑀫𑀸𑀦𑀲𑀁𑀲𑀸𑀭𑀤𑀼𑀓𑁆𑀔𑀲𑀦𑁆𑀢𑀸𑀧𑀲𑁆𑀲 𑀳𑀺 𑀪𑀕𑀯𑀢𑁄 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸𑀬 𑀅𑀦𑁂𑀓𑀸𑀦𑀺𑀧𑀺 𑀓𑀧𑁆𑀧𑀸𑀦𑀫𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀅𑀓𑀺𑀮𑀦𑁆𑀢𑀭𑀽𑀧𑀲𑁆𑀲𑁂𑀯 𑀦𑀺𑀭𑀯𑀲𑁂𑀲𑀩𑀼𑀤𑁆𑀥𑀓𑀭𑀥𑀫𑁆𑀫𑀲𑀫𑁆𑀪𑀭𑀡𑀦𑀺𑀭𑀢𑀲𑁆𑀲 𑀲𑀫𑀥𑀺𑀕𑀢𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑀲𑁆𑀲 𑀘 𑀲𑀦𑁆𑀦𑀺𑀳𑀺𑀢𑁂𑀲𑀼𑀧𑀺 𑀲𑀢𑁆𑀢𑀲𑀗𑁆𑀖𑀸𑀢𑀲𑀫𑀼𑀧𑀦𑀻𑀢𑀳𑀤𑀬𑀽𑀧𑀢𑀸𑀧𑀦𑀺𑀫𑀺𑀢𑁆𑀢𑁂𑀲𑀼 𑀦 𑀈𑀲𑀓𑀫𑁆𑀧𑀺 ¶ 𑀘𑀺𑀢𑁆𑀢𑀲𑀻𑀢𑀺𑀪𑀸𑀯𑀲𑁆𑀲 𑀅𑀜𑁆𑀜𑀣𑀢𑁆𑀢𑀫𑀳𑁄𑀲𑀻𑀢𑀺. 𑀢𑀻𑀲𑀼 𑀘𑁂𑀢𑁆𑀣 𑀯𑀺𑀓𑀧𑁆𑀧𑁂𑀲𑀼 𑀧𑀞𑀫𑁂 𑀯𑀺𑀓𑀧𑁆𑀧𑁂 𑀅𑀯𑀺𑀲𑁂𑀲𑀪𑀽𑀢𑀸 𑀩𑀼𑀤𑁆𑀥𑀪𑀽𑀫𑀺𑀕𑀢𑀸, 𑀤𑀼𑀢𑀺𑀬𑁂 𑀢𑀣𑁂𑀯 𑀫𑀳𑀸𑀓𑀭𑀼𑀡𑀸𑀪𑀸𑀯𑀽𑀧𑀕𑀢𑀸, 𑀢𑀢𑀺𑀬𑁂 𑀧𑀞𑀫𑀸𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀢𑀻𑀲𑀼𑀧𑀺 𑀅𑀯𑀢𑁆𑀣𑀸𑀲𑀼 𑀧𑀯𑀢𑁆𑀢𑀸 𑀪𑀕𑀯𑀢𑁄 𑀓𑀭𑀼𑀡𑀸 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸, 𑀬𑀣𑀸𑀲𑀪𑀸𑀯𑀁 𑀧𑀓𑀸𑀭𑁂𑀳𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀧𑁂𑀢𑀻𑀢𑀺 𑀯𑀸 𑀧𑀜𑁆𑀜𑀸, 𑀢𑀁 𑀢𑀤𑀢𑁆𑀣𑀁 𑀧𑀸𑀓𑀝𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀬𑁂𑀯 𑀜𑁂𑀬𑁆𑀬𑀸𑀯𑀭𑀡𑀧𑁆𑀧𑀳𑀸𑀦𑀢𑁄 𑀧𑀓𑀸𑀭𑁂𑀳𑀺 𑀥𑀫𑁆𑀫𑀲𑀪𑀸𑀯𑀚𑁄𑀢𑀦𑀝𑁆𑀞𑁂𑀦 𑀧𑀚𑁆𑀚𑁄𑀢𑁄𑀢𑀺 𑀧𑀜𑁆𑀜𑀸𑀧𑀚𑁆𑀚𑁄𑀢𑁄. 𑀧𑀜𑁆𑀜𑀯𑀢𑁄 𑀳𑀺 𑀏𑀓𑀧𑀮𑁆𑀮𑀗𑁆𑀓𑁂𑀦𑀧𑀺 𑀦𑀺𑀲𑀺𑀦𑁆𑀦𑀲𑁆𑀲 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀏𑀓𑀧𑀚𑁆𑀚𑁄𑀢𑀸 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀘𑀢𑁆𑀢𑀸𑀭𑁄𑀫𑁂 𑀪𑀺𑀓𑁆𑀔𑀯𑁂, 𑀧𑀚𑁆𑀚𑁄𑀢𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀘𑀦𑁆𑀤𑀧𑀚𑁆𑀚𑁄𑀢𑁄, 𑀲𑀽𑀭𑀺𑀬𑀧𑀚𑁆𑀚𑁄𑀢𑁄, 𑀅𑀕𑁆𑀕𑀺𑀧𑀚𑁆𑀚𑁄𑀢𑁄, 𑀧𑀜𑁆𑀜𑀸𑀧𑀚𑁆𑀚𑁄𑀢𑁄, 𑀇𑀫𑁂 𑀔𑁄 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀧𑀚𑁆𑀚𑁄𑀢𑀸. 𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂, 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀧𑀚𑁆𑀚𑁄𑀢𑀸𑀦𑀁 𑀬𑀤𑀺𑀤𑀁 𑀧𑀜𑁆𑀜𑀸𑀧𑀚𑁆𑀚𑁄𑀢𑁄’’𑀢𑀺 (𑀅. 𑀦𑀺. 𑁪.𑁧𑁪𑁫). 𑀢𑁂𑀦 𑀯𑀺𑀳𑀢𑁄 𑀯𑀺𑀲𑁂𑀲𑁂𑀦 𑀲𑀫𑀼𑀕𑁆𑀖𑀸𑀝𑀺𑀢𑁄𑀢𑀺 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑁄, 𑀯𑀺𑀲𑁂𑀲𑀢𑀸 𑀘𑁂𑀢𑁆𑀣 𑀉𑀧𑀭𑀺 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀫𑀼𑀬𑁆𑀳𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀫𑀼𑀬𑁆𑀳𑀢𑀺, 𑀫𑀼𑀬𑁆𑀳𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀫𑁄𑀳𑁄, 𑀅𑀯𑀺𑀚𑁆𑀚𑀸. 𑀲𑁆𑀯𑁂𑀯 𑀯𑀺𑀲𑀬𑀲𑀪𑀸𑀯𑀧𑀝𑀺𑀘𑁆𑀙𑀸𑀤𑀦𑀢𑁄 𑀅𑀦𑁆𑀥𑀓𑀸𑀭𑀲𑀭𑀺𑀓𑁆𑀔𑀢𑀸𑀬 𑀢𑀫𑁄 𑀯𑀺𑀬𑀸𑀢𑀺 𑀫𑁄𑀳𑀢𑀫𑁄. 𑀲𑀢𑀺𑀧𑀺 𑀢𑀫𑀲𑀤𑁆𑀤𑀲𑁆𑀲 𑀲𑀤𑀺𑀲𑀓𑀧𑁆𑀧𑀦𑀫𑀦𑁆𑀢𑀭𑁂𑀦 𑀅𑀯𑀺𑀚𑁆𑀚𑀸𑀯𑀸𑀘𑀓𑀢𑁆𑀢𑁂 𑀫𑁄𑀳𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂𑀦 𑀢𑀩𑁆𑀩𑀺𑀲𑁂𑀲𑀓𑀢𑀸𑀯𑁂𑀢𑁆𑀣 𑀬𑀼𑀢𑁆𑀢𑀸𑀢𑀺 𑀲𑀤𑀺𑀲𑀓𑀧𑁆𑀧𑀦𑀸. 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑁄 𑀫𑁄𑀳𑀢𑀫𑁄 ¶ 𑀬𑀲𑁆𑀲𑀸𑀢𑀺 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫𑁄, 𑀢𑀁 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫𑀁.

𑀦𑀦𑀼 𑀘 𑀲𑀩𑁆𑀩𑁂𑀲𑀫𑁆𑀧𑀺 𑀔𑀻𑀡𑀸𑀲𑀯𑀸𑀦𑀁 𑀧𑀜𑁆𑀜𑀸𑀧𑀚𑁆𑀚𑁄𑀢𑁂𑀦 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀳𑀢𑀢𑀸 𑀲𑀫𑁆𑀪𑀯𑀢𑀺, 𑀅𑀣 𑀓𑀲𑁆𑀫𑀸 𑀅𑀜𑁆𑀜𑀲𑀸𑀥𑀸𑀭𑀡𑀸𑀯𑀺𑀲𑁂𑀲𑀕𑀼𑀡𑁂𑀦 𑀪𑀕𑀯𑀢𑁄 𑀣𑁄𑀫𑀦𑀸 𑀯𑀼𑀢𑁆𑀢𑀸𑀢𑀺? 𑀲𑀯𑀸𑀲𑀦𑀧𑁆𑀧𑀳𑀸𑀦𑁂𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑀯𑀺𑀲𑁂𑀲𑀢𑀸𑀲𑀫𑁆𑀪𑀯𑀢𑁄. 𑀲𑀩𑁆𑀩𑁂𑀲𑀫𑁆𑀧𑀺 𑀳𑀺 𑀔𑀻𑀡𑀸𑀲𑀯𑀸𑀦𑀁 𑀧𑀜𑁆𑀜𑀸𑀧𑀚𑁆𑀚𑁄𑀢𑀳𑀢𑀸𑀯𑀺𑀚𑁆𑀚𑀦𑁆𑀥𑀓𑀸𑀭𑀢𑁆𑀢𑁂𑀧𑀺 𑀲𑀢𑀺 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁂𑀳𑀺 𑀯𑀺𑀬 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸𑀦𑀁 𑀲𑀸𑀯𑀓𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀲𑀯𑀸𑀲𑀦𑀧𑁆𑀧𑀳𑀸𑀦𑁂𑀦 𑀓𑀺𑀮𑁂𑀲𑀧𑁆𑀧𑀳𑀸𑀦𑀲𑁆𑀲 𑀯𑀺𑀲𑁂𑀲𑁄 𑀯𑀺𑀚𑁆𑀚𑀢𑁂𑀯𑀸𑀢𑀺. 𑀅𑀣 𑀯𑀸 𑀧𑀭𑁄𑀧𑀤𑁂𑀲𑀫𑀦𑁆𑀢𑀭𑁂𑀦 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀅𑀘𑁆𑀘𑀦𑁆𑀢𑀁 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀯𑀺𑀕𑀫𑀲𑁆𑀲 𑀦𑀺𑀧𑁆𑀨𑀸𑀤𑀺𑀢𑀢𑁆𑀢𑀸 (𑀦𑀺𑀩𑁆𑀩𑀢𑁆𑀢𑀺𑀢𑀢𑁆𑀢𑀸 𑀫. 𑀦𑀺. 𑀝𑀻. 𑁧.𑁧), 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀸𑀬 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯𑀲𑁆𑀲 𑀲𑀫𑀥𑀺𑀕𑀢𑀢𑁆𑀢𑀸, 𑀧𑀭𑀲𑀦𑁆𑀢𑀢𑀺𑀬𑀜𑁆𑀘 𑀥𑀫𑁆𑀫𑀤𑁂𑀲𑀦𑀸𑀢𑀺𑀲𑀬𑀸𑀦𑀼𑀪𑀸𑀯𑁂𑀦 𑀲𑀫𑁆𑀫𑀤𑁂𑀯 𑀢𑀲𑁆𑀲 𑀧𑀯𑀢𑁆𑀢𑀺𑀢𑀢𑁆𑀢𑀸, 𑀪𑀕𑀯𑀸𑀬𑁂𑀯 𑀯𑀺𑀲𑁂𑀲𑀢𑁄 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫𑀪𑀸𑀯𑁂𑀦 𑀣𑁄𑀫𑁂𑀢𑀩𑁆𑀩𑁄𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑀯𑀺𑀓𑀧𑁆𑀧𑁂 𑀧𑀜𑁆𑀜𑀸𑀧𑀚𑁆𑀚𑁄𑀢𑀧𑀤𑁂𑀦 𑀲𑀲𑀦𑁆𑀢𑀸𑀦𑀕𑀢𑀫𑁄𑀳𑀯𑀺𑀥𑀫𑀦𑀸 𑀧𑀝𑀺𑀯𑁂𑀥𑀧𑀜𑁆𑀜𑀸 𑀘𑁂𑀯 𑀧𑀭𑀲𑀦𑁆𑀢𑀸𑀦𑀕𑀢𑀫𑁄𑀳𑀯𑀺𑀥𑀫𑀦𑀸 𑀤𑁂𑀲𑀦𑀸𑀧𑀜𑁆𑀜𑀸 𑀘 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, 𑀏𑀓𑀲𑁂𑀲𑀦𑀬𑁂𑀦 𑀯𑀸 𑀲𑀗𑁆𑀕𑀳𑀺𑀢𑀸. 𑀦 𑀢𑀼 𑀧𑀼𑀭𑀺𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀯𑀺𑀬 𑀧𑀝𑀺𑀯𑁂𑀥𑀧𑀜𑁆𑀜𑀸𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀭𑁄 ¶ 𑀦𑀬𑁄 𑁋 𑀪𑀕𑀯𑀢𑁄 𑀜𑀸𑀡𑀲𑁆𑀲 𑀜𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀢𑁆𑀢𑀸 𑀲𑀓𑀮𑀜𑁂𑀬𑁆𑀬𑀥𑀫𑁆𑀫𑀲𑀪𑀸𑀯𑀸𑀯𑀩𑁄𑀥𑀦𑀲𑀫𑀢𑁆𑀣𑁂𑀦 𑀅𑀦𑀸𑀯𑀭𑀡𑀜𑀸𑀡𑀲𑀗𑁆𑀔𑀸𑀢𑁂𑀦 𑀧𑀜𑁆𑀜𑀸𑀧𑀚𑁆𑀚𑁄𑀢𑁂𑀦 𑀲𑀓𑀮𑀜𑁂𑀬𑁆𑀬𑀥𑀫𑁆𑀫𑀲𑀪𑀸𑀯𑀘𑁆𑀙𑀸𑀤𑀓𑀫𑁄𑀳𑀢𑀫𑀲𑁆𑀲 𑀯𑀺𑀳𑀢𑀢𑁆𑀢𑀸 𑀅𑀦𑀸𑀯𑀭𑀡𑀜𑀸𑀡𑀪𑀽𑀢𑁂𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫𑀪𑀸𑀯𑁂𑀦 𑀪𑀕𑀯𑀢𑁄 𑀣𑁄𑀫𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀲𑁆𑀫𑀺𑀁 𑀧𑀦 𑀅𑀢𑁆𑀣𑀯𑀺𑀓𑀧𑁆𑀧𑁂 𑀫𑁄𑀳𑀢𑀫𑀯𑀺𑀥𑀫𑀦𑀦𑁆𑀢𑁂 𑀅𑀥𑀺𑀕𑀢𑀢𑁆𑀢𑀸 𑀅𑀦𑀸𑀯𑀭𑀡𑀜𑀸𑀡𑀁 𑀓𑀸𑀭𑀡𑀽𑀧𑀘𑀸𑀭𑁂𑀦 𑀲𑀓𑀲𑀦𑁆𑀢𑀸𑀦𑁂 𑀫𑁄𑀳𑀢𑀫𑀯𑀺𑀥𑀫𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀲𑀯𑀸𑀲𑀦𑀧𑁆𑀧𑀳𑀸𑀦𑀫𑁂𑀯 𑀳𑀺 𑀓𑀺𑀮𑁂𑀲𑀸𑀦𑀁 𑀜𑁂𑀬𑁆𑀬𑀸𑀯𑀭𑀡𑀧𑁆𑀧𑀳𑀸𑀦𑀦𑁆𑀢𑀺, 𑀧𑀭𑀲𑀦𑁆𑀢𑀸𑀦𑁂 𑀧𑀦 𑀫𑁄𑀳𑀢𑀫𑀯𑀺𑀥𑀫𑀦𑀲𑁆𑀲 𑀓𑀸𑀭𑀡𑀪𑀸𑀯𑀢𑁄 𑀨𑀮𑀽𑀧𑀘𑀸𑀭𑁂𑀦 𑀅𑀦𑀸𑀯𑀭𑀡𑀜𑀸𑀡𑀫𑁂𑀯 𑀫𑁄𑀳𑀢𑀫𑀯𑀺𑀥𑀫𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀸𑀯𑀭𑀡𑀜𑀸𑀡𑀦𑁆𑀢𑀺 𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯, 𑀬𑁂𑀦 𑀥𑀫𑁆𑀫𑀤𑁂𑀲𑀦𑀸𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺 𑀓𑀭𑁄𑀢𑀺. 𑀢𑀤𑀺𑀤𑀜𑁆𑀳𑀺 𑀜𑀸𑀡𑀤𑁆𑀯𑀬𑀁 𑀅𑀢𑁆𑀣𑀢𑁄 𑀏𑀓𑀫𑁂𑀯. 𑀅𑀦𑀯𑀲𑁂𑀲𑀲𑀗𑁆𑀔𑀢𑀸𑀲𑀗𑁆𑀔𑀢𑀲𑀫𑁆𑀫𑀼𑀢𑀺𑀥𑀫𑁆𑀫𑀸𑀭𑀫𑁆𑀫𑀡𑀢𑀸𑀬 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 ¶ 𑀢𑀢𑁆𑀣𑀸𑀯𑀭𑀡𑀸𑀪𑀸𑀯𑀢𑁄 𑀦𑀺𑀲𑁆𑀲𑀗𑁆𑀕𑀘𑀸𑀭𑀫𑀼𑀧𑀸𑀤𑀸𑀬 𑀅𑀦𑀸𑀯𑀭𑀡𑀜𑀸𑀡𑀦𑁆𑀢𑀺, 𑀯𑀺𑀲𑀬𑀧𑁆𑀧𑀯𑀢𑁆𑀢𑀺𑀫𑀼𑀔𑁂𑀦 𑀧𑀦 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀙𑀴𑀸𑀲𑀸𑀥𑀸𑀭𑀡𑀜𑀸𑀡𑀪𑁂𑀤𑁂 𑀯𑀼𑀢𑁆𑀢𑀁.

𑀓𑀺𑀁 𑀧𑀦𑁂𑀢𑁆𑀣 𑀓𑀸𑀭𑀡𑀁 𑀅𑀯𑀺𑀚𑁆𑀚𑀸𑀲𑀫𑀼𑀕𑁆𑀖𑀸𑀢𑁄𑀬𑁂𑀯𑁂𑀓𑁄 𑀧𑀳𑀸𑀦𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀪𑀕𑀯𑀢𑁄 𑀣𑁄𑀫𑀦𑀸𑀬 𑀕𑀬𑁆𑀳𑀢𑀺, 𑀦 𑀧𑀦 𑀲𑀸𑀢𑀺𑀲𑀬𑀁 𑀦𑀺𑀭𑀯𑀲𑁂𑀲𑀓𑀺𑀮𑁂𑀲𑀧𑁆𑀧𑀳𑀸𑀦𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀢𑀧𑁆𑀧𑀳𑀸𑀦𑀯𑀘𑀦𑁂𑀦𑁂𑀯 𑀳𑀺 𑀢𑀤𑁂𑀓𑀝𑁆𑀞𑀢𑀸𑀬 𑀲𑀓𑀮𑀲𑀁𑀓𑀺𑀮𑁂𑀲𑀲𑀫𑀼𑀕𑁆𑀖𑀸𑀢𑀲𑁆𑀲 𑀚𑁄𑀢𑀺𑀢𑀪𑀸𑀯𑀢𑁄 𑀦𑀺𑀭𑀯𑀲𑁂𑀲𑀓𑀺𑀮𑁂𑀲𑀧𑁆𑀧𑀳𑀸𑀦𑀫𑁂𑀢𑁆𑀣 𑀕𑀬𑁆𑀳𑀢𑀺. 𑀦 𑀳𑀺 𑀲𑁄 𑀲𑀁𑀓𑀺𑀮𑁂𑀲𑁄 𑀅𑀢𑁆𑀣𑀺, 𑀬𑁄 𑀦𑀺𑀭𑀯𑀲𑁂𑀲𑀸𑀯𑀺𑀚𑁆𑀚𑀸𑀲𑀫𑀼𑀕𑁆𑀖𑀸𑀢𑀦𑁂𑀦 𑀦 𑀧𑀳𑀻𑀬𑀢𑀻𑀢𑀺. 𑀅𑀣 𑀯𑀸 𑀲𑀓𑀮𑀓𑀼𑀲𑀮𑀥𑀫𑁆𑀫𑀼𑀧𑁆𑀧𑀢𑁆𑀢𑀺𑀬𑀸, 𑀲𑀁𑀲𑀸𑀭𑀦𑀺𑀯𑀢𑁆𑀢𑀺𑀬𑀸 𑀘 𑀯𑀺𑀚𑁆𑀚𑀸 𑀯𑀺𑀬 𑀦𑀺𑀭𑀯𑀲𑁂𑀲𑀸𑀓𑀼𑀲𑀮𑀥𑀫𑁆𑀫𑀼𑀧𑁆𑀧𑀢𑁆𑀢𑀺𑀬𑀸, 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀘 𑀅𑀯𑀺𑀚𑁆𑀚𑀸𑀬𑁂𑀯 𑀧𑀥𑀸𑀦𑀓𑀸𑀭𑀡𑀦𑁆𑀢𑀺 𑀢𑀩𑁆𑀩𑀺𑀖𑀸𑀢𑀯𑀘𑀦𑁂𑀦𑁂𑀯 𑀲𑀓𑀮𑀲𑀁𑀓𑀺𑀮𑁂𑀲𑀲𑀫𑀼𑀕𑁆𑀖𑀸𑀢𑀯𑀘𑀦𑀲𑀺𑀤𑁆𑀥𑀺𑀢𑁄 𑀲𑁄𑀬𑁂𑀯𑁂𑀓𑁄 𑀕𑀬𑁆𑀳𑀢𑀻𑀢𑀺. 𑀅𑀣 𑀯𑀸 𑀲𑀓𑀮𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀫𑀼𑀤𑁆𑀥𑀪𑀽𑀢𑀢𑁆𑀢𑀸 𑀅𑀯𑀺𑀚𑁆𑀚𑀸𑀬 𑀢𑀁 𑀲𑀫𑀼𑀕𑁆𑀖𑀸𑀢𑁄𑀬𑁂𑀯𑁂𑀓𑁄 𑀕𑀬𑁆𑀳𑀢𑀺. 𑀬𑀣𑀸𑀳 𑁋

‘‘𑀅𑀯𑀺𑀚𑁆𑀚𑀸 𑀫𑀼𑀤𑁆𑀥𑀸𑀢𑀺 𑀚𑀸𑀦𑀸𑀳𑀺, 𑀯𑀺𑀚𑁆𑀚𑀸 𑀫𑀼𑀤𑁆𑀥𑀸𑀥𑀺𑀧𑀸𑀢𑀺𑀦𑀻;

𑀲𑀤𑁆𑀥𑀸𑀲𑀢𑀺𑀲𑀫𑀸𑀥𑀻𑀳𑀺, 𑀙𑀦𑁆𑀤𑀯𑀻𑀭𑀺𑀬𑁂𑀦 𑀲𑀁𑀬𑀼𑀢𑀸’’𑀢𑀺. (𑀲𑀼. 𑀦𑀺. 𑁧𑁦𑁩𑁨; 𑀘𑀽𑀴. 𑀦𑀺. 𑁫𑁧);

𑀲𑀦𑀭𑀸𑀫𑀭𑀮𑁄𑀓𑀕𑀭𑀼𑀦𑁆𑀢𑀺 𑀏𑀢𑁆𑀣 𑀧𑀦 𑀧𑀞𑀫𑀧𑀓𑀢𑀺𑀬𑀸 𑀅𑀯𑀺𑀪𑀸𑀕𑁂𑀦 𑀲𑀢𑁆𑀢𑁄𑀧𑀺 𑀦𑀭𑁄𑀢𑀺 𑀯𑀼𑀘𑁆𑀘𑀢𑀺, 𑀇𑀥 𑀧𑀦 𑀤𑀼𑀢𑀺𑀬𑀧𑀓𑀢𑀺𑀬𑀸 𑀫𑀦𑀼𑀚𑀧𑀼𑀭𑀺𑀲𑁄𑀬𑁂𑀯, 𑀇𑀢𑀭𑀣𑀸 𑀮𑁄𑀓𑀲𑀤𑁆𑀤𑀲𑁆𑀲 𑀅𑀯𑀢𑁆𑀢𑀩𑁆𑀩𑀢𑀸 𑀲𑀺𑀬𑀸. ‘‘𑀬𑀣𑀸 𑀳𑀺 𑀧𑀞𑀫𑀧𑀓𑀢𑀺𑀪𑀽𑀢𑁄 𑀲𑀢𑁆𑀢𑁄 𑀇𑀢𑀭𑀸𑀬 𑀧𑀓𑀢𑀺𑀬𑀸 𑀲𑁂𑀝𑁆𑀞𑀝𑁆𑀞𑁂𑀦 𑀧𑀼𑀭𑁂 𑀉𑀘𑁆𑀘𑀝𑁆𑀞𑀸𑀦𑁂 𑀲𑁂𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀼𑀭𑀺𑀲𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀚𑁂𑀝𑁆𑀞𑀪𑀸𑀯𑀁 𑀦𑁂𑀢𑀻𑀢𑀺 𑀦𑀭𑁄𑀢𑀺. 𑀧𑀼𑀢𑁆𑀢𑀪𑀸𑀢𑀼𑀪𑀽𑀢𑁄𑀧𑀺 𑀳𑀺 𑀧𑀼𑀕𑁆𑀕𑀮𑁄 𑀫𑀸𑀢𑀼𑀚𑁂𑀝𑁆𑀞𑀪𑀕𑀺𑀦𑀻𑀦𑀁 𑀧𑀺𑀢𑀼𑀝𑁆𑀞𑀸𑀦𑁂 ¶ 𑀢𑀺𑀝𑁆𑀞𑀢𑀺, 𑀧𑀕𑁂𑀯 𑀪𑀢𑁆𑀢𑀼𑀪𑀽𑀢𑁄 𑀇𑀢𑀭𑀸𑀲’’𑀦𑁆𑀢𑀺 (𑀯𑀺. 𑀅𑀝𑁆𑀞. 𑁪𑁩-𑁪𑁬) 𑀦𑀸𑀯𑀸𑀯𑀺𑀫𑀸𑀦𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀁. 𑀏𑀓𑀲𑁂𑀲𑀧𑁆𑀧𑀓𑀧𑁆𑀧𑀦𑁂𑀦 𑀧𑀼𑀣𑀼𑀯𑀘𑀦𑀦𑁆𑀢𑀯𑀺𑀕𑁆𑀕𑀳𑁂𑀦 𑀯𑀸 𑀦𑀭𑀸, 𑀫𑀭𑀡𑀁 𑀫𑀭𑁄, 𑀲𑁄 𑀦𑀢𑁆𑀣𑀺 𑀬𑁂𑀲𑀦𑁆𑀢𑀺 𑀅𑀫𑀭𑀸, 𑀲𑀳 𑀦𑀭𑁂𑀳𑀺, 𑀅𑀫𑀭𑁂𑀳𑀺 𑀘𑀸𑀢𑀺 𑀲𑀦𑀭𑀸𑀫𑀭𑁄.𑀕𑀭𑀢𑀺 𑀉𑀕𑁆𑀕𑀘𑁆𑀙𑀢𑀺 𑀉𑀕𑁆𑀕𑀢𑁄 𑀧𑀸𑀓𑀝𑁄 𑀪𑀯𑀢𑀻𑀢𑀺 𑀕𑀭𑀼, 𑀕𑀭𑀲𑀤𑁆𑀤𑁄 𑀳𑀺 𑀉𑀕𑁆𑀕𑀫𑁂. 𑀅𑀧𑀺𑀘 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀪𑀸𑀭𑀺𑀬𑀝𑁆𑀞𑁂𑀦 ‘‘𑀕𑀭𑀽’’𑀢𑀺 𑀯𑀼𑀘𑁆𑀘𑀢𑀺.

𑀫𑀸𑀢𑀸𑀧𑀺𑀢𑀸𑀘𑀭𑀺𑀬𑁂𑀲𑀼 ¶ , 𑀤𑀼𑀚𑁆𑀚𑀭𑁂 𑀅𑀮𑀳𑀼𑀫𑁆𑀳𑀺 𑀘;

𑀫𑀳𑀦𑁆𑀢𑁂 𑀘𑀼𑀕𑁆𑀕𑀢𑁂 𑀘𑁂𑀯, 𑀦𑀺𑀙𑁂𑀓𑀸𑀤𑀺𑀓𑀭𑁂𑀲𑀼 𑀘;

𑀢𑀣𑀸 𑀯𑀡𑁆𑀡𑀯𑀺𑀲𑁂𑀲𑁂𑀲𑀼, 𑀕𑀭𑀼𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑀇𑀥 𑀧𑀦 𑀲𑀩𑁆𑀩𑀮𑁄𑀓𑀸𑀘𑀭𑀺𑀬𑁂 𑀢𑀣𑀸𑀕𑀢𑁂. 𑀓𑁂𑀘𑀺 𑀧𑀦 ‘‘𑀕𑀭𑀼, 𑀕𑀼𑀭𑀽𑀢𑀺 𑀘 𑀤𑁆𑀯𑀺𑀥𑀸 𑀕𑀳𑁂𑀢𑁆𑀯𑀸 𑀪𑀸𑀭𑀺𑀬𑀯𑀸𑀘𑀓𑀢𑁆𑀢𑁂 𑀕𑀭𑀼𑀲𑀤𑁆𑀤𑁄, 𑀆𑀘𑀭𑀺𑀬𑀯𑀸𑀘𑀓𑀢𑁆𑀢𑁂 𑀢𑀼 𑀕𑀼𑀭𑀼𑀲𑀤𑁆𑀤𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀧𑀸𑀴𑀺𑀯𑀺𑀲𑀬𑁂 𑀳𑀺 𑀲𑀩𑁆𑀩𑁂𑀲𑀫𑁆𑀧𑀺 𑀬𑀣𑀸𑀯𑀼𑀢𑁆𑀢𑀸𑀦𑀫𑀢𑁆𑀣𑀸𑀦𑀁 𑀯𑀸𑀘𑀓𑀢𑁆𑀢𑁂 𑀕𑀭𑀼𑀲𑀤𑁆𑀤𑁄𑀬𑁂𑀯𑀺𑀘𑁆𑀙𑀺𑀢𑀩𑁆𑀩𑁄 𑀅𑀓𑀸𑀭𑀲𑁆𑀲 𑀆𑀓𑀸𑀭𑀪𑀸𑀯𑁂𑀦 ‘‘𑀕𑀸𑀭𑀯’’𑀦𑁆𑀢𑀺 𑀢𑀤𑁆𑀥𑀺𑀢𑀦𑁆𑀢𑀧𑀤𑀲𑁆𑀲 𑀲𑀯𑀼𑀤𑁆𑀥𑀺𑀓𑀲𑁆𑀲 𑀤𑀲𑁆𑀲𑀦𑀢𑁄. 𑀲𑀓𑁆𑀓𑀢𑀪𑀸𑀲𑀸𑀯𑀺𑀲𑀬𑁂 𑀧𑀦 𑀕𑀼𑀭𑀼𑀲𑀤𑁆𑀤𑁄𑀬𑁂𑀯𑀺𑀘𑁆𑀙𑀺𑀢𑀩𑁆𑀩𑁄 𑀉𑀓𑀸𑀭𑀲𑁆𑀲 𑀯𑀼𑀤𑁆𑀥𑀺𑀪𑀸𑀯𑁂𑀦 𑀅𑀜𑁆𑀜𑀣𑀸 𑀢𑀤𑁆𑀥𑀺𑀢𑀦𑁆𑀢𑀧𑀤𑀲𑁆𑀲 𑀤𑀲𑁆𑀲𑀦𑀢𑁄𑀢𑀺. 𑀲𑀦𑀭𑀸𑀫𑀭𑁄 𑀘 𑀲𑁄 𑀮𑁄𑀓𑁄 𑀘𑀸𑀢𑀺 𑀲𑀦𑀭𑀸𑀫𑀭𑀮𑁄𑀓𑁄, 𑀢𑀲𑁆𑀲 𑀕𑀭𑀽𑀢𑀺 𑀢𑀣𑀸, 𑀢𑀁 𑀲𑀦𑀭𑀸𑀫𑀭𑀮𑁄𑀓𑀕𑀭𑀼𑀁. ‘‘𑀲𑀦𑀭𑀫𑀭𑀽𑀮𑁄𑀓𑀕𑀭𑀼’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀢𑀤𑀧𑀺 𑀅𑀭𑀺𑀬𑀸𑀕𑀸𑀣𑀢𑁆𑀢𑀸 𑀯𑀼𑀢𑁆𑀢𑀺𑀮𑀓𑁆𑀔𑀡𑀢𑁄, 𑀅𑀢𑁆𑀣𑀢𑁄 𑀘 𑀬𑀼𑀢𑁆𑀢𑀫𑁂𑀯. 𑀅𑀢𑁆𑀣𑀢𑁄 𑀳𑀺 𑀤𑀻𑀖𑀸𑀬𑀼𑀓𑀸𑀧𑀺 𑀲𑀫𑀸𑀦𑀸 𑀬𑀣𑀸𑀧𑀭𑀺𑀘𑁆𑀙𑁂𑀤𑀁 𑀫𑀭𑀡𑀲𑀪𑀸𑀯𑀢𑁆𑀢𑀸 𑀫𑀭𑀽𑀢𑀺 𑀤𑁂𑀯𑀸 𑀯𑀼𑀘𑁆𑀘𑀦𑁆𑀢𑀺. 𑀏𑀢𑁂𑀦 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀯𑀺𑀬 𑀢𑀤𑀯𑀲𑀺𑀝𑁆𑀞𑀲𑀢𑁆𑀢𑀸𑀦𑀫𑁆𑀧𑀺 𑀬𑀣𑀸𑀭𑀳𑀁 𑀕𑀼𑀡𑀯𑀺𑀲𑁂𑀲𑀸𑀯𑀳𑀢𑀸𑀬 𑀪𑀕𑀯𑀢𑁄 𑀉𑀧𑀓𑀸𑀭𑀓𑀢𑀁 𑀤𑀲𑁆𑀲𑁂𑀢𑀺. 𑀦𑀦𑀼 𑀘𑁂𑀢𑁆𑀣 𑀤𑁂𑀯𑀫𑀦𑀼𑀲𑁆𑀲𑀸 𑀧𑀥𑀸𑀦𑀪𑀽𑀢𑀸, 𑀅𑀣 𑀓𑀲𑁆𑀫𑀸 𑀢𑁂𑀲𑀁 𑀅𑀧𑁆𑀧𑀥𑀸𑀦𑀢𑀸 𑀦𑀺𑀤𑁆𑀤𑀺𑀲𑀻𑀬𑀢𑀻𑀢𑀺? 𑀅𑀢𑁆𑀣𑀢𑁄 𑀧𑀥𑀸𑀦𑀢𑀸𑀬 𑀕𑀳𑁂𑀢𑀩𑁆𑀩𑀢𑁆𑀢𑀸. 𑀅𑀜𑁆𑀜𑁄 𑀳𑀺 𑀲𑀤𑁆𑀤𑀓𑁆𑀓𑀫𑁄, 𑀅𑀜𑁆𑀜𑁄 𑀅𑀢𑁆𑀣𑀓𑁆𑀓𑀫𑁄𑀢𑀺 𑀲𑀤𑁆𑀤𑀓𑁆𑀓𑀫𑀸𑀦𑀼𑀲𑀸𑀭𑁂𑀦 𑀧𑀥𑀸𑀦𑀸𑀧𑀥𑀸𑀦𑀪𑀸𑀯𑁄 𑀦 𑀘𑁄𑀤𑁂𑀢𑀩𑁆𑀩𑁄. 𑀏𑀤𑀺𑀲𑁂𑀲𑀼 𑀳𑀺 𑀲𑀫𑀸𑀲𑀧𑀤𑁂𑀲𑀼 𑀧𑀥𑀸𑀦𑀫𑁆𑀧𑀺 𑀅𑀧𑁆𑀧𑀥𑀸𑀦𑀁 𑀯𑀺𑀬 𑀦𑀺𑀤𑁆𑀤𑀺𑀲𑀻𑀬𑀢𑀺 𑀬𑀣𑀸 𑀢𑀁 ‘‘𑀲𑀭𑀸𑀚𑀺𑀓𑀸𑀬 𑀧𑀭𑀺𑀲𑀸𑀬𑀸’’𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀢𑁆𑀣 𑀅𑀢𑁆𑀣𑀢𑁄𑀯 𑀅𑀥𑀺𑀧𑁆𑀧𑀸𑀬𑁄 𑀕𑀯𑁂𑀲𑀺𑀢𑀩𑁆𑀩𑁄, 𑀦 𑀩𑁆𑀬𑀜𑁆𑀚𑀦𑀫𑀢𑁆𑀢𑁂𑀦. 𑀬𑀣𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀅𑀢𑁆𑀣𑀜𑁆𑀳𑀺 𑀦𑀸𑀣𑁄 𑀲𑀭𑀡𑀁 𑀅𑀯𑁄𑀘,

𑀦 𑀩𑁆𑀬𑀜𑁆𑀚𑀦𑀁 𑀮𑁄𑀓𑀳𑀺𑀢𑁄 𑀫𑀳𑁂𑀲𑀺.

𑀢𑀲𑁆𑀫𑀸 𑀅𑀓𑀢𑁆𑀯𑀸 𑀭𑀢𑀺𑀫𑀓𑁆𑀔𑀭𑁂𑀲𑀼,

𑀅𑀢𑁆𑀣𑁂 𑀦𑀺𑀯𑁂𑀲𑁂𑀬𑁆𑀬 𑀫𑀢𑀺𑀁 𑀫𑀢𑀺𑀫𑀸’’𑀢𑀺. (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀸𑀭𑀸𑀚𑀺𑀓𑀓𑀡𑁆𑀟𑀯𑀡𑁆𑀡𑀦𑀸);

𑀓𑀸𑀫𑀜𑁆𑀘𑁂𑀢𑁆𑀣 ¶ 𑀲𑀢𑁆𑀢𑀲𑀗𑁆𑀔𑀸𑀭𑀪𑀸𑀚𑀦𑀯𑀲𑁂𑀦 𑀢𑀺𑀯𑀺𑀥𑁄 𑀮𑁄𑀓𑁄, 𑀕𑀭𑀼𑀪𑀸𑀯𑀲𑁆𑀲 𑀧𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀕𑀭𑀼𑀓𑀭𑀡𑀲𑀫𑀢𑁆𑀣𑀲𑁆𑀲𑁂𑀯 𑀬𑀼𑀚𑁆𑀚𑀦𑀢𑁄 𑀲𑀢𑁆𑀢𑀮𑁄𑀓𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀲𑁄 𑀳𑀺 𑀮𑁄𑀓𑀻𑀬𑀦𑁆𑀢𑀺 𑀏𑀢𑁆𑀣 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑀺 ¶ , 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺 𑀮𑁄𑀓𑁄, 𑀤𑀲𑁆𑀲𑀦𑀢𑁆𑀣𑁂 𑀘 𑀮𑁄𑀓𑀲𑀤𑁆𑀤𑀫𑀺𑀘𑁆𑀙𑀦𑁆𑀢𑀺 𑀲𑀤𑁆𑀤𑀯𑀺𑀤𑀽. 𑀅𑀫𑀭𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀉𑀧𑀧𑀢𑁆𑀢𑀺𑀤𑁂𑀯𑀸 𑀅𑀥𑀺𑀧𑁆𑀧𑁂𑀢𑀸. 𑀅𑀧𑀭𑁄 𑀦𑀬𑁄 𑁋 𑀲𑀫𑀽𑀳𑀢𑁆𑀣𑁄 𑀏𑀢𑁆𑀣 𑀮𑁄𑀓𑀲𑀤𑁆𑀤𑁄 𑀲𑀫𑀼𑀤𑀸𑀬𑀯𑀲𑁂𑀦 𑀮𑁄𑀓𑀻𑀬𑀢𑀺 𑀧𑀜𑁆𑀜𑀸𑀧𑀻𑀬𑀢𑀻𑀢𑀺 𑀓𑀢𑁆𑀯𑀸. 𑀲𑀳 𑀦𑀭𑁂𑀳𑀻𑀢𑀺 𑀲𑀦𑀭𑀸, 𑀢𑁂𑀬𑁂𑀯 𑀅𑀫𑀭𑀸𑀢𑀺 𑀲𑀦𑀭𑀸𑀫𑀭𑀸, 𑀢𑁂𑀲𑀁 𑀮𑁄𑀓𑁄 𑀢𑀣𑀸, 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀅𑀫𑀭𑀲𑀤𑁆𑀤𑁂𑀦 𑀘𑁂𑀢𑁆𑀣 𑀉𑀧𑀧𑀢𑁆𑀢𑀺𑀤𑁂𑀯𑀸 𑀯𑀺𑀬 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀧𑀺 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀢𑁂𑀧𑀺 𑀳𑀺 𑀧𑀭𑀫𑀢𑁆𑀣𑀢𑁄 𑀫𑀭𑀡𑀸𑀪𑀸𑀯𑀢𑁄 𑀅𑀫𑀭𑀸. 𑀇𑀫𑀲𑁆𑀫𑀺𑀁 𑀧𑀦 𑀅𑀢𑁆𑀣𑀯𑀺𑀓𑀧𑁆𑀧𑁂 𑀦𑀭𑀸𑀫𑀭𑀸𑀦𑀫𑁂𑀯 𑀕𑀳𑀡𑀁 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑀯𑀲𑁂𑀦 𑀬𑀣𑀸 ‘‘𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 (𑀤𑀻. 𑀦𑀺. 𑁧.𑁧𑁫𑁭, 𑁨𑁫𑁫). 𑀢𑀣𑀸 𑀳𑀺 𑀲𑀩𑁆𑀩𑀸𑀦𑀢𑁆𑀣𑀧𑀭𑀺𑀳𑀸𑀦𑀧𑀼𑀩𑁆𑀩𑀗𑁆𑀕𑀫𑀸𑀬 𑀦𑀺𑀭𑀯𑀲𑁂𑀲𑀳𑀺𑀢𑀲𑀼𑀔𑀯𑀺𑀥𑀸𑀦𑀢𑀧𑁆𑀧𑀭𑀸𑀬 𑀦𑀺𑀭𑀢𑀺𑀲𑀬𑀸𑀬 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸, 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀧𑀚𑀸𑀬 𑀅𑀘𑁆𑀘𑀦𑁆𑀢𑀫𑀼𑀧𑀓𑀸𑀭𑀺𑀢𑀸𑀬 𑀅𑀧𑀭𑀺𑀫𑀺𑀢𑀦𑀺𑀭𑀼𑀧𑀫𑀧𑁆𑀧𑀪𑀸𑀯𑀕𑀼𑀡𑀲𑀫𑀗𑁆𑀕𑀺𑀢𑀸𑀬 𑀘 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑁄 𑀪𑀕𑀯𑀸 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀉𑀢𑁆𑀢𑀫𑀫𑀦𑀜𑁆𑀜𑀲𑀸𑀥𑀸𑀭𑀡𑀁 𑀕𑀸𑀭𑀯𑀝𑁆𑀞𑀸𑀦𑀦𑁆𑀢𑀺. 𑀓𑀸𑀫𑀜𑁆𑀘 𑀇𑀢𑁆𑀣𑀻𑀦𑀫𑁆𑀧𑀺 𑀢𑀣𑀸𑀉𑀧𑀓𑀸𑀭𑀢𑁆𑀢𑀸 𑀪𑀕𑀯𑀸 𑀕𑀭𑀼𑀬𑁂𑀯, 𑀧𑀥𑀸𑀦𑀪𑀽𑀢𑀁 𑀧𑀦 𑀮𑁄𑀓𑀁 𑀤𑀲𑁆𑀲𑁂𑀢𑀼𑀁 𑀧𑀼𑀭𑀺𑀲𑀮𑀺𑀗𑁆𑀕𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑁂𑀭𑀼𑀢𑁆𑀢𑀺𑀓𑀸 𑀧𑀦 𑀅𑀯𑀺𑀲𑁂𑀲𑀦𑀺𑀘𑁆𑀙𑀺𑀢𑀝𑁆𑀞𑀸𑀦𑁂 𑀢𑀣𑀸 𑀦𑀺𑀤𑁆𑀤𑀺𑀝𑁆𑀞𑀫𑀺𑀘𑁆𑀙𑀦𑁆𑀢𑀺 𑀬𑀣𑀸 ‘‘𑀦𑀭𑀸 𑀦𑀸𑀕𑀸 𑀘 𑀕𑀦𑁆𑀥𑀩𑁆𑀩𑀸, 𑀅𑀪𑀺𑀯𑀸𑀤𑁂𑀢𑁆𑀯𑀸𑀦 𑀧𑀓𑁆𑀓𑀫𑀼’’𑀦𑁆𑀢𑀺 (𑀅𑀧. 𑁧.𑁧.𑁪𑁮). 𑀢𑀣𑀸 𑀘𑀸𑀳𑀼 𑁋

‘‘𑀦𑀧𑀼𑀁𑀲𑀓𑁂𑀦 𑀮𑀺𑀗𑁆𑀕𑁂𑀦, 𑀲𑀤𑁆𑀤𑁄𑀤𑀸𑀳𑀼 𑀧𑀼𑀫𑁂𑀦 𑀯𑀸;

𑀦𑀺𑀤𑁆𑀤𑀺𑀲𑁆𑀲𑀢𑀻𑀢𑀺 𑀜𑀸𑀢𑀩𑁆𑀩𑀫𑀯𑀺𑀲𑁂𑀲𑀯𑀺𑀦𑀺𑀘𑁆𑀙𑀺𑀢𑁂’’𑀢𑀺.

𑀯𑀦𑁆𑀤𑁂𑀢𑀺 𑀏𑀢𑁆𑀣 𑀧𑀦 𑁋

𑀯𑀢𑁆𑀢𑀫𑀸𑀦𑀸𑀬 𑀧𑀜𑁆𑀘𑀫𑁆𑀬𑀁, 𑀲𑀢𑁆𑀢𑀫𑁆𑀬𑀜𑁆𑀘 𑀯𑀺𑀪𑀢𑁆𑀢𑀺𑀬𑀁;

𑀏𑀢𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼, 𑀯𑀦𑁆𑀤𑁂𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑀇𑀥 𑀧𑀦 𑀯𑀢𑁆𑀢𑀫𑀸𑀦𑀸𑀬𑀁 𑀅𑀜𑁆𑀜𑀸𑀲𑀫𑀲𑀫𑁆𑀪𑀯𑀢𑁄. 𑀢𑀢𑁆𑀣 𑀘 𑀉𑀢𑁆𑀢𑀫𑀧𑀼𑀭𑀺𑀲𑀯𑀲𑁂𑀦𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 ‘‘𑀅𑀳𑀁 𑀯𑀦𑁆𑀤𑀸𑀫𑀻’’𑀢𑀺. 𑀦𑀫𑀦𑀣𑀼𑀢𑀺𑀬𑀢𑁆𑀣𑁂𑀲𑀼 𑀘 𑀯𑀦𑁆𑀤𑀲𑀤𑁆𑀤𑀫𑀺𑀘𑁆𑀙𑀦𑁆𑀢𑀺 𑀆𑀘𑀭𑀺𑀬𑀸, 𑀢𑁂𑀦 𑀘 𑀲𑀼𑀕𑀢𑀧𑀤𑀁, 𑀦𑀸𑀣𑀧𑀤𑀁 𑀯𑀸 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀲𑁄𑀪𑀦𑀁 𑀕𑀢𑀁 𑀕𑀫𑀦𑀁 𑀏𑀢𑀲𑁆𑀲𑀸𑀢𑀺 𑀲𑀼𑀕𑀢𑁄. 𑀕𑀫𑀦𑀜𑁆𑀘𑁂𑀢𑁆𑀣 𑀓𑀸𑀬𑀕𑀫𑀦𑀁, 𑀜𑀸𑀡𑀕𑀫𑀦𑀜𑁆𑀘, 𑀓𑀸𑀬𑀕𑀫𑀦𑀫𑁆𑀧𑀺 𑀯𑀺𑀦𑁂𑀬𑁆𑀬𑀚𑀦𑁄𑀧𑀲𑀗𑁆𑀓𑀫𑀦𑀁, 𑀧𑀓𑀢𑀺𑀕𑀫𑀦𑀜𑁆𑀘𑀸𑀢𑀺 𑀤𑀼𑀩𑁆𑀩𑀺𑀥𑀁. 𑀪𑀕𑀯𑀢𑁄 𑀳𑀺 𑀯𑀺𑀦𑁂𑀬𑁆𑀬𑀚𑀦𑁄𑀧𑀲𑀗𑁆𑀓𑀫𑀦𑀁 𑀏𑀓𑀦𑁆𑀢𑁂𑀦 𑀢𑁂𑀲𑀁 𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀢𑁄 ¶ 𑀲𑁄𑀪𑀦𑀁, 𑀢𑀣𑀸 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢𑀭𑀽𑀧𑀓𑀸𑀬𑀢𑀸𑀬 𑀤𑀼𑀢𑀯𑀺𑀮𑀫𑁆𑀩𑀺𑀢𑀔𑀮𑀺𑀢𑀸𑀦𑀼𑀓𑀟𑁆𑀠𑀦𑀦𑀺𑀧𑁆𑀧𑀻𑀴𑀦𑀼𑀓𑁆𑀓𑀼𑀝𑀺𑀓-𑀓𑀼𑀝𑀺𑀮𑀸𑀓𑀼𑀮𑀢𑀸𑀤𑀺𑀤𑁄𑀲𑀭𑀳𑀺𑀢- 𑀫𑀯𑀳𑀲𑀺𑀢𑀭𑀸𑀚𑀳𑀁𑀲- ¶ 𑀯𑀲𑀪𑀯𑀸𑀭𑀡𑀫𑀺𑀕𑀭𑀸𑀚𑀕𑀫𑀦𑀁 𑀧𑀓𑀢𑀺𑀕𑀫𑀦𑀜𑁆𑀘, 𑀯𑀺𑀫𑀮𑀯𑀺𑀧𑀼𑀮𑀓𑀭𑀼𑀡𑀸𑀲𑀢𑀺𑀯𑀻𑀭𑀺𑀬𑀸𑀤𑀺𑀕𑀼𑀡𑀯𑀺𑀲𑁂𑀲𑀲𑀳𑀺𑀢𑀫𑁆𑀧𑀺 𑀜𑀸𑀡𑀕𑀫𑀦𑀁 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀳𑀸𑀩𑁄𑀥𑀺, 𑀢𑀸𑀯 𑀦𑀺𑀭𑀯𑀚𑁆𑀚𑀢𑀸𑀬 𑀲𑁄𑀪𑀦𑀫𑁂𑀯𑀸𑀢𑀺. 𑀅𑀣 𑀯𑀸 ‘‘𑀲𑀬𑀫𑁆𑀪𑀽𑀜𑀸𑀡𑁂𑀦 𑀲𑀓𑀮𑀫𑁆𑀧𑀺 𑀮𑁄𑀓𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦 𑀧𑀭𑀺𑀚𑀸𑀦𑀦𑁆𑀢𑁄 𑀲𑀫𑁆𑀫𑀸 𑀕𑀢𑁄 𑀅𑀯𑀕𑀢𑁄𑀢𑀺 𑀲𑀼𑀕𑀢𑁄. 𑀬𑁄 𑀳𑀺 𑀕𑀢𑁆𑀬𑀢𑁆𑀣𑁄, 𑀲𑁄 𑀩𑀼𑀤𑁆𑀥𑀬𑀢𑁆𑀣𑁄. 𑀬𑁄 𑀘 𑀩𑀼𑀤𑁆𑀥𑀬𑀢𑁆𑀣𑁄, 𑀲𑁄 𑀕𑀢𑁆𑀬𑀢𑁆𑀣𑁄𑀢𑀺. 𑀢𑀣𑀸 𑀮𑁄𑀓𑀲𑀫𑀼𑀤𑀬𑀁 𑀧𑀳𑀸𑀦𑀸𑀪𑀺𑀲𑀫𑀬𑀯𑀲𑁂𑀦 𑀧𑀚𑀳𑀦𑁆𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀫𑀸𑀧𑀸𑀤𑁂𑀦𑁆𑀢𑁄 𑀲𑀫𑁆𑀫𑀸 𑀕𑀢𑁄 𑀅𑀢𑀻𑀢𑁄𑀢𑀺 𑀲𑀼𑀕𑀢𑁄. 𑀮𑁄𑀓𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀲𑀫𑁆𑀫𑀸 𑀕𑀢𑁄 𑀅𑀥𑀺𑀕𑀢𑁄𑀢𑀺 𑀲𑀼𑀕𑀢𑁄. 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀲𑀫𑁆𑀫𑀸 𑀕𑀢𑁄 𑀧𑀝𑀺𑀧𑀦𑁆𑀦𑁄𑀢𑀺 𑀲𑀼𑀕𑀢𑁄, 𑀅𑀬𑀜𑁆𑀘𑀢𑁆𑀣𑁄 ‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻’𑀢𑀺 (𑀫𑀳𑀸𑀦𑀺. 𑁩𑁮; 𑀘𑀽𑀴𑀦𑀺. 𑁨𑁭) 𑀲𑀼𑀕𑀢𑁄𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑁂𑀲𑀦𑀬𑁂𑀦 𑀯𑀺𑀪𑀸𑀯𑁂𑀢𑀩𑁆𑀩𑁄.

𑀅𑀧𑀭𑁄 𑀦𑀬𑁄 𑁋 𑀲𑀼𑀦𑁆𑀤𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁, 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸 𑀕𑀢𑁄 𑀅𑀥𑀺𑀕𑀢𑁄𑀢𑀺 𑀲𑀼𑀕𑀢𑁄. 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀁𑀳𑀺𑀢𑀁 𑀬𑀣𑀸𑀭𑀳𑀁 𑀓𑀸𑀮𑀬𑀼𑀢𑁆𑀢𑀫𑁂𑀯 𑀯𑀸𑀘𑀁 𑀯𑀺𑀦𑁂𑀬𑁆𑀬𑀸𑀦𑀁 𑀲𑀫𑁆𑀫𑀸 𑀕𑀤𑀢𑀻𑀢𑀺 𑀯𑀸 𑀲𑀼𑀕𑀢𑁄, 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸, 𑀢𑀁 𑀲𑀼𑀕𑀢𑀁. 𑀧𑀼𑀜𑁆𑀜𑀸𑀧𑀼𑀜𑁆𑀜𑀓𑀫𑁆𑀫𑁂𑀳𑀺 𑀉𑀧𑀧𑀚𑁆𑀚𑀦𑀯𑀲𑁂𑀦 𑀕𑀦𑁆𑀢𑀩𑁆𑀩𑀸𑀢𑀺 𑀕𑀢𑀺𑀬𑁄, 𑀉𑀧𑀧𑀢𑁆𑀢𑀺𑀪𑀯𑀯𑀺𑀲𑁂𑀲𑀸. 𑀢𑀸 𑀧𑀦 𑀦𑀺𑀭𑀬𑀸𑀤𑀺𑀪𑁂𑀤𑁂𑀦 𑀧𑀜𑁆𑀘𑀯𑀺𑀥𑀸, 𑀲𑀓𑀮𑀲𑁆𑀲𑀸𑀧𑀺 𑀪𑀯𑀕𑀸𑀫𑀺𑀓𑀫𑁆𑀫𑀲𑁆𑀲 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑁂𑀦 𑀅𑀯𑀺𑀧𑀸𑀓𑀸𑀭𑀳𑀪𑀸𑀯𑀓𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀢𑁆𑀢𑀸 𑀧𑀜𑁆𑀘𑀳𑀺𑀧𑀺 𑀢𑀸𑀳𑀺 𑀯𑀺𑀲𑀁𑀬𑀼𑀢𑁆𑀢𑁄 𑀳𑀼𑀢𑁆𑀯𑀸 𑀫𑀼𑀢𑁆𑀢𑁄𑀢𑀺 𑀕𑀢𑀺𑀯𑀺𑀫𑀼𑀢𑁆𑀢𑁄. 𑀉𑀤𑁆𑀥𑀫𑀼𑀤𑁆𑀥𑀪𑀯𑀕𑀸𑀫𑀺𑀦𑁄 𑀳𑀺 𑀤𑁂𑀯𑀸 𑀢𑀁𑀢𑀁𑀓𑀫𑁆𑀫𑀯𑀺𑀧𑀸𑀓𑀤𑀸𑀦𑀓𑀸𑀮𑀸𑀦𑀼𑀭𑀽𑀧𑁂𑀦 𑀢𑀢𑁄 𑀢𑀢𑁄 𑀪𑀯𑀢𑁄 𑀫𑀼𑀢𑁆𑀢𑀸𑀧𑀺 𑀫𑀼𑀢𑁆𑀢𑀫𑀢𑁆𑀢𑀸𑀯, 𑀦 𑀧𑀦 𑀯𑀺𑀲𑀜𑁆𑀜𑁄𑀕𑀯𑀲𑁂𑀦 𑀫𑀼𑀢𑁆𑀢𑀸, 𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀸 𑀘 𑀢𑀁𑀢𑀁𑀪𑀯𑀕𑀸𑀫𑀺𑀓𑀫𑁆𑀫𑀲𑁆𑀲 𑀅𑀭𑀺𑀬𑀫𑀕𑁆𑀕𑁂𑀦 𑀅𑀦𑀺𑀯𑀢𑁆𑀢𑀺𑀢𑀢𑁆𑀢𑀸, 𑀦 𑀢𑀣𑀸 𑀪𑀕𑀯𑀸. 𑀪𑀕𑀯𑀸 𑀧𑀦 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀯𑀺𑀲𑀁𑀬𑀼𑀢𑁆𑀢𑁄 𑀳𑀼𑀢𑁆𑀯𑀸 𑀫𑀼𑀢𑁆𑀢𑁄𑀢𑀺. 𑀢𑀲𑁆𑀫𑀸 𑀅𑀦𑁂𑀦 𑀪𑀕𑀯𑀢𑁄 𑀓𑀢𑁆𑀣𑀘𑀺𑀧𑀺 𑀕𑀢𑀺𑀬𑀸 𑀅𑀧𑀭𑀺𑀬𑀸𑀧𑀦𑁆𑀦𑀢𑀁 𑀤𑀲𑁆𑀲𑁂𑀢𑀺. 𑀬𑀢𑁄 𑀘 𑀪𑀕𑀯𑀸 ‘‘𑀤𑁂𑀯𑀸𑀢𑀺𑀤𑁂𑀯𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯𑀸𑀳 𑁋

‘‘𑀬𑁂𑀦 ¶ 𑀤𑁂𑀯𑀽𑀧𑀧𑀢𑁆𑀬𑀲𑁆𑀲, 𑀕𑀦𑁆𑀥𑀩𑁆𑀩𑁄 𑀯𑀸 𑀯𑀺𑀳𑀗𑁆𑀕𑀫𑁄;

𑀬𑀓𑁆𑀔𑀢𑁆𑀢𑀁 𑀬𑁂𑀦 𑀕𑀘𑁆𑀙𑁂𑀬𑁆𑀬𑀁, 𑀫𑀦𑀼𑀲𑁆𑀲𑀢𑁆𑀢𑀜𑁆𑀘 𑀅𑀩𑁆𑀩𑀚𑁂;

𑀢𑁂 𑀫𑀬𑁆𑀳𑀁 𑀆𑀲𑀯𑀸 𑀔𑀻𑀡𑀸, 𑀯𑀺𑀤𑁆𑀥𑀲𑁆𑀢𑀸 𑀯𑀺𑀦𑀴𑀻𑀓𑀢𑀸’’𑀢𑀺. (𑀅. 𑀦𑀺. 𑁪.𑁩𑁬);

𑀢𑀁𑀢𑀁𑀕𑀢𑀺𑀲𑀁𑀯𑀢𑁆𑀢𑀦𑀓𑀸𑀦𑀜𑁆𑀳𑀺 𑀓𑀫𑁆𑀫𑀓𑀺𑀮𑁂𑀲𑀸𑀦𑀁 𑀫𑀳𑀸𑀩𑁄𑀥𑀺𑀫𑀽𑀮𑁂𑀬𑁂𑀯 𑀅𑀕𑁆𑀕𑀫𑀕𑁆𑀕𑁂𑀦 𑀧𑀳𑀻𑀦𑀢𑁆𑀢𑀸 𑀦𑀢𑁆𑀣𑀺 𑀪𑀕𑀯𑀢𑁄 𑀢𑀁𑀢𑀁𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀢𑀺 𑀅𑀘𑁆𑀘𑀦𑁆𑀢𑀫𑁂𑀯 𑀪𑀕𑀯𑀸 𑀲𑀩𑁆𑀩𑀪𑀯𑀬𑁄𑀦𑀺𑀕𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑀲𑀢𑁆𑀢𑀦𑀺𑀓𑀸𑀬𑁂𑀳𑀺 𑀧𑀭𑀺𑀫𑀼𑀢𑁆𑀢𑁄𑀢𑀺. 𑀅𑀣 𑀯𑀸 𑀓𑀸𑀫𑀁 𑀲𑀉𑀧𑀸𑀤𑀺𑀲𑁂𑀲𑀸𑀬𑀧𑀺 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀢𑀸𑀳𑀺 𑀕𑀢𑀻𑀳𑀺 ¶ 𑀯𑀺𑀫𑀼𑀢𑁆𑀢𑁄, 𑀏𑀲𑀸 𑀧𑀦 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺 𑀏𑀢𑁆𑀣𑁂𑀯𑀦𑁆𑀢𑁄𑀕𑀥𑀸𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸𑀯 𑀣𑁄𑀫𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀢𑁆𑀣 𑀧𑀦 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀯𑀲𑁂𑀦 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀪𑀕𑀯𑀢𑁄 𑀣𑁄𑀫𑀦𑀸 𑀓𑀢𑀸 𑀳𑁄𑀢𑀺. 𑀢𑁂𑀲𑀼 𑀅𑀦𑀸𑀯𑀭𑀡𑀜𑀸𑀡𑀸𑀥𑀺𑀕𑀫𑁄, 𑀲𑀳 𑀯𑀸𑀲𑀦𑀸𑀬 𑀓𑀺𑀮𑁂𑀲𑀸𑀦𑀫𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀁, 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺 𑀘 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 𑀦𑀸𑀫, 𑀮𑀸𑀪𑀲𑀓𑁆𑀓𑀸𑀭𑀸𑀤𑀺𑀦𑀺𑀭𑀧𑁂𑀓𑁆𑀔𑀘𑀺𑀢𑁆𑀢𑀲𑁆𑀲 𑀧𑀦 𑀲𑀩𑁆𑀩𑀤𑀼𑀓𑁆𑀔𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀤𑁂𑀲𑀦𑀸𑀧𑀬𑁄𑀕𑀢𑁄 𑀤𑁂𑀯𑀤𑀢𑁆𑀢𑀸𑀤𑀻𑀲𑀼𑀧𑀺 𑀯𑀺𑀭𑀼𑀤𑁆𑀥𑀲𑀢𑁆𑀢𑁂𑀲𑀼 𑀦𑀺𑀘𑁆𑀘𑀁 𑀳𑀺𑀢𑀚𑁆𑀛𑀸𑀲𑀬𑀢𑀸, 𑀯𑀺𑀦𑀻𑀢𑀩𑁆𑀩𑀲𑀢𑁆𑀢𑀸𑀦𑀁 𑀜𑀸𑀡𑀧𑀭𑀺𑀧𑀸𑀓𑀓𑀸𑀮𑀸𑀕𑀫𑀦𑀜𑁆𑀘 𑀆𑀲𑀬𑀢𑁄 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀦𑀸𑀫. 𑀲𑀸 𑀧𑀦 𑀆𑀲𑀬𑀧𑀬𑁄𑀕𑀢𑁄 𑀤𑀼𑀯𑀺𑀥𑀸, 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀢𑀺𑀯𑀺𑀥𑀸 𑀘 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀬𑀣𑀸𑀭𑀳𑀁 𑀧𑀓𑀸𑀲𑀺𑀢𑀸 𑀳𑁄𑀢𑀺. ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺 𑀳𑀺 𑀏𑀢𑁂𑀦 𑀆𑀲𑀬𑀢𑁄 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺, 𑀲𑀫𑁆𑀫𑀸 𑀕𑀤𑀦𑀢𑁆𑀣𑁂𑀦 𑀲𑀼𑀕𑀢𑀲𑀤𑁆𑀤𑁂𑀦 𑀧𑀬𑁄𑀕𑀢𑁄 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺. ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫𑀁 𑀕𑀢𑀺𑀯𑀺𑀫𑀼𑀢𑁆𑀢’’𑀦𑁆𑀢𑀺 𑀏𑀢𑁂𑀳𑀺, 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀢𑁆𑀣𑁂𑀦 𑀘 𑀲𑀼𑀕𑀢𑀲𑀤𑁆𑀤𑁂𑀦 𑀢𑀺𑀯𑀺𑀥𑀸𑀧𑀺 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺, 𑀅𑀯𑀲𑀺𑀝𑁆𑀞𑀝𑁆𑀞𑁂𑀦 𑀧𑀦 𑀢𑁂𑀦, ‘‘𑀲𑀦𑀭𑀸𑀫𑀭𑀮𑁄𑀓𑀕𑀭𑀼’’𑀦𑁆𑀢𑀺 𑀘 𑀏𑀢𑁂𑀦 𑀲𑀩𑁆𑀩𑀸𑀧𑀺 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺, 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀘 𑀧𑀓𑀸𑀲𑀺𑀢𑀸 𑀳𑁄𑀢𑀺.

𑀅𑀣 𑀯𑀸 𑀳𑁂𑀢𑀼𑀨𑀮𑀲𑀢𑁆𑀢𑀽𑀧𑀓𑀸𑀭𑀯𑀲𑁂𑀦 𑀢𑀻𑀳𑀸𑀓𑀸𑀭𑁂𑀳𑀺 𑀣𑁄𑀫𑀦𑀸 𑀓𑀢𑀸. 𑀢𑀢𑁆𑀣 𑀳𑁂𑀢𑀼 𑀦𑀸𑀫 𑀫𑀳𑀸𑀓𑀭𑀼𑀡𑀸𑀲𑀫𑀸𑀬𑁄𑀕𑁄, 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀜𑁆𑀘, 𑀢𑀤𑀼𑀪𑀬𑀫𑁆𑀧𑀺 𑀧𑀞𑀫𑀧𑀤𑁂𑀦 𑀬𑀣𑀸𑀭𑀼𑀢𑀢𑁄, 𑀲𑀸𑀫𑀢𑁆𑀣𑀺𑀬𑀢𑁄 𑀘 𑀧𑀓𑀸𑀲𑀺𑀢𑀁. 𑀨𑀮𑀁 𑀧𑀦 𑀜𑀸𑀡𑀧𑁆𑀧𑀳𑀸𑀦𑀆𑀦𑀼𑀪𑀸𑀯𑀭𑀽𑀧𑀓𑀸𑀬𑀲𑀫𑁆𑀧𑀤𑀸𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁 ¶ . 𑀢𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀧𑀤𑀝𑁆𑀞𑀸𑀦𑀁 𑀫𑀕𑁆𑀕𑀜𑀸𑀡𑀁, 𑀢𑀫𑁆𑀫𑀽𑀮𑀓𑀸𑀦𑀺 𑀘 𑀤𑀲𑀩𑀮𑀸𑀤𑀺𑀜𑀸𑀡𑀸𑀦𑀺 𑀜𑀸𑀡𑀲𑀫𑁆𑀧𑀤𑀸, 𑀲𑀯𑀸𑀲𑀦𑀲𑀓𑀮𑀲𑀁𑀓𑀺𑀮𑁂𑀲𑀸𑀦𑀫𑀘𑁆𑀘𑀦𑁆𑀢𑀫𑀦𑀼𑀧𑁆𑀧𑀸𑀤𑀥𑀫𑁆𑀫𑀢𑀸𑀧𑀸𑀤𑀦𑀁 𑀧𑀳𑀸𑀦𑀲𑀫𑁆𑀧𑀤𑀸, 𑀬𑀣𑀺𑀘𑁆𑀙𑀺𑀢𑀦𑀺𑀧𑁆𑀨𑀸𑀤𑀦𑁂 𑀆𑀥𑀺𑀧𑀘𑁆𑀘𑀁 𑀆𑀦𑀼𑀪𑀸𑀯𑀲𑀫𑁆𑀧𑀤𑀸, 𑀲𑀓𑀮𑀮𑁄𑀓𑀦𑀬𑀦𑀸𑀪𑀺𑀲𑁂𑀓𑀪𑀽𑀢𑀸 𑀧𑀦 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢𑀸 𑀅𑀢𑁆𑀢𑀪𑀸𑀯𑀲𑀫𑁆𑀧𑀢𑁆𑀢𑀺 𑀭𑀽𑀧𑀓𑀸𑀬𑀲𑀫𑁆𑀧𑀤𑀸. 𑀢𑀸𑀲𑀼 𑀜𑀸𑀡𑀧𑁆𑀧𑀳𑀸𑀦𑀲𑀫𑁆𑀧𑀤𑀸 𑀤𑀼𑀢𑀺𑀬𑀧𑀤𑁂𑀦, 𑀲𑀘𑁆𑀘𑀧𑀝𑀺𑀯𑁂𑀥𑀢𑁆𑀣𑁂𑀦 𑀘 𑀲𑀼𑀕𑀢𑀲𑀤𑁆𑀤𑁂𑀦 𑀧𑀓𑀸𑀲𑀺𑀢𑀸, 𑀆𑀦𑀼𑀪𑀸𑀯𑀲𑀫𑁆𑀧𑀤𑀸 𑀢𑀢𑀺𑀬𑀧𑀤𑁂𑀦, 𑀭𑀽𑀧𑀓𑀸𑀬𑀲𑀫𑁆𑀧𑀤𑀸 𑀲𑁄𑀪𑀦𑀓𑀸𑀬𑀕𑀫𑀦𑀢𑁆𑀣𑁂𑀦 𑀲𑀼𑀕𑀢𑀲𑀤𑁆𑀤𑁂𑀦 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀧𑀸𑀭𑀺𑀧𑀽𑀭𑀺𑀬𑀸 𑀯𑀺𑀦𑀸 𑀢𑀤𑀪𑀸𑀯𑀢𑁄. 𑀬𑀣𑀸𑀯𑀼𑀢𑁆𑀢𑀸 𑀤𑀼𑀯𑀺𑀥𑀸𑀧𑀺 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀲𑀢𑁆𑀢𑀽𑀧𑀓𑀸𑀭𑀲𑀫𑁆𑀧𑀤𑀸, 𑀲𑀸 𑀧𑀦 𑀲𑀫𑁆𑀫𑀸 𑀕𑀤𑀦𑀢𑁆𑀣𑁂𑀦 𑀲𑀼𑀕𑀢𑀲𑀤𑁆𑀤𑁂𑀦 𑀧𑀓𑀸𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀧𑀺𑀘 𑀇𑀫𑀸𑀬 𑀕𑀸𑀣𑀸𑀬 𑀲𑀫𑁆𑀫𑀸𑀲𑀫𑁆𑀩𑁄𑀥𑀺 𑀢𑀫𑁆𑀫𑀽𑀮 𑁋 𑀢𑀧𑁆𑀧𑀝𑀺𑀧𑀢𑁆𑀢𑀺𑀬𑀸𑀤𑀬𑁄 𑀅𑀦𑁂𑀓𑁂 𑀩𑀼𑀤𑁆𑀥𑀕𑀼𑀡𑀸 𑀆𑀘𑀭𑀺𑀬𑁂𑀦 𑀧𑀓𑀸𑀲𑀺𑀢𑀸 𑀳𑁄𑀦𑁆𑀢𑀺. 𑀏𑀲𑀸 𑀳𑀺 𑀆𑀘𑀭𑀺𑀬𑀸𑀦𑀁 𑀧𑀓𑀢𑀺, 𑀬𑀤𑀺𑀤𑀁 𑀬𑁂𑀦 𑀓𑁂𑀦𑀘𑀺 𑀧𑀓𑀸𑀭𑁂𑀦 𑀅𑀢𑁆𑀣𑀦𑁆𑀢𑀭𑀯𑀺𑀜𑁆𑀜𑀸𑀧𑀦𑀁. 𑀓𑀣𑀁? ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺 𑀳𑀺 𑀏𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀫𑀽𑀮𑀁 𑀤𑀲𑁆𑀲𑁂𑀢𑀺 ¶ . 𑀫𑀳𑀸𑀓𑀭𑀼𑀡𑀸𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀳𑀺 𑀪𑀕𑀯𑀸 𑀲𑀁𑀲𑀸𑀭𑀧𑀗𑁆𑀓𑀢𑁄 𑀲𑀢𑁆𑀢𑀸𑀦𑀁 𑀲𑀫𑀼𑀤𑁆𑀥𑀭𑀡𑀢𑁆𑀣𑀁 𑀓𑀢𑀸𑀪𑀺𑀦𑀻𑀳𑀸𑀭𑁄 𑀅𑀦𑀼𑀧𑀼𑀩𑁆𑀩𑁂𑀦 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀫𑀥𑀺𑀕𑀢𑁄𑀢𑀺 𑀓𑀭𑀼𑀡𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀫𑀽𑀮𑀁. ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺 𑀏𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀳𑀺 𑀅𑀕𑁆𑀕𑀫𑀕𑁆𑀕𑀜𑀸𑀡𑀁, 𑀅𑀕𑁆𑀕𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 ‘‘𑀲𑀫𑁆𑀫𑀸𑀲𑀫𑁆𑀩𑁄𑀥𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑀫𑁆𑀫𑀸 𑀕𑀫𑀦𑀢𑁆𑀣𑁂𑀦 𑀲𑀼𑀕𑀢𑀲𑀤𑁆𑀤𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 𑀮𑀻𑀦𑀼𑀤𑁆𑀥𑀘𑁆𑀘𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀓𑀸𑀫𑀲𑀼𑀔𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀪𑀺𑀦𑀺𑀯𑁂𑀲𑀸𑀤𑀺𑀅𑀦𑁆𑀢𑀤𑁆𑀯𑀬𑀭𑀳𑀺𑀢𑀸𑀬 𑀓𑀭𑀼𑀡𑀸𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑀺𑀢𑀸𑀬 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀧𑀓𑀸𑀲𑀦𑀢𑁄, 𑀇𑀢𑀭𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀧𑀥𑀸𑀦𑀸𑀧𑁆𑀧𑀥𑀸𑀦𑀧𑁆𑀧𑀪𑁂𑀤𑀁 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀺. 𑀲𑀁𑀲𑀸𑀭𑀫𑀳𑁄𑀖𑀢𑁄 𑀲𑀢𑁆𑀢𑀲𑀦𑁆𑀢𑀸𑀭𑀡𑀜𑁆𑀳𑁂𑀢𑁆𑀣 𑀧𑀥𑀸𑀦𑀁, 𑀢𑀤𑀜𑁆𑀜𑀫𑀧𑁆𑀧𑀥𑀸𑀦𑀁. 𑀢𑁂𑀲𑀼 𑀘 𑀧𑀥𑀸𑀦𑁂𑀦 𑀧𑀬𑁄𑀚𑀦𑁂𑀦 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺, 𑀇𑀢𑀭𑁂𑀦 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺𑀁, 𑀢𑀤𑀼𑀪𑀬𑁂𑀦 𑀘 𑀅𑀢𑁆𑀢𑀳𑀺𑀢𑀧𑀝𑀺𑀧𑀦𑁆𑀦𑀸𑀤𑀻𑀲𑀼 𑀘𑀢𑀽𑀲𑀼 𑀧𑀼𑀕𑁆𑀕𑀮𑁂𑀲𑀼 𑀪𑀕𑀯𑀢𑁄 𑀘𑀢𑀼𑀢𑁆𑀣𑀧𑀼𑀕𑁆𑀕𑀮𑀪𑀸𑀯𑀁 𑀧𑀓𑀸𑀲𑁂𑀢𑀺. 𑀢𑁂𑀦 𑀘 𑀅𑀦𑀼𑀢𑁆𑀢𑀭𑀁 𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀁, 𑀉𑀢𑁆𑀢𑀫𑀜𑁆𑀘 𑀯𑀦𑁆𑀤𑀦𑀻𑀬𑀪𑀸𑀯𑀁, 𑀅𑀢𑁆𑀢𑀦𑁄 𑀘 𑀯𑀦𑁆𑀤𑀦𑀸𑀬 𑀔𑁂𑀢𑁆𑀢𑀗𑁆𑀕𑀢𑀪𑀸𑀯𑀁 𑀯𑀺𑀪𑀸𑀯𑁂𑀢𑀺.

𑀅𑀧𑀺𑀘 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀮𑁄𑀓𑀺𑀬𑁂𑀲𑀼 𑀫𑀳𑀕𑁆𑀕𑀢𑀪𑀸𑀯𑀧𑁆𑀧𑀢𑁆𑀢𑀸𑀲𑀸𑀥𑀸𑀭𑀡𑀕𑀼𑀡𑀤𑀻𑀧𑀦𑀢𑁄 𑀲𑀩𑁆𑀩𑀮𑁄𑀓𑀺𑀬𑀕𑀼𑀡𑀲𑀫𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀫𑀕𑁆𑀕𑀜𑀸𑀡𑀤𑀻𑀧𑀦𑀢𑁄 ¶ 𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑀕𑀼𑀡𑀲𑀫𑁆𑀧𑀢𑁆𑀢𑀺. 𑀢𑀤𑀼𑀪𑀬𑀕𑁆𑀕𑀳𑀡𑀲𑀺𑀤𑁆𑀥𑁄 𑀳𑀺 𑀅𑀢𑁆𑀣𑁄 ‘‘𑀲𑀦𑀭𑀸𑀫𑀭𑀮𑁄𑀓𑀕𑀭𑀼’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀧𑀜𑁆𑀘𑀻𑀬𑀢𑀻𑀢𑀺. 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀘 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀫𑀼𑀧𑀕𑀫𑀦𑀁 𑀤𑀲𑁆𑀲𑁂𑀢𑀺, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀅𑀧𑀕𑀫𑀦𑀁. 𑀢𑀣𑀸 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀮𑁄𑀓𑀲𑀫𑀜𑁆𑀜𑀸𑀦𑀼𑀭𑀽𑀧𑀁 𑀪𑀕𑀯𑀢𑁄 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 𑀮𑁄𑀓𑀯𑁄𑀳𑀸𑀭𑀯𑀺𑀲𑀬𑀢𑁆𑀢𑀸 𑀓𑀭𑀼𑀡𑀸𑀬, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀮𑁄𑀓𑀲𑀫𑀜𑁆𑀜𑀸𑀬 𑀅𑀦𑀢𑀺𑀥𑀸𑀯𑀦𑀁. 𑀲𑀪𑀸𑀯𑀸𑀦𑀯𑀩𑁄𑀥𑁂𑀦 𑀳𑀺 𑀥𑀫𑁆𑀫𑀸𑀦𑀁 𑀲𑀪𑀸𑀯𑀁 𑀅𑀢𑀺𑀥𑀸𑀯𑀺𑀢𑁆𑀯𑀸 𑀲𑀢𑁆𑀢𑀸𑀤𑀺𑀧𑀭𑀸𑀫𑀲𑀦𑀁 𑀳𑁄𑀢𑀺. 𑀢𑀣𑀸 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀁 𑀤𑀲𑁆𑀲𑁂𑀢𑀺, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀁, 𑀘𑀢𑀼𑀲𑀘𑁆𑀘𑀜𑀸𑀡𑀁, 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀁, 𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑀁, 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀜𑀸𑀡𑀲𑁆𑀲 𑀕𑀳𑀺𑀢𑀢𑁆𑀢𑀸 𑀲𑁂𑀲𑀸𑀲𑀸𑀥𑀸𑀭𑀡𑀜𑀸𑀡𑀸𑀦𑀺, 𑀙 𑀅𑀪𑀺𑀜𑁆𑀜𑀸, 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀅𑀓𑀫𑁆𑀧𑀦𑀜𑀸𑀡𑀸𑀦𑀺, 𑀤𑀲 𑀩𑀮𑀸𑀦𑀺, 𑀘𑀼𑀤𑁆𑀤𑀲 𑀩𑀼𑀤𑁆𑀥𑀕𑀼𑀡𑀸, 𑀲𑁄𑀴𑀲 𑀜𑀸𑀡𑀘𑀭𑀺𑀬𑀸, 𑀅𑀝𑁆𑀞𑀸𑀭𑀲 𑀩𑀼𑀤𑁆𑀥𑀥𑀫𑁆𑀫𑀸, 𑀘𑀢𑀼𑀘𑀢𑁆𑀢𑀸𑀭𑀻𑀲 𑀜𑀸𑀡𑀯𑀢𑁆𑀣𑀽𑀦𑀺, 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀯𑀢𑁆𑀣𑀽𑀦𑀻𑀢𑀺 𑀏𑀯𑀫𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀧𑀜𑁆𑀜𑀸𑀧𑀪𑁂𑀤𑀸𑀦𑀁 𑀯𑀲𑁂𑀦 𑀜𑀸𑀡𑀘𑀸𑀭𑀁 𑀤𑀲𑁆𑀲𑁂𑀢𑀺. 𑀢𑀣𑀸 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀘𑀭𑀡𑀲𑀫𑁆𑀧𑀢𑁆𑀢𑀺𑀁, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀯𑀺𑀚𑁆𑀚𑀸𑀲𑀫𑁆𑀧𑀢𑁆𑀢𑀺𑀁. 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀅𑀢𑁆𑀢𑀸𑀥𑀺𑀧𑀢𑀺𑀢𑀸, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀥𑀫𑁆𑀫𑀸𑀥𑀺𑀧𑀢𑀺𑀢𑀸. 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀮𑁄𑀓𑀦𑀸𑀣𑀪𑀸𑀯𑁄, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀅𑀢𑁆𑀢𑀦𑀸𑀣𑀪𑀸𑀯𑁄. 𑀢𑀣𑀸 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀧𑀼𑀩𑁆𑀩𑀓𑀸𑀭𑀻𑀪𑀸𑀯𑁄, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀓𑀢𑀜𑁆𑀜𑀼𑀢𑀸. 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀅𑀧𑀭𑀦𑁆𑀢𑀧𑀢𑀸, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀅𑀦𑀢𑁆𑀢𑀦𑁆𑀢𑀧𑀢𑀸. 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀯𑀸 𑀩𑀼𑀤𑁆𑀥𑀓𑀭𑀥𑀫𑁆𑀫𑀲𑀺𑀤𑁆𑀥𑀺, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀩𑀼𑀤𑁆𑀥𑀪𑀸𑀯𑀲𑀺𑀤𑁆𑀥𑀺. 𑀢𑀣𑀸 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀧𑀭𑀲𑀦𑁆𑀢𑀸𑀭𑀡𑀁, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 ¶ 𑀅𑀢𑁆𑀢𑀲𑀦𑁆𑀢𑀸𑀭𑀡𑀁. 𑀢𑀣𑀸 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀲𑀩𑁆𑀩𑀲𑀢𑁆𑀢𑁂𑀲𑀼 𑀅𑀦𑀼𑀕𑁆𑀕𑀳𑀘𑀺𑀢𑁆𑀢𑀢𑀸, 𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀭𑀢𑁆𑀢𑀘𑀺𑀢𑁆𑀢𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺 𑀲𑀩𑁆𑀩𑁂𑀲𑀜𑁆𑀘 𑀩𑀼𑀤𑁆𑀥𑀕𑀼𑀡𑀸𑀦𑀁 𑀓𑀭𑀼𑀡𑀸 𑀆𑀤𑀺 𑀢𑀦𑁆𑀦𑀺𑀤𑀸𑀦𑀪𑀸𑀯𑀢𑁄, 𑀧𑀜𑁆𑀜𑀸 𑀧𑀭𑀺𑀬𑁄𑀲𑀸𑀦𑀁 𑀢𑀢𑁄 𑀉𑀢𑁆𑀢𑀭𑀺 𑀓𑀭𑀡𑀻𑀬𑀸𑀪𑀸𑀯𑀢𑁄. 𑀇𑀢𑀺 𑀆𑀤𑀺𑀧𑀭𑀺𑀬𑁄𑀲𑀸𑀦𑀤𑀲𑁆𑀲𑀦𑁂𑀦 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀢𑀣𑀸 𑀓𑀭𑀼𑀡𑀸𑀕𑁆𑀕𑀳𑀡𑁂𑀦 𑀲𑀻𑀮𑀓𑁆𑀔𑀦𑁆𑀥𑀧𑀼𑀩𑁆𑀩𑀗𑁆𑀕𑀫𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀓𑀭𑀼𑀡𑀸𑀦𑀺𑀤𑀸𑀦𑀜𑁆𑀳𑀺 𑀲𑀻𑀮𑀁 𑀢𑀢𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀺𑀭𑀢𑀺𑀧𑁆𑀧𑀯𑀢𑁆𑀢𑀺𑀢𑁄, 𑀲𑀸 𑀘 𑀛𑀸𑀦𑀢𑁆𑀢𑀬𑀲𑀫𑁆𑀧𑀬𑁄𑀕𑀺𑀦𑀻𑀢𑀺, 𑀧𑀜𑁆𑀜𑀸𑀯𑀘𑀦𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀲𑀻𑀮𑀜𑁆𑀘 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑀸𑀦𑀁 𑀆𑀤𑀺, 𑀲𑀫𑀸𑀥𑀺 𑀫𑀚𑁆𑀛𑁂, 𑀧𑀜𑁆𑀜𑀸 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀏𑀯𑀫𑁆𑀧𑀺 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺 𑀦𑀬𑀢𑁄 𑀤𑀲𑁆𑀲𑀺𑀢𑀢𑁆𑀢𑀸. 𑀏𑀲𑁄 𑀏𑀯 𑀳𑀺 𑀦𑀺𑀭𑀯𑀲𑁂𑀲𑀢𑁄 𑀩𑀼𑀤𑁆𑀥𑀕𑀼𑀡𑀸𑀦𑀁 𑀤𑀲𑁆𑀲𑀦𑀼𑀧𑀸𑀬𑁄, 𑀬𑀤𑀺𑀤𑀁 𑀦𑀬𑀕𑁆𑀕𑀸𑀳𑀡𑀁, 𑀅𑀜𑁆𑀜𑀣𑀸 𑀓𑁄 ¶ 𑀦𑀸𑀫 𑀲𑀫𑀢𑁆𑀣𑁄 𑀪𑀕𑀯𑀢𑁄 𑀕𑀼𑀡𑁂 𑀅𑀦𑀼𑀧𑀤𑀁 𑀦𑀺𑀭𑀯𑀲𑁂𑀲𑀢𑁄 𑀤𑀲𑁆𑀲𑁂𑀢𑀼𑀁. 𑀢𑁂𑀦𑁂𑀯𑀸𑀳 𑁋

‘‘𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁,

𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄.

𑀔𑀻𑀬𑁂𑀣 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂,

𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺.

𑀢𑁂𑀦𑁂𑀯 𑀘 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦𑀸𑀧𑀺 𑀩𑀼𑀤𑁆𑀥𑀕𑀼𑀡𑀧𑀭𑀺𑀘𑁆𑀙𑁂𑀤𑀦𑀁 𑀧𑀢𑀺 𑀪𑀕𑀯𑀢𑀸 𑀅𑀦𑀼𑀬𑀼𑀢𑁆𑀢𑁂𑀦 ‘‘𑀦𑁄 𑀳𑁂𑀢𑀁 𑀪𑀦𑁆𑀢𑁂’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀧𑀺 𑀘 𑀫𑁂 𑀪𑀦𑁆𑀢𑁂 𑀥𑀫𑁆𑀫𑀦𑁆𑀯𑀬𑁄 𑀯𑀺𑀤𑀺𑀢𑁄’’𑀢𑀺 𑀲𑀫𑁆𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑁂 𑀯𑀼𑀢𑁆𑀢𑀁.

𑀏𑀯𑀁 𑀲𑀗𑁆𑀔𑁂𑀧𑁂𑀦 𑀲𑀓𑀮𑀲𑀩𑁆𑀩𑀜𑁆𑀜𑀼𑀕𑀼𑀡𑁂𑀳𑀺 𑀪𑀕𑀯𑀢𑁄 𑀣𑁄𑀫𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀧𑀡𑀸𑀫𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀲𑀤𑁆𑀥𑀫𑁆𑀫𑀲𑁆𑀲𑀸𑀧𑀺 𑀣𑁄𑀫𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀧𑀡𑀸𑀫𑀁 𑀓𑀭𑁄𑀦𑁆𑀢𑁄 ‘‘𑀩𑀼𑀤𑁆𑀥𑁄𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀸𑀬𑀁 𑀲𑀳 𑀧𑀤𑀲𑀫𑁆𑀩𑀦𑁆𑀥𑁂𑀦 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀣𑀸𑀯𑀼𑀢𑁆𑀢𑀯𑀺𑀯𑀺𑀥𑀕𑀼𑀡𑀕𑀡𑀲𑀫𑀦𑁆𑀦𑀸𑀕𑀢𑁄 𑀩𑀼𑀤𑁆𑀥𑁄𑀧𑀺 𑀬𑀁 𑀅𑀭𑀺𑀬𑀫𑀕𑁆𑀕𑀲𑀗𑁆𑀔𑀸𑀢𑀁 𑀥𑀫𑁆𑀫𑀁, 𑀲𑀳 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑁂𑀦 𑀯𑀸 𑀅𑀭𑀺𑀬𑀫𑀕𑁆𑀕𑀪𑀽𑀢𑀁 𑀥𑀫𑁆𑀫𑀁 𑀪𑀸𑀯𑁂𑀢𑁆𑀯𑀸 𑀘𑁂𑀯 𑀬𑀁 𑀨𑀮𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀥𑀫𑁆𑀫𑀁, 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑁂𑀳𑀺 𑀯𑀸 𑀲𑀳 𑀨𑀮𑀦𑀺𑀩𑁆𑀩𑀸𑀦𑀪𑀽𑀢𑀁 𑀥𑀫𑁆𑀫𑀁 𑀲𑀘𑁆𑀙𑀺𑀓𑀢𑁆𑀯𑀸 𑀘 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀲𑀗𑁆𑀔𑀸𑀢𑀁 𑀩𑀼𑀤𑁆𑀥𑀪𑀸𑀯𑀫𑀼𑀧𑀕𑀢𑁄, 𑀯𑀻𑀢𑀫𑀮𑀫𑀦𑀼𑀢𑁆𑀢𑀭𑀁 𑀢𑀁 𑀥𑀫𑁆𑀫𑀫𑁆𑀧𑀺 𑀯𑀦𑁆𑀤𑁂𑀢𑀺.

𑀢𑀢𑁆𑀣 𑀩𑀼𑀤𑁆𑀥𑀲𑀤𑁆𑀤𑀲𑁆𑀲 𑀢𑀸𑀯 ‘‘𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄. 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑁂𑀲𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀅𑀕𑁆𑀕𑀫𑀕𑁆𑀕𑀜𑀸𑀡𑀸𑀥𑀺𑀕𑀫𑁂𑀦 𑀲𑀯𑀸𑀲𑀦𑀸𑀬 𑀲𑀫𑁆𑀫𑁄𑀳𑀦𑀺𑀤𑁆𑀤𑀸𑀬 𑀅𑀘𑁆𑀘𑀦𑁆𑀢𑀯𑀺𑀕𑀫𑀦𑀢𑁄, 𑀅𑀧𑀭𑀺𑀫𑀺𑀢𑀕𑀼𑀡𑀕𑀡𑀸𑀮𑀗𑁆𑀓𑀢𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑁆𑀧𑀢𑁆𑀢𑀺𑀬𑀸 𑀯𑀺𑀓𑀲𑀺𑀢𑀪𑀸𑀯𑀢𑁄 ¶ 𑀘 𑀩𑀼𑀤𑁆𑀥𑀯𑀸𑀢𑀺 𑀩𑀼𑀤𑁆𑀥𑁄 𑀚𑀸𑀕𑀭𑀡𑀯𑀺𑀓𑀲𑀦𑀢𑁆𑀣𑀯𑀲𑁂𑀦. 𑀅𑀣 𑀯𑀸 𑀓𑀲𑁆𑀲𑀘𑀺𑀧𑀺 𑀜𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀦𑀯𑀩𑀼𑀤𑁆𑀥𑀲𑁆𑀲 𑀅𑀪𑀸𑀯𑁂𑀦 𑀜𑁂𑀬𑁆𑀬𑀯𑀺𑀲𑁂𑀲𑀲𑁆𑀲 𑀓𑀫𑁆𑀫𑀪𑀸𑀯𑀸𑀕𑀳𑀡𑀢𑁄 𑀓𑀫𑁆𑀫𑀯𑀘𑀦𑀺𑀘𑁆𑀙𑀸𑀬𑀸𑀪𑀸𑀯𑁂𑀦 𑀅𑀯𑀕𑀫𑀦𑀢𑁆𑀣𑀯𑀲𑁂𑀦 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄𑀯 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀩𑀼𑀤𑁆𑀥𑀯𑀸𑀢𑀺 𑀩𑀼𑀤𑁆𑀥𑁄𑀢𑀺𑀧𑀺 𑀯𑀢𑁆𑀢𑀩𑁆𑀩𑁄. 𑀧𑀤𑁂𑀲𑀕𑁆𑀕𑀳𑀡𑁂 𑀳𑀺 𑀅𑀲𑀢𑀺 𑀕𑀳𑁂𑀢𑀩𑁆𑀩𑀲𑁆𑀲 𑀦𑀺𑀧𑁆𑀧𑀤𑁂𑀲𑀢𑀸𑀯 𑀯𑀺𑀜𑁆𑀜𑀸𑀬𑀢𑀺 𑀬𑀣𑀸 ‘‘𑀤𑀺𑀓𑁆𑀔𑀺𑀢𑁄 𑀦 𑀤𑀤𑀸𑀢𑀻’’𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀓𑀫𑁆𑀫𑀯𑀺𑀲𑁂𑀲𑀸𑀦𑀧𑁂𑀓𑁆𑀔𑀸 𑀓𑀢𑁆𑀢𑀭𑀺 𑀏𑀯 𑀩𑀼𑀤𑁆𑀥𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸, 𑀅𑀢𑁆𑀣𑀢𑁄 ¶ 𑀧𑀦 𑀧𑀸𑀭𑀫𑀺𑀢𑀸𑀧𑀭𑀺𑀪𑀸𑀯𑀺𑀢𑁄 𑀲𑀬𑀫𑁆𑀪𑀼𑀜𑀸𑀡𑁂𑀦 𑀲𑀳 𑀯𑀸𑀲𑀦𑀸𑀬 𑀯𑀺𑀳𑀢𑀯𑀺𑀤𑁆𑀥𑀲𑁆𑀢𑀦𑀺𑀭𑀯𑀲𑁂𑀲𑀓𑀺𑀮𑁂𑀲𑁄𑀫𑀳𑀸𑀓𑀭𑀼𑀡𑀸𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀅𑀧𑀭𑀺𑀫𑁂𑀬𑁆𑀬𑀕𑀼𑀡𑀕𑀡𑀸𑀥𑀸𑀭𑁄 𑀔𑀦𑁆𑀥𑀲𑀦𑁆𑀢𑀸𑀦𑁄 𑀩𑀼𑀤𑁆𑀥𑁄, 𑀬𑀣𑀸𑀳 𑁋

‘‘𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯’’𑀦𑁆𑀢𑀺 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑁯𑁭; 𑀧𑀝𑀺. 𑀫. 𑁧𑁬𑁧).

𑀅𑀧𑀺𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂, 𑀢𑁂𑀦 𑀏𑀯𑀁 𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑁄 𑀲𑁄𑀧𑀺 𑀦𑀸𑀫 𑀪𑀕𑀯𑀸 𑀈𑀤𑀺𑀲𑀁 𑀥𑀫𑁆𑀫𑀁 𑀪𑀸𑀯𑁂𑀢𑁆𑀯𑀸, 𑀲𑀘𑁆𑀙𑀺𑀓𑀢𑁆𑀯𑀸 𑀘 𑀩𑀼𑀤𑁆𑀥𑀪𑀸𑀯𑀫𑀼𑀧𑀕𑀢𑁄, 𑀓𑀸 𑀦𑀸𑀫 𑀓𑀣𑀸 𑀅𑀜𑁆𑀜𑁂𑀲𑀁 𑀲𑀸𑀯𑀓𑀸𑀤𑀺𑀪𑀸𑀯𑀫𑀼𑀧𑀕𑀫𑀦𑁂𑀢𑀺 𑀥𑀫𑁆𑀫𑁂 𑀲𑀫𑁆𑀪𑀸𑀯𑀦𑀁 𑀤𑀻𑀧𑁂𑀢𑀺. 𑀩𑀼𑀤𑁆𑀥𑀪𑀸𑀯𑀦𑁆𑀢𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁. 𑀬𑁂𑀦 𑀳𑀺 𑀦𑀺𑀫𑀺𑀢𑁆𑀢𑀪𑀽𑀢𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑁂𑀦 𑀅𑀕𑁆𑀕𑀫𑀕𑁆𑀕𑀜𑀸𑀡𑁂𑀦, 𑀅𑀕𑁆𑀕𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑁂𑀦 𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀪𑀕𑀯𑀢𑀺 ‘‘𑀩𑀼𑀤𑁆𑀥𑁄’’𑀢𑀺 𑀦𑀸𑀫𑀁, 𑀢𑀤𑀸𑀭𑀫𑁆𑀫𑀡𑀜𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀢𑀫𑁂𑀯𑀺𑀥 ‘‘𑀪𑀸𑀯𑁄’’𑀢𑀺 𑀯𑀼𑀘𑁆𑀘𑀢𑀺. 𑀪𑀯𑀦𑁆𑀢𑀺 𑀩𑀼𑀤𑁆𑀥𑀺𑀲𑀤𑁆𑀤𑀸 𑀏𑀢𑁂𑀦𑀸𑀢𑀺 𑀳𑀺 𑀪𑀸𑀯𑁄. 𑀢𑀣𑀸 𑀳𑀺 𑀯𑀤𑀦𑁆𑀢𑀺 𑁋

‘‘𑀬𑁂𑀦 𑀬𑁂𑀦 𑀦𑀺𑀫𑀺𑀢𑁆𑀢𑁂𑀦, 𑀩𑀼𑀤𑁆𑀥𑀺 𑀲𑀤𑁆𑀤𑁄 𑀘 𑀯𑀢𑁆𑀢𑀢𑁂;

𑀢𑀁𑀢𑀁𑀦𑀺𑀫𑀺𑀢𑁆𑀢𑀓𑀁 𑀪𑀸𑀯𑀧𑀘𑁆𑀘𑀬𑁂𑀳𑀺 𑀉𑀤𑀻𑀭𑀺𑀢’’𑀦𑁆𑀢𑀺.

𑀪𑀸𑀯𑁂𑀢𑁆𑀯𑀸𑀢𑀺 𑀉𑀧𑁆𑀧𑀸𑀤𑁂𑀢𑁆𑀯𑀸, 𑀯𑀟𑁆𑀠𑁂𑀢𑁆𑀯𑀸 𑀯𑀸. 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸. 𑀘𑁂𑀯-𑀲𑀤𑁆𑀤𑁄 𑀘-𑀲𑀤𑁆𑀤𑁄 𑀘 𑀢𑀤𑀼𑀪𑀬𑀢𑁆𑀣 𑀲𑀫𑀼𑀘𑁆𑀘𑀬𑁂. 𑀢𑁂𑀦 𑀳𑀺 𑀲𑀤𑁆𑀤𑀤𑁆𑀯𑀬𑁂𑀦 𑀦 𑀓𑁂𑀯𑀮𑀁 𑀪𑀕𑀯𑀸 𑀥𑀫𑁆𑀫𑀲𑁆𑀲 𑀪𑀸𑀯𑀦𑀸𑀫𑀢𑁆𑀢𑁂𑀦 𑀩𑀼𑀤𑁆𑀥𑀪𑀸𑀯𑀫𑀼𑀧𑀕𑀢𑁄, 𑀦𑀸𑀧𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀫𑀢𑁆𑀢𑁂𑀦, 𑀅𑀣 𑀔𑁄 𑀢𑀤𑀼𑀪𑀬𑁂𑀦𑁂𑀯𑀸𑀢𑀺 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀉𑀧𑀕𑀢𑁄𑀢𑀺 𑀧𑀢𑁆𑀢𑁄, 𑀅𑀥𑀺𑀕𑀢𑁄𑀢𑀺 𑀅𑀢𑁆𑀣𑁄. 𑀏𑀢𑀲𑁆𑀲 ‘‘𑀩𑀼𑀤𑁆𑀥𑀪𑀸𑀯’’𑀦𑁆𑀢𑀺 𑀧𑀤𑁂𑀦 𑀲𑀫𑁆𑀩𑀦𑁆𑀥𑁄. 𑀯𑀻𑀢𑀫𑀮𑀦𑁆𑀢𑀺 𑀏𑀢𑁆𑀣 𑀯𑀺𑀭𑀳𑀯𑀲𑁂𑀦 𑀏𑀢𑀺 𑀧𑀯𑀢𑁆𑀢𑀢𑀻𑀢𑀺 𑀯𑀻𑀢𑁄, 𑀫𑀮𑀢𑁄 𑀯𑀻𑀢𑁄, 𑀯𑀻𑀢𑀁 𑀯𑀸 𑀫𑀮𑀁 𑀬𑀲𑁆𑀲𑀸𑀢𑀺 𑀯𑀻𑀢𑀫𑀮𑁄, 𑀢𑀁 𑀯𑀻𑀢𑀫𑀮𑀁. ‘‘𑀕𑀢𑀫𑀮’’𑀦𑁆𑀢𑀺𑀧𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀏𑀯𑀁 𑀲𑀢𑀺 𑀲𑀉𑀧𑀲𑀕𑁆𑀕𑁄 𑀯𑀺𑀬 𑀅𑀦𑀼𑀧𑀲𑀕𑁆𑀕𑁄𑀧𑀺 𑀕𑀢𑀲𑀤𑁆𑀤𑁄 𑀯𑀺𑀭𑀳𑀢𑁆𑀣𑀯𑀸𑀘𑀓𑁄 𑀯𑁂𑀤𑀺𑀢𑀩𑁆𑀩𑁄 𑀥𑀸𑀢𑀽𑀦𑀫𑀦𑁂𑀓𑀢𑁆𑀣𑀢𑁆𑀢𑀸. 𑀕𑀘𑁆𑀙𑀢𑀺 𑀅𑀧𑀕𑀘𑁆𑀙𑀢𑀻𑀢𑀺 𑀳𑀺 𑀕𑀢𑁄, 𑀥𑀫𑁆𑀫𑁄 ¶ . 𑀕𑀢𑀁 𑀯𑀸 𑀫𑀮𑀁, 𑀧𑀼𑀭𑀺𑀫𑀦𑀬𑁂𑀦 𑀲𑀫𑀸𑀲𑁄. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀉𑀢𑁆𑀢𑀭𑀯𑀺𑀭𑀳𑀺𑀢𑀁. 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀅𑀧𑀸𑀬𑀢𑁄, 𑀲𑀁𑀲𑀸𑀭𑀢𑁄 𑀘 𑀅𑀧𑀢𑀫𑀸𑀦𑁂 𑀓𑀢𑁆𑀯𑀸 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄, 𑀦𑀯𑀯𑀺𑀥𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄. 𑀢𑀧𑁆𑀧𑀓𑀸𑀲𑀦𑀢𑁆𑀢𑀸, 𑀲𑀘𑁆𑀙𑀺𑀓𑀺𑀭𑀺𑀬𑀸𑀲𑀫𑁆𑀫𑀲𑀦𑀧𑀭𑀺𑀬𑀸𑀬𑀲𑁆𑀲 𑀘 𑀮𑀩𑁆𑀪𑀫𑀸𑀦𑀢𑁆𑀢𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀧𑀺 𑀇𑀥 𑀲𑀗𑁆𑀕𑀳𑀺𑀢𑁄 ¶ . 𑀢𑀣𑀸 𑀳𑀺 ‘‘𑀅𑀪𑀺𑀥𑀫𑁆𑀫𑀦𑀬𑀲𑀫𑀼𑀤𑁆𑀤𑀁 𑀅𑀥𑀺𑀕𑀘𑁆𑀙𑀺, 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑀫𑁆𑀫𑀲𑀻’’𑀢𑀺 𑀘 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀣𑀸 ‘‘𑀬𑀁 𑀥𑀫𑁆𑀫𑀁 𑀪𑀸𑀯𑁂𑀢𑁆𑀯𑀸 𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀪𑀸𑀯𑀦𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑁄𑀕𑁆𑀬𑀢𑀸𑀬 𑀩𑀼𑀤𑁆𑀥𑀓𑀭𑀥𑀫𑁆𑀫𑀪𑀽𑀢𑀸𑀳𑀺 𑀧𑀸𑀭𑀫𑀺𑀢𑀸𑀳𑀺 𑀲𑀳 𑀧𑀼𑀩𑁆𑀩𑀪𑀸𑀕𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀬𑁄𑀧𑀺 𑀇𑀥 𑀲𑀗𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀸𑀧𑀺 𑀳𑀺 𑀯𑀺𑀕𑀢𑀧𑀝𑀺𑀧𑀓𑁆𑀔𑀢𑀸𑀬 𑀯𑀻𑀢𑀫𑀮𑀸, 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀅𑀦𑀼𑀢𑁆𑀢𑀭𑀸 𑀘. 𑀓𑀣𑀁 𑀧𑀦 𑀢𑀸 𑀪𑀸𑀯𑁂𑀢𑁆𑀯𑀸, 𑀲𑀘𑁆𑀙𑀺𑀓𑀢𑁆𑀯𑀸 𑀘 𑀪𑀕𑀯𑀸 𑀩𑀼𑀤𑁆𑀥𑀪𑀸𑀯𑀫𑀼𑀧𑀕𑀢𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑀢𑁆𑀢𑀸𑀦𑀜𑁆𑀳𑀺 𑀲𑀁𑀲𑀸𑀭𑀯𑀝𑁆𑀝𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀸𑀬 [𑀦𑀺𑀲𑁆𑀲𑀭𑀡𑀢𑁆𑀣𑀸𑀬 (𑀧𑀡𑁆𑀡𑀸𑀲 𑀝𑀻.) 𑀦𑀺𑀲𑁆𑀲𑀭𑀡𑁂 (𑀓𑀢𑁆𑀣𑀘𑀺)] 𑀓𑀢𑀫𑀳𑀸𑀪𑀺𑀦𑀻𑀳𑀸𑀭𑁄 𑀫𑀳𑀸𑀓𑀭𑀼𑀡𑀸𑀥𑀺𑀯𑀸𑀲𑀦𑀧𑁂𑀲𑀮𑀚𑁆𑀛𑀸𑀲𑀬𑁄 𑀧𑀜𑁆𑀜𑀸𑀯𑀺𑀲𑁂𑀲𑀧𑀭𑀺𑀬𑁄𑀤𑀸𑀢𑀦𑀺𑀫𑁆𑀫𑀮𑀸𑀦𑀁 𑀤𑀸𑀦𑀤𑀫𑀲𑀜𑁆𑀜𑀫𑀸𑀤𑀻𑀦𑀁 𑀉𑀢𑁆𑀢𑀫𑀥𑀫𑁆𑀫𑀸𑀦𑀁 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀲𑀓𑁆𑀓𑀘𑁆𑀘𑀁 𑀦𑀺𑀭𑀦𑁆𑀢𑀭𑀁 𑀦𑀺𑀭𑀯𑀲𑁂𑀲𑀁 𑀪𑀸𑀯𑀦𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀳𑀺 𑀓𑀫𑁆𑀫𑀸𑀤𑀻𑀲𑀼 𑀅𑀥𑀺𑀕𑀢𑀯𑀲𑀻𑀪𑀸𑀯𑁄 𑀅𑀘𑁆𑀙𑀭𑀺𑀬𑀸𑀘𑀺𑀦𑁆𑀢𑁂𑀬𑁆𑀬𑀫𑀳𑀸𑀦𑀼𑀪𑀸𑀯𑁄 𑀅𑀥𑀺𑀲𑀻𑀮𑀸𑀥𑀺𑀘𑀺𑀢𑁆𑀢𑀸𑀦𑀁 𑀧𑀭𑀫𑀼𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀪𑀕𑀯𑀸 𑀧𑀘𑁆𑀘𑀬𑀸𑀓𑀸𑀭𑁂 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀼𑀔𑁂𑀦 𑀫𑀳𑀸𑀯𑀚𑀺𑀭𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀲𑀗𑁆𑀔𑀸𑀢𑀁 𑀩𑀼𑀤𑁆𑀥𑀪𑀸𑀯𑀫𑀼𑀧𑀕𑀢𑁄𑀢𑀺.

𑀇𑀫𑀸𑀬 𑀧𑀦 𑀕𑀸𑀣𑀸𑀬 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀤𑀸𑀤𑀻𑀳𑀺 𑀅𑀦𑁂𑀓𑁂𑀳𑀺 𑀕𑀼𑀡𑁂𑀳𑀺 𑀬𑀣𑀸𑀭𑀳𑀁 𑀲𑀤𑁆𑀥𑀫𑁆𑀫𑀁 𑀣𑁄𑀫𑁂𑀢𑀺. 𑀓𑀣𑀁? 𑀏𑀢𑁆𑀣 𑀳𑀺 ‘‘𑀪𑀸𑀯𑁂𑀢𑁆𑀯𑀸’’𑀢𑀺 𑀏𑀢𑁂𑀦 𑀯𑀺𑀚𑁆𑀚𑀸𑀲𑀫𑁆𑀧𑀤𑀸𑀬 𑀣𑁄𑀫𑁂𑀢𑀺, ‘‘𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺 𑀏𑀢𑁂𑀦 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀤𑀸𑀬. 𑀢𑀣𑀸 𑀧𑀞𑀫𑁂𑀦 𑀛𑀸𑀦𑀲𑀫𑁆𑀧𑀤𑀸𑀬, 𑀤𑀼𑀢𑀺𑀬𑁂𑀦 𑀯𑀺𑀫𑁄𑀓𑁆𑀔𑀲𑀫𑁆𑀧𑀤𑀸𑀬. 𑀧𑀞𑀫𑁂𑀦 𑀯𑀸 𑀲𑀫𑀸𑀥𑀺𑀲𑀫𑁆𑀧𑀤𑀸𑀬, 𑀤𑀼𑀢𑀺𑀬𑁂𑀦 𑀲𑀫𑀸𑀧𑀢𑁆𑀢𑀺𑀲𑀫𑁆𑀧𑀤𑀸𑀬. 𑀅𑀣 𑀯𑀸 𑀧𑀞𑀫𑁂𑀦 𑀔𑀬𑀜𑀸𑀡𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀅𑀦𑀼𑀧𑁆𑀧𑀸𑀤𑀜𑀸𑀡𑀪𑀸𑀯𑁂𑀦. 𑀧𑀞𑀫𑁂𑀦 𑀯𑀸 𑀯𑀺𑀚𑁆𑀚𑀽𑀧𑀫𑀢𑀸𑀬, 𑀤𑀼𑀢𑀺𑀬𑁂𑀦 𑀯𑀚𑀺𑀭𑀽𑀧𑀫𑀢𑀸𑀬. 𑀧𑀞𑀫𑁂𑀦 𑀯𑀸 𑀯𑀺𑀭𑀸𑀕𑀲𑀫𑁆𑀧𑀢𑁆𑀢𑀺𑀬𑀸, 𑀤𑀼𑀢𑀺𑀬𑁂𑀦 𑀦𑀺𑀭𑁄𑀥𑀲𑀫𑁆𑀧𑀢𑁆𑀢𑀺𑀬𑀸. 𑀢𑀣𑀸 𑀧𑀞𑀫𑁂𑀦 𑀦𑀺𑀬𑁆𑀬𑀸𑀦𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀦𑀺𑀲𑁆𑀲𑀭𑀡𑀪𑀸𑀯𑁂𑀦. 𑀧𑀞𑀫𑁂𑀦 𑀯𑀸 𑀳𑁂𑀢𑀼𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀅𑀲𑀗𑁆𑀔𑀢𑀪𑀸𑀯𑁂𑀦. 𑀧𑀞𑀫𑁂𑀦 𑀯𑀸 𑀤𑀲𑁆𑀲𑀦𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀯𑀺𑀯𑁂𑀓𑀪𑀸𑀯𑁂𑀦. 𑀧𑀞𑀫𑁂𑀦 𑀯𑀸 𑀅𑀥𑀺𑀧𑀢𑀺𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀅𑀫𑀢𑀪𑀸𑀯𑁂𑀦 𑀥𑀫𑁆𑀫𑀁 𑀣𑁄𑀫𑁂𑀢𑀺. 𑀅𑀣 𑀯𑀸 ‘‘𑀬𑀁 𑀥𑀫𑁆𑀫𑀁 𑀪𑀸𑀯𑁂𑀢𑁆𑀯𑀸 𑀩𑀼𑀤𑁆𑀥𑀪𑀸𑀯𑀁 𑀉𑀧𑀕𑀢𑁄’’𑀢𑀺 𑀏𑀢𑁂𑀦 𑀲𑁆𑀯𑀸𑀓𑁆𑀔𑀸𑀢𑀢𑀸𑀬 𑀥𑀫𑁆𑀫𑀁 𑀣𑁄𑀫𑁂𑀢𑀺, ‘‘𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺 𑀏𑀢𑁂𑀦 𑀲𑀦𑁆𑀤𑀺𑀝𑁆𑀞𑀺𑀓𑀢𑀸𑀬. 𑀢𑀣𑀸 𑀧𑀞𑀫𑁂𑀦 𑀅𑀓𑀸𑀮𑀺𑀓𑀢𑀸𑀬, 𑀤𑀼𑀢𑀺𑀬𑁂𑀦 𑀏𑀳𑀺𑀧𑀲𑁆𑀲𑀺𑀓𑀢𑀸𑀬. 𑀧𑀞𑀫𑁂𑀦 𑀯𑀸 𑀑𑀧𑀦𑁂𑀬𑁆𑀬𑀺𑀓𑀢𑀸𑀬, 𑀤𑀼𑀢𑀺𑀬𑁂𑀦 𑀧𑀘𑁆𑀘𑀢𑁆𑀢𑀁𑀯𑁂𑀤𑀺𑀢𑀩𑁆𑀩𑀢𑀸𑀬. 𑀧𑀞𑀫𑁂𑀦 𑀯𑀸 𑀲𑀳 𑀧𑀼𑀩𑁆𑀩𑀪𑀸𑀕𑀲𑀻𑀮𑀸𑀤𑀻𑀳𑀺 𑀲𑁂𑀓𑁆𑀔𑁂𑀳𑀺 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀳𑀺 ¶ , 𑀤𑀼𑀢𑀺𑀬𑁂𑀦 𑀲𑀳 𑀅𑀲𑀗𑁆𑀔𑀢𑀥𑀸𑀢𑀼𑀬𑀸 𑀅𑀲𑁂𑀓𑁆𑀔𑁂𑀳𑀺 𑀥𑀫𑁆𑀫𑀁 𑀣𑁄𑀫𑁂𑀢𑀺.

‘‘𑀯𑀻𑀢𑀫𑀮’’𑀦𑁆𑀢𑀺 ¶ 𑀇𑀫𑀺𑀦𑀸 𑀧𑀦 𑀲𑀁𑀓𑀺𑀮𑁂𑀲𑀸𑀪𑀸𑀯𑀤𑀻𑀧𑀦𑁂𑀦 𑀯𑀺𑀲𑀼𑀤𑁆𑀥𑀢𑀸𑀬 𑀥𑀫𑁆𑀫𑀁 𑀣𑁄𑀫𑁂𑀢𑀺, ‘‘𑀅𑀦𑀼𑀢𑁆𑀢𑀭’’𑀦𑁆𑀢𑀺 𑀏𑀢𑁂𑀦 𑀅𑀜𑁆𑀜𑀲𑁆𑀲 𑀯𑀺𑀲𑀺𑀝𑁆𑀞𑀲𑁆𑀲 𑀅𑀪𑀸𑀯𑀤𑀻𑀧𑀦𑁂𑀦 𑀧𑀭𑀺𑀧𑀼𑀡𑁆𑀡𑀢𑀸𑀬. 𑀧𑀞𑀫𑁂𑀦 𑀯𑀸 𑀧𑀳𑀸𑀦𑀲𑀫𑁆𑀧𑀤𑀸𑀬, 𑀤𑀼𑀢𑀺𑀬𑁂𑀦 𑀲𑀪𑀸𑀯𑀲𑀫𑁆𑀧𑀤𑀸𑀬. 𑀧𑀞𑀫𑁂𑀦 𑀯𑀸 𑀪𑀸𑀯𑀦𑀸𑀨𑀮𑀬𑁄𑀕𑁆𑀬𑀢𑀸𑀬. 𑀪𑀸𑀯𑀦𑀸𑀕𑀼𑀡𑁂𑀦 𑀳𑀺 𑀲𑁄 𑀲𑀁𑀓𑀺𑀮𑁂𑀲𑀫𑀮𑀲𑀫𑀼𑀕𑁆𑀖𑀸𑀢𑀓𑁄, 𑀢𑀲𑁆𑀫𑀸𑀦𑁂𑀦 𑀪𑀸𑀯𑀦𑀸𑀓𑀺𑀭𑀺𑀬𑀸𑀬 𑀨𑀮𑀫𑀸𑀳. 𑀤𑀼𑀢𑀺𑀬𑁂𑀦 𑀲𑀘𑁆𑀙𑀺𑀓𑀺𑀭𑀺𑀬𑀸𑀨𑀮𑀬𑁄𑀕𑁆𑀬𑀢𑀸𑀬. 𑀢𑀤𑀼𑀢𑁆𑀢𑀭𑀺𑀓𑀭𑀡𑀻𑀬𑀸𑀪𑀸𑀯𑀢𑁄 𑀳𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀅𑀦𑀼𑀢𑁆𑀢𑀭𑀪𑀸𑀯𑁄 𑀲𑀘𑁆𑀙𑀺𑀓𑀺𑀭𑀺𑀬𑀸𑀦𑀺𑀩𑁆𑀩𑀢𑁆𑀢𑀺𑀢𑁄, 𑀢𑀲𑁆𑀫𑀸𑀦𑁂𑀦 𑀲𑀘𑁆𑀙𑀺𑀓𑀺𑀭𑀺𑀬𑀸𑀨𑀮𑀫𑀸𑀳𑀸𑀢𑀺.

𑀏𑀯𑀁 𑀲𑀗𑁆𑀔𑁂𑀧𑁂𑀦𑁂𑀯 𑀲𑀩𑁆𑀩𑀲𑀤𑁆𑀥𑀫𑁆𑀫𑀕𑀼𑀡𑁂𑀳𑀺 𑀲𑀤𑁆𑀥𑀫𑁆𑀫𑀲𑁆𑀲𑀸𑀧𑀺 𑀣𑁄𑀫𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀧𑀡𑀸𑀫𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀅𑀭𑀺𑀬𑀲𑀗𑁆𑀖𑀲𑁆𑀲𑀸𑀧𑀺 𑀣𑁄𑀫𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀧𑀡𑀸𑀫𑀁 𑀓𑀭𑁄𑀦𑁆𑀢𑁄 ‘‘𑀲𑀼𑀕𑀢𑀲𑁆𑀲 𑀑𑀭𑀲𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀕𑀢𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑀦𑀺𑀤𑁆𑀤𑁂𑀲𑁄, ‘‘𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀏𑀢𑁂𑀦 𑀲𑀫𑁆𑀩𑀚𑁆𑀛𑀺𑀢𑀩𑁆𑀩𑁄. 𑀉𑀭𑀲𑀺 𑀪𑀯𑀸, 𑀚𑀸𑀢𑀸, 𑀲𑀁𑀯𑀼𑀤𑁆𑀥𑀸 𑀯𑀸 𑀑𑀭𑀲𑀸, 𑀅𑀢𑁆𑀢𑀚𑁄 𑀔𑁂𑀢𑁆𑀢𑀚𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀤𑀺𑀦𑁆𑀦𑀓𑁄𑀢𑀺 𑀘𑀢𑀼𑀩𑁆𑀩𑀺𑀥𑁂𑀲𑀼 𑀧𑀼𑀢𑁆𑀢𑁂𑀲𑀼 𑀅𑀢𑁆𑀢𑀚𑀸, 𑀢𑀁𑀲𑀭𑀺𑀓𑁆𑀔𑀢𑀸𑀬 𑀧𑀦 𑀅𑀭𑀺𑀬𑀧𑀼𑀕𑁆𑀕𑀮𑀸 ‘‘𑀑𑀭𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸 𑀳𑀺 𑀫𑀦𑀼𑀲𑁆𑀲𑀸𑀦𑀁 𑀑𑀭𑀲𑀧𑀼𑀢𑁆𑀢𑀸 𑀅𑀢𑁆𑀢𑀚𑀸𑀢𑀢𑀸𑀬 𑀧𑀺𑀢𑀼𑀲𑀦𑁆𑀢𑀓𑀲𑁆𑀲 𑀤𑀸𑀬𑀚𑁆𑀚𑀲𑁆𑀲 𑀯𑀺𑀲𑁂𑀲𑀪𑀸𑀕𑀺𑀦𑁄 𑀳𑁄𑀦𑁆𑀢𑀺, 𑀏𑀯𑀫𑁂𑀢𑁂𑀧𑀺 𑀲𑀤𑁆𑀥𑀫𑁆𑀫𑀲𑀯𑀦𑀦𑁆𑀢𑁂 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀢𑀸𑀬 𑀪𑀕𑀯𑀢𑁄 𑀲𑀦𑁆𑀢𑀓𑀲𑁆𑀲 𑀯𑀺𑀫𑀼𑀢𑁆𑀢𑀺𑀲𑀼𑀔𑀲𑁆𑀲 𑀥𑀫𑁆𑀫𑀭𑀢𑀦𑀲𑁆𑀲 𑀘 𑀤𑀸𑀬𑀚𑁆𑀚𑀲𑁆𑀲 𑀯𑀺𑀲𑁂𑀲𑀪𑀸𑀕𑀺𑀦𑁄𑀢𑀺. 𑀅𑀣 𑀯𑀸 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸𑀦𑀼𑀪𑀸𑀯𑁂𑀦 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀫𑀸𑀦𑀸, 𑀑𑀓𑁆𑀓𑀦𑁆𑀢𑀸 𑀘 𑀅𑀭𑀺𑀬𑀲𑀸𑀯𑀓𑀸 𑀪𑀕𑀯𑀢𑁄 𑀉𑀭𑁂 𑀯𑀸𑀬𑀸𑀫𑀚𑀦𑀺𑀢𑀸𑀪𑀺𑀚𑀸𑀢𑀢𑀸𑀬 𑀲𑀤𑀺𑀲𑀓𑀧𑁆𑀧𑀦𑀫𑀦𑁆𑀢𑀭𑁂𑀦 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑁂𑀯 ‘‘𑀑𑀭𑀲𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀫𑀭𑀳𑀦𑁆𑀢𑀺. 𑀢𑀣𑀸 𑀳𑀺 𑀢𑁂 𑀪𑀕𑀯𑀢𑀸 𑀆𑀲𑀬𑀸𑀦𑀼𑀲𑀬𑀘𑀭𑀺𑀬𑀸𑀥𑀺𑀫𑀼𑀢𑁆𑀢𑀺𑀆𑀤𑀺𑀑𑀮𑁄𑀓𑀦𑁂𑀦, 𑀯𑀚𑁆𑀚𑀸𑀦𑀼𑀘𑀺𑀦𑁆𑀢𑀦𑁂𑀦 𑀘 𑀳𑀤𑀬𑁂 𑀓𑀢𑁆𑀯𑀸 𑀯𑀚𑁆𑀚𑀢𑁄 𑀦𑀺𑀯𑀸𑀭𑁂𑀢𑁆𑀯𑀸 𑀅𑀦𑀯𑀚𑁆𑀚𑁂 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁂𑀦 𑀲𑀻𑀮𑀸𑀤𑀺𑀥𑀫𑁆𑀫𑀲𑀭𑀻𑀭𑀧𑁄𑀲𑀦𑁂𑀦 𑀲𑀁𑀯𑀟𑁆𑀠𑀸𑀧𑀺𑀢𑀸. 𑀬𑀣𑀸𑀳 𑀪𑀕𑀯𑀸 𑀇𑀢𑀺𑀯𑀼𑀢𑁆𑀢𑀓𑁂 ‘‘𑀅𑀳𑀫𑀲𑁆𑀫𑀺 𑀪𑀺𑀓𑁆𑀔𑀯𑁂 𑀩𑁆𑀭𑀸𑀳𑁆𑀫𑀡𑁄…𑀧𑁂… 𑀢𑀲𑁆𑀲 𑀫𑁂 𑀢𑀼𑀫𑁆𑀳𑁂 𑀧𑀼𑀢𑁆𑀢𑀸 𑀑𑀭𑀲𑀸 𑀫𑀼𑀔𑀢𑁄 𑀚𑀸𑀢𑀸’’𑀢𑀺𑀆𑀤𑀺 (𑀇𑀢𑀺𑀯𑀼. 𑁧𑁦𑁦). 𑀦𑀦𑀼 𑀲𑀸𑀯𑀓𑀤𑁂𑀲𑀺𑀢𑀸𑀧𑀺 𑀤𑁂𑀲𑀦𑀸 𑀅𑀭𑀺𑀬𑀪𑀸𑀯𑀸𑀯𑀳𑀸𑀢𑀺? 𑀲𑀘𑁆𑀘𑀁, 𑀲𑀸 𑀧𑀦 𑀢𑀫𑁆𑀫𑀽𑀮𑀺𑀓𑀢𑁆𑀢𑀸, 𑀮𑀓𑁆𑀔𑀡𑀸𑀤𑀺𑀯𑀺𑀲𑁂𑀲𑀸𑀪𑀸𑀯𑀢𑁄 𑀘 ‘‘𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸’’ ¶ 𑀇𑀘𑁆𑀘𑁂𑀯 𑀲𑀗𑁆𑀔𑁆𑀬𑀁 𑀕𑀢𑀸, 𑀢𑀲𑁆𑀫𑀸 𑀪𑀕𑀯𑀢𑁄 𑀑𑀭𑀲𑀧𑀼𑀢𑁆𑀢𑀪𑀸𑀯𑁄𑀬𑁂𑀯 𑀢𑁂𑀲𑀁 𑀯𑀢𑁆𑀢𑀩𑁆𑀩𑁄𑀢𑀺, 𑀏𑀢𑁂𑀦 𑀘𑀢𑀼𑀩𑁆𑀩𑀺𑀥𑁂𑀲𑀼 𑀧𑀼𑀢𑁆𑀢𑁂𑀲𑀼 𑀅𑀭𑀺𑀬𑀲𑀗𑁆𑀖𑀲𑁆𑀲 𑀅𑀢𑁆𑀢𑀚𑀧𑀼𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀢𑁆𑀢𑀦𑁄 𑀓𑀼𑀮𑀁 𑀧𑀼𑀦𑁂𑀦𑁆𑀢𑀺 𑀲𑁄𑀥𑁂𑀦𑁆𑀢𑀺, 𑀫𑀸𑀢𑀸𑀧𑀺𑀢𑀽𑀦𑀁 𑀯𑀸 𑀳𑀤𑀬𑀁 𑀧𑀽𑀭𑁂𑀦𑁆𑀢𑀻𑀢𑀺 𑀧𑀼𑀢𑁆𑀢𑀸, 𑀅𑀢𑁆𑀢𑀚𑀸𑀤𑀬𑁄. 𑀅𑀭𑀺𑀬𑀸 𑀧𑀦 𑀥𑀫𑁆𑀫𑀢𑀦𑁆𑀢𑀺𑀯𑀺𑀲𑁄𑀥𑀦𑁂𑀦, 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀸𑀭𑀸𑀥𑀦𑁂𑀦 𑀘 𑀢𑀧𑁆𑀧𑀝𑀺𑀪𑀸𑀕𑀢𑀸𑀬 𑀪𑀕𑀯𑀢𑁄 𑀧𑀼𑀢𑁆𑀢𑀸 𑀦𑀸𑀫, 𑀢𑁂𑀲𑀁. 𑀢𑀲𑁆𑀲 ‘‘𑀲𑀫𑀽𑀳’’𑀦𑁆𑀢𑀺 𑀧𑀤𑁂𑀦 𑀲𑀫𑁆𑀩𑀦𑁆𑀥𑁄.

𑀲𑀁𑀓𑀺𑀮𑁂𑀲𑀦𑀺𑀫𑀺𑀢𑁆𑀢𑀁 𑀳𑀼𑀢𑁆𑀯𑀸 𑀕𑀼𑀡𑀁 𑀫𑀸𑀭𑁂𑀢𑀺 𑀯𑀺𑀩𑀸𑀥𑀢𑀻𑀢𑀺 𑀫𑀸𑀭𑁄, 𑀤𑁂𑀯𑀧𑀼𑀢𑁆𑀢𑀫𑀸𑀭𑁄. 𑀲𑀺𑀦𑀸𑀢𑀺 𑀧𑀭𑁂 𑀩𑀦𑁆𑀥𑀢𑀺 𑀏𑀢𑀸𑀬𑀸𑀢𑀺 𑀲𑁂𑀦𑀸, 𑀫𑀸𑀭𑀲𑁆𑀲 𑀲𑁂𑀦𑀸 𑀢𑀣𑀸, 𑀫𑀸𑀭𑀜𑁆𑀘 𑀫𑀸𑀭𑀲𑁂𑀦𑀜𑁆𑀘 𑀫𑀣𑁂𑀦𑁆𑀢𑀺 𑀯𑀺𑀮𑁄𑀣𑁂𑀦𑁆𑀢𑀻𑀢𑀺 𑀫𑀸𑀭𑀲𑁂𑀦𑀫𑀣𑀦𑀸 ¶ , 𑀢𑁂𑀲𑀁. ‘‘𑀫𑀸𑀭𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺 𑀳𑀺 𑀯𑀢𑁆𑀢𑀩𑁆𑀩𑁂𑀧𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑀁. 𑀫𑀸𑀭𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂𑀦 𑀯𑀸 𑀲𑁂𑀦𑀸𑀲𑀤𑁆𑀤𑁂𑀦 𑀫𑀸𑀭𑀲𑁂𑀦𑀸 𑀕𑀳𑁂𑀢𑀩𑁆𑀩𑀸, 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀘𑁂𑀢𑁆𑀣 𑀭𑀲𑁆𑀲𑁄. ‘‘𑀫𑀸𑀭𑀲𑁂𑀦𑀫𑀤𑁆𑀤𑀦𑀸𑀦’’𑀦𑁆𑀢𑀺𑀧𑀺 𑀓𑀢𑁆𑀣𑀘𑀺 𑀧𑀸𑀞𑁄, 𑀲𑁄 𑀅𑀬𑀼𑀢𑁆𑀢𑁄𑀯 𑀅𑀭𑀺𑀬𑀸𑀚𑀸𑀢𑀺𑀓𑀢𑁆𑀢𑀸 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬. 𑀦𑀦𑀼 𑀘 𑀅𑀭𑀺𑀬𑀲𑀸𑀯𑀓𑀸𑀦𑀁 𑀫𑀕𑁆𑀕𑀸𑀥𑀺𑀕𑀫𑀲𑀫𑀬𑁂 𑀪𑀕𑀯𑀢𑁄 𑀯𑀺𑀬 𑀢𑀤𑀦𑁆𑀢𑀭𑀸𑀬𑀓𑀭𑀡𑀢𑁆𑀣𑀁 𑀤𑁂𑀯𑀧𑀼𑀢𑁆𑀢𑀫𑀸𑀭𑁄 𑀯𑀸 𑀫𑀸𑀭𑀲𑁂𑀦𑀸 𑀯𑀸 𑀦 𑀅𑀧𑀲𑀸𑀤𑁂𑀢𑀺, 𑀅𑀣 𑀓𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺? 𑀅𑀧𑀲𑀸𑀤𑁂𑀢𑀩𑁆𑀩𑀪𑀸𑀯𑀓𑀸𑀭𑀡𑀲𑁆𑀲 𑀯𑀺𑀫𑀣𑀺𑀢𑀢𑁆𑀢𑀸. 𑀢𑁂𑀲𑀜𑁆𑀳𑀺 𑀅𑀧𑀲𑀸𑀤𑁂𑀢𑀩𑁆𑀩𑀢𑀸𑀬 𑀓𑀸𑀭𑀡𑁂 𑀲𑀁𑀓𑀺𑀮𑁂𑀲𑁂 𑀯𑀺𑀫𑀣𑀺𑀢𑁂 𑀢𑁂𑀧𑀺 𑀯𑀺𑀫𑀣𑀺𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺. 𑀅𑀣 𑀯𑀸 𑀔𑀦𑁆𑀥𑀸𑀪𑀺𑀲𑀗𑁆𑀔𑀸𑀭𑀫𑀸𑀭𑀸𑀦𑀁 𑀯𑀺𑀬 𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑁆𑀲𑀸𑀧𑀺 𑀕𑀼𑀡𑀫𑀸𑀭𑀡𑁂 𑀲𑀳𑀸𑀬𑀪𑀸𑀯𑀽𑀧𑀕𑀫𑀦𑀢𑁄 𑀓𑀺𑀮𑁂𑀲𑀩𑀮𑀓𑀸𑀬𑁄 𑀇𑀥 ‘‘𑀫𑀸𑀭𑀲𑁂𑀦𑀸’’𑀢𑀺 𑀯𑀼𑀘𑁆𑀘𑀢𑀺 𑀬𑀣𑀸𑀳 𑀪𑀕𑀯𑀸 𑁋

‘‘𑀓𑀸𑀫𑀸 𑀢𑁂 𑀧𑀞𑀫𑀸 𑀲𑁂𑀦𑀸, 𑀤𑀼𑀢𑀺𑀬𑀸 𑀅𑀭𑀢𑀺 𑀯𑀼𑀘𑁆𑀘𑀢𑀺;

𑀢𑀢𑀺𑀬𑀸 𑀔𑀼𑀧𑁆𑀧𑀺𑀧𑀸𑀲𑀸 𑀢𑁂, 𑀘𑀢𑀼𑀢𑁆𑀣𑀻 𑀢𑀡𑁆𑀳𑀸 𑀧𑀯𑀼𑀘𑁆𑀘𑀢𑀺.

𑀧𑀜𑁆𑀘𑀫𑀁 𑀣𑀺𑀦𑀫𑀺𑀤𑁆𑀥𑀁 𑀢𑁂, 𑀙𑀝𑁆𑀞𑀸 𑀪𑀻𑀭𑀽 𑀧𑀯𑀼𑀘𑁆𑀘𑀢𑀺;

𑀲𑀢𑁆𑀢𑀫𑀻 𑀯𑀺𑀘𑀺𑀓𑀺𑀘𑁆𑀙𑀸 𑀢𑁂, 𑀫𑀓𑁆𑀔𑁄 𑀣𑀫𑁆𑀪𑁄 𑀢𑁂 𑀅𑀝𑁆𑀞𑀫𑁄.

𑀮𑀸𑀪𑁄 𑀲𑀺𑀮𑁄𑀓𑁄 𑀲𑀓𑁆𑀓𑀸𑀭𑁄,

𑀫𑀺𑀘𑁆𑀙𑀸𑀮𑀤𑁆𑀥𑁄 𑀘 𑀬𑁄 𑀬𑀲𑁄;

𑀬𑁄 𑀘𑀢𑁆𑀢𑀸𑀦𑀁 𑀲𑀫𑀼𑀓𑁆𑀓𑀁𑀲𑁂,

𑀧𑀭𑁂 𑀘 𑀅𑀯𑀚𑀸𑀦𑀢𑀺.

𑀏𑀲𑀸 ¶ 𑀦𑀫𑀼𑀘𑀺 𑀢𑁂 𑀲𑁂𑀦𑀸, 𑀓𑀡𑁆𑀳𑀲𑁆𑀲𑀸𑀪𑀺𑀧𑁆𑀧𑀳𑀸𑀭𑀺𑀦𑀻;

𑀦 𑀦𑀁 𑀅𑀲𑀽𑀭𑁄 𑀚𑀺𑀦𑀸𑀢𑀺, 𑀚𑁂𑀢𑁆𑀯𑀸 𑀘 𑀮𑀪𑀢𑁂 𑀲𑀼𑀔’’𑀦𑁆𑀢𑀺. (𑀲𑀼. 𑀦𑀺. 𑁪𑁩𑁮; 𑀫𑀳𑀸𑀦𑀺. 𑁨𑁮; 𑀘𑀽𑀴𑀦𑀺. 𑁪𑁭);

𑀲𑀸 𑀘 𑀢𑁂𑀳𑀺 𑀅𑀭𑀺𑀬𑀲𑀸𑀯𑀓𑁂𑀳𑀺 𑀤𑀺𑀬𑀟𑁆𑀠𑀲𑀳𑀲𑁆𑀲𑀪𑁂𑀤𑀸, 𑀅𑀦𑀦𑁆𑀢𑀪𑁂𑀤𑀸 𑀯𑀸 𑀓𑀺𑀮𑁂𑀲𑀯𑀸𑀳𑀺𑀦𑀻 𑀲𑀢𑀺𑀥𑀫𑁆𑀫𑀯𑀺𑀘𑀬𑀯𑀻𑀭𑀺𑀬𑀲𑀫𑀣𑀸𑀤𑀺𑀕𑀼𑀡𑀧𑀳𑀭𑀡𑀻𑀳𑀺 𑀑𑀥𑀺𑀲𑁄 𑀫𑀣𑀺𑀢𑀸, 𑀯𑀺𑀤𑁆𑀥𑀁𑀲𑀺𑀢𑀸, 𑀯𑀺𑀳𑀢𑀸 𑀘, 𑀢𑀲𑁆𑀫𑀸 ‘‘𑀫𑀸𑀭𑀲𑁂𑀦𑀫𑀣𑀦𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑀺𑀮𑁄𑀣𑀦𑀜𑁆𑀘𑁂𑀢𑁆𑀣 𑀯𑀺𑀤𑁆𑀥𑀁𑀲𑀦𑀁, 𑀯𑀺𑀳𑀦𑀦𑀁 𑀯𑀸. 𑀅𑀧𑀺𑀘 𑀔𑀦𑁆𑀥𑀸𑀪𑀺𑀲𑀗𑁆𑀔𑀸𑀭𑀫𑀘𑁆𑀘𑀼𑀤𑁂𑀯𑀧𑀼𑀢𑁆𑀢𑀫𑀸𑀭𑀸𑀦𑀁 𑀢𑁂𑀲𑀁 𑀲𑀳𑀸𑀬𑀪𑀸𑀯𑀽𑀧𑀕𑀫𑀦𑀢𑀸𑀬 𑀲𑁂𑀦𑀸𑀲𑀗𑁆𑀔𑀸𑀢𑀲𑁆𑀲 𑀓𑀺𑀮𑁂𑀲𑀫𑀸𑀭𑀲𑁆𑀲 𑀘 𑀫𑀣𑀦𑀢𑁄 ‘‘𑀫𑀸𑀭𑀲𑁂𑀦𑀫𑀣𑀦𑀸’’𑀢𑀺𑀧𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀏𑀯𑀜𑁆𑀘 𑀲𑀢𑀺 𑀧𑀜𑁆𑀘𑀫𑀸𑀭𑀦𑀺𑀫𑁆𑀫𑀣𑀦𑀪𑀸𑀯𑁂𑀦 𑀅𑀢𑁆𑀣𑁄 𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀺. 𑀅𑀭𑀺𑀬𑀲𑀸𑀯𑀓𑀸𑀧𑀺 𑀳𑀺 𑀲𑀫𑀼𑀤𑀬𑀧𑁆𑀧𑀳𑀸𑀦𑀧𑀭𑀺𑀜𑁆𑀜𑀸𑀯𑀲𑁂𑀦 𑀔𑀦𑁆𑀥𑀫𑀸𑀭𑀁, 𑀲𑀳𑀸𑀬𑀯𑁂𑀓𑀮𑁆𑀮𑀓𑀭𑀡𑁂𑀦 ¶ 𑀲𑀩𑁆𑀩𑀣𑀸, 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀘 𑀅𑀪𑀺𑀲𑀗𑁆𑀔𑀸𑀭𑀫𑀸𑀭𑀁, 𑀩𑀮𑀯𑀺𑀥𑀫𑀦𑀯𑀺𑀲𑀬𑀸𑀢𑀺𑀓𑁆𑀓𑀫𑀦𑀯𑀲𑁂𑀦 𑀫𑀘𑁆𑀘𑀼𑀫𑀸𑀭𑀁, 𑀤𑁂𑀯𑀧𑀼𑀢𑁆𑀢𑀫𑀸𑀭𑀜𑁆𑀘 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀯𑀲𑁂𑀦 𑀲𑀩𑁆𑀩𑀲𑁄 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀓𑀺𑀮𑁂𑀲𑀫𑀸𑀭𑀁 𑀫𑀣𑁂𑀦𑁆𑀢𑀻𑀢𑀺, 𑀇𑀫𑀺𑀦𑀸 𑀧𑀦 𑀢𑁂𑀲𑀁 𑀑𑀭𑀲𑀧𑀼𑀢𑁆𑀢𑀪𑀸𑀯𑁂 𑀓𑀸𑀭𑀡𑀁, 𑀢𑀻𑀲𑀼 𑀧𑀼𑀢𑁆𑀢𑁂𑀲𑀼 𑀘 𑀅𑀦𑀼𑀚𑀸𑀢𑀢𑀁 𑀤𑀲𑁆𑀲𑁂𑀢𑀺. 𑀫𑀸𑀭𑀲𑁂𑀦𑀫𑀣𑀦𑀢𑀸𑀬 𑀳𑀺 𑀢𑁂 𑀪𑀕𑀯𑀢𑁄 𑀑𑀭𑀲𑀧𑀼𑀢𑁆𑀢𑀸, 𑀅𑀦𑀼𑀚𑀸𑀢𑀸 𑀘𑀸𑀢𑀺.

𑀅𑀝𑁆𑀞𑀦𑁆𑀦𑀦𑁆𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄, 𑀢𑁂𑀦𑀲𑀢𑀺𑀧𑀺 𑀢𑁂𑀲𑀁 𑀢𑀁𑀢𑀁𑀪𑁂𑀤𑁂𑀦 𑀅𑀦𑁂𑀓𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀸𑀪𑁂𑀤𑁂 𑀅𑀭𑀺𑀬𑀪𑀸𑀯𑀓𑀭𑀫𑀕𑁆𑀕𑀨𑀮𑀥𑀫𑁆𑀫𑀪𑁂𑀤𑁂𑀦 𑀇𑀫𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺 𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀺-𑀲𑀤𑁆𑀤𑁄, 𑀅𑀧𑀺-𑀲𑀤𑁆𑀤𑁄 𑀯𑀸 𑀧𑀤𑀮𑀻𑀴𑀸𑀤𑀺𑀦𑀸 𑀓𑀸𑀭𑀡𑁂𑀦 𑀅𑀝𑁆𑀞𑀸𑀦𑁂 𑀧𑀬𑀼𑀢𑁆𑀢𑁄, 𑀲𑁄 ‘‘𑀅𑀭𑀺𑀬𑀲𑀗𑁆𑀖’’𑀦𑁆𑀢𑀺 𑀏𑀢𑁆𑀣 𑀬𑁄𑀚𑁂𑀢𑀩𑁆𑀩𑁄, 𑀢𑁂𑀦 𑀦 𑀓𑁂𑀯𑀮𑀁 𑀩𑀼𑀤𑁆𑀥𑀥𑀫𑁆𑀫𑁂𑀬𑁂𑀯, 𑀅𑀣 𑀔𑁄 𑀅𑀭𑀺𑀬𑀲𑀗𑁆𑀖𑀫𑁆𑀧𑀻𑀢𑀺 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀬𑀤𑀺𑀧𑀺 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀲𑀫𑀼𑀤𑀸𑀬𑁄 𑀦𑀸𑀫 𑀓𑁄𑀘𑀺 𑀦𑀢𑁆𑀣𑀺 𑀅𑀯𑀬𑀯𑀁 𑀉𑀧𑀸𑀤𑀸𑀬 𑀲𑀫𑀼𑀤𑀸𑀬𑀲𑁆𑀲 𑀯𑀢𑁆𑀢𑀩𑁆𑀩𑀢𑁆𑀢𑀸, 𑀅𑀯𑀺𑀜𑁆𑀜𑀸𑀬𑀫𑀸𑀦𑀲𑀫𑀼𑀤𑀸𑀬𑀁 𑀧𑀦 𑀯𑀺𑀜𑁆𑀜𑀸𑀬𑀫𑀸𑀦𑀲𑀫𑀼𑀤𑀸𑀬𑁂𑀦 𑀯𑀺𑀲𑁂𑀲𑀺𑀢𑀼𑀫𑀭𑀳𑀢𑀻𑀢𑀺 𑀆𑀳 ‘‘𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀽𑀳’’𑀦𑁆𑀢𑀺, 𑀏𑀢𑁂𑀦 ‘‘𑀅𑀭𑀺𑀬𑀲𑀗𑁆𑀖’’𑀦𑁆𑀢𑀺 𑀏𑀢𑁆𑀣 𑀦 𑀬𑁂𑀦 𑀓𑁂𑀦𑀘𑀺 𑀲𑀡𑁆𑀞𑀸𑀦𑀸𑀤𑀺𑀦𑀸, 𑀓𑀸𑀬𑀲𑀸𑀫𑀕𑁆𑀕𑀺𑀬𑀸 𑀯𑀸 𑀲𑀫𑀼𑀤𑀸𑀬𑀪𑀸𑀯𑁄, 𑀅𑀧𑀺 𑀢𑀼 𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑀪𑀸𑀯𑁂𑀦𑁂𑀯𑀸𑀢𑀺 𑀯𑀺𑀲𑁂𑀲𑁂𑀢𑀺. 𑀅𑀯𑀬𑀯𑀫𑁂𑀯 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀊𑀳𑀺𑀢𑀩𑁆𑀩𑁄 𑀯𑀺𑀢𑀓𑁆𑀓𑁂𑀢𑀩𑁆𑀩𑁄, 𑀲𑀁𑀊𑀳𑀦𑀺𑀢𑀩𑁆𑀩𑁄 𑀯𑀸 𑀲𑀗𑁆𑀖𑀝𑀺𑀢𑀩𑁆𑀩𑁄𑀢𑀺 𑀲𑀫𑀽𑀳𑁄, 𑀲𑁄𑀬𑁂𑀯 𑀲𑀫𑁄𑀳𑁄 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀤𑀺𑀦𑀸. 𑀤𑁆𑀯𑀺𑀥𑀸𑀧𑀺 𑀳𑀺 𑀧𑀸𑀞𑁄 𑀬𑀼𑀚𑁆𑀚𑀢𑀺. 𑀆𑀭𑀓𑀢𑁆𑀢𑀸 𑀓𑀺𑀮𑁂𑀲𑁂𑀳𑀺, 𑀅𑀦𑀬𑁂 𑀦 𑀇𑀭𑀺𑀬𑀦𑀢𑁄, 𑀅𑀬𑁂 𑀘 𑀇𑀭𑀺𑀬𑀦𑀢𑁄 𑀅𑀭𑀺𑀬𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 ¶ . 𑀅𑀣 𑀯𑀸 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀲𑀭𑀡𑀦𑁆𑀢𑀺 𑀅𑀭𑀡𑀻𑀬𑀢𑁄 𑀉𑀧𑀕𑀦𑁆𑀢𑀩𑁆𑀩𑀢𑁄, 𑀉𑀧𑀕𑀢𑀸𑀦𑀜𑁆𑀘 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄 𑀅𑀭𑀺𑀬𑀸, 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑁄, 𑀲𑀫𑀕𑁆𑀕𑀁 𑀯𑀸 𑀓𑀫𑁆𑀫𑀁 𑀲𑀫𑀼𑀤𑀸𑀬𑀯𑀲𑁂𑀦 𑀲𑀫𑀼𑀧𑀕𑀢𑁄𑀢𑀺 𑀲𑀗𑁆𑀖𑁄, 𑀅𑀭𑀺𑀬𑀸𑀦𑀁 𑀲𑀗𑁆𑀖𑁄, 𑀅𑀭𑀺𑀬𑁄 𑀘 𑀲𑁄 𑀲𑀗𑁆𑀖𑁄 𑀘 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀯𑀸 𑀅𑀭𑀺𑀬𑀲𑀗𑁆𑀖𑁄, 𑀢𑀁 𑀅𑀭𑀺𑀬𑀲𑀗𑁆𑀖𑀁. 𑀪𑀕𑀯𑀢𑁄 𑀅𑀧𑀭𑀪𑀸𑀕𑁂 𑀩𑀼𑀤𑁆𑀥𑀥𑀫𑁆𑀫𑀭𑀢𑀦𑀸𑀦𑀫𑁆𑀧𑀺 𑀲𑀫𑀥𑀺𑀕𑀫𑁄 𑀲𑀗𑁆𑀖𑀭𑀢𑀦𑀸𑀥𑀻𑀦𑁄𑀢𑀺 𑀅𑀭𑀺𑀬𑀲𑀗𑁆𑀖𑀲𑁆𑀲 𑀩𑀳𑀽𑀧𑀓𑀸𑀭𑀢𑀁 𑀤𑀲𑁆𑀲𑁂𑀢𑀼𑀁 𑀇𑀥𑁂𑀯 ‘‘𑀲𑀺𑀭𑀲𑀸 𑀯𑀦𑁆𑀤𑁂’’𑀢𑀺 𑀯𑀼𑀢𑁆𑀢𑀁. 𑀅𑀯𑀲𑁆𑀲𑀜𑁆𑀘𑀸𑀬𑀫𑀢𑁆𑀣𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑁄 𑀯𑀺𑀦𑀬𑀝𑁆𑀞𑀓𑀣𑀸𑀤𑀻𑀲𑀼𑀧𑀺 (𑀧𑀸𑀭𑀸. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀢𑀣𑀸 𑀯𑀼𑀢𑁆𑀢𑀢𑁆𑀢𑀸. 𑀓𑁂𑀘𑀺 𑀧𑀦 𑀧𑀼𑀭𑀺𑀫𑀕𑀸𑀣𑀸𑀲𑀼𑀧𑀺 𑀢𑀁 𑀧𑀤𑀫𑀸𑀦𑁂𑀢𑁆𑀯𑀸 𑀬𑁄𑀚𑁂𑀦𑁆𑀢𑀺, 𑀢𑀤𑀬𑀼𑀢𑁆𑀢𑀫𑁂𑀯 𑀭𑀢𑀦𑀢𑁆𑀢𑀬𑀲𑁆𑀲 𑀅𑀲𑀸𑀥𑀸𑀭𑀡𑀕𑀼𑀡𑀧𑁆𑀧𑀓𑀸𑀲𑀦𑀝𑁆𑀞𑀸𑀦𑀢𑁆𑀢𑀸, 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀲𑁆𑀲 𑀘 𑀲𑀩𑁆𑀩𑁂𑀲𑀫𑁆𑀧𑀺 𑀲𑀁𑀯𑀡𑁆𑀡𑀦𑀸𑀓𑀸𑀭𑀸𑀦𑀫𑀥𑀺𑀧𑁆𑀧𑁂𑀢𑀢𑁆𑀢𑀸𑀢𑀺.

𑀇𑀫𑀸𑀬 𑀧𑀦 𑀕𑀸𑀣𑀸𑀬 𑀅𑀭𑀺𑀬𑀲𑀗𑁆𑀖𑀲𑁆𑀲 𑀧𑀪𑀯𑀲𑀫𑁆𑀧𑀤𑀸 𑀧𑀳𑀸𑀦𑀲𑀫𑁆𑀧𑀤𑀸𑀤𑀬𑁄 𑀅𑀦𑁂𑀓𑁂 𑀕𑀼𑀡𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀓𑀣𑀁? ‘‘𑀲𑀼𑀕𑀢𑀲𑁆𑀲 𑀑𑀭𑀲𑀸𑀦𑀁 𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀳𑀺 𑀏𑀢𑁂𑀦 𑀅𑀭𑀺𑀬𑀲𑀗𑁆𑀖𑀲𑁆𑀲 𑀧𑀪𑀯𑀲𑀫𑁆𑀧𑀤𑀁 𑀤𑀲𑁆𑀲𑁂𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀪𑀯𑀢𑀸𑀤𑀻𑀧𑀦𑀢𑁄. ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺 𑀏𑀢𑁂𑀦 𑀧𑀳𑀸𑀦𑀲𑀫𑁆𑀧𑀤𑀁 𑀲𑀓𑀮𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀤𑀻𑀧𑀦𑀢𑁄. ‘‘𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀽𑀳’’𑀦𑁆𑀢𑀺 𑀏𑀢𑁂𑀦 𑀜𑀸𑀡𑀲𑀫𑁆𑀧𑀤𑀁 𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑀪𑀸𑀯𑀤𑀻𑀧𑀦𑀢𑁄 ¶ . ‘‘𑀅𑀭𑀺𑀬𑀲𑀗𑁆𑀖’’𑀦𑁆𑀢𑀺 𑀏𑀢𑁂𑀦 𑀲𑀪𑀸𑀯𑀲𑀫𑁆𑀧𑀤𑀁 𑀲𑀩𑁆𑀩𑀲𑀗𑁆𑀖𑀸𑀦𑀁 𑀅𑀕𑁆𑀕𑀪𑀸𑀯𑀤𑀻𑀧𑀦𑀢𑁄. 𑀅𑀣 𑀯𑀸 ‘‘𑀲𑀼𑀕𑀢𑀲𑁆𑀲 𑀑𑀭𑀲𑀸𑀦𑀁 𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀅𑀭𑀺𑀬𑀲𑀗𑁆𑀖𑀲𑁆𑀲 𑀯𑀺𑀲𑀼𑀤𑁆𑀥𑀦𑀺𑀲𑁆𑀲𑀬𑀪𑀸𑀯𑀤𑀻𑀧𑀦𑀁. ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺 𑀲𑀫𑁆𑀫𑀸𑀉𑀚𑀼𑀜𑀸𑀬𑀲𑀸𑀫𑀻𑀘𑀺𑀧𑀝𑀺𑀧𑀦𑁆𑀦𑀪𑀸𑀯𑀤𑀻𑀧𑀦𑀁. ‘‘𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀽𑀳’’𑀦𑁆𑀢𑀺 𑀆𑀳𑀼𑀦𑁂𑀬𑁆𑀬𑀸𑀤𑀺𑀪𑀸𑀯𑀤𑀻𑀧𑀦𑀁. ‘‘𑀅𑀭𑀺𑀬𑀲𑀗𑁆𑀖’’𑀦𑁆𑀢𑀺 𑀅𑀦𑀼𑀢𑁆𑀢𑀭𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀪𑀸𑀯𑀤𑀻𑀧𑀦𑀁. 𑀢𑀣𑀸 ‘‘𑀲𑀼𑀕𑀢𑀲𑁆𑀲 𑀑𑀭𑀲𑀸𑀦𑀁 𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀏𑀢𑁂𑀦 𑀅𑀭𑀺𑀬𑀲𑀗𑁆𑀖𑀲𑁆𑀲 𑀮𑁄𑀓𑀼𑀢𑁆𑀢𑀭𑀲𑀭𑀡𑀕𑀫𑀦𑀲𑀩𑁆𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀮𑁄𑀓𑀼𑀢𑁆𑀢𑀭𑀲𑀭𑀡𑀕𑀫𑀦𑁂𑀦 𑀳𑀺 𑀢𑁂 𑀪𑀕𑀯𑀢𑁄 𑀑𑀭𑀲𑀧𑀼𑀢𑁆𑀢𑀸 𑀚𑀸𑀢𑀸. ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’𑀦𑁆𑀢𑀺 𑀏𑀢𑁂𑀦 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀤𑀸𑀲𑀺𑀤𑁆𑀥𑀁 𑀧𑀼𑀩𑁆𑀩𑀪𑀸𑀕𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀓𑀢𑀸𑀪𑀺𑀦𑀻𑀳𑀸𑀭𑀸 𑀳𑀺 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸 𑀫𑀸𑀭𑀁, 𑀫𑀸𑀭𑀲𑁂𑀦𑀁 𑀯𑀸 𑀅𑀪𑀺𑀯𑀺𑀚𑀺𑀦𑀦𑁆𑀢𑀺. ‘‘𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀽𑀳’’𑀦𑁆𑀢𑀺 𑀏𑀢𑁂𑀦 𑀯𑀺𑀤𑁆𑀥𑀲𑁆𑀢𑀯𑀺𑀧𑀓𑁆𑀔𑁂 𑀲𑁂𑀓𑁆𑀔𑀸𑀲𑁂𑀓𑁆𑀔𑀥𑀫𑁆𑀫𑁂 𑀤𑀲𑁆𑀲𑁂𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀫𑀕𑁆𑀕𑀨𑀮𑀥𑀫𑁆𑀫𑀸𑀦𑀁 𑀤𑀲𑁆𑀲𑀺𑀢𑀢𑁆𑀢𑀸. ‘‘𑀅𑀭𑀺𑀬𑀲𑀗𑁆𑀖’’𑀦𑁆𑀢𑀺 𑀏𑀢𑁂𑀦 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀁 𑀤𑀲𑁆𑀲𑁂𑀢𑀺 𑀅𑀦𑀼𑀢𑁆𑀢𑀭𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀪𑀸𑀯𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸. 𑀲𑀭𑀡𑀕𑀫𑀦𑀜𑁆𑀘 𑀲𑀸𑀯𑀓𑀸𑀦𑀁 𑀲𑀩𑁆𑀩𑀕𑀼𑀡𑀲𑁆𑀲 𑀆𑀤𑀺, 𑀲𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀲𑁂𑀓𑁆𑀔𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀫𑀚𑁆𑀛𑁂, 𑀅𑀲𑁂𑀓𑁆𑀔𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 ¶ 𑀧𑀭𑀺𑀬𑁄𑀲𑀸𑀦𑀦𑁆𑀢𑀺𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀗𑁆𑀔𑁂𑀧𑀢𑁄 𑀲𑀩𑁆𑀩𑁂𑀧𑀺 𑀅𑀭𑀺𑀬𑀲𑀗𑁆𑀖𑀕𑀼𑀡𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀻𑀢𑀺.

𑀏𑀯𑀁 𑀕𑀸𑀣𑀸𑀢𑁆𑀢𑀬𑁂𑀦 𑀲𑀗𑁆𑀔𑁂𑀧𑀢𑁄 𑀲𑀓𑀮𑀕𑀼𑀡𑀲𑀁𑀓𑀺𑀢𑁆𑀢𑀦𑀫𑀼𑀔𑁂𑀦 𑀭𑀢𑀦𑀢𑁆𑀢𑀬𑀲𑁆𑀲 𑀧𑀡𑀸𑀫𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀦𑀺𑀧𑀘𑁆𑀘𑀓𑀸𑀭𑀁 𑀬𑀣𑀸𑀥𑀺𑀧𑁆𑀧𑁂𑀢𑀧𑀬𑁄𑀚𑀦𑁂 𑀧𑀭𑀺𑀡𑀸𑀫𑁂𑀦𑁆𑀢𑁄 ‘‘𑀇𑀢𑀺 𑀫𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀦𑀺𑀤𑀲𑁆𑀲𑀦𑁂. 𑀢𑁂𑀦 𑀕𑀸𑀣𑀸𑀢𑁆𑀢𑀬𑁂𑀦 𑀬𑀣𑀸𑀯𑀼𑀢𑁆𑀢𑀦𑀬𑀁 𑀦𑀺𑀤𑀲𑁆𑀲𑁂𑀢𑀺. 𑀫𑁂𑀢𑀺 𑀅𑀢𑁆𑀢𑀸𑀦𑀁 𑀓𑀭𑀡𑀯𑀘𑀦𑁂𑀦 𑀓𑀢𑁆𑀢𑀼𑀪𑀸𑀯𑁂𑀦 𑀦𑀺𑀤𑁆𑀤𑀺𑀲𑀢𑀺. 𑀢𑀲𑁆𑀲 ‘‘𑀬𑀁 𑀧𑀼𑀜𑁆𑀜𑀁 𑀫𑀬𑀸 𑀮𑀤𑁆𑀥’’𑀦𑁆𑀢𑀺 𑀧𑀸𑀞𑀲𑁂𑀲𑁂𑀦 𑀲𑀫𑁆𑀩𑀦𑁆𑀥𑁄, 𑀲𑀫𑁆𑀧𑀤𑀸𑀦𑀦𑀺𑀤𑁆𑀤𑁂𑀲𑁄 𑀯𑀸 𑀏𑀲𑁄, ‘‘𑀅𑀢𑁆𑀣𑀻’’𑀢𑀺 𑀧𑀸𑀞𑀲𑁂𑀲𑁄, 𑀲𑀸𑀫𑀺𑀦𑀺𑀤𑁆𑀤𑁂𑀲𑁄 𑀯𑀸 ‘‘𑀬𑀁 𑀫𑀫 𑀧𑀼𑀜𑁆𑀜𑀁 𑀯𑀦𑁆𑀤𑀦𑀸𑀫𑀬’’𑀦𑁆𑀢𑀺. 𑀧𑀲𑀻𑀤𑀻𑀬𑀢𑁂 𑀧𑀲𑀦𑁆𑀦𑀸, 𑀢𑀸𑀤𑀺𑀲𑀸 𑀫𑀢𑀺 𑀧𑀜𑁆𑀜𑀸, 𑀘𑀺𑀢𑁆𑀢𑀁 𑀯𑀸 𑀬𑀲𑁆𑀲𑀸𑀢𑀺 𑀧𑀲𑀦𑁆𑀦𑀫𑀢𑀺, 𑀅𑀜𑁆𑀜𑀧𑀤𑀮𑀺𑀗𑁆𑀕𑀧𑁆𑀧𑀥𑀸𑀦𑀢𑁆𑀢𑀸 𑀇𑀫𑀲𑁆𑀲 𑀲𑀫𑀸𑀲𑀧𑀤𑀲𑁆𑀲 ‘‘𑀧𑀲𑀦𑁆𑀦𑀫𑀢𑀺𑀦𑁄’’𑀢𑀺 𑀯𑀼𑀢𑁆𑀢𑀁. 𑀭𑀢𑀺𑀁 𑀦𑀬𑀢𑀺, 𑀚𑀦𑁂𑀢𑀺, 𑀯𑀳𑀢𑀻𑀢𑀺 𑀯𑀸 𑀭𑀢𑀦𑀁, 𑀲𑀢𑁆𑀢𑀯𑀺𑀥𑀁, 𑀤𑀲𑀯𑀺𑀥𑀁 𑀯𑀸 𑀭𑀢𑀦𑀁, 𑀢𑀫𑀺𑀯 𑀇𑀫𑀸𑀦𑀻𑀢𑀺 𑀦𑁂𑀭𑀼𑀢𑁆𑀢𑀺𑀓𑀸. 𑀲𑀤𑀺𑀲𑀓𑀧𑁆𑀧𑀦𑀫𑀜𑁆𑀜𑀢𑁆𑀭 𑀧𑀦 𑀬𑀣𑀸𑀯𑀼𑀢𑁆𑀢𑀯𑀘𑀦𑀢𑁆𑀣𑁂𑀦𑁂𑀯 𑀩𑀼𑀤𑁆𑀥𑀸𑀤𑀻𑀦𑀁 𑀭𑀢𑀦𑀪𑀸𑀯𑁄 𑀬𑀼𑀚𑁆𑀚𑀢𑀺. 𑀢𑁂𑀲𑀜𑁆𑀳𑀺 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁫𑁭, 𑁨𑁫𑁫) 𑀬𑀣𑀸𑀪𑀽𑀢𑀕𑀼𑀡𑁂 𑀆𑀯𑀚𑁆𑀚𑀦𑁆𑀢𑀲𑁆𑀲 𑀅𑀫𑀢𑀸𑀥𑀺𑀕𑀫𑀳𑁂𑀢𑀼𑀪𑀽𑀢𑀁 𑀅𑀦𑀧𑁆𑀧𑀓𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸𑀳 𑁋

‘‘𑀬𑀲𑁆𑀫𑀺𑀁 𑀫𑀳𑀸𑀦𑀸𑀫 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲…𑀧𑁂… 𑀦 𑀫𑁄𑀳…𑀧𑁂… 𑀉𑀚𑀼𑀕𑀢𑀫𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺 𑀢𑀣𑀸𑀕𑀢𑀁 𑀆𑀭𑀩𑁆𑀪. 𑀉𑀚𑀼𑀕𑀢𑀘𑀺𑀢𑁆𑀢𑁄 𑀔𑁄 𑀧𑀦 𑀫𑀳𑀸𑀦𑀸𑀫 𑀅𑀭𑀺𑀬𑀲𑀸𑀯𑀓𑁄 ¶ 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚𑀁, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁬.𑁧𑁦; 𑁧𑁧.𑁧𑁧).

𑀘𑀺𑀢𑁆𑀢𑀻𑀓𑀢𑀸𑀤𑀺𑀪𑀸𑀯𑁄 𑀯𑀸 𑀭𑀢𑀦𑀝𑁆𑀞𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀲𑀼 𑁋

‘‘𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀁 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺. (𑀔𑀼. 𑀧𑀸. 𑀅𑀝𑁆𑀞. 𑁬.𑁩; 𑀉𑀤𑀸𑀦. 𑀅𑀝𑁆𑀞. 𑁪𑁭; 𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩; 𑀲𑀼. 𑀦𑀺. 𑁧.𑁨𑁨𑁬; 𑀫𑀳𑀸𑀦𑀺. 𑀅𑀝𑁆𑀞. 𑁧.𑁨𑁨𑁬);

𑀘𑀺𑀢𑁆𑀢𑀻𑀓𑀢𑀪𑀸𑀯𑀸𑀤𑀬𑁄 𑀘 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀲𑀸𑀢𑀺𑀲𑀬𑀢𑁄 𑀩𑀼𑀤𑁆𑀥𑀸𑀤𑀻𑀲𑀼𑀬𑁂𑀯 𑀮𑀩𑁆𑀪𑀦𑁆𑀢𑀻𑀢𑀺. 𑀯𑀺𑀢𑁆𑀣𑀸𑀭𑁄 𑀭𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀔𑀼. 𑀧𑀸. 𑀅𑀝𑁆𑀞. 𑁬.𑁩; 𑀲𑀼. 𑀦𑀺. 𑀅𑀝𑁆𑀞. 𑁧.𑁨𑁨𑁬) 𑀕𑀳𑁂𑀢𑀩𑁆𑀩𑁄. 𑀅𑀬𑀫𑀢𑁆𑀣𑁄 ¶ 𑀧𑀦 𑀦𑀺𑀩𑁆𑀩𑀘𑀦𑀢𑁆𑀣𑀯𑀲𑁂𑀦 𑀦 𑀯𑀼𑀢𑁆𑀢𑁄, 𑀅𑀣 𑀓𑁂𑀦𑀸𑀢𑀺 𑀘𑁂? 𑀮𑁄𑀓𑁂 𑀭𑀢𑀦𑀲𑀫𑁆𑀫𑀢𑀲𑁆𑀲 𑀯𑀢𑁆𑀣𑀼𑀦𑁄 𑀕𑀭𑀼𑀓𑀸𑀢𑀩𑁆𑀩𑀢𑀸𑀤𑀺𑀅𑀢𑁆𑀣𑀯𑀲𑁂𑀦𑀸𑀢𑀺 𑀲𑀤𑁆𑀤𑀯𑀺𑀤𑀽. 𑀲𑀸𑀥𑀽𑀦𑀜𑁆𑀘 𑀭𑀫𑀦𑀢𑁄, 𑀲𑀁𑀲𑀸𑀭𑀡𑁆𑀡𑀯𑀸 𑀘 𑀢𑀭𑀡𑀢𑁄, 𑀲𑀼𑀕𑀢𑀺𑀦𑀺𑀩𑁆𑀩𑀸𑀦𑀜𑁆𑀘 𑀦𑀬𑀦𑀢𑁄 𑀭𑀢𑀦𑀁 𑀢𑀼𑀮𑁆𑀬𑀢𑁆𑀣𑀲𑀫𑀸𑀲𑀯𑀲𑁂𑀦, 𑀅𑀮𑀫𑀢𑀺𑀧𑀧𑀜𑁆𑀘𑁂𑀦. 𑀏𑀓𑀲𑁂𑀲𑀧𑀓𑀧𑁆𑀧𑀦𑁂𑀦, 𑀧𑀼𑀣𑀼𑀯𑀘𑀦𑀦𑀺𑀩𑁆𑀩𑀘𑀦𑁂𑀦 𑀯𑀸 𑀭𑀢𑀦𑀸𑀦𑀺. 𑀢𑀺𑀡𑁆𑀡𑀁 𑀲𑀫𑀽𑀳𑁄, 𑀢𑀻𑀡𑀺 𑀯𑀸 𑀲𑀫𑀸𑀳𑀝𑀸𑀦𑀺, 𑀢𑀬𑁄 𑀯𑀸 𑀅𑀯𑀬𑀯𑀸 𑀅𑀲𑁆𑀲𑀸𑀢𑀺 𑀢𑀬𑀁, 𑀭𑀢𑀦𑀸𑀦𑀫𑁂𑀯 𑀢𑀬𑀁, 𑀦𑀸𑀜𑁆𑀜𑁂𑀲𑀦𑁆𑀢𑀺 𑀭𑀢𑀦𑀢𑁆𑀢𑀬𑀁. 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀧𑀦 𑀲𑀫𑀼𑀤𑀸𑀬𑀲𑁆𑀲 𑀅𑀪𑀸𑀯𑀢𑁄 𑀢𑀻𑀡𑀺 𑀏𑀯 𑀭𑀢𑀦𑀸𑀦𑀺 𑀢𑀣𑀸 𑀯𑀼𑀘𑁆𑀘𑀦𑁆𑀢𑀺, 𑀦 𑀲𑀫𑀼𑀤𑀸𑀬𑀫𑀢𑁆𑀢𑀁, 𑀲𑀫𑀼𑀤𑀸𑀬𑀸𑀧𑁂𑀓𑁆𑀔𑀸𑀬 𑀧𑀦 𑀏𑀓𑀯𑀘𑀦𑀁 𑀓𑀢𑀁. 𑀯𑀦𑁆𑀤𑀻𑀬𑀢𑁂 𑀯𑀦𑁆𑀤𑀦𑀸, 𑀲𑀸𑀯 𑀯𑀦𑁆𑀤𑀦𑀸𑀫𑀬𑀁 𑀬𑀣𑀸 ‘‘𑀤𑀸𑀦𑀫𑀬𑀁 𑀲𑀻𑀮𑀫𑀬’’𑀦𑁆𑀢𑀺 (𑀤𑀻. 𑀦𑀺. 𑁩.𑁩𑁦𑁫; 𑀇𑀢𑀺𑀯𑀼. 𑁬𑁦; 𑀦𑁂𑀢𑁆𑀢𑀺. 𑁩𑁩). 𑀯𑀦𑁆𑀤𑀦𑀸 𑀘𑁂𑀢𑁆𑀣 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑀦𑀺𑀦𑁆𑀦𑀢𑀸, 𑀣𑁄𑀫𑀦𑀸 𑀯𑀸. 𑀅𑀧𑀺𑀘 𑀢𑀲𑁆𑀲𑀸 𑀘𑁂𑀢𑀦𑀸𑀬 𑀲𑀳𑀚𑀸𑀢𑀸𑀤𑁄𑀧𑀓𑀸𑀭𑁂𑀓𑁄 𑀲𑀤𑁆𑀥𑀸𑀧𑀜𑁆𑀜𑀸𑀲𑀢𑀺𑀯𑀻𑀭𑀺𑀬𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁄 𑀯𑀦𑁆𑀤𑀦𑀸, 𑀢𑀸𑀬 𑀧𑀓𑀢𑀦𑁆𑀢𑀺 𑀯𑀦𑁆𑀤𑀦𑀸𑀫𑀬𑀁 𑀬𑀣𑀸 ‘‘𑀲𑁄𑀯𑀡𑁆𑀡𑀫𑀬𑀁 𑀭𑀽𑀧𑀺𑀬𑀫𑀬’’𑀦𑁆𑀢𑀺, 𑀅𑀢𑁆𑀣𑀢𑁄 𑀧𑀦 𑀬𑀣𑀸𑀯𑀼𑀢𑁆𑀢𑀘𑁂𑀢𑀦𑀸𑀯. 𑀭𑀢𑀦𑀢𑁆𑀢𑀬𑁂, 𑀭𑀢𑀦𑀢𑁆𑀢𑀬𑀲𑁆𑀲 𑀯𑀸 𑀯𑀦𑁆𑀤𑀦𑀸𑀫𑀬𑀁 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸𑀫𑀬𑀁. 𑀧𑀼𑀚𑁆𑀚𑀪𑀯𑀨𑀮𑀦𑀺𑀩𑁆𑀩𑀢𑁆𑀢𑀦𑀢𑁄 𑀧𑀼𑀜𑁆𑀜𑀁 𑀦𑀺𑀭𑀼𑀢𑁆𑀢𑀺𑀦𑀬𑁂𑀦, 𑀅𑀢𑁆𑀢𑀦𑁄 𑀓𑀸𑀭𑀓𑀁, 𑀲𑀦𑁆𑀢𑀸𑀦𑀁 𑀯𑀸 𑀧𑀼𑀦𑀸𑀢𑀺 𑀯𑀺𑀲𑁄𑀥𑁂𑀢𑀻𑀢𑀺 𑀧𑀼𑀜𑁆𑀜𑀁, 𑀲𑀓𑀫𑁆𑀫𑀓𑀢𑁆𑀢𑀸 𑀥𑀸𑀢𑀼𑀲𑁆𑀲 𑀓𑀸𑀭𑀺𑀢𑀯𑀲𑁂𑀦 𑀅𑀢𑁆𑀣𑀯𑀺𑀯𑀭𑀡𑀁 𑀮𑀩𑁆𑀪𑀢𑀺, 𑀲𑀤𑁆𑀤𑀦𑀺𑀧𑁆𑀨𑀢𑁆𑀢𑀺 𑀧𑀦 𑀲𑀼𑀤𑁆𑀥𑀯𑀲𑁂𑀦𑁂𑀯𑀸𑀢𑀺 𑀲𑀤𑁆𑀤𑀯𑀺𑀤𑀽.

𑀢𑀁𑀢𑀁𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀩𑀦𑁆𑀥𑀦𑀯𑀲𑁂𑀦 𑀲𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀅𑀦𑁆𑀢𑀭𑁂 𑀯𑁂𑀫𑀚𑁆𑀛𑁂 𑀏𑀢𑀺 𑀆𑀕𑀘𑁆𑀙𑀢𑀻𑀢𑀺 𑀅𑀦𑁆𑀢𑀭𑀸𑀬𑁄, 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀦𑀢𑁆𑀣𑁄. 𑀧𑀡𑀸𑀫𑀧𑀬𑁄𑀚𑀦𑁂 𑀯𑀼𑀢𑁆𑀢𑀯𑀺𑀥𑀺𑀦𑀸 𑀲𑀼𑀝𑁆𑀞𑀼 𑀯𑀺𑀳𑀢𑁄 𑀯𑀺𑀤𑁆𑀥𑀲𑁆𑀢𑁄 𑀅𑀦𑁆𑀢𑀭𑀸𑀬𑁄 𑀅𑀲𑁆𑀲𑀸𑀢𑀺 𑀲𑀼𑀯𑀺𑀳𑀢𑀦𑁆𑀢𑀭𑀸𑀬𑁄. 𑀯𑀺𑀳𑀦𑀦𑀜𑁆𑀘𑁂𑀢𑁆𑀣 𑀢𑀤𑀼𑀧𑁆𑀧𑀸𑀤𑀓𑀳𑁂𑀢𑀼𑀧𑀭𑀺𑀳𑀭𑀡𑀯𑀲𑁂𑀦 𑀢𑁂𑀲𑀁 𑀅𑀦𑁆𑀢𑀭𑀸𑀬𑀸𑀦𑀫𑀦𑀼𑀧𑁆𑀧𑀢𑁆𑀢𑀺𑀓𑀭𑀡𑀦𑁆𑀢𑀺 ¶ 𑀤𑀝𑁆𑀞𑀩𑁆𑀩𑀁. 𑀳𑀼𑀢𑁆𑀯𑀸𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸, 𑀢𑀲𑁆𑀲 ‘‘𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀬𑀁-𑀲𑀤𑁆𑀤𑁂𑀦 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀦𑁆𑀤𑀦𑀸𑀫𑀬𑀧𑀼𑀜𑁆𑀜𑀲𑁆𑀲. 𑀆𑀦𑀼𑀪𑀸𑀯𑁂𑀦𑀸𑀢𑀺 𑀩𑀮𑁂𑀦.

‘‘𑀢𑁂𑀚𑁄 𑀉𑀲𑁆𑀲𑀸𑀳𑀫𑀦𑁆𑀢𑀸 𑀘, 𑀧𑀪𑀽 𑀲𑀢𑁆𑀢𑀻𑀢𑀺 𑀧𑀜𑁆𑀘𑀺𑀫𑁂;

‘𑀆𑀦𑀼𑀪𑀸𑀯𑁄’𑀢𑀺 𑀯𑀼𑀘𑁆𑀘𑀦𑁆𑀢𑀺, ‘𑀧𑀪𑀸𑀯𑁄’𑀢𑀺 𑀘 𑀢𑁂 𑀯𑀤𑁂’’𑀢𑀺. 𑁋

𑀯𑀼𑀢𑁆𑀢𑁂𑀲𑀼 𑀳𑀺 𑀅𑀢𑁆𑀣𑁂𑀲𑀼 𑀇𑀥 𑀲𑀢𑁆𑀢𑀺𑀬𑀁 𑀯𑀢𑁆𑀢𑀢𑀺. 𑀅𑀦𑀼 𑀧𑀼𑀦𑀧𑁆𑀧𑀼𑀦𑀁 𑀢𑀁𑀲𑀫𑀗𑁆𑀕𑀺𑀁 𑀪𑀸𑀯𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀳𑀺 𑀅𑀦𑀼𑀪𑀸𑀯𑁄, 𑀲𑁄𑀬𑁂𑀯 𑀆𑀦𑀼𑀪𑀸𑀯𑁄𑀢𑀺 𑀉𑀤𑀸𑀦𑀝𑁆𑀞𑀓𑀣𑀸𑀬𑀁 ¶ , 𑀅𑀢𑁆𑀣𑀢𑁄 𑀧𑀦 𑀬𑀣𑀸𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀓𑀲𑁆𑀲 𑀧𑀼𑀭𑀺𑀫𑀓𑀫𑁆𑀫𑀲𑁆𑀲 𑀩𑀮𑀸𑀦𑀼𑀧𑁆𑀧𑀤𑀸𑀦𑀯𑀲𑀲𑀗𑁆𑀔𑀸𑀢𑀸 𑀯𑀦𑁆𑀤𑀦𑀸𑀫𑀬𑀧𑀼𑀜𑁆𑀜𑀲𑁆𑀲 𑀲𑀢𑁆𑀢𑀺𑀬𑁂𑀯, 𑀲𑀸 𑀘 𑀲𑀼𑀯𑀺𑀳𑀢𑀦𑁆𑀢𑀭𑀸𑀬𑀢𑀸𑀬 𑀓𑀭𑀡𑀁, 𑀳𑁂𑀢𑀼 𑀯𑀸 𑀲𑀫𑁆𑀪𑀯𑀢𑀺.

𑀏𑀢𑁆𑀣 𑀧𑀦 ‘‘𑀧𑀲𑀦𑁆𑀦𑀫𑀢𑀺𑀦𑁄’’𑀢𑀺 𑀏𑀢𑁂𑀦 𑀅𑀢𑁆𑀢𑀦𑁄 𑀧𑀲𑀸𑀤𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. ‘‘𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸𑀫𑀬’’𑀦𑁆𑀢𑀺 𑀏𑀢𑁂𑀦 𑀭𑀢𑀦𑀢𑁆𑀢𑀬𑀲𑁆𑀲 𑀔𑁂𑀢𑁆𑀢𑀪𑀸𑀯𑀲𑀫𑁆𑀧𑀢𑁆𑀢𑀺𑀁, 𑀢𑀢𑁄 𑀘 𑀢𑀲𑁆𑀲 𑀧𑀼𑀜𑁆𑀜𑀲𑁆𑀲 𑀅𑀢𑁆𑀢𑀦𑁄 𑀧𑀲𑀸𑀤𑀲𑀫𑁆𑀧𑀢𑁆𑀢𑀺𑀬𑀸, 𑀭𑀢𑀦𑀢𑁆𑀢𑀬𑀲𑁆𑀲 𑀘 𑀔𑁂𑀢𑁆𑀢𑀪𑀸𑀯𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀤𑁆𑀯𑀻𑀳𑀺 𑀅𑀗𑁆𑀕𑁂𑀳𑀺 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀬 𑀉𑀧𑀖𑀸𑀢𑀓𑀉𑀧𑀤𑁆𑀤𑀯𑀸𑀦𑀁 𑀯𑀺𑀳𑀦𑀦𑁂 𑀲𑀫𑀢𑁆𑀣𑀢𑀁 𑀤𑀻𑀧𑁂𑀢𑀺. 𑀘𑀢𑀼𑀭𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀤𑀸𑀦𑀘𑁂𑀢𑀦𑀸 𑀯𑀺𑀬 𑀳𑀺 𑀤𑁆𑀯𑀬𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀧𑀡𑀸𑀫𑀘𑁂𑀢𑀦𑀸𑀧𑀺 𑀅𑀦𑁆𑀢𑀭𑀸𑀬𑀯𑀺𑀳𑀦𑀦𑁂𑀦 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀢𑀺.

𑀏𑀯𑀁 𑀭𑀢𑀦𑀢𑁆𑀢𑀬𑀲𑁆𑀲 𑀦𑀺𑀧𑀘𑁆𑀘𑀓𑀸𑀭𑀓𑀭𑀡𑁂 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀲𑀸 𑀥𑀫𑁆𑀫𑀤𑁂𑀲𑀦𑀸𑀬 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀢𑀼𑀓𑀸𑀫𑁄, 𑀢𑀤𑀧𑀺 𑀲𑀁𑀯𑀡𑁆𑀡𑁂𑀢𑀩𑁆𑀩𑀥𑀫𑁆𑀫𑀪𑀸𑀯𑁂𑀦 𑀤𑀲𑁆𑀲𑁂𑀢𑁆𑀯𑀸 𑀕𑀼𑀡𑀸𑀪𑀺𑀢𑁆𑀣𑀯𑀦𑀯𑀺𑀲𑁂𑀲𑁂𑀦 𑀅𑀪𑀺𑀢𑁆𑀣𑀯𑁂𑀢𑀼𑀁 ‘‘𑀤𑀻𑀖𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀅𑀬𑀜𑁆𑀳𑀺 𑀆𑀘𑀭𑀺𑀬𑀲𑁆𑀲 𑀧𑀓𑀢𑀺, 𑀬𑀤𑀺𑀤𑀁 𑀢𑀁𑀢𑀁𑀲𑀁𑀯𑀡𑁆𑀡𑀦𑀸𑀲𑀼 𑀆𑀤𑀺𑀢𑁄 𑀢𑀲𑁆𑀲 𑀢𑀲𑁆𑀲 𑀲𑀁𑀯𑀡𑁆𑀡𑁂𑀢𑀩𑁆𑀩𑀥𑀫𑁆𑀫𑀲𑁆𑀲 𑀯𑀺𑀲𑁂𑀲𑀕𑀼𑀡𑀓𑀺𑀢𑁆𑀢𑀦𑁂𑀦 𑀣𑁄𑀫𑀦𑀸. 𑀢𑀣𑀸 𑀳𑀺 𑀢𑁂𑀲𑀼 𑀢𑁂𑀲𑀼 𑀧𑀧𑀜𑁆𑀘𑀲𑀽𑀤𑀦𑀻𑀲𑀸𑀭𑀢𑁆𑀣𑀧𑀓𑀸𑀲𑀦𑀻𑀫𑀦𑁄𑀭𑀣𑀧𑀽𑀭𑀡𑀻𑀅𑀝𑁆𑀞𑀲𑀸𑀮𑀺𑀦𑀻𑀆𑀤𑀻𑀲𑀼 𑀬𑀣𑀸𑀓𑁆𑀓𑀫𑀁 ‘‘𑀧𑀭𑀯𑀸𑀤𑀫𑀣𑀦𑀲𑁆𑀲, 𑀜𑀸𑀡𑀧𑁆𑀧𑀪𑁂𑀤𑀚𑀦𑀦𑀲𑁆𑀲, 𑀥𑀫𑁆𑀫𑀓𑀣𑀺𑀓𑀧𑀼𑀗𑁆𑀕𑀯𑀸𑀦𑀁 𑀯𑀺𑀘𑀺𑀢𑁆𑀢𑀧𑀝𑀺𑀪𑀸𑀦𑀚𑀦𑀦𑀲𑁆𑀲,

𑀢𑀲𑁆𑀲 𑀕𑀫𑁆𑀪𑀻𑀭𑀜𑀸𑀡𑁂𑀳𑀺, 𑀑𑀕𑀸𑀴𑁆𑀳𑀲𑁆𑀲 𑀅𑀪𑀺𑀡𑁆𑀳𑀲𑁄;

𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀲𑁆𑀲, 𑀅𑀪𑀺𑀥𑀫𑁆𑀫𑀲𑁆𑀲 𑀆𑀤𑀺𑀢𑁄’’𑀢𑀺. 𑀆𑀤𑀺𑀦𑀸 𑁋

𑀣𑁄𑀫𑀦𑀸 𑀓𑀢𑀸. 𑀢𑀢𑁆𑀣 𑀤𑀻𑀖𑀲𑁆𑀲𑀸𑀢𑀺 𑀤𑀻𑀖𑀦𑀸𑀫𑀓𑀲𑁆𑀲. 𑀤𑀻𑀖𑀲𑀼𑀢𑁆𑀢𑀗𑁆𑀓𑀺𑀢𑀲𑁆𑀲𑀸𑀢𑀺 𑀤𑀻𑀖𑁂𑀳𑀺 𑀅𑀪𑀺𑀆𑀬𑀢𑀯𑀘𑀦𑀧𑁆𑀧𑀩𑀦𑁆𑀥𑀯𑀦𑁆𑀢𑁂𑀳𑀺 𑀲𑀼𑀢𑁆𑀢𑁂𑀳𑀺 𑀮𑀓𑁆𑀔𑀺𑀢𑀲𑁆𑀲, 𑀅𑀦𑁂𑀦 ‘‘𑀤𑀻𑀖𑁄’’𑀢𑀺 𑀅𑀬𑀁 𑀇𑀫𑀲𑁆𑀲 𑀆𑀕𑀫𑀲𑁆𑀲 ¶ 𑀅𑀢𑁆𑀣𑀸𑀦𑀼𑀕𑀢𑀸 𑀲𑀫𑀜𑁆𑀜𑀸𑀢𑀺 𑀤𑀲𑁆𑀲𑁂𑀢𑀺. 𑀦𑀦𑀼 𑀘 𑀲𑀼𑀢𑁆𑀢𑀸𑀦𑀺𑀬𑁂𑀯 𑀆𑀕𑀫𑁄, 𑀓𑀣𑀁 𑀲𑁄 𑀢𑁂𑀳𑀺 𑀅𑀗𑁆𑀓𑀻𑀬𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁 𑀧𑀭𑀫𑀢𑁆𑀣𑀢𑁄, 𑀧𑀜𑁆𑀜𑀢𑁆𑀢𑀺𑀢𑁄 𑀧𑀦 𑀲𑀼𑀢𑁆𑀢𑀸𑀦𑀺 𑀉𑀧𑀸𑀤𑀸𑀬 𑀆𑀕𑀫𑀪𑀸𑀯𑀲𑁆𑀲 𑀧𑀜𑁆𑀜𑀢𑁆𑀢𑀢𑁆𑀢𑀸 𑀅𑀯𑀬𑀯𑁂𑀳𑀺 𑀲𑀼𑀢𑁆𑀢𑁂𑀳𑀺 𑀅𑀯𑀬𑀯𑀻𑀪𑀽𑀢𑁄 𑀆𑀕𑀫𑁄 𑀅𑀗𑁆𑀓𑀻𑀬𑀢𑀺. 𑀬𑀣𑁂𑀯 𑀳𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑀼𑀤𑀸𑀬𑁂 ‘‘𑀲𑀼𑀢𑁆𑀢’’𑀦𑁆𑀢𑀺 𑀯𑁄𑀳𑀸𑀭𑁄, 𑀏𑀯𑀁 𑀲𑀼𑀢𑁆𑀢𑀲𑀫𑀼𑀤𑀸𑀬𑁂 𑀆𑀕𑀫𑀯𑁄𑀳𑀸𑀭𑁄𑀢𑀺. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀦𑀺𑀧𑀼𑀡𑀢𑁆𑀣𑀪𑀸𑀯𑀢𑁄 𑀦𑀺𑀧𑀼𑀡𑀲𑁆𑀲. 𑀆𑀕𑀘𑁆𑀙𑀦𑁆𑀢𑀺 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸𑀤𑀬𑁄 𑀏𑀢𑁆𑀣, 𑀏𑀢𑁂𑀦, 𑀏𑀢𑀲𑁆𑀫𑀸𑀢𑀺 𑀯𑀸 𑀆𑀕𑀫𑁄, 𑀉𑀢𑁆𑀢𑀫𑀝𑁆𑀞𑁂𑀦, 𑀧𑀢𑁆𑀣𑀦𑀻𑀬𑀝𑁆𑀞𑁂𑀦 𑀘 𑀲𑁄 𑀯𑀭𑁄𑀢𑀺 ¶ 𑀆𑀕𑀫𑀯𑀭𑁄. 𑀅𑀧𑀺𑀘 𑀆𑀕𑀫𑀲𑀫𑁆𑀫𑀢𑁂𑀳𑀺 𑀩𑀸𑀳𑀺𑀭𑀓𑀧𑀯𑁂𑀤𑀺𑀢𑁂𑀳𑀺 𑀪𑀸𑀭𑀢𑀧𑀼𑀭𑀸𑀡𑀓𑀣𑀸𑀦𑀭𑀲𑀻𑀳𑀧𑀼𑀭𑀸𑀡𑀓𑀣𑀸𑀤𑀻𑀳𑀺 𑀯𑀭𑁄𑀢𑀺𑀧𑀺 𑀆𑀕𑀫𑀯𑀭𑁄, 𑀢𑀲𑁆𑀲. 𑀩𑀼𑀤𑁆𑀥𑀸𑀦𑀫𑀦𑀼𑀩𑀼𑀤𑁆𑀥𑀸 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀸, 𑀩𑀼𑀤𑁆𑀥𑀸𑀦𑀁 𑀲𑀘𑁆𑀘𑀧𑀝𑀺𑀯𑁂𑀥𑀁 𑀅𑀦𑀼𑀕𑀫𑁆𑀫 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑀸 𑀅𑀕𑁆𑀕𑀲𑀸𑀯𑀓𑀸𑀤𑀬𑁄 𑀅𑀭𑀺𑀬𑀸, 𑀢𑁂𑀳𑀺 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀯𑀲𑁂𑀦, 𑀕𑀼𑀡𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀘 𑀲𑀁𑀯𑀡𑁆𑀡𑀺𑀢𑁄𑀢𑀺 𑀢𑀣𑀸. 𑀅𑀣 𑀯𑀸 𑀩𑀼𑀤𑁆𑀥𑀸 𑀘 𑀅𑀦𑀼𑀩𑀼𑀤𑁆𑀥𑀸 𑀘, 𑀢𑁂𑀳𑀺 𑀲𑀁𑀯𑀡𑁆𑀡𑀺𑀢𑁄 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀢𑀣𑀸, 𑀢𑀲𑁆𑀲. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑁂𑀯 𑀳𑀺 𑀢𑀺𑀡𑁆𑀡𑀫𑁆𑀧𑀺 𑀧𑀺𑀝𑀓𑀸𑀦𑀁 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄 𑀪𑀸𑀲𑀺𑀢𑁄, 𑀢𑀢𑁄 𑀧𑀭𑀁 𑀲𑀗𑁆𑀕𑀸𑀬𑀦𑀸𑀤𑀺𑀯𑀲𑁂𑀦 𑀲𑀸𑀯𑀓𑁂𑀳𑀻𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺. 𑀯𑀼𑀢𑁆𑀢𑀜𑁆𑀘 𑀫𑀚𑁆𑀛𑀺𑀫𑀸𑀕𑀫𑀝𑁆𑀞𑀓𑀣𑀸𑀬 𑀉𑀧𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 ‘‘𑀯𑁂𑀬𑁆𑀬𑀸𑀓𑀭𑀡𑀲𑁆𑀲𑀸𑀢𑀺 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀅𑀢𑁆𑀣𑀤𑀻𑀧𑀓𑀲𑁆𑀲. 𑀪𑀕𑀯𑀢𑀸 𑀳𑀺 𑀅𑀩𑁆𑀬𑀸𑀓𑀢𑀁 𑀢𑀦𑁆𑀢𑀺𑀧𑀤𑀁 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑁂𑀲𑀁𑀬𑁂𑀯 𑀅𑀢𑁆𑀣𑁄 𑀓𑀣𑀺𑀢𑁄’’𑀢𑀺 (𑀫. 𑀦𑀺. 𑀅𑀝𑁆𑀞. 𑁩.𑁭𑁬). 𑀲𑀤𑁆𑀥𑀸𑀯𑀳𑀕𑀼𑀡𑀲𑁆𑀲𑀸𑀢𑀺 𑀩𑀼𑀤𑁆𑀥𑀸𑀤𑀻𑀲𑀼 𑀧𑀲𑀸𑀤𑀸𑀯𑀳𑀕𑀼𑀡𑀲𑁆𑀲. 𑀦𑀦𑀼 𑀘 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀢𑁂𑀧𑀺𑀝𑀓𑀁 𑀲𑀤𑁆𑀥𑀸𑀯𑀳𑀕𑀼𑀡𑀫𑁂𑀯, 𑀅𑀣 𑀓𑀲𑁆𑀫𑀸 𑀅𑀬𑀫𑀜𑁆𑀜𑀲𑀸𑀥𑀸𑀭𑀡𑀕𑀼𑀡𑁂𑀦 𑀣𑁄𑀫𑀺𑀢𑁄𑀢𑀺? 𑀲𑀸𑀢𑀺𑀲𑀬𑀢𑁄 𑀇𑀫𑀲𑁆𑀲 𑀢𑀕𑁆𑀕𑀼𑀡𑀲𑀫𑁆𑀧𑀦𑁆𑀦𑀢𑁆𑀢𑀸. 𑀅𑀬𑀜𑁆𑀳𑀺 𑀆𑀕𑀫𑁄 𑀩𑁆𑀭𑀳𑁆𑀫𑀚𑀸𑀮𑀸𑀤𑀻𑀲𑀼 𑀲𑀻𑀮𑀤𑀺𑀝𑁆𑀞𑀸𑀤𑀻𑀦𑀁 𑀅𑀦𑀯𑀲𑁂𑀲𑀦𑀺𑀤𑁆𑀤𑁂𑀲𑀸𑀤𑀺𑀯𑀲𑁂𑀦, 𑀫𑀳𑀸𑀧𑀤𑀸𑀦𑀸𑀤𑀻𑀲𑀼 (𑀤𑀻. 𑀦𑀺. 𑁨.𑁩) 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀫𑁆𑀧𑀺 𑀕𑀼𑀡𑀦𑀺𑀤𑁆𑀤𑁂𑀲𑀸𑀤𑀺𑀯𑀲𑁂𑀦, 𑀧𑀸𑀣𑀺𑀓𑀲𑀼𑀢𑁆𑀢𑀸𑀤𑀻𑀲𑀼 (𑀤𑀻. 𑀦𑀺. 𑁩.𑁧.𑁪) 𑀢𑀺𑀢𑁆𑀣𑀺𑀬𑁂 𑀫𑀤𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀲𑀻𑀳𑀦𑀸𑀤𑀦𑀤𑀦𑀸𑀤𑀺𑀯𑀲𑁂𑀦, 𑀅𑀦𑀼𑀢𑁆𑀢𑀭𑀺𑀬𑀲𑀼𑀢𑁆𑀢𑀸𑀤𑀻𑀲𑀼 𑀯𑀺𑀲𑁂𑀲𑀢𑁄 𑀩𑀼𑀤𑁆𑀥𑀕𑀼𑀡𑀯𑀺𑀪𑀸𑀯𑀦𑁂𑀦 𑀭𑀢𑀦𑀢𑁆𑀢𑀬𑁂 𑀲𑀸𑀢𑀺𑀲𑀬𑀁 𑀲𑀤𑁆𑀥𑀁 𑀆𑀯𑀳𑀢𑀻𑀢𑀺.

𑀏𑀯𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀥𑀫𑁆𑀫𑀲𑁆𑀲 𑀅𑀪𑀺𑀢𑁆𑀣𑀯𑀦𑀫𑁆𑀧𑀺 𑀓𑀢𑁆𑀯𑀸 𑀇𑀤𑀸𑀦𑀺 𑀲𑀁𑀯𑀡𑁆𑀡𑀦𑀸𑀬 𑀲𑀫𑁆𑀧𑀢𑀺 𑀯𑀓𑁆𑀔𑀫𑀸𑀦𑀸𑀬 𑀆𑀕𑀫𑀦𑀯𑀺𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀣𑀧𑁆𑀧𑀓𑀸𑀲𑀦𑀢𑁆𑀣’’𑀦𑁆𑀢𑀺𑀆𑀤𑀺𑀫𑀸𑀳. 𑀇𑀫𑀸𑀬 𑀳𑀺 𑀕𑀸𑀣𑀸𑀬 𑀲𑀗𑁆𑀕𑀻𑀢𑀺𑀢𑁆𑀢𑀬𑀫𑀸𑀭𑀼𑀴𑁆𑀳𑀤𑀻𑀖𑀸𑀕𑀫𑀝𑁆𑀞𑀓𑀣𑀸𑀢𑁄𑀯 𑀲𑀻𑀳𑀴𑀪𑀸𑀲𑀸𑀫𑀢𑁆𑀢𑀁 𑀯𑀺𑀦𑀸 𑀅𑀬𑀁 𑀯𑀓𑁆𑀔𑀫𑀸𑀦𑀲𑀁𑀯𑀡𑁆𑀡𑀦𑀸 𑀆𑀕𑀢𑀸, 𑀦𑀸𑀜𑁆𑀜𑀢𑁄, 𑀢𑀤𑁂𑀯 𑀓𑀸𑀭𑀡𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀸, 𑀦𑀸𑀜𑁆𑀜𑀦𑁆𑀢𑀺 𑀅𑀢𑁆𑀢𑀦𑁄 𑀲𑀁𑀯𑀡𑁆𑀡𑀦𑀸𑀬 𑀆𑀕𑀫𑀦𑀯𑀺𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀺. 𑀅𑀧𑀭𑁄 𑀦𑀬𑁄 𑁋 𑀧𑀭𑀫𑀦𑀺𑀧𑀼𑀡𑀕𑀫𑁆𑀪𑀻𑀭𑀁 𑀩𑀼𑀤𑁆𑀥𑀯𑀺𑀲𑀬𑀫𑀸𑀕𑀫𑀯𑀭𑀁 𑀅𑀢𑁆𑀢𑀦𑁄 𑀩𑀮𑁂𑀦𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫𑀻𑀢𑀺 𑀅𑀜𑁆𑀜𑁂𑀳𑀺 𑀯𑀢𑁆𑀢𑀼𑀫𑁆𑀧𑀺 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀲𑀁𑀯𑀡𑁆𑀡𑀦𑀸𑀦𑀺𑀲𑁆𑀲𑀬𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀢𑁆𑀣𑀧𑁆𑀧𑀓𑀸𑀲𑀦𑀢𑁆𑀣’’𑀦𑁆𑀢𑀺𑀆𑀤𑀺. 𑀇𑀫𑀸𑀬 𑀳𑀺 𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀼𑀪𑀸𑀯𑀁 𑀦𑀺𑀲𑁆𑀲𑀸𑀬𑁂𑀯 𑀢𑀲𑁆𑀲 𑀅𑀢𑁆𑀣𑀁 𑀯𑀡𑁆𑀡𑀬𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀢𑀦𑁄 𑀲𑀁𑀯𑀡𑁆𑀡𑀦𑀸𑀦𑀺𑀲𑁆𑀲𑀬𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 ‘‘𑀅𑀢𑁆𑀣𑀧𑁆𑀧𑀓𑀸𑀲𑀦𑀢𑁆𑀣’’𑀦𑁆𑀢𑀺 𑀧𑀸𑀞𑀢𑁆𑀣𑁄, 𑀲𑀪𑀸𑀯𑀢𑁆𑀣𑁄, 𑀜𑁂𑀬𑁆𑀬𑀢𑁆𑀣𑁄, 𑀧𑀸𑀞𑀸𑀦𑀼𑀭𑀽𑀧𑀢𑁆𑀣𑁄, 𑀢𑀤𑀦𑀼𑀭𑀽𑀧𑀢𑁆𑀣𑁄, 𑀲𑀸𑀯𑀲𑁂𑀲𑀢𑁆𑀣𑁄, 𑀦𑀺𑀯𑀭𑀲𑁂𑀲𑀢𑁆𑀣𑁄, 𑀦𑀻𑀢𑀢𑁆𑀣𑁄, 𑀦𑁂𑀬𑁆𑀬𑀢𑁆𑀣𑁄𑀢𑀺𑀆𑀤𑀺𑀦𑀸 ¶ ¶ 𑀅𑀦𑁂𑀓𑀧𑁆𑀧𑀓𑀸𑀭𑀲𑁆𑀲 𑀅𑀢𑁆𑀣𑀲𑁆𑀲 𑀧𑀓𑀸𑀲𑀦𑀢𑁆𑀣𑀸𑀬, 𑀧𑀓𑀸𑀲𑀦𑀸𑀬 𑀯𑀸. 𑀕𑀸𑀣𑀸𑀩𑀦𑁆𑀥𑀲𑀫𑁆𑀧𑀢𑁆𑀢𑀺𑀬𑀸 𑀤𑁆𑀯𑀺𑀪𑀸𑀯𑁄. 𑀅𑀢𑁆𑀣𑁄 𑀓𑀣𑀻𑀬𑀢𑀺 𑀏𑀢𑀸𑀬𑀸𑀢𑀺 𑀅𑀢𑁆𑀣𑀓𑀣𑀸, 𑀲𑀸𑀬𑁂𑀯 𑀅𑀝𑁆𑀞𑀓𑀣𑀸 𑀢𑁆𑀣-𑀓𑀸𑀭𑀲𑁆𑀲 𑀝𑁆𑀞-𑀓𑀸𑀭𑀁 𑀓𑀢𑁆𑀯𑀸 𑀬𑀣𑀸 ‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄’’𑀢𑀺 (𑀧𑀝𑀺. 𑀫. 𑁧.𑁧𑁭; 𑁨.𑁮), 𑀅𑀬𑀜𑁆𑀘 𑀲𑀲𑀜𑁆𑀜𑁄𑀕𑀯𑀺𑀥𑀺 𑀅𑀭𑀺𑀬𑀸𑀚𑀸𑀢𑀺𑀪𑀸𑀯𑀢𑁄. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸𑀧𑀺 𑀳𑀺 ‘‘𑀢𑀣𑀸𑀦𑀁𑀝𑁆𑀞 𑀬𑀼𑀕’’𑀦𑁆𑀢𑀺 𑀮𑀓𑁆𑀔𑀡𑀁 𑀯𑀢𑁆𑀯𑀸 𑀇𑀤𑀫𑁂𑀯𑀼𑀤𑀸𑀳𑀭𑀦𑁆𑀢𑀺.

𑀬𑀸𑀬’𑀢𑁆𑀣𑀫𑀪𑀺𑀯𑀡𑁆𑀡𑁂𑀦𑁆𑀢𑀺, 𑀩𑁆𑀬𑀜𑁆𑀚𑀦𑀢𑁆𑀣𑀧𑀤𑀸𑀦𑀼𑀕𑀁;

𑀦𑀺𑀤𑀸𑀦𑀯𑀢𑁆𑀣𑀼𑀲𑀫𑁆𑀩𑀦𑁆𑀥𑀁, 𑀏𑀲𑀸 𑀅𑀝𑁆𑀞𑀓𑀣𑀸 𑀫𑀢𑀸.

𑀆𑀤𑀺𑀢𑁄𑀢𑀺𑀆𑀤𑀺𑀫𑁆𑀳𑀺 𑀧𑀞𑀫𑀲𑀗𑁆𑀕𑀻𑀢𑀺𑀬𑀁. 𑀙𑀴𑀪𑀺𑀜𑁆𑀜𑀢𑀸𑀬 𑀧𑀭𑀫𑁂𑀦 𑀘𑀺𑀢𑁆𑀢𑀯𑀲𑀻𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸, 𑀛𑀸𑀦𑀸𑀤𑀻𑀲𑀼 𑀧𑀜𑁆𑀘𑀯𑀲𑀺𑀢𑀸 𑀲𑀩𑁆𑀪𑀸𑀯𑀢𑁄 𑀘 𑀯𑀲𑀺𑀦𑁄, 𑀣𑁂𑀭𑀸 𑀫𑀳𑀸𑀓𑀲𑁆𑀲𑀧𑀸𑀤𑀬𑁄, 𑀢𑁂𑀲𑀁 𑀲𑀢𑁂𑀳𑀺 𑀧𑀜𑁆𑀘𑀳𑀺. 𑀬𑀸 𑀲𑀗𑁆𑀕𑀻𑀢𑀸𑀢𑀺 𑀬𑀸 𑀅𑀝𑁆𑀞𑀓𑀣𑀸 𑀅𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 ‘‘𑀅𑀬𑀫𑁂𑀢𑀲𑁆𑀲 𑀅𑀢𑁆𑀣𑁄, 𑀅𑀬𑀫𑁂𑀢𑀲𑁆𑀲 𑀅𑀢𑁆𑀣𑁄’’𑀢𑀺 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀸. 𑀅𑀦𑀼𑀲𑀗𑁆𑀕𑀻𑀢𑀸 𑀘 𑀧𑀘𑁆𑀙𑀸𑀧𑀻𑀢𑀺 𑀦 𑀓𑁂𑀯𑀮𑀁 𑀧𑀞𑀫𑀲𑀗𑁆𑀕𑀻𑀢𑀺𑀬𑀫𑁂𑀯, 𑀅𑀣 𑀔𑁄 𑀧𑀘𑁆𑀙𑀸 𑀤𑀼𑀢𑀺𑀬𑀢𑀢𑀺𑀬𑀲𑀗𑁆𑀕𑀻𑀢𑀻𑀲𑀼𑀧𑀺. 𑀦 𑀘 𑀧𑀜𑁆𑀘𑀳𑀺 𑀯𑀲𑀺𑀲𑀢𑁂𑀳𑀺 𑀆𑀤𑀺𑀢𑁄 𑀲𑀗𑁆𑀕𑀻𑀢𑀸𑀬𑁂𑀯, 𑀅𑀧𑀺 𑀢𑀼 𑀬𑀲𑀢𑁆𑀣𑁂𑀭𑀸𑀤𑀻𑀳𑀺 𑀅𑀦𑀼𑀲𑀗𑁆𑀕𑀻𑀢𑀸 𑀘𑀸𑀢𑀺 𑀲𑀳 𑀲𑀫𑀼𑀘𑁆𑀘𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀫𑀼𑀘𑁆𑀘𑀬𑀤𑁆𑀯𑀬𑀜𑁆𑀳𑀺 𑀧𑀘𑁆𑀘𑁂𑀓𑀁 𑀓𑀺𑀭𑀺𑀬𑀸𑀓𑀸𑀮𑀁 𑀲𑀫𑀼𑀘𑁆𑀘𑀺𑀦𑁄𑀢𑀺.

𑀅𑀣 𑀧𑁄𑀭𑀸𑀡𑀝𑁆𑀞𑀓𑀣𑀸𑀬 𑀯𑀺𑀚𑁆𑀚𑀫𑀸𑀦𑀸𑀬 𑀓𑀺𑀫𑁂𑀢𑀸𑀬 𑀅𑀥𑀼𑀦𑀸 𑀧𑀼𑀦 𑀓𑀢𑀸𑀬 𑀲𑀁𑀯𑀡𑁆𑀡𑀦𑀸𑀬𑀸𑀢𑀺 𑀧𑀼𑀦𑀭𑀼𑀢𑁆𑀢𑀺𑀬𑀸, 𑀦𑀺𑀭𑀢𑁆𑀣𑀓𑀢𑀸𑀬 𑀘 𑀤𑁄𑀲𑀁 𑀲𑀫𑀦𑀼𑀲𑁆𑀲𑀭𑀺𑀢𑁆𑀯𑀸 𑀢𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀲𑀻𑀳𑀴𑀤𑀻𑀧’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀁 𑀧𑀭𑀺𑀳𑀭𑀡𑁂𑀦𑁂𑀯 𑀳𑀺 𑀇𑀫𑀺𑀲𑁆𑀲𑀸 𑀲𑀁𑀯𑀡𑁆𑀡𑀦𑀸𑀬 𑀦𑀺𑀫𑀺𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀲𑀻𑀳𑀁 𑀮𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀲𑀻𑀳𑀴𑁄 𑀮-𑀓𑀸𑀭𑀲𑁆𑀲 𑀴-𑀓𑀸𑀭𑀁 𑀓𑀢𑁆𑀯𑀸 𑀬𑀣𑀸 ‘‘𑀕𑀭𑀼𑀴𑁄’’𑀢𑀺. 𑀢𑀲𑁆𑀫𑀺𑀁 𑀯𑀁𑀲𑁂 𑀆𑀤𑀺𑀧𑀼𑀭𑀺𑀲𑁄 𑀲𑀻𑀳𑀓𑀼𑀫𑀸𑀭𑁄, 𑀢𑀩𑁆𑀩𑀁𑀲𑀚𑀸𑀢𑀸 𑀧𑀦 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀔𑀢𑁆𑀢𑀺𑀬𑀸, 𑀲𑀩𑁆𑀩𑁂𑀧𑀺 𑀘 𑀚𑀦𑀸 𑀢𑀤𑁆𑀥𑀺𑀢𑀯𑀲𑁂𑀦, 𑀲𑀤𑀺𑀲𑀯𑁄𑀳𑀸𑀭𑁂𑀦 𑀯𑀸 𑀲𑀻𑀳𑀴𑀸, 𑀢𑁂𑀲𑀁 𑀦𑀺𑀯𑀸𑀲𑀤𑀻𑀧𑁄𑀧𑀺 𑀢𑀤𑁆𑀥𑀺𑀢𑀯𑀲𑁂𑀦, 𑀞𑀸𑀦𑀻𑀦𑀸𑀫𑁂𑀦 𑀯𑀸 ‘‘𑀲𑀻𑀳𑀴𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀚𑀮𑀫𑀚𑁆𑀛𑁂 𑀤𑀺𑀧𑁆𑀧𑀢𑀺, 𑀤𑁆𑀯𑀺𑀥𑀸 𑀯𑀸 𑀆𑀧𑁄 𑀏𑀢𑁆𑀣 𑀲𑀦𑁆𑀤𑀢𑀻𑀢𑀺 𑀤𑀺𑀧𑁄, 𑀲𑁄𑀬𑁂𑀯 𑀤𑀻𑀧𑁄, 𑀪𑁂𑀤𑀸𑀧𑁂𑀓𑁆𑀔𑀸𑀬 𑀢𑁂𑀲𑀁 𑀤𑀻𑀧𑁄𑀢𑀺 𑀢𑀣𑀸. 𑀧𑀦𑀲𑀤𑁆𑀤𑁄 𑀅𑀭𑀼𑀘𑀺𑀲𑀁𑀲𑀽𑀘𑀦𑁂, 𑀢𑁂𑀦 𑀓𑀸𑀫𑀜𑁆𑀘 𑀲𑀸 𑀲𑀗𑁆𑀕𑀻𑀢𑀺𑀢𑁆𑀢𑀬𑀫𑀸𑀭𑀼𑀴𑁆𑀳𑀸, 𑀢𑀣𑀸𑀧𑀺 𑀧𑀼𑀦 𑀏𑀯𑀁𑀪𑀽𑀢𑀸𑀢𑀺 𑀅𑀭𑀼𑀘𑀺𑀬𑀪𑀸𑀯𑀁 𑀲𑀁𑀲𑀽𑀘𑁂𑀢𑀺. 𑀢𑀤𑀢𑁆𑀣𑀲𑀫𑁆𑀩𑀦𑁆𑀥𑀢𑀸𑀬 𑀧𑀦 𑀧𑀼𑀭𑀺𑀫𑀕𑀸𑀣𑀸𑀬 ‘‘𑀓𑀸𑀫𑀜𑁆𑀘 𑀲𑀗𑁆𑀕𑀻𑀢𑀸 ¶ 𑀅𑀦𑀼𑀲𑀗𑁆𑀕𑀻𑀢𑀸 𑀘𑀸’’𑀢𑀺 𑀲𑀸𑀦𑀼𑀕𑁆𑀕𑀳𑀢𑁆𑀣𑀬𑁄𑀚𑀦𑀸 𑀲𑀫𑁆𑀪𑀯𑀢𑀺. 𑀅𑀜𑁆𑀜𑀢𑁆𑀣𑀸𑀧𑀺 𑀳𑀺 𑀢𑀣𑀸 𑀤𑀺𑀲𑁆𑀲𑀢𑀻𑀢𑀺. 𑀆𑀪𑀢𑀸𑀢𑀺 𑀚𑀫𑁆𑀩𑀼𑀤𑀻𑀧𑀢𑁄 𑀆𑀦𑀻𑀢𑀸. 𑀅𑀣𑀸𑀢𑀺 𑀲𑀗𑁆𑀕𑀻𑀢𑀺𑀓𑀸𑀮𑀢𑁄 𑀧𑀘𑁆𑀙𑀸, 𑀏𑀯𑀁 𑀲𑀢𑀺 𑀆𑀪𑀢𑀧𑀤𑁂𑀦 𑀲𑀫𑁆𑀩𑀦𑁆𑀥𑁄. 𑀅𑀣𑀸𑀢𑀺 𑀯𑀸 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑁂𑀦𑀸𑀪𑀢𑀓𑀸𑀮𑀢𑁄 𑀧𑀘𑁆𑀙𑀸, 𑀏𑀯𑀁 𑀲𑀢𑀺 𑀞𑀧𑀺𑀢𑀧𑀤𑁂𑀦 𑀲𑀫𑁆𑀩𑀦𑁆𑀥𑁄. 𑀲𑀸 𑀳𑀺 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀧𑀞𑀫𑀁 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑀗𑁆𑀕𑀸𑀬𑀺𑀢𑁆𑀯𑀸 𑀢𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀦𑀼𑀭𑀽𑀧𑁂𑀦𑁂𑀯 𑀯𑀸𑀘𑀦𑀸𑀫𑀕𑁆𑀕𑀁 ¶ 𑀆𑀭𑁄𑀧𑀺𑀢𑀢𑁆𑀢𑀸 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑀸𑀬𑁂𑀯, 𑀢𑀢𑁄 𑀧𑀘𑁆𑀙𑀸 𑀘 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑁂𑀦 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀫𑀸𑀪𑀢𑀸, 𑀧𑀘𑁆𑀙𑀸 𑀧𑀦 𑀢𑀫𑁆𑀩𑀧𑀡𑁆𑀡𑀺𑀬𑁂𑀳𑀺 𑀫𑀳𑀸𑀣𑁂𑀭𑁂𑀳𑀺 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀺𑀲𑀗𑁆𑀓𑀭𑀧𑀭𑀺𑀳𑀭𑀡𑀢𑁆𑀣𑀁 𑀲𑀻𑀳𑀴𑀪𑀸𑀲𑀸𑀬 𑀞𑀧𑀺𑀢𑀸𑀢𑀺. 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁄 𑀧𑀦 𑀧𑀘𑁆𑀙𑀺𑀫𑀲𑀫𑁆𑀩𑀦𑁆𑀥𑀫𑁂𑀯 𑀤𑀼𑀤𑁆𑀤𑀲𑀢𑁆𑀢𑀸 𑀧𑀓𑀸𑀲𑁂𑀢𑀺. 𑀢𑀣𑀸 ‘‘𑀤𑀻𑀧𑀯𑀸𑀲𑀻𑀦𑀫𑀢𑁆𑀣𑀸𑀬𑀸’’𑀢𑀺 𑀇𑀤𑀫𑁆𑀧𑀺 ‘‘𑀞𑀧𑀺𑀢𑀸’’𑀢𑀺 𑀘 ‘‘𑀅𑀧𑀦𑁂𑀢𑁆𑀯𑀸 𑀆𑀭𑁄𑀧𑁂𑀦𑁆𑀢𑁄’’𑀢𑀺 𑀘 𑀏𑀢𑁂𑀳𑀺 𑀧𑀤𑁂𑀳𑀺 𑀲𑀫𑁆𑀩𑀚𑁆𑀛𑀺𑀢𑀩𑁆𑀩𑀁. 𑀏𑀓𑀧𑀤𑀫𑁆𑀧𑀺 𑀳𑀺 𑀆𑀯𑀼𑀢𑁆𑀢𑀺𑀬𑀸𑀤𑀺𑀦𑀬𑁂𑀳𑀺 𑀅𑀦𑁂𑀓𑀢𑁆𑀣𑀲𑀫𑁆𑀩𑀦𑁆𑀥𑀫𑀼𑀧𑀕𑀘𑁆𑀙𑀢𑀺. 𑀧𑀼𑀭𑀺𑀫𑀲𑀫𑁆𑀩𑀦𑁆𑀥𑁂𑀦 𑀘𑁂𑀢𑁆𑀣 𑀲𑀻𑀳𑀴𑀤𑀻𑀧𑀯𑀸𑀲𑀻𑀦𑀫𑀢𑁆𑀣𑀸𑀬 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀺𑀲𑀗𑁆𑀓𑀭𑀧𑀭𑀺𑀳𑀭𑀡𑁂𑀦 𑀲𑀻𑀳𑀴𑀪𑀸𑀲𑀸𑀬 𑀞𑀧𑀺𑀢𑀸𑀢𑀺 𑀢𑀫𑁆𑀩𑀧𑀡𑁆𑀡𑀺𑀬𑀢𑁆𑀣𑁂𑀭𑁂𑀳𑀺 𑀞𑀧𑀦𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀺. 𑀧𑀘𑁆𑀙𑀺𑀫𑀲𑀫𑁆𑀩𑀦𑁆𑀥𑁂𑀦 𑀧𑀦 𑀇𑀫𑀸𑀬 𑀲𑀁𑀯𑀡𑁆𑀡𑀦𑀸𑀬 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀁, 𑀅𑀜𑁆𑀜𑀤𑀻𑀧𑀯𑀸𑀲𑀻𑀦𑀜𑁆𑀘 𑀅𑀢𑁆𑀣𑀸𑀬 𑀲𑀻𑀳𑀴𑀪𑀸𑀲𑀸𑀧𑀦𑀬𑀦𑀲𑁆𑀲, 𑀢𑀦𑁆𑀢𑀺𑀦𑀬𑀸𑀦𑀼𑀘𑁆𑀙𑀯𑀺𑀓𑀪𑀸𑀲𑀸𑀭𑁄𑀧𑀦𑀲𑁆𑀲 𑀘 𑀧𑀬𑁄𑀚𑀦𑀦𑁆𑀢𑀺. 𑀫𑀳𑀸𑀇𑀲𑁆𑀲𑀭𑀺𑀬𑀢𑁆𑀢𑀸 𑀫𑀳𑀺𑀦𑁆𑀤𑁄𑀢𑀺 𑀭𑀸𑀚𑀓𑀼𑀫𑀸𑀭𑀓𑀸𑀮𑁂 𑀦𑀸𑀫𑀁, 𑀧𑀘𑁆𑀙𑀸 𑀧𑀦 𑀕𑀼𑀡𑀫𑀳𑀦𑁆𑀢𑀢𑀸𑀬 𑀫𑀳𑀸𑀫𑀳𑀺𑀦𑁆𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀻𑀳𑀴𑀪𑀸𑀲𑀸 𑀦𑀸𑀫 𑀅𑀦𑁂𑀓𑀓𑁆𑀔𑀭𑁂𑀳𑀺 𑀏𑀓𑀢𑁆𑀣𑀲𑁆𑀲𑀸𑀧𑀺 𑀯𑁄𑀳𑀭𑀡𑀢𑁄 𑀧𑀭𑁂𑀲𑀁 𑀯𑁄𑀳𑀭𑀺𑀢𑀼𑀁 𑀅𑀢𑀺𑀤𑀼𑀓𑁆𑀓𑀭𑀸 𑀓𑀜𑁆𑀘𑀼𑀓𑀲𑀤𑀺𑀲𑀸 𑀲𑀻𑀳𑀴𑀸𑀦𑀁 𑀲𑀫𑀼𑀤𑀸𑀘𑀺𑀡𑁆𑀡𑀸 𑀪𑀸𑀲𑀸.

𑀏𑀯𑀁 𑀳𑁄𑀢𑀼 𑀧𑁄𑀭𑀸𑀡𑀝𑁆𑀞𑀓𑀣𑀸𑀬, 𑀅𑀥𑀼𑀦𑀸 𑀓𑀭𑀺𑀬𑀫𑀸𑀦𑀸 𑀧𑀦 𑀅𑀝𑁆𑀞𑀓𑀣𑀸 𑀓𑀣𑀁 𑀓𑀭𑀻𑀬𑀢𑀻𑀢𑀺 𑀅𑀦𑀼𑀬𑁄𑀕𑁂 𑀲𑀢𑀺 𑀇𑀫𑀺𑀲𑁆𑀲𑀸 𑀅𑀝𑁆𑀞𑀓𑀣𑀸𑀬 𑀓𑀭𑀡𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀅𑀧𑀦𑁂𑀢𑁆𑀯𑀸𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀢𑀢𑁄 𑀫𑀽𑀮𑀝𑁆𑀞𑀓𑀣𑀸𑀢𑁄 𑀲𑀻𑀳𑀴𑀪𑀸𑀲𑀁 𑀅𑀧𑀦𑁂𑀢𑁆𑀯𑀸 𑀧𑁄𑀢𑁆𑀣𑀓𑁂 𑀅𑀦𑀸𑀭𑁄𑀧𑀺𑀢𑀪𑀸𑀯𑁂𑀦 𑀦𑀺𑀭𑀗𑁆𑀓𑀭𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄, 𑀏𑀢𑁂𑀦 𑀅𑀬𑀁 𑀯𑀓𑁆𑀔𑀫𑀸𑀦𑀸 𑀅𑀝𑁆𑀞𑀓𑀣𑀸 𑀲𑀗𑁆𑀕𑀻𑀢𑀺𑀢𑁆𑀢𑀬𑀫𑀸𑀭𑁄𑀧𑀺𑀢𑀸𑀬 𑀫𑀽𑀮𑀝𑁆𑀞𑀓𑀣𑀸𑀬 𑀲𑀻𑀳𑀴𑀪𑀸𑀲𑀸𑀧𑀦𑀬𑀦𑀫𑀢𑁆𑀢𑀫𑀜𑁆𑀜𑀢𑁆𑀭 𑀅𑀢𑁆𑀣𑀢𑁄 𑀲𑀁𑀲𑀦𑁆𑀤𑀢𑀺 𑀘𑁂𑀯 𑀲𑀫𑁂𑀢𑀺 𑀘 𑀬𑀣𑀸 ‘‘𑀕𑀗𑁆𑀕𑁄𑀤𑀓𑁂𑀦 𑀬𑀫𑀼𑀦𑁄𑀤𑀓’’𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀫𑀦𑁄𑀭𑀫’’ 𑀫𑀺𑀘𑁆𑀘𑀸𑀤𑀻𑀦𑀺 ‘‘𑀪𑀸𑀲’’𑀦𑁆𑀢𑀺 𑀏𑀢𑀲𑁆𑀲 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀸𑀯𑀤𑀻𑀧𑀓𑀸𑀦𑀺 𑀯𑀺𑀲𑁂𑀲𑀦𑀸𑀦𑀺. 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀸𑀯𑁂𑀦 𑀳𑀺 𑀧𑀡𑁆𑀟𑀺𑀢𑀸𑀦𑀁 𑀫𑀦𑀁 𑀭𑀫𑀬𑀢𑀻𑀢𑀺 𑀫𑀦𑁄𑀭𑀫𑀸. 𑀢𑀦𑁄𑀢𑀺 𑀅𑀢𑁆𑀣𑀫𑁂𑀢𑀸𑀬, 𑀢𑀦𑀻𑀬𑀢𑀺 𑀯𑀸 𑀅𑀢𑁆𑀣𑀯𑀲𑁂𑀦 𑀯𑀺𑀯𑀭𑀻𑀬𑀢𑀺, 𑀯𑀝𑁆𑀝𑀢𑁄 𑀯𑀸 𑀲𑀢𑁆𑀢𑁂 𑀢𑀸𑀭𑁂𑀢𑀺 ¶ , 𑀦𑀸𑀦𑀸𑀢𑁆𑀣𑀯𑀺𑀲𑀬𑀁 𑀯𑀸 𑀓𑀗𑁆𑀔𑀁 𑀢𑀭𑀦𑁆𑀢𑀺 𑀏𑀢𑀸𑀬𑀸𑀢𑀺 𑀢𑀦𑁆𑀢𑀺, 𑀧𑀸𑀴𑀺. 𑀢𑀲𑁆𑀲𑀸 𑀦𑀬𑀲𑀗𑁆𑀔𑀸𑀢𑀸𑀬 𑀕𑀢𑀺𑀬𑀸 𑀙𑀯𑀺𑀁 𑀙𑀸𑀬𑀁 𑀅𑀦𑀼𑀕𑀢𑀸𑀢𑀺 𑀢𑀦𑁆𑀢𑀺𑀦𑀬𑀸𑀦𑀼𑀘𑁆𑀙𑀯𑀺𑀓𑀸. 𑀅𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀸𑀲𑀦𑁆𑀢𑀭𑀲𑀁𑀓𑀺𑀡𑁆𑀡𑀤𑁄𑀲𑀯𑀺𑀭𑀳𑀺𑀢𑀢𑀸𑀬 𑀯𑀺𑀕𑀢𑀤𑁄𑀲𑀸, 𑀢𑀸𑀤𑀺𑀲𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀽𑀢𑀁 𑁋

‘‘𑀲𑀸 𑀫𑀸𑀕𑀥𑀻 𑀫𑀽𑀮𑀪𑀸𑀲𑀸, 𑀦𑀭𑀸 𑀬𑀸𑀬𑀸’𑀤𑀺𑀓𑀧𑁆𑀧𑀺𑀓𑀸;

𑀩𑁆𑀭𑀳𑁆𑀫𑀸𑀦𑁄 𑀘𑀲𑁆𑀲𑀼𑀢𑀸𑀮𑀸𑀧𑀸, 𑀲𑀫𑁆𑀩𑀼𑀤𑁆𑀥𑀸 𑀘𑀸𑀧𑀺 𑀪𑀸𑀲𑀭𑁂’’𑀢𑀺. 𑁋

𑀯𑀼𑀢𑁆𑀢𑀁 𑀧𑀸𑀴𑀺𑀕𑀢𑀺𑀪𑀸𑀲𑀁 𑀧𑁄𑀢𑁆𑀣𑀓𑁂 𑀮𑀺𑀔𑀦𑀯𑀲𑁂𑀦 𑀆𑀭𑁄𑀧𑁂𑀦𑁆𑀢𑁄𑀢𑀺 𑀅𑀢𑁆𑀣𑁄, 𑀇𑀫𑀺𑀦𑀸 𑀲𑀤𑁆𑀤𑀤𑁄𑀲𑀸𑀪𑀸𑀯𑀫𑀸𑀳.

𑀲𑀫𑀬𑀁 ¶ 𑀅𑀯𑀺𑀮𑁄𑀫𑁂𑀦𑁆𑀢𑁄𑀢𑀺 𑀲𑀺𑀤𑁆𑀥𑀦𑁆𑀢𑀫𑀯𑀺𑀭𑁄𑀥𑁂𑀦𑁆𑀢𑁄, 𑀇𑀫𑀺𑀦𑀸 𑀧𑀦 𑀅𑀢𑁆𑀣𑀤𑁄𑀲𑀸𑀪𑀸𑀯𑀫𑀸𑀳. 𑀅𑀯𑀺𑀭𑀼𑀤𑁆𑀥𑀢𑁆𑀢𑀸 𑀏𑀯 𑀳𑀺 𑀢𑁂 𑀣𑁂𑀭𑀯𑀸𑀤𑀸𑀧𑀺 𑀇𑀥 𑀧𑀓𑀸𑀲𑀬𑀺𑀲𑁆𑀲𑀦𑁆𑀢𑀺. 𑀓𑁂𑀲𑀁 𑀧𑀦 𑀲𑀫𑀬𑀦𑁆𑀢𑀺 𑀆𑀳 ‘‘𑀣𑁂𑀭𑀸𑀦’’𑀦𑁆𑀢𑀺𑀆𑀤𑀺, 𑀏𑀢𑁂𑀦 𑀭𑀸𑀳𑀼𑀮𑀸𑀘𑀭𑀺𑀬𑀸𑀤𑀻𑀦𑀁 𑀚𑁂𑀢𑀯𑀦𑀯𑀸𑀲𑀻𑀅𑀪𑀬𑀕𑀺𑀭𑀺𑀯𑀸𑀲𑀻𑀦𑀺𑀓𑀸𑀬𑀸𑀦𑀁 𑀲𑀫𑀬𑀁 𑀦𑀺𑀯𑀢𑁆𑀢𑁂𑀢𑀺. 𑀣𑀺𑀭𑁂𑀳𑀺 𑀲𑀻𑀮𑀲𑀼𑀢𑀛𑀸𑀦𑀯𑀺𑀫𑀼𑀢𑁆𑀢𑀺𑀲𑀗𑁆𑀔𑀸𑀢𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀢𑀺 𑀣𑁂𑀭𑀸. 𑀬𑀣𑀸𑀳 ‘‘𑀘𑀢𑁆𑀢𑀸𑀭𑁄𑀫𑁂 𑀪𑀺𑀓𑁆𑀔𑀯𑁂 𑀣𑁂𑀭𑀓𑀭𑀡𑀸 𑀥𑀫𑁆𑀫𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁪.𑁨𑁨). 𑀅𑀧𑀺𑀘 𑀲𑀘𑁆𑀘𑀥𑀫𑁆𑀫𑀸𑀤𑀻𑀳𑀺 𑀣𑀺𑀭𑀓𑀭𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀣𑁂𑀭𑀸. 𑀬𑀣𑀸𑀳 𑀥𑀫𑁆𑀫𑀭𑀸𑀚𑀸 𑀥𑀫𑁆𑀫𑀧𑀤𑁂 𑁋

‘‘𑀬𑀫𑁆𑀳𑀺 𑀲𑀘𑁆𑀘𑀜𑁆𑀘 𑀥𑀫𑁆𑀫𑁄 𑀘, 𑀅𑀳𑀺𑀁𑀲𑀸 𑀲𑀁𑀬𑀫𑁄 𑀤𑀫𑁄;

𑀲 𑀯𑁂 𑀯𑀦𑁆𑀢𑀫𑀮𑁄 𑀥𑀻𑀭𑁄, ‘𑀣𑁂𑀭𑁄’𑀇𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. (𑀥. 𑀧. 𑁨𑁬𑁦);

𑀢𑁂𑀲𑀁. 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀸𑀤𑀻𑀳𑀺 𑀆𑀕𑀢𑀸 𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀣𑁂𑀭𑀯𑀁𑀲𑁄, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀸 𑀳𑀼𑀢𑁆𑀯𑀸 𑀆𑀕𑀫𑀸𑀥𑀺𑀕𑀫𑀲𑀫𑁆𑀧𑀦𑁆𑀦𑀢𑁆𑀢𑀸 𑀧𑀜𑁆𑀜𑀸𑀧𑀚𑁆𑀚𑁄𑀢𑁂𑀦 𑀢𑀲𑁆𑀲 𑀲𑀫𑀼𑀚𑁆𑀚𑀮𑀦𑀢𑁄 𑀢𑀁 𑀧𑀓𑀸𑀭𑁂𑀦 𑀤𑀻𑀧𑁂𑀦𑁆𑀢𑀺, 𑀢𑀲𑁆𑀫𑀺𑀁 𑀯𑀸 𑀧𑀤𑀻𑀧𑀲𑀤𑀺𑀲𑀸𑀢𑀺 𑀣𑁂𑀭𑀯𑀁𑀲𑀧𑀤𑀺𑀧𑀸. 𑀯𑀺𑀯𑀺𑀥𑁂𑀦 𑀆𑀓𑀸𑀭𑁂𑀦 𑀦𑀺𑀘𑁆𑀙𑀻𑀬𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑁄, 𑀕𑀡𑁆𑀞𑀺𑀝𑁆𑀞𑀸𑀦𑁂𑀲𑀼 𑀔𑀻𑀮𑀫𑀤𑁆𑀤𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀯𑀺𑀫𑀢𑀺𑀘𑁆𑀙𑁂𑀤𑀦𑀻𑀓𑀣𑀸, 𑀲𑀼𑀝𑁆𑀞𑀼 𑀦𑀺𑀧𑀼𑀡𑁄 𑀲𑀡𑁆𑀳𑁄 𑀯𑀺𑀦𑀺𑀘𑁆𑀙𑀬𑁄 𑀏𑀢𑁂𑀲𑀦𑁆𑀢𑀺 𑀲𑀼𑀦𑀺𑀧𑀼𑀡𑀯𑀺𑀦𑀺𑀘𑁆𑀙𑀬𑀸. 𑀅𑀣 𑀯𑀸 𑀯𑀺𑀦𑀺𑀘𑁆𑀙𑀺𑀦𑁄𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑁄, 𑀬𑀣𑀸𑀯𑀼𑀢𑁆𑀢𑀯𑀺𑀲𑀬𑀁 𑀜𑀸𑀡𑀁, 𑀲𑀼𑀝𑁆𑀞𑀼 𑀦𑀺𑀧𑀼𑀡𑁄 𑀙𑁂𑀓𑁄 𑀯𑀺𑀦𑀺𑀘𑁆𑀙𑀬𑁄 𑀏𑀢𑁂𑀲𑀦𑁆𑀢𑀺 𑀲𑀼𑀦𑀺𑀧𑀼𑀡𑀯𑀺𑀦𑀺𑀘𑁆𑀙𑀬𑀸. 𑀫𑀳𑀸𑀫𑁂𑀖𑀯𑀦𑁂 𑀞𑀺𑀢𑁄 𑀯𑀺𑀳𑀸𑀭𑁄 𑀫𑀳𑀸𑀯𑀺𑀳𑀸𑀭𑁄, 𑀬𑁄 𑀲𑀢𑁆𑀣𑀼 𑀫𑀳𑀸𑀩𑁄𑀥𑀺𑀦𑀸 𑀯𑀺𑀭𑁄𑀘𑀢𑀺, 𑀢𑀲𑁆𑀫𑀺𑀁 𑀯𑀲𑀦𑀲𑀻𑀮𑀸 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄 ¶ , 𑀢𑀸𑀤𑀺𑀲𑀸𑀦𑀁 𑀲𑀫𑀬𑀁 𑀅𑀯𑀺𑀮𑁄𑀫𑁂𑀦𑁆𑀢𑁄𑀢𑀺 𑀅𑀢𑁆𑀣𑁄, 𑀏𑀢𑁂𑀦 𑀫𑀳𑀸𑀓𑀲𑁆𑀲𑀧𑀸𑀤𑀺𑀣𑁂𑀭𑀧𑀭𑀫𑁆𑀧𑀭𑀸𑀕𑀢𑁄, 𑀢𑀢𑁄𑀬𑁂𑀯 𑀅𑀯𑀺𑀧𑀭𑀺𑀢𑁄 𑀲𑀡𑁆𑀳𑀲𑀼𑀔𑀼𑀫𑁄 𑀯𑀺𑀦𑀺𑀘𑁆𑀙𑀬𑁄𑀢𑀺 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀲𑀫𑀬𑀲𑁆𑀲 𑀧𑀫𑀸𑀡𑀪𑀽𑀢𑀢𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀤𑀲𑁆𑀲𑁂𑀢𑀺.

𑀳𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀪𑀢𑀫𑀢𑁆𑀣𑀦𑁆𑀢𑀺 𑀏𑀓𑀢𑁆𑀣 𑀯𑀼𑀢𑀫𑁆𑀧𑀺 𑀧𑀼𑀦 𑀅𑀜𑁆𑀜𑀢𑁆𑀣 𑀆𑀪𑀢𑀫𑀢𑁆𑀣𑀁 𑀧𑀼𑀦𑀭𑀼𑀢𑁆𑀢𑀺𑀪𑀸𑀯𑀢𑁄, 𑀕𑀦𑁆𑀣𑀕𑀭𑀼𑀓𑀪𑀸𑀯𑀢𑁄 𑀘 𑀘𑀚𑀺𑀢𑁆𑀯𑀸 𑀢𑀲𑁆𑀲 𑀆𑀕𑀫𑀯𑀭𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀓𑀭𑀡𑀧𑁆𑀧𑀓𑀸𑀭𑀫𑁆𑀧𑀺 𑀤𑀲𑁆𑀲𑁂𑀢𑁆𑀯𑀸 ‘‘𑀤𑀻𑀧𑀯𑀸𑀲𑀻𑀦𑀫𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑀧𑁆𑀧𑀬𑁄𑀚𑀦𑀢𑁄 𑀅𑀜𑁆𑀜𑀫𑁆𑀧𑀺 𑀲𑀁𑀯𑀡𑁆𑀡𑀦𑀸𑀬 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀚𑀦𑀲𑁆𑀲 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀚𑀦𑀲𑁆𑀲 𑀘𑀸𑀢𑀺 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄, 𑀢𑁂𑀦 𑀦 𑀓𑁂𑀯𑀮𑀁 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀫𑁂𑀯 𑀅𑀢𑁆𑀣𑀸𑀬, 𑀅𑀣 𑀔𑁄 𑀲𑀸𑀥𑀼𑀚𑀦𑀢𑁄𑀲𑀦𑀢𑁆𑀣𑀜𑁆𑀘𑀸𑀢𑀺 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀢𑁂𑀦𑁂𑀯 𑀘 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀯𑀸𑀲𑀻𑀦𑀫𑁆𑀧𑀺 𑀅𑀢𑁆𑀣𑀸𑀬𑀸𑀢𑀺 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄 𑀳𑁄𑀢𑀺 𑀉𑀕𑁆𑀕𑀳𑀡𑀸𑀤𑀺𑀲𑀼𑀓𑀭𑀢𑀸𑀬 𑀢𑁂𑀲𑀫𑁆𑀧𑀺 𑀩𑀳𑀽𑀧𑀓𑀸𑀭𑀢𑁆𑀢𑀸. 𑀘𑀺𑀭𑀝𑁆𑀞𑀺𑀢𑀢𑁆𑀣𑀜𑁆𑀘𑀸𑀢𑀺 𑀏𑀢𑁆𑀣𑀸𑀧𑀺 𑀘-𑀲𑀤𑁆𑀤𑁄 𑀦 𑀓𑁂𑀯𑀮𑀁 𑀢𑀤𑀼𑀪𑀬𑀢𑁆𑀣𑀫𑁂𑀯, 𑀅𑀧𑀺 𑀢𑀼 𑀢𑀺𑀯𑀺𑀥𑀲𑁆𑀲𑀸𑀧𑀺 𑀲𑀸𑀲𑀦𑀥𑀫𑁆𑀫𑀲𑁆𑀲, 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 𑀯𑀸 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀧𑀭𑀺𑀫𑀸𑀡𑀁 ¶ 𑀘𑀺𑀭𑀓𑀸𑀮𑀁 𑀞𑀺𑀢𑀢𑁆𑀣𑀜𑁆𑀘𑀸𑀢𑀺 𑀲𑀫𑀼𑀘𑁆𑀘𑀬𑀢𑁆𑀣𑀫𑁂𑀯 𑀤𑀲𑁆𑀲𑁂𑀢𑀺. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 𑀳𑀺 𑀞𑀺𑀢𑀺𑀬𑀸 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀧𑀝𑀺𑀯𑁂𑀥𑀥𑀫𑁆𑀫𑀸𑀦𑀫𑁆𑀧𑀺 𑀞𑀺𑀢𑀺 𑀳𑁄𑀢𑀺 𑀢𑀲𑁆𑀲𑁂𑀯 𑀢𑁂𑀲𑀁 𑀫𑀽𑀮𑀪𑀸𑀯𑀢𑁄. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀧𑀦 𑀲𑀼𑀦𑀺𑀓𑁆𑀔𑀺𑀢𑁆𑀢𑁂𑀦 𑀧𑀤𑀩𑁆𑀬𑀜𑁆𑀚𑀦𑁂𑀦, 𑀢𑀤𑀢𑁆𑀣𑁂𑀦 𑀘 𑀘𑀺𑀭𑀁 𑀲𑀫𑁆𑀫𑀸 𑀧𑀢𑀺𑀝𑁆𑀞𑀸𑀢𑀺, 𑀲𑀁𑀯𑀡𑁆𑀡𑀦𑀸𑀬 𑀘 𑀧𑀤𑀩𑁆𑀬𑀜𑁆𑀚𑀦𑀁 𑀅𑀯𑀺𑀧𑀭𑀻𑀢𑀁 𑀲𑀼𑀦𑀺𑀓𑁆𑀔𑀺𑀢𑁆𑀢𑀁, 𑀢𑀤𑀢𑁆𑀣𑁄𑀧𑀺 𑀅𑀯𑀺𑀧𑀭𑀻𑀢𑁄 𑀲𑀼𑀦𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑀁𑀯𑀡𑁆𑀡𑀦𑀸𑀬 𑀅𑀯𑀺𑀧𑀭𑀻𑀢𑀲𑁆𑀲 𑀧𑀤𑀩𑁆𑀬𑀜𑁆𑀚𑀦𑀲𑁆𑀲, 𑀢𑀤𑀢𑁆𑀣𑀲𑁆𑀲 𑀘 𑀲𑀼𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀉𑀧𑀸𑀬𑀪𑀸𑀯𑀫𑀼𑀧𑀸𑀤𑀸𑀬 𑀯𑀼𑀢𑁆𑀢𑀁 ‘‘𑀘𑀺𑀭𑀝𑁆𑀞𑀺𑀢𑀢𑁆𑀣𑀜𑁆𑀘 𑀥𑀫𑁆𑀫𑀲𑁆𑀲𑀸’’𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀤𑁆𑀯𑁂𑀫𑁂 𑀪𑀺𑀓𑁆𑀔𑀯𑁂 𑀥𑀫𑁆𑀫𑀸 𑀲𑀤𑁆𑀥𑀫𑁆𑀫𑀲𑁆𑀲 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀅𑀦𑀦𑁆𑀢𑀭𑀥𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀤𑁆𑀯𑁂? 𑀲𑀼𑀦𑀺𑀓𑁆𑀔𑀺𑀢𑁆𑀢𑀜𑁆𑀘 𑀧𑀤𑀩𑁆𑀬𑀜𑁆𑀚𑀦𑀁, 𑀅𑀢𑁆𑀣𑁄 𑀘 𑀲𑀼𑀦𑀻𑀢𑁄, 𑀇𑀫𑁂 𑀔𑁄…𑀧𑁂… 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁨.𑁨𑁧).

𑀏𑀯𑀁 𑀧𑀬𑁄𑀚𑀦𑀫𑁆𑀧𑀺 𑀤𑀲𑁆𑀲𑁂𑀢𑁆𑀯𑀸 𑀯𑀓𑁆𑀔𑀫𑀸𑀦𑀸𑀬 𑀲𑀁𑀯𑀡𑁆𑀡𑀦𑀸𑀬 𑀫𑀳𑀢𑁆𑀢𑀧𑀭𑀺𑀘𑁆𑀘𑀸𑀕𑁂𑀦 𑀕𑀦𑁆𑀣𑀕𑀭𑀼𑀓𑀪𑀸𑀯𑀁 𑀧𑀭𑀺𑀳𑀭𑀺𑀢𑀼𑀫𑀸𑀳 ‘‘𑀲𑀻𑀮𑀓𑀣𑀸’’𑀢𑀺𑀆𑀤𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀦 𑀢𑀁 𑀯𑀺𑀘𑀭𑀬𑀺𑀲𑁆𑀲𑀸𑀫𑀻’’𑀢𑀺. 𑀅𑀧𑀭𑁄 𑀦𑀬𑁄 𑁋 𑀬𑀤𑀝𑁆𑀞𑀓𑀣𑀁 𑀓𑀢𑁆𑀢𑀼𑀓𑀸𑀫𑁄, 𑀢𑀤𑁂𑀓𑀤𑁂𑀲𑀪𑀸𑀯𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀕𑀳𑁂𑀢𑀩𑁆𑀩𑁄𑀢𑀺 𑀓𑀣𑀺𑀓𑀸𑀦𑀁 𑀉𑀧𑀤𑁂𑀲𑀁 𑀓𑀭𑁄𑀦𑁆𑀢𑁄 ¶ 𑀢𑀢𑁆𑀣 𑀯𑀺𑀘𑀸𑀭𑀺𑀢𑀥𑀫𑁆𑀫𑁂 𑀉𑀤𑁆𑀤𑁂𑀲𑀯𑀲𑁂𑀦 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀲𑀻𑀮𑀓𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀻𑀮𑀓𑀣𑀸𑀢𑀺 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀸𑀤𑀺𑀯𑀲𑁂𑀦 𑀲𑀻𑀮𑀯𑀺𑀢𑁆𑀣𑀸𑀭𑀓𑀣𑀸. 𑀥𑀼𑀢𑀥𑀫𑁆𑀫𑀸𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀸𑀤𑀬𑁄 𑀢𑁂𑀭𑀲 𑀓𑀺𑀮𑁂𑀲𑀥𑀼𑀦𑀦𑀓𑀥𑀫𑁆𑀫𑀸. 𑀓𑀫𑁆𑀫𑀝𑁆𑀞𑀸𑀦𑀸𑀦𑀻𑀢𑀺 𑀪𑀸𑀯𑀦𑀸𑀲𑀗𑁆𑀔𑀸𑀢𑀲𑁆𑀲 𑀬𑁄𑀕𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑁆𑀢𑀸 𑀓𑀫𑁆𑀫𑀝𑁆𑀞𑀸𑀦𑀦𑀸𑀫𑀸𑀦𑀺 𑀥𑀫𑁆𑀫𑀚𑀸𑀢𑀸𑀦𑀺. 𑀢𑀸𑀦𑀺 𑀧𑀦 𑀧𑀸𑀴𑀺𑀬𑀫𑀸𑀕𑀢𑀸𑀦𑀺 𑀅𑀝𑁆𑀞𑀢𑀺𑀁 𑀲𑁂𑀯 𑀦 𑀕𑀳𑁂𑀢𑀩𑁆𑀩𑀸𑀦𑀺, 𑀅𑀣 𑀔𑁄 𑀅𑀝𑁆𑀞𑀓𑀣𑀸𑀬𑀫𑀸𑀕𑀢𑀸𑀦𑀺𑀧𑀺 𑀤𑁆𑀯𑁂𑀢𑀺 𑀜𑀸𑀧𑁂𑀢𑀼𑀁 ‘‘𑀲𑀩𑁆𑀩𑀸𑀦𑀺𑀧𑀻’’𑀢𑀺 𑀯𑀼𑀢𑁆𑀢𑀁. 𑀘𑀭𑀺 𑀬𑀸𑀯𑀺𑀥𑀸𑀦𑀲𑀳𑀺𑀢𑁄𑀢𑀺 𑀭𑀸𑀕𑀘𑀭𑀺𑀢𑀸𑀤𑀻𑀦𑀁 𑀲𑀪𑀸𑀯𑀸𑀤𑀺𑀯𑀺𑀥𑀸𑀦𑁂𑀦 𑀲𑀳 𑀧𑀯𑀢𑁆𑀢𑁄, 𑀇𑀤𑀁 𑀧𑀦 ‘‘𑀛𑀸𑀦𑀲𑀫𑀸𑀧𑀢𑁆𑀢𑀺𑀯𑀺𑀢𑁆𑀣𑀸𑀭𑁄’’𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀦𑀁. 𑀏𑀢𑁆𑀣 𑀘 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀛𑀸𑀦𑀁, 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀲𑀫𑀸𑀧𑀢𑁆𑀢𑀺. 𑀢𑀤𑀼𑀪𑀬𑀫𑁆𑀧𑀺 𑀯𑀸 𑀧𑀝𑀺𑀮𑀤𑁆𑀥𑀫𑀢𑁆𑀢𑀁 𑀛𑀸𑀦𑀁, 𑀲𑀫𑀸𑀧𑀚𑁆𑀚𑀦𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀁 𑀲𑀫𑀸𑀧𑀢𑁆𑀢𑀺. 𑀅𑀧𑀺𑀘 𑀢𑀤𑀧𑀺 𑀉𑀪𑀬𑀁 𑀛𑀸𑀦𑀫𑁂𑀯, 𑀨𑀮𑀲𑀫𑀸𑀧𑀢𑁆𑀢𑀺𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑁄 𑀧𑀦 𑀲𑀫𑀸𑀧𑀢𑁆𑀢𑀺, 𑀢𑀸𑀲𑀁 𑀯𑀺𑀢𑁆𑀣𑀸𑀭𑁄𑀢𑀺 𑀅𑀢𑁆𑀣𑁄.

𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀪𑁂𑀤𑀸𑀦𑀁 𑀙𑀦𑁆𑀦𑀫𑁆𑀧𑀺 𑀅𑀪𑀺𑀜𑁆𑀜𑀸𑀦𑀁 𑀕𑀳𑀡𑀢𑁆𑀣𑀁 ‘‘𑀲𑀩𑁆𑀩𑀸 𑀘 𑀅𑀪𑀺𑀜𑁆𑀜𑀸𑀬𑁄’’𑀢𑀺 𑀯𑀼𑀢𑁆𑀢𑀁. 𑀜𑀸𑀡𑀯𑀺𑀪𑀗𑁆𑀕𑀸𑀤𑀻𑀲𑀼 (𑀯𑀺𑀪. 𑁭𑁫𑁧) 𑀆𑀕𑀢𑀦𑀬𑁂𑀦 𑀏𑀓𑀯𑀺𑀥𑀸𑀤𑀺𑀦𑀸 𑀪𑁂𑀤𑁂𑀦 𑀧𑀜𑁆𑀜𑀸𑀬 𑀲𑀗𑁆𑀓𑀮𑀬𑀺𑀢𑁆𑀯𑀸 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸, 𑀕𑀡𑁂𑀢𑁆𑀯𑀸 𑀯𑀸 𑀯𑀺𑀦𑀺𑀘𑁆𑀙𑀬𑀦𑀁 𑀧𑀜𑁆𑀜𑀸𑀲𑀗𑁆𑀓𑀮𑀦𑀯𑀺𑀦𑀺𑀘𑁆𑀙𑀬𑁄. 𑀅𑀭𑀺𑀬𑀸𑀦𑀻𑀢𑀺 𑀩𑀼𑀤𑁆𑀥𑀸𑀤𑀻𑀳𑀺 𑀅𑀭𑀺𑀬𑁂𑀳𑀺 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀢𑁆𑀢𑀸, 𑀅𑀭𑀺𑀬𑀪𑀸𑀯𑀲𑀸𑀥𑀓𑀢𑁆𑀢𑀸 𑀯𑀸 𑀅𑀭𑀺𑀬𑀸𑀦𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦. 𑀅𑀯𑀺𑀢𑀣𑀪𑀸𑀯𑁂𑀦 𑀯𑀸 𑀅𑀭𑀡𑀻𑀬𑀢𑁆𑀢𑀸, 𑀅𑀯𑀕𑀦𑁆𑀢𑀩𑁆𑀩𑀢𑁆𑀢𑀸 𑀅𑀭𑀺𑀬𑀸𑀦𑀺, ‘‘𑀲𑀘𑁆𑀘𑀸𑀦𑀻’’𑀢𑀺𑀫𑀲𑁆𑀲 𑀯𑀺𑀲𑁂𑀲𑀦𑀁.

𑀳𑁂𑀢𑀸𑀤𑀺𑀧𑀘𑁆𑀘𑀬𑀥𑀫𑁆𑀫𑀸𑀦𑀁 ¶ 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀪𑀸𑀯𑁂𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀫𑀼𑀧𑀓𑀸𑀭𑀓𑀢𑀸 𑀧𑀘𑁆𑀘𑀬𑀸𑀓𑀸𑀭𑁄, 𑀢𑀲𑁆𑀲 𑀤𑁂𑀲𑀦𑀸 𑀢𑀣𑀸, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸𑀢𑀺 𑀅𑀢𑁆𑀣𑁄. 𑀲𑀸 𑀧𑀦 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀺𑀲𑀗𑁆𑀓𑀭𑀭𑀳𑀺𑀢𑀢𑀸𑀬 𑀲𑀼𑀝𑁆𑀞𑀼 𑀧𑀭𑀺𑀲𑀼𑀤𑁆𑀥𑀸, 𑀖𑀦𑀯𑀺𑀦𑀺𑀩𑁆𑀪𑁄𑀕𑀲𑁆𑀲 𑀘 𑀲𑀼𑀤𑀼𑀓𑁆𑀓𑀭𑀢𑀸𑀬 𑀦𑀺𑀧𑀼𑀡𑀸, 𑀏𑀓𑀢𑁆𑀢𑀸𑀤𑀺𑀦𑀬𑀲𑀳𑀺𑀢𑀸 𑀘 𑀢𑀢𑁆𑀣 𑀯𑀺𑀘𑀸𑀭𑀺𑀢𑀸𑀢𑀺 𑀆𑀳 ‘‘𑀲𑀼𑀧𑀭𑀺𑀲𑀼𑀤𑁆𑀥𑀦𑀺𑀧𑀼𑀡𑀦𑀬𑀸’’𑀢𑀺. 𑀧𑀤𑀢𑁆𑀢𑀬𑀫𑁆𑀧𑀺 𑀳𑁂𑀢𑀁 𑀧𑀘𑁆𑀘𑀬𑀸𑀓𑀸𑀭𑀤𑁂𑀲𑀦𑀸𑀬 𑀯𑀺𑀲𑁂𑀲𑀦𑀁. 𑀧𑀝𑀺𑀲𑀫𑁆𑀪𑀺𑀤𑀸𑀤𑀻𑀲𑀼 𑀆𑀕𑀢𑀦𑀬𑀁 𑀅𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸𑀯 𑀯𑀺𑀘𑀸𑀭𑀺𑀢𑀢𑁆𑀢𑀸 𑀅𑀯𑀺𑀫𑀼𑀢𑁆𑀢𑁄 𑀢𑀦𑁆𑀢𑀺𑀫𑀕𑁆𑀕𑁄 𑀬𑀲𑁆𑀲𑀸𑀢𑀺 𑀅𑀯𑀺𑀫𑀼𑀢𑁆𑀢𑀢𑀦𑁆𑀢𑀺 𑀫𑀕𑁆𑀕𑀸. 𑀫𑀕𑁆𑀕𑁄𑀢𑀺 𑀘𑁂𑀢𑁆𑀣 𑀧𑀸𑀴𑀺𑀲𑀗𑁆𑀔𑀸𑀢𑁄 𑀉𑀧𑀸𑀬𑁄 𑀢𑀁𑀢𑀤𑀢𑁆𑀣𑀸𑀦𑀁 𑀅𑀯𑀩𑁄𑀥𑀲𑁆𑀲, 𑀲𑀘𑁆𑀘𑀧𑀝𑀺𑀯𑁂𑀥𑀲𑁆𑀲 𑀯𑀸 𑀉𑀧𑀸𑀬𑀪𑀸𑀯𑀢𑁄. 𑀧𑀩𑀦𑁆𑀥𑁄 𑀯𑀸 𑀤𑀻𑀖𑀪𑀸𑀯𑁂𑀦 𑀧𑀓𑀢𑀺𑀫𑀕𑁆𑀕𑀲𑀤𑀺𑀲𑀢𑁆𑀢𑀸, 𑀇𑀤𑀁 𑀧𑀦 ‘‘𑀯𑀺𑀧𑀲𑁆𑀲𑀦𑀸, 𑀪𑀸𑀯𑀦𑀸’’𑀢𑀺 𑀧𑀤𑀤𑁆𑀯𑀬𑀲𑁆𑀲 𑀯𑀺𑀲𑁂𑀲𑀦𑀁.

𑀇𑀢𑀺 ¶ 𑀧𑀦 𑀲𑀩𑁆𑀩𑀦𑁆𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀧𑀭𑀺𑀲𑀫𑀸𑀧𑀦𑁂 𑀬𑀣𑀸𑀉𑀤𑁆𑀤𑀺𑀝𑁆𑀞𑀉𑀤𑁆𑀤𑁂𑀲𑀲𑁆𑀲 𑀧𑀭𑀺𑀦𑀺𑀝𑁆𑀞𑀺𑀢𑀢𑁆𑀢𑀸, 𑀏𑀢𑁆𑀢𑀓𑀁 𑀲𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀧𑀦𑀸𑀢𑀺 𑀯𑀘𑀦𑀸𑀮𑀗𑁆𑀓𑀸𑀭𑀫𑀢𑁆𑀢𑀁 𑀯𑀺𑀲𑀼𑀁 𑀅𑀢𑁆𑀣𑀸𑀪𑀸𑀯𑀢𑁄. 𑀧𑀤𑀢𑁆𑀣𑀲𑀁𑀓𑀺𑀡𑁆𑀡𑀲𑁆𑀲, 𑀯𑀢𑁆𑀢𑀩𑁆𑀩𑀲𑁆𑀲 𑀘 𑀅𑀯𑀼𑀢𑁆𑀢𑀲𑁆𑀲 𑀅𑀯𑀲𑁂𑀲𑀲𑁆𑀲 𑀅𑀪𑀸𑀯𑀢𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑁂𑀦 𑀲𑀼𑀧𑀭𑀺𑀲𑀼𑀤𑁆𑀥𑀁, ‘‘𑀲𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄, 𑀪𑀸𑀯𑀦𑀧𑀼𑀁𑀲𑀓𑀁 𑀯𑀸 𑀏𑀢𑀁 ‘‘𑀯𑀼𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀚𑁆𑀛𑀦𑀢𑁄. 𑀪𑀺𑀬𑁆𑀬𑁄𑀢𑀺 𑀅𑀢𑀺𑀭𑁂𑀓𑀁, 𑀅𑀢𑀺𑀯𑀺𑀢𑁆𑀣𑀸𑀭𑀦𑁆𑀢𑀺 𑀅𑀢𑁆𑀣𑁄, 𑀏𑀢𑁂𑀦 𑀧𑀤𑀢𑁆𑀣𑀫𑀢𑁆𑀢𑀫𑁂𑀯 𑀯𑀺𑀘𑀸𑀭𑀬𑀺𑀲𑁆𑀲𑀸𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑀁 𑀲𑀩𑁆𑀩𑀁 𑀇𑀥 𑀅𑀝𑁆𑀞𑀓𑀣𑀸𑀬 𑀦 𑀯𑀺𑀘𑀸𑀭𑀬𑀺𑀲𑁆𑀲𑀸𑀫𑀺 𑀧𑀼𑀦𑀭𑀼𑀢𑁆𑀢𑀺𑀪𑀸𑀯𑀢𑁄, 𑀕𑀦𑁆𑀣𑀕𑀭𑀼𑀓𑀪𑀸𑀯𑀢𑁄 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀘𑀭𑀬𑀺𑀲𑁆𑀲𑀸𑀫𑀻𑀢𑀺 𑀘 𑀕𑀸𑀣𑀸𑀪𑀸𑀯𑀢𑁄 𑀦 𑀯𑀼𑀤𑁆𑀥𑀺𑀪𑀸𑀯𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀯𑀫𑁆𑀧𑀺 𑀏𑀲 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀆𑀕𑀫𑀸𑀦𑀫𑀢𑁆𑀣𑀁 𑀦 𑀧𑀓𑀸𑀲𑁂𑀬𑁆𑀬, 𑀅𑀣 𑀲𑀩𑁆𑀩𑁄𑀧𑁂𑀲𑁄 𑀇𑀥 𑀯𑀺𑀘𑀸𑀭𑀺𑀢𑀩𑁆𑀩𑁄𑀬𑁂𑀯𑀸𑀢𑀺 𑀘𑁄𑀤𑀦𑀸𑀬 𑀢𑀣𑀸 𑀅𑀯𑀺𑀘𑀸𑀭𑀡𑀲𑁆𑀲 𑀏𑀓𑀦𑁆𑀢𑀓𑀸𑀭𑀡𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀢𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀫𑀚𑁆𑀛𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀚𑁆𑀛𑁂𑀢𑀺 𑀔𑀼𑀤𑁆𑀤𑀓𑀢𑁄 𑀅𑀜𑁆𑀜𑁂𑀲𑀁 𑀘𑀢𑀼𑀦𑁆𑀦𑀫𑁆𑀧𑀺 𑀆𑀕𑀫𑀸𑀦𑀁 𑀅𑀩𑁆𑀪𑀦𑁆𑀢𑀭𑁂. 𑀳𑀺-𑀲𑀤𑁆𑀤𑁄 𑀓𑀸𑀭𑀡𑁂, 𑀢𑁂𑀦 𑀬𑀣𑀸𑀯𑀼𑀢𑁆𑀢𑀁 𑀓𑀸𑀭𑀡𑀁 𑀚𑁄𑀢𑁂𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀘𑀢𑀽𑀲𑀼 𑀆𑀕𑀫𑁂𑀲𑀼. 𑀬𑀣𑀸𑀪𑀸𑀲𑀺𑀢𑀦𑁆𑀢𑀺 𑀪𑀕𑀯𑀢𑀸 𑀬𑀁 𑀬𑀁 𑀤𑁂𑀲𑀺𑀢𑀁, 𑀤𑁂𑀲𑀺𑀢𑀸𑀦𑀼𑀭𑀽𑀧𑀁 𑀯𑀸. 𑀅𑀧𑀺 𑀘 𑀲𑀁𑀯𑀡𑁆𑀡𑀓𑁂𑀳𑀺 𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀬𑀁 𑀬𑀁 𑀪𑀸𑀲𑀺𑀢𑀁, 𑀪𑀸𑀲𑀺𑀢𑀸𑀦𑀼𑀭𑀽𑀧𑀦𑁆𑀢𑀺𑀧𑀺 𑀅𑀢𑁆𑀣𑁄. 𑀇𑀘𑁆𑀘𑁂𑀯𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁂𑀦 𑀬𑀣𑀸𑀯𑀼𑀢𑁆𑀢𑀁 𑀓𑀸𑀭𑀡𑀁 𑀦𑀺𑀤𑀲𑁆𑀲𑁂𑀢𑀺, 𑀇𑀫𑀺𑀦𑀸𑀯 𑀓𑀸𑀭𑀡𑁂𑀦, 𑀇𑀤𑀫𑁂𑀯 𑀯𑀸 𑀓𑀸𑀭𑀡𑀁 𑀫𑀦𑀲𑀺 𑀲𑀦𑁆𑀦𑀺𑀥𑀸𑀬𑀸𑀢𑀺 𑀅𑀢𑁆𑀣𑁄. 𑀓𑀢𑁄𑀢𑀺 𑀏𑀢𑁆𑀣𑀸𑀧𑀺 ‘‘𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀏𑀲𑀸’’𑀢𑀺 𑀧𑀤𑀁 𑀓𑀫𑁆𑀫𑀪𑀸𑀯𑁂𑀦 𑀲𑀫𑁆𑀩𑀚𑁆𑀛𑀢𑀺 𑀆𑀯𑀼𑀢𑁆𑀢𑀺𑀬𑀸𑀤𑀺𑀦𑀬𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀫𑁆𑀧𑀻𑀢𑀺 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀫𑁆𑀧𑀺 𑀜𑀸𑀡𑁂𑀦 𑀕𑀳𑁂𑀢𑁆𑀯𑀸𑀦. 𑀏𑀢𑀸𑀬𑀸𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀦𑀸𑀫 𑀏𑀢𑀸𑀬 𑀅𑀝𑁆𑀞𑀓𑀣𑀸𑀬. 𑀏𑀢𑁆𑀣 𑀘 ‘‘𑀫𑀚𑁆𑀛𑁂 𑀞𑀢𑁆𑀯𑀸’’𑀢𑀺 𑀏𑀢𑁂𑀦 𑀫𑀚𑁆𑀛𑀢𑁆𑀢𑀪𑀸𑀯𑀤𑀻𑀧𑀦𑁂𑀦 𑀯𑀺𑀲𑁂𑀲𑀢𑁄 𑀘𑀢𑀼𑀦𑁆𑀦𑀫𑁆𑀧𑀺 𑀆𑀕𑀫𑀸𑀦𑀁 𑀲𑀸𑀥𑀸𑀭𑀡𑀝𑁆𑀞𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄, 𑀦 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀻𑀆𑀤𑀬𑁄 𑀯𑀺𑀬 𑀅𑀲𑀸𑀥𑀸𑀭𑀡𑀝𑁆𑀞𑀓𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀯𑀺𑀲𑁂𑀲𑀢𑁄 𑀧𑀦 𑀯𑀺𑀦𑀬𑀸𑀪𑀺𑀥𑀫𑁆𑀫𑀸𑀦𑀫𑁆𑀧𑀺 𑀬𑀣𑀸𑀭𑀳𑀁 𑀲𑀸𑀥𑀸𑀭𑀡𑀝𑁆𑀞𑀓𑀣𑀸 𑀳𑁄𑀢𑀺𑀬𑁂𑀯, 𑀢𑁂𑀳𑀺 𑀲𑀫𑁆𑀫𑀺𑀲𑁆𑀲𑀢𑀸𑀬 𑀘 𑀢𑀤𑀯𑀲𑁂𑀲𑀲𑁆𑀲 𑀔𑀼𑀤𑁆𑀤𑀓𑀸𑀕𑀫𑀲𑁆𑀲 ¶ 𑀯𑀺𑀲𑁂𑀲𑀢𑁄 𑀲𑀸𑀥𑀸𑀭𑀡𑀸 𑀲𑀫𑀸𑀦𑀸𑀧𑀺 𑀢𑀁 𑀞𑀧𑁂𑀢𑁆𑀯𑀸 𑀘𑀢𑀼𑀦𑁆𑀦𑀫𑁂𑀯 𑀆𑀕𑀫𑀸𑀦𑀁 𑀲𑀸𑀥𑀸𑀭𑀡𑀸𑀢𑁆𑀯𑁂𑀯 𑀯𑀼𑀢𑁆𑀢𑀸𑀢𑀺.

𑀇𑀢𑀺 𑀲𑁄𑀴𑀲𑀕𑀸𑀣𑀸𑀯𑀡𑁆𑀡𑀦𑀸.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸

𑀏𑀯𑀁 ¶ ¶ 𑀬𑀣𑀸𑀯𑀼𑀢𑁆𑀢𑁂𑀦 𑀯𑀺𑀯𑀺𑀥𑁂𑀦 𑀦𑀬𑁂𑀦 𑀧𑀡𑀸𑀫𑀸𑀤𑀺𑀓𑀁 𑀧𑀓𑀭𑀡𑀸𑀭𑀫𑁆𑀪𑀯𑀺𑀥𑀸𑀦𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀯𑀺𑀪𑀸𑀕𑀯𑀦𑁆𑀢𑀸𑀦𑀁 𑀲𑀪𑀸𑀯𑀯𑀺𑀪𑀸𑀯𑀦𑀁 𑀯𑀺𑀪𑀸𑀕𑀤𑀲𑁆𑀲𑀦𑀯𑀲𑁂𑀦𑁂𑀯 𑀲𑀼𑀯𑀺𑀪𑀸𑀯𑀺𑀢𑀁, 𑀲𑀼𑀯𑀺𑀜𑁆𑀜𑀸𑀧𑀺𑀢𑀜𑁆𑀘 𑀳𑁄𑀢𑀻𑀢𑀺 𑀧𑀞𑀫𑀁 𑀢𑀸𑀯 𑀯𑀕𑁆𑀕𑀲𑀼𑀢𑁆𑀢𑀯𑀲𑁂𑀦 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀤𑀻𑀖𑀸𑀕𑀫𑁄 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 ‘‘𑀤𑀻𑀖𑀲𑁆𑀲 𑀆𑀕𑀫𑀯𑀭𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀬𑀤𑀺𑀤𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀺𑀁 𑀯𑀘𑀦𑁂. ‘‘𑀬𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀜𑁆𑀜𑀸𑀢𑀁, 𑀲𑁄 𑀤𑀻𑀖𑀸𑀕𑀫𑁄 𑀦𑀸𑀫 𑀯𑀕𑁆𑀕𑀲𑀼𑀢𑁆𑀢𑀯𑀲𑁂𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄, 𑀏𑀯𑀁 𑀯𑀺𑀪𑀸𑀕𑁄𑀢𑀺 𑀯𑀸 𑀅𑀢𑁆𑀣𑁄. 𑀅𑀣 𑀯𑀸 𑀢𑀢𑁆𑀣𑀸𑀢𑀺 ‘‘𑀤𑀻𑀖𑀸𑀕𑀫𑀦𑀺𑀲𑁆𑀲𑀺𑀢’’𑀦𑁆𑀢𑀺 𑀬𑀁 𑀯𑀼𑀢𑁆𑀢𑀁, 𑀏𑀢𑀲𑁆𑀫𑀺𑀁 𑀯𑀘𑀦𑁂. 𑀬𑁄 𑀤𑀻𑀖𑀸𑀕𑀫𑁄 𑀯𑀼𑀢𑁆𑀢𑁄, 𑀲𑁄 𑀤𑀻𑀖𑀸𑀕𑀫𑁄 𑀦𑀸𑀫 𑀯𑀕𑁆𑀕𑀲𑀼𑀢𑁆𑀢𑀯𑀲𑁂𑀦. 𑀏𑀯𑀁 𑀯𑀺𑀪𑀚𑀺𑀢𑀩𑁆𑀩𑁄, 𑀏𑀤𑀺𑀲𑁄𑀢𑀺 𑀯𑀸 𑀅𑀢𑁆𑀣𑁄. ‘‘𑀤𑀻𑀖𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀳𑀺 𑀯𑀼𑀢𑁆𑀢𑀁 𑀤𑀽𑀭𑀯𑀘𑀦𑀁 𑀢𑀁-𑀲𑀤𑁆𑀤𑁂𑀦 𑀧𑀝𑀺𑀦𑀺𑀤𑁆𑀤𑀺𑀲𑀢𑀺 𑀯𑀺𑀬 ‘‘𑀤𑀻𑀖𑀸𑀕𑀫𑀦𑀺𑀲𑁆𑀲𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁 𑀆𑀲𑀦𑁆𑀦𑀯𑀘𑀦𑀫𑁆𑀧𑀺 𑀢𑀁-𑀲𑀤𑁆𑀤𑁂𑀦 𑀧𑀝𑀺𑀦𑀺𑀤𑁆𑀤𑀺𑀲𑀢𑀺 𑀅𑀢𑁆𑀢𑀦𑁄 𑀩𑀼𑀤𑁆𑀥𑀺𑀬𑀁 𑀧𑀭𑀫𑁆𑀫𑀼𑀔𑀁 𑀯𑀺𑀬 𑀧𑀭𑀺𑀯𑀢𑁆𑀢𑀫𑀸𑀦𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑀢𑁄. 𑀏𑀤𑀺𑀲𑁂𑀲𑀼 𑀳𑀺 𑀞𑀸𑀦𑁂𑀲𑀼 𑀅𑀢𑁆𑀢𑀦𑁄 𑀩𑀼𑀤𑁆𑀥𑀺𑀬𑀁 𑀲𑀫𑁆𑀫𑀼𑀔𑀁 𑀯𑀸 𑀧𑀭𑀫𑁆𑀫𑀼𑀔𑀁 𑀯𑀸 𑀧𑀭𑀺𑀯𑀢𑁆𑀢𑀫𑀸𑀦𑀁 𑀬𑀣𑀸 𑀢𑀣𑀸 𑀯𑀸 𑀧𑀝𑀺𑀦𑀺𑀤𑁆𑀤𑀺𑀲𑀺𑀢𑀼𑀁 𑀯𑀝𑁆𑀝𑀢𑀺 𑀲𑀤𑁆𑀤𑀫𑀢𑁆𑀢𑀧𑀝𑀺𑀦𑀺𑀤𑁆𑀤𑁂𑀲𑁂𑀦 𑀅𑀢𑁆𑀣𑀲𑁆𑀲𑀸𑀯𑀺𑀭𑁄𑀥𑀦𑀢𑁄. 𑀯𑀕𑁆𑀕𑀲𑀼𑀢𑁆𑀢𑀸𑀤𑀻𑀦𑀁 𑀦𑀺𑀩𑁆𑀩𑀘𑀦𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀢𑀬𑁄 𑀯𑀕𑁆𑀕𑀸 𑀬𑀲𑁆𑀲𑀸𑀢𑀺 𑀢𑀺𑀯𑀕𑁆𑀕𑁄. 𑀘𑀢𑀼𑀢𑁆𑀢𑀺𑀁𑀲 𑀲𑀼𑀢𑁆𑀢𑀸𑀦𑀺 𑀏𑀢𑁆𑀣 𑀲𑀗𑁆𑀕𑀬𑁆𑀳𑀦𑁆𑀢𑀺, 𑀢𑁂𑀲𑀁 𑀯𑀸 𑀲𑀗𑁆𑀕𑀳𑁄 𑀕𑀡𑀦𑀸 𑀏𑀢𑁆𑀣𑀸𑀢𑀺 𑀘𑀢𑀼𑀢𑁆𑀢𑀺𑀁𑀲𑀲𑀼𑀢𑁆𑀢𑀲𑀗𑁆𑀕𑀳𑁄.

𑀅𑀢𑁆𑀢𑀦𑁄 𑀲𑀁𑀯𑀡𑁆𑀡𑀦𑀸𑀬 𑀧𑀞𑀫𑀲𑀗𑁆𑀕𑀻𑀢𑀺𑀬𑀁 𑀦𑀺𑀓𑁆𑀔𑀺𑀢𑁆𑀢𑀸𑀦𑀼𑀓𑁆𑀓𑀫𑁂𑀦𑁂𑀯 𑀧𑀯𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀲…𑀧𑁂… 𑀦𑀺𑀤𑀸𑀦𑀫𑀸𑀤𑀻’’𑀢𑀺 𑀯𑀼𑀢𑁆𑀢𑀁. 𑀆𑀤𑀺𑀪𑀸𑀯𑁄 𑀳𑁂𑀢𑁆𑀣 𑀲𑀗𑁆𑀕𑀻𑀢𑀺𑀓𑁆𑀓𑀫𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀓𑀲𑁆𑀫𑀸 𑀧𑀦 𑀘𑀢𑀽𑀲𑀼 𑀆𑀕𑀫𑁂𑀲𑀼 𑀤𑀻𑀖𑀸𑀕𑀫𑁄 𑀧𑀞𑀫𑀁 𑀲𑀗𑁆𑀕𑀻𑀢𑁄, 𑀢𑀢𑁆𑀣 𑀘 𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑁄 𑀧𑀞𑀫𑀁 𑀦𑀺𑀓𑁆𑀔𑀺𑀢𑁆𑀢𑁄, 𑀢𑀲𑁆𑀫𑀺𑀜𑁆𑀘 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀁, 𑀢𑀢𑁆𑀣𑀸𑀧𑀺 𑀦𑀺𑀤𑀸𑀦𑀦𑁆𑀢𑀺? 𑀦𑀸𑀬𑀫𑀦𑀼𑀬𑁄𑀕𑁄 𑀓𑀢𑁆𑀣𑀘𑀺𑀧𑀺 𑀦 𑀧𑀯𑀢𑁆𑀢𑀢𑀺 𑀲𑀩𑁆𑀩𑀢𑁆𑀣𑁂𑀯 𑀯𑀘𑀦𑀓𑁆𑀓𑀫𑀫𑀢𑁆𑀢𑀁 𑀧𑀝𑀺𑀘𑁆𑀘 𑀅𑀦𑀼𑀬𑀼𑀜𑁆𑀚𑀺𑀢𑀩𑁆𑀩𑀢𑁄. 𑀅𑀧𑀺𑀘 𑀲𑀤𑁆𑀥𑀸𑀯𑀳𑀕𑀼𑀡𑀢𑁆𑀢𑀸 𑀤𑀻𑀖𑀸𑀕𑀫𑁄𑀯 𑀧𑀞𑀫𑀁 𑀲𑀗𑁆𑀕𑀻𑀢𑁄. 𑀲𑀤𑁆𑀥𑀸 𑀳𑀺 𑀓𑀼𑀲𑀮𑀥𑀫𑁆𑀫𑀸𑀦𑀁 𑀩𑀻𑀚𑀁. 𑀬𑀣𑀸𑀳 ‘‘𑀲𑀤𑁆𑀥𑀸 𑀩𑀻𑀚𑀁 𑀢𑀧𑁄 𑀯𑀼𑀝𑁆𑀞𑀻’’𑀢𑀺 (𑀲𑀁. 𑀦𑀺. 𑁨.𑁧𑁯𑁭; 𑀲𑀼. 𑀦𑀺. 𑁭𑁭). 𑀲𑀤𑁆𑀥𑀸𑀯𑀳𑀕𑀼𑀡𑀢𑀸 𑀘𑀲𑁆𑀲 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀸𑀬𑁂𑀯. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀓𑀢𑀺𑀧𑀬𑀲𑀼𑀢𑁆𑀢𑀲𑀗𑁆𑀕𑀳𑀢𑀸𑀬 ¶ 𑀘𑁂𑀯 𑀅𑀧𑁆𑀧𑀧𑀭𑀺𑀫𑀸𑀡𑀢𑀸𑀬 𑀘 𑀉𑀕𑁆𑀕𑀳𑀡𑀥𑀸𑀭𑀡𑀸𑀤𑀺𑀲𑀼𑀔𑀢𑁄 𑀧𑀞𑀫𑀁 𑀲𑀗𑁆𑀕𑀻𑀢𑁄. 𑀢𑀣𑀸 𑀳𑁂𑀲 𑀘𑀢𑀼𑀢𑁆𑀢𑀺𑀁𑀲𑀲𑀼𑀢𑁆𑀢𑀲𑀗𑁆𑀕𑀳𑁄, 𑀘𑀢𑀼𑀲𑀝𑁆𑀞𑀺𑀪𑀸𑀡𑀯𑀸𑀭𑀧𑀭𑀺𑀫𑀸𑀡𑁄 𑀘. 𑀲𑀻𑀮𑀓𑀣𑀸𑀩𑀸𑀳𑀼𑀮𑁆𑀮𑀢𑁄 𑀧𑀦 𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑁄 𑀧𑀞𑀫𑀁 𑀦𑀺𑀓𑁆𑀔𑀺𑀢𑁆𑀢𑁄. 𑀲𑀻𑀮𑀜𑁆𑀳𑀺 𑀲𑀸𑀲𑀦𑀲𑁆𑀲 𑀆𑀤𑀺 𑀲𑀻𑀮𑀧𑀢𑀺𑀝𑁆𑀞𑀸𑀦𑀢𑁆𑀢𑀸 𑀲𑀩𑁆𑀩𑀕𑀼𑀡𑀸𑀦𑀁 ¶ . 𑀢𑁂𑀦𑁂𑀯𑀸𑀳 ‘‘𑀢𑀲𑁆𑀫𑀸 𑀢𑀺𑀳 𑀢𑁆𑀯𑀁 𑀪𑀺𑀓𑁆𑀔𑀼 𑀆𑀤𑀺𑀫𑁂𑀯 𑀯𑀺𑀲𑁄𑀥𑁂𑀳𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀓𑁄 𑀘𑀸𑀤𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁? 𑀲𑀻𑀮𑀜𑁆𑀘 𑀲𑀼𑀯𑀺𑀲𑀼𑀤𑁆𑀥’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁫.𑁪𑁬𑁯). 𑀲𑀻𑀮𑀓𑁆𑀔𑀦𑁆𑀥𑀓𑀣𑀸𑀩𑀸𑀳𑀼𑀮𑁆𑀮𑀢𑁄 𑀳𑀺 𑀲𑁄 ‘‘𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑁄’’𑀢𑀺 𑀯𑀼𑀢𑁆𑀢𑁄. 𑀤𑀺𑀝𑁆𑀞𑀺𑀯𑀺𑀦𑀺𑀯𑁂𑀞𑀦𑀓𑀣𑀸𑀪𑀸𑀯𑀢𑁄 𑀧𑀦 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀲𑁆𑀲 𑀦𑀺𑀭𑀯𑀲𑁂𑀲𑀤𑀺𑀝𑁆𑀞𑀺𑀯𑀺𑀪𑀚𑀦𑀁 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀁 𑀧𑀞𑀫𑀁 𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀧𑀺𑀝𑀓𑁂 𑀳𑀺 𑀩𑀼𑀤𑁆𑀥𑀯𑀘𑀦𑁂 𑀩𑁆𑀭𑀳𑁆𑀫𑀚𑀸𑀮𑀲𑀤𑀺𑀲𑀁 𑀤𑀺𑀝𑁆𑀞𑀺𑀕𑀢𑀸𑀦𑀺 𑀦𑀺𑀕𑁆𑀕𑀼𑀫𑁆𑀩𑀁 𑀦𑀺𑀚𑁆𑀚𑀝𑀁 𑀓𑀢𑁆𑀯𑀸 𑀯𑀺𑀪𑀢𑁆𑀢𑀲𑀼𑀢𑁆𑀢𑀁 𑀦𑀢𑁆𑀣𑀺. 𑀦𑀺𑀤𑀸𑀦𑀁 𑀧𑀦 𑀧𑀞𑀫𑀲𑀗𑁆𑀕𑀻𑀢𑀺𑀬𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀧𑀼𑀝𑁆𑀞𑁂𑀦 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀤𑁂𑀲𑀓𑀸𑀮𑀸𑀤𑀺𑀦𑀺𑀤𑀲𑁆𑀲𑀦𑀢𑁆𑀣𑀁 𑀧𑀞𑀫𑀁 𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺. 𑀢𑁂𑀦𑀸𑀳 ‘‘𑀩𑁆𑀭𑀳𑁆𑀫𑀚𑀸𑀮𑀲𑁆𑀲𑀸𑀧𑀻’’𑀢𑀺𑀆𑀤𑀺. 𑀢𑀢𑁆𑀣 𑀘 ‘‘𑀆𑀬𑀲𑁆𑀫𑀢𑀸’’𑀢𑀺𑀆𑀤𑀺𑀦𑀸 𑀤𑁂𑀲𑀓𑀁 𑀦𑀺𑀬𑀫𑁂𑀢𑀺, 𑀧𑀞𑀫𑀲𑀗𑁆𑀕𑀻𑀢𑀺𑀓𑀸𑀮𑁂𑀢𑀺 𑀧𑀦 𑀓𑀸𑀮𑀦𑁆𑀢𑀺, 𑀅𑀬𑀫𑀢𑁆𑀣𑁄 𑀉𑀧𑀭𑀺 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸

𑀇𑀤𑀸𑀦𑀺 ‘‘𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂’’𑀢𑀺 𑀯𑀘𑀦𑀧𑁆𑀧𑀲𑀗𑁆𑀕𑁂𑀦 𑀢𑀁 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀁 𑀤𑀲𑁆𑀲𑁂𑀦𑁆𑀢𑁄, 𑀬𑀲𑁆𑀲𑀁 𑀯𑀸 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀬𑀁 𑀦𑀺𑀓𑁆𑀔𑀺𑀢𑁆𑀢𑀸𑀦𑀼𑀓𑁆𑀓𑀫𑁂𑀦 𑀲𑀁𑀯𑀡𑁆𑀡𑀦𑀁 𑀓𑀢𑁆𑀢𑀼𑀓𑀸𑀫𑀢𑁆𑀢𑀸 𑀢𑀁 𑀯𑀺𑀪𑀸𑀯𑁂𑀦𑁆𑀢𑁄 𑀢𑀲𑁆𑀲𑀸 𑀢𑀦𑁆𑀢𑀺𑀬𑀸 𑀆𑀭𑀼𑀴𑁆𑀳𑀸𑀬𑀧𑀺 𑀇𑀥 𑀯𑀘𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 𑀦𑀸𑀫 𑀘𑁂𑀲𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀳𑀺 𑀓𑀺𑀜𑁆𑀘𑀸𑀧𑀺…𑀧𑁂… 𑀫𑀸𑀭𑀼𑀴𑁆𑀳𑀸𑀢𑀺 𑀏𑀢𑁂𑀦 𑀦𑀦𑀼 𑀲𑀸 𑀲𑀗𑁆𑀕𑀻𑀢𑀺𑀓𑁆𑀔𑀦𑁆𑀥𑀓𑁂 𑀢𑀦𑁆𑀢𑀺𑀫𑀸𑀭𑀼𑀴𑁆𑀳𑀸, 𑀓𑀲𑁆𑀫𑀸 𑀇𑀥 𑀧𑀼𑀦 𑀯𑀼𑀢𑁆𑀢𑀸, 𑀬𑀤𑀺 𑀘 𑀯𑀼𑀢𑁆𑀢𑀸 𑀅𑀲𑁆𑀲 𑀦𑀺𑀭𑀢𑁆𑀣𑀓𑀢𑀸, 𑀕𑀦𑁆𑀣𑀕𑀭𑀼𑀢𑀸 𑀘 𑀲𑀺𑀬𑀸𑀢𑀺 𑀘𑁄𑀤𑀦𑀸𑀮𑁂𑀲𑀁 𑀤𑀲𑁆𑀲𑁂𑀢𑀺. ‘‘𑀦𑀺𑀤𑀸𑀦…𑀧𑁂… 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀧𑀦 𑀏𑀢𑁂𑀦 𑀦𑀺𑀤𑀸𑀦𑀓𑁄𑀲𑀮𑁆𑀮𑀢𑁆𑀣𑀪𑀸𑀯𑀢𑁄 𑀬𑀣𑀸𑀯𑀼𑀢𑁆𑀢𑀤𑁄𑀲𑀢𑀸 𑀦 𑀲𑀺𑀬𑀸𑀢𑀺 𑀯𑀺𑀲𑁂𑀲𑀓𑀸𑀭𑀡𑀤𑀲𑁆𑀲𑀦𑁂𑀦 𑀧𑀭𑀺𑀳𑀭𑀢𑀺. ‘‘𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 𑀦𑀸𑀫 𑀘𑁂𑀲𑀸’’𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀯𑀢𑁆𑀢𑀩𑁆𑀩𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑁂𑀦 𑀳𑀺 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂 𑀯𑀼𑀢𑁆𑀢𑀁 𑀦𑀺𑀤𑀸𑀦𑀜𑁆𑀘 𑀆𑀤𑀺, 𑀏𑀲𑀸 𑀘 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 𑀦𑀸𑀫 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸𑀢𑀺 𑀇𑀫𑀫𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀉𑀧𑀜𑁆𑀜𑀸𑀲𑀢𑁆𑀣𑁄 𑀯𑀸 𑀘-𑀲𑀤𑁆𑀤𑁄, 𑀉𑀧𑀜𑁆𑀜𑀸𑀲𑁄𑀢𑀺 𑀘 𑀯𑀸𑀓𑁆𑀬𑀸𑀭𑀫𑁆𑀪𑁄 𑀯𑀼𑀘𑁆𑀘𑀢𑀺. 𑀏𑀲𑀸 𑀳𑀺 𑀕𑀦𑁆𑀣𑀓𑀸𑀭𑀸𑀦𑀁 𑀧𑀓𑀢𑀺, 𑀬𑀤𑀺𑀤𑀁 𑀓𑀺𑀜𑁆𑀘𑀺 𑀯𑀢𑁆𑀯𑀸 𑀧𑀼𑀦 𑀅𑀧𑀭𑀁 𑀯𑀢𑁆𑀢𑀼𑀫𑀸𑀭𑀪𑀦𑁆𑀢𑀸𑀦𑀁 𑀘-𑀲𑀤𑁆𑀤𑀧𑀬𑁄𑀕𑁄. 𑀬𑀁 𑀧𑀦 𑀯𑀚𑀺𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁 ‘‘𑀏𑀢𑁆𑀣 𑀘-𑀲𑀤𑁆𑀤𑁄 𑀅𑀢𑀺𑀭𑁂𑀓𑀢𑁆𑀣𑁄, 𑀢𑁂𑀦 𑀅𑀜𑁆𑀜𑀸𑀧𑀺 𑀅𑀢𑁆𑀣𑀻𑀢𑀺 𑀤𑀻𑀧𑁂𑀢𑀻’’𑀢𑀺 (𑀯𑀚𑀺𑀭 𑀝𑀻. 𑀩𑀸𑀳𑀺𑀭𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸), 𑀢𑀤𑀬𑀼𑀢𑁆𑀢𑀫𑁂𑀯. 𑀦 𑀳𑁂𑀢𑁆𑀣 𑀘-𑀲𑀤𑁆𑀤𑁂𑀦 𑀢𑀤𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀬𑀤𑀺 𑀘𑁂𑀢𑁆𑀣 𑀢𑀤𑀢𑁆𑀣𑀤𑀲𑁆𑀲𑀦𑀢𑁆𑀣𑀫𑁂𑀯 𑀘-𑀓𑀸𑀭𑁄 𑀅𑀥𑀺𑀧𑁆𑀧𑁂𑀢𑁄 𑀲𑀺𑀬𑀸, 𑀏𑀯𑀁 𑀲𑀢𑀺 𑀲𑁄 𑀦 𑀓𑀢𑁆𑀢𑀩𑁆𑀩𑁄𑀬𑁂𑀯 𑀧𑀞𑀫𑀲𑀤𑁆𑀤𑁂𑀦𑁂𑀯 𑀅𑀜𑁆𑀜𑀸𑀲𑀁 𑀤𑀼𑀢𑀺𑀬𑀸𑀤𑀺𑀲𑀗𑁆𑀕𑀻𑀢𑀻𑀦𑀫𑁆𑀧𑀺 ¶ 𑀅𑀢𑁆𑀣𑀺𑀪𑀸𑀯𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸. 𑀤𑀼𑀢𑀺𑀬𑀸𑀤𑀺𑀫𑀼𑀧𑀸𑀤𑀸𑀬 𑀳𑀺 𑀧𑀞𑀫𑀲𑀤𑁆𑀤𑀧𑀬𑁄𑀕𑁄 ¶ 𑀤𑀻𑀖𑀸𑀤𑀺𑀫𑀼𑀧𑀸𑀤𑀸𑀬 𑀭𑀲𑁆𑀲𑀸𑀤𑀺𑀲𑀤𑁆𑀤𑀧𑀬𑁄𑀕𑁄 𑀯𑀺𑀬. 𑀬𑀣𑀸𑀧𑀘𑁆𑀘𑀬𑀁 𑀢𑀢𑁆𑀣 𑀢𑀢𑁆𑀣 𑀤𑁂𑀲𑀺𑀢𑀢𑁆𑀢𑀸, 𑀧𑀜𑁆𑀜𑀢𑁆𑀢𑀢𑁆𑀢𑀸 𑀘 𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀁 𑀥𑀫𑁆𑀫𑀯𑀺𑀦𑀬𑀸𑀦𑀁 𑀲𑀗𑁆𑀕𑀳𑁂𑀢𑁆𑀯𑀸 𑀕𑀸𑀬𑀦𑀁 𑀓𑀣𑀦𑀁 𑀲𑀗𑁆𑀕𑀻𑀢𑀺, 𑀏𑀢𑁂𑀦 𑀢𑀁 𑀢𑀁 𑀲𑀺𑀓𑁆𑀔𑀸𑀧𑀤𑀸𑀦𑀁, 𑀢𑀁𑀢𑀁𑀲𑀼𑀢𑁆𑀢𑀸𑀦𑀜𑁆𑀘 𑀆𑀤𑀺𑀧𑀭𑀺𑀬𑁄𑀲𑀸𑀦𑁂𑀲𑀼, 𑀅𑀦𑁆𑀢𑀭𑀦𑁆𑀢𑀭𑀸 𑀘 𑀲𑀫𑁆𑀩𑀦𑁆𑀥𑀯𑀲𑁂𑀦 𑀞𑀧𑀺𑀢𑀁 𑀲𑀗𑁆𑀕𑀻𑀢𑀺𑀓𑀸𑀭𑀓𑀯𑀘𑀦𑀁 𑀲𑀗𑁆𑀕𑀳𑀺𑀢𑀁 𑀳𑁄𑀢𑀺. 𑀫𑀳𑀸𑀯𑀺𑀲𑀬𑀢𑁆𑀢𑀸, 𑀧𑀽𑀚𑀺𑀢𑀢𑁆𑀢𑀸 𑀘 𑀫𑀳𑀢𑀻 𑀲𑀗𑁆𑀕𑀻𑀢𑀺 𑀫𑀳𑀸𑀲𑀗𑁆𑀕𑀻𑀢𑀺, 𑀧𑀞𑀫𑀸 𑀫𑀳𑀸𑀲𑀗𑁆𑀕𑀻𑀢𑀺 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺. 𑀓𑀺𑀜𑁆𑀘𑀸𑀧𑀻𑀢𑀺 𑀅𑀦𑀼𑀕𑁆𑀕𑀳𑀢𑁆𑀣𑁄, 𑀢𑁂𑀦 𑀧𑀸𑀴𑀺𑀬𑀫𑁆𑀧𑀺 𑀲𑀸 𑀲𑀗𑁆𑀕𑀻𑀢𑀺𑀫𑀸𑀭𑀼𑀴𑁆𑀳𑀸𑀯𑀸𑀢𑀺 𑀅𑀦𑀼𑀕𑁆𑀕𑀳𑀁 𑀓𑀭𑁄𑀢𑀺, 𑀏𑀯𑀫𑁆𑀧𑀺 𑀢𑀢𑁆𑀣𑀸𑀭𑀼𑀴𑁆𑀳𑀫𑀢𑁆𑀢𑁂𑀦 𑀇𑀥 𑀲𑁄𑀢𑀽𑀦𑀁 𑀦𑀺𑀤𑀸𑀦𑀓𑁄𑀲𑀮𑁆𑀮𑀁 𑀦 𑀳𑁄𑀢𑀻𑀢𑀺 𑀧𑀦-𑀲𑀤𑁆𑀤𑁂𑀦 𑀅𑀭𑀼𑀘𑀺𑀬𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀦𑀺𑀤𑀤𑀸𑀢𑀺 𑀤𑁂𑀲𑀦𑀁 𑀤𑁂𑀲𑀓𑀸𑀮𑀸𑀤𑀺𑀯𑀲𑁂𑀦 𑀅𑀯𑀺𑀤𑀺𑀢𑀁 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀦𑀺𑀤𑀲𑁆𑀲𑁂𑀢𑀻𑀢𑀺 𑀦𑀺𑀤𑀸𑀦𑀁, 𑀢𑀲𑁆𑀫𑀺𑀁 𑀓𑁄𑀲𑀮𑁆𑀮𑀁, 𑀢𑀤𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀢𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀢𑁆𑀢𑀸𑀦𑀁 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀲𑀭𑀡𑀸𑀤𑀺𑀧𑀝𑀺𑀮𑀸𑀪𑀳𑁂𑀢𑀼𑀪𑀽𑀢𑀸𑀲𑀼 𑀯𑀺𑀚𑁆𑀚𑀫𑀸𑀦𑀸𑀲𑀼𑀧𑀺 𑀅𑀜𑁆𑀜𑀸𑀲𑀼 𑀪𑀕𑀯𑀢𑁄 𑀓𑀺𑀭𑀺𑀬𑀸𑀲𑀼 ‘‘𑀩𑀼𑀤𑁆𑀥𑁄 𑀩𑁄𑀥𑁂𑀬𑁆𑀬’’𑀦𑁆𑀢𑀺 (𑀩𑀼. 𑀯𑀁. 𑀅𑀝𑁆𑀞. 𑀅𑀩𑁆𑀪𑀦𑁆𑀢𑀭𑀦𑀺𑀤𑀸𑀦 𑁧; 𑀘𑀭𑀺𑀬𑀸. 𑀅𑀝𑁆𑀞. 𑀧𑀓𑀺𑀡𑁆𑀡𑀓𑀓𑀣𑀸; 𑀉𑀤𑀸𑀦 𑀅𑀝𑁆𑀞. 𑁧𑁮) 𑀧𑀝𑀺𑀜𑁆𑀜𑀸𑀬 𑀅𑀦𑀼𑀮𑁄𑀫𑀦𑀢𑁄 𑀯𑀺𑀦𑁂𑀬𑁆𑀬𑀸𑀦𑀁 𑀫𑀕𑁆𑀕𑀨𑀮𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀸 𑀓𑀺𑀭𑀺𑀬𑀸𑀯 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀩𑀼𑀤𑁆𑀥𑀓𑀺𑀘𑁆𑀘𑀁 𑀦𑀸𑀫𑀸𑀢𑀺 𑀢𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀜𑁆𑀳𑀺…𑀧𑁂… 𑀯𑀺𑀦𑀬𑀦𑀸’’𑀢𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀢𑁄 𑀧𑀦 𑀧𑀼𑀩𑁆𑀩𑀪𑀸𑀕𑁂 𑀪𑀕𑀯𑀢𑀸 𑀪𑀸𑀲𑀺𑀢𑀁 𑀲𑀼𑀡𑀦𑁆𑀢𑀸𑀦𑀫𑁆𑀧𑀺 𑀯𑀸𑀲𑀦𑀸𑀪𑀸𑀕𑀺𑀬𑀫𑁂𑀯 𑀚𑀸𑀢𑀁, 𑀦 𑀲𑁂𑀓𑁆𑀔𑀪𑀸𑀕𑀺𑀬𑀁, 𑀦 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀸𑀦𑀁 𑀲𑀭𑀡𑀤𑀸𑀦𑀁 𑀯𑀺𑀬. 𑀏𑀲𑀸 𑀳𑀺 𑀥𑀫𑁆𑀫𑀢𑀸, 𑀢𑀲𑁆𑀫𑀸 𑀢𑀫𑁂𑀯 𑀫𑀭𑀺𑀬𑀸𑀤𑀪𑀸𑀯𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺 𑀥𑀫𑁆𑀫𑁄𑀬𑁂𑀯 𑀧𑀯𑀢𑁆𑀢𑀦𑀝𑁆𑀞𑁂𑀦 𑀘𑀓𑁆𑀓𑀦𑁆𑀢𑀺 𑀥𑀫𑁆𑀫𑀘𑀓𑁆𑀓𑀁. 𑀅𑀣 𑀯𑀸 𑀘𑀓𑁆𑀓𑀦𑁆𑀢𑀺 𑀆𑀡𑀸, 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 𑀥𑀫𑁆𑀫𑀜𑁆𑀘 𑀢𑀁 𑀘𑀓𑁆𑀓𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂𑀦 𑀜𑀸𑀬𑁂𑀦 𑀘𑀓𑁆𑀓𑀦𑁆𑀢𑀺𑀧𑀺 𑀥𑀫𑁆𑀫𑀘𑀓𑁆𑀓𑀁. 𑀯𑀼𑀢𑁆𑀢𑀜𑁆𑀳𑀺 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑁋

‘‘𑀥𑀫𑁆𑀫𑀜𑁆𑀘 𑀧𑀯𑀢𑁆𑀢𑁂𑀢𑀺 𑀘𑀓𑁆𑀓𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁. 𑀘𑀓𑁆𑀓𑀜𑁆𑀘 𑀧𑀯𑀢𑁆𑀢𑁂𑀢𑀺 𑀥𑀫𑁆𑀫𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀥𑀫𑁆𑀫𑁂𑀦 𑀧𑀯𑀢𑁆𑀢𑁂𑀢𑀻𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀥𑀫𑁆𑀫𑀘𑀭𑀺𑀬𑀸𑀬 𑀧𑀯𑀢𑁆𑀢𑁂𑀢𑀻𑀢𑀺 𑀥𑀫𑁆𑀫𑀘𑀓𑁆𑀓’’𑀦𑁆𑀢𑀺𑀆𑀤𑀺 (𑀧𑀝𑀺. 𑀫. 𑁨.𑁪𑁦, 𑁪𑁧).

𑀢𑀲𑁆𑀲 𑀧𑀯𑀢𑁆𑀢𑀦𑀁 𑀢𑀣𑀸. 𑀧𑀯𑀢𑁆𑀢𑀦𑀦𑁆𑀢𑀺 𑀘 𑀧𑀯𑀢𑁆𑀢𑀬𑀫𑀸𑀦𑀁, 𑀧𑀯𑀢𑁆𑀢𑀺𑀢𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀯𑀲𑁂𑀦 𑀤𑁆𑀯𑀺𑀥𑀸 𑀅𑀢𑁆𑀣𑁄. 𑀬𑀁 𑀲𑀦𑁆𑀥𑀸𑀬 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 ‘‘𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀲𑀼𑀢𑁆𑀢𑀦𑁆𑀢𑀁 ¶ 𑀤𑁂𑀲𑁂𑀦𑁆𑀢𑁄 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀺 𑀦𑀸𑀫, 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀲𑁆𑀲 𑀫𑀕𑁆𑀕𑀨𑀮𑀸𑀥𑀺𑀕𑀢𑀢𑁄 𑀧𑀝𑁆𑀞𑀸𑀬 𑀧𑀯𑀢𑁆𑀢𑀺𑀢𑀁 𑀦𑀸𑀫𑀸’’𑀢𑀺 (𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁧𑁦𑁮𑁧-𑁧𑁦𑁮𑁮; 𑀧𑀝𑀺. 𑀫. 𑀅𑀝𑁆𑀞. 𑁨.𑁨.𑁪𑁦). 𑀇𑀥 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦𑁂𑀯 𑀅𑀢𑁆𑀣𑁄 𑀬𑀼𑀢𑁆𑀢𑁄. 𑀬𑀸𑀯𑀸𑀢𑀺 𑀧𑀭𑀺𑀘𑁆𑀙𑁂𑀤𑀢𑁆𑀣𑁂 𑀦𑀺𑀧𑀸𑀢𑁄, 𑀲𑀼𑀪𑀤𑁆𑀤𑀲𑁆𑀲 𑀦𑀸𑀫 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑀺𑀦𑀬𑀦𑀁 ¶ 𑀅𑀦𑁆𑀢𑁄𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸𑀢𑀺 𑀅𑀪𑀺𑀯𑀺𑀥𑀺𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀜𑁆𑀳𑀺 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑁂 𑀦𑀺𑀧𑀦𑁆𑀦𑁄𑀬𑁂𑀯 𑀯𑀺𑀦𑁂𑀲𑀻𑀢𑀺. 𑀓𑀢𑀁 𑀧𑀭𑀺𑀦𑀺𑀝𑁆𑀞𑀸𑀧𑀺𑀢𑀁 𑀩𑀼𑀤𑁆𑀥𑀓𑀺𑀘𑁆𑀘𑀁 𑀬𑁂𑀦𑀸𑀢𑀺 𑀢𑀣𑀸, 𑀢𑀲𑁆𑀫𑀺𑀁. 𑀓𑀢𑀩𑀼𑀤𑁆𑀥𑀓𑀺𑀘𑁆𑀘𑁂 𑀪𑀕𑀯𑀢𑀺 𑀮𑁄𑀓𑀦𑀸𑀣𑁂 𑀧𑀭𑀺𑀦𑀺𑀩𑁆𑀩𑀼𑀢𑁂𑀢𑀺 𑀲𑀫𑁆𑀩𑀦𑁆𑀥𑁄, 𑀏𑀢𑁂𑀦 𑀩𑀼𑀤𑁆𑀥𑀓𑀢𑁆𑀢𑀩𑁆𑀩𑀲𑁆𑀲 𑀓𑀺𑀘𑁆𑀘𑀲𑁆𑀲 𑀓𑀲𑁆𑀲𑀘𑀺𑀧𑀺 𑀅𑀲𑁂𑀲𑀺𑀢𑀪𑀸𑀯𑀁 𑀤𑀻𑀧𑁂𑀢𑀺. 𑀢𑀢𑁄𑀬𑁂𑀯 𑀳𑀺 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺. 𑀦𑀦𑀼 𑀘 𑀲𑀸𑀯𑀓𑁂𑀳𑀺 𑀯𑀺𑀦𑀻𑀢𑀸𑀧𑀺 𑀯𑀺𑀦𑁂𑀬𑁆𑀬𑀸 𑀪𑀕𑀯𑀢𑀸𑀬𑁂𑀯 𑀯𑀺𑀦𑀻𑀢𑀸 𑀦𑀸𑀫. 𑀢𑀣𑀸 𑀳𑀺 𑀲𑀸𑀯𑀓𑀪𑀸𑀲𑀺𑀢𑀁 𑀲𑀼𑀢𑁆𑀢𑀁 ‘‘𑀩𑀼𑀤𑁆𑀥𑀪𑀸𑀲𑀺𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀸𑀯𑀓𑀯𑀺𑀦𑁂𑀬𑁆𑀬𑀸 𑀘 𑀦 𑀢𑀸𑀯 𑀯𑀺𑀦𑀻𑀢𑀸, 𑀢𑀲𑁆𑀫𑀸 ‘‘𑀓𑀢𑀩𑀼𑀤𑁆𑀥𑀓𑀺𑀘𑁆𑀘𑁂’’𑀢𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦𑀸𑀬𑀁 𑀤𑁄𑀲𑁄 𑀢𑁂𑀲𑀁 𑀯𑀺𑀦𑀬𑀦𑀼𑀧𑀸𑀬𑀲𑁆𑀲 𑀲𑀸𑀯𑀓𑁂𑀲𑀼 𑀞𑀧𑀺𑀢𑀢𑁆𑀢𑀸. 𑀢𑁂𑀦𑁂𑀯𑀸𑀳 𑁋

‘‘𑀦 𑀢𑀸𑀯𑀸𑀳𑀁 𑀧𑀸𑀧𑀺𑀫 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀬𑀸𑀯 𑀫𑁂 𑀪𑀺𑀓𑁆𑀔𑀽 𑀦 𑀲𑀸𑀯𑀓𑀸 𑀪𑀯𑀺𑀲𑁆𑀲𑀦𑁆𑀢𑀺 𑀯𑀺𑀬𑀢𑁆𑀢𑀸 𑀯𑀺𑀦𑀻𑀢𑀸 𑀯𑀺𑀲𑀸𑀭𑀤𑀸 𑀩𑀳𑀼𑀲𑁆𑀲𑀼𑀢𑀸 𑀥𑀫𑁆𑀫𑀥𑀭𑀸…𑀧𑁂… 𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳 𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁧𑁬𑁮; 𑀉𑀤𑀸. 𑁫𑁧).

‘‘𑀓𑀼𑀲𑀺𑀦𑀸𑀭𑀸𑀬’’𑀦𑁆𑀢𑀺𑀆𑀤𑀺𑀦𑀸 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑀤𑁂𑀲𑀓𑀸𑀮𑀯𑀺𑀲𑁂𑀲𑀯𑀘𑀦𑀁 ‘‘𑀅𑀧𑀭𑀺𑀦𑀺𑀩𑁆𑀩𑀼𑀢𑁄 𑀪𑀕𑀯𑀸’’𑀢𑀺 𑀕𑀸𑀳𑀲𑁆𑀲 𑀫𑀺𑀘𑁆𑀙𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀮𑁄𑀓𑁂 𑀚𑀸𑀢𑀲𑀁𑀯𑀤𑁆𑀥𑀸𑀤𑀺𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘. 𑀢𑀣𑀸 𑀳𑀺 𑀫𑀦𑀼𑀲𑁆𑀲𑀪𑀸𑀯𑀲𑁆𑀲 𑀲𑀼𑀧𑀸𑀓𑀝𑀓𑀭𑀡𑀢𑁆𑀣𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑀸 𑀘𑀭𑀺𑀫𑀪𑀯𑁂 𑀤𑀸𑀭𑀧𑀭𑀺𑀕𑁆𑀕𑀳𑀸𑀤𑀻𑀦𑀺𑀧𑀺 𑀓𑀭𑁄𑀦𑁆𑀢𑀻𑀢𑀺. 𑀓𑀼𑀲𑀺𑀦𑀸𑀭𑀸𑀬𑀦𑁆𑀢𑀺 𑀏𑀯𑀁 𑀦𑀸𑀫𑀓𑁂 𑀦𑀕𑀭𑁂. 𑀢𑀜𑁆𑀳𑀺 𑀦𑀕𑀭𑀁 𑀓𑀼𑀲𑀳𑀢𑁆𑀣𑀁 𑀧𑀼𑀭𑀺𑀲𑀁 𑀤𑀲𑁆𑀲𑀦𑀝𑁆𑀞𑀸𑀦𑁂 𑀫𑀸𑀧𑀺𑀢𑀢𑁆𑀢𑀸 ‘‘𑀓𑀼𑀲𑀺𑀦𑀸𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀲𑀫𑀻𑀧𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀉𑀧𑀯𑀢𑁆𑀢𑀦𑁂 𑀫𑀮𑁆𑀮𑀸𑀦𑀁 𑀲𑀸𑀮𑀯𑀦𑁂𑀢𑀺 𑀢𑀲𑁆𑀲 𑀦𑀕𑀭𑀲𑁆𑀲 𑀉𑀧𑀯𑀢𑁆𑀢𑀦𑀪𑀽𑀢𑁂 𑀫𑀮𑁆𑀮𑀭𑀸𑀚𑀽𑀦𑀁 𑀲𑀸𑀮𑀯𑀦𑁂. 𑀢𑀜𑁆𑀳𑀺 𑀲𑀸𑀮𑀯𑀦𑀁 𑀦𑀕𑀭𑀁 𑀧𑀯𑀺𑀲𑀺𑀢𑀼𑀓𑀸𑀫𑀸 𑀉𑀬𑁆𑀬𑀸𑀦𑀢𑁄 𑀉𑀧𑀘𑁆𑀘 𑀯𑀢𑁆𑀢𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀏𑀢𑁂𑀦𑀸𑀢𑀺 𑀉𑀧𑀯𑀢𑁆𑀢𑀦𑀁. 𑀬𑀣𑀸 𑀳𑀺 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀤𑀺𑀲𑀸𑀬𑀁 𑀣𑀽𑀧𑀸𑀭𑀸𑀫𑁄, 𑀏𑀯𑀁 𑀢𑀁 𑀉𑀬𑁆𑀬𑀸𑀦𑀁 𑀓𑀼𑀲𑀺𑀦𑀸𑀭𑀸𑀬 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀤𑀺𑀲𑀸𑀬𑀁 𑀳𑁄𑀢𑀺. 𑀬𑀣𑀸 𑀘 𑀣𑀽𑀧𑀸𑀭𑀸𑀫𑀢𑁄 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀕𑀭𑀁 𑀧𑀯𑀺𑀲𑀦𑀫𑀕𑁆𑀕𑁄 𑀧𑀸𑀘𑀻𑀦𑀫𑀼𑀔𑁄 𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑁂𑀦 𑀦𑀺𑀯𑀢𑁆𑀢𑀢𑀺, 𑀏𑀯𑀁 𑀉𑀬𑁆𑀬𑀸𑀦𑀢𑁄 𑀲𑀸𑀮𑀧𑀦𑁆𑀢𑀺 𑀧𑀸𑀘𑀻𑀦𑀫𑀼𑀔𑀸 𑀕𑀦𑁆𑀢𑁆𑀯𑀸 𑀉𑀢𑁆𑀢𑀭𑁂𑀦 𑀦𑀺𑀯𑀢𑁆𑀢𑀸, 𑀢𑀲𑁆𑀫𑀸 𑀢𑀁 ‘‘𑀉𑀧𑀯𑀢𑁆𑀢𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀧𑀭𑁂 𑀧𑀦 ¶ ‘‘𑀢𑀁 𑀲𑀸𑀮𑀯𑀦𑀫𑀼𑀧𑀕𑀦𑁆𑀢𑁆𑀯𑀸 𑀫𑀺𑀢𑁆𑀢𑀲𑀼𑀳𑀚𑁆𑀚𑁂 𑀅𑀧𑀮𑁄𑀓𑁂𑀢𑁆𑀯𑀸 𑀦𑀺𑀯𑀢𑁆𑀢𑀦𑀢𑁄 𑀉𑀧𑀯𑀢𑁆𑀢𑀦𑀦𑁆𑀢𑀺 𑀧𑀸𑀓𑀝𑀁 𑀚𑀸𑀢𑀁 𑀓𑀺𑀭𑀸’’𑀢𑀺 𑀯𑀤𑀦𑁆𑀢𑀺. 𑀬𑀫𑀓𑀲𑀸𑀮𑀸𑀦𑀫𑀦𑁆𑀢𑀭𑁂𑀢𑀺 𑀬𑀫𑀓𑀲𑀸𑀮𑀸𑀦𑀁 𑀯𑁂𑀫𑀚𑁆𑀛𑁂. 𑀢𑀢𑁆𑀣 𑀓𑀺𑀭 𑀪𑀕𑀯𑀢𑁄 𑀧𑀜𑁆𑀜𑀢𑁆𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑀲𑁆𑀲 𑀲𑀻𑀲𑀪𑀸𑀕𑁂 𑀏𑀓𑀸 𑀲𑀸𑀮𑀧𑀦𑁆𑀢𑀺 𑀳𑁄𑀢𑀺, 𑀧𑀸𑀤𑀪𑀸𑀕𑁂 𑀏𑀓𑀸. 𑀢𑀢𑁆𑀭𑀸𑀧𑀺 𑀏𑀓𑁄 𑀢𑀭𑀼𑀡𑀲𑀸𑀮𑁄 𑀲𑀻𑀲𑀪𑀸𑀕𑀲𑁆𑀲 𑀆𑀲𑀦𑁆𑀦𑁄 𑀳𑁄𑀢𑀺, 𑀏𑀓𑁄 𑀧𑀸𑀤𑀪𑀸𑀕𑀲𑁆𑀲. 𑀢𑀲𑁆𑀫𑀸 ‘‘𑀬𑀫𑀓𑀲𑀸𑀮𑀸𑀦𑀫𑀦𑁆𑀢𑀭𑁂’’𑀢𑀺 𑀯𑀼𑀢𑁆𑀢𑀁. 𑀅𑀧𑀺𑀘 ‘‘𑀬𑀫𑀓𑀲𑀸𑀮𑀸 𑀦𑀸𑀫 𑀫𑀽𑀮𑀓𑁆𑀔𑀦𑁆𑀥𑀯𑀺𑀝𑀧𑀧𑀢𑁆𑀢𑁂𑀳𑀺 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀺𑀩𑁆𑀩𑁂𑀢𑁆𑀯𑀸 𑀞𑀺𑀢𑀲𑀸𑀮𑀸’’𑀢𑀺𑀧𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀫𑀸 𑀇𑀢𑀺 𑀘𑀦𑁆𑀤𑁄 𑀯𑀼𑀘𑁆𑀘𑀢𑀺 𑀢𑀲𑁆𑀲 𑀕𑀢𑀺𑀬𑀸 𑀤𑀺𑀯𑀲𑀲𑁆𑀲 ¶ 𑀫𑀺𑀦𑀺𑀢𑀩𑁆𑀩𑀢𑁄, 𑀢𑀤𑀸 𑀲𑀩𑁆𑀩𑀓𑀮𑀸𑀧𑀸𑀭𑀺𑀧𑀽𑀭𑀺𑀬𑀸 𑀧𑀼𑀡𑁆𑀡𑁄 𑀏𑀯 𑀫𑀸𑀢𑀺 𑀧𑀼𑀡𑁆𑀡𑀫𑀸. 𑀲𑀤𑁆𑀤𑀯𑀺𑀤𑀽 𑀧𑀦 ‘‘𑀫𑁄 𑀲𑀺𑀯𑁄 𑀘𑀦𑁆𑀤𑀺𑀫𑀸 𑀘𑁂𑀯𑀸’’𑀢𑀺 𑀯𑀼𑀢𑁆𑀢𑀁 𑀲𑀓𑁆𑀓𑀢𑀪𑀸𑀲𑀸𑀦𑀬𑀁 𑀕𑀳𑁂𑀢𑁆𑀯𑀸 𑀑𑀓𑀸𑀭𑀦𑁆𑀢𑀫𑁆𑀧𑀺 𑀘𑀦𑁆𑀤𑀺𑀫𑀯𑀸𑀘𑀓 𑀫-𑀲𑀤𑁆𑀤𑀫𑀺𑀘𑁆𑀙𑀦𑁆𑀢𑀺. 𑀯𑀺𑀲𑀸𑀔𑀸𑀬 𑀬𑀼𑀢𑁆𑀢𑁄 𑀧𑀼𑀡𑁆𑀡𑀫𑀸 𑀬𑀢𑁆𑀣𑀸𑀢𑀺 𑀯𑀺𑀲𑀸𑀔𑀸𑀧𑀼𑀡𑁆𑀡𑀫𑁄, 𑀲𑁄𑀬𑁂𑀯 𑀤𑀺𑀯𑀲𑁄 𑀢𑀣𑀸, 𑀢𑀲𑁆𑀫𑀺𑀁. 𑀧𑀘𑁆𑀘𑀽𑀲𑀢𑀺 𑀢𑀺𑀫𑀺𑀭𑀁 𑀯𑀺𑀦𑀸𑀲𑁂𑀢𑀻𑀢𑀺 𑀧𑀘𑁆𑀘𑀽𑀲𑁄, 𑀧𑀢𑀺-𑀧𑀼𑀩𑁆𑀩𑁄 𑀉𑀲-𑀲𑀤𑁆𑀤𑁄 𑀭𑀼𑀚𑀸𑀬𑀦𑁆𑀢𑀺 𑀳𑀺 𑀦𑁂𑀭𑀼𑀢𑁆𑀢𑀺𑀓𑀸, 𑀲𑁄𑀬𑁂𑀯 𑀲𑀫𑀬𑁄𑀢𑀺 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑀬𑀸𑀫𑀧𑀭𑀺𑀬𑀸𑀧𑀦𑁆𑀦𑁄 𑀓𑀸𑀮𑀯𑀺𑀲𑁂𑀲𑁄 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁. 𑀯𑀺𑀲𑀸𑀔𑀸𑀧𑀼𑀡𑁆𑀡𑀫𑀤𑀺𑀯𑀲𑁂 𑀈𑀤𑀺𑀲𑁂 𑀭𑀢𑁆𑀢𑀺𑀬𑀸 𑀧𑀘𑁆𑀙𑀺𑀫𑀲𑀫𑀬𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀉𑀧𑀸𑀤𑀻𑀬𑀢𑁂 𑀓𑀫𑁆𑀫𑀓𑀺𑀮𑁂𑀲𑁂𑀳𑀻𑀢𑀺 𑀉𑀧𑀸𑀤𑀺, 𑀯𑀺𑀧𑀸𑀓𑀓𑁆𑀔𑀦𑁆𑀥𑀸, 𑀓𑀝𑀢𑁆𑀢𑀸 𑀘 𑀭𑀽𑀧𑀁. 𑀲𑁄 𑀧𑀦 𑀉𑀧𑀸𑀤𑀺 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀫𑀸𑀭𑀦𑀺𑀫𑁆𑀫𑀣𑀦𑁂 𑀅𑀦𑁄𑀲𑁆𑀲𑀝𑁆𑀞𑁄, 𑀇𑀥 𑀔𑀦𑁆𑀥𑀫𑀘𑁆𑀘𑀼𑀫𑀸𑀭𑀦𑀺𑀫𑁆𑀫𑀣𑀦𑁂 𑀑𑀲𑁆𑀲𑀝𑁆𑀞𑁄𑀦 𑀲𑁂𑀲𑀺𑀢𑁄, 𑀢𑀲𑁆𑀫𑀸 𑀦𑀢𑁆𑀣𑀺 𑀏𑀢𑀺𑀲𑁆𑀲𑀸 𑀉𑀧𑀸𑀤𑀺𑀲𑀗𑁆𑀔𑀸𑀢𑁄 𑀲𑁂𑀲𑁄, 𑀉𑀧𑀸𑀤𑀺𑀲𑁆𑀲 𑀯𑀸 𑀲𑁂𑀲𑁄𑀢𑀺 𑀓𑀢𑁆𑀯𑀸 ‘‘𑀅𑀦𑀼𑀧𑀸𑀤𑀺𑀲𑁂𑀲𑀸’’𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀩𑁆𑀩𑀸𑀦𑀥𑀸𑀢𑀽𑀢𑀺 𑀘𑁂𑀢𑁆𑀣 𑀦𑀺𑀩𑁆𑀩𑀼𑀢𑀺𑀫𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀦𑀺𑀩𑁆𑀩𑀸𑀦𑀜𑁆𑀘 𑀢𑀁 𑀲𑀪𑀸𑀯𑀥𑀸𑀭𑀡𑀢𑁄 𑀥𑀸𑀢𑀼 𑀘𑀸𑀢𑀺 𑀓𑀢𑁆𑀯𑀸. 𑀦𑀺𑀩𑁆𑀩𑀼𑀢𑀺𑀬𑀸 𑀳𑀺 𑀓𑀸𑀭𑀡𑀧𑀭𑀺𑀬𑀸𑀬𑁂𑀦 𑀅𑀲𑀗𑁆𑀔𑀢𑀥𑀸𑀢𑀼 𑀢𑀣𑀸 𑀯𑀼𑀘𑁆𑀘𑀢𑀺. 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀘𑀸𑀬𑀁 𑀓𑀭𑀡𑀦𑀺𑀤𑁆𑀤𑁂𑀲𑁄. 𑀅𑀦𑀼𑀧𑀸𑀤𑀺𑀲𑁂𑀲𑀢𑀸𑀲𑀗𑁆𑀔𑀸𑀢𑀁 𑀇𑀫𑀁 𑀧𑀓𑀸𑀭𑀁 𑀪𑀽𑀢𑀲𑁆𑀲 𑀧𑀢𑁆𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀪𑀕𑀯𑀢𑁄 𑀮𑀓𑁆𑀔𑀡𑁂 𑀦𑀺𑀩𑁆𑀩𑀸𑀦𑀥𑀸𑀢𑀼𑀲𑀗𑁆𑀔𑀸𑀢𑁂 𑀅𑀢𑁆𑀣𑁂 𑀢𑀢𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀦𑀼 𑀘 ‘‘𑀅𑀦𑀼𑀧𑀸𑀤𑀺𑀲𑁂𑀲𑀸𑀬𑀸’’𑀢𑀺 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸𑀯 𑀯𑀺𑀲𑁂𑀲𑀦𑀁 𑀳𑁄𑀢𑀺, 𑀦 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀪𑀕𑀯𑀢𑁄, 𑀅𑀣 𑀓𑀲𑁆𑀫𑀸 𑀢𑀁 𑀪𑀕𑀯𑀸 𑀧𑀢𑁆𑀢𑁄𑀢𑀺 𑀯𑀼𑀢𑁆𑀢𑁄𑀢𑀺? 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀲𑀳𑀘𑀭𑀡𑀢𑁄. 𑀢𑀁𑀲𑀳𑀘𑀭𑀡𑁂𑀦 𑀳𑀺 𑀪𑀕𑀯𑀸𑀧𑀺 𑀅𑀦𑀼𑀧𑀸𑀤𑀺𑀲𑁂𑀲𑀪𑀸𑀯𑀁 𑀧𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀪𑀸𑀯𑀲𑀗𑁆𑀔𑀸𑀢𑀁 𑀇𑀫𑀁 𑀧𑀓𑀸𑀭𑀁 𑀧𑀢𑁆𑀢𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀮𑀓𑁆𑀔𑀡𑁂 𑀲𑀜𑁆𑀚𑀸𑀦𑀦𑀓𑀺𑀭𑀺𑀬𑀸𑀬 𑀢𑀢𑀺𑀬𑀸𑀢𑀺𑀧𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺. 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸𑀢𑀺 𑀘 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼 ¶ 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀊𑀦𑀧𑀜𑁆𑀘𑀩𑀦𑁆𑀥𑀦𑁂𑀦 𑀧𑀢𑁆𑀢𑁂𑀦𑀸’’𑀢𑀺 (𑀧𑀸𑀭𑀸. 𑁬𑁧𑁨). 𑀏𑀢𑁆𑀣 𑀳𑀺 𑀊𑀦𑀧𑀜𑁆𑀘𑀩𑀦𑁆𑀥𑀦𑀧𑀢𑁆𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀅𑀧𑀺𑀘 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀅𑀦𑀼𑀧𑀸𑀤𑀺𑀲𑁂𑀲𑀸 𑀳𑀼𑀢𑁆𑀯𑀸 𑀪𑀽𑀢𑀸𑀬𑀸𑀢𑀺𑀧𑀺 𑀬𑀼𑀚𑁆𑀚𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀉𑀤𑀸𑀦𑀝𑁆𑀞𑀓𑀣𑀸𑀬 𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 ‘‘𑀉𑀧𑀟𑁆𑀠𑀼𑀮𑁆𑀮𑀺𑀔𑀺𑀢𑁂𑀳𑀺 𑀓𑁂𑀲𑁂𑀳𑀻𑀢𑀺 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁 𑀯𑀺𑀧𑁆𑀧𑀓𑀢𑀼𑀮𑁆𑀮𑀺𑀔𑀺𑀢𑁂𑀳𑀺 𑀓𑁂𑀲𑁂𑀳𑀺 𑀉𑀧𑀮𑀓𑁆𑀔𑀺𑀢𑀸𑀢𑀺 𑀅𑀢𑁆𑀣𑁄’’𑀢𑀺 (𑀉𑀤𑀸. 𑀅𑀝𑁆𑀞. 𑁨𑁨) 𑀏𑀲𑀦𑀬𑁄 𑀈𑀤𑀺𑀲𑁂𑀲𑀼. 𑀥𑀸𑀢𑀼𑀪𑀸𑀚𑀦𑀤𑀺𑀯𑀲𑁂𑀢𑀺 𑀚𑁂𑀝𑁆𑀞𑀫𑀸𑀲𑀲𑁆𑀲 𑀲𑀼𑀓𑁆𑀓𑀧𑀓𑁆𑀔𑀧𑀜𑁆𑀘𑀫𑀻𑀤𑀺𑀯𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀜𑁆𑀘 𑀦 ‘‘𑀲𑀦𑁆𑀦𑀺𑀧𑀢𑀺𑀢𑀸𑀦’’𑀦𑁆𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀁, ‘‘𑀉𑀲𑁆𑀲𑀸𑀳𑀁 𑀚𑀦𑁂𑀲𑀻’’𑀢𑀺 𑀏𑀢𑀲𑁆𑀲 𑀧𑀦 𑀯𑀺𑀲𑁂𑀲𑀦𑀁 ‘‘𑀥𑀸𑀢𑀼𑀪𑀸𑀚𑀦𑀤𑀺𑀯𑀲𑁂 𑀪𑀺𑀓𑁆𑀔𑀽𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀲𑀻’’𑀢𑀺 𑀉𑀲𑁆𑀲𑀸𑀳𑀚𑀦𑀦𑀲𑁆𑀲 𑀓𑀸𑀮𑀯𑀲𑁂𑀦 𑀪𑀺𑀦𑁆𑀦𑀸𑀥𑀺𑀓𑀭𑀡𑀯𑀺𑀲𑁂𑀲𑀦𑀪𑀸𑀯𑀢𑁄. 𑀥𑀸𑀢𑀼𑀪𑀸𑀚𑀦𑀤𑀺𑀯𑀲𑀢𑁄 𑀳𑀺 𑀧𑀼𑀭𑀺𑀫𑀢𑀭𑀤𑀺𑀯𑀲𑁂𑀲𑀼𑀧𑀺 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀺𑀢𑀸𑀢𑀺. 𑀅𑀣 𑀯𑀸 ‘‘𑀲𑀦𑁆𑀦𑀺𑀧𑀢𑀺𑀢𑀸𑀦’’𑀦𑁆𑀢𑀺 𑀇𑀤𑀁 𑀓𑀸𑀬𑀲𑀸𑀫𑀕𑁆𑀕𑀺𑀯𑀲𑁂𑀦 𑀲𑀦𑁆𑀦𑀺𑀧𑀢𑀦𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀲𑀫𑀸𑀕𑀫𑀦𑀫𑀢𑁆𑀢𑁂𑀦. 𑀢𑀲𑁆𑀫𑀸 ‘‘𑀥𑀸𑀢𑀼𑀪𑀸𑀚𑀦𑀤𑀺𑀯𑀲𑁂’’𑀢𑀺 𑀇𑀤𑀁 ‘‘𑀲𑀦𑁆𑀦𑀺𑀧𑀢𑀺𑀢𑀸𑀦’’𑀦𑁆𑀢𑀺 𑀏𑀢𑀲𑁆𑀲 𑀯𑀺𑀲𑁂𑀲𑀦𑀁 𑀲𑀫𑁆𑀪𑀯𑀢𑀺, 𑀇𑀤𑀜𑁆𑀘 𑀪𑀺𑀓𑁆𑀔𑀽𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀲𑀻𑀢𑀺 𑀏𑀢𑁆𑀣 ‘‘𑀪𑀺𑀓𑁆𑀔𑀽𑀦’’𑀦𑁆𑀢𑀺 𑀏𑀢𑁂𑀦𑀧𑀺 𑀲𑀫𑁆𑀩𑀚𑁆𑀛𑀦𑀻𑀬𑀁 ¶ . 𑀲𑀗𑁆𑀖𑀲𑁆𑀲 𑀣𑁂𑀭𑁄 𑀲𑀗𑁆𑀖𑀢𑁆𑀣𑁂𑀭𑁄. 𑀲𑁄 𑀧𑀦 𑀲𑀗𑁆𑀖𑁄 𑀓𑀺𑀁 𑀧𑀭𑀺𑀫𑀸𑀡𑁄𑀢𑀺 𑀆𑀳 ‘‘𑀲𑀢𑁆𑀢𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦’’𑀦𑁆𑀢𑀺. 𑀲𑀗𑁆𑀖𑀲𑀤𑁆𑀤𑁂𑀦 𑀳𑀺 𑀅𑀯𑀺𑀜𑁆𑀜𑀸𑀬𑀫𑀸𑀦𑀲𑁆𑀲 𑀧𑀭𑀺𑀫𑀸𑀡𑀲𑁆𑀲 𑀯𑀺𑀜𑁆𑀜𑀸𑀧𑀦𑀢𑁆𑀣𑀫𑁂𑀯𑁂𑀢𑀁 𑀧𑀼𑀦 𑀯𑀼𑀢𑁆𑀢𑀁. 𑀲𑀤𑁆𑀤𑀯𑀺𑀤𑀽 𑀧𑀦 𑀯𑀤𑀦𑁆𑀢𑀺 𑁋

‘‘𑀲𑀫𑀸𑀲𑁄 𑀘 𑀢𑀤𑁆𑀥𑀺𑀢𑁄 𑀘, 𑀯𑀸𑀓𑁆𑀬𑀢𑁆𑀣𑁂𑀲𑀼 𑀯𑀺𑀲𑁂𑀲𑀓𑀸;

𑀧𑀲𑀺𑀤𑁆𑀥𑀺𑀬𑀦𑁆𑀢𑀼 𑀲𑀸𑀫𑀜𑁆𑀜𑀁, 𑀢𑁂𑀮𑀁 𑀲𑀼𑀕𑀢𑀘𑀻𑀯𑀭𑀁.

𑀢𑀲𑁆𑀫𑀸 𑀦𑀸𑀫𑀫𑀢𑁆𑀢𑀪𑀽𑀢𑀲𑁆𑀲 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀯𑀺𑀲𑁂𑀲𑀦𑀢𑁆𑀣𑀫𑁂𑀯𑁂𑀢𑀁 𑀧𑀼𑀦 𑀯𑀼𑀢𑁆𑀢𑀦𑁆𑀢𑀺, 𑀦𑀺𑀘𑁆𑀘𑀲𑀸𑀧𑁂𑀓𑁆𑀔𑀢𑀸𑀬 𑀘 𑀏𑀤𑀺𑀲𑁂𑀲𑀼 𑀲𑀫𑀸𑀲𑁄 𑀬𑀣𑀸 ‘‘𑀤𑁂𑀯𑀤𑀢𑁆𑀢𑀲𑁆𑀲 𑀕𑀭𑀼𑀓𑀼𑀮’’𑀦𑁆𑀢𑀺. 𑀦𑀺𑀘𑁆𑀘𑀲𑀸𑀧𑁂𑀓𑁆𑀔𑀢𑀸 𑀘𑁂𑀢𑁆𑀣 𑀲𑀗𑁆𑀖𑀲𑀤𑁆𑀤𑀲𑁆𑀲 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀲𑀤𑁆𑀤𑀁 𑀲𑀸𑀧𑁂𑀓𑁆𑀔𑀢𑁆𑀢𑁂𑀧𑀺 𑀅𑀜𑁆𑀜𑀧𑀤𑀦𑁆𑀢𑀭𑀸𑀪𑀸𑀯𑁂𑀦 𑀯𑀸𑀓𑁆𑀬𑁂 𑀯𑀺𑀬 𑀅𑀧𑁂𑀓𑁆𑀔𑀺𑀢𑀩𑁆𑀩𑀢𑁆𑀣𑀲𑁆𑀲 𑀕𑀫𑀓𑀢𑁆𑀢𑀸. ‘‘𑀲𑀢𑁆𑀢𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦’’𑀦𑁆𑀢𑀺 𑀳𑀺 𑀏𑀢𑀲𑁆𑀲 𑀲𑀗𑁆𑀖𑀲𑀤𑁆𑀤𑁂 𑀅𑀯𑀬𑀯𑀻𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑁄, 𑀢𑀲𑁆𑀲𑀸𑀧𑀺 𑀲𑀸𑀫𑀺𑀪𑀸𑀯𑁂𑀦 𑀣𑁂𑀭𑀲𑀤𑁆𑀤𑁂𑀢𑀺. ‘‘𑀲𑀢𑁆𑀢𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦’’𑀦𑁆𑀢𑀺 𑀘 𑀕𑀡𑀧𑀸𑀫𑁄𑀓𑁆𑀔𑀪𑀺𑀓𑁆𑀔𑀽𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀤𑀸 𑀳𑀺 𑀲𑀦𑁆𑀦𑀺𑀧𑀢𑀺𑀢𑀸 𑀪𑀺𑀓𑁆𑀔𑀽 𑀏𑀢𑁆𑀢𑀓𑀸𑀢𑀺 𑀕𑀡𑀦𑀧𑀣𑀫𑀢𑀺𑀓𑁆𑀓𑀦𑁆𑀢𑀸. 𑀢𑀣𑀸 𑀳𑀺 𑀯𑁂𑀴𑀼𑀯𑀕𑀸𑀫𑁂 𑀯𑁂𑀤𑀦𑀸𑀯𑀺𑀓𑁆𑀔𑀫𑁆𑀪𑀦𑀢𑁄 𑀧𑀝𑁆𑀞𑀸𑀬 ‘‘𑀦𑀘𑀺𑀭𑁂𑀦𑁂𑀯 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’’𑀢𑀺 𑀲𑀼𑀢𑁆𑀯𑀸 𑀢𑀢𑁄 𑀢𑀢𑁄 𑀆𑀕𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀏𑀓𑀪𑀺𑀓𑁆𑀔𑀼𑀧𑀺 𑀧𑀓𑁆𑀓𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀬𑀣𑀸𑀳𑀼 𑁋

‘‘𑀲𑀢𑁆𑀢𑀲𑀢𑀲𑀳𑀲𑁆𑀲𑀸𑀦𑀺 ¶ , 𑀢𑁂𑀲𑀼 𑀧𑀸𑀫𑁄𑀓𑁆𑀔𑀪𑀺𑀓𑁆𑀔𑀯𑁄;

𑀣𑁂𑀭𑁄 𑀫𑀳𑀸𑀓𑀲𑁆𑀲𑀧𑁄𑀯, 𑀲𑀗𑁆𑀖𑀢𑁆𑀣𑁂𑀭𑁄 𑀢𑀤𑀸 𑀅𑀳𑀽’’𑀢𑀺.

𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀅𑀦𑀼𑀲𑁆𑀲𑀭𑀦𑁆𑀢𑁄 𑀫𑀜𑁆𑀜𑀫𑀸𑀦𑁄 𑀘𑀺𑀦𑁆𑀢𑀬𑀦𑁆𑀢𑁄 𑀳𑀼𑀢𑁆𑀯𑀸 𑀉𑀲𑁆𑀲𑀸𑀳𑀁 𑀚𑀦𑁂𑀲𑀺, 𑀅𑀦𑀼𑀲𑁆𑀲𑀭𑀦𑁆𑀢𑁄 𑀫𑀜𑁆𑀜𑀫𑀸𑀦𑁄 𑀘𑀺𑀦𑁆𑀢𑀬𑀦𑁆𑀢𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀉𑀲𑁆𑀲𑀸𑀳𑀁 𑀚𑀦𑁂𑀲𑀻𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄. 𑀫𑀳𑀦𑁆𑀢𑁂𑀳𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀳𑀦𑁆𑀢𑁄 𑀓𑀲𑁆𑀲𑀧𑁄𑀢𑀺 𑀫𑀳𑀸𑀓𑀲𑁆𑀲𑀧𑁄. 𑀅𑀧𑀺𑀘 ‘‘𑀫𑀳𑀸𑀓𑀲𑁆𑀲𑀧𑁄’’𑀢𑀺 𑀉𑀭𑀼𑀯𑁂𑀮𑀓𑀲𑁆𑀲𑀧𑁄 𑀦𑀤𑀻𑀓𑀲𑁆𑀲𑀧𑁄 𑀕𑀬𑀸𑀓𑀲𑁆𑀲𑀧𑁄 𑀓𑀼𑀫𑀸𑀭𑀓𑀲𑁆𑀲𑀧𑁄𑀢𑀺 𑀇𑀫𑁂 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑁂 𑀣𑁂𑀭𑁂 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺. 𑀓𑀲𑁆𑀫𑀸 𑀧𑀦𑀸𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀉𑀲𑁆𑀲𑀸𑀳𑀁 𑀚𑀦𑁂𑀲𑀻𑀢𑀺 𑀅𑀦𑀼𑀬𑁄𑀕𑁂 𑀲𑀢𑀺 𑀢𑀁 𑀓𑀸𑀭𑀡𑀁 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁂’’𑀢𑀺𑀆𑀤𑀺. 𑀲𑀢𑁆𑀢 𑀅𑀳𑀸𑀦𑀺 𑀲𑀫𑀸𑀳𑀝𑀸𑀦𑀺 𑀲𑀢𑁆𑀢𑀸𑀳𑀁. 𑀲𑀢𑁆𑀢𑀸𑀳𑀁 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀅𑀲𑁆𑀲𑀸𑀢𑀺 𑀢𑀣𑀸 𑀬𑀣𑀸 ‘‘𑀅𑀘𑀺𑀭𑀧𑀓𑁆𑀓𑀦𑁆𑀢𑁄, 𑀫𑀸𑀲𑀚𑀸𑀢𑁄’’𑀢𑀺, 𑀅𑀦𑁆𑀢𑀢𑁆𑀣𑀅𑀜𑁆𑀜𑀧𑀤𑀲𑀫𑀸𑀲𑁄𑀬𑀁, 𑀢𑀲𑁆𑀫𑀺𑀁. 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀸𑀳𑁂 𑀯𑀻𑀢𑀺𑀯𑀢𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀏𑀢𑀲𑁆𑀲 ‘‘𑀯𑀼𑀢𑁆𑀢𑀯𑀘𑀦’’𑀦𑁆𑀢𑀺 𑀧𑀤𑁂𑀦 𑀲𑀫𑁆𑀩𑀦𑁆𑀥𑁄, 𑀢𑀣𑀸 ‘‘𑀲𑀼𑀪𑀤𑁆𑀤𑁂𑀦 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁂𑀦𑀸’’𑀢𑀺 𑀏𑀢𑀲𑁆𑀲𑀧𑀺. 𑀢𑀢𑁆𑀣 𑀲𑀼𑀪𑀤𑁆𑀤𑁄𑀢𑀺 𑀢𑀲𑁆𑀲 𑀦𑀸𑀫𑀫𑀢𑁆𑀢𑀁, 𑀯𑀼𑀟𑁆𑀠𑀓𑀸𑀮𑁂 𑀧𑀦 𑀧𑀩𑁆𑀩𑀚𑀺𑀢𑀢𑁆𑀢𑀸 ‘‘𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀏𑀢𑁂𑀦 𑀲𑀼𑀪𑀤𑁆𑀤𑀧𑀭𑀺𑀩𑁆𑀩𑀸𑀚𑀓𑀸𑀤𑀻𑀳𑀺 𑀢𑀁 𑀯𑀺𑀲𑁂𑀲𑀁 𑀓𑀭𑁄𑀢𑀺. ‘‘𑀅𑀮𑀁 𑀆𑀯𑀼𑀲𑁄’’𑀢𑀺𑀆𑀤𑀺𑀦𑀸 ¶ 𑀢𑁂𑀦 𑀯𑀼𑀢𑁆𑀢𑀯𑀘𑀦𑀁 𑀦𑀺𑀤𑀲𑁆𑀲𑁂𑀢𑀺. 𑀲𑁄 𑀳𑀺 𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀧𑀸𑀯𑀸𑀬 𑀓𑀼𑀲𑀺𑀦𑀸𑀭𑀁 𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑁂𑀲𑀼 𑀧𑀜𑁆𑀘𑀫𑀢𑁆𑀢𑁂𑀲𑀼 𑀪𑀺𑀓𑁆𑀔𑀼𑀲𑀢𑁂𑀲𑀼 𑀅𑀯𑀻𑀢𑀭𑀸𑀕𑁂 𑀪𑀺𑀓𑁆𑀔𑀽 𑀅𑀦𑁆𑀢𑀭𑀸𑀫𑀕𑁆𑀕𑁂 𑀤𑀺𑀝𑁆𑀞𑀆𑀚𑀻𑀯𑀓𑀲𑁆𑀲 𑀲𑀦𑁆𑀢𑀺𑀓𑀸 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀁 𑀲𑀼𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀩𑀸𑀳𑀸 𑀧𑀕𑁆𑀕𑀬𑁆𑀳𑀁 𑀦𑀸𑀦𑀧𑁆𑀧𑀓𑀸𑀭𑀁 𑀧𑀭𑀺𑀤𑁂𑀯𑀦𑁆𑀢𑁂 𑀤𑀺𑀲𑁆𑀯𑀸 𑀏𑀯𑀫𑀸𑀳.

𑀓𑀲𑁆𑀫𑀸 𑀧𑀦 𑀲𑁄 𑀏𑀯𑀫𑀸𑀳𑀸𑀢𑀺? 𑀪𑀕𑀯𑀢𑀺 𑀆𑀖𑀸𑀢𑁂𑀦. 𑀅𑀬𑀁 𑀓𑀺𑀭𑁂𑀲𑁄 𑀔𑀦𑁆𑀥𑀓𑁂 𑀆𑀕𑀢𑁂 𑀆𑀢𑀼𑀫𑀸𑀯𑀢𑁆𑀣𑀼𑀲𑁆𑀫𑀺𑀁 (𑀫𑀳𑀸𑀯. 𑁩𑁦𑁩) 𑀦𑀳𑀸𑀧𑀺𑀢𑀧𑀼𑀩𑁆𑀩𑀓𑁄 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄 𑀪𑀕𑀯𑀢𑀺 𑀓𑀼𑀲𑀺𑀦𑀸𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀟𑁆𑀠𑀢𑁂𑀴𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀆𑀢𑀼𑀫𑀁 𑀕𑀘𑁆𑀙𑀦𑁆𑀢𑁂 ‘‘𑀪𑀕𑀯𑀸 𑀆𑀕𑀘𑁆𑀙𑀢𑀻’’𑀢𑀺 𑀲𑀼𑀢𑁆𑀯𑀸 ‘‘𑀆𑀕𑀢𑀓𑀸𑀮𑁂𑀬𑀸𑀕𑀼𑀤𑀸𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀺𑀢𑁂 𑀤𑁆𑀯𑁂 𑀧𑀼𑀢𑁆𑀢𑁂 𑀏𑀢𑀤𑀯𑁄𑀘 ‘‘𑀪𑀕𑀯𑀸 𑀓𑀺𑀭 𑀢𑀸𑀢𑀸 𑀆𑀢𑀼𑀫𑀁 𑀆𑀕𑀘𑁆𑀙𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀅𑀟𑁆𑀠𑀢𑁂𑀴𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺, 𑀕𑀘𑁆𑀙𑀣 𑀢𑀼𑀫𑁆𑀳𑁂 𑀢𑀸𑀢𑀸, 𑀔𑀼𑀭𑀪𑀡𑁆𑀟𑀁 𑀆𑀤𑀸𑀬 𑀦𑀸𑀴𑀺𑀬𑀸 𑀯𑀸 𑀧𑀲𑀺𑀩𑁆𑀩𑀓𑁂𑀦 𑀯𑀸 𑀅𑀦𑀼𑀖𑀭𑀓𑀁 𑀆𑀳𑀺𑀡𑁆𑀟𑀣, 𑀮𑁄𑀡𑀫𑁆𑀧𑀺 𑀢𑁂𑀮𑀫𑁆𑀧𑀺 𑀢𑀡𑁆𑀟𑀼𑀮𑀫𑁆𑀧𑀺 𑀔𑀸𑀤𑀦𑀻𑀬𑀫𑁆𑀧𑀺 ¶ 𑀲𑀁𑀳𑀭𑀣, 𑀪𑀕𑀯𑀢𑁄 𑀆𑀕𑀢𑀲𑁆𑀲 𑀬𑀸𑀕𑀼𑀤𑀸𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀢𑁂 𑀢𑀣𑀸 𑀅𑀓𑀁𑀲𑀼. 𑀅𑀣 𑀪𑀕𑀯𑀢𑀺 𑀆𑀢𑀼𑀫𑀁 𑀆𑀕𑀦𑁆𑀢𑁆𑀯𑀸 𑀪𑀼𑀲𑀸𑀕𑀸𑀭𑀓𑀁 𑀧𑀯𑀺𑀝𑁆𑀞𑁂 𑀲𑀼𑀪𑀤𑁆𑀤𑁄 𑀲𑀸𑀬𑀦𑁆𑀳𑀲𑀫𑀬𑀁 𑀕𑀸𑀫𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑁂 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀳𑀢𑁆𑀣𑀓𑀫𑁆𑀫𑀫𑀢𑁆𑀢𑀁 𑀫𑁂 𑀤𑁂𑀣𑀸’’𑀢𑀺 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀺𑀢𑁆𑀯𑀸 ‘‘𑀓𑀺𑀁 𑀪𑀦𑁆𑀢𑁂 𑀓𑀭𑁄𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀕𑀡𑁆𑀳𑀣𑀸’’𑀢𑀺 𑀲𑀩𑁆𑀩𑀽𑀧𑀓𑀭𑀡𑀸𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑁂 𑀉𑀤𑁆𑀥𑀦𑀸𑀦𑀺 𑀓𑀸𑀭𑁂𑀢𑁆𑀯𑀸 𑀏𑀓𑀁 𑀓𑀸𑀴𑀓𑀁 𑀓𑀸𑀲𑀸𑀯𑀁 𑀦𑀺𑀯𑀸𑀲𑁂𑀢𑁆𑀯𑀸 𑀢𑀸𑀤𑀺𑀲𑀫𑁂𑀯 𑀧𑀸𑀭𑀼𑀧𑀺𑀢𑁆𑀯𑀸 ‘‘𑀇𑀤𑀁 𑀓𑀭𑁄𑀣, 𑀇𑀤𑀁 𑀓𑀭𑁄𑀣𑀸’’𑀢𑀺 𑀲𑀩𑁆𑀩𑀭𑀢𑁆𑀢𑀺𑀁 𑀯𑀺𑀘𑀸𑀭𑁂𑀦𑁆𑀢𑁄 𑀲𑀢𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀪𑁄𑀚𑁆𑀚𑀬𑀸𑀕𑀼𑀜𑁆𑀘 𑀫𑀥𑀼𑀕𑁄𑀴𑀓𑀜𑁆𑀘 𑀧𑀝𑀺𑀬𑀸𑀤𑀸𑀧𑁂𑀲𑀺. 𑀪𑁄𑀚𑁆𑀚𑀬𑀸𑀕𑀼 𑀦𑀸𑀫 𑀪𑀼𑀜𑁆𑀚𑀺𑀢𑁆𑀯𑀸 𑀧𑀸𑀢𑀩𑁆𑀩𑀬𑀸𑀕𑀼, 𑀢𑀢𑁆𑀣 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀫𑀘𑁆𑀙𑀫𑀁𑀲𑀧𑀼𑀧𑁆𑀨𑀨𑀮𑀭𑀲𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀔𑀸𑀤𑀦𑀻𑀬𑀁 𑀦𑀸𑀫 𑀅𑀢𑁆𑀣𑀺, 𑀢𑀁 𑀲𑀩𑁆𑀩𑀁 𑀧𑀯𑀺𑀲𑀢𑀺. 𑀓𑀻𑀴𑀺𑀢𑀼𑀓𑀸𑀫𑀸𑀦𑀁 𑀲𑀻𑀲𑀫𑀓𑁆𑀔𑀦𑀬𑁄𑀕𑁆𑀕𑀸 𑀳𑁄𑀢𑀺 𑀲𑀼𑀕𑀦𑁆𑀥𑀕𑀦𑁆𑀥𑀸.

𑀅𑀣 𑀪𑀕𑀯𑀸 𑀓𑀸𑀮𑀲𑁆𑀲𑁂𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁 𑀆𑀢𑀼𑀫𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀅𑀣 𑀢𑀲𑁆𑀲 𑀆𑀭𑁄𑀘𑁂𑀲𑀼𑀁 ‘‘𑀪𑀕𑀯𑀸 𑀧𑀺𑀡𑁆𑀟𑀸𑀬 𑀕𑀸𑀫𑀁 𑀧𑀯𑀺𑀲𑀢𑀺, 𑀢𑀬𑀸 𑀓𑀲𑁆𑀲 𑀬𑀸𑀕𑀼 𑀧𑀝𑀺𑀬𑀸𑀤𑀺𑀢𑀸’’𑀢𑀺. 𑀲𑁄 𑀬𑀣𑀸𑀦𑀺𑀯𑀢𑁆𑀣𑀧𑀸𑀭𑀼𑀢𑁂𑀳𑁂𑀯 𑀢𑁂𑀳𑀺 𑀓𑀸𑀴𑀓𑀓𑀸𑀲𑀸𑀯𑁂𑀳𑀺 𑀏𑀓𑁂𑀦 𑀳𑀢𑁆𑀣𑁂𑀦 𑀤𑀩𑁆𑀩𑀺𑀜𑁆𑀘 𑀓𑀝𑀘𑁆𑀙𑀼𑀜𑁆𑀘 𑀕𑀳𑁂𑀢𑁆𑀯𑀸 𑀩𑁆𑀭𑀳𑁆𑀫𑀸 𑀯𑀺𑀬 𑀤𑀓𑁆𑀔𑀺𑀡𑀁 𑀚𑀸𑀡𑀼𑀫𑀡𑁆𑀟𑀮𑀁 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂 𑀪𑀦𑁆𑀢𑁂 𑀪𑀕𑀯𑀸 𑀬𑀸𑀕𑀼’’𑀦𑁆𑀢𑀺 𑀆𑀳. 𑀢𑀢𑁄 ‘‘𑀚𑀸𑀦𑀦𑁆𑀢𑀸𑀧𑀺 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀻’’𑀢𑀺 𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁦𑁪) 𑀆𑀕𑀢𑀦𑀬𑁂𑀦 𑀪𑀕𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 𑀘 𑀲𑀼𑀢𑁆𑀯𑀸 𑀘 𑀢𑀁 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀁 𑀯𑀺𑀕𑀭𑀳𑀺𑀢𑁆𑀯𑀸 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀓𑀧𑁆𑀧𑀺𑀬𑀲𑀫𑀸𑀤𑀸𑀦𑀲𑀺𑀓𑁆𑀔𑀸𑀧𑀤𑀁, 𑀔𑀼𑀭𑀪𑀡𑁆𑀟𑀧𑀭𑀺𑀳𑀭𑀡𑀲𑀺𑀓𑁆𑀔𑀸𑀧𑀤𑀜𑁆𑀘𑀸𑀢𑀺 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀧𑁂𑀢𑁆𑀯𑀸 ‘‘𑀅𑀦𑁂𑀓𑀓𑀧𑁆𑀧𑀓𑁄𑀝𑀺𑀬𑁄 𑀪𑀺𑀓𑁆𑀔𑀯𑁂 𑀪𑁄𑀚𑀦𑀁 𑀧𑀭𑀺𑀬𑁂𑀲𑀦𑁆𑀢𑁂𑀳𑁂𑀯 𑀯𑀻𑀢𑀺𑀦𑀸𑀫𑀺𑀢𑀸 ¶ , 𑀇𑀤𑀁 𑀧𑀦 𑀢𑀼𑀫𑁆𑀳𑀸𑀓𑀁 𑀅𑀓𑀧𑁆𑀧𑀺𑀬𑀁, 𑀅𑀥𑀫𑁆𑀫𑁂𑀦 𑀉𑀧𑁆𑀧𑀦𑁆𑀦𑀁 𑀪𑁄𑀚𑀦𑀁 𑀇𑀫𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑁂𑀓𑀸𑀦𑀺 𑀅𑀢𑁆𑀢𑀪𑀸𑀯𑀲𑀳𑀲𑁆𑀲𑀸𑀦𑀺 𑀅𑀧𑀸𑀬𑁂𑀲𑁆𑀯𑁂𑀯 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀦𑁆𑀢𑀺, 𑀅𑀧𑁂𑀣 𑀫𑀸 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺, 𑀏𑀓𑀪𑀺𑀓𑁆𑀔𑀼𑀦𑀸𑀧𑀺 𑀦 𑀓𑀺𑀜𑁆𑀘𑀺 𑀕𑀳𑀺𑀢𑀁. 𑀲𑀼𑀪𑀤𑁆𑀤𑁄 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 ‘‘𑀅𑀬𑀁 𑀲𑀩𑁆𑀩𑀁 𑀚𑀸𑀦𑀸𑀫𑀻’’𑀢𑀺 𑀆𑀳𑀺𑀡𑁆𑀟𑀢𑀺, 𑀲𑀘𑁂 𑀦 𑀕𑀳𑁂𑀢𑀼𑀓𑀸𑀫𑁄 𑀧𑁂𑀲𑁂𑀢𑁆𑀯𑀸 𑀆𑀭𑁄𑀘𑁂𑀢𑀩𑁆𑀩𑀁 𑀅𑀲𑁆𑀲, 𑀧𑀓𑁆𑀓𑀸𑀳𑀸𑀭𑁄 𑀦𑀸𑀫 𑀲𑀩𑁆𑀩𑀘𑀺𑀭𑀁 𑀢𑀺𑀝𑁆𑀞𑀦𑁆𑀢𑁄 𑀲𑀢𑁆𑀢𑀸𑀳𑀫𑀢𑁆𑀢𑀁 𑀢𑀺𑀝𑁆𑀞𑁂𑀬𑁆𑀬, 𑀇𑀤𑀜𑁆𑀘 𑀫𑀫 𑀬𑀸𑀯𑀚𑀻𑀯𑀁 𑀧𑀭𑀺𑀬𑀢𑁆𑀢𑀁 𑀅𑀲𑁆𑀲, 𑀲𑀩𑁆𑀩𑀁 𑀢𑁂𑀦 𑀦𑀸𑀲𑀺𑀢𑀁, 𑀅𑀳𑀺𑀢𑀓𑀸𑀫𑁄 𑀅𑀬𑀁 𑀫𑀬𑁆𑀳’’𑀦𑁆𑀢𑀺 𑀪𑀕𑀯𑀢𑀺 𑀆𑀖𑀸𑀢𑀁 𑀩𑀦𑁆𑀥𑀺𑀢𑁆𑀯𑀸 𑀤𑀲𑀩𑀮𑁂 𑀥𑀭𑀫𑀸𑀦𑁂 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 ¶ 𑀦𑀸𑀲𑀓𑁆𑀔𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 ‘‘𑀅𑀬𑀁 𑀉𑀘𑁆𑀘𑀸 𑀓𑀼𑀮𑀸 𑀧𑀩𑁆𑀩𑀚𑀺𑀢𑁄 𑀫𑀳𑀸𑀧𑀼𑀭𑀺𑀲𑁄, 𑀲𑀘𑁂 𑀓𑀺𑀜𑁆𑀘𑀺 𑀥𑀭𑀦𑁆𑀢𑀲𑁆𑀲 𑀯𑀓𑁆𑀔𑀸𑀫𑀺, 𑀫𑀫𑀁𑀬𑁂𑀯 𑀲𑀦𑁆𑀢𑀚𑁆𑀚𑁂𑀲𑁆𑀲𑀢𑀻’’𑀢𑀺.

𑀲𑁆𑀯𑀸𑀬𑀁 𑀅𑀚𑁆𑀚 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁄 ‘‘𑀧𑀭𑀺𑀦𑀺𑀩𑁆𑀩𑀼𑀢𑁄 𑀪𑀕𑀯𑀸’’𑀢𑀺 𑀲𑀼𑀢𑁆𑀯𑀸 𑀮𑀤𑁆𑀥𑀲𑁆𑀲𑀸𑀲𑁄 𑀯𑀺𑀬 𑀳𑀝𑁆𑀞𑀢𑀼𑀝𑁆𑀞𑁄 𑀏𑀯𑀫𑀸𑀳. 𑀣𑁂𑀭𑁄 𑀧𑀦 𑀢𑀁 𑀲𑀼𑀢𑁆𑀯𑀸 𑀳𑀤𑀬𑁂 𑀧𑀳𑀸𑀭𑀁 𑀯𑀺𑀬, 𑀫𑀢𑁆𑀣𑀓𑁂 𑀧𑀢𑀺𑀢𑀲𑀼𑀓𑁆𑀔𑀸𑀲𑀦𑀺𑀁 𑀯𑀺𑀬 (𑀲𑀼𑀓𑁆𑀔𑀸𑀲𑀦𑀺 𑀯𑀺𑀬 𑀤𑀻. 𑀦𑀺. 𑀅𑀝𑁆𑀞. 𑁩.𑁨𑁩𑁨) 𑀫𑀜𑁆𑀜𑀺, 𑀥𑀫𑁆𑀫𑀲𑀁𑀯𑁂𑀕𑁄 𑀘𑀲𑁆𑀲 𑀉𑀧𑁆𑀧𑀚𑁆𑀚𑀺 ‘‘𑀲𑀢𑁆𑀢𑀸𑀳𑀫𑀢𑁆𑀢𑀧𑀭𑀺𑀦𑀺𑀩𑁆𑀩𑀼𑀢𑁄 𑀪𑀕𑀯𑀸, 𑀅𑀚𑁆𑀚𑀸𑀧𑀺𑀲𑁆𑀲 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀭𑀻𑀭𑀁 𑀥𑀭𑀢𑀺𑀬𑁂𑀯, 𑀤𑀼𑀓𑁆𑀔𑁂𑀦 𑀪𑀕𑀯𑀢𑀸 𑀆𑀭𑀸𑀥𑀺𑀢𑀲𑀸𑀲𑀦𑁂 𑀦𑀸𑀫 𑀏𑀯𑀁 𑀮𑀳𑀼𑀁 𑀫𑀳𑀦𑁆𑀢𑀁 𑀧𑀸𑀧𑀁 𑀓𑀲𑀝𑀁 𑀓𑀡𑁆𑀝𑀓𑁄 𑀉𑀧𑁆𑀧𑀦𑁆𑀦𑁄, 𑀅𑀮𑀁 𑀔𑁄 𑀧𑀦𑁂𑀲 𑀧𑀸𑀧𑁄 𑀯𑀟𑁆𑀠𑀫𑀸𑀦𑁄 𑀅𑀜𑁆𑀜𑁂𑀧𑀺 𑀏𑀯𑀭𑀽𑀧𑁂 𑀲𑀳𑀸𑀬𑁂 𑀮𑀪𑀺𑀢𑁆𑀯𑀸 𑀲𑀸𑀲𑀦𑀁 𑀑𑀲𑀓𑁆𑀓𑀸𑀧𑁂𑀢𑀼’’𑀦𑁆𑀢𑀺.

𑀢𑀢𑁄 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 ‘‘𑀲𑀘𑁂 𑀔𑁄 𑀧𑀦𑀸𑀳𑀁 𑀇𑀫𑀁 𑀫𑀳𑀮𑁆𑀮𑀓𑀁 𑀇𑀥𑁂𑀯 𑀧𑀺𑀮𑁄𑀢𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀙𑀸𑀭𑀺𑀓𑀸𑀬 𑀑𑀓𑀺𑀭𑀸𑀧𑁂𑀢𑁆𑀯𑀸 𑀦𑀻𑀳𑀭𑀸𑀧𑁂𑀲𑁆𑀲𑀸𑀫𑀺, 𑀫𑀦𑀼𑀲𑁆𑀲𑀸 ‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀭𑀻𑀭𑁂 𑀥𑀭𑀫𑀸𑀦𑁂𑀬𑁂𑀯 𑀲𑀸𑀯𑀓𑀸 𑀯𑀺𑀯𑀤𑀦𑁆𑀢𑀻’𑀢𑀺 𑀅𑀫𑁆𑀳𑀸𑀓𑀁 𑀤𑁄𑀲𑀁 𑀤𑀲𑁆𑀲𑁂𑀲𑁆𑀲𑀦𑁆𑀢𑀺, 𑀅𑀥𑀺𑀯𑀸𑀲𑁂𑀫𑀺 𑀢𑀸𑀯. 𑀪𑀕𑀯𑀢𑀸 𑀳𑀺 𑀤𑁂𑀲𑀺𑀢𑀥𑀫𑁆𑀫𑁄 𑀅𑀲𑀗𑁆𑀕𑀳𑀺𑀢𑀧𑀼𑀧𑁆𑀨𑀭𑀸𑀲𑀺𑀲𑀤𑀺𑀲𑁄, 𑀢𑀢𑁆𑀣 𑀬𑀣𑀸 𑀯𑀸𑀢𑁂𑀦 𑀧𑀳𑀝𑀧𑀼𑀧𑁆𑀨𑀸𑀦𑀺 𑀬𑀢𑁄 𑀯𑀸 𑀢𑀢𑁄 𑀯𑀸 𑀕𑀘𑁆𑀙𑀦𑁆𑀢𑀺, 𑀏𑀯𑀫𑁂𑀯 𑀏𑀯𑀭𑀽𑀧𑀸𑀦𑀁 𑀯𑀲𑁂𑀦 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀯𑀺𑀦𑀬𑁂 𑀏𑀓𑀁 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀲𑀼𑀢𑁆𑀢𑁂 𑀏𑀓𑁄 𑀤𑁆𑀯𑁂 𑀧𑀜𑁆𑀳𑀸𑀯𑀸𑀭𑀸 𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀅𑀪𑀺𑀥𑀫𑁆𑀫𑁂 𑀏𑀓𑀁 𑀤𑁆𑀯𑁂 𑀪𑀽𑀫𑀦𑁆𑀢𑀭𑀸𑀦𑀺 𑀦𑀲𑁆𑀲𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀅𑀦𑀼𑀓𑁆𑀓𑀫𑁂𑀦 𑀫𑀽𑀮𑁂 𑀦𑀝𑁆𑀞𑁂 𑀧𑀺𑀲𑀸𑀘𑀲𑀤𑀺𑀲𑀸 𑀪𑀯𑀺𑀲𑁆𑀲𑀸𑀫, 𑀢𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀺, 𑀏𑀯𑀁 𑀲𑀢𑀺 𑀤𑀴𑁆𑀳𑀲𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑀧𑀼𑀧𑁆𑀨𑀸𑀦𑀺 𑀯𑀺𑀬 𑀅𑀬𑀁 𑀥𑀫𑁆𑀫𑀯𑀺𑀦𑀬𑁄 𑀦𑀺𑀘𑁆𑀘𑀮𑁄 𑀪𑀯𑀺𑀲𑁆𑀲𑀢𑀺. 𑀏𑀢𑀤𑀢𑁆𑀣𑀜𑁆𑀳𑀺 𑀪𑀕𑀯𑀸 𑀫𑀬𑁆𑀳𑀁 𑀢𑀻𑀡𑀺 𑀕𑀸𑀯𑀼𑀢𑀸𑀦𑀺 𑀧𑀘𑁆𑀘𑀼𑀕𑁆𑀕𑀫𑀦𑀁 𑀅𑀓𑀸𑀲𑀺, 𑀢𑀻𑀳𑀺 𑀑𑀯𑀸𑀤𑁂𑀳𑀺 (𑀲𑀁. 𑀦𑀺. 𑁨.𑁧𑁪𑁯, 𑁧𑁫𑁦, 𑁧𑁫𑁧) 𑀉𑀧𑀲𑀫𑁆𑀧𑀤𑀁 𑀅𑀓𑀸𑀲𑀺, 𑀓𑀸𑀬𑀢𑁄 𑀘𑀻𑀯𑀭𑀧𑀭𑀺𑀯𑀢𑁆𑀢𑀦𑀁 𑀅𑀓𑀸𑀲𑀺, 𑀆𑀓𑀸𑀲𑁂 𑀧𑀸𑀡𑀺𑀁 𑀘𑀸𑀮𑁂𑀢𑁆𑀯𑀸 𑀘𑀦𑁆𑀤𑁄𑀧𑀫𑀧𑀝𑀺𑀧𑀤𑀁 𑀓𑀣𑁂𑀦𑁆𑀢𑁄 𑀫𑀜𑁆𑀜𑁂𑀯 𑀲𑀓𑁆𑀔𑀺𑀁 𑀓𑀢𑁆𑀯𑀸 𑀓𑀣𑁂𑀲𑀺, 𑀢𑀺𑀓𑁆𑀔𑀢𑁆𑀢𑀼𑀁 𑀲𑀓𑀮𑀲𑀸𑀲𑀦𑀭𑀢𑀦𑀁 𑀧𑀝𑀺𑀘𑁆𑀙𑀸𑀧𑁂𑀲𑀺, 𑀫𑀸𑀤𑀺𑀲𑁂 𑀪𑀺𑀓𑁆𑀔𑀼𑀫𑁆𑀳𑀺 𑀢𑀺𑀝𑁆𑀞𑀫𑀸𑀦𑁂 𑀅𑀬𑀁 𑀧𑀸𑀧𑁄 𑀲𑀸𑀲𑀦𑁂 𑀯𑀟𑁆𑀠𑀺𑀁 𑀫𑀸 𑀅𑀮𑀢𑁆𑀣, 𑀬𑀸𑀯 𑀅𑀥𑀫𑁆𑀫𑁄 𑀦 𑀤𑀺𑀧𑁆𑀧𑀢𑀺, 𑀥𑀫𑁆𑀫𑁄 𑀦 𑀧𑀝𑀺𑀩𑀸𑀳𑀺𑀬𑁆𑀬𑀢𑀺, 𑀅𑀯𑀺𑀦𑀬𑁄 𑀦 𑀤𑀺𑀧𑁆𑀧𑀢𑀺, 𑀯𑀺𑀦𑀬𑁄 𑀦 𑀧𑀝𑀺𑀩𑀸𑀳𑀺𑀬𑁆𑀬𑀢𑀺, 𑀅𑀥𑀫𑁆𑀫𑀯𑀸𑀤𑀺𑀦𑁄 𑀦 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀥𑀫𑁆𑀫𑀯𑀸𑀤𑀺𑀦𑁄 ¶ 𑀦 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺, 𑀅𑀯𑀺𑀦𑀬𑀯𑀸𑀤𑀺𑀦𑁄 𑀦 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀯𑀺𑀦𑀬𑀯𑀸𑀤𑀺𑀦𑁄 𑀦 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀺, 𑀢𑀸𑀯 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑀺𑀲𑁆𑀲𑀸𑀫𑀺, 𑀢𑀢𑁄 𑀪𑀺𑀓𑁆𑀔𑀽 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀳𑁄𑀦𑀓𑀁 ¶ 𑀕𑀳𑁂𑀢𑁆𑀯𑀸 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑁂 𑀓𑀣𑁂𑀲𑁆𑀲𑀦𑁆𑀢𑀺, 𑀅𑀣𑀸𑀬𑀁 𑀧𑀸𑀧𑁄 𑀲𑀬𑀫𑁂𑀯 𑀦𑀺𑀕𑁆𑀕𑀳𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀧𑀼𑀦 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀲𑀸𑀲𑀦𑀁 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑁆𑀢𑀜𑁆𑀘 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑁄 ‘‘𑀏𑀯𑀁 𑀦𑀸𑀫 𑀫𑀬𑁆𑀳𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀓𑀲𑁆𑀲𑀘𑀺𑀧𑀺 𑀅𑀦𑀸𑀭𑁄𑀘𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀅𑀣 𑀧𑀘𑁆𑀙𑀸 𑀥𑀸𑀢𑀼𑀪𑀸𑀚𑀦𑀤𑀺𑀯𑀲𑁂 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀢𑁆𑀣𑀁 𑀪𑀺𑀓𑁆𑀔𑀽𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁂…𑀧𑁂… 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀢𑁆𑀣𑀁 𑀪𑀺𑀓𑁆𑀔𑀽𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀲𑀻’’𑀢𑀺.

𑀢𑀢𑁆𑀣 𑀅𑀮𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑀯𑀘𑀦𑀁, 𑀦 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀆𑀯𑀼𑀲𑁄𑀢𑀺 𑀧𑀭𑀺𑀤𑁂𑀯𑀦𑁆𑀢𑁂 𑀪𑀺𑀓𑁆𑀔𑀽 𑀆𑀮𑀧𑀢𑀺. 𑀫𑀸 𑀲𑁄𑀘𑀺𑀢𑁆𑀣𑀸𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀩𑀮𑀯𑀲𑁄𑀓𑁂𑀦 𑀫𑀸 𑀲𑁄𑀓𑀫𑀓𑀢𑁆𑀣. 𑀫𑀸 𑀧𑀭𑀺𑀤𑁂𑀯𑀺𑀢𑁆𑀣𑀸𑀢𑀺 𑀯𑀸𑀘𑀸𑀬 𑀫𑀸 𑀯𑀺𑀮𑀸𑀧𑀫𑀓𑀢𑁆𑀣. ‘‘𑀧𑀭𑀺𑀤𑁂𑀯𑀦𑀁 𑀯𑀺𑀮𑀸𑀧𑁄’’𑀢𑀺 𑀳𑀺 𑀯𑀼𑀢𑁆𑀢𑀁. 𑀅𑀲𑁄𑀘𑀦𑀸𑀤𑀻𑀦𑀁 𑀓𑀸𑀭𑀡𑀫𑀸𑀳 ‘‘𑀲𑀼𑀫𑀼𑀢𑁆𑀢𑀸’’𑀢𑀺𑀆𑀤𑀺𑀦𑀸. 𑀢𑁂𑀦 𑀫𑀳𑀸𑀲𑀫𑀡𑁂𑀦𑀸𑀢𑀺 𑀦𑀺𑀲𑁆𑀲𑀓𑁆𑀓𑁂 𑀓𑀭𑀡𑀯𑀘𑀦𑀁, 𑀲𑁆𑀫𑀸𑀯𑀘𑀦𑀲𑁆𑀲 𑀯𑀸 𑀦𑀸𑀩𑁆𑀬𑀧𑁆𑀧𑀤𑁂𑀲𑁄. ‘‘𑀉𑀧𑀤𑁆𑀤𑀼𑀢𑀸’’𑀢𑀺 𑀧𑀤𑁂 𑀧𑀦 𑀓𑀢𑁆𑀢𑀭𑀺 𑀢𑀢𑀺𑀬𑀸𑀯𑀲𑁂𑀦 𑀲𑀫𑁆𑀩𑀦𑁆𑀥𑁄. 𑀉𑀪𑀬𑀸𑀧𑁂𑀓𑁆𑀔𑀜𑁆𑀳𑁂𑀢𑀁 𑀧𑀤𑀁. 𑀉𑀧𑀤𑁆𑀤𑀼𑀢𑀸 𑀘 𑀳𑁄𑀫𑀸𑀢𑀺 𑀢𑀁𑀓𑀸𑀮𑀸𑀧𑁂𑀓𑁆𑀔𑀯𑀢𑁆𑀢𑀫𑀸𑀦𑀯𑀘𑀦𑀁, ‘‘𑀢𑀤𑀸’’𑀢𑀺 𑀲𑁂𑀲𑁄. 𑀅𑀢𑀻𑀢𑀢𑁆𑀣𑁂 𑀯𑀸 𑀯𑀢𑁆𑀢𑀫𑀸𑀦𑀯𑀘𑀦𑀁, 𑀅𑀳𑀼𑀫𑁆𑀳𑀸𑀢𑀺 𑀅𑀢𑁆𑀣𑁄. 𑀅𑀦𑀼𑀲𑁆𑀲𑀭𑀦𑁆𑀢𑁄 𑀥𑀫𑁆𑀫𑀲𑀁𑀯𑁂𑀕𑀯𑀲𑁂𑀦𑁂𑀯, 𑀦 𑀧𑀦 𑀓𑁄𑀥𑀸𑀤𑀺𑀯𑀲𑁂𑀦. 𑀥𑀫𑁆𑀫𑀲𑀪𑀸𑀯𑀘𑀺𑀦𑁆𑀢𑀸𑀯𑀲𑁂𑀦 𑀳𑀺 𑀧𑀯𑀢𑁆𑀢𑀁 𑀲𑀳𑁄𑀢𑁆𑀢𑀧𑁆𑀧𑀜𑀸𑀡𑀁 𑀥𑀫𑁆𑀫𑀲𑀁𑀯𑁂𑀕𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑀩𑁆𑀩𑀲𑀗𑁆𑀔𑀢𑀥𑀫𑁆𑀫𑁂𑀲𑀼, 𑀑𑀢𑁆𑀢𑀧𑁆𑀧𑀸𑀓𑀸𑀭𑀲𑀡𑁆𑀞𑀺𑀢𑀁;

𑀜𑀸𑀡𑀫𑁄𑀳𑀺𑀢𑀪𑀸𑀭𑀸𑀦𑀁, 𑀥𑀫𑁆𑀫𑀲𑀁𑀯𑁂𑀕𑀲𑀜𑁆𑀜𑀺𑀢’’𑀦𑁆𑀢𑀺. (𑀲𑀸𑀭𑀢𑁆𑀣. 𑀝𑀻. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸);

𑀅𑀜𑁆𑀜𑀁 𑀉𑀲𑁆𑀲𑀸𑀳𑀚𑀦𑀦𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀈𑀤𑀺𑀲𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀈𑀤𑀺𑀲𑀲𑁆𑀲 𑀘 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑀲𑁆𑀲𑀸𑀢𑀺 𑀲𑀢𑁆𑀢𑀲𑀢𑀲𑀳𑀲𑁆𑀲𑀕𑀡𑀧𑀸𑀫𑁄𑀓𑁆𑀔𑀢𑁆𑀣𑁂𑀭𑀧𑁆𑀧𑀫𑀼𑀔𑀕𑀡𑀦𑀧𑀣𑀸𑀢𑀺𑀓𑁆𑀓𑀦𑁆𑀢𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. ‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸𑀧𑀺 𑀅𑀜𑁆𑀜𑀁 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀢𑀺𑀝𑁆𑀞𑀢𑀺 𑀏𑀢𑁆𑀣 𑀨𑀮𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀞𑀸𑀦𑀁, 𑀳𑁂𑀢𑀼. 𑀔𑁄𑀢𑀺 𑀅𑀯𑀥𑀸𑀭𑀡𑁂. 𑀧𑀦𑀸𑀢𑀺 𑀯𑀘𑀦𑀸𑀮𑀗𑁆𑀓𑀸𑀭𑁂, 𑀏𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑁂𑀯, 𑀦𑁄 𑀦 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀦 𑀢𑀦𑁆𑀢𑀺 𑀆𑀳 ‘‘𑀬𑀁 𑀧𑀸𑀧𑀪𑀺𑀓𑁆𑀔𑀽’’𑀢𑀺𑀆𑀤𑀺. 𑀬𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀓𑀸𑀭𑀡𑀦𑀺𑀤𑁆𑀤𑁂𑀲𑁄 𑀯𑀸, 𑀬𑁂𑀦 𑀞𑀸𑀦𑁂𑀦 𑀅𑀦𑁆𑀢𑀭𑀥𑀸𑀧𑁂𑀬𑁆𑀬𑀼𑀁, 𑀢𑀤𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺𑀬𑁂𑀯𑀸𑀢𑀺. 𑀧𑀸𑀧𑁂𑀦 𑀮𑀸𑀫𑀓𑁂𑀦 𑀇𑀘𑁆𑀙𑀸𑀯𑀘𑀭𑁂𑀦 𑀲𑀫𑀦𑁆𑀦𑀸𑀕𑀢𑀸 𑀪𑀺𑀓𑁆𑀔𑀽 𑀧𑀸𑀧𑀪𑀺𑀓𑁆𑀔𑀽 ¶ . 𑀅𑀢𑀻𑀢𑁄 𑀲𑀢𑁆𑀣𑀸 𑀏𑀢𑁆𑀣, 𑀏𑀢𑀲𑁆𑀲𑀸𑀢𑀺 𑀯𑀸 𑀅𑀢𑀻𑀢𑀲𑀢𑁆𑀣𑀼𑀓𑀁 𑀬𑀣𑀸 ‘‘𑀩𑀳𑀼𑀓𑀢𑁆𑀢𑀼𑀓𑁄’’𑀢𑀺. 𑀧𑀥𑀸𑀦𑀁 𑀯𑀘𑀦𑀁 𑀧𑀸𑀯𑀘𑀦𑀁. 𑀧𑀸-𑀲𑀤𑁆𑀤𑁄 ¶ 𑀘𑁂𑀢𑁆𑀣 𑀦𑀺𑀧𑀸𑀢𑁄 ‘‘𑀧𑀸 𑀏𑀯 𑀯𑀼𑀢𑁆𑀬𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀉𑀧𑀲𑀕𑁆𑀕𑀧𑀤𑀁 𑀯𑀸 𑀏𑀢𑀁, 𑀤𑀻𑀖𑀁 𑀓𑀢𑁆𑀯𑀸 𑀧𑀦 𑀢𑀣𑀸 𑀯𑀼𑀢𑁆𑀢𑀁 𑀬𑀣𑀸 ‘‘𑀧𑀸𑀯𑀤𑀢𑀻’’𑀢𑀺𑀧𑀺 𑀯𑀤𑀦𑁆𑀢𑀺. 𑀧𑀓𑁆𑀔𑀦𑁆𑀢𑀺 𑀅𑀮𑀚𑁆𑀚𑀺𑀧𑀓𑁆𑀔𑀁. ‘‘𑀬𑀸𑀯 𑀘𑀸’’𑀢𑀺𑀆𑀤𑀺𑀦𑀸 𑀲𑀗𑁆𑀕𑀻𑀢𑀺𑀬𑀸 𑀲𑀸𑀲𑀦𑀘𑀺𑀭𑀝𑁆𑀞𑀺𑀢𑀺𑀓𑀪𑀸𑀯𑁂 𑀓𑀸𑀭𑀡𑀁, 𑀲𑀸𑀥𑀓𑀜𑁆𑀘 𑀤𑀲𑁆𑀲𑁂𑀢𑀺. ‘‘𑀢𑀲𑁆𑀫𑀸’’𑀢𑀺 𑀳𑀺 𑀧𑀤𑀫𑀚𑁆𑀛𑀸𑀳𑀭𑀺𑀢𑁆𑀯𑀸 ‘‘𑀲𑀗𑁆𑀕𑀸𑀬𑁂𑀬𑁆𑀬’’𑀦𑁆𑀢𑀺 𑀧𑀤𑁂𑀦 𑀲𑀫𑁆𑀩𑀦𑁆𑀥𑀦𑀻𑀬𑀁.

𑀢𑀢𑁆𑀣 𑀬𑀸𑀯 𑀘 𑀥𑀫𑁆𑀫𑀯𑀺𑀦𑀬𑁄 𑀢𑀺𑀝𑁆𑀞𑀢𑀻𑀢𑀺 𑀬𑀢𑁆𑀢𑀓𑀁 𑀓𑀸𑀮𑀁 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀮𑀚𑁆𑀚𑀺𑀧𑀼𑀕𑁆𑀕𑀮𑁂𑀲𑀼 𑀢𑀺𑀝𑁆𑀞𑀢𑀺. 𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑀓𑁂 𑀦𑀺𑀧𑀦𑁆𑀦𑁂𑀦 𑀪𑀕𑀯𑀢𑀸 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑁂 (𑀤𑀻. 𑀦𑀺. 𑁨.𑁨𑁧𑁬) 𑀯𑀼𑀢𑁆𑀢𑀁 𑀲𑀦𑁆𑀥𑀸𑀬 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀳𑀺-𑀲𑀤𑁆𑀤𑁄 𑀆𑀕𑀫𑀯𑀲𑁂𑀦 𑀤𑀴𑁆𑀳𑀺𑀚𑁄𑀢𑀓𑁄. 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄𑀢𑀺 𑀥𑀫𑁆𑀫𑁄𑀧𑀺 𑀤𑁂𑀲𑀺𑀢𑁄 𑀘𑁂𑀯 𑀧𑀜𑁆𑀜𑀢𑁆𑀢𑁄 𑀘. 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀲𑀗𑁆𑀕𑀳𑀺𑀢𑀲𑁆𑀲 𑀳𑀺 𑀥𑀫𑁆𑀫𑀲𑁆𑀲 𑀅𑀢𑀺𑀲𑀚𑁆𑀚𑀦𑀁 𑀧𑀩𑁄𑀥𑀦𑀁 𑀤𑁂𑀲𑀦𑀸, 𑀢𑀲𑁆𑀲𑁂𑀯 𑀧𑀓𑀸𑀭𑀢𑁄 𑀜𑀸𑀧𑀦𑀁 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑁂 𑀞𑀧𑀦𑀁 𑀧𑀜𑁆𑀜𑀸𑀧𑀦𑀁. 𑀯𑀺𑀦𑀬𑁄𑀧𑀺 𑀤𑁂𑀲𑀺𑀢𑁄 𑀘𑁂𑀯 𑀧𑀜𑁆𑀜𑀢𑁆𑀢𑁄 𑀘. 𑀯𑀺𑀦𑀬𑀢𑀦𑁆𑀢𑀺𑀲𑀗𑁆𑀕𑀳𑀺𑀢𑀲𑁆𑀲 𑀳𑀺 𑀅𑀢𑁆𑀣𑀲𑁆𑀲 𑀅𑀢𑀺𑀲𑀚𑁆𑀚𑀦𑀁 𑀧𑀩𑁄𑀥𑀦𑀁 𑀤𑁂𑀲𑀦𑀸, 𑀢𑀲𑁆𑀲𑁂𑀯 𑀧𑀓𑀸𑀭𑀢𑁄 𑀜𑀸𑀧𑀦𑀁 𑀅𑀲𑀗𑁆𑀓𑀭𑀢𑁄 𑀞𑀧𑀦𑀁 𑀧𑀜𑁆𑀜𑀸𑀧𑀦𑀁, 𑀢𑀲𑁆𑀫𑀸 𑀓𑀫𑁆𑀫𑀤𑁆𑀯𑀬𑀫𑁆𑀧𑀺 𑀓𑀺𑀭𑀺𑀬𑀸𑀤𑁆𑀯𑀬𑁂𑀦 𑀲𑀫𑁆𑀩𑀚𑁆𑀛𑀦𑀁 𑀬𑀼𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑁄𑀢𑀺 𑀲𑁄 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘. 𑀫𑀫𑀘𑁆𑀘𑀬𑁂𑀦𑀸𑀢𑀺 𑀫𑀫 𑀅𑀘𑁆𑀘𑀬𑀓𑀸𑀮𑁂. ‘‘𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀦𑀺𑀤𑁆𑀤𑁂𑀲𑁄’’𑀢𑀺 𑀳𑀺 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀯𑀤𑀦𑁆𑀢𑀺. 𑀳𑁂𑀢𑁆𑀯𑀢𑁆𑀣𑁂 𑀯𑀸 𑀓𑀭𑀡𑀯𑀘𑀦𑀁, 𑀫𑀫 𑀅𑀘𑁆𑀘𑀬𑀳𑁂𑀢𑀼 𑀢𑀼𑀫𑁆𑀳𑀸𑀓𑀁 𑀲𑀢𑁆𑀣𑀸 𑀦𑀸𑀫 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑀺 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 ‘‘𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀼𑀫𑁆𑀳𑀸𑀓𑀁 𑀲𑀢𑁆𑀣𑀼𑀓𑀺𑀘𑁆𑀘𑀁 𑀲𑀸𑀥𑁂𑀲𑁆𑀲𑀢𑀻’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁨.𑁨𑁧𑁬). 𑀮𑀓𑁆𑀔𑀡𑀯𑀘𑀦𑀜𑁆𑀳𑁂𑀢𑁆𑀣 𑀳𑁂𑀢𑁆𑀯𑀢𑁆𑀣𑀲𑀸𑀥𑀓𑀁 𑀬𑀣𑀸 ‘‘𑀦𑁂𑀢𑁆𑀢𑁂 𑀉𑀚𑀼𑀁 𑀕𑀢𑁂 𑀲𑀢𑀻’’𑀢𑀺 (𑀅. 𑀦𑀺. 𑁪.𑁭𑁦; 𑀦𑁂𑀢𑁆𑀢𑀺. 𑁧𑁦.𑁯𑁦, 𑁯𑁩). 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀫𑀬𑀸 𑀯𑁄 𑀞𑀺𑀢𑁂𑀦𑁂𑀯 ‘‘𑀇𑀤𑀁 𑀮𑀳𑀼𑀓𑀁, 𑀇𑀤𑀁 𑀕𑀭𑀼𑀓𑀁, 𑀇𑀤𑀁 𑀲𑀢𑁂𑀓𑀺𑀘𑁆𑀙𑀁, 𑀇𑀤𑀁 𑀅𑀢𑁂𑀓𑀺𑀘𑁆𑀙𑀁, 𑀇𑀤𑀁 𑀮𑁄𑀓𑀯𑀚𑁆𑀚𑀁, 𑀇𑀤𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀅𑀬𑀁 𑀆𑀧𑀢𑁆𑀢𑀺 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀺𑀓𑁂 𑀯𑀼𑀝𑁆𑀞𑀸𑀢𑀺, 𑀅𑀬𑀁 𑀕𑀡𑀲𑁆𑀲, 𑀅𑀬𑀁 𑀲𑀗𑁆𑀖𑀲𑁆𑀲 𑀲𑀦𑁆𑀢𑀺𑀓𑁂 𑀯𑀼𑀝𑁆𑀞𑀸𑀢𑀻’’𑀢𑀺 𑀲𑀢𑁆𑀢𑀦𑁆𑀦𑀁 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸𑀦𑀁 𑀅𑀯𑀻𑀢𑀺𑀓𑁆𑀓𑀫𑀦𑀻𑀬𑀢𑀸𑀯𑀲𑁂𑀦 𑀑𑀢𑀺𑀡𑁆𑀡𑀯𑀢𑁆𑀣𑀼𑀲𑁆𑀫𑀺𑀁 𑀲𑀔𑀦𑁆𑀥𑀓𑀧𑀭𑀺𑀯𑀸𑀭𑁄 𑀉𑀪𑀢𑁄𑀯𑀺𑀪𑀗𑁆𑀕𑁄 𑀫𑀳𑀸𑀯𑀺𑀦𑀬𑁄 𑀦𑀸𑀫 𑀤𑁂𑀲𑀺𑀢𑁄, 𑀢𑀁 𑀲𑀓𑀮𑀫𑁆𑀧𑀺 𑀯𑀺𑀦𑀬𑀧𑀺𑀝𑀓𑀁 𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀼𑀫𑁆𑀳𑀸𑀓𑀁 𑀲𑀢𑁆𑀣𑀼𑀓𑀺𑀘𑁆𑀘𑀁 𑀲𑀸𑀥𑁂𑀲𑁆𑀲𑀢𑀺 ‘‘𑀇𑀤𑀁 𑀯𑁄 𑀓𑀢𑁆𑀢𑀩𑁆𑀩𑀁, 𑀇𑀤𑀁 𑀯𑁄 𑀦 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀓𑀢𑁆𑀢𑀩𑁆𑀩𑀸𑀓𑀢𑁆𑀢𑀩𑁆𑀩𑀲𑁆𑀲 𑀯𑀺𑀪𑀸𑀕𑁂𑀦 ¶ 𑀅𑀦𑀼𑀲𑀸𑀲𑀦𑀢𑁄. 𑀞𑀺𑀢𑁂𑀦𑁂𑀯 𑀘 𑀫𑀬𑀸 ‘‘𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺 𑀢𑁂𑀦 𑀢𑁂𑀦 𑀯𑀺𑀦𑁂𑀬𑁆𑀬𑀸𑀦𑀁 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑁂𑀦 𑀧𑀓𑀸𑀭𑁂𑀦 𑀇𑀫𑁂 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀯𑀺𑀪𑀚𑀺𑀢𑁆𑀯𑀸 𑀯𑀺𑀪𑀚𑀺𑀢𑁆𑀯𑀸 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀤𑁂𑀲𑀺𑀢𑀁, 𑀢𑀁 𑀲𑀓𑀮𑀫𑁆𑀧𑀺 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀼𑀫𑁆𑀳𑀸𑀓𑀁 𑀲𑀢𑁆𑀣𑀼𑀓𑀺𑀘𑁆𑀘𑀁 𑀲𑀸𑀥𑁂𑀲𑁆𑀲𑀢𑀺 𑀢𑀁𑀢𑀁𑀘𑀭𑀺𑀬𑀸𑀦𑀼𑀭𑀽𑀧𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀼𑀲𑀸𑀲𑀦𑀢𑁄, 𑀞𑀺𑀢𑁂𑀦𑁂𑀯 𑀘 𑀫𑀬𑀸 ‘‘𑀇𑀫𑁂 ¶ 𑀧𑀜𑁆𑀘𑀓𑁆𑀔𑀦𑁆𑀥𑀸 (𑀤𑀻. 𑀦𑀺. 𑀅𑀝𑁆𑀞. 𑁨.𑁨𑁧𑁬), 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺, 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄, 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺, 𑀩𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺, 𑀦𑀯 𑀳𑁂𑀢𑀽, 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸, 𑀲𑀢𑁆𑀢 𑀨𑀲𑁆𑀲𑀸, 𑀲𑀢𑁆𑀢 𑀯𑁂𑀤𑀦𑀸, 𑀲𑀢𑁆𑀢 𑀲𑀜𑁆𑀜𑀸, 𑀲𑀢𑁆𑀢 𑀘𑁂𑀢𑀦𑀸, 𑀲𑀢𑁆𑀢 𑀘𑀺𑀢𑁆𑀢𑀸𑀦𑀺. 𑀢𑀢𑁆𑀭𑀸𑀧𑀺 𑀏𑀢𑁆𑀢𑀓𑀸 𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸, 𑀏𑀢𑁆𑀢𑀓𑀸 𑀭𑀽𑀧𑀸𑀯𑀘𑀭𑀸, 𑀏𑀢𑁆𑀢𑀓𑀸 𑀅𑀭𑀽𑀧𑀸𑀯𑀘𑀭𑀸, 𑀏𑀢𑁆𑀢𑀓𑀸 𑀧𑀭𑀺𑀬𑀸𑀧𑀦𑁆𑀦𑀸, 𑀏𑀢𑁆𑀢𑀓𑀸 𑀅𑀧𑀭𑀺𑀬𑀸𑀧𑀦𑁆𑀦𑀸, 𑀏𑀢𑁆𑀢𑀓𑀸 𑀮𑁄𑀓𑀺𑀬𑀸, 𑀏𑀢𑁆𑀢𑀓𑀸 𑀮𑁄𑀓𑀼𑀢𑁆𑀢𑀭𑀸’’𑀢𑀺 𑀇𑀫𑁂 𑀥𑀫𑁆𑀫𑁂 𑀯𑀺𑀪𑀚𑀺𑀢𑁆𑀯𑀸 𑀯𑀺𑀪𑀚𑀺𑀢𑁆𑀯𑀸 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀤𑁂𑀲𑀺𑀢𑀁, 𑀢𑀁 𑀲𑀓𑀮𑀫𑁆𑀧𑀺 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀼𑀫𑁆𑀳𑀸𑀓𑀁 𑀲𑀢𑁆𑀣𑀼𑀓𑀺𑀘𑁆𑀘𑀁 𑀲𑀸𑀥𑁂𑀲𑁆𑀲𑀢𑀺 𑀔𑀦𑁆𑀥𑀸𑀤𑀺𑀯𑀺𑀪𑀸𑀕𑁂𑀦 𑀜𑀸𑀬𑀫𑀸𑀦𑀁 𑀘𑀢𑀼𑀲𑀘𑁆𑀘𑀲𑀫𑁆𑀩𑁄𑀥𑀸𑀯𑀳𑀢𑁆𑀢𑀸. 𑀇𑀢𑀺 𑀲𑀩𑁆𑀩𑀫𑁆𑀧𑁂𑀢𑀁 𑀅𑀪𑀺𑀲𑀫𑁆𑀩𑁄𑀥𑀺𑀢𑁄 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀸 𑀧𑀜𑁆𑀘𑀘𑀢𑁆𑀢𑀸𑀮𑀻𑀲 𑀯𑀲𑁆𑀲𑀸𑀦𑀺 𑀪𑀸𑀲𑀺𑀢𑀁 𑀮𑀧𑀺𑀢𑀁 ‘‘𑀢𑀻𑀡𑀺 𑀧𑀺𑀝𑀓𑀸𑀦𑀺, 𑀧𑀜𑁆𑀘 𑀦𑀺𑀓𑀸𑀬𑀸, 𑀦𑀯𑀗𑁆𑀕𑀸𑀦𑀺, 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻’’𑀢𑀺 𑀏𑀯𑀁 𑀫𑀳𑀧𑁆𑀧𑀪𑁂𑀤𑀁 𑀳𑁄𑀢𑀺. 𑀇𑀫𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀺 𑀢𑀺𑀝𑁆𑀞𑀦𑁆𑀢𑀺, 𑀅𑀳𑀁 𑀏𑀓𑁄𑀯 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺, 𑀅𑀳𑀜𑁆𑀘 𑀧𑀦𑀺𑀤𑀸𑀦𑀺 𑀏𑀓𑁄𑀯 𑀑𑀯𑀤𑀸𑀫𑀺 𑀅𑀦𑀼𑀲𑀸𑀲𑀸𑀫𑀺, 𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀇𑀫𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀩𑀼𑀤𑁆𑀥𑀲𑀳𑀲𑁆𑀲𑀸𑀦𑀺 𑀢𑀼𑀫𑁆𑀳𑁂 𑀑𑀯𑀤𑀺𑀲𑁆𑀲𑀦𑁆𑀢𑀺 𑀅𑀦𑀼𑀲𑀸𑀲𑀺𑀲𑁆𑀲𑀦𑁆𑀢𑀺 𑀑𑀯𑀸𑀤𑀸𑀦𑀼𑀲𑀸𑀲𑀦𑀓𑀺𑀘𑁆𑀘𑀲𑁆𑀲 𑀦𑀺𑀧𑁆𑀨𑀸𑀤𑀦𑀢𑁄𑀢𑀺.

𑀲𑀸𑀲𑀦𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀯𑀲𑁂𑀦 𑀢𑀺𑀯𑀺𑀥𑀫𑁆𑀧𑀺 𑀲𑀸𑀲𑀦𑀁, 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀦 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸. 𑀅𑀤𑁆𑀥𑀸𑀦𑀁 𑀕𑀫𑀺𑀢𑀼𑀫𑀮𑀦𑁆𑀢𑀺 𑀅𑀤𑁆𑀥𑀦𑀺𑀬𑀁, 𑀅𑀤𑁆𑀥𑀸𑀦𑀕𑀸𑀫𑀺 𑀅𑀤𑁆𑀥𑀸𑀦𑀓𑁆𑀔𑀫𑀦𑁆𑀢𑀺 𑀅𑀢𑁆𑀣𑁄. 𑀘𑀺𑀭𑀁 𑀞𑀺𑀢𑀺 𑀏𑀢𑀲𑁆𑀲𑀸𑀢𑀺 𑀘𑀺𑀭𑀝𑁆𑀞𑀺𑀢𑀺𑀓𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁂𑀦 𑀧𑀓𑀸𑀭𑁂𑀦 𑀇𑀤𑀁 𑀲𑀸𑀲𑀦𑀁 𑀅𑀤𑁆𑀥𑀦𑀺𑀬𑀁, 𑀢𑀢𑁄𑀬𑁂𑀯 𑀘 𑀘𑀺𑀭𑀝𑁆𑀞𑀺𑀢𑀺𑀓𑀁 𑀪𑀯𑁂𑀬𑁆𑀬, 𑀢𑁂𑀦 𑀧𑀓𑀸𑀭𑁂𑀦 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀬𑀤𑀺 𑀧𑀦𑀸𑀳𑀁 𑀲𑀗𑁆𑀕𑀸𑀬𑁂𑀬𑁆𑀬𑀁, 𑀲𑀸𑀥𑀼 𑀯𑀢𑀸𑀢𑀺.

𑀇𑀤𑀸𑀦𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀢𑁆𑀢𑀦𑁄 𑀓𑀢𑀁 𑀅𑀦𑀼𑀕𑁆𑀕𑀳𑀯𑀺𑀲𑁂𑀲𑀁 𑀲𑀫𑀦𑀼𑀲𑁆𑀲𑀭𑀺𑀢𑁆𑀯𑀸 𑀘𑀺𑀦𑁆𑀢𑀦𑀸𑀓𑀸𑀭𑀫𑁆𑀧𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀜𑁆𑀘𑀸𑀳𑀁 𑀪𑀕𑀯𑀢𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀬𑀜𑁆𑀘𑀸𑀳’’𑀦𑁆𑀢𑀺 𑀏𑀢𑀲𑁆𑀲 ‘‘𑀅𑀦𑀼𑀕𑁆𑀕𑀳𑀺𑀢𑁄, 𑀧𑀲𑀁𑀲𑀺𑀢𑁄’’𑀢𑀺 𑀏𑀢𑁂𑀳𑀺 𑀲𑀫𑁆𑀩𑀦𑁆𑀥𑁄. 𑀬𑀦𑁆𑀢𑀺 ¶ 𑀬𑀲𑁆𑀫𑀸, 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁 𑀯𑀸 𑀏𑀢𑀁, 𑀢𑁂𑀦 ‘‘𑀅𑀦𑀼𑀕𑁆𑀕𑀳𑀺𑀢𑁄, 𑀧𑀲𑀁𑀲𑀺𑀢𑁄’’𑀢𑀺 𑀏𑀢𑁆𑀣 𑀅𑀦𑀼𑀕𑁆𑀕𑀳𑀡𑀁, 𑀧𑀲𑀁𑀲𑀦𑀜𑁆𑀘 𑀧𑀭𑀸𑀫𑀲𑀢𑀺. ‘‘𑀥𑀸𑀭𑁂𑀲𑁆𑀲𑀲𑀻’’𑀢𑀺𑀆𑀤𑀺𑀓𑀁 𑀧𑀦 𑀯𑀘𑀦𑀁 𑀪𑀕𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦 𑀧𑀜𑁆𑀜𑀢𑁆𑀢𑀲𑀗𑁆𑀖𑀸𑀝𑀺𑀬𑀁 𑀦𑀺𑀲𑀺𑀦𑁆𑀦𑁄 𑀢𑀁 𑀲𑀗𑁆𑀖𑀸𑀝𑀺𑀁 𑀧𑀤𑀼𑀫𑀧𑀼𑀧𑁆𑀨𑀯𑀡𑁆𑀡𑁂𑀦 𑀧𑀸𑀡𑀺𑀦𑀸 𑀅𑀦𑁆𑀢𑀦𑁆𑀢𑁂𑀦 𑀧𑀭𑀸𑀫𑀲𑀦𑁆𑀢𑁄 𑀆𑀳. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑁂 (𑀲𑀁. 𑀦𑀺. 𑁨.𑁧𑁫𑁪) 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂𑀦𑁂𑀯 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀢𑁆𑀯𑀸 𑀓𑀣𑁂𑀦𑁆𑀢𑁂𑀦 𑁋

‘‘𑀅𑀣 𑀔𑁄 𑀆𑀯𑀼𑀲𑁄 𑀪𑀕𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀬𑁂𑀦 𑀅𑀜𑁆𑀜𑀢𑀭𑀁 𑀭𑀼𑀓𑁆𑀔𑀫𑀽𑀮𑀁 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀅𑀣 𑀔𑁆𑀯𑀸𑀳𑀁 𑀆𑀯𑀼𑀲𑁄 𑀧𑀝𑀧𑀺𑀮𑁄𑀢𑀺𑀓𑀸𑀦𑀁 𑀲𑀗𑁆𑀖𑀸𑀝𑀺𑀁 𑀘𑀢𑀼𑀕𑁆𑀕𑀼𑀡𑀁 𑀧𑀜𑁆𑀜𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀁 ‘𑀇𑀥 𑀪𑀦𑁆𑀢𑁂 𑀪𑀕𑀯𑀸 𑀦𑀺𑀲𑀻𑀤𑀢𑀼, 𑀬𑀁 𑀫𑀫𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’𑀢𑀺 ¶ . 𑀦𑀺𑀲𑀻𑀤𑀺 𑀔𑁄 𑀆𑀯𑀼𑀲𑁄 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂, 𑀦𑀺𑀲𑀚𑁆𑀚 𑀔𑁄 𑀫𑀁 𑀆𑀯𑀼𑀲𑁄 𑀪𑀕𑀯𑀸 𑀏𑀢𑀤𑀯𑁄𑀘 ‘𑀫𑀼𑀤𑀼𑀓𑀸 𑀔𑁄 𑀢𑁆𑀬𑀸𑀬𑀁 𑀓𑀲𑁆𑀲𑀧 𑀧𑀝𑀧𑀺𑀮𑁄𑀢𑀺𑀓𑀸𑀦𑀁 𑀲𑀗𑁆𑀖𑀸𑀝𑀻’𑀢𑀺. 𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂 𑀪𑀦𑁆𑀢𑁂 𑀪𑀕𑀯𑀸 𑀧𑀝𑀧𑀺𑀮𑁄𑀢𑀺𑀓𑀸𑀦𑀁 𑀲𑀗𑁆𑀖𑀸𑀝𑀺𑀁 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸𑀢𑀺. 𑀥𑀸𑀭𑁂𑀲𑁆𑀲𑀲𑀺 𑀧𑀦 𑀫𑁂 𑀢𑁆𑀯𑀁 𑀓𑀲𑁆𑀲𑀧 𑀲𑀸𑀡𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀺 𑀦𑀺𑀩𑁆𑀩𑀲𑀦𑀸𑀦𑀻𑀢𑀺. 𑀥𑀸𑀭𑁂𑀲𑁆𑀲𑀸𑀫𑀳𑀁 𑀪𑀦𑁆𑀢𑁂 𑀪𑀕𑀯𑀢𑁄 𑀲𑀸𑀡𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀺 𑀦𑀺𑀩𑁆𑀩𑀲𑀦𑀸𑀦𑀻𑀢𑀺. 𑀲𑁄 𑀔𑁆𑀯𑀸𑀳𑀁 𑀆𑀯𑀼𑀲𑁄 𑀧𑀝𑀧𑀺𑀮𑁄𑀢𑀺𑀓𑀸𑀦𑀁 𑀲𑀗𑁆𑀖𑀸𑀝𑀺𑀁 𑀪𑀕𑀯𑀢𑁄 𑀧𑀸𑀤𑀸𑀲𑀺𑀁, 𑀅𑀳𑀁 𑀧𑀦 𑀪𑀕𑀯𑀢𑁄 𑀲𑀸𑀡𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀺 𑀦𑀺𑀩𑁆𑀩𑀲𑀦𑀸𑀦𑀺 𑀧𑀝𑀺𑀧𑀚𑁆𑀚𑀺’’𑀦𑁆𑀢𑀺 (𑀲𑀁. 𑀦𑀺. 𑁨.𑁧𑁫𑁪).

𑀢𑀢𑁆𑀣 𑀫𑀼𑀤𑀼𑀓𑀸 𑀔𑁄 𑀢𑁆𑀬𑀸𑀬𑀦𑁆𑀢𑀺 𑀫𑀼𑀤𑀼𑀓𑀸 𑀔𑁄 𑀢𑁂 𑀅𑀬𑀁. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀏𑀯𑀫𑀸𑀳𑀸𑀢𑀺? 𑀣𑁂𑀭𑁂𑀦 𑀲𑀳 𑀘𑀻𑀯𑀭𑀁 𑀧𑀭𑀺𑀯𑀢𑁆𑀢𑁂𑀢𑀼𑀓𑀸𑀫𑀢𑀸𑀬. 𑀓𑀲𑁆𑀫𑀸 𑀧𑀭𑀺𑀯𑀢𑁆𑀢𑁂𑀢𑀼𑀓𑀸𑀫𑁄 𑀚𑀸𑀢𑁄𑀢𑀺? 𑀣𑁂𑀭𑀁 𑀅𑀢𑁆𑀢𑀦𑁄 𑀞𑀸𑀦𑁂 𑀞𑀧𑁂𑀢𑀼𑀓𑀸𑀫𑀢𑀸𑀬. 𑀓𑀺𑀁 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀦𑀢𑁆𑀣𑀻𑀢𑀺? 𑀅𑀢𑁆𑀣𑀺, 𑀏𑀯𑀁 𑀧𑀦𑀲𑁆𑀲 𑀅𑀳𑁄𑀲𑀺 ‘‘𑀇𑀫𑁂 𑀦 𑀘𑀺𑀭𑀁 𑀞𑀲𑁆𑀲𑀦𑁆𑀢𑀺, ‘𑀓𑀲𑁆𑀲𑀧𑁄 𑀧𑀦 𑀯𑀻𑀲𑀯𑀲𑁆𑀲𑀲𑀢𑀸𑀬𑀼𑀓𑁄, 𑀲𑁄 𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀢𑁆𑀢𑀧𑀡𑁆𑀡𑀺𑀕𑀼𑀳𑀸𑀬𑀁 𑀯𑀲𑀺𑀢𑁆𑀯𑀸 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑀁 𑀓𑀢𑁆𑀯𑀸 𑀫𑀫 𑀲𑀸𑀲𑀦𑀁 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀧𑀭𑀺𑀫𑀸𑀡𑀓𑀸𑀮𑀁 𑀧𑀯𑀢𑁆𑀢𑀦𑀓𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀅𑀢𑁆𑀢𑀦𑁄 𑀦𑀁 𑀞𑀸𑀦𑁂 𑀞𑀧𑁂𑀲𑀺, 𑀏𑀯𑀁 𑀪𑀺𑀓𑁆𑀔𑀽 𑀓𑀲𑁆𑀲𑀧𑀲𑁆𑀲 𑀲𑀼𑀲𑁆𑀲𑀼𑀲𑀺𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀻’’𑀢𑀺 𑀢𑀲𑁆𑀫𑀸 𑀏𑀯𑀫𑀸𑀳. 𑀣𑁂𑀭𑁄 𑀧𑀦 𑀬𑀲𑁆𑀫𑀸 𑀘𑀻𑀯𑀭𑀲𑁆𑀲 𑀯𑀸 𑀧𑀢𑁆𑀢𑀲𑁆𑀲 𑀯𑀸 𑀯𑀡𑁆𑀡𑁂 𑀓𑀣𑀺𑀢𑁂 ‘‘𑀇𑀫𑀁 𑀢𑀼𑀫𑁆𑀳𑁂 𑀕𑀡𑁆𑀳𑀣𑀸’’𑀢𑀺 𑀯𑀘𑀦𑀁 𑀘𑀸𑀭𑀺𑀢𑁆𑀢𑀫𑁂𑀯, 𑀢𑀲𑁆𑀫𑀸 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼 𑀫𑁂 𑀪𑀦𑁆𑀢𑁂 𑀪𑀕𑀯𑀸’’𑀢𑀺 𑀆𑀳.

𑀥𑀸𑀭𑁂𑀲𑁆𑀲𑀲𑀺 ¶ 𑀧𑀦 𑀫𑁂 𑀢𑁆𑀯𑀁 𑀓𑀲𑁆𑀲𑀧𑀸𑀢𑀺 𑀓𑀲𑁆𑀲𑀧 𑀢𑁆𑀯𑀁 𑀇𑀫𑀸𑀦𑀺 𑀧𑀭𑀺𑀪𑁄𑀕𑀚𑀺𑀡𑁆𑀡𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀺 𑀧𑀸𑀭𑀼𑀧𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻𑀢𑀺 𑀯𑀤𑀢𑀺. 𑀢𑀜𑁆𑀘 𑀔𑁄 𑀦 𑀓𑀸𑀬𑀩𑀮𑀁 𑀲𑀦𑁆𑀥𑀸𑀬, 𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑀁 𑀧𑀦 𑀲𑀦𑁆𑀥𑀸𑀬 𑀏𑀯𑀫𑀸𑀳. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀅𑀳𑀁 𑀇𑀫𑀁 𑀘𑀻𑀯𑀭𑀁 𑀧𑀼𑀡𑁆𑀡𑀁 𑀦𑀸𑀫 𑀤𑀸𑀲𑀺𑀁 𑀧𑀸𑀭𑀼𑀧𑀺𑀢𑁆𑀯𑀸 𑀆𑀫𑀓𑀲𑀼𑀲𑀸𑀦𑁂 𑀙𑀟𑁆𑀟𑀺𑀢𑀁 𑀲𑀼𑀲𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀢𑀼𑀫𑁆𑀩𑀫𑀢𑁆𑀢𑁂𑀳𑀺 𑀧𑀸𑀡𑀓𑁂𑀳𑀺 𑀲𑀫𑁆𑀧𑀭𑀺𑀓𑀺𑀡𑁆𑀡𑀁 𑀢𑁂 𑀧𑀸𑀡𑀓𑁂 𑀯𑀺𑀥𑀼𑀦𑀺𑀢𑁆𑀯𑀸 𑀫𑀳𑀸𑀅𑀭𑀺𑀬𑀯𑀁𑀲𑁂 𑀞𑀢𑁆𑀯𑀸 𑀅𑀕𑁆𑀕𑀳𑁂𑀲𑀺𑀁, 𑀢𑀲𑁆𑀲 𑀫𑁂 𑀇𑀫𑀁 𑀘𑀻𑀯𑀭𑀁 𑀕𑀳𑀺𑀢𑀤𑀺𑀯𑀲𑁂 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀫𑀳𑀸𑀧𑀣𑀯𑀻 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀫𑀸𑀦𑀸 𑀓𑀫𑁆𑀧𑀺𑀢𑁆𑀣, 𑀆𑀓𑀸𑀲𑀁 𑀢𑀝𑀢𑀝𑀸𑀬𑀺, 𑀘𑀓𑁆𑀓𑀯𑀸𑀴𑁂 𑀤𑁂𑀯𑀢𑀸 𑀲𑀸𑀥𑀼𑀓𑀸𑀭𑀁 𑀅𑀤𑀁𑀲𑀼, 𑀇𑀫𑀁 𑀘𑀻𑀯𑀭𑀁 𑀕𑀡𑁆𑀳𑀦𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀚𑀸𑀢𑀺𑀧𑀁𑀲𑀼𑀓𑀽𑀮𑀺𑀓𑁂𑀦 𑀚𑀸𑀢𑀺𑀆𑀭𑀜𑁆𑀜𑀺𑀓𑁂𑀦 𑀚𑀸𑀢𑀺𑀏𑀓𑀸𑀲𑀦𑀺𑀓𑁂𑀦 𑀚𑀸𑀢𑀺𑀲𑀧𑀤𑀸𑀦𑀘𑀸𑀭𑀺𑀓𑁂𑀦 𑀪𑀯𑀺𑀢𑀼𑀁 𑀯𑀝𑁆𑀝𑀢𑀺, 𑀢𑁆𑀯𑀁 𑀇𑀫𑀲𑁆𑀲 𑀘𑀻𑀯𑀭𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻𑀢𑀺. 𑀣𑁂𑀭𑁄𑀧𑀺 𑀅𑀢𑁆𑀢𑀦𑀸 𑀧𑀜𑁆𑀘𑀦𑁆𑀦𑀁 𑀳𑀢𑁆𑀣𑀻𑀦𑀁 𑀩𑀮𑀁 𑀥𑀸𑀭𑁂𑀢𑀺, 𑀲𑁄 𑀢𑀁 𑀅𑀢𑀓𑁆𑀓𑀬𑀺𑀢𑁆𑀯𑀸 ‘‘𑀅𑀳𑀫𑁂𑀢𑀁 𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀉𑀲𑁆𑀲𑀸𑀳𑁂𑀦 𑀲𑀼𑀕𑀢𑀘𑀻𑀯𑀭𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀓𑀸𑀢𑀼𑀓𑀸𑀫𑁄 ‘‘𑀥𑀸𑀭𑁂𑀲𑁆𑀲𑀸𑀫𑀳𑀁 𑀪𑀦𑁆𑀢𑁂’’𑀢𑀺 𑀆𑀳. 𑀧𑀝𑀺𑀧𑀚𑁆𑀚𑀺𑀦𑁆𑀢𑀺 𑀧𑀝𑀺𑀧𑀦𑁆𑀦𑁄𑀲𑀺𑀁. 𑀏𑀯𑀁 𑀧𑀦 𑀘𑀻𑀯𑀭𑀧𑀭𑀺𑀯𑀢𑁆𑀢𑀦𑀁 ¶ 𑀓𑀢𑁆𑀯𑀸 𑀣𑁂𑀭𑁂𑀦 𑀧𑀸𑀭𑀼𑀧𑀺𑀢𑀘𑀻𑀯𑀭𑀁 𑀪𑀕𑀯𑀸 𑀧𑀸𑀭𑀼𑀧𑀺, 𑀲𑀢𑁆𑀣𑀼 𑀘𑀻𑀯𑀭𑀁 𑀣𑁂𑀭𑁄. 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀳𑀸𑀧𑀣𑀯𑀻 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀉𑀦𑁆𑀦𑀤𑀦𑁆𑀢𑀻 𑀓𑀫𑁆𑀧𑀺𑀢𑁆𑀣.

𑀲𑀸𑀡𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀻𑀢𑀺 𑀫𑀢𑀓𑀴𑁂𑀯𑀭𑀁 𑀧𑀭𑀺𑀯𑁂𑀞𑁂𑀢𑁆𑀯𑀸 𑀙𑀟𑁆𑀟𑀺𑀢𑀸𑀦𑀺 𑀢𑀼𑀫𑁆𑀩𑀫𑀢𑁆𑀢𑁂 𑀓𑀺𑀫𑀻 𑀧𑀧𑁆𑀨𑁄𑀝𑁂𑀢𑁆𑀯𑀸 𑀕𑀳𑀺𑀢𑀸𑀦𑀺 𑀲𑀸𑀡𑀯𑀸𑀓𑀫𑀬𑀸𑀦𑀺 𑀧𑀁𑀲𑀼𑀓𑀽𑀮𑀘𑀻𑀯𑀭𑀸𑀦𑀺. 𑀦𑀺𑀩𑁆𑀩𑀲𑀦𑀸𑀦𑀻𑀢𑀺 𑀦𑀺𑀝𑁆𑀞𑀺𑀢𑀯𑀲𑀦𑀓𑀺𑀘𑁆𑀘𑀸𑀦𑀺, 𑀧𑀭𑀺𑀪𑁄𑀕𑀚𑀺𑀡𑁆𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀏𑀓𑀫𑁂𑀯 𑀢𑀁 𑀘𑀻𑀯𑀭𑀁, 𑀅𑀦𑁂𑀓𑀸𑀯𑀬𑀯𑀢𑁆𑀢𑀸 𑀧𑀦 𑀩𑀳𑀼𑀯𑀘𑀦𑀁 𑀓𑀢𑀦𑁆𑀢𑀺 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀘𑀻𑀯𑀭𑁂 𑀲𑀸𑀥𑀸𑀭𑀡𑀧𑀭𑀺𑀪𑁄𑀕𑁂𑀦𑀸𑀢𑀺 𑀏𑀢𑁆𑀣 𑀅𑀢𑁆𑀢𑀦𑀸 𑀲𑀸𑀥𑀸𑀭𑀡𑀧𑀭𑀺𑀪𑁄𑀕𑁂𑀦𑀸𑀢𑀺 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸, 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀣𑀲𑁆𑀲 𑀘 𑀲𑀤𑁆𑀤𑀲𑁆𑀲 𑀧𑀬𑁄𑀕𑁂 𑀓𑀸𑀫𑀸𑀘𑀸𑀭𑀢𑁆𑀢𑀸 ‘‘𑀅𑀢𑁆𑀢𑀦𑀸’’𑀢𑀺 𑀦 𑀯𑀼𑀢𑁆𑀢𑀁. ‘‘𑀥𑀸𑀭𑁂𑀲𑁆𑀲𑀲𑀺 𑀧𑀦 𑀫𑁂 𑀢𑁆𑀯𑀁 𑀓𑀲𑁆𑀲𑀧 𑀲𑀸𑀡𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀻’’𑀢𑀺 (𑀲𑀁. 𑀦𑀺. 𑁨.𑁧𑁫𑁪) 𑀳𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀅𑀢𑁆𑀢𑀦𑀸𑀯 𑀲𑀸𑀥𑀸𑀭𑀡𑀧𑀭𑀺𑀪𑁄𑀕𑁂𑀦𑀸’’𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀦𑀸𑀜𑁆𑀜𑁂𑀦. 𑀦 𑀳𑀺 𑀓𑁂𑀯𑀮𑀁 𑀲𑀤𑁆𑀤𑀢𑁄𑀬𑁂𑀯 𑀲𑀩𑁆𑀩𑀢𑁆𑀣 𑀅𑀢𑁆𑀣𑀦𑀺𑀘𑁆𑀙𑀬𑁄, 𑀅𑀢𑁆𑀣𑀧𑀓𑀭𑀡𑀸𑀤𑀺𑀦𑀸𑀧𑀺 𑀬𑁂𑀪𑀼𑀬𑁆𑀬𑁂𑀦 𑀅𑀢𑁆𑀣𑀲𑁆𑀲 𑀦𑀺𑀬𑀫𑀺𑀢𑀢𑁆𑀢𑀸. 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀧𑀦𑁂𑀢𑁆𑀣 𑀏𑀯𑀁 𑀯𑀼𑀢𑁆𑀢𑀁 ‘‘𑀘𑀻𑀯𑀭𑁂 𑀲𑀸𑀥𑀸𑀭𑀡𑀧𑀭𑀺𑀪𑁄𑀕𑁂𑀦𑀸𑀢𑀺 𑀏𑀢𑁆𑀣 ‘𑀅𑀢𑁆𑀢𑀦𑀸 𑀲𑀫𑀲𑀫𑀝𑁆𑀞𑀧𑀦𑁂𑀦𑀸’𑀢𑀺 𑀇𑀥 𑀯𑀼𑀢𑁆𑀢𑀁 𑀅𑀢𑁆𑀢𑀦𑀸 𑁋 𑀲𑀤𑁆𑀤𑀫𑀸𑀦𑁂𑀢𑁆𑀯𑀸 ‘𑀘𑀻𑀯𑀭𑁂 𑀅𑀢𑁆𑀢𑀦𑀸 𑀲𑀸𑀥𑀸𑀭𑀡𑀧𑀭𑀺𑀪𑁄𑀕𑁂𑀦𑀸’𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀬𑀲𑁆𑀲 ¶ 𑀬𑁂𑀦 𑀳𑀺 𑀲𑀫𑁆𑀩𑀦𑁆𑀥𑁄, 𑀤𑀽𑀭𑀝𑁆𑀞𑀫𑁆𑀧𑀺 𑀘 𑀢𑀲𑁆𑀲 𑀢𑀁;

𑀅𑀢𑁆𑀣𑀢𑁄 𑀳𑁆𑀬𑀲𑀫𑀸𑀦𑀸𑀦𑀁, 𑀆𑀲𑀦𑁆𑀦𑀢𑁆𑀢𑀫𑀓𑀸𑀭𑀡𑀦𑁆𑀢𑀺.

𑀅𑀣 𑀯𑀸 𑀪𑀕𑀯𑀢𑀸 𑀘𑀻𑀯𑀭𑁂 𑀲𑀸𑀥𑀸𑀭𑀡𑀧𑀭𑀺𑀪𑁄𑀕𑁂𑀦 𑀪𑀕𑀯𑀢𑀸 𑀅𑀦𑀼𑀕𑁆𑀕𑀳𑀺𑀢𑁄𑀢𑀺 𑀬𑁄𑀚𑀦𑀻𑀬𑀁. 𑀏𑀓𑀲𑁆𑀲𑀸𑀧𑀺 𑀳𑀺 𑀓𑀭𑀡𑀦𑀺𑀤𑁆𑀤𑁂𑀲𑀲𑁆𑀲 𑀲𑀳𑀸𑀤𑀺𑀬𑁄𑀕𑀓𑀢𑁆𑀢𑀼𑀢𑁆𑀣𑀚𑁄𑀢𑀓𑀢𑁆𑀢𑀲𑀫𑁆𑀪𑀯𑀢𑁄’’𑀢𑀺. 𑀲𑀫𑀸𑀦𑀁 𑀥𑀸𑀭𑀡𑀫𑁂𑀢𑀲𑁆𑀲𑀸𑀢𑀺 𑀲𑀸𑀥𑀸𑀭𑀡𑁄, 𑀢𑀸𑀤𑀺𑀲𑁄 𑀧𑀭𑀺𑀪𑁄𑀕𑁄𑀢𑀺 𑀲𑀸𑀥𑀸𑀭𑀡𑀧𑀭𑀺𑀪𑁄𑀕𑁄, 𑀢𑁂𑀦. 𑀲𑀸𑀥𑀸𑀭𑀡𑀧𑀭𑀺𑀪𑁄𑀕𑁂𑀦 𑀘 𑀲𑀫𑀲𑀫𑀝𑁆𑀞𑀧𑀦𑁂𑀦 𑀘 𑀅𑀦𑀼𑀕𑁆𑀕𑀳𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄.

𑀇𑀤𑀸𑀦𑀺 𑁋

‘‘𑀅𑀳𑀁 𑀪𑀺𑀓𑁆𑀔𑀯𑁂, 𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺, 𑀓𑀲𑁆𑀲𑀧𑁄𑀧𑀺 𑀪𑀺𑀓𑁆𑀔𑀯𑁂 𑀬𑀸𑀯𑀤𑁂 𑀆𑀓𑀗𑁆𑀔𑀢𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁧𑁫𑁨) 𑁋

𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀙𑀴𑀪𑀺𑀜𑁆𑀜𑀸𑀧𑀪𑁂𑀤𑁂 ¶ 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀅𑀢𑁆𑀢𑀦𑀸 𑀲𑀫𑀲𑀫𑀝𑁆𑀞𑀧𑀦𑀢𑁆𑀣𑀸𑀬 𑀪𑀕𑀯𑀢𑀸 𑀯𑀼𑀢𑁆𑀢𑀁 𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑁂 (𑀲𑀁. 𑀦𑀺. 𑁨.𑁧𑁫𑁧) 𑀆𑀕𑀢𑀁 𑀧𑀸𑀴𑀺𑀫𑀺𑀫𑀁 𑀧𑁂𑀬𑁆𑀬𑀸𑀮𑀫𑀼𑀔𑁂𑀦, 𑀆𑀤𑀺𑀕𑁆𑀕𑀳𑀡𑁂𑀦 𑀘 𑀲𑀗𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀳𑀁 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺.

𑀢𑀢𑁆𑀣 𑀬𑀸𑀯𑀤𑁂𑀢𑀺 𑀬𑀸𑀯𑀤𑁂𑀯, 𑀬𑀢𑁆𑀢𑀓𑀁 𑀓𑀸𑀮𑀁 𑀆𑀓𑀗𑁆𑀔𑀸𑀫𑀺, 𑀢𑀢𑁆𑀢𑀓𑀁 𑀓𑀸𑀮𑀁 𑀯𑀺𑀳𑀭𑀸𑀫𑀻𑀢𑀺 𑀅𑀢𑁆𑀣𑁄. 𑀢𑀢𑁄𑀬𑁂𑀯 𑀳𑀺 𑀫𑀚𑁆𑀛𑀺𑀫𑀕𑀡𑁆𑀞𑀺𑀧𑀤𑁂, 𑀘𑀽𑀴𑀕𑀡𑁆𑀞𑀺𑀧𑀤𑁂 𑀘 ‘‘𑀬𑀸𑀯𑀤𑁂𑀢𑀺 𑀬𑀸𑀯𑀤𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀮𑀺𑀔𑀺𑀢𑀁. 𑀲𑀁𑀬𑀼𑀢𑁆𑀢𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀬𑀸𑀯𑀤𑁂 𑀆𑀓𑀗𑁆𑀔𑀸𑀫𑀻𑀢𑀺 𑀬𑀸𑀯𑀤𑁂𑀯 𑀇𑀘𑁆𑀙𑀸𑀫𑀻’’𑀢𑀺 (𑀲𑀁. 𑀦𑀺. 𑀅𑀝𑁆𑀞. 𑁧.𑁨.𑁧𑁫𑁨) 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀢𑀣𑀸 𑀳𑀺 𑀢𑀢𑁆𑀣 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀁 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 ‘‘𑀬𑀸𑀯𑀤𑁂𑀯𑀸𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑀁 ‘𑀬𑀸𑀯𑀤𑁂’𑀢𑀺 𑀇𑀤𑀁 𑀧𑀤’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑁄𑀢𑁆𑀣𑀓𑁂𑀲𑀼 𑀧𑀦 𑀓𑀢𑁆𑀣𑀘𑀺 ‘‘𑀬𑀸𑀯𑀤𑁂𑀯𑀸’’𑀢𑀺 𑀅𑀬𑀫𑁂𑀯 𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀅𑀧𑀺 𑀘 𑀬𑀸𑀯𑀤𑁂𑀢𑀺 𑀬𑀢𑁆𑀢𑀓𑀁 𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀁 𑀯𑀺𑀳𑀭𑀺𑀢𑀼𑀁 𑀆𑀓𑀗𑁆𑀔𑀸𑀫𑀺, 𑀢𑀢𑁆𑀢𑀓𑀁 𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀁 𑀯𑀺𑀳𑀭𑀸𑀫𑀻𑀢𑀺 𑀲𑀫𑀸𑀧𑀢𑁆𑀢𑀺𑀝𑁆𑀞𑀸𑀦𑁂, 𑀬𑀢𑁆𑀢𑀓𑀁 𑀅𑀪𑀺𑀜𑁆𑀜𑀸𑀯𑁄𑀳𑀸𑀭𑀁 𑀯𑁄𑀳𑀭𑀺𑀢𑀼𑀁 ¶ 𑀆𑀓𑀗𑁆𑀔𑀸𑀫𑀺, 𑀢𑀢𑁆𑀢𑀓𑀁 𑀅𑀪𑀺𑀜𑁆𑀜𑀸𑀯𑁄𑀳𑀸𑀭𑀁 𑀯𑁄𑀳𑀭𑀸𑀫𑀻𑀢𑀺 𑀅𑀪𑀺𑀜𑁆𑀜𑀸𑀞𑀸𑀦𑁂 𑀘 𑀲𑀳 𑀧𑀸𑀞𑀲𑁂𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦𑀸𑀧𑀺 𑀢𑀤𑁂𑀯𑀢𑁆𑀣𑀁 𑀬𑀣𑀸𑀮𑀸𑀪𑀦𑀬𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑀢𑁆𑀢𑀓𑁂 𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑁂, 𑀅𑀪𑀺𑀜𑁆𑀜𑀸𑀯𑁄𑀳𑀸𑀭𑁂 𑀯𑀸 𑀆𑀓𑀗𑁆𑀔𑀦𑁆𑀢𑁄 𑀯𑀺𑀳𑀸𑀭𑀸𑀫𑀺 𑀘𑁂𑀯 𑀯𑁄𑀳𑀭𑀸𑀫𑀺 𑀘, 𑀢𑀣𑀸 𑀓𑀲𑁆𑀲𑀧𑁄𑀧𑀻𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀅𑀧𑀭𑁂 𑀧𑀦 ‘‘𑀬𑀸𑀯𑀤𑁂𑀢𑀺 ‘𑀬𑀁 𑀧𑀞𑀫𑀚𑁆𑀛𑀸𑀦𑀁 𑀆𑀓𑀗𑁆𑀔𑀸𑀫𑀺, 𑀢𑀁 𑀧𑀞𑀫𑀚𑁆𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀭𑀸𑀫𑀻’𑀢𑀺𑀆𑀤𑀺𑀦𑀸 𑀲𑀫𑀸𑀧𑀢𑁆𑀢𑀺𑀝𑁆𑀞𑀸𑀦𑁂, 𑀇𑀤𑁆𑀥𑀺𑀯𑀺𑀥𑀸𑀪𑀺𑀜𑁆𑀜𑀸𑀞𑀸𑀦𑁂 𑀘 𑀅𑀚𑁆𑀛𑀸𑀳𑀭𑀺𑀢𑀲𑁆𑀲 𑀢-𑀲𑀤𑁆𑀤𑀲𑁆𑀲 𑀓𑀫𑁆𑀫𑀯𑀲𑁂𑀦 ‘𑀬𑀁 𑀤𑀺𑀩𑁆𑀩𑀲𑁄𑀢𑀁 𑀆𑀓𑀗𑁆𑀔𑀸𑀫𑀺, 𑀢𑁂𑀦 𑀤𑀺𑀩𑁆𑀩𑀲𑁄𑀢𑁂𑀦 𑀲𑀤𑁆𑀤𑁂 𑀲𑀼𑀡𑀸𑀫𑀻’𑀢𑀺𑀆𑀤𑀺𑀦𑀸 𑀲𑁂𑀲𑀸𑀪𑀺𑀜𑁆𑀜𑀸𑀞𑀸𑀦𑁂 𑀓𑀭𑀡𑀯𑀲𑁂𑀦 𑀬𑁄𑀚𑀦𑀸 𑀯𑀢𑁆𑀢𑀩𑁆𑀩𑀸’’𑀢𑀺 𑀯𑀤𑀦𑁆𑀢𑀺. 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺 𑀏𑀢𑁆𑀣 𑀏𑀯-𑀲𑀤𑁆𑀤𑁄 𑀦𑀺𑀬𑀫𑀢𑁆𑀣𑁄, 𑀉𑀪𑀬𑀢𑁆𑀣 𑀬𑁄𑀚𑁂𑀢𑀩𑁆𑀩𑁄. 𑀬𑀫𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀤𑀼𑀧𑀭𑀺 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀙𑀴𑀪𑀺𑀜𑁆𑀜𑀸𑀧𑁆𑀧𑀪𑁂𑀤𑁂𑀢𑀺 𑀏𑀢𑁆𑀣 𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀸 𑀦𑀸𑀫 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀏𑀯𑀁𑀲𑀜𑁆𑀜𑀺𑀢𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀲𑀳 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄. 𑀙𑀴𑀪𑀺𑀜𑁆𑀜𑀸 𑀦𑀸𑀫 𑀆𑀲𑀯𑀓𑁆𑀔𑀬𑀜𑀸𑀡𑁂𑀦 𑀲𑀳 𑀧𑀜𑁆𑀘𑀸𑀪𑀺𑀜𑁆𑀜𑀸𑀬𑁄. 𑀓𑀢𑁆𑀣𑀘𑀺 𑀧𑁄𑀢𑁆𑀣𑀓𑁂 𑀘𑁂𑀢𑁆𑀣 𑀆𑀤𑀺𑀲𑀤𑁆𑀤𑁄 𑀤𑀺𑀲𑁆𑀲𑀢𑀺. 𑀲𑁄 𑀅𑀦𑀥𑀺𑀧𑁆𑀧𑁂𑀢𑁄 𑀬𑀣𑀸𑀯𑀼𑀢𑁆𑀢𑀸𑀬 𑀧𑀸𑀴𑀺𑀬𑀸 𑀕𑀳𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀅𑀦𑀯𑀲𑁂𑀲𑀢𑁆𑀢𑀸. 𑀫𑀦𑀼𑀲𑁆𑀲𑁂𑀲𑀼, 𑀫𑀦𑀼𑀲𑁆𑀲𑀸𑀦𑀁 𑀯𑀸 𑀉𑀢𑁆𑀢𑀭𑀺𑀪𑀽𑀢𑀸𑀦𑀁, 𑀉𑀢𑁆𑀢𑀭𑀻𑀦𑀁 𑀯𑀸 𑀫𑀦𑀼𑀲𑁆𑀲𑀸𑀦𑀁 𑀛𑀸𑀬𑀻𑀦𑀜𑁆𑀘𑁂𑀯 𑀅𑀭𑀺𑀬𑀸𑀦𑀜𑁆𑀘 𑀥𑀫𑁆𑀫𑁄𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄, 𑀫𑀦𑀼𑀲𑁆𑀲𑀥𑀫𑁆𑀫𑀸 𑀯𑀸 𑀉𑀢𑁆𑀢𑀭𑀻𑀢𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄. 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸 𑀘𑁂𑀢𑁆𑀣 𑀯𑀺𑀦𑀸 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑁂𑀦 𑀧𑀓𑀢𑀺𑀬𑀸𑀯 𑀫𑀦𑀼𑀲𑁆𑀲𑁂𑀳𑀺 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀢𑁄, 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀸𑀯𑀳𑀦𑀢𑁄 𑀘 𑀫𑀦𑀼𑀲𑁆𑀲𑀥𑀫𑁆𑀫𑁄 𑀦𑀸𑀫, 𑀢𑀢𑁄 𑀉𑀢𑁆𑀢𑀭𑀺 𑀧𑀦 𑀛𑀸𑀦𑀸𑀤𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀫𑀲𑀫𑀝𑁆𑀞𑀧𑀦𑁂𑀦𑀸𑀢𑀺 ‘‘𑀅𑀳𑀁 𑀬𑀢𑁆𑀢𑀓𑀁 𑀓𑀸𑀮𑀁, 𑀬𑀢𑁆𑀢𑀓𑁂 𑀯𑀸 𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑁂, 𑀬𑀢𑁆𑀢𑀓𑀸 𑀅𑀪𑀺𑀜𑁆𑀜𑀸𑀬𑁄 𑀘 𑀯𑀴𑀜𑁆𑀚𑁂𑀫𑀺 ¶ , 𑀢𑀣𑀸 𑀓𑀲𑁆𑀲𑀧𑁄𑀧𑀻’’𑀢𑀺 𑀏𑀯𑀁 𑀲𑀫𑀲𑀫𑀁 𑀓𑀢𑁆𑀯𑀸 𑀞𑀧𑀦𑁂𑀦. 𑀅𑀦𑁂𑀓𑀝𑁆𑀞𑀸𑀦𑁂𑀲𑀼 𑀞𑀧𑀦𑀁, 𑀓𑀲𑁆𑀲𑀘𑀺𑀧𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀅𑀲𑁂𑀲𑀪𑀸𑀯𑁂𑀦 𑀏𑀓𑀦𑁆𑀢𑀲𑀫𑀝𑁆𑀞𑀧𑀦𑀁 𑀯𑀸 𑀲𑀦𑁆𑀥𑀸𑀬 ‘‘𑀲𑀫𑀲𑀫𑀝𑁆𑀞𑀧𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀇𑀤𑀜𑁆𑀘 𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀙𑀴𑀪𑀺𑀜𑁆𑀜𑀸𑀪𑀸𑀯𑀲𑀸𑀫𑀜𑁆𑀜𑁂𑀦 𑀧𑀲𑀁𑀲𑀸𑀫𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀪𑀕𑀯𑀸 𑀯𑀺𑀬 𑀤𑁂𑀯𑀲𑀺𑀓𑀁 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀸 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀢𑀺, 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀸𑀤𑀺𑀯𑀲𑁂𑀦 𑀘 𑀅𑀪𑀺𑀜𑁆𑀜𑀸𑀬𑁄 𑀯𑀴𑀜𑁆𑀚𑁂𑀢𑀻𑀢𑀺. 𑀏𑀢𑁆𑀣 𑀘 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀅𑀢𑁆𑀢𑀦𑀸 𑀲𑀫𑀲𑀫𑀝𑁆𑀞𑀧𑀦𑁂𑀦𑀸’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑁋

‘‘𑀑𑀯𑀤 ¶ 𑀓𑀲𑁆𑀲𑀧 𑀪𑀺𑀓𑁆𑀔𑀽, 𑀓𑀭𑁄𑀳𑀺 𑀓𑀲𑁆𑀲𑀧 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁, 𑀅𑀳𑀁 𑀯𑀸 𑀓𑀲𑁆𑀲𑀧 𑀪𑀺𑀓𑁆𑀔𑀽 𑀑𑀯𑀤𑁂𑀬𑁆𑀬𑀁, 𑀢𑁆𑀯𑀁 𑀯𑀸. 𑀅𑀳𑀁 𑀯𑀸 𑀓𑀲𑁆𑀲𑀧 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀭𑁂𑀬𑁆𑀬𑀁, 𑀢𑁆𑀯𑀁 𑀯𑀸’’𑀢𑀺 𑁋

𑀏𑀯𑀫𑁆𑀧𑀺 𑀅𑀢𑁆𑀢𑀦𑀸 𑀲𑀫𑀲𑀫𑀝𑁆𑀞𑀧𑀦𑀫𑀓𑀸𑀲𑀺𑀬𑁂𑀯𑀸𑀢𑀺.

𑀢𑀣𑀸𑀢𑀺 𑀭𑀽𑀧𑀽𑀧𑀲𑀁𑀳𑀸𑀭𑁄 𑀬𑀣𑀸 𑀅𑀦𑀼𑀕𑁆𑀕𑀳𑀺𑀢𑁄, 𑀢𑀣𑀸 𑀧𑀲𑀁𑀲𑀺𑀢𑁄𑀢𑀺. 𑀆𑀓𑀸𑀲𑁂 𑀧𑀸𑀡𑀺𑀁 𑀘𑀸𑀮𑁂𑀢𑁆𑀯𑀸𑀢𑀺 𑀪𑀕𑀯𑀢𑀸 𑀅𑀢𑁆𑀢𑀦𑁄𑀬𑁂𑀯 𑀧𑀸𑀡𑀺𑀁 𑀆𑀓𑀸𑀲𑁂 𑀘𑀸𑀮𑁂𑀢𑁆𑀯𑀸 𑀓𑀼𑀮𑁂𑀲𑀼 𑀅𑀮𑀕𑁆𑀕𑀘𑀺𑀢𑁆𑀢𑀢𑀸𑀬 𑀘𑁂𑀯 𑀓𑀭𑀡𑀪𑀽𑀢𑀸𑀬 𑀧𑀲𑀁𑀲𑀺𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀮𑀕𑁆𑀕𑀘𑀺𑀢𑁆𑀢𑀢𑀸𑀬𑀸𑀢𑀺 𑀯𑀸 𑀆𑀥𑀸𑀭𑁂 𑀪𑀼𑀫𑁆𑀫𑀁, 𑀆𑀓𑀸𑀲𑁂 𑀧𑀸𑀡𑀺𑀁 𑀘𑀸𑀮𑁂𑀢𑁆𑀯𑀸 𑀓𑀼𑀮𑀽𑀧𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀮𑀕𑁆𑀕𑀘𑀺𑀢𑁆𑀢𑀢𑀸𑀬 𑀓𑀼𑀮𑁂𑀲𑀼 𑀅𑀮𑀕𑁆𑀕𑀦𑀘𑀺𑀢𑁆𑀢𑁂𑀦 𑀪𑀯𑀺𑀢𑀼𑀁 𑀬𑀼𑀢𑁆𑀢𑀢𑀸𑀬 𑀘𑁂𑀯 𑀫𑀜𑁆𑀜𑁂𑀯 𑀲𑀓𑁆𑀔𑀺𑀁 𑀓𑀢𑁆𑀯𑀸 𑀧𑀲𑀁𑀲𑀺𑀢𑁄𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑁋

‘‘𑀅𑀣 𑀔𑁄 𑀪𑀕𑀯𑀸 𑀆𑀓𑀸𑀲𑁂 𑀧𑀸𑀡𑀺𑀁 𑀘𑀸𑀮𑁂𑀲𑀺 𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂, 𑀅𑀬𑀁 𑀆𑀓𑀸𑀲𑁂 𑀧𑀸𑀡𑀺 𑀦 𑀲𑀚𑁆𑀚𑀢𑀺 𑀦 𑀕𑀬𑁆𑀳𑀢𑀺 𑀦 𑀩𑀚𑁆𑀛𑀢𑀺, 𑀏𑀯𑀫𑁂𑀯 𑀔𑁄 𑀪𑀺𑀓𑁆𑀔𑀯𑁂 𑀬𑀲𑁆𑀲 𑀓𑀲𑁆𑀲𑀘𑀺 𑀪𑀺𑀓𑁆𑀔𑀼𑀦𑁄 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑁄 𑀓𑀼𑀮𑁂𑀲𑀼 𑀘𑀺𑀢𑁆𑀢𑀁 𑀦 𑀲𑀚𑁆𑀚𑀢𑀺 𑀦 𑀕𑀬𑁆𑀳𑀢𑀺 𑀦 𑀩𑀚𑁆𑀛𑀢𑀺 ‘𑀮𑀪𑀦𑁆𑀢𑀼 𑀮𑀸𑀪𑀓𑀸𑀫𑀸, 𑀧𑀼𑀜𑁆𑀜𑀓𑀸𑀫𑀸 𑀓𑀭𑁄𑀦𑁆𑀢𑀼 𑀧𑀼𑀜𑁆𑀜𑀸𑀦𑀻’𑀢𑀺. 𑀬𑀣𑀸 𑀲𑀓𑁂𑀦 𑀮𑀸𑀪𑁂𑀦 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀲𑀼𑀫𑀦𑁄, 𑀏𑀯𑀁 𑀧𑀭𑁂𑀲𑀁 𑀮𑀸𑀪𑁂𑀦 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀲𑀼𑀫𑀦𑁄. 𑀏𑀯𑀭𑀽𑀧𑁄 𑀔𑁄 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀅𑀭𑀳𑀢𑀺 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀺𑀢𑀼𑀁. 𑀓𑀲𑁆𑀲𑀧𑀲𑁆𑀲 𑀪𑀺𑀓𑁆𑀔𑀯𑁂 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑁄 𑀓𑀼𑀮𑁂𑀲𑀼 𑀘𑀺𑀢𑁆𑀢𑀁 𑀦 𑀲𑀚𑁆𑀚𑀢𑀺 𑀦 𑀕𑀬𑁆𑀳𑀢𑀺 𑀦 𑀩𑀚𑁆𑀛𑀢𑀺 ‘𑀮𑀪𑀦𑁆𑀢𑀼 𑀮𑀸𑀪𑀓𑀸𑀫𑀸, 𑀧𑀼𑀜𑁆𑀜𑀓𑀸𑀫𑀸 𑀓𑀭𑁄𑀦𑁆𑀢𑀼 𑀧𑀼𑀜𑁆𑀜𑀸𑀦𑀻’𑀢𑀺. 𑀬𑀣𑀸 𑀲𑀓𑁂𑀦 𑀮𑀸𑀪𑁂𑀦 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀲𑀼𑀫𑀦𑁄, 𑀏𑀯𑀁 𑀧𑀭𑁂𑀲𑀁 𑀮𑀸𑀪𑁂𑀦 𑀅𑀢𑁆𑀢𑀫𑀦𑁄 𑀳𑁄𑀢𑀺 𑀲𑀼𑀫𑀦𑁄’’𑀢𑀺 (𑀲𑀁. 𑀦𑀺. 𑁨.𑁧𑁪𑁬).

𑀢𑀢𑁆𑀣 𑀆𑀓𑀸𑀲𑁂 𑀧𑀸𑀡𑀺𑀁 𑀘𑀸𑀮𑁂𑀲𑀻𑀢𑀺 𑀦𑀻𑀮𑁂 𑀕𑀕𑀦𑀦𑁆𑀢𑀭𑁂 𑀬𑀫𑀓𑀯𑀺𑀚𑁆𑀚𑀼𑀓𑀁 𑀲𑀜𑁆𑀘𑀸𑀮𑀬𑀫𑀸𑀦𑁄 𑀯𑀺𑀬 𑀳𑁂𑀝𑁆𑀞𑀸𑀪𑀸𑀕𑁂 ¶ , 𑀉𑀧𑀭𑀺𑀪𑀸𑀕𑁂, 𑀉𑀪𑀢𑁄 𑀘 𑀧𑀲𑁆𑀲𑁂𑀲𑀼 𑀧𑀸𑀡𑀺𑀁 𑀲𑀜𑁆𑀘𑀸𑀮𑁂𑀲𑀺, 𑀇𑀤𑀜𑁆𑀘 𑀧𑀦 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀅𑀲𑀫𑁆𑀪𑀺𑀦𑁆𑀦𑀧𑀤𑀁 𑀦𑀸𑀫. 𑀅𑀢𑁆𑀢𑀫𑀦𑁄𑀢𑀺 𑀲𑀓𑀫𑀦𑁄, 𑀦 𑀤𑁄𑀫𑀦𑀲𑁆𑀲𑁂𑀦 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀺𑀢𑀫𑀦𑁄. 𑀲𑀼𑀫𑀦𑁄𑀢𑀺 𑀢𑀼𑀝𑁆𑀞𑀫𑀦𑁄, 𑀇𑀤𑀸𑀦𑀺 𑀬𑁄 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑁄 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑁄 𑀏𑀯𑀁 ¶ 𑀯𑀤𑁂𑀬𑁆𑀬 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 ‘𑀅𑀮𑀕𑁆𑀕𑀘𑀺𑀢𑁆𑀢𑀢𑀸𑀬 𑀆𑀓𑀸𑀲𑁂 𑀘𑀸𑀮𑀺𑀢𑀧𑀸𑀡𑀽𑀧𑀫𑀸 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀣𑀸’𑀢𑀺 𑀯𑀤𑀦𑁆𑀢𑁄 𑀅𑀝𑁆𑀞𑀸𑀦𑁂 𑀞𑀧𑁂𑀢𑀺, 𑀅𑀲𑀬𑁆𑀳𑀪𑀸𑀭𑀁 𑀆𑀭𑁄𑀧𑁂𑀢𑀺, 𑀬𑀁 𑀦 𑀲𑀓𑁆𑀓𑀸 𑀓𑀸𑀢𑀼𑀁, 𑀢𑀁 𑀓𑀸𑀭𑁂𑀳𑀻’’𑀢𑀺, 𑀢𑀲𑁆𑀲 𑀯𑀸𑀤𑀧𑀣𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ‘‘𑀲𑀓𑁆𑀓𑀸 𑀘 𑀔𑁄 𑀏𑀯𑀁 𑀓𑀸𑀢𑀼𑀁, 𑀅𑀢𑁆𑀣𑀺 𑀏𑀯𑀭𑀽𑀧𑁄 𑀪𑀺𑀓𑁆𑀔𑀽’’𑀢𑀺 𑀆𑀬𑀲𑁆𑀫𑀦𑁆𑀢𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀫𑁂𑀯 𑀲𑀓𑁆𑀔𑀺𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀲𑁆𑀲𑀧𑀲𑁆𑀲 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳.

𑀅𑀜𑁆𑀜𑀫𑁆𑀧𑀺 𑀧𑀲𑀁𑀲𑀦𑀫𑀸𑀳 ‘‘𑀘𑀦𑁆𑀤𑁄𑀧𑀫𑀧𑀝𑀺𑀧𑀤𑀸𑀬 𑀘𑀸’’𑀢𑀺, 𑀘𑀦𑁆𑀤𑀧𑀝𑀺𑀪𑀸𑀕𑀸𑀬 𑀧𑀝𑀺𑀧𑀤𑀸𑀬 𑀘 𑀓𑀭𑀡𑀪𑀽𑀢𑀸𑀬 𑀧𑀲𑀁𑀲𑀺𑀢𑁄, 𑀢𑀲𑁆𑀲𑀁 𑀯𑀸 𑀆𑀥𑀸𑀭𑀪𑀽𑀢𑀸𑀬 𑀫𑀜𑁆𑀜𑁂𑀯 𑀲𑀓𑁆𑀔𑀺𑀁 𑀓𑀢𑁆𑀯𑀸 𑀧𑀲𑀁𑀲𑀺𑀢𑁄𑀢𑀺 𑀅𑀢𑁆𑀣𑁄. 𑀬𑀣𑀸𑀳 𑁋

‘‘𑀘𑀦𑁆𑀤𑀽𑀧𑀫𑀸 𑀪𑀺𑀓𑁆𑀔𑀯𑁂 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀣 𑀅𑀧𑀓𑀲𑁆𑀲𑁂𑀯 𑀓𑀸𑀬𑀁, 𑀅𑀧𑀓𑀲𑁆𑀲 𑀘𑀺𑀢𑁆𑀢𑀁 𑀦𑀺𑀘𑁆𑀘𑀦𑀯𑀓𑀸 𑀓𑀼𑀮𑁂𑀲𑀼 𑀅𑀧𑁆𑀧𑀕𑀩𑁆𑀪𑀸. 𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂 𑀧𑀼𑀭𑀺𑀲𑁄 𑀚𑀭𑀼𑀤𑀧𑀸𑀦𑀁 𑀯𑀸 𑀑𑀮𑁄𑀓𑁂𑀬𑁆𑀬 𑀧𑀩𑁆𑀩𑀢𑀯𑀺𑀲𑀫𑀁 𑀯𑀸 𑀦𑀤𑀻𑀯𑀺𑀤𑀼𑀕𑁆𑀕𑀁 𑀯𑀸 𑀅𑀧𑀓𑀲𑁆𑀲𑁂𑀯 𑀓𑀸𑀬𑀁, 𑀅𑀧𑀓𑀲𑁆𑀲 𑀘𑀺𑀢𑁆𑀢𑀁, 𑀏𑀯𑀫𑁂𑀯 𑀔𑁄 𑀪𑀺𑀓𑁆𑀔𑀯𑁂 𑀘𑀦𑁆𑀤𑀽𑀧𑀫𑀸 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀣 𑀅𑀧𑀓𑀲𑁆𑀲𑁂𑀯 𑀓𑀸𑀬𑀁, 𑀅𑀧𑀓𑀲𑁆𑀲 𑀘𑀺𑀢𑁆𑀢𑀁 𑀦𑀺𑀘𑁆𑀘𑀦𑀯𑀓𑀸 𑀓𑀼𑀮𑁂𑀲𑀼 𑀅𑀧𑁆𑀧𑀕𑀩𑁆𑀪𑀸. 𑀓𑀲𑁆𑀲𑀧𑁄 𑀪𑀺𑀓𑁆𑀔𑀯𑁂 𑀘𑀦𑁆𑀤𑀽𑀧𑀫𑁄 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑀺 𑀅𑀧𑀓𑀲𑁆𑀲𑁂𑀯 𑀓𑀸𑀬𑀁, 𑀅𑀧𑀓𑀲𑁆𑀲 𑀘𑀺𑀢𑁆𑀢𑀁 𑀦𑀺𑀘𑁆𑀘𑀦𑀯𑀓𑁄 𑀓𑀼𑀮𑁂𑀲𑀼 𑀅𑀧𑁆𑀧𑀕𑀩𑁆𑀪𑁄’’𑀢𑀺 (𑀲𑀁. 𑀦𑀺. 𑁨.𑁧𑁪𑁬).

𑀢𑀢𑁆𑀣 𑀘𑀦𑁆𑀤𑀽𑀧𑀫𑀸𑀢𑀺 𑀘𑀦𑁆𑀤𑀲𑀤𑀺𑀲𑀸 𑀳𑀼𑀢𑁆𑀯𑀸. 𑀓𑀺𑀁 𑀧𑀭𑀺𑀫𑀡𑁆𑀟𑀮𑀢𑀸𑀬 𑀲𑀤𑀺𑀲𑀸𑀢𑀺? 𑀦𑁄, 𑀅𑀧𑀺𑀘 𑀔𑁄 𑀬𑀣𑀸 𑀘𑀦𑁆𑀤𑁄 𑀕𑀕𑀦𑀢𑀮𑀁 𑀧𑀓𑁆𑀔𑀦𑁆𑀤𑀫𑀸𑀦𑁄 𑀦 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀲𑀦𑁆𑀣𑀯𑀁 𑀯𑀸 𑀲𑀺𑀦𑁂𑀳𑀁 𑀯𑀸 𑀆𑀮𑀬𑀁 𑀯𑀸 𑀦𑀺𑀓𑀦𑁆𑀢𑀺𑀁 𑀯𑀸 𑀧𑀢𑁆𑀣𑀦𑀁 𑀯𑀸 𑀧𑀭𑀺𑀬𑀼𑀝𑁆𑀞𑀸𑀦𑀁 𑀯𑀸 𑀓𑀭𑁄𑀢𑀺, 𑀦 𑀘 𑀦 𑀳𑁄𑀢𑀺 𑀫𑀳𑀸𑀚𑀦𑀲𑁆𑀲 𑀧𑀺𑀬𑁄 𑀫𑀦𑀸𑀧𑁄, 𑀢𑀼𑀫𑁆𑀳𑁂𑀧𑀺 𑀏𑀯𑀁 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀲𑀦𑁆𑀣𑀯𑀸𑀤𑀻𑀦𑀁 𑀅𑀓𑀭𑀡𑁂𑀦 𑀩𑀳𑀼𑀚𑀦𑀲𑁆𑀲 𑀧𑀺𑀬𑀸 𑀫𑀦𑀸𑀧𑀸 𑀘𑀦𑁆𑀤𑀽𑀧𑀫𑀸 𑀳𑀼𑀢𑁆𑀯𑀸 𑀔𑀢𑁆𑀢𑀺𑀬𑀓𑀼𑀮𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀣𑀸𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀬𑀣𑀸 𑀘𑀦𑁆𑀤𑁄 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀢𑀺, 𑀆𑀮𑁄𑀓𑀁 𑀨𑀭𑀢𑀺, 𑀏𑀯𑀁 𑀓𑀺𑀮𑁂𑀲𑀦𑁆𑀥𑀓𑀸𑀭𑀯𑀺𑀥𑀫𑀦𑁂𑀦, 𑀜𑀸𑀡𑀸𑀮𑁄𑀓𑀨𑀭𑀡𑁂𑀦 𑀘 𑀘𑀦𑁆𑀤𑀽𑀧𑀫𑀸 𑀳𑀼𑀢𑁆𑀯𑀸𑀢𑀺 𑀏𑀯𑀫𑀸𑀤𑀻𑀳𑀺𑀧𑀺 𑀦𑀬𑁂𑀳𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀧𑀓𑀲𑁆𑀲𑁂𑀯 𑀓𑀸𑀬𑀁, 𑀅𑀧𑀓𑀲𑁆𑀲 𑀘𑀺𑀢𑁆𑀢𑀦𑁆𑀢𑀺 𑀢𑁂𑀦𑁂𑀯 𑀲𑀦𑁆𑀣𑀯𑀸𑀤𑀻𑀦𑀫𑀓𑀭𑀡𑁂𑀦 𑀓𑀸𑀬𑀜𑁆𑀘 𑀘𑀺𑀢𑁆𑀢𑀜𑁆𑀘 𑀅𑀧𑀓𑀲𑁆𑀲𑀺𑀢𑁆𑀯𑀸, 𑀅𑀓𑀟𑁆𑀠𑀺𑀢𑁆𑀯𑀸 𑀅𑀧𑀦𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦𑀺𑀘𑁆𑀘𑀦𑀯𑀓𑀸𑀢𑀺 𑀦𑀺𑀘𑁆𑀘𑀁 𑀦𑀯𑀺𑀓𑀸𑀯, 𑀆𑀕𑀦𑁆𑀢𑀼𑀓𑀲𑀤𑀺𑀲𑀸 ¶ 𑀏𑀯 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀆𑀕𑀦𑁆𑀢𑀼𑀓𑁄 ¶ 𑀳𑀺 𑀧𑀝𑀺𑀧𑀸𑀝𑀺𑀬𑀸 𑀲𑀫𑁆𑀧𑀢𑁆𑀢𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀲𑀘𑁂 𑀦𑀁 𑀖𑀭𑀲𑀸𑀫𑀺𑀓𑀸 𑀤𑀺𑀲𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀪𑀸𑀢𑀭𑁄𑀧𑀺 𑀯𑀺𑀧𑁆𑀧𑀯𑀸𑀲𑀕𑀢𑀸 𑀏𑀯𑀁 𑀯𑀺𑀘𑀭𑀺𑀁𑀲𑀽’’𑀢𑀺 𑀅𑀦𑀼𑀓𑀫𑁆𑀧𑀫𑀸𑀦𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑁄𑀚𑁂𑀦𑁆𑀢𑀺, 𑀪𑀼𑀢𑁆𑀢𑀫𑀢𑁆𑀢𑁄𑀬𑁂𑀯 ‘‘𑀢𑀼𑀫𑁆𑀳𑀸𑀓𑀁 𑀪𑀸𑀚𑀦𑀁 𑀕𑀡𑁆𑀳𑀣𑀸’’𑀢𑀺 𑀉𑀝𑁆𑀞𑀸𑀬 𑀧𑀓𑁆𑀓𑀫𑀢𑀺, 𑀦 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀦𑁆𑀣𑀯𑀁 𑀯𑀸 𑀓𑀭𑁄𑀢𑀺, 𑀓𑀺𑀘𑁆𑀘𑀓𑀭𑀡𑀻𑀬𑀸𑀦𑀺 𑀯𑀸 𑀲𑀁𑀯𑀺𑀤𑀳𑀢𑀺, 𑀏𑀯𑀁 𑀢𑀼𑀫𑁆𑀳𑁂𑀧𑀺 𑀧𑀝𑀺𑀧𑀸𑀝𑀺𑀬𑀸 𑀲𑀫𑁆𑀧𑀢𑁆𑀢𑀖𑀭𑀁 𑀧𑀯𑀺𑀲𑀺𑀢𑁆𑀯𑀸 𑀬𑀁 𑀇𑀭𑀺𑀬𑀸𑀧𑀣𑁂𑀲𑀼 𑀧𑀲𑀦𑁆𑀦𑀸 𑀫𑀦𑀼𑀲𑁆𑀲𑀸 𑀤𑁂𑀦𑁆𑀢𑀺, 𑀢𑀁 𑀕𑀳𑁂𑀢𑁆𑀯𑀸 𑀧𑀘𑁆𑀙𑀺𑀦𑁆𑀦𑀲𑀦𑁆𑀣𑀯𑀸 𑀢𑁂𑀲𑀁 𑀓𑀺𑀘𑁆𑀘𑀓𑀭𑀡𑀻𑀬𑁂 𑀅𑀩𑁆𑀬𑀸𑀯𑀝𑀸 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀣𑀸𑀢𑀺 𑀤𑀻𑀧𑁂𑀢𑀺. 𑀅𑀧𑁆𑀧𑀕𑀩𑁆𑀪𑀸𑀢𑀺 𑀦 𑀧𑀕𑀩𑁆𑀪𑀸, 𑀅𑀝𑁆𑀞𑀝𑁆𑀞𑀸𑀦𑁂𑀦 𑀓𑀸𑀬𑀧𑀸𑀕𑀩𑁆𑀪𑀺𑀬𑁂𑀦, 𑀘𑀢𑀼𑀝𑁆𑀞𑀸𑀦𑁂𑀦 𑀯𑀘𑀻𑀧𑀸𑀕𑀩𑁆𑀪𑀺𑀬𑁂𑀦, 𑀅𑀦𑁂𑀓𑀝𑁆𑀞𑀸𑀦𑁂𑀦 𑀫𑀦𑁄𑀧𑀸𑀕𑀩𑁆𑀪𑀺𑀬𑁂𑀦 𑀘 𑀯𑀺𑀭𑀳𑀺𑀢𑀸 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀣𑀸𑀢𑀺 𑀅𑀢𑁆𑀣𑁄.

𑀚𑀭𑀼𑀤𑀧𑀸𑀦𑀦𑁆𑀢𑀺 𑀚𑀺𑀡𑁆𑀡𑀓𑀽𑀧𑀁. 𑀧𑀩𑁆𑀩𑀢𑀯𑀺𑀲𑀫𑀦𑁆𑀢𑀺 𑀧𑀩𑁆𑀩𑀢𑁂 𑀯𑀺𑀲𑀫𑀁 𑀧𑀧𑀸𑀢𑀝𑁆𑀞𑀸𑀦𑀁. 𑀦𑀤𑀻𑀯𑀺𑀤𑀼𑀕𑁆𑀕𑀦𑁆𑀢𑀺 𑀦𑀤𑀺𑀬𑀸 𑀯𑀺𑀤𑀼𑀕𑁆𑀕𑀁 𑀙𑀺𑀦𑁆𑀦𑀢𑀝𑀝𑁆𑀞𑀸𑀦𑀁. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀚𑀭𑀼𑀤𑀧𑀸𑀦𑀸𑀤𑀬𑁄 𑀯𑀺𑀬 𑀳𑀺 𑀘𑀢𑁆𑀢𑀸𑀭𑀺 𑀓𑀼𑀮𑀸𑀦𑀺, 𑀑𑀮𑁄𑀓𑀦𑀧𑀼𑀭𑀺𑀲𑁄 𑀯𑀺𑀬 𑀪𑀺𑀓𑁆𑀔𑀼, 𑀬𑀣𑀸 𑀧𑀦 𑀅𑀦𑀧𑀓𑀝𑁆𑀞𑀓𑀸𑀬𑀘𑀺𑀢𑁆𑀢𑁄 𑀢𑀸𑀦𑀺 𑀑𑀮𑁄𑀓𑁂𑀦𑁆𑀢𑁄 𑀧𑀼𑀭𑀺𑀲𑁄 𑀢𑀢𑁆𑀣 𑀧𑀢𑀢𑀺, 𑀏𑀯𑀁 𑀅𑀭𑀓𑁆𑀔𑀺𑀢𑁂𑀳𑀺 𑀓𑀸𑀬𑀸𑀤𑀻𑀳𑀺 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀦𑁆𑀢𑁄 𑀪𑀺𑀓𑁆𑀔𑀼 𑀓𑀼𑀮𑁂𑀲𑀼 𑀩𑀚𑁆𑀛𑀢𑀺, 𑀢𑀢𑁄 𑀦𑀸𑀦𑀧𑁆𑀧𑀓𑀸𑀭𑀁 𑀲𑀻𑀮𑀧𑀸𑀤𑀪𑀜𑁆𑀚𑀦𑀸𑀤𑀺𑀓𑀁 𑀅𑀦𑀢𑁆𑀣𑀁 𑀧𑀸𑀧𑀼𑀡𑀸𑀢𑀺. 𑀬𑀣𑀸 𑀧𑀦 𑀅𑀧𑀓𑀝𑁆𑀞𑀓𑀸𑀬𑀘𑀺𑀢𑁆𑀢𑁄 𑀧𑀼𑀭𑀺𑀲𑁄 𑀢𑀢𑁆𑀣 𑀦 𑀧𑀢𑀢𑀺, 𑀏𑀯𑀁 𑀭𑀓𑁆𑀔𑀺𑀢𑁂𑀦𑁂𑀯 𑀓𑀸𑀬𑁂𑀦, 𑀭𑀓𑁆𑀔𑀺𑀢𑀸𑀬 𑀯𑀸𑀘𑀸𑀬, 𑀭𑀓𑁆𑀔𑀺𑀢𑁂𑀳𑀺 𑀘𑀺𑀢𑁆𑀢𑁂𑀳𑀺, 𑀲𑀽𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸 𑀅𑀧𑀓𑀝𑁆𑀞𑀓𑀸𑀬𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀦𑁆𑀢𑁄 𑀪𑀺𑀓𑁆𑀔𑀼 𑀓𑀼𑀮𑁂𑀲𑀼 𑀦 𑀩𑀚𑁆𑀛𑀢𑀺, 𑀅𑀣𑀲𑁆𑀲 𑀲𑀻𑀮𑀲𑀤𑁆𑀥𑀸𑀲𑀫𑀸𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀸𑀦𑀺 𑀧𑀸𑀤𑀳𑀢𑁆𑀣𑀓𑀼𑀘𑁆𑀙𑀺𑀲𑀻𑀲𑀸𑀦𑀺 𑀦 𑀪𑀜𑁆𑀚𑀦𑁆𑀢𑀺, 𑀭𑀸𑀕𑀓𑀡𑁆𑀝𑀓𑀸𑀤𑀬𑁄 𑀦 𑀯𑀺𑀚𑁆𑀛𑀦𑁆𑀢𑀺, 𑀲𑀼𑀔𑀺𑀢𑁄 𑀬𑁂𑀦𑀓𑀸𑀫𑀁 𑀅𑀕𑀢𑀧𑀼𑀩𑁆𑀩𑀁 𑀦𑀺𑀩𑁆𑀩𑀸𑀦𑀤𑀺𑀲𑀁 𑀕𑀘𑁆𑀙𑀢𑀺, 𑀏𑀯𑀭𑀽𑀧𑁄 𑀅𑀬𑀁 𑀫𑀳𑀸𑀓𑀲𑁆𑀲𑀧𑁄𑀢𑀺 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀲𑁆𑀲 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀲𑁆𑀲 𑀯𑀸𑀤𑀧𑀣𑀧𑀘𑁆𑀙𑀺𑀦𑁆𑀤𑀦𑀢𑁆𑀣𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀁 𑀏𑀯 𑀲𑀓𑁆𑀔𑀺𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀲𑁆𑀲𑀧𑁄 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳𑀸𑀢𑀺. 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑀫𑀺𑀘𑁆𑀙𑀦𑁆𑀢𑀺𑀅𑀮𑀕𑁆𑀕𑀘𑀺𑀢𑁆𑀢𑀢𑀸𑀲𑀗𑁆𑀔𑀸𑀢𑀸𑀬 𑀘𑀦𑁆𑀤𑁄𑀧𑀫𑀧𑀝𑀺𑀧𑀤𑀸𑀬 𑀓𑀭𑀡𑀪𑀽𑀢𑀸𑀬 𑀧𑀲𑀁𑀲𑀺𑀢𑁄, 𑀢𑀲𑁆𑀲𑀁 𑀯𑀸 𑀆𑀥𑀸𑀭𑀪𑀽𑀢𑀸𑀬 𑀫𑀜𑁆𑀜𑁂𑀯 𑀲𑀓𑁆𑀔𑀺𑀁 𑀓𑀢𑁆𑀯𑀸 𑀧𑀲𑀁𑀲𑀺𑀢𑁄𑀢𑀺, 𑀏𑀯𑀁 𑀲𑀢𑀺 𑀘𑁂𑀯-𑀲𑀤𑁆𑀤𑁄, 𑀘-𑀲𑀤𑁆𑀤𑁄 𑀘 𑀦 𑀧𑀬𑀼𑀚𑁆𑀚𑀺𑀢𑀩𑁆𑀩𑁄 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑁆𑀢𑀸, 𑀅𑀬𑀫𑁂𑀯 𑀅𑀢𑁆𑀣𑁄 𑀧𑀸𑀞𑁄 𑀘 𑀬𑀼𑀢𑁆𑀢𑀢𑀭𑁄 𑀯𑀺𑀬 𑀤𑀺𑀲𑁆𑀲𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 ‘‘𑀆𑀓𑀸𑀲𑁂 𑀧𑀸𑀡𑀺𑀁 𑀘𑀸𑀮𑁂𑀢𑁆𑀯𑀸 𑀘𑀦𑁆𑀤𑀽𑀧𑀫𑀁 𑀧𑀝𑀺𑀧𑀤𑀁 𑀓𑀣𑁂𑀦𑁆𑀢𑁄 𑀫𑀁 𑀓𑀸𑀬𑀲𑀓𑁆𑀔𑀺𑀁 𑀓𑀢𑁆𑀯𑀸 𑀓𑀣𑁂𑀲𑀻’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁨.𑁨𑁩𑁨) 𑀯𑀼𑀢𑁆𑀢𑀢𑁆𑀢𑀸𑀢𑀺.

𑀢𑀲𑁆𑀲 ¶ 𑀓𑀺𑀫𑀜𑁆𑀜𑀁 𑀆𑀡𑀡𑁆𑀬𑀁 𑀪𑀯𑀺𑀲𑁆𑀲𑀢𑀺, 𑀅𑀜𑁆𑀜𑀢𑁆𑀭 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀢𑀲𑁆𑀲𑀸𑀢𑀺 𑀬𑀁-𑀲𑀤𑁆𑀤𑀲𑁆𑀲 𑀓𑀸𑀭𑀡𑀦𑀺𑀤𑀲𑁆𑀲𑀦𑁂 ‘‘𑀢𑀲𑁆𑀫𑀸’’𑀢𑀺 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀢𑀲𑁆𑀲 𑀫𑁂𑀢𑀺 𑀅𑀢𑁆𑀣𑁄, 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑁂 𑀧𑀦 𑀢𑀲𑁆𑀲 𑀅𑀦𑀼𑀕𑁆𑀕𑀳𑀡𑀲𑁆𑀲, 𑀧𑀲𑀁𑀲𑀦𑀲𑁆𑀲 𑀘𑀸𑀢𑀺. 𑀧𑁄𑀢𑁆𑀣𑀓𑁂𑀲𑀼𑀧𑀺 𑀓𑀢𑁆𑀣𑀘𑀺 ‘‘𑀢𑀲𑁆𑀲 𑀫𑁂’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀏𑀯𑀁 𑀲𑀢𑀺 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑁂 ‘‘𑀢𑀲𑁆𑀲𑀸’’𑀢𑀺 𑀅𑀧𑀭𑀁 𑀧𑀤𑀫𑀚𑁆𑀛𑀸𑀳𑀭𑀺𑀢𑀩𑁆𑀩𑀁. 𑀦𑀢𑁆𑀣𑀺 ¶ 𑀇𑀡𑀁 𑀬𑀲𑁆𑀲𑀸𑀢𑀺 𑀅𑀡𑀡𑁄, 𑀢𑀲𑁆𑀲 𑀪𑀸𑀯𑁄 𑀆𑀡𑀡𑁆𑀬𑀁. 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀓𑀺𑀁 𑀦𑀸𑀫 𑀢𑀲𑁆𑀲 𑀇𑀡𑀯𑀺𑀭𑀳𑀺𑀢𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀦 𑀪𑀯𑀺𑀲𑁆𑀲𑀢𑀺 𑀏𑀯𑀸𑀢𑀺 𑀅𑀢𑁆𑀣𑁄. ‘‘𑀦𑀦𑀼 𑀫𑀁 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀉𑀧𑀫𑀸𑀯𑀲𑁂𑀦 𑀯𑀺𑀪𑀸𑀯𑁂𑀢𑀺. 𑀲𑀓𑀓𑀯𑀘𑀇𑀲𑁆𑀲𑀭𑀺𑀬𑀸𑀦𑀼𑀧𑁆𑀧𑀤𑀸𑀦𑁂𑀦𑀸𑀢𑀺 𑀏𑀢𑁆𑀣 𑀓𑀯𑀘𑁄 𑀦𑀸𑀫 𑀉𑀭𑀘𑁆𑀙𑀤𑁄, 𑀬𑁂𑀦 𑀉𑀭𑁄 𑀙𑀸𑀤𑀻𑀬𑀢𑁂, 𑀢𑀲𑁆𑀲 𑀘 𑀘𑀻𑀯𑀭𑀦𑀺𑀤𑀲𑁆𑀲𑀦𑁂𑀦 𑀕𑀳𑀡𑀁, 𑀇𑀲𑁆𑀲𑀭𑀺𑀬𑀲𑁆𑀲 𑀧𑀦 𑀅𑀪𑀺𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀦𑀺𑀤𑀲𑁆𑀲𑀦𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀼𑀮𑀯𑀁𑀲𑀧𑁆𑀧𑀢𑀺𑀝𑁆𑀞𑀸𑀧𑀓𑀦𑁆𑀢𑀺 𑀓𑀼𑀮𑀯𑀁𑀲𑀲𑁆𑀲 𑀓𑀼𑀮𑀧𑀯𑁂𑀡𑀺𑀬𑀸 𑀧𑀢𑀺𑀝𑁆𑀞𑀸𑀧𑀓𑀁. ‘‘𑀫𑁂’’𑀢𑀺 𑀧𑀤𑀲𑁆𑀲 𑀦𑀺𑀘𑁆𑀘𑀲𑀸𑀧𑁂𑀓𑁆𑀔𑀢𑁆𑀢𑀸 𑀲𑀤𑁆𑀥𑀫𑁆𑀫𑀯𑀁𑀲𑀧𑁆𑀧𑀢𑀺𑀝𑁆𑀞𑀸𑀧𑀓𑁄𑀢𑀺 𑀲𑀫𑀸𑀲𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀢𑁆𑀢𑀼𑀲𑀗𑁆𑀖𑀦𑀺𑀫𑁆𑀫𑀤𑁆𑀤𑀦𑁂𑀦 𑀅𑀢𑁆𑀢𑀦𑁄 𑀓𑀼𑀮𑀯𑀁𑀲𑀧𑁆𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀁 𑀲𑀓𑀓𑀯𑀘𑀇𑀲𑁆𑀲𑀭𑀺𑀬𑀸𑀦𑀼𑀧𑁆𑀧𑀤𑀸𑀦𑁂𑀦 𑀓𑀼𑀮𑀯𑀁𑀲𑀧𑁆𑀧𑀢𑀺𑀝𑁆𑀞𑀸𑀧𑀓𑀁 𑀧𑀼𑀢𑁆𑀢𑀁 𑀭𑀸𑀚𑀸 𑀯𑀺𑀬 𑀪𑀕𑀯𑀸𑀧𑀺 𑀫𑀁 𑀤𑀻𑀖𑀤𑀲𑁆𑀲𑀻 ‘‘𑀲𑀤𑁆𑀥𑀫𑁆𑀫𑀯𑀁𑀲𑀧𑁆𑀧𑀢𑀺𑀝𑁆𑀞𑀸𑀧𑀓𑁄 𑀫𑁂 𑀅𑀬𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀦𑁆𑀢𑁆𑀯𑀸 𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑀕𑀡𑀦𑀺𑀫𑁆𑀫𑀤𑁆𑀤𑀦𑁂𑀦 𑀲𑀤𑁆𑀥𑀫𑁆𑀫𑀯𑀁𑀲𑀧𑁆𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀁 𑀘𑀻𑀯𑀭𑀤𑀸𑀦𑀲𑀫𑀲𑀫𑀝𑁆𑀞𑀧𑀦𑀲𑀗𑁆𑀔𑀸𑀢𑁂𑀦 𑀇𑀫𑀺𑀦𑀸 𑀅𑀲𑀸𑀥𑀸𑀭𑀡𑀸𑀦𑀼𑀕𑁆𑀕𑀳𑁂𑀦 𑀅𑀦𑀼𑀕𑁆𑀕𑀳𑁂𑀲𑀺 𑀦𑀦𑀼, 𑀇𑀫𑀸𑀬 𑀘 𑀉𑀴𑀸𑀭𑀸𑀬 𑀧𑀲𑀁𑀲𑀸𑀬 𑀧𑀲𑀁𑀲𑀺 𑀦𑀦𑀽𑀢𑀺. 𑀇𑀢𑀺 𑀘𑀺𑀦𑁆𑀢𑀬𑀦𑁆𑀢𑁄𑀢𑀺 𑀏𑀢𑁆𑀣 𑀇𑀢𑀺𑀲𑀤𑁆𑀤𑁂𑀦 ‘‘𑀅𑀦𑁆𑀢𑀭𑀥𑀸𑀧𑁂𑀬𑁆𑀬𑀼𑀁, 𑀲𑀗𑁆𑀕𑀸𑀬𑁂𑀬𑁆𑀬𑀁, 𑀓𑀺𑀫𑀜𑁆𑀜𑀁 𑀆𑀡𑀡𑁆𑀬𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀘𑀦𑀧𑀼𑀩𑁆𑀩𑀗𑁆𑀕𑀫𑀁, ‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀻’’𑀢𑀺𑀆𑀤𑀺 𑀯𑀸𑀓𑁆𑀬𑀢𑁆𑀢𑀬𑀁 𑀦𑀺𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀲𑀗𑁆𑀕𑀻𑀢𑀺𑀓𑁆𑀔𑀦𑁆𑀥𑀓𑀧𑀸𑀴𑀺𑀬𑀸 𑀲𑀸𑀥𑁂𑀦𑁆𑀢𑁄 𑀆𑀳 ‘‘𑀬𑀣𑀸𑀳𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀣𑀸𑀳𑀸𑀢𑀺 𑀓𑀺𑀁 𑀆𑀳, 𑀫𑀬𑀸 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀓𑀁 𑀓𑀺𑀁 𑀆𑀳𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸 𑀯𑀸 𑀬𑁂𑀦 𑀧𑀓𑀸𑀭𑁂𑀦 𑀫𑀬𑀸 𑀯𑀼𑀢𑁆𑀢𑀁, 𑀢𑀣𑀸 𑀢𑁂𑀦 𑀧𑀓𑀸𑀭𑁂𑀦 𑀧𑀸𑀴𑀺𑀬𑀫𑁆𑀧𑀺 𑀆𑀳𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀯𑀸 𑀬𑀁 𑀯𑀘𑀦𑀁 𑀧𑀸𑀴𑀺𑀬𑀁 𑀆𑀳, 𑀢𑀣𑀸 𑀢𑁂𑀦 𑀯𑀘𑀦𑁂𑀦 𑀫𑀬𑀸 𑀯𑀼𑀢𑁆𑀢𑀯𑀘𑀦𑀁 𑀲𑀁𑀲𑀦𑁆𑀤𑀢𑀺 𑀘𑁂𑀯 𑀲𑀫𑁂𑀢𑀺 𑀘 𑀬𑀣𑀸 𑀢𑀁 𑀕𑀗𑁆𑀕𑁄𑀤𑀓𑁂𑀦 𑀬𑀫𑀼𑀦𑁄𑀤𑀓𑀦𑁆𑀢𑀺𑀧𑀺 𑀯𑀢𑁆𑀢𑀩𑁆𑀩𑁄 𑀧𑀸𑀴𑀺𑀬𑀸 𑀲𑀸𑀥𑀦𑀢𑁆𑀣𑀁 𑀉𑀤𑀸𑀳𑀭𑀺𑀢𑀪𑀸𑀯𑀲𑁆𑀲 𑀧𑀘𑁆𑀘𑀓𑁆𑀔𑀢𑁄 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸, 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀣𑀲𑁆𑀲 𑀘 𑀲𑀤𑁆𑀤𑀲𑁆𑀲 𑀧𑀬𑁄𑀕𑁂 𑀓𑀸𑀫𑀸𑀘𑀸𑀭𑀢𑁆𑀢𑀸. 𑀅𑀥𑀺𑀧𑁆𑀧𑀸𑀬𑀯𑀺𑀪𑀸𑀯𑀦𑀢𑁆𑀣𑀸 𑀳𑀺 𑀅𑀢𑁆𑀣𑀬𑁄𑀚𑀦𑀸. 𑀬𑀣𑀸 𑀯𑀸 𑀬𑁂𑀦 𑀧𑀓𑀸𑀭𑁂𑀦 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀢𑁆𑀣𑀁 𑀪𑀺𑀓𑁆𑀔𑀽𑀦𑀁 ¶ 𑀉𑀲𑁆𑀲𑀸𑀳𑀁 𑀚𑀦𑁂𑀲𑀺, 𑀢𑀣𑀸 𑀢𑁂𑀦 𑀧𑀓𑀸𑀭𑁂𑀦 𑀧𑀸𑀴𑀺𑀬𑀫𑁆𑀧𑀺 𑀆𑀳𑀸𑀢𑀺 𑀅𑀢𑁆𑀣𑁄. 𑀏𑀯𑀫𑀻𑀤𑀺𑀲𑁂𑀲𑀼.

𑀏𑀓𑀫𑀺𑀤𑀸𑀳𑀦𑁆𑀢𑀺 𑀏𑀢𑁆𑀣 𑀇𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀏𑀓𑀁 𑀲𑀫𑀬𑀦𑁆𑀢𑀺 𑀘 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀏𑀓𑀲𑁆𑀫𑀺𑀁 𑀲𑀫𑀬𑁂𑀢𑀺 𑀅𑀢𑁆𑀣𑁄. 𑀧𑀸𑀯𑀸𑀬𑀸𑀢𑀺 𑀧𑀸𑀯𑀸𑀦𑀕𑀭𑀢𑁄, 𑀢𑀢𑁆𑀣 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 ‘‘𑀓𑀼𑀲𑀺𑀦𑀸𑀭𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀤𑁆𑀥𑀸𑀦𑀫𑀕𑁆𑀕𑁄𑀢𑀺 𑀘 𑀤𑀻𑀖𑀫𑀕𑁆𑀕𑁄 𑀯𑀼𑀘𑁆𑀘𑀢𑀺, 𑀤𑀻𑀖𑀧𑀭𑀺𑀬𑀸𑀬𑁄 𑀳𑁂𑀢𑁆𑀣 𑀅𑀤𑁆𑀥𑀸𑀦𑀲𑀤𑁆𑀤𑁄. 𑀫𑀳𑀢𑀸𑀢𑀺 𑀕𑀼𑀡𑀫𑀳𑀢𑁆𑀢𑁂𑀦𑀧𑀺 𑀲𑀗𑁆𑀔𑁆𑀬𑀸𑀫𑀳𑀢𑁆𑀢𑁂𑀦𑀧𑀺 𑀫𑀳𑀢𑀸. ‘‘𑀧𑀜𑁆𑀘𑀫𑀢𑁆𑀢𑁂𑀳𑀻’’𑀢𑀺𑀆𑀤𑀺𑀦𑀸 𑀲𑀗𑁆𑀔𑁆𑀬𑀸𑀫𑀳𑀢𑁆𑀢𑀁 𑀤𑀲𑁆𑀲𑁂𑀢𑀺, 𑀫𑀢𑁆𑀢𑀲𑀤𑁆𑀤𑁄 𑀘 𑀧𑀫𑀸𑀡𑀯𑀘𑀦𑁄 ‘‘𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁧𑁬) 𑀯𑀺𑀬. ‘‘𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀢𑁆𑀣𑀁 𑀉𑀲𑁆𑀲𑀸𑀳𑀁 𑀚𑀦𑁂𑀲𑀻’’𑀢𑀺 𑀏𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀦𑀢𑁆𑀣𑀁 𑀆𑀳𑀢𑀸 ‘‘𑀅𑀣 𑀔𑁄’’𑀢𑀺𑀆𑀤𑀺𑀓𑀸 𑀧𑀸𑀴𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀦 𑀲𑀸𑀥𑁂𑀢𑀺 ¶ . 𑀦 𑀳𑁂𑀢𑁆𑀣 𑀉𑀲𑁆𑀲𑀸𑀳𑀚𑀦𑀦𑀧𑁆𑀧𑀓𑀸𑀭𑁄 𑀆𑀕𑀢𑁄𑀢𑀺 𑀘𑁄𑀤𑀦𑀁 𑀧𑀭𑀺𑀳𑀭𑀺𑀢𑀼𑀫𑀸𑀳 ‘‘𑀲𑀩𑁆𑀩𑀁 𑀲𑀼𑀪𑀤𑁆𑀤𑀓𑀡𑁆𑀟𑀁 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺. 𑀏𑀯𑀫𑁆𑀧𑁂𑀲𑀸 𑀘𑁄𑀤𑀦𑀸 𑀢𑀤𑀯𑀢𑁆𑀣𑀸𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀢𑀢𑁄 𑀧𑀭𑀁 𑀆𑀳𑀸’’𑀢𑀺𑀆𑀤𑀺. 𑀅𑀧𑀺𑀘 𑀬𑀣𑀸𑀯𑀼𑀢𑁆𑀢𑀢𑁆𑀣𑀲𑀸𑀥𑀺𑀓𑀸 𑀧𑀸𑀴𑀺 𑀫𑀳𑀢𑀭𑀸𑀢𑀺 𑀕𑀦𑁆𑀣𑀕𑀭𑀼𑀢𑀸𑀧𑀭𑀺𑀳𑀭𑀡𑀢𑁆𑀣𑀁 𑀫𑀚𑁆𑀛𑁂 𑀧𑁂𑀬𑁆𑀬𑀸𑀮𑀫𑀼𑀔𑁂𑀦 𑀆𑀤𑀺𑀅𑀦𑁆𑀢𑀫𑁂𑀯 𑀧𑀸𑀴𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀩𑁆𑀩𑀁 𑀲𑀼𑀪𑀤𑁆𑀤𑀓𑀡𑁆𑀟𑀁 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀆𑀳. 𑀢𑁂𑀦 𑀳𑀺 ‘‘𑀅𑀣 𑀔𑁆𑀯𑀸𑀳𑀁 𑀆𑀯𑀼𑀲𑁄 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀻’’𑀢𑀺 (𑀘𑀽𑀴𑀯. 𑁪𑁩𑁭) 𑀯𑀼𑀢𑁆𑀢𑀧𑀸𑀴𑀺𑀢𑁄 𑀧𑀝𑁆𑀞𑀸𑀬 ‘‘𑀬𑀁 𑀦 𑀇𑀘𑁆𑀙𑀺𑀲𑁆𑀲𑀸𑀫, 𑀦 𑀢𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 (𑀘𑀽𑀴𑀯. 𑁪𑁩𑁭) 𑀯𑀼𑀢𑁆𑀢𑀧𑀸𑀴𑀺𑀧𑀭𑀺𑀬𑁄𑀲𑀸𑀦𑀁 𑀲𑀼𑀪𑀤𑁆𑀤𑀓𑀡𑁆𑀟𑀁 𑀤𑀲𑁆𑀲𑁂𑀢𑀺.

‘‘𑀢𑀢𑁄 𑀧𑀭’’𑀦𑁆𑀢𑀺𑀆𑀤𑀺𑀦𑀸 𑀧𑀦 𑀢𑀤𑀯𑀲𑁂𑀲𑀁 ‘‘𑀳𑀦𑁆𑀤 𑀫𑀬𑀁 𑀆𑀯𑀼𑀲𑁄’’𑀢𑀺𑀆𑀤𑀺𑀓𑀁 𑀉𑀲𑁆𑀲𑀸𑀳𑀚𑀦𑀦𑀧𑁆𑀧𑀓𑀸𑀭𑀤𑀲𑁆𑀲𑀦𑀧𑀸𑀴𑀺𑀁. 𑀢𑀲𑁆𑀫𑀸 𑀢𑀢𑁄 𑀧𑀭𑀁 𑀆𑀳𑀸𑀢𑀺 𑀏𑀢𑁆𑀣 𑀲𑀼𑀪𑀤𑁆𑀤𑀓𑀡𑁆𑀟𑀢𑁄 𑀧𑀭𑀁 𑀉𑀲𑁆𑀲𑀸𑀳𑀚𑀦𑀦𑀧𑁆𑀧𑀓𑀸𑀭𑀤𑀲𑁆𑀲𑀦𑀯𑀘𑀦𑀫𑀸𑀳𑀸𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀳𑀸𑀕𑀡𑁆𑀞𑀺𑀧𑀤𑁂𑀧𑀺 𑀳𑀺 𑀲𑁄𑀬𑁂𑀯𑀢𑁆𑀣𑁄 𑀯𑀼𑀢𑁆𑀢𑁄. 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦𑀸𑀧𑀺 (𑀲𑀸𑀭𑀢𑁆𑀣. 𑀝𑀻. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀢𑀣𑁂𑀯 𑀅𑀥𑀺𑀧𑁆𑀧𑁂𑀢𑁄. 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀧𑀦 ‘‘𑀢𑀢𑁄 𑀧𑀭𑀦𑁆𑀢𑀺 𑀢𑀢𑁄 𑀪𑀺𑀓𑁆𑀔𑀽𑀦𑀁 𑀉𑀲𑁆𑀲𑀸𑀳𑀚𑀦𑀦𑀢𑁄 𑀧𑀭𑀢𑁄’’𑀢𑀺 (𑀤𑀻. 𑀦𑀺. 𑀝𑀻. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁, 𑀢𑀤𑁂𑀢𑀁 𑀯𑀺𑀘𑀸𑀭𑁂𑀢𑀩𑁆𑀩𑀁 𑀳𑁂𑀝𑁆𑀞𑀸 𑀉𑀲𑁆𑀲𑀸𑀳𑀚𑀦𑀦𑀧𑁆𑀧𑀓𑀸𑀭𑀲𑁆𑀲 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑀢𑁆𑀢𑀸. 𑀅𑀬𑀫𑁂𑀯 𑀳𑀺 𑀉𑀲𑁆𑀲𑀸𑀳𑀚𑀦𑀦𑀧𑁆𑀧𑀓𑀸𑀭𑁄 𑀬𑀤𑀺𑀤𑀁 ‘‘𑀳𑀦𑁆𑀤 𑀫𑀬𑀁 𑀆𑀯𑀼𑀲𑁄 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘 𑀲𑀗𑁆𑀕𑀸𑀬𑁂𑀬𑁆𑀬𑀸𑀫, 𑀧𑀼𑀭𑁂 𑀅𑀥𑀫𑁆𑀫𑁄 𑀤𑀺𑀧𑁆𑀧𑀢𑀻’’𑀢𑀺𑀆𑀤𑀺. 𑀬𑀤𑀺 ¶ 𑀧𑀦 𑀲𑀼𑀪𑀤𑁆𑀤𑀓𑀡𑁆𑀟𑀫𑁂𑀯 𑀉𑀲𑁆𑀲𑀸𑀳𑀚𑀦𑀦𑀳𑁂𑀢𑀼𑀪𑀽𑀢𑀲𑁆𑀲 𑀲𑀼𑀪𑀤𑁆𑀤𑁂𑀦 𑀯𑀼𑀢𑁆𑀢𑀯𑀘𑀦𑀲𑁆𑀲 𑀧𑀓𑀸𑀲𑀦𑀢𑁆𑀢𑀸 𑀉𑀲𑁆𑀲𑀸𑀳𑀚𑀦𑀦𑀦𑁆𑀢𑀺 𑀯𑀤𑁂𑀬𑁆𑀬, 𑀦𑀢𑁆𑀣𑁂𑀯𑁂𑀢𑁆𑀣 𑀯𑀺𑀘𑀸𑀭𑁂𑀢𑀩𑁆𑀩𑀢𑀸𑀢𑀺. 𑀧𑀼𑀭𑁂 𑀅𑀥𑀫𑁆𑀫𑁄 𑀤𑀺𑀧𑁆𑀧𑀢𑀻𑀢𑀺 𑀏𑀢𑁆𑀣 𑀅𑀥𑀫𑁆𑀫𑁄 𑀦𑀸𑀫 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀧𑀝𑀺𑀧𑀓𑁆𑀔𑀪𑀽𑀢𑁄 𑀅𑀥𑀫𑁆𑀫𑁄. 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀢𑁆𑀣𑀁 𑀉𑀲𑁆𑀲𑀸𑀳𑀚𑀦𑀦𑀧𑁆𑀧𑀲𑀗𑁆𑀕𑀢𑁆𑀢𑀸 𑀯𑀸 𑀢𑀤𑀲𑀗𑁆𑀕𑀸𑀬𑀦𑀳𑁂𑀢𑀼𑀓𑁄 𑀤𑁄𑀲𑀕𑀡𑁄𑀧𑀺 𑀲𑀫𑁆𑀪𑀯𑀢𑀺, ‘‘𑀅𑀥𑀫𑁆𑀫𑀯𑀸𑀤𑀺𑀦𑁄 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀥𑀫𑁆𑀫𑀯𑀸𑀤𑀺𑀦𑁄 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀻𑀮𑀯𑀺𑀧𑀢𑁆𑀢𑀺𑀆𑀤𑀺𑀳𑁂𑀢𑀼𑀓𑁄 𑀧𑀸𑀧𑀺𑀘𑁆𑀙𑀢𑀸𑀤𑀺𑀤𑁄𑀲𑀕𑀡𑁄 𑀅𑀥𑀫𑁆𑀫𑁄𑀢𑀺𑀧𑀺 𑀯𑀤𑀦𑁆𑀢𑀺. 𑀧𑀼𑀭𑁂 𑀤𑀺𑀧𑁆𑀧𑀢𑀻𑀢𑀺 𑀅𑀧𑀺 𑀦𑀸𑀫 𑀤𑀺𑀧𑁆𑀧𑀢𑀺. 𑀲𑀁𑀲𑀬𑀢𑁆𑀣𑁂 𑀳𑀺 𑀧𑀼𑀭𑁂-𑀲𑀤𑁆𑀤𑁄. 𑀅𑀣 𑀯𑀸 𑀬𑀸𑀯 𑀅𑀥𑀫𑁆𑀫𑁄 𑀥𑀫𑁆𑀫𑀁 𑀧𑀝𑀺𑀩𑀸𑀳𑀺𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺, 𑀢𑀢𑁄 𑀧𑀼𑀭𑁂𑀢𑀭𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀆𑀲𑀦𑁆𑀦𑁂 𑀳𑀺 𑀅𑀦𑀥𑀺𑀧𑁆𑀧𑁂𑀢𑁂 𑀅𑀬𑀁 𑀧𑀼𑀭𑁂-𑀲𑀤𑁆𑀤𑁄. 𑀤𑀺𑀧𑁆𑀧𑀢𑀻𑀢𑀺 𑀤𑀺𑀧𑁆𑀧𑀺𑀲𑁆𑀲𑀢𑀺, 𑀧𑀼𑀭𑁂-𑀲𑀤𑁆𑀤𑀬𑁄𑀕𑁂𑀦 𑀳𑀺 𑀅𑀦𑀸𑀕𑀢𑀢𑁆𑀣𑁂 𑀅𑀬𑀁 𑀯𑀢𑁆𑀢𑀫𑀸𑀦𑀧𑀬𑁄𑀕𑁄 𑀬𑀣𑀸 ‘‘𑀧𑀼𑀭𑀸 𑀯𑀲𑁆𑀲𑀢𑀺 𑀤𑁂𑀯𑁄’’𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋

‘‘𑀅𑀦𑀸𑀕𑀢𑁂 𑀲𑀦𑁆𑀦𑀺𑀘𑁆𑀙𑀬𑁂, 𑀢𑀣𑀸𑀢𑀻𑀢𑁂 𑀘𑀺𑀭𑀢𑀦𑁂;

𑀓𑀸𑀮𑀤𑁆𑀯𑀬𑁂𑀧𑀺 𑀓𑀯𑀻𑀳𑀺, 𑀧𑀼𑀭𑁂𑀲𑀤𑁆𑀤𑁄 𑀧𑀬𑀼𑀚𑁆𑀚𑀢𑁂’’𑀢𑀺. (𑀯𑀚𑀺𑀭. 𑀝𑀻. 𑀩𑀸𑀳𑀺𑀭𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸);

‘‘𑀧𑀼𑀭𑁂𑀬𑀸𑀯𑀧𑀼𑀭𑀸𑀬𑁄𑀕𑁂 ¶ , 𑀦𑀺𑀘𑁆𑀘𑀁 𑀯𑀸 𑀓𑀭𑀳𑀺 𑀓𑀤𑀸;

𑀮𑀘𑁆𑀙𑀸𑀬𑀫𑀧𑀺 𑀓𑀺𑀁 𑀯𑀼𑀢𑁆𑀢𑁂, 𑀯𑀢𑁆𑀢𑀫𑀸𑀦𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀘.

𑀓𑁂𑀘𑀺 𑀧𑀦𑁂𑀢𑁆𑀣 𑀏𑀯𑀁 𑀯𑀡𑁆𑀡𑀬𑀦𑁆𑀢𑀺 𑁋 𑀧𑀼𑀭𑁂𑀢𑀺 𑀧𑀘𑁆𑀙𑀸 𑀅𑀦𑀸𑀕𑀢𑁂, 𑀬𑀣𑀸 𑀅𑀤𑁆𑀥𑀸𑀦𑀁 𑀕𑀘𑁆𑀙𑀦𑁆𑀢𑀲𑁆𑀲 𑀕𑀦𑁆𑀢𑀩𑁆𑀩𑀫𑀕𑁆𑀕𑁄 ‘‘𑀧𑀼𑀭𑁂’’𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸 𑀇𑀥𑀸𑀧𑀺 𑀫𑀕𑁆𑀕𑀕𑀫𑀦𑀦𑀬𑁂𑀦 𑀅𑀦𑀸𑀕𑀢𑀓𑀸𑀮𑁄 ‘‘𑀧𑀼𑀭𑁂’’𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀏𑀯𑀁 𑀲𑀢𑀺 𑀢𑀁𑀓𑀸𑀮𑀸𑀧𑁂𑀓𑁆𑀔𑀸𑀬 𑀘𑁂𑀢𑁆𑀣 𑀯𑀢𑁆𑀢𑀫𑀸𑀦𑀧𑀬𑁄𑀕𑁄 𑀲𑀫𑁆𑀪𑀯𑀢𑀺. 𑀥𑀫𑁆𑀫𑁄 𑀧𑀝𑀺𑀩𑀸𑀳𑀺𑀬𑁆𑀬𑀢𑀻𑀢𑀺 𑀏𑀢𑁆𑀣𑀸𑀧𑀺 𑀧𑀼𑀭𑁂-𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀢𑀣𑀸 𑀥𑀫𑁆𑀫𑁄𑀧𑀺 𑀅𑀥𑀫𑁆𑀫𑀯𑀺𑀧𑀭𑀻𑀢𑀯𑀲𑁂𑀦, 𑀇𑀢𑁄 𑀧𑀭𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀅𑀯𑀺𑀦𑀬𑁄𑀢𑀺 𑀧𑀳𑀸𑀦𑀯𑀺𑀦𑀬𑀲𑀁𑀯𑀭𑀯𑀺𑀦𑀬𑀸𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑁄 𑀅𑀯𑀺𑀦𑀬𑁄. 𑀯𑀺𑀦𑀬𑀯𑀸𑀤𑀺𑀦𑁄 𑀤𑀼𑀩𑁆𑀩𑀮𑀸 𑀳𑁄𑀦𑁆𑀢𑀻𑀢𑀺 𑀏𑀯𑀁 𑀇𑀢𑀺-𑀲𑀤𑁆𑀤𑁂𑀦 𑀧𑀸𑀞𑁄, 𑀲𑁄 ‘‘𑀢𑀢𑁄 𑀧𑀭𑀁 𑀆𑀳𑀸’’𑀢𑀺 𑀏𑀢𑁆𑀣 𑀆𑀳-𑀲𑀤𑁆𑀤𑁂𑀦 𑀲𑀫𑁆𑀩𑀚𑁆𑀛𑀺𑀢𑀩𑁆𑀩𑁄.

𑀢𑁂𑀦 𑀳𑀻𑀢𑀺 𑀉𑀬𑁆𑀬𑁄𑀚𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀉𑀘𑁆𑀘𑀺𑀦𑀦𑁂 𑀉𑀬𑁆𑀬𑁄𑀚𑁂𑀦𑁆𑀢𑀸 𑀳𑀺 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀁 𑀏𑀯𑀫𑀸𑀳𑀁𑀲𑀼 ‘‘𑀪𑀺𑀓𑁆𑀔𑀽 𑀉𑀘𑁆𑀘𑀺𑀦𑀢𑀽’’𑀢𑀺, 𑀲𑀗𑁆𑀕𑀻𑀢𑀺𑀬𑀸 𑀅𑀦𑀼𑀭𑀽𑀧𑁂 𑀪𑀺𑀓𑁆𑀔𑀽 𑀉𑀘𑁆𑀘𑀺𑀦𑀺𑀢𑁆𑀯𑀸 𑀉𑀧𑀥𑀸𑀭𑁂𑀢𑁆𑀯𑀸 𑀕𑀡𑁆𑀳𑀸𑀢𑀽𑀢𑀺 𑀅𑀢𑁆𑀣𑁄. ‘‘𑀲𑀓𑀮…𑀧𑁂… 𑀧𑀭𑀺𑀕𑁆𑀕𑀳𑁂𑀲𑀻’’𑀢𑀺 𑀏𑀢𑁂𑀦 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑀧𑀭𑀺𑀬𑀦𑁆𑀢𑀸𑀦𑀁 𑀬𑀣𑀸𑀯𑀼𑀢𑁆𑀢𑀧𑀼𑀕𑁆𑀕𑀮𑀸𑀦𑀁 𑀲𑀢𑀺𑀧𑀺 ¶ 𑀆𑀕𑀫𑀸𑀥𑀺𑀕𑀫𑀲𑀫𑁆𑀪𑀯𑁂 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀧𑀦 𑀢𑁂𑀯𑀺𑀚𑁆𑀚𑀸𑀤𑀺𑀕𑀼𑀡𑀬𑀼𑀢𑁆𑀢𑀸𑀦𑀁 𑀆𑀕𑀫𑀸𑀥𑀺𑀕𑀫𑀲𑀫𑁆𑀧𑀢𑁆𑀢𑀺𑀬𑀸 𑀉𑀓𑁆𑀓𑀁𑀲𑀕𑀢𑀢𑁆𑀢𑀸 𑀲𑀗𑁆𑀕𑀻𑀢𑀺𑀬𑀸 𑀩𑀳𑀽𑀧𑀓𑀸𑀭𑀢𑀁 𑀤𑀲𑁆𑀲𑁂𑀢𑀺. 𑀲𑀓𑀮𑀁 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀓𑀁 𑀦𑀯𑀗𑁆𑀕𑀁 𑀏𑀢𑁆𑀣, 𑀏𑀢𑀲𑁆𑀲𑀸𑀢𑀺 𑀯𑀸 𑀲𑀓𑀮𑀦𑀯𑀗𑁆𑀕𑀁, 𑀲𑀢𑁆𑀣𑀼 𑀪𑀕𑀯𑀢𑁄 𑀲𑀸𑀲𑀦𑀁 𑀲𑀢𑁆𑀣𑀼𑀲𑀸𑀲𑀦𑀁 𑀲𑀸𑀲𑀻𑀬𑀢𑀺 𑀏𑀢𑁂𑀦𑀸𑀢𑀺 𑀓𑀢𑁆𑀯𑀸, 𑀢𑀤𑁂𑀯 𑀲𑀢𑁆𑀣𑀼𑀲𑀸𑀲𑀦𑀦𑁆𑀢𑀺 𑀲𑀓𑀮𑀦𑀯𑀗𑁆𑀕𑀲𑀢𑁆𑀣𑀼𑀲𑀸𑀲𑀦𑀁. 𑀦𑀯 𑀯𑀸 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀻𑀦𑀺 𑀅𑀗𑁆𑀕𑀸𑀦𑀺 𑀏𑀢𑁆𑀣, 𑀏𑀢𑀲𑁆𑀲𑀸𑀢𑀺 𑀯𑀸 𑀦𑀯𑀗𑁆𑀕𑀁, 𑀢𑀫𑁂𑀯 𑀲𑀢𑁆𑀣𑀼𑀲𑀸𑀲𑀦𑀁, 𑀢𑀜𑁆𑀘 𑀲𑀓𑀮𑀫𑁂𑀯, 𑀦 𑀏𑀓𑀤𑁂𑀲𑀦𑁆𑀢𑀺 𑀢𑀣𑀸. 𑀅𑀢𑁆𑀣𑀓𑀸𑀫𑁂𑀦 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀸 𑀲𑀺𑀓𑁆𑀔𑀺𑀢𑀩𑁆𑀩𑀸, 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀧𑀼𑀭𑀺𑀲𑀢𑁆𑀣𑀁 𑀯𑀸 𑀦𑀺𑀧𑁆𑀨𑀸𑀤𑁂𑀢𑀼𑀁 𑀧𑀭𑀺𑀬𑀢𑁆𑀢𑀸 𑀲𑀫𑀢𑁆𑀣𑀸𑀢𑀺 𑀧𑀭𑀺𑀬𑀢𑁆𑀢𑀺, 𑀢𑀻𑀡𑀺 𑀧𑀺𑀝𑀓𑀸𑀦𑀺, 𑀲𑀓𑀮𑀦𑀯𑀗𑁆𑀕𑀲𑀢𑁆𑀣𑀼𑀲𑀸𑀲𑀦𑀲𑀗𑁆𑀔𑀸𑀢𑀸 𑀧𑀭𑀺𑀬𑀢𑁆𑀢𑀺, 𑀢𑀁 𑀥𑀸𑀭𑁂𑀦𑁆𑀢𑀻𑀢𑀺 𑀢𑀣𑀸, 𑀢𑀸𑀤𑀺𑀲𑁂𑀢𑀺 𑀅𑀢𑁆𑀣𑁄. 𑀧𑀼𑀣𑀼𑀚𑁆𑀚𑀦…𑀧𑁂… 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑀪𑀺𑀓𑁆𑀔𑀽𑀢𑀺 𑀏𑀢𑁆𑀣 𑁋

‘‘𑀤𑀼𑀯𑁂 𑀧𑀼𑀣𑀼𑀚𑁆𑀚𑀦𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀅𑀦𑁆𑀥𑁄 𑀧𑀼𑀣𑀼𑀚𑁆𑀚𑀦𑁄 𑀏𑀓𑁄, 𑀓𑀮𑁆𑀬𑀸𑀡𑁂𑀓𑁄 𑀧𑀼𑀣𑀼𑀚𑁆𑀚𑀦𑁄’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁭; 𑀫. 𑀦𑀺. 𑀅𑀝𑁆𑀞. 𑁧.𑁨; 𑀲𑀁. 𑀦𑀺. 𑀅𑀝𑁆𑀞. 𑁨.𑁬𑁧; 𑀅. 𑀦𑀺. 𑀅𑀝𑁆𑀞. 𑁧.𑁫𑁧; 𑀘𑀽𑀴𑀦𑀺. 𑀅𑀝𑁆𑀞. 𑁮𑁮; 𑀧𑀝𑀺. 𑀫. 𑀅𑀝𑁆𑀞. 𑁨.𑁧𑁩𑁦); 𑁋

𑀯𑀼𑀢𑁆𑀢𑁂𑀲𑀼 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀸𑀯 𑀅𑀥𑀺𑀧𑁆𑀧𑁂𑀢𑀸 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑁂𑀦𑀧𑀺 𑀅𑀢𑁆𑀣𑀯𑀺𑀲𑁂𑀲𑀲𑁆𑀲 𑀯𑀺𑀜𑁆𑀜𑀸𑀢𑀩𑁆𑀩𑀢𑁆𑀢𑀸. 𑀲𑀫𑀣𑀪𑀸𑀯𑀦𑀸𑀲𑀺𑀦𑁂𑀳𑀸𑀪𑀸𑀯𑁂𑀦 ¶ 𑀲𑀼𑀓𑁆𑀔𑀸 𑀮𑀽𑀔𑀸 𑀅𑀲𑀺𑀦𑀺𑀤𑁆𑀥𑀸 𑀯𑀺𑀧𑀲𑁆𑀲𑀦𑀸 𑀏𑀢𑁂𑀲𑀦𑁆𑀢𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸, 𑀢𑁂𑀬𑁂𑀯 𑀔𑀻𑀡𑀸𑀲𑀯𑀸𑀢𑀺 𑀢𑀣𑀸. ‘‘𑀪𑀺𑀓𑁆𑀔𑀽’’𑀢𑀺 𑀧𑀦 𑀲𑀩𑁆𑀩𑀢𑁆𑀣 𑀬𑁄𑀚𑁂𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀬𑀜𑁆𑀘𑀢𑁆𑀣𑀯𑀢𑁄 𑀲𑀤𑁆𑀤𑁂𑀓𑀲𑁂𑀲𑀢𑁄 𑀯𑀸𑀧𑀺 𑀲𑀼𑀬𑁆𑀬𑀢𑁂;

𑀢𑀁 𑀲𑀫𑁆𑀩𑀚𑁆𑀛𑀢𑁂 𑀧𑀘𑁆𑀘𑁂𑀓𑀁, 𑀬𑀣𑀸𑀮𑀸𑀪𑀁 𑀓𑀤𑀸𑀘𑀺𑀧𑀻’’𑀢𑀺.

𑀢𑀺𑀧𑀺𑀝𑀓𑀲𑀩𑁆𑀩𑀧𑀭𑀺𑀬𑀢𑁆𑀢𑀺𑀧𑁆𑀧𑀪𑁂𑀤𑀥𑀭𑁂𑀢𑀺 𑀏𑀢𑁆𑀣 𑀢𑀺𑀡𑁆𑀡𑀁 𑀧𑀺𑀝𑀓𑀸𑀦𑀁 𑀲𑀫𑀸𑀳𑀸𑀭𑁄 𑀢𑀺𑀧𑀺𑀝𑀓𑀁, 𑀢𑀁𑀲𑀗𑁆𑀔𑀸𑀢𑀁 𑀦𑀯𑀗𑁆𑀕𑀸𑀤𑀺𑀯𑀲𑁂𑀦 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀁 𑀲𑀩𑁆𑀩𑀁 𑀧𑀭𑀺𑀬𑀢𑁆𑀢𑀺𑀧𑁆𑀧𑀪𑁂𑀤𑀁 𑀥𑀸𑀭𑁂𑀦𑁆𑀢𑀻𑀢𑀺 𑀢𑀣𑀸, 𑀢𑀸𑀤𑀺𑀲𑁂. 𑀅𑀦𑀼 𑀅𑀦𑀼 𑀢𑀁 𑀲𑀫𑀗𑁆𑀕𑀺𑀦𑀁 𑀪𑀸𑀯𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀅𑀦𑀼𑀪𑀸𑀯𑁄, 𑀲𑁄𑀬𑁂𑀯 𑀆𑀦𑀼𑀪𑀸𑀯𑁄, 𑀧𑀪𑀸𑀯𑁄, 𑀫𑀳𑀦𑁆𑀢𑁄 𑀆𑀦𑀼𑀪𑀸𑀯𑁄 𑀬𑁂𑀲𑀁 𑀢𑁂 𑀫𑀳𑀸𑀦𑀼𑀪𑀸𑀯𑀸. ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂’’𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀯𑀘𑀦𑀫𑀼𑀧𑀸𑀤𑀸𑀬 𑀧𑀯𑀢𑁆𑀢𑀢𑁆𑀢𑀸 ‘‘𑀏𑀢𑀤𑀕𑁆𑀕’’𑀦𑁆𑀢𑀺 𑀧𑀤𑀁 𑀅𑀦𑀼𑀓𑀭𑀡𑀚𑀦𑀸𑀫𑀁 𑀦𑀸𑀫 𑀬𑀣𑀸 ‘‘𑀬𑁂𑀯𑀸𑀧𑀦𑀓’’𑀦𑁆𑀢𑀺, 𑀢𑀩𑁆𑀩𑀲𑁂𑀦 𑀯𑀼𑀢𑁆𑀢𑀝𑁆𑀞𑀸𑀦𑀦𑁆𑀢𑀭𑀫𑀺𑀥 𑀏𑀢𑀤𑀕𑁆𑀕𑀁, 𑀢𑀫𑀸𑀭𑁄𑀧𑀺𑀢𑁂𑀢𑀺 𑀅𑀢𑁆𑀣𑁄. 𑀏𑀢𑀤𑀕𑁆𑀕𑀁 𑀏𑀲𑁄 𑀪𑀺𑀓𑁆𑀔𑀼 𑀅𑀕𑁆𑀕𑁄𑀢𑀺 𑀯𑀸 𑀆𑀭𑁄𑀧𑀺𑀢𑁂𑀧𑀺 𑀯𑀝𑁆𑀝𑀢𑀺. 𑀢𑀤𑀦𑀸𑀭𑁄𑀧𑀺𑀢𑀸𑀧𑀺 𑀅𑀯𑀲𑁂𑀲𑀕𑀼𑀡𑀲𑀫𑁆𑀧𑀦𑁆𑀦𑀢𑁆𑀢𑀸 𑀉𑀘𑁆𑀘𑀺𑀦𑀺𑀢𑀸 𑀢𑀢𑁆𑀣 𑀲𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑁂𑀪𑀼𑀬𑁆𑀬𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀢𑁂𑀯𑀺𑀚𑁆𑀚𑀸, 𑀢𑀸 ¶ 𑀆𑀤𑀺 𑀬𑁂𑀲𑀁 𑀙𑀴𑀪𑀺𑀜𑁆𑀜𑀸𑀤𑀻𑀦𑀦𑁆𑀢𑀺 𑀢𑁂𑀯𑀺𑀚𑁆𑀚𑀸𑀤𑀬𑁄, 𑀢𑁂 𑀪𑁂𑀤𑀸 𑀅𑀦𑁂𑀓𑀧𑁆𑀧𑀓𑀸𑀭𑀸 𑀬𑁂𑀲𑀦𑁆𑀢𑀺 𑀢𑁂𑀯𑀺𑀚𑁆𑀚𑀸𑀤𑀺𑀪𑁂𑀤𑀸. 𑀅𑀣 𑀯𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀲𑁆𑀲 𑀔𑀻𑀡𑀸𑀲𑀯𑀲𑁆𑀲𑀸𑀢𑀺 𑀢𑁂𑀯𑀺𑀚𑁆𑀚𑁄, 𑀲𑁄 𑀆𑀤𑀺 𑀬𑁂𑀲𑀁 𑀙𑀴𑀪𑀺𑀜𑁆𑀜𑀸𑀤𑀻𑀦𑀦𑁆𑀢𑀺 𑀢𑁂𑀯𑀺𑀚𑁆𑀚𑀸𑀤𑀬𑁄, 𑀢𑁂𑀬𑁂𑀯 𑀪𑁂𑀤𑀸 𑀬𑁂𑀲𑀦𑁆𑀢𑀺 𑀢𑁂𑀯𑀺𑀚𑁆𑀚𑀸𑀤𑀺𑀪𑁂𑀤𑀸. 𑀢𑁂𑀯𑀺𑀚𑁆𑀚𑀙𑀴𑀪𑀺𑀜𑁆𑀜𑀸𑀤𑀺𑀯𑀲𑁂𑀦 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑁂 𑀔𑀻𑀡𑀸𑀲𑀯𑀪𑀺𑀓𑁆𑀔𑀽𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀬𑁂 𑀪𑀺𑀓𑁆𑀔𑀽 𑀲𑀦𑁆𑀥𑀸𑀬 𑀇𑀤𑀁 ‘‘𑀅𑀣 𑀔𑁄’’𑀢𑀺𑀆𑀤𑀺𑀯𑀘𑀦𑀁 𑀲𑀗𑁆𑀕𑀻𑀢𑀺𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 𑀅𑀯𑀺𑀲𑁂𑀲𑀢𑁄𑀯 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀯𑀺𑀲𑁂𑀲𑁂𑀦 𑀬𑀣𑀸𑀯𑀼𑀢𑁆𑀢𑀔𑀻𑀡𑀸𑀲𑀯𑀪𑀺𑀓𑁆𑀔𑀽𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀧𑀸𑀴𑀺𑀬𑀸 𑀲𑀁𑀲𑀦𑁆𑀤𑀦𑀁 𑀓𑀭𑁄𑀢𑀺.

𑀦𑀦𑀼 𑀘 𑀲𑀓𑀮𑀦𑀯𑀗𑁆𑀕𑀲𑀢𑁆𑀣𑀼𑀲𑀸𑀲𑀦𑀧𑀭𑀺𑀬𑀢𑁆𑀢𑀺𑀥𑀭𑀸 𑀔𑀻𑀡𑀸𑀲𑀯𑀸 𑀅𑀦𑁂𑀓𑀲𑀢𑀸, 𑀅𑀦𑁂𑀓𑀲𑀳𑀲𑁆𑀲𑀸 𑀘, 𑀓𑀲𑁆𑀫𑀸 𑀣𑁂𑀭𑁄 𑀏𑀓𑁂𑀦𑀽𑀦𑀫𑀓𑀸𑀲𑀻𑀢𑀺 𑀘𑁄𑀤𑀦𑀁 𑀉𑀤𑁆𑀥𑀭𑀺𑀢𑁆𑀯𑀸 𑀯𑀺𑀲𑁂𑀲𑀓𑀸𑀭𑀡𑀤𑀲𑁆𑀲𑀦𑁂𑀦 𑀢𑀁 𑀧𑀭𑀺𑀳𑀭𑀺𑀢𑀼𑀁 ‘‘𑀓𑀺𑀲𑁆𑀲 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀺𑀲𑁆𑀲𑀸𑀢𑀺 𑀓𑀲𑁆𑀫𑀸. 𑀧𑀓𑁆𑀔𑀦𑁆𑀢𑀭𑀚𑁄𑀢𑀓𑁄 𑀧𑀦-𑀲𑀤𑁆𑀤𑁄. 𑀑𑀓𑀸𑀲𑀓𑀭𑀡𑀢𑁆𑀣𑀦𑁆𑀢𑀺 𑀑𑀓𑀸𑀲𑀓𑀭𑀡𑀦𑀺𑀫𑀺𑀢𑁆𑀢𑀁 𑀑𑀓𑀸𑀲𑀓𑀭𑀡𑀳𑁂𑀢𑀼. 𑀅𑀢𑁆𑀣-𑀲𑀤𑁆𑀤𑁄 𑀳𑀺 ‘‘𑀙𑀡𑀢𑁆𑀣𑀜𑁆𑀘 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀺𑀲𑁆𑀲𑀓𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀢𑀽’’𑀢𑀺𑀆𑀤𑀻𑀲𑀼 𑀯𑀺𑀬 𑀓𑀸𑀭𑀡𑀯𑀘𑀦𑁄, ‘‘𑀓𑀺𑀲𑁆𑀲 𑀳𑁂𑀢𑀽’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁩𑁮) 𑀯𑀺𑀬 𑀘 𑀳𑁂𑀢𑁆𑀯𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀢𑀣𑀸 𑀳𑀺 𑀯𑀡𑁆𑀡𑀬𑀦𑁆𑀢𑀺 ‘‘𑀙𑀡𑀢𑁆𑀣𑀦𑁆𑀢𑀺 𑀙𑀡𑀦𑀺𑀫𑀺𑀢𑁆𑀢𑀁 𑀙𑀡𑀳𑁂𑀢𑀽𑀢𑀺 𑀅𑀢𑁆𑀣𑁄’’𑀢𑀺. 𑀏𑀯𑀜𑁆𑀘 𑀲𑀢𑀺 𑀧𑀼𑀘𑁆𑀙𑀸𑀲𑀪𑀸𑀕𑀢𑀸𑀯𑀺𑀲𑁆𑀲𑀚𑁆𑀚𑀦𑀸𑀬 𑀳𑁄𑀢𑀺, 𑀏𑀲 𑀦𑀬𑁄 𑀈𑀤𑀺𑀲𑁂𑀲𑀼.

𑀓𑀲𑁆𑀫𑀸 𑀧𑀦𑀲𑁆𑀲 𑀑𑀓𑀸𑀲𑀫𑀓𑀸𑀲𑀻𑀢𑀺 𑀆𑀳 ‘‘𑀢𑁂𑀦𑀸’’𑀢𑀺𑀆𑀤𑀺. 𑀳𑀺-𑀲𑀤𑁆𑀤𑁄 𑀓𑀸𑀭𑀡𑀢𑁆𑀣𑁂. ‘‘𑀲𑁄 𑀳𑀸𑀬𑀲𑁆𑀫𑀸’’𑀢𑀺𑀆𑀤𑀺𑀦𑀸 ¶ ‘‘𑀲𑀳𑀸𑀧𑀺 𑀯𑀺𑀦𑀸𑀧𑀺 𑀦 𑀲𑀓𑁆𑀓𑀸’’𑀢𑀺 𑀯𑀼𑀢𑁆𑀢𑀯𑀘𑀦𑁂 𑀧𑀘𑁆𑀘𑁂𑀓𑀁 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀓𑁂𑀘𑀺 𑀧𑀦 ‘‘𑀢𑀫𑀢𑁆𑀣𑀁 𑀯𑀺𑀯𑀭𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀁 ‘‘𑀢𑀲𑁆𑀫𑀸’’𑀢𑀺 𑀓𑀸𑀭𑀡𑀯𑀘𑀦𑀤𑀲𑁆𑀲𑀦𑀢𑁄. ‘‘𑀢𑀲𑁆𑀫𑀸’’𑀢𑀺𑀆𑀤𑀺𑀦𑀸 𑀳𑀺 𑀓𑀸𑀭𑀡𑀤𑀲𑁆𑀲𑀦𑀝𑁆𑀞𑀸𑀦𑁂 𑀓𑀸𑀭𑀡𑀚𑁄𑀢𑀓𑁄𑀬𑁂𑀯 𑀳𑀺-𑀲𑀤𑁆𑀤𑁄. 𑀲𑀜𑁆𑀜𑀸𑀡𑀫𑀢𑁆𑀢𑀚𑁄𑀢𑀓𑀸 𑀲𑀸𑀔𑀸𑀪𑀗𑁆𑀕𑁄𑀧𑀫𑀸 𑀳𑀺 𑀦𑀺𑀧𑀸𑀢𑀸𑀢𑀺, 𑀏𑀯𑀫𑀻𑀤𑀺𑀲𑁂𑀲𑀼. 𑀲𑀺𑀓𑁆𑀔𑀢𑀻𑀢𑀺 𑀲𑁂𑀓𑁆𑀔𑁄, 𑀲𑀺𑀓𑁆𑀔𑀦𑀁 𑀯𑀸 𑀲𑀺𑀓𑁆𑀔𑀸, 𑀲𑀸𑀬𑁂𑀯 𑀢𑀲𑁆𑀲 𑀲𑀻𑀮𑀦𑁆𑀢𑀺 𑀲𑁂𑀓𑁆𑀔𑁄. 𑀲𑁄 𑀳𑀺 𑀅𑀧𑀭𑀺𑀬𑁄𑀲𑀺𑀢𑀲𑀺𑀓𑁆𑀔𑀢𑁆𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑁆𑀢𑀸 𑀘 𑀏𑀓𑀦𑁆𑀢𑁂𑀦 𑀲𑀺𑀓𑁆𑀔𑀦𑀲𑀻𑀮𑁄, 𑀦 𑀅𑀲𑁂𑀓𑁆𑀔𑁄 𑀯𑀺𑀬 𑀧𑀭𑀺𑀦𑀺𑀝𑁆𑀞𑀺𑀢𑀲𑀺𑀓𑁆𑀔𑁄 𑀢𑀢𑁆𑀣 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀼𑀲𑁆𑀲𑀸𑀳𑁄, 𑀦𑀸𑀧𑀺 𑀯𑀺𑀲𑁆𑀲𑀝𑁆𑀞𑀲𑀺𑀓𑁆𑀔𑁄 𑀧𑀘𑀼𑀭𑀚𑀦𑁄 𑀯𑀺𑀬 𑀢𑀢𑁆𑀣 𑀅𑀦𑀥𑀺𑀫𑀼𑀢𑁆𑀢𑁄, 𑀓𑀺𑀢𑀯𑀲𑁂𑀦 𑀯𑀺𑀬 𑀘 𑀢𑀤𑁆𑀥𑀺𑀢𑀯𑀲𑁂𑀦𑀺𑀥 𑀢𑀧𑁆𑀧𑀓𑀢𑀺𑀬𑀢𑁆𑀣𑁄 𑀕𑀬𑁆𑀳𑀢𑀺 𑀬𑀣𑀸 ‘‘𑀓𑀸𑀭𑀼𑀡𑀺𑀓𑁄’’𑀢𑀺. 𑀅𑀣 𑀯𑀸 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀢𑀻𑀲𑀼𑀧𑀺 𑀲𑀺𑀓𑁆𑀔𑀸𑀲𑀼 𑀚𑀸𑀢𑁄, 𑀢𑀢𑁆𑀣 𑀯𑀸 𑀪𑀯𑁄𑀢𑀺 ¶ 𑀲𑁂𑀓𑁆𑀔𑁄. 𑀅𑀧𑀺𑀘 𑀇𑀓𑁆𑀔𑀢𑀺 𑀏𑀢𑀸𑀬𑀸𑀢𑀺 𑀇𑀓𑁆𑀔𑀸, 𑀫𑀕𑁆𑀕𑀨𑀮𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀳 𑀇𑀓𑁆𑀔𑀸𑀬𑀸𑀢𑀺 𑀲𑁂𑀓𑁆𑀔𑁄. 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀓𑀺𑀘𑁆𑀘𑀲𑁆𑀲 𑀅𑀧𑀭𑀺𑀬𑁄𑀲𑀺𑀢𑀢𑁆𑀢𑀸 𑀲𑀳 𑀓𑀭𑀡𑀻𑀬𑁂𑀦𑀸𑀢𑀺 𑀲𑀓𑀭𑀡𑀻𑀬𑁄. 𑀅𑀲𑁆𑀲𑀸𑀢𑀺 𑀅𑀦𑁂𑀦, ‘‘𑀅𑀧𑁆𑀧𑀘𑁆𑀘𑀓𑁆𑀔𑀁 𑀦𑀸𑀫𑀸’’𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀅𑀲𑁆𑀲𑀸𑀢𑀺 𑀯𑀸 ‘‘𑀦𑀢𑁆𑀣𑀻’’𑀢𑀺 𑀏𑀢𑁆𑀣 𑀓𑀺𑀭𑀺𑀬𑀸𑀧𑀝𑀺𑀕𑁆𑀕𑀳𑀓𑀯𑀘𑀦𑀁. 𑀧𑀕𑀼𑀡𑀧𑁆𑀧𑀯𑀢𑁆𑀢𑀺𑀪𑀸𑀯𑀢𑁄 𑀅𑀧𑁆𑀧𑀘𑁆𑀘𑀓𑁆𑀔𑀁 𑀦𑀸𑀫 𑀦𑀢𑁆𑀣𑀺. 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀅𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑀦𑀸𑀫 𑀦𑀢𑁆𑀣𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁, 𑀢𑀁’’ 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀢𑁄’’𑀢𑀺 𑀯𑀼𑀢𑁆𑀢𑀫𑁆𑀧𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀦𑀸𑀫𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀲𑀸𑀯𑀓𑀪𑀸𑀲𑀺𑀢𑀫𑁆𑀧𑀺 𑀲𑀼𑀢𑁆𑀢𑀁 ‘‘𑀩𑀼𑀤𑁆𑀥𑀪𑀸𑀲𑀺𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.

‘‘𑀬𑀣𑀸𑀳𑀸’’𑀢𑀺𑀆𑀤𑀺𑀦𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀯𑀼𑀢𑁆𑀢𑀕𑀸𑀣𑀫𑁂𑀯 𑀲𑀸𑀥𑀓𑀪𑀸𑀯𑁂𑀦 𑀤𑀲𑁆𑀲𑁂𑀢𑀺. 𑀅𑀬𑀜𑁆𑀳𑀺 𑀕𑀸𑀣𑀸 𑀕𑁄𑀧𑀓𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀦𑀸𑀫 𑀩𑁆𑀭𑀸𑀳𑁆𑀫𑀡𑁂𑀦 ‘‘𑀩𑀼𑀤𑁆𑀥𑀲𑀸𑀲𑀦𑁂 𑀢𑁆𑀯𑀁 𑀩𑀳𑀼𑀲𑁆𑀲𑀼𑀢𑁄𑀢𑀺 𑀧𑀸𑀓𑀝𑁄, 𑀓𑀺𑀢𑁆𑀢𑀓𑀸 𑀥𑀫𑁆𑀫𑀸 𑀢𑁂 𑀲𑀢𑁆𑀣𑀸𑀭𑀸 𑀪𑀸𑀲𑀺𑀢𑀸, 𑀢𑀬𑀸 𑀘 𑀥𑀸𑀭𑀺𑀢𑀸’’𑀢𑀺 𑀧𑀼𑀘𑁆𑀙𑀺𑀢𑁂𑀦 𑀢𑀲𑁆𑀲 𑀧𑀝𑀺𑀯𑀘𑀦𑀁 𑀤𑁂𑀦𑁆𑀢𑁂𑀦 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦𑁂𑀯 𑀕𑁄𑀧𑀓𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑁂, 𑀅𑀢𑁆𑀢𑀦𑁄 𑀕𑀼𑀡𑀤𑀲𑁆𑀲𑀦𑀯𑀲𑁂𑀦 𑀯𑀸 𑀣𑁂𑀭𑀕𑀸𑀣𑀸𑀬𑀫𑁆𑀧𑀺 𑀪𑀸𑀲𑀺𑀢𑀸. 𑀢𑀢𑁆𑀣𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀩𑀼𑀤𑁆𑀥𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸 𑀤𑁆𑀯𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀺 𑀅𑀳𑀁 𑀕𑀡𑁆𑀳𑀺𑀁 𑀅𑀥𑀺𑀕𑀡𑁆𑀳𑀺𑀁, 𑀤𑁆𑀯𑁂 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀆𑀤𑀻𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀸 𑀕𑀡𑁆𑀳𑀺𑀁. 𑀬𑁂 𑀥𑀫𑁆𑀫𑀸 𑀫𑁂 𑀚𑀺𑀯𑁆𑀳𑀸𑀕𑁆𑀕𑁂, 𑀳𑀤𑀬𑁂 𑀯𑀸 𑀧𑀯𑀢𑁆𑀢𑀺𑀦𑁄 𑀧𑀕𑀼𑀡𑀸 𑀯𑀸𑀘𑀼𑀕𑁆𑀕𑀢𑀸, 𑀢𑁂 𑀥𑀫𑁆𑀫𑀸 𑀢𑀤𑀼𑀪𑀬𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻𑀢𑀺. 𑀓𑁂𑀘𑀺 𑀧𑀦 ‘‘𑀬𑁂𑀫𑁂𑀢𑀺 𑀏𑀢𑁆𑀣 ‘𑀬𑁂 𑀇𑀫𑁂’𑀢𑀺 𑀧𑀤𑀘𑁆𑀙𑁂𑀤𑀁 𑀓𑀢𑁆𑀯𑀸 𑀬𑁂 𑀇𑀫𑁂 𑀥𑀫𑁆𑀫𑀸 𑀩𑀼𑀤𑁆𑀥𑀲𑁆𑀲, 𑀪𑀺𑀓𑁆𑀔𑀽𑀦𑀜𑁆𑀘 𑀧𑀯𑀢𑁆𑀢𑀺𑀦𑁄 𑀧𑀯𑀢𑁆𑀢𑀺𑀢𑀸, 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀩𑀼𑀤𑁆𑀥𑀢𑁄 𑀤𑁆𑀯𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀺 𑀅𑀳𑀁 𑀕𑀡𑁆𑀳𑀺𑀁, 𑀤𑁆𑀯𑁂 𑀲𑀳𑀲𑁆𑀲𑀸𑀦𑀺 𑀪𑀺𑀓𑁆𑀔𑀼𑀢𑁄 𑀕𑀡𑁆𑀳𑀺𑀁, 𑀏𑀯𑀁 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻’’𑀢𑀺 𑀲𑀫𑁆𑀩𑀦𑁆𑀥𑀁 𑀯𑀤𑀦𑁆𑀢𑀺, 𑀅𑀬𑀜𑁆𑀘 𑀲𑀫𑁆𑀩𑀦𑁆𑀥𑁄 ‘‘𑀏𑀢𑁆𑀢𑀓𑀸𑀬𑁂𑀯 𑀥𑀫𑁆𑀫𑀓𑁆𑀔𑀦𑁆𑀥𑀸’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀲𑁆𑀲 𑀅𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸 𑀓𑁂𑀘𑀺𑀯𑀸𑀤𑁄 𑀦𑀸𑀫 𑀓𑀢𑁄.

‘‘𑀲𑀳𑀸𑀧𑀺 ¶ 𑀦 𑀲𑀓𑁆𑀓𑀸’’𑀢𑀺 𑀯𑀢𑁆𑀢𑀩𑁆𑀩𑀳𑁂𑀢𑀼𑀢𑁄 ‘‘𑀯𑀺𑀦𑀸𑀧𑀺 𑀦 𑀲𑀓𑁆𑀓𑀸’’𑀢𑀺 𑀯𑀢𑁆𑀢𑀩𑁆𑀩𑀳𑁂𑀢𑀼𑀬𑁂𑀯 𑀩𑀮𑀯𑀢𑀭𑁄 𑀲𑀗𑁆𑀕𑀻𑀢𑀺𑀬𑀸 𑀩𑀳𑀼𑀓𑀸𑀭𑀢𑁆𑀢𑀸. 𑀢𑀲𑁆𑀫𑀸 𑀢𑀢𑁆𑀣 𑀘𑁄𑀤𑀦𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀳𑀭𑀺𑀢𑀼𑀁 ‘‘𑀬𑀤𑀺 𑀏𑀯’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀤𑀺 𑀏𑀯𑀦𑁆𑀢𑀺 𑀏𑀯𑀁 𑀯𑀺𑀦𑀸 𑀬𑀤𑀺 𑀦 𑀲𑀓𑁆𑀓𑀸, 𑀢𑀣𑀸 𑀲𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀓𑁆𑀔𑁄𑀧𑀺 𑀲𑀫𑀸𑀦𑁄𑀢𑀺 𑀲𑁂𑀓𑁆𑀔𑀧𑀼𑀕𑁆𑀕𑀮𑁄 𑀲𑀫𑀸𑀦𑁄𑀧𑀺. 𑀫𑀸𑀦-𑀲𑀤𑁆𑀤𑁄 𑀳𑁂𑀢𑁆𑀣 𑀮𑀓𑁆𑀔𑀡𑁂. 𑀩𑀳𑀼𑀓𑀸𑀭𑀢𑁆𑀢𑀸𑀢𑀺 𑀩𑀳𑀽𑀧𑀓𑀸𑀭𑀢𑁆𑀢𑀸. 𑀉𑀧𑀓𑀸𑀭𑀯𑀘𑀦𑁄 𑀳𑀺 𑀓𑀸𑀭-𑀲𑀤𑁆𑀤𑁄 ‘‘𑀅𑀧𑁆𑀧𑀓𑀫𑁆𑀧𑀺 ¶ 𑀓𑀢𑀁 𑀓𑀸𑀭𑀁, 𑀧𑀼𑀜𑁆𑀜𑀁 𑀳𑁄𑀢𑀺 𑀫𑀳𑀧𑁆𑀨𑀮’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀲𑁆𑀲𑀸𑀢𑀺 𑀪𑀯𑁂𑀬𑁆𑀬. 𑀅𑀣-𑀲𑀤𑁆𑀤𑁄 𑀧𑀼𑀘𑁆𑀙𑀸𑀬𑀁. 𑀧𑀜𑁆𑀳𑁂 ‘‘𑀅𑀣 𑀢𑁆𑀯𑀁 𑀓𑁂𑀦 𑀯𑀡𑁆𑀡𑁂𑀦𑀸’’𑀢𑀺 𑀳𑀺 𑀧𑀬𑁄𑀕𑀫𑀼𑀤𑀸𑀳𑀭𑀦𑁆𑀢𑀺. ‘‘𑀏𑀯𑀁 𑀲𑀦𑁆𑀢𑁂’’𑀢𑀺 𑀧𑀦 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀧𑀭𑀽𑀧𑀯𑀸𑀤𑀯𑀺𑀯𑀚𑁆𑀚𑀦𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀁 𑀅𑀚𑀸𑀦𑀦𑁆𑀢𑀸𑀦𑀁 𑀧𑀭𑁂𑀲𑀁 𑀆𑀭𑁄𑀧𑀺𑀢𑀉𑀧𑀯𑀸𑀤𑀢𑁄 𑀯𑀺𑀯𑀚𑁆𑀚𑀺𑀢𑀼𑀓𑀸𑀫𑀢𑁆𑀢𑀸. 𑀢𑀁 𑀯𑀺𑀯𑀭𑀢𑀺 ‘‘𑀣𑁂𑀭𑁄 𑀳𑀻’’𑀢𑀺𑀆𑀤𑀺𑀦𑀸. 𑀅𑀢𑀺𑀯𑀺𑀬 𑀯𑀺𑀲𑁆𑀲𑀢𑁆𑀣𑁄𑀢𑀺 𑀅𑀢𑀺𑀭𑁂𑀓𑀁 𑀯𑀺𑀲𑁆𑀲𑀸𑀲𑀺𑀓𑁄. 𑀓𑁂𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀢𑀣𑀸 𑀳𑀻’’𑀢𑀺𑀆𑀤𑀺. 𑀤𑀴𑁆𑀳𑀻𑀓𑀭𑀡𑀁 𑀯𑀸 𑀏𑀢𑀁 𑀯𑀘𑀦𑀁. ‘‘𑀯𑀼𑀢𑁆𑀢𑀜𑁆𑀳𑀺, 𑀢𑀣𑀸 𑀳𑀺 𑀇𑀘𑁆𑀘𑁂𑀢𑁂 𑀤𑀴𑁆𑀳𑀻𑀓𑀭𑀡𑀢𑁆𑀣𑁂’’𑀢𑀺 𑀳𑀺 𑀯𑀤𑀦𑁆𑀢𑀺 𑀲𑀤𑁆𑀤𑀯𑀺𑀤𑀽. 𑀦𑀦𑁆𑀢𑀺 𑀆𑀦𑀦𑁆𑀤𑀢𑁆𑀣𑁂𑀭𑀁. ‘‘𑀑𑀯𑀤𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀦𑀯𑀓𑀸𑀬 𑀧𑀭𑀺𑀲𑀸𑀬 𑀯𑀺𑀩𑁆𑀪𑀫𑀦𑁂 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 ‘‘𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻’’𑀢𑀺 (𑀲𑀁. 𑀦𑀺. 𑁨.𑁧𑁫𑁪) 𑀆𑀳. 𑀢𑀣𑀸 𑀳𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑁂 𑀲𑀦𑁆𑀦𑀺𑀧𑀢𑀺𑀢𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀢𑁆𑀣𑀁 𑀧𑀜𑁆𑀘𑀲𑀢𑁂 𑀪𑀺𑀓𑁆𑀔𑀽 𑀉𑀘𑁆𑀘𑀺𑀦𑀺𑀢𑁆𑀯𑀸 ‘‘𑀭𑀸𑀚𑀕𑀳𑁂 𑀆𑀯𑀼𑀲𑁄 𑀯𑀲𑁆𑀲𑀁 𑀯𑀲𑀦𑁆𑀢𑀸 𑀥𑀫𑁆𑀫𑀯𑀺𑀦𑀬𑀁 𑀲𑀗𑁆𑀕𑀸𑀬𑀺𑀲𑁆𑀲𑀸𑀫, 𑀢𑀼𑀫𑁆𑀳𑁂 𑀧𑀼𑀭𑁂 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀮𑀺𑀩𑁄𑀥𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀭𑀸𑀚𑀕𑀳𑁂 𑀲𑀦𑁆𑀦𑀺𑀧𑀢𑀣𑀸’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑀸 𑀭𑀸𑀚𑀕𑀳𑀁 𑀕𑀢𑁄.

𑀆𑀦𑀦𑁆𑀤𑀢𑁆𑀣𑁂𑀭𑁄𑀧𑀺 𑀪𑀕𑀯𑀢𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀫𑀳𑀸𑀚𑀦𑀁 𑀲𑀜𑁆𑀜𑀸𑀧𑁂𑀦𑁆𑀢𑁄 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑁆𑀫 𑀭𑀸𑀚𑀕𑀳𑀁 𑀕𑀘𑁆𑀙𑀦𑁆𑀢𑁄 𑀤𑀓𑁆𑀔𑀺𑀡𑀸𑀕𑀺𑀭𑀺𑀲𑁆𑀫𑀺𑀁 𑀘𑀸𑀭𑀺𑀓𑀁 𑀘𑀭𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀢𑀺𑀁𑀲𑀫𑀢𑁆𑀢𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀬𑁂𑀪𑀼𑀬𑁆𑀬𑁂𑀦 𑀓𑀼𑀫𑀸𑀭𑀓𑀸 𑀏𑀓𑀯𑀲𑁆𑀲𑀺𑀓𑀤𑀼𑀯𑀲𑁆𑀲𑀺𑀓𑀪𑀺𑀓𑁆𑀔𑀽 𑀘𑁂𑀯 𑀅𑀦𑀼𑀧𑀲𑀫𑁆𑀧𑀦𑁆𑀦𑀸 𑀘 𑀯𑀺𑀩𑁆𑀪𑀫𑀺𑀁𑀲𑀼. 𑀓𑀲𑁆𑀫𑀸 𑀧𑀦𑁂𑀢𑁂 𑀧𑀩𑁆𑀩𑀚𑀺𑀢𑀸, 𑀓𑀲𑁆𑀫𑀸 𑀘 𑀯𑀺𑀩𑁆𑀪𑀫𑀺𑀁𑀲𑀽𑀢𑀺? 𑀢𑁂𑀲𑀁 𑀓𑀺𑀭 𑀫𑀸𑀢𑀸𑀧𑀺𑀢𑀭𑁄 𑀘𑀺𑀦𑁆𑀢𑁂𑀲𑀼𑀁 ‘‘𑀆𑀦𑀦𑁆𑀤𑀢𑁆𑀣𑁂𑀭𑁄 𑀲𑀢𑁆𑀣𑀼𑀯𑀺𑀲𑁆𑀲𑀸𑀲𑀺𑀓𑁄 𑀅𑀝𑁆𑀞 𑀯𑀭𑁂 𑀬𑀸𑀘𑀺𑀢𑁆𑀯𑀸 𑀉𑀧𑀝𑁆𑀞𑀳𑀢𑀺, 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀲𑀢𑁆𑀣𑀸𑀭𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀲𑀓𑁆𑀓𑁄𑀢𑀺, 𑀅𑀫𑁆𑀳𑀸𑀓𑀁 𑀤𑀸𑀭𑀓𑁂 𑀏𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁂𑀬𑁆𑀬𑀸𑀫, 𑀏𑀯𑀁 𑀲𑁄 𑀲𑀢𑁆𑀣𑀸𑀭𑀁 𑀕𑀳𑁂𑀢𑁆𑀯𑀸 𑀆𑀕𑀫𑀺𑀲𑁆𑀲𑀢𑀺, 𑀢𑀲𑁆𑀫𑀺𑀁 𑀆𑀕𑀢𑁂 𑀫𑀬𑀁 𑀫𑀳𑀸𑀲𑀓𑁆𑀓𑀸𑀭𑀁 𑀓𑀸𑀢𑀼𑀁 𑀮𑀪𑀺𑀲𑁆𑀲𑀸𑀫𑀸’’𑀢𑀺. 𑀇𑀫𑀺𑀦𑀸 𑀢𑀸𑀯 𑀓𑀸𑀭𑀡𑁂𑀦 𑀦𑁂𑀲𑀁 𑀜𑀸𑀢𑀓𑀸 𑀢𑁂 𑀧𑀩𑁆𑀩𑀸𑀚𑁂𑀲𑀼𑀁, 𑀲𑀢𑁆𑀣𑀭𑀺 𑀧𑀦 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑁂𑀲𑀁 𑀲𑀸 𑀧𑀢𑁆𑀣𑀦𑀸 𑀉𑀧𑀘𑁆𑀙𑀺𑀦𑁆𑀦𑀸, 𑀅𑀣 𑀦𑁂 𑀏𑀓𑀤𑀺𑀯𑀲𑁂𑀦𑁂𑀯 𑀉𑀧𑁆𑀧𑀩𑁆𑀩𑀸𑀚𑁂𑀲𑀼𑀁. 𑀅𑀣 𑀆𑀦𑀦𑁆𑀤𑀢𑁆𑀣𑁂𑀭𑀁 𑀤𑀓𑁆𑀔𑀺𑀡𑀸𑀕𑀺𑀭𑀺𑀲𑁆𑀫𑀺𑀁 𑀘𑀸𑀭𑀺𑀓𑀁 𑀘𑀭𑀺𑀢𑁆𑀯𑀸 𑀭𑀸𑀚𑀕𑀳𑀫𑀸𑀕𑀢𑀁 𑀤𑀺𑀲𑁆𑀯𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀏𑀯𑀫𑀸𑀳𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑁂 𑁋

‘‘𑀅𑀣 ¶ 𑀓𑀺𑀜𑁆𑀘𑀭𑀳𑀺 𑀢𑁆𑀯𑀁 𑀆𑀯𑀼𑀲𑁄 𑀆𑀦𑀦𑁆𑀤 𑀇𑀫𑁂𑀳𑀺 𑀦𑀯𑁂𑀳𑀺 𑀪𑀺𑀓𑁆𑀔𑀽𑀳𑀺 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑁂𑀳𑀺 ¶ 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀽𑀳𑀺 𑀚𑀸𑀕𑀭𑀺𑀬𑀁 𑀅𑀦𑀦𑀼𑀬𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀘𑀸𑀭𑀺𑀓𑀁 𑀘𑀭𑀲𑀺, 𑀲𑀲𑁆𑀲𑀖𑀸𑀢𑀁 𑀫𑀜𑁆𑀜𑁂 𑀘𑀭𑀲𑀺, 𑀓𑀼𑀮𑀽𑀧𑀖𑀸𑀢𑀁 𑀫𑀜𑁆𑀜𑁂 𑀘𑀭𑀲𑀺, 𑀑𑀮𑀼𑀚𑁆𑀚𑀢𑀺 𑀔𑁄 𑀢𑁂 𑀆𑀯𑀼𑀲𑁄 𑀆𑀦𑀦𑁆𑀤 𑀧𑀭𑀺𑀲𑀸, 𑀧𑀮𑀼𑀚𑁆𑀚𑀦𑁆𑀢𑀺 𑀔𑁄 𑀢𑁂 𑀆𑀯𑀼𑀲𑁄 𑀦𑀯𑀧𑁆𑀧𑀸𑀬𑀸, 𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻𑀢𑀺.

𑀅𑀧𑀺 𑀫𑁂 𑀪𑀦𑁆𑀢𑁂 𑀓𑀲𑁆𑀲𑀧 𑀲𑀺𑀭𑀲𑁆𑀫𑀺𑀁 𑀧𑀮𑀺𑀢𑀸𑀦𑀺 𑀚𑀸𑀢𑀸𑀦𑀺, 𑀅𑀣 𑀘 𑀧𑀦 𑀫𑀬𑀁 𑀅𑀚𑁆𑀚𑀸𑀧𑀺 𑀆𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀓𑀼𑀫𑀸𑀭𑀓𑀯𑀸𑀤𑀸 𑀦 𑀫𑀼𑀘𑁆𑀘𑀸𑀫𑀸𑀢𑀺. 𑀢𑀣𑀸 𑀳𑀺 𑀧𑀦 𑀢𑁆𑀯𑀁 𑀆𑀯𑀼𑀲𑁄 𑀆𑀦𑀦𑁆𑀤 𑀇𑀫𑁂𑀳𑀺 𑀦𑀯𑁂𑀳𑀺 𑀪𑀺𑀓𑁆𑀔𑀽𑀳𑀺 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑁂𑀳𑀺 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀽𑀳𑀺 𑀚𑀸𑀕𑀭𑀺𑀬𑀁 𑀅𑀦𑀦𑀼𑀬𑀼𑀢𑁆𑀢𑁂𑀳𑀺 𑀲𑀤𑁆𑀥𑀺𑀁 𑀘𑀸𑀭𑀺𑀓𑀁 𑀘𑀭𑀲𑀺, 𑀲𑀲𑁆𑀲𑀖𑀸𑀢𑀁 𑀫𑀜𑁆𑀜𑁂 𑀘𑀭𑀲𑀺, 𑀓𑀼𑀮𑀽𑀧𑀖𑀸𑀢𑀁 𑀫𑀜𑁆𑀜𑁂 𑀘𑀭𑀲𑀺, 𑀑𑀮𑀼𑀚𑁆𑀚𑀢𑀺 𑀔𑁄 𑀢𑁂 𑀆𑀯𑀼𑀲𑁄 𑀆𑀦𑀦𑁆𑀤 𑀧𑀭𑀺𑀲𑀸, 𑀧𑀮𑀼𑀚𑁆𑀚𑀦𑁆𑀢𑀺 𑀔𑁄 𑀢𑁂 𑀆𑀯𑀼𑀲𑁄 𑀦𑀯𑀧𑁆𑀧𑀸𑀬𑀸, 𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻’’𑀢𑀺 (𑀲𑀁. 𑀦𑀺. 𑁨.𑁧𑁫𑁪).

𑀢𑀢𑁆𑀣 𑀲𑀲𑁆𑀲𑀖𑀸𑀢𑀁 𑀫𑀜𑁆𑀜𑁂 𑀘𑀭𑀲𑀻𑀢𑀺 𑀲𑀲𑁆𑀲𑀁 𑀖𑀸𑀢𑁂𑀦𑁆𑀢𑁄 𑀯𑀺𑀬 𑀆𑀳𑀺𑀡𑁆𑀟𑀲𑀺. 𑀓𑀼𑀮𑀽𑀧𑀖𑀸𑀢𑀁 𑀫𑀜𑁆𑀜𑁂 𑀘𑀭𑀲𑀻𑀢𑀺 𑀓𑀼𑀮𑀸𑀦𑀺 𑀉𑀧𑀖𑀸𑀢𑁂𑀦𑁆𑀢𑁄 𑀯𑀺𑀬 𑀆𑀳𑀺𑀡𑁆𑀟𑀲𑀺. 𑀑𑀮𑀼𑀚𑁆𑀚𑀢𑀻𑀢𑀺 𑀧𑀮𑀼𑀚𑁆𑀚𑀢𑀺 𑀪𑀺𑀚𑁆𑀚𑀢𑀺. 𑀧𑀮𑀼𑀚𑁆𑀚𑀦𑁆𑀢𑀺 𑀔𑁄 𑀢𑁂 𑀆𑀯𑀼𑀲𑁄 𑀦𑀯𑀧𑁆𑀧𑀸𑀬𑀸𑀢𑀺 𑀆𑀯𑀼𑀲𑁄 𑀆𑀦𑀦𑁆𑀤 𑀏𑀢𑁂 𑀢𑀼𑀬𑁆𑀳𑀁 𑀧𑀸𑀬𑁂𑀦 𑀬𑁂𑀪𑀼𑀬𑁆𑀬𑁂𑀦 𑀦𑀯𑀓𑀸 𑀏𑀓𑀯𑀲𑁆𑀲𑀺𑀓𑀤𑀼𑀯𑀲𑁆𑀲𑀺𑀓𑀤𑀳𑀭𑀸 𑀘𑁂𑀯 𑀲𑀸𑀫𑀡𑁂𑀭𑀸 𑀘 𑀧𑀮𑀼𑀚𑁆𑀚𑀦𑁆𑀢𑀺. 𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻𑀢𑀺 𑀅𑀬𑀁 𑀓𑀼𑀫𑀸𑀭𑀓𑁄 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀦 𑀯𑀢 𑀚𑀸𑀦𑀸𑀢𑀻𑀢𑀺 𑀣𑁂𑀭𑀁 𑀢𑀚𑁆𑀚𑁂𑀦𑁆𑀢𑁄 𑀆𑀳. 𑀓𑀼𑀫𑀸𑀭𑀓𑀯𑀸𑀤𑀸 𑀦 𑀫𑀼𑀘𑁆𑀘𑀸𑀫𑀸𑀢𑀺 𑀓𑀼𑀫𑀸𑀭𑀓𑀯𑀸𑀤𑀢𑁄 𑀦 𑀫𑀼𑀘𑁆𑀘𑀸𑀫. 𑀢𑀣𑀸 𑀳𑀺 𑀧𑀦 𑀢𑁆𑀯𑀦𑁆𑀢𑀺 𑀇𑀤𑀫𑀲𑁆𑀲 𑀏𑀯𑀁 𑀯𑀢𑁆𑀢𑀩𑁆𑀩𑀢𑀸𑀬 𑀓𑀸𑀭𑀡𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀲𑁆𑀫𑀸 𑀢𑁆𑀯𑀁 𑀇𑀫𑁂𑀳𑀺 𑀦𑀯𑁂𑀳𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀯𑀺𑀭𑀳𑀺𑀢𑁂𑀳𑀺 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀽𑀳𑀺 𑀲𑀤𑁆𑀥𑀺𑀁 𑀯𑀺𑀘𑀭𑀲𑀺, 𑀢𑀲𑁆𑀫𑀸 𑀓𑀼𑀫𑀸𑀭𑀓𑁂𑀳𑀺 𑀲𑀤𑁆𑀥𑀺𑀁 𑀯𑀺𑀘𑀭𑀦𑁆𑀢𑁄 ‘‘𑀓𑀼𑀫𑀸𑀭𑀓𑁄’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀲𑀻𑀢𑀺.

𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀧𑀤𑀧𑀽𑀭𑀡𑁂. 𑀯𑀸-𑀲𑀤𑁆𑀤𑁄 𑀳𑀺 𑀉𑀧𑀫𑀸𑀦𑀲𑀫𑀼𑀘𑁆𑀘𑀬𑀲𑀁𑀲𑀬𑀯𑀺𑀲𑁆𑀲𑀕𑁆𑀕𑀯𑀺𑀓𑀧𑁆𑀧𑀧𑀤𑀧𑀽𑀭𑀡𑀸𑀤𑀻𑀲𑀼 𑀩𑀳𑀽𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑁂𑀲 ‘‘𑀧𑀡𑁆𑀟𑀺𑀢𑁄 𑀯𑀸𑀧𑀺 𑀢𑁂𑀦 𑀲𑁄’’𑀢𑀺𑀆𑀤𑀻𑀲𑀼 (𑀥. 𑀧. 𑁬𑁩) 𑀉𑀧𑀫𑀸𑀦𑁂 ¶ 𑀤𑀺𑀲𑁆𑀲𑀢𑀺, 𑀲𑀤𑀺𑀲𑀪𑀸𑀯𑁂𑀢𑀺 𑀅𑀢𑁆𑀣𑁄. ‘‘𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺 𑀯𑁂𑀤𑀬𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁨𑁧𑁩) 𑀲𑀫𑀼𑀘𑁆𑀘𑀬𑁂. ‘‘𑀓𑁂 𑀯𑀸 𑀇𑀫𑁂 𑀓𑀲𑁆𑀲 𑀯𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨𑁯𑁬) 𑀲𑀁𑀲𑀬𑁂. ‘‘𑀅𑀬𑀁 𑀯𑀸 𑀇𑀫𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀩𑁆𑀩𑀩𑀸𑀮𑁄 𑀲𑀩𑁆𑀩𑀫𑀽𑀴𑁆𑀳𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧𑁮𑁧) 𑀯𑀯𑀲𑁆𑀲𑀕𑁆𑀕𑁂. ‘‘𑀬𑁂 𑀳𑀺 𑀓𑁂𑀘𑀺 𑀪𑀺𑀓𑁆𑀔𑀯𑁂 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸’’𑀢𑀺𑀆𑀤𑀻𑀲𑀼𑀧𑀺 (𑀫. 𑀦𑀺. 𑁧.𑁧𑁭𑁦; 𑀲𑀁. 𑀦𑀺. 𑁨.𑁧𑁩) 𑀯𑀺𑀓𑀧𑁆𑀧𑁂. ‘‘𑀦 𑀯𑀸𑀳𑀁 𑀧𑀡𑁆𑀡𑀁 𑀪𑀼𑀜𑁆𑀚𑀸𑀫𑀺, 𑀦 𑀳𑁂𑀢𑀁 𑀫𑀬𑁆𑀳 𑀪𑁄𑀚𑀦’’𑀦𑁆𑀢𑀺𑀆𑀤𑀻𑀲𑀼 𑀧𑀤𑀧𑀽𑀭𑀡𑁂. 𑀇𑀥𑀸𑀧𑀺 𑀧𑀤𑀧𑀽𑀭𑀡𑁂 ¶ 𑀤𑀝𑁆𑀞𑀩𑁆𑀩𑁄. 𑀢𑁂𑀦𑁂𑀯 𑀘 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀸-𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑀁 𑀓𑀭𑁄𑀦𑁆𑀢𑁂𑀦 𑀯𑀼𑀢𑁆𑀢𑀁 ‘‘𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻’’𑀢𑀺𑀆𑀤𑀻𑀲𑀼 𑀧𑀤𑀧𑀽𑀭𑀡𑁂’’𑀢𑀺. 𑀲𑀁𑀬𑀼𑀢𑁆𑀢𑀝𑁆𑀞𑀓𑀣𑀸𑀬𑀫𑁆𑀧𑀺 𑀇𑀤𑀫𑁂𑀯 𑀯𑀼𑀢𑁆𑀢𑀁 ‘‘𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻𑀢𑀺 𑀅𑀬𑀁 𑀓𑀼𑀫𑀸𑀭𑀓𑁄 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀦 𑀯𑀢 𑀚𑀸𑀦𑀸𑀲𑀻𑀢𑀺 𑀣𑁂𑀭𑀁 𑀢𑀚𑁆𑀚𑁂𑀦𑁆𑀢𑁄 𑀆𑀳𑀸’’𑀢𑀺 (𑀲𑀁. 𑀦𑀺. 𑀅𑀝𑁆𑀞. 𑁨.𑁧𑁫𑁪). 𑀏𑀢𑁆𑀣𑀸𑀧𑀺 ‘‘𑀯𑀢𑀸’’𑀢𑀺 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀬 𑀯𑀼𑀢𑁆𑀢𑀁. ‘‘𑀦 𑀯𑀸𑀬’’𑀦𑁆𑀢𑀺 𑀏𑀢𑀲𑁆𑀲 𑀯𑀸 ‘‘𑀦 𑀯𑁂 𑀅𑀬’’𑀦𑁆𑀢𑀺 𑀧𑀤𑀘𑁆𑀙𑁂𑀤𑀁 𑀓𑀢𑁆𑀯𑀸 𑀯𑁂-𑀲𑀤𑁆𑀤𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀯𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀯𑁂-𑀲𑀤𑁆𑀤𑀲𑁆𑀲 𑀏𑀓𑀁𑀲𑀢𑁆𑀣𑀪𑀸𑀯𑁂 𑀢𑀤𑁂𑀯 𑀧𑀸𑀴𑀺𑀁 𑀧𑀬𑁄𑀕𑀁 𑀓𑀢𑁆𑀯𑀸 𑀉𑀤𑀸𑀳𑀭𑀦𑁆𑀢𑀺 𑀦𑁂𑀭𑀼𑀢𑁆𑀢𑀺𑀓𑀸. 𑀯𑀚𑀺𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑁄 𑀧𑀦 𑀏𑀯𑀁 𑀯𑀤𑀢𑀺 ‘‘𑀦 𑀯𑀸𑀬𑀦𑁆𑀢𑀺 𑀏𑀢𑁆𑀣 𑀘 𑀯𑀸𑀢𑀺 𑀯𑀺𑀪𑀸𑀲𑀸, 𑀅𑀜𑁆𑀜𑀸𑀲𑀺𑀧𑀺 𑀦 𑀅𑀜𑁆𑀜𑀸𑀲𑀺𑀧𑀻’’𑀢𑀺, (𑀯𑀚𑀺𑀭. 𑀝𑀻. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀢𑀁 𑀢𑀲𑁆𑀲 𑀫𑀢𑀺𑀫𑀢𑁆𑀢𑀁 𑀲𑀁𑀬𑀼𑀢𑁆𑀢𑀝𑁆𑀞𑀓𑀣𑀸𑀬 𑀢𑀣𑀸 𑀅𑀯𑀼𑀢𑁆𑀢𑀢𑁆𑀢𑀸. 𑀇𑀤𑀫𑁂𑀓𑀁 𑀧𑀭𑀽𑀧𑀯𑀸𑀤𑀲𑀫𑁆𑀪𑀯𑀓𑀸𑀭𑀡𑀁 ‘‘𑀢𑀢𑁆𑀣 𑀓𑁂𑀘𑀻’’𑀢𑀺𑀆𑀤𑀺𑀦𑀸 𑀲𑀫𑁆𑀩𑀚𑁆𑀛𑀺𑀢𑀩𑁆𑀩𑀁.

𑀅𑀜𑁆𑀜𑀫𑁆𑀧𑀺 𑀓𑀸𑀭𑀡𑀫𑀸𑀳 ‘‘𑀲𑀓𑁆𑀬𑀓𑀼𑀮𑀧𑁆𑀧𑀲𑀼𑀢𑁄 𑀘𑀸𑀬𑀲𑁆𑀫𑀸’’𑀢𑀺. 𑀲𑀸𑀓𑀺𑀬𑀓𑀼𑀮𑁂 𑀚𑀸𑀢𑁄, 𑀲𑀸𑀓𑀺𑀬𑀓𑀼𑀮𑀪𑀸𑀯𑁂𑀦 𑀯𑀸 𑀧𑀸𑀓𑀝𑁄 𑀘 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄. 𑀢𑀢𑁆𑀣…𑀧𑁂… 𑀉𑀧𑀯𑀤𑁂𑀬𑁆𑀬𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀫𑁆𑀧𑀺 𑀓𑀸𑀭𑀡𑀁 𑀯𑀤𑀢𑀺 ‘‘𑀢𑀣𑀸𑀕𑀢𑀲𑁆𑀲 𑀪𑀸𑀢𑀸 𑀘𑀽𑀴𑀧𑀺𑀢𑀼𑀧𑀼𑀢𑁆𑀢𑁄’’𑀢𑀺. 𑀪𑀸𑀢𑀸𑀢𑀺 𑀘𑁂𑀢𑁆𑀣 𑀓𑀦𑀺𑀝𑁆𑀞𑀪𑀸𑀢𑀸 𑀘𑀽𑀴𑀧𑀺𑀢𑀼𑀧𑀼𑀢𑁆𑀢𑀪𑀸𑀯𑁂𑀦, 𑀦 𑀧𑀦 𑀯𑀬𑀲𑀸 𑀲𑀳𑀚𑀸𑀢𑀪𑀸𑀯𑀢𑁄.

‘‘𑀲𑀼𑀤𑁆𑀥𑁄𑀤𑀦𑁄 𑀥𑁄𑀢𑁄𑀤𑀦𑁄, 𑀲𑀓𑁆𑀓𑀲𑀼𑀓𑁆𑀓𑀸𑀫𑀺𑀢𑁄𑀤𑀦𑀸;

𑀅𑀫𑀺𑀢𑀸 𑀧𑀸𑀮𑀺𑀢𑀸 𑀘𑀸𑀢𑀺, 𑀇𑀫𑁂 𑀧𑀜𑁆𑀘 𑀇𑀫𑀸 𑀤𑀼𑀯𑁂’’𑀢𑀺.

𑀯𑀼𑀢𑁆𑀢𑁂𑀲𑀼 𑀳𑀺 𑀲𑀩𑁆𑀩𑀓𑀦𑀺𑀝𑁆𑀞𑀲𑁆𑀲 𑀅𑀫𑀺𑀢𑁄𑀤𑀦𑀲𑀓𑁆𑀓𑀲𑁆𑀲 𑀧𑀼𑀢𑁆𑀢𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄. 𑀯𑀼𑀢𑁆𑀢𑀜𑁆𑀳𑀺 𑀫𑀦𑁄𑀭𑀣𑀧𑀽𑀭𑀡𑀺𑀬𑀁 𑁋

‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀁 ¶ 𑀧𑀦 𑀤𑀸𑀦𑀁 𑀤𑀤𑀫𑀸𑀦𑁄 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀅𑀫𑀺𑀢𑁄𑀤𑀦𑀲𑀓𑁆𑀓𑀲𑁆𑀲 𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺, 𑀅𑀣𑀲𑁆𑀲 𑀲𑀩𑁆𑀩𑁂 𑀜𑀸𑀢𑀓𑁂 𑀆𑀦𑀦𑁆𑀤𑀺𑀢𑁂 𑀧𑀫𑁄𑀤𑀺𑀢𑁂 𑀓𑀭𑁄𑀦𑁆𑀢𑁄 𑀚𑀸𑀢𑁄𑀢𑀺 ‘𑀆𑀦𑀦𑁆𑀤𑁄’𑀢𑁆𑀯𑁂𑀯 𑀦𑀸𑀫𑀫𑀓𑀁𑀲𑀽’’𑀢𑀺.

𑀢𑀣𑀸𑀬𑁂𑀯 𑀯𑀼𑀢𑁆𑀢𑀁 𑀧𑀧𑀜𑁆𑀘𑀲𑀽𑀤𑀦𑀺𑀬𑀫𑁆𑀧𑀺 𑁋

‘‘𑀅𑀜𑁆𑀜𑁂 𑀧𑀦 𑀯𑀤𑀦𑁆𑀢𑀺 𑁋 𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑀸 𑀲𑀳𑀚𑀸𑀢𑁄, 𑀯𑀬𑀲𑀸 𑀘 𑀘𑀽𑀴𑀧𑀺𑀢𑀼𑀧𑀼𑀢𑁆𑀢𑀢𑀸𑀬 ¶ 𑀘 𑀪𑀕𑀯𑀢𑁄 𑀓𑀦𑀺𑀝𑁆𑀞𑀪𑀸𑀢𑀸𑀬𑁂𑀯. 𑀢𑀣𑀸 𑀳𑀺 𑀫𑀦𑁄𑀭𑀣𑀧𑀽𑀭𑀡𑀺𑀬𑀁 𑀏𑀓𑀦𑀺𑀧𑀸𑀢𑀯𑀡𑁆𑀡𑀦𑀸𑀬𑀁 𑀲𑀳𑀚𑀸𑀢𑀕𑀡𑀦𑁂 𑀲𑁄 𑀦 𑀯𑀼𑀢𑁄’’𑀢𑀺.

𑀬𑀁 𑀯𑀼𑀘𑁆𑀘𑀢𑀺, 𑀢𑀁 𑀕𑀳𑁂𑀢𑀩𑁆𑀩𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀯𑀺𑀲𑁆𑀲𑀢𑁆𑀣𑀸𑀤𑀺𑀪𑀸𑀯𑁂 𑀲𑀢𑀺. 𑀅𑀢𑀺𑀯𑀺𑀲𑁆𑀲𑀢𑁆𑀣𑀲𑀓𑁆𑀬𑀓𑀼𑀮𑀧𑁆𑀧𑀲𑀼𑀢𑀢𑀣𑀸𑀕𑀢𑀪𑀸𑀢𑀼𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑁂 𑀳𑀺 𑀓𑀢𑁆𑀣𑀘𑀺 𑀳𑁂𑀢𑁆𑀯𑀢𑁆𑀣𑁄 𑀲𑀫𑁆𑀧𑀚𑁆𑀚𑀢𑀺. 𑀢𑀣𑀸 𑀳𑀺 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀦𑁂𑀢𑁆𑀢𑀺𑀝𑁆𑀞𑀓𑀣𑀸𑀬𑀁 ‘‘𑀕𑀼𑀦𑁆𑀦𑀜𑁆𑀘𑁂 𑀢𑀭𑀫𑀸𑀦𑀸𑀦’’𑀦𑁆𑀢𑀺 𑀕𑀸𑀣𑀸𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀁 𑁋

‘‘𑀲𑀩𑁆𑀩𑀸 𑀢𑀸 𑀚𑀺𑀫𑁆𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀲𑀩𑁆𑀩𑀸 𑀢𑀸 𑀕𑀸𑀯𑀺𑀬𑁄 𑀓𑀼𑀝𑀺𑀮𑀫𑁂𑀯 𑀕𑀘𑁆𑀙𑀦𑁆𑀢𑀺, 𑀓𑀲𑁆𑀫𑀸? 𑀦𑁂𑀢𑁆𑀢𑁂 𑀚𑀺𑀫𑁆𑀳𑀕𑀢𑁂 𑀲𑀢𑀺 𑀦𑁂𑀢𑁆𑀢𑁂 𑀓𑀼𑀝𑀺𑀮𑀁 𑀕𑀢𑁂 𑀲𑀢𑀺, 𑀦𑁂𑀢𑁆𑀢𑀲𑁆𑀲 𑀓𑀼𑀝𑀺𑀮𑀁 𑀕𑀢𑀢𑁆𑀢𑀸𑀢𑀺 𑀅𑀢𑁆𑀣𑁄’’𑀢𑀺.

𑀉𑀤𑀸𑀦𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀇𑀢𑀺 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀻’’𑀢𑀺 𑀲𑀼𑀢𑁆𑀢𑀧𑀤𑀯𑀡𑁆𑀡𑀦𑀸𑀬𑀁 ‘‘𑀳𑁂𑀢𑀼𑀅𑀢𑁆𑀣𑀢𑀸 𑀪𑀼𑀫𑁆𑀫𑀯𑀘𑀦𑀲𑁆𑀲 𑀓𑀸𑀭𑀡𑀲𑁆𑀲 𑀪𑀸𑀯𑁂𑀦 𑀢𑀤𑀯𑀺𑀦𑀸𑀪𑀸𑀯𑀻 𑀨𑀮𑀲𑁆𑀲 𑀪𑀸𑀯𑁄 𑀮𑀓𑁆𑀔𑀻𑀬𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺 (𑀉𑀤𑀸. 𑀅𑀝𑁆𑀞. 𑁧.𑁧). 𑀢𑀢𑁆𑀣𑀸𑀢𑀺 𑀯𑀸 𑀦𑀺𑀫𑀺𑀢𑁆𑀢𑀪𑀽𑀢𑁂 𑀯𑀺𑀲𑁆𑀲𑀢𑁆𑀣𑀸𑀤𑀺𑀫𑁆𑀳𑀻𑀢𑀺 𑀅𑀢𑁆𑀣𑁄, 𑀢𑀲𑁆𑀫𑀺𑀁 𑀉𑀘𑁆𑀘𑀺𑀦𑀦𑁂𑀢𑀺𑀧𑀺 𑀯𑀤𑀦𑁆𑀢𑀺. 𑀙𑀦𑁆𑀤𑀸𑀕𑀫𑀦𑀁 𑀯𑀺𑀬𑀸𑀢𑀺 𑀏𑀢𑁆𑀣 𑀙𑀦𑁆𑀤𑀸 𑀆𑀕𑀫𑀦𑀁 𑀯𑀺𑀬𑀸𑀢𑀺 𑀧𑀤𑀘𑁆𑀙𑁂𑀤𑁄. 𑀙𑀦𑁆𑀤𑀸𑀢𑀺 𑀘 𑀳𑁂𑀢𑀼𑀫𑁆𑀳𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁, 𑀙𑀦𑁆𑀤𑁂𑀦 𑀆𑀕𑀫𑀦𑀁 𑀧𑀯𑀢𑁆𑀢𑀦𑀁 𑀯𑀺𑀬𑀸𑀢𑀺 𑀅𑀢𑁆𑀣𑁄, 𑀙𑀦𑁆𑀤𑁂𑀦 𑀅𑀓𑀢𑁆𑀢𑀩𑁆𑀩𑀓𑀭𑀡𑀫𑀺𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀙𑀦𑁆𑀤𑀁 𑀯𑀸 𑀆𑀕𑀘𑁆𑀙𑀢𑀺 𑀲𑀫𑁆𑀧𑀬𑁄𑀕𑀯𑀲𑁂𑀦𑀸𑀢𑀺 𑀙𑀦𑁆𑀤𑀸𑀕𑀫𑀦𑀁, 𑀢𑀣𑀸 𑀧𑀯𑀢𑁆𑀢𑁄 𑀅𑀧𑀸𑀬𑀕𑀫𑀦𑀻𑀬𑁄 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀅𑀣 𑀯𑀸 𑀅𑀦𑀦𑀼𑀭𑀽𑀧𑀁 𑀕𑀫𑀦𑀁 𑀅𑀕𑀫𑀦𑀁. 𑀙𑀦𑁆𑀤𑁂𑀦 𑀅𑀕𑀫𑀦𑀁 𑀙𑀦𑁆𑀤𑀸𑀕𑀫𑀦𑀁, 𑀙𑀦𑁆𑀤𑁂𑀦 𑀲𑀺𑀦𑁂𑀳𑁂𑀦 𑀅𑀦𑀦𑀼𑀭𑀽𑀧𑀁 𑀕𑀫𑀦𑀁 𑀧𑀯𑀢𑁆𑀢𑀦𑀁 𑀯𑀺𑀬 𑀅𑀓𑀢𑁆𑀢𑀩𑁆𑀩𑀓𑀭𑀡𑀁 𑀯𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀲𑁂𑀓𑁆𑀔𑀪𑀽𑀢𑀸 𑀧𑀝𑀺𑀲𑀫𑁆𑀪𑀺𑀤𑀸, 𑀢𑀁𑀧𑀢𑁆𑀢𑀸𑀢𑀺 ¶ 𑀢𑀣𑀸, 𑀅𑀲𑁂𑀓𑁆𑀔𑀸 𑀘 𑀢𑁂 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀸 𑀘𑀸𑀢𑀺 𑀯𑀸 𑀢𑀣𑀸, 𑀢𑀸𑀤𑀺𑀲𑁂. 𑀲𑁂𑀓𑁆𑀔𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲 𑀦𑀬𑁄. 𑀧𑀭𑀺𑀯𑀚𑁆𑀚𑁂𑀦𑁆𑀢𑁄𑀢𑀺 𑀳𑁂𑀢𑁆𑀯𑀢𑁆𑀣𑁂 𑀅𑀦𑁆𑀢𑀲𑀤𑁆𑀤𑁄, 𑀧𑀭𑀺𑀯𑀚𑁆𑀚𑀦𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀅𑀦𑀼𑀫𑀢𑀺𑀬𑀸𑀢𑀺 𑀅𑀦𑀼𑀜𑁆𑀜𑀸𑀬, 𑀬𑀸𑀘𑀦𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀓𑀺𑀜𑁆𑀘𑀸𑀧𑀺 𑀲𑁂𑀓𑁆𑀔𑁄’’𑀢𑀺 𑀇𑀤𑀁 𑀅𑀲𑁂𑀓𑁆𑀔𑀸𑀦𑀁𑀬𑁂𑀯 𑀉𑀘𑁆𑀘𑀺𑀦𑀺𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀦 𑀲𑁂𑀓𑁆𑀔𑀸𑀦𑀁 𑀅𑀕𑀢𑀺𑀕𑀫𑀦𑀲𑀫𑁆𑀪𑀯𑁂𑀦. 𑀧𑀞𑀫𑀫𑀕𑁆𑀕𑁂𑀦𑁂𑀯 𑀳𑀺 𑀘𑀢𑁆𑀢𑀸𑀭𑀺 𑀅𑀕𑀢𑀺𑀕𑀫𑀦𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀢𑀲𑁆𑀫𑀸 𑀓𑀺𑀜𑁆𑀘𑀸𑀧𑀺 𑀲𑁂𑀓𑁆𑀔𑁄, 𑀢𑀣𑀸𑀧𑀺 𑀣𑁂𑀭𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀉𑀘𑁆𑀘𑀺𑀦𑀢𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀦 𑀧𑀦 𑀓𑀺𑀜𑁆𑀘𑀸𑀧𑀺 𑀲𑁂𑀓𑁆𑀔𑁄, 𑀢𑀣𑀸𑀧𑀺 𑀅𑀪𑀩𑁆𑀩𑁄 𑀅𑀕𑀢𑀺𑀁 𑀕𑀦𑁆𑀢𑀼𑀦𑁆𑀢𑀺. ‘‘𑀅𑀪𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀧𑀦 𑀥𑀫𑁆𑀫𑀲𑀗𑁆𑀕𑀻𑀢𑀺𑀬𑀸 𑀢𑀲𑁆𑀲 𑀅𑀭𑀳𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀚𑁆𑀚𑀫𑀸𑀦𑀕𑀼𑀡𑁂 𑀓𑀣𑁂𑀢𑀺, 𑀢𑁂𑀦 𑀲𑀗𑁆𑀕𑀻𑀢𑀺𑀬𑀸 𑀥𑀫𑁆𑀫𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀲𑀫𑁆𑀧𑀢𑁆𑀢𑁂 𑀙𑀦𑁆𑀤𑀸𑀤𑀺𑀯𑀲𑁂𑀦 𑀅𑀜𑁆𑀜𑀣𑀸 ¶ 𑀅𑀓𑀣𑁂𑀢𑁆𑀯𑀸 𑀬𑀣𑀸𑀪𑀽𑀢𑀫𑁂𑀯 𑀓𑀣𑁂𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀦 𑀕𑀦𑁆𑀢𑀩𑁆𑀩𑀸, 𑀅𑀦𑀦𑀼𑀭𑀽𑀧𑀸 𑀯𑀸 𑀕𑀢𑀻𑀢𑀺 𑀅𑀕𑀢𑀺, 𑀢𑀁. 𑀧𑀭𑀺𑀬𑀢𑁆𑀢𑁄𑀢𑀺 𑀅𑀥𑀺𑀕𑀢𑁄 𑀉𑀕𑁆𑀕𑀳𑀺𑀢𑁄.

‘‘𑀏𑀯’’𑀦𑁆𑀢𑀺𑀆𑀤𑀺𑀦𑀸 𑀲𑀦𑁆𑀦𑀺𑀝𑁆𑀞𑀸𑀦𑀕𑀡𑀦𑀁 𑀤𑀲𑁆𑀲𑁂𑀢𑀺. 𑀉𑀘𑁆𑀘𑀺𑀦𑀺𑀢𑁂𑀦𑀸𑀢𑀺 𑀉𑀘𑁆𑀘𑀺𑀦𑀺𑀢𑁆𑀯𑀸 𑀕𑀳𑀺𑀢𑁂𑀦. 𑀅𑀧𑀺𑀘 𑀏𑀯𑀁…𑀧𑁂… 𑀉𑀘𑁆𑀘𑀺𑀦𑀻𑀢𑀺 𑀦𑀺𑀕𑀫𑀦𑀁, ‘‘𑀢𑁂𑀦𑀸𑀬𑀲𑁆𑀫𑀢𑀸’’𑀢𑀺𑀆𑀤𑀺 𑀧𑀦 𑀲𑀦𑁆𑀦𑀺𑀝𑁆𑀞𑀸𑀦𑀕𑀡𑀦𑀤𑀲𑁆𑀲𑀦𑀦𑁆𑀢𑀺𑀧𑀺 𑀯𑀤𑀦𑁆𑀢𑀺.

𑀏𑀯𑀁 𑀲𑀗𑁆𑀕𑀸𑀬𑀓𑀯𑀺𑀘𑀺𑀦𑀦𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀅𑀜𑁆𑀜𑀫𑁆𑀧𑀺 𑀲𑀗𑁆𑀕𑀸𑀬𑀦𑀢𑁆𑀣𑀁 𑀤𑁂𑀲𑀯𑀺𑀘𑀺𑀦𑀦𑀸𑀤𑀺𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀔𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀢𑀤𑀳𑁄𑀲𑀻𑀢𑀺 𑀏𑀢𑀁 𑀧𑀭𑀺𑀯𑀺𑀢𑀓𑁆𑀓𑀦𑀁 𑀅𑀳𑁄𑀲𑀺. 𑀦𑀼-𑀲𑀤𑁆𑀤𑁂𑀦 𑀳𑀺 𑀧𑀭𑀺𑀯𑀺𑀢𑀓𑁆𑀓𑀦𑀁 𑀤𑀲𑁆𑀲𑁂𑀢𑀺. 𑀭𑀸𑀚𑀕𑀳𑀦𑁆𑀢𑀺 ‘‘𑀭𑀸𑀚𑀕𑀳𑀲𑀸𑀫𑀦𑁆𑀢𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂𑀲𑀼 𑀯𑀤𑀦𑁆𑀢𑀺. 𑀕𑀸𑀯𑁄 𑀘𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑁄𑀘𑀭𑁄, 𑀕𑀼𑀦𑁆𑀦𑀁 𑀘𑀭𑀡𑀝𑁆𑀞𑀸𑀦𑀁, 𑀲𑁄 𑀯𑀺𑀬𑀸𑀢𑀺 𑀕𑁄𑀘𑀭𑁄, 𑀪𑀺𑀓𑁆𑀔𑀽𑀦𑀁 𑀘𑀭𑀡𑀝𑁆𑀞𑀸𑀦𑀁, 𑀫𑀳𑀦𑁆𑀢𑁄 𑀲𑁄 𑀅𑀲𑁆𑀲, 𑀏𑀢𑁆𑀣𑀸𑀢𑀺 𑀯𑀸 𑀫𑀳𑀸𑀕𑁄𑀘𑀭𑀁. 𑀅𑀝𑁆𑀞𑀸𑀭𑀲𑀦𑁆𑀦𑀁 𑀫𑀳𑀸𑀯𑀺𑀳𑀸𑀭𑀸𑀦𑀫𑁆𑀧𑀺 𑀅𑀢𑁆𑀣𑀺𑀢𑀸𑀬 𑀧𑀳𑀽𑀢𑀲𑁂𑀦𑀸𑀲𑀦𑀁.

𑀣𑀸𑀯𑀭𑀓𑀫𑁆𑀫𑀦𑁆𑀢𑀺 𑀘𑀺𑀭𑀝𑁆𑀞𑀸𑀬𑀺𑀓𑀫𑁆𑀫𑀁. 𑀯𑀺𑀲𑀪𑀸𑀕𑀧𑀼𑀕𑁆𑀕𑀮𑁄 𑀲𑀼𑀪𑀤𑁆𑀤𑀲𑀤𑀺𑀲𑁄. 𑀉𑀓𑁆𑀓𑁄𑀝𑁂𑀬𑁆𑀬𑀸𑀢𑀺 𑀦𑀺𑀯𑀸𑀭𑁂𑀬𑁆𑀬. 𑀇𑀢𑀺-𑀲𑀤𑁆𑀤𑁄 𑀇𑀤𑀫𑀢𑁆𑀣𑁂, 𑀇𑀫𑀺𑀦𑀸 𑀫𑀦𑀲𑀺𑀓𑀸𑀭𑁂𑀦 𑀳𑁂𑀢𑀼𑀪𑀽𑀢𑁂𑀦 𑀏𑀢𑀤𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀕𑀭𑀼𑀪𑀸𑀯𑀚𑀦𑀦𑀢𑁆𑀣𑀁 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦 𑀲𑀗𑁆𑀖𑀁 𑀲𑀸𑀯𑁂𑀲𑀺, 𑀦 𑀅𑀧𑀮𑁄𑀓𑀦𑀜𑀢𑁆𑀢𑀺𑀓𑀫𑁆𑀫𑀫𑀢𑁆𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑀤𑀸 𑀧𑀦𑀸𑀬𑀁 𑀓𑀢𑀸𑀢𑀺 𑀆𑀳 ‘‘𑀅𑀬𑀁 𑀧𑀦𑀸’’𑀢𑀺𑀆𑀤𑀺. 𑀏𑀯𑀁 𑀓𑀢𑀪𑀸𑀯𑁄 𑀘 𑀇𑀫𑀸𑀬 𑀕𑀡𑀦𑀸𑀬 𑀯𑀺𑀜𑁆𑀜𑀸𑀬𑀢𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀪𑀕𑀯𑀸 𑀳𑀻’’𑀢𑀺𑀆𑀤𑀺𑀦𑀸. 𑀅𑀣𑀸𑀢𑀺 𑀅𑀦𑀦𑁆𑀢𑀭𑀢𑁆𑀣𑁂 𑀦𑀺𑀧𑀸𑀢𑁄, 𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀭𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀲𑀢𑁆𑀢𑀸𑀳𑀦𑁆𑀢𑀺 ¶ 𑀳𑀺 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑀫𑁆𑀧𑀺 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀲𑁆𑀲𑀸𑀢𑀺 𑀪𑀕𑀯𑀢𑁄, ‘‘𑀲𑀭𑀻𑀭’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀲𑀁𑀯𑁂𑀕𑀯𑀢𑁆𑀣𑀼𑀁 𑀓𑀺𑀢𑁆𑀢𑁂𑀢𑁆𑀯𑀸 𑀓𑀺𑀢𑁆𑀢𑁂𑀢𑁆𑀯𑀸 𑀅𑀦𑀺𑀘𑁆𑀘𑀢𑀸𑀧𑀝𑀺𑀲𑀜𑁆𑀜𑀼𑀢𑁆𑀢𑀸𑀦𑀺 𑀕𑀻𑀢𑀸𑀦𑀺 𑀕𑀸𑀬𑀺𑀢𑁆𑀯𑀸 𑀧𑀽𑀚𑀸𑀯𑀲𑁂𑀦 𑀓𑀻𑀴𑀦𑀢𑁄 𑀲𑀼𑀦𑁆𑀤𑀭𑀁 𑀓𑀻𑀴𑀦𑀤𑀺𑀯𑀲𑀸 𑀲𑀸𑀥𑀼𑀓𑀻𑀴𑀦𑀤𑀺𑀯𑀲𑀸 𑀦𑀸𑀫, 𑀲𑀧𑀭𑀳𑀺𑀢𑀲𑀸𑀥𑀦𑀝𑁆𑀞𑁂𑀦 𑀯𑀸 𑀲𑀸𑀥𑀽𑀢𑀺 𑀯𑀼𑀢𑁆𑀢𑀸𑀦𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀲𑀁𑀯𑁂𑀕𑀯𑀢𑁆𑀣𑀼𑀁 𑀓𑀺𑀢𑁆𑀢𑁂𑀢𑁆𑀯𑀸 𑀓𑀺𑀢𑁆𑀢𑁂𑀢𑁆𑀯𑀸 𑀓𑀻𑀴𑀦𑀤𑀺𑀯𑀲𑀸𑀢𑀺𑀧𑀺 𑀬𑀼𑀚𑁆𑀚𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀧𑀼𑀭𑀺𑀫𑀲𑀢𑁆𑀢𑀸𑀳𑁂 𑀏𑀓𑀤𑁂𑀲𑁂𑀦𑁂𑀯 𑀲𑀸𑀥𑀼𑀓𑀻𑀴𑀦𑀫𑀓𑀁𑀲𑀼. 𑀯𑀺𑀲𑁂𑀲𑀢𑁄 𑀧𑀦 𑀥𑀸𑀢𑀼𑀧𑀽𑀚𑀸𑀤𑀺𑀯𑀲𑁂𑀲𑀼𑀬𑁂𑀯. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁨𑁩𑁫) 𑁋

‘‘𑀇𑀢𑁄 𑀧𑀼𑀭𑀺𑀫𑁂𑀲𑀼 𑀳𑀺 𑀤𑁆𑀯𑀻𑀲𑀼 𑀲𑀢𑁆𑀢𑀸𑀳𑁂𑀲𑀼 𑀢𑁂 𑀪𑀺𑀓𑁆𑀔𑀽 𑀲𑀗𑁆𑀖𑀲𑁆𑀲 𑀞𑀸𑀦𑀦𑀺𑀲𑀚𑁆𑀚𑁄𑀓𑀸𑀲𑀁 𑀓𑀭𑁄𑀦𑁆𑀢𑀸 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀲𑀁𑀯𑀺𑀤𑀳𑀦𑁆𑀢𑀸 𑀲𑀸𑀥𑀼𑀓𑀻𑀴𑀺𑀓𑀸𑀬 𑀑𑀓𑀸𑀲𑀁 𑀦 𑀮𑀪𑀺𑀁𑀲𑀼, 𑀢𑀢𑁄 𑀦𑁂𑀲𑀁 ¶ 𑀅𑀳𑁄𑀲𑀺 ‘𑀇𑀫𑀁 𑀲𑀢𑁆𑀢𑀸𑀳𑀁 𑀲𑀸𑀥𑀼𑀓𑀻𑀴𑀺𑀢𑀁 𑀓𑀻𑀴𑀺𑀲𑁆𑀲𑀸𑀫, 𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀅𑀫𑁆𑀳𑀸𑀓𑀁 𑀧𑀫𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀓𑁄𑀘𑀺𑀤𑁂𑀯 𑀆𑀕𑀦𑁆𑀢𑁆𑀯𑀸 𑀥𑀸𑀢𑀼𑀬𑁄 𑀕𑀡𑁆𑀳𑁂𑀬𑁆𑀬, 𑀢𑀲𑁆𑀫𑀸 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀓𑀻𑀴𑀺𑀲𑁆𑀲𑀸𑀫𑀸’𑀢𑀺, 𑀢𑁂𑀦 𑀢𑁂 𑀏𑀯𑀫𑀓𑀁𑀲𑀽’’𑀢𑀺.

𑀢𑀣𑀸𑀧𑀺 𑀢𑁂 𑀥𑀸𑀢𑀼𑀧𑀽𑀚𑀸𑀬𑀧𑀺 𑀓𑀢𑀢𑁆𑀢𑀸 𑀥𑀸𑀢𑀼𑀧𑀽𑀚𑀸𑀤𑀺𑀯𑀲𑀸 𑀦𑀸𑀫. 𑀇𑀫𑁂𑀬𑁂𑀯 𑀯𑀺𑀲𑁂𑀲𑁂𑀦 𑀪𑀕𑀯𑀢𑀺 𑀓𑀢𑁆𑀢𑀩𑁆𑀩𑀲𑁆𑀲 𑀅𑀜𑁆𑀜𑀲𑁆𑀲 𑀅𑀪𑀸𑀯𑀢𑁄 𑀏𑀓𑀤𑁂𑀲𑁂𑀦 𑀓𑀢𑀫𑁆𑀧𑀺 𑀲𑀸𑀥𑀼𑀓𑀻𑀴𑀦𑀁 𑀉𑀧𑀸𑀤𑀸𑀬 ‘‘𑀲𑀸𑀥𑀼𑀓𑀻𑀴𑀦𑀤𑀺𑀯𑀲𑀸’’𑀢𑀺 𑀧𑀸𑀓𑀝𑀸 𑀚𑀸𑀢𑀸𑀢𑀺 𑀆𑀳 ‘‘𑀏𑀯𑀁 𑀲𑀢𑁆𑀢𑀸𑀳𑀁 𑀲𑀸𑀥𑀼𑀓𑀻𑀴𑀦𑀤𑀺𑀯𑀲𑀸 𑀦𑀸𑀫 𑀅𑀳𑁂𑀲𑀼’’𑀦𑁆𑀢𑀺.

𑀘𑀺𑀢𑀓𑀸𑀬𑀸𑀢𑀺 𑀯𑀻𑀲𑀲𑀢𑀭𑀢𑀦𑀼𑀘𑁆𑀘𑀸𑀬 𑀘𑀦𑁆𑀤𑀦𑀤𑀸𑀭𑀼𑀘𑀺𑀢𑀓𑀸𑀬, 𑀧𑀥𑀸𑀦𑀓𑀺𑀘𑁆𑀘𑀯𑀲𑁂𑀦𑁂𑀯 𑀘 𑀲𑀢𑁆𑀢𑀸𑀳𑀁 𑀘𑀺𑀢𑀓𑀸𑀬𑀁 𑀅𑀕𑁆𑀕𑀺𑀦𑀸 𑀛𑀸𑀬𑀻𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀯𑀲𑁂𑀦 𑀦𑀺𑀭𑀦𑁆𑀢𑀭𑀁 𑀲𑀢𑁆𑀢𑀸𑀳𑀫𑁂𑀯 𑀅𑀕𑁆𑀕𑀺𑀦𑀸 𑀛𑀸𑀬𑀺 𑀢𑀢𑁆𑀣 𑀧𑀘𑁆𑀙𑀺𑀫𑀤𑀺𑀯𑀲𑁂𑀬𑁂𑀯 𑀛𑀸𑀬𑀺𑀢𑀢𑁆𑀢𑀸, 𑀢𑀲𑁆𑀫𑀸 𑀲𑀢𑁆𑀢𑀸𑀳𑀲𑁆𑀫𑀺𑀦𑁆𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦𑀜𑁆𑀳𑀺 𑀤𑁆𑀯𑀺𑀦𑁆𑀦𑀁 𑀲𑀢𑁆𑀢𑀸𑀳𑀸𑀦𑀫𑀦𑁆𑀢𑀭𑁂 𑀲𑀢𑁆𑀢𑀸𑀳𑁂 𑀬𑀢𑁆𑀣 𑀓𑀢𑁆𑀣𑀘𑀺𑀧𑀺 𑀤𑀺𑀯𑀲𑁂 𑀛𑀸𑀬𑀫𑀸𑀦𑁂 𑀲𑀢𑀺 ‘‘𑀲𑀢𑁆𑀢𑀸𑀳𑁂 𑀛𑀸𑀬𑀻’’𑀢𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺. 𑀬𑀣𑀸𑀳 𑁋

‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀘𑀢𑁆𑀢𑀸𑀭𑁄 𑀫𑀮𑁆𑀮𑀧𑀸𑀫𑁄𑀓𑁆𑀔𑀸 𑀲𑀻𑀲𑀁 𑀦𑁆𑀳𑀸𑀢𑀸 𑀅𑀳𑀢𑀸𑀦𑀺 𑀯𑀢𑁆𑀣𑀸𑀦𑀺 𑀦𑀺𑀯𑀢𑁆𑀣𑀸 ‘𑀫𑀬𑀁 𑀪𑀕𑀯𑀢𑁄 𑀘𑀺𑀢𑀓𑀁 𑀆𑀴𑀺𑀫𑁆𑀧𑁂𑀲𑁆𑀲𑀸𑀫𑀸’𑀢𑀺 𑀦 𑀲𑀓𑁆𑀓𑁄𑀦𑁆𑀢𑀺 𑀆𑀴𑀺𑀫𑁆𑀧𑁂𑀢𑀼’’𑀦𑁆𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁨𑁩𑁩).

𑀲𑀢𑁆𑀢𑀺𑀧𑀜𑁆𑀚𑀭𑀁 ¶ 𑀓𑀢𑁆𑀯𑀸𑀢𑀺 𑀲𑀢𑁆𑀢𑀺𑀔𑀕𑁆𑀕𑀸𑀤𑀺𑀳𑀢𑁆𑀣𑁂𑀳𑀺 𑀧𑀼𑀭𑀺𑀲𑁂𑀳𑀺 𑀫𑀮𑁆𑀮𑀭𑀸𑀚𑀽𑀦𑀁 𑀪𑀕𑀯𑀢𑁄 𑀥𑀸𑀢𑀼𑀆𑀭𑀓𑁆𑀔𑀓𑀭𑀡𑀁 𑀉𑀧𑀮𑀓𑁆𑀔𑀡𑀯𑀲𑁂𑀦𑀸𑀳. 𑀲𑀢𑁆𑀢𑀺𑀳𑀢𑁆𑀣𑀸 𑀧𑀼𑀭𑀺𑀲𑀸 𑀳𑀺 𑀲𑀢𑁆𑀢𑀺𑀬𑁄 𑀬𑀣𑀸 ‘‘𑀓𑀼𑀦𑁆𑀢𑀸 𑀧𑀘𑀭𑀦𑁆𑀢𑀻’’𑀢𑀺, 𑀢𑀸𑀳𑀺 𑀲𑀫𑀦𑁆𑀢𑀢𑁄 𑀭𑀓𑁆𑀔𑀸𑀧𑀦𑀯𑀲𑁂𑀦 𑀧𑀜𑁆𑀚𑀭𑀧𑀝𑀺𑀪𑀸𑀕𑀢𑁆𑀢𑀸 𑀲𑀢𑁆𑀢𑀺𑀧𑀜𑁆𑀚𑀭𑀁. 𑀲𑀦𑁆𑀥𑀸𑀕𑀸𑀭𑀁 𑀦𑀸𑀫 𑀭𑀸𑀚𑀽𑀦𑀁 𑀏𑀓𑀸 𑀫𑀳𑀸𑀲𑀸𑀮𑀸. 𑀉𑀬𑁆𑀬𑁄𑀕𑀓𑀸𑀮𑀸𑀤𑀻𑀲𑀼 𑀳𑀺 𑀭𑀸𑀚𑀸𑀦𑁄 𑀢𑀢𑁆𑀣 𑀞𑀢𑁆𑀯𑀸 ‘‘𑀏𑀢𑁆𑀢𑀓𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀼, 𑀏𑀢𑁆𑀢𑀓𑀸 𑀧𑀘𑁆𑀙𑀢𑁄, 𑀏𑀢𑁆𑀢𑀓𑀸 𑀉𑀪𑁄𑀳𑀺 𑀧𑀲𑁆𑀲𑁂𑀳𑀺, 𑀏𑀢𑁆𑀢𑀓𑀸 𑀳𑀢𑁆𑀣𑀻𑀲𑀼 𑀅𑀪𑀺𑀭𑀼𑀳𑀦𑁆𑀢𑀼, 𑀏𑀢𑁆𑀢𑀓𑀸 𑀅𑀲𑁆𑀲𑁂𑀲𑀼, 𑀏𑀢𑁆𑀢𑀓𑀸 𑀭𑀣𑁂𑀲𑀽’’𑀢𑀺 𑀏𑀯𑀁 𑀲𑀦𑁆𑀥𑀺𑀁 𑀓𑀭𑁄𑀦𑁆𑀢𑀺 𑀫𑀭𑀺𑀬𑀸𑀤𑀁 𑀩𑀦𑁆𑀥𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀞𑀸𑀦𑀁 ‘‘𑀲𑀦𑁆𑀥𑀸𑀕𑀸𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀧𑀺𑀘 𑀉𑀬𑁆𑀬𑁄𑀕𑀝𑁆𑀞𑀸𑀦𑀢𑁄 𑀆𑀕𑀦𑁆𑀢𑁆𑀯𑀸𑀧𑀺 𑀬𑀸𑀯 𑀕𑁂𑀳𑁂𑀲𑀼 𑀅𑀮𑁆𑀮𑀕𑁄𑀫𑀬𑀧𑀭𑀺𑀪𑀡𑁆𑀟𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀢𑀸𑀯 𑀤𑁆𑀯𑁂 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀭𑀸𑀚𑀸𑀦𑁄 𑀢𑀢𑁆𑀣 𑀲𑀦𑁆𑀣𑀫𑁆𑀪𑀦𑁆𑀢𑀺 𑀯𑀺𑀲𑁆𑀲𑀫𑀦𑁆𑀢𑀺 𑀧𑀭𑀺𑀲𑁆𑀲𑀬𑀁 𑀯𑀺𑀦𑁄𑀤𑁂𑀦𑁆𑀢𑀻𑀢𑀺𑀧𑀺 𑀲𑀦𑁆𑀥𑀸𑀕𑀸𑀭𑀁, 𑀭𑀸𑀚𑀽𑀦𑀁 𑀯𑀸 𑀲𑀳 𑀅𑀢𑁆𑀣𑀸𑀦𑀼𑀲𑀸𑀲𑀦𑀁 𑀅𑀕𑀸𑀭𑀦𑁆𑀢𑀺𑀧𑀺 𑀲𑀦𑁆𑀥𑀸𑀕𑀸𑀭𑀁 𑀳-𑀓𑀸𑀭𑀲𑁆𑀲 𑀥-𑀓𑀸𑀭𑀁, 𑀅𑀦𑀼𑀲𑀭𑀸𑀕𑀫𑀜𑁆𑀘 𑀓𑀢𑁆𑀯𑀸, 𑀬𑀲𑁆𑀫𑀸 𑀯𑀸 𑀭𑀸𑀚𑀸𑀦𑁄 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀓𑀲𑀺𑀢𑀼𑀁 𑀯𑀝𑁆𑀝𑀢𑀺, 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀯𑀧𑀺𑀢𑀼’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀖𑀭𑀸𑀯𑀸𑀲𑀓𑀺𑀘𑁆𑀘𑀸𑀦𑀺 𑀲𑀫𑁆𑀫𑀦𑁆𑀢𑀬𑀦𑁆𑀢𑀺, 𑀢𑀲𑁆𑀫𑀸 𑀙𑀺𑀦𑁆𑀦𑀯𑀺𑀘𑁆𑀙𑀺𑀦𑁆𑀦𑀁 𑀖𑀭𑀸𑀯𑀸𑀲𑀁 𑀢𑀢𑁆𑀣 𑀲𑀦𑁆𑀥𑀸𑀭𑁂𑀦𑁆𑀢𑀻𑀢𑀺𑀧𑀺 𑀲𑀦𑁆𑀥𑀸𑀕𑀸𑀭𑀁. 𑀯𑀺𑀲𑀸𑀔𑀧𑀼𑀡𑁆𑀡𑀫𑀺𑀢𑁄 ¶ 𑀧𑀝𑁆𑀞𑀸𑀬 𑀬𑀸𑀯 𑀯𑀺𑀲𑀸𑀔𑀫𑀸𑀲𑀲𑁆𑀲 𑀅𑀫𑀸𑀯𑀸𑀲𑀻, 𑀢𑀸𑀯 𑀲𑁄𑀴𑀲 𑀤𑀺𑀯𑀲𑀸 𑀲𑀻𑀳𑀴𑀯𑁄𑀳𑀸𑀭𑀯𑀲𑁂𑀦 𑀕𑀳𑀺𑀢𑀢𑁆𑀢𑀸, 𑀚𑁂𑀝𑁆𑀞𑀫𑀽𑀮𑀫𑀸𑀲𑀲𑁆𑀲 𑀲𑀼𑀓𑁆𑀓𑀧𑀓𑁆𑀔𑁂 𑀘 𑀧𑀜𑁆𑀘 𑀤𑀺𑀯𑀲𑀸𑀢𑀺 𑀆𑀳 ‘‘𑀇𑀢𑀺 𑀏𑀓𑀯𑀻𑀲𑀢𑀺 𑀤𑀺𑀯𑀲𑀸 𑀕𑀢𑀸’’𑀢𑀺. 𑀢𑀢𑁆𑀣 𑀘𑀭𑀺𑀫𑀤𑀺𑀯𑀲𑁂𑀬𑁂𑀯 𑀥𑀸𑀢𑀼𑀬𑁄 𑀪𑀸𑀚𑀬𑀺𑀁𑀲𑀼, 𑀢𑀲𑁆𑀫𑀺𑀁𑀬𑁂𑀯 𑀘 𑀤𑀺𑀯𑀲𑁂 𑀅𑀬𑀁 𑀓𑀫𑁆𑀫𑀯𑀸𑀘𑀸 𑀓𑀢𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀚𑁂𑀝𑁆𑀞𑀫𑀽𑀮𑀲𑀼𑀓𑁆𑀓𑀧𑀓𑁆𑀔𑀧𑀜𑁆𑀘𑀫𑀺𑀬’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀚𑁂𑀝𑁆𑀞𑀦𑀓𑁆𑀔𑀢𑁆𑀢𑀁 𑀯𑀸 𑀫𑀽𑀮𑀦𑀓𑁆𑀔𑀢𑁆𑀢𑀁 𑀯𑀸 𑀢𑀲𑁆𑀲 𑀫𑀸𑀲𑀲𑁆𑀲 𑀧𑀼𑀡𑁆𑀡𑀫𑀺𑀬𑀁 𑀘𑀦𑁆𑀤𑁂𑀦 𑀬𑀼𑀢𑁆𑀢𑀁, 𑀢𑀲𑁆𑀫𑀸 𑀲𑁄 𑀫𑀸𑀲𑁄 ‘‘𑀚𑁂𑀝𑁆𑀞𑀫𑀽𑀮𑀫𑀸𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀸𑀘𑀸𑀭𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀅𑀦𑀸𑀘𑀸𑀭𑀁.

𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀯𑀺𑀦𑀬𑀝𑁆𑀞𑀓𑀣𑀸𑀬𑀁, (𑀧𑀸𑀭𑀸. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀫𑀗𑁆𑀕𑀮𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀜𑁆𑀘 (𑀔𑀼. 𑀧𑀸. 𑀅𑀝𑁆𑀞. 𑀫𑀗𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸) ‘‘𑀲𑀢𑁆𑀢𑀲𑀼 𑀲𑀸𑀥𑀼𑀓𑀻𑀴𑀦𑀤𑀺𑀯𑀲𑁂𑀲𑀼, 𑀲𑀢𑁆𑀢𑀲𑀼 𑀘 𑀥𑀸𑀢𑀼𑀧𑀽𑀚𑀸𑀤𑀺𑀯𑀲𑁂𑀲𑀼 𑀯𑀻𑀢𑀺𑀯𑀢𑁆𑀢𑁂𑀲𑀽’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀲𑀢𑁆𑀢𑀲𑀼 𑀥𑀸𑀢𑀼𑀧𑀽𑀚𑀸𑀤𑀺𑀯𑀲𑁂𑀲𑀼 𑀕𑀳𑀺𑀢𑁂𑀲𑀼 𑀢𑀤𑀯𑀺𑀦𑀸𑀪𑀸𑀯𑀢𑁄 𑀫𑀚𑁆𑀛𑁂 𑀘𑀺𑀢𑀓𑀸𑀬 𑀛𑀸𑀬𑀦𑀲𑀢𑁆𑀢𑀸𑀳𑀫𑁆𑀧𑀺 𑀕𑀳𑀺𑀢𑀫𑁂𑀯𑀸𑀢𑀺 𑀓𑀢𑁆𑀯𑀸 𑀯𑀺𑀲𑀼𑀁 𑀦 𑀯𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 ‘‘𑀅𑀟𑁆𑀠𑀫𑀸𑀲𑁄 𑀅𑀢𑀺𑀓𑁆𑀓𑀦𑁆𑀢𑁄, 𑀤𑀺𑀬𑀟𑁆𑀠𑀫𑀸𑀲𑁄 𑀲𑁂𑀲𑁄’’𑀢𑀺 𑀘 𑀯𑀼𑀢𑁆𑀢𑀦𑁆𑀢𑀺? 𑀦𑀸𑀬𑀁 𑀤𑁄𑀲𑁄. 𑀅𑀧𑁆𑀧𑀓𑀜𑁆𑀳𑀺 𑀊𑀦𑀫𑀥𑀺𑀓𑀁 𑀯𑀸 𑀕𑀡𑀦𑀽𑀧𑀕𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀅𑀧𑁆𑀧𑀓𑁂𑀦 𑀅𑀥𑀺𑀓𑁄𑀧𑀺 𑀲𑀫𑀼𑀤𑀸𑀬𑁄 𑀅𑀦𑀥𑀺𑀓𑁄 𑀯𑀺𑀬 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀅𑀟𑁆𑀠𑀫𑀸𑀲𑀢𑁄 𑀅𑀥𑀺𑀓𑁂𑀧𑀺 𑀧𑀜𑁆𑀘𑀤𑀺𑀯𑀲𑁂 ‘‘𑀅𑀟𑁆𑀠𑀫𑀸𑀲𑁄 𑀅𑀢𑀺𑀓𑁆𑀓𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁 𑀤𑁆𑀯𑀸𑀲𑀻𑀢𑀺𑀔𑀦𑁆𑀥𑀓𑀯𑀢𑁆𑀢𑀸𑀦𑀁 𑀓𑀢𑁆𑀣𑀘𑀺 ‘‘𑀅𑀲𑀻𑀢𑀺 𑀔𑀦𑁆𑀥𑀓𑀯𑀢𑁆𑀢𑀸𑀦𑀻’’𑀢𑀺 𑀯𑀘𑀦𑀁 𑀯𑀺𑀬, 𑀢𑀣𑀸 𑀅𑀧𑁆𑀧𑀓𑁂𑀦 𑀊𑀦𑁄𑀧𑀺 𑀲𑀫𑀼𑀤𑀸𑀬𑁄 𑀅𑀦𑀽𑀦𑁄 𑀯𑀺𑀬 𑀳𑁄𑀢𑀻𑀢𑀺 ¶ 𑀓𑀢𑁆𑀯𑀸 𑀤𑀺𑀬𑀟𑁆𑀠𑀫𑀸𑀲𑀢𑁄 𑀊𑀦𑁂𑀧𑀺 𑀧𑀜𑁆𑀘𑀤𑀺𑀯𑀲𑁂 ‘‘𑀤𑀺𑀬𑀟𑁆𑀠𑀫𑀸𑀲𑁄 𑀲𑁂𑀲𑁄’’𑀢𑀺 𑀯𑀼𑀢𑁆𑀢𑀁 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀁 (𑀯𑀺𑀪. 𑁩𑁫𑁬) 𑀙𑀫𑀸𑀲𑀢𑁄 𑀊𑀦𑁂𑀧𑀺 𑀅𑀟𑁆𑀠𑀫𑀸𑀲𑁂 ‘‘𑀙𑀫𑀸𑀲𑀁 𑀲𑀚𑁆𑀛𑀸𑀬𑁄 𑀓𑀸𑀢𑀩𑁆𑀩𑁄’’𑀢𑀺 𑀯𑀘𑀦𑀁 𑀯𑀺𑀬, 𑀅𑀜𑁆𑀜𑀣𑀸 𑀅𑀝𑁆𑀞𑀓𑀣𑀸𑀦𑀁 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑁄 𑀲𑀺𑀬𑀸. 𑀅𑀧𑀺𑀘 𑀤𑀻𑀖𑀪𑀸𑀡𑀓𑀸𑀦𑀁 𑀫𑀢𑁂𑀦 𑀢𑀺𑀡𑁆𑀡𑀁 𑀲𑀢𑁆𑀢𑀸𑀳𑀸𑀦𑀁 𑀯𑀲𑁂𑀦 ‘‘𑀏𑀓𑀯𑀻𑀲𑀢𑀺 𑀤𑀺𑀯𑀲𑀸 𑀕𑀢𑀸’’𑀢𑀺 𑀇𑀥 𑀯𑀼𑀢𑁆𑀢𑀁. 𑀯𑀺𑀦𑀬𑀲𑀼𑀢𑁆𑀢𑀦𑀺𑀧𑀸𑀢𑀔𑀼𑀤𑁆𑀤𑀓𑀧𑀸𑀞𑀝𑁆𑀞𑀓𑀣𑀸𑀲𑀼 𑀧𑀦 𑀔𑀼𑀤𑁆𑀤𑀓𑀪𑀸𑀡𑀓𑀸𑀦𑀁 𑀫𑀢𑁂𑀦 𑀏𑀓𑀫𑁂𑀯 𑀛𑀸𑀬𑀦𑀤𑀺𑀯𑀲𑀁 𑀓𑀢𑁆𑀯𑀸 𑀢𑀤𑀯𑀲𑁂𑀲𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑀢𑁆𑀢𑀸𑀳𑀸𑀦𑀁 𑀯𑀲𑁂𑀦 ‘‘𑀅𑀟𑁆𑀠𑀫𑀸𑀲𑁄 𑀅𑀢𑀺𑀓𑁆𑀓𑀦𑁆𑀢𑁄, 𑀤𑀺𑀬𑀟𑁆𑀠𑀫𑀸𑀲𑁄 𑀲𑁂𑀲𑁄’’𑀢𑀺 𑀘 𑀯𑀼𑀢𑁆𑀢𑀁. 𑀧𑀞𑀫𑀩𑀼𑀤𑁆𑀥𑀯𑀘𑀦𑀸𑀤𑀻𑀲𑀼 𑀯𑀺𑀬 𑀢𑀁 𑀢𑀁 𑀪𑀸𑀡𑀓𑀸𑀦𑀁 𑀫𑀢𑁂𑀦 𑀅𑀝𑁆𑀞𑀓𑀣𑀸𑀲𑀼𑀧𑀺 𑀯𑀘𑀦𑀪𑁂𑀤𑁄 𑀳𑁄𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀏𑀯𑀫𑁆𑀧𑁂𑀢𑁆𑀣 𑀯𑀤𑀦𑁆𑀢𑀺 𑁋 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀆𑀤𑀺𑀫𑁆𑀳𑀺 𑀘𑀢𑁆𑀢𑀸𑀭𑁄 𑀲𑀸𑀥𑀼𑀓𑀻𑀴𑀦𑀤𑀺𑀯𑀲𑀸𑀬𑁂𑀯, 𑀢𑀢𑁄 𑀧𑀭𑀁 𑀢𑀬𑁄 𑀲𑀸𑀥𑀼𑀓𑀻𑀴𑀦𑀤𑀺𑀯𑀲𑀸 𑀘𑁂𑀯 𑀘𑀺𑀢𑀓𑀛𑀸𑀬𑀦𑀤𑀺𑀯𑀲𑀸 𑀘, 𑀢𑀢𑁄 𑀧𑀭𑀁 𑀏𑀓𑁄 𑀘𑀺𑀢𑀓𑀛𑀸𑀬𑀦𑀤𑀺𑀯𑀲𑁄𑀬𑁂𑀯, 𑀢𑀢𑁄 𑀧𑀭𑀁 𑀢𑀬𑁄 𑀘𑀺𑀢𑀓𑀛𑀸𑀬𑀦𑀤𑀺𑀯𑀲𑀸 𑀘𑁂𑀯 𑀥𑀸𑀢𑀼𑀧𑀽𑀚𑀸𑀤𑀺𑀯𑀲𑀸 𑀘, 𑀢𑀢𑁄 𑀧𑀭𑀁 𑀘𑀢𑁆𑀢𑀸𑀭𑁄 𑀥𑀸𑀢𑀼𑀧𑀽𑀚𑀸𑀤𑀺𑀯𑀲𑀸𑀬𑁂𑀯, 𑀇𑀢𑀺 𑀢𑀁 𑀢𑀁 𑀓𑀺𑀘𑁆𑀘𑀸𑀦𑀼𑀭𑀽𑀧𑀕𑀡𑀦𑀯𑀲𑁂𑀦 𑀢𑀻𑀡𑀺 𑀲𑀢𑁆𑀢𑀸𑀳𑀸𑀦𑀺 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀅𑀕𑀳𑀺𑀢𑀕𑁆𑀕𑀳𑀡𑁂𑀦 𑀧𑀦 𑀅𑀟𑁆𑀠𑀫𑀸𑀲𑁄𑀯 𑀳𑁄𑀢𑀺. ‘‘𑀏𑀓𑀯𑀻𑀲𑀢𑀺 𑀤𑀺𑀯𑀲𑀸 𑀕𑀢𑀸’’𑀢𑀺 𑀇𑀥 𑀯𑀼𑀢𑁆𑀢𑀯𑀘𑀦𑀜𑁆𑀘 𑀢𑀁 𑀢𑀁 𑀓𑀺𑀘𑁆𑀘𑀸𑀦𑀼𑀭𑀽𑀧𑀕𑀡𑀦𑁂𑀦𑁂𑀯. 𑀏𑀯𑀜𑁆𑀳𑀺 𑀘𑀢𑀽𑀲𑀼𑀧𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀯𑀘𑀦𑀁 𑀲𑀫𑁂𑀢𑀻𑀢𑀺 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀯𑀚𑀺𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑁂𑀦 𑀧𑀦 𑀯𑀼𑀢𑁆𑀢𑀁 ‘‘𑀅𑀟𑁆𑀠𑀫𑀸𑀲𑁄 𑀅𑀢𑀺𑀓𑁆𑀓𑀦𑁆𑀢𑁄𑀢𑀺 𑀏𑀢𑁆𑀣 𑀏𑀓𑁄 𑀤𑀺𑀯𑀲𑁄 𑀦𑀝𑁆𑀞𑁄, 𑀲𑁄 𑀧𑀸𑀝𑀺𑀧𑀤𑀤𑀺𑀯𑀲𑁄, 𑀓𑁄𑀮𑀸𑀳𑀮𑀤𑀺𑀯𑀲𑁄 ¶ 𑀦𑀸𑀫 𑀲𑁄, 𑀢𑀲𑁆𑀫𑀸 𑀇𑀥 𑀦 𑀕𑀳𑀺𑀢𑁄’’𑀢𑀺, (𑀯𑀚𑀺𑀭. 𑀝𑀻. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀢𑀁 𑀦 𑀲𑀼𑀦𑁆𑀤𑀭𑀁 𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀦𑁆𑀢𑀧𑀸𑀴𑀺𑀬𑀁 (𑀤𑀻. 𑀦𑀺. 𑁨.𑁨𑁨𑁭) 𑀧𑀸𑀝𑀺𑀧𑀤𑀤𑀺𑀯𑀲𑀢𑁄𑀬𑁂𑀯 𑀧𑀝𑁆𑀞𑀸𑀬 𑀲𑀢𑁆𑀢𑀸𑀳𑀲𑁆𑀲 𑀯𑀼𑀢𑁆𑀢𑀢𑁆𑀢𑀸, 𑀅𑀝𑁆𑀞𑀓𑀣𑀸𑀬𑀜𑁆𑀘 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂𑀦 𑀲𑀤𑁆𑀥𑀺𑀁 𑀢𑀺𑀡𑁆𑀡𑀁 𑀲𑀢𑁆𑀢𑀸𑀳𑀸𑀦𑀁 𑀕𑀡𑀺𑀢𑀢𑁆𑀢𑀸. 𑀢𑀣𑀸 𑀳𑀺 𑀧𑀭𑀺𑀦𑀺𑀩𑁆𑀩𑀸𑀦𑀤𑀺𑀯𑀲𑁂𑀦 𑀲𑀤𑁆𑀥𑀺𑀁 𑀢𑀺𑀡𑁆𑀡𑀁 𑀲𑀢𑁆𑀢𑀸𑀳𑀸𑀦𑀁 𑀕𑀡𑀦𑁂𑀦𑁂𑀯 𑀚𑁂𑀝𑁆𑀞𑀫𑀽𑀮𑀲𑀼𑀓𑁆𑀓𑀧𑀓𑁆𑀔𑀧𑀜𑁆𑀘𑀫𑀻 𑀏𑀓𑀯𑀻𑀲𑀢𑀺𑀫𑁄 𑀤𑀺𑀯𑀲𑁄 𑀳𑁄𑀢𑀺.

𑀘𑀢𑁆𑀢𑀸𑀮𑀻𑀲 𑀤𑀺𑀯𑀲𑀸𑀢𑀺 𑀚𑁂𑀝𑁆𑀞𑀫𑀽𑀮𑀲𑀼𑀓𑁆𑀓𑀧𑀓𑁆𑀔𑀙𑀝𑁆𑀞𑀤𑀺𑀯𑀲𑀢𑁄 𑀬𑀸𑀯 𑀆𑀲𑀴𑁆𑀳𑀻 𑀧𑀼𑀡𑁆𑀡𑀫𑀻, 𑀢𑀸𑀯 𑀕𑀡𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀢𑁆𑀣𑀦𑁆𑀢𑀭𑁂𑀢𑀺 𑀘𑀢𑁆𑀢𑀸𑀮𑀻𑀲𑀤𑀺𑀯𑀲𑀩𑁆𑀪𑀦𑁆𑀢𑀭𑁂. 𑀭𑁄𑀕𑁄 𑀏𑀯 𑀭𑁄𑀕𑀧𑀮𑀺𑀩𑁄𑀥𑁄. 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀲𑀼 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀫𑁂𑀯 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀧𑀮𑀺𑀩𑁄𑀥𑁄 ¶ , 𑀢𑀣𑀸 𑀫𑀸𑀢𑀸𑀧𑀺𑀢𑀼𑀧𑀮𑀺𑀩𑁄𑀥𑁄. 𑀬𑀣𑀸𑀥𑀺𑀧𑁆𑀧𑁂𑀢𑀁 𑀅𑀢𑁆𑀣𑀁, 𑀓𑀫𑁆𑀫𑀁 𑀯𑀸 𑀧𑀭𑀺𑀩𑀼𑀦𑁆𑀥𑁂𑀢𑀺 𑀉𑀧𑀭𑁄𑀥𑁂𑀢𑀺 𑀧𑀯𑀢𑁆𑀢𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀧𑀮𑀺𑀩𑁄𑀥𑁄 𑀭-𑀓𑀸𑀭𑀲𑁆𑀲 𑀮-𑀓𑀸𑀭𑀁 𑀓𑀢𑁆𑀯𑀸. 𑀢𑀁 𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀢𑀁 𑀓𑀭𑀡𑀻𑀬𑀁 𑀓𑀭𑁄𑀢𑀽𑀢𑀺 𑀲𑀗𑁆𑀕𑀸𑀳𑀓𑁂𑀦 𑀙𑀺𑀦𑁆𑀤𑀺𑀢𑀩𑁆𑀩𑀁 𑀢𑀁 𑀲𑀩𑁆𑀩𑀁 𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀲𑀗𑁆𑀔𑀸𑀢𑀁 𑀢𑀤𑁂𑀯 𑀓𑀭𑀡𑀻𑀬𑀁 𑀓𑀭𑁄𑀢𑀼.

𑀅𑀜𑁆𑀜𑁂𑀧𑀺 𑀫𑀳𑀸𑀣𑁂𑀭𑀸𑀢𑀺 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀸𑀤𑀬𑁄. 𑀲𑁄𑀓𑀲𑀮𑁆𑀮𑀲𑀫𑀧𑁆𑀧𑀺𑀢𑀦𑁆𑀢𑀺 𑀲𑁄𑀓𑀲𑀗𑁆𑀔𑀸𑀢𑁂𑀦 𑀲𑀮𑁆𑀮𑁂𑀦 𑀅𑀦𑀼𑀧𑀯𑀺𑀝𑁆𑀞𑀁 𑀧𑀝𑀺𑀯𑀺𑀤𑁆𑀥𑀁. 𑀅𑀲𑀫𑀼𑀘𑁆𑀙𑀺𑀦𑁆𑀦𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀼𑀲𑀬𑀢𑁆𑀢𑀸 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀪𑀺𑀲𑀗𑁆𑀔𑀸𑀢𑁂𑀦 𑀓𑀫𑁆𑀫𑀼𑀦𑀸 𑀪𑀯𑀬𑁄𑀦𑀺𑀕𑀢𑀺𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑁂𑀲𑀼 𑀔𑀦𑁆𑀥𑀧𑀜𑁆𑀘𑀓𑀲𑀗𑁆𑀔𑀸𑀢𑀁 𑀅𑀢𑁆𑀢𑀪𑀸𑀯𑀁 𑀚𑀦𑁂𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀚𑀦𑁄. 𑀓𑀺𑀮𑁂𑀲𑁂 𑀚𑀦𑁂𑀢𑀺, 𑀅𑀚𑀦𑀺, 𑀚𑀦𑀺𑀲𑁆𑀲𑀢𑀻𑀢𑀺 𑀯𑀸 𑀚𑀦𑁄, 𑀫𑀳𑀦𑁆𑀢𑁄 𑀚𑀦𑁄 𑀢𑀣𑀸, 𑀢𑀁. 𑀆𑀕𑀢𑀸𑀕𑀢𑀦𑁆𑀢𑀺 𑀆𑀕𑀢𑀫𑀸𑀕𑀢𑀁 𑀬𑀣𑀸 ‘‘𑀏𑀓𑁂𑀓𑁄’’𑀢𑀺. 𑀏𑀢𑁆𑀣 𑀲𑀺𑀬𑀸 𑁋 ‘‘𑀣𑁂𑀭𑁄 𑀅𑀢𑁆𑀢𑀦𑁄 𑀧𑀜𑁆𑀘𑀲𑀢𑀸𑀬 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁆𑀢𑁄 𑀭𑀸𑀚𑀕𑀳𑀁 𑀕𑀢𑁄, 𑀅𑀜𑁆𑀜𑁂𑀧𑀺 𑀫𑀳𑀸𑀣𑁂𑀭𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂 𑀕𑀳𑁂𑀢𑁆𑀯𑀸 𑀲𑁄𑀓𑀲𑀮𑁆𑀮𑀲𑀫𑀧𑁆𑀧𑀺𑀢𑀁 𑀫𑀳𑀸𑀚𑀦𑀁 𑀅𑀲𑁆𑀲𑀸𑀲𑁂𑀢𑀼𑀓𑀸𑀫𑀸 𑀢𑀁 𑀢𑀁 𑀤𑀺𑀲𑀁 𑀧𑀓𑁆𑀓𑀦𑁆𑀢𑀸’’𑀢𑀺 𑀇𑀥 𑀯𑀼𑀢𑁆𑀢𑀯𑀘𑀦𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 ‘‘𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 ‘𑀭𑀸𑀚𑀕𑀳𑀁 𑀆𑀯𑀼𑀲𑁄 𑀕𑀘𑁆𑀙𑀸𑀫𑀸’𑀢𑀺 𑀉𑀧𑀟𑁆𑀠𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀕𑀳𑁂𑀢𑁆𑀯𑀸 𑀏𑀓𑀁 𑀫𑀕𑁆𑀕𑀁 𑀕𑀢𑁄, 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄𑀧𑀺 𑀉𑀧𑀟𑁆𑀠𑀁 𑀕𑀳𑁂𑀢𑁆𑀯𑀸 𑀏𑀓𑀁 𑀫𑀕𑁆𑀕𑀁 𑀕𑀢𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀯𑀼𑀢𑁆𑀢𑀯𑀘𑀦𑀜𑁆𑀘 𑀅𑀜𑁆𑀜𑀫𑀜𑁆𑀜𑀁 𑀯𑀺𑀭𑀼𑀤𑁆𑀥𑀁 𑀳𑁄𑀢𑀺. 𑀇𑀥 𑀳𑀺 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀸𑀤𑀬𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑀪𑀺𑀓𑁆𑀔𑀽𑀳𑀺𑀬𑁂𑀯 𑀲𑀤𑁆𑀥𑀺𑀁 𑀢𑀁 𑀢𑀁 𑀤𑀺𑀲𑀁 𑀕𑀢𑀸𑀢𑀺 𑀅𑀢𑁆𑀣𑁄 𑀆𑀧𑀚𑁆𑀚𑀢𑀺, 𑀢𑀢𑁆𑀣 𑀧𑀦 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀸𑀬𑁂𑀯 𑀧𑀘𑁆𑀘𑁂𑀓𑀫𑀼𑀧𑀟𑁆𑀠𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀏𑀓𑁂𑀓𑀁 𑀫𑀕𑁆𑀕𑀁 𑀕𑀢𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀢𑀤𑀼𑀪𑀬𑀫𑁆𑀧𑀺 𑀳𑀺 𑀯𑀘𑀦𑀁 𑀦 𑀯𑀺𑀭𑀼𑀚𑁆𑀛𑀢𑀺 𑀅𑀢𑁆𑀣𑀢𑁄 𑀲𑀁𑀲𑀦𑁆𑀤𑀦𑀢𑁆𑀢𑀸. 𑀇𑀥 𑀳𑀺 𑀦𑀺𑀭𑀯𑀲𑁂𑀲𑁂𑀦 𑀣𑁂𑀭𑀸𑀦𑀁 𑀧𑀘𑁆𑀘𑁂𑀓𑀕𑀫𑀦𑀯𑀘𑀦𑀫𑁂𑀯 𑀢𑀢𑁆𑀣 𑀦𑀬𑀯𑀲𑁂𑀦 𑀤𑀲𑁆𑀲𑁂𑀢𑀺, 𑀇𑀥 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀕𑀫𑀦𑀯𑀘𑀦𑀜𑁆𑀘 𑀢𑀢𑁆𑀣 𑀉𑀧𑀟𑁆𑀠𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀕𑀫𑀦𑀯𑀘𑀦𑁂𑀦. 𑀉𑀧𑀟𑁆𑀠𑀲𑀗𑁆𑀖𑁄𑀢𑀺 𑀳𑀺 𑀲𑀓𑀲𑀓𑀧𑀭𑀺𑀲𑀸𑀪𑀽𑀢𑁄 𑀪𑀺𑀓𑁆𑀔𑀼𑀕𑀡𑁄 𑀕𑀬𑁆𑀳𑀢𑀺 𑀉𑀧𑀟𑁆𑀠𑀲𑀤𑁆𑀤𑀲𑁆𑀲 𑀅𑀲𑀫𑁂𑀧𑀺 𑀪𑀸𑀕𑁂 𑀧𑀯𑀢𑁆𑀢𑀢𑁆𑀢𑀸. 𑀬𑀤𑀺 𑀳𑀺 𑀲𑀦𑁆𑀦𑀺𑀧𑀢𑀺𑀢𑁂 𑀲𑀗𑁆𑀖𑁂 𑀉𑀧𑀟𑁆𑀠𑀲𑀗𑁆𑀖𑁂𑀦 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑀁 𑀕𑀡𑁆𑀳𑁂𑀬𑁆𑀬, 𑀢𑀤𑀸 𑀲𑀗𑁆𑀖𑀲𑁆𑀲 𑀕𑀡𑀦𑀧𑀣𑀫𑀢𑀻𑀢𑀢𑁆𑀢𑀸 𑀦 𑀬𑀼𑀚𑁆𑀚𑀢𑁂𑀯 ¶ , 𑀬𑀤𑀺 𑀘 𑀲𑀗𑁆𑀕𑀸𑀬𑀦𑀢𑁆𑀣𑀁 𑀉𑀘𑁆𑀘𑀺𑀦𑀺𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀫𑀚𑁆𑀛𑁂 𑀉𑀧𑀟𑁆𑀠𑀲𑀗𑁆𑀖𑁂𑀦 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑀁 𑀕𑀡𑁆𑀳𑁂𑀬𑁆𑀬, 𑀏𑀯𑀫𑁆𑀧𑀺 𑀢𑁂𑀲𑀁 𑀕𑀡𑀧𑀸𑀫𑁄𑀓𑁆𑀔𑀸𑀦𑀁𑀬𑁂𑀯 𑀉𑀘𑁆𑀘𑀺𑀦𑀺𑀢𑀢𑁆𑀢𑀸 𑀦 𑀬𑀼𑀚𑁆𑀚𑀢𑁂𑀯. 𑀧𑀘𑁆𑀘𑁂𑀓𑀕𑀡𑀺𑀦𑁄 𑀳𑁂𑀢𑁂. 𑀯𑀼𑀢𑁆𑀢𑀜𑁆𑀳𑀺 ‘‘𑀲𑀢𑁆𑀢𑀲𑀢𑀲𑀳𑀲𑁆𑀲𑀸𑀦𑀺, 𑀢𑁂𑀲𑀼 𑀧𑀸𑀫𑁄𑀓𑁆𑀔𑀪𑀺𑀓𑁆𑀔𑀯𑁄’’𑀢𑀺 ¶ , 𑀇𑀢𑀺 𑀅𑀢𑁆𑀣𑀢𑁄 𑀲𑀁𑀲𑀦𑁆𑀤𑀦𑀢𑁆𑀢𑀸 𑀢𑀤𑁂𑀢𑀁 𑀉𑀪𑀬𑀫𑁆𑀧𑀺 𑀯𑀘𑀦𑀁 𑀅𑀜𑁆𑀜𑀫𑀜𑁆𑀜𑀁 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺. 𑀢𑀁𑀢𑀁𑀪𑀸𑀡𑀓𑀸𑀦𑀁 𑀫𑀢𑁂𑀦𑁂𑀯𑀁 𑀯𑀼𑀢𑁆𑀢𑀦𑁆𑀢𑀺𑀧𑀺 𑀯𑀤𑀦𑁆𑀢𑀺.

‘‘𑀅𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀪𑀕𑀯𑀢𑁄’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬𑀸𑀢𑀺 𑀏𑀢𑁆𑀣 𑀘𑀢𑀼𑀫𑀳𑀸𑀭𑀸𑀚𑀤𑀢𑁆𑀢𑀺𑀬𑀲𑁂𑀮𑀫𑀬𑀧𑀢𑁆𑀢𑀁, 𑀲𑀼𑀕𑀢𑀘𑀻𑀯𑀭𑀜𑁆𑀘 𑀕𑀡𑁆𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑁄𑀬𑁂𑀯 𑀳𑀺 𑀧𑀢𑁆𑀢𑁄 𑀪𑀕𑀯𑀢𑀸 𑀲𑀤𑀸 𑀧𑀭𑀺𑀪𑀼𑀢𑁆𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀲𑀫𑀘𑀺𑀢𑁆𑀢𑀧𑀝𑀺𑀧𑀤𑀸𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 ‘‘𑀯𑀲𑁆𑀲𑀁𑀯𑀼𑀢𑁆𑀣𑀸𑀦𑀼𑀲𑀸𑀭𑁂𑀦 𑀅𑀢𑀺𑀭𑁂𑀓𑀯𑀻𑀲𑀢𑀺𑀯𑀲𑁆𑀲𑀓𑀸𑀮𑁂𑀧𑀺 𑀢𑀲𑁆𑀲𑁂𑀯 𑀧𑀭𑀺𑀪𑀼𑀢𑁆𑀢𑀪𑀸𑀯𑀁 𑀤𑀻𑀧𑁂𑀢𑀼𑀓𑀸𑀫𑁂𑀦 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀲𑀼𑀦𑀺𑀯𑀢𑁆𑀣𑀦𑀺𑀯𑀸𑀲𑀦𑁄 𑀲𑀼𑀕𑀢𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑁂𑀮𑀫𑀬𑀧𑀢𑁆𑀢𑀫𑀸𑀤𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄’’𑀢𑀺 (𑀅. 𑀦𑀺. 𑀅𑀝𑁆𑀞. 𑁨.𑁩𑁭) 𑀕𑀦𑁆𑀥𑀫𑀸𑀮𑀸𑀤𑀬𑁄 𑀦𑁂𑀲𑀁 𑀳𑀢𑁆𑀣𑁂𑀢𑀺 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑀸.

𑀢𑀢𑁆𑀭𑀸𑀢𑀺 𑀢𑀺𑀲𑁆𑀲𑀁 𑀲𑀸𑀯𑀢𑁆𑀣𑀺𑀬𑀁. 𑀲𑀼𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀦𑀺𑀘𑁆𑀘𑀢𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀬𑀸𑀢𑀺 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 (𑀥. 𑀧. 𑁨𑁭𑁭) 𑀅𑀦𑀺𑀘𑁆𑀘𑀲𑀪𑀸𑀯𑀧𑀝𑀺𑀲𑀜𑁆𑀜𑀼𑀢𑁆𑀢𑀸𑀬. 𑀥𑀫𑁆𑀫𑁂𑀦 𑀬𑀼𑀢𑁆𑀢𑀸, 𑀥𑀫𑁆𑀫𑀲𑁆𑀲 𑀯𑀸 𑀧𑀢𑀺𑀭𑀽𑀧𑀸𑀢𑀺 𑀥𑀫𑁆𑀫𑀻, 𑀢𑀸𑀤𑀺𑀲𑀸𑀬. 𑀲𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀲𑀼𑀝𑁆𑀞𑀼 𑀚𑀸𑀦𑀸𑀧𑁂𑀢𑁆𑀯𑀸, 𑀲𑀫𑀲𑁆𑀲𑀸𑀲𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀲𑀺𑀢𑀕𑀦𑁆𑀥𑀓𑀼𑀝𑀺𑀦𑁆𑀢𑀺 𑀦𑀺𑀘𑁆𑀘𑀲𑀸𑀧𑁂𑀓𑁆𑀔𑀢𑁆𑀢𑀸 𑀲𑀫𑀸𑀲𑁄. 𑀧𑀭𑀺𑀪𑁄𑀕𑀘𑁂𑀢𑀺𑀬𑀪𑀸𑀯𑀢𑁄 ‘‘𑀕𑀦𑁆𑀥𑀓𑀼𑀝𑀺𑀁 𑀯𑀦𑁆𑀤𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. ‘‘𑀯𑀦𑁆𑀤𑀺𑀢𑁆𑀯𑀸’’𑀢𑀺 𑀘 ‘‘𑀯𑀺𑀯𑀭𑀺𑀢𑁆𑀯𑀸’’𑀢𑀺 𑀏𑀢𑁆𑀣 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸. 𑀢𑀣𑀸 𑀳𑀺 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁 ‘‘𑀕𑀦𑁆𑀥𑀓𑀼𑀝𑀺𑀬𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸𑀢𑀺 𑀧𑀭𑀺𑀪𑁄𑀕𑀘𑁂𑀢𑀺𑀬𑀪𑀸𑀯𑀢𑁄 𑀕𑀦𑁆𑀥𑀓𑀼𑀝𑀺𑀁 𑀯𑀦𑁆𑀤𑀺𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀬𑀸 𑀤𑁆𑀯𑀸𑀭𑀁 𑀯𑀺𑀯𑀭𑀻𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸) 𑀫𑀺𑀮𑀸𑀢𑀸 𑀫𑀸𑀮𑀸, 𑀲𑀸𑀬𑁂𑀯 𑀓𑀘𑀯𑀭𑀁, 𑀫𑀺𑀮𑀸𑀢𑀁 𑀯𑀸 𑀫𑀸𑀮𑀸𑀲𑀗𑁆𑀔𑀸𑀢𑀁 𑀓𑀘𑀯𑀭𑀁 𑀢𑀣𑀸. 𑀅𑀢𑀺𑀳𑀭𑀺𑀢𑁆𑀯𑀸𑀢𑀺 𑀧𑀞𑀫𑀁 𑀞𑀧𑀺𑀢𑀝𑁆𑀞𑀸𑀦𑀫𑀪𑀺𑀫𑀼𑀔𑀁 𑀳𑀭𑀺𑀢𑁆𑀯𑀸. 𑀬𑀣𑀸𑀞𑀸𑀦𑁂 𑀞𑀧𑁂𑀢𑁆𑀯𑀸𑀢𑀺 𑀧𑀞𑀫𑀁 𑀞𑀧𑀺𑀢𑀝𑁆𑀞𑀸𑀦𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀬𑀣𑀸𑀞𑀺𑀢𑀝𑁆𑀞𑀸𑀦𑁂𑀬𑁂𑀯 𑀞𑀧𑁂𑀢𑁆𑀯𑀸. 𑀪𑀕𑀯𑀢𑁄 𑀞𑀺𑀢𑀓𑀸𑀮𑁂 𑀓𑀭𑀡𑀻𑀬𑀁 𑀯𑀢𑁆𑀢𑀁 𑀲𑀩𑁆𑀩𑀫𑀓𑀸𑀲𑀻𑀢𑀺 𑀲𑁂𑀦𑀸𑀲𑀦𑁂 𑀓𑀢𑁆𑀢𑀩𑁆𑀩𑀯𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀼𑀭𑀼𑀫𑀸𑀦𑁄 𑀘𑀸𑀢𑀺 𑀢𑀁 𑀲𑀩𑁆𑀩𑀁 𑀯𑀢𑁆𑀢𑀁 𑀓𑀭𑁄𑀦𑁆𑀢𑁄 𑀘. 𑀮𑀓𑁆𑀔𑀡𑁂 𑀳𑀺 𑀅𑀬𑀁 𑀫𑀸𑀦-𑀲𑀤𑁆𑀤𑁄. 𑀦𑁆𑀳𑀸𑀦𑀓𑁄𑀝𑁆𑀞𑀓𑀲𑁆𑀲 𑀲𑀫𑁆𑀫𑀚𑁆𑀚𑀦𑀜𑁆𑀘 𑀢𑀲𑁆𑀫𑀺𑀁 𑀉𑀤𑀓𑀲𑁆𑀲 𑀉𑀧𑀝𑁆𑀞𑀸𑀧𑀦𑀜𑁆𑀘, 𑀢𑀸𑀦𑀺 𑀆𑀤𑀻𑀦𑀺 𑀬𑁂𑀲𑀁 𑀥𑀫𑁆𑀫𑀤𑁂𑀲𑀦𑀸𑀑𑀯𑀸𑀤𑀸𑀤𑀻𑀦𑀦𑁆𑀢𑀺 𑀢𑀣𑀸, 𑀢𑁂𑀲𑀁 𑀓𑀸𑀮𑁂𑀲𑀽𑀢𑀺 𑀅𑀢𑁆𑀣𑁄. 𑀲𑀻𑀳𑀲𑁆𑀲 𑀫𑀺𑀕𑀭𑀸𑀚𑀲𑁆𑀲 𑀲𑁂𑀬𑁆𑀬𑀸 𑀲𑀻𑀳𑀲𑁂𑀬𑁆𑀬𑀸, 𑀢𑀤𑁆𑀥𑀺𑀢𑀯𑀲𑁂𑀦, 𑀲𑀤𑀺𑀲𑀯𑁄𑀳𑀸𑀭𑁂𑀦 𑀯𑀸 𑀪𑀕𑀯𑀢𑁄 𑀲𑁂𑀬𑁆𑀬𑀸𑀧𑀺 ‘‘𑀲𑀻𑀳𑀲𑁂𑀬𑁆𑀬𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀚𑀼𑀲𑁆𑀲𑀤𑀇𑀭𑀺𑀬𑀸𑀧𑀣𑀢𑁆𑀢𑀸 𑀉𑀢𑁆𑀢𑀫𑀲𑁂𑀬𑁆𑀬𑀸 𑀯𑀸, 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀣 𑀔𑁄 𑀪𑀕𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 ¶ 𑀓𑀧𑁆𑀧𑁂𑀲𑀺 ¶ 𑀧𑀸𑀤𑁂 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬 𑀲𑀢𑁄 𑀲𑀫𑁆𑀧𑀚𑀸𑀦𑁄’’𑀢𑀺, (𑀤𑀻. 𑀦𑀺. 𑁨.𑁧𑁯𑁮) 𑀢𑀁. 𑀓𑀧𑁆𑀧𑀦𑀓𑀸𑀮𑁄 𑀓𑀭𑀡𑀓𑀸𑀮𑁄 𑀦𑀦𑀽𑀢𑀺 𑀬𑁄𑀚𑁂𑀢𑀩𑁆𑀩𑀁.

‘‘𑀬𑀣𑀸 𑀢’’𑀦𑁆𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀉𑀧𑀫𑀸𑀬 𑀆𑀯𑀺 𑀓𑀭𑁄𑀢𑀺. 𑀢𑀢𑁆𑀣 𑀬𑀣𑀸 𑀅𑀜𑁆𑀜𑁄𑀧𑀺 𑀪𑀕𑀯𑀢𑁄…𑀧𑁂… 𑀧𑀢𑀺𑀝𑁆𑀞𑀺𑀢𑀧𑁂𑀫𑁄 𑀘𑁂𑀯 𑀅𑀔𑀻𑀡𑀸𑀲𑀯𑁄 𑀘 𑀅𑀦𑁂𑀓𑁂𑀲𑀼…𑀧𑁂… 𑀉𑀧𑀓𑀸𑀭𑀲𑀜𑁆𑀚𑀦𑀺𑀢𑀘𑀺𑀢𑁆𑀢𑀫𑀤𑁆𑀤𑀯𑁄 𑀘 𑀅𑀓𑀸𑀲𑀺, 𑀏𑀯𑀁 𑀆𑀬𑀲𑁆𑀫𑀸𑀧𑀺 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀕𑀼𑀡…𑀧𑁂… 𑀫𑀤𑁆𑀤𑀯𑁄 𑀘 𑀳𑀼𑀢𑁆𑀯𑀸 𑀅𑀓𑀸𑀲𑀻𑀢𑀺 𑀬𑁄𑀚𑀦𑀸. 𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀧𑀺𑀘 𑀏𑀢𑁂𑀦 𑀢𑀣𑀸𑀓𑀭𑀡𑀳𑁂𑀢𑀼𑀁 𑀤𑀲𑁆𑀲𑁂𑀢𑀺, 𑀬𑀣𑀸 𑀅𑀜𑁆𑀜𑁂𑀧𑀺 𑀬𑀣𑀸𑀯𑀼𑀢𑁆𑀢𑀲𑀪𑀸𑀯𑀸 𑀅𑀓𑀁𑀲𑀼, 𑀢𑀣𑀸 𑀆𑀬𑀲𑁆𑀫𑀸𑀧𑀺 𑀆𑀦𑀦𑁆𑀤𑁄 𑀪𑀕𑀯𑀢𑁄…𑀧𑁂… 𑀧𑀢𑀺𑀝𑁆𑀞𑀺𑀢𑀧𑁂𑀫𑀢𑁆𑀢𑀸 𑀘𑁂𑀯 𑀅𑀔𑀻𑀡𑀸𑀲𑀯𑀢𑁆𑀢𑀸 𑀘 𑀅𑀦𑁂𑀓𑁂𑀲𑀼…𑀧𑁂… 𑀉𑀧𑀓𑀸𑀭𑀲𑀜𑁆𑀚𑀦𑀺𑀢𑀘𑀺𑀢𑁆𑀢𑀫𑀤𑁆𑀤𑀯𑀢𑁆𑀢𑀸 𑀘𑀸𑀢𑀺 𑀳𑁂𑀢𑀼𑀅𑀢𑁆𑀣𑀲𑁆𑀲 𑀮𑀩𑁆𑀪𑀫𑀸𑀦𑀢𑁆𑀢𑀸. 𑀳𑁂𑀢𑀼𑀕𑀩𑁆𑀪𑀸𑀦𑀺 𑀳𑀺 𑀏𑀢𑀸𑀦𑀺 𑀧𑀤𑀸𑀦𑀺 𑀢𑀤𑀢𑁆𑀣𑀲𑁆𑀲𑁂𑀯 𑀢𑀣𑀸𑀓𑀭𑀡𑀳𑁂𑀢𑀼𑀪𑀸𑀯𑀢𑁄. 𑀥𑀦𑀧𑀸𑀮𑀤𑀫𑀦 (𑀘𑀽𑀴𑀯. 𑁩𑁪𑁨), 𑀲𑀼𑀯𑀡𑁆𑀡𑀓𑀓𑁆𑀓𑀝 (𑀚𑀸. 𑁧.𑁫.𑁯𑁪), 𑀘𑀽𑀴𑀳𑀁𑀲 (𑀚𑀸. 𑁧.𑁧𑁫.𑁧𑁩𑁩) -𑀫𑀳𑀸𑀳𑀁𑀲𑀚𑀸𑀢𑀓𑀸𑀤𑀻𑀳𑀺 (𑀚𑀸. 𑁨.𑁨𑁧.𑁮𑁯) 𑀘𑁂𑀢𑁆𑀣 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀕𑀼𑀡𑀸𑀦𑀁 𑀕𑀡𑁄, 𑀲𑁄𑀬𑁂𑀯 𑀅𑀫𑀢𑀦𑀺𑀧𑁆𑀨𑀸𑀤𑀓𑀭𑀲𑀲𑀤𑀺𑀲𑀢𑀸𑀬 𑀅𑀫𑀢𑀭𑀲𑁄. 𑀢𑀁 𑀚𑀸𑀦𑀦𑀧𑀓𑀢𑀺𑀢𑀸𑀬𑀸𑀢𑀺 𑀧𑀢𑀺𑀝𑁆𑀞𑀺𑀢𑀧𑀤𑁂 𑀳𑁂𑀢𑀼. 𑀉𑀧𑀓𑀸𑀭…𑀧𑁂… 𑀫𑀤𑁆𑀤𑀯𑁄𑀢𑀺 𑀉𑀧𑀓𑀸𑀭𑀧𑀼𑀩𑁆𑀩𑀪𑀸𑀯𑁂𑀦 𑀲𑀫𑁆𑀫𑀸𑀚𑀦𑀺𑀢𑀘𑀺𑀢𑁆𑀢𑀫𑀼𑀤𑀼𑀓𑁄. 𑀏𑀯𑀫𑁆𑀧𑀺 𑀲𑁄 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀅𑀥𑀺𑀯𑀸𑀲𑁂𑀲𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀫𑁂𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀫𑁂𑀦𑀦𑁆𑀢𑀺 𑀢𑀁 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁. 𑀏𑀢-𑀲𑀤𑁆𑀤𑁄 𑀳𑀺 𑀧𑀤𑀸𑀮𑀗𑁆𑀓𑀸𑀭𑀫𑀢𑁆𑀢𑀁. 𑀅𑀬𑀜𑁆𑀳𑀺 𑀲𑀤𑁆𑀤𑀧𑀓𑀢𑀺, 𑀬𑀤𑀺𑀤𑀁 𑀤𑁆𑀯𑀻𑀲𑀼 𑀲𑀩𑁆𑀩𑀦𑀸𑀫𑁂𑀲𑀼 𑀧𑀼𑀩𑁆𑀩𑀧𑀤𑀲𑁆𑀲𑁂𑀯 𑀅𑀢𑁆𑀣𑀧𑀤𑀢𑀸. 𑀲𑀁𑀯𑁂𑀚𑁂𑀲𑀻𑀢𑀺 ‘‘𑀦𑀦𑀼 𑀪𑀕𑀯𑀢𑀸 𑀧𑀝𑀺𑀓𑀘𑁆𑀘𑁂𑀯 𑀅𑀓𑁆𑀔𑀸𑀢𑀁 ‘𑀲𑀩𑁆𑀩𑁂𑀳𑁂𑀯 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁧𑁮𑁩; 𑀲𑀁. 𑀦𑀺. 𑁫.𑁩𑁭𑁯; 𑀅. 𑀦𑀺. 𑁧𑁦.𑁪𑁮) 𑀲𑀁𑀯𑁂𑀕𑀁 𑀚𑀦𑁂𑀲𑀻’’𑀢𑀺 (𑀤𑀻. 𑀦𑀺. 𑀝𑀻. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 ‘‘𑀪𑀦𑁆𑀢𑁂…𑀧𑁂… 𑀅𑀲𑁆𑀲𑀸𑀲𑁂𑀲𑁆𑀲𑀣𑀸𑀢𑀺 𑀧𑀞𑀫𑀁 𑀯𑀢𑁆𑀯𑀸’’𑀢𑀺 𑀲𑀳 𑀧𑀸𑀞𑀲𑁂𑀲𑁂𑀦 𑀬𑁄𑀚𑀦𑀸 𑀅𑀲𑁆𑀲. 𑀬𑀣𑀸𑀭𑀼𑀢𑀢𑁄 𑀧𑀦 𑀆𑀤𑁆𑀬𑀢𑁆𑀣𑁂𑀦 𑀇𑀢𑀺-𑀲𑀤𑁆𑀤𑁂𑀦 ‘‘𑀏𑀯𑀫𑀸𑀤𑀺𑀦𑀸 𑀲𑀁𑀯𑁂𑀚𑁂𑀲𑀻’’𑀢𑀺 𑀬𑁄𑀚𑀦𑀸𑀧𑀺 𑀬𑀼𑀚𑁆𑀚𑀢𑁂𑀯. 𑀬𑁂𑀦 𑀓𑁂𑀦𑀘𑀺 𑀳𑀺 𑀯𑀘𑀦𑁂𑀦 𑀲𑀁𑀯𑁂𑀕𑀁 𑀚𑀦𑁂𑀲𑀺, 𑀢𑀁 𑀲𑀩𑁆𑀩𑀫𑁆𑀧𑀺 𑀲𑀁𑀯𑁂𑀚𑀦𑀲𑁆𑀲 𑀓𑀭𑀡𑀁 𑀲𑀫𑁆𑀪𑀯𑀢𑀻𑀢𑀺. 𑀲𑀦𑁆𑀣𑀫𑁆𑀪𑀺𑀢𑁆𑀯𑀸𑀢𑀺 𑀧𑀭𑀺𑀤𑁂𑀯𑀦𑀸𑀤𑀺𑀯𑀺𑀭𑀳𑁂𑀦 𑀅𑀢𑁆𑀢𑀸𑀦𑀁 𑀧𑀝𑀺𑀩𑀦𑁆𑀥𑁂𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸. 𑀉𑀲𑁆𑀲𑀦𑁆𑀦𑀥𑀸𑀢𑀼𑀓𑀦𑁆𑀢𑀺 𑀉𑀧𑀘𑀺𑀢𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀺𑀤𑁄𑀲𑀁. 𑀧𑀺𑀢𑁆𑀢𑀲𑁂𑀫𑁆𑀳𑀯𑀸𑀢𑀯𑀲𑁂𑀦 𑀳𑀺 𑀢𑀺𑀲𑁆𑀲𑁄 𑀥𑀸𑀢𑀼𑀬𑁄 𑀇𑀥 𑀪𑁂𑀲𑀚𑁆𑀚𑀓𑀭𑀡𑀬𑁄𑀕𑁆𑀬𑀢𑀸𑀬 ¶ 𑀅𑀥𑀺𑀧𑁆𑀧𑁂𑀢𑀸, 𑀬𑀸 ‘‘𑀤𑁄𑀲𑀸, 𑀫𑀮𑀸’’𑀢𑀺 𑀘 𑀮𑁄𑀓𑁂 𑀯𑀼𑀘𑁆𑀘𑀦𑁆𑀢𑀺, 𑀧𑀣𑀯𑀻 𑀆𑀧𑁄 𑀢𑁂𑀚𑁄 𑀯𑀸𑀬𑁄 𑀆𑀓𑀸𑀲𑁄𑀢𑀺 𑀘 𑀪𑁂𑀤𑁂𑀦 𑀧𑀘𑁆𑀘𑁂𑀓𑀁 𑀧𑀜𑁆𑀘𑀯𑀺𑀥𑀸. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀯𑀸𑀬𑀼𑀧𑀺𑀢𑁆𑀢𑀓𑀨𑀸 𑀤𑁄𑀲𑀸, 𑀥𑀸𑀢𑀯𑁄 𑀘 𑀫𑀮𑀸 𑀢𑀣𑀸;

𑀢𑀢𑁆𑀣𑀸𑀧𑀺 𑀧𑀜𑁆𑀘𑀥𑀸𑀔𑁆𑀬𑀸𑀢𑀸, 𑀧𑀘𑁆𑀘𑁂𑀓𑀁 𑀤𑁂𑀳𑀥𑀸𑀭𑀡𑀸.

𑀲𑀭𑀻𑀭𑀤𑀽𑀲𑀦𑀸 ¶ 𑀤𑁄𑀲𑀸, 𑀫𑀮𑀻𑀦𑀓𑀭𑀡𑀸 𑀫𑀮𑀸;

𑀥𑀸𑀭𑀡𑀸 𑀥𑀸𑀢𑀯𑁄 𑀢𑁂 𑀢𑀼, 𑀇𑀢𑁆𑀣𑀫𑀦𑁆𑀯𑀢𑁆𑀣𑀲𑀜𑁆𑀜𑀓𑀸’’𑀢𑀺.

𑀲𑀫𑀲𑁆𑀲𑀸𑀲𑁂𑀢𑀼𑀦𑁆𑀢𑀺 𑀲𑀦𑁆𑀢𑀧𑁆𑀧𑁂𑀢𑀼𑀁. 𑀤𑁂𑀯𑀢𑀸𑀬 𑀲𑀁𑀯𑁂𑀚𑀺𑀢𑀤𑀺𑀯𑀲𑀢𑁄, 𑀚𑁂𑀢𑀯𑀦𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑀤𑀺𑀯𑀲𑀢𑁄 𑀯𑀸 𑀤𑀼𑀢𑀺𑀬𑀤𑀺𑀯𑀲𑁂. 𑀯𑀺𑀭𑀺𑀘𑁆𑀘𑀢𑀺 𑀏𑀢𑁂𑀦𑀸𑀢𑀺 𑀯𑀺𑀭𑁂𑀘𑀦𑀁, 𑀑𑀲𑀥𑀧𑀭𑀺𑀪𑀸𑀯𑀺𑀢𑀁 𑀔𑀻𑀭𑀫𑁂𑀯 𑀯𑀺𑀭𑁂𑀘𑀦𑀁 𑀢𑀣𑀸. 𑀬𑀁 𑀲𑀦𑁆𑀥𑀸𑀬𑀸𑀢𑀺 𑀬𑀁 𑀪𑁂𑀲𑀚𑁆𑀚𑀧𑀸𑀦𑀁 𑀲𑀦𑁆𑀥𑀸𑀬. 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀦 𑀲𑁄𑀪𑀢𑀻𑀢𑀺 𑀲𑀼𑀪𑁄, 𑀫𑀦𑀼𑀦𑁄 𑀅𑀧𑀘𑁆𑀘𑀁 𑀫𑀸𑀦𑀯𑁄, 𑀦-𑀓𑀸𑀭𑀲𑁆𑀲 𑀧𑀦 𑀡-𑀓𑀸𑀭𑁂 𑀓𑀢𑁂 𑀫𑀸𑀡𑀯𑁄. 𑀫𑀦𑀽𑀢𑀺 𑀳𑀺 𑀧𑀞𑀫𑀓𑀧𑁆𑀧𑀺𑀓𑀓𑀸𑀮𑁂 𑀫𑀦𑀼𑀲𑁆𑀲𑀸𑀦𑀁 𑀫𑀸𑀢𑀸𑀧𑀺𑀢𑀼𑀝𑁆𑀞𑀸𑀦𑁂 𑀞𑀺𑀢𑁄 𑀧𑀼𑀭𑀺𑀲𑁄, 𑀬𑁄 𑀲𑀸𑀲𑀦𑁂 ‘‘𑀫𑀳𑀸𑀲𑀫𑁆𑀫𑀢𑀭𑀸𑀚𑀸’’𑀢𑀺 𑀯𑀼𑀢𑁆𑀢𑁄. 𑀲𑁄 𑀳𑀺 𑀲𑀓𑀮𑀮𑁄𑀓𑀲𑁆𑀲 𑀳𑀺𑀢𑀁 𑀫𑀦𑀪𑀺 𑀚𑀸𑀦𑀸𑀢𑀻𑀢𑀺 𑀫𑀦𑀽𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀫𑁆𑀧𑁂𑀢𑁆𑀣 𑀯𑀤𑀦𑁆𑀢𑀺 ‘‘𑀤𑀦𑁆𑀢𑀚 𑀦-𑀓𑀸𑀭𑀲𑀳𑀺𑀢𑁄 𑀫𑀸𑀦𑀯𑀲𑀤𑁆𑀤𑁄 𑀲𑀩𑁆𑀩𑀲𑀢𑁆𑀢𑀲𑀸𑀥𑀸𑀭𑀡𑀯𑀘𑀦𑁄, 𑀫𑀼𑀤𑁆𑀥𑀚 𑀡-𑀓𑀸𑀭𑀲𑀳𑀺𑀢𑁄 𑀧𑀦 𑀫𑀸𑀡𑀯𑀲𑀤𑁆𑀤𑁄 𑀓𑀼𑀘𑁆𑀙𑀺𑀢𑀫𑀽𑀴𑁆𑀳𑀸𑀧𑀘𑁆𑀘𑀯𑀘𑀦𑁄’’𑀢𑀺. 𑀘𑀽𑀴𑀓𑀫𑁆𑀫𑀯𑀺𑀪𑀗𑁆𑀕𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀫𑁆𑀧𑀺 (𑀫. 𑀦𑀺. 𑀅𑀝𑁆𑀞. 𑁪.𑁨𑁮𑁯) 𑀳𑀺 𑀫𑀼𑀤𑁆𑀥𑀚 𑀡-𑀓𑀸𑀭𑀲𑀳𑀺𑀢𑀲𑁆𑀲𑁂𑀯 𑀫𑀸𑀡𑀯𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑀡𑁆𑀡𑀺𑀢𑁄. 𑀢𑀝𑁆𑀝𑀻𑀓𑀸𑀬𑀫𑁆𑀧𑀺 ‘‘𑀬𑀁 𑀅𑀧𑀘𑁆𑀘𑀁 𑀓𑀼𑀘𑁆𑀙𑀺𑀢𑀁 𑀫𑀽𑀴𑁆𑀳𑀁 𑀯𑀸, 𑀢𑀢𑁆𑀣 𑀮𑁄𑀓𑁂 𑀫𑀸𑀡𑀯𑀯𑁄𑀳𑀸𑀭𑁄, 𑀬𑁂𑀪𑀼𑀬𑁆𑀬𑁂𑀦 𑀘 𑀲𑀢𑁆𑀢𑀸 𑀤𑀳𑀭𑀓𑀸𑀮𑁂 𑀫𑀽𑀴𑁆𑀳𑀥𑀸𑀢𑀼𑀓𑀸 𑀳𑁄𑀦𑁆𑀢𑀻𑀢𑀺 𑀢𑀲𑁆𑀲𑁂𑀯𑀢𑁆𑀣𑁄 𑀧𑀓𑀸𑀲𑀺𑀢𑁄’’𑀢𑀺 𑀯𑀤𑀦𑁆𑀢𑀺 𑀆𑀘𑀭𑀺𑀬𑀸. 𑀅𑀜𑁆𑀜𑀢𑁆𑀣 𑀘 𑀯𑀻𑀲𑀢𑀺𑀯𑀲𑁆𑀲𑀩𑁆𑀪𑀦𑁆𑀢𑀭𑁄 𑀬𑀼𑀯𑀸 𑀫𑀸𑀡𑀯𑁄, 𑀇𑀥 𑀧𑀦 𑀢𑀩𑁆𑀩𑁄𑀳𑀸𑀭𑁂𑀦 𑀫𑀳𑀮𑁆𑀮𑀓𑁄𑀧𑀺. 𑀯𑀼𑀢𑁆𑀢𑀜𑁆𑀳𑀺 𑀘𑀽𑀴𑀓𑀫𑁆𑀫𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 ‘‘𑀫𑀸𑀡𑀯𑁄𑀢𑀺 𑀧𑀦 𑀢𑀁 𑀢𑀭𑀼𑀡𑀓𑀸𑀮𑁂 𑀯𑁄𑀳𑀭𑀺𑀁𑀲𑀼, 𑀲𑁄 𑀫𑀳𑀮𑁆𑀮𑀓𑀓𑀸𑀮𑁂𑀧𑀺 𑀢𑁂𑀦𑁂𑀯 𑀯𑁄𑀳𑀸𑀭𑁂𑀦 𑀯𑁄𑀳𑀭𑀻𑀬𑀢𑀻’’𑀢𑀺, (𑀫. 𑀦𑀺. 𑀅𑀝𑁆𑀞. 𑁪.𑁨𑁮𑁯) 𑀲𑀼𑀪𑀦𑀸𑀫𑀓𑁂𑀦 𑀮𑀤𑁆𑀥𑀫𑀸𑀡𑀯𑀯𑁄𑀳𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀲𑁄 𑀧𑀦 ‘‘𑀲𑀢𑁆𑀣𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀆𑀦𑀦𑁆𑀤𑀢𑁆𑀣𑁂𑀭𑁄 𑀓𑀺𑀭𑀲𑁆𑀲 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀆𑀕𑀢𑁄, 𑀫𑀳𑀸𑀚𑀦𑁄 𑀢𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀢𑀻’’𑀢𑀺 𑀲𑀼𑀢𑁆𑀯𑀸 ‘‘𑀯𑀺𑀳𑀸𑀭𑀁 𑀔𑁄 𑀧𑀦 𑀕𑀦𑁆𑀢𑁆𑀯𑀸 𑀫𑀳𑀸𑀚𑀦𑀫𑀚𑁆𑀛𑁂 𑀦 𑀲𑀓𑁆𑀓𑀸 𑀲𑀼𑀔𑁂𑀦 𑀧𑀝𑀺𑀲𑀦𑁆𑀣𑀸𑀭𑀁 𑀯𑀸 𑀓𑀸𑀢𑀼𑀁, 𑀥𑀫𑁆𑀫𑀓𑀣𑀁 𑀯𑀸 𑀲𑁄𑀢𑀼𑀁, 𑀕𑁂𑀳𑀫𑀸𑀕𑀢𑀁𑀬𑁂𑀯 𑀦𑀁 𑀤𑀺𑀲𑁆𑀯𑀸 𑀲𑀼𑀔𑁂𑀦 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑀺𑀲𑁆𑀲𑀸𑀫𑀺 ¶ , 𑀏𑀓𑀸 𑀘 𑀫𑁂 𑀓𑀗𑁆𑀔𑀸 𑀅𑀢𑁆𑀣𑀺, 𑀢𑀫𑁆𑀧𑀺 𑀦𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀁 𑀫𑀸𑀡𑀯𑀓𑀁 𑀧𑁂𑀲𑁂𑀲𑀺, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀳𑀺𑀢𑀁 𑀫𑀸𑀡𑀯𑀓’’𑀦𑁆𑀢𑀺 𑀔𑀼𑀤𑁆𑀤𑀓𑁂 𑀘𑁂𑀢𑁆𑀣 𑀓𑀧𑀘𑁆𑀘𑀬𑁄. 𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 ‘‘𑀅𑀓𑀸𑀮𑁄’’𑀢𑀺𑀆𑀤𑀺𑀓𑀁 𑀯𑀘𑀦𑀁 𑀆𑀦𑀦𑁆𑀤𑀢𑁆𑀣𑁂𑀭𑁄 𑀅𑀯𑁄𑀘.

𑀅𑀓𑀸𑀮𑁄𑀢𑀺 𑀅𑀚𑁆𑀚 𑀕𑀦𑁆𑀢𑀼𑀁 𑀅𑀬𑀼𑀢𑁆𑀢𑀓𑀸𑀮𑁄. 𑀓𑀲𑁆𑀫𑀸𑀢𑀺 𑀘𑁂 ‘‘𑀅𑀢𑁆𑀣𑀺 𑀫𑁂’’𑀢𑀺𑀆𑀤𑀺𑀫𑀸𑀳. 𑀪𑁂𑀲𑀚𑁆𑀚𑀫𑀢𑁆𑀢𑀸𑀢𑀺 𑀅𑀧𑁆𑀧𑀓𑀁 𑀪𑁂𑀲𑀚𑁆𑀚𑀁. 𑀅𑀧𑁆𑀧𑀢𑁆𑀣𑁄 𑀳𑁂𑀢𑁆𑀣 𑀫𑀢𑁆𑀢𑀸𑀲𑀤𑁆𑀤𑁄 ‘‘𑀫𑀢𑁆𑀢𑀸 𑀲𑀼𑀔𑀧𑀭𑀺𑀘𑁆𑀘𑀸𑀕𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁨𑁯𑁦) 𑀯𑀺𑀬. 𑀧𑀻𑀢𑀸𑀢𑀺 𑀧𑀺𑀯𑀺𑀢𑀸. 𑀲𑁆𑀯𑁂𑀧𑀻𑀢𑀺 𑀏𑀢𑁆𑀣 ‘‘𑀅𑀧𑀺-𑀲𑀤𑁆𑀤𑁄 𑀅𑀧𑁂𑀓𑁆𑀔𑁄 𑀫𑀦𑁆𑀢𑀸 𑀦𑀼𑀜𑁆𑀜𑀸𑀬𑀸’’𑀢𑀺 (𑀯𑀚𑀺𑀭. 𑀝𑀻. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀯𑀚𑀺𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁. 𑀅𑀬𑀁 𑀧𑀦 𑀢𑀲𑁆𑀲𑀸𑀥𑀺𑀧𑁆𑀧𑀸𑀬𑁄 𑁋 ‘‘𑀅𑀧𑁆𑀧𑁂𑀯 𑀦𑀸𑀫𑀸’’𑀢𑀺 𑀲𑀁𑀲𑀬𑀫𑀢𑁆𑀢𑁂 𑀯𑀼𑀢𑁆𑀢𑁂 𑀅𑀦𑀼𑀜𑁆𑀜𑀸𑀢𑀪𑀸𑀯𑁄 𑀦 𑀲𑀺𑀤𑁆𑀥𑁄, 𑀢𑀲𑁆𑀫𑀸 𑀢𑀁 𑀲𑀸𑀥𑀦𑀢𑁆𑀣𑀁 ¶ ‘‘𑀅𑀧𑀻’’𑀢𑀺 𑀯𑀼𑀢𑁆𑀢𑀁, 𑀢𑁂𑀦 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺 ‘‘𑀅𑀧𑁆𑀧𑁂𑀯 𑀦𑀸𑀫 𑀲𑁆𑀯𑁂 𑀫𑀬𑀁 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫, 𑀉𑀧𑀲𑀗𑁆𑀓𑀫𑀺𑀢𑀼𑀁 𑀧𑀝𑀺𑀩𑀮𑀸 𑀲𑀫𑀸𑀦𑀸 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫 𑀘𑀸’’𑀢𑀺.

𑀤𑀼𑀢𑀺𑀬𑀤𑀺𑀯𑀲𑁂𑀢𑀺 𑀔𑀻𑀭𑀯𑀺𑀭𑁂𑀘𑀦𑀧𑀻𑀢𑀤𑀺𑀯𑀲𑀢𑁄 𑀤𑀼𑀢𑀺𑀬𑀤𑀺𑀯𑀲𑁂. 𑀘𑁂𑀢𑀓𑀢𑁆𑀣𑁂𑀭𑁂𑀦𑀸𑀢𑀺 𑀘𑁂𑀢𑀺𑀬𑀭𑀝𑁆𑀞𑁂 𑀚𑀸𑀢𑀢𑁆𑀢𑀸 𑀘𑁂𑀢𑀓𑁄𑀢𑀺 𑀏𑀯𑀁 𑀮𑀤𑁆𑀥𑀦𑀸𑀫𑁂𑀦 𑀣𑁂𑀭𑁂𑀦. 𑀧𑀘𑁆𑀙𑀸𑀲𑀫𑀡𑁂𑀦𑀸𑀢𑀺 𑀧𑀘𑁆𑀙𑀸𑀦𑀼𑀕𑀢𑁂𑀦 𑀲𑀫𑀡𑁂𑀦. 𑀲𑀳𑀢𑁆𑀣𑁂 𑀘𑁂𑀢𑀁 𑀓𑀭𑀡𑀯𑀘𑀦𑀁. 𑀲𑀼𑀪𑁂𑀦 𑀫𑀸𑀡𑀯𑁂𑀦 𑀧𑀼𑀝𑁆𑀞𑁄𑀢𑀺 ‘‘𑀬𑁂𑀲𑀼 𑀥𑀫𑁆𑀫𑁂𑀲𑀼 𑀪𑀯𑀁 𑀕𑁄𑀢𑀫𑁄 𑀇𑀫𑀁 𑀮𑁄𑀓𑀁 𑀧𑀢𑀺𑀝𑁆𑀞𑀧𑁂𑀲𑀺, 𑀢𑁂 𑀢𑀲𑁆𑀲 𑀅𑀘𑁆𑀘𑀬𑁂𑀦 𑀦𑀝𑁆𑀞𑀸 𑀦𑀼 𑀔𑁄, 𑀥𑀭𑀦𑁆𑀢𑀺 𑀦𑀼 𑀔𑁄, 𑀲𑀘𑁂 𑀥𑀭𑀦𑁆𑀢𑀺, 𑀪𑀯𑀁 (𑀦𑀢𑁆𑀣𑀺 𑀤𑀻. 𑀦𑀺. 𑀅𑀝𑁆𑀞. 𑁧.𑁪𑁪𑁮) 𑀆𑀦𑀦𑁆𑀤𑁄 𑀚𑀸𑀦𑀺𑀲𑁆𑀲𑀢𑀺, 𑀳𑀦𑁆𑀤 𑀦𑀁 𑀧𑀼𑀘𑁆𑀙𑀸𑀫𑀻’’𑀢𑀺 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀬𑁂𑀲𑀁 𑀲𑁄 𑀪𑀯𑀁 𑀕𑁄𑀢𑀫𑁄 𑀥𑀫𑁆𑀫𑀸𑀦𑀁 𑀯𑀡𑁆𑀡𑀯𑀸𑀤𑀻 𑀅𑀳𑁄𑀲𑀺, 𑀬𑀢𑁆𑀣 𑀘 𑀇𑀫𑀁 𑀚𑀦𑀢𑀁 𑀲𑀫𑀸𑀤𑀧𑁂𑀲𑀺 𑀦𑀺𑀯𑁂𑀲𑁂𑀲𑀺 𑀧𑀢𑀺𑀝𑁆𑀞𑀸𑀧𑁂𑀲𑀺, 𑀓𑀢𑀫𑁂𑀲𑀸𑀦𑀁 𑀔𑁄 𑀪𑁄 𑀆𑀦𑀦𑁆𑀤 𑀥𑀫𑁆𑀫𑀸𑀦𑀁 𑀲𑁄 𑀪𑀯𑀁 𑀕𑁄𑀢𑀫𑁄 𑀯𑀡𑁆𑀡𑀯𑀸𑀤𑀻 𑀅𑀳𑁄𑀲𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁪𑁪𑁮) 𑀧𑀼𑀝𑁆𑀞𑁄, 𑀅𑀣𑀲𑁆𑀲 𑀣𑁂𑀭𑁄 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀳𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀺𑀡𑁆𑀡𑀁 𑀔𑁄 𑀫𑀸𑀡𑀯 𑀔𑀦𑁆𑀥𑀸𑀦𑀁 𑀲𑁄 𑀪𑀕𑀯𑀸 𑀯𑀡𑁆𑀡𑀯𑀸𑀤𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁪𑁪𑁯) 𑀇𑀥 𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑁂 𑀤𑀲𑀫𑀁 𑀲𑀼𑀢𑁆𑀢𑀫𑀪𑀸𑀲𑀺, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀇𑀫𑀲𑁆𑀫𑀺𑀁…𑀧𑁂… 𑀫𑀪𑀸𑀲𑀻’’𑀢𑀺.

𑀔𑀡𑁆𑀟𑀦𑁆𑀢𑀺 𑀙𑀺𑀦𑁆𑀦𑀁. 𑀨𑀼𑀮𑁆𑀮𑀦𑁆𑀢𑀺 𑀪𑀺𑀦𑁆𑀦𑀁, 𑀲𑁂𑀯𑀸𑀮𑀸𑀳𑀺𑀙𑀢𑁆𑀢𑀓𑀸𑀤𑀺𑀯𑀺𑀓𑀲𑁆𑀲𑀦𑀁 𑀯𑀸, 𑀢𑁂𑀲𑀁 𑀧𑀝𑀺𑀲𑀗𑁆𑀔𑀭𑀡𑀁 𑀲𑀫𑁆𑀫𑀸 𑀧𑀸𑀓𑀢𑀺𑀓𑀓𑀭𑀡𑀁, 𑀅𑀪𑀺𑀦𑀯𑀧𑀝𑀺𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀓𑀝𑁆𑀞𑀸𑀬𑀸𑀢𑀺 𑀆𑀲𑀦𑁆𑀦𑀸𑀬. 𑀯𑀲𑁆𑀲𑀁 𑀉𑀧𑀦𑁂𑀦𑁆𑀢𑀺 𑀉𑀧𑀕𑀘𑁆𑀙𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀸, 𑀯𑀲𑁆𑀲𑀽𑀧𑀕𑀢𑀓𑀸𑀮𑁄, 𑀢𑀸𑀬. 𑀲𑀗𑁆𑀕𑀻𑀢𑀺𑀧𑀸𑀴𑀺𑀬𑀁 (𑀘𑀽𑀴𑀯. 𑁪𑁪𑁦) 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀫𑁆𑀧𑀺 𑀯𑀘𑀦𑀁 ¶ 𑀏𑀯𑀁 𑀕𑀢𑁂𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀲𑀁𑀲𑀦𑁆𑀤𑁂𑀢𑀼𑀁 𑀲𑀸𑀥𑁂𑀢𑀼𑀁 𑀯𑀸 𑀆𑀳 ‘‘𑀏𑀯𑀜𑁆𑀳𑀻’’𑀢𑀺𑀆𑀤𑀺.

𑀭𑀸𑀚𑀕𑀳𑀁 𑀧𑀭𑀺𑀯𑀸𑀭𑁂𑀢𑁆𑀯𑀸𑀢𑀺 𑀩𑀳𑀺𑀦𑀕𑀭𑁂 𑀞𑀺𑀢𑀪𑀸𑀯𑁂𑀦 𑀯𑀼𑀢𑁆𑀢𑀁. 𑀙𑀟𑁆𑀟𑀺𑀢𑀧𑀢𑀺𑀢𑀉𑀓𑁆𑀮𑀸𑀧𑀸𑀢𑀺 𑀙𑀟𑁆𑀟𑀺𑀢𑀸 𑀘 𑀧𑀢𑀺𑀢𑀸 𑀘 𑀉𑀓𑁆𑀮𑀸𑀧𑀸 𑀘. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀙𑀟𑁆𑀟𑀺𑀢𑀸 𑀯𑀺𑀲𑁆𑀲𑀝𑁆𑀞𑀸, 𑀢𑀢𑁄𑀬𑁂𑀯 𑀘 𑀉𑀧𑀘𑀺𑀓𑀸𑀤𑀻𑀳𑀺 𑀔𑀸𑀤𑀺𑀢𑀢𑁆𑀢𑀸 𑀇𑀢𑁄 𑀘𑀺𑀢𑁄 𑀘 𑀧𑀢𑀺𑀢𑀸, 𑀲𑀫𑁆𑀫𑀚𑁆𑀚𑀦𑀸𑀪𑀸𑀯𑁂𑀦 𑀆𑀓𑀺𑀡𑁆𑀡𑀓𑀘𑀯𑀭𑀢𑁆𑀢𑀸 𑀉𑀓𑁆𑀮𑀸𑀧𑀸 𑀘𑀸𑀢𑀺. 𑀢𑀤𑁂𑀯𑀢𑁆𑀣𑀁 ‘‘𑀪𑀕𑀯𑀢𑁄 𑀳𑀻’’𑀢𑀺𑀆𑀤𑀺𑀦𑀸 𑀯𑀺𑀪𑀸𑀯𑁂𑀢𑀺. 𑀅𑀯𑀓𑀼𑀣𑀺 𑀧𑀽𑀢𑀺𑀪𑀸𑀯𑀫𑀕𑀫𑀸𑀲𑀻𑀢𑀺 𑀉𑀓𑁆𑀮𑀸𑀧𑁄 𑀣-𑀓𑀸𑀭𑀲𑁆𑀲 𑀮-𑀓𑀸𑀭𑀁 𑀓𑀢𑁆𑀯𑀸, 𑀉𑀚𑁆𑀛𑀺𑀝𑁆𑀞𑁄 𑀯𑀸 𑀓𑀮𑀸𑀧𑁄𑀲𑀫𑀽𑀳𑁄𑀢𑀺 𑀉𑀓𑁆𑀮𑀸𑀧𑁄, 𑀯𑀡𑁆𑀡𑀲𑀗𑁆𑀕𑀫𑀦𑀯𑀲𑁂𑀦𑁂𑀯𑀁 𑀯𑀼𑀢𑁆𑀢𑀁 𑀬𑀣𑀸 ‘‘𑀉𑀧𑀓𑁆𑀮𑁂𑀲𑁄, 𑀲𑁆𑀦𑁂𑀳𑁄’’ 𑁋 𑀇𑀘𑁆𑀘𑀸𑀤𑀺, 𑀢𑁂𑀦 𑀬𑀼𑀢𑁆𑀢𑀸𑀢𑀺 𑀢𑀣𑀸. 𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀯𑁂𑀡𑀻𑀬𑀦𑁆𑀢𑀺 𑀤𑀺𑀲𑁆𑀲𑀦𑁆𑀢𑀻𑀢𑀺 𑀧𑀭𑀺𑀯𑁂𑀡𑀸. 𑀓𑀼𑀭𑀼𑀫𑀸𑀦𑀸𑀢𑀺 𑀓𑀢𑁆𑀢𑀼𑀓𑀸𑀫𑀸. 𑀲𑁂𑀦𑀸𑀲𑀦𑀯𑀢𑁆𑀢𑀸𑀦𑀁 𑀧𑀜𑁆𑀜𑀢𑁆𑀢𑀢𑁆𑀢𑀸, 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 𑀘 𑀲𑁂𑀦𑀸𑀲𑀦𑀧𑀝𑀺𑀩𑀤𑁆𑀥𑀸𑀦𑀁 𑀩𑀳𑀽𑀦𑀫𑁆𑀧𑀺 𑀯𑀘𑀦𑀸𑀦𑀁 𑀯𑀼𑀢𑁆𑀢𑀢𑁆𑀢𑀸 𑀲𑁂𑀦𑀸𑀲𑀦𑀧𑀝𑀺𑀲𑀗𑁆𑀔𑀭𑀡𑀫𑁆𑀧𑀺 𑀢𑀲𑁆𑀲 𑀧𑀽𑀚𑀸𑀬𑁂𑀯 𑀦𑀸𑀫𑀸𑀢𑀺 𑀆𑀳 ‘‘𑀪𑀕𑀯𑀢𑁄 𑀯𑀘𑀦𑀧𑀽𑀚𑀦𑀢𑁆𑀣’’𑀦𑁆𑀢𑀺. 𑀧𑀞𑀫𑀁 𑀫𑀸𑀲𑀦𑁆𑀢𑀺 ¶ 𑀯𑀲𑁆𑀲𑀸𑀦𑀲𑁆𑀲 𑀧𑀞𑀫𑀁 𑀫𑀸𑀲𑀁. 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. ‘‘𑀢𑀺𑀢𑁆𑀣𑀺𑀬𑀯𑀸𑀤𑀧𑀭𑀺𑀫𑁄𑀘𑀦𑀢𑁆𑀣𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀢𑀺𑀢𑁆𑀣𑀺𑀬𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀬𑀦𑁆𑀢𑀺 𑀓𑀢𑀺𑀓𑀯𑀢𑁆𑀢𑀓𑀭𑀡𑀁. 𑀏𑀤𑀺𑀲𑁂𑀲𑀼 𑀳𑀺 𑀞𑀸𑀦𑁂𑀲𑀼 𑀬𑀁-𑀲𑀤𑁆𑀤𑁄 𑀢𑀁-𑀲𑀤𑁆𑀤𑀸𑀦𑀧𑁂𑀓𑁆𑀔𑁄 𑀢𑁂𑀦𑁂𑀯 𑀅𑀢𑁆𑀣𑀲𑁆𑀲 𑀧𑀭𑀺𑀧𑀼𑀡𑁆𑀡𑀢𑁆𑀢𑀸. 𑀬𑀁 𑀯𑀸 𑀓𑀢𑀺𑀓𑀯𑀢𑁆𑀢𑀁 𑀲𑀦𑁆𑀥𑀸𑀬 ‘‘𑀅𑀣 𑀔𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀤𑁂𑀯 𑀫𑀬𑀸𑀧𑀺 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀈𑀤𑀺𑀲𑁂𑀲𑀼 𑀪𑀕𑀯𑀢𑀸…𑀧𑁂… 𑀯𑀡𑁆𑀡𑀺𑀢𑀦𑁆𑀢𑀺 𑀲𑁂𑀦𑀸𑀲𑀦𑀯𑀢𑁆𑀢𑀁 𑀧𑀜𑁆𑀜𑀧𑁂𑀦𑁆𑀢𑁂𑀦 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁩𑁦𑁮) 𑀘 𑀲𑁂𑀦𑀸𑀲𑀦𑀧𑀝𑀺𑀩𑀤𑁆𑀥𑀯𑀘𑀦𑀁 𑀓𑀣𑁂𑀦𑁆𑀢𑁂𑀦 𑀯𑀡𑁆𑀡𑀺𑀢𑀁. 𑀲𑀗𑁆𑀕𑀸𑀬𑀺𑀲𑁆𑀲𑀸𑀫𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑀲𑁆𑀲 ‘‘𑀯𑀼𑀢𑁆𑀢𑀁 𑀅𑀳𑁄𑀲𑀻’’𑀢𑀺 𑀘 𑀉𑀪𑀬𑀢𑁆𑀣 𑀲𑀫𑁆𑀩𑀦𑁆𑀥𑁄, 𑀏𑀓𑀲𑁆𑀲 𑀯𑀸 𑀇𑀢𑀺-𑀲𑀤𑁆𑀤𑀲𑁆𑀲 𑀮𑁄𑀧𑁄.

𑀤𑀼𑀢𑀺𑀬𑀤𑀺𑀯𑀲𑁂𑀢𑀺 𑀏𑀯𑀁 𑀘𑀺𑀦𑁆𑀢𑀺𑀢𑀤𑀺𑀯𑀲𑀢𑁄 𑀤𑀼𑀢𑀺𑀬𑀤𑀺𑀯𑀲𑁂, 𑀲𑁄 𑀘 𑀔𑁄 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑀢𑁄 𑀤𑀼𑀢𑀺𑀬𑀤𑀺𑀯𑀲𑁄𑀯. 𑀣𑁂𑀭𑀸 𑀳𑀺 𑀆𑀲𑀴𑁆𑀳𑀺𑀧𑀼𑀡𑁆𑀡𑀫𑀺𑀢𑁄 𑀧𑀸𑀝𑀺𑀧𑀤𑀤𑀺𑀯𑀲𑁂𑀬𑁂𑀯 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀯𑀲𑁆𑀲𑀫𑀼𑀧𑀕𑀦𑁆𑀢𑁆𑀯𑀸 𑀏𑀯𑀁 𑀘𑀺𑀦𑁆𑀢𑁂𑀲𑀼𑀦𑁆𑀢𑀺. 𑀭𑀸𑀚𑀤𑁆𑀯𑀸𑀭𑁂𑀢𑀺 𑀭𑀸𑀚𑀕𑁂𑀳𑀤𑁆𑀯𑀸𑀭𑁂. 𑀳𑀢𑁆𑀣𑀓𑀫𑁆𑀫𑀦𑁆𑀢𑀺 𑀳𑀢𑁆𑀣𑀓𑀺𑀭𑀺𑀬𑀁, 𑀳𑀢𑁆𑀣𑀓𑀫𑁆𑀫𑀲𑁆𑀲 𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀝𑀺𑀯𑁂𑀤𑁂𑀲𑀼𑀦𑁆𑀢𑀺 𑀚𑀸𑀦𑀸𑀧𑁂𑀲𑀼𑀁. 𑀯𑀺𑀲𑀝𑁆𑀞𑀸𑀢𑀺 𑀦𑀺𑀭𑀸𑀲𑀗𑁆𑀓𑀘𑀺𑀢𑁆𑀢𑀸. 𑀆𑀡𑀸𑀬𑁂𑀯 ¶ 𑀅𑀧𑁆𑀧𑀝𑀺𑀳𑀢𑀯𑀼𑀢𑁆𑀢𑀺𑀬𑀸 𑀧𑀯𑀢𑁆𑀢𑀦𑀝𑁆𑀞𑁂𑀦 𑀘𑀓𑁆𑀓𑀦𑁆𑀢𑀺 𑀆𑀡𑀸𑀘𑀓𑁆𑀓𑀁. 𑀢𑀣𑀸 𑀥𑀫𑁆𑀫𑁄𑀬𑁂𑀯 𑀘𑀓𑁆𑀓𑀦𑁆𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀢𑀁 𑀧𑀦𑀺𑀥 𑀤𑁂𑀲𑀦𑀸𑀜𑀸𑀡𑀧𑀝𑀺𑀯𑁂𑀥𑀜𑀸𑀡𑀯𑀲𑁂𑀦 𑀤𑀼𑀯𑀺𑀥𑀫𑁆𑀧𑀺 𑀬𑀼𑀚𑁆𑀚𑀢𑀺 𑀢𑀤𑀼𑀪𑀬𑁂𑀦𑁂𑀯 𑀲𑀗𑁆𑀕𑀻𑀢𑀺𑀬𑀸 𑀧𑀯𑀢𑁆𑀢𑀦𑀢𑁄. ‘‘𑀥𑀫𑁆𑀫𑀘𑀓𑁆𑀓𑀦𑁆𑀢𑀺 𑀘𑁂𑀢𑀁 𑀤𑁂𑀲𑀦𑀸𑀜𑀸𑀡𑀲𑁆𑀲𑀸𑀧𑀺 𑀦𑀸𑀫𑀁, 𑀧𑀝𑀺𑀯𑁂𑀥𑀜𑀸𑀡𑀲𑁆𑀲𑀸𑀧𑀻’’𑀢𑀺 (𑀲𑀁. 𑀦𑀺. 𑀅𑀝𑁆𑀞. 𑁨.𑁩.𑁭𑁮) 𑀳𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀲𑀦𑁆𑀦𑀺𑀲𑀚𑁆𑀚𑀝𑁆𑀞𑀸𑀦𑀦𑁆𑀢𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀦𑀺𑀲𑀻𑀤𑀦𑀝𑁆𑀞𑀸𑀦𑀁. 𑀲𑀢𑁆𑀢 𑀧𑀡𑁆𑀡𑀸𑀦𑀺 𑀬𑀲𑁆𑀲𑀸𑀢𑀺 𑀲𑀢𑁆𑀢𑀧𑀡𑁆𑀡𑀻, 𑀬𑁄 ‘‘𑀙𑀢𑁆𑀢𑀧𑀡𑁆𑀡𑁄, 𑀯𑀺𑀲𑀫𑀘𑁆𑀙𑀤𑁄’’ 𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀚𑀸𑀢𑀕𑀼𑀳𑀤𑁆𑀯𑀸𑀭𑁂𑀢𑀺 𑀅𑀢𑁆𑀣𑁄.

𑀯𑀺𑀲𑁆𑀲𑀓𑀫𑁆𑀫𑀼𑀦𑀸𑀢𑀺 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀓𑀫𑁆𑀫𑀸𑀓𑀫𑁆𑀫𑀯𑀺𑀥𑀸𑀬𑀓𑀁 𑀤𑁂𑀯𑀧𑀼𑀢𑁆𑀢𑀁 𑀲𑀦𑁆𑀥𑀸𑀬𑀸𑀳. 𑀲𑀼𑀯𑀺𑀪𑀢𑁆𑀢𑀪𑀺𑀢𑁆𑀢𑀺𑀣𑀫𑁆𑀪𑀲𑁄𑀧𑀸𑀦𑀦𑁆𑀢𑀺 𑀏𑀢𑁆𑀣 𑀲𑀼𑀯𑀺𑀪𑀢𑁆𑀢𑀧𑀤𑀲𑁆𑀲 𑀤𑁆𑀯𑀦𑁆𑀤𑀢𑁄 𑀧𑀼𑀩𑁆𑀩𑁂 𑀲𑀼𑀬𑁆𑀬𑀫𑀸𑀦𑀢𑁆𑀢𑀸 𑀲𑀩𑁆𑀩𑁂𑀳𑀺 𑀤𑁆𑀯𑀦𑁆𑀤𑀧𑀤𑁂𑀳𑀺 𑀲𑀫𑁆𑀩𑀦𑁆𑀥𑁄, 𑀢𑀣𑀸 ‘‘𑀦𑀸𑀦𑀸𑀯𑀺𑀥…𑀧𑁂… 𑀯𑀺𑀘𑀺𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼𑀧𑀺. 𑀭𑀸𑀚𑀪𑀯𑀦𑀯𑀺𑀪𑀽𑀢𑀺𑀦𑁆𑀢𑀺 𑀭𑀸𑀚𑀪𑀯𑀦𑀲𑀫𑁆𑀧𑀢𑁆𑀢𑀺𑀁, 𑀭𑀸𑀚𑀪𑀯𑀦𑀲𑁄𑀪𑀁 𑀯𑀸. 𑀅𑀯𑀳𑀲𑀦𑁆𑀢𑀫𑀺𑀯𑀸𑀢𑀺 𑀅𑀯𑀳𑀸𑀲𑀁 𑀓𑀼𑀭𑀼𑀫𑀸𑀦𑀁 𑀯𑀺𑀬. 𑀲𑀺𑀭𑀺𑀬𑀸𑀢𑀺 𑀲𑁄𑀪𑀸𑀲𑀗𑁆𑀔𑀸𑀢𑀸𑀬 𑀮𑀓𑁆𑀔𑀺𑀬𑀸. 𑀦𑀺𑀓𑁂𑀢𑀦𑀫𑀺𑀯𑀸𑀢𑀺 𑀯𑀲𑀦𑀝𑁆𑀞𑀸𑀦𑀫𑀺𑀯, ‘‘𑀚𑀮𑀦𑁆𑀢𑀫𑀺𑀯𑀸’’𑀢𑀺𑀧𑀺 𑀧𑀸𑀞𑁄. 𑀏𑀓𑀲𑁆𑀫𑀺𑀁𑀬𑁂𑀯 𑀧𑀸𑀦𑀻𑀬𑀢𑀺𑀢𑁆𑀣𑁂 𑀦𑀺𑀧𑀢𑀦𑁆𑀢𑀸 𑀧𑀓𑁆𑀔𑀺𑀦𑁄 𑀯𑀺𑀬 𑀲𑀩𑁆𑀩𑁂𑀲𑀫𑁆𑀧𑀺 𑀚𑀦𑀸𑀦𑀁 𑀘𑀓𑁆𑀔𑀽𑀦𑀺 𑀫𑀡𑁆𑀟𑀧𑁂𑀬𑁂𑀯 𑀦𑀺𑀧𑀢𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀏𑀓𑀦𑀺𑀧𑀸𑀢…𑀧𑁂… 𑀯𑀺𑀳𑀗𑁆𑀕𑀸𑀦’’𑀦𑁆𑀢𑀺. 𑀦𑀬𑀦𑀯𑀺𑀳𑀗𑁆𑀕𑀸𑀦𑀦𑁆𑀢𑀺 𑀦𑀬𑀦𑀲𑀗𑁆𑀔𑀸𑀢𑀯𑀺𑀳𑀗𑁆𑀕𑀸𑀦𑀁. 𑀮𑁄𑀓𑀭𑀸𑀫𑀡𑁂𑀬𑁆𑀬𑀓𑀫𑀺𑀯 𑀲𑀫𑁆𑀧𑀺𑀡𑁆𑀟𑀺𑀢𑀦𑁆𑀢𑀺 𑀬𑀤𑀺 𑀮𑁄𑀓𑁂 𑀯𑀺𑀚𑁆𑀚𑀫𑀸𑀦𑀁 𑀭𑀸𑀫𑀡𑁂𑀬𑁆𑀬𑀓𑀁 𑀲𑀩𑁆𑀩𑀫𑁂𑀯 𑀆𑀦𑁂𑀢𑁆𑀯𑀸 𑀏𑀓𑀢𑁆𑀣 𑀲𑀫𑁆𑀧𑀺𑀡𑁆𑀟𑀺𑀢𑀁 𑀲𑀺𑀬𑀸, 𑀢𑀁 𑀯𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀬𑀁 𑀬𑀁 𑀯𑀸 𑀮𑁄𑀓𑁂 𑀭𑀫𑀺𑀢𑀼𑀫𑀭𑀳𑀢𑀺, 𑀢𑀁 𑀲𑀩𑁆𑀩𑀁 𑀲𑀫𑁆𑀧𑀺𑀡𑁆𑀟𑀺𑀢𑀫𑀺𑀯𑀸𑀢𑀺𑀧𑀺 ¶ 𑀅𑀢𑁆𑀣𑁄. 𑀤𑀝𑁆𑀞𑀩𑁆𑀩𑀲𑀸𑀭𑀫𑀡𑁆𑀟𑀦𑁆𑀢𑀺 𑀨𑁂𑀕𑁆𑀕𑀼𑀭𑀳𑀺𑀢𑀁 𑀲𑀸𑀭𑀁 𑀯𑀺𑀬, 𑀓𑀲𑀝𑀯𑀺𑀦𑀺𑀫𑀼𑀢𑁆𑀢𑀁 𑀧𑀲𑀦𑁆𑀦𑀁 𑀯𑀺𑀬 𑀘 𑀤𑀝𑁆𑀞𑀼𑀫𑀭𑀳𑀭𑀽𑀧𑁂𑀲𑀼 𑀲𑀸𑀭𑀪𑀽𑀢𑀁, 𑀧𑀲𑀦𑁆𑀦𑀪𑀽𑀢𑀜𑁆𑀘. 𑀅𑀧𑀺𑀘 𑀤𑀝𑁆𑀞𑀩𑁆𑀩𑁄 𑀤𑀲𑁆𑀲𑀦𑀻𑀬𑁄 𑀲𑀸𑀭𑀪𑀽𑀢𑁄 𑀯𑀺𑀲𑀺𑀝𑁆𑀞𑀢𑀭𑁄 𑀫𑀡𑁆𑀟𑁄 𑀫𑀡𑁆𑀟𑀦𑀁 𑀅𑀮𑀗𑁆𑀓𑀸𑀭𑁄 𑀏𑀢𑀲𑁆𑀲𑀸𑀢𑀺 𑀤𑀝𑁆𑀞𑀩𑁆𑀩𑀲𑀸𑀭𑀫𑀡𑁆𑀟𑁄, 𑀢𑀁. 𑀫𑀡𑁆𑀟𑀁 𑀲𑀽𑀭𑀺𑀬𑀭𑀲𑁆𑀫𑀺𑀁 𑀧𑀸𑀢𑀺 𑀦𑀺𑀯𑀸𑀭𑁂𑀢𑀺, 𑀲𑀩𑁆𑀩𑁂𑀲𑀁 𑀯𑀸 𑀚𑀦𑀸𑀦𑀁 𑀫𑀡𑁆𑀟𑀁 𑀧𑀲𑀦𑁆𑀦𑀁 𑀧𑀸𑀢𑀺 𑀭𑀓𑁆𑀔𑀢𑀺, 𑀫𑀡𑁆𑀟𑀦𑀫𑀮𑀗𑁆𑀓𑀸𑀭𑀁 𑀯𑀸 𑀧𑀸𑀢𑀺 𑀧𑀺𑀯𑀢𑀺 𑀅𑀮𑀗𑁆𑀓𑀭𑀺𑀢𑀼𑀁 𑀬𑀼𑀢𑁆𑀢𑀪𑀸𑀯𑁂𑀦𑀸𑀢𑀺 𑀫𑀡𑁆𑀟𑀧𑁄, 𑀢𑀁.

𑀓𑀼𑀲𑀼𑀫𑀤𑀸𑀫𑀸𑀦𑀺 𑀘 𑀢𑀸𑀦𑀺 𑀑𑀮𑀫𑁆𑀩𑀓𑀸𑀦𑀺 𑀘𑁂𑀢𑀺 𑀓𑀼𑀲𑀼𑀫𑀤𑀸𑀫𑁄𑀮𑀫𑁆𑀩𑀓𑀸𑀦𑀺. 𑀯𑀺𑀲𑁂𑀲𑀦𑀲𑁆𑀲 𑀘𑁂𑀢𑁆𑀣 𑀧𑀭𑀦𑀺𑀧𑀸𑀢𑁄 𑀬𑀣𑀸 ‘‘𑀅𑀕𑁆𑀬𑀸𑀳𑀺𑀢𑁄’’𑀢𑀺. 𑀯𑀺𑀯𑀺𑀥𑀸𑀦𑀺𑀬𑁂𑀯 𑀓𑀼𑀲𑀼𑀫𑀤𑀸𑀫𑁄𑀮𑀫𑁆𑀩𑀓𑀸𑀦𑀺 𑀢𑀣𑀸, 𑀢𑀸𑀦𑀺 𑀯𑀺𑀦𑀺𑀕𑁆𑀕𑀮𑀦𑁆𑀢𑀁 𑀯𑀺𑀲𑁂𑀲𑁂𑀦 𑀯𑀫𑁂𑀦𑁆𑀢𑀁 𑀦𑀺𑀓𑁆𑀔𑀸𑀫𑁂𑀦𑁆𑀢𑀫𑀺𑀯 𑀘𑀸𑀭𑀼 𑀲𑁄𑀪𑀦𑀁 𑀯𑀺𑀢𑀸𑀦𑀁 𑀏𑀢𑁆𑀣𑀸𑀢𑀺 𑀢𑀣𑀸. 𑀓𑀼𑀝𑁆𑀝𑁂𑀦 𑀕𑀳𑀺𑀢𑁄 𑀲𑀫𑀁 𑀓𑀢𑁄𑀢𑀺 𑀓𑀼𑀝𑁆𑀝𑀺𑀫𑁄, 𑀓𑁄𑀝𑁆𑀝𑀺𑀫𑁄 𑀯𑀸, 𑀢𑀸𑀤𑀺𑀲𑁄𑀬𑁂𑀯 𑀫𑀡𑀻𑀢𑀺 𑀫𑀡𑀺𑀓𑁄𑀝𑁆𑀝𑀺𑀫𑁄 ¶ , 𑀦𑀸𑀦𑀸𑀭𑀢𑀦𑁂𑀳𑀺 𑀯𑀺𑀘𑀺𑀢𑁆𑀢𑁄 𑀫𑀡𑀺𑀓𑁄𑀝𑁆𑀝𑀺𑀫𑁄, 𑀢𑀲𑁆𑀲 𑀢𑀮𑀁 𑀢𑀣𑀸. 𑀅𑀣 𑀯𑀸 𑀫𑀡𑀺𑀬𑁄 𑀓𑁄𑀝𑁆𑀝𑁂𑀢𑁆𑀯𑀸 𑀓𑀢𑀢𑀮𑀢𑁆𑀢𑀸 𑀫𑀡𑀺𑀓𑁄𑀝𑁆𑀝𑁂𑀦 𑀦𑀺𑀧𑁆𑀨𑀢𑁆𑀢𑀦𑁆𑀢𑀺 𑀫𑀡𑀺𑀓𑁄𑀝𑁆𑀝𑀺𑀫𑀁, 𑀢𑀫𑁂𑀯 𑀢𑀮𑀁, 𑀦𑀸𑀦𑀸𑀭𑀢𑀦𑀯𑀺𑀘𑀺𑀢𑁆𑀢𑀁 𑀫𑀡𑀺𑀓𑁄𑀝𑁆𑀝𑀺𑀫𑀢𑀮𑀁 𑀢𑀣𑀸. 𑀢𑀫𑀺𑀯 𑀘 𑀦𑀸𑀦𑀸𑀧𑀼𑀧𑁆𑀨𑀽𑀧𑀳𑀸𑀭𑀯𑀺𑀘𑀺𑀢𑁆𑀢𑀁 𑀲𑀼𑀧𑀭𑀺𑀦𑀺𑀝𑁆𑀞𑀺𑀢𑀪𑀽𑀫𑀺𑀓𑀫𑁆𑀫𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀧𑁆𑀨𑀧𑀽𑀚𑀸 𑀧𑀼𑀧𑁆𑀨𑀽𑀧𑀳𑀸𑀭𑁄. 𑀏𑀢𑁆𑀣 𑀳𑀺 𑀦𑀸𑀦𑀸𑀭𑀢𑀦𑀯𑀺𑀘𑀺𑀢𑁆𑀢𑀕𑁆𑀕𑀳𑀡𑀁 𑀦𑀸𑀦𑀸𑀧𑀼𑀧𑁆𑀨𑀽𑀧𑀳𑀸𑀭𑀯𑀺𑀘𑀺𑀢𑁆𑀢𑀢𑀸𑀬𑀦𑀺𑀤𑀲𑁆𑀲𑀦𑀁, 𑀫𑀡𑀺𑀓𑁄𑀝𑁆𑀝𑀺𑀫𑀢𑀮𑀕𑁆𑀕𑀳𑀡𑀁 𑀲𑀼𑀧𑀭𑀺𑀦𑀺𑀝𑁆𑀞𑀺𑀢𑀪𑀽𑀫𑀺𑀓𑀫𑁆𑀫𑀢𑀸𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀦𑁆𑀢𑀺 𑀫𑀡𑁆𑀟𑀧𑀁. 𑀩𑁆𑀭𑀳𑁆𑀫𑀯𑀺𑀫𑀸𑀦𑀲𑀤𑀺𑀲𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀁, 𑀬𑀣𑀸 𑀩𑁆𑀭𑀳𑁆𑀫𑀯𑀺𑀫𑀸𑀦𑀁 𑀲𑁄𑀪𑀢𑀺, 𑀢𑀣𑀸 𑀅𑀮𑀗𑁆𑀓𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀲𑁂𑀲𑁂𑀦 𑀫𑀸𑀦𑁂𑀢𑀩𑁆𑀩𑀦𑁆𑀢𑀺 𑀯𑀺𑀫𑀸𑀦𑀁. 𑀲𑀤𑁆𑀤𑀯𑀺𑀤𑀽 𑀧𑀦 ‘‘𑀯𑀺𑀳𑁂 𑀆𑀓𑀸𑀲𑁂 𑀫𑀸𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀤𑁂𑀯𑀸 𑀬𑁂𑀦𑀸𑀢𑀺 𑀯𑀺𑀫𑀸𑀦’’𑀦𑁆𑀢𑀺 𑀯𑀤𑀦𑁆𑀢𑀺. 𑀯𑀺𑀲𑁂𑀲𑁂𑀦 𑀯𑀸 𑀲𑀼𑀘𑀭𑀺𑀢𑀓𑀫𑁆𑀫𑀼𑀦𑀸 𑀫𑀻𑀬𑀢𑀺 𑀦𑀺𑀫𑁆𑀫𑀻𑀬𑀢𑀻𑀢𑀺 𑀯𑀺𑀫𑀸𑀦𑀁, 𑀯𑀻𑀢𑀺 𑀯𑀸 𑀲𑀓𑀼𑀡𑁄 𑀯𑀼𑀘𑁆𑀘𑀢𑀺, 𑀢𑀁 𑀲𑀡𑁆𑀞𑀸𑀦𑁂𑀦 𑀫𑀻𑀬𑀢𑀺 𑀦𑀺𑀫𑁆𑀫𑀻𑀬𑀢𑀻𑀢𑀺 𑀯𑀺𑀫𑀸𑀦𑀦𑁆𑀢𑀺𑀆𑀤𑀺𑀦𑀸𑀧𑀺 𑀯𑀢𑁆𑀢𑀩𑁆𑀩𑁄. 𑀯𑀺𑀫𑀸𑀦𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀏𑀓𑀬𑁄𑀚𑀦𑀤𑁆𑀯𑀺𑀬𑁄𑀚𑀦𑀸𑀤𑀺𑀪𑀸𑀯𑁂𑀦 𑀧𑀫𑀸𑀡𑀯𑀺𑀲𑁂𑀲𑀬𑀼𑀢𑁆𑀢𑀢𑀸𑀬, 𑀲𑁄𑀪𑀸𑀢𑀺𑀲𑀬𑀬𑁄𑀕𑁂𑀦 𑀘 𑀯𑀺𑀲𑁂𑀲𑀢𑁄 𑀫𑀸𑀦𑀦𑀻𑀬𑀢𑀸𑀬 𑀯𑀺𑀫𑀸𑀦’’𑀦𑁆𑀢𑀺 (𑀯𑀺. 𑀯. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀯𑀼𑀢𑁆𑀢𑀁. 𑀦𑀢𑁆𑀣𑀺 𑀅𑀕𑁆𑀖𑀫𑁂𑀢𑁂𑀲𑀦𑁆𑀢𑀺 𑀅𑀦𑀕𑁆𑀖𑀸𑀦𑀺, 𑀅𑀧𑀭𑀺𑀫𑀸𑀡𑀕𑁆𑀖𑀸𑀦𑀺 𑀅𑀕𑁆𑀖𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀢𑀺𑀭𑀽𑀧𑀁, 𑀧𑀘𑁆𑀘𑁂𑀓𑀁 𑀯𑀸 𑀅𑀢𑁆𑀣𑀭𑀺𑀢𑀩𑁆𑀩𑀸𑀦𑀻𑀢𑀺 𑀧𑀘𑁆𑀘𑀢𑁆𑀣𑀭𑀡𑀸𑀦𑀺, 𑀢𑁂𑀲𑀁 𑀲𑀢𑀸𑀦𑀺 𑀢𑀣𑀸. 𑀉𑀢𑁆𑀢𑀭𑀸𑀪𑀺𑀫𑀼𑀔𑀦𑁆𑀢𑀺 𑀉𑀢𑁆𑀢𑀭𑀤𑀺𑀲𑀸𑀪𑀺𑀫𑀼𑀔𑀁. 𑀥𑀫𑁆𑀫𑁄𑀧𑀺 𑀲𑀢𑁆𑀣𑀸𑀬𑁂𑀯 𑀲𑀢𑁆𑀣𑀼𑀓𑀺𑀘𑁆𑀘𑀦𑀺𑀧𑁆𑀨𑀸𑀤𑀦𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀆𑀲𑀦𑀸𑀭𑀳𑀁 𑀥𑀫𑁆𑀫𑀸𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸’’𑀢𑀺. 𑀬𑀣𑀸𑀳 ‘‘𑀬𑁄 𑀔𑁄…𑀧𑁂… 𑀫𑀫𑀘𑁆𑀘𑀬𑁂𑀦 𑀲𑀢𑁆𑀣𑀸’’𑀢𑀺𑀆𑀤𑀺, (𑀤𑀻. 𑀦𑀺. 𑁨.𑁨𑁧𑁬) 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀥𑀫𑁆𑀫𑀤𑁂𑀲𑀓𑀲𑁆𑀲 𑀯𑀸 𑀲𑀢𑁆𑀣𑀼𑀓𑀺𑀘𑁆𑀘𑀸𑀯𑀳𑀢𑁆𑀢𑀸 𑀢𑀣𑀸𑀭𑀽𑀧𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑀼𑀫𑀭𑀳𑀢𑀻𑀢𑀺 𑀤𑀲𑁆𑀲𑁂𑀢𑀼𑀫𑁆𑀧𑀺 𑀏𑀯𑀁 𑀯𑀼𑀢𑁆𑀢𑀁. 𑀆𑀲𑀦𑀸𑀭𑀳𑀦𑁆𑀢𑀺 𑀦𑀺𑀲𑀻𑀤𑀦𑀸𑀭𑀳𑀁. 𑀥𑀫𑁆𑀫𑀸𑀲𑀦𑀦𑁆𑀢𑀺 𑀥𑀫𑁆𑀫𑀤𑁂𑀲𑀓𑀸𑀲𑀦𑀁, 𑀥𑀫𑁆𑀫𑀁 𑀯𑀸 𑀓𑀣𑁂𑀢𑀼𑀁 𑀬𑀼𑀢𑁆𑀢𑀸𑀲𑀦𑀁. 𑀤𑀦𑁆𑀢𑀔𑀘𑀺𑀢𑀦𑁆𑀢𑀺 𑀤𑀦𑁆𑀢𑁂𑀳𑀺 𑀔𑀘𑀺𑀢𑀁, 𑀳𑀢𑁆𑀣𑀺𑀤𑀦𑁆𑀢𑁂𑀳𑀺 𑀓𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀤𑀦𑁆𑀢𑁄 𑀦𑀸𑀫 𑀳𑀢𑁆𑀣𑀺𑀤𑀦𑁆𑀢𑁄 𑀯𑀼𑀘𑁆𑀘𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀥𑀫𑁆𑀫𑀸𑀲𑀦𑁂. 𑀫𑀫 𑀓𑀺𑀘𑁆𑀘𑀦𑁆𑀢𑀺 𑀫𑀫 𑀓𑀫𑁆𑀫𑀁, 𑀫𑀬𑀸 𑀯𑀸 𑀓𑀭𑀡𑀻𑀬𑀁.

𑀇𑀤𑀸𑀦𑀺 ¶ 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀅𑀲𑁂𑀓𑁆𑀔𑀪𑀽𑀫𑀺𑀲𑀫𑀸𑀧𑀚𑁆𑀚𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀲𑁆𑀫𑀺𑀜𑁆𑀘 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀲𑁆𑀫𑀺𑀜𑁆𑀘 𑀧𑀦 𑀤𑀺𑀯𑀲𑀏𑀢𑀺 𑀢𑀣𑀸 𑀭𑀜𑁆𑀜𑀸 𑀆𑀭𑁄𑀘𑀸𑀧𑀺𑀢𑀤𑀺𑀯𑀲𑁂, 𑀲𑀸𑀯𑀡𑀫𑀸𑀲𑀲𑁆𑀲 𑀓𑀸𑀴𑀧𑀓𑁆𑀔𑀘𑀢𑀼𑀢𑁆𑀣𑀤𑀺𑀯𑀲𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀢𑁆𑀣𑀚𑀦𑀦𑀢𑁄 𑀯𑀺𑀲𑀲𑀗𑁆𑀓𑀸𑀲𑀢𑀸𑀬 𑀓𑀺𑀮𑁂𑀲𑁄 𑀯𑀺𑀲𑀁, 𑀢𑀲𑁆𑀲 𑀔𑀻𑀡𑀸𑀲𑀯𑀪𑀸𑀯𑀢𑁄 𑀅𑀜𑁆𑀜𑀣𑀸𑀪𑀸𑀯𑀲𑀗𑁆𑀔𑀸𑀢𑀸 𑀲𑀢𑁆𑀢𑀺 𑀕𑀦𑁆𑀥𑁄. 𑀢𑀣𑀸 𑀳𑀺 𑀲𑁄 ¶ 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀸𑀤𑀻𑀲𑀼 𑀯𑀺𑀮𑀸𑀧𑀸𑀤𑀺𑀫𑀓𑀸𑀲𑀺. 𑀅𑀧𑀺𑀘 𑀯𑀺𑀲𑀚𑀦𑀦𑀓𑀧𑀼𑀧𑁆𑀨𑀸𑀤𑀺𑀕𑀦𑁆𑀥𑀧𑀝𑀺𑀪𑀸𑀕𑀢𑀸𑀬 𑀦𑀸𑀦𑀸𑀯𑀺𑀥𑀤𑀼𑀓𑁆𑀔𑀳𑁂𑀢𑀼𑀓𑀺𑀭𑀺𑀬𑀸𑀚𑀦𑀦𑀓𑁄 𑀓𑀺𑀮𑁂𑀲𑁄𑀯 ‘‘𑀯𑀺𑀲𑀕𑀦𑁆𑀥𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀳𑀺 𑀲𑁄 ‘‘𑀯𑀺𑀲𑀁 𑀳𑀭𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀫𑀽𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀨𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀧𑀭𑀺𑀪𑁄𑀕𑀸𑀢𑀺 𑀯𑀺𑀲𑀢𑁆𑀢𑀺𑀓𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁩) 𑀯𑀼𑀢𑁆𑀢𑁄𑀢𑀺. 𑀅𑀧𑀺𑀘 𑀯𑀺𑀲𑀕𑀦𑁆𑀥𑁄𑀦𑀸𑀫 𑀯𑀺𑀭𑀽𑀧𑁄 𑀫𑀁𑀲𑀸𑀤𑀺𑀕𑀦𑁆𑀥𑁄, 𑀢𑀁𑀲𑀤𑀺𑀲𑀢𑀸𑀬 𑀧𑀦 𑀓𑀺𑀮𑁂𑀲𑁄. ‘‘𑀯𑀺𑀲𑁆𑀲𑀲𑀤𑁆𑀤𑁄 𑀳𑀺 𑀯𑀺𑀭𑀽𑀧𑁂’’𑀢𑀺 (𑀥. 𑀲. 𑀝𑀻. 𑁬𑁨𑁪) 𑀅𑀪𑀺𑀥𑀫𑁆𑀫𑀝𑀻𑀓𑀸𑀬𑀁𑀯𑀼𑀢𑁆𑀢𑀁. 𑀅𑀤𑁆𑀥𑀸𑀢𑀺 𑀏𑀓𑀁𑀲𑀢𑁄. 𑀲𑀁𑀯𑁂𑀕𑀦𑁆𑀢𑀺 𑀥𑀫𑁆𑀫𑀲𑀁𑀯𑁂𑀕𑀁. ‘‘𑀑𑀳𑀺𑀢𑀪𑀸𑀭𑀸𑀦’’𑀦𑁆𑀢𑀺 𑀳𑀺 𑀬𑁂𑀪𑀼𑀬𑁆𑀬𑁂𑀦, 𑀧𑀥𑀸𑀦𑁂𑀦 𑀘 𑀯𑀼𑀢𑁆𑀢𑀁. 𑀏𑀤𑀺𑀲𑁂𑀲𑀼 𑀧𑀦 𑀞𑀸𑀦𑁂𑀲𑀼 𑀢𑀤𑀜𑁆𑀜𑁂𑀲𑀫𑁆𑀧𑀺 𑀥𑀫𑁆𑀫𑀲𑀁𑀯𑁂𑀕𑁄𑀬𑁂𑀯 𑀅𑀥𑀺𑀧𑁆𑀧𑁂𑀢𑁄. 𑀢𑀣𑀸 𑀳𑀺 ‘‘𑀲𑀁𑀯𑁂𑀕𑁄 𑀦𑀸𑀫 𑀲𑀳𑁄𑀢𑁆𑀢𑀧𑁆𑀧𑀁 𑀜𑀸𑀡𑀁, 𑀲𑁄 𑀢𑀲𑁆𑀲𑀸 𑀪𑀕𑀯𑀢𑁄 𑀤𑀲𑁆𑀲𑀦𑁂 𑀉𑀧𑁆𑀧𑀚𑁆𑀚𑀻’’𑀢𑀺 (𑀯𑀺. 𑀯. 𑀅𑀝𑁆𑀞. 𑁮𑁩𑁮) 𑀭𑀚𑁆𑀚𑀼𑀫𑀸𑀮𑀸𑀯𑀺𑀫𑀸𑀦𑀯𑀡𑁆𑀡𑀦𑀸𑀬𑀁𑀯𑀼𑀢𑁆𑀢𑀁, 𑀲𑀸 𑀘 𑀢𑀤𑀸 𑀅𑀯𑀺𑀜𑁆𑀜𑀸𑀢𑀲𑀸𑀲𑀦𑀸 𑀅𑀦𑀸𑀕𑀢𑀨𑀮𑀸𑀢𑀺. 𑀇𑀢𑀭𑀣𑀸 𑀳𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑀯𑀲𑁂𑀦 𑀤𑁄𑀲𑁄𑀬𑁂𑀯 𑀲𑀁𑀯𑁂𑀕𑁄𑀢𑀺 𑀆𑀧𑀚𑁆𑀚𑀢𑀺, 𑀏𑀯𑀜𑁆𑀘 𑀲𑀢𑀺 𑀲𑁄 𑀢𑀲𑁆𑀲 𑀅𑀲𑁂𑀓𑁆𑀔𑀪𑀽𑀫𑀺𑀲𑀫𑀸𑀧𑀚𑁆𑀚𑀦𑀲𑁆𑀲 𑀏𑀓𑀁𑀲𑀓𑀸𑀭𑀡𑀁 𑀦 𑀲𑀺𑀬𑀸. 𑀏𑀯𑀫𑀪𑀽𑀢𑁄 𑀘 𑀲𑁄 𑀇𑀥 𑀦 𑀯𑀢𑁆𑀢𑀩𑁆𑀩𑁄𑀬𑁂𑀯𑀸𑀢𑀺 𑀅𑀮𑀫𑀢𑀺𑀧𑀧𑀜𑁆𑀘𑁂𑀦. 𑀢𑁂𑀦𑀸𑀢𑀺 𑀢𑀲𑁆𑀫𑀸 𑀲𑁆𑀯𑁂 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑀲𑁆𑀲 𑀯𑀢𑁆𑀢𑀫𑀸𑀦𑀢𑁆𑀢𑀸, 𑀲𑁂𑀓𑁆𑀔𑀲𑀓𑀭𑀡𑀻𑀬𑀢𑁆𑀢𑀸 𑀯𑀸. 𑀢𑁂 𑀦 𑀬𑀼𑀢𑁆𑀢𑀦𑁆𑀢𑀺 𑀢𑀯 𑀦 𑀬𑀼𑀢𑁆𑀢𑀁, 𑀢𑀬𑀸 𑀯𑀸 𑀲𑀦𑁆𑀦𑀺𑀧𑀸𑀢𑀁 𑀕𑀦𑁆𑀢𑀼𑀁 𑀦 𑀧𑀢𑀺𑀭𑀽𑀧𑀁.

𑀫𑁂𑀢𑀦𑁆𑀢𑀺 𑀫𑀫 𑀏𑀢𑀁 𑀕𑀫𑀦𑀁. 𑀬𑁆𑀯𑀸𑀳𑀦𑁆𑀢𑀺 𑀬𑁄 𑀅𑀳𑀁, 𑀬𑀦𑁆𑀢𑀺 𑀯𑀸 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁, 𑀢𑁂𑀦 ‘‘𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺 𑀏𑀢𑁆𑀣 𑀕𑀫𑀦𑀓𑀺𑀭𑀺𑀬𑀁 𑀧𑀭𑀸𑀫𑀲𑀢𑀺, 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀲𑁆𑀲 𑀘 𑀬𑀁 𑀢𑀁-𑀲𑀤𑁆𑀤𑀲𑁆𑀲 𑀅𑀬𑀁 𑀧𑀓𑀢𑀺, 𑀬𑀤𑀺𑀤𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀦, 𑀏𑀓𑀯𑀘𑀦𑁂𑀦 𑀘 𑀬𑁄𑀕𑁆𑀬𑀢𑀸 𑀢𑀣𑀸𑀬𑁂𑀯 𑀢𑀢𑁆𑀣 𑀢𑀢𑁆𑀣 𑀤𑀲𑁆𑀲𑀦𑀢𑁄. 𑀓𑀺𑀭𑀺𑀬𑀸𑀬 𑀳𑀺 𑀲𑀪𑀸𑀯𑀢𑁄 𑀦𑀧𑀼𑀁𑀲𑀓𑀢𑁆𑀢𑀫𑁂𑀓𑀢𑁆𑀢𑀜𑁆𑀘 𑀇𑀘𑁆𑀙𑀦𑁆𑀢𑀺 𑀲𑀤𑁆𑀤𑀯𑀺𑀤𑀽. 𑀆𑀯𑀚𑁆𑀚𑁂𑀲𑀻𑀢𑀺 𑀉𑀧𑀦𑀸𑀫𑁂𑀲𑀺. 𑀫𑀼𑀢𑁆𑀢𑀸𑀢𑀺 𑀫𑀼𑀘𑁆𑀘𑀺𑀢𑀸. 𑀅𑀧𑁆𑀧𑀢𑁆𑀢𑀜𑁆𑀘𑀸𑀢𑀺 𑀅𑀕𑀢𑀜𑁆𑀘, 𑀩𑀺𑀫𑁆𑀩𑁄𑀳𑀦𑁂 𑀦 𑀢𑀸𑀯 𑀞𑀧𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂𑀢𑀺 𑀏𑀢𑁆𑀣𑀦𑁆𑀢𑀭𑁂, 𑀇𑀫𑀺𑀦𑀸 𑀧𑀤𑀤𑁆𑀯𑀬𑁂𑀦 𑀤𑀲𑁆𑀲𑀺𑀢𑀓𑀸𑀮𑀸𑀦𑀁 𑀯𑁂𑀫𑀚𑁆𑀛𑀓𑁆𑀔𑀡𑁂, 𑀢𑀣𑀸𑀤𑀲𑁆𑀲𑀺𑀢𑀓𑀸𑀮𑀤𑁆𑀯𑀬𑀲𑁆𑀲 𑀯𑀸 𑀯𑀺𑀯𑀭𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀓𑀸𑀭𑀡𑁂 𑀘𑁂𑀯 𑀘𑀺𑀢𑁆𑀢𑁂 𑀘, 𑀔𑀡𑀲𑁆𑀫𑀺𑀁 𑀯𑀺𑀯𑀭𑁂𑀧𑀺 𑀘;

𑀯𑁂𑀫𑀚𑁆𑀛𑀸𑀤𑀻𑀲𑀼 𑀅𑀢𑁆𑀣𑁂𑀲𑀼 ‘𑀅𑀦𑁆𑀢𑀭𑀸’𑀢𑀺 𑀭𑀯𑁄 𑀕𑀢𑁄’’𑀢𑀺.

𑀳𑀺 ¶ 𑀯𑀼𑀢𑁆𑀢𑀁. 𑀅𑀦𑀼𑀧𑀸𑀤𑀸𑀬𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀕𑁆𑀕𑀳𑁂𑀢𑁆𑀯𑀸, 𑀬𑁂𑀳𑀺 𑀯𑀸 𑀓𑀺𑀮𑁂𑀲𑁂𑀳𑀺 𑀫𑀼𑀘𑁆𑀘𑀢𑀺, 𑀢𑁂𑀲𑀁 𑀮𑁂𑀲𑀫𑀢𑁆𑀢𑀫𑁆𑀧𑀺 𑀅𑀕𑁆𑀕𑀳𑁂𑀢𑁆𑀯𑀸. 𑀆𑀲𑀯𑁂𑀳𑀻𑀢𑀺 ¶ 𑀪𑀯𑀢𑁄 𑀆 𑀪𑀯𑀕𑁆𑀕𑀁, 𑀥𑀫𑁆𑀫𑀢𑁄 𑀘 𑀆 𑀕𑁄𑀢𑁆𑀭𑀪𑀼𑀁 𑀲𑀯𑀦𑀢𑁄 𑀧𑀯𑀢𑁆𑀢𑀦𑀢𑁄 𑀆𑀲𑀯𑀲𑀜𑁆𑀜𑀺𑀢𑁂𑀳𑀺 𑀓𑀺𑀮𑁂𑀲𑁂𑀳𑀺. 𑀉𑀧𑀮𑀓𑁆𑀔𑀡𑀯𑀘𑀦𑀫𑀢𑁆𑀢𑀜𑁆𑀘𑁂𑀢𑀁. 𑀢𑀤𑁂𑀓𑀝𑁆𑀞𑀢𑀸𑀬 𑀳𑀺 𑀲𑀩𑁆𑀩𑁂𑀳𑀺𑀧𑀺 𑀓𑀺𑀮𑁂𑀲𑁂𑀳𑀺 𑀲𑀩𑁆𑀩𑁂𑀳𑀺𑀧𑀺 𑀧𑀸𑀧𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺𑀬𑁂𑀯. 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀻𑀢𑀺 𑀘𑀺𑀢𑁆𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑀓𑁆𑀔𑀡𑁂 𑀆𑀲𑀯𑁂𑀳𑀺 𑀯𑀺𑀫𑀼𑀘𑁆𑀘𑀫𑀸𑀦𑀁 𑀳𑀼𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀯𑀺𑀫𑀼𑀘𑁆𑀘𑀺. 𑀢𑀤𑀢𑁆𑀣𑀁 𑀯𑀺𑀯𑀭𑀢𑀺 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺𑀦𑀸. 𑀘𑀗𑁆𑀓𑀫𑁂𑀦𑀸𑀢𑀺 𑀘𑀗𑁆𑀓𑀫𑀦𑀓𑀺𑀭𑀺𑀬𑀸𑀬. 𑀯𑀺𑀲𑁂𑀲𑀦𑁆𑀢𑀺 𑀅𑀢𑁆𑀢𑀦𑀸 𑀮𑀤𑁆𑀥𑀫𑀕𑁆𑀕𑀨𑀮𑀢𑁄 𑀯𑀺𑀲𑁂𑀲𑀫𑀕𑁆𑀕𑀨𑀮𑀁. 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀪𑀽𑀢𑀁 𑀓𑀢𑀁 𑀉𑀧𑀘𑀺𑀢𑀁 𑀧𑀼𑀜𑁆𑀜𑀁 𑀬𑁂𑀦𑀸𑀢𑀺 𑀓𑀢𑀧𑀼𑀜𑁆𑀜𑁄, 𑀅𑀭𑀳𑀢𑁆𑀢𑀸𑀥𑀺𑀕𑀫𑀸𑀬 𑀓𑀢𑀸𑀥𑀺𑀓𑀸𑀭𑁄𑀢𑀺 𑀅𑀢𑁆𑀣𑁄. 𑀧𑀥𑀸𑀦𑀫𑀦𑀼𑀬𑀼𑀜𑁆𑀚𑀸𑀢𑀺 𑀯𑀻𑀭𑀺𑀬𑀫𑀦𑀼𑀬𑀼𑀜𑁆𑀚𑀸𑀳𑀺, 𑀅𑀭𑀳𑀢𑁆𑀢𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑀼𑀬𑁄𑀕𑀁 𑀓𑀭𑁄𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑁄𑀳𑀺𑀲𑀻𑀢𑀺 𑀪𑀯𑀺𑀲𑁆𑀲𑀲𑀺. 𑀓𑀣𑀸𑀤𑁄𑀲𑁄𑀢𑀺 𑀓𑀣𑀸𑀬 𑀤𑁄𑀲𑁄 𑀯𑀺𑀢𑀣𑀪𑀸𑀯𑁄. 𑀅𑀘𑁆𑀘𑀸𑀭𑀤𑁆𑀥𑀦𑁆𑀢𑀺 𑀅𑀢𑀺𑀯𑀺𑀬 𑀆𑀭𑀤𑁆𑀥𑀁. 𑀉𑀤𑁆𑀥𑀘𑁆𑀘𑀸𑀬𑀸𑀢𑀺 𑀉𑀤𑁆𑀥𑀢𑀪𑀸𑀯𑀸𑀬. 𑀳𑀦𑁆𑀤𑀸𑀢𑀺 𑀯𑁄𑀲𑁆𑀲𑀕𑁆𑀕𑀯𑀘𑀦𑀁. 𑀢𑁂𑀦 𑀳𑀺 𑀅𑀥𑀼𑀦𑀸𑀬𑁂𑀯 𑀬𑁄𑀚𑁂𑀫𑀺, 𑀦 𑀧𑀦𑀸𑀳𑀁 𑀧𑀧𑀜𑁆𑀘𑀁 𑀓𑀭𑁄𑀫𑀻𑀢𑀺 𑀯𑁄𑀲𑁆𑀲𑀕𑁆𑀕𑀁 𑀓𑀭𑁄𑀢𑀺. 𑀯𑀻𑀭𑀺𑀬𑀲𑀫𑀢𑀁 𑀬𑁄𑀚𑁂𑀫𑀻𑀢𑀺 𑀘𑀗𑁆𑀓𑀫𑀦𑀯𑀻𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑁆𑀢𑀸 𑀢𑀲𑁆𑀲 𑀳𑀸𑀧𑀦𑀯𑀲𑁂𑀦 𑀲𑀫𑀸𑀥𑀺𑀦𑀸 𑀲𑀫𑀢𑀸𑀧𑀸𑀤𑀦𑁂𑀦 𑀯𑀻𑀭𑀺𑀬𑀲𑁆𑀲 𑀲𑀫𑀢𑀁 𑀲𑀫𑀪𑀸𑀯𑀁 𑀬𑁄𑀚𑁂𑀫𑀺, 𑀯𑀻𑀭𑀺𑀬𑁂𑀦 𑀯𑀸 𑀲𑀫𑀣𑀲𑀗𑁆𑀔𑀸𑀢𑀁 𑀲𑀫𑀸𑀥𑀺𑀁 𑀬𑁄𑀚𑁂𑀫𑀻𑀢𑀺𑀧𑀺 𑀅𑀢𑁆𑀣𑁄. 𑀤𑁆𑀯𑀺𑀥𑀸𑀧𑀺 𑀳𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀯𑀺𑀲𑁆𑀲𑀫𑀺𑀲𑁆𑀲𑀸𑀫𑀻𑀢𑀺 𑀅𑀲𑁆𑀲𑀲𑀺𑀲𑁆𑀲𑀸𑀫𑀺. 𑀇𑀤𑀸𑀦𑀺 𑀢𑀲𑁆𑀲 𑀯𑀺𑀲𑁂𑀲𑀢𑁄 𑀧𑀲𑀁𑀲𑀦𑀸𑀭𑀳𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀢𑀺 𑀘𑀢𑀼𑀇𑀭𑀺𑀬𑀸𑀧𑀣𑀯𑀺𑀭𑀳𑀺𑀢𑀢𑀸𑀓𑀸𑀭𑀡𑁂𑀦. ‘‘𑀅𑀦𑀺𑀧𑀦𑁆𑀦𑁄’’𑀢𑀺𑀆𑀤𑀻𑀦𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀘𑀦𑀸𑀦𑁂𑀯. 𑀧𑀭𑀺𑀦𑀺𑀩𑁆𑀩𑀼𑀢𑁄𑀧𑀺 𑀲𑁄 𑀆𑀓𑀸𑀲𑁂𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀢𑀲𑁆𑀫𑀸 𑀣𑁂𑀭𑀲𑁆𑀲 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀁, 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀜𑁆𑀘 𑀯𑀺𑀲𑁂𑀲𑁂𑀦 𑀧𑀲𑀁𑀲𑀸𑀭𑀳𑀁 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀫𑁂𑀯𑀸𑀢𑀺.

𑀤𑀼𑀢𑀺𑀬𑀤𑀺𑀯𑀲𑁂𑀢𑀺 𑀣𑁂𑀭𑁂𑀦 𑀅𑀭𑀳𑀢𑁆𑀢𑀧𑀢𑁆𑀢𑀤𑀺𑀯𑀲𑀢𑁄 𑀤𑀼𑀢𑀺𑀬𑀤𑀺𑀯𑀲𑁂. 𑀧𑀜𑁆𑀘𑀫𑀺𑀬𑀦𑁆𑀢𑀺 𑀢𑀺𑀣𑀻𑀧𑁂𑀓𑁆𑀔𑀸𑀬 𑀯𑀼𑀢𑁆𑀢𑀁, ‘‘𑀤𑀼𑀢𑀺𑀬𑀤𑀺𑀯𑀲𑁂’’𑀢𑀺 𑀇𑀫𑀺𑀦𑀸 𑀢𑀼𑀮𑁆𑀬𑀸𑀥𑀺𑀓𑀭𑀡𑀁. 𑀪𑀺𑀦𑁆𑀦𑀮𑀺𑀗𑁆𑀕𑀫𑁆𑀧𑀺 𑀳𑀺 𑀢𑀼𑀮𑁆𑀬𑀢𑁆𑀣𑀧𑀤𑀁 𑀤𑀺𑀲𑁆𑀲𑀢𑀺 𑀬𑀣𑀸 ‘‘𑀕𑀼𑀡𑁄 𑀧𑀫𑀸𑀡𑀁, 𑀯𑀻𑀲𑀢𑀺 𑀘𑀺𑀢𑁆𑀢𑀸𑀦𑀺’’ 𑀇𑀘𑁆𑀘𑀸𑀤𑀺. 𑀓𑀸𑀴𑀧𑀓𑁆𑀔𑀲𑁆𑀲𑀸𑀢𑀺 𑀲𑀸𑀯𑀡𑀫𑀸𑀲𑀓𑀸𑀴𑀧𑀓𑁆𑀔𑀲𑁆𑀲. 𑀧𑀞𑀫𑀜𑁆𑀳𑀺 𑀫𑀸𑀲𑀁 𑀔𑀡𑁆𑀟𑀨𑀼𑀮𑁆𑀮𑀧𑀝𑀺𑀲𑀗𑁆𑀔𑀭𑀡𑀫𑀓𑀁𑀲𑀼, 𑀧𑀞𑀫𑀫𑀸𑀲𑀪𑀸𑀯𑁄 𑀘 𑀫𑀚𑁆𑀛𑀺𑀫𑀧𑁆𑀧𑀤𑁂𑀲𑀯𑁄𑀳𑀸𑀭𑁂𑀦. 𑀢𑀢𑁆𑀣 𑀳𑀺 𑀧𑀼𑀭𑀺𑀫𑀧𑀼𑀡𑁆𑀡𑀫𑀺𑀢𑁄 𑀬𑀸𑀯 𑀅𑀧𑀭𑀸 𑀧𑀼𑀡𑁆𑀡𑀫𑀻, 𑀢𑀸𑀯 𑀏𑀓𑁄 𑀫𑀸𑀲𑁄𑀢𑀺 𑀯𑁄𑀳𑀭𑀦𑁆𑀢𑀺. 𑀢𑀢𑁄 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀭𑀸𑀚𑀸 𑀫𑀡𑁆𑀟𑀧𑀫𑀓𑀸𑀲𑀺, 𑀢𑀢𑁄 𑀤𑀼𑀢𑀺𑀬𑀤𑀺𑀯𑀲𑁂 𑀣𑁂𑀭𑁄 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺, 𑀢𑀢𑀺𑀬𑀤𑀺𑀯𑀲𑁂 𑀧𑀦 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀣𑁂𑀭𑀸 𑀲𑀗𑁆𑀕𑀻𑀢𑀺𑀫𑀓𑀁𑀲𑀼, 𑀢𑀲𑁆𑀫𑀸 𑀆𑀲𑀴𑁆𑀳𑀺𑀫𑀸𑀲𑀓𑀸𑀴𑀧𑀓𑁆𑀔𑀧𑀸𑀝𑀺𑀧𑀤𑀢𑁄 𑀬𑀸𑀯 𑀲𑀸𑀯𑀡𑀫𑀸𑀲𑀓𑀸𑀴𑀧𑀓𑁆𑀔𑀧𑀜𑁆𑀘𑀫𑀻 ¶ , 𑀢𑀸𑀯 𑀧𑀜𑁆𑀘𑀤𑀺𑀯𑀲𑀸𑀥𑀺𑀓𑁄 𑀏𑀓𑀫𑀸𑀲𑁄 𑀳𑁄𑀢𑀺. 𑀲𑀫𑀸𑀦𑁄𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑁄. 𑀳𑀝𑁆𑀞𑀢𑀼𑀝𑁆𑀞𑀘𑀺𑀢𑁆𑀢𑁄𑀢𑀺 𑀅𑀢𑀺𑀯𑀺𑀬 𑀲𑁄𑀫𑀦𑀲𑁆𑀲𑀘𑀺𑀢𑁆𑀢𑁄, 𑀧𑀸𑀫𑁄𑀚𑁆𑀚𑁂𑀦 𑀯𑀸 𑀳𑀝𑁆𑀞𑀘𑀺𑀢𑁆𑀢𑁄 𑀧𑀻𑀢𑀺𑀬𑀸 𑀢𑀼𑀝𑁆𑀞𑀘𑀺𑀢𑁆𑀢𑁄. 𑀏𑀓𑀁𑀲𑀦𑁆𑀢𑀺 𑀏𑀓𑀲𑁆𑀫𑀺𑀁 𑀅𑀁𑀲𑁂, 𑀯𑀸𑀫𑀁𑀲𑁂𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀯𑀗𑁆𑀕𑀻𑀲𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀁 𑁋

‘‘𑀏𑀓𑀁𑀲𑀁 ¶ 𑀘𑀻𑀯𑀭𑀦𑁆𑀢𑀺 𑀏𑀢𑁆𑀣 𑀧𑀼𑀦 𑀲𑀡𑁆𑀞𑀸𑀧𑀦𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑀁, 𑀏𑀓𑀁𑀲𑀦𑁆𑀢𑀺 𑀘 𑀯𑀸𑀫𑀁𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀞𑀺𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀬𑀢𑁄 𑀬𑀣𑀸 𑀯𑀸𑀫𑀁𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀞𑀺𑀢𑀁 𑀳𑁄𑀢𑀺, 𑀢𑀣𑀸 𑀘𑀻𑀯𑀭𑀁 𑀓𑀢𑁆𑀯𑀸𑀢𑀺 𑀏𑀯𑀫𑀲𑁆𑀲𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁨.𑁩𑁪𑁫).

𑀩𑀦𑁆𑀥…𑀧𑁂… 𑀯𑀺𑀬𑀸𑀢𑀺 𑀯𑀡𑁆𑀝𑀢𑁄 𑀧𑀯𑀼𑀢𑁆𑀢𑀲𑀼𑀧𑀭𑀺𑀧𑀓𑁆𑀓𑀢𑀸𑀮𑀨𑀮𑀫𑀺𑀯. 𑀧𑀡𑁆𑀟𑀼…𑀧𑁂… 𑀯𑀺𑀬𑀸𑀢𑀺 𑀲𑀺𑀢𑀧𑀻𑀢𑀧𑀪𑀸𑀬𑀼𑀢𑁆𑀢𑀧𑀡𑁆𑀟𑀼𑀭𑁄𑀫𑀚𑀓𑀫𑁆𑀩𑀮𑁂 𑀞𑀧𑀺𑀢𑁄 𑀚𑀸𑀢𑀺𑀫𑀸 𑀫𑀡𑀺 𑀯𑀺𑀬, 𑀚𑀸𑀢𑀺𑀯𑀘𑀦𑁂𑀦 𑀘𑁂𑀢𑁆𑀣 𑀓𑀼𑀢𑁆𑀢𑀺𑀫𑀁 𑀦𑀺𑀯𑀢𑁆𑀢𑁂𑀢𑀺. 𑀲𑀫𑀼𑀕𑁆𑀕𑀢𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬𑀸𑀢𑀺 𑀚𑀼𑀡𑁆𑀳𑀧𑀓𑁆𑀔𑀧𑀦𑁆𑀦𑀭𑀲𑀼𑀧𑁄𑀲𑀣𑁂 𑀲𑀫𑀼𑀕𑁆𑀕𑀢𑁄 𑀲𑁄𑀴𑀲𑀓𑀮𑀸𑀧𑀭𑀺𑀧𑀼𑀡𑁆𑀡𑁄 𑀘𑀦𑁆𑀤𑁄 𑀯𑀺𑀬. 𑀩𑀸𑀮𑀸…𑀧𑁂… 𑀯𑀺𑀬𑀸𑀢𑀺 𑀢𑀭𑀼𑀡𑀲𑀽𑀭𑀺𑀬𑀧𑀪𑀸𑀲𑀫𑁆𑀨𑀲𑁆𑀲𑁂𑀦 𑀨𑀼𑀮𑁆𑀮𑀺𑀢𑀲𑀼𑀯𑀡𑁆𑀡𑀯𑀡𑁆𑀡𑀧𑀭𑀸𑀕𑀕𑀩𑁆𑀪𑀁 𑀲𑀢𑀧𑀢𑁆𑀢𑀧𑀤𑁆𑀥𑀁 𑀯𑀺𑀬. ‘‘𑀧𑀺𑀜𑁆𑀚𑀭𑀲𑀤𑁆𑀤𑁄 𑀳𑀺 𑀳𑁂𑀫𑀯𑀡𑁆𑀡𑀧𑀭𑀺𑀬𑀸𑀬𑁄’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁧.𑁨𑁨) 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀯𑀼𑀢𑁆𑀢𑁄. 𑀧𑀭𑀺𑀬𑁄𑀤𑀸𑀢𑁂𑀦𑀸𑀢𑀺 𑀧𑀪𑀲𑁆𑀲𑀭𑁂𑀦. 𑀲𑀧𑁆𑀧𑀪𑁂𑀦𑀸𑀢𑀺 𑀯𑀡𑁆𑀡𑀧𑁆𑀧𑀪𑀸𑀬, 𑀲𑀻𑀮𑀧𑁆𑀧𑀪𑀸𑀬 𑀘 𑀲𑀫𑀦𑁆𑀦𑀸𑀕𑀢𑁂𑀦. 𑀲𑀲𑁆𑀲𑀺𑀭𑀺𑀓𑁂𑀦𑀸𑀢𑀺 𑀲𑀭𑀻𑀭𑀲𑁄𑀪𑀕𑁆𑀕𑀸𑀤𑀺𑀲𑀗𑁆𑀔𑀸𑀢𑀸𑀬 𑀲𑀺𑀭𑀺𑀬𑀸 𑀅𑀢𑀺𑀯𑀺𑀬 𑀲𑀺𑀭𑀺𑀫𑀢𑀸. 𑀫𑀼𑀔𑀯𑀭𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁄𑀪𑀸𑀲𑀫𑀮𑀗𑁆𑀓𑀢𑀢𑁆𑀢𑀸 𑀉𑀢𑁆𑀢𑀫𑀫𑀼𑀔𑁂𑀦. 𑀓𑀸𑀫𑀁 ‘‘𑀅𑀳𑀫𑀲𑁆𑀫𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’’𑀢𑀺 𑀦𑀸𑀭𑁄𑀘𑁂𑀲𑀺, 𑀢𑀣𑀸𑀭𑀽𑀧𑀸𑀬 𑀧𑀦 𑀉𑀢𑁆𑀢𑀫𑀮𑀻𑀴𑀸𑀬 𑀕𑀫𑀦𑀢𑁄 𑀧𑀲𑁆𑀲𑀦𑁆𑀢𑀸 𑀲𑀩𑁆𑀩𑁂𑀧𑀺 𑀢𑀫𑀢𑁆𑀣𑀁 𑀚𑀸𑀦𑀦𑁆𑀢𑀺, 𑀢𑀲𑁆𑀫𑀸 𑀆𑀭𑁄𑀘𑁂𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀅𑀢𑁆𑀢𑀦𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀆𑀭𑁄𑀘𑀬𑀫𑀸𑀦𑁄 𑀯𑀺𑀬 𑀅𑀕𑀫𑀸𑀲𑀻’’𑀢𑀺.

𑀓𑀺𑀫𑀢𑁆𑀣𑀁 𑀧𑀦𑀸𑀬𑀁 𑀏𑀯𑀫𑀸𑀭𑁄𑀘𑀬𑀫𑀸𑀦𑁄 𑀯𑀺𑀬 𑀅𑀕𑀫𑀸𑀲𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑁄 𑀳𑀺 ‘‘𑀅𑀢𑁆𑀢𑀼𑀧𑀦𑀸𑀬𑀺𑀓𑀁 𑀅𑀓𑀢𑁆𑀯𑀸 𑀅𑀜𑁆𑀜𑀩𑁆𑀬𑀸𑀓𑀭𑀡𑀁 𑀪𑀕𑀯𑀢𑀸 𑀲𑀁𑀯𑀡𑁆𑀡𑀺𑀢’’𑀦𑁆𑀢𑀺 𑀫𑀦𑀲𑀺 𑀓𑀭𑀺𑀢𑁆𑀯𑀸 ‘‘𑀲𑁂𑀓𑁆𑀔𑀢𑀸𑀬 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀻𑀢𑀺𑀬𑀸 𑀕𑀳𑁂𑀢𑀼𑀫𑀬𑀼𑀢𑁆𑀢𑀫𑁆𑀧𑀺 𑀩𑀳𑀼𑀲𑁆𑀲𑀼𑀢𑀢𑁆𑀢𑀸 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀲𑀺𑀦𑁆𑀦𑀸𑀦𑀁 𑀣𑁂𑀭𑀸𑀦𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀯𑀺𑀚𑀸𑀦𑀦𑁂𑀦 𑀲𑁄𑀫𑀦𑀲𑁆𑀲𑀼𑀧𑁆𑀧𑀸𑀤𑀦𑀢𑁆𑀣𑀁, ‘‘𑀅𑀧𑁆𑀧𑀫𑀢𑁆𑀢𑁄 𑀳𑁄𑀳𑀻’’𑀢𑀺 𑀪𑀕𑀯𑀢𑀸 𑀤𑀺𑀦𑁆𑀦𑀑𑀯𑀸𑀤𑀲𑁆𑀲 𑀘 𑀲𑀨𑀮𑀢𑀸𑀤𑀻𑀧𑀦𑀢𑁆𑀣𑀁 𑀏𑀯𑀫𑀸𑀭𑁄𑀘𑀬𑀫𑀸𑀦𑁄 𑀯𑀺𑀬 𑀅𑀕𑀫𑀸𑀲𑀻𑀢𑀺. 𑀆𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 ¶ 𑀏𑀢𑀤𑀳𑁄𑀲𑀺 𑀲𑀫𑀲𑀫𑀝𑁆𑀞𑀧𑀦𑀸𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑁂𑀦 𑀲𑀢𑁆𑀣𑀼𑀓𑀧𑁆𑀧𑀢𑁆𑀢𑀸. 𑀥𑀭𑁂𑀬𑁆𑀬𑀸𑀢𑀺 𑀯𑀺𑀚𑁆𑀚𑀫𑀸𑀦𑁄 𑀪𑀯𑁂𑀬𑁆𑀬. ‘‘𑀲𑁄𑀪𑀢𑀺 𑀯𑀢 𑀢𑁂 𑀆𑀯𑀼𑀲𑁄 𑀆𑀦𑀦𑁆𑀤 𑀅𑀭𑀳𑀢𑁆𑀢𑀲𑀫𑀥𑀺𑀕𑀫𑀢𑀸’’𑀢𑀺𑀆𑀤𑀺𑀦𑀸 𑀲𑀸𑀥𑀼𑀓𑀸𑀭𑀫𑀤𑀸𑀲𑀺. 𑀅𑀬𑀫𑀺𑀥 𑀤𑀻𑀖𑀪𑀸𑀡𑀓𑀸𑀦𑀁 𑀯𑀸𑀤𑁄. 𑀔𑀼𑀤𑁆𑀤𑀓𑀪𑀸𑀡𑀓𑁂𑀲𑀼 𑀘 𑀲𑀼𑀢𑁆𑀢𑀦𑀺𑀧𑀸𑀢𑀔𑀼𑀤𑁆𑀤𑀓𑀧𑀸𑀞𑀪𑀸𑀡𑀓𑀸𑀦𑀁 𑀯𑀸𑀤𑁄𑀢𑀺𑀧𑀺 𑀬𑀼𑀚𑁆𑀚𑀢𑀺 𑀢𑀤𑀝𑁆𑀞𑀓𑀣𑀸𑀲𑀼𑀧𑀺 𑀢𑀣𑀸 𑀯𑀼𑀢𑁆𑀢𑀢𑁆𑀢𑀸.

𑀫𑀚𑁆𑀛𑀺𑀫𑀁 𑀦𑀺𑀓𑀸𑀬𑀁 𑀪𑀡𑀦𑁆𑀢𑀺 𑀲𑀻𑀮𑁂𑀦𑀸𑀢𑀺 𑀫𑀚𑁆𑀛𑀺𑀫𑀪𑀸𑀡𑀓𑀸, 𑀢𑀧𑁆𑀧𑀕𑀼𑀡𑀸 𑀆𑀘𑀭𑀺𑀬𑀸. 𑀬𑀣𑀸𑀯𑀼𑀟𑁆𑀠𑀦𑁆𑀢𑀺 𑀯𑀼𑀟𑁆𑀠𑀧𑀝𑀺𑀧𑀸𑀝𑀺𑀁, 𑀢𑀤𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀸. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂. 𑀆𑀦𑀦𑁆𑀤𑀲𑁆𑀲 𑀏𑀢𑀫𑀸𑀲𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀢𑀲𑁆𑀫𑀺𑀁 𑀏𑀯𑀁𑀓𑀣𑀦𑀲𑀫𑀬𑁂. 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 ‘‘𑀓𑀼𑀳𑀺𑀁 𑀕𑀢𑁄’’𑀢𑀺 𑀧𑀼𑀘𑁆𑀙𑀦𑁆𑀢𑀸𑀦𑀁 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑁂 𑀅𑀢𑀺𑀯𑀺𑀬 𑀧𑀸𑀓𑀝𑀪𑀸𑀯𑁂𑀦 𑀪𑀯𑀺𑀲𑁆𑀲𑀫𑀸𑀦𑀢𑁆𑀢𑀸, 𑀅𑀬𑀫𑁆𑀧𑀺 𑀫𑀚𑁆𑀛𑀺𑀫𑀪𑀸𑀡𑀓𑁂𑀲𑁆𑀯𑁂𑀯 𑀏𑀓𑀘𑁆𑀘𑀸𑀦𑀁 𑀯𑀸𑀤𑁄, 𑀢𑀲𑁆𑀫𑀸 𑀇𑀢𑀺𑀧𑀺 𑀏𑀓𑁂 𑀯𑀤𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀓𑀸𑀲𑁂𑀦 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀆𑀲𑀦𑁂𑀬𑁂𑀯 ¶ 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀻𑀢𑀺𑀧𑀺 𑀢𑁂𑀲𑀫𑁂𑀯 𑀏𑀓𑀘𑁆𑀘𑁂 𑀯𑀤𑀦𑁆𑀢𑀺. 𑀧𑀼𑀮𑁆𑀮𑀺𑀗𑁆𑀕𑀯𑀺𑀲𑀬𑁂 𑀳𑀺 ‘‘𑀏𑀓𑁂’’𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑀢𑁆𑀣 ‘‘𑀏𑀓𑀘𑁆𑀘𑁂’’𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀻𑀲𑀼𑀧𑀺 𑀘𑁂𑀢𑁆𑀣 𑀯𑀸𑀤𑁂𑀲𑀼 𑀢𑁂𑀲𑀁 𑀢𑁂𑀲𑀁 𑀪𑀸𑀡𑀓𑀸𑀦𑀁 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦 𑀆𑀕𑀢𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀘𑀦𑁂 𑀅𑀜𑁆𑀜𑀁 𑀯𑀺𑀲𑁂𑀲𑀓𑀸𑀭𑀡𑀁 𑀦𑀢𑁆𑀣𑀺. 𑀲𑀢𑁆𑀢𑀫𑀸𑀲𑀁 𑀓𑀢𑀸𑀬 𑀳𑀺 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀻𑀢𑀺𑀬𑀸 𑀓𑀤𑀸𑀘𑀺 𑀧𑀓𑀢𑀺𑀬𑀸𑀯, 𑀓𑀤𑀸𑀘𑀺 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸, 𑀓𑀤𑀸𑀘𑀺 𑀆𑀓𑀸𑀲𑁂𑀦 𑀆𑀕𑀢𑀢𑁆𑀢𑀸 𑀢𑀁 𑀢𑀤𑀸𑀕𑀫𑀦𑀫𑀼𑀧𑀸𑀤𑀸𑀬 𑀢𑀣𑀸 𑀢𑀣𑀸 𑀯𑀤𑀦𑁆𑀢𑀺. 𑀅𑀧𑀺𑀘 𑀲𑀗𑁆𑀕𑀻𑀢𑀺𑀬𑀸 𑀆𑀤𑀺𑀤𑀺𑀯𑀲𑁂𑀬𑁂𑀯 𑀧𑀞𑀫𑀁 𑀧𑀓𑀢𑀺𑀬𑀸 𑀆𑀕𑀦𑁆𑀢𑁆𑀯𑀸 𑀢𑀢𑁄 𑀧𑀭𑀁 𑀆𑀓𑀸𑀲𑀫𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀭𑀺𑀲𑀁 𑀧𑀢𑁆𑀢𑀓𑀸𑀮𑁂 𑀢𑀢𑁄 𑀑𑀢𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀧𑀦𑁆𑀢𑀺𑀁 𑀅𑀧𑀻𑀴𑁂𑀦𑁆𑀢𑁄 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀆𑀲𑀦𑁂 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀻𑀢𑀺𑀧𑀺 𑀯𑀤𑀦𑁆𑀢𑀺. 𑀬𑀣𑀸 𑀯𑀸 𑀢𑀣𑀸 𑀯𑀸 𑀆𑀕𑀘𑁆𑀙𑀢𑀼, 𑀆𑀕𑀫𑀦𑀸𑀓𑀸𑀭𑀫𑀢𑁆𑀢𑀁 𑀦 𑀧𑀫𑀸𑀡𑀁, 𑀆𑀕𑀦𑁆𑀢𑁆𑀯𑀸 𑀕𑀢𑀓𑀸𑀮𑁂 𑀆𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀲𑀸𑀥𑀼𑀓𑀸𑀭𑀤𑀸𑀦𑀫𑁂𑀯 𑀧𑀫𑀸𑀡𑀁 𑀲𑀢𑁆𑀣𑀸𑀭𑀸 𑀤𑀸𑀢𑀩𑁆𑀩𑀲𑀸𑀥𑀼𑀓𑀸𑀭𑀤𑀸𑀦𑁂𑀦𑁂𑀯 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀅𑀜𑁆𑀜𑁂𑀲𑀫𑁆𑀧𑀺 𑀜𑀸𑀧𑀺𑀢𑀢𑁆𑀢𑀸, 𑀪𑀕𑀯𑀢𑀺 𑀥𑀭𑀫𑀸𑀦𑁂 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸𑀬 𑀘 𑀧𑀲𑀁𑀲𑀸𑀬 𑀣𑁂𑀭𑀲𑁆𑀲 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸. 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀯𑀸’’𑀢𑀺𑀆𑀤𑀺𑀫𑀸𑀳. 𑀲𑀩𑁆𑀩𑀢𑁆𑀣𑀸𑀧𑀻𑀢𑀺 𑀲𑀩𑁆𑀩𑁂𑀲𑀼𑀧𑀺 𑀢𑀻𑀲𑀼 𑀯𑀸𑀤𑁂𑀲𑀼.

𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺 𑀪𑀺𑀓𑁆𑀔𑀽 𑀆𑀮𑀧𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄, 𑀅𑀜𑁆𑀜𑀢𑁆𑀭 𑀧𑀦 𑀜𑀸𑀧𑀦𑁂𑀧𑀺 𑀤𑀺𑀲𑁆𑀲𑀢𑀺 𑀬𑀣𑀸 ‘‘𑀆𑀫𑀦𑁆𑀢𑀬𑀸𑀫𑀺 𑀯𑁄 𑀪𑀺𑀓𑁆𑀔𑀯𑁂, (𑀤𑀻. 𑀦𑀺. 𑁨.𑁨𑁧𑁮) 𑀧𑀝𑀺𑀯𑁂𑀤𑀬𑀸𑀫𑀺 𑀯𑁄 𑀪𑀺𑀓𑁆𑀔𑀯𑁂’’𑀢𑀺 ¶ (𑀅. 𑀦𑀺. 𑁭.𑁭𑁨) 𑀧𑀓𑁆𑀓𑁄𑀲𑀦𑁂𑀧𑀺 𑀤𑀺𑀲𑁆𑀲𑀢𑀺 𑀬𑀣𑀸 ‘‘𑀏𑀳𑀺 𑀢𑁆𑀯𑀁 𑀪𑀺𑀓𑁆𑀔𑀼 𑀫𑀫 𑀯𑀘𑀦𑁂𑀦 𑀲𑀸𑀭𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀳𑀻’’𑀢𑀺 (𑀅. 𑀦𑀺. 𑁯.𑁧𑁧) 𑀆𑀮𑀧𑀦𑁂𑀧𑀺 𑀤𑀺𑀲𑁆𑀲𑀢𑀺 𑀬𑀣𑀸 ‘‘𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 ‘𑀪𑀺𑀓𑁆𑀔𑀯𑁄’𑀢𑀺’’ (𑀲𑀁. 𑀦𑀺. 𑁧.𑁨𑁪𑁯), 𑀇𑀥𑀸𑀧𑀺 𑀆𑀮𑀧𑀦𑁂𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁. 𑀆𑀮𑀧𑀦𑀫𑀢𑁆𑀢𑀲𑁆𑀲 𑀧𑀦 𑀅𑀪𑀸𑀯𑀢𑁄 ‘‘𑀓𑀺𑀁 𑀧𑀞𑀫𑀁 𑀲𑀗𑁆𑀕𑀸𑀬𑀸𑀫𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀯𑀺𑀜𑁆𑀜𑀸𑀧𑀺𑀬𑀫𑀸𑀦𑀢𑁆𑀣𑀦𑁆𑀢𑀭𑁂𑀦 𑀘 𑀲𑀳𑀘𑀭𑀡𑀢𑁄 𑀜𑀸𑀧𑀦𑁂𑀯 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀆𑀫𑀦𑁆𑀢𑁂𑀲𑀻𑀢𑀺 𑀧𑀝𑀺𑀯𑁂𑀤𑁂𑀲𑀺 𑀯𑀺𑀜𑁆𑀜𑀸𑀧𑁂𑀲𑀻𑀢𑀺 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. ‘‘𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 ‘𑀪𑀺𑀓𑁆𑀔𑀯𑁄’𑀢𑀺, ‘𑀪𑀤𑁆𑀤𑀦𑁆𑀢𑁂’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁪𑁯) 𑀳𑀺 𑀆𑀮𑀧𑀦𑀫𑀢𑁆𑀢𑀫𑁂𑀯 𑀤𑀺𑀲𑁆𑀲𑀢𑀺, 𑀦 𑀯𑀺𑀜𑁆𑀜𑀸𑀧𑀺𑀬𑀫𑀸𑀦𑀢𑁆𑀣𑀦𑁆𑀢𑀭𑀁, 𑀢𑀁 𑀧𑀦 ‘‘𑀪𑀽𑀢𑀧𑀼𑀩𑁆𑀩𑀁 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁧.𑁨𑁪𑁯) 𑀧𑀘𑁆𑀘𑁂𑀓𑀫𑁂𑀯 𑀆𑀭𑀤𑁆𑀥𑀁. 𑀢𑀲𑁆𑀫𑀸 𑀢𑀸𑀤𑀺𑀲𑁂𑀲𑁆𑀯𑁂𑀯 𑀆𑀮𑀧𑀦𑁂 𑀯𑀝𑁆𑀝𑀢𑀻𑀢𑀺 𑀦𑁄 𑀢𑀓𑁆𑀓𑁄. 𑀲𑀤𑁆𑀤𑀯𑀺𑀤𑀽 𑀧𑀦 𑀯𑀤𑀦𑁆𑀢𑀺 ‘‘𑀆𑀫𑀦𑁆𑀢𑀬𑀺𑀢𑁆𑀯𑀸 𑀤𑁂𑀯𑀺𑀦𑁆𑀤𑁄, 𑀯𑀺𑀲𑁆𑀲𑀓𑀫𑁆𑀫𑀁 𑀫𑀳𑀺𑀤𑁆𑀥𑀺𑀓’𑀦𑁆𑀢𑀺𑀆𑀤𑀻𑀲𑀼 (𑀘𑀭𑀺𑀬𑀸. 𑁧𑁦𑁭) 𑀯𑀺𑀬 𑀫𑀦𑁆𑀢𑀲𑀤𑁆𑀤𑁄 𑀕𑀼𑀢𑁆𑀢𑀪𑀸𑀲𑀦𑁂. 𑀢𑀲𑁆𑀫𑀸 ‘𑀆𑀫𑀦𑁆𑀢𑁂𑀲𑀻’𑀢𑀺 𑀏𑀢𑀲𑁆𑀲 𑀲𑀫𑁆𑀫𑀦𑁆𑀢𑀬𑀻𑀢𑀺 𑀅𑀢𑁆𑀣𑁄’’𑀢𑀺. ‘‘𑀆𑀯𑀼𑀲𑁄’’𑀢𑀺𑀆𑀤𑀺 𑀆𑀫𑀦𑁆𑀢𑀦𑀸𑀓𑀸𑀭𑀤𑀻𑀧𑀦𑀁. 𑀥𑀫𑁆𑀫𑀁 𑀯𑀸 𑀯𑀺𑀦𑀬𑀁 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀯𑀺𑀓𑀧𑁆𑀧𑀦𑁂, 𑀢𑁂𑀦 ‘‘𑀓𑀺𑀫𑁂𑀓𑀁 𑀢𑁂𑀲𑀼 𑀧𑀞𑀫𑀁 𑀲𑀗𑁆𑀕𑀸𑀬𑀸𑀫𑀸’’𑀢𑀺 𑀤𑀲𑁆𑀲𑁂𑀢𑀺. 𑀓𑀲𑁆𑀫𑀸 𑀆𑀬𑀽𑀢𑀺 𑀆𑀳 ‘‘𑀯𑀺𑀦𑀬𑁂 𑀞𑀺𑀢𑁂’’𑀢𑀺𑀆𑀤𑀺. ‘‘𑀬𑀲𑁆𑀫𑀸, 𑀢𑀲𑁆𑀫𑀸’’𑀢𑀺 𑀘 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀢𑀲𑁆𑀫𑀸𑀢𑀺 𑀢𑀸𑀬 𑀆𑀬𑀼𑀲𑀭𑀺𑀓𑁆𑀔𑀢𑀸𑀬 ¶ . 𑀥𑀼𑀭𑀦𑁆𑀢𑀺 𑀚𑁂𑀝𑁆𑀞𑀓𑀁. 𑀦𑁄 𑀦𑀧𑁆𑀧𑀳𑁄𑀢𑀻𑀢𑀺 𑀧𑀳𑁄𑀢𑀺𑀬𑁂𑀯. 𑀤𑁆𑀯𑀺𑀧𑀝𑀺𑀲𑁂𑀥𑁄 𑀳𑀺 𑀲𑀳 𑀅𑀢𑀺𑀲𑀬𑁂𑀦 𑀧𑀓𑀢𑁆𑀬𑀢𑁆𑀣𑀤𑀻𑀧𑀓𑁄.

𑀏𑀢𑀤𑀕𑁆𑀕𑀦𑁆𑀢𑀺 𑀏𑀲𑁄 𑀅𑀕𑁆𑀕𑁄. 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀳𑀺 𑀅𑀬𑀁 𑀦𑀺𑀤𑁆𑀤𑁂𑀲𑁄. 𑀬𑀤𑀺𑀤𑀦𑁆𑀢𑀺 𑀘 𑀬𑁄 𑀅𑀬𑀁, 𑀬𑀤𑀺𑀤𑀁 𑀔𑀦𑁆𑀥𑀧𑀜𑁆𑀘𑀓𑀦𑁆𑀢𑀺 𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀲𑀢𑀺 ‘‘𑀏𑀢𑀤𑀕𑁆𑀕’’𑀦𑁆𑀢𑀺 𑀬𑀣𑀸𑀭𑀼𑀢𑀮𑀺𑀗𑁆𑀕𑀫𑁂𑀯. ‘‘𑀬𑀤𑀺𑀤’’𑀦𑁆𑀢𑀺 𑀧𑀤𑀲𑁆𑀲 𑀘 𑀅𑀬𑀁 𑀲𑀪𑀸𑀯𑁄, 𑀬𑀸 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀢𑁆𑀢𑀩𑁆𑀩𑀲𑁆𑀲 𑀮𑀺𑀗𑁆𑀕𑀸𑀦𑀼𑀭𑀽𑀧𑁂𑀦 ‘‘𑀬𑁄 𑀅𑀬’’𑀦𑁆𑀢𑀺 𑀯𑀸 ‘‘𑀬𑀸 𑀅𑀬’’𑀦𑁆𑀢𑀺 𑀯𑀸 ‘‘𑀬𑀁 𑀇𑀤’’𑀦𑁆𑀢𑀺 𑀯𑀸 𑀬𑁄𑀚𑁂𑀢𑀩𑁆𑀩𑀢𑀸 𑀢𑀣𑀸𑀬𑁂𑀯𑀲𑁆𑀲 𑀢𑀢𑁆𑀣 𑀢𑀢𑁆𑀣 𑀤𑀲𑁆𑀲𑀺𑀢𑀢𑁆𑀢𑀸. 𑀪𑀺𑀓𑁆𑀔𑀽𑀦𑀁 𑀯𑀺𑀦𑀬𑀥𑀭𑀸𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑀙𑀝𑁆𑀞𑀻𑀦𑀺𑀤𑁆𑀤𑁂𑀲𑁄.

𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑁆𑀦𑀻𑀢𑀺 𑀲𑀬𑀫𑁂𑀯 𑀅𑀢𑁆𑀢𑀸𑀦𑀁 𑀲𑀫𑁆𑀫𑀢𑀁 𑀅𑀓𑀸𑀲𑀺. ‘‘𑀅𑀢𑁆𑀢𑀦𑀸’’𑀢𑀺 𑀳𑀺 𑀇𑀤𑀁 𑀢𑀢𑀺𑀬𑀸𑀯𑀺𑀲𑁂𑀲𑀦𑀁 𑀪𑀯𑀢𑀺, 𑀢𑀜𑁆𑀘 𑀧𑀭𑁂𑀳𑀺 𑀲𑀫𑁆𑀫𑀦𑁆𑀦𑀦𑀁 𑀦𑀺𑀯𑀢𑁆𑀢𑁂𑀢𑀺, ‘‘𑀅𑀢𑁆𑀢𑀦𑀸’’𑀢𑀺 𑀯𑀸 𑀅𑀬𑀁 𑀯𑀺𑀪𑀢𑁆𑀬𑀦𑁆𑀢𑀧𑀢𑀺𑀭𑀽𑀧𑀓𑁄 𑀅𑀩𑁆𑀬𑀬𑀲𑀤𑁆𑀤𑁄 ¶ . 𑀓𑁂𑀘𑀺 𑀧𑀦 ‘‘𑀮𑀺𑀗𑁆𑀕𑀢𑁆𑀣𑁂 𑀢𑀢𑀺𑀬𑀸 𑀅𑀪𑀺𑀳𑀺𑀢𑀓𑀢𑁆𑀢𑀼𑀪𑀸𑀯𑀢𑁄’’𑀢𑀺 𑀯𑀤𑀦𑁆𑀢𑀺. 𑀢𑀤𑀬𑀼𑀢𑁆𑀢𑀫𑁂𑀯 ‘‘𑀣𑁂𑀭𑁄’’𑀢𑀺 𑀓𑀢𑁆𑀢𑀼𑀦𑁄 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀯𑀺𑀲𑁆𑀲𑀚𑁆𑀚𑀦𑀢𑁆𑀣𑀸𑀬 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀫𑁆𑀫𑀦𑁆𑀦𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀧𑀼𑀘𑁆𑀙𑀥𑀸𑀢𑀼𑀲𑁆𑀲 𑀤𑁆𑀯𑀺𑀓𑀫𑁆𑀫𑀺𑀓𑀢𑁆𑀢𑀸 ‘‘𑀉𑀧𑀸𑀮𑀺𑀁 𑀯𑀺𑀦𑀬’’𑀦𑁆𑀢𑀺 𑀓𑀫𑁆𑀫𑀤𑁆𑀯𑀬𑀁 𑀯𑀼𑀢𑁆𑀢𑀁.

𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸𑀢𑀺 𑀏𑀢𑁆𑀣 𑀩𑀻𑀚𑀦𑀻𑀕𑀳𑀡𑀁 𑀥𑀫𑁆𑀫𑀓𑀣𑀺𑀓𑀸𑀦𑀁 𑀥𑀫𑁆𑀫𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀸𑀬 𑀳𑀺 𑀥𑀫𑁆𑀫𑀓𑀣𑀺𑀓𑀸𑀦𑀁 𑀧𑀭𑀺𑀲𑀸𑀬 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀫𑀼𑀔𑀯𑀺𑀓𑀸𑀭𑀸𑀤𑀺 𑀧𑀝𑀺𑀘𑁆𑀙𑀸𑀤𑀻𑀬𑀢𑀺. 𑀪𑀕𑀯𑀸 𑀘 𑀥𑀫𑁆𑀫𑀓𑀣𑀺𑀓𑀸𑀦𑀁 𑀥𑀫𑁆𑀫𑀢𑀸𑀤𑀲𑁆𑀲𑀦𑀢𑁆𑀣𑀫𑁂𑀯 𑀯𑀺𑀘𑀺𑀢𑁆𑀭𑀩𑀻𑀚𑀦𑀺𑀁 𑀕𑀡𑁆𑀳𑀸𑀢𑀺. 𑀅𑀜𑁆𑀜𑀣𑀸 𑀳𑀺 𑀲𑀩𑁆𑀩𑀲𑁆𑀲𑀧𑀺 𑀮𑁄𑀓𑀲𑁆𑀲 𑀅𑀮𑀗𑁆𑀓𑀸𑀭𑀪𑀽𑀢𑀁 𑀧𑀭𑀫𑀼𑀓𑁆𑀓𑀁𑀲𑀕𑀢𑀲𑀺𑀓𑁆𑀔𑀸𑀲𑀁𑀬𑀫𑀸𑀦𑀁 𑀩𑀼𑀤𑁆𑀥𑀸𑀦𑀁 𑀫𑀼𑀔𑀘𑀦𑁆𑀤𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑀁 𑀦 𑀲𑀺𑀬𑀸. ‘‘𑀧𑀞𑀫𑀁 𑀆𑀯𑀼𑀲𑁄 𑀉𑀧𑀸𑀮𑀺 𑀧𑀸𑀭𑀸𑀚𑀺𑀓𑀁 𑀓𑀢𑁆𑀣 𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀢𑀲𑁆𑀲 𑀲𑀗𑁆𑀕𑀻𑀢𑀺𑀬𑀸 𑀧𑀼𑀭𑀺𑀫𑀓𑀸𑀮𑁂 𑀧𑀞𑀫𑀪𑀸𑀯𑁄 𑀦 𑀬𑀼𑀢𑁆𑀢𑁄𑀢𑀺? 𑀦𑁄 𑀦 𑀬𑀼𑀢𑁆𑀢𑁄 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀸𑀦𑀼𑀓𑁆𑀓𑀫𑁂𑀦, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀦𑀼𑀓𑁆𑀓𑀫𑁂𑀦 𑀘 𑀧𑀞𑀫𑀪𑀸𑀯𑀲𑁆𑀲 𑀲𑀺𑀤𑁆𑀥𑀢𑁆𑀢𑀸. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀪𑀕𑀯𑀢𑁄 𑀥𑀭𑀫𑀸𑀦𑀓𑀸𑀮𑁂 𑀞𑀺𑀢𑀸𑀦𑀼𑀓𑁆𑀓𑀫𑁂𑀦𑁂𑀯 𑀲𑀗𑁆𑀕𑀻𑀢𑀸𑀦𑀺, 𑀯𑀺𑀲𑁂𑀲𑀢𑁄 𑀯𑀺𑀦𑀬𑀸𑀪𑀺𑀥𑀫𑁆𑀫𑀧𑀺𑀝𑀓𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺, 𑀫𑁂𑀣𑀼𑀦𑀥𑀫𑁆𑀫𑁂𑀢𑀺 𑀘 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁. ‘‘𑀓𑀢𑁆𑀣 𑀧𑀜𑁆𑀜𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀤𑀲𑁆𑀲𑀺𑀢𑁂𑀦 𑀲𑀳 𑀢𑀤𑀯𑀲𑀺𑀝𑁆𑀞𑀫𑁆𑀧𑀺 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀯𑀢𑁆𑀣𑀼𑀫𑁆𑀧𑀺 𑀧𑀼𑀘𑁆𑀙𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀗𑁆𑀕𑀻𑀢𑀺𑀓𑀸𑀭𑀓𑀯𑀘𑀦𑀲𑀫𑁆𑀫𑀺𑀲𑁆𑀲𑀁 𑀯𑀸 𑀦𑀼 𑀔𑁄, 𑀲𑀼𑀤𑁆𑀥𑀁 𑀯𑀸 𑀩𑀼𑀤𑁆𑀥𑀯𑀘𑀦𑀦𑁆𑀢𑀺 𑀆𑀲𑀗𑁆𑀓𑀸𑀧𑀭𑀺𑀳𑀭𑀡𑀢𑁆𑀣𑀁, 𑀬𑀣𑀸𑀲𑀗𑁆𑀕𑀻𑀢𑀲𑁆𑀲𑁂𑀯 𑀧𑀫𑀸𑀡𑀪𑀸𑀯𑀁 𑀤𑀲𑁆𑀲𑀦𑀢𑁆𑀣𑀜𑁆𑀘 𑀧𑀼𑀘𑁆𑀙𑀁 𑀲𑀫𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 ‘‘𑀓𑀺𑀁 𑀧𑀦𑁂𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀧𑀞𑀫𑀧𑀸𑀭𑀸𑀚𑀺𑀓𑁂𑀢𑀺 𑀏𑀢𑀺𑀲𑁆𑀲𑀁 𑀢𑀣𑀸𑀲𑀗𑁆𑀕𑀻𑀢𑀸𑀬 𑀧𑀞𑀫𑀧𑀸𑀭𑀸𑀚𑀺𑀓𑀧𑀸𑀴𑀺𑀬𑀁. 𑀢𑁂𑀦𑁂𑀯𑀸𑀳 ‘‘𑀦 𑀳𑀺 𑀢𑀣𑀸𑀕𑀢𑀸 𑀏𑀓𑀩𑁆𑀬𑀜𑁆𑀚𑀦𑀫𑁆𑀧𑀺 𑀦𑀺𑀭𑀢𑁆𑀣𑀓𑀁 𑀯𑀤𑀦𑁆𑀢𑀻’’𑀢𑀺. 𑀅𑀧𑀦𑁂𑀢𑀩𑁆𑀩𑀦𑁆𑀢𑀺 𑀅𑀢𑀺𑀭𑁂𑀓𑀪𑀸𑀯𑁂𑀦 ¶ 𑀦𑀺𑀭𑀢𑁆𑀣𑀓𑀢𑀸𑀬, 𑀯𑀺𑀢𑀣𑀪𑀸𑀯𑁂𑀦 𑀯𑀸 𑀅𑀬𑀼𑀢𑁆𑀢𑀢𑀸𑀬 𑀙𑀟𑁆𑀟𑁂𑀢𑀩𑁆𑀩𑀯𑀘𑀦𑀁. 𑀧𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀅𑀲𑀫𑁆𑀧𑀼𑀡𑁆𑀡𑀢𑀸𑀬 𑀉𑀧𑀦𑁂𑀢𑀩𑁆𑀩𑀯𑀘𑀦𑀁. 𑀓𑀲𑁆𑀫𑀸𑀢𑀺 𑀆𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀲𑀸𑀯𑀓𑀸𑀦𑀁 𑀧𑀦 𑀤𑁂𑀯𑀢𑀸𑀦𑀁 𑀯𑀸 𑀪𑀸𑀲𑀺𑀢𑁂𑀢𑀺 𑀪𑀕𑀯𑀢𑁄 𑀧𑀼𑀘𑁆𑀙𑀸𑀣𑁄𑀫𑀦𑀸𑀤𑀺𑀯𑀲𑁂𑀦 𑀪𑀸𑀲𑀺𑀢𑀁 𑀲𑀦𑁆𑀥𑀸𑀬𑀸𑀳. 𑀲𑀩𑁆𑀩𑀢𑁆𑀣𑀸𑀧𑀻𑀢𑀺 𑀪𑀕𑀯𑀢𑁄 𑀲𑀸𑀯𑀓𑀸𑀦𑀁 𑀤𑁂𑀯𑀢𑀸𑀦𑀜𑁆𑀘 𑀪𑀸𑀲𑀺𑀢𑁂𑀧𑀺. 𑀢𑀁 𑀧𑀦 𑀧𑀓𑁆𑀔𑀺𑀧𑀦𑀁 𑀲𑀫𑁆𑀩𑀦𑁆𑀥𑀯𑀘𑀦𑀫𑀢𑁆𑀢𑀲𑁆𑀲𑁂𑀯, 𑀦 𑀲𑀪𑀸𑀯𑀸𑀬𑀼𑀢𑁆𑀢𑀺𑀬𑀸 𑀅𑀢𑁆𑀣𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀓𑀺𑀁 𑀧𑀦 𑀢’’𑀦𑁆𑀢𑀺𑀆𑀤𑀺𑀦𑀸 𑀲𑀫𑁆𑀩𑀦𑁆𑀥𑀯𑀘𑀦𑀫𑀢𑁆𑀢𑀦𑁆𑀢𑀺 𑀧𑀼𑀩𑁆𑀩𑀸𑀧𑀭𑀲𑀫𑁆𑀩𑀦𑁆𑀥𑀯𑀘𑀦𑀫𑁂𑀯. 𑀇𑀤𑀁 𑀧𑀞𑀫𑀧𑀸𑀭𑀸𑀚𑀺𑀓𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑁆𑀯𑀸 𑀞𑀧𑁂𑀲𑀼𑀁 𑀇𑀫𑀺𑀦𑀸𑀯 𑀯𑀸𑀘𑀦𑀸𑀫𑀕𑁆𑀕𑁂𑀦 𑀉𑀕𑁆𑀕𑀳𑀡𑀥𑀸𑀭𑀡𑀸𑀤𑀺𑀓𑀺𑀘𑁆𑀘𑀦𑀺𑀧𑁆𑀨𑀸𑀤𑀦𑀢𑁆𑀣𑀁, 𑀢𑀤𑀢𑁆𑀣𑀫𑁂𑀯 𑀘 𑀕𑀡𑀲𑀚𑁆𑀛𑀸𑀬𑀫𑀓𑀁𑀲𑀼 ‘‘𑀢𑁂𑀦…𑀧𑁂… 𑀯𑀺𑀳𑀭𑀢𑀻’’𑀢𑀺. 𑀲𑀚𑁆𑀛𑀸𑀬𑀸𑀭𑀫𑁆𑀪𑀓𑀸𑀮𑁂𑀬𑁂𑀯 𑀧𑀣𑀯𑀻 𑀅𑀓𑀫𑁆𑀧𑀺𑀢𑁆𑀣𑀸𑀢𑀺 𑀯𑀤𑀦𑁆𑀢𑀺, 𑀢𑀤𑀺𑀤𑀁 𑀧𑀦 𑀧𑀣𑀯𑀻𑀓𑀫𑁆𑀧𑀦𑀁 𑀣𑁂𑀭𑀸𑀦𑀁 𑀥𑀫𑁆𑀫𑀲𑀚𑁆𑀛𑀸𑀬𑀸𑀦𑀼𑀪𑀸𑀯𑁂𑀦𑀸𑀢𑀺 ¶ 𑀜𑀸𑀧𑁂𑀢𑀼𑀁 ‘‘𑀲𑀸𑀥𑀼𑀓𑀸𑀭𑀁 𑀤𑀤𑀫𑀸𑀦𑀸 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀉𑀤𑀓𑀧𑀭𑀺𑀬𑀦𑁆𑀢𑀦𑁆𑀢𑀺 𑀧𑀣𑀯𑀻𑀲𑀦𑁆𑀥𑀸𑀭𑀓𑀉𑀤𑀓𑀧𑀭𑀺𑀬𑀦𑁆𑀢𑀁. 𑀢𑀲𑁆𑀫𑀺𑀜𑁆𑀳𑀺 𑀘𑀮𑀺𑀢𑁂𑀬𑁂𑀯 𑀲𑀸𑀧𑀺 𑀘𑀮𑀢𑀺, 𑀏𑀢𑁂𑀦 𑀘 𑀧𑀤𑁂𑀲𑀧𑀣𑀯𑀻𑀓𑀫𑁆𑀧𑀦𑀁 𑀦𑀺𑀯𑀢𑁆𑀢𑁂𑀢𑀺.

𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 𑀕𑀡𑀦𑀸 𑀦𑀢𑁆𑀣𑀺, 𑀲𑀗𑁆𑀕𑀻𑀢𑀺𑀫𑀸𑀭𑁄𑀧𑀺𑀢𑀸𑀦𑀺 𑀧𑀦 𑀏𑀢𑁆𑀢𑀓𑀸𑀦𑁂𑀯𑀸𑀢𑀺 𑀤𑀻𑀧𑁂𑀢𑀼𑀁 ‘‘𑀧𑀜𑁆𑀘𑀲𑀢𑁆𑀢𑀢𑀺 𑀲𑀺𑀓𑁆𑀔𑀸𑀧𑀤𑀸𑀦𑀻’’𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀭𑀺𑀫𑀦𑀬𑁂𑀦𑁂𑀯𑀸’’𑀢𑀺 𑀏𑀢𑁂𑀦 𑀲𑀸𑀥𑀼𑀓𑀸𑀭𑀁 𑀤𑀤𑀫𑀸𑀦𑀸 𑀯𑀺𑀬𑀸𑀢𑀺 𑀅𑀢𑁆𑀣𑀫𑀸𑀳. 𑀦 𑀓𑁂𑀯𑀮𑀁 𑀲𑀺𑀓𑁆𑀔𑀸𑀧𑀤𑀓𑀡𑁆𑀟𑀯𑀺𑀪𑀗𑁆𑀕𑀦𑀺𑀬𑀫𑁂𑀦𑁂𑀯, 𑀅𑀣 𑀔𑁄 𑀧𑀫𑀸𑀡𑀦𑀺𑀬𑀫𑁂𑀦𑀸𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀼𑀲𑀝𑁆𑀞𑀺𑀪𑀸𑀡𑀯𑀸𑀭𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀪𑀸𑀡𑀯𑀸𑀭𑁄𑀢𑀺 𑁋

‘‘𑀅𑀝𑁆𑀞𑀓𑁆𑀔𑀭𑀸 𑀏𑀓𑀧𑀤𑀁, 𑀏𑀓𑀕𑀸𑀣𑀸 𑀘𑀢𑀼𑀧𑁆𑀧𑀤𑀁;

𑀕𑀸𑀣𑀸 𑀘𑁂𑀓𑀸 𑀫𑀢𑁄 𑀕𑀦𑁆𑀣𑁄, 𑀕𑀦𑁆𑀣𑁄 𑀩𑀸𑀢𑁆𑀢𑀺𑀁𑀲𑀢𑀓𑁆𑀔𑀭𑁄.

𑀩𑀸𑀢𑁆𑀢𑀺𑀁𑀲𑀓𑁆𑀔𑀭𑀕𑀦𑁆𑀣𑀸𑀦𑀁, 𑀧𑀜𑁆𑀜𑀸𑀲𑀤𑁆𑀯𑀺𑀲𑀢𑀁 𑀧𑀦;

𑀪𑀸𑀡𑀯𑀸𑀭𑁄 𑀫𑀢𑁄 𑀏𑀓𑁄, 𑀲𑁆𑀯𑀝𑁆𑀞𑀓𑁆𑀔𑀭𑀲𑀳𑀲𑁆𑀲𑀓𑁄’’𑀢𑀺.

𑀏𑀯𑀁 𑀅𑀝𑁆𑀞𑀓𑁆𑀔𑀭𑀲𑀳𑀲𑁆𑀲𑀧𑀭𑀺𑀫𑀸𑀡𑁄 𑀧𑀸𑀞𑁄 𑀯𑀼𑀘𑁆𑀘𑀢𑀺. 𑀪𑀡𑀺𑀢𑀩𑁆𑀩𑁄 𑀯𑀸𑀭𑁄 𑀬𑀲𑁆𑀲𑀸𑀢𑀺 𑀳𑀺 𑀪𑀸𑀡𑀯𑀸𑀭𑁄, 𑀏𑀓𑁂𑀦 𑀲𑀚𑁆𑀛𑀸𑀬𑀦𑀫𑀕𑁆𑀕𑁂𑀦 𑀓𑀣𑁂𑀢𑀩𑁆𑀩𑀯𑀸𑀭𑁄𑀢𑀺 𑀅𑀢𑁆𑀣𑁄. 𑀔𑀦𑁆𑀥𑀓𑀦𑁆𑀢𑀺 𑀫𑀳𑀸𑀯𑀕𑁆𑀕𑀘𑀽𑀴𑀯𑀕𑁆𑀕𑀁. 𑀔𑀦𑁆𑀥𑀸𑀦𑀁 𑀲𑀫𑀽𑀳𑀢𑁄, 𑀧𑀓𑀸𑀲𑀦𑀢𑁄 𑀯𑀸 𑀔𑀦𑁆𑀥𑀓𑁄𑀢𑀺 𑀳𑀺 𑀯𑀼𑀘𑁆𑀘𑀢𑀺, 𑀔𑀦𑁆𑀥𑀸𑀢𑀺 𑀘𑁂𑀢𑁆𑀣 𑀧𑀩𑁆𑀩𑀚𑁆𑀚𑀽𑀧𑀲𑀫𑁆𑀧𑀤𑀸𑀤𑀺𑀯𑀺𑀦𑀬𑀓𑀫𑁆𑀫𑀲𑀗𑁆𑀔𑀸𑀢𑀸, 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀲𑀗𑁆𑀔𑀸𑀢𑀸 𑀘 𑀧𑀜𑁆𑀜𑀢𑁆𑀢𑀺𑀬𑁄 𑀅𑀥𑀺𑀧𑁆𑀧𑁂𑀢𑀸. 𑀧𑀩𑁆𑀩𑀚𑁆𑀚𑀸𑀤𑀻𑀦𑀺 𑀳𑀺 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀢𑁆𑀢𑀸 𑀧𑀜𑁆𑀜𑀢𑁆𑀢𑀺𑀬𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀜𑁆𑀜𑀢𑁆𑀢𑀺𑀬𑀜𑁆𑀘 𑀔𑀦𑁆𑀥𑀲𑀤𑁆𑀤𑁄 𑀤𑀺𑀲𑁆𑀲𑀢𑀺 ‘‘𑀤𑀸𑀭𑀼𑀓𑁆𑀔𑀦𑁆𑀥𑁄, (𑀅. 𑀦𑀺. 𑁬.𑁪𑁧) 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 (𑀅. 𑀦𑀺. 𑁭.𑁭𑁨), 𑀉𑀤𑀓𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁫.𑁪𑁫; 𑁬.𑁩𑁭) 𑀯𑀺𑀬. 𑀅𑀧𑀺𑀘 𑀪𑀸𑀕𑀭𑀸𑀲𑀝𑁆𑀞𑀢𑀸𑀧𑀺 ¶ 𑀬𑀼𑀚𑁆𑀚𑀢𑀺𑀬𑁂𑀯 𑀢𑀸𑀲𑀁 𑀧𑀜𑁆𑀜𑀢𑁆𑀢𑀻𑀦𑀁 𑀪𑀸𑀕𑀢𑁄, 𑀭𑀸𑀲𑀺𑀢𑁄 𑀘 𑀯𑀺𑀪𑀢𑁆𑀢𑀢𑁆𑀢𑀸, 𑀢𑀁 𑀧𑀦 𑀯𑀺𑀦𑀬𑀧𑀺𑀝𑀓𑀁 𑀪𑀸𑀡𑀓𑁂𑀳𑀺 𑀭𑀓𑁆𑀔𑀺𑀢𑀁 𑀕𑁄𑀧𑀺𑀢𑀁 𑀲𑀗𑁆𑀕𑀳𑀸𑀭𑀼𑀴𑁆𑀳𑀦𑀬𑁂𑀦𑁂𑀯 𑀘𑀺𑀭𑀓𑀸𑀮𑀁 𑀅𑀦𑀲𑁆𑀲𑀫𑀸𑀦𑀁 𑀳𑀼𑀢𑁆𑀯𑀸 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀻𑀢𑀺 𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺𑀢𑁆𑀣𑁂𑀭𑀁 𑀧𑀝𑀺𑀘𑁆𑀙𑀸𑀧𑁂𑀲𑀼𑀁 ‘‘𑀆𑀯𑀼𑀲𑁄 𑀇𑀫𑀁 𑀢𑀼𑀬𑁆𑀳𑀁 𑀦𑀺𑀲𑁆𑀲𑀺𑀢𑀓𑁂 𑀯𑀸𑀘𑁂𑀳𑀻’’𑀢𑀺.

𑀥𑀫𑁆𑀫𑀁 𑀲𑀗𑁆𑀕𑀸𑀬𑀺𑀢𑀼𑀓𑀸𑀫𑁄𑀢𑀺 𑀲𑀼𑀢𑁆𑀢𑀦𑁆𑀢𑀸𑀪𑀺𑀥𑀫𑁆𑀫𑀲𑀗𑁆𑀕𑀻𑀢𑀺𑀁 𑀓𑀢𑁆𑀢𑀼𑀓𑀸𑀫𑁄 ‘‘𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁧𑁬) 𑀯𑀺𑀬 𑀧𑀸𑀭𑀺𑀲𑁂𑀲𑀦𑀬𑁂𑀦 𑀥𑀫𑁆𑀫𑀲𑀤𑁆𑀤𑀲𑁆𑀲 𑀲𑀼𑀢𑁆𑀢𑀦𑁆𑀢𑀸𑀪𑀺𑀥𑀫𑁆𑀫𑁂𑀲𑁆𑀯𑁂𑀯 𑀧𑀯𑀢𑁆𑀢𑀦𑀢𑁄. 𑀅𑀬𑀫𑀢𑁆𑀣𑁄 𑀉𑀧𑀭𑀺 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀲𑀗𑁆𑀖𑀁 𑀜𑀸𑀧𑁂𑀲𑀻𑀢𑀺 𑀏𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀢𑀭𑀁 𑀆𑀯𑀼𑀲𑁄 𑀧𑀺𑀝𑀓𑀦𑁆𑀢𑀺 𑀯𑀺𑀦𑀬𑀸𑀯𑀲𑁂𑀲𑁂𑀲𑀼 𑀤𑁆𑀯𑀻𑀲𑀼 𑀧𑀺𑀝𑀓𑁂𑀲𑀼 𑀓𑀢𑀭𑀁 𑀧𑀺𑀝𑀓𑀁. 𑀯𑀺𑀦𑀬𑀸𑀪𑀺𑀥𑀫𑁆𑀫𑀸𑀦𑀫𑁆𑀧𑀺 ¶ 𑀔𑀼𑀤𑁆𑀤𑀓𑀲𑀗𑁆𑀕𑀻𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀢𑀫𑀦𑁆𑀢𑀭𑁂𑀦 𑀯𑀼𑀢𑁆𑀢𑀁 ‘‘𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂 𑀘𑀢𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄’’𑀢𑀺. 𑀲𑀗𑁆𑀕𑀻𑀢𑀺𑀬𑁄𑀢𑀺 𑀘 𑀲𑀗𑁆𑀕𑀸𑀬𑀦𑀓𑀸𑀮𑁂 𑀤𑀻𑀖𑀸𑀤𑀺𑀯𑀲𑁂𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀦𑀺𑀬𑀫𑁂𑀢𑁆𑀯𑀸 𑀲𑀗𑁆𑀕𑀬𑁆𑀳𑀫𑀸𑀦𑀢𑁆𑀢𑀸 𑀦𑀺𑀓𑀸𑀬𑀸𑀯 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀦𑀸𑀳 ‘‘𑀤𑀻𑀖𑀲𑀗𑁆𑀕𑀻𑀢𑀺’’𑀦𑁆𑀢𑀺𑀆𑀤𑀺. 𑀲𑀼𑀢𑁆𑀢𑀸𑀦𑁂𑀯 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀯𑀕𑁆𑀕𑀓𑀭𑀡𑀯𑀲𑁂𑀦 𑀢𑀬𑁄 𑀯𑀕𑁆𑀕𑀸, 𑀦𑀸𑀜𑁆𑀜𑀸𑀦𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀼𑀢𑁆𑀢𑀺𑀁𑀲 𑀲𑀼𑀢𑁆𑀢𑀸𑀦𑀺 𑀢𑀬𑁄 𑀯𑀕𑁆𑀕𑀸’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀘𑀢𑀼𑀢𑁆𑀢𑀺𑀲𑀁 𑀲𑀼𑀢𑁆𑀢𑀸𑀦𑀺 𑀢𑀬𑁄 𑀯𑀕𑁆𑀕𑀸 𑀳𑁄𑀦𑁆𑀢𑀺, 𑀲𑀼𑀢𑁆𑀢𑀸𑀦𑀺 𑀯𑀸 𑀘𑀢𑀼𑀢𑁆𑀢𑀺𑀁𑀲, 𑀢𑁂𑀲𑀁 𑀯𑀕𑁆𑀕𑀓𑀭𑀡𑀯𑀲𑁂𑀦 𑀢𑀬𑁄 𑀯𑀕𑁆𑀕𑀸, 𑀢𑁂𑀲𑀼 𑀢𑀻𑀲𑀼 𑀯𑀕𑁆𑀕𑁂𑀲𑀽𑀢𑀺 𑀬𑁄𑀚𑁂𑀢𑀩𑁆𑀩𑀁. ‘‘𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀁 𑀦𑀸𑀫 𑀅𑀢𑁆𑀣𑀺, 𑀢𑀁 𑀧𑀞𑀫𑀁 𑀲𑀗𑁆𑀕𑀸𑀬𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀓𑀲𑁆𑀫𑀸𑀢𑀺 𑀘𑁄𑀤𑀦𑀸𑀲𑀫𑁆𑀪𑀯𑀢𑁄 ‘‘𑀢𑀺𑀯𑀺𑀥𑀲𑀻𑀮𑀸𑀮𑀗𑁆𑀓𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀳𑁂𑀢𑀼𑀕𑀩𑁆𑀪𑀸𑀦𑀺 𑀳𑀺 𑀏𑀢𑀸𑀦𑀺. 𑀘𑀽𑀴𑀫𑀚𑁆𑀛𑀺𑀫𑀫𑀳𑀸𑀲𑀻𑀮𑀯𑀲𑁂𑀦 𑀢𑀺𑀯𑀺𑀥𑀲𑁆𑀲𑀸𑀧𑀺 𑀲𑀻𑀮𑀲𑁆𑀲 𑀧𑀓𑀸𑀲𑀦𑀢𑁆𑀢𑀸 𑀢𑁂𑀦 𑀅𑀮𑀗𑁆𑀓𑀢𑀁 𑀯𑀺𑀪𑀽𑀲𑀺𑀢𑀁 𑀢𑀣𑀸 𑀦𑀸𑀦𑀸𑀯𑀺𑀥𑁂 𑀫𑀺𑀘𑁆𑀙𑀸𑀚𑀻𑀯𑀪𑀽𑀢𑁂 𑀓𑀼𑀳𑀦𑀮𑀧𑀦𑀸𑀤𑀬𑁄 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀦𑀸𑀦𑀸𑀯𑀺𑀥𑀫𑀺𑀘𑁆𑀙𑀸𑀚𑀻𑀯𑀓𑀼𑀳𑀦𑀮𑀧𑀦𑀸𑀤𑀺𑀯𑀺𑀤𑁆𑀥𑀁𑀲𑀦𑀁. 𑀢𑀢𑁆𑀣 𑀓𑀼𑀳𑀦𑀸𑀢𑀺 𑀓𑀼𑀳𑀸𑀬𑀦𑀸, 𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀲𑀸𑀫𑀦𑁆𑀢𑀚𑀧𑁆𑀧𑀦𑀇𑀭𑀺𑀬𑀸𑀧𑀣𑀲𑀦𑁆𑀦𑀺𑀲𑁆𑀲𑀺𑀢𑀲𑀗𑁆𑀔𑀸𑀢𑁂𑀦 𑀢𑀺𑀯𑀺𑀥𑁂𑀦 𑀯𑀢𑁆𑀣𑀼𑀦𑀸 𑀯𑀺𑀫𑁆𑀳𑀸𑀧𑀦𑀸𑀢𑀺 𑀅𑀢𑁆𑀣𑁄. 𑀮𑀧𑀦𑀸𑀢𑀺 𑀯𑀺𑀳𑀸𑀭𑀁 𑀆𑀕𑀢𑁂 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 ‘‘𑀓𑀺𑀫𑀢𑁆𑀣𑀸𑀬 𑀪𑁄𑀦𑁆𑀢𑁄 𑀆𑀕𑀢𑀸, 𑀓𑀺𑀁 𑀪𑀺𑀓𑁆𑀔𑀽 𑀦𑀺𑀫𑀦𑁆𑀢𑁂𑀢𑀼𑀁. 𑀬𑀤𑀺 𑀏𑀯𑀁 𑀕𑀘𑁆𑀙𑀣, 𑀅𑀳𑀁 𑀧𑀘𑁆𑀙𑀢𑁄 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀸𑀫𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀪𑀸𑀲𑀦𑀸. 𑀆𑀤𑀺𑀲𑀤𑁆𑀤𑁂𑀦 𑀧𑀼𑀧𑁆𑀨𑀤𑀸𑀦𑀸𑀤𑀬𑁄, 𑀦𑁂𑀫𑀺𑀢𑁆𑀢𑀺𑀓𑀢𑀸𑀤𑀬𑁄 𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀧𑀺𑀘𑁂𑀢𑁆𑀣 𑀫𑀺𑀘𑁆𑀙𑀸𑀚𑀻𑀯𑀲𑀤𑁆𑀤𑁂𑀦 𑀓𑀼𑀳𑀦𑀮𑀧𑀦𑀸𑀳𑀺 𑀲𑁂𑀲𑀁 𑀅𑀦𑁂𑀲𑀦𑀁 𑀕𑀡𑁆𑀳𑀸𑀢𑀺. 𑀆𑀤𑀺𑀲𑀤𑁆𑀤𑁂𑀦 𑀧𑀦 𑀢𑀤𑀯𑀲𑁂𑀲𑀁 𑀫𑀳𑀺𑀘𑁆𑀙𑀢𑀸𑀤𑀺𑀓𑀁 𑀤𑀼𑀲𑁆𑀲𑀺𑀮𑁆𑀬𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀏𑀯 𑀧𑀮𑀺𑀯𑁂𑀞𑀦𑀝𑁆𑀞𑁂𑀦 𑀚𑀸𑀮𑀲𑀭𑀺𑀓𑁆𑀔𑀢𑀸𑀬 𑀚𑀸𑀮𑀁, 𑀢𑀲𑁆𑀲 𑀯𑀺𑀦𑀺𑀯𑁂𑀞𑀦𑀁 𑀅𑀧𑀮𑀺𑀯𑁂𑀞𑀓𑀭𑀡𑀁 𑀢𑀣𑀸.

𑀅𑀦𑁆𑀢𑀭𑀸 𑀘 𑀪𑀦𑁆𑀢𑁂 𑀭𑀸𑀚𑀕𑀳𑀁 𑀅𑀦𑁆𑀢𑀭𑀸 𑀘 𑀦𑀸𑀴𑀦𑁆𑀤𑀦𑁆𑀢𑀺 𑀏𑀢𑁆𑀣 𑀅𑀦𑁆𑀢𑀭𑀸𑀲𑀤𑁆𑀤𑁄 𑀯𑀺𑀯𑀭𑁂 ‘‘𑀅𑀧𑀺𑀘𑀸𑀬𑀁 𑀪𑀺𑀓𑁆𑀔𑀯𑁂 ¶ 𑀢𑀧𑁄𑀤𑀸𑀤𑁆𑀯𑀺𑀦𑁆𑀦𑀁 𑀫𑀳𑀸𑀦𑀺𑀭𑀬𑀸𑀦𑀁 𑀅𑀦𑁆𑀢𑀭𑀺𑀓𑀸𑀬 𑀆𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨𑁩𑁧) 𑀯𑀺𑀬. 𑀢𑀲𑁆𑀫𑀸 𑀭𑀸𑀚𑀕𑀳𑀲𑁆𑀲 𑀘 𑀦𑀸𑀴𑀦𑁆𑀤𑀲𑁆𑀲 𑀘 𑀯𑀺𑀯𑀭𑁂𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀦𑁆𑀢𑀭𑀸𑀲𑀤𑁆𑀤𑁂𑀦 𑀧𑀦 𑀬𑀼𑀢𑁆𑀢𑀢𑁆𑀢𑀸 𑀉𑀧𑀬𑁄𑀕𑀯𑀘𑀦𑀁 𑀓𑀢𑀁. 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 ‘‘𑀅𑀦𑁆𑀢𑀭𑀸 𑀕𑀸𑀫𑀜𑁆𑀘 𑀦𑀤𑀺𑀜𑁆𑀘 𑀬𑀸𑀢𑀻’’𑀢𑀺 𑀏𑀯𑀁 𑀏𑀓𑀫𑁂𑀯 𑀅𑀦𑁆𑀢𑀭𑀸𑀲𑀤𑁆𑀤𑀁 𑀧𑀬𑀼𑀚𑁆𑀚𑀦𑁆𑀢𑀺, 𑀲𑁄 𑀤𑀼𑀢𑀺𑀬𑀧𑀤𑁂𑀦𑀧𑀺 𑀬𑁄𑀚𑁂𑀢𑀩𑁆𑀩𑁄 𑀳𑁄𑀢𑀺. 𑀅𑀬𑁄𑀚𑀺𑀬𑀫𑀸𑀦𑁂 𑀳𑀺 𑀉𑀧𑀬𑁄𑀕𑀯𑀘𑀦𑀁 𑀦 𑀧𑀸𑀧𑀼𑀡𑀸𑀢𑀺 𑀲𑀸𑀫𑀺𑀯𑀘𑀦𑀲𑁆𑀲 𑀧𑀲𑀗𑁆𑀕𑁂 𑀅𑀦𑁆𑀢𑀭𑀸𑀲𑀤𑁆𑀤𑀬𑁄𑀕𑁂𑀦 𑀉𑀧𑀬𑁄𑀕𑀯𑀘𑀦𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸. 𑀢𑀢𑁆𑀣 𑀭𑀜𑁆𑀜𑁄 𑀓𑀻𑀴𑀦𑀢𑁆𑀣𑀁 𑀧𑀝𑀺𑀪𑀸𑀦𑀘𑀺𑀢𑁆𑀢𑀯𑀺𑀘𑀺𑀢𑁆𑀭𑀅𑀕𑀸𑀭𑀫𑀓𑀁𑀲𑀼, 𑀢𑀁 ‘‘𑀭𑀸𑀚𑀸𑀕𑀸𑀭𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁. 𑀅𑀫𑁆𑀩𑀮𑀝𑁆𑀞𑀺𑀓𑀸𑀢𑀺 𑀭𑀜𑁆𑀜𑁄 ¶ 𑀉𑀬𑁆𑀬𑀸𑀦𑀁. 𑀢𑀲𑁆𑀲 𑀓𑀺𑀭 𑀤𑁆𑀯𑀸𑀭𑀲𑀫𑀻𑀧𑁂 𑀢𑀭𑀼𑀡𑁄 𑀅𑀫𑁆𑀩𑀭𑀼𑀓𑁆𑀔𑁄 𑀅𑀢𑁆𑀣𑀺, 𑀢𑀁 ‘‘𑀅𑀫𑁆𑀩𑀮𑀝𑁆𑀞𑀺𑀓𑀸’’𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀲 𑀲𑀫𑀻𑀧𑁂 𑀧𑀯𑀢𑁆𑀢𑀢𑁆𑀢𑀸 𑀉𑀬𑁆𑀬𑀸𑀦𑀫𑁆𑀧𑀺 ‘‘𑀅𑀫𑁆𑀩𑀮𑀝𑁆𑀞𑀺𑀓𑀸’’ 𑀢𑁆𑀯𑁂𑀯 𑀲𑀗𑁆𑀔𑁆𑀬𑀁 𑀕𑀢𑀁 𑀬𑀣𑀸 ‘‘𑀯𑀭𑀼𑀡𑀦𑀕𑀭’’𑀦𑁆𑀢𑀺, 𑀢𑀲𑁆𑀫𑀸 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀁 𑀦𑀸𑀫 𑀉𑀬𑁆𑀬𑀸𑀦𑁂 𑀭𑀸𑀚𑀸𑀕𑀸𑀭𑀓𑁂𑀢𑀺 𑀅𑀢𑁆𑀣𑁄. 𑀅𑀯𑀺𑀜𑁆𑀜𑀸𑀬𑀫𑀸𑀦𑀲𑁆𑀲 𑀳𑀺 𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀏𑀢𑀁 𑀆𑀥𑀸𑀭𑀤𑁆𑀯𑀬𑀁 𑀯𑀼𑀢𑁆𑀢𑀁 𑀭𑀸𑀚𑀸𑀕𑀸𑀭𑀫𑁂𑀢𑀲𑁆𑀲𑀸𑀢𑀺 𑀯𑀸 𑀭𑀸𑀚𑀸𑀕𑀸𑀭𑀓𑀁, 𑀉𑀬𑁆𑀬𑀸𑀦𑀁, 𑀭𑀸𑀚𑀸𑀕𑀸𑀭𑀯𑀢𑀺 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀁 𑀦𑀸𑀫 𑀉𑀬𑁆𑀬𑀸𑀦𑁂𑀢𑀺 𑀅𑀢𑁆𑀣𑁄. 𑀪𑀺𑀦𑁆𑀦𑀮𑀺𑀗𑁆𑀕𑀫𑁆𑀧𑀺 𑀳𑀺 𑀯𑀺𑀲𑁂𑀲𑀦𑀧𑀤𑀫𑀢𑁆𑀣𑀻’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀏𑀯𑀁 𑀲𑀢𑀺 𑀭𑀸𑀚𑀸𑀕𑀸𑀭𑀁 𑀆𑀥𑀸𑀭𑁄 𑀦 𑀲𑀺𑀬𑀸. ‘‘𑀭𑀸𑀚𑀸𑀕𑀸𑀭𑀓𑁂𑀢𑀺 𑀏𑀯𑀁𑀦𑀸𑀫𑀓𑁂 𑀉𑀬𑁆𑀬𑀸𑀦𑁂 𑀅𑀪𑀺𑀭𑀫𑀦𑀸𑀭𑀳𑀁 𑀓𑀺𑀭 𑀭𑀸𑀚𑀸𑀕𑀸𑀭𑀫𑁆𑀧𑀺. 𑀢𑀢𑁆𑀣, 𑀬𑀲𑁆𑀲 𑀯𑀲𑁂𑀦𑁂𑀢𑀁 𑀏𑀯𑀁 𑀦𑀸𑀫𑀁 𑀮𑀪𑀢𑀻’’𑀢𑀺 (𑀯𑀚𑀺𑀭. 𑀝𑀻. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀯𑀚𑀺𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑁄. 𑀏𑀯𑀁 𑀲𑀢𑀺 ‘‘𑀅𑀫𑁆𑀩𑀮𑀝𑁆𑀞𑀺𑀓𑀸𑀬’’𑀦𑁆𑀢𑀺 𑀆𑀲𑀦𑁆𑀦𑀢𑀭𑀼𑀡𑀫𑁆𑀩𑀭𑀼𑀓𑁆𑀔𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 ‘‘𑀭𑀸𑀚𑀸𑀕𑀸𑀭𑀓𑁂’’𑀢𑀺 𑀉𑀬𑁆𑀬𑀸𑀦𑀫𑁂𑀯 𑀦𑀸𑀫𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄 𑀆𑀧𑀚𑁆𑀚𑀢𑀺, 𑀢𑀣𑀸 𑀘 𑀯𑀼𑀢𑁆𑀢𑀤𑁄𑀲𑁄𑀯 𑀲𑀺𑀬𑀸. 𑀲𑀼𑀧𑁆𑀧𑀺𑀬𑀜𑁆𑀘 𑀧𑀭𑀺𑀩𑁆𑀩𑀸𑀚𑀓𑀦𑁆𑀢𑀺 𑀲𑀼𑀧𑁆𑀧𑀺𑀬𑀁 𑀦𑀸𑀫 𑀲𑀜𑁆𑀘𑀬𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀁 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑀜𑁆𑀘. 𑀩𑁆𑀭𑀳𑁆𑀫𑀤𑀢𑁆𑀢𑀜𑁆𑀘 𑀫𑀸𑀡𑀯𑀦𑁆𑀢𑀺 𑀏𑀢𑁆𑀣 𑀢𑀭𑀼𑀡𑁄 ‘‘𑀫𑀸𑀡𑀯𑁄’’𑀢𑀺 𑀯𑀼𑀢𑁆𑀢𑁄 ‘‘𑀅𑀫𑁆𑀩𑀝𑁆𑀞𑁄 𑀫𑀸𑀡𑀯𑁄, 𑀅𑀗𑁆𑀕𑀓𑁄 𑀫𑀸𑀡𑀯𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁫𑁯, 𑁨𑁧𑁧) 𑀯𑀺𑀬, 𑀢𑀲𑁆𑀫𑀸 𑀩𑁆𑀭𑀳𑁆𑀫𑀤𑀢𑁆𑀢𑀁 𑀦𑀸𑀫 𑀢𑀭𑀼𑀡𑀧𑀼𑀭𑀺𑀲𑀜𑁆𑀘 𑀆𑀭𑀩𑁆𑀪𑀸𑀢𑀺 𑀅𑀢𑁆𑀣𑁄. 𑀯𑀡𑁆𑀡𑀸𑀯𑀡𑁆𑀡𑁂𑀢𑀺 𑀧𑀲𑀁𑀲𑀸𑀬 𑀘𑁂𑀯 𑀕𑀭𑀳𑀸𑀬 𑀘. 𑀅𑀣 𑀯𑀸 𑀕𑀼𑀡𑁄 𑀯𑀡𑁆𑀡𑁄, 𑀅𑀕𑀼𑀡𑁄 𑀅𑀯𑀡𑁆𑀡𑁄, 𑀢𑁂𑀲𑀁 𑀪𑀸𑀲𑀦𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀢𑀣𑀸 𑀯𑀼𑀢𑁆𑀢𑀁 𑀬𑀣𑀸 ‘‘𑀭𑀽𑀧𑀪𑀯𑁄 𑀭𑀽𑀧’’𑀦𑁆𑀢𑀺.

‘‘𑀢𑀢𑁄 𑀧𑀭’’𑀦𑁆𑀢𑀺𑀆𑀤𑀺𑀫𑁆𑀳𑀺 𑀅𑀬𑀁 𑀯𑀘𑀦𑀓𑁆𑀓𑀫𑁄 𑁋 𑀲𑀸𑀫𑀜𑁆𑀜𑀨𑀮𑀁 𑀧𑀦𑀸𑀯𑀼𑀲𑁄 𑀆𑀦𑀦𑁆𑀤 𑀓𑀢𑁆𑀣 𑀪𑀸𑀲𑀺𑀢𑀦𑁆𑀢𑀺? 𑀭𑀸𑀚𑀕𑀳𑁂 𑀪𑀦𑁆𑀢𑁂 𑀚𑀻𑀯𑀓𑀫𑁆𑀩𑀯𑀦𑁂𑀢𑀺. 𑀓𑁂𑀦 𑀲𑀤𑁆𑀥𑀺𑀦𑁆𑀢𑀺? 𑀅𑀚𑀸𑀢𑀲𑀢𑁆𑀢𑀼𑀦𑀸 𑀯𑁂𑀤𑁂𑀳𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀲𑀸𑀫𑀜𑁆𑀜𑀨𑀮𑀲𑁆𑀲 𑀦𑀺𑀤𑀸𑀦𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀼𑀕𑁆𑀕𑀮𑀫𑁆𑀧𑀺 𑀧𑀼𑀘𑁆𑀙𑀻𑀢𑀺. 𑀏𑀢𑁆𑀣 𑀳𑀺 ‘‘𑀓𑀁 𑀆𑀭𑀩𑁆𑀪𑀸’’𑀢𑀺 𑀅𑀯𑀢𑁆𑀯𑀸 ‘‘𑀓𑁂𑀦 𑀲𑀤𑁆𑀥𑀺’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸𑀢𑀺 𑀘𑁂? 𑀦 𑀪𑀕𑀯𑀢𑀸 𑀏𑀯 𑀏𑀢𑀁 𑀲𑀼𑀢𑁆𑀢𑀁 𑀪𑀸𑀲𑀺𑀢𑀁, 𑀭𑀜𑁆𑀜𑀸𑀧𑀺 ‘‘𑀬𑀣𑀸 𑀦𑀼 𑀔𑁄 𑀇𑀫𑀸𑀦𑀺 𑀧𑀼𑀣𑀼𑀲𑀺𑀧𑁆𑀧𑀸𑀬𑀢𑀦𑀸𑀦𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁬𑁩) 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀯𑀼𑀢𑁆𑀢𑀫𑀢𑁆𑀣𑀺, 𑀢𑀲𑁆𑀫𑀸 𑀏𑀯𑀫𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺. 𑀇𑀫𑀺𑀦𑀸𑀯 𑀦𑀬𑁂𑀦 𑀲𑀩𑁆𑀩𑀢𑁆𑀣 ‘‘𑀓𑀁 𑀆𑀭𑀩𑁆𑀪𑀸’’𑀢𑀺 𑀯𑀸 ‘‘𑀓𑁂𑀦 𑀲𑀤𑁆𑀥𑀺’’𑀦𑁆𑀢𑀺 𑀯𑀸 𑀬𑀣𑀸𑀭𑀳𑀁 𑀯𑀢𑁆𑀯𑀸 𑀲𑀗𑁆𑀕𑀻𑀢𑀺𑀫𑀓𑀸𑀲𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀦𑁆𑀢𑀺𑀦𑁆𑀢𑀺 𑀲𑀼𑀢𑁆𑀢𑀯𑀕𑁆𑀕𑀲𑀫𑀼𑀤𑀸𑀬𑀯𑀲𑁂𑀦 𑀯𑀯𑀢𑁆𑀣𑀺𑀢𑀁 𑀧𑀸𑀴𑀺𑀁. 𑀏𑀯𑀜𑁆𑀘 ¶ 𑀓𑀢𑁆𑀯𑀸 ‘‘𑀢𑀺𑀯𑀕𑁆𑀕𑀲𑀗𑁆𑀕𑀳𑀁 𑀘𑀢𑀼𑀢𑁆𑀢𑀺𑀁𑀲𑀲𑀼𑀢𑁆𑀢𑀧𑀝𑀺𑀫𑀡𑁆𑀟𑀺𑀢’’𑀦𑁆𑀢𑀺 𑀯𑀘𑀦𑀁 𑀉𑀧𑀧𑀦𑁆𑀦𑀁 𑀳𑁄𑀢𑀺. 𑀧𑀭𑀺𑀳𑀭𑀣𑀸𑀢𑀺 𑀉𑀕𑁆𑀕𑀳𑀡𑀯𑀸𑀘𑀦𑀸𑀤𑀺𑀯𑀲𑁂𑀦 𑀥𑀸𑀭𑁂𑀣. 𑀢𑀢𑁄 𑀅𑀦𑀦𑁆𑀢𑀭𑀁 𑀲𑀗𑁆𑀕𑀸𑀬𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

‘‘𑀥𑀫𑁆𑀫𑀲𑀗𑁆𑀕𑀳𑁄 ¶ 𑀘𑀸’’𑀢𑀺𑀆𑀤𑀺𑀦𑀸 𑀲𑀫𑀸𑀲𑁄. 𑀏𑀯𑀁 𑀲𑀁𑀯𑀡𑁆𑀡𑀺𑀢𑀁 𑀧𑁄𑀭𑀸𑀡𑀓𑁂𑀳𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀦 ‘‘𑀫𑀳𑀸𑀥𑀫𑁆𑀫𑀳𑀤𑀬𑁂𑀦, 𑀫𑀳𑀸𑀥𑀸𑀢𑀼𑀓𑀣𑀸𑀬 𑀯𑀸 𑀲𑀤𑁆𑀥𑀺𑀁 𑀲𑀢𑁆𑀢𑀧𑁆𑀧𑀓𑀭𑀡𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁 𑀯𑀺𑀢𑀡𑁆𑀟𑀯𑀸𑀤𑀺𑀫𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀓𑀣𑀸𑀯𑀢𑁆𑀣𑀼𑀦𑀸𑀯 𑀲𑀤𑁆𑀥𑀺’’𑀦𑁆𑀢𑀺 𑀯𑀼𑀢𑁆𑀢𑀁 𑀲𑀫𑀸𑀦𑀯𑀸𑀤𑀺𑀫𑀢𑀁 𑀤𑀲𑁆𑀲𑁂𑀢𑀺. 𑀲𑀡𑁆𑀳𑀜𑀸𑀡𑀲𑁆𑀲, 𑀲𑀡𑁆𑀳𑀜𑀸𑀡𑀯𑀦𑁆𑀢𑀸𑀦𑀁 𑀯𑀸 𑀯𑀺𑀲𑀬𑀪𑀸𑀯𑀢𑁄 𑀲𑀼𑀔𑀼𑀫𑀜𑀸𑀡𑀕𑁄𑀘𑀭𑀁.

𑀘𑀽𑀴𑀦𑀺𑀤𑁆𑀤𑁂𑀲𑀫𑀳𑀸𑀦𑀺𑀤𑁆𑀤𑁂𑀲𑀯𑀲𑁂𑀦 𑀤𑀼𑀯𑀺𑀥𑁄𑀧𑀺 𑀦𑀺𑀤𑁆𑀤𑁂𑀲𑁄. 𑀚𑀸𑀢𑀓𑀸𑀤𑀺𑀓𑁂 𑀔𑀼𑀤𑁆𑀤𑀓𑀦𑀺𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑁂, 𑀬𑁂𑀪𑀼𑀬𑁆𑀬𑁂𑀦 𑀘 𑀥𑀫𑁆𑀫𑀦𑀺𑀤𑁆𑀤𑁂𑀲𑀪𑀽𑀢𑁂 𑀢𑀸𑀤𑀺𑀲𑁂 𑀅𑀪𑀺𑀥𑀫𑁆𑀫𑀧𑀺𑀝𑀓𑁂𑀯 𑀲𑀗𑁆𑀕𑀡𑁆𑀳𑀺𑀢𑀼𑀁 𑀬𑀼𑀢𑁆𑀢𑀁, 𑀦 𑀧𑀦 𑀤𑀻𑀖𑀦𑀺𑀓𑀸𑀬𑀸𑀤𑀺𑀧𑁆𑀧𑀓𑀸𑀭𑁂 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂, 𑀦𑀸𑀧𑀺 𑀧𑀜𑁆𑀜𑀢𑁆𑀢𑀺𑀦𑀺𑀤𑁆𑀤𑁂𑀲𑀪𑀽𑀢𑁂 𑀯𑀺𑀦𑀬𑀧𑀺𑀝𑀓𑁂𑀢𑀺 𑀤𑀻𑀖𑀪𑀸𑀡𑀓𑀸 𑀚𑀸𑀢𑀓𑀸𑀤𑀻𑀦𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀲𑀗𑁆𑀕𑀳𑀁 𑀯𑀤𑀦𑁆𑀢𑀺. 𑀘𑀭𑀺𑀬𑀸𑀧𑀺𑀝𑀓𑀩𑀼𑀤𑁆𑀥𑀯𑀁𑀲𑀸𑀦𑀜𑁆𑀘𑁂𑀢𑁆𑀣 𑀅𑀕𑁆𑀕𑀳𑀡𑀁 𑀚𑀸𑀢𑀓𑀕𑀢𑀺𑀓𑀢𑁆𑀢𑀸, 𑀦𑁂𑀢𑁆𑀢𑀺𑀧𑁂𑀝𑀓𑁄𑀧𑀤𑁂𑀲𑀸𑀤𑀻𑀦𑀜𑁆𑀘 𑀦𑀺𑀤𑁆𑀤𑁂𑀲𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀕𑀢𑀺𑀓𑀢𑁆𑀢𑀸. 𑀫𑀚𑁆𑀛𑀺𑀫𑀪𑀸𑀡𑀓𑀸 𑀧𑀦 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀤𑁂𑀲𑀺𑀢𑀸𑀦𑀁 𑀚𑀸𑀢𑀓𑀸𑀤𑀻𑀦𑀁 𑀬𑀣𑀸𑀦𑀼𑀮𑁄𑀫𑀤𑁂𑀲𑀦𑀸𑀪𑀸𑀯𑀢𑁄 𑀢𑀸𑀤𑀺𑀲𑁂 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂 𑀲𑀗𑁆𑀕𑀳𑁄 𑀬𑀼𑀢𑁆𑀢𑁄, 𑀦 𑀧𑀦 𑀲𑀪𑀸𑀯𑀥𑀫𑁆𑀫𑀦𑀺𑀤𑁆𑀤𑁂𑀲𑀪𑀽𑀢𑁂 𑀬𑀣𑀸𑀥𑀫𑁆𑀫𑀲𑀸𑀲𑀦𑁂 𑀅𑀪𑀺𑀥𑀫𑁆𑀫𑀧𑀺𑀝𑀓𑁂, 𑀦𑀸𑀧𑀺 𑀧𑀜𑁆𑀜𑀢𑁆𑀢𑀺𑀦𑀺𑀤𑁆𑀤𑁂𑀲𑀪𑀽𑀢𑁂 𑀬𑀣𑀸𑀧𑀭𑀸𑀥𑀲𑀸𑀲𑀦𑁂 𑀯𑀺𑀦𑀬𑀧𑀺𑀝𑀓𑁂𑀢𑀺 𑀚𑀸𑀢𑀓𑀸𑀤𑀻𑀦𑀁 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀧𑀭𑀺𑀬𑀸𑀧𑀦𑁆𑀦𑀢𑀁 𑀯𑀤𑀦𑁆𑀢𑀺. 𑀬𑀼𑀢𑁆𑀢𑀫𑁂𑀢𑁆𑀣 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀏𑀯𑀁 𑀦𑀺𑀫𑀺𑀢𑁆𑀢𑀧𑀬𑁄𑀚𑀦𑀓𑀸𑀮𑀤𑁂𑀲𑀓𑀸𑀭𑀓𑀓𑀭𑀡𑀧𑁆𑀧𑀓𑀸𑀭𑁂𑀳𑀺 𑀧𑀞𑀫𑀁 𑀲𑀗𑁆𑀕𑀻𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀢𑁆𑀣 𑀯𑀯𑀢𑁆𑀣𑀸𑀧𑀺𑀢𑁂𑀲𑀼 𑀥𑀫𑁆𑀫𑀯𑀺𑀦𑀬𑁂𑀲𑀼 𑀦𑀸𑀦𑀧𑁆𑀧𑀓𑀸𑀭𑀓𑁄𑀲𑀮𑁆𑀮𑀢𑁆𑀣𑀁 𑀏𑀓𑀯𑀺𑀥𑀸𑀤𑀺𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀫𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀏𑀯’’𑀦𑁆𑀢𑀺 𑀇𑀫𑀺𑀦𑀸 𑀏𑀢𑀲𑀤𑁆𑀤𑁂𑀦 𑀧𑀭𑀸𑀫𑀲𑀺𑀢𑀩𑁆𑀩𑀁 𑀬𑀣𑀸𑀯𑀼𑀢𑁆𑀢𑀲𑀗𑁆𑀕𑀻𑀢𑀺𑀧𑁆𑀧𑀓𑀸𑀭𑀁 𑀦𑀺𑀤𑀲𑁆𑀲𑁂𑀢𑀺. ‘‘𑀬𑀜𑁆𑀳𑀻’’𑀢𑀺𑀆𑀤𑀺 𑀯𑀺𑀢𑁆𑀣𑀸𑀭𑁄. 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀦𑁆𑀢𑀺 𑀅𑀦𑀸𑀯𑀭𑀡𑀜𑀸𑀡𑀧𑀤𑀝𑁆𑀞𑀸𑀦𑀁 𑀫𑀕𑁆𑀕𑀜𑀸𑀡𑀁, 𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀘 𑀅𑀦𑀸𑀯𑀭𑀡𑀜𑀸𑀡𑀁. 𑀏𑀢𑁆𑀣𑀦𑁆𑀢𑀭𑁂𑀢𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀲𑁆𑀲, 𑀧𑀭𑀺𑀦𑀺𑀩𑁆𑀩𑀸𑀬𑀦𑀲𑁆𑀲 𑀘 𑀯𑀺𑀯𑀭𑁂. 𑀢𑀤𑁂𑀢𑀁 𑀧𑀜𑁆𑀘𑀘𑀢𑁆𑀢𑀸𑀮𑀻𑀲 𑀯𑀲𑁆𑀲𑀸𑀦𑀻𑀢𑀺 𑀓𑀸𑀮𑀯𑀲𑁂𑀦 𑀦𑀺𑀬𑀫𑁂𑀢𑀺. 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁂𑀦 𑀯𑀸𑀢𑀺 𑀉𑀤𑀸𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀥𑀫𑁆𑀫𑀁 𑀲𑀦𑁆𑀥𑀸𑀬𑀸𑀳. 𑀬𑀁 𑀯𑀘𑀦𑀁 𑀯𑀼𑀢𑁆𑀢𑀁, 𑀲𑀩𑁆𑀩𑀁 𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀺𑀁 𑀧𑀦𑁂𑀢𑀦𑁆𑀢𑀺 𑀆𑀳 ‘‘𑀯𑀺𑀫𑀼𑀢𑁆𑀢𑀺𑀭𑀲𑀫𑁂𑀯𑀸’’𑀢𑀺, 𑀦 𑀢𑀤𑀜𑁆𑀜𑀭𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀫𑀼𑀘𑁆𑀘𑀺𑀢𑁆𑀣𑀸𑀢𑀺 𑀯𑀺𑀫𑀼𑀢𑁆𑀢𑀺, 𑀭𑀲𑀺𑀢𑀩𑁆𑀩𑀁 𑀅𑀲𑁆𑀲𑀸𑀤𑁂𑀢𑀩𑁆𑀩𑀦𑁆𑀢𑀺 𑀭𑀲𑀁, 𑀯𑀺𑀫𑀼𑀢𑁆𑀢𑀺𑀲𑀗𑁆𑀔𑀸𑀢𑀁 𑀭𑀲𑀫𑁂𑀢𑀲𑁆𑀲𑀸𑀢𑀺 𑀯𑀺𑀫𑀼𑀢𑁆𑀢𑀺𑀭𑀲𑀁, 𑀅𑀭𑀳𑀢𑁆𑀢𑀨𑀮𑀲𑁆𑀲𑀸𑀤𑀦𑁆𑀢𑀺 𑀅𑀢𑁆𑀣𑁄. 𑀅𑀬𑀁 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀫𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸). 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁄 𑀧𑀦 𑀢𑀁 𑀓𑁂𑀘𑀺𑀯𑀸𑀤𑀁 𑀓𑀢𑁆𑀯𑀸 𑀇𑀫𑀫𑀢𑁆𑀣𑀫𑀸𑀳 ¶ ‘‘𑀯𑀺𑀫𑀼𑀘𑁆𑀘𑀢𑀺 𑀯𑀺𑀫𑀼𑀘𑁆𑀘𑀺𑀢𑁆𑀣𑀸𑀢𑀺 𑀯𑀺𑀫𑀼𑀢𑁆𑀢𑀺, 𑀬𑀣𑀸𑀭𑀳𑀁 𑀫𑀕𑁆𑀕𑁄 𑀨𑀮𑀜𑁆𑀘. 𑀭𑀲𑀦𑁆𑀢𑀺 𑀕𑀼𑀡𑁄, 𑀲𑀫𑁆𑀧𑀢𑁆𑀢𑀺𑀓𑀺𑀘𑁆𑀘𑀁 𑀯𑀸 ¶ , 𑀯𑀼𑀢𑁆𑀢𑀦𑀬𑁂𑀦 𑀲𑀫𑀸𑀲𑁄. 𑀯𑀺𑀫𑀼𑀢𑁆𑀢𑀸𑀦𑀺𑀲𑀁𑀲𑀁, 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀓𑀁 𑀯𑀸 𑀫𑀕𑁆𑀕𑀨𑀮𑀦𑀺𑀧𑁆𑀨𑀸𑀤𑀦𑀢𑁄, 𑀯𑀺𑀫𑀼𑀢𑁆𑀢𑀺𑀓𑀺𑀘𑁆𑀘𑀁 𑀯𑀸 𑀓𑀺𑀮𑁂𑀲𑀸𑀦𑀫𑀘𑁆𑀘𑀦𑁆𑀢𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀸𑀤𑀦𑀢𑁄𑀢𑀺 𑀅𑀢𑁆𑀣𑁄’’𑀢𑀺 (𑀤𑀻. 𑀦𑀺. 𑀝𑀻. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸). 𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀅𑀢𑁆𑀣𑀭𑀲𑀲𑁆𑀲𑀸𑀤𑀻𑀲𑀼 𑀅𑀢𑁆𑀣𑀭𑀲𑁄 𑀦𑀸𑀫 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀥𑀫𑁆𑀫𑀭𑀲𑁄 𑀦𑀸𑀫 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸, 𑀯𑀺𑀫𑀼𑀢𑁆𑀢𑀺𑀭𑀲𑁄 𑀦𑀸𑀫 𑀅𑀫𑀢𑀦𑀺𑀩𑁆𑀩𑀸𑀦’’𑀦𑁆𑀢𑀺 (𑀅. 𑀦𑀺. 𑀅𑀝𑁆𑀞. 𑁧.𑁧.𑁩𑁩𑁫) 𑀯𑀼𑀢𑁆𑀢𑀁.

𑀓𑀺𑀜𑁆𑀘𑀸𑀧𑀺 𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀓𑀺𑀮𑁂𑀲𑀯𑀺𑀦𑀬𑀦𑁂𑀦 𑀯𑀺𑀦𑀬𑁄, 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀅𑀧𑀸𑀬𑀧𑀢𑀦𑀸𑀤𑀺𑀢𑁄 𑀥𑀸𑀭𑀡𑁂𑀦 𑀥𑀫𑁆𑀫𑁄 𑀘 𑀳𑁄𑀢𑀺, 𑀢𑀣𑀸𑀧𑀺 𑀇𑀥𑀸𑀥𑀺𑀧𑁆𑀧𑁂𑀢𑁂𑀬𑁂𑀯 𑀥𑀫𑁆𑀫𑀯𑀺𑀦𑀬𑁂 𑀯𑀢𑁆𑀢𑀺𑀘𑁆𑀙𑀸𑀯𑀲𑁂𑀦 𑀲𑀭𑀽𑀧𑀢𑁄 𑀦𑀺𑀤𑁆𑀥𑀸𑀭𑁂𑀢𑀼𑀁 ‘‘𑀢𑀢𑁆𑀣 𑀯𑀺𑀦𑀬𑀧𑀺𑀝𑀓’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀯𑀲𑁂𑀲𑀁 𑀩𑀼𑀤𑁆𑀥𑀯𑀘𑀦𑀁 𑀥𑀫𑁆𑀫𑁄 𑀔𑀦𑁆𑀥𑀸𑀤𑀺𑀯𑀲𑁂𑀦 𑀲𑀪𑀸𑀯𑀥𑀫𑁆𑀫𑀤𑁂𑀲𑀦𑀸𑀩𑀸𑀳𑀼𑀮𑁆𑀮𑀢𑁄. 𑀅𑀣 𑀯𑀸 𑀬𑀤𑀺𑀧𑀺 𑀯𑀺𑀦𑀬𑁄 𑀘 𑀥𑀫𑁆𑀫𑁄𑀬𑁂𑀯 𑀧𑀭𑀺𑀬𑀢𑁆𑀢𑀺𑀬𑀸𑀤𑀺𑀪𑀸𑀯𑀢𑁄, 𑀢𑀣𑀸𑀧𑀺 𑀯𑀺𑀦𑀬𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂 𑀪𑀺𑀦𑁆𑀦𑀸𑀥𑀺𑀓𑀭𑀡𑀪𑀸𑀯𑁂𑀦 𑀧𑀬𑀼𑀢𑁆𑀢𑁄 𑀥𑀫𑁆𑀫𑀲𑀤𑁆𑀤𑁄 𑀯𑀺𑀦𑀬𑀢𑀦𑁆𑀢𑀺 𑀯𑀺𑀧𑀭𑀻𑀢𑀁 𑀢𑀦𑁆𑀢𑀺𑀫𑁂𑀯 𑀤𑀻𑀧𑁂𑀢𑀺 𑀬𑀣𑀸 ‘‘𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑀸, 𑀕𑁄𑀩𑀮𑀻𑀩𑀤𑁆𑀤’’𑀦𑁆𑀢𑀺. 𑀧𑀬𑁄𑀕𑀯𑀲𑁂𑀦 𑀢𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀢𑁂𑀦𑁂𑀯𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑁂𑀦 𑀯𑀺𑀦𑀬…𑀧𑁂… 𑀥𑀫𑁆𑀫𑁄, 𑀢𑁂𑀦𑁂𑀯 𑀢𑁂𑀲𑀁 𑀢𑀣𑀸𑀪𑀸𑀯𑀁 𑀲𑀗𑁆𑀕𑀻𑀢𑀺𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁩𑁪𑁭) 𑀆𑀳𑀸𑀢𑀺 𑀅𑀢𑁆𑀣𑁄.

‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭’’𑀦𑁆𑀢𑀺 𑀅𑀬𑀁 𑀕𑀸𑀣𑀸 𑀪𑀕𑀯𑀢𑀸 𑀅𑀢𑁆𑀢𑀦𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁂𑀦 𑀏𑀓𑀽𑀦𑀯𑀻𑀲𑀢𑀺𑀫𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀁 𑀪𑀸𑀲𑀺𑀢𑀸, 𑀢𑀲𑁆𑀫𑀸 ‘‘𑀧𑀞𑀫𑀩𑀼𑀤𑁆𑀥𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀸. 𑀇𑀤𑀁 𑀓𑀺𑀭 𑀲𑀩𑁆𑀩𑀩𑀼𑀤𑁆𑀥𑁂𑀳𑀺 𑀅𑀯𑀺𑀚𑀳𑀺𑀢𑀁 𑀉𑀤𑀸𑀦𑀁. 𑀅𑀬𑀫𑀲𑁆𑀲 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀅𑀳𑀁 𑀇𑀫𑀲𑁆𑀲 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀕𑁂𑀳𑀲𑁆𑀲 𑀓𑀸𑀭𑀓𑀁 𑀢𑀡𑁆𑀳𑀸𑀯𑀟𑁆𑀠𑀓𑀺𑀁 𑀕𑀯𑁂𑀲𑀦𑁆𑀢𑁄 𑀬𑁂𑀦 𑀜𑀸𑀡𑁂𑀦 𑀢𑀁 𑀤𑀝𑁆𑀞𑀼𑀁 𑀲𑀓𑁆𑀓𑀸, 𑀢𑀲𑁆𑀲 𑀩𑁄𑀥𑀺𑀜𑀸𑀡𑀲𑁆𑀲𑀢𑁆𑀣𑀸𑀬 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀓𑀢𑀸𑀪𑀺𑀦𑀻𑀳𑀸𑀭𑁄 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁 𑀅𑀦𑁂𑀓𑀚𑀸𑀢𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀁 𑀲𑀁𑀲𑀸𑀭𑀯𑀝𑁆𑀝𑀁 𑀅𑀦𑀺𑀩𑁆𑀩𑀺𑀲𑀁 𑀅𑀦𑀺𑀩𑁆𑀩𑀺𑀲𑀦𑁆𑀢𑁄 𑀢𑀁 𑀜𑀸𑀡𑀁 𑀅𑀯𑀺𑀦𑁆𑀤𑀦𑁆𑀢𑁄 𑀅𑀮𑀪𑀦𑁆𑀢𑁄𑀬𑁂𑀯 𑀲𑀦𑁆𑀥𑀸𑀯𑀺𑀲𑁆𑀲𑀁 𑀲𑀁𑀲𑀭𑀺𑀁. 𑀬𑀲𑁆𑀫𑀸 𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀫𑀺𑀲𑁆𑀲𑀢𑀸𑀬 𑀚𑀸𑀢𑀺 𑀦𑀸𑀫𑁂𑀲𑀸 𑀧𑀼𑀦𑀧𑁆𑀧𑀼𑀦𑀁 𑀉𑀧𑀕𑀦𑁆𑀢𑀼𑀁 𑀤𑀼𑀓𑁆𑀔𑀸, 𑀦 𑀘 𑀲𑀸 𑀢𑀲𑁆𑀫𑀺𑀁 𑀅𑀤𑀺𑀝𑁆𑀞𑁂 𑀦𑀺𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀢𑀁 𑀕𑀯𑁂𑀲𑀦𑁆𑀢𑁄 𑀲𑀦𑁆𑀥𑀸𑀯𑀺𑀲𑁆𑀲𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀪𑁄 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀕𑁂𑀳𑀲𑁆𑀲 𑀓𑀸𑀭𑀓 𑀢𑀡𑁆𑀳𑀸𑀯𑀟𑁆𑀠𑀓𑀺 𑀢𑁆𑀯𑀁 𑀫𑀬𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁂𑀦 𑀤𑀺𑀝𑁆𑀞𑁄 𑀅𑀲𑀺. 𑀧𑀼𑀦 𑀇𑀫𑀁 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀁 𑀫𑀫 𑀕𑁂𑀳𑀁 𑀦 𑀓𑀸𑀳𑀲𑀺 𑀦 𑀓𑀭𑀺𑀲𑁆𑀲𑀲𑀺. 𑀢𑀯 𑀲𑀩𑁆𑀩𑀸 𑀅𑀯𑀲𑁂𑀲𑀓𑀺𑀮𑁂𑀲 𑀨𑀸𑀲𑀼𑀓𑀸 𑀫𑀬𑀸 𑀪𑀕𑁆𑀕𑀸 𑀪𑀜𑁆𑀚𑀺𑀢𑀸 ¶ . 𑀇𑀫𑀲𑁆𑀲 𑀢𑀬𑀸 𑀓𑀢𑀲𑁆𑀲 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀕𑁂𑀳𑀲𑁆𑀲 𑀓𑀽𑀝𑀁 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀁 𑀓𑀡𑁆𑀡𑀺𑀓𑀫𑀡𑁆𑀟𑀮𑀁 𑀯𑀺𑀲𑀗𑁆𑀔𑀢𑀁 𑀯𑀺𑀤𑁆𑀥𑀁𑀲𑀺𑀢𑀁. 𑀇𑀤𑀸𑀦𑀺 𑀫𑀫 𑀘𑀺𑀢𑁆𑀢𑀁 𑀯𑀺𑀲𑀗𑁆𑀔𑀸𑀭𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀕𑀢𑀁 𑀅𑀦𑀼𑀧𑀯𑀺𑀝𑁆𑀞𑀁. 𑀅𑀳𑀜𑁆𑀘 𑀢𑀡𑁆𑀳𑀸𑀦𑀁 𑀔𑀬 𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑀁, 𑀅𑀭𑀳𑀢𑁆𑀢𑀨𑀮𑀁 𑀯𑀸 𑀅𑀚𑁆𑀛𑀕𑀸 𑀅𑀥𑀺𑀕𑀢𑁄 𑀧𑀢𑁆𑀢𑁄𑀲𑁆𑀫𑀻𑀢𑀺. 𑀕𑀡𑁆𑀞𑀺𑀧𑀤𑁂𑀲𑀼 𑀧𑀦 𑀯𑀺𑀲𑀗𑁆𑀔𑀸𑀭𑀕𑀢𑀁 ¶ 𑀘𑀺𑀢𑁆𑀢𑀫𑁂𑀯 𑀢𑀡𑁆𑀳𑀸𑀦𑀁 𑀔𑀬𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑀁, 𑀅𑀭𑀳𑀢𑁆𑀢𑀨𑀮𑀁 𑀯𑀸 𑀅𑀚𑁆𑀛𑀕𑀸 𑀅𑀥𑀺𑀕𑀢𑀦𑁆𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄.

‘‘𑀲𑀦𑁆𑀥𑀸𑀯𑀺𑀲𑁆𑀲’’𑀦𑁆𑀢𑀺 𑀏𑀢𑁆𑀣 𑀘 ‘‘𑀕𑀸𑀣𑀸𑀬𑀫𑀢𑀻𑀢𑀢𑁆𑀣𑁂 𑀇𑀫𑀺𑀲𑁆𑀲’’𑀦𑁆𑀢𑀺 𑀦𑁂𑀭𑀼𑀢𑁆𑀢𑀺𑀓𑀸. ‘‘𑀢𑀁𑀓𑀸𑀮𑀯𑀘𑀦𑀺𑀘𑁆𑀙𑀸𑀬𑀫𑀢𑀻𑀢𑁂𑀧𑀺 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀓𑁂𑀘𑀺. 𑀧𑀼𑀦𑀧𑁆𑀧𑀼𑀦𑀦𑁆𑀢𑀺 𑀅𑀪𑀺𑀡𑁆𑀳𑀢𑁆𑀣𑁂 𑀦𑀺𑀧𑀸𑀢𑁄. 𑀧𑀸𑀢𑀩𑁆𑀩𑀸 𑀭𑀓𑁆𑀔𑀺𑀢𑀩𑁆𑀩𑀸𑀢𑀺 𑀨𑀸𑀲𑀼 𑀧-𑀓𑀸𑀭𑀲𑁆𑀲 𑀨-𑀓𑀸𑀭𑀁 𑀓𑀢𑁆𑀯𑀸, 𑀨𑀼𑀲𑀺𑀢𑀩𑁆𑀩𑀸𑀢𑀺 𑀯𑀸 𑀨𑀸𑀲𑀼, 𑀲𑀸𑀬𑁂𑀯 𑀨𑀸𑀲𑀼𑀓𑀸. 𑀅𑀚𑁆𑀛𑀕𑀸𑀢𑀺 𑀘 ‘‘𑀅𑀚𑁆𑀚𑀢𑀦𑀺𑀬𑀫𑀸𑀢𑁆𑀢𑀫𑀺𑀁 𑀯𑀸 𑀅𑀁 𑀯𑀸’’𑀢𑀺 𑀯𑀤𑀦𑁆𑀢𑀺. 𑀬𑀤𑀺 𑀧𑀦 𑀘𑀺𑀢𑁆𑀢𑀫𑁂𑀯 𑀓𑀢𑁆𑀢𑀸, 𑀢𑀤𑀸 𑀧𑀭𑁄𑀓𑁆𑀔𑀸𑀬𑁂𑀯. 𑀅𑀦𑁆𑀢𑁄𑀚𑀧𑁆𑀧𑀦𑀯𑀲𑁂𑀦 𑀓𑀺𑀭 𑀪𑀕𑀯𑀸 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭’’𑀦𑁆𑀢𑀺 𑀕𑀸𑀣𑀸𑀤𑁆𑀯𑀬𑀫𑀸𑀳, 𑀢𑀲𑁆𑀫𑀸 𑀏𑀲𑀸 𑀫𑀦𑀲𑀸 𑀧𑀯𑀢𑁆𑀢𑀺𑀢𑀥𑀫𑁆𑀫𑀸𑀦𑀫𑀸𑀤𑀺. ‘‘𑀬𑀤𑀸 𑀳𑀯𑁂 𑀧𑀸𑀢𑀼𑀪𑀯𑀦𑁆𑀢𑀺 𑀥𑀫𑁆𑀫𑀸’’𑀢𑀺 𑀅𑀬𑀁 𑀧𑀦 𑀯𑀸𑀘𑀸𑀬 𑀧𑀯𑀢𑁆𑀢𑀺𑀢𑀥𑀫𑁆𑀫𑀸𑀦𑀦𑁆𑀢𑀺 𑀯𑀤𑀦𑁆𑀢𑀺.

𑀓𑁂𑀘𑀻𑀢𑀺 𑀔𑀦𑁆𑀥𑀓𑀪𑀸𑀡𑀓𑀸. 𑀧𑀞𑀫𑀁 𑀯𑀼𑀢𑁆𑀢𑁄 𑀧𑀦 𑀥𑀫𑁆𑀫𑀧𑀤𑀪𑀸𑀡𑀓𑀸𑀦𑀁 𑀯𑀸𑀤𑁄. 𑀬𑀤𑀸…𑀧𑁂… 𑀥𑀫𑁆𑀫𑀸𑀢𑀺 𑀏𑀢𑁆𑀣 𑀦𑀺𑀤𑀲𑁆𑀲𑀦𑀢𑁆𑀣𑁄, 𑀆𑀤𑁆𑀬𑀢𑁆𑀣𑁄 𑀘 𑀇𑀢𑀺-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. 𑀦𑀺𑀤𑀲𑁆𑀲𑀦𑁂𑀦 𑀳𑀺 𑀫𑀭𑀺𑀬𑀸𑀤𑀯𑀘𑀦𑁂𑀦 𑀯𑀺𑀦𑀸 𑀧𑀤𑀢𑁆𑀣𑀯𑀺𑀧𑀮𑁆𑀮𑀸𑀲𑀓𑀸𑀭𑀺𑀦𑀸𑀯 𑀅𑀢𑁆𑀣𑁄 𑀧𑀭𑀺𑀧𑀼𑀡𑁆𑀡𑁄 𑀦 𑀳𑁄𑀢𑀺. 𑀢𑀢𑁆𑀣 𑀆𑀤𑁆𑀬𑀢𑁆𑀣𑀫𑁂𑀯 𑀇𑀢𑀺-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, ‘‘𑀢𑁂𑀦 𑀆𑀢𑀸𑀧𑀺𑀦𑁄…𑀧𑁂… 𑀲𑀳𑁂𑀢𑀼𑀥𑀫𑁆𑀫’𑀦𑁆𑀢𑀺𑀆𑀤𑀺𑀕𑀸𑀣𑀸𑀢𑁆𑀢𑀬𑀁 𑀲𑀗𑁆𑀕𑀡𑁆𑀳𑀸𑀢𑀻’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁. 𑀔𑀦𑁆𑀥𑀓𑁂𑀢𑀺 𑀫𑀳𑀸𑀯𑀕𑁆𑀕𑁂. 𑀉𑀤𑀸𑀦𑀕𑀸𑀣𑀦𑁆𑀢𑀺 𑀚𑀸𑀢𑀺𑀬𑀸 𑀏𑀓𑀯𑀘𑀦𑀁, 𑀢𑀢𑁆𑀣𑀸𑀧𑀺 𑀯𑀸 𑀧𑀞𑀫𑀕𑀸𑀣𑀫𑁂𑀯 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀢𑁆𑀣 𑀘 𑀔𑀦𑁆𑀥𑀓𑀪𑀸𑀡𑀓𑀸 𑀏𑀯𑀁 𑀯𑀤𑀦𑁆𑀢𑀺 ‘‘𑀥𑀫𑁆𑀫𑀧𑀤𑀪𑀸𑀡𑀓𑀸𑀦𑀁 𑀕𑀸𑀣𑀸 𑀫𑀦𑀲𑀸𑀯 𑀤𑁂𑀲𑀺𑀢𑀢𑁆𑀢𑀸 𑀢𑀤𑀸 𑀫𑀳𑀢𑁄 𑀚𑀦𑀲𑁆𑀲 𑀉𑀧𑀓𑀸𑀭𑀸𑀬 𑀦𑀸𑀳𑁄𑀲𑀺, 𑀅𑀫𑁆𑀳𑀸𑀓𑀁 𑀧𑀦 𑀕𑀸𑀣𑀸 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀤𑁂𑀲𑀺𑀢𑀢𑁆𑀢𑀸 𑀢𑀤𑀸 𑀲𑀼𑀡𑀦𑁆𑀢𑀸𑀦𑀁 𑀤𑁂𑀯𑀩𑁆𑀭𑀳𑁆𑀫𑀸𑀦𑀁 𑀉𑀧𑀓𑀸𑀭𑀸𑀬 𑀅𑀳𑁄𑀲𑀺, 𑀢𑀲𑁆𑀫𑀸 𑀇𑀤𑀫𑁂𑀯 𑀧𑀞𑀫𑀩𑀼𑀤𑁆𑀥𑀯𑀘𑀦’’𑀦𑁆𑀢𑀺. 𑀥𑀫𑁆𑀫𑀧𑀤𑀪𑀸𑀡𑀓𑀸 𑀧𑀦 ‘‘𑀤𑁂𑀲𑀦𑀸𑀬 𑀚𑀦𑀲𑁆𑀲 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀪𑀸𑀯𑁄 𑀧𑀞𑀫𑀪𑀸𑀯𑁂 𑀮𑀓𑁆𑀔𑀡𑀁 𑀦 𑀳𑁄𑀢𑀺, 𑀪𑀕𑀯𑀢𑀸 𑀫𑀦𑀲𑀸 𑀧𑀞𑀫𑀁 𑀤𑁂𑀲𑀺𑀢𑀢𑁆𑀢𑀸 𑀇𑀤𑀫𑁂𑀯 𑀧𑀞𑀫𑀩𑀼𑀤𑁆𑀥𑀯𑀘𑀦’’𑀦𑁆𑀢𑀺 𑀯𑀤𑀦𑁆𑀢𑀺 ¶ . 𑀢𑀲𑁆𑀫𑀸 𑀉𑀪𑀬𑀫𑁆𑀧𑀺 𑀉𑀪𑀬𑀣𑀸 𑀬𑀼𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦𑀦𑀼 𑀘 𑀬𑀤𑀺 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭’’𑀦𑁆𑀢𑀺 𑀕𑀸𑀣𑀸 𑀫𑀦𑀲𑀸𑀯 𑀤𑁂𑀲𑀺𑀢𑀸, 𑀅𑀣 𑀓𑀲𑁆𑀫𑀸 𑀥𑀫𑁆𑀫𑀧𑀤𑀝𑁆𑀞𑀓𑀣𑀸𑀬𑀁 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭’𑀦𑁆𑀢𑀺 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀲𑀢𑁆𑀣𑀸 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑁄 𑀉𑀤𑀸𑀦𑀯𑀲𑁂𑀦 𑀉𑀤𑀸𑀦𑁂𑀢𑁆𑀯𑀸 𑀅𑀧𑀭𑀪𑀸𑀕𑁂 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀧𑀼𑀝𑁆𑀞𑁄 𑀓𑀣𑁂𑀲𑀻’’𑀢𑀺 (𑀥. 𑀧. 𑀅𑀝𑁆𑀞. 𑁨.𑁧𑁫𑁨 𑀉𑀤𑀸𑀦𑀯𑀢𑁆𑀣𑀼) 𑀯𑀼𑀢𑁆𑀢𑀦𑁆𑀢𑀺? 𑀅𑀢𑁆𑀣𑀯𑀲𑁂𑀦 𑀢𑀣𑀸𑀬𑁂𑀯 𑀕𑀳𑁂𑀢𑀩𑁆𑀩𑀢𑁆𑀢𑀸. 𑀢𑀢𑁆𑀣𑀸𑀧𑀺 𑀳𑀺 𑀫𑀦𑀲𑀸 𑀉𑀤𑀸𑀦𑁂𑀢𑁆𑀯𑀸𑀢𑀺 𑀅𑀢𑁆𑀣𑁄𑀬𑁂𑀯 𑀕𑀳𑁂𑀢𑀩𑁆𑀩𑁄. 𑀤𑁂𑀲𑀦𑀸 𑀯𑀺𑀬 𑀳𑀺 𑀉𑀤𑀸𑀦𑀫𑁆𑀧𑀺 𑀫𑀦𑀲𑀸 𑀉𑀤𑀸𑀦𑀁, 𑀯𑀘𑀲𑀸 𑀉𑀤𑀸𑀦𑀦𑁆𑀢𑀺 𑀤𑁆𑀯𑀺𑀥𑀸 𑀯𑀺𑀜𑁆𑀜𑀸𑀬𑀢𑀺. 𑀬𑀤𑀺 𑀘𑀸𑀬𑀁 𑀯𑀘𑀲𑀸 𑀉𑀤𑀸𑀦𑀁 𑀲𑀺𑀬𑀸, 𑀉𑀤𑀸𑀦𑀧𑀸𑀴𑀺𑀬𑀫𑀸𑀭𑀼𑀴𑁆𑀳𑀸 𑀪𑀯𑁂𑀬𑁆𑀬 ¶ , 𑀢𑀲𑁆𑀫𑀸 𑀉𑀤𑀸𑀦𑀧𑀸𑀴𑀺𑀬𑀫𑀦𑀸𑀭𑀼𑀴𑁆𑀳𑀪𑀸𑀯𑁄𑀬𑁂𑀯 𑀯𑀘𑀲𑀸 𑀅𑀦𑀼𑀤𑀸𑀦𑁂𑀢𑁆𑀯𑀸 𑀫𑀦𑀲𑀸 𑀉𑀤𑀸𑀦𑀪𑀸𑀯𑁂 𑀓𑀸𑀭𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀧𑀸𑀝𑀺𑀧𑀤𑀤𑀺𑀯𑀲𑁂’’𑀢𑀺 𑀇𑀤𑀁 ‘‘𑀲𑀩𑁆𑀩𑀜𑁆𑀜𑀼𑀪𑀸𑀯𑀧𑁆𑀧𑀢𑁆𑀢𑀲𑁆𑀲𑀸’’𑀢𑀺 𑀏𑀢𑁂𑀦 𑀦 𑀲𑀫𑁆𑀩𑀚𑁆𑀛𑀺𑀢𑀩𑁆𑀩𑀁, ‘‘𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸’’𑀢𑀺 𑀏𑀢𑁂𑀦 𑀧𑀦 𑀲𑀫𑁆𑀩𑀚𑁆𑀛𑀺𑀢𑀩𑁆𑀩𑀁. 𑀯𑀺𑀲𑀸𑀔𑀧𑀼𑀡𑁆𑀡𑀫𑀸𑀬𑀫𑁂𑀯 𑀳𑀺 𑀪𑀕𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄. 𑀮𑁄𑀓𑀺𑀬𑀲𑀫𑀬𑁂 𑀧𑀦 𑀏𑀯𑀫𑁆𑀧𑀺 𑀲𑀫𑁆𑀩𑀚𑁆𑀛𑀦𑀁 𑀪𑀯𑀢𑀺, 𑀢𑀣𑀸𑀧𑀺 𑀦𑁂𑀲 𑀲𑀸𑀲𑀦𑀲𑀫𑀬𑁄𑀢𑀺 𑀦 𑀕𑀳𑁂𑀢𑀩𑁆𑀩𑀁. 𑀲𑁄𑀫𑀦𑀲𑁆𑀲𑀫𑁂𑀯 𑀲𑁄𑀫𑀦𑀲𑁆𑀲𑀫𑀬𑀁 𑀬𑀣𑀸 ‘‘𑀤𑀸𑀦𑀫𑀬𑀁, 𑀲𑀻𑀮𑀫𑀬’’𑀦𑁆𑀢𑀺, (𑀤𑀻. 𑀦𑀺. 𑁩.𑁩𑁦𑁫; 𑀇𑀢𑀺𑀯𑀼. 𑁬𑁦; 𑀦𑁂𑀢𑁆𑀢𑀺. 𑁩𑁪) 𑀢𑀁𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀲𑁄𑀫𑀦𑀲𑁆𑀲𑁂𑀦 𑀯𑀸 𑀲𑀳𑀚𑀸𑀢𑀸𑀤𑀺𑀲𑀢𑁆𑀢𑀺𑀬𑀸 𑀧𑀓𑀢𑀁, 𑀢𑀸𑀤𑀺𑀲𑁂𑀦 𑀜𑀸𑀡𑁂𑀦𑀸𑀢𑀺𑀧𑀺 𑀯𑀝𑁆𑀝𑀢𑀺.

𑀳𑀦𑁆𑀤𑀸𑀢𑀺 𑀘𑁄𑀤𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀇𑀗𑁆𑀖 𑀲𑀫𑁆𑀧𑀸𑀤𑁂𑀣𑀸𑀢𑀺 𑀳𑀺 𑀘𑁄𑀤𑁂𑀢𑀺. 𑀆𑀫𑀦𑁆𑀢𑀬𑀸𑀫𑀻𑀢𑀺 𑀧𑀝𑀺𑀯𑁂𑀤𑀬𑀸𑀫𑀺, 𑀩𑁄𑀥𑁂𑀫𑀻𑀢𑀺 𑀅𑀢𑁆𑀣𑁄. 𑀯𑁄𑀢𑀺 𑀧𑀦 ‘‘𑀆𑀫𑀦𑁆𑀢𑀬𑀸𑀫𑀻’’𑀢𑀺 𑀏𑀢𑀲𑁆𑀲 𑀓𑀫𑁆𑀫𑀧𑀤𑀁. ‘‘𑀆𑀫𑀦𑁆𑀢𑀦𑀢𑁆𑀣𑁂 𑀤𑀼𑀢𑀺𑀬𑀸𑀬𑁂𑀯, 𑀦 𑀘𑀢𑀼𑀢𑁆𑀣𑀻’’𑀢𑀺 𑀳𑀺 𑀯𑀢𑁆𑀯𑀸 𑀢𑀫𑁂𑀯𑀼𑀤𑀸𑀳𑀭𑀦𑁆𑀢𑀺 𑀅𑀓𑁆𑀔𑀭𑀘𑀺𑀦𑁆𑀢𑀓𑀸. 𑀯𑀬𑀥𑀫𑁆𑀫𑀸𑀢𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀫𑀼𑀔𑁂𑀦 𑀲𑀗𑁆𑀔𑀸𑀭𑀸𑀦𑀁 𑀤𑀼𑀓𑁆𑀔𑀸𑀦𑀢𑁆𑀢𑀮𑀓𑁆𑀔𑀡𑀫𑁆𑀧𑀺 𑀯𑀺𑀪𑀸𑀯𑁂𑀢𑀺 ‘‘𑀬𑀤𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔𑀁. 𑀬𑀁 𑀤𑀼𑀓𑁆𑀔𑀁, 𑀢𑀤𑀦𑀢𑁆𑀢𑀸’’𑀢𑀺 (𑀲𑀁. 𑀦𑀺. 𑁨.𑁧𑁫, 𑁪𑁫, 𑁭𑁬, 𑁭𑁭; 𑁨.𑁩.𑁧, 𑁪; 𑀧𑀝𑀺. 𑀫. 𑁨.𑁧𑁦) 𑀯𑀘𑀦𑀢𑁄. 𑀮𑀓𑁆𑀔𑀡𑀢𑁆𑀢𑀬𑀯𑀺𑀪𑀸𑀯𑀦𑀦𑀬𑁂𑀦𑁂𑀯 𑀘 𑀢𑀤𑀸𑀭𑀫𑁆𑀫𑀡𑀁 𑀯𑀺𑀧𑀲𑁆𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 𑀲𑀩𑁆𑀩𑀢𑀺𑀢𑁆𑀣𑀺𑀬𑀸𑀦𑀁 𑀅𑀯𑀺𑀲𑀬𑀪𑀽𑀢𑀁 𑀩𑀼𑀤𑁆𑀥𑀸𑀯𑁂𑀡𑀺𑀓𑀁 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀸𑀥𑀺𑀝𑁆𑀞𑀸𑀦𑀁 𑀅𑀯𑀺𑀧𑀭𑀻𑀢𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀧𑀝𑀺𑀧𑀤𑀁 𑀧𑀓𑀸𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀤𑀸𑀦𑀺 𑀢𑀢𑁆𑀣 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀦𑀺𑀬𑁄𑀚𑁂𑀢𑀺 ‘‘𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣𑀸’’𑀢𑀺, 𑀢𑀸𑀬 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀸𑀥𑀺𑀝𑁆𑀞𑀸𑀦𑀸𑀬 𑀅𑀯𑀺𑀧𑀭𑀻𑀢𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀬 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣𑀸𑀢𑀺 𑀅𑀢𑁆𑀣𑁄. 𑀅𑀧𑀺𑀘 ‘‘𑀯𑀬𑀥𑀫𑁆𑀫𑀸 𑀲𑀗𑁆𑀔𑀸𑀭𑀸’’𑀢𑀺 𑀏𑀢𑁂𑀦 𑀲𑀗𑁆𑀔𑁂𑀧𑁂𑀦 𑀲𑀁𑀯𑁂𑀚𑁂𑀢𑁆𑀯𑀸 ‘‘𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣𑀸’’𑀢𑀺 𑀲𑀗𑁆𑀔𑁂𑀧𑁂𑀦𑁂𑀯 𑀦𑀺𑀭𑀯𑀲𑁂𑀲𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 ¶ . 𑀅𑀧𑁆𑀧𑀫𑀸𑀤𑀧𑀤𑀜𑁆𑀳𑀺 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀁 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀲𑀸𑀲𑀦𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀸𑀬 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀸𑀬 𑀲𑀸𑀲𑀦𑀲𑀗𑁆𑀔𑀸𑀢𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀣𑀸𑀢𑀺 𑀅𑀢𑁆𑀣𑁄. 𑀉𑀪𑀺𑀦𑁆𑀦𑀫𑀦𑁆𑀢𑀭𑁂𑀢𑀺 𑀤𑁆𑀯𑀺𑀦𑁆𑀦𑀁 𑀯𑀘𑀦𑀸𑀦𑀫𑀦𑁆𑀢𑀭𑀸𑀴𑁂 𑀯𑁂𑀫𑀚𑁆𑀛𑁂. 𑀏𑀢𑁆𑀣 𑀳𑀺 𑀓𑀸𑀮𑀯𑀢𑀸 𑀓𑀸𑀮𑁄𑀧𑀺 𑀦𑀺𑀤𑀲𑁆𑀲𑀺𑀢𑁄 𑀢𑀤𑀯𑀺𑀦𑀸𑀪𑀸𑀯𑀺𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀦𑁆𑀢𑀺 𑀏𑀢𑁆𑀣 𑀲𑀼𑀢𑁆𑀢𑀫𑁂𑀯 𑀲𑀼𑀢𑁆𑀢𑀦𑁆𑀢𑀁 𑀬𑀣𑀸 ‘‘𑀓𑀫𑁆𑀫𑀦𑁆𑀢𑀁, 𑀯𑀦𑀦𑁆𑀢’’𑀦𑁆𑀢𑀺. 𑀲𑀗𑁆𑀕𑀻𑀢𑀜𑁆𑀘 𑀅𑀲𑀗𑁆𑀕𑀻𑀢𑀜𑁆𑀘𑀸𑀢𑀺 𑀲𑀩𑁆𑀩𑀲𑀭𑀽𑀧𑀫𑀸𑀳. ‘‘𑀅𑀲𑀗𑁆𑀕𑀻𑀢𑀦𑁆𑀢𑀺 𑀘 𑀲𑀗𑁆𑀕𑀻𑀢𑀺𑀓𑁆𑀔𑀦𑁆𑀥𑀓𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀸𑀤𑀺. 𑀓𑁂𑀘𑀺 𑀧𑀦 ‘𑀲𑀼𑀪𑀲𑀼𑀢𑁆𑀢𑀁 (𑀤𑀻. 𑀦𑀺. 𑁧.𑁪𑁪𑁪) 𑀧𑀞𑀫𑀲𑀗𑁆𑀕𑀻𑀢𑀺𑀬𑀫𑀲𑀗𑁆𑀕𑀻𑀢’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀚𑁆𑀚𑀢𑀺. 𑀧𑀞𑀫𑀲𑀗𑁆𑀕𑀻𑀢𑀺𑀢𑁄 𑀧𑀼𑀭𑁂𑀢𑀭𑀫𑁂𑀯 𑀳𑀺 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀚𑁂𑀢𑀯𑀦𑁂 𑀯𑀺𑀳𑀭𑀦𑁆𑀢𑁂𑀦 𑀲𑀼𑀪𑀲𑁆𑀲 𑀫𑀸𑀡𑀯𑀲𑁆𑀲 𑀪𑀸𑀲𑀺𑀢’’𑀦𑁆𑀢𑀺 (𑀤𑀻. 𑀦𑀺. 𑀝𑀻. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁. 𑀲𑀼𑀪𑀲𑀼𑀢𑁆𑀢𑀁 𑀧𑀦 ‘‘𑀏𑀯𑀁 𑀫𑁂 𑀲𑀼𑀢𑁆𑀢𑀁 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 ¶ 𑀆𑀭𑀸𑀫𑁂 𑀅𑀘𑀺𑀭𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁪𑁪𑁪) 𑀆𑀕𑀢𑀁. 𑀢𑀢𑁆𑀣 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀧𑀞𑀫𑀲𑀗𑁆𑀕𑀻𑀢𑀺𑀬𑀁 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦𑁂𑀯 𑀯𑀢𑁆𑀢𑀼𑀁 𑀬𑀼𑀢𑁆𑀢𑀭𑀽𑀧𑀁 𑀦 𑀳𑁄𑀢𑀺. 𑀦 𑀳𑀺 𑀆𑀦𑀦𑁆𑀤𑀢𑁆𑀣𑁂𑀭𑁄 𑀲𑀬𑀫𑁂𑀯 𑀲𑀼𑀪𑀲𑀼𑀢𑁆𑀢𑀁 𑀤𑁂𑀲𑁂𑀢𑁆𑀯𑀸 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀻𑀦𑀺 𑀯𑀤𑀢𑀺. 𑀏𑀯𑀁 𑀧𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 ‘‘𑀏𑀓𑀫𑀺𑀤𑀸𑀳𑀁 𑀪𑀦𑁆𑀢𑁂 𑀲𑀫𑀬𑀁 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀸𑀫𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂’’𑀢𑀺𑀆𑀤𑀺. 𑀢𑀲𑁆𑀫𑀸 𑀤𑀼𑀢𑀺𑀬𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀺𑀦𑀸 𑀲𑀼𑀪𑀲𑀼𑀢𑁆𑀢𑀁 𑀲𑀗𑁆𑀕𑀻𑀢𑀺𑀫𑀸𑀭𑁄𑀧𑀺𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀅𑀣𑀸𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑀲𑁆𑀲 𑀏𑀯𑀫𑀥𑀺𑀧𑁆𑀧𑀸𑀬𑁄 𑀲𑀺𑀬𑀸 ‘‘𑀆𑀦𑀦𑁆𑀤𑀢𑁆𑀣𑁂𑀭𑁂𑀦𑁂𑀯 𑀯𑀼𑀢𑁆𑀢𑀫𑁆𑀧𑀺 𑀲𑀼𑀪𑀲𑀼𑀢𑁆𑀢𑀁 𑀧𑀞𑀫𑀲𑀗𑁆𑀕𑀻𑀢𑀺𑀫𑀸𑀭𑁄𑀧𑁂𑀢𑁆𑀯𑀸 𑀢𑀦𑁆𑀢𑀺𑀁 𑀞𑀧𑁂𑀢𑀼𑀓𑀸𑀫𑁂𑀳𑀺 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀸𑀤𑀻𑀳𑀺 𑀅𑀜𑁆𑀜𑁂𑀲𑀼 𑀲𑀼𑀢𑁆𑀢𑁂𑀲𑀼 𑀆𑀕𑀢𑀦𑀬𑁂𑀦𑁂𑀯 ‘𑀏𑀯𑀁 𑀫𑁂 𑀲𑀼𑀢’𑀦𑁆𑀢𑀺𑀆𑀤𑀺𑀦𑀸 𑀢𑀦𑁆𑀢𑀺 𑀞𑀧𑀺𑀢𑀸’’𑀢𑀺. 𑀏𑀯𑀁 𑀲𑀢𑀺 𑀬𑀼𑀚𑁆𑀚𑁂𑀬𑁆𑀬. 𑀅𑀣 𑀯𑀸 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀼𑀪𑀲𑀼𑀢𑁆𑀢𑀁 𑀲𑀬𑀁 𑀤𑁂𑀲𑁂𑀦𑁆𑀢𑁄𑀧𑀺 𑀲𑀸𑀫𑀜𑁆𑀜𑀨𑀮𑀸𑀤𑀻𑀲𑀼 𑀪𑀕𑀯𑀢𑀸 𑀤𑁂𑀲𑀺𑀢𑀦𑀬𑁂𑀦𑁂𑀯 𑀤𑁂𑀲𑁂𑀲𑀻𑀢𑀺 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀮𑀤𑁆𑀥𑀦𑀬𑁂 𑀞𑀢𑁆𑀯𑀸 𑀤𑁂𑀲𑀺𑀢𑀢𑁆𑀢𑀸 𑀪𑀕𑀯𑀢𑀸 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀅𑀢𑁆𑀢𑀦𑀺 𑀅𑀤𑀳𑀦𑁆𑀢𑁄 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀺𑀫𑀸𑀳𑀸𑀢𑀺 𑀏𑀯𑀫𑀥𑀺𑀧𑁆𑀧𑀸𑀬𑁂𑀧𑀺 𑀲𑀢𑀺 𑀬𑀼𑀚𑁆𑀚𑀢𑁂𑀯. ‘‘𑀅𑀦𑀼𑀲𑀗𑁆𑀕𑀻𑀢𑀜𑁆𑀘𑀸’’𑀢𑀺𑀧𑀺 𑀧𑀸𑀞𑁄. 𑀤𑀼𑀢𑀺𑀬𑀢𑀢𑀺𑀬𑀲𑀗𑁆𑀕𑀻𑀢𑀻𑀲𑀼 𑀧𑀼𑀦 𑀲𑀗𑁆𑀕𑀻𑀢𑀜𑁆𑀘𑀸𑀢𑀺 𑀅𑀢𑁆𑀣𑀯𑀲𑁂𑀦 𑀦𑀺𑀦𑁆𑀦𑀸𑀦𑀸𑀓𑀭𑀡𑀫𑁂𑀯. 𑀲𑀫𑁄𑀥𑀸𑀦𑁂𑀢𑁆𑀯𑀸 𑀯𑀺𑀦𑀬𑀧𑀺𑀝𑀓𑀁 𑀦𑀸𑀫 𑀯𑁂𑀤𑀺𑀢𑀩𑁆𑀩𑀁, 𑀲𑀼𑀢𑁆𑀢…𑀧𑁂… 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀦𑀸𑀫 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀬𑁄𑀚𑀦𑀸.

𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀧𑀸𑀢𑀺𑀫𑁄𑀓𑁆𑀔𑀯𑀲𑁂𑀦 ¶ 𑀉𑀪𑀬𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀸𑀦𑀺. 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑀯𑀲𑁂𑀦 𑀤𑁆𑀯𑁂 𑀯𑀺𑀪𑀗𑁆𑀕𑀸. 𑀫𑀳𑀸𑀯𑀕𑁆𑀕𑀘𑀽𑀴𑀯𑀕𑁆𑀕𑁂𑀲𑀼 𑀆𑀕𑀢𑀸 𑀤𑁆𑀯𑀸𑀯𑀻𑀲𑀢𑀺 𑀔𑀦𑁆𑀥𑀓𑀸. 𑀧𑀘𑁆𑀘𑁂𑀓𑀁 𑀲𑁄𑀴𑀲𑀳𑀺 𑀯𑀸𑀭𑁂𑀳𑀺 𑀉𑀧𑀮𑀓𑁆𑀔𑀺𑀢𑀢𑁆𑀢𑀸 𑀲𑁄𑀴𑀲 𑀧𑀭𑀺𑀯𑀸𑀭𑀸𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀯𑀸𑀭𑀧𑀸𑀴𑀺𑀬𑀜𑁆𑀳𑀺 𑀫𑀳𑀸𑀯𑀺𑀪𑀗𑁆𑀕𑁂 𑀲𑁄𑀴𑀲 𑀯𑀸𑀭𑀸, 𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑁂 𑀲𑁄𑀴𑀲 𑀯𑀸𑀭𑀸 𑀘𑀸𑀢𑀺 𑀩𑀸𑀢𑁆𑀢𑀺𑀁𑀲 𑀯𑀸𑀭𑀸 𑀆𑀕𑀢𑀸. 𑀧𑁄𑀢𑁆𑀣𑀓𑁂𑀲𑀼 𑀧𑀦 𑀓𑀢𑁆𑀣𑀘𑀺 ‘‘𑀧𑀭𑀺𑀯𑀸𑀭𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀤𑀺𑀲𑁆𑀲𑀢𑀺, 𑀩𑀳𑀽𑀲𑀼 𑀧𑀦 𑀧𑁄𑀢𑁆𑀣𑀓𑁂𑀲𑀼 𑀯𑀺𑀦𑀬𑀝𑁆𑀞𑀓𑀣𑀸𑀬𑀁, 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑀜𑁆𑀘 ‘‘𑀲𑁄𑀴𑀲 𑀧𑀭𑀺𑀯𑀸𑀭𑀸’’𑀢𑀺 𑀏𑀯𑀫𑁂𑀯 𑀤𑀺𑀲𑁆𑀲𑀫𑀸𑀦𑀢𑁆𑀢𑀸 𑀅𑀬𑀫𑁆𑀧𑀺 𑀧𑀸𑀞𑁄 𑀦 𑀲𑀓𑁆𑀓𑀸 𑀧𑀝𑀺𑀩𑀸𑀳𑀺𑀢𑀼𑀦𑁆𑀢𑀺 𑀢𑀲𑁆𑀲𑁂𑀯𑀢𑁆𑀣𑁄 𑀯𑀼𑀢𑁆𑀢𑁄. ‘‘𑀇𑀢𑀻’’𑀢𑀺 𑀬𑀣𑀸𑀯𑀼𑀢𑁆𑀢𑀁 𑀩𑀼𑀤𑁆𑀥𑀯𑀘𑀦𑀁 𑀦𑀺𑀤𑀲𑁆𑀲𑁂𑀢𑁆𑀯𑀸 ‘‘𑀇𑀤’’𑀦𑁆𑀢𑀺 𑀢𑀁 𑀧𑀭𑀸𑀫𑀲𑀢𑀺. 𑀇𑀢𑀺-𑀲𑀤𑁆𑀤𑁄 𑀯𑀸 𑀇𑀤𑀫𑀢𑁆𑀣𑁂, 𑀇𑀤𑀦𑁆𑀢𑀺 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀫𑀢𑁆𑀢𑀁, 𑀇𑀢𑀺 𑀇𑀤𑀦𑁆𑀢𑀺 𑀯𑀸 𑀧𑀭𑀺𑀬𑀸𑀬𑀤𑁆𑀯𑀬𑀁 𑀇𑀤𑀫𑀢𑁆𑀣𑁂𑀬𑁂𑀯 𑀯𑀢𑁆𑀢𑀢𑀺 ‘‘𑀇𑀤𑀸𑀦𑁂𑀢𑀭𑀳𑀺 𑀯𑀺𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀏𑀲 𑀦𑀬𑁄 𑀈𑀤𑀺𑀲𑁂𑀲𑀼. 𑀩𑁆𑀭𑀳𑁆𑀫𑀚𑀸𑀮𑀸𑀤𑀻𑀦𑀺 𑀘𑀢𑀼𑀢𑁆𑀢𑀺𑀁𑀲 𑀲𑀼𑀢𑁆𑀢𑀸𑀦𑀺 𑀲𑀗𑁆𑀕𑀬𑁆𑀳𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸, 𑀢𑁂𑀲𑀁 𑀯𑀸 𑀲𑀗𑁆𑀕𑀳𑁄 𑀕𑀡𑀦𑀸 𑀏𑀢𑀲𑁆𑀲𑀸𑀢𑀺 𑀩𑁆𑀭𑀳𑁆𑀫𑀚𑀸𑀮𑀸𑀤𑀺𑀘𑀢𑀼𑀢𑁆𑀢𑀺𑀁𑀲𑀲𑀼𑀢𑁆𑀢𑀲𑀗𑁆𑀕𑀳𑁄. 𑀏𑀯𑀫𑀺𑀢𑀭𑁂𑀲𑀼𑀧𑀺. 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼 𑀤𑀻𑀖𑀪𑀸𑀡𑀓𑀫𑀚𑁆𑀛𑀺𑀫𑀪𑀸𑀡𑀓𑀸𑀦𑀁 𑀯𑀸𑀤𑁂𑀲𑀼 𑀫𑀚𑁆𑀛𑀺𑀫𑀪𑀸𑀡𑀓𑀸𑀦𑀜𑁆𑀜𑁂𑀯 𑀯𑀸𑀤𑀲𑁆𑀲 𑀬𑀼𑀢𑁆𑀢𑀢𑀭𑀢𑁆𑀢𑀸 𑀔𑀼𑀤𑁆𑀤𑀓𑀧𑀸𑀞𑀸𑀤𑀬𑁄𑀧𑀺 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂𑀬𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀔𑀼𑀤𑁆𑀤𑀓…𑀧𑁂… 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀦𑀸𑀫𑀸’’𑀢𑀺 𑀆𑀳. 𑀢𑀢𑁆𑀣 ‘‘𑀲𑀼𑀡𑀸𑀣 𑀪𑀸𑀯𑀺𑀢𑀢𑁆𑀢𑀸𑀦𑀁, 𑀕𑀸𑀣𑀸 𑀅𑀢𑁆𑀣𑀽𑀧𑀦𑀸𑀬𑀺𑀓𑀸𑀢𑀺 (𑀣𑁂𑀭𑀕𑀸. 𑀦𑀺𑀤𑀸𑀦𑀕𑀸𑀣𑀸) 𑀯𑀼𑀢𑁆𑀢𑀢𑁆𑀢𑀸 ‘‘𑀣𑁂𑀭𑀕𑀸𑀣𑀸 𑀣𑁂𑀭𑀻𑀕𑀸𑀣𑀸’’𑀢𑀺 𑀘 𑀧𑀸𑀞𑁄 𑀬𑀼𑀢𑁆𑀢𑁄.

𑀏𑀯𑀁 ¶ 𑀲𑀭𑀽𑀧𑀢𑁄 𑀧𑀺𑀝𑀓𑀢𑁆𑀢𑀬𑀁 𑀦𑀺𑀬𑀫𑁂𑀢𑁆𑀯𑀸 𑀇𑀤𑀸𑀦𑀺 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀢𑀺𑀩𑁆𑀩𑀺𑀥𑁂𑀲𑀼 𑀧𑀺𑀝𑀓𑁂𑀲𑀼. 𑀯𑀺𑀯𑀺𑀥𑀯𑀺𑀲𑁂𑀲𑀦𑀬𑀢𑁆𑀢𑀸𑀢𑀺 𑀯𑀺𑀯𑀺𑀥𑀦𑀬𑀢𑁆𑀢𑀸, 𑀯𑀺𑀲𑁂𑀲𑀦𑀬𑀢𑁆𑀢𑀸 𑀘. 𑀯𑀺𑀦𑀬𑀦𑀢𑁄𑀢𑀺 𑀯𑀺𑀦𑀬𑀦𑀪𑀸𑀯𑀢𑁄, 𑀪𑀸𑀯𑀧𑁆𑀧𑀥𑀸𑀦𑀦𑀺𑀤𑁆𑀤𑁂𑀲𑁄𑀬𑀁, 𑀪𑀸𑀯𑀮𑁄𑀧𑁄 𑀯𑀸, 𑀇𑀢𑀭𑀣𑀸 𑀤𑀩𑁆𑀩𑀫𑁂𑀯 𑀧𑀥𑀸𑀦𑀁 𑀲𑀺𑀬𑀸, 𑀢𑀣𑀸 𑀘 𑀲𑀢𑀺 𑀯𑀺𑀦𑀬𑀦𑀢𑀸𑀕𑀼𑀡𑀲𑀫𑀗𑁆𑀕𑀺𑀦𑀸 𑀯𑀺𑀦𑀬𑀤𑀩𑁆𑀩𑁂𑀦𑁂𑀯 𑀳𑁂𑀢𑀼𑀪𑀽𑀢𑁂𑀦 𑀯𑀺𑀦𑀬𑁄𑀢𑀺 𑀅𑀓𑁆𑀔𑀸𑀢𑁄, 𑀦 𑀧𑀦 𑀯𑀺𑀦𑀬𑀦𑀢𑀸𑀕𑀼𑀡𑁂𑀦𑀸𑀢𑀺 𑀅𑀦𑀥𑀺𑀧𑁆𑀧𑁂𑀢𑀢𑁆𑀣𑀧𑁆𑀧𑀲𑀗𑁆𑀕𑁄 𑀪𑀯𑁂𑀬𑁆𑀬. 𑀅𑀬𑀁 𑀦𑀬𑁄 𑀏𑀤𑀺𑀲𑁂𑀲𑀼. 𑀯𑀺𑀦𑀻𑀬𑀢𑁂 𑀯𑀸 𑀯𑀺𑀦𑀬𑀦𑀁, 𑀢𑀢𑁄𑀢𑀺 𑀅𑀢𑁆𑀣𑁄. 𑀅𑀬𑀁 𑀯𑀺𑀦𑀬𑁄𑀢𑀺 𑀅𑀢𑁆𑀣𑀧𑀜𑁆𑀜𑀢𑁆𑀢𑀺𑀪𑀽𑀢𑁄 𑀲𑀜𑁆𑀜𑀻𑀲𑀗𑁆𑀔𑀸𑀢𑁄 𑀅𑀬𑀁 𑀢𑀦𑁆𑀢𑀺 𑀯𑀺𑀦𑀬𑁄. 𑀯𑀺𑀦𑀬𑁄𑀢𑀺 𑀅𑀓𑁆𑀔𑀸𑀢𑁄𑀢𑀺 𑀲𑀤𑁆𑀤𑀧𑀜𑁆𑀜𑀢𑁆𑀢𑀺𑀪𑀽𑀢𑁄 𑀲𑀜𑁆𑀜𑀸𑀲𑀗𑁆𑀔𑀸𑀢𑁄 𑀯𑀺𑀦𑀬𑁄 𑀦𑀸𑀫𑀸𑀢𑀺 𑀓𑀣𑀺𑀢𑁄. 𑀅𑀢𑁆𑀣𑀧𑀜𑁆𑀜𑀢𑁆𑀢𑀺𑀬𑀸 𑀳𑀺 𑀦𑀸𑀫𑀧𑀜𑁆𑀜𑀢𑁆𑀢𑀺𑀯𑀺𑀪𑀸𑀯𑀦𑀁 𑀦𑀺𑀩𑁆𑀩𑀘𑀦𑀦𑁆𑀢𑀺.

𑀇𑀤𑀸𑀦𑀺 ¶ 𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀯𑀺𑀯𑀺𑀥𑀸 𑀳𑀻’’𑀢𑀺𑀆𑀤𑀺. ‘‘𑀯𑀺𑀯𑀺𑀥𑀸 𑀏𑀢𑁆𑀣 𑀦𑀬𑀸, 𑀢𑀲𑁆𑀫𑀸 𑀯𑀺𑀯𑀺𑀥𑀦𑀬𑀢𑁆𑀢𑀸 𑀯𑀺𑀦𑀬𑁄𑀢𑀺 𑀅𑀓𑁆𑀔𑀸𑀢𑁄’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀯𑀺𑀯𑀺𑀥𑀢𑁆𑀢𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺 ‘‘𑀧𑀜𑁆𑀘𑀯𑀺𑀥𑀸’’𑀢𑀺𑀆𑀤𑀺𑀦𑀸, 𑀢𑀣𑀸 𑀯𑀺𑀲𑁂𑀲𑀢𑁆𑀢𑀫𑁆𑀧𑀺 ‘‘𑀤𑀴𑁆𑀳𑀻𑀓𑀫𑁆𑀫𑀸’’𑀢𑀺𑀆𑀤𑀺𑀦𑀸. 𑀮𑁄𑀓𑀯𑀚𑁆𑀚𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀤𑀴𑁆𑀳𑀻𑀓𑀫𑁆𑀫𑀧𑀬𑁄𑀚𑀦𑀸, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑁂𑀲𑀼 𑀲𑀺𑀣𑀺𑀮𑀓𑀭𑀡𑀧𑀬𑁄𑀚𑀦𑀸. 𑀲𑀜𑁆𑀜𑀫𑀯𑁂𑀮𑀁 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑁄 𑀆𑀘𑀸𑀭𑁄 𑀅𑀚𑁆𑀛𑀸𑀘𑀸𑀭𑁄, 𑀯𑀻𑀢𑀺𑀓𑁆𑀓𑀫𑁄, 𑀓𑀸𑀬𑁂, 𑀯𑀸𑀘𑀸𑀬 𑀘 𑀧𑀯𑀢𑁆𑀢𑁄 𑀲𑁄, 𑀢𑀲𑁆𑀲 𑀦𑀺𑀲𑁂𑀥𑀦𑀁 𑀢𑀣𑀸, 𑀢𑁂𑀦 𑀢𑀣𑀸𑀦𑀺𑀲𑁂𑀥𑀦𑀫𑁂𑀯 𑀧𑀭𑀺𑀬𑀸𑀬𑁂𑀦 𑀓𑀸𑀬𑀯𑀸𑀘𑀸𑀯𑀺𑀦𑀬𑀦𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀢𑀲𑁆𑀫𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑀸𑀦𑁂𑀓𑀥𑀸 𑀧𑀭𑀸𑀫𑀲𑀦𑀫𑀸𑀳 ‘‘𑀯𑀺𑀯𑀺𑀥𑀦𑀬𑀢𑁆𑀢𑀸’’𑀢𑀺𑀆𑀤𑀺. 𑀬𑀣𑀸𑀯𑀼𑀢𑁆𑀢𑀸 𑀘 𑀕𑀸𑀣𑀸 𑀈𑀤𑀺𑀲𑀲𑁆𑀲 𑀦𑀺𑀩𑁆𑀩𑀘𑀦𑀲𑁆𑀲 𑀧𑀓𑀸𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀢𑀺 𑀯𑀺𑀯𑀺𑀥𑀦𑀬𑀢𑁆𑀢𑀸𑀤𑀺𑀳𑁂𑀢𑀼𑀦𑀸 𑀓𑀭𑀡𑀪𑀽𑀢𑁂𑀦𑀸𑀢𑀺 𑀯𑀤𑀦𑁆𑀢𑀺. 𑀅𑀧𑀺𑀘 ‘‘𑀯𑀺𑀯𑀺𑀥𑀸 𑀳𑀻’’𑀢𑀺𑀆𑀤𑀺𑀯𑀸𑀓𑁆𑀬𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀕𑀼𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀦𑀸’’𑀢𑀺𑀆𑀤𑀺𑀫𑀸𑀳𑀸𑀢𑀺𑀧𑀺 𑀲𑀫𑁆𑀩𑀦𑁆𑀥𑀁 𑀯𑀤𑀦𑁆𑀢𑀺. 𑀏𑀯𑀁 𑀲𑀢𑀺 𑀢𑁂𑀦𑀸𑀢𑀺 𑀯𑀺𑀯𑀺𑀥𑀦𑀬𑀢𑁆𑀢𑀸𑀤𑀺𑀦𑀸 𑀳𑁂𑀢𑀼𑀪𑀽𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑀣𑀸𑀯𑀼𑀢𑁆𑀢𑀯𑀘𑀦𑀫𑁂𑀯 𑀲𑀦𑁆𑀥𑀸𑀬 𑀧𑁄𑀭𑀸𑀡𑁂𑀳𑀺 𑀅𑀬𑀁 𑀕𑀸𑀣𑀸 𑀯𑀼𑀢𑁆𑀢𑀸𑀢𑀺 𑀲𑀁𑀲𑀦𑁆𑀤𑁂𑀢𑀼𑀁 ‘‘𑀢𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺𑀧𑀺 𑀯𑀤𑀦𑁆𑀢𑀺, 𑀤𑀼𑀢𑀺𑀬𑀦𑀬𑁂 𑀯𑀺𑀬 ‘‘𑀢𑁂𑀦𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑁄. 𑀏𑀢𑀦𑁆𑀢𑀺 𑀕𑀸𑀣𑀸𑀯𑀘𑀦𑀁. 𑀏𑀢𑀲𑁆𑀲𑀸𑀢𑀺 𑀯𑀺𑀦𑀬𑀲𑀤𑁆𑀤𑀲𑁆𑀲, ‘‘𑀯𑀘𑀦𑀢𑁆𑀣𑀸’’𑀢𑀺 𑀧𑀤𑁂𑀦 𑀲𑀫𑁆𑀩𑀦𑁆𑀥𑁄. ‘‘𑀯𑀘𑀦𑀲𑁆𑀲 𑀅𑀢𑁆𑀣𑁄’’𑀢𑀺 𑀳𑀺 𑀲𑀫𑁆𑀩𑀦𑁆𑀥𑁂 𑀯𑀼𑀢𑁆𑀢𑁂𑀧𑀺 𑀢𑀲𑁆𑀲 𑀯𑀘𑀦𑀲𑀸𑀫𑀜𑁆𑀜𑀢𑁄 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀢𑀲𑁆𑀲𑀸’’𑀢𑀺 𑀧𑀼𑀦 𑀯𑀼𑀢𑁆𑀢𑀁. 𑀦𑁂𑀭𑀼𑀢𑁆𑀢𑀺𑀓𑀸 𑀧𑀦 𑀲𑀫𑀸𑀲𑀢𑀤𑁆𑀥𑀺𑀢𑁂𑀲𑀼 𑀲𑀺𑀤𑁆𑀥𑁂𑀲𑀼 𑀲𑀸𑀫𑀜𑁆𑀜𑀢𑁆𑀢𑀸, 𑀦𑀸𑀫𑀲𑀤𑁆𑀤𑀢𑁆𑀢𑀸 𑀘 𑀏𑀤𑀺𑀲𑁂𑀲𑀼 𑀲𑀤𑁆𑀤𑀦𑁆𑀢𑀭𑁂𑀦 𑀯𑀺𑀲𑁂𑀲𑀺𑀢𑀪𑀸𑀯𑀁 𑀇𑀘𑁆𑀙𑀦𑁆𑀢𑀺.

‘‘𑀅𑀢𑁆𑀣𑀸𑀦’’𑀦𑁆𑀢𑀺 𑀧𑀤𑀁 ‘‘𑀲𑀽𑀘𑀦𑀢𑁄…𑀧𑁂… 𑀲𑀼𑀢𑁆𑀢𑀸𑀡𑀸’’𑀢𑀺 𑀧𑀤𑁂𑀳𑀺 𑀬𑀣𑀸𑀭𑀳𑀁 𑀓𑀫𑁆𑀫𑀲𑀫𑁆𑀩𑀦𑁆𑀥𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀢𑀫𑀢𑁆𑀣𑀁 𑀯𑀺𑀯𑀭𑀢𑀺 ‘‘𑀢𑀜𑁆𑀳𑀻’’𑀢𑀺𑀆𑀤𑀺𑀦𑀸. 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸𑀤𑀺𑀪𑁂𑀤𑁂 𑀅𑀢𑁆𑀣𑁂𑀢𑀺 𑀬𑁄 𑀢𑀁 𑀲𑀼𑀢𑁆𑀢𑀁 𑀲𑀚𑁆𑀛𑀸𑀬𑀢𑀺, 𑀲𑀼𑀡𑀸𑀢𑀺, 𑀯𑀸𑀘𑁂𑀢𑀺, 𑀘𑀺𑀦𑁆𑀢𑁂𑀢𑀺, 𑀤𑁂𑀲𑁂𑀢𑀺 𑀘, 𑀲𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑁄 𑀲𑀻𑀮𑀸𑀤𑀺𑀅𑀢𑁆𑀣𑁄 𑀢𑀲𑁆𑀲𑀧𑀺 𑀳𑁄𑀢𑀺, 𑀢𑁂𑀦 𑀧𑀭𑀲𑁆𑀲 𑀲𑀸𑀥𑁂𑀢𑀩𑁆𑀩𑀢𑁄 𑀧𑀭𑀲𑁆𑀲𑀧𑀻𑀢𑀺 𑀢𑀤𑀼𑀪𑀬𑀁 𑀢𑀁 𑀲𑀼𑀢𑁆𑀢𑀁 𑀲𑀽𑀘𑁂𑀢𑀺 𑀤𑀻𑀧𑁂𑀢𑀺, 𑀢𑀣𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑁂 ¶ 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀢𑁆𑀣𑁂 𑀘𑀸𑀢𑀺 𑀏𑀯𑀫𑀸𑀤𑀺𑀪𑁂𑀤𑁂 𑀅𑀢𑁆𑀣𑁂 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀢𑁆𑀣𑀲𑀤𑁆𑀤𑁄 𑀘𑀸𑀬𑀁 𑀳𑀺𑀢𑀧𑀭𑀺𑀬𑀸𑀬𑁄, 𑀦 𑀪𑀸𑀲𑀺𑀢𑀢𑁆𑀣𑀯𑀘𑀦𑁄. 𑀬𑀤𑀺 𑀲𑀺𑀬𑀸, 𑀲𑀼𑀢𑁆𑀢𑀁 𑀅𑀢𑁆𑀢𑀦𑁄𑀧𑀺 𑀪𑀸𑀲𑀺𑀢𑀢𑁆𑀣𑀁 𑀲𑀽𑀘𑁂𑀢𑀺, 𑀧𑀭𑀲𑁆𑀲𑀧𑀻𑀢𑀺 𑀅𑀬𑀫𑀦𑀥𑀺𑀧𑁆𑀧𑁂𑀢𑀢𑁆𑀣𑁄 𑀯𑀼𑀢𑁆𑀢𑁄 𑀲𑀺𑀬𑀸. 𑀲𑀼𑀢𑁆𑀢𑁂𑀦 𑀳𑀺 𑀬𑁄 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄, 𑀲𑁄 𑀢𑀲𑁆𑀲𑁂𑀯 𑀧𑀓𑀸𑀲𑀓𑀲𑁆𑀲 ¶ 𑀲𑀼𑀢𑁆𑀢𑀲𑁆𑀲 𑀳𑁄𑀢𑀺, 𑀢𑀲𑁆𑀫𑀸 𑀦 𑀢𑁂𑀦 𑀧𑀭𑀢𑁆𑀣𑁄 𑀲𑀽𑀘𑀺𑀢𑁄, 𑀢𑁂𑀦 𑀲𑀽𑀘𑁂𑀢𑀩𑁆𑀩𑀲𑁆𑀲 𑀧𑀭𑀢𑁆𑀣𑀲𑁆𑀲 𑀦𑀺𑀯𑀢𑁆𑀢𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀸 𑀅𑀢𑁆𑀢𑀢𑁆𑀣𑀕𑁆𑀕𑀳𑀡𑀜𑁆𑀘 𑀦 𑀓𑀢𑁆𑀢𑀩𑁆𑀩𑀁. 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀪𑀸𑀲𑀺𑀢𑀢𑁆𑀣𑀲𑁆𑀲 𑀅𑀪𑀸𑀯𑀸 𑀆𑀤𑀺𑀕𑁆𑀕𑀳𑀡𑀜𑁆𑀘 𑀦 𑀓𑀢𑁆𑀢𑀩𑁆𑀩𑀁, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀲𑁆𑀲 𑀳𑀺𑀢𑀧𑀭𑀺𑀬𑀸𑀬𑀲𑁆𑀲 𑀅𑀢𑁆𑀣𑀲𑁆𑀲 𑀲𑀼𑀢𑁆𑀢𑁂 𑀅𑀲𑀫𑁆𑀪𑀯𑀢𑁄 𑀲𑀼𑀢𑁆𑀢𑀸𑀥𑀸𑀭𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸 𑀯𑀼𑀢𑁆𑀢𑀸.

𑀅𑀣 𑀯𑀸 𑀲𑀼𑀢𑁆𑀢𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀬𑁂 𑀅𑀢𑁆𑀢𑀢𑁆𑀣𑀸𑀤𑀬𑁄 𑀅𑀢𑁆𑀣𑀧𑁆𑀧𑀪𑁂𑀤𑀸 ‘‘𑀦 𑀳’𑀜𑁆𑀜𑀤𑀢𑁆𑀣’𑀢𑁆𑀣𑀺 𑀧𑀲𑀁𑀲𑀮𑀸𑀪𑀸’’𑀢𑀺 𑀏𑀢𑀲𑁆𑀲 𑀧𑀤𑀲𑁆𑀲 𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁬𑁩) 𑀯𑀼𑀢𑁆𑀢𑀸 ‘‘𑀅𑀢𑁆𑀢𑀢𑁆𑀣𑁄, 𑀧𑀭𑀢𑁆𑀣𑁄, 𑀉𑀪𑀬𑀢𑁆𑀣𑁄, 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀅𑀢𑁆𑀣𑁄, 𑀲𑀫𑁆𑀧𑀭𑀸𑀬𑀺𑀓𑁄 𑀅𑀢𑁆𑀣𑁄, 𑀉𑀢𑁆𑀢𑀸𑀦𑁄 𑀅𑀢𑁆𑀣𑁄, 𑀕𑀫𑁆𑀪𑀻𑀭𑁄 𑀅𑀢𑁆𑀣𑁄, 𑀕𑀽𑀴𑁆𑀳𑁄 𑀅𑀢𑁆𑀣𑁄, 𑀧𑀝𑀺𑀘𑁆𑀙𑀦𑁆𑀦𑁄 𑀅𑀢𑁆𑀣𑁄, 𑀦𑁂𑀬𑁆𑀬𑁄 𑀅𑀢𑁆𑀣𑁄, 𑀦𑀻𑀢𑁄 𑀅𑀢𑁆𑀣𑁄, 𑀅𑀦𑀯𑀚𑁆𑀚𑁄 𑀅𑀢𑁆𑀣𑁄, 𑀦𑀺𑀓𑁆𑀓𑀺𑀮𑁂𑀲𑁄 𑀅𑀢𑁆𑀣𑁄, 𑀯𑁄𑀤𑀸𑀦𑁄 𑀅𑀢𑁆𑀣𑁄, 𑀧𑀭𑀫𑀢𑁆𑀣𑁄’’𑀢𑀺, (𑀫𑀳𑀸𑀦𑀺. 𑁬𑁩) 𑀢𑁂 𑀅𑀢𑁆𑀣𑀧𑁆𑀧𑀪𑁂𑀤𑁂 𑀲𑀽𑀘𑁂𑀢𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀓𑀺𑀜𑁆𑀘𑀸𑀧𑀺 𑀳𑀺 𑀲𑀼𑀢𑁆𑀢𑀦𑀺𑀭𑀧𑁂𑀓𑁆𑀔𑀁 𑀅𑀢𑁆𑀢𑀢𑁆𑀣𑀸𑀤𑀬𑁄 𑀯𑀼𑀢𑁆𑀢𑀸 𑀲𑀼𑀢𑁆𑀢𑀢𑁆𑀣𑀪𑀸𑀯𑁂𑀦 𑀅𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸, 𑀢𑁂𑀲𑀼 𑀧𑀦 𑀏𑀓𑁄𑀧𑀺 𑀅𑀢𑁆𑀣𑀧𑁆𑀧𑀪𑁂𑀤𑁄 𑀲𑀼𑀢𑁆𑀢𑁂𑀦 𑀤𑀻𑀧𑁂𑀢𑀩𑁆𑀩𑀢𑀁 𑀦𑀸𑀢𑀺𑀯𑀢𑁆𑀢𑀢𑀻𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑀯𑀺𑀓𑀧𑁆𑀧𑁂 𑀅𑀢𑁆𑀣𑀲𑀤𑁆𑀤𑁄 𑀪𑀸𑀲𑀺𑀢𑀢𑁆𑀣𑀧𑀭𑀺𑀬𑀸𑀬𑁄𑀧𑀺 𑀳𑁄𑀢𑀺. 𑀏𑀢𑁆𑀣 𑀳𑀺 𑀧𑀼𑀭𑀺𑀫𑀓𑀸 𑀧𑀜𑁆𑀘 𑀅𑀢𑁆𑀣𑀧𑁆𑀧𑀪𑁂𑀤𑀸 𑀳𑀺𑀢𑀧𑀭𑀺𑀬𑀸𑀬𑀸, 𑀢𑀢𑁄 𑀧𑀭𑁂 𑀙 𑀪𑀸𑀲𑀺𑀢𑀢𑁆𑀣𑀧𑁆𑀧𑀪𑁂𑀤𑀸, 𑀧𑀘𑁆𑀙𑀺𑀫𑀓𑀸 𑀘𑀢𑁆𑀢𑀸𑀭𑁄 𑀉𑀪𑀬𑀲𑀪𑀸𑀯𑀸. 𑀢𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑀸𑀬 𑀯𑀺𑀪𑀸𑀯𑁂𑀦 𑀅𑀦𑀕𑀸𑀥𑀪𑀸𑀯𑁄 𑀉𑀢𑁆𑀢𑀸𑀦𑁄. 𑀤𑀼𑀭𑀥𑀺𑀕𑀫𑀢𑀸𑀬 𑀯𑀺𑀪𑀸𑀯𑁂𑀦 𑀅𑀕𑀸𑀥𑀪𑀸𑀯𑁄 𑀕𑀫𑁆𑀪𑀻𑀭𑁄. 𑀅𑀯𑀺𑀯𑀝𑁄 𑀕𑀽𑀴𑁆𑀳𑁄. 𑀫𑀽𑀮𑀼𑀤𑀓𑀸𑀤𑀬𑁄 𑀯𑀺𑀬 𑀧𑀁𑀲𑀼𑀦𑀸 𑀅𑀓𑁆𑀔𑀭𑀲𑀦𑁆𑀦𑀺𑀯𑁂𑀲𑀸𑀤𑀺𑀦𑀸 𑀢𑀺𑀭𑁄𑀳𑀺𑀢𑁄 𑀧𑀝𑀺𑀘𑁆𑀙𑀦𑁆𑀦𑁄. 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀜𑀸𑀧𑁂𑀢𑀩𑁆𑀩𑁄 𑀦𑁂𑀬𑁆𑀬𑁄. 𑀬𑀣𑀸𑀭𑀼𑀢𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄 𑀦𑀻𑀢𑁄. 𑀅𑀦𑀯𑀚𑁆𑀚𑀦𑀺𑀓𑁆𑀓𑀺𑀮𑁂𑀲𑀯𑁄𑀤𑀸𑀦𑀸 𑀧𑀭𑀺𑀬𑀸𑀬𑀯𑀲𑁂𑀦 𑀯𑀼𑀢𑁆𑀢𑀸, 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀥𑀫𑁆𑀫𑀯𑀲𑁂𑀦 𑀯𑀸 𑀬𑀣𑀸𑀓𑁆𑀓𑀫𑀁 𑀬𑁄𑀚𑁂𑀢𑀩𑁆𑀩𑀸. 𑀧𑀭𑀫𑀢𑁆𑀣𑁄 𑀦𑀺𑀩𑁆𑀩𑀸𑀦𑀁, 𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑀲𑀪𑀸𑀯𑁄 𑀏𑀯 𑀯𑀸.

𑀅𑀣 𑀯𑀸 ‘‘𑀅𑀢𑁆𑀢𑀦𑀸 𑀘 𑀅𑀧𑁆𑀧𑀺𑀘𑁆𑀙𑁄 𑀳𑁄𑀢𑀻’’𑀢𑀺 𑀅𑀢𑁆𑀢𑀢𑁆𑀣𑀁, ‘‘𑀅𑀧𑁆𑀧𑀺𑀘𑁆𑀙𑀓𑀣𑀜𑁆𑀘 𑀧𑀭𑁂𑀲𑀁 𑀓𑀢𑁆𑀢𑀸 𑀳𑁄𑀢𑀻’’𑀢𑀺 𑀧𑀭𑀢𑁆𑀣𑀁 𑀲𑀽𑀘𑁂𑀢𑀺. 𑀏𑀯𑀁 ‘‘𑀅𑀢𑁆𑀢𑀦𑀸 𑀘 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺, 𑀧𑀭𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀬𑀸 𑀲𑀫𑀸𑀤𑀧𑁂𑀢𑀻’’𑀢𑀺𑀆𑀤𑀺𑀲𑀼𑀢𑁆𑀢𑀸𑀦𑀺 (𑀅. 𑀦𑀺. 𑁪.𑁯𑁯, 𑁨𑁬𑁫) 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀅𑀧𑀭𑁂 𑀧𑀦 ‘‘𑀬𑀣𑀸𑀲𑀪𑀸𑀯𑀁 𑀪𑀸𑀲𑀺𑀢𑀁 𑀅𑀢𑁆𑀢𑀢𑁆𑀣𑀁, 𑀧𑀽𑀭𑀡𑀓𑀲𑁆𑀲𑀧𑀸𑀤𑀻𑀦𑀫𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀲𑀫𑀬𑀪𑀽𑀢𑀁 𑀧𑀭𑀢𑁆𑀣𑀁 𑀲𑀽𑀘𑁂𑀢𑀺, 𑀲𑀼𑀢𑁆𑀢𑁂𑀦 𑀯𑀸 𑀲𑀗𑁆𑀕𑀳𑀺𑀢𑀁 𑀅𑀢𑁆𑀢𑀢𑁆𑀣𑀁, 𑀲𑀼𑀢𑁆𑀢𑀸𑀦𑀼𑀮𑁄𑀫𑀪𑀽𑀢𑀁 𑀧𑀭𑀢𑁆𑀣𑀁, 𑀲𑀼𑀢𑁆𑀢𑀦𑁆𑀢𑀦𑀬𑀪𑀽𑀢𑀁 𑀯𑀸 𑀅𑀢𑁆𑀢𑀢𑁆𑀣𑀁, 𑀯𑀺𑀦𑀬𑀸𑀪𑀺𑀥𑀫𑁆𑀫𑀦𑀬𑀪𑀽𑀢𑀁 𑀧𑀭𑀢𑁆𑀣𑀁 ¶ 𑀲𑀽𑀘𑁂𑀢𑀻’’𑀢𑀺𑀧𑀺 𑀯𑀤𑀦𑁆𑀢𑀺. 𑀯𑀺𑀦𑀬𑀸𑀪𑀺𑀥𑀫𑁆𑀫𑁂𑀳𑀺 𑀘 𑀯𑀺𑀲𑁂𑀲𑁂𑀢𑁆𑀯𑀸 𑀲𑀼𑀢𑁆𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄, 𑀢𑀲𑁆𑀫𑀸 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑀧𑁆𑀧𑀯𑀢𑁆𑀢𑀸𑀬 𑀤𑁂𑀲𑀦𑀸𑀬 𑀲𑀸𑀢𑀺𑀲𑀬𑀁 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀸𑀤𑀻𑀦𑀺 ¶ 𑀧𑀓𑀸𑀲𑀺𑀢𑀸𑀦𑀺 𑀳𑁄𑀦𑁆𑀢𑀺 𑀢𑀧𑁆𑀧𑀥𑀸𑀦𑀪𑀸𑀯𑀢𑁄, 𑀦 𑀧𑀦 𑀆𑀡𑀸𑀥𑀫𑁆𑀫𑀲𑀪𑀸𑀯-𑀯𑀲𑀧𑁆𑀧𑀯𑀢𑁆𑀢𑀸𑀬𑀸𑀢𑀺 𑀇𑀤𑀫𑁂𑀯 ‘‘𑀅𑀢𑁆𑀣𑀸𑀦𑀁 𑀲𑀽𑀘𑀦𑀢𑁄 𑀲𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀽𑀘-𑀲𑀤𑁆𑀤𑀲𑁆𑀲 𑀘𑁂𑀢𑁆𑀣 𑀭𑀲𑁆𑀲𑁄. ‘‘𑀏𑀯𑀜𑁆𑀘 𑀓𑀢𑁆𑀯𑀸 ‘𑀏𑀢𑁆𑀢𑀓𑀁 𑀢𑀲𑁆𑀲 𑀪𑀕𑀯𑀢𑁄 𑀲𑀼𑀢𑁆𑀢𑀸𑀕𑀢𑀁 𑀲𑀼𑀢𑁆𑀢𑀧𑀭𑀺𑀬𑀸𑀧𑀦𑁆𑀦’𑀦𑁆𑀢𑀺 (𑀧𑀸𑀘𑀺. 𑁬𑁫𑁫, 𑁧𑁨𑁪𑁨) 𑀘 𑀲𑀓𑀯𑀸𑀤𑁂 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀻’𑀢𑀺 (𑀅𑀝𑁆𑀞𑀲𑀸. 𑀦𑀺𑀤𑀸𑀦𑀓𑀣𑀸, 𑀓𑀣𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸) 𑀘 𑀏𑀯𑀫𑀸𑀤𑀻𑀲𑀼 𑀲𑀼𑀢𑁆𑀢𑀲𑀤𑁆𑀤𑁄 𑀉𑀧𑀘𑀭𑀺𑀢𑁄𑀢𑀺 𑀕𑀳𑁂𑀢𑀩𑁆𑀩𑁄’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁. 𑀅𑀜𑁆𑀜𑁂 𑀧𑀦 𑀬𑀣𑀸𑀯𑀼𑀢𑁆𑀢𑀲𑀤𑀺𑀲𑁂𑀦𑁂𑀯 𑀦𑀺𑀩𑁆𑀩𑀘𑀦𑁂𑀦 𑀲𑀼𑀢𑁆𑀢𑀲𑀤𑁆𑀤𑀲𑁆𑀲 𑀯𑀺𑀦𑀬𑀸𑀪𑀺𑀥𑀫𑁆𑀫𑀸𑀦𑀫𑁆𑀧𑀺 𑀯𑀸𑀘𑀓𑀢𑁆𑀢𑀁 𑀯𑀤𑀦𑁆𑀢𑀺.

𑀲𑀼𑀢𑁆𑀢𑁂 𑀘 𑀆𑀡𑀸𑀥𑀫𑁆𑀫𑀲𑀪𑀸𑀯𑁄 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀫𑀦𑀼𑀯𑀢𑁆𑀢𑀢𑀺, 𑀦 𑀯𑀺𑀦𑀬𑀸𑀪𑀺𑀥𑀫𑁆𑀫𑁂𑀲𑀼 𑀯𑀺𑀬 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑁄 𑀆𑀡𑀸𑀥𑀫𑁆𑀫𑀲𑀪𑀸𑀯𑁂, 𑀢𑀲𑁆𑀫𑀸 𑀯𑁂𑀦𑁂𑀬𑁆𑀬𑀸𑀦𑀁 𑀏𑀓𑀦𑁆𑀢𑀳𑀺𑀢𑀧𑀝𑀺𑀮𑀸𑀪𑀲𑀁𑀯𑀢𑁆𑀢𑀦𑀺𑀓𑀸 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀢𑀺 𑀆𑀳 ‘‘𑀲𑀼𑀯𑀼𑀢𑁆𑀢𑀸 𑀘𑁂𑀢𑁆𑀣 𑀅𑀢𑁆𑀣𑀸’’𑀢𑀺𑀆𑀤𑀺. ‘‘𑀏𑀓𑀦𑁆𑀢𑀳𑀺𑀢𑀧𑀝𑀺𑀮𑀸𑀪𑀲𑀁𑀯𑀢𑁆𑀢𑀦𑀺𑀓𑀸 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸’’𑀢𑀺 𑀇𑀤𑀫𑁆𑀧𑀺 𑀯𑁂𑀦𑁂𑀬𑁆𑀬𑀸𑀦𑀁 𑀳𑀺𑀢𑀲𑀫𑁆𑀧𑀸𑀤𑀦𑁂 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 𑀢𑀧𑁆𑀧𑀭𑀪𑀸𑀯𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀧𑁆𑀧𑀭𑀪𑀸𑀯𑁄 𑀘 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀮𑁄𑀫𑀢𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦𑁂𑀯𑀸𑀳 ‘‘𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀮𑁄𑀫𑁂𑀦 𑀯𑀼𑀢𑁆𑀢𑀢𑁆𑀢𑀸’’𑀢𑀺. 𑀏𑀢𑁂𑀦 𑀘 𑀳𑁂𑀢𑀼𑀦𑀸 𑀦𑀦𑀼 𑀯𑀺𑀦𑀬𑀸𑀪𑀺𑀥𑀫𑁆𑀫𑀸𑀧𑀺 𑀲𑀼𑀯𑀼𑀢𑁆𑀢𑀸, 𑀅𑀣 𑀓𑀲𑁆𑀫𑀸 𑀇𑀤𑀫𑁂𑀯 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀅𑀦𑀼𑀬𑁄𑀕𑀁 𑀧𑀭𑀺𑀳𑀭𑀢𑀺.

𑀅𑀦𑀼𑀧𑀼𑀩𑁆𑀩𑀲𑀺𑀓𑁆𑀔𑀸𑀤𑀺𑀯𑀲𑁂𑀦 𑀓𑀸𑀮𑀦𑁆𑀢𑀭𑁂𑀦 𑀅𑀢𑁆𑀣𑀸𑀪𑀺𑀦𑀺𑀧𑁆𑀨𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀲𑁆𑀲𑀫𑀺𑀯 𑀨𑀮’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀲𑀲𑁆𑀲𑀁 𑀦𑀸𑀫 𑀯𑀧𑀦𑀭𑁄𑀧𑀦𑀸𑀤𑀺𑀓𑁆𑀔𑀡𑁂𑀬𑁂𑀯 𑀨𑀮𑀁 𑀦 𑀧𑀲𑀯𑀢𑀺, 𑀅𑀦𑀼𑀧𑀼𑀩𑁆𑀩𑀚𑀕𑁆𑀕𑀦𑀸𑀤𑀺𑀯𑀲𑁂𑀦 𑀓𑀸𑀮𑀦𑁆𑀢𑀭𑁂𑀦𑁂𑀯 𑀧𑀲𑀯𑀢𑀺, 𑀢𑀣𑀸 𑀇𑀤𑀫𑁆𑀧𑀺 𑀲𑀯𑀦𑀥𑀸𑀭𑀡𑀸𑀤𑀺𑀓𑁆𑀔𑀡𑁂𑀬𑁂𑀯 𑀅𑀢𑁆𑀣𑁂 𑀦 𑀧𑀲𑀯𑀢𑀺, 𑀅𑀦𑀼𑀧𑀼𑀩𑁆𑀩𑀲𑀺𑀓𑁆𑀔𑀸𑀤𑀺𑀯𑀲𑁂𑀦 𑀓𑀸𑀮𑀦𑁆𑀢𑀭𑁂𑀦𑁂𑀯 𑀧𑀲𑀯𑀢𑀻𑀢𑀺. 𑀧𑀲𑀯𑀢𑀻𑀢𑀺 𑀘 𑀨𑀮𑀢𑀺, 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀪𑀺𑀦𑀺𑀧𑁆𑀨𑀸𑀤𑀦𑀫𑁂𑀯 𑀳𑀺 𑀨𑀮𑀦𑀁. 𑀉𑀧𑀸𑀬𑀲𑀫𑀗𑁆𑀕𑀻𑀦𑀜𑁆𑀜𑁂𑀯 𑀅𑀢𑁆𑀣𑀸𑀪𑀺𑀦𑀺𑀧𑁆𑀨𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀥𑁂𑀦𑀼 𑀯𑀺𑀬 𑀔𑀻𑀭’’𑀦𑁆𑀢𑀺 𑀆𑀳. 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸 𑀥𑁂𑀦𑀼 𑀦𑀸𑀫 𑀓𑀸𑀮𑁂 𑀚𑀸𑀢𑀯𑀘𑁆𑀙𑀸 𑀣𑀦𑀁 𑀕𑀳𑁂𑀢𑁆𑀯𑀸 𑀤𑀼𑀳𑀢𑀁 𑀉𑀧𑀸𑀬𑀯𑀦𑁆𑀢𑀸𑀦𑀫𑁂𑀯 𑀔𑀻𑀭𑀁 𑀧𑀕𑁆𑀖𑀭𑀸𑀧𑁂𑀢𑀺, 𑀦 𑀅𑀓𑀸𑀮𑁂 𑀅𑀚𑀸𑀢𑀯𑀘𑁆𑀙𑀸. 𑀓𑀸𑀮𑁂𑀧𑀺 𑀯𑀸 𑀯𑀺𑀲𑀸𑀡𑀸𑀤𑀺𑀓𑀁 𑀕𑀳𑁂𑀢𑁆𑀯𑀸 𑀤𑀼𑀳𑀢𑀁 𑀅𑀦𑀼𑀧𑀸𑀬𑀯𑀦𑁆𑀢𑀸𑀦𑀁, 𑀢𑀣𑀸 𑀇𑀤𑀫𑁆𑀧𑀺 𑀦𑀺𑀲𑁆𑀲𑀭𑀡𑀸𑀤𑀺𑀦𑀸 𑀲𑀯𑀦𑀥𑀸𑀭𑀡𑀸𑀤𑀻𑀦𑀺 𑀓𑀼𑀭𑀼𑀢𑀁 𑀉𑀧𑀸𑀬𑀯𑀦𑁆𑀢𑀸𑀦𑀫𑁂𑀯 ¶ 𑀲𑀻𑀮𑀸𑀤𑀺𑀅𑀢𑁆𑀣𑁂 𑀧𑀕𑁆𑀖𑀭𑀸𑀧𑁂𑀢𑀺, 𑀦 𑀅𑀮𑀕𑀤𑁆𑀤𑀽𑀧𑀫𑀸𑀬 𑀲𑀯𑀦𑀥𑀸𑀭𑀡𑀸𑀤𑀻𑀦𑀺 𑀓𑀼𑀭𑀼𑀢𑀁 𑀅𑀦𑀼𑀧𑀸𑀬𑀯𑀦𑁆𑀢𑀸𑀦𑀦𑁆𑀢𑀺. 𑀬𑀤𑀺𑀧𑀺 ‘‘𑀲𑀽𑀤𑀢𑀻’’𑀢𑀺 𑀏𑀢𑀲𑁆𑀲 𑀖𑀭𑀢𑀺 𑀲𑀺𑀜𑁆𑀘𑀢𑀻𑀢𑀺 𑀅𑀢𑁆𑀣𑁄, 𑀢𑀣𑀸𑀧𑀺 𑀲𑀓𑀫𑁆𑀫𑀺𑀓𑀥𑀸𑀢𑀼𑀢𑁆𑀢𑀸 𑀧𑀕𑁆𑀖𑀭𑀸𑀧𑁂𑀢𑀻𑀢𑀺 𑀓𑀸𑀭𑀺𑀢𑀯𑀲𑁂𑀦 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀬𑀣𑀸 ‘‘𑀢𑀭𑀢𑀻’’𑀢𑀺 𑀏𑀢𑀲𑁆𑀲 𑀦𑀺𑀧𑀸𑀢𑁂𑀢𑀻𑀢𑀺 𑀅𑀢𑁆𑀣𑁄’’𑀢𑀺. ‘‘𑀲𑀼𑀢𑁆𑀢𑀸𑀡𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀫𑀸𑀳 ‘‘𑀲𑀼𑀝𑁆𑀞𑀼 𑀘 𑀦𑁂 𑀢𑀸𑀬𑀢𑀻’’𑀢𑀺. 𑀦𑁂𑀢𑀺 𑀅𑀢𑁆𑀣𑁂.

𑀲𑀼𑀢𑁆𑀢𑀲𑀪𑀸𑀕𑀦𑁆𑀢𑀺 ¶ 𑀲𑀼𑀢𑁆𑀢𑀲𑀤𑀺𑀲𑀁. 𑀢𑀩𑁆𑀪𑀸𑀯𑀁 𑀤𑀲𑁆𑀲𑁂𑀢𑀺 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀦𑀸. 𑀢𑀘𑁆𑀙𑀓𑀸𑀦𑀁 𑀲𑀼𑀢𑁆𑀢𑀦𑁆𑀢𑀺 𑀯𑀟𑁆𑀠𑀓𑀻𑀦𑀁 𑀓𑀸𑀴𑀲𑀼𑀢𑁆𑀢𑀁. 𑀧𑀫𑀸𑀡𑀁 𑀳𑁄𑀢𑀺 𑀢𑀤𑀦𑀼𑀲𑀸𑀭𑁂𑀦 𑀢𑀘𑁆𑀙𑀦𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀓𑀸𑀴𑀲𑀼𑀢𑁆𑀢𑀁 𑀧𑀲𑀸𑀭𑁂𑀢𑁆𑀯𑀸 𑀲𑀜𑁆𑀜𑀸𑀡𑁂 𑀓𑀢𑁂 𑀕𑀳𑁂𑀢𑀩𑁆𑀩𑀁, 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀜𑁆𑀘 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀢𑀁 𑀢𑀘𑁆𑀙𑀓𑀸𑀦𑀁 𑀧𑀫𑀸𑀡𑀁 𑀳𑁄𑀢𑀺, 𑀏𑀯𑀁 𑀯𑀺𑀯𑀸𑀤𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀲𑀼𑀢𑁆𑀢𑁂 𑀆𑀦𑀻𑀢𑀫𑀢𑁆𑀢𑁂 ‘‘𑀇𑀤𑀁 𑀕𑀳𑁂𑀢𑀩𑁆𑀩𑀁, 𑀇𑀤𑀁 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩’’𑀦𑁆𑀢𑀺 𑀧𑀸𑀓𑀝𑀢𑁆𑀢𑀸 𑀯𑀺𑀯𑀸𑀤𑁄 𑀯𑀽𑀧𑀲𑀫𑁆𑀫𑀢𑀺, 𑀢𑀲𑁆𑀫𑀸 𑀏𑀢𑀁 𑀯𑀺𑀜𑁆𑀜𑀽𑀦𑀁 𑀧𑀫𑀸𑀡𑀦𑁆𑀢𑀺. 𑀇𑀤𑀸𑀦𑀺 𑀅𑀜𑁆𑀜𑀣𑀸𑀧𑀺 𑀲𑀼𑀢𑁆𑀢𑀲𑀪𑀸𑀕𑀢𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀬𑀣𑀸 𑀘𑀸’’𑀢𑀺𑀆𑀤𑀺𑀫𑀸𑀳. 𑀲𑀼𑀢𑁆𑀢𑁂𑀦𑀸𑀢𑀺 𑀧𑀼𑀧𑁆𑀨𑀸𑀯𑀼𑀢𑁂𑀦 𑀬𑁂𑀦 𑀓𑁂𑀦𑀘𑀺 𑀣𑀺𑀭𑀲𑀼𑀢𑁆𑀢𑁂𑀦. 𑀲𑀗𑁆𑀕𑀳𑀺𑀢𑀸𑀦𑀻𑀢𑀺 𑀲𑀼𑀝𑁆𑀞𑀼, 𑀲𑀫𑀁 𑀯𑀸 𑀕𑀳𑀺𑀢𑀸𑀦𑀺, 𑀆𑀯𑀼𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀦 𑀯𑀺𑀓𑀺𑀭𑀺𑀬𑀦𑁆𑀢𑀻𑀢𑀺 𑀇𑀢𑁄 𑀘𑀺𑀢𑁄 𑀘 𑀯𑀺𑀧𑁆𑀧𑀓𑀺𑀡𑁆𑀡𑀸𑀪𑀸𑀯𑀫𑀸𑀳, 𑀦 𑀯𑀺𑀤𑁆𑀥𑀁𑀲𑀻𑀬𑀦𑁆𑀢𑀻𑀢𑀺 𑀙𑁂𑀚𑁆𑀚𑀪𑁂𑀚𑁆𑀚𑀸𑀪𑀸𑀯𑀁. 𑀅𑀬𑀫𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸 𑀣𑀺𑀭𑀲𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀯𑀸𑀢𑁂𑀦 𑀦 𑀯𑀺𑀓𑀺𑀭𑀺𑀬𑀦𑁆𑀢𑀺 𑀦 𑀯𑀺𑀤𑁆𑀥𑀁𑀲𑀻𑀬𑀦𑁆𑀢𑀺, 𑀏𑀯𑀁 𑀲𑀼𑀢𑁆𑀢𑁂𑀦 𑀲𑀗𑁆𑀕𑀳𑀺𑀢𑀸 𑀅𑀢𑁆𑀣𑀸 𑀫𑀺𑀘𑁆𑀙𑀸𑀯𑀸𑀤𑁂𑀦 𑀦 𑀯𑀺𑀓𑀺𑀭𑀺𑀬𑀦𑁆𑀢𑀺 𑀦 𑀯𑀺𑀤𑁆𑀥𑀁𑀲𑀻𑀬𑀦𑁆𑀢𑀻𑀢𑀺. 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑀧𑁆𑀧𑀯𑀢𑁆𑀢𑀸𑀬 𑀘 𑀤𑁂𑀲𑀦𑀸𑀬 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸𑀤𑀻𑀦𑀁 𑀲𑀸𑀢𑀺𑀲𑀬𑀧𑁆𑀧𑀓𑀸𑀲𑀦𑀢𑁄 𑀆𑀡𑀸𑀥𑀫𑁆𑀫𑀲𑀪𑀸𑀯𑁂𑀳𑀺 𑀯𑀺𑀦𑀬𑀸𑀪𑀺𑀥𑀫𑁆𑀫𑁂𑀳𑀺 𑀯𑀺𑀲𑁂𑀲𑁂𑀢𑁆𑀯𑀸 𑀇𑀫𑀲𑁆𑀲𑁂𑀯 𑀲𑀼𑀢𑁆𑀢𑀲𑀪𑀸𑀕𑀢𑀸 𑀯𑀼𑀢𑁆𑀢𑀸. ‘‘𑀢𑁂𑀦𑀸’’𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑀫𑁆𑀩𑀦𑁆𑀥𑁄 𑀘𑁂𑀯 𑀅𑀢𑁆𑀣𑁄 𑀘 𑀬𑀣𑀸𑀭𑀳𑀁 𑀯𑀢𑁆𑀢𑀩𑁆𑀩𑁄. 𑀏𑀢𑁆𑀣 𑀘 ‘‘𑀲𑀼𑀢𑁆𑀢𑀦𑁆𑀢𑀧𑀺𑀝𑀓’’𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀧𑀺 𑀅𑀦𑁆𑀢𑀲𑀤𑁆𑀤𑀲𑁆𑀲 𑀅𑀯𑀘𑀦𑀁 𑀢𑀲𑁆𑀲 𑀯𑀺𑀲𑀼𑀁 𑀅𑀢𑁆𑀣𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀢𑀩𑁆𑀪𑀸𑀯𑀯𑀼𑀢𑁆𑀢𑀺𑀢𑁄. 𑀲𑀳𑀬𑁄𑀕𑀲𑁆𑀲 𑀳𑀺 𑀲𑀤𑁆𑀤𑀲𑁆𑀲 𑀅𑀯𑀘𑀦𑁂𑀦 𑀲𑁂𑀲𑀢𑀸 𑀢𑀲𑁆𑀲 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑀁, 𑀅𑀦𑀢𑁆𑀣𑀓𑀢𑀁 𑀯𑀸 𑀜𑀸𑀧𑁂𑀢𑀺.

𑀬𑀦𑁆𑀢𑀺 𑀏𑀲 𑀦𑀺𑀧𑀸𑀢𑁄 𑀓𑀸𑀭𑀡𑁂, 𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀅𑀪𑀺𑀥𑀫𑁆𑀫𑁂 𑀯𑀼𑀟𑁆𑀠𑀺𑀫𑀦𑁆𑀢𑁄 𑀥𑀫𑁆𑀫𑀸 𑀬𑁂𑀦 𑀯𑀼𑀢𑁆𑀢𑀸, 𑀢𑁂𑀦 𑀅𑀪𑀺𑀥𑀫𑁆𑀫𑁄 𑀦𑀸𑀫 𑀅𑀓𑁆𑀔𑀸𑀢𑁄𑀢𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀅𑀪𑀺-𑀲𑀤𑁆𑀤𑀲𑁆𑀲 𑀅𑀢𑁆𑀣𑀯𑀲𑁂𑀦𑀸𑀬𑀁 𑀧𑀪𑁂𑀤𑁄𑀢𑀺 𑀢𑀲𑁆𑀲 𑀢𑀤𑀢𑁆𑀣𑀧𑁆𑀧𑀯𑀢𑁆𑀢𑀢𑀸𑀤𑀲𑁆𑀲𑀦𑁂𑀦 𑀢𑀫𑀢𑁆𑀣𑀁 𑀲𑀸𑀥𑁂𑀦𑁆𑀢𑁄 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀅𑀪𑀺-𑀲𑀤𑁆𑀤𑁄 ¶ 𑀓𑀫𑀦𑀓𑀺𑀭𑀺𑀬𑀸𑀬 𑀯𑀼𑀟𑁆𑀠𑀺𑀪𑀸𑀯𑀲𑀗𑁆𑀔𑀸𑀢𑀫𑀢𑀺𑀭𑁂𑀓𑀢𑁆𑀣𑀁 𑀤𑀻𑀧𑁂𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀪𑀺𑀓𑁆𑀓𑀫𑀦𑁆𑀢𑀻𑀢𑀺𑀆𑀤𑀻𑀲𑀼 𑀯𑀼𑀟𑁆𑀠𑀺𑀬𑀁 𑀆𑀕𑀢𑁄’’𑀢𑀺. 𑀅𑀪𑀺𑀜𑁆𑀜𑀸𑀢𑀸𑀢𑀺 𑀅𑀟𑁆𑀠𑀘𑀦𑁆𑀤𑀸𑀤𑀺𑀦𑀸 𑀓𑁂𑀦𑀘𑀺 𑀲𑀜𑁆𑀜𑀸𑀡𑁂𑀦 𑀜𑀸𑀢𑀸, 𑀧𑀜𑁆𑀜𑀸𑀢𑀸 𑀧𑀸𑀓𑀝𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀟𑁆𑀠𑀘𑀦𑁆𑀤𑀸𑀤𑀺𑀪𑀸𑀯𑁄 𑀳𑀺 𑀭𑀢𑁆𑀢𑀺𑀬𑀸 𑀉𑀧𑀮𑀓𑁆𑀔𑀡𑀯𑀲𑁂𑀦 𑀧𑀜𑁆𑀜𑀸𑀡𑀁 𑀳𑁄𑀢𑀺 ‘‘𑀬𑀲𑁆𑀫𑀸 𑀅𑀟𑁆𑀠𑁄, 𑀢𑀲𑁆𑀫𑀸 𑀅𑀝𑁆𑀞𑀫𑀻. 𑀬𑀲𑁆𑀫𑀸 𑀊𑀦𑁄, 𑀢𑀲𑁆𑀫𑀸 𑀘𑀸𑀢𑀼𑀤𑁆𑀤𑀲𑀻. 𑀬𑀲𑁆𑀫𑀸 𑀧𑀼𑀡𑁆𑀡𑁄, 𑀢𑀲𑁆𑀫𑀸 𑀧𑀦𑁆𑀦𑀭𑀲𑀻’’𑀢𑀺. 𑀅𑀪𑀺𑀮𑀓𑁆𑀔𑀺𑀢𑀸𑀢𑀺 𑀏𑀢𑁆𑀣𑀸𑀧𑀺 𑀅𑀬𑀫𑁂𑀯𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀇𑀤𑀁 𑀧𑀦 𑀫𑀽𑀮𑀧𑀡𑁆𑀡𑀸𑀲𑀓𑁂 𑀪𑀬𑀪𑁂𑀭𑀯𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁩𑁪) 𑀅𑀪𑀺𑀮𑀓𑁆𑀔𑀺𑀢𑀲𑀤𑁆𑀤𑀧𑀭𑀺𑀬𑀸𑀬𑁄 𑀅𑀪𑀺𑀜𑁆𑀜𑀸𑀢𑀲𑀤𑁆𑀤𑁄𑀢𑀺 𑀆𑀳 ‘‘𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀮𑀓𑁆𑀔𑀺𑀢𑀸𑀢𑀺𑀆𑀤𑀻𑀲𑀼 𑀮𑀓𑁆𑀔𑀡𑁂’’𑀢𑀺. 𑀬𑀚𑁆𑀚𑁂𑀯𑀁 𑀮𑀓𑁆𑀔𑀺𑀢𑀲𑀤𑁆𑀤𑀲𑁆𑀲𑁂𑀯 𑀮𑀓𑁆𑀔𑀡𑀢𑁆𑀣𑀤𑀻𑀧𑀦𑀢𑁄 𑀅𑀪𑀺-𑀲𑀤𑁆𑀤𑁄 𑀅𑀦𑀢𑁆𑀣𑀓𑁄𑀯 𑀲𑀺𑀬𑀸𑀢𑀺? 𑀦𑁂𑀯𑀁 𑀤𑀝𑁆𑀞𑀩𑁆𑀩𑀁 𑀢𑀲𑁆𑀲𑀸𑀧𑀺 𑀢𑀤𑀢𑁆𑀣𑀚𑁄𑀢𑀦𑀢𑁄. 𑀯𑀸𑀘𑀓𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂 𑀳𑀺 𑀉𑀧𑀲𑀕𑁆𑀕𑀦𑀺𑀧𑀸𑀢𑀸 𑀢𑀤𑀢𑁆𑀣𑀚𑁄𑀢𑀓𑀫𑀢𑁆𑀢𑀸𑀢𑀺 𑀮𑀓𑁆𑀔𑀺𑀢𑀲𑀤𑁆𑀤𑁂𑀦 𑀯𑀸𑀘𑀓𑀪𑀸𑀯𑁂𑀦 𑀧𑀓𑀸𑀲𑀺𑀢𑀲𑁆𑀲 𑀮𑀓𑁆𑀔𑀡𑀢𑁆𑀣𑀲𑁆𑀲𑁂𑀯 𑀚𑁄𑀢𑀓𑀪𑀸𑀯𑁂𑀦 𑀧𑀓𑀸𑀲𑀦𑀢𑁄 𑀅𑀪𑀺-𑀲𑀤𑁆𑀤𑁄𑀧𑀺 𑀮𑀓𑁆𑀔𑀡𑁂 𑀧𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀭𑀸𑀚𑀸𑀪𑀺𑀭𑀸𑀚𑀸𑀢𑀺 𑀧𑀭𑁂𑀳𑀺 ¶ 𑀭𑀸𑀚𑀽𑀳𑀺 𑀧𑀽𑀚𑀺𑀢𑀼𑀫𑀭𑀳𑁄 𑀭𑀸𑀚𑀸. 𑀧𑀽𑀚𑀺𑀢𑁂𑀢𑀺 𑀧𑀽𑀚𑀸𑀭𑀳𑁂. 𑀇𑀤𑀁 𑀧𑀦 𑀲𑀼𑀢𑁆𑀢𑀦𑀺𑀧𑀸𑀢𑁂 𑀲𑁂𑀮𑀲𑀼𑀢𑁆𑀢𑁂 (𑀲𑀼. 𑀦𑀺. 𑁫𑁫𑁩 𑀆𑀤𑀬𑁄).

𑀅𑀪𑀺𑀥𑀫𑁆𑀫𑁂𑀢𑀺 ‘‘𑀲𑀼𑀧𑀺𑀦𑀦𑁆𑀢𑁂𑀦 𑀲𑀼𑀓𑁆𑀓𑀯𑀺𑀲𑀝𑁆𑀞𑀺𑀬𑀸 𑀅𑀦𑀸𑀧𑀢𑁆𑀢𑀺𑀪𑀸𑀯𑁂𑀧𑀺 𑀅𑀓𑀼𑀲𑀮𑀘𑁂𑀢𑀦𑀸 𑀉𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺𑀦𑀸 (𑀲𑀸𑀭𑀢𑁆𑀣. 𑀝𑀻. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸 𑀲𑀗𑁆𑀓𑀭𑀯𑀺𑀭𑀳𑀺𑀢𑁂 𑀥𑀫𑁆𑀫𑁂. 𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑀸𑀪𑀸𑀯𑁂𑀦 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀸𑀦𑀫𑁂𑀯 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀯𑀺𑀭𑀳𑀢𑁄 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀯𑀺𑀭𑀳𑀺𑀢𑁂 𑀥𑀫𑁆𑀫𑁂𑀢𑀺𑀧𑀺 𑀯𑀤𑀦𑁆𑀢𑀺. ‘‘𑀧𑀸𑀡𑀸𑀢𑀺𑀧𑀸𑀢𑁄 𑀅𑀓𑀼𑀲𑀮’’𑀦𑁆𑀢𑀺 (𑀫. 𑀦𑀺. 𑁨.𑁧𑁯𑁨) 𑀏𑀯𑀫𑀸𑀤𑀻𑀲𑀼 𑀯𑀸 𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀅𑀓𑀼𑀲𑀮𑁄, 𑀦 𑀧𑀸𑀡𑀲𑀗𑁆𑀔𑀸𑀢𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀘𑁆𑀙𑁂𑀤𑀲𑀗𑁆𑀔𑀸𑀢𑁄 𑀅𑀢𑀺𑀧𑀸𑀢𑁄. 𑀢𑀣𑀸 ‘‘𑀅𑀤𑀺𑀦𑁆𑀦𑀲𑁆𑀲 𑀧𑀭𑀲𑀦𑁆𑀢𑀓𑀲𑁆𑀲 𑀆𑀤𑀸𑀦𑀲𑀗𑁆𑀔𑀸𑀢𑀸 𑀯𑀺𑀜𑁆𑀜𑀢𑁆𑀢𑀺 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄, 𑀢𑀁𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀺𑀓𑀸 𑀣𑁂𑀬𑁆𑀬𑀘𑁂𑀢𑀦𑀸 𑀅𑀓𑀼𑀲𑀮𑁄 𑀥𑀫𑁆𑀫𑁄’’𑀢𑀺 𑀏𑀯𑀫𑀸𑀤𑀺𑀦𑀸𑀧𑀺 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀯𑀺𑀭𑀳𑀺𑀢𑁂 𑀥𑀫𑁆𑀫𑁂𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀪𑀺𑀯𑀺𑀦𑀬𑁂𑀢𑀺 𑀏𑀢𑁆𑀣 𑀧𑀦 ‘‘𑀚𑀸𑀢𑀭𑀽𑀧𑀭𑀚𑀢𑀁 𑀦 𑀧𑀝𑀺𑀕𑁆𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑁄 𑀯𑀺𑀦𑀬𑁂 𑀯𑀺𑀦𑁂𑀢𑀺 𑀦𑀸𑀫. 𑀏𑀢𑁆𑀣 𑀘 ‘‘𑀏𑀯𑀁 𑀧𑀝𑀺𑀕𑁆𑀕𑀡𑁆𑀳𑀢𑁄 𑀧𑀸𑀘𑀺𑀢𑁆𑀢𑀺𑀬𑀁, 𑀏𑀯𑀁 𑀧𑀦 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀤𑀦𑁆𑀢𑁄 𑀅𑀪𑀺𑀯𑀺𑀦𑀬𑁂 𑀯𑀺𑀦𑁂𑀢𑀺 𑀦𑀸𑀫𑀸𑀢𑀺 𑀯𑀤𑀦𑁆𑀢𑀺. 𑀢𑀲𑁆𑀫𑀸 𑀚𑀸𑀢𑀭𑀽𑀧𑀭𑀚𑀢𑀁 𑀧𑀭𑀲𑀦𑁆𑀢𑀓𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀦𑁆𑀢𑀲𑁆𑀲 𑀬𑀣𑀸𑀯𑀢𑁆𑀣𑀼𑀁 ¶ 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑁂𑀲𑀼 𑀅𑀜𑁆𑀜𑀢𑀭𑀁, 𑀪𑀡𑁆𑀟𑀸𑀕𑀸𑀭𑀺𑀓𑀲𑀻𑀲𑁂𑀦 𑀕𑀡𑁆𑀳𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁, 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀕𑀡𑁆𑀳𑀦𑁆𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀓𑁂𑀯𑀮𑀁 𑀮𑁄𑀮𑀢𑀸𑀬 𑀕𑀡𑁆𑀳𑀦𑁆𑀢𑀲𑁆𑀲 𑀅𑀦𑀸𑀫𑀸𑀲𑀤𑀼𑀓𑁆𑀓𑀝𑀁, 𑀭𑀽𑀧𑀺𑀬𑀙𑀟𑁆𑀟𑀓𑀲𑀫𑁆𑀫𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀯𑀺𑀭𑀳𑀺𑀢𑁂 𑀯𑀺𑀦𑀬𑁂𑀧𑀺 𑀧𑀝𑀺𑀩𑀮𑁄 𑀯𑀺𑀦𑁂𑀢𑀼𑀦𑁆𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀁 𑀧𑀦 𑀧𑀭𑀺𑀘𑁆𑀙𑀺𑀦𑁆𑀦𑀢𑀁 𑀲𑀭𑀽𑀧𑀢𑁄 𑀲𑀗𑁆𑀔𑁂𑀧𑁂𑀦𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀜𑁆𑀜𑀫𑀜𑁆𑀜…𑀧𑁂… 𑀳𑁄𑀢𑀻’’𑀢𑀺 𑀆𑀳.

𑀅𑀪𑀺𑀓𑁆𑀓𑀦𑁆𑀢𑁂𑀦𑀸𑀢𑀺 𑀏𑀢𑁆𑀣 𑀓𑀦𑁆𑀢𑀺𑀬𑀸 𑀅𑀥𑀺𑀓𑀢𑁆𑀢𑀁 𑀅𑀪𑀺-𑀲𑀤𑁆𑀤𑁄 𑀤𑀻𑀧𑁂𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀥𑀺𑀓𑁂’’𑀢𑀺. 𑀦𑀦𑀼 𑀘 ‘‘𑀅𑀪𑀺𑀓𑁆𑀓𑀫𑀦𑁆𑀢𑀻’’𑀢𑀺 𑀏𑀢𑁆𑀣 𑀅𑀪𑀺-𑀲𑀤𑁆𑀤𑁄 𑀓𑀫𑀦𑀓𑀺𑀭𑀺𑀬𑀸𑀬 𑀯𑀼𑀟𑁆𑀠𑀺𑀪𑀸𑀯𑀁 𑀅𑀢𑀺𑀭𑁂𑀓𑀢𑁆𑀢𑀁 𑀤𑀻𑀧𑁂𑀢𑀺, ‘‘𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀮𑀓𑁆𑀔𑀺𑀢𑀸’’𑀢𑀺 𑀏𑀢𑁆𑀣 𑀜𑀸𑀡𑀮𑀓𑁆𑀔𑀡𑀓𑀺𑀭𑀺𑀬𑀸𑀦𑀁 𑀲𑀼𑀧𑀸𑀓𑀝𑀢𑀁 𑀯𑀺𑀲𑁂𑀲𑀁, ‘‘𑀅𑀪𑀺𑀓𑁆𑀓𑀦𑁆𑀢𑁂𑀦𑀸’’𑀢𑀺 𑀏𑀢𑁆𑀣 𑀓𑀦𑁆𑀢𑀺𑀬𑀸 𑀅𑀥𑀺𑀓𑀢𑁆𑀢𑀁 𑀯𑀺𑀲𑀺𑀝𑁆𑀞𑀪𑀸𑀯𑀁 𑀤𑀻𑀧𑁂𑀢𑀻𑀢𑀺 𑀇𑀤𑀁 𑀢𑀸𑀯 𑀬𑀼𑀢𑁆𑀢𑀁 𑀓𑀺𑀭𑀺𑀬𑀸𑀯𑀺𑀲𑁂𑀲𑀓𑀢𑁆𑀢𑀸 𑀉𑀧𑀲𑀕𑁆𑀕𑀲𑁆𑀲. ‘‘𑀧𑀸𑀤𑀬𑁄 𑀓𑀺𑀭𑀺𑀬𑀸𑀬𑁄𑀕𑁂 𑀉𑀧𑀲𑀕𑁆𑀕𑀸’’𑀢𑀺 𑀳𑀺 𑀲𑀤𑁆𑀤𑀲𑀢𑁆𑀣𑁂 𑀯𑀼𑀢𑁆𑀢𑀁. ‘‘𑀅𑀪𑀺𑀭𑀸𑀚𑀸, 𑀅𑀪𑀺𑀯𑀺𑀦𑀬𑁂’’𑀢𑀺 𑀧𑀦 𑀧𑀽𑀚𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑁂𑀲𑀼 𑀭𑀸𑀚𑀯𑀺𑀦𑀬𑁂𑀲𑀼 𑀅𑀪𑀺-𑀲𑀤𑁆𑀤𑁄 𑀯𑀢𑁆𑀢𑀢𑀻𑀢𑀺 𑀓𑀣𑀫𑁂𑀢𑀁 𑀬𑀼𑀚𑁆𑀚𑁂𑀬𑁆𑀬. 𑀦 𑀳𑀺 𑀅𑀲𑀢𑁆𑀯𑀯𑀸𑀘𑀻 𑀲𑀤𑁆𑀤𑁄 𑀲𑀢𑁆𑀯𑀯𑀸𑀘𑀓𑁄 𑀲𑀫𑁆𑀪𑀯𑀢𑀻𑀢𑀺? 𑀦𑀢𑁆𑀣𑀺 𑀅𑀢𑁆𑀭 𑀤𑁄𑀲𑁄 𑀧𑀽𑀚𑀦𑀧𑀭𑀺𑀘𑁆𑀙𑁂𑀤𑀦𑀓𑀺𑀭𑀺𑀬𑀸𑀦𑀫𑁆𑀧𑀺 𑀤𑀻𑀧𑀦𑀢𑁄, 𑀢𑀸𑀳𑀺 𑀘 𑀓𑀺𑀭𑀺𑀬𑀸𑀳𑀺 𑀬𑀼𑀢𑁆𑀢𑁂𑀲𑀼 𑀭𑀸𑀚𑀯𑀺𑀦𑀬𑁂𑀲𑀼𑀧𑀺 𑀧𑀯𑀢𑁆𑀢𑀢𑁆𑀢𑀸. 𑀅𑀪𑀺𑀧𑀽𑀚𑀺𑀢𑁄 𑀭𑀸𑀚𑀸𑀢𑀺 𑀳𑀺 𑀅𑀢𑁆𑀣𑁂𑀦 𑀓𑀺𑀭𑀺𑀬𑀸𑀓𑀸𑀭𑀓𑀲𑀫𑁆𑀩𑀦𑁆𑀥𑀁 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀓𑀫𑁆𑀫𑀲𑀸𑀥𑀦𑀪𑀽𑀢𑀁 𑀭𑀸𑀚𑀤𑀩𑁆𑀩𑀁 𑀅𑀪𑀺-𑀲𑀤𑁆𑀤𑁄 𑀧𑀥𑀸𑀦𑀢𑁄 𑀯𑀤𑀢𑀺, 𑀧𑀽𑀚𑀦𑀓𑀺𑀭𑀺𑀬𑀁 𑀧𑀦 𑀅𑀧𑁆𑀧𑀥𑀸𑀦𑀢𑁄. 𑀢𑀣𑀸 𑀅𑀪𑀺𑀧𑀭𑀺𑀘𑁆𑀙𑀺𑀦𑁆𑀦𑁄 𑀯𑀺𑀦𑀬𑁄𑀢𑀺 ¶ 𑀅𑀢𑁆𑀣𑁂𑀦 𑀓𑀺𑀭𑀺𑀬𑀸𑀓𑀸𑀭𑀓𑀲𑀫𑁆𑀩𑀦𑁆𑀥𑀁 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀓𑀫𑁆𑀫𑀲𑀸𑀥𑀦𑀪𑀽𑀢𑀁 𑀯𑀺𑀦𑀬𑀤𑀩𑁆𑀩𑀁 𑀅𑀪𑀺-𑀲𑀤𑁆𑀤𑁄 𑀧𑀥𑀸𑀦𑀢𑁄 𑀯𑀤𑀢𑀺, 𑀧𑀭𑀺𑀘𑁆𑀙𑀺𑀦𑁆𑀤𑀦𑀓𑀺𑀭𑀺𑀬𑀁 𑀧𑀦 𑀅𑀧𑁆𑀧𑀥𑀸𑀦𑀢𑁄. 𑀢𑀲𑁆𑀫𑀸 𑀅𑀢𑀺𑀫𑀸𑀮𑀸𑀤𑀻𑀲𑀼 𑀅𑀢𑀺-𑀲𑀤𑁆𑀤𑁄 𑀯𑀺𑀬 𑀅𑀪𑀺-𑀲𑀤𑁆𑀤𑁄 𑀏𑀢𑁆𑀣 𑀲𑀳 𑀲𑀸𑀥𑀦𑁂𑀦 𑀓𑀺𑀭𑀺𑀬𑀁 𑀯𑀤𑀢𑀻𑀢𑀺 𑀅𑀪𑀺𑀭𑀸𑀚𑀅𑀪𑀺𑀯𑀺𑀦𑀬𑀲𑀤𑁆𑀤𑀸 𑀲𑁄𑀧𑀲𑀕𑁆𑀕𑀸𑀯 𑀲𑀺𑀤𑁆𑀥𑀸. 𑀏𑀯𑀁 𑀅𑀪𑀺𑀥𑀫𑁆𑀫𑀲𑀤𑁆𑀤𑁂𑀧𑀺 𑀅𑀪𑀺𑀲𑀤𑁆𑀤𑁄 𑀲𑀳 𑀲𑀸𑀥𑀦𑁂𑀦 𑀯𑀼𑀟𑁆𑀠𑀺𑀬𑀸𑀤𑀺𑀓𑀺𑀭𑀺𑀬𑀁 𑀯𑀤𑀢𑀻𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀳𑁄𑀢𑀼 𑀅𑀪𑀺-𑀲𑀤𑁆𑀤𑁄 𑀬𑀣𑀸𑀯𑀼𑀢𑁆𑀢𑁂𑀲𑀼 𑀅𑀢𑁆𑀣𑁂𑀲𑀼, 𑀢𑀧𑁆𑀧𑀬𑁄𑀕𑁂𑀦 𑀧𑀦 𑀥𑀫𑁆𑀫𑀲𑀤𑁆𑀤𑁂𑀦 𑀤𑀻𑀧𑀺𑀢𑀸 𑀯𑀼𑀟𑁆𑀠𑀺𑀫𑀦𑁆𑀢𑀸𑀤𑀬𑁄 𑀥𑀫𑁆𑀫𑀸 𑀏𑀢𑁆𑀣 𑀯𑀼𑀢𑁆𑀢𑀸 𑀦 𑀪𑀯𑁂𑀬𑁆𑀬𑀼𑀁, 𑀓𑀣𑀁 𑀅𑀬𑀫𑀢𑁆𑀣𑁄 𑀬𑀼𑀚𑁆𑀚𑁂𑀬𑁆𑀬𑀸𑀢𑀺 𑀅𑀦𑀼𑀬𑁄𑀕𑁂 𑀲𑀢𑀺 𑀢𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀅𑀪𑀺𑀥𑀫𑁆𑀫𑁂. 𑀉𑀧𑀦𑁆𑀬𑀸𑀲𑁂 𑀘-𑀲𑀤𑁆𑀤𑁄. 𑀪𑀸𑀯𑁂𑀢𑀻𑀢𑀺 𑀘𑀺𑀢𑁆𑀢𑀲𑁆𑀲 𑀯𑀟𑁆𑀠𑀦𑀁 𑀯𑀼𑀢𑁆𑀢𑀁, 𑀨𑀭𑀺𑀢𑁆𑀯𑀸𑀢𑀺 𑀆𑀭𑀫𑁆𑀫𑀡𑀲𑁆𑀲 𑀯𑀟𑁆𑀠𑀦𑀁, 𑀢𑀲𑁆𑀫𑀸 𑀢𑀸𑀳𑀺 𑀪𑀸𑀯𑀦𑀸𑀨𑀭𑀡𑀯𑀼𑀟𑁆𑀠𑀻𑀳𑀺 𑀯𑀼𑀟𑁆𑀠𑀺𑀫𑀦𑁆𑀢𑁄𑀧𑀺 𑀥𑀫𑁆𑀫𑀸 𑀯𑀼𑀢𑁆𑀢𑀸𑀢𑀺 𑀅𑀢𑁆𑀣𑁄 ¶ . 𑀆𑀭𑀫𑁆𑀫𑀡𑀸𑀤𑀻𑀳𑀻𑀢𑀺 𑀆𑀭𑀫𑁆𑀫𑀡𑀲𑀫𑁆𑀧𑀬𑀼𑀢𑁆𑀢𑀓𑀫𑁆𑀫𑀤𑁆𑀯𑀸𑀭𑀧𑀝𑀺𑀧𑀤𑀸𑀤𑀻𑀳𑀺. 𑀏𑀓𑀦𑁆𑀢𑀢𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀜𑁆𑀜𑁂𑀯 𑀧𑀽𑀚𑀸𑀭𑀳𑀢𑁆𑀢𑀸 ‘‘𑀲𑁂𑀓𑁆𑀔𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀢𑁂𑀬𑁂𑀯 𑀧𑀽𑀚𑀺𑀢𑀸𑀢𑀺 𑀤𑀲𑁆𑀲𑀺𑀢𑀸. ‘‘𑀧𑀽𑀚𑀸𑀭𑀳𑀸’’𑀢𑀺 𑀏𑀢𑁂𑀦 𑀓𑀢𑁆𑀢𑀸𑀤𑀺𑀲𑀸𑀥𑀦𑀁, 𑀅𑀢𑀻𑀢𑀸𑀤𑀺𑀓𑀸𑀮𑀁, 𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀣𑀁 𑀯𑀸 𑀦𑀺𑀯𑀢𑁆𑀢𑁂𑀢𑀺. 𑀧𑀽𑀚𑀺𑀢𑀩𑁆𑀩𑀸𑀬𑁂𑀯 𑀳𑀺 𑀥𑀫𑁆𑀫𑀸 𑀓𑀸𑀮𑀯𑀺𑀲𑁂𑀲𑀦𑀺𑀬𑀫𑀭𑀳𑀺𑀢𑀸 𑀧𑀽𑀚𑀸𑀭𑀳𑀸 𑀏𑀢𑁆𑀣 𑀯𑀼𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄 𑀤𑀲𑁆𑀲𑀺𑀢𑁄. 𑀲𑀪𑀸𑀯𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸𑀢𑀺 𑀨𑀼𑀲𑀦𑀸𑀤𑀺𑀲𑀪𑀸𑀯𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸. 𑀓𑀸𑀫𑀸𑀯𑀘𑀭𑁂𑀳𑀺 𑀫𑀳𑀦𑁆𑀢𑀪𑀸𑀯𑀢𑁄 𑀫𑀳𑀕𑁆𑀕𑀢𑀸 𑀥𑀫𑁆𑀫𑀸 𑀅𑀥𑀺𑀓𑀸, 𑀢𑀢𑁄𑀧𑀺 𑀉𑀢𑁆𑀢𑀭𑀯𑀺𑀭𑀳𑀢𑁄 𑀅𑀦𑀼𑀢𑁆𑀢𑀭𑀸 𑀥𑀫𑁆𑀫𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀫𑀳𑀕𑁆𑀕𑀢𑀸’’𑀢𑀺𑀆𑀤𑀺𑀦𑀸. 𑀢𑁂𑀦𑀸𑀢𑀺 ‘‘𑀯𑀼𑀟𑁆𑀠𑀺𑀫𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀯𑀘𑀦𑁂𑀦 𑀓𑀭𑀡𑀪𑀽𑀢𑁂𑀦, 𑀳𑁂𑀢𑀼𑀪𑀽𑀢𑁂𑀦 𑀯𑀸.

𑀬𑀁 𑀧𑀦𑁂𑀢𑁆𑀣𑀸𑀢𑀺 𑀏𑀢𑁂𑀲𑀼 𑀯𑀺𑀦𑀬𑀸𑀤𑀻𑀲𑀼 𑀢𑀻𑀲𑀼 𑀅𑀜𑁆𑀜𑀫𑀜𑁆𑀜𑀯𑀺𑀲𑀺𑀝𑁆𑀞𑁂𑀲𑀼 𑀬𑀁 𑀅𑀯𑀺𑀲𑀺𑀝𑁆𑀞𑀁 𑀲𑀫𑀸𑀦𑀁, 𑀢𑀁 𑀧𑀺𑀝𑀓𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀦𑀬𑀸𑀤𑀬𑁄 𑀳𑀺 𑀢𑀬𑁄 𑀲𑀤𑁆𑀤𑀸 𑀅𑀜𑁆𑀜𑀫𑀜𑁆𑀜𑀸𑀲𑀸𑀥𑀸𑀭𑀡𑀢𑁆𑀢𑀸 𑀯𑀺𑀲𑀺𑀝𑁆𑀞𑀸 𑀦𑀸𑀫, 𑀧𑀺𑀝𑀓𑀲𑀤𑁆𑀤𑁄 𑀧𑀦 𑀢𑁂𑀳𑀺 𑀢𑀻𑀳𑀺𑀧𑀺 𑀲𑀸𑀥𑀸𑀭𑀡𑀢𑁆𑀢𑀸 ‘‘𑀅𑀯𑀺𑀲𑀺𑀝𑁆𑀞𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀺𑀬𑀢𑁆𑀢𑀺𑀩𑁆𑀪𑀸𑀚𑀦𑀢𑁆𑀣𑀢𑁄𑀢𑀺 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀢𑁆𑀣𑀧𑀢𑀺𑀝𑁆𑀞𑀸𑀦𑀢𑁆𑀣𑁂𑀳𑀺 𑀓𑀭𑀡𑀪𑀽𑀢𑁂𑀳𑀺, 𑀯𑀺𑀲𑁂𑀲𑀦𑀪𑀽𑀢𑁂𑀳𑀺 𑀯𑀸. 𑀅𑀧𑀺𑀘 𑀧𑀭𑀺𑀬𑀢𑁆𑀢𑀺𑀩𑁆𑀪𑀸𑀚𑀦𑀢𑁆𑀣𑀢𑁄 𑀧𑀭𑀺𑀬𑀢𑁆𑀢𑀺𑀪𑀸𑀚𑀦𑀢𑁆𑀣𑀦𑁆𑀢𑀺 𑀆𑀳𑀽𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀧𑀘𑁆𑀘𑀢𑁆𑀢𑀢𑁆𑀣𑁂 𑀳𑀺 𑀢𑁄-𑀲𑀤𑁆𑀤𑁄 𑀇𑀢𑀺-𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑁆𑀢𑀸. 𑀇𑀢𑀺𑀦𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁂𑀳𑀺𑀢𑁄 𑁋 𑀲𑀤𑁆𑀤𑀫𑀺𑀘𑁆𑀙𑀦𑁆𑀢𑀺 𑀦𑁂𑀭𑀼𑀢𑁆𑀢𑀺𑀓𑀸 𑀬𑀣𑀸 ‘‘𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀦𑁆𑀢𑀻’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁦𑁬, 𑁪𑁦𑁮, 𑁪𑁧𑁧) 𑀏𑀢𑁂𑀦 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀢𑁄, 𑀢𑀁𑀢𑀤𑀢𑁆𑀣𑀸𑀦𑀁 𑀪𑀸𑀚𑀦𑀢𑁄 𑀘 𑀧𑀺𑀝𑀓𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀦𑀺𑀧𑁆𑀨𑀦𑁆𑀦𑀧𑀸𑀝𑀺𑀧𑀤𑀺𑀓𑀧𑀤𑀜𑁆𑀳𑁂𑀢𑀁. 𑀲𑀤𑁆𑀤𑀯𑀺𑀤𑀽 𑀧𑀦 ‘‘𑀧𑀺𑀝 𑀲𑀤𑁆𑀤𑀲𑀗𑁆𑀖𑀸𑀝𑁂𑀲𑀽’’𑀢𑀺 𑀯𑀢𑁆𑀯𑀸 𑀇𑀥 𑀯𑀼𑀢𑁆𑀢𑀫𑁂𑀯 𑀧𑀬𑁄𑀕𑀫𑀼𑀤𑀸𑀳𑀭𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀫𑀢𑁂𑀦 𑀧𑀺𑀝𑀻𑀬𑀢𑀺 𑀲𑀤𑁆𑀤𑀻𑀬𑀢𑀺 𑀧𑀭𑀺𑀬𑀸𑀧𑀼𑀡𑀻𑀬𑀢𑀻𑀢𑀺 𑀧𑀺𑀝𑀓𑀁, 𑀧𑀺𑀝𑀻𑀬𑀢𑀺 𑀯𑀸 𑀲𑀗𑁆𑀖𑀸𑀝𑀻𑀬𑀢𑀺 𑀢𑀁𑀢𑀤𑀢𑁆𑀣𑁄 𑀏𑀢𑁆𑀣𑀸𑀢𑀺 𑀧𑀺𑀝𑀓𑀦𑁆𑀢𑀺 𑀦𑀺𑀩𑁆𑀩𑀘𑀦𑀁 𑀓𑀸𑀢𑀩𑁆𑀩𑀁. ‘‘𑀢𑁂𑀦𑀸’’𑀢𑀺𑀆𑀤𑀺𑀦𑀸 𑀲𑀫𑀸𑀲𑀁 𑀤𑀲𑁆𑀲𑁂𑀢𑀺.

𑀫𑀸 ¶ 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦𑀸𑀢𑀺 𑀓𑀸𑀮𑀸𑀫𑀲𑀼𑀢𑁆𑀢𑁂, (𑀅. 𑀦𑀺. 𑁩.𑁬𑁬) 𑀲𑀸𑀴𑁆𑀳𑀲𑀼𑀢𑁆𑀢𑁂 (𑀅. 𑀦𑀺. 𑁩.𑁬𑁭) 𑀘 𑀆𑀕𑀢𑀁 𑀧𑀸𑀴𑀺𑀫𑀸𑀳. 𑀢𑀤𑀝𑁆𑀞𑀓𑀣𑀸𑀬𑀜𑁆𑀘 ‘‘𑀅𑀫𑁆𑀳𑀸𑀓𑀁 𑀧𑀺𑀝𑀓𑀢𑀦𑁆𑀢𑀺𑀬𑀸 𑀲𑀤𑁆𑀥𑀺𑀁 𑀲𑀫𑁂𑀢𑀻𑀢𑀺 𑀫𑀸 𑀕𑀡𑁆𑀳𑀺𑀢𑁆𑀣𑀸’’𑀢𑀺 (𑀅. 𑀦𑀺. 𑀅𑀝𑁆𑀞. 𑁨.𑁩.𑁬𑁬) 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀧𑀦 ‘‘𑀧𑀸𑀴𑀺𑀲𑀫𑁆𑀧𑀤𑀸𑀦𑀯𑀲𑁂𑀦 𑀫𑀸 𑀕𑀡𑁆𑀳𑀣𑀸’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁. 𑀓𑀼𑀤𑀸𑀮𑀧𑀺𑀝𑀓𑀫𑀸𑀤𑀸𑀬𑀸𑀢𑀺 𑀓𑀼𑀤𑀸𑀮𑀜𑁆𑀘 ¶ 𑀧𑀺𑀝𑀓𑀜𑁆𑀘 𑀆𑀤𑀸𑀬. 𑀓𑀼 𑀯𑀼𑀘𑁆𑀘𑀢𑀺 𑀧𑀣𑀯𑀻, 𑀢𑀲𑁆𑀲𑀸 𑀤𑀸𑀮𑀦𑀢𑁄 𑀯𑀺𑀤𑀸𑀮𑀦𑀢𑁄 𑀅𑀬𑁄𑀫𑀬𑀉𑀧𑀓𑀭𑀡𑀯𑀺𑀲𑁂𑀲𑁄 𑀓𑀼𑀤𑀸𑀮𑀁 𑀦𑀸𑀫. 𑀢𑁂𑀲𑀁 𑀢𑁂𑀲𑀁 𑀯𑀢𑁆𑀣𑀽𑀦𑀁 𑀪𑀸𑀚𑀦𑀪𑀸𑀯𑀢𑁄 𑀢𑀸𑀮𑀧𑀡𑁆𑀡𑀯𑁂𑀢𑁆𑀢𑀮𑀢𑀸𑀤𑀻𑀳𑀺 𑀓𑀢𑁄 𑀪𑀸𑀚𑀦𑀯𑀺𑀲𑁂𑀲𑁄 𑀧𑀺𑀝𑀓𑀁 𑀦𑀸𑀫. 𑀇𑀤𑀁 𑀧𑀦 𑀫𑀽𑀮𑀧𑀡𑁆𑀡𑀸𑀲𑀓𑁂 𑀓𑀓𑀘𑀽𑀧𑀫𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁨𑁨𑁭).

‘‘𑀢𑁂𑀦…𑀧𑁂… 𑀜𑁂𑀬𑁆𑀬𑀸’’𑀢𑀺 𑀕𑀸𑀣𑀸𑀧𑀤𑀁 𑀉𑀮𑁆𑀮𑀺𑀗𑁆𑀕𑁂𑀢𑁆𑀯𑀸 ‘‘𑀢𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀺𑀯𑀭𑀢𑀺. 𑀲𑀩𑁆𑀩𑀸𑀤𑀻𑀳𑀺 𑀲𑀩𑁆𑀩𑀦𑀸𑀫𑁂𑀳𑀺 𑀯𑀼𑀢𑁆𑀢𑀲𑁆𑀲 𑀯𑀸 𑀮𑀺𑀗𑁆𑀕𑀫𑀸𑀤𑀺𑀬𑀢𑁂, 𑀯𑀼𑀘𑁆𑀘𑀫𑀸𑀦𑀲𑁆𑀲 𑀯𑀸, 𑀇𑀥 𑀧𑀦 𑀯𑀢𑁆𑀢𑀺𑀘𑁆𑀙𑀸𑀬 𑀯𑀼𑀢𑁆𑀢𑀲𑁆𑀲𑁂𑀯𑀸𑀢𑀺 𑀓𑀢𑁆𑀯𑀸 ‘‘𑀯𑀺𑀦𑀬𑁄 𑀘 𑀲𑁄 𑀧𑀺𑀝𑀓𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀁. ‘‘𑀬𑀣𑀸𑀯𑀼𑀢𑁆𑀢𑁂𑀦𑁂𑀯 𑀦𑀬𑁂𑀦𑀸’’𑀢𑀺 𑀇𑀫𑀺𑀦𑀸 ‘‘𑀏𑀯𑀁 𑀤𑀼𑀯𑀺𑀥𑀢𑁆𑀣𑁂𑀦…𑀧𑁂… 𑀓𑀢𑁆𑀯𑀸’’𑀢𑀺 𑀘 ‘‘𑀧𑀭𑀺𑀬𑀢𑁆𑀢𑀺𑀪𑀸𑀯𑀢𑁄, 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀪𑀸𑀚𑀦𑀢𑁄 𑀘𑀸’’𑀢𑀺 𑀘 𑀯𑀼𑀢𑁆𑀢𑀁 𑀲𑀩𑁆𑀩𑀫𑀢𑀺𑀤𑀺𑀲𑀢𑀺. 𑀢𑀬𑁄𑀧𑀻𑀢𑀺 𑀏𑀢𑁆𑀣 𑀅𑀧𑀺𑀲𑀤𑁆𑀤𑁄, 𑀧𑀺-𑀲𑀤𑁆𑀤𑁄 𑀯𑀸 𑀅𑀯𑀬𑀯𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. ‘‘𑀅𑀧𑀻’’𑀢𑀺 𑀅𑀯𑀢𑁆𑀯𑀸 ‘‘𑀧𑀻’’𑀢𑀺 𑀯𑀤𑀦𑁆𑀢𑁄 𑀳𑀺 𑀅𑀧𑀺-𑀲𑀤𑁆𑀤𑁄 𑀯𑀺𑀬 𑀧𑀺-𑀲𑀤𑁆𑀤𑁄𑀧𑀺 𑀯𑀺𑀲𑀼𑀁 𑀦𑀺𑀧𑀸𑀢𑁄 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺.

𑀓𑀣𑁂𑀢𑀩𑁆𑀩𑀸𑀦𑀁 𑀅𑀢𑁆𑀣𑀸𑀦𑀁 𑀤𑁂𑀲𑀓𑀸𑀬𑀢𑁆𑀢𑁂𑀦 𑀆𑀡𑀸𑀤𑀺𑀯𑀺𑀥𑀺𑀦𑀸 𑀅𑀢𑀺𑀲𑀚𑁆𑀚𑀦𑀁 𑀧𑀩𑁄𑀥𑀦𑀁 𑀤𑁂𑀲𑀦𑀸. 𑀲𑀸𑀲𑀺𑀢𑀩𑁆𑀩𑀧𑀼𑀕𑁆𑀕𑀮𑀕𑀢𑁂𑀦 𑀬𑀣𑀸𑀧𑀭𑀸𑀥𑀸𑀤𑀺𑀲𑀸𑀲𑀺𑀢𑀩𑁆𑀩𑀪𑀸𑀯𑁂𑀦 𑀅𑀦𑀼𑀲𑀸𑀲𑀦𑀁 𑀯𑀺𑀦𑀬𑀦𑀁 𑀲𑀸𑀲𑀦𑀁. 𑀓𑀣𑁂𑀢𑀩𑁆𑀩𑀲𑁆𑀲 𑀲𑀁𑀯𑀭𑀸𑀲𑀁𑀯𑀭𑀸𑀤𑀺𑀦𑁄 𑀅𑀢𑁆𑀣𑀲𑁆𑀲 𑀓𑀣𑀦𑀁 𑀯𑀘𑀦𑀧𑀝𑀺𑀩𑀤𑁆𑀥𑀢𑀸𑀓𑀭𑀡𑀁 𑀓𑀣𑀸, 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀤𑁂𑀲𑀺𑀢𑀸𑀭𑀁 𑀪𑀕𑀯𑀦𑁆𑀢𑀫𑀧𑁂𑀓𑁆𑀔𑀺𑀢𑁆𑀯𑀸 𑀤𑁂𑀲𑀦𑀸, 𑀲𑀸𑀲𑀺𑀢𑀩𑁆𑀩𑀧𑀼𑀕𑁆𑀕𑀮𑀯𑀲𑁂𑀦 𑀲𑀸𑀲𑀦𑀁, 𑀓𑀣𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀯𑀲𑁂𑀦 𑀓𑀣𑀸𑀢𑀺 𑀏𑀯𑀫𑀺𑀫𑁂𑀲𑀁 𑀦𑀸𑀦𑀸𑀓𑀭𑀡𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀤𑁂𑀲𑀦𑀸𑀤𑀬𑁄 𑀤𑁂𑀲𑁂𑀢𑀩𑁆𑀩𑀸𑀤𑀺𑀦𑀺𑀭𑀧𑁂𑀓𑁆𑀔𑀸 𑀦 𑀳𑁄𑀦𑁆𑀢𑀺, 𑀆𑀡𑀸𑀤𑀬𑁄 𑀧𑀦 𑀯𑀺𑀲𑁂𑀲𑀢𑁄 𑀤𑁂𑀲𑀓𑀸𑀤𑀺𑀅𑀥𑀻𑀦𑀸𑀢𑀺 𑀢𑀁 𑀢𑀁 𑀯𑀺𑀲𑁂𑀲𑀬𑁄𑀕𑀯𑀲𑁂𑀦 𑀤𑁂𑀲𑀦𑀸𑀤𑀻𑀦𑀁 𑀪𑁂𑀤𑁄 𑀯𑀼𑀢𑁆𑀢𑁄. 𑀬𑀣𑀸 𑀳𑀺 𑀆𑀡𑀸𑀯𑀺𑀥𑀸𑀦𑀁 𑀯𑀺𑀲𑁂𑀲𑀢𑁄 𑀆𑀡𑀸𑀭𑀳𑀸𑀥𑀻𑀦𑀁 𑀢𑀢𑁆𑀣 𑀓𑁄𑀲𑀮𑁆𑀮𑀬𑁄𑀕𑀢𑁄, 𑀏𑀯𑀁 𑀯𑁄𑀳𑀸𑀭𑀧𑀭𑀫𑀢𑁆𑀣𑀯𑀺𑀥𑀸𑀦𑀸𑀦𑀺 𑀘 𑀯𑀺𑀥𑀸𑀬𑀓𑀸𑀥𑀻𑀦𑀸𑀦𑀻𑀢𑀺 𑀆𑀡𑀸𑀤𑀺𑀯𑀺𑀥𑀺𑀦𑁄 𑀤𑁂𑀲𑀓𑀸𑀬𑀢𑁆𑀢𑀢𑀸 𑀯𑀼𑀢𑁆𑀢𑀸. 𑀅𑀧𑀭𑀸𑀥𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀯𑀺𑀬 𑀘 𑀥𑀫𑁆𑀫𑀸𑀦𑀼𑀭𑀽𑀧𑀫𑁆𑀧𑀺 𑀲𑀸𑀲𑀦𑀁 𑀯𑀺𑀲𑁂𑀲𑀢𑁄, 𑀢𑀣𑀸 𑀯𑀺𑀦𑁂𑀢𑀩𑁆𑀩𑀧𑀼𑀕𑁆𑀕𑀮𑀸𑀧𑁂𑀓𑁆𑀔𑀦𑁆𑀢𑀺 𑀲𑀸𑀲𑀺𑀢𑀩𑁆𑀩𑀧𑀼𑀕𑁆𑀕𑀮𑀯𑀲𑁂𑀦 𑀲𑀸𑀲𑀦𑀁 𑀯𑀼𑀢𑁆𑀢𑀁. 𑀲𑀁𑀯𑀭𑀸𑀲𑀁𑀯𑀭𑀦𑀸𑀫𑀭𑀽𑀧𑀸𑀦𑀁 𑀯𑀺𑀬 𑀘 𑀯𑀺𑀦𑀺𑀩𑁆𑀩𑁂𑀞𑁂𑀢𑀩𑁆𑀩𑀸𑀬 𑀤𑀺𑀝𑁆𑀞𑀺𑀬𑀸 𑀓𑀣𑀦𑀁 𑀲𑀢𑀺 𑀯𑀸𑀘𑀸𑀯𑀢𑁆𑀣𑀼𑀲𑁆𑀫𑀺𑀁, 𑀦𑀸𑀲𑀢𑀻𑀢𑀺 𑀯𑀺𑀲𑁂𑀲𑀢𑁄 𑀢𑀤𑀥𑀻𑀦𑀁, 𑀢𑀲𑁆𑀫𑀸 𑀓𑀣𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀯𑀲𑁂𑀦 𑀓𑀣𑀸 𑀯𑀼𑀢𑁆𑀢𑀸. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀤𑁂𑀲𑀓𑀲𑁆𑀲 ¶ ¶ 𑀯𑀲𑁂𑀦𑁂𑀢𑁆𑀣, 𑀤𑁂𑀲𑀦𑀸 𑀧𑀺𑀝𑀓𑀢𑁆𑀢𑀬𑀁;

𑀲𑀸𑀲𑀺𑀢𑀩𑁆𑀩𑀯𑀲𑁂𑀦𑁂𑀢𑀁, 𑀲𑀸𑀲𑀦𑀦𑁆𑀢𑀺 𑀧𑀯𑀼𑀘𑁆𑀘𑀢𑀺.

𑀓𑀣𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲, 𑀯𑀲𑁂𑀦𑀸𑀧𑀺 𑀓𑀣𑀸𑀢𑀺 𑀘;

𑀤𑁂𑀲𑀦𑀸𑀲𑀸𑀲𑀦𑀓𑀣𑀸-𑀪𑁂𑀤𑀫𑁆𑀧𑁂𑀯𑀁 𑀧𑀓𑀸𑀲𑀬𑁂’’𑀢𑀺.

𑀧𑀤𑀢𑁆𑀢𑀬𑀫𑁆𑀧𑁂𑀢𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀢𑀸𑀲𑀁 𑀪𑁂𑀤𑁄𑀢𑀺 𑀓𑀢𑁆𑀯𑀸 𑀪𑁂𑀤𑀲𑀤𑁆𑀤𑁄 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑁂𑀢𑀩𑁆𑀩𑁄 𑀤𑁆𑀯𑀦𑁆𑀤𑀧𑀤𑀢𑁄 𑀧𑀭𑀁 𑀲𑀼𑀬𑁆𑀬𑀫𑀸𑀦𑀢𑁆𑀢𑀸 ‘‘𑀤𑁂𑀲𑀦𑀸𑀪𑁂𑀤𑀁, 𑀲𑀸𑀲𑀦𑀪𑁂𑀤𑀁, 𑀓𑀣𑀸𑀪𑁂𑀤𑀜𑁆𑀘 𑀬𑀣𑀸𑀭𑀳𑀁 𑀧𑀭𑀺𑀤𑀻𑀧𑀬𑁂’’𑀢𑀺. 𑀪𑁂𑀤𑀦𑁆𑀢𑀺 𑀘 𑀦𑀸𑀦𑀢𑁆𑀢𑀁, 𑀯𑀺𑀲𑁂𑀲𑀁 𑀯𑀸. 𑀢𑁂𑀲𑀼 𑀧𑀺𑀝𑀓𑁂𑀲𑀼. 𑀲𑀺𑀓𑁆𑀔𑀸 𑀘 𑀧𑀳𑀸𑀦𑀜𑁆𑀘 𑀕𑀫𑁆𑀪𑀻𑀭𑀪𑀸𑀯𑁄 𑀘, 𑀢𑀜𑁆𑀘 𑀬𑀣𑀸𑀭𑀳𑀁 𑀧𑀭𑀺𑀤𑀻𑀧𑀬𑁂.

𑀤𑀼𑀢𑀺𑀬𑀕𑀸𑀣𑀸𑀬 𑀧𑀭𑀺𑀬𑀢𑁆𑀢𑀺𑀪𑁂𑀤𑀁 𑀧𑀭𑀺𑀬𑀸𑀧𑀼𑀡𑀦𑀲𑁆𑀲 𑀧𑀓𑀸𑀭𑀁, 𑀯𑀺𑀲𑁂𑀲𑀜𑁆𑀘 𑀯𑀺𑀪𑀸𑀯𑀬𑁂. 𑀬𑀳𑀺𑀁 𑀯𑀺𑀦𑀬𑀸𑀤𑀺𑀓𑁂 𑀧𑀺𑀝𑀓𑁂. 𑀬𑀁 𑀲𑀫𑁆𑀧𑀢𑁆𑀢𑀺𑀁, 𑀯𑀺𑀧𑀢𑁆𑀢𑀺𑀜𑁆𑀘 𑀬𑀣𑀸 𑀪𑀺𑀓𑁆𑀔𑀼 𑀧𑀸𑀧𑀼𑀡𑀸𑀢𑀺, 𑀢𑀣𑀸 𑀢𑀫𑁆𑀧𑀺 𑀲𑀩𑁆𑀩𑀁 𑀢𑀳𑀺𑀁 𑀯𑀺𑀪𑀸𑀯𑀬𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀣 𑀯𑀸 𑀬𑀁 𑀧𑀭𑀺𑀬𑀢𑁆𑀢𑀺𑀪𑁂𑀤𑀁 𑀲𑀫𑁆𑀧𑀢𑁆𑀢𑀺𑀁, 𑀯𑀺𑀧𑀢𑁆𑀢𑀺𑀜𑁆𑀘 𑀬𑀳𑀺𑀁 𑀬𑀣𑀸 𑀪𑀺𑀓𑁆𑀔𑀼 𑀧𑀸𑀧𑀼𑀡𑀸𑀢𑀺, 𑀢𑀣𑀸 𑀢𑀫𑁆𑀧𑀺 𑀲𑀩𑁆𑀩𑀁 𑀢𑀳𑀺𑀁 𑀯𑀺𑀪𑀸𑀯𑀬𑁂𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀬𑀣𑀸𑀢𑀺 𑀘 𑀬𑁂𑀳𑀺 𑀉𑀧𑀸𑀭𑀫𑁆𑀪𑀸𑀤𑀺𑀳𑁂𑀢𑀼𑀧𑀭𑀺𑀬𑀸𑀧𑀼𑀡𑀦𑀸𑀤𑀺𑀧𑁆𑀧𑀓𑀸𑀭𑁂𑀳𑀺, 𑀉𑀧𑀸𑀭𑀫𑁆𑀪𑀦𑀺𑀲𑁆𑀲𑀭𑀡𑀥𑀫𑁆𑀫𑀓𑁄𑀲𑀭𑀓𑁆𑀔𑀡𑀳𑁂𑀢𑀼𑀧𑀭𑀺𑀬𑀸𑀧𑀼𑀡𑀦𑀁 𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀤𑀼𑀧𑁆𑀧𑀝𑀺𑀧𑀢𑁆𑀢𑀻𑀢𑀺 𑀏𑀢𑁂𑀳𑀺 𑀧𑀓𑀸𑀭𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀦𑁆𑀢𑁂𑀲𑀼𑀧𑀺 𑀘 𑀅𑀜𑁆𑀜𑁂𑀲𑀼 𑀢𑀣𑀸 𑀧𑀸𑀧𑀼𑀡𑀦𑁆𑀢𑁂𑀲𑀼 𑀚𑁂𑀝𑁆𑀞𑀲𑁂𑀝𑁆𑀞𑀸𑀲𑀦𑁆𑀦𑀲𑀤𑀸𑀲𑀦𑁆𑀦𑀺𑀳𑀺𑀢𑀪𑀸𑀯𑀢𑁄, 𑀬𑀣𑀸𑀦𑀼𑀲𑀺𑀝𑁆𑀞𑀁 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀦𑁂𑀦 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀘 𑀪𑀺𑀓𑁆𑀔𑀽𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀭𑀸𑀢𑀺 𑀢𑀸𑀲𑀼 𑀕𑀸𑀣𑀸𑀲𑀼. 𑀅𑀬𑀦𑁆𑀢𑀺 𑀅𑀥𑀼𑀦𑀸 𑀯𑀓𑁆𑀔𑀫𑀸𑀦𑀸 𑀓𑀣𑀸. 𑀧𑀭𑀺𑀤𑀻𑀧𑀦𑀸𑀢𑀺 𑀲𑀫𑀦𑁆𑀢𑀢𑁄 𑀧𑀓𑀸𑀲𑀦𑀸, 𑀓𑀺𑀜𑁆𑀘𑀺𑀫𑀢𑁆𑀢𑀫𑁆𑀧𑀺 𑀅𑀲𑁂𑀲𑁂𑀢𑁆𑀯𑀸 𑀯𑀺𑀪𑀚𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀪𑀸𑀯𑀦𑀸𑀢𑀺 𑀏𑀯𑀁 𑀧𑀭𑀺𑀤𑀻𑀧𑀦𑀸𑀬𑀧𑀺 𑀲𑀢𑀺 𑀕𑀽𑀴𑁆𑀳𑀁 𑀧𑀝𑀺𑀘𑁆𑀙𑀦𑁆𑀦𑀫𑀓𑀢𑁆𑀯𑀸 𑀲𑁄𑀢𑀽𑀦𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑁂𑀦 𑀆𑀯𑀺𑀪𑀸𑀯𑀦𑀸. 𑀲𑀗𑁆𑀔𑁂𑀧𑁂𑀦 𑀧𑀭𑀺𑀤𑀻𑀧𑀦𑀸, 𑀯𑀺𑀢𑁆𑀣𑀸𑀭𑁂𑀦 𑀯𑀺𑀪𑀸𑀯𑀦𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀧𑀺𑀘 𑀏𑀢𑀁 𑀧𑀤𑀤𑁆𑀯𑀬𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀦𑀼𑀭𑀽𑀧𑀢𑁄 𑀓𑀣𑀺𑀢𑀁, 𑀅𑀢𑁆𑀣𑀢𑁄 𑀧𑀦 𑀏𑀓𑀫𑁂𑀯. 𑀢𑀲𑁆𑀫𑀸 𑀧𑀭𑀺𑀤𑀻𑀧𑀦𑀸 𑀧𑀞𑀫𑀕𑀸𑀣𑀸𑀬, 𑀯𑀺𑀪𑀸𑀯𑀦𑀸 𑀤𑀼𑀢𑀺𑀬𑀕𑀸𑀣𑀸𑀬𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀘-𑀲𑀤𑁆𑀤𑁂𑀦 𑀉𑀪𑀬𑀢𑁆𑀣𑀁 𑀅𑀜𑁆𑀜𑀫𑀜𑁆𑀜𑀁 𑀲𑀫𑀼𑀘𑁆𑀘𑁂𑀢𑀺. 𑀓𑀲𑁆𑀫𑀸, 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀳 ‘‘𑀏𑀢𑁆𑀣 𑀳𑀻’’𑀢𑀺𑀆𑀤𑀺. 𑀳𑀻𑀢𑀺 𑀓𑀸𑀭𑀡𑁂 𑀦𑀺𑀧𑀸𑀢𑁄 ‘‘𑀅𑀓𑁆𑀔𑀭𑀯𑀺𑀧𑀢𑁆𑀢𑀺𑀬𑀁 𑀳𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀬𑀲𑁆𑀫𑀸, 𑀓𑀲𑁆𑀫𑀸𑀢𑀺 𑀯𑀸 𑀅𑀢𑁆𑀣𑁄. 𑀆𑀡𑀁 𑀧𑀡𑁂𑀢𑀼𑀁 [𑀞𑀧𑁂𑀢𑀼𑀁 (𑀲𑀸𑀭𑀢𑁆𑀣. 𑀝𑀻. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸)] 𑀅𑀭𑀳𑀢𑀻𑀢𑀺 𑀆𑀡𑀸𑀭𑀳𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁆𑀢𑀸, 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 ¶ 𑀘 𑀅𑀯𑀺𑀧𑀭𑀻𑀢𑀳𑀺𑀢𑁄𑀧𑀤𑁂𑀲𑀓𑀪𑀸𑀯𑁂𑀦 𑀧𑀫𑀸𑀡𑀯𑀘𑀦𑀢𑁆𑀢𑀸 𑀆𑀡𑀸𑀭𑀳𑁂𑀦 𑀪𑀕𑀯𑀢𑀸𑀢𑀺 𑀅𑀢𑁆𑀣𑁄. 𑀯𑁄𑀳𑀸𑀭𑀧𑀭𑀫𑀢𑁆𑀣𑀥𑀫𑁆𑀫𑀸𑀦𑀫𑁆𑀧𑀺 𑀢𑀢𑁆𑀣 𑀲𑀩𑁆𑀪𑀸𑀯𑀢𑁄 ‘‘𑀆𑀡𑀸𑀩𑀸𑀳𑀼𑀮𑁆𑀮𑀢𑁄’’𑀢𑀺 ¶ 𑀯𑀼𑀢𑁆𑀢𑀁, 𑀢𑁂𑀦 𑀬𑁂𑀪𑀼𑀬𑁆𑀬𑀦𑀬𑀁 𑀤𑀲𑁆𑀲𑁂𑀢𑀺. 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀲𑁂𑀲𑁂𑀦 𑀲𑀢𑁆𑀢𑀸𑀦𑀁 𑀫𑀦𑀁 𑀅𑀯𑀳𑀭𑀢𑀻𑀢𑀺 𑀯𑁄𑀳𑀸𑀭𑁄, 𑀧𑀜𑁆𑀜𑀢𑁆𑀢𑀺, 𑀢𑀲𑁆𑀫𑀺𑀁 𑀓𑀼𑀲𑀮𑁄, 𑀢𑁂𑀦.

𑀧𑀘𑀼𑀭𑁄 𑀩𑀳𑀼𑀮𑁄 𑀅𑀧𑀭𑀸𑀥𑁄 𑀤𑁄𑀲𑁄 𑀯𑀻𑀢𑀺𑀓𑁆𑀓𑀫𑁄 𑀬𑁂𑀲𑀁 𑀢𑁂 𑀧𑀘𑀼𑀭𑀸𑀧𑀭𑀸𑀥𑀸, 𑀲𑁂𑀬𑁆𑀬𑀲𑀓𑀢𑁆𑀣𑁂𑀭𑀸𑀤𑀬𑁄. 𑀬𑀣𑀸𑀧𑀭𑀸𑀥𑀦𑁆𑀢𑀺 𑀤𑁄𑀲𑀸𑀦𑀼𑀭𑀽𑀧𑀁. ‘‘𑀅𑀦𑁂𑀓𑀚𑁆𑀛𑀸𑀲𑀬𑀸’’𑀢𑀺𑀆𑀤𑀻𑀲𑀼 𑀆𑀲𑀬𑁄𑀯 𑀅𑀚𑁆𑀛𑀸𑀲𑀬𑁄, 𑀲𑁄 𑀅𑀢𑁆𑀣𑀢𑁄 𑀤𑀺𑀝𑁆𑀞𑀺, 𑀜𑀸𑀡𑀜𑁆𑀘, 𑀧𑀪𑁂𑀤𑀢𑁄 𑀧𑀦 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀘 𑁋

‘‘𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀻 𑀘, 𑀔𑀦𑁆𑀢𑀺 𑀘𑁂𑀯𑀸𑀦𑀼𑀮𑁄𑀫𑀺𑀓𑀸;

𑀬𑀣𑀸𑀪𑀽𑀢𑀜𑁆𑀘 𑀬𑀁 𑀜𑀸𑀡𑀁, 𑀏𑀢𑀁 𑀆𑀲𑀬𑀲𑀤𑁆𑀤𑀺𑀢’’𑀦𑁆𑀢𑀺.

𑀢𑀢𑁆𑀣 𑀲𑀩𑁆𑀩𑀤𑀺𑀝𑁆𑀞𑀻𑀦𑀁 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀻𑀳𑀺 𑀲𑀗𑁆𑀕𑀳𑀺𑀢𑀢𑁆𑀢𑀸 𑀲𑀩𑁆𑀩𑁂𑀧𑀺 𑀤𑀺𑀝𑁆𑀞𑀺𑀕𑀢𑀺𑀓𑀸 𑀲𑀢𑁆𑀢𑀸 𑀇𑀫𑀸 𑀏𑀯 𑀤𑁆𑀯𑁂 𑀤𑀺𑀝𑁆𑀞𑀺𑀬𑁄 𑀲𑀦𑁆𑀦𑀺𑀲𑁆𑀲𑀺𑀢𑀸. 𑀬𑀣𑀸𑀳 ‘‘𑀤𑁆𑀯𑀬𑀦𑀺𑀲𑁆𑀲𑀺𑀢𑁄 𑀔𑁄 𑀧𑀦𑀸𑀬𑀁 𑀓𑀘𑁆𑀘𑀸𑀦 𑀮𑁄𑀓𑁄 𑀬𑁂𑀪𑀼𑀬𑁆𑀬𑁂𑀦 𑀅𑀢𑁆𑀣𑀺𑀢𑀜𑁆𑀘 𑀦𑀢𑁆𑀣𑀺𑀢𑀜𑁆𑀘𑀸’’𑀢𑀺, (𑀲𑀁. 𑀦𑀺. 𑁨.𑁧𑁫) 𑀅𑀢𑁆𑀣𑀺𑀢𑀸𑀢𑀺 𑀳𑀺 𑀲𑀲𑁆𑀲𑀢𑀕𑁆𑀕𑀸𑀳𑁄 𑀅𑀥𑀺𑀧𑁆𑀧𑁂𑀢𑁄, 𑀦𑀢𑁆𑀣𑀺𑀢𑀸𑀢𑀺 𑀉𑀘𑁆𑀙𑁂𑀤𑀕𑁆𑀕𑀸𑀳𑁄. 𑀅𑀬𑀁 𑀢𑀸𑀯 𑀯𑀝𑁆𑀝𑀦𑀺𑀲𑁆𑀲𑀺𑀢𑀸𑀦𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀆𑀲𑀬𑁄. 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀸𑀦𑀁 𑀧𑀦 𑀲𑀼𑀤𑁆𑀥𑀲𑀢𑁆𑀢𑀸𑀦𑀁 𑀅𑀦𑀼𑀮𑁄𑀫𑀺𑀓𑀸 𑀔𑀦𑁆𑀢𑀺, 𑀬𑀣𑀸𑀪𑀽𑀢𑀜𑀸𑀡𑀦𑁆𑀢𑀺 𑀤𑀼𑀯𑀺𑀥𑁄 𑀆𑀲𑀬𑁄. 𑀢𑀢𑁆𑀣 𑀘 𑀅𑀦𑀼𑀮𑁄𑀫𑀺𑀓𑀸 𑀔𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. 𑀬𑀣𑀸𑀪𑀽𑀢𑀜𑀸𑀡𑀁 𑀧𑀦 𑀓𑀫𑁆𑀫𑀲𑀓𑀢𑀸𑀜𑀸𑀡𑀁. 𑀘𑀢𑀼𑀩𑁆𑀩𑀺𑀥𑁄 𑀧𑁂𑀲𑁄 𑀆𑀲𑀬𑀦𑁆𑀢𑀺 𑀲𑀢𑁆𑀢𑀸 𑀏𑀢𑁆𑀣 𑀦𑀺𑀯𑀲𑀦𑁆𑀢𑀺, 𑀘𑀺𑀢𑁆𑀢𑀁 𑀯𑀸 𑀆𑀕𑀫𑁆𑀫 𑀲𑁂𑀢𑀺 𑀏𑀢𑁆𑀣𑀸𑀢𑀺 𑀆𑀲𑀬𑁄 𑀫𑀺𑀕𑀸𑀲𑀬𑁄 𑀯𑀺𑀬. 𑀬𑀣𑀸 𑀫𑀺𑀕𑁄 𑀕𑁄𑀘𑀭𑀸𑀬 𑀕𑀦𑁆𑀢𑁆𑀯𑀸𑀧𑀺 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀯𑀦𑀕𑀳𑀦𑁂 𑀲𑀬𑀢𑀻𑀢𑀺 𑀢𑀁 𑀢𑀲𑁆𑀲 ‘‘𑀆𑀲𑀬𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸 𑀘𑀺𑀢𑁆𑀢𑀁 𑀅𑀜𑁆𑀜𑀣𑀸𑀧𑀺 𑀧𑀯𑀢𑁆𑀢𑀺𑀢𑁆𑀯𑀸 𑀬𑀢𑁆𑀣 𑀧𑀘𑁆𑀘𑀸𑀕𑀫𑁆𑀫 𑀲𑁂𑀢𑀺, 𑀢𑀲𑁆𑀲 𑀲𑁄 ‘‘𑀆𑀲𑀬𑁄’’𑀢𑀺. 𑀓𑀸𑀫𑀭𑀸𑀕𑀸𑀤𑀬𑁄 𑀲𑀢𑁆𑀢 𑀅𑀦𑀼𑀲𑀬𑀸. 𑀫𑀽𑀲𑀺𑀓𑀯𑀺𑀲𑀁 𑀯𑀺𑀬 𑀓𑀸𑀭𑀡𑀮𑀸𑀪𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀭𑀳𑀸 𑀅𑀦𑀸𑀕𑀢𑀸, 𑀅𑀢𑀻𑀢𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀘 𑀢𑀁𑀲𑀪𑀸𑀯𑀢𑁆𑀢𑀸 𑀢𑀣𑀸 𑀯𑀼𑀘𑁆𑀘𑀦𑁆𑀢𑀺. 𑀦 𑀳𑀺 𑀥𑀫𑁆𑀫𑀸𑀦𑀁 𑀓𑀸𑀮𑀪𑁂𑀤𑁂𑀦 𑀲𑀪𑀸𑀯𑀪𑁂𑀤𑁄𑀢𑀺. 𑀘𑀭𑀺𑀬𑀸𑀢𑀺 𑀭𑀸𑀕𑀘𑀭𑀺𑀬𑀸𑀤𑀺𑀓𑀸 𑀙 𑀫𑀽𑀮𑀘𑀭𑀺𑀬𑀸, 𑀅𑀦𑁆𑀢𑀭𑀪𑁂𑀤𑁂𑀦 𑀅𑀦𑁂𑀓𑀯𑀺𑀥𑀸, 𑀲𑀁𑀲𑀕𑁆𑀕𑀯𑀲𑁂𑀦 𑀧𑀦 𑀢𑁂𑀲𑀝𑁆𑀞𑀺 𑀳𑁄𑀦𑁆𑀢𑀺. 𑀅𑀣 𑀯𑀸 𑀘𑀭𑀺𑀬𑀸𑀢𑀺 𑀲𑀼𑀘𑀭𑀺𑀢𑀤𑀼𑀘𑁆𑀘𑀭𑀺𑀢𑀯𑀲𑁂𑀦 𑀤𑀼𑀯𑀺𑀥𑀁 𑀘𑀭𑀺𑀢𑀁. 𑀢𑀜𑁆𑀳𑀺 𑀯𑀺𑀪𑀗𑁆𑀕𑁂 𑀘𑀭𑀺𑀢𑀦𑀺𑀤𑁆𑀤𑁂𑀲𑁂 𑀦𑀺𑀤𑁆𑀤𑀺𑀝𑁆𑀞𑀁.

‘‘𑀅𑀥𑀺𑀫𑀼𑀢𑁆𑀢𑀺 ¶ 𑀦𑀸𑀫 ‘𑀅𑀚𑁆𑀚𑁂𑀯 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀅𑀚𑁆𑀚𑁂𑀯 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺𑀆𑀤𑀺𑀦𑀸 𑀢𑀦𑁆𑀦𑀺𑀦𑁆𑀦𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀁 𑀲𑀦𑁆𑀦𑀺𑀝𑁆𑀞𑀸𑀦’’𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀧𑀦 ‘‘𑀅𑀥𑀺𑀫𑀼𑀢𑁆𑀢𑀺 𑀦𑀸𑀫 𑀲𑀢𑁆𑀢𑀸𑀦𑀁 𑀧𑀼𑀩𑁆𑀩𑀘𑀭𑀺𑀬𑀯𑀲𑁂𑀦 𑀅𑀪𑀺𑀭𑀼𑀘𑀺, 𑀲𑀸 𑀤𑀼𑀯𑀺𑀥𑀸 𑀳𑀻𑀦𑀧𑀡𑀻𑀢𑀪𑁂𑀤𑁂𑀦𑀸’𑀢𑀺 (𑀤𑀻. 𑀦𑀺. 𑀝𑀻. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀬𑀸𑀬 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸 𑀲𑀢𑁆𑀢𑀸 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑁂𑀬𑁂𑀯 𑀲𑀢𑁆𑀢𑁂 𑀲𑁂𑀯𑀦𑁆𑀢𑀺, 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀓𑀸 𑀧𑀡𑀻𑀢𑀸𑀥𑀺𑀫𑀼𑀢𑁆𑀢𑀺𑀓𑁂𑀬𑁂𑀯 ¶ . 𑀲𑀘𑁂 𑀳𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀲𑀻𑀮𑀯𑀦𑁆𑀢𑁄 𑀦 𑀳𑁄𑀦𑁆𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸 𑀲𑀻𑀮𑀯𑀦𑁆𑀢𑁄, 𑀢𑁂 𑀅𑀢𑁆𑀢𑀦𑁄 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀧𑀺 𑀦 𑀉𑀧𑀲𑀗𑁆𑀓𑀫𑀦𑁆𑀢𑀺, 𑀅𑀢𑁆𑀢𑀦𑀸 𑀲𑀤𑀺𑀲𑁂 𑀲𑀸𑀭𑀼𑀧𑁆𑀧𑀪𑀺𑀓𑁆𑀔𑀽𑀬𑁂𑀯 𑀉𑀧𑀲𑀗𑁆𑀓𑀫𑀦𑁆𑀢𑀺. 𑀲𑀘𑁂 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀲𑀸𑀭𑀼𑀧𑁆𑀧𑀪𑀺𑀓𑁆𑀔𑀽, 𑀇𑀢𑀭𑁂 𑀅𑀲𑀸𑀭𑀼𑀧𑁆𑀧𑀸, 𑀢𑁂𑀧𑀺 𑀦 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀉𑀧𑀲𑀗𑁆𑀓𑀫𑀦𑁆𑀢𑀺, 𑀅𑀢𑁆𑀢𑀦𑀸 𑀲𑀤𑀺𑀲𑁂 𑀅𑀲𑀸𑀭𑀼𑀧𑁆𑀧𑀪𑀺𑀓𑁆𑀔𑀽𑀬𑁂𑀯 𑀉𑀧𑀲𑀗𑁆𑀓𑀫𑀦𑁆𑀢𑀺. 𑀥𑀸𑀢𑀼𑀲𑀁𑀬𑀼𑀢𑁆𑀢𑀯𑀲𑁂𑀦 (𑀲𑀁. 𑀦𑀺. 𑁨.𑁮𑁫 𑀆𑀤𑀬𑁄) 𑀘𑁂𑀲 𑀅𑀢𑁆𑀣𑁄 𑀤𑀻𑀧𑁂𑀢𑀩𑁆𑀩𑁄. 𑀏𑀯𑀫𑀬𑀁 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑁄 𑀧𑀲𑁂𑀯𑀦𑀸𑀤𑀺𑀦𑀺𑀬𑀫𑀺𑀢𑀸 𑀅𑀪𑀺𑀭𑀼𑀘𑀺 𑀅𑀚𑁆𑀛𑀸𑀲𑀬𑀥𑀸𑀢𑀼 ‘‘𑀅𑀥𑀺𑀫𑀼𑀢𑁆𑀢𑀻’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀦𑁂𑀓𑀸 𑀅𑀚𑁆𑀛𑀸𑀲𑀬𑀸𑀤𑀬𑁄 𑀢𑁂 𑀬𑁂𑀲𑀁 𑀅𑀢𑁆𑀣𑀺, 𑀅𑀦𑁂𑀓𑀸 𑀯𑀸 𑀅𑀚𑁆𑀛𑀸𑀲𑀬𑀸𑀤𑀬𑁄 𑀬𑁂𑀲𑀦𑁆𑀢𑀺 𑀢𑀣𑀸 𑀬𑀣𑀸 ‘‘𑀩𑀳𑀼𑀓𑀢𑁆𑀢𑀼𑀓𑁄, 𑀩𑀳𑀼𑀦𑀤𑀺𑀓𑁄’’𑀢𑀺. 𑀬𑀣𑀸𑀦𑀼𑀮𑁄𑀫𑀦𑁆𑀢𑀺 𑀅𑀚𑁆𑀛𑀸𑀲𑀬𑀸𑀤𑀻𑀦𑀁 𑀅𑀦𑀼𑀮𑁄𑀫𑀁 𑀅𑀦𑀢𑀺𑀓𑁆𑀓𑀫𑁆𑀫, 𑀬𑁂 𑀬𑁂 𑀯𑀸 𑀅𑀚𑁆𑀛𑀸𑀲𑀬𑀸𑀤𑀬𑁄 𑀅𑀦𑀼𑀮𑁄𑀫𑀸, 𑀢𑁂𑀳𑀺 𑀢𑁂𑀳𑀻𑀢𑀺 𑀅𑀢𑁆𑀣𑁄. 𑀆𑀲𑀬𑀸𑀤𑀻𑀦𑀁 𑀅𑀦𑀼𑀮𑁄𑀫𑀲𑁆𑀲 𑀯𑀸 𑀅𑀦𑀼𑀭𑀽𑀧𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀖𑀦𑀯𑀺𑀦𑀺𑀩𑁆𑀪𑁄𑀕𑀸𑀪𑀸𑀯𑀢𑁄 𑀤𑀺𑀝𑁆𑀞𑀺𑀫𑀸𑀦𑀢𑀡𑁆𑀳𑀸𑀯𑀲𑁂𑀦 ‘‘𑀅𑀳𑀁 𑀫𑀫 𑀲𑀦𑁆𑀢𑀓’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀲𑀜𑁆𑀜𑀺𑀦𑁄. 𑀬𑀣𑀸𑀥𑀫𑁆𑀫𑀦𑁆𑀢𑀺 ‘‘𑀦𑀢𑁆𑀣𑁂𑀢𑁆𑀣 𑀅𑀢𑁆𑀢𑀸, 𑀅𑀢𑁆𑀢𑀦𑀺𑀬𑀁 𑀯𑀸, 𑀓𑁂𑀯𑀮𑀁 𑀥𑀫𑁆𑀫𑀫𑀢𑁆𑀢𑀫𑁂𑀯𑁂𑀢’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀥𑀫𑁆𑀫𑀲𑀪𑀸𑀯𑀸𑀦𑀼𑀭𑀽𑀧𑀦𑁆𑀢𑀺 𑀅𑀢𑁆𑀣𑁄.

𑀲𑀁𑀯𑀭𑀡𑀁 𑀲𑀁𑀯𑀭𑁄, 𑀓𑀸𑀬𑀯𑀸𑀘𑀸𑀳𑀺 𑀅𑀯𑀻𑀢𑀺𑀓𑁆𑀓𑀫𑁄. 𑀫𑀳𑀦𑁆𑀢𑁄 𑀲𑀁𑀯𑀭𑁄 𑀅𑀲𑀁𑀯𑀭𑁄. 𑀯𑀼𑀟𑁆𑀠𑀺𑀅𑀢𑁆𑀣𑁄 𑀳𑀺 𑀅𑀬𑀁 𑀅-𑀓𑀸𑀭𑁄 𑀬𑀣𑀸 ‘‘𑀅𑀲𑁂𑀓𑁆𑀔𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁨𑁧) 𑀢𑀁𑀬𑁄𑀕𑀢𑀸𑀬 𑀘 𑀔𑀼𑀤𑁆𑀤𑀓𑁄 𑀲𑀁𑀯𑀭𑁄 𑀧𑀸𑀭𑀺𑀲𑁂𑀲𑀸𑀤𑀺𑀦𑀬𑁂𑀦 𑀲𑀁𑀯𑀭𑁄, 𑀢𑀲𑁆𑀫𑀸 𑀔𑀼𑀤𑁆𑀤𑀓𑁄, 𑀫𑀳𑀦𑁆𑀢𑁄 𑀘 𑀲𑀁𑀯𑀭𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀲𑀁𑀯𑀭𑀸 𑀲𑀁𑀯𑀭𑁄’’𑀢𑀺𑀆𑀤𑀺. 𑀤𑀺𑀝𑁆𑀞𑀺𑀯𑀺𑀦𑀺𑀯𑁂𑀞𑀦𑀸𑀢𑀺 𑀤𑀺𑀝𑁆𑀞𑀺𑀬𑀸 𑀯𑀺𑀫𑁄𑀘𑀦𑀁, 𑀅𑀢𑁆𑀣𑀢𑁄 𑀧𑀦 𑀢𑀲𑁆𑀲 𑀉𑀚𑀼𑀯𑀺𑀧𑀘𑁆𑀘𑀦𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄 𑀥𑀫𑁆𑀫𑀸. 𑀢𑀣𑀸 𑀘𑀸𑀳 ‘‘𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀧𑀝𑀺𑀧𑀓𑁆𑀔𑀪𑀽𑀢𑀸’’𑀢𑀺. 𑀦𑀸𑀫𑀲𑁆𑀲, 𑀭𑀽𑀧𑀲𑁆𑀲, 𑀦𑀸𑀫𑀭𑀽𑀧𑀲𑁆𑀲 𑀘 𑀧𑀭𑀺𑀘𑁆𑀙𑀺𑀦𑁆𑀤𑀦𑀁 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁄, 𑀲𑁄 𑀧𑀦 ‘‘𑀭𑀸𑀕𑀸𑀤𑀺𑀧𑀝𑀺𑀧𑀓𑁆𑀔𑀪𑀽𑀢𑁄’’𑀢𑀺 𑀯𑀘𑀦𑀢𑁄 𑀢𑀣𑀸𑀧𑀯𑀢𑁆𑀢𑀫𑁂𑀯 𑀜𑀸𑀡𑀁.

‘‘𑀢𑀻𑀲𑀼𑀧𑀻’’𑀢𑀺𑀆𑀤𑀺𑀦𑀸 ¶ 𑀅𑀧𑀭𑀟𑁆𑀠𑀁 𑀯𑀺𑀯𑀭𑀢𑀺. 𑀢𑀻𑀲𑀼𑀧𑀺 𑀢𑀸𑀲𑀁 𑀯𑀘𑀦𑀲𑀫𑁆𑀪𑀯𑀢𑁄 ‘‘𑀯𑀺𑀲𑁂𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑀤𑁂𑀢𑀁 𑀲𑀩𑁆𑀩𑀢𑁆𑀣 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀭 ‘‘𑀬𑀸𑀬𑀁 𑀅𑀥𑀺𑀲𑀻𑀮𑀲𑀺𑀓𑁆𑀔𑀸, 𑀅𑀬𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀸 𑀲𑀺𑀓𑁆𑀔𑀸’’𑀢𑀺 𑀯𑀘𑀦𑀢𑁄 𑀆𑀳 ‘‘𑀯𑀺𑀦𑀬𑀧𑀺𑀝𑀓𑁂 𑀅𑀥𑀺𑀲𑀻𑀮𑀲𑀺𑀓𑁆𑀔𑀸’’𑀢𑀺. 𑀲𑀼𑀢𑁆𑀢𑀦𑁆𑀢𑀧𑀸𑀴𑀺𑀬𑀁 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁨𑁬; 𑀲𑀁. 𑀦𑀺. 𑁧.𑁧𑁫𑁨; 𑀅. 𑀦𑀺. 𑁪.𑁧𑁨𑁩) 𑀲𑀫𑀸𑀥𑀺𑀤𑁂𑀲𑀦𑀸𑀩𑀸𑀳𑀼𑀮𑁆𑀮𑀢𑁄 ‘‘𑀲𑀼𑀢𑁆𑀢𑀦𑁆𑀢 𑀧𑀺𑀝𑀓𑁂 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸’’𑀢𑀺 𑀯𑀼𑀢𑁆𑀢𑀁. 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀲𑁆𑀲 𑀅𑀥𑀺𑀧𑀜𑁆𑀜𑀸𑀧𑀤𑀝𑁆𑀞𑀸𑀦𑀢𑁄, 𑀅𑀥𑀺𑀧𑀜𑁆𑀜𑀸𑀬 𑀘 𑀅𑀢𑁆𑀣𑀸𑀬 𑀢𑀤𑀯𑀲𑁂𑀲𑀦𑀸𑀫𑀭𑀽𑀧𑀥𑀫𑁆𑀫𑀓𑀣𑀦𑀢𑁄 𑀆𑀳 ‘‘𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸’’𑀢𑀺.

𑀓𑀺𑀮𑁂𑀲𑀸𑀦𑀦𑁆𑀢𑀺 𑀲𑀁𑀓𑁆𑀮𑁂𑀲𑀥𑀫𑁆𑀫𑀸𑀦𑀁, 𑀓𑀫𑁆𑀫𑀓𑀺𑀮𑁂𑀲𑀸𑀦𑀁 𑀯𑀸, 𑀉𑀪𑀬𑀸𑀧𑁂𑀓𑁆𑀔𑀜𑁆𑀘𑁂𑀢𑀁 ‘‘𑀬𑁄 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀳𑀺 ¶ 𑀓𑀺𑀮𑁂𑀲𑀸𑀦𑀁 𑀯𑀻𑀢𑀺𑀓𑁆𑀓𑀫𑁄, 𑀢𑀲𑁆𑀲 𑀧𑀳𑀸𑀦𑀁, 𑀢𑀲𑁆𑀲 𑀧𑀝𑀺𑀧𑀓𑁆𑀔𑀢𑁆𑀢𑀸’’𑀢𑀺 𑀘. ‘‘𑀯𑀻𑀢𑀺𑀓𑁆𑀓𑀫𑁄’’𑀢𑀺 𑀅𑀬𑀁 ‘‘𑀧𑀝𑀺𑀧𑀓𑁆𑀔’’𑀦𑁆𑀢𑀺 𑀪𑀸𑀯𑀬𑁄𑀕𑁂 𑀲𑀫𑁆𑀩𑀦𑁆𑀥𑁄, ‘‘𑀲𑀻𑀮𑀲𑁆𑀲𑀸’’𑀢𑀺 𑀧𑀦 𑀪𑀸𑀯𑀧𑀘𑁆𑀘𑀬𑁂. 𑀏𑀯𑀁 𑀲𑀩𑁆𑀩𑀢𑁆𑀣. 𑀅𑀦𑀼𑀲𑀬𑀯𑀲𑁂𑀦 𑀲𑀦𑁆𑀢𑀸𑀦𑁂 𑀅𑀦𑀼𑀯𑀢𑁆𑀢𑀦𑁆𑀢𑀸 𑀓𑀺𑀮𑁂𑀲𑀸 𑀓𑀸𑀭𑀡𑀮𑀸𑀪𑁂 𑀧𑀭𑀺𑀬𑀼𑀝𑁆𑀞𑀺𑀢𑀸𑀧𑀺 𑀲𑀻𑀮𑀪𑁂𑀤𑀪𑀬𑀯𑀲𑁂𑀦 𑀯𑀻𑀢𑀺𑀓𑁆𑀓𑀫𑀺𑀢𑀼𑀁 𑀦 𑀮𑀪𑀦𑁆𑀢𑀻𑀢𑀺 𑀆𑀳 ‘‘𑀯𑀻𑀢𑀺𑀓𑁆𑀓𑀫𑀧𑀝𑀺𑀧𑀓𑁆𑀔𑀢𑁆𑀢𑀸 𑀲𑀻𑀮𑀲𑁆𑀲𑀸’’𑀢𑀺. 𑀑𑀓𑀸𑀲𑀸𑀤𑀸𑀦𑀯𑀲𑁂𑀦 𑀓𑀺𑀮𑁂𑀲𑀸𑀦𑀁 𑀘𑀺𑀢𑁆𑀢𑁂 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀉𑀝𑁆𑀞𑀸𑀦𑀁 𑀧𑀭𑀺𑀬𑀼𑀝𑁆𑀞𑀸𑀦𑀁, 𑀢𑀲𑁆𑀲 𑀧𑀳𑀸𑀦𑀁, 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀓𑀺𑀮𑁂𑀲𑀸𑀦𑀁 𑀧𑀭𑀺𑀬𑀼𑀝𑁆𑀞𑀸𑀦𑀲𑁆𑀲 𑀧𑀳𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀓𑀺𑀮𑁂𑀲𑀸𑀦’’𑀦𑁆𑀢𑀺 𑀳𑀺 𑀅𑀥𑀺𑀓𑀸𑀭𑁄, 𑀢𑀁 𑀧𑀦 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀁 𑀘𑀺𑀢𑁆𑀢𑀲𑀫𑀸𑀤𑀳𑀦𑀯𑀲𑁂𑀦 𑀪𑀯𑀢𑀻𑀢𑀺 𑀆𑀳 ‘‘𑀧𑀭𑀺𑀬𑀼𑀝𑁆𑀞𑀸𑀦𑀧𑀝𑀺𑀧𑀓𑁆𑀔𑀢𑁆𑀢𑀸 𑀲𑀫𑀸𑀥𑀺𑀲𑁆𑀲𑀸’’𑀢𑀺. 𑀅𑀧𑁆𑀧𑀳𑀻𑀦𑀪𑀸𑀯𑁂𑀦 𑀲𑀦𑁆𑀢𑀸𑀦𑁂 𑀅𑀦𑀼 𑀅𑀦𑀼 𑀲𑀬𑀦𑀓𑀸 𑀅𑀦𑀼𑀭𑀽𑀧𑀓𑀸𑀭𑀡𑀮𑀸𑀪𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀸 𑀣𑀸𑀫𑀕𑀢𑀸 𑀓𑀸𑀫𑀭𑀸𑀕𑀸𑀤𑀬𑁄 𑀲𑀢𑁆𑀢 𑀓𑀺𑀮𑁂𑀲𑀸 𑀅𑀦𑀼𑀲𑀬𑀸, 𑀢𑁂𑀲𑀁 𑀧𑀳𑀸𑀦𑀁, 𑀢𑁂 𑀧𑀦 𑀲𑀩𑁆𑀩𑀲𑁄 𑀅𑀭𑀺𑀬𑀫𑀕𑁆𑀕𑀧𑀜𑁆𑀜𑀸𑀬 𑀧𑀳𑀻𑀬𑀦𑁆𑀢𑀻𑀢𑀺 𑀆𑀳 ‘‘𑀅𑀦𑀼𑀲𑀬𑀧𑀝𑀺𑀧𑀓𑁆𑀔𑀢𑁆𑀢𑀸 𑀧𑀜𑁆𑀜𑀸𑀬𑀸’’𑀢𑀺.

𑀤𑀻𑀧𑀸𑀮𑁄𑀓𑁂𑀦 𑀯𑀺𑀬 𑀢𑀫𑀲𑁆𑀲 𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀕𑀢𑁂𑀦 𑀢𑁂𑀦 𑀢𑁂𑀦 𑀓𑀼𑀲𑀮𑀗𑁆𑀕𑁂𑀦 𑀢𑀲𑁆𑀲 𑀢𑀲𑁆𑀲 𑀅𑀓𑀼𑀲𑀮𑀲𑁆𑀲 𑀧𑀳𑀸𑀦𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑀁. 𑀇𑀥 𑀧𑀦 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬 𑀯𑀼𑀢𑁆𑀢𑀝𑁆𑀞𑀸𑀦𑀢𑁆𑀢𑀸 𑀢𑁂𑀦 𑀢𑁂𑀦 𑀲𑀼𑀲𑀻𑀮𑁆𑀬𑀗𑁆𑀕𑁂𑀦 𑀢𑀲𑁆𑀲 𑀢𑀲𑁆𑀲 𑀤𑀼𑀲𑁆𑀲𑀻𑀮𑁆𑀬𑀗𑁆𑀕𑀲𑁆𑀲 𑀧𑀳𑀸𑀦𑀁 ‘‘𑀢𑀤𑀗𑁆𑀕𑀧𑁆𑀧𑀳𑀸𑀦’’𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑁂𑀦 𑀲𑀫𑀸𑀥𑀺𑀦𑀸 𑀧𑀯𑀢𑁆𑀢𑀺𑀦𑀺𑀯𑀸𑀭𑀡𑁂𑀦 𑀖𑀝𑀧𑁆𑀧𑀳𑀸𑀭𑁂𑀦 𑀯𑀺𑀬 𑀚𑀮𑀢𑀮𑁂 𑀲𑁂𑀯𑀸𑀮𑀲𑁆𑀲 𑀢𑁂𑀲𑀁 𑀢𑁂𑀲𑀁 𑀦𑀻𑀯𑀭𑀡𑀸𑀤𑀺𑀥𑀫𑁆𑀫𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀳𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁. 𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀢𑀁 𑀢𑀁 𑀫𑀕𑁆𑀕𑀯𑀢𑁄 𑀲𑀦𑁆𑀢𑀸𑀦𑁂 𑀲𑀫𑀼𑀤𑀬𑀧𑀓𑁆𑀔𑀺𑀓𑀲𑁆𑀲 ¶ 𑀓𑀺𑀮𑁂𑀲𑀕𑀡𑀲𑁆𑀲 𑀅𑀘𑁆𑀘𑀦𑁆𑀢𑀫𑀧𑁆𑀧𑀯𑀢𑁆𑀢𑀺𑀲𑀗𑁆𑀔𑀸𑀢 𑀲𑀫𑀼𑀘𑁆𑀙𑀺𑀦𑁆𑀤𑀦𑀯𑀲𑁂𑀦 𑀧𑀳𑀸𑀦𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁. 𑀤𑀼𑀝𑁆𑀞𑀼 𑀘𑀭𑀺𑀢𑀁, 𑀲𑀁𑀓𑀺𑀮𑁂𑀲𑁂𑀳𑀺 𑀯𑀸 𑀤𑀽𑀲𑀺𑀢𑀁 𑀘𑀭𑀺𑀢𑀁 𑀤𑀼𑀘𑁆𑀘𑀭𑀺𑀢𑀁. 𑀢𑀤𑁂𑀯 𑀬𑀢𑁆𑀣 𑀉𑀧𑁆𑀧𑀦𑁆𑀦𑀁, 𑀢𑀁 𑀲𑀦𑁆𑀢𑀸𑀦𑀁 𑀲𑀫𑁆𑀫𑀸 𑀓𑀺𑀮𑀺𑀲𑀢𑀺 𑀯𑀺𑀩𑀸𑀥𑀢𑀺, 𑀉𑀧𑀢𑀸𑀧𑁂𑀢𑀺 𑀘𑀸𑀢𑀺 𑀲𑀁𑀓𑀺𑀮𑁂𑀲𑁄, 𑀢𑀲𑁆𑀲 𑀧𑀳𑀸𑀦𑀁. 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀯𑀲𑁂𑀦 𑀧𑀯𑀢𑁆𑀢𑀲𑀁𑀓𑀺𑀮𑁂𑀲𑀲𑁆𑀲 𑀢𑀤𑀗𑁆𑀕𑀯𑀲𑁂𑀦 𑀧𑀳𑀸𑀦𑀁 𑀯𑀼𑀢𑁆𑀢𑀁 𑀲𑀻𑀮𑀲𑁆𑀲 𑀤𑀼𑀘𑁆𑀘𑀭𑀺𑀢𑀧𑀝𑀺𑀧𑀓𑁆𑀔𑀢𑁆𑀢𑀸. 𑀲𑀺𑀓𑁆𑀔𑀢𑁆𑀢𑀬𑀸𑀦𑀼𑀲𑀸𑀭𑁂𑀦 𑀳𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀲𑀢𑀻𑀢𑀺 𑀢𑀡𑁆𑀳𑀸, 𑀲𑀸𑀯 𑀯𑀼𑀢𑁆𑀢𑀦𑀬𑁂𑀦 𑀲𑀁𑀓𑀺𑀮𑁂𑀲𑁄, 𑀢𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀳𑀸𑀦𑀁 𑀯𑀼𑀢𑁆𑀢𑀁 𑀲𑀫𑀸𑀥𑀺𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀧𑀝𑀺𑀧𑀓𑁆𑀔𑀢𑁆𑀢𑀸. 𑀤𑀺𑀝𑁆𑀞𑀺𑀬𑁂𑀯 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀲𑀁𑀓𑀺𑀮𑁂𑀲𑁄, 𑀢𑀲𑁆𑀲 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀳𑀸𑀦𑀁 𑀯𑀼𑀢𑁆𑀢𑀁 𑀧𑀜𑁆𑀜𑀸𑀬 𑀅𑀢𑁆𑀢𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀲𑀪𑀸𑀯 𑀥𑀫𑁆𑀫𑀧𑁆𑀧𑀓𑀸𑀲𑀦𑀢𑁄.

𑀏𑀓𑀫𑁂𑀓𑀲𑁆𑀫𑀺𑀜𑁆𑀘𑁂𑀢𑁆𑀣𑀸𑀢𑀺 𑀏𑀢𑁂𑀲𑀼 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀧𑀺𑀝𑀓𑁂, 𑀘-𑀲𑀤𑁆𑀤𑁄 𑀯𑀸𑀓𑁆𑀬𑀸𑀭𑀫𑁆𑀪𑁂, 𑀧𑀓𑁆𑀔𑀦𑁆𑀢𑀭𑁂 𑀯𑀸. 𑀧𑀺-𑀲𑀤𑁆𑀤𑁄, 𑀅𑀧𑀺-𑀲𑀤𑁆𑀤𑁄 𑀯𑀸 𑀅𑀯𑀬𑀯𑀲𑀫𑁆𑀧𑀺𑀡𑁆𑀟𑀦𑁂, 𑀢𑁂𑀦 𑀦 𑀓𑁂𑀯𑀮𑀁 𑀘𑀢𑀼𑀩𑁆𑀩𑀺𑀥𑀲𑁆𑀲𑁂𑀯 𑀕𑀫𑁆𑀪𑀻𑀭𑀪𑀸𑀯𑁄, 𑀅𑀣 𑀔𑁄 𑀧𑀘𑁆𑀘𑁂𑀓𑀁 𑀢𑀤𑀯𑀬𑀯𑀸𑀦𑀫𑁆𑀧𑀻𑀢𑀺 𑀲𑀫𑁆𑀧𑀺𑀡𑁆𑀟𑀦𑀁 𑀓𑀭𑁄𑀢𑀺. 𑀏𑀲 𑀦𑀬𑁄 𑀈𑀤𑀺𑀲𑁂𑀲𑀼. 𑀇𑀤𑀸𑀦𑀺 𑀢𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀦𑁆𑀢𑀻𑀢𑀺 𑀧𑀸𑀴𑀺. 𑀲𑀸 𑀳𑀺 𑀉𑀓𑁆𑀓𑀝𑁆𑀞𑀸𑀦𑀁 𑀲𑀻𑀮𑀸𑀤𑀺𑀅𑀢𑁆𑀣𑀸𑀦𑀁 ¶ 𑀩𑁄𑀥𑀦𑀢𑁄, 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀸𑀯𑀢𑁄, 𑀩𑀼𑀤𑁆𑀥𑀸𑀤𑀻𑀳𑀺 𑀪𑀸𑀲𑀺𑀢𑀢𑁆𑀢𑀸 𑀘 𑀧𑀓𑀝𑁆𑀞𑀸𑀦𑀁 𑀯𑀘𑀦𑀸𑀦𑀁 𑀆𑀴𑀺 𑀧𑀦𑁆𑀢𑀻𑀢𑀺 ‘‘𑀧𑀸𑀴𑀻’’𑀢𑀺 𑀯𑀼𑀘𑁆𑀘𑀢𑀺.

𑀇𑀥 𑀧𑀦 𑀯𑀺𑀦𑀬𑀕𑀡𑁆𑀞𑀺𑀧𑀤𑀓𑀸𑀭𑀸𑀤𑀻𑀦𑀁 𑀲𑀤𑁆𑀤𑀯𑀸𑀤𑀻𑀦𑀁 𑀫𑀢𑁂𑀦 𑀧𑀼𑀩𑁆𑀩𑁂 𑀯𑀯𑀢𑁆𑀣𑀸𑀧𑀺𑀢𑀸 𑀧𑀭𑀫𑀢𑁆𑀣𑀲𑀤𑁆𑀤𑀧𑁆𑀧𑀩𑀦𑁆𑀥𑀪𑀽𑀢𑀸 𑀢𑀦𑁆𑀢𑀺 𑀥𑀫𑁆𑀫𑁄 𑀦𑀸𑀫. 𑀇𑀢𑀺-𑀲𑀤𑁆𑀤𑁄 𑀳𑀺 𑀦𑀸𑀫𑀢𑁆𑀣𑁂, ‘‘𑀥𑀫𑁆𑀫𑁄’’𑀢𑀺 𑀯𑀸 𑀯𑀼𑀘𑁆𑀘𑀢𑀺. 𑀢𑀲𑁆𑀲𑀸𑀬𑁂𑀯𑀸𑀢𑀺 𑀢𑀲𑁆𑀲𑀸 𑀬𑀣𑀸𑀯𑀼𑀢𑁆𑀢𑀸𑀬 𑀏𑀯 𑀢𑀦𑁆𑀢𑀺𑀬𑀸 𑀅𑀢𑁆𑀣𑁄. 𑀫𑀦𑀲𑀸 𑀯𑀯𑀢𑁆𑀣𑀸𑀧𑀺𑀢𑀸𑀬𑀸𑀢𑀺 𑀉𑀕𑁆𑀕𑀳𑀡-𑀥𑀸𑀭𑀡𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑁂𑀦 𑀫𑀦𑀲𑀸 𑀧𑀼𑀩𑁆𑀩𑁂 𑀯𑀯𑀢𑁆𑀣𑀸𑀧𑀺𑀢𑀸𑀬 𑀬𑀣𑀸𑀯𑀼𑀢𑁆𑀢𑀸𑀬 𑀧𑀭𑀫𑀢𑁆𑀣𑀲𑀤𑁆𑀤𑀧𑁆𑀧𑀩𑀦𑁆𑀥𑀪𑀽𑀢𑀸𑀬 𑀢𑀲𑁆𑀲𑀸 𑀢𑀦𑁆𑀢𑀺𑀬𑀸. 𑀤𑁂𑀲𑀦𑀸𑀢𑀺 𑀧𑀘𑁆𑀙𑀸 𑀧𑀭𑁂𑀲𑀫𑀯𑀩𑁄𑀥𑀦𑀢𑁆𑀣𑀁 𑀤𑁂𑀲𑀦𑀸𑀲𑀗𑁆𑀔𑀸𑀢𑀸 𑀧𑀭𑀫𑀢𑁆𑀣𑀲𑀤𑁆𑀤𑀧𑁆𑀧𑀩𑀦𑁆𑀥𑀪𑀽𑀢𑀸 𑀢𑀦𑁆𑀢𑀺𑀬𑁂𑀯. 𑀅𑀧𑀺𑀘 𑀬𑀣𑀸𑀯𑀼𑀢𑁆𑀢𑀢𑀦𑁆𑀢𑀺 𑀲𑀗𑁆𑀔𑀸𑀢𑀲𑀤𑁆𑀤𑀲𑀫𑀼𑀝𑁆𑀞𑀸𑀧𑀓𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀤𑁂𑀲𑀦𑀸. 𑀢𑀦𑁆𑀢𑀺𑀬𑀸, 𑀢𑀦𑁆𑀢𑀺𑀅𑀢𑁆𑀣𑀲𑁆𑀲 𑀘𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀬 𑀤𑀼𑀯𑀺𑀥𑀸𑀬𑀧𑀺 𑀢𑀦𑁆𑀢𑀺𑀬𑀸, 𑀢𑀤𑀢𑁆𑀣𑀲𑁆𑀲 𑀘 𑀬𑀣𑀸𑀪𑀽𑀢𑀸𑀯𑀩𑁄𑀥𑁄𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂 𑀳𑀺 𑀪𑀕𑀯𑀢𑀸 𑀯𑀼𑀘𑁆𑀘𑀫𑀸𑀦𑀲𑁆𑀲 𑀅𑀢𑁆𑀣𑀲𑁆𑀲, 𑀯𑁄𑀳𑀸𑀭𑀲𑁆𑀲 𑀘 𑀤𑀻𑀧𑀓𑁄 𑀲𑀤𑁆𑀤𑁄𑀬𑁂𑀯 𑀢𑀦𑁆𑀢𑀺 𑀦𑀸𑀫𑀸𑀢𑀺 𑀯𑀤𑀦𑁆𑀢𑀺. 𑀢𑁂𑀲𑀁 𑀧𑀦 𑀯𑀸𑀤𑁂 𑀥𑀫𑁆𑀫𑀲𑁆𑀲𑀸𑀧𑀺 𑀲𑀤𑁆𑀤𑀲𑀪𑀸𑀯𑀢𑁆𑀢𑀸 𑀥𑀫𑁆𑀫𑀤𑁂𑀲𑀦𑀸𑀦𑀁 𑀓𑁄 𑀯𑀺𑀲𑁂𑀲𑁄𑀢𑀺 𑀘𑁂? 𑀢𑁂𑀲𑀁 𑀢𑁂𑀲𑀁 𑀅𑀢𑁆𑀣𑀸𑀦𑀁 𑀩𑁄𑀥𑀓𑀪𑀸𑀯𑁂𑀦 𑀜𑀸𑀢𑁄, 𑀉𑀕𑁆𑀕𑀳𑀡𑀸𑀤𑀺𑀯𑀲𑁂𑀦 ¶ 𑀘 𑀧𑀼𑀩𑁆𑀩𑁂 𑀯𑀯𑀢𑁆𑀣𑀸𑀧𑀺𑀢𑁄 𑀧𑀭𑀫𑀢𑁆𑀣𑀲𑀤𑁆𑀤𑀧𑁆𑀧𑀩𑀦𑁆𑀥𑁄 𑀥𑀫𑁆𑀫𑁄, 𑀧𑀘𑁆𑀙𑀸 𑀧𑀭𑁂𑀲𑀁 𑀅𑀯𑀩𑁄𑀥𑀦𑀢𑁆𑀣𑀁 𑀧𑀯𑀢𑁆𑀢𑀺𑀢𑁄 𑀢𑀁 𑀢𑀤𑀢𑁆𑀣𑀧𑁆𑀧𑀓𑀸𑀲𑀓𑁄 𑀲𑀤𑁆𑀤𑁄 𑀤𑁂𑀲𑀦𑀸𑀢𑀺 𑀅𑀬𑀫𑀺𑀫𑁂𑀲𑀁 𑀯𑀺𑀲𑁂𑀲𑁄𑀢𑀺. 𑀅𑀣 𑀯𑀸 𑀬𑀣𑀸𑀯𑀼𑀢𑁆𑀢𑀲𑀤𑁆𑀤𑀲𑀫𑀼𑀝𑁆𑀞𑀸𑀧𑀓𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀤𑁂𑀲𑀦𑀸 𑀤𑁂𑀲𑀻𑀬𑀢𑀺 𑀲𑀫𑀼𑀝𑁆𑀞𑀸𑀧𑀻𑀬𑀢𑀺 𑀲𑀤𑁆𑀤𑁄 𑀏𑀢𑁂𑀦𑀸𑀢𑀺 𑀓𑀢𑁆𑀯𑀸 𑀫𑀼𑀲𑀸𑀯𑀸𑀤𑀸𑀤𑀬𑁄 𑀯𑀺𑀬 𑀢𑀢𑁆𑀣𑀸𑀧𑀺 𑀳𑀺 𑀫𑀼𑀲𑀸𑀯𑀸𑀤𑀸𑀤𑀺𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑀸𑀤𑀺𑀲𑀤𑁆𑀤𑁂𑀳𑀺 𑀯𑁄𑀳𑀭𑀻𑀬𑀢𑀻𑀢𑀺. 𑀓𑀺𑀜𑁆𑀘𑀸𑀧𑀺 𑀅𑀓𑁆𑀔𑀭𑀸𑀯𑀮𑀺𑀪𑀽𑀢𑁄 𑀧𑀜𑁆𑀜𑀢𑁆𑀢𑀺𑀲𑀤𑁆𑀤𑁄𑀬𑁂𑀯 𑀅𑀢𑁆𑀣𑀲𑁆𑀲 𑀜𑀸𑀧𑀓𑁄, 𑀢𑀣𑀸𑀧𑀺 𑀫𑀽𑀮𑀓𑀸𑀭𑀡𑀪𑀸𑀯𑀢𑁄 ‘‘𑀅𑀓𑁆𑀔𑀭𑀲𑀜𑁆𑀜𑀸𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀢𑀲𑁆𑀲𑀸𑀬𑁂𑀯 𑀅𑀢𑁆𑀣𑁄𑀢𑀺 𑀧𑀭𑀫𑀢𑁆𑀣𑀲𑀤𑁆𑀤𑁄𑀬𑁂𑀯 𑀅𑀢𑁆𑀣𑀲𑁆𑀲 𑀜𑀸𑀧𑀓𑀪𑀸𑀯𑁂𑀦 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀢𑀲𑁆𑀲𑀸 𑀢𑀦𑁆𑀢𑀺𑀬𑀸 𑀤𑁂𑀲𑀦𑀸’’𑀢𑀺 𑀘 𑀲𑀤𑀺𑀲𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑀁 𑀬𑀣𑀸 ‘‘𑀉𑀧𑁆𑀧𑀦𑁆𑀦𑀸 𑀘 𑀓𑀼𑀲𑀮𑀸𑀥𑀫𑁆𑀫𑀸 𑀪𑀺𑀬𑁆𑀬𑁄𑀪𑀸𑀯𑀸𑀬 𑀯𑁂𑀧𑀼𑀮𑁆𑀮𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺.

𑀅𑀪𑀺𑀥𑀫𑁆𑀫𑀕𑀡𑁆𑀞𑀺𑀧𑀤𑀓𑀸𑀭𑀸𑀤𑀻𑀦𑀁 𑀧𑀦 𑀧𑀡𑁆𑀡𑀢𑁆𑀢𑀺𑀯𑀸𑀤𑀻𑀦𑀁 𑀫𑀢𑁂𑀦 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀪𑁂𑀤𑀲𑁆𑀲 𑀅𑀢𑁆𑀣𑀲𑁆𑀲 𑀅𑀦𑀼𑀭𑀽𑀧𑀯𑀸𑀘𑀓𑀪𑀸𑀯𑁂𑀦 𑀧𑀭𑀫𑀢𑁆𑀣𑀲𑀤𑁆𑀤𑁂𑀲𑀼 𑀏𑀓𑀦𑁆𑀢𑁂𑀦 𑀪𑀕𑀯𑀢𑀸 𑀫𑀦𑀲𑀸 𑀯𑀯𑀢𑁆𑀣𑀸𑀧𑀺𑀢𑀸 𑀦𑀸𑀫𑀧𑀜𑁆𑀜𑀢𑁆𑀢𑀺𑀧𑀩𑀦𑁆𑀥𑀪𑀽𑀢𑀸 𑀢𑀦𑁆𑀢𑀺 𑀥𑀫𑁆𑀫𑁄 𑀦𑀸𑀫, ‘‘𑀥𑀫𑁆𑀫𑁄’’𑀢𑀺 𑀯𑀸 𑀯𑀼𑀘𑁆𑀘𑀢𑀺. 𑀢𑀲𑁆𑀲𑀸𑀬𑁂𑀯𑀸𑀢𑀺 𑀢𑀲𑁆𑀲𑀸 𑀦𑀸𑀫𑀧𑀜𑁆𑀜𑀢𑁆𑀢𑀺𑀪𑀽𑀢𑀸𑀬 𑀢𑀦𑁆𑀢𑀺𑀬𑀸 𑀏𑀯 𑀅𑀢𑁆𑀣𑁄. 𑀫𑀦𑀲𑀸 𑀯𑀯𑀢𑁆𑀣𑀸𑀧𑀺𑀢𑀸𑀬𑀸𑀢𑀺 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀪𑁂𑀤𑀲𑁆𑀲 𑀅𑀢𑁆𑀣𑀲𑁆𑀲𑀸𑀦𑀼𑀭𑀽𑀧𑀯𑀸𑀘𑀓𑀪𑀸𑀯𑁂𑀦 𑀧𑀭𑀫𑀢𑁆𑀣𑀲𑀤𑁆𑀤𑁂𑀲𑀼 𑀪𑀕𑀯𑀢𑀸 𑀫𑀦𑀲𑀸 𑀯𑀯𑀢𑁆𑀣𑀸𑀧𑀺𑀢𑀸𑀬 𑀦𑀸𑀫𑀧𑀡𑁆𑀡𑀢𑁆𑀢𑀺𑀧𑀩𑀦𑁆𑀥𑀪𑀽𑀢𑀸𑀬 𑀢𑀲𑁆𑀲𑀸 𑀢𑀦𑁆𑀢𑀺𑀬𑀸. 𑀤𑁂𑀲𑀦𑀸𑀢𑀺 𑀧𑀭𑁂𑀲𑀁 𑀧𑀩𑁄𑀥𑀦𑁂𑀦 𑀅𑀢𑀺𑀲𑀚𑁆𑀚𑀦𑀸 𑀯𑀸𑀘𑀸𑀬 𑀧𑀓𑀸𑀲𑀦𑀸 𑀯𑀘𑀻𑀪𑁂𑀤𑀪𑀽𑀢𑀸 𑀧𑀭𑀫𑀢𑁆𑀣𑀲𑀤𑁆𑀤𑀧𑁆𑀧𑀩𑀦𑁆𑀥𑀲𑀗𑁆𑀔𑀸𑀢𑀸 𑀢𑀦𑁆𑀢𑀺. 𑀢𑀦𑁆𑀢𑀺𑀬𑀸, 𑀢𑀦𑁆𑀢𑀺𑀅𑀢𑁆𑀣𑀲𑁆𑀲 𑀘𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀬 𑀤𑀼𑀩𑁆𑀩𑀺𑀥𑀸𑀬𑀧𑀺 𑀢𑀦𑁆𑀢𑀺𑀬𑀸, 𑀢𑀤𑀢𑁆𑀣𑀲𑁆𑀲 𑀘 𑀬𑀣𑀸𑀪𑀽𑀢𑀸𑀯𑀩𑁄𑀥𑁄𑀢𑀺 𑀅𑀢𑁆𑀣𑁄. 𑀢𑁂 𑀳𑀺 𑀏𑀯𑀁 𑀯𑀤𑀦𑁆𑀢𑀺 𑁋 𑀲𑀪𑀸𑀯𑀢𑁆𑀣𑀲𑁆𑀲, 𑀲𑀪𑀸𑀯𑀯𑁄𑀳𑀸𑀭𑀲𑁆𑀲 𑀘 𑀅𑀦𑀼𑀭𑀽𑀧𑀯𑀲𑁂𑀦𑁂𑀯 𑀪𑀕𑀯𑀢𑀸 𑀫𑀦𑀲𑀸 𑀯𑀯𑀢𑁆𑀣𑀸𑀧𑀺𑀢𑀸 𑀧𑀡𑁆𑀡𑀢𑁆𑀢𑀺 ¶ 𑀇𑀥 ‘‘𑀢𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀬𑀤𑀺 𑀘 𑀲𑀤𑁆𑀤𑀯𑀸𑀤𑀻𑀦𑀁 𑀫𑀢𑁂𑀦 𑀲𑀤𑁆𑀤𑁄𑀬𑁂𑀯 𑀇𑀥 𑀢𑀦𑁆𑀢𑀺 𑀦𑀸𑀫 𑀲𑀺𑀬𑀸. 𑀢𑀦𑁆𑀢𑀺𑀬𑀸, 𑀤𑁂𑀲𑀦𑀸𑀬 𑀘 𑀦𑀸𑀦𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀫𑀦𑀲𑀸 𑀯𑀯𑀢𑁆𑀣𑀸𑀧𑀺𑀢𑀸𑀬 𑀘 𑀢𑀦𑁆𑀢𑀺𑀬𑀸 𑀯𑀘𑀻𑀪𑁂𑀤𑀓𑀭𑀡𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀤𑁂𑀲𑀦𑀸𑀬 𑀦𑀸𑀦𑀢𑁆𑀢𑀁 𑀦𑀢𑁆𑀣𑀺. 𑀢𑀣𑀸 𑀳𑀺 𑀤𑁂𑀲𑀦𑀁 𑀤𑀲𑁆𑀲𑁂𑀦𑁆𑀢𑁂𑀦 𑀫𑀦𑀲𑀸 𑀯𑀯𑀢𑁆𑀣𑀸𑀧𑀺𑀢𑀸𑀬 𑀢𑀦𑁆𑀢𑀺𑀬𑀸 𑀤𑁂𑀲𑀦𑀸𑀢𑀺 𑀯𑀘𑀻𑀪𑁂𑀤𑀓𑀭𑀡𑀫𑀢𑁆𑀢𑀁 𑀯𑀺𑀦𑀸 𑀢𑀦𑁆𑀢𑀺𑀬𑀸 𑀲𑀳 𑀤𑁂𑀲𑀦𑀸𑀬 𑀅𑀦𑀜𑁆𑀜𑀢𑀸 𑀯𑀼𑀢𑁆𑀢𑀸. 𑀢𑀣𑀸 𑀘 𑀉𑀧𑀭𑀺 ‘‘𑀤𑁂𑀲𑀦𑀸𑀢𑀺 𑀧𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀤𑁂𑀲𑀦𑀸𑀬 𑀅𑀦𑀜𑁆𑀜𑀪𑀸𑀯𑁂𑀦 𑀢𑀦𑁆𑀢𑀺𑀬𑀸𑀧𑀺 𑀧𑀡𑁆𑀡𑀢𑁆𑀢𑀺𑀪𑀸𑀯𑁄 𑀓𑀣𑀺𑀢𑁄 𑀳𑁄𑀢𑀺.

𑀅𑀧𑀺𑀘 ¶ 𑀬𑀤𑀺 𑀢𑀦𑁆𑀢𑀺𑀬𑀸 𑀅𑀜𑁆𑀜𑀸𑀬𑁂𑀯 𑀤𑁂𑀲𑀦𑀸 𑀲𑀺𑀬𑀸, ‘‘𑀢𑀦𑁆𑀢𑀺𑀬𑀸 𑀘 𑀢𑀦𑁆𑀢𑀺𑀅𑀢𑁆𑀣𑀲𑁆𑀲 𑀘 𑀤𑁂𑀲𑀦𑀸𑀬 𑀘 𑀬𑀣𑀸𑀪𑀽𑀢𑀸𑀯𑀩𑁄𑀥𑁄’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀏𑀯𑀁 𑀧𑀦 𑀅𑀯𑀢𑁆𑀯𑀸 ‘‘𑀢𑀦𑁆𑀢𑀺𑀬𑀸 𑀘 𑀢𑀦𑁆𑀢𑀺𑀅𑀢𑁆𑀣𑀲𑁆𑀲 𑀘 𑀬𑀣𑀸𑀪𑀽𑀢𑀸𑀯𑀩𑁄𑀥𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀦𑁆𑀢𑀺𑀬𑀸, 𑀤𑁂𑀲𑀦𑀸𑀬 𑀘 𑀅𑀦𑀜𑁆𑀜𑀪𑀸𑀯𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀉𑀧𑀭𑀺 ‘‘𑀤𑁂𑀲𑀦𑀸 𑀦𑀸𑀫 𑀧𑀜𑁆𑀜𑀢𑁆𑀢𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁂𑀦 𑀤𑁂𑀲𑀦𑀸𑀬 𑀅𑀦𑀜𑁆𑀜𑀪𑀸𑀯𑀢𑁄 𑀢𑀦𑁆𑀢𑀺𑀬𑀸 𑀧𑀡𑁆𑀡𑀢𑁆𑀢𑀺𑀪𑀸𑀯𑁄 𑀓𑀣𑀺𑀢𑁄 𑀳𑁄𑀢𑀻𑀢𑀺. 𑀢𑀤𑀼𑀪𑀬𑀫𑁆𑀧𑀺 𑀧𑀦 𑀧𑀭𑀫𑀢𑁆𑀣𑀢𑁄 𑀲𑀤𑁆𑀤𑁄𑀬𑁂𑀯 𑀧𑀭𑀫𑀢𑁆𑀣𑀯𑀺𑀦𑀺𑀫𑀼𑀢𑁆𑀢𑀸𑀬 𑀲𑀫𑁆𑀫𑀼𑀢𑀺𑀬𑀸 𑀅𑀪𑀸𑀯𑀸, 𑀇𑀫𑀫𑁂𑀯 𑀘 𑀦𑀬𑀁 𑀕𑀳𑁂𑀢𑁆𑀯𑀸 𑀓𑁂𑀘𑀺 𑀆𑀘𑀭𑀺𑀬𑀸 ‘‘𑀥𑀫𑁆𑀫𑁄 𑀘 𑀤𑁂𑀲𑀦𑀸 𑀘 𑀧𑀭𑀫𑀢𑁆𑀣𑀢𑁄 𑀲𑀤𑁆𑀤𑁄 𑀏𑀯𑀸’’𑀢𑀺 𑀯𑁄𑀳𑀭𑀦𑁆𑀢𑀺, 𑀢𑁂𑀧𑀺 𑀅𑀦𑀼𑀧𑀯𑀚𑁆𑀚𑀸𑀬𑁂𑀯. 𑀬𑀣𑀸 𑀓𑀸𑀫𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑀸 ‘‘𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀓𑀸𑀫𑀸𑀯𑀘𑀭𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑀸 ‘‘𑀦𑀺𑀩𑁆𑀩𑀢𑁆𑀢𑀺𑀢𑀧𑀭𑀫𑀢𑁆𑀣𑀯𑀺𑀲𑀬𑀸𑀬𑁂𑀯𑀸’’𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀧𑀼𑀩𑁆𑀩𑀓𑀸𑀦𑀁 𑀭𑀸𑀕𑀸𑀤𑀺𑀅𑀓𑀼𑀲𑀮𑀸𑀦𑀁, 𑀫𑁂𑀢𑁆𑀢𑀸𑀤𑀺𑀓𑀼𑀲𑀮𑀸𑀦𑀜𑁆𑀘 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸𑀧𑀺 𑀲𑀫𑀼𑀧𑁆𑀧𑀚𑁆𑀚𑀦𑀢𑁄. 𑀧𑀭𑀫𑀢𑁆𑀣𑀥𑀫𑁆𑀫𑀫𑀽𑀮𑀓𑀢𑁆𑀢𑀸 𑀧𑀦𑀲𑁆𑀲 𑀧𑀭𑀺𑀓𑀧𑁆𑀧𑀲𑁆𑀲 𑀧𑀭𑀫𑀢𑁆𑀣𑀯𑀺𑀲𑀬𑀢𑀸 𑀲𑀓𑁆𑀓𑀸 𑀧𑀜𑁆𑀜𑀧𑁂𑀢𑀼𑀁, 𑀏𑀯𑀫𑀺𑀥𑀸𑀧𑀺 𑀤𑀝𑁆𑀞𑀩𑁆𑀩𑀦𑁆𑀢𑀺 𑀘. 𑀏𑀯𑀫𑁆𑀧𑀺 𑀧𑀡𑁆𑀡𑀢𑁆𑀢𑀺𑀯𑀸𑀤𑀻𑀦𑀁 𑀫𑀢𑀁 𑀳𑁄𑀢𑀼, 𑀲𑀤𑁆𑀤𑀯𑀸𑀤𑀻𑀦𑀁 𑀫𑀢𑁂𑀧𑀺 𑀥𑀫𑁆𑀫𑀤𑁂𑀲𑀦𑀸𑀦𑀁 𑀦𑀸𑀦𑀢𑁆𑀢𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑀸 𑀤𑀻𑀳𑀺 𑀧𑀓𑀸𑀲𑀺𑀢𑀦𑁆𑀢𑀺. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀲𑀤𑁆𑀤𑁄 𑀥𑀫𑁆𑀫𑁄 𑀤𑁂𑀲𑀦𑀸 𑀘, 𑀇𑀘𑁆𑀘𑀸𑀳𑀼 𑀅𑀧𑀭𑁂 𑀕𑀭𑀽;

𑀥𑀫𑁆𑀫𑁄 𑀧𑀡𑁆𑀡𑀢𑁆𑀢𑀺 𑀲𑀤𑁆𑀤𑁄 𑀢𑀼, 𑀤𑁂𑀲𑀦𑀸 𑀯𑀸𑀢𑀺 𑀘𑀸𑀧𑀭𑁂’’𑀢𑀺.

𑀢𑀻𑀲𑀼𑀧𑀺 𑀘𑁂𑀢𑁂𑀲𑀼 𑀏𑀢𑁂 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀸𑀢𑀺 𑀏𑀢𑁆𑀣 𑀢𑀦𑁆𑀢𑀺𑀅𑀢𑁆𑀣𑁄, 𑀢𑀦𑁆𑀢𑀺𑀤𑁂𑀲𑀦𑀸, 𑀢𑀦𑁆𑀢𑀺𑀅𑀢𑁆𑀣𑀧𑀝𑀺𑀯𑁂𑀥𑁄 𑀘𑀸𑀢𑀺 𑀇𑀫𑁂 𑀢𑀬𑁄 𑀢𑀦𑁆𑀢𑀺𑀯𑀺𑀲𑀬𑀸 𑀳𑁄𑀦𑁆𑀢𑀻𑀢𑀺 𑀯𑀺𑀦𑀬𑀧𑀺𑀝𑀓𑀸𑀤𑀻𑀦𑀁 𑀅𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀸𑀥𑀸𑀭𑀪𑀸𑀯𑁄 𑀬𑀼𑀢𑁆𑀢𑁄, 𑀧𑀺𑀝𑀓𑀸𑀦𑀺 𑀧𑀦 𑀢𑀦𑁆𑀢𑀺𑀬𑁂𑀯𑀸𑀢𑀺 𑀢𑁂𑀲𑀁 𑀥𑀫𑁆𑀫𑀸𑀥𑀸𑀭𑀪𑀸𑀯𑁄 𑀓𑀣𑀁 𑀬𑀼𑀚𑁆𑀚𑁂𑀬𑁆𑀬𑀸𑀢𑀺? 𑀢𑀦𑁆𑀢𑀺𑀲𑀫𑀼𑀤𑀸𑀬𑀲𑁆𑀲 𑀅𑀯𑀬𑀯𑀢𑀦𑁆𑀢𑀺𑀬𑀸 𑀆𑀥𑀸𑀭𑀪𑀸𑀯𑀢𑁄. 𑀲𑀫𑀼𑀤𑀸𑀬𑁄 𑀳𑀺 𑀅𑀯𑀬𑀯𑀲𑁆𑀲 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑁂𑀦 𑀆𑀥𑀸𑀭𑀪𑀸𑀯𑁂𑀦 𑀯𑀼𑀘𑁆𑀘𑀢𑀺 𑀬𑀣𑀸 ‘‘𑀭𑀼𑀓𑁆𑀔𑁂 𑀲𑀸𑀔𑀸’’𑀢𑀺. 𑀏𑀢𑁆𑀣 𑀘 𑀥𑀫𑁆𑀫𑀸𑀤𑀻𑀦𑀁 𑀤𑀼𑀓𑁆𑀔𑁄𑀕𑀸𑀳𑀪𑀸𑀯𑀢𑁄 𑀢𑁂𑀳𑀺 𑀥𑀫𑁆𑀫𑀸𑀤𑀻𑀳𑀺 𑀯𑀺𑀦𑀬𑀸𑀤𑀬𑁄 𑀕𑀫𑁆𑀪𑀻𑀭𑀸𑀢𑀺 𑀯𑀺𑀦𑀬𑀸𑀤𑀻𑀦𑀫𑁆𑀧𑀺 𑀘𑀢𑀼𑀩𑁆𑀩𑀺𑀥𑁄 𑀕𑀫𑁆𑀪𑀻𑀭𑀪𑀸𑀯𑁄 ¶ 𑀯𑀼𑀢𑁆𑀢𑁄𑀬𑁂𑀯, 𑀢𑀲𑁆𑀫𑀸 𑀥𑀫𑁆𑀫𑀸𑀤𑀬𑁄 𑀏𑀯 𑀤𑀼𑀓𑁆𑀔𑁄𑀕𑀸𑀳𑀢𑁆𑀢𑀸 𑀕𑀫𑁆𑀪𑀻𑀭𑀸, 𑀦 𑀯𑀺𑀦𑀬𑀸𑀤𑀬𑁄𑀢𑀺 𑀦 𑀘𑁄𑀤𑁂𑀢𑀩𑁆𑀩𑀫𑁂𑀢𑀁 𑀲𑀫𑀼𑀔𑁂𑀦, 𑀯𑀺𑀲𑀬𑀯𑀺𑀲𑀬𑀻𑀫𑀼𑀔𑁂𑀦 𑀘 𑀯𑀺𑀦𑀬𑀸𑀤𑀻𑀦𑀜𑁆𑀜𑁂𑀯 𑀕𑀫𑁆𑀪𑀻𑀭𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀥𑀫𑁆𑀫𑁄 𑀳𑀺 𑀯𑀺𑀦𑀬𑀸𑀤𑀬𑁄 𑀏𑀯 𑀅𑀪𑀺𑀦𑁆𑀦𑀢𑁆𑀢𑀸. 𑀢𑁂𑀲𑀁 𑀯𑀺𑀲𑀬𑁄 𑀅𑀢𑁆𑀣𑁄 𑀯𑀸𑀘𑀓𑀪𑀽𑀢𑀸𑀦𑀁 𑀢𑁂𑀲𑀫𑁂𑀯 𑀯𑀸𑀘𑁆𑀘𑀪𑀸𑀯𑀢𑁄, 𑀯𑀺𑀲𑀬𑀺𑀦𑁄 𑀤𑁂𑀲𑀦𑀸𑀧𑀝𑀺𑀯𑁂𑀥𑀸 ¶ 𑀥𑀫𑁆𑀫𑀢𑁆𑀣𑀯𑀺𑀲𑀬𑀪𑀸𑀯𑀢𑁄𑀢𑀺. 𑀢𑀢𑁆𑀣 𑀧𑀝𑀺𑀯𑁂𑀥𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄 𑀥𑀫𑁆𑀫𑀢𑁆𑀣𑀸𑀦𑀁, 𑀤𑁂𑀲𑀦𑀸𑀜𑀸𑀡𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄 𑀤𑁂𑀲𑀦𑀸𑀬 𑀘 𑀤𑀼𑀓𑁆𑀔𑁄𑀕𑀸𑀳𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀧𑀝𑀺𑀯𑁂𑀥𑀲𑁆𑀲 𑀧𑀦 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸, 𑀢𑀩𑁆𑀩𑀺𑀲𑀬𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀘 𑀤𑀼𑀓𑁆𑀓𑀭𑀪𑀸𑀯𑀢𑁄 𑀤𑀼𑀓𑁆𑀔𑁄𑀕𑀸𑀳𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀦𑀁 𑀕𑀫𑁆𑀪𑀻𑀭𑀪𑀸𑀯𑀢𑁄 𑀢𑀩𑁆𑀩𑀺𑀲𑀬𑁄 𑀧𑀝𑀺𑀯𑁂𑀥𑁄𑀧𑀺 𑀕𑀫𑁆𑀪𑀻𑀭𑁄 𑀬𑀣𑀸 𑀢𑀁 𑀕𑀫𑁆𑀪𑀻𑀭𑀲𑁆𑀲 𑀉𑀤𑀓𑀲𑁆𑀲 𑀧𑀫𑀸𑀡𑀕𑁆𑀕𑀳𑀡𑁂 𑀤𑀻𑀖𑁂𑀦 𑀧𑀫𑀸𑀡𑁂𑀦 𑀪𑀯𑀺𑀢𑀩𑁆𑀩𑀁, 𑀏𑀯𑀁𑀲𑀫𑁆𑀧𑀤𑀫𑀺𑀤𑀦𑁆𑀢𑀺 (𑀯𑀚𑀺𑀭. 𑀝𑀻. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀯𑀚𑀺𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑁄. 𑀧𑀺𑀝𑀓𑀸𑀯𑀬𑀯𑀸𑀦𑀁 𑀥𑀫𑁆𑀫𑀸𑀤𑀻𑀦𑀁 𑀯𑀼𑀘𑁆𑀘𑀫𑀸𑀦𑁄 𑀕𑀫𑁆𑀪𑀻𑀭𑀪𑀸𑀯𑁄 𑀢𑀁𑀲𑀫𑀼𑀤𑀸𑀬𑀲𑁆𑀲 𑀧𑀺𑀝𑀓𑀲𑁆𑀲𑀸𑀧𑀺 𑀯𑀼𑀢𑁆𑀢𑁄𑀬𑁂𑀯, 𑀢𑀲𑁆𑀫𑀸 𑀢𑀣𑀸 𑀦 𑀘𑁄𑀤𑁂𑀢𑀩𑁆𑀩𑀦𑁆𑀢𑀺𑀧𑀺 𑀯𑀤𑀦𑁆𑀢𑀺, 𑀯𑀺𑀘𑀸𑀭𑁂𑀢𑀩𑁆𑀩𑀫𑁂𑀢𑀁 𑀲𑀩𑁆𑀩𑁂𑀲𑀫𑁆𑀧𑀺 𑀢𑁂𑀲𑀁 𑀧𑀺𑀝𑀓𑀸𑀯𑀬𑀯𑀸𑀲𑀫𑁆𑀪𑀯𑀢𑁄. 𑀫𑀳𑀸𑀲𑀫𑀼𑀤𑁆𑀤𑁄 𑀤𑀼𑀓𑁆𑀔𑁄𑀕𑀸𑀳𑁄, 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑁄 𑀯𑀺𑀬 𑀘𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀢𑁆𑀣𑀯𑀲𑀸 𑀳𑀺 𑀯𑀺𑀪𑀢𑁆𑀢𑀺𑀯𑀘𑀦𑀮𑀺𑀗𑁆𑀕𑀧𑀭𑀺𑀡𑀸𑀫𑁄𑀢𑀺. 𑀤𑀼𑀓𑁆𑀔𑁂𑀦 𑀑𑀕𑀬𑁆𑀳𑀦𑁆𑀢𑀺, 𑀤𑀼𑀓𑁆𑀔𑁄 𑀯𑀸 𑀑𑀕𑀸𑀳𑁄 𑀅𑀦𑁆𑀢𑁄 𑀧𑀯𑀺𑀲𑀦𑀫𑁂𑀢𑁂𑀲𑀽𑀢𑀺 𑀤𑀼𑀓𑁆𑀔𑁄𑀕𑀸𑀳𑀸. 𑀦 𑀮𑀪𑀺𑀢𑀩𑁆𑀩𑁄𑀢𑀺 𑀅𑀮𑀩𑁆𑀪𑀦𑀻𑀬𑁄, 𑀲𑁄𑀬𑁂𑀯 𑀅𑀮𑀩𑁆𑀪𑀦𑁂𑀬𑁆𑀬𑁄, 𑀮𑀪𑀻𑀬𑀢𑁂 𑀯𑀸 𑀮𑀩𑁆𑀪𑀦𑀁, 𑀢𑀁 𑀦𑀸𑀭𑀳𑀢𑀻𑀢𑀺 𑀅𑀮𑀩𑁆𑀪𑀦𑁂𑀬𑁆𑀬𑁄. 𑀧𑀢𑀺𑀝𑁆𑀞𑀳𑀦𑁆𑀢𑀺 𑀏𑀢𑁆𑀣 𑀑𑀓𑀸𑀲𑁂𑀢𑀺 𑀧𑀢𑀺𑀝𑁆𑀞𑁄, 𑀧𑀢𑀺𑀝𑁆𑀞𑀳𑀦𑀁 𑀯𑀸 𑀧𑀢𑀺𑀝𑁆𑀞𑁄, 𑀅𑀮𑀩𑁆𑀪𑀦𑁂𑀬𑁆𑀬𑁄 𑀲𑁄 𑀬𑁂𑀲𑀼 𑀢𑁂 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀸. 𑀏𑀓𑀤𑁂𑀲𑁂𑀦 𑀑𑀕𑀸𑀳𑀦𑁆𑀢𑁂𑀳𑀺𑀧𑀺 𑀫𑀦𑁆𑀤𑀩𑀼𑀤𑁆𑀥𑀻𑀳𑀺 𑀧𑀢𑀺𑀝𑁆𑀞𑀸 𑀮𑀤𑁆𑀥𑀼𑀁 𑀦 𑀲𑀓𑁆𑀓𑀸𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 𑀏𑀢𑀁 𑀧𑀼𑀦 𑀯𑀼𑀢𑁆𑀢𑀁. ‘‘𑀏𑀯’’𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁.

𑀇𑀤𑀸𑀦𑀺 𑀳𑁂𑀢𑀼𑀳𑁂𑀢𑀼𑀨𑀮𑀸𑀤𑀻𑀦𑀫𑁆𑀧𑀺 𑀯𑀲𑁂𑀦 𑀕𑀫𑁆𑀪𑀻𑀭𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀭𑁄 𑀦𑀬𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑁂𑀢𑀽𑀢𑀺 𑀧𑀘𑁆𑀘𑀬𑁄. 𑀲𑁄 𑀘 𑀅𑀢𑁆𑀢𑀦𑁄 𑀨𑀮𑀁 𑀤𑀳𑀢𑀺 𑀯𑀺𑀤𑀳𑀢𑀻𑀢𑀺 𑀥𑀫𑁆𑀫𑁄 𑀤-𑀓𑀸𑀭𑀲𑁆𑀲 𑀥-𑀓𑀸𑀭𑀁 𑀓𑀢𑁆𑀯𑀸. 𑀥𑀫𑁆𑀫𑀲𑀤𑁆𑀤𑀲𑁆𑀲 𑀘𑁂𑀢𑁆𑀣 𑀳𑁂𑀢𑀼𑀧𑀭𑀺𑀬𑀸𑀬𑀢𑀸 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺. 𑀯𑀼𑀢𑁆𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑁂 (𑀯𑀺𑀪. 𑁭𑁧𑁮). 𑀦𑀦𑀼 𑀘 ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀏𑀢𑁂𑀦 𑀯𑀘𑀦𑁂𑀦 𑀥𑀫𑁆𑀫𑀲𑁆𑀲 𑀳𑁂𑀢𑀼𑀪𑀸𑀯𑁄 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺? ‘‘𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀏𑀢𑀲𑁆𑀲 𑀲𑀫𑀸𑀲𑀧𑀤𑀲𑁆𑀲 𑀅𑀯𑀬𑀯𑀧𑀤𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀳𑁂𑀢𑀼𑀫𑁆𑀳𑀺 𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸. ‘‘𑀥𑀫𑁆𑀫𑁂 𑀧𑀝𑀺𑀲𑀫𑁆𑀪𑀺𑀤𑀸 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀏𑀢𑁆𑀣 𑀳𑀺 ‘‘𑀥𑀫𑁆𑀫𑁂’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀳𑁂𑀢𑀼𑀫𑁆𑀳𑀻’’𑀢𑀺 𑀯𑀼𑀢𑁆𑀢𑀁, ‘‘𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀜𑀸𑀡’’𑀦𑁆𑀢𑀺. 𑀢𑀲𑁆𑀫𑀸 𑀳𑁂𑀢𑀼𑀥𑀫𑁆𑀫𑀲𑀤𑁆𑀤𑀸 𑀏𑀓𑀢𑁆𑀣𑀸, 𑀜𑀸𑀡𑀧𑀝𑀺𑀲𑀫𑁆𑀪𑀺𑀤𑀸 𑀲𑀤𑁆𑀤𑀸 𑀘𑀸𑀢𑀺 𑀇𑀫𑀫𑀢𑁆𑀣𑀁 𑀯𑀤𑀦𑁆𑀢𑁂𑀦 𑀲𑀸𑀥𑀺𑀢𑁄 𑀥𑀫𑁆𑀫𑀲𑁆𑀲 𑀳𑁂𑀢𑀼𑀪𑀸𑀯𑁄𑀢𑀺. 𑀢𑀣𑀸 ‘‘𑀳𑁂𑀢𑀼𑀨𑀮𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 𑀏𑀢𑁂𑀦 𑀯𑀘𑀦𑁂𑀦 𑀲𑀸𑀥𑀺𑀢𑁄 𑀅𑀢𑁆𑀣𑀲𑁆𑀲 𑀳𑁂𑀢𑀼𑀨𑀮𑀪𑀸𑀯𑁄𑀢𑀺 ¶ 𑀤𑀝𑁆𑀞𑀩𑁆𑀩𑁄. 𑀳𑁂𑀢𑀼𑀦𑁄 𑀨𑀮𑀁 𑀳𑁂𑀢𑀼𑀨𑀮𑀁, 𑀢𑀜𑁆𑀘 𑀳𑁂𑀢𑀼𑀅𑀦𑀼𑀲𑀸𑀭𑁂𑀦 𑀅𑀭𑀻𑀬𑀢𑀺 𑀅𑀥𑀺𑀕𑀫𑀻𑀬𑀢𑀻𑀢𑀺 𑀅𑀢𑁆𑀣𑁄𑀢𑀺 𑀯𑀼𑀘𑁆𑀘𑀢𑀺.

𑀤𑁂𑀲𑀦𑀸𑀢𑀺 ¶ 𑀧𑀜𑁆𑀜𑀢𑁆𑀢𑀻𑀢𑀺 𑀏𑀢𑁆𑀣 𑀲𑀤𑁆𑀤𑀯𑀸𑀤𑀻𑀦𑀁 𑀯𑀸𑀤𑁂 𑀅𑀢𑁆𑀣𑀩𑁆𑀬𑀜𑁆𑀚𑀦𑀓𑀸 𑀅𑀯𑀺𑀧𑀭𑀻𑀢𑀸𑀪𑀺𑀮𑀸𑀧𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀪𑀽𑀢𑀸 𑀧𑀭𑀫𑀢𑁆𑀣𑀲𑀤𑁆𑀤𑀧𑁆𑀧𑀩𑀦𑁆𑀥𑀲𑀗𑁆𑀔𑀸𑀢𑀸 𑀢𑀦𑁆𑀢𑀺 ‘‘𑀤𑁂𑀲𑀦𑀸’’𑀢𑀺 𑀯𑀼𑀘𑁆𑀘𑀢𑀺, 𑀤𑁂𑀲𑀦𑀸 𑀦𑀸𑀫𑀸𑀢𑀺 𑀯𑀸 𑀅𑀢𑁆𑀣𑁄. 𑀤𑁂𑀲𑀻𑀬𑀢𑀺 𑀅𑀢𑁆𑀣𑁄 𑀏𑀢𑀸𑀬𑀸𑀢𑀺 𑀳𑀺 𑀤𑁂𑀲𑀦𑀸. 𑀧𑀓𑀸𑀭𑁂𑀦 𑀜𑀸𑀧𑀻𑀬𑀢𑀺 𑀅𑀢𑁆𑀣𑁄 𑀏𑀢𑀸𑀬, 𑀧𑀓𑀸𑀭𑀢𑁄 𑀯𑀸 𑀜𑀸𑀧𑁂𑀢𑀻𑀢𑀺 𑀧𑀜𑁆𑀜𑀢𑁆𑀢𑀺. 𑀢𑀫𑁂𑀯 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸𑀥𑀫𑁆𑀫𑀁 𑀥𑀫𑁆𑀫𑀸𑀪𑀺𑀮𑀸𑀧𑁄𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀯𑀼𑀢𑁆𑀢𑀁. 𑀬𑀣𑀸𑀥𑀫𑁆𑀫𑀦𑁆𑀢𑀺 𑀏𑀢𑁆𑀣 𑀧𑀦 𑀥𑀫𑁆𑀫𑀲𑀤𑁆𑀤𑁄 𑀳𑁂𑀢𑀼𑀁, 𑀳𑁂𑀢𑀼𑀨𑀮𑀜𑁆𑀘 𑀲𑀩𑁆𑀩𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀪𑀸𑀯𑀯𑀸𑀘𑀓𑁄 𑀳𑁂𑀲 𑀥𑀫𑁆𑀫𑀲𑀤𑁆𑀤𑁄, 𑀦 𑀧𑀭𑀺𑀬𑀢𑁆𑀢𑀺𑀳𑁂𑀢𑀼𑀆𑀤𑀺𑀯𑀸𑀘𑀓𑁄, 𑀢𑀲𑁆𑀫𑀸 𑀬𑁄 𑀬𑁄 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀺𑀥𑀫𑁆𑀫𑁄, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀲𑀁 𑀢𑁂𑀲𑀁 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀺𑀥𑀫𑁆𑀫𑀸𑀦𑀁 𑀅𑀦𑀼𑀭𑀽𑀧𑀁 𑀯𑀸 𑀬𑀣𑀸𑀥𑀫𑁆𑀫𑀁. 𑀤𑁂𑀲𑀦𑀸𑀧𑀺 𑀳𑀺 𑀧𑀝𑀺𑀯𑁂𑀥𑁄 𑀯𑀺𑀬 𑀅𑀯𑀺𑀧𑀭𑀻𑀢𑀲𑀯𑀺𑀲𑀬𑀯𑀺𑀪𑀸𑀯𑀦𑀢𑁄 𑀥𑀫𑁆𑀫𑀸𑀦𑀼𑀭𑀽𑀧𑀁 𑀧𑀯𑀢𑁆𑀢𑀢𑀺, 𑀢𑀢𑁄𑀬𑁂𑀯 𑀘 𑀅𑀯𑀺𑀧𑀭𑀻𑀢𑀸𑀪𑀺𑀮𑀸𑀧𑁄𑀢𑀺 𑀯𑀼𑀘𑁆𑀘𑀢𑀺. 𑀥𑀫𑁆𑀫𑀸𑀪𑀺𑀮𑀸𑀧𑁄𑀢𑀺 𑀳𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀓𑁄 𑀅𑀯𑀺𑀧𑀭𑀻𑀢𑀸𑀪𑀺𑀮𑀸𑀧𑁄 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀪𑀽𑀢𑁄 𑀢𑀦𑁆𑀢𑀺𑀲𑀗𑁆𑀔𑀸𑀢𑁄 𑀧𑀭𑀫𑀢𑁆𑀣𑀲𑀤𑁆𑀤𑀧𑁆𑀧𑀩𑀦𑁆𑀥𑁄. 𑀲𑁄 𑀳𑀺 𑀅𑀪𑀺𑀮𑀧𑁆𑀧𑀢𑀺 𑀉𑀘𑁆𑀘𑀸𑀭𑀻𑀬𑀢𑀻𑀢𑀺 𑀅𑀪𑀺𑀮𑀸𑀧𑁄, 𑀥𑀫𑁆𑀫𑁄 𑀅𑀯𑀺𑀧𑀭𑀻𑀢𑁄 𑀲𑀪𑀸𑀯𑀪𑀽𑀢𑁄 𑀅𑀪𑀺𑀮𑀸𑀧𑁄 𑀥𑀫𑁆𑀫𑀸𑀪𑀺𑀮𑀸𑀧𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀢𑁂𑀦 ‘‘𑀢𑀢𑁆𑀭 𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺 (𑀯𑀺𑀪. 𑁭𑁧𑁮) 𑀏𑀢𑁆𑀣 𑀯𑀼𑀢𑁆𑀢𑀁 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 𑀲𑀤𑁆𑀤𑀲𑀪𑀸𑀯𑀢𑁆𑀢𑀸 𑀤𑁂𑀲𑀦𑀸𑀬. 𑀢𑀣𑀸 𑀳𑀺 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀬 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀪𑀸𑀯𑁄 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑀧𑀸𑀴𑀺𑀬𑀁 (𑀯𑀺𑀪. 𑁭𑁧𑁮) 𑀯𑀼𑀢𑁆𑀢𑁄. 𑀢𑀤𑀝𑁆𑀞𑀓𑀣𑀸𑀬 𑀘 ‘‘𑀢𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀁 𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑀅𑀝𑁆𑀞. 𑁭𑁧𑁮) 𑀢𑀲𑁆𑀲𑀸 𑀲𑀤𑁆𑀤𑀸𑀭𑀫𑁆𑀫𑀡𑀢𑀸 𑀤𑀲𑁆𑀲𑀺𑀢𑀸. ‘‘𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀅𑀬𑀁 𑀲𑀤𑁆𑀤𑁄 𑀯𑀸𑀘𑀓𑁄’’𑀢𑀺 𑀳𑀺 𑀯𑀘𑀦𑀯𑀘𑀦𑀢𑁆𑀣𑁂 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑀁 𑀢𑀁 𑀯𑀘𑀦𑀢𑁆𑀣𑀯𑀺𑀪𑀸𑀯𑀦𑀯𑀲𑁂𑀦 𑀧𑀯𑀢𑁆𑀢𑀺𑀢𑁄 𑀲𑀤𑁆𑀤𑁄 ‘‘𑀤𑁂𑀲𑀦𑀸’’𑀢𑀺 𑀯𑀼𑀘𑁆𑀘𑀢𑀺. ‘‘𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀏𑀢𑁂𑀦 ‘‘𑀤𑁂𑀲𑀦𑀸𑀢𑀺 𑀧𑀜𑁆𑀜𑀢𑁆𑀢𑀻’’𑀢𑀺 𑀏𑀢𑀁 𑀯𑀘𑀦𑀁 𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀢𑀢𑁄 𑀯𑀺𑀦𑀺𑀫𑀼𑀢𑁆𑀢𑀁 𑀧𑀜𑁆𑀜𑀢𑁆𑀢𑀺𑀁 𑀲𑀦𑁆𑀥𑀸𑀬𑀸𑀢𑀺 𑀤𑀲𑁆𑀲𑁂𑀢𑀺 𑀅𑀦𑁂𑀓𑀥𑀸 𑀅𑀢𑁆𑀣𑀲𑀫𑁆𑀪𑀯𑁂 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀬𑀁 𑀲𑀤𑁆𑀤𑀯𑀸𑀤𑀻𑀦𑀁 𑀯𑀸𑀤𑀢𑁄 𑀯𑀺𑀦𑀺𑀘𑁆𑀙𑀬𑁄.

𑀧𑀜𑁆𑀜𑀢𑁆𑀢𑀺𑀯𑀸𑀤𑀻𑀦𑀁 𑀯𑀸𑀤𑁂 𑀧𑀦 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀪𑁂𑀤𑀲𑁆𑀲 𑀅𑀢𑁆𑀣𑀲𑁆𑀲𑀸𑀦𑀼𑀭𑀽𑀧𑀯𑀸𑀘𑀓𑀪𑀸𑀯𑁂𑀦 𑀧𑀭𑀫𑀢𑁆𑀣𑀲𑀤𑁆𑀤𑁂𑀲𑀼 𑀪𑀕𑀯𑀢𑀸 𑀫𑀦𑀲𑀸 𑀯𑀯𑀢𑁆𑀣𑀸𑀧𑀺𑀢𑀸 𑀢𑀦𑁆𑀢𑀺𑀲𑀗𑁆𑀔𑀸𑀢𑀸 𑀦𑀸𑀫𑀧𑀜𑁆𑀜𑀢𑁆𑀢𑀺 𑀤𑁂𑀲𑀦𑀸 𑀦𑀸𑀫, ‘‘𑀤𑁂𑀲𑀦𑀸’’𑀢𑀺 𑀯𑀸 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀢𑀤𑁂𑀯 𑀫𑀽𑀮𑀓𑀸𑀭𑀡𑀪𑀽𑀢𑀲𑁆𑀲 ¶ 𑀲𑀤𑁆𑀤𑀲𑁆𑀲 𑀤𑀲𑁆𑀲𑀦𑀯𑀲𑁂𑀦 𑀓𑀸𑀭𑀡𑀽𑀧𑀘𑀸𑀭𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸𑀥𑀫𑁆𑀫𑀁 𑀥𑀫𑁆𑀫𑀸𑀪𑀺𑀮𑀸𑀧𑁄𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀳𑀺 ‘‘𑀥𑀫𑁆𑀫𑀸𑀪𑀺𑀮𑀸𑀧𑁄’’𑀢𑀺 𑀏𑀢𑁆𑀣 𑀅𑀪𑀺𑀮𑀧𑁆𑀧𑀢𑀺 𑀉𑀘𑁆𑀘𑀸𑀭𑀻𑀬𑀢𑀻𑀢𑀺 𑀅𑀪𑀺𑀮𑀸𑀧𑁄𑀢𑀺 𑀲𑀤𑁆𑀤𑁄 𑀯𑀼𑀘𑁆𑀘𑀢𑀺, 𑀦 𑀧𑀡𑁆𑀡𑀢𑁆𑀢𑀺, 𑀢𑀣𑀸𑀧𑀺 𑀲𑀤𑁆𑀤𑁂 𑀯𑀼𑀘𑁆𑀘𑀫𑀸𑀦𑁂 𑀢𑀤𑀦𑀼𑀭𑀽𑀧𑀁 𑀯𑁄𑀳𑀸𑀭𑀁 𑀕𑀳𑁂𑀢𑁆𑀯𑀸 𑀢𑁂𑀦 𑀯𑁄𑀳𑀸𑀭𑁂𑀦 𑀤𑀻𑀧𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀚𑀸𑀦𑀦𑀢𑁄 𑀲𑀤𑁆𑀤𑁂 𑀓𑀣𑀺𑀢𑁂 𑀢𑀤𑀦𑀼𑀭𑀽𑀧𑀸 𑀧𑀡𑁆𑀡𑀢𑁆𑀢𑀺𑀧𑀺 𑀓𑀸𑀭𑀡𑀽𑀧𑀘𑀸𑀭𑁂𑀦 𑀓𑀣𑀺𑀢𑀸𑀬𑁂𑀯 𑀳𑁄𑀢𑀺. 𑀅𑀧𑀺𑀘 ‘‘𑀥𑀫𑁆𑀫𑀸𑀪𑀺𑀮𑀸𑀧𑁄𑀢𑀺 𑀅𑀢𑁆𑀣𑁄’’𑀢𑀺 𑀅𑀯𑀢𑁆𑀯𑀸 ‘‘𑀥𑀫𑁆𑀫𑀸𑀪𑀺𑀮𑀸𑀧𑁄𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀤𑁂𑀲𑀦𑀸 𑀦𑀸𑀫 𑀲𑀤𑁆𑀤𑁄 𑀦 𑀳𑁄𑀢𑀻𑀢𑀺 𑀤𑀻𑀧𑀺𑀢𑀫𑁂𑀯. 𑀢𑁂𑀦 𑀳𑀺 𑀅𑀥𑀺𑀧𑁆𑀧𑀸𑀬𑀫𑀢𑁆𑀢𑀫𑁂𑀯 𑀫𑀽𑀮𑀓𑀸𑀭𑀡𑀲𑀤𑁆𑀤𑀯𑀲𑁂𑀦 𑀓𑀣𑀺𑀢𑀁, 𑀦 𑀇𑀥 𑀕𑀳𑁂𑀢𑀩𑁆𑀩𑁄 ‘‘𑀤𑁂𑀲𑀦𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑁄𑀢𑀺 ¶ 𑀅𑀬𑀁 𑀧𑀜𑁆𑀜𑀢𑁆𑀢𑀺𑀯𑀸𑀤𑀻𑀦𑀁 𑀯𑀸𑀤𑀢𑁄 𑀯𑀺𑀦𑀺𑀘𑁆𑀙𑀬𑁄. 𑀅𑀢𑁆𑀣𑀦𑁆𑀢𑀭𑀫𑀸𑀳 ‘‘𑀅𑀦𑀼𑀮𑁄𑀫…𑀧𑁂… 𑀓𑀣𑀦’’𑀦𑁆𑀢𑀺, 𑀏𑀢𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀤𑁂𑀲𑀦𑀸𑀲𑀫𑀼𑀝𑁆𑀞𑀸𑀧𑀓𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀁 𑀤𑀲𑁆𑀲𑁂𑀢𑀺. 𑀓𑀣𑀻𑀬𑀢𑀺 𑀅𑀢𑁆𑀣𑁄 𑀏𑀢𑁂𑀦𑀸𑀢𑀺 𑀳𑀺 𑀓𑀣𑀦𑀁. 𑀆𑀤𑀺𑀲𑀤𑁆𑀤𑁂𑀦 𑀦𑀻𑀢𑀦𑁂𑀬𑁆𑀬𑀸𑀤𑀺𑀓𑀸 𑀧𑀸𑀴𑀺𑀕𑀢𑀺𑀬𑁄, 𑀏𑀓𑀢𑁆𑀢𑀸𑀤𑀺𑀦𑀦𑁆𑀤𑀺𑀬𑀸𑀯𑀢𑁆𑀢𑀸𑀤𑀺𑀓𑀸 𑀧𑀸𑀴𑀺𑀦𑀺𑀲𑁆𑀲𑀺𑀢𑀸 𑀘 𑀦𑀬𑀸 𑀲𑀗𑁆𑀕𑀳𑀺𑀢𑀸.

𑀲𑀬𑀫𑁂𑀯 𑀧𑀝𑀺𑀯𑀺𑀚𑁆𑀛𑀢𑀺, 𑀏𑀢𑁂𑀦 𑀯𑀸 𑀧𑀝𑀺𑀯𑀺𑀚𑁆𑀛𑀦𑁆𑀢𑀻𑀢𑀺 𑀧𑀝𑀺𑀯𑁂𑀥𑁄, 𑀜𑀸𑀡𑀁. 𑀢𑀤𑁂𑀯 𑀅𑀪𑀺𑀲𑀫𑁂𑀢𑀺, 𑀏𑀢𑁂𑀦 𑀯𑀸 𑀅𑀪𑀺𑀲𑀫𑁂𑀦𑁆𑀢𑀻𑀢𑀺 𑀅𑀪𑀺𑀲𑀫𑀬𑁄𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀇𑀤𑀸𑀦𑀺 𑀢𑀁 𑀧𑀝𑀺𑀯𑁂𑀥𑀁 𑀅𑀪𑀺𑀲𑀫𑀬𑀧𑁆𑀧𑀪𑁂𑀤𑀢𑁄, 𑀅𑀪𑀺𑀲𑀫𑀬𑀸𑀓𑀸𑀭𑀢𑁄, 𑀆𑀭𑀫𑁆𑀫𑀡𑀢𑁄, 𑀲𑀪𑀸𑀯𑀢𑁄 𑀘 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀲𑁄 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁄𑀢𑀺 𑀧𑀪𑁂𑀤𑀢𑁄, 𑀯𑀺𑀲𑀬𑀢𑁄, 𑀅𑀲𑀫𑁆𑀫𑁄𑀳𑀢𑁄𑀢𑀺 𑀆𑀓𑀸𑀭𑀢𑁄, 𑀥𑀫𑁆𑀫𑁂𑀲𑀼, 𑀅𑀢𑁆𑀣𑁂𑀲𑀼, 𑀧𑀜𑁆𑀜𑀢𑁆𑀢𑀻𑀲𑀽𑀢𑀺 𑀆𑀭𑀫𑁆𑀫𑀡𑀢𑁄, 𑀅𑀢𑁆𑀣𑀸𑀦𑀼𑀭𑀽𑀧𑀁, 𑀥𑀫𑁆𑀫𑀸𑀦𑀼𑀭𑀽𑀧𑀁, 𑀧𑀜𑁆𑀜𑀢𑁆𑀢𑀺𑀧𑀣𑀸𑀦𑀼𑀭𑀽𑀧𑀦𑁆𑀢𑀺 𑀲𑀪𑀸𑀯𑀢𑁄 𑀘 𑀧𑀸𑀓𑀝𑀁 𑀓𑀭𑁄𑀢𑀺. 𑀢𑀢𑁆𑀣 𑀯𑀺𑀲𑀬𑀢𑁄 𑀅𑀢𑁆𑀣𑀸𑀤𑀺𑀅𑀦𑀼𑀭𑀽𑀧𑀁 𑀥𑀫𑁆𑀫𑀸𑀤𑀻𑀲𑀼 𑀅𑀯𑀩𑁄𑀥𑁄 𑀦𑀸𑀫 𑀅𑀯𑀺𑀚𑁆𑀚𑀸𑀤𑀺𑀥𑀫𑁆𑀫𑀸𑀭𑀫𑁆𑀫𑀡𑁄, 𑀲𑀗𑁆𑀔𑀸𑀭𑀸𑀤𑀺𑀅𑀢𑁆𑀣𑀸𑀭𑀫𑁆𑀫𑀡𑁄, 𑀢𑀤𑀼𑀪𑀬𑀧𑀜𑁆𑀜𑀸𑀧𑀦𑀸𑀭𑀫𑁆𑀫𑀡𑁄 𑀘 𑀮𑁄𑀓𑀺𑀬𑁄 𑀅𑀪𑀺𑀲𑀫𑀬𑁄. 𑀅𑀲𑀫𑁆𑀫𑁄𑀳𑀢𑁄 𑀅𑀢𑁆𑀣𑀸𑀤𑀺𑀅𑀦𑀼𑀭𑀽𑀧𑀁 𑀥𑀫𑁆𑀫𑀸𑀤𑀻𑀲𑀼 𑀅𑀯𑀩𑁄𑀥𑁄 𑀦𑀸𑀫 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁄 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑁄 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀢𑁆𑀣𑀧𑀜𑁆𑀜𑀢𑁆𑀢𑀻𑀲𑀼 𑀲𑀫𑁆𑀫𑁄𑀳𑀯𑀺𑀤𑁆𑀥𑀁𑀲𑀦𑁄 𑀮𑁄𑀓𑀼𑀢𑁆𑀢𑀭𑁄 𑀅𑀪𑀺𑀲𑀫𑀬𑁄. 𑀢𑀣𑀸 𑀳𑀺 ‘‘𑀅𑀬𑀁 𑀳𑁂𑀢𑀼, 𑀇𑀤𑀫𑀲𑁆𑀲 𑀨𑀮𑀁, 𑀅𑀬𑀁 𑀢𑀤𑀼𑀪𑀬𑀸𑀦𑀼𑀭𑀽𑀧𑁄 𑀯𑁄𑀳𑀸𑀭𑁄’’𑀢𑀺 𑀏𑀯𑀁 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀮𑁄𑀓𑀺𑀬𑀜𑀸𑀡𑀁 𑀯𑀺𑀲𑀬𑀢𑁄 𑀧𑀝𑀺𑀯𑀺𑀚𑁆𑀛𑀢𑀺, 𑀮𑁄𑀓𑀼𑀢𑁆𑀢𑀭𑀜𑀸𑀡𑀁 𑀧𑀦 𑀢𑁂𑀲𑀼 𑀳𑁂𑀢𑀼𑀳𑁂𑀢𑀼𑀨𑀮𑀸𑀤𑀻𑀲𑀼 𑀲𑀫𑁆𑀫𑁄𑀳𑀲𑁆𑀲𑀜𑀸𑀡𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀅𑀲𑀫𑁆𑀫𑁄𑀳𑀢𑁄 𑀧𑀝𑀺𑀯𑀺𑀚𑁆𑀛𑀢𑀺. 𑀮𑁄𑀓𑀼𑀢𑁆𑀢𑀭𑁄 𑀧𑀦 𑀧𑀝𑀺𑀯𑁂𑀥𑁄 ¶ 𑀯𑀺𑀲𑀬𑀢𑁄 𑀦𑀺𑀩𑁆𑀩𑀸𑀦𑀲𑁆𑀲, 𑀅𑀲𑀫𑁆𑀫𑁄𑀳𑀢𑁄 𑀘 𑀇𑀢𑀭𑀲𑁆𑀲𑀸𑀢𑀺𑀧𑀺 𑀯𑀤𑀦𑁆𑀢𑀺 𑀏𑀓𑁂.

𑀅𑀢𑁆𑀣𑀸𑀦𑀼𑀭𑀽𑀧𑀁 𑀥𑀫𑁆𑀫𑁂𑀲𑀽𑀢𑀺 ‘‘𑀅𑀯𑀺𑀚𑁆𑀚𑀸 𑀳𑁂𑀢𑀼, 𑀲𑀗𑁆𑀔𑀸𑀭𑀸 𑀳𑁂𑀢𑀼𑀲𑀫𑀼𑀧𑁆𑀧𑀦𑁆𑀦𑀸, 𑀲𑀗𑁆𑀔𑀸𑀭𑁂 𑀉𑀧𑁆𑀧𑀸𑀤𑁂𑀢𑀺 𑀅𑀯𑀺𑀚𑁆𑀚𑀸’’𑀢𑀺 𑀏𑀯𑀁 𑀓𑀸𑀭𑀺𑀬𑀸𑀦𑀼𑀭𑀽𑀧𑀁 𑀓𑀸𑀭𑀡𑁂𑀲𑀽𑀢𑀺 𑀅𑀢𑁆𑀣𑁄. 𑀅𑀣 𑀯𑀸 ‘‘𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁂𑀲𑀼 𑀢𑀻𑀲𑀼 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀅𑀯𑀺𑀚𑁆𑀚𑀸 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁄, 𑀇𑀢𑀭𑁂𑀲𑀁 𑀬𑀣𑀸𑀦𑀼𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀓𑀸𑀭𑀺𑀬𑀸𑀦𑀼𑀭𑀽𑀧𑀁 𑀓𑀸𑀭𑀡𑁂𑀲𑀼 𑀧𑀝𑀺𑀯𑁂𑀥𑁄𑀢𑀺𑀧𑀺 𑀅𑀢𑁆𑀣𑁄. 𑀥𑀫𑁆𑀫𑀸𑀦𑀼𑀭𑀽𑀧𑀁 𑀅𑀢𑁆𑀣𑁂𑀲𑀽𑀢𑀺 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁧𑁨𑁬; 𑀲𑀁. 𑀦𑀺. 𑁨.𑁧; 𑀉𑀤𑀸. 𑁧; 𑀯𑀺𑀪. 𑁨𑁨𑁫) 𑀓𑀸𑀭𑀡𑀸𑀦𑀼𑀭𑀽𑀧𑀁 𑀓𑀸𑀭𑀺𑀬𑁂𑀲𑀼. 𑀙𑀩𑁆𑀩𑀺𑀥𑀸𑀬 𑀧𑀜𑁆𑀜𑀢𑁆𑀢𑀺𑀬𑀸 𑀧𑀣𑁄 𑀧𑀜𑁆𑀜𑀢𑁆𑀢𑀺𑀧𑀣𑁄, 𑀢𑀲𑁆𑀲 𑀅𑀦𑀼𑀭𑀽𑀧𑀁 𑀢𑀣𑀸, 𑀧𑀜𑁆𑀜𑀢𑁆𑀢𑀺𑀬𑀸 𑀯𑀼𑀘𑁆𑀘𑀫𑀸𑀦𑀥𑀫𑁆𑀫𑀸𑀦𑀼𑀭𑀽𑀧𑀁 𑀧𑀜𑁆𑀜𑀢𑁆𑀢𑀻𑀲𑀼 𑀅𑀯𑀩𑁄𑀥𑁄𑀢𑀺 𑀅𑀢𑁆𑀣𑁄. 𑀅𑀪𑀺𑀲𑀫𑀬𑀢𑁄 𑀅𑀜𑁆𑀜𑀫𑁆𑀧𑀺 𑀧𑀝𑀺𑀯𑁂𑀥𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀲’’𑀦𑁆𑀢𑀺𑀆𑀤𑀺𑀫𑀸𑀳. 𑀧𑀝𑀺𑀯𑀺𑀚𑁆𑀛𑀻𑀬𑀢𑀻𑀢𑀺 𑀧𑀝𑀺𑀯𑁂𑀥𑁄𑀢𑀺 𑀳𑀺 𑀢𑀁𑀢𑀁𑀭𑀽𑀧𑀸𑀤𑀺𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑀲𑀪𑀸𑀯𑁄 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀺𑀝𑀓𑁂, 𑀧𑀸𑀴𑀺𑀧𑀤𑁂𑀲𑁂 𑀯𑀸. 𑀲𑀮𑀓𑁆𑀔𑀡𑀲𑀗𑁆𑀔𑀸𑀢𑁄𑀢𑀺 𑀭𑀼𑀧𑁆𑀧𑀦𑀦𑀫𑀦𑀨𑀼𑀲𑀦𑀸𑀤𑀺𑀲𑀓𑀲𑀓𑀮𑀓𑁆𑀔𑀡𑀲𑀗𑁆𑀔𑀸𑀢𑁄.

𑀬𑀣𑀸𑀯𑀼𑀢𑁆𑀢𑁂𑀳𑀺 ¶ 𑀥𑀫𑁆𑀫𑀸𑀤𑀻𑀳𑀺 𑀧𑀺𑀝𑀓𑀸𑀦𑀁 𑀕𑀫𑁆𑀪𑀻𑀭𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀥𑀫𑁆𑀫𑀚𑀸𑀢𑀦𑁆𑀢𑀺 𑀓𑀸𑀭𑀡𑀧𑁆𑀧𑀪𑁂𑀤𑁄, 𑀓𑀸𑀭𑀡𑀫𑁂𑀯 𑀯𑀸. 𑀅𑀢𑁆𑀣𑀚𑀸𑀢𑀦𑁆𑀢𑀺 𑀓𑀸𑀭𑀺𑀬𑀧𑁆𑀧𑀪𑁂𑀤𑁄, 𑀓𑀸𑀭𑀺𑀬𑀫𑁂𑀯 𑀯𑀸. 𑀬𑀸 𑀘𑀸𑀬𑀁 𑀤𑁂𑀲𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀤𑀢𑁆𑀣𑀯𑀺𑀚𑀸𑀦𑀦𑀯𑀲𑁂𑀦 𑀅𑀪𑀺𑀫𑀼𑀔𑁄 𑀳𑁄𑀢𑀺. 𑀬𑁄 𑀘𑁂𑀢𑁆𑀣𑀸𑀢𑀺 𑀬𑁄 𑀏𑀢𑀸𑀲𑀼 𑀢𑀁 𑀢𑀁 𑀧𑀺𑀝𑀓𑀸𑀕𑀢𑀸𑀲𑀼 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀲𑀼 𑀧𑀝𑀺𑀯𑁂𑀥𑁄, 𑀬𑁄 𑀘 𑀏𑀢𑁂𑀲𑀼 𑀧𑀺𑀝𑀓𑁂𑀲𑀼 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑀲𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀲𑀫𑁆𑀪𑀭𑀺𑀢𑀩𑁆𑀩𑀢𑁄 𑀓𑀼𑀲𑀮𑀫𑁂𑀯 𑀲𑀫𑁆𑀪𑀸𑀭𑁄, 𑀲𑁄 𑀲𑀫𑁆𑀫𑀸 𑀅𑀦𑀼𑀧𑀘𑀺𑀢𑁄 𑀬𑁂𑀳𑀺 𑀢𑁂 𑀅𑀦𑀼𑀧𑀘𑀺𑀢𑀓𑀼𑀲𑀮𑀲𑀫𑁆𑀪𑀸𑀭𑀸, 𑀢𑀢𑁄𑀯 𑀤𑀼𑀧𑁆𑀧𑀜𑁆𑀜𑁂𑀳𑀺, 𑀦𑀺𑀧𑁆𑀧𑀜𑁆𑀜𑁂𑀳𑀻𑀢𑀺 𑀅𑀢𑁆𑀣𑁄. 𑀦 𑀳𑀺 𑀧𑀜𑁆𑀜𑀯𑀢𑁄, 𑀧𑀜𑁆𑀜𑀸𑀬 𑀯𑀸 𑀤𑀼𑀝𑁆𑀞𑀼𑀪𑀸𑀯𑁄 𑀤𑀽𑀲𑀺𑀢𑀪𑀸𑀯𑁄 𑀘 𑀲𑀫𑁆𑀪𑀯𑀢𑀻𑀢𑀺 𑀦𑀺𑀧𑁆𑀧𑀜𑁆𑀜𑀢𑁆𑀢𑀸𑀬𑁂𑀯 𑀤𑀼𑀧𑁆𑀧𑀜𑁆𑀜𑀸 𑀬𑀣𑀸 ‘‘𑀤𑀼𑀲𑁆𑀲𑀻𑀮𑁄’’𑀢𑀺 (𑀅. 𑀦𑀺. 𑁫.𑁨𑁧𑁩; 𑁧𑁦.𑁭𑁫; 𑀧𑀸𑀭𑀸. 𑁨𑁯𑁫; 𑀥. 𑀧. 𑁩𑁦𑁮). 𑀏𑀢𑁆𑀣 𑀘 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀻𑀦𑀁 𑀥𑀫𑁆𑀫𑀢𑁆𑀣𑀸𑀦𑀁 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀢𑀸𑀬 𑀤𑀼𑀓𑁆𑀔𑁄𑀕𑀸𑀳𑀢𑀸, 𑀢𑁂𑀲𑀁 𑀧𑀜𑁆𑀜𑀸𑀧𑀦𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄 𑀢𑀁𑀤𑁂𑀲𑀦𑀸𑀬, 𑀅𑀪𑀺𑀲𑀫𑀬𑀲𑀗𑁆𑀔𑀸𑀢𑀲𑁆𑀲 𑀧𑀝𑀺𑀯𑁂𑀥𑀲𑁆𑀲 𑀉𑀧𑁆𑀧𑀸𑀤𑀦𑀯𑀺𑀲𑀬𑀻𑀓𑀭𑀡𑀸𑀦𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸, 𑀅𑀯𑀺𑀧𑀭𑀻𑀢𑀲𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀧𑀝𑀺𑀯𑁂𑀥𑀲𑁆𑀲 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀢𑀸𑀬 𑀤𑀼𑀓𑁆𑀔𑁄𑀕𑀸𑀳𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀧𑀼𑀩𑁆𑀩𑁂 ¶ 𑀯𑀼𑀢𑁆𑀢𑀁 𑀧𑀓𑀸𑀭𑀦𑁆𑀢𑀭𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀏𑀯𑀁 𑀧𑀞𑀫𑀕𑀸𑀣𑀸𑀬 𑀅𑀦𑀽𑀦𑀁 𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀤𑀻𑀧𑀺𑀢𑀢𑁆𑀣𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑁆𑀢𑀸𑀯𑀢𑀸’’𑀢𑀺𑀆𑀤𑀺𑀫𑀸𑀳. ‘‘𑀲𑀺𑀤𑁆𑀥𑁂 𑀳𑀺 𑀲𑀢𑁆𑀬𑀸𑀭𑀫𑁆𑀪𑁄 𑀅𑀢𑁆𑀣𑀦𑁆𑀢𑀭𑀯𑀺𑀜𑁆𑀜𑀸𑀧𑀦𑀸𑀬 𑀯𑀸 𑀳𑁄𑀢𑀺, 𑀦𑀺𑀬𑀫𑀸𑀬 𑀯𑀸’’𑀢𑀺 𑀇𑀫𑀺𑀦𑀸 𑀧𑀼𑀦𑀸𑀭𑀫𑁆𑀪𑀯𑀘𑀦𑁂𑀦 𑀅𑀦𑀽𑀦𑀁 𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀤𑀻𑀧𑀺𑀢𑀢𑁆𑀣𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀏𑀢𑁆𑀢𑀸𑀯𑀢𑀸𑀢𑀺 𑀧𑀭𑀺𑀘𑁆𑀙𑁂𑀤𑀢𑁆𑀣𑁂 𑀦𑀺𑀧𑀸𑀢𑁄, 𑀏𑀢𑁆𑀢𑀓𑁂𑀦 𑀯𑀘𑀦𑀓𑁆𑀓𑀫𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀢𑀁 𑀯𑀸 𑀧𑀭𑀺𑀫𑀸𑀡𑀁 𑀬𑀲𑁆𑀲𑀸𑀢𑀺 𑀏𑀢𑁆𑀢𑀸𑀯𑀁, 𑀢𑁂𑀦, 𑀏𑀢𑀧𑀭𑀺𑀫𑀸𑀡𑀯𑀢𑀸 𑀲𑀤𑁆𑀤𑀢𑁆𑀣𑀓𑁆𑀓𑀫𑁂𑀦𑀸𑀢𑀺 𑀅𑀢𑁆𑀣𑁄. ‘‘𑀲𑀤𑁆𑀤𑁂 𑀳𑀺 𑀯𑀼𑀢𑁆𑀢𑁂 𑀢𑀤𑀢𑁆𑀣𑁄𑀧𑀺 𑀯𑀼𑀢𑁆𑀢𑁄𑀬𑁂𑀯 𑀦𑀸𑀫𑀸’’𑀢𑀺 𑀯𑀤𑀦𑁆𑀢𑀺. 𑀯𑀼𑀢𑁆𑀢𑁄 𑀲𑀁𑀯𑀡𑁆𑀡𑀺𑀢𑁄 𑀅𑀢𑁆𑀣𑁄 𑀬𑀲𑁆𑀲𑀸𑀢𑀺 𑀯𑀼𑀢𑁆𑀢𑀢𑁆𑀣𑀸.

𑀏𑀢𑁆𑀣𑀸𑀢𑀺 𑀏𑀢𑀺𑀲𑁆𑀲𑀸 𑀕𑀸𑀣𑀸𑀬. 𑀏𑀯𑀁 𑀅𑀢𑁆𑀣𑁄, 𑀯𑀺𑀦𑀺𑀘𑁆𑀙𑀬𑁄𑀢𑀺 𑀯𑀸 𑀲𑁂𑀲𑁄. 𑀢𑀻𑀲𑀼 𑀧𑀺𑀝𑀓𑁂𑀲𑀽𑀢𑀺 𑀏𑀢𑁆𑀣 ‘‘𑀏𑀓𑁂𑀓𑀲𑁆𑀫𑀺’’𑀦𑁆𑀢𑀺 𑀅𑀥𑀺𑀓𑀸𑀭𑀢𑁄, 𑀧𑀓𑀭𑀡𑀢𑁄 𑀯𑀸 𑀯𑁂𑀤𑀺𑀢𑀩𑁆𑀩𑀁. ‘‘𑀏𑀓𑀫𑁂𑀓𑀲𑁆𑀫𑀺𑀜𑁆𑀘𑁂𑀢𑁆𑀣𑀸’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸) 𑀳𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁. 𑀅𑀣 𑀯𑀸 𑀯𑀢𑁆𑀢𑀺𑀘𑁆𑀙𑀸𑀦𑀼𑀧𑀼𑀩𑁆𑀩𑀺𑀓𑀢𑁆𑀢𑀸 𑀲𑀤𑁆𑀤𑀧𑀝𑀺𑀧𑀢𑁆𑀢𑀺𑀬𑀸 𑀦𑀺𑀤𑁆𑀥𑀸𑀭𑀡𑀫𑀺𑀥 𑀅𑀯𑀢𑁆𑀢𑀼𑀓𑀸𑀫𑁂𑀦 𑀆𑀥𑀸𑀭𑁄𑀬𑁂𑀯 𑀯𑀼𑀢𑁆𑀢𑁄. 𑀦 𑀘𑁂𑀢𑁆𑀣 𑀘𑁄𑀤𑁂𑀢𑀩𑁆𑀩𑀁 ‘‘𑀢𑀻𑀲𑀼𑀬𑁂𑀯 𑀧𑀺𑀝𑀓𑁂𑀲𑀼 𑀢𑀺𑀯𑀺𑀥𑁄 𑀧𑀭𑀺𑀬𑀢𑁆𑀢𑀺𑀪𑁂𑀤𑁄 𑀤𑀝𑁆𑀞𑀩𑁆𑀩𑁄 𑀲𑀺𑀬𑀸’’𑀢𑀺 𑀲𑀫𑀼𑀤𑀸𑀬𑀯𑀲𑁂𑀦 𑀯𑀼𑀢𑁆𑀢𑀲𑁆𑀲𑀸𑀧𑀺 𑀯𑀸𑀓𑁆𑀬𑀲𑁆𑀲 𑀅𑀯𑀬𑀯𑀸𑀥𑀺𑀧𑁆𑀧𑀸𑀬𑀲𑀫𑁆𑀪𑀯𑀢𑁄. 𑀤𑀺𑀲𑁆𑀲𑀢𑀺 𑀳𑀺 𑀅𑀯𑀬𑀯𑀯𑀸𑀓𑁆𑀬𑀦𑀺𑀧𑁆𑀨𑀢𑁆𑀢𑀺 ‘‘𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀪𑀼𑀜𑁆𑀚𑀦𑁆𑀢𑀽’’𑀢𑀺𑀆𑀤𑀻𑀲𑀼, 𑀢𑀲𑁆𑀫𑀸 𑀅𑀮𑀫𑀢𑀺𑀧𑀧𑀜𑁆𑀘𑁂𑀦. 𑀬𑀣𑀸 𑀅𑀢𑁆𑀣𑁄 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀣𑀸𑀬𑁂𑀯 𑀕𑀳𑁂𑀢𑀩𑁆𑀩𑁄𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣. 𑀧𑀭𑀺𑀬𑀢𑁆𑀢𑀺𑀪𑁂𑀤𑁄𑀢𑀺 𑀧𑀭𑀺𑀬𑀸𑀧𑀼𑀡𑀦𑀁 𑀧𑀭𑀺𑀬𑀢𑁆𑀢𑀺. 𑀧𑀭𑀺𑀬𑀸𑀧𑀼𑀡𑀦𑀯𑀸𑀘𑀓𑁄 𑀳𑁂𑀢𑁆𑀣 𑀧𑀭𑀺𑀬𑀢𑁆𑀢𑀺𑀲𑀤𑁆𑀤𑁄, 𑀦 𑀧𑀦 𑀧𑀸𑀴𑀺𑀧𑀭𑀺𑀬𑀸𑀬𑁄, 𑀢𑀲𑁆𑀫𑀸 𑀧𑀭𑀺𑀬𑀸𑀧𑀼𑀡𑀦𑀧𑁆𑀧𑀓𑀸𑀭𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀢𑀻𑀳𑀺 𑀧𑀓𑀸𑀭𑁂𑀳𑀺 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀸 𑀧𑀸𑀴𑀺𑀬𑁄 𑀏𑀯 ‘‘𑀧𑀭𑀺𑀬𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀣𑀸 𑀘𑁂𑀯 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬 𑀲𑀻𑀳𑀴𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀏𑀯𑀫𑁆𑀧𑀺 𑀳𑀺 𑀅𑀮𑀕𑀤𑁆𑀤𑀽𑀧𑀫𑀸𑀧𑀭𑀺𑀬𑀸𑀧𑀼𑀡𑀦𑀬𑁄𑀕𑀢𑁄 ‘‘𑀅𑀮𑀕𑀤𑁆𑀤𑀽𑀧𑀫𑀸 𑀧𑀭𑀺𑀬𑀢𑁆𑀢𑀻’’𑀢𑀺 𑀧𑀸𑀴𑀺𑀧𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀤𑀼𑀕𑁆𑀕𑀳𑀺𑀢𑀸 𑀉𑀧𑀸𑀭𑀫𑁆𑀪𑀸𑀤𑀺𑀳𑁂𑀢𑀼 ¶ 𑀧𑀭𑀺𑀬𑀸𑀧𑀼𑀝𑀸 𑀅𑀮𑀕𑀤𑁆𑀤𑀽𑀧𑀫𑀸’’𑀢𑀺 𑀧𑀭𑀢𑁄 𑀦𑀺𑀤𑁆𑀤𑁂𑀲𑀯𑀘𑀦𑀫𑁆𑀧𑀺 𑀉𑀧𑀧𑀦𑁆𑀦𑀁 𑀳𑁄𑀢𑀺. 𑀢𑀢𑁆𑀣 𑀳𑀺 𑀧𑀸𑀴𑀺𑀬𑁂𑀯 ‘‘𑀤𑀼𑀕𑁆𑀕𑀳𑀺𑀢𑀸, 𑀧𑀭𑀺𑀬𑀸𑀧𑀼𑀝𑀸’’𑀢𑀺 𑀘 𑀯𑀢𑁆𑀢𑀼𑀁 𑀬𑀼𑀢𑁆𑀢𑀸.

𑀅𑀮𑀕𑀤𑁆𑀤𑁄 𑀅𑀮𑀕𑀤𑁆𑀤𑀕𑁆𑀕𑀳𑀡𑀁 𑀉𑀧𑀫𑀸 𑀏𑀢𑀺𑀲𑁆𑀲𑀸𑀢𑀺 𑀅𑀮𑀕𑀤𑁆𑀤𑀽𑀧𑀫𑀸. 𑀅𑀮𑀕𑀤𑁆𑀤𑀲𑁆𑀲 𑀕𑀳𑀡𑀜𑁆𑀳𑁂𑀢𑁆𑀣 𑀅𑀮𑀕𑀤𑁆𑀤𑀲𑀤𑁆𑀤𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀧𑀽𑀧𑀺𑀓𑁄𑀢𑀺 𑀏𑀢𑁆𑀣 𑀆𑀧𑀽𑀧-𑀲𑀤𑁆𑀤𑁂𑀦 𑀆𑀧𑀽𑀧𑀔𑀸𑀤𑀦𑀁 𑀯𑀺𑀬, 𑀯𑁂𑀡𑀺𑀓𑁄𑀢𑀺 𑀏𑀢𑁆𑀣 𑀯𑀻𑀡𑀸𑀲𑀤𑁆𑀤𑁂𑀦 𑀯𑀻𑀡𑀸𑀯𑀸𑀤𑀦𑀕𑁆𑀕𑀳𑀡𑀁 𑀯𑀺𑀬 𑀘. 𑀅𑀮𑀕𑀤𑁆𑀤𑀕𑁆𑀕𑀳𑀡𑁂𑀦 𑀳𑀺 𑀧𑀭𑀺𑀬𑀢𑁆𑀢𑀺 𑀉𑀧𑀫𑀻𑀬𑀢𑀺 ¶ , 𑀦 𑀅𑀮𑀕𑀤𑁆𑀤𑁂𑀦. ‘‘𑀅𑀮𑀕𑀤𑁆𑀤𑀕𑁆𑀕𑀳𑀡𑀽𑀧𑀫𑀸’’𑀢𑀺 𑀯𑀸 𑀯𑀢𑁆𑀢𑀩𑁆𑀩𑁂 𑀫𑀚𑁆𑀛𑁂𑀧𑀤𑀮𑁄𑀧𑀁 𑀓𑀢𑁆𑀯𑀸 ‘‘𑀅𑀮𑀕𑀤𑁆𑀤𑀽𑀧𑀫𑀸’’𑀢𑀺 𑀯𑀼𑀢𑁆𑀢𑀁 ‘‘𑀑𑀝𑁆𑀞𑀫𑀼𑀔𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀮𑀕𑀤𑁆𑀤𑁄𑀢𑀺 𑀘 𑀆𑀲𑀻𑀯𑀺𑀲𑁄 𑀯𑀼𑀘𑁆𑀘𑀢𑀺. 𑀕𑀤𑁄𑀢𑀺 𑀳𑀺 𑀯𑀺𑀲𑀲𑁆𑀲 𑀦𑀸𑀫𑀁, 𑀢𑀜𑁆𑀘 𑀢𑀲𑁆𑀲 𑀅𑀮𑀁 𑀧𑀭𑀺𑀧𑀼𑀡𑁆𑀡𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀅𑀮𑀁 𑀧𑀭𑀺𑀬𑀢𑁆𑀢𑁄 𑀧𑀭𑀺𑀧𑀼𑀡𑁆𑀡𑁄 𑀕𑀤𑁄 𑀅𑀲𑁆𑀲𑀸𑀢𑀺 𑀅𑀮𑀕𑀤𑁆𑀤𑁄 𑀅𑀦𑀼𑀦𑀸𑀲𑀺𑀓𑀮𑁄𑀧𑀁, 𑀤-𑀓𑀸𑀭𑀸𑀕𑀫𑀜𑁆𑀘 𑀓𑀢𑁆𑀯𑀸, 𑀅𑀮𑀁 𑀯𑀸 𑀚𑀻𑀯𑀺𑀢𑀳𑀭𑀡𑁂 𑀲𑀫𑀢𑁆𑀣𑁄 𑀕𑀤𑁄 𑀬𑀲𑁆𑀲𑀸𑀢𑀺 𑀅𑀮𑀕𑀤𑁆𑀤𑁄 𑀯𑀼𑀢𑁆𑀢𑀦𑀬𑁂𑀦. 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀲𑁆𑀲𑀭𑀡𑀁 𑀅𑀢𑁆𑀣𑁄 𑀧𑀬𑁄𑀚𑀦𑀫𑁂𑀢𑀺𑀲𑁆𑀲𑀸𑀢𑀺 𑀦𑀺𑀲𑁆𑀲𑀭𑀡𑀢𑁆𑀣𑀸. 𑀪𑀡𑁆𑀟𑀸𑀕𑀸𑀭𑁂 𑀦𑀺𑀬𑀼𑀢𑁆𑀢𑁄 𑀪𑀡𑁆𑀟𑀸𑀕𑀸𑀭𑀺𑀓𑁄, 𑀭𑀸𑀚𑀭𑀢𑀦𑀸𑀦𑀼𑀧𑀸𑀮𑀓𑁄, 𑀲𑁄 𑀯𑀺𑀬𑀸𑀢𑀺 𑀢𑀣𑀸, 𑀥𑀫𑁆𑀫𑀭𑀢𑀦𑀸𑀦𑀼𑀧𑀸𑀮𑀓𑁄 𑀔𑀻𑀡𑀸𑀲𑀯𑁄. 𑀅𑀜𑁆𑀜𑀫𑀢𑁆𑀣𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲𑁂𑀯 𑀲𑀢𑁄 𑀧𑀭𑀺𑀬𑀢𑁆𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺.

𑀤𑀼𑀕𑁆𑀕𑀳𑀺𑀢𑀸𑀢𑀺 𑀤𑀼𑀝𑁆𑀞𑀼 𑀕𑀳𑀺𑀢𑀸. 𑀢𑀤𑁂𑀯 𑀲𑀭𑀽𑀧𑀢𑁄 𑀦𑀺𑀬𑀫𑁂𑀢𑀼𑀁 ‘‘𑀉𑀧𑀸𑀭𑀫𑁆𑀪𑀸𑀤𑀺𑀳𑁂𑀢𑀼 𑀧𑀭𑀺𑀬𑀸𑀧𑀼𑀝𑀸’’𑀢𑀺 𑀆𑀳, 𑀉𑀧𑀸𑀭𑀫𑁆𑀪𑀇𑀢𑀺𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀤𑀺𑀳𑁂𑀢𑀼 𑀉𑀕𑁆𑀕𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀮𑀸𑀪𑀲𑀓𑁆𑀓𑀸𑀭𑀸𑀤𑀺𑀳𑁂𑀢𑀼 𑀧𑀭𑀺𑀬𑀸𑀧𑀼𑀡𑀦𑀫𑁆𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀮𑀕𑀤𑁆𑀤𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 𑁋

‘‘𑀬𑁄 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 ‘𑀏𑀯𑀁 𑀘𑀻𑀯𑀭𑀸𑀤𑀻𑀦𑀺 𑀯𑀸 𑀮𑀪𑀺𑀲𑁆𑀲𑀸𑀫𑀺, 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀯𑀸 𑀫𑀁 𑀚𑀸𑀦𑀺𑀲𑁆𑀲𑀦𑁆𑀢𑀻’𑀢𑀺 𑀮𑀸𑀪𑀲𑀓𑁆𑀓𑀸𑀭𑀳𑁂𑀢𑀼 𑀧𑀭𑀺𑀬𑀸𑀧𑀼𑀡𑀸𑀢𑀺, 𑀢𑀲𑁆𑀲 𑀲𑀸 𑀧𑀭𑀺𑀬𑀢𑁆𑀢𑀺 𑀅𑀮𑀕𑀤𑁆𑀤𑀧𑀭𑀺𑀬𑀢𑁆𑀢𑀺 𑀦𑀸𑀫. 𑀏𑀯𑀁 𑀧𑀭𑀺𑀬𑀸𑀧𑀼𑀡𑀦𑀢𑁄 𑀳𑀺 𑀩𑀼𑀤𑁆𑀥𑀯𑀘𑀦𑀁 𑀅𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀦𑀺𑀤𑁆𑀤𑁄𑀓𑁆𑀓𑀫𑀦𑀁 𑀯𑀭𑀢𑀭’’𑀦𑁆𑀢𑀺 (𑀫. 𑀦𑀺. 𑀅𑀝𑁆𑀞. 𑁨.𑁨𑁩𑁯).

𑀦𑀦𑀼 𑀘 𑀅𑀮𑀕𑀤𑁆𑀤𑀕𑁆𑀕𑀳𑀡𑀽𑀧𑀫𑀸 𑀧𑀭𑀺𑀬𑀢𑁆𑀢𑀺 ‘‘𑀅𑀮𑀕𑀤𑁆𑀤𑀽𑀧𑀫𑀸’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀜𑁆𑀘 𑀲𑀢𑀺 𑀲𑀼𑀕𑁆𑀕𑀳𑀺𑀢𑀸𑀧𑀺 𑀧𑀭𑀺𑀬𑀢𑁆𑀢𑀺 ‘‘𑀅𑀮𑀕𑀤𑁆𑀤𑀽𑀧𑀫𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺 𑀢𑀢𑁆𑀣𑀸𑀧𑀺 𑀅𑀮𑀕𑀤𑁆𑀤𑀕𑁆𑀕𑀳𑀡𑀲𑁆𑀲 𑀉𑀧𑀫𑀸𑀪𑀸𑀯𑁂𑀦 𑀧𑀸𑀴𑀺𑀬𑀁 𑀯𑀼𑀢𑁆𑀢𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀅𑀮𑀕𑀤𑁆𑀤𑀢𑁆𑀣𑀺𑀓𑁄 𑀅𑀮𑀕𑀤𑁆𑀤𑀕𑀯𑁂𑀲𑀻 𑀅𑀮𑀕𑀤𑁆𑀤𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄, 𑀲𑁄 𑀧𑀲𑁆𑀲𑁂𑀬𑁆𑀬 𑀫𑀳𑀦𑁆𑀢𑀁 𑀅𑀮𑀕𑀤𑁆𑀤𑀁, 𑀢𑀫𑁂𑀦𑀁 𑀅𑀚𑀧𑀤𑁂𑀦 𑀤𑀡𑁆𑀟𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀡𑁆𑀳𑁂𑀬𑁆𑀬 ¶ , 𑀅𑀚𑀧𑀤𑁂𑀦 𑀤𑀡𑁆𑀟𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑀺𑀢𑁆𑀯𑀸 𑀕𑀻𑀯𑀸𑀬 𑀲𑀼𑀕𑁆𑀕𑀳𑀺𑀢𑀁 𑀕𑀡𑁆𑀳𑁂𑀬𑁆𑀬. 𑀓𑀺𑀜𑁆𑀘𑀸𑀧𑀺 𑀲𑁄 𑀪𑀺𑀓𑁆𑀔𑀯𑁂, 𑀅𑀮𑀕𑀤𑁆𑀤𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀁 𑀯𑀸 𑀩𑀸𑀳𑀁 𑀯𑀸 𑀅𑀜𑁆𑀜𑀢𑀭𑀁 𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑀁 𑀪𑁄𑀕𑁂𑀳𑀺 𑀧𑀮𑀺𑀯𑁂𑀞𑁂𑀬𑁆𑀬 ¶ . 𑀅𑀣 𑀔𑁄 𑀲𑁄 𑀦𑁂𑀯 𑀢𑀢𑁄𑀦𑀺𑀤𑀸𑀦𑀁 𑀫𑀭𑀡𑀁 𑀯𑀸 𑀦𑀺𑀕𑀘𑁆𑀙𑁂𑀬𑁆𑀬 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼, 𑀲𑀼𑀕𑁆𑀕𑀳𑀺𑀢𑀢𑁆𑀢𑀸 𑀪𑀺𑀓𑁆𑀔𑀯𑁂, 𑀅𑀮𑀕𑀤𑁆𑀤𑀲𑁆𑀲. 𑀏𑀯𑀫𑁂𑀯 𑀔𑁄 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁂 𑀓𑀼𑀮𑀧𑀼𑀢𑁆𑀢𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑀲𑀼𑀢𑁆𑀢𑀁 𑀕𑁂𑀬𑁆𑀬’’𑀦𑁆𑀢𑀺𑀆𑀤𑀺 (𑀫. 𑀦𑀺. 𑁧.𑁨𑁩𑁯).

𑀢𑀲𑁆𑀫𑀸 𑀇𑀥 𑀤𑀼𑀕𑁆𑀕𑀳𑀺𑀢𑀸 𑀏𑀯 𑀧𑀭𑀺𑀬𑀢𑁆𑀢𑀺 𑀅𑀮𑀕𑀤𑁆𑀤𑀽𑀧𑀫𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀓𑀼𑀢𑁄 𑀯𑀺𑀜𑁆𑀜𑀸𑀬𑀢𑀺, 𑀬𑁂𑀦 𑀤𑀼𑀕𑁆𑀕𑀳𑀺𑀢𑀸 𑀉𑀧𑀸𑀭𑀫𑁆𑀪𑀸𑀤𑀺𑀳𑁂𑀢𑀼 𑀧𑀭𑀺𑀬𑀸𑀧𑀼𑀝𑀸 ‘‘𑀅𑀮𑀕𑀤𑁆𑀤𑀽𑀧𑀫𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀇𑀤𑀁 𑀧𑀦 𑀧𑀸𑀭𑀺𑀲𑁂𑀲𑀜𑀸𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀦𑀺𑀲𑁆𑀲𑀭𑀡𑀢𑁆𑀣𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀻𑀦𑀁 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀧𑀸𑀭𑀺𑀲𑁂𑀲𑀢𑁄 𑀅𑀮𑀕𑀤𑁆𑀤𑀲𑁆𑀲 𑀤𑀼𑀕𑁆𑀕𑀳𑀡𑀽𑀧𑀫𑀸𑀬𑁂𑀯 𑀧𑀭𑀺𑀬𑀢𑁆𑀢𑀺 ‘‘𑀅𑀮𑀕𑀤𑁆𑀤𑀽𑀧𑀫𑀸’’𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀅𑀮𑀕𑀤𑁆𑀤𑀲𑁆𑀲 𑀲𑀼𑀕𑁆𑀕𑀳𑀡𑀽𑀧𑀫𑀸 𑀳𑀺 𑀧𑀭𑀺𑀬𑀢𑁆𑀢𑀺 𑀦𑀺𑀲𑁆𑀲𑀭𑀡𑀢𑁆𑀣𑀸 𑀯𑀸 𑀳𑁄𑀢𑀺, 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺 𑀯𑀸. 𑀢𑀲𑁆𑀫𑀸 𑀲𑀼𑀯𑀼𑀢𑁆𑀢𑀫𑁂𑀢𑀁 ‘‘𑀤𑀼𑀕𑁆𑀕𑀳𑀺𑀢𑀸…𑀧𑁂… 𑀧𑀭𑀺𑀬𑀢𑁆𑀢𑀻’’𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀧𑀸𑀴𑀺𑀬𑀸 𑀲𑀸𑀥𑁂𑀦𑁆𑀢𑁄 ‘‘𑀬𑀁 𑀲𑀦𑁆𑀥𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀦𑁆𑀢𑀺 𑀬𑀁 𑀧𑀭𑀺𑀬𑀢𑁆𑀢𑀺𑀤𑀼𑀕𑁆𑀕𑀳𑀡𑀁. 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀫𑀽𑀮𑀧𑀡𑁆𑀡𑀸𑀲𑀓𑁂 𑀅𑀮𑀕𑀤𑁆𑀤𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁨𑁩𑁯) 𑀪𑀕𑀯𑀢𑀸 𑀯𑀼𑀢𑁆𑀢𑀁.

𑀅𑀮𑀕𑀤𑁆𑀤𑀢𑁆𑀣𑀺𑀓𑁄𑀢𑀺 𑀆𑀲𑀻𑀯𑀺𑀲𑁂𑀦, 𑀆𑀲𑀻𑀯𑀺𑀲𑀁 𑀯𑀸 𑀅𑀢𑁆𑀣𑀺𑀓𑁄, 𑀅𑀮𑀕𑀤𑁆𑀤𑀁 𑀕𑀯𑁂𑀲𑀢𑀺 𑀧𑀭𑀺𑀬𑁂𑀲𑀢𑀺 𑀲𑀻𑀮𑁂𑀦𑀸𑀢𑀺 𑀅𑀮𑀕𑀤𑁆𑀤𑀕𑀯𑁂𑀲𑀻. 𑀅𑀮𑀕𑀤𑁆𑀤𑀧𑀭𑀺𑀬𑁂𑀲𑀦𑀁 𑀘𑀭𑀫𑀸𑀦𑁄𑀢𑀺 𑀆𑀲𑀻𑀯𑀺𑀲𑀧𑀭𑀺𑀬𑁂𑀲𑀦𑀢𑁆𑀣𑀁 𑀘𑀭𑀫𑀸𑀦𑁄. 𑀢𑀤𑀢𑁆𑀣𑁂 𑀳𑁂𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀉𑀧𑀬𑁄𑀕𑀯𑀘𑀦𑀁 𑀯𑀸, 𑀅𑀮𑀕𑀤𑁆𑀤𑀧𑀭𑀺𑀬𑁂𑀲𑀦𑀝𑁆𑀞𑀸𑀦𑀁 𑀯𑀸 𑀘𑀭𑀫𑀸𑀦𑁄. 𑀅𑀮𑀕𑀤𑁆𑀤𑀁 𑀧𑀭𑀺𑀬𑁂𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀳𑀺 𑀅𑀮𑀕𑀤𑁆𑀤𑀧𑀭𑀺𑀬𑁂𑀲𑀦𑀁. 𑀢𑀫𑁂𑀦𑀦𑁆𑀢𑀺 𑀢𑀁 𑀅𑀮𑀕𑀤𑁆𑀤𑀁. 𑀪𑁄𑀕𑁂𑀢𑀺 𑀲𑀭𑀻𑀭𑁂. ‘‘𑀪𑁄𑀕𑁄 𑀢𑀼 𑀨𑀡𑀺𑀦𑁄 𑀢𑀦𑀽’’𑀢𑀺 𑀳𑀺 𑀯𑀼𑀢𑁆𑀢𑀁. 𑀪𑀼𑀚𑀻𑀬𑀢𑀺 𑀓𑀼𑀝𑀺𑀮𑀁 𑀓𑀭𑀻𑀬𑀢𑀻𑀢𑀺 𑀪𑁄𑀕𑁄. 𑀢𑀲𑁆𑀲𑀸𑀢𑀺 𑀧𑀼𑀭𑀺𑀲𑀲𑁆𑀲. 𑀳𑀢𑁆𑀣𑁂 𑀯𑀸 𑀩𑀸𑀳𑀸𑀬 𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀡𑀺𑀩𑀦𑁆𑀥𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀕𑁆𑀕𑀦𑀔𑀸 𑀳𑀢𑁆𑀣𑁄. 𑀲𑀤𑁆𑀥𑀺𑀁 𑀅𑀕𑁆𑀕𑀩𑀸𑀳𑀸𑀬 𑀅𑀯𑀲𑁂𑀲𑀸 𑀩𑀸𑀳𑀸, 𑀓𑀢𑁆𑀣𑀘𑀺 𑀧𑀦 𑀓𑀧𑁆𑀧𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀕𑁆𑀕𑀦𑀔𑀸 ‘‘𑀳𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁 𑀩𑀸𑀳𑀸𑀬 𑀯𑀺𑀲𑀼𑀁 𑀅𑀦𑀸𑀕𑀢𑀢𑁆𑀢𑀸. 𑀯𑀼𑀢𑁆𑀢𑀮𑀓𑁆𑀔𑀡𑀁 𑀳𑀢𑁆𑀣𑀜𑁆𑀘 𑀩𑀸𑀳𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀁 𑀲𑀭𑀻𑀭𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑀁. 𑀢𑀢𑁄𑀦𑀺𑀤𑀸𑀦𑀦𑁆𑀢𑀺 𑀢𑀦𑁆𑀦𑀺𑀤𑀸𑀦𑀁, 𑀢𑀁𑀓𑀸𑀭𑀡𑀸𑀢𑀺 𑀅𑀢𑁆𑀣𑁄. 𑀢𑀁 𑀳𑀢𑁆𑀣𑀸𑀤𑀻𑀲𑀼 𑀟𑀁𑀲𑀦𑀁 𑀦𑀺𑀤𑀸𑀦𑀁 𑀓𑀸𑀭𑀡𑀁 𑀏𑀢𑀲𑁆𑀲𑀸𑀢𑀺 ‘‘𑀢𑀦𑁆𑀦𑀺𑀤𑀸𑀦’’𑀦𑁆𑀢𑀺 𑀳𑀺 𑀯𑀢𑁆𑀢𑀩𑁆𑀩𑁂 ‘‘𑀢𑀢𑁄𑀦𑀺𑀤𑀸𑀦’’𑀦𑁆𑀢𑀺 𑀧𑀼𑀭𑀺𑀫𑀧𑀤𑁂 𑀧𑀘𑁆𑀘𑀢𑁆𑀢𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀓𑀢𑁆𑀯𑀸, 𑀢𑀲𑁆𑀲 𑀘 𑀮𑁄𑀧𑀫𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄, 𑀳𑁂𑀢𑁆𑀯𑀢𑁆𑀣𑁂 𑀘 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀓𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑀧𑀤𑀫𑁂𑀢𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀧𑀺𑀘 ‘‘𑀢𑀢𑁄𑀦𑀺𑀤𑀸𑀦’’𑀦𑁆𑀢𑀺 𑀏𑀢𑀁 ‘‘𑀫𑀭𑀡𑀁 𑀯𑀸 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔’’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀯𑀺𑀲𑁂𑀲𑀦𑀁. 𑀢𑀁 ¶ 𑀓𑀺𑀲𑁆𑀲 𑀳𑁂𑀢𑀽𑀢𑀺 𑀬𑀁 𑀯𑀼𑀢𑁆𑀢𑀁 𑀳𑀢𑁆𑀣𑀸𑀤𑀻𑀲𑀼 𑀟𑀁𑀲𑀦𑀁, 𑀢𑀦𑁆𑀦𑀺𑀤𑀸𑀦𑀜𑁆𑀘 𑀫𑀭𑀡𑀸𑀤𑀺𑀉𑀧𑀕𑀫𑀦𑀁 ¶ , 𑀢𑀁 𑀓𑀺𑀲𑁆𑀲 𑀳𑁂𑀢𑀼 𑀓𑁂𑀦 𑀓𑀸𑀭𑀡𑁂𑀦𑀸𑀢𑀺 𑀘𑁂? 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀮𑀕𑀤𑁆𑀤𑀲𑁆𑀲 𑀤𑀼𑀕𑁆𑀕𑀳𑀺𑀢𑀢𑁆𑀢𑀸.

𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀫𑁄𑀖𑀧𑀼𑀭𑀺𑀲𑀸𑀢𑀺 𑀕𑀼𑀡𑀲𑀸𑀭𑀭𑀳𑀺𑀢𑀢𑀸𑀬 𑀢𑀼𑀘𑁆𑀙𑀧𑀼𑀭𑀺𑀲𑀸. 𑀥𑀫𑁆𑀫𑀦𑁆𑀢𑀺 𑀧𑀸𑀴𑀺𑀥𑀫𑁆𑀫𑀁. 𑀧𑀭𑀺𑀬𑀸𑀧𑀼𑀡𑀦𑁆𑀢𑀻𑀢𑀺 𑀉𑀕𑁆𑀕𑀡𑁆𑀳𑀦𑁆𑀢𑀺, 𑀲𑀚𑁆𑀛𑀸𑀬𑀦𑁆𑀢𑀺 𑀘𑁂𑀯 𑀯𑀸𑀘𑀼𑀕𑁆𑀕𑀢𑀁 𑀓𑀭𑁄𑀦𑁆𑀢𑀸 𑀥𑀸𑀭𑁂𑀦𑁆𑀢𑀺 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀥𑀫𑁆𑀫’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀫𑁂𑀯 𑀲𑀭𑀽𑀧𑁂𑀦 𑀤𑀲𑁆𑀲𑁂𑀢𑀺 ‘‘𑀲𑀼𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸. 𑀦 𑀳𑀺 𑀲𑀼𑀢𑁆𑀢𑀸𑀤𑀺𑀦𑀯𑀗𑁆𑀕𑀢𑁄 𑀅𑀜𑁆𑀜𑁄 𑀥𑀫𑁆𑀫𑁄 𑀦𑀸𑀫 𑀅𑀢𑁆𑀣𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀢𑁂𑀲𑀁 𑀥𑀫𑁆𑀫𑀸𑀦’’𑀦𑁆𑀢𑀺. 𑀅𑀢𑁆𑀣𑀦𑁆𑀢𑀺 𑀘𑁂𑀢𑁆𑀣 𑀲𑀫𑁆𑀩𑀦𑁆𑀥𑀻𑀦𑀺𑀤𑁆𑀤𑁂𑀲𑁄 𑀏𑀲𑁄, 𑀅𑀢𑁆𑀣𑀦𑁆𑀢𑀺 𑀘 𑀬𑀣𑀸𑀪𑀽𑀢𑀁 𑀪𑀸𑀲𑀺𑀢𑀢𑁆𑀣𑀁, 𑀧𑀬𑁄𑀚𑀦𑀢𑁆𑀣𑀜𑁆𑀘 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, 𑀏𑀓𑀲𑁂𑀲𑀦𑀬𑁂𑀦 𑀯𑀸 𑀯𑀼𑀢𑁆𑀢𑀁. 𑀬𑀜𑁆𑀳𑀺 𑀧𑀤𑀁 𑀲𑀼𑀢𑀺𑀲𑀸𑀫𑀜𑁆𑀜𑁂𑀦 𑀅𑀦𑁂𑀓𑀥𑀸 𑀅𑀢𑁆𑀣𑀁 𑀤𑀻𑀧𑁂𑀢𑀺, 𑀢𑀁 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, 𑀏𑀓𑀲𑁂𑀲𑀦𑀬𑁂𑀦 𑀯𑀸𑀢𑀺 𑀲𑀩𑁆𑀩𑀢𑁆𑀣 𑀯𑁂𑀤𑀺𑀢𑀩𑁆𑀩𑀁. 𑀦 𑀉𑀧𑀧𑀭𑀺𑀓𑁆𑀔𑀦𑁆𑀢𑀻𑀢𑀺 𑀦 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺 𑀦 𑀯𑀺𑀘𑀸𑀭𑁂𑀦𑁆𑀢𑀺. 𑀇𑀓𑁆𑀔𑀲𑀤𑁆𑀤𑀲𑁆𑀲 𑀳𑀺 𑀤𑀲𑁆𑀲𑀦𑀗𑁆𑀓𑁂𑀲𑀼 𑀇𑀥 𑀤𑀲𑁆𑀲𑀦𑀫𑁂𑀯 𑀅𑀢𑁆𑀣𑁄, 𑀢𑀲𑁆𑀲 𑀘 𑀧𑀭𑀺𑀕𑁆𑀕𑀡𑁆𑀳𑀦𑀘𑀓𑁆𑀔𑀼𑀮𑁄𑀘𑀦𑁂𑀲𑀼 𑀧𑀭𑀺𑀕𑁆𑀕𑀡𑁆𑀳𑀦𑀫𑁂𑀯, 𑀢𑀜𑁆𑀘 𑀯𑀺𑀘𑀸𑀭𑀡𑀸 𑀧𑀭𑀺𑀬𑀸𑀤𑀸𑀦𑀯𑀲𑁂𑀦 𑀤𑀼𑀩𑁆𑀩𑀺𑀥𑁂𑀲𑀼 𑀯𑀺𑀘𑀸𑀭𑀡𑀸𑀬𑁂𑀯, 𑀲𑀸 𑀘 𑀯𑀻𑀫𑀁𑀲𑀸𑀬𑁂𑀯, 𑀦 𑀯𑀺𑀘𑀸𑀭𑁄, 𑀯𑀻𑀫𑀁𑀲𑀸 𑀘 𑀦𑀸𑀫𑁂𑀲𑀸 𑀪𑀸𑀲𑀺𑀢𑀢𑁆𑀣𑀯𑀻𑀫𑀁𑀲𑀸, 𑀧𑀬𑁄𑀚𑀦𑀢𑁆𑀣𑀯𑀻𑀫𑀁𑀲𑀸 𑀘𑀸𑀢𑀺 𑀇𑀥 𑀤𑀼𑀩𑁆𑀩𑀺𑀥𑀸𑀯 𑀅𑀥𑀺𑀧𑁆𑀧𑁂𑀢𑀸, 𑀢𑀸𑀲𑀼 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀻𑀮𑀁 𑀓𑀣𑀺𑀢𑀁, 𑀇𑀫𑀲𑁆𑀫𑀺𑀁 𑀲𑀫𑀸𑀥𑀺, 𑀇𑀫𑀲𑁆𑀫𑀺𑀁 𑀧𑀜𑁆𑀜𑀸, 𑀫𑀬𑀜𑁆𑀘 𑀢𑀁 𑀧𑀽𑀭𑁂𑀲𑁆𑀲𑀸𑀫𑀸’’𑀢𑀺 𑀏𑀯𑀁 𑀪𑀸𑀲𑀺𑀢𑀢𑁆𑀣𑀯𑀻𑀫𑀁𑀲𑀜𑁆𑀘𑁂𑀯 ‘‘𑀲𑀻𑀮𑀁 𑀲𑀫𑀸𑀥𑀺𑀲𑁆𑀲 𑀓𑀸𑀭𑀡𑀁, 𑀲𑀫𑀸𑀥𑀺 𑀯𑀺𑀧𑀲𑁆𑀲𑀦𑀸𑀬𑀸’’𑀢𑀺𑀆𑀤𑀺𑀦𑀸 𑀧𑀬𑁄𑀚𑀦𑀢𑁆𑀣𑀯𑀻𑀫𑀁𑀲𑀜𑁆𑀘 𑀦 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀼𑀧𑀧𑀭𑀺𑀓𑁆𑀔𑀢𑀦𑁆𑀢𑀺 𑀅𑀦𑀼𑀧𑀧𑀭𑀺𑀓𑁆𑀔𑀦𑁆𑀢𑀸𑀦𑀁 𑀢𑁂𑀲𑀁 𑀫𑁄𑀖𑀧𑀼𑀭𑀺𑀲𑀸𑀦𑀁. 𑀦 𑀦𑀺𑀚𑁆𑀛𑀸𑀦𑀓𑁆𑀔𑀫𑀦𑁆𑀢𑀻𑀢𑀺 𑀦𑀺𑀚𑁆𑀛𑀸𑀦𑀁 𑀦𑀺𑀲𑁆𑀲𑁂𑀲𑁂𑀦 𑀧𑁂𑀓𑁆𑀔𑀦𑀁 𑀧𑀜𑁆𑀜𑀁 𑀦 𑀔𑀫𑀦𑁆𑀢𑀺. 𑀛𑁂-𑀲𑀤𑁆𑀤𑁄 𑀳𑀺 𑀇𑀥 𑀧𑁂𑀓𑁆𑀔𑀦𑁂𑀬𑁂𑀯, 𑀦 𑀘𑀺𑀦𑁆𑀢𑀦𑀛𑀸𑀧𑀦𑁂𑀲𑀼, 𑀢𑀜𑁆𑀘 𑀜𑀸𑀡𑀧𑁂𑀓𑁆𑀔𑀦𑀫𑁂𑀯, 𑀦 𑀘𑀓𑁆𑀔𑀼𑀧𑁂𑀓𑁆𑀔𑀦𑀁, 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀫𑁂𑀯 𑀯𑀸, 𑀦 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁, 𑀢𑀲𑁆𑀫𑀸 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀭𑁄𑀘𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀸 𑀦 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀺𑀲𑁆𑀲𑁂𑀲𑁂𑀦 𑀛𑀸𑀬𑀢𑁂 𑀧𑁂𑀓𑁆𑀔𑀢𑁂𑀢𑀺 𑀳𑀺 𑀦𑀺𑀚𑁆𑀛𑀸𑀦𑀁. 𑀲𑀦𑁆𑀥𑀺𑀯𑀲𑁂𑀦 𑀅𑀦𑀼𑀲𑁆𑀯𑀸𑀭𑀮𑁄𑀧𑁄 𑀦𑀺𑀚𑁆𑀛𑀸𑀦𑀓𑁆𑀔𑀫𑀦𑁆𑀢𑀻𑀢𑀺, ‘‘𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀻’’𑀢𑀺𑀧𑀺 𑀧𑀸𑀞𑁄, 𑀢𑁂𑀦 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺 ‘‘𑀢𑁂𑀲𑀁 𑀧𑀜𑁆𑀜𑀸𑀬 𑀅𑀢𑁆𑀣𑀲𑁆𑀲 𑀅𑀦𑀼𑀧𑀧𑀭𑀺𑀓𑁆𑀔𑀦𑀢𑁄 𑀢𑁂 𑀥𑀫𑁆𑀫𑀸 𑀦 𑀉𑀧𑀝𑁆𑀞𑀳𑀦𑁆𑀢𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀻𑀮𑀁, 𑀲𑀫𑀸𑀥𑀺, 𑀯𑀺𑀧𑀲𑁆𑀲𑀦𑀸, 𑀫𑀕𑁆𑀕𑁄, 𑀯𑀝𑁆𑀝𑀁, 𑀯𑀺𑀯𑀝𑁆𑀞𑀁 𑀓𑀣𑀺𑀢𑀦𑁆𑀢𑀺 𑀏𑀯𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀦𑁆𑀢𑀻’’𑀢𑀺.

𑀉𑀧𑀸𑀭𑀫𑁆𑀪𑀸𑀦𑀺𑀲𑀁𑀲𑀸 𑀘𑁂𑀯𑀸𑀢𑀺 𑀧𑀭𑁂𑀲𑀁 𑀯𑀸𑀤𑁂 𑀤𑁄𑀲𑀸𑀭𑁄𑀧𑀦𑀸𑀦𑀺𑀲𑀁𑀲𑀸 𑀘 𑀳𑀼𑀢𑁆𑀯𑀸. 𑀪𑀼𑀲𑁄 𑀆𑀭𑀫𑁆𑀪𑀦𑀜𑁆𑀳𑀺 𑀧𑀭𑁂𑀲𑀁 𑀯𑀸𑀤𑁂 𑀤𑁄𑀲𑀸𑀭𑁄𑀧𑀦𑀁 𑀉𑀧𑀸𑀭𑀫𑁆𑀪𑁄, 𑀧𑀭𑀺𑀬𑀢𑁆𑀢𑀺𑀁 ¶ 𑀦𑀺𑀲𑁆𑀲𑀸𑀬 𑀧𑀭𑀯𑀫𑁆𑀪𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀳𑁂𑀲 ‘‘𑀧𑀭𑀯𑀚𑁆𑀚𑀸𑀦𑀼𑀧𑀦𑀬𑀦𑀮𑀓𑁆𑀔𑀡𑁄’’𑀢𑀺 𑀯𑀼𑀢𑁆𑀢𑁄. 𑀇𑀢𑀺 𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀦𑀺𑀲𑀁𑀲𑀸 𑀘𑀸𑀢𑀺 𑀇𑀢𑀺 𑀏𑀯𑀁 𑀏𑀢𑀸𑀬 𑀧𑀭𑀺𑀬𑀢𑁆𑀢𑀺𑀬𑀸 𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀦𑀺𑀲𑀁𑀲𑀸 𑀅𑀢𑁆𑀢𑀦𑁄 𑀉𑀧𑀭𑀺 𑀧𑀭𑁂𑀳𑀺 𑀆𑀭𑁄𑀧𑀺𑀢𑀲𑁆𑀲 𑀯𑀸𑀤𑀲𑁆𑀲 𑀦𑀺𑀕𑁆𑀕𑀳𑀲𑁆𑀲 𑀅𑀢𑁆𑀢𑀢𑁄, 𑀲𑀓𑀯𑀸𑀤𑀢𑁄 𑀯𑀸 𑀧𑀫𑁄𑀓𑁆𑀔𑀧𑀬𑁄𑀚𑀦𑀸 𑀘 𑀳𑀼𑀢𑁆𑀯𑀸. 𑀇𑀢𑀺 𑀲𑀤𑁆𑀤𑁄 𑀇𑀤𑀫𑀢𑁆𑀣𑁂, 𑀢𑁂𑀦 ‘‘𑀧𑀭𑀺𑀬𑀸𑀧𑀼𑀡𑀦𑁆𑀢𑀻’’𑀢𑀺 ¶ 𑀏𑀢𑁆𑀣 𑀧𑀭𑀺𑀬𑀸𑀧𑀼𑀡𑀦𑀁 𑀧𑀭𑀸𑀫𑀲𑀢𑀺. 𑀯𑀤𑀦𑁆𑀢𑀺 𑀦𑀺𑀕𑁆𑀕𑀡𑁆𑀳𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸𑀤𑁄, 𑀤𑁄𑀲𑁄, 𑀧𑀫𑀼𑀘𑁆𑀘𑀦𑀁, 𑀧𑀫𑀼𑀘𑁆𑀘𑀸𑀧𑀦𑀁 𑀯𑀸 𑀧𑀫𑁄𑀓𑁆𑀔𑁄, 𑀅𑀢𑁆𑀢𑀦𑁄 𑀉𑀧𑀭𑀺 𑀆𑀭𑁄𑀧𑀺𑀢𑀲𑁆𑀲 𑀧𑀫𑁄𑀓𑁆𑀔𑁄 𑀆𑀦𑀺𑀲𑀁𑀲𑁄 𑀬𑁂𑀲𑀁 𑀢𑀣𑀸. 𑀆𑀭𑁄𑀧𑀺𑀢𑀯𑀸𑀤𑁄 𑀳𑀺 ‘‘𑀯𑀸𑀤𑁄’’𑀢𑀺 𑀯𑀼𑀢𑁆𑀢𑁄 𑀬𑀣𑀸 ‘‘𑀤𑁂𑀯𑁂𑀦 𑀤𑀢𑁆𑀢𑁄 𑀤𑀢𑁆𑀢𑁄’’𑀢𑀺. 𑀯𑀸𑀤𑁄𑀢𑀺 𑀯𑀸 𑀉𑀧𑀯𑀸𑀤𑁄𑀦𑀺𑀦𑁆𑀤𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀫𑀸𑀲𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀧𑀭𑁂𑀳𑀺 𑀲𑀓𑀯𑀸𑀤𑁂 𑀤𑁄𑀲𑁂 𑀆𑀭𑁄𑀧𑀺𑀢𑁂, 𑀦𑀺𑀦𑁆𑀤𑀸𑀬 𑀯𑀸 𑀆𑀭𑁄𑀧𑀺𑀢𑀸𑀬 𑀢𑀁 𑀤𑁄𑀲𑀁, 𑀦𑀺𑀦𑁆𑀤𑀁 𑀯𑀸 𑀏𑀯𑀜𑁆𑀘 𑀏𑀯𑀜𑁆𑀘 𑀫𑁄𑀘𑁂𑀲𑁆𑀲𑀸𑀫𑀸𑀢𑀺 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦 𑀧𑀭𑀺𑀬𑀸𑀧𑀼𑀡𑀦𑁆𑀢𑀻𑀢𑀺. 𑀅𑀣 𑀯𑀸 𑀲𑁄 𑀲𑁄 𑀯𑀸𑀤𑁄 𑀇𑀢𑀺 𑀯𑀸𑀤𑁄 𑀇𑀢𑀺-𑀲𑀤𑁆𑀤𑀲𑁆𑀲 𑀲𑀳 𑀯𑀺𑀘𑁆𑀙𑀸𑀬 𑀢-𑀲𑀤𑁆𑀤𑀢𑁆𑀣𑁂 𑀧𑀯𑀢𑁆𑀢𑀢𑁆𑀢𑀸. 𑀇𑀢𑀺𑀯𑀸𑀤𑀲 𑀧𑀫𑁄𑀓𑁆𑀔𑁄 𑀬𑀣𑀸𑀯𑀼𑀢𑁆𑀢𑀦𑀬𑁂𑀦, 𑀲𑁄 𑀆𑀦𑀺𑀲𑀁𑀲𑁄 𑀬𑁂𑀲𑀁 𑀢𑀣𑀸, 𑀢𑀁 𑀢𑀁 𑀯𑀸𑀤𑀧𑀫𑁄𑀘𑀦𑀸𑀦𑀺𑀲𑀁𑀲𑀸 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀲 𑀘𑀢𑁆𑀣𑀸𑀬𑀸𑀢𑀺 𑀬𑀲𑁆𑀲 𑀘 𑀲𑀻𑀮𑀸𑀤𑀺𑀧𑀽𑀭𑀡𑀲𑁆𑀲, 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀪𑀽𑀢𑀲𑁆𑀲 𑀯𑀸 𑀅𑀦𑀼𑀧𑀸𑀤𑀸𑀯𑀺𑀫𑁄𑀓𑁆𑀔𑀲𑁆𑀲 𑀅𑀢𑁆𑀣𑀸𑀬. 𑀅𑀪𑁂𑀤𑁂𑀧𑀺 𑀪𑁂𑀤𑀯𑁄𑀳𑀸𑀭𑁄 𑀏𑀲𑁄 𑀬𑀣𑀸 ‘‘𑀧𑀝𑀺𑀫𑀸𑀬 𑀲𑀭𑀻𑀭’’𑀦𑁆𑀢𑀺, 𑀪𑁂𑀤𑁆𑀬𑀪𑁂𑀤𑀓𑀁 𑀯𑀸 𑀏𑀢𑀁 𑀬𑀣𑀸 ‘‘𑀓𑀣𑀺𑀦𑀲𑁆𑀲𑀢𑁆𑀣𑀸𑀬 𑀆𑀪𑀢𑀁 𑀤𑀼𑀲𑁆𑀲’’𑀦𑁆𑀢𑀺. ‘‘𑀢𑀜𑁆𑀘𑀲𑁆𑀲 𑀅𑀢𑁆𑀣’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀘-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂, 𑀢𑁂𑀦 𑀢𑀤𑀢𑁆𑀣𑀸𑀬 𑀏𑀯 𑀧𑀭𑀺𑀬𑀸𑀧𑀼𑀡𑀦𑀁 𑀲𑀫𑁆𑀪𑀯𑀢𑀺, 𑀦𑀸𑀜𑁆𑀜𑀢𑁆𑀣𑀸𑀬𑀸𑀢𑀺 𑀯𑀺𑀦𑀺𑀘𑁆𑀙𑀺𑀦𑁄𑀢𑀺. 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀻𑀢𑀺 𑀳𑀺 𑀚𑀸𑀢𑀺𑀆𑀘𑀸𑀭𑀯𑀲𑁂𑀦 𑀤𑀼𑀯𑀺𑀥𑀸𑀧𑀺 𑀓𑀼𑀮𑀧𑀼𑀢𑁆𑀢𑀸 𑀜𑀸𑀬𑁂𑀦 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀜𑁆𑀘𑀲𑁆𑀲 𑀅𑀢𑁆𑀣𑀁 𑀦𑀸𑀦𑀼𑀪𑁄𑀦𑁆𑀢𑀻𑀢𑀺 𑀅𑀲𑁆𑀲 𑀥𑀫𑁆𑀫𑀲𑁆𑀲 𑀲𑀻𑀮𑀸𑀤𑀺𑀧𑀽𑀭𑀡𑀲𑀗𑁆𑀔𑀸𑀢𑀁, 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀪𑀽𑀢𑀁 𑀯𑀸 𑀅𑀦𑀼𑀧𑀸𑀤𑀸𑀯𑀺𑀫𑁄𑀓𑁆𑀔𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀏𑀢𑁂 𑀤𑀼𑀕𑁆𑀕𑀳𑀺𑀢𑀕𑀸𑀳𑀺𑀦𑁄 𑀦𑀸𑀦𑀼𑀪𑁄𑀦𑁆𑀢𑀺 𑀦 𑀯𑀺𑀦𑁆𑀤𑀦𑁆𑀢𑀺𑀬𑁂𑀯.

𑀅𑀧𑀭𑁄 𑀦𑀬𑁄 𑁋 𑀬𑀲𑁆𑀲 𑀉𑀧𑀸𑀭𑀫𑁆𑀪𑀲𑁆𑀲, 𑀇𑀢𑀺𑀯𑀸𑀤𑀧𑁆𑀧𑀫𑁄𑀓𑁆𑀔𑀲𑁆𑀲 𑀯𑀸 𑀅𑀢𑁆𑀣𑀸𑀬 𑀬𑁂 𑀫𑁄𑀖𑀧𑀼𑀭𑀺𑀲𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺, 𑀢𑁂 𑀧𑀭𑁂𑀳𑀺 ‘‘𑀅𑀬𑀫𑀢𑁆𑀣𑁄 𑀦 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑁂 𑀤𑀼𑀕𑁆𑀕𑀳𑀺𑀢𑀢𑁆𑀢𑀸𑀬𑁂𑀯 ‘‘𑀢𑀤𑀢𑁆𑀣𑁄𑀯 𑀳𑁄𑀢𑀻’’𑀢𑀺 𑀧𑀝𑀺𑀧𑀸𑀤𑀦𑀓𑁆𑀔𑀫𑀸 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀧𑀭𑀲𑁆𑀲 𑀯𑀸𑀤𑁂 𑀉𑀧𑀸𑀭𑀫𑁆𑀪𑀁 𑀆𑀭𑁄𑀧𑁂𑀢𑀼𑀁 𑀅𑀢𑁆𑀢𑀦𑁄 𑀯𑀸𑀤𑀁 𑀧𑀫𑁄𑀘𑁂𑀢𑀼𑀜𑁆𑀘 𑀅𑀲𑀓𑁆𑀓𑁄𑀦𑁆𑀢𑀸𑀧𑀺 𑀢𑀁 𑀅𑀢𑁆𑀣𑀁 𑀦𑀸𑀦𑀼𑀪𑁄𑀦𑁆𑀢𑀺 𑀘 𑀦 𑀯𑀺𑀦𑁆𑀤𑀦𑁆𑀢𑀺𑀬𑁂𑀯𑀸𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀇𑀥𑀸𑀧𑀺 𑀳𑀺 𑀘-𑀲𑀤𑁆𑀤𑁄 𑀅𑀯𑀥𑀸𑀭𑀡𑀢𑁆𑀣𑁄𑀯. ‘‘𑀢𑁂𑀲’’𑀦𑁆𑀢𑀺𑀆𑀤𑀻𑀲𑀼 ¶ 𑀢𑁂𑀲𑀁 𑀢𑁂 𑀥𑀫𑁆𑀫𑀸 𑀤𑀼𑀕𑁆𑀕𑀳𑀺𑀢𑀢𑁆𑀢𑀸 𑀉𑀧𑀸𑀭𑀫𑁆𑀪𑀫𑀸𑀦𑀤𑀩𑁆𑀩𑀫𑀓𑁆𑀔𑀧𑀮𑀸𑀲𑀸𑀤𑀺𑀳𑁂𑀢𑀼𑀪𑀸𑀯𑁂𑀦 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀕𑁆𑀕𑀳𑀺𑀢𑀸𑀢𑀺 𑀳𑀺 𑀳𑁂𑀢𑀼𑀕𑀩𑁆𑀪𑀯𑀘𑀦𑀁. 𑀢𑁂𑀦𑀸𑀳 ‘‘𑀤𑀼𑀕𑁆𑀕𑀳𑀺𑀢𑀢𑁆𑀢𑀸 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦’’𑀦𑁆𑀢𑀺 (𑀫. 𑀦𑀺. 𑁧.𑁨𑁩𑁮). 𑀏𑀢𑁆𑀣 𑀘 𑀓𑀸𑀭𑀡𑁂 𑀨𑀮𑀯𑁄𑀳𑀸𑀭𑀯𑀲𑁂𑀦 ‘‘𑀢𑁂 𑀥𑀫𑁆𑀫𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’𑀢𑀺 𑀯𑀼𑀢𑁆𑀢𑀁 𑀬𑀣𑀸 ‘‘𑀖𑀢𑀫𑀸𑀬𑀼, 𑀤𑀥𑀺 𑀩𑀮’’𑀦𑁆𑀢𑀺. 𑀢𑀣𑀸 𑀳𑀺 𑀓𑀺𑀜𑁆𑀘𑀸𑀧𑀺 𑀦 𑀢𑁂 𑀥𑀫𑁆𑀫𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀢𑀣𑀸𑀧𑀺 𑀯𑀼𑀢𑁆𑀢𑀦𑀬𑁂𑀦 𑀧𑀭𑀺𑀬𑀸𑀧𑀼𑀡𑀦𑁆𑀢𑀸𑀦𑀁 𑀲𑀚𑁆𑀛𑀸𑀬𑀦𑀓𑀸𑀮𑁂, 𑀯𑀺𑀯𑀸𑀤𑀓𑀸𑀮𑁂 𑀘 𑀢𑀫𑁆𑀫𑀽𑀮𑀓𑀸𑀦𑀁 𑀉𑀧𑀸𑀭𑀫𑁆𑀪𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀅𑀓𑀼𑀲𑀮𑀸𑀦𑀁 𑀉𑀧𑁆𑀧𑀢𑁆𑀢𑀺𑀲𑀫𑁆𑀪𑀯𑀢𑁄 ‘‘𑀢𑁂…𑀧𑁂… 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀽𑀢𑀺 𑀏𑀢𑁆𑀣 𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲𑀢𑁆𑀣𑀲𑁆𑀲 𑀅𑀦𑀦𑀼𑀪𑀯𑀦𑀁, 𑀢𑁂𑀲𑀜𑁆𑀘 𑀥𑀫𑁆𑀫𑀸𑀦𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑀁 𑀧𑀭𑀸𑀫𑀲𑀢𑀺. 𑀓𑀺𑀲𑁆𑀲𑀸𑀢𑀺 𑀲𑀸𑀫𑀺𑀯𑀘𑀦𑀁 𑀳𑁂𑀢𑁆𑀯𑀢𑁆𑀣𑁂, 𑀢𑀣𑀸 𑀳𑁂𑀢𑀽𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀜𑁆𑀘.

𑀬𑀸 ¶ 𑀧𑀦𑀸𑀢𑀺 𑀏𑀢𑁆𑀣 𑀓𑀺𑀭𑀺𑀬𑀸 𑀧𑀸𑀴𑀺𑀯𑀲𑁂𑀦 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀓𑀺𑀭𑀺𑀬𑀸𑀧𑀓𑁆𑀔𑁂 𑀬𑀸 𑀲𑀼𑀕𑁆𑀕𑀳𑀺𑀢𑀸𑀢𑀺 𑀅𑀪𑁂𑀤𑁂𑀧𑀺 𑀪𑁂𑀤𑀯𑁄𑀳𑀸𑀭𑁄 ‘‘𑀘𑀸𑀭𑀺𑀓𑀁 𑀧𑀓𑁆𑀓𑀫𑀢𑀺, 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁫𑁪, 𑁩𑁦𑁦) 𑀯𑀺𑀬. 𑀢𑀤𑁂𑀯𑀢𑁆𑀣𑀁 𑀯𑀺𑀯𑀭𑀢𑀺 ‘‘𑀲𑀻𑀮𑀓𑁆𑀔𑀦𑁆𑀥𑀸𑀤𑀻’’𑀢𑀺𑀆𑀤𑀺𑀦𑀸, 𑀆𑀤𑀺𑀲𑀤𑁆𑀤𑁂𑀦 𑀘𑁂𑀢𑁆𑀣 𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀬𑁄 𑀳𑀺 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑀻𑀮𑀲𑁆𑀲 𑀆𑀕𑀢𑀝𑁆𑀞𑀸𑀦𑁂 𑀲𑀻𑀮𑀁 𑀧𑀽𑀭𑁂𑀢𑁆𑀯𑀸, 𑀲𑀫𑀸𑀥𑀺𑀦𑁄 𑀆𑀕𑀢𑀝𑁆𑀞𑀸𑀦𑁂 𑀲𑀫𑀸𑀥𑀺𑀁 𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀢𑁆𑀯𑀸, 𑀯𑀺𑀧𑀲𑁆𑀲𑀦𑀸𑀬 𑀆𑀕𑀢𑀝𑁆𑀞𑀸𑀦𑁂 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸, 𑀫𑀕𑁆𑀕𑀨𑀮𑀸𑀦𑀁 𑀆𑀕𑀢𑀝𑁆𑀞𑀸𑀦𑁂 ‘‘𑀫𑀕𑁆𑀕𑀁 𑀪𑀸𑀯𑁂𑀲𑁆𑀲𑀸𑀫𑀺, 𑀨𑀮𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀕𑁆𑀕𑀡𑁆𑀳𑀸𑀢𑀺, 𑀢𑀲𑁆𑀲𑁂𑀯 𑀲𑀸 𑀧𑀭𑀺𑀬𑀢𑁆𑀢𑀺 𑀦𑀺𑀲𑁆𑀲𑀭𑀡𑀢𑁆𑀣𑀸 𑀦𑀸𑀫 𑀳𑁄𑀢𑀺. 𑀬𑀦𑁆𑀢𑀺 𑀬𑀁 𑀧𑀭𑀺𑀬𑀢𑁆𑀢𑀺𑀲𑀼𑀕𑁆𑀕𑀳𑀡𑀁. 𑀯𑀼𑀢𑁆𑀢𑀁 𑀅𑀮𑀕𑀤𑁆𑀤𑀲𑀼𑀢𑁆𑀢𑁂. 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀲𑀻𑀮𑀸𑀤𑀻𑀦𑀁 𑀆𑀕𑀢𑀝𑁆𑀞𑀸𑀦𑁂 𑀲𑀻𑀮𑀸𑀤𑀻𑀦𑀺 𑀧𑀽𑀭𑁂𑀦𑁆𑀢𑀸𑀦𑀫𑁆𑀧𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀲𑀫𑀚𑁆𑀛𑁂 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀬 𑀧𑀲𑀦𑁆𑀦𑁂𑀳𑀺 𑀉𑀧𑀦𑀻𑀢𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀸𑀦𑀫𑁆𑀧𑀺 𑀧𑀭𑁂𑀲𑀁 𑀯𑀸𑀤𑁂 𑀲𑀳𑀥𑀫𑁆𑀫𑁂𑀦 𑀉𑀧𑀸𑀭𑀫𑁆𑀪𑀁 𑀆𑀭𑁄𑀧𑁂𑀦𑁆𑀢𑀸𑀦𑀫𑁆𑀧𑀺 𑀲𑀓𑀯𑀸𑀤𑀢𑁄 𑀧𑀭𑁂𑀳𑀺 𑀆𑀭𑁄𑀧𑀺𑀢𑀤𑁄𑀲𑀁 𑀧𑀭𑀺𑀳𑀭𑀦𑁆𑀢𑀸𑀦𑀫𑁆𑀧𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀦 𑀓𑁂𑀯𑀮𑀁 𑀲𑀼𑀕𑁆𑀕𑀳𑀺𑀢𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀫𑀕𑁆𑀕𑀪𑀸𑀯𑀦𑀸𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀤𑀻𑀦𑀺𑀬𑁂𑀯, 𑀅𑀧𑀺 𑀢𑀼 𑀧𑀭𑀯𑀸𑀤𑀦𑀺𑀕𑁆𑀕𑀳𑀲𑀓𑀯𑀸𑀤𑀧𑀢𑀺𑀝𑁆𑀞𑀸𑀧𑀦𑀸𑀦𑀺𑀧𑀺 𑀇𑀚𑁆𑀛𑀦𑁆𑀢𑀺. 𑀢𑀣𑀸 𑀘 𑀯𑀼𑀢𑁆𑀢𑀁 𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀸 𑀤𑀻𑀲𑀼 ‘‘𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁬𑁮).

𑀬𑀁 ¶ 𑀧𑀦𑀸𑀢𑀺 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑁂𑀦 𑀤𑀼𑀯𑀺𑀥𑁂𑀦 𑀅𑀢𑁆𑀣𑁄. 𑀤𑀼𑀓𑁆𑀔𑀧𑀭𑀺𑀚𑀸𑀦𑁂𑀦 𑀧𑀭𑀺𑀜𑁆𑀜𑀸𑀢𑀓𑁆𑀔𑀦𑁆𑀥𑁄. 𑀲𑀫𑀼𑀤𑀬𑀧𑁆𑀧𑀳𑀸𑀦𑁂𑀦 𑀧𑀳𑀻𑀦𑀓𑀺𑀮𑁂𑀲𑁄. 𑀧𑀝𑀺𑀯𑀺𑀤𑁆𑀥𑀸𑀭𑀳𑀢𑁆𑀢𑀨𑀮𑀢𑀸𑀬 𑀧𑀝𑀺𑀯𑀺𑀤𑁆𑀥𑀸𑀓𑀼𑀧𑁆𑀧𑁄. 𑀅𑀓𑀼𑀧𑁆𑀧𑀦𑁆𑀢𑀺 𑀘 𑀅𑀭𑀳𑀢𑁆𑀢𑀨𑀮𑀲𑁆𑀲𑁂𑀢𑀁 𑀦𑀸𑀫. 𑀲𑀢𑀺𑀧𑀺 𑀳𑀺 𑀘𑀢𑁆𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁, 𑀘𑀢𑀼𑀦𑁆𑀦𑀜𑁆𑀘 𑀨𑀮𑀸𑀦𑀁 𑀅𑀯𑀺𑀦𑀲𑁆𑀲𑀦𑀪𑀸𑀯𑁂 𑀲𑀢𑁆𑀢𑀦𑁆𑀦𑀁 𑀲𑁂𑀓𑁆𑀔𑀸𑀦𑀁 𑀲𑀓𑀲𑀓𑀦𑀸𑀫𑀧𑀭𑀺𑀘𑁆𑀘𑀸𑀕𑁂𑀦 𑀉𑀧𑀭𑀽𑀧𑀭𑀺 𑀦𑀸𑀫𑀦𑁆𑀢𑀭𑀧𑁆𑀧𑀢𑁆𑀢𑀺𑀢𑁄 𑀢𑁂𑀲𑀁 𑀫𑀕𑁆𑀕𑀨𑀮𑀸𑀢𑀺 ‘‘𑀅𑀓𑀼𑀧𑁆𑀧𑀸𑀫𑀺’’𑀢𑀺 𑀦 𑀯𑀼𑀘𑁆𑀘𑀦𑁆𑀢𑀺. 𑀅𑀭𑀳𑀸 𑀧𑀦 𑀲𑀩𑁆𑀩𑀤𑀸𑀧𑀺 𑀅𑀭𑀳𑀸𑀬𑁂𑀯 𑀦𑀸𑀫𑀸𑀢𑀺 𑀢𑀲𑁆𑀲𑁂𑀯 𑀨𑀮𑀁 𑀧𑀼𑀕𑁆𑀕𑀮𑀦𑀸𑀫𑀯𑀲𑁂𑀦 ‘‘𑀅𑀓𑀼𑀧𑁆𑀧’’𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀫𑀺𑀦𑀸 𑀘 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀔𑀻𑀡𑀸𑀲𑀯𑀲𑁆𑀲𑁂𑀯 𑀧𑀭𑀺𑀬𑀢𑁆𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺 𑀦𑀸𑀫𑀸’’𑀢𑀺. 𑀢𑀲𑁆𑀲 𑀳𑀺 𑀅𑀧𑀭𑀺𑀜𑁆𑀜𑀸𑀢𑀁, 𑀅𑀧𑁆𑀧𑀳𑀻𑀦𑀁 𑀅𑀪𑀸𑀯𑀺𑀢𑀁, 𑀅𑀲𑀘𑁆𑀙𑀺𑀓𑀢𑀁 𑀯𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑁄 𑀩𑀼𑀤𑁆𑀥𑀯𑀘𑀦𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑁄𑀧𑀺 𑀢𑀦𑁆𑀢𑀺𑀥𑀸𑀭𑀓𑁄 𑀧𑀯𑁂𑀡𑀻𑀧𑀸𑀮𑀓𑁄 𑀯𑀁𑀲𑀸𑀦𑀼𑀭𑀓𑁆𑀔𑀓𑁄𑀯 𑀳𑀼𑀢𑁆𑀯𑀸 𑀧𑀭𑀺𑀬𑀸𑀧𑀼𑀡𑀸𑀢𑀺, 𑀢𑁂𑀦𑁂𑀯𑀸𑀳 ‘‘𑀧𑀯𑁂𑀡𑀻𑀧𑀸𑀮𑀦𑀢𑁆𑀣𑀸𑀬𑀸’’𑀢𑀺𑀆𑀤𑀺. 𑀧𑀯𑁂𑀡𑀻 𑀘𑁂𑀢𑁆𑀣 𑀥𑀫𑁆𑀫𑀲𑀦𑁆𑀢𑀢𑀺 𑀥𑀫𑁆𑀫𑀲𑁆𑀲 𑀅𑀯𑀺𑀘𑁆𑀙𑁂𑀤𑁂𑀦 𑀧𑀯𑀢𑁆𑀢𑀺. 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑀁𑀲𑁄𑀢𑀺 𑀘 𑀬𑀣𑀸𑀯𑀼𑀢𑁆𑀢𑀧𑀯𑁂𑀡𑀻𑀬𑁂𑀯.

𑀦𑀦𑀼 𑀘 𑀬𑀤𑀺 𑀧𑀯𑁂𑀡𑀻𑀧𑀸𑀮𑀦𑀢𑁆𑀣𑀸𑀬 𑀩𑀼𑀤𑁆𑀥𑀯𑀘𑀦𑀲𑁆𑀲 𑀧𑀭𑀺𑀬𑀸𑀧𑀼𑀡𑀦𑀁 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺, 𑀅𑀣 𑀓𑀲𑁆𑀫𑀸 ‘‘𑀔𑀻𑀡𑀸𑀲𑀯𑁄’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀓𑀘𑁆𑀘𑀲𑁆𑀲 𑀳𑀺 𑀧𑀼𑀣𑀼𑀚𑁆𑀚𑀦𑀲𑁆𑀲𑀸𑀧𑀺 𑀅𑀬𑀁 𑀦𑀬𑁄 𑀮𑀩𑁆𑀪𑀢𑀺. 𑀢𑀣𑀸 𑀳𑀺 𑀏𑀓𑀘𑁆𑀘𑁄 𑀧𑀼𑀣𑀼𑀚𑁆𑀚𑀦𑁄 𑀪𑀺𑀓𑁆𑀔𑀼 𑀙𑀸𑀢𑀓𑀪𑀬𑀸𑀤𑀺𑀦𑀸 𑀕𑀦𑁆𑀣𑀥𑀼𑀭𑁂𑀲𑀼 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀲𑀺𑀢𑀼𑀫𑀲𑀓𑁆𑀓𑁄𑀦𑁆𑀢𑁂𑀲𑀼 ¶ 𑀲𑀬𑀁 𑀪𑀺𑀓𑁆𑀔𑀸𑀘𑀸𑀭𑁂𑀦 𑀅𑀢𑀺𑀓𑀺𑀮𑀫𑀫𑀸𑀦𑁄 ‘‘𑀅𑀢𑀺𑀫𑀥𑀼𑀭𑀁 𑀩𑀼𑀤𑁆𑀥𑀯𑀘𑀦𑀁 𑀫𑀸 𑀦𑀲𑁆𑀲𑀢𑀼, 𑀢𑀦𑁆𑀢𑀺𑀁 𑀥𑀸𑀭𑁂𑀲𑁆𑀲𑀸𑀫𑀺, 𑀯𑀁𑀲𑀁 𑀞𑀧𑁂𑀲𑁆𑀲𑀸𑀫𑀺, 𑀧𑀯𑁂𑀡𑀺𑀁 𑀧𑀸𑀮𑁂𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀬𑀸𑀧𑀼𑀡𑀸𑀢𑀺. 𑀢𑀲𑁆𑀫𑀸 𑀢𑀲𑁆𑀲𑀸𑀧𑀺 𑀧𑀭𑀺𑀬𑀢𑁆𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺 𑀦𑀸𑀫 𑀓𑀲𑁆𑀫𑀸 𑀦 𑀳𑁄𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀏𑀯𑀁 𑀲𑀦𑁆𑀢𑁂𑀧𑀺 𑀳𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀭𑀺𑀬𑀢𑁆𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺 𑀦𑀸𑀫 𑀦 𑀳𑁄𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀧𑀼𑀣𑀼𑀚𑁆𑀚𑀦𑁄 ‘‘𑀧𑀯𑁂𑀡𑀺𑀁 𑀧𑀸𑀮𑁂𑀲𑁆𑀲𑀸𑀫𑀻’’𑀢𑀺 𑀅𑀚𑁆𑀛𑀸𑀲𑀬𑁂𑀦 𑀧𑀭𑀺𑀬𑀸𑀧𑀼𑀡𑀸𑀢𑀺, 𑀅𑀢𑁆𑀢𑀦𑁄 𑀧𑀦 𑀪𑀯𑀓𑀦𑁆𑀢𑀸𑀭𑀢𑁄 𑀅𑀯𑀺𑀢𑀺𑀡𑁆𑀡𑀢𑁆𑀢𑀸 𑀢𑀲𑁆𑀲 𑀲𑀸 𑀧𑀭𑀺𑀬𑀢𑁆𑀢𑀺 𑀦𑀺𑀲𑁆𑀲𑀭𑀡𑀢𑁆𑀣𑀸𑀬𑁂𑀯 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀭𑀺𑀬𑀢𑁆𑀢𑀺 𑀅𑀮𑀕𑀤𑁆𑀤𑀼𑀧𑀫𑀸 𑀯𑀸 𑀳𑁄𑀢𑀺, 𑀦𑀺𑀲𑁆𑀲𑀭𑀡𑀢𑁆𑀣𑀸 𑀯𑀸. 𑀲𑀢𑁆𑀢𑀦𑁆𑀦𑀁 𑀲𑁂𑀓𑁆𑀔𑀸𑀦𑀁 𑀦𑀺𑀲𑁆𑀲𑀭𑀡𑀢𑁆𑀣𑀸𑀯. 𑀔𑀻𑀡𑀸𑀲𑀯𑀸𑀦𑀁 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀔𑀻𑀡𑀸𑀲𑀯𑁄 𑀳𑀺 𑀪𑀡𑁆𑀟𑀸𑀕𑀸𑀭𑀺𑀓 𑀲𑀤𑀺𑀲𑀢𑁆𑀢𑀸 ‘‘𑀪𑀡𑁆𑀟𑀸𑀕𑀸𑀭𑀺𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀳𑀺 𑀪𑀡𑁆𑀟𑀸𑀕𑀸𑀭𑀺𑀓𑁄 𑀅𑀮𑀗𑁆𑀓𑀸𑀭𑀪𑀡𑁆𑀟𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀧𑀲𑀸𑀥𑀦𑀓𑀸𑀮𑁂 𑀢𑀤𑀼𑀧𑀺𑀬𑀁 𑀅𑀮𑀗𑁆𑀓𑀸𑀭𑀪𑀡𑁆𑀟𑀁 𑀭𑀜𑁆𑀜𑁄 𑀉𑀧𑀦𑀸𑀫𑁂𑀢𑁆𑀯𑀸 𑀢𑀁 𑀅𑀮𑀗𑁆𑀓𑀭𑁄𑀢𑀺, 𑀏𑀯𑀁 𑀔𑀻𑀡𑀸𑀲𑀯𑁄𑀧𑀺 𑀥𑀫𑁆𑀫𑀭𑀢𑀦𑀪𑀡𑁆𑀟𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀫𑁄𑀓𑁆𑀔𑀸𑀥𑀺𑀕𑀫𑀸𑀬 ¶ 𑀪𑀩𑁆𑀩𑀭𑀽𑀧𑁂 𑀲𑀳𑁂𑀢𑀼𑀓𑁂 𑀲𑀢𑁆𑀢𑁂 𑀧𑀲𑁆𑀲𑀺𑀢𑁆𑀯𑀸 𑀢𑀤𑀦𑀼𑀭𑀽𑀧𑀁 𑀥𑀫𑁆𑀫𑀤𑁂𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀫𑀕𑁆𑀕𑀗𑁆𑀕𑀩𑁄𑀚𑁆𑀛𑀗𑁆𑀕𑀸𑀤𑀺𑀲𑀗𑁆𑀔𑀸𑀢𑁂𑀦 𑀮𑁄𑀓𑀼𑀢𑁆𑀢𑀭𑁂𑀦 𑀅𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀭𑁄𑀢𑀻𑀢𑀺.

𑀏𑀯𑀁 𑀢𑀺𑀲𑁆𑀲𑁄 𑀧𑀭𑀺𑀬𑀢𑁆𑀢𑀺𑀬𑁄 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀢𑀻𑀲𑀼𑀧𑀺 𑀧𑀺𑀝𑀓𑁂𑀲𑀼 𑀬𑀣𑀸𑀭𑀳𑀁 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀬𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀺𑀪𑀚𑀦𑁆𑀢𑁄 ‘‘𑀯𑀺𑀦𑀬𑁂 𑀧𑀦𑀸’’𑀢𑀺𑀆𑀤𑀺𑀫𑀸𑀳. ‘‘𑀲𑀻𑀮𑀲𑀫𑁆𑀧𑀤𑀁 𑀦𑀺𑀲𑁆𑀲𑀸𑀬 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀧𑀸𑀧𑀼𑀡𑀸𑀢𑀻’’𑀢𑀺𑀆𑀤𑀻𑀲𑀼 𑀬𑀲𑁆𑀫𑀸 𑀲𑀻𑀮𑀁 𑀯𑀺𑀲𑀼𑀚𑁆𑀛𑀫𑀸𑀦𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀩𑀮𑁂𑀦, 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀩𑀮𑁂𑀦 𑀘 𑀲𑀁𑀓𑀺𑀮𑁂𑀲𑀫𑀮𑀢𑁄 𑀯𑀺𑀲𑀼𑀚𑁆𑀛𑀢𑀺, 𑀧𑀸𑀭𑀺𑀧𑀽𑀭𑀺𑀜𑁆𑀘 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀲𑀻𑀮𑀲𑀫𑁆𑀧𑀤𑀸 𑀲𑀺𑀚𑁆𑀛𑀫𑀸𑀦𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀪𑀸𑀯𑁂𑀦 𑀲𑀢𑀺𑀩𑀮𑀁, 𑀜𑀸𑀡𑀩𑀮𑀜𑁆𑀘 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀻𑀢𑀺 𑀢𑀲𑁆𑀲𑀸 𑀯𑀺𑀚𑁆𑀚𑀢𑁆𑀢𑀬𑀽𑀧𑀦𑀺𑀲𑁆𑀲𑀬𑀢𑀸 𑀯𑁂𑀤𑀺𑀢𑀩𑁆𑀩𑀸 𑀲𑀪𑀸𑀕𑀳𑁂𑀢𑀼𑀲𑀫𑁆𑀧𑀸𑀤𑀦𑀢𑁄. 𑀲𑀢𑀺𑀩𑀮𑁂𑀦 𑀳𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀯𑀺𑀚𑁆𑀚𑀸𑀲𑀺𑀤𑁆𑀥𑀺. 𑀲𑀫𑁆𑀧𑀚𑀜𑁆𑀜𑀩𑀮𑁂𑀦 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀲𑀼𑀤𑀺𑀝𑁆𑀞𑀓𑀸𑀭𑀺𑀢𑀸𑀧𑀭𑀺𑀘𑀬𑁂𑀦 𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀦𑀼𑀩𑀤𑁆𑀥𑀸𑀬 𑀤𑀼𑀢𑀺𑀬𑀯𑀺𑀚𑁆𑀚𑀸𑀬 𑀲𑀺𑀤𑁆𑀥𑀺. 𑀯𑀻𑀢𑀺𑀓𑁆𑀓𑀫𑀸𑀪𑀸𑀯𑁂𑀦 𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀲𑀩𑁆𑀪𑀸𑀯𑀢𑁄 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀢𑀸𑀯𑀲𑁂𑀦 𑀅𑀚𑁆𑀛𑀸𑀲𑀬𑀲𑀼𑀤𑁆𑀥𑀺𑀬𑀸 𑀢𑀢𑀺𑀬𑀯𑀺𑀚𑁆𑀚𑀸𑀲𑀺𑀤𑁆𑀥𑀺. 𑀧𑀼𑀭𑁂𑀢𑀭𑀲𑀺𑀤𑁆𑀥𑀸𑀦𑀁 𑀲𑀫𑀸𑀥𑀺𑀧𑀜𑁆𑀜𑀸𑀦𑀁 𑀧𑀸𑀭𑀺𑀧𑀽𑀭𑀺𑀁 𑀯𑀺𑀦𑀸 𑀲𑀻𑀮𑀲𑁆𑀲 𑀆𑀲𑀯𑀓𑁆𑀔𑀬𑀜𑀸𑀡𑀽𑀧𑀦𑀺𑀲𑁆𑀲𑀬𑀢𑀸 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑁂𑀳𑀺 𑀤𑀻𑀧𑁂𑀢𑀩𑁆𑀩𑀸. ‘‘𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺 (𑀲𑀁. 𑀦𑀺. 𑁩.𑁫; 𑁫.𑁧𑁦𑁭𑁧; 𑀦𑁂𑀢𑁆𑀢𑀺. 𑁪𑁦; 𑀫𑀺. 𑀧. 𑁧𑁪) 𑀯𑀘𑀦𑀢𑁄 𑀲𑀫𑀸𑀥𑀺𑀲𑀫𑁆𑀧𑀤𑀸 𑀙𑀴𑀪𑀺𑀜𑁆𑀜𑀢𑀸𑀬 𑀉𑀧𑀦𑀺𑀲𑁆𑀲𑀬𑁄. ‘‘𑀬𑁄𑀕𑀸 𑀯𑁂 𑀚𑀸𑀬𑀢𑁂 𑀪𑀽𑀭𑀻’’𑀢𑀺 (𑀥. 𑀧. 𑁨𑁮𑁨) 𑀯𑀘𑀦𑀢𑁄 𑀧𑀼𑀩𑁆𑀩𑀬𑁄𑀕𑁂𑀦 𑀕𑀭𑀼𑀯𑀸𑀲𑀤𑁂𑀲𑀪𑀸𑀲𑀸𑀓𑁄𑀲𑀮𑁆𑀮𑀉𑀕𑁆𑀕𑀳𑀡𑀧𑀭𑀺𑀧𑀼𑀘𑁆𑀙𑀸𑀤𑀻𑀳𑀺 𑀘 𑀧𑀭𑀺𑀪𑀸𑀯𑀺𑀢𑀸 𑀧𑀜𑁆𑀜𑀸𑀲𑀫𑁆𑀧𑀤𑀸 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀪𑁂𑀤𑀲𑁆𑀲 𑀉𑀧𑀦𑀺𑀲𑁆𑀲𑀬𑁄. 𑀏𑀢𑁆𑀣 𑀘 ‘‘𑀲𑀻𑀮𑀲𑀫𑁆𑀧𑀤𑀁 𑀦𑀺𑀲𑁆𑀲𑀸𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀬𑀲𑁆𑀲 𑀲𑀫𑀸𑀥𑀺𑀯𑀺𑀚𑀫𑁆𑀪𑀦𑀪𑀽𑀢𑀸 𑀅𑀦𑀯𑀲𑁂𑀲𑀸 𑀙 𑀅𑀪𑀺𑀜𑁆𑀜𑀸 𑀦 𑀇𑀚𑁆𑀛𑀦𑁆𑀢𑀺, 𑀢𑀲𑁆𑀲 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀦 𑀲𑀫𑀸𑀥𑀺𑀲𑀫𑁆𑀧𑀤𑀸 𑀅𑀢𑁆𑀣𑀻𑀢𑀺 𑀲𑀢𑀺𑀧𑀺 𑀯𑀺𑀚𑁆𑀚𑀸𑀦𑀁 𑀅𑀪𑀺𑀜𑁆𑀜𑁂𑀓𑀤𑁂𑀲𑀪𑀸𑀯𑁂 𑀲𑀻𑀮𑀲𑀫𑁆𑀧𑀤𑀸𑀲𑀫𑀼𑀤𑀸𑀕𑀢𑀸 𑀏𑀯 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀕𑀳𑀺𑀢𑀸, 𑀬𑀣𑀸 𑀘 𑀧𑀜𑁆𑀜𑀸𑀲𑀫𑁆𑀧𑀤𑀸𑀲𑀫𑀼𑀤𑀸𑀕𑀢𑀸 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀲𑁆𑀲 ¶ 𑀫𑀕𑁆𑀕𑁂𑀦𑁂𑀯 𑀇𑀚𑁆𑀛𑀦𑁆𑀢𑀺 𑀫𑀕𑁆𑀕𑀓𑁆𑀔𑀡𑁂𑀬𑁂𑀯 𑀢𑀸𑀲𑀁 𑀧𑀝𑀺𑀮𑀤𑁆𑀥𑀢𑁆𑀢𑀸. 𑀏𑀯𑀁 𑀲𑀻𑀮𑀲𑀫𑁆𑀧𑀤𑀸𑀲𑀫𑀼𑀤𑀸𑀕𑀢𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀲𑀫𑀸𑀥𑀺𑀲𑀫𑁆𑀧𑀤𑀸𑀲𑀫𑀼𑀤𑀸𑀕𑀢𑀸 𑀘 𑀙 𑀅𑀪𑀺𑀜𑁆𑀜𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑁂𑀦𑁂𑀯 𑀇𑀚𑁆𑀛𑀦𑁆𑀢𑀻𑀢𑀺 𑀫𑀕𑁆𑀕𑀸𑀥𑀺𑀕𑀫𑁂𑀦𑁂𑀯 𑀢𑀸𑀲𑀁 𑀅𑀥𑀺𑀕𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀜𑁆𑀘 𑀧𑀘𑁆𑀘𑁂𑀓𑀩𑁄𑀥𑀺𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀲𑀫𑀥𑀺𑀕𑀫𑀲𑀤𑀺𑀲𑀸 𑀳𑀺 𑀇𑀫𑁂𑀲𑀁 𑀅𑀭𑀺𑀬𑀸𑀦𑀁 𑀇𑀫𑁂 𑀯𑀺𑀲𑁂𑀲𑀸𑀥𑀺𑀕𑀫𑀸𑀢𑀺.

𑀢𑀸𑀲𑀁𑀬𑁂𑀯 ¶ 𑀘 𑀢𑀢𑁆𑀣 𑀧𑀪𑁂𑀤𑀯𑀘𑀦𑀢𑁄𑀢𑀺 𑀏𑀢𑁆𑀣 ‘‘𑀢𑀸𑀲𑀁𑀬𑁂𑀯𑀸’’𑀢𑀺 𑀅𑀯𑀥𑀸𑀭𑀡𑀁 𑀧𑀸𑀧𑀼𑀡𑀺𑀢𑀩𑁆𑀩𑀸𑀦𑀁 𑀙𑀴𑀪𑀺𑀜𑁆𑀜𑀸𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀯𑀺𑀦𑀬𑁂 𑀧𑀪𑁂𑀤𑀯𑀘𑀦𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑁂𑀭𑀜𑁆𑀚𑀓𑀡𑁆𑀟𑁂 (𑀧𑀸𑀭𑀸. 𑁧𑁨) 𑀳𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸𑀯 𑀯𑀺𑀪𑀢𑁆𑀢𑀸𑀢𑀺. 𑀘𑀲𑀤𑁆𑀤𑁂𑀦 𑀲𑀫𑀼𑀘𑁆𑀘𑀺𑀦𑀦𑀜𑁆𑀘 𑀢𑀸𑀲𑀁 𑀏𑀢𑁆𑀣 𑀏𑀓𑀤𑁂𑀲𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀅𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀦𑀫𑁆𑀧𑀺 𑀏𑀓𑀤𑁂𑀲𑀸𑀦𑀁 𑀢𑀢𑁆𑀣 𑀯𑀼𑀢𑁆𑀢𑀢𑁆𑀢𑀸. 𑀤𑀼𑀢𑀺𑀬𑁂 ‘‘𑀢𑀸𑀲𑀁𑀬𑁂𑀯𑀸’’𑀢𑀺 𑀅𑀯𑀥𑀸𑀭𑀡𑀁 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀅𑀧𑁂𑀓𑁆𑀔𑀺𑀢𑁆𑀯𑀸 𑀓𑀢𑀁, 𑀦 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸. 𑀢𑀸 𑀳𑀺 𑀙𑀲𑀼 𑀅𑀪𑀺𑀜𑁆𑀜𑀸𑀲𑀼 𑀅𑀦𑁆𑀢𑁄𑀕𑀥𑀢𑁆𑀢𑀸 𑀲𑀼𑀢𑁆𑀢𑁂 𑀯𑀺𑀪𑀢𑁆𑀢𑀸𑀬𑁂𑀯𑀸𑀢𑀺. 𑀘-𑀲𑀤𑁆𑀤𑁂𑀦 𑀘 𑀧𑀝𑀺𑀲𑀫𑁆𑀪𑀺𑀤𑀸𑀦𑀫𑁂𑀓𑀤𑁂𑀲𑀯𑀘𑀦𑀁 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀢𑀢𑀺𑀬𑁂 ‘‘𑀢𑀸𑀲𑀜𑁆𑀘𑀸’’𑀢𑀺 𑀘-𑀲𑀤𑁆𑀤𑁂𑀦 𑀲𑁂𑀲𑀸𑀦𑀫𑁆𑀧𑀺 𑀢𑀢𑁆𑀣 𑀅𑀢𑁆𑀣𑀺𑀪𑀸𑀯𑀁 𑀤𑀻𑀧𑁂𑀢𑀺. 𑀅𑀪𑀺𑀥𑀫𑁆𑀫𑁂 𑀳𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀙 𑀅𑀪𑀺𑀜𑁆𑀜𑀸, 𑀘𑀢𑀲𑁆𑀲𑁄 𑀘 𑀧𑀝𑀺𑀲𑀫𑁆𑀪𑀺𑀤𑀸 𑀯𑀼𑀢𑁆𑀢𑀸𑀬𑁂𑀯. 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀧𑀦 𑀅𑀜𑁆𑀜𑀢𑁆𑀣 𑀧𑀪𑁂𑀤𑀯𑀘𑀦𑀸𑀪𑀸𑀯𑀁, 𑀢𑀢𑁆𑀣𑁂𑀯 𑀘 𑀲𑀫𑁆𑀫𑀸 𑀯𑀺𑀪𑀢𑁆𑀢𑀪𑀸𑀯𑀁 𑀤𑀻𑀧𑁂𑀢𑀼𑀓𑀸𑀫𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀅𑀯𑀥𑀸𑀭𑀡𑀫𑀓𑀢𑁆𑀯𑀸 ‘‘𑀢𑀢𑁆𑀣𑁂𑀯𑀸’’𑀢𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀯𑀥𑀸𑀭𑀡𑀁 𑀞𑀧𑁂𑀢𑀺. ‘‘𑀅𑀪𑀺𑀥𑀫𑁆𑀫𑁂 𑀧𑀦 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀙 𑀅𑀪𑀺𑀜𑁆𑀜𑀸, 𑀘𑀢𑀲𑁆𑀲𑁄 𑀘 𑀧𑀝𑀺𑀲𑀫𑁆𑀪𑀺𑀤𑀸 𑀅𑀜𑁆𑀜𑁂 𑀘 𑀲𑀫𑁆𑀫𑀧𑁆𑀧𑀥𑀸𑀦𑀸𑀤𑀬𑁄 𑀕𑀼𑀡𑀯𑀺𑀲𑁂𑀲𑀸 𑀯𑀺𑀪𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀯𑀺𑀪𑀢𑁆𑀢𑀸, 𑀯𑀺𑀲𑁂𑀲𑀢𑁄 𑀧𑀦 𑀧𑀜𑁆𑀜𑀸𑀚𑀸𑀢𑀺𑀓𑀢𑁆𑀢𑀸 𑀘𑀢𑀲𑁆𑀲𑁄𑀯 𑀧𑀝𑀺𑀲𑀫𑁆𑀪𑀺𑀤𑀸 𑀧𑀸𑀧𑀼𑀡𑀸𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘𑀢𑀸𑀲𑀜𑁆𑀘 𑀢𑀢𑁆𑀣𑁂𑀯𑀸’𑀢𑀺 𑀅𑀯𑀥𑀸𑀭𑀡𑀯𑀺𑀧𑀮𑁆𑀮𑀸𑀲𑁄 𑀓𑀢𑁄’’𑀢𑀺 𑀯𑀚𑀺𑀭𑀩𑀼𑀤𑁆𑀥𑀺𑀢𑁆𑀣𑁂𑀭𑁄. ‘‘𑀏𑀯’’𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁.

𑀲𑀼𑀔𑁄 𑀲𑀫𑁆𑀨𑀲𑁆𑀲𑁄 𑀏𑀢𑁂𑀲𑀦𑁆𑀢𑀺 𑀲𑀼𑀔𑀲𑀫𑁆𑀨𑀲𑁆𑀲𑀸𑀦𑀺, 𑀅𑀦𑀼𑀜𑁆𑀜𑀸𑀢𑀸𑀦𑀺𑀬𑁂𑀯 𑀢𑀸𑀤𑀺𑀲𑀸𑀦𑀺 𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀤𑀻𑀦𑀺, 𑀢𑁂𑀲𑀁 𑀨𑀲𑁆𑀲𑀲𑀸𑀫𑀜𑁆𑀜𑀢𑁄 𑀲𑀼𑀔𑁄 𑀯𑀸 𑀲𑀫𑁆𑀨𑀲𑁆𑀲𑁄 𑀢𑀣𑀸, 𑀅𑀦𑀼𑀜𑁆𑀜𑀸𑀢𑁄 𑀲𑁄 𑀬𑁂𑀲𑀦𑁆𑀢𑀺 𑀅𑀦𑀼𑀜𑁆𑀜𑀸𑀢𑀲𑀼𑀔𑀲𑀫𑁆𑀨𑀲𑁆𑀲𑀸𑀦𑀺, 𑀢𑀸𑀤𑀺𑀲𑀸𑀦𑀺 𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀤𑀻𑀦𑀺 𑀢𑁂𑀲𑀁 𑀨𑀲𑁆𑀲𑁂𑀦 𑀲𑀫𑀸𑀦𑀢𑀸𑀬. 𑀉𑀧𑀸𑀤𑀺𑀦𑁆𑀦𑀓𑀨𑀲𑁆𑀲𑁄 𑀇𑀢𑁆𑀣𑀺𑀨𑀲𑁆𑀲𑁄, 𑀫𑁂𑀣𑀼𑀦𑀥𑀫𑁆𑀫𑁄𑀬𑁂𑀯. 𑀯𑀼𑀢𑁆𑀢𑀁 𑀅𑀭𑀺𑀝𑁆𑀞𑁂𑀦 𑀦𑀸𑀫 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁂𑀦 𑀪𑀺𑀓𑁆𑀔𑀼𑀦𑀸 (𑀫. 𑀦𑀺. 𑁨𑁩𑁪; 𑀧𑀸𑀘𑀺. 𑁪𑁧𑁭). 𑀲𑁄 𑀳𑀺 𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀓𑀣𑀺𑀓𑁄 𑀓𑀫𑁆𑀫𑀓𑀺𑀮𑁂𑀲𑀯𑀺𑀧𑀸𑀓𑀉𑀧𑀯𑀸𑀤𑀆𑀡𑀸𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀧𑀜𑁆𑀘𑀯𑀺𑀥𑁂𑀲𑀼 𑀅𑀦𑁆𑀢𑀭𑀸𑀬𑀺𑀓𑁂𑀲𑀼 𑀆𑀡𑀸𑀯𑀻𑀢𑀺𑀓𑁆𑀓𑀫𑀦𑁆𑀢𑀭𑀸𑀬𑀺𑀓𑀁 𑀦 𑀚𑀸𑀦𑀸𑀢𑀺, 𑀲𑁂𑀲𑀦𑁆𑀢𑀭𑀸𑀬𑀺𑀓𑁂𑀬𑁂𑀯 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀲𑁄 𑀭𑀳𑁄𑀕𑀢𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺 ‘‘𑀇𑀫𑁂 𑀅𑀕𑀸𑀭𑀺𑀓𑀸 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀲𑁄𑀢𑀸𑀧𑀦𑁆𑀦𑀸𑀧𑀺 𑀲𑀓𑀤𑀸𑀕𑀸𑀫𑀺𑀦𑁄𑀧𑀺 𑀅𑀦𑀸𑀕𑀸𑀫𑀺𑀦𑁄𑀧𑀺 𑀳𑁄𑀦𑁆𑀢𑀺, 𑀪𑀺𑀓𑁆𑀔𑀽𑀧𑀺 𑀫𑀦𑀸𑀧𑀺𑀓𑀸𑀦𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺 𑀭𑀽𑀧𑀸𑀦𑀺 𑀧𑀲𑁆𑀲𑀦𑁆𑀢𑀺 ¶ …𑀧𑁂… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑁂 ¶ 𑀨𑁄𑀝𑁆𑀞𑀩𑁆𑀩𑁂 𑀨𑀼𑀲𑀦𑁆𑀢𑀺, 𑀫𑀼𑀤𑀼𑀓𑀸𑀦𑀺 𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀦𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀏𑀢𑀁 𑀲𑀩𑁆𑀩𑀫𑁆𑀧𑀺 𑀯𑀝𑁆𑀝𑀢𑀺, 𑀓𑀲𑁆𑀫𑀸 𑀇𑀢𑁆𑀣𑀻𑀦𑀁𑀬𑁂𑀯 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸 𑀦 𑀯𑀝𑁆𑀝𑀦𑁆𑀢𑀺, 𑀏𑀢𑁂𑀧𑀺 𑀯𑀝𑁆𑀝𑀦𑁆𑀢𑀺𑀬𑁂𑀯𑀸’’𑀢𑀺 𑀅𑀦𑀯𑀚𑁆𑀚𑁂𑀦 𑀧𑀘𑁆𑀘𑀬𑀧𑀭𑀺𑀪𑁄𑀕𑀭𑀲𑁂𑀦 𑀲𑀸𑀯𑀚𑁆𑀚𑀁 𑀓𑀸𑀫𑀕𑀼𑀡𑀧𑀭𑀺𑀪𑁄𑀕𑀭𑀲𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀲𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑀜𑁆𑀘 𑀦𑀺𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑀜𑁆𑀘 𑀏𑀓𑀁 𑀓𑀢𑁆𑀯𑀸 𑀣𑀼𑀮𑁆𑀮𑀯𑀸𑀓𑁂𑀳𑀺 𑀲𑀤𑁆𑀥𑀺𑀁 𑀅𑀢𑀺𑀲𑀼𑀔𑀼𑀫𑀲𑀼𑀢𑁆𑀢𑀁 𑀖𑀝𑁂𑀦𑁆𑀢𑁄 𑀯𑀺𑀬, 𑀲𑀸𑀲𑀧𑁂𑀦 𑀲𑀤𑁆𑀥𑀺𑀁 𑀲𑀺𑀦𑁂𑀭𑀼𑀦𑁄 𑀲𑀤𑀺𑀲𑀢𑀁 𑀉𑀧𑀲𑀁𑀳𑀭𑀦𑁆𑀢𑁄 𑀯𑀺𑀬 𑀘 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀓𑀺𑀁 𑀪𑀕𑀯𑀢𑀸 𑀫𑀳𑀸𑀲𑀫𑀼𑀤𑁆𑀤𑀁 𑀩𑀦𑁆𑀥𑀦𑁆𑀢𑁂𑀦 𑀯𑀺𑀬 𑀫𑀳𑀢𑀸 𑀉𑀲𑁆𑀲𑀸𑀳𑁂𑀦 𑀧𑀞𑀫𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀢𑁆𑀢𑀁, 𑀦𑀢𑁆𑀣𑀺 𑀏𑀢𑁆𑀣 𑀤𑁄𑀲𑁄’’𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀧𑀝𑀺𑀯𑀺𑀭𑀼𑀚𑁆𑀛𑀦𑁆𑀢𑁄 𑀯𑁂𑀲𑀸𑀭𑀚𑁆𑀚𑀜𑀸𑀡𑀁 𑀧𑀝𑀺𑀩𑀸𑀳𑀦𑁆𑀢𑁄 𑀅𑀭𑀺𑀬𑀫𑀕𑁆𑀕𑁂 𑀔𑀸𑀡𑀼𑀓𑀡𑁆𑀝𑀓𑀸𑀤𑀻𑀦𑀺 𑀧𑀓𑁆𑀔𑀺𑀧𑀦𑁆𑀢𑁄 ‘‘𑀫𑁂𑀣𑀼𑀦𑀥𑀫𑁆𑀫𑁂 𑀤𑁄𑀲𑁄 𑀦𑀢𑁆𑀣𑀻’’𑀢𑀺 𑀚𑀺𑀦𑀘𑀓𑁆𑀓𑁂 𑀧𑀳𑀸𑀭𑀫𑀤𑀸𑀲𑀺, 𑀢𑁂𑀦𑀸𑀳 ‘‘𑀢𑀣𑀸𑀳’’𑀦𑁆𑀢𑀺𑀆𑀤𑀺.

𑀅𑀦𑀢𑀺𑀓𑁆𑀓𑀫𑀦𑀢𑁆𑀣𑁂𑀦 𑀅𑀦𑁆𑀢𑀭𑀸𑀬𑁂 𑀦𑀺𑀬𑀼𑀢𑁆𑀢𑀸, 𑀅𑀦𑁆𑀢𑀭𑀸𑀬𑀁 𑀯𑀸 𑀨𑀮𑀁 𑀅𑀭𑀳𑀦𑁆𑀢𑀺, 𑀅𑀦𑁆𑀢𑀭𑀸𑀬𑀲𑁆𑀲 𑀯𑀸 𑀓𑀭𑀡𑀲𑀻𑀮𑀸𑀢𑀺 𑀅𑀦𑁆𑀢𑀭𑀸𑀬𑀺𑀓𑀸, 𑀲𑀕𑁆𑀕𑀫𑁄𑀓𑁆𑀔𑀸𑀦𑀁 𑀅𑀦𑁆𑀢𑀭𑀸𑀬𑀓𑀭𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂 𑀘 𑀓𑀫𑁆𑀫𑀓𑀺𑀮𑁂𑀲𑀯𑀺𑀧𑀸𑀓𑀉𑀧𑀯𑀸𑀤𑀆𑀡𑀸𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀧𑀜𑁆𑀘𑀯𑀺𑀥𑀸. 𑀯𑀺𑀢𑁆𑀣𑀸𑀭𑁄 𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸𑀤𑀻𑀲𑀼 (𑀧𑀸𑀘𑀺. 𑀅𑀝𑁆𑀞. 𑁪𑁧𑁭) 𑀕𑀳𑁂𑀢𑀩𑁆𑀩𑁄. 𑀅𑀬𑀁 𑀧𑀦𑁂𑀢𑁆𑀣 𑀧𑀤𑀢𑁆𑀣𑀲𑀫𑁆𑀩𑀦𑁆𑀥𑁄 𑁋 𑀬𑁂 𑀇𑀫𑁂 𑀥𑀫𑁆𑀫𑀸 𑀅𑀦𑁆𑀢𑀭𑀸𑀬𑀺𑀓𑀸 𑀇𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀸 𑀤𑁂𑀲𑀺𑀢𑀸 𑀘𑁂𑀯 𑀧𑀜𑁆𑀜𑀢𑁆𑀢𑀸 𑀘, 𑀢𑁂 𑀥𑀫𑁆𑀫𑁂 𑀧𑀝𑀺𑀲𑁂𑀯𑀢𑁄 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀬𑀣𑀸 𑀬𑁂𑀦 𑀧𑀓𑀸𑀭𑁂𑀦 𑀢𑁂 𑀥𑀫𑁆𑀫𑀸 𑀅𑀦𑁆𑀢𑀭𑀸𑀬𑀸𑀬 𑀲𑀕𑁆𑀕𑀫𑁄𑀓𑁆𑀔𑀸𑀦𑀁 𑀅𑀦𑁆𑀢𑀭𑀸𑀬𑀓𑀭𑀡𑀢𑁆𑀣𑀁 𑀦𑀸𑀮𑀁 𑀲𑀫𑀢𑁆𑀣𑀸 𑀦 𑀳𑁄𑀦𑁆𑀢𑀺, 𑀢𑀣𑀸 𑀢𑁂𑀦 𑀧𑀓𑀸𑀭𑁂𑀦 𑀅𑀳𑀁 𑀪𑀕𑀯𑀢𑀸 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀆𑀚𑀸𑀦𑀸𑀫𑀻𑀢𑀺. 𑀢𑀢𑁄 𑀤𑀼𑀲𑁆𑀲𑀻𑀮𑀪𑀸𑀯𑀁 𑀧𑀸𑀧𑀼𑀡𑀸𑀢𑀻𑀢𑀺 𑀢𑀢𑁄 𑀅𑀦𑀯𑀚𑁆𑀚𑀲𑀜𑁆𑀜𑀺𑀪𑀸𑀯𑀳𑁂𑀢𑀼𑀢𑁄 𑀯𑀻𑀢𑀺𑀓𑁆𑀓𑀫𑀺𑀢𑁆𑀯𑀸 𑀤𑀼𑀲𑁆𑀲𑀻𑀮𑀪𑀸𑀯𑀁 𑀧𑀸𑀧𑀼𑀡𑀸𑀢𑀺.

𑀘𑀢𑁆𑀢𑀸𑀭𑁄…𑀧𑁂…𑀆𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑁋

‘‘𑀘𑀢𑁆𑀢𑀸𑀭𑁄𑀫𑁂 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀦𑁄 𑀧𑀭𑀳𑀺𑀢𑀸𑀬, 𑀧𑀭𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀦𑁄 𑀅𑀢𑁆𑀢𑀳𑀺𑀢𑀸𑀬, 𑀦𑁂𑀯𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀦𑁄 𑀧𑀭𑀳𑀺𑀢𑀸𑀬, 𑀅𑀢𑁆𑀢𑀳𑀺𑀢𑀸𑀬 𑀘𑁂𑀯 𑀧𑀝𑀺𑀧𑀦𑁆𑀦𑁄 𑀧𑀭𑀳𑀺𑀢𑀸𑀬 𑀘…𑀧𑁂… 𑀇𑀫𑁂 𑀔𑁄 𑀪𑀺𑀓𑁆𑀔𑀯𑁂…𑀧𑁂… 𑀮𑁄𑀓𑀲𑁆𑀫𑀺’’𑀦𑁆𑀢𑀺 (𑀅. 𑀦𑀺. 𑁪.𑁯𑁬) 𑁋

𑀏𑀯𑀫𑀸𑀤𑀺𑀦𑀸 ¶ 𑀧𑀼𑀕𑁆𑀕𑀮𑀤𑁂𑀲𑀦𑀸𑀧𑀝𑀺𑀲𑀜𑁆𑀜𑀼𑀢𑁆𑀢𑀲𑀼𑀢𑁆𑀢𑀦𑁆𑀢𑀧𑀸𑀴𑀺𑀁 𑀦𑀺𑀤𑀲𑁆𑀲𑁂𑀢𑀺. 𑀅𑀥𑀺𑀧𑁆𑀧𑀸𑀬𑀦𑁆𑀢𑀺 ‘‘𑀅𑀬𑀁 𑀧𑀼𑀕𑁆𑀕𑀮𑀤𑁂𑀲𑀦𑀸𑀯𑁄𑀳𑀸𑀭𑀯𑀲𑁂𑀦, 𑀦 𑀧𑀭𑀫𑀢𑁆𑀣𑀢𑁄’’𑀢𑀺 𑀏𑀯𑀁 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀁. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀤𑀼𑀯𑁂 ¶ 𑀲𑀘𑁆𑀘𑀸𑀦𑀺 𑀅𑀓𑁆𑀔𑀸𑀲𑀺, 𑀲𑀫𑁆𑀩𑀼𑀤𑁆𑀥𑁄 𑀯𑀤𑀢𑀁 𑀯𑀭𑁄;

𑀲𑀫𑁆𑀫𑀼𑀢𑀺𑀁 𑀧𑀭𑀫𑀢𑁆𑀣𑀜𑁆𑀘, 𑀢𑀢𑀺𑀬𑀁 𑀦𑀽𑀧𑀮𑀩𑁆𑀪𑀢𑀺.

𑀲𑀗𑁆𑀓𑁂𑀢𑀯𑀘𑀦𑀁 𑀲𑀘𑁆𑀘𑀁, 𑀮𑁄𑀓𑀲𑀫𑁆𑀫𑀼𑀢𑀺𑀓𑀸𑀭𑀡𑀸;

𑀧𑀭𑀫𑀢𑁆𑀣𑀯𑀘𑀦𑀁 𑀲𑀘𑁆𑀘𑀁, 𑀥𑀫𑁆𑀫𑀸𑀦𑀁 𑀪𑀽𑀢𑀓𑀸𑀭𑀡𑀸.

𑀢𑀲𑁆𑀫𑀸 𑀯𑁄𑀳𑀸𑀭𑀓𑀼𑀲𑀮𑀲𑁆𑀲, 𑀮𑁄𑀓𑀦𑀸𑀣𑀲𑁆𑀲 𑀲𑀢𑁆𑀣𑀼𑀦𑁄;

𑀲𑀫𑁆𑀫𑀼𑀢𑀺𑀁 𑀯𑁄𑀳𑀭𑀦𑁆𑀢𑀲𑁆𑀲, 𑀫𑀼𑀲𑀸𑀯𑀸𑀤𑁄 𑀦 𑀚𑀸𑀬𑀢𑀻’’𑀢𑀺. (𑀫. 𑀦𑀺. 𑀅𑀝𑁆𑀞. 𑁧.𑁫𑁭; 𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁭𑁦; 𑀇𑀢𑀺𑀯𑀼. 𑀅𑀝𑁆𑀞. 𑁨𑁪);

𑀦 𑀳𑀺 𑀮𑁄𑀓𑀲𑀫𑁆𑀫𑀼𑀢𑀺𑀁 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀯𑀺𑀚𑀳𑀦𑁆𑀢𑀺, 𑀮𑁄𑀓𑀲𑀫𑀜𑁆𑀜𑀸𑀬 𑀮𑁄𑀓𑀦𑀺𑀭𑀼𑀢𑁆𑀢𑀺𑀬𑀸 𑀮𑁄𑀓𑀸𑀪𑀺𑀮𑀸𑀧𑁂 𑀞𑀺𑀢𑀸𑀬𑁂𑀯 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀅𑀧𑀺𑀘 ‘‘𑀳𑀺𑀭𑁄𑀢𑁆𑀢𑀧𑁆𑀧𑀤𑀻𑀧𑀦𑀢𑁆𑀣𑀁, 𑀓𑀫𑁆𑀫𑀲𑁆𑀲𑀓𑀢𑀸𑀤𑀻𑀧𑀦𑀢𑁆𑀣’’𑀦𑁆𑀢𑀺 (𑀫. 𑀦𑀺. 𑀅𑀝𑁆𑀞. 𑁧.𑁫𑁭; 𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁦𑁨; 𑀇𑀢𑀺𑀯𑀼. 𑀅𑀝𑁆𑀞. 𑁨𑁪; 𑀓𑀣𑀸. 𑀅𑀦𑀼𑀝𑀻. 𑁧) 𑀏𑀯𑀫𑀸𑀤𑀻𑀳𑀺𑀧𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀻’’𑀢𑀺 𑀏𑀯𑀁 𑀅𑀥𑀺𑀧𑁆𑀧𑀸𑀬𑀫𑀚𑀸𑀦𑀦𑁆𑀢𑁄. 𑀅𑀬𑀫𑀢𑁆𑀣𑁄 𑀉𑀧𑀭𑀺 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀤𑀼𑀕𑁆𑀕𑀳𑀺𑀢𑀁 𑀕𑀡𑁆𑀳𑀸𑀢𑀻𑀢𑀺 ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺, 𑀬𑀣𑀸 𑀢𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺 𑀅𑀦𑀜𑁆𑀜’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁪𑁪) 𑀤𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀯𑀺𑀧𑀭𑀻𑀢𑀁 𑀕𑀡𑁆𑀳𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀼𑀕𑁆𑀕𑀳𑀺𑀢𑀦𑁆𑀢𑀺 𑀳𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 𑀓𑀺𑀭𑀺𑀬𑀸𑀬𑀯𑀺𑀲𑁂𑀲𑀦𑀪𑀸𑀯𑁂𑀦 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑁆𑀢𑀸. 𑀅𑀬𑀜𑁆𑀳𑀺 𑀪𑀸𑀯𑀦𑀧𑀼𑀁𑀲𑀓𑀧𑀤𑀲𑁆𑀲 𑀧𑀓𑀢𑀺, 𑀬𑀤𑀺𑀤𑀁 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑁆𑀢𑀸, 𑀪𑀸𑀯𑀧𑁆𑀧𑀝𑁆𑀞𑀸𑀦𑀢𑀸, 𑀲𑀓𑀫𑁆𑀫𑀸𑀓𑀫𑁆𑀫𑀓𑀺𑀭𑀺𑀬𑀸𑀦𑀼𑀬𑁄𑀕𑀁 𑀧𑀘𑁆𑀘𑀢𑁆𑀢𑁄𑀧𑀬𑁄𑀕𑀯𑀘𑀦𑀢𑀸 𑀘. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸’’𑀢𑀺. 𑀬𑀦𑁆𑀢𑀺 𑀤𑀼𑀕𑁆𑀕𑀳𑀺𑀢𑀕𑀸𑀳𑀁. 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀫𑀽𑀮𑀧𑀡𑁆𑀡𑀸𑀲𑀓𑁂 𑀫𑀳𑀸𑀢𑀡𑁆𑀳𑀸𑀲𑀗𑁆𑀔𑀬𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁧𑁪𑁪) 𑀢𑀣𑀸𑀯𑀸𑀤𑀻𑀦𑀁 𑀲𑀸𑀥𑀺𑀦𑀸𑀫𑀓𑀁 𑀓𑁂𑀯𑀝𑁆𑀝𑀧𑀼𑀢𑁆𑀢𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀪𑀕𑀯𑀢𑀸 𑀯𑀼𑀢𑁆𑀢𑀁. 𑀅𑀢𑁆𑀢𑀦𑀸 𑀤𑀼𑀕𑁆𑀕𑀳𑀺𑀢𑁂𑀦 𑀥𑀫𑁆𑀫𑁂𑀦𑀸𑀢𑀺 𑀧𑀸𑀞𑀲𑁂𑀲𑁄, 𑀫𑀺𑀘𑁆𑀙𑀸𑀲𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀤𑀼𑀕𑁆𑀕𑀳𑀡𑀁 𑀤𑀼𑀕𑁆𑀕𑀳𑀺𑀢𑀁, 𑀅𑀢𑁆𑀢𑀦𑀸𑀢𑀺 𑀘 𑀲𑀸𑀫𑀺𑀅𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀯𑀺𑀪𑀢𑁆𑀢𑀺𑀬𑀦𑁆𑀢𑀧𑀢𑀺𑀭𑀽𑀧𑀓𑀁 𑀯𑀸 𑀅𑀩𑁆𑀬𑀬𑀧𑀤𑀁, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀤𑀼𑀕𑁆𑀕𑀳𑀡𑁂𑀦 𑀯𑀺𑀧𑀭𑀻𑀢𑀕𑀸𑀳𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀩𑁆𑀪𑀸𑀘𑀺𑀓𑁆𑀔𑀢𑀻𑀢𑀺 𑀅𑀩𑁆𑀪𑀓𑁆𑀔𑀸𑀦𑀁 𑀓𑀭𑁄𑀢𑀺. 𑀅𑀢𑁆𑀢𑀦𑁄 𑀓𑀼𑀲𑀮𑀫𑀽𑀮𑀸𑀦𑀺 𑀔𑀦𑀦𑁆𑀢𑁄 𑀅𑀢𑁆𑀢𑀸𑀦𑀁 𑀔𑀦𑀢𑀺 𑀦𑀸𑀫. 𑀢𑀢𑁄𑀢𑀺 𑀤𑀼𑀕𑁆𑀕𑀳𑀺𑀢𑀪𑀸𑀯𑀳𑁂𑀢𑀼𑀢𑁄.

𑀥𑀫𑁆𑀫𑀘𑀺𑀦𑁆𑀢𑀦𑁆𑀢𑀺 ¶ 𑀥𑀫𑁆𑀫𑀲𑀪𑀸𑀯𑀯𑀺𑀘𑀸𑀭𑀁. 𑀅𑀢𑀺𑀥𑀸𑀯𑀦𑁆𑀢𑁄𑀢𑀺 𑀞𑀸𑀢𑀩𑁆𑀩𑀫𑀭𑀺𑀬𑀸𑀤𑀸𑀬𑀁 𑀅𑀝𑁆𑀞𑀢𑁆𑀯𑀸 ‘‘𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦𑀧𑀺 𑀤𑀸𑀦𑀁 𑀳𑁄𑀢𑀺, 𑀲𑀬𑀫𑁂𑀯 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀲𑀩𑁆𑀩𑀫𑁆𑀧𑀺 𑀘𑀺𑀢𑁆𑀢𑀁 𑀲𑀪𑀸𑀯𑀥𑀫𑁆𑀫𑀸𑀭𑀫𑁆𑀫𑀡𑀫𑁂𑀯 𑀳𑁄𑀢𑀻’’𑀢𑀺 𑀘 𑀏𑀯𑀫𑀸𑀤𑀺𑀦𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀯𑀢𑁆𑀢𑀬𑀫𑀸𑀦𑁄. 𑀘𑀺𑀦𑁆𑀢𑁂𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀸𑀦𑀺 ¶ , 𑀅𑀦𑀭𑀳𑀭𑀽𑀧𑀸𑀦𑀺 𑀯𑀸 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀺 𑀦𑀸𑀫, 𑀢𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀻𑀢𑀺 𑀢𑁂𑀲𑀁 𑀲𑀪𑀸𑀯𑀤𑀲𑁆𑀲𑀦𑀁. 𑀦 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀻𑀢𑀺 𑀢𑀢𑁆𑀣 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀤𑀲𑁆𑀲𑀦𑀁. ‘‘𑀬𑀸𑀦𑀻’’𑀢𑀺𑀆𑀤𑀺 𑀢𑀲𑁆𑀲 𑀳𑁂𑀢𑀼𑀤𑀲𑁆𑀲𑀦𑀁. 𑀬𑀸𑀦𑀺 𑀘𑀺𑀦𑁆𑀢𑁂𑀦𑁆𑀢𑁄 𑀉𑀫𑁆𑀫𑀸𑀤𑀲𑁆𑀲 𑀘𑀺𑀢𑁆𑀢𑀓𑁆𑀔𑁂𑀧𑀲𑁆𑀲, 𑀯𑀺𑀖𑀸𑀢𑀲𑁆𑀲 𑀯𑀺𑀳𑁂𑀲𑀲𑁆𑀲 𑀘 𑀪𑀸𑀕𑀻 𑀅𑀲𑁆𑀲, 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀦 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀺, 𑀇𑀫𑀸𑀦𑀺 𑀯𑀸 𑀘𑀢𑁆𑀢𑀸𑀭𑀺 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀺 𑀦𑀸𑀫 𑀦 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀺, 𑀬𑀸𑀦𑀺 𑀯𑀸…𑀧𑁂… 𑀅𑀲𑁆𑀲, 𑀢𑀲𑁆𑀫𑀸 𑀦 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀺 𑀅𑀘𑀺𑀦𑁆𑀢𑁂𑀢𑀩𑁆𑀩𑀪𑀽𑀢𑀸𑀦𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀺 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀇𑀢𑀺-𑀲𑀤𑁆𑀤𑁂𑀦 𑀧𑀦 𑁋

‘‘𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀩𑀼𑀤𑁆𑀥𑀸𑀦𑀁 𑀪𑀺𑀓𑁆𑀔𑀯𑁂 𑀩𑀼𑀤𑁆𑀥𑀯𑀺𑀲𑀬𑁄 𑀅𑀘𑀺𑀦𑁆𑀢𑁂𑀬𑁆𑀬𑁄 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄, 𑀬𑀁 𑀘𑀺𑀦𑁆𑀢𑁂𑀦𑁆𑀢𑁄 𑀉𑀫𑁆𑀫𑀸𑀤𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲. 𑀛𑀸𑀬𑀺𑀲𑁆𑀲 𑀪𑀺𑀓𑁆𑀔𑀯𑁂 𑀛𑀸𑀦𑀯𑀺𑀲𑀬𑁄 𑀅𑀘𑀺𑀦𑁆𑀢𑁂𑀬𑁆𑀬𑁄…𑀧𑁂… 𑀓𑀫𑁆𑀫𑀯𑀺𑀧𑀸𑀓𑁄 𑀪𑀺𑀓𑁆𑀔𑀯𑁂 𑀅𑀘𑀺𑀦𑁆𑀢𑁂𑀬𑁆𑀬𑁄…𑀧𑁂… 𑀮𑁄𑀓𑀘𑀺𑀦𑁆𑀢𑀸 𑀪𑀺𑀓𑁆𑀔𑀯𑁂 𑀅𑀘𑀺𑀦𑁆𑀢𑁂𑀬𑁆𑀬𑀸…𑀧𑁂… 𑀇𑀫𑀸𑀦𑀺…𑀧𑁂… 𑀅𑀲𑁆𑀲𑀸’’𑀢𑀺 (𑀅. 𑀦𑀺. 𑁪.𑁭𑁭) 𑁋

𑀘𑀢𑀼𑀭𑀗𑁆𑀕𑀼𑀢𑁆𑀢𑀭𑁂 𑀯𑀼𑀢𑁆𑀢𑀁 𑀅𑀘𑀺𑀦𑁆𑀢𑁂𑀬𑁆𑀬𑀲𑀼𑀢𑁆𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀅𑀘𑀺𑀦𑁆𑀢𑁂𑀬𑁆𑀬𑀪𑀸𑀯𑀤𑀻𑀧𑀓𑀁 𑀧𑀸𑀴𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀸𑀫𑀁 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀺 𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀤𑀻𑀦𑀺, 𑀢𑀸𑀦𑀺 𑀧𑀦 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀺, 𑀇𑀫𑀸𑀦𑀺 𑀧𑀦 𑀏𑀯𑀁 𑀦 𑀳𑁄𑀦𑁆𑀢𑀺 𑀅𑀨𑀮𑀪𑀸𑀯𑀢𑁄, 𑀢𑀲𑁆𑀫𑀸 𑀦 𑀘𑀺𑀦𑁆𑀢𑁂𑀢𑀩𑁆𑀩𑀸𑀦𑀺. ‘‘𑀤𑀼𑀲𑁆𑀲𑀻𑀮𑁆𑀬…𑀧𑁂… 𑀧𑀪𑁂𑀤’’𑀦𑁆𑀢𑀺 𑀇𑀫𑀺𑀦𑀸 𑀯𑀺𑀧𑀢𑁆𑀢𑀺𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺. ‘‘𑀓𑀣𑀁? 𑀧𑀺𑀝𑀓𑀯𑀲𑁂𑀦𑀸’’𑀢𑀺𑀆𑀤𑀺𑀯𑀘𑀦𑀲𑀫𑁆𑀩𑀚𑁆𑀛𑀦𑁂𑀦 𑀧𑀼𑀩𑁆𑀩𑀸𑀧𑀭𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁 𑀦𑀸𑀦𑀧𑁆𑀧𑀓𑀸𑀭𑀢𑁄’’𑀢𑀺𑀆𑀤𑀺𑀫𑀸𑀳. 𑀧𑀼𑀩𑁆𑀩𑀸𑀧𑀭𑀲𑀫𑁆𑀩𑀦𑁆𑀥𑀯𑀺𑀭𑀳𑀺𑀢𑀜𑁆𑀳𑀺 𑀯𑀘𑀦𑀁 𑀩𑁆𑀬𑀸𑀓𑀼𑀮𑀁. 𑀲𑁄𑀢𑀽𑀦𑀜𑁆𑀘 𑀅𑀢𑁆𑀣𑀯𑀺𑀜𑁆𑀜𑀸𑀧𑀓𑀁 𑀦 𑀳𑁄𑀢𑀺, 𑀧𑀼𑀩𑁆𑀩𑀸𑀧𑀭𑀜𑁆𑀜𑀽𑀦𑀫𑁂𑀯 𑀘 𑀢𑀣𑀸𑀯𑀺𑀘𑀸𑀭𑀺𑀢𑀯𑀘𑀦𑀁 𑀯𑀺𑀲𑀬𑁄. 𑀬𑀣𑀸𑀳 𑁋

‘‘𑀧𑀼𑀩𑁆𑀩𑀸𑀧𑀭𑀜𑁆𑀜𑀽 𑀅𑀢𑁆𑀣𑀜𑁆𑀜𑀽, 𑀦𑀺𑀭𑀼𑀢𑁆𑀢𑀺𑀧𑀤𑀓𑁄𑀯𑀺𑀤𑁄;

𑀲𑀼𑀕𑁆𑀕𑀳𑀻𑀢𑀜𑁆𑀘 𑀕𑀡𑁆𑀳𑀸𑀢𑀺, 𑀅𑀢𑁆𑀣𑀜𑁆𑀘𑁄’ 𑀧𑀧𑀭𑀺𑀓𑁆𑀔𑀢𑀻’’𑀢𑀺. (𑀣𑁂𑀭𑀕𑀸. 𑁧𑁦𑁩𑁧);

𑀢𑁂𑀲𑀦𑁆𑀢𑀺 𑀧𑀺𑀝𑀓𑀸𑀦𑀁. 𑀏𑀢𑀦𑁆𑀢𑀺 𑀩𑀼𑀤𑁆𑀥𑀯𑀘𑀦𑀁.

𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑀫𑀳𑀸𑀯𑀕𑁆𑀕𑀧𑀸𑀣𑀺𑀓𑀯𑀕𑁆𑀕𑀲𑀗𑁆𑀔𑀸𑀢𑁂𑀳𑀺 ¶ 𑀢𑀻𑀳𑀺 𑀯𑀕𑁆𑀕𑁂𑀳𑀺 𑀲𑀗𑁆𑀕𑀳𑁄 𑀏𑀢𑁂𑀲𑀦𑁆𑀢𑀺 𑀢𑀺𑀯𑀕𑁆𑀕𑀲𑀗𑁆𑀕𑀳𑀸𑀦𑀺. 𑀕𑀸𑀣𑀸𑀬 𑀧𑀦 𑀬𑀲𑁆𑀲 𑀦𑀺𑀓𑀸𑀬𑀲𑁆𑀲 𑀲𑀼𑀢𑁆𑀢𑀕𑀡𑀦𑀢𑁄 𑀘𑀢𑀼𑀢𑁆𑀢𑀺𑀁𑀲𑁂𑀯 𑀲𑀼𑀢𑁆𑀢𑀦𑁆𑀢𑀸. 𑀯𑀕𑁆𑀕𑀲𑀗𑁆𑀕𑀳𑀯𑀲𑁂𑀦 𑀢𑀬𑁄 𑀯𑀕𑁆𑀕𑀸 𑀅𑀲𑁆𑀲 𑀲𑀗𑁆𑀕𑀳𑀲𑁆𑀲𑀸𑀢𑀺 𑀢𑀺𑀯𑀕𑁆𑀕𑁄 𑀲𑀗𑁆𑀕𑀳𑁄. 𑀧𑀞𑀫𑁄 𑀏𑀲 𑀦𑀺𑀓𑀸𑀬𑁄 𑀤𑀻𑀖𑀦𑀺𑀓𑀸𑀬𑁄𑀢𑀺 ¶ 𑀅𑀦𑀼𑀮𑁄𑀫𑀺𑀓𑁄 𑀅𑀧𑀘𑁆𑀘𑀦𑀻𑀓𑁄, 𑀅𑀢𑁆𑀣𑀸𑀦𑀼𑀮𑁄𑀫𑀦𑀢𑁄 𑀅𑀢𑁆𑀣𑀸𑀦𑀼𑀮𑁄𑀫𑀦𑀸𑀫𑀺𑀓𑁄 𑀯𑀸, 𑀅𑀦𑁆𑀯𑀢𑁆𑀣𑀦𑀸𑀫𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 ‘‘𑀢𑀺𑀯𑀕𑁆𑀕𑁄 𑀲𑀗𑁆𑀕𑀳𑁄’’𑀢𑀺 𑀏𑀢𑀁 ‘‘𑀬𑀲𑁆𑀲𑀸’’𑀢𑀺 𑀅𑀦𑁆𑀢𑀭𑀺𑀓𑁂𑀧𑀺 𑀲𑀫𑀸𑀲𑁄𑀬𑁂𑀯 𑀳𑁄𑀢𑀺, 𑀦 𑀯𑀸𑀓𑁆𑀬𑀦𑁆𑀢𑀺 𑀤𑀝𑁆𑀞𑀩𑁆𑀩𑀁 ‘‘𑀦𑀯𑀁 𑀧𑀦 𑀪𑀺𑀓𑁆𑀔𑀼𑀦𑀸 𑀘𑀻𑀯𑀭𑀮𑀸𑀪𑁂𑀦𑀸’’𑀢𑀺 (𑀧𑀸𑀘𑀺. 𑁩𑁬𑁮) 𑀏𑀢𑁆𑀣 ‘‘𑀦𑀯𑀁𑀘𑀻𑀯𑀭𑀮𑀸𑀪𑁂𑀦𑀸’’𑀢𑀺 𑀧𑀤𑀁 𑀯𑀺𑀬. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀯𑀡𑁆𑀡𑀬𑀦𑁆𑀢𑀺 ‘‘𑀅𑀮𑀩𑁆𑀪𑀻𑀢𑀺 𑀮𑀪𑁄, 𑀮𑀪𑁄 𑀏𑀯 𑀮𑀸𑀪𑁄. 𑀓𑀺𑀁 𑀅𑀮𑀩𑁆𑀪𑀺? 𑀘𑀻𑀯𑀭𑀁. 𑀓𑀻𑀤𑀺𑀲𑀁? 𑀦𑀯𑀁, 𑀇𑀢𑀺 ‘𑀦𑀯𑀘𑀻𑀯𑀭𑀮𑀸𑀪𑁂𑀦𑀸’𑀢𑀺 𑀯𑀢𑁆𑀢𑀩𑁆𑀩𑁂 𑀅𑀦𑀼𑀦𑀸𑀲𑀺𑀓𑀮𑁄𑀧𑀁 𑀅𑀓𑀢𑁆𑀯𑀸 ‘𑀦𑀯𑀁𑀘𑀻𑀯𑀭𑀮𑀸𑀪𑁂𑀦𑀸’𑀢𑀺 𑀯𑀼𑀢𑁆𑀢𑀁, 𑀧𑀝𑀺𑀮𑀤𑁆𑀥𑀦𑀯𑀘𑀻𑀯𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀫𑀚𑁆𑀛𑁂 𑀞𑀺𑀢𑀧𑀤𑀤𑁆𑀯𑀬𑁂 𑀧𑀦𑀸𑀢𑀺 𑀦𑀺𑀧𑀸𑀢𑁄. 𑀪𑀺𑀓𑁆𑀔𑀼𑀦𑀸𑀢𑀺 𑀬𑁂𑀦 𑀮𑀤𑁆𑀥𑀁, 𑀢𑀲𑁆𑀲 𑀦𑀺𑀤𑀲𑁆𑀲𑀦’’𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁩𑁬𑁮). 𑀇𑀥𑀸𑀧𑀺 𑀲𑀤𑁆𑀤𑀢𑁄, 𑀅𑀢𑁆𑀣𑀢𑁄 𑀘 𑀯𑀸𑀓𑁆𑀬𑁂 𑀬𑀼𑀢𑁆𑀢𑀺𑀬𑀸𑀅𑀪𑀸𑀯𑀢𑁄 𑀲𑀫𑀸𑀲𑁄𑀬𑁂𑀯 𑀲𑀫𑁆𑀪𑀯𑀢𑀺. ‘‘𑀢𑀺𑀯𑀕𑁆𑀕𑁄’’𑀢𑀺 𑀧𑀤𑀜𑁆𑀳𑀺 ‘‘𑀲𑀗𑁆𑀕𑀳𑁄’’𑀢𑀺 𑀏𑀢𑁆𑀣 𑀬𑀤𑀺 𑀓𑀭𑀡𑀁, 𑀏𑀯𑀁 𑀲𑀢𑀺 𑀓𑀭𑀡𑀯𑀘𑀦𑀦𑁆𑀢𑀫𑁂𑀯 𑀲𑀺𑀬𑀸. 𑀬𑀤𑀺 𑀘 𑀧𑀤𑀤𑁆𑀯𑀬𑀫𑁂𑀢𑀁 𑀢𑀼𑀮𑁆𑀬𑀸𑀥𑀺𑀓𑀭𑀡𑀁, 𑀢𑀣𑀸 𑀘 𑀲𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀫𑁂𑀯 𑀲𑀺𑀬𑀸 ‘‘𑀢𑀺𑀮𑁄𑀓’’𑀦𑁆𑀢𑀺𑀆𑀤𑀺𑀧𑀤𑀁 𑀯𑀺𑀬. 𑀢𑀣𑀸 ‘‘𑀢𑀺𑀯𑀕𑁆𑀕𑁄’’𑀢𑀺 𑀏𑀢𑀲𑁆𑀲 ‘‘𑀲𑀗𑁆𑀕𑀳𑁄’’𑀢𑀺 𑀧𑀤𑀫𑀦𑁆𑀢𑀭𑁂𑀦 𑀅𑀜𑁆𑀜𑀢𑁆𑀣𑀸𑀲𑀫𑁆𑀩𑀦𑁆𑀥𑁄 𑀦 𑀲𑀫𑁆𑀪𑀯𑀢𑀺, 𑀢𑀢𑁆𑀣 𑀘 𑀢𑀸𑀤𑀺𑀲𑁂𑀦 𑀯𑀸𑀓𑁆𑀬𑁂𑀦 𑀲𑀫𑁆𑀩𑀚𑁆𑀛𑀦𑀁 𑀦 𑀬𑀼𑀢𑁆𑀢𑀁, 𑀢𑀲𑁆𑀫𑀸 𑀲𑀫𑀸𑀦𑁂𑀧𑀺 𑀧𑀤𑀦𑁆𑀢𑀭𑀦𑁆𑀢𑀭𑀺𑀓𑁂 𑀲𑀤𑁆𑀤𑀢𑁆𑀣𑀸𑀯𑀺𑀭𑁄𑀥𑀪𑀸𑀯𑁄𑀬𑁂𑀯 𑀲𑀫𑀸𑀲𑀢𑀸𑀓𑀸𑀭𑀡𑀦𑁆𑀢𑀺 𑀲𑀫𑀸𑀲𑁄 𑀏𑀯 𑀬𑀼𑀢𑁆𑀢𑁄. 𑀢𑀬𑁄 𑀯𑀕𑁆𑀕𑀸 𑀅𑀲𑁆𑀲 𑀲𑀗𑁆𑀕𑀳𑀲𑁆𑀲𑀸𑀢𑀺 𑀳𑀺 𑀢𑀺𑀯𑀕𑁆𑀕𑁄𑀲𑀗𑁆𑀕𑀳𑁄 𑀅𑀓𑀸𑀭𑀲𑁆𑀲 𑀑𑀓𑀸𑀭𑀸𑀤𑁂𑀲𑀁, 𑀑𑀓𑀸𑀭𑀸𑀕𑀫𑀁 𑀯𑀸 𑀓𑀢𑁆𑀯𑀸 𑀬𑀣𑀸 ‘‘𑀲𑀢𑁆𑀢𑀸𑀳𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀘𑀺𑀭𑀧𑀓𑁆𑀓𑀦𑁆𑀢𑁄, 𑀫𑀸𑀲𑀚𑀸𑀢𑁄’’𑀢𑀺𑀆𑀤𑀺, 𑀅𑀲𑁆𑀲 𑀲𑀗𑁆𑀕𑀳𑀲𑁆𑀲𑀸𑀢𑀺 𑀘 𑀲𑀗𑁆𑀕𑀳𑀺𑀢𑀲𑁆𑀲 𑀅𑀲𑁆𑀲 𑀦𑀺𑀓𑀸𑀬𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀧𑀭𑁂 𑀧𑀦 ‘‘𑀢𑀬𑁄 𑀯𑀕𑁆𑀕𑀸 𑀬𑀲𑁆𑀲𑀸𑀢𑀺 𑀓𑀢𑁆𑀯𑀸 ‘𑀲𑀗𑁆𑀕𑀳𑁄’𑀢𑀺 𑀧𑀤𑁂𑀦 𑀢𑀼𑀮𑁆𑀬𑀸𑀥𑀺𑀓𑀭𑀡𑀫𑁂𑀯 𑀲𑀫𑁆𑀪𑀯𑀢𑀺, 𑀲𑀗𑁆𑀕𑀳𑁄𑀢𑀺 𑀘 𑀕𑀡𑀦𑀸. 𑀝𑀻𑀓𑀸𑀘𑀭𑀺𑀬𑁂𑀳𑀺 (𑀲𑀸𑀭𑀢𑁆𑀣. 𑀝𑀻. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀧𑀦 ‘𑀢𑀬𑁄 𑀯𑀕𑁆𑀕𑀸 𑀅𑀲𑁆𑀲 𑀲𑀗𑁆𑀕𑀳𑀲𑁆𑀲𑀸’𑀢𑀺 𑀧𑀤𑀤𑁆𑀯𑀬𑀲𑁆𑀲 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑀸𑀬𑁂𑀯 𑀤𑀲𑁆𑀲𑀺𑀢𑀸’’𑀢𑀺 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀫𑁂𑀯 𑀲𑀗𑁆𑀔𑁆𑀬𑀸𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀁 𑀫𑀺𑀲𑁆𑀲𑀓𑀢𑁆𑀢𑀸, 𑀅𑀧𑀸𑀓𑀝𑀢𑁆𑀢𑀸 𑀘.

𑀅𑀢𑁆𑀣𑀸𑀦𑀼𑀮𑁄𑀫𑀺𑀓𑀢𑁆𑀢𑀁 𑀯𑀺𑀪𑀸𑀯𑁂𑀢𑀼𑀫𑀸𑀳 ‘‘𑀓𑀲𑁆𑀫𑀸’’𑀢𑀺𑀆𑀤𑀺. 𑀕𑀼𑀡𑁄𑀧𑀘𑀸𑀭𑁂𑀦, 𑀢𑀤𑁆𑀥𑀺𑀢𑀯𑀲𑁂𑀦 𑀯𑀸 𑀤𑀻𑀖-𑀲𑀤𑁆𑀤𑁂𑀦 𑀤𑀻𑀖𑀧𑁆𑀧𑀫𑀸𑀡𑀸𑀦𑀺 𑀲𑀼𑀢𑁆𑀢𑀸𑀦𑀺𑀬𑁂𑀯 𑀕𑀳𑀺𑀢𑀸𑀦𑀺 ¶ , 𑀦𑀺𑀓𑀸𑀬𑀲𑀤𑁆𑀤𑁄 𑀘 𑀭𑀼𑀴𑁆𑀳𑀺𑀯𑀲𑁂𑀦 𑀲𑀫𑀽𑀳𑀦𑀺𑀯𑀸𑀲𑀢𑁆𑀣𑁂𑀲𑀼 𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀤𑀻𑀖𑀧𑁆𑀧𑀫𑀸𑀡𑀸𑀦’’𑀦𑁆𑀢𑀺𑀆𑀤𑀺𑀦𑀸. 𑀲𑀗𑁆𑀓𑁂𑀢𑀲𑀺𑀤𑁆𑀥𑀢𑁆𑀢𑀸 𑀯𑀘𑀦𑀻𑀬𑀯𑀸𑀘𑀓𑀸𑀦𑀁 𑀧𑀬𑁄𑀕𑀢𑁄 𑀢𑀤𑀢𑁆𑀣𑁂𑀲𑀼 𑀢𑀲𑁆𑀲 𑀲𑀗𑁆𑀓𑁂𑀢𑀲𑀺𑀤𑁆𑀥𑀢𑀁 𑀜𑀸𑀧𑁂𑀦𑁆𑀢𑁄 ‘‘𑀦𑀸𑀳’’𑀦𑁆𑀢𑀺𑀆𑀤𑀺𑀫𑀸𑀳. 𑀏𑀓𑀦𑀺𑀓𑀸𑀬𑀫𑁆𑀧𑀻𑀢𑀺 𑀏𑀓𑀲𑀫𑀽𑀳𑀫𑁆𑀧𑀺. 𑀏𑀯𑀁 𑀘𑀺𑀢𑁆𑀢𑀦𑁆𑀢𑀺 𑀏𑀯𑀁 𑀯𑀺𑀘𑀺𑀢𑁆𑀢𑀁. 𑀬𑀣𑀬𑀺𑀤𑀦𑁆𑀢𑀺 𑀬𑀣𑀸 𑀇𑀫𑁂 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸. 𑀧𑁄𑀡𑀺𑀓𑀸, 𑀘𑀺𑀓𑁆𑀔𑀮𑁆𑀮𑀺𑀓𑀸 𑀘 𑀔𑀢𑁆𑀢𑀺𑀬𑀸, 𑀢𑁂𑀲𑀁 𑀦𑀺𑀯𑀸𑀲𑁄 ‘‘𑀧𑁄𑀡𑀺𑀓𑀦𑀺𑀓𑀸𑀬𑁄 𑀘𑀺𑀓𑁆𑀔𑀮𑁆𑀮𑀺𑀓𑀦𑀺𑀓𑀸𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀢𑁆𑀣𑀸𑀢𑀺 𑀦𑀺𑀓𑀸𑀬𑀲𑀤𑁆𑀤𑀲𑁆𑀲 𑀲𑀫𑀽𑀳𑀦𑀺𑀯𑀸𑀲𑀸𑀦𑀁 𑀯𑀸𑀘𑀓𑀪𑀸𑀯𑁂. 𑀲𑀸𑀥𑀓𑀸𑀦𑀻𑀢𑀺 𑀅𑀥𑀺𑀧𑁆𑀧𑁂𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀦𑀢𑁄 𑀉𑀤𑀸𑀳𑀭𑀡𑀸𑀦𑀺 𑀯𑀼𑀘𑁆𑀘𑀦𑁆𑀢𑀺. ‘‘𑀲𑀫𑀸𑀦𑀻𑀢𑀸𑀦𑀻’’𑀢𑀺 𑀧𑀸𑀞𑀲𑁂𑀲𑁂𑀦 𑀘𑁂𑀢𑀲𑁆𑀲 𑀲𑀫𑁆𑀩𑀦𑁆𑀥𑁄, 𑀲𑀓𑁆𑀔𑀻𑀦𑀺 𑀯𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀲𑀸𑀥𑀓𑀸𑀦𑀺. 𑀬𑀜𑁆𑀳𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀅𑀥𑀺𑀧𑁆𑀧𑁂𑀢𑀢𑁆𑀣𑀁 𑀲𑀸𑀥𑁂𑀦𑁆𑀢𑀺 ¶ , 𑀢𑀁 ‘‘𑀲𑀓𑁆𑀔𑀻’’𑀢𑀺 𑀯𑀤𑀦𑁆𑀢𑀺. 𑀢𑀣𑀸 𑀳𑀺 𑀫𑀦𑁄𑀭𑀣𑀧𑀽𑀭𑀡𑀺𑀬𑀁 𑀯𑀼𑀢𑁆𑀢𑀁 ‘‘𑀧𑀜𑁆𑀘𑀕𑀭𑀼𑀚𑀸𑀢𑀓𑀁 (𑀚𑀸. 𑁧.𑁧.𑁧𑁩𑁨) 𑀧𑀦 𑀲𑀓𑁆𑀔𑀺𑀪𑀸𑀯𑀢𑁆𑀣𑀸𑀬 𑀆𑀳𑀭𑀺𑀢𑁆𑀯𑀸 𑀓𑀣𑁂𑀢𑀩𑁆𑀩’’𑀦𑁆𑀢𑀺 (𑀅. 𑀦𑀺. 𑀅𑀝𑁆𑀞. 𑁧.𑁧.𑁫) 𑀲𑀸𑀲𑀦𑀢𑁄𑀢𑀺 𑀲𑀸𑀲𑀦𑀧𑀬𑁄𑀕𑀢𑁄, 𑀲𑀸𑀲𑀦𑁂 𑀯𑀸. 𑀮𑁄𑀓𑀢𑁄𑀢𑀺 𑀮𑁄𑀓𑀺𑀬𑀧𑀬𑁄𑀕𑀢𑁄, 𑀮𑁄𑀓𑁂 𑀯𑀸. 𑀇𑀤𑀁 𑀧𑀦 𑀧𑀺𑀝𑀓𑀢𑁆𑀢𑀬𑁂 𑀦 𑀯𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀏𑀢𑁆𑀣 𑀘 𑀧𑀞𑀫𑀫𑀼𑀤𑀸𑀳𑀭𑀡𑀁 𑀲𑀸𑀲𑀦𑀢𑁄 𑀲𑀸𑀥𑀓𑀯𑀘𑀦𑀁, 𑀤𑀼𑀢𑀺𑀬𑀁 𑀮𑁄𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀫𑀽𑀮𑀧𑀭𑀺𑀬𑀸𑀬 𑀯𑀕𑁆𑀕𑀸𑀤𑀺𑀯𑀲𑁂𑀦 𑀧𑀜𑁆𑀘𑀤𑀲𑀯𑀕𑁆𑀕𑀲𑀗𑁆𑀕𑀳𑀸𑀦𑀺. 𑀅𑀟𑁆𑀠𑁂𑀦 𑀤𑀼𑀢𑀺𑀬𑀁 𑀤𑀺𑀬𑀟𑁆𑀠𑀁, 𑀢𑀤𑁂𑀯 𑀲𑀢𑀁, 𑀏𑀓𑀲𑀢𑀁, 𑀧𑀜𑁆𑀜𑀸𑀲 𑀘 𑀲𑀼𑀢𑁆𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀦𑀺𑀓𑀸𑀬𑁂. 𑀧𑀜𑁆𑀘𑀤𑀲𑀯𑀕𑁆𑀕𑀧𑀭𑀺𑀕𑁆𑀕𑀳𑁄𑀢𑀺 𑀧𑀜𑁆𑀘𑀤𑀲𑀳𑀺 𑀯𑀕𑁆𑀕𑁂𑀳𑀺 𑀧𑀭𑀺𑀕𑁆𑀕𑀳𑀺𑀢𑁄 𑀲𑀗𑁆𑀕𑀳𑀺𑀢𑁄.

𑀲𑀁𑀬𑀼𑀚𑁆𑀚𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀁𑀬𑀼𑀢𑁆𑀢𑀁, 𑀓𑁂𑀲𑀁 𑀲𑀁𑀬𑀼𑀢𑁆𑀢𑀁? 𑀲𑀼𑀢𑁆𑀢𑀯𑀕𑁆𑀕𑀸𑀦𑀁. 𑀬𑀣𑀸 𑀳𑀺 𑀩𑁆𑀬𑀜𑁆𑀚𑀦𑀲𑀫𑀼𑀤𑀸𑀬𑁂 𑀧𑀤𑀁, 𑀧𑀤𑀲𑀫𑀼𑀤𑀸𑀬𑁂 𑀘 𑀯𑀸𑀓𑁆𑀬𑀁, 𑀯𑀸𑀓𑁆𑀬𑀲𑀫𑀼𑀤𑀸𑀬𑁂 𑀲𑀼𑀢𑁆𑀢𑀁, 𑀲𑀼𑀢𑁆𑀢𑀲𑀫𑀼𑀤𑀸𑀬𑁂 𑀯𑀕𑁆𑀕𑁄𑀢𑀺 𑀲𑀫𑀜𑁆𑀜𑀸, 𑀏𑀯𑀁 𑀯𑀕𑁆𑀕𑀲𑀫𑀼𑀤𑀸𑀬𑁂 𑀲𑀁𑀬𑀼𑀢𑁆𑀢𑀲𑀫𑀜𑁆𑀜𑀸. 𑀤𑁂𑀯𑀢𑀸𑀬 𑀧𑀼𑀘𑁆𑀙𑀺𑀢𑁂𑀦 𑀓𑀣𑀺𑀢𑀲𑀼𑀢𑁆𑀢𑀯𑀕𑁆𑀕𑀸𑀤𑀻𑀦𑀁 𑀲𑀁𑀬𑀼𑀢𑁆𑀢𑀢𑁆𑀢𑀸 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀸𑀤𑀺𑀪𑀸𑀯𑁄 (𑀲𑀁. 𑀦𑀺. 𑁧.𑁧), 𑀢𑁂𑀦𑀸𑀳 ‘‘𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀸𑀤𑀺𑀯𑀲𑁂𑀦𑀸’’𑀢𑀺𑀆𑀤𑀺. ‘‘𑀲𑀼𑀢𑁆𑀢𑀦𑁆𑀢𑀸𑀦𑀁 𑀲𑀳𑀲𑁆𑀲𑀸𑀦𑀺 𑀲𑀢𑁆𑀢 𑀲𑀼𑀢𑁆𑀢𑀲𑀢𑀸𑀦𑀺 𑀘𑀸’’𑀢𑀺 𑀧𑀸𑀞𑁂 𑀲𑀼𑀢𑁆𑀢𑀦𑁆𑀢𑀸𑀦𑀁 𑀲𑀢𑁆𑀢 𑀲𑀳𑀲𑁆𑀲𑀸𑀦𑀺, 𑀲𑀢𑁆𑀢 𑀲𑀼𑀢𑁆𑀢𑀲𑀢𑀸𑀦𑀺 𑀘𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. ‘‘𑀲𑀢𑁆𑀢 𑀲𑀼𑀢𑁆𑀢𑀲𑀳𑀲𑁆𑀲𑀸𑀦𑀺, 𑀲𑀢𑁆𑀢 𑀲𑀼𑀢𑁆𑀢𑀲𑀢𑀸𑀦𑀺 𑀘𑀸’’𑀢𑀺𑀧𑀺 𑀧𑀸𑀞𑁄. 𑀲𑀁𑀬𑀼𑀢𑁆𑀢𑀲𑀗𑁆𑀕𑀳𑁄𑀢𑀺 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀲𑁆𑀲 𑀲𑀗𑁆𑀕𑀳𑁄 𑀕𑀡𑀦𑀸.

𑀏𑀓𑁂𑀓𑁂𑀳𑀺 ¶ 𑀅𑀗𑁆𑀕𑁂𑀳𑀺 𑀉𑀧𑀭𑀽𑀧𑀭𑀺 𑀉𑀢𑁆𑀢𑀭𑁄 𑀅𑀥𑀺𑀓𑁄 𑀏𑀢𑁆𑀣𑀸𑀢𑀺 𑀅𑀗𑁆𑀕𑀼𑀢𑁆𑀢𑀭𑁄𑀢𑀺 𑀆𑀳 ‘‘𑀏𑀓𑁂𑀓𑀅𑀗𑁆𑀕𑀸𑀢𑀺𑀭𑁂𑀓𑀯𑀲𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀳𑀺 𑀏𑀓𑁂𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀏𑀓𑀸𑀤𑀲 𑀅𑀗𑁆𑀕𑀸𑀦𑀺 𑀓𑀣𑀺𑀢𑀸𑀦𑀺. 𑀅𑀗𑁆𑀕𑀦𑁆𑀢𑀺 𑀘 𑀥𑀫𑁆𑀫𑀓𑁄𑀝𑁆𑀞𑀸𑀲𑁄.

𑀧𑀼𑀩𑁆𑀩𑁂𑀢𑀺 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀦𑀺𑀤𑁆𑀤𑁂𑀲𑁂. 𑀯𑀼𑀢𑁆𑀢𑀫𑁂𑀯 𑀧𑀓𑀸𑀭𑀦𑁆𑀢𑀭𑁂𑀦 𑀲𑀗𑁆𑀔𑀺𑀧𑀺𑀢𑁆𑀯𑀸 𑀅𑀯𑀺𑀲𑁂𑀲𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀞𑀧𑁂𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀲𑀓𑀮𑀁 𑀯𑀺𑀦𑀬𑀧𑀺𑀝𑀓’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯 𑀳𑀺 𑀇𑀫𑀺𑀦𑀸 𑀧𑀓𑀸𑀭𑀦𑁆𑀢𑀭𑁂𑀦 𑀲𑀗𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀅𑀧𑀺𑀘 𑀬𑀣𑀸𑀯𑀼𑀢𑁆𑀢𑀢𑁄 𑀅𑀯𑀲𑀺𑀝𑁆𑀞𑀁 𑀬𑀁 𑀓𑀺𑀜𑁆𑀘𑀺 𑀪𑀕𑀯𑀢𑀸 𑀤𑀺𑀦𑁆𑀦𑀦𑀬𑁂 𑀞𑀢𑁆𑀯𑀸 𑀤𑁂𑀲𑀺𑀢𑀁, 𑀪𑀕𑀯𑀢𑀸 𑀘 𑀅𑀦𑀼𑀫𑁄𑀤𑀺𑀢𑀁 𑀦𑁂𑀢𑁆𑀢𑀺𑀧𑁂𑀝𑀓𑁄𑀧𑀤𑁂𑀲𑀸𑀤𑀺𑀓𑀁, 𑀢𑀁 𑀲𑀩𑁆𑀩𑀫𑁆𑀧𑀺 𑀏𑀢𑁆𑀣𑁂𑀯 𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺𑀧𑀺 𑀤𑀝𑁆𑀞𑀩𑁆𑀩𑀁. 𑀲𑀺𑀤𑁆𑀥𑁂𑀧𑀺 𑀳𑀺 𑀲𑀢𑀺 𑀆𑀭𑀫𑁆𑀪𑁄 𑀅𑀢𑁆𑀣𑀦𑁆𑀢𑀭𑀯𑀺𑀜𑁆𑀜𑀸𑀧𑀦𑀸𑀬 𑀯𑀸 𑀳𑁄𑀢𑀺, 𑀦𑀺𑀬𑀫𑀸𑀬 𑀯𑀸𑀢𑀺. 𑀏𑀢𑁆𑀣 𑀘 𑀬𑀣𑀸 ‘‘𑀤𑀻𑀖𑀧𑁆𑀧𑀫𑀸𑀡𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀏𑀯𑀁 ‘‘𑀔𑀼𑀤𑁆𑀤𑀓𑀧𑁆𑀧𑀫𑀸𑀡𑀸𑀦’’𑀦𑁆𑀢𑀺𑀆𑀤𑀺𑀫𑀯𑀢𑁆𑀯𑀸 𑀲𑀭𑀽𑀧𑀲𑁆𑀲𑁂𑀯 𑀓𑀣𑀦𑀁 𑀯𑀺𑀦𑀬𑀸𑀪𑀺𑀥𑀫𑁆𑀫𑀸𑀤𑀻𑀦𑀁 𑀤𑀻𑀖𑀧𑁆𑀧𑀫𑀸𑀡𑀸𑀦𑀫𑁆𑀧𑀺 𑀢𑀤𑀦𑁆𑀢𑁄𑀕𑀥𑀢𑀸𑀬𑀸𑀢𑀺 𑀤𑀝𑁆𑀞𑀩𑁆𑀩𑀁, 𑀢𑁂𑀦 𑀘 𑀯𑀺𑀜𑁆𑀜𑀸𑀬𑀢𑀺 ‘‘𑀦 𑀲𑀩𑁆𑀩𑀢𑁆𑀣 𑀔𑀼𑀤𑁆𑀤𑀓𑀧𑀭𑀺𑀬𑀸𑀧𑀦𑁆𑀦𑁂𑀲𑀼 ¶ 𑀢𑀲𑁆𑀲 𑀅𑀦𑁆𑀯𑀢𑁆𑀣𑀲𑀫𑀜𑁆𑀜𑀢𑀸, 𑀤𑀻𑀖𑀦𑀺𑀓𑀸𑀬𑀸𑀤𑀺𑀲𑀪𑀸𑀯𑀯𑀺𑀧𑀭𑀻𑀢𑀪𑀸𑀯𑀲𑀸𑀫𑀜𑁆𑀜𑁂𑀦 𑀧𑀦 𑀓𑀢𑁆𑀣𑀘𑀺 𑀢𑀩𑁆𑀩𑁄𑀳𑀸𑀭𑀢𑀸’’𑀢𑀺. 𑀢𑀤𑀜𑁆𑀜𑀦𑁆𑀢𑀺 𑀢𑁂𑀳𑀺 𑀘𑀢𑀽𑀳𑀺 𑀦𑀺𑀓𑀸𑀬𑁂𑀳𑀺 𑀅𑀜𑁆𑀜𑀁, 𑀅𑀯𑀲𑁂𑀲𑀦𑁆𑀢𑀺 𑀅𑀢𑁆𑀣𑁄.

𑀦𑀯𑀧𑁆𑀧𑀪𑁂𑀤𑀦𑁆𑀢𑀺 𑀏𑀢𑁆𑀣 𑀓𑀣𑀁 𑀧𑀦𑁂𑀢𑀁 𑀦𑀯𑀧𑁆𑀧𑀪𑁂𑀤𑀁 𑀳𑁄𑀢𑀺. 𑀢𑀣𑀸 𑀳𑀺 𑀦𑀯𑀳𑀺 𑀅𑀗𑁆𑀕𑁂𑀳𑀺 𑀯𑀯𑀢𑁆𑀣𑀺𑀢𑁂𑀳𑀺 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀭𑀳𑀺𑀢𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀢𑀣𑀸 𑀘 𑀲𑀢𑀺 𑀅𑀲𑀼𑀢𑁆𑀢𑀲𑀪𑀸𑀯𑀸𑀦𑁂𑀯 𑀕𑁂𑀬𑁆𑀬𑀗𑁆𑀕𑀸𑀤𑀻𑀦𑀺 𑀲𑀺𑀬𑀼𑀁, 𑀅𑀣 𑀲𑀼𑀢𑁆𑀢𑀲𑀪𑀸𑀯𑀸𑀦𑁂𑀯 𑀕𑁂𑀬𑁆𑀬𑀗𑁆𑀕𑀸𑀤𑀻𑀦𑀺, 𑀏𑀯𑀁 𑀲𑀢𑀺 𑀲𑀼𑀢𑁆𑀢𑀦𑁆𑀢𑀺 𑀯𑀺𑀲𑀼𑀁 𑀲𑀼𑀢𑁆𑀢𑀗𑁆𑀕𑀫𑁂𑀯 𑀦 𑀲𑀺𑀬𑀸, 𑀏𑀯𑀁 𑀲𑀦𑁆𑀢𑁂 𑀅𑀝𑁆𑀞𑀗𑁆𑀕𑀁 𑀲𑀸𑀲𑀦𑀦𑁆𑀢𑀺 𑀆𑀧𑀚𑁆𑀚𑀢𑀺. 𑀅𑀧𑀺𑀘 ‘‘𑀲𑀕𑀸𑀣𑀓𑀁 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁, 𑀦𑀺𑀕𑁆𑀕𑀸𑀣𑀓𑀁 𑀲𑀼𑀢𑁆𑀢𑀁 𑀯𑁂𑀬𑁆𑀬𑀸𑀓𑀭𑀡’’𑀦𑁆𑀢𑀺 (𑀤𑀻. 𑀦𑀺. 𑀅𑀝𑁆𑀞., 𑀧𑀸𑀭𑀸. 𑀅𑀝𑁆𑀞. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀲𑀼𑀢𑁆𑀢𑀜𑁆𑀘 𑀦𑀸𑀫 𑀲𑀕𑀸𑀣𑀓𑀁 𑀯𑀸 𑀲𑀺𑀬𑀸, 𑀦𑀺𑀕𑁆𑀕𑀸𑀣𑀓𑀁 𑀯𑀸, 𑀢𑀲𑁆𑀫𑀸 𑀅𑀗𑁆𑀕𑀤𑁆𑀯𑀬𑁂𑀦𑁂𑀯 𑀢𑀤𑀼𑀪𑀬𑀁 𑀲𑀗𑁆𑀕𑀳𑀺𑀢𑀦𑁆𑀢𑀺 𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑀁 𑀲𑀼𑀢𑁆𑀢𑀁 𑀉𑀤𑀸𑀦𑀸𑀤𑀺𑀯𑀺𑀲𑁂𑀲𑀲𑀜𑁆𑀜𑀸𑀭𑀳𑀺𑀢𑀁 𑀦𑀢𑁆𑀣𑀺, 𑀬𑀁 𑀲𑀼𑀢𑁆𑀢𑀗𑁆𑀕𑀁 𑀲𑀺𑀬𑀸, 𑀅𑀣𑀸𑀧𑀺 𑀓𑀣𑀜𑁆𑀘𑀺 𑀯𑀺𑀲𑀼𑀁 𑀲𑀼𑀢𑁆𑀢𑀗𑁆𑀕𑀁 𑀲𑀺𑀬𑀸, 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀦𑀁 (𑀔𑀼. 𑀧𑀸. 𑁧; 𑀲𑀼. 𑀦𑀺. 𑁨𑁬𑁧) 𑀲𑀼𑀢𑁆𑀢𑀗𑁆𑀕𑀲𑀗𑁆𑀕𑀳𑁄 𑀦 𑀲𑀺𑀬𑀸 𑀕𑀸𑀣𑀸𑀪𑀸𑀯𑀢𑁄 𑀥𑀫𑁆𑀫𑀧𑀤𑀸𑀤𑀻𑀦𑀁 𑀯𑀺𑀬. 𑀕𑁂𑀬𑁆𑀬𑀗𑁆𑀕𑀲𑀗𑁆𑀕𑀳𑁄 𑀯𑀸 𑀲𑀺𑀬𑀸 𑀲𑀕𑀸𑀣𑀓𑀢𑁆𑀢𑀸 𑀲𑀕𑀸𑀣𑀸𑀯𑀕𑁆𑀕𑀲𑁆𑀲 𑀯𑀺𑀬. 𑀢𑀣𑀸 𑀉𑀪𑀢𑁄𑀯𑀺𑀪𑀗𑁆𑀕𑀸𑀤𑀻𑀲𑀼 𑀲𑀕𑀸𑀣𑀓𑀧𑁆𑀧𑀤𑁂𑀲𑀸𑀦𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋

𑀲𑀼𑀢𑁆𑀢𑀦𑁆𑀢𑀺 ¶ 𑀲𑀸𑀫𑀜𑁆𑀜𑀯𑀺𑀥𑀺, 𑀯𑀺𑀲𑁂𑀲𑀯𑀺𑀥𑀬𑁄 𑀧𑀭𑁂;

𑀲𑀦𑀺𑀫𑀺𑀢𑁆𑀢𑀸 𑀦𑀺𑀭𑀼𑀴𑁆𑀳𑀢𑁆𑀢𑀸, 𑀲𑀳𑀢𑀸𑀜𑁆𑀜𑁂𑀦 𑀦𑀸𑀜𑁆𑀜𑀢𑁄. (𑀤𑀻. 𑀦𑀺. 𑀝𑀻. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸);

𑀬𑀣𑀸𑀯𑀼𑀢𑁆𑀢𑀲𑁆𑀲 𑀤𑁄𑀲𑀲𑁆𑀲, 𑀦𑀢𑁆𑀣𑀺 𑀏𑀢𑁆𑀣𑀸𑀯𑀕𑀸𑀳𑀡𑀁;

𑀢𑀲𑁆𑀫𑀸 𑀅𑀲𑀗𑁆𑀓𑀭𑀁𑀬𑁂𑀯, 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁. (𑀲𑀸𑀭𑀢𑁆𑀣. 𑀝𑀻. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸);

𑀲𑀩𑁆𑀩𑀲𑁆𑀲𑀸𑀧𑀺 𑀳𑀺 𑀩𑀼𑀤𑁆𑀥𑀯𑀘𑀦𑀲𑁆𑀲 𑀲𑀼𑀢𑁆𑀢𑀦𑁆𑀢𑀺 𑀅𑀬𑀁 𑀲𑀸𑀫𑀜𑁆𑀜𑀯𑀺𑀥𑀺. 𑀢𑀣𑀸 𑀳𑀺 ‘‘𑀏𑀢𑁆𑀢𑀓𑀁 𑀢𑀲𑁆𑀲 𑀪𑀕𑀯𑀢𑁄 𑀲𑀼𑀢𑁆𑀢𑀸𑀕𑀢𑀁 𑀲𑀼𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀁, (𑀧𑀸𑀘𑀺. 𑀅𑀝𑁆𑀞. 𑁬𑁫𑁫, 𑁧𑁨𑁪𑁨) 𑀲𑀸𑀯𑀢𑁆𑀣𑀺𑀬𑀸 𑀲𑀼𑀢𑁆𑀢𑀯𑀺𑀪𑀗𑁆𑀕𑁂, (𑀘𑀽𑀴𑀯. 𑁪𑁫𑁬) 𑀲𑀓𑀯𑀸𑀤𑁂 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀻’’𑀢𑀺𑀆𑀤𑀺 (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸) 𑀯𑀘𑀦𑀢𑁄 𑀯𑀺𑀦𑀬𑀸𑀪𑀺𑀥𑀫𑁆𑀫𑀧𑀭𑀺𑀬𑀢𑁆𑀢𑀺 𑀯𑀺𑀲𑁂𑀲𑁂𑀲𑀼𑀧𑀺 𑀲𑀼𑀢𑁆𑀢𑀯𑁄𑀳𑀸𑀭𑁄 𑀤𑀺𑀲𑁆𑀲𑀢𑀺. 𑀢𑁂𑀦𑁂𑀯 𑀘 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 𑀦𑁂𑀢𑁆𑀢𑀺𑀬𑀁 𑀆𑀳 ‘‘𑀦𑀯𑀯𑀺𑀥𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑁂𑀝𑁆𑀞𑀻’’𑀢𑀺 (𑀦𑁂𑀢𑁆𑀢𑀺. 𑀲𑀗𑁆𑀕𑀳𑀯𑀸𑀭𑀯𑀡𑁆𑀡𑀦𑀸) 𑀢𑀢𑁆𑀣 𑀳𑀺 𑀲𑀼𑀢𑁆𑀢𑀸𑀤𑀺𑀯𑀲𑁂𑀦 𑀦𑀯𑀗𑁆𑀕𑀲𑁆𑀲 𑀲𑀸𑀲𑀦𑀲𑁆𑀲 𑀧𑀭𑀺𑀬𑁂𑀝𑁆𑀞𑀺 𑀧𑀭𑀺𑀬𑁂𑀲𑀦𑀸 𑀅𑀢𑁆𑀣𑀯𑀺𑀘𑀸𑀭𑀡𑀸 ‘‘𑀦𑀯𑀯𑀺𑀥 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑁂𑀝𑁆𑀞𑀻’’𑀢𑀺 𑀯𑀼𑀢𑁆𑀢𑀸. 𑀢𑀤𑁂𑀓𑀤𑁂𑀲𑁂𑀲𑀼 𑀧𑀦 𑀧𑀭𑁂 𑀕𑁂𑀬𑁆𑀬𑀸𑀤𑀬𑁄 𑀲𑀦𑀺𑀫𑀺𑀢𑁆𑀢𑀸 𑀯𑀺𑀲𑁂𑀲𑀯𑀺𑀥𑀬𑁄 𑀢𑁂𑀦 𑀢𑁂𑀦 𑀦𑀺𑀫𑀺𑀢𑁆𑀢𑁂𑀦 𑀧𑀢𑀺𑀝𑁆𑀞𑀺𑀢𑀸. 𑀢𑀣𑀸 𑀳𑀺 𑀕𑁂𑀬𑁆𑀬𑀲𑁆𑀲 𑀲𑀕𑀸𑀣𑀓𑀢𑁆𑀢𑀁 𑀢𑀩𑁆𑀪𑀸𑀯𑀦𑀺𑀫𑀺𑀢𑁆𑀢𑀁. 𑀮𑁄𑀓𑁂𑀧𑀺 𑀳𑀺 𑀲𑀲𑀺𑀮𑁄𑀓𑀁 𑀲𑀕𑀸𑀣𑀓𑀁 𑀘𑀼𑀡𑁆𑀡𑀺𑀬𑀕𑀦𑁆𑀣𑀁 ‘‘𑀕𑁂𑀬𑁆𑀬’’𑀦𑁆𑀢𑀺 ¶ 𑀯𑀤𑀦𑁆𑀢𑀺, 𑀕𑀸𑀣𑀸𑀯𑀺𑀭𑀳𑁂 𑀧𑀦 𑀲𑀢𑀺 𑀧𑀼𑀘𑁆𑀙𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀪𑀸𑀯𑁄 𑀯𑁂𑀬𑁆𑀬𑀸𑀓𑀭𑀡𑀲𑁆𑀲 𑀢𑀩𑁆𑀪𑀸𑀯𑀦𑀺𑀫𑀺𑀢𑁆𑀢𑀁. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀜𑁆𑀳𑀺 ‘‘𑀩𑁆𑀬𑀸𑀓𑀭𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀩𑁆𑀬𑀸𑀓𑀭𑀡𑀫𑁂𑀯 𑀯𑁂𑀬𑁆𑀬𑀸𑀓𑀭𑀡𑀁. 𑀏𑀯𑀁 𑀲𑀦𑁆𑀢𑁂 𑀲𑀕𑀸𑀣𑀓𑀸𑀤𑀻𑀦𑀫𑁆𑀧𑀺 𑀧𑀼𑀘𑁆𑀙𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀕𑁂𑀬𑁆𑀬𑀸𑀤𑀺𑀲𑀜𑁆𑀜𑀸𑀦𑀁 𑀅𑀦𑁄𑀓𑀸𑀲𑀪𑀸𑀯𑀢𑁄. 𑀲𑀑𑀓𑀸𑀲𑀯𑀺𑀥𑀺𑀢𑁄 𑀳𑀺 𑀅𑀦𑁄𑀓𑀸𑀲𑀯𑀺𑀥𑀺 𑀩𑀮𑀯𑀸. 𑀅𑀧𑀺𑀘 ‘‘𑀕𑀸𑀣𑀸𑀯𑀺𑀭𑀳𑁂 𑀲𑀢𑀻’’𑀢𑀺 𑀯𑀺𑀲𑁂𑀲𑀺𑀢𑀢𑁆𑀢𑀸. 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀳𑀺 𑀅𑀢𑁆𑀣𑀲𑁆𑀲 𑀅𑀦𑀥𑀺𑀧𑁆𑀧𑁂𑀢𑀢𑁄 𑀩𑁆𑀬𑀯𑀘𑁆𑀙𑁂𑀤𑀓𑀁 𑀯𑀺𑀲𑁂𑀲𑀦𑀁. 𑀢𑀣𑀸 𑀳𑀺 𑀥𑀫𑁆𑀫𑀧𑀤𑀸𑀤𑀻𑀲𑀼 𑀓𑁂𑀯𑀮𑀕𑀸𑀣𑀸𑀩𑀦𑁆𑀥𑁂𑀲𑀼, 𑀲𑀕𑀸𑀣𑀓𑀢𑁆𑀢𑁂𑀧𑀺 𑀲𑁄𑀫𑀦𑀲𑁆𑀲𑀜𑀸𑀡𑀫𑀬𑀺𑀓𑀕𑀸𑀣𑀸𑀧𑀝𑀺𑀲𑀜𑁆𑀜𑀼𑀢𑁆𑀢𑁂𑀲𑀼, ‘‘𑀯𑀼𑀢𑁆𑀢𑀁 𑀳𑁂𑀢’’𑀦𑁆𑀢𑀺𑀆𑀤𑀺𑀯𑀘𑀦 𑀲𑀫𑁆𑀩𑀦𑁆𑀥𑁂𑀲𑀼, 𑀅𑀩𑁆𑀪𑀼𑀢𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀘 𑀲𑀼𑀢𑁆𑀢𑀯𑀺𑀲𑁂𑀲𑁂𑀲𑀼 𑀬𑀣𑀸𑀓𑁆𑀓𑀫𑀁 𑀕𑀸𑀣𑀸𑀉𑀤𑀸𑀦𑀇𑀢𑀺𑀯𑀼𑀢𑁆𑀢𑀓 𑀅𑀩𑁆𑀪𑀼𑀢𑀥𑀫𑁆𑀫𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸. 𑀏𑀢𑁆𑀣 𑀳𑀺 𑀲𑀢𑀺𑀧𑀺 𑀲𑀜𑁆𑀜𑀸𑀦𑁆𑀢𑀭𑀦𑀺𑀫𑀺𑀢𑁆𑀢𑀬𑁄𑀕𑁂 𑀅𑀦𑁄𑀓𑀸𑀲𑀲𑀜𑁆𑀜𑀸𑀦𑀁 𑀩𑀮𑀯𑀪𑀸𑀯𑁂𑀦𑁂𑀯 𑀕𑀸𑀣𑀸𑀤𑀺𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸, 𑀢𑀣𑀸 𑀲𑀢𑀺𑀧𑀺 𑀕𑀸𑀣𑀸𑀩𑀦𑁆𑀥𑀪𑀸𑀯𑁂 𑀪𑀕𑀯𑀢𑁄 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀼 𑀘𑀭𑀺𑀬𑀸𑀦𑀼𑀪𑀸𑀯𑀧𑁆𑀧𑀓𑀸𑀲𑀓𑁂𑀲𑀼 𑀚𑀸𑀢𑀓𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸, 𑀲𑀢𑀺𑀧𑀺 𑀧𑀜𑁆𑀳𑀸𑀯𑀺𑀲𑁆𑀲𑀚𑁆𑀚𑀦𑀪𑀸𑀯𑁂 ¶ , 𑀲𑀕𑀸𑀣𑀓𑀢𑁆𑀢𑁂 𑀘 𑀓𑁂𑀲𑀼𑀘𑀺 𑀲𑀼𑀢𑁆𑀢𑀦𑁆𑀢𑁂𑀲𑀼 𑀯𑁂𑀤𑀲𑁆𑀲 𑀮𑀪𑀸𑀧𑀦𑀢𑁄 𑀯𑁂𑀤𑀮𑁆𑀮𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸, 𑀏𑀯𑀁 𑀢𑁂𑀦 𑀢𑁂𑀦 𑀲𑀕𑀸𑀣𑀓𑀢𑁆𑀢𑀸𑀤𑀺𑀦𑀸 𑀦𑀺𑀫𑀺𑀢𑁆𑀢𑁂𑀦 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑀯𑀺𑀲𑁂𑀲𑁂𑀲𑀼 𑀕𑁂𑀬𑁆𑀬𑀸𑀤𑀺𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸𑀢𑀺 𑀯𑀺𑀲𑁂𑀲𑀯𑀺𑀥𑀬𑁄 𑀲𑀼𑀢𑁆𑀢𑀗𑁆𑀕𑀢𑁄 𑀧𑀭𑁂 𑀕𑁂𑀬𑁆𑀬𑀸𑀤𑀬𑁄, 𑀬𑀁 𑀧𑀦𑁂𑀢𑁆𑀣 𑀕𑁂𑀬𑁆𑀬𑀗𑁆𑀕𑀸𑀤𑀺𑀦𑀺𑀫𑀺𑀢𑁆𑀢𑀭𑀳𑀺𑀢𑀁, 𑀢𑀁 𑀲𑀼𑀢𑁆𑀢𑀗𑁆𑀕𑀫𑁂𑀯 𑀯𑀺𑀲𑁂𑀲𑀲𑀜𑁆𑀜𑀸𑀧𑀭𑀺𑀳𑀸𑀭𑁂𑀦 𑀲𑀸𑀫𑀜𑁆𑀜𑀲𑀜𑁆𑀜𑀸𑀬 𑀧𑀯𑀢𑁆𑀢𑀦𑀢𑁄. 𑀦𑀦𑀼 𑀘 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀕𑀸𑀣𑀓𑀁 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁, 𑀦𑀺𑀕𑁆𑀕𑀸𑀣𑀓𑀁 𑀲𑀼𑀢𑁆𑀢𑀁 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺 𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀪𑀸𑀯𑀢𑁄 𑀯𑀺𑀲𑀼𑀁 𑀲𑀼𑀢𑁆𑀢𑀗𑁆𑀕𑀫𑁂𑀯 𑀦 𑀲𑀺𑀬𑀸𑀢𑀺 𑀘𑁄𑀤𑀦𑀸 𑀢𑀤𑀯𑀢𑁆𑀣𑀸 𑀏𑀯𑀸𑀢𑀺? 𑀦 𑀢𑀤𑀯𑀢𑁆𑀣𑀸 𑀲𑁄𑀥𑀺𑀢𑀢𑁆𑀢𑀸. 𑀲𑁄𑀥𑀺𑀢𑀜𑁆𑀳𑀺 𑀧𑀼𑀩𑁆𑀩𑁂 𑀕𑀸𑀣𑀸𑀯𑀺𑀭𑀳𑁂 𑀲𑀢𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀪𑀸𑀯𑁄 𑀯𑁂𑀬𑁆𑀬𑀸𑀓𑀭𑀡𑀲𑁆𑀲 𑀢𑀩𑁆𑀪𑀸𑀯𑀦𑀺𑀫𑀺𑀢𑁆𑀢𑀦𑁆𑀢𑀺.

𑀬𑀜𑁆𑀘 𑀯𑀼𑀢𑁆𑀢𑀁 ‘‘𑀕𑀸𑀣𑀸𑀪𑀸𑀯𑀢𑁄 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀦𑀁 (𑀔𑀼. 𑀧𑀸. 𑁧; 𑀲𑀼. 𑀦𑀺. 𑁨𑁬𑁧) 𑀲𑀼𑀢𑁆𑀢𑀗𑁆𑀕𑀲𑀗𑁆𑀕𑀳𑁄 𑀦 𑀲𑀺𑀬𑀸’’𑀢𑀺, 𑀢𑀫𑁆𑀧𑀺 𑀦, 𑀦𑀺𑀭𑀼𑀴𑁆𑀳𑀢𑁆𑀢𑀸. 𑀦𑀺𑀭𑀼𑀴𑁆𑀳𑁄 𑀳𑀺 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀦𑀁 𑀲𑀼𑀢𑁆𑀢𑀪𑀸𑀯𑁄. 𑀦 𑀳𑀺 𑀢𑀸𑀦𑀺 𑀥𑀫𑁆𑀫𑀧𑀤𑀩𑀼𑀤𑁆𑀥𑀯𑀁𑀲𑀸𑀤𑀬𑁄 𑀯𑀺𑀬 𑀕𑀸𑀣𑀸𑀪𑀸𑀯𑁂𑀦 𑀲𑀜𑁆𑀜𑀺𑀢𑀸𑀦𑀺, 𑀅𑀣 𑀔𑁄 𑀲𑀼𑀢𑁆𑀢𑀪𑀸𑀯𑁂𑀦𑁂𑀯. 𑀢𑁂𑀦𑁂𑀯 𑀳𑀺 𑀅𑀓𑀣𑀸𑀬𑀁 ‘‘𑀲𑀼𑀢𑁆𑀢𑀦𑀸𑀫𑀓’’𑀦𑁆𑀢𑀺 𑀦𑀸𑀫𑀕𑁆𑀕𑀳𑀡𑀁 𑀓𑀢𑀁. 𑀬𑀜𑁆𑀘 𑀧𑀦 𑀯𑀼𑀢𑁆𑀢𑀁 ‘‘𑀲𑀕𑀸𑀣𑀓𑀢𑁆𑀢𑀸 𑀕𑁂𑀬𑁆𑀬𑀗𑁆𑀕𑀲𑀗𑁆𑀕𑀳𑁄 𑀯𑀸 𑀲𑀺𑀬𑀸’’𑀢𑀺, 𑀢𑀫𑁆𑀧𑀺 𑀦𑀢𑁆𑀣𑀺. 𑀓𑀲𑁆𑀫𑀸𑀢𑀺 𑀘𑁂? 𑀬𑀲𑁆𑀫𑀸 𑀲𑀳𑀢𑀸𑀜𑁆𑀜𑁂𑀦, 𑀢𑀲𑁆𑀫𑀸. 𑀲𑀳𑀪𑀸𑀯𑁄 𑀳𑀺 𑀦𑀸𑀫 𑀅𑀢𑁆𑀢𑀢𑁄 𑀅𑀜𑁆𑀜𑁂𑀦 𑀳𑁄𑀢𑀺. 𑀲𑀳 𑀕𑀸𑀣𑀸𑀳𑀻𑀢𑀺 𑀘 𑀲𑀕𑀸𑀣𑀓𑀁, 𑀦 𑀘 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀲𑀼 𑀕𑀸𑀣𑀸𑀯𑀺𑀦𑀺𑀫𑀼𑀢𑁆𑀢𑁄 𑀓𑁄𑀘𑀺 𑀲𑀼𑀢𑁆𑀢𑀧𑀤𑁂𑀲𑁄 𑀅𑀢𑁆𑀣𑀺, 𑀬𑁄 ‘‘𑀲𑀳 𑀕𑀸𑀣𑀸𑀳𑀻’’𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀦𑀦𑀼 𑀘 𑀕𑀸𑀣𑀸𑀲𑀫𑀼𑀤𑀸𑀬𑁄 𑀢𑀤𑁂𑀓𑀤𑁂𑀲𑀸𑀳𑀺 𑀕𑀸𑀣𑀸𑀳𑀺 𑀅𑀜𑁆𑀜𑁄 𑀳𑁄𑀢𑀺, 𑀬𑀲𑁆𑀲 𑀯𑀲𑁂𑀦 ‘‘𑀲𑀳 𑀕𑀸𑀣𑀸𑀳𑀻’’𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺? 𑀢𑀁 𑀦. 𑀦 𑀳𑀺 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀲𑀫𑀼𑀤𑀸𑀬𑁄 𑀦𑀸𑀫 𑀓𑁄𑀘𑀺 𑀅𑀢𑁆𑀣𑀺, 𑀬𑁄 𑀢𑀤𑁂𑀓𑀤𑁂𑀲𑁂𑀳𑀺 𑀲𑀳 𑀪𑀯𑁂𑀬𑁆𑀬. 𑀓𑀢𑁆𑀣𑀘𑀺 𑀧𑀦 ‘‘𑀤𑀻𑀖𑀲𑀼𑀢𑁆𑀢𑀗𑁆𑀓𑀺𑀢𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀲𑀫𑀼𑀤𑀸𑀬𑁂𑀓𑀤𑁂𑀲𑀸𑀦𑀁 𑀯𑀺𑀪𑀸𑀕𑀯𑀘𑀦𑀁 𑀯𑁄𑀳𑀸𑀭𑀫𑀢𑁆𑀢𑀁 𑀧𑀢𑀺 𑀧𑀭𑀺𑀬𑀸𑀬𑀯𑀘𑀦𑀫𑁂𑀯, 𑀅𑀬𑀜𑁆𑀘 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀪𑁂𑀤𑀯𑀺𑀪𑀸𑀕𑀤𑀲𑁆𑀲𑀦𑀓𑀣𑀸𑀢𑀺 ¶ . 𑀬𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀉𑀪𑀢𑁄𑀯𑀺𑀪𑀗𑁆𑀕𑀸𑀤𑀻𑀲𑀼 𑀲𑀕𑀸𑀣𑀓𑀧𑁆𑀧𑀤𑁂𑀲𑀸𑀦𑀁 𑀕𑁂𑀬𑁆𑀬𑀗𑁆𑀕𑀲𑀗𑁆𑀕𑀳𑁄 𑀲𑀺𑀬𑀸’’𑀢𑀺, 𑀢𑀫𑁆𑀧𑀺 𑀦, 𑀅𑀜𑁆𑀜𑀢𑁄. 𑀅𑀜𑁆𑀜𑀸𑀬𑁂𑀯 𑀳𑀺 𑀢𑀸 𑀕𑀸𑀣𑀸 𑀚𑀸𑀢𑀓𑀸𑀤𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸. 𑀢𑀸𑀤𑀺𑀲𑀸𑀬𑁂𑀯 𑀳𑀺 𑀓𑀸𑀭𑀡𑀸𑀦𑀼𑀭𑀽𑀧𑁂𑀦 𑀢𑀢𑁆𑀣 𑀤𑁂𑀲𑀺𑀢𑀸, 𑀅𑀢𑁄 𑀦 𑀢𑀸𑀳𑀺 𑀉𑀪𑀢𑁄𑀯𑀺𑀪𑀗𑁆𑀕𑀸𑀤𑀻𑀦𑀁 𑀕𑁂𑀬𑁆𑀬𑀗𑁆𑀕𑀪𑀸𑀯𑁄𑀢𑀺. 𑀏𑀯𑀁 𑀲𑀼𑀢𑁆𑀢𑀸𑀤𑀺𑀦𑀯𑀗𑁆𑀕𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀇𑀤𑀸𑀦𑀺 ¶ 𑀏𑀢𑀸𑀦𑀺 𑀦𑀯𑀗𑁆𑀕𑀸𑀦𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀦𑀺𑀤𑁆𑀤𑁂𑀲𑁄 𑀦𑀸𑀫 𑀲𑀼𑀢𑁆𑀢𑀦𑀺𑀧𑀸𑀢𑁂 𑁋

‘‘𑀓𑀸𑀫𑀁 𑀓𑀸𑀫𑀬𑀫𑀸𑀦𑀲𑁆𑀲, 𑀢𑀲𑁆𑀲 𑀘𑁂 𑀢𑀁 𑀲𑀫𑀺𑀚𑁆𑀛𑀢𑀺;

𑀅𑀤𑁆𑀥𑀸 𑀧𑀻𑀢𑀺𑀫𑀦𑁄 𑀳𑁄𑀢𑀺, 𑀮𑀤𑁆𑀥𑀸 𑀫𑀘𑁆𑀘𑁄 𑀬𑀤𑀺𑀘𑁆𑀙𑀢𑀻’’𑀢𑀺𑀆𑀤𑀺𑀦𑀸. (𑀲𑀼. 𑀦𑀺. 𑁭𑁭𑁨); 𑁋

𑀆𑀕𑀢𑀲𑁆𑀲 𑀅𑀝𑁆𑀞𑀓𑀯𑀕𑁆𑀕𑀲𑁆𑀲;

‘‘𑀓𑁂𑀦𑀲𑁆𑀲𑀼 𑀦𑀺𑀯𑀼𑀢𑁄 𑀮𑁄𑀓𑁄, (𑀇𑀘𑁆𑀘𑀸𑀬𑀲𑁆𑀫𑀸 𑀅𑀚𑀺𑀢𑁄);

𑀓𑁂𑀦𑀲𑁆𑀲𑀼 𑀦 𑀧𑀓𑀸𑀲𑀢𑀺;

𑀓𑀺𑀲𑁆𑀲𑀸𑀪𑀺𑀮𑁂𑀧𑀦𑀁 𑀩𑁆𑀭𑀽𑀲𑀺,

𑀓𑀺𑀁𑀲𑀼 𑀢𑀲𑁆𑀲 𑀫𑀳𑀩𑁆𑀪𑀬’’𑀦𑁆𑀢𑀺𑀆𑀤𑀺𑀦𑀸. (𑀲𑀼. 𑀦𑀺. 𑁧𑁦𑁩𑁮); 𑁋

𑀆𑀕𑀢𑀲𑁆𑀲 𑀧𑀸𑀭𑀸𑀬𑀦𑀯𑀕𑁆𑀕𑀲𑁆𑀲;

‘‘𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁,

𑀅𑀯𑀺𑀳𑁂𑀞𑀬𑀁 𑀅𑀜𑁆𑀜𑀢𑀭𑀫𑁆𑀧𑀺 𑀢𑁂𑀲𑀁;

𑀦 𑀧𑀼𑀢𑁆𑀢𑀫𑀺𑀘𑁆𑀙𑁂𑀬𑁆𑀬 𑀓𑀼𑀢𑁄 𑀲𑀳𑀸𑀬𑀁,

𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺𑀆𑀤𑀺𑀦𑀸. (𑀲𑀼. 𑀦𑀺. 𑁩𑁫); 𑁋

𑀆𑀕𑀢𑀲𑁆𑀲 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀲𑁆𑀲 𑀘 𑀅𑀢𑁆𑀣𑀯𑀺𑀪𑀸𑀕𑀯𑀲𑁂𑀦 𑀲𑀢𑁆𑀣𑀼𑀓𑀧𑁆𑀧𑁂𑀦 𑀆𑀬𑀲𑁆𑀫𑀢𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀓𑀢𑁄 𑀦𑀺𑀤𑁆𑀤𑁂𑀲𑁄, 𑀬𑁄 ‘‘𑀫𑀳𑀸𑀦𑀺𑀤𑁆𑀤𑁂𑀲𑁄, 𑀘𑀽𑀴𑀦𑀺𑀤𑁆𑀤𑁂𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀫𑀺𑀥 𑀦𑀺𑀤𑁆𑀤𑁂𑀲𑀲𑁆𑀲 𑀲𑀼𑀢𑁆𑀢𑀗𑁆𑀕𑀲𑀗𑁆𑀕𑀳𑁄 𑀪𑀤𑀦𑁆𑀢𑀩𑀼𑀤𑁆𑀥𑀥𑁄𑀲𑀸𑀘𑀭𑀺𑀬𑁂𑀦 𑀤𑀲𑁆𑀲𑀺𑀢𑁄, 𑀢𑀣𑀸 𑀅𑀜𑁆𑀜𑀢𑁆𑀣𑀸𑀧𑀺 𑀯𑀺𑀦𑀬𑀝𑁆𑀞𑀓𑀣𑀸𑀤𑀻𑀲𑀼 ¶ , 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦𑀸𑀧𑀺 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑀝𑁆𑀞𑀓𑀣𑀸𑀬𑀁. 𑀅𑀧𑀭𑁂 𑀧𑀦 𑀦𑀺𑀤𑁆𑀤𑁂𑀲𑀲𑁆𑀲 𑀕𑀸𑀣𑀸𑀯𑁂𑀬𑁆𑀬𑀸𑀓𑀭𑀡𑀗𑁆𑀕𑁂𑀲𑀼 𑀤𑁆𑀯𑀻𑀲𑀼 𑀲𑀗𑁆𑀕𑀳𑀁 𑀯𑀤𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀦𑀺𑀤𑁆𑀤𑁂𑀲𑀝𑁆𑀞𑀓𑀣𑀸𑀬𑀁 𑀉𑀧𑀲𑁂𑀦𑀢𑁆𑀣𑁂𑀭𑁂𑀦 𑁋

‘‘𑀲𑁄 𑀧𑀦𑁂𑀲 𑀯𑀺𑀦𑀬𑀧𑀺𑀝𑀓𑀁…𑀧𑁂… 𑀅𑀪𑀺𑀥𑀫𑁆𑀫𑀧𑀺𑀝𑀓𑀦𑁆𑀢𑀺 𑀢𑀻𑀲𑀼 𑀧𑀺𑀝𑀓𑁂𑀲𑀼 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀧𑀭𑀺𑀬𑀸𑀧𑀦𑁆𑀦𑁄, 𑀤𑀻𑀖𑀦𑀺𑀓𑀸𑀬𑁄…𑀧𑁂… 𑀔𑀼𑀤𑁆𑀤𑀓𑀦𑀺𑀓𑀸𑀬𑁄𑀢𑀺 𑀧𑀜𑁆𑀘𑀲𑀼 𑀦𑀺𑀓𑀸𑀬𑁂𑀲𑀼 𑀔𑀼𑀤𑁆𑀤𑀓𑀫𑀳𑀸𑀦𑀺𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑁄, 𑀲𑀼𑀢𑁆𑀢𑀁…𑀧𑁂… 𑀯𑁂𑀤𑀮𑁆𑀮𑀦𑁆𑀢𑀺 𑀦𑀯𑀲𑀼 𑀲𑀢𑁆𑀣𑀼𑀲𑀸𑀲𑀦𑀗𑁆𑀕𑁂𑀲𑀼 𑀬𑀣𑀸𑀲𑀫𑁆𑀪𑀯𑀁 𑀕𑀸𑀣𑀗𑁆𑀕𑀯𑁂𑀬𑁆𑀬𑀸𑀓𑀭𑀡𑀗𑁆𑀕𑀤𑁆𑀯𑀬𑀲𑀗𑁆𑀕𑀳𑀺𑀢𑁄’’𑀢𑀺 (𑀫𑀳𑀸𑀦𑀺. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸).

𑀏𑀢𑁆𑀣 ¶ 𑀢𑀸𑀯 𑀓𑀢𑁆𑀣𑀘𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀲𑀩𑁆𑀪𑀸𑀯𑀢𑁄 𑀦𑀺𑀤𑁆𑀤𑁂𑀲𑁂𑀓𑀤𑁂𑀲𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀗𑁆𑀕𑀲𑀗𑁆𑀕𑀳𑁄 𑀬𑀼𑀚𑁆𑀚𑀢𑀼, 𑀅𑀕𑀸𑀣𑀸𑀪𑀸𑀯𑀢𑁄 𑀕𑀸𑀣𑀗𑁆𑀕𑀲𑀗𑁆𑀕𑀳𑁄 𑀓𑀣𑀁 𑀬𑀼𑀚𑁆𑀚𑁂𑀬𑁆𑀬𑀸𑀢𑀺 𑀯𑀻𑀫𑀁𑀲𑀺𑀢𑀩𑁆𑀩𑀫𑁂𑀢𑀁. 𑀥𑀫𑁆𑀫𑀸𑀧𑀤𑀸𑀤𑀻𑀦𑀁 𑀯𑀺𑀬 𑀳𑀺 𑀓𑁂𑀯𑀮𑀁 𑀕𑀸𑀣𑀸𑀩𑀦𑁆𑀥𑀪𑀸𑀯𑁄 𑀕𑀸𑀣𑀗𑁆𑀕𑀲𑁆𑀲 𑀢𑀩𑁆𑀪𑀸𑀯𑀦𑀺𑀫𑀺𑀢𑁆𑀢𑀁. 𑀥𑀫𑁆𑀫𑀧𑀤𑀸𑀤𑀻𑀲𑀼 𑀳𑀺 𑀓𑁂𑀯𑀮𑀁 𑀕𑀸𑀣𑀸𑀩𑀦𑁆𑀥𑁂𑀲𑀼 𑀕𑀸𑀣𑀸𑀲𑀫𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸, 𑀦𑀺𑀤𑁆𑀤𑁂𑀲𑁂 𑀘 𑀦 𑀓𑁄𑀘𑀺 𑀓𑁂𑀯𑀮𑁄 𑀕𑀸𑀣𑀸𑀩𑀦𑁆𑀤𑀧𑁆𑀧𑀤𑁂𑀲𑁄 𑀉𑀧𑀮𑀩𑁆𑀪𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀪𑀸𑀲𑀺𑀢𑀸𑀦𑀁𑀬𑁂𑀯 𑀳𑀺 𑀅𑀝𑁆𑀞𑀓𑀯𑀕𑁆𑀕𑀸𑀤𑀺𑀲𑀗𑁆𑀕𑀳𑀺𑀢𑀸𑀦𑀁 𑀕𑀸𑀣𑀸𑀦𑀁 𑀦𑀺𑀤𑁆𑀤𑁂𑀲𑀫𑀢𑁆𑀢𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀓𑀢𑀁. 𑀅𑀢𑁆𑀣𑀯𑀺𑀪𑀚𑀦𑀢𑁆𑀣𑀁 𑀆𑀦𑀻𑀢𑀸𑀧𑀺 𑀳𑀺 𑀢𑀸 𑀅𑀝𑁆𑀞𑀓𑀯𑀕𑁆𑀕𑀸𑀤𑀺𑀲𑀗𑁆𑀕𑀳𑀺𑀢𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸 𑀫𑀽𑀮𑀕𑀸𑀣𑀸𑀬𑁄 𑀲𑀼𑀢𑁆𑀢𑀦𑀺𑀧𑀸𑀢𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀅𑀜𑁆𑀜𑀸𑀬𑁂𑀯𑀸𑀢𑀺 𑀦 𑀦𑀺𑀤𑁆𑀤𑁂𑀲𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺 𑀉𑀪𑀢𑁄𑀯𑀺𑀪𑀗𑁆𑀕𑀸𑀤𑀻𑀲𑀼 𑀆𑀕𑀢𑀸𑀧𑀺 𑀢𑀁 𑀯𑁄𑀳𑀸𑀭𑀫𑀮𑀪𑀫𑀸𑀦𑀸 𑀚𑀸𑀢𑀓𑀸𑀤𑀺𑀧𑀭𑀺𑀬𑀸𑀧𑀦𑁆𑀦𑀸 𑀕𑀸𑀣𑀸𑀬𑁄 𑀯𑀺𑀬, 𑀢𑀲𑁆𑀫𑀸 𑀓𑀸𑀭𑀡𑀦𑁆𑀢𑀭𑀫𑁂𑀢𑁆𑀣 𑀕𑀯𑁂𑀲𑀺𑀢𑀩𑁆𑀩𑀁, 𑀬𑀼𑀢𑁆𑀢𑀢𑀭𑀁 𑀯𑀸 𑀕𑀳𑁂𑀢𑀩𑁆𑀩𑀁.

𑀦𑀸𑀮𑀓𑀲𑀼𑀢𑁆𑀢𑀁 𑀦𑀸𑀫 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀺𑀢 𑀤𑀺𑀯𑀲𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀦𑀸𑀮𑀓𑀢𑁆𑀣𑁂𑀭𑀲𑁆𑀲 ‘‘𑀫𑁄𑀦𑁂𑀬𑁆𑀬𑀁 𑀢𑁂 𑀉𑀧𑀜𑁆𑀜𑀺𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸 (𑀲𑀼. 𑀦𑀺. 𑁭𑁦𑁬) 𑀪𑀕𑀯𑀢𑀸 𑀪𑀸𑀲𑀺𑀢𑀁 𑀫𑁄𑀦𑁂𑀬𑁆𑀬 𑀧𑀝𑀺𑀧𑀤𑀸𑀧𑀭𑀺𑀤𑀻𑀧𑀓𑀁 𑀲𑀼𑀢𑁆𑀢𑀁. 𑀢𑀼𑀯𑀝𑁆𑀝𑀓𑀲𑀼𑀢𑁆𑀢𑀁 𑀦𑀸𑀫 𑀫𑀳𑀸𑀲𑀫𑀬𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀤𑁂𑀯𑁂𑀲𑀼 ‘‘𑀓𑀸 𑀦𑀼 𑀔𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀧𑀝𑀺𑀧𑀢𑁆𑀢𑀻’’𑀢𑀺 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀸𑀦𑀁 𑀏𑀓𑀘𑁆𑀘𑀸𑀦𑀁 𑀤𑁂𑀯𑀢𑀸𑀦𑀁 𑀢𑀫𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑁂𑀦 𑀅𑀢𑁆𑀢𑀸𑀦𑀁 𑀧𑀼𑀘𑁆𑀙𑀸𑀧𑁂𑀢𑁆𑀯𑀸 ‘‘𑀫𑀽𑀮𑀁 𑀧𑀧𑀜𑁆𑀘𑀲𑀗𑁆𑀔𑀸𑀬𑀸’’𑀢𑀺𑀆𑀤𑀺𑀦𑀸 (𑀲𑀼. 𑀦𑀺. 𑁯𑁨𑁨) 𑀪𑀕𑀯𑀢𑀸 𑀪𑀸𑀲𑀺𑀢𑀁 𑀲𑀼𑀢𑁆𑀢𑀁. 𑀏𑀯𑀫𑀺𑀥 𑀲𑀼𑀢𑁆𑀢𑀦𑀺𑀧𑀸𑀢𑁂 𑀆𑀕𑀢𑀸𑀦𑀁 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀦𑀁 𑀲𑀼𑀢𑁆𑀢𑀗𑁆𑀕𑀲𑀗𑁆𑀕𑀳𑁄 𑀤𑀲𑁆𑀲𑀺𑀢𑁄, 𑀢𑀢𑁆𑀣𑁂𑀯 𑀆𑀕𑀢𑀸𑀦𑀁 𑀅𑀲𑀼𑀢𑁆𑀢𑀦𑀸𑀫𑀺𑀓𑀸𑀦𑀁 𑀲𑀼𑀤𑁆𑀥𑀺𑀓𑀕𑀸𑀣𑀸𑀦𑀁 𑀕𑀸𑀣𑀗𑁆𑀕𑀲𑀗𑁆𑀕𑀳𑀜𑁆𑀘 𑀤𑀲𑁆𑀲𑀬𑀺𑀲𑁆𑀲𑀢𑀺, 𑀏𑀯𑀁 𑀲𑀢𑀺 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀭𑀫𑁆𑀪𑁂 𑁋

‘‘𑀕𑀸𑀣𑀸𑀲𑀢𑀲𑀫𑀸𑀓𑀺𑀡𑁆𑀡𑁄, 𑀕𑁂𑀬𑁆𑀬𑀩𑁆𑀬𑀸𑀓𑀭𑀡𑀗𑁆𑀓𑀺𑀢𑁄;

𑀓𑀲𑁆𑀫𑀸 𑀲𑀼𑀢𑁆𑀢𑀦𑀺𑀧𑀸𑀢𑁄𑀢𑀺, 𑀲𑀗𑁆𑀔𑀫𑁂𑀲 𑀕𑀢𑁄𑀢𑀺 𑀘𑁂’’𑀢𑀺. (𑀲𑀼. 𑀦𑀺. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸); 𑁋

𑀲𑀓𑀮𑀲𑁆𑀲𑀸𑀧𑀺 ¶ 𑀲𑀼𑀢𑁆𑀢𑀦𑀺𑀧𑀸𑀢𑀲𑁆𑀲 𑀕𑁂𑀬𑁆𑀬𑀯𑁂𑀬𑁆𑀬𑀸𑀓𑀭𑀡𑀗𑁆𑀕𑀲𑀗𑁆𑀕𑀳𑁄 𑀓𑀲𑁆𑀫𑀸 𑀘𑁄𑀤𑀺𑀢𑁄𑀢𑀺? 𑀦𑀸𑀬𑀁 𑀯𑀺𑀭𑁄𑀥𑁄. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 𑀘𑁄𑀤𑀓𑁂𑀦 𑀲𑀕𑀸𑀣𑀓𑀢𑁆𑀢𑀁, 𑀓𑀢𑁆𑀣𑀘𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀢𑁆𑀢𑀜𑁆𑀘 𑀕𑀳𑁂𑀢𑁆𑀯𑀸 𑀘𑁄𑀤𑀦𑀸𑀫𑀢𑁆𑀢𑀁 𑀓𑀢𑀁, 𑀅𑀜𑁆𑀜𑀣𑀸 𑀲𑀼𑀢𑁆𑀢𑀦𑀺𑀧𑀸𑀢𑁂 𑀦𑀺𑀕𑁆𑀕𑀸𑀣𑀓𑀲𑁆𑀲 𑀲𑀼𑀢𑁆𑀢𑀲𑁆𑀲𑁂𑀯 𑀅𑀪𑀸𑀯𑀢𑁄 𑀯𑁂𑀬𑁆𑀬𑀸𑀓𑀭𑀡𑀗𑁆𑀕𑀲𑀗𑁆𑀕𑀳𑁄 𑀦 𑀘𑁄𑀤𑁂𑀢𑀩𑁆𑀩𑁄 𑀲𑀺𑀬𑀸, 𑀢𑀲𑁆𑀫𑀸 𑀘𑁄𑀤𑀓𑀲𑁆𑀲 𑀯𑀘𑀦𑀫𑁂𑀢𑀁 𑀅𑀧𑁆𑀧𑀫𑀸𑀡𑀦𑁆𑀢𑀺 𑀇𑀥, 𑀅𑀜𑁆𑀜𑀸𑀲𑀼 𑀘 𑀯𑀺𑀦𑀬𑀝𑁆𑀞𑀓𑀣𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀲𑁆𑀲 ¶ 𑀲𑀼𑀢𑁆𑀢𑀗𑁆𑀕𑀕𑀸𑀣𑀗𑁆𑀕𑀲𑀗𑁆𑀕𑀳𑁄 𑀤𑀲𑁆𑀲𑀺𑀢𑁄𑀢𑀺. 𑀲𑀼𑀢𑁆𑀢𑀦𑁆𑀢𑀺 𑀘𑀼𑀡𑁆𑀡𑀺𑀬𑀲𑀼𑀢𑁆𑀢𑀁. 𑀯𑀺𑀲𑁂𑀲𑁂𑀦𑀸𑀢𑀺 𑀭𑀸𑀲𑀺𑀪𑀸𑀯𑁂𑀦 𑀞𑀺𑀢𑀁 𑀲𑀦𑁆𑀥𑀸𑀬𑀸𑀳. 𑀲𑀕𑀸𑀣𑀸𑀯𑀕𑁆𑀕𑁄 𑀕𑁂𑀬𑁆𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

‘‘𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀅𑀲𑀗𑁆𑀕𑀳𑀺𑀢𑀁 𑀦𑀸𑀫 𑀧𑀝𑀺𑀲𑀫𑁆𑀪𑀺𑀤𑀸𑀤𑀻’’𑀢𑀺 𑀢𑀻𑀲𑀼𑀧𑀺 𑀓𑀺𑀭 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. 𑀅𑀧𑀭𑁂 𑀧𑀦 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀲𑁆𑀲 𑀕𑁂𑀬𑁆𑀬𑀯𑁂𑀬𑁆𑀬𑀸𑀓𑀭𑀡𑀗𑁆𑀕𑀤𑁆𑀯𑀬𑀲𑀗𑁆𑀕𑀳𑀁 𑀯𑀤𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀢𑀤𑀝𑁆𑀞𑀓𑀣𑀸𑀬𑀁 ‘‘𑀦𑀯𑀲𑀼 𑀲𑀢𑁆𑀣𑀼𑀲𑀸𑀲𑀦𑀗𑁆𑀕𑁂𑀲𑀼 𑀬𑀣𑀸𑀲𑀫𑁆𑀪𑀯𑀁 𑀕𑁂𑀬𑁆𑀬𑀯𑁂𑀬𑁆𑀬𑀸𑀓𑀭𑀡𑀗𑁆𑀕𑀤𑁆𑀯𑀬𑀲𑀗𑁆𑀕𑀳𑀺𑀢’’𑀦𑁆𑀢𑀺 (𑀧𑀝𑀺. 𑀫. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸), 𑀏𑀢𑁆𑀣𑀸𑀧𑀺 𑀕𑁂𑀬𑁆𑀬𑀗𑁆𑀕𑀲𑀗𑁆𑀕𑀳𑀺𑀢𑀪𑀸𑀯𑁄 𑀯𑀼𑀢𑁆𑀢𑀦𑀬𑁂𑀦 𑀯𑀻𑀫𑀁𑀲𑀺𑀢𑀩𑁆𑀩𑁄. 𑀦𑁄 𑀲𑀼𑀢𑁆𑀢𑀦𑀸𑀫𑀺𑀓𑀸𑀢𑀺 𑀅𑀲𑀼𑀢𑁆𑀢𑀦𑀸𑀫𑀺𑀓𑀸 𑀲𑀗𑁆𑀕𑀻𑀢𑀺𑀓𑀸𑀮𑁂 𑀲𑀼𑀢𑁆𑀢𑀲𑀫𑀜𑁆𑀜𑀸𑀬 𑀅𑀧𑀜𑁆𑀜𑀸𑀢𑀸. ‘‘𑀲𑀼𑀤𑁆𑀥𑀺𑀓𑀕𑀸𑀣𑀸 𑀦𑀸𑀫 𑀯𑀢𑁆𑀣𑀼𑀕𑀸𑀣𑀸’’𑀢𑀺 𑀢𑀻𑀲𑀼𑀧𑀺 𑀓𑀺𑀭 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁, 𑀯𑀢𑁆𑀣𑀼𑀕𑀸𑀣𑀸𑀢𑀺 𑀘 𑀧𑀸𑀭𑀸𑀬𑀦𑀯𑀕𑁆𑀕𑀲𑁆𑀲 𑀦𑀺𑀤𑀸𑀦𑀫𑀸𑀭𑁄𑀧𑁂𑀦𑁆𑀢𑁂𑀦 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀲𑀗𑁆𑀕𑀻𑀢𑀺𑀓𑀸𑀮𑁂 𑀯𑀼𑀢𑁆𑀢𑀸 𑀙𑀧𑁆𑀧𑀜𑁆𑀜𑀸𑀲 𑀕𑀸𑀣𑀸𑀬𑁄, 𑀦𑀸𑀮𑀓𑀲𑀼𑀢𑁆𑀢𑀲𑁆𑀲 𑀦𑀺𑀤𑀸𑀦𑀫𑀸𑀭𑁄𑀧𑁂𑀦𑁆𑀢𑁂𑀦 𑀢𑁂𑀦𑁂𑀯 𑀢𑀤𑀸 𑀯𑀼𑀢𑁆𑀢𑀸 𑀯𑀻𑀲𑀢𑀺𑀫𑀢𑁆𑀢𑀸 𑀕𑀸𑀣𑀸𑀬𑁄 𑀘 𑀯𑀼𑀘𑁆𑀘𑀦𑁆𑀢𑀺. 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀬𑀁 (𑀲𑀼. 𑀦𑀺. 𑀅𑀝𑁆𑀞. 𑁨.𑁬𑁮𑁫) 𑀧𑀦 ‘‘𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀲𑀗𑁆𑀕𑀻𑀢𑀺𑀁 𑀓𑀭𑁄𑀦𑁆𑀢𑁂𑀦𑀸𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 𑀢𑀫𑁂𑀯 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀁 𑀧𑀼𑀝𑁆𑀞𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀬𑁂𑀦, 𑀬𑀤𑀸 𑀘 𑀲𑀫𑀸𑀤𑀧𑀺𑀢𑁄 𑀦𑀸𑀮𑀓𑀢𑁆𑀣𑁂𑀭𑁄 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺, 𑀢𑀁 𑀲𑀩𑁆𑀩𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀓𑀸𑀫𑁄 ‘𑀆𑀦𑀦𑁆𑀤𑀚𑀸𑀢𑁂’𑀢𑀺𑀆𑀤𑀺𑀓𑀸 (𑀲𑀼. 𑀦𑀺. 𑁬𑁮𑁪) 𑀯𑀻𑀲𑀢𑀺 𑀯𑀢𑁆𑀣𑀼𑀕𑀸𑀣𑀸𑀬𑁄 𑀯𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀢𑀁 𑀲𑀩𑁆𑀩𑀫𑁆𑀧𑀺 ‘𑀦𑀸𑀮𑀓𑀲𑀼𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀆𑀕𑀢𑀢𑁆𑀢𑀸 𑀦𑀸𑀮𑀓𑀲𑀼𑀢𑁆𑀢𑀲𑁆𑀲 𑀯𑀢𑁆𑀣𑀼𑀕𑀸𑀣𑀸𑀬𑁄 𑀦𑀸𑀮𑀓𑀲𑀼𑀢𑁆𑀢𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸𑀢𑀺 𑀧𑀸𑀭𑀸𑀬𑀦𑀯𑀕𑁆𑀕𑀲𑁆𑀲 𑀯𑀢𑁆𑀣𑀼𑀕𑀸𑀣𑀸𑀬𑁄 𑀇𑀥 𑀲𑀼𑀤𑁆𑀥𑀺𑀓𑀕𑀸𑀣𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀢𑀢𑁆𑀣𑁂𑀯 𑀘 𑀧𑀸𑀭𑀸𑀬𑀦𑀯𑀕𑁆𑀕𑁂 𑀅𑀚𑀺𑀢𑀫𑀸𑀡𑀯𑀓𑀸𑀤𑀻𑀦𑀁 𑀲𑁄𑀴𑀲𑀦𑁆𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀼𑀘𑁆𑀙𑀸𑀕𑀸𑀣𑀸, 𑀪𑀕𑀯𑀢𑁄 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸 𑀘 𑀧𑀸𑀴𑀺𑀬𑀁 𑀲𑀼𑀢𑁆𑀢𑀦𑀸𑀫𑁂𑀦 𑀅𑀯𑀢𑁆𑀯𑀸 ‘𑀅𑀚𑀺𑀢𑀫𑀸𑀡𑀯𑀓𑀧𑀼𑀘𑁆𑀙𑀸, 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀫𑀸𑀡𑀯𑀓𑀧𑀼𑀘𑁆𑀙𑀸’’𑀢𑀺𑀆𑀤𑀺𑀦𑀸 (𑀲𑀼. 𑀦𑀺. 𑁧𑁦𑁩𑁮) 𑀆𑀕𑀢𑀢𑁆𑀢𑀸, 𑀘𑀼𑀡𑁆𑀡𑀺𑀬𑀕𑀦𑁆𑀣𑁂 𑀳𑀺 𑀅𑀲𑀫𑁆𑀫𑀺𑀲𑁆𑀲𑀢𑁆𑀢𑀸 𑀘 ‘‘𑀦𑁄 𑀲𑀼𑀢𑁆𑀢𑀦𑀸𑀫𑀺𑀓𑀸 𑀲𑀼𑀤𑁆𑀥𑀺𑀓𑀕𑀸𑀣𑀸 𑀦𑀸𑀫𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

‘‘𑀲𑁄𑀫𑀦𑀲𑁆𑀲𑀜𑀸𑀡𑀫𑀬𑀺𑀓𑀕𑀸𑀣𑀸𑀧𑀝𑀺𑀲𑀁𑀬𑀼𑀢𑁆𑀢𑀸’’𑀢𑀺 𑀏𑀢𑁂𑀦 𑀉𑀤𑀸𑀦𑀝𑁆𑀞𑁂𑀦 𑀉𑀤𑀸𑀦𑀦𑁆𑀢𑀺 𑀅𑀦𑁆𑀯𑀢𑁆𑀣𑀲𑀜𑁆𑀜𑀢𑀁 𑀤𑀲𑁆𑀲𑁂𑀢𑀺 (𑀉𑀤𑀸. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀓𑀺𑀫𑀺𑀤𑀁 𑀉𑀤𑀸𑀦𑀁 𑀦𑀸𑀫? 𑀧𑀻𑀢𑀺𑀯𑁂𑀕𑀲𑀫𑀼𑀝𑁆𑀞𑀸𑀧𑀺𑀢𑁄 𑀉𑀤𑀸𑀳𑀸𑀭𑁄. 𑀬𑀣𑀸 𑀳𑀺 𑀬𑀁 𑀢𑁂𑀮𑀸𑀤𑀺 𑀫𑀺𑀦𑀺𑀢𑀩𑁆𑀩𑀯𑀢𑁆𑀣𑀼 𑀫𑀸𑀦𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀯𑀺𑀲𑁆𑀲𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀁 ‘‘𑀅𑀯𑀲𑁂𑀲𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀜𑁆𑀘 ¶ 𑀚𑀮𑀁 𑀢𑀴𑀸𑀓𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀁 ‘‘𑀫𑀳𑁄𑀖𑁄’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑁂𑀯 𑀬𑀁 𑀧𑀻𑀢𑀺𑀯𑁂𑀕𑀲𑀫𑀼𑀝𑁆𑀞𑀸𑀧𑀺𑀢𑀁 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀁 𑀅𑀦𑁆𑀢𑁄𑀳𑀤𑀬𑀁 𑀲𑀦𑁆𑀥𑀸𑀭𑁂𑀢𑀼𑀁 ¶ 𑀦 𑀲𑀓𑁆𑀓𑁄𑀢𑀺, 𑀲𑁄 𑀅𑀥𑀺𑀓𑁄 𑀳𑀼𑀢𑁆𑀯𑀸 𑀅𑀦𑁆𑀢𑁄 𑀅𑀲𑀡𑁆𑀞𑀳𑀺𑀢𑁆𑀯𑀸 𑀩𑀳𑀺 𑀯𑀘𑀻𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀦𑁆𑀢𑁄 𑀧𑀝𑀺𑀕𑁆𑀕𑀸𑀳𑀓𑀦𑀺𑀭𑀧𑁂𑀓𑁆𑀔𑁄 𑀉𑀤𑀸𑀳𑀸𑀭𑀯𑀺𑀲𑁂𑀲𑁄 ‘‘𑀉𑀤𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺 (𑀉𑀤𑀸. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸) ‘‘𑀉𑀤 𑀫𑁄𑀤𑁂 𑀓𑀻𑀴𑀸𑀬𑀜𑁆𑀘𑀸’’𑀢𑀺 𑀳𑀺 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀯𑀤𑀦𑁆𑀢𑀺, 𑀇𑀤𑀜𑁆𑀘 𑀬𑁂𑀪𑀼𑀬𑁆𑀬𑁂𑀦 𑀯𑀼𑀢𑁆𑀢𑀁 𑀥𑀫𑁆𑀫𑀲𑀁𑀯𑁂𑀕𑀯𑀲𑁂𑀦 𑀉𑀤𑀺𑀢𑀲𑁆𑀲𑀸𑀧𑀺 ‘‘𑀲𑀘𑁂 𑀪𑀸𑀬𑀣 𑀤𑀼𑀓𑁆𑀔𑀲𑁆𑀲𑀸’’𑀢𑀺𑀆𑀤𑀺𑀉𑀤𑀸𑀦𑀲𑁆𑀲 (𑀉𑀤𑀸. 𑁪𑁪) 𑀉𑀤𑀸𑀦𑀧𑀸𑀴𑀺𑀬𑀁 𑀆𑀕𑀢𑀢𑁆𑀢𑀸, 𑀢𑀣𑀸‘‘𑀕𑀸𑀣𑀸𑀧𑀝𑀺𑀲𑀁𑀬𑀼𑀢𑁆𑀢𑀸’’𑀢𑀺 𑀇𑀤𑀫𑁆𑀧𑀺 𑀬𑁂𑀪𑀼𑀬𑁆𑀬𑁂𑀦𑁂𑀯 ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂, 𑀢𑀤𑀸𑀬𑀢𑀦𑀁, 𑀬𑀢𑁆𑀣 𑀦𑁂𑀯 𑀧𑀣𑀯𑀻, 𑀦 𑀆𑀧𑁄’’𑀢𑀺𑀆𑀤𑀺𑀓𑀲𑁆𑀲 (𑀉𑀤𑀸. 𑁭𑁧) 𑀘𑀼𑀡𑁆𑀡𑀺𑀬𑀯𑀸𑀓𑁆𑀬𑀯𑀲𑁂𑀦 𑀉𑀤𑀺𑀢𑀲𑁆𑀲𑀸𑀧𑀺 𑀢𑀢𑁆𑀣 𑀆𑀕𑀢𑀢𑁆𑀢𑀸. 𑀦𑀦𑀼 𑀘 𑀉𑀤𑀸𑀦𑀁 𑀦𑀸𑀫 𑀧𑀻𑀢𑀺𑀲𑁄𑀫𑀦𑀲𑁆𑀲𑀲𑀫𑀼𑀝𑁆𑀝𑀸𑀧𑀺𑀢𑁄, 𑀥𑀫𑁆𑀫𑀲𑀁𑀯𑁂𑀕𑀲𑀫𑀼𑀝𑁆𑀞𑀸𑀧𑀺𑀢𑁄 𑀯𑀸 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀦𑀺𑀭𑀧𑁂𑀓𑁆𑀔𑁄 𑀕𑀸𑀣𑀸𑀩𑀦𑁆𑀥𑀯𑀲𑁂𑀦, 𑀘𑀼𑀡𑁆𑀡𑀺𑀬𑀯𑀸𑀓𑁆𑀬𑀯𑀲𑁂𑀦 𑀘 𑀧𑀯𑀢𑁆𑀢𑁄 𑀉𑀤𑀸𑀳𑀸𑀭𑁄, 𑀢𑀣𑀸 𑀘𑁂𑀯 𑀲𑀩𑁆𑀩𑀢𑁆𑀣 𑀆𑀕𑀢𑀁, 𑀇𑀥 𑀓𑀲𑁆𑀫𑀸 ‘‘𑀪𑀺𑀓𑁆𑀔𑀯𑁂’’𑀢𑀺 𑀆𑀫𑀦𑁆𑀢𑀦𑀁 𑀯𑀼𑀢𑁆𑀢𑀦𑁆𑀢𑀺? 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀜𑁆𑀜𑀸𑀧𑀦𑀢𑁆𑀣𑀁 𑀏𑀯, 𑀦 𑀧𑀝𑀺𑀕𑁆𑀕𑀸𑀳𑀓𑀓𑀭𑀡𑀢𑁆𑀣𑀁. 𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀜𑁆𑀳𑀺 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀕𑀼𑀡𑀸𑀦𑀼𑀲𑁆𑀲𑀭𑀡𑁂𑀦 𑀉𑀧𑁆𑀧𑀦𑁆𑀦𑀧𑀻𑀢𑀺𑀲𑁄𑀫𑀦𑀲𑁆𑀲𑁂𑀦 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 ‘‘𑀅𑀬𑀁 𑀦𑀺𑀩𑁆𑀩𑀸𑀦𑀥𑀫𑁆𑀫𑁄 𑀓𑀣𑀫𑀧𑀘𑁆𑀘𑀬𑁄 𑀉𑀧𑀮𑀩𑁆𑀪𑀢𑀻’’𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀢𑁂𑀲𑀁 𑀢𑀫𑀢𑁆𑀣𑀁 𑀜𑀸𑀧𑁂𑀢𑀼𑀓𑀸𑀫𑁂𑀦 ‘‘𑀢𑀤𑀸𑀬𑀢𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀏𑀓𑀦𑁆𑀢𑀢𑁄 𑀢𑁂 𑀧𑀝𑀺𑀕𑁆𑀕𑀸𑀳𑀓𑁂 𑀓𑀢𑁆𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀢𑀬𑀺𑀤𑀁 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀪𑀸𑀲𑀺𑀢𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀪𑀸𑀲𑀺𑀢𑀁 𑀲𑀸𑀯𑀓𑀪𑀸𑀲𑀺𑀢𑀦𑁆𑀢𑀺 𑀢𑀺𑀩𑁆𑀩𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀧𑀘𑁆𑀘𑁂𑀓𑀩𑀼𑀤𑁆𑀥𑀪𑀸𑀲𑀺𑀢𑀁 𑁋

‘‘𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀦𑀺𑀥𑀸𑀬 𑀤𑀡𑁆𑀟𑀁,

𑀅𑀯𑀺𑀳𑁂𑀞𑀬𑀁 𑀅𑀜𑁆𑀜𑀢𑀭𑀫𑁆𑀧𑀺 𑀢𑁂𑀲’’𑀦𑁆𑀢𑀺. 𑀆𑀤𑀺𑀦𑀸 (𑀲𑀼. 𑀦𑀺. 𑁩𑁫) 𑁋

𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑁂 𑀆𑀕𑀢𑀁. 𑀲𑀸𑀯𑀓𑀪𑀸𑀲𑀺𑀢𑀫𑁆𑀧𑀺 𑁋

‘‘𑀲𑀩𑁆𑀩𑁄 ¶ 𑀭𑀸𑀕𑁄 𑀧𑀳𑀻𑀦𑁄 𑀫𑁂,

𑀲𑀩𑁆𑀩𑁄 𑀤𑁄𑀲𑁄 𑀲𑀫𑀽𑀳𑀢𑁄;

𑀲𑀩𑁆𑀩𑁄 𑀫𑁂 𑀯𑀺𑀳𑀢𑁄 𑀫𑁄𑀳𑁄,

𑀲𑀻𑀢𑀺𑀪𑀽𑀢𑁄𑀲𑁆𑀫𑀺 𑀦𑀺𑀩𑁆𑀩𑀼𑀢𑁄’’𑀢𑀺. 𑀆𑀤𑀺𑀦𑀸 (𑀣𑁂𑀭𑀕𑀸. 𑁭𑁯) 𑁋

𑀣𑁂𑀭𑀕𑀸𑀣𑀸𑀲𑀼 ¶ ,

‘‘𑀓𑀸𑀬𑁂𑀦 𑀲𑀁𑀯𑀼𑀢𑀸 𑀆𑀲𑀺𑀁, 𑀯𑀸𑀘𑀸𑀬 𑀉𑀤 𑀘𑁂𑀢𑀲𑀸;

𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀩𑀼𑀬𑁆𑀳, 𑀲𑀻𑀢𑀺𑀪𑀽𑀢𑀸𑀫𑁆𑀳𑀺 𑀦𑀺𑀩𑁆𑀩𑀼𑀢𑀸’’𑀢𑀺. (𑀣𑁂𑀭𑀻𑀕𑀸. 𑁧𑁫); 𑁋

𑀣𑁂𑀭𑀻𑀕𑀸𑀣𑀸𑀲𑀼 𑀘 𑀆𑀕𑀢𑀁. 𑀅𑀜𑁆𑀜𑀸𑀦𑀺𑀧𑀺 𑀲𑀓𑁆𑀓𑀸𑀤𑀻𑀳𑀺 𑀤𑁂𑀯𑁂𑀳𑀺 𑀪𑀸𑀲𑀺𑀢𑀸𑀦𑀺 ‘‘𑀅𑀳𑁄 𑀤𑀸𑀦𑀁 𑀧𑀭𑀫𑀤𑀸𑀦𑀁, 𑀓𑀲𑁆𑀲𑀧𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢’’𑀦𑁆𑀢𑀺𑀆𑀤𑀻𑀦𑀺 (𑀉𑀤𑀸. 𑁨𑁭). 𑀲𑁄𑀡𑀤𑀡𑁆𑀟𑀩𑁆𑀭𑀸𑀳𑁆𑀫𑀡𑀸𑀤𑀻𑀳𑀺 𑀫𑀦𑀼𑀲𑁆𑀲𑁂𑀳𑀺 𑀘 𑀪𑀸𑀲𑀺𑀢𑀸𑀦𑀺 ‘‘𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄’’𑀢𑀺𑀆𑀤𑀻𑀦𑀺 (𑀤𑀻. 𑀦𑀺. 𑁨.𑁩𑁭𑁧; 𑀫. 𑀦𑀺. 𑁧.𑁨𑁯𑁦; 𑁨.𑁨𑁯𑁦, 𑁩𑁫𑁭; 𑀲𑀁. 𑀦𑀺. 𑁧𑁧𑁮𑁭; 𑁨.𑁩𑁮; 𑀅. 𑀦𑀺. 𑁫.𑁧𑁯𑁪) 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑀸𑀦𑀺 𑀉𑀤𑀸𑀦𑀸𑀦𑀺 𑀲𑀦𑁆𑀢𑀺 𑀏𑀯, 𑀢𑀸𑀦𑀺 𑀲𑀩𑁆𑀩𑀸𑀦𑀺𑀧𑀺 𑀇𑀥 𑀦 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀬𑀁 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀸𑀫𑀁 𑀆𑀳𑀘𑁆𑀘𑀪𑀸𑀲𑀺𑀢𑀁 𑀚𑀺𑀦𑀯𑀘𑀦𑀪𑀽𑀢𑀁, 𑀢𑀤𑁂𑀯 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 ‘‘𑀉𑀤𑀸𑀦’’𑀦𑁆𑀢𑀺 𑀲𑀗𑁆𑀕𑀻𑀢𑀁, 𑀢𑀤𑁂𑀯 𑀘 𑀲𑀦𑁆𑀥𑀸𑀬 𑀪𑀕𑀯𑀢𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀁 𑀦𑀯𑀥𑀸 𑀯𑀺𑀪𑀚𑀺𑀢𑁆𑀯𑀸 𑀉𑀤𑁆𑀤𑀺𑀲𑀦𑁆𑀢𑁂𑀦 ‘‘𑀉𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀸 𑀧𑀦 ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭’’𑀦𑁆𑀢𑀺𑀆𑀤𑀺𑀓𑀸 (𑀥. 𑀧. 𑁧𑁫𑁩) 𑀕𑀸𑀣𑀸 𑀪𑀕𑀯𑀢𑀸 𑀩𑁄𑀥𑀺𑀫𑀽𑀮𑁂 𑀉𑀤𑀸𑀦𑀯𑀲𑁂𑀦 𑀧𑀯𑀢𑁆𑀢𑀺𑀢𑀸, 𑀅𑀦𑁂𑀓𑀲𑀢𑀲𑀳𑀲𑁆𑀲𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀉𑀤𑀸𑀦𑀪𑀽𑀢𑀸 𑀘, 𑀢𑀸 𑀅𑀧𑀭𑀪𑀸𑀕𑁂 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀪𑀕𑀯𑀢𑀸 𑀤𑁂𑀲𑀺𑀢𑀢𑁆𑀢𑀸 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀉𑀤𑀸𑀦𑀧𑀸𑀴𑀺𑀬𑀁 𑀲𑀗𑁆𑀕𑀳𑀁 𑀅𑀦𑀸𑀭𑁄𑀧𑁂𑀢𑁆𑀯𑀸 𑀥𑀫𑁆𑀫𑀧𑀤𑁂 𑀲𑀗𑁆𑀕𑀳𑀺𑀢𑀸, 𑀬𑀜𑁆𑀘 ‘‘𑀅𑀜𑁆𑀜𑀸𑀲𑀺 𑀯𑀢 𑀪𑁄 𑀓𑁄𑀡𑁆𑀟𑀜𑁆𑀜𑁄 𑀅𑀜𑁆𑀜𑀸𑀲𑀺 𑀯𑀢 𑀪𑁄 𑀓𑁄𑀡𑁆𑀟𑀜𑁆𑀜𑁄’’𑀢𑀺 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁭; 𑀧𑀝𑀺. 𑀫. 𑁨.𑁩𑁦) 𑀉𑀤𑀸𑀦𑀯𑀘𑀦𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀯𑁂𑀤𑀦𑀲𑀫𑀢𑁆𑀣𑀦𑀺𑀕𑁆𑀖𑁄𑀲𑀯𑀺𑀧𑁆𑀨𑀸𑀭𑀁 𑀪𑀕𑀯𑀢𑀸 𑀪𑀸𑀲𑀺𑀢𑀁, 𑀢𑀤𑀧𑀺 𑀧𑀞𑀫𑀩𑁄𑀥𑀺𑀬𑀁 𑀲𑀩𑁆𑀩𑁂𑀲𑀁 𑀏𑀯 𑀪𑀺𑀓𑁆𑀔𑀽𑀦𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀧𑀘𑁆𑀘𑀯𑁂𑀓𑁆𑀔𑀡𑀳𑁂𑀢𑀼𑀓𑀁 ‘‘𑀆𑀭𑀸𑀥𑀬𑀺𑀁𑀲𑀼 𑀯𑀢 𑀫𑀁 𑀪𑀺𑀓𑁆𑀔𑀽 𑀏𑀓𑀁 𑀲𑀫𑀬’’𑀦𑁆𑀢𑀺𑀆𑀤𑀺𑀯𑀘𑀦𑀁 (𑀫. 𑀦𑀺. 𑁧.𑁨𑁨𑁫) 𑀯𑀺𑀬 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀅𑀢𑁆𑀢𑀦𑀸𑀧𑀺 𑀅𑀥𑀺𑀕𑀢𑀥𑀫𑁆𑀫𑁂𑀓𑀤𑁂𑀲𑀲𑁆𑀲 𑀬𑀣𑀸𑀤𑁂𑀲𑀺𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀲𑀩𑁆𑀩𑀧𑀞𑀫𑀁 𑀲𑀸𑀯𑀓𑁂𑀲𑀼 𑀣𑁂𑀭𑁂𑀦 𑀅𑀥𑀺𑀕𑀢𑀢𑁆𑀢𑀸 𑀅𑀢𑁆𑀢𑀦𑁄 𑀧𑀭𑀺𑀲𑁆𑀲𑀫𑀲𑁆𑀲 𑀲𑀨𑀮𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑀳𑁂𑀢𑀼𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀦𑀺𑀢𑀁 ¶ 𑀉𑀤𑀸𑀳𑀸𑀭𑀫𑀢𑁆𑀢𑀁, 𑀦 𑀧𑀦 ‘‘𑀬𑀤𑀸 𑀳𑀯𑁂 𑀧𑀸𑀢𑀼𑀪𑀯𑀦𑁆𑀢𑀺 𑀥𑀫𑁆𑀫𑀸’’𑀢𑀺𑀆𑀤𑀺𑀯𑀘𑀦𑀁 𑀯𑀺𑀬 (𑀫𑀳𑀸𑀯. 𑁧; 𑀉𑀤𑀸. 𑁧) 𑀧𑀯𑀢𑁆𑀢𑀺𑀬𑀸, 𑀦𑀺𑀯𑀢𑁆𑀢𑀺𑀬𑀸 𑀯𑀸 𑀧𑀓𑀸𑀲𑀦𑀦𑁆𑀢𑀺 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀉𑀤𑀸𑀦𑀧𑀸𑀴𑀺𑀬𑀁 𑀦 𑀲𑀗𑁆𑀕𑀻𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀤𑀸𑀦𑀧𑀸𑀴𑀺𑀬𑀁 𑀧𑀦 𑀅𑀝𑁆𑀞𑀲𑀼 𑀯𑀕𑁆𑀕𑁂𑀲𑀼 𑀤𑀲 𑀤𑀲 𑀓𑀢𑁆𑀯𑀸 𑀅𑀲𑀻𑀢𑀺𑀬𑁂𑀯 𑀲𑀼𑀢𑁆𑀢𑀦𑁆𑀢𑀸 𑀲𑀗𑁆𑀕𑀻𑀢𑀸. 𑀢𑀣𑀸 𑀳𑀺 𑀢𑀤𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 𑁋

‘‘𑀅𑀲𑀻𑀢𑀺𑀬𑁂𑀯 𑀲𑀼𑀢𑁆𑀢𑀦𑁆𑀢𑀸, 𑀯𑀕𑁆𑀕𑀸 𑀅𑀝𑁆𑀞 𑀲𑀫𑀸𑀲𑀢𑁄’’𑀢𑀺. (𑀉𑀤𑀸. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸).

𑀇𑀥 ¶ 𑀧𑀦 ‘‘𑀤𑁆𑀯𑁂𑀅𑀲𑀻𑀢𑀺 𑀲𑀼𑀢𑁆𑀢𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀉𑀤𑀸𑀦𑀧𑀸𑀴𑀺𑀬𑀸 𑀦 𑀲𑀫𑁂𑀢𑀺, 𑀢𑀲𑁆𑀫𑀸 ‘‘𑀅𑀲𑀻𑀢𑀺 𑀲𑀼𑀢𑁆𑀢𑀦𑁆𑀢𑀸’’𑀢𑀺 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁. 𑀅𑀧𑀺𑀘 𑀦 𑀓𑁂𑀯𑀮𑀁 𑀇𑀥𑁂𑀯, 𑀅𑀣 𑀔𑁄 𑀅𑀜𑁆𑀜𑀸𑀲𑀼𑀧𑀺 (𑀯𑀺. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸) 𑀯𑀺𑀦𑀬𑀸𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀲𑀼 (𑀥. 𑀲𑀁. 𑀦𑀺𑀤𑀸𑀦𑀓𑀣𑀸) 𑀢𑀣𑀸𑀬𑁂𑀯 𑀯𑀼𑀢𑁆𑀢𑀢𑁆𑀢𑀸 ‘‘𑀅𑀧𑁆𑀧𑀓𑀁 𑀧𑀦 𑀊𑀦𑀫𑀥𑀺𑀓𑀁 𑀯𑀸 𑀕𑀡𑀦𑀽𑀧𑀕𑀁 𑀦 𑀳𑁄𑀢𑀻’’𑀢𑀺 𑀧𑀭𑀺𑀬𑀸𑀬𑁂𑀦 𑀅𑀦𑁂𑀓𑀁𑀲𑁂𑀦 𑀯𑀼𑀢𑁆𑀢𑀁 𑀲𑀺𑀬𑀸. 𑀬𑀣𑀸 𑀯𑀸 𑀢𑀣𑀸 𑀯𑀸 𑀅𑀦𑀼𑀫𑀸𑀦𑁂𑀦 𑀕𑀡𑀦𑀫𑁂𑀯 𑀳𑀺 𑀢𑀢𑁆𑀣 𑀢𑀢𑁆𑀣 𑀊𑀦𑀸𑀥𑀺𑀓𑀲𑀗𑁆𑀔𑁆𑀬𑀸, 𑀇𑀢𑀭𑀣𑀸 𑀢𑀸𑀬𑁂𑀯 𑀦 𑀲𑀺𑀬𑀼𑀦𑁆𑀢𑀺𑀧𑀺 𑀯𑀤𑀦𑁆𑀢𑀺, 𑀧𑀘𑁆𑀙𑀸 𑀧𑀫𑀸𑀤𑀮𑁂𑀔𑀯𑀘𑀦𑀁 𑀯𑀸 𑀏𑀢𑀁.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 ‘‘𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀁. 𑀏𑀓𑀥𑀫𑁆𑀫𑀁 𑀪𑀺𑀓𑁆𑀔𑀯𑁂, 𑀧𑀚𑀳𑀣, 𑀅𑀳𑀁 𑀯𑁄 𑀧𑀸𑀝𑀺𑀪𑁄𑀕𑁄 𑀅𑀦𑀸𑀕𑀸𑀫𑀺𑀢𑀸𑀬. 𑀓𑀢𑀫𑀁 𑀏𑀓𑀥𑀫𑁆𑀫𑀁? 𑀮𑁄𑀪𑀁 𑀪𑀺𑀓𑁆𑀔𑀯𑁂, 𑀏𑀓𑀥𑀫𑁆𑀫𑀁 𑀧𑀚𑀳𑀣, 𑀅𑀳𑀁 𑀯𑁄 𑀧𑀸𑀝𑀺𑀪𑁄𑀕𑁄 𑀅𑀦𑀸𑀕𑀸𑀫𑀺𑀢𑀸𑀬𑀸’’𑀢𑀺 (𑀇𑀢𑀺𑀯𑀼. 𑁧) 𑀏𑀯𑀫𑀸𑀤𑀺𑀦𑀸 𑀏𑀓𑀤𑀼𑀓𑀢𑀺𑀓𑀘𑀢𑀼𑀓𑁆𑀓𑀦𑀺𑀧𑀸𑀢𑀯𑀲𑁂𑀦 𑀯𑀼𑀢𑁆𑀢𑀁 𑀤𑁆𑀯𑀸𑀤𑀲𑀼𑀢𑁆𑀢𑀭𑀲𑀢𑀲𑀼𑀢𑁆𑀢𑀲𑀫𑀽𑀳𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀣𑀸 𑀳𑀺 𑀇𑀢𑀺𑀯𑀼𑀢𑁆𑀢𑀓𑀧𑀸𑀴𑀺𑀬𑀫𑁂𑀯 𑀉𑀤𑀸𑀦𑀕𑀸𑀣𑀸𑀳𑀺 𑀤𑁆𑀯𑀸𑀤𑀲𑀼𑀢𑁆𑀢𑀭𑀲𑀢𑀲𑀼𑀢𑁆𑀢𑀸𑀦𑀺 𑀕𑀡𑁂𑀢𑁆𑀯𑀸 𑀲𑀗𑁆𑀕𑀻𑀢𑀸𑀦𑀺, 𑀢𑀤𑀝𑁆𑀞𑀓𑀣𑀸𑀬𑀫𑁆𑀧𑀺 (𑀇𑀢𑀺𑀯𑀼. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀢𑀣𑀸𑀬𑁂𑀯 𑀯𑀼𑀢𑁆𑀢𑀁. 𑀢𑀲𑁆𑀫𑀸 ‘‘𑀤𑁆𑀯𑀸𑀤𑀲𑀼𑀢𑁆𑀢𑀭𑀲𑀢𑀲𑀼𑀢𑁆𑀢𑀦𑁆𑀢𑀸’’ 𑀇𑀘𑁆𑀘𑁂𑀯 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁, 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀯𑀸 𑀅𑀦𑁂𑀓𑀁𑀲𑀢𑁄 𑀯𑀼𑀢𑁆𑀢𑀦𑁆𑀢𑀺𑀧𑀺 𑀯𑀢𑁆𑀢𑀼𑀁 𑀲𑀓𑁆𑀓𑀸, 𑀢𑀣𑀸𑀧𑀺 𑀈𑀤𑀺𑀲𑁂 𑀞𑀸𑀦𑁂 𑀧𑀫𑀸𑀡𑀁 𑀤𑀲𑁆𑀲𑁂𑀦𑁆𑀢𑁂𑀦 𑀬𑀸𑀣𑀸𑀯𑀢𑁄𑀯 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀦𑁆𑀢𑀺 ‘‘𑀤𑀲𑀼𑀢𑁆𑀢𑀭𑀲𑀢𑀲𑀼𑀢𑁆𑀢𑀦𑁆𑀢𑀸’’𑀢𑀺 𑀇𑀤𑀁 𑀧𑀘𑁆𑀙𑀸 𑀧𑀫𑀸𑀤𑀮𑁂𑀔𑀫𑁂𑀯𑀸𑀢𑀺 𑀕𑀳𑁂𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑀺. 𑀇𑀢𑀺 𑀏𑀯𑀁 𑀪𑀕𑀯𑀢𑀸 𑀯𑀼𑀢𑁆𑀢𑀁 𑀇𑀢𑀺𑀯𑀼𑀢𑁆𑀢𑀁. 𑀇𑀢𑀺𑀯𑀼𑀢𑁆𑀢𑀦𑁆𑀢𑀺 𑀲𑀗𑁆𑀕𑀻𑀢𑀁 𑀇𑀢𑀺𑀯𑀼𑀢𑁆𑀢𑀓𑀁. 𑀭𑀼𑀴𑁆𑀳𑀺𑀦𑀸𑀫𑀁 𑀯𑀸 𑀏𑀢𑀁 𑀬𑀣𑀸 ‘‘𑀬𑁂𑀯𑀸𑀧𑀦𑀓𑀁, 𑀦𑀢𑀼𑀫𑁆𑀳𑀸𑀓𑀯𑀕𑁆𑀕𑁄’’𑀢𑀺, 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸, 𑀯𑀼𑀢𑁆𑀢𑀫𑀭𑀳𑀢𑀸𑀢𑀺 𑀫𑁂 𑀲𑀼𑀢𑀦𑁆𑀢𑀺 𑀦𑀺𑀤𑀸𑀦𑀯𑀘𑀦𑁂𑀦 𑀲𑀗𑁆𑀕𑀻𑀢𑀁 𑀬𑀣𑀸𑀯𑀼𑀢𑁆𑀢𑀲𑀼𑀢𑁆𑀢𑀲𑀫𑀽𑀳𑀁.

𑀚𑀸𑀢𑀁 ¶ 𑀪𑀽𑀢𑀁 𑀧𑀼𑀭𑀸𑀯𑀼𑀢𑁆𑀣𑀁 𑀪𑀕𑀯𑀢𑁄 𑀧𑀼𑀩𑁆𑀩𑀘𑀭𑀺𑀢𑀁 𑀓𑀸𑀬𑀢𑀺 𑀓𑀣𑁂𑀢𑀺 𑀧𑀓𑀸𑀲𑁂𑀢𑀺 𑀏𑀢𑁂𑀦𑀸𑀢𑀺 𑀚𑀸𑀢𑀓𑀁, 𑀢𑀁 𑀧𑀦 𑀇𑀫𑀸𑀦𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀡𑁆𑀡𑀓𑀚𑀸𑀢𑀓𑀸𑀤𑀻𑀦𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀧𑀜𑁆𑀜𑀸𑀲𑀸𑀥𑀺𑀓𑀸𑀦𑀺 𑀧𑀜𑁆𑀘𑀚𑀸𑀢𑀓𑀲𑀢𑀸𑀦𑀻’’𑀢𑀺 𑀇𑀤𑀁 𑀅𑀧𑁆𑀧𑀓𑀁 𑀧𑀦 𑀊𑀦𑀫𑀥𑀺𑀓𑀁 𑀯𑀸 𑀕𑀡𑀦𑀽𑀧𑀕𑀁 𑀦 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀅𑀦𑁂𑀓𑀁𑀲𑁂𑀦, 𑀯𑁄𑀳𑀸𑀭𑀲𑀼𑀔𑀢𑀸𑀫𑀢𑁆𑀢𑁂𑀦 𑀘 𑀯𑀼𑀢𑁆𑀢𑀁. 𑀏𑀓𑀁𑀲𑀢𑁄 𑀳𑀺 𑀲𑀢𑁆𑀢𑀘𑀢𑁆𑀢𑀸𑀮𑀻𑀲𑀸𑀥𑀺𑀓𑀸𑀦𑀺𑀬𑁂𑀯 𑀬𑀣𑀸𑀯𑀼𑀢𑁆𑀢𑀕𑀡𑀦𑀢𑁄 𑀢𑀻𑀳𑀺 𑀊𑀦𑀢𑁆𑀢𑀸. 𑀢𑀣𑀸 𑀳𑀺 𑀏𑀓𑀦𑀺𑀧𑀸𑀢𑁂 𑀧𑀜𑁆𑀜𑀸𑀲𑀲𑀢𑀁, 𑀤𑀼𑀓𑀦𑀺𑀧𑀸𑀢𑁂 𑀲𑀢𑀁, 𑀢𑀺𑀓𑀦𑀺𑀧𑀸𑀢𑁂 𑀧𑀜𑁆𑀜𑀸𑀲, 𑀢𑀣𑀸 𑀘𑀢𑀼𑀓𑁆𑀓𑀦𑀺𑀧𑀸𑀢𑁂, 𑀧𑀜𑁆𑀘𑀓𑀦𑀺𑀧𑀸𑀢𑁂 𑀧𑀜𑁆𑀘𑀯𑀻𑀲, 𑀙𑀓𑁆𑀓𑀦𑀺𑀧𑀸𑀢𑁂 𑀯𑀻𑀲, 𑀲𑀢𑁆𑀢𑀦𑀺𑀧𑀸𑀢𑁂 𑀏𑀓𑀯𑀻𑀲, 𑀅𑀝𑁆𑀞𑀦𑀺𑀧𑀸𑀢𑁂 𑀤𑀲, 𑀦𑀯𑀦𑀺𑀧𑀸𑀢𑁂 𑀤𑁆𑀯𑀸𑀤𑀲, 𑀤𑀲𑀦𑀺𑀧𑀸𑀢𑁂 𑀲𑁄𑀴𑀲, 𑀏𑀓𑀸𑀤𑀲𑀦𑀺𑀧𑀸𑀢𑁂 𑀦𑀯, 𑀤𑁆𑀯𑀸𑀤𑀲𑀦𑀺𑀧𑀸𑀢𑁂 𑀤𑀲, 𑀢𑀣𑀸 𑀢𑁂𑀭𑀲𑀦𑀺𑀧𑀸𑀢𑁂, 𑀧𑀓𑀺𑀡𑁆𑀡𑀓𑀦𑀺𑀧𑀸𑀢𑁂 𑀢𑁂𑀭𑀲, 𑀯𑀻𑀲𑀢𑀺𑀦𑀺𑀧𑀸𑀢𑁂 𑀘𑀼𑀤𑁆𑀤𑀲, 𑀢𑀺𑀁𑀲𑀦𑀺𑀧𑀸𑀢𑁂 𑀤𑀲, 𑀘𑀢𑁆𑀢𑀸𑀮𑀻𑀲𑀦𑀺𑀧𑀸𑀢𑁂 𑀧𑀜𑁆𑀘, 𑀧𑀡𑁆𑀡𑀸𑀲𑀦𑀺𑀧𑀸𑀢𑁂 𑀢𑀻𑀡𑀺, 𑀲𑀝𑁆𑀞𑀺𑀦𑀺𑀧𑀸𑀢𑁂 ¶ 𑀤𑁆𑀯𑁂, 𑀢𑀣𑀸 𑀲𑀢𑁆𑀢𑀢𑀺𑀦𑀺𑀧𑀸𑀢𑁂, 𑀅𑀲𑀻𑀢𑀺𑀦𑀺𑀧𑀸𑀢𑁂 𑀧𑀜𑁆𑀘, 𑀫𑀳𑀸𑀦𑀺𑀧𑀸𑀢𑁂 𑀤𑀲𑀸𑀢𑀺 𑀲𑀢𑁆𑀢𑀘𑀢𑁆𑀢𑀸𑀮𑀻𑀲𑀸𑀥𑀺𑀓𑀸𑀦𑁂𑀯 𑀧𑀜𑁆𑀘 𑀚𑀸𑀢𑀓𑀲𑀢𑀸𑀦𑀺 𑀲𑀗𑁆𑀕𑀻𑀢𑀸𑀦𑀻𑀢𑀺.

𑀅𑀩𑁆𑀪𑀼𑀢𑁄 𑀥𑀫𑁆𑀫𑁄 𑀲𑀪𑀸𑀯𑁄 𑀯𑀼𑀢𑁆𑀢𑁄 𑀬𑀢𑁆𑀣𑀸𑀢𑀺 𑀅𑀩𑁆𑀪𑀼𑀢𑀥𑀫𑁆𑀫𑀁, 𑀢𑀁 𑀧𑀦𑀺𑀤𑀦𑁆𑀢𑀺 𑀆𑀳 ‘‘𑀘𑀢𑁆𑀢𑀸𑀭𑁄𑀫𑁂’’𑀢𑀺𑀆𑀤𑀺. 𑀆𑀤𑀺𑀲𑀤𑁆𑀤𑁂𑀦 𑀘𑁂𑀢𑁆𑀣 𑁋

‘‘𑀘𑀢𑁆𑀢𑀸𑀭𑁄𑀫𑁂 𑀪𑀺𑀓𑁆𑀔𑀯𑁂, 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸 𑀆𑀦𑀦𑁆𑀤𑁂. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀲𑀘𑁂 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀧𑀭𑀺𑀲𑀸 𑀆𑀦𑀦𑁆𑀤𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀢𑀺, 𑀤𑀲𑁆𑀲𑀦𑁂𑀦𑀧𑀺 𑀲𑀸 𑀅𑀢𑁆𑀢𑀫𑀦𑀸 𑀳𑁄𑀢𑀺. 𑀢𑀢𑁆𑀭 𑀘𑁂 𑀆𑀦𑀦𑁆𑀤𑁄, 𑀥𑀫𑁆𑀫𑀁 𑀪𑀸𑀲𑀢𑀺, 𑀪𑀸𑀲𑀺𑀢𑁂𑀦𑀧𑀺 𑀲𑀸 𑀅𑀢𑁆𑀢𑀫𑀦𑀸 𑀳𑁄𑀢𑀺, 𑀅𑀢𑀺𑀢𑁆𑀢𑀸𑀯 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼𑀧𑀭𑀺𑀲𑀸 𑀳𑁄𑀢𑀺, 𑀅𑀣 𑀆𑀦𑀦𑁆𑀤𑁄 𑀢𑀼𑀡𑁆𑀳𑀻 𑀪𑀯𑀢𑀺. 𑀲𑀘𑁂 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀻𑀧𑀭𑀺𑀲𑀸…𑀧𑁂… 𑀉𑀧𑀸𑀲𑀓𑀧𑀭𑀺𑀲𑀸…𑀧𑁂… 𑀉𑀧𑀸𑀲𑀺𑀓𑀸 𑁋 𑀧𑀭𑀺𑀲𑀸…𑀧𑁂… 𑀢𑀼𑀡𑁆𑀳𑀻 𑀪𑀯𑀢𑀺. 𑀇𑀫𑁂 𑀔𑁄 𑀪𑀺𑀓𑁆𑀔𑀯𑁂…𑀧𑁂… 𑀆𑀦𑀦𑁆𑀤𑁂’’𑀢𑀺 (𑀅. 𑀦𑀺. 𑁪.𑁧𑁨𑁯) 𑁋

𑀏𑀯𑀫𑀸𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀢𑀢𑁆𑀣 𑀢𑀢𑁆𑀣 𑀪𑀸𑀲𑀺𑀢𑀁 𑀲𑀩𑁆𑀩𑀫𑁆𑀧𑀺 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑀁 𑀲𑀼𑀢𑁆𑀢𑀦𑁆𑀢𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀘𑀽𑀴𑀯𑁂𑀤𑀮𑁆𑀮𑀸𑀤𑀻𑀲𑀼 (𑀫. 𑀦𑀺. 𑁧.𑁪𑁬𑁦) 𑀯𑀺𑀲𑀸𑀔𑁂𑀦 𑀦𑀸𑀫 𑀉𑀧𑀸𑀲𑀓𑁂𑀦 𑀧𑀼𑀝𑁆𑀞𑀸𑀬 𑀥𑀫𑁆𑀫𑀤𑀺𑀦𑁆𑀦𑀸𑀬 𑀦𑀸𑀫 𑀪𑀺𑀓𑁆𑀔𑀼𑀦𑀺𑀬𑀸 𑀪𑀸𑀲𑀺𑀢𑀁 𑀲𑀼𑀢𑁆𑀢𑀁 𑀘𑀽𑀴𑀯𑁂𑀤𑀮𑁆𑀮𑀁 𑀦𑀸𑀫. 𑀫𑀳𑀸𑀓𑁄𑀝𑁆𑀞𑀺𑀓𑀢𑁆𑀣𑁂𑀭𑁂𑀦 𑀧𑀼𑀘𑁆𑀙𑀺𑀢𑁂𑀦 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀪𑀸𑀲𑀺𑀢𑀁 𑀫𑀳𑀸𑀯𑁂𑀤𑀮𑁆𑀮𑀁 (𑀫. 𑀦𑀺. 𑁧.𑁪𑁪𑁯) 𑀦𑀸𑀫. 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑀫𑁆𑀧𑀺 ¶ (𑀫. 𑀦𑀺. 𑁧.𑁮𑁯) 𑀪𑀺𑀓𑁆𑀔𑀽𑀳𑀺 𑀧𑀼𑀝𑁆𑀞𑁂𑀦 𑀢𑁂𑀦𑁂𑀯 𑀪𑀸𑀲𑀺𑀢𑀁, 𑀏𑀢𑀸𑀦𑀺 𑀫𑀚𑁆𑀛𑀺𑀫𑀦𑀺𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀸𑀦𑀺. 𑀲𑀓𑁆𑀓𑀧𑀜𑁆𑀳𑀁 (𑀤𑀻. 𑀦𑀺. 𑁨.𑁩𑁪𑁪) 𑀧𑀦 𑀲𑀓𑁆𑀓𑁂𑀦 𑀧𑀼𑀝𑁆𑀞𑁄 𑀪𑀕𑀯𑀸 𑀅𑀪𑀸𑀲𑀺, 𑀢𑀁 𑀤𑀻𑀖𑀦𑀺𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀁. 𑀫𑀳𑀸𑀧𑀼𑀡𑁆𑀡𑀫𑀲𑀼𑀢𑁆𑀢𑀁 (𑀫. 𑀦𑀺. 𑁩.𑁮𑁫) 𑀧𑀦 𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂 𑀧𑀼𑀡𑁆𑀡𑀫𑀸𑀬 𑀭𑀢𑁆𑀢𑀺𑀬𑀸 𑀅𑀜𑁆𑀜𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀧𑀼𑀝𑁆𑀞𑁂𑀦 𑀪𑀕𑀯𑀢𑀸 𑀪𑀸𑀲𑀺𑀢𑀁, 𑀢𑀁 𑀫𑀚𑁆𑀛𑀺𑀫𑀦𑀺𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀁. 𑀏𑀯𑀫𑀸𑀤𑀬𑁄 𑀲𑀩𑁆𑀩𑁂𑀧𑀺 𑀢𑀢𑁆𑀣 𑀢𑀢𑁆𑀣𑀸𑀕𑀢𑀸 𑀯𑁂𑀤𑀜𑁆𑀘 𑀢𑀼𑀝𑁆𑀞𑀺𑀜𑁆𑀘 𑀮𑀤𑁆𑀥𑀸 𑀮𑀤𑁆𑀥𑀸 𑀧𑀼𑀘𑁆𑀙𑀺𑀢𑀲𑀼𑀢𑁆𑀢𑀦𑁆𑀢𑀸 ‘‘𑀯𑁂𑀤𑀮𑁆𑀮’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑁂𑀤𑀦𑁆𑀢𑀺 𑀜𑀸𑀡𑀁. 𑀢𑀼𑀝𑁆𑀞𑀺𑀦𑁆𑀢𑀺 𑀬𑀣𑀸𑀪𑀸𑀲𑀺𑀢𑀥𑀫𑁆𑀫𑀤𑁂𑀲𑀦𑀁 𑀯𑀺𑀤𑀺𑀢𑁆𑀯𑀸 ‘‘𑀲𑀸𑀥𑀼 𑀅𑀬𑁆𑀬𑁂 𑀲𑀸𑀥𑀸𑀯𑀼𑀲𑁄’’𑀢𑀺𑀆𑀤𑀺𑀦𑀸 𑀅𑀩𑁆𑀪𑀦𑀼𑀫𑁄𑀤𑀦𑀯𑀲𑀧𑁆𑀧𑀯𑀢𑁆𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁. 𑀮𑀤𑁆𑀥𑀸 𑀮𑀤𑁆𑀥𑀸𑀢𑀺 𑀮𑀪𑀺𑀢𑁆𑀯𑀸 𑀮𑀪𑀺𑀢𑁆𑀯𑀸, 𑀧𑀼𑀦𑀧𑁆𑀧𑀼𑀦𑀁 𑀮𑀪𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀏𑀢𑁂𑀦 𑀯𑁂𑀤𑀲𑀤𑁆𑀤𑁄 𑀜𑀸𑀡𑁂, 𑀲𑁄𑀫𑀦𑀲𑁆𑀲𑁂 𑀘 𑀏𑀓𑀲𑁂𑀲𑀦𑀬𑁂𑀦, 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦 𑀯𑀸 𑀧𑀯𑀢𑁆𑀢𑀢𑀺, 𑀯𑁂𑀤𑀫𑁆𑀳𑀺 𑀦𑀺𑀲𑁆𑀲𑀺𑀢𑀁 𑀢𑀲𑁆𑀲 𑀮𑀪𑀸𑀧𑀦𑀯𑀲𑁂𑀦𑀸𑀢𑀺 𑀯𑁂𑀤𑀮𑁆𑀮𑀦𑁆𑀢𑀺 𑀘 𑀤𑀲𑁆𑀲𑁂𑀢𑀺.

𑀏𑀯𑀁 ¶ 𑀅𑀗𑁆𑀕𑀯𑀲𑁂𑀦 𑀲𑀓𑀮𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀯𑀺𑀪𑀚𑀺𑀢𑁆𑀯𑀸 𑀇𑀤𑀸𑀦𑀺 𑀥𑀫𑁆𑀫𑀓𑁆𑀔𑀦𑁆𑀥𑀯𑀲𑁂𑀦 𑀯𑀺𑀪𑀚𑀺𑀢𑀼𑀓𑀸𑀫𑁄 ‘‘𑀓𑀣’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀥𑀫𑁆𑀫𑀓𑁆𑀔𑀦𑁆𑀥𑀯𑀲𑁂𑀦𑀸𑀢𑀺 𑀥𑀫𑁆𑀫𑀭𑀸𑀲𑀺𑀯𑀲𑁂𑀦. ‘‘𑀤𑁆𑀯𑀸𑀲𑀻𑀢𑀻’’𑀢𑀺 𑀅𑀬𑀁 𑀕𑀸𑀣𑀸 𑀯𑀼𑀢𑁆𑀢𑀢𑁆𑀣𑀸𑀯. 𑀏𑀯𑀁 𑀧𑀭𑀺𑀤𑀻𑀧𑀺𑀢𑀥𑀫𑁆𑀫𑀓𑁆𑀔𑀦𑁆𑀥𑀯𑀲𑁂𑀦𑀸𑀢𑀺 𑀕𑁄𑀧𑀓𑀫𑁄𑀕𑁆𑀕𑀮𑁆𑀮𑀸𑀦𑁂𑀦 𑀦𑀸𑀫 𑀩𑁆𑀭𑀸𑀳𑁆𑀫𑀡𑁂𑀦 𑀧𑀼𑀝𑁆𑀞𑁂𑀦 𑀕𑁄𑀧𑀓𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁭𑁯) 𑀅𑀢𑁆𑀢𑀦𑁄 𑀕𑀼𑀡𑀧𑁆𑀧𑀓𑀸𑀲𑀦𑀢𑁆𑀣𑀁 𑀯𑀸 𑀣𑁂𑀭𑀕𑀸𑀣𑀸𑀬𑀁 (𑀣𑁂𑀭𑀕𑀸. 𑁧𑁦𑁧𑁭 𑀆𑀤𑀬𑁄) 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀲𑀫𑀦𑁆𑀢𑀢𑁄 𑀤𑀻𑀧𑀺𑀢𑀥𑀫𑁆𑀫𑀓𑁆𑀔𑀦𑁆𑀥𑀯𑀲𑁂𑀦 𑀇𑀫𑀺𑀦𑀸 𑀏𑀯𑀁 𑀢𑁂𑀦 𑀅𑀧𑀭𑀺𑀤𑀻𑀧𑀺𑀢𑀸𑀧𑀺 𑀥𑀫𑁆𑀫𑀓𑁆𑀔𑀦𑁆𑀥𑀸 𑀲𑀦𑁆𑀢𑀻𑀢𑀺 𑀧𑀓𑀸𑀲𑁂𑀢𑀺, 𑀢𑀲𑁆𑀫𑀸 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡 𑀫𑀸𑀥𑀼𑀭𑀺𑀬𑀲𑀼𑀢𑁆𑀢𑀸𑀤𑀻𑀦𑀁 (𑀫. 𑀦𑀺. 𑁨.𑁩𑁧𑁭) 𑀯𑀺𑀫𑀸𑀦𑀯𑀢𑁆𑀣𑀸𑀤𑀻𑀲𑀼 𑀓𑁂𑀲𑀜𑁆𑀘𑀺 𑀕𑀸𑀣𑀸𑀦𑀜𑁆𑀘 𑀯𑀲𑁂𑀦 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀢𑁄𑀧𑀺 𑀥𑀫𑁆𑀫𑀓𑁆𑀔𑀦𑁆𑀥𑀸𑀦𑀁 𑀅𑀥𑀺𑀓𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀏𑀢𑁆𑀣 𑀘 𑀲𑀼𑀪𑀲𑀼𑀢𑁆𑀢𑀁 (𑀤𑀻. 𑀦𑀺. 𑁧.𑁪𑁪𑁪), 𑀕𑁄𑀧𑀓𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀜𑁆𑀘 𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀺 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀪𑀸𑀲𑀺𑀢𑀢𑁆𑀢𑀸 𑀘𑀢𑀼𑀭𑀸𑀲𑀻𑀢𑀺𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑁂𑀲𑀼 𑀅𑀦𑁆𑀢𑁄𑀕𑀥𑀁 𑀳𑁄𑀢𑀺, 𑀦 𑀳𑁄𑀢𑀻𑀢𑀺? 𑀧𑀝𑀺𑀲𑀫𑁆𑀪𑀺𑀤𑀸𑀕𑀡𑁆𑀞𑀺𑀧𑀤𑁂 𑀢𑀸𑀯 𑀇𑀤𑀁 𑀯𑀼𑀢𑁆𑀢𑀁 ‘‘𑀲𑀬𑀁 𑀯𑀼𑀢𑁆𑀢𑀥𑀫𑁆𑀫𑀓𑁆𑀔𑀦𑁆𑀥𑀸𑀦𑀫𑁆𑀧𑀺 𑀪𑀺𑀓𑁆𑀔𑀼𑀢𑁄 𑀕𑀳𑀺𑀢𑁂𑀬𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 𑀏𑀯𑀫𑀸𑀳𑀸𑀢𑀺 𑀤𑀝𑁆𑀞𑀩𑁆𑀩’’𑀦𑁆𑀢𑀺, 𑀪𑀕𑀯𑀢𑀸 𑀧𑀦 𑀤𑀺𑀦𑁆𑀦𑀦𑀬𑁂 𑀞𑀢𑁆𑀯𑀸 𑀪𑀸𑀲𑀺𑀢𑀢𑁆𑀢𑀸 ‘‘𑀲𑀬𑀁 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀲𑀼𑀢𑁆𑀢𑀤𑁆𑀯𑀬𑀁 𑀪𑀕𑀯𑀢𑁄 𑀕𑀳𑀺𑀢𑁂𑀬𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢’’𑀦𑁆𑀢𑀺 𑀏𑀯𑀫𑁆𑀧𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀢𑀭𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀪𑀕𑀯𑀢𑀸 𑀳𑀺 𑀤𑀺𑀦𑁆𑀦𑀦𑀬𑁂 𑀞𑀢𑁆𑀯𑀸 𑀲𑀸𑀯𑀓𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀢𑁂𑀦𑁂𑀯 𑀲𑀸𑀯𑀓𑀪𑀸𑀲𑀺𑀢𑀫𑁆𑀧𑀺 𑀓𑀣𑀸𑀯𑀢𑁆𑀣𑀸𑀤𑀺𑀓𑀁 𑀩𑀼𑀤𑁆𑀥𑀪𑀸𑀲𑀺𑀢𑀁 𑀦𑀸𑀫 𑀚𑀸𑀢𑀁 ¶ , 𑀢𑀢𑁄𑀬𑁂𑀯 𑀘 𑀅𑀢𑁆𑀢𑀦𑀸 𑀪𑀸𑀲𑀺𑀢𑀫𑁆𑀧𑀺 𑀲𑀼𑀪𑀲𑀼𑀢𑁆𑀢𑀸𑀤𑀺𑀓𑀁 𑀲𑀗𑁆𑀕𑀻𑀢𑀺𑀫𑀸𑀭𑁄𑀧𑁂𑀦𑁆𑀢𑁂𑀦 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀏𑀓𑀸𑀦𑀼𑀲𑀦𑁆𑀥𑀺𑀓𑀁 𑀲𑀼𑀢𑁆𑀢𑀁 𑀲𑀢𑀺𑀧𑀝𑁆𑀞𑀸𑀦𑀸𑀤𑀺. 𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀜𑁆𑀳𑀺 ‘‘𑀏𑀓𑀸𑀬𑀦𑁄 𑀅𑀬𑀁 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁩𑁭𑁩; 𑀫. 𑀦𑀺. 𑁧.𑁧𑁦𑁬; 𑀲𑀁. 𑀦𑀺. 𑁩.𑁩𑁬𑁭-𑁩𑁮𑁪) 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀆𑀭𑀪𑀺𑀢𑁆𑀯𑀸 𑀢𑁂𑀲𑀁𑀬𑁂𑀯 𑀯𑀺𑀪𑀸𑀕𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 ‘‘𑀏𑀓𑀸𑀦𑀼𑀲𑀦𑁆𑀥𑀺𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀦𑁂𑀓𑀸𑀦𑀼𑀲𑀦𑁆𑀥𑀺𑀓𑀁 𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀸𑀤𑀺 (𑀤𑀻. 𑀦𑀺. 𑁨.𑁧𑁩𑁧 𑀆𑀤𑀬𑁄) 𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀜𑁆𑀳𑀺 𑀦𑀸𑀦𑀸𑀞𑀸𑀦𑁂𑀲𑀼 𑀦𑀸𑀦𑀸𑀥𑀫𑁆𑀫𑀤𑁂𑀲𑀦𑀸𑀦𑀁 𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 ‘‘𑀅𑀦𑁂𑀓𑀸𑀦𑀼𑀲𑀦𑁆𑀥𑀺𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺.

‘‘𑀓𑀢𑀺 𑀙𑀺𑀦𑁆𑀤𑁂 𑀓𑀢𑀺 𑀚𑀳𑁂, 𑀓𑀢𑀺 𑀘𑀼𑀢𑁆𑀢𑀭𑀺 𑀪𑀸𑀯𑀬𑁂;

𑀓𑀢𑀺 𑀲𑀗𑁆𑀕𑀸𑀢𑀺𑀕𑁄 𑀪𑀺𑀓𑁆𑀔𑀼, ‘𑀑𑀖𑀢𑀺𑀡𑁆𑀡𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺. (𑀲𑀁. 𑀦𑀺. 𑁧.𑁫); 𑁋

𑀏𑀯𑀫𑀸𑀤𑀺𑀦𑀸 𑀧𑀜𑁆𑀳𑀸𑀧𑀼𑀘𑁆𑀙𑀦𑀁 𑀕𑀸𑀣𑀸𑀩𑀦𑁆𑀥𑁂𑀲𑀼 𑀏𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄.

‘‘𑀧𑀜𑁆𑀘 ¶ 𑀙𑀺𑀦𑁆𑀤𑁂 𑀧𑀜𑁆𑀘 𑀚𑀳𑁂, 𑀧𑀜𑁆𑀘 𑀘𑀼𑀢𑁆𑀢𑀭𑀺 𑀪𑀸𑀯𑀬𑁂;

𑀧𑀜𑁆𑀘 𑀲𑀗𑁆𑀕𑀸𑀢𑀺𑀕𑁄 𑀪𑀺𑀓𑁆𑀔𑀼, ‘𑀑𑀖𑀢𑀺𑀡𑁆𑀡𑁄’𑀢𑀺 𑀯𑀼𑀘𑁆𑀘𑀢𑀻’’𑀢𑀺. (𑀲𑀁. 𑀦𑀺. 𑁧.𑁫); 𑁋

𑀏𑀯𑀫𑀸𑀤𑀺𑀦𑀸 𑀘 𑀯𑀺𑀲𑁆𑀲𑀚𑁆𑀚𑀦𑀁 𑀏𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄.

𑀢𑀺𑀓𑀤𑀼𑀓𑀪𑀸𑀚𑀦𑀁 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 𑀦𑀺𑀓𑁆𑀔𑁂𑀧𑀓𑀡𑁆𑀟𑀅𑀝𑁆𑀞𑀓𑀣𑀸𑀓𑀡𑁆𑀟𑀯𑀲𑁂𑀦 𑀕𑀳𑁂𑀢𑀩𑁆𑀩𑀁. 𑀢𑀲𑁆𑀫𑀸 𑀬𑀁 𑀓𑀼𑀲𑀮𑀢𑁆𑀢𑀺𑀓𑀫𑀸𑀢𑀺𑀓𑀸𑀧𑀤𑀲𑁆𑀲 (𑀥. 𑀲. 𑁧) 𑀯𑀺𑀪𑀚𑀦𑀯𑀲𑁂𑀦 𑀦𑀺𑀓𑁆𑀔𑁂𑀧𑀓𑀡𑁆𑀟𑁂 𑀯𑀼𑀢𑁆𑀢𑀁 𑁋

‘‘𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸? 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸. 𑀓𑀢𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸? 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸’’? 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀸…𑀧𑁂… 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸’’𑀢𑀺 (𑀥. 𑀲. 𑁧𑁮𑁭),

𑀅𑀬𑀫𑁂𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄. 𑀏𑀲 𑀦𑀬𑁄 𑀲𑁂𑀲𑀢𑁆𑀢𑀺𑀓𑀤𑀼𑀓𑀧𑀤𑀯𑀺𑀪𑀚𑀦𑁂𑀲𑀼𑀧𑀺. 𑀬𑀤𑀧𑀺 𑀅𑀝𑁆𑀞𑀓𑀣𑀸𑀓𑀡𑁆𑀟𑁂 𑀯𑀼𑀢𑁆𑀢𑀁 𑁋

‘‘𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸? 𑀘𑀢𑀽𑀲𑀼 𑀪𑀽𑀫𑀻𑀲𑀼 𑀓𑀼𑀲𑀮𑀁. 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸. 𑀓𑀢𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸? 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸. 𑀇𑀫𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸. 𑀓𑀢𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸? 𑀘𑀢𑀽𑀲𑀼 ¶ 𑀪𑀽𑀫𑀻𑀲𑀼 𑀯𑀺𑀧𑀸𑀓𑁄 𑀢𑀻𑀲𑀼 𑀪𑀽𑀫𑀻𑀲𑀼 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁 𑀭𑀽𑀧𑀜𑁆𑀘 𑀦𑀺𑀩𑁆𑀩𑀸𑀦𑀜𑁆𑀘. 𑀇𑀫𑁂 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸’’𑀢𑀺 (𑀥. 𑀲. 𑁧𑁩𑁮𑁬),

𑀅𑀬𑀁 𑀓𑀼𑀲𑀮𑀢𑁆𑀢𑀺𑀓𑀫𑀸𑀢𑀺𑀓𑀸𑀧𑀤𑀲𑁆𑀲 𑀯𑀺𑀪𑀚𑀦𑀯𑀲𑁂𑀦 𑀧𑀯𑀢𑁆𑀢𑁄 𑀏𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀘𑀺𑀢𑁆𑀢𑀯𑀸𑀭𑀪𑀸𑀚𑀦𑀁 𑀧𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟 𑀯𑀲𑁂𑀦 (𑀥. 𑀲. 𑁧) 𑀕𑀳𑁂𑀢𑀩𑁆𑀩𑀁. 𑀬𑀜𑁆𑀳𑀺 𑀢𑀢𑁆𑀣 𑀯𑀼𑀢𑁆𑀢𑀁 𑀓𑀼𑀲𑀮𑀘𑀺𑀢𑁆𑀢𑀯𑀺𑀪𑀚𑀦𑀢𑁆𑀣𑀁 𑁋

‘‘𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸…𑀧𑁂… 𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀻’’𑀢𑀺 (𑀥. 𑀲. 𑁧),

𑀅𑀬𑀫𑁂𑀓𑁄 ¶ 𑀥𑀫𑁆𑀫𑀓𑁆𑀔𑀦𑁆𑀥𑁄. 𑀏𑀯𑀁 𑀲𑁂𑀲𑀘𑀺𑀢𑁆𑀢𑀯𑀸𑀭𑀯𑀺𑀪𑀚𑀦𑁂𑀲𑀼. 𑀏𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄𑀢𑀺 (𑀏𑀓𑀫𑁂𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄 𑀙𑀴 𑀅𑀝𑁆𑀞.) 𑀘 𑀏𑀓𑁂𑀓𑁄 𑀥𑀫𑁆𑀫𑀓𑁆𑀔𑀦𑁆𑀥𑁄𑀢𑀺 𑀅𑀢𑁆𑀣𑁄. ‘‘𑀏𑀓𑀫𑁂𑀓𑀁 𑀢𑀺𑀓𑀤𑀼𑀓𑀪𑀸𑀚𑀦𑀁, 𑀏𑀓𑀫𑁂𑀓𑀁 𑀘𑀺𑀢𑁆𑀢𑀯𑀸𑀭𑀪𑀸𑀚𑀦’’𑀦𑁆𑀢𑀺 𑀘 𑀯𑀘𑀦𑀢𑁄 𑀳𑀺 ‘‘𑀏𑀓𑁂𑀓𑁄’’𑀢𑀺 𑀅𑀯𑀼𑀢𑁆𑀢𑁂𑀧𑀺 𑀅𑀬𑀫𑀢𑁆𑀣𑁄 𑀲𑀸𑀫𑀢𑁆𑀣𑀺𑀬𑀢𑁄 𑀯𑀺𑀜𑁆𑀜𑀸𑀬𑀫𑀸𑀦𑁄𑀯 𑀳𑁄𑀢𑀺.

𑀯𑀢𑁆𑀣𑀼 𑀦𑀸𑀫 𑀲𑀼𑀤𑀺𑀦𑁆𑀦𑀓𑀡𑁆𑀟𑀸𑀤𑀺. 𑀫𑀸𑀢𑀺𑀓𑀸 𑀦𑀸𑀫 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁪) 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀚𑁆𑀛𑀸𑀘𑀸𑀭𑁂 𑀧𑀜𑁆𑀜𑀢𑁆𑀢𑀁 𑀉𑀤𑁆𑀤𑁂𑀲 𑀲𑀺𑀓𑁆𑀔𑀸𑀧𑀤𑀁. 𑀧𑀤𑀪𑀸𑀚𑀦𑀺𑀬𑀦𑁆𑀢𑀺 𑀢𑀲𑁆𑀲 𑀢𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 ‘‘𑀬𑁄 𑀧𑀦𑀸𑀢𑀺 𑀬𑁄 𑀬𑀸𑀤𑀺𑀲𑁄’’𑀢𑀺𑀆𑀤𑀺 (𑀧𑀸𑀭𑀸. 𑁪𑁫) 𑀦𑀬𑀧𑁆𑀧𑀯𑀢𑁆𑀢𑀁 𑀧𑀤𑀯𑀺𑀪𑀚𑀦𑀁. 𑀅𑀦𑁆𑀢𑀭𑀸𑀧𑀢𑁆𑀢𑀻𑀢𑀺 ‘‘𑀧𑀝𑀺𑀮𑀸𑀢𑀁 𑀉𑀓𑁆𑀔𑀺𑀧𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀘𑀺. 𑁩𑁫𑁫) 𑀏𑀯𑀫𑀸𑀤𑀺𑀦𑀸 𑀲𑀺𑀓𑁆𑀔𑀸𑀧𑀤𑀦𑁆𑀢𑀭𑁂𑀲𑀼 𑀧𑀜𑁆𑀜𑀢𑁆𑀢𑀸 𑀆𑀧𑀢𑁆𑀢𑀺. 𑀆𑀧𑀢𑁆𑀢𑀻𑀢𑀺 𑀢𑀁𑀢𑀁𑀲𑀺𑀓𑁆𑀔𑀸𑀧𑀤𑀸𑀦𑀼𑀭𑀽𑀧𑀁 𑀯𑀼𑀢𑁆𑀢𑁄 𑀢𑀺𑀓𑀘𑁆𑀙𑁂𑀤𑀫𑀼𑀢𑁆𑀢𑁄 𑀆𑀧𑀢𑁆𑀢𑀺𑀯𑀸𑀭𑁄. 𑀅𑀦𑀸𑀧𑀢𑁆𑀢𑀻𑀢𑀺 ‘‘𑀅𑀦𑀸𑀧𑀢𑁆𑀢𑀺 𑀅𑀚𑀸𑀦𑀦𑁆𑀢𑀲𑁆𑀲 𑀅𑀲𑀸𑀤𑀺𑀬𑀦𑁆𑀢𑀲𑁆𑀲 𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲 𑀯𑁂𑀤𑀦𑀸𑀝𑁆𑀝𑀲𑁆𑀲 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸’’𑀢𑀺𑀆𑀤𑀺 (𑀧𑀸𑀭𑀸. 𑁬𑁬) 𑀦𑀬𑀧𑁆𑀧𑀯𑀢𑁆𑀢𑁄 𑀅𑀦𑀸𑀧𑀢𑁆𑀢𑀺𑀯𑀸𑀭𑁄. 𑀢𑀺𑀓𑀘𑁆𑀙𑁂𑀤𑁄𑀢𑀺 ‘‘𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢𑁂 𑀅𑀢𑀺𑀓𑁆𑀓𑀦𑁆𑀢𑀲𑀜𑁆𑀜𑀻 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢𑁂 𑀯𑁂𑀫𑀢𑀺𑀓𑁄…𑀧𑁂… 𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢𑁂 𑀅𑀦𑀢𑀺𑀓𑁆𑀓𑀦𑁆𑀢𑀲𑀜𑁆𑀜𑀻 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀭𑀸. 𑁪𑁬𑁮) 𑀏𑀯𑀫𑀸𑀤𑀺𑀦𑀬𑀧𑁆𑀧𑀯𑀢𑁆𑀢𑁄 𑀢𑀺𑀓𑀧𑀸𑀘𑀺𑀢𑁆𑀢𑀺𑀬-𑀢𑀺𑀓-𑀤𑀼𑀓𑁆𑀓𑀝𑀸𑀤𑀺𑀪𑁂𑀤𑁄 𑀢𑀺𑀓𑀧𑀭𑀺𑀘𑁆𑀙𑁂𑀤𑁄. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀯𑀢𑁆𑀣𑀼𑀫𑀸𑀢𑀺𑀓𑀸𑀤𑀻𑀲𑀼.

𑀏𑀯𑀁 ¶ 𑀅𑀦𑁂𑀓𑀦𑀬𑀲𑀫𑀮𑀗𑁆𑀓𑀢𑀁 𑀲𑀗𑁆𑀕𑀻𑀢𑀺𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄…𑀧𑁂… 𑀇𑀫𑀸𑀦𑀺 𑀘𑀢𑀼𑀭𑀸𑀲𑀻𑀢𑀺 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻’’𑀢𑀺 𑀩𑀼𑀤𑁆𑀥𑀯𑀘𑀦𑀁 𑀥𑀫𑁆𑀫𑀯𑀺𑀦𑀬𑀸𑀤𑀺𑀪𑁂𑀤𑁂𑀦 𑀯𑀯𑀢𑁆𑀣𑀧𑁂𑀢𑁆𑀯𑀸 𑀲𑀗𑁆𑀕𑀸𑀬𑀦𑁆𑀢𑁂𑀦 𑀫𑀳𑀸𑀓𑀲𑁆𑀲𑀧𑀧𑁆𑀧𑀫𑀼𑀔𑁂𑀦 𑀯𑀲𑀻𑀕𑀡𑁂𑀦 𑀅𑀦𑁂𑀓𑀘𑁆𑀙𑀭𑀺𑀬𑀧𑀸𑀢𑀼𑀪𑀸𑀯𑀧𑀝𑀺𑀫𑀡𑁆𑀟𑀺𑀢𑀸𑀬 𑀲𑀗𑁆𑀕𑀻𑀢𑀺𑀬𑀸 𑀇𑀫𑀲𑁆𑀲 𑀤𑀻𑀖𑀸𑀕𑀫𑀲𑁆𑀲 𑀥𑀫𑁆𑀫𑀪𑀸𑀯𑁄, 𑀫𑀚𑁆𑀛𑀺𑀫𑀩𑀼𑀤𑁆𑀥𑀯𑀘𑀦𑀸𑀤𑀺𑀪𑀸𑀯𑁄 𑀘 𑀯𑀯𑀢𑁆𑀣𑀸𑀧𑀺𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀫𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀲𑀸𑀥𑀸𑀭𑀡𑀯𑀘𑀦𑁂𑀦 𑀤𑀲𑁆𑀲𑀺𑀢𑁂𑀧𑀺 𑀳𑀺 ‘‘𑀬𑀤𑀢𑁆𑀣𑀁 𑀲𑀁𑀯𑀡𑁆𑀡𑁂𑀢𑀼𑀁 𑀇𑀤𑀫𑀸𑀭𑀪𑀢𑀺, 𑀲𑁄𑀬𑁂𑀯 𑀧𑀥𑀸𑀦𑀯𑀲𑁂𑀦 𑀤𑀲𑁆𑀲𑀺𑀢𑁄’’𑀢𑀺 𑀆𑀘𑀭𑀺𑀬𑁂𑀳𑀺 𑀅𑀬𑀁 𑀲𑀫𑁆𑀩𑀦𑁆𑀥𑁄 𑀯𑀼𑀢𑁆𑀢𑁄. 𑀅𑀧𑀭𑁄 𑀦𑀬𑁄 𑁋 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀲𑀼 𑀏𑀓𑀯𑀺𑀥𑀸𑀤𑀺𑀪𑁂𑀤𑀪𑀺𑀦𑁆𑀦𑁂𑀲𑀼 𑀧𑀓𑀸𑀭𑁂𑀲𑀼 𑀥𑀫𑁆𑀫𑀯𑀺𑀦𑀬𑀸𑀤𑀺𑀪𑀸𑀯𑁄 𑀲𑀗𑁆𑀕𑀻𑀢𑀺𑀓𑀸𑀭𑀓𑁂 𑀳𑁂𑀯 𑀲𑀗𑁆𑀕𑀻𑀢𑀺𑀓𑀸𑀮𑁂 𑀯𑀯𑀢𑁆𑀣𑀸𑀧𑀺𑀢𑁄, 𑀦 𑀧𑀘𑁆𑀙𑀸 𑀓𑀧𑁆𑀧𑀦𑀫𑀢𑁆𑀢𑀲𑀺𑀤𑁆𑀥𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀫𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳𑀸𑀢𑀺𑀧𑀺 𑀯𑀢𑁆𑀢𑀩𑁆𑀩𑁄. 𑀦 𑀓𑁂𑀯𑀮𑀁 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯 𑀯𑀯𑀢𑁆𑀣𑀸𑀧𑁂𑀢𑁆𑀯𑀸 𑀲𑀗𑁆𑀕𑀻𑀢𑀁, 𑀅𑀣 𑀔𑁄 𑀅𑀜𑁆𑀜𑀫𑁆𑀧𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀦 𑀓𑁂𑀯𑀮𑀜𑁆𑀘𑀸’’𑀢𑀺𑀆𑀤𑀺𑀦𑀸. 𑀉𑀤𑀸𑀦𑀲𑀗𑁆𑀕𑀳𑁄 𑀦𑀸𑀫 𑀧𑀞𑀫𑀧𑀸𑀭𑀸𑀚𑀺𑀓𑀸𑀤𑀻𑀲𑀼 𑀆𑀕𑀢𑀸𑀦𑀁 𑀯𑀺𑀦𑀻𑀢𑀯𑀢𑁆𑀣𑀼𑀆𑀤𑀻𑀦𑀁 𑀲𑀗𑁆𑀔𑁂𑀧𑀢𑁄 𑀲𑀗𑁆𑀕𑀳𑀤𑀲𑁆𑀲𑀦𑀯𑀲𑁂𑀦 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀞𑀧𑀺𑀢𑀸 𑁋

‘‘𑀫𑀓𑁆𑀓𑀝𑀻 ¶ 𑀯𑀚𑁆𑀚𑀺𑀧𑀼𑀢𑁆𑀢𑀸 𑀘, 𑀕𑀺𑀳𑀻 𑀦𑀕𑁆𑀕𑁄 𑀘 𑀢𑀺𑀢𑁆𑀣𑀺𑀬𑀸;

𑀤𑀸𑀭𑀺𑀓𑀼𑀧𑁆𑀧𑀮𑀯𑀡𑁆𑀡𑀸 𑀘, 𑀩𑁆𑀬𑀜𑁆𑀚𑀦𑁂𑀳𑀺 𑀧𑀭𑁂 𑀤𑀼𑀯𑁂’’𑀢𑀺. 𑀆𑀤𑀺𑀓𑀸 (𑀧𑀸𑀭𑀸. 𑁬𑁬); 𑁋

𑀕𑀸𑀣𑀸𑀬𑁄. 𑀯𑀼𑀘𑁆𑀘𑀫𑀸𑀦𑀲𑁆𑀲 𑀳𑀺 𑀯𑀼𑀢𑁆𑀢𑀲𑁆𑀲 𑀯𑀸 𑀅𑀢𑁆𑀣𑀲𑁆𑀲 𑀯𑀺𑀧𑁆𑀧𑀓𑀺𑀡𑁆𑀡𑀪𑀸𑀯𑁂𑀦 𑀧𑀯𑀢𑁆𑀢𑀺𑀢𑀼𑀁 𑀅𑀤𑀢𑁆𑀯𑀸 𑀉𑀤𑁆𑀥𑀁 𑀤𑀸𑀦𑀁 𑀭𑀓𑁆𑀔𑀡𑀁 𑀉𑀤𑀸𑀦𑀁, 𑀲𑀗𑁆𑀕𑀳𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑀫𑀽𑀮𑀧𑀭𑀺𑀬𑀸𑀬𑀯𑀕𑁆𑀕𑀸𑀤𑀺𑀯𑀲𑁂𑀦 𑀯𑀕𑁆𑀕𑀲𑀗𑁆𑀕𑀳𑁄. 𑀯𑀕𑁆𑀕𑁄𑀢𑀺 𑀳𑀺 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑁂𑀯 𑀓𑀢𑀸 𑀲𑀼𑀢𑁆𑀢𑀲𑀫𑀼𑀤𑀸𑀬𑀲𑁆𑀲 𑀲𑀫𑀜𑁆𑀜𑀸. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀧𑁂𑀬𑁆𑀬𑀸𑀮𑀦𑀻𑀮𑀧𑁂𑀬𑁆𑀬𑀸𑀮𑀸𑀤𑀺𑀯𑀲𑁂𑀦 𑀧𑁂𑀬𑁆𑀬𑀸𑀮𑀲𑀗𑁆𑀕𑀳𑁄. 𑀧𑀸𑀢𑀼𑀁 𑀭𑀓𑁆𑀔𑀺𑀢𑀼𑀁, 𑀯𑀺𑀢𑁆𑀣𑀸𑀭𑀺𑀢𑀼𑀁 𑀯𑀸 𑀅𑀮𑀦𑁆𑀢𑀺 𑀳𑀺 𑀧𑁂𑀬𑁆𑀬𑀸𑀮𑀁, 𑀲𑀗𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑀦𑀯𑀘𑀦𑀁. 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑀸𑀤𑀻𑀲𑀼 𑀦𑀺𑀧𑀸𑀢𑀲𑀗𑁆𑀕𑀳𑁄, 𑀕𑀸𑀣𑀗𑁆𑀕𑀸𑀤𑀺𑀯𑀲𑁂𑀦 𑀦𑀺𑀧𑀸𑀢𑀦𑀁. 𑀲𑀫𑀼𑀤𑀸𑀬𑀓𑀭𑀡𑀜𑁆𑀳𑀺 𑀦𑀺𑀧𑀸𑀢𑁄. 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀸𑀤𑀺𑀯𑀲𑁂𑀦 (𑀲𑀁. 𑀦𑀺. 𑁧.𑁧) 𑀲𑀁𑀬𑀼𑀢𑁆𑀢𑀲𑀗𑁆𑀕𑀳𑁄. 𑀯𑀕𑁆𑀕𑀲𑀫𑀼𑀤𑀸𑀬𑁂 𑀏𑀯 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀓𑀢𑀸 𑀲𑀁𑀬𑀼𑀢𑁆𑀢𑀲𑀫𑀜𑁆𑀜𑀸. 𑀫𑀽𑀮𑀧𑀡𑁆𑀡𑀸𑀲𑀓𑀸𑀤𑀺𑀯𑀲𑁂𑀦 𑀧𑀡𑁆𑀡𑀸𑀲𑀲𑀗𑁆𑀕𑀳𑁄, 𑀧𑀜𑁆𑀜𑀸𑀲 𑀧𑀜𑁆𑀜𑀸𑀲 𑀲𑀼𑀢𑁆𑀢𑀸𑀦𑀺 𑀕𑀡𑁂𑀢𑁆𑀯𑀸 𑀲𑀗𑁆𑀕𑀳𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀤𑀺𑀲𑀤𑁆𑀤𑁂𑀦 𑀢𑀲𑁆𑀲𑀁 𑀢𑀲𑁆𑀲𑀁 𑀧𑀸𑀴𑀺𑀬𑀁 𑀤𑀺𑀲𑁆𑀲𑀫𑀸𑀦𑀁 𑀲𑀗𑁆𑀕𑀻𑀢𑀺𑀓𑀸𑀭𑀓𑀯𑀘𑀦𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀉𑀤𑀸𑀦𑀲𑀗𑁆𑀕𑀳…𑀧𑁂… 𑀧𑀡𑁆𑀡𑀸𑀲𑀲𑀗𑁆𑀕𑀳𑀸𑀤𑀻𑀳𑀺 𑀅𑀦𑁂𑀓𑀯𑀺𑀥𑀁 𑀢𑀣𑀸. 𑀲𑀢𑁆𑀢𑀳𑀺 𑀫𑀸𑀲𑁂𑀳𑀻𑀢𑀺 𑀓𑀺𑀭𑀺𑀬𑀸𑀧𑀯𑀕𑁆𑀕𑁂 𑀢𑀢𑀺𑀬𑀸 ‘‘𑀏𑀓𑀸𑀳𑁂𑀦𑁂𑀯 ¶ 𑀩𑀸𑀭𑀸𑀡𑀲𑀺𑀁 𑀧𑀸𑀬𑀸𑀲𑀺. 𑀦𑀯𑀳𑀺 𑀫𑀸𑀲𑁂𑀳𑀺 𑀯𑀺𑀳𑀸𑀭𑀁 𑀦𑀺𑀝𑁆𑀞𑀸𑀧𑁂𑀲𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀓𑀺𑀭𑀺𑀬𑀸𑀬 𑀆𑀲𑀼𑀁 𑀧𑀭𑀺𑀦𑀺𑀝𑁆𑀞𑀸𑀧𑀦𑀜𑁆𑀳𑀺 𑀓𑀺𑀭𑀺𑀬𑀸𑀧𑀯𑀕𑁆𑀕𑁄.

𑀢𑀤𑀸 𑀅𑀦𑁂𑀓𑀘𑁆𑀙𑀭𑀺𑀬𑀧𑀸𑀢𑀼𑀪𑀸𑀯𑀤𑀲𑁆𑀲𑀦𑁂𑀦 𑀲𑀸𑀥𑀽𑀦𑀁 𑀧𑀲𑀸𑀤𑀚𑀦𑀦𑀢𑁆𑀣𑀫𑀸𑀳 ‘‘𑀲𑀗𑁆𑀕𑀻𑀢𑀺𑀧𑀭𑀺𑀬𑁄𑀲𑀸𑀦𑁂 𑀘𑀲𑁆𑀲𑀸’’𑀢𑀺𑀆𑀤𑀺. 𑀅𑀲𑁆𑀲 𑀩𑀼𑀤𑁆𑀥𑀯𑀘𑀦𑀲𑁆𑀲 𑀲𑀗𑁆𑀕𑀻𑀢𑀺𑀧𑀭𑀺𑀬𑁄𑀲𑀸𑀦𑁂 𑀲𑀜𑁆𑀚𑀸𑀢𑀧𑁆𑀧𑀫𑁄𑀤𑀸 𑀯𑀺𑀬, 𑀲𑀸𑀥𑀼𑀓𑀸𑀭𑀁 𑀤𑀤𑀫𑀸𑀦𑀸 𑀯𑀺𑀬 𑀘 𑀲𑀗𑁆𑀓𑀫𑁆𑀧𑀺…𑀧𑁂… 𑀧𑀸𑀢𑀼𑀭𑀳𑁂𑀲𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀬𑀸𑀢𑀺 𑀳𑀺 𑀉𑀪𑀬𑀢𑁆𑀣 𑀬𑁄𑀚𑁂𑀢𑀩𑁆𑀩𑀁. 𑀧𑀯𑀢𑁆𑀢𑀦𑁂, 𑀧𑀯𑀢𑁆𑀢𑀦𑀸𑀬 𑀯𑀸 𑀲𑀫𑀢𑁆𑀣𑀁 𑀧𑀯𑀢𑁆𑀢𑀦𑀲𑀫𑀢𑁆𑀣𑀁. 𑀉𑀤𑀓𑀧𑀭𑀺𑀬𑀦𑁆𑀢𑀦𑁆𑀢𑀺 𑀧𑀣𑀯𑀻𑀲𑀦𑁆𑀥𑀸𑀭𑀓𑀉𑀤𑀓𑀧𑀭𑀺𑀬𑁄𑀲𑀸𑀦𑀁 𑀓𑀢𑁆𑀯𑀸, 𑀲𑀳 𑀢𑁂𑀦 𑀉𑀤𑀓𑁂𑀦, 𑀢𑀁 𑀯𑀸 𑀉𑀤𑀓𑀁 𑀆𑀳𑀘𑁆𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑁂𑀦 𑀏𑀓𑀤𑁂𑀲𑀓𑀫𑁆𑀧𑀦𑀁 𑀦𑀺𑀯𑀸𑀭𑁂𑀢𑀺. 𑀲𑀗𑁆𑀓𑀫𑁆𑀧𑀻𑀢𑀺 𑀉𑀤𑁆𑀥𑀁 𑀉𑀤𑁆𑀥𑀁 𑀕𑀘𑁆𑀙𑀦𑁆𑀢𑀻 𑀲𑀼𑀝𑁆𑀞𑀼 𑀓𑀫𑁆𑀧𑀺. 𑀲𑀫𑁆𑀧𑀓𑀫𑁆𑀧𑀻𑀢𑀺 𑀉𑀤𑁆𑀥𑀫𑀥𑁄 𑀘 𑀕𑀘𑁆𑀙𑀦𑁆𑀢𑀻 𑀲𑀫𑁆𑀫𑀸 𑀧𑀓𑀸𑀭𑁂𑀦 𑀓𑀫𑁆𑀧𑀺. 𑀲𑀫𑁆𑀧𑀯𑁂𑀥𑀻𑀢𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀕𑀘𑁆𑀙𑀦𑁆𑀢𑀻 𑀲𑀼𑀝𑁆𑀞𑀼 𑀪𑀺𑀬𑁆𑀬𑁄 𑀧𑀯𑁂𑀥𑀺. 𑀏𑀯𑀁 𑀏𑀢𑁂𑀦 𑀧𑀤𑀢𑁆𑀢𑀬𑁂𑀦 𑀙𑀧𑁆𑀧𑀓𑀸𑀭𑀁 𑀧𑀣𑀯𑀻𑀘𑀮𑀦𑀁 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀧𑀼𑀭𑀢𑁆𑀣𑀺𑀫𑀢𑁄, 𑀧𑀘𑁆𑀙𑀺𑀫𑀢𑁄 𑀘 𑀉𑀦𑁆𑀦𑀫𑀦𑀑𑀦𑀫𑀦𑀯𑀲𑁂𑀦 𑀲𑀗𑁆𑀓𑀫𑁆𑀧𑀺. 𑀉𑀢𑁆𑀢𑀭𑀢𑁄, 𑀤𑀓𑁆𑀔𑀺𑀡𑀢𑁄 𑀘 𑀉𑀦𑁆𑀦𑀫𑀦𑀑𑀦𑀫𑀦𑀯𑀲𑁂𑀦 𑀲𑀫𑁆𑀧𑀓𑀫𑁆𑀧𑀺. 𑀫𑀚𑁆𑀛𑀺𑀫𑀢𑁄, 𑀧𑀭𑀺𑀬𑀦𑁆𑀢𑀢𑁄 𑀘 𑀉𑀦𑁆𑀦𑀫𑀦𑀑𑀦𑀫𑀦𑀯𑀲𑁂𑀦 𑀲𑀫𑁆𑀧𑀯𑁂𑀥𑀺. 𑀏𑀯𑀫𑁆𑀧𑀺 𑀙𑀧𑁆𑀧𑀓𑀸𑀭𑀁 𑀧𑀣𑀯𑀻𑀘𑀮𑀦𑀁 𑀤𑀲𑁆𑀲𑁂𑀢𑀺, 𑀬𑀁 𑀲𑀦𑁆𑀥𑀸𑀬 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 𑁋-

‘‘𑀧𑀼𑀭𑀢𑁆𑀣𑀺𑀫𑀢𑁄 𑀉𑀦𑁆𑀦𑀫𑀢𑀺 𑀧𑀘𑁆𑀙𑀺𑀫𑀢𑁄 𑀑𑀦𑀫𑀢𑀺, 𑀧𑀘𑁆𑀙𑀺𑀫𑀢𑁄 𑀉𑀦𑁆𑀦𑀫𑀢𑀺 𑀧𑀼𑀭𑀢𑁆𑀣𑀺𑀫𑀢𑁄 𑀑𑀦𑀫𑀢𑀺, 𑀉𑀢𑁆𑀢𑀭𑀢𑁄 𑀉𑀦𑁆𑀦𑀫𑀢𑀺 𑀤𑀓𑁆𑀔𑀺𑀡𑀢𑁄 𑀑𑀦𑀫𑀢𑀺, 𑀤𑀓𑁆𑀔𑀺𑀡𑀢𑁄 𑀉𑀦𑁆𑀦𑀫𑀢𑀺 𑀉𑀢𑁆𑀢𑀭𑀢𑁄 𑀑𑀦𑀫𑀢𑀺 ¶ , 𑀫𑀚𑁆𑀛𑀺𑀫𑀢𑁄 𑀉𑀦𑁆𑀦𑀫𑀢𑀺 𑀧𑀭𑀺𑀬𑀦𑁆𑀢𑀢𑁄 𑀑𑀦𑀫𑀢𑀺, 𑀧𑀭𑀺𑀬𑀦𑁆𑀢𑀢𑁄 𑀉𑀦𑁆𑀦𑀫𑀢𑀺 𑀫𑀚𑁆𑀛𑀺𑀫𑀢𑁄 𑀑𑀦𑀫𑀢𑀻𑀢𑀺 𑀏𑀯𑀁 𑀙𑀧𑁆𑀧𑀓𑀸𑀭𑀁…𑀧𑁂… 𑀅𑀓𑀫𑁆𑀧𑀺𑀢𑁆𑀣𑀸’’𑀢𑀺 (𑀩𑀼. 𑀯𑀁. 𑀅𑀝𑁆𑀞. 𑁭𑁧).

𑀅𑀘𑁆𑀙𑀭𑀁 𑀧𑀳𑀭𑀺𑀢𑀼𑀁 𑀬𑀼𑀢𑁆𑀢𑀸𑀦𑀺 𑀅𑀘𑁆𑀙𑀭𑀺𑀬𑀸𑀦𑀺, 𑀧𑀼𑀧𑁆𑀨𑀯𑀲𑁆𑀲𑀘𑁂𑀮𑀼𑀓𑁆𑀔𑁂𑀧𑀸𑀤𑀻𑀦𑀺 𑀅𑀜𑁆𑀜𑀸𑀬𑀧𑀺 𑀲𑀸 𑀲𑀫𑀜𑁆𑀜𑀸𑀬 𑀧𑀸𑀓𑀝𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀸 𑀮𑁄𑀓𑁂’’𑀢𑀺𑀆𑀤𑀺. 𑀬𑀸 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 𑀥𑀫𑁆𑀫𑀲𑀗𑁆𑀕𑀸𑀳𑀓𑁂𑀳𑀺 𑀫𑀳𑀸𑀓𑀲𑁆𑀲𑀧𑀸𑀤𑀻𑀳𑀺 𑀧𑀜𑁆𑀘𑀳𑀺 𑀲𑀢𑁂𑀳𑀺 𑀬𑁂𑀦 𑀓𑀢𑀸 𑀲𑀗𑁆𑀕𑀻𑀢𑀸, 𑀢𑁂𑀦 𑀧𑀜𑁆𑀘 𑀲𑀢𑀸𑀦𑀺 𑀏𑀢𑀺𑀲𑁆𑀲𑀸𑀢𑀺 ‘‘𑀧𑀜𑁆𑀘𑀲𑀢𑀸’’𑀢𑀺 𑀘 𑀣𑁂𑀭𑁂𑀳𑁂𑀯 𑀓𑀢𑀢𑁆𑀢𑀸 𑀣𑁂𑀭𑀸 𑀫𑀳𑀸𑀓𑀲𑁆𑀲𑀧𑀸𑀤𑀬𑁄 𑀏𑀢𑀺𑀲𑁆𑀲𑀸, 𑀣𑁂𑀭𑁂𑀳𑀺 𑀯𑀸 𑀓𑀢𑀸𑀢𑀺 ‘‘𑀣𑁂𑀭𑀺𑀓𑀸’’𑀢𑀺 𑀘 𑀮𑁄𑀓𑁂 𑀧𑀯𑀼𑀘𑁆𑀘𑀢𑀺, 𑀅𑀬𑀁 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀏𑀯𑀁 ¶ 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 𑀤𑀲𑁆𑀲𑁂𑀢𑁆𑀯𑀸 𑀬𑀤𑀢𑁆𑀣𑀁 𑀲𑀸 𑀇𑀥 𑀤𑀲𑁆𑀲𑀺𑀢𑀸, 𑀇𑀤𑀸𑀦𑀺 𑀢𑀁 𑀦𑀺𑀤𑀸𑀦𑀁 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀺𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀆𑀤𑀺𑀦𑀺𑀓𑀸𑀬𑀲𑁆𑀲𑀸𑀢𑀺 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀧𑀜𑁆𑀘𑀲𑀼 𑀦𑀺𑀓𑀸𑀬𑁂𑀲𑀼 𑀆𑀤𑀺𑀪𑀽𑀢𑀲𑁆𑀲 𑀤𑀻𑀖𑀦𑀺𑀓𑀸𑀬𑀲𑁆𑀲. 𑀔𑀼𑀤𑁆𑀤𑀓𑀧𑀭𑀺𑀬𑀸𑀧𑀦𑁆𑀦𑁄 𑀳𑀺 𑀯𑀺𑀦𑀬𑁄 𑀧𑀞𑀫𑀁 𑀲𑀗𑁆𑀕𑀻𑀢𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀲𑀼𑀢𑁆𑀢𑀦𑁆𑀢 𑀧𑀺𑀝𑀓𑁂’’𑀢𑀺. 𑀢𑁂𑀦𑀸𑀢𑀺 𑀢𑀣𑀸𑀯𑀼𑀢𑁆𑀢𑀢𑁆𑀢𑀸, 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀬𑀁 𑀢𑀣𑀸𑀯𑀘𑀦𑀫𑁂𑀯 𑀲𑀦𑁆𑀥𑀸𑀬 𑀫𑀬𑀸 𑀳𑁂𑀝𑁆𑀞𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀧𑀼𑀩𑁆𑀩𑀸𑀧𑀭𑀲𑀫𑁆𑀩𑀦𑁆𑀥𑀁, 𑀬𑀣𑀸𑀯𑀼𑀢𑁆𑀢𑀯𑀺𑀢𑁆𑀣𑀸𑀭𑀯𑀘𑀦𑀲𑁆𑀲 𑀯𑀸 𑀕𑀼𑀡𑀁 𑀤𑀲𑁆𑀲𑁂𑀢𑀻𑀢𑀺.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀧𑀭𑀫𑀲𑀼𑀔𑀼𑀫𑀕𑀫𑁆𑀪𑀻𑀭𑀤𑀼𑀭𑀦𑀼𑀩𑁄𑀥𑀢𑁆𑀣𑀧𑀭𑀺𑀤𑀻𑀧𑀦𑀸𑀬 𑀲𑀼𑀯𑀺𑀫𑀮𑀯𑀺𑀧𑀼𑀮𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀚𑀦𑀦𑀸𑀬 𑀅𑀚𑁆𑀚𑀯𑀫𑀤𑁆𑀤𑀯𑀲𑁄𑀭𑀘𑁆𑀘𑀲𑀤𑁆𑀥𑀸𑀲𑀢𑀺𑀥𑀺𑀢𑀺𑀩𑀼𑀤𑁆𑀥𑀺𑀔𑀦𑁆𑀢𑀺 𑀯𑀻𑀭𑀺𑀬𑀸𑀤𑀺𑀥𑀫𑁆𑀫𑀲𑀫𑀗𑁆𑀕𑀺𑀦𑀸 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀅𑀲𑀗𑁆𑀕𑀸𑀲𑀁𑀳𑀻𑀭𑀯𑀺𑀲𑀸𑀭𑀤𑀜𑀸𑀡𑀘𑀸𑀭𑀺𑀦𑀸 𑀅𑀦𑁂𑀓𑀧𑁆𑀧𑀪𑁂𑀤𑀲𑀓𑀲𑀫𑀬𑀲𑀫𑀬𑀦𑁆𑀢𑀭𑀕𑀳𑀦𑀚𑁆𑀛𑁄𑀕𑀸𑀳𑀺𑀦𑀸 𑀫𑀳𑀸𑀕𑀡𑀺𑀦𑀸 𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁂𑀦 𑀜𑀸𑀡𑀸𑀪𑀺𑀯𑀁𑀲𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸𑀫𑀣𑁂𑀭𑁂𑀦 𑀫𑀳𑀸𑀥𑀫𑁆𑀫𑀭𑀸𑀚𑀸𑀥𑀺𑀭𑀸𑀚𑀕𑀭𑀼𑀦𑀸 𑀓𑀢𑀸𑀬 𑀲𑀸𑀥𑀼𑀯𑀺𑀮𑀸𑀲𑀺𑀦𑀺𑀬𑀸 𑀦𑀸𑀫 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸 𑀩𑀸𑀳𑀺𑀭𑀦𑀺𑀤𑀸𑀦𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑀓𑀸𑀲𑀦𑀸.

𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀁

𑀧𑀭𑀺𑀩𑁆𑀩𑀸𑀚𑀓𑀓𑀣𑀸𑀯𑀡𑁆𑀡𑀦𑀸

𑁧. 𑀏𑀢𑁆𑀢𑀸𑀯𑀢𑀸 ¶ ¶ 𑀘 𑀧𑀭𑀫𑀲𑀡𑁆𑀳𑀲𑀼𑀔𑀼𑀫𑀕𑀫𑁆𑀪𑀻𑀭𑀤𑀼𑀤𑁆𑀤𑀲𑀸𑀦𑁂𑀓𑀯𑀺𑀥𑀦𑀬𑀲𑀫𑀮𑀗𑁆𑀓𑀢𑀁 𑀩𑁆𑀭𑀳𑁆𑀫𑀚𑀸𑀮𑀲𑁆𑀲 𑀲𑀸𑀥𑀸𑀭𑀡𑀢𑁄 𑀩𑀸𑀳𑀺𑀭𑀦𑀺𑀤𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀩𑁆𑀪𑀦𑁆𑀢𑀭𑀦𑀺𑀤𑀸𑀦𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 𑀅𑀢𑁆𑀣𑀸𑀥𑀺𑀕𑀫𑀲𑁆𑀲 𑀲𑀼𑀦𑀺𑀓𑁆𑀔𑀺𑀢𑁆𑀢𑀧𑀤𑀫𑀽𑀮𑀓𑀢𑁆𑀢𑀸, 𑀲𑀼𑀦𑀺𑀓𑁆𑀔𑀺𑀢𑁆𑀢𑀧𑀤𑀪𑀸𑀯𑀲𑁆𑀲 𑀘 ‘‘𑀇𑀤𑀫𑁂𑀯’’𑀦𑁆𑀢𑀺 𑀲𑀪𑀸𑀯𑀯𑀺𑀪𑀸𑀯𑀦𑁂𑀦 𑀧𑀤𑀯𑀺𑀪𑀸𑀕𑁂𑀦 𑀲𑀸𑀥𑁂𑀢𑀩𑁆𑀩𑀢𑁆𑀢𑀸 𑀧𑀞𑀫𑀁 𑀢𑀸𑀯 𑀧𑀤𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀏𑀯’’𑀦𑁆𑀢𑀺𑀆𑀤𑀺𑀫𑀸𑀳. 𑀧𑀤𑀯𑀺𑀪𑀸𑀕𑁂𑀦 𑀳𑀺 ‘‘𑀇𑀤𑀁 𑀦𑀸𑀫 𑀏𑀢𑀁 𑀧𑀤’’𑀦𑁆𑀢𑀺 𑀯𑀺𑀚𑀸𑀦𑀦𑁂𑀦 𑀢𑀁𑀢𑀁𑀧𑀤𑀸𑀦𑀼𑀭𑀽𑀧𑀁 𑀮𑀺𑀗𑁆𑀕𑀯𑀺𑀪𑀢𑁆𑀢𑀺 𑀯𑀘𑀦 𑀓𑀸𑀮𑀧𑀬𑁄𑀕𑀸𑀤𑀺𑀓𑀁 𑀲𑀫𑁆𑀫𑀸𑀧𑀢𑀺𑀝𑁆𑀞𑀸𑀧𑀦𑀢𑁄 𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀤𑀲𑁆𑀲 𑀲𑀼𑀦𑀺𑀓𑁆𑀔𑀺𑀢𑁆𑀢𑀢𑀸 𑀳𑁄𑀢𑀺, 𑀢𑀸𑀬 𑀘 𑀅𑀢𑁆𑀣𑀲𑁆𑀲 𑀲𑀫𑀥𑀺𑀕𑀫𑀺𑀬𑀢𑀸. 𑀬𑀣𑀸𑀳 ‘‘𑀲𑀼𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀯𑁂 𑁋 𑀧𑀤𑀩𑁆𑀬𑀜𑁆𑀚𑀦𑀲𑁆𑀲 𑀅𑀢𑁆𑀣𑁄𑀧𑀺 𑀲𑀼𑀦𑀬𑁄𑀳𑁄𑀢𑀻’’𑀢𑀺𑀆𑀤𑀺. 𑀅𑀧𑀺𑀘 𑀲𑀫𑁆𑀩𑀦𑁆𑀥𑀢𑁄, 𑀧𑀤𑀢𑁄, 𑀧𑀤𑀯𑀺𑀪𑀸𑀕𑀢𑁄, 𑀧𑀤𑀢𑁆𑀣𑀢𑁄 𑀅𑀦𑀼𑀬𑁄𑀕𑀢𑁄, 𑀧𑀭𑀺𑀳𑀸𑀭𑀢𑁄 𑀘𑀸𑀢𑀺 𑀙𑀳𑀸𑀓𑀸𑀭𑁂𑀳𑀺 𑀅𑀢𑁆𑀣𑀯𑀡𑁆𑀡𑀦𑀸 𑀓𑀸𑀢𑀩𑁆𑀩𑀸. 𑀢𑀢𑁆𑀣 𑀲𑀫𑁆𑀩𑀦𑁆𑀥𑁄 𑀦𑀸𑀫 𑀤𑁂𑀲𑀦𑀸𑀲𑀫𑁆𑀩𑀦𑁆𑀥𑁄, 𑀬𑀁 𑀮𑁄𑀓𑀺𑀬𑀸 ‘‘𑀉𑀫𑁆𑀫𑀼𑀕𑁆𑀖𑀸𑀢𑁄’’𑀢𑀺𑀧𑀺 𑀯𑀤𑀦𑁆𑀢𑀺, 𑀲𑁄 𑀧𑀦 𑀧𑀸𑀴𑀺𑀬𑀸 𑀦𑀺𑀤𑀸𑀦𑀧𑀸𑀴𑀺𑀯𑀲𑁂𑀦, 𑀦𑀺𑀤𑀸𑀦𑀧𑀸𑀴𑀺𑀬𑀸 𑀘 𑀲𑀗𑁆𑀕𑀻𑀢𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀁 𑀤𑀲𑁆𑀲𑁂𑀦𑁆𑀢𑁂𑀦 𑀳𑀺 𑀦𑀺𑀤𑀸𑀦𑀧𑀸𑀴𑀺𑀬𑀸 𑀲𑀫𑁆𑀩𑀦𑁆𑀥𑁄 𑀤𑀲𑁆𑀲𑀺𑀢𑁄, 𑀢𑀲𑁆𑀫𑀸 𑀧𑀤𑀸𑀤𑀺𑀯𑀲𑁂𑀦𑁂𑀯 𑀲𑀁𑀯𑀡𑁆𑀡𑀦𑀁 𑀓𑀭𑁄𑀦𑁆𑀢𑁄 ‘‘𑀏𑀯’’𑀦𑁆𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 ‘‘𑀏𑀯𑀦𑁆𑀢𑀺 𑀦𑀺𑀧𑀸𑀢𑀧𑀤𑀦𑁆𑀢𑀺𑀆𑀤𑀺𑀦𑀸 𑀧𑀤𑀢𑁄, 𑀧𑀤𑀯𑀺𑀪𑀸𑀕𑀢𑁄 𑀘 𑀲𑀁𑀯𑀡𑁆𑀡𑀦𑀁 𑀓𑀭𑁄𑀢𑀺 𑀧𑀤𑀸𑀦𑀁 𑀢𑀩𑁆𑀩𑀺𑀲𑁂𑀲𑀸𑀦𑀜𑁆𑀘 𑀤𑀲𑁆𑀲𑀺𑀢𑀢𑁆𑀢𑀸. 𑀧𑀤𑀯𑀺𑀪𑀸𑀕𑁄𑀢𑀺 𑀳𑀺 𑀧𑀤𑀸𑀦𑀁 𑀯𑀺𑀲𑁂𑀲𑁄𑀬𑁂𑀯 𑀅𑀥𑀺𑀧𑁆𑀧𑁂𑀢𑁄, 𑀦 𑀧𑀤𑀯𑀺𑀕𑁆𑀕𑀳𑁄. 𑀧𑀤𑀸𑀦𑀺 𑀘 𑀧𑀤𑀯𑀺𑀪𑀸𑀕𑁄 𑀘 𑀧𑀤𑀯𑀺𑀪𑀸𑀕𑁄. 𑀅𑀣 𑀯𑀸 𑀧𑀤𑀯𑀺𑀪𑀸𑀕𑁄 𑀘 𑀧𑀤𑀯𑀺𑀕𑁆𑀕𑀳𑁄 𑀘 𑀧𑀤𑀯𑀺𑀪𑀸𑀕𑁄𑀢𑀺 𑀏𑀓𑀲𑁂𑀲𑀯𑀲𑁂𑀦 𑀧𑀤𑀧𑀤𑀯𑀺𑀕𑁆𑀕𑀳𑀸𑀧𑀺 𑀧𑀤𑀯𑀺𑀪𑀸𑀕𑀲𑀤𑁆𑀤𑁂𑀦 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀤𑀯𑀺𑀕𑁆𑀕𑀳𑀢𑁄 𑀧𑀦 ‘‘𑀪𑀺𑀓𑁆𑀔𑀽𑀦𑀁 𑀲𑀗𑁆𑀖𑁄’’𑀢𑀺𑀆𑀤𑀺𑀦𑀸 𑀉𑀧𑀭𑀺 𑀲𑀁𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀢𑀺, 𑀢𑀣𑀸 𑀧𑀤𑀢𑁆𑀣𑀸𑀦𑀼𑀬𑁄𑀕𑀧𑀭𑀺𑀳𑀸𑀭𑁂𑀳𑀺𑀧𑀺. 𑀏𑀯𑀦𑁆𑀢𑀺 𑀏𑀢𑁆𑀣 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄 𑀅𑀦𑁆𑀢𑀭𑀸𑀲𑀤𑁆𑀤 𑀘 𑀲𑀤𑁆𑀤𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀢𑁆𑀢𑀸, 𑀦𑀬𑀕𑁆𑀕𑀳𑀡𑁂𑀦 𑀯𑀸 𑀢𑁂 𑀕𑀳𑀺𑀢𑀸. 𑀢𑁂𑀦𑀸𑀳 ‘‘𑀫𑁂𑀢𑀺𑀆𑀤𑀻𑀦𑀺 𑀦𑀸𑀫𑀧𑀤𑀸𑀦𑀻’’𑀢𑀺. 𑀇𑀢𑀭𑀣𑀸 𑀳𑀺 𑀅𑀦𑁆𑀢𑀭𑀸𑀲𑀤𑁆𑀤𑀁 𑀘 𑀲𑀤𑁆𑀤𑀸𑀤𑀻𑀦𑀫𑁆𑀧𑀺 𑀦𑀺𑀧𑀸𑀢𑀪𑀸𑀯𑁄 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸. 𑀫𑁂𑀢𑀺𑀆𑀤𑀻𑀦𑀻𑀢𑀺 𑀏𑀢𑁆𑀣 𑀧𑀦 𑀆𑀤𑀺-𑀲𑀤𑁆𑀤𑁂𑀦 𑀬𑀸𑀯 ¶ 𑀧𑀝𑀺𑀲𑀤𑁆𑀤𑁄 ¶ , 𑀢𑀸𑀯 𑀢𑀤𑀯𑀲𑀺𑀝𑁆𑀞𑀸𑀬𑁂𑀯 𑀲𑀤𑁆𑀤𑀸 𑀲𑀗𑁆𑀕𑀳𑀺𑀢𑀸. 𑀧𑀝𑀻𑀢𑀺 𑀉𑀧𑀲𑀕𑁆𑀕𑀧𑀤𑀁 𑀧𑀢𑀺𑀲𑀤𑁆𑀤𑀲𑁆𑀲 𑀓𑀸𑀭𑀺𑀬𑀪𑀸𑀯𑀢𑁄.

𑀇𑀤𑀸𑀦𑀺 𑀅𑀢𑁆𑀣𑀼𑀤𑁆𑀥𑀸𑀭𑀓𑁆𑀓𑀫𑁂𑀦 𑀧𑀤𑀢𑁆𑀣𑀢𑁄 𑀲𑀁𑀯𑀡𑁆𑀡𑀦𑀁 𑀓𑀭𑁄𑀦𑁆𑀢𑁄 ‘‘𑀅𑀢𑁆𑀣𑀢𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀲𑁄𑀢𑀽𑀦𑀁 𑀲𑀁𑀯𑀡𑁆𑀡𑀦𑀸𑀦𑀬𑀓𑁄𑀲𑀮𑁆𑀮𑀢𑁆𑀣𑀁 𑀲𑀁𑀯𑀡𑁆𑀡𑀦𑀸𑀧𑁆𑀧𑀓𑀸𑀭𑀸 𑀯𑀢𑁆𑀢𑀩𑁆𑀩𑀸. 𑀓𑀣𑀁?

𑀏𑀓𑀦𑀸𑀴𑀺𑀓𑀸 𑀓𑀣𑀸 𑀘, 𑀘𑀢𑀼𑀭𑀲𑁆𑀲𑀸 𑀢𑀣𑀸𑀧𑀺 𑀘;

𑀦𑀺𑀲𑀺𑀦𑁆𑀦𑀯𑀢𑁆𑀢𑀺𑀓𑀸 𑀘𑁂𑀯, 𑀢𑀺𑀥𑀸 𑀲𑀁𑀯𑀡𑁆𑀡𑀦𑀁 𑀯𑀤𑁂.

𑀢𑀢𑁆𑀣 𑀧𑀸𑀴𑀺𑀁 𑀯𑀢𑁆𑀯𑀸 𑀏𑀓𑁂𑀓𑀧𑀤𑀲𑁆𑀲 𑀅𑀢𑁆𑀣𑀓𑀣𑀦𑀁 𑀏𑀓𑀸𑀬 𑀦𑀸𑀴𑀺𑀬𑀸 𑀫𑀺𑀦𑀺𑀢𑀲𑀤𑀺𑀲𑀢𑁆𑀢𑀸, 𑀏𑀓𑁂𑀓𑀁 𑀯𑀸 𑀧𑀤𑀁 𑀦𑀸𑀴𑀁 𑀫𑀽𑀮𑀁, 𑀏𑀓𑀫𑁂𑀓𑀁 𑀧𑀤𑀁 𑀯𑀸 𑀦𑀸𑀴𑀺𑀓𑀸 𑀅𑀢𑁆𑀣𑀦𑀺𑀕𑁆𑀕𑀫𑀦𑀫𑀕𑁆𑀕𑁄 𑀏𑀢𑀺𑀲𑁆𑀲𑀸𑀢𑀺 𑀓𑀢𑁆𑀯𑀸 𑀏𑀓𑀦𑀸𑀴𑀺𑀓𑀸 𑀦𑀸𑀫. 𑀧𑀝𑀺𑀧𑀓𑁆𑀔𑀁 𑀤𑀲𑁆𑀲𑁂𑀢𑁆𑀯𑀸, 𑀧𑀝𑀺𑀧𑀓𑁆𑀔𑀲𑁆𑀲 𑀘 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸, 𑀲𑀧𑀓𑁆𑀔𑀁 𑀤𑀲𑁆𑀲𑁂𑀢𑁆𑀯𑀸, 𑀲𑀧𑀓𑁆𑀔𑀲𑁆𑀲 𑀘 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸, 𑀓𑀣𑀦𑀁 𑀘𑀢𑀽𑀳𑀺 𑀪𑀸𑀕𑁂𑀳𑀺 𑀯𑀼𑀢𑁆𑀢𑀢𑁆𑀢𑀸, 𑀘𑀢𑁆𑀢𑀸𑀭𑁄 𑀯𑀸 𑀭𑀲𑁆𑀲𑀸 𑀲𑀮𑁆𑀮𑀓𑁆𑀔𑀡𑀽𑀧𑀸𑀬𑀸 𑀏𑀢𑀺𑀲𑁆𑀲𑀸𑀢𑀺 𑀓𑀢𑁆𑀯𑀸 𑀘𑀢𑀼𑀭𑀲𑁆𑀲𑀸 𑀦𑀸𑀫, 𑀯𑀺𑀲𑀪𑀸𑀕𑀥𑀫𑁆𑀫𑀯𑀲𑁂𑀦𑁂𑀯 𑀧𑀭𑀺𑀬𑁄𑀲𑀸𑀦𑀁 𑀕𑀦𑁆𑀢𑁆𑀯𑀸 𑀧𑀼𑀦 𑀲𑀪𑀸𑀕𑀥𑀫𑁆𑀫𑀯𑀲𑁂𑀦𑁂𑀯 𑀧𑀭𑀺𑀬𑁄𑀲𑀸𑀦𑀕𑀫𑀦𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀆𑀯𑀢𑁆𑀢𑀦𑀬𑀼𑀢𑁆𑀢𑀢𑁆𑀢𑀸, 𑀦𑀺𑀬𑀫𑀢𑁄 𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀆𑀭𑀤𑁆𑀥𑀲𑁆𑀲 𑀯𑀢𑁆𑀢𑁄 𑀲𑀁𑀯𑀢𑁆𑀢𑁄 𑀏𑀢𑀺𑀲𑁆𑀲𑀸𑀢𑀺 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑀯𑀢𑁆𑀢𑀺𑀓𑀸 𑀦𑀸𑀫, 𑀬𑀣𑀸𑀭𑀤𑁆𑀥𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀭𑀺𑀬𑁄𑀲𑀸𑀦𑀸𑀧𑀺 𑀦𑀺𑀬𑀼𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀲𑁄𑀤𑀸𑀳𑀭𑀡𑀸 𑀧𑀦 𑀓𑀣𑀸 𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬 𑀢𑀝𑁆𑀝𑀻𑀓𑀸𑀬𑀁 𑀏𑀓𑀸𑀤𑀲𑀦𑀺𑀧𑀸𑀢𑁂 𑀕𑁄𑀧𑀸𑀮𑀓𑀲𑀼𑀢𑁆𑀢𑀯𑀡𑁆𑀡𑀦𑀸𑀢𑁄 𑀕𑀳𑁂𑀢𑀩𑁆𑀩𑀸.

𑀪𑁂𑀤𑀓𑀣𑀸 𑀢𑀢𑁆𑀯𑀓𑀣𑀸, 𑀧𑀭𑀺𑀬𑀸𑀬𑀓𑀣𑀸𑀧𑀺 𑀘;

𑀇𑀢𑀺 𑀅𑀢𑁆𑀣𑀓𑁆𑀓𑀫𑁂 𑀯𑀺𑀤𑁆𑀯𑀸, 𑀢𑀺𑀥𑀸 𑀲𑀁𑀯𑀡𑁆𑀡𑀦𑀁 𑀯𑀤𑁂.

𑀢𑀢𑁆𑀣 𑀧𑀓𑀢𑀺𑀆𑀤𑀺𑀯𑀺𑀘𑀸𑀭𑀡𑀸 𑀪𑁂𑀤𑀓𑀣𑀸 𑀬𑀣𑀸 ‘‘𑀩𑀼𑀚𑁆𑀛𑀢𑀻𑀢𑀺 𑀩𑀼𑀤𑁆𑀥𑁄’’𑀢𑀺𑀆𑀤𑀺. 𑀲𑀭𑀽𑀧𑀯𑀺𑀘𑀸𑀭𑀡𑀸 𑀢𑀢𑁆𑀯𑀓𑀣𑀸 𑀬𑀣𑀸 ‘‘𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄’’𑀢𑀺𑀆𑀤𑀺 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑁯𑁭; 𑀧𑀝𑀺. 𑀫. 𑁧.𑁧𑁬𑁧). 𑀯𑁂𑀯𑀘𑀦𑀯𑀺𑀘𑀸𑀭𑀡𑀸 𑀧𑀭𑀺𑀬𑀸𑀬𑀓𑀣𑀸 𑀬𑀣𑀸 ‘‘𑀩𑀼𑀤𑁆𑀥𑁄 𑀪𑀕𑀯𑀸 𑀲𑀩𑁆𑀩𑀜𑁆𑀜𑀽 𑀮𑁄𑀓𑀦𑀸𑀬𑀓𑁄’’𑀢𑀺𑀆𑀤𑀺 (𑀦𑁂𑀢𑁆𑀢𑀺. 𑁩𑁮 𑀯𑁂𑀯𑀘𑀦𑀸𑀳𑀸𑀭𑀯𑀺𑀪𑀗𑁆𑀕𑀦𑀺𑀲𑁆𑀲𑀺𑀢𑁄 𑀧𑀸𑀴𑀺).

𑀧𑀬𑁄𑀚𑀦𑀜𑁆𑀘 𑀧𑀺𑀡𑁆𑀟𑀢𑁆𑀣𑁄, 𑀅𑀦𑀼𑀲𑀦𑁆𑀥𑀺 𑀘 𑀘𑁄𑀤𑀦𑀸;

𑀧𑀭𑀺𑀳𑀸𑀭𑁄 𑀘 𑀲𑀩𑁆𑀩𑀢𑁆𑀣, 𑀧𑀜𑁆𑀘𑀥𑀸 𑀯𑀡𑁆𑀡𑀦𑀁 𑀯𑀤𑁂.

𑀢𑀢𑁆𑀣 ¶ ¶ 𑀧𑀬𑁄𑀚𑀦𑀁 𑀦𑀸𑀫 𑀤𑁂𑀲𑀦𑀸𑀨𑀮𑀁, 𑀢𑀁 𑀧𑀦 𑀲𑀼𑀢𑀫𑀬𑀜𑀸𑀡𑀸𑀤𑀺. 𑀧𑀺𑀡𑁆𑀟𑀢𑁆𑀣𑁄 𑀦𑀸𑀫 𑀯𑀺𑀧𑁆𑀧𑀓𑀺𑀡𑁆𑀡𑀲𑁆𑀲 𑀅𑀢𑁆𑀣𑀲𑁆𑀲 𑀲𑀼𑀯𑀺𑀚𑀸𑀦𑀦𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀓𑀣𑀦𑀁. 𑀅𑀦𑀼𑀲𑀦𑁆𑀥𑀺 𑀦𑀸𑀫 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀸𑀤𑀺. 𑀘𑁄𑀤𑀦𑀸 𑀦𑀸𑀫 𑀬𑀣𑀸𑀯𑀼𑀢𑁆𑀢𑀲𑁆𑀲 𑀯𑀘𑀦𑀲𑁆𑀲 𑀯𑀺𑀭𑁄𑀥𑀺𑀓𑀣𑀦𑀁. 𑀧𑀭𑀺𑀳𑀸𑀭𑁄 𑀦𑀸𑀫 𑀢𑀲𑁆𑀲 𑀅𑀯𑀺𑀭𑁄𑀥𑀺𑀓𑀣𑀦𑀁.

𑀉𑀫𑁆𑀫𑀼𑀕𑁆𑀖𑀸𑀢𑁄 𑀧𑀤𑀜𑁆𑀘𑁂𑀯, 𑀧𑀤𑀢𑁆𑀣𑁄 𑀧𑀤𑀯𑀺𑀕𑁆𑀕𑀳𑁄;

𑀘𑀸𑀮𑀦𑀸 𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀙𑀥𑀸 𑀲𑀁𑀯𑀡𑁆𑀡𑀦𑀁 𑀯𑀤𑁂. (𑀯𑀚𑀺𑀭. 𑀝𑀻. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀯𑀡𑁆𑀡𑀦𑀸);

𑀢𑀢𑁆𑀣 𑀅𑀚𑁆𑀛𑀢𑁆𑀢𑀺𑀓𑀸𑀤𑀺𑀦𑀺𑀤𑀸𑀦𑀁 𑀉𑀫𑁆𑀫𑀼𑀕𑁆𑀖𑀸𑀢𑁄. ‘‘𑀏𑀯𑀫𑀺𑀤’’𑀦𑁆𑀢𑀺 𑀦𑀸𑀦𑀸𑀯𑀺𑀥𑁂𑀦 𑀧𑀤𑀯𑀺𑀲𑁂𑀲𑀢𑀸𑀓𑀣𑀦𑀁 𑀧𑀤𑀁, 𑀲𑀤𑁆𑀤𑀢𑁆𑀣𑀸𑀥𑀺𑀧𑁆𑀧𑀸𑀬𑀢𑁆𑀣𑀸𑀤𑀺 𑀧𑀤𑀢𑁆𑀣𑁄. 𑀅𑀦𑁂𑀓𑀥𑀸 𑀦𑀺𑀩𑁆𑀩𑀘𑀦𑀁 𑀧𑀤𑀯𑀺𑀕𑁆𑀕𑀳𑁄. 𑀘𑀸𑀮𑀦𑀸 𑀦𑀸𑀫 𑀘𑁄𑀤𑀦𑀸. 𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀧𑀭𑀺𑀳𑀸𑀭𑁄.

𑀲𑀫𑀼𑀝𑁆𑀞𑀸𑀦𑀁 𑀧𑀤𑀢𑁆𑀣𑁄 𑀘, 𑀪𑀸𑀯𑀸𑀦𑀼𑀯𑀸𑀤𑀯𑀺𑀥𑀬𑁄;

𑀯𑀺𑀭𑁄𑀥𑁄 𑀧𑀭𑀺𑀳𑀸𑀭𑁄 𑀘, 𑀦𑀺𑀕𑀫𑀦𑀦𑁆𑀢𑀺 𑀅𑀝𑁆𑀞𑀥𑀸.

𑀢𑀢𑁆𑀣 𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀅𑀚𑁆𑀛𑀢𑁆𑀢𑀺𑀓𑀸𑀤𑀺𑀦𑀺𑀤𑀸𑀦𑀁. 𑀧𑀤𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑁂𑀢𑀸𑀦𑀥𑀺𑀧𑁆𑀧𑁂𑀢𑀸𑀤𑀺𑀯𑀲𑁂𑀦 𑀅𑀦𑁂𑀓𑀥𑀸 𑀧𑀤𑀲𑁆𑀲 𑀅𑀢𑁆𑀣𑁄. 𑀪𑀸𑀯𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀼𑀯𑀸𑀤𑀯𑀺𑀥𑀬𑁄𑀢𑀺 𑀧𑀞𑀫𑀯𑀘𑀦𑀁 𑀯𑀺𑀥𑀺, 𑀢𑀤𑀸𑀯𑀺𑀓𑀭𑀡𑀯𑀲𑁂𑀦 𑀧𑀘𑁆𑀙𑀸 𑀯𑀘𑀦𑀁 𑀅𑀦𑀼𑀯𑀸𑀤𑁄, 𑀯𑀺𑀲𑁂𑀲𑀦𑀯𑀺𑀲𑁂𑀲𑁆𑀬𑀸𑀦𑀁 𑀯𑀸 𑀯𑀺𑀥𑀸𑀦𑀼𑀯𑀸𑀤 𑀲𑀫𑀜𑁆𑀜𑀸. 𑀯𑀺𑀭𑁄𑀥𑁄𑀢𑀺 𑀅𑀢𑁆𑀣𑀦𑀺𑀘𑁆𑀙𑀬𑀦𑀢𑁆𑀣𑀁 𑀘𑁄𑀤𑀦𑀸. 𑀧𑀭𑀺𑀳𑀸𑀭𑁄𑀢𑀺 𑀢𑀲𑁆𑀲𑀸 𑀲𑁄𑀥𑀦𑀸. 𑀦𑀺𑀕𑀫𑀦𑀦𑁆𑀢𑀺 𑀅𑀦𑀼𑀲𑀦𑁆𑀥𑀺𑀬𑀸 𑀅𑀦𑀼𑀭𑀽𑀧𑀁 𑀅𑀧𑁆𑀧𑀦𑀸.

𑀆𑀤𑀺𑀢𑁄 𑀢𑀲𑁆𑀲 𑀦𑀺𑀤𑀸𑀦𑀁, 𑀯𑀢𑁆𑀢𑀩𑁆𑀩𑀁 𑀢𑀧𑁆𑀧𑀬𑁄𑀚𑀦𑀁;

𑀧𑀺𑀡𑁆𑀟𑀢𑁆𑀣𑁄 𑀘𑁂𑀯 𑀧𑀤𑀢𑁆𑀣𑁄, 𑀲𑀫𑁆𑀩𑀦𑁆𑀥𑁄 𑀅𑀥𑀺𑀧𑁆𑀧𑀸𑀬𑀓𑁄;

𑀘𑁄𑀤𑀦𑀸 𑀲𑁄𑀥𑀦𑀸 𑀘𑁂𑀢𑀺, 𑀅𑀝𑁆𑀞𑀥𑀸 𑀯𑀡𑁆𑀡𑀦𑀁 𑀯𑀤𑁂.

𑀢𑀢𑁆𑀣 𑀲𑀫𑁆𑀩𑀦𑁆𑀥𑁄 𑀦𑀸𑀫 𑀧𑀼𑀩𑁆𑀩𑀸𑀧𑀭𑀲𑀫𑁆𑀩𑀦𑁆𑀥𑁄, 𑀬𑁄 ‘‘𑀅𑀦𑀼𑀲𑀦𑁆𑀥𑀻’’𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀲𑀸 𑀯𑀼𑀢𑁆𑀢𑀢𑁆𑀣𑀸𑀯, 𑀏𑀯𑀫𑀸𑀤𑀺𑀦𑀸 𑀢𑀢𑁆𑀣 𑀢𑀢𑁆𑀣𑀸𑀕𑀢𑁂 𑀲𑀁𑀯𑀡𑁆𑀡𑀦𑀸𑀧𑁆𑀧𑀓𑀸𑀭𑁂 𑀜𑀢𑁆𑀯𑀸 𑀲𑀩𑁆𑀩𑀢𑁆𑀣 𑀬𑀣𑀸𑀭𑀳𑀁 𑀯𑀺𑀘𑁂𑀢𑀩𑁆𑀩𑀸𑀢𑀺.

𑀏𑀯𑀫𑀦𑁂𑀓𑀢𑁆𑀣𑀧𑁆𑀧𑀪𑁂𑀤𑀢𑀸 𑀧𑀬𑁄𑀕𑀢𑁄𑀯 𑀜𑀸𑀢𑀩𑁆𑀩𑀸𑀢𑀺 𑀢𑀩𑁆𑀩𑀲𑁂𑀦 𑀢𑀁 𑀲𑀫𑀢𑁆𑀣𑁂𑀢𑀼𑀁 ‘‘𑀢𑀣𑀸 𑀳𑁂𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀅𑀬𑀁 𑀲𑀤𑁆𑀤𑁄 𑀇𑀫𑀲𑁆𑀲𑀢𑁆𑀣𑀲𑁆𑀲 𑀯𑀸𑀘𑀓𑁄𑀢𑀺 𑀲𑀗𑁆𑀓𑁂𑀢𑀯𑀯𑀢𑁆𑀣𑀺𑀢𑀸𑀬𑁂𑀯 𑀲𑀤𑁆𑀤𑀸 𑀢𑀁 𑀢𑀤𑀢𑁆𑀣𑀲𑁆𑀲 𑀯𑀸𑀘𑀓𑀸 ¶ , 𑀲𑀗𑁆𑀓𑁂𑀢𑁄 𑀘 𑀦𑀸𑀫 𑀧𑀬𑁄𑀕𑀯𑀲𑁂𑀦 𑀲𑀺𑀤𑁆𑀥𑁄𑀢𑀺 𑀤𑀲𑁆𑀲𑁂𑀢𑀼𑀫𑁆𑀧𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀫𑀻𑀤𑀺𑀲𑁂𑀲𑀼. 𑀦𑀦𑀼 𑀘 𑁋

‘‘𑀬𑀣𑀸𑀧𑀺 ¶ 𑀧𑀼𑀧𑁆𑀨𑀭𑀸𑀲𑀺𑀫𑁆𑀳𑀸, 𑀓𑀬𑀺𑀭𑀸 𑀫𑀸𑀮𑀸𑀕𑀼𑀡𑁂 𑀩𑀳𑀽;

𑀏𑀯𑀁 𑀚𑀸𑀢𑁂𑀦 𑀫𑀘𑁆𑀘𑁂𑀦, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁 𑀩𑀳𑀼’’𑀦𑁆𑀢𑀺. (𑀥. 𑀧. 𑁫𑁩);

𑀏𑀢𑁆𑀣 𑀏𑀯𑀁-𑀲𑀤𑁆𑀤𑁂𑀦 𑀉𑀧𑀫𑀸𑀓𑀸𑀭𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸 𑀆𑀓𑀸𑀭𑀢𑁆𑀣𑁄𑀬𑁂𑀯 𑀏𑀯𑀁-𑀲𑀤𑁆𑀤𑁄 𑀲𑀺𑀬𑀸𑀢𑀺? 𑀦, 𑀯𑀺𑀲𑁂𑀲𑀲𑀩𑁆𑀪𑀸𑀯𑀢𑁄. ‘‘𑀏𑀯𑀁 𑀩𑁆𑀬𑀸 𑀔𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨𑁩𑁪, 𑁩𑁯𑁬) 𑀳𑀺 𑀆𑀓𑀸𑀭𑀫𑀢𑁆𑀢𑀯𑀸𑀘𑀓𑁄𑀬𑁂𑀯 𑀆𑀓𑀸𑀭𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀦 𑀧𑀦 𑀆𑀓𑀸𑀭𑀯𑀺𑀲𑁂𑀲𑀯𑀸𑀘𑀓𑁄. 𑀏𑀢𑁆𑀣 𑀳𑀺 𑀓𑀺𑀜𑁆𑀘𑀸𑀧𑀺 𑀧𑀼𑀧𑁆𑀨𑀭𑀸𑀲𑀺𑀲𑀤𑀺𑀲𑀢𑁄 𑀫𑀦𑀼𑀲𑁆𑀲𑀽𑀧𑀧𑀢𑁆𑀢𑀺 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬 𑀲𑀤𑁆𑀥𑀫𑁆𑀫𑀲𑀯𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀪𑁄𑀕𑀲𑀫𑁆𑀧𑀢𑁆𑀢𑀺𑀆𑀤𑀺𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀺𑀭𑀺𑀬𑀸𑀳𑁂𑀢𑀼𑀲𑀫𑀼𑀤𑀸𑀬𑀢𑁄 𑀲𑁄𑀪𑀸𑀲𑀼𑀕𑀦𑁆𑀥𑀢𑀸𑀤𑀺𑀕𑀼𑀡𑀬𑁄𑀕𑁂𑀦 𑀫𑀸𑀮𑀸𑀕𑀼𑀡𑀲𑀤𑀺𑀲𑀺𑀬𑁄 𑀩𑀳𑀼𑀓𑀸 𑀧𑀼𑀜𑁆𑀜𑀓𑀺𑀭𑀺𑀬𑀸 𑀫𑀭𑀺𑀢𑀩𑁆𑀩𑀲𑀪𑀸𑀯𑀢𑀸𑀬 𑀫𑀘𑁆𑀘𑁂𑀦 𑀲𑀢𑁆𑀢𑁂𑀦 𑀓𑀢𑁆𑀢𑀩𑁆𑀩𑀸𑀢𑀺 𑀅𑀢𑁆𑀣𑀲𑁆𑀲 𑀚𑁄𑀢𑀺𑀢𑀢𑁆𑀢𑀸 𑀧𑀼𑀧𑁆𑀨𑀭𑀸𑀲𑀺𑀫𑀸𑀮𑀸𑀕𑀼𑀡𑀸𑀯 𑀉𑀧𑀫𑀸 𑀦𑀸𑀫 𑀉𑀧𑀫𑀻𑀬𑀢𑀺 𑀏𑀢𑀸𑀬𑀸𑀢𑀺 𑀓𑀢𑁆𑀯𑀸, 𑀢𑁂𑀲𑀁 𑀉𑀧𑀫𑀸𑀓𑀸𑀭𑁄 𑀘 𑀬𑀣𑀸𑀲𑀤𑁆𑀤𑁂𑀦 𑀅𑀦𑀺𑀬𑀫𑀢𑁄 𑀚𑁄𑀢𑀺𑀢𑁄, 𑀢𑀲𑁆𑀫𑀸 ‘‘𑀏𑀯𑀁-𑀲𑀤𑁆𑀤𑁄 𑀦𑀺𑀬𑀫𑀢𑁄 𑀉𑀧𑀫𑀸𑀓𑀸𑀭𑀦𑀺𑀕𑀫𑀦𑀢𑁆𑀣𑁄’’𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁, 𑀢𑀣𑀸𑀧𑀺 𑀲𑁄 𑀉𑀧𑀫𑀸𑀓𑀸𑀭𑁄 𑀦𑀺𑀬𑀫𑀺𑀬𑀫𑀸𑀦𑁄 𑀅𑀢𑁆𑀣𑀢𑁄 𑀉𑀧𑀫𑀸𑀯 𑀳𑁄𑀢𑀺 𑀦𑀺𑀲𑁆𑀲𑀬𑀪𑀽𑀢𑀁 𑀢𑀫𑀦𑁆𑀢𑀭𑁂𑀦 𑀦𑀺𑀲𑁆𑀲𑀺𑀢𑀪𑀽𑀢𑀲𑁆𑀲 𑀉𑀧𑀫𑀸𑀓𑀸𑀭𑀲𑁆𑀲 𑀅𑀮𑀩𑁆𑀪𑀫𑀸𑀦𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀉𑀧𑀫𑀸𑀬𑀁 𑀆𑀕𑀢𑁄’’𑀢𑀺. 𑀅𑀣 𑀯𑀸 𑀉𑀧𑀫𑀻𑀬𑀦𑀁 𑀲𑀤𑀺𑀲𑀻𑀓𑀭𑀡𑀦𑁆𑀢𑀺 𑀓𑀢𑁆𑀯𑀸 𑀧𑀼𑀧𑁆𑀨𑀭𑀸𑀲𑀺𑀫𑀸𑀮𑀸𑀕𑀼𑀡𑁂𑀳𑀺 𑀲𑀤𑀺𑀲𑀪𑀸𑀯𑀲𑀗𑁆𑀔𑀸𑀢𑁄 𑀉𑀧𑀫𑀸𑀓𑀸𑀭𑁄𑀬𑁂𑀯 𑀉𑀧𑀫𑀸 𑀦𑀸𑀫. ‘‘𑀲𑀤𑁆𑀥𑀫𑁆𑀫𑀢𑁆𑀢𑀁 𑀲𑀺𑀬𑁄𑀧𑀫𑀸’’𑀢𑀺 𑀳𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀆𑀓𑀸𑀭𑀫𑀢𑁆𑀢𑀯𑀸𑀘𑀓𑁄𑀯 𑀆𑀓𑀸𑀭𑀢𑁆𑀣𑁄 𑀏𑀯𑀁-𑀲𑀤𑁆𑀤𑁄. 𑀉𑀧𑀫𑀸𑀲𑀗𑁆𑀔𑀸𑀢𑀆𑀓𑀸𑀭𑀯𑀺𑀲𑁂𑀲𑀯𑀸𑀘𑀓𑁄 𑀧𑀦 𑀉𑀧𑀫𑀸𑀢𑁆𑀣𑁄𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀉𑀧𑀫𑀸𑀬𑀁 𑀆𑀕𑀢𑁄’’𑀢𑀺.

𑀢𑀣𑀸 ‘‘𑀏𑀯𑀁 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀅𑀪𑀺𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀉𑀧𑀤𑀺𑀲𑀺𑀬𑀫𑀸𑀦𑀸𑀬 𑀲𑀫𑀡𑀲𑀸𑀭𑀼𑀧𑁆𑀧𑀸𑀬 𑀆𑀓𑀧𑁆𑀧𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑀤𑀺𑀲𑀦𑀸𑀓𑀸𑀭𑁄𑀧𑀺 𑀅𑀢𑁆𑀣𑀢𑁄 𑀉𑀧𑀤𑁂𑀲𑁄𑀬𑁂𑀯𑀸𑀢𑀺 𑀆𑀳 ‘‘𑀏𑀯𑀁…𑀧𑁂… 𑀉𑀧𑀤𑁂𑀲𑁂’’𑀢𑀺. 𑀏𑀯𑀫𑁂𑀢𑀦𑁆𑀢𑀺 𑀏𑀢𑁆𑀣 𑀧𑀦 𑀪𑀕𑀯𑀢𑀸 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀅𑀯𑀺𑀧𑀭𑀻𑀢𑀢𑁄 𑀚𑀸𑀦𑀦𑁆𑀢𑁂𑀳𑀺 𑀓𑀢𑀁 𑀢𑀢𑁆𑀣 𑀲𑀁𑀯𑀺𑀚𑁆𑀚𑀫𑀸𑀦𑀕𑀼𑀡𑀸𑀦𑀁 𑀧𑀓𑀸𑀭𑁂𑀳𑀺 𑀳𑀁𑀲𑀦𑀁 𑀉𑀤𑀕𑁆𑀕𑀢𑀸𑀓𑀭𑀡𑀁 𑀲𑀫𑁆𑀧𑀳𑀁𑀲𑀦𑀁. 𑀢𑀢𑁆𑀣 𑀲𑀫𑁆𑀧𑀳𑀁𑀲𑀦𑀸𑀓𑀸𑀭𑁄𑀧𑀺 𑀅𑀢𑁆𑀣𑀢𑁄 𑀲𑀫𑁆𑀧𑀳𑀁𑀲𑀦𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀫𑁆𑀧𑀳𑀁𑀲𑀦𑁂𑀢𑀺. 𑀏𑀯𑀫𑁂𑀯 𑀧𑀦𑀸𑀬𑀦𑁆𑀢𑀺 𑀏𑀢𑁆𑀣 𑀘 𑀤𑁄𑀲𑀯𑀺𑀪𑀸𑀯𑀦𑁂𑀦 𑀕𑀸𑀭𑀬𑁆𑀳𑀯𑀘𑀦𑀁 𑀕𑀭𑀳𑀡𑀁, 𑀢𑀤𑀸𑀓𑀸𑀭𑁄𑀧𑀺 𑀅𑀢𑁆𑀣𑀢𑁄 𑀕𑀭𑀳𑀡𑀁 𑀦𑀸𑀫, 𑀢𑀲𑁆𑀫𑀸 ‘‘𑀕𑀭𑀳𑀡𑁂’’𑀢𑀺 ¶ 𑀯𑀼𑀢𑁆𑀢𑀁. 𑀲𑁄 𑀘𑁂𑀢𑁆𑀣 𑀕𑀭𑀳𑀡𑀸𑀓𑀸𑀭𑁄 ‘‘𑀯𑀲𑀮𑀻’’𑀢𑀺𑀆𑀤𑀺𑀔𑀼𑀁𑀲𑀦𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀢𑁄 𑀏𑀯𑀁-𑀲𑀤𑁆𑀤𑁂𑀦 𑀧𑀓𑀸𑀲𑀺𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀬𑀣𑀸 𑀘𑁂𑀢𑁆𑀣 𑀏𑀯𑀁 𑀉𑀧𑀫𑀸𑀓𑀸𑀭𑀸𑀤𑀬𑁄𑀧𑀺 𑀉𑀧𑀫𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀸𑀦𑀁 𑀧𑀼𑀧𑁆𑀨𑀭𑀸𑀲𑀺𑀆𑀤𑀺𑀲𑀤𑁆𑀤𑀸𑀦𑀁 𑀲𑀦𑁆𑀦𑀺𑀥𑀸𑀦𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀚𑁄𑀢𑀓𑀫𑀢𑁆𑀢𑀸 𑀳𑀺 𑀦𑀺𑀧𑀸𑀢𑀸𑀢𑀺. 𑀏𑀯𑀫𑁂𑀯𑀸𑀢𑀺 𑀘 𑀅𑀥𑀼𑀦𑀸 𑀪𑀸𑀲𑀺𑀢𑀸𑀓𑀸𑀭𑁂𑀦𑁂𑀯. 𑀅𑀬𑀁 ¶ 𑀯𑀲𑀮𑀕𑀼𑀡𑀬𑁄𑀕𑀢𑁄 𑀯𑀲𑀮𑀻 𑀓𑀸𑀴𑀓𑀡𑁆𑀡𑀻 𑀬𑀲𑁆𑀫𑀺𑀁 𑀯𑀸 𑀢𑀲𑁆𑀫𑀺𑀁 𑀯𑀸 𑀞𑀸𑀦𑁂 𑀪𑀸𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀪𑀦𑁆𑀢𑁂𑀢𑀺 𑀲𑀸𑀥𑀼 𑀪𑀦𑁆𑀢𑁂, 𑀲𑀼𑀝𑁆𑀞𑀼 𑀪𑀦𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 𑀧𑀦 𑀥𑀫𑁆𑀫𑀲𑁆𑀲 𑀲𑀸𑀥𑀼𑀓𑀁 𑀲𑀯𑀦𑀫𑀦𑀲𑀺𑀓𑀸𑀭𑁂 𑀲𑀦𑁆𑀦𑀺𑀬𑁄𑀚𑀺𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀢𑀢𑁆𑀣 𑀅𑀢𑁆𑀢𑀦𑁄 𑀞𑀺𑀢𑀪𑀸𑀯𑀲𑁆𑀲 𑀧𑀝𑀺𑀚𑀸𑀦𑀦𑀫𑁂𑀯 𑀯𑀘𑀦𑀲𑀫𑁆𑀧𑀝𑀺𑀕𑁆𑀕𑀳𑁄, 𑀢𑀤𑀸𑀓𑀸𑀭𑁄𑀧𑀺 𑀅𑀢𑁆𑀣𑀢𑁄 𑀯𑀘𑀦𑀲𑀫𑁆𑀧𑀝𑀺𑀕𑁆𑀕𑀳𑁄𑀬𑁂𑀯 𑀦𑀸𑀫, 𑀢𑁂𑀦𑀸𑀳 ‘‘𑀯𑀘𑀦𑀲𑀫𑁆𑀧𑀝𑀺𑀕𑁆𑀕𑀳𑁂’’𑀢𑀺.

𑀏𑀯𑀁 𑀩𑁆𑀬𑀸 𑀔𑁄𑀢𑀺 𑀏𑀯𑀁 𑀯𑀺𑀬 𑀔𑁄. 𑀏𑀯𑀁 𑀔𑁄𑀢𑀺 𑀳𑀺 𑀇𑀫𑁂𑀲𑀁 𑀧𑀤𑀸𑀦𑀫𑀦𑁆𑀢𑀭𑁂 𑀯𑀺𑀬𑀲𑀤𑁆𑀤𑀲𑁆𑀲 𑀩𑁆𑀬𑀸𑀧𑀤𑁂𑀲𑁄𑀢𑀺 𑀦𑁂𑀭𑀼𑀢𑁆𑀢𑀺𑀓𑀸 ‘‘𑀯-𑀓𑀸𑀭𑀲𑁆𑀲, 𑀩-𑀓𑀸𑀭𑀁, 𑀬-𑀓𑀸𑀭𑀲𑀁𑀬𑁄𑀕𑀜𑁆𑀘 𑀓𑀢𑁆𑀯𑀸 𑀤𑀻𑀖𑀯𑀲𑁂𑀦 𑀧𑀤𑀲𑀺𑀤𑁆𑀥𑀻’’𑀢𑀺𑀧𑀺 𑀯𑀤𑀦𑁆𑀢𑀺. 𑀆𑀓𑀸𑀭𑁂𑀢𑀺 𑀆𑀓𑀸𑀭𑀫𑀢𑁆𑀢𑁂. 𑀅𑀧𑁆𑀧𑀸𑀩𑀸𑀥𑀦𑁆𑀢𑀺 𑀯𑀺𑀲𑀪𑀸𑀕𑀯𑁂𑀤𑀦𑀸𑀪𑀸𑀯𑀁. 𑀅𑀧𑁆𑀧𑀸𑀢𑀗𑁆𑀓𑀦𑁆𑀢𑀺 𑀓𑀺𑀘𑁆𑀙𑀚𑀻𑀯𑀺𑀢𑀓𑀭𑀭𑁄𑀕𑀸𑀪𑀸𑀯𑀁. 𑀮𑀳𑀼𑀝𑁆𑀞𑀸𑀦𑀦𑁆𑀢𑀺 𑀦𑀺𑀕𑁆𑀕𑁂𑀮𑀜𑁆𑀜𑀢𑀸𑀬 𑀮𑀳𑀼𑀢𑀸𑀬𑀼𑀢𑁆𑀢𑀁 𑀉𑀝𑁆𑀞𑀸𑀦𑀁. 𑀩𑀮𑀦𑁆𑀢𑀺 𑀓𑀸𑀬𑀩𑀮𑀁. 𑀨𑀸𑀲𑀼𑀯𑀺𑀳𑀸𑀭𑀦𑁆𑀢𑀺 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀲𑀼𑀔𑀯𑀺𑀳𑀸𑀭𑀁. 𑀯𑀺𑀢𑁆𑀣𑀸𑀭𑁄 𑀤𑀲𑀫 𑀲𑀼𑀪𑀲𑀼𑀢𑁆𑀢𑀝𑁆𑀞𑀓𑀣𑀸𑀬 𑀫𑁂𑀯 (𑀤𑀻. 𑀦𑀺. 𑀅𑀝𑁆𑀞. 𑁧.𑁪𑁪𑁫) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀏𑀯𑀜𑁆𑀘 𑀯𑀤𑁂𑀳𑀻𑀢𑀺 𑀬𑀣𑀸𑀳𑀁 𑀯𑀤𑀸𑀫𑀺, 𑀏𑀯𑀫𑁆𑀧𑀺 𑀲𑀫𑀡𑀁 𑀆𑀦𑀦𑁆𑀤𑀁 𑀯𑀤𑁂𑀳𑀺. ‘‘𑀲𑀸𑀥𑀼 𑀓𑀺𑀭 𑀪𑀯’’𑀦𑁆𑀢𑀺𑀆𑀤𑀺𑀓𑀁 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀯𑀘𑀦𑀁, 𑀲𑁄 𑀘 𑀯𑀤𑀦𑀸𑀓𑀸𑀭𑁄 𑀇𑀥 𑀏𑀯𑀁-𑀲𑀤𑁆𑀤𑁂𑀦 𑀦𑀺𑀤𑀲𑁆𑀲𑀻𑀬𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀦𑀺𑀤𑀲𑁆𑀲𑀦𑁂’’𑀢𑀺. 𑀓𑀸𑀮𑀸𑀫𑀸𑀢𑀺 𑀓𑀸𑀮𑀸𑀫𑀕𑁄𑀢𑁆𑀢𑀲𑀫𑁆𑀩𑀦𑁆𑀥𑁂 𑀚𑀦𑁂 𑀆𑀮𑀧𑀢𑀺. ‘‘𑀇𑀫𑁂…𑀧𑁂… 𑀯𑀸’’𑀢𑀺 𑀬𑀁 𑀫𑀬𑀸 𑀯𑀼𑀢𑁆𑀢𑀁, 𑀢𑀁 𑀓𑀺𑀁 𑀫𑀜𑁆𑀜𑀣𑀸𑀢𑀺 𑀅𑀢𑁆𑀣𑁄. 𑀲𑀫𑀢𑁆𑀢𑀸𑀢𑀺 𑀧𑀭𑀺𑀧𑀽𑀭𑀺𑀢𑀸. 𑀲𑀫𑀸𑀤𑀺𑀦𑁆𑀦𑀸𑀢𑀺 𑀲𑀫𑀸𑀤𑀺𑀬𑀺𑀢𑀸. 𑀲𑀁𑀯𑀢𑁆𑀢𑀦𑁆𑀢𑀺 𑀯𑀸 𑀦𑁄 𑀯𑀸 𑀲𑀁𑀯𑀢𑁆𑀢𑀦𑁆𑀢𑀺 𑀏𑀢𑁆𑀣 𑀯𑀘𑀦𑀤𑁆𑀯𑀬𑁂 𑀓𑀣𑀁 𑀯𑁄 𑀢𑀼𑀫𑁆𑀳𑀸𑀓𑀁 𑀫𑀢𑀺 𑀳𑁄𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀁 𑀦𑁄𑀢𑀺 𑀏𑀯𑀫𑁂𑀯 𑀅𑀫𑁆𑀳𑀸𑀓𑀁 𑀫𑀢𑀺 𑀏𑀢𑁆𑀣 𑀳𑁄𑀢𑀺, 𑀅𑀫𑁆𑀳𑀸𑀓𑀫𑁂𑀢𑁆𑀣 𑀫𑀢𑀺 𑀳𑁄𑀢𑀺 𑀬𑁂𑀯𑀸𑀢𑀺𑀧𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀢𑁂𑀲𑀁 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀳𑀺𑀢𑀤𑀼𑀓𑁆𑀔𑀸𑀯𑀳𑀪𑀸𑀯𑁂 𑀲𑀦𑁆𑀦𑀺𑀝𑁆𑀞𑀸𑀦𑀚𑀦𑀦𑀢𑁆𑀣𑀁 𑀅𑀦𑀼𑀫𑀢𑀺𑀕𑁆𑀕𑀳𑀡𑀯𑀲𑁂𑀦 ‘‘𑀲𑀁𑀯𑀢𑁆𑀢𑀦𑁆𑀢𑀺 𑀦𑁄 𑀯𑀸, 𑀓𑀣𑀁 𑀯𑁄 𑀏𑀢𑁆𑀣 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀸𑀬 𑀓𑀢𑀸𑀬 ‘‘𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀤𑀸𑀓𑀸𑀭𑀲𑀦𑁆𑀦𑀺𑀝𑁆𑀞𑀸𑀦𑀁 𑀏𑀯𑀁-𑀲𑀤𑁆𑀤𑁂𑀦 𑀯𑀺𑀪𑀸𑀯𑀺𑀢𑀁, 𑀲𑁄 𑀘 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑀸𑀓𑀸𑀭𑁄 𑀦𑀺𑀬𑀫𑀺𑀬𑀫𑀸𑀦𑁄 𑀅𑀢𑁆𑀣𑀢𑁄 ¶ 𑀅𑀯𑀥𑀸𑀭𑀡𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀯𑀥𑀸𑀭𑀡𑁂’’𑀢𑀺. 𑀆𑀓𑀸𑀭𑀢𑁆𑀣𑀫𑀜𑁆𑀜𑀢𑁆𑀭 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀘𑁄𑀤𑀦𑀸, 𑀲𑁄𑀥𑀦𑀸 𑀘 𑀯𑁂𑀤𑀺𑀢𑀩𑁆𑀩𑀸.

𑀆𑀤𑀺𑀲𑀤𑁆𑀤𑁂𑀦 𑀘𑁂𑀢𑁆𑀣 𑀇𑀤𑀫𑀢𑁆𑀣𑀧𑀼𑀘𑁆𑀙𑀸𑀧𑀭𑀺𑀫𑀸𑀡𑀸𑀤𑀺𑀅𑀢𑁆𑀣𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 ‘‘𑀏𑀯𑀁𑀕𑀢𑀸𑀦𑀺, 𑀏𑀯𑀁𑀯𑀺𑀥𑁄, 𑀏𑀯𑀫𑀸𑀓𑀸𑀭𑁄’’𑀢𑀺 𑀘 𑀆𑀤𑀻𑀲𑀼 𑀇𑀤𑀫𑀢𑁆𑀣𑁂, 𑀕𑀢𑀯𑀺𑀥𑀸𑀓𑀸𑀭𑀲𑀤𑁆𑀤𑀸 𑀧𑀦 𑀧𑀓𑀸𑀭𑀧𑀭𑀺𑀬𑀸𑀬𑀸. 𑀕𑀢𑀯𑀺𑀥𑀬𑀼𑀢𑁆𑀢𑀸𑀓𑀸𑀭𑀲𑀤𑁆𑀤𑁂 𑀳𑀺 𑀮𑁄𑀓𑀺𑀬𑀸 𑀧𑀓𑀸𑀭𑀢𑁆𑀣𑁂 𑀯𑀤𑀦𑁆𑀢𑀺. ‘‘𑀏𑀯𑀁 𑀲𑀼 𑀢𑁂 𑀲𑀼𑀦𑁆𑀳𑀸𑀢𑀸 𑀲𑀼𑀯𑀺𑀮𑀺𑀢𑁆𑀢𑀸 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸𑀪𑀭𑀡𑀸 𑀑𑀤𑀸𑀢𑀯𑀢𑁆𑀣𑀯𑀲𑀦𑀸 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀧𑀭𑀺𑀘𑀸𑀭𑁂𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀢𑁆𑀯𑀁 𑀏𑀢𑀭𑀳𑀺 𑀲𑀸𑀘𑀭𑀺𑀬𑀓𑁄𑀢𑀺? 𑀦𑁄 𑀳𑀺𑀤𑀁 𑀪𑁄 𑀕𑁄𑀢𑀫𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁮𑁬) 𑀧𑀼𑀘𑁆𑀙𑀸𑀬𑀁. ‘‘𑀏𑀯𑀁 𑀮𑀳𑀼𑀧𑀭𑀺𑀯𑀢𑁆𑀢𑀁 (𑀅. 𑀦𑀺. 𑁧.𑁪𑁮), 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄’’𑀢𑀺 ¶ (𑀧𑀸𑀭𑀸. 𑁧𑁨) 𑀘 𑀆𑀤𑀻𑀲𑀼 𑀧𑀭𑀺𑀫𑀸𑀡𑁂. 𑀏𑀢𑁆𑀣𑀸𑀧𑀺 ‘‘𑀲𑀼𑀦𑁆𑀳𑀸𑀢𑀸 𑀲𑀼𑀯𑀺𑀮𑀺𑀢𑁆𑀢𑀸’’𑀢𑀺𑀆𑀤𑀺𑀯𑀘𑀦𑀁 𑀧𑀼𑀘𑁆𑀙𑀸, 𑀮𑀳𑀼𑀧𑀭𑀺𑀯𑀢𑁆𑀢𑀁, 𑀆𑀬𑀽𑀦𑀁 𑀧𑀫𑀸𑀡𑀜𑁆𑀘 𑀧𑀭𑀺𑀫𑀸𑀡𑀁, 𑀢𑀤𑀸𑀓𑀸𑀭𑁄𑀧𑀺 𑀅𑀢𑁆𑀣𑀢𑁄 𑀧𑀼𑀘𑁆𑀙𑀸 𑀘 𑀧𑀭𑀺𑀫𑀸𑀡𑀜𑁆𑀘 𑀦𑀸𑀫, 𑀢𑀲𑁆𑀫𑀸 𑀏𑀢𑁂𑀲𑀼 𑀧𑀼𑀘𑁆𑀙𑀢𑁆𑀣𑁄, 𑀧𑀭𑀺𑀫𑀸𑀡𑀢𑁆𑀣𑁄 𑀘 𑀏𑀯𑀁𑀲𑀤𑁆𑀤𑁄 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀇𑀥 𑀧𑀦 𑀲𑁄 𑀓𑀢𑀫𑁂𑀲𑀼 𑀪𑀯𑀢𑀺, 𑀲𑀩𑁆𑀩𑀢𑁆𑀣 𑀯𑀸, 𑀅𑀦𑀺𑀬𑀫𑀢𑁄 𑀧𑀤𑁂𑀲𑁂 𑀯𑀸𑀢𑀺 𑀘𑁄𑀤𑀦𑀸𑀬 ‘‘𑀲𑁆𑀯𑀸𑀬𑀫𑀺𑀥𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀦𑀦𑀼 𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀣𑁂 𑀲𑀺𑀬𑀸, 𑀓𑀲𑁆𑀫𑀸 𑀢𑀻𑀲𑀼𑀧𑀻𑀢𑀺 𑀘, 𑀳𑁄𑀢𑀼 𑀢𑀺𑀩𑁆𑀩𑀺𑀥𑁂𑀲𑀼 𑀅𑀢𑁆𑀣𑁂𑀲𑀼, 𑀓𑁂𑀦 𑀓𑀺𑀫𑀢𑁆𑀣𑀁 𑀤𑀻𑀧𑁂𑀢𑀻𑀢𑀺 𑀘 𑀅𑀦𑀼𑀬𑁄𑀕𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀢𑀻𑀲𑀼 𑀅𑀢𑁆𑀣𑁂𑀲𑀼. 𑀏𑀓𑀢𑁆𑀢𑀦𑀸𑀦𑀢𑁆𑀢𑀅𑀩𑁆𑀬𑀸𑀧𑀸𑀭𑀏𑀯𑀁𑀥𑀫𑁆𑀫𑀢𑀸𑀲𑀗𑁆𑀔𑀸𑀢𑀸, 𑀦𑀦𑁆𑀤𑀺𑀬𑀸𑀯𑀢𑁆𑀢𑀢𑀺𑀧𑀼𑀓𑁆𑀔𑀮𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀅𑀗𑁆𑀓𑀼𑀲𑀤𑀺𑀲𑀸𑀮𑁄𑀘𑀦𑀲𑀗𑁆𑀔𑀸𑀢𑀸 𑀯𑀸 𑀆𑀥𑀸𑀭𑀸𑀤𑀺𑀪𑁂𑀤𑀯𑀲𑁂𑀦 𑀦𑀸𑀦𑀸𑀯𑀺𑀥𑀸 𑀦𑀬𑀸 𑀦𑀸𑀦𑀸𑀦𑀬𑀸, 𑀧𑀸𑀴𑀺𑀕𑀢𑀺𑀬𑁄 𑀯𑀸 𑀦𑀬𑀸, 𑀢𑀸 𑀘 𑀧𑀜𑁆𑀜𑀢𑁆𑀢𑀺𑀅𑀦𑀼𑀧𑀜𑁆𑀜𑀢𑁆𑀢𑀺 𑀆𑀤𑀺𑀯𑀲𑁂𑀦, 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸𑀤𑀺𑀯𑀲𑁂𑀦, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀮𑁄𑀓𑀺𑀬𑀸𑀤𑀺𑀢𑀤𑀼𑀪𑀬𑀯𑁄𑀫𑀺𑀲𑁆𑀲𑀓𑀸𑀤𑀺𑀯𑀲𑁂𑀦, 𑀓𑀼𑀲𑀮𑀸𑀤𑀺𑀯𑀲𑁂𑀦, 𑀔𑀦𑁆𑀥𑀸𑀤𑀺𑀯𑀲𑁂𑀦, 𑀲𑀗𑁆𑀕𑀳𑀸𑀤𑀺𑀯𑀲𑁂𑀦, 𑀲𑀫𑀬𑀯𑀺𑀫𑀼𑀢𑁆𑀢𑀸𑀤𑀺𑀯𑀲𑁂𑀦, 𑀞𑀧𑀦𑀸𑀤𑀺𑀯𑀲𑁂𑀦, 𑀓𑀼𑀲𑀮𑀫𑀽𑀮𑀸𑀤𑀺𑀯𑀲𑁂𑀦, 𑀢𑀺𑀓𑀧𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀘 𑀧𑀺𑀝𑀓𑀢𑁆𑀢𑀬𑀸𑀦𑀼𑀭𑀽𑀧𑀁 𑀦𑀸𑀦𑀸𑀧𑁆𑀧𑀓𑀸𑀭𑀸𑀢𑀺 𑀦𑀸𑀦𑀸𑀦𑀬𑀸. 𑀢𑁂𑀳𑀺 𑀦𑀺𑀧𑀼𑀡𑀁 𑀲𑀡𑁆𑀳𑀁 𑀲𑀼𑀔𑀼𑀫𑀁 𑀢𑀣𑀸. 𑀆𑀲𑀬𑁄𑀯 𑀅𑀚𑁆𑀛𑀸𑀲𑀬𑁄, 𑀢𑁂 𑀘 𑀲𑀲𑁆𑀲𑀢𑀸𑀤𑀺𑀪𑁂𑀤𑁂𑀦, 𑀢𑀢𑁆𑀣 𑀘 𑀅𑀧𑁆𑀧𑀭𑀚𑀓𑁆𑀔𑀢𑀸𑀤𑀺𑀯𑀲𑁂𑀦 𑀅𑀦𑁂𑀓𑀸, 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀬𑁄 𑀏𑀯 𑀯𑀸 𑀲𑀫𑀼𑀝𑁆𑀞𑀸𑀦𑀫𑀼𑀧𑁆𑀧𑀢𑁆𑀢𑀺𑀳𑁂𑀢𑀼 𑀏𑀢𑀲𑁆𑀲𑀸𑀢𑀺 𑀢𑀣𑀸, 𑀉𑀧𑀦𑁂𑀢𑀩𑁆𑀩𑀸𑀪𑀸𑀯𑀢𑁄 𑀅𑀢𑁆𑀣𑀩𑁆𑀬𑀜𑁆𑀚𑀦𑁂 ¶ 𑀳𑀺 𑀲𑀫𑁆𑀧𑀦𑁆𑀦𑀁 𑀧𑀭𑀺𑀧𑀼𑀡𑁆𑀡𑀁 𑀢𑀣𑀸. 𑀅𑀧𑀺𑀘 𑀲𑀗𑁆𑀓𑀸𑀲𑀦𑀧𑀓𑀸𑀲𑀦𑀯𑀺𑀯𑀭𑀡𑀯𑀺𑀪𑀚𑀦𑀉𑀢𑁆𑀢𑀸𑀦𑀻𑀓𑀭𑀡𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀙𑀳𑀺 𑀅𑀢𑁆𑀣𑀧𑀤𑁂𑀳𑀺, 𑀅𑀓𑁆𑀔𑀭𑀧𑀤𑀩𑁆𑀬𑀜𑁆𑀚𑀦𑀆𑀓𑀸𑀭𑀦𑀺𑀭𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀙𑀳𑀺 𑀩𑁆𑀬𑀜𑁆𑀚𑀦𑀧𑀤𑁂𑀳𑀺 𑀘 𑀲𑀫𑁆𑀧𑀦𑁆𑀦𑀁 𑀲𑀫𑀦𑁆𑀦𑀸𑀕𑀢𑀁 𑀢𑀣𑀸. 𑀅𑀣 𑀯𑀸 𑀯𑀺𑀜𑁆𑀜𑀽𑀦𑀁 𑀳𑀤𑀬𑀗𑁆𑀕𑀫𑀢𑁄, 𑀲𑀯𑀦𑁂 𑀅𑀢𑀺𑀢𑁆𑀢𑀺𑀚𑀦𑀦𑀢𑁄, 𑀩𑁆𑀬𑀜𑁆𑀚𑀦𑀭𑀲𑀯𑀲𑁂𑀦 𑀧𑀭𑀫𑀕𑀫𑁆𑀪𑀻𑀭𑀪𑀸𑀯𑀢𑁄, 𑀯𑀺𑀘𑀸𑀭𑀡𑁂 𑀅𑀢𑀺𑀢𑁆𑀢𑀺𑀚𑀦𑀦𑀢𑁄, 𑀅𑀢𑁆𑀣𑀭𑀲𑀯𑀲𑁂𑀦 𑀘 𑀲𑀫𑁆𑀧𑀦𑁆𑀦𑀁 𑀲𑀸𑀤𑀼𑀭𑀲𑀁 𑀢𑀣𑀸.

𑀧𑀸𑀝𑀺𑀳𑀸𑀭𑀺𑀬𑀧𑀤𑀲𑁆𑀲 𑀯𑀘𑀦𑀢𑁆𑀣𑀁 ‘‘𑀧𑀝𑀺𑀧𑀓𑁆𑀔𑀳𑀭𑀡𑀢𑁄 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀧𑀦𑀬𑀦𑀢𑁄 𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀤𑀦𑁆𑀢𑀺. 𑀪𑀕𑀯𑀢𑁄 𑀧𑀦 𑀧𑀝𑀺𑀧𑀓𑁆𑀔𑀸 𑀭𑀸𑀕𑀸𑀤𑀬𑁄 𑀦 𑀲𑀦𑁆𑀢𑀺, 𑀬𑁂 𑀳𑀭𑀺𑀢𑀩𑁆𑀩𑀸 𑀩𑁄𑀥𑀺𑀫𑀽𑀮𑁂𑀬𑁂𑀯 𑀲𑀯𑀸𑀲𑀦𑀲𑀓𑀮𑀲𑀁𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸. 𑀧𑀼𑀣𑀼𑀚𑁆𑀚𑀦𑀸𑀦𑀫𑁆𑀧𑀺 𑀘 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀅𑀝𑁆𑀞𑀕𑀼𑀡𑀲𑀫𑀦𑁆𑀦𑀸𑀕𑀢𑁂 𑀘𑀺𑀢𑁆𑀢𑁂 𑀳𑀢𑀧𑀝𑀺𑀧𑀓𑁆𑀔𑁂 𑀲𑀢𑀺𑀬𑁂𑀯 𑀇𑀤𑁆𑀥𑀺𑀯𑀺𑀥𑀁 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀧𑀼𑀣𑀼𑀚𑁆𑀚𑀦𑁂𑀲𑀼 𑀧𑀯𑀢𑁆𑀢𑀯𑁄𑀳𑀸𑀭𑁂𑀦𑀧𑀺 𑀦 𑀲𑀓𑁆𑀓𑀸 𑀇𑀥 ‘‘𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀢𑁆𑀢𑀼𑀁, 𑀲𑀘𑁂 𑀧𑀦 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀪𑀕𑀯𑀢𑁄 𑀯𑁂𑀦𑁂𑀬𑁆𑀬𑀕𑀢𑀸𑀯 𑀓𑀺𑀮𑁂𑀲𑀸 𑀧𑀝𑀺𑀧𑀓𑁆𑀔𑀸 𑀲𑀁𑀲𑀸𑀭𑀧𑀗𑁆𑀓𑀦𑀺𑀫𑀼𑀕𑁆𑀕𑀲𑁆𑀲 𑀲𑀢𑁆𑀢𑀦𑀺𑀓𑀸𑀬𑀲𑁆𑀲 𑀲𑀫𑀼𑀤𑁆𑀥𑀭𑀺𑀢𑀼𑀓𑀸𑀫𑀢𑁄, 𑀢𑀲𑁆𑀫𑀸 𑀢𑁂𑀲𑀁 𑀯𑁂𑀦𑁂𑀬𑁆𑀬𑀕𑀢𑀓𑀺𑀮𑁂𑀲𑀲𑀗𑁆𑀔𑀸𑀢𑀸𑀦𑀁 𑀧𑀝𑀺𑀧𑀓𑁆𑀔𑀸𑀦𑀁 𑀳𑀭𑀡𑀢𑁄 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀅𑀲𑁆𑀲, 𑀏𑀯𑀁 𑀲𑀢𑀺 𑀬𑀼𑀢𑁆𑀢𑀫𑁂𑀢𑀁.

𑀅𑀣 ¶ 𑀯𑀸 𑀪𑀕𑀯𑀢𑁄 𑀲𑀸𑀲𑀦𑀲𑁆𑀲 𑀧𑀝𑀺𑀧𑀓𑁆𑀔𑀸 𑀢𑀺𑀢𑁆𑀣𑀺𑀬𑀸, 𑀢𑁂𑀲𑀁 𑀢𑀺𑀢𑁆𑀣𑀺𑀬𑀪𑀽𑀢𑀸𑀦𑀁 𑀧𑀝𑀺𑀧𑀓𑁆𑀔𑀸𑀦𑀁 𑀳𑀭𑀡𑀢𑁄 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺𑀧𑀺 𑀬𑀼𑀚𑁆𑀚𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 𑀢𑀺𑀢𑁆𑀣𑀺𑀬𑀸 𑀳𑀭𑀺𑀢𑀩𑁆𑀩𑀸 𑀦𑀸𑀲𑁆𑀲𑀼, 𑀢𑁂𑀲𑀁 𑀧𑀦 𑀲𑀦𑁆𑀢𑀸𑀦𑀕𑀢𑀤𑀺𑀝𑁆𑀞𑀺𑀳𑀭𑀡𑀯𑀲𑁂𑀦 𑀤𑀺𑀝𑁆𑀞𑀺𑀧𑁆𑀧𑀓𑀸𑀲𑀦𑁂 𑀅𑀲𑀫𑀢𑁆𑀣𑀢𑀸𑀓𑀸𑀭𑀡𑁂𑀦 𑀘 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀻𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺𑀧𑀺 𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀢𑁂 𑀳𑀭𑀺𑀢𑀸 𑀅𑀧𑀦𑀻𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀧𑀝𑀻𑀢𑀺 𑀯𑀸 𑀅𑀬𑀁 𑀲𑀤𑁆𑀤𑁄 ‘‘𑀧𑀘𑁆𑀙𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀩𑁄𑀥𑁂𑀢𑀺 ‘‘𑀢𑀲𑁆𑀫𑀺𑀁 𑀧𑀝𑀺𑀧𑀯𑀺𑀝𑁆𑀞𑀫𑁆𑀳𑀺, 𑀅𑀜𑁆𑀜𑁄 𑀆𑀕𑀜𑁆𑀙𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁯𑁮𑁫; 𑀘𑀽𑀴𑀦𑀺. 𑁪) 𑀯𑀺𑀬, 𑀢𑀲𑁆𑀫𑀸 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀯𑀺𑀕𑀢𑀽𑀧𑀓𑁆𑀮𑁂𑀲𑁂 𑀓𑀢𑀓𑀺𑀘𑁆𑀘𑁂𑀦 𑀧𑀘𑁆𑀙𑀸 𑀳𑀭𑀺𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀧𑀝𑀺𑀳𑀸𑀭𑀺𑀬𑀁, 𑀢𑀤𑁂𑀯 𑀤𑀻𑀖𑀯𑀲𑁂𑀦, 𑀲𑀓𑀢𑁆𑀣𑀯𑀼𑀢𑁆𑀢𑀺𑀧𑀘𑁆𑀘𑀬𑀯𑀲𑁂𑀦 𑀯𑀸 𑀧𑀸𑀝𑀺𑀳𑀸𑀭𑀺𑀬𑀁, 𑀅𑀢𑁆𑀢𑀦𑁄 𑀯𑀸 𑀉𑀧𑀓𑁆𑀮𑁂𑀲𑁂𑀲𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑀕𑁆𑀕𑁂𑀳𑀺 𑀳𑀭𑀺𑀢𑁂𑀲𑀼 𑀧𑀘𑁆𑀙𑀸 𑀢𑀤𑀜𑁆𑀜𑁂𑀲𑀁 𑀳𑀭𑀡𑀁 𑀧𑀸𑀝𑀺𑀳𑀸𑀭𑀺𑀬𑀁 𑀯𑀼𑀢𑁆𑀢𑀦𑀬𑁂𑀦. 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀺𑀬𑁄 𑀳𑀺 𑀯𑀺𑀕𑀢𑀽𑀧𑀓𑁆𑀮𑁂𑀲𑁂𑀦, 𑀓𑀢𑀓𑀺𑀘𑁆𑀘𑁂𑀦 𑀘 𑀲𑀢𑁆𑀢𑀳𑀺𑀢𑀢𑁆𑀣𑀁 𑀧𑀼𑀦 𑀧𑀯𑀢𑁆𑀢𑁂𑀢𑀩𑁆𑀩𑀸, 𑀳𑀢𑁂𑀲𑀼 𑀘 𑀅𑀢𑁆𑀢𑀦𑁄 𑀉𑀧𑀓𑁆𑀮𑁂𑀲𑁂𑀲𑀼 𑀧𑀭𑀲𑀢𑁆𑀢𑀸𑀦𑀁 𑀉𑀧𑀓𑁆𑀮𑁂𑀲𑀳𑀭𑀡𑀸𑀦𑀺 𑀘 𑀳𑁄𑀦𑁆𑀢𑀻𑀢𑀺 𑀢𑀤𑀼𑀪𑀬𑀫𑁆𑀧𑀺 𑀦𑀺𑀩𑁆𑀩𑀘𑀦𑀁 𑀬𑀼𑀚𑁆𑀚𑀢𑀺.

𑀅𑀧𑀺𑀘 ¶ 𑀬𑀣𑀸𑀯𑀼𑀢𑁆𑀢𑁂𑀳𑀺 𑀦𑀺𑀩𑁆𑀩𑀘𑀦𑁂𑀳𑀺 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀻𑀲𑀗𑁆𑀔𑀸𑀢𑁄 𑀲𑀫𑀼𑀤𑀸𑀬𑁄 𑀧𑀝𑀺𑀳𑀸𑀭𑀺𑀬𑀁 𑀦𑀸𑀫. 𑀏𑀓𑁂𑀓𑀁 𑀧𑀦 𑀢𑀲𑁆𑀫𑀺𑀁 𑀪𑀯𑀁 ‘‘𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀯𑀺𑀲𑁂𑀲𑀢𑁆𑀣𑀚𑁄𑀢𑀓𑀧𑀘𑁆𑀘𑀬𑀦𑁆𑀢𑀭𑁂𑀦 𑀲𑀤𑁆𑀤𑀭𑀘𑀦𑀸𑀯𑀺𑀲𑁂𑀲𑀲𑀫𑁆𑀪𑀯𑀢𑁄, 𑀧𑀝𑀺𑀳𑀸𑀭𑀺𑀬𑀁 𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁, 𑀫𑀕𑁆𑀕𑁄 𑀘 𑀧𑀝𑀺𑀧𑀓𑁆𑀔𑀳𑀭𑀡𑀢𑁄, 𑀢𑀢𑁆𑀣 𑀚𑀸𑀢𑀁, 𑀢𑀲𑁆𑀫𑀺𑀁 𑀯𑀸 𑀦𑀺𑀫𑀺𑀢𑁆𑀢𑀪𑀽𑀢𑁂, 𑀢𑀢𑁄 𑀯𑀸 𑀆𑀕𑀢𑀦𑁆𑀢𑀺 𑀧𑀸𑀝𑀺𑀳𑀸𑀭𑀺𑀬𑀁. 𑀯𑀺𑀘𑀺𑀢𑁆𑀭𑀸 𑀳𑀺 𑀢𑀤𑁆𑀥𑀺𑀢𑀯𑀼𑀢𑁆𑀢𑀺. 𑀢𑀲𑁆𑀲 𑀧𑀦 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀻𑀪𑁂𑀤𑁂𑀦, 𑀯𑀺𑀲𑀬𑀪𑁂𑀤𑁂𑀦 𑀘 𑀩𑀳𑀼𑀯𑀺𑀥𑀲𑁆𑀲 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀮𑀩𑁆𑀪𑀫𑀸𑀦𑀢𑁆𑀢𑀸 ‘‘𑀯𑀺𑀯𑀺𑀥𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁. 𑀪𑀕𑀯𑀸 𑀳𑀺 𑀓𑀤𑀸𑀘𑀺 𑀇𑀤𑁆𑀥𑀺𑀯𑀲𑁂𑀦𑀸𑀧𑀺 𑀤𑁂𑀲𑀦𑀁 𑀓𑀭𑁄𑀢𑀺 𑀦𑀺𑀫𑁆𑀫𑀺𑀢𑀩𑀼𑀤𑁆𑀥𑁂𑀦 𑀲𑀳 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀤𑀻𑀲𑀼, 𑀓𑀤𑀸𑀘𑀺 𑀆𑀤𑁂𑀲𑀦𑀸𑀯𑀲𑁂𑀦𑀸𑀧𑀺 𑀆𑀫𑀕𑀦𑁆𑀥𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀤𑀻𑀲𑀼 (𑀲𑀼. 𑀦𑀺. 𑀅𑀝𑁆𑀞. 𑁧.𑁨𑁪𑁧), 𑀬𑁂𑀪𑀼𑀬𑁆𑀬𑁂𑀦 𑀧𑀦 𑀅𑀦𑀼𑀲𑀸𑀲𑀦𑀺𑀬𑀸. 𑀅𑀦𑀼𑀲𑀸𑀲𑀦𑀻𑀧𑀸𑀝𑀺𑀳𑀸𑀭𑀺𑀬𑀜𑁆𑀳𑀺 𑀩𑀼𑀤𑁆𑀥𑀸𑀦𑀁 𑀲𑀢𑀢𑀁 𑀥𑀫𑁆𑀫𑀤𑁂𑀲𑀦𑀸. 𑀇𑀢𑀺 𑀢𑀁𑀢𑀁𑀤𑁂𑀲𑀦𑀸𑀓𑀸𑀭𑁂𑀦 𑀅𑀦𑁂𑀓𑀯𑀺𑀥𑀧𑀸𑀝𑀺𑀳𑀸𑀭𑀺𑀬𑀢𑀸 𑀤𑁂𑀲𑀦𑀸𑀬 𑀮𑀩𑁆𑀪𑀢𑀺. 𑀅𑀬𑀫𑀢𑁆𑀣𑁄 𑀉𑀧𑀭𑀺 𑀏𑀓𑀸𑀤𑀲𑀫𑀲𑁆𑀲 𑀓𑁂𑀯𑀝𑁆𑀝𑀲𑀼𑀢𑁆𑀢𑀲𑁆𑀲 𑀯𑀡𑁆𑀡𑀦𑀸𑀬 (𑀤𑀻. 𑀦𑀺. 𑀅𑀝𑁆𑀞. 𑁧.𑁪𑁮𑁧) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀅𑀣 𑀯𑀸 𑀢𑀲𑁆𑀲 𑀯𑀺𑀯𑀺𑀥𑀲𑁆𑀲𑀸𑀧𑀺 𑀧𑀸𑀝𑀺𑀳𑀸𑀭𑀺𑀬𑀲𑁆𑀲 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀲𑀁𑀲𑀽𑀘𑀦𑀢𑁄 ‘‘𑀯𑀺𑀯𑀺𑀥𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁, 𑀅𑀦𑁂𑀓𑀯𑀺𑀥𑀧𑀸𑀝𑀺𑀳𑀸𑀭𑀺𑀬𑀤𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄.

𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀬𑀸𑀯 𑀪𑀕𑀯𑀢𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀲𑀩𑁆𑀩𑁂𑀲𑀁 𑀲𑀼𑀡𑀦𑁆𑀢𑀸𑀦𑀁 𑀦𑀸𑀦𑀸𑀪𑀸𑀲𑀺𑀢𑀸𑀦𑀁 𑀢𑀁𑀢𑀁𑀪𑀸𑀲𑀸𑀦𑀼𑀭𑀽𑀧𑀢𑁄 𑀤𑁂𑀲𑀦𑀸 𑀲𑁄𑀢𑀧𑀣𑀫𑀸𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀲𑀩𑁆𑀩…𑀧𑁂… 𑀫𑀸𑀕𑀘𑁆𑀙𑀦𑁆𑀢’’𑀦𑁆𑀢𑀺. 𑀲𑁄𑀢𑀫𑁂𑀯 𑀲𑁄𑀢𑀧𑀣𑁄, 𑀲𑀯𑀦𑀁 𑀯𑀸 𑀲𑁄𑀢𑀁, 𑀢𑀲𑁆𑀲 𑀧𑀣𑁄 𑀢𑀣𑀸, 𑀲𑁄𑀢𑀤𑁆𑀯𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀸𑀓𑀸𑀭𑁂𑀦𑀸𑀢𑀺 𑀬𑀣𑀸𑀤𑁂𑀲𑀺𑀢𑀸𑀓𑀸𑀭𑁂𑀦. 𑀓𑁄 𑀲𑀫𑀢𑁆𑀣𑁄 𑀯𑀺𑀜𑁆𑀜𑀸𑀢𑀼𑀁, 𑀅𑀲𑀫𑀢𑁆𑀣𑁄𑀬𑁂𑀯, 𑀢𑀲𑁆𑀫𑀸𑀢𑀺 𑀧𑀸𑀞𑀲𑁂𑀲𑁄. 𑀧𑀦𑀸𑀢𑀺 𑀏𑀓𑀁𑀲𑀢𑁆𑀣𑁂 ¶ , 𑀢𑁂𑀦 𑀲𑀤𑁆𑀥𑀸𑀲𑀢𑀺𑀥𑀺𑀢𑀺𑀯𑀻𑀭𑀺𑀬𑀸𑀤𑀺𑀩𑀮𑀲𑀗𑁆𑀔𑀸𑀢𑁂𑀦 𑀲𑀩𑁆𑀩𑀣𑀸𑀫𑁂𑀦 𑀏𑀓𑀁𑀲𑁂𑀦𑁂𑀯 𑀲𑁄𑀢𑀼𑀓𑀸𑀫𑀢𑀸𑀲𑀗𑁆𑀔𑀸𑀢𑀓𑀼𑀲𑀮𑀘𑁆𑀙𑀦𑁆𑀤𑀲𑁆𑀲 𑀚𑀦𑀦𑀁 𑀤𑀲𑁆𑀲𑁂𑀢𑀺. 𑀚𑀦𑁂𑀢𑁆𑀯𑀸𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄, 𑀅𑀧𑀺-𑀲𑀤𑁆𑀤𑁄 𑀯𑀸 𑀲𑀫𑁆𑀪𑀸𑀯𑀦𑀢𑁆𑀣𑁄 ‘‘𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀪𑀸𑀯𑀁 𑀪𑀸𑀯𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑀅𑀝𑁆𑀞 𑁧; 𑀫. 𑀦𑀺. 𑀅𑀝𑁆𑀞. 𑁧; 𑀲𑀁. 𑀦𑀺. 𑀅𑀝𑁆𑀞. 𑁧; 𑀅. 𑀦𑀺. 𑀅𑀝𑁆𑀞 𑁧.𑀧𑀞𑀫𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀯𑀺𑀬, 𑀢𑁂𑀦 ‘‘𑀲𑀩𑁆𑀩𑀣𑀸𑀫𑁂𑀦 𑀏𑀓𑀁𑀲𑁂𑀦𑁂𑀯 𑀲𑁄𑀢𑀼𑀓𑀸𑀫𑀢𑀁 𑀚𑀦𑁂𑀢𑁆𑀯𑀸𑀧𑀺 𑀦𑀸𑀫 𑀏𑀓𑁂𑀦𑀸𑀓𑀸𑀭𑁂𑀦 𑀲𑀼𑀢𑀁, 𑀓𑀺𑀫𑀗𑁆𑀕𑀁 𑀧𑀦 𑀅𑀜𑁆𑀜𑀣𑀸’’𑀢𑀺 𑀢𑀣𑀸𑀲𑀼𑀢𑁂 𑀥𑀫𑁆𑀫𑁂 𑀲𑀫𑁆𑀪𑀸𑀯𑀦𑀁 𑀓𑀭𑁄𑀢𑀺. 𑀓𑁂𑀘𑀺 𑀧𑀦 ‘‘𑀏𑀤𑀺𑀲𑁂𑀲𑀼 𑀕𑀭𑀳𑀢𑁆𑀣𑁄’’𑀢𑀺 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀫𑁂𑀯 𑀕𑀭𑀳𑀢𑁆𑀣𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸, 𑀯𑀺𑀚𑁆𑀚𑀫𑀸𑀦𑀢𑁆𑀣𑀲𑁆𑀲𑁂𑀯 𑀘 𑀉𑀧𑀲𑀕𑁆𑀕𑀦𑀺𑀧𑀸𑀢𑀸𑀦𑀁 𑀚𑁄𑀢𑀓𑀢𑁆𑀢𑀸. ‘‘𑀦𑀸𑀦𑀸𑀦𑀬𑀦𑀺𑀧𑀼𑀡’’𑀦𑁆𑀢𑀺𑀆𑀤𑀺𑀦𑀸 ¶ 𑀳𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀲𑁄𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑁂𑀦 𑀥𑀫𑁆𑀫𑀲𑁆𑀲 𑀇𑀥 𑀲𑀫𑁆𑀪𑀸𑀯𑀦𑀫𑁂𑀯 𑀓𑀭𑁄𑀢𑀺, 𑀢𑀲𑁆𑀫𑀸 ‘‘𑀅𑀧𑀺 𑀤𑀺𑀩𑁆𑀩𑁂𑀲𑀼 𑀓𑀸𑀫𑁂𑀲𑀼, 𑀭𑀢𑀺𑀁 𑀲𑁄 𑀦𑀸𑀥𑀺𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼𑀬𑁂𑀯 (𑀥. 𑀧. 𑁧𑁮𑁭) 𑀕𑀭𑀳𑀢𑁆𑀣𑀲𑀫𑁆𑀪𑀯𑁂𑀲𑀼 𑀕𑀭𑀳𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀅𑀧𑀺-𑀲𑀤𑁆𑀤𑁄 𑀘 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑀺𑀧𑀸𑀢𑁄𑀬𑁂𑀯, 𑀦 𑀉𑀧𑀲𑀕𑁆𑀕𑁄. 𑀢𑀣𑀸 𑀳𑀺 ‘‘𑀅𑀧𑀺-𑀲𑀤𑁆𑀤𑁄 𑀘 𑀦𑀺𑀧𑀸𑀢𑀧𑀓𑁆𑀔𑀺𑀓𑁄 𑀓𑀸𑀢𑀩𑁆𑀩𑁄, 𑀬𑀢𑁆𑀣 𑀓𑀺𑀭𑀺𑀬𑀸𑀯𑀸𑀘𑀓𑀢𑁄 𑀧𑀼𑀩𑁆𑀩𑁄 𑀦 𑀳𑁄𑀢𑀻’’𑀢𑀺 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀯𑀤𑀦𑁆𑀢𑀺. 𑀫𑀬𑀸𑀧𑀻𑀢𑀺 𑀏𑀢𑁆𑀣 𑀧𑀦 𑀦 𑀓𑁂𑀯𑀮𑀁 𑀫𑀬𑀸𑀯, 𑀅𑀣 𑀔𑁄 𑀅𑀜𑁆𑀜𑁂𑀳𑀺𑀧𑀺 𑀢𑀣𑀸𑀭𑀽𑀧𑁂𑀳𑀻𑀢𑀺 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀲𑀸𑀫𑀁 𑀪𑀯𑀢𑀻𑀢𑀺 𑀲𑀬𑀫𑁆𑀪𑀽, 𑀅𑀦𑀸𑀘𑀭𑀺𑀬𑀓𑁄. 𑀦 𑀫𑀬𑀁 𑀇𑀤𑀁 𑀲𑀘𑁆𑀙𑀺𑀓𑀢𑀦𑁆𑀢𑀺 𑀏𑀢𑁆𑀣 𑀧𑀦 ‘‘𑀦 𑀅𑀢𑁆𑀢𑀦𑁄 𑀜𑀸𑀡𑁂𑀦𑁂𑀯 𑀅𑀢𑁆𑀢𑀦𑀸 𑀲𑀘𑁆𑀙𑀺𑀓𑀢’’𑀦𑁆𑀢𑀺 𑀧𑀓𑀭𑀡𑀢𑁄 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀲𑀸𑀫𑀜𑁆𑀜𑀯𑀘𑀦𑀲𑁆𑀲𑀸𑀧𑀺 𑀳𑀺 𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀲𑀳𑀘𑀭𑀡𑀯𑀺𑀭𑁄𑀥𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀮𑀺𑀗𑁆𑀕𑀑𑀘𑀺𑀢𑁆𑀬𑀓𑀸𑀮𑀤𑁂𑀲𑀧𑀓𑀭𑀡𑀸𑀤𑀺𑀯𑀲𑁂𑀦 𑀯𑀺𑀲𑁂𑀲𑀢𑁆𑀣𑀕𑁆𑀕𑀳𑀡𑀁 𑀲𑀫𑁆𑀪𑀯𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣. 𑀧𑀭𑀺𑀫𑁄𑀘𑁂𑀦𑁆𑀢𑁄𑀢𑀺 ‘‘𑀧𑀼𑀦 𑀘𑀧𑀭𑀁 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀸𑀧𑀪𑀺𑀓𑁆𑀔𑀼 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀅𑀢𑁆𑀢𑀦𑁄 𑀤𑀳𑀢𑀻’’𑀢𑀺 (𑀧𑀸𑀭𑀸. 𑁧𑁯𑁫) 𑀯𑀼𑀢𑁆𑀢𑀤𑁄𑀲𑀢𑁄 𑀧𑀭𑀺𑀫𑁄𑀘𑀸𑀧𑀦𑀳𑁂𑀢𑀼. 𑀳𑁂𑀢𑁆𑀯𑀢𑁆𑀣𑁂 𑀳𑀺 𑀅𑀦𑁆𑀢-𑀲𑀤𑁆𑀤𑁄 ‘‘𑀅𑀲𑀫𑁆𑀩𑀼𑀥𑀁 𑀩𑀼𑀤𑁆𑀥𑀦𑀺𑀲𑁂𑀯𑀺𑀢’’𑀦𑁆𑀢𑀺𑀆𑀤𑀻𑀲𑀼 (𑀯𑀺. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀯𑀺𑀬. 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀁𑀯𑀡𑁆𑀡𑀦𑀸𑀧𑁆𑀧𑀓𑀸𑀭𑀯𑀺𑀘𑀸𑀭𑀡𑁂𑀦 𑀅𑀢𑁆𑀢𑀦𑁄 𑀜𑀸𑀡𑀲𑁆𑀲 𑀧𑀘𑁆𑀘𑀓𑁆𑀔𑀢𑀁 𑀲𑀦𑁆𑀥𑀸𑀬 ‘‘𑀇𑀤𑀸𑀦𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀲𑀸 𑀳𑀺 𑀲𑀁𑀯𑀡𑁆𑀡𑀦𑀸𑀓𑀸𑀭𑀸𑀦𑀁 𑀧𑀓𑀢𑀺, 𑀬𑀤𑀺𑀤𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀥𑀫𑁆𑀫𑁂 𑀲𑀩𑁆𑀩𑀢𑁆𑀣 ‘‘𑀅𑀬𑀫𑀺𑀫𑀲𑁆𑀲 𑀅𑀢𑁆𑀣𑁄, 𑀏𑀯𑀫𑀺𑀥 𑀲𑀁𑀯𑀡𑁆𑀡𑀬𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀭𑁂𑀢𑀭𑀫𑁂𑀯 𑀲𑀁𑀯𑀡𑁆𑀡𑀦𑀸𑀧𑁆𑀧𑀓𑀸𑀭𑀯𑀺𑀘𑀸𑀭𑀡𑀸.

𑀏𑀢𑀤𑀕𑁆𑀕𑀧𑀤𑀲𑁆𑀲𑀢𑁆𑀣𑁄 𑀯𑀼𑀢𑁆𑀢𑁄𑀯. ‘‘𑀩𑀳𑀼𑀲𑁆𑀲𑀼𑀢𑀸𑀦’’𑀦𑁆𑀢𑀺𑀆𑀤𑀻𑀲𑀼 𑀧𑀦 𑀅𑀜𑁆𑀜𑁂𑀧𑀺 𑀣𑁂𑀭𑀸 𑀩𑀳𑀼𑀲𑁆𑀲𑀼𑀢𑀸, 𑀲𑀢𑀺𑀫𑀦𑁆𑀢𑁄, 𑀕𑀢𑀺𑀫𑀦𑁆𑀢𑁄, 𑀥𑀺𑀢𑀺𑀫𑀦𑁆𑀢𑁄, 𑀉𑀧𑀝𑁆𑀞𑀸𑀓𑀸 𑀘 𑀅𑀢𑁆𑀣𑀺, 𑀅𑀬𑀁 𑀧𑀦𑀸𑀬𑀲𑁆𑀫𑀸 𑀩𑀼𑀤𑁆𑀥𑀯𑀘𑀦𑀁 𑀕𑀡𑁆𑀳𑀦𑁆𑀢𑁄 𑀤𑀲𑀩𑀮𑀲𑁆𑀲 𑀲𑀸𑀲𑀦𑁂 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺𑀬𑀁 𑀞𑀢𑁆𑀯𑀸 𑀕𑀡𑁆𑀳𑀺, 𑀢𑀲𑁆𑀫𑀸 𑀩𑀳𑀼𑀲𑁆𑀲𑀼𑀢𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄. 𑀇𑀫𑀲𑁆𑀲 𑀘 𑀣𑁂𑀭𑀲𑁆𑀲 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀥𑀸𑀭𑀡𑀲𑀢𑀺 𑀅𑀜𑁆𑀜𑁂𑀳𑀺 𑀣𑁂𑀭𑁂𑀳𑀺 𑀩𑀮𑀯𑀢𑀭𑀸 𑀅𑀳𑁄𑀲𑀺, 𑀢𑀲𑁆𑀫𑀸 𑀲𑀢𑀺𑀫𑀦𑁆𑀢𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄. 𑀅𑀬𑀫𑁂𑀯𑀸𑀬𑀲𑁆𑀫𑀸 𑀏𑀓𑀧𑀤𑁂 𑀞𑀢𑁆𑀯𑀸 𑀲𑀝𑁆𑀞𑀺𑀧𑀤𑀲𑀳𑀲𑁆𑀲𑀸𑀦𑀺 ¶ 𑀕𑀡𑁆𑀳𑀦𑁆𑀢𑁄 𑀲𑀢𑁆𑀣𑀸𑀭𑀸 𑀓𑀣𑀺𑀢𑀦𑀺𑀬𑀸𑀫𑁂𑀦 𑀲𑀩𑁆𑀩𑀧𑀤𑀸𑀦𑀺 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀕𑀢𑀺𑀫𑀦𑁆𑀢𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄 ¶ . 𑀢𑀲𑁆𑀲𑁂𑀯 𑀘𑀸𑀬𑀲𑁆𑀫𑀢𑁄 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀦𑀯𑀻𑀭𑀺𑀬𑀁, 𑀲𑀚𑁆𑀛𑀸𑀬𑀦𑀯𑀻𑀭𑀺𑀬𑀜𑁆𑀘 𑀅𑀜𑁆𑀜𑁂𑀳𑀺 𑀅𑀲𑀤𑀺𑀲𑀁 𑀅𑀳𑁄𑀲𑀺, 𑀢𑀲𑁆𑀫𑀸 𑀥𑀺𑀢𑀺𑀫𑀦𑁆𑀢𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄. 𑀢𑀣𑀸𑀕𑀢𑀁 𑀉𑀧𑀝𑁆𑀞𑀳𑀦𑁆𑀢𑁄 𑀘𑁂𑀲 𑀦 𑀅𑀜𑁆𑀜𑁂𑀲𑀁 𑀉𑀧𑀝𑁆𑀞𑀸𑀓𑀪𑀺𑀓𑁆𑀔𑀽𑀦𑀁 𑀉𑀧𑀝𑁆𑀞𑀳𑀦𑀸𑀓𑀸𑀭𑁂𑀦 𑀉𑀧𑀝𑁆𑀞𑀳𑀢𑀺. 𑀅𑀜𑁆𑀜𑁂𑀧𑀺 𑀳𑀺 𑀢𑀣𑀸𑀕𑀢𑀁 𑀉𑀧𑀝𑁆𑀞𑀳𑀺𑀁𑀲𑀼, 𑀦 𑀘 𑀧𑀦 𑀩𑀼𑀤𑁆𑀥𑀸𑀦𑀁 𑀫𑀦𑀁 𑀕𑀳𑁂𑀢𑁆𑀯𑀸 𑀉𑀧𑀝𑁆𑀞𑀳𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀅𑀬𑀁 𑀧𑀦 𑀣𑁂𑀭𑁄 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑀁 𑀮𑀤𑁆𑀥𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑀼𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀫𑀦𑀁 𑀕𑀳𑁂𑀢𑁆𑀯𑀸 𑀉𑀧𑀝𑁆𑀞𑀳𑀺, 𑀢𑀲𑁆𑀫𑀸 𑀉𑀧𑀝𑁆𑀞𑀸𑀓𑀸𑀦𑀁 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄. 𑀅𑀢𑁆𑀣𑀓𑀼𑀲𑀮𑁄𑀢𑀺 𑀪𑀸𑀲𑀺𑀢𑀢𑁆𑀣𑁂, 𑀧𑀬𑁄𑀚𑀦𑀢𑁆𑀣𑁂 𑀘 𑀙𑁂𑀓𑁄. 𑀥𑀫𑁆𑀫𑁄𑀢𑀺 𑀧𑀸𑀴𑀺𑀥𑀫𑁆𑀫𑁄, 𑀦𑀸𑀦𑀸𑀯𑀺𑀥𑁄 𑀯𑀸 𑀳𑁂𑀢𑀼. 𑀩𑁆𑀬𑀜𑁆𑀚𑀦𑀦𑁆𑀢𑀺 𑀅𑀓𑁆𑀔𑀭𑀁 𑀅𑀢𑁆𑀣𑀲𑁆𑀲 𑀩𑁆𑀬𑀜𑁆𑀚𑀦𑀢𑁄. 𑀧𑀤𑁂𑀦 𑀳𑀺 𑀩𑁆𑀬𑀜𑁆𑀚𑀺𑀢𑁄𑀧𑀺 𑀅𑀢𑁆𑀣𑁄 𑀅𑀓𑁆𑀔𑀭𑀫𑀽𑀮𑀓𑀢𑁆𑀢𑀸 𑀧𑀤𑀲𑁆𑀲 ‘‘𑀅𑀓𑁆𑀔𑀭𑁂𑀦 𑀩𑁆𑀬𑀜𑁆𑀚𑀺𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀢𑁆𑀣𑀲𑁆𑀲 𑀯𑀺𑀬𑀜𑁆𑀚𑀦𑀢𑁄 𑀯𑀸 𑀯𑀸𑀓𑁆𑀬𑀫𑁆𑀧𑀺 𑀇𑀥 𑀩𑁆𑀬𑀜𑁆𑀚𑀦𑀁 𑀦𑀸𑀫. 𑀯𑀸𑀓𑁆𑀬𑁂𑀦 𑀳𑀺 𑀅𑀢𑁆𑀣𑁄 𑀧𑀭𑀺𑀧𑀼𑀡𑁆𑀡𑀁 𑀩𑁆𑀬𑀜𑁆𑀚𑀻𑀬𑀢𑀺, 𑀬𑀢𑁄 ‘‘𑀩𑁆𑀬𑀜𑁆𑀚𑀦𑁂𑀳𑀺 𑀯𑀺𑀯𑀭𑀢𑀻’’𑀢𑀺 𑀆𑀬𑀲𑁆𑀫𑀢𑀸 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁. 𑀦𑀺𑀭𑀼𑀢𑁆𑀢𑀻𑀢𑀺 𑀦𑀺𑀩𑁆𑀩𑀘𑀦𑀁, 𑀧𑀜𑁆𑀘𑀯𑀺𑀥𑀸 𑀯𑀸 𑀦𑀺𑀭𑀼𑀢𑁆𑀢𑀺𑀦𑀬𑀸. 𑀢𑁂𑀲𑀫𑁆𑀧𑀺 𑀳𑀺 𑀲𑀤𑁆𑀤𑀭𑀘𑀦𑀸𑀯𑀺𑀲𑁂𑀲𑁂𑀦 𑀅𑀢𑁆𑀣𑀸𑀥𑀺𑀕𑀫𑀳𑁂𑀢𑀼𑀢𑁄 𑀇𑀥 𑀕𑀳𑀡𑀁 𑀬𑀼𑀚𑁆𑀚𑀢𑀺. 𑀧𑀼𑀩𑁆𑀩𑀸𑀧𑀭𑀁 𑀦𑀸𑀫 𑀧𑀼𑀩𑁆𑀩𑀸𑀧𑀭𑀸𑀦𑀼𑀲𑀦𑁆𑀥𑀺, 𑀲𑀼𑀢𑁆𑀢𑀲𑁆𑀲 𑀯𑀸 𑀧𑀼𑀩𑁆𑀩𑀪𑀸𑀕𑁂𑀦 𑀅𑀧𑀭𑀪𑀸𑀕𑀲𑁆𑀲 𑀲𑀁𑀲𑀦𑁆𑀤𑀦𑀁. 𑀪𑀕𑀯𑀢𑀸 𑀘 𑀧𑀜𑁆𑀘𑀯𑀺𑀥𑀏𑀢𑀤𑀕𑁆𑀕𑀝𑁆𑀞𑀸𑀦𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀘 𑀧𑀜𑁆𑀘𑀯𑀺𑀥𑀓𑁄𑀲𑀮𑁆𑀮𑁂𑀦 𑀧𑀲𑀝𑁆𑀞𑀪𑀸𑀯𑀸𑀦𑀼𑀭𑀽𑀧𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀥𑀸𑀭𑀡𑀩𑀮𑀦𑁆𑀢𑀺 𑀥𑀸𑀭𑀡𑀲𑀗𑁆𑀔𑀸𑀢𑀁 𑀩𑀮𑀁, 𑀥𑀸𑀭𑀡𑁂 𑀯𑀸 𑀩𑀮𑀁, 𑀉𑀪𑀬𑀢𑁆𑀣𑀸𑀧𑀺 𑀥𑀸𑀭𑁂𑀢𑀼𑀁 𑀲𑀸𑀫𑀢𑁆𑀣𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀲𑁆𑀲𑁂𑀦𑁆𑀢𑁄 𑀳𑀼𑀢𑁆𑀯𑀸, 𑀤𑀲𑁆𑀲𑀦𑀳𑁂𑀢𑀽𑀢𑀺𑀧𑀺 𑀅𑀢𑁆𑀣𑁄. 𑀢𑀜𑁆𑀘 𑀔𑁄 𑀅𑀢𑁆𑀣𑀢𑁄 𑀯𑀸 𑀩𑁆𑀬𑀜𑁆𑀚𑀦𑀢𑁄 𑀯𑀸 𑀅𑀦𑀽𑀦𑀫𑀦𑀥𑀺𑀓𑀦𑁆𑀢𑀺 𑀅𑀯𑀥𑀸𑀭𑀡𑀨𑀮𑀫𑀸𑀳. 𑀦 𑀅𑀜𑁆𑀜𑀣𑀸 𑀤𑀝𑁆𑀞𑀩𑁆𑀩𑀦𑁆𑀢𑀺 𑀧𑀦 𑀦𑀺𑀯𑀢𑁆𑀢𑁂𑀢𑀩𑁆𑀩𑀢𑁆𑀣𑀁. 𑀦 𑀅𑀜𑁆𑀜𑀣𑀸𑀢𑀺 𑀘 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀸𑀓𑀸𑀭𑀢𑁄 𑀦 𑀅𑀜𑁆𑀜𑀣𑀸, 𑀦 𑀧𑀦 𑀪𑀕𑀯𑀢𑀸 𑀤𑁂𑀲𑀺𑀢𑀸𑀓𑀸𑀭𑀢𑁄. 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑀸 𑀳𑀺 𑀪𑀕𑀯𑀢𑁄 𑀤𑁂𑀲𑀦𑀸, 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀓𑁄 𑀲𑀫𑀢𑁆𑀣𑁄 𑀯𑀺𑀜𑁆𑀜𑀸𑀢𑀼’’𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺, 𑀇𑀢𑀭𑀣𑀸 𑀪𑀕𑀯𑀢𑀸 𑀤𑁂𑀲𑀺𑀢𑀸𑀓𑀸𑀭𑁂𑀦𑁂𑀯 𑀲𑁄𑀢𑀼𑀁 𑀲𑀫𑀢𑁆𑀣𑀢𑁆𑀢𑀸 𑀢𑀤𑁂𑀢𑀁 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀬𑀣𑀸𑀯𑀼𑀢𑁆𑀢𑁂𑀦 𑀧𑀦 𑀅𑀢𑁆𑀣𑁂𑀦 𑀥𑀸𑀭𑀡𑀩𑀮𑀤𑀲𑁆𑀲𑀦𑀜𑁆𑀘 𑀦 𑀯𑀺𑀭𑀼𑀚𑁆𑀛𑀢𑀺 𑀲𑀼𑀢𑀸𑀓𑀸𑀭𑀸𑀯𑀺𑀭𑀼𑀚𑁆𑀛𑀦𑀯𑀲𑁂𑀦 𑀥𑀸𑀭𑀡𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀅𑀜𑁆𑀜𑀣𑀸 𑀪𑀕𑀯𑀢𑀸 𑀤𑁂𑀲𑀺𑀢𑀸𑀓𑀸𑀭𑁂𑀦𑁂𑀯 𑀥𑀸𑀭𑀺𑀢𑀼𑀁 𑀲𑀫𑀢𑁆𑀣𑀦𑀢𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑁂𑀬𑁆𑀬. 𑀦 𑀳𑁂𑀢𑁆𑀣 𑀤𑁆𑀯𑀺𑀦𑁆𑀦𑀁 𑀅𑀢𑁆𑀣𑀸𑀦𑀁 𑀅𑀢𑁆𑀣𑀦𑁆𑀢𑀭𑀢𑀸𑀧𑀭𑀺𑀳𑀸𑀭𑁄 𑀬𑀼𑀢𑁆𑀢𑁄 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀢𑁆𑀣𑀸𑀦𑀁 𑀲𑀼𑀢𑀪𑀸𑀯𑀤𑀻𑀧𑀦𑁂𑀦 𑀏𑀓𑀯𑀺𑀲𑀬𑀢𑁆𑀢𑀸, 𑀇𑀢𑀭𑀣𑀸 𑀣𑁂𑀭𑁄 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀲𑀩𑁆𑀩𑀣𑀸 𑀧𑀝𑀺𑀕𑁆𑀕𑀳𑀡𑁂 𑀧𑀘𑁆𑀙𑀺𑀫𑀢𑁆𑀣𑀯𑀲𑁂𑀦 𑀲𑀫𑀢𑁆𑀣𑁄, 𑀧𑀼𑀭𑀺𑀫𑀢𑁆𑀣𑀯𑀲𑁂𑀦 𑀘 𑀅𑀲𑀫𑀢𑁆𑀣𑁄𑀢𑀺 𑀆𑀧𑀚𑁆𑀚𑁂𑀬𑁆𑀬𑀸𑀢𑀺.

‘‘𑀬𑁄 ¶ 𑀧𑀭𑁄 𑀦 𑀳𑁄𑀢𑀺, 𑀲𑁄 𑀅𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀸𑀬 𑀦𑀺𑀬𑀓𑀚𑁆𑀛𑀢𑁆𑀢𑀲𑀗𑁆𑀔𑀸𑀢𑀸𑀬 𑀲𑀦𑁆𑀢𑀢𑀺𑀬𑀸 𑀧𑀯𑀢𑁆𑀢𑀦𑀓𑁄 𑀢𑀺𑀯𑀺𑀥𑁄𑀧𑀺 𑀫𑁂-𑀲𑀤𑁆𑀤𑁄, 𑀢𑀲𑁆𑀫𑀸 𑀓𑀺𑀜𑁆𑀘𑀸𑀧𑀺 𑀦𑀺𑀬𑀓𑀚𑁆𑀛𑀢𑁆𑀢𑀲𑀦𑁆𑀢𑀢𑀺𑀯𑀲𑁂𑀦 𑀏𑀓𑀲𑁆𑀫𑀺𑀁 𑀬𑁂𑀯𑀢𑁆𑀣𑁂 𑀫𑁂-𑀲𑀤𑁆𑀤𑁄 𑀤𑀺𑀲𑁆𑀲𑀢𑀺, 𑀢𑀣𑀸𑀧𑀺 𑀓𑀭𑀡𑀲𑀫𑁆𑀧𑀤𑀸𑀦𑀲𑀸𑀫𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀯𑀺𑀚𑁆𑀚𑀫𑀸𑀦𑀯𑀺𑀪𑀢𑁆𑀢𑀺𑀪𑁂𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀢𑀻𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀻’’𑀢𑀺, 𑀢𑀻𑀲𑀼 𑀯𑀺𑀪𑀢𑁆𑀢𑀺𑀬𑀢𑁆𑀣𑁂𑀲𑀼 𑀅𑀢𑁆𑀢𑀦𑀸 𑀲𑀜𑁆𑀜𑀼𑀢𑁆𑀢𑀯𑀺𑀪𑀢𑁆𑀢𑀺𑀢𑁄 𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄 ¶ . 𑀕𑀸𑀣𑀸𑀪𑀺𑀕𑀻𑀢𑀦𑁆𑀢𑀺 𑀕𑀸𑀣𑀸𑀬 𑀅𑀪𑀺𑀕𑀻𑀢𑀁 𑀅𑀪𑀺𑀫𑀼𑀔𑀁 𑀕𑀸𑀬𑀺𑀢𑀁. 𑀅𑀪𑁄𑀚𑀦𑁂𑀬𑁆𑀬𑀦𑁆𑀢𑀺 𑀪𑁄𑀚𑀦𑀁 𑀓𑀸𑀢𑀼𑀫𑀦𑀭𑀳𑀭𑀽𑀧𑀁. 𑀅𑀪𑀺𑀕𑀻𑀢𑀧𑀤𑀲𑁆𑀲 𑀓𑀢𑁆𑀢𑀼𑀧𑁂𑀓𑁆𑀔𑀢𑁆𑀢𑀸 𑀫𑀬𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀬𑀣𑀸𑀭𑀳𑀁. 𑀲𑀼𑀢𑀲𑀤𑁆𑀤𑀲𑁆𑀲 𑀓𑀫𑁆𑀫𑀪𑀸𑀯𑀲𑀸𑀥𑀦𑀯𑀲𑁂𑀦 𑀤𑁆𑀯𑀸𑀥𑀺𑀧𑁆𑀧𑀸𑀬𑀺𑀓𑀧𑀤𑀢𑁆𑀢𑀸 𑀬𑀣𑀸𑀬𑁄𑀕𑀁 ‘‘𑀫𑀬𑀸 𑀲𑀼𑀢’’𑀦𑁆𑀢𑀺 𑀘 ‘‘𑀫𑀫 𑀲𑀼𑀢’’𑀦𑁆𑀢𑀺 𑀘 𑀅𑀢𑁆𑀣𑀤𑁆𑀯𑀬𑁂 𑀬𑀼𑀚𑁆𑀚𑀢𑀺.

𑀓𑀺𑀜𑁆𑀘𑀸𑀧𑀺 𑀉𑀧𑀲𑀕𑁆𑀕𑁄 𑀓𑀺𑀭𑀺𑀬𑀁 𑀯𑀺𑀲𑁂𑀲𑁂𑀢𑀺, 𑀚𑁄𑀢𑀓𑀫𑀢𑁆𑀢𑀪𑀸𑀯𑀢𑁄 𑀧𑀦 𑀲𑀢𑀺𑀧𑀺 𑀢𑀲𑁆𑀫𑀺𑀁 𑀲𑀼𑀢𑀲𑀤𑁆𑀤𑁄𑀬𑁂𑀯 𑀢𑀁 𑀢𑀁 𑀅𑀢𑁆𑀣𑀁 𑀯𑀤𑀢𑀻𑀢𑀺 𑀅𑀦𑀼𑀧𑀲𑀕𑁆𑀕𑀲𑁆𑀲 𑀲𑀼𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂 𑀲𑀉𑀧𑀲𑀕𑁆𑀕𑀲𑁆𑀲 𑀕𑀳𑀡𑀁 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀆𑀳 ‘‘𑀲𑀉𑀧𑀲𑀕𑁆𑀕𑁄 𑀘 𑀅𑀦𑀼𑀧𑀲𑀕𑁆𑀕𑁄 𑀘𑀸’’𑀢𑀺. 𑀅𑀲𑁆𑀲𑀸𑀢𑀺 𑀲𑀼𑀢𑀲𑀤𑁆𑀤𑀲𑁆𑀲. 𑀉𑀧𑀲𑀕𑁆𑀕𑀯𑀲𑁂𑀦𑀧𑀺 𑀥𑀸𑀢𑀼𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀯𑀸𑀘𑀓𑁄 𑀬𑀣𑀸 ‘‘𑀅𑀦𑀼𑀪𑀯𑀢𑀺 𑀧𑀭𑀸𑀪𑀯𑀢𑀻’’𑀢𑀺 𑀯𑀼𑀢𑁆𑀢𑀁 ‘‘𑀕𑀘𑁆𑀙𑀦𑁆𑀢𑁄𑀢𑀺 𑀅𑀢𑁆𑀣𑁄’’𑀢𑀺. 𑀢𑀣𑀸 𑀅𑀦𑀼𑀧𑀲𑀕𑁆𑀕𑁄𑀧𑀺 𑀥𑀸𑀢𑀼𑀲𑀤𑁆𑀤𑁄 𑀲𑀉𑀧𑀲𑀕𑁆𑀕𑁄 𑀯𑀺𑀬 𑀯𑀺𑀲𑁂𑀲𑀢𑁆𑀣𑀯𑀸𑀘𑀓𑁄𑀢𑀺 𑀆𑀳 ‘‘𑀯𑀺𑀲𑁆𑀲𑀼𑀢𑀥𑀫𑁆𑀫𑀲𑁆𑀲𑀸𑀢𑀺 𑀅𑀢𑁆𑀣𑁄’’𑀢𑀺. 𑀏𑀯𑀫𑀻𑀤𑀺𑀲𑁂𑀲𑀼. 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀲𑁄𑀢𑀤𑁆𑀯𑀸𑀭𑀦𑀺𑀲𑁆𑀲𑀺𑀢𑁂𑀦 𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀢𑀩𑁆𑀩𑀁, 𑀲𑀲𑀫𑁆𑀪𑀸𑀭𑀓𑀣𑀸 𑀯𑀸 𑀏𑀲𑀸, 𑀲𑁄𑀢𑀤𑁆𑀯𑀸𑀭𑁂𑀦 𑀯𑀺𑀜𑁆𑀜𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑀯𑀺𑀜𑁆𑀜𑀸𑀢𑀥𑀭𑁄𑀢𑀺 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀢𑀥𑀫𑁆𑀫𑀥𑀭𑁄. 𑀦 𑀳𑀺 𑀲𑁄𑀢𑀤𑁆𑀯𑀸𑀭𑀦𑀺𑀲𑁆𑀲𑀺𑀢𑀯𑀺𑀜𑁆𑀜𑀸𑀡𑀫𑀢𑁆𑀢𑁂𑀦 𑀥𑀫𑁆𑀫𑁄 𑀯𑀺𑀜𑁆𑀜𑀸𑀬𑀢𑀺, 𑀅𑀣 𑀔𑁄 𑀢𑀤𑀦𑀼𑀲𑀸𑀭𑀫𑀦𑁄𑀯𑀺𑀜𑁆𑀜𑀸𑀡𑁂𑀦𑁂𑀯, 𑀲𑀼𑀢𑀥𑀭𑁄𑀢𑀺 𑀘 𑀢𑀣𑀸 𑀯𑀺𑀜𑁆𑀜𑀸𑀢𑀥𑀫𑁆𑀫𑀥𑀭𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀢𑀤𑀢𑁆𑀣𑁄𑀬𑁂𑀯 𑀲𑀫𑁆𑀪𑀯𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀓𑀫𑁆𑀫𑀪𑀸𑀯𑀲𑀸𑀥𑀦𑀸𑀦𑀺 𑀲𑀼𑀢𑀲𑀤𑁆𑀤𑁂 𑀲𑀫𑁆𑀪𑀯𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀇𑀥 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀧𑀼𑀩𑁆𑀩𑀸𑀧𑀭𑀧𑀤𑀲𑀫𑁆𑀩𑀦𑁆𑀥𑀯𑀲𑁂𑀦 𑀅𑀢𑁆𑀣𑀲𑁆𑀲 𑀉𑀧𑀧𑀦𑁆𑀦𑀢𑀸, 𑀅𑀦𑀼𑀧𑀧𑀦𑁆𑀦𑀢𑀸 𑀘 𑀯𑀺𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀲𑀼𑀢𑀲𑀤𑁆𑀤𑀲𑁆𑀲𑁂𑀯 𑀯𑀲𑁂𑀦 𑀅𑀬𑀫𑀢𑁆𑀣𑁄 ‘‘𑀉𑀧𑀧𑀦𑁆𑀦𑁄, 𑀅𑀦𑀼𑀧𑀧𑀦𑁆𑀦𑁄’’𑀢𑀺 𑀯𑀸 𑀦 𑀯𑀺𑀜𑁆𑀜𑀸𑀢𑀩𑁆𑀩𑁄𑀢𑀺 𑀘𑁄𑀤𑀦𑀸𑀬 𑀧𑀼𑀩𑁆𑀩𑀸𑀧𑀭𑀧𑀤𑀲𑀫𑁆𑀩𑀦𑁆𑀥𑀯𑀲𑁂𑀦 𑀏𑀢𑀤𑀢𑁆𑀣𑀲𑁆𑀲 𑀉𑀧𑀧𑀦𑁆𑀦𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀫𑁂-𑀲𑀤𑁆𑀤𑀲𑁆𑀲 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀬𑀸𑀢𑀺 𑀅𑀢𑁆𑀣𑁂 𑀲𑀢𑀻𑀢𑀺 𑀓𑀢𑁆𑀢𑀼𑀢𑁆𑀣𑁂 𑀓𑀭𑀡𑀦𑀺𑀤𑁆𑀤𑁂𑀲𑀯𑀲𑁂𑀦 𑀫𑀬𑀸𑀢𑀺 𑀅𑀢𑁆𑀣𑁂 𑀯𑀢𑁆𑀢𑀩𑁆𑀩𑁂 𑀲𑀢𑀺, 𑀬𑀤𑀸 𑀫𑁂-𑀲𑀤𑁆𑀤𑀲𑁆𑀲 𑀓𑀢𑁆𑀢𑀼𑀯𑀲𑁂𑀦 𑀓𑀭𑀡𑀦𑀺𑀤𑁆𑀤𑁂𑀲𑁄, 𑀢𑀤𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀫𑀸𑀢𑀺 𑀅𑀢𑁆𑀣𑁂 𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑀻𑀬𑀢𑁆𑀣𑁂 𑀲𑀸𑀫𑀺𑀦𑀺𑀤𑁆𑀤𑁂𑀲𑀯𑀲𑁂𑀦 ¶ 𑀫𑀫𑀸𑀢𑀺 𑀅𑀢𑁆𑀣𑁂 𑀯𑀢𑁆𑀢𑀩𑁆𑀩𑁂 𑀲𑀢𑀺, 𑀬𑀤𑀸 𑀲𑀫𑁆𑀩𑀦𑁆𑀥𑀯𑀲𑁂𑀦 𑀲𑀸𑀫𑀺 𑀦𑀺𑀤𑁆𑀤𑁂𑀲𑁄, 𑀢𑀤𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀯𑀁 𑀲𑀤𑁆𑀤𑀢𑁄 𑀜𑀸𑀢𑀩𑁆𑀩𑀫𑀢𑁆𑀣𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀳𑀺 𑀤𑀲𑁆𑀲𑁂𑀢𑀩𑁆𑀩𑀫𑀢𑁆𑀣𑀁 𑀦𑀺𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀫𑁂𑀢𑁂𑀲𑀽’’𑀢𑀺𑀆𑀤𑀺𑀫𑀸𑀳. 𑀲𑀼𑀢𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂 𑀧𑀬𑀼𑀢𑁆𑀢𑁂𑀦 𑀏𑀯𑀁-𑀲𑀤𑁆𑀤𑁂𑀦 𑀲𑀯𑀦𑀓𑀺𑀭𑀺𑀬𑀸𑀚𑁄𑀢𑀓𑁂𑀦𑁂𑀯 𑀪𑀯𑀺𑀢𑀩𑁆𑀩𑀁 𑀯𑀺𑀚𑁆𑀚𑀫𑀸𑀦𑀢𑁆𑀣𑀲𑁆𑀲 𑀚𑁄𑀢𑀓𑀫𑀢𑁆𑀢𑀢𑁆𑀢𑀸 𑀦𑀺𑀧𑀸𑀢𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀏𑀯𑀦𑁆𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀺𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀲𑀯𑀦𑀸𑀬 𑀏𑀯 𑀳𑀺 𑀆𑀓𑀸𑀭𑁄, 𑀦𑀺𑀤𑀲𑁆𑀲𑀦𑀁, 𑀅𑀯𑀥𑀸𑀭𑀡𑀫𑁆𑀧𑀺, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁄 𑀏𑀯𑀁-𑀲𑀤𑁆𑀤𑀲𑁆𑀲 𑀢𑀺𑀯𑀺𑀥𑁄𑀧𑀺 𑀅𑀢𑁆𑀣𑁄 𑀲𑀯𑀦𑀓𑀺𑀭𑀺𑀬𑀸𑀚𑁄𑀢𑀓𑀪𑀸𑀯𑁂𑀦 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀘𑁂𑀢𑁆𑀣 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀁 𑀲𑁄𑀢𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀸𑀦𑀁, 𑀢𑀤𑀪𑀺𑀦𑀺𑀧𑀸𑀢𑀸𑀦𑀜𑁆𑀘 𑀫𑀦𑁄𑀤𑁆𑀯𑀸𑀭𑀺𑀓 ¶ 𑀯𑀺𑀜𑁆𑀜𑀸𑀡𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀬𑀢𑁄 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑀯𑀺𑀜𑁆𑀜𑀸𑀢𑀢𑁆𑀣𑁂 𑀇𑀥 𑀲𑀼𑀢𑀲𑀤𑁆𑀤𑁄𑀢𑀺 𑀯𑀼𑀢𑁆𑀢𑁄. 𑀅𑀯𑀥𑀸𑀭𑀡𑀨𑀮𑀢𑁆𑀢𑀸 𑀲𑀤𑁆𑀤𑀧𑀬𑁄𑀕𑀲𑁆𑀲 𑀲𑀩𑁆𑀩𑀫𑁆𑀧𑀺 𑀯𑀸𑀓𑁆𑀬𑀁 𑀅𑀦𑁆𑀢𑁄𑀕𑀥𑀸𑀯𑀥𑀸𑀭𑀡𑀁, 𑀢𑀲𑁆𑀫𑀸 ‘‘𑀲𑀼𑀢’’𑀦𑁆𑀢𑀺 𑀏𑀢𑀲𑁆𑀲 𑀲𑀼𑀢𑀫𑁂𑀯𑀸𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀅𑀲𑁆𑀲𑀯𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺. 𑀏𑀢𑁂𑀦 𑀳𑀺 𑀯𑀘𑀦𑁂𑀦 𑀅𑀯𑀥𑀸𑀭𑀡𑁂𑀦 𑀦𑀺𑀭𑀸𑀓𑀢𑀁 𑀤𑀲𑁆𑀲𑁂𑀢𑀺. 𑀬𑀣𑀸 𑀧𑀦 𑀬𑀁 𑀲𑀼𑀢𑀁 𑀲𑀼𑀢𑀫𑁂𑀯𑀸𑀢𑀺 𑀦𑀺𑀬𑀫𑁂𑀢𑀩𑁆𑀩𑀁, 𑀢𑀣𑀸 𑀘 𑀢𑀁 𑀲𑀼𑀢𑀁 𑀲𑀫𑁆𑀫𑀸 𑀲𑀼𑀢𑀁 𑀳𑁄𑀢𑀻𑀢𑀺 𑀅𑀯𑀥𑀸𑀭𑀡𑀨𑀮𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ‘‘𑀅𑀦𑀽𑀦𑀸𑀥𑀺𑀓𑀸𑀯𑀺𑀧𑀭𑀻𑀢𑀕𑁆𑀕𑀳𑀡𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀅𑀣 𑀯𑀸 𑀲𑀤𑁆𑀤𑀦𑁆𑀢𑀭𑀢𑁆𑀣𑀸𑀧𑁄𑀳𑀦𑀯𑀲𑁂𑀦 𑀲𑀤𑁆𑀤𑁄 𑀅𑀢𑁆𑀣𑀁 𑀯𑀤𑀢𑀺, 𑀢𑀲𑁆𑀫𑀸 ‘‘𑀲𑀼𑀢’’𑀦𑁆𑀢𑀺 𑀏𑀢𑀲𑁆𑀲 𑀅𑀲𑀼𑀢𑀁 𑀦 𑀳𑁄𑀢𑀻𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀲𑀦𑁆𑀥𑀸𑀬 ‘‘𑀅𑀲𑁆𑀲𑀯𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺 𑀯𑀼𑀢𑁆𑀢𑀁, 𑀇𑀫𑀺𑀦𑀸 𑀤𑀺𑀝𑁆𑀞𑀸𑀤𑀺𑀦𑀺𑀯𑀢𑁆𑀢𑀦𑀁 𑀓𑀭𑁄𑀢𑀺 𑀤𑀺𑀝𑁆𑀞𑀸𑀤𑀻𑀦𑀁 ‘‘𑀅𑀲𑀼𑀢’’𑀦𑁆𑀢𑀺 𑀲𑀤𑁆𑀤𑀦𑁆𑀢𑀭𑀢𑁆𑀣𑀪𑀸𑀯𑁂𑀦 𑀦𑀺𑀯𑀢𑁆𑀢𑁂𑀢𑀩𑁆𑀩𑀢𑁆𑀢𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀦 𑀇𑀤𑀁 𑀫𑀬𑀸 𑀅𑀢𑁆𑀢𑀦𑁄 𑀜𑀸𑀡𑁂𑀦 𑀤𑀺𑀝𑁆𑀞𑀁, 𑀦 𑀘 𑀲𑀬𑀫𑁆𑀪𑀼𑀜𑀸𑀡𑁂𑀦 𑀲𑀘𑁆𑀙𑀺𑀓𑀢𑀁, 𑀅𑀣 𑀔𑁄 𑀲𑀼𑀢𑀁, 𑀢𑀜𑁆𑀘 𑀔𑁄 𑀲𑀼𑀢𑀁 𑀲𑀫𑁆𑀫𑀤𑁂𑀯𑀸𑀢𑀺. 𑀢𑀤𑁂𑀯 𑀲𑀫𑁆𑀫𑀸 𑀲𑀼𑀢𑀪𑀸𑀯𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀦𑀽𑀦𑀸…𑀧𑁂… 𑀤𑀲𑁆𑀲𑀦’’𑀦𑁆𑀢𑀺. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀏𑀯𑀸𑀤𑀺𑀲𑀢𑁆𑀢𑀺𑀬𑀸 𑀘𑁂𑀯, 𑀅𑀜𑁆𑀜𑀢𑁆𑀣𑀸𑀧𑁄𑀳𑀦𑁂𑀦 𑀘;

𑀤𑁆𑀯𑀺𑀥𑀸 𑀲𑀤𑁆𑀤𑁄 𑀅𑀢𑁆𑀣𑀦𑁆𑀢𑀭𑀁, 𑀦𑀺𑀯𑀢𑁆𑀢𑁂𑀢𑀺 𑀬𑀣𑀸𑀭𑀳’’𑀦𑁆𑀢𑀺.

𑀅𑀧𑀺𑀘 𑀅𑀯𑀥𑀸𑀭𑀡𑀢𑁆𑀣𑁂 𑀏𑀯𑀁-𑀲𑀤𑁆𑀤𑁂 𑀅𑀬𑀫𑀢𑁆𑀣𑀬𑁄𑀚𑀦𑀸 𑀓𑀭𑀻𑀬𑀢𑀻𑀢𑀺 𑀢𑀤𑀧𑁂𑀓𑁆𑀔𑀲𑁆𑀲 𑀲𑀼𑀢𑀲𑀤𑁆𑀤𑀲𑁆𑀲 𑀲𑀸𑀯𑀥𑀸𑀭𑀡𑀢𑁆𑀣𑁄 𑀯𑀼𑀢𑁆𑀢𑁄 ‘‘𑀅𑀲𑁆𑀲𑀯𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺, 𑀢𑀤𑀯𑀥𑀸𑀭𑀡𑀨𑀮𑀁 𑀤𑀲𑁆𑀲𑁂𑀢𑀺 ‘‘𑀅𑀦𑀽…𑀧𑁂… 𑀤𑀲𑁆𑀲𑀦’’𑀦𑁆𑀢𑀺 𑀇𑀫𑀺𑀦𑀸. 𑀲𑀯𑀦-𑀲𑀤𑁆𑀤𑁄 𑀘𑁂𑀢𑁆𑀣 𑀪𑀸𑀯𑀲𑀤𑁆𑀤𑁂𑀦 𑀬𑁄𑀕𑀢𑁄 𑀓𑀫𑁆𑀫𑀲𑀸𑀥𑀦𑁄 𑀯𑁂𑀤𑀺𑀢𑀩𑁆𑀩𑁄 ‘‘𑀲𑀼𑀬𑁆𑀬𑀢𑀻’’𑀢𑀺. 𑀅𑀦𑀽𑀦𑀸𑀥𑀺𑀓𑀢𑀸𑀬 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀸𑀓𑀸𑀭𑀢𑁄 𑀅𑀯𑀺𑀧𑀭𑀻𑀢𑀁 ¶ , 𑀅𑀯𑀺𑀧𑀭𑀻𑀢𑀲𑁆𑀲 𑀯𑀸 𑀲𑀼𑀢𑁆𑀢𑀲𑁆𑀲 𑀕𑀳𑀡𑀁, 𑀢𑀲𑁆𑀲 𑀦𑀺𑀤𑀲𑁆𑀲𑀦𑀁 𑀢𑀣𑀸, 𑀇𑀢𑀺 𑀲𑀯𑀦𑀳𑁂𑀢𑀼 𑀲𑀼𑀡𑀦𑁆𑀢𑀧𑀼𑀕𑁆𑀕𑀮𑀲𑀯𑀦𑀯𑀺𑀲𑁂𑀲𑀯𑀲𑁂𑀦 𑀅𑀬𑀁 𑀬𑁄𑀚𑀦𑀸 𑀓𑀢𑀸.

𑀏𑀯𑀁 𑀧𑀤𑀢𑁆𑀢𑀬𑀲𑁆𑀲 𑀏𑀓𑁂𑀦 𑀧𑀓𑀸𑀭𑁂𑀦 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀓𑀸𑀭𑀦𑁆𑀢𑀭𑁂𑀦𑀸𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀲𑁆𑀲𑀸𑀢𑀺 𑀬𑀸 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀥𑀫𑁆𑀫𑀲𑁆𑀲𑀯𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀫𑀦𑁄𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀯𑀻𑀣𑀺, 𑀢𑀲𑁆𑀲𑀸. 𑀲𑀸 𑀳𑀺 𑀦𑀸𑀦𑀸𑀧𑁆𑀧𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀢𑀼𑀁 𑀲𑀫𑀢𑁆𑀣𑀸, 𑀦 𑀲𑁄𑀢𑀤𑁆𑀯𑀸𑀭𑀺𑀓 𑀯𑀺𑀜𑁆𑀜𑀸𑀡𑀯𑀻𑀣𑀺 𑀏𑀓𑀸𑀭𑀫𑁆𑀫𑀡𑁂𑀬𑁂𑀯 𑀧𑀯𑀢𑁆𑀢𑀦𑀢𑁄, 𑀢𑀣𑀸 𑀘𑁂𑀯 𑀯𑀼𑀢𑁆𑀢𑀁 ‘‘𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦𑀸’’𑀢𑀺. 𑀢𑁂𑀦 𑀳𑀺 𑀲𑁄𑀢𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀯𑀻𑀣𑀺 𑀦𑀺𑀯𑀢𑁆𑀢𑀢𑀺. 𑀦𑀸𑀦𑀧𑁆𑀧𑀓𑀸𑀭𑁂𑀦𑀸𑀢𑀺 𑀯𑀓𑁆𑀔𑀫𑀸𑀦𑁂𑀦 𑀅𑀦𑁂𑀓𑀯𑀺𑀳𑀺𑀢𑁂𑀦 𑀩𑁆𑀬𑀜𑁆𑀚𑀦𑀢𑁆𑀣𑀕𑁆𑀕𑀳𑀡𑀸𑀓𑀸𑀭𑀲𑀗𑁆𑀔𑀸𑀢𑁂𑀦 𑀦𑀸𑀦𑀸𑀯𑀺𑀥𑁂𑀦 𑀆𑀓𑀸𑀭𑁂𑀦, 𑀏𑀢𑁂𑀦 𑀇𑀫𑀺𑀲𑁆𑀲𑀸 𑀬𑁄𑀚𑀦𑀸𑀬 𑀆𑀓𑀸𑀭𑀢𑁆𑀣𑁄 𑀏𑀯𑀁-𑀲𑀤𑁆𑀤𑁄 𑀕𑀳𑀺𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀯𑀢𑁆𑀢𑀺𑀪𑀸𑀯𑀧𑁆𑀧𑀓𑀸𑀲𑀦𑀦𑁆𑀢𑀺 𑀧𑀯𑀢𑁆𑀢𑀺𑀬𑀸 𑀅𑀢𑁆𑀣𑀺𑀪𑀸𑀯𑀧𑁆𑀧𑀓𑀸𑀲𑀦𑀁. 𑀬𑀲𑁆𑀫𑀺𑀁 𑀧𑀓𑀸𑀭𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀯𑀺𑀜𑁆𑀜𑀸𑀡𑀯𑀻𑀣𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀧𑀯𑀢𑁆𑀢𑀸, 𑀢𑀤𑁂𑀯 𑀆𑀭𑀫𑁆𑀫𑀡𑀁 𑀲𑀦𑁆𑀥𑀸𑀬 ‘‘𑀥𑀫𑁆𑀫𑀧𑁆𑀧𑀓𑀸𑀲𑀦’’𑀦𑁆𑀢𑀺 ¶ 𑀯𑀼𑀢𑁆𑀢𑀁, 𑀦 𑀧𑀦 𑀲𑀼𑀢𑀲𑀤𑁆𑀤𑀲𑁆𑀲 𑀥𑀫𑁆𑀫𑀢𑁆𑀣𑀁, 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀬𑀁 𑀥𑀫𑁆𑀫𑁄 𑀲𑀼𑀢𑁄’’𑀢𑀺. 𑀢𑀲𑁆𑀲𑀸 𑀳𑀺 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀆𑀭𑀫𑁆𑀫𑀡𑀫𑁂𑀯 ‘‘𑀅𑀬𑀁 𑀥𑀫𑁆𑀫𑁄 𑀲𑀼𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀜𑁆𑀘 𑀦𑀺𑀬𑀫𑀺𑀬𑀫𑀸𑀦𑀁 𑀬𑀣𑀸𑀯𑀼𑀢𑁆𑀢𑀸𑀬 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀆𑀭𑀫𑁆𑀫𑀡𑀪𑀽𑀢𑀁 𑀲𑀼𑀢𑁆𑀢𑀫𑁂𑀯. 𑀅𑀬𑀜𑁆𑀳𑁂𑀢𑁆𑀣𑀸𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀸𑀓𑀝𑀻𑀓𑀭𑀡𑀁. 𑀢𑀧𑁆𑀧𑀸𑀓𑀝𑀻𑀓𑀭𑀡𑀢𑁆𑀣𑁄 𑀳𑁂𑀢𑁆𑀣 𑀳𑀺-𑀲𑀤𑁆𑀤𑁄. 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀓𑀭𑀡𑀪𑀽𑀢𑀸𑀬 𑀫𑀬𑀸 𑀦 𑀅𑀜𑁆𑀜𑀁 𑀓𑀢𑀁, 𑀇𑀤𑀁 𑀧𑀦 𑀆𑀭𑀫𑁆𑀫𑀡𑀁 𑀓𑀢𑀁. 𑀓𑀺𑀁 𑀧𑀦 𑀢𑀦𑁆𑀢𑀺 𑀘𑁂? 𑀅𑀬𑀁 𑀥𑀫𑁆𑀫𑁄 𑀲𑀼𑀢𑁄𑀢𑀺. 𑀅𑀬𑀁 𑀧𑀦𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑁋 𑀆𑀓𑀸𑀭𑀢𑁆𑀣𑁂 𑀏𑀯𑀁-𑀲𑀤𑁆𑀤𑁂 ‘‘𑀏𑀓𑁂𑀦𑀸𑀓𑀸𑀭𑁂𑀦𑀸’’𑀢𑀺 𑀬𑁄 𑀆𑀓𑀸𑀭𑁄 𑀯𑀼𑀢𑁆𑀢𑁄, 𑀲𑁄 𑀅𑀢𑁆𑀣𑀢𑁄 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀦𑀸𑀦𑀧𑁆𑀧𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀪𑀸𑀯𑁄𑀬𑁂𑀯, 𑀢𑁂𑀦 𑀘 𑀢𑀤𑀸𑀭𑀫𑁆𑀫𑀡𑀪𑀽𑀢𑀲𑁆𑀲 𑀥𑀫𑁆𑀫𑀲𑁆𑀲𑁂𑀯 𑀲𑀯𑀦𑀁 𑀓𑀢𑀁, 𑀦 𑀅𑀜𑁆𑀜𑀦𑁆𑀢𑀺. 𑀏𑀯𑀁 𑀲𑀯𑀦𑀓𑀺𑀭𑀺𑀬𑀸𑀬 𑀓𑀭𑀡𑀓𑀢𑁆𑀢𑀼𑀓𑀫𑁆𑀫𑀯𑀺𑀲𑁂𑀲𑁄 𑀇𑀫𑀺𑀲𑁆𑀲𑀸 𑀬𑁄𑀚𑀦𑀸𑀬 𑀤𑀲𑁆𑀲𑀺𑀢𑁄.

𑀅𑀜𑁆𑀜𑀫𑁆𑀧𑀺 𑀬𑁄𑀚𑀦𑀫𑀸𑀳 ‘‘𑀢𑀣𑀸’’𑀢𑀺𑀆𑀤𑀺𑀦𑀸. 𑀦𑀺𑀤𑀲𑁆𑀲𑀦𑀢𑁆𑀣𑀁 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀦𑀺𑀤𑀲𑁆𑀲𑀦𑁂𑀦 𑀘 𑀦𑀺𑀤𑀲𑁆𑀲𑀺𑀢𑀩𑁆𑀩𑀲𑁆𑀲𑀸𑀯𑀺𑀦𑀸𑀪𑀸𑀯𑀢𑁄 ‘‘𑀏𑀯𑀦𑁆𑀢𑀺 𑀦𑀺𑀤𑀲𑁆𑀲𑀺𑀢𑀩𑁆𑀩𑀧𑁆𑀧𑀓𑀸𑀲𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀳𑀺 𑀢𑀤𑀯𑀺𑀦𑀸𑀪𑀸𑀯𑀢𑁄 𑀏𑀯𑀁𑀲𑀤𑁆𑀤𑁂𑀦 𑀲𑀓𑀮𑀫𑁆𑀧𑀺 𑀲𑀼𑀢𑁆𑀢𑀁 𑀧𑀘𑁆𑀘𑀸𑀫𑀝𑁆𑀞𑀦𑁆𑀢𑀺 𑀤𑀲𑁆𑀲𑁂𑀢𑀺, 𑀲𑀼𑀢𑀲𑀤𑁆𑀤𑀲𑁆𑀲 𑀓𑀺𑀭𑀺𑀬𑀸𑀧𑀭𑀢𑁆𑀢𑀸, 𑀲𑀯𑀦𑀓𑀺𑀭𑀺𑀬𑀸𑀬 𑀘 𑀲𑀸𑀥𑀸𑀭𑀡𑀯𑀺𑀜𑁆𑀜𑀸𑀡𑀧𑁆𑀧𑀩𑀦𑁆𑀥𑀧𑀝𑀺𑀩𑀤𑁆𑀥𑀢𑁆𑀢𑀸 𑀢𑀲𑁆𑀫𑀺𑀜𑁆𑀘 𑀯𑀺𑀜𑁆𑀜𑀸𑀡𑀧𑁆𑀧𑀩𑀦𑁆𑀥𑁂 ¶ 𑀧𑀼𑀕𑁆𑀕𑀮𑀯𑁄𑀳𑀸𑀭𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀕𑁆𑀕𑀮𑀓𑀺𑀘𑁆𑀘𑀧𑁆𑀧𑀓𑀸𑀲𑀦’’𑀦𑁆𑀢𑀺. 𑀲𑀸𑀥𑀸𑀭𑀡𑀯𑀺𑀜𑁆𑀜𑀸𑀡𑀧𑁆𑀧𑀩𑀦𑁆𑀥𑁄 𑀳𑀺 𑀧𑀡𑁆𑀡𑀢𑁆𑀢𑀺𑀬𑀸 𑀇𑀥 𑀧𑀼𑀕𑁆𑀕𑀮𑁄 𑀦𑀸𑀫, 𑀲𑀯𑀦𑀓𑀺𑀭𑀺𑀬𑀸 𑀧𑀦 𑀢𑀲𑁆𑀲 𑀓𑀺𑀘𑁆𑀘𑀁 𑀦𑀸𑀫. 𑀦 𑀳𑀺 𑀧𑀼𑀕𑁆𑀕𑀮𑀯𑁄𑀳𑀸𑀭𑀭𑀳𑀺𑀢𑁂 𑀥𑀫𑁆𑀫𑀧𑁆𑀧𑀩𑀦𑁆𑀥𑁂 𑀲𑀯𑀦𑀓𑀺𑀭𑀺𑀬𑀸 𑀮𑀩𑁆𑀪𑀢𑀺 𑀯𑁄𑀳𑀸𑀭𑀯𑀺𑀲𑀬𑀢𑁆𑀢𑀸 𑀢𑀲𑁆𑀲𑀸 𑀓𑀺𑀭𑀺𑀬𑀸𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀇𑀤’’𑀦𑁆𑀢𑀺𑀆𑀤𑀺 𑀧𑀺𑀡𑁆𑀟𑀢𑁆𑀣𑀤𑀲𑁆𑀲𑀦𑀁 𑀫𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀜𑁆𑀜𑀸𑀡𑀧𑁆𑀧𑀩𑀦𑁆𑀥𑀲𑀗𑁆𑀔𑀸𑀢𑀧𑀼𑀕𑁆𑀕𑀮𑀪𑀽𑀢𑁂𑀦 𑀫𑀬𑀸. 𑀲𑀼𑀢𑀦𑁆𑀢𑀺 𑀲𑀯𑀦𑀓𑀺𑀭𑀺𑀬𑀸𑀲𑀗𑁆𑀔𑀸𑀢𑁂𑀦 𑀧𑀼𑀕𑁆𑀕𑀮𑀓𑀺𑀘𑁆𑀘𑁂𑀦 𑀬𑁄𑀚𑀺𑀢𑀁, 𑀇𑀫𑀺𑀲𑁆𑀲𑀸 𑀧𑀦 𑀬𑁄𑀚𑀦𑀸𑀬 𑀧𑀼𑀕𑁆𑀕𑀮𑀩𑁆𑀬𑀸𑀧𑀸𑀭𑀯𑀺𑀲𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, 𑀧𑀼𑀕𑁆𑀕𑀮𑀩𑁆𑀬𑀸𑀧𑀸𑀭𑀲𑁆𑀲 𑀘 𑀦𑀺𑀤𑀲𑁆𑀲𑀦𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀆𑀓𑀸𑀭𑀢𑁆𑀣𑀫𑁂𑀯 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀧𑀼𑀭𑀺𑀫𑀬𑁄𑀚𑀦𑀸𑀬 𑀅𑀜𑁆𑀜𑀣𑀸𑀧𑀺 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀜𑁆𑀜𑀸𑀡𑀧𑁆𑀧𑀩𑀦𑁆𑀥𑀲𑁆𑀲. 𑀦𑀸𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀬𑀸. 𑀦𑀸𑀦𑀧𑁆𑀧𑀓𑀸𑀭𑀁 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑁆𑀲 𑀕𑀳𑀡𑀁, 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀯𑀸 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑁆𑀲 𑀕𑀳𑀡𑀁 𑀢𑀣𑀸, 𑀢𑀢𑁄𑀬𑁂𑀯 𑀲𑀸 ‘‘𑀆𑀓𑀸𑀭𑀧𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀸𑀢𑀺 𑀢𑀤𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀺 ‘‘𑀏𑀯𑀦𑁆𑀢𑀺 𑀳𑀻’’𑀢𑀺𑀆𑀤𑀺𑀦𑀸. 𑀆𑀓𑀸𑀭𑀧𑀜𑁆𑀜𑀢𑁆𑀢𑀻𑀢𑀺 𑀘 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀬𑁂𑀯, 𑀥𑀫𑁆𑀫𑀸𑀦𑀁 𑀧𑀦 𑀧𑀯𑀢𑁆𑀢𑀺𑀆𑀓𑀸𑀭𑀫𑀼𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑀢𑁆𑀢𑀸 𑀢𑀤𑀜𑁆𑀜𑀸𑀬 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀬𑀸 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀆𑀓𑀸𑀭𑀧𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀸 𑀯𑀺𑀲𑀬𑀦𑀺𑀤𑁆𑀤𑁂𑀲𑁄𑀢𑀺 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀦𑀺𑀤𑁆𑀤𑁂𑀲𑁄. 𑀲𑁄𑀢𑀩𑁆𑀩𑀪𑀽𑀢𑁄 𑀳𑀺 𑀥𑀫𑁆𑀫𑁄 𑀲𑀯𑀦𑀓𑀺𑀭𑀺𑀬𑀸𑀓𑀢𑁆𑀢𑀼𑀪𑀽𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀯𑀦𑀓𑀺𑀭𑀺𑀬𑀸𑀯𑀲𑁂𑀦 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀓𑀺𑀭𑀺𑀬𑀸𑀬 𑀓𑀢𑁆𑀢𑀼𑀓𑀫𑁆𑀫𑀝𑁆𑀞𑀢𑁆𑀢𑀸 𑀢𑀩𑁆𑀩𑀲𑁂𑀦 𑀘 𑀢𑀤𑀸𑀥𑀸𑀭𑀲𑁆𑀲𑀸𑀧𑀺 𑀤𑀩𑁆𑀩𑀲𑁆𑀲 𑀆𑀥𑀸𑀭𑀪𑀸𑀯𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸, 𑀇𑀥 𑀧𑀦 𑀓𑀺𑀭𑀺𑀬𑀸𑀬 𑀓𑀢𑁆𑀢𑀼𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑁄 𑀇𑀘𑁆𑀙𑀺𑀢𑁄𑀢𑀺 𑀓𑀫𑁆𑀫𑀫𑁂𑀯 ¶ 𑀆𑀥𑀸𑀭𑀯𑀲𑁂𑀦 𑀯𑀼𑀢𑁆𑀢𑀁, 𑀢𑁂𑀦𑀸𑀳 ‘‘𑀓𑀢𑁆𑀢𑀼 𑀯𑀺𑀲𑀬𑀕𑁆𑀕𑀳𑀡𑀲𑀦𑁆𑀦𑀺𑀝𑁆𑀞𑀸𑀦’’𑀦𑁆𑀢𑀺, 𑀆𑀭𑀫𑁆𑀫𑀡𑀫𑁂𑀯 𑀯𑀸 𑀯𑀺𑀲𑀬𑁄. 𑀆𑀭𑀫𑁆𑀫𑀡𑀜𑁆𑀳𑀺 𑀢𑀤𑀸𑀭𑀫𑁆𑀫𑀡𑀺𑀓𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀁. 𑀏𑀯𑀫𑁆𑀧𑀺 𑀳𑀺 𑀅𑀢𑁆𑀣𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑀭𑁄 𑀳𑁄𑀢𑀺. 𑀬𑀣𑀸𑀯𑀼𑀢𑁆𑀢𑀯𑀘𑀦𑁂 𑀧𑀺𑀡𑁆𑀟𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀢𑀸𑀯𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀢𑀸𑀯𑀢𑀸 𑀏𑀢𑁆𑀢𑀓𑁂𑀦 𑀬𑀣𑀸𑀯𑀼𑀢𑁆𑀢𑀢𑁆𑀣𑁂𑀦 𑀧𑀤𑀢𑁆𑀢𑀬𑁂𑀦, 𑀓𑀢𑀁 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀸𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑁂𑀦𑀸𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑁂𑀦. 𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀲𑀗𑁆𑀔𑀸𑀢𑁂𑀦 𑀘𑀺𑀢𑁆𑀢𑀧𑁆𑀧𑀩𑀦𑁆𑀥𑁂𑀦. 𑀕𑀳𑀡𑀲𑀤𑁆𑀤𑁂 𑀘𑁂𑀢𑀁 𑀓𑀭𑀡𑀁. 𑀘𑀺𑀢𑁆𑀢𑀲𑀦𑁆𑀢𑀸𑀦𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀓𑀲𑁆𑀲𑀘𑀺 𑀓𑀢𑁆𑀢𑀼 𑀧𑀭𑀫𑀢𑁆𑀣𑀢𑁄 𑀅𑀪𑀸𑀯𑁂𑀧𑀺 𑀲𑀤𑁆𑀤𑀯𑁄𑀳𑀸𑀭𑁂𑀦 𑀩𑀼𑀤𑁆𑀥𑀺𑀧𑀭𑀺𑀓𑀧𑁆𑀧𑀺𑀢𑀪𑁂𑀤𑀯𑀘𑀦𑀺𑀘𑁆𑀙𑀸𑀬 𑀘𑀺𑀢𑁆𑀢𑀲𑀦𑁆𑀢𑀸𑀦𑀢𑁄 𑀅𑀜𑁆𑀜𑀫𑀺𑀯 𑀢𑀁𑀲𑀫𑀗𑁆𑀕𑀺𑀁 𑀓𑀢𑁆𑀯𑀸 𑀅𑀪𑁂𑀤𑁂𑀧𑀺 𑀪𑁂𑀤𑀯𑁄𑀳𑀸𑀭𑁂𑀦 ‘‘𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀦 𑀢𑀁𑀲𑀫𑀗𑁆𑀕𑀺𑀦𑁄’’𑀢𑀺 𑀯𑀼𑀢𑁆𑀢𑀁. 𑀯𑁄𑀳𑀸𑀭𑀯𑀺𑀲𑀬𑁄 𑀳𑀺 𑀲𑀤𑁆𑀤𑁄 𑀦𑁂𑀓𑀦𑁆𑀢𑀧𑀭𑀫𑀢𑁆𑀣𑀺𑀓𑁄𑀢𑀺 ¶ (𑀓𑀸𑀭𑀓𑀭𑀽𑀧𑀲𑀺𑀤𑁆𑀥𑀺𑀬𑀁 𑀬𑁄 𑀓𑀸𑀭𑁂𑀢𑀺 𑀲𑀳𑁂𑀢𑀼𑀲𑀼𑀢𑁆𑀢𑀁 𑀧𑀲𑁆𑀲𑀺𑀢𑀩𑁆𑀩𑀁) 𑀲𑀯𑀦𑀓𑀺𑀭𑀺𑀬𑀸𑀯𑀺𑀲𑀬𑁄𑀧𑀺 𑀲𑁄𑀢𑀩𑁆𑀩𑀥𑀫𑁆𑀫𑁄 𑀲𑀯𑀦𑀓𑀺𑀭𑀺𑀬𑀸𑀯𑀲𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀇𑀥 𑀧𑀭𑀫𑀢𑁆𑀣𑀢𑁄 𑀓𑀢𑁆𑀢𑀼𑀪𑀸𑀯𑀢𑁄 𑀢𑀲𑁆𑀲 𑀯𑀺𑀲𑀬𑁄𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀓𑀢𑁆𑀢𑀼 𑀯𑀺𑀲𑀬𑀕𑁆𑀕𑀳𑀡𑀲𑀦𑁆𑀦𑀺𑀝𑁆𑀞𑀸𑀦’’𑀦𑁆𑀢𑀺.

𑀅𑀧𑀺𑀘 𑀲𑀯𑀦𑀯𑀲𑁂𑀦 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀏𑀯 𑀲𑀯𑀦𑀓𑀺𑀭𑀺𑀬𑀸𑀪𑀸𑀯𑀢𑁄 𑀢𑀁𑀯𑀲𑁂𑀦 𑀢𑀤𑀜𑁆𑀜𑀦𑀸𑀫𑀭𑀽𑀧𑀥𑀫𑁆𑀫𑀲𑀫𑀼𑀤𑀸𑀬𑀪𑀽𑀢𑀲𑁆𑀲 𑀢𑀁𑀓𑀺𑀭𑀺𑀬𑀸𑀓𑀢𑁆𑀢𑀼 𑀘 𑀯𑀺𑀲𑀬𑁄 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀢𑀣𑀸 𑀯𑀼𑀢𑁆𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀧𑀼𑀭𑀺𑀫𑀦𑀬𑁂 𑀲𑀯𑀦𑀓𑀺𑀭𑀺𑀬𑀸, 𑀢𑀓𑁆𑀓𑀢𑁆𑀢𑀸 𑀘 𑀧𑀭𑀫𑀢𑁆𑀣𑀢𑁄 𑀢𑀣𑀸𑀧𑀯𑀢𑁆𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑀫𑁂𑀯, 𑀢𑀲𑁆𑀫𑀸 𑀓𑀺𑀭𑀺𑀬𑀸𑀯𑀺𑀲𑀬𑁄𑀧𑀺 ‘‘𑀓𑀢𑁆𑀢𑀼 𑀯𑀺𑀲𑀬𑁄’’𑀢𑀺 𑀯𑀼𑀢𑁆𑀢𑁄. 𑀧𑀘𑁆𑀙𑀺𑀫𑀦𑀬𑁂 𑀧𑀦 𑀢𑀣𑀸𑀧𑀯𑀢𑁆𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀓𑀺𑀭𑀺𑀬𑀸, 𑀢𑀤𑀜𑁆𑀜𑀥𑀫𑁆𑀫𑀲𑀫𑀼𑀤𑀸𑀬𑁄 𑀧𑀦 𑀓𑀢𑁆𑀢𑀸, 𑀢𑀲𑁆𑀫𑀸 𑀓𑀸𑀫𑀁 𑀏𑀓𑀦𑁆𑀢𑀢𑁄 𑀓𑀺𑀭𑀺𑀬𑀸𑀯𑀺𑀲𑀬𑁄𑀬𑁂𑀯𑁂𑀲 𑀥𑀫𑁆𑀫𑁄, 𑀢𑀣𑀸𑀧𑀺 𑀓𑀺𑀭𑀺𑀬𑀸𑀯𑀲𑁂𑀦 ‘‘𑀢𑀩𑁆𑀩𑀦𑁆𑀢𑀓𑀢𑁆𑀢𑀼 𑀯𑀺𑀲𑀬𑁄’’𑀢𑀺 𑀯𑀼𑀢𑁆𑀢𑁄𑀢𑀺. 𑀢𑀁𑀲𑀫𑀗𑁆𑀕𑀺𑀦𑁄𑀢𑀺 𑀢𑁂𑀦 𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀦 𑀲𑀫𑀗𑁆𑀕𑀺𑀦𑁄. 𑀓𑀢𑁆𑀢𑀽𑀢𑀺 𑀓𑀢𑁆𑀢𑀸𑀭𑀲𑁆𑀲. 𑀯𑀺𑀲𑀬𑁄𑀢𑀺 𑀆𑀭𑀫𑁆𑀫𑀡𑀯𑀲𑁂𑀦 𑀧𑀯𑀢𑁆𑀢𑀺𑀝𑁆𑀞𑀸𑀦𑀁, 𑀆𑀭𑀫𑁆𑀫𑀡𑀫𑁂𑀯 𑀯𑀸. 𑀲𑀼𑀢𑀸𑀓𑀸𑀭𑀲𑁆𑀲 𑀘 𑀣𑁂𑀭𑀲𑁆𑀲 𑀲𑀫𑁆𑀫𑀸 𑀦𑀺𑀘𑁆𑀙𑀺𑀢𑀪𑀸𑀯𑀢𑁄 ‘‘𑀕𑀳𑀡𑀲𑀦𑁆𑀦𑀺𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀅𑀧𑀭𑁄 𑀦𑀬𑁄 𑁋 𑀬𑀲𑁆𑀲…𑀧𑁂… 𑀆𑀓𑀸𑀭𑀧𑀜𑁆𑀜𑀢𑁆𑀢𑀻𑀢𑀺 𑀆𑀓𑀸𑀭𑀢𑁆𑀣𑁂𑀦 𑀏𑀯𑀁-𑀲𑀤𑁆𑀤𑁂𑀦 𑀬𑁄𑀚𑀦𑀁 𑀓𑀢𑁆𑀯𑀸 𑀢𑀤𑁂𑀯 𑀅𑀯𑀥𑀸𑀭𑀡𑀢𑁆𑀣𑀫𑁆𑀧𑀺 𑀕𑀳𑁂𑀢𑁆𑀯𑀸 𑀇𑀫𑀲𑁆𑀫𑀺𑀁𑀬𑁂𑀯 𑀦𑀬𑁂 𑀬𑁄𑀚𑁂𑀢𑀼𑀁 ‘‘𑀕𑀳𑀡𑀁 𑀓𑀢𑀁’’ 𑀇𑀘𑁆𑀘𑁂𑀯 𑀅𑀯𑀢𑁆𑀯𑀸 ‘‘𑀕𑀳𑀡𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀯𑀥𑀸𑀭𑀡𑁂𑀦 𑀳𑀺 𑀲𑀦𑁆𑀦𑀺𑀝𑁆𑀞𑀸𑀦𑀫𑀺𑀥𑀸𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 ‘‘𑀏𑀢𑁆𑀢𑀸𑀯𑀢𑀸’’𑀢𑀺𑀆𑀤𑀺𑀦𑀸 𑀅𑀯𑀥𑀸𑀭𑀡𑀢𑁆𑀣𑀫𑁆𑀧𑀺 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀅𑀬𑀫𑁂𑀯 𑀬𑁄𑀚𑀦𑀸 𑀓𑀢𑀸𑀢𑀺 𑀤𑀲𑁆𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀇𑀫𑀺𑀲𑁆𑀲𑀸 𑀧𑀦 𑀬𑁄𑀚𑀦𑀸𑀬 𑀕𑀳𑀡𑀸𑀓𑀸𑀭𑀕𑀸𑀳𑀓𑀢𑀩𑁆𑀩𑀺𑀲𑀬𑀯𑀺𑀲𑁂𑀲𑀦𑀺𑀤𑀲𑁆𑀲𑀦𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀜𑁆𑀜𑀫𑁆𑀧𑀺 𑀬𑁄𑀚𑀦𑀫𑀸𑀳 ‘‘𑀅𑀣 𑀯𑀸’’𑀢𑀺𑀆𑀤𑀺𑀦𑀸. 𑀧𑀼𑀩𑁆𑀩𑁂 𑀅𑀢𑁆𑀢𑀦𑀸 𑀲𑀼𑀢𑀸𑀦𑀁 𑀦𑀸𑀦𑀸𑀯𑀺𑀳𑀺𑀢𑀸𑀦𑀁 𑀲𑀼𑀢𑁆𑀢𑀲𑀗𑁆𑀔𑀸𑀢𑀸𑀦𑀁 𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀦𑀁 𑀉𑀧𑀥𑀸𑀭𑀺𑀢𑀭𑀽𑀧𑀲𑁆𑀲 𑀆𑀓𑀸𑀭𑀲𑁆𑀲 𑀦𑀺𑀤𑀲𑁆𑀲𑀦𑀲𑁆𑀲, 𑀅𑀯𑀥𑀸𑀭𑀡𑀲𑁆𑀲 𑀯𑀸 𑀧𑀓𑀸𑀲𑀦𑀲𑀪𑀸𑀯𑁄 𑀏𑀯𑀁-𑀲𑀤𑁆𑀤𑁄𑀢𑀺 𑀢𑀤𑀸𑀓𑀸𑀭𑀸𑀤𑀺𑀪𑀽𑀢𑀲𑁆𑀲 𑀉𑀧𑀥𑀸𑀭𑀡𑀲𑁆𑀲 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀦𑀪𑀽𑀢𑀥𑀫𑁆𑀫𑀧𑁆𑀧𑀩𑀦𑁆𑀥𑀩𑁆𑀬𑀸𑀧𑀸𑀭𑀢𑀸𑀬 ¶ ‘‘𑀧𑀼𑀕𑁆𑀕𑀮𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄’’𑀢𑀺 𑀯𑀼𑀢𑁆𑀢𑀁 𑀅𑀢𑁆𑀢𑀦𑀸 𑀲𑀼𑀢𑀸𑀦𑀜𑁆𑀳𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀦𑀁 𑀧𑀼𑀦 𑀉𑀧𑀥𑀸𑀭𑀡𑀁 𑀆𑀓𑀸𑀭𑀸𑀤𑀺𑀢𑁆𑀢𑀬𑀁, 𑀢𑀜𑁆𑀘 𑀏𑀯𑀁-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄. 𑀲𑁄 𑀧𑀦 𑀬𑀁 𑀥𑀫𑁆𑀫𑀧𑁆𑀧𑀩𑀦𑁆𑀥𑀁 𑀉𑀧𑀸𑀤𑀸𑀬 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺 𑀧𑀯𑀢𑁆𑀢𑀸, 𑀢𑀲𑁆𑀲 𑀩𑁆𑀬𑀸𑀧𑀸𑀭𑀪𑀽𑀢𑀁 𑀓𑀺𑀘𑁆𑀘𑀫𑁂𑀯 ¶ , 𑀢𑀲𑁆𑀫𑀸 𑀏𑀯𑀁-𑀲𑀤𑁆𑀤𑁂𑀦 𑀧𑀼𑀕𑁆𑀕𑀮𑀓𑀺𑀘𑁆𑀘𑀁 𑀦𑀺𑀤𑁆𑀤𑀺𑀲𑀻𑀬𑀢𑀻𑀢𑀺. 𑀓𑀸𑀫𑀁 𑀲𑀯𑀦𑀓𑀺𑀭𑀺𑀬𑀸 𑀧𑀼𑀕𑁆𑀕𑀮𑀩𑁆𑀬𑀸𑀧𑀸𑀭𑁄𑀧𑀺 𑀅𑀯𑀺𑀲𑁂𑀲𑁂𑀦, 𑀢𑀣𑀸𑀧𑀺 𑀯𑀺𑀲𑁂𑀲𑀢𑁄 𑀯𑀺𑀜𑁆𑀜𑀸𑀡𑀩𑁆𑀬𑀸𑀧𑀸𑀭𑁄𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄’’𑀢𑀺. 𑀢𑀣𑀸 𑀳𑀺 𑀧𑀼𑀕𑁆𑀕𑀮𑀯𑀸𑀤𑀻𑀦𑀫𑁆𑀧𑀺 𑀲𑀯𑀦𑀓𑀺𑀭𑀺𑀬𑀸 𑀯𑀺𑀜𑁆𑀜𑀸𑀡𑀦𑀺𑀭𑀧𑁂𑀓𑁆𑀔𑀸 𑀦𑀢𑁆𑀣𑀺 𑀲𑀯𑀦𑀸𑀤𑀻𑀦𑀁 𑀯𑀺𑀲𑁂𑀲𑀢𑁄 𑀯𑀺𑀜𑁆𑀜𑀸𑀡𑀩𑁆𑀬𑀸𑀧𑀸𑀭𑀪𑀸𑀯𑁂𑀦 𑀇𑀘𑁆𑀙𑀺𑀢𑀢𑁆𑀢𑀸. 𑀫𑁂𑀢𑀺 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀬𑀸 𑀏𑀓𑀦𑁆𑀢𑁂𑀦𑁂𑀯 𑀲𑀢𑁆𑀢𑀯𑀺𑀲𑀬𑀢𑁆𑀢𑀸, 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀲𑁆𑀲 𑀘 𑀲𑀢𑁆𑀢𑀯𑀺𑀜𑁆𑀜𑀸𑀡𑀸𑀦𑀫𑀪𑁂𑀤𑀓𑀭𑀡𑀯𑀲𑁂𑀦 𑀢𑀢𑁆𑀣𑁂𑀯 𑀲𑀫𑁄𑀤𑀳𑀺𑀢𑀩𑁆𑀩𑀢𑁄 ‘‘𑀉𑀪𑀬𑀓𑀺𑀘𑁆𑀘𑀬𑀼𑀢𑁆𑀢𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑁄’’𑀢𑀺 𑀯𑀼𑀢𑁆𑀢𑀁. ‘‘𑀅𑀬’’𑀦𑁆𑀢𑀺𑀆𑀤𑀺 𑀢𑀧𑁆𑀧𑀸𑀓𑀝𑀻𑀓𑀭𑀡𑀁. 𑀏𑀢𑁆𑀣 𑀳𑀺 𑀲𑀯𑀦𑀓𑀺𑀘𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀦𑀸𑀢𑀺 𑀏𑀯𑀁-𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀝𑁆𑀞𑀁 𑀧𑀼𑀕𑁆𑀕𑀮𑀓𑀺𑀘𑁆𑀘𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀁 𑀧𑀦 𑀧𑀼𑀕𑁆𑀕𑀮𑀲𑁆𑀲 𑀲𑀯𑀦𑀓𑀺𑀘𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀻𑀪𑀸𑀯𑁂𑀦 𑀧𑀼𑀕𑁆𑀕𑀮𑀓𑀺𑀘𑁆𑀘𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀕𑁆𑀕𑀮𑀓𑀺𑀘𑁆𑀘𑀲𑀫𑀗𑁆𑀕𑀺𑀦𑀸’’𑀢𑀺 𑀅𑀯𑀢𑁆𑀯𑀸 ‘‘𑀲𑀯𑀦𑀓𑀺𑀘𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀦𑀸’’𑀢𑀺 𑀆𑀳, 𑀢𑀲𑁆𑀫𑀸 ‘‘𑀧𑀼𑀕𑁆𑀕𑀮𑀓𑀺𑀘𑁆𑀘’’𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀲𑀯𑀦𑀓𑀺𑀘𑁆𑀘𑀯𑀢𑀸 𑀯𑀺𑀜𑁆𑀜𑀸𑀡𑁂𑀦 𑀲𑀫𑀗𑁆𑀕𑀺𑀦𑀸𑀢𑀺 𑀅𑀢𑁆𑀣𑁄. 𑀯𑀺𑀜𑁆𑀜𑀸𑀡𑀯𑀲𑁂𑀦, 𑀮𑀤𑁆𑀥𑀲𑀯𑀦𑀓𑀺𑀘𑁆𑀘𑀯𑁄𑀳𑀸𑀭𑁂𑀦𑀸𑀢𑀺 𑀘 𑀲𑀼𑀢𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀝𑁆𑀞𑀁 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀯𑀦𑀫𑁂𑀯 𑀓𑀺𑀘𑁆𑀘𑀁 𑀬𑀲𑁆𑀲𑀸𑀢𑀺 𑀢𑀣𑀸. 𑀲𑀯𑀦𑀓𑀺𑀘𑁆𑀘𑀦𑁆𑀢𑀺 𑀯𑁄𑀳𑀸𑀭𑁄 𑀲𑀯𑀦𑀓𑀺𑀘𑁆𑀘𑀯𑁄𑀳𑀸𑀭𑁄, 𑀮𑀤𑁆𑀥𑁄 𑀲𑁄 𑀬𑁂𑀦𑀸𑀢𑀺 𑀢𑀣𑀸. 𑀮𑀤𑁆𑀥𑀲𑀯𑀦𑀓𑀺𑀘𑁆𑀘𑀯𑁄𑀳𑀸𑀭𑁂𑀦 𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑁂𑀦 𑀯𑀲𑁂𑀦 𑀲𑀸𑀫𑀢𑁆𑀣𑀺𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦 𑀲𑀫𑁆𑀩𑀦𑁆𑀥𑁄 𑁋 𑀲𑀯𑀦𑀓𑀺𑀘𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀦𑀸 𑀧𑀼𑀕𑁆𑀕𑀮𑁂𑀦 𑀫𑀬𑀸 𑀮𑀤𑁆𑀥𑀲𑀯𑀦𑀓𑀺𑀘𑁆𑀘𑀯𑁄𑀳𑀸𑀭𑁂𑀦 𑀯𑀺𑀜𑁆𑀜𑀸𑀡𑀯𑀲𑁂𑀦 𑀓𑀭𑀡𑀪𑀽𑀢𑁂𑀦 𑀲𑀼𑀢𑀦𑁆𑀢𑀺.

𑀅𑀧𑀺𑀘 ‘‘𑀏𑀯’’𑀦𑁆𑀢𑀺 𑀲𑀤𑁆𑀤𑀲𑁆𑀲𑀢𑁆𑀣𑁄 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, ‘‘𑀲𑀼𑀢’’𑀦𑁆𑀢𑀺 𑀲𑀤𑁆𑀤𑀲𑁆𑀲𑀢𑁆𑀣𑁄 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀢𑀲𑁆𑀫𑀸 𑀢𑁂 𑀢𑀣𑀸𑀭𑀽𑀧𑀧𑀜𑁆𑀜𑀢𑁆𑀢𑀺 𑀉𑀧𑀸𑀤𑀸𑀦𑀪𑀽𑀢𑀧𑀼𑀕𑁆𑀕𑀮𑀩𑁆𑀬𑀸𑀧𑀸𑀭𑀪𑀸𑀯𑁂𑀦𑁂𑀯 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀯𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄. 𑀲𑀼𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄’’𑀢𑀺. 𑀦 𑀳𑀺 𑀧𑀭𑀫𑀢𑁆𑀣𑀢𑁄𑀬𑁂𑀯 𑀦𑀺𑀬𑀫𑀺𑀬𑀫𑀸𑀦𑁂 𑀲𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀯𑀲𑁂𑀦 𑀅𑀬𑀁 𑀯𑀺𑀪𑀸𑀕𑁄 𑀮𑀩𑁆𑀪𑀢𑀻𑀢𑀺. 𑀇𑀫𑀺𑀲𑁆𑀲𑀸 𑀧𑀦 𑀬𑁄𑀚𑀦𑀸𑀬 𑀓𑀢𑁆𑀢𑀼𑀩𑁆𑀬𑀸𑀧𑀸𑀭𑀓𑀭𑀡𑀩𑁆𑀬𑀸𑀧𑀸𑀭𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀩𑁆𑀩𑀲𑁆𑀲𑀸𑀧𑀺 𑀲𑀤𑁆𑀤𑀸𑀥𑀺𑀕𑀫𑀦𑀻𑀬𑀲𑁆𑀲 𑀅𑀢𑁆𑀣𑀲𑁆𑀲 𑀧𑀜𑁆𑀜𑀢𑁆𑀢𑀺𑀫𑀼𑀔𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸, 𑀲𑀩𑁆𑀩𑀸𑀲𑀜𑁆𑀘 𑀧𑀜𑁆𑀜𑀢𑁆𑀢𑀻𑀦𑀁 𑀯𑀺𑀚𑁆𑀚𑀫𑀸𑀦𑀸𑀤𑀺𑀯𑀲𑁂𑀦 𑀙𑀲𑀼 𑀧𑀜𑁆𑀜𑀢𑁆𑀢𑀺𑀪𑁂𑀤𑁂𑀲𑀼 𑀅𑀦𑁆𑀢𑁄𑀕𑀥𑀢𑁆𑀢𑀸 𑀢𑀸𑀲𑀼 ‘‘𑀏𑀯’’𑀦𑁆𑀢𑀺𑀆𑀤𑀻𑀦𑀁 𑀧𑀜𑁆𑀜𑀢𑁆𑀢𑀻𑀦𑀁 𑀲𑀭𑀽𑀧𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀦𑁆𑀢𑀺 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀏𑀯’’𑀦𑁆𑀢𑀺 𑀘 ‘‘𑀫𑁂’’𑀢𑀺 𑀘 𑀯𑀼𑀘𑁆𑀘𑀫𑀸𑀦𑀲𑁆𑀲 𑀅𑀢𑁆𑀣𑀲𑁆𑀲 𑀆𑀓𑀸𑀭𑀸𑀤𑀺𑀪𑀽𑀢𑀲𑁆𑀲 𑀥𑀫𑁆𑀫𑀸𑀦𑀁 𑀅𑀲𑀮𑁆𑀮𑀓𑁆𑀔𑀡𑀪𑀸𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑁄𑀢𑀺 𑀆𑀳 ‘‘𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺. 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦𑀸𑀢𑀺 ¶ 𑀘 𑀪𑀽𑀢𑀢𑁆𑀣𑀉𑀢𑁆𑀢𑀫𑀢𑁆𑀣𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀫𑀸𑀬𑀸𑀫𑀭𑀻𑀘𑀺𑀆𑀤𑀬𑁄 ¶ 𑀯𑀺𑀬 𑀅𑀪𑀽𑀢𑀢𑁆𑀣𑁄, 𑀅𑀦𑀼𑀲𑁆𑀲𑀯𑀸𑀤𑀻𑀳𑀺 𑀕𑀳𑁂𑀢𑀩𑁆𑀩𑁄 𑀯𑀺𑀬 𑀅𑀦𑀼𑀢𑁆𑀢𑀫𑀢𑁆𑀣𑁄 𑀘 𑀦 𑀳𑁄𑀢𑀺, 𑀲𑁄 𑀭𑀽𑀧𑀲𑀤𑁆𑀤𑀸𑀤𑀺𑀲𑀪𑀸𑀯𑁄, 𑀭𑀼𑀧𑁆𑀧𑀦𑀸𑀦𑀼𑀪𑀯𑀦𑀸𑀤𑀺𑀲𑀪𑀸𑀯𑁄 𑀯𑀸 𑀅𑀢𑁆𑀣𑁄 ‘‘𑀲𑀘𑁆𑀘𑀺𑀓𑀝𑁆𑀞𑁄, 𑀧𑀭𑀫𑀢𑁆𑀣𑁄’’𑀢𑀺 𑀘 𑀯𑀼𑀘𑁆𑀘𑀢𑀺, ‘‘𑀏𑀯𑀁 𑀫𑁂’’𑀢𑀺 𑀧𑀤𑀸𑀦𑀁 𑀧𑀦 𑀅𑀢𑁆𑀣𑁄 𑀅𑀪𑀽𑀢𑀢𑁆𑀢𑀸, 𑀅𑀦𑀼𑀢𑁆𑀢𑀫𑀢𑁆𑀢𑀸 𑀘 𑀦 𑀢𑀣𑀸 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀪𑀽𑀢𑀢𑁆𑀣𑀉𑀢𑁆𑀢𑀫𑀢𑁆𑀣𑀲𑀗𑁆𑀔𑀸𑀢𑁂𑀦 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦 𑀯𑀺𑀲𑁂𑀲𑀦𑀪𑀽𑀢𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀬𑁂𑀯𑀸𑀢𑀺. 𑀏𑀢𑁂𑀦 𑀘 𑀯𑀺𑀲𑁂𑀲𑀦𑁂𑀦 𑀩𑀸𑀮𑀚𑀦𑁂𑀳𑀺 ‘‘𑀅𑀢𑁆𑀣𑀻’’𑀢𑀺 𑀧𑀭𑀺𑀓𑀧𑁆𑀧𑀺𑀢𑀁 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀁 𑀦𑀺𑀯𑀢𑁆𑀢𑁂𑀢𑀺. 𑀢𑀤𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀭𑁄𑀢𑀺, 𑀳𑁂𑀢𑀼𑀦𑀸 𑀯𑀸 𑀲𑀸𑀥𑁂𑀢𑀺 ‘‘𑀓𑀺𑀜𑁆𑀳𑁂𑀢𑁆𑀣 𑀢’’𑀦𑁆𑀢𑀺𑀆𑀤𑀺𑀦𑀸. 𑀬𑀁 𑀥𑀫𑁆𑀫𑀚𑀸𑀢𑀁, 𑀅𑀢𑁆𑀣𑀚𑀸𑀢𑀁 𑀯𑀸 ‘‘𑀏𑀯’’𑀦𑁆𑀢𑀺 𑀯𑀸 ‘‘𑀫𑁂’’𑀢𑀺 𑀯𑀸 𑀦𑀺𑀤𑁆𑀤𑁂𑀲𑀁 𑀮𑀪𑁂𑀣, 𑀢𑀁 𑀏𑀢𑁆𑀣 𑀭𑀽𑀧𑀨𑀲𑁆𑀲𑀸𑀤𑀺𑀥𑀫𑁆𑀫𑀲𑀫𑀼𑀤𑀸𑀬𑁂, ‘‘𑀏𑀯𑀁 𑀫𑁂’’𑀢𑀺 𑀧𑀤𑀸𑀦𑀁 𑀯𑀸 𑀅𑀢𑁆𑀣𑁂. 𑀧𑀭𑀫𑀢𑁆𑀣𑀢𑁄 𑀦 𑀅𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀭𑀽𑀧𑀨𑀲𑁆𑀲𑀸𑀤𑀺𑀪𑀸𑀯𑁂𑀦 𑀦𑀺𑀤𑁆𑀤𑀺𑀝𑁆𑀞𑁄 𑀧𑀭𑀫𑀢𑁆𑀣𑀢𑁄 𑀏𑀢𑁆𑀣 𑀅𑀢𑁆𑀣𑁂𑀯, ‘‘𑀏𑀯𑀁 𑀫𑁂’’𑀢𑀺 𑀧𑀦 𑀦𑀺𑀤𑁆𑀤𑀺𑀝𑁆𑀞𑁄 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀼𑀢𑀦𑁆𑀢𑀺 𑀧𑀦 𑀲𑀤𑁆𑀤𑀸𑀬𑀢𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺. ‘‘𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦𑀸’’𑀢𑀺 𑀘𑁂𑀢𑁆𑀣 𑀅𑀥𑀺𑀓𑀸𑀭𑁄. ‘‘𑀬𑀜𑁆𑀳𑀻’’𑀢𑀺𑀆𑀤𑀺 𑀢𑀧𑁆𑀧𑀸𑀓𑀝𑀻𑀓𑀭𑀡𑀁, 𑀳𑁂𑀢𑀼𑀤𑀲𑁆𑀲𑀦𑀁 𑀯𑀸. 𑀬𑀁 𑀢𑀁 𑀲𑀤𑁆𑀤𑀸𑀬𑀢𑀦𑀁 𑀲𑁄𑀢𑁂𑀦 𑀲𑁄𑀢𑀤𑁆𑀯𑀸𑀭𑁂𑀦, 𑀢𑀦𑁆𑀦𑀺𑀲𑁆𑀲𑀺𑀢𑀯𑀺𑀜𑁆𑀜𑀸𑀡𑁂𑀦 𑀯𑀸 𑀉𑀧𑀮𑀤𑁆𑀥𑀁 𑀅𑀥𑀺𑀕𑀫𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦 𑀳𑀺 𑀲𑀤𑁆𑀤𑀸𑀬𑀢𑀦𑀫𑀺𑀥 𑀕𑀳𑀺𑀢𑀁 𑀓𑀫𑁆𑀫𑀲𑀸𑀥𑀦𑁂𑀦𑀸𑀢𑀺 𑀤𑀲𑁆𑀲𑁂𑀢𑀺.

𑀏𑀯𑀁 𑀅𑀝𑁆𑀞𑀓𑀣𑀸𑀦𑀬𑁂𑀦 𑀧𑀜𑁆𑀜𑀢𑁆𑀢𑀺𑀲𑀭𑀽𑀧𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀇𑀤𑀸𑀦𑀺 𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑁂𑀦𑀸𑀧𑀺 𑀦𑀬𑁂𑀦 𑀯𑀼𑀢𑁆𑀢𑁂𑀲𑀼 𑀙𑀲𑀼 𑀧𑀜𑁆𑀜𑀢𑁆𑀢𑀺𑀪𑁂𑀤𑁂𑀲𑀼 ‘‘𑀏𑀯’’𑀦𑁆𑀢𑀺𑀆𑀤𑀻𑀦𑀁 𑀧𑀜𑁆𑀜𑀢𑁆𑀢𑀻𑀦𑀁 𑀲𑀭𑀽𑀧𑀁 𑀦𑀺𑀤𑁆𑀥𑀸𑀭𑁂𑀦𑁆𑀢𑁄 ‘‘𑀢𑀣𑀸’’𑀢𑀺𑀆𑀤𑀺𑀫𑀸𑀳. 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀆𑀤𑀬𑁄 𑀳𑀺 𑀧𑁄𑀭𑀸𑀡𑀝𑁆𑀞𑀓𑀣𑀸𑀢𑁄 𑀫𑀼𑀢𑁆𑀢𑀸 𑀲𑀗𑁆𑀕𑀳𑀓𑀸𑀭𑁂𑀦𑁂𑀯 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀸. 𑀯𑀺𑀢𑁆𑀣𑀸𑀭𑁄 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬 𑀕𑀳𑁂𑀢𑀩𑁆𑀩𑁄. 𑀢𑀁 𑀢𑀦𑁆𑀢𑀺 𑀢𑀁 𑀢𑀁 𑀥𑀫𑁆𑀫𑀚𑀸𑀢𑀁, 𑀲𑁄𑀢𑀧𑀣𑀫𑀸𑀕𑀢𑁂 𑀥𑀫𑁆𑀫𑁂 𑀉𑀧𑀸𑀤𑀸𑀬 𑀢𑁂𑀲𑀁 𑀉𑀧𑀥𑀸𑀭𑀺𑀢𑀸𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑀲𑁆𑀲 𑀧𑀘𑁆𑀘𑀸𑀫𑀲𑀦𑀯𑀲𑁂𑀦 𑀏𑀯𑀦𑁆𑀢𑀺 𑀘 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁂 𑀔𑀦𑁆𑀥𑁂 𑀉𑀧𑀸𑀤𑀸𑀬 𑀫𑁂𑀢𑀺 𑀘 𑀯𑀢𑁆𑀢𑀩𑁆𑀩𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀭𑀽𑀧𑀯𑁂𑀤𑀦𑀸𑀤𑀺𑀪𑁂𑀤𑁂𑀳𑀺 𑀥𑀫𑁆𑀫𑁂 𑀉𑀧𑀸𑀤𑀸𑀬 𑀦𑀺𑀲𑁆𑀲𑀸𑀬 𑀓𑀸𑀭𑀡𑀁 𑀓𑀢𑁆𑀯𑀸 𑀧𑀜𑁆𑀜𑀢𑁆𑀢𑀺 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀬𑀣𑀸 ‘‘𑀢𑀸𑀦𑀺 𑀢𑀸𑀦𑀺 𑀅𑀗𑁆𑀕𑀸𑀦𑀺 𑀉𑀧𑀸𑀤𑀸𑀬 𑀭𑀣𑁄 𑀕𑁂𑀳𑀁, 𑀢𑁂 𑀢𑁂 𑀭𑀽𑀧𑀭𑀲𑀸𑀤𑀬𑁄 𑀉𑀧𑀸𑀤𑀸𑀬 𑀖𑀝𑁄 𑀧𑀝𑁄, 𑀘𑀦𑁆𑀤𑀺𑀫𑀲𑀽𑀭𑀺𑀬𑀧𑀭𑀺𑀯𑀢𑁆𑀢𑀸𑀤𑀬𑁄 𑀉𑀧𑀸𑀤𑀸𑀬 𑀓𑀸𑀮𑁄 𑀤𑀺𑀲𑀸’’𑀢𑀺𑀆𑀤𑀺. 𑀧𑀜𑁆𑀜𑀧𑁂𑀢𑀩𑁆𑀩𑀝𑁆𑀞𑁂𑀦 𑀘𑁂𑀲𑀸 𑀧𑀜𑁆𑀜𑀢𑁆𑀢𑀺 𑀦𑀸𑀫, 𑀦 𑀧𑀜𑁆𑀜𑀸𑀧𑀦𑀝𑁆𑀞𑁂𑀦. 𑀬𑀸 𑀧𑀦 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀜𑁆𑀜𑀸𑀧𑀦𑀸, 𑀅𑀬𑀁 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀬𑁂𑀯. 𑀤𑀺𑀝𑁆𑀞𑀸𑀤𑀻𑀦𑀺 𑀉𑀧𑀦𑀺𑀥𑀸𑀬 ¶ 𑀯𑀢𑁆𑀢𑀩𑁆𑀩𑀢𑁄𑀢𑀺 𑀤𑀺𑀝𑁆𑀞𑀫𑀼𑀢𑀯𑀺𑀜𑁆𑀜𑀸𑀢𑁂 𑀉𑀧𑀦𑀺𑀥𑀸𑀬 𑀉𑀧𑀢𑁆𑀣𑀫𑁆𑀪𑀁 𑀓𑀢𑁆𑀯𑀸 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀢𑁆𑀢𑀸. 𑀤𑀺𑀝𑁆𑀞𑀸𑀤𑀺𑀲𑀪𑀸𑀯𑀯𑀺𑀭𑀳𑀺𑀢𑁂 𑀲𑀤𑁆𑀤𑀸𑀬𑀢𑀦𑁂 𑀯𑀢𑁆𑀢𑀫𑀸𑀦𑁄𑀧𑀺 𑀳𑀺 𑀲𑀼𑀢𑀯𑁄𑀳𑀸𑀭𑁄 ‘‘𑀤𑀼𑀢𑀺𑀬𑀁 𑀢𑀢𑀺𑀬’’𑀦𑁆𑀢𑀺𑀆𑀤𑀺𑀓𑁄 𑀯𑀺𑀬 𑀧𑀞𑀫𑀸𑀤𑀻𑀦𑀺 𑀤𑀺𑀝𑁆𑀞𑀫𑀼𑀢𑀯𑀺𑀜𑁆𑀜𑀸𑀢𑁂 𑀅𑀧𑁂𑀓𑁆𑀔𑀺𑀢𑁆𑀯𑀸 𑀧𑀯𑀢𑁆𑀢𑁄 ‘‘𑀉𑀧𑀦𑀺𑀥𑀸𑀧𑀜𑁆𑀜𑀢𑀻’’𑀢𑀺 𑀯𑀼𑀘𑁆𑀘𑀢𑁂. 𑀲𑀸 𑀧𑀦𑁂𑀲𑀸 𑀅𑀦𑁂𑀓𑀯𑀺𑀥𑀸 𑀢𑀤𑀜𑁆𑀜𑀧𑁂𑀓𑁆𑀔𑀽𑀧𑀦𑀺𑀥𑀸 𑀳𑀢𑁆𑀣𑀕𑀢𑀽𑀧𑀦𑀺𑀥𑀸 𑀲𑀫𑁆𑀧𑀬𑀼𑀢𑁆𑀢𑀽𑀧𑀦𑀺𑀥𑀸𑀲𑀫𑀸𑀭𑁄𑀧𑀺𑀢𑀽𑀧𑀦𑀺𑀥𑀸 𑀅𑀯𑀺𑀤𑀽𑀭𑀕𑀢𑀽𑀧𑀦𑀺𑀥𑀸 𑀧𑀝𑀺𑀪𑀸𑀕𑀽𑀧𑀦𑀺𑀥𑀸 𑀢𑀩𑁆𑀩𑀳𑀼𑀮𑀽𑀧𑀦𑀺𑀥𑀸𑀢𑀩𑁆𑀩𑀺𑀲𑀺𑀝𑁆𑀞𑀽𑀧𑀦𑀺𑀥𑀸’’𑀢𑀺𑀆𑀤𑀺𑀦𑀸. 𑀢𑀸𑀲𑀼 𑀅𑀬𑀁 ‘‘𑀤𑀼𑀢𑀺𑀬𑀁 𑀢𑀢𑀺𑀬’’𑀦𑁆𑀢𑀺𑀆𑀤𑀺𑀓𑀸 𑀯𑀺𑀬 𑀧𑀞𑀫𑀸𑀤𑀻𑀦𑀁 𑀤𑀺𑀝𑁆𑀞𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀫𑀧𑁂𑀓𑁆𑀔𑀺𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀢𑀤𑀜𑁆𑀜𑀧𑁂𑀓𑁆𑀔𑀽𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺 𑀦𑀸𑀫.

𑀏𑀯𑀁 𑀧𑀜𑁆𑀜𑀢𑁆𑀢𑀺𑀬𑀸𑀧𑀺 ¶ 𑀅𑀢𑁆𑀣𑀸𑀥𑀺𑀕𑀫𑀦𑀻𑀬𑀢𑀸𑀲𑀗𑁆𑀔𑀸𑀢𑀁 𑀤𑀲𑁆𑀲𑁂𑀢𑀩𑁆𑀩𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀤𑁆𑀤𑀲𑀸𑀫𑀢𑁆𑀣𑀺𑀬𑁂𑀦 𑀤𑀻𑀧𑁂𑀢𑀩𑁆𑀩𑀫𑀢𑁆𑀣𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀻𑀧𑁂𑀦𑁆𑀢𑁄 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀯𑀘𑀦𑀢𑁆𑀢𑀬𑁂. 𑀘-𑀲𑀤𑁆𑀤𑁄 𑀉𑀧𑀦𑁆𑀬𑀸𑀲𑁄 𑀅𑀢𑁆𑀣𑀦𑁆𑀢𑀭𑀁 𑀆𑀭𑀪𑀺𑀢𑀼𑀓𑀸𑀫𑁂𑀦 𑀬𑁄𑀚𑀺𑀢𑀢𑁆𑀢𑀸. ‘‘𑀲𑀼𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀲𑀼𑀢𑀁 𑀦 𑀳𑁄𑀢𑀻𑀢𑀺 𑀧𑀓𑀸𑀲𑀺𑀢𑁄𑀬𑀫𑀢𑁆𑀣𑁄, 𑀢𑀲𑁆𑀫𑀸 𑀢𑀣𑀸 𑀲𑀼𑀢-𑀲𑀤𑁆𑀤𑁂𑀦 𑀧𑀓𑀸𑀲𑀺𑀢𑀸 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀲𑀼𑀢𑁆𑀢𑀲𑁆𑀲 𑀧𑀓𑀸𑀭𑀯𑀺𑀲𑁂𑀲𑀸 ‘‘𑀏𑀯’’𑀦𑁆𑀢𑀺 𑀣𑁂𑀭𑁂𑀦 𑀧𑀘𑁆𑀘𑀸𑀫𑀝𑁆𑀞𑀸𑀢𑀺 𑀢𑁂𑀦 𑀏𑀯𑀁-𑀲𑀤𑁆𑀤𑁂𑀦 𑀅𑀲𑀫𑁆𑀫𑁄𑀳𑁄 𑀤𑀻𑀧𑀺𑀢𑁄 𑀦𑀸𑀫, 𑀢𑁂𑀦𑀸𑀳 ‘‘𑀏𑀯𑀦𑁆𑀢𑀺 𑀯𑀘𑀦𑁂𑀦 𑀅𑀲𑀫𑁆𑀫𑁄𑀳𑀁 𑀤𑀻𑀧𑁂𑀢𑀻’’𑀢𑀺. 𑀅𑀲𑀫𑁆𑀫𑁄𑀳𑀦𑁆𑀢𑀺 𑀘 𑀬𑀣𑀸𑀲𑀼𑀢𑁂 𑀲𑀼𑀢𑁆𑀢𑁂 𑀅𑀲𑀫𑁆𑀫𑁄𑀳𑀁. 𑀢𑀤𑁂𑀯 𑀬𑀼𑀢𑁆𑀢𑀺𑀬𑀸, 𑀩𑁆𑀬𑀢𑀺𑀭𑁂𑀓𑁂𑀦 𑀘 𑀲𑀫𑀢𑁆𑀣𑁂𑀳𑀺 ‘‘𑀦 𑀳𑀻’’𑀢𑀺𑀆𑀤𑀺𑀦𑀸 𑀯𑀓𑁆𑀔𑀫𑀸𑀦𑀜𑁆𑀘 𑀲𑀼𑀢𑁆𑀢𑀁 𑀦𑀸𑀦𑀧𑁆𑀧𑀓𑀸𑀭𑀁 𑀤𑀼𑀧𑁆𑀧𑀝𑀺𑀯𑀺𑀤𑁆𑀥𑀜𑁆𑀘. 𑀏𑀯𑀁 𑀦𑀸𑀦𑀧𑁆𑀧𑀓𑀸𑀭𑁂 𑀤𑀼𑀧𑁆𑀧𑀝𑀺𑀯𑀺𑀤𑁆𑀥𑁂 𑀲𑀼𑀢𑁆𑀢𑁂 𑀓𑀣𑀁 𑀲𑀫𑁆𑀫𑀽𑀴𑁆𑀳𑁄 𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀲𑀫𑀢𑁆𑀣𑁄 𑀪𑀯𑀺𑀲𑁆𑀲𑀢𑀺. 𑀇𑀫𑀸𑀬 𑀬𑀼𑀢𑁆𑀢𑀺𑀬𑀸, 𑀇𑀫𑀺𑀦𑀸 𑀘 𑀩𑁆𑀬𑀢𑀺𑀭𑁂𑀓𑁂𑀦 𑀣𑁂𑀭𑀲𑁆𑀲 𑀢𑀢𑁆𑀣 𑀅𑀲𑀫𑁆𑀫𑀽𑀴𑁆𑀳𑀪𑀸𑀯𑀲𑀗𑁆𑀔𑀸𑀢𑁄 𑀤𑀻𑀧𑁂𑀢𑀩𑁆𑀩𑁄 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀫𑀻𑀤𑀺𑀲𑁂𑀲𑀼 𑀬𑀣𑀸𑀭𑀳𑀁. 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀸𑀓𑀸𑀭𑀲𑁆𑀲 𑀬𑀸𑀣𑀸𑀯𑀢𑁄 𑀉𑀧𑀭𑀺 𑀣𑁂𑀭𑁂𑀦 𑀤𑀲𑁆𑀲𑀺𑀬𑀫𑀸𑀦𑀢𑁆𑀢𑀸 ‘‘𑀲𑀼𑀢𑁆𑀢𑀲𑁆𑀲 𑀅𑀲𑀫𑁆𑀫𑁄𑀲𑀁 𑀤𑀻𑀧𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀸𑀮𑀦𑁆𑀢𑀭𑁂𑀦𑀸𑀢𑀺 𑀲𑀼𑀢𑀓𑀸𑀮𑀢𑁄 𑀅𑀧𑀭𑁂𑀦 𑀓𑀸𑀮𑁂𑀦. 𑀬𑀲𑁆𑀲…𑀧𑁂… 𑀧𑀝𑀺𑀚𑀸𑀦𑀸𑀢𑀺, 𑀣𑁂𑀭𑀲𑁆𑀲 𑀧𑀦 𑀲𑀼𑀯𑀡𑁆𑀡𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀲𑀻𑀳𑀯𑀲𑀸 𑀯𑀺𑀬 𑀅𑀦𑀲𑁆𑀲𑀫𑀸𑀦𑀁 𑀅𑀲𑀫𑁆𑀫𑀼𑀝𑁆𑀞𑀁 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀲𑁄 𑀏𑀯𑀁 𑀧𑀝𑀺𑀚𑀸𑀦𑀸𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀤𑀻𑀧𑀺𑀢𑁂𑀦 𑀧𑀦 𑀅𑀢𑁆𑀣𑁂𑀦 𑀓𑀺𑀁 𑀧𑀓𑀸𑀲𑀺𑀢𑀦𑁆𑀢𑀺 𑀆𑀳 ‘‘𑀇𑀘𑁆𑀘𑀲𑁆𑀲𑀸’’𑀢𑀺𑀆𑀤𑀺. 𑀢𑀢𑁆𑀣 𑀇𑀘𑁆𑀘𑀲𑁆𑀲𑀸𑀢𑀺 𑀇𑀢𑀺 𑀅𑀲𑁆𑀲, 𑀢𑀲𑁆𑀫𑀸 𑀅𑀲𑀫𑁆𑀫𑁄𑀳𑀲𑁆𑀲, 𑀅𑀲𑀫𑁆𑀫𑁄𑀲𑀲𑁆𑀲 𑀘 𑀤𑀻𑀧𑀺𑀢𑀢𑁆𑀢𑀸 𑀅𑀲𑁆𑀲 𑀣𑁂𑀭𑀲𑁆𑀲𑀧𑀜𑁆𑀜𑀸𑀲𑀺𑀤𑁆𑀥𑀻𑀢𑀺𑀆𑀤𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀅𑀲𑀫𑁆𑀫𑁄𑀳𑁂𑀦𑀸𑀢𑀺 𑀲𑀫𑁆𑀫𑁄𑀳𑀸𑀪𑀸𑀯𑁂𑀦. 𑀧𑀜𑁆𑀜𑀸𑀯𑀚𑁆𑀚𑀺𑀢𑀲𑀫𑀸𑀥𑀺𑀆𑀤𑀺𑀥𑀫𑁆𑀫𑀚𑀸𑀢𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀬 𑀧𑀜𑁆𑀜𑀸𑀬 ¶ 𑀲𑀺𑀤𑁆𑀥𑀺 𑀲𑀳𑀚𑀸𑀢𑀸𑀤𑀺𑀲𑀢𑁆𑀢𑀺𑀬𑀸 𑀲𑀺𑀚𑁆𑀛𑀦𑀢𑁄. 𑀲𑀫𑁆𑀫𑁄𑀳𑀧𑀝𑀺𑀧𑀓𑁆𑀔𑁂𑀦 𑀯𑀸 𑀧𑀜𑁆𑀜𑀸𑀲𑀗𑁆𑀔𑀸𑀢𑁂𑀦 𑀥𑀫𑁆𑀫𑀚𑀸𑀢𑁂𑀦. 𑀲𑀯𑀦𑀓𑀸𑀮𑀲𑀫𑁆𑀪𑀽𑀢𑀸𑀬 𑀳𑀺 𑀧𑀜𑁆𑀜𑀸𑀬 𑀢𑀤𑀼𑀢𑁆𑀢𑀭𑀺𑀓𑀸𑀮𑀧𑀜𑁆𑀜𑀸𑀲𑀺𑀤𑁆𑀥𑀺 𑀉𑀧𑀦𑀺𑀲𑁆𑀲𑀬𑀸𑀤𑀺𑀓𑁄𑀝𑀺𑀬𑀸 𑀲𑀺𑀚𑁆𑀛𑀦𑀢𑁄. 𑀇𑀢𑀭𑀢𑁆𑀣𑀸𑀧𑀺 𑀬𑀣𑀸𑀭𑀳𑀁 𑀦𑀬𑁄 𑀦𑁂𑀢𑀩𑁆𑀩𑁄.

𑀏𑀯𑀁 𑀧𑀓𑀸𑀲𑀺𑀢𑁂𑀦 𑀧𑀦 𑀅𑀢𑁆𑀣𑁂𑀦 𑀓𑀺𑀁 𑀯𑀺𑀪𑀸𑀯𑀺𑀢𑀦𑁆𑀢𑀺 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀤𑀼𑀩𑁆𑀩𑀺𑀥𑁂𑀲𑀼 𑀥𑀫𑁆𑀫𑁂𑀲𑀼. 𑀩𑁆𑀬𑀜𑁆𑀚𑀦𑀸𑀦𑀁 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄 𑀆𑀓𑀸𑀭𑁄 𑀦𑀸𑀢𑀺𑀕𑀫𑁆𑀪𑀻𑀭𑁄, 𑀬𑀣𑀸𑀲𑀼𑀢𑀥𑀸𑀭𑀡𑀫𑁂𑀯 𑀢𑀢𑁆𑀣 𑀓𑀭𑀡𑀻𑀬𑀁, 𑀢𑀲𑁆𑀫𑀸 𑀢𑀢𑁆𑀣 𑀲𑀢𑀺𑀬𑀸 𑀩𑁆𑀬𑀸𑀧𑀸𑀭𑁄 𑀅𑀥𑀺𑀓𑁄, 𑀧𑀜𑁆𑀜𑀸 𑀧𑀦 𑀕𑀼𑀡𑀻𑀪𑀽𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀸𑀬𑀸’’𑀢𑀺𑀆𑀤𑀺. 𑀧𑀜𑁆𑀜𑀸𑀬 𑀧𑀼𑀩𑁆𑀩𑀗𑁆𑀕𑀫𑀸 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀳𑀺 𑀦𑀺𑀩𑁆𑀩𑀘𑀦𑀁, 𑀧𑀼𑀩𑁆𑀩𑀗𑁆𑀕𑀫𑀢𑀸 𑀘𑁂𑀢𑁆𑀣 𑀧𑀥𑀸𑀦𑀪𑀸𑀯𑁄 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁧) 𑀯𑀺𑀬. 𑀅𑀧𑀺𑀘 𑀬𑀣𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀆𑀯𑀚𑁆𑀚𑀦𑀸𑀤𑀬𑁄 𑀧𑀼𑀩𑁆𑀩𑀗𑁆𑀕𑀫𑀸 𑀲𑀫𑀸𑀦𑀸𑀧𑀺 𑀢𑀤𑀸𑀭𑀫𑁆𑀫𑀡𑀲𑁆𑀲 𑀅𑀯𑀺𑀚𑀸𑀦𑀦𑀢𑁄 𑀅𑀧𑁆𑀧𑀥𑀸𑀦𑀪𑀽𑀢𑀸, 𑀏𑀯𑀁 𑀧𑀼𑀩𑁆𑀩𑀗𑁆𑀕𑀫𑀸𑀬𑀧𑀺 𑀅𑀧𑁆𑀧𑀥𑀸𑀦𑀢𑁆𑀢𑁂 𑀲𑀢𑀺 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀸 𑀏𑀢𑀺𑀲𑁆𑀲𑀸𑀢𑀺 𑀦𑀺𑀩𑁆𑀩𑀘𑀦𑀫𑁆𑀧𑀺 𑀬𑀼𑀚𑁆𑀚𑀢𑀺. 𑀧𑀼𑀩𑁆𑀩𑀗𑁆𑀕𑀫𑀢𑀸 𑀘𑁂𑀢𑁆𑀣 𑀧𑀼𑀭𑁂𑀘𑀸𑀭𑀺𑀪𑀸𑀯𑁄. 𑀇𑀢𑀺 𑀲𑀳𑀚𑀸𑀢𑀧𑀼𑀩𑁆𑀩𑀗𑁆𑀕𑀫𑁄 𑀧𑀼𑀭𑁂𑀚𑀸𑀢𑀧𑀼𑀩𑁆𑀩𑀗𑁆𑀕𑀫𑁄𑀢𑀺 𑀤𑀼𑀯𑀺𑀥𑁄𑀧𑀺 𑀧𑀼𑀩𑁆𑀩𑀗𑁆𑀕𑀫𑁄 𑀇𑀥 𑀲𑀫𑁆𑀪𑀯𑀢𑀺, 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑀢𑀺 ‘‘𑀧𑀼𑀩𑁆𑀩𑀗𑁆𑀕𑀫𑀸𑀬𑀸’’𑀢𑀺 𑀏𑀢𑁆𑀣𑀸𑀧𑀺 𑀬𑀣𑀸𑀲𑀫𑁆𑀪𑀯𑀫𑁂𑀲 ¶ 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀯𑀺𑀪𑀸𑀯𑀺𑀢𑁂𑀦 𑀲𑀫𑀢𑁆𑀣𑀢𑀸𑀯𑀘𑀦𑁂𑀦 𑀓𑀺𑀫𑀦𑀼𑀪𑀸𑀯𑀺𑀢𑀦𑁆𑀢𑀺 𑀆𑀳 ‘‘𑀢𑀤𑀼𑀪𑀬𑀲𑀫𑀢𑁆𑀣𑀢𑀸𑀬𑁄𑀕𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀲𑁆𑀲𑀸𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑁂𑀦 𑀧𑀭𑀺𑀧𑀼𑀡𑁆𑀡𑀲𑁆𑀲, 𑀲𑀗𑁆𑀓𑀸𑀲𑀦𑀸𑀤𑀻𑀳𑀺 𑀯𑀸 𑀙𑀳𑀺 𑀅𑀢𑁆𑀣𑀧𑀤𑁂𑀳𑀺, 𑀅𑀓𑁆𑀔𑀭𑀸𑀤𑀻𑀳𑀺 𑀘 𑀙𑀳𑀺 𑀩𑁆𑀬𑀜𑁆𑀚𑀦𑀧𑀤𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲, 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀗𑁆𑀔𑀸𑀢𑁂𑀦 𑀯𑀸 𑀭𑀲𑁂𑀦 𑀲𑀸𑀤𑀼𑀭𑀲𑀲𑁆𑀲. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀬𑁂𑀯 𑀦𑀯𑀮𑁄𑀓𑀼𑀢𑁆𑀢𑀭𑀭𑀢𑀦𑀲𑀦𑁆𑀦𑀺𑀥𑀸𑀦𑀢𑁄 𑀲𑀢𑁆𑀢𑀯𑀺𑀥𑀲𑁆𑀲, 𑀤𑀲𑀯𑀺𑀥𑀲𑁆𑀲 𑀯𑀸 𑀭𑀢𑀦𑀲𑁆𑀲 𑀲𑀦𑁆𑀦𑀺𑀥𑀸𑀦𑁄 𑀓𑁄𑀲𑁄 𑀯𑀺𑀬𑀸𑀢𑀺 𑀥𑀫𑁆𑀫𑀓𑁄𑀲𑁄, 𑀢𑀣𑀸 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑁄, 𑀢𑀢𑁆𑀣 𑀦𑀺𑀬𑀼𑀢𑁆𑀢𑁄𑀢𑀺 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁄. 𑀅𑀣 𑀯𑀸 𑀦𑀸𑀦𑀸𑀭𑀸𑀚𑀪𑀡𑁆𑀟𑀭𑀓𑁆𑀔𑀓𑁄 𑀪𑀡𑁆𑀟𑀸𑀕𑀸𑀭𑀺𑀓𑁄 𑀯𑀺𑀬𑀸𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑁄, 𑀥𑀫𑁆𑀫𑀲𑁆𑀲 𑀅𑀦𑀼𑀭𑀓𑁆𑀔𑀓𑁄 𑀪𑀡𑁆𑀟𑀸𑀕𑀸𑀭𑀺𑀓𑁄𑀢𑀺 𑀢𑀫𑁂𑀯 𑀲𑀤𑀺𑀲𑀢𑀸𑀓𑀸𑀭𑀡𑀤𑀲𑁆𑀲𑀦𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 ‘‘𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁄’’𑀢𑀺 𑀯𑀼𑀢𑁆𑀢𑁄. 𑀬𑀣𑀸𑀳 𑁋

‘‘𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀥𑀭𑁄, 𑀲𑀩𑁆𑀩𑀧𑀸𑀞𑀻 𑀘 𑀲𑀸𑀲𑀦𑁂;

𑀆𑀦𑀦𑁆𑀤𑁄 𑀦𑀸𑀫 𑀦𑀸𑀫𑁂𑀦, 𑀥𑀫𑁆𑀫𑀸𑀭𑀓𑁆𑀔𑁄 𑀢𑀯𑀁 𑀫𑀼𑀦𑁂’’𑀢𑀺. (𑀅𑀧. 𑁧.𑁫𑁪𑁨);

𑀅𑀜𑁆𑀜𑀣𑀸𑀧𑀺 𑀤𑀻𑀧𑁂𑀢𑀩𑁆𑀩𑀫𑀢𑁆𑀣𑀁 𑀤𑀻𑀧𑁂𑀢𑀺 ‘‘𑀅𑀧𑀭𑁄 𑀦𑀬𑁄’’𑀢𑀺𑀆𑀤𑀺𑀦𑀸, 𑀏𑀯𑀁 𑀲𑀤𑁆𑀤𑁂𑀦 𑀯𑀼𑀘𑁆𑀘𑀫𑀸𑀦𑀸𑀦𑀁 𑀆𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑀢𑁆𑀣𑀸𑀦𑀁 𑀅𑀯𑀺𑀧𑀭𑀻𑀢𑀲𑀤𑁆𑀥𑀫𑁆𑀫𑀯𑀺𑀲𑀬𑀢𑁆𑀢𑀸 𑀢𑀩𑁆𑀩𑀺𑀲𑀬𑁂𑀳𑀺 ¶ 𑀢𑁂𑀳𑀺 𑀅𑀢𑁆𑀣𑁂𑀳𑀺 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀲𑁆𑀲 𑀤𑀻𑀧𑀦𑀁 𑀬𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀬𑁄𑀦𑀺…𑀧𑁂… 𑀤𑀻𑀧𑁂𑀢𑀻’’𑀢𑀺. ‘‘𑀅𑀬𑁄𑀦𑀺𑀲𑁄’’𑀢𑀺𑀆𑀤𑀺𑀦𑀸 𑀩𑁆𑀬𑀢𑀺𑀭𑁂𑀓𑁂𑀦 𑀜𑀸𑀧𑀓𑀳𑁂𑀢𑀼𑀤𑀲𑁆𑀲𑀦𑀁. 𑀢𑀢𑁆𑀣 𑀓𑀢𑁆𑀣𑀘𑀺 𑀳𑀺-𑀲𑀤𑁆𑀤𑁄 𑀤𑀺𑀲𑁆𑀲𑀢𑀺, 𑀲𑁄 𑀓𑀸𑀭𑀡𑁂, 𑀓𑀲𑁆𑀫𑀸𑀢𑀺 𑀅𑀢𑁆𑀣𑁄, 𑀇𑀫𑀺𑀦𑀸 𑀯𑀘𑀦𑁂𑀦𑁂𑀯 𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄 𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀲𑀫𑁆𑀪𑀯𑀢𑁄 𑀅𑀕𑁆𑀕𑀺 𑀯𑀺𑀬 𑀥𑀽𑀫𑁂𑀦 𑀓𑀸𑀭𑀺𑀬𑁂𑀦 𑀓𑀸𑀭𑀡𑀪𑀽𑀢𑁄 𑀲𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀢𑀤𑀦𑁆𑀯𑀬𑀫𑁆𑀧𑀺 𑀅𑀢𑁆𑀣𑀸𑀧𑀢𑁆𑀢𑀺𑀬𑀸 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣 𑀬𑀣𑀸𑀭𑀳𑀁. ‘‘𑀩𑁆𑀭𑀳𑁆𑀫𑀚𑀸𑀮𑀁 𑀆𑀯𑀼𑀲𑁄 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺𑀆𑀤𑀺 𑀧𑀼𑀘𑁆𑀙𑀸𑀯𑀲𑁂𑀦 𑀅𑀥𑀼𑀦𑀸 𑀧𑀓𑀭𑀡𑀧𑁆𑀧𑀢𑁆𑀢𑀲𑁆𑀲 𑀯𑀓𑁆𑀔𑀫𑀸𑀦𑀲𑁆𑀲 𑀲𑀼𑀢𑁆𑀢𑀲𑁆𑀲 ‘‘𑀲𑀼𑀢’’𑀦𑁆𑀢𑀺 𑀧𑀤𑁂𑀦 𑀯𑀼𑀘𑁆𑀘𑀫𑀸𑀦𑀁 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀯𑀦𑀁 𑀲𑀫𑀸𑀥𑀸𑀦𑀫𑀦𑁆𑀢𑀭𑁂𑀦 𑀦 𑀲𑀫𑁆𑀪𑀯𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀯𑀺𑀓𑁆𑀔𑁂𑀧𑀁 𑀤𑀻𑀧𑁂𑀢𑀻’’𑀢𑀺. ‘‘𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀩𑁆𑀬𑀢𑀺𑀭𑁂𑀓𑀓𑀸𑀭𑀡𑁂𑀦 𑀜𑀸𑀧𑀓𑀳𑁂𑀢𑀼𑀁 𑀤𑀲𑁆𑀲𑁂𑀢𑁆𑀯𑀸 𑀢𑀤𑁂𑀯 𑀲𑀫𑀢𑁆𑀣𑁂𑀢𑀺 ‘‘𑀢𑀣𑀸 𑀳𑀻’’𑀢𑀺𑀆𑀤𑀺𑀦𑀸. 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀲𑀩𑁆𑀩𑁂𑀦 𑀅𑀢𑁆𑀣𑀩𑁆𑀬𑀜𑁆𑀚𑀦𑀤𑁂𑀲𑀓𑀧𑀬𑁄𑀚𑀦𑀸𑀤𑀺𑀦𑀸 𑀲𑀫𑁆𑀧𑀢𑁆𑀢𑀺𑀬𑀸. 𑀓𑀺𑀁 𑀇𑀫𑀺𑀦𑀸 𑀧𑀓𑀸𑀲𑀺𑀢𑀦𑁆𑀢𑀺 𑀆𑀳 ‘‘𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦 𑀘𑁂𑀢𑁆𑀣𑀸’’𑀢𑀺𑀆𑀤𑀺. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀥𑀫𑁆𑀫𑀤𑁆𑀯𑀬𑁂. ‘‘𑀦 𑀳𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀓𑀸𑀭𑀡𑀪𑀽𑀢𑁂𑀦 𑀅𑀯𑀺𑀓𑁆𑀔𑁂𑀧𑁂𑀦, 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁂𑀦 𑀘 𑀨𑀮𑀪𑀽𑀢𑀲𑁆𑀲 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀲𑀺𑀤𑁆𑀥𑀺𑀬𑀸 𑀏𑀯 𑀲𑀫𑀢𑁆𑀣𑀦𑀁 𑀯𑀼𑀢𑁆𑀢𑀁, 𑀅𑀯𑀺𑀓𑁆𑀔𑁂𑀧𑁂𑀦 𑀧𑀦 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀲𑁆𑀲 𑀲𑀺𑀤𑁆𑀥𑀺𑀬𑀸 𑀲𑀫𑀢𑁆𑀣𑀦𑀁 𑀦 𑀯𑀼𑀢𑁆𑀢𑀁. 𑀓𑀲𑁆𑀫𑀸𑀢𑀺 𑀘𑁂? 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸𑀦𑀁 𑀲𑀧𑁆𑀧𑀼𑀭𑀺𑀲𑁂 𑀧𑀬𑀺𑀭𑀼𑀧𑀸𑀲𑀦𑀸𑀪𑀸𑀯𑀲𑁆𑀲 𑀅𑀢𑁆𑀣𑀢𑁄 𑀲𑀺𑀤𑁆𑀥𑀢𑁆𑀢𑀸. 𑀅𑀢𑁆𑀣𑀯𑀲𑁂𑀦𑁂𑀯 𑀳𑀺 𑀲𑁄 𑀧𑀸𑀓𑀝𑁄𑀢𑀺 𑀦 𑀯𑀼𑀢𑁆𑀢𑁄.

𑀏𑀢𑁆𑀣𑀸𑀳 𑁋 𑀬𑀣𑀸 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦 𑀨𑀮𑀪𑀽𑀢𑁂𑀦 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸𑀦𑀁 𑀓𑀸𑀭𑀡𑀪𑀽𑀢𑀸𑀦𑀁 ¶ 𑀲𑀺𑀤𑁆𑀥𑀺 𑀯𑀼𑀢𑁆𑀢𑀸 𑀢𑀤𑀯𑀺𑀦𑀸𑀪𑀸𑀯𑀢𑁄, 𑀏𑀯𑀁 𑀅𑀯𑀺𑀓𑁆𑀔𑁂𑀧𑁂𑀦 𑀨𑀮𑀪𑀽𑀢𑁂𑀦 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀦𑀁 𑀓𑀸𑀭𑀡𑀪𑀽𑀢𑀸𑀦𑀁 𑀲𑀺𑀤𑁆𑀥𑀺 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸 𑀅𑀲𑁆𑀲𑀼𑀢𑀯𑀢𑁄, 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀯𑀺𑀭𑀳𑀺𑀢𑀲𑁆𑀲 𑀘 𑀢𑀤𑀪𑀸𑀯𑀢𑁄. 𑀏𑀯𑀁 𑀲𑀦𑁆𑀢𑁂𑀧𑀺 ‘‘𑀦 𑀳𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄’’𑀢𑀺𑀆𑀤𑀺𑀲𑀫𑀢𑁆𑀣𑀦𑀯𑀘𑀦𑁂𑀦 𑀅𑀯𑀺𑀓𑁆𑀔𑁂𑀧𑁂𑀦, 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁂𑀦 𑀘 𑀓𑀸𑀭𑀡𑀪𑀽𑀢𑁂𑀦 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑁆𑀲𑁂𑀯 𑀨𑀮𑀪𑀽𑀢𑀲𑁆𑀲 𑀲𑀺𑀤𑁆𑀥𑀺 𑀯𑀼𑀢𑁆𑀢𑀸, 𑀓𑀲𑁆𑀫𑀸 𑀧𑀦𑁂𑀯𑀁 𑀯𑀼𑀢𑁆𑀢𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀥𑀺𑀧𑁆𑀧𑀸𑀬𑀦𑁆𑀢𑀭𑀲𑀫𑁆𑀪𑀯𑀢𑁄 𑀳𑀺 𑀢𑀣𑀸 𑀲𑀺𑀤𑁆𑀥𑀺 𑀯𑀼𑀢𑁆𑀢𑀸. 𑀅𑀬𑀁 𑀧𑀦𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑁋 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸 𑀦 𑀏𑀓𑀦𑁆𑀢𑁂𑀦 𑀅𑀯𑀺𑀓𑁆𑀔𑁂𑀧𑀲𑁆𑀲 𑀓𑀸𑀭𑀡𑀁 𑀩𑀸𑀳𑀺𑀭𑀓𑀸𑀭𑀡𑀢𑁆𑀢𑀸, 𑀅𑀯𑀺𑀓𑁆𑀔𑁂𑀧𑁄 𑀧𑀦 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁄 𑀯𑀺𑀬 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀏𑀓𑀦𑁆𑀢𑀓𑀸𑀭𑀡𑀁 𑀅𑀚𑁆𑀛𑀢𑁆𑀢𑀺𑀓𑀓𑀸𑀭𑀡𑀢𑁆𑀢𑀸, 𑀢𑀲𑁆𑀫𑀸 𑀏𑀓𑀦𑁆𑀢𑀓𑀸𑀭𑀡𑁂 𑀳𑁄𑀦𑁆𑀢𑁂 𑀓𑀺𑀫𑀢𑁆𑀣𑀺𑀬𑀸 𑀅𑀦𑁂𑀓𑀦𑁆𑀢𑀓𑀸𑀭𑀡𑀁 𑀧𑀢𑀺 𑀨𑀮𑀪𑀸𑀯𑀧𑀭𑀺𑀓𑀧𑁆𑀧𑀦𑀸𑀢𑀺 𑀢𑀣𑀸𑀬𑁂𑀯𑁂𑀢𑀲𑁆𑀲 ¶ 𑀲𑀺𑀤𑁆𑀥𑀺 𑀯𑀼𑀢𑁆𑀢𑀸𑀢𑀺. 𑀏𑀢𑁆𑀣 𑀘 𑀧𑀞𑀫𑀁 𑀨𑀮𑁂𑀦 𑀓𑀸𑀭𑀡𑀲𑁆𑀲 𑀲𑀺𑀤𑁆𑀥𑀺𑀤𑀲𑁆𑀲𑀦𑀁 𑀦𑀤𑀻𑀧𑀽𑀭𑁂𑀦 𑀯𑀺𑀬 𑀉𑀧𑀭𑀺 𑀯𑀼𑀝𑁆𑀞𑀺𑀲𑀩𑁆𑀪𑀸𑀯𑀲𑁆𑀲, 𑀤𑀼𑀢𑀺𑀬𑀁 𑀓𑀸𑀭𑀡𑁂𑀦 𑀨𑀮𑀲𑁆𑀲 𑀲𑀺𑀤𑁆𑀥𑀺𑀤𑀲𑁆𑀲𑀦𑀁 𑀏𑀓𑀦𑁆𑀢𑀯𑀲𑁆𑀲𑀺𑀦𑀸 𑀯𑀺𑀬 𑀫𑁂𑀖𑀯𑀼𑀝𑁆𑀞𑀸𑀦𑁂𑀦 𑀯𑀼𑀝𑁆𑀞𑀺𑀧𑀯𑀢𑁆𑀢𑀺𑀬𑀸.

‘‘𑀅𑀧𑀭𑁄 𑀦𑀬𑁄’’𑀢𑀺𑀆𑀤𑀺𑀦𑀸 𑀅𑀜𑁆𑀜𑀣𑀸𑀧𑀺 𑀤𑀻𑀧𑁂𑀢𑀩𑁆𑀩𑀢𑁆𑀣𑀫𑀸𑀳, 𑀬𑀲𑁆𑀫𑀸 𑀦 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀦𑁆𑀢𑀺…𑀧𑁂… 𑀦𑀸𑀦𑀸𑀓𑀸𑀭𑀦𑀺𑀤𑁆𑀤𑁂𑀲𑁄𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁, 𑀲𑁄 𑀘 𑀆𑀓𑀸𑀭𑁄𑀢𑀺 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑀯𑀺𑀜𑁆𑀜𑀸𑀡𑀯𑀻𑀣𑀺𑀲𑀗𑁆𑀔𑀸𑀢𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀦𑀸𑀦𑀸𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀬𑀸 𑀦𑀸𑀦𑀢𑁆𑀣𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑀲𑀗𑁆𑀔𑀸𑀢𑁄 𑀲𑁄 𑀪𑀕𑀯𑀢𑁄 𑀯𑀘𑀦𑀲𑁆𑀲 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑁆𑀧𑀪𑁂𑀤𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀓𑀮𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀑𑀕𑀸𑀳𑀦𑀸𑀓𑀸𑀭𑁄. 𑀏𑀯𑀁 𑀪𑀤𑁆𑀤𑀓𑁄𑀢𑀺 𑀦𑀺𑀭𑀯𑀲𑁂𑀲𑀧𑀭𑀳𑀺𑀢𑀧𑀸𑀭𑀺𑀧𑀽𑀭𑀺𑀪𑀸𑀯𑀓𑀸𑀭𑀡𑀢𑁆𑀢𑀸 𑀏𑀯𑀁 𑀬𑀣𑀸𑀯𑀼𑀢𑁆𑀢𑁂𑀦 𑀦𑀸𑀦𑀢𑁆𑀣𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑁂𑀦 𑀲𑀼𑀦𑁆𑀤𑀭𑁄 𑀲𑁂𑀝𑁆𑀞𑁄, 𑀲𑀫𑀸𑀲𑀧𑀤𑀁 𑀯𑀸 𑀏𑀢𑀁 𑀏𑀯𑀁 𑀈𑀤𑀺𑀲𑁄 𑀪𑀤𑁆𑀤𑁄 𑀬𑀲𑁆𑀲𑀸𑀢𑀺 𑀓𑀢𑁆𑀯𑀸. 𑀦 𑀧𑀡𑀺𑀳𑀺𑀢𑁄 𑀅𑀧𑁆𑀧𑀡𑀺𑀳𑀺𑀢𑁄, 𑀲𑀫𑁆𑀫𑀸 𑀅𑀧𑁆𑀧𑀡𑀺 𑀳𑀺𑀢𑁄 𑀅𑀢𑁆𑀢𑀸 𑀬𑀲𑁆𑀲𑀸𑀢𑀺 𑀢𑀣𑀸, 𑀢𑀲𑁆𑀲. 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸𑀲𑀗𑁆𑀔𑀸𑀢𑀕𑀼𑀡𑀤𑁆𑀯𑀬𑀲𑀫𑁆𑀧𑀢𑁆𑀢𑀺𑀁. 𑀕𑀼𑀡𑀲𑁆𑀲𑁂𑀯 𑀳𑀺 𑀅𑀧𑀭𑀸𑀧𑀭𑀯𑀼𑀢𑁆𑀢𑀺𑀬𑀸 𑀧𑀯𑀢𑁆𑀢𑀦𑀝𑁆𑀞𑁂𑀦 𑀘𑀓𑁆𑀓𑀪𑀸𑀯𑁄. 𑀘𑀭𑀦𑁆𑀢𑀺 𑀯𑀸 𑀏𑀢𑁂𑀦 𑀲𑀢𑁆𑀢𑀸 𑀲𑀫𑁆𑀧𑀢𑁆𑀢𑀺𑀪𑀯𑀁, 𑀲𑀫𑁆𑀧𑀢𑁆𑀢𑀺𑀪𑀯𑁂𑀲𑀽𑀢𑀺 𑀯𑀸 𑀘𑀓𑁆𑀓𑀁. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀘𑀢𑀼𑀘𑀓𑁆𑀓𑀁 𑀯𑀢𑁆𑀢𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁪.𑁩𑁧) 𑀧𑀘𑁆𑀙𑀺𑀫𑀪𑀸𑀯𑁄 𑀘𑁂𑀢𑁆𑀣 𑀤𑁂𑀲𑀦𑀸𑀓𑁆𑀓𑀫𑀯𑀲𑁂𑀦𑁂𑀯. 𑀧𑀼𑀭𑀺𑀫𑀘𑀓𑁆𑀓𑀤𑁆𑀯𑀬𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀲𑀗𑁆𑀔𑀸𑀢𑀕𑀼𑀡𑀤𑁆𑀯𑀬𑀲𑀫𑁆𑀧𑀢𑁆𑀢𑀺𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀢𑀲𑁆𑀫𑀸𑀢𑀺 𑀧𑀼𑀭𑀺𑀫𑀓𑀸𑀭𑀡𑀁 𑀧𑀼𑀭𑀺𑀫𑀲𑁆𑀲𑁂𑀯𑀸𑀢𑀺 𑀇𑀥 𑀓𑀸𑀭𑀡𑀫𑀸𑀳 ‘‘𑀦 𑀳𑀻’’𑀢𑀺𑀆𑀤𑀺𑀦𑀸.

𑀢𑁂𑀦 𑀓𑀺𑀁 𑀧𑀓𑀸𑀲𑀺𑀢𑀦𑁆𑀢𑀺 𑀆𑀳 ‘‘𑀇𑀘𑁆𑀘𑀲𑁆𑀲𑀸’’𑀢𑀺𑀆𑀤𑀺. 𑀇𑀢𑀺 𑀇𑀫𑀸𑀬 𑀘𑀢𑀼𑀘𑀓𑁆𑀓𑀲𑀫𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀪𑀽𑀢𑀸𑀬. 𑀅𑀲𑁆𑀲 𑀣𑁂𑀭𑀲𑁆𑀲. 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑀺𑀤𑁆𑀥𑀺𑀬𑀸𑀢𑀺 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑁆𑀲 𑀅𑀢𑁆𑀣𑀺𑀪𑀸𑀯𑁂𑀦 𑀲𑀺𑀤𑁆𑀥𑀺𑀬𑀸 ¶ . 𑀆𑀲𑀬𑀲𑀼𑀤𑁆𑀥𑀻𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑀗𑁆𑀔𑀸𑀢𑀸𑀬 𑀅𑀦𑀼𑀮𑁄𑀫𑀺𑀓𑀔𑀦𑁆𑀢𑀺𑀬𑀸, 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡-𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀲𑁆𑀲 𑀬𑀣𑀸𑀪𑀽𑀢𑀜𑀸𑀡𑀲𑁆𑀲 𑀘𑀸𑀢𑀺 𑀤𑀼𑀯𑀺𑀥𑀲𑁆𑀲𑀸𑀧𑀺 𑀆𑀲𑀬𑀲𑁆𑀲 𑀅𑀲𑀼𑀤𑁆𑀥𑀺𑀳𑁂𑀢𑀼𑀪𑀽𑀢𑀸𑀦𑀁 𑀓𑀺𑀮𑁂𑀲𑀸𑀦𑀁 𑀤𑀽𑀭𑀻𑀪𑀸𑀯𑁂𑀦 𑀲𑀼𑀤𑁆𑀥𑀺. 𑀢𑀤𑁂𑀯 𑀳𑀺 𑀤𑁆𑀯𑀬𑀁 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀸𑀦𑀁 𑀲𑀼𑀤𑁆𑀥𑀲𑀢𑁆𑀢𑀸𑀦𑀁 𑀆𑀲𑀬𑁄. 𑀲𑀫𑁆𑀫𑀸𑀧𑀡𑀺𑀳𑀺𑀢𑀢𑁆𑀢𑁄 𑀳𑀺 𑀧𑀼𑀩𑁆𑀩𑁂 𑀘 𑀓𑀢𑀧𑀼𑀜𑁆𑀜𑁄 𑀲𑀼𑀤𑁆𑀥𑀸𑀲𑀬𑁄 𑀳𑁄𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀲𑀫𑁆𑀫𑀸𑀧𑀡𑀺𑀳𑀺𑀢𑀁 𑀘𑀺𑀢𑁆𑀢𑀁, 𑀲𑁂𑀬𑁆𑀬𑀲𑁄 𑀦𑀁 𑀢𑀢𑁄 𑀓𑀭𑁂’’𑀢𑀺, (𑀥. 𑀧. 𑁪𑁩) ‘‘𑀓𑀢𑀧𑀼𑀜𑁆𑀜𑁄𑀲𑀺 𑀢𑁆𑀯𑀁 𑀆𑀦𑀦𑁆𑀤, 𑀧𑀥𑀸𑀦𑀫𑀦𑀼𑀬𑀼𑀜𑁆𑀚 ¶ 𑀔𑀺𑀧𑁆𑀧𑀁 𑀳𑁄𑀳𑀺𑀲𑀺 𑀅𑀦𑀸𑀲𑀯𑁄’’𑀢𑀺 (𑀤𑀻. 𑀦𑀺. 𑁨.𑁨𑁦𑁭) 𑀘. 𑀓𑁂𑀘𑀺 𑀧𑀦 ‘‘𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄 𑀆𑀲𑀬𑁄’’𑀢𑀺 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀫𑁂𑀯 ‘‘𑀢𑀸𑀬 𑀘 𑀆𑀲𑀬𑀲𑀼𑀤𑁆𑀥𑀺𑀬𑀸 𑀅𑀥𑀺𑀕𑀫𑀩𑁆𑀬𑀢𑁆𑀢𑀺𑀲𑀺𑀤𑁆𑀥𑀻’’𑀢𑀺 𑀯𑀘𑀦𑁂𑀦 𑀯𑀺𑀭𑁄𑀥𑀢𑁄. 𑀏𑀯𑀫𑁆𑀧𑀺 𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀲𑁆𑀲 𑀆𑀲𑀬𑀲𑁆𑀲 𑀲𑀼𑀤𑁆𑀥𑀺 𑀦 𑀬𑀼𑀢𑁆𑀢𑀸 𑀢𑀸𑀬 𑀅𑀥𑀺𑀕𑀫𑀩𑁆𑀬𑀢𑁆𑀢𑀺𑀲𑀺𑀤𑁆𑀥𑀺𑀬𑀸 𑀅𑀯𑀢𑁆𑀢𑀩𑁆𑀩𑀢𑁄𑀢𑀺? 𑀦𑁄 𑀦 𑀬𑀼𑀢𑁆𑀢𑁄 𑀧𑀼𑀭𑀺𑀫𑀲𑁆𑀲 𑀫𑀕𑁆𑀕𑀲𑁆𑀲, 𑀧𑀘𑁆𑀙𑀺𑀫𑀸𑀦𑀁 𑀫𑀕𑁆𑀕𑀸𑀦𑀁, 𑀨𑀮𑀸𑀦𑀜𑁆𑀘 𑀓𑀸𑀭𑀡𑀪𑀸𑀯𑀢𑁄. 𑀧𑀬𑁄𑀕𑀲𑀼𑀤𑁆𑀥𑀻𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀼𑀩𑁆𑀩𑀗𑁆𑀕𑀫𑀲𑁆𑀲 𑀥𑀫𑁆𑀫𑀲𑁆𑀲𑀯𑀦𑀧𑀬𑁄𑀕𑀲𑁆𑀲 𑀯𑀺𑀲𑀤𑀪𑀸𑀯𑁂𑀦 𑀲𑀼𑀤𑁆𑀥𑀺, 𑀲𑀩𑁆𑀩𑀲𑁆𑀲 𑀯𑀸 𑀓𑀸𑀬𑀯𑀘𑀻𑀧𑀬𑁄𑀕𑀲𑁆𑀲 𑀦𑀺𑀤𑁆𑀤𑁄𑀲𑀪𑀸𑀯𑁂𑀦 𑀲𑀼𑀤𑁆𑀥𑀺. 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀻, 𑀳𑀺 𑀲𑀧𑁆𑀧𑀼𑀭𑀺𑀲𑀲𑁂𑀯𑀻 𑀘 𑀬𑀣𑀸𑀯𑀼𑀢𑁆𑀢𑀯𑀺𑀲𑀼𑀤𑁆𑀥𑀧𑀬𑁄𑀕𑁄 𑀳𑁄𑀢𑀺. 𑀢𑀣𑀸𑀯𑀺𑀲𑀼𑀤𑁆𑀥𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀼𑀩𑁆𑀩𑀗𑁆𑀕𑀫𑁂𑀦 𑀥𑀫𑁆𑀫𑀲𑁆𑀲𑀯𑀦𑀧𑀬𑁄𑀕𑁂𑀦, 𑀯𑀺𑀧𑁆𑀧𑀝𑀺𑀲𑀸𑀭𑀸𑀪𑀸𑀯𑀸𑀯𑀳𑁂𑀦 𑀘 𑀓𑀸𑀬𑀯𑀘𑀻𑀧𑀬𑁄𑀕𑁂𑀦 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀭𑀺𑀬𑀢𑁆𑀢𑀺𑀬𑀁 𑀯𑀺𑀲𑀸𑀭𑀤𑁄 𑀳𑁄𑀢𑀺, 𑀢𑀣𑀸𑀪𑀽𑀢𑁄 𑀘 𑀣𑁂𑀭𑁄, 𑀢𑁂𑀦 𑀯𑀺𑀜𑁆𑀜𑀸𑀬𑀢𑀺 𑀧𑀼𑀭𑀺𑀫𑀘𑀓𑁆𑀓𑀤𑁆𑀯𑀬𑀲𑀺𑀤𑁆𑀥𑀺𑀬𑀸 𑀣𑁂𑀭𑀲𑁆𑀲 𑀧𑀬𑁄𑀕𑀲𑀼𑀤𑁆𑀥𑀺 𑀲𑀺𑀤𑁆𑀥𑀸𑀯𑀸𑀢𑀺. 𑀢𑁂𑀦 𑀓𑀺𑀁 𑀯𑀺𑀪𑀸𑀯𑀺𑀢𑀦𑁆𑀢𑀺 𑀆𑀳 ‘‘𑀢𑀸𑀬 𑀘𑀸’’𑀢𑀺𑀆𑀤𑀺. 𑀅𑀥𑀺𑀕𑀫𑀩𑁆𑀬𑀢𑁆𑀢𑀺𑀲𑀺𑀤𑁆𑀥𑀻𑀢𑀺 𑀧𑀝𑀺𑀯𑁂𑀥𑀲𑀗𑁆𑀔𑀸𑀢𑁂 𑀅𑀥𑀺𑀕𑀫𑁂 𑀙𑁂𑀓𑀪𑀸𑀯𑀲𑀺𑀤𑁆𑀥𑀺. 𑀅𑀥𑀺𑀕𑀫𑁂𑀢𑀩𑁆𑀩𑀢𑁄 𑀳𑀺 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀢𑁄 𑀧𑀝𑀺𑀯𑁂𑀥𑁄 ‘‘𑀅𑀥𑀺𑀕𑀫𑁄’’𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑁄, 𑀆𑀕𑀫𑁄𑀢𑀺 𑀘 𑀧𑀭𑀺𑀬𑀢𑁆𑀢𑀺 𑀆𑀕𑀘𑁆𑀙𑀦𑁆𑀢𑀺 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸𑀤𑀬𑁄 𑀏𑀢𑁂𑀦, 𑀆𑀪𑀼𑀲𑁄 𑀯𑀸 𑀕𑀫𑀺𑀢𑀩𑁆𑀩𑁄 𑀜𑀸𑀢𑀩𑁆𑀩𑁄𑀢𑀺 𑀓𑀢𑁆𑀯𑀸.

𑀢𑁂𑀦 𑀓𑀺𑀫𑀦𑀼𑀪𑀸𑀯𑀺𑀢𑀦𑁆𑀢𑀺 𑀆𑀳 ‘‘𑀇𑀢𑀻’’𑀢𑀺𑀆𑀤𑀺. 𑀇𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦, 𑀢𑀲𑁆𑀫𑀸 𑀲𑀺𑀤𑁆𑀥𑀢𑁆𑀢𑀸𑀢𑀺 𑀯𑀸 𑀓𑀸𑀭𑀡𑀦𑀺𑀤𑁆𑀤𑁂𑀲𑁄. 𑀯𑀘𑀦𑀦𑁆𑀢𑀺 𑀦𑀺𑀤𑀸𑀦𑀯𑀘𑀦𑀁 𑀮𑁄𑀓𑀢𑁄, 𑀥𑀫𑁆𑀫𑀢𑁄 𑀘 𑀲𑀺𑀤𑁆𑀥𑀸𑀬 𑀉𑀧𑀫𑀸𑀬 𑀢𑀫𑀢𑁆𑀣𑀁 𑀜𑀸𑀧𑁂𑀢𑀼𑀁 ‘‘𑀅𑀭𑀼𑀡𑀼𑀕𑁆𑀕𑀁 𑀯𑀺𑀬𑀸’’𑀢𑀺𑀆𑀤𑀺𑀫𑀸𑀳. ‘‘𑀉𑀧𑀫𑀸𑀬 𑀫𑀺𑀥𑁂𑀓𑀘𑁆𑀘𑁂, 𑀅𑀢𑁆𑀣𑀁 𑀚𑀸𑀦𑀦𑁆𑀢𑀺 𑀧𑀡𑁆𑀟𑀺𑀢𑀸’’𑀢𑀺 (𑀚𑀸. 𑁨.𑁧𑁯.𑁨𑁪) 𑀳𑀺 𑀯𑀼𑀢𑁆𑀢𑀁. 𑀅𑀭𑀼𑀡𑁄𑀢𑀺 𑀲𑀽𑀭𑀺𑀬𑀲𑁆𑀲 𑀉𑀤𑀬𑀢𑁄 𑀧𑀼𑀩𑁆𑀩𑀪𑀸𑀕𑁂 𑀉𑀝𑁆𑀞𑀺𑀢𑀭𑀁𑀲𑀺, 𑀢𑀲𑁆𑀲 𑀉𑀕𑁆𑀕𑀁 𑀉𑀕𑁆𑀕𑀫𑀦𑀁 𑀉𑀤𑀬𑀢𑁄 𑀉𑀤𑀬𑀦𑁆𑀢𑀲𑁆𑀲 𑀉𑀤𑀬𑀸𑀯𑀸𑀲𑀫𑀼𑀕𑁆𑀕𑀘𑁆𑀙𑀢𑁄 𑀲𑀽𑀭𑀺𑀬𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑀁 𑀧𑀼𑀭𑁂𑀘𑀭𑀁 𑀪𑀯𑀺𑀢𑀼𑀁 𑀅𑀭𑀳𑀢𑀺 𑀯𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀆𑀕𑀫𑀸𑀥𑀺𑀕𑀫𑀩𑁆𑀬𑀢𑁆𑀢𑀺𑀬𑀸 𑀈𑀤𑀺𑀲𑀲𑁆𑀲 𑀣𑁂𑀭𑀲𑁆𑀲 𑀯𑀼𑀢𑁆𑀢𑀦𑀺𑀤𑀸𑀦𑀯𑀘𑀦𑀁 𑀪𑀕𑀯𑀢𑁄 𑀯𑀘𑀦𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑀁 𑀪𑀯𑀺𑀢𑀼𑀫𑀭𑀳𑀢𑀺, 𑀦𑀺𑀤𑀸𑀦𑀪𑀸𑀯𑀁 𑀕𑀢𑀁 𑀳𑁄𑀢𑀻𑀢𑀺 𑀇𑀤𑀫𑀢𑁆𑀣𑀚𑀸𑀢𑀁 𑀅𑀦𑀼𑀪𑀸𑀯𑀺𑀢𑀦𑁆𑀢𑀺.

𑀇𑀤𑀸𑀦𑀺 𑀅𑀧𑀭𑀫𑁆𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑁆𑀲 𑀅𑀲𑀫𑁆𑀫𑁄𑀳𑀸𑀲𑀫𑁆𑀫𑁄𑀲𑀲𑀗𑁆𑀔𑀸𑀢𑀲𑁆𑀲 𑀤𑀻𑀧𑁂𑀢𑀩𑁆𑀩𑀲𑁆𑀲𑀢𑁆𑀣𑀲𑁆𑀲 𑀤𑀻𑀧𑀓𑁂𑀳𑀺 𑀏𑀯𑀁-𑀲𑀤𑁆𑀤 𑀲𑀼𑀢-𑀲𑀤𑁆𑀤𑁂𑀳𑀺 𑀧𑀓𑀸𑀲𑁂𑀢𑀩𑁆𑀩𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀅𑀧𑀭𑁄 𑀦𑀬𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑀺 ‘‘𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀤𑀻𑀧𑀓𑁂𑀦 ¶ , 𑀲𑁄𑀢𑀩𑁆𑀩𑀧𑁆𑀧𑀪𑁂𑀤𑀧𑀝𑀺𑀯𑁂𑀥𑀤𑀻𑀧𑀓𑁂𑀦𑀸’’𑀢𑀺 𑀘 𑀇𑀫𑀺𑀦𑀸 𑀢𑁂𑀳𑀺 𑀲𑀤𑁆𑀤𑁂𑀳𑀺 𑀧𑀼𑀩𑁆𑀩𑁂 ¶ 𑀤𑀻𑀧𑀺𑀢𑀁 𑀅𑀲𑀫𑁆𑀫𑁄𑀳𑀸𑀲𑀫𑁆𑀫𑁄𑀲𑀲𑀗𑁆𑀔𑀸𑀢𑀁 𑀤𑀻𑀧𑁂𑀢𑀩𑁆𑀩𑀢𑁆𑀣𑀫𑀸𑀳 𑀅𑀲𑀫𑁆𑀫𑁄𑀳𑁂𑀦 𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀲𑁆𑀲, 𑀅𑀲𑀫𑁆𑀫𑁄𑀲𑁂𑀦 𑀘 𑀲𑁄𑀢𑀩𑁆𑀩𑀧𑁆𑀧𑀪𑁂𑀤𑀧𑀝𑀺𑀯𑁂𑀥𑀲𑁆𑀲 𑀲𑀺𑀚𑁆𑀛𑀦𑀢𑁄. ‘‘𑀅𑀢𑁆𑀢𑀦𑁄’’𑀢𑀺𑀆𑀤𑀻𑀳𑀺 𑀧𑀦 𑀧𑀓𑀸𑀲𑁂𑀢𑀩𑁆𑀩𑀢𑁆𑀣𑀁. 𑀢𑁂𑀦 𑀯𑀼𑀢𑁆𑀢𑀁 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 ‘‘𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀤𑀻𑀧𑀓𑁂𑀦𑀸𑀢𑀺𑀆𑀤𑀺𑀦𑀸 𑀏𑀯𑀁-𑀲𑀤𑁆𑀤 𑀲𑀼𑀢-𑀲𑀤𑁆𑀤𑀸𑀦𑀁 𑀣𑁂𑀭𑀲𑁆𑀲 𑀅𑀢𑁆𑀣𑀩𑁆𑀬𑀜𑁆𑀚𑀦𑁂𑀲𑀼 𑀅𑀲𑀫𑁆𑀫𑁄𑀳𑀸𑀲𑀫𑁆𑀫𑁄𑀲𑀤𑀻𑀧𑀦𑀢𑁄 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀯𑀲𑁂𑀦 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀢𑀻’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁧). 𑀳𑁂𑀢𑀼𑀕𑀩𑁆𑀪𑀜𑁆𑀘𑁂𑀢𑀁 𑀧𑀤𑀤𑁆𑀯𑀬𑀁, 𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀲𑀗𑁆𑀔𑀸𑀢𑀲𑁆𑀲, 𑀲𑁄𑀢𑀩𑁆𑀩𑀧𑁆𑀧𑀪𑁂𑀤-𑀧𑀝𑀺𑀯𑁂𑀥𑀲𑀗𑁆𑀔𑀸𑀢𑀲𑁆𑀲 𑀘 𑀤𑀻𑀧𑁂𑀢𑀩𑁆𑀩𑀢𑁆𑀣𑀲𑁆𑀲 𑀤𑀻𑀧𑀓𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀦𑁆𑀢𑀲𑁆𑀲 𑀯𑀺𑀚𑁆𑀚𑀫𑀸𑀦𑀲𑁆𑀲 𑀪𑀸𑀯𑁄 𑀲𑀩𑁆𑀪𑀸𑀯𑁄, 𑀅𑀢𑁆𑀣𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀪𑀸𑀯𑁄 𑀢𑀣𑀸. ‘‘𑀲𑀫𑁆𑀪𑀯’’𑀦𑁆𑀢𑀺𑀧𑀺 𑀧𑀸𑀞𑁄, 𑀲𑀫𑁆𑀪𑀯𑀦𑀁 𑀲𑀫𑁆𑀪𑀯𑁄, 𑀅𑀢𑁆𑀣𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀲𑀫𑁆𑀧𑀢𑁆𑀢𑀻𑀦𑀁 𑀲𑀫𑁆𑀪𑀯𑁄 𑀢𑀣𑀸. 𑀏𑀯𑀁 𑀇𑀢𑀭𑀢𑁆𑀣𑀸𑀧𑀺. ‘‘𑀲𑁄𑀢𑀩𑁆𑀩𑀧𑁆𑀧𑀪𑁂𑀤𑀧𑀝𑀺𑀯𑁂𑀥𑀤𑀻𑀧𑀓𑁂𑀦𑀸’’𑀢𑀺 𑀏𑀢𑁂𑀦 𑀧𑀦 𑀅𑀬𑀁 𑀲𑀼𑀢-𑀲𑀤𑁆𑀤𑁄 𑀏𑀯𑀁-𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀢𑁄, 𑀯𑀓𑁆𑀔𑀫𑀸𑀦𑀸𑀧𑁂𑀓𑁆𑀔𑀸𑀬 𑀯𑀸 𑀲𑀸𑀫𑀜𑁆𑀜𑁂𑀦𑁂𑀯 𑀯𑀼𑀢𑁆𑀢𑁂𑀧𑀺 𑀲𑁄𑀢𑀩𑁆𑀩𑀥𑀫𑁆𑀫𑀯𑀺𑀲𑁂𑀲𑀁 𑀆𑀫𑀲𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀘 𑀲𑁄𑀢𑀩𑁆𑀩𑀥𑀫𑁆𑀫𑀲𑀗𑁆𑀔𑀸𑀢𑀸𑀬 𑀧𑀸𑀴𑀺𑀬𑀸 𑀦𑀺𑀤𑀲𑁆𑀲𑁂𑀢𑀩𑁆𑀩𑀸𑀦𑀁 𑀪𑀸𑀲𑀺𑀢𑀢𑁆𑀣𑀧𑀬𑁄𑀚𑀦𑀢𑁆𑀣𑀸𑀦𑀁, 𑀢𑀻𑀲𑀼 𑀘 𑀜𑀸𑀡𑁂𑀲𑀼 𑀧𑀯𑀢𑁆𑀢𑀜𑀸𑀡𑀲𑁆𑀲 𑀦𑀸𑀦𑀧𑁆𑀧𑀓𑀸𑀭𑀪𑀸𑀯𑀢𑁄 𑀢𑀩𑁆𑀪𑀸𑀯𑀧𑀝𑀺𑀯𑁂𑀥𑀤𑀻𑀧𑀓𑁂𑀦 𑀏𑀯𑀁-𑀲𑀤𑁆𑀤𑁂𑀦 𑀅𑀢𑁆𑀣𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀲𑀫𑁆𑀧𑀢𑁆𑀢𑀺𑀲𑀩𑁆𑀪𑀸𑀯𑀤𑀻𑀧𑀦𑀁 𑀬𑀼𑀢𑁆𑀢𑀁, 𑀲𑁄𑀢𑀩𑁆𑀩𑀥𑀫𑁆𑀫𑀲𑁆𑀲 𑀧𑀦 𑀅𑀢𑁆𑀣𑀸𑀥𑀺𑀕𑀫𑀳𑁂𑀢𑀼𑀢𑁄, 𑀢𑀁𑀯𑀲𑁂𑀦 𑀘 𑀢𑀤𑀯𑀲𑁂𑀲𑀳𑁂𑀢𑀼𑀧𑁆𑀧𑀪𑁂𑀤𑀲𑁆𑀲 𑀕𑀳𑀺𑀢𑀢𑁆𑀢𑀸, 𑀦𑀺𑀭𑀼𑀢𑁆𑀢𑀺𑀪𑀸𑀯𑀢𑁄 𑀘 𑀲𑁄𑀢𑀩𑁆𑀩𑀧𑁆𑀧𑀪𑁂𑀤𑀤𑀻𑀧𑀓𑁂𑀦 𑀲𑀼𑀢-𑀲𑀤𑁆𑀤𑁂𑀦 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀲𑀫𑁆𑀧𑀢𑁆𑀢𑀺𑀲𑀩𑁆𑀪𑀸𑀯𑀤𑀻𑀧𑀦𑀁 𑀬𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀤𑁂𑀯𑀢𑁆𑀣𑀜𑁆𑀳𑀺 𑀜𑀸𑀧𑁂𑀢𑀼𑀁 ‘‘𑀅𑀲𑀫𑁆𑀫𑁄𑀳𑀤𑀻𑀧𑀓𑁂𑀦, 𑀅𑀲𑀫𑁆𑀫𑁄𑀲𑀤𑀻𑀧𑀓𑁂𑀦𑀸’’𑀢𑀺 𑀘 𑀅𑀯𑀢𑁆𑀯𑀸 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺.

𑀏𑀯𑀁 𑀅𑀲𑀫𑁆𑀫𑁄𑀳𑀸𑀲𑀫𑁆𑀫𑁄𑀲𑀲𑀗𑁆𑀔𑀸𑀢𑀲𑁆𑀲 𑀤𑀻𑀧𑁂𑀢𑀩𑁆𑀩𑀲𑁆𑀲𑀢𑁆𑀣𑀲𑁆𑀲 𑀤𑀻𑀧𑀓𑁂𑀳𑀺 𑀏𑀯𑀁-𑀲𑀤𑁆𑀤 𑀲𑀼𑀢-𑀲𑀤𑁆𑀤𑁂𑀳𑀺 𑀧𑀓𑀸𑀲𑁂𑀢𑀩𑁆𑀩𑀫𑀢𑁆𑀣𑀁 𑀧𑀓𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀯𑀺𑀓𑁆𑀔𑁂𑀧𑀲𑀗𑁆𑀔𑀸𑀢𑀲𑁆𑀲 𑀤𑀻𑀧𑁂𑀢𑀩𑁆𑀩𑀲𑁆𑀲𑀢𑁆𑀣𑀲𑁆𑀲 𑀤𑀻𑀧𑀓𑁂𑀳𑀺𑀧𑀺 𑀢𑁂𑀳𑀺 𑀧𑀓𑀸𑀲𑁂𑀢𑀩𑁆𑀩𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀏𑀯𑀦𑁆𑀢𑀺 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑀺 ‘‘𑀏𑀯𑀦𑁆𑀢𑀺…𑀧𑁂… 𑀪𑀸𑀲𑀫𑀸𑀦𑁄, 𑀲𑀼𑀢𑀦𑁆𑀢𑀺 𑀇𑀤𑀁…𑀧𑁂… 𑀪𑀸𑀲𑀫𑀸𑀦𑁄’’𑀢𑀺 𑀘 𑀇𑀫𑀺𑀦𑀸 𑀢𑁂𑀳𑀺 𑀲𑀤𑁆𑀤𑁂𑀳𑀺 𑀧𑀼𑀩𑁆𑀩𑁂 𑀤𑀻𑀧𑀺𑀢𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀯𑀺𑀓𑁆𑀔𑁂𑀧𑀲𑀗𑁆𑀔𑀸𑀢𑀁 𑀤𑀻𑀧𑁂𑀢𑀩𑁆𑀩𑀢𑁆𑀣𑀫𑀸𑀳, ‘‘𑀏𑀢𑁂 𑀫𑀬𑀸’’𑀢𑀺𑀆𑀤𑀻𑀳𑀺 𑀧𑀦 𑀧𑀓𑀸𑀲𑁂𑀢𑀩𑁆𑀩𑀢𑁆𑀣𑀁 𑀲𑀯𑀦𑀬𑁄𑀕𑀤𑀻𑀧𑀓𑀦𑁆𑀢𑀺 𑀘 𑀅𑀯𑀺𑀓𑁆𑀔𑁂𑀧𑀯𑀲𑁂𑀦 𑀲𑀯𑀦𑀬𑁄𑀕𑀲𑁆𑀲 𑀲𑀺𑀚𑁆𑀛𑀦𑀢𑁄 𑀢𑀤𑁂𑀯 𑀲𑀦𑁆𑀥𑀸𑀬𑀸𑀳 ¶ . 𑀢𑀣𑀸 𑀳𑀺 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁 ‘‘𑀲𑀯𑀦𑀥𑀸𑀭𑀡𑀯𑀘𑀻𑀧𑀭𑀺𑀘𑀭𑀺𑀬𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑁂𑀦 𑀲𑁄𑀢𑀸𑀯𑀥𑀸𑀭𑀡𑀧𑀝𑀺𑀩𑀤𑁆𑀥𑀸𑀢𑀺 𑀢𑁂 𑀅𑀯𑀺𑀓𑁆𑀔𑁂𑀧𑀤𑀻𑀧𑀓𑁂𑀦 𑀲𑀼𑀢𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁧). 𑀫𑀦𑁄𑀤𑀺𑀝𑁆𑀞𑀻𑀳𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸𑀦𑀁 𑀅𑀦𑀼𑀧𑁂𑀓𑁆𑀔𑀦𑀲𑀼𑀧𑁆𑀧𑀝𑀺𑀯𑁂𑀥𑀸 𑀯𑀺𑀲𑁂𑀲𑀢𑁄 𑀫𑀦𑀲𑀺𑀓𑀸𑀭𑀧𑀝𑀺𑀩𑀤𑁆𑀥𑀸, 𑀢𑀲𑁆𑀫𑀸 𑀢𑀤𑁆𑀤𑀻𑀧𑀓𑀯𑀘𑀦𑁂𑀦𑁂𑀯 𑀏𑀢𑁂 𑀫𑀬𑀸 𑀥𑀫𑁆𑀫𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀏𑀯𑀦𑁆𑀢𑀺 𑀘…𑀧𑁂… 𑀤𑀻𑀧𑁂𑀢𑀻’’𑀢𑀺 𑀢𑀢𑁆𑀣 𑀥𑀫𑁆𑀫𑀸𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸. 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸𑀢𑀺 ‘‘𑀇𑀥 𑀲𑀻𑀮𑀁 𑀓𑀣𑀺𑀢𑀁, 𑀇𑀥 𑀲𑀫𑀸𑀥𑀺, 𑀇𑀥 𑀧𑀜𑁆𑀜𑀸, 𑀏𑀢𑁆𑀢𑀓𑀸𑀯 𑀏𑀢𑁆𑀣 ¶ 𑀅𑀦𑀼𑀲𑀦𑁆𑀥𑀬𑁄’’𑀢𑀺𑀆𑀤𑀺𑀪𑁂𑀤𑁂𑀦 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀺𑀢𑀸. 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀢𑀺 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀲𑀗𑁆𑀔𑀸𑀢𑀸𑀬, 𑀜𑀸𑀢𑀧𑀭𑀺𑀜𑁆𑀜𑀸𑀲𑀗𑁆𑀔𑀸𑀢𑀸𑀬 𑀯𑀸 𑀤𑀺𑀝𑁆𑀞𑀺𑀬𑀸 𑀢𑀢𑁆𑀣 𑀯𑀼𑀢𑁆𑀢𑀭𑀽𑀧𑀸𑀭𑀽𑀧𑀥𑀫𑁆𑀫𑁂 ‘‘𑀇𑀢𑀺 𑀭𑀽𑀧𑀁, 𑀏𑀢𑁆𑀢𑀓𑀁 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀲𑀼𑀝𑁆𑀞𑀼 𑀯𑀯𑀢𑁆𑀣𑀸𑀧𑁂𑀢𑁆𑀯𑀸 𑀧𑀝𑀺𑀯𑀺𑀤𑁆𑀥𑀸.

𑀲𑀯𑀦𑀥𑀸𑀭𑀡𑀯𑀘𑀻𑀧𑀭𑀺𑀘𑀭𑀺𑀬𑀸 𑀘 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑁂𑀦 𑀲𑁄𑀢𑀸𑀯𑀥𑀸𑀭𑀡𑀧𑀝𑀺𑀩𑀤𑁆𑀥𑀸, 𑀢𑀲𑁆𑀫𑀸 𑀢𑀤𑁆𑀤𑀻𑀧𑀓𑀯𑀘𑀦𑁂𑀦𑁂𑀯 𑀩𑀳𑀽 𑀫𑀬𑀸 𑀥𑀫𑁆𑀫𑀸 𑀲𑀼𑀢𑀸 𑀥𑀸𑀢𑀸 𑀯𑀘𑀲𑀸 𑀧𑀭𑀺𑀘𑀺𑀢𑀸𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀼𑀢𑀦𑁆𑀢𑀺 𑀇𑀤𑀁…𑀧𑁂… 𑀤𑀻𑀧𑁂𑀢𑀻’’𑀢𑀺. 𑀢𑀢𑁆𑀣 𑀲𑀼𑀢𑀸𑀢𑀺 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀯𑀺𑀜𑁆𑀜𑀸𑀢𑀸. 𑀥𑀸𑀢𑀸𑀢𑀺 𑀲𑀼𑀯𑀡𑁆𑀡𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀲𑀻𑀳𑀯𑀲𑀸 𑀯𑀺𑀬 𑀫𑀦𑀲𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑁂𑀦 𑀉𑀧𑀥𑀸𑀭𑀺𑀢𑀸. 𑀯𑀘𑀲𑀸 𑀧𑀭𑀺𑀘𑀺𑀢𑀸𑀢𑀺 𑀧𑀕𑀼𑀡𑀢𑀸𑀲𑀫𑁆𑀧𑀸𑀤𑀦𑁂𑀦 𑀯𑀸𑀘𑀸𑀬 𑀧𑀭𑀺𑀘𑀺𑀢𑀸 𑀲𑀚𑁆𑀛𑀸𑀬𑀺𑀢𑀸. 𑀇𑀤𑀸𑀦𑀺 𑀧𑀓𑀸𑀲𑁂𑀢𑀩𑁆𑀩𑀢𑁆𑀣𑀤𑁆𑀯𑀬𑀤𑀻𑀧𑀓𑁂𑀦 𑀬𑀣𑀸𑀯𑀼𑀢𑁆𑀢𑀲𑀤𑁆𑀤𑀤𑁆𑀯𑀬𑁂𑀦 𑀯𑀺𑀪𑀸𑀯𑁂𑀢𑀩𑁆𑀩𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀢𑀤𑀼𑀪𑀬𑁂𑀦𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀤𑀼𑀪𑀬𑁂𑀦𑀸𑀢𑀺 𑀧𑀼𑀭𑀺𑀫𑀦𑀬𑁂, 𑀧𑀘𑁆𑀙𑀺𑀫𑀦𑀬𑁂 𑀘 𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀓𑀸𑀲𑁂𑀢𑀩𑁆𑀩𑀲𑁆𑀲𑀢𑁆𑀣𑀲𑁆𑀲 𑀧𑀓𑀸𑀲𑀓𑁂𑀦 𑀢𑁂𑀦 𑀤𑀼𑀩𑁆𑀩𑀺𑀥𑁂𑀦 𑀲𑀤𑁆𑀤𑁂𑀦. 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀸𑀭𑀺𑀧𑀽𑀭𑀺𑀁 𑀤𑀻𑀧𑁂𑀦𑁆𑀢𑁄𑀢𑀺 𑀆𑀤𑀭𑀚𑀦𑀦𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀢𑀤𑁂𑀯 𑀓𑀸𑀭𑀡𑀁 𑀩𑁆𑀬𑀢𑀺𑀭𑁂𑀓𑁂𑀦 𑀯𑀺𑀯𑀭𑀢𑀺, 𑀬𑀼𑀢𑁆𑀢𑀺𑀬𑀸 𑀯𑀸 𑀤𑀴𑁆𑀳𑀁 𑀓𑀭𑁄𑀢𑀺 ‘‘𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀭𑀺𑀧𑀼𑀡𑁆𑀡𑀜𑁆𑀳𑀻’’𑀢𑀺𑀆𑀤𑀺𑀦𑀸. 𑀅𑀲𑀼𑀡𑀦𑁆𑀢𑁄𑀢𑀺 𑀘𑁂𑀢𑁆𑀣 𑀮𑀓𑁆𑀔𑀡𑁂, 𑀳𑁂𑀢𑀼𑀫𑁆𑀳𑀺 𑀯𑀸 𑀅𑀦𑁆𑀢-𑀲𑀤𑁆𑀤𑁄. 𑀫𑀳𑀢𑀸 𑀳𑀺𑀢𑀸𑀢𑀺 𑀫𑀳𑀦𑁆𑀢𑀢𑁄 𑀳𑀺𑀢𑀲𑁆𑀫𑀸. 𑀧𑀭𑀺𑀩𑀸𑀳𑀺𑀭𑁄𑀢𑀺 𑀲𑀩𑁆𑀩𑀢𑁄 𑀪𑀸𑀕𑁂𑀦 𑀩𑀸𑀳𑀺𑀭𑁄.

𑀏𑀢𑁂𑀦 𑀧𑀦 𑀯𑀺𑀪𑀸𑀯𑁂𑀢𑀩𑁆𑀩𑀢𑁆𑀣𑀤𑀻𑀧𑀓𑁂𑀦 𑀲𑀤𑁆𑀤𑀤𑁆𑀯𑀬𑁂𑀦 𑀅𑀦𑀼𑀪𑀸𑀯𑁂𑀢𑀩𑁆𑀩𑀢𑁆𑀣𑀫𑀦𑀼𑀪𑀸𑀯𑁂𑀦𑁆𑀢𑁄 ‘‘𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀇𑀫𑀺𑀦𑀸’’𑀢𑀺𑀆𑀤𑀺𑀫𑀸𑀳. 𑀧𑀼𑀩𑁆𑀩𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀢𑁆𑀣𑁂 𑀬𑁄𑀚𑀺𑀢𑀸𑀬𑁂𑀯 𑀏𑀢𑁂 𑀲𑀤𑁆𑀤𑀸 𑀇𑀥 𑀏𑀓𑀲𑁆𑀲𑁂𑀯𑀸𑀦𑀼𑀪𑀸𑀯𑀢𑁆𑀣𑀲𑁆𑀲 𑀅𑀦𑀼𑀪𑀸𑀯𑀓𑀪𑀸𑀯𑁂𑀦 𑀕𑀳𑀺𑀢𑀸𑀢𑀺 𑀜𑀸𑀧𑁂𑀢𑀼𑀁 ‘‘𑀲𑀓𑀮𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀓𑀸𑀫𑀜𑁆𑀘 𑀫𑁂-𑀲𑀤𑁆𑀤𑁄 𑀇𑀫𑀲𑁆𑀫𑀺𑀁 ¶ 𑀞𑀸𑀦𑁂 𑀧𑀼𑀩𑁆𑀩𑁂𑀦 𑀬𑁄𑀚𑀺𑀢𑁄, 𑀢𑀤𑀧𑁂𑀓𑁆𑀔𑀸𑀦𑀁 𑀧𑀦 𑀏𑀯𑀁-𑀲𑀤𑁆𑀤 𑀲𑀼𑀢-𑀲𑀤𑁆𑀤𑀸𑀦𑀁 𑀲𑀳𑀘𑀭𑀡𑀢𑁄, 𑀅𑀯𑀺𑀦𑀸𑀪𑀸𑀯𑀢𑁄 𑀘 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀦𑁆𑀢𑀺 𑀢𑀣𑀸𑀕𑀢𑁂𑀦 𑀧𑀓𑀸𑀭𑀢𑁄 𑀯𑀺𑀤𑀺𑀢𑀁, 𑀪𑀸𑀲𑀺𑀢𑀁 𑀯𑀸. 𑀅𑀢𑁆𑀢𑀦𑁄 𑀅𑀤𑀳𑀦𑁆𑀢𑁄𑀢𑀺 𑀅𑀢𑁆𑀢𑀦𑀺 ‘‘𑀫𑀫𑁂𑀤’’𑀦𑁆𑀢𑀺 𑀅𑀝𑁆𑀞𑀧𑁂𑀦𑁆𑀢𑁄. 𑀪𑀼𑀫𑁆𑀫𑀢𑁆𑀣𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀦𑁆𑀢𑀺 𑀅𑀲𑀧𑁆𑀧𑀼𑀭𑀺𑀲𑀯𑀺𑀲𑀬𑀁, 𑀲𑁄 𑀘 𑀅𑀢𑁆𑀣𑀢𑁄 𑀅𑀧𑀓𑀢𑀜𑁆𑀜𑀼𑀢𑀸𑀲𑀗𑁆𑀔𑀸𑀢𑀸 ‘‘𑀇𑀥𑁂𑀓𑀘𑁆𑀘𑁄 𑀧𑀸𑀧𑀪𑀺𑀓𑁆𑀔𑀼 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀅𑀢𑁆𑀢𑀦𑁄 𑀤𑀳𑀢𑀻’’𑀢𑀺 (𑀧𑀸𑀭𑀸. 𑁧𑁯𑁫) 𑀏𑀯𑀁 𑀫𑀳𑀸𑀘𑁄𑀭𑀤𑀻𑀧𑀓𑁂𑀦 𑀪𑀕𑀯𑀢𑀸 𑀯𑀼𑀢𑁆𑀢𑀸 𑀅𑀦𑀭𑀺𑀬𑀯𑁄𑀳𑀸𑀭𑀸𑀯𑀢𑁆𑀣𑀸, 𑀢𑀣𑀸 𑀘𑀸𑀳 ‘‘𑀢𑀣𑀸𑀕𑀢…𑀧𑁂… 𑀅𑀤𑀳𑀦𑁆𑀢𑁄’’𑀢𑀺. 𑀳𑀼𑀢𑁆𑀯𑀸𑀢𑀺 𑀘𑁂𑀢𑁆𑀣 𑀲𑁂𑀲𑁄. 𑀢𑀣𑀸 𑀲𑀸𑀯𑀓𑀢𑁆𑀢𑀁 𑀧𑀝𑀺𑀚𑀸𑀦𑀦𑁆𑀢𑁄𑀢𑀺 𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀑𑀓𑁆𑀓𑀫𑀦𑀲𑀭𑀽𑀧𑀓𑀣𑀦𑀁. 𑀦𑀦𑀼 𑀘 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 ‘‘𑀫𑀫𑁂𑀢𑀁 𑀯𑀘𑀦’’𑀦𑁆𑀢𑀺 𑀅𑀥𑀺𑀫𑀸𑀦𑀲𑁆𑀲, 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀸𑀤𑀻𑀦𑀜𑁆𑀘 𑀢𑀤𑀸𑀲𑀗𑁆𑀓𑀸𑀬 𑀅𑀪𑀸𑀯𑀢𑁄 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀲𑀫𑀢𑀺𑀓𑁆𑀓𑀫𑀸𑀤𑀺𑀯𑀘𑀦𑀁 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸𑀢𑀺? 𑀦𑀬𑀺𑀤𑀫𑁂𑀯𑀁 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺 𑀯𑀤𑀦𑁆𑀢𑁂𑀦 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀅𑀦𑀼𑀪𑀸𑀯𑀺𑀢𑁄𑀢𑀺 𑀅𑀢𑁆𑀣𑀲𑁆𑀲𑁂𑀯 𑀤𑀲𑁆𑀲𑀦𑀢𑁄. 𑀢𑁂𑀦 𑀳𑀺 𑀅𑀦𑀼𑀪𑀸𑀯𑁂𑀢𑀩𑁆𑀩𑀫𑀢𑁆𑀣𑀁𑀬𑁂𑀯 𑀢𑀣𑀸 𑀤𑀲𑁆𑀲𑁂𑀢𑀺, 𑀦 𑀧𑀦 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀅𑀥𑀺𑀫𑀸𑀦𑀲𑁆𑀲, 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀸𑀤𑀻𑀦𑀜𑁆𑀘 ¶ 𑀢𑀤𑀸𑀲𑀗𑁆𑀓𑀸𑀬 𑀲𑀫𑁆𑀪𑀯𑀦𑁆𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀓𑁂𑀘𑀺 𑀧𑀦 ‘‘𑀤𑁂𑀯𑀢𑀸𑀦𑀁 𑀧𑀭𑀺𑀯𑀺𑀢𑀓𑁆𑀓𑀸𑀧𑁂𑀓𑁆𑀔𑀁 𑀢𑀣𑀸𑀯𑀘𑀦𑀁, 𑀢𑀲𑁆𑀫𑀸 𑀏𑀤𑀺𑀲𑀻 𑀘𑁄𑀤𑀦𑀸 𑀅𑀦𑀯𑀓𑀸𑀲𑀸’’𑀢𑀺 𑀯𑀤𑀦𑁆𑀢𑀺. 𑀢𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀏𑀓𑀘𑁆𑀘𑀸𑀦𑀁 𑀤𑁂𑀯𑀢𑀸𑀦𑀁 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 ‘‘𑀪𑀕𑀯𑀸 𑀘 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀬𑀜𑁆𑀘𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀤𑁂𑀲𑀦𑀸𑀓𑀼𑀲𑀮𑁄, 𑀇𑀤𑀸𑀦𑀺 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀲𑀓𑁆𑀬𑀓𑀼𑀮𑀧𑁆𑀧𑀲𑀼𑀢𑁄 𑀢𑀣𑀸𑀕𑀢𑀲𑁆𑀲 𑀪𑀸𑀢𑀸, 𑀘𑀽𑀴𑀧𑀺𑀢𑀼𑀧𑀼𑀢𑁆𑀢𑁄 𑀘, 𑀓𑀺𑀁 𑀦𑀼 𑀔𑁄 𑀲𑁄 𑀲𑀬𑀁 𑀲𑀘𑁆𑀙𑀺𑀓𑀢𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀉𑀤𑀸𑀳𑀼 𑀪𑀕𑀯𑀢𑁄𑀬𑁂𑀯 𑀯𑀘𑀦𑀁 𑀬𑀣𑀸𑀲𑀼𑀢’’𑀦𑁆𑀢𑀺, 𑀢𑁂𑀲𑀫𑁂𑀯 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀢𑀤𑀪𑀺𑀧𑀭𑀺𑀳𑀭𑀡𑀢𑁆𑀣𑀁 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀲𑀫𑀢𑀺𑀓𑁆𑀓𑀫𑀦𑀸𑀤𑀺𑀅𑀢𑁆𑀣𑁄 𑀅𑀦𑀼𑀪𑀸𑀯𑀺𑀢𑁄𑀢𑀺. 𑀲𑀸𑀬𑁂𑀯 𑀬𑀣𑀸𑀯𑀼𑀢𑁆𑀢𑀸 𑀅𑀦𑀭𑀺𑀬𑀯𑁄𑀳𑀸𑀭𑀸𑀯𑀢𑁆𑀣𑀸 𑀅𑀲𑀤𑁆𑀥𑀫𑁆𑀫𑁄, 𑀢𑀤𑀯𑀢𑁆𑀣𑀸𑀦𑁄𑀓𑁆𑀓𑀫𑀦𑀲𑀗𑁆𑀔𑀸𑀢𑀸 𑀘 𑀲𑀸𑀯𑀓𑀢𑁆𑀢𑀧𑀝𑀺𑀚𑀸𑀦𑀦𑀸 𑀲𑀤𑁆𑀥𑀫𑁆𑀫𑁄. 𑀏𑀯𑀁 𑀲𑀢𑀺 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀧𑀼𑀭𑀺𑀫𑀢𑁆𑀣𑀫𑁂𑀯 𑀤𑀲𑁆𑀲𑁂𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀅𑀧𑀺𑀘 𑀓𑀼𑀳𑀦𑀮𑀧𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑁄 𑀅𑀓𑀼𑀲𑀮𑀭𑀸𑀲𑀺 𑀅𑀲𑀤𑁆𑀥𑀫𑁆𑀫𑁄, 𑀢𑀩𑁆𑀩𑀺𑀭𑀳𑀺𑀢𑀪𑀸𑀯𑁄 𑀘 𑀲𑀤𑁆𑀥𑀫𑁆𑀫𑁄. ‘‘𑀓𑁂𑀯𑀮’’𑀦𑁆𑀢𑀺𑀆𑀤𑀺𑀦𑀸𑀧𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀭𑀺𑀬𑀸𑀬𑀦𑁆𑀢𑀭𑁂𑀦 𑀤𑀲𑁆𑀲𑀦𑀁, 𑀬𑀣𑀸𑀯𑀼𑀢𑁆𑀢𑀸𑀬 𑀅𑀦𑀭𑀺𑀬𑀯𑁄𑀳𑀸𑀭𑀸𑀯𑀢𑁆𑀣𑀸𑀬 𑀧𑀭𑀺𑀫𑁄𑀘𑁂𑀢𑀺. 𑀲𑀸𑀯𑀓𑀢𑁆𑀢𑀁 𑀧𑀝𑀺𑀚𑀸𑀦𑀦𑁂𑀦 𑀲𑀢𑁆𑀣𑀸𑀭𑀁 𑀅𑀧𑀤𑀺𑀲𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀲𑀢𑁆𑀣𑀼𑀓𑀧𑁆𑀧𑀸𑀤𑀺𑀓𑀺𑀭𑀺𑀬𑀢𑁄 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑁂𑀢𑀺 𑀢𑀓𑁆𑀓𑀺𑀭𑀺𑀬𑀸𑀲𑀗𑁆𑀓𑀸𑀬 ¶ 𑀲𑀫𑁆𑀪𑀯𑀢𑁄. ‘‘𑀲𑀢𑁆𑀣𑀼 𑀪𑀕𑀯𑀢𑁄𑀬𑁂𑀯 𑀯𑀘𑀦𑀁 𑀫𑀬𑀸𑀲𑀼𑀢’’𑀦𑁆𑀢𑀺 𑀲𑀢𑁆𑀣𑀸𑀭𑀁 𑀅𑀧𑀤𑀺𑀲𑀢𑀻𑀢𑀺 𑀅𑀢𑁆𑀣𑀦𑁆𑀢𑀭𑀫𑀦𑀼𑀪𑀸𑀯𑀦𑀁 𑀳𑁄𑀢𑀺. ‘‘𑀚𑀺𑀦𑀯𑀘𑀦’’𑀦𑁆𑀢𑀺𑀆𑀤𑀺𑀧𑀺 𑀧𑀭𑀺𑀬𑀸𑀬𑀦𑁆𑀢𑀭𑀤𑀲𑁆𑀲𑀦𑀁, 𑀅𑀢𑁆𑀣𑀦𑁆𑀢𑀭𑀫𑀦𑀼𑀪𑀸𑀯𑀦𑀫𑁂𑀯 𑀯𑀸. 𑀅𑀧𑁆𑀧𑁂𑀢𑀻𑀢𑀺 𑀦𑀺𑀤𑀲𑁆𑀲𑁂𑀢𑀺. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀲𑀼 𑀬𑀣𑀸𑀭𑀳𑀁 𑀲𑀢𑁆𑀢𑁂 𑀦𑁂𑀢𑀻𑀢𑀺 𑀦𑁂𑀢𑁆𑀢𑀺, 𑀥𑀫𑁆𑀫𑁄𑀬𑁂𑀯 𑀦𑁂𑀢𑁆𑀢𑀺 𑀢𑀣𑀸. 𑀯𑀼𑀢𑁆𑀢𑀦𑀬𑁂𑀦 𑀘𑁂𑀢𑁆𑀣 𑀉𑀪𑀬𑀣𑀸 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀭𑀫𑁆𑀧𑀺 𑀅𑀦𑀼𑀪𑀸𑀯𑁂𑀢𑀩𑁆𑀩𑀫𑀢𑁆𑀣𑀫𑀦𑀼𑀪𑀸𑀯𑁂𑀢𑀺 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀉𑀧𑁆𑀧𑀸𑀤𑀺𑀢𑀪𑀸𑀯𑀢𑀦𑁆𑀢𑀺 𑀤𑁂𑀲𑀦𑀸𑀯𑀲𑁂𑀦 𑀧𑀯𑀢𑁆𑀢𑀺𑀢𑀪𑀸𑀯𑀁. 𑀧𑀼𑀭𑀺𑀫𑀯𑀘𑀦𑀁 𑀯𑀺𑀯𑀭𑀦𑁆𑀢𑁄𑀢𑀺 𑀪𑀕𑀯𑀢𑀸 𑀤𑁂𑀲𑀺𑀢𑀯𑀲𑁂𑀦 𑀧𑀼𑀭𑀺𑀫𑀢𑀭𑀁 𑀲𑀁𑀯𑀺𑀚𑁆𑀚𑀫𑀸𑀦𑀁 𑀪𑀕𑀯𑀢𑀸 𑀯𑀘𑀦𑀫𑁂𑀯 𑀉𑀢𑁆𑀢𑀸𑀦𑀺𑀁 𑀓𑀭𑁄𑀦𑁆𑀢𑁄, 𑀇𑀤𑀁 𑀯𑀘𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀢𑀽𑀳𑀺 𑀯𑁂𑀲𑀸𑀭𑀚𑁆𑀚𑀜𑀸𑀡𑁂𑀳𑀺 𑀯𑀺𑀲𑀸𑀭𑀤𑀲𑁆𑀲, 𑀯𑀺𑀲𑀸𑀭𑀤𑀳𑁂𑀢𑀼𑀪𑀽𑀢𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑀲𑀫𑁆𑀧𑀦𑁆𑀦𑀲𑁆𑀲 𑀯𑀸. 𑀤𑀲𑀜𑀸𑀡𑀩𑀮𑀥𑀭𑀲𑁆𑀲. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑀲𑀗𑁆𑀔𑀸𑀢𑁂 𑀉𑀢𑁆𑀢𑀫𑀝𑁆𑀞𑀸𑀦𑁂 𑀞𑀺𑀢𑀲𑁆𑀲, 𑀉𑀲𑀪𑀲𑁆𑀲 𑀇𑀤𑀦𑁆𑀢𑀺 𑀯𑀸 𑀅𑀢𑁆𑀣𑁂𑀦 𑀆𑀲𑀪𑀲𑀗𑁆𑀔𑀸𑀢𑁂 𑀅𑀓𑀫𑁆𑀧𑀦𑀲𑀪𑀸𑀯𑀪𑀽𑀢𑁂 𑀞𑀸𑀦𑁂 𑀞𑀺𑀢𑀲𑁆𑀲. ‘‘𑀏𑀯𑀫𑁂𑀯 𑀔𑁄 𑀪𑀺𑀓𑁆𑀔𑀯𑁂, 𑀬𑀤𑀸 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺…𑀧𑁂… 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁪.𑁩𑁩) 𑀲𑀻𑀳𑁄𑀧𑀫𑀲𑀼𑀢𑁆𑀢𑀸𑀤𑀻𑀲𑀼 𑀆𑀕𑀢𑁂𑀦 𑀅𑀦𑁂𑀓𑀦𑀬𑁂𑀦 𑀲𑀻𑀳𑀦𑀸𑀤𑀦𑀤𑀺𑀦𑁄. 𑀲𑀩𑁆𑀩𑀲𑀢𑁆𑀢𑁂𑀲𑀼, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀯𑀸 𑀉𑀢𑁆𑀢𑀫𑀲𑁆𑀲. 𑀦 𑀘𑁂𑀢𑁆𑀣 𑀦𑀺𑀤𑁆𑀥𑀸𑀭𑀡𑀮𑀓𑁆𑀔𑀡𑀸𑀪𑀸𑀯𑀢𑁄 𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀲𑀫𑀸𑀲𑁄. 𑀲𑀩𑁆𑀩𑀢𑁆𑀣 𑀳𑀺 𑀲𑀓𑁆𑀓𑀢𑀕𑀦𑁆𑀣𑁂𑀲𑀼, 𑀲𑀸𑀲𑀦𑀕𑀦𑁆𑀣𑁂𑀲𑀼 𑀘 𑀏𑀯𑀫𑁂𑀯 𑀯𑀼𑀢𑁆𑀢𑀁. 𑀥𑀫𑁆𑀫𑁂𑀦 𑀲𑀢𑁆𑀢𑀸𑀦𑀫𑀺𑀲𑁆𑀲𑀭𑀲𑁆𑀲. 𑀥𑀫𑁆𑀫𑀲𑁆𑀲𑁂𑀯 𑀇𑀲𑁆𑀲𑀭𑀲𑁆𑀲 𑀢𑀤𑀼𑀧𑁆𑀧𑀸𑀤𑀦𑀯𑀲𑁂𑀦𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀲𑁂𑀲𑀧𑀤𑀤𑁆𑀯𑀬𑀁 𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀭𑀺𑀬𑀸𑀬𑀦𑁆𑀢𑀭𑀤𑀻𑀧𑀦𑀁. 𑀥𑀫𑁆𑀫𑁂𑀦 𑀮𑁄𑀓𑀲𑁆𑀲 𑀧𑀤𑀻𑀧𑀫𑀺𑀯 𑀪𑀽𑀢𑀲𑁆𑀲, 𑀢𑀤𑀼𑀧𑁆𑀧𑀸𑀤𑀓𑀪𑀸𑀯𑁂𑀦 𑀯𑀸 𑀥𑀫𑁆𑀫𑀲𑀗𑁆𑀔𑀸𑀢𑀧𑀤𑀻𑀧𑀲𑀫𑁆𑀧𑀦𑁆𑀦𑀲𑁆𑀲. ‘‘𑀥𑀫𑁆𑀫𑀓𑀸𑀬𑁄𑀢𑀺 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀤𑀻. 𑀦𑀺. 𑁩.𑁧𑁧𑁮) 𑀳𑀺 𑀯𑀼𑀢𑁆𑀢𑀁. 𑀥𑀫𑁆𑀫𑁂𑀦 𑀮𑁄𑀓𑀧𑀝𑀺𑀲𑀭𑀡𑀪𑀽𑀢𑀲𑁆𑀲, 𑀥𑀫𑁆𑀫𑀲𑀗𑁆𑀔𑀸𑀢𑁂𑀦 ¶ 𑀯𑀸 𑀧𑀝𑀺𑀲𑀭𑀡𑁂𑀦 𑀲𑀫𑁆𑀧𑀦𑁆𑀦𑀲𑁆𑀲. ‘‘𑀬𑀁𑀦𑀽𑀦𑀸𑀳𑀁…𑀧𑁂… 𑀢𑀫𑁂𑀯 𑀥𑀫𑁆𑀫𑀁 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺 (𑀅. 𑀦𑀺. 𑁪.𑁨𑁧; 𑀲𑀁. 𑀦𑀺. 𑁧.𑁧𑁭𑁩) 𑀳𑀺 𑀯𑀼𑀢𑁆𑀢𑀁. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀲𑀤𑁆𑀥𑀫𑁆𑀫𑀲𑀗𑁆𑀔𑀸𑀢𑀲𑁆𑀲 𑀯𑀭𑀘𑀓𑁆𑀓𑀲𑁆𑀲 𑀧𑀯𑀢𑁆𑀢𑀺𑀦𑁄, 𑀲𑀤𑁆𑀥𑀫𑁆𑀫𑀸𑀦𑀫𑁂𑀢𑀲𑁆𑀲 𑀯𑀸 𑀆𑀡𑀸𑀘𑀓𑁆𑀓𑀯𑀭𑀲𑁆𑀲 𑀧𑀯𑀢𑁆𑀢𑀺𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑀲𑁆𑀲 𑀪𑀕𑀯𑀢𑁄 𑀇𑀤𑀁 𑀯𑀘𑀦𑀁 𑀲𑀫𑁆𑀫𑀼𑀔𑀸𑀯 𑀫𑀬𑀸 𑀧𑀝𑀺𑀕𑁆𑀕𑀳𑀺𑀢𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀩𑁆𑀬𑀜𑁆𑀚𑀦𑁂𑀢𑀺 𑀧𑀤𑀲𑀫𑀼𑀤𑀸𑀬𑀪𑀽𑀢𑁂 𑀯𑀸𑀓𑁆𑀬𑁂. 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸𑀢𑀺 𑀏𑀢𑁆𑀣 𑀤𑀴𑁆𑀳𑀢𑀭𑀁 𑀦𑀺𑀯𑀺𑀝𑁆𑀞𑀸 𑀯𑀺𑀘𑀺𑀓𑀺𑀘𑁆𑀙𑀸 𑀓𑀗𑁆𑀔𑀸. 𑀦𑀸𑀢𑀺𑀲𑀁𑀲𑀧𑁆𑀧𑀦𑀁 𑀫𑀢𑀺𑀪𑁂𑀤𑀫𑀢𑁆𑀢𑀁 𑀯𑀺𑀫𑀢𑀺. 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀫𑀺𑀤𑀁 𑀫𑀬𑀸𑀢𑀺 𑀢𑀣𑀸 𑀅𑀓𑀢𑁆𑀢𑀩𑁆𑀩𑀪𑀸𑀯𑀓𑀸𑀭𑀡𑀯𑀘𑀦𑀁. 𑀅𑀢𑁆𑀢𑀦𑀸 𑀉𑀧𑁆𑀧𑀸𑀤𑀺𑀢𑀪𑀸𑀯𑀁 𑀅𑀧𑁆𑀧𑀝𑀺𑀚𑀸𑀦𑀦𑁆𑀢𑁄 𑀧𑀼𑀭𑀺𑀫𑀯𑀘𑀦𑀁 ¶ 𑀯𑀺𑀯𑀭𑀦𑁆𑀢𑁄𑀢𑀺 𑀧𑀦 𑀅𑀲𑁆𑀲𑀤𑁆𑀥𑀺𑀬𑀯𑀺𑀦𑀸𑀲𑀦𑀲𑁆𑀲, 𑀲𑀤𑁆𑀥𑀸𑀲𑀫𑁆𑀧𑀤𑀫𑀼𑀧𑁆𑀧𑀸𑀤𑀦𑀲𑁆𑀲 𑀘 𑀓𑀸𑀭𑀡𑀯𑀘𑀦𑀁. ‘‘𑀢𑁂𑀦𑁂𑀢’’𑀦𑁆𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀉𑀤𑀸𑀦𑀯𑀲𑁂𑀦 𑀤𑀲𑁆𑀲𑁂𑀢𑀺.

‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺 𑀏𑀯𑀁 𑀯𑀤𑀦𑁆𑀢𑁄 𑀕𑁄𑀢𑀫𑀕𑁄𑀢𑁆𑀢𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀸𑀯𑀓𑁄, 𑀕𑁄𑀢𑀫𑀕𑁄𑀢𑁆𑀢𑀲𑀫𑁆𑀩𑀦𑁆𑀥𑁄 𑀯𑀸 𑀲𑀸𑀯𑀓𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑀸 𑀪𑀸𑀲𑀺𑀢𑀪𑀸𑀯𑀲𑁆𑀲, 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀪𑀸𑀯𑀲𑁆𑀲 𑀘 𑀲𑀽𑀘𑀦𑀢𑁄, 𑀢𑀣𑀸𑀲𑀽𑀘𑀦𑁂𑀦𑁂𑀯 𑀘 𑀔𑀮𑀺𑀢𑀤𑀼𑀦𑁆𑀦𑀺𑀭𑀼𑀢𑁆𑀢𑀸𑀤𑀺𑀕𑀳𑀡𑀤𑁄𑀲𑀸𑀪𑀸𑀯𑀲𑁆𑀲 𑀲𑀺𑀚𑁆𑀛𑀦𑀢𑁄 𑀲𑀸𑀲𑀦𑁂 𑀅𑀲𑁆𑀲𑀤𑁆𑀥𑀁 𑀯𑀺𑀦𑀸𑀲𑀬𑀢𑀺, 𑀲𑀤𑁆𑀥𑀁 𑀯𑀟𑁆𑀠𑁂𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀧𑀜𑁆𑀘𑀫𑀸𑀤𑀬𑁄 𑀢𑀺𑀲𑁆𑀲𑁄 𑀅𑀢𑁆𑀣𑀬𑁄𑀚𑀦𑀸 𑀆𑀓𑀸𑀭𑀸𑀤𑀺𑀅𑀢𑁆𑀣𑁂𑀲𑀼 𑀅𑀕𑁆𑀕𑀳𑀺𑀢𑀯𑀺𑀲𑁂𑀲𑀫𑁂𑀯 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑀺𑀢𑀸, 𑀢𑀢𑁄 𑀧𑀭𑀸 𑀢𑀺𑀲𑁆𑀲𑁄 𑀆𑀓𑀸𑀭𑀢𑁆𑀣𑀫𑁂𑀯 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀯𑀺𑀪𑀸𑀯𑀺𑀢𑀸, 𑀧𑀘𑁆𑀙𑀺𑀫𑀸 𑀧𑀦 𑀢𑀺𑀲𑁆𑀲𑁄 𑀬𑀣𑀸𑀓𑁆𑀓𑀫𑀁 𑀆𑀓𑀸𑀭𑀢𑁆𑀣𑀁, 𑀦𑀺𑀤𑀲𑁆𑀲𑀦𑀢𑁆𑀣𑀁, 𑀅𑀯𑀥𑀸𑀭𑀡𑀢𑁆𑀣𑀜𑁆𑀘 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀬𑁄𑀚𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀤𑀲𑁆𑀲𑀦𑀁 𑀤𑀻𑀧𑀦𑀜𑁆𑀘𑀸𑀧𑀺, 𑀧𑀓𑀸𑀲𑀦𑀁 𑀯𑀺𑀪𑀸𑀯𑀦𑀁;

𑀅𑀦𑀼𑀪𑀸𑀯𑀦𑀫𑀺𑀘𑁆𑀘𑀢𑁆𑀣𑁄, 𑀓𑀺𑀭𑀺𑀬𑀸𑀬𑁄𑀕𑁂𑀦 𑀧𑀜𑁆𑀘𑀥𑀸.

𑀤𑀲𑁆𑀲𑀺𑀢𑁄 𑀧𑀭𑀫𑁆𑀧𑀭𑀸𑀬, 𑀲𑀺𑀤𑁆𑀥𑁄 𑀦𑁂𑀓𑀢𑁆𑀣𑀯𑀼𑀢𑁆𑀢𑀺𑀬𑀸;

𑀏𑀯𑀁 𑀫𑁂 𑀲𑀼𑀢𑀫𑀺𑀘𑁆𑀘𑁂𑀢𑁆𑀣, 𑀧𑀤𑀢𑁆𑀢𑀬𑁂 𑀦𑀬𑀜𑁆𑀜𑀼𑀦𑀸’’𑀢𑀺.

𑀏𑀓-𑀲𑀤𑁆𑀤𑁄 𑀧𑀦 𑀅𑀜𑁆𑀜𑀲𑁂𑀝𑁆𑀞𑀸𑀲𑀳𑀸𑀬𑀲𑀗𑁆𑀔𑁆𑀬𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑁂𑀲 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜𑀦𑁆𑀢𑀺 𑀇𑀢𑁆𑀣𑁂𑀓𑁂 𑀅𑀪𑀺𑀯𑀤𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁨𑁭) 𑀅𑀜𑁆𑀜𑀢𑁆𑀣𑁂 𑀤𑀺𑀲𑁆𑀲𑀢𑀺, ‘‘𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁨𑁮; 𑀧𑀸𑀭𑀸. 𑁧𑁧) 𑀲𑁂𑀝𑁆𑀞𑁂, ‘‘𑀏𑀓𑁄𑀯𑀽𑀧𑀓𑀝𑁆𑀞𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁪𑁦𑁫; 𑀤𑀻. 𑀦𑀺. 𑁨.𑁨𑁧𑁫; 𑀫. 𑀦𑀺. 𑁧.𑁮𑁦; 𑀲𑀁. 𑀦𑀺. 𑁩.𑁬𑁩; 𑀯𑀺𑀪. 𑁪.𑁪𑁪𑁫) 𑀅𑀲𑀳𑀸𑀬𑁂, ‘‘𑀏𑀓𑁄𑀯 𑀔𑁄 𑀪𑀺𑀓𑁆𑀔𑀯𑁂, 𑀔𑀡𑁄 𑀘 𑀲𑀫𑀬𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁨𑁯) 𑀲𑀗𑁆𑀔𑁆𑀬𑀸𑀬𑀁, 𑀇𑀥𑀸𑀧𑀺 𑀲𑀗𑁆𑀔𑁆𑀬𑀸𑀬𑀫𑁂𑀯𑀸𑀢𑀺 ¶ 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑀦𑁆𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑀦𑀺𑀤𑁆𑀤𑁂𑀲𑁄’’𑀢𑀺 (𑀇𑀢𑀺𑀯𑀼. 𑀅𑀝𑁆𑀞. 𑁧; 𑀤𑀻. 𑀦𑀺. 𑀝𑀻. 𑁧.𑀧𑀭𑀺𑀩𑁆𑀩𑀸𑀚𑀓𑀓𑀣𑀸𑀯𑀡𑁆𑀡𑀦𑀸) 𑀏𑀓𑁄𑀬𑁂𑀯𑁂𑀲 𑀲𑀫𑀬𑁄, 𑀦 𑀤𑁆𑀯𑁂 𑀯𑀸 𑀢𑀬𑁄 𑀯𑀸𑀢𑀺 𑀊𑀦𑀸𑀥𑀺𑀓𑀸𑀪𑀸𑀯𑁂𑀦 𑀕𑀡𑀦𑀲𑁆𑀲 𑀧𑀭𑀺𑀘𑁆𑀙𑁂𑀤𑀦𑀺𑀤𑁆𑀤𑁂𑀲𑁄 𑀏𑀓𑀦𑁆𑀢𑀺 𑀅𑀬𑀁 𑀲𑀤𑁆𑀤𑁄𑀢𑀺 𑀅𑀢𑁆𑀣𑁄, 𑀢𑁂𑀦 𑀓𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀤𑀦𑀦𑁆𑀢𑀺 𑀅𑀦𑀼𑀬𑁄𑀕𑁂 𑀲𑀢𑀺 ¶ ‘‘𑀲𑀫𑀬’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀫𑀬𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀦𑀺𑀤𑁆𑀤𑁂𑀲𑁄’’𑀢𑀺. 𑀏𑀯𑀁 𑀧𑀭𑀺𑀘𑁆𑀙𑁂𑀤𑀧𑀭𑀺𑀘𑁆𑀙𑀺𑀦𑁆𑀦𑀯𑀲𑁂𑀦 𑀯𑀼𑀢𑁆𑀢𑁂𑀧𑀺 ‘‘𑀅𑀬𑀁 𑀦𑀸𑀫 𑀲𑀫𑀬𑁄’’𑀢𑀺 𑀲𑀭𑀽𑀧𑀢𑁄 𑀅𑀦𑀺𑀬𑀫𑀺𑀢𑀢𑁆𑀢𑀸 𑀅𑀦𑀺𑀬𑀫𑀺𑀢𑀯𑀘𑀦𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀏𑀓𑀁…𑀧𑁂…. 𑀤𑀻𑀧𑀦’’𑀦𑁆𑀢𑀺 𑀇𑀫𑀺𑀦𑀸.

𑀇𑀤𑀸𑀦𑀺 𑀲𑀫𑀬𑀲𑀤𑁆𑀤𑀲𑁆𑀲 𑀅𑀦𑁂𑀓𑀢𑁆𑀣𑀯𑀼𑀢𑁆𑀢𑀺𑀢𑀁 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀤𑀲𑁆𑀲𑁂𑀢𑁆𑀯𑀸 𑀇𑀥𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀦𑀺𑀬𑀫𑁂𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀧𑀤𑀤𑁆𑀯𑀬𑁂, 𑀲𑀫𑀪𑀺𑀦𑀺𑀯𑀺𑀝𑁆𑀞𑁄 𑀲𑀫𑀬 𑀲𑀤𑁆𑀤𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀦 𑀧𑀦 𑀤𑀺𑀲𑁆𑀲𑀢𑀻𑀢𑀺 𑀢𑁂𑀲𑁆𑀯𑁂𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀣𑁂 𑀇𑀥 𑀧𑀯𑀢𑁆𑀢𑀦𑀢𑁄. 𑀲𑀫𑀯𑀸𑀬𑁂𑀢𑀺 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀁, 𑀓𑀸𑀭𑀡𑀲𑀫𑀯𑀸𑀬𑁂𑀢𑀺 𑀅𑀢𑁆𑀣𑁄. 𑀔𑀡𑁂𑀢𑀺 𑀑𑀓𑀸𑀲𑁂. 𑀳𑁂𑀢𑀼𑀤𑀺𑀝𑁆𑀞𑀻𑀲𑀽𑀢𑀺 𑀳𑁂𑀢𑀼𑀫𑁆𑀳𑀺 𑀘𑁂𑀯 𑀮𑀤𑁆𑀥𑀺𑀬𑀜𑁆𑀘. 𑀅𑀲𑁆𑀲𑀸𑀢𑀺 𑀲𑀫𑀬𑀲𑀤𑁆𑀤𑀲𑁆𑀲. 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘 𑀉𑀧𑀸𑀤𑀸𑀬𑀸𑀢𑀺 𑀏𑀢𑁆𑀣 𑀓𑀸𑀮𑁄 𑀦𑀸𑀫 𑀉𑀧𑀲𑀗𑁆𑀓𑀫𑀦𑀲𑁆𑀲 𑀬𑀼𑀢𑁆𑀢𑀓𑀸𑀮𑁄. 𑀲𑀫𑀬𑁄 𑀦𑀸𑀫 𑀢𑀲𑁆𑀲𑁂𑀯 𑀧𑀘𑁆𑀘𑀬𑀲𑀸𑀫𑀕𑁆𑀕𑀻, 𑀅𑀢𑁆𑀣𑀢𑁄 𑀧𑀦 𑀢𑀤𑀦𑀼𑀭𑀽𑀧𑀲𑀭𑀻𑀭𑀩𑀮𑀜𑁆𑀘𑁂𑀯 𑀢𑀧𑁆𑀧𑀘𑁆𑀘𑀬𑀧𑀭𑀺𑀲𑁆𑀲𑀬𑀸𑀪𑀸𑀯𑁄 𑀘. 𑀉𑀧𑀸𑀤𑀸𑀦𑀁 𑀦𑀸𑀫 𑀜𑀸𑀡𑁂𑀦 𑀢𑁂𑀲𑀁 𑀕𑀳𑀡𑀁, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀁 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘 𑀧𑀜𑁆𑀜𑀸𑀬 𑀕𑀳𑁂𑀢𑁆𑀯𑀸 𑀉𑀧𑀥𑀸𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀘𑁂 𑀅𑀫𑁆𑀳𑀸𑀓𑀁 𑀲𑁆𑀯𑁂 𑀕𑀫𑀦𑀲𑁆𑀲 𑀬𑀼𑀢𑁆𑀢𑀓𑀸𑀮𑁄 𑀪𑀯𑀺𑀲𑁆𑀲𑀢𑀺, 𑀓𑀸𑀬𑁂 𑀩𑀮𑀫𑀢𑁆𑀢𑀸 𑀘 𑀨𑀭𑀺𑀲𑁆𑀲𑀢𑀺, 𑀕𑀫𑀦𑀧𑀘𑁆𑀘𑀬𑀸 𑀘 𑀅𑀜𑁆𑀜𑁄 𑀅𑀨𑀸𑀲𑀼𑀯𑀺𑀳𑀸𑀭𑁄 𑀦 𑀪𑀯𑀺𑀲𑁆𑀲𑀢𑀺, 𑀅𑀣𑁂𑀢𑀁 𑀓𑀸𑀮𑀜𑁆𑀘 𑀕𑀫𑀦𑀓𑀸𑀭𑀡𑀲𑀫𑀯𑀸𑀬𑀲𑀗𑁆𑀔𑀸𑀢𑀁 𑀲𑀫𑀬𑀜𑁆𑀘 𑀉𑀧𑀥𑀸𑀭𑁂𑀢𑁆𑀯𑀸 𑀅𑀧𑁆𑀧𑁂𑀯 𑀦𑀸𑀫 𑀲𑁆𑀯𑁂𑀧𑀺 𑀆𑀕𑀘𑁆𑀙𑁂𑀬𑁆𑀬𑀸𑀫𑀸𑀢𑀺. 𑀔𑀡𑁄𑀢𑀺 𑀑𑀓𑀸𑀲𑁄. 𑀢𑀣𑀸𑀕𑀢𑀼𑀧𑁆𑀧𑀸𑀤𑀸𑀤𑀺𑀓𑁄 𑀳𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀑𑀓𑀸𑀲𑁄 𑀢𑀧𑁆𑀧𑀘𑁆𑀘𑀬𑀧𑀝𑀺𑀮𑀸𑀪𑀳𑁂𑀢𑀼𑀢𑁆𑀢𑀸. 𑀔𑀡𑁄 𑀏𑀯 𑀘 𑀲𑀫𑀬𑁄. 𑀬𑁄 ‘‘𑀔𑀡𑁄’’𑀢𑀺 𑀘 ‘‘𑀲𑀫𑀬𑁄’’𑀢𑀺 𑀘 𑀯𑀼𑀘𑁆𑀘𑀢𑀺, 𑀲𑁄 𑀏𑀓𑁄𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀺𑀬𑀟𑁆𑀠𑁄 𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦𑀁 𑀉𑀡𑁆𑀳𑀲𑀫𑀬𑁄. 𑀯𑀲𑁆𑀲𑀸𑀦𑀲𑁆𑀲 𑀧𑀞𑀫𑁄 𑀫𑀸𑀲𑁄 𑀧𑀭𑀺𑀴𑀸𑀳𑀲𑀫𑀬𑁄. 𑀫𑀳𑀸𑀲𑀫𑀬𑁄𑀢𑀺 𑀫𑀳𑀸𑀲𑀫𑀽𑀳𑁄. 𑀲𑀫𑀸𑀲𑁄 𑀯𑀸 𑀏𑀲, 𑀩𑁆𑀬𑀸𑀲𑁄 𑀯𑀸. 𑀧𑀯𑀼𑀝𑁆𑀞𑀁 𑀯𑀦𑀁 𑀧𑀯𑀦𑀁, 𑀢𑀲𑁆𑀫𑀺𑀁, 𑀓𑀧𑀺𑀮𑀯𑀢𑁆𑀣𑀼𑀲𑀸𑀫𑀦𑁆𑀢𑁂 𑀫𑀳𑀸𑀯𑀦𑀲𑀗𑁆𑀔𑀸𑀢𑁂 𑀯𑀦𑀲𑀡𑁆𑀟𑁂𑀢𑀺 𑀅𑀢𑁆𑀣𑁄. 𑀲𑀫𑀬𑁄𑀧𑀺 𑀔𑁄𑀢𑀺 𑀏𑀢𑁆𑀣 𑀲𑀫𑀬𑁄𑀢𑀺 𑀲𑀺𑀓𑁆𑀔𑀸𑀧𑀤𑀧𑀽𑀭𑀡𑀲𑁆𑀲 𑀳𑁂𑀢𑀼. 𑀪𑀤𑁆𑀤𑀸𑀮𑀻𑀢𑀺 𑀢𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀦𑀸𑀫𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀬𑀸 𑀪𑀤𑁆𑀤𑀸𑀮𑀺 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀏𑀓𑀁 𑀓𑀸𑀭𑀡𑀁 𑀅𑀢𑁆𑀣𑀺, 𑀢𑀫𑁆𑀧𑀺 𑀢𑁂 𑀦 𑀧𑀝𑀺𑀯𑀺𑀤𑁆𑀥𑀁 𑀦 𑀲𑀮𑁆𑀮𑀓𑁆𑀔𑀺𑀢𑀦𑁆𑀢𑀺. 𑀓𑀺𑀁 𑀢𑀁 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀪𑀕𑀯𑀸𑀧𑀺 𑀔𑁄’’𑀢𑀺𑀆𑀤𑀺.

‘‘𑀉𑀕𑁆𑀕𑀳𑀫𑀸𑀦𑁄’’𑀢𑀺𑀆𑀤𑀻𑀲𑀼 𑀫𑀸𑀦𑁄𑀢𑀺 𑀢𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀧𑀓𑀢𑀺𑀦𑀸𑀫𑀁, 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀧𑀦 𑀲𑀺𑀧𑁆𑀧𑀁 𑀉𑀕𑁆𑀕𑀳𑁂𑀢𑀼𑀁 𑀲𑀫𑀢𑁆𑀣𑀢𑀸𑀬 ‘‘𑀉𑀕𑁆𑀕𑀳𑀫𑀸𑀦𑁄’’𑀢𑀺 𑀦𑀁 ¶ 𑀲𑀜𑁆𑀚𑀸𑀦𑀦𑁆𑀢𑀺, 𑀢𑀲𑁆𑀫𑀸 ‘‘𑀉𑀕𑁆𑀕𑀳𑀫𑀸𑀦𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀡𑀫𑀼𑀡𑁆𑀟𑀺𑀓𑀲𑁆𑀲 𑀧𑀼𑀢𑁆𑀢𑁄 𑀲𑀫𑀡𑀫𑀼𑀡𑁆𑀟𑀺𑀓𑀸𑀧𑀼𑀢𑁆𑀢𑁄. 𑀲𑁄 𑀓𑀺𑀭 𑀤𑁂𑀯𑀤𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀓𑁄. 𑀲𑀫𑀬𑀁 𑀤𑀺𑀝𑁆𑀞𑀺𑀁 ¶ 𑀧𑀓𑀸𑀭𑁂𑀦 𑀯𑀤𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀫𑀬𑀧𑁆𑀧𑀯𑀸𑀤𑀓𑁄, 𑀢𑀲𑁆𑀫𑀺𑀁, 𑀤𑀺𑀝𑁆𑀞𑀺𑀧𑁆𑀧𑀯𑀸𑀤𑀓𑁂𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀺𑀁 𑀓𑀺𑀭 𑀞𑀸𑀦𑁂 𑀘𑀗𑁆𑀓𑀻𑀢𑀸𑀭𑀼𑀓𑁆𑀔𑀧𑁄𑀓𑁆𑀔𑀭𑀲𑀸𑀢𑀺𑀧𑁆𑀧𑀪𑀽𑀢𑀬𑁄 𑀩𑁆𑀭𑀸𑀳𑁆𑀫𑀡𑀸, 𑀦𑀺𑀕𑀡𑁆𑀞𑀸𑀘𑁂𑀮𑀓𑀧𑀭𑀺𑀩𑁆𑀩𑀸𑀚𑀓𑀸𑀤𑀬𑁄 𑀘 𑀧𑀩𑁆𑀩𑀚𑀺𑀢𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀫𑀬𑀁 𑀧𑀓𑀸𑀭𑁂𑀦 𑀯𑀤𑀦𑁆𑀢𑀺 𑀓𑀣𑁂𑀦𑁆𑀢𑀺 𑀤𑀻𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀲𑁄 𑀆𑀭𑀸𑀫𑁄 ‘‘𑀲𑀫𑀬𑀧𑁆𑀧𑀯𑀸𑀤𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑁆𑀯𑁂𑀯 𑀢𑀺𑀦𑁆𑀤𑀼𑀓𑀸𑀘𑀻𑀭𑀲𑀗𑁆𑀔𑀸𑀢𑀸𑀬 𑀢𑀺𑀫𑁆𑀩𑀭𑀽𑀲𑀓𑀭𑀼𑀓𑁆𑀔𑀧𑀦𑁆𑀢𑀺𑀬𑀸 𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸 ‘‘𑀢𑀺𑀦𑁆𑀤𑀼𑀓𑀸𑀘𑀻𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀓𑀸 𑀲𑀸𑀮𑀸 𑀏𑀢𑁆𑀣𑀸𑀢𑀺 𑀏𑀓𑀲𑀸𑀮𑀓𑁄. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀧𑀞𑀫𑀁 𑀏𑀓𑀸 𑀲𑀸𑀮𑀸 𑀅𑀳𑁄𑀲𑀺, 𑀧𑀘𑁆𑀙𑀸 𑀧𑀦 𑀫𑀳𑀸𑀧𑀼𑀜𑁆𑀜𑀁 𑀧𑁄𑀝𑁆𑀞𑀧𑀸𑀤𑀧𑀭𑀺𑀩𑁆𑀩𑀸𑀚𑀓𑀁 𑀦𑀺𑀲𑁆𑀲𑀸𑀬 𑀩𑀳𑀽 𑀲𑀸𑀮𑀸 𑀓𑀢𑀸, 𑀢𑀲𑁆𑀫𑀸 𑀢𑀫𑁂𑀯 𑀧𑀞𑀫𑀁 𑀓𑀢𑀁 𑀏𑀓𑀁 𑀲𑀸𑀮𑀁 𑀉𑀧𑀸𑀤𑀸𑀬 𑀮𑀤𑁆𑀥𑀧𑀼𑀩𑁆𑀩𑀦𑀸𑀫𑀯𑀲𑁂𑀦 ‘‘𑀏𑀓𑀲𑀸𑀮𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀫𑀮𑁆𑀮𑀺𑀓𑀸𑀬 𑀦𑀸𑀫 𑀧𑀲𑁂𑀦𑀤𑀺𑀭𑀜𑁆𑀜𑁄 𑀤𑁂𑀯𑀺𑀬𑀸 𑀉𑀬𑁆𑀬𑀸𑀦𑀪𑀽𑀢𑁄 𑀲𑁄 𑀧𑀼𑀧𑁆𑀨𑀨𑀮𑀲𑀘𑁆𑀙𑀦𑁆𑀦𑁄 𑀆𑀭𑀸𑀫𑁄, 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀮𑁆𑀮𑀺𑀓𑀸𑀬 𑀆𑀭𑀸𑀫𑁂’’𑀢𑀺. 𑀧𑀝𑀺𑀯𑀲𑀢𑀻𑀢𑀺 𑀢𑀲𑁆𑀫𑀺𑀁 𑀨𑀸𑀲𑀼𑀢𑀸𑀬 𑀯𑀲𑀢𑀺.

𑀤𑀺𑀝𑁆𑀞𑁂 𑀥𑀫𑁆𑀫𑁂𑀢𑀺 𑀧𑀘𑁆𑀘𑀓𑁆𑀔𑁂 𑀅𑀢𑁆𑀢𑀪𑀸𑀯𑁂. 𑀅𑀢𑁆𑀣𑁄𑀢𑀺 𑀯𑀼𑀟𑁆𑀠𑀺. 𑀓𑀫𑁆𑀫𑀓𑀺𑀮𑁂𑀲𑀯𑀲𑁂𑀦 𑀲𑀫𑁆𑀧𑀭𑁂𑀢𑀩𑁆𑀩𑀢𑁄 𑀲𑀫𑁆𑀫𑀸 𑀧𑀸𑀧𑀼𑀡𑀺𑀢𑀩𑁆𑀩𑀢𑁄 𑀲𑀫𑁆𑀧𑀭𑀸𑀬𑁄, 𑀧𑀭𑀮𑁄𑀓𑁄, 𑀢𑀢𑁆𑀣 𑀦𑀺𑀬𑀼𑀢𑁆𑀢𑁄 𑀲𑀫𑁆𑀧𑀭𑀸𑀬𑀺𑀓𑁄, 𑀧𑀭𑀮𑁄𑀓𑀢𑁆𑀣𑁄. 𑀅𑀢𑁆𑀣𑀸𑀪𑀺𑀲𑀫𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀉𑀪𑀬𑀢𑁆𑀣𑀲𑀗𑁆𑀔𑀸𑀢𑀳𑀺𑀢𑀧𑀝𑀺𑀮𑀸𑀪𑀸. 𑀲𑀫𑁆𑀧𑀭𑀸𑀬𑀺𑀓𑁄𑀧𑀺 𑀳𑀺 𑀅𑀢𑁆𑀣𑁄 𑀓𑀸𑀭𑀡𑀲𑁆𑀲 𑀦𑀺𑀧𑁆𑀨𑀦𑁆𑀦𑀢𑁆𑀢𑀸 𑀧𑀝𑀺𑀮𑀤𑁆𑀥𑁄 𑀦𑀸𑀫 𑀳𑁄𑀢𑀻𑀢𑀺 𑀢𑀁 𑀅𑀢𑁆𑀣𑀤𑁆𑀯𑀬𑀫𑁂𑀓𑀢𑁄 𑀓𑀢𑁆𑀯𑀸 ‘‘𑀅𑀢𑁆𑀣𑀸𑀪𑀺𑀲𑀫𑀬𑀸’’𑀢𑀺 𑀯𑀼𑀢𑁆𑀢𑀁. 𑀥𑀺𑀬𑀸 𑀧𑀜𑁆𑀜𑀸𑀬 𑀢𑀁𑀢𑀤𑀢𑁆𑀣𑁂 𑀭𑀸𑀢𑀺 𑀕𑀡𑁆𑀳𑀸𑀢𑀺, 𑀥𑀻 𑀯𑀸 𑀧𑀜𑁆𑀜𑀸 𑀏𑀢𑀲𑁆𑀲𑀢𑁆𑀣𑀻𑀢𑀺 𑀥𑀻𑀭𑁄. 𑀧𑀡𑁆𑀟𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸. 𑀲𑀸 𑀳𑀺 𑀲𑀼𑀔𑀼𑀫𑁂𑀲𑀼𑀧𑀺 𑀅𑀢𑁆𑀣𑁂𑀲𑀼 𑀧𑀟𑀢𑀺 𑀕𑀘𑁆𑀙𑀢𑀺, 𑀤𑀼𑀓𑁆𑀔𑀸𑀤𑀻𑀦𑀁 𑀯𑀸 𑀧𑀻𑀴𑀦𑀸𑀤𑀺𑀆𑀓𑀸𑀭𑀁 𑀚𑀸𑀦𑀸𑀢𑀻𑀢𑀺 𑀧𑀡𑁆𑀟𑀸. 𑀢𑀸𑀬 𑀇𑀢𑁄 𑀕𑀢𑁄𑀢𑀺 𑀧𑀡𑁆𑀟𑀺𑀢𑁄. 𑀅𑀣 𑀯𑀸 𑀇𑀢𑀸 𑀲𑀜𑁆𑀚𑀸𑀢𑀸 𑀧𑀡𑁆𑀟𑀸 𑀏𑀢𑀲𑁆𑀲, 𑀧𑀟𑀢𑀺 𑀯𑀸 𑀜𑀸𑀡𑀕𑀢𑀺𑀬𑀸 𑀕𑀘𑁆𑀙𑀢𑀻𑀢𑀺 𑀧𑀡𑁆𑀟𑀺𑀢𑁄. 𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸𑀢𑀺 𑀫𑀸𑀦𑀲𑁆𑀲 𑀲𑀫𑁆𑀫𑀸 𑀧𑀳𑀸𑀦𑁂𑀦. 𑀲𑀫𑁆𑀫𑀸𑀢𑀺 𑀘𑁂𑀢𑁆𑀣 𑀅𑀕𑁆𑀕𑀫𑀕𑁆𑀕𑀜𑀸𑀡𑁂𑀦 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁 𑀯𑀼𑀢𑁆𑀢𑀁. 𑀅𑀦𑁆𑀢𑀦𑁆𑀢𑀺 𑀅𑀯𑀲𑀸𑀦𑀁. 𑀧𑀻𑀴𑀦𑀁 𑀢𑀁𑀲𑀫𑀗𑁆𑀕𑀺𑀦𑁄 𑀳𑀺𑀁𑀲𑀦𑀁 𑀅𑀯𑀺𑀧𑁆𑀨𑀸𑀭𑀺𑀢𑀸𑀓𑀭𑀡𑀁. 𑀢𑀤𑁂𑀯 𑀅𑀢𑁆𑀣𑁄 𑀢𑀣𑀸 𑀢𑁆𑀣-𑀓𑀸𑀭𑀲𑁆𑀲 𑀝𑁆𑀞-𑀓𑀸𑀭𑀁 𑀓𑀢𑁆𑀯𑀸. 𑀲𑀫𑁂𑀘𑁆𑀘 𑀧𑀘𑁆𑀘𑀬𑁂𑀳𑀺 𑀓𑀢𑀪𑀸𑀯𑁄 𑀲𑀗𑁆𑀔𑀢𑀝𑁆𑀞𑁄. 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀤𑀺𑀯𑀲𑁂𑀦 𑀲𑀦𑁆𑀢𑀸𑀧𑀦𑀁 𑀧𑀭𑀺𑀤𑀳𑀦𑀁 𑀲𑀦𑁆𑀢𑀸𑀧𑀝𑁆𑀞𑁄. 𑀚𑀭𑀸𑀬, 𑀫𑀭𑀡𑁂𑀦 𑀘𑀸𑀢𑀺 𑀤𑁆𑀯𑀺𑀥𑀸 𑀯𑀺𑀧𑀭𑀺𑀡𑀸𑀫𑁂𑀢𑀩𑁆𑀩𑁄 𑀯𑀺𑀧𑀭𑀺𑀡𑀸𑀫𑀝𑁆𑀞𑁄 ¶ . 𑀅𑀪𑀺𑀲𑀫𑁂𑀢𑀩𑁆𑀩𑁄 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄 𑀅𑀪𑀺𑀲𑀫𑀬𑀝𑁆𑀞𑁄, 𑀧𑀻𑀴𑀦𑀸𑀤𑀻𑀦𑀺𑀬𑁂𑀯. 𑀢𑀸𑀦𑀺 𑀳𑀺 𑀅𑀪𑀺𑀲𑀫𑁂𑀢𑀩𑁆𑀩𑀪𑀸𑀯𑁂𑀦 𑀏𑀓𑀻𑀪𑀸𑀯𑀫𑀼𑀧𑀦𑁂𑀢𑁆𑀯𑀸 ‘‘𑀅𑀪𑀺𑀲𑀫𑀬𑀝𑁆𑀞𑁄’’𑀢𑀺 𑀯𑀼𑀢𑁆𑀢𑀸𑀦𑀺. 𑀅𑀪𑀺𑀲𑀫𑀬𑀲𑁆𑀲 𑀯𑀸 𑀧𑀝𑀺𑀯𑁂𑀥𑀲𑁆𑀲 𑀅𑀢𑁆𑀣𑁄 𑀕𑁄𑀘𑀭𑁄 𑀅𑀪𑀺𑀲𑀫𑀬𑀝𑁆𑀞𑁄𑀢𑀺 𑀢𑀸𑀦𑀺𑀬𑁂𑀯 𑀢𑀩𑁆𑀩𑀺𑀲𑀬-𑀪𑀸𑀯𑀽𑀧𑀕𑀫𑀦-𑀲𑀸𑀫𑀜𑁆𑀜𑀢𑁄 𑀏𑀓𑀢𑁆𑀢𑁂𑀦 𑀯𑀼𑀢𑁆𑀢𑀸𑀦𑀺. 𑀏𑀢𑁆𑀣 𑀘 𑀉𑀧𑀲𑀕𑁆𑀕𑀸𑀦𑀁 𑀚𑁄𑀢𑀓𑀫𑀢𑁆𑀢𑀢𑁆𑀢𑀸 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀸𑀘𑀓𑁄 𑀲𑀫𑀬𑀲𑀤𑁆𑀤𑁄 𑀏𑀯𑀸𑀢𑀺 𑀲𑀫𑀬𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂𑀧𑀺 𑀲𑀉𑀧𑀲𑀕𑁆𑀕𑁄 𑀅𑀪𑀺𑀲𑀫𑀬𑁄 𑀯𑀼𑀢𑁆𑀢𑁄.

𑀢𑁂𑀲𑀼 𑀧𑀦 𑀅𑀢𑁆𑀣𑁂𑀲𑀼 𑀅𑀬𑀁 𑀯𑀘𑀦𑀢𑁆𑀣𑁄 𑁋 𑀲𑀳𑀓𑀸𑀭𑀻𑀓𑀸𑀭𑀡𑀯𑀲𑁂𑀦 𑀲𑀦𑁆𑀦𑀺𑀚𑁆𑀛𑀁 𑀲𑀫𑁂𑀢𑀺 𑀲𑀫𑀯𑁂𑀢𑀻𑀢𑀺 𑀲𑀫𑀬𑁄, 𑀲𑀫𑀯𑀸𑀬𑁄. 𑀲𑀫𑁂𑀢𑀺 𑀲𑀫𑀸𑀕𑀘𑁆𑀙𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀫𑁂𑀢𑁆𑀣 𑀢𑀤𑀸𑀥𑀸𑀭𑀧𑀼𑀕𑁆𑀕𑀮𑀯𑀲𑁂𑀦𑀸𑀢𑀺 𑀲𑀫𑀬𑁄, 𑀔𑀡𑁄. 𑀲𑀫𑁂𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸 𑀲𑀁𑀕𑀘𑁆𑀙𑀦𑁆𑀢𑀺 𑀥𑀫𑁆𑀫𑀸, 𑀲𑀢𑁆𑀢𑀸 𑀯𑀸 𑀲𑀳𑀚𑀸𑀢𑀸𑀤𑀻𑀳𑀺, 𑀉𑀧𑁆𑀧𑀸𑀤𑀸𑀤𑀻𑀳𑀺 𑀘𑀸𑀢𑀺 ¶ 𑀲𑀫𑀬𑁄, 𑀓𑀸𑀮𑁄. 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀢𑀸𑀬 𑀳𑀺 𑀅𑀢𑁆𑀣𑀢𑁄 𑀅𑀪𑀽𑀢𑁄𑀧𑀺 𑀓𑀸𑀮𑁄 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀅𑀥𑀺𑀓𑀭𑀡𑀁, 𑀓𑀭𑀡𑀁 𑀯𑀺𑀬 𑀘 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑁂𑀦 𑀭𑀽𑀧𑁂𑀦 𑀯𑁄𑀳𑀭𑀻𑀬𑀢𑀺. 𑀲𑀫𑀁, 𑀲𑀫𑁆𑀫𑀸 𑀯𑀸 𑀅𑀯𑀬𑀯𑀸𑀦𑀁 𑀅𑀬𑀦𑀁 𑀧𑀯𑀢𑁆𑀢𑀺 𑀅𑀯𑀝𑁆𑀞𑀸𑀦𑀦𑁆𑀢𑀺 𑀲𑀫𑀬𑁄, 𑀲𑀫𑀽𑀳𑁄 𑀬𑀣𑀸 ‘‘𑀲𑀫𑀼𑀤𑀸𑀬𑁄’’𑀢𑀺. 𑀅𑀯𑀬𑀯𑀸𑀦𑀁 𑀲𑀳𑀸𑀯𑀝𑁆𑀞𑀸𑀦𑀫𑁂𑀯 𑀳𑀺 𑀲𑀫𑀽𑀳𑁄, 𑀦 𑀧𑀦 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀲𑀫𑀽𑀳𑁄 𑀦𑀸𑀫 𑀓𑁄𑀘𑀺 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺. 𑀧𑀘𑁆𑀘𑀬𑀦𑁆𑀢𑀭𑀲𑀫𑀸𑀕𑀫𑁂 𑀏𑀢𑀺 𑀨𑀮𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀯𑀢𑁆𑀢𑀢𑀺 𑀯𑀸 𑀏𑀢𑀲𑁆𑀫𑀸𑀢𑀺 𑀲𑀫𑀬𑁄, 𑀳𑁂𑀢𑀼 𑀬𑀣𑀸 ‘‘𑀲𑀫𑀼𑀤𑀬𑁄’’𑀢𑀺. 𑀲𑁄 𑀳𑀺 𑀧𑀘𑁆𑀘𑀬𑀦𑁆𑀢𑀭𑀲𑀫𑀸𑀕𑀫𑀦𑁂𑀦𑁂𑀯 𑀅𑀢𑁆𑀢𑀦𑁄 𑀨𑀮𑀁 𑀉𑀧𑁆𑀧𑀸𑀤𑀝𑁆𑀞𑀺𑀢𑀺𑀲𑀫𑀗𑁆𑀕𑀻𑀪𑀸𑀯𑀁 𑀓𑀭𑁄𑀢𑀺. 𑀲𑀫𑁂𑀢𑀺 𑀲𑀁𑀬𑁄𑀚𑀦𑀪𑀸𑀯𑀢𑁄 𑀲𑀫𑁆𑀩𑀦𑁆𑀥𑁄 𑀳𑀼𑀢𑁆𑀯𑀸 𑀏𑀢𑀺 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀧𑀯𑀢𑁆𑀢𑀢𑀺, 𑀤𑀴𑁆𑀳𑀕𑁆𑀕𑀡𑀪𑀸𑀯𑀢𑁄 𑀯𑀸 𑀢𑀁𑀲𑀜𑁆𑀜𑀼𑀢𑁆𑀢𑀸 𑀲𑀢𑁆𑀢𑀸 𑀅𑀬𑀦𑁆𑀢𑀺 𑀏𑀢𑁂𑀦 𑀬𑀣𑀸𑀪𑀺𑀦𑀺𑀯𑁂𑀲𑀁 𑀧𑀯𑀢𑁆𑀢𑀦𑁆𑀢𑀻𑀢𑀺 𑀲𑀫𑀬𑁄, 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑁂𑀦 𑀳𑀺 𑀲𑀢𑁆𑀢𑀸 𑀅𑀢𑀺𑀯𑀺𑀬 𑀩𑀚𑁆𑀛𑀦𑁆𑀢𑀺. 𑀲𑀫𑀺𑀢𑀺 𑀲𑀗𑁆𑀕𑀢𑀺 𑀲𑀫𑁄𑀥𑀸𑀦𑀁 𑀲𑀫𑀬𑁄, 𑀧𑀝𑀺𑀮𑀸𑀪𑁄. 𑀲𑀫𑀲𑁆𑀲 𑀦𑀺𑀭𑁄𑀥𑀲𑁆𑀲 𑀬𑀸𑀦𑀁 𑀧𑀸𑀧𑀼𑀡𑀦𑀁, 𑀲𑀫𑁆𑀫𑀸 𑀯𑀸 𑀬𑀸𑀦𑀁 𑀅𑀧𑀕𑀫𑁄 𑀅𑀧𑁆𑀧𑀯𑀢𑁆𑀢𑀺 𑀲𑀫𑀬𑁄, 𑀧𑀳𑀸𑀦𑀁. 𑀅𑀪𑀺𑀫𑀼𑀔𑀁 𑀜𑀸𑀡𑁂𑀦 𑀲𑀫𑁆𑀫𑀸 𑀏𑀢𑀩𑁆𑀩𑁄 𑀅𑀪𑀺𑀕𑀦𑁆𑀢𑀩𑁆𑀩𑁄𑀢𑀺 𑀅𑀪𑀺𑀲𑀫𑀬𑁄, 𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑁄 𑀲𑀪𑀸𑀯𑁄. 𑀅𑀪𑀺𑀫𑀼𑀔𑀪𑀸𑀯𑁂𑀦 𑀢𑀁 𑀢𑀁 𑀲𑀪𑀸𑀯𑀁 𑀲𑀫𑁆𑀫𑀸 𑀏𑀢𑀺 𑀕𑀘𑁆𑀙𑀢𑀺 𑀩𑀼𑀚𑁆𑀛𑀢𑀻𑀢𑀺 𑀅𑀪𑀺𑀲𑀫𑀬𑁄, 𑀥𑀫𑁆𑀫𑀸𑀦𑀁 𑀬𑀣𑀸𑀪𑀽𑀢𑀲𑀪𑀸𑀯𑀸𑀯𑀩𑁄𑀥𑁄.

𑀦𑀦𑀼 𑀘 𑀅𑀢𑁆𑀣𑀫𑀢𑁆𑀢𑀁 𑀬𑀣𑀸𑀥𑀺𑀧𑁆𑀧𑁂𑀢𑀁 𑀧𑀢𑀺 𑀲𑀤𑁆𑀤𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑀻𑀢𑀺 𑀦 𑀏𑀓𑁂𑀦 𑀲𑀤𑁆𑀤𑁂𑀦 𑀅𑀦𑁂𑀓𑁂 𑀅𑀢𑁆𑀣𑀸 𑀅𑀪𑀺𑀥𑀻𑀬𑀦𑁆𑀢𑀺, 𑀅𑀣 𑀓𑀲𑁆𑀫𑀸 𑀇𑀥 𑀲𑀫𑀬𑀲𑀤𑁆𑀤𑀲𑁆𑀲 𑀅𑀦𑁂𑀓𑀥𑀸 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺? 𑀲𑀘𑁆𑀘𑀫𑁂𑀢𑀁 𑀲𑀤𑁆𑀤𑀯𑀺𑀲𑁂𑀲𑁂 𑀅𑀧𑁂𑀓𑁆𑀔𑀺𑀢𑁂 𑀲𑀤𑁆𑀤𑀯𑀺𑀲𑁂𑀲𑁂 ¶ 𑀳𑀺 𑀅𑀧𑁂𑀓𑁆𑀔𑀺𑀢𑁂 𑀦 𑀏𑀓𑁂𑀦 𑀲𑀤𑁆𑀤𑁂𑀦 𑀅𑀦𑁂𑀓𑀢𑁆𑀣𑀸𑀪𑀺𑀥𑀸𑀦𑀁 𑀲𑀫𑁆𑀪𑀯𑀢𑀺. 𑀦 𑀳𑀺 𑀬𑁄 𑀓𑀸𑀮𑀸𑀤𑀺𑀅𑀢𑁆𑀣𑁄 𑀲𑀫𑀬-𑀲𑀤𑁆𑀤𑁄, 𑀲𑁄𑀬𑁂𑀯 𑀲𑀫𑀽𑀳𑀸𑀤𑀺𑀅𑀢𑁆𑀣𑀁 𑀯𑀤𑀢𑀺. 𑀏𑀢𑁆𑀣 𑀧𑀦 𑀢𑁂𑀲𑀁 𑀢𑁂𑀲𑀫𑀢𑁆𑀣𑀸𑀦𑀁 𑀲𑀫𑀬𑀲𑀤𑁆𑀤𑀯𑀘𑀦𑀻𑀬𑀢𑀸𑀲𑀸𑀫𑀜𑁆𑀜𑀫𑀼𑀧𑀸𑀤𑀸𑀬 𑀅𑀦𑁂𑀓𑀢𑁆𑀣𑀢𑀸 𑀲𑀫𑀬-𑀲𑀤𑁆𑀤𑀲𑁆𑀲 𑀯𑀼𑀢𑁆𑀢𑀸𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑀼𑀤𑁆𑀥𑀸𑀭𑁂. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀲𑀸𑀫𑀜𑁆𑀜𑀯𑀘𑀦𑀻𑀬𑀢𑀁, 𑀉𑀧𑀸𑀤𑀸𑀬 𑀅𑀦𑁂𑀓𑀥𑀸;

𑀅𑀢𑁆𑀣𑀁 𑀯𑀤𑁂 𑀦 𑀳𑀺 𑀲𑀤𑁆𑀤𑁄, 𑀏𑀓𑁄 𑀦𑁂𑀓𑀢𑁆𑀣𑀓𑁄 𑀲𑀺𑀬𑀸’’𑀢𑀺.

𑀲𑀫𑀯𑀸𑀬𑀸𑀤𑀺𑀅𑀢𑁆𑀣𑀸𑀦𑀁 𑀇𑀥 𑀅𑀲𑀫𑁆𑀪𑀯𑀢𑁄, 𑀓𑀸𑀮𑀲𑁆𑀲𑁂𑀯 𑀘 𑀅𑀧𑀤𑀺𑀲𑀺𑀢𑀩𑁆𑀩𑀢𑁆𑀢𑀸 ‘‘𑀇𑀥 𑀧𑀦𑀲𑁆𑀲 𑀓𑀸𑀮𑁄 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀤𑁂𑀲𑀤𑁂𑀲𑀓𑀸𑀤𑀻𑀦𑀁 𑀯𑀺𑀬 𑀳𑀺 𑀓𑀸𑀮𑀲𑁆𑀲 𑀦𑀺𑀤𑀸𑀦𑀪𑀸𑀯𑁂𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀲𑁄𑀧𑀺 𑀇𑀥 𑀅𑀧𑀤𑀺𑀲𑀻𑀬𑀢𑀺. ‘𑀇𑀫𑀺𑀦𑀸 𑀓𑀻𑀤𑀺𑀲𑀁 𑀓𑀸𑀮𑀁 𑀤𑀻𑀧𑁂𑀢𑀻𑀢𑀺 𑀆𑀳 ‘‘𑀢𑁂𑀦𑀸’’𑀢𑀺𑀆𑀤𑀺. 𑀢𑁂𑀦𑀸𑀢𑀺 𑀓𑀸𑀮𑀢𑁆𑀣𑁂𑀦 𑀲𑀫𑀬-𑀲𑀤𑁆𑀤𑁂𑀦. 𑀅𑀟𑁆𑀠𑀫𑀸𑀲𑁄 𑀧𑀓𑁆𑀔𑀯𑀲𑁂𑀦 𑀯𑀼𑀢𑁆𑀢𑁄, 𑀧𑀼𑀩𑁆𑀩𑀡𑁆𑀳𑀸𑀤𑀺𑀓𑁄 𑀤𑀺𑀯𑀲𑀪𑀸𑀕𑀯𑀲𑁂𑀦, 𑀧𑀞𑀫𑀬𑀸𑀫𑀸𑀤𑀺𑀓𑁄 𑀧𑀳𑀸𑀭𑀯𑀲𑁂𑀦. 𑀆𑀤𑀺-𑀲𑀤𑁆𑀤𑁂𑀦 𑀔𑀡𑀮𑀬𑀸𑀤𑀬𑁄 𑀲𑀗𑁆𑀕𑀳𑀺𑀢𑀸, 𑀅𑀦𑀺𑀬𑀫𑀺𑀢𑀯𑀲𑁂𑀦 𑀏𑀓𑀁 𑀓𑀸𑀮𑀁 𑀤𑀻𑀧𑁂𑀢𑀻𑀢𑀺 𑀅𑀢𑁆𑀣𑁄.

𑀓𑀲𑁆𑀫𑀸 ¶ 𑀧𑀦𑁂𑀢𑁆𑀣 𑀅𑀦𑀺𑀬𑀫𑀺𑀢𑀯𑀲𑁂𑀦 𑀓𑀸𑀮𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀦 𑀉𑀢𑀼𑀲𑀁𑀯𑀘𑁆𑀙𑀭𑀸𑀤𑀺𑀦𑀸 𑀦𑀺𑀬𑀫𑀺𑀢𑀯𑀲𑁂𑀦𑀸𑀢𑀺 𑀆𑀳 ‘‘𑀢𑀢𑁆𑀣 𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀓𑀺𑀜𑁆𑀘𑀸𑀧𑀺 𑀧𑀜𑁆𑀜𑀸𑀬 𑀯𑀺𑀤𑀺𑀢𑀁 𑀲𑀼𑀯𑀯𑀢𑁆𑀣𑀸𑀧𑀺𑀢𑀁, 𑀢𑀣𑀸𑀧𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀘𑀲𑀸 𑀥𑀸𑀭𑁂𑀢𑀼𑀁 𑀯𑀸 𑀲𑀬𑀁 𑀉𑀤𑁆𑀤𑀺𑀲𑀺𑀢𑀼𑀁 𑀯𑀸 𑀧𑀭𑁂𑀦 𑀉𑀤𑁆𑀤𑀺𑀲𑀸𑀧𑁂𑀢𑀼𑀁 𑀯𑀸 𑀦 𑀲𑀓𑁆𑀓𑀸 𑀦𑀸𑀦𑀧𑁆𑀧𑀓𑀸𑀭𑀪𑀸𑀯𑀢𑁄 𑀩𑀳𑀼 𑀘 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺 𑀬𑀸𑀯 𑀓𑀸𑀮𑀧𑁆𑀧𑀪𑁂𑀤𑁄, 𑀢𑀸𑀯 𑀯𑀢𑁆𑀢𑀩𑁆𑀩𑀢𑁆𑀢𑀸. ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀯𑀼𑀢𑁆𑀢𑁂 𑀧𑀦 𑀦 𑀲𑁄 𑀓𑀸𑀮𑀧𑁆𑀧𑀪𑁂𑀤𑁄 𑀅𑀢𑁆𑀣𑀺, 𑀬𑁄 𑀏𑀢𑁆𑀣𑀸𑀦𑀦𑁆𑀢𑁄𑀕𑀥𑁄 𑀲𑀺𑀬𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀏𑀓𑁂𑀦𑁂𑀯 𑀧𑀤𑁂𑀦 𑀢𑀫𑀢𑁆𑀣𑀁 𑀲𑀫𑁄𑀥𑀸𑀦𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸. 𑀏𑀯𑀁 𑀮𑁄𑀓𑀺𑀬𑀲𑀫𑁆𑀫𑀢𑀓𑀸𑀮𑀯𑀲𑁂𑀦 𑀲𑀫𑀬𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀸𑀲𑀦𑁂 𑀧𑀸𑀓𑀝𑀓𑀸𑀮𑀯𑀲𑁂𑀦 𑀲𑀫𑀬𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁂 𑀯𑀸 𑀇𑀫𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀧𑀺𑀘 𑀉𑀢𑀼𑀲𑀁𑀯𑀘𑁆𑀙𑀭𑀸𑀤𑀺𑀯𑀲𑁂𑀦 𑀦𑀺𑀬𑀫𑀁 𑀅𑀓𑀢𑁆𑀯𑀸 𑀲𑀫𑀬𑀲𑀤𑁆𑀤𑀲𑁆𑀲 𑀯𑀘𑀦𑁂 𑀅𑀬𑀫𑁆𑀧𑀺 𑀕𑀼𑀡𑁄 𑀮𑀤𑁆𑀥𑁄𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂 𑀯𑀸 𑀇𑀫𑁂’’𑀢𑀺𑀆𑀤𑀺𑀫𑀸𑀳. 𑀲𑀸𑀫𑀜𑁆𑀜𑀚𑁄𑀢𑀦𑀸 𑀳𑀺 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀺 𑀢𑀲𑁆𑀲𑀸 𑀯𑀺𑀲𑁂𑀲𑀧𑀭𑀺𑀳𑀸𑀭𑀯𑀺𑀲𑀬𑀢𑁆𑀢𑀸. 𑀢𑀢𑁆𑀣 𑀬𑁂 𑀇𑀫𑁂 𑀲𑀫𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀕𑀯𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀑𑀓𑁆𑀓𑀫𑀦𑀓𑀸𑀮𑁄 𑀘𑁂𑀢𑁆𑀣 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀲𑀫𑀬𑁄. 𑀘𑀢𑁆𑀢𑀸𑀭𑀺 𑀦𑀺𑀫𑀺𑀢𑁆𑀢𑀸𑀦𑀺 𑀧𑀲𑁆𑀲𑀺𑀢𑁆𑀯𑀸 𑀲𑀁𑀯𑁂𑀚𑀦𑀓𑀸𑀮𑁄 𑀲𑀁𑀯𑁂𑀕𑀲𑀫𑀬𑁄. 𑀙𑀩𑁆𑀩𑀲𑁆𑀲𑀸𑀦𑀺 𑀲𑀫𑁆𑀩𑁄𑀥𑀺𑀲𑀫𑀥𑀺𑀕𑀫𑀸𑀬 𑀘𑀭𑀺𑀬𑀓𑀸𑀮𑁄 ¶ 𑀤𑀼𑀓𑁆𑀓𑀭𑀓𑀸𑀭𑀺𑀓𑀲𑀫𑀬𑁄. 𑀤𑁂𑀯𑀲𑀺𑀓𑀁 𑀛𑀸𑀦𑀨𑀮𑀲𑀫𑀸𑀧𑀢𑁆𑀢𑀻𑀳𑀺 𑀯𑀻𑀢𑀺𑀦𑀸𑀫𑀦𑀓𑀸𑀮𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑀫𑀬𑁄, 𑀯𑀺𑀲𑁂𑀲𑀢𑁄 𑀧𑀦 𑀲𑀢𑁆𑀢𑀲𑀢𑁆𑀢𑀸𑀳𑀸𑀦𑀺 𑀛𑀸𑀦𑀲𑀫𑀸𑀧𑀢𑁆𑀢𑀺𑀯𑀴𑀜𑁆𑀚𑀦𑀓𑀸𑀮𑁄. 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀸𑀦𑀺 𑀢𑀁𑀢𑀁𑀥𑀫𑁆𑀫𑀤𑁂𑀲𑀦𑀸𑀓𑀸𑀮𑁄 𑀤𑁂𑀲𑀦𑀸𑀲𑀫𑀬𑁄. 𑀆𑀤𑀺-𑀲𑀤𑁆𑀤𑁂𑀦 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀲𑀫𑀬𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀓𑀸𑀲𑀸𑀢𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀧𑀓𑀫𑁆𑀧𑀦𑀑𑀪𑀸𑀲𑀧𑀸𑀢𑀼𑀪𑀸𑀯𑀸𑀤𑀻𑀳𑀺 𑀧𑀸𑀓𑀝𑀸. ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀯𑀼𑀢𑁆𑀢𑁂 𑀢𑀤𑀜𑁆𑀜𑁂𑀧𑀺 𑀲𑀫𑀬𑀸 𑀲𑀦𑁆𑀢𑀻𑀢𑀺 𑀅𑀢𑁆𑀣𑀸𑀧𑀢𑁆𑀢𑀺𑀢𑁄 𑀢𑁂𑀲𑀼 𑀲𑀫𑀬𑁂𑀲𑀼 𑀇𑀥 𑀤𑁂𑀲𑀦𑀸𑀲𑀫𑀬𑀲𑀗𑁆𑀔𑀸𑀢𑁄 𑀲𑀫𑀬𑀯𑀺𑀲𑁂𑀲𑁄 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀯𑀼𑀢𑁆𑀢𑁄𑀢𑀺 𑀤𑀻𑀧𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑀣𑀸𑀯𑀼𑀢𑁆𑀢𑀧𑁆𑀧𑀪𑁂𑀤𑁂𑀲𑀼𑀬𑁂𑀯 𑀲𑀫𑀬𑁂𑀲𑀼 𑀏𑀓𑀤𑁂𑀲𑀁 𑀧𑀓𑀸𑀭𑀦𑁆𑀢𑀭𑁂𑀳𑀺 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀘𑀸𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀜𑀸𑀡𑀓𑀺𑀘𑁆𑀘𑀲𑀫𑀬𑁄, 𑀅𑀢𑁆𑀢𑀳𑀺𑀢𑀧𑀝𑀺𑀧𑀢𑁆𑀢𑀺𑀲𑀫𑀬𑁄 𑀘 𑀅𑀪𑀺𑀲𑀫𑁆𑀩𑁄𑀥𑀺𑀲𑀫𑀬𑁄𑀬𑁂𑀯. 𑀅𑀭𑀺𑀬𑀢𑀼𑀡𑁆𑀳𑀻𑀪𑀸𑀯𑀲𑀫𑀬𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑀫𑀬𑁄. 𑀓𑀭𑀼𑀡𑀸𑀓𑀺𑀘𑁆𑀘𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀺𑀓𑀣𑀸𑀲𑀫𑀬𑁄 𑀤𑁂𑀲𑀦𑀸𑀲𑀫𑀬𑁄, 𑀢𑀲𑁆𑀫𑀸 𑀢𑁂𑀲𑀼 𑀯𑀼𑀢𑁆𑀢𑀧𑁆𑀧𑀪𑁂𑀤𑁂𑀲𑀼 𑀲𑀫𑀬𑁂𑀲𑀼 𑀏𑀓𑀤𑁂𑀲𑁄𑀯 𑀧𑀓𑀸𑀭𑀦𑁆𑀢𑀭𑁂𑀦 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀯𑁄 𑀪𑀺𑀓𑁆𑀔𑀯𑁂 𑀤𑁆𑀯𑀬𑀁 𑀓𑀭𑀡𑀻𑀬𑀁 𑀥𑀫𑁆𑀫𑀻 𑀓𑀣𑀸 𑀯𑀸 𑀅𑀭𑀺𑀬𑁄 𑀯𑀸 𑀢𑀼𑀡𑁆𑀳𑀻𑀪𑀸𑀯𑁄’’𑀢𑀺 (𑀉𑀤𑀸. 𑁧𑁨) 𑀯𑀼𑀢𑁆𑀢𑀲𑀫𑀬𑁂 𑀲𑀦𑁆𑀥𑀸𑀬 ‘‘𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀓𑀭𑀡𑀻𑀬𑀤𑁆𑀯𑀬𑀲𑀫𑀬𑁂𑀲𑀽’’𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀼𑀧𑀺 𑀲𑀫𑀬𑁂𑀲𑀽𑀢𑀺 𑀓𑀭𑀼𑀡𑀸𑀓𑀺𑀘𑁆𑀘𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀺𑀓𑀣𑀸𑀤𑁂𑀲𑀦𑀸𑀲𑀫𑀬𑁂𑀲𑀼𑀧𑀺. 𑀅𑀜𑁆𑀜𑀢𑀭𑀁 𑀲𑀫𑀬𑀁 𑀲𑀦𑁆𑀥𑀸𑀬 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀯𑀼𑀢𑁆𑀢𑀁 𑀅𑀢𑁆𑀣𑀢𑁄 𑀅𑀪𑁂𑀤𑀢𑁆𑀢𑀸.

𑀅𑀜𑁆𑀜𑀢𑁆𑀣 𑀯𑀺𑀬 𑀪𑀼𑀫𑁆𑀫𑀯𑀘𑀦𑁂𑀦 𑀘 𑀓𑀭𑀡𑀯𑀘𑀦𑁂𑀦 𑀘 𑀦𑀺𑀤𑁆𑀤𑁂𑀲𑀫𑀓𑀢𑁆𑀯𑀸 𑀇𑀥 𑀉𑀧𑀬𑁄𑀕𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑀧𑀬𑁄𑀚𑀦𑀁 𑀦𑀺𑀤𑁆𑀥𑀸𑀭𑁂𑀢𑀼𑀓𑀸𑀫𑁄 𑀧𑀭𑀫𑁆𑀫𑀼𑀔𑁂𑀦 𑀘𑁄𑀤𑀦𑀁 𑀲𑀫𑀼𑀝𑁆𑀞𑀧𑁂𑀢𑀺 ‘‘𑀓𑀲𑁆𑀫𑀸 𑀧𑀦𑁂𑀢𑁆𑀣𑀸’’𑀢𑀺𑀆𑀤𑀺𑀦𑀸. 𑀏𑀢𑁆𑀣𑀸𑀢𑀺 ¶ ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂, 𑀓𑀭𑀡𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄 𑀬𑀣𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀪𑀼𑀫𑁆𑀫𑀁, 𑀑𑀓𑀸𑀲𑁄, 𑀢𑀢𑁆𑀣 𑀧𑀯𑀢𑁆𑀢𑀁 𑀯𑀘𑀦𑀁 𑀯𑀺𑀪𑀢𑁆𑀢𑀺 𑀪𑀼𑀫𑁆𑀫𑀯𑀘𑀦𑀁. 𑀓𑀭𑁄𑀢𑀺 𑀓𑀺𑀭𑀺𑀬𑀫𑀪𑀺𑀦𑀺𑀧𑁆𑀨𑀸𑀤𑁂𑀪𑀺 𑀏𑀢𑁂𑀦𑀸𑀢𑀺 𑀓𑀭𑀡𑀁, 𑀓𑀺𑀭𑀺𑀬𑀸𑀦𑀺𑀧𑁆𑀨𑀢𑁆𑀢𑀺𑀓𑀸𑀭𑀡𑀁. 𑀉𑀧𑀬𑀼𑀚𑁆𑀚𑀺𑀢𑀩𑁆𑀩𑁄 𑀓𑀺𑀭𑀺𑀬𑀸𑀬𑀸𑀢𑀺 𑀉𑀧𑀬𑁄𑀕𑁄, 𑀓𑀫𑁆𑀫𑀁, 𑀢𑀢𑁆𑀣 𑀯𑀘𑀦𑀁 𑀢𑀣𑀸. ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀘𑁄𑀤𑀦𑀁 𑀧𑀭𑀺𑀳𑀭𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀅𑀪𑀺𑀥𑀫𑁆𑀫𑀢𑀤𑀜𑁆𑀜𑀲𑀼𑀢𑁆𑀢𑀧𑀤𑀯𑀺𑀦𑀬𑁂𑀲𑀼. 𑀢𑀣𑀸𑀢𑀺 𑀪𑀼𑀫𑁆𑀫𑀯𑀘𑀦𑀓𑀭𑀡𑀯𑀘𑀦𑁂𑀳𑀺 𑀅𑀢𑁆𑀣𑀲𑀫𑁆𑀪𑀯𑀢𑁄 𑀘𑀸𑀢𑀺 𑀬𑁄𑀚𑁂𑀢𑀩𑁆𑀩𑀁, 𑀅𑀥𑀺𑀓𑀭𑀡𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀢𑁆𑀣𑀸𑀦𑀁, 𑀳𑁂𑀢𑀼𑀓𑀭𑀡𑀢𑁆𑀣𑀸𑀦𑀜𑁆𑀘 ¶ 𑀲𑀫𑁆𑀪𑀯𑀢𑁄𑀢𑀺 𑀅𑀢𑁆𑀣𑁄. 𑀇𑀥𑀸𑀢𑀺 𑀇𑀥𑀲𑁆𑀫𑀺𑀁 𑀲𑀼𑀢𑁆𑀢𑀧𑀤𑁂. 𑀅𑀜𑁆𑀜𑀣𑀸𑀢𑀺 𑀉𑀧𑀬𑁄𑀕𑀯𑀘𑀦𑁂𑀦. 𑀅𑀢𑁆𑀣𑀲𑀫𑁆𑀪𑀯𑀢𑁄𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑀲𑁆𑀲 𑀲𑀫𑁆𑀪𑀯𑀢𑁄.

‘‘𑀢𑀢𑁆𑀣 𑀳𑀻’’𑀢𑀺𑀆𑀤𑀺 𑀢𑀩𑁆𑀩𑀺𑀯𑀭𑀡𑀁. 𑀇𑀢𑁄𑀢𑀺 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀲𑀼𑀢𑁆𑀢𑀧𑀤𑀢𑁄. 𑀅𑀥𑀺𑀓𑀭𑀡𑀢𑁆𑀣𑁄𑀢𑀺 𑀆𑀥𑀸𑀭𑀢𑁆𑀣𑁄. 𑀪𑀯𑀦𑀁 𑀪𑀸𑀯𑁄, 𑀓𑀺𑀭𑀺𑀬𑀸, 𑀓𑀺𑀭𑀺𑀬𑀸𑀬 𑀓𑀺𑀭𑀺𑀬𑀦𑁆𑀢𑀭𑀮𑀓𑁆𑀔𑀡𑀁 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀁, 𑀢𑀤𑁂𑀯𑀢𑁆𑀣𑁄 𑀢𑀣𑀸. 𑀓𑁂𑀦 𑀲𑀫𑀬𑀢𑁆𑀣𑁂𑀦 𑀇𑀤𑀁 𑀅𑀢𑁆𑀣𑀤𑁆𑀯𑀬𑀁 𑀲𑀫𑁆𑀪𑀯𑀢𑀻𑀢𑀺 𑀅𑀦𑀼𑀬𑁄𑀕𑁂 𑀲𑀢𑀺 𑀢𑀤𑀢𑁆𑀣𑀤𑁆𑀯𑀬𑀲𑀫𑁆𑀪𑀯𑀸𑀦𑀼𑀭𑀽𑀧𑁂𑀦 𑀲𑀫𑀬𑀢𑁆𑀣𑁂𑀦, 𑀢𑀁 𑀤𑀴𑁆𑀳𑀁 𑀓𑀭𑁄𑀦𑁆𑀢𑁄 ‘‘𑀅𑀥𑀺𑀓𑀭𑀡𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀧𑀤𑀢𑁆𑀣𑀢𑁄𑀬𑁂𑀯 𑀳𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀤𑁆𑀯𑀬𑀁 𑀲𑀺𑀤𑁆𑀥𑀁, 𑀯𑀺𑀪𑀢𑁆𑀢𑀺 𑀧𑀦 𑀚𑁄𑀢𑀓𑀫𑀢𑁆𑀢𑀸. 𑀢𑀢𑁆𑀣 𑀓𑀸𑀮𑀲𑀗𑁆𑀔𑀸𑀢𑁄, 𑀓𑀸𑀮𑀲𑀤𑁆𑀤𑀲𑁆𑀲 𑀯𑀸 𑀅𑀢𑁆𑀣𑁄 𑀬𑀲𑁆𑀲𑀸𑀢𑀺 𑀓𑀸𑀮𑀢𑁆𑀣𑁄. 𑀲𑀫𑀽𑀳𑀲𑀗𑁆𑀔𑀸𑀢𑁄, ‘𑀲𑀫𑀽𑀳𑀲𑀤𑁆𑀤𑀲𑁆𑀲 𑀯𑀸 𑀅𑀢𑁆𑀣𑁄 𑀬𑀲𑁆𑀲𑀸𑀢𑀺 𑀲𑀫𑀽𑀳𑀢𑁆𑀣𑁄, 𑀓𑁄 𑀲𑁄? 𑀲𑀫𑀬𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑀸𑀮𑀢𑁆𑀣𑁄, 𑀲𑀫𑀽𑀳𑀢𑁆𑀣𑁄 𑀘 𑀲𑀫𑀬𑁄 𑀢𑀢𑁆𑀣 𑀅𑀪𑀺𑀥𑀫𑁆𑀫𑁂 𑀯𑀼𑀢𑁆𑀢𑀸𑀦𑀁 𑀨𑀲𑁆𑀲𑀸𑀤𑀺𑀥𑀫𑁆𑀫𑀸𑀦𑀁 𑀅𑀥𑀺𑀓𑀭𑀡𑀁 𑀆𑀥𑀸𑀭𑁄𑀢𑀺, 𑀬𑀲𑁆𑀫𑀺𑀁 𑀓𑀸𑀮𑁂, 𑀥𑀫𑁆𑀫𑀧𑀼𑀜𑁆𑀚𑁂 𑀯𑀸 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀓𑀸𑀮𑁂, 𑀥𑀫𑁆𑀫𑀧𑀼𑀜𑁆𑀚𑁂 𑀯𑀸 𑀨𑀲𑁆𑀲𑀸𑀤𑀬𑁄𑀧𑀺 𑀳𑁄𑀦𑁆𑀢𑀻𑀢𑀺 𑀅𑀬𑀜𑁆𑀳𑀺 𑀢𑀢𑁆𑀣 𑀅𑀢𑁆𑀣𑁄. 𑀦𑀦𑀼 𑀘𑀸𑀬𑀁 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑁄 𑀓𑀸𑀮𑁄, 𑀯𑁄𑀳𑀸𑀭𑀫𑀢𑁆𑀢𑁄 𑀘 𑀲𑀫𑀽𑀳𑁄, 𑀲𑁄 𑀓𑀣𑀁 𑀅𑀥𑀺𑀓𑀭𑀡𑀁 𑀲𑀺𑀬𑀸 𑀢𑀢𑁆𑀣 𑀯𑀼𑀢𑁆𑀢𑀥𑀫𑁆𑀫𑀸𑀦𑀦𑁆𑀢𑀺? 𑀦𑀸𑀬𑀁 𑀤𑁄𑀲𑁄. 𑀬𑀣𑀸 𑀳𑀺 𑀓𑀸𑀮𑁄 𑀲𑀬𑀁 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀲𑀪𑀸𑀯𑀥𑀫𑁆𑀫𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀆𑀥𑀸𑀭𑀪𑀸𑀯𑁂𑀦 𑀧𑀜𑁆𑀜𑀸𑀢𑁄, 𑀲𑀪𑀸𑀯𑀥𑀫𑁆𑀫𑀧𑀭𑀺𑀘𑁆𑀙𑀺𑀦𑁆𑀦𑁄 𑀘 𑀢𑀗𑁆𑀔𑀡𑀧𑁆𑀧𑀯𑀢𑁆𑀢𑀸𑀦𑀁 𑀢𑀢𑁄 𑀧𑀼𑀩𑁆𑀩𑁂, 𑀧𑀭𑀢𑁄 𑀘 𑀅𑀪𑀸𑀯𑀢𑁄 ‘‘𑀧𑀼𑀩𑁆𑀩𑀡𑁆𑀳𑁂𑀚𑀸𑀢𑁄, 𑀲𑀸𑀬𑀦𑁆𑀳𑁂 𑀆𑀕𑀘𑁆𑀙𑀢𑀻’’𑀢𑀺𑀆𑀤𑀻𑀲𑀼, 𑀲𑀫𑀽𑀳𑁄 𑀘 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀯𑀺𑀲𑀼𑀁 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑀢𑁆𑀢𑀸 𑀅𑀯𑀬𑀯𑀸𑀦𑀁 𑀆𑀥𑀸𑀭𑀪𑀸𑀯𑁂𑀦 𑀧𑀜𑁆𑀜𑀸𑀧𑀻𑀬𑀢𑀺 ‘‘𑀭𑀼𑀓𑁆𑀔𑁂 𑀲𑀸𑀔𑀸, 𑀬𑀯𑀭𑀸𑀲𑀺𑀬𑀁 𑀧𑀢𑁆𑀢𑀲𑀫𑁆𑀪𑀽𑀢𑁄’’𑀢𑀺𑀆𑀤𑀻𑀲𑀼, 𑀏𑀯𑀫𑀺𑀥𑀸𑀧𑀺 𑀲𑀪𑀸𑀯𑀥𑀫𑁆𑀫𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸, 𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑀢𑁆𑀢𑀸 𑀘 𑀢𑀤𑀼𑀪𑀬𑀁 𑀢𑀢𑁆𑀣 𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀥𑀺𑀓𑀭𑀡𑀪𑀸𑀯𑁂𑀦 𑀧𑀜𑁆𑀜𑀸𑀧𑀻𑀬𑀢𑀻𑀢𑀺.

‘‘𑀔𑀡𑀲𑀫𑀯𑀸𑀬𑀳𑁂𑀢𑀼𑀲𑀗𑁆𑀔𑀸𑀢𑀲𑁆𑀲𑀸’’𑀢𑀺𑀆𑀤𑀺 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀢𑁆𑀣𑀲𑀫𑁆𑀪𑀯𑀤𑀲𑁆𑀲𑀦𑀁. 𑀢𑀢𑁆𑀣 𑀔𑀡𑁄 𑀦𑀸𑀫 𑀅𑀝𑁆𑀞𑀓𑁆𑀔𑀡𑀯𑀺𑀦𑀺𑀫𑀼𑀢𑁆𑀢𑁄 𑀦𑀯𑀫𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑀓𑁆𑀔𑀡𑁄, 𑀬𑀸𑀦𑀺 𑀯𑀸 𑀧𑀦𑁂𑀢𑀸𑀦𑀺 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀸𑀦𑀺, 𑀬𑁂𑀳𑀺 ¶ 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀼𑀲𑁆𑀲𑀸𑀦𑀁 𑀘𑀢𑀼𑀘𑀓𑁆𑀓𑀁 𑀧𑀯𑀢𑁆𑀢𑀢𑀻’’𑀢𑀺 (𑀅. 𑀦𑀺. 𑁪.𑁩𑁧) 𑀏𑀢𑁆𑀣 ¶ 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑁄 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁄 𑀅𑀢𑁆𑀢𑀲𑀫𑁆𑀫𑀸𑀧𑀡𑀻𑀥𑀺 𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸𑀢𑀺 𑀘𑀢𑁆𑀢𑀸𑀭𑀺 𑀘𑀓𑁆𑀓𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀑𑀓𑀸𑀲𑀝𑁆𑀞𑁂𑀦 ‘‘𑀔𑀡𑁄’’𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀸𑀦𑀺 𑀳𑀺 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀑𑀓𑀸𑀲𑀪𑀽𑀢𑀸𑀦𑀺. 𑀲𑀫𑀯𑀸𑀬𑁄 𑀦𑀸𑀫 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁦𑁪; 𑁩.𑁪𑁨𑁧, 𑁪𑁨𑁫, 𑁪𑁨𑁬; 𑀲𑀁. 𑀦𑀺. 𑁨.𑁪𑁩, 𑁪𑁪; 𑀲𑀁. 𑀦𑀺. 𑁩.𑁬𑁦; 𑀓𑀣𑀸. 𑁪𑁬𑁫, 𑁪𑁬𑁭) 𑀦𑀺𑀤𑁆𑀤𑀺𑀝𑁆𑀞𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀲𑀸𑀥𑀸𑀭𑀡𑀨𑀮𑀦𑀺𑀧𑁆𑀨𑀸𑀤𑀓𑀢𑁆𑀢𑁂𑀦 𑀲𑀡𑁆𑀞𑀺𑀢𑀸 𑀘𑀓𑁆𑀔𑀼𑀭𑀽𑀧𑀸𑀤𑀺𑀧𑀘𑁆𑀘𑀬𑀲𑀸𑀫𑀕𑁆𑀕𑀻. 𑀘𑀓𑁆𑀔𑀼𑀭𑀽𑀧𑀸𑀤𑀻𑀦𑀜𑁆𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺 𑀲𑀸𑀥𑀸𑀭𑀡𑀨𑀮𑀁. 𑀳𑁂𑀢𑀼 𑀦𑀸𑀫 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀚𑀦𑀓𑀳𑁂𑀢𑀼. 𑀬𑀣𑀸𑀯𑀼𑀢𑁆𑀢𑀲𑁆𑀲 𑀔𑀡𑀲𑀗𑁆𑀔𑀸𑀢𑀲𑁆𑀲, 𑀲𑀫𑀯𑀸𑀬𑀲𑀗𑁆𑀔𑀸𑀢𑀲𑁆𑀲, 𑀳𑁂𑀢𑀼𑀲𑀗𑁆𑀔𑀸𑀢𑀲𑁆𑀲 𑀘 𑀲𑀫𑀬𑀲𑁆𑀲 𑀲𑀢𑁆𑀢𑀸𑀲𑀗𑁆𑀔𑀸𑀢𑁂𑀦 𑀪𑀸𑀯𑁂𑀦 𑀢𑁂𑀲𑀁 𑀨𑀲𑁆𑀲𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀲𑀢𑁆𑀢𑀸𑀲𑀗𑁆𑀔𑀸𑀢𑁄 𑀪𑀸𑀯𑁄 𑀮𑀓𑁆𑀔𑀻𑀬𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 ‘‘𑀕𑀸𑀯𑀻𑀲𑀼 𑀤𑀼𑀬𑁆𑀳𑀫𑀸𑀦𑀸𑀲𑀼 𑀕𑀢𑁄, 𑀤𑀼𑀤𑁆𑀥𑀸𑀲𑀼 𑀆𑀕𑀢𑁄’’𑀢𑀺 𑀏𑀢𑁆𑀣 𑀤𑁄𑀳𑀦𑀓𑀺𑀭𑀺𑀬𑀸𑀬 𑀕𑀫𑀦𑀓𑀺𑀭𑀺𑀬𑀸 𑀮𑀓𑁆𑀔𑀻𑀬𑀢𑀺, 𑀏𑀯𑀫𑀺𑀥𑀸𑀧𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀲𑀫𑀬𑀲𑁆𑀲 𑀲𑀢𑁆𑀢𑀸𑀓𑀺𑀭𑀺𑀬𑀸𑀬 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑀺𑀭𑀺𑀬𑀸, 𑀨𑀲𑁆𑀲𑀸𑀤𑀻𑀦𑀁 𑀪𑀯𑀦𑀓𑀺𑀭𑀺𑀬𑀸 𑀘 𑀮𑀓𑁆𑀔𑀻𑀬𑀢𑀻𑀢𑀺. 𑀦𑀦𑀼 𑀘𑁂𑀢𑁆𑀣 𑀲𑀢𑁆𑀢𑀸𑀓𑀺𑀭𑀺𑀬𑀸 𑀅𑀯𑀺𑀚𑁆𑀚𑀫𑀸𑀦𑀸𑀯, 𑀓𑀣𑀁 𑀢𑀸𑀬 𑀮𑀓𑁆𑀔𑀻𑀬𑀢𑀻𑀢𑀺? 𑀲𑀘𑁆𑀘𑀁, 𑀢𑀣𑀸𑀧𑀺 ‘‘𑀬𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀘 𑀯𑀼𑀢𑁆𑀢𑁂 𑀲𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀫𑀸𑀦𑁄 𑀏𑀯𑀳𑁄𑀢𑀺 𑀅𑀜𑁆𑀜𑀓𑀺𑀭𑀺𑀬𑀸𑀲𑀫𑁆𑀩𑀦𑁆𑀥𑀸𑀪𑀸𑀯𑁂 𑀧𑀤𑀢𑁆𑀣𑀲𑁆𑀲 𑀲𑀢𑁆𑀢𑀸𑀯𑀺𑀭𑀳𑀸𑀪𑀸𑀯𑀢𑁄, 𑀢𑀲𑁆𑀫𑀸 𑀅𑀢𑁆𑀣𑀢𑁄 𑀕𑀫𑁆𑀬𑀫𑀸𑀦𑀸𑀬 𑀢𑀸𑀬 𑀲𑀢𑁆𑀢𑀸𑀓𑀺𑀭𑀺𑀬𑀸𑀬 𑀮𑀓𑁆𑀔𑀻𑀬𑀢𑀻𑀢𑀺. 𑀅𑀬𑀜𑁆𑀳𑀺 𑀢𑀢𑁆𑀣 𑀅𑀢𑁆𑀣𑁄 𑁋 𑀬𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑁂 𑀔𑀡𑁂, 𑀧𑀘𑁆𑀘𑀬𑀲𑀫𑀯𑀸𑀬𑁂, 𑀳𑁂𑀢𑀼𑀫𑁆𑀳𑀺 𑀯𑀸 𑀲𑀢𑀺 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂, 𑀧𑀘𑁆𑀘𑀬𑀲𑀫𑀯𑀸𑀬𑁂, 𑀳𑁂𑀢𑀼𑀫𑁆𑀳𑀺 𑀯𑀸 𑀲𑀢𑀺 𑀨𑀲𑁆𑀲𑀸𑀤𑀬𑁄𑀧𑀺 𑀳𑁄𑀦𑁆𑀢𑀻𑀢𑀺. 𑀅𑀬𑀁 𑀧𑀦 𑀅𑀢𑁆𑀣𑁄 𑀅𑀪𑀺𑀥𑀫𑁆𑀫𑁂𑀬𑁂𑀯 (𑀅𑀝𑁆𑀞𑀲𑀸. 𑀓𑀸𑀫𑀸𑀯𑀘𑀭𑀓𑀼𑀲𑀮𑀧𑀤𑀪𑀸𑀚𑀦𑀻𑀬𑁂) 𑀦𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑁄, 𑀬𑀣𑀸𑀭𑀳𑀫𑁂𑀲 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀲𑀼𑀢𑁆𑀢𑀧𑀤𑁂𑀲𑀽𑀢𑀺. 𑀢𑀲𑁆𑀫𑀸𑀢𑀺 𑀅𑀥𑀺𑀓𑀭𑀡𑀢𑁆𑀣𑀲𑁆𑀲, 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀢𑁆𑀣𑀲𑁆𑀲 𑀘 𑀲𑀫𑁆𑀪𑀯𑀢𑁄. 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀦𑁆𑀢𑀺 𑀢𑀤𑀼𑀪𑀬𑀢𑁆𑀣𑀲𑁆𑀲 𑀲𑀫𑀬𑀲𑀤𑁆𑀤𑀢𑁆𑀣𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀲𑁆𑀲𑁂𑀯 𑀪𑀼𑀫𑁆𑀫𑀯𑀘𑀦𑀯𑀲𑁂𑀦 𑀤𑀻𑀧𑀦𑀢𑁆𑀣𑀁. 𑀯𑀺𑀪𑀢𑁆𑀢𑀺𑀬𑁄 𑀳𑀺 𑀧𑀤𑀻𑀧𑁄 𑀯𑀺𑀬 𑀯𑀢𑁆𑀣𑀼𑀦𑁄 𑀯𑀺𑀚𑁆𑀚𑀫𑀸𑀦𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀚𑁄𑀢𑀓𑀸𑀢𑀺, 𑀅𑀬𑀫𑀢𑁆𑀣𑁄 𑀲𑀤𑁆𑀤𑀲𑀢𑁆𑀣𑁂𑀲𑀼 𑀧𑀸𑀓𑀝𑁄𑀬𑁂𑀯.

𑀳𑁂𑀢𑀼𑀅𑀢𑁆𑀣𑁄, 𑀓𑀭𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀻𑀢𑀺 ‘‘𑀅𑀦𑁆𑀦𑁂𑀦 𑀯𑀲𑀢𑀺, 𑀯𑀺𑀚𑁆𑀚𑀸𑀬 𑀯𑀲𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀳𑁂𑀢𑀼𑀅𑀢𑁆𑀣𑁄, ‘‘𑀨𑀭𑀲𑀼𑀦𑀸 𑀙𑀺𑀦𑁆𑀤𑀢𑀺, 𑀓𑀼𑀤𑀸𑀮𑁂𑀦 𑀔𑀡𑀢𑀻’’𑀢𑀺𑀆𑀤𑀻𑀲𑀼 ¶ 𑀯𑀺𑀬 𑀓𑀭𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀺. 𑀓𑀣𑀁 𑀧𑀦 𑀲𑀫𑁆𑀪𑀯𑀢𑀻𑀢𑀺 𑀆𑀳 ‘‘𑀬𑁄 𑀳𑀺 𑀲𑁄’’𑀢𑀺𑀆𑀤𑀺. 𑀯𑀺𑀦𑀬𑁂 (𑀧𑀸𑀭𑀸. 𑁨𑁦) 𑀆𑀕𑀢𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀯𑀢𑁆𑀣𑀼𑀯𑀲𑁂𑀦 𑀣𑁂𑀭𑀁 𑀫𑀭𑀺𑀬𑀸𑀤𑀁 𑀓𑀢𑁆𑀯𑀸 ‘‘𑀲𑀸𑀭𑀺𑀧𑀼𑀢𑁆𑀢𑀸𑀤𑀻𑀳𑀺𑀧𑀺 𑀤𑀼𑀯𑀺𑀜𑁆𑀜𑁂𑀬𑁆𑀬𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦 𑀓𑀭𑀡𑀪𑀽𑀢𑁂𑀦𑀸𑀢𑀺 𑀏𑀢𑁆𑀣 𑀧𑀦 𑀢𑀁𑀢𑀁𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑁄𑀯 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀳𑁂𑀢𑀼 𑀘𑁂𑀯 𑀓𑀭𑀡𑀜𑁆𑀘. 𑀢𑀣𑀸 𑀳𑀺 𑀬𑀤𑀸 𑀪𑀕𑀯𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀧𑀞𑀫𑀫𑁂𑀯 𑀢𑁂𑀲𑀁 𑀢𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀢𑀁 𑀢𑀁 𑀯𑀻𑀢𑀺𑀓𑁆𑀓𑀫𑀁 𑀅𑀧𑁂𑀓𑁆𑀔𑀫𑀸𑀦𑁄 𑀯𑀺𑀳𑀭𑀢𑀺 ¶ , 𑀢𑀤𑀸 𑀢𑀁 𑀢𑀁 𑀯𑀻𑀢𑀺𑀓𑁆𑀓𑀫𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀢𑀤𑀢𑁆𑀣𑀁 𑀯𑀲𑀢𑀻𑀢𑀺 𑀲𑀺𑀤𑁆𑀥𑁄 𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀪𑀸𑀯𑁄 ‘‘𑀅𑀦𑁆𑀦𑁂𑀦𑀯𑀲𑀢𑀻’’𑀢𑀺𑀆𑀤𑀻𑀲𑀼 𑀅𑀦𑁆𑀦𑀫𑀧𑁂𑀓𑁆𑀔𑀺𑀢𑁆𑀯𑀸 𑀢𑀤𑀢𑁆𑀣𑀁 𑀯𑀲𑀢𑀻𑀢𑀺𑀆𑀤𑀺𑀦𑀸 𑀓𑀸𑀭𑀡𑁂𑀦 𑀅𑀦𑁆𑀦𑀸𑀤𑀻𑀦𑀁 𑀳𑁂𑀢𑀼𑀪𑀸𑀯𑁄 𑀯𑀺𑀬. 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀓𑀸𑀮𑁂 𑀧𑀦 𑀢𑁂𑀦𑁂𑀯 𑀧𑀼𑀩𑁆𑀩𑀲𑀺𑀤𑁆𑀥𑁂𑀦 𑀯𑀻𑀢𑀺𑀓𑁆𑀓𑀫𑁂𑀦 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺, 𑀢𑀲𑁆𑀫𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀲𑀸𑀥𑀓𑀢𑀫𑀢𑁆𑀢𑀸 𑀓𑀭𑀡𑀪𑀸𑀯𑁄𑀧𑀺 𑀯𑀻𑀢𑀺𑀓𑁆𑀓𑀫𑀲𑁆𑀲𑁂𑀯 𑀲𑀺𑀤𑁆𑀥𑁄 ‘‘𑀅𑀲𑀺𑀦𑀸 𑀙𑀺𑀦𑁆𑀤𑀢𑀻’’𑀢𑀺𑀆𑀤𑀻𑀲𑀼 𑀅𑀲𑀺𑀦𑀸 𑀙𑀺𑀦𑁆𑀤𑀦𑀓𑀺𑀭𑀺𑀬𑀁 𑀲𑀸𑀥𑁂𑀢𑀻𑀢𑀺𑀆𑀤𑀺𑀦𑀸 𑀓𑀸𑀭𑀡𑁂𑀦 𑀅𑀲𑀺𑀆𑀤𑀻𑀦𑀁 𑀓𑀭𑀡𑀪𑀸𑀯𑁄 𑀯𑀺𑀬. 𑀏𑀯𑀁 𑀲𑀦𑁆𑀢𑁂𑀧𑀺 𑀯𑀻𑀢𑀺𑀓𑁆𑀓𑀫𑀁 𑀅𑀧𑁂𑀓𑁆𑀔𑀫𑀸𑀦𑁄 𑀢𑁂𑀦𑁂𑀯 𑀲𑀤𑁆𑀥𑀺𑀁 𑀢𑀦𑁆𑀦𑀺𑀲𑁆𑀲𑀺𑀢𑀫𑁆𑀧𑀺 𑀓𑀸𑀮𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀓𑀸𑀮𑀲𑁆𑀲𑀸𑀧𑀺 𑀇𑀥 𑀳𑁂𑀢𑀼𑀪𑀸𑀯𑁄 𑀯𑀼𑀢𑁆𑀢𑁄, 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀦𑁆𑀢𑁄 𑀘 𑀢𑀁 𑀢𑀁 𑀯𑀻𑀢𑀺𑀓𑁆𑀓𑀫𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑁂𑀦𑁂𑀯 𑀓𑀸𑀮𑁂𑀦 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀻𑀢𑀺 𑀯𑀻𑀢𑀺𑀓𑁆𑀓𑀫𑀦𑀺𑀲𑁆𑀲𑀬𑀲𑁆𑀲 𑀓𑀸𑀮𑀲𑁆𑀲𑀸𑀧𑀺 𑀓𑀭𑀡𑀪𑀸𑀯𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀓𑀸𑀮𑀲𑁆𑀲𑀸𑀧𑀺 𑀳𑁂𑀢𑀼𑀪𑀸𑀯𑁄, 𑀓𑀭𑀡𑀪𑀸𑀯𑁄 𑀘 𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦 𑀓𑀭𑀡𑀪𑀽𑀢𑁂𑀦𑀸’’𑀢𑀺, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀯𑀻𑀢𑀺𑀓𑁆𑀓𑀫𑁄𑀬𑁂𑀯 𑀳𑁂𑀢𑀼𑀪𑀽𑀢𑁄, 𑀓𑀭𑀡𑀪𑀽𑀢𑁄 𑀘. 𑀲𑁄 𑀳𑀺 𑀯𑀻𑀢𑀺𑀓𑁆𑀓𑀫𑀓𑁆𑀔𑀡𑁂 𑀳𑁂𑀢𑀼 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀓𑁆𑀔𑀡𑁂 𑀓𑀭𑀡𑀫𑁆𑀧𑀺 𑀳𑁄𑀢𑀻𑀢𑀺. 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀸𑀧𑀬𑀦𑁆𑀢𑁄𑀢𑀺 𑀯𑀻𑀢𑀺𑀓𑁆𑀓𑀫𑀁 𑀧𑀼𑀘𑁆𑀙𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀑𑀢𑀺𑀡𑁆𑀡𑀯𑀢𑁆𑀣𑀼𑀁 𑀢𑀁 𑀧𑀼𑀕𑁆𑀕𑀮𑀁 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸, 𑀯𑀺𑀕𑀭𑀳𑀺𑀢𑁆𑀯𑀸 𑀘 𑀢𑀁 𑀢𑀁 𑀯𑀢𑁆𑀣𑀼𑀑𑀢𑀺𑀡𑁆𑀡𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑁂𑀦𑁂𑀯 𑀓𑀸𑀮𑁂𑀦 𑀓𑀭𑀡𑀪𑀽𑀢𑁂𑀦 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀧𑁂𑀦𑁆𑀢𑁄. 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀜𑁆𑀘 𑀅𑀧𑁂𑀓𑁆𑀔𑀫𑀸𑀦𑁄𑀢𑀺 𑀢𑀢𑀺𑀬𑀧𑀸𑀭𑀸𑀚𑀺𑀓𑀸𑀤𑀻𑀲𑀼 (𑀧𑀸𑀭𑀸. 𑁧𑁬𑁨) 𑀯𑀺𑀬 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀳𑁂𑀢𑀼𑀪𑀽𑀢𑀁 𑀢𑀁 𑀢𑀁 𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑀲𑀫𑀬𑀁 𑀅𑀧𑁂𑀓𑁆𑀔𑀫𑀸𑀦𑁄 𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦 𑀪𑀕𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀳𑀸𑀲𑀻𑀢𑀺 𑀅𑀢𑁆𑀣𑁄.

‘‘𑀲𑀺𑀓𑁆𑀔𑀸𑀧𑀤𑀸𑀦𑀺 ¶ 𑀧𑀜𑁆𑀜𑀸𑀧𑀬𑀦𑁆𑀢𑁄, 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀜𑁆𑀘 𑀅𑀧𑁂𑀓𑁆𑀔𑀫𑀸𑀦𑁄’’𑀢𑀺 𑀇𑀤𑀁 𑀬𑀣𑀸𑀓𑁆𑀓𑀫𑀁 𑀓𑀭𑀡𑀪𑀸𑀯𑀲𑁆𑀲, 𑀳𑁂𑀢𑀼𑀪𑀸𑀯𑀲𑁆𑀲 𑀘 𑀲𑀫𑀢𑁆𑀣𑀦𑀯𑀘𑀦𑀁, 𑀢𑀲𑁆𑀫𑀸 𑀢𑀤𑀦𑀼𑀭𑀽𑀧𑀁 ‘‘𑀢𑁂𑀦𑀲𑀫𑀬𑁂𑀦 𑀓𑀭𑀡𑀪𑀽𑀢𑁂𑀦 𑀳𑁂𑀢𑀼𑀪𑀽𑀢𑁂𑀦𑀸’’𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩𑁂𑀧𑀺 𑀧𑀞𑀫𑀁 ‘‘𑀳𑁂𑀢𑀼𑀪𑀽𑀢𑁂𑀦𑀸’’𑀢𑀺 𑀉𑀧𑁆𑀧𑀝𑀺𑀧𑀸𑀝𑀺𑀯𑀘𑀦𑀁 𑀢𑀢𑁆𑀣 𑀳𑁂𑀢𑀼𑀪𑀸𑀯𑀲𑁆𑀲 𑀲𑀸𑀢𑀺𑀲𑀬𑀫𑀥𑀺𑀧𑁆𑀧𑁂𑀢𑀢𑁆𑀢𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀪𑀕𑀯𑀸 𑀳𑀺 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀦𑁆𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀢𑁆𑀣𑁂𑀭𑀲𑁆𑀲 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀳𑁂𑀢𑀼𑀪𑀽𑀢𑀁 𑀧𑀭𑀺𑀯𑀺𑀢𑀓𑁆𑀓𑀲𑀫𑀬𑀁 𑀅𑀧𑁂𑀓𑁆𑀔𑀫𑀸𑀦𑁄 𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦 𑀯𑀺𑀳𑀸𑀲𑀻’’𑀢𑀺 𑀢𑀻𑀲𑀼𑀧𑀺 𑀓𑀺𑀭 𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀁. ‘‘𑀓𑀺𑀁 𑀧𑀦𑁂𑀢𑁆𑀣 𑀬𑀼𑀢𑁆𑀢𑀺𑀘𑀺𑀦𑁆𑀢𑀸𑀬, 𑀆𑀘𑀭𑀺𑀬𑀲𑁆𑀲 𑀇𑀥 𑀓𑀫𑀯𑀘𑀦𑀺𑀘𑁆𑀙𑀸 𑀦𑀢𑁆𑀣𑀻𑀢𑀺 𑀏𑀯𑀫𑁂𑀢𑀁 𑀕𑀳𑁂𑀢𑀩𑁆𑀩𑀁 𑁋 𑀅𑀜𑁆𑀜𑀸𑀲𑀼𑀧𑀺 𑀳𑀺 𑀅𑀝𑁆𑀞𑀓𑀣𑀸𑀲𑀼 𑀅𑀬𑀫𑁂𑀯 𑀅𑀦𑀼𑀓𑁆𑀓𑀫𑁄 𑀯𑀼𑀢𑁆𑀢𑁄, 𑀦 𑀘 𑀢𑀸𑀲𑀼 ‘𑀢𑁂𑀦 𑀲𑀫𑀬𑁂𑀦 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀻’𑀢𑀺 𑀯𑀺𑀦𑀬𑀧𑀸𑀴𑀺𑀧𑀤𑁂 𑀳𑁂𑀢𑀼𑀅𑀢𑁆𑀣𑀲𑁆𑀲𑁂𑀯 𑀲𑀸𑀢𑀺𑀲𑀬𑀁 𑀅𑀥𑀺𑀧𑁆𑀧𑁂𑀢𑀪𑀸𑀯𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑁄 𑀅𑀯𑀺𑀲𑀬𑀢𑁆𑀢𑀸, 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀸𑀧𑀬𑀦𑁆𑀢𑁄 𑀳𑁂𑀢𑀼𑀪𑀽𑀢𑁂𑀦, 𑀓𑀭𑀡𑀪𑀽𑀢𑁂𑀦 𑀘 𑀲𑀫𑀬𑁂𑀦 𑀯𑀺𑀳𑀸𑀲𑀺, 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀜𑁆𑀘 𑀅𑀧𑁂𑀓𑁆𑀔𑀫𑀸𑀦𑁄 𑀳𑁂𑀢𑀼𑀪𑀽𑀢𑁂𑀦 𑀲𑀫𑀬𑁂𑀦 𑀯𑀺𑀳𑀸𑀲𑀻𑀢𑀺 𑀏𑀯𑀫𑁂𑀢𑁆𑀣 𑀬𑀣𑀸𑀮𑀸𑀪𑀁 𑀲𑀫𑁆𑀩𑀦𑁆𑀥𑀪𑀸𑀯𑀢𑁄 𑀏𑀯𑀁 𑀯𑀼𑀢𑁆𑀢𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀲𑁆𑀫𑀸𑀢𑀺 ¶ 𑀬𑀣𑀸𑀯𑀼𑀢𑁆𑀢𑀲𑁆𑀲 𑀤𑀼𑀯𑀺𑀥𑀲𑁆𑀲𑀸𑀧𑀺 𑀅𑀢𑁆𑀣𑀲𑁆𑀲 𑀲𑀫𑁆𑀪𑀯𑀢𑁄. 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀦𑀬𑁂𑀦 𑀓𑀭𑀡𑀯𑀘𑀦𑁂𑀦 𑀢𑀤𑀼𑀪𑀬𑀢𑁆𑀣𑀲𑁆𑀲 𑀚𑁄𑀢𑀦𑀢𑁆𑀣𑀁. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀯𑀺𑀦𑀬𑁂. 𑀏𑀢𑁆𑀣 𑀘 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀏𑀯 𑀯𑀻𑀢𑀺𑀓𑁆𑀓𑀫𑀲𑀫𑀬𑀲𑁆𑀲 𑀲𑀸𑀥𑀓𑀢𑀫𑀢𑁆𑀢𑀸 𑀢𑀲𑁆𑀲 𑀓𑀭𑀡𑀪𑀸𑀯𑁂 ‘‘𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀸𑀧𑀬𑀦𑁆𑀢𑁄’’𑀢𑀺 𑀅𑀚𑁆𑀛𑀸𑀳𑀭𑀺𑀢𑀧𑀤𑁂𑀦 𑀲𑀫𑁆𑀩𑀦𑁆𑀥𑁄, 𑀳𑁂𑀢𑀼𑀪𑀸𑀯𑁂 𑀧𑀦 𑀢𑀤𑀧𑁂𑀓𑁆𑀔𑀦𑀫𑀢𑁆𑀢𑀢𑁆𑀢𑀸 ‘‘𑀯𑀺𑀳𑀭𑀢𑀻’’𑀢𑀺 𑀧𑀤𑁂𑀦𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸𑀬𑁂𑀯 𑀳𑀺 𑀯𑀼𑀢𑁆𑀢𑀁 ‘‘𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦, 𑀓𑀭𑀡𑀪𑀽𑀢𑁂𑀦 𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀸𑀧𑀬𑀦𑁆𑀢𑁄, 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀜𑁆𑀘 𑀅𑀧𑁂𑀓𑁆𑀔𑀫𑀸𑀦𑁄 𑀪𑀕𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀳𑀸𑀲𑀻’’𑀢𑀺. 𑀓𑀭𑀡𑀜𑁆𑀳𑀺 𑀓𑀺𑀭𑀺𑀬𑀢𑁆𑀣𑀁, 𑀦 𑀳𑁂𑀢𑀼 𑀯𑀺𑀬 𑀓𑀺𑀭𑀺𑀬𑀸𑀓𑀸𑀭𑀡𑀁. 𑀳𑁂𑀢𑀼 𑀧𑀦 𑀓𑀺𑀭𑀺𑀬𑀸𑀓𑀸𑀭𑀡𑀁, 𑀦 𑀓𑀭𑀡𑀁 𑀯𑀺𑀬 𑀓𑀺𑀭𑀺𑀬𑀢𑁆𑀣𑁄𑀢𑀺.

‘‘𑀇𑀥 𑀧𑀦𑀸’’𑀢𑀺𑀆𑀤𑀺𑀦𑀸 𑀉𑀧𑀬𑁄𑀕𑀯𑀘𑀦𑀲𑁆𑀲 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑀲𑀫𑁆𑀪𑀯𑀤𑀲𑁆𑀲𑀦𑀁, 𑀅𑀘𑁆𑀘𑀦𑁆𑀢𑀫𑁂𑀯 𑀤𑀩𑁆𑀩𑀕𑀼𑀡𑀓𑀺𑀭𑀺𑀬𑀸𑀳𑀺 𑀲𑀁𑀬𑁄𑀕𑁄 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁄, 𑀦𑀺𑀭𑀦𑁆𑀢𑀭𑀫𑁂𑀯 𑀢𑁂𑀳𑀺 𑀲𑀁𑀬𑀼𑀢𑁆𑀢𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄𑀬𑁂𑀯𑀢𑁆𑀣𑁄 𑀢𑀣𑀸. 𑀏𑀯𑀁𑀚𑀸𑀢𑀺𑀓𑁂𑀢𑀺 𑀏𑀯𑀁𑀲𑀪𑀸𑀯𑁂. 𑀓𑀣𑀁 𑀲𑀫𑁆𑀪𑀯𑀢𑀻𑀢𑀺 𑀆𑀳 ‘‘𑀬𑀜𑁆𑀳𑀻’’𑀢𑀺𑀆𑀤𑀺. 𑀅𑀘𑁆𑀘𑀦𑁆𑀢𑀫𑁂𑀯𑀸𑀢𑀺 𑀆𑀭𑀩𑁆𑀪𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑁂𑀲𑀦𑀸𑀦𑀺𑀝𑁆𑀞𑀸𑀦𑀁, 𑀢𑀸𑀯 𑀏𑀓𑀁𑀲𑀫𑁂𑀯, 𑀦𑀺𑀭𑀦𑁆𑀢𑀭𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀓𑀭𑀼𑀡𑀸𑀯𑀺𑀳𑀸𑀭𑁂𑀦𑀸𑀢𑀺 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀓𑀭𑀼𑀡𑀸𑀯𑀺𑀳𑀸𑀭𑁂𑀦. 𑀢𑀣𑀸 𑀳𑀺 𑀓𑀭𑀼𑀡𑀸𑀦𑀺𑀤𑀸𑀦𑀢𑁆𑀢𑀸 ¶ 𑀤𑁂𑀲𑀦𑀸𑀬 𑀇𑀥 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 ‘‘𑀓𑀭𑀼𑀡𑀸𑀯𑀺𑀳𑀸𑀭𑁄’’𑀢𑀺 𑀯𑀼𑀢𑁆𑀢𑀸, 𑀦 𑀧𑀦 𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑁄. 𑀦 𑀳𑀺 𑀤𑁂𑀲𑀦𑀸𑀓𑀸𑀮𑁂 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀯𑀺𑀲𑀬𑀲𑁆𑀲 𑀤𑁂𑀲𑀦𑀸𑀜𑀸𑀡𑀲𑁆𑀲 𑀲𑀢𑁆𑀢𑀯𑀺𑀲𑀬𑀸𑀬 𑀫𑀳𑀸𑀓𑀭𑀼𑀡𑀸𑀬 𑀲𑀳𑀼𑀧𑁆𑀧𑀢𑁆𑀢𑀺 𑀲𑀫𑁆𑀪𑀯𑀢𑀺 𑀪𑀺𑀦𑁆𑀦𑀯𑀺𑀲𑀬𑀢𑁆𑀢𑀸, 𑀢𑀲𑁆𑀫𑀸 𑀓𑀭𑀼𑀡𑀸𑀬 𑀧𑀯𑀢𑁆𑀢𑁄 𑀯𑀺𑀳𑀸𑀭𑁄𑀢𑀺 𑀓𑀢𑁆𑀯𑀸 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀯𑀺𑀳𑀸𑀭𑁄 𑀇𑀥 ‘‘𑀓𑀭𑀼𑀡𑀸𑀯𑀺𑀳𑀸𑀭𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀫𑀸𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑀲𑀫𑁆𑀪𑀯𑀢𑁄. 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀦𑀬𑁂𑀦 𑀉𑀧𑀬𑁄𑀕𑀯𑀺𑀪𑀢𑁆𑀢𑀺𑀬𑀸 𑀢𑀤𑀢𑁆𑀣𑀲𑁆𑀲 𑀚𑁄𑀢𑀦𑀢𑁆𑀣𑀁 𑀉𑀧𑀬𑁄𑀕𑀦𑀺𑀤𑁆𑀤𑁂𑀲𑁄 𑀓𑀢𑁄 𑀬𑀣𑀸 ‘‘𑀫𑀸𑀲𑀁 𑀲𑀚𑁆𑀛𑀸𑀬𑀢𑀺, 𑀤𑀺𑀯𑀲𑀁 𑀪𑀼𑀜𑁆𑀚𑀢𑀻’’𑀢𑀺. 𑀢𑁂𑀦𑀸𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀅𑀪𑀺𑀥𑀫𑁆𑀫𑁂, 𑀇𑀢𑁄 𑀅𑀜𑁆𑀜𑁂𑀲𑀼 𑀘 𑀲𑀼𑀢𑁆𑀢𑀧𑀤𑁂𑀲𑀼 𑀪𑀼𑀫𑁆𑀫𑀯𑀘𑀦𑀲𑁆𑀲 𑀅𑀥𑀺𑀓𑀭𑀡𑀢𑁆𑀣𑁄, 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀢𑁆𑀣𑁄 𑀘, 𑀯𑀺𑀦𑀬𑁂 𑀓𑀭𑀡𑀯𑀘𑀦𑀲𑁆𑀲 𑀳𑁂𑀢𑀼𑀅𑀢𑁆𑀣𑁄, 𑀓𑀭𑀡𑀢𑁆𑀣𑁄 𑀘 𑀇𑀥 𑀉𑀧𑀬𑁄𑀕𑀯𑀘𑀦𑀲𑁆𑀲 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑁄 𑀲𑀫𑁆𑀪𑀯𑀢𑀺, 𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀢𑀦𑁆𑀢𑀺 𑀬𑀣𑀸 𑀯𑀼𑀢𑁆𑀢𑀲𑁆𑀲𑀢𑁆𑀣𑀲𑁆𑀲 𑀲𑀗𑁆𑀕𑀳𑀕𑀸𑀣𑀸𑀧𑀤𑀁 𑀅𑀜𑁆𑀜𑀢𑁆𑀭𑀸𑀢𑀺 𑀅𑀪𑀺𑀥𑀫𑁆𑀫𑁂 𑀇𑀢𑁄 𑀅𑀜𑁆𑀜𑁂𑀲𑀼 𑀲𑀼𑀢𑁆𑀢𑀧𑀤𑁂𑀲𑀼, 𑀯𑀺𑀦𑀬𑁂 𑀘. 𑀲𑀫𑀬𑁄𑀢𑀺 𑀲𑀫𑀬𑀲𑀤𑁆𑀤𑁄. 𑀲𑀤𑁆𑀤𑁂𑀬𑁂𑀯 𑀳𑀺 𑀯𑀺𑀪𑀢𑁆𑀢𑀺𑀧𑀭𑀸 𑀪𑀯𑀢𑀺𑀅𑀢𑁆𑀣𑁂 𑀅𑀲𑀫𑁆𑀪𑀯𑀢𑁄. 𑀲𑁄𑀢𑀺 𑀲𑁆𑀯𑁂𑀯 𑀲𑀫𑀬𑀲𑀤𑁆𑀤𑁄.

𑀏𑀯𑀁 𑀅𑀢𑁆𑀢𑀦𑁄 𑀫𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑁄𑀭𑀸𑀡𑀸𑀘𑀭𑀺𑀬𑀫𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀧𑁄𑀭𑀸𑀡𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑁄𑀭𑀸𑀡𑀸𑀢𑀺 𑀘 𑀧𑀼𑀭𑀺𑀫𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑀸. ‘‘𑀢𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀯𑀸…𑀧𑁂… ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀯𑀸 𑀏𑀲 𑀪𑁂𑀤𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀪𑀺𑀮𑀸𑀧𑀫𑀢𑁆𑀢𑀪𑁂𑀤𑁄𑀢𑀺 𑀯𑀘𑀦𑀫𑀢𑁆𑀢𑁂𑀦 𑀪𑁂𑀤𑁄 𑀯𑀺𑀲𑁂𑀲𑁄, 𑀦 𑀧𑀦 𑀅𑀢𑁆𑀣𑁂𑀦, 𑀢𑁂𑀦𑀸𑀳 ‘‘𑀲𑀩𑁆𑀩𑀢𑁆𑀣 𑀪𑀼𑀫𑁆𑀫𑀫𑁂𑀯𑀢𑁆𑀣𑁄’’𑀢𑀺, 𑀲𑀩𑁆𑀩𑁂𑀲𑀼𑀧𑀺 𑀅𑀢𑁆𑀣𑀢𑁄 𑀆𑀥𑀸𑀭𑁄 𑀏𑀯 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 ¶ . 𑀇𑀫𑀺𑀦𑀸 𑀘 𑀯𑀘𑀦𑁂𑀦 𑀲𑀼𑀢𑁆𑀢𑀯𑀺𑀦𑀬𑁂𑀲𑀼 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁄 𑀓𑀢𑁄, 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀉𑀧𑀬𑁄𑀕𑀓𑀭𑀡𑀯𑀺𑀪𑀢𑁆𑀢𑀺𑀬𑁄 𑀲𑀺𑀤𑁆𑀥𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀢𑀲𑁆𑀫𑀸’’𑀢𑀺𑀆𑀤𑀺𑀦𑀸 𑀢𑁂𑀲𑀁 𑀫𑀢𑀺𑀤𑀲𑁆𑀲𑀦𑁂 𑀕𑀼𑀡𑀫𑀸𑀳.

𑀪𑀸𑀭𑀺𑀬𑀝𑁆𑀞𑁂𑀦 𑀕𑀭𑀼. 𑀢𑀤𑁂𑀯𑀢𑁆𑀣𑀁 𑀲𑀗𑁆𑀓𑁂𑀢𑀢𑁄 𑀲𑀫𑀢𑁆𑀣𑁂𑀢𑀺 ‘‘𑀕𑀭𑀼𑀁 𑀳𑀻’’𑀢𑀺𑀆𑀤𑀺𑀦𑀸 𑀲𑀗𑁆𑀓𑁂𑀢𑀯𑀺𑀲𑀬𑁄 𑀳𑀺 𑀲𑀤𑁆𑀤𑁄 𑀢𑀁𑀯𑀯𑀢𑁆𑀣𑀺𑀢𑁄𑀬𑁂𑀯 𑀘𑁂𑀲 𑀅𑀢𑁆𑀣𑀩𑁄𑀥𑀓𑁄𑀢𑀺. 𑀕𑀭𑀼𑀦𑁆𑀢𑀺 𑀕𑀭𑀼𑀓𑀸𑀢𑀩𑁆𑀩𑀁 𑀚𑀦𑀁. ‘‘𑀮𑁄𑀓𑁂’’𑀢𑀺 𑀇𑀫𑀺𑀦𑀸 𑀦 𑀓𑁂𑀯𑀮𑀁 𑀲𑀸𑀲𑀦𑁂𑀬𑁂𑀯, 𑀮𑁄𑀓𑁂𑀧𑀺 𑀕𑀭𑀼𑀓𑀸𑀢𑀩𑁆𑀩𑀝𑁆𑀞𑁂𑀦 𑀪𑀕𑀯𑀸𑀢𑀺 𑀲𑀗𑁆𑀓𑁂𑀢𑀲𑀺𑀤𑁆𑀥𑀻𑀢𑀺 𑀤𑀲𑁆𑀲𑁂𑀢𑀺. 𑀬𑀤𑀺 𑀕𑀭𑀼𑀓𑀸𑀢𑀩𑁆𑀩𑀝𑁆𑀞𑁂𑀦 𑀪𑀕𑀯𑀸, 𑀅𑀣 𑀅𑀬𑀫𑁂𑀯 𑀲𑀸𑀢𑀺𑀲𑀬𑀁 𑀪𑀕𑀯𑀸 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀣𑀸 𑀳𑀺 𑀮𑁄𑀓𑀦𑀸𑀣𑁄 𑀅𑀧𑀭𑀺𑀫𑀺𑀢𑀦𑀺𑀭𑀼𑀧𑀫𑀧𑁆𑀧𑀪𑀸𑀯𑀲𑀻𑀮𑀸𑀤𑀺𑀕𑀼𑀡𑀯𑀺𑀲𑁂𑀲𑀲𑀫𑀗𑁆𑀕𑀺𑀢𑀸𑀬, 𑀲𑀩𑁆𑀩𑀸𑀦𑀢𑁆𑀣𑀧𑀭𑀺𑀳𑀸𑀭𑀧𑀼𑀩𑁆𑀩𑀗𑁆𑀕𑀫𑀸𑀬 ¶ 𑀦𑀺𑀭𑀯𑀲𑁂𑀲𑀳𑀺𑀢𑀲𑀼𑀔𑀯𑀺𑀥𑀸𑀦𑀢𑀧𑁆𑀧𑀭𑀸𑀬 𑀦𑀺𑀭𑀢𑀺𑀲𑀬𑀸𑀬 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀧𑀚𑀸𑀬 𑀅𑀘𑁆𑀘𑀦𑁆𑀢𑀼𑀧𑀓𑀸𑀭𑀺𑀢𑀸𑀬 𑀘 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀉𑀢𑁆𑀢𑀫𑀁 𑀕𑀸𑀭𑀯𑀝𑁆𑀞𑀸𑀦𑀦𑁆𑀢𑀺. 𑀦 𑀓𑁂𑀯𑀮𑀁 𑀮𑁄𑀓𑁂𑀬𑁂𑀯, 𑀅𑀣 𑀔𑁄 𑀲𑀸𑀲𑀦𑁂𑀧𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀧𑁄𑀭𑀸𑀡𑁂𑀳𑀻’’𑀢𑀺𑀆𑀤𑀺𑀦𑀸, 𑀧𑁄𑀭𑀸𑀡𑁂𑀳𑀻𑀢𑀺 𑀘 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀻𑀢𑀺 𑀅𑀢𑁆𑀣𑁄. 𑀲𑁂𑀝𑁆𑀞𑀯𑀸𑀘𑀓𑀯𑀘𑀦𑀫𑁆𑀧𑀺 𑀲𑁂𑀝𑁆𑀞𑀕𑀼𑀡𑀲𑀳𑀘𑀭𑀡𑀢𑁄 𑀲𑁂𑀝𑁆𑀞𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀪𑀕𑀯𑀸𑀢𑀺 𑀯𑀘𑀦𑀁 𑀲𑁂𑀝𑁆𑀞’’𑀦𑁆𑀢𑀺. 𑀯𑀼𑀘𑁆𑀘𑀢𑀺 𑀅𑀢𑁆𑀣𑁄, 𑀏𑀢𑁂𑀦𑀸𑀢𑀺 𑀳𑀺 𑀯𑀘𑀦𑀁, 𑀲𑀤𑁆𑀤𑁄. 𑀅𑀣 𑀯𑀸 𑀯𑀼𑀘𑁆𑀘𑀢𑀻𑀢𑀺 𑀯𑀘𑀦𑀁, 𑀅𑀢𑁆𑀣𑁄, 𑀢𑀲𑁆𑀫𑀸 𑀬𑁄 ‘‘𑀪𑀕𑀯𑀸’’𑀢𑀺 𑀯𑀘𑀦𑁂𑀦 𑀯𑀘𑀦𑀻𑀬𑁄 𑀅𑀢𑁆𑀣𑁄, 𑀲𑁄 𑀲𑁂𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀪𑀕𑀯𑀸𑀢𑀺 𑀯𑀘𑀦𑀫𑀼𑀢𑁆𑀢𑀫𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀕𑀸𑀭𑀯𑀬𑀼𑀢𑁆𑀢𑁄𑀢𑀺 𑀕𑀭𑀼𑀪𑀸𑀯𑀬𑀼𑀢𑁆𑀢𑁄 𑀕𑀭𑀼𑀕𑀼𑀡𑀬𑁄𑀕𑀢𑁆𑀢𑀸, 𑀲𑀸𑀢𑀺𑀲𑀬𑀁 𑀯𑀸 𑀕𑀭𑀼𑀓𑀭𑀡𑀸𑀭𑀳𑀢𑀸𑀬 𑀕𑀸𑀭𑀯𑀬𑀼𑀢𑁆𑀢𑁄, 𑀕𑀸𑀭𑀯𑀸𑀭𑀳𑁄𑀢𑀺 𑀅𑀢𑁆𑀣𑁄. 𑀬𑁂𑀦 𑀓𑀸𑀭𑀡𑀢𑁆𑀢𑀬𑁂𑀦 𑀲𑁄 𑀢𑀣𑀸𑀕𑀢𑁄 𑀕𑀭𑀼 𑀪𑀸𑀭𑀺𑀬𑀝𑁆𑀞𑁂𑀦, 𑀢𑁂𑀦 ‘‘𑀪𑀕𑀯𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀭𑀼𑀢𑀸𑀓𑀸𑀭𑀡𑀤𑀲𑁆𑀲𑀦𑀜𑁆𑀳𑁂𑀢𑀁 𑀧𑀤𑀢𑁆𑀢𑀬𑀁. ‘‘𑀲𑀺𑀧𑁆𑀧𑀸𑀤𑀺𑀲𑀺𑀓𑁆𑀔𑀸𑀧𑀓𑀸𑀧𑀺 𑀕𑀭𑀽𑀬𑁂𑀯 𑀦𑀸𑀫 𑀳𑁄𑀦𑁆𑀢𑀺, 𑀦 𑀘 𑀕𑀸𑀭𑀯𑀬𑀼𑀢𑁆𑀢𑀸, 𑀅𑀬𑀁 𑀧𑀦 𑀢𑀸𑀤𑀺𑀲𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀕𑀭𑀽𑀢𑀺 𑀓𑀢𑁆𑀯𑀸 ‘𑀕𑀸𑀭𑀯𑀬𑀼𑀢𑁆𑀢𑁄’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀓𑁂𑀘𑀺. 𑀏𑀯𑀁 𑀲𑀢𑀺 𑀢𑀤𑁂𑀢𑀁 𑀯𑀺𑀲𑁂𑀲𑀦𑀧𑀤𑀫𑀢𑁆𑀢𑀁, 𑀧𑀼𑀭𑀺𑀫𑀧𑀤𑀤𑁆𑀯𑀬𑀫𑁂𑀯 𑀓𑀸𑀭𑀡𑀤𑀲𑁆𑀲𑀦𑀁 𑀲𑀺𑀬𑀸.

𑀅𑀧𑀺𑀘𑀸𑀢𑀺 𑀅𑀢𑁆𑀣𑀦𑁆𑀢𑀭𑀯𑀺𑀓𑀧𑁆𑀧𑀢𑁆𑀣𑁂 𑀦𑀺𑀧𑀸𑀢𑁄, 𑀅𑀧𑀭𑁄 𑀦𑀬𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑁋

‘‘𑀯𑀡𑁆𑀡𑀕𑀫𑁄 𑀯𑀡𑁆𑀡𑀯𑀺𑀧𑀭𑀺𑀬𑀸𑀬𑁄,

𑀤𑁆𑀯𑁂 𑀘𑀸𑀧𑀭𑁂 𑀯𑀡𑁆𑀡𑀯𑀺𑀓𑀸𑀭𑀦𑀸𑀲𑀸;

𑀥𑀸𑀢𑀽𑀦𑀫𑀢𑁆𑀣𑀸𑀢𑀺𑀲𑀬𑁂𑀦 𑀬𑁄𑀕𑁄,

𑀢𑀤𑀼𑀘𑁆𑀘𑀢𑁂 𑀧𑀜𑁆𑀘𑀯𑀺𑀥𑀸 𑀦𑀺𑀭𑀼𑀢𑁆𑀢𑀻’’𑀢𑀺. 𑁋

𑀯𑀼𑀢𑁆𑀢𑀁 𑀦𑀺𑀭𑀼𑀢𑁆𑀢𑀺𑀮𑀓𑁆𑀔𑀡𑀁 𑀕𑀳𑁂𑀢𑁆𑀯𑀸, ‘‘𑀧𑀺𑀲𑁄𑀤𑀭𑀸𑀤𑀻𑀦𑀺 𑀬𑀣𑁄𑀧𑀤𑀺𑀝𑁆𑀞’’𑀦𑁆𑀢𑀺 𑀯𑀼𑀢𑁆𑀢𑀲𑀤𑁆𑀤𑀦𑀬𑁂𑀦 𑀯𑀸 𑀧𑀺𑀲𑁄𑀤𑀭𑀸𑀤𑀺𑀆𑀓𑀢𑀺𑀕𑀡𑀧𑀓𑁆𑀔𑁂𑀧𑀮𑀓𑁆𑀔𑀡𑀁 ¶ 𑀕𑀳𑁂𑀢𑁆𑀯𑀸 𑀮𑁄𑀓𑀺𑀬 𑀮𑁄𑀓𑀼𑀢𑁆𑀢𑀭𑀲𑀼𑀔𑀸𑀪𑀺𑀦𑀺𑀩𑁆𑀩𑀢𑁆𑀢𑀓𑀁 𑀲𑀻𑀮𑀸𑀤𑀺𑀧𑀸𑀭𑀧𑁆𑀧𑀢𑁆𑀢𑀁 𑀪𑀸𑀕𑁆𑀬𑀫𑀲𑁆𑀲 𑀅𑀢𑁆𑀣𑀻𑀢𑀺 ‘‘𑀪𑀸𑀕𑁆𑀬𑀯𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀪𑀕𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀪𑀸𑀕𑁆𑀬𑀯𑀸’’𑀢𑀺. 𑀢𑀣𑀸 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀓𑀺𑀮𑁂𑀲𑀲𑀢𑀲𑀳𑀲𑁆𑀲𑀸𑀦𑀺, 𑀲𑀗𑁆𑀔𑁂𑀧𑀢𑁄 𑀯𑀸 𑀧𑀜𑁆𑀘𑀫𑀸𑀭𑁂 𑀅𑀪𑀜𑁆𑀚𑀻𑀢𑀺 ‘‘𑀪𑀕𑁆𑀕𑀯𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀪𑀕𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀪𑀕𑁆𑀕𑀯𑀸’’𑀢𑀺 𑀇𑀫𑀺𑀦𑀸. 𑀮𑁄𑀓𑁂 ¶ 𑀘 𑀪𑀕-𑀲𑀤𑁆𑀤𑁄 𑀇𑀲𑁆𑀲𑀭𑀺𑀬𑀥𑀫𑁆𑀫𑀬𑀲𑀲𑀺𑀭𑀻𑀓𑀸𑀫𑀧𑀬𑀢𑁆𑀢𑁂𑀲𑀼 𑀙𑀲𑀼 𑀥𑀫𑁆𑀫𑁂𑀲𑀼 𑀧𑀯𑀢𑁆𑀢𑀢𑀺, 𑀢𑁂 𑀘 𑀪𑀕𑀲𑀗𑁆𑀔𑀸𑀢𑀸 𑀥𑀫𑁆𑀫𑀸 𑀅𑀲𑁆𑀲 𑀲𑀦𑁆𑀢𑀻𑀢𑀺 𑀪𑀕𑀯𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀼𑀢𑁆𑀢𑁄 𑀪𑀕𑁂𑀳𑀺 𑀘𑀸’’𑀢𑀺 𑀯𑀼𑀢𑁆𑀢𑀁. 𑀓𑀼𑀲𑀮𑀸𑀤𑀻𑀳𑀺 𑀅𑀦𑁂𑀓𑀪𑁂𑀤𑁂𑀳𑀺 𑀲𑀩𑁆𑀩𑀥𑀫𑁆𑀫𑁂 𑀯𑀺𑀪𑀚𑀺 𑀯𑀺𑀪𑀚𑀺𑀢𑁆𑀯𑀸 𑀯𑀺𑀯𑀭𑀺𑀢𑁆𑀯𑀸 𑀤𑁂𑀲𑁂𑀲𑀻𑀢𑀺 ‘‘𑀯𑀺𑀪𑀢𑁆𑀢𑀯𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀪𑀕𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀯𑀺𑀪𑀢𑁆𑀢𑀯𑀸’’𑀢𑀺. 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂, 𑀓𑀸𑀬𑀘𑀺𑀢𑁆𑀢𑀉𑀧𑀥𑀺𑀯𑀺𑀯𑁂𑀓𑁂, 𑀲𑀼𑀜𑁆𑀜𑀢𑀸𑀦𑀺𑀫𑀺𑀢𑁆𑀢𑀸𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑁂, 𑀅𑀜𑁆𑀜𑁂 𑀘 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀪𑀚𑀺 𑀲𑁂𑀯𑀺 𑀩𑀳𑀼𑀮𑀫𑀓𑀸𑀲𑀻𑀢𑀺 ‘‘𑀪𑀢𑁆𑀢𑀯𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀪𑀕𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀪𑀢𑁆𑀢𑀯𑀸’’𑀢𑀺 𑀇𑀫𑀺𑀦𑀸. 𑀢𑀻𑀲𑀼 𑀪𑀯𑁂𑀲𑀼 𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀕𑀫𑀦𑀫𑀦𑁂𑀦 𑀯𑀦𑁆𑀢𑀁 𑀯𑀫𑀺𑀢𑀦𑁆𑀢𑀺 ‘‘𑀪𑀯𑁂𑀲𑀼 𑀯𑀦𑁆𑀢𑀕𑀫𑀦𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀪𑀯𑀲𑀤𑁆𑀤𑀢𑁄 𑀪-𑀓𑀸𑀭𑀁 𑀕𑀫𑀦𑀲𑀤𑁆𑀤𑀢𑁄 𑀕-𑀓𑀸𑀭𑀁 𑀯𑀦𑁆𑀢𑀲𑀤𑁆𑀤𑀢𑁄 𑀯-𑀓𑀸𑀭𑀁 𑀆𑀤𑀸𑀬, 𑀢𑀲𑁆𑀲 𑀘 𑀤𑀻𑀖𑀁 𑀓𑀢𑁆𑀯𑀸 𑀯𑀡𑁆𑀡𑀯𑀺𑀧𑀭𑀺𑀬𑀸𑀬𑁂𑀦 ‘‘𑀪𑀕𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀦𑁆𑀢𑀕𑀫𑀦𑁄 𑀪𑀯𑁂𑀲𑀽’’𑀢𑀺 𑀯𑀼𑀢𑁆𑀢𑀁. ‘‘𑀬𑀢𑁄 𑀪𑀸𑀕𑁆𑀬𑀯𑀸, 𑀢𑀢𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀅𑀲𑁆𑀲 𑀧𑀤𑀲𑁆𑀲𑀸𑀢𑀺 ‘‘𑀪𑀕𑀯𑀸’’𑀢𑀺 𑀧𑀤𑀲𑁆𑀲. 𑀯𑀺𑀢𑁆𑀣𑀸𑀭𑀢𑁆𑀣𑁄𑀢𑀺 𑀯𑀺𑀢𑁆𑀣𑀸𑀭𑀪𑀽𑀢𑁄 𑀅𑀢𑁆𑀣𑁄. ‘‘𑀲𑁄 𑀘𑀸’’𑀢𑀺𑀆𑀤𑀺𑀦𑀸 𑀕𑀦𑁆𑀣𑀫𑀳𑀢𑁆𑀢𑀁 𑀧𑀭𑀺𑀳𑀭𑀢𑀺. 𑀯𑀼𑀢𑁆𑀢𑁄𑀬𑁂𑀯, 𑀦 𑀧𑀦 𑀇𑀥 𑀧𑀦 𑀯𑀢𑁆𑀢𑀩𑁆𑀩𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑁆𑀲 𑀇𑀫𑀺𑀲𑁆𑀲𑀸 𑀅𑀝𑁆𑀞𑀓𑀣𑀸𑀬 𑀏𑀓𑀤𑁂𑀲𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀧𑀺𑀘 𑀪𑀕𑁂 𑀯𑀦𑀺, 𑀯𑀫𑀻𑀢𑀺 𑀯𑀸 𑀪𑀕𑀯𑀸. 𑀲𑁄 𑀳𑀺 𑀪𑀕𑁂 𑀲𑀻𑀮𑀸𑀤𑀺𑀕𑀼𑀡𑁂 𑀯𑀦𑀺 𑀪𑀚𑀺 𑀲𑁂𑀯𑀺, 𑀢𑁂 𑀯𑀸 𑀪𑀕𑀲𑀗𑁆𑀔𑀸𑀢𑁂 𑀲𑀻𑀮𑀸𑀤𑀺𑀕𑀼𑀡𑁂 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑁂𑀲𑀼 ‘‘𑀓𑀣𑀁 𑀦𑀼 𑀔𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺 𑀯𑀦𑀺 𑀬𑀸𑀘𑀺 𑀧𑀢𑁆𑀣𑀬𑀺, 𑀏𑀯𑀁 𑀪𑀕𑁂 𑀯𑀦𑀻𑀢𑀺 𑀪𑀕𑀯𑀸, 𑀪𑀕𑁂 𑀯𑀸 𑀲𑀺𑀭𑀺𑀁, 𑀇𑀲𑁆𑀲𑀭𑀺𑀬𑀁, 𑀬𑀲𑀜𑁆𑀘 𑀯𑀫𑀺 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀙𑀟𑁆𑀟𑀬𑀺. 𑀢𑀣𑀸 𑀳𑀺 𑀪𑀕𑀯𑀸 𑀳𑀢𑁆𑀣𑀕𑀢𑀁 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀁, 𑀘𑀢𑀼𑀤𑀻𑀧𑀺𑀲𑁆𑀲𑀭𑀺𑀬𑀁, 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀲𑀦𑁆𑀦𑀺𑀲𑁆𑀲𑀬𑀜𑁆𑀘 𑀲𑀢𑁆𑀢𑀭𑀢𑀦𑀲𑀫𑀼𑀚𑁆𑀚𑀮𑀁 𑀬𑀲𑀁 𑀅𑀦𑀧𑁂𑀓𑁆𑀔𑁄 𑀙𑀟𑁆𑀟𑀬𑀺. 𑀅𑀣 𑀯𑀸 𑀪𑀸𑀦𑀺 𑀦𑀸𑀫 𑀦𑀓𑁆𑀔𑀢𑁆𑀢𑀸𑀦𑀺, 𑀢𑁂𑀳𑀺 𑀲𑀫𑀁 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀪𑀕𑀸 𑀆𑀓𑀸𑀭𑀲𑁆𑀲 𑀭𑀲𑁆𑀲𑀁 𑀓𑀢𑁆𑀯𑀸, 𑀲𑀺𑀦𑁂𑀭𑀼𑀬𑀼𑀕𑀦𑁆𑀥𑀭𑀸𑀤𑀺𑀕𑀢𑀸 𑀪𑀸𑀚𑀦𑀮𑁄𑀓𑀲𑁄𑀪𑀸. 𑀢𑀸 𑀪𑀕𑀸 𑀯𑀫𑀺 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀧𑀚𑀳𑀺, 𑀏𑀯𑀁 𑀪𑀕𑁂 𑀯𑀫𑀻𑀢𑀺 𑀪𑀕𑀯𑀸𑀢𑀺 𑀏𑀯𑀫𑀸𑀤𑀻𑀳𑀺 𑀢𑀢𑁆𑀣 𑀢𑀢𑁆𑀣𑀸𑀕𑀢𑀦𑀬𑁂𑀳𑀺 𑀘𑀲𑁆𑀲 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄, 𑀅𑀫𑁆𑀳𑁂𑀳𑀺 𑀧𑀦 𑀲𑁄 𑀕𑀦𑁆𑀣𑀪𑀻𑀭𑀼𑀚𑀦𑀸𑀦𑀼𑀕𑁆𑀕𑀳𑀡𑀢𑁆𑀣𑀁, 𑀕𑀦𑁆𑀣𑀕𑀭𑀼𑀢𑀸𑀧𑀭𑀺𑀳𑀭𑀡𑀢𑁆𑀣𑀜𑁆𑀘 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁄𑀢𑀺.

𑀏𑀯𑀫𑁂𑀢𑁂𑀲𑀁 𑀅𑀯𑀬𑀯𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀫𑀼𑀤𑀸𑀬𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀧𑀼𑀭𑀺𑀫𑀧𑀤𑀢𑁆𑀢𑀬𑀲𑁆𑀲 𑀲𑀫𑀼𑀤𑀸𑀬𑀢𑁆𑀣𑁂𑀦 𑀯𑀼𑀢𑁆𑀢𑀸𑀯𑀲𑁂𑀲𑁂𑀦 𑀢𑁂𑀲𑀫𑀢𑁆𑀣𑀸𑀦𑀁 𑀧𑀝𑀺𑀬𑁄𑀕𑀺𑀢𑀸𑀬 𑀢𑁂𑀦𑀸𑀧𑀺 𑀲𑀳 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀢𑀸𑀯𑀢𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀢𑀸𑀯𑀢𑀸𑀢𑀺 ¶ ¶ 𑀏𑀢𑀲𑁆𑀲 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺 𑀯𑀘𑀦𑁂𑀦 ‘‘𑀏𑀓𑀁 𑀲𑀫𑀬𑀁 𑀪𑀕𑀯𑀸’’ 𑀢𑀺𑀯𑀘𑀦𑁂𑀦𑀸𑀢𑀺 𑀇𑀫𑁂𑀳𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑀯𑀘𑀦𑁂. 𑀬𑀣𑀸𑀲𑀼𑀢𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄𑀢𑀺 𑀏𑀢𑁆𑀣 𑀅𑀦𑁆𑀢-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀢𑀣𑀸𑀤𑁂𑀲𑀺𑀢𑀢𑁆𑀢𑀸 𑀳𑀺 𑀧𑀘𑁆𑀘𑀓𑁆𑀔𑀁 𑀓𑀭𑁄𑀢𑀺 𑀦𑀸𑀫. 𑀏𑀲 𑀦𑀬𑁄 𑀅𑀧𑀭𑀢𑁆𑀣𑀸𑀧𑀺. ‘‘𑀬𑁄 𑀔𑁄 𑀆𑀦𑀦𑁆𑀤, 𑀫𑀬𑀸 𑀥𑀫𑁆𑀫𑁄 𑀘…𑀧𑁂… 𑀲𑀢𑁆𑀣𑀸’’𑀢𑀺 𑀯𑀘𑀦𑀢𑁄 𑀥𑀫𑁆𑀫𑀲𑁆𑀲 𑀲𑀢𑁆𑀣𑀼𑀪𑀸𑀯𑀧𑀭𑀺𑀬𑀸𑀬𑁄 𑀯𑀺𑀚𑁆𑀚𑀢𑁂𑀯𑀸𑀢𑀺 𑀓𑀢𑁆𑀯𑀸 ‘‘𑀥𑀫𑁆𑀫𑀲𑀭𑀻𑀭𑀁 𑀧𑀘𑁆𑀘𑀓𑁆𑀔𑀁 𑀓𑀭𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀓𑀸𑀬𑀦𑁆𑀢𑀺 𑀳𑀺 𑀪𑀕𑀯𑀢𑁄 𑀲𑀫𑁆𑀩𑀦𑁆𑀥𑀻𑀪𑀽𑀢𑀁 𑀥𑀫𑁆𑀫𑀲𑀗𑁆𑀔𑀸𑀢𑀁 𑀓𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀥𑀫𑁆𑀫𑀓𑀸𑀬𑁄𑀢𑀺 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀢𑀁 𑀧𑀦 𑀓𑀺𑀫𑀢𑁆𑀣𑀺𑀬𑀦𑁆𑀢𑀺 𑀆𑀳 ‘‘𑀢𑁂𑀦𑀸’’𑀢𑀺𑀆𑀤𑀺. 𑀢𑁂𑀦𑀸𑀢𑀺 𑀘 𑀢𑀸𑀤𑀺𑀲𑁂𑀦 𑀧𑀘𑁆𑀘𑀓𑁆𑀔𑀓𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀅𑀥𑀼𑀦𑀸 𑀯𑀓𑁆𑀔𑀫𑀸𑀦𑀲𑀼𑀢𑁆𑀢𑀁 𑀧𑀸𑀯𑀘𑀦𑀁 𑀧𑀓𑀝𑁆𑀞𑀁 𑀉𑀢𑁆𑀢𑀫𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁 𑀦𑀸𑀫. 𑀢𑀲𑁆𑀫𑀸 𑀢𑀼𑀫𑁆𑀳𑀸𑀓𑀁 𑀅𑀢𑀺𑀓𑁆𑀓𑀦𑁆𑀢𑀲𑀢𑁆𑀣𑀼𑀓𑀁 𑀅𑀢𑀻𑀢𑀲𑀢𑁆𑀣𑀼𑀓𑀪𑀸𑀯𑁄 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀪𑀸𑀯𑀧𑁆𑀧𑀥𑀸𑀦𑁄 𑀳𑀺 𑀅𑀬𑀁 𑀦𑀺𑀤𑁆𑀤𑁂𑀲𑁄, 𑀪𑀸𑀯𑀮𑁄𑀧𑁄 𑀯𑀸, 𑀇𑀢𑀭𑀣𑀸 𑀧𑀸𑀯𑀘𑀦𑀫𑁂𑀯 𑀅𑀦𑀢𑀺𑀓𑁆𑀓𑀦𑁆𑀢𑀲𑀢𑁆𑀣𑀼𑀓𑀁, 𑀲𑀢𑁆𑀣𑀼𑀅𑀤𑀲𑁆𑀲𑀦𑁂𑀦 𑀧𑀦 𑀉𑀓𑁆𑀓𑀡𑁆𑀞𑀺𑀢𑀲𑁆𑀲 𑀚𑀦𑀲𑁆𑀲 𑀅𑀢𑀺𑀓𑁆𑀓𑀦𑁆𑀢𑀲𑀢𑁆𑀣𑀼𑀓𑀪𑀸𑀯𑁄𑀢𑀺 𑀅𑀢𑁆𑀣𑁄 𑀆𑀧𑀚𑁆𑀚𑁂𑀬𑁆𑀬, 𑀏𑀯𑀜𑁆𑀘 𑀲𑀢𑀺 ‘‘𑀅𑀬𑀁 𑀯𑁄 𑀲𑀢𑁆𑀣𑀸𑀢𑀺 𑀲𑀢𑁆𑀣𑀼𑀅𑀤𑀲𑁆𑀲𑀦𑁂𑀦 𑀉𑀓𑁆𑀓𑀡𑁆𑀞𑀺𑀢𑀁 𑀚𑀦𑀁 𑀲𑀫𑀲𑁆𑀲𑀸𑀲𑁂𑀢𑀻’’ 𑀢𑀺𑀯𑀘𑀦𑁂𑀦 𑀲𑀳 𑀯𑀺𑀭𑁄𑀥𑁄 𑀪𑀯𑁂𑀬𑁆𑀬𑀸𑀢𑀺 𑀯𑀤𑀦𑁆𑀢𑀺. 𑀇𑀤𑀁 𑀧𑀸𑀯𑀘𑀦𑀁 𑀲𑀢𑁆𑀣𑀼𑀓𑀺𑀘𑁆𑀘𑀦𑀺𑀧𑁆𑀨𑀸𑀤𑀦𑁂𑀦 𑀦 𑀅𑀢𑀻𑀢𑀲𑀢𑁆𑀣𑀼𑀓𑀦𑁆𑀢𑀺 𑀧𑀦 𑀅𑀢𑁆𑀣𑁄. 𑀲𑀢𑁆𑀣𑀽𑀢𑀺 𑀓𑀫𑁆𑀫𑀢𑁆𑀣𑁂 𑀙𑀝𑁆𑀞𑀻, 𑀲𑀫𑀸𑀲𑀧𑀤𑀁 𑀯𑀸 𑀏𑀢𑀁 𑀲𑀢𑁆𑀣𑀼𑀅𑀤𑀲𑁆𑀲𑀦𑁂𑀦𑀸𑀢𑀺. 𑀉𑀓𑁆𑀓𑀡𑁆𑀞𑀦𑀁 𑀉𑀓𑁆𑀓𑀡𑁆𑀞𑁄, 𑀓𑀺𑀘𑁆𑀙𑀚𑀻𑀯𑀺𑀢𑀸. ‘‘𑀓𑀞 𑀓𑀺𑀘𑁆𑀙𑀚𑀻𑀯𑀦𑁂’’𑀢𑀺 𑀳𑀺 𑀯𑀤𑀦𑁆𑀢𑀺. 𑀢𑀫𑀺𑀢𑁄 𑀧𑀢𑁆𑀢𑁄𑀢𑀺 𑀉𑀓𑁆𑀓𑀡𑁆𑀞𑀺𑀢𑁄, 𑀅𑀦𑀪𑀺𑀭𑀢𑀺𑀬𑀸 𑀯𑀸 𑀧𑀻𑀴𑀺𑀢𑁄 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑁆𑀥𑀁 𑀓𑀡𑁆𑀞𑀁 𑀓𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀆𑀳𑀺𑀡𑁆𑀟𑀢𑀺, 𑀯𑀺𑀳𑀭𑀢𑀺 𑀘𑀸𑀢𑀺 𑀉𑀓𑁆𑀓𑀡𑁆𑀞𑀺𑀢𑁄 𑀦𑀺𑀭𑀼𑀢𑁆𑀢𑀺𑀦𑀬𑁂𑀦, 𑀢𑀁 𑀉𑀓𑁆𑀓𑀡𑁆𑀞𑀺𑀢𑀁. 𑀲𑀤𑁆𑀤𑀲𑀸𑀫𑀢𑁆𑀣𑀺𑀬𑀸𑀥𑀺𑀕𑀢𑀫𑀢𑁆𑀢𑁄 𑀘𑁂𑀲, 𑀯𑁄𑀳𑀸𑀭𑀢𑁄 𑀧𑀦 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀲𑀫𑀲𑁆𑀲𑀸𑀲𑁂𑀢𑀻𑀢𑀺 𑀅𑀲𑁆𑀲𑀸𑀲𑀁 𑀚𑀦𑁂𑀢𑀺.

𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀗𑁆𑀕𑀻𑀢𑀺𑀲𑀫𑀬𑁂. 𑀓𑀸𑀫𑀁 𑀯𑀺𑀚𑁆𑀚𑀫𑀸𑀦𑁂𑀧𑀺 𑀪𑀕𑀯𑀢𑀺 𑀏𑀯𑀁 𑀯𑀢𑁆𑀢𑀼𑀫𑀭𑀳𑀢𑀺, 𑀇𑀥 𑀧𑀦 𑀅𑀯𑀺𑀚𑁆𑀚𑀫𑀸𑀦𑁂𑀬𑁂𑀯 𑀢𑀲𑁆𑀫𑀺𑀁 𑀏𑀯𑀁 𑀯𑀤𑀢𑀺, 𑀢𑀲𑁆𑀫𑀸 𑀲𑀦𑁆𑀥𑀸𑀬𑀪𑀸𑀲𑀺𑀢𑀯𑀲𑁂𑀦 𑀢𑀤𑀢𑁆𑀣𑀁 𑀤𑀲𑁆𑀲𑁂𑀢𑀻𑀢𑀺 𑀆𑀳 ‘‘𑀅𑀯𑀺𑀚𑁆𑀚𑀫𑀸𑀦𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄’’𑀢𑀺. 𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀯𑀲𑁂𑀦 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀁. 𑀢𑁂𑀦𑀸𑀢𑀺 𑀢𑀣𑀸𑀲𑀸𑀥𑀦𑁂𑀦. 𑀏𑀯𑀁𑀯𑀺𑀥𑀲𑁆𑀲𑀸𑀢𑀺 𑀏𑀯𑀁𑀧𑀓𑀸𑀭𑀲𑁆𑀲, 𑀏𑀯𑀁𑀲𑀪𑀸𑀯𑀲𑁆𑀲𑀸𑀢𑀺𑀧𑀺 ¶ 𑀅𑀢𑁆𑀣𑁄. 𑀦𑀸𑀫-𑀲𑀤𑁆𑀤𑁄 𑀕𑀭𑀳𑀸𑀬𑀁 𑀦𑀺𑀧𑀸𑀢𑁄 ‘‘𑀅𑀢𑁆𑀣𑀺 𑀦𑀸𑀫 𑀆𑀦𑀦𑁆𑀤 𑀣𑁂𑀭𑀁 𑀪𑀺𑀓𑁆𑀔𑀼𑀁 𑀯𑀺𑀳𑁂𑀲𑀺𑀬𑀫𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀲𑁆𑀲𑀣𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁫.𑁧𑁬𑁬) 𑀯𑀺𑀬, 𑀢𑁂𑀦 𑀏𑀤𑀺𑀲𑁄 𑀅𑀧𑀺 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀓𑀸 𑀦𑀸𑀫 𑀓𑀣𑀸 𑀅𑀜𑁆𑀜𑁂𑀲𑀦𑁆𑀢𑀺 𑀕𑀭𑀳𑀢𑁆𑀣𑀁 𑀚𑁄𑀢𑁂𑀢𑀺. 𑀅𑀭𑀺𑀬𑀥𑀫𑁆𑀫𑀲𑁆𑀲𑀸𑀢𑀺 𑀅𑀭𑀺𑀬𑀸𑀦𑀁 𑀥𑀫𑁆𑀫𑀲𑁆𑀲, 𑀅𑀭𑀺𑀬𑀪𑀽𑀢𑀲𑁆𑀲 𑀯𑀸 𑀥𑀫𑁆𑀫𑀲𑁆𑀲. 𑀤𑀲𑀯𑀺𑀥𑀲𑁆𑀲 𑀓𑀸𑀬𑀩𑀮𑀲𑁆𑀲, 𑀜𑀸𑀡𑀩𑀮𑀲𑁆𑀲 𑀘 𑀯𑀲𑁂𑀦 𑀤𑀲𑀩𑀮𑀥𑀭𑁄. 𑀯𑀚𑀺𑀭𑀲𑁆𑀲 𑀦𑀸𑀫 𑀫𑀡𑀺𑀯𑀺𑀲𑁂𑀲𑀲𑁆𑀲 𑀲𑀗𑁆𑀖𑀸𑀢𑁄 𑀲𑀫𑀽𑀳𑁄 𑀏𑀓𑀕𑁆𑀖𑀦𑁄, 𑀢𑁂𑀦 𑀲𑀫𑀸𑀦𑁄 𑀓𑀸𑀬𑁄 𑀬𑀲𑁆𑀲𑀸𑀢𑀺 𑀢𑀣𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀯𑀚𑀺𑀭𑀲𑀗𑁆𑀖𑀸𑀢𑁄 𑀦𑀸𑀫 𑀦 𑀅𑀜𑁆𑀜𑁂𑀦 𑀫𑀡𑀺𑀦𑀸 ¶ 𑀯𑀸 𑀧𑀸𑀲𑀸𑀡𑁂𑀦 𑀯𑀸 𑀪𑁂𑀚𑁆𑀚𑁄, 𑀅𑀧𑀺 𑀢𑀼 𑀲𑁄𑀬𑁂𑀯 𑀅𑀜𑁆𑀜𑀁 𑀫𑀡𑀺𑀁 𑀯𑀸 𑀧𑀸𑀲𑀸𑀡𑀁 𑀯𑀸 𑀪𑀺𑀦𑁆𑀤𑀢𑀺. 𑀢𑁂𑀦𑁂𑀯 𑀯𑀼𑀢𑁆𑀢𑀁 ‘‘𑀯𑀚𑀺𑀭𑀲𑁆𑀲 𑀦𑀢𑁆𑀣𑀺 𑀓𑁄𑀘𑀺 𑀅𑀪𑁂𑀚𑁆𑀚𑁄 𑀫𑀡𑀺 𑀯𑀸 𑀧𑀸𑀲𑀸𑀡𑁄 𑀯𑀸’’𑀢𑀺, 𑀏𑀯𑀁 𑀪𑀕𑀯𑀸𑀧𑀺 𑀓𑁂𑀦𑀘𑀺 𑀅𑀪𑁂𑀚𑁆𑀚𑀲𑀭𑀻𑀭𑁄. 𑀦 𑀳𑀺 𑀪𑀕𑀯𑀢𑁄 𑀭𑀽𑀧𑀓𑀸𑀬𑁂 𑀓𑁂𑀦𑀘𑀺 𑀅𑀦𑁆𑀢𑀭𑀸𑀬𑁄 𑀓𑀸𑀢𑀼𑀁 𑀲𑀓𑁆𑀓𑀸𑀢𑀺. 𑀦𑀸𑀫𑀲𑀤𑁆𑀤𑀲𑁆𑀲 𑀕𑀭𑀳𑀸𑀚𑁄𑀢𑀓𑀢𑁆𑀢𑀸 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀚𑁄𑀢𑀓𑁄 ‘‘𑀦 𑀓𑁂𑀯𑀮𑀁 𑀪𑀕𑀯𑀸𑀬𑁂𑀯, 𑀅𑀣 𑀔𑁄 𑀅𑀜𑁆𑀜𑁂𑀧𑀻’’𑀢𑀺. 𑀏𑀢𑁆𑀣 𑀘 𑀏𑀯𑀁𑀕𑀼𑀡𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀅𑀧𑀭𑀺𑀦𑀺𑀩𑁆𑀩𑀼𑀢𑀲𑀪𑀸𑀯𑁂𑀦 𑀪𑀯𑀺𑀢𑀼𑀁 𑀬𑀼𑀢𑁆𑀢𑁄𑀧𑀺 𑀏𑀲 𑀧𑀭𑀺𑀦𑀺𑀩𑁆𑀩𑀼𑀢𑁄 𑀏𑀯𑀸𑀢𑀺 𑀧𑀓𑀭𑀡𑀸𑀦𑀼𑀭𑀽𑀧𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀯’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀲𑀸 𑀧𑀢𑁆𑀣𑀦𑀸 𑀓𑁂𑀦 𑀚𑀦𑁂𑀢𑀩𑁆𑀩𑀸, 𑀦 𑀚𑀦𑁂𑀢𑀩𑁆𑀩𑀸 𑀏𑀯𑀸𑀢𑀺 𑀅𑀢𑁆𑀣𑁄. ‘‘𑀅𑀳𑀁 𑀘𑀺𑀭𑀁 𑀚𑀻𑀯𑀺𑀁, 𑀘𑀺𑀭𑀁 𑀚𑀻𑀯𑀸𑀫𑀺, 𑀘𑀺𑀭𑀁 𑀚𑀻𑀯𑀺𑀲𑁆𑀲𑀸𑀫𑀺, 𑀲𑀼𑀔𑀁 𑀚𑀻𑀯𑀺𑀁, 𑀲𑀼𑀔𑀁 𑀚𑀻𑀯𑀸𑀫𑀺, 𑀲𑀼𑀔𑀁 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺 𑀫𑀚𑁆𑀚𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄 𑀚𑀻𑀯𑀺𑀢𑀫𑀤𑁄 𑀦𑀸𑀫, 𑀢𑁂𑀦 𑀫𑀢𑁆𑀢𑁄 𑀧𑀫𑀢𑁆𑀢𑁄 𑀢𑀣𑀸. 𑀲𑀁𑀯𑁂𑀚𑁂𑀢𑀻𑀢𑀺 𑀲𑀁𑀯𑁂𑀕𑀁 𑀚𑀦𑁂𑀢𑀺, 𑀢𑀢𑁄𑀬𑁂𑀯 𑀅𑀲𑁆𑀲 𑀚𑀦𑀲𑁆𑀲 𑀲𑀤𑁆𑀥𑀫𑁆𑀫𑁂 𑀉𑀲𑁆𑀲𑀸𑀳𑀁 𑀚𑀦𑁂𑀢𑀺. 𑀲𑀁𑀯𑁂𑀚𑀦𑀜𑁆𑀳𑀺 𑀉𑀲𑁆𑀲𑀸𑀳𑀳𑁂𑀢𑀼 ‘‘𑀲𑀁𑀯𑀺𑀕𑁆𑀕𑁄 𑀬𑁄𑀦𑀺𑀲𑁄 𑀧𑀤𑀳𑀢𑀻’’𑀢𑀺 𑀯𑀘𑀦𑀢𑁄.

𑀤𑁂𑀲𑀦𑀸𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀯𑀓𑁆𑀔𑀫𑀸𑀦𑀲𑁆𑀲 𑀲𑀓𑀮𑀲𑀼𑀢𑁆𑀢𑀲𑁆𑀲 ‘‘𑀏𑀯’’𑀦𑁆𑀢𑀺 𑀦𑀺𑀤𑀲𑁆𑀲𑀦𑀢𑁄. 𑀲𑀸𑀯𑀓𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀲𑀼𑀡𑀦𑁆𑀢𑀧𑀼𑀕𑁆𑀕𑀮𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁂𑀦 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀪𑀕𑀯𑀢𑀸 𑀏𑀢𑀤𑀕𑁆𑀕𑁂 𑀞𑀧𑀺𑀢𑁂𑀦, 𑀧𑀜𑁆𑀘𑀲𑀼 𑀘 𑀓𑁄𑀲𑀮𑁆𑀮𑁂𑀲𑀼 𑀆𑀬𑀲𑁆𑀫𑀢𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀧𑀲𑀁𑀲𑀺𑀢𑁂𑀦 𑀫𑀬𑀸 𑀫𑀳𑀸𑀲𑀸𑀯𑀓𑁂𑀦 𑀲𑀼𑀢𑀁, 𑀢𑀜𑁆𑀘 𑀔𑁄 𑀲𑀬𑀫𑁂𑀯 𑀲𑀼𑀢𑀁 𑀦 𑀅𑀦𑀼𑀲𑁆𑀲𑀼𑀢𑀁, 𑀦 𑀘 𑀧𑀭𑀫𑁆𑀧𑀭𑀸𑀪𑀢𑀦𑁆𑀢𑀺 𑀅𑀢𑁆𑀣𑀲𑁆𑀲 𑀤𑀻𑀧𑀦𑀢𑁄. 𑀓𑀸𑀮𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀪𑀕𑀯𑀸𑀢𑀺𑀲𑀤𑀲𑀦𑁆𑀦𑀺𑀥𑀸𑀦𑁂 𑀧𑀬𑀼𑀢𑁆𑀢𑀲𑁆𑀲 𑀲𑀫𑀬𑀲𑀤𑁆𑀤𑀲𑁆𑀲 𑀩𑀼𑀤𑁆𑀥𑀼𑀧𑁆𑀧𑀸𑀤-𑀧𑀝𑀺𑀫𑀡𑁆𑀟𑀺𑀢-𑀲𑀫𑀬-𑀪𑀸𑀯-𑀤𑀻𑀧𑀦𑀢𑁄. 𑀩𑀼𑀤𑁆𑀥𑀼𑀧𑁆𑀧𑀸𑀤𑀧𑀭𑀫𑀸 𑀳𑀺 𑀓𑀸𑀮𑀲𑀫𑁆𑀧𑀤𑀸. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀓𑀧𑁆𑀧𑀓𑀲𑀸𑀬𑀓𑀮𑀺𑀬𑀼𑀕𑁂 ¶ , 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀅𑀳𑁄 𑀫𑀳𑀘𑁆𑀙𑀭𑀺𑀬𑀁;

𑀳𑀼𑀢𑀯𑀳𑀫𑀚𑁆𑀛𑁂 𑀚𑀸𑀢𑀁, 𑀲𑀫𑀼𑀤𑀺𑀢𑀫𑀓𑀭𑀦𑁆𑀤𑀫𑀭𑀯𑀺𑀦𑁆𑀤’’𑀦𑁆𑀢𑀺. (𑀤𑀻. 𑀦𑀺. 𑀝𑀻. 𑁧.𑁧; 𑀲𑀁. 𑀦𑀺. 𑀝𑀻. 𑁧.𑁧);

𑀢𑀲𑁆𑀲𑀸𑀬𑀫𑀢𑁆𑀣𑁄 𑁋 𑀓𑀧𑁆𑀧𑀲𑀗𑁆𑀔𑀸𑀢𑀓𑀸𑀮𑀲𑀜𑁆𑀘𑀬𑀲𑁆𑀲 𑀮𑁂𑀔𑀦𑀯𑀲𑁂𑀦 𑀧𑀯𑀢𑁆𑀢𑁂 𑀓𑀮𑀺𑀬𑀼𑀕𑀲𑀗𑁆𑀔𑀸𑀢𑁂 𑀲𑀓𑀭𑀸𑀚𑀲𑀫𑁆𑀫𑀢𑁂 𑀯𑀲𑁆𑀲𑀸𑀤𑀺𑀲𑀫𑀽𑀳𑁂 𑀚𑀸𑀢𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑀔𑀡𑀲𑀗𑁆𑀔𑀸𑀢𑁄 𑀤𑀺𑀦𑀲𑀫𑀽𑀳𑁄 𑀅𑀦𑁆𑀥𑀲𑁆𑀲 𑀧𑀩𑁆𑀩𑀢𑀸𑀭𑁄𑀳𑀦𑀫𑀺𑀯 𑀓𑀤𑀸𑀘𑀺 𑀧𑀯𑀢𑁆𑀢𑀦𑀝𑁆𑀞𑁂𑀦, 𑀅𑀘𑁆𑀙𑀭𑀁 𑀧𑀳𑀭𑀺𑀢𑀼𑀁 𑀬𑀼𑀢𑁆𑀢𑀝𑁆𑀞𑁂𑀦 𑀘 𑀫𑀳𑀘𑁆𑀙𑀭𑀺𑀬𑀁 𑀳𑁄𑀢𑀺. 𑀓𑀺𑀫𑀺𑀯 𑀚𑀸𑀢𑀦𑁆𑀢𑀺 𑀘𑁂? 𑀳𑀼𑀢𑀯𑀳𑀲𑀗𑁆𑀔𑀸𑀢𑀲𑁆𑀲 𑀧𑀸𑀯𑀓𑀲𑁆𑀲 𑀫𑀚𑁆𑀛𑁂 𑀲𑀫𑁆𑀫𑀸 𑀉𑀤𑀺𑀢𑀫𑀥𑀼𑀫𑀦𑁆𑀢𑀁 𑀅𑀭𑀯𑀺𑀦𑁆𑀤𑀲𑀗𑁆𑀔𑀸𑀢𑀁 𑀯𑀸𑀭𑀺𑀚𑀫𑀺𑀯 𑀚𑀸𑀢𑀦𑁆𑀢𑀺. 𑀤𑁂𑀲𑀓𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀕𑀼𑀡𑀯𑀺𑀲𑀺𑀝𑁆𑀞𑀲𑀢𑁆𑀢𑀼𑀢𑁆𑀢𑀫𑀕𑀸𑀭𑀯𑀸𑀥𑀺𑀯𑀘𑀦𑀢𑁄.

𑀏𑀯𑀁 𑀧𑀤𑀙𑀓𑁆𑀓𑀲𑁆𑀲 𑀧𑀤𑀸𑀦𑀼𑀓𑁆𑀓𑀫𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑁄 𑀅𑀢𑁆𑀣𑀯𑀡𑁆𑀡𑀦𑀁 𑀓𑀢𑁆𑀯𑀸 𑀇𑀤𑀸𑀦𑀺 ‘‘𑀅𑀦𑁆𑀢𑀭𑀸 𑀘 𑀭𑀸𑀚𑀕𑀳’’𑀦𑁆𑀢𑀺𑀆𑀤𑀻𑀦𑀁 ¶ 𑀧𑀤𑀸𑀦𑀫𑀢𑁆𑀣𑀯𑀡𑁆𑀡𑀦𑀁 𑀓𑀭𑁄𑀦𑁆𑀢𑁄 ‘‘𑀅𑀦𑁆𑀢𑀭𑀸 𑀘𑀸’’𑀢𑀺𑀆𑀤𑀺𑀫𑀸𑀳. 𑀅𑀦𑁆𑀢𑀭𑀸 𑀘 𑀭𑀸𑀚𑀕𑀳𑀁 𑀅𑀦𑁆𑀢𑀭𑀸 𑀘 𑀦𑀸𑀴𑀦𑁆𑀤𑀦𑁆𑀢𑀺 𑀏𑀢𑁆𑀣 𑀲𑀫𑀪𑀺𑀦𑀺𑀯𑀺𑀝𑁆𑀞𑁄 𑀅𑀦𑁆𑀢𑀭𑀸-𑀲𑀤𑁆𑀤𑁄 𑀤𑀺𑀲𑁆𑀲𑀢𑀺 𑀲𑀸𑀫𑀜𑁆𑀜𑀯𑀘𑀦𑀻𑀬𑀢𑁆𑀣𑀫𑀧𑁂𑀓𑁆𑀔𑀺𑀢𑁆𑀯𑀸 𑀧𑀓𑀭𑀡𑀸𑀤𑀺𑀲𑀸𑀫𑀢𑁆𑀣𑀺𑀬𑀸𑀤𑀺𑀕𑀢𑀢𑁆𑀣𑀫𑀦𑁆𑀢𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀧𑀦𑀲𑁆𑀲 𑀦𑀸𑀦𑀢𑁆𑀣𑀪𑀸𑀯𑁄 𑀧𑀬𑁄𑀕𑀢𑁄 𑀅𑀯𑀕𑀫𑀻𑀬𑀢𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀢𑀤𑀦𑁆𑀢𑀭’’𑀦𑁆𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀢𑀤𑀦𑁆𑀢𑀭𑀦𑁆𑀢𑀺 𑀢𑀁 𑀓𑀸𑀭𑀡𑀁. 𑀫𑀜𑁆𑀘 𑀢𑀜𑁆𑀘 𑀫𑀦𑁆𑀢𑁂𑀦𑁆𑀢𑀺, 𑀓𑀺𑀫𑀦𑁆𑀢𑀭𑀁 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀚𑁆𑀚𑀦𑁆𑀢𑀭𑀺𑀓𑀸𑀬𑀸𑀢𑀺 𑀯𑀺𑀚𑁆𑀚𑀼𑀦𑀺𑀘𑁆𑀙𑀭𑀡𑀓𑁆𑀔𑀡𑁂. 𑀥𑁄𑀯𑀦𑁆𑀢𑀻 𑀇𑀢𑁆𑀣𑀻 𑀅𑀤𑁆𑀤𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑁆𑀢𑀭𑀢𑁄𑀢𑀺 𑀳𑀤𑀬𑁂. 𑀓𑁄𑀧𑀸𑀢𑀺 𑀘𑀺𑀢𑁆𑀢𑀓𑀸𑀮𑀼𑀲𑁆𑀲𑀺𑀬𑀓𑀭𑀡𑀢𑁄 𑀘𑀺𑀢𑁆𑀢𑀧𑀓𑁄𑀧𑀸 𑀭𑀸𑀕𑀸𑀤𑀬𑁄. 𑀅𑀦𑁆𑀢𑀭𑀸 𑀯𑁄𑀲𑀸𑀦𑀦𑁆𑀢𑀺 𑀆𑀭𑀫𑁆𑀪𑀦𑀺𑀧𑁆𑀨𑀢𑁆𑀢𑀻𑀦𑀁 𑀯𑁂𑀫𑀚𑁆𑀛𑁂 𑀧𑀭𑀺𑀬𑁄𑀲𑀸𑀦𑀁 𑀆𑀧𑀸𑀤𑀺. 𑀅𑀧𑀺𑀘𑀸𑀢𑀺 𑀢𑀣𑀸𑀧𑀺, 𑀏𑀯𑀁 𑀧𑀪𑀯𑀲𑀫𑁆𑀧𑀦𑁆𑀦𑁂𑀧𑀻𑀢𑀺 𑀅𑀢𑁆𑀣𑁄. 𑀤𑁆𑀯𑀺𑀦𑁆𑀦𑀁 𑀫𑀳𑀸𑀦𑀺𑀭𑀬𑀸𑀦𑀦𑁆𑀢𑀺 𑀮𑁄𑀳𑀓𑀼𑀫𑁆𑀪𑀻𑀦𑀺𑀭𑀬𑁂 𑀲𑀦𑁆𑀥𑀸𑀬𑀸𑀳. 𑀅𑀦𑁆𑀢𑀭𑀺𑀓𑀸𑀬𑀸𑀢𑀺 𑀅𑀦𑁆𑀢𑀭𑁂𑀦. 𑀭𑀸𑀚𑀕𑀳𑀦𑀕𑀭𑀁 𑀓𑀺𑀭 𑀆𑀯𑀺𑀚𑁆𑀛𑀺𑀢𑁆𑀯𑀸 𑀫𑀳𑀸𑀧𑁂𑀢𑀮𑁄𑀓𑁄. 𑀢𑀢𑁆𑀣 𑀤𑁆𑀯𑀺𑀦𑁆𑀦𑀁 𑀫𑀳𑀸𑀮𑁄𑀳𑀓𑀼𑀫𑁆𑀪𑀻𑀦𑀺𑀭𑀬𑀸𑀦𑀁 𑀅𑀦𑁆𑀢𑀭𑁂𑀦 𑀅𑀬𑀁 𑀢𑀧𑁄𑀤𑀸 𑀦𑀤𑀻 𑀆𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀲𑀸 𑀓𑀼𑀣𑀺𑀢𑀸 𑀲𑀦𑁆𑀤𑀢𑀻𑀢𑀺. 𑀲𑁆𑀯𑀸𑀬𑀫𑀺𑀥 𑀯𑀺𑀯𑀭𑁂 𑀧𑀯𑀢𑁆𑀢𑀢𑀺 𑀢𑀤𑀜𑁆𑀜𑁂𑀲𑀫𑀲𑀫𑁆𑀪𑀯𑀢𑁄. 𑀏𑀢𑁆𑀣 𑀘 ‘‘𑀢𑀤𑀦𑁆𑀢𑀭𑀁 𑀓𑁄 𑀚𑀸𑀦𑁂𑀬𑁆𑀬, (𑀅. 𑀦𑀺. 𑁬.𑁪𑁪; 𑁧𑁦.𑁭𑁫) 𑀏𑀢𑁂𑀲𑀁 𑀅𑀦𑁆𑀢𑀭𑀸 𑀓𑀧𑁆𑀧𑀸, 𑀕𑀡𑀦𑀸𑀢𑁄 𑀅𑀲𑀗𑁆𑀔𑀺𑀬𑀸, (𑀩𑀼. 𑀯𑀁. 𑁨𑁮.𑁯) 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀁 𑀑𑀧𑀸𑀢𑁂𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁪𑁨𑁬; 𑀧𑀳𑀸. 𑀯. 𑁬𑁬; 𑀘𑀽𑀴𑀯. 𑁩𑁭𑁬) 𑀯𑀺𑀬 𑀓𑀸𑀭𑀡𑀯𑁂𑀫𑀚𑁆𑀛𑁂𑀲𑀼 𑀯𑀢𑁆𑀢𑀫𑀸𑀦𑀸 𑀅𑀦𑁆𑀢𑀭𑀸𑀲𑀤𑁆𑀤𑀸𑀬𑁂𑀯 𑀉𑀤𑀸𑀳𑀭𑀺𑀢𑀩𑁆𑀩𑀸 𑀲𑀺𑀬𑀼𑀁, 𑀦 𑀧𑀦 𑀘𑀺𑀢𑁆𑀢𑀔𑀡𑀯𑀺𑀯𑀭𑁂𑀲𑀼 𑀯𑀢𑁆𑀢𑀫𑀸𑀦𑀸 𑀅𑀦𑁆𑀢𑀭𑀺𑀓𑀅𑀦𑁆𑀢𑀭𑀲𑀤𑁆𑀤𑀸 ¶ . 𑀅𑀦𑁆𑀢𑀭𑀸𑀲𑀤𑁆𑀤𑀲𑁆𑀲 𑀳𑀺 𑀅𑀬𑀫𑀢𑁆𑀣𑀼𑀤𑁆𑀥𑀸𑀭𑁄𑀢𑀺. 𑀅𑀬𑀁 𑀧𑀦𑁂𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑀲𑀺𑀬𑀸 𑁋 𑀬𑁂𑀲𑀼 𑀅𑀢𑁆𑀣𑁂𑀲𑀼 𑀅𑀦𑁆𑀢𑀭𑀺𑀓𑀲𑀤𑁆𑀤𑁄, 𑀅𑀦𑁆𑀢𑀭𑀲𑀤𑁆𑀤𑁄 𑀘 𑀧𑀯𑀢𑁆𑀢𑀢𑀺, 𑀢𑁂𑀲𑀼 𑀅𑀦𑁆𑀢𑀭𑀸𑀲𑀤𑁆𑀤𑁄𑀧𑀻𑀢𑀺 𑀲𑀫𑀸𑀦𑀢𑁆𑀣𑀢𑁆𑀢𑀸 𑀅𑀦𑁆𑀢𑀭𑀸𑀲𑀤𑁆𑀤𑀢𑁆𑀣𑁂 𑀯𑀢𑁆𑀢𑀫𑀸𑀦𑁄 𑀅𑀦𑁆𑀢𑀭𑀺𑀓𑀲𑀤𑁆𑀤𑁄, 𑀅𑀦𑁆𑀢𑀭𑀲𑀤𑁆𑀤𑁄, 𑀘 𑀉𑀤𑀸𑀳𑀝𑁄𑀢𑀺. 𑀅𑀣 𑀯𑀸 𑀅𑀦𑁆𑀢𑀭𑀸𑀲𑀤𑁆𑀤𑁄𑀬𑁂𑀯 ‘‘𑀬𑀲𑁆𑀲𑀦𑁆𑀢𑀭𑀢𑁄’’𑀢𑀺 (𑀉𑀤𑀸. 𑁨𑁦) 𑀏𑀢𑁆𑀣 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀭𑀲𑁆𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑁄 𑁋

‘‘𑀬𑀲𑁆𑀲𑀦𑁆𑀢𑀭𑀢𑁄 𑀦 𑀲𑀦𑁆𑀢𑀺 𑀓𑁄𑀧𑀸,

𑀇𑀢𑀺𑀪𑀯𑀸𑀪𑀯𑀢𑀜𑁆𑀘 𑀯𑀻𑀢𑀺𑀯𑀢𑁆𑀢𑁄;

𑀢𑀁 𑀯𑀺𑀕𑀢𑀪𑀬𑀁 𑀲𑀼𑀔𑀺𑀁 𑀅𑀲𑁄𑀓𑀁,

𑀤𑁂𑀯𑀸 𑀦𑀸𑀦𑀼𑀪𑀯𑀦𑁆𑀢𑀺 𑀤𑀲𑁆𑀲𑀦𑀸𑀬𑀸’’𑀢𑀺. (𑀉𑀤𑀸. 𑁨𑁦); 𑁋

𑀳𑀺 𑀅𑀬𑀁 𑀉𑀤𑀸𑀦𑁂 𑀪𑀤𑁆𑀤𑀺𑀬𑀲𑀼𑀢𑁆𑀢𑁂 𑀕𑀸𑀣𑀸. 𑀲𑁄𑀬𑁂𑀯 𑀇𑀓-𑀲𑀤𑁆𑀤𑁂𑀦 𑀲𑀓𑀢𑁆𑀣𑀧𑀯𑀢𑁆𑀢𑁂𑀦 𑀧𑀤𑀁 𑀯𑀟𑁆𑀠𑁂𑀢𑁆𑀯𑀸 ‘‘𑀅𑀦𑁆𑀢𑀭𑀺𑀓𑀸𑀬𑀸’’𑀢𑀺 𑀘 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀉𑀤𑀸𑀳𑀭𑀡𑁄𑀤𑀸𑀳𑀭𑀺𑀢𑀩𑁆𑀩𑀸𑀦𑀫𑁂𑀢𑁆𑀣 𑀯𑀺𑀭𑁄𑀥𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀓𑀺𑀫𑀢𑁆𑀣𑀁 𑀅𑀢𑁆𑀣𑀯𑀺𑀲𑁂𑀲𑀦𑀺𑀬𑀫𑁄 𑀓𑀢𑁄𑀢𑀺 𑀆𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀦𑀦𑀼 𑀘𑁂𑀢𑁆𑀣 𑀉𑀧𑀬𑁄𑀕𑀯𑀘𑀦𑀫𑁂𑀯, 𑀅𑀣 𑀓𑀲𑁆𑀫𑀸 𑀲𑀫𑁆𑀩𑀦𑁆𑀥𑀻𑀬𑀢𑁆𑀣𑁄 𑀯𑀼𑀢𑁆𑀢𑁄, 𑀲𑀫𑁆𑀩𑀦𑁆𑀥𑀻𑀬𑀢𑁆𑀣𑁂 𑀯𑀸 𑀓𑀲𑁆𑀫𑀸 𑀉𑀧𑀬𑁄𑀕𑀯𑀘𑀦𑀁 𑀓𑀢𑀦𑁆𑀢𑀺 𑀅𑀦𑀼𑀬𑁄𑀕𑀲𑀫𑁆𑀪𑀯𑀢𑁄 𑀢𑀁 𑀧𑀭𑀺𑀳𑀭𑀺𑀢𑀼𑀁 ‘‘𑀅𑀦𑁆𑀢𑀭𑀸𑀲𑀤𑁆𑀤𑁂𑀦 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑁂𑀦 𑀲𑀫𑁆𑀩𑀦𑁆𑀥𑀻𑀬𑀢𑁆𑀣𑁂 𑀲𑀸𑀫𑀺𑀯𑀘𑀦𑀧𑁆𑀧𑀲𑀗𑁆𑀕𑁂 ¶ 𑀲𑀤𑁆𑀤𑀦𑁆𑀢𑀭𑀬𑁄𑀕𑁂𑀦 𑀮𑀤𑁆𑀥𑀫𑀺𑀤𑀁 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺, 𑀦 𑀓𑁂𑀯𑀮𑀁 𑀲𑀸𑀲𑀦𑁂𑀯, 𑀮𑁄𑀓𑁂𑀧𑀺 𑀏𑀯𑀫𑁂𑀯𑀺𑀤𑀁 𑀮𑀤𑁆𑀥𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀈𑀤𑀺𑀲𑁂𑀲𑀼 𑀘𑀸’’𑀢𑀺𑀆𑀤𑀺𑀫𑀸𑀳. 𑀯𑀺𑀲𑁂𑀲𑀬𑁄𑀕𑀢𑀸𑀤𑀲𑁆𑀲𑀦𑀫𑀼𑀔𑁂𑀦 𑀳𑀺 𑀅𑀬𑀫𑀢𑁆𑀣𑁄𑀧𑀺 𑀤𑀲𑁆𑀲𑀺𑀢𑁄. 𑀏𑀓𑁂𑀦𑀧𑀺 𑀅𑀦𑁆𑀢𑀭𑀸-𑀲𑀤𑁆𑀤𑁂𑀦 𑀬𑀼𑀢𑁆𑀢𑀢𑁆𑀢𑀸 𑀤𑁆𑀯𑁂 𑀉𑀧𑀬𑁄𑀕𑀯𑀘𑀦𑀸𑀦𑀺 𑀓𑀸𑀢𑀩𑁆𑀩𑀸𑀦𑀺. 𑀤𑁆𑀯𑀻𑀳𑀺 𑀧𑀦 𑀬𑁄𑀕𑁂 𑀓𑀸 𑀓𑀣𑀸𑀢𑀺 𑀅𑀢𑁆𑀣𑀲𑁆𑀲 𑀲𑀺𑀚𑁆𑀛𑀦𑀢𑁄. 𑀅𑀓𑁆𑀔𑀭𑀁 𑀘𑀺𑀦𑁆𑀢𑁂𑀦𑁆𑀢𑀺 𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀬𑀸𑀤𑀻𑀳𑀻𑀢𑀺 𑀅𑀓𑁆𑀔𑀭𑀘𑀺𑀦𑁆𑀢𑀓𑀸, 𑀲𑀤𑁆𑀤𑀯𑀺𑀤𑀽. 𑀅𑀓𑁆𑀔𑀭-𑀲𑀤𑁆𑀤𑁂𑀦 𑀘𑁂𑀢𑁆𑀣 𑀢𑀫𑁆𑀫𑀽𑀮𑀓𑀸𑀦𑀺 𑀧𑀤𑀸𑀤𑀻𑀦𑀺𑀧𑀺 𑀕𑀳𑁂𑀢𑀩𑁆𑀩𑀸𑀦𑀺. 𑀬𑀤𑀺𑀧𑀺 𑀲𑀤𑁆𑀤𑀢𑁄 𑀏𑀓𑀫𑁂𑀯 𑀬𑀼𑀚𑁆𑀚𑀦𑁆𑀢𑀺, 𑀅𑀢𑁆𑀣𑀢𑁄 𑀧𑀦 𑀲𑁄 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀬𑁄𑀚𑁂𑀢𑀩𑁆𑀩𑁄 𑀏𑀓𑀲𑁆𑀲𑀸𑀧𑀺 𑀧𑀤𑀲𑁆𑀲 𑀆𑀯𑀼𑀢𑁆𑀢𑀺𑀬𑀸𑀤𑀺𑀦𑀬𑁂𑀦 𑀅𑀦𑁂𑀓𑀥𑀸 𑀲𑀫𑁆𑀧𑀚𑁆𑀚𑀦𑀢𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀤𑀼𑀢𑀺𑀬𑀧𑀤𑁂𑀦𑀧𑀻’’𑀢𑀺𑀆𑀤𑀺𑀦𑀸. 𑀓𑁄 𑀧𑀦 𑀤𑁄𑀲𑁄 𑀅𑀬𑁄𑀚𑀺𑀢𑁂𑀢𑀺 𑀆𑀳 ‘‘𑀅𑀬𑁄𑀚𑀺𑀬𑀫𑀸𑀦𑁂 𑀉𑀧𑀬𑁄𑀕𑀯𑀘𑀦𑀁 𑀦 𑀧𑀸𑀧𑀼𑀡𑀸𑀢𑀻’’𑀢𑀺. 𑀤𑀼𑀢𑀺𑀬𑀧𑀤𑀁 𑀦 𑀧𑀸𑀧𑀼𑀡𑀸𑀢𑀻𑀢𑀺 𑀅𑀢𑁆𑀣𑁄 𑀲𑀤𑁆𑀤𑀦𑁆𑀢𑀭𑀬𑁄𑀕𑀯𑀲𑀸 𑀲𑀤𑁆𑀤𑁂𑀬𑁂𑀯 𑀲𑀸𑀫𑀺𑀯𑀘𑀦𑀧𑁆𑀧𑀲𑀗𑁆𑀕𑁂 𑀉𑀧𑀬𑁄𑀕𑀯𑀺𑀪𑀢𑁆𑀢𑀺𑀬𑀸 𑀇𑀘𑁆𑀙𑀺𑀢𑀢𑁆𑀢𑀸. 𑀲𑀤𑁆𑀤𑀸𑀥𑀺𑀓𑀸𑀭𑁄 𑀳𑀺 𑀯𑀺𑀪𑀢𑁆𑀢𑀺𑀧𑀬𑁄𑀕𑁄.

𑀅𑀤𑁆𑀥𑀸𑀦-𑀲𑀤𑁆𑀤𑁄 ¶ 𑀤𑀻𑀖𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀤𑀻𑀖𑀫𑀕𑁆𑀕’’𑀦𑁆𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀧𑀦 𑀲𑁄 𑀤𑀻𑀖𑁄 𑀦𑀸𑀫 𑀢𑀤𑀢𑁆𑀣𑀪𑀽𑀢𑁄𑀢𑀺 𑀘𑁄𑀤𑀦𑀫𑀧𑀦𑁂𑀢𑀺 ‘‘𑀅𑀤𑁆𑀥𑀸𑀦𑀕𑀫𑀦𑀲𑀫𑀬𑀲𑁆𑀲 𑀳𑀻’’𑀢𑀺𑀆𑀤𑀺𑀦𑀸. 𑀅𑀤𑁆𑀥𑀸𑀦𑀕𑀫𑀦𑀲𑀫𑀬𑀲𑁆𑀲 𑀯𑀺𑀪𑀗𑁆𑀕𑁂𑀢𑀺 𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀸𑀤𑀻𑀲𑀼 𑀅𑀤𑁆𑀥𑀸𑀦𑀕𑀫𑀦𑀲𑀫𑀬𑀲𑀤𑁆𑀤𑀲𑁆𑀲 𑀧𑀤𑀪𑀸𑀚𑀦𑀻𑀬𑀪𑀽𑀢𑁂 𑀯𑀺𑀪𑀗𑁆𑀕𑁂 (𑀧𑀸𑀘𑀺. 𑁨𑁧𑁭). 𑀅𑀟𑁆𑀠𑀬𑁄𑀚𑀦𑀫𑁆𑀧𑀺 𑀅𑀤𑁆𑀥𑀸𑀦𑀫𑀕𑁆𑀕𑁄, 𑀧𑀕𑁂𑀯 𑀢𑀤𑀼𑀢𑁆𑀢𑀭𑀺. 𑀅𑀟𑁆𑀠𑀫𑁂𑀯 𑀬𑁄𑀚𑀦𑀲𑁆𑀲 𑀅𑀟𑁆𑀠𑀬𑁄𑀚𑀦𑀁, 𑀤𑁆𑀯𑀺𑀕𑀸𑀯𑀼𑀢𑀫𑀢𑁆𑀢𑀁. 𑀇𑀥 𑀧𑀦 𑀘𑀢𑀼𑀕𑀸𑀯𑀼𑀢𑀧𑁆𑀧𑀫𑀸𑀡𑀁 𑀬𑁄𑀚𑀦𑀫𑁂𑀯, 𑀢𑀲𑁆𑀫𑀸 ‘‘𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑁄’’𑀢𑀺 𑀯𑀤𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑀳𑀦𑁆𑀢𑀲𑀤𑁆𑀤𑁄 𑀉𑀢𑁆𑀢𑀫𑀢𑁆𑀣𑁄, 𑀩𑀳𑁆𑀯𑀢𑁆𑀣𑁄 𑀘 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀫𑀳𑀢𑀸’’𑀢𑀺𑀆𑀤𑀺. 𑀕𑀼𑀡𑀫𑀳𑀢𑁆𑀢𑁂𑀦𑀸𑀢𑀺 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀕𑀼𑀡𑀫𑀳𑀦𑁆𑀢𑀪𑀸𑀯𑁂𑀦. 𑀲𑀗𑁆𑀔𑁆𑀬𑀸𑀫𑀳𑀢𑁆𑀢𑁂𑀦𑀸𑀢𑀺 𑀕𑀡𑀦𑀫𑀳𑀦𑁆𑀢𑀪𑀸𑀯𑁂𑀦. 𑀢𑀤𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀺 ‘‘𑀲𑁄 𑀳𑀻’’𑀢𑀺𑀆𑀤𑀺𑀦𑀸. 𑀲𑁄 𑀪𑀺𑀓𑁆𑀔𑀼𑀲𑀗𑁆𑀖𑁄𑀢𑀺 𑀇𑀥 𑀆𑀕𑀢𑁄 𑀢𑀤𑀸 𑀧𑀭𑀺𑀯𑀸𑀭𑀪𑀽𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁄. 𑀫𑀳𑀸𑀢𑀺 𑀉𑀢𑁆𑀢𑀫𑁄. 𑀯𑀸𑀓𑁆𑀬𑁂𑀧𑀺 𑀳𑀺 𑀢𑀫𑀺𑀘𑁆𑀙𑀦𑁆𑀢𑀺 𑀧𑀬𑁄𑀕𑀯𑀲𑀸. 𑀅𑀧𑁆𑀧𑀺𑀘𑁆𑀙𑀢𑀸𑀢𑀺 𑀦𑀺𑀮𑁆𑀮𑁄𑀪𑀢𑀸 𑀲𑀤𑁆𑀤𑁄 𑀘𑁂𑀢𑁆𑀣 𑀲𑀸𑀯𑀲𑁂𑀲𑁄, 𑀅𑀢𑁆𑀣𑁄 𑀧𑀦 𑀦𑀺𑀭𑀯𑀲𑁂𑀲𑁄. 𑀦 𑀳𑀺 ‘‘𑀅𑀧𑁆𑀧𑀮𑁄𑀪𑀢𑀸𑀢𑀺 𑀅𑀪𑀺𑀢𑁆𑀣𑀯𑀺𑀢𑀼𑀫𑀭𑀳𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀫𑀚𑁆𑀛𑀺𑀫𑀸𑀕𑀫𑀝𑀻𑀓𑀸𑀓𑀸𑀭𑁄 𑀧𑀦 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁄 𑀏𑀯𑀫𑀸𑀳 ‘‘𑀅𑀧𑁆𑀧𑀲𑀤𑁆𑀤𑀲𑁆𑀲 𑀧𑀭𑀺𑀢𑁆𑀢𑀧𑀭𑀺𑀬𑀸𑀬𑀁 𑀫𑀦𑀲𑀺 𑀓𑀢𑁆𑀯𑀸 ‘𑀩𑁆𑀬𑀜𑁆𑀚𑀦𑀁 𑀲𑀸𑀯𑀲𑁂𑀲𑀁 𑀯𑀺𑀬𑀸’𑀢𑀺 (𑀫𑀳𑀸𑀦𑀺. 𑀅𑀝𑁆𑀞. 𑁮𑁫) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀅𑀧𑁆𑀧𑀲𑀤𑁆𑀤𑁄 𑀧𑀦𑁂𑀢𑁆𑀣 ‘𑀅𑀪𑀸𑀯𑀢𑁆𑀣𑁄’ 𑀢𑀺𑀧𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁 ‘𑀅𑀧𑁆𑀧𑀸𑀩𑀸𑀥𑀢𑀜𑁆𑀘𑀲𑀜𑁆𑀚𑀸𑀦𑀸𑀫𑀻’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁨𑁫) 𑀯𑀺𑀬𑀸’’𑀢𑀺. 𑀲𑀗𑁆𑀔𑁆𑀬𑀸𑀬𑀧𑀺 𑀫𑀳𑀸𑀢𑀺 𑀕𑀡𑀦𑀸𑀬𑀧𑀺 𑀩𑀳𑀼 𑀅𑀳𑁄𑀲𑀺, ‘‘𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺 𑀧𑀤𑀸𑀯𑀢𑁆𑀣𑀺𑀓𑀦𑁆𑀢𑀯𑀘𑀦𑀯𑀲𑁂𑀦 𑀲𑀁𑀯𑀡𑁆𑀡𑁂𑀢𑀩𑁆𑀩𑀧𑀤𑀲𑁆𑀲 𑀙𑁂𑀤𑀦𑀫𑀺𑀯 𑀳𑁄𑀢𑀻𑀢𑀺 𑀢𑀤𑀧𑀭𑀸𑀫𑀲𑀺𑀢𑁆𑀯𑀸 ‘‘𑀢𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸’’𑀢𑀺 𑀧𑀼𑀦 𑀯𑀸𑀓𑁆𑀬𑀸𑀯𑀢𑁆𑀣𑀺𑀓𑀦𑁆𑀢𑀯𑀘𑀦𑀯𑀲𑁂𑀦 𑀲𑀁𑀯𑀡𑁆𑀡𑁂𑀢𑀩𑁆𑀩𑀧𑀤𑁂𑀦 𑀲𑀤𑀺𑀲𑀻𑀓𑀭𑀡𑀁. 𑀏𑀲𑀸 𑀳𑀺 𑀲𑀁𑀯𑀡𑁆𑀡𑀦𑀓𑀸𑀦𑀁 𑀧𑀓𑀢𑀺, 𑀬𑀤𑀺𑀤𑀁 𑀯𑀺𑀪𑀢𑁆𑀢𑀺𑀬𑀸𑀦𑀧𑁂𑀓𑁆𑀔𑀸𑀯𑀲𑁂𑀦 𑀬𑀣𑀸𑀭𑀳𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀧𑀤𑀢𑁆𑀣𑀁 ¶ 𑀲𑀁𑀯𑀡𑁆𑀡𑁂𑀢𑁆𑀯𑀸 𑀧𑀼𑀦 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀯𑀺𑀪𑀢𑁆𑀢𑀺𑀯𑀲𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀦𑀦𑁆𑀢𑀺. 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀢𑁆𑀢𑀸 𑀲𑀗𑁆𑀖𑁄𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑀲𑀗𑁆𑀖𑀸𑀢𑁂𑀦 𑀲𑀫𑀡𑀕𑀡𑁂𑀦𑀸’’𑀢𑀺. 𑀏𑀢𑁆𑀣 𑀧𑀦 ‘‘𑀬𑀸𑀬𑀁 𑀤𑀺𑀝𑁆𑀞𑀺 𑀅𑀭𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀸 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬, 𑀢𑀣𑀸𑀭𑀽𑀧𑀸𑀬 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁪, 𑁩𑁫𑁬; 𑀫. 𑀦𑀺. 𑁧.𑁪𑁯𑁨; 𑁩.𑁫𑁪; 𑀧𑀭𑀺. 𑁨𑁭𑁪) 𑀏𑀯𑀁 𑀯𑀼𑀢𑁆𑀢𑀸𑀬 𑀤𑀺𑀝𑁆𑀞𑀺𑀬𑀸. ‘‘𑀬𑀸𑀦𑀺 𑀢𑀸𑀦𑀺 𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀪𑀼𑀚𑀺𑀲𑁆𑀲𑀸𑀦𑀺 ¶ 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 𑀅𑀧𑀭𑀸𑀫𑀝𑁆𑀞𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺, 𑀢𑀣𑀸𑀭𑀽𑀧𑁂𑀲𑀼 𑀲𑀻𑀮𑁂𑀲𑀼 𑀲𑀻𑀮𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁩; 𑀫. 𑀦𑀺. 𑁧.𑁪𑁯𑁨; 𑁩.𑁫𑁪; 𑀅. 𑀦𑀺. 𑁬.𑁧𑁧; 𑀧𑀭𑀺. 𑁨𑁭𑁪) 𑀏𑀯𑀁 𑀯𑀼𑀢𑁆𑀢𑀸𑀦𑀜𑁆𑀘 𑀲𑀻𑀮𑀸𑀦𑀁 𑀲𑀸𑀫𑀜𑁆𑀜𑁂𑀦 𑀲𑀗𑁆𑀖𑀸𑀢𑁄 𑀲𑀗𑁆𑀖𑀝𑀺𑀢𑁄 𑀲𑀫𑁂𑀢𑁄𑀢𑀺 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑀲𑀗𑁆𑀖𑀸𑀢𑁄, 𑀲𑀫𑀡𑀕𑀡𑁄, 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑀲𑀗𑁆𑀖𑀸𑀝𑀲𑀗𑁆𑀔𑀸𑀢𑁂𑀦𑀸’’ 𑀢𑀺𑀧𑀺 𑀧𑀸𑀞𑁄. 𑀢𑀣𑀸 𑀲𑀗𑁆𑀔𑀸𑀢𑁂𑀦 𑀓𑀢𑀺𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀤𑀺𑀝𑁆𑀞𑀺𑀲𑀻𑀮𑀸𑀤𑀻𑀦𑀁 𑀦𑀺𑀬𑀢𑀲𑀪𑀸𑀯𑀢𑁆𑀢𑀸 𑀲𑁄𑀢𑀸𑀧𑀦𑁆𑀦𑀸𑀧𑀺 𑀅𑀜𑁆𑀜𑀫𑀜𑁆𑀜𑀁 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀸, 𑀧𑀕𑁂𑀯 𑀲𑀓𑀤𑀸𑀕𑀸𑀫𑀺𑀆𑀤𑀬𑁄, 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄’’𑀢𑀺, (𑀲𑀁. 𑀦𑀺. 𑁨.𑁪𑁧; 𑁫.𑁧𑁯𑁮, 𑁧𑁦𑁦𑁪) ‘‘𑀅𑀝𑁆𑀞𑀸𑀦𑀫𑁂𑀢𑀁 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀲𑀜𑁆𑀘𑀺𑀘𑁆𑀘𑀧𑀸𑀡𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 𑀘 𑀆𑀤𑀺. 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀳𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀤𑀽𑀭𑁂 𑀞𑀺𑀢𑀸𑀧𑀺 𑀅𑀢𑁆𑀢𑀦𑁄 𑀕𑀼𑀡𑀲𑀸𑀫𑀕𑁆𑀕𑀺𑀬𑀸 𑀲𑀁𑀳𑀢𑀢𑀸𑀬𑁂𑀯, ‘‘𑀢𑀣𑀸𑀭𑀽𑀧𑀸𑀬 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀺, (𑀫. 𑀦𑀺. 𑁧.𑁪𑁯𑁨) 𑀢𑀣𑀸𑀭𑀽𑀧𑁂𑀲𑀼 𑀲𑀻𑀮𑁂𑀲𑀼 𑀲𑀻𑀮𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻’’𑀢𑀺 (𑀫. 𑀦𑀺. 𑁧.𑁪𑁯𑁨) 𑀯𑀘𑀦𑀢𑁄 𑀧𑀦 𑀧𑀼𑀣𑀼𑀚𑁆𑀚𑀦𑀸𑀦𑀫𑁆𑀧𑀺 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀪𑀸𑀯𑁄 𑀮𑀩𑁆𑀪𑀢𑀺𑀬𑁂𑀯. 𑀲𑀤𑁆𑀥𑀺𑀁-𑀲𑀤𑁆𑀤𑁄 𑀏𑀓𑀢𑁄𑀢𑀺 𑀅𑀢𑁆𑀣𑁂 𑀦𑀺𑀧𑀸𑀢𑁄. 𑀧𑀜𑁆𑀘…𑀧𑁂… 𑀫𑀢𑁆𑀢𑀸𑀦𑀻𑀢𑀺 𑀧𑀜𑁆𑀘-𑀲𑀤𑁆𑀤𑁂𑀦 𑀫𑀢𑁆𑀢𑀲𑀤𑁆𑀤𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄 𑀯𑀼𑀢𑁆𑀢𑁄. 𑀏𑀢𑁂𑀲𑀦𑁆𑀢𑀺 𑀪𑀺𑀓𑁆𑀔𑀼𑀲𑀢𑀸𑀦𑀁. 𑀧𑀼𑀦 𑀧𑀜𑁆𑀘 𑀫𑀢𑁆𑀢𑀸 𑀧𑀫𑀸𑀡𑀸𑀢𑀺 𑀩𑁆𑀬𑀸𑀲𑁄, 𑀦𑀺𑀓𑀸𑀭𑀮𑁄𑀧𑁄 𑀘𑁂𑀢𑁆𑀣 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀸.

𑀲𑀼𑀧𑁆𑀧𑀺𑀬𑁄𑀢𑀺 𑀢𑀲𑁆𑀲 𑀦𑀸𑀫𑀫𑁂𑀯, 𑀦 𑀕𑀼𑀡𑀸𑀤𑀺. 𑀦 𑀓𑁂𑀯𑀮𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀪𑀕𑀯𑀸𑀬𑁂𑀯, 𑀅𑀣 𑀔𑁄 𑀲𑀼𑀧𑁆𑀧𑀺𑀬𑁄𑀧𑀺 𑀧𑀭𑀺𑀩𑁆𑀩𑀸𑀚𑀓𑁄 𑀩𑁆𑀭𑀳𑁆𑀫𑀤𑀢𑁆𑀢𑁂𑀦 𑀫𑀸𑀡𑀯𑁂𑀦 𑀲𑀤𑁆𑀥𑀺𑀦𑁆𑀢𑀺 𑀧𑀼𑀕𑁆𑀕𑀮𑀁 𑀲𑀫𑁆𑀧𑀺𑀡𑁆𑀟𑁂𑀢𑀺, 𑀢𑀜𑁆𑀘 𑀔𑁄 𑀫𑀕𑁆𑀕𑀧𑀝𑀺𑀧𑀦𑁆𑀦𑀲𑀪𑀸𑀕𑀢𑀸𑀬 𑀏𑀯, 𑀦 𑀲𑀻𑀮𑀸𑀘𑀸𑀭𑀸𑀤𑀺𑀲𑀪𑀸𑀕𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀺-𑀓𑀸𑀭𑁄’’𑀢𑀺𑀆𑀤𑀺. 𑀲𑀼𑀔𑀼𑀘𑁆𑀘𑀸𑀭𑀡𑀯𑀲𑁂𑀦 𑀧𑀼𑀩𑁆𑀩𑀸𑀧𑀭𑀧𑀤𑀸𑀦𑀁 𑀲𑀫𑁆𑀩𑀦𑁆𑀥𑀫𑀢𑁆𑀢𑀓𑀭𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀧𑀤𑀲𑀦𑁆𑀥𑀺𑀓𑀭𑁄’’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀲𑀭𑀩𑁆𑀬𑀜𑁆𑀚𑀦𑀸𑀤𑀺𑀲𑀦𑁆𑀥𑀺𑀪𑀸𑀯𑀁, 𑀢𑁂𑀦𑀸𑀳 ‘‘𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀯𑀲𑁂𑀦 𑀯𑀼𑀢𑁆𑀢𑁄’’𑀢𑀺, 𑀏𑀢𑁂𑀦 𑀧𑀤𑀧𑀽𑀭𑀡𑀫𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀧𑀺𑀘 𑀅𑀯𑀥𑀸𑀭𑀡𑀢𑁆𑀣𑁄𑀧𑀺 𑀔𑁄-𑀲𑀤𑁆𑀤𑁄 𑀬𑀼𑀢𑁆𑀢𑁄 ‘‘𑀅𑀲𑁆𑀲𑁄𑀲𑀺 𑀔𑁄 𑀯𑁂𑀭𑀜𑁆𑀚𑁄 𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧) 𑀯𑀺𑀬, 𑀢𑁂𑀦 𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑁄 𑀅𑀳𑁄𑀲𑀺𑀬𑁂𑀯, 𑀦𑀸𑀲𑁆𑀲 𑀫𑀕𑁆𑀕𑀧𑀝𑀺𑀧𑀢𑁆𑀢𑀺𑀬𑀸 𑀓𑁄𑀘𑀺 𑀅𑀦𑁆𑀢𑀭𑀸𑀬𑁄 𑀅𑀳𑁄𑀲𑀻𑀢𑀺 𑀅𑀬𑀫𑀢𑁆𑀣𑁄 𑀤𑀻𑀧𑀺𑀢𑁄 𑀳𑁄𑀢𑀺. 𑀲𑀜𑁆𑀚𑀬𑀲𑁆𑀲𑀸𑀢𑀺 𑀭𑀸𑀚𑀕𑀳𑀯𑀸𑀲𑀺𑀦𑁄 ¶ 𑀲𑀜𑁆𑀚𑀬𑀦𑀸𑀫𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲, 𑀬𑀲𑁆𑀲 𑀲𑀦𑁆𑀢𑀺𑀓𑁂 𑀧𑀞𑀫𑀁 𑀉𑀧𑀢𑀺𑀲𑁆𑀲𑀓𑁄𑀮𑀺𑀢𑀸𑀧𑀺 𑀧𑀩𑁆𑀩𑀚𑀺𑀁𑀲𑀼 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑁄𑀯 ¶ , 𑀦 𑀅𑀘𑁂𑀮𑀓𑀧𑀭𑀺𑀩𑁆𑀩𑀸𑀚𑀓𑁄. ‘‘𑀬𑀤𑀸, 𑀢𑀤𑀸’’𑀢𑀺 𑀘 𑀏𑀢𑁂𑀦 𑀲𑀫𑀓𑀸𑀮𑀫𑁂𑀯 𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑀢𑀁 𑀤𑀲𑁆𑀲𑁂𑀢𑀺. 𑀅𑀢𑀻𑀢𑀓𑀸𑀮𑀢𑁆𑀣𑁄 𑀧𑀸𑀴𑀺𑀬𑀁 𑀳𑁄𑀢𑀺𑀲𑀤𑁆𑀤𑁄 𑀬𑁄𑀕𑀯𑀺𑀪𑀸𑀕𑁂𑀦, 𑀢𑀁𑀓𑀸𑀮𑀸𑀧𑁂𑀓𑁆𑀔𑀸𑀬 𑀯𑀸 𑀏𑀯𑀁 𑀯𑀼𑀢𑁆𑀢𑀁, 𑀢𑀤𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀅𑀦𑁆𑀢𑁂𑀢𑀺 𑀲𑀫𑀻𑀧𑁂. 𑀯𑀲𑀢𑀻𑀢𑀺 𑀯𑀢𑁆𑀢𑀧𑀝𑀺𑀯𑀢𑁆𑀢𑀸𑀤𑀺𑀓𑀭𑀡𑀯𑀲𑁂𑀦 𑀲𑀩𑁆𑀩𑀺𑀭𑀺𑀬𑀸𑀧𑀣𑀲𑀸𑀥𑀸𑀭𑀡𑀯𑀘𑀦𑀁, 𑀅𑀯𑀘𑀭𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑁂𑀦𑁂𑀯𑀸𑀳 ‘‘𑀲𑀫𑀻𑀧𑀘𑀸𑀭𑁄 𑀲𑀦𑁆𑀢𑀺𑀓𑀸𑀯𑀘𑀭𑁄 𑀲𑀺𑀲𑁆𑀲𑁄’’𑀢𑀺. 𑀘𑁄𑀤𑀺𑀢𑀸 𑀤𑁂𑀯𑀤𑀽𑀢𑁂𑀳𑀻𑀢𑀺 𑀤𑀳𑀭𑀓𑀼𑀫𑀸𑀭𑁄 𑀚𑀭𑀸𑀚𑀺𑀡𑁆𑀡𑀲𑀢𑁆𑀢𑁄 𑀕𑀺𑀮𑀸𑀦𑁄 𑀓𑀫𑁆𑀫𑀓𑀸𑀭𑀡𑀸, 𑀓𑀫𑁆𑀫𑀓𑀸𑀭𑀡𑀺𑀓𑀸 𑀯𑀸 𑀫𑀢𑀲𑀢𑁆𑀢𑁄𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀤𑁂𑀯𑀤𑀽𑀢𑁂𑀳𑀺 𑀘𑁄𑀤𑀺𑀢𑀸 𑀑𑀯𑀤𑀺𑀢𑀸 𑀲𑀁𑀯𑁂𑀕𑀁 𑀉𑀧𑁆𑀧𑀸𑀤𑀺𑀢𑀸 𑀲𑀫𑀸𑀦𑀸𑀧𑀺. 𑀢𑁂 𑀳𑀺 𑀤𑁂𑀯𑀸 𑀯𑀺𑀬 𑀤𑀽𑀢𑀸, 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀦𑀁 𑀯𑀸 𑀤𑀽𑀢𑀸𑀢𑀺 𑀤𑁂𑀯𑀤𑀽𑀢𑀸. 𑀳𑀻𑀦𑀓𑀸𑀬𑀽𑀧𑀕𑀸𑀢𑀺 𑀅𑀧𑀸𑀬𑀓𑀸𑀬𑀫𑀼𑀧𑀕𑀢𑀸. 𑀦𑀭𑀲𑀗𑁆𑀔𑀸𑀢𑀸 𑀢𑁂 𑀫𑀸𑀡𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀸𑀫𑀜𑁆𑀜𑀯𑀲𑁂𑀦 𑀘𑁂𑀢𑁆𑀣 𑀲𑀢𑁆𑀢𑁄 ‘‘𑀫𑀸𑀡𑀯𑁄’’𑀢𑀺 𑀯𑀼𑀢𑁆𑀢𑁄, 𑀇𑀢𑀭𑁂 𑀧𑀦 𑀯𑀺𑀲𑁂𑀲𑀯𑀲𑁂𑀦. 𑀧𑀓𑀭𑀡𑀸𑀥𑀺𑀕𑀢𑁄 𑀳𑁂𑀲 𑀅𑀢𑁆𑀣𑀼𑀤𑁆𑀥𑀸𑀭𑁄𑀢𑀺. 𑀓𑀢𑀓𑀫𑁆𑀫𑁂𑀳𑀻𑀢𑀺 𑀓𑀢𑀘𑁄𑀭𑀓𑀫𑁆𑀫𑁂𑀳𑀺. 𑀢𑀭𑀼𑀡𑁄𑀢𑀺 𑀲𑁄𑀴𑀲𑀯𑀲𑁆𑀲𑀢𑁄 𑀧𑀝𑁆𑀞𑀸𑀬 𑀧𑀢𑁆𑀢𑀯𑀻𑀲𑀢𑀺𑀯𑀲𑁆𑀲𑁄, 𑀉𑀤𑀸𑀦𑀝𑁆𑀞𑀓𑀣𑀸𑀬𑀜𑁆𑀳𑀺 ‘‘𑀲𑀢𑁆𑀢𑀸 𑀚𑀸𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀜𑁆𑀘𑀤𑀲𑀯𑀲𑁆𑀲𑀓𑀸, 𑀢𑀸𑀯 ‘𑀓𑀼𑀫𑀸𑀭𑀓𑀸, 𑀩𑀸𑀮𑀸’𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁄 𑀧𑀭𑀁 𑀯𑀻𑀲𑀢𑀺𑀯𑀲𑁆𑀲𑀸𑀦𑀺 ‘𑀬𑀼𑀯𑀸𑀦𑁄’’’𑀢𑀺 (𑀉𑀤𑀸. 𑀅𑀝𑁆𑀞. 𑁪𑁪) 𑀯𑀼𑀢𑁆𑀢𑀁. 𑀢𑀭𑀼𑀡𑁄, 𑀫𑀸𑀡𑀯𑁄, 𑀬𑀼𑀯𑀸𑀢𑀺 𑀘 𑀅𑀢𑁆𑀣𑀢𑁄 𑀏𑀓𑀁, 𑀮𑁄𑀓𑀺𑀬𑀸 𑀧𑀦 ‘‘𑀤𑁆𑀯𑀸𑀤𑀲𑀯𑀲𑁆𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀚𑀭𑀫𑀧𑁆𑀧𑀢𑁆𑀢𑁄, 𑀢𑀸𑀯 𑀢𑀭𑀼𑀡𑁄’’𑀢𑀺𑀧𑀺 𑀯𑀤𑀦𑁆𑀢𑀺.

𑀢𑁂𑀲𑀼 𑀯𑀸 𑀤𑁆𑀯𑀻𑀲𑀼 𑀚𑀦𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀬𑁄 𑀯𑀸 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀧𑀼𑀩𑁆𑀩𑁂 𑀅𑀥𑀺𑀕𑀢𑁄 𑀓𑀸𑀮𑁄, 𑀢𑀲𑁆𑀲 𑀧𑀝𑀺𑀦𑀺𑀤𑁆𑀤𑁂𑀲𑁄 𑀢𑀢𑁆𑀭𑀸𑀢𑀺 𑀬𑀜𑁆𑀳𑀺 𑀲𑀫𑀬𑀁 𑀪𑀕𑀯𑀸 𑀅𑀦𑁆𑀢𑀭𑀸 𑀭𑀸𑀚𑀕𑀳𑀜𑁆𑀘 𑀦𑀸𑀴𑀦𑁆𑀤𑀜𑁆𑀘 𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑁄, 𑀢𑀲𑁆𑀫𑀺𑀁𑀬𑁂𑀯 𑀲𑀫𑀬𑁂 𑀲𑀼𑀧𑁆𑀧𑀺𑀬𑁄𑀧𑀺 𑀢𑀁 𑀅𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄 𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀩𑁆𑀭𑀳𑁆𑀫𑀤𑀢𑁆𑀢𑁄 𑀘 𑀯𑀡𑁆𑀡𑀁 𑀪𑀸𑀲𑀢𑀻𑀢𑀺. 𑀦𑀺𑀧𑀸𑀢𑀫𑀢𑁆𑀢𑀦𑁆𑀢𑀺 𑀏𑀢𑁆𑀣 𑀫𑀢𑁆𑀢𑀲𑀤𑁆𑀤𑁂𑀦 𑀯𑀺𑀲𑁂𑀲𑀢𑁆𑀣𑀸𑀪𑀸𑀯𑀢𑁄 𑀧𑀤𑀧𑀽𑀭𑀡𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀫𑀥𑀼𑀧𑀺𑀡𑁆𑀟𑀺𑀓𑀧𑀭𑀺𑀬𑀸𑀬𑁄𑀢𑀺 𑀫𑀥𑀼𑀧𑀺𑀡𑁆𑀟𑀺𑀓𑀤𑁂𑀲𑀦𑀸 𑀦𑀸𑀫 𑀇𑀢𑀺 𑀦𑀁 𑀲𑀼𑀢𑁆𑀢𑀦𑁆𑀢𑀁 𑀥𑀸𑀭𑁂𑀳𑀺, 𑀭𑀸𑀚𑀜𑁆𑀜𑀸𑀢𑀺 𑀧𑀸𑀬𑀸𑀲𑀺𑀭𑀸𑀚𑀜𑁆𑀜𑀦𑀸𑀫𑀓𑀁 𑀭𑀸𑀚𑀸𑀦𑀫𑀸𑀮𑀧𑀢𑀺. 𑀧𑀭𑀺𑀬𑀸𑀬𑀢𑀺 𑀧𑀭𑀺𑀯𑀢𑁆𑀢𑀢𑀻𑀢𑀺 𑀧𑀭𑀺𑀬𑀸𑀬𑁄, 𑀯𑀸𑀭𑁄. 𑀧𑀭𑀺𑀬𑀸𑀬𑁂𑀢𑀺 𑀤𑁂𑀲𑁂𑀢𑀩𑁆𑀩𑀫𑀢𑁆𑀣𑀁 𑀧𑀝𑀺𑀧𑀸𑀤𑁂𑀢𑀻𑀢𑀺 𑀧𑀭𑀺𑀬𑀸𑀬𑁄, 𑀤𑁂𑀲𑀦𑀸. 𑀧𑀭𑀺𑀬𑀸𑀬𑀢𑀺 𑀅𑀢𑁆𑀢𑀦𑁄 𑀨𑀮𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀧𑀭𑀺𑀬𑀸𑀬𑁄, 𑀓𑀸𑀭𑀡𑀁. 𑀅𑀦𑁂𑀓𑀲𑀤𑁆𑀤𑁂𑀦𑁂𑀯 𑀅𑀦𑁂𑀓𑀯𑀺𑀥𑁂𑀦𑀸𑀢𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺 𑀅𑀥𑀺𑀧𑁆𑀧𑀸𑀬𑀫𑀢𑁆𑀢𑁂𑀦𑀸𑀢𑀺 ¶ 𑀆𑀳 ‘‘𑀅𑀦𑁂𑀓𑀯𑀺𑀥𑁂𑀦𑀸’’𑀢𑀺. 𑀓𑀸𑀭𑀡𑀜𑁆𑀘𑁂𑀢𑁆𑀣 𑀓𑀸𑀭𑀡𑀧𑀢𑀺𑀭𑀽𑀧𑀓𑀫𑁂𑀯, 𑀦 𑀏𑀓𑀁𑀲𑀓𑀸𑀭𑀡𑀁 𑀅𑀯𑀡𑁆𑀡𑀓𑀸𑀭𑀡𑀲𑁆𑀲 𑀅𑀪𑀽𑀢𑀢𑁆𑀢𑀸, 𑀢𑀲𑁆𑀫𑀸 𑀓𑀸𑀭𑀡𑁂𑀦𑀸𑀢𑀺 𑀓𑀸𑀭𑀡𑀧𑀢𑀺𑀭𑀽𑀧𑀓𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀅𑀓𑀸𑀭𑀡𑀫𑁂𑀯 ‘𑀓𑀸𑀭𑀡’𑀦𑁆𑀢𑀺 𑀯𑀢𑁆𑀯𑀸’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁧). 𑀚𑀸𑀢𑀺𑀯𑀲𑁂𑀦𑀺𑀤𑀁 𑀩𑀳𑁆𑀯𑀢𑁆𑀣𑁂 𑀏𑀓𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀩𑀳𑀽𑀳𑀻’’𑀢𑀺𑀆𑀤𑀺𑀦𑀸.

‘‘𑀅𑀯𑀡𑁆𑀡𑀯𑀺𑀭𑀳𑀺𑀢𑀲𑁆𑀲 ¶ 𑀅𑀲𑀫𑀸𑀦𑀯𑀡𑁆𑀡𑀲𑀫𑀦𑁆𑀦𑀸𑀕𑀢𑀲𑁆𑀲𑀧𑀻’’𑀢𑀺 𑀯𑀓𑁆𑀔𑀫𑀸𑀦𑀓𑀸𑀭𑀡𑀲𑁆𑀲 𑀅𑀓𑀸𑀭𑀡𑀪𑀸𑀯𑀳𑁂𑀢𑀼𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀤𑁄𑀲𑀯𑀺𑀭𑀳𑀺𑀢𑀲𑁆𑀲𑀧𑀺 𑀅𑀲𑀤𑀺𑀲𑀕𑀼𑀡𑀲𑀫𑀦𑁆𑀦𑀸𑀕𑀢𑀲𑁆𑀲𑀸𑀧𑀻𑀢𑀺 𑀅𑀢𑁆𑀣𑁄. 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀯𑀡𑁆𑀡𑀁 𑀤𑁄𑀲𑀁 𑀦𑀺𑀦𑁆𑀤𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀬𑀁 𑀮𑁄𑀓𑁂’’𑀢𑀺𑀆𑀤𑀺𑀦𑀸 𑀅𑀭𑀲𑀭𑀽𑀧𑀦𑀺𑀩𑁆𑀪𑁄𑀕𑀅𑀓𑀺𑀭𑀺𑀬𑀯𑀸𑀤𑀉𑀘𑁆𑀙𑁂𑀤𑀯𑀸𑀤𑀚𑁂𑀕𑀼𑀘𑁆𑀙𑀻𑀯𑁂𑀦𑀬𑀺𑀓𑀢𑀧𑀲𑁆𑀲𑀻𑀅𑀧𑀕𑀩𑁆𑀪𑀪𑀸𑀯𑀸𑀦𑀁 𑀓𑀸𑀭𑀡𑀧𑀢𑀺𑀭𑀽𑀧𑀓𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀸𑀢𑀺 𑀳𑀺 𑀏𑀢𑀁 ‘‘𑀅𑀭𑀲𑀭𑀽𑀧𑁄…𑀧𑁂… 𑀅𑀧𑀕𑀩𑁆𑀪𑁄’’𑀢𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀮𑁄𑀓𑀲𑀫𑁆𑀫𑀢𑁄 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀅𑀜𑁆𑀚𑀮𑀻𑀓𑀫𑁆𑀫𑀲𑀸𑀫𑀻𑀘𑀺𑀓𑀫𑁆𑀫𑀆𑀲𑀦𑀸𑀪𑀺𑀦𑀺𑀫𑀦𑁆𑀢𑀦𑀲𑀗𑁆𑀔𑀸𑀢𑁄 𑀲𑀸𑀫𑀕𑁆𑀕𑀻𑀭𑀲𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑁄 𑀲𑀸𑀫𑀕𑁆𑀕𑀻𑀭𑀲𑀲𑀗𑁆𑀔𑀸𑀢𑁂𑀦 𑀭𑀲𑁂𑀦 𑀅𑀲𑀫𑁆𑀧𑀦𑁆𑀦𑀲𑀪𑀸𑀯𑁄, 𑀢𑁂𑀦 𑀲𑀸𑀫𑀕𑁆𑀕𑀻𑀭𑀲𑀲𑀗𑁆𑀔𑀸𑀢𑁂𑀦 𑀧𑀭𑀺𑀪𑁄𑀕𑁂𑀦 𑀅𑀲𑀫𑀦𑁆𑀦𑀸𑀕𑀢𑁄. 𑀢𑀲𑁆𑀲 𑀅𑀓𑀢𑁆𑀢𑀩𑁆𑀩𑀢𑀸𑀯𑀸𑀤𑁄, 𑀉𑀘𑁆𑀙𑀺𑀚𑁆𑀚𑀺𑀢𑀩𑁆𑀩𑀢𑀸𑀯𑀸𑀤𑁄 𑀘, 𑀢𑀁 𑀲𑀩𑁆𑀩𑀁 𑀕𑀽𑀣𑀁 𑀯𑀺𑀬 𑀫𑀡𑁆𑀟𑀦𑀚𑀸𑀢𑀺𑀬𑁄 𑀧𑀼𑀭𑀺𑀲𑁄 𑀚𑁂𑀕𑀼𑀘𑁆𑀙𑀻. 𑀢𑀲𑁆𑀲 𑀯𑀺𑀦𑀸𑀲𑀓𑁄 𑀲𑁄𑀯 𑀢𑀤𑀓𑀭𑀡𑀢𑁄 𑀯𑀺𑀦𑁂𑀢𑀩𑁆𑀩𑁄. 𑀢𑀤𑀓𑀭𑀡𑁂𑀦 𑀯𑀬𑁄𑀯𑀼𑀟𑁆𑀠𑁂 𑀢𑀸𑀧𑁂𑀢𑀺 𑀢𑀤𑀸𑀘𑀸𑀭𑀯𑀺𑀭𑀳𑀺𑀢𑀢𑀸𑀬 𑀯𑀸 𑀓𑀧𑀡𑀧𑀼𑀭𑀺𑀲𑁄. 𑀢𑀤𑀓𑀭𑀡𑁂𑀦 𑀤𑁂𑀯𑀮𑁄𑀓𑀕𑀩𑁆𑀪𑀢𑁄 𑀅𑀧𑀕𑀢𑁄, 𑀢𑀤𑀓𑀭𑀡𑀢𑁄 𑀯𑀸 𑀲𑁄 𑀳𑀻𑀦𑀕𑀩𑁆𑀪𑁄 𑀘𑀸𑀢𑀺 𑀏𑀯𑀁 𑀢𑀤𑁂𑀯 𑀅𑀪𑀺𑀯𑀸𑀤𑀦𑀸𑀤𑀺𑀅𑀓𑀭𑀡𑀁 𑀅𑀭𑀲𑀭𑀽𑀧𑀢𑀸𑀤𑀻𑀦𑀁 𑀓𑀸𑀭𑀡𑀧𑀢𑀺𑀭𑀽𑀧𑀓𑀁 𑀤𑀝𑁆𑀞𑀩𑁆𑀩𑀁. ‘‘𑀦𑀢𑁆𑀣𑀺…𑀧𑁂… 𑀯𑀺𑀲𑁂𑀲𑁄’’𑀢𑀺 𑀏𑀢𑀲𑁆𑀲 𑀧𑀦 ‘‘𑀲𑀼𑀦𑁆𑀤𑀭𑀺𑀓𑀸𑀬 𑀦𑀸𑀫 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀫𑀭𑀡𑀸𑀦𑀯𑀩𑁄𑀥𑁄, 𑀲𑀁𑀲𑀸𑀭𑀲𑁆𑀲 𑀆𑀤𑀺𑀓𑁄𑀝𑀺𑀬𑀸 𑀅𑀧𑀜𑁆𑀜𑀸𑀬𑀦𑀧𑀝𑀺𑀜𑁆𑀜𑀸, 𑀞𑀧𑀦𑀻𑀬𑀧𑀼𑀘𑁆𑀙𑀸𑀬 𑀅𑀩𑁆𑀬𑀸𑀓𑀢𑀯𑀢𑁆𑀣𑀼𑀩𑁆𑀬𑀸𑀓𑀭𑀡’’𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀓𑀸𑀭𑀡𑀧𑀢𑀺𑀭𑀽𑀧𑀓𑀸𑀦𑀺 𑀦𑀺𑀤𑁆𑀥𑀸𑀭𑀺𑀢𑀩𑁆𑀩𑀸𑀦𑀺, 𑀢𑀣𑀸 ‘‘𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀲𑀫𑀡𑁄…𑀧𑁂… 𑀲𑀬𑀫𑁆𑀧𑀝𑀺𑀪𑀸𑀦’’𑀦𑁆𑀢𑀺 𑀏𑀢𑀲𑁆𑀲 ‘‘𑀅𑀦𑀸𑀘𑀭𑀺𑀬𑀓𑁂𑀦 𑀲𑀸𑀫𑀁 𑀧𑀝𑀺𑀯𑁂𑀥𑁂𑀦 𑀢𑀢𑁆𑀣 𑀢𑀢𑁆𑀣 𑀢𑀣𑀸 𑀢𑀣𑀸 𑀥𑀫𑁆𑀫𑀤𑁂𑀲𑀦𑀸, 𑀓𑀢𑁆𑀣𑀘𑀺 𑀧𑀭𑁂𑀲𑀁 𑀧𑀝𑀺𑀧𑀼𑀘𑁆𑀙𑀸𑀓𑀣𑀦𑀁, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀻𑀳𑀺 𑀆𑀭𑁄𑀘𑀺𑀢𑀦𑀬𑁂𑀦𑁂𑀯 𑀩𑁆𑀬𑀸𑀓𑀭𑀡’’𑀦𑁆𑀢𑀺 𑀏𑀯𑀫𑀸𑀤𑀻𑀦𑀺, ‘‘𑀲𑀫𑀡𑁄…𑀧𑁂… 𑀦 𑀅𑀕𑁆𑀕𑀧𑀼𑀕𑁆𑀕𑀮𑁄’’𑀢𑀺 𑀏𑀢𑁂𑀲𑀁 𑀧𑀦 ‘‘𑀲𑀩𑁆𑀩𑀥𑀫𑁆𑀫𑀸𑀦𑀁 𑀓𑀫𑁂𑀦𑁂𑀯 ¶ 𑀅𑀦𑀯𑀩𑁄𑀥𑁄, 𑀮𑁄𑀓𑀦𑁆𑀢𑀲𑁆𑀲 𑀅𑀚𑀸𑀦𑀦𑀁, 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀢𑀧𑀘𑀸𑀭𑀸𑀪𑀸𑀯𑁄’’𑀢𑀺 𑀏𑀯𑀫𑀸𑀤𑀻𑀦𑀺. 𑀛𑀸𑀦𑀯𑀺𑀫𑁄𑀓𑁆𑀔𑀸𑀤𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄. 𑀅𑀭𑀺𑀬𑀁 𑀯𑀺𑀲𑀼𑀤𑁆𑀥𑀁, 𑀉𑀢𑁆𑀢𑀫𑀁 𑀯𑀸 𑀜𑀸𑀡𑀲𑀗𑁆𑀔𑀸𑀢𑀁 𑀤𑀲𑁆𑀲𑀦𑀁, 𑀅𑀮𑀁 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀲𑀫𑀢𑁆𑀣𑀁 𑀅𑀭𑀺𑀬𑀜𑀸𑀡𑀤𑀲𑁆𑀲𑀦𑀁 𑀏𑀢𑁆𑀣, 𑀏𑀢𑀲𑁆𑀲𑀸𑀢𑀺 𑀯𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑁄. 𑀲𑁆𑀯𑁂𑀯 𑀯𑀺𑀲𑁂𑀲𑁄 𑀢𑀣𑀸. 𑀅𑀭𑀺𑀬𑀜𑀸𑀡𑀤𑀲𑁆𑀲𑀦𑀫𑁂𑀯 𑀯𑀸 𑀯𑀺𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦 𑀅𑀮𑀁 𑀧𑀭𑀺𑀬𑀢𑁆𑀢𑀁 𑀬𑀲𑁆𑀲, 𑀬𑀲𑁆𑀫𑀺𑀦𑁆𑀢𑀺 𑀯𑀸 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄, 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄𑀯. 𑀢𑀓𑁆𑀓𑀧𑀭𑀺𑀬𑀸𑀳𑀢𑀦𑁆𑀢𑀺 𑀓𑀧𑁆𑀧𑀦𑀸𑀫𑀢𑁆𑀢𑁂𑀦 𑀲𑀫𑀦𑁆𑀢𑀢𑁄 𑀆𑀳𑀭𑀺𑀢𑀁, 𑀯𑀺𑀢𑀓𑁆𑀓𑁂𑀦 𑀯𑀸 𑀧𑀭𑀺𑀖𑀝𑀺𑀢𑀁. 𑀯𑀻𑀫𑀁𑀲𑀸𑀦𑀼𑀘𑀭𑀺𑀢𑀦𑁆𑀢𑀺 𑀯𑀻𑀫𑀁𑀲𑀦𑀸𑀬 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀫𑀚𑁆𑀚𑀺𑀢𑀁. 𑀲𑀬𑀫𑁆𑀧𑀝𑀺𑀪𑀸𑀦𑀦𑁆𑀢𑀺 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀯𑀺𑀪𑀽𑀢𑀁, 𑀢𑀸𑀤𑀺𑀲𑀁 𑀥𑀫𑁆𑀫𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀓𑀸𑀭𑀡𑀦𑁆𑀢𑀺 𑀅𑀬𑀼𑀢𑁆𑀢𑀁 𑀅𑀦𑀼𑀧𑀧𑀢𑁆𑀢𑀺𑀁. 𑀓𑀸𑀭𑀡𑀧𑀤𑁂 𑀘𑁂𑀢𑀁 𑀯𑀺𑀲𑁂𑀲𑀦𑀁. 𑀦 𑀳𑀺 𑀅𑀭𑀲𑀭𑀽𑀧𑀢𑀸𑀤𑀬𑁄 𑀤𑁄𑀲𑀸 𑀪𑀕𑀯𑀢𑀺 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀥𑀫𑁆𑀫𑀲𑀗𑁆𑀖𑁂𑀲𑀼 𑀘 𑀤𑀼𑀭𑀓𑁆𑀔𑀸𑀢𑀤𑀼𑀧𑁆𑀧𑀝𑀺𑀧𑀦𑁆𑀦𑀸𑀤𑀬𑁄 𑀅𑀓𑀸𑀭𑀡𑀦𑁆𑀢𑀺 𑀯𑀸 𑀬𑀼𑀢𑁆𑀢𑀺𑀓𑀸𑀭𑀡𑀭𑀳𑀺𑀢𑀁 𑀅𑀢𑁆𑀢𑀦𑀸 𑀧𑀝𑀺𑀜𑁆𑀜𑀸𑀫𑀢𑁆𑀢𑀁. 𑀧𑀓𑀢𑀺𑀓𑀫𑁆𑀫𑀧𑀤𑀜𑁆𑀘𑁂𑀢𑀁. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑁂 𑀓𑀸𑀭𑀡𑀁 𑀯𑀢𑁆𑀯𑀸𑀢𑀺 𑀏𑀢𑁆𑀣 𑀓𑀸𑀭𑀡𑀁 𑀇𑀯𑀸𑀢𑀺 𑀇𑀯-𑀲𑀤𑁆𑀤𑀢𑁆𑀣𑁄 𑀭𑀽𑀧𑀓𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑁄 𑀧𑀢𑀺𑀭𑀽𑀧𑀓𑀓𑀸𑀭𑀡𑀲𑁆𑀲 ¶ 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀣𑀸 𑀢𑀣𑀸𑀢𑀺 𑀚𑀸𑀢𑀺𑀯𑀼𑀟𑁆𑀠𑀸𑀦𑀫𑀦𑀪𑀺𑀯𑀸𑀤𑀦𑀸𑀤𑀺𑀦𑀸 𑀢𑁂𑀦 𑀢𑁂𑀦 𑀆𑀓𑀸𑀭𑁂𑀦. 𑀯𑀡𑁆𑀡𑀲𑀤𑁆𑀤𑀲𑁆𑀲 𑀕𑀼𑀡𑀧𑀲𑀁𑀲𑀸𑀲𑀼 𑀧𑀯𑀢𑁆𑀢𑀦𑀢𑁄 𑀬𑀣𑀸𑀓𑁆𑀓𑀫𑀁 ‘‘𑀅𑀯𑀡𑁆𑀡𑀁 𑀤𑁄𑀲𑀁 𑀦𑀺𑀦𑁆𑀤’’𑀦𑁆𑀢𑀺 𑀯𑀼𑀢𑁆𑀢𑀁.

𑀤𑀼𑀭𑀓𑁆𑀔𑀸𑀢𑁄𑀢𑀺 𑀤𑀼𑀝𑁆𑀞𑀼𑀫𑀸𑀓𑁆𑀔𑀸𑀢𑁄, 𑀢𑀣𑀸 𑀤𑀼𑀧𑁆𑀧𑀝𑀺𑀯𑁂𑀤𑀺𑀢𑁄. 𑀯𑀝𑁆𑀝𑀢𑁄 𑀦𑀺𑀬𑁆𑀬𑀸𑀢𑀻𑀢𑀺 𑀦𑀺𑀬𑁆𑀬𑀸𑀦𑀁, 𑀢𑀤𑁂𑀯 𑀦𑀺𑀬𑁆𑀬𑀸𑀦𑀺𑀓𑁄, 𑀢𑀢𑁄 𑀯𑀸 𑀦𑀺𑀬𑁆𑀬𑀸𑀦𑀁 𑀦𑀺𑀲𑁆𑀲𑀭𑀡𑀁, 𑀢𑀢𑁆𑀣 𑀦𑀺𑀬𑀼𑀢𑁆𑀢𑁄𑀢𑀺 𑀦𑀺𑀬𑁆𑀬𑀸𑀦𑀺𑀓𑁄. 𑀯𑀝𑁆𑀝𑀢𑁄 𑀯𑀸 𑀦𑀺𑀬𑁆𑀬𑀸𑀢𑀻𑀢𑀺 𑀦𑀺𑀬𑁆𑀬𑀸𑀦𑀺𑀓𑁄 𑀬-𑀓𑀸𑀭𑀲𑁆𑀲 𑀓-𑀓𑀸𑀭𑀁, 𑀈-𑀓𑀸𑀭𑀲𑁆𑀲 𑀘 𑀭𑀲𑁆𑀲𑀁 𑀓𑀢𑁆𑀯𑀸. ‘‘𑀅𑀦𑀻𑀬-𑀲𑀤𑁆𑀤𑁄 𑀳𑀺 𑀩𑀳𑀼𑀮𑀸 𑀓𑀢𑁆𑀢𑀼𑀅𑀪𑀺𑀥𑀸𑀬𑀓𑁄’’𑀢𑀺 𑀲𑀤𑁆𑀤𑀯𑀺𑀤𑀽 𑀯𑀤𑀦𑁆𑀢𑀺, 𑀦 𑀦𑀺𑀬𑁆𑀬𑀸𑀦𑀺𑀓𑁄 𑀢𑀣𑀸. 𑀲𑀁𑀲𑀸𑀭𑀤𑀼𑀓𑁆𑀔𑀲𑁆𑀲 𑀅𑀦𑀼𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁄 𑀯𑀼𑀢𑁆𑀢𑀦𑀬𑁂𑀦. 𑀧𑀘𑁆𑀘𑀦𑀻𑀓𑀧𑀝𑀺𑀧𑀤𑀦𑁆𑀢𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀭𑀼𑀤𑁆𑀥𑀧𑀝𑀺𑀧𑀤𑀁. 𑀅𑀦𑀦𑀼𑀮𑁄𑀫𑀧𑀝𑀺𑀧𑀤𑀦𑁆𑀢𑀺 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀦𑀦𑀼𑀮𑁄𑀫𑀧𑀝𑀺𑀧𑀤𑀁. 𑀅𑀥𑀫𑁆𑀫𑀸𑀦𑀼𑀮𑁄𑀫𑀧𑀝𑀺𑀧𑀤𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑁆𑀲 𑀅𑀦𑀦𑀼𑀮𑁄𑀫𑀧𑀝𑀺𑀧𑀤𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 ‘‘𑀅𑀯𑀡𑁆𑀡𑀁 𑀪𑀸𑀲𑀢𑀺, 𑀯𑀡𑁆𑀡𑀁 𑀪𑀸𑀲𑀢𑀻’’𑀢𑀺 𑀘 𑀯𑀢𑁆𑀢𑀫𑀸𑀦𑀓𑀸𑀮𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀦𑀦𑀼 𑀲𑀗𑁆𑀕𑀻𑀢𑀺𑀓𑀸𑀮𑀢𑁄 𑀲𑁄 𑀅𑀯𑀡𑁆𑀡𑀯𑀡𑁆𑀡𑀸𑀦𑀁 𑀪𑀸𑀲𑀦𑀓𑀸𑀮𑁄 𑀅𑀢𑀻𑀢𑁄𑀢𑀺? 𑀲𑀘𑁆𑀘𑀫𑁂𑀢𑀁, ‘‘𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺 𑀏𑀢𑁆𑀣 𑀳𑁄𑀢𑀺-𑀲𑀤𑁆𑀤𑁄 𑀯𑀺𑀬 𑀅𑀢𑀻𑀢𑀓𑀸𑀮𑀢𑁆𑀣𑀢𑁆𑀢𑀸 𑀧𑀦 𑀪𑀸𑀲𑀢𑀺-𑀲𑀤𑁆𑀤𑀲𑁆𑀲 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀬𑀲𑁆𑀫𑀺𑀁 𑀓𑀸𑀮𑁂 𑀢𑁂𑀳𑀺 𑀅𑀯𑀡𑁆𑀡𑁄 𑀯𑀡𑁆𑀡𑁄 𑀘 𑀪𑀸𑀲𑀻𑀬𑀢𑀺, 𑀢𑀫𑀧𑁂𑀓𑁆𑀔𑀺𑀢𑁆𑀯𑀸 ¶ 𑀏𑀯𑀁 𑀯𑀼𑀢𑁆𑀢𑀁, 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀢𑀢𑁆𑀭𑀸’’𑀢𑀺 𑀧𑀤𑀲𑁆𑀲 𑀓𑀸𑀮𑀧𑀝𑀺𑀦𑀺𑀤𑁆𑀤𑁂𑀲𑀯𑀺𑀓𑀧𑁆𑀧𑀦𑀁 𑀅𑀝𑁆𑀞𑀓𑀣𑀸𑀬𑀁 𑀅𑀯𑀼𑀢𑁆𑀢𑀫𑁆𑀧𑀺 𑀲𑀼𑀧𑀧𑀦𑁆𑀦𑀁 𑀳𑁄𑀢𑀺.

‘‘𑀲𑀼𑀧𑁆𑀧𑀺𑀬𑀲𑁆𑀲 𑀧𑀦…𑀧𑁂… 𑀪𑀸𑀲𑀢𑀻’’𑀢𑀺 𑀧𑀸𑀴𑀺𑀬𑀸 𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑀁 ‘‘𑀅𑀦𑁆𑀢𑁂𑀯𑀸𑀲𑀻 𑀧𑀦𑀲𑁆𑀲𑀸’’𑀢𑀺𑀆𑀤𑀺𑀯𑀘𑀦𑀁. 𑀅𑀧𑀭𑀸𑀫𑀲𑀺𑀢𑀩𑁆𑀩𑀁 𑀅𑀭𑀺𑀬𑀽𑀧𑀯𑀸𑀤𑀓𑀫𑁆𑀫𑀁, 𑀢𑀣𑀸 𑀅𑀦𑀓𑁆𑀓𑀫𑀺𑀢𑀩𑁆𑀩𑀁. 𑀲𑁆𑀯𑀸𑀬𑀦𑁆𑀢𑀺 𑀲𑁄 𑀆𑀘𑀭𑀺𑀬𑁄. 𑀅𑀲𑀺𑀥𑀸𑀭𑀦𑁆𑀢𑀺 𑀅𑀲𑀺𑀦𑀸 𑀢𑀺𑀔𑀺𑀡𑀪𑀸𑀕𑀁. 𑀓𑀓𑀘𑀤𑀦𑁆𑀢 𑀧𑀦𑁆𑀢𑀺𑀬𑀦𑁆𑀢𑀺 𑀔𑀦𑁆𑀥𑀓𑀓𑀘𑀲𑁆𑀲 𑀤𑀦𑁆𑀢𑀲𑀗𑁆𑀔𑀸𑀢𑀸𑀬 𑀯𑀺𑀲𑀫𑀧𑀦𑁆𑀢𑀺𑀬𑀸. 𑀳𑀢𑁆𑀣𑁂𑀦 𑀯𑀸 𑀧𑀸𑀤𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺 𑀯𑀸 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀦 𑀧𑀳𑀭𑀺𑀢𑁆𑀯𑀸 𑀓𑀻𑀴𑀫𑀸𑀦𑁄 𑀯𑀺𑀬. 𑀅𑀓𑁆𑀔𑀺𑀓𑀡𑁆𑀡𑀓𑁄𑀲𑀲𑀗𑁆𑀔𑀸𑀢𑀝𑁆𑀞𑀸𑀦𑀯𑀲𑁂𑀦 𑀢𑀻𑀳𑀺 𑀧𑀓𑀸𑀭𑁂𑀳𑀺 𑀪𑀺𑀦𑁆𑀦𑁄 𑀫𑀤𑁄 𑀬𑀲𑁆𑀲𑀸𑀢𑀺 𑀧𑀪𑀺𑀦𑁆𑀦𑀫𑀤𑁄, 𑀢𑀁. 𑀅𑀯𑀡𑁆𑀡𑀁 𑀪𑀸𑀲𑀫𑀸𑀦𑁄𑀢𑀺 𑀅𑀯𑀡𑁆𑀡𑀁 𑀪𑀸𑀲𑀦𑀳𑁂𑀢𑀼. 𑀳𑁂𑀢𑀼𑀅𑀢𑁆𑀣𑁄 𑀳𑀺 𑀅𑀬𑀁 𑀫𑀸𑀦-𑀲𑀤𑁆𑀤𑁄. 𑀦 𑀅𑀬𑁄 𑀯𑀼𑀟𑁆𑀠𑀺 𑀅𑀦𑀬𑁄. 𑀲𑁄𑀬𑁂𑀯 𑀩𑁆𑀬𑀲𑀦𑀁, 𑀅𑀢𑀺𑀭𑁂𑀓𑀩𑁆𑀬𑀲𑀦𑀦𑁆𑀢𑀺 𑀅𑀢𑁆𑀣𑁄, 𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀺 𑀏𑀓𑀦𑁆𑀢𑀫𑀳𑀸𑀲𑀸𑀯𑀚𑁆𑀚𑀢𑁆𑀢𑀸 𑀭𑀢𑀦𑀢𑁆𑀢𑀬𑁄𑀧𑀯𑀸𑀤𑀲𑁆𑀲. 𑀢𑁂𑀦𑁂𑀯𑀸𑀳 𑁋

‘‘𑀬𑁄 𑀦𑀺𑀦𑁆𑀤𑀺𑀬𑀁 𑀧𑀲𑀁𑀲𑀢𑀺,

𑀢𑀁 𑀯𑀸 𑀦𑀺𑀦𑁆𑀤𑀢𑀺 𑀬𑁄 𑀧𑀲𑀁𑀲𑀺𑀬𑁄;

𑀯𑀺𑀘𑀺𑀦𑀸𑀢𑀺 𑀫𑀼𑀔𑁂𑀦 𑀲𑁄 𑀓𑀮𑀺𑀁,

𑀓𑀮𑀺𑀦𑀸 𑀢𑁂𑀦 𑀲𑀼𑀔𑀁 𑀦 𑀯𑀺𑀦𑁆𑀤𑀢𑀻’’𑀢𑀺. (𑀲𑀼. 𑀦𑀺. 𑁬𑁬𑁩; 𑀲𑀁 𑀦𑀺. 𑁧.𑁧𑁮𑁦-𑁧𑁮𑁧; 𑀦𑁂𑀢𑁆𑀢𑀺. 𑁯𑁨);

‘‘𑀅𑀫𑁆𑀳𑀸𑀓𑀁 ¶ 𑀆𑀘𑀭𑀺𑀬𑁄’’𑀢𑀺𑀆𑀤𑀺𑀦𑀸 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀲𑀁𑀯𑁂𑀕𑀼𑀧𑁆𑀧𑀢𑁆𑀢𑀺𑀁, 𑀅𑀢𑁆𑀢𑀦𑁄 𑀆𑀘𑀭𑀺𑀬𑁂 𑀘 𑀓𑀸𑀭𑀼𑀜𑁆𑀜𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀓𑀺𑀜𑁆𑀘𑀸𑀧𑀺 𑀅𑀦𑁆𑀢𑁂𑀯𑀸𑀲𑀺𑀦𑀸 𑀆𑀘𑀭𑀺𑀬𑀲𑁆𑀲 𑀅𑀦𑀼𑀓𑀽𑀮𑁂𑀦 𑀪𑀯𑀺𑀢𑀩𑁆𑀩𑀁, 𑀅𑀬𑀁 𑀧𑀦 𑀧𑀡𑁆𑀟𑀺𑀢𑀚𑀸𑀢𑀺𑀓𑀢𑁆𑀢𑀸 𑀦 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀢𑀫𑀦𑀼𑀯𑀢𑁆𑀢𑀢𑀻𑀢𑀺 𑀇𑀤𑀸𑀦𑀺𑀲𑁆𑀲 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀘𑀭𑀺𑀬𑁂 𑀔𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀳𑀮𑀸𑀳𑀮𑀦𑁆𑀢𑀺 𑀢𑀗𑁆𑀔𑀡𑀜𑁆𑀜𑁂𑀯 𑀫𑀸𑀭𑀡𑀓𑀁 𑀯𑀺𑀲𑀁. 𑀳𑀦𑀢𑀻𑀢𑀺 𑀳𑀺 𑀳𑀮𑁄 𑀦-𑀓𑀸𑀭𑀲𑁆𑀲 𑀮-𑀓𑀸𑀭𑀁 𑀓𑀢𑁆𑀯𑀸, 𑀳𑀮𑀸𑀦𑀫𑁆𑀧𑀺 𑀯𑀺𑀲𑁂𑀲𑁄 𑀳𑀮𑁄 𑀳𑀮𑀸𑀳𑀮𑁄 𑀫𑀚𑁆𑀛𑁂𑀤𑀻𑀖𑀯𑀲𑁂𑀦, 𑀏𑀢𑁂𑀦 𑀘 𑀅𑀜𑁆𑀜𑁂 𑀅𑀝𑁆𑀞𑀯𑀺𑀥𑁂 𑀯𑀺𑀲𑁂 𑀦𑀺𑀯𑀢𑁆𑀢𑁂𑀢𑀺. 𑀯𑀼𑀢𑁆𑀢𑀜𑁆𑀘 𑁋

‘‘𑀧𑀼𑀫𑁂 𑀧𑀡𑁆𑀟𑁂 𑀘 𑀓𑀸𑀓𑁄𑀮, 𑀓𑀸𑀴𑀓𑀽𑀝𑀳𑀮𑀸𑀳𑀮𑀸;

𑀲𑀭𑁄𑀢𑁆𑀣𑀺𑀓𑁄𑀲𑀼𑀗𑁆𑀓𑀺𑀓𑁂 𑀬𑁄, 𑀩𑁆𑀭𑀳𑁆𑀫𑀧𑀼𑀢𑁆𑀢𑁄 𑀧𑀤𑀻𑀧𑀦𑁄;

𑀤𑀸𑀭𑀤𑁄 𑀯𑀘𑁆𑀙𑀦𑀸𑀪𑁄 𑀘, 𑀯𑀺𑀲𑀪𑁂𑀤𑀸 𑀇𑀫𑁂 𑀦𑀯𑀸’’𑀢𑀺.

𑀔𑀭𑁄𑀤𑀓𑀦𑁆𑀢𑀺 ¶ 𑀘𑀡𑁆𑀟𑀲𑁄𑀢𑁄𑀤𑀓𑀁. ‘‘𑀔𑀸𑀭𑁄𑀤𑀓’’𑀦𑁆𑀢𑀺𑀧𑀺 𑀧𑀸𑀞𑁄, 𑀅𑀢𑀺𑀮𑁄𑀡𑀢𑀸𑀬 𑀢𑀺𑀢𑁆𑀢𑁄𑀤𑀓𑀦𑁆𑀢𑀺 𑀅𑀢𑁆𑀣𑁄. 𑀦𑀭𑀓𑀧𑀧𑀸𑀢𑀦𑁆𑀢𑀺 𑀘𑁄𑀭𑀧𑀧𑀸𑀢𑀁. 𑀫𑀸𑀡𑀯𑀓𑀸𑀢𑀺 𑀅𑀢𑁆𑀢𑀸𑀦𑀫𑁂𑀯 𑀑𑀯𑀤𑀺𑀢𑀼𑀁 𑀆𑀮𑀧𑀢𑀺 ‘‘𑀲𑀫𑀬𑁄𑀧𑀺 𑀔𑁄 𑀢𑁂 𑀪𑀤𑁆𑀤𑀸𑀮𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑁄𑀅𑀳𑁄𑀲𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁩𑁫) 𑀯𑀺𑀬. ‘‘𑀓𑀫𑁆𑀫𑀲𑁆𑀲𑀓𑀸’’𑀢𑀺 𑀓𑀫𑁆𑀫𑀫𑁂𑀯 𑀅𑀢𑁆𑀢𑀲𑀦𑁆𑀢𑀓𑀪𑀸𑀯𑀁 𑀯𑀢𑁆𑀯𑀸 𑀢𑀤𑁂𑀯 𑀯𑀺𑀯𑀭𑀢𑀺 ‘‘𑀅𑀢𑁆𑀢𑀦𑁄 𑀓𑀫𑁆𑀫𑀸𑀦𑀼𑀭𑀽𑀧𑀫𑁂𑀯 𑀕𑀢𑀺𑀁 𑀕𑀘𑁆𑀙𑀦𑁆𑀢𑀻’’𑀢𑀺𑀆𑀤𑀺𑀦𑀸. 𑀬𑁄𑀦𑀺𑀲𑁄𑀢𑀺 𑀉𑀧𑀸𑀬𑁂𑀦 𑀜𑀸𑀬𑁂𑀦. 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸𑀢𑀺 𑀆𑀘𑀭𑀺𑀬𑁄 𑀯𑀺𑀬 𑀅𑀬𑁄𑀦𑀺𑀲𑁄 𑀅𑀭𑀺𑀬𑀽𑀧𑀯𑀸𑀤𑁂 𑀅𑀦𑀺𑀫𑁆𑀫𑀼𑀚𑁆𑀚𑀦𑁆𑀢𑁄 𑀬𑁄𑀦𑀺𑀲𑁄 𑀅𑀭𑀺𑀬𑀽𑀧𑀯𑀸𑀤𑀢𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸, 𑀉𑀤𑁆𑀥𑀁 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀫𑀤𑁆𑀤𑀫𑀸𑀦𑁄𑀢𑀺 𑀫𑀤𑁆𑀤𑀦𑁆𑀢𑁄 𑀪𑀺𑀦𑁆𑀤𑀦𑁆𑀢𑁄. 𑀏𑀓𑀁𑀲𑀓𑀸𑀭𑀡𑀫𑁂𑀯 𑀇𑀥 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀼𑀓𑀸𑀫𑁂𑀦 ‘‘𑀲𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀁. ‘‘𑀬𑀣𑀸 𑀢’’𑀦𑁆𑀢𑀺𑀆𑀤𑀺𑀦𑀸 𑀢𑀲𑁆𑀲 𑀲𑀫𑀸𑀭𑀤𑁆𑀥𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀦𑁆𑀢𑀺 𑀘 𑀦𑀺𑀧𑀸𑀢𑀫𑀢𑁆𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀅𑀜𑁆𑀜𑁄 𑀧𑀡𑁆𑀟𑀺𑀢𑀲𑀪𑀸𑀯𑁄 𑀚𑀸𑀢𑀺 𑀆𑀘𑀸𑀭𑀯𑀲𑁂𑀦 𑀓𑀼𑀮𑀧𑀼𑀢𑁆𑀢𑁄 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀯𑀡𑁆𑀡𑀁 𑀪𑀸𑀲𑀺𑀢𑀼𑀫𑀸𑀭𑀪𑀢𑀺, 𑀢𑀣𑀸 𑀅𑀬𑀫𑁆𑀧𑀺 𑀆𑀭𑀤𑁆𑀥𑁄, 𑀢𑀜𑁆𑀘 𑀔𑁄 𑀅𑀧𑀺 𑀦𑀸𑀫𑀸𑀬𑀫𑀸𑀘𑀭𑀺𑀬𑁄 𑀏𑀢𑁆𑀢𑀓𑁂𑀦𑀸𑀧𑀺 𑀭𑀢𑀦𑀢𑁆𑀢𑀬𑀸𑀯𑀡𑁆𑀡𑀪𑀸𑀲𑀢𑁄 𑀑𑀭𑀫𑁂𑀬𑁆𑀬𑀸𑀢𑀺.

𑀲𑀧𑁆𑀧𑀭𑀸𑀚𑀯𑀡𑁆𑀡𑀦𑁆𑀢𑀺 𑀅𑀳𑀺𑀭𑀸𑀚𑀯𑀡𑁆𑀡𑀁. 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬𑀸𑀢𑀺 𑀯𑀡𑁆𑀡𑀲𑀼𑀦𑁆𑀤𑀭𑀢𑀸𑀬, 𑀯𑀡𑁆𑀡𑀲𑀭𑀻𑀭𑁂𑀦 𑀯𑀸. 𑀯𑀸𑀭𑀺𑀚𑀁 𑀓𑀫𑀮𑀁 𑀦 𑀧𑀳𑀭𑀸𑀫𑀺 𑀦 𑀪𑀜𑁆𑀚𑀸𑀫𑀺, 𑀆𑀭𑀸 𑀤𑀽𑀭𑀢𑁄𑀯 𑀉𑀧𑀲𑀺𑀗𑁆𑀖𑀸𑀫𑀻𑀢𑀺 𑀅𑀢𑁆𑀣𑁄. 𑀅𑀣𑀸𑀢𑀺 𑀏𑀯𑀁 𑀲𑀦𑁆𑀢𑁂𑀧𑀺. 𑀕𑀦𑁆𑀥𑀢𑁆𑀣𑁂𑀦𑁄𑀢𑀺 𑀕𑀦𑁆𑀥𑀘𑁄𑀭𑁄. 𑀲𑀜𑁆𑀜𑀽𑀴𑁆𑀳𑀸𑀢𑀺 𑀕𑀦𑁆𑀣𑀺𑀢𑀸 𑀩𑀦𑁆𑀥𑀺𑀢𑀸. 𑀕𑀳𑀧𑀢𑀻𑀢𑀺 𑀉𑀧𑀸𑀮𑀺𑀕𑀳𑀧𑀢𑀺𑀁 𑀦𑀸𑀝𑀧𑀼𑀢𑁆𑀢𑀲𑁆𑀲 𑀆𑀮𑀧𑀦𑀁. 𑀏𑀢𑁆𑀣 𑀘 𑀯𑀡𑁆𑀡𑀺𑀢𑀩𑁆𑀩𑁄 ‘‘𑀅𑀬𑀫𑀻𑀤𑀺𑀲𑁄’’𑀢𑀺 𑀧𑀓𑀸𑀲𑁂𑀢𑀩𑁆𑀩𑁄𑀢𑀺 𑀯𑀡𑁆𑀡𑁄, 𑀲𑀡𑁆𑀞𑀸𑀦𑀁. 𑀯𑀡𑁆𑀡𑀻𑀬𑀢𑀺 𑀅𑀲𑀗𑁆𑀓𑀭𑀢𑁄 𑀯𑀯𑀢𑁆𑀣𑀸𑀧𑀻𑀬𑀢𑀻𑀢𑀺 𑀯𑀡𑁆𑀡𑁄, 𑀚𑀸𑀢𑀺. 𑀯𑀡𑁆𑀡𑁂𑀢𑀺 𑀯𑀺𑀓𑀸𑀭𑀫𑀸𑀧𑀚𑁆𑀚𑀫𑀸𑀦𑀁 𑀳𑀤𑀬𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀢𑀻𑀢𑀺 𑀯𑀡𑁆𑀡𑁄, 𑀭𑀽𑀧𑀸𑀬𑀢𑀦𑀁. 𑀯𑀡𑁆𑀡𑀻𑀬𑀢𑀺 𑀨𑀮𑀫𑁂𑀢𑁂𑀦 𑀬𑀣𑀸𑀲𑀪𑀸𑀯𑀢𑁄 𑀯𑀺𑀪𑀸𑀯𑀻𑀬𑀢𑀻𑀢𑀺 𑀯𑀡𑁆𑀡𑁄, 𑀓𑀸𑀭𑀡𑀁. 𑀯𑀡𑁆𑀡𑀻𑀬𑀢𑀺 𑀅𑀧𑁆𑀧𑀫𑀳𑀦𑁆𑀢𑀸𑀤𑀺𑀯𑀲𑁂𑀦 𑀧𑀫𑀻𑀬𑀢𑀻𑀢𑀺 𑀯𑀡𑁆𑀡𑁄, 𑀧𑀫𑀸𑀡𑀁. 𑀯𑀡𑁆𑀡𑀻𑀬𑀢𑀺 𑀧𑀲𑀁𑀲𑀻𑀬𑀢𑀻𑀢𑀺 𑀯𑀡𑁆𑀡𑁄 ¶ , 𑀕𑀼𑀡𑁄. 𑀯𑀡𑁆𑀡𑀦𑀁 𑀕𑀼𑀡𑀲𑀁𑀓𑀺𑀢𑁆𑀢𑀦𑀁 𑀯𑀡𑁆𑀡𑁄, 𑀧𑀲𑀁𑀲𑀸. 𑀏𑀯𑀁 𑀢𑀢𑁆𑀣 𑀢𑀢𑁆𑀣 𑀯𑀡𑁆𑀡𑀲𑀤𑁆𑀤𑀲𑁆𑀲𑀼𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀆𑀤𑀺𑀲𑀤𑁆𑀤𑁂𑀦 𑀚𑀸𑀢𑀭𑀽𑀧𑀧𑀼𑀴𑀺𑀦𑀓𑁆𑀔𑀭𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀇𑀥 𑀕𑀼𑀡𑁄𑀧𑀺 𑀧𑀲𑀁𑀲𑀸𑀧𑀻’’𑀢𑀺 𑀯𑀼𑀢𑁆𑀢𑀫𑁂𑀯 𑀲𑀫𑀢𑁆𑀣𑁂𑀢𑀺 ‘‘𑀅𑀬𑀁 𑀓𑀺𑀭𑀸’’𑀢𑀺𑀆𑀤𑀺𑀦𑀸. 𑀓𑀺𑀭𑀸𑀢𑀺 𑀘𑁂𑀢𑁆𑀣 𑀅𑀦𑀼𑀲𑁆𑀲𑀯𑀦𑀢𑁆𑀣𑁂, 𑀧𑀤𑀧𑀽𑀭𑀡𑀫𑀢𑁆𑀢𑁂 𑀯𑀸. 𑀕𑀼𑀡𑀽𑀧𑀲𑀜𑁆𑀳𑀺𑀢𑀦𑁆𑀢𑀺 𑀕𑀼𑀡𑁄𑀧𑀲𑀜𑁆𑀜𑀼𑀢𑀁. ‘‘𑀕𑀼𑀡𑀽𑀧𑀲𑀜𑁆𑀳𑀺𑀢𑀁 𑀧𑀲𑀁𑀲’’𑀦𑁆𑀢𑀺 𑀧𑀦 𑀯𑀤𑀦𑁆𑀢𑁄 𑀧𑀲𑀁𑀲𑀸𑀬 𑀏𑀯 𑀕𑀼𑀡𑀪𑀸𑀲𑀦𑀁 𑀲𑀺𑀤𑁆𑀥𑀁 𑀢𑀲𑁆𑀲𑀸 𑀢𑀤𑀯𑀺𑀦𑀸𑀪𑀸𑀯𑀢𑁄, 𑀢𑀲𑁆𑀫𑀸 𑀇𑀤𑀫𑀢𑁆𑀣𑀤𑁆𑀯𑀬𑀁 𑀬𑀼𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀓𑀣𑀁 ¶ 𑀪𑀸𑀲𑀢𑀻𑀢𑀺 𑀆𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀏𑀓𑁄 𑀘 𑀲𑁄 𑀧𑀼𑀕𑁆𑀕𑀮𑁄 𑀘𑀸𑀢𑀺 𑀏𑀓𑀧𑀼𑀕𑁆𑀕𑀮𑁄. 𑀓𑁂𑀦𑀝𑁆𑀞𑁂𑀦 𑀏𑀓𑀧𑀼𑀕𑁆𑀕𑀮𑁄? 𑀅𑀲𑀤𑀺𑀲𑀝𑁆𑀞𑁂𑀦, 𑀕𑀼𑀡𑀯𑀺𑀲𑀺𑀝𑁆𑀞𑀝𑁆𑀞𑁂𑀦, 𑀅𑀲𑀫𑀲𑀫𑀝𑁆𑀞𑁂𑀦 𑀘. 𑀲𑁄 𑀳𑀺 𑀧𑀞𑀫𑀸𑀪𑀺𑀦𑀻𑀳𑀸𑀭𑀓𑀸𑀮𑁂 𑀤𑀲𑀦𑁆𑀦𑀁 𑀧𑀸𑀭𑀫𑀻𑀦𑀁 𑀧𑀝𑀺𑀧𑀸𑀝𑀺𑀬𑀸 𑀆𑀯𑀚𑁆𑀚𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀕𑀼𑀡𑁂𑀳𑀺 𑀘𑁂𑀯 𑀩𑀼𑀤𑁆𑀥𑀕𑀼𑀡𑁂𑀳𑀺 𑀘 𑀲𑁂𑀲𑀫𑀳𑀸𑀚𑀦𑁂𑀦 𑀅𑀲𑀤𑀺𑀲𑁄. 𑀬𑁂 𑀘𑀲𑁆𑀲 𑀕𑀼𑀡𑀸, 𑀢𑁂𑀧𑀺 𑀅𑀜𑁆𑀜𑀲𑀢𑁆𑀢𑀸𑀦𑀁 𑀕𑀼𑀡𑁂𑀳𑀺 𑀯𑀺𑀲𑀺𑀝𑁆𑀞𑀸, 𑀧𑀼𑀭𑀺𑀫𑀓𑀸 𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀲𑀩𑁆𑀩𑀲𑀢𑁆𑀢𑁂𑀳𑀺 𑀅𑀲𑀫𑀸, 𑀢𑁂𑀳𑀺 𑀧𑀦 𑀅𑀬𑀫𑁂𑀯𑁂𑀓𑁄 𑀭𑀽𑀧𑀓𑀸𑀬𑀦𑀸𑀫𑀓𑀸𑀬𑁂𑀳𑀺 𑀲𑀫𑁄. 𑀮𑁄𑀓𑁂𑀢𑀺 𑀲𑀢𑁆𑀢𑀮𑁄𑀓𑁂. ‘‘𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀧𑀦 𑀇𑀤𑀁 𑀉𑀪𑀬𑀫𑁆𑀧𑀺 𑀯𑀺𑀧𑁆𑀧𑀓𑀢𑀯𑀘𑀦𑀫𑁂𑀯 𑀉𑀧𑁆𑀧𑀸𑀤𑀓𑀺𑀭𑀺𑀬𑀸𑀬 𑀯𑀢𑁆𑀢𑀫𑀸𑀦𑀓𑀸𑀮𑀺𑀓𑀢𑁆𑀢𑀸. 𑀉𑀧𑁆𑀧𑀚𑁆𑀚𑀫𑀸𑀦𑁄 𑀩𑀳𑀼𑀚𑀦𑀳𑀺𑀢𑀸𑀬 𑀉𑀧𑁆𑀧𑀚𑁆𑀚𑀢𑀺, 𑀦 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦𑀸𑀢𑀺 𑀏𑀯𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀮𑀓𑁆𑀔𑀡𑁂 𑀳𑁂𑀲 𑀫𑀸𑀦-𑀲𑀤𑁆𑀤𑁄, 𑀏𑀯𑀭𑀽𑀧𑀜𑁆𑀘𑁂𑀢𑁆𑀣 𑀮𑀓𑁆𑀔𑀡𑀁 𑀦 𑀲𑀓𑁆𑀓𑀸 𑀅𑀜𑁆𑀜𑁂𑀦 𑀲𑀤𑁆𑀤𑀮𑀓𑁆𑀔𑀡𑁂𑀦 𑀧𑀝𑀺𑀩𑀸𑀳𑀺𑀢𑀼𑀁. 𑀅𑀧𑀺𑀘 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫, 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫, 𑀉𑀧𑁆𑀧𑀦𑁆𑀦𑁄 𑀦𑀸𑀫𑀸𑀢𑀺 𑀅𑀬𑀫𑁂𑀢𑁆𑀣 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀲 𑀳𑀺 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀦𑀸𑀕𑀸𑀫𑀺𑀨𑀮𑀁, 𑀢𑀸𑀯 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫, 𑀅𑀭𑀳𑀢𑁆𑀢𑀫𑀕𑁆𑀕𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫, 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑁄 𑀦𑀸𑀫. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀲𑀸𑀯𑀓𑀸𑀦𑀁 𑀯𑀺𑀬 𑀦 𑀧𑀝𑀺𑀧𑀸𑀝𑀺𑀬𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀸𑀤𑀻𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀳𑁂𑀯 𑀧𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀓𑀮𑁄𑀧𑀺 𑀲𑀩𑁆𑀩𑀜𑁆𑀜𑀼𑀕𑀼𑀡𑀭𑀸𑀲𑀺 𑀆𑀕𑀢𑁄𑀯 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀦𑀺𑀩𑁆𑀩𑀢𑁆𑀢𑀲𑀩𑁆𑀩𑀓𑀺𑀘𑁆𑀘𑀢𑁆𑀢𑀸 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑁄 𑀦𑀸𑀫, 𑀢𑀤𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀢𑀤𑀜𑁆𑀜𑀓𑁆𑀔𑀡𑁂 𑀬𑀣𑀸𑀭𑀳𑀁 ‘‘𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺’’ 𑀘𑁆𑀘𑁂𑀯 𑀯𑀼𑀘𑁆𑀘𑀢𑀺. 𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑁂 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑀁𑀬𑁂𑀯 𑀲𑀦𑁆𑀥𑀸𑀬 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀢𑀻𑀢𑀓𑀸𑀮𑀺𑀓𑀲𑁆𑀲𑀸𑀧𑀺 𑀯𑀢𑁆𑀢𑀫𑀸𑀦𑀧𑀬𑁄𑀕𑀲𑁆𑀲 𑀓𑀢𑁆𑀣𑀘𑀺 𑀤𑀺𑀝𑁆𑀞𑀢𑁆𑀢𑀸 𑀉𑀧𑁆𑀧𑀦𑁆𑀦𑁄 𑀳𑁄𑀢𑀻𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀏𑀯𑀁 𑀲𑀢𑀺 ‘‘𑀉𑀧𑁆𑀧𑀚𑁆𑀚𑀫𑀸𑀦𑁄’’𑀢𑀺 𑀘𑁂𑀢𑁆𑀣 𑀫𑀸𑀦-𑀲𑀤𑁆𑀤𑁄 𑀲𑀸𑀫𑀢𑁆𑀣𑀺𑀬𑀢𑁆𑀣𑁄. 𑀬𑀸𑀯𑀢𑀸 𑀲𑀸𑀫𑀢𑁆𑀣𑀺𑀬𑁂𑀦 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀘𑀭𑀺𑀫𑀪𑀯𑁂 𑀉𑀧𑁆𑀧𑀢𑁆𑀢𑀺 𑀇𑀘𑁆𑀙𑀺𑀢𑀩𑁆𑀩𑀸, 𑀢𑀸𑀯𑀢𑀸 𑀲𑀸𑀫𑀢𑁆𑀣𑀺𑀬𑁂𑀦 𑀩𑁄𑀥𑀺𑀲𑀫𑁆𑀪𑀸𑀭𑀪𑀽𑀢𑁂𑀦 𑀧𑀭𑀺𑀧𑀼𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀣𑀸𑀲𑀸𑀫𑀢𑁆𑀣𑀺𑀬𑀬𑁄𑀕𑁂𑀦 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫𑀸𑀢𑀺. 𑀲𑀩𑁆𑀩𑀲𑀢𑁆𑀢𑁂𑀳𑀺 𑀅𑀲𑀫𑁄, 𑀅𑀲𑀫𑁂𑀳𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀳𑁂𑀯 𑀲𑀫𑁄 𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡 𑀦𑀺𑀓𑁆𑀔𑀁 𑀯𑀺𑀬 𑀦𑀺𑀩𑁆𑀩𑀺𑀲𑀺𑀝𑁆𑀞𑁄, ‘‘𑀏𑀓𑀧𑀼𑀕𑁆𑀕𑀮𑁄’’𑀢𑀺 𑀘𑁂𑀢𑀲𑁆𑀲 𑀯𑀺𑀲𑁂𑀲𑀦𑀁. 𑀆𑀮𑀬𑀲𑀗𑁆𑀔𑀸𑀢𑀁 𑀢𑀡𑁆𑀳𑀁 𑀲𑀫𑀼𑀕𑁆𑀖𑀸𑀢𑁂𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀢𑀻𑀢𑀺 𑀆𑀮𑀬𑀲𑀫𑀼𑀕𑁆𑀖𑀸𑀢𑁄. 𑀯𑀝𑁆𑀝𑀁 𑀉𑀧𑀘𑁆𑀙𑀺𑀦𑁆𑀤𑀢𑀻𑀢𑀺 𑀯𑀝𑁆𑀝𑀼𑀧𑀘𑁆𑀙𑁂𑀤𑁄.

𑀧𑀳𑁄𑀦𑁆𑀢𑁂𑀦𑀸𑀢𑀺 ¶ 𑀲𑀓𑁆𑀓𑁄𑀦𑁆𑀢𑁂𑀦. ‘‘𑀧𑀜𑁆𑀘𑀦𑀺𑀓𑀸𑀬𑁂’’𑀢𑀺 𑀯𑀢𑁆𑀯𑀸𑀧𑀺 𑀅𑀦𑁂𑀓𑀸𑀯𑀬𑀯𑀢𑁆𑀢𑀸 𑀢𑁂𑀲𑀁 𑀦 𑀏𑀢𑁆𑀢𑀓𑁂𑀦 𑀲𑀩𑁆𑀩𑀣𑀸 𑀧𑀭𑀺𑀬𑀸𑀤𑀸𑀦𑀦𑁆𑀢𑀺 ‘‘𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁 𑀘𑀢𑀼𑀭𑀸𑀲𑀻𑀢𑀺 ¶ 𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀅𑀢𑀺𑀢𑁆𑀣𑁂𑀦𑀸𑀢𑀺 𑀅𑀦𑁄𑀢𑀭𑀡𑀝𑁆𑀞𑀸𑀦𑁂𑀦. 𑀦 𑀯𑀢𑁆𑀢𑀩𑁆𑀩𑁄 𑀅𑀧𑀭𑀺𑀫𑀸𑀡𑀯𑀡𑁆𑀡𑀢𑁆𑀢𑀸 𑀩𑀼𑀤𑁆𑀥𑀸𑀤𑀻𑀦𑀁, 𑀦𑀺𑀭𑀯𑀲𑁂𑀲𑀸𑀦𑀜𑁆𑀘 𑀢𑁂𑀲𑀁 𑀇𑀥 𑀧𑀓𑀸𑀲𑀦𑁂𑀦 𑀧𑀸𑀴𑀺𑀲𑀁𑀯𑀡𑁆𑀡𑀦𑀸𑀬 𑀏𑀯 𑀲𑀫𑁆𑀧𑀚𑁆𑀚𑀦𑀢𑁄, 𑀘𑀺𑀢𑁆𑀢𑀲𑀫𑁆𑀧𑀳𑀁𑀲𑀦𑀓𑀫𑁆𑀫𑀝𑁆𑀞𑀸𑀦𑀲𑀫𑁆𑀧𑀚𑁆𑀚𑀦𑀯𑀲𑁂𑀦 𑀘 𑀲𑀨𑀮𑀢𑁆𑀢𑀸. 𑀣𑀸𑀫𑁄 𑀯𑁂𑀤𑀺𑀢𑀩𑁆𑀩𑁄 𑀲𑀩𑁆𑀩𑀣𑀸𑀫𑁂𑀦 𑀧𑀓𑀸𑀲𑀺𑀢𑀢𑁆𑀢𑀸. 𑀓𑀺𑀁 𑀧𑀦 𑀲𑁄 𑀢𑀣𑀸 𑀑𑀕𑀸𑀳𑁂𑀢𑁆𑀯𑀸 𑀪𑀸𑀲𑀢𑀻𑀢𑀺 𑀆𑀳. ‘‘𑀩𑁆𑀭𑀳𑁆𑀫𑀤𑀢𑁆𑀢𑁄 𑀧𑀦𑀸’’𑀢𑀺𑀆𑀤𑀺. 𑀅𑀦𑀼𑀓𑁆𑀓𑀫𑁂𑀦 𑀧𑀼𑀦𑀧𑁆𑀧𑀼𑀦𑀁 𑀯𑀸 𑀲𑀯𑀦𑀁 𑀅𑀦𑀼𑀲𑁆𑀲𑀯𑁄, 𑀧𑀭𑀫𑁆𑀧𑀭𑀲𑀯𑀦𑀁. 𑀆𑀤𑀺-𑀲𑀤𑁆𑀤𑁂𑀦 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 ‘‘𑀲𑀼𑀦𑁆𑀤𑀭𑀫𑀺𑀤𑀁 𑀓𑀸𑀭𑀡’’𑀦𑁆𑀢𑀺 𑀏𑀯𑀁 𑀲𑀬𑀫𑁂𑀯 𑀓𑀸𑀭𑀡𑀧𑀭𑀺𑀯𑀺𑀢𑀓𑁆𑀓𑀦𑀁 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁄. 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀬𑀸 𑀦𑀺𑀚𑁆𑀛𑀸𑀬𑀺𑀢𑁆𑀯𑀸 𑀔𑀫𑀦𑀁 𑀭𑀼𑀘𑁆𑀘𑀦𑀁 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀻𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁, 𑀢𑁂𑀳𑀺𑀬𑁂𑀯 𑀲𑀫𑁆𑀩𑀦𑁆𑀥𑀺𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀫𑀢𑁆𑀢-𑀲𑀤𑁆𑀤𑁄 𑀳𑁂𑀢𑁆𑀣 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄, 𑀢𑁂𑀦 𑀬𑀣𑀸𑀯𑀼𑀢𑁆𑀢𑀁 𑀓𑀸𑀭𑀡𑀁 𑀦𑀺𑀯𑀢𑁆𑀢𑁂𑀢𑀺. 𑀅𑀢𑁆𑀢𑀦𑁄 𑀣𑀸𑀫𑁂𑀦𑀸𑀢𑀺 𑀅𑀢𑁆𑀢𑀦𑁄 𑀜𑀸𑀡𑀩𑀮𑁂𑀦𑁂𑀯, 𑀦 𑀧𑀦 𑀩𑀼𑀤𑁆𑀥𑀸𑀤𑀻𑀦𑀁 𑀕𑀼𑀡𑀸𑀦𑀼𑀭𑀽𑀧𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀧𑀭𑀺𑀫𑁂𑀬𑁆𑀬𑀧𑁆𑀧𑀪𑁂𑀤𑀸 𑀳𑀺 𑀩𑀼𑀤𑁆𑀥𑀸𑀤𑀻𑀦𑀁 𑀕𑀼𑀡𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁,

𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄;

𑀔𑀻𑀬𑁂𑀣 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂,

𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁦𑁪; 𑁩.𑁧𑁪𑁧; 𑀫. 𑀦𑀺. 𑀅𑀝𑁆𑀞. 𑁨.𑁪𑁨𑁫; 𑀉𑀤𑀸. 𑀅𑀝𑁆𑀞. 𑁫𑁩; 𑀩𑀼. 𑀯𑀁. 𑀅𑀝𑁆𑀞. 𑁪.𑁧; 𑀅𑀧. 𑀅𑀝𑁆𑀞. 𑁨.𑁯𑁧; 𑀘𑀭𑀺𑀬𑀸. 𑀅𑀝𑁆𑀞. 𑁯, 𑁩𑁨𑁯);

𑀇𑀥𑀸𑀧𑀺 𑀯𑀓𑁆𑀔𑀢𑀺 ‘‘𑀅𑀧𑁆𑀧𑀫𑀢𑁆𑀢𑀓𑀁 𑀔𑁄 𑀧𑀦𑁂𑀢’’𑀦𑁆𑀢𑀺𑀆𑀤𑀺.

𑀇𑀢𑀺-𑀲𑀤𑁆𑀤𑁄 𑀦𑀺𑀤𑀲𑁆𑀲𑀦𑀢𑁆𑀣𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀦𑀺𑀤𑀲𑁆𑀲𑁂𑀢𑀺. 𑀳-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀯𑀁 𑀢𑁂’’𑀢𑀺. 𑀅𑀜𑁆𑀜𑀫𑀜𑁆𑀜𑀲𑁆𑀲𑀸’’𑀢𑀺 𑀇𑀤𑀁 𑀭𑀼𑀴𑁆𑀳𑀺𑀧𑀤𑀁 ‘‘𑀏𑀓𑁄 𑀏𑀓𑀸𑀬𑀸’’𑀢𑀺 (𑀧𑀸𑀭𑀸. 𑁪𑁪𑁪, 𑁪𑁫𑁨) 𑀧𑀤𑀁 𑀯𑀺𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀜𑁆𑀜𑁄𑀅𑀜𑁆𑀜𑀲𑁆𑀲𑀸’’𑀢𑀺 𑀭𑀼𑀴𑁆𑀳𑀺𑀧𑀤𑁂𑀦𑁂𑀯 𑀯𑀺𑀯𑀭𑀢𑀺. ‘‘𑀉𑀚𑀼𑀫𑁂𑀯𑀸’’𑀢𑀺 𑀲𑀸𑀯𑀥𑀸𑀭𑀡𑀲𑀫𑀸𑀲𑀢𑀁 𑀯𑀢𑁆𑀯𑀸 𑀢𑁂𑀦 𑀦𑀺𑀯𑀢𑁆𑀢𑁂𑀢𑀩𑁆𑀩𑀢𑁆𑀣𑀁 𑀆𑀳 ‘‘𑀈𑀲𑀓𑀫𑁆𑀧𑀺 𑀅𑀧𑀭𑀺𑀳𑀭𑀺𑀢𑁆𑀯𑀸’’𑀢𑀺, 𑀣𑁄𑀓𑀢𑀭𑀫𑁆𑀧𑀺 𑀅𑀯𑀺𑀭𑀚𑁆𑀛𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀣𑀦𑁆𑀢𑀺 𑀆𑀳 ‘‘𑀆𑀘𑀭𑀺𑀬𑁂𑀦 𑀳𑀻’’𑀢𑀺𑀆𑀤𑀺. 𑀧𑀼𑀩𑁆𑀩𑁂 𑀏𑀓𑀯𑀸𑀭𑀫𑀺𑀯 𑀅𑀯𑀡𑁆𑀡𑀯𑀡𑁆𑀡𑀪𑀸𑀲𑀦𑁂 𑀦𑀺𑀤𑁆𑀤𑀺𑀝𑁆𑀞𑁂𑀧𑀺 ‘‘𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀯𑀸𑀤𑀸’’𑀢𑀺 (𑀤𑀻. 𑀦𑀺. 𑁧.𑁧) 𑀯𑀼𑀢𑁆𑀢𑀢𑁆𑀢𑀸 𑀅𑀦𑁂𑀓𑀯𑀸𑀭𑀫𑁂𑀯 ¶ 𑀢𑁂 𑀏𑀯𑀁 𑀪𑀸𑀲𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀦 𑀇𑀢𑀭𑁄 𑀅𑀯𑀡𑁆𑀡𑀁 𑀇𑀢𑀭𑁄 𑀯𑀡𑁆𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀳𑀺 𑀯𑀺𑀲𑀤𑁆𑀤𑀲𑁆𑀲 𑀯𑀺𑀯𑀺𑀥𑀢𑁆𑀣𑀢𑀁 𑀲𑀫𑀢𑁆𑀣𑁂𑀢𑀺. 𑀲𑀸𑀭𑀨𑀮𑀓𑁂𑀢𑀺 𑀲𑀸𑀭𑀤𑀸𑀭𑀼𑀨𑀮𑀓𑁂 ¶ , 𑀉𑀢𑁆𑀢𑀫𑀨𑀮𑀓𑁂 𑀯𑀸. 𑀯𑀺𑀲𑀭𑀼𑀓𑁆𑀔𑀆𑀡𑀺𑀦𑁆𑀢𑀺 𑀯𑀺𑀲𑀤𑀸𑀭𑀼𑀫𑀬𑀧𑀝𑀸𑀡𑀺𑀁. 𑀇𑀭𑀺𑀬𑀸𑀧𑀣𑀸𑀦𑀼𑀩𑀦𑁆𑀥𑀦𑁂𑀦 𑀅𑀦𑀼𑀩𑀦𑁆𑀥𑀸 𑀳𑁄𑀦𑁆𑀢𑀺, 𑀦 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀅𑀦𑀼𑀩𑀦𑁆𑀥𑀦𑁂𑀦.

𑀲𑀻𑀲𑀸𑀦𑀼𑀮𑁄𑀓𑀺𑀦𑁄𑀢𑀺 𑀲𑀻𑀲𑁂𑀦 𑀅𑀦𑀼𑀮𑁄𑀓𑀺𑀦𑁄, 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀫𑀕𑁆𑀕𑀸𑀦𑀼𑀓𑁆𑀓𑀫𑁂𑀦 𑀑𑀮𑁄𑀓𑀬𑀫𑀸𑀦𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀺𑀁 𑀓𑀸𑀮𑁂𑀢𑀺 𑀬𑀫𑁆𑀳𑀺 𑀲𑀁𑀯𑀘𑁆𑀙𑀭𑁂, 𑀉𑀢𑀼𑀫𑁆𑀳𑀺, 𑀫𑀸𑀲𑁂, 𑀧𑀓𑁆𑀔𑁂 𑀯𑀸 𑀪𑀕𑀯𑀸 𑀢𑀁 𑀅𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄, 𑀢𑀲𑁆𑀫𑀺𑀁 𑀓𑀸𑀮𑁂. 𑀢𑁂𑀦 𑀳𑀺 𑀅𑀦𑀺𑀬𑀫𑀢𑁄 𑀲𑀁𑀯𑀘𑁆𑀙𑀭𑀉𑀢𑀼𑀫𑀸𑀲𑀟𑁆𑀠𑀫𑀸𑀲𑀸𑀯 𑀦𑀺𑀤𑁆𑀤𑀺𑀲𑀺𑀢𑀸 ‘‘𑀢𑀁 𑀤𑀺𑀯𑀲’’𑀦𑁆𑀢𑀺 𑀤𑀺𑀯𑀲𑀲𑁆𑀲 𑀯𑀺𑀲𑀼𑀁 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸, 𑀫𑀼𑀳𑀼𑀢𑁆𑀢𑀸𑀤𑀻𑀦𑀜𑁆𑀘 𑀤𑀺𑀯𑀲𑀧𑀭𑀺𑀬𑀸𑀧𑀦𑁆𑀦𑀢𑁄. ‘‘𑀢𑀁 𑀅𑀤𑁆𑀥𑀸𑀦𑀁 𑀧𑀝𑀺𑀧𑀦𑁆𑀦𑁄’’𑀢𑀺 𑀘𑁂𑀢𑁆𑀣 𑀆𑀥𑀸𑀭𑀯𑀘𑀦𑀫𑁂𑀢𑀁. 𑀢𑁂𑀦𑁂𑀯 𑀳𑀺 𑀓𑀺𑀭𑀺𑀬𑀸𑀯𑀺𑀘𑁆𑀙𑁂𑀤𑀤𑀲𑁆𑀲𑀦𑀯𑀲𑁂𑀦 ‘‘𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀢𑀻’’𑀢𑀺 𑀲𑀳 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀳𑀺 𑀯𑀢𑁆𑀢𑀫𑀸𑀦𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀇𑀢𑀭𑀣𑀸 𑀢𑀲𑁆𑀫𑀺𑀁 𑀓𑀸𑀮𑁂 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀢𑀺, 𑀢𑀁 𑀅𑀤𑁆𑀥𑀸𑀦𑀫𑀕𑁆𑀕𑀜𑁆𑀘 𑀧𑀝𑀺𑀧𑀦𑁆𑀦𑁄𑀢𑀺 𑀅𑀦𑀥𑀺𑀧𑁆𑀧𑁂𑀢𑀢𑁆𑀣𑁄 𑀆𑀧𑀚𑁆𑀚𑁂𑀬𑁆𑀬. 𑀦 𑀳𑀺 𑀅𑀲𑀫𑀸𑀦𑀯𑀺𑀲𑀬𑀸 𑀓𑀺𑀭𑀺𑀬𑀸 𑀏𑀓𑀸𑀥𑀸𑀭𑀸 𑀲𑀫𑁆𑀪𑀯𑀦𑁆𑀢𑀺, 𑀬𑀸 𑀘𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑀸 𑀅𑀤𑁆𑀥𑀸𑀦𑀧𑀝𑀺𑀧𑀚𑁆𑀚𑀦𑀓𑀺𑀭𑀺𑀬𑀸, 𑀲𑀸 𑀘 𑀅𑀦𑀺𑀬𑀫𑀺𑀢𑀸 𑀦 𑀬𑀼𑀢𑁆𑀢𑀸𑀢𑀺. 𑀭𑀸𑀚𑀕𑀳𑀧𑀭𑀺𑀯𑀢𑁆𑀢𑀓𑁂𑀲𑀽𑀢𑀺 𑀭𑀸𑀚𑀕𑀳𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀞𑀺𑀢𑁂𑀲𑀼. ‘‘𑀅𑀜𑁆𑀜𑀢𑀭𑀲𑁆𑀫𑀺’’𑀦𑁆𑀢𑀺 𑀇𑀫𑀺𑀦𑀸 𑀢𑁂𑀲𑀼 𑀪𑀕𑀯𑀢𑁄 𑀅𑀦𑀺𑀩𑀤𑁆𑀥𑀯𑀸𑀲𑀁 𑀤𑀲𑁆𑀲𑁂𑀢𑀺. 𑀲𑁄𑀢𑀺 𑀏𑀯𑀁 𑀭𑀸𑀚𑀕𑀳𑁂 𑀯𑀲𑀫𑀸𑀦𑁄 𑀲𑁄 𑀪𑀕𑀯𑀸. 𑀧𑀺𑀡𑁆𑀟𑀸𑀬 𑀘𑀭𑀡𑁂𑀦𑀧𑀺 𑀳𑀺 𑀢𑀢𑁆𑀣 𑀧𑀝𑀺𑀩𑀤𑁆𑀥𑀪𑀸𑀯𑀯𑀘𑀦𑀢𑁄 𑀲𑀦𑁆𑀦𑀺𑀯𑀸𑀲𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀺. 𑀬𑀤𑀺 𑀧𑀦 ‘‘𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑁄 𑀲𑁄 𑀪𑀕𑀯𑀸’’𑀢𑀺 𑀧𑀘𑁆𑀘𑀸𑀫𑀲𑁂𑀬𑁆𑀬, 𑀬𑀣𑀸𑀯𑀼𑀢𑁆𑀢𑁄𑀯 𑀅𑀦𑀥𑀺𑀧𑁆𑀧𑁂𑀢𑀢𑁆𑀣𑁄 𑀆𑀧𑀚𑁆𑀚𑁂𑀬𑁆𑀬𑀸𑀢𑀺. 𑀢𑀁 𑀤𑀺𑀯𑀲𑀦𑁆𑀢𑀺 𑀬𑀁 𑀤𑀺𑀯𑀲𑀁 𑀅𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄, 𑀢𑀁 𑀤𑀺𑀯𑀲. 𑀢𑀁 𑀅𑀤𑁆𑀥𑀸𑀦𑀁 𑀧𑀝𑀺𑀧𑀦𑁆𑀦𑁄𑀢𑀺 𑀏𑀢𑁆𑀣 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀯𑀘𑀦𑀫𑁂𑀢𑀁. 𑀪𑀢𑁆𑀢𑀪𑀼𑀜𑁆𑀚𑀦𑀢𑁄 𑀧𑀘𑁆𑀙𑀸 𑀧𑀘𑁆𑀙𑀸𑀪𑀢𑁆𑀢𑀁, 𑀢𑀲𑁆𑀫𑀺𑀁 𑀧𑀘𑁆𑀙𑀸𑀪𑀢𑁆𑀢𑀲𑀫𑀬𑁂. 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄𑀢𑀺 𑀬𑀢𑁆𑀣 𑀧𑀺𑀡𑁆𑀟𑀧𑀸𑀢𑀢𑁆𑀣𑀸𑀬 𑀘𑀭𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺, 𑀢𑀢𑁄 𑀅𑀧𑀓𑁆𑀓𑀦𑁆𑀢𑁄. 𑀢𑀁 𑀅𑀤𑁆𑀥𑀸𑀦𑀁 𑀧𑀝𑀺𑀧𑀦𑁆𑀦𑁄𑀢𑀺 ‘‘𑀦𑀸𑀴𑀦𑁆𑀤𑀸𑀬𑀁 𑀯𑁂𑀦𑁂𑀬𑁆𑀬𑀸𑀦𑀁 𑀯𑀺𑀯𑀺𑀥𑀳𑀺𑀢𑀲𑀼𑀔𑀦𑀺𑀧𑁆𑀨𑀢𑁆𑀢𑀺𑀁 𑀆𑀓𑀗𑁆𑀔𑀫𑀸𑀦𑁄 𑀇𑀫𑀺𑀲𑁆𑀲𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀢𑀺𑀯𑀺𑀥𑀲𑀻𑀮𑀸𑀮𑀗𑁆𑀓𑀢𑀁 𑀦𑀸𑀦𑀸𑀯𑀺𑀥𑀓𑀼𑀳𑀦𑀮𑀧𑀦𑀸𑀤𑀺𑀫𑀺𑀘𑁆𑀙𑀸𑀚𑀻𑀯𑀯𑀺𑀤𑁆𑀥𑀁𑀲𑀦𑀁 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀚𑀸𑀮𑀯𑀺𑀦𑀺𑀯𑁂𑀞𑀦𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀧𑀓𑀫𑁆𑀧𑀦𑀁 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀢𑀁 𑀬𑀣𑀸𑀯𑀼𑀢𑁆𑀢𑀁 𑀤𑀻𑀖𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄, 𑀇𑀤𑀁 𑀧𑀦 𑀓𑀸𑀭𑀡𑀁 𑀧𑀓𑀭𑀡𑀢𑁄𑀯 𑀧𑀸𑀓𑀝𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀏𑀢𑁆𑀢𑀸𑀯𑀢𑀸 ‘‘𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀢𑀁 𑀅𑀤𑁆𑀥𑀸𑀦𑀁 𑀧𑀝𑀺𑀧𑀦𑁆𑀦𑁄’’𑀢𑀺 𑀘𑁄𑀤𑀦𑀸 𑀯𑀺𑀲𑁄𑀥𑀺𑀢𑀸 𑀳𑁄𑀢𑀺.

𑀇𑀤𑀸𑀦𑀺 𑀇𑀢𑀭𑀫𑁆𑀧𑀺 𑀘𑁄𑀤𑀦𑀁 𑀯𑀺𑀲𑁄𑀥𑀺𑀢𑀼𑀁 ‘‘𑀲𑀼𑀧𑁆𑀧𑀺𑀬𑁄𑀧𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀁 𑀓𑀸𑀮𑁂, 𑀢𑀁 𑀤𑀺𑀯𑀲𑀁 𑀅𑀦𑀼𑀩𑀦𑁆𑀥𑁄𑀢𑀺 𑀘 𑀯𑀼𑀢𑁆𑀢𑀦𑀬𑁂𑀦 𑀲𑀫𑁆𑀩𑀦𑁆𑀥𑁄. 𑀧𑀸𑀢𑁄 ¶ 𑀅𑀲𑀺𑀢𑀩𑁆𑀩𑁄𑀢𑀺 𑀧𑀸𑀢𑀭𑀸𑀲𑁄, 𑀲𑁄 𑀪𑀼𑀢𑁆𑀢𑁄 𑀬𑁂𑀦𑀸𑀢𑀺 𑀪𑀼𑀢𑁆𑀢𑀧𑀸𑀢𑀭𑀸𑀲𑁄. 𑀇𑀘𑁆𑀘𑁂𑀯𑀸𑀢𑀺 𑀏𑀯𑀫𑁂𑀯 𑀫𑀦𑀲𑀺 𑀲𑀦𑁆𑀦𑀺𑀥𑀸𑀬, 𑀦 𑀧𑀦 ‘‘𑀪𑀕𑀯𑀦𑁆𑀢𑀁, 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀧𑀺𑀝𑁆𑀞𑀺𑀢𑁄 ¶ 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺𑀲𑁆𑀲𑀸𑀫𑀻’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀪𑀕𑀯𑀢𑁄 𑀢𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀪𑀸𑀯𑀁 𑀅𑀚𑀸𑀦𑀦𑁆𑀢𑁄𑀯𑀸’’𑀢𑀺, 𑀢𑀣𑀸 𑀅𑀚𑀸𑀦𑀦𑁆𑀢𑁄 𑀏𑀯 𑀳𑀼𑀢𑁆𑀯𑀸 𑀅𑀦𑀼𑀩𑀦𑁆𑀥𑁄𑀢𑀺 𑀅𑀢𑁆𑀣𑁄. 𑀦 𑀳𑀺 𑀲𑁄 𑀪𑀕𑀯𑀦𑁆𑀢𑀁 𑀤𑀝𑁆𑀞𑀼𑀫𑁂𑀯 𑀇𑀘𑁆𑀙𑀢𑀺, 𑀢𑁂𑀦𑀸𑀳 ‘‘𑀲𑀘𑁂 𑀧𑀦 𑀚𑀸𑀦𑁂𑀬𑁆𑀬, 𑀦𑀸𑀦𑀼𑀩𑀦𑁆𑀥𑁂𑀬𑁆𑀬𑀸’’𑀢𑀺. 𑀏𑀢𑁆𑀢𑀸𑀯𑀢𑀸 ‘‘𑀓𑀲𑁆𑀫𑀸 𑀘 𑀲𑀼𑀧𑁆𑀧𑀺𑀬𑁄 𑀅𑀦𑀼𑀩𑀦𑁆𑀥𑁄’’𑀢𑀺 𑀘𑁄𑀤𑀦𑀸 𑀯𑀺𑀲𑁄𑀥𑀺𑀢𑀸 𑀳𑁄𑀢𑀺. ‘‘𑀲𑁄’’𑀢𑀺𑀆𑀤𑀺𑀦𑀸 𑀅𑀧𑀭𑀫𑁆𑀧𑀺 𑀘𑁄𑀤𑀦𑀁 𑀯𑀺𑀲𑁄𑀥𑁂𑀢𑀺. 𑀓𑀤𑀸𑀘𑀺 𑀧𑀦 𑀪𑀕𑀯𑀸 𑀅𑀜𑁆𑀜𑀢𑀭𑀯𑁂𑀲𑁂𑀦𑁂𑀯 𑀕𑀘𑁆𑀙𑀢𑀺 𑀅𑀗𑁆𑀕𑀼𑀮𑀺𑀫𑀸𑀮𑀤𑀫𑀦𑀧𑀓𑁆𑀓𑀼𑀲𑀸𑀢𑀺𑀅𑀪𑀺𑀕𑁆𑀕𑀫𑀦𑀸𑀤𑀻𑀲𑀼, 𑀓𑀤𑀸𑀘𑀺 𑀩𑀼𑀤𑁆𑀥𑀲𑀺𑀭𑀺𑀬𑀸, 𑀇𑀥𑀸𑀧𑀺 𑀈𑀤𑀺𑀲𑀸𑀬 𑀩𑀼𑀤𑁆𑀥𑀲𑀺𑀭𑀺𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀩𑀼𑀤𑁆𑀥𑀲𑀺𑀭𑀺𑀬𑀸 𑀲𑁄𑀪𑀫𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀺𑀭𑀻𑀢𑀺 𑀘𑁂𑀢𑁆𑀣 𑀲𑀭𑀻𑀭𑀲𑁄𑀪𑀕𑁆𑀕𑀸𑀤𑀺𑀲𑀫𑁆𑀧𑀢𑁆𑀢𑀺, 𑀢𑀤𑁂𑀯 𑀉𑀧𑀫𑀸𑀯𑀲𑁂𑀦 𑀤𑀲𑁆𑀲𑁂𑀢𑀺 ‘‘𑀭𑀢𑁆𑀢𑀓𑀫𑁆𑀩𑀮𑀧𑀭𑀺𑀓𑁆𑀔𑀺𑀢𑁆𑀢𑀫𑀺𑀯𑀸’’𑀢𑀺𑀆𑀤𑀺𑀦𑀸. 𑀕𑀘𑁆𑀙𑀢𑀻𑀢𑀺 𑀚𑀗𑁆𑀕𑀫𑁄 𑀬𑀣𑀸 ‘‘𑀘𑀗𑁆𑀓𑀫𑁄’’𑀢𑀺. 𑀘𑀜𑁆𑀘𑀮𑀫𑀸𑀦𑁄 𑀕𑀘𑁆𑀙𑀦𑁆𑀢𑁄 𑀕𑀺𑀭𑀺, 𑀢𑀸𑀤𑀺𑀲𑀲𑁆𑀲 𑀓𑀦𑀓𑀕𑀺𑀭𑀺𑀦𑁄 𑀲𑀺𑀔𑀭𑀫𑀺𑀯𑀸𑀢𑀺 𑀅𑀢𑁆𑀣𑁄.

‘‘𑀢𑀲𑁆𑀫𑀺𑀁 𑀓𑀺𑀭𑀸’’𑀢𑀺𑀆𑀤𑀺 𑀢𑀩𑁆𑀩𑀺𑀯𑀭𑀡𑀁, 𑀧𑀸𑀴𑀺𑀬𑀁 𑀅𑀤𑀲𑁆𑀲𑀺𑀢𑀢𑁆𑀢𑀸, 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀜𑁆𑀘 𑀅𑀦𑀸𑀕𑀢𑀢𑁆𑀢𑀸 𑀅𑀦𑀼𑀲𑁆𑀲𑀯𑀲𑀺𑀤𑁆𑀥𑀸 𑀅𑀬𑀁 𑀓𑀣𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀭𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀣𑀸 𑀯𑀸 𑀳𑁄𑀢𑀼 𑀅𑀜𑁆𑀜𑀣𑀸 𑀯𑀸, 𑀅𑀢𑁆𑀢𑀦𑀸 𑀅𑀤𑀺𑀝𑁆𑀞𑀁, 𑀅𑀲𑀼𑀢𑀁, 𑀅𑀫𑀼𑀢𑀜𑁆𑀘 𑀅𑀦𑀼𑀲𑁆𑀲𑀯𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀫𑀜𑁆𑀚𑀺𑀝𑁆𑀞𑀧𑀪𑀲𑁆𑀲𑀭𑀯𑀲𑁂𑀦 𑀙𑀩𑁆𑀩𑀡𑁆𑀡𑀸. 𑀲𑀫𑀦𑁆𑀢𑀸𑀢𑀺 𑀲𑀫𑀦𑁆𑀢𑀢𑁄 𑀤𑀲𑀳𑀺 𑀤𑀺𑀲𑀸𑀳𑀺. 𑀅𑀲𑀻𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑁂𑀢𑀺 𑀢𑁂𑀲𑀁 𑀭𑀲𑁆𑀫𑀻𑀦𑀁 𑀧𑀓𑀢𑀺𑀬𑀸 𑀧𑀯𑀢𑁆𑀢𑀺𑀝𑁆𑀞𑀸𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀲𑀫𑀦𑁆𑀢𑀢𑁄, 𑀉𑀧𑀭𑀺 𑀘 𑀧𑀘𑁆𑀘𑁂𑀓𑀁 𑀅𑀲𑀻𑀢𑀺𑀳𑀢𑁆𑀣𑀫𑀢𑁆𑀢𑁂 𑀧𑀤𑁂𑀲𑁂 𑀧𑀓𑀢𑀺𑀬𑀸𑀯 𑀖𑀦𑀻𑀪𑀽𑀢𑀸 𑀭𑀲𑁆𑀫𑀺𑀬𑁄 𑀢𑀺𑀝𑁆𑀞𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀁, 𑀯𑀺𑀦𑀬𑀝𑀻𑀓𑀸𑀬𑀁 𑀧𑀦 ‘‘𑀢𑀸𑀬𑁂𑀯 𑀩𑁆𑀬𑀸𑀫𑀧𑁆𑀧𑀪𑀸 𑀦𑀸𑀫. 𑀬𑀢𑁄 𑀙𑀩𑁆𑀩𑀡𑁆𑀡𑀸 𑀭𑀲𑁆𑀫𑀺𑀬𑁄 𑀢𑀴𑀸𑀓𑀢𑁄 𑀫𑀸𑀢𑀺𑀓𑀸 𑀯𑀺𑀬 𑀤𑀲𑀲𑀼 𑀤𑀺𑀲𑀸𑀲𑀼 𑀥𑀸𑀯𑀦𑁆𑀢𑀺, 𑀲𑀸 𑀬𑀲𑁆𑀫𑀸 𑀩𑁆𑀬𑀸𑀫𑀫𑀢𑁆𑀢𑀸 𑀯𑀺𑀬 𑀔𑀸𑀬𑀢𑀺, 𑀢𑀲𑁆𑀫𑀸 𑀩𑁆𑀬𑀸𑀫𑀧𑁆𑀧𑀪𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁, (𑀯𑀺. 𑀯𑀺. 𑀝𑀻. 𑁧.𑁧𑁬) 𑀲𑀗𑁆𑀕𑀻𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀧𑀦 𑀯𑀓𑁆𑀔𑀢𑀺 ‘‘𑀧𑀼𑀭𑀢𑁆𑀣𑀺𑀫𑀓𑀸𑀬𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀸 𑀭𑀲𑁆𑀫𑀺 𑀉𑀝𑁆𑀞𑀳𑀺𑀢𑁆𑀯𑀸 𑀅𑀲𑀻𑀢𑀺𑀳𑀢𑁆𑀣𑀁 𑀞𑀸𑀦𑀁 𑀕𑀡𑁆𑀳𑀸𑀢𑀺. 𑀧𑀘𑁆𑀙𑀺𑀫𑀓𑀸𑀬𑀢𑁄. 𑀤𑀓𑁆𑀔𑀺𑀡𑀳𑀢𑁆𑀣𑀢𑁄. 𑀯𑀸𑀫𑀳𑀢𑁆𑀣𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀸 𑀭𑀲𑁆𑀫𑀺 𑀉𑀝𑁆𑀞𑀳𑀺𑀢𑁆𑀯𑀸 𑀅𑀲𑀻𑀢𑀺𑀳𑀢𑁆𑀣𑀁 𑀞𑀸𑀦𑀁 𑀕𑀡𑁆𑀳𑀸𑀢𑀺. 𑀉𑀧𑀭𑀺 𑀓𑁂𑀲𑀦𑁆𑀢𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀓𑁂𑀲𑀸𑀯𑀝𑁆𑀝𑁂𑀳𑀺 𑀫𑁄𑀭𑀕𑀻𑀯𑀯𑀡𑁆𑀡𑀸 𑀭𑀲𑁆𑀫𑀺 𑀉𑀝𑁆𑀞𑀳𑀺𑀢𑁆𑀯𑀸 𑀕𑀕𑀦𑀢𑀮𑁂 ¶ 𑀅𑀲𑀻𑀢𑀺𑀳𑀢𑁆𑀣𑀁 𑀞𑀸𑀦𑀁 𑀕𑀡𑁆𑀳𑀸𑀢𑀺. 𑀳𑁂𑀝𑁆𑀞𑀸 𑀧𑀸𑀤𑀢𑀮𑁂𑀳𑀺 𑀧𑀯𑀸𑀴𑀯𑀡𑁆𑀡𑀸 𑀭𑀲𑁆𑀫𑀺 𑀉𑀝𑁆𑀞𑀳𑀺𑀢𑁆𑀯𑀸 𑀖𑀦𑀧𑀣𑀯𑀺𑀬𑀁 𑀅𑀲𑀻𑀢𑀺𑀳𑀢𑁆𑀣𑀁 𑀞𑀸𑀦𑀁 𑀕𑀡𑁆𑀳𑀸𑀢𑀺. 𑀏𑀯𑀁 𑀲𑀫𑀦𑁆𑀢𑀸 𑀅𑀲𑀻𑀢𑀺𑀳𑀢𑁆𑀣𑀫𑀢𑁆𑀢𑀁 𑀞𑀸𑀦𑀁 𑀙𑀩𑁆𑀩𑀡𑁆𑀡𑀸 𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀚𑁆𑀚𑁄𑀢𑀫𑀸𑀦𑀸 𑀯𑀺𑀧𑁆𑀨𑀦𑁆𑀤𑀫𑀸𑀦𑀸 𑀯𑀺𑀥𑀸𑀯𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁩.𑁨𑁯𑁯) 𑀓𑁂𑀘𑀺 𑀧𑀦 𑀅𑀜𑁆𑀜𑀣𑀸𑀧𑀺 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑁂𑀦 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁 𑀢𑀣𑀸 𑀅𑀜𑁆𑀜𑀢𑁆𑀣 𑀅𑀦𑀸𑀕𑀢𑀢𑁆𑀢𑀸, 𑀅𑀬𑀼𑀢𑁆𑀢𑀢𑁆𑀢𑀸 𑀘. 𑀢𑀸𑀲𑀁 𑀧𑀦 𑀩𑀼𑀤𑁆𑀥𑀭𑀲𑁆𑀫𑀻𑀦𑀁 𑀢𑀤𑀸 𑀅𑀦𑀺𑀕𑁆𑀕𑀽𑀳𑀺𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀢𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂’’𑀢𑀺 𑀯𑀼𑀢𑁆𑀢𑀁. 𑀧𑀓𑁆𑀓𑀼𑀲𑀸𑀢𑀺𑀅𑀪𑀺𑀕𑁆𑀕𑀫𑀦𑀸𑀤𑀻𑀲𑀼 𑀯𑀺𑀬 𑀳𑀺 𑀢𑀤𑀸 𑀢𑀸𑀲𑀁 𑀦𑀺𑀕𑁆𑀕𑀽𑀳𑀦𑁂 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀦𑀢𑁆𑀣𑀺. 𑀆𑀥𑀸𑀯𑀦𑁆𑀢𑀻𑀢𑀺 𑀅𑀪𑀺𑀫𑀼𑀔𑀁 𑀤𑀺𑀲𑀁 𑀥𑀸𑀯𑀦𑁆𑀢𑀺. 𑀯𑀺𑀥𑀸𑀯𑀦𑁆𑀢𑀻𑀢𑀺 𑀯𑀺𑀯𑀺𑀥𑀸 𑀳𑀼𑀢𑁆𑀯𑀸 𑀯𑀺𑀤𑀺𑀲𑀁 𑀥𑀸𑀯𑀦𑁆𑀢𑀺.

𑀢𑀲𑁆𑀫𑀺𑀁 ¶ 𑀯𑀦𑀦𑁆𑀢𑀭𑁂 𑀤𑀺𑀲𑁆𑀲𑀫𑀸𑀦𑀸𑀓𑀸𑀭𑁂𑀦 𑀢𑀸𑀲𑀁 𑀭𑀲𑁆𑀫𑀻𑀦𑀁 𑀲𑁄𑀪𑀸 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀭𑀢𑀦𑀸𑀯𑁂𑀴𑀸’’𑀢𑀺𑀆𑀤𑀺. 𑀭𑀢𑀦𑀸𑀯𑁂𑀴𑀸 𑀦𑀸𑀫 𑀭𑀢𑀦𑀫𑀬𑀯𑀝𑀁𑀲𑀓𑀁 𑀫𑀼𑀤𑁆𑀥𑀁 𑀅𑀯𑀢𑀺 𑀭𑀓𑁆𑀔𑀢𑀻𑀢𑀺 𑀳𑀺 𑀅𑀯𑁂𑀴𑀸, 𑀆𑀯𑁂𑀴𑀸 𑀯𑀸, 𑀫𑀼𑀤𑁆𑀥𑀫𑀸𑀮𑀸. 𑀉𑀓𑁆𑀓𑀸 𑀦𑀸𑀫 𑀬𑀸 𑀲𑀚𑁄𑀢𑀺𑀪𑀽𑀢𑀸, 𑀢𑀸𑀲𑀁 𑀲𑀢𑀁, 𑀦𑀺𑀧𑀢𑀦𑀁 𑀦𑀺𑀧𑀸𑀢𑁄, 𑀢𑀲𑁆𑀲 𑀦𑀺𑀧𑀸𑀢𑁄, 𑀢𑁂𑀦 𑀲𑀫𑀸𑀓𑀼𑀮𑀁 𑀢𑀣𑀸. 𑀧𑀺𑀲𑀺𑀢𑀩𑁆𑀩𑀢𑁆𑀢𑀸 𑀧𑀺𑀝𑁆𑀞𑀁, 𑀘𑀻𑀦𑀤𑁂𑀲𑁂 𑀚𑀸𑀢𑀁 𑀧𑀺𑀝𑁆𑀞𑀁 𑀘𑀻𑀦𑀧𑀺𑀝𑁆𑀞𑀁, 𑀭𑀢𑁆𑀢𑀘𑀼𑀡𑁆𑀡𑀁, 𑀬𑀁 ‘‘𑀲𑀺𑀦𑁆𑀤𑀽𑀭𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀘𑀻𑀦𑀧𑀺𑀝𑁆𑀞𑀫𑁂𑀯 𑀘𑀼𑀡𑁆𑀡𑀁. 𑀯𑀸𑀬𑀼𑀦𑁄 𑀯𑁂𑀕𑁂𑀦 𑀇𑀢𑁄 𑀘𑀺𑀢𑁄 𑀘 𑀔𑀺𑀢𑁆𑀢𑀁 𑀢𑀦𑁆𑀢𑀺 𑀢𑀣𑀸. 𑀇𑀦𑁆𑀤𑀲𑁆𑀲 𑀥𑀦𑀼 𑀮𑁄𑀓𑀲𑀗𑁆𑀓𑁂𑀢𑀯𑀲𑁂𑀦𑀸𑀢𑀺 𑀇𑀦𑁆𑀤𑀥𑀦𑀼, 𑀲𑀽𑀭𑀺𑀬𑀭𑀲𑁆𑀫𑀺𑀯𑀲𑁂𑀦 𑀕𑀕𑀦𑁂 𑀧𑀜𑁆𑀜𑀸𑀬𑀫𑀸𑀦𑀸𑀓𑀸𑀭𑀯𑀺𑀲𑁂𑀲𑁄. 𑀓𑀼𑀝𑀺𑀮𑀁 𑀅𑀘𑀺𑀭𑀝𑁆𑀞𑀸𑀬𑀺𑀢𑁆𑀢𑀸 𑀯𑀺𑀭𑀽𑀧𑀁 𑀳𑀼𑀢𑁆𑀯𑀸 𑀚𑀯𑀢𑀺 𑀥𑀸𑀯𑀢𑀻𑀢𑀺 𑀯𑀺𑀚𑁆𑀚𑀼, 𑀲𑀸𑀬𑁂𑀯 𑀮𑀢𑀸 𑀢𑀁𑀲𑀤𑀺𑀲𑀪𑀸𑀯𑁂𑀦𑀸𑀢𑀺 𑀢𑀣𑀸, 𑀯𑀸𑀬𑀼𑀯𑁂𑀕𑀢𑁄 𑀯𑀮𑀸𑀳𑀓𑀖𑀝𑁆𑀝𑀦𑁂𑀦𑁂𑀯 𑀚𑀸𑀢𑀭𑀲𑁆𑀫𑀺. 𑀢𑀸𑀬𑀢𑀺 𑀅𑀯𑀺𑀚𑀳𑀦𑀯𑀲𑁂𑀦 𑀆𑀓𑀸𑀲𑀁 𑀧𑀸𑀮𑁂𑀢𑀻𑀢𑀺 𑀢𑀸𑀭𑀸, 𑀕𑀡𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀢𑀲𑁆𑀲 𑀧𑀪𑀸 𑀢𑀣𑀸. 𑀯𑀺𑀧𑁆𑀨𑀼𑀭𑀺𑀢𑀯𑀺𑀘𑁆𑀙𑀭𑀺𑀢𑀫𑀺𑀯𑀸𑀢𑀺 𑀆𑀪𑀸𑀬 𑀯𑀺𑀯𑀺𑀥𑀁 𑀨𑀭𑀫𑀸𑀦𑀁, 𑀯𑀺𑀚𑁆𑀚𑁄𑀢𑀬𑀫𑀸𑀦𑀁 𑀯𑀺𑀬 𑀘. 𑀯𑀦𑀲𑁆𑀲 𑀅𑀦𑁆𑀢𑀭𑀁 𑀯𑀺𑀯𑀭𑀁 𑀯𑀦𑀦𑁆𑀢𑀭𑀁, 𑀪𑀕𑀯𑀢𑀸 𑀧𑀢𑁆𑀢𑀧𑀢𑁆𑀢𑀯𑀦𑀧𑁆𑀧𑀤𑁂𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀲𑀻𑀢𑀺𑀬𑀸 𑀅𑀦𑀼𑀩𑁆𑀬𑀜𑁆𑀚𑀦𑁂𑀳𑀺 𑀢𑀫𑁆𑀩𑀦𑀔𑀢𑀸𑀤𑀻𑀳𑀺 𑀅𑀦𑀼𑀭𑀜𑁆𑀚𑀺𑀢𑀁 𑀢𑀣𑀸. 𑀓𑀫𑀮𑀁 𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀸𑀦𑀺, 𑀅𑀯𑀲𑁂𑀲𑀁 𑀦𑀻𑀮𑀭𑀢𑁆𑀢𑀲𑁂𑀢𑀪𑁂𑀤𑀁 𑀲𑀭𑁄𑀭𑀼𑀳𑀁 𑀉𑀧𑁆𑀧𑀮𑀁, 𑀇𑀢𑀺 𑀧𑀜𑁆𑀘𑀯𑀺𑀥𑀸 𑀧𑀗𑁆𑀓𑀚𑀚𑀸𑀢𑀺 𑀧𑀭𑀺𑀕𑁆𑀕𑀳𑀺𑀢𑀸 𑀳𑁄𑀢𑀺. 𑀯𑀺𑀓𑀲𑀺𑀢𑀁 𑀨𑀼𑀮𑁆𑀮𑀺𑀢𑀁 𑀢𑀤𑀼𑀪𑀬𑀁 𑀬𑀲𑁆𑀲 𑀲𑀭𑀲𑁆𑀲 𑀢𑀣𑀸. 𑀲𑀩𑁆𑀩𑁂𑀦 𑀧𑀓𑀸𑀭𑁂𑀦 𑀧𑀭𑀺𑀢𑁄 𑀲𑀫𑀦𑁆𑀢𑀢𑁄 𑀨𑀼𑀮𑁆𑀮𑀢𑀺 𑀯𑀺𑀓𑀲𑀢𑀻𑀢𑀺 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀁 𑀅-𑀓𑀸𑀭𑀲𑁆𑀲 𑀆-𑀓𑀸𑀭𑀁, 𑀭-𑀓𑀸𑀭𑀲𑁆𑀲 𑀘 𑀮-𑀓𑀸𑀭𑀁 𑀓𑀢𑁆𑀯𑀸 𑀬𑀣𑀸 ‘‘𑀧𑀸𑀮𑀺𑀪𑀤𑁆𑀤𑁄’’𑀢𑀺, 𑀢𑀸𑀭𑀸𑀦𑀁 𑀫𑀭𑀻𑀘𑀺 𑀧𑀪𑀸, 𑀢𑀸𑀬 𑀯𑀺𑀓𑀲𑀺𑀢𑀁 𑀯𑀺𑀚𑁆𑀚𑁄𑀢𑀺𑀢𑀁 ¶ 𑀢𑀣𑀸. 𑀩𑁆𑀬𑀸𑀫𑀧𑁆𑀧𑀪𑀸𑀬 𑀧𑀭𑀺𑀓𑁆𑀔𑁂𑀧𑁄 𑀧𑀭𑀺𑀫𑀡𑁆𑀟𑀮𑁄, 𑀢𑁂𑀦 𑀯𑀺𑀮𑀸𑀲𑀺𑀦𑀻 𑀲𑁄𑀪𑀺𑀦𑀻 𑀢𑀣𑀸. 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀺 𑀅𑀜𑁆𑀜𑀫𑀜𑁆𑀜𑀧𑀝𑀺𑀩𑀤𑁆𑀥𑀢𑁆𑀢𑀸 𑀫𑀸𑀮𑀸𑀓𑀸𑀭𑁂𑀦𑁂𑀯 𑀞𑀺𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 ‘‘𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀫𑀸𑀮𑀸’’𑀢𑀺. 𑀤𑁆𑀯𑀢𑁆𑀢𑀺𑀁𑀲𑀘𑀦𑁆𑀤𑀸𑀤𑀻𑀦𑀁 𑀫𑀸𑀮𑀸 𑀓𑁂𑀦𑀘𑀺 𑀕𑀦𑁆𑀣𑁂𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀘 𑀞𑀧𑀺𑀢𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸 ‘‘𑀬𑀤𑀺 𑀲𑀺𑀬𑀸’’𑀢𑀺 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑁂𑀦 𑀳𑀺 ‘‘𑀕𑀦𑁆𑀣𑁂𑀢𑁆𑀯𑀸 𑀞𑀧𑀺𑀢𑀤𑁆𑀯𑀢𑁆𑀢𑀺𑀁𑀲𑀘𑀦𑁆𑀤𑀫𑀸𑀮𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀓𑀧𑁆𑀧𑁄𑀧𑀫𑀸 𑀳𑁂𑀲𑀸, 𑀮𑁄𑀓𑁂𑀧𑀺 𑀘 𑀤𑀺𑀲𑁆𑀲𑀢𑀺.

‘‘𑀫𑀬𑁂𑀯 𑀫𑀼𑀔𑀲𑁄𑀪𑀸𑀲𑁆𑀲𑁂, 𑀢𑁆𑀬𑀮𑀫𑀺𑀦𑁆𑀤𑀼𑀯𑀺𑀓𑀢𑁆𑀣𑀦𑀸;

𑀬𑀢𑁄𑀫𑁆𑀩𑀼𑀚𑁂𑀧𑀺 𑀲𑀸𑀢𑁆𑀣𑀻𑀢𑀺, 𑀧𑀭𑀺𑀓𑀧𑁆𑀧𑁄𑀧𑀫𑀸 𑀅𑀬’’𑀦𑁆𑀢𑀺.

𑀤𑁆𑀯𑀢𑁆𑀢𑀺𑀁𑀲𑀘𑀦𑁆𑀤𑀫𑀸𑀮𑀸𑀬 𑀲𑀺𑀭𑀺𑀁 𑀅𑀢𑁆𑀢𑀦𑁄 𑀲𑀺𑀭𑀺𑀬𑀸 𑀅𑀪𑀺𑀪𑀯𑀦𑁆𑀢𑀻 𑀇𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀏𑀯𑀁 𑀪𑀕𑀯𑀢𑁄 𑀢𑀤𑀸 𑀲𑁄𑀪𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀸𑀧𑀺 𑀲𑁄𑀪𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀜𑁆𑀘 𑀧𑀦𑀸’’𑀢𑀺𑀆𑀤𑀺𑀫𑀸𑀳 ¶ . 𑀘𑀢𑀼𑀩𑁆𑀩𑀺𑀥𑀸𑀬 𑀅𑀧𑁆𑀧𑀺𑀘𑁆𑀙𑀢𑀸𑀬 𑀅𑀧𑁆𑀧𑀺𑀘𑁆𑀙𑀸. 𑀤𑁆𑀯𑀸𑀤𑀲𑀳𑀺 𑀲𑀦𑁆𑀢𑁄𑀲𑁂𑀳𑀺 𑀲𑀦𑁆𑀢𑀼𑀝𑁆𑀞𑀸. 𑀢𑀺𑀯𑀺𑀥𑁂𑀦 𑀯𑀺𑀯𑁂𑀓𑁂𑀦 𑀧𑀯𑀺𑀯𑀺𑀢𑁆𑀢𑀸. 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀳𑀺 𑀅𑀲𑀁𑀲𑀝𑁆𑀞𑀸. 𑀤𑀼𑀧𑁆𑀧𑀝𑀺𑀧𑀢𑁆𑀢𑀺𑀓𑀸𑀦𑀁 𑀘𑁄𑀤𑀓𑀸. 𑀧𑀸𑀧𑁂 𑀅𑀓𑀼𑀲𑀮𑁂 𑀕𑀭𑀳𑀺𑀦𑁄 𑀧𑀭𑁂𑀲𑀁 𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀸 𑀯𑀢𑁆𑀢𑀸𑀭𑁄. 𑀧𑀭𑁂𑀲𑀜𑁆𑀘 𑀯𑀘𑀦𑀓𑁆𑀔𑀫𑀸. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀦𑀸𑀫 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. ‘‘𑀢𑁂𑀲’’𑀦𑁆𑀢𑀺𑀆𑀤𑀺𑀦𑀸 𑀢𑀤𑀪𑀺𑀲𑀫𑁆𑀩𑀦𑁆𑀥𑁂𑀦 𑀪𑀕𑀯𑀢𑁄 𑀲𑁄𑀪𑀁 𑀤𑀲𑁆𑀲𑁂𑀢𑀺. 𑀭𑀢𑁆𑀢𑀧𑀤𑀼𑀫𑀸𑀦𑀁 𑀲𑀡𑁆𑀟𑁄 𑀲𑀫𑀽𑀳𑁄 𑀯𑀦𑀁, 𑀢𑀲𑁆𑀲 𑀫𑀚𑁆𑀛𑁂 𑀕𑀢𑀸 𑀢𑀣𑀸. ‘‘𑀭𑀢𑁆𑀢𑀁 𑀧𑀤𑀼𑀫𑀁, 𑀲𑁂𑀢𑀁 𑀧𑀼𑀡𑁆𑀟𑀭𑀻𑀓’’𑀦𑁆𑀢𑀺 𑀧𑀢𑁆𑀢𑀦𑀺𑀬𑀫𑀫𑀦𑁆𑀢𑀭𑁂𑀦 𑀢𑀣𑀸 𑀯𑀼𑀢𑁆𑀢𑀁, 𑀧𑀢𑁆𑀢𑀦𑀺𑀬𑀫𑁂𑀦 𑀧𑀦 𑀲𑀢𑀧𑀢𑁆𑀢𑀁 𑀧𑀤𑀼𑀫𑀁, 𑀊𑀦𑀓𑀲𑀢𑀧𑀢𑁆𑀢𑀁 𑀧𑀼𑀡𑁆𑀟𑀭𑀻𑀓𑀁. 𑀧𑀯𑀸𑀴𑀁 𑀯𑀺𑀤𑁆𑀤𑀼𑀫𑁄, 𑀢𑁂𑀦 𑀓𑀢𑀸𑀬 𑀯𑁂𑀤𑀺𑀓𑀸𑀬 𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀺𑀬. 𑀫𑀺𑀕𑀧𑀓𑁆𑀔𑀻𑀦𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁄, 𑀅𑀧𑀺-𑀲𑀤𑁆𑀤𑁄 𑀯𑀸 𑀲𑀫𑁆𑀪𑀸𑀯𑀦𑀸𑀬𑀁, 𑀢𑁂𑀦𑀸𑀳 ‘‘𑀧𑀕𑁂𑀯 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺. 𑀫𑀳𑀸𑀣𑁂𑀭𑀸𑀢𑀺 𑀫𑀳𑀸𑀲𑀸𑀯𑀓𑁂 𑀲𑀦𑁆𑀥𑀸𑀬𑀸𑀳. 𑀲𑀼𑀭𑀜𑁆𑀚𑀺𑀢𑀪𑀸𑀯𑁂𑀦 𑀈𑀲𑀓𑀁 𑀓𑀡𑁆𑀳𑀯𑀡𑁆𑀡𑀢𑀸𑀬 𑀫𑁂𑀖𑀯𑀡𑁆𑀡𑀁. 𑀏𑀓𑀁𑀲𑀁 𑀓𑀭𑀺𑀢𑁆𑀯𑀸𑀢𑀺 𑀏𑀓𑀁𑀲𑀧𑀸𑀭𑀼𑀧𑀦𑀯𑀲𑁂𑀦 𑀯𑀸𑀫𑀁𑀲𑁂 𑀓𑀭𑀺𑀢𑁆𑀯𑀸. 𑀓𑀢𑁆𑀢𑀭𑀲𑁆𑀲 𑀚𑀺𑀡𑁆𑀡𑀲𑁆𑀲 𑀆𑀮𑀫𑁆𑀩𑀦𑁄 𑀤𑀡𑁆𑀟𑁄 𑀓𑀢𑁆𑀢𑀭𑀤𑀡𑁆𑀟𑁄, 𑀩𑀸𑀳𑀼𑀮𑁆𑀮𑀯𑀲𑁂𑀦𑀸𑀬𑀁 𑀲𑀫𑀜𑁆𑀜𑀸. 𑀲𑀼𑀯𑀫𑁆𑀫𑀁 𑀦𑀸𑀫 𑀲𑁄𑀪𑀡𑀼𑀭𑀘𑁆𑀙𑀤𑁄, 𑀢𑁂𑀦 𑀯𑀫𑁆𑀫𑀺𑀢𑀸 𑀲𑀦𑁆𑀦𑀤𑁆𑀥𑀸𑀢𑀺 𑀲𑀼𑀯𑀫𑁆𑀫𑀯𑀫𑁆𑀫𑀺𑀢𑀸, 𑀇𑀤𑀁 𑀢𑁂𑀲𑀁 𑀧𑀁𑀲𑀼𑀓𑀽𑀮𑀥𑀸𑀭𑀡𑀦𑀺𑀤𑀲𑁆𑀲𑀦𑀁. 𑀬𑁂𑀲𑀁 𑀓𑀼𑀘𑁆𑀙𑀺𑀕𑀢𑀁 𑀲𑀩𑁆𑀩𑀫𑁆𑀧𑀺 𑀢𑀺𑀡𑀧𑀮𑀸𑀲𑀸𑀤𑀺 𑀕𑀦𑁆𑀥𑀚𑀸𑀢𑀫𑁂𑀯 𑀳𑁄𑀢𑀺, 𑀢𑁂 𑀕𑀦𑁆𑀥𑀳𑀢𑁆𑀣𑀺𑀦𑁄 𑀦𑀸𑀫, 𑀬𑁂 ‘‘𑀳𑁂𑀫𑀯𑀢𑀸’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀣𑁂𑀭𑀸𑀦𑀁 𑀲𑀻𑀮𑀸𑀤𑀺𑀕𑀼𑀡𑀕𑀦𑁆𑀥𑀢𑀸𑀬 𑀢𑀁𑀲𑀤𑀺𑀲𑀢𑀸. 𑀅𑀦𑁆𑀢𑁄𑀚𑀝𑀸𑀩𑀳𑀺𑀚𑀝𑀸𑀲𑀗𑁆𑀔𑀸𑀢𑀸𑀬 ¶ 𑀢𑀡𑁆𑀳𑀸𑀚𑀝𑀸𑀬 𑀯𑀺𑀚𑀝𑀺𑀢𑀪𑀸𑀯𑀢𑁄 𑀯𑀺𑀚𑀝𑀺𑀢𑀚𑀝𑀸. 𑀢𑀡𑁆𑀳𑀸𑀩𑀦𑁆𑀥𑀦𑀸𑀬 𑀙𑀺𑀦𑁆𑀦𑀢𑁆𑀢𑀸 𑀙𑀺𑀦𑁆𑀦𑀩𑀦𑁆𑀥𑀦𑀸. ‘‘𑀲𑁄’’𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀯𑀘𑀦𑀲𑁆𑀲 𑀕𑀼𑀡𑀤𑀲𑁆𑀲𑀦𑀁. 𑀅𑀦𑀼𑀩𑀼𑀤𑁆𑀥𑁂𑀳𑀻𑀢𑀺 𑀩𑀼𑀤𑁆𑀥𑀸𑀦𑀫𑀦𑀼𑀩𑀼𑀤𑁆𑀥𑁂𑀳𑀺. 𑀢𑁂𑀧𑀺 𑀳𑀺 𑀏𑀓𑀤𑁂𑀲𑁂𑀦 𑀪𑀕𑀯𑀢𑀸 𑀧𑀝𑀺𑀯𑀺𑀤𑁆𑀥𑀧𑀝𑀺𑀪𑀸𑀕𑁂𑀦𑁂𑀯 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀦𑁆𑀢𑀺. 𑀧𑀢𑁆𑀢𑀧𑀭𑀺𑀯𑀸𑀭𑀺𑀢𑀦𑁆𑀢𑀺 𑀧𑀼𑀧𑁆𑀨𑀤𑀮𑁂𑀦 𑀧𑀭𑀺𑀯𑀸𑀭𑀺𑀢𑀁. 𑀓𑀁 𑀯𑀼𑀘𑁆𑀘𑀢𑀺 𑀓𑀫𑀮𑀸𑀤𑀺, 𑀢𑀲𑁆𑀫𑀺𑀁 𑀲𑀭𑀢𑀺 𑀯𑀺𑀭𑀸𑀚𑀢𑀻𑀢𑀺 𑀓𑁂𑀲𑀭𑀁, 𑀓𑀺𑀜𑁆𑀚𑀓𑁆𑀔𑁄. 𑀓𑀡𑁆𑀡𑁂 𑀓𑀭𑀻𑀬𑀢𑀻𑀢𑀺 𑀓𑀡𑁆𑀡𑀺𑀓𑀸. 𑀓𑀡𑁆𑀡𑀸𑀮𑀗𑁆𑀓𑀸𑀭𑁄, 𑀢𑀁𑀲𑀤𑀺𑀲𑀡𑁆𑀞𑀸𑀦𑀢𑀸𑀬 𑀓𑀡𑁆𑀡𑀺𑀓𑀸, 𑀩𑀻𑀚𑀓𑁄𑀲𑁄. 𑀙𑀦𑁆𑀦𑀁 𑀳𑀁𑀲𑀓𑀼𑀮𑀸𑀦𑀁 𑀲𑁂𑀝𑁆𑀞𑁄 𑀥𑀢𑀭𑀝𑁆𑀞𑁄 𑀳𑀁𑀲𑀭𑀸𑀚𑀸 𑀯𑀺𑀬, 𑀳𑀸𑀭𑀺𑀢𑁄 𑀦𑀸𑀫 𑀫𑀳𑀸𑀩𑁆𑀭𑀳𑁆𑀫𑀸 𑀯𑀺𑀬.

𑀏𑀯𑀁 𑀕𑀘𑁆𑀙𑀦𑁆𑀢𑀁 𑀪𑀕𑀯𑀦𑁆𑀢𑀁, 𑀪𑀺𑀓𑁆𑀔𑀽 𑀘 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀑𑀮𑁄𑀓𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀸𑀚𑀤𑀡𑁆𑀟𑀓𑁂𑀢𑀺 𑀓𑀸𑀚𑀲𑀗𑁆𑀔𑀸𑀢𑁂 𑀪𑀸𑀭𑀸𑀯𑀳𑀤𑀡𑁆𑀟𑀓𑁂, 𑀓𑀸𑀚𑀲𑁆𑀫𑀺𑀁 𑀯𑀸 𑀪𑀸𑀭𑀮𑀕𑁆𑀕𑀺𑀢𑀤𑀡𑁆𑀟𑀓𑁂. 𑀔𑀼𑀤𑁆𑀤𑀓𑀁 𑀧𑀻𑀞𑀁 𑀧𑀻𑀞𑀓𑀁. 𑀫𑀽𑀮𑁂, 𑀅𑀕𑁆𑀕𑁂 𑀘 𑀢𑀺𑀥𑀸 𑀓𑀢𑁄 𑀤𑀡𑁆𑀟𑁄 𑀢𑀺𑀤𑀡𑁆𑀟𑁄. 𑀫𑁄𑀭𑀳𑀢𑁆𑀣𑀓𑁄 𑀫𑁄𑀭𑀧𑀺𑀜𑁆𑀙𑀁. 𑀔𑀼𑀤𑁆𑀤𑀓𑀁 𑀧𑀲𑀺𑀩𑁆𑀩𑀁 𑀧𑀲𑀺𑀩𑁆𑀩𑀓𑀁. 𑀓𑀼𑀡𑁆𑀟𑀺𑀓𑀸 𑀓𑀫𑀡𑁆𑀟𑀮𑀼. 𑀲𑀸 𑀳𑀺 𑀓𑀁 𑀉𑀤𑀓𑀁 𑀉𑀤𑁂𑀢𑀺 𑀧𑀲𑀯𑁂𑀢𑀺, 𑀭𑀓𑁆𑀔𑀢𑀻𑀢𑀺 𑀯𑀸 𑀓𑀼𑀡𑁆𑀟𑀺𑀓𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀕𑀳𑀺𑀢𑀁 𑀑𑀫𑀓𑀢𑁄 𑀮𑀼𑀚𑁆𑀚𑀺𑀢𑀁, 𑀯𑀺𑀯𑀺𑀥𑀁 𑀮𑀼𑀚𑁆𑀚𑀺𑀢𑀜𑁆𑀘 𑀧𑀻𑀞𑀓…𑀧𑁂… 𑀓𑀼𑀡𑁆𑀟𑀺𑀓𑀸𑀤𑀺𑀅𑀦𑁂𑀓𑀧𑀭𑀺𑀓𑁆𑀔𑀸𑀭𑀲𑀗𑁆𑀔𑀸𑀢𑀁 𑀪𑀸𑀭𑀁 𑀪𑀭𑀢𑀺 𑀯𑀳𑀢𑀻𑀢𑀺 𑀕𑀳𑀺𑀢…𑀧𑁂… 𑀪𑀸𑀭𑀪𑀭𑀺𑀢𑀸. 𑀇𑀢𑀻𑀢𑀺 𑀦𑀺𑀤𑀲𑁆𑀲𑀦𑀢𑁆𑀣𑁄. 𑀏𑀯𑀦𑁆𑀢𑀺 𑀇𑀤𑀫𑀢𑁆𑀣𑁄. 𑀏𑀯𑀁 𑀇𑀤𑀁 𑀯𑀘𑀦𑀫𑀸𑀤𑀺 𑀬𑀲𑁆𑀲 𑀯𑀘𑀦𑀲𑁆𑀲 𑀢𑀣𑀸, 𑀢𑀤𑁂𑀯 𑀦𑀺𑀭𑀢𑁆𑀣𑀓𑀁 𑀯𑀘𑀦𑀁 𑀬𑀲𑁆𑀲𑀸𑀢𑀺 𑀏𑀯𑀫𑀸𑀤𑀺𑀦𑀺𑀭𑀢𑁆𑀣𑀓𑀯𑀘𑀦𑀸. 𑀫𑀼𑀔𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑀼𑀔𑀭𑀸, 𑀲𑀩𑁆𑀩𑁂𑀧𑀺 𑀫𑀼𑀔𑀯𑀦𑁆𑀢𑀸 𑀏𑀯, 𑀅𑀬𑀁 𑀧𑀦 𑀨𑀭𑀼𑀲𑀸𑀪𑀺𑀮𑀸𑀧𑀫𑀼𑀔𑀯𑀢𑀻, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁. 𑀦𑀺𑀦𑁆𑀤𑀸𑀬𑀜𑁆𑀳𑀺 𑀅𑀬𑀁 𑀭𑀧𑀘𑁆𑀘𑀬𑁄. 𑀫𑀼𑀔𑁂𑀦 ¶ 𑀯𑀸 𑀅𑀫𑀦𑀸𑀧𑀁 𑀓𑀫𑁆𑀫𑀁 𑀭𑀸𑀢𑀺 𑀕𑀡𑁆𑀳𑀸𑀢𑀻𑀢𑀺 𑀫𑀼𑀔𑀭𑀸. 𑀯𑀺𑀯𑀺𑀥𑀸 𑀓𑀺𑀡𑁆𑀡𑀸 𑀯𑀸𑀘𑀸 𑀬𑀲𑁆𑀲𑀸𑀢𑀺 𑀯𑀺𑀓𑀺𑀡𑁆𑀡𑀯𑀸𑀘𑀸. 𑀢𑀲𑁆𑀲𑀸𑀢𑀺 𑀲𑀼𑀧𑁆𑀧𑀺𑀬𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲. 𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀧𑀭𑀺𑀲𑀁.

𑀇𑀤𑀸𑀦𑀻𑀢𑀺 𑀢𑀲𑁆𑀲 𑀢𑀣𑀸𑀭𑀽𑀧𑀸𑀬 𑀧𑀭𑀺𑀲𑀸𑀬 𑀤𑀲𑁆𑀲𑀦𑀓𑁆𑀔𑀡𑁂. 𑀧𑀦𑀸𑀢𑀺 𑀅𑀭𑀼𑀘𑀺𑀲𑀁𑀲𑀽𑀘𑀦𑀢𑁆𑀣𑁄, 𑀢𑀣𑀸𑀧𑀻𑀢𑀺 𑀅𑀢𑁆𑀣𑁄. 𑀮𑀸𑀪…𑀧𑁂… 𑀳𑀸𑀦𑀺𑀬𑀸 𑀘𑁂𑀯 𑀳𑁂𑀢𑀼𑀪𑀽𑀢𑀸𑀬. 𑀓𑀣𑀁 𑀳𑀸𑀦𑀻𑀢𑀺 𑀆𑀳 ‘‘𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀜𑁆𑀳𑀻’’𑀢𑀺𑀆𑀤𑀺. 𑀦𑀺𑀲𑁆𑀲𑀺𑀭𑀻𑀓𑀢𑀦𑁆𑀢𑀺 𑀦𑀺𑀲𑁄𑀪𑀢𑀁, 𑀅𑀬𑀫𑀢𑁆𑀣𑁄 𑀫𑁄𑀭𑀚𑀸𑀢𑀓𑀸𑀤𑀻𑀳𑀺𑀧𑀺 𑀤𑀻𑀧𑁂𑀢𑀩𑁆𑀩𑁄. ‘‘𑀉𑀧𑀢𑀺𑀲𑁆𑀲𑀓𑁄𑀮𑀺𑀢𑀸𑀦𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀧𑀓𑁆𑀔𑀳𑀸𑀦𑀺𑀢𑀸𑀬 𑀯𑀺𑀢𑁆𑀣𑀸𑀭𑁄. 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀘 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁 𑀲𑀦𑁆𑀥𑀸𑀬 ‘‘𑀢𑁂𑀲𑀼 𑀧𑀦 𑀧𑀓𑁆𑀓𑀦𑁆𑀢𑁂𑀲𑀽’’𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀁 𑀧𑀩𑁆𑀩𑀚𑀺𑀢𑀓𑀸𑀮𑁂𑀬𑁂𑀯 𑀅𑀟𑁆𑀠𑀢𑁂𑀬𑁆𑀬𑀲𑀢𑀁 𑀧𑀭𑀺𑀩𑁆𑀩𑀸𑀚𑀓𑀧𑀭𑀺𑀲𑀸 𑀧𑀩𑁆𑀩𑀚𑀺, 𑀢𑀢𑁄 𑀧𑀭𑀫𑁆𑀧𑀺 ¶ 𑀢𑀤𑀦𑀼𑀧𑀩𑁆𑀩𑀚𑀺𑀢𑀸 𑀧𑀭𑀺𑀩𑁆𑀩𑀸𑀚𑀓𑀧𑀭𑀺𑀲𑀸 𑀅𑀧𑀭𑀺𑀫𑀸𑀡𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀲𑀸𑀧𑀺 𑀢𑁂𑀲𑀁 𑀧𑀭𑀺𑀲𑀸 𑀪𑀺𑀦𑁆𑀦𑀸’’𑀢𑀺 𑀇𑀫𑀺𑀦𑀸. 𑀬𑀸𑀬 𑀓𑀸𑀬𑀘𑀺 𑀳𑀺 𑀧𑀭𑀺𑀩𑁆𑀩𑀸𑀚𑀓𑀧𑀭𑀺𑀲𑀸𑀬 𑀧𑀩𑁆𑀩𑀚𑀺𑀢𑀸𑀬 𑀢𑀲𑁆𑀲 𑀧𑀭𑀺𑀲𑀸 𑀪𑀺𑀦𑁆𑀦𑀸𑀬𑁂𑀯 𑀦𑀸𑀫 𑀲𑀫𑀸𑀦𑀕𑀡𑀢𑁆𑀢𑀸𑀢𑀺 𑀢𑀣𑀸 𑀯𑀼𑀢𑁆𑀢𑀁. ‘‘𑀇𑀫𑁂𑀳𑀻’’𑀢𑀺𑀆𑀤𑀺𑀦𑀸 𑀮𑀸𑀪𑀧𑀓𑁆𑀔𑀳𑀸𑀦𑀺𑀁 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀢𑀺. 𑀉𑀲𑀽𑀬𑀲𑀗𑁆𑀔𑀸𑀢𑀲𑁆𑀲 𑀯𑀺𑀲𑀲𑁆𑀲 𑀉𑀕𑁆𑀕𑀸𑀭𑁄 𑀉𑀕𑁆𑀕𑀺𑀮𑀦𑀁 𑀉𑀲𑀽𑀬𑀯𑀺𑀲𑀼𑀕𑁆𑀕𑀸𑀭𑁄, 𑀢𑀁. 𑀏𑀢𑁆𑀣 𑀘 ‘‘𑀬𑀲𑁆𑀫𑀸 𑀧𑀦𑁂𑀲𑀸’’𑀢𑀺𑀆𑀤𑀺𑀦𑀸𑀯 ‘‘𑀓𑀲𑁆𑀫𑀸 𑀘 𑀲𑁄 𑀭𑀢𑀦𑀢𑁆𑀢𑀬𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀻’’𑀢𑀺 𑀘𑁄𑀤𑀦𑀁 𑀯𑀺𑀲𑁄𑀥𑁂𑀢𑀺, ‘‘𑀲𑀘𑁂’’𑀢𑀺𑀆𑀤𑀺𑀓𑀁 𑀧𑀦 𑀲𑀩𑁆𑀩𑀫𑁆𑀧𑀺 𑀢𑀧𑁆𑀧𑀭𑀺𑀯𑀸𑀭𑀯𑀘𑀦𑀫𑁂𑀯𑀸𑀢𑀺 𑀢𑁂𑀳𑀺𑀧𑀺 𑀲𑀸 𑀯𑀺𑀲𑁄𑀥𑀺𑀢𑀸𑀬𑁂𑀯 𑀦𑀸𑀫. 𑀪𑀕𑀯𑀢𑁄 𑀯𑀺𑀭𑁄𑀥𑀸𑀦𑀼𑀦𑀬𑀸𑀪𑀸𑀯𑀯𑀻𑀫𑀁𑀲𑀦𑀢𑁆𑀣𑀁 𑀏𑀢𑁂 𑀅𑀯𑀡𑁆𑀡𑀁 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺. ‘‘𑀫𑀸𑀭𑁂𑀦 𑀅𑀦𑁆𑀯𑀸𑀯𑀺𑀝𑁆𑀞𑀸 𑀏𑀯𑀁 𑀪𑀸𑀲𑀦𑁆𑀢𑀻’’𑀢𑀺 𑀘 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀫𑁂𑀯 𑀅𑀝𑁆𑀞𑀓𑀣𑀸𑀬 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑁆𑀢𑀸. 𑀧𑀸𑀓𑀝𑁄𑀬𑁂𑀯𑀸𑀬𑀫𑀢𑁆𑀣𑁄𑀢𑀺.

𑁨. 𑀬𑀲𑁆𑀫𑀸 𑀅𑀢𑁆𑀣𑀗𑁆𑀕𑀢𑁄 𑀲𑀽𑀭𑀺𑀬𑁄, 𑀢𑀲𑁆𑀫𑀸 𑀅𑀓𑀸𑀮𑁄 𑀤𑀸𑀦𑀺 𑀕𑀦𑁆𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀅𑀫𑁆𑀩𑀮𑀝𑁆𑀞𑀺𑀓𑀸𑀢𑀺 𑀲𑀸𑀫𑀻𑀧𑀺𑀓𑀯𑁄𑀳𑀸𑀭𑁄 𑀬𑀣𑀸 ‘‘𑀯𑀭𑀼𑀡𑀦𑀕𑀭𑀁, 𑀕𑁄𑀤𑀸𑀕𑀸𑀫𑁄’’𑀢𑀺 𑀆𑀳 ‘‘𑀢𑀲𑁆𑀲 𑀓𑀺𑀭𑀸’’𑀢𑀺𑀆𑀤𑀺. 𑀢𑀭𑀼𑀡𑀧𑀭𑀺𑀬𑀸𑀬𑁄 𑀮𑀝𑁆𑀞𑀺𑀓𑀸-𑀲𑀤𑁆𑀤𑁄 𑀭𑀼𑀓𑁆𑀔𑀯𑀺𑀲𑀬𑁂 𑀬𑀣𑀸 ‘‘𑀫𑀳𑀸𑀯𑀦𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀩𑁂𑀮𑀼𑀯𑀮𑀝𑁆𑀞𑀺𑀓𑀸𑀬 𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀻’’𑀢𑀺𑀆𑀤𑀻𑀲𑀽𑀢𑀺 𑀤𑀲𑁆𑀲𑁂𑀢𑀺’’ ‘‘𑀢𑀭𑀼𑀡𑀫𑁆𑀩𑀭𑀼𑀓𑁆𑀔𑁄’’𑀢𑀺 𑀇𑀫𑀺𑀦𑀸. 𑀓𑁂𑀘𑀺 𑀧𑀦 ‘‘𑀅𑀫𑁆𑀩𑀮𑀝𑁆𑀞𑀺𑀓𑀸 𑀦𑀸𑀫 𑀯𑀼𑀢𑁆𑀢𑀦𑀬𑁂𑀦 𑀏𑀓𑁄 𑀕𑀸𑀫𑁄’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀫𑀢𑁂 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀦𑁆𑀢𑀺 𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁. 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑀦𑁆𑀢𑀺 𑀙𑀸𑀬𑀸𑀬 𑀘𑁂𑀯 𑀉𑀤𑀓𑁂𑀦 𑀘 𑀲𑀫𑁆𑀧𑀦𑁆𑀦𑀁. 𑀫𑀜𑁆𑀚𑀼𑀲𑀸𑀢𑀺 𑀧𑁂𑀴𑀸. 𑀧𑀝𑀺𑀪𑀸𑀦𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀦𑁆𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀲𑀜𑁆𑀜𑁄𑀕𑀸𑀤𑀺𑀦𑀸 𑀧𑀝𑀺𑀪𑀸𑀦𑀘𑀺𑀢𑁆𑀢𑁂𑀦 𑀯𑀺𑀘𑀺𑀢𑁆𑀢𑀁, 𑀏𑀢𑁂𑀦 𑀭𑀜𑁆𑀜𑁄 𑀅𑀕𑀸𑀭𑀁, 𑀢𑀤𑁂𑀯 𑀭𑀸𑀚𑀸𑀕𑀸𑀭𑀓𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀭𑀸𑀚𑀸𑀕𑀸𑀭𑀓𑀁 𑀦𑀸𑀫 𑀯𑁂𑀲𑁆𑀲𑀯𑀡𑀫𑀳𑀸𑀭𑀸𑀚𑀲𑁆𑀲 𑀤𑁂𑀯𑀸𑀬𑀢𑀦𑀦𑁆𑀢𑀺 𑀏𑀓𑁂.

𑀩𑀳𑀼𑀧𑀭𑀺𑀲𑁆𑀲𑀬𑁄𑀢𑀺 ¶ 𑀩𑀳𑀼𑀧𑀤𑁆𑀤𑀯𑁄. 𑀓𑁂𑀳𑀻𑀢𑀺 𑀯𑀼𑀢𑁆𑀢𑀁 ‘‘𑀘𑁄𑀭𑁂’𑀳𑀺𑀧𑀻’’𑀢𑀺𑀆𑀤𑀺. 𑀳𑀦𑁆𑀤𑀸𑀢𑀺 𑀯𑀘𑀦𑀯𑁄𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄, 𑀢𑀤𑀸𑀦𑀼𑀪𑀸𑀯𑀢𑁄 𑀦𑀺𑀧𑁆𑀧𑀭𑀺𑀲𑁆𑀲𑀬𑀢𑁆𑀣𑀸𑀬 𑀇𑀤𑀸𑀦𑀺 𑀉𑀧𑀕𑀦𑁆𑀢𑁆𑀯𑀸 𑀲𑁆𑀯𑁂 𑀕𑀫𑀺𑀲𑁆𑀲𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑀤𑁆𑀥𑀺𑀁 𑀅𑀦𑁆𑀢𑁂𑀯𑀸𑀲𑀺𑀦𑀸 𑀩𑁆𑀭𑀳𑁆𑀫𑀤𑀢𑁆𑀢𑁂𑀦 𑀫𑀸𑀡𑀯𑁂𑀦𑀸’’ 𑀢𑀺𑀘𑁆𑀘𑁂𑀯 𑀲𑀻𑀳𑀴𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀜𑁆𑀘 𑀔𑁄 𑀧𑀸𑀴𑀺𑀆𑀭𑀼𑀴𑁆𑀳𑀯𑀲𑁂𑀦𑁂𑀯, 𑀦 𑀧𑀦 𑀢𑀤𑀸 𑀲𑀼𑀧𑁆𑀧𑀺𑀬𑀲𑁆𑀲 𑀧𑀭𑀺𑀲𑀸𑀬 𑀅𑀪𑀸𑀯𑀢𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀤𑁆𑀥𑀺𑀁 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬𑀸’’𑀢𑀺 𑀇𑀥 𑀯𑀼𑀢𑁆𑀢𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀩𑁆𑀭𑀳𑁆𑀫𑀤𑀢𑁆𑀢𑁄𑀬𑁂𑀯 𑀧𑀸𑀴𑀺𑀬𑀫𑀸𑀭𑀼𑀴𑁆𑀳𑁄, 𑀦 𑀧𑀦 𑀢𑀤𑀯𑀲𑁂𑀲𑀸 𑀲𑀼𑀧𑁆𑀧𑀺𑀬𑀲𑁆𑀲 𑀧𑀭𑀺𑀲𑀸𑀢𑀺 ¶ ? 𑀤𑁂𑀲𑀦𑀸𑀦𑀥𑀻𑀦𑀪𑀸𑀯𑁂𑀦 𑀧𑀬𑁄𑀚𑀦𑀸𑀪𑀸𑀯𑀢𑁄. 𑀬𑀣𑀸 𑀘𑁂𑀢𑀁, 𑀏𑀯𑀁 𑀅𑀜𑁆𑀜𑀫𑁆𑀧𑀺 𑀏𑀤𑀺𑀲𑀁 𑀧𑀬𑁄𑀚𑀦𑀸𑀪𑀸𑀯𑀢𑁄 𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑀦 𑀲𑀗𑁆𑀕𑀻𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑁂𑀘𑀺 𑀧𑀦 ‘‘𑀧𑀸𑀴𑀺𑀬𑀁 𑀯𑀼𑀢𑁆𑀢’’𑀦𑁆𑀢𑀺 𑀆𑀥𑀸𑀭𑀁 𑀯𑀢𑁆𑀯𑀸 ‘𑀢𑀤𑁂𑀢𑀁 𑀦 𑀲𑀻𑀳𑀴𑀝𑁆𑀞𑀓𑀣𑀸𑀦𑀬𑀤𑀲𑁆𑀲𑀦𑀁, 𑀧𑀸𑀴𑀺𑀬𑀁 𑀯𑀼𑀢𑁆𑀢𑀪𑀸𑀯𑀤𑀲𑁆𑀲𑀦𑀫𑁂𑀯𑀸’𑀢𑀺’’ 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀚𑁆𑀚𑀢𑀺. 𑀧𑀸𑀴𑀺𑀆𑀭𑀼𑀴𑁆𑀳𑀯𑀲𑁂𑀦𑁂𑀯 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑁆𑀲 𑀆𑀧𑀚𑁆𑀚𑀦𑀢𑁄. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺. ‘‘𑀯𑀼𑀢𑁆𑀢𑀦𑁆𑀢𑀺 𑀯𑀸 𑀅𑀫𑁆𑀳𑁂𑀳𑀺𑀧𑀺 𑀇𑀥 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀳𑀺 𑀢𑀤𑀸 𑀅𑀜𑁆𑀜𑀸𑀬𑀧𑀺 𑀧𑀭𑀺𑀲𑀸𑀬 𑀯𑀺𑀚𑁆𑀚𑀫𑀸𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀏𑀯𑀁 𑀯𑀼𑀢𑁆𑀢𑀁, 𑀧𑀸𑀴𑀺𑀬𑀫𑀸𑀭𑀼𑀴𑁆𑀳𑀯𑀲𑁂𑀦 𑀧𑀦 𑀅𑀜𑁆𑀜𑀣𑀸𑀧𑀺 𑀇𑀥 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄 𑀬𑀼𑀢𑁆𑀢𑁄’’𑀢𑀺 𑀯𑀤𑀦𑁆𑀢𑀺.

𑀇𑀤𑀸𑀦𑀺 ‘‘𑀢𑀢𑁆𑀭𑀸𑀧𑀺 𑀲𑀼𑀤’’𑀦𑁆𑀢𑀺𑀆𑀤𑀺𑀧𑀸𑀴𑀺𑀬𑀸 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀯𑀸𑀲𑀁 𑀉𑀧𑀕𑀢𑁄 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀼𑀘𑁆𑀙𑀺𑀢𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀓𑀼𑀓𑀢𑀁, 𑀢𑀲𑁆𑀲 𑀪𑀸𑀯𑁄 𑀓𑀼𑀓𑁆𑀓𑀼𑀘𑁆𑀘𑀁, 𑀓𑀼𑀘𑁆𑀙𑀺𑀢𑀓𑀺𑀭𑀺𑀬𑀸, 𑀇𑀢𑁄 𑀘𑀺𑀢𑁄 𑀘 𑀘𑀜𑁆𑀘𑀮𑀦𑀦𑁆𑀢𑀺 𑀅𑀢𑁆𑀣𑁄, 𑀳𑀢𑁆𑀣𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀢𑀣𑀸. ‘‘𑀲𑀸 𑀳𑀻’’𑀢𑀺𑀆𑀤𑀺𑀦𑀸 𑀢𑀣𑀸𑀪𑀽𑀢𑀢𑀸𑀬 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀦𑀺𑀯𑀸𑀢𑁂𑀢𑀺 𑀯𑀸𑀢𑀯𑀺𑀭𑀳𑀺𑀢𑀝𑁆𑀞𑀸𑀦𑁂. 𑀬𑀣𑀸𑀯𑀼𑀢𑁆𑀢𑀤𑁄𑀲𑀸𑀪𑀸𑀯𑁂𑀦 𑀦𑀺𑀘𑁆𑀘𑀮𑀸. 𑀢𑀁 𑀯𑀺𑀪𑀽𑀢𑀺𑀦𑁆𑀢𑀺 𑀢𑀸𑀤𑀺𑀲𑀁 𑀲𑁄𑀪𑀁. 𑀯𑀺𑀧𑁆𑀧𑀮𑀧𑀦𑁆𑀢𑀻𑀢𑀺 𑀲𑀢𑀺𑀯𑁄𑀲𑁆𑀲𑀕𑁆𑀕𑀯𑀲𑁂𑀦 𑀯𑀺𑀯𑀺𑀥𑀸 𑀮𑀧𑀦𑁆𑀢𑀺. 𑀦𑀺𑀮𑁆𑀮𑀸𑀮𑀺𑀢𑀚𑀺𑀯𑁆𑀳𑀸𑀢𑀺 𑀇𑀢𑁄 𑀘𑀺𑀢𑁄 𑀘 𑀦𑀺𑀓𑁆𑀔𑀦𑁆𑀢𑀚𑀺𑀯𑁆𑀳𑀸. 𑀓𑀸𑀓𑀘𑁆𑀙𑀫𑀸𑀦𑀸𑀢𑀺 𑀓𑀸𑀓𑀸𑀦𑀁 𑀲𑀤𑁆𑀤𑀲𑀤𑀺𑀲𑀁 𑀲𑀤𑁆𑀤𑀁 𑀓𑀼𑀭𑀼𑀫𑀸𑀦𑀸. 𑀖𑀭𑀼𑀖𑀭𑀼𑀧𑀲𑁆𑀲𑀸𑀲𑀺𑀦𑁄𑀢𑀺 𑀖𑀭𑀼𑀖𑀭𑀼𑀇𑀢𑀺 𑀲𑀤𑁆𑀤𑀁 𑀚𑀦𑁂𑀢𑁆𑀯𑀸 𑀧𑀲𑁆𑀲𑀲𑀦𑁆𑀢𑀸. 𑀇𑀲𑁆𑀲𑀸𑀯𑀲𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀉𑀲𑀽𑀬𑀦𑀯𑀲𑁂𑀦. ‘‘𑀲𑀩𑁆𑀩𑀁 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 ‘‘𑀆𑀤𑀺𑀧𑁂𑀬𑁆𑀬𑀸𑀮𑀦𑀬𑁄𑀬’’𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁩. 𑀲𑀫𑁆𑀫𑀸 𑀧𑀳𑁄𑀦𑁆𑀢𑀺 𑀢𑀁 𑀢𑀁 𑀓𑀫𑁆𑀫𑀦𑁆𑀢𑀺 𑀲𑀫𑁆𑀧𑀳𑀼𑀮𑀸, 𑀩𑀳𑀯𑁄, 𑀢𑁂𑀦𑀸𑀳 ‘‘𑀩𑀳𑀼𑀓𑀸𑀦’’𑀦𑁆𑀢𑀺. 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑀼𑀯𑀕𑁆𑀕𑀲𑀗𑁆𑀖𑁂𑀦𑁂𑀯 𑀯𑀺𑀦𑀬𑀓𑀫𑁆𑀫𑀲𑁆𑀲 𑀓𑀢𑁆𑀢𑀩𑁆𑀩𑀢𑁆𑀢𑀸 ‘‘𑀯𑀺𑀦𑀬𑀧𑀭𑀺𑀬𑀸𑀬𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀬𑁄 𑀚𑀦𑀸𑀢𑀺 𑀘𑁂𑀲 𑀉𑀧𑀮𑀓𑁆𑀔𑀡𑀦𑀺𑀤𑁆𑀤𑁂𑀲𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀫𑁆𑀧𑀳𑀼𑀮𑀢𑁆𑀢𑀸. 𑀢𑀢𑁆𑀣 𑀢𑀢𑁆𑀣 𑀢𑀣𑀸𑀬𑁂𑀯𑀸𑀕𑀢𑀢𑁆𑀢𑀸 ‘‘𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀁 𑀢𑀁 𑀧𑀸𑀴𑀺𑀬𑀸 𑀆𑀕𑀢𑀯𑁄𑀳𑀸𑀭𑀯𑀲𑁂𑀦 𑀳𑀺 𑀅𑀬𑀁 𑀪𑁂𑀤𑁄. 𑀢𑀬𑁄 𑀚𑀦𑀸 𑀢𑀬𑁄 𑀏𑀯 𑀦𑀸𑀫, 𑀢𑀢𑁄 𑀧𑀝𑁆𑀞𑀸𑀬 𑀉𑀢𑁆𑀢𑀭𑀺 𑀘𑀢𑀼𑀧𑀜𑁆𑀘𑀚𑀦𑀸𑀤𑀺𑀓𑀸 𑀲𑀫𑁆𑀧𑀳𑀼𑀮𑀸𑀢𑀺 𑀅𑀢𑁆𑀣𑁄. 𑀢𑀢𑁄𑀢𑀺 𑀘𑀸𑀬𑀁 𑀫𑀭𑀺𑀬𑀸𑀤𑀸𑀯𑀥𑀺. 𑀫𑀡𑁆𑀟𑀮𑀫𑀸𑀴𑁄𑀢𑀺 𑀅𑀦𑁂𑀓𑀢𑁆𑀣𑀧𑀯𑀢𑁆𑀢𑀸 𑀲𑀫𑀜𑁆𑀜𑀸, 𑀇𑀥 𑀧𑀦 𑀈𑀤𑀺𑀲𑀸𑀬 𑀏𑀯𑀸𑀢𑀺 𑀦𑀺𑀬𑀫𑁂𑀦𑁆𑀢𑁄 ¶ 𑀆𑀳 ‘‘𑀓𑀢𑁆𑀣𑀘𑀻’’𑀢𑀺𑀆𑀤𑀺. 𑀓𑀡𑁆𑀡𑀺𑀓𑀸 𑀯𑀼𑀘𑁆𑀘𑀢𑀺 𑀓𑀽𑀝𑀁. 𑀳𑀁𑀲𑀯𑀝𑁆𑀝𑀓𑀘𑁆𑀙𑀦𑁆𑀦𑁂𑀦𑀸𑀢𑀺 𑀳𑀁𑀲𑀫𑀡𑁆𑀟𑀮𑀸𑀓𑀸𑀭𑀙𑀦𑁆𑀦𑁂𑀦. 𑀢𑀤𑁂𑀯 𑀙𑀦𑁆𑀦𑀁 𑀅𑀜𑁆𑀜𑀢𑁆𑀣 ¶ ‘‘𑀲𑀼𑀧𑀡𑁆𑀡𑀯𑀗𑁆𑀓𑀘𑁆𑀙𑀤𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀽𑀝𑁂𑀦 𑀬𑀼𑀢𑁆𑀢𑁄 𑀅𑀕𑀸𑀭𑁄, 𑀲𑁄𑀬𑁂𑀯 𑀲𑀸𑀮𑀸𑀢𑀺 𑀓𑀽𑀝𑀸𑀕𑀸𑀭𑀲𑀸𑀮𑀸. 𑀣𑀫𑁆𑀪𑀧𑀦𑁆𑀢𑀺𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀣𑀫𑁆𑀪𑀫𑀸𑀮𑀁 𑀧𑀭𑀺𑀯𑀸𑀭𑁂𑀢𑁆𑀯𑀸, 𑀧𑀭𑀺𑀫𑀡𑁆𑀟𑀮𑀸𑀓𑀸𑀭𑁂𑀦 𑀣𑀫𑁆𑀪𑀧𑀦𑁆𑀢𑀺𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀝𑁆𑀞𑀸𑀦𑀲𑀸𑀮𑀸 𑀦𑀸𑀫 𑀧𑀬𑀺𑀭𑀼𑀧𑀸𑀲𑀦𑀲𑀸𑀮𑀸. 𑀬𑀢𑁆𑀣 𑀉𑀧𑀝𑁆𑀞𑀸𑀦𑀫𑀢𑁆𑀢𑀁 𑀓𑀭𑁄𑀦𑁆𑀢𑀺, 𑀦 𑀏𑀓𑀭𑀢𑁆𑀢𑀤𑀺𑀭𑀢𑁆𑀢𑀸𑀤𑀺𑀯𑀲𑁂𑀦 𑀦𑀺𑀲𑀻𑀤𑀦𑀁, 𑀇𑀥 𑀧𑀦 𑀢𑀣𑀸 𑀓𑀢𑀸 𑀦𑀺𑀲𑀻𑀤𑀦𑀲𑀸𑀮𑀸𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀇𑀥 𑀧𑀦𑀸’’𑀢𑀺𑀆𑀤𑀺𑀦𑀸. 𑀢𑁂𑀦𑁂𑀯 𑀧𑀸𑀴𑀺𑀬𑀁 ‘‘𑀲𑀦𑁆𑀦𑀺𑀧𑀢𑀺𑀢𑀸𑀦’’ 𑀦𑁆𑀢𑁆𑀯𑁂𑀯 𑀅𑀯𑀢𑁆𑀯𑀸 ‘‘𑀲𑀦𑁆𑀦𑀺𑀲𑀺𑀦𑁆𑀦𑀸𑀦’’𑀦𑁆𑀢𑀺𑀧𑀺 𑀯𑀼𑀢𑁆𑀢𑀁. 𑀫𑀸𑀦𑀺𑀢𑀩𑁆𑀩𑁄𑀢𑀺 𑀫𑀸𑀴𑁄, 𑀫𑀻𑀬𑀢𑀺 𑀧𑀫𑀻𑀬𑀢𑀻𑀢𑀺 𑀯𑀸 𑀫𑀸𑀴𑁄. 𑀫𑀡𑁆𑀟𑀮𑀸𑀓𑀸𑀭𑁂𑀦 𑀧𑀝𑀺𑀘𑁆𑀙𑀦𑁆𑀦𑁄 𑀫𑀸𑀴𑁄𑀢𑀺 𑀫𑀡𑁆𑀟𑀮𑀫𑀸𑀴𑁄, 𑀅𑀦𑁂𑀓𑀓𑁄𑀡𑀯𑀦𑁆𑀢𑁄 𑀧𑀝𑀺𑀲𑁆𑀲𑀬𑀯𑀺𑀲𑁂𑀲𑁄. ‘‘𑀲𑀦𑁆𑀦𑀺𑀲𑀺𑀦𑁆𑀦𑀸𑀦’’𑀦𑁆𑀢𑀺 𑀦𑀺𑀲𑀚𑁆𑀚𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀦𑀺𑀲𑀚𑁆𑀚𑀦𑀯𑀲𑁂𑀦 𑀯𑀸 ‘‘𑀲𑀦𑁆𑀦𑀺𑀲𑀺𑀦𑁆𑀦𑀸𑀦’’𑀦𑁆𑀢𑀺 𑀲𑀁𑀯𑀡𑁆𑀡𑁂𑀢𑀩𑁆𑀩𑀧𑀤𑀫𑀚𑁆𑀛𑀸𑀳𑀭𑀺𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀦𑀸 𑀦𑀺𑀲𑀻𑀤𑀦𑀇𑀭𑀺𑀬𑀸𑀧𑀣𑀁, 𑀓𑀸𑀬𑀲𑀸𑀫𑀕𑁆𑀕𑀻𑀯𑀲𑁂𑀦 𑀘 𑀲𑀫𑁄𑀥𑀸𑀦𑀁 𑀲𑀦𑁆𑀥𑀸𑀬 𑀧𑀤𑀤𑁆𑀯𑀬𑀫𑁂𑀢𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀗𑁆𑀔𑀺𑀬𑀸 𑀯𑀼𑀘𑁆𑀘𑀢𑀺 𑀓𑀣𑀸 𑀲𑀫𑁆𑀫𑀸 𑀔𑀺𑀬𑀦𑀢𑁄 𑀓𑀣𑀦𑀢𑁄. 𑀓𑀣𑀸𑀥𑀫𑁆𑀫𑁄𑀢𑀺 𑀓𑀣𑀸𑀲𑀪𑀸𑀯𑁄, 𑀉𑀧𑀧𑀭𑀺𑀓𑁆𑀔𑀸 𑀯𑀺𑀥𑀻𑀢𑀺 𑀓𑁂𑀘𑀺.

‘‘𑀅𑀘𑁆𑀙𑀭𑀺𑀬’’𑀦𑁆𑀢𑀺𑀆𑀤𑀺 𑀢𑀲𑁆𑀲 𑀭𑀽𑀧𑀤𑀲𑁆𑀲𑀦𑀦𑁆𑀢𑀺 𑀆𑀳 ‘‘𑀓𑀢𑀫𑁄 𑀧𑀦 𑀲𑁄’’𑀢𑀺𑀆𑀤𑀺. 𑀲𑁄𑀢𑀺 𑀓𑀣𑀸𑀥𑀫𑁆𑀫𑁄. ‘‘𑀦𑀻𑀬𑀢𑀻𑀢𑀺 𑀦𑀬𑁄, 𑀅𑀢𑁆𑀣𑁄, 𑀲𑀤𑁆𑀤𑀲𑀢𑁆𑀣𑀁 𑀅𑀦𑀼𑀕𑀢𑁄 𑀦𑀬𑁄 𑀲𑀤𑁆𑀤𑀦𑀬𑁄’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁩) 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁. 𑀦𑀻𑀬𑀢𑀺 𑀅𑀢𑁆𑀣𑁄 𑀏𑀢𑁂𑀦𑀸𑀢𑀺 𑀯𑀸 𑀦𑀬𑁄, 𑀉𑀧𑀸𑀬𑁄, 𑀲𑀤𑁆𑀤𑀲𑀢𑁆𑀣𑁂 𑀆𑀕𑀢𑁄 𑀦𑀬𑁄 𑀅𑀢𑁆𑀣𑀕𑀳𑀡𑀽𑀧𑀸𑀬𑁄 𑀲𑀤𑁆𑀤𑀦𑀬𑁄. 𑀢𑀢𑁆𑀣 𑀳𑀺 𑀅𑀦𑀪𑀺𑀡𑁆𑀳𑀯𑀼𑀢𑁆𑀢𑀺𑀓𑁂 𑀅𑀘𑁆𑀙𑀭𑀺𑀬-𑀲𑀤𑁆𑀤𑁄 𑀇𑀘𑁆𑀙𑀺𑀢𑁄 𑀭𑀼𑀴𑁆𑀳𑀺𑀯𑀲𑁂𑀦. 𑀢𑁂𑀦𑁂𑀯𑀸𑀳 ‘‘𑀅𑀦𑁆𑀥𑀲𑁆𑀲 𑀧𑀩𑁆𑀩𑀢𑀸𑀭𑁄𑀳𑀡𑀁 𑀯𑀺𑀬𑀸’’𑀢𑀺𑀆𑀤𑀺. 𑀢𑀲𑁆𑀲 𑀳𑀺 𑀢𑀤𑀸𑀭𑁄𑀳𑀡𑀁 𑀦 𑀦𑀺𑀘𑁆𑀘𑀁, 𑀓𑀤𑀸𑀘𑀺𑀬𑁂𑀯 𑀲𑀺𑀬𑀸, 𑀏𑀯𑀫𑀺𑀤𑀫𑁆𑀧𑀺. 𑀅𑀘𑁆𑀙𑀭𑀸𑀬𑁄𑀕𑁆𑀕𑀁 𑀅𑀘𑁆𑀙𑀭𑀺𑀬𑀁 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀬𑁄𑀕𑁆𑀕𑀲𑀤𑁆𑀤𑀲𑁆𑀲 𑀮𑁄𑀧𑀢𑁄, 𑀢𑀤𑁆𑀥𑀺𑀢𑀯𑀲𑁂𑀦 𑀯𑀸 𑀡𑀺𑀬𑀧𑀘𑁆𑀘𑀬𑀲𑁆𑀲 𑀯𑀺𑀘𑀺𑀢𑁆𑀭𑀯𑀼𑀢𑁆𑀢𑀺𑀢𑁄, 𑀲𑁄 𑀧𑀦 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀫𑁂𑀯 𑀆𑀕𑀢𑀢𑁆𑀢𑀸 ‘‘𑀅𑀝𑁆𑀞𑀓𑀣𑀸𑀦𑀬𑁄’’𑀢𑀺 𑀯𑀼𑀢𑁆𑀢𑁄. 𑀧𑀼𑀩𑁆𑀩𑁂 𑀅𑀪𑀽𑀢𑀦𑁆𑀢𑀺 𑀅𑀪𑀽𑀢𑀧𑀼𑀩𑁆𑀩𑀁, 𑀏𑀢𑁂𑀦 𑀦 𑀪𑀽𑀢𑀁 𑀅𑀪𑀽𑀢𑀦𑁆𑀢𑀺 𑀦𑀺𑀩𑁆𑀩𑀘𑀦𑀁, 𑀪𑀽𑀢-𑀲𑀤𑁆𑀤𑀲𑁆𑀲 𑀘 𑀅𑀢𑀻𑀢𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀬𑀸𑀯𑀜𑁆𑀘𑀺𑀤𑀦𑁆𑀢𑀺 𑀲𑀦𑁆𑀥𑀺𑀯𑀲𑁂𑀦 𑀦𑀺𑀕𑁆𑀕𑀳𑀺𑀢𑀸𑀕𑀫𑁄𑀢𑀺 𑀆𑀳 ‘‘𑀬𑀸𑀯 𑀘 𑀇𑀤’’𑀦𑁆𑀢𑀺, 𑀏𑀢𑀲𑁆𑀲 𑀘 ‘‘𑀲𑀼𑀧𑁆𑀧𑀝𑀺𑀯𑀺𑀤𑀺𑀢𑀸’’𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀬𑀸𑀯 𑀘𑀬𑀢𑁆𑀢𑀓𑀁 𑀇𑀤𑀁 𑀅𑀬𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸 𑀲𑀼𑀧𑁆𑀧𑀝𑀺𑀯𑀺𑀤𑀺𑀢𑀸, 𑀢𑀁 ‘‘𑀏𑀢𑁆𑀢𑀓𑀫𑁂𑀯𑀸’’𑀢𑀺 𑀦 𑀲𑀓𑁆𑀓𑀸 𑀅𑀫𑁆𑀳𑁂𑀳𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁, 𑀅𑀓𑁆𑀔𑀸𑀢𑀼𑀜𑁆𑀘𑀸𑀢𑀺 𑀲𑀧𑀸𑀞𑀲𑁂𑀲𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀢𑁂𑀦 𑀲𑀼𑀧𑁆𑀧𑀝𑀺𑀯𑀺𑀤𑀺𑀢𑀢𑀸𑀬 𑀅𑀧𑁆𑀧𑀫𑁂𑀬𑁆𑀬𑀢𑀁 𑀤𑀲𑁆𑀲𑁂𑀢𑀻’’𑀢𑀺.

‘‘𑀪𑀕𑀯𑀢𑀸’’𑀢𑀺𑀆𑀤𑀻𑀳𑀺 ¶ 𑀧𑀤𑁂𑀳𑀺 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸 𑀢𑁂𑀦𑀸𑀢𑀺 𑀏𑀢𑁆𑀣 𑀢-𑀲𑀤𑁆𑀤𑁄 𑀲𑀓𑀢𑁆𑀣𑀧𑀝𑀺𑀦𑀺𑀤𑁆𑀤𑁂𑀲𑁄, 𑀢𑀲𑁆𑀫𑀸 𑀬𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀪𑀸𑀯𑁂𑀦 𑀪𑀕𑀯𑀸 𑀧𑀓𑀢𑁄 𑀲𑀫𑀸𑀦𑁄 𑀲𑀼𑀧𑀸𑀓𑀝𑁄 𑀦𑀸𑀫 𑀳𑁄𑀢𑀺, 𑀢𑀤𑀪𑀺𑀲𑀫𑁆𑀩𑀼𑀤𑁆𑀥𑀪𑀸𑀯𑀁 𑀲𑀤𑁆𑀥𑀺𑀁 𑀆𑀕𑀫𑀦𑀧𑀝𑀺𑀧𑀤𑀸𑀬 𑀢𑀲𑁆𑀲 𑀅𑀢𑁆𑀣𑀪𑀸𑀯𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀲𑁄’’𑀢𑀺𑀆𑀤𑀺𑀫𑀸𑀳 ¶ . 𑀦 𑀳𑁂𑀢𑁆𑀣 𑀲𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄 𑀅𑀢𑁆𑀣𑀺, 𑀬𑁄 𑀅𑀢𑁆𑀣𑁄 𑀢𑁂𑀳𑀺 𑀣𑁂𑀭𑁂𑀳𑀺 𑀢-𑀲𑀤𑁆𑀤𑁂𑀦 𑀧𑀭𑀸𑀫𑀲𑀺𑀢𑀩𑁆𑀩𑁄 𑀪𑀯𑁂𑀬𑁆𑀬. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀕𑀼𑀡𑀲𑀗𑁆𑀔𑀸𑀢𑀁 𑀲𑀓𑀢𑁆𑀣𑀁𑀬𑁂𑀯𑁂𑀲 𑀧𑀥𑀸𑀦𑀪𑀸𑀯𑁂𑀦 𑀧𑀭𑀸𑀫𑀲𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀦𑁆𑀢𑀺 𑀅𑀕𑁆𑀕𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑀁 𑀅𑀦𑀸𑀯𑀭𑀡𑀜𑀸𑀡𑀁, 𑀅𑀦𑀸𑀯𑀭𑀡𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀘 𑀅𑀕𑁆𑀕𑀫𑀕𑁆𑀕𑀜𑀸𑀡𑀁. 𑀢𑀤𑀼𑀪𑀬𑀜𑁆𑀳𑀺 𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑀁 𑀲𑀬𑀫𑁂𑀯 𑀩𑀼𑀚𑁆𑀛𑀢𑀺, 𑀲𑀫𑁆𑀫𑀸 𑀯𑀸 𑀧𑀲𑀝𑁆𑀞𑀸 𑀲𑀼𑀦𑁆𑀤𑀭𑀁 𑀩𑀼𑀚𑁆𑀛𑀢𑀻𑀢𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺. 𑀲𑀸 𑀧𑀦 𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀕𑀼𑀡𑀲𑀫𑁆𑀧𑀢𑁆𑀢𑀺𑀁 𑀤𑁂𑀢𑀺 𑀅𑀪𑀺𑀲𑁂𑀓𑁄 𑀯𑀺𑀬 𑀭𑀜𑁆𑀜𑁄 𑀲𑀩𑁆𑀩𑀮𑁄𑀓𑀺𑀲𑁆𑀲𑀭𑀺𑀬𑀪𑀸𑀯𑀁, 𑀢𑀲𑁆𑀫𑀸 ‘‘𑀅𑀦𑀼𑀢𑁆𑀢𑀭𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀻’’𑀢𑀺 𑀯𑀼𑀘𑁆𑀘𑀢𑀺. 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀅𑀩𑁆𑀪𑀜𑁆𑀜𑀸𑀲𑀺 𑀧𑀝𑀺𑀯𑀺𑀚𑁆𑀛𑀺, 𑀢𑁂𑀦 𑀢𑀸𑀤𑀺𑀲𑁂𑀦 𑀪𑀕𑀯𑀢𑀸𑀢𑀺 𑀅𑀢𑁆𑀣𑁄. 𑀲𑀢𑀺𑀧𑀺 𑀜𑀸𑀡𑀤𑀲𑁆𑀲𑀦𑀸𑀦𑀁 𑀇𑀥 𑀧𑀜𑁆𑀜𑀸𑀯𑁂𑀯𑀘𑀦𑀪𑀸𑀯𑁂 𑀢𑁂𑀦 𑀢𑁂𑀦 𑀯𑀺𑀲𑁂𑀲𑁂𑀦 𑀦𑁂𑀲𑀁 𑀯𑀺𑀲𑀬𑀯𑀺𑀲𑁂𑀲𑀧𑁆𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀳𑀺 𑀧𑀞𑀫𑀫𑀢𑁆𑀣𑀁 𑀅𑀲𑀸𑀥𑀸𑀭𑀡𑀜𑀸𑀡𑀯𑀲𑁂𑀦 𑀤𑀲𑁆𑀲𑁂𑀢𑀺. 𑀆𑀲𑀬𑀸𑀦𑀼𑀲𑀬𑀜𑀸𑀡𑁂𑀦 𑀚𑀸𑀦𑀢𑀸 𑀲𑀩𑁆𑀩𑀜𑁆𑀜𑀼𑀢𑀸𑀦𑀸𑀯𑀭𑀡𑀜𑀸𑀡𑁂𑀳𑀺 𑀧𑀲𑁆𑀲𑀢𑀸𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀁 𑀯𑀺𑀚𑁆𑀚𑀢𑁆𑀢𑀬𑀯𑀲𑁂𑀦. 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀤𑀻𑀳𑀻𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀲𑀯𑀓𑁆𑀔𑀬𑀜𑀸𑀡𑁂𑀳𑀺. 𑀢𑀢𑀺𑀬𑀁 𑀅𑀪𑀺𑀜𑁆𑀜𑀸𑀦𑀸𑀯𑀭𑀡𑀜𑀸𑀡𑀯𑀲𑁂𑀦. 𑀅𑀪𑀺𑀜𑁆𑀜𑀸𑀧𑀭𑀺𑀬𑀸𑀧𑀦𑁆𑀦𑁂𑀧𑀺 ‘‘𑀢𑀻𑀳𑀺 𑀯𑀺𑀚𑁆𑀚𑀸𑀳𑀻’’𑀢𑀺 𑀢𑀸𑀲𑀁 𑀭𑀸𑀲𑀺𑀪𑁂𑀤𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀦𑀸𑀯𑀭𑀡𑀜𑀸𑀡𑀲𑀗𑁆𑀔𑀸𑀢𑁂𑀦 𑀲𑀫𑀦𑁆𑀢𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀸𑀢𑀺 𑀅𑀢𑁆𑀣𑁄. 𑀘𑀢𑀼𑀢𑁆𑀣𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑀁𑀲𑀘𑀓𑁆𑀔𑀼𑀯𑀲𑁂𑀦. 𑀧𑀜𑁆𑀜𑀸𑀬𑀸𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦. 𑀓𑀼𑀝𑁆𑀝𑀲𑁆𑀲 𑀪𑀺𑀢𑁆𑀢𑀺𑀬𑀸 𑀢𑀺𑀭𑁄 𑀧𑀭𑀁, 𑀅𑀦𑁆𑀢𑁄 𑀯𑀸, 𑀢𑀤𑀸𑀤𑀻𑀲𑀼 𑀕𑀢𑀸𑀦𑀺. 𑀅𑀢𑀺𑀯𑀺𑀲𑀼𑀤𑁆𑀥𑁂𑀦𑀸𑀢𑀺 𑀅𑀢𑀺𑀯𑀺𑀬 𑀯𑀺𑀲𑀼𑀤𑁆𑀥𑁂𑀦 𑀧𑀜𑁆𑀘𑀯𑀡𑁆𑀡𑀲𑀫𑀦𑁆𑀦𑀸𑀕𑀢𑁂𑀦 𑀲𑀼𑀦𑀻𑀮𑀧𑀸𑀲𑀸𑀤𑀺𑀓𑀅𑀓𑁆𑀔𑀺𑀮𑁄𑀫𑀲𑀫𑀮𑀗𑁆𑀓𑀢𑁂𑀦 𑀭𑀢𑁆𑀢𑀺𑀜𑁆𑀘𑁂𑀯 𑀤𑀺𑀯𑀸 𑀘 𑀲𑀫𑀦𑁆𑀢𑀸 𑀬𑁄𑀚𑀦𑀁 𑀧𑀲𑁆𑀲𑀦𑁆𑀢𑁂𑀦 𑀫𑀁𑀲𑀘𑀓𑁆𑀔𑀼𑀦𑀸. 𑀧𑀜𑁆𑀘𑀫𑀁 𑀧𑀝𑀺𑀯𑁂𑀥𑀤𑁂𑀲𑀦𑀸𑀜𑀸𑀡𑀯𑀲𑁂𑀦. ‘‘𑀅𑀢𑁆𑀢𑀳𑀺𑀢𑀲𑀸𑀥𑀺𑀓𑀸𑀬𑀸’’𑀢𑀺 𑀏𑀓𑀁𑀲𑀢𑁄 𑀯𑀼𑀢𑁆𑀢𑀁, 𑀧𑀭𑀺𑀬𑀸𑀬𑀢𑁄 𑀧𑀦𑁂𑀲𑀸 𑀧𑀭𑀳𑀺𑀢𑀲𑀸𑀥𑀺𑀓𑀸𑀧𑀺 𑀳𑁄𑀢𑀺. 𑀢𑀸𑀬 𑀳𑀺 𑀥𑀫𑁆𑀫𑀲𑀪𑀸𑀯𑀧𑀝𑀺𑀘𑁆𑀙𑀸𑀤𑀓𑀓𑀺𑀮𑁂𑀲𑀲𑀫𑀼𑀕𑁆𑀖𑀸𑀢𑀸𑀬 𑀤𑁂𑀲𑀦𑀸𑀜𑀸𑀡𑀸𑀤𑀺 𑀲𑀫𑁆𑀪𑀯𑀢𑀺. 𑀧𑀝𑀺𑀯𑁂𑀥𑀧𑀜𑁆𑀜𑀸𑀬𑀸𑀢𑀺 𑀅𑀭𑀺𑀬𑀫𑀕𑁆𑀕𑀧𑀜𑁆𑀜𑀸𑀬. 𑀯𑀺𑀧𑀲𑁆𑀲𑀦𑀸𑀲𑀳𑀕𑀢𑁄 𑀲𑀫𑀸𑀥𑀺 𑀧𑀤𑀝𑁆𑀞𑀸𑀦𑀁 ¶ 𑀆𑀲𑀦𑁆𑀦𑀓𑀸𑀭𑀡𑀫𑁂𑀢𑀺𑀲𑁆𑀲𑀸𑀢𑀺 𑀲𑀫𑀸𑀥𑀺𑀧𑀤𑀝𑁆𑀞𑀸𑀦𑀸, 𑀢𑀸𑀬. 𑀤𑁂𑀲𑀦𑀸𑀧𑀜𑁆𑀜𑀸𑀬𑀸𑀢𑀺 𑀤𑁂𑀲𑀦𑀸𑀓𑀺𑀘𑁆𑀘𑀦𑀺𑀧𑁆𑀨𑀸𑀤𑀓𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦. 𑀅𑀭𑀻𑀦𑀦𑁆𑀢𑀺 𑀓𑀺𑀮𑁂𑀲𑀸𑀭𑀻𑀦𑀁, 𑀧𑀜𑁆𑀘𑀫𑀸𑀭𑀸𑀦𑀁 𑀯𑀸, 𑀲𑀸𑀲𑀦𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀯𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁. 𑀢𑁂𑀲𑀁 𑀳𑀦𑀦𑀁 𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀅𑀪𑀺𑀪𑀯𑀦𑀁 𑀅𑀧𑁆𑀧𑀝𑀺𑀪𑀸𑀦𑀢𑀸𑀓𑀭𑀡𑀁, 𑀅𑀚𑁆𑀛𑀼𑀧𑁂𑀓𑁆𑀔𑀦𑀜𑁆𑀘 𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑀓𑁂 𑀧𑀜𑁆𑀘𑀫𑀯𑀕𑁆𑀕𑁂 𑀲𑀗𑁆𑀕𑀻𑀢𑀁 𑀘𑀗𑁆𑀓𑀻𑀲𑀼𑀢𑁆𑀢𑀜𑁆𑀘𑁂𑀢𑁆𑀣 (𑀫. 𑀦𑀺. 𑁨.𑁪𑁨𑁨) 𑀦𑀺𑀤𑀲𑁆𑀲𑀦𑀁, 𑀏𑀢𑁂𑀦 𑀅𑀭𑀬𑁄 𑀳𑀢𑀸 𑀅𑀦𑁂𑀦𑀸𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑀤𑀲𑀺𑀤𑁆𑀥𑀺𑀫𑀸𑀳. 𑀅𑀢𑁄 𑀦𑀸𑀯𑀘𑀦𑀲𑁆𑀲 𑀢𑀸𑀩𑁆𑀬𑀧𑁆𑀧𑀤𑁂𑀲𑁄 𑀫𑀳𑀸𑀯𑀺𑀲𑀬𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀧𑀺𑀘 𑀅𑀭𑀬𑁄 𑀳𑀦𑀢𑀻𑀢𑀺 𑀅𑀦𑁆𑀢𑀲𑀤𑁆𑀤𑁂𑀦 𑀧𑀤𑀲𑀺𑀤𑁆𑀥𑀺, 𑀇𑀓𑀸𑀭𑀲𑁆𑀲 𑀘 𑀅𑀓𑀸𑀭𑁄. 𑀧𑀘𑁆𑀘𑀬𑀸𑀤𑀻𑀦𑀁 𑀲𑀫𑁆𑀧𑀤𑀸𑀦𑀪𑀽𑀢𑀸𑀦𑀁, 𑀢𑁂𑀲𑀁 𑀯𑀸 𑀧𑀝𑀺𑀕𑁆𑀕𑀳𑀡𑀁, 𑀧𑀝𑀺𑀕𑁆𑀕𑀳𑀺𑀢𑀼𑀁 𑀯𑀸 𑀅𑀭𑀳𑀢𑀻𑀢𑀺 𑀅𑀭𑀳𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀧𑀘𑁆𑀘𑀬𑀸𑀤𑀻𑀦𑀜𑁆𑀘 𑀅𑀭𑀳𑀢𑁆𑀢𑀸’’𑀢𑀺 𑀇𑀫𑀺𑀦𑀸. 𑀲𑀫𑁆𑀫𑀸𑀢𑀺 𑀅𑀯𑀺𑀧𑀭𑀻𑀢𑀁. 𑀲𑀸𑀫𑀜𑁆𑀘𑀸𑀢𑀺 𑀲𑀬𑀫𑁂𑀯, 𑀅𑀧𑀭𑀦𑁂𑀬𑁆𑀬𑁄 𑀳𑀼𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀣𑀁 𑀧𑀦𑁂𑀢𑁆𑀣 ‘‘𑀲𑀩𑁆𑀩𑀥𑀫𑁆𑀫𑀸𑀦’’𑀦𑁆𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀮𑀩𑁆𑀪𑀢𑀻𑀢𑀺? 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 ¶ 𑀯𑀺𑀲𑁂𑀲𑁂 𑀅𑀯𑀝𑁆𑀞𑀸𑀦𑀢𑁄, 𑀯𑀺𑀲𑁂𑀲𑀢𑁆𑀣𑀺𑀦𑀸 𑀘 𑀯𑀺𑀲𑁂𑀲𑀲𑁆𑀲 𑀅𑀦𑀼𑀧𑀬𑁄𑀚𑁂𑀢𑀩𑁆𑀩𑀢𑁄 𑀬𑀚𑁆𑀚𑁂𑀯𑀁 ‘‘𑀥𑀫𑁆𑀫𑀸𑀦’’𑀦𑁆𑀢𑀺 𑀯𑀺𑀲𑁂𑀲𑁄𑀯𑀸𑀦𑀼𑀧𑀬𑁄𑀚𑀺𑀢𑁄 𑀲𑀺𑀬𑀸, 𑀓𑀲𑁆𑀫𑀸 𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 𑀅𑀬𑀫𑀢𑁆𑀣𑁄 𑀅𑀦𑀼𑀧𑀬𑁄𑀚𑀻𑀬𑀢𑀻𑀢𑀺? 𑀏𑀓𑀤𑁂𑀲𑀲𑁆𑀲 𑀅𑀕𑁆𑀕𑀳𑀡𑀢𑁄. 𑀧𑀤𑁂𑀲𑀕𑁆𑀕𑀳𑀡𑁂 𑀳𑀺 𑀅𑀲𑀢𑀺 𑀕𑀳𑁂𑀢𑀩𑁆𑀩𑀲𑁆𑀲 𑀦𑀺𑀧𑁆𑀧𑀤𑁂𑀲𑀢𑀸 𑀯𑀺𑀜𑁆𑀜𑀸𑀬𑀢𑀺 𑀬𑀣𑀸 ‘‘𑀤𑀺𑀓𑁆𑀔𑀺𑀢𑁄 𑀦 𑀤𑀤𑀸𑀢𑀻’’𑀢𑀺, 𑀏𑀲 𑀦𑀬𑁄 𑀈𑀤𑀺𑀲𑁂𑀲𑀼.

𑀇𑀤𑀸𑀦𑀺 𑀘 𑀘𑀢𑀽𑀳𑀺 𑀧𑀤𑁂𑀳𑀺 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀲𑁂𑀦 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀢𑀭𑀁 𑀙𑀝𑁆𑀞𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑁆𑀢𑀭𑀸𑀬𑀺𑀓𑀥𑀫𑁆𑀫𑁂 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀢𑀤𑁂𑀯 𑀦𑀺𑀕𑀫𑀦𑀁 𑀓𑀭𑁄𑀢𑀺 ‘‘𑀏𑀯’’𑀦𑁆𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀅𑀦𑁆𑀢𑀭𑀸𑀬𑀓𑀭𑀥𑀫𑁆𑀫𑀜𑀸𑀡𑁂𑀦 𑀚𑀸𑀦𑀢𑀸, 𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀜𑀸𑀡𑁂𑀦 𑀧𑀲𑁆𑀲𑀢𑀸, 𑀆𑀲𑀯𑀓𑁆𑀔𑀬𑀜𑀸𑀡𑁂𑀦 𑀅𑀭𑀳𑀢𑀸, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀆𑀢𑀺 𑀬𑀣𑀸𑀓𑁆𑀓𑀫𑀁 𑀬𑁄𑀚𑁂𑀢𑀩𑁆𑀩𑀁. 𑀅𑀦𑀢𑁆𑀣𑀘𑀭𑀡𑁂𑀦 𑀓𑀺𑀮𑁂𑀲𑀸 𑀏𑀯 𑀅𑀭𑀬𑁄𑀢𑀺 𑀓𑀺𑀮𑁂𑀲𑀸𑀭𑀬𑁄, 𑀢𑁂𑀲𑀁 𑀓𑀺𑀮𑁂𑀲𑀸𑀭𑀻𑀦𑀁. 𑀏𑀢𑁆𑀣𑀸𑀳 𑁋 𑀬𑀲𑁆𑀲 𑀜𑀸𑀡𑀲𑁆𑀲 𑀯𑀲𑁂𑀦 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀪𑀕𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀦𑀸𑀫 𑀚𑀸𑀢𑁄, 𑀓𑀺𑀁 𑀧𑀦𑀺𑀤𑀁 𑀜𑀸𑀡𑀁 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀚𑁆𑀛𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀲𑀓𑀺𑀁𑀬𑁂𑀯 𑀲𑀩𑁆𑀩𑀲𑁆𑀫𑀺𑀁 𑀯𑀺𑀲𑀬𑁂 𑀧𑀯𑀢𑁆𑀢𑀢𑀺, 𑀉𑀤𑀸𑀳𑀼 𑀓𑀫𑁂𑀦𑀸𑀢𑀺. 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀢𑀸𑀯 𑀲𑀓𑀺𑀁𑀬𑁂𑀯 𑀲𑀩𑁆𑀩𑀲𑁆𑀫𑀺𑀁 𑀯𑀺𑀲𑀬𑁂 𑀧𑀯𑀢𑁆𑀢𑀢𑀺, 𑀏𑀯𑀁 𑀲𑀢𑀺 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀤𑀺𑀪𑁂𑀤𑀪𑀺𑀦𑁆𑀦𑀸𑀦𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁, 𑀅𑀲𑀗𑁆𑀔𑀢𑀲𑀫𑁆𑀫𑀼𑀢𑀺𑀥𑀫𑁆𑀫𑀸𑀦𑀜𑁆𑀘 𑀏𑀓𑀚𑁆𑀛𑀁 𑀉𑀧𑀝𑁆𑀞𑀸𑀦𑁂 𑀤𑀽𑀭𑀢𑁄 𑀘𑀺𑀢𑁆𑀢𑀧𑀝𑀁 𑀧𑁂𑀓𑁆𑀔𑀦𑁆𑀢𑀲𑁆𑀲 𑀯𑀺𑀬 𑀧𑀝𑀺𑀪𑀸𑀕𑁂𑀦𑀸𑀯𑀩𑁄𑀥𑁄 𑀦 𑀲𑀺𑀬𑀸, 𑀢𑀣𑀸 𑀘 𑀲𑀢𑀺 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 ¶ (𑀅. 𑀦𑀺. 𑁩.𑁧𑁩𑁭; 𑀥. 𑀧. 𑁨𑁭𑁯; 𑀫𑀳𑀸𑀦𑀺. 𑁨𑁭; 𑀘𑀽𑀴𑀦𑀺. 𑁮, 𑁧𑁦; 𑀦𑁂𑀢𑁆𑀢𑀺. 𑁫) 𑀯𑀺𑀧𑀲𑁆𑀲𑀦𑁆𑀢𑀸𑀦𑀁 𑀅𑀦𑀢𑁆𑀢𑀸𑀓𑀸𑀭𑁂𑀦 𑀯𑀺𑀬 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀺𑀭𑀽𑀧𑀺𑀢𑀭𑀽𑀧𑁂𑀦 𑀪𑀕𑀯𑀢𑁄 𑀜𑀸𑀡𑀯𑀺𑀲𑀬𑀸 𑀳𑁄𑀦𑁆𑀢𑀻𑀢𑀺 𑀆𑀧𑀚𑁆𑀚𑀢𑀺. 𑀬𑁂𑀧𑀺 ‘‘𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀸𑀦𑀁 𑀞𑀺𑀢𑀺𑀮𑀓𑁆𑀔𑀡𑀯𑀺𑀲𑀬𑀁 𑀯𑀺𑀓𑀧𑁆𑀧𑀭𑀳𑀺𑀢𑀁 𑀲𑀩𑁆𑀩𑀓𑀸𑀮𑀁 𑀩𑀼𑀤𑁆𑀥𑀸𑀦𑀁 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀢𑁂𑀦 𑀢𑁂 ‘𑀲𑀩𑁆𑀩𑀯𑀺𑀤𑀽’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑁋

‘𑀕𑀘𑁆𑀙𑀁 𑀲𑀫𑀸𑀳𑀺𑀢𑁄 𑀦𑀸𑀕𑁄, 𑀞𑀺𑀢𑁄 𑀦𑀸𑀕𑁄 𑀲𑀫𑀸𑀳𑀺𑀢𑁄;

𑀲𑁂𑀬𑁆𑀬𑀁 𑀲𑀫𑀸𑀳𑀺𑀢𑁄 𑀦𑀸𑀕𑁄, 𑀦𑀺𑀲𑀺𑀦𑁆𑀦𑁄𑀧𑀺 𑀲𑀫𑀸𑀳𑀺𑀢𑁄’𑀢𑀺. (𑀅. 𑀦𑀺. 𑁬.𑁪𑁩); 𑁋

𑀇𑀤𑀫𑁆𑀧𑀺 𑀲𑀩𑁆𑀩𑀤𑀸 𑀜𑀸𑀡𑀧𑁆𑀧𑀯𑀢𑁆𑀢𑀺𑀤𑀻𑀧𑀓𑀁 𑀅𑀗𑁆𑀕𑀼𑀢𑁆𑀢𑀭𑀸𑀕𑀫𑁂 𑀦𑀸𑀕𑁄𑀧𑀫𑀲𑀼𑀢𑁆𑀢𑀯𑀘𑀦𑀁 𑀲𑀼𑀯𑀼𑀢𑁆𑀢𑀁 𑀦𑀸𑀫 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀯𑀸𑀤𑁂 𑀯𑀼𑀢𑁆𑀢𑀤𑁄𑀲𑀸 𑀦𑀸𑀢𑀺𑀯𑀢𑁆𑀢𑀺. 𑀞𑀺𑀢𑀺𑀮𑀓𑁆𑀔𑀡𑀸𑀭𑀫𑁆𑀫𑀡𑀢𑀸𑀬 𑀘 𑀅𑀢𑀻𑀢𑀸𑀦𑀸𑀕𑀢𑀥𑀫𑁆𑀫𑀸𑀦𑀁 𑀢𑀤𑀪𑀸𑀯𑀢𑁄 𑀏𑀓𑀤𑁂𑀲𑀯𑀺𑀲𑀬𑀫𑁂𑀯 𑀪𑀕𑀯𑀢𑁄 𑀜𑀸𑀡𑀁 𑀲𑀺𑀬𑀸, 𑀢𑀲𑁆𑀫𑀸 𑀲𑀓𑀺𑀜𑁆𑀜𑁂𑀯 𑀲𑀩𑁆𑀩𑀲𑁆𑀫𑀺𑀁 𑀯𑀺𑀲𑀬𑁂 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺. 𑀅𑀣 𑀓𑀫𑁂𑀦 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀯𑀺𑀲𑀬𑁂 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀏𑀯𑀫𑁆𑀧𑀺 𑀦 𑀬𑀼𑀚𑁆𑀚𑀢𑀺. 𑀦 𑀳𑀺 𑀚𑀸𑀢𑀺𑀪𑀽𑀫𑀺𑀲𑀪𑀸𑀯𑀸𑀤𑀺𑀯𑀲𑁂𑀦, 𑀤𑀺𑀲𑀸𑀤𑁂𑀲𑀓𑀸𑀮𑀸𑀤𑀺𑀯𑀲𑁂𑀦 𑀘 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑁂 𑀜𑁂𑀬𑁆𑀬𑁂 𑀓𑀫𑁂𑀦 ¶ 𑀕𑀬𑁆𑀳𑀫𑀸𑀦𑁂 𑀢𑀲𑁆𑀲 𑀅𑀦𑀯𑀲𑁂𑀲𑀧𑀝𑀺𑀯𑁂𑀥𑁄 𑀲𑀫𑁆𑀪𑀯𑀢𑀺 𑀅𑀧𑀭𑀺𑀬𑀦𑁆𑀢𑀪𑀸𑀯𑀢𑁄 𑀜𑁂𑀬𑁆𑀬𑀲𑁆𑀲. 𑀬𑁂 𑀧𑀦 ‘‘𑀅𑀢𑁆𑀣𑀲𑁆𑀲 𑀅𑀯𑀺𑀲𑀁𑀯𑀸𑀤𑀦𑀢𑁄 𑀜𑁂𑀬𑁆𑀬𑀲𑁆𑀲 𑀏𑀓𑀤𑁂𑀲𑀁 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀲𑁂𑀲𑁂𑀧𑀺 𑀏𑀯𑀦𑁆𑀢𑀺 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀯𑀢𑁆𑀣𑀸𑀧𑀦𑁂𑀦 𑀲𑀩𑁆𑀩𑀜𑁆𑀜𑀽 𑀦𑀸𑀫 𑀪𑀕𑀯𑀸 𑀚𑀸𑀢𑁄, 𑀢𑀜𑁆𑀘 𑀜𑀸𑀡𑀁 𑀦 𑀅𑀦𑀼𑀫𑀸𑀦𑀺𑀓𑀁 𑀦𑀸𑀫 𑀲𑀁𑀲𑀬𑀸𑀪𑀸𑀯𑀢𑁄. 𑀲𑀁𑀲𑀬𑀸𑀦𑀼𑀩𑀤𑁆𑀥𑀜𑁆𑀳𑀺 𑀜𑀸𑀡𑀁 𑀮𑁄𑀓𑁂 𑀅𑀦𑀼𑀫𑀸𑀦𑀺𑀓’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀢𑀁 𑀦 𑀬𑀼𑀢𑁆𑀢𑀫𑁂𑀯. 𑀲𑀩𑁆𑀩𑀲𑁆𑀲 𑀳𑀺 𑀅𑀧𑁆𑀧𑀘𑁆𑀘𑀓𑁆𑀔𑀪𑀸𑀯𑁂 𑀅𑀢𑁆𑀣𑀸𑀯𑀺𑀲𑀁𑀯𑀸𑀤𑀦𑁂𑀦 𑀜𑁂𑀬𑁆𑀬𑀲𑁆𑀲 𑀏𑀓𑀤𑁂𑀲𑀁 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀲𑁂𑀲𑁂𑀧𑀺 𑀏𑀯𑀦𑁆𑀢𑀺 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀯𑀢𑁆𑀣𑀸𑀧𑀦𑀲𑁆𑀲𑁂𑀯 𑀅𑀲𑀫𑁆𑀪𑀯𑀢𑁄 𑀢𑀣𑀸 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀘. 𑀬𑀜𑁆𑀳𑀺 𑀲𑁂𑀲𑀁, 𑀢𑀤𑀧𑀘𑁆𑀘𑀓𑁆𑀔𑀫𑁂𑀯, 𑀅𑀣 𑀢𑀫𑁆𑀧𑀺 𑀧𑀘𑁆𑀘𑀓𑁆𑀔𑀁, 𑀢𑀲𑁆𑀲 𑀲𑁂𑀲𑀪𑀸𑀯𑁄 𑀏𑀯 𑀦 𑀲𑀺𑀬𑀸, 𑀅𑀧𑀭𑀺𑀬𑀦𑁆𑀢𑀪𑀸𑀯𑀢𑁄 𑀜𑁂𑀬𑁆𑀬𑀲𑁆𑀲 𑀢𑀣𑀸𑀯𑀯𑀢𑁆𑀣𑀺𑀢𑀼𑀫𑁂𑀯 𑀦 𑀲𑀓𑁆𑀓𑀸𑀢𑀺? 𑀲𑀩𑁆𑀩𑀫𑁂𑀢𑀁 𑀅𑀓𑀸𑀭𑀡𑀁. 𑀓𑀲𑁆𑀫𑀸? 𑀅𑀯𑀺𑀲𑀬𑀯𑀺𑀘𑀸𑀭𑀡𑀪𑀸𑀯𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀩𑀼𑀤𑁆𑀥𑀸𑀦𑀁 𑀪𑀺𑀓𑁆𑀔𑀯𑁂, 𑀩𑀼𑀤𑁆𑀥𑀯𑀺𑀲𑀬𑁄 𑀅𑀘𑀺𑀦𑁆𑀢𑁂𑀬𑁆𑀬𑁄 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄, 𑀬𑀁 𑀘𑀺𑀦𑁆𑀢𑁂𑀦𑁆𑀢𑁄 𑀉𑀫𑁆𑀫𑀸𑀤𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲𑀸’’𑀢𑀺 (𑀅. 𑀦𑀺. 𑁪.𑁭𑁭) 𑀇𑀤𑀁 𑀧𑀦𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁 𑁋 𑀬𑀁 𑀓𑀺𑀜𑁆𑀘𑀺 𑀪𑀕𑀯𑀢𑀸 𑀜𑀸𑀢𑀼𑀁 𑀇𑀘𑁆𑀙𑀺𑀢𑀁, 𑀲𑀓𑀮𑀫𑁂𑀓𑀤𑁂𑀲𑁄 𑀯𑀸, 𑀢𑀢𑁆𑀣 𑀢𑀢𑁆𑀣 𑀅𑀧𑁆𑀧𑀝𑀺𑀳𑀢𑀯𑀼𑀢𑁆𑀢𑀺𑀢𑀸𑀬 𑀧𑀘𑁆𑀘𑀓𑁆𑀔𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀺 𑀦𑀺𑀘𑁆𑀘𑀲𑀫𑀸𑀥𑀸𑀦𑀜𑁆𑀘 𑀯𑀺𑀓𑁆𑀔𑁂𑀧𑀸𑀪𑀸𑀯𑀢𑁄, 𑀜𑀸𑀢𑀼𑀁 𑀇𑀘𑁆𑀙𑀺𑀢𑀲𑁆𑀲 𑀘 𑀲𑀓𑀮𑀲𑁆𑀲 𑀅𑀯𑀺𑀲𑀬𑀪𑀸𑀯𑁂 𑀢𑀲𑁆𑀲 𑀆𑀓𑀗𑁆𑀔𑀸𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸 𑀦 𑀲𑀺𑀬𑀸, 𑀏𑀓𑀦𑁆𑀢𑁂𑀦𑁂𑀯 ¶ 𑀲𑀸 𑀇𑀘𑁆𑀙𑀺𑀢𑀩𑁆𑀩𑀸, 𑀲𑀩𑁆𑀩𑁂 𑀥𑀫𑁆𑀫𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀸 𑀆𑀓𑀗𑁆𑀔𑀸𑀧𑀝𑀺𑀩𑀤𑁆𑀥𑀸 𑀫𑀦𑀲𑀺𑀓𑀸𑀭𑀧𑀝𑀺𑀩𑀤𑁆𑀥𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀝𑀺𑀩𑀤𑁆𑀥𑀸𑀢𑀺 (𑀫𑀳𑀸𑀦𑀺. 𑁬𑁯, 𑁧𑁫𑁬; 𑀘𑀽𑀴𑀦𑀺. 𑁮𑁫; 𑀧𑀝𑀺. 𑀫. 𑁩.𑁫) 𑀯𑀘𑀦𑀢𑁄. 𑀅𑀢𑀻𑀢𑀸𑀦𑀸𑀕𑀢𑀯𑀺𑀲𑀬𑀫𑁆𑀧𑀺 𑀪𑀕𑀯𑀢𑁄 𑀜𑀸𑀡𑀁 𑀅𑀦𑀼𑀫𑀸𑀦𑀸𑀕𑀫𑀢𑀓𑁆𑀓𑀕𑀳𑀡𑀯𑀺𑀭𑀳𑀺𑀢𑀢𑁆𑀢𑀸 𑀧𑀘𑁆𑀘𑀓𑁆𑀔𑀫𑁂𑀯.

𑀦𑀦𑀼 𑀘 𑀏𑀢𑀲𑁆𑀫𑀺𑀫𑁆𑀧𑀺 𑀧𑀓𑁆𑀔𑁂 𑀬𑀤𑀸 𑀲𑀓𑀮𑀁 𑀜𑀸𑀢𑀼𑀁 𑀇𑀘𑁆𑀙𑀺𑀢𑀁, 𑀢𑀤𑀸 𑀲𑀓𑀺𑀁𑀬𑁂𑀯 𑀲𑀓𑀮𑀯𑀺𑀲𑀬𑀢𑀸𑀬 𑀅𑀦𑀺𑀭𑀽𑀧𑀺𑀢𑀭𑀽𑀧𑁂𑀦 𑀪𑀕𑀯𑀢𑁄 𑀜𑀸𑀡𑀁 𑀧𑀯𑀢𑁆𑀢𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀤𑁄𑀲𑀸 𑀦𑀸𑀢𑀺𑀯𑀢𑁆𑀢𑀺𑀬𑁂𑀯𑀸𑀢𑀺? 𑀦, 𑀢𑀲𑁆𑀲 𑀯𑀺𑀲𑁄𑀥𑀺𑀢𑀢𑁆𑀢𑀸. 𑀯𑀺𑀲𑁄𑀥𑀺𑀢𑁄 𑀳𑀺 𑀲𑁄 𑀩𑀼𑀤𑁆𑀥𑀯𑀺𑀲𑀬𑁄 𑀅𑀘𑀺𑀦𑁆𑀢𑁂𑀬𑁆𑀬𑁄𑀢𑀺. 𑀅𑀜𑁆𑀜𑀣𑀸 𑀧𑀘𑀼𑀭𑀚𑀦𑀜𑀸𑀡𑀲𑀫𑀸𑀦𑀯𑀼𑀢𑁆𑀢𑀺𑀢𑀸𑀬 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀜𑀸𑀡𑀲𑁆𑀲 𑀅𑀘𑀺𑀦𑁆𑀢𑁂𑀬𑁆𑀬𑀢𑀸 𑀦 𑀲𑀺𑀬𑀸, 𑀢𑀲𑁆𑀫𑀸 𑀲𑀓𑀮𑀥𑀫𑁆𑀫𑀸𑀭𑀫𑁆𑀫𑀡𑀫𑁆𑀧𑀺 𑀢𑀁 𑀏𑀓𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀺𑀬 𑀲𑀼𑀯𑀯𑀢𑁆𑀣𑀸𑀧𑀺𑀢𑁂𑀬𑁂𑀯 𑀢𑁂 𑀥𑀫𑁆𑀫𑁂 𑀓𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀇𑀤𑀫𑁂𑀢𑁆𑀣 𑀅𑀘𑀺𑀦𑁆𑀢𑁂𑀬𑁆𑀬𑀁, ‘‘𑀬𑀸𑀯𑀢𑀓𑀁 𑀦𑁂𑀬𑁆𑀬𑀁, 𑀢𑀸𑀯𑀢𑀓𑀁 𑀜𑀸𑀡𑀁. 𑀬𑀸𑀯𑀢𑀓𑀁 𑀜𑀸𑀡𑀁, 𑀢𑀸𑀯𑀢𑀓𑀁 𑀦𑁂𑀬𑁆𑀬𑀁. 𑀦𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀦𑁂𑀬𑁆𑀬𑀁. 𑀦𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀜𑀸𑀡𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀜𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑁂𑀬𑁆𑀬𑀧𑀣𑁄 𑀦𑀢𑁆𑀣𑀺. 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄 𑀢𑁂 𑀥𑀫𑁆𑀫𑀸, 𑀬𑀣𑀸 𑀤𑁆𑀯𑀺𑀦𑁆𑀦𑀁 𑀲𑀫𑀼𑀕𑁆𑀕𑀧𑀝𑀮𑀸𑀦𑀁 𑀲𑀫𑁆𑀫𑀸 𑀨𑀼𑀲𑀺𑀢𑀸𑀦𑀁 𑀳𑁂𑀝𑁆𑀞𑀺𑀫𑀁 𑀲𑀫𑀼𑀕𑁆𑀕𑀧𑀝𑀮𑀁 𑀉𑀧𑀭𑀺𑀫𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀉𑀧𑀭𑀺𑀫𑀁 𑀲𑀫𑀼𑀕𑁆𑀕𑀧𑀝𑀮𑀁 𑀳𑁂𑀝𑁆𑀞𑀺𑀫𑀁 𑀦𑀸𑀢𑀺𑀯𑀢𑁆𑀢𑀢𑀺. 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄, 𑀏𑀯𑀫𑁂𑀯 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀦𑁂𑀬𑁆𑀬𑀜𑁆𑀘 𑀜𑀸𑀡𑀜𑁆𑀘 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄…𑀧𑁂… 𑀢𑁂 𑀥𑀫𑁆𑀫𑀸’’𑀢𑀺 (𑀫𑀳𑀸𑀦𑀺. 𑁬𑁯, 𑁧𑁫𑁬; 𑀘𑀽𑀴𑀦𑀺. 𑁮𑁫; 𑀧𑀝𑀺. 𑀫. 𑁩.𑁫) 𑀏𑀯𑀫𑁂𑀓𑀚𑁆𑀛𑀁, 𑀯𑀺𑀲𑀼𑀁, 𑀲𑀓𑀺𑀁, 𑀓𑀫𑁂𑀦 𑀯𑀸 𑀇𑀘𑁆𑀙𑀸𑀦𑀼𑀭𑀽𑀧𑀁 ¶ 𑀧𑀯𑀢𑁆𑀢𑀲𑁆𑀲 𑀢𑀲𑁆𑀲 𑀜𑀸𑀡𑀲𑁆𑀲 𑀯𑀲𑁂𑀦 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀪𑀕𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀦𑀸𑀫 𑀚𑀸𑀢𑁄𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑁄 𑀦𑀬𑁄 𑁋 𑀞𑀸𑀦𑀸𑀞𑀸𑀦𑀸𑀤𑀻𑀦𑀺 𑀙𑀩𑁆𑀩𑀺𑀲𑀬𑀸𑀦𑀺 𑀙𑀳𑀺 𑀜𑀸𑀡𑁂𑀳𑀺 𑀚𑀸𑀦𑀢𑀸, 𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀘𑀼𑀢𑀽𑀧𑀧𑀸𑀢𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂𑀳𑀺 𑀧𑀲𑁆𑀲𑀢𑀸, 𑀲𑀯𑀸𑀲𑀦𑀸𑀦𑀫𑀸𑀲𑀯𑀸𑀦𑀁 𑀆𑀲𑀯𑀓𑁆𑀔𑀬𑀜𑀸𑀡𑁂𑀦 𑀔𑀻𑀡𑀢𑁆𑀢𑀸 𑀅𑀭𑀳𑀢𑀸, 𑀛𑀸𑀦𑀸𑀤𑀺𑀥𑀫𑁆𑀫𑁂 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀯𑀲𑁂𑀦 𑀲𑀸𑀫𑀁𑀬𑁂𑀯 𑀅𑀯𑀺𑀧𑀭𑀻𑀢𑀸𑀯𑀩𑁄𑀥𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦, 𑀏𑀯𑀁 𑀤𑀲𑀩𑀮𑀜𑀸𑀡𑀯𑀲𑁂𑀦 𑀘𑀢𑀽𑀳𑀸𑀓𑀸𑀭𑁂𑀳𑀺 𑀣𑁄𑀫𑀺𑀢𑁂𑀦. 𑀅𑀧𑀺𑀘 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀢𑀸𑀬 𑀚𑀸𑀦𑀢𑀸, 𑀢𑀺𑀡𑁆𑀡𑀫𑁆𑀧𑀺 𑀓𑀫𑁆𑀫𑀸𑀦𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀢𑁄 𑀦𑀺𑀲𑀫𑁆𑀫𑀓𑀸𑀭𑀺𑀢𑀸𑀬 𑀧𑀲𑁆𑀲𑀢𑀸, 𑀤𑀯𑀸𑀤𑀻𑀦𑀁 𑀙𑀦𑁆𑀦𑀫𑀪𑀸𑀯𑀲𑀸𑀥𑀺𑀓𑀸𑀬 𑀧𑀳𑀸𑀦𑀲𑀫𑁆𑀧𑀤𑀸𑀬 𑀅𑀭𑀳𑀢𑀸, 𑀙𑀦𑁆𑀤𑀸𑀤𑀻𑀦𑀁 𑀙𑀦𑁆𑀦𑀫𑀳𑀸𑀦𑀺𑀳𑁂𑀢𑀼𑀪𑀽𑀢𑀸𑀬 𑀅𑀧𑀭𑀺𑀓𑁆𑀔𑀬𑀧𑀝𑀺𑀪𑀸𑀦𑀲𑀸𑀥𑀺𑀓𑀸𑀬 𑀲𑀩𑁆𑀩𑀜𑁆𑀜𑀼𑀢𑀸𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 ¶ , 𑀏𑀯𑀁 𑀅𑀝𑁆𑀞𑀸𑀭𑀲𑀸𑀯𑁂𑀡𑀺𑀓𑀩𑀼𑀤𑁆𑀥𑀥𑀫𑁆𑀫𑀯𑀲𑁂𑀦 (𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁦𑁫) 𑀘𑀢𑀽𑀳𑀸𑀓𑀸𑀭𑁂𑀳𑀺 𑀣𑁄𑀫𑀺𑀢𑁂𑀦𑀸𑀢𑀺 𑀏𑀯𑀫𑀸𑀤𑀺𑀦𑀸 𑀢𑁂𑀲𑀁 𑀢𑁂𑀲𑀁 𑀜𑀸𑀡𑀤𑀲𑁆𑀲𑀦𑀧𑀳𑀸𑀦𑀩𑁄𑀥𑀦𑀢𑁆𑀣𑁂𑀳𑀺 𑀲𑀗𑁆𑀕𑀳𑀺𑀢𑀸𑀦𑀁 𑀩𑀼𑀤𑁆𑀥𑀕𑀼𑀡𑀸𑀦𑀁 𑀯𑀲𑁂𑀦 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺.

𑀘𑀢𑀼𑀯𑁂𑀲𑀸𑀭𑀚𑁆𑀚𑀁 𑀲𑀦𑁆𑀥𑀸𑀬 ‘‘𑀘𑀢𑀽𑀳𑀸𑀓𑀸𑀭𑁂𑀳𑀻’’𑀢𑀺 𑀯𑀼𑀢𑁆𑀢𑀁. ‘‘𑀣𑁄𑀫𑀺𑀢𑁂𑀦𑀸’’𑀢𑀺 𑀏𑀢𑁂𑀦 𑀇𑀫𑁂𑀲𑀁 ‘‘𑀪𑀕𑀯𑀢𑀸’’𑀢𑀺 𑀧𑀤𑀲𑁆𑀲 𑀯𑀺𑀲𑁂𑀲𑀦𑀢𑀁 𑀤𑀲𑁆𑀲𑁂𑀢𑀺. 𑀬𑀤𑀺𑀧𑀺 𑀳𑀻𑀦𑀧𑀡𑀻𑀢𑀪𑁂𑀤𑁂𑀦 𑀤𑀼𑀯𑀺𑀥𑀸𑀯 𑀅𑀥𑀺𑀫𑀼𑀢𑁆𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸, 𑀧𑀯𑀢𑁆𑀢𑀺𑀆𑀓𑀸𑀭𑀯𑀲𑁂𑀦 𑀧𑀦 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀸𑀯𑀸𑀢𑀺 𑀆𑀳 ‘‘𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸’’𑀢𑀺. 𑀲𑀸 𑀧𑀦 𑀅𑀥𑀺𑀫𑀼𑀢𑁆𑀢𑀺 𑀅𑀚𑁆𑀛𑀸𑀲𑀬𑀥𑀸𑀢𑀼𑀬𑁂𑀯, 𑀢𑀤𑀧𑀺 𑀢𑀣𑀸 𑀢𑀣𑀸 𑀤𑀲𑁆𑀲𑀦𑀁, 𑀔𑀫𑀦𑀁, 𑀭𑁄𑀘𑀦𑀜𑁆𑀘𑀸𑀢𑀺 𑀅𑀢𑁆𑀣𑀁 𑀯𑀺𑀜𑁆𑀜𑀸𑀧𑁂𑀢𑀺 ‘‘𑀦𑀸𑀦𑀚𑁆𑀛𑀸𑀲𑀬𑀢𑀸’’𑀢𑀺 𑀇𑀫𑀺𑀦𑀸. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸 𑀦𑀸𑀦𑀚𑁆𑀛𑀸𑀲𑀬𑀢𑀸 𑀦𑀸𑀦𑀸𑀤𑀺𑀝𑁆𑀞𑀺𑀓𑀢𑀸 𑀦𑀸𑀦𑀓𑁆𑀔𑀦𑁆𑀢𑀺𑀢𑀸 𑀦𑀸𑀦𑀸𑀭𑀼𑀘𑀺𑀢𑀸’’𑀢𑀺. ‘‘𑀬𑀸𑀯𑀜𑁆𑀘𑀺𑀤’’𑀦𑁆𑀢𑀺 𑀏𑀢𑀲𑁆𑀲 ‘‘𑀲𑀼𑀧𑁆𑀧𑀝𑀺𑀯𑀺𑀤𑀺𑀢𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀘 𑀇𑀤𑀦𑁆𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑀁, ‘‘𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸’’𑀢𑀺 𑀏𑀢𑁂𑀦 𑀯𑀸 𑀧𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀁, 𑀢𑀲𑁆𑀲𑀢𑁆𑀣𑁄 𑀧𑀦 𑀧𑀸𑀓𑀝𑁄𑀬𑁂𑀯𑀸𑀢𑀺 𑀆𑀳 ‘‘𑀬𑀸𑀯 𑀘 𑀲𑀼𑀝𑁆𑀞𑀼 𑀧𑀝𑀺𑀯𑀺𑀤𑀺𑀢𑀸’’𑀢𑀺.

‘‘𑀬𑀸 𑀘 𑀅𑀬’’𑀦𑁆𑀢𑀺𑀆𑀤𑀺𑀦𑀸 𑀥𑀸𑀢𑀼𑀲𑀁𑀬𑀼𑀢𑁆𑀢𑀧𑀸𑀴𑀺𑀁 𑀤𑀲𑁆𑀲𑁂𑀦𑁆𑀢𑁄 𑀢𑀤𑁂𑀯 𑀲𑀁𑀬𑀼𑀢𑁆𑀢𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀢𑁂𑀲𑀁 𑀅𑀯𑀡𑁆𑀡𑀯𑀡𑁆𑀡𑀪𑀸𑀲𑀦𑁂𑀦 𑀲𑀤𑁆𑀥𑀺𑀁 𑀖𑀝𑁂𑀢𑁆𑀯𑀸 𑀣𑁂𑀭𑀸𑀦𑀫𑀬𑀁 𑀲𑀗𑁆𑀔𑀺𑀬𑀥𑀫𑁆𑀫𑁄 𑀉𑀤𑀧𑀸𑀤𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀢𑁄 𑀅𑀲𑁆𑀲 𑀪𑀕𑀯𑀢𑁄 𑀥𑀸𑀢𑀼𑀲𑀁𑀬𑀼𑀢𑁆𑀢𑀤𑁂𑀲𑀦𑀸𑀦𑀬𑁂𑀦 𑀢𑀸𑀲𑀁 𑀲𑀼𑀧𑁆𑀧𑀝𑀺𑀯𑀺𑀤𑀺𑀢𑀪𑀸𑀯𑀁 𑀲𑀫𑀢𑁆𑀣𑀦𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀳𑀻’’𑀢𑀺𑀆𑀤𑀺𑀫𑀸𑀳𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀼𑀧𑁆𑀧𑀝𑀺𑀯𑀺𑀤𑀺𑀢𑀪𑀸𑀯𑀲𑀫𑀢𑁆𑀣𑀦𑀜𑁆𑀳𑀺 ‘‘𑀅𑀬𑀁 𑀳𑀻’’𑀢𑀺𑀆𑀤𑀺𑀯𑀘𑀦𑀁. 𑀢𑀢𑁆𑀣 𑀬𑀸 𑀅𑀬𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸…𑀧𑁂… 𑀭𑀼𑀘𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀥𑀸𑀢𑀼𑀲𑁄𑀢𑀺 𑀅𑀚𑁆𑀛𑀸𑀲𑀬𑀥𑀸𑀢𑀼𑀬𑀸. 𑀲𑀁𑀲𑀦𑁆𑀤𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁂𑀦𑁆𑀢𑀺 𑀯𑀺𑀲𑁆𑀲𑀸𑀲𑁂𑀦𑁆𑀢𑀺. 𑀲𑀫𑁂𑀦𑁆𑀢𑀻𑀢𑀺 𑀲𑀫𑁆𑀫𑀸, 𑀲𑀳 𑀯𑀸 𑀪𑀯𑀦𑁆𑀢𑀺. ‘‘𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸’’𑀢𑀺𑀆𑀤𑀺 ¶ 𑀢𑀣𑀸𑀪𑀸𑀯𑀯𑀺𑀪𑀸𑀯𑀦𑀁. 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀦𑁆𑀢𑀺 𑀅𑀢𑀻𑀢𑀲𑁆𑀫𑀺𑀁 𑀓𑀸𑀮𑁂, 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀯𑀸 𑀏𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸-𑀧𑀤𑀲𑁆𑀲 𑀦𑀸𑀦𑀚𑁆𑀛𑀸𑀲𑀬𑀢𑀸𑀢𑀺 𑀅𑀢𑁆𑀣𑀯𑀘𑀦𑀁. 𑀦𑀸𑀦𑀸𑀤𑀺𑀝𑁆𑀞𑀺…𑀧𑁂… 𑀭𑀼𑀘𑀺𑀢𑀸𑀢𑀺 𑀢𑀲𑁆𑀲 𑀲𑀭𑀽𑀧𑀤𑀲𑁆𑀲𑀦𑀁. 𑀲𑀲𑁆𑀲𑀢𑀸𑀤𑀺𑀮𑀤𑁆𑀥𑀺𑀯𑀲𑁂𑀦 𑀦𑀸𑀦𑀸𑀤𑀺𑀝𑁆𑀞𑀺𑀓𑀢𑀸. 𑀧𑀸𑀧𑀸𑀘𑀸𑀭𑀓𑀮𑁆𑀬𑀸𑀡𑀸𑀘𑀸𑀭𑀸𑀤𑀺𑀧𑀓𑀢𑀺𑀯𑀲𑁂𑀦 𑀦𑀸𑀦𑀓𑁆𑀔𑀦𑁆𑀢𑀺𑀢𑀸. 𑀧𑀸𑀧𑀺𑀘𑁆𑀙𑀸𑀅𑀧𑁆𑀧𑀺𑀘𑁆𑀙𑀸𑀤𑀺𑀯𑀲𑁂𑀦 𑀦𑀸𑀦𑀸𑀭𑀼𑀘𑀺𑀢𑀸. 𑀦𑀸𑀴𑀺𑀬𑀸𑀢𑀺 𑀢𑀼𑀫𑁆𑀩𑁂𑀦, 𑀆𑀴𑁆𑀳𑀓𑁂𑀦 𑀯𑀸. 𑀢𑀼𑀮𑀸𑀬𑀸𑀢𑀺 𑀫𑀸𑀦𑁂𑀦. 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸𑀜𑀸𑀡𑀦𑁆𑀢𑀺 𑀘𑁂𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀅𑀥𑀺𑀧𑁆𑀧𑁂𑀢𑀁, 𑀦 𑀤𑀲𑀩𑀮𑀜𑀸𑀡𑀦𑁆𑀢𑀺 𑀆𑀳 ¶ ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦𑀸’’𑀢𑀺. 𑀏𑀯𑀁 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 (𑀤𑀻. 𑀦𑀺. 𑀝𑀻. 𑁧.𑁩) 𑀯𑀼𑀢𑁆𑀢𑀁, 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑀁, 𑀤𑀲𑀩𑀮𑀲𑀼𑀢𑁆𑀢𑀝𑁆𑀞𑀓𑀣𑀸𑀲𑀼 (𑀫. 𑀦𑀺. 𑀅𑀝𑁆𑀞. 𑁧.𑁧𑁪𑁯; 𑀅. 𑀦𑀺. 𑀅𑀝𑁆𑀞. 𑁩.𑁧𑁦.𑁨𑁧; 𑀯𑀺𑀪. 𑀅𑀝𑁆𑀞. 𑁮𑁩𑁧) 𑀘 𑀏𑀯𑀫𑀸𑀕𑀢𑀁.

𑀧𑀭𑀯𑀸𑀤𑀻 𑀧𑀦𑀸𑀳 ‘‘𑀤𑀲𑀩𑀮𑀜𑀸𑀡𑀁 𑀦𑀸𑀫 𑀧𑀸𑀝𑀺𑀬𑁂𑀓𑁆𑀓𑀁 𑀦𑀢𑁆𑀣𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑁂𑀯𑀸𑀬𑀁 𑀧𑀪𑁂𑀤𑁄’’𑀢𑀺, 𑀢𑀁 𑀢𑀣𑀸 𑀦 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀜𑀫𑁂𑀯 𑀳𑀺 𑀤𑀲𑀩𑀮𑀜𑀸𑀡𑀁, 𑀅𑀜𑁆𑀜𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. 𑀤𑀲𑀩𑀮𑀜𑀸𑀡𑀜𑁆𑀳𑀺 𑀲𑀓𑀓𑀺𑀘𑁆𑀘𑀫𑁂𑀯 𑀚𑀸𑀦𑀸𑀢𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀦 𑀢𑀫𑁆𑀧𑀺 𑀢𑀢𑁄 𑀅𑀯𑀲𑁂𑀲𑀫𑁆𑀧𑀺 𑀚𑀸𑀦𑀸𑀢𑀺. 𑀤𑀲𑀩𑀮𑀜𑀸𑀡𑁂𑀲𑀼 𑀳𑀺 𑀧𑀞𑀫𑀁 𑀓𑀸𑀭𑀡𑀸𑀓𑀸𑀭𑀡𑀫𑁂𑀯 𑀚𑀸𑀦𑀸𑀢𑀺, 𑀤𑀼𑀢𑀺𑀬𑀁 𑀓𑀫𑁆𑀫𑀦𑁆𑀢𑀭𑀯𑀺𑀧𑀸𑀓𑀦𑁆𑀢𑀭𑀫𑁂𑀯, 𑀢𑀢𑀺𑀬𑀁 𑀓𑀫𑁆𑀫𑀧𑀭𑀺𑀘𑁆𑀙𑁂𑀤𑀫𑁂𑀯, 𑀘𑀢𑀼𑀢𑁆𑀣𑀁 𑀥𑀸𑀢𑀼𑀦𑀸𑀦𑀢𑁆𑀢𑀓𑀸𑀭𑀡𑀫𑁂𑀯, 𑀧𑀜𑁆𑀘𑀫𑀁 𑀲𑀢𑁆𑀢𑀸𑀦𑀫𑀚𑁆𑀛𑀸𑀲𑀬𑀸𑀥𑀺𑀫𑀼𑀢𑁆𑀢𑀺𑀫𑁂𑀯, 𑀙𑀝𑁆𑀞𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀢𑀺𑀓𑁆𑀔𑀫𑀼𑀤𑀼𑀪𑀸𑀯𑀫𑁂𑀯, 𑀲𑀢𑁆𑀢𑀫𑀁 𑀛𑀸𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀢𑁂𑀲𑀁 𑀲𑀁𑀓𑀺𑀮𑁂𑀲𑀸𑀤𑀺𑀫𑁂𑀯, 𑀅𑀝𑁆𑀞𑀫𑀁 𑀧𑀼𑀩𑁆𑀩𑁂𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀲𑀦𑁆𑀢𑀢𑀺𑀫𑁂𑀯, 𑀦𑀯𑀫𑀁 𑀲𑀢𑁆𑀢𑀸𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀫𑁂𑀯, 𑀤𑀲𑀫𑀁 𑀲𑀘𑁆𑀘𑀧𑀭𑀺𑀘𑁆𑀙𑁂𑀤𑀫𑁂𑀯, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀦 𑀏𑀢𑁂𑀳𑀺 𑀚𑀸𑀦𑀺𑀢𑀩𑁆𑀩𑀜𑁆𑀘 𑀢𑀢𑁄 𑀉𑀢𑁆𑀢𑀭𑀺𑀜𑁆𑀘 𑀚𑀸𑀦𑀸𑀢𑀺, 𑀏𑀢𑁂𑀲𑀁 𑀧𑀦 𑀓𑀺𑀘𑁆𑀘𑀁 𑀦 𑀲𑀩𑁆𑀩𑀁 𑀓𑀭𑁄𑀢𑀺. 𑀢𑀜𑁆𑀳𑀺 𑀛𑀸𑀦𑀁 𑀳𑀼𑀢𑁆𑀯𑀸 𑀅𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀇𑀤𑁆𑀥𑀺 𑀳𑀼𑀢𑁆𑀯𑀸 𑀯𑀺𑀓𑀼𑀩𑁆𑀩𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀫𑀕𑁆𑀕𑁄 𑀳𑀼𑀢𑁆𑀯𑀸 𑀓𑀺𑀮𑁂𑀲𑁂 𑀔𑁂𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀧𑀺𑀘 𑀧𑀭𑀯𑀸𑀤𑀻 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑁄 ‘‘𑀤𑀲𑀩𑀮𑀜𑀸𑀡𑀁 𑀦𑀸𑀫 𑀏𑀢𑀁 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀁, 𑀓𑀸𑀫𑀸𑀯𑀘𑀭𑀁 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀁, 𑀮𑁄𑀓𑀺𑀬𑀁 𑀮𑁄𑀓𑀼𑀢𑁆𑀢𑀭’’𑀦𑁆𑀢𑀺. 𑀚𑀸𑀦𑀦𑁆𑀢𑁄 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀜𑀸𑀡𑀸𑀦𑀺 ‘‘𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀦𑀻’’𑀢𑀺 𑀯𑀓𑁆𑀔𑀢𑀺, 𑀢𑀢𑁄 𑀧𑀭𑀸𑀦𑀺 𑀤𑁆𑀯𑁂 ‘‘𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸𑀦𑀻’’𑀢𑀺 𑀯𑀓𑁆𑀔𑀢𑀺, 𑀆𑀲𑀯𑀓𑁆𑀔𑀬𑀜𑀸𑀡𑀁 ‘‘𑀲𑀺𑀬𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀁, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀁, 𑀲𑀺𑀬𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭’’𑀦𑁆𑀢𑀺 𑀯𑀓𑁆𑀔𑀢𑀺, 𑀢𑀣𑀸 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀓𑀸𑀫𑀸𑀯𑀘𑀭𑀸𑀦𑀺, 𑀢𑀢𑁄 𑀧𑀭𑀁 𑀤𑁆𑀯𑁂 𑀭𑀽𑀧𑀸𑀯𑀘𑀭𑀸𑀦𑀺, 𑀅𑀯𑀲𑀸𑀦𑁂 𑀏𑀓𑀁 ‘‘𑀮𑁄𑀓𑀼𑀢𑁆𑀢𑀭’𑀦𑁆𑀢𑀺 𑀯𑀓𑁆𑀔𑀢𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀦 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀫𑁂𑀯, 𑀓𑀸𑀫𑀸𑀯𑀘𑀭𑀫𑁂𑀯, 𑀮𑁄𑀓𑀺𑀬𑀫𑁂𑀯𑀸𑀢𑀺. 𑀇𑀢𑀺 𑀅𑀜𑁆𑀜𑀤𑁂𑀯 𑀤𑀲𑀩𑀮𑀜𑀸𑀡𑀁, 𑀅𑀜𑁆𑀜𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀦𑁆𑀢𑀺, 𑀢𑀲𑁆𑀫𑀸 𑀧𑀜𑁆𑀘𑀫𑀩𑀮𑀜𑀸𑀡𑀲𑀗𑁆𑀔𑀸𑀢𑁂𑀦 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸𑀜𑀸𑀡𑁂𑀦 𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀘 𑀯𑀺𑀤𑀺𑀢𑀸𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀘-𑀓𑀸𑀭𑁄𑀧𑀺 𑀳𑀺 𑀧𑁄𑀢𑁆𑀣𑀓𑁂𑀲𑀼 𑀤𑀺𑀲𑁆𑀲𑀢𑀺. 𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀸 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸. ‘‘𑀤𑁆𑀯𑁂𑀧𑀺 𑀦𑀸𑀫𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀲𑀼𑀢𑁆𑀢𑀲𑁆𑀲𑀢𑁆𑀣𑀁 ¶ 𑀲𑀗𑁆𑀔𑁂𑀧𑁂𑀦 𑀤𑀲𑁆𑀲𑁂𑀢𑁆𑀯𑀸 ‘‘𑀇𑀫𑁂𑀲𑀼 𑀘𑀸𑀧𑀻’’𑀢𑀺𑀆𑀤𑀺𑀦𑀸 𑀢𑀲𑁆𑀲 𑀲𑀗𑁆𑀔𑀺𑀬𑀥𑀫𑁆𑀫𑀲𑁆𑀲 𑀢𑀤𑀪𑀺𑀲𑀫𑁆𑀩𑀦𑁆𑀥𑀢𑀁 𑀆𑀯𑀺 𑀓𑀭𑁄𑀢𑀺. 𑀇𑀢𑀺 𑀳 𑀫𑁂𑀢𑀺 𑀏𑀢𑁆𑀣 𑀏𑀯𑀁𑀲𑀤𑁆𑀤𑀢𑁆𑀣𑁂 𑀇𑀢𑀺-𑀲𑀤𑁆𑀤𑁄, 𑀳-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁, 𑀆𑀕𑀫𑁄 𑀯𑀸. 𑀲𑀦𑁆𑀥𑀺𑀯𑀲𑁂𑀦 ¶ 𑀇𑀓𑀸𑀭𑀮𑁄𑀧𑁄, 𑀅𑀓𑀸𑀭𑀸𑀤𑁂𑀲𑁄 𑀯𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀏𑀯𑀁 𑀇𑀫𑁂’’𑀢𑀺 𑀇𑀫𑀺𑀦𑀸.

𑁪. ‘‘𑀯𑀺𑀤𑀺𑀢𑁆𑀯𑀸’’𑀢𑀺 𑀏𑀢𑁆𑀣 𑀧𑀓𑀢𑀺𑀬𑀢𑁆𑀣𑀪𑀽𑀢𑀸 𑀯𑀺𑀚𑀸𑀦𑀦𑀓𑀺𑀭𑀺𑀬𑀸 𑀲𑀸𑀫𑀜𑁆𑀜𑁂𑀦 𑀅𑀪𑁂𑀤𑀯𑀢𑀻𑀧𑀺 𑀲𑀫𑀸𑀦𑀸 𑀢𑀁𑀢𑀁𑀓𑀭𑀡𑀬𑁄𑀕𑁆𑀬𑀢𑀸𑀬 𑀅𑀦𑁂𑀓𑀧𑁆𑀧𑀪𑁂𑀤𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀪𑀕𑀯𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀢𑁆𑀣𑀽𑀦𑀻𑀢𑀺 𑀖𑀭𑀯𑀢𑁆𑀣𑀽𑀦𑀺. ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀤𑀺𑀲𑁆𑀯𑀸 𑀅𑀜𑁆𑀜𑀸𑀲𑀻’’𑀢𑀺 𑀘 𑀯𑁄𑀳𑀸𑀭𑀯𑀘𑀦𑀫𑀢𑁆𑀢𑀫𑁂𑀢𑀁. 𑀦 𑀳𑀺 𑀢𑁂𑀦 𑀤𑀲𑁆𑀲𑀦𑀢𑁄 𑀅𑀜𑁆𑀜𑀁 𑀚𑀸𑀦𑀦𑀁 𑀦𑀸𑀫 𑀦𑀢𑁆𑀣𑀺. 𑀢𑀤𑀺𑀤𑀁 𑀜𑀸𑀡𑀁 𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀁 𑀆𑀓𑀗𑁆𑀔𑀸𑀧𑀝𑀺𑀩𑀤𑁆𑀥𑀁 𑀫𑀦𑀲𑀺𑀓𑀸𑀭𑀧𑀝𑀺𑀩𑀤𑁆𑀥𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀝𑀺𑀩𑀤𑁆𑀥𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀓𑀺𑀁 𑀦𑀸𑀫 𑀓𑀭𑁄𑀦𑁆𑀢𑁄 𑀪𑀕𑀯𑀸 𑀢𑁂𑀦 𑀜𑀸𑀡𑁂𑀦 𑀆𑀯𑀚𑁆𑀚𑀦𑀸𑀤𑀺𑀧𑀝𑀺𑀩𑀤𑁆𑀥𑁂𑀦 𑀅𑀜𑁆𑀜𑀸𑀲𑀻𑀢𑀺 𑀲𑁄𑀢𑀽𑀦𑀫𑀢𑁆𑀣𑀲𑁆𑀲 𑀲𑀼𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀧𑀭𑀫𑁆𑀫𑀼𑀔𑀸 𑀯𑀺𑀬 𑀘𑁄𑀤𑀦𑀁 𑀲𑀫𑀼𑀝𑁆𑀞𑀸𑀧𑁂𑀢𑀺 ‘‘𑀓𑀺𑀁 𑀓𑀭𑁄𑀦𑁆𑀢𑁄 𑀅𑀜𑁆𑀜𑀸𑀲𑀻’’𑀢𑀺 𑀇𑀫𑀺𑀦𑀸, 𑀧𑀘𑁆𑀙𑀺𑀫𑀬𑀸𑀫𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑁄 𑀢𑀁 𑀜𑀸𑀡𑀁 𑀆𑀯𑀚𑁆𑀚𑀦𑀸𑀤𑀺𑀧𑀝𑀺𑀩𑀤𑁆𑀥𑀁 𑀳𑀼𑀢𑁆𑀯𑀸 𑀢𑁂𑀦 𑀢𑀣𑀸 𑀅𑀜𑁆𑀜𑀸𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀸𑀫𑀜𑁆𑀜𑀲𑁆𑀫𑀺𑀁 𑀲𑀢𑀺 𑀯𑀺𑀲𑁂𑀲𑀯𑀘𑀦𑀁 𑀲𑀸𑀢𑁆𑀣𑀓𑀁 𑀲𑀺𑀬𑀸𑀢𑀺 𑀅𑀦𑀼𑀬𑁄𑀕𑁂𑀦𑀸𑀳 ‘‘𑀓𑀺𑀘𑁆𑀘𑀜𑁆𑀘𑀦𑀸𑀫𑁂𑀢’’𑀦𑁆𑀢𑀺𑀆𑀤𑀺. 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀢𑀁 𑀓𑀢𑀁 𑀢𑀲𑁆𑀲 𑀲𑀫𑀼𑀝𑁆𑀞𑀸𑀧𑀓𑀓𑀺𑀮𑁂𑀲𑀲𑀫𑀼𑀕𑁆𑀖𑀸𑀝𑀦𑁂𑀦, 𑀬𑀢𑁄 ‘‘𑀦𑀢𑁆𑀣𑀺 𑀅𑀩𑁆𑀬𑀸𑀯𑀝𑀫𑀦𑁄’’𑀢𑀺 𑀅𑀝𑁆𑀞𑀸𑀭𑀲𑀲𑀼 𑀩𑀼𑀤𑁆𑀥𑀥𑀫𑁆𑀫𑁂𑀲𑀼 𑀯𑀼𑀘𑁆𑀘𑀢𑀺. 𑀦𑀺𑀭𑀢𑁆𑀣𑀓𑁄 𑀘𑀺𑀢𑁆𑀢𑀲𑀫𑀼𑀤𑀸𑀘𑀸𑀭𑁄 𑀦𑀢𑁆𑀣𑀻𑀢𑀺 𑀳𑁂𑀢𑁆𑀣 𑀅𑀢𑁆𑀣𑁄. 𑀏𑀯𑀫𑁆𑀧𑀺 𑀯𑀼𑀢𑁆𑀢𑀸𑀦𑀼𑀬𑁄𑀕𑁄 𑀢𑀤𑀯𑀢𑁆𑀣𑁄𑀬𑁂𑀯𑀸𑀢𑀺 𑀘𑁄𑀤𑀦𑀫𑀧𑀦𑁂𑀢𑀺 ‘‘𑀢𑀁 𑀧𑀜𑁆𑀘𑀯𑀺𑀥’’𑀦𑁆𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀧𑀼𑀭𑀺𑀫𑀓𑀺𑀘𑁆𑀘𑀤𑁆𑀯𑀬𑀁 𑀤𑀺𑀯𑀲𑀪𑀸𑀕𑀯𑀲𑁂𑀦, 𑀇𑀢𑀭𑀢𑁆𑀢𑀬𑀁 𑀭𑀢𑁆𑀢𑀺𑀪𑀸𑀕𑀯𑀲𑁂𑀦 𑀕𑀳𑁂𑀢𑀩𑁆𑀩𑀁 𑀢𑀣𑀸𑀬𑁂𑀯 𑀯𑀓𑁆𑀔𑀫𑀸𑀦𑀢𑁆𑀢𑀸.

‘‘𑀉𑀧𑀝𑁆𑀞𑀸𑀓𑀸𑀦𑀼𑀕𑁆𑀕𑀳𑀡𑀢𑁆𑀣𑀁, 𑀲𑀭𑀻𑀭𑀨𑀸𑀲𑀼𑀓𑀢𑁆𑀣𑀜𑁆𑀘𑀸’’𑀢𑀺 𑀏𑀢𑁂𑀦 𑀅𑀦𑁂𑀓𑀓𑀧𑁆𑀧𑀲𑀫𑀼𑀧𑀘𑀺𑀢𑀧𑀼𑀜𑁆𑀜𑀲𑀫𑁆𑀪𑀸𑀭𑀚𑀦𑀺𑀢𑀁 𑀪𑀕𑀯𑀢𑁄 𑀫𑀼𑀔𑀯𑀭𑀁 𑀤𑀼𑀕𑁆𑀕𑀦𑁆𑀥𑀸𑀤𑀺𑀤𑁄𑀲𑀁 𑀦𑀸𑀫 𑀦𑀢𑁆𑀣𑀺, 𑀢𑀤𑀼𑀪𑀬𑀢𑁆𑀣𑀫𑁂𑀯 𑀧𑀦 𑀫𑀼𑀔𑀥𑁄𑀯𑀦𑀸𑀤𑀻𑀦𑀺 𑀓𑀭𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀩𑁆𑀩𑁄𑀧𑀺 𑀳𑀺 𑀩𑀼𑀤𑁆𑀥𑀸𑀦𑀁 𑀓𑀸𑀬𑁄 𑀩𑀸𑀳𑀺𑀭𑀩𑁆𑀪𑀦𑁆𑀢𑀭𑁂𑀳𑀺 𑀫𑀮𑁂𑀳𑀺 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑁄 𑀲𑀼𑀥𑁄𑀢𑀫𑀡𑀺 𑀯𑀺𑀬 𑀳𑁄𑀢𑀺. 𑀯𑀺𑀯𑀺𑀢𑁆𑀢𑀸𑀲𑀦𑁂𑀢𑀺 𑀨𑀮𑀲𑀫𑀸𑀧𑀢𑁆𑀢𑀻𑀦𑀫𑀦𑀼𑀭𑀽𑀧𑁂 𑀯𑀺𑀯𑁂𑀓𑀸𑀦𑀼𑀩𑁆𑀭𑀽𑀳𑀦𑀸𑀲𑀦𑁂. 𑀯𑀻𑀢𑀺𑀦𑀸𑀫𑁂𑀢𑁆𑀯𑀸𑀢𑀺 𑀨𑀮𑀲𑀫𑀸𑀧𑀢𑁆𑀢𑀻𑀳𑀺 𑀯𑀻𑀢𑀺𑀦𑀸𑀫𑀦𑀁 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀦 𑀯𑀺𑀯𑁂𑀓𑀦𑀺𑀦𑁆𑀦𑀢𑀸𑀬, 𑀧𑀭𑁂𑀲𑀜𑁆𑀘 𑀤𑀺𑀝𑁆𑀞𑀸𑀦𑀼𑀕𑀢𑀺 𑀆𑀧𑀚𑁆𑀚𑀦𑀢𑁆𑀣𑀁. 𑀲𑀼𑀭𑀢𑁆𑀢𑀤𑀼𑀧𑀝𑁆𑀝𑀁 𑀅𑀦𑁆𑀢𑀭𑀯𑀸𑀲𑀓𑀁 𑀯𑀺𑀳𑀸𑀭𑀦𑀺𑀯𑀸𑀲𑀦𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀦𑀺𑀯𑀸𑀲𑁂𑀢𑁆𑀯𑀸 𑀯𑀺𑀚𑁆𑀚𑀼𑀮𑀢𑀸𑀲𑀤𑀺𑀲𑀁 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀫𑁂𑀖𑀯𑀡𑁆𑀡𑀁 𑀲𑀼𑀕𑀢𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑁂𑀮𑀫𑀬𑀧𑀢𑁆𑀢𑀁 𑀆𑀤𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀣𑀸𑀬𑁂𑀯 𑀳𑀺 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑁄. ‘‘𑀓𑀤𑀸𑀘𑀺 𑀏𑀓𑀓𑁄’’𑀢𑀺𑀆𑀤𑀺 ¶ 𑀢𑁂𑀲𑀁 𑀢𑁂𑀲𑀁 𑀯𑀺𑀦𑁂𑀬𑁆𑀬𑀸𑀦𑀁 𑀯𑀺𑀦𑀬𑀦𑀸𑀦𑀼𑀓𑀽𑀮𑀁 𑀪𑀕𑀯𑀢𑁄 𑀉𑀧𑀲𑀗𑁆𑀓𑀫𑀦𑀤𑀲𑁆𑀲𑀦𑀁. 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀯𑀺𑀓𑀧𑁆𑀧𑀦𑀢𑁆𑀣𑁄, 𑀢𑁂𑀦 𑀦𑀕𑀭𑀫𑁆𑀧𑀺 𑀯𑀺𑀓𑀧𑁆𑀧𑁂𑀢𑀺. 𑀬𑀣𑀸𑀭𑀼𑀘𑀺 𑀯𑀢𑁆𑀢𑀫𑀸𑀦𑁂𑀳𑀺 𑀅𑀦𑁂𑀓𑁂𑀳𑀺 𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀧𑀯𑀺𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

‘‘𑀲𑁂𑀬𑁆𑀬𑀣𑀺𑀤’’𑀦𑁆𑀢𑀺𑀆𑀤𑀺𑀦𑀸 ¶ 𑀧𑀘𑁆𑀙𑀺𑀫𑀧𑀓𑁆𑀔𑀁 𑀯𑀺𑀢𑁆𑀣𑀸𑀭𑁂𑀢𑀺. 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀘 𑀢𑀁 𑀓𑀢𑀫𑀦𑁆𑀢𑀺 𑀅𑀢𑁆𑀣𑁂 𑀦𑀺𑀧𑀸𑀢𑁄, 𑀇𑀤𑀁 𑀯𑀸 𑀲𑀧𑁆𑀧𑀸𑀝𑀺𑀳𑀻𑀭𑀧𑀯𑀺𑀲𑀦𑀁 𑀓𑀢𑀫𑀦𑁆𑀢𑀺𑀧𑀺 𑀯𑀝𑁆𑀝𑀢𑀺. 𑀫𑀼𑀤𑀼𑀕𑀢𑀯𑀸𑀢𑀸𑀢𑀺 𑀫𑀼𑀤𑀼𑀪𑀽𑀢𑀸, 𑀫𑀼𑀤𑀼𑀪𑀸𑀯𑁂𑀦 𑀯𑀸 𑀕𑀢𑀸 𑀯𑀸𑀢𑀸. 𑀉𑀤𑀓𑀨𑀼𑀲𑀺𑀢𑀸𑀦𑀻𑀢𑀺 𑀉𑀤𑀓𑀩𑀺𑀦𑁆𑀤𑀽𑀦𑀺. 𑀫𑀼𑀜𑁆𑀘𑀦𑁆𑀢𑀸𑀢𑀺 𑀑𑀲𑀺𑀜𑁆𑀘𑀦𑁆𑀢𑀸. 𑀭𑁂𑀡𑀼𑀁 𑀯𑀽𑀧𑀲𑀫𑁂𑀢𑁆𑀯𑀸𑀢𑀺 𑀭𑀚𑀁 𑀲𑀦𑁆𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀉𑀧𑀭𑀺 𑀯𑀺𑀢𑀸𑀦𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺 𑀘𑀡𑁆𑀟-𑀯𑀸𑀢𑀸𑀢𑀧-𑀳𑀺𑀫𑀧𑀸𑀢𑀸𑀤𑀺-𑀳𑀭𑀡𑁂𑀦 𑀯𑀺𑀢𑀸𑀦𑀓𑀺𑀘𑁆𑀘𑀦𑀺𑀧𑁆𑀨𑀸𑀤𑀓𑀢𑁆𑀢𑀸, 𑀢𑀢𑁄 𑀢𑀢𑁄 𑀳𑀺𑀫𑀯𑀦𑁆𑀢𑀸𑀤𑀻𑀲𑀼 𑀧𑀼𑀧𑁆𑀨𑀽𑀧𑀕𑀭𑀼𑀓𑁆𑀔𑀢𑁄 𑀉𑀧𑀲𑀁𑀳𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸 𑀢𑀣𑀸 𑀦 𑀯𑀼𑀢𑁆𑀢𑀁. 𑀲𑀫𑀪𑀸𑀕𑀓𑀭𑀡𑀫𑀢𑁆𑀢𑁂𑀦 𑀑𑀦𑀫𑀦𑁆𑀢𑀺, 𑀉𑀦𑁆𑀦𑀫𑀦𑁆𑀢𑀺 𑀘, 𑀢𑀢𑁄𑀬𑁂𑀯 𑀧𑀸𑀤𑀦𑀺𑀓𑁆𑀔𑁂𑀧𑀲𑀫𑀬𑁂 𑀲𑀫𑀸𑀯 𑀪𑀽𑀫𑀺 𑀳𑁄𑀢𑀺. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁 𑀲𑀓𑁆𑀔𑀭𑀓𑀣𑀮𑀓𑀡𑁆𑀝𑀓𑀲𑀗𑁆𑀓𑀼𑀓𑀮𑀮𑀸𑀤𑀺𑀅𑀧𑀕𑀫𑀦𑀲𑁆𑀲𑀸𑀧𑀺 𑀲𑀫𑁆𑀪𑀯𑀢𑁄, 𑀢𑀜𑁆𑀘 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀸𑀮𑀓𑁆𑀔𑀡𑀲𑁆𑀲 𑀦𑀺𑀲𑁆𑀲𑀦𑁆𑀤𑀨𑀮𑀁, 𑀦 𑀇𑀤𑁆𑀥𑀺𑀦𑀺𑀫𑁆𑀫𑀸𑀦𑀁. 𑀧𑀤𑀼𑀫𑀧𑀼𑀧𑁆𑀨𑀸𑀦𑀺 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀯𑀺𑀓𑀧𑁆𑀧𑀦𑀢𑁆𑀣𑁄, 𑀢𑁂𑀦 ‘‘𑀬𑀤𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀲𑀫𑀸 𑀪𑀽𑀫𑀺 𑀳𑁄𑀢𑀺, 𑀏𑀯𑀁 𑀲𑀢𑀺 𑀢𑀸𑀦𑀺 𑀦 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺, 𑀢𑀣𑀸 𑀧𑀦 𑀅𑀲𑀢𑀺𑀬𑁂𑀯 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀻’’𑀢𑀺 𑀪𑀕𑀯𑀢𑁄 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀦𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀤𑀸𑀯 𑀪𑀕𑀯𑀢𑁄 𑀕𑀫𑀦𑀁 𑀧𑀞𑀫𑀁 𑀤𑀓𑁆𑀔𑀺𑀡𑀧𑀸𑀤𑀼𑀤𑁆𑀥𑀭𑀡𑀲𑀗𑁆𑀔𑀸𑀢𑀸𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢𑀦𑁆𑀢𑀺 𑀆𑀳 ‘‘𑀞𑀧𑀺𑀢𑀫𑀢𑁆𑀢𑁂 𑀤𑀓𑁆𑀔𑀺𑀡𑀧𑀸𑀤𑁂’’𑀢𑀺. 𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀤𑀓𑁆𑀔𑀺𑀡𑀢𑀸𑀬 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁄,(𑀤𑀻. 𑀦𑀺. 𑀝𑀻. 𑁧.𑁪) 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 (𑀅. 𑀦𑀺. 𑀅𑀝𑁆𑀞. 𑁧.𑁫𑁩) 𑀘 𑀯𑀤𑀢𑀺, 𑀲𑀩𑁆𑀩𑁂𑀲𑀁 𑀉𑀢𑁆𑀢𑀫𑀢𑀸𑀬 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑀸𑀦𑀁 𑀢𑀣𑀸𑀧𑀓𑀢𑀺𑀢𑀸𑀬𑀸𑀢𑀺 𑀆𑀧𑀚𑁆𑀚𑀢𑀺. 𑀞𑀧𑀺𑀢𑀫𑀢𑁆𑀢𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀥𑀸𑀯𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀜𑁆𑀘 𑀬𑀸𑀯𑀤𑁂𑀯 𑀯𑀺𑀦𑁂𑀬𑁆𑀬𑀚𑀦𑀯𑀺𑀦𑀬𑀦𑀢𑁆𑀣𑀁 𑀲𑀢𑁆𑀣𑀼 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀢𑁂𑀲𑀁 𑀤𑀲𑁆𑀲𑀦𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄’’𑀢𑀺 𑀯𑀢𑁆𑀯𑀸𑀧𑀺 ‘‘𑀲𑀼𑀯𑀡𑁆𑀡𑀭𑀲𑀧𑀺𑀜𑁆𑀚𑀭𑀸𑀦𑀺 𑀯𑀺𑀬𑀸’’𑀢𑀺 𑀯𑀘𑀦𑀁 𑀪𑀕𑀯𑀢𑁄 𑀲𑀭𑀻𑀭𑁂 𑀧𑀻𑀢𑀸𑀪𑀸𑀬 𑀬𑁂𑀪𑀼𑀬𑁆𑀬𑀢𑀸𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀭𑀲-𑀲𑀤𑁆𑀤𑁄 𑀘𑁂𑀢𑁆𑀣 𑀉𑀤𑀓𑀧𑀭𑀺𑀬𑀸𑀬𑁄, 𑀧𑀺𑀜𑁆𑀚𑀭-𑀲𑀤𑁆𑀤𑁄 𑀳𑁂𑀫𑀯𑀡𑁆𑀡𑀧𑀭𑀺𑀬𑀸𑀬𑁄, 𑀲𑀼𑀯𑀡𑁆𑀡𑀚𑀮𑀥𑀸𑀭𑀸 𑀯𑀺𑀬 𑀲𑀼𑀯𑀡𑁆𑀡𑀯𑀡𑁆𑀡𑀸𑀦𑀻𑀢𑀺 𑀅𑀢𑁆𑀣𑁄’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁧.𑀩𑀼𑀤𑁆𑀥𑀸𑀘𑀺𑀡𑁆𑀡𑀓𑀣𑀸.𑁨𑁨) 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀯𑀼𑀢𑁆𑀢𑀁. 𑀧𑀸𑀲𑀸𑀤𑀓𑀽𑀝𑀸𑀕𑀸𑀭𑀸𑀤𑀻𑀦𑀺 𑀢𑁂𑀲𑀼 𑀢𑁂𑀲𑀼 𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀲𑀁𑀯𑀺𑀚𑁆𑀚𑀫𑀸𑀦𑀸𑀦𑀺 𑀅𑀮𑀗𑁆𑀓𑀭𑁄𑀦𑁆𑀢𑀺𑀬𑁄 𑀳𑀼𑀢𑁆𑀯𑀸.

‘‘𑀢𑀣𑀸’’𑀢𑀺𑀆𑀤𑀺𑀦𑀸 ¶ 𑀲𑀬𑀫𑁂𑀯 𑀥𑀫𑁆𑀫𑀢𑀸𑀯𑀲𑁂𑀦 𑀢𑁂𑀲𑀁 𑀲𑀤𑁆𑀤𑀓𑀭𑀡𑀁 𑀤𑀲𑁆𑀲𑁂𑀢𑀺. 𑀢𑀤𑀸 𑀓𑀸𑀬𑀁 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀓𑀸𑀬𑀽𑀧𑀕𑀸𑀦𑀺, 𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀺𑀢𑀸𑀦𑀺. ‘‘𑀅𑀦𑁆𑀢𑀭𑀯𑀻𑀣𑀺’’𑀦𑁆𑀢𑀺 𑀇𑀫𑀺𑀦𑀸 𑀪𑀕𑀯𑀢𑁄 𑀧𑀺𑀡𑁆𑀟𑀸𑀬 𑀕𑀫𑀦𑀸𑀦𑀼𑀭𑀽𑀧𑀯𑀻𑀣𑀺𑀁 𑀤𑀲𑁆𑀲𑁂𑀢𑀺. 𑀦 𑀳𑀺 𑀪𑀕𑀯𑀸 𑀮𑁄𑀮𑀼𑀧𑁆𑀧𑀘𑀸𑀭𑀧𑀺𑀡𑁆𑀟𑀘𑀸𑀭𑀺𑀓𑁄 𑀯𑀺𑀬 𑀬𑀢𑁆𑀣 𑀓𑀢𑁆𑀣𑀘𑀺 𑀕𑀘𑁆𑀙𑀢𑀺. 𑀬𑁂 𑀧𑀞𑀫𑀁 𑀕𑀢𑀸, 𑀬𑁂 𑀯𑀸 𑀢𑀤𑀦𑀼𑀘𑁆𑀙𑀯𑀺𑀓𑀁 𑀧𑀺𑀡𑁆𑀟𑀧𑀸𑀢𑀁 𑀤𑀸𑀢𑀼𑀁 𑀲𑀫𑀢𑁆𑀣𑀸, 𑀢𑁂 𑀪𑀕𑀯𑀢𑁄𑀧𑀺 𑀧𑀢𑁆𑀢𑀁 𑀕𑀡𑁆𑀳𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀝𑀺𑀫𑀸𑀦𑁂𑀦𑁆𑀢𑀻𑀢𑀺 𑀧𑀢𑀺𑀲𑁆𑀲𑀫𑀸𑀦𑀲𑀸 𑀧𑀽𑀚𑁂𑀦𑁆𑀢𑀺, 𑀪𑀕𑀯𑀦𑁆𑀢𑀁 𑀯𑀸 𑀧𑀝𑀺𑀫𑀸𑀦𑀸𑀧𑁂𑀦𑁆𑀢𑀺 𑀧𑀝𑀺𑀫𑀸𑀦𑀦𑁆𑀢𑀁 𑀓𑀭𑁄𑀦𑁆𑀢𑀺. 𑀯𑁄𑀳𑀸𑀭𑀫𑀢𑁆𑀢𑀜𑁆𑀘𑁂𑀢𑀁, 𑀪𑀕𑀯𑀢𑁄 𑀧𑀦 𑀅𑀧𑀝𑀺𑀫𑀸𑀦𑀦𑀸 𑀦𑀸𑀫 𑀦𑀢𑁆𑀣𑀺. 𑀘𑀺𑀢𑁆𑀢𑀲𑀦𑁆𑀢𑀸𑀦𑀸𑀦𑀻𑀢𑀺 𑀅𑀢𑀻𑀢𑁂, 𑀏𑀢𑀭𑀳𑀺 𑀘 𑀧𑀯𑀢𑁆𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑀸𑀦𑀺. 𑀬𑀣𑀸 𑀓𑁂𑀘𑀺 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀦𑁆𑀢𑀺, 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑁂𑀘𑀺 𑀧𑀩𑁆𑀩𑀚𑀺𑀢𑁆𑀯𑀸𑀢𑀺 𑀘 𑀅𑀭𑀳𑀢𑁆𑀢𑀲𑀫𑀸𑀧𑀦𑁆𑀦𑀸𑀦𑀁 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑁂𑀧𑀕𑀢𑀤𑀲𑁆𑀲𑀦𑀢𑁆𑀣𑀁 ¶ , 𑀦 𑀧𑀦 𑀕𑀺𑀳𑀻𑀦𑀁 𑀅𑀭𑀳𑀢𑁆𑀢𑀲𑀫𑀸𑀧𑀦𑁆𑀦𑀢𑀸𑀧𑀝𑀺𑀓𑁆𑀔𑁂𑀧𑀦𑀢𑁆𑀣𑀁. 𑀅𑀬𑀜𑁆𑀳𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀸𑀦𑀁 𑀕𑀺𑀳𑀻𑀦𑀁 𑀲𑀪𑀸𑀯𑁄, 𑀬𑀸 𑀢𑀤𑀳𑁂𑀯 𑀧𑀩𑁆𑀩𑀚𑁆𑀚𑀸 𑀯𑀸, 𑀓𑀸𑀮𑀁 𑀓𑀺𑀭𑀺𑀬𑀸𑀯𑀸𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀆𑀬𑀲𑁆𑀫𑀢𑀸 𑀦𑀸𑀕𑀲𑁂𑀦𑀢𑁆𑀣𑁂𑀭𑁂𑀦 ‘‘𑀯𑀺𑀲𑀫𑀁 𑀫𑀳𑀸𑀭𑀸𑀚, 𑀕𑀺𑀳𑀺𑀮𑀺𑀗𑁆𑀕𑀁, 𑀯𑀺𑀲𑀫𑁂 𑀮𑀺𑀗𑁆𑀕𑁂 𑀮𑀺𑀗𑁆𑀕𑀤𑀼𑀩𑁆𑀩𑀮𑀢𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀕𑀺𑀳𑀻 𑀢𑀲𑁆𑀫𑀺𑀁𑀬𑁂𑀯 𑀤𑀺𑀯𑀲𑁂 𑀧𑀩𑁆𑀩𑀚𑀢𑀺 𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺 𑀯𑀸 𑀦𑁂𑀲𑁄 𑀫𑀳𑀸𑀭𑀸𑀚, 𑀤𑁄𑀲𑁄 𑀅𑀭𑀳𑀢𑁆𑀢𑀲𑁆𑀲, 𑀕𑀺𑀳𑀺𑀮𑀺𑀗𑁆𑀕𑀲𑁆𑀲𑁂𑀯𑁂𑀲𑁄 𑀤𑁄𑀲𑁄 𑀬𑀤𑀺𑀤𑀁 𑀮𑀺𑀗𑁆𑀕𑀤𑀼𑀩𑁆𑀩𑀮𑀢𑀸’’𑀢𑀺 (𑀫𑀺. 𑀧. 𑁫.𑁨.𑁨) 𑀲𑀩𑁆𑀩𑀁 𑀯𑀢𑁆𑀢𑀩𑁆𑀩𑀁. 𑀏𑀢𑁆𑀣 𑀘 𑀲𑀧𑁆𑀧𑀸𑀝𑀺𑀳𑀻𑀭𑀧𑁆𑀧𑀯𑁂𑀲𑀦𑀲𑀫𑁆𑀩𑀦𑁆𑀥𑁂𑀦𑁂𑀯 𑀫𑀳𑀸𑀚𑀦𑀸𑀦𑀼𑀕𑁆𑀕𑀳𑀡𑀁 𑀤𑀲𑁆𑀲𑀺𑀢𑀁, 𑀅𑀧𑁆𑀧𑀸𑀝𑀺𑀳𑀻𑀭𑀧𑁆𑀧𑀯𑁂𑀲𑀦𑁂𑀦 𑀘 𑀧𑀦 ‘‘𑀢𑁂 𑀲𑀼𑀦𑀺𑀯𑀢𑁆𑀣𑀸 𑀲𑀼𑀧𑀸𑀭𑀼𑀢𑀸’’𑀢𑀺𑀆𑀤𑀺𑀯𑀘𑀦𑀁 𑀬𑀣𑀸𑀭𑀳𑀁 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀫𑀳𑀸𑀚𑀦𑀸𑀦𑀼𑀕𑁆𑀕𑀳𑀡𑀁 𑀅𑀢𑁆𑀣𑀢𑁄 𑀯𑀺𑀪𑀸𑀯𑁂𑀢𑀩𑁆𑀩𑀁 𑀳𑁄𑀢𑀺. 𑀢𑀫𑁆𑀧𑀺 𑀳𑀺 𑀧𑀼𑀭𑁂𑀪𑀢𑁆𑀢𑀓𑀺𑀘𑁆𑀘𑀫𑁂𑀯𑀸𑀢𑀺. 𑀉𑀧𑀝𑁆𑀞𑀸𑀦𑀲𑀸𑀮𑀸 𑀘𑁂𑀢𑁆𑀣 𑀫𑀡𑁆𑀟𑀮𑀫𑀸𑀴𑁄. 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀫𑀡𑁆𑀟𑀮𑀫𑀸𑀴𑁂𑀢𑀺 𑀇𑀥 𑀧𑀸𑀞𑁄 𑀮𑀺𑀔𑀺𑀢𑁄. ‘‘𑀕𑀦𑁆𑀥𑀫𑀡𑁆𑀟𑀮𑀫𑀸𑀴𑁂’’𑀢𑀺𑀧𑀺 (𑀅. 𑀦𑀺. 𑀅𑀝𑁆𑀞. 𑁧.𑁫𑁩) 𑀫𑀦𑁄𑀭𑀣𑀧𑀽𑀭𑀡𑀺𑀬𑀸 𑀤𑀺𑀲𑁆𑀲𑀢𑀺, 𑀢𑀝𑁆𑀝𑀻𑀓𑀸𑀬𑀜𑁆𑀘 ‘‘𑀘𑀢𑀼𑀚𑁆𑀚𑀸𑀢𑀺𑀬𑀕𑀦𑁆𑀥𑁂𑀦 𑀧𑀭𑀺𑀪𑀡𑁆𑀟𑁂 𑀫𑀡𑁆𑀟𑀮𑀫𑀸𑀴𑁂’’𑀢𑀺 𑀯𑀼𑀢𑁆𑀢𑀁. 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀢𑀻𑀢𑀺 𑀘 𑀧𑀯𑀺𑀲𑀦𑀓𑀺𑀭𑀺𑀬𑀸𑀲𑀫𑁆𑀩𑀦𑁆𑀥𑀢𑀸𑀬, 𑀢𑀲𑁆𑀲𑀫𑀻𑀧𑀢𑀸𑀬 𑀘 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀧𑀯𑀺𑀲𑀺𑀢𑀼𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀦 𑀧𑀦 𑀅𑀦𑁆𑀢𑁄 𑀢𑀺𑀝𑁆𑀞𑀢𑀻𑀢𑀺. 𑀏𑀯𑀜𑁆𑀳𑀺 ‘‘𑀅𑀣 𑀔𑁄 𑀪𑀕𑀯𑀸’’𑀢𑀺𑀆𑀤𑀺𑀯𑀘𑀦𑀁 (𑀤𑀻. 𑀦𑀺. 𑁧.𑁪) 𑀲𑀽𑀧𑀧𑀦𑁆𑀦𑀁 𑀳𑁄𑀢𑀺.

𑀅𑀣 𑀔𑁄𑀢𑀺 𑀏𑀯𑀁 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑀼𑀁 𑀕𑀫𑀦𑀓𑀸𑀮𑁂. 𑀉𑀧𑀝𑁆𑀞𑀸𑀦𑁂𑀢𑀺 𑀲𑀫𑀻𑀧𑀧𑀤𑁂𑀲𑁂. ‘‘𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀧𑀸𑀤𑀧𑀻𑀞𑁂 𑀞𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀑𑀯𑀤𑀢𑀻’’𑀢𑀺 𑀏𑀢𑁆𑀣 𑀧𑀸𑀤𑁂 𑀧𑀓𑁆𑀔𑀸𑀮𑁂𑀦𑁆𑀢𑁄𑀯 𑀧𑀸𑀤𑀧𑀻𑀞𑁂 𑀢𑀺𑀝𑁆𑀞𑀦𑁆𑀢𑁄 𑀑𑀯𑀤𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑀤𑀢𑁆𑀣𑀁𑀬𑁂𑀯 ¶ 𑀳𑀺 𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑀁 𑀆𑀕𑀫𑀬𑀫𑀸𑀦𑁄 𑀦𑀺𑀲𑀻𑀤𑀺. 𑀤𑀼𑀮𑁆𑀮𑀪𑀸 𑀲𑀫𑁆𑀧𑀢𑁆𑀢𑀻𑀢𑀺 𑀲𑀢𑀺𑀧𑀺 𑀫𑀦𑀼𑀲𑁆𑀲𑀢𑁆𑀢𑀧𑀝𑀺𑀮𑀸𑀪𑁂 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀇𑀦𑁆𑀤𑁆𑀭𑀺𑀬𑀸𑀯𑁂𑀓𑀮𑁆𑀮𑀲𑀤𑁆𑀥𑀸𑀧𑀝𑀺𑀮𑀸𑀪𑀸𑀤𑀬𑁄 𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀸 𑀕𑀼𑀡𑀸 𑀤𑀼𑀮𑁆𑀮𑀪𑀸𑀢𑀺 𑀅𑀢𑁆𑀣𑁄. 𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀤𑀼𑀮𑁆𑀮𑀪𑀸 𑀲𑀤𑁆𑀥𑀸𑀲𑀫𑁆𑀧𑀢𑁆𑀢𑀻’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀲𑁄 𑀅𑀬𑀼𑀢𑁆𑀢𑁄𑀯. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑀸𑀤𑀧𑀻𑀞𑁂 𑀞𑀢𑁆𑀯𑀸 𑀑𑀯𑀤𑀦𑀓𑀸𑀮𑁂, 𑀢𑁂𑀲𑀼 𑀯𑀸 𑀪𑀺𑀓𑁆𑀔𑀽𑀲𑀼, 𑀭𑀢𑁆𑀢𑀺𑀬𑀸 𑀯𑀲𑀦𑀁 𑀞𑀸𑀦𑀁 𑀭𑀢𑁆𑀢𑀺𑀝𑁆𑀞𑀸𑀦𑀁, 𑀢𑀣𑀸 𑀤𑀺𑀯𑀸𑀞𑀸𑀦𑀁. ‘‘𑀓𑁂𑀘𑀻’’𑀢𑀺𑀆𑀤𑀺 𑀢𑀩𑁆𑀩𑀺𑀯𑀭𑀡𑀁. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀪𑀯𑀦𑀦𑁆𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑀮𑁄𑀓𑁂 𑀲𑀼𑀜𑁆𑀜𑀯𑀺𑀫𑀸𑀦𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀢𑀸𑀯𑀢𑀺𑀁𑀲𑀪𑀯𑀦𑀸𑀤𑀻𑀲𑀼𑀧𑀺. 𑀢𑀢𑁄 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀢𑀬𑁄 𑀪𑀸𑀕𑁂 𑀓𑀢𑁆𑀯𑀸 𑀧𑀞𑀫𑀪𑀸𑀕𑁂 𑀲𑀘𑁂 𑀆𑀓𑀗𑁆𑀔𑀢𑀺, 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀲𑀘𑁂 𑀦𑀸𑀓𑀗𑁆𑀔𑀢𑀺, 𑀩𑀼𑀤𑁆𑀥𑀸𑀘𑀺𑀡𑁆𑀡𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀅𑀣 𑀬𑀣𑀸𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀢𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀤𑀼𑀢𑀺𑀬𑀪𑀸𑀕𑁂 𑀧𑀘𑁆𑀙𑀺𑀫𑀬𑀸𑀫𑀲𑁆𑀲 𑀢𑀢𑀺𑀬𑀓𑁄𑀝𑁆𑀞𑀸𑀲𑁂 𑀯𑀺𑀬 𑀮𑁄𑀓𑀁 𑀯𑁄𑀮𑁄𑀓𑁂𑀢𑀺 𑀯𑁂𑀦𑁂𑀬𑁆𑀬𑀸𑀦𑀁 𑀜𑀸𑀡𑀧𑀭𑀺𑀧𑀸𑀓𑀁 𑀧𑀲𑁆𑀲𑀺𑀢𑀼𑀁, 𑀢𑁂𑀦𑀸𑀳 ‘‘𑀲𑀘𑁂 𑀆𑀓𑀗𑁆𑀔𑀢𑀻’’𑀢𑀺𑀆𑀤𑀺. 𑀲𑀻𑀳𑀲𑁂𑀬𑁆𑀬𑀦𑁆𑀢𑀺𑀆𑀤𑀻𑀦𑀫𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀯. 𑀬𑀜𑁆𑀳𑀺 𑀅𑀧𑀼𑀩𑁆𑀩𑀁 𑀧𑀤𑀁 𑀅𑀦𑀼𑀢𑁆𑀢𑀸𑀦𑀁, 𑀢𑀤𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀲𑀫𑁆𑀫𑀸 𑀅𑀲𑁆𑀲𑀸𑀲𑀺𑀢𑀩𑁆𑀩𑁄𑀢𑀺 𑀕𑀸𑀳𑀸𑀧𑀦𑀯𑀲𑁂𑀦 𑀉𑀧𑀢𑁆𑀣𑀫𑁆𑀪𑀺𑀢𑀩𑁆𑀩𑁄𑀢𑀺 𑀲𑀫𑀲𑁆𑀲𑀸𑀲𑀺𑀢𑁄. 𑀢𑀸𑀤𑀺𑀲𑁄 𑀓𑀸𑀬𑁄 𑀬𑀲𑁆𑀲𑀸𑀢𑀺 𑀢𑀣𑀸. 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀁 𑀲𑀦𑁆𑀦𑀺𑀧𑀢𑀢𑀺. 𑀢𑀲𑁆𑀲𑀸 𑀧𑀭𑀺𑀲𑀸𑀬 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀓𑀢𑀪𑀸𑀯𑀁 𑀲𑀦𑁆𑀥𑀸𑀬𑀸𑀳 ¶ ‘‘𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬𑀅𑀦𑀼𑀭𑀽𑀧𑁂𑀦 𑀧𑀸𑀝𑀺𑀳𑀸𑀭𑀺𑀬𑁂𑀦𑀸’’𑀢𑀺. 𑀬𑀢𑁆𑀣 𑀥𑀫𑁆𑀫𑀁 𑀲𑀳 𑀪𑀸𑀲𑀦𑁆𑀢𑀺, 𑀲𑀸 𑀥𑀫𑁆𑀫𑀲𑀪𑀸 𑀦𑀸𑀫. 𑀓𑀸𑀮𑀬𑀼𑀢𑁆𑀢𑀦𑁆𑀢𑀺 ‘‘𑀇𑀫𑀺𑀲𑁆𑀲𑀸 𑀯𑁂𑀮𑀸𑀬 𑀇𑀫𑀲𑁆𑀲 𑀏𑀯𑀁 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀢𑀁𑀢𑀁𑀓𑀸𑀮𑀸𑀦𑀼𑀭𑀽𑀧𑀁. 𑀲𑀫𑀬𑀬𑀼𑀢𑁆𑀢𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀅𑀦𑀼𑀭𑀽𑀧𑀁 𑀯𑀸 𑀲𑀫𑀬𑀬𑀼𑀢𑁆𑀢𑀁. 𑀅𑀣 𑀯𑀸 𑀲𑀫𑀬𑀬𑀼𑀢𑁆𑀢𑀦𑁆𑀢𑀺 𑀳𑁂𑀢𑀼𑀤𑀸𑀳𑀭𑀡𑁂𑀳𑀺 𑀬𑀼𑀢𑁆𑀢𑀁. 𑀓𑀸𑀮𑁂𑀦 𑀲𑀸𑀧𑀤𑁂𑀲𑀜𑁆𑀳𑀺 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀧𑀭𑀺𑀲𑀁 𑀉𑀬𑁆𑀬𑁄𑀚𑁂𑀢𑀺, 𑀦 𑀬𑀸𑀯 𑀲𑀫𑀦𑁆𑀥𑀓𑀸𑀭𑀸 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑀫𑀬𑀁 𑀯𑀺𑀤𑀺𑀢𑁆𑀯𑀸 𑀧𑀭𑀺𑀲𑀁 𑀉𑀬𑁆𑀬𑁄𑀚𑁂𑀲𑀻’’𑀢𑀺𑀧𑀺 𑀓𑀢𑁆𑀣𑀘𑀺 𑀧𑀭𑀺𑀬𑀸𑀬𑀯𑀘𑀦𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀲𑁄 𑀧𑀘𑁆𑀙𑀸 𑀧𑀫𑀸𑀤𑀮𑀺𑀔𑀺𑀢𑁄.

𑀕𑀢𑁆𑀢𑀸𑀦𑀻𑀢𑀺 𑀓𑀸𑀬𑁄𑀬𑁂𑀯 𑀅𑀦𑁂𑀓𑀸𑀯𑀬𑀯𑀢𑁆𑀢𑀸 𑀯𑀼𑀢𑁆𑀢𑁄. ‘‘𑀉𑀢𑀼𑀁 𑀕𑀡𑁆𑀳𑀸𑀧𑁂𑀢𑀻’’𑀢𑀺 𑀇𑀫𑀺𑀦𑀸 𑀉𑀢𑀼𑀕𑀡𑁆𑀳𑀸𑀧𑀦𑀢𑁆𑀣𑀫𑁂𑀯 𑀑𑀲𑀺𑀜𑁆𑀘𑀦𑀁, 𑀦 𑀧𑀦 𑀫𑀮𑀯𑀺𑀓𑁆𑀔𑀸𑀮𑀦𑀢𑁆𑀣𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀦 𑀳𑀺 𑀪𑀕𑀯𑀢𑁄 𑀓𑀸𑀬𑁂 𑀭𑀚𑁄𑀚𑀮𑁆𑀮𑀁 𑀉𑀧𑀮𑀺𑀫𑁆𑀧𑀢𑀻𑀢𑀺. 𑀘𑀢𑀼𑀚𑁆𑀚𑀸𑀢𑀺𑀓𑁂𑀦 𑀕𑀦𑁆𑀥𑁂𑀦 𑀧𑀭𑀺𑀪𑀸𑀯𑀺𑀢𑀸 𑀓𑀼𑀝𑀻 𑀕𑀦𑁆𑀥𑀓𑀼𑀝𑀻. 𑀢𑀲𑁆𑀲𑀸 𑀧𑀭𑀺𑀯𑁂𑀡𑀁 𑀢𑀣𑀸. 𑀨𑀮𑀲𑀫𑀸𑀧𑀢𑁆𑀢𑀻𑀳𑀺 𑀫𑀼𑀳𑀼𑀢𑁆𑀢𑀁 𑀧𑀝𑀺𑀲𑀮𑁆𑀮𑀻𑀦𑁄. 𑀢𑀢𑁄 𑀢𑀢𑁄𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 ¶ 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀞𑀸𑀦𑀢𑁄, 𑀉𑀧𑀕𑀦𑁆𑀢𑁆𑀯𑀸, 𑀲𑀫𑀻𑀧𑁂 𑀯𑀸 𑀞𑀸𑀦𑀁 𑀉𑀧𑀝𑁆𑀞𑀸𑀦𑀁, 𑀪𑀚𑀦𑀁 𑀲𑁂𑀯𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀦𑀺𑀲𑀻𑀤𑀦𑀝𑁆𑀞𑀸𑀦𑁂, 𑀧𑀼𑀭𑀺𑀫𑀬𑀸𑀫𑁂 𑀯𑀸, 𑀢𑁂𑀲𑀼 𑀯𑀸 𑀪𑀺𑀓𑁆𑀔𑀽𑀲𑀼.

𑀧𑀜𑁆𑀳𑀸𑀓𑀣𑀦𑀸𑀤𑀺𑀯𑀲𑁂𑀦 𑀅𑀥𑀺𑀧𑁆𑀧𑀸𑀬𑀁 𑀲𑀫𑁆𑀧𑀸𑀤𑁂𑀦𑁆𑀢𑁄 ‘‘𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀽’’𑀢𑀺 𑀏𑀯𑀁 𑀅𑀯𑀢𑁆𑀯𑀸 𑀢𑀲𑁆𑀲𑀸 𑀅𑀦𑁂𑀓𑀸𑀯𑀬𑀯𑀲𑀗𑁆𑀕𑀳𑀡𑀢𑁆𑀣𑀁 ‘‘𑀲𑀓𑀮𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀽’’𑀢𑀺 𑀯𑀼𑀢𑁆𑀢𑀁. 𑀧𑀼𑀭𑁂𑀪𑀢𑁆𑀢𑀧𑀘𑁆𑀙𑀸𑀪𑀢𑁆𑀢𑀧𑀼𑀭𑀺𑀫𑀬𑀸𑀫𑁂𑀲𑀼 𑀫𑀦𑀼𑀲𑁆𑀲𑀧𑀭𑀺𑀲𑀸𑀩𑀸𑀳𑀼𑀮𑁆𑀮𑀢𑁄 𑀑𑀓𑀸𑀲𑀁 𑀅𑀮𑀪𑀺𑀢𑁆𑀯𑀸 𑀇𑀤𑀸𑀦𑀺 𑀫𑀚𑁆𑀛𑀺𑀫𑀬𑀸𑀫𑁂𑀬𑁂𑀯 𑀑𑀓𑀸𑀲𑀁 𑀮𑀪𑀫𑀸𑀦𑀸, 𑀪𑀕𑀯𑀢𑀸 𑀯𑀸 𑀓𑀢𑁄𑀓𑀸𑀲𑀢𑀸𑀬 𑀑𑀓𑀸𑀲𑀁 𑀮𑀪𑀫𑀸𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀻𑀤𑀺𑀲𑀁 𑀧𑀦 𑀧𑀼𑀘𑁆𑀙𑀦𑁆𑀢𑀻𑀢𑀺 𑀆𑀳 ‘‘𑀬𑀣𑀸𑀪𑀺𑀲𑀗𑁆𑀔𑀢𑀁 𑀅𑀦𑁆𑀢𑀫𑀲𑁄 𑀘𑀢𑀼𑀭𑀓𑁆𑀔𑀭𑀫𑁆𑀧𑀻’’𑀢𑀺. 𑀬𑀣𑀸𑀪𑀺𑀲𑀗𑁆𑀔𑀢𑀦𑁆𑀢𑀺 𑀅𑀪𑀺𑀲𑀗𑁆𑀔𑀢𑀸𑀦𑀼𑀭𑀽𑀧𑀁, 𑀢𑀤𑀦𑀢𑀺𑀓𑁆𑀓𑀫𑁆𑀫 𑀯𑀸, 𑀏𑀢𑁂𑀦 𑀬𑀣𑀸 𑀢𑀣𑀸 𑀅𑀢𑁆𑀢𑀦𑁄 𑀧𑀝𑀺𑀪𑀸𑀦𑀸𑀦𑀼𑀭𑀽𑀧𑀁 𑀧𑀼𑀘𑁆𑀙𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀧𑀘𑁆𑀙𑀸𑀪𑀢𑁆𑀢𑀓𑀸𑀮𑀲𑁆𑀲 𑀢𑀻𑀲𑀼 𑀪𑀸𑀕𑁂𑀲𑀼 𑀧𑀞𑀫𑀪𑀸𑀕𑁂 𑀲𑀻𑀳𑀲𑁂𑀬𑁆𑀬𑀸𑀓𑀧𑁆𑀧𑀦𑀁 𑀏𑀓𑀦𑁆𑀢𑀁 𑀦 𑀳𑁄𑀢𑀻𑀢𑀺 𑀆𑀳 ‘‘𑀧𑀼𑀭𑁂𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀦𑀺𑀲𑀚𑁆𑀚𑀸𑀬 𑀧𑀻𑀴𑀺𑀢𑀲𑁆𑀲 𑀲𑀭𑀻𑀭𑀲𑁆𑀲𑀸’’𑀢𑀺. 𑀢𑁂𑀦𑁂𑀯 𑀳𑀺 𑀧𑀼𑀩𑁆𑀩𑁂 ‘‘𑀲𑀘𑁂 𑀆𑀓𑀗𑁆𑀔𑀢𑀻’’𑀢𑀺 𑀢𑀤𑀸 𑀲𑀻𑀳𑀲𑁂𑀬𑁆𑀬𑀸𑀓𑀧𑁆𑀧𑀦𑀲𑁆𑀲 𑀅𑀦𑀺𑀩𑀤𑁆𑀥𑀢𑀸 𑀯𑀺𑀪𑀸𑀯𑀺𑀢𑀸. 𑀓𑀺𑀮𑀸𑀲𑀼𑀪𑀸𑀯𑁄 𑀓𑀺𑀮𑀫𑀣𑁄. 𑀲𑀭𑀻𑀭𑀲𑁆𑀲 𑀓𑀺𑀮𑀸𑀲𑀼𑀪𑀸𑀯𑀫𑁄𑀘𑀦𑀢𑁆𑀣𑀁 𑀘𑀗𑁆𑀓𑀫𑁂𑀦 𑀯𑀻𑀢𑀺𑀦𑀸𑀫𑁂𑀢𑀺 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀢𑀺 𑀆𑀲𑀬𑀸𑀦𑀼𑀲𑀬𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀲𑀗𑁆𑀔𑀸𑀢𑁂𑀦 𑀧𑀜𑁆𑀘𑀫𑀙𑀝𑁆𑀞𑀩𑀮𑀪𑀽𑀢𑁂𑀦 𑀩𑀼𑀤𑁆𑀥𑀘𑀓𑁆𑀔𑀼𑀦𑀸. 𑀢𑁂𑀦 𑀳𑀺 𑀮𑁄𑀓𑀯𑁄𑀮𑁄𑀓𑀦𑀩𑀸𑀳𑀼𑀮𑁆𑀮𑀢𑀸𑀬 𑀢𑀁 ‘‘𑀩𑀼𑀤𑁆𑀥𑀘𑀓𑁆𑀔𑀽’’𑀢𑀺 𑀯𑀼𑀘𑁆𑀘𑀢𑀺, 𑀇𑀤𑀜𑁆𑀘 𑀧𑀘𑁆𑀙𑀺𑀫𑀬𑀸𑀫𑁂 𑀪𑀕𑀯𑀢𑁄 𑀩𑀳𑀼𑀮𑀁 𑀆𑀘𑀺𑀡𑁆𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀧𑁆𑀧𑁂𑀓𑀤𑀸 𑀅𑀯𑀲𑀺𑀝𑁆𑀞𑀩𑀮𑀜𑀸𑀡𑁂𑀳𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦𑁂𑀯 𑀘 𑀪𑀕𑀯𑀸 𑀢𑀫𑀢𑁆𑀣𑀁 𑀲𑀸𑀥𑁂𑀢𑀺.

‘‘𑀧𑀘𑁆𑀙𑀺𑀫𑀬𑀸𑀫𑀓𑀺𑀘𑁆𑀘𑀁 ¶ 𑀓𑀭𑁄𑀦𑁆𑀢𑁄 𑀅𑀜𑁆𑀜𑀸𑀲𑀻’’𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑀢𑁆𑀣𑀁 𑀲𑀫𑀢𑁆𑀣𑁂𑀦𑁆𑀢𑁄 ‘‘𑀢𑀲𑁆𑀫𑀺𑀁 𑀧𑀦 𑀤𑀺𑀯𑀲𑁂’’𑀢𑀺𑀆𑀤𑀺𑀫𑀸𑀳. 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀦𑁆𑀢𑀸𑀦𑀁 𑀇𑀤𑀁 𑀧𑀜𑁆𑀘𑀯𑀺𑀥𑀁 𑀓𑀺𑀘𑁆𑀘𑀁 𑀅𑀯𑀺𑀚𑀳𑀺𑀢𑀫𑁂𑀯 𑀳𑁄𑀢𑀺 𑀲𑀩𑁆𑀩𑀓𑀸𑀮𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀲𑀢𑀺𑀲𑀫𑁆𑀧𑀚𑀜𑁆𑀜𑀢𑁆𑀢𑀸, 𑀢𑀲𑁆𑀫𑀸 𑀢𑀤𑀳𑁂𑀧𑀺 𑀢𑀤𑀯𑀺𑀚𑀳𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀇𑀥 𑀧𑀜𑁆𑀘𑀯𑀺𑀥𑀓𑀺𑀘𑁆𑀘𑀧𑀬𑁄𑀚𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀘𑀗𑁆𑀓𑀫𑀦𑁆𑀢𑀺 𑀢𑀢𑁆𑀣 𑀘𑀗𑁆𑀓𑀫𑀦𑀸𑀦𑀼𑀭𑀽𑀧𑀝𑁆𑀞𑀸𑀦𑀁. 𑀘𑀗𑁆𑀓𑀫𑀫𑀸𑀦𑁄 𑀅𑀜𑁆𑀜𑀸𑀲𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂 𑀅𑀢𑁆𑀣𑀤𑁆𑀯𑀬𑁂 𑀧𑀘𑁆𑀙𑀺𑀫𑀢𑁆𑀣𑀜𑁆𑀜𑁂𑀯 𑀕𑀳𑁂𑀢𑁆𑀯𑀸 ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀆𑀭𑀩𑁆𑀪𑀸’’𑀢𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀢𑁆𑀣𑁄 𑀳𑀺 𑀧𑀓𑀭𑀡𑀸𑀥𑀺𑀕𑀢𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀢𑀺.

‘‘𑀅𑀣 ¶ 𑀔𑁄 𑀪𑀕𑀯𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀇𑀫𑀁 𑀲𑀗𑁆𑀔𑀺𑀬𑀥𑀫𑁆𑀫𑀁 𑀯𑀺𑀤𑀺𑀢𑁆𑀯𑀸 𑀬𑁂𑀦 𑀫𑀡𑁆𑀟𑀮𑀫𑀸𑀴𑁄, 𑀢𑁂𑀦𑀼𑀧𑀲𑀗𑁆𑀓𑀫𑀻’’𑀢𑀺 𑀅𑀬𑀁 𑀲𑀸𑀯𑀲𑁂𑀲𑀧𑀸𑀞𑁄, 𑀢𑀲𑁆𑀫𑀸 𑀏𑀢𑀁 𑀯𑀺𑀤𑀺𑀢𑁆𑀯𑀸, 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀘 𑀉𑀧𑀲𑀗𑁆𑀓𑀫𑀻𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀜𑀢𑁆𑀯𑀸 𑀘 𑀧𑀦𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀲𑁆𑀲 𑀏𑀢𑀤𑀳𑁄𑀲𑀻𑀢𑀺 𑀅𑀲𑁆𑀲 𑀪𑀕𑀯𑀢𑁄 𑀏𑀢𑀁 𑀧𑀭𑀺𑀯𑀺𑀢𑀓𑁆𑀓𑀦𑀁, 𑀏𑀲𑁄 𑀯𑀸 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀅𑀳𑁄𑀲𑀺, 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁄𑀬𑀁 ‘‘𑀏𑀢𑀤𑀕𑁆𑀕’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁧.𑁧𑁮𑁮 𑀆𑀤𑀬𑁄) 𑀯𑀺𑀬. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀓𑀺𑀘𑁆𑀘𑀁 𑀦 𑀲𑀩𑁆𑀩𑀣𑀸 𑀧𑀸𑀓𑀝𑀁. 𑀦𑀺𑀭𑀦𑁆𑀢𑀭𑀦𑁆𑀢𑀺 𑀅𑀦𑀼𑀧𑀼𑀩𑁆𑀩𑀸𑀭𑁄𑀘𑀦𑀯𑀲𑁂𑀦 𑀦𑀺𑀩𑁆𑀩𑀺𑀯𑀭𑀁, 𑀬𑀣𑀸𑀪𑀸𑀲𑀺𑀢𑀲𑁆𑀲 𑀯𑀸 𑀆𑀭𑁄𑀘𑀦𑀯𑀲𑁂𑀦 𑀦𑀺𑀩𑁆𑀩𑀺𑀲𑁂𑀲𑀁. 𑀪𑀸𑀯𑀦𑀧𑀼𑀁𑀲𑀓𑀜𑁆𑀘𑁂𑀢𑀁. 𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸𑀢𑀺 𑀢𑀁 𑀬𑀣𑀸𑀭𑁄𑀘𑀺𑀢𑀁 𑀯𑀘𑀦𑀁 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀁 𑀓𑀢𑁆𑀯𑀸, 𑀇𑀫𑀲𑁆𑀲 𑀯𑀸 𑀲𑀼𑀢𑁆𑀢𑀲𑁆𑀲 𑀤𑁂𑀲𑀦𑀸𑀬 𑀉𑀧𑁆𑀧𑀦𑁆𑀦𑀁 𑀓𑀸𑀭𑀡𑀁 𑀓𑀢𑁆𑀯𑀸𑀢𑀺𑀧𑀺 𑀅𑀢𑁆𑀣𑁄. 𑀅𑀢𑁆𑀣-𑀲𑀤𑁆𑀤𑁄 𑀘𑁂𑀢𑁆𑀣 𑀓𑀸𑀭𑀡𑁂, 𑀢𑁂𑀦 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀁 𑀦𑀺𑀓𑁆𑀔𑁂𑀧𑀁 𑀤𑀲𑁆𑀲𑁂𑀢𑀺. 𑀤𑁆𑀯𑀸𑀲𑀝𑁆𑀞𑀺𑀬𑀸 𑀞𑀸𑀦𑁂𑀲𑀽𑀢𑀺 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀝𑁆𑀞𑀸𑀦𑁂𑀲𑀼. 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀦𑁆𑀢𑀺 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁 𑀅𑀦𑀺𑀯𑀢𑁆𑀢𑀺𑀬𑀁. 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄𑀢𑀺 𑀲𑁂𑀝𑁆𑀞𑀦𑀸𑀤𑀲𑀗𑁆𑀔𑀸𑀢𑀁 𑀅𑀪𑀻𑀢𑀦𑀸𑀤𑀁 𑀦𑀤𑀦𑁆𑀢𑁄. 𑀬𑀁 𑀧𑀦 𑀮𑁄𑀓𑀺𑀬𑀸 𑀯𑀤𑀦𑁆𑀢𑀺 𑁋

‘‘𑀉𑀢𑁆𑀢𑀭𑀲𑁆𑀫𑀺𑀁 𑀧𑀤𑁂 𑀩𑁆𑀬𑀕𑁆𑀖𑀧𑀼𑀗𑁆𑀕𑀯𑁄𑀲𑀪𑀓𑀼𑀜𑁆𑀚𑀭𑀸;

𑀲𑀻𑀳𑀲𑀤𑁆𑀤𑀽𑀮𑀦𑀸𑀕𑀸𑀤𑁆𑀬𑀸, 𑀧𑀼𑀫𑁂 𑀲𑁂𑀝𑁆𑀞𑀢𑁆𑀣𑀕𑁄𑀘𑀭𑀸’’𑀢𑀺.

𑀢𑀁 𑀬𑁂𑀪𑀼𑀬𑁆𑀬𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀻𑀳𑀦𑀸𑀤𑀲𑀤𑀺𑀲𑀁 𑀯𑀸 𑀦𑀸𑀤𑀁 𑀦𑀤𑀦𑁆𑀢𑁄. 𑀅𑀬𑀫𑀢𑁆𑀣𑁄 𑀲𑀻𑀳𑀦𑀸𑀤𑀲𑀼𑀢𑁆𑀢𑁂𑀦 (𑀅. 𑀦𑀺. 𑁬.𑁬𑁪; 𑁧𑁦.𑁨𑁧) 𑀤𑀻𑀧𑁂𑀢𑀩𑁆𑀩𑁄. 𑀬𑀣𑀸 𑀯𑀸 𑀓𑁂𑀲𑀭𑁄 𑀫𑀺𑀕𑀭𑀸𑀚𑀸 𑀲𑀳𑀦𑀢𑁄, 𑀳𑀦𑀦𑀢𑁄, 𑀘 ‘‘𑀲𑀻𑀳𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀢𑀣𑀸𑀕𑀢𑁄𑀧𑀺 𑀮𑁄𑀓𑀥𑀫𑁆𑀫𑀸𑀦𑀁 𑀲𑀳𑀦𑀢𑁄, 𑀧𑀭𑀧𑁆𑀧𑀯𑀸𑀤𑀸𑀦𑀁 𑀳𑀦𑀦𑀢𑁄 𑀘 ‘‘𑀲𑀻𑀳𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀲𑀻𑀳𑀲𑁆𑀲 𑀢𑀣𑀸𑀕𑀢𑀲𑁆𑀲 𑀦𑀸𑀤𑀁 𑀦𑀤𑀦𑁆𑀢𑁄𑀢𑀺𑀧𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑀳𑀺 𑀲𑀻𑀳𑁄 𑀲𑀻𑀳𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀩𑁆𑀩𑀢𑁆𑀣 𑀯𑀺𑀲𑀸𑀭𑀤𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀏𑀯𑀁 𑀢𑀣𑀸𑀕𑀢𑀲𑀻𑀳𑁄𑀧𑀺 𑀢𑀣𑀸𑀕𑀢𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 ‘‘𑀇𑀫𑁂 𑀤𑀺𑀝𑁆𑀞𑀺𑀝𑁆𑀞𑀸𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀸𑀦𑀸𑀯𑀺𑀥𑀤𑁂𑀲𑀦𑀸𑀯𑀺𑀮𑀸𑀲𑀲𑀫𑁆𑀧𑀦𑁆𑀦𑀁 𑀲𑀻𑀳𑀦𑀸𑀤𑀁 𑀦𑀤𑀢𑀺 ¶ . 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀻𑀳𑁄𑀢𑀺 𑀔𑁄 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. 𑀬𑀁 𑀔𑁄 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀇𑀤𑀫𑀲𑁆𑀲 𑀳𑁄𑀢𑀺 𑀲𑀻𑀳𑀦𑀸𑀤𑀲𑁆𑀫𑀺’’𑀦𑁆𑀢𑀺 (𑀅. 𑀦𑀺. 𑁧𑁦.𑁨𑁧). ‘‘𑀇𑀫𑁂 ¶ 𑀤𑀺𑀝𑁆𑀞𑀺𑀝𑁆𑀞𑀸𑀦𑀸’’𑀢𑀺𑀆𑀤𑀺𑀓𑀸 𑀳𑀺 𑀇𑀥 𑀯𑀓𑁆𑀔𑀫𑀸𑀦𑀤𑁂𑀲𑀦𑀸𑀬𑁂𑀯 𑀲𑀻𑀳𑀦𑀸𑀤𑁄. 𑀢𑁂𑀲𑀁 ‘‘𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸’’𑀢𑀺𑀆𑀤𑀺𑀦𑀸 𑀯𑀓𑁆𑀔𑀫𑀸𑀦𑀦𑀬𑁂𑀦 𑀧𑀘𑁆𑀘𑀬𑀸𑀓𑀸𑀭𑀲𑁆𑀲 𑀲𑀫𑁄𑀥𑀸𑀦𑀫𑁆𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀺𑀦𑁂𑀭𑀼𑀁…𑀧𑁂… 𑀯𑀺𑀬 𑀘𑀸𑀢𑀺 𑀉𑀧𑀫𑀸𑀤𑁆𑀯𑀬𑁂𑀦 𑀩𑁆𑀭𑀳𑁆𑀫𑀚𑀸𑀮𑀤𑁂𑀲𑀦𑀸𑀬 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸 𑀲𑀼𑀤𑀼𑀓𑁆𑀓𑀭𑀢𑀁 𑀤𑀲𑁆𑀲𑁂𑀢𑀺. 𑀲𑀼𑀯𑀡𑁆𑀡𑀓𑀽𑀝𑁂𑀦𑀸𑀢𑀺 𑀲𑀼𑀯𑀡𑁆𑀡𑀫𑀬𑀧𑀳𑀭𑀡𑁄𑀧𑀓𑀭𑀡𑀯𑀺𑀲𑁂𑀲𑁂𑀦. 𑀭𑀢𑀦𑀦𑀺𑀓𑀽𑀝𑁂𑀦 𑀯𑀺𑀬 𑀅𑀕𑀸𑀭𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀦𑁆𑀢𑀁 𑀦𑀺𑀝𑁆𑀞𑀧𑁂𑀦𑁆𑀢𑁄, 𑀦𑀺𑀓𑀽𑀝𑁂𑀦𑀸𑀢𑀺 𑀘 𑀦𑀺𑀝𑁆𑀞𑀸𑀦𑀕𑀢𑁂𑀦 𑀅𑀘𑁆𑀘𑀼𑀕𑁆𑀕𑀢𑀓𑀽𑀝𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘 𑀅𑀭𑀳𑀢𑁆𑀢𑀨𑀮𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀲𑀩𑁆𑀩𑀕𑀼𑀡𑀸𑀦𑀁 𑀢𑀤𑁂𑀯 𑀲𑀩𑁆𑀩𑁂𑀲𑀁 𑀉𑀢𑁆𑀢𑀭𑀺𑀢𑀭𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀫𑁄 𑀧𑀦 𑀫𑁂-𑀲𑀤𑁆𑀤𑁄 𑀤𑁂𑀲𑀦𑀸𑀧𑁂𑀓𑁆𑀔𑁄𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲𑀸𑀧𑀺 𑀫𑁂 𑀲𑀸 𑀤𑁂𑀲𑀦𑀸 𑀅𑀧𑀭𑀪𑀸𑀕𑁂 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀸𑀦𑀻𑀢𑀺 𑀅𑀢𑁆𑀣𑁄 𑀬𑀼𑀢𑁆𑀢𑁄. 𑀲𑀯𑀦𑀉𑀕𑁆𑀕𑀳𑀡𑀥𑀸𑀭𑀡𑀯𑀸𑀘𑀦𑀸𑀤𑀺𑀯𑀲𑁂𑀦 𑀧𑀭𑀺𑀘𑀬𑀁 𑀓𑀭𑁄𑀦𑁆𑀢𑁂, 𑀢𑀣𑀸 𑀘 𑀧𑀝𑀺𑀧𑀦𑁆𑀦𑁂 𑀦𑀺𑀩𑁆𑀩𑀸𑀦𑀁 𑀲𑀫𑁆𑀧𑀸𑀧𑀺𑀓𑀸 𑀪𑀯𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑀤𑀕𑁆𑀕𑁂𑀦 𑀬𑁂𑀦𑀸𑀢𑀺 𑀓𑀭𑀡𑀦𑀺𑀤𑁆𑀤𑁂𑀲𑁄, 𑀢𑀤𑀕𑁆𑀕𑁂𑀦 𑀢𑁂𑀦𑀸 𑀢𑀺𑀧𑀺 𑀤𑀝𑁆𑀞𑀩𑁆𑀩𑀁. 𑀏𑀢𑀦𑁆𑀢𑀺 ‘‘𑀬𑁂𑀦 𑀢𑁂𑀦𑀸’’𑀢𑀺 𑀏𑀢𑀁 𑀧𑀤𑀤𑁆𑀯𑀬𑀁. 𑀢𑀢𑁆𑀣𑀸𑀢𑀺 𑀳𑀺 𑀢𑀲𑁆𑀫𑀺𑀁 𑀫𑀡𑁆𑀟𑀮𑀫𑀸𑀴𑁂𑀢𑀺 𑀅𑀢𑁆𑀣𑁄. 𑀬𑁂𑀦𑀸𑀢𑀺 𑀯𑀸 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀢𑁂𑀦𑀸𑀢𑀺 𑀧𑀦 𑀉𑀧𑀬𑁄𑀕𑀢𑁆𑀣𑁂. 𑀢𑀲𑁆𑀫𑀸 𑀢𑀢𑁆𑀣𑀸𑀢𑀺 𑀢𑀁 𑀫𑀡𑁆𑀟𑀮𑀫𑀸𑀴𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀉𑀧𑀲𑀗𑁆𑀓𑀫𑀻𑀢𑀺 𑀘 𑀉𑀧𑀲𑀗𑁆𑀓𑀫𑀦𑁆𑀢𑁄𑀢𑀺 𑀅𑀢𑁆𑀣𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀢𑀤𑀼𑀧𑀲𑀗𑁆𑀓𑀫𑀦𑀲𑁆𑀲 𑀧𑀦 𑀅𑀢𑀻𑀢𑀪𑀸𑀯𑀲𑁆𑀲 𑀲𑀽𑀘𑀦𑀢𑁄 ‘‘𑀉𑀧𑀲𑀗𑁆𑀓𑀫𑀻’’𑀢𑀺 𑀢𑀓𑁆𑀓𑀸𑀮𑀸𑀧𑁂𑀓𑁆𑀔𑀦𑀯𑀲𑁂𑀦 𑀅𑀢𑀻𑀢𑀧𑀬𑁄𑀕𑁄 𑀯𑀼𑀢𑁆𑀢𑁄. 𑀏𑀯𑀜𑁆𑀳𑀺 ‘‘𑀉𑀧𑀲𑀗𑁆𑀓𑀫𑀺𑀢𑁆𑀯𑀸’’𑀢𑀺 𑀯𑀘𑀦𑀁 𑀲𑀽𑀧𑀧𑀦𑁆𑀦𑀁 𑀳𑁄𑀢𑀺. 𑀇𑀢𑀭𑀣𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀘𑀦𑀸𑀦𑀁 𑀅𑀢𑀻𑀢𑀓𑀸𑀮𑀺𑀓𑀢𑁆𑀢𑀸 𑀢𑀣𑀸𑀯𑀢𑁆𑀢𑀩𑁆𑀩𑀫𑁂𑀯 𑀦 𑀲𑀺𑀬𑀸. 𑀉𑀧𑀲𑀗𑁆𑀓𑀫𑀦𑀲𑁆𑀲 𑀘 𑀕𑀫𑀦𑀁, 𑀉𑀧𑀕𑀫𑀦𑀜𑁆𑀘𑀸𑀢𑀺 𑀤𑁆𑀯𑀺𑀥𑀸 𑀅𑀢𑁆𑀣𑁄, 𑀇𑀥 𑀧𑀦 𑀕𑀫𑀦𑀫𑁂𑀯. 𑀲𑀫𑁆𑀧𑀢𑁆𑀢𑀼𑀓𑀸𑀫𑀢𑀸𑀬 𑀳𑀺 𑀬𑀁 𑀓𑀺𑀜𑁆𑀘𑀺 𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀢𑀁 𑀢𑀁 𑀧𑀤𑁂𑀲𑀸𑀢𑀺𑀓𑁆𑀓𑀫𑀦𑀯𑀲𑁂𑀦 ‘‘𑀢𑀁 𑀞𑀸𑀦𑀁 𑀉𑀧𑀲𑀗𑁆𑀓𑀫𑀺 𑀉𑀧𑀲𑀗𑁆𑀓𑀫𑀦𑁆𑀢𑁄’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺, 𑀢𑁂𑀦𑀸𑀳 ‘‘𑀢𑀢𑁆𑀣 𑀕𑀢𑁄’’𑀢𑀺, 𑀢𑁂𑀦 𑀉𑀧𑀕𑀫𑀦𑀢𑁆𑀣𑀁 𑀦𑀺𑀯𑀢𑁆𑀢𑁂𑀢𑀺. 𑀬𑀜𑁆𑀳𑀺 𑀞𑀸𑀦𑀁 𑀧𑀢𑁆𑀢𑀼𑀫𑀺𑀘𑁆𑀙𑀦𑁆𑀢𑁄 𑀕𑀘𑁆𑀙𑀢𑀺, 𑀢𑀁 𑀧𑀢𑁆𑀢𑀢𑀸𑀬𑁂𑀯 ‘‘𑀉𑀧𑀕𑀫𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀫𑁂𑀢𑁆𑀣 𑀦 𑀲𑀁𑀯𑀡𑁆𑀡𑀺𑀢𑀁 ‘‘𑀉𑀧𑀲𑀗𑁆𑀓𑀫𑀺𑀢𑁆𑀯𑀸’’𑀢𑀺 𑀧𑀤𑀁, 𑀢𑀁 𑀉𑀧𑀲𑀗𑁆𑀓𑀫𑀦𑀧𑀭𑀺𑀬𑁄𑀲𑀸𑀦𑀤𑀻𑀧𑀦𑀁. 𑀅𑀣 𑀯𑀸 𑀕𑀢𑁄𑀢𑀺 𑀉𑀧𑀕𑀢𑁄. 𑀅𑀦𑀼𑀧𑀲𑀕𑁆𑀕𑁄𑀧𑀺 𑀳𑀺 𑀲𑀤𑁆𑀤𑁄 𑀲𑀉𑀧𑀲𑀕𑁆𑀕𑁄 𑀯𑀺𑀬 𑀅𑀢𑁆𑀣𑀦𑁆𑀢𑀭𑀁 𑀯𑀤𑀢𑀺 𑀲𑀉𑀧𑀲𑀕𑁆𑀕𑁄𑀧𑀺 𑀅𑀦𑀼𑀧𑀲𑀕𑁆𑀕𑁄 𑀯𑀺𑀬𑀸𑀢𑀺. 𑀅𑀢𑁄 ‘‘𑀉𑀧𑀲𑀗𑁆𑀓𑀫𑀺𑀢𑁆𑀯𑀸’’𑀢𑀺 𑀧𑀤𑀲𑁆𑀲 𑀏𑀯𑀁 𑀉𑀧𑀕𑀢𑁄 𑀢𑀢𑁄 𑀆𑀲𑀦𑁆𑀦𑀢𑀭𑀁 𑀪𑀺𑀓𑁆𑀔𑀽𑀦𑀁 𑀲𑀫𑀻𑀧𑀲𑀗𑁆𑀔𑀸𑀢𑀁 𑀧𑀜𑁆𑀳𑀁 𑀯𑀸 𑀓𑀣𑁂𑀢𑀼𑀁, 𑀥𑀫𑁆𑀫𑀁 𑀯𑀸 𑀤𑁂𑀲𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀝𑁆𑀞𑀸𑀦𑀁 𑀉𑀧𑀕𑀦𑁆𑀢𑁆𑀯𑀸𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘 𑀬𑁂𑀦𑀸𑀢𑀺 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀁. 𑀬𑁂𑀦 𑀓𑀸𑀭𑀡𑁂𑀦 𑀪𑀕𑀯𑀢𑀸 𑀲𑁄 ¶ 𑀫𑀡𑁆𑀟𑀮𑀫𑀸𑀴𑁄 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄, 𑀢𑁂𑀦 𑀓𑀸𑀭𑀡𑁂𑀦 𑀉𑀧𑀲𑀗𑁆𑀓𑀫𑀻𑀢𑀺 𑀅𑀢𑁆𑀣𑁄. 𑀓𑀸𑀭𑀡𑀁 𑀧𑀦 ‘‘𑀇𑀫𑁂 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀫𑁂𑀯.

𑀧𑀜𑁆𑀜𑀢𑁆𑀢𑁂 ¶ 𑀆𑀲𑀦𑁂 𑀦𑀺𑀲𑀻𑀤𑀻𑀢𑀺 𑀏𑀢𑁆𑀣 𑀓𑁂𑀦𑀺𑀤𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀅𑀦𑀼𑀬𑁄𑀕𑁂 𑀲𑀢𑀺 𑀪𑀺𑀓𑁆𑀔𑀽𑀳𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀩𑀼𑀤𑁆𑀥𑀓𑀸𑀮𑁂 𑀓𑀺𑀭𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑀼𑀤𑁆𑀥𑀓𑀸𑀮𑁂𑀢𑀺 𑀥𑀭𑀫𑀸𑀦𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂. 𑀯𑀺𑀲𑁂𑀲𑀦𑁆𑀢𑀺 𑀬𑀣𑀸𑀮𑀤𑁆𑀥𑀢𑁄 𑀉𑀢𑁆𑀢𑀭𑀺 𑀛𑀸𑀦𑀫𑀕𑁆𑀕𑀨𑀮𑀁. 𑀅𑀣𑀸𑀢𑀺 𑀲𑀁𑀲𑀬𑀢𑁆𑀣𑁂 𑀦𑀺𑀧𑀸𑀢𑁄, 𑀬𑀤𑀺 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀢𑀓𑁆𑀓𑀬𑀫𑀸𑀦𑀁 𑀦𑀁 𑀪𑀺𑀓𑁆𑀔𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀢𑀣𑀸 𑀢𑀢𑁄 𑀧𑀲𑁆𑀲𑀦𑀳𑁂𑀢𑀼 𑀤𑀲𑁆𑀲𑁂𑀢𑁆𑀯𑀸, 𑀑𑀯𑀤𑀺𑀢𑁆𑀯𑀸𑀢𑀺 𑀘. 𑀅𑀦𑀫𑀢𑀕𑁆𑀕𑁂𑀢𑀺 𑀅𑀦𑀸𑀤𑀺𑀫𑀢𑀺. 𑀆𑀓𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸𑀢𑀺 𑀆𑀓𑀸𑀲𑁂 𑀉𑀕𑁆𑀕𑀦𑁆𑀢𑁆𑀯𑀸. 𑀈𑀤𑀺𑀲𑁂𑀲𑀼 𑀳𑀺 𑀪𑀼𑀫𑁆𑀫𑀢𑁆𑀣𑁄 𑀏𑀯 𑀬𑀼𑀚𑁆𑀚𑀢𑀻𑀢𑀺 𑀉𑀤𑀸𑀦𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀪𑀸𑀭𑁄𑀢𑀺 𑀢𑀗𑁆𑀔𑀡𑁂𑀬𑁂𑀯 𑀪𑀕𑀯𑀢𑁄 𑀅𑀦𑀼𑀘𑁆𑀙𑀯𑀺𑀓𑀸𑀲𑀦𑀲𑁆𑀲 𑀤𑀼𑀮𑁆𑀮𑀪𑀢𑁆𑀢𑀸 𑀕𑀭𑀼𑀓𑀫𑁆𑀫𑀁. 𑀨𑀮𑀓𑀦𑁆𑀢𑀺 𑀦𑀺𑀲𑀻𑀤𑀦𑀢𑁆𑀣𑀸𑀬 𑀓𑀢𑀁 𑀨𑀮𑀁. 𑀓𑀝𑁆𑀞𑀓𑀦𑁆𑀢𑀺 𑀦𑀺𑀲𑀻𑀤𑀦𑀬𑁄𑀕𑁆𑀬𑀁 𑀨𑀮𑀓𑀢𑁄 𑀅𑀜𑁆𑀜𑀁 𑀤𑀸𑀭𑀼𑀓𑁆𑀔𑀦𑁆𑀥𑀁. 𑀲𑀗𑁆𑀓𑀟𑁆𑀠𑀺𑀢𑁆𑀯𑀸𑀢𑀺 𑀲𑀁𑀳𑀭𑀺𑀢𑁆𑀯𑀸. 𑀢𑀢𑁆𑀣𑀸𑀢𑀺 𑀧𑀼𑀭𑀸𑀡𑀧𑀡𑁆𑀡𑁂𑀲𑀼, 𑀓𑁂𑀯𑀮𑀁 𑀢𑁂𑀲𑀼 𑀏𑀯 𑀦𑀺𑀲𑀻𑀤𑀺𑀢𑀼𑀫𑀦𑀦𑀼𑀘𑁆𑀙𑀯𑀺𑀓𑀢𑁆𑀢𑀸 𑀢𑀣𑀸 𑀯𑀼𑀢𑁆𑀢𑀁, 𑀢𑀢𑁆𑀣𑀸𑀢𑀺 𑀯𑀸 𑀢𑁂𑀲𑀼 𑀧𑀻𑀞𑀸𑀤𑀻𑀲𑀼. 𑀏𑀯𑀁 𑀲𑀢𑀺 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀧𑀜𑁆𑀜𑀧𑁂𑀦𑁆𑀢𑀻𑀢𑀺 𑀅𑀢𑁆𑀣𑀯𑀲𑀸 𑀯𑀺𑀪𑀢𑁆𑀢𑀺𑀁 𑀯𑀺𑀧𑀭𑀺𑀡𑀸𑀫𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀧𑀧𑁆𑀨𑁄𑀝𑁂𑀢𑁆𑀯𑀸𑀢𑀺 𑀬𑀣𑀸𑀞𑀺𑀢𑀁 𑀭𑀚𑁄𑀚𑀮𑁆𑀮𑀸𑀤𑀺-𑀲𑀁𑀓𑀺𑀡𑁆𑀡𑀫𑀦𑀦𑀼𑀭𑀽𑀧𑀦𑁆𑀢𑀺 𑀢𑀩𑁆𑀩𑀺𑀲𑁄𑀥𑀦𑀢𑁆𑀣𑀁 𑀲𑀜𑁆𑀘𑀸𑀮𑁂𑀢𑁆𑀯𑀸. ‘‘𑀅𑀫𑁆𑀳𑀸𑀓𑀁 𑀈𑀤𑀺𑀲𑀸 𑀓𑀣𑀸 𑀅𑀜𑁆𑀜𑀢𑀭𑀺𑀲𑁆𑀲𑀸 𑀤𑁂𑀲𑀦𑀸𑀬 𑀓𑀸𑀭𑀡𑀁 𑀪𑀯𑀺𑀢𑀼𑀁 𑀬𑀼𑀢𑁆𑀢𑀸, 𑀅𑀯𑀲𑁆𑀲𑀁 𑀪𑀕𑀯𑀸 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀬𑀣𑀸𑀦𑀺𑀲𑀻𑀤𑀦𑀁 𑀲𑀦𑁆𑀥𑀸𑀬 𑀏𑀯𑀁 𑀯𑀼𑀢𑁆𑀢𑀁. 𑀏𑀢𑁆𑀣 𑀘 ‘‘𑀇𑀥𑀸𑀕𑀢𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀢𑀸𑀯𑀓𑀸𑀮𑀺𑀓𑀁 𑀕𑀡𑁆𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀽’’𑀢𑀺 𑀭𑀜𑁆𑀜𑀸 𑀞𑀧𑀺𑀢𑀁, 𑀢𑁂𑀦 𑀘 𑀆𑀕𑀢𑀓𑀸𑀮𑁂 𑀧𑀭𑀺𑀪𑀼𑀢𑁆𑀢𑀁 𑀆𑀲𑀦𑀁 𑀭𑀜𑁆𑀜𑁄 𑀦𑀺𑀲𑀻𑀤𑀦𑀸𑀲𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀢𑀣𑀸 𑀅𑀝𑁆𑀞𑀧𑀺𑀢𑀁 𑀪𑀺𑀓𑁆𑀔𑀽𑀳𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀪𑀕𑀯𑀢𑁄 𑀘 𑀧𑀜𑁆𑀜𑀧𑁂𑀢𑀼𑀁 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀢𑀸𑀤𑀺𑀲𑀁 𑀭𑀜𑁆𑀜𑁄 𑀦𑀺𑀲𑀻𑀤𑀦𑀸𑀲𑀦𑀁 𑀧𑀸𑀴𑀺𑀬𑀁 𑀓𑀣𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀲𑀦𑁆𑀥𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀥𑀺𑀫𑀼𑀢𑁆𑀢𑀺𑀜𑀸𑀡𑀦𑁆𑀢𑀺 𑀘 𑀲𑀢𑁆𑀢𑀸𑀦𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸𑀭𑀫𑁆𑀫𑀡𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀩𑀮𑀜𑀸𑀡𑀜𑁆𑀘, 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄.

‘‘𑀦𑀺𑀲𑀚𑁆𑀚𑀸’’𑀢𑀺 𑀇𑀤𑀁 𑀦𑀺𑀲𑀻𑀤𑀦𑀧𑀭𑀺𑀬𑁄𑀲𑀸𑀦𑀤𑀻𑀧𑀦𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀏𑀯’’𑀦𑁆𑀢𑀺𑀆𑀤𑀺𑀦𑀸. ‘‘𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀇𑀫𑁂 𑀲𑀗𑁆𑀔𑀺𑀬𑀥𑀫𑁆𑀫𑀁 𑀯𑀺𑀤𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀚𑀸𑀦𑀦𑁆𑀢𑁄𑀬𑁂𑀯 𑀧𑀼𑀘𑁆𑀙𑀻𑀢𑀺 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄𑀢𑀺 𑀆𑀳 ‘‘𑀚𑀸𑀦𑀦𑁆𑀢𑁄𑀬𑁂𑀯𑀸’’𑀢𑀺. 𑀅𑀲𑀢𑀺 𑀓𑀣𑀸𑀯𑀢𑁆𑀣𑀼𑀫𑁆𑀳𑀺 𑀢𑀤𑀦𑀼𑀭𑀽𑀧𑀸 𑀉𑀧𑀭𑀽𑀧𑀭𑀺 𑀯𑀢𑁆𑀢𑀩𑁆𑀩𑀸 𑀯𑀺𑀲𑁂𑀲𑀓𑀣𑀸 𑀦 𑀲𑀫𑀽𑀧𑀩𑁆𑀭𑀽𑀳𑀢𑀻𑀢𑀺 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀧𑀼𑀘𑁆𑀙𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀦𑀼-𑀇𑀢𑀺 𑀧𑀼𑀘𑁆𑀙𑀦𑀢𑁆𑀣𑁂. 𑀅𑀲-𑀲𑀤𑁆𑀤𑁄 𑀧𑀯𑀢𑁆𑀢𑀦𑀢𑁆𑀣𑁂𑀢𑀺 𑀯𑀼𑀢𑁆𑀢𑀁 ‘‘𑀓𑀢𑀫𑀸𑀬 𑀦𑀼…𑀧𑁂… 𑀪𑀯𑀣𑀸’’𑀢𑀺. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀞𑀸𑀦𑁂 ¶ 𑀲𑀦𑁆𑀥𑀺𑀯𑀲𑁂𑀦 𑀉𑀓𑀸𑀭𑀲𑁆𑀲 𑀑𑀓𑀸𑀭𑀸𑀤𑁂𑀲𑁄𑀯, 𑀦 𑀧𑀞𑀫𑀸𑀬 𑀧𑀸𑀴𑀺𑀬𑀸 𑀅𑀢𑁆𑀣𑀢𑁄 𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀢𑀲𑁆𑀲𑀸𑀧𑀺 𑀧𑀼𑀭𑀺𑀫𑁄𑀬𑁂𑀯 𑀅𑀢𑁆𑀣𑁄’’𑀢𑀺 𑀇𑀫𑀺𑀦𑀸. 𑀧𑀼𑀭𑀺𑀫𑁄𑀬𑁂𑀯𑀢𑁆𑀣𑁄𑀢𑀺 𑀘 ‘‘𑀓𑀢𑀫𑀸𑀬 𑀦𑀼 𑀪𑀯𑀣𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁄 𑀅𑀢𑁆𑀣𑁄.

‘‘𑀓𑀸 𑀘 𑀧𑀦𑀸’’𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀩𑁆𑀬𑀢𑀺𑀭𑁂𑀓𑁂 ‘‘𑀬𑁄 𑀘 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘, 𑀲𑀗𑁆𑀖𑀜𑁆𑀘 𑀲𑀭𑀡𑀁 𑀕𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀩𑁆𑀬𑀢𑀺𑀭𑁂𑀓𑁄 𑀘 𑀦𑀸𑀫 𑀧𑀼𑀩𑁆𑀩𑁂 𑀯𑀼𑀢𑁆𑀢𑀢𑁆𑀣𑀸𑀧𑁂𑀓𑁆𑀔𑀓𑁄 𑀯𑀺𑀲𑁂𑀲𑀸𑀢𑀺𑀭𑁂𑀓𑀢𑁆𑀣𑁄, 𑀲𑁄 𑀘 𑀢𑀁 𑀧𑀼𑀩𑁆𑀩𑁂 𑀬𑀣𑀸𑀧𑀼𑀘𑁆𑀙𑀺𑀢𑀸𑀬 𑀓𑀣𑀸𑀬 𑀯𑀓𑁆𑀔𑀫𑀸𑀦𑀁 𑀯𑀺𑀧𑁆𑀧𑀓𑀢𑀪𑀸𑀯𑀲𑀗𑁆𑀔𑀸𑀢𑀁 𑀩𑁆𑀬𑀢𑀺𑀭𑁂𑀓𑀢𑁆𑀣𑀁 𑀚𑁄𑀢𑁂𑀢𑀺. 𑀧𑀦-𑀲𑀤𑁆𑀤𑁄 𑀯𑀘𑀦𑀸𑀮𑀗𑁆𑀓𑀸𑀭𑁄 ¶ . 𑀢𑀸𑀤𑀺𑀲𑁄 𑀧𑀦 𑀅𑀢𑁆𑀣𑁄 𑀲𑀤𑁆𑀤𑀲𑀢𑁆𑀣𑀢𑁄𑀯 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀓𑀢𑁆𑀯𑀸 𑀢𑀤𑀜𑁆𑀜𑁂𑀲𑀫𑁂𑀯 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑁆𑀢𑀭𑀸𑀓𑀣𑀸𑀢𑀺 𑀓𑀫𑁆𑀫𑀝𑁆𑀞𑀸𑀦…𑀧𑁂… 𑀓𑀣𑀸’’𑀢𑀺𑀆𑀤𑀺𑀫𑀸𑀳. 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀬𑁄 𑀲𑀫𑀡𑀓𑀭𑀡𑀻𑀬𑀪𑀽𑀢𑀸𑀢𑀺 𑀅𑀦𑁆𑀢𑀭𑀸𑀲𑀤𑁆𑀤𑁂𑀦 𑀅𑀧𑁂𑀓𑁆𑀔𑀺𑀢𑁂 𑀓𑀭𑀡𑀻𑀬𑀯𑀺𑀲𑁂𑀲𑁂 𑀲𑀫𑁆𑀩𑀦𑁆𑀥𑀸𑀧𑀸𑀤𑀸𑀦𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑁂 𑀢𑁂𑀲𑀫𑁂𑀯 𑀯𑀢𑁆𑀢𑀩𑁆𑀩𑀭𑀽𑀧𑀢𑁆𑀢𑀸 ‘‘𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀸𑀬 𑀳𑀺 𑀓𑀣𑀸𑀬 𑀢𑁂 𑀪𑀺𑀓𑁆𑀔𑀽 𑀲𑀦𑁆𑀦𑀺𑀲𑀺𑀦𑁆𑀦𑀸, 𑀲𑀸 𑀏𑀯 𑀅𑀦𑁆𑀢𑀭𑀸𑀓𑀣𑀸 𑀯𑀺𑀧𑁆𑀧𑀓𑀢𑀸 𑀯𑀺𑀲𑁂𑀲𑁂𑀦 𑀧𑀼𑀦 𑀧𑀼𑀘𑁆𑀙𑀻𑀬𑀢𑀺, 𑀦 𑀢𑀤𑀜𑁆𑀜𑁂 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀬𑁄𑀢𑀺. 𑀅𑀦𑁆𑀢𑀭𑀸𑀲𑀤𑁆𑀤𑀲𑁆𑀲 𑀅𑀜𑁆𑀜𑀢𑁆𑀣𑀫𑀸𑀳 ‘‘𑀅𑀜𑁆𑀜𑀸, 𑀏𑀓𑀸’’𑀢𑀺 𑀘. 𑀧𑀭𑀺𑀬𑀸𑀬𑀯𑀘𑀦𑀜𑁆𑀳𑁂𑀢𑀁 𑀧𑀤𑀤𑁆𑀯𑀬𑀁. 𑀬𑀲𑁆𑀫𑀸 𑀅𑀜𑁆𑀜𑀢𑁆𑀣𑁂 𑀅𑀬𑀁 𑀅𑀦𑁆𑀢𑀭𑀸𑀲𑀤𑁆𑀤𑁄 ‘‘𑀪𑀽𑀫𑀦𑁆𑀢𑀭𑀁, 𑀲𑀫𑀬𑀦𑁆𑀢𑀭’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀢𑀲𑁆𑀫𑀸 ‘‘𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀦’’𑀦𑁆𑀢𑀺 𑀦𑀺𑀲𑁆𑀲𑀓𑁆𑀓𑀢𑁆𑀣𑁂 𑀲𑀸𑀫𑀺𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀯𑁂𑀫𑀚𑁆𑀛𑁂 𑀯𑀸 𑀅𑀦𑁆𑀢𑀭𑀸𑀲𑀤𑁆𑀤𑁄, 𑀲𑀸 𑀧𑀦 𑀢𑁂𑀲𑀁 𑀯𑁂𑀫𑀚𑁆𑀛𑀪𑀽𑀢𑀢𑁆𑀢𑀸 𑀅𑀜𑁆𑀜𑀸𑀬𑁂𑀯, 𑀢𑁂𑀳𑀺 𑀘 𑀅𑀲𑀫𑁆𑀫𑀺𑀲𑁆𑀲𑀢𑁆𑀢𑀸 𑀯𑀺𑀲𑀼𑀁 𑀏𑀓𑀸𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀜𑁆𑀜𑀸, 𑀏𑀓𑀸’’𑀢𑀺 𑀘 𑀯𑀼𑀢𑁆𑀢𑀁. 𑀧𑀓𑀸𑀭𑁂𑀦 𑀓𑀭𑀡𑀁 𑀧𑀓𑀢𑁄, 𑀢𑀢𑁄 𑀯𑀺𑀕𑀢𑀸, 𑀯𑀺𑀕𑀢𑀁 𑀯𑀸 𑀧𑀓𑀢𑀁 𑀬𑀲𑁆𑀲𑀸𑀢𑀺 𑀯𑀺𑀧𑁆𑀧𑀓𑀢𑀸, 𑀅𑀧𑀭𑀺𑀦𑀺𑀝𑁆𑀞𑀺𑀢𑀸. 𑀲𑀺𑀔𑀦𑁆𑀢𑀺 𑀧𑀭𑀺𑀬𑁄𑀲𑀸𑀦𑀁. 𑀅𑀬𑀁 𑀧𑀦 𑀢𑀤𑀪𑀺𑀲𑀫𑁆𑀩𑀦𑁆𑀥𑀯𑀲𑁂𑀦 𑀉𑀢𑁆𑀢𑀭𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀦𑀸𑀳’’𑀦𑁆𑀢𑀺𑀆𑀤𑀺. 𑀓𑀣𑀸𑀪𑀗𑁆𑀕𑀢𑁆𑀣𑀦𑁆𑀢𑀺 𑀓𑀣𑀸𑀬 𑀪𑀜𑁆𑀚𑀦𑀢𑁆𑀣𑀁. 𑀅𑀢𑁆𑀣𑀢𑁄 𑀆𑀧𑀦𑁆𑀦𑀢𑁆𑀢𑀸 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀢𑀺. 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸 𑀲𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑀸𑀦𑀁 𑀢𑀺𑀭𑀘𑁆𑀙𑀸𑀦𑀪𑀽𑀢𑀸 𑀓𑀣𑀸 𑀢𑀺𑀭𑀘𑁆𑀙𑀸𑀦𑀓𑀣𑀸. 𑀢𑀺𑀭𑀘𑁆𑀙𑀸𑀦𑀪𑀽𑀢𑀸𑀢𑀺 𑀘 𑀢𑀺𑀭𑁄𑀓𑀭𑀡𑀪𑀽𑀢𑀸, 𑀯𑀺𑀩𑀦𑁆𑀥𑀦𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀆𑀤𑀺-𑀲𑀤𑁆𑀤𑁂𑀦 𑀘𑁂𑀢𑁆𑀣 𑀘𑁄𑀭𑀫𑀳𑀸𑀫𑀢𑁆𑀢𑀲𑁂𑀦𑀸𑀪𑀬𑀓𑀣𑀸𑀤𑀺𑀓𑀁 𑀅𑀦𑁂𑀓𑀯𑀺𑀳𑀺𑀢𑀁 𑀦𑀺𑀭𑀢𑁆𑀣𑀓𑀓𑀣𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀬𑀁 𑀓𑀣𑀸 𑀏𑀯𑀸𑀢𑀺 𑀅𑀦𑁆𑀢𑁄𑀕𑀥𑀸𑀯𑀥𑀸𑀭𑀡𑀢𑀁 ¶ , 𑀅𑀜𑁆𑀜𑀢𑁆𑀣𑀸𑀧𑁄𑀳𑀦𑀁 𑀯𑀸 𑀲𑀦𑁆𑀥𑀸𑀬 𑀘𑁂𑀢𑀁 𑀯𑀼𑀢𑁆𑀢𑀁. 𑀅𑀣𑀸𑀢𑀺 𑀢𑀲𑁆𑀲𑀸 𑀅𑀯𑀺𑀧𑁆𑀧𑀓𑀢𑀓𑀸𑀮𑁂𑀬𑁂𑀯. ‘‘𑀢𑀁 𑀦𑁄’’𑀢𑀺𑀆𑀤𑀺𑀦𑀸 𑀅𑀢𑁆𑀣𑀢𑁄 𑀆𑀧𑀦𑁆𑀦𑀫𑀸𑀳. 𑀏𑀲 𑀦𑀬𑁄 𑀈𑀤𑀺𑀲𑁂𑀲𑀼. 𑀦𑀦𑀼 𑀘 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀸 𑀓𑀣𑀸 ‘‘𑀇𑀢𑀺 𑀳 𑀫𑁂’’𑀢𑀺𑀆𑀤𑀺𑀦𑀸 𑀬𑀣𑀸𑀥𑀺𑀧𑁆𑀧𑀸𑀬𑀁 𑀦𑀺𑀝𑁆𑀞𑀸𑀧𑀺𑀢𑀸𑀬𑁂𑀯𑀸𑀢𑀺? 𑀦 𑀦𑀺𑀝𑁆𑀞𑀸𑀧𑀺𑀢𑀸 𑀪𑀕𑀯𑀢𑁄 𑀉𑀧𑀲𑀗𑁆𑀓𑀫𑀦𑁂𑀦 𑀉𑀧𑀘𑁆𑀙𑀺𑀦𑁆𑀦𑀢𑁆𑀢𑀸. 𑀬𑀤𑀺 𑀳𑀺 𑀪𑀕𑀯𑀸 𑀢𑀲𑁆𑀫𑀺𑀁 𑀔𑀡𑁂 𑀦 𑀉𑀧𑀲𑀗𑁆𑀓𑀫𑁂𑀬𑁆𑀬, 𑀪𑀺𑀬𑁆𑀬𑁄𑀧𑀺 𑀢𑀧𑁆𑀧𑀝𑀺𑀩𑀤𑁆𑀥𑀸𑀬𑁂𑀯 𑀢𑀣𑀸 𑀧𑀯𑀢𑁆𑀢𑁂𑀬𑁆𑀬𑀼𑀁, 𑀪𑀕𑀯𑀢𑁄 𑀉𑀧𑀲𑀗𑁆𑀓𑀫𑀦𑁂𑀦 𑀧𑀦 𑀦 𑀧𑀯𑀢𑁆𑀢𑁂𑀲𑀼𑀁, 𑀢𑁂𑀦𑁂𑀯𑀸𑀳 ‘‘𑀅𑀬𑀁 𑀦𑁄…𑀧𑁂… 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺.

𑀇𑀤𑀸𑀦𑀺 𑀦𑀺𑀤𑀸𑀦𑀲𑁆𑀲, 𑀦𑀺𑀤𑀸𑀦𑀯𑀡𑁆𑀡𑀦𑀸𑀬 𑀯𑀸 𑀧𑀭𑀺𑀦𑀺𑀝𑁆𑀞𑀺𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀲𑁆𑀲𑀸𑀦𑀼𑀓𑀽𑀮𑀪𑀸𑀯𑀫𑁆𑀧𑀺 𑀲𑀫𑀢𑁆𑀣𑁂𑀢𑀼𑀁 ‘‘𑀏𑀢𑁆𑀢𑀸𑀯𑀢𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀢𑀸𑀯𑀢𑀸𑀢𑀺 𑀳𑀺 𑀏𑀢𑁆𑀢𑀓𑁂𑀦 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀺𑀯𑀘𑀦𑀓𑁆𑀓𑀫𑁂𑀦 𑀬𑀁 𑀦𑀺𑀤𑀸𑀦𑀁 𑀪𑀸𑀲𑀺𑀢𑀦𑁆𑀢𑀺 𑀯𑀸 𑀏𑀢𑁆𑀢𑀓𑁂𑀦 ‘‘𑀢𑀢𑁆𑀣 𑀏𑀯𑀦𑁆𑀢𑀺 𑀦𑀺𑀧𑀸𑀢𑀧𑀤’’𑀦𑁆𑀢𑀺𑀆𑀤𑀺𑀯𑀘𑀦𑀓𑁆𑀓𑀫𑁂𑀦 𑀅𑀢𑁆𑀣𑀯𑀡𑁆𑀡𑀦𑀸 𑀲𑀫𑀢𑁆𑀢𑀸𑀢𑀺 𑀯𑀸 𑀤𑁆𑀯𑀺𑀥𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. ‘‘𑀓𑀫𑀮…𑀧𑁂… 𑀲𑀮𑀺𑀮𑀸𑀬𑀸’’𑀢𑀺𑀆𑀤𑀺𑀦𑀸 𑀧𑀦 𑀢𑀲𑁆𑀲 𑀦𑀺𑀤𑀸𑀦𑀲𑁆𑀲 𑀪𑀕𑀯𑀢𑁄 𑀯𑀘𑀦𑀲𑁆𑀲𑀸𑀦𑀼𑀓𑀽𑀮𑀪𑀸𑀯𑀁 𑀤𑀻𑀧𑁂𑀢𑀺. 𑀢𑀢𑁆𑀣 𑀓𑀫𑀮𑀓𑀼𑀯𑀮𑀬𑀼𑀚𑁆𑀚𑀮𑀯𑀺𑀫𑀮𑀲𑀸𑀥𑀼𑀭𑀲𑀲𑀮𑀺𑀮𑀸𑀬𑀸𑀢𑀺 𑀓𑀫𑀮𑀲𑀗𑁆𑀔𑀸𑀢𑁂𑀳𑀺 𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀲𑁂𑀢𑀼𑀧𑁆𑀧𑀮𑀭𑀢𑁆𑀢𑀼𑀧𑁆𑀧𑀮𑁂𑀳𑀺 ¶ 𑀘𑁂𑀯 𑀓𑀼𑀯𑀮𑀬𑀲𑀗𑁆𑀔𑀸𑀢𑁂𑀦 𑀦𑀻𑀮𑀼𑀧𑁆𑀧𑀮𑁂𑀦 𑀘 𑀉𑀚𑁆𑀚𑀮𑀯𑀺𑀫𑀮𑀲𑀸𑀥𑀼𑀭𑀲𑀲𑀮𑀺𑀮𑀯𑀢𑀺𑀬𑀸. 𑀦𑀺𑀫𑁆𑀫𑀮𑀲𑀺𑀮𑀸𑀢𑀮𑀭𑀘𑀦𑀯𑀺𑀮𑀸𑀲𑀲𑁄𑀪𑀺𑀢𑀭𑀢𑀦𑀲𑁄𑀧𑀸𑀦𑀦𑁆𑀢𑀺 𑀦𑀺𑀫𑁆𑀫𑀮𑁂𑀦 𑀲𑀺𑀮𑀸𑀢𑀮𑁂𑀦 𑀭𑀘𑀦𑀸𑀬 𑀯𑀺𑀮𑀸𑀲𑁂𑀦 𑀮𑀻𑀮𑀸𑀬 𑀲𑁄𑀪𑀺𑀢𑀭𑀢𑀦𑀲𑁄𑀧𑀸𑀦𑀯𑀦𑁆𑀢𑀁, 𑀦𑀺𑀫𑁆𑀫𑀮𑀲𑀺𑀮𑀸𑀢𑀮𑁂𑀦 𑀯𑀸 𑀭𑀘𑀦𑀯𑀺𑀮𑀸𑀲𑁂𑀦, 𑀲𑀼𑀲𑀗𑁆𑀔𑀢𑀓𑀺𑀭𑀺𑀬𑀸𑀲𑁄𑀪𑁂𑀦 𑀘 𑀲𑁄𑀪𑀺𑀢𑀭𑀢𑀦𑀲𑁄𑀧𑀸𑀦𑀁, 𑀯𑀺𑀮𑀸𑀲𑀲𑁄𑀪𑀺𑀢𑀲𑀤𑁆𑀤𑁂𑀳𑀺 𑀯𑀸 𑀅𑀢𑀺𑀯𑀺𑀬 𑀲𑁄𑀪𑀺𑀢𑀪𑀸𑀯𑁄 𑀯𑀼𑀢𑁆𑀢𑁄. 𑀯𑀺𑀧𑁆𑀧𑀓𑀺𑀡𑁆𑀡𑀫𑀼𑀢𑁆𑀢𑀸𑀢𑀮𑀲𑀤𑀺𑀲𑀯𑀸𑀮𑀼𑀓𑀸𑀘𑀼𑀡𑁆𑀡𑀧𑀡𑁆𑀟𑀭𑀪𑀽𑀫𑀺𑀪𑀸𑀕𑀦𑁆𑀢𑀺 𑀯𑀺𑀯𑀺𑀥𑁂𑀦 𑀧𑀓𑀺𑀡𑁆𑀡𑀸𑀬 𑀫𑀼𑀢𑁆𑀢𑀸𑀬 𑀢𑀮𑀲𑀤𑀺𑀲𑀸𑀦𑀁 𑀯𑀸𑀮𑀼𑀓𑀸𑀦𑀁 𑀘𑀼𑀡𑁆𑀡𑁂𑀳𑀺 𑀧𑀡𑁆𑀟𑀭𑀯𑀡𑁆𑀡𑀪𑀽𑀫𑀺𑀪𑀸𑀕𑀯𑀦𑁆𑀢𑀁. 𑀲𑀼𑀯𑀺𑀪𑀢𑁆𑀢𑀪𑀺𑀢𑁆𑀢𑀺𑀯𑀺𑀘𑀺𑀢𑁆𑀭𑀯𑁂𑀤𑀺𑀓𑀸𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲𑀸𑀢𑀺 𑀲𑀼𑀝𑁆𑀞𑀼 𑀯𑀺𑀪𑀢𑁆𑀢𑀸𑀳𑀺 𑀪𑀺𑀢𑁆𑀢𑀻𑀳𑀺 𑀯𑀺𑀘𑀺𑀢𑁆𑀭𑀲𑁆𑀲, 𑀯𑁂𑀤𑀺𑀓𑀸𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀘. 𑀉𑀘𑁆𑀘𑀢𑀭𑁂𑀦 𑀦𑀓𑁆𑀔𑀢𑁆𑀢𑀧𑀣𑀁 𑀆𑀓𑀸𑀲𑀁 𑀨𑀼𑀲𑀺𑀢𑀼𑀓𑀸𑀫𑀢𑀸𑀬 𑀯𑀺𑀬, 𑀯𑀺𑀚𑀫𑁆𑀪𑀺𑀢𑀲𑀤𑁆𑀤𑁂𑀦 𑀘𑁂𑀢𑀲𑁆𑀲 𑀲𑀫𑁆𑀩𑀦𑁆𑀥𑁄. 𑀯𑀺𑀚𑀫𑁆𑀪𑀺𑀢𑀲𑀫𑀼𑀲𑁆𑀲𑀬𑀲𑁆𑀲𑀸𑀢𑀺 𑀯𑀺𑀓𑁆𑀓𑀻𑀴𑀦𑀲𑀫𑀽𑀳𑀯𑀦𑁆𑀢𑀲𑁆𑀲. 𑀤𑀦𑁆𑀢𑀫𑀬𑀲𑀡𑁆𑀳𑀫𑀼𑀤𑀼𑀨𑀮𑀓𑀓𑀜𑁆𑀘𑀦𑀮𑀢𑀸𑀯𑀺𑀦𑀤𑁆𑀥𑀫𑀡𑀺𑀕𑀡𑀧𑁆𑀧𑀪𑀸𑀲𑀫𑀼𑀤𑀬𑀼𑀚𑁆𑀚𑀮𑀲𑁄𑀪𑀦𑁆𑀢𑀺 𑀤𑀦𑁆𑀢𑀫𑀬𑁂 𑀅𑀢𑀺𑀯𑀺𑀬 𑀲𑀺𑀦𑀺𑀤𑁆𑀥𑀨𑀮𑀓𑁂 𑀓𑀜𑁆𑀘𑀦𑀫𑀬𑀸𑀳𑀺 𑀮𑀢𑀸𑀳𑀺 𑀯𑀺𑀦𑀤𑁆𑀥𑀸𑀦𑀁 𑀫𑀡𑀻𑀦𑀁 𑀕𑀡𑀧𑁆𑀧𑀪𑀸𑀲𑀫𑀼𑀤𑀸𑀬𑁂𑀦 𑀲𑀫𑀼𑀚𑁆𑀚𑀮𑀲𑁄𑀪𑀸𑀲𑀫𑁆𑀧𑀦𑁆𑀦𑀁. 𑀲𑀼𑀯𑀡𑁆𑀡𑀯𑀮𑀬𑀦𑀼𑀧𑀼𑀭𑀸𑀤𑀺𑀲𑀗𑁆𑀖𑀝𑁆𑀝𑀦𑀲𑀤𑁆𑀤𑀲𑀫𑁆𑀫𑀺𑀲𑁆𑀲𑀺𑀢𑀓𑀣𑀺𑀢𑀳𑀲𑀺𑀢- 𑀫𑀥𑀼𑀭𑀲𑁆𑀲𑀭𑀕𑁂𑀳𑀚𑀦𑀯𑀺𑀘𑀭𑀺𑀢𑀲𑁆𑀲𑀸𑀢𑀺 𑀲𑀼𑀯𑀡𑁆𑀡𑀫𑀬𑀦𑀺𑀬𑀼𑀭𑀧𑀸𑀤𑀓𑀝𑀓𑀸𑀤𑀻𑀦𑀁 ¶ 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀖𑀝𑁆𑀝𑀦𑁂𑀦 𑀚𑀦𑀺𑀢𑀲𑀤𑁆𑀤𑁂𑀳𑀺 𑀲𑀫𑁆𑀫𑀺𑀲𑁆𑀲𑀺𑀢𑀓𑀣𑀺𑀢𑀲𑀭𑀳𑀲𑀺𑀢𑀲𑀭𑀲𑀗𑁆𑀔𑀸𑀢𑁂𑀦 𑀫𑀥𑀼𑀭𑀲𑁆𑀲𑀭𑁂𑀦 𑀲𑀫𑁆𑀧𑀦𑁆𑀦𑀸𑀦𑀁 𑀕𑁂𑀳𑀦𑀺𑀯𑀸𑀲𑀻𑀦𑀁 𑀦𑀭𑀦𑀸𑀭𑀻𑀦𑀁 𑀯𑀺𑀘𑀭𑀺𑀢𑀝𑁆𑀞𑀸𑀦𑀪𑀽𑀢𑀲𑁆𑀲. 𑀉𑀴𑀸𑀭𑀺𑀲𑁆𑀲𑀭𑀺𑀬𑀯𑀺𑀪𑀯𑀲𑁄𑀪𑀺𑀢𑀲𑁆𑀲𑀸𑀢𑀺 𑀉𑀴𑀸𑀭𑀢𑀸𑀲𑀫𑁆𑀧𑀦𑁆𑀦𑀚𑀦𑀇𑀲𑁆𑀲𑀭𑀺𑀬𑀲𑀫𑁆𑀧𑀦𑁆𑀦𑀚𑀦𑀯𑀺𑀪𑀯𑀲𑀫𑁆𑀧𑀦𑁆𑀦𑀚𑀦𑁂𑀳𑀺, 𑀢𑀦𑁆𑀦𑀺𑀯𑀸𑀲𑀻𑀦𑀁 𑀯𑀸 𑀦𑀭𑀦𑀸𑀭𑀻𑀦𑀁 𑀉𑀢𑁆𑀢𑀫𑀸𑀥𑀺𑀧𑀘𑁆𑀘𑀪𑁄𑀕𑁂𑀳𑀺 𑀲𑁄𑀪𑀺𑀢𑀲𑁆𑀲. 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀼𑀢𑁆𑀢𑀸𑀧𑀯𑀸𑀴𑀸𑀤𑀺𑀚𑀼𑀢𑀺𑀯𑀺𑀲𑁆𑀲𑀭𑀯𑀺𑀚𑁆𑀚𑁄𑀢𑀺𑀢𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀯𑀺𑀲𑀸𑀮 𑀤𑁆𑀯𑀸𑀭𑀩𑀸𑀳𑀦𑁆𑀢𑀺 𑀲𑀼𑀯𑀡𑁆𑀡𑀭𑀚𑀢𑀦𑀸𑀦𑀸𑀫𑀡𑀺𑀫𑀼𑀢𑁆𑀢𑀸𑀧𑀯𑀸𑀴𑀸𑀤𑀻𑀦𑀁 𑀚𑀼𑀢𑀻𑀳𑀺 𑀧𑀪𑀲𑁆𑀲𑀭𑀯𑀺𑀚𑁆𑀚𑁄𑀢𑀺𑀢𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀯𑀺𑀢𑁆𑀣𑀢𑀤𑁆𑀯𑀸𑀭𑀩𑀸𑀳𑀁.

𑀢𑀺𑀯𑀺𑀥𑀲𑀻𑀮𑀸𑀤𑀺𑀤𑀲𑁆𑀲𑀦𑀯𑀲𑁂𑀦 𑀩𑀼𑀤𑁆𑀥𑀲𑁆𑀲 𑀕𑀼𑀡𑀸𑀦𑀼𑀪𑀸𑀯𑀁 𑀲𑀫𑁆𑀫𑀸 𑀲𑀽𑀘𑁂𑀢𑀻𑀢𑀺 𑀩𑀼𑀤𑁆𑀥𑀕𑀼𑀡𑀸𑀦𑀼𑀪𑀸𑀯𑀲𑀁𑀲𑀽𑀘𑀓𑀁, 𑀢𑀲𑁆𑀲. 𑀓𑀸𑀮𑁄 𑀘 𑀤𑁂𑀲𑁄 𑀘 𑀤𑁂𑀲𑀓𑁄 𑀘 𑀯𑀢𑁆𑀣𑀼 𑀘 𑀧𑀭𑀺𑀲𑀸 𑀘, 𑀢𑀸𑀲𑀁 𑀅𑀧𑀤𑁂𑀲𑁂𑀦 𑀦𑀺𑀤𑀲𑁆𑀲𑀦𑁂𑀦 𑀧𑀝𑀺𑀫𑀡𑁆𑀟𑀺𑀢𑀁 𑀢𑀣𑀸.

𑀓𑀺𑀫𑀢𑁆𑀣𑀁 𑀧𑀦𑁂𑀢𑁆𑀣 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑁂 𑀓𑀭𑀺𑀬𑀫𑀸𑀦𑁂 𑀦𑀺𑀤𑀸𑀦𑀯𑀘𑀦𑀁 𑀯𑀼𑀢𑁆𑀢𑀁, 𑀦𑀦𑀼 𑀪𑀕𑀯𑀢𑀸 𑀪𑀸𑀲𑀺𑀢𑀯𑀘𑀦𑀲𑁆𑀲𑁂𑀯 𑀲𑀗𑁆𑀕𑀳𑁄 𑀓𑀸𑀢𑀩𑁆𑀩𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀤𑁂𑀲𑀦𑀸𑀬 𑀞𑀺𑀢𑀺𑀅𑀲𑀫𑁆𑀫𑁄𑀲𑀲𑀤𑁆𑀥𑁂𑀬𑁆𑀬𑀪𑀸𑀯𑀲𑀫𑁆𑀧𑀸𑀤𑀦𑀢𑁆𑀣𑀁. 𑀓𑀸𑀮𑀤𑁂𑀲𑀤𑁂𑀲𑀓𑀯𑀢𑁆𑀣𑀼𑀧𑀭𑀺𑀲𑀸𑀧𑀤𑁂𑀲𑁂𑀳𑀺 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀸 𑀳𑀺 𑀤𑁂𑀲𑀦𑀸 𑀘𑀺𑀭𑀝𑁆𑀞𑀺𑀢𑀺𑀓𑀸 𑀳𑁄𑀢𑀺, 𑀅𑀲𑀫𑁆𑀫𑁄𑀲𑀥𑀫𑁆𑀫𑀸, 𑀲𑀤𑁆𑀥𑁂𑀬𑁆𑀬𑀸 𑀘 𑀤𑁂𑀲𑀓𑀸𑀮𑀯𑀢𑁆𑀣𑀼𑀳𑁂𑀢𑀼𑀦𑀺𑀫𑀺𑀢𑁆𑀢𑁂𑀳𑀺 𑀉𑀧𑀦𑀺𑀩𑀦𑁆𑀥𑁄 𑀯𑀺𑀬 𑀯𑁄𑀳𑀸𑀭𑀯𑀺𑀦𑀺𑀘𑁆𑀙𑀬𑁄, 𑀢𑁂𑀦𑁂𑀯 𑀘𑀸𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 ‘‘𑀩𑁆𑀭𑀳𑁆𑀫𑀚𑀸𑀮𑀁 𑀆𑀯𑀼𑀲𑁄 𑀆𑀦𑀦𑁆𑀤 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁪𑁩𑁯) 𑀤𑁂𑀲𑀸𑀤𑀺𑀧𑀼𑀘𑁆𑀙𑀸𑀲𑀼 𑀓𑀢𑀸𑀲𑀼 𑀢𑀸𑀲𑀁 𑀯𑀺𑀲𑁆𑀲𑀚𑁆𑀚𑀦𑀁 ¶ 𑀓𑀭𑁄𑀦𑁆𑀢𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀦𑀺𑀤𑀸𑀦𑀁 𑀪𑀸𑀲𑀺𑀢𑀦𑁆𑀢𑀺 𑀢𑀤𑁂𑀯𑀺𑀥𑀸𑀧𑀺 𑀯𑀼𑀢𑁆𑀢𑀁 ‘‘𑀓𑀸𑀮𑀤𑁂𑀲𑀤𑁂𑀲𑀓𑀯𑀢𑁆𑀣𑀼𑀧𑀭𑀺𑀲𑀸𑀧𑀤𑁂𑀲𑀧𑀝𑀺𑀫𑀡𑁆𑀟𑀺𑀢𑀁 𑀦𑀺𑀤𑀸𑀦’’𑀦𑁆𑀢𑀺.

𑀅𑀧𑀺𑀘 𑀲𑀢𑁆𑀣𑀼𑀲𑀫𑁆𑀧𑀢𑁆𑀢𑀺𑀧𑀓𑀸𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦𑀁. 𑀢𑀣𑀸𑀕𑀢𑀲𑁆𑀲 𑀳𑀺 𑀪𑀕𑀯𑀢𑁄 𑀧𑀼𑀩𑁆𑀩-𑀭𑀘𑀦𑀸-𑀦𑀼𑀫𑀸𑀦𑀸𑀕𑀫-𑀢𑀓𑁆𑀓𑀸𑀪𑀸𑀯𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁆𑀢𑀲𑀺𑀤𑁆𑀥𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑁂𑀦 𑀳𑀺𑀲𑁆𑀲 𑀧𑀼𑀭𑁂𑀢𑀭𑀁 𑀭𑀘𑀦𑀸𑀬, ‘‘𑀏𑀯𑀫𑁆𑀧𑀺 𑀦𑀸𑀫 𑀪𑀯𑁂𑀬𑁆𑀬𑀸’’𑀢𑀺 𑀅𑀦𑀼𑀫𑀸𑀦𑀲𑁆𑀲, 𑀆𑀕𑀫𑀦𑁆𑀢𑀭𑀁 𑀦𑀺𑀲𑁆𑀲𑀸𑀬 𑀧𑀭𑀺𑀯𑀺𑀢𑀓𑁆𑀓𑀲𑁆𑀲 𑀘 𑀅𑀪𑀸𑀯𑁄 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑀢𑀸𑀬 𑀏𑀓𑀧𑁆𑀧𑀫𑀸𑀡𑀢𑁆𑀢𑀸 𑀜𑁂𑀬𑁆𑀬𑀥𑀫𑁆𑀫𑁂𑀲𑀼. 𑀢𑀣𑀸 𑀆𑀘𑀭𑀺𑀬𑀫𑀼𑀝𑁆𑀞𑀺𑀥𑀫𑁆𑀫𑀫𑀘𑁆𑀙𑀭𑀺𑀬𑀲𑀸𑀲𑀦𑀲𑀸𑀯𑀓𑀸𑀦𑀼𑀭𑁄𑀥𑀪𑀸𑀯𑀢𑁄 𑀔𑀻𑀡𑀸𑀲𑀯𑀢𑁆𑀢𑀲𑀺𑀤𑁆𑀥𑀺. 𑀔𑀻𑀡𑀸𑀲𑀯𑀢𑀸𑀬 𑀳𑀺 𑀆𑀘𑀭𑀺𑀬𑀫𑀼𑀝𑁆𑀞𑀺𑀆𑀤𑀻𑀦𑀫𑀪𑀸𑀯𑁄, 𑀯𑀺𑀲𑀼𑀤𑁆𑀥𑀸 𑀘 𑀧𑀭𑀸𑀦𑀼𑀕𑁆𑀕𑀳𑀧𑁆𑀧𑀯𑀢𑁆𑀢𑀺. 𑀇𑀢𑀺 𑀤𑁂𑀲𑀓𑀲𑀁𑀓𑀺𑀮𑁂𑀲𑀪𑀽𑀢𑀸𑀦𑀁 𑀤𑀺𑀝𑁆𑀞𑀺𑀲𑀻𑀮𑀲𑀫𑁆𑀧𑀢𑁆𑀢𑀺𑀤𑀽𑀲𑀓𑀸𑀦𑀁 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀁 𑀅𑀪𑀸𑀯𑀲𑀁𑀲𑀽𑀘𑀓𑁂𑀳𑀺 ¶ , 𑀜𑀸𑀡𑀧𑁆𑀧𑀳𑀸𑀦𑀲𑀫𑁆𑀧𑀤𑀸𑀪𑀺𑀩𑁆𑀬𑀜𑁆𑀚𑀦𑀓𑁂𑀳𑀺 𑀘 𑀲𑀫𑁆𑀩𑀼𑀤𑁆𑀥𑀯𑀺𑀲𑀼𑀤𑁆𑀥𑀪𑀸𑀯𑁂𑀳𑀺 𑀧𑀼𑀭𑀺𑀫𑀯𑁂𑀲𑀸𑀭𑀚𑁆𑀚𑀤𑁆𑀯𑀬𑀲𑀺𑀤𑁆𑀥𑀺. 𑀢𑀢𑁄𑀬𑁂𑀯 𑀘 𑀅𑀦𑁆𑀢𑀭𑀸𑀬𑀺𑀓𑀦𑀺𑀬𑁆𑀬𑀸𑀦𑀺𑀓𑁂𑀲𑀼 𑀲𑀫𑁆𑀫𑁄𑀳𑀸𑀪𑀸𑀯𑀲𑀺𑀤𑁆𑀥𑀺𑀢𑁄 𑀧𑀘𑁆𑀙𑀺𑀫𑀯𑁂𑀲𑀸𑀭𑀚𑁆𑀚𑀤𑁆𑀯𑀬𑀲𑀺𑀤𑁆𑀥𑀻𑀢𑀺 𑀪𑀕𑀯𑀢𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀲𑀫𑀦𑁆𑀦𑀸𑀕𑀫𑁄, 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀘 𑀦𑀺𑀤𑀸𑀦𑀯𑀘𑀦𑁂𑀦 𑀧𑀓𑀸𑀲𑀺𑀢𑀸 𑀳𑁄𑀢𑀺 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀝𑀺𑀪𑀸𑀦𑁂𑀦 𑀥𑀫𑁆𑀫𑀤𑁂𑀲𑀦𑀸𑀤𑀻𑀧𑀦𑀢𑁄, ‘‘𑀚𑀸𑀦𑀢𑀸 𑀧𑀲𑁆𑀲𑀢𑀸’’𑀢𑀺𑀆𑀤𑀺𑀯𑀘𑀦𑀢𑁄 𑀘, 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀢𑁆𑀣𑀼𑀲𑀫𑁆𑀧𑀢𑁆𑀢𑀺𑀧𑀓𑀸𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦’’𑀦𑁆𑀢𑀺.

𑀅𑀧𑀺𑀘 𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀧𑀓𑀸𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦𑀁. 𑀜𑀸𑀡𑀓𑀭𑀼𑀡𑀸𑀧𑀭𑀺𑀕𑁆𑀕𑀳𑀺𑀢𑀲𑀩𑁆𑀩𑀓𑀺𑀭𑀺𑀬𑀲𑁆𑀲 𑀳𑀺 𑀪𑀕𑀯𑀢𑁄 𑀦𑀢𑁆𑀣𑀺 𑀦𑀺𑀭𑀢𑁆𑀣𑀺𑀓𑀸 𑀧𑀯𑀢𑁆𑀢𑀺, 𑀅𑀢𑁆𑀢𑀳𑀺𑀢𑀢𑁆𑀣𑀸 𑀯𑀸, 𑀢𑀲𑁆𑀫𑀸 𑀧𑀭𑁂𑀲𑀁𑀬𑁂𑀯 𑀳𑀺𑀢𑀸𑀬 𑀧𑀯𑀢𑁆𑀢𑀲𑀩𑁆𑀩𑀓𑀺𑀭𑀺𑀬𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀓𑀮𑀫𑁆𑀧𑀺 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀁 𑀬𑀣𑀸𑀧𑀯𑀢𑁆𑀢𑀁 𑀯𑀼𑀘𑁆𑀘𑀫𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀬𑀣𑀸𑀭𑀳𑀁 𑀲𑀢𑁆𑀢𑀸𑀦𑀁 𑀅𑀦𑀼𑀲𑀸𑀲𑀦𑀝𑁆𑀞𑁂𑀦 𑀲𑀸𑀲𑀦𑀁, 𑀦 𑀓𑀩𑁆𑀩𑀭𑀘𑀦𑀸. 𑀢𑀬𑀺𑀤𑀁 𑀲𑀢𑁆𑀣𑀼 𑀘𑀭𑀺𑀢𑀁 𑀓𑀸𑀮𑀤𑁂𑀲𑀤𑁂𑀲𑀓𑀯𑀢𑁆𑀣𑀼𑀧𑀭𑀺𑀲𑀸𑀧𑀤𑁂𑀲𑁂𑀳𑀺 𑀲𑀤𑁆𑀥𑀺𑀁 𑀢𑀢𑁆𑀣 𑀢𑀢𑁆𑀣 𑀦𑀺𑀤𑀸𑀦𑀯𑀘𑀦𑁂𑀳𑀺 𑀬𑀣𑀸𑀲𑀫𑁆𑀪𑀯𑀁 𑀧𑀓𑀸𑀲𑀻𑀬𑀢𑀺. 𑀅𑀣 𑀯𑀸 𑀲𑀢𑁆𑀣𑀼𑀦𑁄 𑀧𑀫𑀸𑀡𑀪𑀸𑀯𑀧𑁆𑀧𑀓𑀸𑀲𑀦𑁂𑀦 𑀲𑀸𑀲𑀦𑀲𑁆𑀲 𑀧𑀫𑀸𑀡𑀪𑀸𑀯𑀧𑁆𑀧𑀓𑀸𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦𑀁, 𑀢𑀜𑁆𑀘𑀲𑁆𑀲 𑀧𑀫𑀸𑀡𑀪𑀸𑀯𑀤𑀲𑁆𑀲𑀦𑀁 ‘‘𑀪𑀕𑀯𑀸’’𑀢𑀺 𑀇𑀫𑀺𑀦𑀸 𑀢𑀣𑀸𑀕𑀢𑀲𑁆𑀲 𑀕𑀼𑀡𑀯𑀺𑀲𑀺𑀝𑁆𑀞𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑀪𑀸𑀯𑀤𑀻𑀧𑀦𑁂𑀦 𑀘𑁂𑀯 ‘‘𑀚𑀸𑀦𑀢𑀸 𑀧𑀲𑁆𑀲𑀢𑀸’’𑀢𑀺𑀆𑀤𑀺𑀦𑀸 𑀆𑀲𑀬𑀸𑀦𑀼𑀲𑀬𑀜𑀸𑀡𑀸𑀤𑀺𑀧𑀬𑁄𑀕𑀤𑀻𑀧𑀦𑁂𑀦 𑀘 𑀯𑀺𑀪𑀸𑀯𑀺𑀢𑀁 𑀳𑁄𑀢𑀺, 𑀇𑀤𑀫𑁂𑀢𑁆𑀣 𑀦𑀺𑀤𑀸𑀦𑀯𑀘𑀦𑀧𑀬𑁄𑀚𑀦𑀲𑁆𑀲 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀁. 𑀓𑁄 𑀳𑀺 𑀲𑀫𑀢𑁆𑀣𑁄 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 𑀪𑀸𑀲𑀺𑀢𑀲𑁆𑀲 𑀦𑀺𑀤𑀸𑀦𑀲𑁆𑀲 𑀧𑀬𑁄𑀚𑀦𑀸𑀦𑀺 𑀦𑀺𑀭𑀯𑀲𑁂𑀲𑀢𑁄 𑀯𑀺𑀪𑀸𑀯𑀺𑀢𑀼𑀦𑁆𑀢𑀺. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀤𑁂𑀲𑀦𑀸𑀘𑀺𑀭𑀝𑁆𑀞𑀺𑀢𑀢𑁆𑀣𑀁, 𑀅𑀲𑀫𑁆𑀫𑁄𑀲𑀸𑀬 𑀪𑀸𑀲𑀺𑀢𑀁;

𑀲𑀤𑁆𑀥𑀸𑀬 𑀘𑀸𑀧𑀺 𑀦𑀺𑀤𑀸𑀦𑀁, 𑀯𑁂𑀤𑁂𑀳𑁂𑀦 𑀬𑀲𑀲𑁆𑀲𑀺𑀦𑀸.

𑀲𑀢𑁆𑀣𑀼𑀲𑀫𑁆𑀧𑀢𑁆𑀢𑀺𑀬𑀸 ¶ 𑀘𑁂𑀯, 𑀲𑀸𑀲𑀦𑀲𑀫𑁆𑀧𑀤𑀸𑀬 𑀘;

𑀢𑀲𑁆𑀲 𑀧𑀫𑀸𑀡𑀪𑀸𑀯𑀲𑁆𑀲, 𑀤𑀲𑁆𑀲𑀦𑀢𑁆𑀣𑀫𑁆𑀧𑀺 𑀪𑀸𑀲𑀺𑀢’’𑀦𑁆𑀢𑀺.

𑀇𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀧𑀭𑀫𑀲𑀼𑀔𑀼𑀫𑀕𑀫𑁆𑀪𑀻𑀭𑀤𑀼𑀭𑀦𑀼𑀩𑁄𑀥𑀢𑁆𑀣𑀧𑀭𑀺𑀤𑀻𑀧𑀦𑀸𑀬 𑀲𑀼𑀯𑀺𑀫𑀮𑀯𑀺𑀧𑀼𑀮𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀚𑀦𑀦𑀸𑀬 𑀅𑀚𑁆𑀚𑀯𑀫𑀤𑁆𑀤𑀯𑀲𑁄𑀭𑀘𑁆𑀘𑀲𑀤𑁆𑀥𑀸𑀲𑀢𑀺𑀥𑀺𑀢𑀺𑀩𑀼𑀤𑁆𑀥𑀺𑀔𑀦𑁆𑀢𑀺𑀯𑀻𑀭𑀺𑀬𑀸𑀤𑀺𑀥𑀫𑁆𑀫𑀲𑀫𑀗𑁆𑀕𑀺𑀦𑀸 𑀲𑀸𑀝𑁆𑀞𑀓𑀣𑁂 𑀧𑀺𑀝𑀓𑀢𑁆𑀢𑀬𑁂 𑀅𑀲𑀗𑁆𑀕𑀸𑀲𑀁𑀳𑀻𑀭𑀯𑀺𑀲𑀸𑀭𑀤𑀜𑀸𑀡𑀘𑀸𑀭𑀺𑀦𑀸 𑀅𑀦𑁂𑀓𑀧𑁆𑀧𑀪𑁂𑀤𑀲𑀓𑀲𑀫𑀬𑀲𑀫𑀬𑀦𑁆𑀢𑀭𑀕𑀳𑀦𑀚𑁆𑀛𑁄𑀕𑀸𑀳𑀺𑀦𑀸 𑀫𑀳𑀸𑀕𑀡𑀺𑀦𑀸 𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁂𑀦 𑀜𑀸𑀡𑀸𑀪𑀺𑀯𑀁𑀲𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸𑀫𑀣𑁂𑀭𑁂𑀦 ¶ 𑀫𑀳𑀸𑀥𑀫𑁆𑀫𑀭𑀸𑀚𑀸𑀥𑀺𑀭𑀸𑀚𑀕𑀭𑀼𑀦𑀸 𑀓𑀢𑀸𑀬 𑀲𑀸𑀥𑀼𑀯𑀺𑀮𑀸𑀲𑀺𑀦𑀺𑀬𑀸 𑀦𑀸𑀫 𑀮𑀻𑀦𑀢𑁆𑀣𑀧𑀓𑀸𑀲𑀦𑀺𑀬𑀸 𑀅𑀩𑁆𑀪𑀦𑁆𑀢𑀭𑀦𑀺𑀤𑀸𑀦𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑀓𑀸𑀲𑀦𑀸.

𑀦𑀺𑀤𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀏𑀯𑀁 𑀅𑀩𑁆𑀪𑀦𑁆𑀢𑀭𑀦𑀺𑀤𑀸𑀦𑀲𑀁𑀯𑀡𑁆𑀡𑀦𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀁𑀯𑀡𑁆𑀡𑀦𑀁 𑀓𑀭𑁄𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑀸𑀯𑀺𑀭𑁄𑀥𑀺𑀦𑀻 𑀲𑀁𑀯𑀡𑁆𑀡𑀦𑀸 𑀓𑀫𑀸𑀦𑀢𑀺𑀓𑁆𑀓𑀫𑀦𑁂𑀦 𑀩𑁆𑀬𑀸𑀓𑀼𑀮𑀤𑁄𑀲𑀧𑁆𑀧𑀳𑀸𑀬𑀺𑀦𑀻, 𑀯𑀺𑀜𑁆𑀜𑀽𑀦𑀜𑁆𑀘 𑀘𑀺𑀢𑁆𑀢𑀸𑀭𑀸𑀥𑀺𑀦𑀻, 𑀆𑀕𑀢𑀪𑀸𑀭𑁄 𑀘 𑀅𑀯𑀲𑁆𑀲𑀁 𑀆𑀯𑀳𑀺𑀢𑀩𑁆𑀩𑁄𑀢𑀺 𑀲𑀁𑀯𑀡𑁆𑀡𑀓𑀲𑁆𑀲 𑀲𑀫𑁆𑀧𑀢𑁆𑀢𑀪𑀸𑀭𑀸𑀯𑀳𑀦𑁂𑀦 𑀧𑀡𑁆𑀟𑀺𑀢𑀸𑀘𑀸𑀭𑀲𑀫𑀢𑀺𑀓𑁆𑀓𑀫𑀸𑀪𑀸𑀯𑀯𑀺𑀪𑀸𑀯𑀺𑀦𑀻, 𑀢𑀲𑁆𑀫𑀸 𑀢𑀤𑀸𑀯𑀺𑀓𑀭𑀡𑀲𑀸𑀥𑀓𑀁 𑀲𑀁𑀯𑀡𑁆𑀡𑀦𑁄𑀓𑀸𑀲𑀯𑀺𑀘𑀸𑀭𑀡𑀁 𑀓𑀸𑀢𑀼𑀫𑀸𑀳 ‘‘𑀇𑀤𑀸𑀦𑀻’’𑀢𑀺𑀆𑀤𑀺. 𑀦𑀺𑀓𑁆𑀔𑀺𑀢𑁆𑀢𑀲𑁆𑀲𑀸𑀢𑀺 𑀤𑁂𑀲𑀺𑀢𑀲𑁆𑀲, ‘‘𑀤𑁂𑀲𑀦𑀸 𑀦𑀺𑀓𑁆𑀔𑁂𑀧𑁄’’𑀢𑀺 𑀳𑀺 𑀏𑀢𑀁 𑀅𑀢𑁆𑀣𑀢𑁄 𑀪𑀺𑀦𑁆𑀦𑀫𑁆𑀧𑀺 𑀲𑀭𑀽𑀧𑀢𑁄 𑀏𑀓𑀫𑁂𑀯, 𑀤𑁂𑀲𑀦𑀸𑀧𑀺 𑀳𑀺 𑀤𑁂𑀲𑁂𑀢𑀩𑁆𑀩𑀲𑁆𑀲 𑀲𑀻𑀮𑀸𑀤𑀺𑀅𑀢𑁆𑀣𑀲𑁆𑀲 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑁂𑀲𑀼 𑀦𑀺𑀓𑁆𑀔𑀺𑀧𑀦𑀢𑁄 ‘‘𑀦𑀺𑀓𑁆𑀔𑁂𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀦𑀦𑀼 𑀲𑀼𑀢𑁆𑀢𑀫𑁂𑀯 𑀲𑀁𑀯𑀡𑁆𑀡𑀻𑀬𑀢𑀻𑀢𑀺 𑀆𑀳 ‘‘𑀲𑀸 𑀧𑀦𑁂𑀲𑀸’’𑀢𑀺𑀆𑀤𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀁 𑀯𑀺𑀘𑀸𑀭𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀸 𑀲𑀁𑀯𑀡𑁆𑀡𑀦𑀸 ‘‘𑀅𑀬𑀁 𑀤𑁂𑀲𑀦𑀸 𑀏𑀯𑀁𑀲𑀫𑀼𑀝𑁆𑀞𑀸𑀦𑀸’’𑀢𑀺 𑀲𑀼𑀢𑁆𑀢𑀲𑁆𑀲 𑀲𑀫𑁆𑀫𑀤𑁂𑀯 𑀦𑀺𑀤𑀸𑀦𑀧𑀭𑀺𑀚𑁆𑀛𑀸𑀦𑁂𑀦 𑀢𑀩𑁆𑀩𑀡𑁆𑀡𑀦𑀸𑀬 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀧𑀸𑀓𑀝𑀸 𑀳𑁄𑀢𑀺, 𑀢𑀲𑁆𑀫𑀸 𑀢𑀤𑁂𑀯 𑀲𑀸𑀥𑀸𑀭𑀡𑀢𑁄 𑀧𑀞𑀫𑀁 𑀯𑀺𑀘𑀸𑀭𑀬𑀺𑀲𑁆𑀲𑀸𑀫𑀸𑀢𑀺. 𑀬𑀸 𑀳𑀺 𑀲𑀸 𑀓𑀣𑀸 𑀲𑀼𑀢𑁆𑀢𑀢𑁆𑀣𑀲𑀁𑀯𑀡𑁆𑀡𑀦𑀸𑀧𑀸𑀓𑀝𑀓𑀸𑀭𑀺𑀦𑀻, 𑀲𑀸 𑀲𑀩𑁆𑀩𑀸𑀧𑀺 𑀲𑀁𑀯𑀡𑁆𑀡𑀓𑁂𑀦 𑀯𑀢𑁆𑀢𑀩𑁆𑀩𑀸. 𑀢𑀤𑀢𑁆𑀣𑀯𑀺𑀚𑀸𑀦𑀦𑀼𑀧𑀸𑀬𑀢𑁆𑀢𑀸 𑀘 𑀲𑀸 𑀧𑀭𑀺𑀬𑀸𑀬𑁂𑀦 𑀲𑀁𑀯𑀡𑁆𑀡𑀦𑀸𑀬𑁂𑀯𑀸𑀢𑀺. 𑀇𑀥 𑀧𑀦 𑀢𑀲𑁆𑀫𑀺𑀁 𑀯𑀺𑀘𑀸𑀭𑀺𑀢𑁂 𑀬𑀲𑁆𑀲𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀇𑀤𑀁 𑀲𑀼𑀢𑁆𑀢𑀁 𑀦𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀲𑀸 𑀯𑀺𑀪𑀸𑀕𑀯𑀲𑁂𑀦 ‘‘𑀫𑀫𑀁 𑀯𑀸 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁫), ‘‘𑀅𑀧𑁆𑀧𑀫𑀢𑁆𑀢𑀓𑀁 𑀔𑁄 𑀧𑀦𑁂𑀢’’𑀦𑁆𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁭), ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁮) 𑀘 𑀯𑀼𑀢𑁆𑀢𑀸𑀦𑀁 𑀲𑀼𑀢𑁆𑀢𑀧𑀤𑁂𑀲𑀸𑀦𑀁 𑀲𑀁𑀯𑀡𑁆𑀡𑀦𑀸 𑀯𑀼𑀘𑁆𑀘𑀫𑀸𑀦𑀸 𑀢𑀁𑀢𑀁𑀅𑀦𑀼𑀲𑀦𑁆𑀥𑀺𑀤𑀲𑁆𑀲𑀦𑀲𑀼𑀔𑀢𑀸𑀬 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀬𑀣𑀸 𑀅𑀦𑁂𑀓𑀲𑀢𑀅𑀦𑁂𑀓𑀲𑀳𑀲𑁆𑀲𑀪𑁂𑀤𑀸𑀦𑀺𑀧𑀺 𑀲𑀼𑀢𑁆𑀢𑀦𑁆𑀢𑀸𑀦𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀲𑀸𑀲𑀦𑀧𑀝𑁆𑀞𑀸𑀦𑀦𑀬𑁂𑀦 𑀲𑁄𑀴𑀲𑀯𑀺𑀥𑀪𑀸𑀯𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀺-𑀲𑀼𑀢𑁆𑀢-𑀦𑀺𑀓𑁆𑀔𑁂𑀧𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀪𑀸𑀯𑀦𑁆𑀢𑀺 𑀆𑀳 ‘‘𑀘𑀢𑁆𑀢𑀸𑀭𑁄 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸’’𑀢𑀺. 𑀦𑀦𑀼 𑀲𑀁𑀲𑀕𑁆𑀕𑀪𑁂𑀤𑁄𑀧𑀺 ¶ 𑀲𑀫𑁆𑀪𑀯𑀢𑀺, 𑀅𑀣 𑀓𑀲𑁆𑀫𑀸 ‘‘𑀘𑀢𑁆𑀢𑀸𑀭𑁄 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀲𑀁𑀲𑀕𑁆𑀕𑀪𑁂𑀤𑀲𑁆𑀲 𑀲𑀩𑁆𑀩𑀢𑁆𑀣 𑀅𑀮𑀩𑁆𑀪𑀫𑀸𑀦𑀢𑁆𑀢𑀸. 𑀅𑀢𑁆𑀢𑀚𑁆𑀛𑀸𑀲𑀬𑀲𑁆𑀲, 𑀳𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀘 𑀧𑀭𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀯𑀲𑀺𑀓𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀕𑁆𑀕𑀪𑁂𑀤𑁄 𑀲𑀫𑁆𑀪𑀯𑀢𑀺. ‘‘𑀅𑀢𑁆𑀢𑀚𑁆𑀛𑀸𑀲𑀬𑁄 ¶ 𑀘 𑀧𑀭𑀚𑁆𑀛𑀸𑀲𑀬𑁄 𑀘, 𑀅𑀢𑁆𑀢𑀚𑁆𑀛𑀸𑀲𑀬𑁄 𑀘 𑀧𑀼𑀘𑁆𑀙𑀸𑀯𑀲𑀺𑀓𑁄 𑀘, 𑀅𑀢𑁆𑀢𑀚𑁆𑀛𑀸𑀲𑀬𑁄 𑀘 𑀧𑀭𑀚𑁆𑀛𑀸𑀲𑀬𑁄 𑀘 𑀧𑀼𑀘𑁆𑀙𑀸𑀯𑀲𑀺𑀓𑁄 𑀘, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄 𑀘 𑀧𑀭𑀚𑁆𑀛𑀸𑀲𑀬𑁄 𑀘 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄 𑀘 𑀧𑀼𑀘𑁆𑀙𑀸𑀯𑀲𑀺𑀓𑁄 𑀘, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄 𑀘 𑀧𑀭𑀚𑁆𑀛𑀸𑀲𑀬𑁄 𑀘 𑀧𑀼𑀘𑁆𑀙𑀸𑀯𑀲𑀺𑀓𑁄 𑀘𑀸’’𑀢𑀺 𑀅𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀲𑀩𑁆𑀪𑀸𑀯𑀢𑁄. 𑀅𑀢𑁆𑀢𑀚𑁆𑀛𑀸𑀲𑀬𑀝𑁆𑀞𑀼𑀧𑁆𑀧𑀢𑁆𑀢𑀻𑀦𑀁 𑀧𑀦 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀕𑁆𑀕𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀦𑀺𑀭𑀯𑀲𑁂𑀲𑀁 𑀧𑀢𑁆𑀣𑀸𑀭𑀦𑀬𑁂𑀦 𑀲𑀁𑀲𑀕𑁆𑀕𑀪𑁂𑀤𑀲𑁆𑀲 𑀅𑀮𑀩𑁆𑀪𑀦𑀢𑁄 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀣 𑀯𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀅𑀢𑁆𑀢𑀚𑁆𑀛𑀸𑀲𑀬𑁂𑀦𑀧𑀺 𑀲𑀺𑀬𑀸 𑀲𑀁𑀲𑀕𑁆𑀕𑀪𑁂𑀤𑁄, 𑀢𑀤𑀦𑁆𑀢𑁄𑀕𑀥𑀢𑁆𑀢𑀸 𑀧𑀦 𑀲𑀁𑀲𑀕𑁆𑀕𑀯𑀲𑁂𑀦 𑀯𑀼𑀢𑁆𑀢𑀸𑀦𑀁 𑀲𑁂𑀲𑀦𑀺𑀓𑁆𑀔𑁂𑀧𑀸𑀦𑀁 𑀫𑀽𑀮𑀦𑀺𑀓𑁆𑀔𑁂𑀧𑁂𑀬𑁂𑀯 𑀲𑀦𑁆𑀥𑀸𑀬 ‘‘𑀘𑀢𑁆𑀢𑀸𑀭𑁄 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸’’𑀢𑀺 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀧𑀦 𑀅𑀢𑁆𑀣𑀯𑀺𑀓𑀧𑁆𑀧𑁂 𑀬𑀣𑀸𑀭𑀳𑀁 𑀏𑀓𑀓𑀤𑀼𑀓𑀢𑀺𑀓𑀘𑀢𑀼𑀓𑀯𑀲𑁂𑀦 𑀲𑀸𑀲𑀦𑀧𑀝𑁆𑀞𑀸𑀦𑀦𑀬𑁂𑀦 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸 𑀯𑀢𑁆𑀢𑀩𑁆𑀩𑀸𑀢𑀺 𑀦𑀬𑀫𑀢𑁆𑀢𑀁 𑀤𑀲𑁆𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀦𑀺𑀓𑁆𑀔𑀺𑀧𑀦𑀁 𑀓𑀣𑀦𑀁 𑀦𑀺𑀓𑁆𑀔𑁂𑀧𑁄, 𑀲𑀼𑀢𑁆𑀢𑀲𑁆𑀲 𑀦𑀺𑀓𑁆𑀔𑁂𑀧𑁄 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄, 𑀲𑀼𑀢𑁆𑀢𑀤𑁂𑀲𑀦𑀸𑀢𑀺 𑀅𑀢𑁆𑀣𑁄. 𑀦𑀺𑀓𑁆𑀔𑀺𑀧𑀻𑀬𑀢𑀻𑀢𑀺 𑀯𑀸 𑀦𑀺𑀓𑁆𑀔𑁂𑀧𑁄, 𑀲𑀼𑀢𑁆𑀢𑀫𑁂𑀯 𑀦𑀺𑀓𑁆𑀔𑁂𑀧𑁄 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄. 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁄 𑀅𑀢𑁆𑀢𑀚𑁆𑀛𑀸𑀲𑀬𑁄, 𑀲𑁄 𑀅𑀲𑁆𑀲 𑀅𑀢𑁆𑀣𑀺 𑀓𑀸𑀭𑀡𑀯𑀲𑁂𑀦𑀸𑀢𑀺 𑀅𑀢𑁆𑀢𑀚𑁆𑀛𑀸𑀲𑀬𑁄, 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁄 𑀯𑀸 𑀏𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀅𑀢𑁆𑀢𑀚𑁆𑀛𑀸𑀲𑀬𑁄. 𑀧𑀭𑀚𑁆𑀛𑀸𑀲𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀘𑁆𑀙𑀸𑀬 𑀯𑀲𑁄 𑀧𑀼𑀘𑁆𑀙𑀸𑀯𑀲𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀧𑀼𑀘𑁆𑀙𑀸𑀯𑀲𑀺𑀓𑁄. 𑀅𑀭𑀡𑀻𑀬𑀢𑁄 𑀅𑀯𑀕𑀦𑁆𑀢𑀩𑁆𑀩𑀢𑁄 𑀅𑀢𑁆𑀣𑁄 𑀯𑀼𑀘𑁆𑀘𑀢𑀺 𑀲𑀼𑀢𑁆𑀢𑀤𑁂𑀲𑀦𑀸𑀬 𑀯𑀢𑁆𑀣𑀼, 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀼𑀧𑁆𑀧𑀢𑁆𑀢𑀺, 𑀲𑀸 𑀏𑀯 𑀅𑀝𑁆𑀞𑀼𑀧𑁆𑀧𑀢𑁆𑀢𑀺 𑀢𑁆𑀣-𑀓𑀸𑀭𑀲𑁆𑀲 𑀝𑁆𑀞-𑀓𑀸𑀭𑀁 𑀓𑀢𑁆𑀯𑀸, 𑀲𑀸 𑀏𑀢𑀲𑁆𑀲 𑀅𑀢𑁆𑀣𑀺 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄. 𑀅𑀧𑀺𑀘 𑀦𑀺𑀓𑁆𑀔𑀺𑀧𑀻𑀬𑀢𑀺 𑀲𑀼𑀢𑁆𑀢𑀫𑁂𑀢𑁂𑀦𑀸𑀢𑀺 𑀦𑀺𑀓𑁆𑀔𑁂𑀧𑁄, 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀺𑀲𑀼𑀢𑁆𑀢𑀤𑁂𑀲𑀦𑀸𑀓𑀸𑀭𑀡𑀫𑁂𑀯. 𑀏𑀢𑀲𑁆𑀫𑀺𑀁 𑀧𑀦 𑀅𑀢𑁆𑀣𑀯𑀺𑀓𑀧𑁆𑀧𑁂 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁄 𑀅𑀢𑁆𑀢𑀚𑁆𑀛𑀸𑀲𑀬𑁄. 𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑁄 𑀧𑀭𑀚𑁆𑀛𑀸𑀲𑀬𑁄. 𑀧𑀼𑀘𑁆𑀙𑀻𑀬𑀢𑀻𑀢𑀺 𑀧𑀼𑀘𑁆𑀙𑀸, 𑀧𑀼𑀘𑁆𑀙𑀺𑀢𑀩𑁆𑀩𑁄 𑀅𑀢𑁆𑀣𑁄. 𑀢𑀲𑁆𑀲𑀸 𑀧𑀼𑀘𑁆𑀙𑀸𑀬 𑀯𑀲𑁂𑀦 𑀧𑀯𑀢𑁆𑀢𑀁 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀯𑀘𑀦𑀁 𑀧𑀼𑀘𑁆𑀙𑀸𑀯𑀲𑀺𑀓𑀁. 𑀢𑀤𑁂𑀯 𑀦𑀺𑀓𑁆𑀔𑁂𑀧𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀘𑁆𑀙𑀸𑀯𑀲𑀺𑀓𑁄’’𑀢𑀺. 𑀯𑀼𑀢𑁆𑀢𑀦𑀬𑁂𑀦 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑁂𑀯 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄𑀢𑀺 𑀏𑀯𑀁 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀏𑀢𑁆𑀣 𑀘 𑀧𑀭𑁂𑀲𑀁 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀸𑀤𑀺𑀓𑀸𑀭𑀡𑀁 𑀦𑀺𑀭𑀧𑁂𑀓𑁆𑀔𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂𑀦𑁂𑀯 𑀥𑀫𑁆𑀫𑀢𑀦𑁆𑀢𑀺𑀞𑀧𑀦𑀢𑁆𑀣𑀁 𑀧𑀯𑀢𑁆𑀢𑀺𑀢𑀤𑁂𑀲𑀦𑀢𑁆𑀢𑀸 𑀅𑀢𑁆𑀢𑀚𑁆𑀛𑀸𑀲𑀬𑀲𑁆𑀲 𑀯𑀺𑀲𑀼𑀁 𑀦𑀺𑀓𑁆𑀔𑁂𑀧𑀪𑀸𑀯𑁄 𑀬𑀼𑀢𑁆𑀢𑁄. 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂𑀦𑁂𑀯 ¶ 𑀓𑀣𑁂𑀢𑀻’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁫). 𑀧𑀭𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀯𑀲𑀺𑀓𑀸𑀦𑀁 𑀧𑀦 𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀦𑀁 𑀤𑁂𑀲𑀦𑀸𑀦𑀺𑀫𑀺𑀢𑁆𑀢𑀪𑀽𑀢𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀁 𑀧𑀯𑀢𑁆𑀢𑀢𑁆𑀢𑀸 𑀓𑀣𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁂 𑀅𑀦𑀯𑀭𑁄𑀥𑁄 𑀲𑀺𑀬𑀸, 𑀧𑀼𑀘𑁆𑀙𑀸𑀯𑀲𑀺𑀓𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀸𑀦𑀁 𑀯𑀸 𑀧𑀭𑀚𑁆𑀛𑀸𑀲𑀬𑀸𑀦𑀼𑀭𑁄𑀥𑁂𑀦 𑀧𑀯𑀢𑁆𑀢𑀺𑀢𑀤𑁂𑀲𑀦𑀢𑁆𑀢𑀸 𑀓𑀣𑀁 𑀧𑀭𑀚𑁆𑀛𑀸𑀲𑀬𑁂 ¶ 𑀅𑀦𑀯𑀭𑁄𑀥𑁄 𑀲𑀺𑀬𑀸𑀢𑀺 𑀦 𑀘𑁄𑀤𑁂𑀢𑀩𑁆𑀩𑀫𑁂𑀢𑀁. 𑀧𑀭𑁂𑀲𑀜𑁆𑀳𑀺 𑀅𑀪𑀺𑀦𑀻𑀳𑀸𑀭𑀧𑀭𑀺𑀧𑀼𑀘𑁆𑀙𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀲𑁆𑀲𑁂𑀯 𑀲𑀼𑀢𑁆𑀢𑀤𑁂𑀲𑀦𑀸𑀓𑀸𑀭𑀡𑀼𑀧𑁆𑀧𑀸𑀤𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀕𑀳𑀺𑀢𑀢𑁆𑀢𑀸 𑀧𑀭𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀯𑀲𑀺𑀓𑀸𑀦𑀁 𑀯𑀺𑀲𑀼𑀁 𑀕𑀳𑀡𑀁. 𑀢𑀣𑀸 𑀳𑀺 𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀸𑀤𑀻𑀦𑀁 (𑀫. 𑀦𑀺. 𑁧.𑁨𑁯) 𑀆𑀫𑀺𑀲𑀼𑀧𑁆𑀧𑀸𑀤𑀸𑀤𑀺𑀤𑁂𑀲𑀦𑀸𑀦𑀺𑀫𑀺𑀢𑁆𑀢𑀁 ‘‘𑀅𑀝𑁆𑀞𑀼𑀧𑁆𑀧𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀭𑁂𑀲𑀁 𑀧𑀼𑀘𑁆𑀙𑀁 𑀯𑀺𑀦𑀸 𑀅𑀚𑁆𑀛𑀸𑀲𑀬𑀫𑁂𑀯 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀤𑁂𑀲𑀺𑀢𑁄 𑀧𑀭𑀚𑁆𑀛𑀸𑀲𑀬𑁄. 𑀧𑀼𑀘𑁆𑀙𑀸𑀯𑀲𑁂𑀦 𑀤𑁂𑀲𑀺𑀢𑁄 𑀧𑀼𑀘𑁆𑀙𑀸𑀯𑀲𑀺𑀓𑁄𑀢𑀺 𑀧𑀸𑀓𑀝𑁄𑀯𑀸𑀬𑀫𑀢𑁆𑀣𑁄.

𑀅𑀦𑀚𑁆𑀛𑀺𑀝𑁆𑀞𑁄𑀢𑀺 𑀧𑀼𑀘𑁆𑀙𑀸𑀤𑀺𑀦𑀸 𑀅𑀦𑀚𑁆𑀛𑁂𑀲𑀺𑀢𑁄 𑀅𑀬𑀸𑀘𑀺𑀢𑁄, 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂𑀦𑁂𑀯 𑀓𑀣𑁂𑀢𑀺 𑀥𑀫𑁆𑀫𑀢𑀦𑁆𑀢𑀺𑀞𑀧𑀦𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀳𑀸𑀭𑁄𑀢𑀺 𑀆𑀯𑀴𑀺 𑀬𑀣𑀸 ‘‘𑀫𑀼𑀢𑁆𑀢𑀸𑀳𑀸𑀭𑁄’’𑀢𑀺, 𑀲𑁆𑀯𑁂𑀯 𑀳𑀸𑀭𑀓𑁄, 𑀲𑀫𑁆𑀫𑀧𑁆𑀧𑀥𑀸𑀦𑀲𑀼𑀢𑁆𑀢𑀦𑁆𑀢𑀸𑀦𑀁 𑀳𑀸𑀭𑀓𑁄 𑀢𑀣𑀸. 𑀅𑀦𑀼𑀧𑀼𑀩𑁆𑀩𑁂𑀦 𑀳𑀺 𑀲𑀁𑀬𑀼𑀢𑁆𑀢𑀓𑁂 𑀦𑀺𑀤𑁆𑀤𑀺𑀝𑁆𑀞𑀸𑀦𑀁 𑀲𑀫𑁆𑀫𑀧𑁆𑀧𑀥𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁 𑀲𑀼𑀢𑁆𑀢𑀦𑁆𑀢𑀸𑀦𑀁 𑀆𑀯𑀴𑀺 ‘‘𑀲𑀫𑁆𑀫𑀧𑁆𑀧𑀥𑀸𑀦𑀲𑀼𑀢𑁆𑀢𑀦𑁆𑀢𑀳𑀸𑀭𑀓𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸 𑀇𑀤𑁆𑀥𑀺𑀧𑀸𑀤𑀳𑀸𑀭𑀓𑀸𑀤𑀺. 𑀇𑀤𑁆𑀥𑀺𑀧𑀸𑀤𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀲𑀼𑀢𑁆𑀢𑀦𑁆𑀢𑀳𑀸𑀭𑀓𑁄𑀢𑀺 𑀧𑀼𑀩𑁆𑀩𑀧𑀤𑁂𑀲𑀼 𑀧𑀭𑀧𑀤𑀮𑁄𑀧𑁄, 𑀤𑁆𑀯𑀦𑁆𑀤𑀕𑀩𑁆𑀪𑀲𑀫𑀸𑀲𑁄 𑀯𑀸 𑀏𑀲𑁄, 𑀧𑁂𑀬𑁆𑀬𑀸𑀮𑀦𑀺𑀤𑁆𑀤𑁂𑀲𑁄 𑀯𑀸. 𑀢𑁂𑀲𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀲𑀼𑀢𑁆𑀢𑀸𑀦𑀁.

𑀧𑀭𑀺𑀧𑀓𑁆𑀓𑀸𑀢𑀺 𑀧𑀭𑀺𑀡𑀢𑀸. 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸𑀢𑀺 𑀅𑀭𑀳𑀢𑁆𑀢𑀨𑀮𑀁 𑀧𑀭𑀺𑀧𑀸𑀘𑁂𑀦𑁆𑀢𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀬𑁄 𑀥𑀫𑁆𑀫𑀸. 𑀔𑀬𑁂𑀢𑀺 𑀔𑀬𑀦𑀢𑁆𑀣𑀁, 𑀔𑀬𑀓𑀸𑀭𑀡𑀪𑀽𑀢𑀸𑀬 𑀯𑀸 𑀥𑀫𑁆𑀫𑀤𑁂𑀲𑀦𑀸𑀬. 𑀅𑀚𑁆𑀛𑀸𑀲𑀬𑀦𑁆𑀢𑀺 𑀅𑀥𑀺𑀫𑀼𑀢𑁆𑀢𑀺𑀁. 𑀔𑀦𑁆𑀢𑀺𑀦𑁆𑀢𑀺 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀁. 𑀫𑀦𑀦𑁆𑀢𑀺 𑀘𑀺𑀢𑁆𑀢𑀁. 𑀅𑀪𑀺𑀦𑀻𑀳𑀸𑀭𑀦𑁆𑀢𑀺 𑀧𑀡𑀺𑀥𑀸𑀦𑀁. 𑀩𑀼𑀚𑁆𑀛𑀦𑀪𑀸𑀯𑀦𑁆𑀢𑀺 𑀩𑀼𑀚𑁆𑀛𑀦𑀲𑀪𑀸𑀯𑀁, 𑀩𑀼𑀚𑁆𑀛𑀦𑀸𑀓𑀸𑀭𑀁 𑀯𑀸. 𑀅𑀯𑁂𑀓𑁆𑀔𑀺𑀢𑁆𑀯𑀸𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸, 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀸.

𑀘𑀢𑁆𑀢𑀸𑀭𑁄 𑀯𑀡𑁆𑀡𑀸𑀢𑀺 𑀘𑀢𑁆𑀢𑀸𑀭𑀺 𑀓𑀼𑀮𑀸𑀦𑀺, 𑀘𑀢𑁆𑀢𑀸𑀭𑁄 𑀯𑀸 𑀭𑀽𑀧𑀸𑀤𑀺𑀧𑀫𑀸𑀡𑀸 𑀲𑀢𑁆𑀢𑀸. 𑀫𑀳𑀸𑀭𑀸𑀚𑀸𑀦𑁄𑀢𑀺 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀤𑁂𑀯𑀸. 𑀯𑀼𑀘𑁆𑀘𑀦𑁆𑀢𑀺 𑀓𑀺𑀁, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀓𑀺𑀦𑁆𑀢𑀺 𑀅𑀢𑁆𑀣𑁄.

𑀓𑀲𑁆𑀫𑀸𑀢𑀺 𑀆𑀳 ‘‘𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀳𑀻’’𑀢𑀺𑀆𑀤𑀺. 𑀯𑀡𑁆𑀡𑀸𑀯𑀡𑁆𑀡𑁂𑀢𑀺 𑀦𑀺𑀫𑀺𑀢𑁆𑀢𑁂 𑀪𑀼𑀫𑁆𑀫𑀁, 𑀯𑀡𑁆𑀡𑀲𑀤𑁆𑀤𑁂𑀦 𑀘𑁂𑀢𑁆𑀣 ‘‘𑀅𑀘𑁆𑀙𑀭𑀺𑀬𑀁 𑀆𑀯𑀼𑀲𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁪) 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀯𑀼𑀢𑁆𑀢𑁄𑀧𑀺 𑀯𑀡𑁆𑀡𑁄 𑀲𑀗𑁆𑀕𑀳𑀺𑀢𑁄. 𑀢𑀫𑁆𑀧𑀺 𑀳𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂 𑀅𑀜𑁆𑀜𑁂 ¶ 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁮) 𑀉𑀧𑀭𑀺 𑀤𑁂𑀲𑀦𑀁 𑀆𑀭𑀪𑀺𑀲𑁆𑀲𑀢𑀺. 𑀢𑀤𑁂𑀯 𑀯𑀺𑀯𑀭𑀢𑀺 ‘‘𑀆𑀘𑀭𑀺𑀬𑁄’’𑀢𑀺𑀆𑀤𑀺𑀦𑀸. ‘‘𑀫𑀫𑀁 𑀯𑀸 𑀪𑀺𑀓𑁆𑀔𑀯𑁂, 𑀧𑀭𑁂 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼’’𑀦𑁆𑀢𑀺 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀩𑁆𑀭𑀳𑁆𑀫𑀤𑀢𑁆𑀢𑁂𑀦 𑀯𑀼𑀢𑁆𑀢𑀁 𑀯𑀡𑁆𑀡𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀤𑁂𑀲𑀺𑀢𑀢𑁆𑀢𑀸 𑀆𑀳 ‘‘𑀅𑀦𑁆𑀢𑁂𑀯𑀸𑀲𑀻 𑀯𑀡𑁆𑀡’’𑀦𑁆𑀢𑀺. 𑀇𑀤𑀸𑀦𑀺 𑀧𑀸𑀴𑀺𑀬𑀸 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑁂𑀲𑀦𑀸𑀓𑀼𑀲𑀮𑁄𑀢𑀺 ‘‘𑀇𑀫𑀺𑀲𑁆𑀲𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀅𑀬𑀁 𑀤𑁂𑀲𑀦𑀸 𑀲𑀫𑁆𑀪𑀯𑀢𑀻’’𑀢𑀺 𑀤𑁂𑀲𑀦𑀸𑀬 𑀓𑀼𑀲𑀮𑁄, 𑀏𑀢𑁂𑀦 𑀧𑀓𑀭𑀡𑀸𑀦𑀼𑀕𑀼𑀡𑀁 𑀪𑀕𑀯𑀢𑁄 𑀣𑁄𑀫𑀦𑀫𑀓𑀸𑀲𑀺. 𑀏𑀲𑀸 𑀳𑀺 𑀲𑀁𑀯𑀡𑁆𑀡𑀦𑀓𑀸𑀦𑀁 𑀧𑀓𑀢𑀺, 𑀬𑀤𑀺𑀤𑀁 𑀢𑀢𑁆𑀣 𑀢𑀢𑁆𑀣 𑀧𑀓𑀭𑀡𑀸𑀥𑀺𑀕𑀢𑀕𑀼𑀡𑁂𑀦 𑀪𑀕𑀯𑀢𑁄 𑀣𑁄𑀫𑀦𑀸. 𑀯𑀸-𑀲𑀤𑁆𑀤𑁄 𑀘𑁂𑀢𑁆𑀣 𑀉𑀧𑀫𑀸𑀦𑀲𑀫𑀼𑀘𑁆𑀘𑀬𑀲𑀁𑀲𑀬𑀯𑀘𑀦𑀯𑁄𑀲𑁆𑀲𑀕𑁆𑀕𑀧𑀤𑀧𑀽𑀭𑀡𑀲𑀤𑀺𑀲𑀯𑀺𑀓𑀧𑁆𑀧𑀸𑀤𑀻𑀲𑀼 ¶ 𑀩𑀳𑀽𑀲𑁆𑀯𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑁂𑀲 ‘‘𑀧𑀡𑁆𑀟𑀺𑀢𑁄𑀯𑀸𑀧𑀺 𑀢𑁂𑀦 𑀲𑁄’’𑀢𑀺𑀆𑀤𑀻𑀲𑀼 𑀉𑀧𑀫𑀸𑀦𑁂 𑀤𑀺𑀲𑁆𑀲𑀢𑀺, 𑀲𑀤𑀺𑀲𑀪𑀸𑀯𑁂𑀢𑀺 𑀅𑀢𑁆𑀣𑁄. ‘‘𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺𑀁 𑀧𑀯𑁂𑀤𑀬𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺.𑁨𑁧𑁩) 𑀲𑀫𑀼𑀘𑁆𑀘𑀬𑁂. ‘‘𑀓𑁂 𑀯𑀸 𑀇𑀫𑁂 𑀓𑀲𑁆𑀲 𑀯𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨𑁯𑁬) 𑀲𑀁𑀲𑀬𑁂. ‘‘𑀅𑀬𑀁 𑀯𑀸 (𑀅𑀬𑀜𑁆𑀘) (𑀤𑀻. 𑀦𑀺. 𑁧.𑁧𑁮𑁧) 𑀇𑀫𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀩𑁆𑀩𑀩𑀸𑀮𑁄 𑀲𑀩𑁆𑀩𑀫𑀽𑀴𑁆𑀳𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁮𑁧) 𑀯𑀘𑀦𑀯𑁄𑀲𑁆𑀲𑀕𑁆𑀕𑁂. ‘‘𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁧𑁫𑁪) 𑀧𑀤𑀧𑀽𑀭𑀡𑁂. ‘‘𑀫𑀥𑀼𑀁 𑀯𑀸 𑀫𑀜𑁆𑀜𑀢𑀺 𑀩𑀸𑀮𑁄, 𑀬𑀸𑀯 𑀧𑀸𑀧𑀁 𑀦 𑀧𑀘𑁆𑀘𑀢𑀻’’𑀢𑀺𑀆𑀤𑀻𑀲𑀼 (𑀥. 𑀧. 𑁬𑁯) 𑀲𑀤𑀺𑀲𑁂. ‘‘𑀬𑁂 𑀳𑀺 𑀓𑁂𑀘𑀺 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁭𑁦; 𑀲𑀁. 𑀦𑀺. 𑁫.𑁧𑁦𑁯𑁨) 𑀯𑀺𑀓𑀧𑁆𑀧𑁂. 𑀇𑀥𑀸𑀧𑀺 𑀯𑀺𑀓𑀧𑁆𑀧𑁂𑀬𑁂𑀯. 𑀫𑀫 𑀯𑀸 𑀥𑀫𑁆𑀫𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸𑀢𑀺 𑀯𑀺𑀯𑀺𑀥𑀸 𑀯𑀺𑀲𑀼𑀁 𑀯𑀺𑀓𑀧𑁆𑀧𑀦𑀲𑁆𑀲 𑀚𑁄𑀢𑀓𑀢𑁆𑀢𑀸𑀢𑀺 𑀆𑀳 ‘‘𑀯𑀸-𑀲𑀤𑁆𑀤𑁄 𑀯𑀺𑀓𑀧𑁆𑀧𑀦𑀢𑁆𑀣𑁄’’𑀢𑀺. 𑀧𑀭-𑀲𑀤𑁆𑀤𑁄 𑀧𑀦 𑀅𑀢𑁆𑀣𑁂𑀯 𑀅𑀜𑁆𑀜𑀢𑁆𑀣𑁄 ‘‘𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁, 𑀧𑀭𑁂 𑀘 𑀫𑁂 𑀦 𑀆𑀚𑀸𑀦𑁂𑀬𑁆𑀬𑀼’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁬𑁪; 𑀫. 𑀦𑀺. 𑁧.𑁨𑁮𑁧; 𑁨.𑁩𑁩𑁭; 𑀫𑀳𑀸𑀯. 𑁭, 𑁮) 𑀅𑀢𑁆𑀣𑀺 𑀅𑀥𑀺𑀓𑀢𑁆𑀣𑁄 ‘‘𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 (𑀯𑀺𑀪. 𑁮𑁧𑁪; 𑀅. 𑀦𑀺. 𑁧𑁦.𑁨𑁧; 𑀫. 𑀦𑀺. 𑁧.𑁧𑁪𑁮; 𑀧𑀝𑀺. 𑀫. 𑁧.𑁬𑁮; 𑁧.𑁧𑁧𑁧) 𑀅𑀢𑁆𑀣𑀺 𑀧𑀘𑁆𑀙𑀸𑀪𑀸𑀕𑀢𑁆𑀣𑁄 ‘‘𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼. 𑀅𑀢𑁆𑀣𑀺 𑀧𑀘𑁆𑀘𑀦𑀻𑀓𑀢𑁆𑀣𑁄 ‘‘𑀉𑀧𑁆𑀧𑀦𑁆𑀦𑀁 𑀧𑀭𑀧𑁆𑀧𑀯𑀸𑀤𑀁 𑀲𑀳𑀥𑀫𑁆𑀫𑁂𑀦 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀳𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁧𑁬𑁮; 𑀲𑀁. 𑀦𑀺. 𑁫.𑁮𑁨𑁨; 𑀅. 𑀦𑀺. 𑁮.𑁭𑁦; 𑀉𑀤𑀸. 𑁫𑁧) 𑀇𑀥𑀸𑀧𑀺 𑀧𑀘𑁆𑀘𑀦𑀻𑀓𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀧𑀝𑀺𑀯𑀺𑀭𑀼𑀤𑁆𑀥𑀸 𑀲𑀢𑁆𑀢𑀸’’𑀢𑀺 𑀇𑀫𑀺𑀦𑀸. 𑀲𑀸𑀲𑀦𑀲𑁆𑀲 𑀧𑀘𑁆𑀘𑀦𑀻𑀓𑀪𑀽𑀢𑀸 𑀧𑀘𑁆𑀘𑀢𑁆𑀣𑀺𑀓𑀸 𑀲𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢-𑀲𑀤𑁆𑀤𑁄 𑀧𑀭𑁂𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀅𑀯𑀡𑁆𑀡𑀪𑀸𑀲𑀦𑀓𑀺𑀭𑀺𑀬𑀸𑀯𑀺𑀲𑀺𑀝𑁆𑀞𑀁 𑀧𑀭𑀸𑀫𑀲𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀬𑁂 𑀅𑀯𑀡𑁆𑀡𑀁 𑀯𑀤𑀦𑁆𑀢𑀺, 𑀢𑁂𑀲𑀽’’𑀢𑀺.

𑀦𑀦𑀼 ¶ 𑀢𑁂𑀲𑀁 𑀆𑀖𑀸𑀢𑁄 𑀦𑀢𑁆𑀣𑀺 𑀕𑀼𑀡𑀫𑀳𑀢𑁆𑀢𑀢𑁆𑀢𑀸, 𑀅𑀣 𑀓𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀘𑁄𑀤𑀦𑀸𑀮𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀢𑀤𑀧𑀦𑁂𑀢𑀺 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺𑀦𑀸. 𑀓𑀺𑀜𑁆𑀘𑀸𑀧𑀺 𑀦𑀢𑁆𑀣𑀺, 𑀅𑀣 𑀔𑁄 𑀢𑀣𑀸𑀧𑀻𑀢𑀺 𑀅𑀢𑁆𑀣𑁄. 𑀈𑀤𑀺𑀲𑁂𑀲𑀼𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑀢𑁆𑀣𑁄, 𑀢𑁂𑀦 𑀭𑀢𑀦𑀢𑁆𑀢𑀬𑀦𑀺𑀫𑀺𑀢𑁆𑀢𑀫𑁆𑀧𑀺 𑀅𑀓𑀼𑀲𑀮𑀘𑀺𑀢𑁆𑀢𑀁 𑀦 𑀉𑀧𑁆𑀧𑀸𑀤𑁂𑀢𑀩𑁆𑀩𑀁, 𑀧𑀕𑁂𑀯 𑀯𑀝𑁆𑀝𑀸𑀫𑀺𑀲𑀮𑁄𑀓𑀸𑀫𑀺𑀲𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀫𑁆𑀪𑀸𑀯𑁂𑀢𑀺. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀬𑁂𑀯 𑀲𑀤𑁆𑀥𑀫𑁆𑀫𑀦𑀬𑀦𑀝𑁆𑀞𑁂𑀦 𑀦𑁂𑀢𑁆𑀢𑀻𑀢𑀺 𑀥𑀫𑁆𑀫𑀦𑁂𑀢𑁆𑀢𑀺. 𑀆𑀳𑀦𑀢𑀻𑀢𑀺 𑀆𑀪𑀼𑀲𑁄 𑀖𑀝𑁆𑀝𑁂𑀢𑀺, 𑀳𑀺𑀁𑀲𑀢𑀺 𑀯𑀸, 𑀯𑀺𑀩𑀸𑀥𑀢𑀺, 𑀉𑀧𑀢𑀸𑀧𑁂𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀓𑀢𑁆𑀣𑀘𑀺 ‘‘𑀏𑀢𑁆𑀣𑀸’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀲𑁄 𑀧𑀘𑁆𑀙𑀸𑀮𑀺𑀔𑀺𑀢𑁄 𑀧𑁄𑀭𑀸𑀡𑀧𑀸𑀞𑀸𑀦𑀼𑀕𑀢𑀸𑀬 𑀝𑀻𑀓𑀸𑀬 𑀯𑀺𑀭𑁄𑀥𑀢𑁆𑀢𑀸, 𑀅𑀢𑁆𑀣𑀬𑀼𑀢𑁆𑀢𑀺𑀬𑀸 𑀘 𑀅𑀪𑀸𑀯𑀢𑁄. 𑀬𑀤𑀺𑀧𑀺 𑀤𑁄𑀫𑀦𑀲𑁆𑀲𑀸𑀤𑀬𑁄 𑀘 𑀆𑀳𑀦𑀦𑁆𑀢𑀺, 𑀓𑁄𑀧𑁂𑀬𑁂𑀯 𑀧𑀦𑀸𑀬𑀁 𑀦𑀺𑀭𑀼𑀴𑁆𑀳𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀓𑁄𑀧𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀇𑀫𑀺𑀦𑀸. 𑀅𑀯𑀬𑀯𑀢𑁆𑀣𑀜𑁆𑀳𑀺 𑀤𑀲𑁆𑀲𑁂𑀢𑁆𑀯𑀸 𑀢𑀢𑁆𑀣 𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀅𑀥𑀺𑀯𑀘𑀦𑀦𑁆𑀢𑀺 𑀘 𑀅𑀥𑀺𑀓𑀺𑀘𑁆𑀘 𑀧𑀯𑀢𑁆𑀢𑀁 𑀯𑀘𑀦𑀁, 𑀧𑀲𑀺𑀤𑁆𑀥𑀁 𑀯𑀸 𑀯𑀘𑀦𑀁, 𑀦𑀸𑀫𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀫𑀺𑀢𑀭𑁂𑀲𑀼𑀧𑀺. 𑀏𑀢𑁆𑀣 𑀘 𑀲𑀪𑀸𑀯𑀥𑀫𑁆𑀫𑀢𑁄 𑀅𑀜𑁆𑀜𑀲𑁆𑀲 𑀓𑀢𑁆𑀢𑀼𑀅𑀪𑀸𑀯𑀚𑁄𑀢𑀦𑀢𑁆𑀣𑀁 ‘‘𑀆𑀳𑀦𑀢𑀻’’𑀢𑀺 ¶ 𑀓𑀢𑁆𑀢𑀼𑀢𑁆𑀣𑁂 𑀆𑀖𑀸𑀢𑀲𑀤𑁆𑀤𑀁 𑀤𑀲𑁆𑀲𑁂𑀢𑀺. 𑀆𑀳𑀦𑀢𑀺 𑀏𑀢𑁂𑀦, 𑀆𑀳𑀦𑀦𑀫𑀢𑁆𑀢𑀁 𑀯𑀸 𑀆𑀖𑀸𑀢𑁄𑀢𑀺 𑀓𑀭𑀡𑀪𑀸𑀯𑀢𑁆𑀣𑀸𑀧𑀺 𑀲𑀫𑁆𑀪𑀯𑀦𑁆𑀢𑀺𑀬𑁂𑀯. ‘‘𑀅𑀧𑁆𑀧𑀢𑀻𑀢𑀸’’𑀢𑀺 𑀏𑀢𑀲𑁆𑀲𑀢𑁆𑀣𑁄 ‘‘𑀅𑀢𑀼𑀝𑁆𑀞𑀸 𑀅𑀲𑁄𑀫𑀦𑀲𑁆𑀲𑀺𑀓𑀸’’𑀢𑀺 𑀯𑀼𑀢𑁆𑀢𑁄, 𑀇𑀤𑀁 𑀧𑀦 𑀧𑀸𑀓𑀝𑀧𑀭𑀺𑀬𑀸𑀬𑁂𑀦 𑀅𑀧𑀘𑁆𑀘𑀬𑀲𑀤𑁆𑀤𑀲𑁆𑀲 𑀦𑀺𑀩𑁆𑀩𑀘𑀦𑀤𑀲𑁆𑀲𑀦𑀁, 𑀢𑀫𑁆𑀫𑀼𑀔𑁂𑀦 𑀧𑀦 𑀦 𑀧𑀘𑁆𑀘𑁂𑀢𑀺 𑀢𑁂𑀦𑀸𑀢𑀺 𑀅𑀧𑁆𑀧𑀘𑁆𑀘𑀬𑁄𑀢𑀺 𑀓𑀸𑀢𑀩𑁆𑀩𑀁. 𑀅𑀪𑀺𑀭𑀸𑀥𑀬𑀢𑀻𑀢𑀺 𑀲𑀸𑀥𑀬𑀢𑀺. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀢𑀻𑀲𑀼 𑀧𑀤𑁂𑀲𑀼. 𑀤𑁆𑀯𑀻𑀳𑀻𑀢𑀺 𑀆𑀖𑀸𑀢𑀅𑀦𑀪𑀺𑀭𑀤𑁆𑀥𑀺𑀧𑀤𑁂𑀳𑀺. 𑀏𑀓𑁂𑀦𑀸𑀢𑀺 𑀅𑀧𑀘𑁆𑀘𑀬𑀧𑀤𑁂𑀦. 𑀏𑀢𑁆𑀢𑀓𑁂𑀲𑀼 𑀕𑀳𑀺𑀢𑁂𑀲𑀼 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀅𑀕𑁆𑀕𑀳𑀺𑀢𑀸 𑀲𑀺𑀬𑀼𑀁, 𑀦 𑀘 𑀲𑀓𑁆𑀓𑀸 𑀢𑁂𑀧𑀺 𑀅𑀕𑁆𑀕𑀳𑀺𑀢𑀼𑀁 𑀏𑀓𑀼𑀧𑁆𑀧𑀸𑀤𑀸𑀤𑀺𑀲𑀪𑀸𑀯𑀢𑁆𑀢𑀸𑀢𑀺 𑀘𑁄𑀤𑀦𑀁 𑀯𑀺𑀲𑁄𑀥𑁂𑀢𑀼𑀁 ‘‘𑀢𑁂𑀲’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑁂𑀲𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀓𑀤𑁂𑀲𑀸𑀦𑀁. 𑀲𑁂𑀲𑀸𑀦𑀦𑁆𑀢𑀺 𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀸𑀯𑀲𑀺𑀝𑁆𑀞𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀓𑀤𑁂𑀲𑀸𑀦𑀁. 𑀓𑀭𑀡𑀦𑁆𑀢𑀺 𑀉𑀧𑁆𑀧𑀸𑀤𑀦𑀁. 𑀆𑀖𑀸𑀢𑀸𑀤𑀻𑀦𑀜𑁆𑀳𑀺 𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑀲𑀫𑀯𑀸𑀬𑀦𑀁 𑀇𑀥 ‘‘𑀓𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀦 𑀅𑀢𑁆𑀣𑀢𑁄 𑀉𑀧𑁆𑀧𑀸𑀤𑀦𑀫𑁂𑀯. 𑀢𑀤𑀦𑀼𑀧𑁆𑀧𑀸𑀤𑀦𑀜𑁆𑀳𑀺 𑀲𑀦𑁆𑀥𑀸𑀬 𑀧𑀸𑀴𑀺𑀬𑀁 ‘‘𑀦 𑀓𑀭𑀡𑀻𑀬𑀸’’𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯 𑀬𑀣𑀸𑀭𑀳𑀁 𑀏𑀓𑀼𑀧𑁆𑀧𑀸𑀤𑀦𑀺𑀭𑁄𑀥𑀸𑀭𑀫𑁆𑀫𑀡𑀯𑀢𑁆𑀣𑀼𑀪𑀸𑀯𑀢𑁄.

𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀫𑀦𑁄𑀧𑀤𑁄𑀲𑁂. ‘‘𑀢𑁂𑀲𑀼 𑀅𑀯𑀡𑁆𑀡𑀪𑀸𑀲𑀓𑁂𑀲𑀽’’𑀢𑀺 𑀇𑀫𑀺𑀦𑀸 𑀆𑀥𑀸𑀭𑀢𑁆𑀣𑁂 𑀪𑀼𑀫𑁆𑀫𑀁 𑀤𑀲𑁆𑀲𑁂𑀢𑀺. 𑀦𑀺𑀫𑀺𑀢𑁆𑀢𑀢𑁆𑀣𑁂, 𑀪𑀸𑀯𑀮𑀓𑁆𑀔𑀡𑁂 𑀯𑀸 𑀏𑀢𑀁 𑀪𑀼𑀫𑁆𑀫𑀦𑁆𑀢𑀺 𑀆𑀳 ‘‘𑀢𑀲𑁆𑀫𑀺𑀁 𑀯𑀸 𑀅𑀯𑀡𑁆𑀡𑁂’’𑀢𑀺. 𑀦 𑀳𑀺 𑀅𑀕𑀼𑀡𑁄, 𑀦𑀺𑀦𑁆𑀤𑀸 𑀯𑀸 𑀓𑁄𑀧𑀤𑁄𑀫𑀦𑀲𑁆𑀲𑀸𑀦𑀁 𑀆𑀥𑀸𑀭𑁄 𑀲𑀫𑁆𑀪𑀯𑀢𑀺 𑀢𑀩𑁆𑀪𑀸𑀲𑀓𑀸𑀬𑀢𑁆𑀢𑀢𑁆𑀢𑀸 𑀢𑁂𑀲𑀁. 𑀅𑀲𑁆𑀲𑀣𑀸𑀢𑀺 ¶ 𑀲𑀢𑁆𑀢𑀫𑀺𑀬𑀸 𑀭𑀽𑀧𑀁 𑀘𑁂-𑀲𑀤𑁆𑀤𑀬𑁄𑀕𑁂𑀦 𑀧𑀭𑀺𑀓𑀧𑁆𑀧𑀦𑀯𑀺𑀲𑀬𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀪𑀯𑁂𑀬𑁆𑀬𑀸𑀣𑀸’’𑀢𑀺 𑀇𑀫𑀺𑀦𑀸. ‘‘𑀪𑀯𑁂𑀬𑁆𑀬𑀸𑀣 𑀘𑁂, 𑀬𑀤𑀺 𑀪𑀯𑁂𑀬𑁆𑀬𑀸𑀣𑀸’𑀢𑀺 𑀘 𑀯𑀤𑀦𑁆𑀢𑁄 ‘𑀬𑀣𑀸𑀓𑁆𑀓𑀫𑀁 𑀧𑀼𑀩𑁆𑀩𑀸𑀧𑀭𑀬𑁄𑀕𑀺𑀦𑁄 𑀏𑀢𑁂 𑀲𑀤𑁆𑀤𑀸’𑀢𑀺 𑀜𑀸𑀧𑁂𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀓𑀼𑀧𑀺𑀢𑀸 𑀓𑁄𑀧𑁂𑀦 𑀅𑀦𑀢𑁆𑀢𑀫𑀦𑀸 𑀤𑁄𑀫𑀦𑀲𑁆𑀲𑁂𑀦𑀸’’𑀢𑀺 𑀇𑀫𑀺𑀦𑀸 ‘‘𑀏𑀯𑀁 𑀧𑀞𑀫𑁂𑀦 𑀦𑀬𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑀘𑀦𑀁 𑀅𑀢𑁆𑀣𑀦𑁆𑀢𑀭𑀸𑀪𑀸𑀯𑀤𑀲𑁆𑀲𑀦𑁂𑀦 𑀲𑀫𑀢𑁆𑀣𑁂𑀢𑀺. ‘‘𑀢𑀼𑀫𑁆𑀳𑀸𑀓’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑁄 ‘‘𑀢𑀼𑀫𑁆𑀳’’𑀦𑁆𑀢𑀺 𑀏𑀓𑁄 𑀲𑀤𑁆𑀤𑁄 ‘‘𑀅𑀫𑁆𑀳𑀸𑀓’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑁄 ‘‘𑀅𑀫𑁆𑀳’’𑀦𑁆𑀢𑀺 𑀲𑀤𑁆𑀤𑁄 𑀯𑀺𑀬 𑀬𑀣𑀸 ‘‘𑀢𑀲𑁆𑀫𑀸 𑀳𑀺 𑀅𑀫𑁆𑀳𑀁 𑀤𑀳𑀭𑀸 𑀦 𑀫𑀻𑀬𑀭𑁂’’𑀢𑀺 (𑀚𑀸. 𑁧.𑁯𑁩) 𑀆𑀳 ‘‘𑀢𑀼𑀫𑁆𑀳𑀸𑀓𑀁𑀬𑁂𑀯𑀸’’𑀢𑀺. 𑀅𑀢𑁆𑀣𑀯𑀲𑀸 𑀮𑀺𑀗𑁆𑀕𑀯𑀺𑀧𑀭𑀺𑀬𑀸𑀬𑁄𑀢𑀺 𑀓𑀢𑁆𑀯𑀸 ‘‘𑀢𑀸𑀬 𑀘 𑀅𑀦𑀢𑁆𑀢𑀫𑀦𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁. ‘‘𑀅𑀦𑁆𑀢𑀭𑀸𑀬𑁄’’𑀢𑀺 𑀯𑀼𑀢𑁆𑀢𑁂 𑀲𑀫𑀡𑀥𑀫𑁆𑀫𑀯𑀺𑀲𑁂𑀲𑀸𑀦𑀦𑁆𑀢𑀺 𑀅𑀢𑁆𑀣𑀲𑁆𑀲 𑀧𑀓𑀭𑀡𑀢𑁄 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸, 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀣𑀲𑁆𑀲 𑀘 𑀲𑀤𑁆𑀤𑀲𑁆𑀲 𑀧𑀬𑁄𑀕𑁂 𑀓𑀸𑀫𑀘𑀸𑀭𑀢𑁆𑀢𑀸 ‘‘𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀅𑀦𑁆𑀢𑀭𑀸𑀬𑁄’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 ‘‘𑀅𑀦𑁆𑀢𑀭𑀸𑀬𑁄’’𑀢𑀺 𑀇𑀤𑀁 𑀫𑀦𑁄𑀧𑀤𑁄𑀲𑀲𑁆𑀲 𑀅𑀓𑀭𑀡𑀻𑀬𑀢𑀸𑀬 𑀓𑀸𑀭𑀡𑀯𑀘𑀦𑀁. 𑀬𑀲𑁆𑀫𑀸 𑀢𑀼𑀫𑁆𑀳𑀸𑀓𑀫𑁂𑀯 𑀢𑁂𑀦 𑀓𑁄𑀧𑀸𑀤𑀺𑀦𑀸 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀫𑀦𑁆𑀢𑀭𑀸𑀬𑁄 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀢𑁂 𑀓𑁄𑀧𑀸𑀤𑀺𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸 𑀆𑀖𑀸𑀢𑀸𑀤𑀬𑁄 𑀦 𑀓𑀭𑀡𑀻𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑁂𑀦 ‘‘𑀦𑀸𑀳𑀁 𑀲𑀩𑁆𑀩𑀜𑁆𑀜𑀽’’𑀢𑀺 𑀇𑀲𑁆𑀲𑀭𑀪𑀸𑀯𑁂𑀦 𑀢𑀼𑀫𑁆𑀳𑁂 𑀢𑀢𑁄 𑀦𑀺𑀯𑀸𑀭𑁂𑀫𑀺, 𑀅𑀣 𑀔𑁄 𑀇𑀫𑀺𑀦𑀸𑀯 𑀓𑀸𑀭𑀡𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀁 𑀧𑀦 𑀓𑀸𑀭𑀡𑀯𑀘𑀦𑀁 𑀬𑀲𑁆𑀫𑀸 𑀆𑀤𑀻𑀦𑀯𑀯𑀺𑀪𑀸𑀯𑀦𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀆𑀤𑀻𑀦𑀯𑀁 𑀤𑀲𑁆𑀲𑁂𑀦𑁆𑀢𑁄’’𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀲𑁄 ¶ 𑀧𑀦 𑀫𑀦𑁄𑀧𑀤𑁄𑀲𑁄 𑀦 𑀓𑁂𑀯𑀮𑀁 𑀓𑀸𑀮𑀦𑁆𑀢𑀭𑀪𑀸𑀯𑀺𑀦𑁄𑀬𑁂𑀯 𑀳𑀺𑀢𑀲𑀼𑀔𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑁄, 𑀅𑀣 𑀔𑁄 𑀢𑀗𑁆𑀔𑀡𑀧𑀯𑀢𑁆𑀢𑀦𑀸𑀭𑀳𑀲𑁆𑀲𑀧𑀺 𑀳𑀺𑀢𑀲𑀼𑀔𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑁄𑀢𑀺 𑀫𑀦𑁄𑀧𑀤𑁄𑀲𑁂 𑀆𑀤𑀻𑀦𑀯𑀁 𑀤𑀴𑁆𑀳𑀢𑀭𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺 𑀦𑀽’’𑀢𑀺𑀆𑀤𑀺𑀫𑀸𑀳𑀸𑀢𑀺𑀧𑀺 𑀲𑀫𑁆𑀩𑀦𑁆𑀥𑁄 𑀯𑀢𑁆𑀢𑀩𑁆𑀩𑁄. 𑀧𑀭𑁂𑀲𑀦𑁆𑀢𑀺 𑀬𑁂 𑀅𑀢𑁆𑀢𑀢𑁄 𑀅𑀜𑁆𑀜𑁂, 𑀢𑁂𑀲𑀦𑁆𑀢𑀺 𑀅𑀢𑁆𑀣𑁄, 𑀦 𑀧𑀦 ‘‘𑀧𑀭𑁂 𑀅𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀧𑀝𑀺𑀯𑀺𑀭𑀼𑀤𑁆𑀥𑀲𑀢𑁆𑀢𑀸𑀦𑀦𑁆𑀢𑀺 𑀆𑀳 ‘‘𑀬𑁂𑀲𑀁 𑀓𑁂𑀲𑀜𑁆𑀘𑀻’’𑀢𑀺. 𑀢𑀤𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀺 ‘‘𑀓𑀼𑀧𑀺𑀢𑁄 𑀳𑀻’’𑀢𑀺𑀆𑀤𑀺𑀦𑀸. 𑀧𑀸𑀴𑀺𑀬𑀁 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀯𑀘𑀦𑀚𑀸𑀦𑀦𑀫𑁆𑀧𑀺 𑀢𑀤𑀢𑁆𑀣𑀚𑀸𑀦𑀦𑁂𑀦𑁂𑀯 𑀲𑀺𑀤𑁆𑀥𑀦𑁆𑀢𑀺 𑀆𑀳 ‘‘𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀲𑁆𑀲 𑀅𑀢𑁆𑀣’’𑀦𑁆𑀢𑀺.

𑀅𑀦𑁆𑀥𑀁𑀢𑀫𑀦𑁆𑀢𑀺 𑀅𑀦𑁆𑀥𑀪𑀸𑀯𑀓𑀭𑀁 𑀢𑀫𑀁, 𑀅𑀢𑀺𑀯𑀺𑀬 𑀯𑀸 𑀢𑀫𑀁. 𑀬𑀁 𑀦𑀭𑀁 𑀲𑀳𑀢𑁂 𑀅𑀪𑀺𑀪𑀯𑀢𑀺, 𑀢𑀲𑁆𑀲 𑀅𑀦𑁆𑀥𑀢𑀫𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀦𑁆𑀢𑀺 𑀯𑀸 𑀪𑀼𑀫𑁆𑀫𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀬𑀲𑁆𑀫𑀺𑀁 𑀓𑀸𑀮𑁂 𑀲𑀳𑀢𑁂, 𑀢𑀤𑀸 𑀅𑀦𑁆𑀥𑀢𑀫𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄 ¶ , 𑀓𑀸𑀭𑀡𑀦𑀺𑀤𑁆𑀤𑁂𑀲𑁄 𑀯𑀸, 𑀬𑁂𑀦 𑀓𑀸𑀭𑀡𑁂𑀦 𑀲𑀳𑀢𑁂, 𑀢𑁂𑀦 𑀅𑀦𑁆𑀥𑀢𑀫𑀦𑁆𑀢𑀺. 𑀏𑀯𑀁 𑀲𑀢𑀺 𑀬𑀁𑀢𑀁-𑀲𑀤𑁆𑀤𑀸𑀦𑀁 𑀦𑀺𑀘𑁆𑀘𑀲𑀫𑁆𑀩𑀦𑁆𑀥𑀢𑁆𑀢𑀸 ‘‘𑀬𑀤𑀸’’𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁. 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁 𑀯𑀸 𑀏𑀢𑀁, ‘‘𑀓𑁄𑀥𑁄 𑀲𑀳𑀢𑁂’’𑀢𑀺 𑀬𑀤𑁂𑀢𑀁 𑀓𑁄𑀥𑀲𑁆𑀲 𑀅𑀪𑀺𑀪𑀯𑀦𑀁 𑀯𑀼𑀢𑁆𑀢𑀁, 𑀏𑀢𑀁 𑀅𑀦𑁆𑀥𑀢𑀫𑀦𑁆𑀢𑀺. 𑀢𑀢𑁄 𑀘 𑀓𑀼𑀤𑁆𑀥𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀓𑀼𑀤𑁆𑀥𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀢𑁆𑀣𑀁 𑀥𑀫𑁆𑀫𑀦𑁆𑀢𑀺 𑀧𑀸𑀴𑀺𑀅𑀢𑁆𑀣𑀁, 𑀧𑀸𑀴𑀺𑀥𑀫𑁆𑀫𑀜𑁆𑀘. 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄𑀢𑀺 𑀘𑀺𑀢𑁆𑀢𑀲𑁆𑀲 𑀧𑀓𑀢𑀺𑀪𑀸𑀯𑀯𑀺𑀚𑀳𑀦𑁂𑀦 𑀧𑀤𑀽𑀲𑀓𑁄. 𑀅𑀦𑁆𑀢𑀭𑀢𑁄𑀢𑀺 𑀅𑀩𑁆𑀪𑀦𑁆𑀢𑀭𑀢𑁄, 𑀘𑀺𑀢𑁆𑀢𑀢𑁄 𑀯𑀸 𑀓𑁄𑀥𑀯𑀲𑁂𑀦 𑀪𑀬𑀁 𑀚𑀸𑀢𑀁. 𑀦𑁆𑀢𑀺 𑀢𑀣𑀸𑀲𑀪𑀸𑀯𑀁 𑀓𑁄𑀥𑀁, 𑀓𑁄𑀥𑀲𑁆𑀲 𑀯𑀸 𑀅𑀦𑀢𑁆𑀣𑀚𑀦𑀦𑀸𑀤𑀺𑀧𑁆𑀧𑀓𑀸𑀭𑀁.

𑀲𑀩𑁆𑀩𑀢𑁆𑀣𑀸𑀧𑀻𑀢𑀺 𑀲𑀩𑁆𑀩𑁂𑀲𑀼𑀧𑀺 𑀧𑀞𑀫𑀤𑀼𑀢𑀺𑀬𑀢𑀢𑀺𑀬𑀦𑀬𑁂𑀲𑀼. ‘‘𑀅𑀯𑀡𑁆𑀡𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸𑀓𑀸𑀭’’𑀦𑁆𑀢𑀺 𑀅𑀥𑀺𑀓𑀸𑀭𑁄. 𑀅𑀯𑀡𑁆𑀡𑀪𑀸𑀲𑀓𑀸𑀦𑀫𑀯𑀺𑀲𑀬𑀢𑁆𑀢𑀸 ‘‘𑀢𑀢𑁆𑀭𑀸’’𑀢𑀺 𑀧𑀤𑀲𑁆𑀲 𑀢𑀲𑁆𑀫𑀺𑀁 𑀅𑀯𑀡𑁆𑀡𑁂𑀢𑀺 𑀅𑀢𑁆𑀣𑁄𑀯 𑀤𑀲𑁆𑀲𑀺𑀢𑁄. 𑀅𑀪𑀽𑀢𑀦𑁆𑀢𑀺 𑀓𑀢𑁆𑀢𑀼𑀪𑀽𑀢𑀁 𑀯𑀘𑀦𑀁, 𑀬𑀁 𑀯𑀘𑀦𑀁 𑀅𑀪𑀽𑀢𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀪𑀽𑀢𑀢𑁄𑀢𑀺 𑀧𑀦 𑀅𑀪𑀽𑀢𑀢𑀸𑀓𑀺𑀭𑀺𑀬𑀸𑀯 𑀪𑀸𑀯𑀧𑁆𑀧𑀥𑀸𑀦𑀢𑁆𑀢𑀸, 𑀪𑀸𑀯𑀮𑁄𑀧𑀢𑁆𑀢𑀸 𑀘𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀅𑀪𑀽𑀢𑀪𑀸𑀯𑁂𑀦𑁂𑀯𑀸’’𑀢𑀺 𑀇𑀫𑀺𑀦𑀸. ‘‘𑀇𑀢𑀺𑀧𑁂𑀢’’𑀦𑁆𑀢𑀺𑀆𑀤𑀺 𑀦𑀺𑀩𑁆𑀩𑁂𑀞𑀦𑀸𑀓𑀸𑀭𑀦𑀺𑀤𑀲𑁆𑀲𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀣’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀯𑀘𑀦𑁂. 𑀬𑁄𑀚𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑀧𑀬𑁄𑀚𑀦𑀸. 𑀢𑀼𑀡𑁆𑀳𑀻𑀢𑀺 𑀅𑀪𑀸𑀲𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀪𑀸𑀯𑀦𑀧𑀼𑀁𑀲𑀓𑁄 𑀘𑁂𑀲. ‘‘𑀇𑀢𑀺𑀧𑁂𑀢𑀁 𑀅𑀪𑀽𑀢’’𑀦𑁆𑀢𑀺 𑀯𑀢𑁆𑀯𑀸 ‘‘𑀬𑀁 𑀢𑀼𑀫𑁆𑀳𑁂𑀳𑀻’’𑀢𑀺𑀆𑀤𑀺𑀦𑀸 𑀢𑀤𑀢𑁆𑀣𑀁 𑀯𑀺𑀯𑀭𑀢𑀺. 𑀇𑀫𑀺𑀦𑀸𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀅𑀦𑁂𑀓𑀯𑀺𑀥𑀁 𑀓𑀸𑀭𑀡𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀓𑀸𑀭𑀡𑀲𑀭𑀽𑀧𑀫𑀸𑀳 ‘‘𑀲𑀩𑁆𑀩𑀜𑁆𑀜𑀼𑀬𑁂𑀯𑀸’’𑀢𑀺𑀆𑀤𑀺𑀦𑀸. 𑀏𑀯-𑀲𑀤𑁆𑀤𑁄 𑀢𑀻𑀲𑀼𑀧𑀺 𑀧𑀤𑁂𑀲𑀼 𑀬𑁄𑀚𑁂𑀢𑀩𑁆𑀩𑁄, 𑀲𑀩𑁆𑀩𑀜𑁆𑀜𑀼𑀪𑀸𑀯𑀢𑁄 𑀦 𑀅𑀲𑀩𑁆𑀩𑀜𑁆𑀜𑀽, 𑀲𑁆𑀯𑀸𑀓𑁆𑀔𑀸𑀢𑀢𑁆𑀢𑀸 𑀦 𑀤𑀼𑀭𑀓𑁆𑀔𑀸𑀢𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑀢𑁆𑀢𑀸 𑀦 𑀤𑀼𑀧𑁆𑀧𑀝𑀺𑀧𑀦𑁆𑀦𑁄𑀢𑀺 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀦𑀺𑀩𑁆𑀩𑁂𑀞𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀓𑀲𑁆𑀫𑀸 𑀧𑀦 𑀲𑀩𑁆𑀩𑀜𑁆𑀜𑀽’’𑀢𑀺𑀆𑀤𑀺𑀧𑀝𑀺𑀘𑁄𑀤𑀦𑀸𑀬𑀧𑀺 𑀢𑀁𑀓𑀸𑀭𑀡𑀤𑀲𑁆𑀲𑀦𑁂𑀦 𑀦𑀺𑀩𑁆𑀩𑁂𑀞𑁂𑀢𑀩𑁆𑀩𑀫𑁂𑀯𑀸𑀢𑀺 𑀆𑀳 ‘‘𑀢𑀢𑁆𑀭 𑀇𑀤𑀜𑁆𑀘𑀺𑀤𑀜𑁆𑀘 𑀓𑀸𑀭𑀡’’𑀦𑁆𑀢𑀺. 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀲𑀩𑁆𑀩𑀜𑁆𑀜𑀼𑀢𑀸𑀤𑀻𑀲𑀼. 𑀇𑀤𑀜𑁆𑀘 𑀇𑀤𑀜𑁆𑀘 𑀓𑀸𑀭𑀡𑀦𑁆𑀢𑀺 𑀅𑀦𑁂𑀓𑀯𑀺𑀥𑁂𑀦 𑀓𑀸𑀭𑀡𑀸𑀦𑀼𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀦 𑀲𑀩𑁆𑀩𑀜𑁆𑀜𑀽’’𑀢𑀺𑀆𑀤𑀺𑀯𑀘𑀦𑀁 𑀦𑀺𑀩𑁆𑀩𑁂𑀞𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀭𑀺𑀤𑀁 𑀓𑀸𑀭𑀡𑀁 ¶ 𑁋 𑀲𑀩𑁆𑀩𑀜𑁆𑀜𑀽 𑀏𑀯 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑀢𑁆𑀢𑀸. 𑀲𑁆𑀯𑀸𑀓𑁆𑀔𑀸𑀢𑁄 𑀏𑀯 𑀥𑀫𑁆𑀫𑁄 𑀏𑀓𑀦𑁆𑀢𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸. 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀏𑀯 𑀲𑀗𑁆𑀖𑁄 𑀲𑀁𑀓𑀺𑀮𑁂𑀲𑀭𑀳𑀺𑀢𑀢𑁆𑀢𑀸𑀢𑀺. 𑀓𑀸𑀭𑀡𑀸𑀦𑀼𑀓𑀸𑀭𑀡𑀤𑀲𑁆𑀲𑀦𑀫𑁆𑀧𑁂𑀢𑁆𑀣 𑀅𑀲𑀩𑁆𑀩𑀜𑁆𑀜𑀼𑀢𑀸𑀤𑀺𑀯𑀘𑀦-𑀦𑀺𑀩𑁆𑀩𑁂𑀞𑀦𑀫𑁂𑀯 𑀢𑀣𑀸𑀤𑀲𑁆𑀲𑀦𑀲𑁆𑀲 𑀢𑁂𑀲𑀫𑁆𑀧𑀺 𑀓𑀸𑀭𑀡𑀪𑀸𑀯𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀸𑀭𑀡𑀓𑀸𑀭𑀡𑀫𑁆𑀧𑀺 𑀳𑀺 ‘‘𑀓𑀸𑀭𑀡’’𑀦𑁆𑀢𑁆𑀯𑁂𑀯 𑀯𑀼𑀘𑁆𑀘𑀢𑀺, 𑀧𑀢𑀺𑀝𑁆𑀞𑀸𑀦𑀧𑀢𑀺𑀝𑁆𑀞𑀸𑀦𑀫𑁆𑀧𑀺 ‘‘𑀧𑀢𑀺𑀝𑁆𑀞𑀸𑀦’’𑀦𑁆𑀢𑁆𑀯𑁂𑀯 𑀬𑀣𑀸 ‘‘𑀢𑀺𑀡𑁂𑀳𑀺 𑀪𑀢𑁆𑀢𑀁 ¶ 𑀲𑀺𑀦𑀺𑀤𑁆𑀥𑀁, 𑀧𑀸𑀲𑀸𑀤𑁂 𑀥𑀫𑁆𑀫𑀫𑀚𑁆𑀛𑀸𑀬𑀢𑀻’’𑀢𑀺. 𑀤𑀼𑀢𑀺𑀬𑀁 𑀧𑀤𑀦𑁆𑀢𑀺 ‘‘𑀅𑀢𑀘𑁆𑀙’’𑀦𑁆𑀢𑀺 𑀧𑀤𑀁. 𑀧𑀞𑀫𑀲𑁆𑀲 𑀧𑀤𑀲𑁆𑀲𑀸𑀢𑀺 ‘‘𑀅𑀪𑀽𑀢’’𑀦𑁆𑀢𑀺 𑀧𑀤𑀲𑁆𑀲. 𑀘𑀢𑀼𑀢𑁆𑀣𑀦𑁆𑀢𑀺 ‘‘𑀦 𑀘 𑀧𑀦𑁂𑀢𑀁 𑀅𑀫𑁆𑀳𑁂𑀲𑀼 𑀲𑀁𑀯𑀺𑀚𑁆𑀚𑀢𑀻’’𑀢𑀺 𑀧𑀤𑀁. 𑀢𑀢𑀺𑀬𑀲𑁆𑀲𑀸𑀢𑀺 ‘‘𑀦𑀢𑁆𑀣𑀺 𑀘𑁂𑀢𑀁 𑀅𑀫𑁆𑀳𑁂𑀲𑀽’’𑀢𑀺 𑀧𑀤𑀲𑁆𑀲. 𑀯𑀺𑀯𑀺𑀥𑀫𑁂𑀓𑀢𑁆𑀣𑁂𑀬𑁂𑀯 𑀧𑀯𑀢𑁆𑀢𑀁 𑀯𑀘𑀦𑀁 𑀯𑀺𑀯𑀘𑀦𑀁, 𑀢𑀤𑁂𑀯 𑀯𑁂𑀯𑀘𑀦𑀁, 𑀯𑀘𑀦𑀦𑁆𑀢𑀺 𑀯𑀸 𑀅𑀢𑁆𑀣𑁄 𑀲𑀤𑁆𑀤𑁂𑀦 𑀯𑀘𑀦𑀻𑀬𑀢𑁆𑀢𑀸 ‘‘𑀪𑀕𑀯𑀸𑀢𑀺 𑀯𑀘𑀦𑀁 𑀲𑁂𑀝𑁆𑀞𑀁, 𑀪𑀕𑀯𑀸𑀢𑀺 𑀯𑀘𑀦𑀫𑀼𑀢𑁆𑀢𑀫’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁧.𑁧 𑀫. 𑀦𑀺. 𑀅𑀝𑁆𑀞. 𑁧.𑁧; 𑀅. 𑀦𑀺. 𑁧.𑀭𑀽𑀧𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸; 𑀧𑀸𑀭𑀸. 𑀅𑀝𑁆𑀞. 𑁧.𑁧) 𑀯𑀺𑀬. 𑀦𑀸𑀦𑀸𑀲𑀪𑀸𑀯𑀢𑁄 𑀯𑀺𑀕𑀢𑀁 𑀯𑀘𑀦𑀁 𑀬𑀲𑁆𑀲𑀸𑀢𑀺 𑀯𑁂𑀯𑀘𑀦𑀁 𑀯𑀼𑀢𑁆𑀢𑀦𑀬𑁂𑀦, 𑀧𑀭𑀺𑀬𑀸𑀬𑀯𑀘𑀦𑀦𑁆𑀢𑀺 𑀅𑀢𑁆𑀣𑁄.

𑀏𑀢𑁆𑀣𑀸𑀳 𑁋 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀧𑀭𑀺𑀬𑀸𑀬𑀯𑀘𑀦𑀁 𑀯𑀼𑀢𑁆𑀢𑀁, 𑀦𑀦𑀼 𑀏𑀓𑁂𑀓𑀧𑀤𑀯𑀲𑁂𑀦𑁂𑀯 𑀅𑀥𑀺𑀧𑁆𑀧𑁂𑀢𑁄 𑀅𑀢𑁆𑀣𑁄 𑀲𑀺𑀤𑁆𑀥𑁄, 𑀏𑀯𑀁 𑀲𑀺𑀤𑁆𑀥𑁂 𑀲𑀢𑀺 𑀓𑀺𑀫𑁂𑀢𑁂 𑀢𑁂𑀦 𑀧𑀭𑀺𑀬𑀸𑀬𑀯𑀘𑀦𑁂𑀦. 𑀢𑀤𑁂𑀢𑀜𑁆𑀳𑀺 𑀕𑀦𑁆𑀣𑀕𑀸𑀭𑀯𑀸𑀤𑀺𑀅𑀦𑁂𑀓𑀤𑁄𑀲𑀓𑀭𑀁, 𑀬𑀤𑀺 𑀘 𑀢𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀤𑁂𑀯 𑀯𑀼𑀢𑁆𑀢𑀁 𑀅𑀲𑁆𑀲, 𑀦 𑀢𑀤𑀜𑁆𑀜𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀤𑁂𑀲𑀦𑀸𑀓𑀸𑀮𑁂, 𑀳𑀺 𑀆𑀬𑀢𑀺𑀜𑁆𑀘 𑀓𑀲𑁆𑀲𑀘𑀺 𑀓𑀣𑀜𑁆𑀘𑀺 𑀢𑀤𑀢𑁆𑀣𑀧𑀝𑀺𑀯𑁂𑀥𑀦𑀢𑁆𑀣𑀁 𑀧𑀭𑀺𑀬𑀸𑀬𑀯𑀘𑀦𑀁 𑀯𑀼𑀢𑁆𑀢𑀁. 𑀤𑁂𑀲𑀦𑀸𑀧𑀝𑀺𑀕𑁆𑀕𑀸𑀳𑀓𑁂𑀲𑀼 𑀳𑀺 𑀬𑁄 𑀢𑁂𑀲𑀁 𑀧𑀭𑀺𑀬𑀸𑀬𑀯𑀘𑀦𑀸𑀦𑀁 𑀬𑀁 𑀧𑀼𑀩𑁆𑀩𑁂 𑀲𑀗𑁆𑀓𑁂𑀢𑀁 𑀓𑀭𑁄𑀢𑀺 ‘‘𑀇𑀤𑀫𑀺𑀫𑀲𑁆𑀲𑀢𑁆𑀣𑀲𑁆𑀲 𑀯𑀘𑀦’’𑀦𑁆𑀢𑀺, 𑀢𑀲𑁆𑀲 𑀢𑁂𑀦𑁂𑀯 𑀢𑀤𑀢𑁆𑀣𑀧𑀝𑀺𑀯𑁂𑀥𑁄 𑀳𑁄𑀢𑀺. 𑀅𑀧𑀺𑀘 𑀢𑀲𑁆𑀫𑀺𑀁 𑀔𑀡𑁂 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸𑀦𑀁 𑀅𑀜𑁆𑀜𑀯𑀺𑀳𑀺𑀢𑀸𑀦𑀁 𑀯𑀺𑀧𑀭𑀺𑀬𑀸𑀬𑀸𑀦𑀁 𑀅𑀜𑁆𑀜𑁂𑀦 𑀧𑀭𑀺𑀬𑀸𑀬𑁂𑀦 𑀢𑀤𑀢𑁆𑀣𑀸𑀯𑀩𑁄𑀥𑀦𑀢𑁆𑀣𑀫𑁆𑀧𑀺 𑀧𑀭𑀺𑀬𑀸𑀬𑀯𑀘𑀦𑀁 𑀯𑀼𑀢𑁆𑀢𑀁. 𑀬𑀜𑁆𑀳𑀺 𑀬𑁂 𑀦 𑀲𑀼𑀡𑀦𑁆𑀢𑀺, 𑀢𑀧𑁆𑀧𑀭𑀺𑀳𑀸𑀬𑀦𑀯𑀲𑁂𑀦 𑀢𑁂𑀲𑀁 𑀲𑀩𑁆𑀩𑀣𑀸 𑀧𑀭𑀺𑀧𑀼𑀡𑁆𑀡𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀦𑀯𑀩𑁄𑀥𑁄 𑀲𑀺𑀬𑀸, 𑀧𑀭𑀺𑀬𑀸𑀬𑀯𑀘𑀦𑁂 𑀧𑀦 𑀯𑀼𑀢𑁆𑀢𑁂 𑀢𑀩𑁆𑀩𑀲𑁂𑀦 𑀧𑀭𑀺𑀧𑀼𑀡𑁆𑀡𑀫𑀢𑁆𑀣𑀸𑀯𑀩𑁄𑀥𑁄 𑀳𑁄𑀢𑀺. 𑀅𑀣 𑀯𑀸 𑀫𑀦𑁆𑀤𑀩𑀼𑀤𑁆𑀥𑀻𑀦𑀁 𑀧𑀼𑀦𑀧𑁆𑀧𑀼𑀦𑀁 𑀢𑀤𑀢𑁆𑀣𑀮𑀓𑁆𑀔𑀡𑁂𑀦 𑀅𑀲𑀫𑁆𑀫𑁄𑀳𑀦𑀢𑁆𑀣𑀁 𑀧𑀭𑀺𑀬𑀸𑀬𑀯𑀘𑀦𑀁 𑀯𑀼𑀢𑁆𑀢𑀁. 𑀫𑀦𑁆𑀤𑀩𑀼𑀤𑁆𑀥𑀻𑀦𑀜𑁆𑀳𑀺 𑀏𑀓𑁂𑀦𑁂𑀯 𑀧𑀤𑁂𑀦 𑀏𑀓𑀢𑁆𑀣𑀲𑁆𑀲 𑀲𑀮𑁆𑀮𑀓𑁆𑀔𑀡𑁂𑀦 𑀲𑀫𑁆𑀫𑁄𑀳𑁄 𑀳𑁄𑀢𑀺, 𑀅𑀦𑁂𑀓𑁂𑀦 𑀧𑀭𑀺𑀬𑀸𑀬𑁂𑀦 𑀧𑀦 𑀏𑀓𑀢𑁆𑀣𑀲𑁆𑀲 𑀲𑀮𑁆𑀮𑀓𑁆𑀔𑀡𑁂𑀦 𑀢𑀣𑀸𑀲𑀫𑁆𑀫𑁄𑀳𑁄 𑀦 𑀳𑁄𑀢𑀺 𑀅𑀦𑁂𑀓𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑁂𑀦 𑀏𑀓𑀢𑁆𑀣𑁂𑀬𑁂𑀯 𑀧𑀯𑀢𑁆𑀢𑀲𑀤𑁆𑀤𑁂𑀦 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀘𑁆𑀙𑀺𑀢𑀢𑁆𑀢𑀸.

𑀅𑀧𑀭𑁄 𑀦𑀬𑁄 𑁋 ‘‘𑀅𑀦𑁂𑀓𑁂𑀧𑀺 𑀅𑀢𑁆𑀣𑀸 𑀲𑀫𑀸𑀦𑀩𑁆𑀬𑀜𑁆𑀚𑀦𑀸 𑀳𑁄𑀦𑁆𑀢𑀻’’𑀢𑀺 𑀬𑀸 𑀅𑀢𑁆𑀣𑀦𑁆𑀢𑀭𑀧𑀭𑀺𑀓𑀧𑁆𑀧𑀦𑀸 𑀲𑀺𑀬𑀸, 𑀢𑀲𑁆𑀲𑀸 𑀧𑀭𑀺𑀯𑀚𑁆𑀚𑀦𑀢𑁆𑀣𑀫𑁆𑀧𑀺 𑀧𑀭𑀺𑀬𑀸𑀬𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀦𑁂𑀓𑁂𑀲𑀫𑁆𑀧𑀺 𑀳𑀺 𑀅𑀢𑁆𑀣𑀸𑀦𑀁 𑀏𑀓𑀧𑀤𑀯𑀘𑀦𑀻𑀬𑀢𑀸𑀯𑀲𑁂𑀦 𑀲𑀫𑀸𑀦𑀩𑁆𑀬𑀜𑁆𑀚𑀦𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀤𑀲𑁆𑀲 ‘‘𑀅𑀬𑀫𑀢𑁆𑀣𑁄 𑀦𑀼 𑀔𑁄 𑀅𑀥𑀺𑀧𑁆𑀧𑁂𑀢𑁄, 𑀉𑀤𑀸𑀳𑀼 𑀅𑀬𑀫𑀢𑁆𑀣𑁄𑀯𑀸’’𑀢𑀺 𑀧𑀯𑀢𑁆𑀢𑀁 𑀲𑁄𑀢𑀽𑀦𑀫𑀢𑁆𑀣𑀦𑁆𑀢𑀭𑀧𑀭𑀺𑀓𑀧𑁆𑀧𑀦𑀁 𑀯𑁂𑀯𑀘𑀦𑀁 𑀅𑀜𑁆𑀜𑀫𑀜𑁆𑀜𑀁 𑀪𑁂𑀤𑀓𑀯𑀲𑁂𑀦 𑀧𑀭𑀺𑀯𑀚𑁆𑀚𑁂𑀢𑀺. 𑀯𑀼𑀢𑁆𑀢𑀜𑁆𑀘 𑁋

‘‘𑀦𑁂𑀓𑀢𑁆𑀣𑀯𑀼𑀢𑁆𑀢𑀺𑀬𑀸 ¶ ¶ 𑀲𑀤𑁆𑀤𑁄, 𑀦 𑀯𑀺𑀲𑁂𑀲𑀢𑁆𑀣𑀜𑀸𑀧𑀓𑁄;

𑀧𑀭𑀺𑀬𑀸𑀬𑁂𑀦 𑀬𑀼𑀢𑁆𑀢𑁄 𑀢𑀼, 𑀧𑀭𑀺𑀬𑀸𑀬𑁄 𑀘 𑀪𑁂𑀤𑀓𑁄’’𑀢𑀺.

𑀅𑀧𑀭𑁄 𑀦𑀬𑁄 𑁋 𑀅𑀦𑀜𑁆𑀜𑀲𑁆𑀲𑀸𑀧𑀺 𑀧𑀭𑀺𑀬𑀸𑀬𑀯𑀘𑀦𑀲𑁆𑀲 𑀯𑀘𑀦𑁂 𑀅𑀦𑁂𑀓𑀸𑀳𑀺 𑀢𑀸𑀳𑀺 𑀢𑀸𑀳𑀺 𑀦𑀸𑀫𑀧𑀜𑁆𑀜𑀢𑁆𑀢𑀻𑀳𑀺 𑀢𑁂𑀲𑀁 𑀢𑁂𑀲𑀁 𑀅𑀢𑁆𑀣𑀸𑀦𑀁 𑀧𑀜𑁆𑀜𑀸𑀧𑀦𑀢𑁆𑀣𑀫𑁆𑀧𑀺 𑀧𑀭𑀺𑀬𑀸𑀬𑀯𑀘𑀦𑀁 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺. 𑀢𑀣𑀸 𑀳𑀺 𑀧𑀭𑀺𑀬𑀸𑀬𑀯𑀘𑀦𑁂 𑀯𑀼𑀢𑁆𑀢𑁂 ‘‘𑀇𑀫𑀲𑁆𑀲𑀢𑁆𑀣𑀲𑁆𑀲 𑀇𑀤𑀫𑀺𑀤𑀫𑁆𑀧𑀺 𑀦𑀸𑀫’’𑀦𑁆𑀢𑀺 𑀲𑁄𑀢𑀽𑀦𑀁 𑀅𑀦𑁂𑀓𑀥𑀸 𑀦𑀸𑀫𑀧𑀜𑁆𑀜𑀢𑁆𑀢𑀺𑀯𑀺𑀚𑀸𑀦𑀦𑀁. 𑀢𑀢𑁄 𑀘 𑀢𑀁𑀢𑀁𑀧𑀜𑁆𑀜𑀢𑁆𑀢𑀺𑀓𑁄𑀲𑀮𑁆𑀮𑀁 𑀳𑁄𑀢𑀺 𑀲𑁂𑀬𑁆𑀬𑀣𑀸𑀧𑀺 𑀦𑀺𑀖𑀡𑁆𑀝𑀼𑀲𑀢𑁆𑀣𑁂 𑀧𑀭𑀺𑀘𑀬𑀢𑀁. 𑀅𑀧𑀺𑀘 𑀥𑀫𑁆𑀫𑀓𑀣𑀺𑀓𑀸𑀦𑀁 𑀢𑀦𑁆𑀢𑀺𑀅𑀢𑁆𑀣𑀼𑀧𑀦𑀺𑀩𑀦𑁆𑀥𑀦𑀧𑀭𑀸𑀯𑀩𑁄𑀥𑀦𑀸𑀦𑀁 𑀲𑀼𑀔𑀲𑀺𑀤𑁆𑀥𑀺𑀬𑀸𑀧𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀢𑀩𑁆𑀩𑀘𑀦𑁂𑀦 𑀳𑀺 𑀥𑀫𑁆𑀫𑀤𑁂𑀲𑀓𑀸𑀦𑀁 𑀢𑀦𑁆𑀢𑀺𑀅𑀢𑁆𑀣𑀲𑁆𑀲 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀉𑀧𑀦𑀺𑀩𑀦𑁆𑀥𑀦𑁂𑀦 𑀞𑀧𑀦𑁂𑀦 𑀧𑀭𑁂𑀲𑀁 𑀲𑁄𑀢𑀽𑀦𑀫𑀯𑀩𑁄𑀥𑀦𑀁 𑀲𑀼𑀔𑀲𑀺𑀤𑁆𑀥𑀁 𑀳𑁄𑀢𑀺. 𑀅𑀣 𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀅𑀢𑁆𑀢𑀦𑁄 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀪𑀸𑀯𑀦𑀢𑁆𑀣𑀁, 𑀯𑁂𑀦𑁂𑀬𑁆𑀬𑀸𑀦𑀜𑁆𑀘 𑀢𑀢𑁆𑀣 𑀩𑀻𑀚𑀯𑀸𑀧𑀦𑀢𑁆𑀣𑀁 𑀧𑀭𑀺𑀬𑀸𑀬𑀯𑀘𑀦𑀁 𑀪𑀕𑀯𑀸 𑀦𑀺𑀤𑁆𑀤𑀺𑀲𑀢𑀺. 𑀢𑀤𑀲𑀫𑁆𑀧𑀢𑁆𑀢𑀺𑀓𑀲𑁆𑀲 𑀳𑀺 𑀢𑀣𑀸𑀯𑀘𑀦𑀁 𑀦 𑀲𑀫𑁆𑀪𑀯𑀢𑀺. 𑀢𑁂𑀦 𑀘 𑀧𑀭𑀺𑀬𑀸𑀬𑀯𑀘𑀦𑁂𑀦 𑀬𑀣𑀸𑀲𑀼𑀢𑁂𑀦 𑀢𑀲𑁆𑀲𑀁 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀲𑀫𑁆𑀧𑀢𑁆𑀢𑀺𑀬𑀁 𑀢𑀧𑁆𑀧𑀭𑀺𑀘𑀭𑀡𑁂𑀦, 𑀢𑀤𑀜𑁆𑀜𑀲𑀼𑀘𑀭𑀺𑀢𑀲𑀫𑀼𑀧𑀩𑁆𑀭𑀽𑀳𑀦𑁂𑀦 𑀘 𑀧𑀼𑀜𑁆𑀜𑀲𑀗𑁆𑀔𑀸𑀢𑀲𑁆𑀲 𑀩𑀻𑀚𑀲𑁆𑀲 𑀯𑀧𑀦𑀁 𑀲𑀫𑁆𑀪𑀯𑀢𑀺. 𑀓𑁄 𑀳𑀺 𑀈𑀤𑀺𑀲𑀸𑀬 𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀜𑁆𑀜𑀸𑀬𑀫𑀸𑀦𑀸𑀬 𑀢𑀤𑁂𑀢𑀁 𑀦𑀸𑀪𑀺𑀧𑀢𑁆𑀣𑁂𑀬𑁆𑀬𑀸𑀢𑀺, 𑀓𑀺𑀁 𑀯𑀸 𑀩𑀳𑀼𑀦𑀸. 𑀬𑀲𑁆𑀲𑀸 𑀥𑀫𑁆𑀫𑀥𑀸𑀢𑀼𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀬𑀣𑀸 𑀲𑀩𑁆𑀩𑀲𑁆𑀫𑀺𑀁 𑀅𑀢𑁆𑀣𑁂 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑁄, 𑀢𑀣𑀸 𑀲𑀩𑁆𑀩𑀲𑁆𑀫𑀺𑀁 𑀲𑀤𑁆𑀤𑀯𑁄𑀳𑀸𑀭𑁂𑀢𑀺 𑀏𑀓𑀫𑁆𑀧𑀺 𑀅𑀢𑁆𑀣𑀁 𑀅𑀦𑁂𑀓𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀩𑁄𑀥𑁂𑀢𑀺, 𑀦𑀢𑁆𑀣𑀺 𑀢𑀢𑁆𑀣 𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀯𑀺𑀢𑁆𑀣𑀸𑀭𑀺𑀢𑀢𑁆𑀢𑀁, 𑀦𑀸𑀧𑀺 𑀥𑀫𑁆𑀫𑀤𑁂𑀲𑀦𑀸𑀬 𑀳𑀸𑀦𑀺, 𑀆𑀯𑁂𑀡𑀺𑀓𑁄 𑀘𑀸𑀬𑀁 𑀩𑀼𑀤𑁆𑀥𑀥𑀫𑁆𑀫𑁄. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀳𑀺 𑀲𑀼𑀧𑁆𑀧𑀝𑀺𑀯𑀺𑀤𑀺𑀢𑀪𑀸𑀯𑁂𑀦 𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑁂𑀳𑀺 𑀯𑀺𑀬 𑀢𑁂𑀦𑀧𑀺 𑀜𑀸𑀡𑁂𑀦 𑀅𑀢𑁆𑀣𑁂, 𑀥𑀫𑁆𑀫𑁂, 𑀦𑀺𑀭𑀼𑀢𑁆𑀢𑀺𑀬𑀸 𑀘 𑀅𑀧𑁆𑀧𑀝𑀺𑀳𑀢𑀯𑀼𑀢𑁆𑀢𑀺𑀢𑀸𑀬 𑀩𑀼𑀤𑁆𑀥𑀮𑀻𑀴𑀸𑀬 𑀏𑀓𑀫𑁆𑀧𑀺 𑀅𑀢𑁆𑀣𑀁 𑀅𑀦𑁂𑀓𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀩𑁄𑀥𑁂𑀢𑀺, 𑀦 𑀧𑀦 𑀢𑀲𑁆𑀫𑀺𑀁 𑀲𑀤𑁆𑀤𑀯𑁄𑀳𑀸𑀭𑁂, 𑀢𑀣𑀸𑀩𑁄𑀥𑀦𑁂 𑀯𑀸 𑀫𑀦𑁆𑀤𑀪𑀸𑀯𑁄 𑀲𑀫𑁆𑀫𑀸𑀩𑁄𑀥𑀦𑀲𑁆𑀲 𑀲𑀸𑀥𑀦𑀢𑁆𑀢𑀸, 𑀦 𑀘 𑀢𑁂𑀦 𑀅𑀢𑁆𑀣𑀲𑁆𑀲 𑀯𑀺𑀢𑁆𑀣𑀸𑀭𑀪𑀸𑀯𑁄 𑀏𑀓𑀲𑁆𑀲𑁂𑀯𑀢𑁆𑀣𑀲𑁆𑀲 𑀤𑁂𑀲𑁂𑀢𑀩𑁆𑀩𑀲𑁆𑀲 𑀲𑀼𑀩𑁆𑀩𑀺𑀚𑀸𑀦𑀦𑀓𑀸𑀭𑀡𑀢𑁆𑀢𑀸, 𑀦𑀸𑀧𑀺 𑀢𑀩𑁆𑀩𑀘𑀦𑁂𑀦 𑀥𑀫𑁆𑀫𑀤𑁂𑀲𑀦𑀸𑀳𑀸𑀦𑀺 𑀢𑀲𑁆𑀲 𑀤𑁂𑀲𑀦𑀸𑀲𑀫𑁆𑀧𑀢𑁆𑀢𑀺𑀪𑀸𑀯𑀢𑁄. 𑀢𑀲𑁆𑀫𑀸 𑀲𑀸𑀢𑁆𑀣𑀓𑀁 𑀧𑀭𑀺𑀬𑀸𑀬𑀯𑀘𑀦𑀁, 𑀦 𑀘𑀸𑀧𑀺 𑀢𑀁 𑀕𑀦𑁆𑀣𑀕𑀸𑀭𑀯𑀸𑀤𑀺𑀅𑀦𑁂𑀓𑀤𑁄𑀲𑀓𑀭𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀁 𑀧𑀦𑁂𑀢𑀁 𑀯𑀼𑀢𑁆𑀢𑀁 ‘‘𑀬𑀤𑀺 𑀘 𑀢𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀤𑁂𑀯 𑀯𑀼𑀢𑁆𑀢𑀁 𑀅𑀲𑁆𑀲, 𑀦 𑀢𑀤𑀜𑁆𑀜’’𑀦𑁆𑀢𑀺, 𑀢𑀫𑁆𑀧𑀺 𑀦 𑀬𑀼𑀢𑁆𑀢𑀁 𑀧𑀬𑁄𑀚𑀦𑀦𑁆𑀢𑀭𑀲𑀫𑁆𑀪𑀯𑀢𑁄. 𑀢𑀤𑁂𑀯 𑀳𑀺 𑀅𑀯𑀢𑁆𑀯𑀸 𑀢𑀤𑀜𑁆𑀜𑀲𑁆𑀲 𑀯𑀘𑀦𑁂𑀦 𑀤𑁂𑀲𑀦𑀸𑀓𑁆𑀔𑀡𑁂 𑀲𑀫𑀸𑀳𑀺𑀢𑀘𑀺𑀢𑁆𑀢𑀸𑀦𑀫𑁆𑀧𑀺 𑀲𑀫𑁆𑀫𑀤𑁂𑀯 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀸𑀦𑀁 𑀢𑀁𑀢𑀁𑀧𑀤𑀦𑁆𑀢𑁄𑀕𑀥𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀫𑀸𑀭𑀩𑁆𑀪 ¶ 𑀢𑀤𑀢𑁆𑀣𑀸𑀥𑀺𑀕𑀫𑁄 𑀳𑁄𑀢𑀺, 𑀇𑀢𑀭𑀣𑀸 𑀢𑀲𑁆𑀫𑀺𑀁𑀬𑁂𑀯 𑀧𑀤𑁂 𑀧𑀼𑀦𑀧𑁆𑀧𑀼𑀦𑀁 𑀯𑀼𑀢𑁆𑀢𑁂 𑀢𑁂𑀲𑀁 𑀢𑀤𑀢𑁆𑀣𑀸𑀦𑀥𑀺𑀕𑀢𑀢𑀸 𑀲𑀺𑀬𑀸𑀢𑀺. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀬𑁂𑀦 𑀓𑁂𑀦𑀘𑀺 𑀅𑀢𑁆𑀣𑀲𑁆𑀲, 𑀩𑁄𑀥𑀸𑀬 𑀅𑀜𑁆𑀜𑀲𑀤𑁆𑀤𑀢𑁄;

𑀯𑀺𑀓𑁆𑀔𑀺𑀢𑁆𑀢𑀓𑀫𑀦𑀸𑀦𑀫𑁆𑀧𑀺, 𑀧𑀭𑀺𑀬𑀸𑀬𑀓𑀣𑀸 𑀓𑀢𑀸.

𑀫𑀦𑁆𑀤𑀸𑀦𑀜𑁆𑀘 ¶ 𑀅𑀫𑀽𑀴𑁆𑀳𑀢𑁆𑀣𑀁, 𑀅𑀢𑁆𑀣𑀦𑁆𑀢𑀭𑀦𑀺𑀲𑁂𑀥𑀬𑀸;

𑀢𑀁𑀢𑀁𑀦𑀸𑀫𑀦𑀺𑀭𑀼𑀴𑁆𑀳𑀢𑁆𑀣𑀁, 𑀧𑀭𑀺𑀬𑀸𑀬𑀓𑀣𑀸 𑀓𑀢𑀸.

𑀤𑁂𑀲𑀓𑀸𑀦𑀁 𑀲𑀼𑀓𑀭𑀢𑁆𑀣𑀁, 𑀢𑀦𑁆𑀢𑀺𑀅𑀢𑁆𑀣𑀸𑀯𑀩𑁄𑀥𑀦𑁂;

𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀩𑁄𑀥𑀢𑁆𑀣𑀁, 𑀧𑀭𑀺𑀬𑀸𑀬𑀓𑀣𑀸 𑀓𑀢𑀸.

𑀯𑁂𑀦𑁂𑀬𑁆𑀬𑀸𑀦𑀁 𑀢𑀢𑁆𑀣 𑀩𑀻𑀚𑀯𑀸𑀧𑀦𑀢𑁆𑀣𑀜𑁆𑀘 𑀅𑀢𑁆𑀢𑀦𑁄;

𑀥𑀫𑁆𑀫𑀥𑀸𑀢𑀼𑀬𑀸 𑀮𑀻𑀴𑀸𑀬, 𑀧𑀭𑀺𑀬𑀸𑀬𑀓𑀣𑀸 𑀓𑀢𑀸.

𑀢𑀤𑁂𑀯 𑀢𑀼 𑀅𑀯𑀢𑁆𑀯𑀸𑀦, 𑀢𑀤𑀜𑁆𑀜𑁂𑀳𑀺 𑀧𑀩𑁄𑀥𑀦𑀁;

𑀲𑀫𑁆𑀫𑀸𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀸𑀦𑀁, 𑀅𑀢𑁆𑀣𑀸𑀥𑀺𑀕𑀫𑀸𑀬 𑀓𑀢’’𑀦𑁆𑀢𑀺.

𑀇𑀤𑀁 𑀧𑀦 𑀦𑀺𑀩𑁆𑀩𑁂𑀞𑀦𑀁 𑀈𑀤𑀺𑀲𑁂𑀬𑁂𑀯, 𑀦 𑀲𑀩𑁆𑀩𑀢𑁆𑀣 𑀓𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀯𑀡𑁆𑀡𑁂𑀬𑁂𑀯𑀸𑀢𑀺 𑀓𑀸𑀭𑀡𑀧𑀢𑀺𑀭𑀽𑀧𑀁 𑀯𑀢𑁆𑀯𑀸, 𑀅𑀯𑀢𑁆𑀯𑀸 𑀯𑀸 𑀤𑁄𑀲𑀧𑀢𑀺𑀝𑁆𑀞𑀸𑀧𑀦𑀯𑀲𑁂𑀦 𑀦𑀺𑀦𑁆𑀤𑀸𑀬 𑀏𑀯. 𑀦 𑀲𑀩𑁆𑀩𑀢𑁆𑀣𑀸𑀢𑀺 𑀦 𑀓𑁂𑀯𑀮𑀁 𑀅𑀓𑁆𑀓𑁄𑀲𑀦𑀔𑀼𑀁𑀲𑀦𑀯𑀫𑁆𑀪𑀦𑀸𑀤𑀻𑀲𑀼 𑀲𑀩𑁆𑀩𑀢𑁆𑀣 𑀦𑀺𑀩𑁆𑀩𑁂𑀞𑀦𑀁 𑀓𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑀤𑁂𑀯𑀢𑁆𑀣𑀁 ‘‘𑀬𑀤𑀺 𑀳𑀻’’𑀢𑀺𑀆𑀤𑀺𑀦𑀸 𑀧𑀸𑀓𑀝𑀁 𑀓𑀭𑁄𑀢𑀺. ‘‘𑀲𑀸𑀲𑀗𑁆𑀓𑀦𑀻𑀬𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁 𑀢𑀣𑀸𑀦𑀺𑀩𑁆𑀩𑁂𑀞𑁂𑀢𑀩𑁆𑀩𑀢𑀸𑀬 𑀓𑀸𑀭𑀡𑀫𑁂𑀯 ‘‘𑀢𑀲𑁆𑀫𑀸’’𑀢𑀺 𑀧𑀝𑀺𑀦𑀺𑀤𑁆𑀤𑀺𑀲𑀢𑀺. ‘‘𑀑𑀝𑁆𑀞𑁄𑀲𑀻’’𑀢𑀺𑀆𑀤𑀺 ‘‘𑀦 𑀲𑀩𑁆𑀩𑀢𑁆𑀣𑀸’’𑀢𑀺 𑀏𑀢𑀲𑁆𑀲 𑀯𑀺𑀯𑀭𑀡𑀁. 𑀚𑀸𑀢𑀺𑀦𑀸𑀫𑀕𑁄𑀢𑁆𑀢𑀓𑀫𑁆𑀫𑀲𑀺𑀧𑁆𑀧𑀆𑀩𑀸𑀥 𑀮𑀺𑀗𑁆𑀕 𑀓𑀺𑀮𑁂𑀲 𑀆𑀧𑀢𑁆𑀢𑀺 𑀅𑀓𑁆𑀓𑁄𑀲𑀦𑀲𑀗𑁆𑀔𑀸𑀢𑁂𑀳𑀺 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺. 𑀅𑀥𑀺𑀯𑀸𑀲𑀦𑀫𑁂𑀯 𑀔𑀦𑁆𑀢𑀺, 𑀦 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀫𑀦𑀸𑀤𑀬𑁄𑀢𑀺 𑀅𑀥𑀺𑀯𑀸𑀲𑀦𑀔𑀦𑁆𑀢𑀺.

𑁬. 𑀏𑀯𑀁 𑀅𑀯𑀡𑁆𑀡𑀪𑀽𑀫𑀺𑀬𑀸 𑀲𑀁𑀯𑀡𑁆𑀡𑀦𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀯𑀡𑁆𑀡𑀪𑀽𑀫𑀺𑀬𑀸𑀧𑀺 𑀲𑀁𑀯𑀡𑁆𑀡𑀦𑀁 𑀓𑀸𑀢𑀼𑀫𑀸𑀳 ‘‘𑀏𑀯’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀅𑀯𑀡𑁆𑀡𑀪𑀽𑀫𑀺𑀬𑀦𑁆𑀢𑀺 𑀅𑀯𑀡𑁆𑀡𑀧𑁆𑀧𑀓𑀸𑀲𑀦𑀝𑁆𑀞𑀸𑀦𑁂. 𑀢𑀸𑀤𑀺𑀮𑀓𑁆𑀔𑀡𑀦𑁆𑀢𑀺 𑀏𑀢𑁆𑀣 ‘‘𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀢𑀸𑀤𑀻 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻, 𑀘𑀢𑁆𑀢𑀸𑀯𑀻𑀢𑀺 𑀢𑀸𑀤𑀻, 𑀢𑀺𑀡𑁆𑀡𑀸𑀯𑀻𑀢𑀺 𑀢𑀸𑀤𑀻, 𑀫𑀼𑀢𑁆𑀢𑀸𑀯𑀻𑀢𑀺 𑀢𑀸𑀤𑀻, 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻’’𑀢𑀺 (𑀫𑀳𑀸𑀦𑀺. 𑁩𑁮) 𑀦𑀺𑀤𑁆𑀤𑁂𑀲𑀦𑀬𑁂𑀦 𑀧𑀜𑁆𑀘𑀲𑀼 𑀅𑀢𑁆𑀣𑁂𑀲𑀼 𑀇𑀥 𑀧𑀞𑀫𑁂𑀦𑀢𑁆𑀣𑁂𑀦 𑀢𑀸𑀤𑀻. 𑀢𑀢𑁆𑀭𑀸𑀬𑀁 𑀦𑀺𑀤𑁆𑀤𑁂𑀲𑁄 𑁋

𑀓𑀣𑀁 𑀅𑀭𑀳𑀸 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻, 𑀅𑀭𑀳𑀸 𑀮𑀸𑀪𑁂𑀧𑀺 𑀢𑀸𑀤𑀻, 𑀅𑀮𑀸𑀪𑁂𑀧𑀺 𑀢𑀸𑀤𑀻, 𑀬𑀲𑁂𑀧𑀺, 𑀅𑀬𑀲𑁂𑀧𑀺, 𑀧𑀲𑀁𑀲𑀸𑀬𑀧𑀺, 𑀦𑀺𑀦𑁆𑀤𑀸𑀬𑀧𑀺, 𑀲𑀼𑀔𑁂𑀧𑀺 ¶ , 𑀤𑀼𑀓𑁆𑀔𑁂𑀧𑀺 𑀢𑀸𑀤𑀻, 𑀏𑀓𑀜𑁆𑀘𑁂 𑀩𑀸𑀳𑀁 𑀕𑀦𑁆𑀥𑁂𑀦 𑀮𑀺𑀫𑁆𑀧𑁂𑀬𑁆𑀬𑀼𑀁, 𑀏𑀓𑀜𑁆𑀘𑁂 𑀩𑀸𑀳𑀁 𑀯𑀸𑀲𑀺𑀬𑀸 𑀢𑀘𑁆𑀙𑁂𑀬𑁆𑀬𑀼𑀁, 𑀅𑀫𑀼𑀲𑁆𑀫𑀺𑀁 𑀦𑀢𑁆𑀣𑀺 𑀭𑀸𑀕𑁄, 𑀅𑀫𑀼𑀲𑁆𑀫𑀺𑀁 𑀦𑀢𑁆𑀣𑀺 𑀧𑀝𑀺𑀖𑁄 ¶ , 𑀅𑀦𑀼𑀦𑀬𑀧𑀝𑀺𑀖𑀯𑀺𑀧𑁆𑀧𑀳𑀻𑀦𑁄 𑀉𑀕𑁆𑀖𑀸𑀝𑀺𑀦𑀺𑀕𑁆𑀖𑀸𑀝𑀺𑀯𑀻𑀢𑀺𑀯𑀢𑁆𑀢𑁄, 𑀅𑀦𑀼𑀭𑁄𑀥𑀯𑀺𑀭𑁄𑀥𑀲𑀫𑀢𑀺𑀓𑁆𑀓𑀦𑁆𑀢𑁄, 𑀏𑀯𑀁 𑀅𑀭𑀳𑀸 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻𑀢𑀺 (𑀫𑀳𑀸𑀦𑀺. 𑁩𑁮).

𑀯𑀘𑀦𑀢𑁆𑀣𑁄 𑀧𑀦 𑀢𑀫𑀺𑀯 𑀤𑀺𑀲𑁆𑀲𑀢𑀻𑀢𑀺 𑀢𑀸𑀤𑀻, 𑀇𑀝𑁆𑀞𑀫𑀺𑀯 𑀅𑀦𑀺𑀝𑁆𑀞𑀫𑁆𑀧𑀺 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀮𑀓𑁆𑀔𑀡𑀁 𑀢𑀸𑀤𑀺𑀮𑀓𑁆𑀔𑀡𑀁, 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀲𑀫𑀧𑁂𑀓𑁆𑀔𑀦𑀲𑀪𑀸𑀯𑁄. 𑀅𑀣 𑀯𑀸 𑀢𑀫𑀺𑀯 𑀤𑀺𑀲𑁆𑀲𑀢𑁂 𑀢𑀸𑀤𑀻, 𑀲𑁄 𑀏𑀯 𑀲𑀪𑀸𑀯𑁄, 𑀢𑀤𑁂𑀯 𑀮𑀓𑁆𑀔𑀡𑀁 𑀢𑀸𑀤𑀺𑀮𑀓𑁆𑀔𑀡𑀦𑁆𑀢𑀺. 𑀯𑀡𑁆𑀡𑀪𑀽𑀫𑀺𑀬𑀁 𑀢𑀸𑀤𑀺𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭-𑀲𑀤𑁆𑀤𑁄 𑀅𑀜𑁆𑀜𑀢𑁆𑀣𑁂𑀢𑀺 𑀆𑀳 ‘‘𑀬𑁂 𑀓𑁂𑀘𑀻’’𑀢𑀺𑀆𑀤𑀺. 𑀆𑀦𑀦𑁆𑀤𑀦𑁆𑀢𑀺 𑀪𑀼𑀲𑀁 𑀧𑀫𑁄𑀤𑀦𑁆𑀢𑀺 𑀢𑀁𑀲𑀫𑀗𑁆𑀕𑀺𑀦𑁄 𑀲𑀢𑁆𑀢𑀸 𑀏𑀢𑁂𑀦𑀸𑀢𑀺 𑀆𑀦𑀦𑁆𑀤𑀲𑀤𑁆𑀤𑀲𑁆𑀲 𑀓𑀭𑀡𑀢𑁆𑀣𑀢𑀁 𑀤𑀲𑁆𑀲𑁂𑀢𑀺. 𑀲𑁄𑀪𑀦𑀫𑀦𑁄 𑀲𑀼𑀫𑀦𑁄, 𑀘𑀺𑀢𑁆𑀢𑀁, 𑀲𑁄𑀪𑀦𑀁 𑀯𑀸 𑀫𑀦𑁄 𑀬𑀲𑁆𑀲𑀸𑀢𑀺 𑀲𑀼𑀫𑀦𑁄, 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄. 𑀦𑀦𑀼 𑀘 𑀘𑀺𑀢𑁆𑀢𑀯𑀸𑀘𑀓𑀪𑀸𑀯𑁂 𑀲𑀢𑀺 𑀘𑁂𑀢𑀲𑀺𑀓𑀲𑀼𑀔𑀲𑁆𑀲 𑀪𑀸𑀯𑀢𑁆𑀣𑀢𑀸 𑀬𑀼𑀢𑁆𑀢𑀸, 𑀧𑀼𑀕𑁆𑀕𑀮𑀯𑀸𑀘𑀓𑀪𑀸𑀯𑁂 𑀧𑀦 𑀘𑀺𑀢𑁆𑀢𑀫𑁂𑀯 𑀪𑀸𑀯𑀢𑁆𑀣𑁄 𑀲𑀺𑀬𑀸, 𑀦 𑀘𑁂𑀢𑀲𑀺𑀓𑀲𑀼𑀔𑀁, 𑀲𑀼𑀫𑀦𑀲𑀤𑁆𑀤𑀲𑁆𑀲 𑀤𑀩𑁆𑀩𑀦𑀺𑀫𑀺𑀢𑁆𑀢𑀁 𑀧𑀢𑀺 𑀧𑀯𑀢𑁆𑀢𑀢𑁆𑀢𑀸 𑀬𑀣𑀸 ‘‘𑀤𑀡𑁆𑀟𑀺𑀢𑁆𑀢𑀁 𑀲𑀺𑀔𑀺𑀢𑁆𑀢’’𑀦𑁆𑀢𑀺𑀆𑀤𑀻𑀢𑀺? 𑀲𑀘𑁆𑀘𑀫𑁂𑀢𑀁 𑀤𑀩𑁆𑀩𑁂 𑀅𑀧𑁂𑀓𑁆𑀔𑀺𑀢𑁂, 𑀇𑀥 𑀧𑀦 𑀢𑀤𑀦𑀧𑁂𑀓𑁆𑀔𑀺𑀢𑁆𑀯𑀸 𑀢𑁂𑀦 𑀤𑀩𑁆𑀩𑁂𑀦 𑀬𑀼𑀢𑁆𑀢𑀁 𑀫𑀽𑀮𑀦𑀺𑀫𑀺𑀢𑁆𑀢𑀪𑀽𑀢𑀁 𑀘𑁂𑀢𑀲𑀺𑀓𑀲𑀼𑀔𑀫𑁂𑀯 𑀅𑀧𑁂𑀓𑁆𑀔𑀺𑀢𑁆𑀯𑀸 𑀲𑀼𑀫𑀦𑀲𑀤𑁆𑀤𑁄 𑀧𑀯𑀢𑁆𑀢𑁄, 𑀢𑀲𑁆𑀫𑀸 𑀏𑀢𑁆𑀣𑀸𑀧𑀺 𑀘𑁂𑀢𑀲𑀺𑀓𑀲𑀼𑀔𑀫𑁂𑀯 𑀪𑀸𑀯𑀢𑁆𑀣𑁄 𑀲𑀫𑁆𑀪𑀯𑀢𑀺, 𑀢𑁂𑀦𑀸𑀳 ‘‘𑀘𑁂𑀢𑀲𑀺𑀓𑀲𑀼𑀔𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀏𑀢𑁂𑀦 𑀳𑀺 𑀯𑀘𑀦𑁂𑀦 𑀢𑀤𑀜𑁆𑀜𑀘𑁂𑀢𑀲𑀺𑀓𑀸𑀦𑀫𑁆𑀧𑀺 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀢𑁆𑀢𑀸, 𑀘𑀺𑀢𑁆𑀢𑀓𑀺𑀭𑀺𑀬𑀢𑁆𑀢𑀸 𑀘 𑀬𑀣𑀸𑀲𑀫𑁆𑀪𑀯𑀁 𑀲𑁄𑀫𑀦𑀲𑁆𑀲𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀘𑁄𑀤𑀦𑀁 𑀦𑀸𑀧𑀚𑁆𑀚𑀢𑁂𑀯 𑀭𑀼𑀴𑁆𑀳𑀺𑀲𑀤𑁆𑀤𑀢𑁆𑀢𑀸 𑀢𑀲𑁆𑀲 𑀬𑀣𑀸 ‘‘𑀧𑀗𑁆𑀓𑀚’’𑀦𑁆𑀢𑀺 𑀧𑀭𑀺𑀳𑀭𑀢𑀺. 𑀉𑀩𑁆𑀩𑀺𑀮𑀬𑀢𑀻𑀢𑀺 𑀉𑀩𑁆𑀩𑀺𑀮𑀁, 𑀪𑀺𑀦𑁆𑀤𑀢𑀺 𑀧𑀼𑀭𑀺𑀫𑀸𑀯𑀢𑁆𑀣𑀸𑀬 𑀯𑀺𑀲𑁂𑀲𑀁 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀢𑀤𑁂𑀯 𑀉𑀩𑁆𑀩𑀺𑀮𑀸𑀯𑀺𑀢𑀁 𑀧𑀘𑁆𑀘𑀬𑀦𑁆𑀢𑀭𑀸𑀕𑀫𑀸𑀤𑀺𑀯𑀲𑁂𑀦. 𑀉𑀤𑁆𑀥𑀁 𑀧𑀮𑀯𑀢𑀻𑀢𑀺 𑀯𑀸 𑀉𑀩𑁆𑀩𑀺𑀮𑀸𑀯𑀺𑀢𑀁 𑀅𑀓𑀸𑀭𑀸𑀦𑀁 𑀇𑀓𑀸𑀭𑀁, 𑀆𑀓𑀸𑀭𑀜𑁆𑀘 𑀓𑀢𑁆𑀯𑀸, 𑀘𑀺𑀢𑁆𑀢𑀫𑁂𑀯 ‘‘𑀘𑁂𑀢𑀲𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀢𑀤𑁆𑀥𑀺𑀢𑁂 𑀧𑀦 𑀲𑀺𑀤𑁆𑀥𑁂 𑀢𑀁 𑀅𑀩𑁆𑀬𑀢𑀺𑀭𑀺𑀢𑁆𑀢𑀁 𑀢𑀲𑁆𑀫𑀺𑀁 𑀧𑀤𑁂 𑀯𑀘𑀦𑀻𑀬𑀲𑁆𑀲 𑀲𑀸𑀫𑀜𑁆𑀜𑀪𑀸𑀯𑀢𑁄, 𑀢𑀲𑁆𑀲 𑀯𑀸 𑀲𑀤𑁆𑀤𑀲𑁆𑀲 𑀦𑀸𑀫𑀧𑀤𑀢𑁆𑀢𑀸, 𑀢𑀲𑁆𑀫𑀸 𑀓𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑀻𑀯𑀺𑀲𑁂𑀲𑀸𑀦𑀼𑀬𑁄𑀕𑁂 ‘‘𑀘𑁂𑀢𑀲𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀈𑀤𑀺𑀲𑁂𑀲𑀼. 𑀬𑀸𑀬 𑀉𑀧𑁆𑀧𑀦𑁆𑀦𑀸𑀬 𑀓𑀸𑀬𑀘𑀺𑀢𑁆𑀢𑀁 𑀯𑀸𑀢𑀧𑀽𑀭𑀺𑀢𑀪𑀲𑁆𑀢𑀸 𑀯𑀺𑀬 𑀉𑀤𑁆𑀥𑀼𑀫𑀸𑀬𑀦𑀸𑀓𑀸𑀭𑀧𑁆𑀧𑀢𑁆𑀢𑀁 𑀳𑁄𑀢𑀺 𑀢𑀲𑁆𑀲𑀸 𑀕𑁂𑀳𑀲𑀺𑀢𑀸𑀬 𑀑𑀤𑀕𑁆𑀬𑀧𑀻𑀢𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀲𑀭𑀽𑀧𑀁 𑀤𑀲𑁆𑀲𑁂𑀢𑀺 ‘‘𑀉𑀤𑁆𑀥𑀘𑁆𑀘𑀸𑀯𑀳𑀸𑀬𑀸’’𑀢𑀺𑀆𑀤𑀺𑀦𑀸. 𑀉𑀤𑁆𑀥𑀘𑁆𑀘𑀸𑀯𑀳𑀸𑀬𑀸𑀢𑀺 𑀉𑀤𑁆𑀥𑀢𑀪𑀸𑀯𑀸𑀯𑀳𑀸𑀬. 𑀉𑀧𑁆𑀧𑀺𑀮𑀸𑀧𑁂𑀢𑀺 ¶ 𑀘𑀺𑀢𑁆𑀢𑀁 𑀉𑀧𑁆𑀧𑀺𑀮𑀸𑀯𑀺𑀢𑀁 𑀓𑀭𑁄𑀢𑀻𑀢𑀺 𑀉𑀩𑁆𑀩𑀺𑀮𑀸𑀧𑀦𑀸, 𑀲𑀸 𑀏𑀯 𑀧𑀻𑀢𑀺, 𑀢𑀲𑁆𑀲𑀸. 𑀔𑀦𑁆𑀥𑀯𑀲𑁂𑀦 𑀥𑀫𑁆𑀫𑀯𑀺𑀲𑁂𑀲𑀢𑁆𑀢𑀁 𑀆𑀳 ‘‘𑀇𑀥𑀸𑀧𑀻’’𑀢𑀺𑀆𑀤𑀺𑀦𑀸. 𑀅𑀯𑀡𑁆𑀡𑀪𑀽𑀫𑀺𑀫𑀧𑁂𑀓𑁆𑀔𑀸𑀬 𑀅𑀧𑀺-𑀲𑀤𑁆𑀤𑁄 ‘‘𑀅𑀬𑀫𑁆𑀧𑀺 𑀧𑀸𑀭𑀸𑀚𑀺𑀓𑁄’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧.𑁮𑁯, 𑁯𑁧, 𑁧𑁬𑁭, 𑁧𑁭𑁧, 𑁧𑁯𑁫, 𑁧𑁯𑁭) 𑀯𑀺𑀬, 𑀇𑀥 𑀘 𑀓𑀺𑀜𑁆𑀘𑀸𑀧𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀉𑀩𑁆𑀩𑀺𑀮𑀸𑀯𑀺𑀢𑀫𑁂𑀯 𑀦𑀢𑁆𑀣𑀺, 𑀅𑀣 𑀔𑁄 𑀆𑀬𑀢𑀺𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀏𑀤𑀺𑀲𑁂𑀲𑀼𑀧𑀺 𑀞𑀸𑀦𑁂𑀲𑀼 𑀅𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 𑀥𑀫𑁆𑀫𑀦𑁂𑀢𑁆𑀢𑀺𑀁 𑀞𑀧𑁂𑀢𑀻𑀢𑀺. 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀏𑀓𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀯𑀼𑀢𑁆𑀢𑁄𑀢𑀺 𑀏𑀢𑁆𑀣𑀸𑀧𑀺 ‘‘𑀢𑁂𑀲𑀁 𑀯𑀲𑁂𑀦 𑀲𑁂𑀲𑀸𑀦𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀓𑀭𑀡𑀁 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯𑀸’’𑀢𑀺 𑀘 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 ¶ 𑀦 𑀯𑀼𑀢𑁆𑀢𑀁. ‘‘𑀧𑀺-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑀢𑁆𑀣𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦 𑀘𑁂𑀢𑁆𑀣 𑀅𑀢𑁆𑀣𑁄 𑀬𑀣𑀸𑀲𑀫𑁆𑀪𑀯𑀁 𑀯𑁂𑀤𑀺𑀢𑀩𑁆𑀩𑁄.

𑀢𑀼𑀫𑁆𑀳𑀁𑀬𑁂𑀯𑀲𑁆𑀲 𑀢𑁂𑀦 𑀅𑀦𑁆𑀢𑀭𑀸𑀬𑁄𑀢𑀺 𑀏𑀢𑁆𑀣𑀸𑀧𑀺 ‘‘𑀅𑀦𑁆𑀢𑀭𑀸𑀬𑁄’’𑀢𑀺 𑀇𑀤𑀁 ‘‘𑀉𑀩𑁆𑀩𑀺𑀮𑀸𑀯𑀺𑀢𑀢𑁆𑀢𑀲𑁆𑀲 𑀅𑀓𑀭𑀡𑀻𑀬𑀢𑀸𑀓𑀸𑀭𑀡𑀯𑀘𑀦’’𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀸 𑀅𑀯𑀡𑁆𑀡𑀧𑀓𑁆𑀔𑁂 𑀅𑀫𑁆𑀳𑁂𑀳𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀣 𑀘 ‘‘𑀆𑀦𑀦𑁆𑀤𑀺𑀦𑁄 𑀉𑀩𑁆𑀩𑀺𑀮𑀸𑀯𑀺𑀢𑀸’’𑀢𑀺 𑀤𑀻𑀧𑀺𑀢𑀁 𑀧𑀻𑀢𑀺𑀫𑁂𑀯 𑀕𑀳𑁂𑀢𑁆𑀯𑀸 ‘‘𑀢𑁂𑀦 𑀉𑀩𑁆𑀩𑀺𑀮𑀸𑀯𑀺𑀢𑀢𑁆𑀢𑁂𑀦𑀸’’𑀢𑀺 𑀯𑀘𑀦𑀁 𑀲𑁄𑀫𑀦𑀲𑁆𑀲𑀭𑀳𑀺𑀢𑀸𑀬 𑀧𑀻𑀢𑀺𑀬𑀸 𑀅𑀪𑀸𑀯𑀢𑁄 𑀢𑀩𑁆𑀩𑀘𑀦𑁂𑀦𑁂𑀯 ‘‘𑀲𑀼𑀫𑀦𑀸’’𑀢𑀺 𑀤𑀻𑀧𑀺𑀢𑀁 𑀲𑁄𑀫𑀦𑀲𑁆𑀲𑀫𑁆𑀧𑀺 𑀲𑀺𑀤𑁆𑀥𑀫𑁂𑀯𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀣 𑀯𑀸 𑀲𑁄𑀫𑀦𑀲𑁆𑀲𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑀢𑀸 𑀧𑀸𑀓𑀝𑀸, 𑀦 𑀢𑀣𑀸 𑀧𑀻𑀢𑀺𑀬𑀸𑀢𑀺 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀲𑁆𑀫𑀸 𑀧𑀦𑁂𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀅𑀢𑁆𑀣𑀁 𑀅𑀯𑀺𑀪𑀸𑀕𑀢𑁄 𑀫𑀦𑀲𑀺 𑀓𑀢𑁆𑀯𑀸 𑀘𑁄𑀤𑁂𑀢𑀺. 𑀆𑀘𑀭𑀺𑀬𑁄 ‘‘𑀲𑀘𑁆𑀘’’𑀦𑁆𑀢𑀺 𑀢𑀫𑀢𑁆𑀣𑀁 𑀧𑀝𑀺𑀚𑀸𑀦𑀺𑀢𑁆𑀯𑀸 ‘‘𑀢𑀁 𑀧𑀦𑀸’’𑀢𑀺𑀆𑀤𑀺𑀦𑀸 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀯𑀲𑁂𑀦 𑀧𑀭𑀺𑀳𑀭𑀢𑀺.

𑀢𑀢𑁆𑀣 𑀏𑀢𑀦𑁆𑀢𑀺 𑀆𑀦𑀦𑁆𑀤𑀸𑀤𑀻𑀦𑀫𑀓𑀭𑀡𑀻𑀬𑀢𑀸𑀯𑀘𑀦𑀁, 𑀦𑀦𑀼 𑀪𑀕𑀯𑀢𑀸 𑀯𑀡𑁆𑀡𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀩𑀼𑀤𑁆𑀥𑁄𑀢𑀺 𑀓𑀺𑀢𑁆𑀢𑀬𑀦𑁆𑀢𑀲𑁆𑀲𑀸𑀢𑀺 ‘‘𑀩𑀼𑀤𑁆𑀥𑁄’’𑀢𑀺 𑀯𑀘𑀦𑀁 𑀕𑀼𑀡𑀸𑀦𑀼𑀲𑁆𑀲𑀭𑀡𑀯𑀲𑁂𑀦 𑀓𑀣𑁂𑀦𑁆𑀢𑀲𑁆𑀲 𑀲𑀸𑀥𑀼𑀚𑀦𑀲𑁆𑀲. 𑀓𑀲𑀺𑀡𑁂𑀦𑀸𑀢𑀺 𑀓𑀲𑀺𑀡𑀢𑀸𑀬 𑀲𑀓𑀮𑀪𑀸𑀯𑁂𑀦. 𑀚𑀫𑁆𑀩𑀼𑀤𑀻𑀧𑀲𑁆𑀲𑀸𑀢𑀺 𑀘𑁂𑀢𑀲𑁆𑀲 𑀅𑀯𑀬𑀯𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑀻𑀯𑀘𑀦𑀁. 𑀅𑀧𑀭𑁂 𑀧𑀦 ‘‘𑀚𑀫𑁆𑀩𑀼𑀤𑀻𑀧𑀲𑁆𑀲𑀸𑀢𑀺 𑀓𑀭𑀡𑀯𑀘𑀦𑀢𑁆𑀣𑁂 𑀲𑀸𑀫𑀺𑀯𑀘𑀦’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀫𑀢𑁂𑀦 𑀓𑀲𑀺𑀡𑀚𑀫𑁆𑀩𑀼𑀤𑀻𑀧𑀲𑀤𑁆𑀤𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁄 𑀤𑀝𑁆𑀞𑀩𑁆𑀩𑁄, 𑀓𑀭𑀡𑀯𑀘𑀦𑀜𑁆𑀘 𑀦𑀺𑀲𑁆𑀲𑀓𑁆𑀓𑀢𑁆𑀣𑁂. 𑀧𑀕𑁂𑀯 𑀏𑀓𑀤𑁂𑀲𑀢𑁄 𑀧𑀦𑀸𑀢𑀺 𑀅𑀧𑀺-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂. 𑀆𑀤𑀺-𑀲𑀤𑁆𑀤𑁂𑀦 𑀘𑁂𑀢𑁆𑀣 𑁋

‘‘𑀫𑀸 𑀲𑁄𑀘𑀺 𑀉𑀤𑀸𑀬𑀺, 𑀆𑀦𑀦𑁆𑀤𑁄 𑀅𑀯𑀻𑀢𑀭𑀸𑀕𑁄 𑀓𑀸𑀮𑀁 𑀓𑀭𑁂𑀬𑁆𑀬, 𑀢𑁂𑀦 𑀘𑀺𑀢𑁆𑀢𑀧𑁆𑀧𑀲𑀸𑀤𑁂𑀦 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀤𑁂𑀯𑀭𑀚𑁆𑀚𑀁 𑀓𑀸𑀭𑁂𑀬𑁆𑀬, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 ¶ 𑀇𑀫𑀲𑁆𑀫𑀺𑀁𑀬𑁂𑀯 𑀚𑀫𑁆𑀩𑀼𑀤𑀻𑀧𑁂 𑀫𑀳𑀸𑀭𑀚𑁆𑀚𑀁 𑀓𑀸𑀭𑁂𑀬𑁆𑀬, 𑀅𑀧𑀺𑀘 𑀉𑀤𑀸𑀬𑀺 𑀆𑀦𑀦𑁆𑀤𑁄 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’’𑀢𑀺𑀆𑀤𑀺𑀲𑀼𑀢𑁆𑀢𑀁 (𑀅. 𑀦𑀺. 𑁩.𑁮𑁧) 𑁋

𑀲𑀗𑁆𑀕𑀳𑀺𑀢𑀁. 𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑀭𑁂 𑀯𑀼𑀢𑁆𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁. 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀦𑁆𑀢𑀺 𑀓𑀸𑀫𑀢𑁄 𑀦𑀺𑀓𑁆𑀔𑀫𑀦𑁂 𑀓𑀼𑀲𑀮𑀥𑀫𑁆𑀫𑁂 𑀦𑀺𑀲𑁆𑀲𑀺𑀢𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂. 𑀕𑁂𑀳𑀲𑁆𑀲𑀺𑀢𑀦𑁆𑀢𑀺 𑀕𑁂𑀳𑀯𑀸𑀲𑀻𑀦𑀁 𑀲𑀫𑀼𑀤𑀸𑀘𑀺𑀡𑁆𑀡𑀢𑁄 𑀕𑁂𑀳𑀲𑀗𑁆𑀔𑀸𑀢𑁂 𑀓𑀸𑀫𑀕𑀼𑀡𑁂 𑀦𑀺𑀲𑁆𑀲𑀺𑀢𑀁. 𑀓𑀲𑁆𑀫𑀸 𑀢𑀤𑁂𑀯𑀺𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀇𑀤𑀜𑁆𑀳𑀻’’𑀢𑀺𑀆𑀤𑀺. ‘‘𑀆𑀬𑀲𑁆𑀫𑀢𑁄 𑀙𑀦𑁆𑀦𑀲𑁆𑀲 𑀉𑀧𑁆𑀧𑀦𑁆𑀦𑀲𑀤𑀺𑀲’’𑀦𑁆𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀓𑀝𑀁 𑀓𑀸𑀢𑀼𑀁, 𑀲𑀫𑀢𑁆𑀣𑁂𑀢𑀼𑀁 𑀯𑀸 ‘‘𑀢𑁂𑀦𑁂𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺 𑀪𑀕𑀯𑀢𑀺, 𑀥𑀫𑁆𑀫𑁂 𑀘 𑀧𑀯𑀢𑁆𑀢𑀕𑁂𑀳𑀲𑁆𑀲𑀺𑀢𑀧𑁂𑀫𑀢𑀸𑀬. 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀸𑀲𑀦𑁆𑀦𑀓𑀸𑀮𑁂 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑁂𑀦 𑀢𑀚𑁆𑀚𑀺𑀢𑁄𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄. 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂𑀢𑀺 ¶ 𑀯𑀸 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑀓𑀸𑀮𑁂 𑀲𑀗𑁆𑀖𑁂𑀦 𑀢𑀚𑁆𑀚𑀺𑀢𑁄 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄. 𑀩𑁆𑀭𑀳𑁆𑀫𑀤𑀡𑁆𑀟𑁂𑀦𑀸𑀢𑀺 ‘‘𑀪𑀺𑀓𑁆𑀔𑀽𑀳𑀺 𑀇𑀢𑁆𑀣𑀦𑁆𑀦𑀸𑀫𑁄 𑀦𑁂𑀯 𑀯𑀢𑁆𑀢𑀩𑁆𑀩𑁄, 𑀦 𑀑𑀯𑀤𑀺𑀢𑀩𑁆𑀩𑁄, 𑀦𑀸𑀦𑀼𑀲𑀸𑀲𑀺𑀢𑀩𑁆𑀩𑁄’’𑀢𑀺 (𑀘𑀽𑀴𑀯. 𑁪𑁪𑁫) 𑀓𑀢𑁂𑀦 𑀩𑁆𑀭𑀳𑁆𑀫𑀤𑀡𑁆𑀟𑁂𑀦. 𑀢𑀚𑁆𑀚𑀺𑀢𑁄𑀢𑀺 𑀲𑀁𑀯𑁂𑀚𑀺𑀢𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀕𑁂𑀳𑀲𑁆𑀲𑀺𑀢𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀛𑀸𑀦𑀸𑀤𑀻𑀦𑀁 𑀅𑀦𑁆𑀢𑀭𑀸𑀬𑀓𑀭𑀁, 𑀢𑀲𑁆𑀫𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑁂 ‘‘𑀲𑁄𑀫𑀦𑀲𑁆𑀲𑀁𑀧𑀸𑀳𑀁 𑀤𑁂𑀯𑀸𑀦𑀫𑀺𑀦𑁆𑀤, 𑀤𑀼𑀯𑀺𑀥𑁂𑀦 𑀯𑀤𑀸𑀫𑀺 𑀲𑁂𑀯𑀺𑀢𑀩𑁆𑀩𑀫𑁆𑀧𑀺 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻’’𑀢𑀺 (𑀤𑀻. 𑀦𑀺. 𑁨.𑁩𑁫𑁯).

‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺𑀦𑀸 𑀢𑀤𑁂𑀯𑀢𑁆𑀣𑀁 𑀓𑀸𑀭𑀡𑀢𑁄 𑀲𑀫𑀢𑁆𑀣𑁂𑀢𑀺. 𑀭𑀸𑀕𑀲𑀳𑀺𑀢𑀢𑁆𑀢𑀸 𑀳𑀺 𑀲𑀸 𑀅𑀦𑁆𑀢𑀭𑀸𑀬𑀓𑀭𑀸𑀢𑀺. 𑀏𑀢𑁆𑀣 𑀧𑀦 ‘‘𑀇𑀤𑀜𑁆𑀳𑀺 𑀭𑀸𑀕𑀲𑀜𑁆𑀳𑀺𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀣𑀸𑀧𑀺 𑀧𑀻𑀢𑀺𑀕𑁆𑀕𑀳𑀡𑁂𑀦 𑀲𑁄𑀫𑀦𑀲𑁆𑀲𑀫𑁆𑀧𑀺 𑀕𑀳𑀺𑀢𑀫𑁂𑀯 𑀳𑁄𑀢𑀺 𑀲𑁄𑀫𑀦𑀲𑁆𑀲𑀭𑀳𑀺𑀢𑀸𑀬 𑀧𑀻𑀢𑀺𑀬𑀸 𑀅𑀪𑀸𑀯𑀢𑁄𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀧𑀻𑀢𑀺𑀬𑁂𑀯 𑀕𑀳𑀺𑀢𑀸. 𑀅𑀧𑀺𑀘 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀯𑀺𑀪𑀸𑀕𑀲𑁆𑀲 𑀲𑀼𑀢𑁆𑀢𑁂 𑀯𑀘𑀦𑀢𑁄 𑀲𑁄𑀫𑀦𑀲𑁆𑀲𑀲𑁆𑀲 𑀧𑀸𑀓𑀝𑁄 𑀅𑀦𑁆𑀢𑀭𑀸𑀬𑀓𑀭𑀪𑀸𑀯𑁄, 𑀦 𑀢𑀣𑀸 𑀧𑀻𑀢𑀺𑀬𑀸𑀢𑀺 𑀲𑀸𑀬𑁂𑀯 𑀭𑀸𑀕𑀲𑀳𑀺𑀢𑀢𑁆𑀣𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀸. 𑀅𑀯𑀡𑁆𑀡𑀪𑀽𑀫𑀺𑀬𑀸 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀮𑁄𑀪𑁄 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑁄𑀥𑀲𑀤𑀺𑀲𑁄𑀯𑀸𑀢𑀺 𑀅𑀯𑀡𑁆𑀡𑀪𑀽𑀫𑀺𑀬𑀁 𑀯𑀼𑀢𑁆𑀢𑀓𑁄𑀥𑀲𑀤𑀺𑀲𑁄 𑀏𑀯. ‘‘𑀮𑀼𑀤𑁆𑀥𑁄’’𑀢𑀺𑀆𑀤𑀺𑀕𑀸𑀣𑀸𑀦𑀁 ‘‘𑀓𑀼𑀤𑁆𑀥𑁄’’𑀢𑀺𑀆𑀤𑀺𑀕𑀸𑀣𑀸𑀲𑀼 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

‘‘𑀫𑀫𑀁 𑀯𑀸 𑀪𑀺𑀓𑁆𑀔𑀯𑁂 𑀧𑀭𑁂 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀥𑀫𑁆𑀫𑀲𑁆𑀲 𑀯𑀸 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀲𑀗𑁆𑀖𑀲𑁆𑀲 𑀯𑀸 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬𑀼𑀁, 𑀢𑀢𑁆𑀭 𑀘𑁂 𑀢𑀼𑀫𑁆𑀳𑁂 𑀅𑀲𑁆𑀲𑀣 𑀆𑀦𑀦𑁆𑀤𑀺𑀦𑁄 𑀲𑀼𑀫𑀦𑀸 𑀉𑀩𑁆𑀩𑀺𑀮𑀸𑀯𑀺𑀢𑀸 ¶ , 𑀅𑀧𑀺 𑀦𑀼 𑀢𑀼𑀫𑁆𑀳𑁂 𑀧𑀭𑁂𑀲𑀁 𑀲𑀼𑀪𑀸𑀲𑀺𑀢𑀤𑀼𑀩𑁆𑀪𑀸𑀲𑀺𑀢𑀁 𑀆𑀚𑀸𑀦𑁂𑀬𑁆𑀬𑀸𑀣𑀸𑀢𑀺? 𑀦𑁄 𑀳𑁂𑀢𑀁 𑀪𑀦𑁆𑀢𑁂’’𑀢𑀺 𑀅𑀬𑀁 𑀢𑀢𑀺𑀬𑀯𑀸𑀭𑁄 𑀦𑀸𑀫 𑀅𑀯𑀡𑁆𑀡𑀪𑀽𑀫𑀺𑀬𑀁 𑀯𑀼𑀢𑁆𑀢𑀦𑀬𑀯𑀲𑁂𑀦 𑀢𑀢𑀺𑀬𑀯𑀸𑀭𑀝𑁆𑀞𑀸𑀦𑁂 𑀦𑀻𑀳𑀭𑀺𑀢𑀩𑁆𑀩𑀢𑁆𑀢𑀸, 𑀲𑁄 𑀤𑁂𑀲𑀦𑀸𑀓𑀸𑀮𑁂 𑀢𑁂𑀦 𑀯𑀸𑀭𑁂𑀦 𑀩𑁄𑀥𑁂𑀢𑀩𑁆𑀩𑀧𑀼𑀕𑁆𑀕𑀮𑀸𑀪𑀸𑀯𑀢𑁄 𑀤𑁂𑀲𑀦𑀸𑀬 𑀅𑀦𑀸𑀕𑀢𑁄𑀧𑀺 𑀢𑀤𑀢𑁆𑀣𑀲𑀫𑁆𑀪𑀯𑀢𑁄 𑀅𑀢𑁆𑀣𑀢𑁄 𑀆𑀕𑀢𑁄𑀬𑁂𑀯. 𑀬𑀣𑀸 𑀢𑀁 𑀯𑀺𑀢𑁆𑀣𑀸𑀭𑀯𑀲𑁂𑀦 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑀺𑀬𑀯𑀸𑀭𑁄 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀏𑀢𑁂𑀦 𑀲𑀁𑀯𑀡𑁆𑀡𑀦𑀸𑀓𑀸𑀮𑁂 𑀢𑀣𑀸𑀩𑀼𑀚𑁆𑀛𑀦𑀓𑀲𑀢𑁆𑀢𑀸𑀦𑀁 𑀯𑀲𑁂𑀦 𑀲𑁄 𑀯𑀸𑀭𑁄 𑀆𑀦𑁂𑀢𑁆𑀯𑀸 𑀲𑀁𑀯𑀡𑁆𑀡𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀬𑀣𑁂𑀯 𑀳𑀻’’𑀢𑀺𑀆𑀤𑀺𑀦𑀸 𑀢𑀤𑁂𑀯𑀢𑁆𑀣𑀲𑀫𑁆𑀪𑀯𑀁 𑀯𑀺𑀪𑀸𑀯𑁂𑀢𑀺. 𑀓𑀼𑀤𑁆𑀥𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺 𑀬𑀣𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸𑀓𑀸𑀭𑀤𑀲𑁆𑀲𑀦𑀯𑀸𑀭𑁂𑀢𑀺 𑀬𑀣𑀸𑀯𑀼𑀢𑁆𑀢𑀁 𑀢𑀢𑀺𑀬𑀯𑀸𑀭𑀁 𑀉𑀧𑀸𑀤𑀸𑀬 𑀯𑀢𑁆𑀢𑀩𑁆𑀩𑁂 𑀘𑀢𑀼𑀢𑁆𑀣𑀯𑀸𑀭𑁂. ‘‘𑀢𑀼𑀫𑁆𑀳𑀸𑀓𑀁 𑀲𑀢𑁆𑀣𑀸’’𑀢𑀺 𑀯𑀘𑀦𑀢𑁄 𑀧𑀪𑀼𑀢𑀺 𑀬𑀸𑀯 ‘‘𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀢𑀘𑁆𑀙’’𑀦𑁆𑀢𑀺 𑀯𑀘𑀦𑀁, 𑀢𑀸𑀯 𑀬𑁄𑀚𑀦𑀸. ‘‘𑀲𑁄 𑀳𑀺 𑀪𑀕𑀯𑀸’’𑀢𑀺𑀆𑀤𑀺 𑀢𑀩𑁆𑀩𑀺𑀯𑀭𑀡𑀁. 𑀢𑀢𑁆𑀣 𑀇𑀢𑀺𑀧𑀻𑀢𑀺 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦. 𑀯𑀺𑀢𑁆𑀣𑀸𑀭𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧𑁨𑁩 𑀆𑀤𑀬𑁄) ‘‘𑀅𑀦𑀸𑀧𑀢𑁆𑀢𑀺 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀪𑀽𑀢𑀁 𑀆𑀭𑁄𑀘𑁂𑀢𑀻’’𑀢𑀺 ¶ (𑀧𑀸𑀘𑀺. 𑁭𑁭) 𑀯𑀼𑀢𑁆𑀢𑁂𑀧𑀺 𑀲𑀪𑀸𑀕𑀸𑀦𑀫𑁂𑀯 𑀆𑀭𑁄𑀘𑀦𑀁 𑀬𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀪𑀸𑀕𑀸𑀦𑀁 𑀪𑀺𑀓𑁆𑀔𑀽𑀦𑀁𑀬𑁂𑀯 𑀧𑀝𑀺𑀚𑀸𑀦𑀺𑀢𑀩𑁆𑀩’’𑀦𑁆𑀢𑀺. 𑀢𑁂𑀬𑁂𑀯 𑀳𑀺 𑀢𑀲𑁆𑀲 𑀅𑀢𑁆𑀣𑀓𑀸𑀫𑀸, 𑀲𑀤𑁆𑀥𑁂𑀬𑁆𑀬𑀯𑀘𑀦𑀢𑁆𑀢𑀜𑁆𑀘 𑀫𑀜𑁆𑀜𑀦𑁆𑀢𑀺, 𑀢𑀢𑁄 𑀘 ‘‘𑀲𑀸𑀲𑀦𑀲𑁆𑀲 𑀅𑀫𑁄𑀖𑀢𑀸 𑀤𑀻𑀧𑀺𑀢𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀣𑀲𑀫𑀢𑁆𑀣𑀦𑀁 𑀲𑀺𑀬𑀸. ‘‘𑀏𑀯𑀜𑁆𑀳𑀻’’𑀢𑀺𑀆𑀤𑀺 𑀓𑀸𑀭𑀡𑀯𑀘𑀦𑀁. 𑀧𑀸𑀧𑀺𑀘𑁆𑀙𑀢𑀸 𑀘𑁂𑀯 𑀧𑀭𑀺𑀯𑀚𑁆𑀚𑀺𑀢𑀸, 𑀓𑀢𑁆𑀢𑀼𑀪𑀽𑀢𑀸 𑀯𑀸 𑀲𑀸, 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀫𑁄𑀖𑀢𑀸𑀢𑀺 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑁂𑀦 𑀅𑀢𑀼𑀘𑁆𑀙𑀢𑀸. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀢𑀢𑁆𑀭 𑀢𑀼𑀫𑁆𑀳𑁂𑀳𑀻𑀢𑀺 𑀢𑀲𑁆𑀫𑀺𑀁 𑀯𑀡𑁆𑀡𑁂 𑀢𑀼𑀫𑁆𑀳𑁂𑀳𑀻’’𑀢𑀺𑀆𑀤𑀺𑀦𑀸 𑀘𑁂𑀯 ‘‘𑀤𑀼𑀢𑀺𑀬𑀁 𑀧𑀤𑀁 𑀧𑀞𑀫𑀲𑁆𑀲 𑀧𑀤𑀲𑁆𑀲, 𑀘𑀢𑀼𑀢𑁆𑀣𑀜𑁆𑀘 𑀢𑀢𑀺𑀬𑀲𑁆𑀲 𑀯𑁂𑀯𑀘𑀦’’𑀦𑁆𑀢𑀺𑀆𑀤𑀺𑀦𑀸 𑀘 𑀯𑀼𑀢𑁆𑀢𑀦𑀬𑁂𑀦.

𑀘𑀽𑀴𑀲𑀻𑀮𑀯𑀡𑁆𑀡𑀦𑀸

𑁭. 𑀓𑁄 𑀅𑀦𑀼𑀲𑀦𑁆𑀥𑀻𑀢𑀺 𑀧𑀼𑀘𑁆𑀙𑀸 ‘‘𑀦𑀦𑀼 𑀏𑀢𑁆𑀢𑀓𑁂𑀦𑁂𑀯 𑀬𑀣𑀸𑀯𑀼𑀢𑁆𑀢𑁂𑀳𑀺 𑀅𑀯𑀡𑁆𑀡𑀯𑀡𑁆𑀡𑁂𑀳𑀺 𑀲𑀫𑁆𑀩𑀦𑁆𑀥𑀸 𑀤𑁂𑀲𑀦𑀸𑀫𑀢𑁆𑀣𑀓𑀁 𑀧𑀢𑁆𑀢𑀸’’𑀢𑀺 𑀅𑀦𑀼𑀬𑁄𑀕𑀲𑀫𑁆𑀪𑀯𑀢𑁄 𑀓𑀢𑀸. 𑀯𑀡𑁆𑀡𑁂𑀦 𑀘 𑀅𑀯𑀡𑁆𑀡𑁂𑀦 𑀘𑀸𑀢𑀺 𑀢𑀤𑀼𑀪𑀬𑀧𑀤𑁂𑀦. 𑀅𑀢𑁆𑀣𑀦𑀺𑀤𑁆𑀤𑁂𑀲𑁄 𑀯𑀺𑀬 𑀳𑀺 𑀲𑀤𑁆𑀤𑀦𑀺𑀤𑁆𑀤𑁂𑀲𑁄𑀧𑀻𑀢𑀺 𑀅𑀓𑁆𑀔𑀭𑀘𑀺𑀦𑁆𑀢𑀓𑀸. 𑀅𑀣 𑀯𑀸 𑀢𑀣𑀸𑀪𑀸𑀲𑀦𑀲𑁆𑀲 𑀓𑀸𑀭𑀡𑀢𑁆𑀢𑀸, 𑀓𑁄𑀝𑁆𑀞𑀸𑀲𑀢𑁆𑀢𑀸 𑀘 ‘‘𑀧𑀤𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀅𑀯𑀡𑁆𑀡𑁂𑀦 𑀘 𑀯𑀡𑁆𑀡𑁂𑀦 𑀘𑀸𑀢𑀺 𑀧𑀦 𑀅𑀕𑀼𑀡𑀕𑀼𑀡𑀯𑀲𑁂𑀦, 𑀦𑀺𑀦𑁆𑀤𑀸𑀧𑀲𑀁𑀲𑀸𑀯𑀲𑁂𑀦 𑀘 𑀲𑀭𑀽𑀧𑀤𑀲𑁆𑀲𑀦𑀁. ‘‘𑀦𑀺𑀯𑀢𑁆𑀢𑁄 𑀅𑀫𑀽𑀮𑀓𑀢𑀸𑀬 ¶ 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀢𑀸𑀪𑀸𑀯𑀢𑁄’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁭) 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁. 𑀢𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑁂𑀲𑀦𑀸𑀬 𑀩𑁄𑀥𑁂𑀢𑀩𑁆𑀩𑀧𑀼𑀕𑁆𑀕𑀮𑀸𑀪𑀸𑀯𑀢𑁄 𑀏𑀢𑁆𑀢𑀓𑀸𑀯 𑀲𑀸 𑀬𑀼𑀢𑁆𑀢𑀭𑀽𑀧𑀸𑀢𑀺 𑀪𑀕𑀯𑀢𑁄 𑀅𑀚𑁆𑀛𑀸𑀲𑀬𑁂𑀦𑁂𑀯 𑀅𑀤𑁂𑀲𑀦𑀸𑀪𑀸𑀯𑁂𑀦 𑀦𑀺𑀯𑀢𑁆𑀢𑁄, 𑀬𑀣𑀸 𑀢𑀁 𑀯𑀡𑁆𑀡𑀪𑀽𑀫𑀺𑀬𑀁 𑀢𑀢𑀺𑀬𑀯𑀸𑀭𑁄𑀢𑀺𑀧𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀩𑁄𑀥𑁂𑀢𑀩𑁆𑀩𑀧𑀼𑀕𑁆𑀕𑀮𑀲𑀫𑁆𑀪𑀯𑁂𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀢𑀸𑀬 𑀅𑀥𑀺𑀕𑀢𑀪𑀸𑀯𑀢𑁄 𑀅𑀦𑀼𑀯𑀢𑁆𑀢𑀢𑀺𑀬𑁂𑀯. 𑀇𑀢𑀺𑀧𑁂𑀢𑀁 𑀪𑀽𑀢𑀦𑁆𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄 𑀢𑀤𑀼𑀧𑀭𑀺𑀧𑀺 𑀅𑀦𑀼𑀯𑀢𑁆𑀢𑀓𑀢𑁆𑀢𑀸, 𑀢𑁂𑀦 𑀯𑀓𑁆𑀔𑀢𑀺 ‘‘𑀇𑀥 𑀧𑀦𑀸’’𑀢𑀺𑀆𑀤𑀺. 𑀏𑀢𑁆𑀢𑀸𑀯𑀢𑀸 𑀅𑀬𑀁 𑀯𑀡𑁆𑀡𑀸𑀦𑀼𑀲𑀦𑁆𑀥𑀻𑀢𑀺 𑀤𑀲𑁆𑀲𑁂𑀢𑁆𑀯𑀸 𑀤𑀼𑀯𑀺𑀥𑁂𑀲𑀼 𑀧𑀦 𑀢𑁂𑀲𑀼 𑀯𑀡𑁆𑀡𑁂𑀲𑀼 𑀩𑁆𑀭𑀳𑁆𑀫𑀤𑀢𑁆𑀢𑀲𑁆𑀲 𑀯𑀡𑁆𑀡𑀸𑀦𑀼𑀲𑀦𑁆𑀥𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀉𑀧𑀭𑀺 𑀲𑀼𑀜𑁆𑀜𑀢𑀸𑀧𑀓𑀸𑀲𑀦𑁂 𑀅𑀦𑀼𑀲𑀦𑁆𑀥𑀺𑀁 𑀤𑀲𑁆𑀲𑁂𑀲𑁆𑀲𑀢𑀺 ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁮).

𑀏𑀯𑀁 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀫𑀼𑀔𑁂𑀦 𑀲𑀫𑀼𑀤𑀸𑀬𑀢𑁆𑀣𑀢𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀅𑀯𑀬𑀯𑀢𑁆𑀣𑀢𑀁 𑀤𑀲𑁆𑀲𑁂𑀢𑀺 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀦𑀸. 𑀅𑀧𑁆𑀧𑀫𑁂𑀯 𑀧𑀭𑀺𑀢𑁄 𑀲𑀫𑀦𑁆𑀢𑀢𑁄 𑀔𑀡𑁆𑀟𑀺𑀢𑀢𑁆𑀢𑀸 𑀧𑀭𑀺𑀢𑁆𑀢𑀁 𑀦𑀸𑀫𑀸𑀢𑀺 𑀆𑀳 ‘‘𑀅𑀧𑁆𑀧𑀫𑀢𑁆𑀢𑀓𑀦𑁆𑀢𑀺 𑀧𑀭𑀺𑀢𑁆𑀢𑀲𑁆𑀲 𑀦𑀸𑀫’’𑀦𑁆𑀢𑀺. 𑀫𑀢𑁆𑀢𑀸 𑀯𑀼𑀘𑁆𑀘𑀢𑀺 𑀧𑀫𑀸𑀡𑀁 𑀫𑀻𑀬𑀢𑁂 𑀧𑀭𑀺𑀫𑀻𑀬𑀢𑁂𑀢𑀺 𑀓𑀢𑁆𑀯𑀸. 𑀲𑀫𑀸𑀲𑀦𑁆𑀢𑀓𑀓𑀸𑀭𑁂𑀦 𑀅𑀧𑁆𑀧𑀫𑀢𑁆𑀢𑀓𑀁 𑀬𑀣𑀸 ‘‘𑀩𑀳𑀼𑀧𑀼𑀢𑁆𑀢𑀓𑁄’’𑀢𑀺, 𑀏𑀯𑀁 𑀑𑀭𑀫𑀢𑁆𑀢𑀓𑁂𑀧𑀺. 𑀏𑀢𑁂𑀦𑁂𑀯 ‘‘𑀅𑀧𑁆𑀧𑀸 𑀫𑀢𑁆𑀢𑀸 𑀅𑀧𑁆𑀧𑀫𑀢𑁆𑀢𑀸, 𑀲𑀸 𑀏𑀢𑀲𑁆𑀲𑀸𑀢𑀺 𑀅𑀧𑁆𑀧𑀫𑀢𑁆𑀢𑀓’’𑀦𑁆𑀢𑀺𑀆𑀤𑀺𑀦𑀸 𑀓𑀧𑀘𑁆𑀘𑀬𑀲𑁆𑀲 𑀲𑀸𑀢𑁆𑀣𑀓𑀢𑀫𑁆𑀧𑀺 𑀤𑀲𑁆𑀲𑁂𑀢𑀺 𑀅𑀢𑁆𑀣𑀢𑁄 𑀅𑀪𑀺𑀦𑁆𑀦𑀢𑁆𑀢𑀸. 𑀫𑀢𑁆𑀢𑀓𑀲𑀤𑁆𑀤𑀲𑁆𑀲 𑀅𑀦𑀢𑁆𑀣𑀓𑀪𑀸𑀯𑀢𑁄 𑀲𑀻𑀮𑀫𑁂𑀯 𑀲𑀻𑀮𑀫𑀢𑁆𑀢𑀓𑀁. 𑀅𑀦𑀢𑁆𑀣𑀓𑀪𑀸𑀯𑁄𑀢𑀺 𑀘 𑀲𑀓𑀢𑁆𑀣𑀢𑀸 ¶ 𑀧𑀼𑀭𑀺𑀫𑀧𑀤𑀢𑁆𑀣𑁂𑀬𑁂𑀯 𑀧𑀯𑀢𑁆𑀢𑀦𑀢𑁄. 𑀦 𑀳𑀺 𑀲𑀤𑁆𑀤𑀸 𑀓𑁂𑀯𑀮𑀁 𑀅𑀦𑀢𑁆𑀣𑀓𑀸 𑀪𑀯𑀦𑁆𑀢𑀻𑀢𑀺 𑀅𑀓𑁆𑀔𑀭𑀘𑀺𑀦𑁆𑀢𑀓𑀸. 𑀦𑀦𑀼 𑀘 𑀪𑀕𑀯𑀢𑁄 𑀧𑀸𑀭𑀫𑀺𑀢𑀸𑀦𑀼𑀪𑀸𑀯𑁂𑀦 𑀦𑀺𑀭𑀢𑁆𑀣𑀓𑀫𑁂𑀓𑀓𑁆𑀔𑀭𑀫𑁆𑀧𑀺 𑀫𑀼𑀔𑀯𑀭𑀁 𑀦𑀸𑀭𑁄𑀳𑀢𑀺, 𑀲𑀓𑀮𑀜𑁆𑀘 𑀧𑀭𑀺𑀬𑀢𑁆𑀢𑀺𑀲𑀸𑀲𑀦𑀁 𑀧𑀤𑁂 𑀧𑀤𑁂 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑀦𑁆𑀢𑀺 𑀯𑀼𑀢𑁆𑀢𑀁, 𑀓𑀣𑀁 𑀢𑀲𑁆𑀲 𑀅𑀦𑀢𑁆𑀣𑀓𑀢𑀸 𑀲𑀫𑁆𑀪𑀯𑀢𑀻𑀢𑀺? 𑀲𑀘𑁆𑀘𑀁, 𑀢𑀫𑁆𑀧𑀺 𑀧𑀤𑀦𑁆𑀢𑀭𑀸𑀪𑀺𑀳𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀲𑁂𑀲𑀦𑀯𑀲𑁂𑀦 𑀢𑀤𑀪𑀺𑀳𑀺𑀢𑀁 𑀅𑀢𑁆𑀣𑀁 𑀯𑀤𑀢𑀺 𑀏𑀯, 𑀲𑁄 𑀧𑀦 𑀅𑀢𑁆𑀣𑁄 𑀯𑀺𑀦𑀸𑀧𑀺 𑀢𑁂𑀦 𑀧𑀤𑀦𑁆𑀢𑀭𑁂𑀦𑁂𑀯 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀅𑀦𑀢𑁆𑀣𑀓𑀫𑀺𑀘𑁆𑀘𑁂𑀯 𑀯𑀼𑀢𑁆𑀢𑀦𑁆𑀢𑀺. 𑀦𑀦𑀼 𑀅𑀯𑁄𑀘𑀼𑀫𑁆𑀳 ‘‘𑀅𑀦𑀢𑁆𑀣𑀓𑀪𑀸𑀯𑁄…𑀧𑁂… 𑀧𑀯𑀢𑁆𑀢𑀦𑀢𑁄’’𑀢𑀺. 𑀅𑀧𑀺𑀘 𑀯𑀺𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀯𑀲𑁂𑀦 𑀪𑀕𑀯𑀢𑁄 𑀤𑁂𑀲𑀦𑀸 𑀧𑀯𑀢𑁆𑀢𑀢𑀺, 𑀯𑀺𑀦𑁂𑀬𑁆𑀬𑀸 𑀘 𑀅𑀦𑀸𑀤𑀺𑀫𑀢𑀺𑀲𑀁𑀲𑀸𑀭𑁂 𑀮𑁄𑀓𑀺𑀬𑁂𑀲𑀼𑀬𑁂𑀯 𑀲𑀤𑁆𑀤𑁂𑀲𑀼 𑀧𑀭𑀺𑀪𑀸𑀯𑀺𑀢𑀘𑀺𑀢𑁆𑀢𑀸, 𑀮𑁄𑀓𑁂 𑀘 𑀅𑀲𑀢𑀺𑀧𑀺 𑀅𑀢𑁆𑀣𑀦𑁆𑀢𑀭𑀸𑀯𑀩𑁄𑀥𑁂 𑀯𑀸𑀘𑀸𑀲𑀺𑀮𑀺𑀝𑁆𑀞𑀢𑀸𑀤𑀺𑀯𑀲𑁂𑀦 𑀲𑀤𑁆𑀤𑀧𑀬𑁄𑀕𑁄 𑀤𑀺𑀲𑁆𑀲𑀢𑀺 ‘‘𑀮𑀩𑁆𑀪𑀢𑀺 𑀧𑀮𑀩𑁆𑀪𑀢𑀺, 𑀔𑀜𑁆𑀚𑀢𑀺 𑀦𑀺𑀔𑀜𑁆𑀚𑀢𑀺, 𑀆𑀕𑀘𑁆𑀙𑀢𑀺 𑀧𑀘𑁆𑀘𑀸𑀕𑀘𑁆𑀙𑀢𑀻’’𑀢𑀺𑀆𑀤𑀺𑀦𑀸. 𑀢𑀣𑀸𑀧𑀭𑀺𑀘𑀺𑀢𑀸𑀦𑀜𑁆𑀘 𑀢𑀣𑀸𑀯𑀺𑀥𑁂𑀦𑁂𑀯 𑀲𑀤𑁆𑀤𑀧𑀬𑁄𑀕𑁂𑀦 𑀅𑀢𑁆𑀣𑀸𑀯𑀕𑀫𑁄 ¶ 𑀲𑀼𑀔𑁄 𑀳𑁄𑀢𑀻𑀢𑀺 𑀅𑀦𑀢𑁆𑀣𑀓𑀲𑀤𑁆𑀤𑀧𑀬𑁄𑀕𑁄 𑀯𑀼𑀢𑁆𑀢𑁄𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀧𑀤𑀦𑁆𑀢𑀭𑀯𑀘𑀦𑀻𑀬-𑀲𑁆𑀲𑀢𑁆𑀣𑀲𑁆𑀲 𑀯𑀺𑀲𑁂𑀲𑀦𑀸𑀬;

𑀩𑁄𑀥𑀦𑀸𑀬 𑀯𑀺𑀦𑁂𑀬𑁆𑀬𑀸𑀦𑀁, 𑀢𑀣𑀸𑀦𑀢𑁆𑀣𑀧𑀤𑀁 𑀯𑀤𑁂’’𑀢𑀺.

𑀅𑀣 𑀯𑀸 𑀲𑀻𑀮𑀫𑀢𑁆𑀢𑀓𑀦𑁆𑀢𑀺 𑀏𑀢𑁆𑀣 𑀫𑀢𑁆𑀢-𑀲𑀤𑁆𑀤𑁄 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸 𑀥𑀫𑁆𑀫𑀸 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸) 𑀫𑀦𑁄𑀫𑀢𑁆𑀢𑀸 𑀥𑀸𑀢𑀼 𑀫𑀦𑁄𑀥𑀸𑀢𑀽’’𑀢𑀺 (𑀥. 𑀲. 𑀫𑀽𑀮𑀝𑀻. 𑁪𑁯𑁯) 𑀘 𑀆𑀤𑀻𑀲𑀼 𑀯𑀺𑀬. ‘‘𑀅𑀧𑁆𑀧𑀫𑀢𑁆𑀢𑀓𑀁 𑀑𑀭𑀫𑀢𑁆𑀢𑀓’’𑀦𑁆𑀢𑀺 𑀧𑀤𑀤𑁆𑀯𑀬𑁂𑀦 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑁄𑀬𑁂𑀯 𑀳𑀺 𑀅𑀢𑁆𑀣𑁄 ‘‘𑀲𑀻𑀮𑀫𑀢𑁆𑀢𑀓’’𑀦𑁆𑀢𑀺 𑀧𑀤𑁂𑀦 𑀯𑀺𑀲𑁂𑀲𑀢𑁄 𑀯𑀼𑀢𑁆𑀢𑁄, 𑀢𑁂𑀦 𑀘 𑀲𑀻𑀮𑀁 𑀏𑀯 𑀲𑀻𑀮𑀫𑀢𑁆𑀢𑀁, 𑀢𑀤𑁂𑀯 𑀲𑀻𑀮𑀫𑀢𑁆𑀢𑀓𑀦𑁆𑀢𑀺 𑀦𑀺𑀩𑁆𑀩𑀘𑀦𑀁 𑀓𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀮𑀫𑁂𑀯 𑀲𑀻𑀮𑀫𑀢𑁆𑀢𑀓’’𑀦𑁆𑀢𑀺 𑀯𑀼𑀢𑁆𑀢𑀁.

𑀅𑀬𑀁 𑀧𑀦 𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑁄 𑀦𑀬𑁄 𑁋 𑀑𑀭𑀫𑀢𑁆𑀢𑀓𑀦𑁆𑀢𑀺 𑀏𑀢𑁆𑀣 𑀑𑀭𑀦𑁆𑀢𑀺 𑀅𑀧𑀸𑀭𑀪𑀸𑀕𑁄 ‘‘𑀑𑀭𑀢𑁄 𑀪𑁄𑀕𑀁 (𑀫𑀳𑀸𑀯. 𑁬𑁬) 𑀑𑀭𑀁 𑀧𑀸𑀭’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀣 𑀯𑀸 𑀳𑁂𑀝𑁆𑀞𑀸𑀅𑀢𑁆𑀣𑁄 𑀑𑀭𑀲𑀤𑁆𑀤𑁄 𑀑𑀭𑀁 𑀆𑀕𑀫𑀦𑀸𑀬 𑀬𑁂 𑀧𑀘𑁆𑀘𑀬𑀸, 𑀢𑁂 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀻𑀢𑀺𑀆𑀤𑀻𑀲𑀼 𑀯𑀺𑀬. 𑀲𑀻𑀮𑀜𑁆𑀳𑀺 𑀲𑀫𑀸𑀥𑀺𑀧𑀜𑁆𑀜𑀸𑀬𑁄 𑀅𑀧𑁂𑀓𑁆𑀔𑀺𑀢𑁆𑀯𑀸 𑀅𑀧𑀸𑀭𑀪𑀸𑀕𑁂, 𑀳𑁂𑀝𑁆𑀞𑀸𑀪𑀸𑀕𑁂 𑀘 𑀳𑁄𑀢𑀺, 𑀉𑀪𑀬𑀢𑁆𑀣𑀸𑀧𑀺 ‘‘𑀑𑀭𑁂 𑀧𑀯𑀢𑁆𑀢𑀁 𑀫𑀢𑁆𑀢𑀁 𑀬𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀯𑀺𑀕𑁆𑀕𑀳𑁄. 𑀲𑀻𑀮𑀫𑀢𑁆𑀢𑀓𑀦𑁆𑀢𑀺 𑀏𑀢𑁆𑀣𑀸𑀧𑀺 𑀫𑀢𑁆𑀢𑀲𑀤𑁆𑀤𑁄 𑀅𑀫𑀳𑀢𑁆𑀣𑀯𑀸𑀘𑀓𑁄 ‘‘𑀪𑁂𑀲𑀚𑁆𑀚𑀫𑀢𑁆𑀢𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀣 𑀯𑀸 𑀲𑀻𑀮𑁂𑀧𑀺 𑀢𑀤𑁂𑀓𑀤𑁂𑀲𑀲𑁆𑀲𑁂𑀯 𑀲𑀗𑁆𑀕𑀳𑀡𑀢𑁆𑀣𑀁 𑀅𑀫𑀳𑀢𑁆𑀣𑀯𑀸𑀘𑀓𑁄 𑀏𑀢𑁆𑀣 𑀫𑀢𑁆𑀢𑀲𑀤𑁆𑀤𑁄 𑀯𑀼𑀢𑁆𑀢𑁄. 𑀢𑀣𑀸 𑀳𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀲𑀻𑀮𑀸𑀦𑀺 𑀇𑀥 𑀤𑁂𑀲𑀦𑀁 𑀅𑀦𑀸𑀭𑀼𑀴𑁆𑀳𑀸𑀦𑀺. 𑀓𑀲𑁆𑀫𑀸𑀢𑀺 𑀘𑁂? 𑀬𑀲𑁆𑀫𑀸 𑀢𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀦𑀺 𑀯𑀺𑀬 𑀦 𑀲𑀩𑁆𑀩𑀧𑀼𑀣𑀼𑀚𑁆𑀚𑀦𑁂𑀲𑀼 ¶ 𑀧𑀸𑀓𑀝𑀸𑀦𑀻𑀢𑀺. 𑀫𑀢𑁆𑀢𑀦𑁆𑀢𑀺 𑀘𑁂𑀢𑁆𑀣 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁂 𑀦𑀧𑀼𑀁𑀲𑀓𑀮𑀺𑀗𑁆𑀕𑀁. 𑀧𑀫𑀸𑀡𑀧𑁆𑀧𑀓𑀢𑁆𑀣𑁂𑀲𑀼 𑀧𑀦 ‘‘𑀫𑀢𑁆𑀢’’𑀦𑁆𑀢𑀺 𑀯𑀸 ‘‘𑀫𑀢𑁆𑀢𑀸’’𑀢𑀺 𑀯𑀸 𑀦𑀧𑀼𑀁𑀲𑀓𑀺𑀢𑁆𑀣𑀺𑀮𑀺𑀗𑁆𑀕𑀁.

‘‘𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀲𑀳 𑀬𑁄𑀚𑀦𑀸𑀬 𑀧𑀺𑀡𑁆𑀟𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀬𑁂𑀦 𑀲𑀻𑀮𑁂𑀦 𑀯𑀤𑁂𑀬𑁆𑀬, 𑀏𑀢𑀁 𑀲𑀻𑀮𑀫𑀢𑁆𑀢𑀓𑀁 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀯𑀡𑁆𑀡𑀁 𑀯𑀤𑀸𑀫𑀻𑀢𑀺 𑀉𑀲𑁆𑀲𑀸𑀳𑀁 𑀓𑀢𑁆𑀯𑀸𑀧𑀻’’𑀢𑀺 𑀇𑀤𑀁 ‘‘𑀯𑀡𑁆𑀡𑀁 𑀯𑀤𑀫𑀸𑀦𑁄’’𑀢𑀺 𑀏𑀢𑀲𑁆𑀲 𑀯𑀺𑀯𑀭𑀡𑀁. 𑀏𑀢𑁂𑀦 𑀳𑀺 ‘‘𑀏𑀓𑀧𑀼𑀕𑁆𑀕𑀮𑁄 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁧.𑁧𑁭𑁦) 𑀯𑀺𑀬 𑀫𑀸𑀦𑀲𑀤𑁆𑀤𑀲𑁆𑀲 𑀲𑀸𑀫𑀢𑁆𑀣𑀺𑀬𑀢𑁆𑀣𑀢𑀁 𑀤𑀲𑁆𑀲𑁂𑀢𑀺. ‘‘𑀉𑀲𑁆𑀲𑀸𑀳𑀁 𑀓𑀼𑀭𑀼𑀫𑀸𑀦𑁄’’𑀢𑀺 ¶ 𑀅𑀯𑀢𑁆𑀯𑀸 ‘‘𑀓𑀢𑁆𑀯𑀸’’𑀢𑀺 𑀘 𑀯𑀘𑀦𑀁 𑀢𑁆𑀯𑀸𑀤𑀺𑀧𑀘𑁆𑀘𑀬𑀦𑁆𑀢𑀧𑀤𑀸𑀦𑀫𑀺𑀯 𑀫𑀸𑀦𑀦𑁆𑀢𑀧𑀘𑁆𑀘𑀬𑀦𑁆𑀢𑀧𑀤𑀸𑀦𑀫𑁆𑀧𑀺 𑀧𑀭𑀓𑀺𑀭𑀺𑀬𑀸𑀧𑁂𑀓𑁆𑀔𑀫𑁂𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁. ‘‘𑀢𑀢𑁆𑀣 𑀲𑀺𑀬𑀸’’𑀢𑀺𑀆𑀤𑀺𑀦𑀸 𑀲𑀦𑁆𑀥𑀸𑀬𑀪𑀸𑀲𑀺𑀢𑀫𑀢𑁆𑀣𑀁 𑀅𑀚𑀸𑀦𑀺𑀢𑁆𑀯𑀸 𑀦𑀻𑀢𑀢𑁆𑀣𑀫𑁂𑀯 𑀕𑀳𑁂𑀢𑁆𑀯𑀸 𑀲𑀼𑀢𑁆𑀢𑀦𑁆𑀢𑀭𑀯𑀺𑀭𑁄𑀥𑀺𑀢𑀁 𑀫𑀜𑁆𑀜𑀫𑀸𑀦𑀲𑁆𑀲 𑀓𑀲𑁆𑀲𑀘𑀺 𑀈𑀤𑀺𑀲𑀻 𑀘𑁄𑀤𑀦𑀸 𑀲𑀺𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 ‘‘𑀅𑀧𑁆𑀧𑀫𑀢𑁆𑀢𑀓𑀁 𑀔𑁄 𑀧𑀦𑁂𑀢’’𑀦𑁆𑀢𑀺𑀆𑀤𑀺𑀯𑀘𑀦𑁂 (𑀤𑀻. 𑀦𑀺. 𑁧.𑁭). 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑁂 𑀬𑀼𑀜𑁆𑀚𑀢𑀺 𑀲𑀻𑀮𑁂𑀦𑀸𑀢𑀺 𑀬𑁄𑀕𑀻, 𑀢𑀲𑁆𑀲.

𑀅𑀮𑀗𑁆𑀓𑀭𑀡𑀁 𑀯𑀺𑀪𑀽𑀲𑀦𑀁 𑀅𑀮𑀗𑁆𑀓𑀸𑀭𑁄, 𑀧𑀲𑀸𑀥𑀦𑀓𑀺𑀭𑀺𑀬𑀸. 𑀅𑀮𑀁 𑀓𑀭𑁄𑀢𑀺 𑀏𑀢𑁂𑀦𑁂𑀯𑀸𑀢𑀺 𑀯𑀸 𑀅𑀮𑀗𑁆𑀓𑀸𑀭𑁄, 𑀓𑀼𑀡𑁆𑀟𑀮𑀸𑀤𑀺𑀧𑀲𑀸𑀥𑀦𑀁. 𑀫𑀡𑁆𑀟𑀻𑀬𑀢𑁂 𑀫𑀡𑁆𑀟𑀦𑀁, 𑀊𑀦𑀝𑁆𑀞𑀸𑀦𑀧𑀽𑀭𑀡𑀁. 𑀫𑀡𑁆𑀟𑀻𑀬𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀫𑀡𑁆𑀟𑀦𑀁, 𑀫𑀼𑀔𑀘𑀼𑀡𑁆𑀡𑀸𑀤𑀺𑀊𑀦𑀧𑀽𑀭𑀡𑁄𑀧𑀓𑀭𑀡𑀁. 𑀇𑀥 𑀧𑀦 𑀲𑀤𑀺𑀲𑀯𑁄𑀳𑀸𑀭𑁂𑀦, 𑀢𑀤𑁆𑀥𑀺𑀢𑀯𑀲𑁂𑀦 𑀯𑀸 𑀲𑀻𑀮𑀫𑁂𑀯 𑀢𑀣𑀸 𑀯𑀼𑀢𑁆𑀢𑀁. 𑀫𑀡𑁆𑀟𑀦𑁂𑀢𑀺 𑀫𑀡𑁆𑀟𑀦𑀳𑁂𑀢𑀼, 𑀫𑀡𑁆𑀟𑀦𑀓𑀺𑀭𑀺𑀬𑀸𑀦𑀺𑀫𑀺𑀢𑁆𑀢𑀁 𑀕𑀢𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀫𑀡𑁆𑀟𑀢𑀺 𑀲𑀻𑀮𑁂𑀦𑀸𑀢𑀺 𑀫𑀡𑁆𑀟𑀦𑁄, 𑀫𑀡𑁆𑀟𑀦𑀚𑀸𑀢𑀺𑀓𑁄 𑀧𑀼𑀭𑀺𑀲𑁄. 𑀩𑀳𑀼𑀫𑁆𑀳𑀺 𑀘𑁂𑀢𑀁 𑀚𑀸𑀢𑁆𑀬𑀸𑀧𑁂𑀓𑁆𑀔𑀸𑀬 𑀏𑀓𑀯𑀘𑀦𑀁. 𑀉𑀩𑁆𑀩𑀸𑀳𑀦𑀢𑁆𑀣𑁂𑀧𑀺 𑀳𑀺 𑀏𑀓𑀯𑀘𑀦𑀫𑀺𑀘𑁆𑀙𑀦𑁆𑀢𑀺 𑀓𑁂𑀘𑀺, 𑀢𑀤𑀬𑀼𑀢𑁆𑀢𑀫𑁂𑀯 𑀲𑀤𑁆𑀤𑀲𑀢𑁆𑀣𑁂 𑀅𑀦𑀸𑀕𑀢𑀢𑁆𑀢𑀸, 𑀅𑀢𑁆𑀣𑀬𑀼𑀢𑁆𑀢𑀺𑀬𑀸 𑀘 𑀅𑀪𑀸𑀯𑀢𑁄. 𑀓𑀣𑀜𑁆𑀳𑀺 𑀏𑀓𑀯𑀘𑀦𑀦𑀺𑀤𑁆𑀤𑀺𑀝𑁆𑀞𑀢𑁄 𑀉𑀩𑁆𑀩𑀸𑀳𑀦𑀓𑀭𑀡𑀁 𑀬𑀼𑀢𑁆𑀢𑀁 𑀲𑀺𑀬𑀸 𑀏𑀓𑀲𑁆𑀫𑀺𑀁 𑀬𑁂𑀯𑀢𑁆𑀣𑁂 𑀉𑀩𑁆𑀩𑀸𑀳𑀺𑀢𑀩𑁆𑀩𑀲𑁆𑀲 𑀅𑀜𑁆𑀜𑀲𑁆𑀲𑀢𑁆𑀣𑀲𑁆𑀲 𑀅𑀪𑀸𑀯𑀢𑁄. 𑀢𑀲𑁆𑀫𑀸 𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀩𑀳𑁆𑀯𑀢𑁆𑀣𑁂 𑀇𑀤𑀁 𑀏𑀓𑀯𑀘𑀦𑀁 𑀤𑀝𑁆𑀞𑀩𑁆𑀩𑀁, 𑀫𑀡𑁆𑀟𑀦𑀲𑀻𑀮𑁂𑀲𑀽𑀢𑀺 𑀅𑀢𑁆𑀣𑁄. 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦𑀧𑀺 𑀳𑀺 𑀅𑀬𑀫𑁂𑀯𑀺𑀥 𑀯𑀺𑀦𑀺𑀘𑁆𑀙𑀬𑁄 (𑀤𑀻. 𑀦𑀺. 𑀝𑀻. 𑁧.𑁭) 𑀯𑀼𑀢𑁆𑀢𑁄. 𑀅𑀕𑁆𑀕𑀢𑀦𑁆𑀢𑀺 𑀉𑀢𑁆𑀢𑀫𑀪𑀸𑀯𑀁.

𑀅𑀲𑁆𑀲𑀁 𑀪𑀯𑀺𑀲𑁆𑀲𑀸𑀫𑀻𑀢𑀺 𑀆𑀓𑀗𑁆𑀔𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀲𑁆𑀲𑀸𑀢𑀺 𑀪𑀯𑁂𑀬𑁆𑀬. 𑀧𑀭𑀺𑀧𑀽𑀭𑀓𑀸𑀭𑀻𑀢𑀺 𑀘𑁂𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄 𑀯𑀸, 𑀢𑁂𑀦 𑀲𑀓𑀮𑀫𑁆𑀧𑀺 𑀲𑀻𑀮𑀣𑁄𑀫𑀦𑀲𑀼𑀢𑁆𑀢𑀁 𑀤𑀲𑁆𑀲𑁂𑀢𑀺.

𑀓𑀺𑀓𑀻𑀯 𑀅𑀡𑁆𑀟𑀦𑁆𑀢𑀺 𑀏𑀢𑁆𑀣𑀸𑀧𑀺 𑀢𑀤𑀢𑁆𑀣𑁂𑀦 𑀇𑀢𑀺-𑀲𑀤𑁆𑀤𑁂𑀦 𑁋

‘‘𑀓𑀺𑀓𑀻𑀯 ¶ 𑀅𑀡𑁆𑀟𑀁 𑀘𑀫𑀭𑀻𑀯 𑀯𑀸𑀮𑀥𑀺𑀁,

𑀧𑀺𑀬𑀁𑀯 𑀧𑀼𑀢𑁆𑀢𑀁 𑀦𑀬𑀦𑀁𑀯 𑀏𑀓𑀓𑀁;

𑀢𑀣𑁂𑀯 𑀲𑀻𑀮𑀁 𑀅𑀦𑀼𑀭𑀓𑁆𑀔𑀫𑀸𑀦𑀸,

𑀲𑀼𑀧𑁂𑀲𑀮𑀸 𑀳𑁄𑀣 𑀲𑀤𑀸 𑀲𑀕𑀸𑀭𑀯𑀸’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁧𑁯); 𑁋

𑀕𑀸𑀣𑀁 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀧𑀼𑀧𑁆𑀨𑀕𑀦𑁆𑀥𑁄’’𑀢𑀺 𑀯𑀢𑁆𑀯𑀸 𑀢𑀤𑁂𑀓𑀤𑁂𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀦 𑀘𑀦𑁆𑀤𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀦𑁆𑀤𑀦𑀁 𑀢𑀕𑀭𑀁 𑀫𑀮𑁆𑀮𑀺𑀓𑀸𑀢𑀺 𑀳𑀺 𑀢𑀁𑀲𑀳𑀘𑀭𑀡𑀢𑁄 𑀢𑁂𑀲𑀁 ¶ 𑀕𑀦𑁆𑀥𑁄𑀯 𑀯𑀼𑀢𑁆𑀢𑁄. 𑀧𑀼𑀧𑁆𑀨𑀕𑀦𑁆𑀥𑁄𑀢𑀺 𑀘 𑀧𑀼𑀧𑁆𑀨𑀜𑁆𑀘 𑀢𑀤𑀯𑀲𑁂𑀲𑁄 𑀕𑀦𑁆𑀥𑁄 𑀘𑀸𑀢𑀺 𑀅𑀢𑁆𑀣𑁄. 𑀢𑀕𑀭𑀫𑀮𑁆𑀮𑀺𑀓𑀸𑀳𑀺 𑀯𑀸 𑀅𑀯𑀲𑀺𑀝𑁆𑀞𑁄 ‘‘𑀧𑀼𑀧𑁆𑀨𑀕𑀦𑁆𑀥𑁄’’𑀢𑀺 𑀯𑀼𑀢𑁆𑀢𑁄. 𑀲𑀢𑀜𑁆𑀘 𑀕𑀦𑁆𑀥𑁄𑀢𑀺 𑀏𑀢𑁆𑀣 𑀲𑀻𑀮𑀫𑁂𑀯 𑀲𑀤𑀺𑀲𑀯𑁄𑀳𑀸𑀭𑁂𑀦 𑀯𑀸 𑀢𑀤𑁆𑀥𑀺𑀢𑀯𑀲𑁂𑀦 𑀯𑀸 𑀕𑀦𑁆𑀥𑁄. 𑀲𑀻𑀮𑀦𑀺𑀩𑀦𑁆𑀥𑀦𑁄 𑀯𑀸 𑀣𑀼𑀢𑀺𑀖𑁄𑀲𑁄 𑀯𑀼𑀢𑁆𑀢𑀦𑀬𑁂𑀦 ‘‘𑀕𑀦𑁆𑀥𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀲𑀻𑀮𑀜𑁆𑀳𑀺 𑀓𑀺𑀢𑁆𑀢𑀺𑀬𑀸 𑀦𑀺𑀫𑀺𑀢𑁆𑀢𑀁. 𑀬𑀣𑀸𑀳 ‘‘𑀲𑀻𑀮𑀯𑀢𑁄 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀻’’𑀢𑀺 (𑀤𑀻. 𑀦𑀺. 𑁨.𑁧𑁫𑁦; 𑁩.𑁩𑁧𑁬; 𑀅. 𑀦𑀺. 𑁫.𑁨𑁧𑁩; 𑀫𑀳𑀸𑀯. 𑁭𑁮𑁫; 𑀉𑀤𑀸. 𑁭𑁬). 𑀲𑀧𑁆𑀧𑀼𑀭𑀺𑀲𑁄 𑀧𑀯𑀸𑀬𑀢𑀺 𑀧𑀓𑀸𑀭𑁂𑀳𑀺 𑀕𑀦𑁆𑀥𑀢𑀺 𑀢𑀲𑁆𑀲 𑀕𑀦𑁆𑀥𑀽𑀧𑀕𑀭𑀼𑀓𑁆𑀔𑀧𑀝𑀺𑀪𑀸𑀕𑀢𑁆𑀢𑀸.

𑀯𑀲𑁆𑀲𑀺𑀓𑀻𑀢𑀺 𑀲𑀼𑀫𑀦𑀧𑀼𑀧𑁆𑀨𑀁, ‘‘𑀯𑀲𑁆𑀲𑀺𑀓’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀤𑀢𑁆𑀣𑁄𑀯. 𑀕𑀦𑁆𑀥𑀸 𑀏𑀯 𑀕𑀦𑁆𑀥𑀚𑀸𑀢𑀸, 𑀕𑀦𑁆𑀥𑀧𑁆𑀧𑀓𑀸𑀭𑀸 𑀯𑀸. 𑀬𑁆𑀯𑀸𑀬𑀦𑁆𑀢𑀺 𑀬𑀤𑀺𑀤𑀁, 𑀉𑀢𑁆𑀢𑀫𑁄 𑀕𑀦𑁆𑀥𑁄 𑀯𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀲𑀫𑁆𑀫𑀤𑀜𑁆𑀜𑀸 𑀯𑀺𑀫𑀼𑀢𑁆𑀢𑀸𑀦𑀦𑁆𑀢𑀺 𑀲𑀫𑁆𑀫𑀸 𑀅𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸, 𑀅𑀕𑁆𑀕𑀫𑀕𑁆𑀕𑁂𑀦 𑀯𑀸 𑀯𑀺𑀫𑀼𑀢𑁆𑀢𑀸𑀦𑀁. 𑀫𑀕𑁆𑀕𑀁 𑀦 𑀯𑀺𑀦𑁆𑀤𑀢𑀻𑀢𑀺 𑀓𑀸𑀭𑀡𑀁 𑀦 𑀮𑀪𑀢𑀺, 𑀦 𑀚𑀸𑀦𑀸𑀢𑀺 𑀯𑀸.

‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬𑀸’’𑀢𑀺 𑀕𑀸𑀣𑀸𑀬 𑀧𑀝𑀺𑀲𑀦𑁆𑀥𑀺𑀧𑀜𑁆𑀜𑀸𑀬 𑀲𑀧𑀜𑁆𑀜𑁄 𑀆𑀢𑀸𑀧𑀻 𑀯𑀻𑀭𑀺𑀬𑀯𑀸 𑀧𑀸𑀭𑀺𑀳𑀸𑀭𑀺𑀓𑀧𑀜𑁆𑀜𑀸𑀬 𑀦𑀺𑀧𑀓𑁄 𑀦𑀭𑀲𑀗𑁆𑀔𑀸𑀢𑁄 𑀪𑀺𑀓𑁆𑀔𑀼 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀘𑀺𑀢𑁆𑀢𑀁 𑀢𑀧𑁆𑀧𑀥𑀸𑀦𑁂𑀦 𑀯𑀼𑀢𑁆𑀢𑀁 𑀲𑀫𑀸𑀥𑀺𑀁 𑀪𑀸𑀯𑀬𑀁 𑀪𑀸𑀯𑀬𑀦𑁆𑀢𑁄 𑀪𑀸𑀯𑀦𑀸𑀳𑁂𑀢𑀼 𑀢𑀣𑀸 𑀧𑀜𑁆𑀜𑀁 𑀯𑀺𑀧𑀲𑁆𑀲𑀦𑀜𑁆𑀘 𑀇𑀫𑀁 𑀅𑀦𑁆𑀢𑁄𑀚𑀝𑀸𑀩𑀳𑀺𑀚𑀝𑀸𑀲𑀗𑁆𑀔𑀸𑀢𑀁 𑀚𑀝𑀁 𑀯𑀺𑀚𑀝𑀬𑁂 𑀯𑀺𑀚𑀝𑁂𑀬𑁆𑀬 𑀯𑀺𑀚𑀝𑀺𑀢𑀼𑀁 𑀲𑀫𑀢𑁆𑀣𑁂𑀬𑁆𑀬𑀸𑀢𑀺 𑀲𑀗𑁆𑀔𑁂𑀧𑀢𑁆𑀣𑁄.

𑀧𑀣𑀯𑀺𑀁 𑀦𑀺𑀲𑁆𑀲𑀸𑀬𑀸𑀢𑀺 𑀧𑀣𑀯𑀺𑀁 𑀭𑀲𑀕𑁆𑀕𑀳𑀡𑀯𑀲𑁂𑀦 𑀦𑀺𑀲𑁆𑀲𑀸𑀬, 𑀲𑀻𑀮𑀲𑁆𑀫𑀺𑀁 𑀧𑀦 𑀧𑀭𑀺𑀧𑀽𑀭𑀡𑀯𑀲𑁂𑀦 𑀦𑀺𑀲𑁆𑀲𑀸𑀬 𑀧𑀢𑀺𑀝𑁆𑀞𑀸𑀦𑀁 𑀤𑀝𑁆𑀞𑀩𑁆𑀩𑀁.

𑀅𑀧𑁆𑀧𑀓𑀫𑀳𑀦𑁆𑀢𑀢𑀸𑀬 𑀧𑀸𑀭𑀸𑀧𑀸𑀭𑀸𑀤𑀺 𑀯𑀺𑀬 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺𑀪𑀸𑀯𑀢𑁄 𑀅𑀜𑁆𑀜𑀫𑀜𑁆𑀜𑀁 𑀉𑀧𑀦𑀺𑀥𑀸𑀬 𑀆𑀳𑀸𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 ‘‘𑀉𑀧𑀭𑀺 𑀕𑀼𑀡𑁂 𑀉𑀧𑀦𑀺𑀥𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀲𑀻𑀮𑀜𑁆𑀳𑀻𑀢𑀺 𑀏𑀢𑁆𑀣 𑀳𑀺-𑀲𑀤𑁆𑀤𑁄 𑀓𑀸𑀭𑀡𑀢𑁆𑀣𑁄, 𑀢𑁂𑀦𑀺𑀤𑀁 ¶ 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺 ‘‘𑀬𑀲𑁆𑀫𑀸 𑀲𑀻𑀮𑀁 𑀓𑀺𑀜𑁆𑀘𑀸𑀧𑀺 𑀧𑀢𑀺𑀝𑁆𑀞𑀸𑀪𑀸𑀯𑁂𑀦 𑀲𑀫𑀸𑀥𑀺𑀲𑁆𑀲 𑀩𑀳𑀽𑀧𑀓𑀸𑀭𑀁, 𑀧𑀪𑀸𑀯𑀸𑀤𑀺𑀕𑀼𑀡𑀯𑀺𑀲𑁂𑀲𑁂 𑀧𑀦𑀲𑁆𑀲 𑀉𑀧𑀦𑀺𑀥𑀸𑀬 𑀓𑀮𑀫𑁆𑀧𑀺 𑀪𑀸𑀕𑀁 𑀦 𑀉𑀧𑁂𑀢𑀺, 𑀢𑀣𑀸 𑀲𑀫𑀸𑀥𑀺 𑀘 𑀧𑀜𑁆𑀜𑀸𑀬𑀸’’𑀢𑀺. 𑀢𑁂𑀦𑁂𑀯𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀦 𑀧𑀸𑀧𑀼𑀡𑀸𑀢𑀻𑀢𑀺 𑀕𑀼𑀡𑀲𑀫𑀪𑀸𑀯𑁂𑀦 𑀦 𑀲𑀫𑁆𑀧𑀸𑀧𑀼𑀡𑀸𑀢𑀺, 𑀦 𑀲𑀫𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀭𑀺𑀫𑀦𑁆𑀢𑀺 𑀲𑀫𑀸𑀥𑀺𑀧𑀜𑁆𑀜𑀁. 𑀉𑀧𑀦𑀺𑀥𑀸𑀬𑀸𑀢𑀺 𑀉𑀧𑀢𑁆𑀣𑀫𑁆𑀪𑀁 𑀓𑀢𑁆𑀯𑀸. 𑀢𑀜𑁆𑀳𑀺 𑀢𑀸𑀤𑀺𑀲𑀸𑀬 𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑀢𑁆𑀣𑀫𑁆𑀪𑀦𑀁 𑀳𑁄𑀢𑀺. 𑀳𑁂𑀝𑁆𑀞𑀺𑀫𑀦𑁆𑀢𑀺 𑀲𑀻𑀮𑀲𑀫𑀸𑀥𑀺𑀤𑁆𑀯𑀬𑀁.

‘‘𑀓𑀣’’𑀦𑁆𑀢𑀺𑀆𑀤𑀺 ¶ 𑀯𑀺𑀢𑁆𑀣𑀸𑀭𑀯𑀘𑀦𑀁. 𑀓𑀡𑁆𑀟𑀫𑁆𑀩𑀫𑀽𑀮𑀺𑀓𑀧𑀸𑀝𑀺𑀳𑀸𑀭𑀺𑀬𑀓𑀣𑀦𑀜𑁆𑀘𑁂𑀢𑁆𑀣 𑀬𑀣𑀸𑀓𑀣𑀜𑁆𑀘𑀺𑀧𑀺 𑀲𑀻𑀮𑀲𑁆𑀲 𑀲𑀫𑀸𑀥𑀺𑀫𑀧𑀸𑀧𑀼𑀡𑀢𑀸𑀲𑀺𑀤𑁆𑀥𑀺𑀬𑁂𑀯𑀺𑀥𑀸𑀥𑀺𑀧𑁆𑀧𑁂𑀢𑀸𑀢𑀺 𑀧𑀸𑀓𑀝𑀢𑀭𑀧𑀸𑀝𑀺𑀳𑀸𑀭𑀺𑀬𑀪𑀸𑀯𑁂𑀦, 𑀦𑀺𑀤𑀲𑁆𑀲𑀦𑀦𑀬𑁂𑀦 𑀘𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀅𑀪𑀺…𑀧𑁂… 𑀢𑀺𑀢𑁆𑀣𑀺𑀬𑀫𑀤𑁆𑀤𑀦’’𑀦𑁆𑀢𑀺 𑀇𑀤𑀁 𑀧𑀦 𑀢𑀲𑁆𑀲 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀲𑁆𑀲 𑀲𑀼𑀧𑀸𑀓𑀝𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀅𑀜𑁆𑀜𑁂𑀳𑀺 𑀩𑁄𑀥𑀺𑀫𑀽𑀮𑁂 𑀜𑀸𑀢𑀺𑀲𑀫𑀸𑀕𑀫𑀸𑀤𑀻𑀲𑀼 𑀘 𑀓𑀢𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀜𑁆𑀘 𑀯𑀼𑀢𑁆𑀢𑀁. 𑀲𑀫𑁆𑀩𑁄𑀥𑀺𑀢𑁄 𑀳𑀺 𑀅𑀝𑁆𑀞𑀫𑁂𑀧𑀺 𑀤𑀺𑀯𑀲𑁂 𑀤𑁂𑀯𑀢𑀸𑀦𑀁 ‘‘𑀩𑀼𑀤𑁆𑀥𑁄 𑀯𑀸 𑀦𑁄 𑀯𑀸’’𑀢𑀺 𑀉𑀧𑁆𑀧𑀦𑁆𑀦𑀓𑀗𑁆𑀔𑀸𑀯𑀺𑀥𑀫𑀦𑀢𑁆𑀣𑀁 𑀆𑀓𑀸𑀲𑁂 𑀭𑀢𑀦𑀘𑀗𑁆𑀓𑀫𑀁 𑀫𑀸𑀧𑁂𑀢𑁆𑀯𑀸 𑀘𑀗𑁆𑀓𑀫𑀦𑁆𑀢𑁄 𑀧𑀸𑀝𑀺𑀳𑀸𑀭𑀺𑀬𑀁 𑀅𑀓𑀸𑀲𑀺, 𑀢𑀢𑁄 𑀤𑀼𑀢𑀺𑀬𑀲𑀁𑀯𑀘𑁆𑀙𑀭𑁂 𑀓𑀼𑀮𑀦𑀕𑀭𑀕𑀢𑁄 𑀓𑀧𑀺𑀮𑀯𑀢𑁆𑀣𑀼𑀧𑀼𑀭𑁂 𑀦𑀺𑀕𑁆𑀭𑁄𑀥𑀸𑀭𑀸𑀫𑁂 𑀜𑀸𑀢𑀻𑀦𑀁 𑀲𑀫𑀸𑀕𑀫𑁂𑀧𑀺 𑀢𑁂𑀲𑀁 𑀫𑀸𑀦𑀫𑀤𑀧𑁆𑀧𑀳𑀸𑀦𑀢𑁆𑀣𑀁 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀅𑀓𑀸𑀲𑀺. 𑀢𑀢𑁆𑀣 𑀅𑀪𑀺𑀲𑀫𑁆𑀩𑁄𑀥𑀺𑀢𑁄𑀢𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀓𑀸𑀮𑀢𑁄. 𑀲𑀸𑀯𑀢𑁆𑀣𑀺𑀦𑀕𑀭𑀤𑁆𑀯𑀸𑀭𑁂𑀢𑀺 𑀲𑀸𑀯𑀢𑁆𑀣𑀺𑀦𑀕𑀭𑀲𑁆𑀲 𑀤𑀓𑁆𑀔𑀺𑀡𑀤𑁆𑀯𑀸𑀭𑁂. 𑀓𑀡𑁆𑀟𑀫𑁆𑀩𑀭𑀼𑀓𑁆𑀔𑀫𑀽𑀮𑁂𑀢𑀺 𑀓𑀡𑁆𑀟𑁂𑀦 𑀦𑀸𑀫 𑀧𑀲𑁂𑀦𑀤𑀺𑀭𑀜𑁆𑀜𑁄 𑀉𑀬𑁆𑀬𑀸𑀦𑀧𑀸𑀮𑁂𑀦 𑀭𑁄𑀧𑀺𑀢𑀢𑁆𑀢𑀸 𑀓𑀡𑁆𑀟𑀫𑁆𑀩𑀦𑀸𑀫𑀓𑀲𑁆𑀲 𑀭𑀼𑀓𑁆𑀔𑀲𑁆𑀲 𑀫𑀽𑀮𑁂. 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀓𑀭𑀡𑀢𑁆𑀣𑀸𑀬 𑀪𑀕𑀯𑀢𑁄 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 ‘‘𑀢𑀤𑀦𑀼𑀘𑁆𑀙𑀯𑀺𑀓𑀁 𑀞𑀸𑀦𑀁 𑀇𑀘𑁆𑀙𑀺𑀢𑀩𑁆𑀩’’𑀦𑁆𑀢𑀺 𑀭𑀢𑀦𑀫𑀡𑁆𑀟𑀧𑀸𑀤𑀺 𑀲𑀓𑁆𑀓𑁂𑀦 𑀤𑁂𑀯𑀭𑀜𑁆𑀜𑀸 𑀆𑀡𑀢𑁆𑀢𑁂𑀦 𑀯𑀺𑀲𑁆𑀲𑀓𑀫𑁆𑀫𑀼𑀦𑀸 𑀓𑀢𑀦𑁆𑀢𑀺 𑀯𑀤𑀦𑁆𑀢𑀺 𑀓𑁂𑀘𑀺. 𑀪𑀕𑀯𑀢𑀸 𑀦𑀺𑀫𑁆𑀫𑀺𑀢𑀦𑁆𑀢𑀺 𑀅𑀧𑀭𑁂. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀅𑀦𑁂𑀓𑀸𑀲𑀼 ‘‘𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀆𑀡𑀸𑀧𑀺𑀢𑁂𑀦 𑀯𑀺𑀲𑁆𑀲𑀓𑀫𑁆𑀫𑀤𑁂𑀯𑀧𑀼𑀢𑁆𑀢𑁂𑀦 𑀫𑀡𑁆𑀟𑀧𑁄 𑀓𑀢𑁄, 𑀘𑀗𑁆𑀓𑀫𑁄 𑀧𑀦 𑀪𑀕𑀯𑀢𑀸 𑀦𑀺𑀫𑁆𑀫𑀺𑀢𑁄’’𑀢𑀺 𑀯𑀼𑀢𑁆𑀢𑀁. 𑀤𑀺𑀩𑁆𑀩𑀲𑁂𑀢𑀘𑁆𑀙𑀢𑁆𑀢𑁂 𑀤𑁂𑀯𑀢𑀸𑀳𑀺 𑀥𑀸𑀭𑀺𑀬𑀫𑀸𑀦𑁂𑀢𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺 𑀅𑀜𑁆𑀜𑁂𑀲𑀫𑀲𑀫𑁆𑀪𑀯𑀢𑁄. ‘‘𑀤𑁆𑀯𑀸𑀤𑀲𑀬𑁄𑀚𑀦𑀸𑀬 𑀧𑀭𑀺𑀲𑀸𑀬𑀸’’𑀢𑀺 𑀇𑀤𑀁 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀧𑀘𑁆𑀘𑁂𑀓𑀁 𑀤𑁆𑀯𑀸𑀤𑀲𑀬𑁄𑀚𑀦𑀁 𑀫𑀦𑀼𑀲𑁆𑀲𑀧𑀭𑀺𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀤𑀸 𑀓𑀺𑀭 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀢𑁄 𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀧𑀭𑀺𑀧𑀽𑀭𑁂𑀢𑁆𑀯𑀸 𑀤𑁂𑀯𑀩𑁆𑀭𑀳𑁆𑀫𑀸𑀦𑁄𑀧𑀺 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀬𑁄 𑀓𑁄𑀘𑀺 𑀏𑀯𑀭𑀽𑀧𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄 𑀘𑁂, 𑀲𑁄 𑀆𑀕𑀘𑁆𑀙𑀢𑀽𑀢𑀺 𑀘𑁄𑀤𑀦𑀸𑀲𑀤𑀺𑀲𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀸𑀤𑀸𑀦𑀧𑀭𑀺𑀤𑀻𑀧𑀦’’𑀦𑁆𑀢𑀺. 𑀅𑀢𑁆𑀢𑀸𑀤𑀸𑀦𑀜𑁆𑀳𑀺 𑀅𑀦𑀼𑀬𑁄𑀕𑁄 𑀧𑀝𑀺𑀧𑀓𑁆𑀔𑀲𑁆𑀲 𑀅𑀢𑁆𑀢𑀲𑁆𑀲 𑀆𑀤𑀸𑀦𑀁 𑀕𑀳𑀡𑀦𑁆𑀢𑀺 𑀓𑀢𑁆𑀯𑀸. 𑀢𑀺𑀢𑁆𑀣𑀺𑀬𑀫𑀤𑁆𑀤𑀦𑀦𑁆𑀢𑀺 ‘‘𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀓𑀼𑀳𑀸𑀬𑀦𑀯𑀲𑁂𑀦 𑀧𑀼𑀩𑁆𑀩𑁂 𑀉𑀝𑁆𑀞𑀺𑀢𑀸𑀦𑀁 𑀢𑀺𑀢𑁆𑀣𑀺𑀬𑀸𑀦𑀁 𑀫𑀤𑁆𑀤𑀦𑀁, 𑀢𑀜𑁆𑀘 𑀢𑀣𑀸 𑀓𑀸𑀢𑀼𑀁 𑀅𑀲𑀫𑀢𑁆𑀣𑀢𑀸𑀲𑀫𑁆𑀧𑀸𑀤𑀦𑀫𑁂𑀯. 𑀢𑀤𑁂𑀢𑀁 𑀧𑀤𑀤𑁆𑀯𑀬𑀁 ‘‘𑀬𑀫𑀓𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀭𑀸𑀚𑀕𑀳𑀲𑁂𑀝𑁆𑀞𑀺𑀦𑁄 𑀘𑀦𑁆𑀤𑀦𑀖𑀝𑀺𑀓𑀼𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀫𑁂𑀯 𑀘𑁂𑀢𑁆𑀣 𑀯𑀢𑁆𑀢𑀩𑁆𑀩𑀁.

𑀉𑀧𑀭𑀺𑀫𑀓𑀸𑀬𑀢𑁄𑀢𑀺𑀆𑀤𑀺 ¶ ¶ 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑀧𑀝𑀺. 𑀫. 𑁧.𑁧𑁧𑁬) 𑀆𑀕𑀢𑀦𑀬𑀤𑀲𑁆𑀲𑀦𑀁, 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢’’𑀦𑁆𑀢𑀺, ‘‘𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀘. 𑀢𑀢𑁆𑀣𑀸𑀬𑀁 𑀧𑀸𑀴𑀺𑀲𑁂𑀲𑁄 𑁋

‘‘𑀳𑁂𑀝𑁆𑀞𑀺𑀫𑀓𑀸𑀬𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀉𑀧𑀭𑀺𑀫𑀓𑀸𑀬𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀺. 𑀧𑀼𑀭𑀢𑁆𑀣𑀺𑀫𑀓𑀸𑀬𑀢𑁄 𑀅𑀕𑁆𑀕𑀺, 𑀧𑀘𑁆𑀙𑀺𑀫𑀓𑀸𑀬𑀢𑁄 𑀉𑀤𑀓𑀁. 𑀧𑀘𑁆𑀙𑀺𑀫𑀓𑀸𑀬𑀢𑁄 𑀅𑀕𑁆𑀕𑀺, 𑀧𑀼𑀭𑀢𑁆𑀣𑀺𑀫𑀓𑀸𑀬𑀢𑁄 𑀉𑀤𑀓𑀁. 𑀤𑀓𑁆𑀔𑀺𑀡𑀅𑀓𑁆𑀔𑀺𑀢𑁄 𑀅𑀕𑁆𑀕𑀺, 𑀯𑀸𑀫𑀅𑀓𑁆𑀔𑀺𑀢𑁄 𑀉𑀤𑀓𑀁. 𑀯𑀸𑀫𑀅𑀓𑁆𑀔𑀺𑀢𑁄 𑀅𑀕𑁆𑀕𑀺, 𑀤𑀓𑁆𑀔𑀺𑀡𑀅𑀓𑁆𑀔𑀺𑀢𑁄 𑀉𑀤𑀓𑀁. 𑀤𑀓𑁆𑀔𑀺𑀡𑀓𑀡𑁆𑀡𑀲𑁄𑀢𑀢𑁄 𑀅𑀕𑁆𑀕𑀺, 𑀯𑀸𑀫𑀓𑀡𑁆𑀡𑀲𑁄𑀢𑀢𑁄 𑀉𑀤𑀓𑀁. 𑀯𑀸𑀫𑀓𑀡𑁆𑀡𑀲𑁄𑀢𑀢𑁄 𑀅𑀕𑁆𑀕𑀺, 𑀤𑀓𑁆𑀔𑀺𑀡𑀓𑀡𑁆𑀡𑀲𑁄𑀢𑀢𑁄 𑀉𑀤𑀓𑀁. 𑀤𑀓𑁆𑀔𑀺𑀡𑀦𑀸𑀲𑀺𑀓𑀸𑀲𑁄𑀢𑀢𑁄 𑀅𑀕𑁆𑀕𑀺, 𑀯𑀸𑀫𑀦𑀸𑀲𑀺𑀓𑀸𑀲𑁄𑀢𑀢𑁄 𑀉𑀤𑀓𑀁. 𑀯𑀸𑀫𑀦𑀸𑀲𑀺𑀓𑀸𑀲𑁄𑀢𑀢𑁄 𑀅𑀕𑁆𑀕𑀺, 𑀤𑀓𑁆𑀔𑀺𑀡𑀦𑀸𑀲𑀺𑀓𑀸𑀲𑁄𑀢𑀢𑁄 𑀉𑀤𑀓𑀁. 𑀤𑀓𑁆𑀔𑀺𑀡𑀅𑀁𑀲𑀓𑀽𑀝𑀢𑁄 𑀅𑀕𑁆𑀕𑀺, 𑀯𑀸𑀫𑀅𑀁𑀲𑀓𑀽𑀝𑀢𑁄 𑀉𑀤𑀓𑀁. 𑀯𑀸𑀫𑀅𑀁𑀲𑀓𑀽𑀝𑀢𑁄 𑀅𑀕𑁆𑀕𑀺, 𑀤𑀓𑁆𑀔𑀺𑀡𑀅𑀁𑀲𑀓𑀽𑀝𑀢𑁄 𑀉𑀤𑀓𑀁. 𑀤𑀓𑁆𑀔𑀺𑀡𑀳𑀢𑁆𑀣𑀢𑁄 𑀅𑀕𑁆𑀕𑀺, 𑀯𑀸𑀫𑀳𑀢𑁆𑀣𑀢𑁄 𑀉𑀤𑀓𑀁. 𑀯𑀸𑀫𑀳𑀢𑁆𑀣𑀢𑁄 𑀅𑀕𑁆𑀕𑀺, 𑀤𑀓𑁆𑀔𑀺𑀡𑀳𑀢𑁆𑀣𑀢𑁄 𑀉𑀤𑀓𑀁. 𑀤𑀓𑁆𑀔𑀺𑀡𑀧𑀲𑁆𑀲𑀢𑁄 𑀅𑀕𑁆𑀕𑀺, 𑀯𑀸𑀫𑀧𑀲𑁆𑀲𑀢𑁄 𑀉𑀤𑀓𑀁. 𑀯𑀸𑀫𑀧𑀲𑁆𑀲𑀢𑁄 𑀅𑀕𑁆𑀕𑀺, 𑀤𑀓𑁆𑀔𑀺𑀡𑀧𑀲𑁆𑀲𑀢𑁄 𑀉𑀤𑀓𑀁. 𑀤𑀓𑁆𑀔𑀺𑀡𑀧𑀸𑀤𑀢𑁄 𑀅𑀕𑁆𑀕𑀺, 𑀯𑀸𑀫𑀧𑀸𑀤𑀢𑁄 𑀉𑀤𑀓𑀁. 𑀯𑀸𑀫𑀧𑀸𑀤𑀢𑁄 𑀅𑀕𑁆𑀕𑀺, 𑀤𑀓𑁆𑀔𑀺𑀡𑀧𑀸𑀤𑀢𑁄 𑀉𑀤𑀓𑀁. 𑀅𑀗𑁆𑀕𑀼𑀮𑀗𑁆𑀕𑀼𑀮𑁂𑀳𑀺 𑀅𑀕𑁆𑀕𑀺, 𑀅𑀗𑁆𑀕𑀼𑀮𑀦𑁆𑀢𑀭𑀺𑀓𑀸𑀳𑀺 𑀉𑀤𑀓𑀁. 𑀅𑀗𑁆𑀕𑀼𑀮𑀦𑁆𑀢𑀭𑀺𑀓𑀸𑀳𑀺 𑀅𑀕𑁆𑀕𑀺, 𑀅𑀗𑁆𑀕𑀼𑀮𑀗𑁆𑀕𑀼𑀮𑁂𑀳𑀺 𑀉𑀤𑀓𑀁. 𑀏𑀓𑁂𑀓𑀮𑁄𑀫𑀢𑁄 𑀅𑀕𑁆𑀕𑀺, 𑀏𑀓𑁂𑀓𑀮𑁄𑀫𑀢𑁄 𑀉𑀤𑀓𑀁. 𑀮𑁄𑀫𑀓𑀽𑀧𑀢𑁄 𑀮𑁄𑀫𑀓𑀽𑀧𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀧𑀯𑀢𑁆𑀢𑀢𑀺, 𑀮𑁄𑀫𑀓𑀽𑀧𑀢𑁄 𑀮𑁄𑀫𑀓𑀽𑀧𑀢𑁄 𑀉𑀤𑀓𑀥𑀸𑀭𑀸 𑀧𑀯𑀢𑁆𑀢𑀢𑀻’’𑀢𑀺.

𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀏𑀓𑁂𑀓𑀮𑁄𑀫𑀓𑀽𑀧𑀢𑁄’’ 𑀇𑀘𑁆𑀘𑁂𑀯 (𑀧𑀝𑀺. 𑀫. 𑀅𑀝𑁆𑀞. 𑁨.𑁧.𑁧𑁧𑁬) 𑀆𑀕𑀢𑀁.

𑀙𑀦𑁆𑀦𑀁 𑀯𑀡𑁆𑀡𑀸𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀦𑀻𑀮𑀸𑀦𑀁 𑀧𑀻𑀢𑀓𑀸𑀦𑀁 𑀮𑁄𑀳𑀺𑀢𑀓𑀸𑀦𑀁 𑀑𑀤𑀸𑀢𑀸𑀦𑀁 𑀫𑀜𑁆𑀚𑀺𑀝𑁆𑀞𑀸𑀦𑀁 𑀧𑀪𑀲𑁆𑀲𑀭𑀸𑀦𑀦𑁆𑀢𑀺 𑀅𑀬𑀁 𑀲𑀩𑁆𑀩𑁄𑀧𑀺 𑀧𑀸𑀴𑀺𑀲𑁂𑀲𑁄 𑀧𑁂𑀬𑁆𑀬𑀸𑀮𑀦𑀬𑁂𑀦, 𑀆𑀤𑀺-𑀲𑀤𑁆𑀤𑁂𑀦 𑀘 𑀤𑀲𑁆𑀲𑀺𑀢𑁄. 𑀏𑀢𑁆𑀣 𑀘 𑀙𑀦𑁆𑀦𑀁 𑀯𑀡𑁆𑀡𑀸𑀦𑀁 𑀉𑀩𑁆𑀩𑀸𑀳𑀦𑀪𑀽𑀢𑀸𑀦𑀁 𑀬𑀫𑀓𑀸 𑀬𑀫𑀓𑀸 𑀯𑀡𑁆𑀡𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀧𑀸𑀞𑀲𑁂𑀲𑁂𑀦 𑀲𑀫𑁆𑀩𑀦𑁆𑀥𑁄, 𑀢𑁂𑀦 𑀯𑀓𑁆𑀔𑀢𑀺 ‘‘𑀤𑀼𑀢𑀺𑀬𑀸 𑀤𑀼𑀢𑀺𑀬𑀸 𑀭𑀲𑁆𑀫𑀺𑀬𑁄’’𑀢𑀺𑀆𑀤𑀺. 𑀢𑀢𑁆𑀣 𑀳𑀺 𑀢𑀸𑀲𑀁 𑀬𑀫𑀓𑀁 ¶ 𑀬𑀫𑀓𑀁 𑀧𑀯𑀢𑁆𑀢𑀦𑀸𑀓𑀸𑀭𑁂𑀦 𑀲𑀳 𑀆𑀯𑀚𑁆𑀚𑀦𑀧𑀭𑀺𑀓𑀫𑁆𑀫𑀸𑀥𑀺𑀝𑁆𑀞𑀸𑀦𑀸𑀦𑀁 𑀯𑀺𑀲𑀼𑀁 𑀧𑀯𑀢𑁆𑀢𑀺 𑀤𑀲𑁆𑀲𑀺𑀢𑀸. 𑀓𑁂𑀘𑀺 𑀧𑀦 ‘‘𑀙𑀦𑁆𑀦𑀁 𑀯𑀡𑁆𑀡𑀸𑀦’’𑀦𑁆𑀢𑀺 𑀏𑀢𑀲𑁆𑀲 ‘‘𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀉𑀤𑀓𑀥𑀸𑀭𑀸’’𑀢𑀺 𑀧𑀼𑀭𑀺𑀫𑁂𑀳𑀺 𑀧𑀤𑁂𑀳𑀺 𑀲𑀫𑁆𑀩𑀦𑁆𑀥𑀁 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀫𑁂𑀯 𑀅𑀕𑁆𑀕𑀺𑀓𑁆𑀔𑀦𑁆𑀥𑀉𑀤𑀓𑀥𑀸𑀭𑀸𑀦𑀁 𑀅𑀢𑁆𑀣𑀸𑀬 𑀢𑁂𑀚𑁄𑀓𑀲𑀺𑀡𑀯𑀸𑀬𑁄𑀓𑀲𑀺𑀡𑀸𑀦𑀁 𑀲𑀫𑀸𑀧𑀚𑁆𑀚𑀦𑀲𑁆𑀲 𑀯𑀓𑁆𑀔𑀫𑀸𑀦𑀢𑁆𑀢𑀸. 𑀙𑀦𑁆𑀦𑀁 𑀯𑀡𑁆𑀡𑀸𑀦𑀁 𑀙𑀩𑁆𑀩𑀡𑁆𑀡𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀓𑀢𑁆𑀢𑀼𑀯𑀲𑁂𑀦 𑀯𑀸 𑀲𑀫𑁆𑀩𑀦𑁆𑀥𑁄 𑀬𑀣𑀸 ‘‘𑀏𑀓𑀲𑁆𑀲 𑀘𑁂𑀧𑀺 𑀪𑀺𑀓𑁆𑀔𑀼𑀦𑁄 𑀦 𑀧𑀝𑀺𑀪𑀸𑀲𑁂𑀬𑁆𑀬 𑀢𑀁 𑀪𑀺𑀓𑁆𑀔𑀼𑀦𑀺𑀁 𑀅𑀧𑀲𑀸𑀤𑁂𑀢𑀼’’𑀦𑁆𑀢𑀺 (𑀧𑀸𑀘𑀺. 𑁫𑁫𑁮). 𑀓𑀢𑁆𑀢𑀼𑀓𑀫𑁆𑀫𑁂𑀲𑀼 𑀳𑀺 𑀩𑀳𑀼𑀮𑀸 𑀲𑀸𑀫𑀺𑀯𑀘𑀦𑀁 𑀆𑀔𑁆𑀬𑀸𑀢𑀧𑀬𑁄𑀕𑁂𑀧𑀺 𑀇𑀘𑁆𑀙𑀦𑁆𑀢𑀺 𑀦𑁂𑀭𑀼𑀢𑁆𑀢𑀺𑀓𑀸.

𑀏𑀯𑀁 ¶ 𑀧𑀸𑀴𑀺𑀦𑀬𑁂𑀦 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀅𑀝𑁆𑀞𑀓𑀣𑀸𑀦𑀬𑁂𑀦 𑀯𑀺𑀯𑀭𑀦𑁆𑀢𑁄 𑀧𑀘𑁆𑀘𑀸𑀲𑀢𑁆𑀢𑀺𑀦𑀬𑁂𑀦 ‘‘𑀙𑀦𑁆𑀦𑀁 𑀯𑀡𑁆𑀡𑀸𑀦’’𑀦𑁆𑀢𑀺 𑀧𑀤𑀫𑁂𑀯 𑀧𑀞𑀫𑀁 𑀯𑀺𑀯𑀭𑀺𑀢𑀼𑀁 ‘‘𑀢𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀲𑁆𑀲𑀸𑀢𑀺 𑀪𑀕𑀯𑀢𑁄. ‘‘𑀲𑀼𑀯𑀡𑁆𑀡𑀯𑀡𑁆𑀡𑀸 𑀭𑀲𑁆𑀫𑀺𑀬𑁄’’𑀢𑀺 𑀇𑀤𑀁 𑀢𑀸𑀲𑀁 𑀧𑀻𑀢𑀸𑀪𑀸𑀦𑀁 𑀬𑁂𑀪𑀼𑀬𑁆𑀬𑀢𑀸𑀬 𑀯𑀼𑀢𑁆𑀢𑀁, 𑀙𑀩𑁆𑀩𑀡𑁆𑀡𑀸𑀳𑀺 𑀭𑀲𑁆𑀫𑀻𑀳𑀺 𑀅𑀮𑀗𑁆𑀓𑀭𑀡𑀓𑀸𑀮𑁄 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀢𑀸𑀧𑀺 𑀳𑀺 𑀘𑀓𑁆𑀓𑀯𑀸𑀴𑀕𑀩𑁆𑀪𑀢𑁄 𑀉𑀕𑁆𑀕𑀦𑁆𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀫𑀸𑀳𑀘𑁆𑀘 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀫𑁂𑀯 𑀕𑀡𑁆𑀳𑀺𑀁𑀲𑀼. 𑀏𑀓𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀯𑀗𑁆𑀓𑀕𑁄𑀧𑀸𑀦𑀲𑀺𑀓𑀁 𑀯𑀺𑀬 𑀩𑁄𑀥𑀺𑀖𑀭𑀁 𑀅𑀳𑁄𑀲𑀺 𑀏𑀓𑀸𑀮𑁄𑀓𑀁. 𑀤𑀼𑀢𑀺𑀬𑀸 𑀤𑀼𑀢𑀺𑀬𑀸 𑀭𑀲𑁆𑀫𑀺𑀬𑁄𑀢𑀺 𑀧𑀼𑀭𑀺𑀫𑀧𑀼𑀭𑀺𑀫𑀢𑁄 𑀧𑀘𑁆𑀙𑀸 𑀧𑀘𑁆𑀙𑀸 𑀦𑀺𑀓𑁆𑀔𑀦𑁆𑀢𑀸 𑀭𑀲𑁆𑀫𑀺𑀬𑁄. 𑀓𑀲𑁆𑀫𑀸 𑀲𑀤𑀺𑀲𑀸𑀓𑀸𑀭𑀯𑀲𑁂𑀦 ‘‘𑀯𑀺𑀬𑀸’’𑀢𑀺 𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀤𑁆𑀯𑀺𑀦𑁆𑀦𑀜𑁆𑀘𑀸’’𑀢𑀺𑀆𑀤𑀺. 𑀤𑁆𑀯𑀺𑀦𑁆𑀦𑀜𑁆𑀘 𑀘𑀺𑀢𑁆𑀢𑀸𑀦𑀁 𑀏𑀓𑀓𑁆𑀔𑀡𑁂 𑀧𑀯𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺, 𑀬𑁂𑀳𑀺 𑀢𑀸 𑀏𑀯𑀁 𑀲𑀺𑀬𑀼𑀁, 𑀢𑀣𑀸𑀧𑀺 𑀇𑀫𑀺𑀦𑀸 𑀓𑀸𑀭𑀡𑀤𑁆𑀯𑀬𑁂𑀦 𑀏𑀯𑀫𑁂𑀯 𑀔𑀸𑀬𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀯𑀗𑁆𑀕𑀧𑀭𑀺𑀯𑀸𑀲𑀲𑁆𑀲𑀸𑀢𑀺 𑀪𑀯𑀗𑁆𑀕𑀯𑀲𑁂𑀦 𑀧𑀭𑀺𑀯𑀲𑀦𑀲𑁆𑀲, 𑀪𑀯𑀗𑁆𑀕𑀲𑀗𑁆𑀔𑀸𑀢𑀲𑁆𑀲 𑀧𑀭𑀺𑀯𑀲𑀦𑀲𑁆𑀲 𑀯𑀸, 𑀪𑀯𑀗𑁆𑀕𑀧𑀢𑀦𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀘𑀺𑀡𑁆𑀡𑀯𑀲𑀺𑀢𑀸𑀬𑀸𑀢𑀺 𑀆𑀯𑀚𑁆𑀚𑀦𑀲𑀫𑀸𑀧𑀚𑁆𑀚𑀦𑀸𑀤𑀻𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀲𑀫𑀸𑀘𑀺𑀡𑁆𑀡𑀧𑀭𑀺𑀘𑀬𑀢𑀸𑀬. 𑀦𑀦𑀼 𑀘 𑀏𑀓𑀲𑁆𑀲𑀸𑀧𑀺 𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀬𑀸 𑀤𑁆𑀯𑁂 𑀓𑀺𑀲𑁆𑀲𑁄 𑀭𑀲𑁆𑀫𑀺𑀬𑁄𑀧𑀺 𑀲𑀫𑁆𑀪𑀯𑁂𑀬𑁆𑀬𑀼𑀦𑁆𑀢𑀺 𑀅𑀦𑀼𑀬𑁄𑀕𑀫𑀧𑀦𑁂𑀢𑀺 ‘‘𑀢𑀲𑁆𑀲𑀸 𑀢𑀲𑁆𑀲𑀸 𑀧𑀦 𑀭𑀲𑁆𑀫𑀺𑀬𑀸’’𑀢𑀺𑀆𑀤𑀺𑀦𑀸. 𑀘𑀺𑀢𑁆𑀢𑀯𑀸𑀭𑀦𑀸𑀦𑀢𑁆𑀢𑀸 𑀆𑀯𑀚𑁆𑀚𑀦𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀸𑀦𑀺, 𑀓𑀲𑀺𑀡𑀦𑀸𑀦𑀢𑁆𑀢𑀸 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀯𑀸𑀭𑀸𑀦𑀺𑀧𑀺 𑀯𑀺𑀲𑀼𑀁 𑀯𑀺𑀲𑀼𑀁𑀬𑁂𑀯 𑀧𑀯𑀢𑁆𑀢𑀦𑁆𑀢𑀺. 𑀆𑀯𑀚𑁆𑀚𑀦𑀸𑀯𑀲𑀸𑀦𑁂 𑀢𑀺𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀚𑀯𑀦𑀸𑀦𑀺 𑀧𑀭𑀺𑀓𑀫𑁆𑀫𑀦𑀸𑀫𑁂𑀦𑁂𑀯 𑀇𑀥 𑀯𑀼𑀢𑁆𑀢𑀸𑀦𑀺.

𑀓𑀣𑀦𑁆𑀢𑀺 𑀆𑀳 ‘‘𑀦𑀻𑀮𑀭𑀲𑁆𑀫𑀺𑀅𑀢𑁆𑀣𑀸𑀬 𑀳𑀻’’𑀢𑀺𑀆𑀤𑀺. ‘‘𑀫𑀜𑁆𑀚𑀺𑀝𑁆𑀞𑀭𑀲𑁆𑀫𑀺𑀅𑀢𑁆𑀣𑀸𑀬 𑀮𑁄𑀳𑀺𑀢𑀓𑀲𑀺𑀡𑀁, 𑀧𑀪𑀲𑁆𑀲𑀭𑀭𑀲𑁆𑀫𑀺𑀅𑀢𑁆𑀣𑀸𑀬 𑀧𑀻𑀢𑀓𑀲𑀺𑀡’’𑀦𑁆𑀢𑀺 𑀇𑀤𑀁 𑀮𑁄𑀳𑀺𑀢𑀧𑀻𑀢𑀭𑀲𑁆𑀫𑀻𑀦𑀁 𑀓𑀸𑀭𑀡𑁂𑀬𑁂𑀯 𑀯𑀼𑀢𑁆𑀢𑁂 𑀲𑀺𑀤𑁆𑀥𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀢𑀸𑀲𑀫𑁂𑀯 𑀳𑀺 𑀫𑀜𑁆𑀚𑀺𑀝𑁆𑀞𑀧𑀪𑀲𑁆𑀲𑀭𑀭𑀲𑁆𑀫𑀺𑀬𑁄 ¶ 𑀯𑀺𑀲𑁂𑀲𑀧𑀪𑁂𑀤𑀪𑀽𑀢𑀸𑀢𑀺. ‘‘𑀅𑀕𑁆𑀕𑀺𑀓𑁆𑀔𑀦𑁆𑀥𑀢𑁆𑀣𑀸𑀬𑀸’’𑀢𑀺𑀆𑀤𑀺𑀦𑀸 ‘‘𑀉𑀧𑀭𑀺𑀫𑀓𑀸𑀬𑀢𑁄’’𑀢𑀺𑀆𑀤𑀻𑀦𑀁 𑀯𑀺𑀯𑀭𑀡𑀁. 𑀅𑀕𑁆𑀕𑀺𑀓𑁆𑀔𑀦𑁆𑀥𑀉𑀤𑀓𑀓𑁆𑀔𑀦𑁆𑀥𑀸𑀧𑀺 𑀅𑀜𑁆𑀜𑀫𑀜𑁆𑀜𑀅𑀲𑀫𑁆𑀫𑀺𑀲𑁆𑀲𑀸 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀉𑀕𑁆𑀕𑀦𑁆𑀢𑁆𑀯𑀸 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀧𑀢𑀺𑀁𑀲𑀼, 𑀢𑀁 𑀤𑀺𑀯𑀲𑀁 𑀧𑀦 𑀲𑀢𑁆𑀣𑀸 𑀬𑁄 𑀬𑁄 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀥𑀫𑁆𑀫𑁂 𑀘 𑀧𑀸𑀝𑀺𑀳𑀸𑀭𑀺𑀬𑁂 𑀘 𑀧𑀲𑀦𑁆𑀦𑁄, 𑀢𑀲𑁆𑀲 𑀢𑀲𑁆𑀲 𑀅𑀚𑁆𑀛𑀸𑀲𑀬𑀯𑀲𑁂𑀦 𑀢𑀁 𑀢𑀁 𑀥𑀫𑁆𑀫𑀜𑁆𑀘 𑀓𑀣𑁂𑀲𑀺, 𑀧𑀸𑀝𑀺𑀳𑀸𑀭𑀺𑀬𑀜𑁆𑀘 𑀤𑀲𑁆𑀲𑁂𑀲𑀺, 𑀏𑀯𑀁 𑀥𑀫𑁆𑀫𑁂 𑀪𑀸𑀲𑀺𑀬𑀫𑀸𑀦𑁂, 𑀧𑀸𑀝𑀺𑀳𑀸𑀭𑀺𑀬𑁂 𑀘 𑀓𑀭𑀺𑀬𑀫𑀸𑀦𑁂 𑀫𑀳𑀸𑀚𑀦𑁄 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑀲𑁆𑀫𑀺𑀜𑁆𑀘 𑀲𑀫𑀸𑀕𑀫𑁂 𑀅𑀢𑁆𑀢𑀦𑁄 𑀫𑀦𑀁 𑀕𑀳𑁂𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀲𑀫𑀢𑁆𑀣𑀁 𑀅𑀤𑀺𑀲𑁆𑀯𑀸 𑀦𑀺𑀫𑁆𑀫𑀺𑀢𑀁 𑀩𑀼𑀤𑁆𑀥𑀁 𑀫𑀸𑀧𑁂𑀲𑀺, 𑀢𑁂𑀦 𑀧𑀼𑀘𑁆𑀙𑀺𑀢𑀁 𑀧𑀜𑁆𑀳𑀁 𑀲𑀢𑁆𑀣𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑀢𑁆𑀣𑀸𑀭𑀸 𑀧𑀼𑀘𑁆𑀙𑀺𑀢𑀁 𑀧𑀜𑁆𑀳𑀁 𑀲𑁄 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀲𑀢𑁆𑀣𑀼 𑀘𑀗𑁆𑀓𑀫𑀦𑀓𑀸𑀮𑁂 𑀦𑀺𑀫𑁆𑀫𑀺𑀢𑁄 𑀞𑀸𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀓𑀧𑁆𑀧𑁂𑀲𑀺, 𑀢𑀲𑁆𑀲 𑀘𑀗𑁆𑀓𑀫𑀦𑀓𑀸𑀮𑁂 𑀲𑀢𑁆𑀣𑀸 𑀞𑀸𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀓𑀧𑁆𑀧𑁂𑀲𑀻𑀢𑀺 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀢𑁆𑀣𑀸 𑀘𑀗𑁆𑀓𑀫𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀏𑀢𑁂𑀦 ‘‘𑀲𑀢𑁆𑀣𑀸 𑀢𑀺𑀝𑁆𑀞𑀢𑀺, 𑀦𑀺𑀫𑁆𑀫𑀺𑀢𑁄 𑀘𑀗𑁆𑀓𑀫𑀢𑀺 𑀯𑀸 𑀦𑀺𑀲𑀻𑀤𑀢𑀺 𑀯𑀸 𑀲𑁂𑀬𑁆𑀬𑀁 𑀯𑀸 𑀓𑀧𑁆𑀧𑁂𑀢𑀻’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁧𑁧𑁬) 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀏𑀓𑁂𑀓𑀫𑀽𑀮𑀓𑀸 𑀲𑀢𑁆𑀣𑀼𑀧𑀓𑁆𑀔𑁂 𑀘𑀢𑁆𑀢𑀸𑀭𑁄 ¶ , 𑀦𑀺𑀫𑁆𑀫𑀺𑀢𑀧𑀓𑁆𑀔𑁂 𑀘𑀢𑁆𑀢𑀸𑀭𑁄𑀢𑀺 𑀲𑀩𑁆𑀩𑁂 𑀅𑀝𑁆𑀞 𑀯𑀸𑀭𑀸 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀬𑀲𑁆𑀫𑀸 𑀲𑀻𑀮𑀁 𑀲𑀫𑀸𑀥𑀺𑀲𑁆𑀲 𑀧𑀢𑀺𑀝𑁆𑀞𑀸𑀫𑀢𑁆𑀢𑀫𑁂𑀯 𑀳𑀼𑀢𑁆𑀯𑀸 𑀦𑀺𑀯𑀢𑁆𑀢𑀢𑀺, 𑀲𑀫𑀸𑀥𑀺𑀬𑁂𑀯 𑀢𑀢𑁆𑀣 𑀧𑀢𑀺𑀝𑁆𑀞𑀸𑀬 𑀬𑀣𑀸𑀯𑀼𑀢𑁆𑀢𑀁 𑀲𑀩𑁆𑀩𑀁 𑀧𑀸𑀝𑀺𑀳𑀸𑀭𑀺𑀬𑀓𑀺𑀘𑁆𑀘𑀁 𑀧𑀯𑀢𑁆𑀢𑁂𑀢𑀺, 𑀢𑀲𑁆𑀫𑀸 𑀢𑀤𑁂𑀢𑀁 𑀲𑀫𑀸𑀥𑀺𑀓𑀺𑀘𑁆𑀘𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀏𑀢𑁆𑀣 𑀏𑀓𑀫𑁆𑀧𑀻’’𑀢𑀺𑀆𑀤𑀺.

‘‘𑀬𑀁 𑀧𑀦𑀸’’𑀢𑀺𑀆𑀤𑀺𑀦𑀸 𑀲𑀫𑀸𑀥𑀺𑀲𑁆𑀲 𑀧𑀜𑁆𑀜𑀫𑀧𑀸𑀧𑀼𑀡𑀢𑀸 𑀯𑀺𑀪𑀸𑀯𑀺𑀢𑀸, 𑀬𑀁 𑀧𑀦 𑀧𑀝𑀺𑀯𑀺𑀚𑁆𑀛𑀺, 𑀇𑀤𑀁 𑀧𑀝𑀺𑀯𑀺𑀚𑁆𑀛𑀦𑀁 𑀧𑀜𑁆𑀜𑀸𑀓𑀺𑀘𑁆𑀘𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀅𑀦𑀼𑀓𑁆𑀓𑀫𑀢𑁄 𑀤𑀲𑁆𑀲𑁂𑀢𑀺 ‘‘𑀪𑀕𑀯𑀸’’𑀢𑀺𑀆𑀤𑀺𑀦𑀸. ‘‘𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀻’’𑀢𑀺 𑀇𑀤𑀁 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀓𑀢𑀧𑀞𑀫𑀸𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀯𑀼𑀢𑁆𑀢𑀁, 𑀢𑀢𑁄 𑀧𑀼𑀩𑁆𑀩𑁂𑀧𑀺 𑀬𑀢𑁆𑀢𑀓𑁂𑀦 𑀢𑀲𑁆𑀫𑀺𑀁 𑀪𑀯𑁂 𑀇𑀘𑁆𑀙𑀦𑁆𑀢𑁄 𑀲𑀸𑀯𑀓𑀩𑁄𑀥𑀺𑀁 𑀧𑀢𑁆𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬, 𑀢𑀢𑁆𑀢𑀓𑀁 𑀧𑀼𑀜𑁆𑀜𑀲𑀫𑁆𑀪𑀸𑀭𑀁 𑀲𑀫𑀼𑀧𑀘𑀺𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁄𑀬𑁂𑀯 𑀳𑀺 ‘‘𑀫𑀦𑀼𑀲𑁆𑀲𑀢𑁆𑀢𑀁 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀺, 𑀳𑁂𑀢𑀼 𑀲𑀢𑁆𑀣𑀸𑀭𑀤𑀲𑁆𑀲𑀦’’𑀦𑁆𑀢𑀺𑀆𑀤𑀺𑀦𑀸 (𑀩𑀼. 𑀯𑀁. 𑁫𑁯) 𑀯𑀼𑀢𑁆𑀢𑁂𑀲𑀼 𑀅𑀝𑁆𑀞𑀥𑀫𑁆𑀫𑁂𑀲𑀼 𑀳𑁂𑀢𑀼𑀲𑀫𑁆𑀧𑀦𑁆𑀦𑀢𑀸 𑀅𑀳𑁄𑀲𑀺. 𑀓𑁂𑀘𑀺 𑀧𑀦 𑀫𑀦𑁄𑀧𑀡𑀺𑀥𑀸𑀦𑀯𑀘𑀻𑀧𑀡𑀺𑀥𑀸𑀦𑀯𑀲𑁂𑀦 𑀅𑀦𑁂𑀓𑀥𑀸 𑀅𑀲𑀗𑁆𑀔𑁆𑀬𑁂𑀬𑁆𑀬𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀧𑀼𑀩𑁆𑀩𑀲𑀫𑁆𑀪𑀸𑀭𑀁 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀫𑁂𑀯 𑀲𑀗𑁆𑀕𑀳𑀸𑀭𑀼𑀴𑁆𑀳𑀸𑀲𑀼 𑀅𑀝𑁆𑀞𑀓𑀣𑀸𑀲𑀼 𑀢𑀣𑀸 𑀅𑀯𑀼𑀢𑁆𑀢𑀢𑁆𑀢𑀸. 𑀢𑀸𑀲𑀼 𑀳𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀧𑀞𑀫𑀸𑀪𑀺𑀦𑀻𑀳𑀸𑀭𑀢𑁄 𑀧𑀼𑀩𑁆𑀩𑁂 𑀳𑁂𑀢𑀼𑀲𑀫𑁆𑀧𑀦𑁆𑀦𑀢𑀸𑀬𑁂𑀯 𑀤𑀲𑁆𑀲𑀺𑀢𑀸. 𑀏𑀓𑀽𑀦𑀢𑀺𑀁𑀲𑀯𑀲𑁆𑀲𑀓𑀸𑀮𑁂 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀓𑁆𑀓𑀭𑀢𑀦𑀸𑀭𑀳𑀧𑀼𑀜𑁆𑀜𑀯𑀦𑁆𑀢𑀢𑀸𑀬 ¶ 𑀩𑁄𑀥𑀺𑀲𑀢𑁆𑀢𑁄 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀲𑀫𑁆𑀧𑀦𑁆𑀦𑁄𑀢𑀺 𑀢𑀲𑁆𑀲 𑀦𑀺𑀯𑀸𑀲𑀪𑀯𑀦𑀁 ‘‘𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀦𑀺𑀯𑀸𑀲𑀪𑀽𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀪𑀯𑀦𑀸𑀢𑀺 𑀭𑀫𑁆𑀫𑀲𑀼𑀭𑀫𑁆𑀫𑀲𑀼𑀪𑀲𑀗𑁆𑀔𑀸𑀢𑀸 𑀦𑀺𑀓𑁂𑀢𑀦𑀸. 𑀧𑀥𑀸𑀦𑀬𑁄𑀕𑀦𑁆𑀢𑀺 𑀤𑀼𑀓𑁆𑀓𑀭𑀘𑀭𑀺𑀬𑀸𑀬 𑀉𑀢𑁆𑀢𑀫𑀯𑀻𑀭𑀺𑀬𑀸𑀦𑀼𑀬𑁄𑀕𑀁.

𑀉𑀭𑀼𑀯𑁂𑀮𑀸𑀬𑀁 𑀓𑀺𑀭 𑀲𑁂𑀦𑀸𑀦𑀺𑀕𑀫𑁂 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀥𑀻𑀢𑀸 𑀲𑀼𑀚𑀸𑀢𑀸 𑀦𑀸𑀫 𑀤𑀸𑀭𑀺𑀓𑀸 𑀯𑀬𑀧𑁆𑀧𑀢𑁆𑀢𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀦𑀺𑀕𑁆𑀭𑁄𑀥𑀫𑀽𑀮𑁂 𑀧𑀢𑁆𑀣𑀦𑀫𑀓𑀸𑀲𑀺 ‘‘𑀲𑀘𑀸𑀳𑀁 𑀲𑀫𑀚𑀸𑀢𑀺𑀓𑀁 𑀓𑀼𑀮𑀖𑀭𑀁 𑀕𑀦𑁆𑀢𑁆𑀯𑀸 𑀧𑀞𑀫𑀕𑀩𑁆𑀪𑁂 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀸𑀫𑀺, 𑀔𑀻𑀭𑀧𑀸𑀬𑀸𑀲𑁂𑀦 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺, (𑀫. 𑀦𑀺. 𑀅𑀝𑁆𑀞. 𑁨.𑁨𑁮𑁪; 𑀚𑀸. 𑀅𑀝𑁆𑀞. 𑁧.𑀅𑀯𑀺𑀤𑀽𑀭𑁂 𑀦𑀺𑀤𑀸𑀦𑀓𑀣𑀸) 𑀢𑀲𑁆𑀲𑀸 𑀲𑀸 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀺. 𑀲𑀸 𑀲𑀢𑁆𑀢 𑀥𑁂𑀦𑀼𑀬𑁄 𑀮𑀝𑁆𑀞𑀺𑀯𑀦𑁂 𑀔𑀸𑀤𑀸𑀧𑁂𑀢𑁆𑀯𑀸 𑀢𑀸𑀲𑀫𑁆𑀧𑀺 𑀥𑀻𑀢𑀭𑁄 𑀕𑀸𑀯𑀺𑀬𑁄 𑀮𑀤𑁆𑀥𑀸 𑀢𑀣𑁂𑀯 𑀔𑀸𑀤𑀸𑀧𑁂𑀢𑁆𑀯𑀸 𑀧𑀼𑀦 𑀢𑀸𑀲𑀫𑁆𑀧𑀺 𑀥𑀻𑀢𑀭𑁄 𑀢𑀣𑁂𑀯𑀸𑀢𑀺 𑀲𑀢𑁆𑀢𑀧𑀼𑀢𑁆𑀢𑀺𑀦𑀢𑁆𑀢𑀺𑀧𑀦𑀢𑁆𑀢𑀺𑀧𑀭𑀫𑁆𑀧𑀭𑀸𑀕𑀢𑀸𑀳𑀺 𑀥𑁂𑀦𑀽𑀳𑀺 𑀔𑀻𑀭𑀁 𑀕𑀳𑁂𑀢𑁆𑀯𑀸 𑀔𑀻𑀭𑀧𑀸𑀬𑀸𑀲𑀁 𑀧𑀘𑀺𑀢𑀼𑀫𑀸𑀭𑀪𑀺. 𑀢𑀲𑁆𑀫𑀺𑀁 𑀔𑀡𑁂 𑀫𑀳𑀸𑀩𑁆𑀭𑀳𑁆𑀫𑀸 𑀢𑀺𑀬𑁄𑀚𑀦𑀺𑀓𑀁 𑀲𑁂𑀢𑀘𑁆𑀙𑀢𑁆𑀢𑀁 𑀉𑀧𑀭𑀺 𑀥𑀸𑀭𑁂𑀲𑀺, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑁂𑀲𑀺, 𑀲𑀓𑀮𑀮𑁄𑀓𑁂 𑀯𑀺𑀚𑁆𑀚𑀫𑀸𑀦𑀭𑀲𑀁 𑀤𑁂𑀯𑀢𑀸 𑀧𑀓𑁆𑀔𑀺𑀧𑀺𑀁𑀲𑀼, 𑀧𑀸𑀬𑀸𑀲𑀁 𑀤𑀓𑁆𑀔𑀺𑀡𑀸𑀯𑀝𑁆𑀝𑀁 𑀳𑀼𑀢𑁆𑀯𑀸 𑀧𑀘𑀢𑀺, 𑀢𑀁 𑀲𑀸 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸𑀬 𑀲𑀳𑁂𑀯 𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀕𑀳𑁂𑀢𑁆𑀯𑀸 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁂 𑀦𑀸𑀫 𑀢𑀺𑀢𑁆𑀣𑁂 𑀏𑀓𑀢𑀸𑀮𑀝𑁆𑀞𑀺𑀧𑁆𑀧𑀫𑀸𑀡𑁂 𑀏𑀓𑀽𑀦𑀧𑀜𑁆𑀜𑀸𑀲𑀧𑀺𑀡𑁆𑀟𑁂 𑀓𑀭𑁄𑀦𑁆𑀢𑁄 𑀧𑀭𑀺𑀪𑀼𑀜𑁆𑀚𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀯𑀺𑀲𑀸𑀔𑀸𑀧𑀼𑀡𑁆𑀡𑀫𑀸𑀬𑀁 𑀉𑀭𑀼𑀯𑁂𑀮𑀕𑀸𑀫𑁂 𑀲𑀼𑀚𑀸𑀢𑀸𑀬 𑀤𑁆𑀯𑀺𑀦𑁆𑀦𑀁 𑀧𑀓𑁆𑀔𑀺𑀢𑁆𑀢𑀤𑀺𑀩𑁆𑀩𑁄𑀚𑀁 𑀫𑀥𑀼𑀧𑀸𑀬𑀸𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸’’𑀢𑀺. 𑀢𑀢𑁆𑀣 𑀲𑀼𑀚𑀸𑀢𑀸𑀬𑀸𑀢𑀺 𑀆𑀬𑀲𑁆𑀫𑀢𑁄 𑀬𑀲𑀢𑁆𑀣𑁂𑀭𑀲𑁆𑀲 𑀫𑀸𑀢𑀼𑀪𑀽𑀢𑀸𑀬 𑀧𑀘𑁆𑀙𑀸 𑀲𑀭𑀡𑀕𑀫𑀦𑀝𑁆𑀞𑀸𑀦𑁂 𑀏𑀢𑀤𑀕𑁆𑀕𑀧𑁆𑀧𑀢𑁆𑀢𑀸𑀬 𑀲𑀼𑀚𑀸𑀢𑀸𑀬 𑀦𑀸𑀫 𑀲𑁂𑀝𑁆𑀞𑀺𑀪𑀭𑀺𑀬𑀸𑀬. 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀺𑀦𑁄 ¶ 𑀭𑀲𑀲𑁆𑀲 𑀲𑀸𑀭𑁄 𑀉𑀧𑀢𑁆𑀣𑀫𑁆𑀪𑀩𑀮𑀓𑀭𑁄 𑀪𑀽𑀢𑀦𑀺𑀲𑁆𑀲𑀺𑀢𑁄 𑀏𑀓𑁄 𑀯𑀺𑀲𑁂𑀲𑁄 𑀑𑀚𑀸 𑀦𑀸𑀫, 𑀲𑀸 𑀤𑀺𑀯𑀺 𑀪𑀯𑀸 𑀧𑀓𑁆𑀔𑀺𑀢𑁆𑀢𑀸 𑀏𑀢𑁆𑀣𑀸𑀢𑀺 𑀧𑀓𑁆𑀔𑀺𑀢𑁆𑀢𑀤𑀺𑀩𑁆𑀩𑁄𑀚𑁄, 𑀢𑀁. 𑀧𑀸𑀢𑀩𑁆𑀩𑁄 𑀘 𑀲𑁄 𑀅𑀲𑀺𑀢𑀩𑁆𑀩𑁄 𑀘𑀸𑀢𑀺 𑀧𑀸𑀬𑀸𑀲𑁄, 𑀭𑀲𑀁 𑀓𑀢𑁆𑀯𑀸 𑀧𑀺𑀯𑀺𑀢𑀼𑀁, 𑀆𑀮𑁄𑀧𑀁 𑀓𑀢𑁆𑀯𑀸 𑀘 𑀪𑀼𑀜𑁆𑀚𑀺𑀢𑀼𑀁 𑀬𑀼𑀢𑁆𑀢𑁄 𑀪𑁄𑀚𑀦𑀯𑀺𑀲𑁂𑀲𑁄, 𑀫𑀥𑀼𑀦𑀸 𑀲𑀺𑀢𑁆𑀢𑁄 𑀧𑀸𑀬𑀸𑀲𑁄 𑀫𑀥𑀼𑀧𑀸𑀬𑀸𑀲𑁄, 𑀢𑀁.

𑀢𑀢𑁄 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑁂 𑀫𑀳𑀸𑀲𑀸𑀮𑀯𑀦𑁂 𑀦𑀸𑀦𑀸𑀲𑀫𑀸𑀧𑀢𑁆𑀢𑀻𑀳𑀺 𑀤𑀺𑀯𑀸𑀯𑀺𑀳𑀸𑀭𑀲𑁆𑀲 𑀓𑀢𑀢𑁆𑀢𑀸 ‘‘𑀲𑀸𑀬𑀦𑁆𑀳𑀲𑀫𑀬𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀢𑁆𑀣𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀕𑀳𑁂𑀢𑀩𑁆𑀩𑁄. 𑀤𑀓𑁆𑀔𑀺𑀡𑀼𑀢𑁆𑀢𑀭𑁂𑀦𑀸𑀢𑀺 𑀤𑀺𑀯𑀸𑀯𑀺𑀳𑀸𑀭𑀢𑁄 𑀩𑁄𑀥𑀺𑀬𑀸 𑀧𑀯𑀺𑀲𑀦𑀫𑀕𑁆𑀕𑀁 𑀲𑀦𑁆𑀥𑀸𑀬𑀸𑀳, 𑀉𑀚𑀼𑀓𑀁 𑀤𑀓𑁆𑀔𑀺𑀡𑀼𑀢𑁆𑀢𑀭𑀕𑀢𑁂𑀦 𑀤𑁂𑀯𑀢𑀸𑀳𑀺 𑀅𑀮𑀗𑁆𑀓𑀢𑁂𑀦 𑀫𑀕𑁆𑀕𑁂𑀦𑀸𑀢𑀺 𑀅𑀢𑁆𑀣𑁄 ¶ . 𑀏𑀯𑀫𑁆𑀧𑀺 𑀯𑀤𑀦𑁆𑀢𑀺 ‘‘𑀤𑀓𑁆𑀔𑀺𑀡𑀼𑀢𑁆𑀢𑀭𑁂𑀦𑀸𑀢𑀺 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀼𑀢𑁆𑀢𑀭𑁂𑀦 𑀆𑀤𑀺𑀅𑀯𑀲𑀸𑀦𑀕𑀳𑀡𑁂𑀦 𑀫𑀚𑁆𑀛𑀺𑀫𑀲𑁆𑀲𑀸𑀧𑀺 𑀕𑀳𑀺𑀢𑀢𑁆𑀢𑀸, 𑀢𑀣𑀸 𑀮𑀼𑀢𑁆𑀢𑀧𑀬𑁄𑀕𑀲𑁆𑀲 𑀘 𑀤𑀲𑁆𑀲𑀦𑀢𑁄. 𑀏𑀯𑀜𑁆𑀳𑀺 𑀲𑀢𑀺 ‘𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀼𑀢𑁆𑀢𑀭𑀤𑀺𑀲𑀸𑀪𑀸𑀕𑁂𑀦 𑀩𑁄𑀥𑀺𑀫𑀡𑁆𑀟𑀁 𑀧𑀯𑀺𑀲𑀺𑀢𑁆𑀯𑀸 𑀢𑀺𑀝𑁆𑀞𑀢𑀻’𑀢𑀺 (𑀚𑀸. 𑀅𑀝𑁆𑀞. 𑁧.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸) 𑀚𑀸𑀢𑀓𑀦𑀺𑀤𑀸𑀦𑁂 𑀯𑀼𑀢𑁆𑀢𑀯𑀘𑀦𑁂𑀦 𑀲𑀫𑁂𑀢𑀻’’𑀢𑀺. 𑀤𑀓𑁆𑀔𑀺𑀡𑀤𑀺𑀲𑀢𑁄 𑀕𑀦𑁆𑀢𑀩𑁆𑀩𑁄 𑀉𑀢𑁆𑀢𑀭𑀤𑀺𑀲𑀸𑀪𑀸𑀕𑁄 𑀤𑀓𑁆𑀔𑀺𑀡𑀼𑀢𑁆𑀢𑀭𑁄, 𑀢𑁂𑀦 𑀧𑀯𑀺𑀲𑀺𑀢𑁆𑀯𑀸𑀢𑀺 𑀅𑀧𑀭𑁂. 𑀓𑁂𑀘𑀺 𑀧𑀦 ‘‘𑀉𑀢𑁆𑀢𑀭𑀲𑀤𑁆𑀤𑁄 𑀘𑁂𑀢𑁆𑀣 𑀫𑀕𑁆𑀕𑀯𑀸𑀘𑀓𑁄. 𑀬𑀤𑀺 𑀳𑀺 𑀤𑀺𑀲𑀸𑀯𑀸𑀘𑀓𑁄 𑀪𑀯𑁂𑀬𑁆𑀬, ‘𑀤𑀓𑁆𑀔𑀺𑀡𑀼𑀢𑁆𑀢𑀭𑀸𑀬𑀸’𑀢𑀺 𑀯𑀤𑁂𑀬𑁆𑀬𑀸’’𑀢𑀺, 𑀢𑀁 𑀦 ‘‘𑀉𑀢𑁆𑀢𑀭𑁂𑀦 𑀦𑀤𑀻 𑀲𑀻𑀤𑀸, 𑀕𑀫𑁆𑀪𑀻𑀭𑀸 𑀤𑀼𑀭𑀢𑀺𑀓𑁆𑀓𑀫𑀸’’𑀢𑀺𑀆𑀤𑀺𑀦𑀸 𑀤𑀺𑀲𑀸𑀯𑀸𑀘𑀓𑀲𑁆𑀲𑀸𑀧𑀺 𑀏𑀦𑀬𑁄𑀕𑀲𑁆𑀲 𑀤𑀲𑁆𑀲𑀦𑀢𑁄, 𑀉𑀢𑁆𑀢𑀭𑀲𑀤𑁆𑀤𑀲𑁆𑀲 𑀘 𑀫𑀕𑁆𑀕𑀯𑀸𑀘𑀓𑀲𑁆𑀲 𑀅𑀦𑀸𑀕𑀢𑀢𑁆𑀢𑀸. 𑀅𑀧𑀺𑀘 𑀤𑀺𑀲𑀸𑀪𑀸𑀕𑀁 𑀲𑀦𑁆𑀥𑀸𑀬 𑀏𑀯𑀁 𑀯𑀼𑀢𑁆𑀢𑀁. 𑀤𑀺𑀲𑀸𑀪𑀸𑀕𑁄𑀧𑀺 𑀳𑀺 𑀤𑀺𑀲𑀸 𑀏𑀯𑀸𑀢𑀺. 𑀅𑀣 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑁄𑀢𑁆𑀣𑀺𑀬𑁂𑀦 𑀦𑀸𑀫 𑀢𑀺𑀡𑀳𑀸𑀭𑀓𑀩𑁆𑀭𑀸𑀳𑁆𑀫𑀡𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀓𑀼𑀲𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀅𑀲𑀺𑀢𑀜𑁆𑀘𑀦𑀕𑀺𑀭𑀺𑀲𑀗𑁆𑀓𑀸𑀲𑀁 𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑀸𑀦𑀫𑀲𑁆𑀲𑀸𑀲𑀚𑀦𑀦𑀝𑁆𑀞𑀸𑀦𑁂 𑀲𑀫𑀸𑀯𑀺𑀭𑀼𑀴𑁆𑀳𑀁 𑀩𑁄𑀥𑀺𑀬𑀸 𑀫𑀡𑁆𑀟𑀦𑀪𑀽𑀢𑀁 𑀩𑁄𑀥𑀺𑀫𑀡𑁆𑀟𑀫𑀼𑀧𑀕𑀦𑁆𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁂 𑀅𑀝𑁆𑀞𑀸𑀲𑀺, 𑀲𑁄 𑀧𑀦 𑀧𑀤𑁂𑀲𑁄 𑀧𑀤𑀼𑀫𑀺𑀦𑀺𑀧𑀢𑁆𑀢𑁂 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀧𑀓𑀫𑁆𑀧𑀺𑀢𑁆𑀣, 𑀢𑀢𑁄 𑀧𑀘𑁆𑀙𑀺𑀫𑀤𑀺𑀲𑀸𑀪𑀸𑀕𑀁, 𑀉𑀢𑁆𑀢𑀭𑀤𑀺𑀲𑀸𑀪𑀸𑀕𑀜𑁆𑀘 𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑁂𑀧𑀺 𑀫𑀳𑀸𑀧𑀼𑀭𑀺𑀲𑁂 𑀢𑀣𑁂𑀯 𑀢𑁂 𑀅𑀓𑀫𑁆𑀧𑀺𑀁𑀲𑀼, 𑀢𑀢𑁄 ‘‘𑀦𑀸𑀬𑀁 𑀲𑀩𑁆𑀩𑁄𑀧𑀺 𑀧𑀤𑁂𑀲𑁄 𑀫𑀫 𑀕𑀼𑀡𑀁 𑀲𑀦𑁆𑀥𑀸𑀭𑁂𑀢𑀼𑀁 𑀲𑀫𑀢𑁆𑀣𑁄’’𑀢𑀺 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀪𑀸𑀕𑀫𑀕𑀫𑀸𑀲𑀺, 𑀢𑀢𑁆𑀣 𑀧𑀮𑁆𑀮𑀗𑁆𑀓𑀧𑁆𑀧𑀫𑀸𑀡𑀁 𑀦𑀺𑀘𑁆𑀘𑀮𑀫𑀳𑁄𑀲𑀺, 𑀢𑀲𑁆𑀲𑁂𑀯 𑀘 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀩𑁄𑀥𑀺𑀫𑀡𑁆𑀟𑀲𑀫𑀜𑁆𑀜𑀸, 𑀫𑀳𑀸𑀧𑀼𑀭𑀺𑀲𑁄 ‘‘𑀇𑀤𑀁 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀝𑁆𑀞𑀸𑀦’’𑀦𑁆𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀧𑀼𑀩𑁆𑀩𑀼𑀢𑁆𑀢𑀭𑀤𑀺𑀲𑀸𑀪𑀸𑀕𑁂 𑀞𑀺𑀢𑁄 𑀢𑀢𑁆𑀣 𑀅𑀓𑀫𑁆𑀧𑀦𑀧𑁆𑀧𑀤𑁂𑀲𑁂 𑀢𑀸𑀦𑀺 𑀢𑀺𑀡𑀸𑀦𑀺 𑀅𑀕𑁆𑀕𑁂 𑀕𑀳𑁂𑀢𑁆𑀯𑀸 𑀲𑀜𑁆𑀘𑀸𑀮𑁂𑀲𑀺, 𑀢𑀸𑀯𑀤𑁂𑀯 𑀘𑀼𑀤𑁆𑀤𑀲𑀳𑀢𑁆𑀣𑁄 𑀧𑀮𑁆𑀮𑀗𑁆𑀓𑁄 𑀅𑀳𑁄𑀲𑀺, 𑀢𑀸𑀦𑀺𑀧𑀺 𑀢𑀺𑀡𑀸𑀦𑀺 𑀯𑀺𑀘𑀺𑀢𑁆𑀢𑀸𑀓𑀸𑀭𑁂𑀦 𑀢𑀽𑀮𑀺𑀓𑀸𑀬 𑀮𑁂𑀔𑀸 𑀕𑀳𑀺𑀢𑀸𑀦𑀺 𑀯𑀺𑀬 𑀅𑀳𑁂𑀲𑀼𑀁. 𑀲𑁄 𑀢𑀢𑁆𑀣 𑀢𑀺𑀲𑀦𑁆𑀥𑀺𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀫𑁂𑀢𑁆𑀢𑀸𑀓𑀫𑁆𑀫𑀝𑁆𑀞𑀸𑀦𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀘𑀢𑀼𑀭𑀗𑁆𑀕𑀺𑀓𑀁 𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀦𑀺𑀲𑀻𑀤𑀺, 𑀢𑀫𑀢𑁆𑀣𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀩𑁄𑀥𑀺𑀫𑀡𑁆𑀟𑀁 𑀧𑀯𑀺𑀲𑀺𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀩𑁄𑀥𑀺 𑀯𑀼𑀘𑁆𑀘𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘, 𑀲𑀸 𑀫𑀡𑁆𑀟𑀢𑀺 𑀣𑀸𑀫𑀕𑀢𑀢𑀸𑀬 𑀧𑀲𑀻𑀤𑀢𑀺 ¶ 𑀏𑀢𑁆𑀣𑀸𑀢𑀺 𑀩𑁄𑀥𑀺𑀫𑀡𑁆𑀟𑁄, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀬𑀣𑀸𑀯𑀼𑀢𑁆𑀢𑀧𑁆𑀧𑀤𑁂𑀲𑁄, 𑀧𑀭𑀺𑀬𑀸𑀬𑁂𑀦 𑀧𑀦 𑀇𑀥 𑀤𑀼𑀫𑀭𑀸𑀚𑀸. 𑀢𑀣𑀸 𑀳𑀺 𑀆𑀘𑀭𑀺𑀬𑀸𑀦𑀦𑁆𑀤𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁 ‘‘𑀩𑁄𑀥𑀺𑀫𑀡𑁆𑀟𑀲𑀤𑁆𑀤𑁄𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑀝𑁆𑀞𑀸𑀦𑁂 𑀏𑀯 𑀤𑀝𑁆𑀞𑀩𑁆𑀩𑁄, 𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀩𑁄𑀥𑀺𑀭𑀼𑀓𑁆𑀔𑀲𑁆𑀲 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑁂’’𑀢𑀺, 𑀢𑀁.

𑀫𑀸𑀭𑀯𑀺𑀚𑀬𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀝𑀺𑀮𑀸𑀪𑀸𑀤𑀻𑀳𑀺 ¶ 𑀪𑀕𑀯𑀦𑁆𑀢𑀁 𑀅𑀲𑁆𑀲𑀸𑀲𑁂𑀢𑀻𑀢𑀺 𑀅𑀲𑁆𑀲𑀢𑁆𑀣𑁄. 𑀆𑀧𑀼𑀩𑁆𑀩𑀜𑁆𑀳𑀺 𑀲𑀸𑀲𑀲𑀤𑁆𑀤𑀁 𑀅𑀦𑀼𑀲𑀺𑀝𑁆𑀞𑀺𑀢𑁄𑀲𑀦𑁂𑀲𑀼 𑀇𑀘𑁆𑀙𑀦𑁆𑀢𑀺, 𑀬𑀁 𑀢𑀼 𑀮𑁄𑀓𑁂 ‘‘𑀘𑀮𑀤𑀮𑁄, 𑀓𑀼𑀜𑁆𑀚𑀭𑀸𑀲𑀦𑁄’’ 𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀘𑁆𑀘𑀼𑀕𑁆𑀕𑀢𑀪𑀸𑀯𑁂𑀦, 𑀅𑀚𑁂𑀬𑁆𑀬𑀪𑀽𑀫𑀺𑀲𑀻𑀲𑀕𑀢𑀪𑀸𑀯𑁂𑀦, 𑀲𑀓𑀮𑀲𑀩𑁆𑀩𑀜𑁆𑀜𑀼𑀕𑀼𑀡𑀧𑀝𑀺𑀮𑀸𑀪𑀝𑁆𑀞𑀸𑀦𑀯𑀺𑀭𑀼𑀴𑁆𑀳𑀪𑀸𑀯𑁂𑀦 𑀘 𑀤𑀼𑀫𑀸𑀦𑀁 𑀭𑀸𑀚𑀸𑀢𑀺 𑀤𑀼𑀫𑀭𑀸𑀚𑀸, 𑀅𑀲𑁆𑀲𑀢𑁆𑀣𑁄 𑀘 𑀲𑁄 𑀤𑀼𑀫𑀭𑀸𑀚𑀸 𑀘𑀸𑀢𑀺 𑀅𑀲𑁆𑀲𑀢𑁆𑀣𑀤𑀼𑀫𑀭𑀸𑀚𑀸 𑀢𑀁. 𑀤𑁆𑀯𑀺𑀦𑁆𑀦𑀁 𑀊𑀭𑀼𑀚𑀸𑀡𑀼𑀲𑀦𑁆𑀥𑀻𑀦𑀁, 𑀊𑀭𑀼𑀫𑀽𑀮𑀓𑀝𑀺𑀲𑀦𑁆𑀥𑀺𑀲𑁆𑀲 𑀘 𑀯𑀲𑁂𑀦 𑀢𑀬𑁄 𑀲𑀦𑁆𑀥𑀬𑁄, 𑀲𑀡𑁆𑀞𑀸𑀦𑀯𑀲𑁂𑀦 𑀯𑀸 𑀢𑀬𑁄 𑀓𑁄𑀡𑀸 𑀬𑀲𑁆𑀲𑀸𑀢𑀺 𑀢𑀺𑀲𑀦𑁆𑀥𑀺, 𑀲𑁆𑀯𑁂𑀯 𑀧𑀮𑁆𑀮𑀗𑁆𑀓𑁄 𑀊𑀭𑀼𑀩𑀤𑁆𑀥𑀸𑀲𑀦𑀁 𑀧𑀭𑀺𑀲𑀫𑀦𑁆𑀢𑀢𑁄 𑀅𑀗𑁆𑀓𑀦𑀁 𑀆𑀲𑀦𑀦𑁆𑀢𑀺 𑀅𑀢𑁆𑀣𑁂𑀦 𑀭-𑀓𑀸𑀭𑀲𑁆𑀲 𑀮-𑀓𑀸𑀭𑀁, 𑀤𑁆𑀯𑀺𑀪𑀸𑀯𑀜𑁆𑀘 𑀓𑀢𑁆𑀯𑀸, 𑀢𑀻𑀳𑀺 𑀯𑀸 𑀲𑀦𑁆𑀥𑀻𑀳𑀺 𑀮𑀓𑁆𑀔𑀺𑀢𑁄 𑀧𑀮𑁆𑀮𑀗𑁆𑀓𑁄 𑀢𑀺𑀲𑀦𑁆𑀥𑀺𑀧𑀮𑁆𑀮𑀗𑁆𑀓𑁄, 𑀢𑀁. 𑀆𑀪𑀼𑀚𑀺𑀢𑁆𑀯𑀸𑀢𑀺 𑀆𑀩𑀦𑁆𑀥𑀺𑀢𑁆𑀯𑀸, 𑀉𑀪𑁄 𑀧𑀸𑀤𑁂 𑀲𑀫𑀜𑁆𑀙𑀺𑀢𑁂 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀢𑁆𑀣𑀸𑀭𑁄 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁧𑁬) 𑀆𑀕𑀫𑀺𑀲𑁆𑀲𑀢𑀺. 𑀅𑀢𑁆𑀢𑀸, 𑀫𑀺𑀢𑁆𑀢𑁄, 𑀫𑀚𑁆𑀛𑀢𑁆𑀢𑁄, 𑀯𑁂𑀭𑀻𑀢𑀺 𑀘𑀢𑀽𑀲𑀼𑀧𑀺 𑀲𑀫𑀧𑁆𑀧𑀯𑀢𑁆𑀢𑀦𑀯𑀲𑁂𑀦 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀫𑁂𑀢𑁆𑀢𑀸𑀓𑀫𑁆𑀫𑀝𑁆𑀞𑀸𑀦𑀁. ‘‘𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢’’𑀦𑁆𑀢𑀺 𑀇𑀤𑀁 𑀧𑀦 ‘‘𑀯𑀻𑀭𑀺𑀬𑀸𑀥𑀺𑀝𑁆𑀞𑀸𑀦’’𑀦𑁆𑀢𑀺 𑀏𑀢𑁂𑀦𑀸𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀫𑁆𑀧𑀺 𑀳𑀺 𑁋

𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘 𑀅𑀝𑁆𑀞𑀺 𑀘 𑀅𑀯𑀲𑀺𑀲𑁆𑀲𑀢𑀼, 𑀉𑀧𑀲𑀼𑀲𑁆𑀲𑀢𑀼 𑀲𑀭𑀻𑀭𑁂 𑀫𑀁𑀲𑀮𑁄𑀳𑀺𑀢𑀁, 𑀬𑀁 𑀢𑀁 𑀧𑀼𑀭𑀺𑀲𑀣𑀸𑀫𑁂𑀦 𑀧𑀼𑀭𑀺𑀲𑀯𑀻𑀭𑀺𑀬𑁂𑀦 𑀧𑀼𑀭𑀺𑀲𑀧𑀭𑀓𑁆𑀓𑀫𑁂𑀦 𑀧𑀢𑁆𑀢𑀩𑁆𑀩𑀁, 𑀦 𑀢𑀁 𑀅𑀧𑀸𑀧𑀼𑀡𑀺𑀢𑁆𑀯𑀸 𑀯𑀻𑀭𑀺𑀬𑀲𑁆𑀲 𑀲𑀡𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁨.𑁧𑁮𑁪; 𑀲𑀁. 𑀦𑀺. 𑁧.𑁨𑁬𑁬; 𑀅. 𑀦𑀺. 𑁩.𑁫𑁧; 𑀅. 𑀦𑀺. 𑁮.𑁧𑁩; 𑀫𑀳𑀸𑀦𑀺. 𑁧𑁭, 𑁧𑁯𑁬) 𑁋

𑀯𑀼𑀢𑁆𑀢𑀦𑀬𑁂𑀦 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀫𑁂𑀯.

𑀘𑀼𑀤𑁆𑀤𑀲 𑀳𑀢𑁆𑀣𑀸 𑀯𑀺𑀢𑁆𑀣𑀢𑀧𑁆𑀧𑀫𑀸𑀡𑀪𑀸𑀯𑁂𑀦 𑀬𑀲𑁆𑀲𑀸𑀢𑀺 𑀘𑀼𑀤𑁆𑀤𑀲𑀳𑀢𑁆𑀣𑁄. 𑀧𑀭𑀺𑀲𑀫𑀦𑁆𑀢𑀢𑁄 𑀅𑀗𑁆𑀓𑀻𑀬𑀢𑁂 𑀮𑀓𑁆𑀔𑀻𑀬𑀢𑁂 𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑀸𑀢𑀺 𑀧𑀮𑁆𑀮𑀗𑁆𑀓𑁄 𑀭-𑀓𑀸𑀭𑀲𑁆𑀲 𑀮-𑀓𑀸𑀭𑀁, 𑀢𑀲𑁆𑀲 𑀘 𑀤𑁆𑀯𑀺𑀢𑁆𑀢𑀁 𑀓𑀢𑁆𑀯𑀸. 𑀅𑀧𑀺𑀘 ‘‘𑀇𑀤𑀁 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀝𑁆𑀞𑀸𑀦’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀘𑀦𑀢𑁄 𑀧𑀮𑁆𑀮𑀁 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀁 𑀓𑀭𑁄𑀢𑀺 𑀏𑀢𑁆𑀣𑀸𑀢𑀺 𑀧𑀮𑁆𑀮𑀗𑁆𑀓𑁄 𑀦𑀺𑀕𑁆𑀕𑀳𑀺𑀢𑀸𑀕𑀫𑀯𑀲𑁂𑀦, 𑀅𑀮𑀼𑀢𑁆𑀢𑀲𑀫𑀸𑀲𑀯𑀲𑁂𑀦 𑀯𑀸, 𑀘𑀼𑀤𑁆𑀤𑀲𑀳𑀢𑁆𑀣𑁄 𑀘 𑀲𑁄 𑀧𑀮𑁆𑀮𑀗𑁆𑀓𑁄 𑀘, 𑀲𑁆𑀯𑁂𑀯 𑀉𑀢𑁆𑀢𑀫𑀝𑁆𑀞𑁂𑀦 𑀧𑀢𑁆𑀣𑀦𑀻𑀬𑀝𑁆𑀞𑁂𑀦 𑀘 𑀯𑀭𑁄𑀢𑀺 𑀘𑀼𑀤𑁆𑀤𑀲𑀳𑀢𑁆𑀣𑀧𑀮𑁆𑀮𑀗𑁆𑀓𑀯𑀭𑁄, 𑀢𑀢𑁆𑀣 𑀕𑀢𑁄 𑀧𑀯𑀢𑁆𑀢𑁄 𑀦𑀺𑀲𑀺𑀦𑁆𑀦𑁄 𑀢𑀣𑀸. 𑀘𑀼𑀤𑁆𑀤𑀲𑀳𑀢𑁆𑀣𑀢𑀸 𑀘𑁂𑀢𑁆𑀣 𑀯𑀺𑀢𑁆𑀣𑀸𑀭𑀯𑀲𑁂𑀦 𑀕𑀳𑁂𑀢𑀩𑁆𑀩𑀸. 𑀢𑀸𑀦𑀺𑀬𑁂𑀯 ¶ 𑀳𑀺 𑀢𑀺𑀡𑀸𑀦𑀺 𑀅𑀧𑀭𑀺𑀫𑀺𑀢𑀧𑀼𑀜𑁆𑀜𑀸𑀦𑀼𑀪𑀸𑀯𑀢𑁄 𑀘𑀼𑀤𑁆𑀤𑀲𑀳𑀢𑁆𑀣𑀯𑀺𑀢𑁆𑀣𑀢𑀧𑀮𑁆𑀮𑀗𑁆𑀓𑀪𑀸𑀯𑁂𑀦 𑀧𑀯𑀢𑁆𑀢𑀸𑀦𑀺, 𑀦 𑀘 𑀢𑀸𑀦𑀺 𑀅𑀝𑁆𑀞𑀫𑀼𑀝𑁆𑀞𑀺𑀧𑁆𑀧𑀫𑀸𑀡𑀸𑀦𑀺 𑀘𑀼𑀤𑁆𑀤𑀲𑀳𑀢𑁆𑀣𑀅𑀘𑁆𑀘𑀼𑀕𑁆𑀕𑀢𑀸𑀦𑀺 𑀲𑀫𑁆𑀪𑀯𑀦𑁆𑀢𑀺 ¶ . 𑀢𑀢𑁄𑀬𑁂𑀯 𑀘 𑀇𑀥 ‘‘𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, 𑀥𑀫𑁆𑀫𑀧𑀤𑀝𑁆𑀞𑀓𑀣𑀸𑀤𑀻𑀲𑀼 𑀘 ‘‘𑀢𑀺𑀡𑀸𑀦𑀺 𑀲𑀦𑁆𑀣𑀭𑀺𑀢𑁆𑀯𑀸…𑀧𑁂… 𑀧𑀼𑀭𑀢𑁆𑀣𑀺𑀫𑀸𑀪𑀺𑀫𑀼𑀔𑁄 𑀦𑀺𑀲𑀻𑀤𑀺𑀢𑁆𑀯𑀸’’𑀢𑀺 (𑀥. 𑀲. 𑀅𑀝𑁆𑀞. 𑁧.𑀲𑀸𑀭𑀺𑀧𑀼𑀢𑁆𑀣𑁂𑀭𑀯𑀡𑁆𑀡𑀦𑀸; 𑀥. 𑀲. 𑀅𑀝𑁆𑀞. 𑁧.𑀦𑀺𑀤𑀸𑀦𑀓𑀣𑀸). 𑀅𑀜𑁆𑀜𑀢𑁆𑀣 𑀘 ‘‘𑀢𑀺𑀡𑀸𑀲𑀦𑁂 𑀘𑀼𑀤𑁆𑀤𑀲𑀳𑀢𑁆𑀣𑀲𑀫𑁆𑀫𑀢𑁂’’𑀢𑀺. 𑀓𑁂𑀘𑀺 𑀧𑀦 ‘‘𑀅𑀘𑁆𑀘𑀼𑀕𑁆𑀕𑀢𑀪𑀸𑀯𑁂𑀦𑁂𑀯 𑀘𑀼𑀤𑁆𑀤𑀲𑀳𑀢𑁆𑀣𑁄’’𑀢𑀺 𑀬𑀣𑀸 𑀢𑀣𑀸 𑀧𑀭𑀺𑀓𑀧𑁆𑀧𑀦𑀸𑀯𑀲𑁂𑀦 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁 𑀬𑀣𑀸𑀯𑀼𑀢𑁆𑀢𑁂𑀦 𑀓𑀸𑀭𑀡𑁂𑀦, 𑀲𑀸𑀥𑀓𑁂𑀦 𑀘 𑀯𑀺𑀭𑀼𑀤𑁆𑀥𑀢𑁆𑀢𑀸. 𑀓𑀸𑀫𑀜𑁆𑀘 𑀫𑀦𑁄𑀭𑀣𑀧𑀽𑀭𑀡𑀺𑀬𑀸 𑀘𑀢𑀼𑀭𑀗𑁆𑀕𑀼𑀢𑁆𑀢𑀭𑀯𑀡𑁆𑀡𑀦𑀸𑀬 ‘‘𑀢𑀺𑀓𑁆𑀔𑀢𑁆𑀢𑀼𑀁 𑀩𑁄𑀥𑀺𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀘𑀼𑀤𑁆𑀤𑀲𑀳𑀢𑁆𑀣𑀼𑀩𑁆𑀩𑁂𑀥𑁂 𑀞𑀸𑀦𑁂 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀸𑀬 𑀦𑀺𑀲𑀺𑀦𑁆𑀦𑀓𑀸𑀮𑀢𑁄’’𑀢𑀺 (𑀅. 𑀦𑀺. 𑀅𑀝𑁆𑀞. 𑁨.𑁪.𑁩𑁩) 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀢𑀣𑀸𑀧𑀺 𑀢𑀢𑁆𑀣 𑀉𑀩𑁆𑀩𑁂𑀥𑀲𑀤𑁆𑀤𑁄 𑀯𑀺𑀢𑁆𑀣𑀸𑀭𑀯𑀸𑀘𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀬𑀣𑀸 ‘‘𑀢𑀺𑀭𑀺𑀬𑀁 𑀲𑁄𑀴𑀲𑀼𑀩𑁆𑀩𑁂𑀥𑁄, 𑀉𑀤𑁆𑀥𑀫𑀸𑀳𑀼 𑀲𑀳𑀲𑁆𑀲𑀥𑀸’’𑀢𑀺 (𑀚𑀸. 𑁧.𑁩.𑁪𑁦) 𑀫𑀳𑀸𑀧𑀦𑀸𑀤𑀚𑀸𑀢𑀓𑁂. 𑀢𑀣𑀸 𑀳𑀺 𑀢𑀤𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀢𑀺𑀭𑀺𑀬𑀁 𑀲𑁄𑀴𑀲𑀼𑀩𑁆𑀩𑁂𑀥𑁄𑀢𑀺 𑀯𑀺𑀢𑁆𑀣𑀸𑀭𑀢𑁄 𑀲𑁄𑀴𑀲𑀓𑀡𑁆𑀟𑀧𑀸𑀢𑀯𑀺𑀢𑁆𑀣𑀸𑀭𑁄 𑀅𑀳𑁄𑀲𑀻’’𑀢𑀺 (𑀚𑀸𑀢𑀓 𑀅𑀝𑁆𑀞. 𑁨-𑁩𑁦𑁨 𑀧𑀺𑀝𑁆𑀞𑁂). 𑀅𑀜𑁆𑀜𑀣𑀸 𑀳𑀺 𑀆𑀓𑀸𑀲𑁂𑀬𑁂𑀯 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀡𑀲𑀦𑁆𑀣𑀭𑀡𑀁 𑀓𑀢𑀁, 𑀦 𑀅𑀘𑀮𑀧𑀤𑁂𑀲𑁂𑀢𑀺 𑀅𑀢𑁆𑀣𑁄 𑀆𑀧𑀚𑁆𑀚𑁂𑀬𑁆𑀬 𑀲𑀦𑁆𑀣𑀭𑀡𑀓𑀺𑀭𑀺𑀬𑀸𑀥𑀸𑀭𑀪𑀸𑀯𑀢𑁄 𑀢𑀲𑁆𑀲, 𑀲𑁄 𑀘𑀢𑁆𑀣𑁄 𑀅𑀦𑀥𑀺𑀧𑁆𑀧𑁂𑀢𑁄 𑀅𑀜𑁆𑀜𑀢𑁆𑀣 𑀅𑀦𑀸𑀕𑀢𑀢𑁆𑀢𑀸𑀢𑀺.

𑀭𑀚𑀢𑀓𑁆𑀔𑀦𑁆𑀥𑀁 𑀧𑀺𑀝𑁆𑀞𑀺𑀢𑁄 𑀓𑀢𑁆𑀯𑀸 𑀯𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀢𑁆𑀣𑀦𑁆𑀢𑀺 𑀧𑀘𑁆𑀙𑀺𑀫𑀧𑀩𑁆𑀩𑀢𑀁. 𑀫𑀸𑀭𑀩𑀮𑀦𑁆𑀢𑀺 𑀫𑀸𑀭𑀁, 𑀫𑀸𑀭𑀩𑀮𑀜𑁆𑀘, 𑀫𑀸𑀭𑀲𑁆𑀲 𑀯𑀸 𑀲𑀸𑀫𑀢𑁆𑀣𑀺𑀬𑀁. 𑀧𑀼𑀩𑁆𑀩𑁂𑀦𑀺𑀯𑀸𑀲𑀦𑁆𑀢𑀺 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀁. 𑀤𑀺𑀩𑁆𑀩𑀘𑀓𑁆𑀔𑀼𑀦𑁆𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁. ‘‘𑀓𑀺𑀘𑁆𑀙𑀁 𑀯𑀢𑀸𑀬𑀁 𑀮𑁄𑀓𑁄 𑀆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁫𑁭; 𑀲𑀁. 𑀦𑀺. 𑁨.𑁪) 𑀚𑀭𑀸𑀫𑀭𑀡𑀫𑀼𑀔𑁂𑀦 𑀧𑀘𑁆𑀘𑀬𑀸𑀓𑀸𑀭𑁂 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸. 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 ‘‘𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡’’𑀦𑁆𑀢𑀺 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑀁 𑀓𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀢𑀫𑁆𑀧𑀺 𑀳𑀺 𑀩𑀼𑀤𑁆𑀥𑀸𑀦𑀫𑀸𑀘𑀺𑀡𑁆𑀡𑀫𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀧𑀸𑀤𑀓𑀁 𑀓𑀢𑁆𑀯𑀸𑀢𑀺 𑀓𑀸𑀭𑀡𑀁, 𑀧𑀢𑀺𑀝𑁆𑀞𑀸𑀦𑀁 𑀯𑀸 𑀓𑀢𑁆𑀯𑀸. ‘‘𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸𑀢𑀺 𑀙𑀢𑁆𑀢𑀺𑀁𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀼𑀔𑁂𑀦 𑀆𑀲𑀯𑀓𑁆𑀔𑀬𑀜𑀸𑀡𑀲𑀗𑁆𑀔𑀸𑀢𑀫𑀳𑀸𑀯𑀚𑀺𑀭𑀜𑀸𑀡𑀕𑀩𑁆𑀪𑀁 𑀕𑀡𑁆𑀳𑀸𑀧𑀦𑀯𑀲𑁂𑀦 𑀯𑀺𑀧𑀲𑁆𑀲𑀦𑀁 𑀪𑀸𑀯𑁂𑀢𑁆𑀯𑀸. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀥𑀺𑀕𑀫𑀸𑀬 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑁂 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀢𑁄 𑀙𑀢𑁆𑀢𑀺𑀁𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀼𑀔𑁂𑀦 𑀧𑀯𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀫𑁆𑀧𑀺 𑀳𑀺 ‘‘𑀫𑀳𑀸𑀯𑀚𑀺𑀭𑀜𑀸𑀡’’𑀦𑁆𑀢𑀺 ¶ 𑀯𑀼𑀘𑁆𑀘𑀢𑀺, 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀸𑀬 𑀤𑁂𑀯𑀲𑀺𑀓𑀁 𑀯𑀴𑀜𑁆𑀚𑀦𑀓𑀲𑀫𑀸𑀧𑀢𑁆𑀢𑀻𑀦𑀁 𑀧𑀼𑀭𑁂𑀘𑀭𑀸𑀦𑀼𑀘𑀭𑀜𑀸𑀡𑀫𑁆𑀧𑀺. 𑀇𑀥 𑀧𑀦 𑀫𑀕𑁆𑀕𑀜𑀸𑀡𑀫𑁂𑀯, 𑀯𑀺𑀲𑁂𑀲𑀢𑁄 𑀘 𑀅𑀕𑁆𑀕𑀫𑀕𑁆𑀕𑀜𑀸𑀡𑀁, 𑀢𑀲𑁆𑀫𑀸 𑀢𑀲𑁆𑀲𑁂𑀯 𑀯𑀺𑀧𑀲𑁆𑀲𑀦𑀸𑀕𑀩𑁆𑀪𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑁂𑀢𑀺 𑀲𑀩𑁆𑀩𑀜𑁆𑀜𑀼𑀢𑀸𑀤𑀺𑀦𑀺𑀭𑀯𑀲𑁂𑀲𑀩𑀼𑀤𑁆𑀥𑀕𑀼𑀡𑁂. 𑀢𑀲𑁆𑀲𑀸 𑀧𑀸𑀤𑀓𑀁 𑀓𑀢𑁆𑀯𑀸 𑀲𑀫𑀸𑀥𑀺 𑀦𑀺𑀯𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀇𑀤𑀫𑀲𑁆𑀲 𑀧𑀜𑁆𑀜𑀸𑀓𑀺𑀘𑁆𑀘’’𑀦𑁆𑀢𑀺. 𑀅𑀲𑁆𑀲𑀸𑀢𑀺 𑀪𑀕𑀯𑀢𑁄.

‘‘𑀢𑀢𑁆𑀣 𑀬𑀣𑀸 𑀳𑀢𑁆𑀣𑁂’’𑀢𑀺𑀆𑀤𑀺𑀦𑀸 𑀉𑀧𑀫𑀸𑀬 𑀧𑀸𑀓𑀝𑀻𑀓𑀭𑀡𑀁. 𑀳𑀢𑁆𑀣𑁂𑀢𑀺 𑀳𑀢𑁆𑀣𑀧𑀲𑀢𑁂, 𑀓𑀭𑀧𑀼𑀝𑁂 𑀯𑀸. 𑀧𑀸𑀢𑀺𑀬𑀦𑁆𑀢𑀺 ¶ 𑀲𑀭𑀸𑀯𑀓𑁂. 𑀖𑀝𑁂𑀢𑀺 𑀉𑀤𑀓𑀳𑀭𑀡𑀖𑀝𑁂. 𑀤𑁆𑀯𑀢𑁆𑀢𑀺𑀁𑀲𑀤𑁄𑀡𑀕𑀡𑁆𑀳𑀦𑀧𑁆𑀧𑀫𑀸𑀡𑀁 𑀓𑀼𑀡𑁆𑀟𑀁 𑀓𑁄𑀮𑀫𑁆𑀩𑁄. 𑀢𑀢𑁄 𑀫𑀳𑀢𑀭𑀸 𑀘𑀸𑀝𑀺. 𑀢𑀢𑁄𑀧𑀺 𑀫𑀳𑀢𑀻 𑀫𑀳𑀸𑀓𑀼𑀫𑁆𑀪𑀻. 𑀲𑁄𑀡𑁆𑀟𑀻 𑀓𑀼𑀲𑁄𑀩𑁆𑀪𑁄. 𑀦𑀤𑀻𑀪𑀸𑀕𑁄 𑀓𑀦𑁆𑀤𑀭𑁄. 𑀘𑀓𑁆𑀓𑀯𑀸𑀴𑀧𑀸𑀤𑁂𑀲𑀼 𑀲𑀫𑀼𑀤𑁆𑀤𑁄 𑀘𑀓𑁆𑀓𑀯𑀸𑀴𑀫𑀳𑀸𑀲𑀫𑀼𑀤𑁆𑀤𑁄. 𑀲𑀺𑀦𑁂𑀭𑀼𑀧𑀸𑀤𑀓𑁂 𑀫𑀳𑀸𑀲𑀫𑀼𑀤𑁆𑀤𑁂𑀢𑀺 𑀲𑀻𑀤𑀦𑁆𑀢𑀭𑀲𑀫𑀼𑀤𑁆𑀤𑀁 𑀲𑀦𑁆𑀥𑀸𑀬𑀸𑀳. ‘‘𑀧𑀸𑀢𑀺𑀬’’𑀦𑁆𑀢𑀺𑀆𑀤𑀺𑀦𑀸𑀧𑀺 𑀢𑀤𑁂𑀯𑀢𑁆𑀣𑀁 𑀧𑀓𑀸𑀭𑀦𑁆𑀢𑀭𑁂𑀦 𑀯𑀺𑀪𑀸𑀯𑁂𑀢𑀺. 𑀧𑀭𑀺𑀢𑁆𑀢𑀁 𑀳𑁄𑀢𑀺 𑀬𑀣𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀲𑀸 𑀧𑀸𑀴𑀺𑀬𑀸 𑀅𑀢𑁆𑀣𑀯𑀺𑀪𑀸𑀯𑀦𑀢𑁆𑀣𑀸𑀬 𑀬𑀸 𑀲𑀁𑀯𑀡𑁆𑀡𑀦𑀸 𑀯𑀼𑀢𑁆𑀢𑀸, 𑀢𑀤𑁂𑀯 𑀢𑀲𑁆𑀲𑀸 𑀕𑀼𑀡𑀪𑀸𑀯𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀩𑁆𑀩𑀢𑁆𑀣.

‘‘𑀤𑀼𑀯𑁂 𑀧𑀼𑀣𑀼𑀚𑁆𑀚𑀦𑀸’’𑀢𑀺𑀆𑀤𑀺 𑀧𑀼𑀣𑀼𑀚𑁆𑀚𑀦𑁂𑀲𑀼 𑀮𑀩𑁆𑀪𑀫𑀸𑀦𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀫𑁂𑀯 𑀯𑀼𑀢𑁆𑀢𑀁, 𑀦 𑀧𑀦 𑀫𑀽𑀮𑀧𑀭𑀺𑀬𑀸𑀬𑀲𑀁𑀯𑀡𑁆𑀡𑀦𑀸𑀤𑀻𑀲𑀼 (𑀫. 𑀦𑀺. 𑀅𑀝𑁆𑀞. 𑁧.𑁨) 𑀯𑀺𑀬 𑀧𑀼𑀣𑀼𑀚𑁆𑀚𑀦𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀢𑁆𑀣𑀁 𑀦𑀺𑀭𑀯𑀲𑁂𑀲𑀧𑀼𑀣𑀼𑀚𑁆𑀚𑀦𑀲𑁆𑀲𑁂𑀯 𑀇𑀥 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀲𑀩𑁆𑀩𑁄𑀧𑀺 𑀳𑀺 𑀧𑀼𑀣𑀼𑀚𑁆𑀚𑀦𑁄 𑀪𑀕𑀯𑀢𑁄 𑀉𑀧𑀭𑀺𑀕𑀼𑀡𑁂 𑀯𑀺𑀪𑀸𑀯𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀺𑀝𑁆𑀞𑀢𑀼 𑀢𑀸𑀯 𑀧𑀼𑀣𑀼𑀚𑁆𑀚𑀦𑁄, 𑀅𑀭𑀺𑀬𑀲𑀸𑀯𑀓𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀫𑁆𑀧𑀺 𑀅𑀯𑀺𑀲𑀬𑀸 𑀏𑀯 𑀩𑀼𑀤𑁆𑀥𑀕𑀼𑀡𑀸. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀲𑁄𑀢𑀸𑀧𑀦𑁆𑀦𑁄’’𑀢𑀺𑀆𑀤𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁭). 𑀕𑁄𑀢𑁆𑀢𑀲𑀫𑁆𑀩𑀦𑁆𑀥𑀢𑀸𑀬 𑀆𑀤𑀺𑀘𑁆𑀘𑀲𑁆𑀲 𑀲𑀽𑀭𑀺𑀬𑀤𑁂𑀯𑀧𑀼𑀢𑁆𑀢𑀲𑁆𑀲 𑀩𑀦𑁆𑀥𑀽𑀢𑀺 𑀆𑀤𑀺𑀘𑁆𑀘𑀩𑀦𑁆𑀥𑀼, 𑀢𑁂𑀦 𑀯𑀼𑀢𑁆𑀢𑀁 𑀦𑀺𑀤𑁆𑀤𑁂𑀲𑁂 𑁋

‘‘𑀆𑀤𑀺𑀘𑁆𑀘𑁄 𑀯𑀼𑀘𑁆𑀘𑀢𑀺 𑀲𑀽𑀭𑀺𑀬𑁄. 𑀲𑀽𑀭𑀺𑀬𑁄 𑀕𑁄𑀢𑀫𑁄 𑀕𑁄𑀢𑁆𑀢𑁂𑀦, 𑀪𑀕𑀯𑀸𑀧𑀺 𑀕𑁄𑀢𑀫𑁄 𑀕𑁄𑀢𑁆𑀢𑁂𑀦, 𑀪𑀕𑀯𑀸 𑀲𑀽𑀭𑀺𑀬𑀲𑁆𑀲 𑀕𑁄𑀢𑁆𑀢𑀜𑀸𑀢𑀓𑁄 𑀕𑁄𑀢𑁆𑀢𑀩𑀦𑁆𑀥𑀼, 𑀢𑀲𑁆𑀫𑀸 𑀩𑀼𑀤𑁆𑀥𑁄 𑀆𑀤𑀺𑀘𑁆𑀘𑀩𑀦𑁆𑀥𑀽’’𑀢𑀺 (𑀫𑀳𑀸𑀦𑀺. 𑁧𑁫𑁦; 𑀘𑀽𑀴𑀦𑀺. 𑁯𑁯).

𑀲𑀤𑁆𑀤𑀯𑀺𑀤𑀽 𑀧𑀦 ‘‘𑀩𑀼𑀤𑁆𑀥𑀲𑁆𑀲𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸’’𑀢𑀺 𑀧𑀸𑀞𑀫𑀺𑀘𑁆𑀙𑀦𑁆𑀢𑀺. 𑀆𑀤𑀺𑀘𑁆𑀘𑀲𑁆𑀲 𑀩𑀦𑁆𑀥𑀼𑀦𑀸 𑀕𑁄𑀢𑁆𑀢𑁂𑀦 𑀲𑀫𑀸𑀦𑁄 𑀕𑁄𑀢𑁆𑀢𑀲𑀗𑁆𑀔𑀸𑀢𑁄 𑀩𑀦𑁆𑀥𑀼 𑀬𑀲𑁆𑀲, 𑀩𑀼𑀤𑁆𑀥𑁄 𑀘 𑀲𑁄 𑀆𑀤𑀺𑀘𑁆𑀘𑀩𑀦𑁆𑀥𑀼 𑀘𑀸𑀢𑀺 𑀓𑀢𑁆𑀯𑀸. 𑀬𑀲𑁆𑀫𑀸 𑀧𑀦 𑀔𑀦𑁆𑀥𑀓𑀣𑀸𑀤𑀺𑀓𑁄𑀲𑀮𑁆𑀮𑁂𑀦𑀸𑀧𑀺 𑀉𑀧𑀓𑁆𑀓𑀺𑀮𑁂𑀲𑀸𑀦𑀼𑀧𑀓𑁆𑀓𑀺𑀮𑁂𑀲𑀸𑀦𑀁 𑀚𑀸𑀦𑀦𑀳𑁂𑀢𑀼𑀪𑀽𑀢𑀁 𑀩𑀸𑀳𑀼𑀲𑀘𑁆𑀘𑀁 𑀳𑁄𑀢𑀺, 𑀬𑀣𑀸𑀳 𑁋

‘‘𑀓𑀺𑀢𑁆𑀢𑀸𑀯𑀢𑀸 ¶ 𑀦𑀼 𑀔𑁄 𑀪𑀦𑁆𑀢𑁂 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀻𑀢𑀺? 𑀬𑀢𑁄 𑀔𑁄 𑀪𑀺𑀓𑁆𑀔𑀼 𑀔𑀦𑁆𑀥𑀓𑀼𑀲𑀮𑁄 𑀳𑁄𑀢𑀺. 𑀥𑀸𑀢𑀼…𑀧𑁂… 𑀆𑀬𑀢𑀦…𑀧𑁂… 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑁄 𑀳𑁄𑀢𑀺, 𑀏𑀢𑁆𑀢𑀸𑀯𑀢𑀸 𑀔𑁄 𑀪𑀺𑀓𑁆𑀔𑀼 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀻’’𑀢𑀺.

𑀢𑀲𑁆𑀫𑀸 ‘‘𑀬𑀲𑁆𑀲 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀤𑀻𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀤𑀺-𑀲𑀤𑁆𑀤𑁂𑀦 𑀘𑁂𑀢𑁆𑀣 𑀬𑀸𑀯 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀯𑀸𑀘𑀼𑀕𑁆𑀕𑀢𑀓𑀭𑀡𑀁 𑀉𑀕𑁆𑀕𑀳𑁄. 𑀅𑀢𑁆𑀣𑀲𑁆𑀲 𑀧𑀭𑀺𑀧𑀼𑀘𑁆𑀙𑀦𑀁 𑀧𑀭𑀺𑀧𑀼𑀘𑁆𑀙𑀸. 𑀅𑀝𑁆𑀞𑀓𑀣𑀸𑀯𑀲𑁂𑀦 𑀅𑀢𑁆𑀣𑀲𑁆𑀲 𑀲𑁄𑀢𑀤𑁆𑀯𑀸𑀭𑀧𑀝𑀺𑀩𑀤𑁆𑀥𑀢𑀸𑀓𑀭𑀡𑀁 𑀲𑀯𑀦𑀁. 𑀩𑁆𑀬𑀜𑁆𑀚𑀦𑀢𑁆𑀣𑀸𑀦𑀁 𑀲𑀼𑀦𑀺𑀓𑁆𑀔𑁂𑀧𑀲𑀼𑀦𑀬𑀦𑁂𑀦 𑀥𑀫𑁆𑀫𑀲𑁆𑀲 𑀧𑀭𑀺𑀳𑀭𑀡𑀁 𑀥𑀸𑀭𑀡𑀁. 𑀏𑀯𑀁 𑀲𑀼𑀢𑀥𑀸𑀢𑀧𑀭𑀺𑀘𑀺𑀢𑀸𑀦𑀁 𑀯𑀺𑀢𑀓𑁆𑀓𑀦𑀁 𑀫𑀦𑀲𑀸𑀦𑀼𑀧𑁂𑀓𑁆𑀔𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀁.

𑀏𑀯𑀁 ¶ 𑀧𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀯𑀘𑀦𑀢𑁆𑀣𑀫𑁆𑀧𑀺 𑀤𑀲𑁆𑀲𑁂𑀢𑀺 ‘‘𑀤𑀼𑀯𑀺𑀥𑁄’’𑀢𑀺𑀆𑀤𑀺𑀦𑀸. 𑀧𑀼𑀣𑀽𑀦𑀦𑁆𑀢𑀺 𑀅𑀦𑁂𑀓𑀯𑀺𑀥𑀸𑀦𑀁 𑀓𑀺𑀮𑁂𑀲𑀸𑀤𑀻𑀦𑀁. 𑀧𑀼𑀣𑀼𑀚𑁆𑀚𑀦𑀦𑁆𑀢𑁄𑀕𑀥𑀢𑁆𑀢𑀸𑀢𑀺 𑀩𑀳𑀽𑀦𑀁 𑀚𑀦𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀲𑀫𑀯𑀭𑁄𑀥𑀪𑀸𑀯𑀢𑁄 𑀧𑀼𑀣𑀼𑀚𑁆𑀚𑀦𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀣𑀼𑀘𑀸𑀬𑀁 𑀚𑀦𑁄𑀢𑀺 𑀧𑀼𑀣𑀼 𑀏𑀯 𑀯𑀺𑀲𑀼𑀁𑀬𑁂𑀯 𑀅𑀬𑀁 𑀲𑀗𑁆𑀔𑁆𑀬𑀁 𑀕𑀢𑁄. 𑀇𑀢𑀻𑀢𑀺 𑀢𑀲𑁆𑀫𑀸 𑀧𑀼𑀣𑀼𑀚𑁆𑀚𑀦𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀕𑀸𑀣𑀸𑀩𑀦𑁆𑀥𑁂𑀦 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑀺𑀢𑀫𑀢𑁆𑀣𑀁 ‘‘𑀲𑁄 𑀳𑀻’’𑀢𑀺𑀆𑀤𑀺𑀦𑀸 𑀯𑀺𑀯𑀭𑀢𑀺. ‘‘𑀦𑀸𑀦𑀧𑁆𑀧𑀓𑀸𑀭𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀧𑀼𑀣𑀼-𑀲𑀤𑁆𑀤𑁄 𑀇𑀥 𑀩𑀳𑁆𑀯𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺.

𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀫𑀢𑁆𑀣𑀁, 𑀢𑀤𑀢𑁆𑀣𑀲𑁆𑀲 𑀘 𑀲𑀸𑀥𑀓𑀁 𑀅𑀫𑁆𑀩𑀲𑁂𑀘𑀦𑀕𑀭𑀼𑀲𑀺𑀦𑀸𑀦𑀦𑀬𑁂𑀦 𑀦𑀺𑀤𑁆𑀤𑁂𑀲𑀧𑀸𑀴𑀺𑀬𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸𑀳𑀸’’𑀢𑀺𑀆𑀤𑀺𑀫𑀸𑀳. 𑀅𑀯𑀺𑀳𑀢𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑁄, 𑀧𑀼𑀣𑀼 𑀩𑀳𑀼𑀓𑀸 𑀢𑀸 𑀏𑀢𑁂𑀲𑀦𑁆𑀢𑀺 𑀧𑀼𑀣𑀼𑀅𑀯𑀺𑀳𑀢𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀓𑀸, 𑀏𑀢𑁂𑀦 𑀅𑀯𑀺𑀳𑀢𑀢𑁆𑀢𑀸 𑀧𑀼𑀣𑀼 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑁄 𑀚𑀦𑁂𑀦𑁆𑀢𑀺, 𑀧𑀼𑀣𑀽𑀳𑀺 𑀯𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀻𑀳𑀺 𑀚𑀦𑀺𑀢𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀅𑀯𑀺𑀳𑀢𑀢𑁆𑀣𑀫𑁂𑀯 𑀯𑀸 𑀚𑀦𑀲𑀤𑁆𑀤𑁄 𑀯𑀤𑀢𑀺, 𑀢𑀲𑁆𑀫𑀸 𑀧𑀼𑀣𑀼 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑁄 𑀚𑀦𑁂𑀦𑁆𑀢𑀺 𑀦 𑀯𑀺𑀳𑀦𑀦𑁆𑀢𑀺, 𑀚𑀦𑀸 𑀯𑀸 𑀅𑀯𑀺𑀳𑀢𑀸 𑀧𑀼𑀣𑀼 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑁄 𑀏𑀢𑁂𑀲𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀻𑀢𑀺𑀧𑀺 𑀯𑀝𑁆𑀝𑀢𑀺, 𑀯𑀺𑀲𑁂𑀲𑀦𑀧𑀭𑀦𑀺𑀧𑀸𑀢𑀦𑀜𑁆𑀘𑁂𑀢𑁆𑀣 𑀤𑀝𑁆𑀞𑀩𑁆𑀩𑀁 𑀬𑀣𑀸 ‘‘𑀅𑀕𑁆𑀬𑀸𑀳𑀺𑀢𑁄’’𑀢𑀺. ‘‘𑀧𑀼𑀣𑀼 𑀲𑀢𑁆𑀣𑀸𑀭𑀸𑀦𑀁 𑀫𑀼𑀔𑀼𑀮𑁆𑀮𑁄𑀓𑀺𑀓𑀸’’𑀢𑀺 𑀏𑀢𑁂𑀦 𑀧𑀼𑀣𑀼 𑀩𑀳𑀯𑁄 𑀚𑀦𑀸 𑀲𑀢𑁆𑀣𑀸𑀭𑁄 𑀏𑀢𑁂𑀲𑀦𑁆𑀢𑀺 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑀺𑀢𑀁. 𑀧𑀼𑀣𑀼 𑀲𑀩𑁆𑀩𑀕𑀢𑀻𑀳𑀺 𑀅𑀯𑀼𑀝𑁆𑀞𑀺𑀢𑀸𑀢𑀺 𑀏𑀢𑁆𑀣 𑀧𑀦 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀚𑀦𑁂𑀢𑀩𑁆𑀩𑀸, 𑀚𑀸𑀬𑀦𑁆𑀢𑀺 𑀯𑀸 𑀲𑀢𑁆𑀢𑀸 𑀏𑀢𑁆𑀣𑀸𑀢𑀺 𑀚𑀦𑀸, 𑀕𑀢𑀺𑀬𑁄, 𑀧𑀼𑀣𑀼 𑀲𑀩𑁆𑀩𑀸 𑀏𑀯 𑀚𑀦𑀸 𑀕𑀢𑀺𑀬𑁄 𑀏𑀢𑁂𑀲𑀦𑁆𑀢𑀺 𑀯𑀘𑀦𑀢𑁆𑀣𑁄. ‘‘𑀧𑀼𑀣𑀼 𑀦𑀸𑀦𑀸𑀪𑀺𑀲𑀗𑁆𑀔𑀸𑀭𑁂 ¶ 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻’’𑀢𑀺 𑀏𑀢𑁂𑀦 𑀘 𑀚𑀸𑀬𑀦𑁆𑀢𑀺 𑀏𑀢𑁂𑀳𑀺 𑀲𑀢𑁆𑀢𑀸𑀢𑀺 𑀚𑀦𑀸, 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀬𑁄, 𑀧𑀼𑀣𑀼 𑀦𑀸𑀦𑀸𑀯𑀺𑀥𑀸 𑀚𑀦𑀸 𑀲𑀗𑁆𑀔𑀸𑀭𑀸 𑀏𑀢𑁂𑀲𑀁 𑀯𑀺𑀚𑁆𑀚𑀦𑁆𑀢𑀺, 𑀧𑀼𑀣𑀼 𑀯𑀸 𑀦𑀸𑀦𑀸𑀪𑀺𑀲𑀗𑁆𑀔𑀸𑀭𑁂 𑀚𑀦𑁂𑀦𑁆𑀢𑀺 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑀫𑀸𑀳. 𑀢𑀢𑁄 𑀧𑀭𑀁 𑀧𑀦 ‘‘𑀧𑀼𑀣𑀼 𑀦𑀸𑀦𑀸𑀑𑀖𑁂𑀳𑀺 𑀯𑀼𑀬𑁆𑀳𑀦𑁆𑀢𑀻’’𑀢𑀺𑀆𑀤𑀺𑀅𑀢𑁆𑀣𑀢𑁆𑀢𑀬𑀁 𑀚𑀦𑁂𑀦𑁆𑀢𑀺 𑀏𑀢𑁂𑀳𑀺 𑀲𑀢𑁆𑀢𑀸𑀢𑀺 𑀚𑀦𑀸, 𑀓𑀸𑀫𑁄𑀖𑀸𑀤𑀬𑁄, 𑀭𑀸𑀕𑀲𑀦𑁆𑀢𑀸𑀧𑀸𑀤𑀬𑁄, 𑀭𑀸𑀕𑀧𑀭𑀺𑀴𑀸𑀳𑀸𑀤𑀬𑁄 𑀘, 𑀲𑀩𑁆𑀩𑁂𑀧𑀺 𑀯𑀸 𑀓𑀺𑀮𑁂𑀲𑀧𑀭𑀺𑀴𑀸𑀳𑀸. 𑀧𑀼𑀣𑀼 𑀦𑀸𑀦𑀧𑁆𑀧𑀓𑀸𑀭𑀸 𑀢𑁂 𑀏𑀢𑁂𑀲𑀁 𑀯𑀺𑀚𑁆𑀚𑀦𑁆𑀢𑀺, 𑀢𑁂𑀳𑀺 𑀯𑀸 𑀚𑀦𑁂𑀦𑁆𑀢𑀺 𑀯𑀼𑀬𑁆𑀳𑀦𑁆𑀢𑀺, 𑀲𑀦𑁆𑀢𑀸𑀧𑁂𑀦𑁆𑀢𑀺, 𑀧𑀭𑀺𑀟𑀳𑀦𑁆𑀢𑀺 𑀘𑀸𑀢𑀺 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. ‘‘𑀭𑀢𑁆𑀢𑀸 𑀕𑀺𑀤𑁆𑀥𑀸’’𑀢𑀺𑀆𑀤𑀺 𑀧𑀭𑀺𑀬𑀸𑀬𑀯𑀘𑀦𑀁.

𑀅𑀧𑀺 𑀘 𑀭𑀢𑁆𑀢𑀸𑀢𑀺 𑀯𑀢𑁆𑀣𑀁 𑀯𑀺𑀬 𑀭𑀗𑁆𑀕𑀚𑀸𑀢𑁂𑀦 𑀘𑀺𑀢𑁆𑀢𑀲𑁆𑀲 𑀯𑀺𑀧𑀭𑀺𑀡𑀸𑀫𑀓𑀭𑁂𑀦 𑀙𑀦𑁆𑀤𑀭𑀸𑀕𑁂𑀦 𑀭𑀢𑁆𑀢𑀸. 𑀕𑀺𑀤𑁆𑀥𑀸𑀢𑀺 𑀅𑀪𑀺𑀓𑀗𑁆𑀔𑀦𑀲𑀪𑀸𑀯𑁂𑀦 𑀅𑀪𑀺𑀕𑀺𑀚𑁆𑀛𑀦𑁂𑀦 𑀕𑀺𑀤𑁆𑀥𑀸. 𑀕𑀣𑀺𑀢𑀸𑀢𑀺 𑀕𑀦𑁆𑀣𑀺𑀢𑀸 𑀯𑀺𑀬 𑀤𑀼𑀫𑁆𑀫𑁄𑀘𑀦𑀻𑀬𑀪𑀸𑀯𑁂𑀦 𑀢𑀢𑁆𑀣 𑀧𑀝𑀺𑀩𑀤𑁆𑀥𑀸. 𑀫𑀼𑀘𑁆𑀙𑀺𑀢𑀸𑀢𑀺 𑀓𑀺𑀮𑁂𑀲𑀸𑀯𑀺𑀲𑀦𑀯𑀲𑁂𑀦 𑀯𑀺𑀲𑀜𑁆𑀜𑀻𑀪𑀽𑀢𑀸 𑀯𑀺𑀬 𑀅𑀦𑀜𑁆𑀜𑀓𑀺𑀘𑁆𑀘𑀫𑁄𑀳𑀁 𑀲𑀫𑀸𑀧𑀦𑁆𑀦𑀸. 𑀅𑀚𑁆𑀛𑁄𑀲𑀦𑁆𑀦𑀸𑀢𑀺 𑀅𑀦𑀜𑁆𑀜𑀸𑀲𑀸𑀥𑀸𑀭𑀡𑁂 𑀯𑀺𑀬 𑀓𑀢𑁆𑀯𑀸 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀞𑀺𑀢𑀸. 𑀮𑀕𑁆𑀕𑀸𑀢𑀺 𑀕𑀸𑀯𑁄 𑀓𑀡𑁆𑀝𑀓𑁂 𑀯𑀺𑀬 𑀆𑀲𑀢𑁆𑀢𑀸, 𑀫𑀳𑀸𑀧𑀮𑀺𑀧𑁂 𑀯𑀸 𑀧𑀢𑀦𑁂𑀦 𑀦𑀸𑀲𑀺𑀓𑀕𑁆𑀕𑀧𑀮𑀺𑀧𑀦𑁆𑀦𑀧𑀼𑀭𑀺𑀲𑁄 𑀯𑀺𑀬 𑀉𑀤𑁆𑀥𑀭𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑁂𑀦 𑀦𑀺𑀫𑀼𑀕𑁆𑀕𑀸. 𑀮𑀕𑁆𑀕𑀺𑀢𑀸𑀢𑀺 𑀫𑀓𑁆𑀓𑀝𑀸𑀮𑁂𑀧𑁂𑀦 𑀯𑀺𑀬 𑀫𑀓𑁆𑀓𑀝𑁄 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀆𑀲𑀗𑁆𑀕𑀺𑀢𑀸, 𑀧𑀮𑀺𑀩𑀼𑀤𑁆𑀥𑀸𑀢𑀺 𑀲𑀫𑁆𑀩𑀤𑁆𑀥𑀸, 𑀉𑀧𑀤𑁆𑀤𑀼𑀢𑀸 𑀯𑀸𑀢𑀺 𑀅𑀬𑀫𑀢𑁆𑀣𑁄 ¶ 𑀅𑀗𑁆𑀕𑀼𑀢𑁆𑀢𑀭𑀝𑀻𑀓𑀸𑀬𑀁 (𑀅. 𑀦𑀺. 𑀅𑀝𑁆𑀞. 𑁧.𑁫𑁧) 𑀯𑀼𑀢𑁆𑀢𑁄. 𑀏𑀢𑁂𑀦 𑀚𑀸𑀬𑀢𑀻𑀢𑀺 𑀚𑀦𑁄, ‘‘𑀭𑀸𑀕𑁄 𑀕𑁂𑀥𑁄’’𑀢𑀺 𑀏𑀯𑀫𑀸𑀤𑀺𑀓𑁄, 𑀧𑀼𑀣𑀼 𑀦𑀸𑀦𑀸𑀯𑀺𑀥𑁄 𑀚𑀦𑁄 𑀭𑀸𑀕𑀸𑀤𑀺𑀓𑁄 𑀏𑀢𑁂𑀲𑀁, 𑀧𑀼𑀣𑀽𑀲𑀼 𑀯𑀸 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀚𑀦𑀸 𑀭𑀢𑁆𑀢𑀸 𑀕𑀺𑀤𑁆𑀥𑀸…𑀧𑁂… 𑀧𑀮𑀺𑀩𑀼𑀤𑁆𑀥𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺.

‘‘𑀆𑀯𑀼𑀢𑀸’’𑀢𑀺𑀆𑀤𑀺𑀧𑀺 𑀧𑀭𑀺𑀬𑀸𑀬𑀯𑀘𑀦𑀫𑁂𑀯. 𑀅𑀧𑀺𑀘 ‘‘𑀆𑀯𑀼𑀢𑀸𑀢𑀺 𑀆𑀯𑀭𑀺𑀢𑀸. 𑀦𑀺𑀯𑀼𑀢𑀸𑀢𑀺 𑀦𑀺𑀯𑀸𑀭𑀺𑀢𑀸. 𑀑𑀨𑀼𑀢𑀸𑀢𑀺 𑀧𑀮𑀺𑀕𑀼𑀡𑁆𑀞𑀺𑀢𑀸, 𑀧𑀭𑀺𑀬𑁄𑀦𑀤𑁆𑀥𑀸 𑀯𑀸. 𑀧𑀺𑀳𑀺𑀢𑀸𑀢𑀺 𑀧𑀺𑀤𑀳𑀺𑀢𑀸. 𑀧𑀝𑀺𑀘𑁆𑀙𑀦𑁆𑀦𑀸𑀢𑀺 𑀙𑀸𑀤𑀺𑀢𑀸. 𑀧𑀝𑀺𑀓𑀼𑀚𑁆𑀚𑀺𑀢𑀸𑀢𑀺 𑀳𑁂𑀝𑁆𑀞𑀸𑀫𑀼𑀔𑀚𑀸𑀢𑀸’’𑀢𑀺 𑀢𑀢𑁆𑀣𑁂𑀯 (𑀅. 𑀦𑀺. 𑀅𑀝𑁆𑀞. 𑁧.𑁫𑁧) 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀚𑀦𑁂𑀦𑁆𑀢𑀺 𑀏𑀢𑁂𑀳𑀻𑀢𑀺 𑀚𑀦𑀸, 𑀦𑀻𑀯𑀭𑀡𑀸, 𑀧𑀼𑀣𑀼 𑀦𑀸𑀦𑀸𑀯𑀺𑀥𑀸 𑀚𑀦𑀸 𑀦𑀻𑀯𑀭𑀡𑀸 𑀏𑀢𑁂𑀲𑀁, 𑀧𑀼𑀣𑀽𑀳𑀺 𑀯𑀸 𑀦𑀻𑀯𑀭𑀡𑁂𑀳𑀺 𑀚𑀦𑀸 𑀆𑀯𑀼𑀢𑀸…𑀧𑁂… 𑀧𑀝𑀺𑀓𑀼𑀚𑁆𑀚𑀺𑀢𑀸𑀢𑀺 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀢𑀺. 𑀧𑀼𑀣𑀽𑀲𑀼 𑀦𑀻𑀘𑀥𑀫𑁆𑀫𑀲𑀫𑀸𑀘𑀸𑀭𑁂𑀲𑀼 𑀚𑀸𑀬𑀢𑀺, 𑀧𑀼𑀣𑀽𑀦𑀁 𑀯𑀸 𑀅𑀩𑁆𑀪𑀦𑁆𑀢𑀭𑁂 𑀚𑀦𑁄 𑀅𑀦𑁆𑀢𑁄𑀕𑀥𑁄, 𑀧𑀼𑀣𑀼 𑀯𑀸 𑀩𑀳𑀼𑀓𑁄 𑀚𑀦𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀧𑀼𑀣𑀽𑀦’’𑀦𑁆𑀢𑀺𑀆𑀤𑀺𑀦𑀸, 𑀏𑀢𑁂𑀦 𑀘 𑀢𑀢𑀺𑀬𑀧𑀸𑀤𑀁 𑀯𑀺𑀯𑀭𑀢𑀺, 𑀲𑀫𑀢𑁆𑀣𑁂𑀢𑀺 𑀯𑀸. ‘‘𑀧𑀼𑀣𑀼𑀯𑀸’’𑀢𑀺𑀆𑀤𑀺𑀦𑀸 𑀧𑀦 𑀘𑀢𑀼𑀢𑁆𑀣𑀧𑀸𑀤𑀁. 𑀧𑀼𑀣𑀼 𑀯𑀺𑀲𑀁𑀲𑀝𑁆𑀞𑁄 𑀏𑀯 𑀚𑀦𑁄 𑀧𑀼𑀣𑀼𑀚𑁆𑀚𑀦𑁄𑀢𑀺 𑀅𑀬𑀜𑁆𑀳𑁂𑀢𑁆𑀣 𑀯𑀘𑀦𑀢𑁆𑀣𑁄.

𑀬𑁂𑀳𑀺 ¶ 𑀕𑀼𑀡𑀯𑀺𑀲𑁂𑀲𑁂𑀳𑀺 𑀦𑀺𑀫𑀺𑀢𑁆𑀢𑀪𑀽𑀢𑁂𑀳𑀺 𑀪𑀕𑀯𑀢𑀺 ‘‘𑀢𑀣𑀸𑀕𑀢𑁄’’𑀢𑀺 𑀅𑀬𑀁 𑀲𑀫𑀜𑁆𑀜𑀸 𑀧𑀯𑀢𑁆𑀢𑀸, 𑀢𑀁 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀢𑀣𑀸𑀕𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀓𑁄𑀧𑀺 𑀳𑀺 𑀲𑀤𑁆𑀤𑁄 𑀅𑀦𑁂𑀓𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀫𑀥𑀺𑀓𑀺𑀘𑁆𑀘 𑀅𑀦𑁂𑀓𑀥𑀸 𑀅𑀢𑁆𑀣𑀧𑁆𑀧𑀓𑀸𑀲𑀓𑁄, 𑀪𑀕𑀯𑀢𑁄 𑀘 𑀲𑀩𑁆𑀩𑁂𑀧𑀺 𑀦𑀸𑀫𑀲𑀤𑁆𑀤𑀸 𑀅𑀦𑁂𑀓𑀕𑀼𑀡𑀦𑁂𑀫𑀺𑀢𑁆𑀢𑀺𑀓𑀸𑀬𑁂𑀯. 𑀬𑀣𑀸𑀳 𑁋

‘‘𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀦𑀸𑀫𑀸𑀦𑀺, 𑀲𑀕𑀼𑀡𑁂𑀦 𑀫𑀳𑁂𑀲𑀺𑀦𑁄;

𑀕𑀼𑀡𑁂𑀦 𑀦𑀸𑀫𑀫𑀼𑀤𑁆𑀥𑁂𑀬𑁆𑀬𑀁, 𑀅𑀧𑀺 𑀦𑀸𑀫𑀲𑀳𑀲𑁆𑀲𑀢𑁄’’𑀢𑀺. (𑀥. 𑀲. 𑁧𑁩𑁧𑁩; 𑀉𑀤𑀸. 𑀅𑀝𑁆𑀞. 𑁫𑁭; 𑀧𑀝𑀺. 𑀫. 𑀅𑀝𑁆𑀞. 𑁧.𑁭𑁬; 𑀤𑀻. 𑀦𑀺. 𑀝𑀻. 𑁧.𑁪𑁧𑁩);

𑀓𑀸𑀦𑀺 𑀧𑀦 𑀢𑀸𑀦𑀻𑀢𑀺 𑀅𑀦𑀼𑀬𑁄𑀕𑁂 𑀲𑀢𑀺 𑀧𑀞𑀫𑀁 𑀢𑀲𑁆𑀲𑀭𑀽𑀧𑀁 𑀲𑀗𑁆𑀔𑁂𑀧𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀓𑀣’’𑀦𑁆𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑀺𑀲𑀢𑀺. 𑀢𑀣𑀸 𑀆𑀕𑀢𑁄𑀢𑀺 𑀏𑀢𑁆𑀣 𑀆𑀓𑀸𑀭𑀦𑀺𑀬𑀫𑀦𑀯𑀲𑁂𑀦 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀢𑁆𑀣𑁄 𑀢𑀣𑀸-𑀲𑀤𑁆𑀤𑁄. 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 𑀯𑀺𑀲𑁂𑀲𑀸𑀯𑀝𑁆𑀞𑀸𑀦𑀢𑁄, 𑀯𑀺𑀲𑁂𑀲𑀢𑁆𑀣𑀺𑀦𑀸 𑀘 𑀲𑀸𑀫𑀜𑁆𑀜𑀲𑀤𑁆𑀤𑀲𑁆𑀲𑀸𑀧𑀺 𑀯𑀺𑀲𑁂𑀲𑀢𑁆𑀣𑁂𑀬𑁂𑀯 𑀅𑀦𑀼𑀧𑀬𑀼𑀚𑁆𑀚𑀺𑀢𑀩𑁆𑀩𑀢𑁄 𑀧𑀝𑀺𑀧𑀤𑀸𑀕𑀫𑀦𑀢𑁆𑀣𑁄 𑀆𑀕𑀢 𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄, 𑀦 𑀜𑀸𑀡𑀕𑀫𑀦𑀢𑁆𑀣𑁄 𑀢𑀣𑀮𑀓𑁆𑀔𑀡𑀁 𑀆𑀕𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁧.𑁭; 𑀫. 𑀦𑀺. 𑀅𑀝𑁆𑀞. 𑁧.𑁧𑁨; 𑀲𑀁. 𑀦𑀺. 𑀅𑀝𑁆𑀞. 𑁨.𑁩.𑁭𑁮; 𑀅. 𑀦𑀺. 𑀅𑀝𑁆𑀞. 𑁧.𑁧𑁭𑁦; 𑀣𑁂𑀭𑀕𑀸. 𑀅𑀝𑁆𑀞. 𑁧.𑁪𑁩; 𑀇𑀢𑀺𑀯𑀼. 𑀅𑀝𑁆𑀞. 𑁩𑁮; 𑀧𑀝𑀺. 𑀫. 𑀅𑀝𑁆𑀞. 𑁧.𑁩𑁭; 𑀩𑀼. 𑀯𑀁. 𑀅𑀝𑁆𑀞. 𑁨; 𑀫𑀳𑀸𑀦𑀺. 𑀅𑀝𑁆𑀞. 𑁧𑁪) 𑀯𑀺𑀬 ¶ , 𑀦𑀸𑀧𑀺 𑀓𑀸𑀬𑀕𑀫𑀦𑀸𑀤𑀺 𑀅𑀢𑁆𑀣𑁄 ‘‘𑀆𑀕𑀢𑁄 𑀔𑁄 𑀫𑀳𑀸𑀲𑀫𑀡𑁄, 𑀫𑀸𑀕𑀥𑀸𑀦𑀁 𑀕𑀺𑀭𑀺𑀩𑁆𑀩𑀚’’𑀦𑁆𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁫𑁩) 𑀯𑀺𑀬. 𑀢𑀢𑁆𑀣 𑀬𑀲𑁆𑀲 𑀆𑀓𑀸𑀭𑀲𑁆𑀲 𑀦𑀺𑀬𑀫𑀦𑀯𑀲𑁂𑀦 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀢𑁆𑀣𑁄 𑀢𑀣𑀸-𑀲𑀤𑁆𑀤𑁄, 𑀢𑀤𑀸𑀓𑀸𑀭𑀁 𑀓𑀭𑀼𑀡𑀸𑀧𑀥𑀸𑀦𑀢𑁆𑀢𑀸 𑀢𑀲𑁆𑀲 𑀫𑀳𑀸𑀓𑀭𑀼𑀡𑀸𑀫𑀼𑀔𑁂𑀦 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀁 𑀆𑀕𑀫𑀦𑀧𑀝𑀺𑀧𑀤𑀸𑀬 𑀉𑀤𑀸𑀳𑀭𑀡𑀯𑀲𑁂𑀦 𑀲𑀸𑀫𑀜𑁆𑀜𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀲𑀩𑁆𑀩𑀮𑁄𑀓𑁂’’𑀢𑀺𑀆𑀤𑀺𑀫𑀸𑀳. 𑀬𑀁𑀢𑀁-𑀲𑀤𑁆𑀤𑀸𑀦𑀁 𑀏𑀓𑀦𑁆𑀢𑀲𑀫𑁆𑀩𑀦𑁆𑀥𑀪𑀸𑀯𑀢𑁄 𑀘𑁂𑀢𑁆𑀣 𑀢𑀣𑀸-𑀲𑀤𑁆𑀤𑀲𑁆𑀲𑀢𑁆𑀣𑀤𑀲𑁆𑀲𑀦𑁂 𑀬𑀣𑀸-𑀲𑀤𑁆𑀤𑁂𑀦 𑀅𑀢𑁆𑀣𑁄 𑀯𑀺𑀪𑀸𑀯𑀺𑀢𑁄. 𑀢𑀤𑁂𑀯 𑀯𑀺𑀢𑁆𑀣𑀸𑀭𑁂𑀢𑀺 ‘‘𑀬𑀣𑀸 𑀯𑀺𑀧𑀲𑁆𑀲𑀻 𑀪𑀕𑀯𑀸’’𑀢𑀺𑀆𑀤𑀺𑀦𑀸, 𑀯𑀺𑀧𑀲𑁆𑀲𑀻𑀆𑀤𑀻𑀦𑀜𑁆𑀘𑁂𑀢𑁆𑀣 𑀙𑀦𑁆𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀫𑀳𑀸𑀧𑀤𑀸𑀦𑀲𑀼𑀢𑁆𑀢𑀸𑀤𑀻𑀲𑀼 (𑀤𑀻. 𑀦𑀺. 𑁨.𑁪) 𑀲𑀫𑁆𑀧𑀳𑀼𑀮𑀦𑀺𑀤𑁆𑀤𑁂𑀲𑁂𑀦 (𑀤𑀻. 𑀦𑀺. 𑀅𑀝𑁆𑀞. 𑁨.𑀲𑀫𑁆𑀩𑀳𑀼𑀮𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸) 𑀲𑀼𑀧𑀸𑀓𑀝𑀢𑁆𑀢𑀸, 𑀆𑀲𑀦𑁆𑀦𑀢𑁆𑀢𑀸 𑀘 𑀢𑁂𑀲𑀁 𑀯𑀲𑁂𑀦 𑀢𑀁 𑀧𑀝𑀺𑀧𑀤𑀁 𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀕𑀢𑁄 𑀬𑀣𑀸, 𑀢𑀣𑀸 𑀆𑀕𑀢𑁄𑀢𑀺 𑀲𑀩𑁆𑀩𑀢𑁆𑀭 𑀲𑀫𑁆𑀩𑀦𑁆𑀥𑁄. ‘‘𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸𑀧𑀺 𑀢𑀤𑁂𑀯 𑀧𑀝𑀺𑀦𑀺𑀤𑁆𑀤𑀺𑀲𑀢𑀺. 𑀢𑀢𑁆𑀣 𑀬𑁂𑀦 𑀅𑀪𑀺𑀦𑀻𑀳𑀸𑀭𑁂𑀦𑀸𑀢𑀺 𑀫𑀦𑀼𑀲𑁆𑀲𑀢𑁆𑀢𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀲𑀢𑁆𑀣𑀸𑀭𑀤𑀲𑁆𑀲𑀦𑀧𑀩𑁆𑀩𑀚𑁆𑀚𑀸𑀕𑀼𑀡𑀲𑀫𑁆𑀧𑀢𑁆𑀢𑀺𑀅𑀥𑀺𑀓𑀸𑀭𑀙𑀦𑁆𑀤𑀸𑀦𑀁 𑀯𑀲𑁂𑀦 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀫𑀳𑀸𑀧𑀡𑀺𑀥𑀸𑀦𑁂𑀦 ¶ . 𑀲𑀩𑁆𑀩𑁂𑀲𑀜𑁆𑀳𑀺 𑀩𑀼𑀤𑁆𑀥𑀸𑀦𑀁 𑀧𑀞𑀫𑀧𑀡𑀺𑀥𑀸𑀦𑀁 𑀇𑀫𑀺𑀦𑀸𑀯 𑀦𑀻𑀳𑀸𑀭𑁂𑀦 𑀲𑀫𑀺𑀚𑁆𑀛𑀢𑀺. 𑀅𑀪𑀺𑀦𑀻𑀳𑀸𑀭𑁄𑀢𑀺 𑀘𑁂𑀢𑁆𑀣 𑀫𑀽𑀮𑀧𑀡𑀺𑀥𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀯𑀁 𑀫𑀳𑀸𑀪𑀺𑀦𑀻𑀳𑀸𑀭𑀯𑀲𑁂𑀦 ‘‘𑀢𑀣𑀸𑀕𑀢𑁄’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀸𑀭𑀫𑀻𑀧𑀽𑀭𑀡𑀯𑀲𑁂𑀦𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. ‘‘𑀏𑀢𑁆𑀣 𑀘 𑀲𑀼𑀢𑁆𑀢𑀦𑁆𑀢𑀺𑀓𑀸𑀦𑀁 𑀫𑀳𑀸𑀩𑁄𑀥𑀺𑀬𑀸𑀦𑀧𑀝𑀺𑀧𑀤𑀸𑀬 𑀓𑁄𑀲𑀮𑁆𑀮𑀚𑀦𑀦𑀢𑁆𑀣𑀁 𑀧𑀸𑀭𑀫𑀻𑀲𑀼 𑀅𑀬𑀁 𑀯𑀺𑀢𑁆𑀣𑀸𑀭𑀓𑀣𑀸’’𑀢𑀺𑀆𑀤𑀺𑀦𑀸 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 (𑀤𑀻. 𑀦𑀺. 𑀝𑀻. 𑁧.𑁭) 𑀬𑀸 𑀧𑀸𑀭𑀫𑀻𑀲𑀼 𑀯𑀺𑀦𑀺𑀘𑁆𑀙𑀬𑀓𑀣𑀸 𑀯𑀼𑀢𑁆𑀢𑀸, 𑀓𑀺𑀜𑁆𑀘𑀸𑀧𑀺 𑀲𑀸 𑀅𑀫𑁆𑀳𑁂𑀳𑀺 𑀇𑀥 𑀯𑀼𑀘𑁆𑀘𑀫𑀸𑀦𑀸 𑀕𑀦𑁆𑀣𑀯𑀺𑀢𑁆𑀣𑀸𑀭𑀓𑀭𑀸 𑀯𑀺𑀬 𑀪𑀯𑀺𑀲𑁆𑀲𑀢𑀺, 𑀬𑀲𑁆𑀫𑀸 𑀧𑀦𑀸𑀬𑀁 𑀲𑀁𑀯𑀡𑁆𑀡𑀦𑀸 𑀏𑀢𑀺𑀲𑁆𑀲𑀁 𑀧𑀘𑁆𑀙𑀸 𑀧𑀫𑀸𑀤𑀮𑁂𑀔𑀯𑀺𑀲𑁄𑀥𑀦𑀯𑀲𑁂𑀦, 𑀢𑀤𑀯𑀲𑁂𑀲𑀢𑁆𑀣𑀧𑀭𑀺𑀬𑀸𑀤𑀸𑀦𑀯𑀲𑁂𑀦 𑀘 𑀧𑀯𑀢𑁆𑀢𑀸, 𑀢𑀲𑁆𑀫𑀸 𑀲𑀸𑀧𑀺 𑀧𑀸𑀭𑀫𑀻𑀓𑀣𑀸 𑀇𑀥 𑀯𑀢𑁆𑀢𑀩𑁆𑀩𑀸𑀬𑁂𑀯𑀸𑀢𑀺 𑀢𑀢𑁄 𑀘𑁂𑀯 𑀘𑀭𑀺𑀬𑀸𑀧𑀺𑀝𑀓𑀝𑁆𑀞𑀓𑀣𑀸𑀢𑁄 𑀘 𑀆𑀳𑀭𑀺𑀢𑁆𑀯𑀸 𑀬𑀣𑀸𑀭𑀳𑀁 𑀕𑀸𑀣𑀸𑀩𑀦𑁆𑀥𑁂𑀳𑀺 𑀲𑀫𑀮𑀗𑁆𑀓𑀭𑀺𑀢𑁆𑀯𑀸 𑀅𑀢𑁆𑀣𑀫𑀥𑀺𑀧𑁆𑀧𑀸𑀬𑀜𑁆𑀘 𑀯𑀺𑀲𑁄𑀥𑀬𑀫𑀸𑀦𑀸 𑀪𑀯𑀺𑀲𑁆𑀲𑀢𑀺. 𑀓𑀣𑀁?

𑀓𑀸 𑀧𑀦𑁂𑀢𑀸 𑀧𑀸𑀭𑀫𑀺𑀬𑁄, 𑀓𑁂𑀦𑀝𑁆𑀞𑁂𑀦 𑀓𑀢𑀻𑀯𑀺𑀥𑀸;

𑀓𑁄 𑀘 𑀢𑀸𑀲𑀁 𑀓𑀫𑁄 𑀓𑀸𑀦𑀺, 𑀮𑀓𑁆𑀔𑀡𑀸𑀤𑀻𑀦𑀺 𑀲𑀩𑁆𑀩𑀣𑀸.

𑀓𑁄 𑀧𑀘𑁆𑀘𑀬𑁄, 𑀲𑀁𑀓𑀺𑀮𑁂𑀲𑁄, 𑀯𑁄𑀤𑀸𑀦𑀁 𑀧𑀝𑀺𑀧𑀓𑁆𑀔𑀓𑁄;

𑀧𑀝𑀺𑀧𑀢𑁆𑀢𑀺𑀯𑀺𑀪𑀸𑀕𑁄 𑀘, 𑀲𑀗𑁆𑀕𑀳𑁄 𑀲𑀫𑁆𑀧𑀤𑀸 𑀢𑀣𑀸.

𑀓𑀺𑀢𑁆𑀢𑀓𑁂𑀦 ¶ 𑀲𑀫𑁆𑀧𑀸𑀤𑀦𑀁, 𑀆𑀦𑀺𑀲𑀁𑀲𑁄 𑀘 𑀓𑀺𑀁 𑀨𑀮𑀁;

𑀧𑀜𑁆𑀳𑀫𑁂𑀢𑀁 𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸, 𑀪𑀯𑀺𑀲𑁆𑀲𑀢𑀺 𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀭𑀺𑀤𑀁 𑀯𑀺𑀲𑁆𑀲𑀚𑁆𑀚𑀦𑀁 𑁋

𑀓𑀸 𑀧𑀦𑁂𑀢𑀸 𑀧𑀸𑀭𑀫𑀺𑀬𑁄𑀢𑀺 𑁋

𑀢𑀡𑁆𑀳𑀸𑀫𑀸𑀦𑀸𑀤𑀺𑀫𑀜𑁆𑀜𑀢𑁆𑀭, 𑀉𑀧𑀸𑀬𑀓𑀼𑀲𑀮𑁂𑀦 𑀬𑀸;

𑀜𑀸𑀡𑁂𑀦 𑀧𑀭𑀺𑀕𑁆𑀕𑀳𑀺𑀢𑀸, 𑀧𑀸𑀭𑀫𑀻 𑀲𑀸 𑀯𑀺𑀪𑀸𑀯𑀺𑀢𑀸.

𑀢𑀡𑁆𑀳𑀸𑀫𑀸𑀦𑀸𑀤𑀺𑀦𑀸 𑀳𑀺 𑀅𑀦𑀼𑀧𑀳𑀢𑀸 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀸 𑀤𑀸𑀦𑀸𑀤𑀬𑁄 𑀕𑀼𑀡𑀲𑀗𑁆𑀔𑀸𑀢𑀸 𑀏𑀢𑀸 𑀓𑀺𑀭𑀺𑀬𑀸 ‘‘𑀧𑀸𑀭𑀫𑀻’’𑀢𑀺 𑀯𑀺𑀪𑀸𑀯𑀺𑀢𑀸.

𑀓𑁂𑀦𑀝𑁆𑀞𑁂𑀦 𑀧𑀸𑀭𑀫𑀺𑀬𑁄𑀢𑀺 𑁋

𑀧𑀭𑀫𑁄 𑀉𑀢𑁆𑀢𑀫𑀝𑁆𑀞𑁂𑀦, 𑀢𑀲𑁆𑀲𑀸𑀬𑀁 𑀧𑀸𑀭𑀫𑀻 𑀢𑀣𑀸;

𑀓𑀫𑁆𑀫𑀁 𑀪𑀸𑀯𑁄𑀢𑀺 𑀤𑀸𑀦𑀸𑀤𑀺, 𑀢𑀤𑁆𑀥𑀺𑀢𑀢𑁄 𑀢𑀺𑀥𑀸 𑀫𑀢𑀸.

𑀧𑀽𑀭𑁂𑀢𑀺 ¶ 𑀫𑀯𑀢𑀺 𑀧𑀭𑁂, 𑀧𑀭𑀁 𑀫𑀚𑁆𑀚𑀢𑀺 𑀫𑀬𑀢𑀺;

𑀫𑀼𑀦𑀸𑀢𑀺 𑀫𑀺𑀦𑁄𑀢𑀺 𑀢𑀣𑀸, 𑀫𑀺𑀦𑀸𑀢𑀻𑀢𑀺 𑀯𑀸 𑀧𑀭𑀫𑁄.

𑀧𑀸𑀭𑁂 𑀫𑀚𑁆𑀚𑀢𑀺 𑀲𑁄𑀥𑁂𑀢𑀺, 𑀫𑀯𑀢𑀺 𑀫𑀬𑀢𑀻𑀢𑀺 𑀯𑀸;

𑀫𑀸𑀬𑁂𑀢𑀺 𑀢𑀁 𑀯𑀸 𑀫𑀼𑀦𑀸𑀢𑀺, 𑀫𑀺𑀦𑁄𑀢𑀺 𑀫𑀺𑀦𑀸𑀢𑀺 𑀢𑀣𑀸.

𑀧𑀸𑀭𑀫𑀻𑀢𑀺 𑀫𑀳𑀸𑀲𑀢𑁆𑀢𑁄, 𑀯𑀼𑀢𑁆𑀢𑀸𑀦𑀼𑀲𑀸𑀭𑀢𑁄 𑀧𑀦;

𑀢𑀤𑁆𑀥𑀺𑀢𑀢𑁆𑀣𑀢𑁆𑀢𑀬𑁂𑀦𑁂𑀯, 𑀧𑀸𑀭𑀫𑀻𑀢𑀺 𑀅𑀬𑀁 𑀫𑀢𑀸.

𑀤𑀸𑀦𑀲𑀻𑀮𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑁄𑀕𑁂𑀦 𑀳𑀺 𑀲𑀢𑁆𑀢𑀼𑀢𑁆𑀢𑀫𑀢𑀸𑀬 𑀫𑀳𑀸𑀩𑁄𑀥𑀺𑀲𑀢𑁆𑀢𑁄 𑀧𑀭𑀫𑁄, 𑀢𑀲𑁆𑀲 𑀅𑀬𑀁, 𑀪𑀸𑀯𑁄, 𑀓𑀫𑁆𑀫𑀦𑁆𑀢𑀺 𑀯𑀸 𑀧𑀸𑀭𑀫𑀻, 𑀤𑀸𑀦𑀸𑀤𑀺𑀓𑀺𑀭𑀺𑀬𑀸. 𑀅𑀣 𑀯𑀸 𑀧𑀭𑀢𑀺 𑀧𑀽𑀭𑁂𑀢𑀻𑀢𑀺 𑀧𑀭𑀫𑁄 𑀦𑀺𑀭𑀼𑀢𑁆𑀢𑀺𑀦𑀬𑁂𑀦, 𑀤𑀸𑀦𑀸𑀤𑀺𑀕𑀼𑀡𑀸𑀦𑀁 𑀧𑀽𑀭𑀓𑁄, 𑀧𑀸𑀮𑀓𑁄 𑀘 𑀩𑁄𑀥𑀺𑀲𑀢𑁆𑀢𑁄, 𑀧𑀭𑀫𑀲𑁆𑀲 𑀅𑀬𑀁, 𑀪𑀸𑀯𑁄, 𑀓𑀫𑁆𑀫𑀁 𑀯𑀸 𑀧𑀸𑀭𑀫𑀻. 𑀅𑀧𑀺𑀘 ¶ 𑀧𑀭𑁂 𑀲𑀢𑁆𑀢𑁂 𑀫𑀯𑀢𑀺 𑀅𑀢𑁆𑀢𑀦𑀺 𑀩𑀦𑁆𑀥𑀢𑀺 𑀕𑀼𑀡𑀯𑀺𑀲𑁂𑀲𑀬𑁄𑀕𑁂𑀦, 𑀧𑀭𑀁 𑀯𑀸 𑀅𑀢𑀺𑀭𑁂𑀓𑀁 𑀫𑀚𑁆𑀚𑀢𑀺 𑀲𑀁𑀓𑀺𑀮𑁂𑀲𑀫𑀮𑀢𑁄, 𑀧𑀭𑀁 𑀯𑀸 𑀲𑁂𑀝𑁆𑀞𑀁 𑀦𑀺𑀩𑁆𑀩𑀸𑀦𑀁 𑀯𑀺𑀲𑁂𑀲𑁂𑀦 𑀫𑀬𑀢𑀺 𑀕𑀘𑁆𑀙𑀢𑀺, 𑀧𑀭𑀁 𑀯𑀸 𑀮𑁄𑀓𑀁 𑀧𑀫𑀸𑀡𑀪𑀽𑀢𑁂𑀦 𑀜𑀸𑀡𑀯𑀺𑀲𑁂𑀲𑁂𑀦 𑀇𑀥𑀮𑁄𑀓𑀫𑀺𑀯 𑀫𑀼𑀦𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀢𑀺, 𑀧𑀭𑀁 𑀯𑀸 𑀅𑀢𑀺𑀯𑀺𑀬 𑀲𑀻𑀮𑀸𑀤𑀺𑀕𑀼𑀡𑀕𑀡𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀫𑀺𑀦𑁄𑀢𑀺 𑀧𑀓𑁆𑀔𑀺𑀧𑀢𑀺, 𑀧𑀭𑀁 𑀯𑀸 𑀅𑀢𑁆𑀢𑀪𑀽𑀢𑀢𑁄 𑀥𑀫𑁆𑀫𑀓𑀸𑀬𑀢𑁄 𑀅𑀜𑁆𑀜𑀁, 𑀧𑀝𑀺𑀧𑀓𑁆𑀔𑀁 𑀯𑀸 𑀢𑀤𑀦𑀢𑁆𑀣𑀓𑀭𑀁 𑀓𑀺𑀮𑁂𑀲𑀘𑁄𑀭𑀕𑀡𑀁 𑀫𑀺𑀦𑀸𑀢𑀺 𑀳𑀺𑀁𑀲𑀢𑀻𑀢𑀺 𑀧𑀭𑀫𑁄, 𑀫𑀳𑀸𑀲𑀢𑁆𑀢𑁄, ‘‘𑀧𑀭𑀫𑀲𑁆𑀲 𑀅𑀬’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦 𑀧𑀸𑀭𑀫𑀻. 𑀧𑀸𑀭𑁂 𑀯𑀸 𑀦𑀺𑀩𑁆𑀩𑀸𑀦𑁂 𑀫𑀚𑁆𑀚𑀢𑀺 𑀲𑀼𑀚𑁆𑀛𑀢𑀺, 𑀲𑀢𑁆𑀢𑁂 𑀘 𑀲𑁄𑀥𑁂𑀢𑀺, 𑀢𑀢𑁆𑀣 𑀯𑀸 𑀲𑀢𑁆𑀢𑁂 𑀫𑀯𑀢𑀺 𑀩𑀦𑁆𑀥𑀢𑀺 𑀬𑁄𑀚𑁂𑀢𑀺, 𑀢𑀁 𑀯𑀸 𑀫𑀬𑀢𑀺 𑀕𑀘𑁆𑀙𑀢𑀺, 𑀲𑀢𑁆𑀢𑁂 𑀘 𑀫𑀸𑀬𑁂𑀢𑀺 𑀕𑀫𑁂𑀢𑀺, 𑀢𑀁 𑀯𑀸 𑀬𑀸𑀣𑀸𑀯𑀢𑁄 𑀫𑀼𑀦𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀢𑀺, 𑀢𑀢𑁆𑀣 𑀯𑀸 𑀲𑀢𑁆𑀢𑁂 𑀫𑀺𑀦𑁄𑀢𑀺 𑀧𑀓𑁆𑀔𑀺𑀧𑀢𑀺, 𑀢𑀢𑁆𑀣 𑀯𑀸 𑀲𑀢𑁆𑀢𑀸𑀦𑀁 𑀓𑀺𑀮𑁂𑀲𑀸𑀭𑀺𑀁 𑀫𑀺𑀦𑀸𑀢𑀺 𑀳𑀺𑀁𑀲𑀢𑀻𑀢𑀺 𑀧𑀸𑀭𑀫𑀻, 𑀫𑀳𑀸𑀲𑀢𑁆𑀢𑁄, ‘‘𑀢𑀲𑁆𑀲 𑀅𑀬’’𑀦𑁆𑀢𑀺𑀆𑀤𑀺𑀦𑀸 𑀤𑀸𑀦𑀸𑀤𑀺𑀓𑀺𑀭𑀺𑀬𑀸𑀯 𑀧𑀸𑀭𑀫𑀻𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀧𑀸𑀭𑀫𑀻𑀦𑀁 𑀯𑀘𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀢𑀺𑀯𑀺𑀥𑀸𑀢𑀺 𑀲𑀗𑁆𑀔𑁂𑀧𑀢𑁄 𑀤𑀲𑀯𑀺𑀥𑀸, 𑀢𑀸 𑀧𑀦 𑀩𑀼𑀤𑁆𑀥𑀯𑀁𑀲𑀧𑀸𑀴𑀺𑀬𑀁 (𑀩𑀼. 𑀯𑀁. 𑁧.𑁭𑁬) 𑀲𑀭𑀽𑀧𑀢𑁄 𑀆𑀕𑀢𑀸𑀬𑁂𑀯. 𑀬𑀣𑀸𑀳 ‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸𑀤𑀓𑁆𑀔𑀺𑀁, 𑀧𑀞𑀫𑀁 𑀤𑀸𑀦𑀧𑀸𑀭𑀫𑀺’’𑀦𑁆𑀢𑀺𑀆𑀤𑀺 (𑀩𑀼. 𑀯𑀁. 𑁨.𑁧𑁧𑁬). 𑀬𑀣𑀸 𑀘𑀸𑀳 𑁋

‘‘𑀓𑀢𑀺 𑀦𑀼 𑀔𑁄 𑀪𑀦𑁆𑀢𑁂 𑀩𑀼𑀤𑁆𑀥𑀓𑀸𑀭𑀓𑀸 𑀥𑀫𑁆𑀫𑀸𑀢𑀺? 𑀤𑀲 𑀔𑁄 𑀲𑀸𑀭𑀺𑀧𑀼𑀢𑁆𑀢 𑀩𑀼𑀤𑁆𑀥𑀓𑀸𑀭𑀓𑀸 𑀥𑀫𑁆𑀫𑀸, 𑀓𑀢𑀫𑁂 𑀤𑀲? 𑀤𑀸𑀦𑀁 𑀔𑁄 𑀲𑀸𑀭𑀺𑀧𑀼𑀢𑁆𑀢 𑀩𑀼𑀤𑁆𑀥𑀓𑀸𑀭𑀓𑁄 𑀥𑀫𑁆𑀫𑁄, 𑀲𑀻𑀮𑀁 𑀦𑁂𑀓𑁆𑀔𑀫𑁆𑀫𑀁 𑀧𑀜𑁆𑀜𑀸 𑀯𑀻𑀭𑀺𑀬𑀁 𑀔𑀦𑁆𑀢𑀺 𑀲𑀘𑁆𑀘𑀁 𑀅𑀥𑀺𑀝𑁆𑀞𑀸𑀦𑀁 ¶ 𑀫𑁂𑀢𑁆𑀢𑀸 𑀉𑀧𑁂𑀓𑁆𑀔𑀸 𑀩𑀼𑀤𑁆𑀥𑀓𑀸𑀭𑀓𑁄 𑀥𑀫𑁆𑀫𑁄, 𑀇𑀫𑁂 𑀔𑁄 𑀲𑀸𑀭𑀺𑀧𑀼𑀢𑁆𑀢 𑀤𑀲 𑀩𑀼𑀤𑁆𑀥𑀓𑀸𑀭𑀓𑀸 𑀥𑀫𑁆𑀫𑀸𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸, 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘𑀤𑀸𑀦𑀁 𑀲𑀻𑀮𑀜𑁆𑀘 𑀦𑁂𑀓𑁆𑀔𑀫𑁆𑀫𑀁, 𑀧𑀜𑁆𑀜𑀸𑀯𑀻𑀭𑀺𑀬𑁂𑀦 𑀧𑀜𑁆𑀘𑀫𑀁;

𑀔𑀦𑁆𑀢𑀺𑀲𑀘𑁆𑀘𑀫𑀥𑀺𑀝𑁆𑀞𑀸𑀦𑀁, 𑀫𑁂𑀢𑁆𑀢𑀼𑀧𑁂𑀓𑁆𑀔𑀸𑀢𑀺 𑀢𑁂 𑀤𑀲𑀸’𑀢𑀺’’. (𑀩𑀼. 𑀯𑀁. 𑁧.𑁭𑁬);

𑀓𑁂𑀘𑀺 𑀧𑀦 ‘‘𑀙𑀩𑁆𑀩𑀺𑀥𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀏𑀢𑀸𑀲𑀁 𑀲𑀗𑁆𑀕𑀳𑀯𑀲𑁂𑀦 𑀯𑀼𑀢𑁆𑀢𑀁. 𑀲𑁄 𑀧𑀦 𑀲𑀗𑁆𑀕𑀳𑁄 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀓𑁄 𑀘 𑀢𑀸𑀲𑀁 𑀓𑀫𑁄𑀢𑀺 𑀏𑀢𑁆𑀣 𑀓𑀫𑁄 𑀦𑀸𑀫 𑀤𑁂𑀲𑀦𑀸𑀓𑁆𑀓𑀫𑁄, 𑀲𑁄 𑀘 𑀧𑀞𑀫𑀲𑀫𑀸𑀤𑀸𑀦𑀳𑁂𑀢𑀼𑀓𑁄, 𑀲𑀫𑀸𑀤𑀸𑀦𑀁 𑀧𑀯𑀺𑀘𑀬𑀳𑁂𑀢𑀼𑀓𑀁, 𑀇𑀢𑀺 𑀬𑀣𑀸 𑀆𑀤𑀺𑀫𑁆𑀳𑀺 𑀧𑀞𑀫𑀸𑀪𑀺𑀦𑀻𑀳𑀸𑀭𑀓𑀸𑀮𑁂 𑀧𑀯𑀺𑀘𑀺𑀢𑀸, 𑀲𑀫𑀸𑀤𑀺𑀦𑁆𑀦𑀸 𑀘, 𑀢𑀣𑀸 ¶ 𑀤𑁂𑀲𑀺𑀢𑀸. 𑀬𑀣𑀸𑀳 ‘‘𑀯𑀺𑀘𑀺𑀦𑀦𑁆𑀢𑁄 𑀢𑀤𑀸𑀤𑀓𑁆𑀔𑀺𑀁, 𑀧𑀞𑀫𑀁 𑀤𑀸𑀦𑀧𑀸𑀭𑀫𑀺’’𑀦𑁆𑀢𑀺𑀆𑀤𑀺 (𑀩𑀼. 𑀯𑀁. 𑁨.𑁧𑁧𑁬) 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀧𑀞𑀫𑀁 𑀲𑀫𑀸𑀤𑀸𑀦𑀢𑀸-𑀯𑀲𑁂𑀦𑀸𑀬𑀁 𑀓𑀫𑁄 𑀭𑀼𑀢𑁄;

𑀅𑀣 𑀯𑀸 𑀅𑀜𑁆𑀜𑀫𑀜𑁆𑀜𑀲𑁆𑀲, 𑀩𑀳𑀽𑀧𑀓𑀸𑀭𑀢𑁄𑀧𑀺 𑀘𑀸’’𑀢𑀺.

𑀢𑀢𑁆𑀣 𑀳𑀺 𑀤𑀸𑀦𑀁 𑀲𑀻𑀮𑀲𑁆𑀲 𑀩𑀳𑀽𑀧𑀓𑀸𑀭𑀁, 𑀲𑀼𑀓𑀭𑀜𑁆𑀘𑀸𑀢𑀺 𑀢𑀁 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀁. 𑀤𑀸𑀦𑀁 𑀧𑀦 𑀲𑀻𑀮𑀧𑀭𑀺𑀕𑁆𑀕𑀳𑀺𑀢𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀦𑁆𑀢𑀺 𑀤𑀸𑀦𑀸𑀦𑀦𑁆𑀢𑀭𑀁 𑀲𑀻𑀮𑀁 𑀯𑀼𑀢𑁆𑀢𑀁. 𑀲𑀻𑀮𑀁 𑀦𑁂𑀓𑁆𑀔𑀫𑁆𑀫𑀧𑀭𑀺𑀕𑁆𑀕𑀳𑀺𑀢𑀁…𑀧𑁂… 𑀦𑁂𑀓𑁆𑀔𑀫𑁆𑀫𑀁 𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑀺𑀢𑀁…𑀧𑁂… 𑀧𑀜𑁆𑀜𑀸 𑀯𑀻𑀭𑀺𑀬𑀧𑀭𑀺𑀕𑁆𑀕𑀳𑀺𑀢𑀸…𑀧𑁂… 𑀯𑀻𑀭𑀺𑀬𑀁 𑀔𑀦𑁆𑀢𑀺𑀧𑀭𑀺𑀕𑁆𑀕𑀳𑀺𑀢𑀁…𑀧𑁂… 𑀔𑀦𑁆𑀢𑀺 𑀲𑀘𑁆𑀘𑀧𑀭𑀺𑀕𑁆𑀕𑀳𑀺𑀢𑀸…𑀧𑁂… 𑀲𑀘𑁆𑀘𑀁 𑀅𑀥𑀺𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑀺𑀢𑀁…𑀧𑁂… 𑀅𑀥𑀺𑀝𑁆𑀞𑀸𑀦𑀁 𑀫𑁂𑀢𑁆𑀢𑀸𑀧𑀭𑀺𑀕𑁆𑀕𑀳𑀺𑀢𑀁…𑀧𑁂… 𑀫𑁂𑀢𑁆𑀢𑀸 𑀉𑀧𑁂𑀓𑁆𑀔𑀸𑀧𑀭𑀺𑀕𑁆𑀕𑀳𑀺𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸𑀢𑀺 𑀫𑁂𑀢𑁆𑀢𑀸𑀦𑀦𑁆𑀢𑀭𑀁 𑀉𑀧𑁂𑀓𑁆𑀔𑀸 𑀯𑀼𑀢𑁆𑀢𑀸. 𑀉𑀧𑁂𑀓𑁆𑀔𑀸 𑀧𑀦 𑀓𑀭𑀼𑀡𑀸𑀧𑀭𑀺𑀕𑁆𑀕𑀳𑀺𑀢𑀸, 𑀓𑀭𑀼𑀡𑀸 𑀘 𑀉𑀧𑁂𑀓𑁆𑀔𑀸𑀧𑀭𑀺𑀕𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁 𑀧𑀦 𑀫𑀳𑀸𑀓𑀸𑀭𑀼𑀡𑀺𑀓𑀸 𑀩𑁄𑀥𑀺𑀲𑀢𑁆𑀢𑀸 𑀲𑀢𑁆𑀢𑁂𑀲𑀼 𑀉𑀧𑁂𑀓𑁆𑀔𑀓𑀸 𑀳𑁄𑀦𑁆𑀢𑀻𑀢𑀺? 𑀉𑀧𑁂𑀓𑁆𑀔𑀺𑀢𑀩𑁆𑀩𑀬𑀼𑀢𑁆𑀢𑀓𑁂𑀲𑀼 𑀓𑀜𑁆𑀘𑀺 𑀓𑀸𑀮𑀁 𑀉𑀧𑁂𑀓𑁆𑀔𑀓𑀸 𑀳𑁄𑀦𑁆𑀢𑀺, 𑀦 𑀧𑀦 𑀲𑀩𑁆𑀩𑀢𑁆𑀣, 𑀲𑀩𑁆𑀩𑀤𑀸 𑀘𑀸𑀢𑀺 𑀓𑁂𑀘𑀺. 𑀅𑀧𑀭𑁂 𑀧𑀦 𑀦 𑀘 𑀲𑀢𑁆𑀢𑁂𑀲𑀼 𑀉𑀧𑁂𑀓𑁆𑀔𑀓𑀸, 𑀲𑀢𑁆𑀢𑀓𑀢𑁂𑀲𑀼 𑀧𑀦 𑀯𑀺𑀧𑁆𑀧𑀓𑀸𑀭𑁂𑀲𑀼 𑀉𑀧𑁂𑀓𑁆𑀔𑀓𑀸 𑀳𑁄𑀦𑁆𑀢𑀻𑀢𑀺, 𑀇𑀤𑀫𑁂𑀯𑁂𑀢𑁆𑀣 𑀬𑀼𑀢𑁆𑀢𑀁.

𑀅𑀧𑀭𑁄 𑀦𑀬𑁄 𑁋

𑀲𑀩𑁆𑀩𑀲𑀸𑀥𑀸𑀭𑀡𑀢𑀸𑀤𑀺-𑀓𑀸𑀭𑀡𑁂𑀳𑀺𑀧𑀺 𑀈𑀭𑀺𑀢𑀁;

𑀤𑀸𑀦𑀁 𑀆𑀤𑀺𑀫𑁆𑀳𑀺 𑀲𑁂𑀲𑀸 𑀢𑀼, 𑀧𑀼𑀭𑀺𑀫𑁂𑀧𑀺 𑀅𑀧𑁂𑀓𑁆𑀔𑀓𑀸.

𑀧𑀘𑀼𑀭𑀚𑀦𑁂𑀲𑀼𑀧𑀺 ¶ 𑀳𑀺 𑀧𑀯𑀢𑁆𑀢𑀺𑀬𑀸 𑀲𑀩𑁆𑀩𑀲𑀢𑁆𑀢𑀲𑀸𑀥𑀸𑀭𑀡𑀢𑁆𑀢𑀸, 𑀅𑀧𑁆𑀧𑀨𑀮𑀢𑁆𑀢𑀸, 𑀲𑀼𑀓𑀭𑀢𑁆𑀢𑀸 𑀘 𑀤𑀸𑀦𑀁 𑀆𑀤𑀺𑀫𑁆𑀳𑀺 𑀯𑀼𑀢𑁆𑀢𑀁. 𑀲𑀻𑀮𑁂𑀦 𑀤𑀸𑀬𑀓𑀧𑀝𑀺𑀕𑁆𑀕𑀸𑀳𑀓𑀲𑀼𑀤𑁆𑀥𑀺𑀢𑁄 𑀧𑀭𑀸𑀦𑀼𑀕𑁆𑀕𑀳𑀁 𑀯𑀢𑁆𑀯𑀸 𑀧𑀭𑀧𑀻𑀴𑀸𑀦𑀺𑀯𑀢𑁆𑀢𑀺𑀯𑀘𑀦𑀢𑁄, 𑀓𑀺𑀭𑀺𑀬𑀥𑀫𑁆𑀫𑀁 𑀯𑀢𑁆𑀯𑀸 𑀅𑀓𑀺𑀭𑀺𑀬𑀥𑀫𑁆𑀫𑀯𑀘𑀦𑀢𑁄, 𑀪𑁄𑀕𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀁 𑀯𑀢𑁆𑀯𑀸 𑀪𑀯𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀯𑀘𑀦𑀢𑁄 𑀘 𑀤𑀸𑀦𑀲𑁆𑀲𑀸𑀦𑀦𑁆𑀢𑀭𑀁 𑀲𑀻𑀮𑀁 𑀯𑀼𑀢𑁆𑀢𑀁. 𑀦𑁂𑀓𑁆𑀔𑀫𑁆𑀫𑁂𑀦 𑀲𑀻𑀮𑀲𑀫𑁆𑀧𑀢𑁆𑀢𑀺𑀲𑀺𑀤𑁆𑀥𑀺𑀢𑁄, 𑀓𑀸𑀬𑀯𑀘𑀻𑀲𑀼𑀘𑀭𑀺𑀢𑀁 𑀯𑀢𑁆𑀯𑀸 𑀫𑀦𑁄𑀲𑀼𑀘𑀭𑀺𑀢𑀯𑀘𑀦𑀢𑁄, 𑀯𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀲𑀼𑀔𑁂𑀦𑁂𑀯 𑀛𑀸𑀦𑀲𑀫𑀺𑀚𑁆𑀛𑀦𑀢𑁄, 𑀓𑀫𑁆𑀫𑀸𑀧𑀭𑀸𑀥𑀧𑁆𑀧𑀳𑀸𑀦𑁂𑀦 𑀧𑀬𑁄𑀕𑀲𑀼𑀤𑁆𑀥𑀺𑀁 𑀯𑀢𑁆𑀯𑀸 𑀓𑀺𑀮𑁂𑀲𑀸𑀧𑀭𑀸𑀥𑀧𑁆𑀧𑀳𑀸𑀦𑁂𑀦 𑀆𑀲𑀬𑀲𑀼𑀤𑁆𑀥𑀺𑀯𑀘𑀦𑀢𑁄, 𑀯𑀻𑀢𑀺𑀓𑁆𑀓𑀫𑀧𑁆𑀧𑀳𑀸𑀦𑁂 𑀞𑀺𑀢𑀲𑁆𑀲 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀯𑀘𑀦𑀢𑁄 𑀘 𑀲𑀻𑀮𑀲𑁆𑀲𑀸𑀦𑀦𑁆𑀢𑀭𑀁 𑀦𑁂𑀓𑁆𑀔𑀫𑁆𑀫𑀁 𑀯𑀼𑀢𑁆𑀢𑀁. 𑀧𑀜𑁆𑀜𑀸𑀬 𑀦𑁂𑀓𑁆𑀔𑀫𑁆𑀫𑀲𑁆𑀲 𑀲𑀺𑀤𑁆𑀥𑀺𑀧𑀭𑀺𑀲𑀼𑀤𑁆𑀥𑀺𑀢𑁄, 𑀛𑀸𑀦𑀸𑀪𑀸𑀯𑁂 𑀧𑀜𑁆𑀜𑀸𑀪𑀸𑀯𑀯𑀘𑀦𑀢𑁄. 𑀲𑀫𑀸𑀥𑀺𑀧𑀤𑀝𑁆𑀞𑀸𑀦𑀸 𑀳𑀺 𑀧𑀜𑁆𑀜𑀸, 𑀧𑀜𑁆𑀜𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄 ¶ 𑀘 𑀲𑀫𑀸𑀥𑀺. 𑀲𑀫𑀣𑀦𑀺𑀫𑀺𑀢𑁆𑀢𑀁 𑀯𑀢𑁆𑀯𑀸 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀯𑀘𑀦𑀢𑁄, 𑀧𑀭𑀳𑀺𑀢𑀚𑁆𑀛𑀸𑀦𑁂𑀦 𑀧𑀭𑀳𑀺𑀢𑀓𑀭𑀡𑀽𑀧𑀸𑀬𑀓𑁄𑀲𑀮𑁆𑀮𑀯𑀘𑀦𑀢𑁄 𑀘 𑀦𑁂𑀓𑁆𑀔𑀫𑁆𑀫𑀲𑁆𑀲𑀸𑀦𑀦𑁆𑀢𑀭𑀁 𑀧𑀜𑁆𑀜𑀸 𑀯𑀼𑀢𑁆𑀢𑀸. 𑀯𑀻𑀭𑀺𑀬𑀸𑀭𑀫𑁆𑀪𑁂𑀦 𑀧𑀜𑁆𑀜𑀸𑀓𑀺𑀘𑁆𑀘𑀲𑀺𑀤𑁆𑀥𑀺𑀢𑁄, 𑀲𑀢𑁆𑀢𑀲𑀼𑀜𑁆𑀜𑀢𑀸𑀥𑀫𑁆𑀫𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀁 𑀯𑀢𑁆𑀯𑀸 𑀲𑀢𑁆𑀢𑀳𑀺𑀢𑀸𑀬 𑀆𑀭𑀫𑁆𑀪𑀲𑁆𑀲 𑀅𑀘𑁆𑀙𑀭𑀺𑀬𑀢𑀸𑀯𑀘𑀦𑀢𑁄, 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁 𑀯𑀢𑁆𑀯𑀸 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀯𑀘𑀦𑀢𑁄, 𑀦𑀺𑀲𑀫𑁆𑀫𑀓𑀸𑀭𑀺𑀢𑀁 𑀯𑀢𑁆𑀯𑀸 𑀉𑀝𑁆𑀞𑀸𑀦𑀯𑀘𑀦𑀢𑁄 𑀘. 𑀦𑀺𑀲𑀫𑁆𑀫𑀓𑀸𑀭𑀺𑀦𑁄 𑀳𑀺 𑀉𑀝𑁆𑀞𑀸𑀦𑀁 𑀨𑀮𑀯𑀺𑀲𑁂𑀲𑀫𑀸𑀯𑀳𑀢𑀻𑀢𑀺 𑀧𑀜𑁆𑀜𑀸𑀬𑀸𑀦𑀦𑁆𑀢𑀭𑀁 𑀯𑀻𑀭𑀺𑀬𑀁 𑀯𑀼𑀢𑁆𑀢𑀁.

𑀯𑀻𑀭𑀺𑀬𑁂𑀦 𑀢𑀺𑀢𑀺𑀓𑁆𑀔𑀸𑀲𑀺𑀤𑁆𑀥𑀺𑀢𑁄. 𑀯𑀻𑀭𑀺𑀬𑀯𑀸 𑀳𑀺 𑀆𑀭𑀤𑁆𑀥𑀯𑀻𑀭𑀺𑀬𑀢𑁆𑀢𑀸 𑀲𑀢𑁆𑀢𑀲𑀗𑁆𑀔𑀸𑀭𑁂𑀳𑀺 𑀉𑀧𑀦𑀻𑀢𑀁 𑀤𑀼𑀓𑁆𑀔𑀁 𑀅𑀪𑀺𑀪𑀼𑀬𑁆𑀬 𑀯𑀺𑀳𑀭𑀢𑀺. 𑀯𑀻𑀭𑀺𑀬𑀲𑁆𑀲 𑀢𑀺𑀢𑀺𑀓𑁆𑀔𑀸𑀮𑀗𑁆𑀓𑀸𑀭𑀪𑀸𑀯𑀢𑁄. 𑀯𑀻𑀭𑀺𑀬𑀯𑀢𑁄 𑀳𑀺 𑀢𑀺𑀢𑀺𑀓𑁆𑀔𑀸 𑀲𑁄𑀪𑀢𑀺. 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀯𑀢𑁆𑀯𑀸 𑀲𑀫𑀣𑀦𑀺𑀫𑀺𑀢𑁆𑀢𑀯𑀘𑀦𑀢𑁄, 𑀅𑀘𑁆𑀘𑀸𑀭𑀫𑁆𑀪𑁂𑀦 𑀉𑀤𑁆𑀥𑀘𑁆𑀘𑀤𑁄𑀲𑀧𑁆𑀧𑀳𑀸𑀦𑀯𑀘𑀦𑀢𑁄. 𑀥𑀫𑁆𑀫𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀳𑀺 𑀉𑀤𑁆𑀥𑀘𑁆𑀘𑀤𑁄𑀲𑁄 𑀧𑀳𑀻𑀬𑀢𑀺. 𑀯𑀻𑀭𑀺𑀬𑀯𑀢𑁄 𑀲𑀸𑀢𑀘𑁆𑀘𑀓𑀭𑀡𑀯𑀘𑀦𑀢𑁄. 𑀔𑀦𑁆𑀢𑀺𑀩𑀳𑀼𑀮𑁄 𑀳𑀺 𑀅𑀦𑀼𑀤𑁆𑀥𑀢𑁄 𑀲𑀸𑀢𑀘𑁆𑀘𑀓𑀸𑀭𑀻 𑀳𑁄𑀢𑀺. 𑀅𑀧𑁆𑀧𑀫𑀸𑀤𑀯𑀢𑁄 𑀧𑀭𑀳𑀺𑀢𑀓𑀺𑀭𑀺𑀬𑀸𑀭𑀫𑁆𑀪𑁂 𑀧𑀘𑁆𑀘𑀼𑀧𑀓𑀸𑀭𑀢𑀡𑁆𑀳𑀸𑀪𑀸𑀯𑀯𑀘𑀦𑀢𑁄. 𑀬𑀸𑀣𑀸𑀯𑀢𑁄 𑀥𑀫𑁆𑀫𑀦𑀺𑀚𑁆𑀛𑀸𑀦𑁂 𑀳𑀺 𑀲𑀢𑀺 𑀢𑀡𑁆𑀳𑀸 𑀦 𑀳𑁄𑀢𑀺. 𑀧𑀭𑀳𑀺𑀢𑀸𑀭𑀫𑁆𑀪𑁂 𑀧𑀭𑀫𑁂𑀧𑀺 𑀧𑀭𑀓𑀢𑀤𑀼𑀓𑁆𑀔𑀲𑀳𑀦𑀢𑀸𑀯𑀘𑀦𑀢𑁄 𑀘 𑀯𑀻𑀭𑀺𑀬𑀲𑁆𑀲𑀸𑀦𑀦𑁆𑀢𑀭𑀁 𑀔𑀦𑁆𑀢𑀺 𑀯𑀼𑀢𑁆𑀢𑀸. 𑀲𑀘𑁆𑀘𑁂𑀦 𑀔𑀦𑁆𑀢𑀺𑀬𑀸 𑀘𑀺𑀭𑀸𑀥𑀺𑀝𑁆𑀞𑀸𑀦𑀢𑁄, 𑀅𑀧𑀓𑀸𑀭𑀺𑀦𑁄 𑀅𑀧𑀓𑀸𑀭𑀔𑀦𑁆𑀢𑀺𑀁 𑀯𑀢𑁆𑀯𑀸 𑀢𑀤𑀼𑀧𑀓𑀸𑀭𑀓𑀭𑀡𑁂 𑀅𑀯𑀺𑀲𑀁𑀯𑀸𑀤𑀯𑀘𑀦𑀢𑁄, 𑀔𑀦𑁆𑀢𑀺𑀬𑀸 𑀅𑀧𑀯𑀸𑀤𑀯𑀸𑀘𑀸𑀯𑀺𑀓𑀫𑁆𑀧𑀦𑁂𑀦 𑀪𑀽𑀢𑀯𑀸𑀤𑀺𑀢𑀸𑀬 𑀅𑀯𑀺𑀚𑀳𑀦𑀯𑀘𑀦𑀢𑁄, 𑀲𑀢𑁆𑀢𑀲𑀼𑀜𑁆𑀜𑀢𑀸𑀥𑀫𑁆𑀫-𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀁 𑀯𑀢𑁆𑀯𑀸 𑀢𑀤𑀼𑀧𑀩𑁆𑀭𑀽𑀳𑀺𑀢𑀜𑀸𑀡𑀲𑀘𑁆𑀘𑀲𑁆𑀲 𑀯𑀘𑀦𑀢𑁄 𑀘 𑀔𑀦𑁆𑀢𑀺𑀬𑀸𑀦𑀦𑁆𑀢𑀭𑀁 𑀲𑀘𑁆𑀘𑀁 𑀯𑀼𑀢𑁆𑀢𑀁. 𑀅𑀥𑀺𑀝𑁆𑀞𑀸𑀦𑁂𑀦 𑀲𑀘𑁆𑀘𑀲𑀺𑀤𑁆𑀥𑀺𑀢𑁄. 𑀅𑀘𑀮𑀸𑀥𑀺𑀝𑁆𑀞𑀸𑀦𑀲𑁆𑀲 𑀳𑀺 𑀯𑀺𑀭𑀢𑀺 𑀲𑀺𑀚𑁆𑀛𑀢𑀺. 𑀅𑀯𑀺𑀲𑀁𑀯𑀸𑀤𑀺𑀢𑀁 𑀯𑀢𑁆𑀯𑀸 ¶ 𑀢𑀢𑁆𑀣 𑀅𑀘𑀮𑀪𑀸𑀯𑀯𑀘𑀦𑀢𑁄. 𑀲𑀘𑁆𑀘𑀲𑀦𑁆𑀥𑁄 𑀳𑀺 𑀤𑀸𑀦𑀸𑀤𑀻𑀲𑀼 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀦𑀺𑀘𑁆𑀘𑀮𑁄 𑀧𑀯𑀢𑁆𑀢𑀢𑀺. 𑀜𑀸𑀡𑀲𑀘𑁆𑀘𑀁 𑀯𑀢𑁆𑀯𑀸 𑀲𑀫𑁆𑀪𑀸𑀭𑁂𑀲𑀼 𑀧𑀯𑀢𑁆𑀢𑀺𑀦𑀺𑀝𑁆𑀞𑀸𑀧𑀦𑀯𑀘𑀦𑀢𑁄. 𑀬𑀣𑀸𑀪𑀽𑀢𑀜𑀸𑀡𑀯𑀸 𑀳𑀺 𑀩𑁄𑀥𑀺𑀲𑀫𑁆𑀪𑀸𑀭𑁂𑀲𑀼 𑀅𑀥𑀺𑀝𑁆𑀞𑀸𑀢𑀺, 𑀢𑁂 𑀘 𑀦𑀺𑀝𑁆𑀞𑀸𑀧𑁂𑀢𑀺. 𑀧𑀝𑀺𑀧𑀓𑁆𑀔𑁂𑀳𑀺 𑀅𑀓𑀫𑁆𑀧𑀺𑀬𑀪𑀸𑀯𑀢𑁄 𑀘 𑀲𑀘𑁆𑀘𑀲𑁆𑀲𑀸𑀦𑀦𑁆𑀢𑀭𑀁 𑀅𑀥𑀺𑀝𑁆𑀞𑀸𑀦𑀁 𑀯𑀼𑀢𑁆𑀢𑀁. 𑀫𑁂𑀢𑁆𑀢𑀸𑀬 𑀧𑀭𑀳𑀺𑀢𑀓𑀭𑀡𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑀲𑀺𑀤𑁆𑀥𑀺𑀢𑁄, 𑀅𑀥𑀺𑀝𑁆𑀞𑀸𑀦𑀁 𑀯𑀢𑁆𑀯𑀸 𑀳𑀺𑀢𑀽𑀧𑀲𑀁𑀳𑀸𑀭𑀯𑀘𑀦𑀢𑁄. 𑀩𑁄𑀥𑀺𑀲𑀫𑁆𑀪𑀸𑀭𑁂 𑀳𑀺 𑀅𑀥𑀺𑀢𑀺𑀝𑁆𑀞𑀫𑀸𑀦𑁄 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀳𑁄𑀢𑀺. 𑀅𑀘𑀮𑀸𑀥𑀺𑀝𑁆𑀞𑀸𑀦𑀲𑁆𑀲 𑀲𑀫𑀸𑀤𑀸𑀦𑀸𑀯𑀺𑀓𑁄𑀧𑀦𑁂𑀦 𑀲𑀫𑀸𑀤𑀸𑀦𑀲𑀫𑁆𑀪𑀯𑀢𑁄 𑀘 𑀅𑀥𑀺𑀝𑁆𑀞𑀸𑀦𑀲𑁆𑀲𑀸𑀦𑀦𑁆𑀢𑀭𑀁 𑀫𑁂𑀢𑁆𑀢𑀸 𑀯𑀼𑀢𑁆𑀢𑀸. 𑀉𑀧𑁂𑀓𑁆𑀔𑀸𑀬 𑀫𑁂𑀢𑁆𑀢𑀸𑀯𑀺𑀲𑀼𑀤𑁆𑀥𑀺𑀢𑁄, 𑀲𑀢𑁆𑀢𑁂𑀲𑀼 𑀳𑀺𑀢𑀽𑀧𑀲𑀁𑀳𑀸𑀭𑀁 𑀯𑀢𑁆𑀯𑀸 𑀢𑀤𑀧𑀭𑀸𑀥𑁂𑀲𑀼 𑀉𑀤𑀸𑀲𑀻𑀦𑀢𑀸𑀯𑀘𑀦𑀢𑁄, 𑀫𑁂𑀢𑁆𑀢𑀸𑀪𑀸𑀯𑀦𑀁 𑀯𑀢𑁆𑀯𑀸 𑀢𑀦𑁆𑀦𑀺𑀲𑁆𑀲𑀦𑁆𑀤𑀪𑀸𑀯𑀦𑀸𑀯𑀘𑀦𑀢𑁄, ‘‘𑀳𑀺𑀢𑀓𑀸𑀫𑀲𑀢𑁆𑀢𑁂𑀧𑀺 𑀉𑀧𑁂𑀓𑁆𑀔𑀓𑁄’’𑀢𑀺 𑀅𑀘𑁆𑀙𑀭𑀺𑀬𑀕𑀼𑀡𑀢𑀸𑀯𑀘𑀦𑀢𑁄 𑀘 𑀫𑁂𑀢𑁆𑀢𑀸𑀬𑀸𑀦𑀦𑁆𑀢𑀭𑀁 𑀉𑀧𑁂𑀓𑁆𑀔𑀸 𑀯𑀼𑀢𑁆𑀢𑀸𑀢𑀺 𑀏𑀯𑀫𑁂𑀢𑀸𑀲𑀁 𑀓𑀫𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀸𑀦𑀺 𑀮𑀓𑁆𑀔𑀡𑀸𑀤𑀻𑀦𑀺 𑀲𑀩𑁆𑀩𑀣𑀸𑀢𑀺 𑀏𑀢𑁆𑀣 𑀧𑀦 𑀅𑀯𑀺𑀲𑁂𑀲𑁂𑀦 𑁋

𑀧𑀭𑁂𑀲𑀫𑀦𑀼𑀕𑁆𑀕𑀳𑀡𑀁 ¶ , 𑀮𑀓𑁆𑀔𑀡𑀦𑁆𑀢𑀺 𑀧𑀯𑀼𑀘𑁆𑀘𑀢𑀺;

𑀉𑀧𑀓𑀸𑀭𑁄 𑀅𑀓𑀫𑁆𑀧𑁄 𑀘, 𑀭𑀲𑁄 𑀳𑀺𑀢𑁂𑀲𑀺𑀢𑀸𑀧𑀺 𑀘.

𑀩𑀼𑀤𑁆𑀥𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀤𑀬𑀸 𑀜𑀸𑀡𑀁 𑀧𑀯𑀼𑀘𑁆𑀘𑀢𑀺;

𑀧𑀤𑀝𑁆𑀞𑀸𑀦𑀦𑁆𑀢𑀺 𑀢𑀸𑀲𑀦𑁆𑀢𑀼, 𑀧𑀘𑁆𑀘𑁂𑀓𑀁 𑀢𑀸𑀦𑀺 𑀪𑁂𑀤𑀢𑁄.

𑀲𑀩𑁆𑀩𑀸𑀧𑀺 𑀳𑀺 𑀧𑀸𑀭𑀫𑀺𑀬𑁄 𑀧𑀭𑀸𑀦𑀼𑀕𑁆𑀕𑀳𑀮𑀓𑁆𑀔𑀡𑀸, 𑀧𑀭𑁂𑀲𑀁 𑀉𑀧𑀓𑀸𑀭𑀓𑀭𑀡𑀭𑀲𑀸, 𑀅𑀯𑀺𑀓𑀫𑁆𑀧𑀦𑀭𑀲𑀸 𑀯𑀸, 𑀳𑀺𑀢𑁂𑀲𑀺𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀩𑀼𑀤𑁆𑀥𑀢𑁆𑀢𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀫𑀳𑀸𑀓𑀭𑀼𑀡𑀸𑀧𑀤𑀝𑁆𑀞𑀸𑀦𑀸, 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀤𑀝𑁆𑀞𑀸𑀦𑀸 𑀯𑀸.

𑀯𑀺𑀲𑁂𑀲𑁂𑀦 𑀧𑀦 𑀬𑀲𑁆𑀫𑀸 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀸 𑀅𑀢𑁆𑀢𑀼𑀧𑀓𑀭𑀡𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀸 𑀤𑀸𑀦𑀧𑀸𑀭𑀫𑀻. 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀁 𑀓𑀸𑀬𑀯𑀘𑀻𑀲𑀼𑀘𑀭𑀺𑀢𑀁 𑀅𑀢𑁆𑀣𑀢𑁄 𑀅𑀓𑀢𑁆𑀢𑀩𑁆𑀩𑀯𑀺𑀭𑀢𑀺, 𑀓𑀢𑁆𑀢𑀩𑁆𑀩𑀓𑀭𑀡𑀘𑁂𑀢𑀦𑀸𑀤𑀬𑁄 𑀘 𑀲𑀻𑀮𑀧𑀸𑀭𑀫𑀻. 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑁄 𑀆𑀤𑀻𑀦𑀯𑀤𑀲𑁆𑀲𑀦𑀧𑀼𑀩𑁆𑀩𑀗𑁆𑀕𑀫𑁄 𑀓𑀸𑀫𑀪𑀯𑁂𑀳𑀺 𑀦𑀺𑀓𑁆𑀔𑀫𑀦𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻. 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑁄 𑀥𑀫𑁆𑀫𑀸𑀦𑀁 𑀲𑀸𑀫𑀜𑁆𑀜𑀯𑀺𑀲𑁂𑀲𑀮𑀓𑁆𑀔𑀡𑀸𑀯𑀩𑁄𑀥𑁄 𑀧𑀜𑁆𑀜𑀸𑀧𑀸𑀭𑀫𑀻. 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑁄 𑀓𑀸𑀬𑀘𑀺𑀢𑁆𑀢𑁂𑀳𑀺 𑀧𑀭𑀳𑀺𑀢𑀸𑀭𑀫𑁆𑀪𑁄 𑀯𑀻𑀭𑀺𑀬𑀧𑀸𑀭𑀫𑀻. 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑁄 𑀲𑀢𑁆𑀢𑀲𑀗𑁆𑀔𑀸𑀭𑀸𑀧𑀭𑀸𑀥𑀲𑀳𑀦𑀲𑀗𑁆𑀔𑀸𑀢𑁄 𑀅𑀤𑁄𑀲𑀧𑁆𑀧𑀥𑀸𑀦𑁄 𑀢𑀤𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀔𑀦𑁆𑀢𑀺𑀧𑀸𑀭𑀫𑀻. 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀁 𑀯𑀺𑀭𑀢𑀺𑀘𑁂𑀢𑀦𑀸𑀤𑀺𑀪𑁂𑀤𑀁 𑀅𑀯𑀺𑀲𑀁𑀯𑀸𑀤𑀦𑀁 𑀲𑀘𑁆𑀘𑀧𑀸𑀭𑀫𑀻 ¶ . 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑁄 𑀅𑀘𑀮𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑀲𑀗𑁆𑀔𑀸𑀢𑁄 𑀢𑀤𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀻. 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑁄 𑀮𑁄𑀓𑀲𑁆𑀲 𑀳𑀺𑀢𑀲𑀼𑀔𑀽𑀧𑀲𑀁𑀳𑀸𑀭𑁄 𑀅𑀢𑁆𑀣𑀢𑁄 𑀅𑀩𑁆𑀬𑀸𑀧𑀸𑀤𑁄 𑀫𑁂𑀢𑁆𑀢𑀸𑀧𑀸𑀭𑀫𑀻. 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀸 𑀅𑀦𑀼𑀦𑀬𑀧𑀝𑀺𑀖𑀯𑀺𑀤𑁆𑀥𑀁𑀲𑀦𑀲𑀗𑁆𑀔𑀸𑀢𑀸 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀲𑀢𑁆𑀢𑀲𑀗𑁆𑀔𑀸𑀭𑁂𑀲𑀼 𑀲𑀫𑀧𑁆𑀧𑀯𑀢𑁆𑀢𑀺 𑀉𑀧𑁂𑀓𑁆𑀔𑀸𑀧𑀸𑀭𑀫𑀻.

𑀢𑀲𑁆𑀫𑀸 𑀧𑀭𑀺𑀘𑁆𑀘𑀸𑀕𑀮𑀓𑁆𑀔𑀡𑀁 𑀤𑀸𑀦𑀁, 𑀤𑁂𑀬𑁆𑀬𑀥𑀫𑁆𑀫𑁂 𑀮𑁄𑀪𑀯𑀺𑀤𑁆𑀥𑀁𑀲𑀦𑀭𑀲𑀁, 𑀅𑀦𑀸𑀲𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀪𑀯𑀯𑀺𑀪𑀯𑀲𑀫𑁆𑀧𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀁 𑀯𑀸, 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀁. 𑀲𑀻𑀮𑀦𑀮𑀓𑁆𑀔𑀡𑀁 𑀲𑀻𑀮𑀁, 𑀲𑀫𑀸𑀥𑀸𑀦𑀮𑀓𑁆𑀔𑀡𑀁, 𑀧𑀢𑀺𑀝𑁆𑀞𑀸𑀦𑀮𑀓𑁆𑀔𑀡𑀁 𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑀼𑀲𑁆𑀲𑀻𑀮𑁆𑀬𑀯𑀺𑀤𑁆𑀥𑀁𑀲𑀦𑀭𑀲𑀁, 𑀅𑀦𑀯𑀚𑁆𑀚𑀭𑀲𑀁 𑀯𑀸, 𑀲𑁄𑀘𑁂𑀬𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀳𑀺𑀭𑁄𑀢𑁆𑀢𑀧𑁆𑀧𑀧𑀤𑀝𑁆𑀞𑀸𑀦𑀁. 𑀓𑀸𑀫𑀢𑁄, 𑀪𑀯𑀢𑁄 𑀘 𑀦𑀺𑀓𑁆𑀔𑀫𑀦𑀮𑀓𑁆𑀔𑀡𑀁 𑀦𑁂𑀓𑁆𑀔𑀫𑁆𑀫𑀁, 𑀢𑀤𑀸𑀤𑀻𑀦𑀯𑀯𑀺𑀪𑀸𑀯𑀦𑀭𑀲𑀁, 𑀢𑀢𑁄𑀬𑁂𑀯 𑀯𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀲𑀁𑀯𑁂𑀕𑀧𑀤𑀝𑁆𑀞𑀸𑀦𑀁. 𑀬𑀣𑀸𑀲𑀪𑀸𑀯𑀧𑀝𑀺𑀯𑁂𑀥𑀮𑀓𑁆𑀔𑀡𑀸 𑀧𑀜𑁆𑀜𑀸, 𑀅𑀓𑁆𑀔𑀮𑀺𑀢𑀧𑀝𑀺𑀯𑁂𑀥𑀮𑀓𑁆𑀔𑀡𑀸 𑀯𑀸 𑀓𑀼𑀲𑀮𑀺𑀲𑁆𑀲𑀸𑀲𑀔𑀺𑀢𑁆𑀢𑀉𑀲𑀼𑀧𑀝𑀺𑀯𑁂𑀥𑁄 𑀯𑀺𑀬, 𑀯𑀺𑀲𑀬𑁄𑀪𑀸𑀲𑀦𑀭𑀲𑀸 𑀧𑀤𑀻𑀧𑁄 𑀯𑀺𑀬, 𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀅𑀭𑀜𑁆𑀜𑀕𑀢𑀲𑀼𑀤𑁂𑀲𑀓𑁄 𑀯𑀺𑀬, 𑀲𑀫𑀸𑀥𑀺𑀧𑀤𑀝𑁆𑀞𑀸𑀦𑀸 ¶ , 𑀘𑀢𑀼𑀲𑀘𑁆𑀘𑀧𑀤𑀝𑁆𑀞𑀸𑀦𑀸 𑀯𑀸. 𑀉𑀲𑁆𑀲𑀸𑀳𑀮𑀓𑁆𑀔𑀡𑀁 𑀯𑀻𑀭𑀺𑀬𑀁, 𑀉𑀧𑀢𑁆𑀣𑀫𑁆𑀪𑀦𑀭𑀲𑀁, 𑀅𑀲𑀁𑀲𑀻𑀤𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀯𑀻𑀭𑀺𑀬𑀸𑀭𑀫𑁆𑀪𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑀁, 𑀲𑀁𑀯𑁂𑀕𑀧𑀤𑀝𑁆𑀞𑀸𑀦𑀁 𑀯𑀸.

𑀔𑀫𑀦𑀮𑀓𑁆𑀔𑀡𑀸 𑀔𑀦𑁆𑀢𑀺, 𑀇𑀝𑁆𑀞𑀸𑀦𑀺𑀝𑁆𑀞𑀲𑀳𑀦𑀭𑀲𑀸, 𑀅𑀥𑀺𑀯𑀸𑀲𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀅𑀯𑀺𑀭𑁄𑀥𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀯𑀸, 𑀬𑀣𑀸𑀪𑀽𑀢𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸. 𑀅𑀯𑀺𑀲𑀁𑀯𑀸𑀤𑀦𑀮𑀓𑁆𑀔𑀡𑀁 𑀲𑀘𑁆𑀘𑀁, 𑀬𑀸𑀣𑀸𑀯𑀯𑀺𑀪𑀸𑀯𑀦𑀭𑀲𑀁, 𑀲𑀸𑀥𑀼𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀲𑁄𑀭𑀘𑁆𑀘𑀧𑀤𑀝𑁆𑀞𑀸𑀦𑀁. 𑀩𑁄𑀥𑀺𑀲𑀫𑁆𑀪𑀸𑀭𑁂𑀲𑀼 𑀅𑀥𑀺𑀝𑁆𑀞𑀸𑀦𑀮𑀓𑁆𑀔𑀡𑀁 𑀅𑀥𑀺𑀝𑁆𑀞𑀸𑀦𑀁, 𑀢𑁂𑀲𑀁 𑀧𑀝𑀺𑀧𑀓𑁆𑀔𑀸𑀪𑀺𑀪𑀯𑀦𑀭𑀲𑀁, 𑀢𑀢𑁆𑀣 𑀅𑀘𑀮𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀩𑁄𑀥𑀺𑀲𑀫𑁆𑀪𑀸𑀭𑀧𑀤𑀝𑁆𑀞𑀸𑀦𑀁. 𑀳𑀺𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸 𑀫𑁂𑀢𑁆𑀢𑀸, 𑀳𑀺𑀢𑀽𑀧𑀲𑀁𑀳𑀸𑀭𑀭𑀲𑀸, 𑀆𑀖𑀸𑀢𑀯𑀺𑀦𑀬𑀦𑀭𑀲𑀸 𑀯𑀸, 𑀲𑁄𑀫𑁆𑀫𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀲𑀢𑁆𑀢𑀸𑀦𑀁 𑀫𑀦𑀸𑀧𑀪𑀸𑀯𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑀸. 𑀫𑀚𑁆𑀛𑀢𑁆𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀮𑀓𑁆𑀔𑀡𑀸 𑀉𑀧𑁂𑀓𑁆𑀔𑀸, 𑀲𑀫𑀪𑀸𑀯𑀤𑀲𑁆𑀲𑀦𑀭𑀲𑀸, 𑀧𑀝𑀺𑀖𑀸𑀦𑀼𑀦𑀬𑀯𑀽𑀧𑀲𑀫𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀓𑀫𑁆𑀫𑀲𑁆𑀲𑀓𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀧𑀤𑀝𑁆𑀞𑀸𑀦𑀸. 𑀏𑀢𑁆𑀣 𑀘 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀢𑀸 𑀤𑀸𑀦𑀸𑀤𑀻𑀦𑀁 𑀧𑀭𑀺𑀘𑁆𑀘𑀸𑀕𑀸𑀤𑀺𑀮𑀓𑁆𑀔𑀡𑀲𑁆𑀲 𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀸, 𑀬𑀢𑁄 𑀢𑀸𑀦𑀺 𑀧𑀸𑀭𑀫𑀻𑀲𑀗𑁆𑀔𑁆𑀬𑀁 𑀮𑀪𑀦𑁆𑀢𑀺. 𑀦 𑀳𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸𑀤𑀺𑀧𑀢𑁆𑀣𑀦𑀫𑀜𑁆𑀜𑀢𑁆𑀭 𑀅𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀯𑀝𑁆𑀝𑀕𑀸𑀫𑀻𑀦𑀺 𑀤𑀸𑀦𑀸𑀤𑀻𑀦𑀺 𑀧𑀸𑀭𑀫𑀻𑀲𑀗𑁆𑀔𑁆𑀬𑀁 𑀮𑀪𑀦𑁆𑀢𑀻𑀢𑀺.

𑀓𑁄 ¶ 𑀧𑀘𑁆𑀘𑀬𑁄𑀢𑀺 𑁋

𑀅𑀪𑀺𑀦𑀻𑀳𑀸𑀭𑁄 𑀘 𑀢𑀸𑀲𑀁, 𑀤𑀬𑀸 𑀜𑀸𑀡𑀜𑁆𑀘 𑀧𑀘𑁆𑀘𑀬𑁄;

𑀉𑀲𑁆𑀲𑀸𑀳𑀼𑀫𑁆𑀫𑀗𑁆𑀕𑀯𑀢𑁆𑀣𑀸𑀦𑀁, 𑀳𑀺𑀢𑀸𑀘𑀸𑀭𑀸𑀤𑀬𑁄 𑀢𑀣𑀸.

𑀅𑀪𑀺𑀦𑀻𑀳𑀸𑀭𑁄 𑀢𑀸𑀯 𑀧𑀸𑀭𑀫𑀻𑀦𑀁 𑀲𑀩𑁆𑀩𑀸𑀲𑀫𑁆𑀧𑀺 𑀧𑀘𑁆𑀘𑀬𑁄. 𑀬𑁄 𑀳𑀺 𑀅𑀬𑀁 ‘‘𑀫𑀦𑀼𑀲𑁆𑀲𑀢𑁆𑀢𑀁 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀻’’𑀢𑀺𑀆𑀤𑀺 (𑀩𑀼. 𑀯𑀁. 𑁨.𑁫𑁯) 𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑀲𑀫𑁆𑀧𑀸𑀤𑀺𑀢𑁄 ‘‘𑀢𑀺𑀡𑁆𑀡𑁄 𑀢𑀸𑀭𑁂𑀬𑁆𑀬𑀁 𑀫𑀼𑀢𑁆𑀢𑁄 𑀫𑁄𑀘𑁂𑀬𑁆𑀬𑀁, 𑀩𑀼𑀤𑁆𑀥𑁄 𑀩𑁄𑀥𑁂𑀬𑁆𑀬𑀁 𑀲𑀼𑀤𑁆𑀥𑁄 𑀲𑁄𑀥𑁂𑀬𑁆𑀬𑀁, 𑀤𑀦𑁆𑀢𑁄 𑀤𑀫𑁂𑀬𑁆𑀬𑀁, 𑀲𑀦𑁆𑀢𑁄 𑀲𑀫𑁂𑀬𑁆𑀬𑀁, 𑀅𑀲𑁆𑀲𑀢𑁆𑀣𑁄 𑀅𑀲𑁆𑀲𑀸𑀲𑁂𑀬𑁆𑀬𑀁, 𑀧𑀭𑀺𑀦𑀺𑀩𑁆𑀩𑀼𑀢𑁄 𑀧𑀭𑀺𑀦𑀺𑀩𑁆𑀩𑀸𑀧𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑁄 𑀅𑀪𑀺𑀦𑀻𑀳𑀸𑀭𑁄, 𑀲𑁄 𑀅𑀯𑀺𑀲𑁂𑀲𑁂𑀦 𑀲𑀩𑁆𑀩𑀧𑀸𑀭𑀫𑀻𑀦𑀁 𑀧𑀘𑁆𑀘𑀬𑁄. 𑀢𑀧𑁆𑀧𑀯𑀢𑁆𑀢𑀺𑀬𑀸 𑀳𑀺 𑀉𑀤𑁆𑀥𑀁 𑀧𑀸𑀭𑀫𑀻𑀦𑀁 𑀧𑀯𑀺𑀘𑀬𑀼𑀧𑀝𑁆𑀞𑀸𑀦𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑀦𑀺𑀧𑁆𑀨𑀢𑁆𑀢𑀺𑀬𑁄 𑀫𑀳𑀸𑀧𑀼𑀭𑀺𑀲𑀸𑀦𑀁 𑀲𑀫𑁆𑀪𑀯𑀦𑁆𑀢𑀺, 𑀅𑀪𑀺𑀦𑀻𑀳𑀸𑀭𑁄 𑀘 𑀦𑀸𑀫𑁂𑀲 𑀅𑀢𑁆𑀣𑀢𑁄 𑀪𑁂𑀲𑀫𑀝𑁆𑀞𑀗𑁆𑀕𑀸𑀦𑀁 𑀲𑀫𑁄𑀥𑀸𑀦𑁂𑀦 𑀢𑀣𑀸𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄, ‘‘𑀅𑀳𑁄 𑀯𑀢𑀸𑀳𑀁 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑁂𑀬𑁆𑀬𑀁, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀁 𑀦𑀺𑀧𑁆𑀨𑀸𑀤𑁂𑀬𑁆𑀬’’𑀦𑁆𑀢𑀺𑀆𑀤𑀺𑀧𑀢𑁆𑀣𑀦𑀸𑀲𑀗𑁆𑀔𑀸𑀢𑁄 𑀅𑀘𑀺𑀦𑁆𑀢𑁂𑀬𑁆𑀬𑀁 𑀩𑀼𑀤𑁆𑀥𑀪𑀽𑀫𑀺𑀁, 𑀅𑀧𑀭𑀺𑀫𑀸𑀡𑀁 𑀮𑁄𑀓𑀳𑀺𑀢𑀜𑁆𑀘 𑀆𑀭𑀩𑁆𑀪 𑀧𑀯𑀢𑁆𑀢𑀺𑀬𑀸 𑀲𑀩𑁆𑀩𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑀫𑀽𑀮𑀪𑀽𑀢𑁄 𑀧𑀭𑀫𑀪𑀤𑁆𑀤𑀓𑁄 𑀧𑀭𑀫𑀓𑀮𑁆𑀬𑀸𑀡𑁄 𑀅𑀧𑀭𑀺𑀫𑁂𑀬𑁆𑀬𑀧𑁆𑀧𑀪𑀸𑀯𑁄 𑀧𑀼𑀜𑁆𑀜𑀯𑀺𑀲𑁂𑀲𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀢𑀲𑁆𑀲 ¶ 𑀘 𑀉𑀧𑁆𑀧𑀢𑁆𑀢𑀺𑀬𑀸 𑀲𑀳𑁂𑀯 𑀫𑀳𑀸𑀧𑀼𑀭𑀺𑀲𑁄 𑀫𑀳𑀸𑀩𑁄𑀥𑀺𑀬𑀸𑀦𑀧𑀝𑀺𑀧𑀢𑁆𑀢𑀺𑀁 𑀑𑀢𑀺𑀡𑁆𑀡𑁄 𑀦𑀸𑀫 𑀳𑁄𑀢𑀺, 𑀦𑀺𑀬𑀢𑀪𑀸𑀯𑀲𑀫𑀥𑀺𑀕𑀫𑀦𑀢𑁄, 𑀢𑀢𑁄 𑀘 𑀅𑀦𑀺𑀯𑀢𑁆𑀢𑀦𑀲𑀪𑀸𑀯𑀢𑁄 ‘‘𑀩𑁄𑀥𑀺𑀲𑀢𑁆𑀢𑁄’’𑀢𑀺 𑀲𑀫𑀜𑁆𑀜𑀁 𑀮𑀪𑀢𑀺, 𑀲𑀩𑁆𑀩𑀪𑀸𑀕𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀁 𑀲𑀫𑁆𑀫𑀸𑀲𑀢𑁆𑀢𑀫𑀸𑀦𑀲𑀢𑀸, 𑀩𑁄𑀥𑀺𑀲𑀫𑁆𑀪𑀸𑀭𑁂 𑀲𑀺𑀓𑁆𑀔𑀸𑀲𑀫𑀢𑁆𑀣𑀢𑀸 𑀘𑀲𑁆𑀲 𑀲𑀦𑁆𑀢𑀺𑀝𑁆𑀞𑀢𑀺. 𑀬𑀣𑀸𑀯𑀼𑀢𑁆𑀢𑀸𑀪𑀺𑀦𑀻𑀳𑀸𑀭𑀲𑀫𑀺𑀚𑁆𑀛𑀦𑁂𑀦 𑀳𑀺 𑀫𑀳𑀸𑀧𑀼𑀭𑀺𑀲𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀥𑀺𑀕𑀫𑀦𑀧𑀼𑀩𑁆𑀩𑀮𑀺𑀗𑁆𑀕𑁂𑀦 𑀲𑀬𑀫𑁆𑀪𑀼𑀜𑀸𑀡𑁂𑀦 𑀲𑀫𑁆𑀫𑀤𑁂𑀯 𑀲𑀩𑁆𑀩𑀧𑀸𑀭𑀫𑀺𑀬𑁄 𑀯𑀺𑀘𑀺𑀦𑀺𑀢𑁆𑀯𑀸 𑀲𑀫𑀸𑀤𑀸𑀬 𑀅𑀦𑀼𑀓𑁆𑀓𑀫𑁂𑀦 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀬𑀣𑀸 𑀢𑀁 𑀓𑀢𑀫𑀳𑀸𑀪𑀺𑀦𑀻𑀳𑀸𑀭𑁄 𑀲𑀼𑀫𑁂𑀥𑀧𑀡𑁆𑀟𑀺𑀢𑁄. 𑀬𑀣𑀸𑀳 𑁋

‘‘𑀳𑀦𑁆𑀤 𑀩𑀼𑀤𑁆𑀥𑀓𑀭𑁂 𑀥𑀫𑁆𑀫𑁂, 𑀯𑀺𑀘𑀺𑀦𑀸𑀫𑀺 𑀇𑀢𑁄 𑀘𑀺𑀢𑁄;

𑀉𑀤𑁆𑀥𑀁 𑀅𑀥𑁄 𑀤𑀲 𑀤𑀺𑀲𑀸, 𑀬𑀸𑀯𑀢𑀸 𑀥𑀫𑁆𑀫𑀥𑀸𑀢𑀼𑀬𑀸;

𑀯𑀺𑀘𑀺𑀦𑀦𑁆𑀢𑁄 𑀢𑀤𑀸 𑀤𑀓𑁆𑀔𑀺𑀁, 𑀧𑀞𑀫𑀁 𑀤𑀸𑀦𑀧𑀸𑀭𑀫𑀺’’𑀦𑁆𑀢𑀺. (𑀩𑀼. 𑀯𑀁. 𑁨.𑁧𑁧𑁫, 𑁧𑁧𑁬); 𑁋

𑀯𑀺𑀢𑁆𑀣𑀸𑀭𑁄. 𑀮𑀓𑁆𑀔𑀡𑀸𑀤𑀺𑀢𑁄 𑀧𑀦𑁂𑀲 𑀲𑀫𑁆𑀫𑀤𑁂𑀯 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀧𑀡𑀺𑀥𑀸𑀦𑀮𑀓𑁆𑀔𑀡𑁄, ‘‘𑀅𑀳𑁄 𑀯𑀢𑀸𑀳𑀁 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑁂𑀬𑁆𑀬𑀁, 𑀲𑀩𑁆𑀩𑀲𑀢𑁆𑀢𑀸𑀦𑀁 ¶ 𑀳𑀺𑀢𑀲𑀼𑀔𑀁 𑀦𑀺𑀧𑁆𑀨𑀸𑀤𑁂𑀬𑁆𑀬’’𑀦𑁆𑀢𑀺𑀆𑀤𑀺𑀧𑀢𑁆𑀣𑀦𑀸𑀭𑀲𑁄, 𑀩𑁄𑀥𑀺𑀲𑀫𑁆𑀪𑀸𑀭𑀳𑁂𑀢𑀼𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀫𑀳𑀸𑀓𑀭𑀼𑀡𑀸𑀧𑀤𑀝𑁆𑀞𑀸𑀦𑁄, 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑁄 𑀯𑀸.

𑀢𑀲𑁆𑀲 𑀧𑀦 𑀅𑀪𑀺𑀦𑀻𑀳𑀸𑀭𑀲𑁆𑀲 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸, 𑀘𑀢𑁆𑀢𑀸𑀭𑁄 𑀳𑁂𑀢𑀽, 𑀘𑀢𑁆𑀢𑀸𑀭𑀺 𑀘 𑀩𑀮𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀓𑀢𑀫𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀫𑀳𑀸𑀪𑀺𑀦𑀻𑀳𑀸𑀭𑀸𑀬? 𑀇𑀥 𑀫𑀳𑀸𑀧𑀼𑀭𑀺𑀲𑁄 𑀧𑀲𑁆𑀲𑀢𑀺 𑀢𑀣𑀸𑀕𑀢𑀁 𑀫𑀳𑀢𑀸 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀦𑁆𑀢𑀁, 𑀢𑀲𑁆𑀲 𑀢𑀁 𑀦𑀺𑀲𑁆𑀲𑀸𑀬 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀫𑀳𑀸𑀩𑁄𑀥𑀺𑀬𑀁 𑀘𑀺𑀢𑁆𑀢𑀁 𑀲𑀦𑁆𑀢𑀺𑀝𑁆𑀞𑀢𑀺 ‘‘𑀫𑀳𑀸𑀦𑀼𑀪𑀸𑀯𑀸 𑀯𑀢𑀸𑀬𑀁 𑀥𑀫𑁆𑀫𑀥𑀸𑀢𑀼, 𑀬𑀲𑁆𑀲𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀪𑀕𑀯𑀸 𑀏𑀯𑀁 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀥𑀫𑁆𑀫𑁄, 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑁄 𑀘𑀸’’𑀢𑀺, 𑀲𑁄 𑀢𑀫𑁂𑀯 𑀫𑀳𑀸𑀦𑀼𑀪𑀸𑀯𑀤𑀲𑁆𑀲𑀦𑀁 𑀦𑀺𑀲𑁆𑀲𑀸𑀬 𑀢𑀁 𑀧𑀘𑁆𑀘𑀬𑀁 𑀓𑀢𑁆𑀯𑀸 𑀲𑀫𑁆𑀩𑁄𑀥𑀺𑀬𑀁 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀢𑀢𑁆𑀣 𑀘𑀺𑀢𑁆𑀢𑀁 𑀞𑀧𑁂𑀢𑀺, 𑀅𑀬𑀁 𑀧𑀞𑀫𑁄 𑀧𑀘𑁆𑀘𑀬𑁄 𑀫𑀳𑀸𑀪𑀺𑀦𑀻𑀳𑀸𑀭𑀸𑀬.

𑀦 𑀳𑁂𑀯 𑀔𑁄 𑀧𑀲𑁆𑀲𑀢𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀁 𑀫𑀳𑀸𑀦𑀼𑀪𑀸𑀯𑀢𑀁, 𑀅𑀧𑀺𑀘 𑀔𑁄 𑀲𑀼𑀡𑀸𑀢𑀺 ‘‘𑀏𑀤𑀺𑀲𑁄 𑀘 𑀏𑀤𑀺𑀲𑁄 𑀘 𑀪𑀕𑀯𑀸’’𑀢𑀺, 𑀲𑁄 𑀢𑀁 𑀦𑀺𑀲𑁆𑀲𑀸𑀬 𑀢𑀁 𑀧𑀘𑁆𑀘𑀬𑀁 𑀓𑀢𑁆𑀯𑀸 𑀲𑀫𑁆𑀩𑁄𑀥𑀺𑀬𑀁 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀢𑀢𑁆𑀣 𑀘𑀺𑀢𑁆𑀢𑀁 𑀞𑀧𑁂𑀢𑀺, 𑀅𑀬𑀁 𑀤𑀼𑀢𑀺𑀬𑁄 𑀧𑀘𑁆𑀘𑀬𑁄 𑀫𑀳𑀸𑀪𑀺𑀦𑀻𑀳𑀸𑀭𑀸𑀬.

𑀦 𑀳𑁂𑀯 𑀔𑁄 𑀧𑀲𑁆𑀲𑀢𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀁 𑀫𑀳𑀸𑀦𑀼𑀪𑀸𑀯𑀢𑀁, 𑀦𑀸𑀧𑀺 𑀢𑀁 𑀧𑀭𑀢𑁄 𑀲𑀼𑀡𑀸𑀢𑀺, 𑀅𑀧𑀺𑀘 𑀔𑁄 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 ‘‘𑀤𑀲𑀩𑀮𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁨𑁧) 𑀩𑀼𑀤𑁆𑀥𑀸𑀦𑀼𑀪𑀸𑀯𑀧𑀝𑀺𑀲𑀁𑀬𑀼𑀢𑁆𑀢𑀁 ¶ 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀲𑁄 𑀢𑀁 𑀦𑀺𑀲𑁆𑀲𑀸𑀬…𑀧𑁂… 𑀅𑀬𑀁 𑀢𑀢𑀺𑀬𑁄 𑀧𑀘𑁆𑀘𑀬𑁄 𑀫𑀳𑀸𑀪𑀺𑀦𑀻𑀳𑀸𑀭𑀸𑀬.

𑀦 𑀳𑁂𑀯 𑀔𑁄 𑀧𑀲𑁆𑀲𑀢𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀁 𑀫𑀳𑀸𑀦𑀼𑀪𑀸𑀯𑀢𑀁, 𑀦𑀸𑀧𑀺 𑀢𑀁 𑀧𑀭𑀢𑁄 𑀲𑀼𑀡𑀸𑀢𑀺, 𑀦𑀸𑀧𑀺 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀅𑀧𑀺𑀘 𑀔𑁄 𑀉𑀴𑀸𑀭𑀚𑁆𑀛𑀸𑀲𑀬𑁄 𑀓𑀮𑁆𑀬𑀸𑀡𑀸𑀥𑀺𑀫𑀼𑀢𑁆𑀢𑀺𑀓𑁄 ‘‘𑀅𑀳𑀫𑁂𑀢𑀁 𑀩𑀼𑀤𑁆𑀥𑀯𑀁𑀲𑀁 𑀩𑀼𑀤𑁆𑀥𑀢𑀦𑁆𑀢𑀺𑀁 𑀩𑀼𑀤𑁆𑀥𑀧𑀯𑁂𑀡𑀺𑀁 𑀩𑀼𑀤𑁆𑀤𑀥𑀫𑁆𑀫𑀢𑀁 𑀧𑀭𑀺𑀧𑀸𑀮𑁂𑀲𑁆𑀲𑀸𑀫𑀻’’𑀢𑀺 𑀬𑀸𑀯𑀤𑁂𑀯 𑀥𑀫𑁆𑀫𑀜𑁆𑀜𑁂𑀯 𑀲𑀓𑁆𑀓𑀭𑁄𑀦𑁆𑀢𑁄 𑀕𑀭𑀼𑀁 𑀓𑀭𑁄𑀦𑁆𑀢𑁄 𑀫𑀸𑀦𑁂𑀦𑁆𑀢𑁄 𑀧𑀽𑀚𑁂𑀦𑁆𑀢𑁄 𑀥𑀫𑁆𑀫𑀁 𑀅𑀧𑀘𑀬𑀫𑀸𑀦𑁄 𑀢𑀁 𑀦𑀺𑀲𑁆𑀲𑀸𑀬…𑀧𑁂… 𑀞𑀧𑁂𑀢𑀺, 𑀅𑀬𑀁 𑀘𑀢𑀼𑀢𑁆𑀣𑁄 𑀧𑀘𑁆𑀘𑀬𑁄 𑀫𑀳𑀸𑀪𑀺𑀦𑀻𑀳𑀸𑀭𑀸𑀬𑀸𑀢𑀺.

𑀓𑀢𑀫𑁂 ¶ 𑀘𑀢𑁆𑀢𑀸𑀭𑁄 𑀳𑁂𑀢𑀽 𑀫𑀳𑀸𑀪𑀺𑀦𑀻𑀳𑀸𑀭𑀸𑀬? 𑀇𑀥 𑀫𑀳𑀸𑀧𑀼𑀭𑀺𑀲𑁄 𑀧𑀓𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀧𑀼𑀭𑀺𑀫𑀓𑁂𑀲𑀼 𑀩𑀼𑀤𑁆𑀥𑁂𑀲𑀼 𑀓𑀢𑀸𑀥𑀺𑀓𑀸𑀭𑁄, 𑀅𑀬𑀁 𑀧𑀞𑀫𑁄 𑀳𑁂𑀢𑀼 𑀫𑀳𑀸𑀪𑀺𑀦𑀻𑀳𑀸𑀭𑀸𑀬. 𑀧𑀼𑀦 𑀘𑀧𑀭𑀁 𑀫𑀳𑀸𑀧𑀼𑀭𑀺𑀲𑁄 𑀧𑀓𑀢𑀺𑀬𑀸𑀧𑀺 𑀓𑀭𑀼𑀡𑀸𑀚𑁆𑀛𑀸𑀲𑀬𑁄 𑀳𑁄𑀢𑀺 𑀓𑀭𑀼𑀡𑀸𑀥𑀺𑀫𑀼𑀢𑁆𑀢𑁄 𑀲𑀢𑁆𑀢𑀸𑀦𑀁 𑀤𑀼𑀓𑁆𑀔𑀁 𑀅𑀧𑀦𑁂𑀢𑀼𑀓𑀸𑀫𑁄, 𑀅𑀧𑀺𑀘 𑀅𑀢𑁆𑀢𑀦𑁄 𑀓𑀸𑀬𑀜𑁆𑀘 𑀚𑀻𑀯𑀺𑀢𑀜𑁆𑀘 𑀧𑀭𑀺𑀘𑁆𑀘𑀚𑀺, 𑀅𑀬𑀁 𑀤𑀼𑀢𑀺𑀬𑁄 𑀳𑁂𑀢𑀼 𑀫𑀳𑀸𑀪𑀺𑀦𑀻𑀳𑀸𑀭𑀸𑀬. 𑀧𑀼𑀦 𑀘𑀧𑀭𑀁 𑀫𑀳𑀸𑀧𑀼𑀭𑀺𑀲𑁄 𑀲𑀓𑀮𑀢𑁄𑀧𑀺 𑀯𑀝𑁆𑀝𑀤𑀼𑀓𑁆𑀔𑀢𑁄 𑀲𑀢𑁆𑀢𑀳𑀺𑀢𑀸𑀬 𑀤𑀼𑀓𑁆𑀓𑀭𑀘𑀭𑀺𑀬𑀢𑁄 𑀲𑀼𑀘𑀺𑀭𑀫𑁆𑀧𑀺 𑀓𑀸𑀮𑀁 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀅𑀦𑀺𑀩𑁆𑀩𑀺𑀦𑁆𑀦𑁄 𑀳𑁄𑀢𑀺 𑀅𑀦𑀼𑀢𑁆𑀭𑀸𑀲𑀻, 𑀬𑀸𑀯 𑀇𑀘𑁆𑀙𑀺𑀢𑀢𑁆𑀣𑀦𑀺𑀧𑁆𑀨𑀢𑁆𑀢𑀺, 𑀅𑀬𑀁 𑀢𑀢𑀺𑀬𑁄 𑀳𑁂𑀢𑀼 𑀫𑀳𑀸𑀪𑀺𑀦𑀻𑀳𑀸𑀭𑀸𑀬. 𑀧𑀼𑀦 𑀘𑀧𑀭𑀁 𑀫𑀳𑀸𑀧𑀼𑀭𑀺𑀲𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑁄 𑀳𑁄𑀢𑀺, 𑀬𑁄 𑀅𑀳𑀺𑀢𑀢𑁄 𑀦𑀁 𑀦𑀺𑀯𑀸𑀭𑁂𑀢𑀺, 𑀳𑀺𑀢𑁂 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀅𑀬𑀁 𑀘𑀢𑀼𑀢𑁆𑀣𑁄 𑀳𑁂𑀢𑀼 𑀫𑀳𑀸𑀪𑀺𑀦𑀻𑀳𑀸𑀭𑀸𑀬.

𑀢𑀢𑁆𑀭𑀸𑀬𑀁 𑀫𑀳𑀸𑀧𑀼𑀭𑀺𑀲𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀤𑀸 𑁋 𑀏𑀓𑀦𑁆𑀢𑁂𑀦𑁂𑀯𑀲𑁆𑀲 𑀬𑀣𑀸 𑀅𑀚𑁆𑀛𑀸𑀲𑀬𑁄 𑀲𑀫𑁆𑀩𑁄𑀥𑀺𑀦𑀺𑀦𑁆𑀦𑁄 𑀳𑁄𑀢𑀺 𑀲𑀫𑁆𑀩𑁄𑀥𑀺𑀧𑁄𑀡𑁄 𑀲𑀫𑁆𑀩𑁄𑀥𑀺𑀧𑀩𑁆𑀪𑀸𑀭𑁄, 𑀢𑀣𑀸 𑀲𑀢𑁆𑀢𑀸𑀦𑀁 𑀳𑀺𑀢𑀘𑀭𑀺𑀬𑀸𑀬, 𑀬𑀢𑁄 𑀅𑀦𑁂𑀦 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀲𑀫𑁆𑀩𑁄𑀥𑀺𑀬𑀸 𑀧𑀡𑀺𑀥𑀸𑀦𑀁 𑀓𑀢𑀁 𑀳𑁄𑀢𑀺 𑀫𑀦𑀲𑀸, 𑀯𑀸𑀘𑀸𑀬 𑀘 ‘‘𑀅𑀳𑀫𑁆𑀧𑀺 𑀏𑀤𑀺𑀲𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀲𑀫𑁆𑀫𑀤𑁂𑀯 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀁 𑀦𑀺𑀧𑁆𑀨𑀸𑀤𑁂𑀬𑁆𑀬’’𑀦𑁆𑀢𑀺. 𑀏𑀯𑀁 𑀲𑀫𑁆𑀧𑀦𑁆𑀦𑀽𑀧𑀦𑀺𑀲𑁆𑀲𑀬𑀲𑁆𑀲 𑀧𑀦𑀲𑁆𑀲 𑀇𑀫𑀸𑀦𑀺 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀮𑀺𑀗𑁆𑀕𑀸𑀦𑀺 𑀲𑀫𑁆𑀪𑀯𑀦𑁆𑀢𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑁂𑀳𑀺, 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑁂𑀳𑀺 𑀘 𑀫𑀳𑀸𑀯𑀺𑀲𑁂𑀲𑁄 𑀫𑀳𑀦𑁆𑀢𑀁 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀬𑀢𑀺 𑀇𑀦𑁆𑀤𑁆𑀭𑀺𑀬𑀢𑁄, 𑀧𑀝𑀺𑀧𑀢𑁆𑀢𑀺𑀢𑁄, 𑀓𑁄𑀲𑀮𑁆𑀮𑀢𑁄 𑀘. 𑀇𑀥 𑀳𑀺 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀫𑀳𑀸𑀧𑀼𑀭𑀺𑀲𑁄 𑀬𑀣𑀸 𑀯𑀺𑀲𑀤𑀺𑀦𑁆𑀤𑁆𑀭𑀺𑀬𑁄 𑀳𑁄𑀢𑀺 𑀯𑀺𑀲𑀤𑀜𑀸𑀡𑁄, 𑀦 𑀢𑀣𑀸 𑀇𑀢𑀭𑁂. 𑀧𑀭𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺, 𑀦𑁄 𑀅𑀢𑁆𑀢𑀳𑀺𑀢𑀸𑀬. 𑀢𑀣𑀸 𑀳𑀺 𑀲𑁄 𑀬𑀣𑀸 𑀩𑀳𑀼𑀚𑀦𑀳𑀺𑀢𑀸𑀬 𑀩𑀳𑀼𑀚𑀦𑀲𑀼𑀔𑀸𑀬 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀝𑀺𑀧𑀚𑁆𑀚𑀺, 𑀦 𑀢𑀣𑀸 𑀇𑀢𑀭𑁂, 𑀢𑀢𑁆𑀣 𑀘 𑀓𑁄𑀲𑀮𑁆𑀮𑀁 𑀆𑀯𑀳𑀢𑀺 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀝𑀺𑀪𑀸𑀦𑁂𑀦, 𑀞𑀸𑀦𑀸𑀞𑀸𑀦𑀓𑀼𑀲𑀮𑀢𑀸𑀬 𑀘.

𑀢𑀣𑀸 ¶ 𑀫𑀳𑀸𑀧𑀼𑀭𑀺𑀲𑁄 𑀧𑀓𑀢𑀺𑀬𑀸 𑀤𑀸𑀦𑀚𑁆𑀛𑀸𑀲𑀬𑁄 𑀳𑁄𑀢𑀺 𑀤𑀸𑀦𑀸𑀪𑀺𑀭𑀢𑁄, 𑀲𑀢𑀺 𑀤𑁂𑀬𑁆𑀬𑀥𑀫𑁆𑀫𑁂 𑀤𑁂𑀢𑀺𑀬𑁂𑀯, 𑀦 𑀤𑀸𑀦𑀢𑁄 𑀲𑀗𑁆𑀓𑁄𑀘𑀁 𑀆𑀧𑀚𑁆𑀚𑀢𑀺, 𑀲𑀢𑀢𑀁 𑀲𑀫𑀺𑀢𑀁 𑀲𑀁𑀯𑀺𑀪𑀸𑀕𑀲𑀻𑀮𑁄 𑀳𑁄𑀢𑀺, 𑀧𑀫𑀼𑀤𑀺𑀢𑁄𑀯 𑀤𑁂𑀢𑀺 𑀆𑀤𑀭𑀚𑀸𑀢𑁄, 𑀦 𑀉𑀤𑀸𑀲𑀻𑀦𑀘𑀺𑀢𑁆𑀢𑁄, 𑀫𑀳𑀦𑁆𑀢𑀫𑁆𑀧𑀺 𑀤𑀸𑀦𑀁 𑀤𑀢𑁆𑀯𑀸 𑀦𑁂𑀯 ¶ 𑀤𑀸𑀦𑁂𑀦 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺, 𑀧𑀕𑁂𑀯 𑀅𑀧𑁆𑀧𑀁. 𑀧𑀭𑁂𑀲𑀜𑁆𑀘 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁄 𑀤𑀸𑀦𑁂 𑀯𑀡𑁆𑀡𑀁 𑀪𑀸𑀲𑀢𑀺, 𑀤𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀓𑀣𑀁 𑀓𑀭𑁄𑀢𑀺, 𑀅𑀜𑁆𑀜𑁂 𑀘 𑀧𑀭𑁂𑀲𑀁 𑀤𑁂𑀦𑁆𑀢𑁂 𑀤𑀺𑀲𑁆𑀯𑀸 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀪𑀬𑀝𑁆𑀞𑀸𑀦𑁂𑀲𑀼 𑀘 𑀧𑀭𑁂𑀲𑀁 𑀅𑀪𑀬𑀁 𑀤𑁂𑀢𑀻𑀢𑀺 𑀏𑀯𑀫𑀸𑀤𑀻𑀦𑀺 𑀤𑀸𑀦𑀚𑁆𑀛𑀸𑀲𑀬𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑀸𑀦𑀧𑀸𑀭𑀫𑀺𑀬𑀸 𑀮𑀺𑀗𑁆𑀕𑀸𑀦𑀺.

𑀢𑀣𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀧𑀸𑀧𑀥𑀫𑁆𑀫𑁂𑀳𑀺 𑀳𑀺𑀭𑀻𑀬𑀢𑀺 𑀑𑀢𑁆𑀢𑀧𑁆𑀧𑀢𑀺, 𑀲𑀢𑁆𑀢𑀸𑀦𑀁 𑀅𑀯𑀺𑀳𑁂𑀞𑀦𑀚𑀸𑀢𑀺𑀓𑁄 𑀳𑁄𑀢𑀺, 𑀲𑁄𑀭𑀢𑁄 𑀲𑀼𑀔𑀲𑀻𑀮𑁄 𑀅𑀲𑀞𑁄 𑀅𑀫𑀸𑀬𑀸𑀯𑀻 𑀉𑀚𑀼𑀚𑀸𑀢𑀺𑀓𑁄 𑀲𑀼𑀩𑁆𑀩𑀘𑁄 𑀲𑁄𑀯𑀘𑀲𑁆𑀲𑀓𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀫𑀼𑀤𑀼𑀚𑀸𑀢𑀺𑀓𑁄 𑀅𑀣𑀤𑁆𑀥𑁄 𑀅𑀦𑀢𑀺𑀫𑀸𑀦𑀻, 𑀧𑀭𑀲𑀦𑁆𑀢𑀓𑀁 𑀦𑀸𑀤𑀺𑀬𑀢𑀺 𑀅𑀦𑁆𑀢𑀫𑀲𑁄 𑀢𑀺𑀡𑀲𑀮𑀸𑀓𑀫𑀼𑀧𑀸𑀤𑀸𑀬, 𑀅𑀢𑁆𑀢𑀦𑁄 𑀳𑀢𑁆𑀣𑁂 𑀦𑀺𑀓𑁆𑀔𑀺𑀢𑁆𑀢𑀁 𑀇𑀡𑀁 𑀯𑀸 𑀕𑀳𑁂𑀢𑁆𑀯𑀸 𑀧𑀭𑀁 𑀦 𑀯𑀺𑀲𑀁𑀯𑀸𑀤𑁂𑀢𑀺, 𑀧𑀭𑀲𑁆𑀫𑀺𑀁 𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂 𑀩𑁆𑀬𑀸𑀫𑀽𑀴𑁆𑀳𑁂, 𑀯𑀺𑀲𑁆𑀲𑀭𑀺𑀢𑁂 𑀯𑀸 𑀢𑀁 𑀲𑀜𑁆𑀜𑀸𑀧𑁂𑀢𑁆𑀯𑀸 𑀧𑀝𑀺𑀧𑀸𑀤𑁂𑀢𑀺 𑀬𑀣𑀸 𑀢𑀁 𑀦 𑀧𑀭𑀳𑀢𑁆𑀣𑀕𑀢𑀁 𑀳𑁄𑀢𑀺, 𑀅𑀮𑁄𑀮𑀼𑀧𑁆𑀧𑁄 𑀳𑁄𑀢𑀺, 𑀧𑀭𑀧𑀭𑀺𑀕𑁆𑀕𑀳𑀺𑀢𑁂𑀲𑀼 𑀧𑀸𑀧𑀓𑀁 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀢𑀺, 𑀇𑀢𑁆𑀣𑀺𑀩𑁆𑀬𑀲𑀦𑀸𑀤𑀻𑀦𑀺 𑀤𑀽𑀭𑀢𑁄 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀘𑁆𑀘𑀯𑀸𑀤𑀻 𑀲𑀘𑁆𑀘𑀲𑀦𑁆𑀥𑁄 𑀪𑀺𑀦𑁆𑀦𑀸𑀦𑀁 𑀲𑀦𑁆𑀥𑀸𑀢𑀸 𑀲𑀳𑀺𑀢𑀸𑀦𑀁 𑀅𑀦𑀼𑀧𑁆𑀧𑀤𑀸𑀢𑀸 𑀧𑀺𑀬𑀯𑀸𑀤𑀻 𑀫𑀺𑀳𑀺𑀢𑀧𑀼𑀩𑁆𑀩𑀗𑁆𑀕𑀫𑁄 𑀧𑀼𑀩𑁆𑀩𑀪𑀸𑀲𑀻 𑀅𑀢𑁆𑀣𑀯𑀸𑀤𑀻 𑀥𑀫𑁆𑀫𑀯𑀸𑀤𑀻 𑀅𑀦𑀪𑀺𑀚𑁆𑀛𑀸𑀮𑀼 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀅𑀯𑀺𑀧𑀭𑀻𑀢𑀤𑀲𑁆𑀲𑀦𑁄 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑁂𑀦, 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡𑁂𑀦 𑀘, 𑀓𑀢𑀜𑁆𑀜𑀽 𑀓𑀢𑀯𑁂𑀤𑀻 𑀯𑀼𑀟𑁆𑀠𑀸𑀧𑀘𑀸𑀬𑀻 𑀲𑀼𑀯𑀺𑀲𑀼𑀤𑁆𑀥𑀸𑀚𑀻𑀯𑁄 𑀥𑀫𑁆𑀫𑀓𑀸𑀫𑁄, 𑀧𑀭𑁂𑀲𑀫𑁆𑀧𑀺 𑀥𑀫𑁆𑀫𑁂 𑀲𑀫𑀸𑀤𑀧𑁂𑀢𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀓𑀺𑀘𑁆𑀘𑀢𑁄 𑀲𑀢𑁆𑀢𑁂 𑀦𑀺𑀯𑀸𑀭𑁂𑀢𑀸 𑀓𑀺𑀘𑁆𑀘𑁂𑀲𑀼 𑀧𑀢𑀺𑀝𑁆𑀞𑀧𑁂𑀢𑀸 𑀅𑀢𑁆𑀢𑀦𑀸 𑀘 𑀢𑀢𑁆𑀣 𑀓𑀺𑀘𑁆𑀘𑁂 𑀬𑁄𑀕𑀁 𑀆𑀧𑀚𑁆𑀚𑀺𑀢𑀸, 𑀓𑀢𑁆𑀯𑀸 𑀯𑀸 𑀧𑀦 𑀲𑀬𑀁 𑀅𑀓𑀢𑁆𑀢𑀩𑁆𑀩𑀁 𑀲𑀻𑀖𑀜𑁆𑀜𑁂𑀯 𑀢𑀢𑁄 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻𑀢𑀺 𑀏𑀯𑀫𑀸𑀤𑀻𑀦𑀺 𑀲𑀻𑀮𑀚𑁆𑀛𑀸𑀲𑀬𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀲𑀻𑀮𑀧𑀸𑀭𑀫𑀺𑀬𑀸 𑀮𑀺𑀗𑁆𑀕𑀸𑀦𑀺.

𑀢𑀣𑀸 𑀫𑀦𑁆𑀤𑀓𑀺𑀮𑁂𑀲𑁄 𑀳𑁄𑀢𑀺 𑀫𑀦𑁆𑀤𑀦𑀻𑀯𑀭𑀡𑁄 𑀧𑀯𑀺𑀯𑁂𑀓𑀚𑁆𑀛𑀸𑀲𑀬𑁄 𑀅𑀯𑀺𑀓𑁆𑀔𑁂𑀧𑀩𑀳𑀼𑀮𑁄, 𑀦 𑀢𑀲𑁆𑀲 𑀧𑀸𑀧𑀓𑀸 𑀯𑀺𑀢𑀓𑁆𑀓𑀸 𑀘𑀺𑀢𑁆𑀢𑀫𑀦𑁆𑀯𑀸𑀲𑁆𑀲𑀯𑀦𑁆𑀢𑀺, 𑀯𑀺𑀯𑁂𑀓𑀕𑀢𑀲𑁆𑀲 𑀘𑀲𑁆𑀲 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀅𑀫𑀺𑀢𑁆𑀢𑀧𑀓𑁆𑀔𑁂𑀧𑀺 𑀢𑀼𑀯𑀝𑀁 𑀫𑁂𑀢𑁆𑀢𑀘𑀺𑀢𑁆𑀢𑀢𑀸 𑀲𑀦𑁆𑀢𑀺𑀝𑁆𑀞𑀢𑀺, 𑀧𑀕𑁂𑀯 𑀇𑀢𑀭𑀲𑁆𑀫𑀺𑀁, 𑀲𑀢𑀺𑀫𑀸 𑀘 𑀳𑁄𑀢𑀺 𑀘𑀺𑀭𑀓𑀢𑀫𑁆𑀧𑀺 𑀘𑀺𑀭𑀪𑀸𑀲𑀺𑀢𑀫𑁆𑀧𑀺 𑀲𑀼𑀲𑀭𑀺𑀢𑀸 𑀅𑀦𑀼𑀲𑁆𑀲𑀭𑀺𑀢𑀸, 𑀫𑁂𑀥𑀸𑀯𑀻 𑀘 𑀳𑁄𑀢𑀺 𑀥𑀫𑁆𑀫𑁄𑀚𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀦𑀺𑀧𑀓𑁄 𑀘 𑀳𑁄𑀢𑀺 𑀢𑀸𑀲𑀼 𑀢𑀸𑀲𑀼 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀲𑀼, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀘 𑀳𑁄𑀢𑀺 𑀲𑀢𑁆𑀢𑀸𑀦𑀁 𑀳𑀺𑀢𑀓𑀺𑀭𑀺𑀬𑀸𑀲𑀼, 𑀔𑀦𑁆𑀢𑀺𑀩𑀮𑀲𑀫𑀦𑁆𑀦𑀸𑀕𑀢𑁄 𑀘 𑀳𑁄𑀢𑀺 𑀲𑀩𑁆𑀩𑀲𑀳𑁄, 𑀅𑀘𑀮𑀸𑀥𑀺𑀝𑁆𑀞𑀸𑀦𑁄 𑀘 𑀳𑁄𑀢𑀺 𑀤𑀴𑁆𑀳𑀲𑀫𑀸𑀤𑀸𑀦𑁄, 𑀅𑀚𑁆𑀛𑀼𑀧𑁂𑀓𑁆𑀔𑀓𑁄 𑀘 𑀳𑁄𑀢𑀺 𑀉𑀧𑁂𑀓𑁆𑀔𑀸𑀞𑀸𑀦𑀻𑀬𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀏𑀯𑀫𑀸𑀤𑀻𑀦𑀺 𑀫𑀳𑀸𑀧𑀼𑀭𑀺𑀲𑀲𑁆𑀲 𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑀸𑀤𑀻𑀦𑀁 𑀯𑀲𑁂𑀦 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀬𑀸𑀤𑀻𑀦𑀁 𑀮𑀺𑀗𑁆𑀕𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀏𑀯𑀫𑁂𑀢𑁂𑀳𑀺 ¶ ¶ 𑀩𑁄𑀥𑀺𑀲𑀫𑁆𑀪𑀸𑀭𑀮𑀺𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀬𑀁 𑀯𑀼𑀢𑁆𑀢𑀁 ‘‘𑀫𑀳𑀸𑀪𑀺𑀦𑀻𑀳𑀸𑀭𑀸𑀬 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀬𑁄 𑀳𑁂𑀢𑀽’’𑀢𑀺, 𑀢𑀢𑁆𑀭𑀺𑀤𑀁 𑀲𑀗𑁆𑀔𑁂𑀧𑀢𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀮𑀓𑁆𑀔𑀡𑀁 𑁋 𑀇𑀥 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁄 𑀳𑁄𑀢𑀺 𑀲𑀻𑀮𑀲𑀫𑁆𑀧𑀦𑁆𑀦𑁄 𑀲𑀼𑀢𑀲𑀫𑁆𑀧𑀦𑁆𑀦𑁄 𑀘𑀸𑀕𑀯𑀻𑀭𑀺𑀬𑀲𑀢𑀺𑀲𑀫𑀸𑀥𑀺𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄. 𑀢𑀢𑁆𑀣 𑀲𑀤𑁆𑀥𑀸𑀲𑀫𑁆𑀧𑀢𑁆𑀢𑀺𑀬𑀸 𑀲𑀤𑁆𑀤𑀳𑀢𑀺 𑀢𑀣𑀸𑀕𑀢𑀲𑁆𑀲 𑀩𑁄𑀥𑀺𑀁 𑀓𑀫𑁆𑀫𑀁, 𑀓𑀫𑁆𑀫𑀨𑀮𑀜𑁆𑀘, 𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀳𑁂𑀢𑀼𑀪𑀽𑀢𑀁 𑀲𑀢𑁆𑀢𑁂𑀲𑀼 𑀳𑀺𑀢𑁂𑀲𑀺𑀢𑀁 𑀦 𑀧𑀭𑀺𑀘𑁆𑀘𑀚𑀢𑀺. 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀲𑀢𑁆𑀢𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄 𑀕𑀭𑀼 𑀪𑀸𑀯𑀦𑀻𑀬𑁄 𑀘𑁄𑀤𑀓𑁄 𑀧𑀸𑀧𑀕𑀭𑀳𑀺𑀓𑁄 𑀯𑀢𑁆𑀢𑀸 𑀯𑀘𑀦𑀓𑁆𑀔𑀫𑁄. 𑀲𑀼𑀢𑀲𑀫𑁆𑀧𑀢𑁆𑀢𑀺𑀬𑀸 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀸𑀯𑀳𑀁 𑀕𑀫𑁆𑀪𑀻𑀭𑀁 𑀥𑀫𑁆𑀫𑀓𑀣𑀁 𑀓𑀢𑁆𑀢𑀸 𑀳𑁄𑀢𑀺. 𑀘𑀸𑀕𑀲𑀫𑁆𑀧𑀢𑁆𑀢𑀺𑀬𑀸 𑀅𑀧𑁆𑀧𑀺𑀘𑁆𑀙𑁄 𑀳𑁄𑀢𑀺 𑀲𑀫𑀸𑀳𑀺𑀢𑁄 𑀲𑀦𑁆𑀢𑀼𑀝𑁆𑀞𑁄 𑀧𑀯𑀺𑀯𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄. 𑀯𑀻𑀭𑀺𑀬𑀲𑀫𑁆𑀧𑀢𑁆𑀢𑀺𑀬𑀸 𑀆𑀭𑀤𑁆𑀥𑀯𑀻𑀭𑀺𑀬𑁄 𑀳𑁄𑀢𑀺 𑀲𑀢𑁆𑀢𑀸𑀦𑀁 𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀸. 𑀲𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑀝𑁆𑀞𑀺𑀢𑀲𑁆𑀲𑀢𑀻 𑀳𑁄𑀢𑀺 𑀅𑀦𑀯𑀚𑁆𑀚𑁂𑀲𑀼 𑀥𑀫𑁆𑀫𑁂𑀲𑀼. 𑀲𑀫𑀸𑀥𑀺𑀲𑀫𑁆𑀧𑀢𑁆𑀢𑀺𑀬𑀸 𑀅𑀯𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺 𑀲𑀫𑀸𑀳𑀺𑀢𑀘𑀺𑀢𑁆𑀢𑁄. 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀬𑀸 𑀅𑀯𑀺𑀧𑀭𑀻𑀢𑀁 𑀧𑀚𑀸𑀦𑀸𑀢𑀺. 𑀲𑁄 𑀲𑀢𑀺𑀬𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀯𑁂𑀲𑀫𑀸𑀦𑁄 𑀧𑀜𑁆𑀜𑀸𑀬 𑀲𑀢𑁆𑀢𑀸𑀦𑀁 𑀳𑀺𑀢𑀸𑀳𑀺𑀢𑀁 𑀬𑀣𑀸𑀪𑀽𑀢𑀁 𑀚𑀸𑀦𑀺𑀢𑁆𑀯𑀸 𑀲𑀫𑀸𑀥𑀺𑀦𑀸 𑀢𑀢𑁆𑀣 𑀏𑀓𑀕𑁆𑀕𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀯𑀻𑀭𑀺𑀬𑁂𑀦 𑀅𑀳𑀺𑀢𑀸 𑀲𑀢𑁆𑀢𑁂 𑀦𑀺𑀲𑁂𑀥𑁂𑀢𑁆𑀯𑀸 𑀳𑀺𑀢𑁂 𑀦𑀺𑀬𑁄𑀚𑁂𑀢𑀺. 𑀢𑁂𑀦𑀸𑀳 𑁋

‘‘𑀧𑀺𑀬𑁄 𑀕𑀭𑀼 𑀪𑀸𑀯𑀦𑀻𑀬𑁄, 𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄;

𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸, 𑀦𑁄 𑀘𑀝𑁆𑀞𑀸𑀦𑁂 𑀦𑀺𑀬𑁄𑀚𑀓𑁄’’𑀢𑀺. (𑀅. 𑀦𑀺. 𑁭.𑁩𑁭; 𑀦𑁂𑀢𑁆𑀢𑀺. 𑁧𑁧𑁩);

𑀏𑀯𑀁 𑀕𑀼𑀡𑀲𑀫𑀦𑁆𑀦𑀸𑀕𑀢𑀁𑀯 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀉𑀧𑀦𑀺𑀲𑁆𑀲𑀸𑀬 𑀫𑀳𑀸𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀁 𑀲𑀫𑁆𑀫𑀤𑁂𑀯 𑀧𑀭𑀺𑀬𑁄𑀤𑀧𑁂𑀢𑀺. 𑀲𑀼𑀯𑀺𑀲𑀼𑀤𑁆𑀥𑀸𑀲𑀬𑀧𑀬𑁄𑀕𑁄𑀯 𑀳𑀼𑀢𑁆𑀯𑀸 𑀘𑀢𑀽𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀦𑀘𑀺𑀭𑁂𑀦𑁂𑀯 𑀅𑀝𑁆𑀞𑀗𑁆𑀕𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀫𑀳𑀸𑀪𑀺𑀦𑀻𑀳𑀸𑀭𑀁 𑀓𑀭𑁄𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀪𑀸𑀯𑁂 𑀧𑀢𑀺𑀝𑁆𑀞𑀳𑀢𑀺 𑀅𑀦𑀺𑀯𑀢𑁆𑀢𑀺𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄.

𑀢𑀲𑁆𑀲𑀺𑀫𑀸𑀦𑀺 𑀘𑀢𑁆𑀢𑀸𑀭𑀺 𑀩𑀮𑀸𑀦𑀺 𑀅𑀚𑁆𑀛𑀢𑁆𑀢𑀺𑀓𑀩𑀮𑀁 𑀬𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀁 𑀅𑀢𑁆𑀢𑀲𑀦𑁆𑀦𑀺𑀲𑁆𑀲𑀬𑀸 𑀥𑀫𑁆𑀫𑀕𑀸𑀭𑀯𑁂𑀦 𑀅𑀪𑀺𑀭𑀼𑀘𑀺 𑀏𑀓𑀦𑁆𑀢𑀦𑀺𑀦𑁆𑀦𑀚𑁆𑀛𑀸𑀲𑀬𑀢𑀸, 𑀬𑀸𑀬 𑀫𑀳𑀸𑀧𑀼𑀭𑀺𑀲𑁄 𑀅𑀢𑁆𑀢𑀸𑀥𑀺𑀧𑀢𑀺𑀮𑀚𑁆𑀚𑀸𑀲𑀦𑁆𑀦𑀺𑀲𑁆𑀲𑀬𑁄, 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑁄 𑀘 𑀳𑀼𑀢𑁆𑀯𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀸𑀢𑀺. 𑀩𑀸𑀳𑀺𑀭𑀩𑀮𑀁 𑀬𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀁 𑀧𑀭𑀲𑀦𑁆𑀦𑀺𑀲𑁆𑀲𑀬𑀸 𑀅𑀪𑀺𑀭𑀼𑀘𑀺 𑀏𑀓𑀦𑁆𑀢𑀦𑀺𑀦𑁆𑀦𑀚𑁆𑀛𑀸𑀲𑀬𑀢𑀸, 𑀬𑀸𑀬 𑀫𑀳𑀸𑀧𑀼𑀭𑀺𑀲𑁄 𑀮𑁄𑀓𑀸𑀥𑀺𑀧𑀢𑀺𑀑𑀢𑁆𑀢𑀧𑁆𑀧𑀦𑀲𑀦𑁆𑀦𑀺𑀲𑁆𑀲𑀬𑁄, 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑁄 𑀘 𑀳𑀼𑀢𑁆𑀯𑀸 𑀧𑀸𑀭𑀫𑀺𑀬𑁄 ¶ 𑀧𑀽𑀭𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀸𑀢𑀺. 𑀉𑀧𑀦𑀺𑀲𑁆𑀲𑀬𑀩𑀮𑀁 𑀬𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀁 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀺𑀭𑀼𑀘𑀺 𑀏𑀓𑀦𑁆𑀢𑀦𑀺𑀦𑁆𑀦𑀚𑁆𑀛𑀸𑀲𑀬𑀢𑀸, 𑀬𑀸𑀬 𑀫𑀳𑀸𑀧𑀼𑀭𑀺𑀲𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄, 𑀯𑀺𑀲𑀤𑀥𑀸𑀢𑀼𑀓𑁄, 𑀲𑀢𑀺𑀲𑀦𑁆𑀦𑀺𑀲𑁆𑀲𑀬𑁄, 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑁄 𑀘 𑀳𑀼𑀢𑁆𑀯𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀸𑀢𑀺. 𑀧𑀬𑁄𑀕𑀩𑀮𑀁 𑀬𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 ¶ 𑀢𑀚𑁆𑀚𑀸 𑀧𑀬𑁄𑀕𑀲𑀫𑁆𑀧𑀤𑀸 𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸 𑀲𑀸𑀢𑀘𑁆𑀘𑀓𑀸𑀭𑀺𑀢𑀸, 𑀬𑀸𑀬 𑀫𑀳𑀸𑀧𑀼𑀭𑀺𑀲𑁄 𑀯𑀺𑀲𑀼𑀤𑁆𑀥𑀧𑀬𑁄𑀕𑁄, 𑀦𑀺𑀭𑀦𑁆𑀢𑀭𑀓𑀸𑀭𑀻, 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑁄 𑀘 𑀳𑀼𑀢𑁆𑀯𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀸𑀢𑀺. 𑀏𑀯𑀫𑀬𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺, 𑀘𑀢𑀽𑀳𑀺 𑀳𑁂𑀢𑀽𑀳𑀺, 𑀘𑀢𑀽𑀳𑀺 𑀘 𑀩𑀮𑁂𑀳𑀺 𑀲𑀫𑁆𑀧𑀦𑁆𑀦𑀲𑀫𑀼𑀤𑀸𑀕𑀫𑁄 𑀅𑀝𑁆𑀞𑀗𑁆𑀕𑀲𑀫𑁄𑀥𑀸𑀦𑀲𑀫𑁆𑀧𑀸𑀤𑀺𑀢𑁄 𑀅𑀪𑀺𑀦𑀻𑀳𑀸𑀭𑁄 𑀧𑀸𑀭𑀫𑀻𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺 𑀫𑀽𑀮𑀓𑀸𑀭𑀡𑀪𑀸𑀯𑀢𑁄.

𑀬𑀲𑁆𑀲 𑀘 𑀧𑀯𑀢𑁆𑀢𑀺𑀬𑀸 𑀫𑀳𑀸𑀧𑀼𑀭𑀺𑀲𑁂 𑀘𑀢𑁆𑀢𑀸𑀭𑁄 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸 𑀧𑀢𑀺𑀝𑁆𑀞𑀳𑀦𑁆𑀢𑀺, 𑀲𑀩𑁆𑀩𑀁 𑀲𑀢𑁆𑀢𑀦𑀺𑀓𑀸𑀬𑀁 𑀅𑀢𑁆𑀢𑀦𑁄 𑀑𑀭𑀲𑀧𑀼𑀢𑁆𑀢𑀁 𑀯𑀺𑀬 𑀧𑀺𑀬𑀘𑀺𑀢𑁆𑀢𑁂𑀦 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀦 𑀘𑀲𑁆𑀲 𑀘𑀺𑀢𑁆𑀢𑀁 𑀧𑀼𑀦 𑀲𑀁𑀓𑀺𑀮𑁂𑀲𑀯𑀲𑁂𑀦 𑀲𑀁𑀓𑀺𑀮𑀺𑀲𑁆𑀲𑀢𑀺, 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀸𑀯𑀳𑁄 𑀘𑀲𑁆𑀲 𑀅𑀚𑁆𑀛𑀸𑀲𑀬𑁄, 𑀧𑀬𑁄𑀕𑁄 𑀘 𑀳𑁄𑀢𑀺, 𑀅𑀢𑁆𑀢𑀦𑁄 𑀘 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑀸 𑀉𑀧𑀭𑀽𑀧𑀭𑀺 𑀯𑀟𑁆𑀠𑀦𑁆𑀢𑀺, 𑀧𑀭𑀺𑀧𑀘𑁆𑀘𑀦𑁆𑀢𑀺 𑀘, 𑀬𑀢𑁄 𑀫𑀳𑀸𑀧𑀼𑀭𑀺𑀲𑁄 𑀉𑀴𑀸𑀭𑀢𑀭𑁂𑀦 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁂𑀦 𑀓𑀼𑀲𑀮𑀸𑀪𑀺𑀲𑀦𑁆𑀤𑁂𑀦 𑀧𑀯𑀟𑁆𑀠𑀺𑀬𑀸 [𑀧𑀯𑀢𑁆𑀢𑀺𑀬𑀸 (𑀘𑀭𑀺𑀬𑀸. 𑀅𑀝𑁆𑀞. 𑀧𑀓𑀺𑀡𑁆𑀡𑀓𑀓𑀣𑀸)] 𑀧𑀘𑁆𑀘𑀬𑁂𑀦 𑀲𑀼𑀔𑀲𑁆𑀲𑀸𑀳𑀸𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀢𑁆𑀢𑀸𑀦𑀁 𑀤𑀓𑁆𑀔𑀺𑀡𑁂𑀬𑁆𑀬𑁄 𑀉𑀢𑁆𑀢𑀫𑀁 𑀕𑀸𑀭𑀯𑀝𑁆𑀞𑀸𑀦𑀁, 𑀅𑀲𑀤𑀺𑀲𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀜𑁆𑀘 𑀳𑁄𑀢𑀺. 𑀏𑀯𑀫𑀦𑁂𑀓𑀕𑀼𑀡𑁄 𑀅𑀦𑁂𑀓𑀸𑀦𑀺𑀲𑀁𑀲𑁄 𑀫𑀳𑀸𑀪𑀺𑀦𑀻𑀳𑀸𑀭𑁄 𑀧𑀸𑀭𑀫𑀻𑀦𑀁 𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀬𑀣𑀸 𑀘 𑀫𑀳𑀸𑀪𑀺𑀦𑀻𑀳𑀸𑀭𑁄, 𑀏𑀯𑀁 𑀫𑀳𑀸𑀓𑀭𑀼𑀡𑀸, 𑀉𑀧𑀸𑀬𑀓𑁄𑀲𑀮𑁆𑀮𑀜𑁆𑀘. 𑀢𑀢𑁆𑀣 𑀉𑀧𑀸𑀬𑀓𑁄𑀲𑀮𑁆𑀮𑀁 𑀦𑀸𑀫 𑀤𑀸𑀦𑀸𑀤𑀻𑀦𑀁 𑀩𑁄𑀥𑀺𑀲𑀫𑁆𑀪𑀸𑀭𑀪𑀸𑀯𑀲𑁆𑀲 𑀦𑀺𑀫𑀺𑀢𑁆𑀢𑀪𑀽𑀢𑀸 𑀧𑀜𑁆𑀜𑀸, 𑀬𑀸𑀳𑀺 𑀫𑀳𑀸𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀢𑀸𑀳𑀺 𑀫𑀳𑀸𑀧𑀼𑀭𑀺𑀲𑀸𑀦𑀁 𑀅𑀢𑁆𑀢𑀲𑀼𑀔𑀦𑀺𑀭𑀧𑁂𑀓𑁆𑀔𑀢𑀸, 𑀦𑀺𑀭𑀦𑁆𑀢𑀭𑀁 𑀧𑀭𑀲𑀼𑀔𑀓𑀭𑀡𑀧𑀲𑀼𑀢𑀢𑀸, 𑀲𑀼𑀤𑀼𑀓𑁆𑀓𑀭𑁂𑀳𑀺 𑀫𑀳𑀸𑀩𑁄𑀥𑀺𑀲𑀢𑁆𑀢𑀘𑀭𑀺𑀢𑁂𑀳𑀺 𑀯𑀺𑀲𑀸𑀤𑀸𑀪𑀸𑀯𑁄, 𑀧𑀲𑀸𑀤𑀲𑀁𑀯𑀼𑀤𑁆𑀥𑀺𑀤𑀲𑁆𑀲𑀦𑀲𑀯𑀦𑀸𑀦𑀼𑀲𑁆𑀲𑀭𑀡𑀸𑀯𑀢𑁆𑀣𑀸𑀲𑀼𑀧𑀺 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀧𑀝𑀺𑀮𑀸𑀪𑀳𑁂𑀢𑀼𑀪𑀸𑀯𑁄 𑀘 𑀲𑀫𑁆𑀧𑀚𑁆𑀚𑀢𑀺. 𑀢𑀣𑀸 𑀳𑀺 𑀢𑀲𑁆𑀲 𑀧𑀜𑁆𑀜𑀸𑀬 𑀩𑀼𑀤𑁆𑀥𑀪𑀸𑀯𑀲𑀺𑀤𑁆𑀥𑀺, 𑀓𑀭𑀼𑀡𑀸𑀬 𑀩𑀼𑀤𑁆𑀥𑀓𑀫𑁆𑀫𑀲𑀺𑀤𑁆𑀥𑀺. 𑀧𑀜𑁆𑀜𑀸𑀬 𑀲𑀬𑀁 𑀢𑀭𑀢𑀺, 𑀓𑀭𑀼𑀡𑀸𑀬 𑀧𑀭𑁂 𑀢𑀸𑀭𑁂𑀢𑀺. 𑀧𑀜𑁆𑀜𑀸𑀬 𑀧𑀭𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀸𑀢𑀺, 𑀓𑀭𑀼𑀡𑀸𑀬 𑀧𑀭𑀤𑀼𑀓𑁆𑀔𑀧𑀝𑀺𑀓𑀸𑀭𑀁 𑀆𑀭𑀪𑀢𑀺. 𑀧𑀜𑁆𑀜𑀸𑀬 𑀤𑀼𑀓𑁆𑀔𑀁 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀓𑀭𑀼𑀡𑀸𑀬 𑀤𑀼𑀓𑁆𑀔𑀁 𑀲𑀫𑁆𑀧𑀝𑀺𑀘𑁆𑀙𑀢𑀺. 𑀧𑀜𑁆𑀜𑀸𑀬 𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑁄 𑀳𑁄𑀢𑀺, 𑀓𑀭𑀼𑀡𑀸𑀬 ¶ 𑀢𑀁 𑀦 𑀧𑀸𑀧𑀼𑀡𑀸𑀢𑀺. 𑀢𑀣𑀸 𑀓𑀭𑀼𑀡𑀸𑀬 𑀲𑀁𑀲𑀸𑀭𑀸𑀪𑀺𑀫𑀼𑀔𑁄 𑀳𑁄𑀢𑀺, 𑀧𑀜𑁆𑀜𑀸𑀬 𑀢𑀢𑁆𑀭 𑀦𑀸𑀪𑀺𑀭𑀫𑀢𑀺. 𑀧𑀜𑁆𑀜𑀸𑀬 𑀲𑀩𑁆𑀩𑀢𑁆𑀣 𑀯𑀺𑀭𑀚𑁆𑀚𑀢𑀺, 𑀓𑀭𑀼𑀡𑀸𑀦𑀼𑀕𑀢𑀢𑁆𑀢𑀸 𑀦 𑀘 𑀦 𑀲𑀩𑁆𑀩𑁂𑀲𑀫𑀦𑀼𑀕𑁆𑀕𑀳𑀸𑀬 𑀧𑀯𑀢𑁆𑀢𑁄, 𑀓𑀭𑀼𑀡𑀸𑀬 𑀲𑀩𑁆𑀩𑁂𑀧𑀺 𑀅𑀦𑀼𑀓𑀫𑁆𑀧𑀢𑀺, 𑀧𑀜𑁆𑀜𑀸𑀦𑀼𑀕𑀢𑀢𑁆𑀢𑀸 𑀦 𑀘 𑀦 𑀲𑀩𑁆𑀩𑀢𑁆𑀣 𑀯𑀺𑀭𑀢𑁆𑀢𑀘𑀺𑀢𑁆𑀢𑁄. 𑀧𑀜𑁆𑀜𑀸𑀬 𑀅𑀳𑀁𑀓𑀸𑀭𑀫𑀫𑀁𑀓𑀸𑀭𑀸𑀪𑀸𑀯𑁄, 𑀓𑀭𑀼𑀡𑀸𑀬 𑀆𑀮𑀲𑀺𑀬𑀤𑀻𑀦𑀢𑀸𑀪𑀸𑀯𑁄.

𑀢𑀣𑀸 𑀧𑀜𑁆𑀜𑀸𑀓𑀭𑀼𑀡𑀸𑀳𑀺 𑀬𑀣𑀸𑀓𑁆𑀓𑀫𑀁 𑀅𑀢𑁆𑀢𑀦𑀸𑀣𑀧𑀭𑀦𑀸𑀣𑀢𑀸, 𑀥𑀻𑀭𑀯𑀻𑀭𑀪𑀸𑀯𑁄, 𑀅𑀦𑀢𑁆𑀢𑀦𑁆𑀢𑀧𑀸𑀧𑀭𑀦𑁆𑀢𑀧𑀢𑀸, 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀦𑀺𑀧𑁆𑀨𑀢𑁆𑀢𑀺, 𑀦𑀺𑀩𑁆𑀪𑀬𑀸𑀪𑀻𑀲𑀦𑀓𑀪𑀸𑀯𑁄, 𑀥𑀫𑁆𑀫𑀸𑀥𑀺𑀧𑀢𑀺𑀮𑁄𑀓𑀸𑀥𑀺𑀧𑀢𑀺𑀢𑀸, 𑀓𑀢𑀜𑁆𑀜𑀼𑀧𑀼𑀩𑁆𑀩𑀓𑀸𑀭𑀺𑀪𑀸𑀯𑁄, 𑀫𑁄𑀳𑀢𑀡𑁆𑀳𑀸𑀯𑀺𑀕𑀫𑁄, 𑀯𑀺𑀚𑁆𑀚𑀸𑀘𑀭𑀡𑀲𑀺𑀤𑁆𑀥𑀺, 𑀩𑀮𑀯𑁂𑀲𑀸𑀭𑀚𑁆𑀚𑀦𑀺𑀧𑁆𑀨𑀢𑁆𑀢𑀻𑀢𑀺 𑀲𑀩𑁆𑀩𑀲𑁆𑀲𑀸𑀧𑀺 ¶ 𑀧𑀸𑀭𑀫𑀺𑀢𑀸𑀨𑀮𑀲𑁆𑀲 𑀯𑀺𑀲𑁂𑀲𑁂𑀦 𑀉𑀧𑀸𑀬𑀪𑀸𑀯𑀢𑁄 𑀧𑀜𑁆𑀜𑀸 𑀓𑀭𑀼𑀡𑀸 𑀧𑀸𑀭𑀫𑀻𑀦𑀁 𑀧𑀘𑁆𑀘𑀬𑁄. 𑀇𑀤𑀁 𑀧𑀦 𑀤𑁆𑀯𑀬𑀁 𑀧𑀸𑀭𑀫𑀻𑀦𑀁 𑀯𑀺𑀬 𑀧𑀡𑀺𑀥𑀸𑀦𑀲𑁆𑀲𑀸𑀧𑀺 𑀧𑀘𑁆𑀘𑀬𑁄.

𑀢𑀣𑀸 𑀉𑀲𑁆𑀲𑀸𑀳𑀉𑀫𑁆𑀫𑀗𑁆𑀕𑀅𑀯𑀢𑁆𑀣𑀸𑀦𑀳𑀺𑀢𑀘𑀭𑀺𑀬𑀸 𑀘 𑀧𑀸𑀭𑀫𑀻𑀦𑀁 𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀸 𑀘 𑀩𑀼𑀤𑁆𑀥𑀪𑀸𑀯𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑀸𑀬 ‘‘𑀩𑀼𑀤𑁆𑀥𑀪𑀽𑀫𑀺𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 𑀉𑀲𑁆𑀲𑀸𑀳𑁄 𑀦𑀸𑀫 𑀩𑁄𑀥𑀺𑀲𑀫𑁆𑀪𑀸𑀭𑀸𑀦𑀁 𑀅𑀩𑁆𑀪𑀼𑀲𑁆𑀲𑀸𑀳𑀦𑀯𑀻𑀭𑀺𑀬𑀁. 𑀉𑀫𑁆𑀫𑀗𑁆𑀕𑁄 𑀦𑀸𑀫 𑀩𑁄𑀥𑀺𑀲𑀫𑁆𑀪𑀸𑀭𑁂𑀲𑀼 𑀉𑀧𑀸𑀬𑀓𑁄𑀲𑀮𑁆𑀮𑀪𑀽𑀢𑀸 𑀧𑀜𑁆𑀜𑀸. 𑀅𑀯𑀢𑁆𑀣𑀸𑀦𑀁 𑀦𑀸𑀫 𑀅𑀥𑀺𑀝𑁆𑀞𑀸𑀦𑀁, 𑀅𑀘𑀮𑀸𑀥𑀺𑀝𑁆𑀞𑀸𑀦𑀢𑀸. 𑀳𑀺𑀢𑀘𑀭𑀺𑀬𑀸 𑀦𑀸𑀫 𑀫𑁂𑀢𑁆𑀢𑀸𑀪𑀸𑀯𑀦𑀸, 𑀓𑀭𑀼𑀡𑀸𑀪𑀸𑀯𑀦𑀸 𑀘. 𑀬𑀣𑀸𑀳 𑁋

‘‘𑀓𑀢𑀺 𑀧𑀦 𑀪𑀦𑁆𑀢𑁂, 𑀩𑀼𑀤𑁆𑀥𑀪𑀽𑀫𑀺𑀬𑁄𑀢𑀺? 𑀘𑀢𑀲𑁆𑀲𑁄 𑀔𑁄 𑀲𑀸𑀭𑀺𑀧𑀼𑀢𑁆𑀢, 𑀩𑀼𑀤𑁆𑀥𑀪𑀽𑀫𑀺𑀬𑁄. 𑀓𑀢𑀫𑀸 𑀘𑀢𑀲𑁆𑀲𑁄? 𑀉𑀲𑁆𑀲𑀸𑀳𑁄 𑀘 𑀳𑁄𑀢𑀺 𑀯𑀻𑀭𑀺𑀬𑀁, 𑀉𑀫𑁆𑀫𑀗𑁆𑀕𑁄 𑀘 𑀳𑁄𑀢𑀺 𑀧𑀜𑁆𑀜𑀸𑀪𑀸𑀯𑀦𑀸, 𑀅𑀯𑀢𑁆𑀣𑀸𑀦𑀜𑁆𑀘 𑀳𑁄𑀢𑀺 𑀅𑀥𑀺𑀝𑁆𑀞𑀸𑀦𑀁, 𑀳𑀺𑀢𑀘𑀭𑀺𑀬𑀸 𑀘 𑀳𑁄𑀢𑀺 𑀫𑁂𑀢𑁆𑀢𑀸𑀪𑀸𑀯𑀦𑀸. 𑀇𑀫𑀸 𑀔𑁄 𑀲𑀸𑀭𑀺𑀧𑀼𑀢𑁆𑀢, 𑀘𑀢𑀲𑁆𑀲𑁄 𑀩𑀼𑀤𑁆𑀥𑀪𑀽𑀫𑀺𑀬𑁄’’𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁩𑁪).

𑀢𑀣𑀸 𑀦𑁂𑀓𑁆𑀔𑀫𑁆𑀫𑀧𑀯𑀺𑀯𑁂𑀓𑀅𑀮𑁄𑀪𑀸𑀤𑁄𑀲𑀸𑀫𑁄𑀳𑀦𑀺𑀲𑁆𑀲𑀭𑀡𑀧𑁆𑀧𑀪𑁂𑀤𑀸 𑀘 𑀙 𑀅𑀚𑁆𑀛𑀸𑀲𑀬𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀦𑁂𑀓𑁆𑀔𑀫𑁆𑀫𑀚𑁆𑀛𑀸𑀲𑀬𑀸 𑀘 𑀩𑁄𑀥𑀺𑀲𑀢𑁆𑀢𑀸 𑀓𑀸𑀫𑁂𑀲𑀼, 𑀖𑀭𑀸𑀯𑀸𑀲𑁂 𑀘 𑀤𑁄𑀲𑀤𑀲𑁆𑀲𑀸𑀯𑀺𑀦𑁄, 𑀧𑀯𑀺𑀯𑁂𑀓𑀚𑁆𑀛𑀸𑀲𑀬𑀸 𑀘 𑀩𑁄𑀥𑀺𑀲𑀢𑁆𑀢𑀸 𑀲𑀗𑁆𑀕𑀡𑀺𑀓𑀸𑀬 𑀤𑁄𑀲𑀤𑀲𑁆𑀲𑀸𑀯𑀺𑀦𑁄. 𑀅𑀮𑁄𑀪…𑀧𑁂… 𑀮𑁄𑀪𑁂…𑀧𑁂… 𑀅𑀤𑁄𑀲…𑀧𑁂… 𑀤𑁄𑀲𑁂…𑀧𑁂… 𑀅𑀫𑁄𑀳…𑀧𑁂… 𑀫𑁄𑀳𑁂…𑀧𑁂… 𑀦𑀺𑀲𑁆𑀲𑀭𑀡…𑀧𑁂… 𑀲𑀩𑁆𑀩𑀪𑀯𑁂𑀲𑀼 𑀤𑁄𑀲𑀤𑀲𑁆𑀲𑀸𑀯𑀺𑀦𑁄’’𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁩𑁪; 𑀯𑀺𑀲𑀼𑀤𑁆𑀥𑀺. 𑁧.𑁪𑁯).

𑀢𑀲𑁆𑀫𑀸 ¶ 𑀏𑀢𑁂 𑀘 𑀙 𑀅𑀚𑁆𑀛𑀸𑀲𑀬𑀸𑀧𑀺 𑀧𑀸𑀭𑀫𑀻𑀦𑀁 𑀧𑀘𑁆𑀘𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀦 𑀳𑀺 𑀮𑁄𑀪𑀸𑀤𑀻𑀲𑀼 𑀆𑀤𑀻𑀦𑀯𑀤𑀲𑁆𑀲𑀦𑁂𑀦, 𑀅𑀮𑁄𑀪𑀸𑀤𑀻𑀦𑀁 𑀅𑀥𑀺𑀓𑀪𑀸𑀯𑁂𑀦 𑀘 𑀯𑀺𑀦𑀸 𑀤𑀸𑀦𑀸𑀤𑀺𑀧𑀸𑀭𑀫𑀺𑀬𑁄 𑀲𑀫𑁆𑀪𑀯𑀦𑁆𑀢𑀺. 𑀅𑀮𑁄𑀪𑀸𑀤𑀻𑀦𑀜𑁆𑀳𑀺 𑀅𑀥𑀺𑀓𑀪𑀸𑀯𑁂𑀦 𑀧𑀭𑀺𑀘𑁆𑀘𑀸𑀕𑀸𑀤𑀺𑀦𑀺𑀦𑁆𑀦𑀘𑀺𑀢𑁆𑀢𑀢𑀸, 𑀅𑀮𑁄𑀪𑀚𑁆𑀛𑀸𑀲𑀬𑀸𑀤𑀺𑀢𑀸 𑀘𑀸𑀢𑀺, 𑀬𑀣𑀸 𑀘𑁂𑀢𑁂, 𑀏𑀯𑀁 𑀤𑀸𑀦𑀚𑁆𑀛𑀸𑀲𑀬𑀢𑀸𑀤𑀬𑁄𑀧𑀺. 𑀬𑀣𑀸𑀳 𑁋

‘‘𑀓𑀢𑀺 𑀧𑀦 𑀪𑀦𑁆𑀢𑁂 𑀩𑁄𑀥𑀸𑀬 𑀘𑀭𑀦𑁆𑀢𑀸𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀚𑁆𑀛𑀸𑀲𑀬𑀸𑀢𑀺? 𑀤𑀲 𑀔𑁄 𑀲𑀸𑀭𑀺𑀧𑀼𑀢𑁆𑀢, 𑀩𑁄𑀥𑀸𑀬 𑀘𑀭𑀦𑁆𑀢𑀸𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀚𑁆𑀛𑀸𑀲𑀬𑀸. 𑀓𑀢𑀫𑁂 𑀤𑀲? 𑀤𑀸𑀦𑀚𑁆𑀛𑀸𑀲𑀬𑀸 𑀲𑀸𑀭𑀺𑀧𑀼𑀢𑁆𑀢, 𑀩𑁄𑀥𑀺𑀲𑀢𑁆𑀢𑀸 𑀫𑀘𑁆𑀙𑁂𑀭𑁂 𑀤𑁄𑀲𑀤𑀲𑁆𑀲𑀸𑀯𑀺𑀦𑁄. 𑀲𑀻𑀮…𑀧𑁂… 𑀅𑀲𑀁𑀯𑀭𑁂…𑀧𑁂… 𑀦𑁂𑀓𑁆𑀔𑀫𑁆𑀫…𑀧𑁂… 𑀓𑀸𑀫𑁂𑀲𑀼…𑀧𑁂… 𑀬𑀣𑀸𑀪𑀽𑀢𑀜𑀸𑀡…𑀧𑁂… 𑀯𑀺𑀘𑀺𑀓𑀺𑀘𑁆𑀙𑀸𑀬.…𑀧𑁂… 𑀯𑀻𑀭𑀺𑀬 ¶ …𑀧𑁂… 𑀓𑁄𑀲𑀚𑁆𑀚𑁂…𑀧𑁂… 𑀔𑀦𑁆𑀢𑀺…𑀧𑁂… 𑀅𑀓𑁆𑀔𑀦𑁆𑀢𑀺𑀬𑀁…𑀧𑁂… 𑀲𑀘𑁆𑀘…𑀧𑁂… 𑀯𑀺𑀲𑀁𑀯𑀸𑀤𑀦𑁂…𑀧𑁂… 𑀅𑀥𑀺𑀝𑁆𑀞𑀸𑀦…𑀧𑁂… 𑀅𑀦𑀥𑀺𑀝𑁆𑀞𑀸𑀦𑁂…𑀧𑁂… 𑀫𑁂𑀢𑁆𑀢𑀸…𑀧𑁂… 𑀩𑁆𑀬𑀸𑀧𑀸𑀤𑁂…𑀧𑁂… 𑀉𑀧𑁂𑀓𑁆𑀔𑀸…𑀧𑁂… 𑀲𑀼𑀔𑀤𑀼𑀓𑁆𑀔𑁂𑀲𑀼 𑀆𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄’’𑀢𑀺.

𑀏𑀢𑁂𑀲𑀼 𑀳𑀺 𑀫𑀘𑁆𑀙𑁂𑀭𑀅𑀲𑀁𑀯𑀭𑀓𑀸𑀫𑀯𑀺𑀘𑀺𑀓𑀺𑀘𑁆𑀙𑀸𑀓𑁄𑀲𑀚𑁆𑀚𑀅𑀓𑁆𑀔𑀦𑁆𑀢𑀺𑀯𑀺𑀲𑀁𑀯𑀸𑀤𑀦𑀅𑀦𑀥𑀺𑀝𑁆𑀞𑀸𑀦- 𑀩𑁆𑀬𑀸𑀧𑀸𑀤𑀲𑀼𑀔𑀤𑀼𑀓𑁆𑀔𑀲𑀗𑁆𑀔𑀸𑀢𑁂𑀲𑀼 𑀆𑀤𑀻𑀦𑀯𑀤𑀲𑁆𑀲𑀦𑀧𑀼𑀩𑁆𑀩𑀗𑁆𑀕𑀫𑀸 𑀤𑀸𑀦𑀸𑀤𑀺𑀦𑀺𑀦𑁆𑀦𑀘𑀺𑀢𑁆𑀢𑀢𑀸𑀲𑀗𑁆𑀔𑀸𑀢𑀸 𑀤𑀸𑀦𑀚𑁆𑀛𑀸𑀲𑀬𑀢𑀸𑀤𑀬𑁄 𑀤𑀸𑀦𑀸𑀤𑀺𑀧𑀸𑀭𑀫𑀻𑀦𑀁 𑀦𑀺𑀩𑁆𑀩𑀢𑁆𑀢𑀺𑀬𑀸 𑀧𑀘𑁆𑀘𑀬𑁄. 𑀢𑀣𑀸 𑀅𑀧𑀭𑀺𑀘𑁆𑀘𑀸𑀕𑀧𑀭𑀺𑀘𑁆𑀘𑀸𑀕𑀸𑀤𑀻𑀲𑀼 𑀬𑀣𑀸𑀓𑁆𑀓𑀫𑀁 𑀆𑀤𑀻𑀦𑀯𑀸𑀦𑀺𑀲𑀁𑀲𑀧𑀘𑁆𑀘𑀯𑁂𑀓𑁆𑀔𑀡𑀫𑁆𑀧𑀺 𑀤𑀸𑀦𑀸𑀤𑀺𑀧𑀸𑀭𑀫𑀻𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺.

𑀢𑀢𑁆𑀭𑀸𑀬𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀯𑀺𑀥𑀺 𑁋 𑀔𑁂𑀢𑁆𑀢𑀯𑀢𑁆𑀣𑀼𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀕𑁄𑀫𑀳𑀺𑀁 𑀲𑀤𑀸𑀲𑀻𑀤𑀸𑀲𑀧𑀼𑀢𑁆𑀢𑀤𑀸𑀭𑀸𑀤𑀺𑀧𑀭𑀺𑀕𑁆𑀕𑀳𑀩𑁆𑀬𑀸𑀲𑀢𑁆𑀢𑀘𑀺𑀢𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀔𑁂𑀢𑁆𑀢𑀸𑀤𑀻𑀦𑀁 𑀯𑀢𑁆𑀣𑀼𑀓𑀸𑀫𑀪𑀸𑀯𑁂𑀦 𑀩𑀳𑀼𑀧𑀢𑁆𑀣𑀦𑀻𑀬𑀪𑀸𑀯𑀢𑁄, 𑀭𑀸𑀚𑀘𑁄𑀭𑀸𑀤𑀺𑀲𑀸𑀥𑀸𑀭𑀡𑀪𑀸𑀯𑀢𑁄, 𑀯𑀺𑀯𑀸𑀤𑀸𑀥𑀺𑀝𑁆𑀞𑀸𑀦𑀢𑁄, 𑀲𑀧𑀢𑁆𑀢𑀓𑀭𑀡𑀢𑁄, 𑀦𑀺𑀲𑁆𑀲𑀸𑀭𑀢𑁄, 𑀧𑀝𑀺𑀮𑀸𑀪𑀧𑀭𑀺𑀧𑀸𑀮𑀦𑁂𑀲𑀼 𑀧𑀭𑀯𑀺𑀳𑁂𑀞𑀦𑀳𑁂𑀢𑀼𑀪𑀸𑀯𑀢𑁄, 𑀯𑀺𑀦𑀸𑀲𑀦𑀺𑀫𑀺𑀢𑁆𑀢𑀜𑁆𑀘𑀲𑁄𑀓𑀸𑀤𑀺𑀅𑀦𑁂𑀓𑀯𑀺𑀳𑀺𑀢𑀩𑁆𑀬𑀲𑀦𑀸𑀯𑀳𑀢𑁄 𑀢𑀤𑀸𑀲𑀢𑁆𑀢𑀺𑀦𑀺𑀤𑀸𑀦𑀜𑁆𑀘 𑀫𑀘𑁆𑀙𑁂𑀭𑀫𑀮𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑀸𑀦𑀁 𑀅𑀧𑀸𑀬𑀽𑀧𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄𑀢𑀺 𑀏𑀯𑀁 𑀯𑀺𑀯𑀺𑀥𑀯𑀺𑀧𑀼𑀮𑀸𑀦𑀢𑁆𑀣𑀸𑀯𑀳𑀸𑀦𑀺 𑀧𑀭𑀺𑀕𑁆𑀕𑀳𑀺𑀢𑀯𑀢𑁆𑀣𑀽𑀦𑀺 𑀦𑀸𑀫, 𑀢𑁂𑀲𑀁 𑀧𑀭𑀺𑀘𑁆𑀘𑀸𑀕𑁄𑀬𑁂𑀯𑁂𑀓𑁄 𑀲𑁄𑀢𑁆𑀣𑀺𑀪𑀸𑀯𑁄𑀢𑀺 𑀧𑀭𑀺𑀘𑁆𑀘𑀸𑀕𑁂 𑀅𑀧𑁆𑀧𑀫𑀸𑀤𑁄 𑀓𑀭𑀡𑀻𑀬𑁄.

𑀅𑀧𑀺𑀘 ‘‘𑀬𑀸𑀘𑀓𑁄 𑀬𑀸𑀘𑀫𑀸𑀦𑁄 𑀅𑀢𑁆𑀢𑀦𑁄 𑀕𑀼𑀬𑁆𑀳𑀲𑁆𑀲 𑀆𑀘𑀺𑀓𑁆𑀔𑀦𑀢𑁄 𑀫𑀬𑁆𑀳𑀁 𑀯𑀺𑀲𑁆𑀲𑀸𑀲𑀺𑀓𑁄’’𑀢𑀺 𑀘 ‘‘𑀧𑀳𑀸𑀬 𑀕𑀫𑀦𑀻𑀬𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀕𑀳𑁂𑀢𑁆𑀯𑀸 𑀧𑀭𑀮𑁄𑀓𑀁 𑀬𑀸𑀳𑀻𑀢𑀺𑀉𑀧𑀤𑀺𑀲𑀦𑀢𑁄 𑀫𑀬𑁆𑀳𑀁 𑀉𑀧𑀤𑁂𑀲𑀓𑁄’’𑀢𑀺 𑀘 ‘‘𑀆𑀤𑀺𑀢𑁆𑀢𑁂 𑀯𑀺𑀬 ¶ 𑀅𑀕𑀸𑀭𑁂 𑀫𑀭𑀡𑀕𑁆𑀕𑀺𑀦𑀸 𑀆𑀤𑀺𑀢𑁆𑀢𑁂 𑀮𑁄𑀓𑁂 𑀢𑀢𑁄 𑀫𑀬𑁆𑀳𑀁 𑀲𑀦𑁆𑀢𑀓𑀲𑁆𑀲 𑀅𑀧𑀳𑀭𑀡𑀢𑁄 𑀅𑀧𑀯𑀸𑀳𑀓𑀲𑀳𑀸𑀬𑁄’’𑀢𑀺 𑀘 ‘‘𑀅𑀧𑀯𑀸𑀳𑀺𑀢𑀲𑁆𑀲 𑀘𑀲𑁆𑀲 𑀅𑀚𑁆𑀛𑀸𑀧𑀦𑀦𑀺𑀓𑁆𑀔𑁂𑀧𑀝𑁆𑀞𑀸𑀦𑀪𑀽𑀢𑁄’’𑀢𑀺 𑀘 ‘‘𑀤𑀸𑀦𑀲𑀗𑁆𑀔𑀸𑀢𑁂 𑀓𑀮𑁆𑀬𑀸𑀡𑀓𑀫𑁆𑀫𑀲𑁆𑀫𑀺𑀁 𑀲𑀳𑀸𑀬𑀪𑀸𑀯𑀢𑁄, 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀦𑀁 𑀅𑀕𑁆𑀕𑀪𑀽𑀢𑀸𑀬 𑀧𑀭𑀫𑀤𑀼𑀮𑁆𑀮𑀪𑀸𑀬 𑀩𑀼𑀤𑁆𑀥𑀪𑀽𑀫𑀺𑀬𑀸 𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄 𑀘 𑀧𑀭𑀫𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁄’’𑀢𑀺 𑀘 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁.

𑀢𑀣𑀸 ‘‘𑀉𑀴𑀸𑀭𑁂 𑀓𑀫𑁆𑀫𑀦𑀺 𑀅𑀦𑁂𑀦𑀸𑀳𑀁 𑀲𑀫𑁆𑀪𑀸𑀯𑀺𑀢𑁄, 𑀢𑀲𑁆𑀫𑀸 𑀲𑀸 𑀲𑀫𑁆𑀪𑀸𑀯𑀦𑀸 𑀅𑀯𑀺𑀢𑀣𑀸 𑀓𑀸𑀢𑀩𑁆𑀩𑀸’’𑀢𑀺 𑀘 ‘‘𑀏𑀓𑀦𑁆𑀢𑀪𑁂𑀤𑀺𑀢𑀸𑀬 𑀚𑀻𑀯𑀺𑀢𑀲𑁆𑀲 𑀆𑀬𑀸𑀘𑀺𑀢𑁂𑀦𑀸𑀧𑀺 𑀫𑀬𑀸 𑀤𑀸𑀢𑀩𑁆𑀩𑀁, 𑀧𑀕𑁂𑀯 𑀬𑀸𑀘𑀺𑀢𑁂𑀦𑀸’’𑀢𑀺 𑀘 ‘‘𑀉𑀴𑀸𑀭𑀚𑁆𑀛𑀸𑀲𑀬𑁂𑀳𑀺 𑀕𑀯𑁂𑀲𑀺𑀢𑁆𑀯𑀸𑀧𑀺 𑀤𑀸𑀢𑀩𑁆𑀩𑁄, [𑀤𑀸𑀢𑀩𑁆𑀩𑀢𑁄 (𑀘𑀭𑀺𑀬𑀸. 𑀅𑀝𑁆𑀞. 𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸)] 𑀲𑀬𑀫𑁂𑀯𑀸𑀕𑀢𑁄 𑀫𑀫 𑀧𑀼𑀜𑁆𑀜𑁂𑀦𑀸’’𑀢𑀺 𑀘 ‘‘𑀬𑀸𑀘𑀓𑀲𑁆𑀲 𑀤𑀸𑀦𑀸𑀧𑀤𑁂𑀲𑁂𑀦 𑀫𑀬𑁆𑀳𑀫𑁂𑀯𑀸𑀬𑀫𑀦𑀼𑀕𑁆𑀕𑀳𑁄’’𑀢𑀺 𑀘 ‘‘𑀅𑀳𑀁 𑀯𑀺𑀬 𑀅𑀬𑀁 𑀲𑀩𑁆𑀩𑁄𑀧𑀺 𑀮𑁄𑀓𑁄 𑀫𑀬𑀸 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑁄’’𑀢𑀺 𑀘 ‘‘𑀅𑀲𑀢𑀺 𑀬𑀸𑀘𑀓𑁂 𑀓𑀣𑀁 𑀫𑀬𑁆𑀳𑀁 𑀤𑀸𑀦𑀧𑀸𑀭𑀫𑀻 𑀧𑀽𑀭𑁂𑀬𑁆𑀬𑀸’’𑀢𑀺 𑀘 ‘‘𑀬𑀸𑀘𑀓𑀸𑀦𑀫𑁂𑀯𑀢𑁆𑀣𑀸𑀬 𑀫𑀬𑀸 𑀲𑀩𑁆𑀩𑁄𑀧𑀺 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑁄’’𑀢𑀺 𑀘 ‘‘𑀅𑀬𑀸𑀘𑀺𑀢𑁆𑀯𑀸𑀧𑀺 𑀫𑀁 𑀫𑀫 𑀲𑀦𑁆𑀢𑀓𑀁 𑀬𑀸𑀘𑀓𑀸 𑀓𑀤𑀸 𑀲𑀬𑀫𑁂𑀯 𑀕𑀡𑁆𑀳𑁂𑀬𑁆𑀬𑀼’’𑀦𑁆𑀢𑀺 𑀘 ¶ ‘‘𑀓𑀣𑀫𑀳𑀁 𑀬𑀸𑀘𑀓𑀸𑀦𑀁 𑀧𑀺𑀬𑁄 𑀘𑀲𑁆𑀲𑀁 𑀫𑀦𑀸𑀧𑁄’’𑀢𑀺 𑀘 ‘‘𑀓𑀣𑀁 𑀯𑀸 𑀢𑁂 𑀫𑀬𑁆𑀳𑀁 𑀧𑀺𑀬𑀸 𑀘𑀲𑁆𑀲𑀼 𑀫𑀦𑀸𑀧𑀸’’𑀢𑀺 𑀘 ‘‘𑀓𑀣𑀁 𑀯𑀸𑀳𑀁 𑀤𑀤𑀫𑀸𑀦𑁄 𑀤𑀢𑁆𑀯𑀸𑀧𑀺 𑀘 𑀅𑀢𑁆𑀢𑀫𑀦𑁄 𑀅𑀲𑁆𑀲𑀁 𑀧𑀫𑀼𑀤𑀺𑀢𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀚𑀸𑀢𑁄’’𑀢𑀺 𑀘 ‘‘𑀓𑀣𑀁 𑀯𑀸 𑀫𑁂 𑀬𑀸𑀘𑀓𑀸 𑀪𑀯𑁂𑀬𑁆𑀬𑀼𑀁, 𑀉𑀴𑀸𑀭𑁄 𑀘 𑀤𑀸𑀦𑀚𑁆𑀛𑀸𑀲𑀬𑁄’’𑀢𑀺 𑀘 ‘‘𑀓𑀣𑀁 𑀯𑀸𑀳𑀫𑀬𑀸𑀘𑀺𑀢𑁄 𑀏𑀯 𑀬𑀸𑀘𑀓𑀸𑀦𑀁 𑀳𑀤𑀬𑀫𑀜𑁆𑀜𑀸𑀬 𑀤𑀤𑁂𑀬𑁆𑀬’’𑀦𑁆𑀢𑀺 ‘‘𑀲𑀢𑀺 𑀥𑀦𑁂, 𑀬𑀸𑀘𑀓𑁂 𑀘 𑀅𑀧𑀭𑀺𑀘𑁆𑀘𑀸𑀕𑁄 𑀫𑀳𑀢𑀻 𑀫𑀬𑁆𑀳𑀁 𑀯𑀜𑁆𑀘𑀦𑀸’’𑀢𑀺 𑀘 ‘‘𑀓𑀣𑀫𑀳𑀁 𑀅𑀢𑁆𑀢𑀦𑁄 𑀅𑀗𑁆𑀕𑀸𑀦𑀺, 𑀚𑀻𑀯𑀺𑀢𑀜𑁆𑀘𑀸𑀧𑀺 𑀧𑀭𑀺𑀘𑁆𑀘𑀚𑁂𑀬𑁆𑀬’’𑀦𑁆𑀢𑀺 𑀘 𑀘𑀸𑀕𑀦𑀺𑀦𑁆𑀦𑀢𑀸 𑀉𑀧𑀝𑁆𑀞𑀧𑁂𑀢𑀩𑁆𑀩𑀸.

𑀅𑀧𑀺𑀘 ‘‘𑀅𑀢𑁆𑀣𑁄 𑀦𑀸𑀫𑀸𑀬𑀁 𑀦𑀺𑀭𑀧𑁂𑀓𑁆𑀔𑀁 𑀤𑀸𑀬𑀓𑀫𑀦𑀼𑀕𑀘𑁆𑀙𑀢𑀺 𑀬𑀣𑀸 𑀢𑀁 𑀦𑀺𑀭𑀧𑁂𑀓𑁆𑀔𑀁 𑀔𑁂𑀧𑀓𑀁 𑀓𑀺𑀝𑀓𑁄’’𑀢𑀺 𑀅𑀢𑁆𑀣𑁂 𑀦𑀺𑀭𑀧𑁂𑀓𑁆𑀔𑀢𑀸𑀬 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁. 𑀬𑀸𑀘𑀫𑀸𑀦𑁄 𑀧𑀦 𑀬𑀤𑀺 𑀧𑀺𑀬𑀧𑀼𑀕𑁆𑀕𑀮𑁄 𑀳𑁄𑀢𑀺 ‘‘𑀧𑀺𑀬𑁄 𑀫𑀁 𑀬𑀸𑀘𑀢𑀻’’𑀢𑀺 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁. 𑀅𑀣 𑀉𑀤𑀸𑀲𑀻𑀦𑀧𑀼𑀕𑁆𑀕𑀮𑁄 𑀳𑁄𑀢𑀺 ‘‘𑀅𑀬𑀁 𑀫𑀁 𑀬𑀸𑀘𑀫𑀸𑀦𑁄 𑀅𑀤𑁆𑀥𑀸 𑀇𑀫𑀺𑀦𑀸 𑀧𑀭𑀺𑀘𑁆𑀘𑀸𑀕𑁂𑀦 𑀫𑀺𑀢𑁆𑀢𑁄 𑀳𑁄𑀢𑀻’’𑀢𑀺 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁. 𑀤𑀤𑀦𑁆𑀢𑁄 𑀳𑀺 𑀬𑀸𑀘𑀓𑀸𑀦𑀁 𑀧𑀺𑀬𑁄 𑀳𑁄𑀢𑀻𑀢𑀺. 𑀅𑀣 𑀧𑀦 𑀯𑁂𑀭𑀻𑀧𑀼𑀕𑁆𑀕𑀮𑁄 𑀬𑀸𑀘𑀢𑀺, ‘‘𑀧𑀘𑁆𑀘𑀢𑁆𑀣𑀺𑀓𑁄 𑀫𑀁 𑀬𑀸𑀘𑀢𑀺, 𑀅𑀬𑀁 𑀫𑀁 𑀬𑀸𑀘𑀫𑀸𑀦𑁄 𑀅𑀤𑁆𑀥𑀸 𑀇𑀫𑀺𑀦𑀸 𑀧𑀭𑀺𑀘𑁆𑀘𑀸𑀕𑁂𑀦 𑀯𑁂𑀭𑀻𑀧𑀺 𑀧𑀺𑀬𑁄 𑀫𑀺𑀢𑁆𑀢𑁄 𑀳𑁄𑀢𑀻’’𑀢𑀺 𑀯𑀺𑀲𑁂𑀲𑀢𑁄 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁. 𑀏𑀯𑀁 ¶ 𑀧𑀺𑀬𑀧𑀼𑀕𑁆𑀕𑀮𑁂 𑀯𑀺𑀬 𑀫𑀚𑁆𑀛𑀢𑁆𑀢𑀯𑁂𑀭𑀻𑀧𑀼𑀕𑁆𑀕𑀮𑁂𑀲𑀼𑀧𑀺 𑀫𑁂𑀢𑁆𑀢𑀸𑀧𑀼𑀩𑁆𑀩𑀗𑁆𑀕𑀫𑀁 𑀓𑀭𑀼𑀡𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀯 𑀤𑀸𑀢𑀩𑁆𑀩𑀁.

𑀲𑀘𑁂 𑀧𑀦𑀲𑁆𑀲 𑀘𑀺𑀭𑀓𑀸𑀮𑀁 𑀧𑀭𑀺𑀪𑀸𑀯𑀺𑀢𑀢𑁆𑀢𑀸 𑀮𑁄𑀪𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀯𑀺𑀲𑀬𑀸 𑀮𑁄𑀪𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁂𑀦 𑀩𑁄𑀥𑀺𑀲𑀢𑁆𑀢𑀧𑀝𑀺𑀜𑁆𑀜𑁂𑀦 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 ‘‘𑀦𑀦𑀼 𑀢𑀬𑀸 𑀲𑀧𑁆𑀧𑀼𑀭𑀺𑀲 𑀲𑀫𑁆𑀩𑁄𑀥𑀸𑀬 𑀅𑀪𑀺𑀦𑀻𑀳𑀸𑀭𑀁 𑀓𑀭𑁄𑀦𑁆𑀢𑁂𑀦 𑀲𑀩𑁆𑀩𑀲𑀢𑁆𑀢𑀸𑀦𑀫𑀼𑀧𑀓𑀸𑀭𑀸𑀬 𑀅𑀬𑀁 𑀓𑀸𑀬𑁄 𑀦𑀺𑀲𑁆𑀲𑀝𑁆𑀞𑁄, 𑀢𑀧𑁆𑀧𑀭𑀺𑀘𑁆𑀘𑀸𑀕𑀫𑀬𑀜𑁆𑀘 𑀧𑀼𑀜𑁆𑀜𑀁, 𑀢𑀢𑁆𑀣 𑀦𑀸𑀫 𑀢𑁂 𑀩𑀸𑀳𑀺𑀭𑁂𑀧𑀺 𑀯𑀢𑁆𑀣𑀼𑀲𑁆𑀫𑀺𑀁 𑀅𑀪𑀺𑀲𑀗𑁆𑀕𑀧𑁆𑀧𑀯𑀢𑁆𑀢𑀺 𑀳𑀢𑁆𑀣𑀺𑀲𑀺𑀦𑀸𑀦𑀲𑀤𑀺𑀲𑀻 𑀳𑁄𑀢𑀺, 𑀢𑀲𑁆𑀫𑀸 𑀢𑀬𑀸 𑀦 𑀓𑀢𑁆𑀣𑀘𑀺 𑀅𑀪𑀺𑀲𑀗𑁆𑀕𑁄 𑀉𑀧𑁆𑀧𑀸𑀤𑁂𑀢𑀩𑁆𑀩𑁄. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀫𑀳𑀢𑁄 𑀪𑁂𑀲𑀚𑁆𑀚𑀭𑀼𑀓𑁆𑀔𑀲𑁆𑀲 𑀢𑀺𑀝𑁆𑀞𑀢𑁄 𑀫𑀽𑀮𑀁 𑀫𑀽𑀮𑀢𑁆𑀣𑀺𑀓𑀸 𑀳𑀭𑀦𑁆𑀢𑀺, 𑀧𑀧𑀝𑀺𑀓𑀁, 𑀢𑀘𑀁, 𑀔𑀦𑁆𑀥𑀁, 𑀯𑀺𑀝𑀧𑀁, 𑀲𑀸𑀔𑀁, 𑀧𑀮𑀸𑀲𑀁, 𑀧𑀼𑀧𑁆𑀨𑀁, 𑀨𑀮𑀁 𑀨𑀮𑀢𑁆𑀣𑀺𑀓𑀸 𑀳𑀭𑀦𑁆𑀢𑀺, 𑀦 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 ‘𑀫𑀬𑁆𑀳𑀁 𑀲𑀦𑁆𑀢𑀓𑀁 𑀏𑀢𑁂 𑀳𑀭𑀦𑁆𑀢𑀻’𑀢𑀺 𑀯𑀺𑀢𑀓𑁆𑀓𑀲𑀫𑀼𑀤𑀸𑀘𑀸𑀭𑁄 𑀳𑁄𑀢𑀺, 𑀏𑀯𑀫𑁂𑀯 𑀲𑀩𑁆𑀩𑀮𑁄𑀓𑀳𑀺𑀢𑀸𑀬 𑀉𑀲𑁆𑀲𑀼𑀓𑁆𑀓𑀫𑀸𑀧𑀚𑁆𑀚𑀦𑁆𑀢𑁂𑀦 𑀫𑀬𑀸 𑀫𑀳𑀸𑀤𑀼𑀓𑁆𑀔𑁂 𑀅𑀓𑀢𑀜𑁆𑀜𑀼𑀓𑁂 𑀦𑀺𑀘𑁆𑀘𑀸𑀲𑀼𑀘𑀺𑀫𑁆𑀳𑀺 𑀓𑀸𑀬𑁂 𑀧𑀭𑁂𑀲𑀁 𑀉𑀧𑀓𑀸𑀭𑀸𑀬 𑀯𑀺𑀦𑀺𑀬𑀼𑀚𑁆𑀚𑀫𑀸𑀦𑁂 𑀅𑀡𑀼𑀫𑀢𑁆𑀢𑁄𑀧𑀺 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁄 𑀦 𑀉𑀧𑁆𑀧𑀸𑀤𑁂𑀢𑀩𑁆𑀩𑁄. 𑀓𑁄 𑀯𑀸 𑀏𑀢𑁆𑀣 𑀯𑀺𑀲𑁂𑀲𑁄 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 𑀏𑀓𑀦𑁆𑀢𑀪𑁂𑀤𑀦𑀯𑀺𑀓𑀺𑀭𑀡𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑁂𑀲𑀼. 𑀓𑁂𑀯𑀮𑀁 𑀧𑀦 𑀲𑀫𑁆𑀫𑁄𑀳𑀯𑀺𑀚𑀫𑁆𑀪𑀺𑀢𑀫𑁂𑀢𑀁, 𑀬𑀤𑀺𑀤𑀁 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀅𑀪𑀺𑀦𑀺𑀯𑁂𑀲𑁄, 𑀢𑀲𑁆𑀫𑀸 𑀩𑀸𑀳𑀺𑀭𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 𑀯𑀺𑀬 𑀅𑀚𑁆𑀛𑀢𑁆𑀢𑀺𑀓𑁂𑀲𑀼𑀧𑀺 𑀓𑀭𑀘𑀭𑀡𑀦𑀬𑀦𑀸𑀤𑀻𑀲𑀼, 𑀫𑀁𑀲𑀸𑀤𑀻𑀲𑀼 𑀘 𑀅𑀦𑀧𑁂𑀓𑁆𑀔𑁂𑀦 𑀳𑀼𑀢𑁆𑀯𑀸 ‘𑀢𑀁 𑀢𑀤𑀢𑁆𑀣𑀺𑀓𑀸 𑀳𑀭𑀦𑁆𑀢𑀽’𑀢𑀺 𑀦𑀺𑀲𑁆𑀲𑀝𑁆𑀞𑀘𑀺𑀢𑁆𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀏𑀯𑀁 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑁄 𑀘𑀲𑁆𑀲 𑀲𑀫𑁆𑀩𑁄𑀥𑀸𑀬 𑀧𑀳𑀺𑀢𑀢𑁆𑀢𑀲𑁆𑀲 𑀓𑀸𑀬𑀚𑀻𑀯𑀺𑀢𑁂𑀲𑀼 𑀦𑀺𑀭𑀧𑁂𑀓𑁆𑀔𑀲𑁆𑀲 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀸𑀦𑀺 ¶ 𑀲𑀼𑀯𑀺𑀲𑀼𑀤𑁆𑀥𑀸𑀦𑀺 𑀳𑁄𑀦𑁆𑀢𑀺, 𑀲𑁄 𑀯𑀺𑀲𑀼𑀤𑁆𑀥𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀦𑁆𑀢𑁄 𑀯𑀺𑀲𑀼𑀤𑁆𑀥𑀸𑀚𑀻𑀯𑁄 𑀜𑀸𑀬𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑁄 𑀆𑀬𑀸𑀧𑀸𑀬𑀼𑀧𑀸𑀬𑀓𑁄𑀲𑀮𑁆𑀮𑀲𑀫𑀦𑁆𑀦𑀸𑀕𑀫𑁂𑀦 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑁂𑀦, 𑀅𑀪𑀬𑀤𑀸𑀦𑀲𑀤𑁆𑀥𑀫𑁆𑀫𑀤𑀸𑀦𑁂𑀳𑀺 𑀘 𑀲𑀩𑁆𑀩𑀲𑀢𑁆𑀢𑁂 𑀅𑀦𑀼𑀕𑁆𑀕𑀡𑁆𑀳𑀺𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺, 𑀅𑀬𑀁 𑀢𑀸𑀯 𑀤𑀸𑀦𑀧𑀸𑀭𑀫𑀺𑀬𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀬𑁄.

𑀲𑀻𑀮𑀧𑀸𑀭𑀫𑀺𑀬𑀁 𑀧𑀦 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 𑁋 ‘‘𑀇𑀤𑀜𑁆𑀳𑀺 𑀲𑀻𑀮𑀁 𑀦𑀸𑀫 𑀕𑀗𑁆𑀕𑁄𑀤𑀓𑀸𑀤𑀻𑀳𑀺 𑀯𑀺𑀲𑁄𑀥𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀲𑁆𑀲 𑀤𑁄𑀲𑀫𑀮𑀲𑁆𑀲 𑀯𑀺𑀓𑁆𑀔𑀸𑀮𑀦𑀚𑀮𑀁, 𑀳𑀭𑀺𑀘𑀦𑁆𑀤𑀦𑀸𑀤𑀻𑀳𑀺 𑀯𑀺𑀦𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀲𑁆𑀲 𑀭𑀸𑀕𑀸𑀤𑀺𑀧𑀭𑀺𑀴𑀸𑀳𑀲𑁆𑀲 𑀯𑀺𑀦𑀬𑀦𑀁, 𑀫𑀼𑀢𑁆𑀢𑀸𑀳𑀸𑀭𑀫𑀓𑀼𑀝𑀓𑀼𑀡𑁆𑀟𑀮𑀸𑀤𑀻𑀳𑀺 𑀧𑀘𑀼𑀭𑀚𑀦𑀸𑀮𑀗𑁆𑀓𑀸𑀭𑁂𑀳𑀺 𑀅𑀲𑀸𑀥𑀸𑀭𑀡𑁄 𑀲𑀸𑀥𑀽𑀦𑀫𑀮𑀗𑁆𑀓𑀸𑀭𑀯𑀺𑀲𑁂𑀲𑁄, 𑀲𑀩𑁆𑀩𑀤𑀺𑀲𑀸𑀯𑀸𑀬𑀦𑀓𑁄 𑀅𑀢𑀺𑀓𑀺𑀢𑁆𑀢𑀺𑀫𑁄 [𑀲𑀩𑁆𑀩𑀤𑀺𑀲𑀸𑀯𑀸𑀬𑀦𑀢𑁄 𑀅𑀓𑀺𑀢𑁆𑀢𑀺𑀫𑁄 (𑀘𑀭𑀺𑀬𑀸. 𑀅𑀝𑁆𑀞. 𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸; 𑀤𑀻. 𑀦𑀺. 𑀝𑀻. 𑁧.𑁭)] 𑀲𑀩𑁆𑀩𑀓𑀸𑀮𑀸𑀦𑀼𑀭𑀽𑀧𑁄 ¶ 𑀘 𑀲𑀼𑀭𑀪𑀺𑀕𑀦𑁆𑀥𑁄, 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀤𑀻𑀳𑀺, 𑀤𑁂𑀯𑀢𑀸𑀳𑀺 𑀘 𑀯𑀦𑁆𑀤𑀦𑀻𑀬𑀸𑀤𑀺𑀪𑀸𑀯𑀸𑀯𑀳𑀦𑀢𑁄 𑀧𑀭𑀫𑁄 𑀯𑀲𑀻𑀓𑀭𑀡𑀫𑀦𑁆𑀢𑁄, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀺𑀤𑁂𑀯𑀮𑁄𑀓𑀸𑀭𑁄𑀳𑀡𑀲𑁄𑀧𑀸𑀦𑀧𑀦𑁆𑀢𑀺, 𑀛𑀸𑀦𑀸𑀪𑀺𑀜𑁆𑀜𑀸𑀦𑀁 𑀅𑀥𑀺𑀕𑀫𑀽𑀧𑀸𑀬𑁄, 𑀦𑀺𑀩𑁆𑀩𑀸𑀦𑀫𑀳𑀸𑀦𑀕𑀭𑀲𑁆𑀲 𑀲𑀫𑁆𑀧𑀸𑀧𑀓𑀫𑀕𑁆𑀕𑁄, 𑀲𑀸𑀯𑀓𑀩𑁄𑀥𑀺𑀧𑀘𑁆𑀘𑁂𑀓𑀩𑁄𑀥𑀺𑀲𑀫𑁆𑀫𑀸𑀲𑀫𑁆𑀩𑁄𑀥𑀻𑀦𑀁 𑀧𑀢𑀺𑀝𑁆𑀞𑀸𑀦𑀪𑀽𑀫𑀺, 𑀬𑀁 𑀬𑀁 𑀯𑀸 𑀧𑀦𑀺𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀁, 𑀢𑀲𑁆𑀲 𑀢𑀲𑁆𑀲 𑀲𑀫𑀺𑀚𑁆𑀛𑀦𑀽𑀧𑀸𑀬𑀪𑀸𑀯𑀢𑁄 𑀘𑀺𑀦𑁆𑀢𑀸𑀫𑀡𑀺𑀓𑀧𑁆𑀧𑀭𑀼𑀓𑁆𑀔𑀸𑀤𑀺𑀓𑁂 𑀘 𑀅𑀢𑀺𑀲𑁂𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀇𑀚𑁆𑀛𑀢𑀺 𑀪𑀺𑀓𑁆𑀔𑀯𑁂, 𑀲𑀻𑀮𑀯𑀢𑁄 𑀘𑁂𑀢𑁄𑀧𑀡𑀺𑀥𑀺 𑀯𑀺𑀲𑀼𑀤𑁆𑀥𑀢𑁆𑀢𑀸’’𑀢𑀺 (𑀤𑀻. 𑀦𑀺. 𑁩.𑁩𑁩𑁭; 𑀲𑀁. 𑀦𑀺. 𑁪.𑁩𑁫𑁨; 𑀅. 𑀦𑀺. 𑁮.𑁩𑁫). 𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀆𑀓𑀗𑁆𑀔𑁂𑀬𑁆𑀬 𑀘𑁂 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑁄 𑀘 𑀅𑀲𑁆𑀲𑀁 𑀫𑀦𑀸𑀧𑁄 𑀘 𑀕𑀭𑀼 𑀘 𑀪𑀸𑀯𑀦𑀻𑀬𑁄 𑀘𑀸𑀢𑀺, 𑀲𑀻𑀮𑁂𑀲𑁆𑀯𑁂𑀯𑀲𑁆𑀲 𑀧𑀭𑀺𑀧𑀽𑀭𑀓𑀸𑀭𑀻’’𑀢𑀺𑀆𑀤𑀺 (𑀫. 𑀦𑀺. 𑁧.𑁬𑁫). 𑀢𑀣𑀸 ‘‘𑀅𑀯𑀺𑀧𑁆𑀧𑀝𑀺𑀲𑀸𑀭𑀢𑁆𑀣𑀸𑀦𑀺 𑀔𑁄 𑀆𑀦𑀦𑁆𑀤 𑀓𑀼𑀲𑀮𑀸𑀦𑀺 𑀲𑀻𑀮𑀸𑀦𑀻’’𑀢𑀺, (𑀅. 𑀦𑀺. 𑁧𑁦.𑁧; 𑁧𑁧.𑁧) ‘‘𑀧𑀜𑁆𑀘𑀺𑀫𑁂 𑀕𑀳𑀧𑀢𑀬𑁄, 𑀆𑀦𑀺𑀲𑀁𑀲𑀸 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀤𑀸𑀬𑀸’’𑀢𑀺𑀆𑀤𑀺𑀲𑀼𑀢𑁆𑀢𑀸𑀦𑀜𑁆𑀘 (𑀤𑀻. 𑀦𑀺. 𑁨.𑁧𑁫𑁦; 𑀅. 𑀦𑀺. 𑁫.𑁨𑁧𑁩; 𑀉𑀤𑀸. 𑁭𑁬; 𑀫𑀳𑀸𑀯. 𑁩𑁮𑁫) 𑀯𑀲𑁂𑀦 𑀲𑀻𑀮𑀕𑀼𑀡𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸. 𑀢𑀣𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀸𑀤𑀻𑀦𑀁 (𑀅. 𑀦𑀺. 𑁭.𑁭𑁨) 𑀯𑀲𑁂𑀦 𑀲𑀻𑀮𑀯𑀺𑀭𑀳𑁂 𑀆𑀤𑀻𑀦𑀯𑀸.

𑀅𑀧𑀺𑀘 𑀧𑀻𑀢𑀺𑀲𑁄𑀫𑀦𑀲𑁆𑀲𑀦𑀺𑀫𑀺𑀢𑁆𑀢𑀢𑁄, 𑀅𑀢𑁆𑀢𑀸𑀦𑀼𑀯𑀸𑀤𑀧𑀭𑀸𑀦𑀼𑀯𑀸𑀤𑀤𑀡𑁆𑀟𑀤𑀼𑀕𑁆𑀕𑀢𑀺𑀪𑀬𑀸𑀪𑀸𑀯𑀢𑁄, 𑀯𑀺𑀜𑁆𑀜𑀽𑀳𑀺 𑀧𑀸𑀲𑀁𑀲𑀪𑀸𑀯𑀢𑁄, 𑀅𑀯𑀺𑀧𑁆𑀧𑀝𑀺𑀲𑀸𑀭𑀳𑁂𑀢𑀼𑀢𑁄, 𑀧𑀭𑀫𑀲𑁄𑀢𑁆𑀣𑀺𑀝𑁆𑀞𑀸𑀦𑀢𑁄, 𑀓𑀼𑀮𑀲𑀸𑀧𑀢𑁂𑀬𑁆𑀬𑀸𑀥𑀺𑀧𑀢𑁂𑀬𑁆𑀬𑀚𑀻𑀯𑀺𑀢𑀭𑀽𑀧𑀝𑁆𑀞𑀸𑀦𑀩𑀦𑁆𑀥𑀼𑀫𑀺𑀢𑁆𑀢𑀲𑀫𑁆𑀧𑀢𑁆𑀢𑀻𑀦𑀁 𑀅𑀢𑀺𑀲𑀬𑀦𑀢𑁄 𑀘 𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁. 𑀲𑀻𑀮𑀯𑀢𑁄 𑀳𑀺 𑀅𑀢𑁆𑀢𑀦𑁄 𑀲𑀻𑀮𑀲𑀫𑁆𑀧𑀤𑀸𑀳𑁂𑀢𑀼 𑀫𑀳𑀦𑁆𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺 ‘‘𑀓𑀢𑀁 𑀯𑀢 𑀫𑀬𑀸 𑀓𑀼𑀲𑀮𑀁, 𑀓𑀢𑀁 𑀓𑀮𑁆𑀬𑀸𑀡𑀁, 𑀓𑀢𑀁 𑀪𑀻𑀭𑀼𑀢𑁆𑀢𑀸𑀡’’𑀦𑁆𑀢𑀺.

𑀢𑀣𑀸 ¶ 𑀲𑀻𑀮𑀯𑀢𑁄 𑀅𑀢𑁆𑀢𑀸 𑀦 𑀉𑀧𑀯𑀤𑀢𑀺, 𑀦 𑀘 𑀧𑀭𑁂 𑀯𑀺𑀜𑁆𑀜𑀽, 𑀤𑀡𑁆𑀟𑀤𑀼𑀕𑁆𑀕𑀢𑀺𑀪𑀬𑀸𑀦𑀜𑁆𑀘 𑀲𑀫𑁆𑀪𑀯𑁄𑀬𑁂𑀯 𑀦𑀢𑁆𑀣𑀺, ‘‘𑀲𑀻𑀮𑀯𑀸 𑀧𑀼𑀭𑀺𑀲𑀧𑀼𑀕𑁆𑀕𑀮𑁄 𑀓𑀮𑁆𑀬𑀸𑀡𑀥𑀫𑁆𑀫𑁄’’𑀢𑀺 𑀯𑀺𑀜𑁆𑀜𑀽𑀦𑀁 𑀧𑀸𑀲𑀁𑀲𑁄 𑀘 𑀳𑁄𑀢𑀺. 𑀢𑀣𑀸 𑀲𑀻𑀮𑀯𑀢𑁄 𑀬𑁆𑀯𑀸𑀬𑀁 ‘‘𑀓𑀢𑀁 𑀯𑀢 𑀫𑀬𑀸 𑀧𑀸𑀧𑀁, 𑀓𑀢𑀁 𑀮𑀼𑀤𑁆𑀤𑀁, 𑀓𑀢𑀁 𑀓𑀺𑀩𑁆𑀩𑀺𑀲’’𑀦𑁆𑀢𑀺 𑀤𑀼𑀲𑁆𑀲𑀻𑀮𑀲𑁆𑀲 𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀦 𑀳𑁄𑀢𑀺. 𑀲𑀻𑀮𑀜𑁆𑀘 𑀦𑀸𑀫𑁂𑀢𑀁 𑀅𑀧𑁆𑀧𑀫𑀸𑀤𑀸𑀥𑀺𑀝𑁆𑀞𑀸𑀦𑀢𑁄, 𑀪𑁄𑀕𑀩𑁆𑀬𑀲𑀦𑀸𑀤𑀺𑀧𑀭𑀺𑀳𑀸𑀭𑀫𑀼𑀔𑁂𑀦 𑀫𑀳𑀢𑁄 𑀅𑀢𑁆𑀣𑀲𑁆𑀲 𑀲𑀸𑀥𑀦𑀢𑁄, 𑀫𑀗𑁆𑀕𑀮𑀪𑀸𑀯𑀢𑁄, 𑀧𑀭𑀫𑀁 𑀲𑁄𑀢𑁆𑀣𑀺𑀝𑁆𑀞𑀸𑀦𑀁. 𑀦𑀺𑀳𑀻𑀦𑀚𑀘𑁆𑀘𑁄𑀧𑀺 𑀲𑀻𑀮𑀯𑀸 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀤𑀻𑀦𑀁 𑀧𑀽𑀚𑀦𑀻𑀬𑁄 𑀳𑁄𑀢𑀻𑀢𑀺 𑀓𑀼𑀮𑀲𑀫𑁆𑀧𑀢𑁆𑀢𑀺𑀁 𑀅𑀢𑀺𑀲𑁂𑀢𑀺 𑀲𑀻𑀮𑀲𑀫𑁆𑀧𑀤𑀸, ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺 ¶ 𑀫𑀳𑀸𑀭𑀸𑀚, 𑀇𑀥 𑀢𑁂 𑀅𑀲𑁆𑀲 𑀤𑀸𑀲𑁄 𑀓𑀫𑁆𑀫𑀓𑀭𑁄’’𑀢𑀺𑀆𑀤𑀺 (𑀤𑀻. 𑀦𑀺. 𑁧.𑁧𑁮𑁩) 𑀯𑀓𑁆𑀔𑀫𑀸𑀦𑀲𑀸𑀫𑀜𑁆𑀜𑀲𑀼𑀢𑁆𑀢𑀯𑀘𑀦𑀜𑁆𑀘𑁂𑀢𑁆𑀣 𑀲𑀸𑀥𑀓𑀁, 𑀘𑁄𑀭𑀸𑀤𑀻𑀳𑀺 𑀅𑀲𑀸𑀥𑀸𑀭𑀡𑀢𑁄, 𑀧𑀭𑀮𑁄𑀓𑀸𑀦𑀼𑀕𑀫𑀦𑀢𑁄, 𑀫𑀳𑀧𑁆𑀨𑀮𑀪𑀸𑀯𑀢𑁄, 𑀲𑀫𑀣𑀸𑀤𑀺𑀕𑀼𑀡𑀸𑀥𑀺𑀝𑁆𑀞𑀸𑀦𑀢𑁄 𑀘 𑀩𑀸𑀳𑀺𑀭𑀥𑀦𑀁 𑀲𑀸𑀧𑀢𑁂𑀬𑁆𑀬𑀁 𑀅𑀢𑀺𑀲𑁂𑀢𑀺 𑀲𑀻𑀮𑀁. 𑀧𑀭𑀫𑀲𑁆𑀲 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀔𑀢𑁆𑀢𑀺𑀬𑀸𑀤𑀻𑀦𑀫𑀺𑀲𑁆𑀲𑀭𑀺𑀬𑀁 𑀅𑀢𑀺𑀲𑁂𑀢𑀺 𑀲𑀻𑀮𑀁. 𑀲𑀻𑀮𑀦𑀺𑀫𑀺𑀢𑁆𑀢𑀜𑁆𑀳𑀺 𑀢𑀁𑀢𑀁𑀲𑀢𑁆𑀢𑀦𑀺𑀓𑀸𑀬𑁂𑀲𑀼 𑀲𑀢𑁆𑀢𑀸𑀦𑀫𑀺𑀲𑁆𑀲𑀭𑀺𑀬𑀁, 𑀯𑀲𑁆𑀲𑀲𑀢𑀸𑀤𑀺𑀤𑀻𑀖𑀧𑁆𑀧𑀫𑀸𑀡𑀢𑁄 𑀘 𑀚𑀻𑀯𑀺𑀢𑀢𑁄 𑀏𑀓𑀸𑀳𑀫𑁆𑀧𑀺 𑀲𑀻𑀮𑀯𑀢𑁄 𑀚𑀻𑀯𑀺𑀢𑀲𑁆𑀲 𑀯𑀺𑀲𑀺𑀝𑁆𑀞𑀢𑀸𑀯𑀘𑀦𑀢𑁄, 𑀲𑀢𑀺𑀧𑀺 𑀚𑀻𑀯𑀺𑀢𑁂 𑀲𑀺𑀓𑁆𑀔𑀸𑀦𑀺𑀓𑁆𑀔𑀺𑀧𑀦𑀲𑁆𑀲 𑀫𑀭𑀡𑀢𑀸𑀯𑀘𑀦𑀢𑁄 𑀘 𑀲𑀻𑀮𑀁 𑀚𑀻𑀯𑀺𑀢𑀢𑁄 𑀯𑀺𑀲𑀺𑀝𑁆𑀞𑀢𑀭𑀁. 𑀯𑁂𑀭𑀻𑀦𑀫𑁆𑀧𑀺 𑀫𑀦𑀼𑀜𑁆𑀜𑀪𑀸𑀯𑀸𑀯𑀳𑀦𑀢𑁄, 𑀚𑀭𑀸𑀭𑁄𑀕𑀯𑀺𑀧𑀢𑁆𑀢𑀻𑀳𑀺 𑀅𑀦𑀪𑀺𑀪𑀯𑀦𑀻𑀬𑀢𑁄 𑀘 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀅𑀢𑀺𑀲𑁂𑀢𑀺 𑀲𑀻𑀮𑀁. 𑀧𑀸𑀲𑀸𑀤𑀳𑀫𑁆𑀫𑀺𑀬𑀸𑀤𑀺𑀝𑁆𑀞𑀸𑀦𑀧𑁆𑀧𑀪𑁂𑀤𑁂 𑀭𑀸𑀚𑀬𑀼𑀯𑀭𑀸𑀚𑀲𑁂𑀦𑀸𑀧𑀢𑀺𑀆𑀤𑀺𑀞𑀸𑀦𑀯𑀺𑀲𑁂𑀲𑁂 𑀘 𑀲𑀼𑀔𑀯𑀺𑀲𑁂𑀲𑀸𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀅𑀢𑀺𑀲𑁂𑀢𑀺 𑀲𑀻𑀮𑀁. 𑀲𑀪𑀸𑀯𑀲𑀺𑀦𑀺𑀤𑁆𑀥𑁂 𑀲𑀦𑁆𑀢𑀺𑀓𑀸𑀯𑀘𑀭𑁂𑀧𑀺 𑀩𑀦𑁆𑀥𑀼𑀚𑀦𑁂, 𑀫𑀺𑀢𑁆𑀢𑀚𑀦𑁂 𑀘 𑀏𑀓𑀦𑁆𑀢𑀳𑀺𑀢𑀲𑀫𑁆𑀧𑀸𑀤𑀦𑀢𑁄, 𑀧𑀭𑀮𑁄𑀓𑀸𑀦𑀼𑀕𑀫𑀦𑀢𑁄 𑀘 𑀅𑀢𑀺𑀲𑁂𑀢𑀺 𑀲𑀻𑀮𑀁. ‘‘𑀦 𑀢𑀁 𑀫𑀸𑀢𑀸 𑀧𑀺𑀢𑀸 𑀓𑀬𑀺𑀭𑀸’’𑀢𑀺𑀆𑀤𑀺 (𑀥. 𑀧. 𑁪𑁩) 𑀯𑀘𑀦𑀜𑁆𑀘𑁂𑀢𑁆𑀣 𑀲𑀸𑀥𑀓𑀁. 𑀢𑀣𑀸 𑀳𑀢𑁆𑀣𑀺𑀅𑀲𑁆𑀲𑀭𑀣𑀧𑀢𑁆𑀢𑀺𑀩𑀮𑀓𑀸𑀬𑁂𑀳𑀺, 𑀫𑀦𑁆𑀢𑀸𑀕𑀤𑀲𑁄𑀢𑁆𑀣𑀸𑀦𑀧𑀬𑁄𑀕𑁂𑀳𑀺 𑀘 𑀤𑀼𑀭𑀸𑀭𑀓𑁆𑀔𑀸𑀦𑀫𑀦𑀸𑀣𑀸𑀦𑀁 𑀅𑀢𑁆𑀢𑀸𑀥𑀻𑀦𑀢𑁄, 𑀅𑀦𑀧𑀭𑀸𑀥𑀻𑀦𑀢𑁄, 𑀫𑀳𑀸𑀯𑀺𑀲𑀬𑀢𑁄 𑀘 𑀆𑀭𑀓𑁆𑀔𑀪𑀸𑀯𑁂𑀦 𑀲𑀻𑀮𑀫𑁂𑀯 𑀯𑀺𑀲𑀺𑀝𑁆𑀞𑀢𑀭𑀁. 𑀢𑁂𑀦𑁂𑀯𑀸𑀳 ‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺’’𑀦𑁆𑀢𑀺𑀆𑀤𑀺 (𑀣𑁂𑀭𑀕𑀸. 𑁩𑁦𑁩; 𑀚𑀸. 𑁧.𑁧𑁦.𑁧𑁦𑁨). 𑀏𑀯𑀫𑀦𑁂𑀓𑀕𑀼𑀡𑀲𑀫𑀦𑁆𑀦𑀸𑀕𑀢𑀁 𑀲𑀻𑀮𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀅𑀧𑀭𑀺𑀧𑀼𑀡𑁆𑀡𑀸 𑀘𑁂𑀯 𑀲𑀻𑀮𑀲𑀫𑁆𑀧𑀤𑀸 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀺, 𑀅𑀧𑀭𑀺𑀲𑀼𑀤𑁆𑀥𑀸 𑀘 𑀧𑀸𑀭𑀺𑀲𑀼𑀤𑁆𑀥𑀺𑀁.

𑀲𑀘𑁂 𑀧𑀦𑀲𑁆𑀲 𑀤𑀻𑀖𑀭𑀢𑁆𑀢𑀁 𑀧𑀭𑀺𑀘𑀬𑁂𑀦 𑀲𑀻𑀮𑀧𑀝𑀺𑀧𑀓𑁆𑀔𑀥𑀫𑁆𑀫𑀸 𑀤𑁄𑀲𑀸𑀤𑀬𑁄 𑀅𑀦𑁆𑀢𑀭𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁂𑀦 𑀩𑁄𑀥𑀺𑀲𑀢𑁆𑀢𑀧𑀝𑀺𑀜𑁆𑀜𑁂𑀦 𑀏𑀯𑀁 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 ‘‘𑀦𑀦𑀼 𑀢𑀬𑀸 𑀩𑁄𑀥𑀸𑀬 𑀧𑀡𑀺𑀥𑀸𑀦𑀁 𑀓𑀢𑀁, 𑀲𑀻𑀮𑀯𑁂𑀓𑀮𑁆𑀮𑁂𑀦 𑀘 𑀦 𑀲𑀓𑁆𑀓𑀸 𑀦 𑀘 𑀲𑀼𑀓𑀭𑀸 𑀮𑁄𑀓𑀺𑀬𑀸𑀧𑀺 𑀲𑀫𑁆𑀧𑀢𑁆𑀢𑀺𑀬𑁄 𑀧𑀸𑀧𑀼𑀡𑀺𑀢𑀼𑀁, 𑀧𑀕𑁂𑀯 𑀮𑁄𑀓𑀼𑀢𑁆𑀢𑀭𑀸’’𑀢𑀺. 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀦𑀫𑀕𑁆𑀕𑀪𑀽𑀢𑀸𑀬 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀅𑀥𑀺𑀝𑁆𑀞𑀸𑀦𑀪𑀽𑀢𑁂𑀦 𑀲𑀻𑀮𑁂𑀦 𑀧𑀭𑀫𑀼𑀓𑁆𑀓𑀁𑀲𑀕𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀢𑀲𑁆𑀫𑀸 ‘‘𑀓𑀺𑀓𑀻𑀯 𑀅𑀡𑁆𑀟’’𑀦𑁆𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑀅𑀝𑁆𑀞. 𑁧.𑁭; 𑀯𑀺𑀲𑀼𑀤𑁆𑀥𑀺. 𑁧.𑁧𑁯) 𑀯𑀼𑀢𑁆𑀢𑀦𑀬𑁂𑀦 𑀲𑀫𑁆𑀫𑀤𑁂𑀯 𑀲𑀻𑀮𑀁 𑀭𑀓𑁆𑀔𑀦𑁆𑀢𑁂𑀦 𑀲𑀼𑀝𑁆𑀞𑀼 𑀢𑀬𑀸 𑀧𑁂𑀲𑀮𑁂𑀦 𑀪𑀯𑀺𑀢𑀩𑁆𑀩𑀁.

𑀅𑀧𑀺𑀘 ¶ ¶ 𑀢𑀬𑀸 𑀥𑀫𑁆𑀫𑀤𑁂𑀲𑀦𑀸𑀬 𑀬𑀸𑀦𑀢𑁆𑀢𑀬𑁂 𑀲𑀢𑁆𑀢𑀸𑀦𑀫𑀯𑀢𑀸𑀭𑀡𑀧𑀭𑀺𑀧𑀸𑀘𑀦𑀸𑀦𑀺 𑀓𑀸𑀢𑀩𑁆𑀩𑀸𑀦𑀺, 𑀲𑀻𑀮𑀯𑁂𑀓𑀮𑁆𑀮𑀲𑁆𑀲 𑀘 𑀯𑀘𑀦𑀁 𑀦 𑀧𑀘𑁆𑀘𑁂𑀢𑀩𑁆𑀩𑀁 𑀳𑁄𑀢𑀺, 𑀅𑀲𑀧𑁆𑀧𑀸𑀬𑀸𑀳𑀸𑀭𑀯𑀺𑀘𑀸𑀭𑀲𑁆𑀲 𑀯𑀺𑀬 𑀯𑁂𑀚𑁆𑀚𑀲𑁆𑀲 𑀢𑀺𑀓𑀺𑀘𑁆𑀙𑀦𑀁, 𑀢𑀲𑁆𑀫𑀸 ‘‘𑀓𑀣𑀸𑀳𑀁 𑀲𑀤𑁆𑀥𑁂𑀬𑁆𑀬𑁄 𑀳𑀼𑀢𑁆𑀯𑀸 𑀲𑀢𑁆𑀢𑀸𑀦𑀫𑀯𑀢𑀸𑀭𑀡𑀧𑀭𑀺𑀧𑀸𑀘𑀦𑀸𑀦𑀺 𑀓𑀭𑁂𑀬𑁆𑀬’’𑀦𑁆𑀢𑀺 𑀲𑀪𑀸𑀯𑀧𑀭𑀺𑀲𑀼𑀤𑁆𑀥𑀲𑀻𑀮𑁂𑀦 𑀪𑀯𑀺𑀢𑀩𑁆𑀩𑀁. 𑀓𑀺𑀜𑁆𑀘 𑀛𑀸𑀦𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑁄𑀕𑁂𑀦 𑀫𑁂 𑀲𑀢𑁆𑀢𑀸𑀦𑀫𑀼𑀧𑀓𑀸𑀭𑀓𑀭𑀡𑀲𑀫𑀢𑁆𑀣𑀢𑀸, 𑀧𑀜𑁆𑀜𑀸𑀧𑀸𑀭𑀫𑀻𑀆𑀤𑀺𑀧𑀭𑀺𑀧𑀽𑀭𑀡𑀜𑁆𑀘 𑀛𑀸𑀦𑀸𑀤𑀬𑁄 𑀕𑀼𑀡𑀸 𑀘 𑀲𑀻𑀮𑀧𑀸𑀭𑀺𑀲𑀼𑀤𑁆𑀥𑀺𑀁 𑀯𑀺𑀦𑀸 𑀦 𑀲𑀫𑁆𑀪𑀯𑀦𑁆𑀢𑀻𑀢𑀺 𑀲𑀫𑁆𑀫𑀤𑁂𑀯 𑀲𑀻𑀮𑀁 𑀲𑁄𑀥𑁂𑀢𑀩𑁆𑀩𑀁.

𑀢𑀣𑀸 ‘‘𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄 𑀭𑀚𑁄𑀧𑀣𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁧𑁧; 𑀫. 𑀦𑀺. 𑁧.𑁨𑁯𑁧, 𑁩𑁭𑁧; 𑁨.𑁧𑁦; 𑁩.𑁧𑁩, 𑁨𑁧𑁮; 𑀲𑀁. 𑀦𑀺. 𑁨.𑁧𑁫𑁪; 𑁫.𑁧𑁦𑁦𑁨; 𑀅. 𑀦𑀺. 𑁧𑁦.𑁯𑁯; 𑀦𑁂𑀢𑁆𑀢𑀺. 𑁯𑁪) 𑀖𑀭𑀸𑀯𑀸𑀲𑁂, ‘‘𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀓𑀸𑀫𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩𑁪; 𑁨.𑁪𑁨; 𑀧𑀸𑀘𑀺. 𑁪𑁧𑁭; 𑀘𑀽𑀴𑀦𑀺. 𑁧𑁪𑁭) ‘‘𑀫𑀸𑀢𑀸𑀧𑀺 𑀧𑀼𑀢𑁆𑀢𑁂𑀦 𑀯𑀺𑀯𑀤𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁬𑁮) 𑀘 𑀓𑀸𑀫𑁂𑀲𑀼, ‘‘𑀲𑁂𑀬𑁆𑀬𑀣𑀸𑀧𑀺 𑀧𑀼𑀭𑀺𑀲𑁄 𑀇𑀡𑀁 𑀆𑀤𑀸𑀬 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁪𑁨𑁬) 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀲𑀼 𑀆𑀤𑀻𑀦𑀯𑀤𑀲𑁆𑀲𑀦𑀧𑀼𑀩𑁆𑀩𑀗𑁆𑀕𑀫𑀸, 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 ‘‘𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁯𑁧, 𑁩𑁯𑁮; 𑀫. 𑀦𑀺. 𑁧.𑁨𑁯𑁧, 𑁩𑁭𑁧; 𑁨.𑁧𑁦; 𑁩.𑁧𑁩, 𑁨𑁧𑁮; 𑀲𑀁. 𑀦𑀺. 𑁧.𑁨𑁯𑁧; 𑀲𑀁. 𑀦𑀺. 𑁫.𑁧𑁦𑁦𑁨; 𑀅. 𑀦𑀺. 𑁧𑁦.𑁯𑁯; 𑀦𑁂𑀢𑁆𑀢𑀺. 𑁯𑁮) 𑀧𑀩𑁆𑀩𑀚𑁆𑀚𑀸𑀤𑀻𑀲𑀼 𑀆𑀦𑀺𑀲𑀁𑀲𑀸𑀧𑀝𑀺𑀲𑀗𑁆𑀔𑀸𑀯𑀲𑁂𑀦 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀬𑀁 𑀧𑀘𑁆𑀘𑀯𑁂𑀓𑁆𑀔𑀡𑀸 𑀓𑀸𑀢𑀩𑁆𑀩𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀤𑀼𑀓𑁆𑀔𑀓𑁆𑀔𑀦𑁆𑀥𑀆𑀲𑀺𑀯𑀺𑀲𑁄𑀧𑀫𑀲𑀼𑀢𑁆𑀢𑀸𑀤𑀺 (𑀫. 𑀦𑀺. 𑁧.𑁧𑁬𑁩, 𑁧𑁭𑁫; 𑀲𑀁. 𑀦𑀺. 𑁪.𑁨𑁩𑁮) 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀢𑀣𑀸 ‘‘𑀧𑀜𑁆𑀜𑀸𑀬 𑀯𑀺𑀦𑀸 𑀤𑀸𑀦𑀸𑀤𑀬𑁄 𑀥𑀫𑁆𑀫𑀸 𑀦 𑀯𑀺𑀲𑀼𑀚𑁆𑀛𑀦𑁆𑀢𑀺, 𑀬𑀣𑀸𑀲𑀓𑀁 𑀩𑁆𑀬𑀸𑀧𑀸𑀭𑀲𑀫𑀢𑁆𑀣𑀸 𑀘 𑀦 𑀳𑁄𑀦𑁆𑀢𑀻’’𑀢𑀺 𑀧𑀜𑁆𑀜𑀸𑀬 𑀕𑀼𑀡𑀸 𑀫𑀦𑀲𑀺 𑀓𑀸𑀢𑀩𑁆𑀩𑀸. 𑀬𑀣𑁂𑀯 𑀳𑀺 𑀚𑀻𑀯𑀺𑀢𑁂𑀦 𑀯𑀺𑀦𑀸 𑀲𑀭𑀻𑀭𑀬𑀦𑁆𑀢𑀁 𑀦 𑀲𑁄𑀪𑀢𑀺, 𑀦 𑀘 𑀅𑀢𑁆𑀢𑀦𑁄 𑀓𑀺𑀭𑀺𑀬𑀸𑀲𑀼 𑀧𑀝𑀺𑀧𑀢𑁆𑀢𑀺𑀲𑀫𑀢𑁆𑀣𑀁 𑀳𑁄𑀢𑀺. 𑀬𑀣𑀸 𑀘 𑀘𑀓𑁆𑀔𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀜𑁆𑀜𑀸𑀡𑁂𑀦 𑀯𑀺𑀦𑀸 𑀬𑀣𑀸𑀲𑀓𑀁 𑀯𑀺𑀲𑀬𑁂𑀲𑀼 𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦𑀧𑁆𑀧𑀳𑁄𑀦𑁆𑀢𑀺, 𑀏𑀯𑀁 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀜𑀸𑀬 𑀯𑀺𑀦𑀸 𑀲𑀓𑀓𑀺𑀘𑁆𑀘𑀧𑀝𑀺𑀧𑀢𑁆𑀢𑀺𑀬𑀫𑀲𑀫𑀢𑁆𑀣𑀸𑀦𑀻𑀢𑀺 𑀧𑀭𑀺𑀘𑁆𑀘𑀸𑀕𑀸𑀤𑀺𑀧𑀝𑀺𑀧𑀢𑁆𑀢𑀺𑀬𑀁 𑀧𑀜𑁆𑀜𑀸 𑀧𑀥𑀸𑀦𑀓𑀸𑀭𑀡𑀁. 𑀉𑀫𑁆𑀫𑀻𑀮𑀺𑀢𑀧𑀜𑁆𑀜𑀸𑀘𑀓𑁆𑀔𑀼𑀓𑀸 𑀳𑀺 𑀫𑀳𑀸𑀲𑀢𑁆𑀢𑀸 𑀩𑁄𑀥𑀺𑀲𑀢𑁆𑀢𑀸 𑀅𑀢𑁆𑀢𑀦𑁄 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺𑀧𑀺 𑀤𑀢𑁆𑀯𑀸 𑀅𑀦𑀢𑁆𑀢𑀼𑀓𑁆𑀓𑀁𑀲𑀓𑀸, 𑀅𑀧𑀭𑀯𑀫𑁆𑀪𑀓𑀸 𑀘 𑀳𑁄𑀦𑁆𑀢𑀺, 𑀪𑁂𑀲𑀚𑁆𑀚𑀭𑀼𑀓𑁆𑀔𑀸 𑀯𑀺𑀬 𑀯𑀺𑀓𑀧𑁆𑀧𑀭𑀳𑀺𑀢𑀸 𑀓𑀸𑀮𑀢𑁆𑀢𑀬𑁂𑀧𑀺 𑀲𑁄𑀫𑀦𑀲𑁆𑀲𑀚𑀸𑀢𑀸. 𑀧𑀜𑁆𑀜𑀸𑀯𑀲𑁂𑀦 𑀳𑀺 𑀉𑀧𑀸𑀬𑀓𑁄𑀲𑀮𑁆𑀮𑀬𑁄𑀕𑀢𑁄 𑀧𑀭𑀺𑀘𑁆𑀘𑀸𑀕𑁄 𑀧𑀭𑀳𑀺𑀢𑀧𑀯𑀢𑁆𑀢𑀺𑀬𑀸 𑀤𑀸𑀦𑀧𑀸𑀭𑀫𑀺𑀪𑀸𑀯𑀁 𑀉𑀧𑁂𑀢𑀺. 𑀅𑀢𑁆𑀢𑀢𑁆𑀣𑀜𑁆𑀳𑀺 𑀤𑀸𑀦𑀁 𑀫𑀼𑀤𑁆𑀥𑀲𑀤𑀺𑀲𑀁 [𑀯𑀼𑀤𑁆𑀥𑀺𑀲𑀤𑀺𑀲𑀁 (𑀤𑀻. 𑀦𑀺. 𑀝𑀻. 𑁧.𑁭)] 𑀳𑁄𑀢𑀺.

𑀢𑀣𑀸 ¶ ¶ 𑀧𑀜𑁆𑀜𑀸𑀬 𑀅𑀪𑀸𑀯𑁂𑀦 𑀢𑀡𑁆𑀳𑀸𑀤𑀺𑀲𑀁𑀓𑀺𑀮𑁂𑀲𑀸𑀯𑀺𑀬𑁄𑀕𑀢𑁄 𑀲𑀻𑀮𑀲𑁆𑀲 𑀯𑀺𑀲𑀼𑀤𑁆𑀥𑀺𑀬𑁂𑀯 𑀦 𑀲𑀫𑁆𑀪𑀯𑀢𑀺, 𑀓𑀼𑀢𑁄 𑀲𑀩𑁆𑀩𑀜𑁆𑀜𑀼𑀕𑀼𑀡𑀸𑀥𑀺𑀝𑁆𑀞𑀸𑀦𑀪𑀸𑀯𑁄. 𑀧𑀜𑁆𑀜𑀯𑀸 𑀏𑀯 𑀘 𑀖𑀭𑀸𑀯𑀸𑀲𑁂 𑀓𑀸𑀫𑀕𑀼𑀡𑁂𑀲𑀼 𑀲𑀁𑀲𑀸𑀭𑁂 𑀘 𑀆𑀤𑀻𑀦𑀯𑀁, 𑀧𑀩𑁆𑀩𑀚𑁆𑀚𑀸𑀬 𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑀁 𑀦𑀺𑀩𑁆𑀩𑀸𑀦𑁂 𑀘 𑀆𑀦𑀺𑀲𑀁𑀲𑀁 𑀲𑀼𑀝𑁆𑀞𑀼 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀧𑀩𑁆𑀩𑀚𑀺𑀢𑁆𑀯𑀸 𑀛𑀸𑀦𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑁄, 𑀧𑀭𑁂 𑀘 𑀢𑀢𑁆𑀣 𑀧𑀢𑀺𑀝𑁆𑀞𑀧𑁂𑀢𑀺.

𑀯𑀻𑀭𑀺𑀬𑀜𑁆𑀘 𑀧𑀜𑁆𑀜𑀸𑀭𑀳𑀺𑀢𑀁 𑀬𑀣𑀺𑀘𑁆𑀙𑀺𑀢𑀫𑀢𑁆𑀣𑀁 𑀦 𑀲𑀸𑀥𑁂𑀢𑀺 𑀤𑀼𑀭𑀸𑀭𑀫𑁆𑀪𑀪𑀸𑀯𑀢𑁄. 𑀅𑀦𑀸𑀭𑀫𑁆𑀪𑁄𑀬𑁂𑀯 𑀳𑀺 𑀤𑀼𑀭𑀸𑀭𑀫𑁆𑀪𑀢𑁄 𑀲𑁂𑀬𑁆𑀬𑁄, 𑀧𑀜𑁆𑀜𑀸𑀲𑀳𑀺𑀢𑁂𑀦 𑀧𑀦 𑀯𑀻𑀭𑀺𑀬𑁂𑀦 𑀦 𑀓𑀺𑀜𑁆𑀘𑀺 𑀤𑀼𑀭𑀥𑀺𑀕𑀫𑀁 𑀉𑀧𑀸𑀬𑀧𑀝𑀺𑀧𑀢𑁆𑀢𑀺𑀢𑁄. 𑀢𑀣𑀸 𑀧𑀜𑁆𑀜𑀯𑀸 𑀏𑀯 𑀧𑀭𑀸𑀧𑀓𑀸𑀭𑀸𑀤𑀻𑀦𑀫𑀥𑀺𑀯𑀸𑀲𑀓𑀚𑀸𑀢𑀺𑀬𑁄 𑀳𑁄𑀢𑀺, 𑀦 𑀤𑀼𑀧𑁆𑀧𑀜𑁆𑀜𑁄. 𑀧𑀜𑁆𑀜𑀸𑀯𑀺𑀭𑀳𑀺𑀢𑀲𑁆𑀲 𑀘 𑀧𑀭𑁂𑀳𑀺 𑀉𑀧𑀦𑀻𑀢𑀸 𑀅𑀧𑀓𑀸𑀭𑀸 𑀔𑀦𑁆𑀢𑀺𑀬𑀸 𑀧𑀝𑀺𑀧𑀓𑁆𑀔𑀫𑁂𑀯 𑀅𑀦𑀼𑀩𑁆𑀭𑀽𑀳𑁂𑀦𑁆𑀢𑀺. 𑀧𑀜𑁆𑀜𑀯𑀢𑁄 𑀧𑀦 𑀢𑁂 𑀔𑀦𑁆𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀅𑀦𑀼𑀩𑁆𑀭𑀽𑀳𑀦𑀯𑀲𑁂𑀦 𑀅𑀲𑁆𑀲𑀸 𑀣𑀺𑀭𑀪𑀸𑀯𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀧𑀜𑁆𑀜𑀯𑀸 𑀏𑀯 𑀢𑀻𑀡𑀺𑀧𑀺 𑀲𑀘𑁆𑀘𑀸𑀦𑀺 𑀢𑁂𑀲𑀁 𑀓𑀸𑀭𑀡𑀸𑀦𑀺 𑀧𑀝𑀺𑀧𑀓𑁆𑀔𑁂 𑀘 𑀬𑀣𑀸𑀪𑀽𑀢𑀁 𑀚𑀸𑀦𑀺𑀢𑁆𑀯𑀸 𑀧𑀭𑁂𑀲𑀁 𑀅𑀯𑀺𑀲𑀁𑀯𑀸𑀤𑀓𑁄 𑀳𑁄𑀢𑀺. 𑀢𑀣𑀸 𑀧𑀜𑁆𑀜𑀸𑀩𑀮𑁂𑀦 𑀅𑀢𑁆𑀢𑀸𑀦𑀫𑀼𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀥𑀺𑀢𑀺𑀲𑀫𑁆𑀧𑀤𑀸𑀬 𑀲𑀩𑁆𑀩𑀧𑀸𑀭𑀫𑀻𑀲𑀼 𑀅𑀘𑀮𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑁄 𑀳𑁄𑀢𑀺. 𑀧𑀜𑁆𑀜𑀯𑀸 𑀏𑀯 𑀘 𑀧𑀺𑀬𑀫𑀚𑁆𑀛𑀢𑁆𑀢𑀯𑁂𑀭𑀺𑀯𑀺𑀪𑀸𑀕𑀫𑀓𑀢𑁆𑀯𑀸 𑀲𑀩𑁆𑀩𑀢𑁆𑀣 𑀳𑀺𑀢𑀽𑀧𑀲𑀁𑀳𑀸𑀭𑀓𑀼𑀲𑀮𑁄 𑀳𑁄𑀢𑀺. 𑀢𑀣𑀸 𑀧𑀜𑁆𑀜𑀸𑀯𑀲𑁂𑀦 𑀮𑀸𑀪𑀸𑀮𑀸𑀪𑀸𑀤𑀺𑀮𑁄𑀓𑀥𑀫𑁆𑀫𑀲𑀦𑁆𑀦𑀺𑀧𑀸𑀢𑁂 𑀦𑀺𑀩𑁆𑀩𑀺𑀓𑀸𑀭𑀢𑀸𑀬 𑀫𑀚𑁆𑀛𑀢𑁆𑀢𑁄 𑀳𑁄𑀢𑀺. 𑀏𑀯𑀁 𑀲𑀩𑁆𑀩𑀸𑀲𑀁 𑀧𑀸𑀭𑀫𑀻𑀦𑀁 𑀧𑀜𑁆𑀜𑀸𑀯 𑀧𑀸𑀭𑀺𑀲𑀼𑀤𑁆𑀥𑀺𑀳𑁂𑀢𑀽𑀢𑀺 𑀧𑀜𑁆𑀜𑀸𑀕𑀼𑀡𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑀅𑀧𑀺𑀘 𑀧𑀜𑁆𑀜𑀸𑀬 𑀯𑀺𑀦𑀸 𑀦 𑀤𑀲𑁆𑀲𑀦𑀲𑀫𑁆𑀧𑀢𑁆𑀢𑀺, 𑀅𑀦𑁆𑀢𑀭𑁂𑀦 𑀘 𑀤𑀺𑀝𑁆𑀞𑀺𑀲𑀫𑁆𑀧𑀤𑀁 𑀦 𑀲𑀻𑀮𑀲𑀫𑁆𑀧𑀤𑀸, 𑀲𑀻𑀮𑀤𑀺𑀝𑁆𑀞𑀺𑀲𑀫𑁆𑀧𑀤𑀸𑀭𑀳𑀺𑀢𑀲𑁆𑀲 𑀘 𑀦 𑀲𑀫𑀸𑀥𑀺𑀲𑀫𑁆𑀧𑀤𑀸, 𑀅𑀲𑀫𑀸𑀳𑀺𑀢𑁂𑀦 𑀘 𑀦 𑀲𑀓𑁆𑀓𑀸 𑀅𑀢𑁆𑀢𑀳𑀺𑀢𑀫𑀢𑁆𑀢𑀫𑁆𑀧𑀺 𑀲𑀸𑀥𑁂𑀢𑀼𑀁, 𑀧𑀕𑁂𑀯 𑀉𑀓𑁆𑀓𑀁𑀲𑀕𑀢𑀁 𑀧𑀭𑀳𑀺𑀢𑀦𑁆𑀢𑀺. ‘‘𑀦𑀦𑀼 𑀢𑀬𑀸 𑀧𑀭𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁂𑀦 𑀲𑀓𑁆𑀓𑀘𑁆𑀘𑀁 𑀧𑀜𑁆𑀜𑀸𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀆𑀬𑁄𑀕𑁄 𑀓𑀭𑀡𑀻𑀬𑁄’’𑀢𑀺 𑀩𑁄𑀥𑀺𑀲𑀢𑁆𑀢𑁂𑀦 𑀅𑀢𑁆𑀢𑀸 𑀑𑀯𑀤𑀺𑀢𑀩𑁆𑀩𑁄. 𑀧𑀜𑁆𑀜𑀸𑀦𑀼𑀪𑀸𑀯𑁂𑀦 𑀳𑀺 𑀫𑀳𑀸𑀲𑀢𑁆𑀢𑁄 𑀘𑀢𑀼𑀭𑀥𑀺𑀝𑁆𑀞𑀸𑀦𑀸𑀥𑀺𑀝𑁆𑀞𑀺𑀢𑁄 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀮𑁄𑀓𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀲𑀢𑁆𑀢𑁂 𑀦𑀺𑀬𑁆𑀬𑀸𑀦𑀫𑀕𑁆𑀕𑁂 𑀅𑀯𑀢𑀸𑀭𑁂𑀢𑀺, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘 𑀦𑁂𑀲𑀁 𑀧𑀭𑀺𑀧𑀸𑀘𑁂𑀢𑀺. 𑀢𑀣𑀸 𑀧𑀜𑁆𑀜𑀸𑀩𑀮𑁂𑀦 𑀔𑀦𑁆𑀥𑀸𑀬𑀢𑀦𑀸𑀤𑀻𑀲𑀼 𑀧𑀯𑀺𑀘𑀬𑀩𑀳𑀼𑀮𑁄 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀬𑁄 𑀬𑀸𑀣𑀸𑀯𑀢𑁄 𑀧𑀭𑀺𑀚𑀸𑀦𑀦𑁆𑀢𑁄 𑀤𑀸𑀦𑀸𑀤𑀬𑁄 𑀕𑀼𑀡𑀯𑀺𑀲𑁂𑀲𑁂 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀪𑀸𑀯𑀁 𑀦𑀬𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀲𑀺𑀓𑁆𑀔𑀸𑀬 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀻𑀢𑀺 𑀏𑀯𑀫𑀸𑀤𑀺𑀦𑀸 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑁂 𑀧𑀜𑁆𑀜𑀸𑀕𑀼𑀡𑁂 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀜𑁆𑀜𑀸𑀧𑀸𑀭𑀫𑀻 𑀅𑀦𑀼𑀩𑁆𑀭𑀽𑀳𑁂𑀢𑀩𑁆𑀩𑀸.

𑀢𑀣𑀸 ¶ 𑀤𑀺𑀲𑁆𑀲𑀫𑀸𑀦𑀧𑀸𑀭𑀸𑀦𑀺𑀧𑀺 𑀮𑁄𑀓𑀺𑀬𑀸𑀦𑀺 𑀓𑀫𑁆𑀫𑀸𑀦𑀺 𑀦𑀺𑀳𑀻𑀦𑀯𑀻𑀭𑀺𑀬𑁂𑀦 𑀧𑀸𑀧𑀼𑀡𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀸𑀦𑀺, 𑀅𑀕𑀡𑀺𑀢𑀔𑁂𑀤𑁂𑀦 𑀧𑀦 𑀆𑀭𑀤𑁆𑀥𑀯𑀻𑀭𑀺𑀬𑁂𑀦 𑀤𑀼𑀭𑀥𑀺𑀕𑀫𑀁 𑀦𑀸𑀫 𑀦𑀢𑁆𑀣𑀺. 𑀦𑀺𑀳𑀻𑀦𑀯𑀻𑀭𑀺𑀬𑁄 𑀳𑀺 ‘‘𑀲𑀁𑀲𑀸𑀭𑀫𑀳𑁄𑀖𑀢𑁄 𑀲𑀩𑁆𑀩𑀲𑀢𑁆𑀢𑁂 𑀲𑀦𑁆𑀢𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀆𑀭𑀪𑀺𑀢𑀼𑀫𑁂𑀯 𑀦 𑀲𑀓𑁆𑀓𑀼𑀡𑁄𑀢𑀺. 𑀫𑀚𑁆𑀛𑀺𑀫𑁄 𑀧𑀦 𑀆𑀭𑀪𑀺𑀢𑁆𑀯𑀸𑀦 ¶ 𑀅𑀦𑁆𑀢𑀭𑀸𑀯𑁄𑀲𑀸𑀦𑀫𑀸𑀧𑀚𑁆𑀚𑀢𑀺. 𑀉𑀓𑁆𑀓𑀝𑁆𑀞𑀯𑀻𑀭𑀺𑀬𑁄 𑀧𑀦 𑀅𑀢𑁆𑀢𑀲𑀼𑀔𑀦𑀺𑀭𑀧𑁂𑀓𑁆𑀔𑁄 𑀆𑀭𑀪𑀺𑀢𑁆𑀯𑀸 𑀧𑀸𑀭𑀫𑀥𑀺𑀕𑀘𑁆𑀙𑀢𑀻𑀢𑀺 𑀯𑀻𑀭𑀺𑀬𑀲𑀫𑁆𑀧𑀢𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑀅𑀧𑀺𑀘 ‘‘𑀬𑀲𑁆𑀲 𑀅𑀢𑁆𑀢𑀦𑁄 𑀏𑀯 𑀲𑀁𑀲𑀸𑀭𑀧𑀗𑁆𑀓𑀢𑁄 𑀲𑀫𑀼𑀤𑁆𑀥𑀭𑀡𑀢𑁆𑀣𑀫𑀸𑀭𑀫𑁆𑀪𑁄, 𑀢𑀲𑁆𑀲𑀸𑀧𑀺 𑀯𑀻𑀭𑀺𑀬𑀲𑁆𑀲 𑀲𑀺𑀣𑀺𑀮𑀪𑀸𑀯𑁂𑀦 𑀫𑀦𑁄𑀭𑀣𑀸𑀦𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀺 𑀦 𑀲𑀓𑁆𑀓𑀸 𑀲𑀫𑁆𑀪𑀸𑀯𑁂𑀢𑀼𑀁, 𑀧𑀕𑁂𑀯 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀫𑀼𑀤𑁆𑀥𑀭𑀡𑀢𑁆𑀣𑀁 𑀓𑀢𑀸𑀪𑀺𑀦𑀻𑀳𑀸𑀭𑁂𑀦𑀸’’𑀢𑀺 𑀘 ‘‘𑀭𑀸𑀕𑀸𑀤𑀻𑀦𑀁 𑀤𑁄𑀲𑀕𑀡𑀸𑀦𑀁 𑀫𑀢𑁆𑀢𑀫𑀳𑀸𑀦𑀸𑀕𑀸𑀦𑀫𑀺𑀯 𑀤𑀼𑀦𑁆𑀦𑀺𑀯𑀸𑀭𑀡𑀪𑀸𑀯𑀢𑁄, 𑀢𑀦𑁆𑀦𑀺𑀤𑀸𑀦𑀸𑀦𑀜𑁆𑀘 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀁 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀯𑀥𑀓𑀲𑀤𑀺𑀲𑀪𑀸𑀯𑀢𑁄, 𑀢𑀦𑁆𑀦𑀺𑀫𑀺𑀢𑁆𑀢𑀸𑀦𑀜𑁆𑀘 𑀤𑀼𑀕𑁆𑀕𑀢𑀻𑀦𑀁 𑀲𑀩𑁆𑀩𑀤𑀸 𑀯𑀺𑀯𑀝𑀫𑀼𑀔𑀪𑀸𑀯𑀢𑁄, 𑀢𑀢𑁆𑀣 𑀦𑀺𑀬𑁄𑀚𑀓𑀸𑀦𑀜𑁆𑀘 𑀧𑀸𑀧𑀫𑀺𑀢𑁆𑀢𑀸𑀦𑀁 𑀲𑀤𑀸 𑀲𑀦𑁆𑀦𑀺𑀳𑀺𑀢𑀪𑀸𑀯𑀢𑁄, 𑀢𑀤𑁄𑀯𑀸𑀤𑀓𑀸𑀭𑀺𑀢𑀸𑀬 𑀘 𑀯𑀲𑀮𑀲𑁆𑀲 𑀧𑀼𑀣𑀼𑀚𑁆𑀚𑀦𑀪𑀸𑀯𑀲𑁆𑀲 𑀲𑀢𑀺 𑀲𑀫𑁆𑀪𑀯𑁂 𑀬𑀼𑀢𑁆𑀢𑀁 𑀲𑀬𑀫𑁂𑀯 𑀲𑀁𑀲𑀸𑀭𑀤𑀼𑀓𑁆𑀔𑀢𑁄 𑀦𑀺𑀲𑁆𑀲𑀭𑀺𑀢𑀼’’𑀦𑁆𑀢𑀺 𑀘 ‘‘𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸 𑀯𑀻𑀭𑀺𑀬𑀸𑀦𑀼𑀪𑀸𑀯𑁂𑀦 𑀤𑀽𑀭𑀻 𑀪𑀯𑀦𑁆𑀢𑀻’’𑀢𑀺 𑀘 ‘‘𑀬𑀤𑀺 𑀧𑀦 𑀲𑀫𑁆𑀩𑁄𑀥𑀺𑀁 𑀅𑀢𑁆𑀢𑀸𑀥𑀻𑀦𑁂𑀦 𑀯𑀻𑀭𑀺𑀬𑁂𑀦 𑀲𑀓𑁆𑀓𑀸 𑀲𑀫𑀥𑀺𑀕𑀦𑁆𑀢𑀼𑀁, 𑀓𑀺𑀫𑁂𑀢𑁆𑀣 𑀤𑀼𑀓𑁆𑀓𑀭’’𑀦𑁆𑀢𑀺 𑀘 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀯𑀻𑀭𑀺𑀬𑀕𑀼𑀡𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑀢𑀣𑀸 ‘‘𑀔𑀦𑁆𑀢𑀺 𑀦𑀸𑀫𑀸𑀬𑀁 𑀦𑀺𑀭𑀯𑀲𑁂𑀲𑀕𑀼𑀡𑀧𑀝𑀺𑀧𑀓𑁆𑀔𑀲𑁆𑀲 𑀓𑁄𑀥𑀲𑁆𑀲 𑀯𑀺𑀥𑀫𑀦𑀢𑁄 𑀕𑀼𑀡𑀲𑀫𑁆𑀧𑀸𑀤𑀦𑁂 𑀲𑀸𑀥𑀽𑀦𑀁 𑀅𑀧𑁆𑀧𑀝𑀺𑀳𑀢𑀫𑀸𑀬𑀼𑀥𑀁, 𑀧𑀭𑀸𑀪𑀺𑀪𑀯𑀦𑁂 𑀲𑀫𑀢𑁆𑀣𑀸𑀦𑀫𑀮𑀗𑁆𑀓𑀸𑀭𑁄, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀩𑀮𑀲𑀫𑁆𑀧𑀤𑀸, 𑀓𑁄𑀥𑀕𑁆𑀕𑀺𑀯𑀺𑀦𑀬𑀦𑀸 𑀉𑀤𑀓𑀥𑀸𑀭𑀸, 𑀓𑀮𑁆𑀬𑀸𑀡𑀓𑀺𑀢𑁆𑀢𑀺𑀲𑀤𑁆𑀤𑀲𑁆𑀲 𑀲𑀜𑁆𑀚𑀸𑀢𑀺𑀤𑁂𑀲𑁄, 𑀧𑀸𑀧𑀧𑀼𑀕𑁆𑀕𑀮𑀸𑀦𑀁 𑀯𑀘𑀻𑀯𑀺𑀲𑀯𑀽𑀧𑀲𑀫𑀓𑀭𑁄 𑀫𑀦𑁆𑀢𑀸𑀕𑀤𑁄, 𑀲𑀁𑀯𑀭𑁂 𑀞𑀺𑀢𑀸𑀦𑀁 𑀧𑀭𑀫𑀸 𑀥𑀻𑀭𑀧𑀓𑀢𑀺, 𑀕𑀫𑁆𑀪𑀻𑀭𑀸𑀲𑀬𑀢𑀸𑀬 𑀲𑀸𑀕𑀭𑁄, 𑀤𑁄𑀲𑀫𑀳𑀸𑀲𑀸𑀕𑀭𑀲𑁆𑀲 𑀯𑁂𑀮𑀸, 𑀅𑀧𑀸𑀬𑀤𑁆𑀯𑀸𑀭𑀲𑁆𑀲 𑀧𑀺𑀥𑀸𑀦𑀓𑀯𑀸𑀝𑀁 𑀤𑁂𑀯𑀩𑁆𑀭𑀳𑁆𑀫𑀮𑁄𑀓𑀸𑀦𑀁 𑀆𑀭𑁄𑀳𑀡𑀲𑁄𑀧𑀸𑀦𑀁, 𑀲𑀩𑁆𑀩𑀕𑀼𑀡𑀸𑀦𑀫𑀥𑀺𑀯𑀸𑀲𑀪𑀽𑀫𑀺, 𑀉𑀢𑁆𑀢𑀫𑀸 𑀓𑀸𑀬𑀯𑀘𑀻𑀫𑀦𑁄𑀯𑀺𑀲𑀼𑀤𑁆𑀥𑀻’’𑀢𑀺 𑀫𑀦𑀲𑀺 𑀓𑀸𑀢𑀩𑁆𑀩𑀁. 𑀅𑀧𑀺𑀘 ‘‘𑀏𑀢𑁂 𑀲𑀢𑁆𑀢𑀸 𑀔𑀦𑁆𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀇𑀥𑀮𑁄𑀓𑁂 𑀢𑀧𑀦𑁆𑀢𑀺, 𑀧𑀭𑀮𑁄𑀓𑁂 𑀘 𑀢𑀧𑀦𑀻𑀬𑀥𑀫𑁆𑀫𑀸𑀦𑀼𑀬𑁄𑀕𑀢𑁄’’𑀢𑀺 𑀘 ‘‘𑀬𑀤𑀺𑀧𑀺 𑀧𑀭𑀸𑀧𑀓𑀸𑀭𑀦𑀺𑀫𑀺𑀢𑁆𑀢𑀁 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀧𑀦 𑀤𑀼𑀓𑁆𑀔𑀲𑁆𑀲 𑀔𑁂𑀢𑁆𑀢𑀪𑀽𑀢𑁄 𑀅𑀢𑁆𑀢𑀪𑀸𑀯𑁄, 𑀩𑀻𑀚𑀪𑀽𑀢𑀜𑁆𑀘 𑀓𑀫𑁆𑀫𑀁 𑀫𑀬𑀸𑀯 𑀅𑀪𑀺𑀲𑀗𑁆𑀔𑀢’’𑀦𑁆𑀢𑀺 𑀘 ‘‘𑀢𑀲𑁆𑀲 𑀘 𑀤𑀼𑀓𑁆𑀔𑀲𑁆𑀲 𑀆𑀡𑀡𑁆𑀬𑀓𑀭𑀡𑀫𑁂𑀢’’𑀦𑁆𑀢𑀺 𑀘 ‘‘𑀅𑀧𑀓𑀸𑀭𑀓𑁂 𑀅𑀲𑀢𑀺 𑀓𑀣𑀁 𑀫𑀬𑁆𑀳𑀁 𑀔𑀦𑁆𑀢𑀺𑀲𑀫𑁆𑀧𑀤𑀸 𑀲𑀫𑁆𑀪𑀯𑀢𑀻’’𑀢𑀺 𑀘 ‘‘𑀬𑀤𑀺𑀧𑀸𑀬𑀁 𑀏𑀢𑀭𑀳𑀺 𑀅𑀧𑀓𑀸𑀭𑀓𑁄 ¶ , 𑀅𑀬𑀁 𑀦𑀸𑀫 𑀧𑀼𑀩𑁆𑀩𑁂 𑀅𑀦𑁂𑀦 𑀫𑀬𑁆𑀳𑀁 𑀉𑀧𑀓𑀸𑀭𑁄 𑀓𑀢𑁄’’𑀢𑀺 𑀘 ‘‘𑀅𑀧𑀓𑀸𑀭𑁄 𑀏𑀯 𑀯𑀸 𑀔𑀦𑁆𑀢𑀺𑀦𑀺𑀫𑀺𑀢𑁆𑀢𑀢𑀸𑀬 𑀉𑀧𑀓𑀸𑀭𑁄’’𑀢𑀺 𑀘 ‘‘𑀲𑀩𑁆𑀩𑁂𑀧𑀺𑀫𑁂 𑀲𑀢𑁆𑀢𑀸 𑀫𑀬𑁆𑀳𑀁 𑀧𑀼𑀢𑁆𑀢𑀲𑀤𑀺𑀲𑀸, 𑀧𑀼𑀢𑁆𑀢𑀓𑀢𑀸𑀧𑀭𑀸𑀥𑁂𑀲𑀼 𑀘 𑀓𑁄 𑀓𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀘 ‘‘𑀬𑁂𑀦 𑀓𑁄𑀥𑀪𑀽𑀢𑀸𑀯𑁂𑀲𑁂𑀦 𑀅𑀬𑀁 𑀫𑀬𑁆𑀳𑀁 𑀅𑀧𑀭𑀚𑁆𑀛𑀢𑀺, 𑀲𑁆𑀯𑀸𑀬𑀁 𑀓𑁄𑀥𑀪𑀽𑀢𑀸𑀯𑁂𑀲𑁄 𑀫𑀬𑀸 𑀯𑀺𑀦𑁂𑀢𑀩𑁆𑀩𑁄’’𑀢𑀺 𑀘 ‘‘𑀬𑁂𑀦 𑀅𑀧𑀓𑀸𑀭𑁂𑀦 𑀇𑀤𑀁 𑀫𑀬𑁆𑀳𑀁 𑀤𑀼𑀓𑁆𑀔𑀁 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀲 𑀅𑀳𑀫𑁆𑀧𑀺 𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀘 ‘‘𑀬𑁂𑀳𑀺 𑀥𑀫𑁆𑀫𑁂𑀳𑀺 𑀅𑀧𑀓𑀸𑀭𑁄 𑀓𑀢𑁄, 𑀬𑀢𑁆𑀣 𑀘 𑀓𑀢𑁄, 𑀲𑀩𑁆𑀩𑁂𑀧𑀺 𑀢𑁂 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀦𑀺𑀭𑀼𑀤𑁆𑀥𑀸, 𑀓𑀲𑁆𑀲𑀺𑀤𑀸𑀦𑀺 𑀓𑁂𑀦 𑀓𑁄𑀧𑁄 𑀓𑀸𑀢𑀩𑁆𑀩𑁄’’𑀢𑀺 𑀘 ‘‘𑀅𑀦𑀢𑁆𑀢𑀢𑀸𑀬 𑀲𑀩𑁆𑀩𑀥𑀫𑁆𑀫𑀸𑀦𑀁 𑀓𑁄 𑀓𑀲𑁆𑀲 𑀅𑀧𑀭𑀚𑁆𑀛𑀢𑀻’’𑀢𑀺 𑀘 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁂𑀦 𑀔𑀦𑁆𑀢𑀺𑀲𑀫𑁆𑀧𑀤𑀸 𑀩𑁆𑀭𑀽𑀳𑁂𑀢𑀩𑁆𑀩𑀸.

𑀬𑀤𑀺 ¶ 𑀧𑀦𑀲𑁆𑀲 𑀤𑀻𑀖𑀭𑀢𑁆𑀢𑀁 𑀧𑀭𑀺𑀘𑀬𑁂𑀦 𑀧𑀭𑀸𑀧𑀓𑀸𑀭𑀦𑀺𑀫𑀺𑀢𑁆𑀢𑀓𑁄 𑀓𑁄𑀥𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑁂𑀬𑁆𑀬, 𑀢𑁂𑀦 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑀩𑁆𑀩𑀁 ‘‘𑀔𑀦𑁆𑀢𑀺 𑀦𑀸𑀫𑁂𑀲𑀸 𑀧𑀭𑀸𑀧𑀓𑀸𑀭𑀲𑁆𑀲 𑀧𑀝𑀺𑀧𑀓𑁆𑀔𑀧𑀝𑀺𑀧𑀢𑁆𑀢𑀻𑀦𑀁 𑀧𑀘𑁆𑀘𑀼𑀧𑀓𑀸𑀭𑀓𑀸𑀭𑀡’’𑀦𑁆𑀢𑀺 𑀘 ‘‘𑀅𑀧𑀓𑀸𑀭𑁄 𑀘 𑀫𑀬𑁆𑀳𑀁 𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑁂𑀦 𑀤𑀼𑀓𑁆𑀔𑀼𑀧𑀦𑀺𑀲𑀸𑀬 𑀲𑀤𑁆𑀥𑀸𑀬, 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀺𑀲𑀜𑁆𑀜𑀸𑀬 𑀘 𑀧𑀘𑁆𑀘𑀬𑁄’’𑀢𑀺 𑀘 ‘‘𑀇𑀦𑁆𑀤𑁆𑀭𑀺𑀬𑀧𑀓𑀢𑀺𑀭𑁂𑀲𑀸, 𑀬𑀤𑀺𑀤𑀁 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀲𑀬𑀲𑀫𑀸𑀬𑁄𑀕𑁄, 𑀢𑀢𑁆𑀣 𑀅𑀦𑀺𑀝𑁆𑀞𑀯𑀺𑀲𑀬𑀲𑀫𑀸𑀬𑁄𑀕𑁄 𑀫𑀬𑁆𑀳𑀁 𑀦 𑀲𑀺𑀬𑀸𑀢𑀺 𑀢𑀁 𑀓𑀼𑀢𑁂𑀢𑁆𑀣 𑀮𑀩𑁆𑀪𑀸’’𑀢𑀺 𑀘 ‘‘𑀓𑁄𑀥𑀯𑀲𑀺𑀓𑁄 𑀲𑀢𑁆𑀢𑁄 𑀓𑁄𑀥𑁂𑀦 𑀉𑀫𑁆𑀫𑀢𑁆𑀢𑁄 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄, 𑀢𑀢𑁆𑀣 𑀓𑀺𑀁 𑀧𑀘𑁆𑀘𑀧𑀓𑀸𑀭𑁂𑀦𑀸’’𑀢𑀺 𑀘 ‘‘𑀲𑀩𑁆𑀩𑁂𑀧𑀺𑀫𑁂 𑀲𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀑𑀭𑀲𑀧𑀼𑀢𑁆𑀢𑀸 𑀯𑀺𑀬 𑀧𑀭𑀺𑀧𑀸𑀮𑀺𑀢𑀸, 𑀢𑀲𑁆𑀫𑀸 𑀦 𑀢𑀢𑁆𑀣 𑀫𑀬𑀸 𑀘𑀺𑀢𑁆𑀢𑀓𑁄𑀧𑁄 𑀓𑀸𑀢𑀩𑁆𑀩𑁄’’𑀢𑀺 𑀘 ‘‘𑀅𑀧𑀭𑀸𑀥𑀓𑁂 𑀘 𑀲𑀢𑀺 𑀕𑀼𑀡𑁂 𑀕𑀼𑀡𑀯𑀢𑀺 𑀫𑀬𑀸 𑀓𑁄𑀧𑁄 𑀦 𑀓𑀸𑀢𑀩𑁆𑀩𑁄’’𑀢𑀺 𑀘 ‘‘𑀅𑀲𑀢𑀺 𑀕𑀼𑀡𑁂 𑀓𑀲𑁆𑀲𑀘𑀺𑀧𑀺 𑀕𑀼𑀡𑀲𑁆𑀲𑀸𑀪𑀸𑀯𑀢𑁄 𑀯𑀺𑀲𑁂𑀲𑁂𑀦 𑀓𑀭𑀼𑀡𑀸𑀬𑀺𑀢𑀩𑁆𑀩𑁄’’𑀢𑀺 𑀘 ‘‘𑀓𑁄𑀧𑁂𑀦 𑀫𑀬𑁆𑀳𑀁 𑀕𑀼𑀡𑀬𑀲𑀸 𑀦𑀺𑀳𑀻𑀬𑀦𑁆𑀢𑀻’’𑀢𑀺 𑀘 ‘‘𑀓𑀼𑀚𑁆𑀛𑀦𑁂𑀦 𑀫𑀬𑁆𑀳𑀁 𑀤𑀼𑀩𑁆𑀩𑀡𑁆𑀡𑀤𑀼𑀓𑁆𑀔𑀲𑁂𑀬𑁆𑀬𑀸𑀤𑀬𑁄 𑀲𑀧𑀢𑁆𑀢𑀓𑀦𑁆𑀢𑀸 𑀆𑀕𑀘𑁆𑀙𑀦𑁆𑀢𑀻’’𑀢𑀺 𑀘 ‘‘𑀓𑁄𑀥𑁄 𑀘 𑀦𑀸𑀫𑀸𑀬𑀁 𑀲𑀩𑁆𑀩𑀤𑀼𑀓𑁆𑀔𑀸𑀳𑀺𑀢𑀓𑀸𑀭𑀓𑁄 𑀲𑀩𑁆𑀩𑀲𑀼𑀔𑀳𑀺𑀢𑀯𑀺𑀦𑀸𑀲𑀓𑁄 𑀩𑀮𑀯𑀸 𑀧𑀘𑁆𑀘𑀢𑁆𑀣𑀺𑀓𑁄’’𑀢𑀺 𑀘 ‘‘𑀲𑀢𑀺 𑀘 𑀔𑀦𑁆𑀢𑀺𑀬𑀸 𑀦 𑀓𑁄𑀘𑀺 𑀧𑀘𑁆𑀘𑀢𑁆𑀣𑀺𑀓𑁄’’𑀢𑀺 𑀘 ‘‘𑀅𑀧𑀭𑀸𑀥𑀓𑁂𑀦 𑀅𑀧𑀭𑀸𑀥𑀦𑀺𑀫𑀺𑀢𑁆𑀢𑀁 𑀬𑀁 𑀤𑀼𑀓𑁆𑀔𑀁 𑀆𑀬𑀢𑀺𑀁 𑀮𑀤𑁆𑀥𑀩𑁆𑀩𑀁, 𑀲𑀢𑀺 𑀘 𑀔𑀦𑁆𑀢𑀺𑀬𑀸 𑀫𑀬𑁆𑀳𑀁 𑀢𑀤𑀪𑀸𑀯𑁄’’𑀢𑀺 𑀘 ‘‘𑀘𑀺𑀦𑁆𑀢𑁂𑀦𑁆𑀢𑁂𑀦, 𑀓𑀼𑀚𑁆𑀛𑀦𑁆𑀢𑁂𑀦 𑀘 𑀫𑀬𑀸 𑀧𑀘𑁆𑀘𑀢𑁆𑀣𑀺𑀓𑁄𑀬𑁂𑀯 𑀅𑀦𑀼𑀯𑀢𑁆𑀢𑀺𑀢𑁄’’𑀢𑀺 𑀘 ‘‘𑀓𑁄𑀥𑁂 𑀘 𑀫𑀬𑀸 𑀔𑀦𑁆𑀢𑀺𑀬𑀸 𑀅𑀪𑀺𑀪𑀽𑀢𑁂 𑀢𑀲𑁆𑀲 𑀤𑀸𑀲𑀪𑀽𑀢𑁄 𑀧𑀘𑁆𑀘𑀢𑁆𑀣𑀺𑀓𑁄 𑀲𑀫𑁆𑀫𑀤𑁂𑀯 𑀅𑀪𑀺𑀪𑀽𑀢𑁄’’𑀢𑀺 𑀘 ‘‘𑀓𑁄𑀥𑀦𑀺𑀫𑀺𑀢𑁆𑀢𑀁 𑀔𑀦𑁆𑀢𑀺𑀕𑀼𑀡𑀧𑀭𑀺𑀘𑁆𑀘𑀸𑀕𑁄 𑀫𑀬𑁆𑀳𑀁 𑀦 𑀬𑀼𑀢𑁆𑀢𑁄’’𑀢𑀺 𑀘 ‘‘𑀲𑀢𑀺 𑀘 𑀓𑁄𑀥𑁂 𑀕𑀼𑀡𑀯𑀺𑀭𑁄𑀥𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀓𑀣𑀁 𑀫𑁂 𑀲𑀻𑀮𑀸𑀤𑀺𑀥𑀫𑁆𑀫𑀸 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑁂𑀬𑁆𑀬𑀼𑀁, 𑀅𑀲𑀢𑀺 𑀘 𑀢𑁂𑀲𑀼 𑀓𑀣𑀸𑀳𑀁 𑀲𑀢𑁆𑀢𑀸𑀦𑀁 𑀉𑀧𑀓𑀸𑀭𑀩𑀳𑀼𑀮𑁄 ¶ 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀉𑀢𑁆𑀢𑀫𑀁 𑀲𑀫𑁆𑀧𑀢𑁆𑀢𑀺𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀘 ‘‘𑀔𑀦𑁆𑀢𑀺𑀬𑀸 𑀘 𑀲𑀢𑀺 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀸𑀪𑀸𑀯𑀢𑁄 𑀲𑀫𑀸𑀳𑀺𑀢𑀲𑁆𑀲 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀢𑁄 𑀦𑀺𑀩𑁆𑀩𑀸𑀦𑀁 𑀅𑀲𑀗𑁆𑀔𑀢𑀸𑀫𑀢𑀲𑀦𑁆𑀢𑀧𑀡𑀻𑀢𑀢𑀸𑀤𑀺𑀪𑀸𑀯𑀢𑁄 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀺, ‘𑀩𑀼𑀤𑁆𑀥𑀥𑀫𑁆𑀫𑀸 𑀘 𑀅𑀘𑀺𑀦𑁆𑀢𑁂𑀬𑁆𑀬𑀸𑀧𑀭𑀺𑀫𑁂𑀬𑁆𑀬𑀧𑁆𑀧𑀪𑀯𑀸’𑀢𑀺’’, 𑀢𑀢𑁄 𑀘 ‘‘𑀅𑀦𑀼𑀮𑁄𑀫𑀺𑀓𑀔𑀦𑁆𑀢𑀺𑀬𑀁 𑀞𑀺𑀢𑁄 ‘𑀓𑁂𑀯𑀮𑀸 𑀇𑀫𑁂 𑀅𑀢𑁆𑀢𑀢𑁆𑀢𑀦𑀺𑀬𑀪𑀸𑀯𑀭𑀳𑀺𑀢𑀸 𑀥𑀫𑁆𑀫𑀫𑀢𑁆𑀢𑀸 𑀬𑀣𑀸𑀲𑀓𑀁 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑀯𑀺𑀦𑀲𑁆𑀲𑀦𑁆𑀢𑀺, 𑀦 𑀓𑀼𑀢𑁄𑀘𑀺 𑀆𑀕𑀘𑁆𑀙𑀦𑁆𑀢𑀺, 𑀦 𑀓𑀼𑀳𑀺𑀜𑁆𑀘𑀺 𑀕𑀘𑁆𑀙𑀦𑁆𑀢𑀺, 𑀦 𑀘 𑀓𑀢𑁆𑀣𑀘𑀺 𑀧𑀢𑀺𑀝𑁆𑀞𑀺𑀢𑀸, 𑀦 𑀘𑁂𑀢𑁆𑀣 𑀓𑁄𑀘𑀺 𑀓𑀲𑁆𑀲𑀘𑀺 𑀩𑁆𑀬𑀸𑀧𑀸𑀭𑁄’𑀢𑀺 𑀅𑀳𑀁𑀓𑀸𑀭𑀫𑀫𑀁𑀓𑀸𑀭𑀸𑀦𑀥𑀺𑀝𑁆𑀞𑀸𑀦𑀢𑀸 𑀦𑀺𑀚𑁆𑀛𑀸𑀦𑀁 𑀔𑀫𑀢𑀺, 𑀬𑁂𑀦 𑀩𑁄𑀥𑀺𑀲𑀢𑁆𑀢𑁄 𑀩𑁄𑀥𑀺𑀬𑀸 𑀦𑀺𑀬𑀢𑁄 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀳𑁄𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀔𑀦𑁆𑀢𑀺𑀧𑀸𑀭𑀫𑀺𑀬𑀸 𑀧𑀘𑁆𑀘𑀯𑁂𑀓𑁆𑀔𑀡𑀸 𑀯𑁂𑀤𑀺𑀢𑀩𑁆𑀩𑀸.

𑀢𑀣𑀸 ‘‘𑀲𑀘𑁆𑀘𑁂𑀦 𑀯𑀺𑀦𑀸 𑀲𑀻𑀮𑀸𑀤𑀻𑀦𑀫𑀲𑀫𑁆𑀪𑀯𑀢𑁄, 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀧𑀝𑀺𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄, 𑀲𑀘𑁆𑀘𑀥𑀫𑁆𑀫𑀸𑀢𑀺𑀓𑁆𑀓𑀫𑁂 𑀘 𑀲𑀩𑁆𑀩𑀧𑀸𑀧𑀥𑀫𑁆𑀫𑀸𑀦𑀁 𑀲𑀫𑁄𑀲𑀭𑀡𑀪𑀸𑀯𑀢𑁄, 𑀅𑀲𑀘𑁆𑀘𑀲𑀦𑁆𑀥𑀲𑁆𑀲 𑀅𑀧𑁆𑀧𑀘𑁆𑀘𑀬𑀺𑀓𑀪𑀸𑀯𑀢𑁄, 𑀆𑀬𑀢𑀺𑀜𑁆𑀘 𑀅𑀦𑀸𑀤𑁂𑀬𑁆𑀬𑀯𑀘𑀦𑀢𑀸𑀯𑀳𑀦𑀢𑁄, 𑀲𑀫𑁆𑀧𑀦𑁆𑀦𑀲𑀘𑁆𑀘𑀲𑁆𑀲 𑀲𑀩𑁆𑀩𑀕𑀼𑀡𑀸𑀥𑀺𑀝𑁆𑀞𑀸𑀦𑀪𑀸𑀯𑀢𑁄, 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑁂𑀦 𑀲𑀩𑁆𑀩𑀲𑀫𑁆𑀩𑁄𑀥𑀺𑀲𑀫𑁆𑀪𑀸𑀭𑀸𑀦𑀁 𑀧𑀸𑀭𑀺𑀲𑀼𑀤𑁆𑀥𑀺𑀧𑀸𑀭𑀺𑀧𑀽𑀭𑀺𑀲𑀫𑀦𑁆𑀯𑀸𑀬𑀢𑁄, 𑀲𑀪𑀸𑀯𑀥𑀫𑁆𑀫𑀸𑀯𑀺𑀲𑀁𑀯𑀸𑀤𑀦𑁂𑀦 𑀲𑀩𑁆𑀩𑀩𑁄𑀥𑀺𑀲𑀫𑁆𑀪𑀸𑀭𑀓𑀺𑀘𑁆𑀘𑀓𑀭𑀡𑀢𑁄 ¶ , 𑀩𑁄𑀥𑀺𑀲𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀘 𑀧𑀭𑀺𑀦𑀺𑀧𑁆𑀨𑀢𑁆𑀢𑀺𑀢𑁄’’𑀢𑀺𑀆𑀤𑀺𑀦𑀸 𑀲𑀘𑁆𑀘𑀧𑀸𑀭𑀫𑀺𑀬𑀸 𑀲𑀫𑁆𑀧𑀢𑁆𑀢𑀺𑀬𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑀢𑀣𑀸 ‘‘𑀤𑀸𑀦𑀸𑀤𑀻𑀲𑀼 𑀤𑀴𑁆𑀳𑀲𑀫𑀸𑀤𑀸𑀦𑀁, 𑀢𑀧𑁆𑀧𑀝𑀺𑀧𑀓𑁆𑀔𑀲𑀦𑁆𑀦𑀺𑀧𑀸𑀢𑁂 𑀘 𑀦𑁂𑀲𑀁 𑀅𑀘𑀮𑀸𑀥𑀺𑀝𑁆𑀞𑀸𑀦𑀁, 𑀢𑀢𑁆𑀣 𑀘 𑀥𑀻𑀭𑀯𑀻𑀭𑀪𑀸𑀯𑀁 𑀯𑀺𑀦𑀸 𑀦 𑀤𑀸𑀦𑀸𑀤𑀺𑀲𑀫𑁆𑀪𑀸𑀭𑀸 𑀲𑀫𑁆𑀩𑁄𑀥𑀺𑀦𑀺𑀫𑀺𑀢𑁆𑀢𑀸 𑀲𑀫𑁆𑀪𑀯𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀅𑀥𑀺𑀝𑁆𑀞𑀸𑀦𑀕𑀼𑀡𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑀢𑀣𑀸 ‘‘𑀅𑀢𑁆𑀢𑀳𑀺𑀢𑀫𑀢𑁆𑀢𑁂 𑀅𑀯𑀢𑀺𑀝𑁆𑀞𑀦𑁆𑀢𑁂𑀦𑀸𑀧𑀺 𑀲𑀢𑁆𑀢𑁂𑀲𑀼 𑀳𑀺𑀢𑀘𑀺𑀢𑁆𑀢𑀢𑀁 𑀯𑀺𑀦𑀸 𑀦 𑀲𑀓𑁆𑀓𑀸 𑀇𑀥𑀮𑁄𑀓𑀧𑀭𑀮𑁄𑀓𑀲𑀫𑁆𑀧𑀢𑁆𑀢𑀺𑀬𑁄 𑀧𑀸𑀧𑀼𑀡𑀺𑀢𑀼𑀁, 𑀧𑀕𑁂𑀯 𑀲𑀩𑁆𑀩𑀲𑀢𑁆𑀢𑁂 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀓𑀸𑀫𑁂𑀦𑀸’’𑀢𑀺 𑀘 ‘‘𑀧𑀘𑁆𑀙𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀮𑁄𑀓𑀼𑀢𑁆𑀢𑀭𑀲𑀫𑁆𑀧𑀢𑁆𑀢𑀺𑀫𑀸𑀓𑀗𑁆𑀔𑀦𑁆𑀢𑁂𑀦 𑀇𑀤𑀸𑀦𑀺 𑀮𑁄𑀓𑀺𑀬𑀲𑀫𑁆𑀧𑀢𑁆𑀢𑀺𑀫𑀸𑀓𑀗𑁆𑀔𑀸 𑀬𑀼𑀢𑁆𑀢𑀭𑀽𑀧𑀸’’𑀢𑀺 𑀘 ‘‘𑀇𑀤𑀸𑀦𑀺 𑀆𑀲𑀬𑀫𑀢𑁆𑀢𑁂𑀦 𑀧𑀭𑁂𑀲𑀁 𑀳𑀺𑀢𑀲𑀼𑀔𑀽𑀧𑀲𑀁𑀳𑀸𑀭𑀁 𑀓𑀸𑀢𑀼𑀫𑀲𑀓𑁆𑀓𑁄𑀦𑁆𑀢𑁄 𑀓𑀤𑀸 𑀧𑀬𑁄𑀕𑁂𑀦 𑀢𑀁 𑀲𑀸𑀥𑀬𑀺𑀲𑁆𑀲𑀸𑀫𑀻’’𑀢𑀺 𑀘 ‘‘𑀇𑀤𑀸𑀦𑀺 𑀫𑀬𑀸 𑀳𑀺𑀢𑀲𑀼𑀔𑀽𑀧𑀲𑀁𑀳𑀸𑀭𑁂𑀦 𑀲𑀁𑀯𑀤𑁆𑀥𑀺𑀢𑀸 𑀧𑀘𑁆𑀙𑀸 𑀥𑀫𑁆𑀫𑀲𑀁𑀯𑀺𑀪𑀸𑀕𑀲𑀳𑀸𑀬𑀸 𑀫𑀬𑁆𑀳𑀁 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀘 ‘‘𑀏𑀢𑁂𑀳𑀺 𑀯𑀺𑀦𑀸 𑀦 𑀫𑀬𑁆𑀳𑀁 𑀩𑁄𑀥𑀺𑀲𑀫𑁆𑀪𑀸𑀭𑀸 𑀲𑀫𑁆𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑀯𑀺𑀪𑀽𑀢𑀺𑀦𑀺𑀧𑁆𑀨𑀢𑁆𑀢𑀺𑀓𑀸𑀭𑀡𑀢𑁆𑀢𑀸 𑀫𑀬𑁆𑀳𑀁 𑀏𑀢𑁂 𑀧𑀭𑀫𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀅𑀦𑀼𑀢𑁆𑀢𑀭𑀁 𑀓𑀼𑀲𑀮𑀸𑀬𑀢𑀦𑀁 𑀉𑀢𑁆𑀢𑀫𑀁 ¶ 𑀕𑀸𑀭𑀯𑀝𑁆𑀞𑀸𑀦’’𑀦𑁆𑀢𑀺 𑀘 ‘‘𑀲𑀯𑀺𑀲𑁂𑀲𑀁 𑀲𑀩𑁆𑀩𑁂𑀲𑀼𑀧𑀺 𑀲𑀢𑁆𑀢𑁂𑀲𑀼 𑀳𑀺𑀢𑀚𑁆𑀛𑀸𑀲𑀬𑀢𑀸 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀩𑁆𑀩𑀸, 𑀓𑀺𑀜𑁆𑀘 𑀓𑀭𑀼𑀡𑀸𑀥𑀺𑀝𑁆𑀞𑀸𑀦𑀢𑁄𑀧𑀺 𑀲𑀩𑁆𑀩𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸 𑀅𑀦𑀼𑀩𑁆𑀭𑀽𑀳𑁂𑀢𑀩𑁆𑀩𑀸. 𑀯𑀺𑀫𑀭𑀺𑀬𑀸𑀤𑀻𑀓𑀢𑁂𑀦 𑀳𑀺 𑀘𑁂𑀢𑀲𑀸 𑀲𑀢𑁆𑀢𑁂𑀲𑀼 𑀳𑀺𑀢𑀲𑀼𑀔𑀽𑀧𑀲𑀁𑀳𑀸𑀭𑀦𑀺𑀭𑀢𑀲𑁆𑀲 𑀢𑁂𑀲𑀁 𑀅𑀳𑀺𑀢𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸 𑀩𑀮𑀯𑀢𑀻 𑀉𑀧𑁆𑀧𑀚𑁆𑀚𑀢𑀺 𑀤𑀴𑁆𑀳𑀫𑀽𑀮𑀸, 𑀓𑀭𑀼𑀡𑀸 𑀘 𑀲𑀩𑁆𑀩𑁂𑀲𑀁 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑀸𑀦𑀁 𑀆𑀤𑀺 𑀘𑀭𑀡𑀁 𑀧𑀢𑀺𑀝𑁆𑀞𑀸 𑀫𑀽𑀮𑀁 𑀫𑀼𑀔𑀁 𑀧𑀫𑀼𑀔’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀫𑁂𑀢𑁆𑀢𑀸𑀕𑀼𑀡𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸.

𑀢𑀣𑀸 ‘‘𑀉𑀧𑁂𑀓𑁆𑀔𑀸𑀬 𑀅𑀪𑀸𑀯𑁂 𑀲𑀢𑁆𑀢𑁂𑀳𑀺 𑀓𑀢𑀸 𑀯𑀺𑀧𑁆𑀧𑀓𑀸𑀭𑀸 𑀘𑀺𑀢𑁆𑀢𑀲𑁆𑀲 𑀯𑀺𑀓𑀸𑀭𑀁 𑀉𑀧𑁆𑀧𑀸𑀤𑁂𑀬𑁆𑀬𑀼𑀁, 𑀲𑀢𑀺 𑀘 𑀘𑀺𑀢𑁆𑀢𑀯𑀺𑀓𑀸𑀭𑁂 𑀤𑀸𑀦𑀸𑀤𑀺𑀲𑀫𑁆𑀪𑀸𑀭𑀸𑀦𑀁 𑀲𑀫𑁆𑀪𑀯𑁄 𑀏𑀯 𑀦𑀢𑁆𑀣𑀻’’𑀢𑀺 𑀘 ‘‘𑀫𑁂𑀢𑁆𑀢𑀸𑀲𑀺𑀦𑁂𑀳𑁂𑀦 𑀲𑀺𑀦𑁂𑀳𑀺𑀢𑁂 𑀘𑀺𑀢𑁆𑀢𑁂 𑀉𑀧𑁂𑀓𑁆𑀔𑀸𑀬 𑀯𑀺𑀦𑀸 𑀲𑀫𑁆𑀪𑀸𑀭𑀸𑀦𑀁 𑀧𑀸𑀭𑀺𑀲𑀼𑀤𑁆𑀥𑀺 𑀦 𑀳𑁄𑀢𑀻’’𑀢𑀺 𑀘 ‘‘𑀅𑀦𑀼𑀧𑁂𑀓𑁆𑀔𑀓𑁄 𑀲𑀗𑁆𑀔𑀸𑀭𑁂𑀲𑀼 𑀧𑀼𑀜𑁆𑀜𑀲𑀫𑁆𑀪𑀸𑀭𑀁, 𑀢𑀩𑁆𑀩𑀺𑀧𑀸𑀓𑀜𑁆𑀘 𑀲𑀢𑁆𑀢𑀳𑀺𑀢𑀢𑁆𑀣𑀁 𑀧𑀭𑀺𑀡𑀸𑀫𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺 𑀘 𑀉𑀧𑁂𑀓𑁆𑀔𑀸𑀬 𑀅𑀪𑀸𑀯𑁂 𑀤𑁂𑀬𑁆𑀬𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀯𑀺𑀪𑀸𑀕𑀫𑀓𑀢𑁆𑀯𑀸 𑀧𑀭𑀺𑀘𑁆𑀘𑀚𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺 𑀘 ‘‘𑀉𑀧𑁂𑀓𑁆𑀔𑀸𑀭𑀳𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸𑀦𑀁, 𑀚𑀻𑀯𑀺𑀢𑀲𑁆𑀲 𑀯𑀸 𑀅𑀦𑁆𑀢𑀭𑀸𑀬𑀁 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀲𑀻𑀮𑀯𑀺𑀲𑁄𑀥𑀦𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀘 𑀢𑀣𑀸 ‘‘𑀉𑀧𑁂𑀓𑁆𑀔𑀸𑀯𑀲𑁂𑀦 𑀅𑀭𑀢𑀺𑀭𑀢𑀺𑀲𑀳𑀲𑁆𑀲𑁂𑀯 𑀦𑁂𑀓𑁆𑀔𑀫𑁆𑀫𑀩𑀮𑀲𑀺𑀤𑁆𑀥𑀺𑀢𑁄, 𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀦𑀯𑀲𑁂𑀦𑁂𑀯 𑀲𑀩𑁆𑀩𑀲𑀫𑁆𑀪𑀸𑀭𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀢𑁄, 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀅𑀦𑀼𑀧𑁂𑀓𑁆𑀔𑀦𑁂 𑀧𑀥𑀸𑀦𑀓𑀺𑀘𑁆𑀘𑀸𑀓𑀭𑀡𑀢𑁄, 𑀉𑀧𑁂𑀓𑁆𑀔𑀢𑁄 𑀏𑀯 𑀢𑀺𑀢𑀺𑀓𑁆𑀔𑀸𑀦𑀺𑀚𑁆𑀛𑀸𑀦𑀲𑀫𑁆𑀪𑀯𑀢𑁄, 𑀉𑀧𑁂𑀓𑁆𑀔𑀸𑀯𑀲𑁂𑀦 𑀲𑀢𑁆𑀢𑀲𑀗𑁆𑀔𑀸𑀭𑀸𑀦𑀁 𑀅𑀯𑀺𑀲𑀁𑀯𑀸𑀤𑀦𑀢𑁄, 𑀮𑁄𑀓𑀥𑀫𑁆𑀫𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀦𑁂𑀦 𑀲𑀫𑀸𑀤𑀺𑀦𑁆𑀦𑀥𑀫𑁆𑀫𑁂𑀲𑀼 𑀅𑀘𑀮𑀸𑀥𑀺𑀝𑁆𑀞𑀸𑀦𑀲𑀺𑀤𑁆𑀥𑀺𑀢𑁄, 𑀧𑀭𑀸𑀧𑀓𑀸𑀭𑀸𑀤𑀻𑀲𑀼 ¶ 𑀅𑀦𑀸𑀪𑁄𑀕𑀯𑀲𑁂𑀦𑁂𑀯 𑀫𑁂𑀢𑁆𑀢𑀸𑀯𑀺𑀳𑀸𑀭𑀦𑀺𑀧𑁆𑀨𑀢𑁆𑀢𑀺𑀢𑁄𑀢𑀺 𑀲𑀩𑁆𑀩𑀲𑀫𑁆𑀩𑁄𑀥𑀺𑀲𑀫𑁆𑀪𑀸𑀭𑀸𑀦𑀁 𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑀧𑀸𑀭𑀺𑀧𑀽𑀭𑀺𑀦𑀺𑀧𑁆𑀨𑀢𑁆𑀢𑀺𑀬𑁄 𑀉𑀧𑁂𑀓𑁆𑀔𑀸𑀦𑀼𑀪𑀸𑀯𑁂𑀦 𑀲𑀫𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀉𑀧𑁂𑀓𑁆𑀔𑀸𑀧𑀸𑀭𑀫𑀻 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸. 𑀏𑀯𑀁 𑀅𑀧𑀭𑀺𑀘𑁆𑀘𑀸𑀕𑀧𑀭𑀺𑀘𑁆𑀘𑀸𑀕𑀸𑀤𑀻𑀲𑀼 𑀬𑀣𑀸𑀓𑁆𑀓𑀫𑀁 𑀆𑀤𑀻𑀦𑀯𑀸𑀦𑀺𑀲𑀁𑀲𑀧𑀘𑁆𑀘𑀯𑁂𑀓𑁆𑀔𑀡𑀸 𑀤𑀸𑀦𑀸𑀤𑀺𑀧𑀸𑀭𑀫𑀻𑀦𑀁 𑀧𑀘𑁆𑀘𑀬𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀣𑀸 𑀲𑀧𑀭𑀺𑀓𑁆𑀔𑀸𑀭𑀸 𑀧𑀜𑁆𑀘𑀤𑀲 𑀘𑀭𑀡𑀥𑀫𑁆𑀫𑀸 𑀧𑀜𑁆𑀘 𑀘 𑀅𑀪𑀺𑀜𑁆𑀜𑀸𑀬𑁄. 𑀢𑀢𑁆𑀣 𑀘𑀭𑀡𑀥𑀫𑁆𑀫𑀸 𑀦𑀸𑀫 𑀲𑀻𑀮𑀲𑀁𑀯𑀭𑁄, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄, 𑀲𑀢𑁆𑀢 𑀲𑀤𑁆𑀥𑀫𑁆𑀫𑀸, 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀘. 𑀢𑁂𑀲𑀼 𑀲𑀻𑀮𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀢𑁂𑀭𑀲𑀧𑀺 𑀥𑀼𑀢𑀗𑁆𑀕𑀥𑀫𑁆𑀫𑀸, 𑀅𑀧𑁆𑀧𑀺𑀘𑁆𑀙𑀢𑀸𑀤𑀬𑁄 𑀘 𑀧𑀭𑀺𑀓𑁆𑀔𑀸𑀭𑀸. 𑀲𑀤𑁆𑀥𑀫𑁆𑀫𑁂𑀲𑀼 𑀲𑀤𑁆𑀥𑀸𑀬 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀲𑀻𑀮𑀘𑀸𑀕𑀤𑁂𑀯𑀢𑀼𑀧𑀲𑀫𑀸𑀦𑀼𑀲𑁆𑀲𑀢𑀺 𑀮𑀽𑀔𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸, 𑀲𑀺𑀦𑀺𑀤𑁆𑀥𑀧𑀼𑀕𑁆𑀕𑀮𑀲𑁂𑀯𑀦𑀸, 𑀲𑀫𑁆𑀧𑀲𑀸𑀤𑀦𑀻𑀬𑀥𑀫𑁆𑀫𑀧𑀘𑁆𑀘𑀯𑁂𑀓𑁆𑀔𑀡𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸 𑀘 𑀧𑀭𑀺𑀓𑁆𑀔𑀸𑀭𑀸. 𑀳𑀺𑀭𑁄𑀢𑁆𑀢𑀧𑁆𑀧𑀸𑀦𑀁 𑀅𑀓𑀼𑀲𑀮𑀸𑀤𑀻𑀦𑀯𑀧𑀘𑁆𑀘𑀯𑁂𑀓𑁆𑀔𑀡𑀸, 𑀅𑀧𑀸𑀬𑀸𑀤𑀻𑀦𑀯𑀧𑀘𑁆𑀘𑀯𑁂𑀓𑁆𑀔𑀡𑀸 ¶ , 𑀓𑀼𑀲𑀮𑀥𑀫𑁆𑀫𑀽𑀧𑀢𑁆𑀣𑀫𑁆𑀪𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑀸, 𑀳𑀺𑀭𑁄𑀢𑁆𑀢𑀧𑁆𑀧𑀭𑀳𑀺𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸, 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑀧𑀼𑀕𑁆𑀕𑀮𑀲𑁂𑀯𑀦𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸 𑀘. 𑀩𑀸𑀳𑀼𑀲𑀘𑁆𑀘𑀲𑁆𑀲 𑀧𑀼𑀩𑁆𑀩𑀬𑁄𑀕𑁄, 𑀧𑀭𑀺𑀧𑀼𑀘𑁆𑀙𑀓𑀪𑀸𑀯𑁄, 𑀲𑀤𑁆𑀥𑀫𑁆𑀫𑀸𑀪𑀺𑀬𑁄𑀕𑁄, 𑀅𑀦𑀯𑀚𑁆𑀚𑀯𑀺𑀚𑁆𑀚𑀸𑀝𑁆𑀞𑀸𑀦𑀸𑀤𑀺𑀧𑀭𑀺𑀘𑀬𑁄, 𑀧𑀭𑀺𑀧𑀓𑁆𑀓𑀺𑀦𑁆𑀤𑁆𑀭𑀺𑀬𑀢𑀸, 𑀓𑀺𑀮𑁂𑀲𑀤𑀽𑀭𑀻𑀪𑀸𑀯𑁄, 𑀅𑀧𑁆𑀧𑀲𑁆𑀲𑀼𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸 𑀩𑀳𑀼𑀲𑁆𑀲𑀼𑀢𑀧𑀼𑀕𑁆𑀕𑀮𑀲𑁂𑀯𑀦𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸 𑀘. 𑀯𑀻𑀭𑀺𑀬𑀲𑁆𑀲 𑀅𑀧𑀸𑀬𑀪𑀬𑀧𑀘𑁆𑀘𑀯𑁂𑀓𑁆𑀔𑀡𑀸, 𑀕𑀫𑀦𑀯𑀻𑀣𑀺𑀧𑀘𑁆𑀘𑀯𑁂𑀓𑁆𑀔𑀡𑀸, 𑀥𑀫𑁆𑀫𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸, 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀸, 𑀓𑀼𑀲𑀻𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸, 𑀆𑀭𑀤𑁆𑀥𑀯𑀻𑀭𑀺𑀬𑀧𑀼𑀕𑁆𑀕𑀮𑀲𑁂𑀯𑀦𑀸, 𑀲𑀫𑁆𑀫𑀧𑁆𑀧𑀥𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸 𑀘. 𑀲𑀢𑀺𑀬𑀸 𑀲𑀢𑀺𑀲𑀫𑁆𑀧𑀚𑀜𑁆𑀜𑀁, 𑀫𑀼𑀝𑁆𑀞𑀲𑁆𑀲𑀢𑀺𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀧𑀼𑀕𑁆𑀕𑀮𑀲𑁂𑀯𑀦𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸 𑀘. 𑀧𑀜𑁆𑀜𑀸𑀬 𑀧𑀭𑀺𑀧𑀼𑀘𑁆𑀙𑀓𑀪𑀸𑀯𑁄, 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸, 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀸, 𑀤𑀼𑀧𑁆𑀧𑀜𑁆𑀜𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸, 𑀧𑀜𑁆𑀜𑀯𑀦𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀸, 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀲𑀼𑀢𑁆𑀢𑀦𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸, 𑀥𑀫𑁆𑀫𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸 𑀘. 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀲𑀻𑀮𑀸𑀤𑀺𑀘𑀢𑀼𑀓𑁆𑀓𑀁, 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸, 𑀆𑀯𑀚𑁆𑀚𑀦𑀸𑀤𑀺𑀯𑀲𑀻𑀪𑀸𑀯𑀓𑀭𑀡𑀜𑁆𑀘 𑀧𑀭𑀺𑀓𑁆𑀔𑀸𑀭𑀸.

𑀢𑀢𑁆𑀣 𑀲𑀻𑀮𑀸𑀤𑀻𑀳𑀺 𑀧𑀬𑁄𑀕𑀲𑀼𑀤𑁆𑀥𑀺𑀬𑀸 𑀲𑀢𑁆𑀢𑀸𑀦𑀁 𑀅𑀪𑀬𑀤𑀸𑀦𑁂, 𑀆𑀲𑀬𑀲𑀼𑀤𑁆𑀥𑀺𑀬𑀸 𑀆𑀫𑀺𑀲𑀤𑀸𑀦𑁂, 𑀉𑀪𑀬𑀲𑀼𑀤𑁆𑀥𑀺𑀬𑀸 𑀥𑀫𑁆𑀫𑀤𑀸𑀦𑁂 𑀲𑀫𑀢𑁆𑀣𑁄𑀳𑁄𑀢𑀻𑀢𑀺𑀆𑀤𑀺𑀦𑀸 𑀘𑀭𑀡𑀸𑀤𑀻𑀦𑀁 𑀤𑀸𑀦𑀸𑀤𑀺𑀲𑀫𑁆𑀪𑀸𑀭𑀧𑀘𑁆𑀘𑀬𑀢𑀸 𑀬𑀣𑀸𑀭𑀳𑀁 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀅𑀢𑀺𑀯𑀺𑀢𑁆𑀣𑀸𑀭𑀪𑀬𑁂𑀦 𑀧𑀦 𑀫𑀬𑀁 𑀦 𑀯𑀺𑀢𑁆𑀣𑀸𑀭𑀬𑀺𑀫𑁆𑀳. 𑀢𑀣𑀸 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀸𑀤𑀬𑁄𑀧𑀺 𑀤𑀸𑀦𑀸𑀤𑀻𑀦𑀁 𑀧𑀘𑁆𑀘𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑁄 𑀲𑀁𑀓𑀺𑀮𑁂𑀲𑁄𑀢𑀺 𑀏𑀢𑁆𑀣 𑁋

𑀢𑀡𑁆𑀳𑀸𑀤𑀻𑀳𑀺 ¶ 𑀧𑀭𑀸𑀫𑀝𑁆𑀞-𑀪𑀸𑀯𑁄 𑀢𑀸𑀲𑀁 𑀓𑀺𑀮𑀺𑀲𑁆𑀲𑀦𑀁;

𑀲𑀸𑀫𑀜𑁆𑀜𑀢𑁄 𑀯𑀺𑀲𑁂𑀲𑁂𑀦, 𑀬𑀣𑀸𑀭𑀳𑀁 𑀯𑀺𑀓𑀧𑁆𑀧𑀢𑀸.

𑀅𑀯𑀺𑀲𑁂𑀲𑁂𑀦 𑀳𑀺 𑀢𑀡𑁆𑀳𑀸𑀤𑀻𑀳𑀺 𑀧𑀭𑀸𑀫𑀝𑁆𑀞𑀪𑀸𑀯𑁄 𑀧𑀸𑀭𑀫𑀻𑀦𑀁 𑀲𑀁𑀓𑀺𑀮𑁂𑀲𑁄. 𑀯𑀺𑀲𑁂𑀲𑁂𑀦 𑀧𑀦 𑀤𑁂𑀬𑁆𑀬𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀯𑀺𑀓𑀧𑁆𑀧𑀸 𑀤𑀸𑀦𑀧𑀸𑀭𑀫𑀺𑀬𑀸 𑀲𑀁𑀓𑀺𑀮𑁂𑀲𑁄. 𑀲𑀢𑁆𑀢𑀓𑀸𑀮𑀯𑀺𑀓𑀧𑁆𑀧𑀸 𑀲𑀻𑀮𑀧𑀸𑀭𑀫𑀺𑀬𑀸. 𑀓𑀸𑀫𑀪𑀯𑀢𑀤𑀼𑀧𑀲𑀫𑁂𑀲𑀼 𑀅𑀪𑀺𑀭𑀢𑀺𑀅𑀦𑀪𑀺𑀭𑀢𑀺𑀯𑀺𑀓𑀧𑁆𑀧𑀸 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀬𑀸. ‘‘𑀅𑀳𑀁 𑀫𑀫𑀸’’𑀢𑀺 𑀯𑀺𑀓𑀧𑁆𑀧𑀸 𑀧𑀜𑁆𑀜𑀸𑀧𑀸𑀭𑀫𑀺𑀬𑀸. 𑀮𑀻𑀦𑀼𑀤𑁆𑀥𑀘𑁆𑀘𑀯𑀺𑀓𑀧𑁆𑀧𑀸 𑀯𑀻𑀭𑀺𑀬𑀧𑀸𑀭𑀫𑀺𑀬𑀸. 𑀅𑀢𑁆𑀢𑀧𑀭𑀯𑀺𑀓𑀧𑁆𑀧𑀸 𑀔𑀦𑁆𑀢𑀺𑀧𑀸𑀭𑀫𑀺𑀬𑀸. 𑀅𑀤𑀺𑀝𑁆𑀞𑀸𑀤𑀻𑀲𑀼 𑀤𑀺𑀝𑁆𑀞𑀸𑀤𑀺𑀯𑀺𑀓𑀧𑁆𑀧𑀸 𑀲𑀘𑁆𑀘𑀧𑀸𑀭𑀫𑀺𑀬𑀸. 𑀩𑁄𑀥𑀺𑀲𑀫𑁆𑀪𑀸𑀭𑀢𑀩𑁆𑀩𑀺𑀧𑀓𑁆𑀔𑁂𑀲𑀼 𑀤𑁄𑀲𑀕𑀼𑀡𑀯𑀺𑀓𑀧𑁆𑀧𑀸 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀬𑀸. 𑀳𑀺𑀢𑀸𑀳𑀺𑀢𑀯𑀺𑀓𑀧𑁆𑀧𑀸 𑀫𑁂𑀢𑁆𑀢𑀸𑀧𑀸𑀭𑀫𑀺𑀬𑀸. 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀓𑀧𑁆𑀧𑀸 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀬𑀸 𑀲𑀁𑀓𑀺𑀮𑁂𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀓𑀺𑀁 ¶ 𑀯𑁄𑀤𑀸𑀦𑀦𑁆𑀢𑀺 𑁋

𑀢𑀡𑁆𑀳𑀸𑀤𑀻𑀳𑀺 𑀅𑀖𑀸𑀢𑀢𑀸, 𑀭𑀳𑀺𑀢𑀢𑀸 𑀯𑀺𑀓𑀧𑁆𑀧𑀸𑀦𑀁;

𑀯𑁄𑀤𑀸𑀦𑀦𑁆𑀢𑀺 𑀯𑀺𑀚𑀸𑀦𑀺𑀬𑀸, 𑀲𑀩𑁆𑀩𑀸𑀲𑀫𑁂𑀯 𑀢𑀸𑀲𑀫𑁆𑀧𑀺.

𑀅𑀦𑀼𑀧𑀖𑀸𑀢𑀸 𑀳𑀺 𑀢𑀡𑁆𑀳𑀸 𑀫𑀸𑀦 𑀤𑀺𑀝𑁆𑀞𑀺 𑀓𑁄𑀥𑀼 𑀧𑀦𑀸𑀳 𑀫𑀓𑁆𑀔 𑀧𑀮𑀸𑀲 𑀇𑀲𑁆𑀲𑀸𑀫𑀘𑁆𑀙𑀭𑀺𑀬 𑀫𑀸𑀬𑀸 𑀲𑀸𑀞𑁂𑀬𑁆𑀬 𑀣𑀫𑁆𑀪 𑀲𑀸𑀭𑀫𑁆𑀪 𑀫𑀤 𑀧𑀫𑀸𑀤𑀸𑀤𑀻𑀳𑀺 𑀓𑀺𑀮𑁂𑀲𑁂𑀳𑀺 𑀤𑁂𑀬𑁆𑀬𑀧𑀝𑀺𑀕𑁆𑀕𑀸𑀳𑀓𑀯𑀺𑀓𑀧𑁆𑀧𑀸𑀤𑀺𑀭𑀳𑀺𑀢𑀸 𑀘 𑀤𑀸𑀦𑀸𑀤𑀺𑀧𑀸𑀭𑀫𑀺𑀬𑁄 𑀧𑀭𑀺𑀲𑀼𑀤𑁆𑀥𑀸 𑀧𑀪𑀲𑁆𑀲𑀭𑀸 𑀪𑀯𑀦𑁆𑀢𑀻𑀢𑀺.

𑀓𑁄 𑀧𑀝𑀺𑀧𑀓𑁆𑀔𑁄𑀢𑀺 𑁋

𑀅𑀓𑀼𑀲𑀮𑀸 𑀓𑀺𑀮𑁂𑀲𑀸 𑀘, 𑀧𑀝𑀺𑀧𑀓𑁆𑀔𑀸 𑀅𑀪𑁂𑀤𑀢𑁄;

𑀪𑁂𑀤𑀢𑁄 𑀧𑀦 𑀧𑀼𑀩𑁆𑀩𑁂𑀧𑀺, 𑀯𑀼𑀢𑁆𑀢𑀸 𑀫𑀘𑁆𑀙𑀭𑀺𑀬𑀸𑀤𑀬𑁄.

𑀅𑀯𑀺𑀲𑁂𑀲𑁂𑀦 𑀳𑀺 𑀲𑀩𑁆𑀩𑁂𑀧𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂𑀧𑀺 𑀓𑀺𑀮𑁂𑀲𑀸 𑀘 𑀏𑀢𑀸𑀲𑀁 𑀧𑀝𑀺𑀧𑀓𑁆𑀔𑀸. 𑀯𑀺𑀲𑁂𑀲𑁂𑀦 𑀧𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸 𑀫𑀘𑁆𑀙𑀭𑀺𑀬𑀸𑀤𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀺𑀘 𑀤𑁂𑀬𑁆𑀬𑀧𑀝𑀺𑀕𑁆𑀕𑀸𑀳𑀓𑀤𑀸𑀦𑀨𑀮𑁂𑀲𑀼 𑀅𑀮𑁄𑀪𑀸𑀤𑁄𑀲𑀸𑀫𑁄𑀳𑀕𑀼𑀡𑀬𑁄𑀕𑀢𑁄 𑀮𑁄𑀪𑀤𑁄𑀲𑀫𑁄𑀳𑀧𑀝𑀺𑀧𑀓𑁆𑀔𑀁 𑀤𑀸𑀦𑀁, 𑀓𑀸𑀬𑀸𑀤𑀺𑀤𑁄𑀲𑀢𑁆𑀢𑀬𑀯𑀗𑁆𑀓𑀸𑀧𑀕𑀫𑀢𑁄 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀁 𑀲𑀻𑀮𑀁, 𑀓𑀸𑀫𑀲𑀼𑀔𑀧𑀭𑀽𑀧𑀖𑀸𑀢𑀅𑀢𑁆𑀢𑀓𑀺𑀮𑀫𑀣𑀧𑀭𑀺𑀯𑀚𑁆𑀚𑀦𑀢𑁄 𑀤𑁄𑀲𑀢𑁆𑀢𑀬𑀧𑀝𑀺𑀧𑀓𑁆𑀔𑀁 𑀦𑁂𑀓𑁆𑀔𑀫𑁆𑀫𑀁, 𑀮𑁄𑀪𑀸𑀤𑀻𑀦𑀁 𑀅𑀦𑁆𑀥𑀻𑀓𑀭𑀡𑀢𑁄, 𑀜𑀸𑀡𑀲𑁆𑀲 𑀘 𑀅𑀦𑀦𑁆𑀥𑀻𑀓𑀭𑀡𑀢𑁄 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀸 𑀧𑀜𑁆𑀜𑀸, 𑀅𑀮𑀻𑀦𑀸𑀦𑀼𑀤𑁆𑀥𑀢𑀜𑀸𑀬𑀸𑀭𑀫𑁆𑀪𑀯𑀲𑁂𑀦 ¶ 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀁 𑀯𑀻𑀭𑀺𑀬𑀁, 𑀇𑀝𑁆𑀞𑀸𑀦𑀺𑀝𑁆𑀞𑀲𑀼𑀜𑁆𑀜𑀢𑀸𑀦𑀁 𑀔𑀫𑀦𑀢𑁄 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀸 𑀔𑀦𑁆𑀢𑀺, 𑀲𑀢𑀺𑀧𑀺 𑀧𑀭𑁂𑀲𑀁 𑀉𑀧𑀓𑀸𑀭𑁂, 𑀅𑀧𑀓𑀸𑀭𑁂 𑀘 𑀬𑀣𑀸𑀪𑀽𑀢𑀧𑁆𑀧𑀯𑀢𑁆𑀢𑀺𑀬𑀸 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀁 𑀲𑀘𑁆𑀘𑀁, 𑀮𑁄𑀓𑀥𑀫𑁆𑀫𑁂 𑀅𑀪𑀺𑀪𑀼𑀬𑁆𑀬 𑀬𑀣𑀸𑀲𑀫𑀸𑀤𑀺𑀦𑁆𑀦𑁂𑀲𑀼 𑀲𑀫𑁆𑀪𑀸𑀭𑁂𑀲𑀼 𑀅𑀘𑀮𑀦𑀢𑁄 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀁 𑀅𑀥𑀺𑀝𑁆𑀞𑀸𑀦𑀁, 𑀦𑀻𑀯𑀭𑀡𑀯𑀺𑀯𑁂𑀓𑀢𑁄 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀸 𑀫𑁂𑀢𑁆𑀢𑀸, 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀅𑀦𑀼𑀦𑀬𑀧𑀝𑀺𑀖𑀯𑀺𑀤𑁆𑀥𑀁𑀲𑀦𑀢𑁄, 𑀲𑀫𑀧𑁆𑀧𑀯𑀢𑁆𑀢𑀺𑀢𑁄 𑀘 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀸 𑀉𑀧𑁂𑀓𑁆𑀔𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀓𑀸 𑀧𑀝𑀺𑀧𑀢𑁆𑀢𑀻𑀢𑀺 𑁋

𑀤𑀸𑀦𑀸𑀓𑀸𑀭𑀸𑀤𑀬𑁄 𑀏𑀯, 𑀉𑀧𑁆𑀧𑀸𑀤𑀺𑀢𑀸 𑀅𑀦𑁂𑀓𑀥𑀸;

𑀧𑀝𑀺𑀧𑀢𑁆𑀢𑀻𑀢𑀺 𑀯𑀺𑀜𑁆𑀜𑁂𑀬𑁆𑀬𑀸, 𑀧𑀸𑀭𑀫𑀻𑀧𑀽𑀭𑀡𑀓𑁆𑀓𑀫𑁂.

𑀤𑀸𑀦𑀧𑀸𑀭𑀫𑀺𑀬𑀸 𑀳𑀺 𑀢𑀸𑀯 𑀲𑀼𑀔𑀽𑀧𑀓𑀭𑀡𑀲𑀭𑀻𑀭𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑁂𑀦, 𑀪𑀬𑀸𑀧𑀦𑀬𑀦𑁂𑀦, 𑀥𑀫𑁆𑀫𑁄𑀧𑀤𑁂𑀲𑁂𑀦 𑀘 𑀩𑀳𑀼𑀥𑀸 𑀲𑀢𑁆𑀢𑀸𑀦𑀁 𑀅𑀦𑀼𑀕𑁆𑀕𑀳𑀓𑀭𑀡𑀁 𑀧𑀝𑀺𑀧𑀢𑁆𑀢𑀺. 𑀢𑀢𑁆𑀣 ¶ 𑀆𑀫𑀺𑀲𑀤𑀸𑀦𑀁 𑀅𑀪𑀬𑀤𑀸𑀦𑀁 𑀥𑀫𑁆𑀫𑀤𑀸𑀦𑀦𑁆𑀢𑀺 𑀤𑀸𑀢𑀩𑁆𑀩𑀯𑀢𑁆𑀣𑀼𑀯𑀲𑁂𑀦 𑀢𑀺𑀯𑀺𑀥𑀁 𑀤𑀸𑀦𑀁. 𑀢𑁂𑀲𑀼 𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑀸𑀢𑀩𑁆𑀩𑀯𑀢𑁆𑀣𑀼 𑀅𑀚𑁆𑀛𑀢𑁆𑀢𑀺𑀓𑀁, 𑀩𑀸𑀳𑀺𑀭𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀢𑁆𑀣 𑀩𑀸𑀳𑀺𑀭𑀁 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁 𑀫𑀸𑀮𑀸 𑀕𑀦𑁆𑀥𑀁 𑀯𑀺𑀮𑁂𑀧𑀦𑀁 𑀲𑁂𑀬𑁆𑀬𑀸 𑀆𑀯𑀲𑀣𑀁 𑀧𑀤𑀻𑀧𑁂𑀬𑁆𑀬𑀦𑁆𑀢𑀺 𑀤𑀲𑀯𑀺𑀥𑀁. 𑀅𑀦𑁆𑀦𑀸𑀤𑀻𑀦𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀤𑀺𑀯𑀺𑀪𑀸𑀕𑁂𑀦 𑀅𑀦𑁂𑀓𑀯𑀺𑀥𑀜𑁆𑀘. 𑀢𑀣𑀸 𑀭𑀽𑀧𑀸𑀭𑀫𑁆𑀫𑀡𑀁 𑀬𑀸𑀯 𑀥𑀫𑁆𑀫𑀸𑀭𑀫𑁆𑀫𑀡𑀦𑁆𑀢𑀺 𑀆𑀭𑀫𑁆𑀫𑀡𑀢𑁄 𑀙𑀩𑁆𑀩𑀺𑀥𑀁. 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀦𑀜𑁆𑀘 𑀦𑀻𑀮𑀸𑀤𑀺𑀯𑀺𑀪𑀸𑀕𑁂𑀦 𑀅𑀦𑁂𑀓𑀯𑀺𑀥𑀁. 𑀢𑀣𑀸 𑀫𑀡𑀺𑀓𑀦𑀓𑀭𑀚𑀢𑀫𑀼𑀢𑁆𑀢𑀸𑀧𑀯𑀸𑀴𑀸𑀤𑀺𑀔𑁂𑀢𑁆𑀢𑀯𑀢𑁆𑀣𑀼𑀆𑀭𑀸𑀫𑀸𑀤𑀺 𑀤𑀸𑀲𑀻𑀤𑀸𑀲𑀕𑁄𑀫𑀳𑀺𑀁𑀲𑀸𑀤𑀺𑀦𑀸𑀦𑀸𑀯𑀺𑀥𑀯𑀢𑁆𑀣𑀽𑀧𑀓𑀭𑀡𑀯𑀲𑁂𑀦 𑀅𑀦𑁂𑀓𑀯𑀺𑀥𑀁.

𑀢𑀢𑁆𑀣 𑀫𑀳𑀸𑀧𑀼𑀭𑀺𑀲𑁄 𑀩𑀸𑀳𑀺𑀭𑀁 𑀯𑀢𑁆𑀣𑀼𑀁 𑀤𑁂𑀦𑁆𑀢𑁄 ‘‘𑀬𑁄 𑀬𑁂𑀦 𑀅𑀢𑁆𑀣𑀺𑀓𑁄, 𑀢𑀁 𑀢𑀲𑁆𑀲𑁂𑀯 𑀤𑁂𑀢𑀺. 𑀤𑁂𑀦𑁆𑀢𑁄 𑀘 𑀢𑀲𑁆𑀲 𑀅𑀢𑁆𑀣𑀺𑀓𑁄’’𑀢𑀺 𑀲𑀬𑀫𑁂𑀯 𑀚𑀸𑀦𑀦𑁆𑀢𑁄 𑀅𑀬𑀸𑀘𑀺𑀢𑁄𑀧𑀺 𑀤𑁂𑀢𑀺, 𑀧𑀕𑁂𑀯 𑀬𑀸𑀘𑀺𑀢𑁄. 𑀫𑀼𑀢𑁆𑀢𑀘𑀸𑀕𑁄 𑀤𑁂𑀢𑀺, 𑀦𑁄 𑀅𑀫𑀼𑀢𑁆𑀢𑀘𑀸𑀕𑁄. 𑀧𑀭𑀺𑀬𑀢𑁆𑀢𑀁 𑀤𑁂𑀢𑀺, 𑀦𑁄 𑀅𑀧𑀭𑀺𑀬𑀢𑁆𑀢𑀁. 𑀲𑀢𑀺 𑀤𑁂𑀬𑁆𑀬𑀥𑀫𑁆𑀫𑁂 𑀧𑀘𑁆𑀘𑀼𑀧𑀓𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑁄 𑀦 𑀤𑁂𑀢𑀺, 𑀅𑀲𑀢𑀺 𑀤𑁂𑀬𑁆𑀬𑀥𑀫𑁆𑀫𑁂, 𑀧𑀭𑀺𑀬𑀢𑁆𑀢𑁂 𑀘 𑀲𑀁𑀯𑀺𑀪𑀸𑀕𑀸𑀭𑀳𑀁 𑀯𑀺𑀪𑀚𑀢𑀺. 𑀦 𑀘 𑀤𑁂𑀢𑀺 𑀧𑀭𑀽𑀧𑀖𑀸𑀢𑀸𑀯𑀳𑀁 𑀲𑀢𑁆𑀣𑀯𑀺𑀲𑀫𑀚𑁆𑀚𑀸𑀤𑀺𑀓𑀁, 𑀦𑀸𑀧𑀺 𑀓𑀻𑀴𑀦𑀓𑀁, 𑀬𑀁 𑀅𑀦𑀢𑁆𑀣𑀼𑀧𑀲𑀁𑀳𑀺𑀢𑀁, 𑀧𑀫𑀸𑀤𑀸𑀯𑀳𑀜𑁆𑀘, 𑀦 𑀘 𑀕𑀺𑀮𑀸𑀦𑀲𑁆𑀲 𑀬𑀸𑀘𑀓𑀲𑁆𑀲 𑀧𑀸𑀦𑀪𑁄𑀚𑀦𑀸𑀤𑀺𑀅𑀲𑀧𑁆𑀧𑀸𑀬𑀁, 𑀧𑀫𑀸𑀡𑀭𑀳𑀺𑀢𑀁 𑀯𑀸 𑀤𑁂𑀢𑀺, 𑀧𑀫𑀸𑀡𑀬𑀼𑀢𑁆𑀢𑀁 𑀧𑀦 𑀲𑀧𑁆𑀧𑀸𑀬𑀫𑁂𑀯 𑀤𑁂𑀢𑀺.

𑀢𑀣𑀸 𑀬𑀸𑀘𑀺𑀢𑁄 𑀕𑀳𑀝𑁆𑀞𑀸𑀦𑀁 𑀕𑀳𑀝𑁆𑀞𑀸𑀦𑀼𑀘𑁆𑀙𑀯𑀺𑀓𑀁 𑀤𑁂𑀢𑀺, 𑀧𑀩𑁆𑀩𑀚𑀺𑀢𑀸𑀦𑀁 𑀧𑀩𑁆𑀩𑀚𑀺𑀢𑀸𑀦𑀼𑀘𑁆𑀙𑀯𑀺𑀓𑀁 𑀤𑁂𑀢𑀺. 𑀫𑀸𑀢𑀸𑀧𑀺𑀢𑀭𑁄 𑀜𑀸𑀢𑀺𑀲𑀸𑀮𑁄𑀳𑀺𑀢𑀸 𑀫𑀺𑀢𑁆𑀢𑀸𑀫𑀘𑁆𑀘𑀸 𑀧𑀼𑀢𑁆𑀢𑀤𑀸𑀭𑀤𑀸𑀲𑀓𑀫𑁆𑀫𑀓𑀭𑀸𑀢𑀺 𑀏𑀢𑁂𑀲𑀼 𑀓𑀲𑁆𑀲𑀘𑀺 𑀧𑀻𑀴𑀁 𑀅𑀚𑀦𑁂𑀦𑁆𑀢𑁄 𑀤𑁂𑀢𑀺, 𑀦 𑀘 𑀉𑀴𑀸𑀭𑀁 𑀤𑁂𑀬𑁆𑀬𑀥𑀫𑁆𑀫𑀁 𑀧𑀝𑀺𑀚𑀸𑀦𑀺𑀢𑁆𑀯𑀸 𑀮𑀽𑀔𑀁 𑀤𑁂𑀢𑀺, 𑀦 𑀘 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀲𑀦𑁆𑀦𑀺𑀲𑁆𑀲𑀺𑀢𑁄 ¶ 𑀤𑁂𑀢𑀺, 𑀦 𑀘 𑀧𑀘𑁆𑀘𑀼𑀧𑀓𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑁄 𑀤𑁂𑀢𑀺, 𑀦 𑀘 𑀨𑀮𑀧𑀸𑀝𑀺𑀓𑀗𑁆𑀔𑀻 𑀤𑁂𑀢𑀺 𑀅𑀜𑁆𑀜𑀢𑁆𑀭 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸, 𑀦 𑀘 𑀬𑀸𑀘𑀺𑀢𑁄, 𑀤𑁂𑀬𑁆𑀬𑀥𑀫𑁆𑀫𑀁 𑀯𑀸 𑀚𑀺𑀕𑀼𑀘𑁆𑀙𑀦𑁆𑀢𑁄 𑀤𑁂𑀢𑀺, 𑀦 𑀘 𑀅𑀲𑀜𑁆𑀜𑀢𑀸𑀦𑀁 𑀬𑀸𑀘𑀓𑀸𑀦𑀁 𑀅𑀓𑁆𑀓𑁄𑀲𑀓𑀧𑀭𑀺𑀪𑀸𑀲𑀓𑀸𑀦𑀫𑁆𑀧𑀺 𑀅𑀧𑀯𑀺𑀤𑁆𑀥𑀸 𑀤𑀸𑀦𑀁 𑀤𑁂𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀧𑀲𑀦𑁆𑀦𑀘𑀺𑀢𑁆𑀢𑁄 𑀅𑀦𑀼𑀓𑀫𑁆𑀧𑀦𑁆𑀢𑁄 𑀲𑀓𑁆𑀓𑀘𑁆𑀘𑀫𑁂𑀯 𑀤𑁂𑀢𑀺, 𑀦 𑀘 𑀓𑁄𑀢𑀽𑀳𑀮𑀫𑀗𑁆𑀕𑀮𑀺𑀓𑁄 𑀳𑀼𑀢𑁆𑀯𑀸 𑀤𑁂𑀢𑀺, 𑀓𑀫𑁆𑀫𑀨𑀮𑀫𑁂𑀯 𑀧𑀦 𑀲𑀤𑁆𑀤𑀳𑀦𑁆𑀢𑁄 𑀤𑁂𑀢𑀺, 𑀦𑀸𑀧𑀺 𑀬𑀸𑀘𑀓𑁂 𑀧𑀬𑀺𑀭𑀼𑀧𑀸𑀲𑀦𑀸𑀤𑀻𑀳𑀺 𑀲𑀁𑀓𑀺𑀮𑀫𑁂𑀢𑁆𑀯𑀸 𑀤𑁂𑀢𑀺, 𑀅𑀧𑀭𑀺𑀓𑀺𑀮𑀫𑁂𑀦𑁆𑀢𑁄 𑀏𑀯 𑀧𑀦 𑀤𑁂𑀢𑀺, 𑀦 𑀘 𑀧𑀭𑁂𑀲𑀁 𑀯𑀜𑁆𑀘𑀦𑀸𑀥𑀺𑀧𑁆𑀧𑀸𑀬𑁄, 𑀪𑁂𑀤𑀸𑀥𑀺𑀧𑁆𑀧𑀸𑀬𑁄 𑀯𑀸 𑀤𑀸𑀦𑀁 𑀤𑁂𑀢𑀺, 𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄𑀯 𑀤𑁂𑀢𑀺, 𑀦𑀸𑀧𑀺 𑀨𑀭𑀼𑀲𑀯𑀸𑀘𑁄 𑀪𑀸𑀓𑀼𑀝𑀺𑀓𑀫𑀼𑀔𑁄 𑀤𑀸𑀦𑀁 𑀤𑁂𑀢𑀺, 𑀧𑀺𑀬𑀯𑀸𑀤𑀻 𑀘 𑀧𑀦 𑀧𑀼𑀩𑁆𑀩𑀪𑀸𑀲𑀻 𑀫𑀺𑀳𑀺𑀢𑀲𑀺𑀢𑀯𑀘𑀦𑁄 𑀳𑀼𑀢𑁆𑀯𑀸 𑀤𑁂𑀢𑀺, 𑀬𑀲𑁆𑀫𑀺𑀁 𑀘𑁂 𑀤𑁂𑀬𑁆𑀬𑀥𑀫𑁆𑀫𑁂 𑀉𑀴𑀸𑀭𑀫𑀦𑀼𑀜𑁆𑀜𑀢𑀸𑀬 𑀯𑀸 𑀘𑀺𑀭𑀧𑀭𑀺𑀘𑀬𑁂𑀦 ¶ 𑀯𑀸 𑀕𑁂𑀥𑀲𑀪𑀸𑀯𑀢𑀸𑀬 𑀯𑀸 𑀮𑁄𑀪𑀥𑀫𑁆𑀫𑁄 𑀅𑀥𑀺𑀫𑀢𑁆𑀢𑁄 𑀳𑁄𑀢𑀺, 𑀚𑀸𑀦𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀔𑀺𑀧𑁆𑀧𑀫𑁂𑀯 𑀧𑀝𑀺𑀯𑀺𑀦𑁄𑀤𑀬𑀺𑀢𑁆𑀯𑀸 𑀬𑀸𑀘𑀓𑁂 𑀧𑀭𑀺𑀬𑁂𑀲𑁂𑀢𑁆𑀯𑀸𑀧𑀺 𑀤𑁂𑀢𑀺, 𑀬𑀜𑁆𑀘 𑀤𑁂𑀬𑁆𑀬𑀯𑀢𑁆𑀣𑀼 𑀧𑀭𑀺𑀢𑁆𑀢𑀁, 𑀬𑀸𑀘𑀓𑁄𑀧𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑁄, 𑀢𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 𑀅𑀧𑀺 𑀅𑀢𑁆𑀢𑀸𑀦𑀁 𑀥𑀸𑀯𑀺𑀢𑁆𑀯𑀸 𑀤𑁂𑀦𑁆𑀢𑁄 𑀬𑀸𑀘𑀓𑀁 𑀲𑀫𑁆𑀫𑀸𑀦𑁂𑀢𑀺 𑀬𑀣𑀸 𑀢𑀁 𑀅𑀓𑀺𑀢𑁆𑀢𑀺𑀧𑀡𑁆𑀟𑀺𑀢𑁄, 𑀦 𑀘 𑀫𑀳𑀸𑀧𑀼𑀭𑀺𑀲𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑀤𑀸𑀭𑀤𑀸𑀲𑀓𑀫𑁆𑀫𑀓𑀭𑀧𑁄𑀭𑀺𑀲𑁂 𑀬𑀸𑀘𑀺𑀢𑁄 𑀢𑁂 𑀅𑀲𑀜𑁆𑀜𑀸𑀧𑀺𑀢𑁂 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁂 𑀬𑀸𑀘𑀓𑀸𑀦𑀁 𑀤𑁂𑀢𑀺, 𑀲𑀫𑁆𑀫𑀤𑁂𑀯 𑀧𑀦 𑀲𑀜𑁆𑀜𑀸𑀧𑀺𑀢𑁂 𑀲𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁂 𑀤𑁂𑀢𑀺, 𑀤𑁂𑀦𑁆𑀢𑁄 𑀘 𑀬𑀓𑁆𑀔𑀭𑀓𑁆𑀔𑀲𑀧𑀺𑀲𑀸𑀘𑀸𑀤𑀻𑀦𑀁 𑀯𑀸 𑀫𑀦𑀼𑀲𑁆𑀲𑀸𑀦𑀁 𑀯𑀸 𑀓𑀼𑀭𑀽𑀭𑀓𑀫𑁆𑀫𑀦𑁆𑀢𑀸𑀦𑀁 𑀚𑀸𑀦𑀦𑁆𑀢𑁄 𑀦 𑀤𑁂𑀢𑀺, 𑀢𑀣𑀸 𑀭𑀚𑁆𑀚𑀫𑁆𑀧𑀺 𑀢𑀸𑀤𑀺𑀲𑀸𑀦𑀁 𑀦 𑀤𑁂𑀢𑀺, 𑀬𑁂 𑀮𑁄𑀓𑀲𑁆𑀲 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀅𑀦𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀬𑁂 𑀧𑀦 𑀥𑀫𑁆𑀫𑀺𑀓𑀸 𑀥𑀫𑁆𑀫𑁂𑀦 𑀮𑁄𑀓𑀁 𑀧𑀸𑀮𑁂𑀦𑁆𑀢𑀺, 𑀢𑁂𑀲𑀁 𑀭𑀚𑁆𑀚𑀤𑀸𑀦𑀁 𑀤𑁂𑀢𑀺. 𑀏𑀯𑀁 𑀢𑀸𑀯 𑀩𑀸𑀳𑀺𑀭𑀤𑀸𑀦𑁂 𑀧𑀝𑀺𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀚𑁆𑀛𑀢𑁆𑀢𑀺𑀓𑀤𑀸𑀦𑀫𑁆𑀧𑀺 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀣𑀁? 𑀬𑀣𑀸 𑀦𑀸𑀫 𑀓𑁄𑀘𑀺 𑀧𑀼𑀭𑀺𑀲𑁄 𑀖𑀸𑀲𑀘𑁆𑀙𑀸𑀤𑀦𑀳𑁂𑀢𑀼 𑀅𑀢𑁆𑀢𑀸𑀦𑀁 𑀧𑀭𑀲𑁆𑀲 𑀦𑀺𑀲𑁆𑀲𑀚𑁆𑀚𑀢𑀺, 𑀯𑀺𑀥𑁂𑀬𑁆𑀬𑀪𑀸𑀯𑀁 𑀉𑀧𑀕𑀘𑁆𑀙𑀢𑀺 𑀤𑀸𑀲𑀩𑁆𑀬𑀁, 𑀏𑀯𑀫𑁂𑀯 𑀫𑀳𑀸𑀧𑀼𑀭𑀺𑀲𑁄 𑀲𑀫𑁆𑀩𑁄𑀥𑀺𑀳𑁂𑀢𑀼 𑀦𑀺𑀭𑀸𑀫𑀺𑀲𑀘𑀺𑀢𑁆𑀢𑁄 𑀲𑀢𑁆𑀢𑀸𑀦𑀁 𑀅𑀦𑀼𑀢𑁆𑀢𑀭𑀁 𑀳𑀺𑀢𑀲𑀼𑀔𑀁 𑀇𑀘𑁆𑀙𑀦𑁆𑀢𑁄 𑀅𑀢𑁆𑀢𑀦𑁄 𑀤𑀸𑀦𑀧𑀸𑀭𑀫𑀺𑀁 𑀧𑀭𑀺𑀧𑀽𑀭𑁂𑀢𑀼𑀓𑀸𑀫𑁄 𑀅𑀢𑁆𑀢𑀸𑀦𑀁 𑀧𑀭𑀲𑁆𑀲 𑀦𑀺𑀲𑁆𑀲𑀚𑁆𑀚𑀢𑀺, 𑀯𑀺𑀥𑁂𑀬𑁆𑀬𑀪𑀸𑀯𑀁 𑀉𑀧𑀕𑀘𑁆𑀙𑀢𑀺 𑀬𑀣𑀸𑀓𑀸𑀫𑀓𑀭𑀡𑀻𑀬𑀢𑀁, 𑀓𑀭𑀘𑀭𑀡𑀦𑀬𑀦𑀸𑀤𑀺𑀅𑀗𑁆𑀕𑀧𑀘𑁆𑀘𑀗𑁆𑀕𑀁 𑀢𑁂𑀦 𑀢𑁂𑀦 𑀅𑀢𑁆𑀣𑀺𑀓𑀸𑀦𑀁 𑀅𑀓𑀫𑁆𑀧𑀺𑀢𑁄 𑀅𑀮𑀻𑀦𑁄 𑀅𑀦𑀼𑀧𑁆𑀧𑀤𑁂𑀢𑀺, 𑀦 𑀢𑀢𑁆𑀣 𑀲𑀚𑁆𑀚𑀢𑀺, 𑀦 𑀲𑀗𑁆𑀓𑁄𑀘𑀁 𑀆𑀧𑀚𑁆𑀚𑀢𑀺 𑀬𑀣𑀸 𑀢𑀁 𑀩𑀸𑀳𑀺𑀭𑀯𑀢𑁆𑀣𑀼𑀲𑁆𑀫𑀺𑀁. 𑀢𑀣𑀸 𑀳𑀺 𑀫𑀳𑀸𑀧𑀼𑀭𑀺𑀲𑁄 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀩𑀸𑀳𑀺𑀭𑀯𑀢𑁆𑀣𑀼𑀁 𑀧𑀭𑀺𑀘𑁆𑀘𑀚𑀢𑀺 𑀬𑀣𑀸𑀲𑀼𑀔𑀁 𑀧𑀭𑀺𑀪𑁄𑀕𑀸𑀬 𑀯𑀸 𑀬𑀸𑀘𑀓𑀸𑀦𑀁, 𑀢𑁂𑀲𑀁 𑀫𑀦𑁄𑀭𑀣𑀁 𑀧𑀽𑀭𑁂𑀦𑁆𑀢𑁄 𑀅𑀢𑁆𑀢𑀦𑁄 𑀯𑀲𑀻𑀪𑀸𑀯𑀸𑀬 𑀯𑀸. 𑀢𑀢𑁆𑀣 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀫𑀼𑀢𑁆𑀢𑀘𑀸𑀕𑁄 𑀏𑀯𑀫𑀸𑀳 ‘‘𑀦𑀺𑀲𑁆𑀲𑀗𑁆𑀕𑀪𑀸𑀯𑁂𑀦𑀸𑀳𑀁 𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺, 𑀏𑀯𑀁 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼𑀲𑁆𑀫𑀺𑀫𑁆𑀧𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀬𑀁 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼 𑀤𑀺𑀬𑁆𑀬𑀫𑀸𑀦𑀁 𑀬𑀸𑀘𑀓𑀲𑁆𑀲 𑀏𑀓𑀦𑁆𑀢𑁂𑀦𑁂𑀯 𑀳𑀺𑀢𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀁 𑀤𑁂𑀢𑀺, 𑀦 𑀇𑀢𑀭𑀁. 𑀦 𑀘 𑀫𑀳𑀸𑀧𑀼𑀭𑀺𑀲𑁄 𑀫𑀸𑀭𑀲𑁆𑀲, 𑀫𑀸𑀭𑀓𑀸𑀬𑀺𑀓𑀸𑀦𑀁 𑀯𑀸 𑀤𑁂𑀯𑀢𑀸𑀦𑀁 𑀯𑀺𑀳𑀺𑀁𑀲𑀸𑀥𑀺𑀧𑁆𑀧𑀸𑀬𑀸𑀦𑀁 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑀁 ¶ , 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀺 𑀯𑀸 𑀚𑀸𑀦𑀫𑀸𑀦𑁄 𑀤𑁂𑀢𑀺 ‘‘𑀫𑀸 𑀢𑁂𑀲𑀁 𑀅𑀦𑀢𑁆𑀣𑁄 𑀅𑀳𑁄𑀲𑀻’’𑀢𑀺. 𑀬𑀣𑀸 𑀘 𑀫𑀸𑀭𑀓𑀸𑀬𑀺𑀓𑀸𑀦𑀁, 𑀏𑀯𑀁 𑀢𑁂𑀳𑀺 𑀅𑀦𑁆𑀯𑀸𑀯𑀺𑀝𑁆𑀞𑀸𑀦𑀫𑁆𑀧𑀺 𑀦 𑀤𑁂𑀢𑀺, 𑀦𑀸𑀧𑀺 𑀉𑀫𑁆𑀫𑀢𑁆𑀢𑀓𑀸𑀦𑀁, 𑀇𑀢𑀭𑁂𑀲𑀁 𑀧𑀦 𑀬𑀸𑀘𑀺𑀬𑀫𑀸𑀦𑁄 𑀲𑀫𑀦𑀦𑁆𑀢𑀭𑀫𑁂𑀯 𑀤𑁂𑀢𑀺 𑀢𑀸𑀤𑀺𑀲𑀸𑀬 𑀬𑀸𑀘𑀦𑀸𑀬 𑀤𑀼𑀮𑁆𑀮𑀪𑀪𑀸𑀯𑀢𑁄, 𑀢𑀸𑀤𑀺𑀲𑀲𑁆𑀲 𑀘 𑀤𑀸𑀦𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄.

𑀅𑀪𑀬𑀤𑀸𑀦𑀁 ¶ 𑀧𑀦 𑀭𑀸𑀚𑀢𑁄 𑀘𑁄𑀭𑀢𑁄 𑀅𑀕𑁆𑀕𑀺𑀢𑁄 𑀉𑀤𑀓𑀢𑁄 𑀯𑁂𑀭𑀻𑀧𑀼𑀕𑁆𑀕𑀮𑀢𑁄 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀯𑀸𑀴𑀫𑀺𑀕𑀢𑁄 𑀦𑀸𑀕𑀬𑀓𑁆𑀔𑀭𑀓𑁆𑀔𑀲𑀧𑀺𑀲𑀸𑀘𑀸𑀤𑀺𑀢𑁄 𑀲𑀢𑁆𑀢𑀸𑀦𑀁 𑀪𑀬𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀢𑀢𑁄 𑀧𑀭𑀺𑀢𑁆𑀢𑀸𑀡𑀪𑀸𑀯𑁂𑀦 𑀤𑀸𑀢𑀩𑁆𑀩𑀁.

𑀥𑀫𑁆𑀫𑀤𑀸𑀦𑀁 𑀧𑀦 𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀲𑁆𑀲 𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑀸. 𑀑𑀧𑀸𑀬𑀺𑀓𑁄 𑀳𑀺 𑀢𑀲𑁆𑀲 𑀉𑀧𑀤𑁂𑀲𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀯𑀲𑁂𑀦, 𑀬𑁂𑀦 𑀲𑀸𑀲𑀦𑁂 𑀅𑀦𑁄𑀢𑀺𑀡𑁆𑀡𑀸𑀦𑀁 𑀅𑀯𑀢𑀸𑀭𑀡𑀁 𑀑𑀢𑀺𑀡𑁆𑀡𑀸𑀦𑀁 𑀧𑀭𑀺𑀧𑀸𑀘𑀦𑀁. 𑀢𑀢𑁆𑀣𑀸𑀬𑀁 𑀦𑀬𑁄 𑁋 𑀲𑀗𑁆𑀔𑁂𑀧𑀢𑁄 𑀢𑀸𑀯 𑀤𑀸𑀦𑀓𑀣𑀸 𑀲𑀻𑀮𑀓𑀣𑀸 𑀲𑀕𑁆𑀕𑀓𑀣𑀸 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄 𑀲𑀁𑀓𑀺𑀮𑁂𑀲𑁄 𑀑𑀓𑀸𑀭𑁄 𑀘 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀲𑀸𑀯𑀓𑀩𑁄𑀥𑀺𑀬𑀁 𑀅𑀥𑀺𑀫𑀼𑀢𑁆𑀢𑀘𑀺𑀢𑁆𑀢𑀸𑀦𑀁 𑀲𑀭𑀡𑀕𑀫𑀦𑀁, 𑀲𑀻𑀮𑀲𑀁𑀯𑀭𑁄, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄, 𑀲𑀢𑁆𑀢 𑀲𑀤𑁆𑀥𑀫𑁆𑀫𑀸, 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀓𑀫𑁆𑀫𑀓𑀭𑀡𑀯𑀲𑁂𑀦 𑀲𑀫𑀣𑀸𑀦𑀼𑀬𑁄𑀕𑁄, 𑀭𑀽𑀧𑀫𑀼𑀔𑀸𑀤𑀻𑀲𑀼 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁂𑀲𑀼 𑀬𑀣𑀸𑀭𑀳𑀁 𑀅𑀪𑀺𑀦𑀺𑀯𑁂𑀲𑀦𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀸𑀦𑀼𑀬𑁄𑀕𑁄, 𑀢𑀣𑀸 𑀯𑀺𑀲𑀼𑀤𑁆𑀥𑀺𑀧𑀝𑀺𑀧𑀤𑀸𑀬 𑀲𑀫𑁆𑀫𑀢𑁆𑀢𑀕𑀳𑀡𑀁, 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀙 𑀅𑀪𑀺𑀜𑁆𑀜𑀸, 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸, 𑀲𑀸𑀯𑀓𑀩𑁄𑀥𑀻𑀢𑀺 𑀏𑀢𑁂𑀲𑀁 𑀕𑀼𑀡𑀲𑀁𑀓𑀺𑀢𑁆𑀢𑀦𑀯𑀲𑁂𑀦 𑀬𑀣𑀸𑀭𑀳𑀁 𑀢𑀢𑁆𑀣 𑀢𑀢𑁆𑀣 𑀧𑀢𑀺𑀝𑁆𑀞𑀸𑀧𑀦𑀸, 𑀧𑀭𑀺𑀬𑁄𑀤𑀧𑀦𑀸 𑀘. 𑀢𑀣𑀸 𑀧𑀘𑁆𑀘𑁂𑀓𑀩𑁄𑀥𑀺𑀬𑀁, 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀜𑁆𑀘 𑀅𑀥𑀺𑀫𑀼𑀢𑁆𑀢𑀘𑀺𑀢𑁆𑀢𑀸𑀦𑀁 𑀬𑀣𑀸𑀭𑀳𑀁 𑀤𑀸𑀦𑀸𑀤𑀺𑀧𑀸𑀭𑀫𑀻𑀦𑀁 𑀲𑀪𑀸𑀯𑀲𑀭𑀲𑀮𑀓𑁆𑀔𑀡𑀸𑀤𑀺𑀲𑀁𑀓𑀺𑀢𑁆𑀢𑀦𑀫𑀼𑀔𑁂𑀦 𑀢𑀻𑀲𑀼𑀧𑀺 𑀅𑀯𑀢𑁆𑀣𑀸𑀪𑁂𑀤𑁂𑀲𑀼 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁 𑀫𑀳𑀸𑀦𑀼𑀪𑀸𑀯𑀢𑀸𑀯𑀺𑀪𑀸𑀯𑀦𑁂𑀦 𑀬𑀸𑀦𑀤𑁆𑀯𑀬𑁂 𑀧𑀢𑀺𑀝𑁆𑀞𑀸𑀧𑀦𑀸, 𑀧𑀭𑀺𑀬𑁄𑀤𑀧𑀦𑀸 𑀘. 𑀏𑀯𑀁 𑀫𑀳𑀸𑀧𑀼𑀭𑀺𑀲𑁄 𑀲𑀢𑁆𑀢𑀸𑀦𑀁 𑀥𑀫𑁆𑀫𑀤𑀸𑀦𑀁 𑀤𑁂𑀢𑀺.

𑀢𑀣𑀸 𑀫𑀳𑀸𑀧𑀼𑀭𑀺𑀲𑁄 𑀆𑀫𑀺𑀲𑀤𑀸𑀦𑀁 𑀤𑁂𑀦𑁆𑀢𑁄 ‘‘𑀇𑀫𑀺𑀦𑀸𑀳𑀁 𑀤𑀸𑀦𑁂𑀦 𑀲𑀢𑁆𑀢𑀸𑀦𑀁 𑀆𑀬𑀼𑀯𑀡𑁆𑀡𑀲𑀼𑀔𑀩𑀮𑀧𑀝𑀺𑀪𑀸𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀜𑁆𑀘 𑀭𑀫𑀡𑀻𑀬𑀁 𑀅𑀕𑁆𑀕𑀨𑀮𑀲𑀫𑁆𑀧𑀢𑁆𑀢𑀺𑀜𑁆𑀘 𑀦𑀺𑀧𑁆𑀨𑀸𑀤𑁂𑀬𑁆𑀬’’𑀦𑁆𑀢𑀺 𑀅𑀦𑁆𑀦𑀁 𑀤𑁂𑀢𑀺, 𑀢𑀣𑀸 𑀲𑀢𑁆𑀢𑀸𑀦𑀁 𑀓𑀸𑀫𑀓𑀺𑀮𑁂𑀲𑀧𑀺𑀧𑀸𑀲𑀯𑀽𑀧𑀲𑀫𑀸𑀬 𑀧𑀸𑀦𑀁 𑀤𑁂𑀢𑀺, 𑀢𑀣𑀸 𑀲𑀼𑀯𑀡𑁆𑀡𑀯𑀡𑁆𑀡𑀢𑀸𑀬, 𑀳𑀺𑀭𑁄𑀢𑁆𑀢𑀧𑁆𑀧𑀸𑀮𑀗𑁆𑀓𑀸𑀭𑀲𑁆𑀲 𑀘 𑀦𑀺𑀧𑁆𑀨𑀢𑁆𑀢𑀺𑀬𑀸 𑀯𑀢𑁆𑀣𑀸𑀦𑀺 𑀤𑁂𑀢𑀺, 𑀢𑀣𑀸 𑀇𑀤𑁆𑀥𑀺𑀯𑀺𑀥𑀲𑁆𑀲 𑀘𑁂𑀯 𑀦𑀺𑀩𑁆𑀩𑀸𑀦𑀲𑀼𑀔𑀲𑁆𑀲 𑀘 𑀦𑀺𑀧𑁆𑀨𑀢𑁆𑀢𑀺𑀬𑀸 𑀬𑀸𑀦𑀁 𑀤𑁂𑀢𑀺, 𑀢𑀣𑀸 𑀲𑀻𑀮𑀕𑀦𑁆𑀥𑀦𑀺𑀧𑁆𑀨𑀢𑁆𑀢𑀺𑀬𑀸 𑀕𑀦𑁆𑀥𑀁 𑀤𑁂𑀢𑀺, 𑀢𑀣𑀸 𑀩𑀼𑀤𑁆𑀥𑀕𑀼𑀡𑀲𑁄𑀪𑀸𑀦𑀺𑀧𑁆𑀨𑀢𑁆𑀢𑀺𑀬𑀸 𑀫𑀸𑀮𑀸𑀯𑀺𑀮𑁂𑀧𑀦𑀁 𑀤𑁂𑀢𑀺, 𑀢𑀣𑀸 𑀩𑁄𑀥𑀺𑀫𑀡𑁆𑀟𑀸𑀲𑀦𑀦𑀺𑀧𑁆𑀨𑀢𑁆𑀢𑀺𑀬𑀸 𑀆𑀲𑀦𑀁 𑀤𑁂𑀢𑀺, 𑀢𑀣𑀸𑀕𑀢𑀲𑁂𑀬𑁆𑀬𑀦𑀺𑀧𑁆𑀨𑀢𑁆𑀢𑀺𑀬𑀸 𑀲𑁂𑀬𑁆𑀬𑀁 𑀤𑁂𑀢𑀺, 𑀲𑀭𑀡𑀪𑀸𑀯𑀦𑀺𑀧𑁆𑀨𑀢𑁆𑀢𑀺𑀬𑀸 𑀆𑀯𑀲𑀣𑀁 𑀤𑁂𑀢𑀺, 𑀧𑀜𑁆𑀘𑀘𑀓𑁆𑀔𑀼𑀧𑀝𑀺𑀮𑀸𑀪𑀸𑀬 𑀧𑀤𑀻𑀧𑁂𑀬𑁆𑀬𑀁 𑀤𑁂𑀢𑀺.

𑀩𑁆𑀬𑀸𑀫𑀧𑁆𑀧𑀪𑀸𑀦𑀺𑀧𑁆𑀨𑀢𑁆𑀢𑀺𑀬𑀸 ¶ 𑀭𑀽𑀧𑀤𑀸𑀦𑀁 𑀤𑁂𑀢𑀺, 𑀩𑁆𑀭𑀳𑁆𑀫𑀲𑁆𑀲𑀭𑀦𑀺𑀧𑁆𑀨𑀢𑁆𑀢𑀺𑀬𑀸 𑀲𑀤𑁆𑀤𑀤𑀸𑀦𑀁 𑀤𑁂𑀢𑀺, 𑀲𑀩𑁆𑀩𑀮𑁄𑀓𑀲𑁆𑀲 𑀧𑀺𑀬𑀪𑀸𑀯𑀸𑀬 𑀭𑀲𑀤𑀸𑀦𑀁 𑀤𑁂𑀢𑀺, 𑀩𑀼𑀤𑁆𑀥𑀲𑀼𑀔𑀼𑀫𑀸𑀮𑀪𑀸𑀯𑀸𑀬 𑀨𑁄𑀝𑁆𑀞𑀩𑁆𑀩𑀤𑀸𑀦𑀁 ¶ 𑀤𑁂𑀢𑀺, 𑀅𑀚𑀭𑀸𑀫𑀭𑀡𑀪𑀸𑀯𑀸𑀬 𑀪𑁂𑀲𑀚𑁆𑀚𑀤𑀸𑀦𑀁 𑀤𑁂𑀢𑀺, 𑀓𑀺𑀮𑁂𑀲𑀤𑀸𑀲𑀩𑁆𑀬𑀯𑀺𑀫𑁄𑀘𑀦𑀢𑁆𑀣𑀁 𑀤𑀸𑀲𑀸𑀦𑀁 𑀪𑀼𑀚𑀺𑀲𑁆𑀲𑀢𑀸𑀤𑀸𑀦𑀁 𑀤𑁂𑀢𑀺, 𑀲𑀤𑁆𑀥𑀫𑁆𑀫𑀸𑀪𑀺𑀭𑀢𑀺𑀬𑀸 𑀅𑀦𑀯𑀚𑁆𑀚𑀔𑀺𑀟𑁆𑀟𑀸𑀭𑀢𑀺𑀳𑁂𑀢𑀼𑀤𑀸𑀦𑀁 𑀤𑁂𑀢𑀺, 𑀲𑀩𑁆𑀩𑁂𑀧𑀺 𑀲𑀢𑁆𑀢𑁂 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀪𑀸𑀯𑀽𑀧𑀦𑀬𑀦𑀸𑀬 𑀧𑀼𑀢𑁆𑀢𑀤𑀸𑀦𑀁 𑀤𑁂𑀢𑀺, 𑀲𑀓𑀮𑀲𑁆𑀲𑀸𑀧𑀺 𑀮𑁄𑀓𑀲𑁆𑀲 𑀧𑀢𑀺𑀪𑀸𑀯𑀽𑀧𑀕𑀫𑀦𑀸𑀬 𑀤𑀸𑀭𑀤𑀸𑀦𑀁 𑀤𑁂𑀢𑀺, 𑀲𑀼𑀪𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀬𑀸 𑀲𑀼𑀯𑀡𑁆𑀡𑀫𑀡𑀺𑀫𑀼𑀢𑁆𑀢𑀸𑀧𑀯𑀸𑀴𑀸𑀤𑀺𑀤𑀸𑀦𑀁, 𑀅𑀦𑀼𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀦𑀸𑀦𑀸𑀯𑀺𑀥𑀯𑀺𑀪𑀽𑀲𑀦𑀤𑀸𑀦𑀁, 𑀲𑀤𑁆𑀥𑀫𑁆𑀫𑀓𑁄𑀲𑀸𑀥𑀺𑀕𑀫𑀸𑀬 𑀯𑀺𑀢𑁆𑀢𑀓𑁄𑀲𑀤𑀸𑀦𑀁, 𑀥𑀫𑁆𑀫𑀭𑀸𑀚𑀪𑀸𑀯𑀸𑀬 𑀭𑀚𑁆𑀚𑀤𑀸𑀦𑀁, 𑀤𑀸𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀆𑀭𑀸𑀫𑀼𑀬𑁆𑀬𑀸𑀦𑀸𑀤𑀺𑀯𑀦𑀤𑀸𑀦𑀁, 𑀘𑀓𑁆𑀓𑀗𑁆𑀓𑀺𑀢𑁂𑀳𑀺 𑀧𑀸𑀤𑁂𑀳𑀺 𑀩𑁄𑀥𑀺𑀫𑀡𑁆𑀟𑀽𑀧𑀲𑀗𑁆𑀓𑀫𑀦𑀸𑀬 𑀘𑀭𑀡𑀤𑀸𑀦𑀁, 𑀘𑀢𑀼𑀭𑁄𑀖𑀦𑀺𑀢𑁆𑀣𑀭𑀡𑁂 𑀲𑀢𑁆𑀢𑀸𑀦𑀁 𑀲𑀤𑁆𑀥𑀫𑁆𑀫𑀳𑀢𑁆𑀣𑀤𑀸𑀦𑀢𑁆𑀣𑀁 𑀳𑀢𑁆𑀣𑀤𑀸𑀦𑀁, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺𑀧𑀝𑀺𑀮𑀸𑀪𑀸𑀬 𑀓𑀡𑁆𑀡𑀦𑀸𑀲𑀸𑀤𑀺𑀤𑀸𑀦𑀁, 𑀲𑀫𑀦𑁆𑀢𑀘𑀓𑁆𑀔𑀼𑀧𑀝𑀺𑀮𑀸𑀪𑀸𑀬 𑀘𑀓𑁆𑀔𑀼𑀤𑀸𑀦𑀁, ‘‘𑀤𑀲𑁆𑀲𑀦𑀲𑀯𑀦𑀸𑀦𑀼𑀲𑁆𑀲𑀭𑀡𑀧𑀸𑀭𑀺𑀘𑀭𑀺𑀬𑀸𑀤𑀻𑀲𑀼 𑀲𑀩𑁆𑀩𑀓𑀸𑀮𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀸𑀯𑀳𑁄 𑀲𑀩𑁆𑀩𑀮𑁄𑀓𑁂𑀦 𑀘 𑀉𑀧𑀚𑀻𑀯𑀺𑀢𑀩𑁆𑀩𑁄 𑀫𑁂 𑀓𑀸𑀬𑁄 𑀪𑀯𑁂𑀬𑁆𑀬𑀸’’𑀢𑀺 𑀫𑀁𑀲𑀮𑁄𑀳𑀺𑀢𑀸𑀤𑀺𑀤𑀸𑀦𑀁. ‘‘𑀲𑀩𑁆𑀩𑀮𑁄𑀓𑀼𑀢𑁆𑀢𑀫𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀉𑀢𑁆𑀢𑀫𑀗𑁆𑀕𑀤𑀸𑀦𑀁 𑀤𑁂𑀢𑀺.

𑀏𑀯𑀁 𑀤𑀤𑀦𑁆𑀢𑁄 𑀘 𑀦 𑀅𑀦𑁂𑀲𑀦𑀸𑀬 𑀤𑁂𑀢𑀺, 𑀦 𑀧𑀭𑁄𑀧𑀖𑀸𑀢𑁂𑀦, 𑀦 𑀪𑀬𑁂𑀦, 𑀦 𑀮𑀚𑁆𑀚𑀸𑀬, 𑀦 𑀤𑀓𑁆𑀔𑀺𑀡𑁂𑀬𑁆𑀬𑀭𑁄𑀲𑀦𑁂𑀦, 𑀦 𑀧𑀡𑀻𑀢𑁂 𑀲𑀢𑀺 𑀮𑀽𑀔𑀁, 𑀦 𑀅𑀢𑁆𑀢𑀼𑀓𑁆𑀓𑀁𑀲𑀦𑁂𑀦, 𑀦 𑀧𑀭𑀯𑀫𑁆𑀪𑀦𑁂𑀦, 𑀦 𑀨𑀮𑀸𑀪𑀺𑀓𑀗𑁆𑀔𑀸𑀬, 𑀦 𑀬𑀸𑀘𑀓𑀚𑀺𑀕𑀼𑀘𑁆𑀙𑀸𑀬, 𑀦 𑀅𑀘𑀺𑀢𑁆𑀢𑀻𑀓𑀸𑀭𑁂𑀦, 𑀅𑀣 𑀔𑁄 𑀲𑀓𑁆𑀓𑀘𑁆𑀘𑀁 𑀤𑁂𑀢𑀺, 𑀲𑀳𑀢𑁆𑀣𑁂𑀦 𑀤𑁂𑀢𑀺, 𑀓𑀸𑀮𑁂𑀦 𑀤𑁂𑀢𑀺, 𑀘𑀺𑀢𑁆𑀢𑀺𑀁 𑀓𑀢𑁆𑀯𑀸 𑀤𑁂𑀢𑀺, 𑀅𑀯𑀺𑀪𑀸𑀕𑁂𑀦 𑀤𑁂𑀢𑀺, 𑀢𑀻𑀲𑀼 𑀓𑀸𑀮𑁂𑀲𑀼 𑀲𑁄𑀫𑀦𑀲𑁆𑀲𑀺𑀓𑁄 𑀤𑁂𑀢𑀺, 𑀢𑀢𑁄 𑀏𑀯 𑀘 𑀤𑀢𑁆𑀯𑀸 𑀦 𑀧𑀘𑁆𑀙𑀸𑀦𑀼𑀢𑀸𑀧𑀻 𑀳𑁄𑀢𑀺, 𑀦 𑀧𑀝𑀺𑀕𑁆𑀕𑀸𑀳𑀓𑀯𑀲𑁂𑀦 𑀫𑀸𑀦𑀸𑀯𑀫𑀸𑀦𑀁 𑀓𑀭𑁄𑀢𑀺, 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀧𑀺𑀬𑀲𑀫𑀼𑀤𑀸𑀘𑀸𑀭𑁄 𑀳𑁄𑀢𑀺 𑀯𑀤𑀜𑁆𑀜𑀽 𑀬𑀸𑀘𑀬𑁄𑀕𑁄 𑀲𑀧𑀭𑀺𑀯𑀸𑀭𑀤𑀸𑀬𑀓𑁄. 𑀅𑀦𑁆𑀦𑀤𑀸𑀦𑀜𑁆𑀳𑀺 𑀤𑁂𑀦𑁆𑀢𑁄 ‘‘𑀢𑀁 𑀲𑀧𑀭𑀺𑀯𑀸𑀭𑀁 𑀓𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀣𑀸𑀤𑀻𑀳𑀺 𑀲𑀤𑁆𑀥𑀺𑀁 𑀤𑁂𑀢𑀺, 𑀢𑀣𑀸 𑀯𑀢𑁆𑀣𑀤𑀸𑀦𑀁 𑀤𑁂𑀦𑁆𑀢𑁄 ‘‘𑀢𑀁 𑀲𑀧𑀭𑀺𑀯𑀸𑀭𑀁 𑀓𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀅𑀦𑁆𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀤𑁂𑀢𑀺. 𑀧𑀸𑀦𑀤𑀸𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄, 𑀢𑀣𑀸 𑀭𑀽𑀧𑀤𑀸𑀦𑀁 𑀤𑁂𑀦𑁆𑀢𑁄 𑀇𑀢𑀭𑀸𑀭𑀫𑁆𑀫𑀡𑀸𑀦𑀺𑀧𑀺 𑀢𑀲𑁆𑀲 𑀧𑀭𑀺𑀯𑀸𑀭𑀁 𑀓𑀢𑁆𑀯𑀸 𑀤𑁂𑀢𑀺, 𑀏𑀯𑀁 𑀲𑁂𑀲𑁂𑀲𑀼𑀧𑀺.

𑀢𑀢𑁆𑀣 𑀭𑀽𑀧𑀤𑀸𑀦𑀁 𑀦𑀸𑀫 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀸𑀤𑀺𑀯𑀡𑁆𑀡𑀸𑀤𑀻𑀲𑀼 𑀧𑀼𑀧𑁆𑀨𑀯𑀢𑁆𑀣𑀥𑀸𑀢𑀽𑀲𑀼 𑀅𑀜𑁆𑀜𑀢𑀭𑀁 𑀮𑀪𑀺𑀢𑁆𑀯𑀸 𑀭𑀽𑀧𑀯𑀲𑁂𑀦 𑀆𑀪𑀼𑀚𑀺𑀢𑁆𑀯𑀸 ‘‘𑀭𑀽𑀧𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀭𑀽𑀧𑀤𑀸𑀦𑀁 𑀫𑀬𑁆𑀳’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀸𑀤𑀺𑀲𑁂 𑀤𑀓𑁆𑀔𑀺𑀡𑁂𑀬𑁆𑀬𑁂 𑀤𑀸𑀦𑀁 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀏𑀢𑀁 𑀭𑀽𑀧𑀤𑀸𑀦𑀁 𑀦𑀸𑀫.

𑀲𑀤𑁆𑀤𑀤𑀸𑀦𑀁 ¶ 𑀧𑀦 𑀪𑁂𑀭𑀻𑀲𑀤𑁆𑀤𑀸𑀤𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀲𑀤𑁆𑀤𑀁 𑀓𑀦𑁆𑀤𑀫𑀽𑀮𑀸𑀦𑀺 𑀯𑀺𑀬 𑀉𑀧𑁆𑀧𑀸𑀝𑁂𑀢𑁆𑀯𑀸, 𑀦𑀻𑀮𑀼𑀧𑁆𑀧𑀮𑀳𑀢𑁆𑀣𑀓𑀁 𑀯𑀺𑀬 𑀘 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀲𑀯𑀢𑁆𑀣𑀼𑀓𑀁 𑀧𑀦 𑀓𑀢𑁆𑀯𑀸 𑀤𑀤𑀦𑁆𑀢𑁄 𑀲𑀤𑁆𑀤𑀤𑀸𑀦𑀁 𑀤𑁂𑀢𑀺 𑀦𑀸𑀫, 𑀢𑀲𑁆𑀫𑀸 𑀬𑀤𑀸 ‘‘𑀲𑀤𑁆𑀤𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀪𑁂𑀭𑀻𑀫𑀼𑀤𑀺𑀗𑁆𑀕𑀸𑀤𑀻𑀲𑀼 𑀅𑀜𑁆𑀜𑀢𑀭𑁂𑀦 𑀢𑀽𑀭𑀺𑀬𑁂𑀦 𑀢𑀺𑀡𑁆𑀡𑀁 ¶ 𑀭𑀢𑀦𑀸𑀦𑀁 𑀉𑀧𑀳𑀸𑀭𑀁 𑀓𑀭𑁄𑀢𑀺, 𑀓𑀸𑀭𑁂𑀢𑀺 𑀘, ‘‘𑀲𑀤𑁆𑀤𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀲𑀤𑁆𑀤𑀤𑀸𑀦𑀁 𑀫𑁂’’𑀢𑀺 𑀪𑁂𑀭𑀻𑀆𑀤𑀻𑀦𑀺 𑀞𑀧𑀸𑀧𑁂𑀢𑀺, 𑀥𑀫𑁆𑀫𑀓𑀣𑀺𑀓𑀸𑀦𑀁 𑀧𑀦 𑀲𑀤𑁆𑀤𑀪𑁂𑀲𑀚𑁆𑀚𑀁, 𑀢𑁂𑀮𑀨𑀸𑀡𑀺𑀢𑀸𑀤𑀻𑀦𑀺 𑀘 𑀤𑁂𑀢𑀺, 𑀥𑀫𑁆𑀫𑀲𑁆𑀲𑀯𑀦𑀁 𑀖𑁄𑀲𑁂𑀢𑀺, 𑀲𑀭𑀪𑀜𑁆𑀜𑀁 𑀪𑀡𑀢𑀺, 𑀥𑀫𑁆𑀫𑀓𑀣𑀁 𑀓𑀣𑁂𑀢𑀺, 𑀉𑀧𑀦𑀺𑀲𑀺𑀦𑁆𑀦𑀓𑀣𑀁, 𑀅𑀦𑀼𑀫𑁄𑀤𑀦𑀓𑀣𑀜𑁆𑀘 𑀓𑀭𑁄𑀢𑀺, 𑀓𑀸𑀭𑁂𑀢𑀺 𑀘, 𑀢𑀤𑀸 𑀲𑀤𑁆𑀤𑀤𑀸𑀦𑀁 𑀦𑀸𑀫 𑀳𑁄𑀢𑀺.

𑀢𑀣𑀸 𑀫𑀽𑀮𑀕𑀦𑁆𑀥𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀭𑀚𑀦𑀻𑀬𑀁 𑀕𑀦𑁆𑀥𑀯𑀢𑁆𑀣𑀼𑀁, 𑀧𑀺𑀲𑀺𑀢𑀫𑁂𑀯 𑀯𑀸 𑀕𑀦𑁆𑀥𑀁 𑀬𑀁 𑀓𑀺𑀜𑁆𑀘𑀺 𑀮𑀪𑀺𑀢𑁆𑀯𑀸 𑀕𑀦𑁆𑀥𑀯𑀲𑁂𑀦 𑀆𑀪𑀼𑀚𑀺𑀢𑁆𑀯𑀸 ‘‘𑀕𑀦𑁆𑀥𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀕𑀦𑁆𑀥𑀤𑀸𑀦𑀁 𑀫𑀬𑁆𑀳’’𑀦𑁆𑀢𑀺 𑀩𑀼𑀤𑁆𑀥𑀭𑀢𑀦𑀸𑀤𑀻𑀦𑀁 𑀧𑀽𑀚𑀁 𑀓𑀭𑁄𑀢𑀺, 𑀓𑀸𑀭𑁂𑀢𑀺 𑀘, 𑀕𑀦𑁆𑀥𑀧𑀽𑀚𑀦𑀢𑁆𑀣𑀸𑀬 𑀅𑀕𑀭𑀼𑀘𑀦𑁆𑀤𑀦𑀸𑀤𑀺𑀓𑁂 𑀕𑀦𑁆𑀥𑀯𑀢𑁆𑀣𑀼𑀓𑁂 𑀧𑀭𑀺𑀘𑁆𑀘𑀚𑀢𑀺, 𑀇𑀤𑀁 𑀕𑀦𑁆𑀥𑀤𑀸𑀦𑀁.

𑀢𑀣𑀸 𑀫𑀽𑀮𑀭𑀲𑀸𑀤𑀻𑀲𑀼 𑀬𑀁 𑀓𑀺𑀜𑁆𑀘𑀺 𑀭𑀚𑀦𑀻𑀬𑀁 𑀭𑀲𑀯𑀢𑁆𑀣𑀼𑀁 𑀮𑀪𑀺𑀢𑁆𑀯𑀸 𑀭𑀲𑀯𑀲𑁂𑀦 𑀆𑀪𑀼𑀚𑀺𑀢𑁆𑀯𑀸 ‘‘𑀭𑀲𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀭𑀲𑀤𑀸𑀦𑀁 𑀫𑀬𑁆𑀳’’𑀦𑁆𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀤𑁂𑀢𑀺, 𑀭𑀲𑀯𑀢𑁆𑀣𑀼𑀫𑁂𑀯 𑀯𑀸 𑀅𑀜𑁆𑀜𑀁 𑀕𑀯𑀸𑀤𑀺𑀓𑀁 𑀧𑀭𑀺𑀘𑁆𑀘𑀚𑀢𑀺, 𑀇𑀤𑀁 𑀭𑀲𑀤𑀸𑀦𑀁.

𑀢𑀣𑀸 𑀨𑁄𑀝𑁆𑀞𑀩𑁆𑀩𑀤𑀸𑀦𑀁 𑀫𑀜𑁆𑀘𑀧𑀻𑀞𑀸𑀤𑀺𑀯𑀲𑁂𑀦, 𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀤𑀺𑀯𑀲𑁂𑀦 𑀘 𑀯𑁂𑀤𑀺𑀢𑀩𑁆𑀩𑀁. 𑀬𑀤𑀸 𑀳𑀺 𑀫𑀜𑁆𑀘𑀧𑀻𑀞𑀪𑀺𑀲𑀺𑀩𑀺𑀩𑁆𑀩𑁄𑀳𑀦𑀸𑀤𑀺𑀓𑀁, 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸𑀤𑀺𑀓𑀁 𑀯𑀸 𑀲𑀼𑀔𑀲𑀫𑁆𑀨𑀲𑁆𑀲𑀁 𑀭𑀚𑀦𑀻𑀬𑀁 𑀅𑀦𑀯𑀚𑁆𑀚𑀁 𑀨𑁄𑀝𑁆𑀞𑀩𑁆𑀩𑀯𑀢𑁆𑀣𑀼𑀁 𑀮𑀪𑀺𑀢𑁆𑀯𑀸 𑀨𑁄𑀝𑁆𑀞𑀩𑁆𑀩𑀯𑀲𑁂𑀦 𑀆𑀪𑀼𑀚𑀺𑀢𑁆𑀯𑀸 ‘‘𑀨𑁄𑀝𑁆𑀞𑀩𑁆𑀩𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀨𑁄𑀝𑁆𑀞𑀩𑁆𑀩𑀤𑀸𑀦𑀁 𑀫𑀬𑁆𑀳’’𑀦𑁆𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀤𑁂𑀢𑀺. 𑀬𑀣𑀸𑀯𑀼𑀢𑁆𑀢𑀁 𑀨𑁄𑀝𑁆𑀞𑀩𑁆𑀩𑀯𑀢𑁆𑀣𑀼𑀁 𑀮𑀪𑀺𑀢𑁆𑀯𑀸 𑀧𑀭𑀺𑀘𑁆𑀘𑀚𑀢𑀺, 𑀏𑀢𑀁 𑀨𑁄𑀝𑁆𑀞𑀩𑁆𑀩𑀤𑀸𑀦𑀁.

𑀥𑀫𑁆𑀫𑀤𑀸𑀦𑀁 𑀧𑀦 𑀥𑀫𑁆𑀫𑀸𑀭𑀫𑁆𑀫𑀡𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀑𑀚𑀸𑀧𑀸𑀦𑀚𑀻𑀯𑀺𑀢𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀑𑀚𑀸𑀤𑀻𑀲𑀼 𑀳𑀺 𑀅𑀜𑁆𑀜𑀢𑀭𑀁 𑀭𑀚𑀦𑀻𑀬𑀁 𑀥𑀫𑁆𑀫𑀯𑀢𑁆𑀣𑀼𑀁 𑀮𑀪𑀺𑀢𑁆𑀯𑀸 𑀥𑀫𑁆𑀫𑀸𑀭𑀫𑁆𑀫𑀡𑀯𑀲𑁂𑀦 𑀆𑀪𑀼𑀚𑀺𑀢𑁆𑀯𑀸 ‘‘𑀥𑀫𑁆𑀫𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀥𑀫𑁆𑀫𑀤𑀸𑀦𑀁 𑀫𑀬𑁆𑀳’’𑀦𑁆𑀢𑀺 𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀺 𑀑𑀚𑀤𑀸𑀦𑀁 𑀤𑁂𑀢𑀺, 𑀅𑀫𑁆𑀩𑀧𑀸𑀦𑀸𑀤𑀺𑀅𑀝𑁆𑀞𑀯𑀺𑀥𑀁 𑀧𑀸𑀦𑀤𑀸𑀦𑀁 𑀤𑁂𑀢𑀺, 𑀚𑀻𑀯𑀺𑀢𑀤𑀸𑀦𑀦𑁆𑀢𑀺 𑀆𑀪𑀼𑀚𑀺𑀢𑁆𑀯𑀸 𑀲𑀮𑀸𑀓𑀪𑀢𑁆𑀢𑀧𑀓𑁆𑀔𑀺𑀓𑀪𑀢𑁆𑀢𑀸𑀤𑀻𑀦𑀺 𑀤𑁂𑀢𑀺. 𑀅𑀨𑀸𑀲𑀼𑀓𑀪𑀸𑀯𑁂𑀦 𑀅𑀪𑀺𑀪𑀽𑀢𑀸𑀦𑀁 𑀩𑁆𑀬𑀸𑀥𑀺𑀓𑀸𑀦𑀁 𑀯𑁂𑀚𑁆𑀚𑀁 𑀧𑀝𑁆𑀞𑀧𑁂𑀢𑀺, 𑀚𑀸𑀮𑀁 𑀨𑀸𑀮𑀸𑀧𑁂𑀢𑀺, 𑀓𑀼𑀫𑀻𑀦𑀁 𑀯𑀺𑀤𑁆𑀥𑀁𑀲𑀸𑀧𑁂𑀢𑀺, 𑀲𑀓𑀼𑀡𑀧𑀜𑁆𑀚𑀭𑀁 𑀯𑀺𑀤𑁆𑀥𑀁𑀲𑀸𑀧𑁂𑀢𑀺, 𑀩𑀦𑁆𑀥𑀦𑁂𑀦 𑀩𑀤𑁆𑀥𑀸𑀦𑀁 𑀲𑀢𑁆𑀢𑀸𑀦𑀁 𑀩𑀦𑁆𑀥𑀦𑀫𑁄𑀓𑁆𑀔𑀁 𑀓𑀸𑀭𑁂𑀢𑀺, 𑀫𑀸𑀖𑀸𑀢𑀪𑁂𑀭𑀺𑀁 𑀘𑀭𑀸𑀧𑁂𑀢𑀺, 𑀅𑀜𑁆𑀜𑀸𑀦𑀺𑀧𑀺 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀧𑀭𑀺𑀢𑁆𑀢𑀸𑀡𑀢𑁆𑀣𑀁 𑀏𑀯𑀭𑀽𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀢𑀺, 𑀓𑀸𑀭𑀸𑀧𑁂𑀢𑀺 𑀘, 𑀇𑀤𑀁 𑀥𑀫𑁆𑀫𑀤𑀸𑀦𑀁 𑀦𑀸𑀫.

𑀲𑀩𑁆𑀩𑀫𑁆𑀧𑁂𑀢𑀁 ¶ 𑀬𑀣𑀸𑀯𑀼𑀢𑁆𑀢𑀤𑀸𑀦𑀲𑀫𑁆𑀧𑀤𑀁 𑀲𑀓𑀮𑀮𑁄𑀓𑀳𑀺𑀢𑀲𑀼𑀔𑀸𑀬 𑀧𑀭𑀺𑀡𑀸𑀫𑁂𑀢𑀺 𑀅𑀢𑁆𑀢𑀦𑁄 𑀘 𑀅𑀓𑀼𑀧𑁆𑀧𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀅𑀧𑀭𑀺𑀓𑁆𑀔𑀬𑀲𑁆𑀲 𑀙𑀦𑁆𑀤𑀲𑁆𑀲 𑀅𑀧𑀭𑀺𑀓𑁆𑀔𑀬𑀲𑁆𑀲 𑀯𑀻𑀭𑀺𑀬𑀲𑁆𑀲 𑀅𑀧𑀭𑀺𑀓𑁆𑀔𑀬𑀲𑁆𑀲 𑀲𑀫𑀸𑀥𑀺𑀲𑁆𑀲 𑀅𑀧𑀭𑀺𑀓𑁆𑀔𑀬𑀲𑁆𑀲 𑀧𑀝𑀺𑀪𑀸𑀦𑀲𑁆𑀲 𑀅𑀧𑀭𑀺𑀓𑁆𑀔𑀬𑀲𑁆𑀲 𑀛𑀸𑀦𑀲𑁆𑀲 𑀅𑀧𑀭𑀺𑀓𑁆𑀔𑀬𑀸𑀬 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀧𑀭𑀺𑀡𑀸𑀫𑁂𑀢𑀺 ¶ , 𑀇𑀫𑀜𑁆𑀘 𑀤𑀸𑀦𑀧𑀸𑀭𑀫𑀺𑀁 𑀧𑀝𑀺𑀧𑀚𑁆𑀚𑀦𑁆𑀢𑁂𑀦 𑀫𑀳𑀸𑀲𑀢𑁆𑀢𑁂𑀦 𑀚𑀻𑀯𑀺𑀢𑁂 𑀅𑀦𑀺𑀘𑁆𑀘𑀲𑀜𑁆𑀜𑀸 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀩𑁆𑀩𑀸. 𑀢𑀣𑀸 𑀪𑁄𑀕𑁂𑀲𑀼, 𑀩𑀳𑀼𑀲𑀸𑀥𑀸𑀭𑀡𑀢𑀸 𑀘 𑀦𑁂𑀲𑀁 𑀫𑀦𑀲𑀺 𑀓𑀸𑀢𑀩𑁆𑀩𑀸, 𑀲𑀢𑁆𑀢𑁂𑀲𑀼 𑀘 𑀫𑀳𑀸𑀓𑀭𑀼𑀡𑀸 𑀲𑀢𑀢𑀁 𑀲𑀫𑀺𑀢𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀪𑁄𑀕𑁂𑀳𑀺 𑀕𑀳𑁂𑀢𑀩𑁆𑀩𑀲𑀸𑀭𑀁 𑀕𑀡𑁆𑀳𑀦𑁆𑀢𑁄 𑀆𑀤𑀺𑀢𑁆𑀢𑀢𑁄 𑀯𑀺𑀬 𑀅𑀕𑀸𑀭𑀢𑁄 𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀁, 𑀅𑀢𑁆𑀢𑀸𑀦𑀜𑁆𑀘 𑀩𑀳𑀺 𑀦𑀻𑀳𑀭𑀦𑁆𑀢𑁄 𑀦 𑀓𑀺𑀜𑁆𑀘𑀺 𑀲𑁂𑀲𑁂𑀢𑀺, 𑀦 𑀓𑀢𑁆𑀣𑀘𑀺 𑀯𑀺𑀪𑀸𑀕𑀁 𑀓𑀭𑁄𑀢𑀺, 𑀅𑀜𑁆𑀜𑀤𑀢𑁆𑀣𑀼 𑀦𑀺𑀭𑀧𑁂𑀓𑁆𑀔𑁄 𑀦𑀺𑀲𑁆𑀲𑀚𑁆𑀚𑀢𑀺 𑀏𑀯. 𑀅𑀬𑀁 𑀢𑀸𑀯 𑀤𑀸𑀦𑀧𑀸𑀭𑀫𑀺𑀬𑀸 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄.

𑀲𑀻𑀮𑀧𑀸𑀭𑀫𑀺𑀬𑀸 𑀧𑀦 𑀅𑀬𑀁 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄 𑁋 𑀬𑀲𑁆𑀫𑀸 𑀲𑀩𑁆𑀩𑀜𑁆𑀜𑀼𑀲𑀻𑀮𑀸𑀮𑀗𑁆𑀓𑀸𑀭𑁂𑀳𑀺 𑀲𑀢𑁆𑀢𑁂 𑀅𑀮𑀗𑁆𑀓𑀭𑀺𑀢𑀼𑀓𑀸𑀫𑁂𑀦 𑀫𑀳𑀸𑀧𑀼𑀭𑀺𑀲𑁂𑀦 𑀆𑀤𑀺𑀢𑁄 𑀅𑀢𑁆𑀢𑀦𑁄 𑀏𑀯 𑀢𑀸𑀯 𑀲𑀻𑀮𑀁 𑀯𑀺𑀲𑁄𑀥𑁂𑀢𑀩𑁆𑀩𑀁. 𑀢𑀢𑁆𑀣 𑀘𑀢𑀽𑀳𑀸𑀓𑀸𑀭𑁂𑀳𑀺 𑀲𑀻𑀮𑀁 𑀯𑀺𑀲𑀼𑀚𑁆𑀛𑀢𑀺 𑀅𑀚𑁆𑀛𑀸𑀲𑀬𑀯𑀺𑀲𑀼𑀤𑁆𑀥𑀺𑀢𑁄, 𑀲𑀫𑀸𑀤𑀸𑀦𑀢𑁄, 𑀅𑀯𑀻𑀢𑀺𑀓𑁆𑀓𑀫𑀦𑀢𑁄, 𑀲𑀢𑀺 𑀯𑀻𑀢𑀺𑀓𑁆𑀓𑀫𑁂 𑀧𑀼𑀦 𑀧𑀸𑀓𑀝𑀻𑀓𑀭𑀡𑀢𑁄 𑀘. 𑀯𑀺𑀲𑀼𑀤𑁆𑀥𑀸𑀲𑀬𑀢𑀸𑀬 𑀳𑀺 𑀏𑀓𑀘𑁆𑀘𑁄 𑀅𑀢𑁆𑀢𑀸𑀥𑀺𑀧𑀢𑀺 𑀳𑀼𑀢𑁆𑀯𑀸 𑀧𑀸𑀧𑀚𑀺𑀕𑀼𑀘𑁆𑀙𑀦𑀲𑀪𑀸𑀯𑁄 𑀅𑀚𑁆𑀛𑀢𑁆𑀢𑀁 𑀳𑀺𑀭𑀺𑀥𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀲𑀼𑀧𑀭𑀺𑀲𑀼𑀤𑁆𑀥𑀲𑀫𑀸𑀘𑀸𑀭𑁄 𑀳𑁄𑀢𑀺, 𑀢𑀣𑀸 𑀧𑀭𑀢𑁄 𑀲𑀫𑀸𑀤𑀸𑀦𑁂 𑀲𑀢𑀺 𑀏𑀓𑀘𑁆𑀘𑁄 𑀮𑁄𑀓𑀸𑀥𑀺𑀧𑀢𑀺 𑀳𑀼𑀢𑁆𑀯𑀸 𑀧𑀸𑀧𑀢𑁄 𑀉𑀢𑁆𑀢𑀲𑀦𑁆𑀢𑁄 𑀑𑀢𑁆𑀢𑀧𑁆𑀧𑀥𑀫𑁆𑀫𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀲𑀼𑀧𑀭𑀺𑀲𑀼𑀤𑁆𑀥𑀲𑀫𑀸𑀘𑀸𑀭𑁄 𑀳𑁄𑀢𑀺, 𑀇𑀢𑀺 𑀉𑀪𑀬𑀣𑀸𑀧𑀺 𑀏𑀢𑁂 𑀅𑀯𑀻𑀢𑀺𑀓𑁆𑀓𑀫𑀦𑀢𑁄 𑀲𑀻𑀮𑁂 𑀧𑀢𑀺𑀝𑁆𑀞𑀳𑀦𑁆𑀢𑀺. 𑀅𑀣 𑀘 𑀧𑀦 𑀓𑀤𑀸𑀘𑀺 𑀲𑀢𑀺𑀲𑀫𑁆𑀫𑁄𑀲𑁂𑀦 𑀲𑀻𑀮𑀲𑁆𑀲 𑀔𑀡𑁆𑀟𑀸𑀤𑀺𑀪𑀸𑀯𑁄 𑀲𑀺𑀬𑀸, 𑀢𑀸𑀬𑀬𑁂𑀯 𑀬𑀣𑀸𑀯𑀼𑀢𑁆𑀢𑀸𑀬 𑀳𑀺𑀭𑁄𑀢𑁆𑀢𑀧𑁆𑀧𑀲𑀫𑁆𑀧𑀢𑁆𑀢𑀺𑀬𑀸 𑀔𑀺𑀧𑁆𑀧𑀫𑁂𑀯 𑀦𑀁 𑀯𑀼𑀝𑁆𑀞𑀸𑀦𑀸𑀤𑀺𑀦𑀸 𑀧𑀝𑀺𑀧𑀸𑀓𑀢𑀺𑀓𑀁 𑀓𑀭𑁄𑀦𑁆𑀢𑀻𑀢𑀺.

𑀢𑀬𑀺𑀤𑀁 𑀲𑀻𑀮𑀁 𑀯𑀸𑀭𑀺𑀢𑁆𑀢𑀁 𑀘𑀸𑀭𑀺𑀢𑁆𑀢𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀢𑁆𑀣𑀸𑀬𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀸𑀭𑀺𑀢𑁆𑀢𑀲𑀻𑀮𑁂 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄 𑁋 𑀢𑁂𑀦 𑀲𑀩𑁆𑀩𑀲𑀢𑁆𑀢𑁂𑀲𑀼 𑀢𑀣𑀸 𑀤𑀬𑀸𑀧𑀦𑁆𑀦𑀘𑀺𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀬𑀣𑀸 𑀲𑀼𑀧𑀺𑀦𑀦𑁆𑀢𑁂𑀦𑀧𑀺 𑀦 𑀆𑀖𑀸𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀧𑀭𑀽𑀧𑀓𑀭𑀡𑀯𑀺𑀭𑀢𑀢𑀸𑀬 𑀧𑀭𑀲𑀦𑁆𑀢𑀓𑁄 𑀅𑀮𑀕𑀤𑁆𑀤𑁄 𑀯𑀺𑀬 𑀦 𑀧𑀭𑀸𑀫𑀲𑀺𑀢𑀩𑁆𑀩𑁄. 𑀲𑀘𑁂 𑀧𑀩𑁆𑀩𑀚𑀺𑀢𑁄 𑀳𑁄𑀢𑀺, 𑀅𑀩𑁆𑀭𑀳𑁆𑀫𑀘𑀭𑀺𑀬𑀢𑁄𑀧𑀺 𑀆𑀭𑀸𑀘𑀸𑀭𑀻 𑀳𑁄𑀢𑀺 𑀲𑀢𑁆𑀢𑀯𑀺𑀥𑀫𑁂𑀣𑀼𑀦𑀲𑀁𑀬𑁄𑀕𑀯𑀺𑀭𑀢𑁄, 𑀧𑀕𑁂𑀯 𑀧𑀭𑀤𑀸𑀭𑀕𑀫𑀦𑀢𑁄. 𑀕𑀳𑀝𑁆𑀞𑁄 𑀲𑀫𑀸𑀦𑁄 𑀧𑀭𑁂𑀲𑀁 𑀤𑀸𑀭𑁂𑀲𑀼 𑀲𑀤𑀸 𑀧𑀸𑀧𑀓𑀁 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀢𑀺. 𑀓𑀣𑁂𑀦𑁆𑀢𑁄 𑀲𑀘𑁆𑀘𑀁 𑀳𑀺𑀢𑀁 𑀧𑀺𑀬𑀁 𑀧𑀭𑀺𑀫𑀺𑀢𑀫𑁂𑀯 𑀘 𑀓𑀸𑀮𑁂𑀦 𑀥𑀫𑁆𑀫𑀺𑀁 𑀓𑀣𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀲𑀩𑁆𑀩𑀢𑁆𑀣 𑀅𑀦𑀪𑀺𑀚𑁆𑀛𑀸𑀮𑀼 ¶ , 𑀅𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄, 𑀅𑀯𑀺𑀧𑀭𑀻𑀢𑀤𑀲𑁆𑀲𑀦𑁄 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄. 𑀲𑀫𑀕𑁆𑀕𑀢𑁂𑀲𑀼 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁂𑀲𑀼 𑀦𑀺𑀯𑀺𑀝𑁆𑀞𑀲𑀤𑁆𑀥𑁄 𑀳𑁄𑀢𑀺 𑀦𑀺𑀯𑀺𑀝𑁆𑀞𑀧𑁂𑀫𑁄𑀢𑀺.

𑀇𑀢𑀺 𑀘𑀢𑀼𑀭𑀸𑀧𑀸𑀬𑀯𑀝𑁆𑀝𑀤𑀼𑀓𑁆𑀔𑀸𑀦𑀁 𑀧𑀣𑀪𑀽𑀢𑁂𑀳𑀺 𑀅𑀓𑀼𑀲𑀮𑀓𑀫𑁆𑀫𑀧𑀣𑁂𑀳𑀺, 𑀅𑀓𑀼𑀲𑀮𑀥𑀫𑁆𑀫𑁂𑀳𑀺 𑀘 𑀑𑀭𑀫𑀺𑀢𑁆𑀯𑀸 𑀲𑀕𑁆𑀕𑀫𑁄𑀓𑁆𑀔𑀸𑀦𑀁 𑀧𑀣𑀪𑀽𑀢𑁂𑀲𑀼 𑀓𑀼𑀲𑀮𑀓𑀫𑁆𑀫𑀧𑀣𑁂𑀲𑀼, 𑀓𑀼𑀲𑀮𑀥𑀫𑁆𑀫𑁂𑀲𑀼 𑀘 𑀧𑀢𑀺𑀝𑁆𑀞𑀺𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀭𑀺𑀲𑀼𑀤𑁆𑀥𑀸𑀲𑀬𑀧𑀬𑁄𑀕𑀢𑁄 𑀬𑀣𑀸𑀪𑀺𑀧𑀢𑁆𑀣𑀺𑀢𑀸 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀽𑀧𑀲𑀜𑁆𑀳𑀺𑀢𑀸 𑀫𑀦𑁄𑀭𑀣𑀸 𑀲𑀻𑀖𑀁 𑀲𑀻𑀖𑀁 𑀅𑀪𑀺𑀦𑀺𑀧𑁆𑀨𑀚𑁆𑀚𑀦𑁆𑀢𑀺, 𑀧𑀸𑀭𑀫𑀺𑀬𑁄 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀏𑀯𑀁𑀪𑀽𑀢𑁄 𑀳𑀺 𑀅𑀬𑀁. 𑀢𑀢𑁆𑀣 𑀳𑀺𑀁𑀲𑀸𑀦𑀺𑀯𑀢𑁆𑀢𑀺𑀬𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 ¶ 𑀅𑀪𑀬𑀤𑀸𑀦𑀁 𑀤𑁂𑀢𑀺, 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀫𑁂𑀢𑁆𑀢𑀸𑀪𑀸𑀯𑀦𑀁 𑀲𑀫𑁆𑀧𑀸𑀤𑁂𑀢𑀺, 𑀏𑀓𑀸𑀤𑀲 𑀫𑁂𑀢𑁆𑀢𑀸𑀦𑀺𑀲𑀁𑀲𑁂 𑀅𑀥𑀺𑀕𑀘𑁆𑀙𑀢𑀺, 𑀅𑀧𑁆𑀧𑀸𑀩𑀸𑀥𑁄 𑀳𑁄𑀢𑀺 𑀅𑀧𑁆𑀧𑀸𑀢𑀗𑁆𑀓𑁄, 𑀤𑀻𑀖𑀸𑀬𑀼𑀓𑁄 𑀲𑀼𑀔𑀩𑀳𑀼𑀮𑁄, 𑀮𑀓𑁆𑀔𑀡𑀯𑀺𑀲𑁂𑀲𑁂 𑀧𑀸𑀧𑀼𑀡𑀸𑀢𑀺, 𑀤𑁄𑀲𑀯𑀸𑀲𑀦𑀜𑁆𑀘 𑀲𑀫𑀼𑀘𑁆𑀙𑀺𑀦𑁆𑀤𑀢𑀺. 𑀢𑀣𑀸 𑀅𑀤𑀺𑀦𑁆𑀦𑀸𑀤𑀸𑀦𑀦𑀺𑀯𑀢𑁆𑀢𑀺𑀬𑀸 𑀘𑁄𑀭𑀸𑀤𑀻𑀳𑀺 𑀅𑀲𑀸𑀥𑀸𑀭𑀡𑁂 𑀪𑁄𑀕𑁂 𑀅𑀥𑀺𑀕𑀘𑁆𑀙𑀢𑀺, 𑀧𑀭𑁂𑀳𑀺 𑀅𑀦𑀸𑀲𑀗𑁆𑀓𑀦𑀻𑀬𑁄, 𑀧𑀺𑀬𑁄, 𑀫𑀦𑀸𑀧𑁄, 𑀯𑀺𑀲𑁆𑀲𑀸𑀲𑀦𑀻𑀬𑁄, 𑀪𑀯𑀲𑀫𑁆𑀧𑀢𑁆𑀢𑀻𑀲𑀼 𑀅𑀮𑀕𑁆𑀕𑀘𑀺𑀢𑁆𑀢𑁄 𑀧𑀭𑀺𑀘𑁆𑀘𑀸𑀕𑀲𑀻𑀮𑁄, 𑀮𑁄𑀪𑀯𑀸𑀲𑀦𑀜𑁆𑀘 𑀲𑀫𑀼𑀘𑁆𑀙𑀺𑀦𑁆𑀤𑀢𑀺. 𑀅𑀩𑁆𑀭𑀳𑁆𑀫𑀘𑀭𑀺𑀬𑀦𑀺𑀯𑀢𑁆𑀢𑀺𑀬𑀸 𑀅𑀮𑁄𑀪𑁄 𑀳𑁄𑀢𑀺 𑀲𑀦𑁆𑀢𑀓𑀸𑀬𑀘𑀺𑀢𑁆𑀢𑁄, 𑀲𑀢𑁆𑀢𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄 𑀅𑀧𑀭𑀺𑀲𑀗𑁆𑀓𑀦𑀻𑀬𑁄, 𑀓𑀮𑁆𑀬𑀸𑀡𑁄 𑀘𑀲𑁆𑀲 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺, 𑀅𑀮𑀕𑁆𑀕𑀘𑀺𑀢𑁆𑀢𑁄 𑀳𑁄𑀢𑀺 𑀫𑀸𑀢𑀼𑀕𑀸𑀫𑁂𑀲𑀼 𑀅𑀮𑀼𑀤𑁆𑀥𑀸𑀲𑀬𑁄, 𑀦𑁂𑀓𑁆𑀔𑀫𑁆𑀫𑀩𑀳𑀼𑀮𑁄, 𑀮𑀓𑁆𑀔𑀡𑀯𑀺𑀲𑁂𑀲𑁂 𑀅𑀥𑀺𑀕𑀘𑁆𑀙𑀢𑀺, 𑀮𑁄𑀪𑀯𑀸𑀲𑀦𑀜𑁆𑀘 𑀲𑀫𑀼𑀘𑁆𑀙𑀺𑀦𑁆𑀤𑀢𑀺.

𑀫𑀼𑀲𑀸𑀯𑀸𑀤𑀦𑀺𑀯𑀢𑁆𑀢𑀺𑀬𑀸 𑀲𑀢𑁆𑀢𑀸𑀦𑀁 𑀧𑀫𑀸𑀡𑀪𑀽𑀢𑁄 𑀳𑁄𑀢𑀺 𑀧𑀘𑁆𑀘𑀬𑀺𑀓𑁄 𑀣𑁂𑀢𑁄 𑀆𑀤𑁂𑀬𑁆𑀬𑀯𑀘𑀦𑁄 𑀤𑁂𑀯𑀢𑀸𑀦𑀁 𑀧𑀺𑀬𑁄 𑀫𑀦𑀸𑀧𑁄 𑀲𑀼𑀭𑀪𑀺𑀕𑀦𑁆𑀥𑀫𑀼𑀔𑁄 𑀅𑀲𑀤𑁆𑀥𑀫𑁆𑀫𑀸𑀭𑀓𑁆𑀔𑀺𑀢𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑁄, 𑀮𑀓𑁆𑀔𑀡𑀯𑀺𑀲𑁂𑀲𑁂 𑀅𑀥𑀺𑀕𑀘𑁆𑀙𑀢𑀺, 𑀓𑀺𑀮𑁂𑀲𑀯𑀸𑀲𑀦𑀜𑁆𑀘 𑀲𑀫𑀼𑀘𑁆𑀙𑀺𑀦𑁆𑀤𑀢𑀺. 𑀧𑁂𑀲𑀼𑀜𑁆𑀜𑀦𑀺𑀯𑀢𑁆𑀢𑀺𑀬𑀸 𑀧𑀭𑀽𑀧𑀓𑁆𑀓𑀫𑁂𑀳𑀺 𑀅𑀪𑁂𑀚𑁆𑀚𑀓𑀸𑀬𑁄 𑀳𑁄𑀢𑀺 𑀅𑀪𑁂𑀚𑁆𑀚𑀧𑀭𑀺𑀯𑀸𑀭𑁄, 𑀲𑀤𑁆𑀥𑀫𑁆𑀫𑁂 𑀘 𑀅𑀪𑁂𑀚𑁆𑀚𑀦𑀓𑀲𑀤𑁆𑀥𑁄, 𑀤𑀴𑁆𑀳𑀫𑀺𑀢𑁆𑀢𑁄 𑀪𑀯𑀦𑁆𑀢𑀭𑀧𑀭𑀺𑀘𑀺𑀢𑀸𑀦𑀫𑁆𑀧𑀺 𑀲𑀢𑁆𑀢𑀸𑀦𑀁 𑀏𑀓𑀦𑁆𑀢𑀧𑀺𑀬𑁄, 𑀅𑀲𑀁𑀓𑀺𑀮𑁂𑀲𑀩𑀳𑀼𑀮𑁄. 𑀨𑀭𑀼𑀲𑀯𑀸𑀘𑀸𑀦𑀺𑀯𑀢𑁆𑀢𑀺𑀬𑀸 𑀲𑀢𑁆𑀢𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄 𑀲𑀼𑀔𑀲𑀻𑀮𑁄 𑀫𑀥𑀼𑀭𑀯𑀘𑀦𑁄 𑀲𑀫𑁆𑀪𑀸𑀯𑀦𑀻𑀬𑁄, 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀘𑀲𑁆𑀲 𑀲𑀭𑁄 𑀦𑀺𑀩𑁆𑀩𑀢𑁆𑀢𑀢𑀺. 𑀲𑀫𑁆𑀨𑀧𑁆𑀧𑀮𑀸𑀧𑀦𑀺𑀯𑀢𑁆𑀢𑀺𑀬𑀸 𑀲𑀢𑁆𑀢𑀸𑀦𑀁 𑀧𑀺𑀬𑁄 𑀳𑁄𑀢𑀺 𑀫𑀦𑀸𑀧𑁄, 𑀕𑀭𑀼𑀪𑀸𑀯𑀦𑀻𑀬𑁄 𑀘, 𑀆𑀤𑁂𑀬𑁆𑀬𑀯𑀘𑀦𑁄 𑀧𑀭𑀺𑀫𑀺𑀢𑀸𑀮𑀸𑀧𑁄, 𑀫𑀳𑁂𑀲𑀓𑁆𑀔𑁄 𑀘 𑀳𑁄𑀢𑀺 ¶ 𑀫𑀳𑀸𑀦𑀼𑀪𑀸𑀯𑁄, 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑁂𑀦 𑀧𑀝𑀺𑀪𑀸𑀦𑁂𑀦 𑀧𑀜𑁆𑀳𑀸𑀩𑁆𑀬𑀸𑀓𑀭𑀡𑀓𑀼𑀲𑀮𑁄, 𑀩𑀼𑀤𑁆𑀥𑀪𑀽𑀫𑀺𑀬𑀜𑁆𑀘 𑀏𑀓𑀸𑀬 𑀏𑀯 𑀯𑀸𑀘𑀸𑀬 𑀅𑀦𑁂𑀓𑀪𑀸𑀲𑀸𑀦𑀁 𑀲𑀢𑁆𑀢𑀸𑀦𑀁 𑀅𑀦𑁂𑀓𑁂𑀲𑀁 𑀧𑀜𑁆𑀳𑀸𑀦𑀁 𑀩𑁆𑀬𑀸𑀓𑀭𑀡𑀲𑀫𑀢𑁆𑀣𑁄 𑀳𑁄𑀢𑀺.

𑀅𑀦𑀪𑀺𑀚𑁆𑀛𑀸𑀮𑀼𑀢𑀸𑀬 𑀅𑀓𑀺𑀘𑁆𑀙𑀮𑀸𑀪𑀻 𑀳𑁄𑀢𑀺, 𑀉𑀴𑀸𑀭𑁂𑀲𑀼 𑀘 𑀪𑁄𑀕𑁂𑀲𑀼 𑀭𑀼𑀘𑀺𑀁 𑀧𑀝𑀺𑀮𑀪𑀢𑀺, 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀤𑀻𑀦𑀁 𑀲𑀫𑁆𑀫𑀢𑁄 𑀳𑁄𑀢𑀺, 𑀧𑀘𑁆𑀘𑀢𑁆𑀣𑀺𑀓𑁂𑀳𑀺 𑀅𑀦𑀪𑀺𑀪𑀯𑀦𑀻𑀬𑁄, 𑀇𑀦𑁆𑀤𑁆𑀭𑀺𑀬𑀯𑁂𑀓𑀮𑁆𑀮𑀁 𑀦 𑀧𑀸𑀧𑀼𑀡𑀸𑀢𑀺, 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄 𑀘 𑀳𑁄𑀢𑀺. 𑀅𑀩𑁆𑀬𑀸𑀧𑀸𑀤𑁂𑀦 𑀧𑀺𑀬𑀤𑀲𑁆𑀲𑀦𑁄 𑀳𑁄𑀢𑀺 𑀲𑀢𑁆𑀢𑀸𑀦𑀁 𑀲𑀫𑁆𑀪𑀸𑀯𑀦𑀻𑀬𑁄, 𑀧𑀭𑀳𑀺𑀢𑀸𑀪𑀺𑀦𑀦𑁆𑀤𑀺𑀢𑀸𑀬 𑀘 𑀲𑀢𑁆𑀢𑁂 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀧𑀲𑀸𑀤𑁂𑀢𑀺, 𑀅𑀮𑀽𑀔𑀲𑀪𑀸𑀯𑁄 𑀘 𑀳𑁄𑀢𑀺 𑀫𑁂𑀢𑁆𑀢𑀸𑀯𑀺𑀳𑀸𑀭𑀻, 𑀫𑀳𑁂𑀲𑀓𑁆𑀔𑁄 𑀘 𑀳𑁄𑀢𑀺 𑀫𑀳𑀸𑀦𑀼𑀪𑀸𑀯𑁄. 𑀫𑀺𑀘𑁆𑀙𑀸𑀤𑀲𑁆𑀲𑀦𑀸𑀪𑀸𑀯𑁂𑀦 𑀓𑀮𑁆𑀬𑀸𑀡𑁂 𑀲𑀳𑀸𑀬𑁂 𑀧𑀝𑀺𑀮𑀪𑀢𑀺, 𑀲𑀻𑀲𑀘𑁆𑀙𑁂𑀤𑀁 𑀧𑀸𑀧𑀼𑀡𑀦𑁆𑀢𑁄𑀧𑀺 𑀧𑀸𑀧𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀓𑀫𑁆𑀫𑀲𑁆𑀲𑀓𑀢𑀸𑀤𑀲𑁆𑀲𑀦𑀢𑁄 𑀅𑀓𑁄𑀢𑀽𑀳𑀮𑀫𑀗𑁆𑀕𑀮𑀺𑀓𑁄 𑀘 𑀳𑁄𑀢𑀺, 𑀲𑀤𑁆𑀥𑀫𑁆𑀫𑁂 𑀘𑀲𑁆𑀲 𑀲𑀤𑁆𑀥𑀸 𑀧𑀢𑀺𑀝𑁆𑀞𑀺𑀢𑀸 𑀳𑁄𑀢𑀺 𑀫𑀽𑀮𑀚𑀸𑀢𑀸, 𑀲𑀤𑁆𑀤𑀳𑀢𑀺 𑀘 𑀢𑀣𑀸𑀕𑀢𑀸𑀦𑀁 𑀩𑁄𑀥𑀺𑀁, 𑀲𑀫𑀬𑀦𑁆𑀢𑀭𑁂𑀲𑀼 𑀦𑀸𑀪𑀺𑀭𑀫𑀢𑀺 𑀉𑀓𑁆𑀓𑀸𑀭𑀝𑁆𑀞𑀸𑀦𑁂 𑀭𑀸𑀚𑀳𑀁𑀲𑁄 𑀯𑀺𑀬, 𑀮𑀓𑁆𑀔𑀡𑀢𑁆𑀢𑀬𑀯𑀺𑀚𑀸𑀦𑀦𑁂 𑀓𑀼𑀲𑀮𑁄 𑀳𑁄𑀢𑀺, 𑀅𑀦𑁆𑀢𑁂 𑀘 𑀅𑀦𑀸𑀯𑀭𑀡𑀜𑀸𑀡𑀮𑀸𑀪𑀻, 𑀬𑀸𑀯 𑀘 𑀩𑁄𑀥𑀺𑀁 𑀦 𑀧𑀸𑀧𑀼𑀡𑀸𑀢𑀺, 𑀢𑀸𑀯 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀢𑁆𑀢𑀦𑀺𑀓𑀸𑀬𑁂 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑁄 𑀳𑁄𑀢𑀺, 𑀉𑀴𑀸𑀭𑀼𑀴𑀸𑀭𑀲𑀫𑁆𑀧𑀢𑁆𑀢𑀺𑀬𑁄 𑀧𑀸𑀧𑀼𑀡𑀸𑀢𑀺.

‘‘𑀇𑀢𑀺 ¶ 𑀳𑀺𑀤𑀁 𑀲𑀻𑀮𑀁 𑀦𑀸𑀫 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀦𑀁 𑀅𑀥𑀺𑀝𑁆𑀞𑀸𑀦𑀁, 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑀸𑀦𑀁 𑀧𑀪𑀯𑀪𑀽𑀫𑀺, 𑀲𑀩𑁆𑀩𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑀸𑀦𑀁 𑀆𑀤𑀺 𑀘𑀭𑀡𑀁 𑀓𑀸𑀭𑀡𑀁 𑀫𑀼𑀔𑀁 𑀧𑀫𑀼𑀔’’𑀦𑁆𑀢𑀺 𑀩𑀳𑀼𑀫𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀸𑀬𑀯𑀘𑀻𑀲𑀁𑀬𑀫𑁂, 𑀇𑀦𑁆𑀤𑁆𑀭𑀺𑀬𑀤𑀫𑀦𑁂, 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀬𑀁, 𑀧𑀘𑁆𑀘𑀬𑀧𑀭𑀺𑀪𑁄𑀕𑁂 𑀘 𑀲𑀢𑀺𑀲𑀫𑁆𑀧𑀚𑀜𑁆𑀜𑀩𑀮𑁂𑀦 𑀅𑀧𑁆𑀧𑀫𑀢𑁆𑀢𑁄 𑀳𑁄𑀢𑀺, 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀁 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀧𑀘𑁆𑀘𑀢𑁆𑀣𑀺𑀓𑀁 𑀯𑀺𑀬 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀓𑀺𑀓𑀻𑀯 𑀅𑀡𑁆𑀟’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁧.𑁭; 𑀤𑀻. 𑀦𑀺. 𑀅𑀝𑁆𑀞. 𑁧.𑁭) 𑀯𑀼𑀢𑁆𑀢𑀦𑀬𑁂𑀦 𑀲𑀓𑁆𑀓𑀘𑁆𑀘𑀁 𑀲𑀻𑀮𑀁 𑀲𑀫𑁆𑀧𑀸𑀤𑁂𑀢𑀩𑁆𑀩𑀁. 𑀅𑀬𑀁 𑀢𑀸𑀯 𑀯𑀸𑀭𑀺𑀢𑁆𑀢𑀲𑀻𑀮𑁂 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄.

𑀘𑀸𑀭𑀺𑀢𑁆𑀢𑀲𑀻𑀮𑁂 𑀧𑀦 𑀧𑀝𑀺𑀧𑀢𑁆𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀇𑀥 𑀩𑁄𑀥𑀺𑀲𑀢𑁆𑀢𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀦𑀁 𑀕𑀭𑀼𑀝𑁆𑀞𑀸𑀦𑀺𑀬𑀸𑀦𑀁 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀓𑀸𑀮𑁂𑀦 𑀓𑀸𑀮𑀁 𑀓𑀢𑁆𑀢𑀸 𑀳𑁄𑀢𑀺, 𑀢𑀣𑀸 𑀢𑁂𑀲𑀁 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀝𑁆𑀞𑀸𑀦𑀁 𑀓𑀢𑁆𑀢𑀸 𑀳𑁄𑀢𑀺, 𑀕𑀺𑀮𑀸𑀦𑀸𑀦𑀁 𑀓𑀸𑀬𑀯𑁂𑀬𑁆𑀬𑀸𑀯𑀝𑀺𑀓𑀁, 𑀯𑀸𑀘𑀸𑀬 𑀧𑀼𑀘𑁆𑀙𑀦𑀜𑁆𑀘 𑀓𑀢𑁆𑀢𑀸 𑀳𑁄𑀢𑀺, 𑀲𑀼𑀪𑀸𑀲𑀺𑀢𑀧𑀤𑀸𑀦𑀺 𑀲𑀼𑀢𑁆𑀯𑀸 𑀲𑀸𑀥𑀼𑀓𑀸𑀭𑀁 𑀓𑀢𑁆𑀢𑀸 ¶ 𑀳𑁄𑀢𑀺, 𑀕𑀼𑀡𑀯𑀦𑁆𑀢𑀸𑀦𑀁 𑀕𑀼𑀡𑁂 𑀯𑀡𑁆𑀡𑁂𑀢𑀸, 𑀧𑀭𑁂𑀲𑀁 𑀅𑀧𑀓𑀸𑀭𑁂 𑀔𑀦𑁆𑀢𑀸, 𑀉𑀧𑀓𑀸𑀭𑁂 𑀅𑀦𑀼𑀲𑁆𑀲𑀭𑀺𑀢𑀸, 𑀧𑀼𑀜𑁆𑀜𑀸𑀦𑀺 𑀅𑀦𑀼𑀫𑁄𑀤𑀺𑀢𑀸, 𑀅𑀢𑁆𑀢𑀦𑁄 𑀧𑀼𑀜𑁆𑀜𑀸𑀦𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀧𑀭𑀺𑀡𑀸𑀫𑁂𑀢𑀸, 𑀲𑀩𑁆𑀩𑀓𑀸𑀮𑀁 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀲𑀢𑀺 𑀅𑀘𑁆𑀘𑀬𑁂 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀢𑀸𑀤𑀺𑀲𑀸𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀬𑀣𑀸𑀪𑀽𑀢𑀁 𑀆𑀯𑀺 𑀓𑀢𑁆𑀢𑀸, 𑀉𑀢𑁆𑀢𑀭𑀺𑀜𑁆𑀘 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀲𑀫𑁆𑀫𑀤𑁂𑀯 𑀧𑀭𑀺𑀧𑀽𑀭𑁂𑀢𑀸.

𑀢𑀣𑀸 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀸𑀲𑀼 𑀅𑀢𑁆𑀣𑀽𑀧𑀲𑀁𑀳𑀺𑀢𑀸𑀲𑀼 𑀲𑀢𑁆𑀢𑀸𑀦𑀁 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀧𑀼𑀭𑁂𑀓𑁆𑀔𑀸𑀭𑁄 𑀅𑀦𑀮𑀲𑁄 𑀲𑀳𑀸𑀬𑀪𑀸𑀯𑀁 𑀉𑀧𑀕𑀘𑁆𑀙𑀢𑀺. 𑀉𑀧𑁆𑀧𑀦𑁆𑀦𑁂𑀲𑀼 𑀘 𑀲𑀢𑁆𑀢𑀸𑀦𑀁 𑀩𑁆𑀬𑀸𑀥𑀺𑀆𑀤𑀺𑀤𑀼𑀓𑁆𑀔𑁂𑀲𑀼 𑀬𑀣𑀸𑀭𑀳𑀁 𑀧𑀢𑀺𑀓𑀸𑀭𑀯𑀺𑀥𑀸𑀬𑀓𑁄, 𑀜𑀸𑀢𑀺𑀪𑁄𑀕𑀸𑀤𑀺𑀩𑁆𑀬𑀲𑀦𑀧𑀢𑀺𑀢𑁂𑀲𑀼 𑀲𑁄𑀓𑀧𑀦𑁄𑀤𑀦𑁄, 𑀉𑀮𑁆𑀮𑀼𑀫𑁆𑀧𑀦𑀲𑀪𑀸𑀯𑀸𑀯𑀝𑁆𑀞𑀺𑀢𑁄 𑀳𑀼𑀢𑁆𑀯𑀸 𑀦𑀺𑀕𑁆𑀕𑀳𑀸𑀭𑀳𑀸𑀦𑀁 𑀥𑀫𑁆𑀫𑁂𑀦𑁂𑀯 𑀦𑀺𑀕𑁆𑀕𑀡𑁆𑀳𑀦𑀓𑁄 𑀬𑀸𑀯𑀤𑁂𑀯 𑀅𑀓𑀼𑀲𑀮𑀸 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀓𑀼𑀲𑀮𑁂 𑀧𑀢𑀺𑀝𑁆𑀞𑀸𑀧𑀦𑀸𑀬, 𑀧𑀕𑁆𑀕𑀳𑀸𑀭𑀳𑀸𑀦𑀁 𑀥𑀫𑁆𑀫𑁂𑀦𑁂𑀯 𑀧𑀕𑁆𑀕𑀡𑁆𑀳𑀦𑀓𑁄. 𑀬𑀸𑀦𑀺 𑀧𑀼𑀭𑀺𑀫𑀓𑀸𑀦𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀉𑀴𑀸𑀭𑀢𑀫𑀸𑀦𑀺 𑀧𑀭𑀫𑀤𑀼𑀓𑁆𑀓𑀭𑀸𑀦𑀺 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑀸𑀦𑀺 𑀲𑀢𑁆𑀢𑀸𑀦𑀁 𑀏𑀓𑀦𑁆𑀢𑀳𑀺𑀢𑀲𑀼𑀔𑀸𑀯𑀳𑀸𑀦𑀺 𑀘𑀭𑀺𑀢𑀸𑀦𑀺, 𑀬𑁂𑀳𑀺 𑀦𑁂𑀲𑀁 𑀩𑁄𑀥𑀺𑀲𑀫𑁆𑀪𑀸𑀭𑀸 𑀲𑀫𑁆𑀫𑀤𑁂𑀯 𑀧𑀭𑀺𑀧𑀸𑀓𑀁 𑀅𑀕𑀫𑀺𑀁𑀲𑀼, 𑀢𑀸𑀦𑀺 𑀲𑀼𑀢𑁆𑀯𑀸 𑀅𑀦𑀼𑀩𑁆𑀩𑀺𑀕𑁆𑀕𑁄 𑀅𑀦𑀼𑀢𑁆𑀭𑀸𑀲𑁄 ‘‘𑀢𑁂𑀧𑀺 𑀫𑀳𑀸𑀧𑀼𑀭𑀺𑀲𑀸 𑀫𑀦𑀼𑀲𑁆𑀲𑀸 𑀏𑀯, 𑀅𑀦𑀼𑀓𑁆𑀓𑀫𑁂𑀦 𑀧𑀦 𑀲𑀺𑀓𑁆𑀔𑀸𑀧𑀸𑀭𑀺𑀧𑀽𑀭𑀺𑀬𑀸 𑀪𑀸𑀯𑀺𑀢𑀢𑁆𑀢𑀸 𑀢𑀸𑀤𑀺𑀲𑀸𑀬 𑀉𑀴𑀸𑀭𑀢𑀫𑀸𑀬 𑀆𑀦𑀼𑀪𑀸𑀯𑀲𑀫𑁆𑀧𑀢𑁆𑀢𑀺𑀬𑀸 𑀩𑁄𑀥𑀺𑀲𑀫𑁆𑀪𑀸𑀭𑁂𑀲𑀼 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑀸 𑀅𑀳𑁂𑀲𑀼𑀁, 𑀢𑀲𑁆𑀫𑀸 𑀫𑀬𑀸𑀧𑀺 𑀲𑀻𑀮𑀸𑀤𑀺𑀲𑀺𑀓𑁆𑀔𑀸𑀲𑀼 𑀲𑀫𑁆𑀫𑀤𑁂𑀯 𑀢𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁, 𑀬𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀅𑀳𑀫𑁆𑀧𑀺 𑀅𑀦𑀼𑀓𑁆𑀓𑀫𑁂𑀦 𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀢𑁆𑀯𑀸 𑀏𑀓𑀦𑁆𑀢𑀢𑁄 𑀧𑀤𑀁 𑀅𑀦𑀼𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀲𑀤𑁆𑀥𑀸𑀧𑀼𑀭𑁂𑀘𑀸𑀭𑀺𑀓𑀁 𑀯𑀻𑀭𑀺𑀬𑀁 𑀅𑀯𑀺𑀲𑁆𑀲𑀚𑁆𑀚𑀦𑁆𑀢𑁄 𑀲𑀫𑁆𑀫𑀤𑁂𑀯 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺.

𑀢𑀣𑀸 𑀧𑀝𑀺𑀘𑁆𑀙𑀦𑁆𑀦𑀓𑀮𑁆𑀬𑀸𑀡𑁄 𑀳𑁄𑀢𑀺 𑀯𑀺𑀯𑀝𑀸𑀧𑀭𑀸𑀥𑁄, 𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄 𑀧𑀯𑀺𑀯𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄 𑀤𑀼𑀓𑁆𑀔𑀲𑀳𑁄 ¶ 𑀅𑀯𑀺𑀧𑀭𑀻𑀢𑀤𑀲𑁆𑀲𑀦𑀚𑀸𑀢𑀺𑀓𑁄 𑀅𑀦𑀼𑀤𑁆𑀥𑀢𑁄 𑀅𑀦𑀼𑀦𑁆𑀦𑀴𑁄 𑀅𑀘𑀧𑀮𑁄 𑀅𑀫𑀼𑀔𑀭𑁄 𑀅𑀯𑀺𑀓𑀺𑀡𑁆𑀡𑀯𑀸𑀘𑁄 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁄 𑀲𑀦𑁆𑀢𑀫𑀸𑀦𑀲𑁄 𑀓𑀼𑀳𑀦𑀸𑀤𑀺𑀫𑀺𑀘𑁆𑀙𑀸𑀚𑀻𑀯𑀯𑀺𑀭𑀳𑀺𑀢𑁄 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄, 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼, 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀦𑀺𑀭𑀧𑁂𑀓𑁆𑀔𑁄, 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀓𑀸𑀬𑁂, 𑀚𑀻𑀯𑀺𑀢𑁂 𑀯𑀸 𑀅𑀧𑁂𑀓𑁆𑀔𑀁 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺, 𑀧𑀕𑁂𑀯 𑀅𑀥𑀺𑀫𑀢𑁆𑀢𑀁. 𑀲𑀩𑁆𑀩𑁂𑀧𑀺 𑀤𑀼𑀲𑁆𑀲𑀻𑀮𑁆𑀬𑀳𑁂𑀢𑀼𑀪𑀽𑀢𑁂 𑀓𑁄𑀥𑀼𑀧𑀦𑀸𑀳𑀸𑀤𑀺𑀓𑁂 𑀓𑀺𑀮𑁂𑀲𑀼𑀧𑀓𑁆𑀓𑀺𑀮𑁂𑀲𑁂 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺, 𑀅𑀧𑁆𑀧𑀫𑀢𑁆𑀢𑀓𑁂𑀦 𑀯𑀺𑀲𑁂𑀲𑀸𑀥𑀺𑀕𑀫𑁂𑀦 𑀅𑀧𑀭𑀺𑀢𑀼𑀝𑁆𑀞𑁄 𑀳𑁄𑀢𑀺, 𑀦 𑀲𑀗𑁆𑀓𑁄𑀘𑀁 𑀆𑀧𑀚𑁆𑀚𑀢𑀺, 𑀉𑀧𑀭𑀽𑀧𑀭𑀺𑀯𑀺𑀲𑁂𑀲𑀸𑀥𑀺𑀕𑀫𑀸𑀬 𑀯𑀸𑀬𑀫𑀢𑀺.

𑀬𑁂𑀦 ¶ 𑀬𑀣𑀸𑀮𑀤𑁆𑀥𑀸 𑀲𑀫𑁆𑀧𑀢𑁆𑀢𑀺 𑀳𑀸𑀦𑀪𑀸𑀕𑀺𑀬𑀸 𑀯𑀸 𑀞𑀺𑀢𑀺𑀪𑀸𑀕𑀺𑀬𑀸 𑀯𑀸 𑀦 𑀳𑁄𑀢𑀺, 𑀢𑀣𑀸 𑀫𑀳𑀸𑀧𑀼𑀭𑀺𑀲𑁄 𑀅𑀦𑁆𑀥𑀸𑀦𑀁 𑀧𑀭𑀺𑀡𑀸𑀬𑀓𑁄 𑀳𑁄𑀢𑀺, 𑀫𑀕𑁆𑀕𑀁 𑀆𑀘𑀺𑀓𑁆𑀔𑀢𑀺, 𑀩𑀥𑀺𑀭𑀸𑀦𑀁 𑀳𑀢𑁆𑀣𑀫𑀼𑀤𑁆𑀤𑀸𑀬 𑀲𑀜𑁆𑀜𑀁 𑀤𑁂𑀢𑀺, 𑀅𑀢𑁆𑀣𑀫𑀦𑀼𑀕𑁆𑀕𑀸𑀳𑁂𑀢𑀺, 𑀢𑀣𑀸 𑀫𑀽𑀕𑀸𑀦𑀁. 𑀧𑀻𑀞𑀲𑀧𑁆𑀧𑀺𑀓𑀸𑀦𑀁 𑀧𑀻𑀞𑀁 𑀤𑁂𑀢𑀺, 𑀯𑀸𑀳𑁂𑀢𑀺 𑀯𑀸. 𑀅𑀲𑁆𑀲𑀤𑁆𑀥𑀸𑀦𑀁 𑀲𑀤𑁆𑀥𑀸𑀧𑀝𑀺𑀮𑀸𑀪𑀸𑀬 𑀯𑀸𑀬𑀫𑀢𑀺, 𑀓𑀼𑀲𑀻𑀢𑀸𑀦𑀁 𑀉𑀲𑁆𑀲𑀸𑀳𑀚𑀦𑀦𑀸𑀬, 𑀫𑀼𑀝𑁆𑀞𑀲𑁆𑀲𑀢𑀻𑀦𑀁 𑀲𑀢𑀺𑀲𑀫𑀸𑀬𑁄𑀕𑀸𑀬. 𑀯𑀺𑀩𑁆𑀪𑀦𑁆𑀢𑀢𑁆𑀢𑀸𑀦𑀁 𑀲𑀫𑀸𑀥𑀺𑀲𑀫𑁆𑀧𑀤𑀸𑀬, 𑀤𑀼𑀧𑁆𑀧𑀜𑁆𑀜𑀸𑀦𑀁 𑀧𑀜𑁆𑀜𑀸𑀥𑀺𑀕𑀫𑀸𑀬 𑀯𑀸𑀬𑀫𑀢𑀺. 𑀓𑀸𑀫𑀘𑁆𑀙𑀦𑁆𑀤𑀧𑀭𑀺𑀬𑀼𑀝𑁆𑀞𑀺𑀢𑀸𑀦𑀁 𑀓𑀸𑀫𑀘𑁆𑀙𑀦𑁆𑀤𑀧𑀝𑀺𑀯𑀺𑀦𑁄𑀤𑀦𑀸𑀬 𑀯𑀸𑀬𑀫𑀢𑀺. 𑀩𑁆𑀬𑀸𑀧𑀸𑀤𑀣𑀺𑀦𑀫𑀺𑀤𑁆𑀥𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸𑀧𑀭𑀺𑀬𑀼𑀝𑁆𑀞𑀺𑀢𑀸𑀦𑀁 𑀯𑀺𑀘𑀺𑀓𑀺𑀘𑁆𑀙𑀸𑀯𑀺𑀦𑁄𑀤𑀦𑀸𑀬 𑀯𑀸𑀬𑀫𑀢𑀺. 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀧𑀓𑀢𑀸𑀦𑀁 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀯𑀺𑀦𑁄𑀤𑀦𑀸𑀬 𑀯𑀸𑀬𑀫𑀢𑀺. 𑀧𑀼𑀩𑁆𑀩𑀓𑀸𑀭𑀻𑀦𑀁 𑀲𑀢𑁆𑀢𑀸𑀦𑀁 𑀓𑀢𑀜𑁆𑀜𑀼𑀢𑀁 𑀦𑀺𑀲𑁆𑀲𑀸𑀬 𑀧𑀼𑀩𑁆𑀩𑀪𑀸𑀲𑀻 𑀧𑀺𑀬𑀯𑀸𑀤𑀻 𑀲𑀗𑁆𑀕𑀸𑀳𑀓𑁄 𑀲𑀤𑀺𑀲𑁂𑀦, 𑀅𑀥𑀺𑀓𑁂𑀦 𑀯𑀸 𑀧𑀘𑁆𑀘𑀼𑀧𑀓𑀸𑀭𑁂 𑀲𑀫𑁆𑀫𑀸𑀦𑁂𑀢𑀸 𑀳𑁄𑀢𑀺.

𑀆𑀧𑀤𑀸𑀲𑀼 𑀲𑀳𑀸𑀬𑀓𑀺𑀘𑁆𑀘𑀁 𑀅𑀦𑀼𑀢𑀺𑀝𑁆𑀞𑀢𑀺, 𑀢𑁂𑀲𑀁 𑀢𑁂𑀲𑀜𑁆𑀘 𑀲𑀢𑁆𑀢𑀸𑀦𑀁 𑀧𑀓𑀢𑀺𑀁, 𑀲𑀪𑀸𑀯𑀜𑁆𑀘 𑀧𑀭𑀺𑀚𑀸𑀦𑀺𑀢𑁆𑀯𑀸 𑀬𑁂𑀳𑀺 𑀬𑀣𑀸 𑀲𑀁𑀯𑀲𑀺𑀢𑀩𑁆𑀩𑀁 𑀳𑁄𑀢𑀺, 𑀢𑁂𑀳𑀺 𑀢𑀣𑀸 𑀲𑀁𑀯𑀲𑀢𑀺. 𑀬𑁂𑀲𑀼 𑀘 𑀬𑀣𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁 𑀳𑁄𑀢𑀺, 𑀢𑁂𑀲𑀼 𑀢𑀣𑀸 𑀧𑀝𑀺𑀧𑀚𑁆𑀚𑀢𑀺. 𑀢𑀜𑁆𑀘 𑀔𑁄 𑀅𑀓𑀼𑀲𑀮𑀢𑁄 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀓𑀼𑀲𑀮𑁂 𑀧𑀢𑀺𑀝𑁆𑀞𑀸𑀧𑀦𑀯𑀲𑁂𑀦, 𑀦 𑀅𑀜𑁆𑀜𑀣𑀸. 𑀧𑀭𑀘𑀺𑀢𑁆𑀢𑀸𑀦𑀼𑀭𑀓𑁆𑀔𑀡𑀸 𑀳𑀺 𑀩𑁄𑀥𑀺𑀲𑀢𑁆𑀢𑀸𑀦𑀁 𑀬𑀸𑀯𑀤𑁂𑀯 𑀓𑀼𑀲𑀮𑀸𑀪𑀺𑀯𑀟𑁆𑀠𑀺𑀬𑀸. 𑀢𑀣𑀸 𑀳𑀺𑀢𑀚𑁆𑀛𑀸𑀲𑀬𑁂𑀦𑀸𑀧𑀺 𑀧𑀭𑁄 𑀦 𑀲𑀸𑀳𑀲𑀺𑀢𑀩𑁆𑀩𑁄, 𑀦 𑀪𑀡𑁆𑀟𑀺𑀢𑀩𑁆𑀩𑁄, 𑀦 𑀫𑀗𑁆𑀓𑀼𑀪𑀸𑀯𑀫𑀸𑀧𑀸𑀤𑁂𑀢𑀩𑁆𑀩𑁄, 𑀦 𑀧𑀭𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀁 𑀉𑀧𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀦𑀺𑀕𑁆𑀕𑀳𑀝𑁆𑀞𑀸𑀦𑁂 𑀘𑁄𑀤𑁂𑀢𑀩𑁆𑀩𑁄, 𑀦 𑀦𑀻𑀘𑀢𑀭𑀁 𑀧𑀝𑀺𑀧𑀦𑁆𑀦𑀲𑁆𑀲 𑀅𑀢𑁆𑀢𑀸 𑀉𑀘𑁆𑀘𑀢𑀭𑁂 𑀞𑀧𑁂𑀢𑀩𑁆𑀩𑁄, 𑀦 𑀘 𑀧𑀭𑁂𑀲𑀼 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀲𑁂𑀯𑀺𑀦𑀸 𑀪𑀯𑀺𑀢𑀩𑁆𑀩𑀁, 𑀦 𑀅𑀢𑀺𑀲𑁂𑀯𑀺𑀦𑀸, 𑀦 𑀅𑀓𑀸𑀮𑀲𑁂𑀯𑀺𑀦𑀸 𑀪𑀯𑀺𑀢𑀩𑁆𑀩𑀁.

𑀬𑀼𑀢𑁆𑀢𑁂 𑀧𑀦 𑀲𑀢𑁆𑀢𑁂 𑀤𑁂𑀲𑀓𑀸𑀮𑀸𑀦𑀼𑀭𑀽𑀧𑀁 𑀲𑁂𑀯𑀢𑀺, 𑀦 𑀘 𑀧𑀭𑁂𑀲𑀁 𑀧𑀼𑀭𑀢𑁄 𑀧𑀺𑀬𑁂𑀧𑀺 𑀕𑀭𑀳𑀢𑀺, 𑀅𑀧𑁆𑀧𑀺𑀬𑁂 𑀯𑀸 𑀧𑀲𑀁𑀲𑀢𑀺, 𑀦 𑀅𑀥𑀺𑀝𑁆𑀞𑀸𑀬 𑀯𑀺𑀲𑁆𑀲𑀸𑀲𑀻 𑀳𑁄𑀢𑀺, 𑀦 𑀥𑀫𑁆𑀫𑀺𑀓𑀁 𑀉𑀧𑀦𑀺𑀫𑀦𑁆𑀢𑀦𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀧𑀜𑁆𑀜𑀢𑁆𑀢𑀺𑀁 𑀉𑀧𑀕𑀘𑁆𑀙𑀢𑀺, 𑀦𑀸𑀥𑀺𑀓𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑁂 𑀲𑀤𑁆𑀥𑀸𑀦𑀺𑀲𑀁𑀲𑀓𑀣𑀸𑀬 𑀲𑀫𑁆𑀧𑀳𑀁𑀲𑁂𑀢𑀺, 𑀲𑀻𑀮𑀲𑀼𑀢𑀘𑀸𑀕𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁂 ¶ 𑀧𑀜𑁆𑀜𑀸𑀦𑀺𑀲𑀁𑀲𑀓𑀣𑀸𑀬 𑀲𑀫𑁆𑀧𑀳𑀁𑀲𑁂𑀢𑀺. 𑀲𑀘𑁂 𑀧𑀦 𑀩𑁄𑀥𑀺𑀲𑀢𑁆𑀢𑁄 𑀅𑀪𑀺𑀜𑁆𑀜𑀸𑀩𑀮𑀧𑁆𑀧𑀢𑁆𑀢𑁄 𑀳𑁄𑀢𑀺, 𑀧𑀫𑀸𑀤𑀸𑀧𑀦𑁆𑀦𑁂 𑀲𑀢𑁆𑀢𑁂 𑀅𑀪𑀺𑀜𑁆𑀜𑀸𑀩𑀮𑁂𑀦 𑀬𑀣𑀸𑀭𑀳𑀁 𑀦𑀺𑀭𑀬𑀸𑀤𑀺𑀓𑁂 𑀤𑀲𑁆𑀲𑁂𑀦𑁆𑀢𑁄 𑀲𑀁𑀯𑁂𑀚𑁂𑀢𑁆𑀯𑀸 𑀅𑀲𑁆𑀲𑀤𑁆𑀥𑀸𑀤𑀺𑀓𑁂 𑀲𑀤𑁆𑀥𑀸𑀤𑀻𑀲𑀼 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀲𑀸𑀲𑀦𑁂 𑀑𑀢𑀸𑀭𑁂𑀢𑀺, 𑀲𑀤𑁆𑀥𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁂 𑀧𑀭𑀺𑀧𑀸𑀘𑁂𑀢𑀺. 𑀏𑀯𑀫𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀘𑀸𑀭𑀺𑀢𑁆𑀢𑀪𑀽𑀢𑁄 𑀅𑀧𑀭𑀺𑀫𑀸𑀡𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄 𑀓𑀼𑀲𑀮𑀸𑀪𑀺𑀲𑀦𑁆𑀤𑁄 𑀉𑀧𑀭𑀽𑀧𑀭𑀺 𑀅𑀪𑀺𑀯𑀟𑁆𑀠𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀺𑀘 ¶ 𑀬𑀸 𑀲𑀸 ‘‘𑀓𑀺𑀁 𑀲𑀻𑀮𑀁, 𑀓𑁂𑀦𑀝𑁆𑀞𑁂𑀦 𑀲𑀻𑀮’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀁 𑀓𑀢𑁆𑀯𑀸 ‘‘𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀺𑀭𑀫𑀦𑁆𑀢𑀲𑁆𑀲, 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀯𑀸 𑀧𑀽𑀭𑁂𑀦𑁆𑀢𑀲𑁆𑀲 𑀘𑁂𑀢𑀦𑀸𑀤𑀬𑁄 𑀥𑀫𑁆𑀫𑀸 𑀲𑀻𑀮’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑁄 𑀲𑀻𑀮𑀲𑁆𑀲 𑀯𑀺𑀢𑁆𑀣𑀸𑀭𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁬) 𑀯𑀼𑀢𑁆𑀢𑀸, 𑀲𑀸 𑀲𑀩𑁆𑀩𑀸𑀧𑀺 𑀇𑀥 𑀆𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀸. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑀯𑀲𑁂𑀦 𑀲𑀻𑀮𑀓𑀣𑀸 𑀆𑀕𑀢𑀸, 𑀇𑀥 𑀫𑀳𑀸𑀩𑁄𑀥𑀺𑀲𑀢𑁆𑀢𑀯𑀲𑁂𑀦 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀬𑀢𑁄 𑀇𑀤𑀁 𑀲𑀻𑀮𑀁 𑀫𑀳𑀸𑀧𑀼𑀭𑀺𑀲𑁄 𑀬𑀣𑀸 𑀦 𑀅𑀢𑁆𑀢𑀦𑁄 𑀤𑀼𑀕𑁆𑀕𑀢𑀺𑀬𑀁 𑀧𑀭𑀺𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀺𑀬𑀸, 𑀲𑀼𑀕𑀢𑀺𑀬𑀫𑁆𑀧𑀺 𑀦 𑀭𑀚𑁆𑀚𑀲𑀫𑁆𑀧𑀢𑁆𑀢𑀺𑀬𑀸, 𑀦 𑀘𑀓𑁆𑀓𑀯𑀢𑁆𑀢𑀻, 𑀦 𑀤𑁂𑀯, 𑀦 𑀲𑀓𑁆𑀓, 𑀦 𑀫𑀸𑀭, 𑀦 𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑀺𑀡𑀸𑀫𑁂𑀢𑀺, 𑀢𑀣𑀸 𑀦 𑀅𑀢𑁆𑀢𑀦𑁄 𑀢𑁂𑀯𑀺𑀚𑁆𑀚𑀢𑀸𑀬, 𑀦 𑀙𑀴𑀪𑀺𑀜𑁆𑀜𑀢𑀸𑀬, 𑀦 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀥𑀺𑀕𑀫𑀸𑀬, 𑀦 𑀲𑀸𑀯𑀓𑀩𑁄𑀥𑀺𑀬𑀸, 𑀦 𑀧𑀘𑁆𑀘𑁂𑀓𑀩𑁄𑀥𑀺𑀬𑀸 𑀧𑀭𑀺𑀡𑀸𑀫𑁂𑀢𑀺, 𑀅𑀣 𑀔𑁄 𑀲𑀩𑁆𑀩𑀜𑁆𑀜𑀼𑀪𑀸𑀯𑁂𑀦 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀦𑀼𑀢𑁆𑀢𑀭𑀲𑀻𑀮𑀸𑀮𑀗𑁆𑀓𑀸𑀭𑀲𑀫𑁆𑀧𑀸𑀤𑀦𑀢𑁆𑀣𑀫𑁂𑀯 𑀧𑀭𑀺𑀡𑀸𑀫𑁂𑀢𑀻𑀢𑀺 𑀅𑀬𑀁 𑀲𑀻𑀮𑀧𑀸𑀭𑀫𑀺𑀬𑀸 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄.

𑀢𑀣𑀸 𑀬𑀲𑁆𑀫𑀸 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀭𑀺𑀕𑁆𑀕𑀳𑀺𑀢𑀸 𑀆𑀤𑀻𑀦𑀯𑀤𑀲𑁆𑀲𑀦𑀧𑀼𑀩𑁆𑀩𑀗𑁆𑀕𑀫𑀸 𑀓𑀸𑀫𑁂𑀳𑀺 𑀘 𑀪𑀯𑁂𑀳𑀺 𑀘 𑀦𑀺𑀓𑁆𑀔𑀫𑀦𑀯𑀲𑁂𑀦 𑀧𑀯𑀢𑁆𑀢𑀸 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻, 𑀢𑀲𑁆𑀫𑀸 𑀲𑀓𑀮𑀲𑀁𑀓𑀺𑀮𑁂𑀲𑀦𑀺𑀯𑀸𑀲𑀦𑀝𑁆𑀞𑀸𑀦𑀢𑀸𑀬, 𑀧𑀼𑀢𑁆𑀢𑀤𑀸𑀭𑀸𑀤𑀻𑀳𑀺 𑀫𑀳𑀸𑀲𑀫𑁆𑀩𑀸𑀥𑀢𑀸𑀬, 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀦𑀸𑀦𑀸𑀯𑀺𑀓𑀫𑁆𑀫𑀦𑁆𑀢𑀸𑀥𑀺𑀝𑁆𑀞𑀸𑀦𑀩𑁆𑀬𑀸𑀓𑀼𑀮𑀢𑀸𑀬 𑀘 𑀖𑀭𑀸𑀯𑀸𑀲𑀲𑁆𑀲 𑀦𑁂𑀓𑁆𑀔𑀫𑁆𑀫𑀲𑀼𑀔𑀸𑀤𑀻𑀦𑀁 𑀅𑀦𑁄𑀓𑀸𑀲𑀢𑀁, 𑀓𑀸𑀫𑀸𑀦𑀜𑁆𑀘 ‘‘𑀲𑀢𑁆𑀣𑀥𑀸𑀭𑀸𑀮𑀕𑁆𑀕𑀫𑀥𑀼𑀩𑀺𑀦𑁆𑀤𑀼 𑀯𑀺𑀬 𑀘 𑀓𑀤𑀮𑀻 𑀯𑀺𑀬 𑀘 𑀅𑀯𑀮𑁂𑀬𑁆𑀳𑀫𑀸𑀦𑀧𑀭𑀺𑀢𑁆𑀢𑀲𑁆𑀲𑀸𑀤𑀯𑀺𑀧𑀼𑀮𑀸𑀦𑀢𑁆𑀣𑀸𑀦𑀼𑀩𑀦𑁆𑀥𑀸’’𑀢𑀺 𑀘 𑀯𑀺𑀚𑁆𑀚𑀼𑀮𑀢𑁄𑀪𑀸𑀲𑁂𑀦 𑀕𑀳𑁂𑀢𑀩𑁆𑀩𑀁 𑀦𑀘𑁆𑀘𑀁 𑀯𑀺𑀬 𑀧𑀭𑀺𑀢𑁆𑀢𑀓𑀸𑀮𑀽𑀧𑀮𑀩𑁆𑀪𑀸, 𑀉𑀫𑁆𑀫𑀢𑁆𑀢𑀓𑀸𑀮𑀗𑁆𑀓𑀸𑀭𑁄 𑀯𑀺𑀬 𑀯𑀺𑀧𑀭𑀻𑀢𑀲𑀜𑁆𑀜𑀸𑀬 𑀅𑀦𑀼𑀪𑀯𑀺𑀢𑀩𑁆𑀩𑀸, 𑀓𑀭𑀻𑀲𑀸𑀯𑀘𑁆𑀙𑀸𑀤𑀦𑀫𑀼𑀔𑀁 𑀯𑀺𑀬 𑀧𑀝𑀺𑀓𑀸𑀭𑀪𑀽𑀢𑀸, 𑀉𑀤𑀓𑁂 𑀢𑁂𑀫𑀺𑀢𑀗𑁆𑀕𑀼𑀮𑀺𑀬𑀸 𑀦𑀺𑀲𑀸𑀭𑀼𑀤𑀓𑀧𑀸𑀦𑀁 𑀯𑀺𑀬 𑀅𑀢𑀺𑀢𑁆𑀢𑀺𑀓𑀭𑀸, 𑀙𑀸𑀢𑀚𑁆𑀛𑀢𑁆𑀢𑀪𑁄𑀚𑀦𑀁 𑀯𑀺𑀬 𑀲𑀸𑀩𑀸𑀥𑀸, 𑀩𑀮𑀺𑀲𑀸𑀫𑀺𑀲𑀁 𑀯𑀺𑀬 𑀩𑁆𑀬𑀸𑀲𑀦𑀼𑀧𑀦𑀺𑀧𑀸𑀢𑀓𑀸𑀭𑀡𑀸 (𑀩𑁆𑀬𑀲𑀦𑀲𑀦𑁆𑀦𑀺𑀧𑀸𑀢𑀓𑀸𑀭𑀡𑀸 𑁋 𑀤𑀻. 𑀦𑀺. 𑀝𑀻. 𑁧.𑁭), 𑀅𑀕𑁆𑀕𑀺𑀲𑀦𑁆𑀢𑀸𑀧𑁄 𑀯𑀺𑀬 𑀓𑀸𑀮𑀢𑁆𑀢𑀬𑁂𑀧𑀺 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀸, 𑀫𑀓𑁆𑀓𑀝𑀸𑀮𑁂𑀧𑁄 𑀯𑀺𑀬 𑀩𑀦𑁆𑀥𑀦𑀦𑀺𑀫𑀺𑀢𑁆𑀢𑀸, 𑀖𑀸𑀢𑀓𑀸𑀯𑀘𑁆𑀙𑀸𑀤𑀦𑀓𑀺𑀫𑀸𑀮𑀬𑁄 𑀯𑀺𑀬 𑀅𑀦𑀢𑁆𑀣𑀘𑁆𑀙𑀸𑀤𑀦𑀸, 𑀲𑀧𑀢𑁆𑀢𑀕𑀸𑀫𑀯𑀸𑀲𑁄 𑀯𑀺𑀬 𑀪𑀬𑀝𑁆𑀞𑀸𑀦𑀪𑀽𑀢𑀸, 𑀧𑀘𑁆𑀘𑀢𑁆𑀣𑀺𑀓𑀧𑁄𑀲𑀓𑁄 𑀯𑀺𑀬 𑀓𑀺𑀮𑁂𑀲𑀫𑀸𑀭𑀸𑀤𑀻𑀦𑀁 𑀆𑀫𑀺𑀲𑀪𑀽𑀢𑀸, 𑀙𑀡𑀲𑀫𑁆𑀧𑀢𑁆𑀢𑀺𑀬𑁄 𑀯𑀺𑀬 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀸, 𑀓𑁄𑀝𑀭𑀕𑁆𑀕𑀺 ¶ 𑀯𑀺𑀬 𑀅𑀦𑁆𑀢𑁄𑀤𑀸𑀳𑀓𑀸, 𑀧𑀼𑀭𑀸𑀡𑀓𑀽𑀧𑀸𑀯𑀮𑀫𑁆𑀩𑀩𑀻𑀭𑀡𑀫𑀥𑀼𑀧𑀺𑀡𑁆𑀟𑀁 𑀯𑀺𑀬 𑀅𑀦𑁂𑀓𑀸𑀤𑀻𑀦𑀯𑀸, 𑀮𑁄𑀡𑀽𑀤𑀓𑀧𑀸𑀦𑀁 𑀯𑀺𑀬 𑀧𑀺𑀧𑀸𑀲𑀸𑀳𑁂𑀢𑀼𑀪𑀽𑀢𑀸, 𑀲𑀼𑀭𑀸𑀫𑁂𑀭𑀬𑀁 𑀯𑀺𑀬 𑀦𑀻𑀘𑀚𑀦𑀲𑁂𑀯𑀺𑀢𑀸 ¶ , 𑀅𑀧𑁆𑀧𑀲𑁆𑀲𑀸𑀤𑀢𑀸𑀬 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸’’𑀢𑀺𑀆𑀤𑀺𑀦𑀸 𑀘 𑀦𑀬𑁂𑀦 𑀆𑀤𑀻𑀦𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀲𑁆𑀲𑀦𑁆𑀢𑁂𑀦 𑀦𑁂𑀓𑁆𑀔𑀫𑁆𑀫𑀧𑀯𑀺𑀯𑁂𑀓𑀉𑀧𑀲𑀫𑀲𑀼𑀔𑀸𑀤𑀻𑀲𑀼 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑁂𑀦 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀬𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑀬𑀲𑁆𑀫𑀸 𑀧𑀦 𑀦𑁂𑀓𑁆𑀔𑀫𑁆𑀫𑀁 𑀧𑀩𑁆𑀩𑀚𑁆𑀚𑀸𑀫𑀽𑀮𑀓𑀁, 𑀢𑀲𑁆𑀫𑀸 𑀧𑀩𑁆𑀩𑀚𑁆𑀚𑀸 𑀢𑀸𑀯 𑀅𑀦𑀼𑀝𑁆𑀞𑀸𑀢𑀩𑁆𑀩𑀸. 𑀧𑀩𑁆𑀩𑀚𑁆𑀚𑀫𑀦𑀼𑀢𑀺𑀝𑁆𑀞𑀦𑁆𑀢𑁂𑀦 𑀫𑀳𑀸𑀲𑀢𑁆𑀢𑁂𑀦 𑀅𑀲𑀢𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀫𑁆𑀫𑀯𑀸𑀤𑀻𑀦𑀁 𑀓𑀺𑀭𑀺𑀬𑀯𑀸𑀤𑀻𑀦𑀁 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀧𑀩𑁆𑀩𑀚𑁆𑀚𑀸 𑀅𑀦𑀼𑀝𑁆𑀞𑀸𑀢𑀩𑁆𑀩𑀸. 𑀉𑀧𑁆𑀧𑀦𑁆𑀦𑁂𑀲𑀼 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀲𑀼 𑀢𑁂𑀲𑀁 𑀲𑀸𑀲𑀦𑁂 𑀏𑀯 𑀧𑀩𑁆𑀩𑀚𑀺𑀢𑀩𑁆𑀩𑀁. 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀬𑀣𑀸𑀯𑀼𑀢𑁆𑀢𑁂 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁂𑀦 𑀢𑀲𑁆𑀲𑀸 𑀏𑀯 𑀲𑀻𑀮𑀧𑀸𑀭𑀫𑀺𑀬𑀸 𑀯𑁄𑀤𑀸𑀧𑀦𑀢𑁆𑀣𑀁 𑀥𑀼𑀢𑀕𑀼𑀡𑀸 𑀲𑀫𑀸𑀤𑀸𑀢𑀩𑁆𑀩𑀸. 𑀲𑀫𑀸𑀤𑀺𑀦𑁆𑀦𑀥𑀼𑀢𑀥𑀫𑁆𑀫𑀸 𑀳𑀺 𑀫𑀳𑀸𑀧𑀼𑀭𑀺𑀲𑀸 𑀲𑀫𑁆𑀫𑀤𑁂𑀯 𑀢𑁂 𑀧𑀭𑀺𑀳𑀭𑀦𑁆𑀢𑀸 𑀅𑀧𑁆𑀧𑀺𑀘𑁆𑀙𑀸𑀲𑀦𑁆𑀢𑀼𑀝𑁆𑀞𑀲𑀮𑁆𑀮𑁂𑀔𑀧𑀯𑀺𑀯𑁂𑀓𑀅𑀲𑀁𑀲𑀕𑁆𑀕𑀯𑀻𑀭𑀺𑀬𑀸𑀭𑀫𑁆𑀪𑀲𑀼𑀪𑀭𑀢𑀸𑀤𑀺𑀕𑀼𑀡𑀲𑀮𑀺𑀮𑀯𑀺𑀓𑁆𑀔𑀸𑀮𑀺𑀢𑀓𑀺𑀮𑁂𑀲𑀫𑀮𑀢𑀸𑀬 𑀅𑀦𑀯𑀚𑁆𑀚𑀲𑀻𑀮𑀯𑀢𑀕𑀼𑀡𑀧𑀭𑀺𑀲𑀼𑀤𑁆𑀥𑀲𑀫𑀸𑀘𑀸𑀭𑀸 𑀧𑁄𑀭𑀸𑀡𑁂 𑀅𑀭𑀺𑀬𑀯𑀁𑀲𑀢𑁆𑀢𑀬𑁂 𑀧𑀢𑀺𑀝𑁆𑀞𑀺𑀢𑀸 𑀘𑀢𑀼𑀢𑁆𑀣𑀁 𑀪𑀸𑀯𑀦𑀸𑀭𑀸𑀫𑀢𑀸𑀲𑀗𑁆𑀔𑀸𑀢𑀁 𑀅𑀭𑀺𑀬𑀯𑀁𑀲𑀁 𑀕𑀦𑁆𑀢𑀼𑀁 𑀘𑀢𑁆𑀢𑀸𑀭𑀻𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀬𑀣𑀸𑀭𑀳𑀁 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀺. 𑀏𑀯𑀜𑁆𑀳𑀺𑀲𑁆𑀲 𑀲𑀫𑁆𑀫𑀤𑁂𑀯 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻 𑀧𑀸𑀭𑀺𑀧𑀽𑀭𑀺𑀢𑀸 𑀳𑁄𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀢𑁂𑀭𑀲𑀳𑀺 𑀥𑀼𑀢𑀥𑀫𑁆𑀫𑁂𑀳𑀺 𑀲𑀤𑁆𑀥𑀺𑀁 𑀤𑀲 𑀓𑀲𑀺𑀡𑀸𑀦𑀺 𑀤𑀲𑀸𑀲𑀼𑀪𑀸𑀦𑀺 𑀤𑀲𑀸𑀦𑀼𑀲𑁆𑀲𑀢𑀺𑀬𑁄 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸 𑀏𑀓𑀸 𑀲𑀜𑁆𑀜𑀸 𑀏𑀓𑀁 𑀯𑀯𑀢𑁆𑀣𑀸𑀦𑀦𑁆𑀢𑀺 𑀘𑀢𑁆𑀢𑀸𑀭𑀻𑀲 𑀲𑀫𑀸𑀥𑀺𑀪𑀸𑀯𑀦𑀸𑀓𑀫𑁆𑀫𑀝𑁆𑀞𑀸𑀦𑀸𑀦𑀺, 𑀪𑀸𑀯𑀦𑀸𑀯𑀺𑀥𑀸𑀦𑀜𑁆𑀘 𑀯𑀺𑀢𑁆𑀣𑀸𑀭𑀢𑁄 𑀯𑀢𑁆𑀢𑀩𑁆𑀩𑀸𑀦𑀺, 𑀢𑀁 𑀧𑀦𑁂𑀢𑀁 𑀲𑀩𑁆𑀩𑀁 𑀬𑀲𑁆𑀫𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁨, 𑁪𑁭) 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁, 𑀇𑀥 𑀫𑀳𑀸𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀲𑁂𑀦 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀏𑀯𑀫𑁂𑀢𑁆𑀣 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀬𑀸 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀣𑀸 𑀧𑀜𑁆𑀜𑀸𑀧𑀸𑀭𑀫𑀺𑀁 𑀲𑀫𑁆𑀧𑀸𑀤𑁂𑀢𑀼𑀓𑀸𑀫𑁂𑀦 𑀬𑀲𑁆𑀫𑀸 𑀧𑀜𑁆𑀜𑀸 𑀆𑀮𑁄𑀓𑁄 𑀯𑀺𑀬 𑀅𑀦𑁆𑀥𑀓𑀸𑀭𑁂𑀦 𑀫𑁄𑀳𑁂𑀦 𑀲𑀳 𑀦 𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀫𑁄𑀳𑀓𑀸𑀭𑀡𑀸𑀦𑀺 𑀢𑀸𑀯 𑀩𑁄𑀥𑀺𑀲𑀢𑁆𑀢𑁂𑀦 𑀧𑀭𑀺𑀯𑀚𑁆𑀚𑁂𑀢𑀩𑁆𑀩𑀸𑀦𑀺. 𑀢𑀢𑁆𑀣𑀺𑀫𑀸𑀦𑀺 𑀫𑁄𑀳𑀓𑀸𑀭𑀡𑀸𑀦𑀺-𑀅𑀭𑀢𑀺 𑀢𑀦𑁆𑀤𑀻 𑀯𑀺𑀚𑀫𑁆𑀪𑀺𑀢𑀸 𑀆𑀮𑀲𑀺𑀬𑀁 𑀕𑀡𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸 𑀦𑀺𑀤𑁆𑀤𑀸𑀲𑀻𑀮𑀢𑀸 𑀅𑀦𑀺𑀘𑁆𑀙𑀬𑀲𑀻𑀮𑀢𑀸 𑀜𑀸𑀡𑀲𑁆𑀫𑀺𑀁 𑀅𑀓𑀼𑀢𑀽𑀳𑀮𑀢𑀸 𑀫𑀺𑀘𑁆𑀙𑀸𑀥𑀺𑀫𑀸𑀦𑁄 𑀅𑀧𑀭𑀺𑀧𑀼𑀘𑁆𑀙𑀓𑀢𑀸 𑀓𑀸𑀬𑀲𑁆𑀲 𑀦𑀲𑀫𑁆𑀫𑀸𑀧𑀭𑀺𑀳𑀸𑀭𑁄 𑀅𑀲𑀫𑀸𑀳𑀺𑀢𑀘𑀺𑀢𑁆𑀢𑀢𑀸 𑀤𑀼𑀧𑁆𑀧𑀜𑁆𑀜𑀸𑀦𑀁 ¶ 𑀧𑀼𑀕𑁆𑀕𑀮𑀸𑀦𑀁 𑀲𑁂𑀯𑀦𑀸 𑀧𑀜𑁆𑀜𑀯𑀦𑁆𑀢𑀸𑀦𑀁 𑀅𑀧𑀬𑀺𑀭𑀼𑀧𑀸𑀲𑀦𑀸 𑀅𑀢𑁆𑀢𑀧𑀭𑀺𑀪𑀯𑁄 𑀫𑀺𑀘𑁆𑀙𑀸𑀯𑀺𑀓𑀧𑁆𑀧𑁄 𑀯𑀺𑀧𑀭𑀻𑀢𑀸𑀪𑀺𑀦𑀺𑀯𑁂𑀲𑁄 𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑀢𑀸 𑀅𑀲𑀁𑀯𑁂𑀕𑀲𑀻𑀮𑀢𑀸 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺, 𑀲𑀗𑁆𑀔𑁂𑀧𑀢𑁄 𑀬𑁂𑀯𑀸𑀧𑀦𑀥𑀫𑁆𑀫𑁂 𑀆𑀲𑁂𑀯𑀢𑁄 𑀅𑀦𑀼𑀧𑁆𑀧𑀦𑁆𑀦𑀸 𑀧𑀜𑁆𑀜𑀸 𑀦𑀼𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀸 𑀧𑀭𑀺𑀳𑀸𑀬𑀢𑀺 ¶ , 𑀇𑀢𑀺 𑀇𑀫𑀸𑀦𑀺 𑀫𑁄𑀳𑀓𑀸𑀭𑀡𑀸𑀦𑀺, 𑀢𑀸𑀦𑀺 𑀧𑀭𑀺𑀯𑀚𑁆𑀚𑀦𑁆𑀢𑁂𑀦 𑀩𑀸𑀳𑀼𑀲𑀘𑁆𑀘𑁂, 𑀛𑀸𑀦𑀸𑀤𑀻𑀲𑀼 𑀘 𑀬𑁄𑀕𑁄 𑀓𑀭𑀡𑀻𑀬𑁄.

𑀢𑀢𑁆𑀣𑀸𑀬𑀁 𑀩𑀸𑀳𑀼𑀲𑀘𑁆𑀘𑀲𑁆𑀲 𑀯𑀺𑀲𑀬𑀯𑀺𑀪𑀸𑀕𑁄 𑁋 𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀸𑀯𑀻𑀲𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀤𑁆𑀯𑀸𑀤𑀲𑀧𑀤𑀺𑀓𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄, 𑀢𑀣𑀸 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀓𑀼𑀲𑀮𑀸𑀤𑀺𑀥𑀫𑁆𑀫𑀧𑁆𑀧𑀪𑁂𑀤𑀸 𑀘, 𑀬𑀸𑀦𑀺 𑀘 𑀮𑁄𑀓𑁂 𑀅𑀦𑀯𑀚𑁆𑀚𑀸𑀦𑀺 𑀯𑀺𑀚𑁆𑀚𑀸𑀝𑁆𑀞𑀸𑀦𑀸𑀦𑀺, 𑀬𑁄 𑀘 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀯𑀺𑀥𑀸𑀦𑀦𑀬𑁄 𑀩𑁆𑀬𑀸𑀓𑀭𑀡𑀯𑀺𑀲𑁂𑀲𑁄. 𑀇𑀢𑀺 𑀏𑀯𑀁 𑀧𑀓𑀸𑀭𑀁 𑀲𑀓𑀮𑀫𑁂𑀯 𑀲𑀼𑀢𑀯𑀺𑀲𑀬𑀁 𑀉𑀧𑀸𑀬𑀓𑁄𑀲𑀮𑁆𑀮𑀧𑀼𑀩𑁆𑀩𑀗𑁆𑀕𑀫𑀸𑀬 𑀧𑀜𑁆𑀜𑀸𑀬, 𑀲𑀢𑀺𑀬𑀸, 𑀯𑀻𑀭𑀺𑀬𑁂𑀦 𑀘 𑀲𑀸𑀥𑀼𑀓𑀁 𑀉𑀕𑁆𑀕𑀳𑀡𑀲𑀯𑀦𑀥𑀸𑀭𑀡𑀧𑀭𑀺𑀘𑀬𑀧𑀭𑀺𑀧𑀼𑀘𑁆𑀙𑀸𑀳𑀺 𑀑𑀕𑀸𑀳𑁂𑀢𑁆𑀯𑀸 𑀢𑀢𑁆𑀣 𑀘 𑀧𑀭𑁂𑀲𑀁 𑀧𑀢𑀺𑀝𑁆𑀞𑀸𑀧𑀦𑁂𑀦 𑀲𑀼𑀢𑀫𑀬𑀸 𑀧𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀸, 𑀢𑀣𑀸 𑀲𑀢𑁆𑀢𑀸𑀦𑀁 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀲𑀼 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀸 𑀧𑀝𑀺𑀪𑀸𑀦𑀪𑀽𑀢𑀸, 𑀆𑀬𑀸𑀧𑀸𑀬𑀉𑀧𑀸𑀬𑀓𑁄𑀲𑀮𑁆𑀮𑀪𑀽𑀢𑀸 𑀘 𑀧𑀜𑁆𑀜𑀸 𑀳𑀺𑀢𑁂𑀲𑀺𑀢𑀁 𑀦𑀺𑀲𑁆𑀲𑀸𑀬 𑀢𑀢𑁆𑀣 𑀢𑀢𑁆𑀣 𑀬𑀣𑀸𑀭𑀳𑀁 𑀧𑀯𑀢𑁆𑀢𑁂𑀢𑀩𑁆𑀩𑀸, 𑀢𑀣𑀸 𑀔𑀦𑁆𑀥𑀸𑀤𑀻𑀦𑀁 𑀲𑀪𑀸𑀯𑀥𑀫𑁆𑀫𑀸𑀦𑀁 𑀆𑀓𑀸𑀭𑀧𑀭𑀺𑀢𑀓𑁆𑀓𑀦𑀫𑀼𑀔𑁂𑀦 𑀘𑁂𑀯 𑀦𑀺𑀚𑁆𑀛𑀸𑀦𑀁 𑀔𑀫𑀸𑀧𑁂𑀦𑁆𑀢𑁂𑀦 𑀘 𑀘𑀺𑀦𑁆𑀢𑀸𑀫𑀬𑀸 𑀧𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀸.

𑀔𑀦𑁆𑀥𑀸𑀤𑀻𑀦𑀁𑀬𑁂𑀯 𑀧𑀦 𑀲𑀮𑀓𑁆𑀔𑀡𑀲𑀸𑀫𑀜𑁆𑀜𑀮𑀓𑁆𑀔𑀡𑀧𑀭𑀺𑀕𑁆𑀕𑀳𑀡𑀯𑀲𑁂𑀦 𑀮𑁄𑀓𑀺𑀬𑀧𑀭𑀺𑀜𑁆𑀜𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁂𑀦 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀧𑀜𑁆𑀜𑀸 𑀲𑀫𑁆𑀧𑀸𑀤𑁂𑀢𑀩𑁆𑀩𑀸. 𑀏𑀯𑀜𑁆𑀳𑀺 ‘‘𑀦𑀸𑀫𑀭𑀽𑀧𑀫𑀢𑁆𑀢𑀫𑀺𑀤𑀁, 𑀬𑀣𑀸𑀭𑀳𑀁 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀦𑀺𑀭𑀼𑀚𑁆𑀛𑀢𑀺 𑀘, 𑀦 𑀏𑀢𑁆𑀣 𑀓𑁄𑀘𑀺 𑀓𑀢𑁆𑀢𑀸 𑀯𑀸 𑀓𑀸𑀭𑁂𑀢𑀸 𑀯𑀸, 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀁, 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀦𑀝𑁆𑀞𑁂𑀦 𑀤𑀼𑀓𑁆𑀔𑀁, 𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦 𑀅𑀦𑀢𑁆𑀢𑀸’’𑀢𑀺 𑀅𑀚𑁆𑀛𑀢𑁆𑀢𑀺𑀓𑀥𑀫𑁆𑀫𑁂, 𑀩𑀸𑀳𑀺𑀭𑀓𑀥𑀫𑁆𑀫𑁂 𑀘 𑀦𑀺𑀩𑁆𑀩𑀺𑀲𑁂𑀲𑀁 𑀧𑀭𑀺𑀚𑀸𑀦𑀦𑁆𑀢𑁄 𑀢𑀢𑁆𑀣 𑀆𑀲𑀗𑁆𑀕𑀁 𑀧𑀚𑀳𑀦𑁆𑀢𑁄, 𑀧𑀭𑁂 𑀘 𑀢𑀢𑁆𑀣 𑀢𑀁 𑀧𑀚𑀳𑀸𑀧𑁂𑀦𑁆𑀢𑁄 𑀓𑁂𑀯𑀮𑀁 𑀓𑀭𑀼𑀡𑀸𑀯𑀲𑁂𑀦𑁂𑀯 𑀬𑀸𑀯 𑀦 𑀩𑀼𑀤𑁆𑀥𑀕𑀼𑀡𑀸 𑀳𑀢𑁆𑀣𑀢𑀮𑀁 𑀆𑀕𑀘𑁆𑀙𑀦𑁆𑀢𑀺, 𑀢𑀸𑀯 𑀬𑀸𑀦𑀢𑁆𑀢𑀬𑁂 𑀲𑀢𑁆𑀢𑁂 𑀅𑀯𑀢𑀸𑀭𑀡𑀧𑀭𑀺𑀧𑀸𑀘𑀦𑁂𑀳𑀺 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁄, 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀺𑀬𑁄, 𑀅𑀪𑀺𑀜𑁆𑀜𑀸𑀬𑁄 𑀘 𑀮𑁄𑀓𑀺𑀬𑀯𑀲𑀻𑀪𑀸𑀯𑀁 𑀧𑀸𑀧𑁂𑀦𑁆𑀢𑁄 𑀧𑀜𑁆𑀜𑀸𑀬 𑀫𑀢𑁆𑀣𑀓𑀁 𑀧𑀸𑀧𑀼𑀡𑀸𑀢𑀺.

𑀢𑀢𑁆𑀣 𑀬𑀸𑀘𑀺𑀫𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀁 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀜𑀸𑀡𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀁 𑀅𑀦𑀸𑀕𑀢𑀁𑀲𑀜𑀸𑀡𑀦𑁆𑀢𑀺 𑀲𑀧𑀭𑀺𑀪𑀡𑁆𑀟𑀸 𑀧𑀜𑁆𑀘𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀲𑀗𑁆𑀔𑀸𑀢𑀸 𑀪𑀸𑀯𑀦𑀸𑀧𑀜𑁆𑀜𑀸, 𑀬𑀸 𑀘 ¶ 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀇𑀦𑁆𑀤𑁆𑀭𑀺𑀬𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀪𑁂𑀤𑁂𑀲𑀼 𑀘𑀢𑀼𑀪𑀽𑀫𑀓𑁂𑀲𑀼 𑀥𑀫𑁆𑀫𑁂𑀲𑀼 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦 𑀜𑀸𑀡𑀧𑀭𑀺𑀘𑀬𑀁 𑀓𑀢𑁆𑀯𑀸 𑀲𑀻𑀮𑀯𑀺𑀲𑀼𑀤𑁆𑀥𑀺 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀻𑀢𑀺 𑀫𑀽𑀮𑀪𑀽𑀢𑀸𑀲𑀼 𑀇𑀫𑀸𑀲𑀼 𑀤𑁆𑀯𑀻𑀲𑀼 𑀯𑀺𑀲𑀼𑀤𑁆𑀥𑀻𑀲𑀼 𑀧𑀢𑀺𑀝𑁆𑀞𑀸𑀬 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻𑀢𑀺 𑀲𑀭𑀻𑀭𑀪𑀽𑀢𑀸 𑀇𑀫𑀸 𑀧𑀜𑁆𑀘 𑀯𑀺𑀲𑀼𑀤𑁆𑀥𑀺𑀬𑁄 𑀲𑀫𑁆𑀧𑀸𑀤𑁂𑀦𑁆𑀢𑁂𑀦 𑀪𑀸𑀯𑁂𑀢𑀩𑁆𑀩𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀪𑁂𑀤𑀸 ¶ 𑀪𑀸𑀯𑀦𑀸𑀧𑀜𑁆𑀜𑀸, 𑀢𑀸𑀲𑀁 𑀲𑀫𑁆𑀧𑀸𑀤𑀦𑀯𑀺𑀥𑀸𑀦𑀁 𑀬𑀲𑁆𑀫𑀸 ‘‘𑀢𑀢𑁆𑀣 ‘𑀏𑀓𑁄𑀧𑀺 𑀳𑀼𑀢𑁆𑀯𑀸 𑀩𑀳𑀼𑀥𑀸 𑀳𑁄𑀢𑀻’𑀢𑀺𑀆𑀤𑀺𑀓𑀁 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀁 𑀓𑀸𑀢𑀼𑀓𑀸𑀫𑁂𑀦 𑀆𑀤𑀺𑀓𑀫𑁆𑀫𑀺𑀓𑁂𑀦 𑀬𑁄𑀕𑀺𑀦𑀸’’𑀢𑀺𑀆𑀤𑀺𑀦𑀸, (𑀯𑀺𑀲𑀼𑀤𑁆𑀥𑀺. 𑁨.𑁩𑁬𑁫) ‘‘𑀔𑀦𑁆𑀥𑀸𑀢𑀺 𑀧𑀜𑁆𑀙 𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀲𑀜𑁆𑀜𑀸𑀓𑁆𑀔𑀦𑁆𑀥𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 (𑀯𑀺𑀲𑀼𑀤𑁆𑀥𑀺. 𑁨.𑁪𑁩𑁧) 𑀘 𑀯𑀺𑀲𑀬𑀯𑀺𑀲𑀬𑀺𑀯𑀺𑀪𑀸𑀕𑁂𑀦 (𑀯𑀺𑀲𑀬𑀯𑀺𑀪𑀸𑀕𑁂𑀦 𑁋 𑀘𑀭𑀺𑀬𑀸. 𑀅𑀝𑁆𑀞. 𑀧𑀓𑀺𑀡𑁆𑀡𑀓𑀓𑀣𑀸) 𑀲𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀲𑀩𑁆𑀩𑀸𑀓𑀸𑀭𑀢𑁄 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀲𑁂𑀦 𑀧𑀜𑁆𑀜𑀸 𑀆𑀕𑀢𑀸, 𑀇𑀥 𑀫𑀳𑀸𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀲𑁂𑀦 𑀓𑀭𑀼𑀡𑀽𑀧𑀸𑀬𑀓𑁄𑀲𑀮𑁆𑀮𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀸. 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀁 𑀅𑀧𑀸𑀧𑁂𑀢𑁆𑀯𑀸 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀬𑀁𑀬𑁂𑀯 𑀯𑀺𑀧𑀲𑁆𑀲𑀦𑀸 𑀞𑀧𑁂𑀢𑀩𑁆𑀩𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄𑀢𑀺. 𑀏𑀯𑀫𑁂𑀢𑁆𑀣 𑀧𑀜𑁆𑀜𑀸𑀧𑀸𑀭𑀫𑀺𑀬𑀸 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀣𑀸 𑀬𑀲𑁆𑀫𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀓𑀢𑀸𑀪𑀺𑀦𑀻𑀳𑀸𑀭𑁂𑀦 𑀫𑀳𑀸𑀲𑀢𑁆𑀢𑁂𑀦 𑀧𑀸𑀭𑀫𑀻𑀧𑀭𑀺𑀧𑀽𑀭𑀡𑀢𑁆𑀣𑀁 𑀲𑀩𑁆𑀩𑀓𑀸𑀮𑀁 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁 𑀆𑀩𑀤𑁆𑀥𑀧𑀭𑀺𑀓𑀭𑀡𑁂𑀦, 𑀢𑀲𑁆𑀫𑀸 𑀓𑀸𑀮𑁂𑀦 𑀓𑀸𑀮𑀁 ‘‘𑀓𑁄 𑀦𑀼 𑀔𑁄 𑀅𑀚𑁆𑀚 𑀫𑀬𑀸 𑀧𑀼𑀜𑁆𑀜𑀲𑀫𑁆𑀪𑀸𑀭𑁄, 𑀜𑀸𑀡𑀲𑀫𑁆𑀪𑀸𑀭𑁄 𑀯𑀸 𑀉𑀧𑀘𑀺𑀢𑁄, 𑀓𑀺𑀁 𑀯𑀸 𑀫𑀬𑀸 𑀧𑀭𑀳𑀺𑀢𑀁 𑀓𑀢’’𑀦𑁆𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁂𑀦 𑀲𑀢𑁆𑀢𑀳𑀺𑀢𑀢𑁆𑀣𑀁 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄, 𑀲𑀩𑁆𑀩𑁂𑀲𑀫𑁆𑀧𑀺 𑀲𑀢𑁆𑀢𑀸𑀦𑀁 𑀉𑀧𑀓𑀸𑀭𑀸𑀬 𑀅𑀢𑁆𑀢𑀦𑁄 𑀧𑀭𑀺𑀕𑁆𑀕𑀳𑀪𑀽𑀢𑀁 𑀯𑀢𑁆𑀣𑀼𑀁, 𑀓𑀸𑀬𑀁, 𑀚𑀻𑀯𑀺𑀢𑀜𑁆𑀘 𑀦𑀺𑀭𑀧𑁂𑀓𑁆𑀔𑀦𑀘𑀺𑀢𑁆𑀢𑁂𑀦 𑀑𑀲𑁆𑀲𑀚𑁆𑀚𑀺𑀢𑀩𑁆𑀩𑀁, 𑀬𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀭𑁄𑀢𑀺 𑀓𑀸𑀬𑁂𑀦, 𑀯𑀸𑀘𑀸𑀬 𑀯𑀸, 𑀢𑀁 𑀲𑀩𑁆𑀩𑀁 𑀲𑀫𑁆𑀩𑁄𑀥𑀺𑀬𑀁 𑀦𑀺𑀦𑁆𑀦𑀘𑀺𑀢𑁆𑀢𑁂𑀦𑁂𑀯 𑀓𑀸𑀢𑀩𑁆𑀩𑀁, 𑀩𑁄𑀥𑀺𑀬𑀸 𑀧𑀭𑀺𑀡𑀸𑀫𑁂𑀢𑀩𑁆𑀩𑀁, 𑀉𑀴𑀸𑀭𑁂𑀳𑀺, 𑀇𑀢𑁆𑀢𑀭𑁂𑀳𑀺 𑀘 𑀓𑀸𑀫𑁂𑀳𑀺 𑀯𑀺𑀦𑀺𑀯𑀢𑁆𑀢𑀘𑀺𑀢𑁆𑀢𑁂𑀦𑁂𑀯 𑀪𑀯𑀺𑀢𑀩𑁆𑀩𑀁, 𑀲𑀩𑁆𑀩𑀸𑀲𑀼 𑀘 𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀲𑀼 𑀉𑀧𑀸𑀬𑀓𑁄𑀲𑀮𑁆𑀮𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁.

𑀢𑀲𑁆𑀫𑀺𑀁 𑀢𑀲𑁆𑀫𑀺𑀜𑁆𑀘 𑀲𑀢𑁆𑀢𑀳𑀺𑀢𑁂 𑀆𑀭𑀤𑁆𑀥𑀯𑀻𑀭𑀺𑀬𑁂𑀦 𑀪𑀯𑀺𑀢𑀩𑁆𑀩𑀁 𑀇𑀝𑁆𑀞𑀸𑀦𑀺𑀝𑁆𑀞𑀸𑀤𑀺𑀲𑀩𑁆𑀩𑀲𑀳𑁂𑀦 𑀅𑀯𑀺𑀲𑀁𑀯𑀸𑀤𑀺𑀦𑀸. 𑀲𑀩𑁆𑀩𑁂𑀧𑀺 𑀲𑀢𑁆𑀢𑀸 𑀅𑀦𑁄𑀥𑀺𑀲𑁄 𑀫𑁂𑀢𑁆𑀢𑀸𑀬, 𑀓𑀭𑀼𑀡𑀸𑀬 𑀘 𑀨𑀭𑀺𑀢𑀩𑁆𑀩𑀸. 𑀬𑀸 𑀓𑀸𑀘𑀺 𑀲𑀢𑁆𑀢𑀸𑀦𑀁 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺, 𑀲𑀩𑁆𑀩𑀸 𑀲𑀸 𑀅𑀢𑁆𑀢𑀦𑀺 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸. 𑀲𑀩𑁆𑀩𑁂𑀲𑀜𑁆𑀘 𑀲𑀢𑁆𑀢𑀸𑀦𑀁 𑀧𑀼𑀜𑁆𑀜𑀁 𑀅𑀩𑁆𑀪𑀦𑀼𑀫𑁄𑀤𑀺𑀢𑀩𑁆𑀩𑀁, 𑀩𑀼𑀤𑁆𑀥𑀸𑀦𑀁 𑀫𑀳𑀦𑁆𑀢𑀢𑀸 𑀫𑀳𑀸𑀦𑀼𑀪𑀸𑀯𑀢𑀸 ¶ 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸, 𑀬𑀜𑁆𑀘 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀭𑁄𑀢𑀺 𑀓𑀸𑀬𑁂𑀦, 𑀯𑀸𑀘𑀸𑀬 𑀯𑀸, 𑀢𑀁 𑀲𑀩𑁆𑀩𑀁 𑀩𑁄𑀥𑀺𑀘𑀺𑀢𑁆𑀢𑀧𑀼𑀩𑁆𑀩𑀗𑁆𑀕𑀫𑀁 𑀓𑀸𑀢𑀩𑁆𑀩𑀁. 𑀇𑀫𑀺𑀦𑀸 𑀳𑀺 𑀉𑀧𑀸𑀬𑁂𑀦 𑀤𑀸𑀦𑀸𑀤𑀻𑀲𑀼 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀲𑁆𑀲 𑀣𑀸𑀫𑀯𑀢𑁄 𑀤𑀴𑁆𑀳𑀧𑀭𑀓𑁆𑀓𑀫𑀲𑁆𑀲 𑀫𑀳𑀸𑀲𑀢𑁆𑀢𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀧𑀭𑀺𑀫𑁂𑀬𑁆𑀬𑁄 𑀧𑀼𑀜𑁆𑀜𑀲𑀫𑁆𑀪𑀸𑀭𑁄, 𑀜𑀸𑀡𑀲𑀫𑁆𑀪𑀸𑀭𑁄 𑀘 𑀤𑀺𑀯𑀲𑁂 𑀤𑀺𑀯𑀲𑁂 𑀉𑀧𑀘𑀻𑀬𑀢𑀺.

𑀅𑀧𑀺𑀘 𑀲𑀢𑁆𑀢𑀸𑀦𑀁 𑀧𑀭𑀺𑀪𑁄𑀕𑀢𑁆𑀣𑀁, 𑀧𑀭𑀺𑀧𑀸𑀮𑀦𑀢𑁆𑀣𑀜𑁆𑀘 𑀅𑀢𑁆𑀢𑀦𑁄 𑀲𑀭𑀻𑀭𑀁, 𑀚𑀻𑀯𑀺𑀢𑀜𑁆𑀘 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀔𑀼𑀧𑁆𑀧𑀺𑀧𑀸𑀲𑀲𑀻𑀢𑀼𑀡𑁆𑀳𑀯𑀸𑀢𑀸𑀢𑀧𑀸𑀤𑀺𑀤𑀼𑀓𑁆𑀔𑀧𑀢𑀺𑀓𑀸𑀭𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄 𑀘 𑀉𑀧𑁆𑀧𑀸𑀤𑁂𑀢𑀩𑁆𑀩𑁄 𑀘, 𑀬𑀜𑁆𑀘 𑀬𑀣𑀸𑀯𑀼𑀢𑁆𑀢𑀤𑀼𑀓𑁆𑀔𑀧𑀢𑀺𑀓𑀸𑀭𑀚𑀁 𑀲𑀼𑀔𑀁 𑀅𑀢𑁆𑀢𑀦𑀸 𑀧𑀝𑀺𑀮𑀪𑀢𑀺, 𑀢𑀣𑀸 𑀭𑀫𑀡𑀻𑀬𑁂𑀲𑀼 𑀆𑀭𑀸𑀫𑀼𑀬𑁆𑀬𑀸𑀦𑀧𑀸𑀲𑀸𑀤𑀢𑀴𑀸𑀓𑀸𑀤𑀻𑀲𑀼 ¶ , 𑀅𑀭𑀜𑁆𑀜𑀸𑀬𑀢𑀦𑁂𑀲𑀼 𑀘 𑀓𑀸𑀬𑀘𑀺𑀢𑁆𑀢𑀲𑀦𑁆𑀢𑀸𑀧𑀸𑀪𑀸𑀯𑁂𑀦 𑀅𑀪𑀺𑀦𑀺𑀩𑁆𑀩𑀼𑀢𑀢𑁆𑀢𑀸 𑀅𑀢𑁆𑀢𑀦𑀸 𑀲𑀼𑀔𑀁 𑀧𑀝𑀺𑀮𑀪𑀢𑀺, 𑀬𑀜𑁆𑀘 𑀲𑀼𑀡𑀸𑀢𑀺 ‘‘𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀸, 𑀫𑀳𑀸𑀩𑁄𑀥𑀺𑀲𑀢𑁆𑀢𑀸 𑀘 𑀦𑁂𑀓𑁆𑀔𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑀸’’𑀢𑀺 𑀘 ‘‘𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀼𑀔𑀯𑀺𑀳𑀸𑀭𑀪𑀽𑀢𑀁 𑀈𑀤𑀺𑀲𑀁 𑀦𑀸𑀫 𑀛𑀸𑀦𑀲𑀫𑀸𑀧𑀢𑁆𑀢𑀺𑀲𑀼𑀔𑀫𑀦𑀼𑀪𑀯𑀦𑁆𑀢𑀻’’𑀢𑀺 𑀘, 𑀢𑀁 𑀲𑀩𑁆𑀩𑀁 𑀲𑀢𑁆𑀢𑁂𑀲𑀼 𑀅𑀦𑁄𑀥𑀺𑀲𑁄 𑀉𑀧𑀲𑀁𑀳𑀭𑀢𑀺. 𑀅𑀬𑀁 𑀢𑀸𑀯 𑀦𑀬𑁄 𑀅𑀲𑀫𑀸𑀳𑀺𑀢𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀺𑀢𑀲𑁆𑀲.

𑀲𑀫𑀸𑀳𑀺𑀢𑀪𑀽𑀫𑀺𑀬𑀁 𑀧𑀦 𑀧𑀢𑀺𑀝𑁆𑀞𑀺𑀢𑁄 𑀅𑀢𑁆𑀢𑀦𑀸 𑀬𑀣𑀸𑀦𑀼𑀪𑀽𑀢𑀁 𑀯𑀺𑀲𑁂𑀲𑀸𑀥𑀺𑀕𑀫𑀦𑀺𑀩𑁆𑀩𑀢𑁆𑀢𑀁 𑀧𑀻𑀢𑀺𑀁, 𑀧𑀲𑁆𑀲𑀤𑁆𑀥𑀺𑀁, 𑀲𑀼𑀔𑀁, 𑀲𑀫𑀸𑀥𑀺𑀁, 𑀬𑀣𑀸𑀪𑀽𑀢𑀜𑀸𑀡𑀜𑁆𑀘 𑀲𑀢𑁆𑀢𑁂𑀲𑀼 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀉𑀧𑀲𑀁𑀳𑀭𑀢𑀺 𑀧𑀭𑀺𑀡𑀸𑀫𑁂𑀢𑀺, 𑀢𑀣𑀸 𑀫𑀳𑀢𑀺 𑀲𑀁𑀲𑀸𑀭𑀤𑀼𑀓𑁆𑀔𑁂, 𑀢𑀲𑁆𑀲 𑀘 𑀦𑀺𑀫𑀺𑀢𑁆𑀢𑀪𑀽𑀢𑁂 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀤𑀼𑀓𑁆𑀔𑁂 𑀦𑀺𑀫𑀼𑀕𑁆𑀕𑀁 𑀲𑀢𑁆𑀢𑀦𑀺𑀓𑀸𑀬𑀁 𑀤𑀺𑀲𑁆𑀯𑀸 𑀢𑀢𑁆𑀭𑀸𑀧𑀺 𑀔𑀸𑀤𑀦𑀙𑁂𑀤𑀦𑀪𑁂𑀤𑀦𑀲𑁂𑀤𑀦𑀧𑀺𑀲𑀦𑀳𑀺𑀁𑀲𑀦𑀅𑀕𑁆𑀕𑀺𑀲𑀦𑁆𑀢𑀸𑀧𑀸𑀤𑀺𑀚𑀦𑀺𑀢𑀸 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸 𑀓𑀝𑀼𑀓𑀸 𑀯𑁂𑀤𑀦𑀸 𑀦𑀺𑀭𑀦𑁆𑀢𑀭𑀁 𑀘𑀺𑀭𑀓𑀸𑀮𑀁 𑀯𑁂𑀤𑀬𑀦𑁆𑀢𑁂 𑀦𑀭𑀓𑁂, 𑀅𑀜𑁆𑀜𑀫𑀜𑁆𑀜𑀁 𑀓𑀼𑀚𑁆𑀛𑀦𑀲𑀦𑁆𑀢𑀸𑀲𑀦𑀯𑀺𑀲𑁄𑀥𑀦𑀳𑀺𑀁𑀲𑀦𑀧𑀭𑀸𑀥𑀻𑀦𑀢𑀸𑀤𑀻𑀳𑀺 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑁂 𑀢𑀺𑀭𑀘𑁆𑀙𑀸𑀦𑀕𑀢𑁂, 𑀚𑁄𑀢𑀺𑀫𑀸𑀮𑀸𑀓𑀼𑀮𑀲𑀭𑀻𑀭𑁂 𑀔𑀼𑀧𑁆𑀧𑀺𑀧𑀸𑀲𑀯𑀸𑀢𑀸𑀢𑀧𑀸𑀤𑀻𑀳𑀺 𑀟𑀬𑁆𑀳𑀫𑀸𑀦𑁂, 𑀯𑀺𑀲𑀼𑀲𑁆𑀲𑀫𑀸𑀦𑁂 𑀘 𑀯𑀦𑁆𑀢𑀔𑁂𑀴𑀸𑀤𑀺𑀆𑀳𑀸𑀭𑁂, 𑀉𑀤𑁆𑀥𑀩𑀸𑀳𑀼 𑀯𑀺𑀭𑀯𑀦𑁆𑀢𑁂 𑀦𑀺𑀚𑁆𑀛𑀸𑀫𑀢𑀡𑁆𑀳𑀺𑀓𑀸𑀤𑀺𑀓𑁂 𑀫𑀳𑀸𑀤𑀼𑀓𑁆𑀔𑀁 𑀯𑁂𑀤𑀬𑀫𑀸𑀦𑁂 𑀧𑁂𑀢𑁂 𑀘 𑀧𑀭𑀺𑀬𑁂𑀝𑁆𑀞𑀺𑀫𑀽𑀮𑀓𑀁 𑀫𑀳𑀦𑁆𑀢𑀁 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑀦𑁆𑀢𑁂 𑀳𑀢𑁆𑀣𑀘𑁆𑀙𑁂𑀤𑀸𑀤𑀺𑀓𑀭𑀡𑀬𑁄𑀕𑁂𑀦 𑀤𑀼𑀩𑁆𑀩𑀡𑁆𑀡𑀤𑀼𑀤𑁆𑀤𑀲𑀺𑀓𑀤𑀮𑀺𑀤𑁆𑀤𑀸𑀤𑀺𑀪𑀸𑀯𑁂𑀦 𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀆𑀩𑀸𑀥𑀬𑁄𑀕𑁂𑀦 𑀩𑀮𑀯𑀦𑁆𑀢𑁂𑀳𑀺 𑀅𑀪𑀺𑀪𑀯𑀦𑀻𑀬𑀢𑁄, 𑀧𑀭𑁂𑀲𑀁 𑀯𑀳𑀦𑀢𑁄, 𑀧𑀭𑀸𑀥𑀻𑀦𑀢𑁄 𑀘 𑀦𑀭𑀓𑁂, 𑀧𑁂𑀢𑁂, 𑀢𑀺𑀭𑀘𑁆𑀙𑀸𑀦𑀕𑀢𑁂 𑀘 𑀅𑀢𑀺𑀲𑀬𑀦𑁆𑀢𑁂 𑀅𑀧𑀸𑀬𑀤𑀼𑀓𑁆𑀔𑀦𑀺𑀩𑁆𑀩𑀺𑀲𑁂𑀲𑀁 𑀤𑀼𑀓𑁆𑀔𑀫𑀦𑀼𑀪𑀯𑀦𑁆𑀢𑁂 𑀫𑀦𑀼𑀲𑁆𑀲𑁂 𑀘 𑀢𑀣𑀸 𑀯𑀺𑀲𑀬𑀧𑀭𑀺𑀪𑁄𑀕𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀢𑀸𑀬 𑀭𑀸𑀕𑀸𑀤𑀺𑀧𑀭𑀺𑀴𑀸𑀳𑁂𑀦 𑀟𑀬𑁆𑀳𑀫𑀸𑀦𑁂 𑀯𑀸𑀢𑀯𑁂𑀕𑀲𑀫𑀼𑀝𑁆𑀞𑀺𑀢𑀚𑀸𑀮𑀸𑀲𑀫𑀺𑀤𑁆𑀥𑀲𑀼𑀓𑁆𑀔𑀓𑀝𑁆𑀞𑀲𑀦𑁆𑀦𑀺𑀧𑀸𑀢𑁂 𑀅𑀕𑁆𑀕𑀺𑀓𑁆𑀔𑀦𑁆𑀥𑁂 𑀯𑀺𑀬 𑀅𑀦𑀼𑀧𑀲𑀦𑁆𑀢𑀧𑀭𑀺𑀴𑀸𑀳𑀯𑀼𑀢𑁆𑀢𑀺𑀓𑁂 𑀅𑀦𑀼𑀧𑀲𑀦𑁆𑀢𑀦𑀺𑀳𑀢𑀧𑀭𑀸𑀥𑀻𑀦𑁂 ¶ (𑀅𑀦𑀺𑀳𑀢𑀧𑀭𑀸𑀥𑀻𑀦𑁂 𑀤𑀻. 𑀦𑀺. 𑀝𑀻. 𑁧.𑁭) 𑀓𑀸𑀫𑀸𑀯𑀘𑀭𑀤𑁂𑀯𑁂 𑀘 𑀫𑀳𑀢𑀸 𑀯𑀸𑀬𑀸𑀫𑁂𑀦 𑀯𑀺𑀤𑀽𑀭𑀫𑀸𑀓𑀸𑀲𑀁 𑀯𑀺𑀕𑀸𑀳𑀺𑀢𑀲𑀓𑀼𑀦𑁆𑀢𑀸 𑀯𑀺𑀬, 𑀩𑀮𑀯𑀢𑀸 𑀤𑀽𑀭𑁂 𑀧𑀸𑀡𑀺𑀦𑀸 𑀔𑀺𑀢𑁆𑀢𑀲𑀭𑀸 𑀯𑀺𑀬 𑀘 ‘‘𑀲𑀢𑀺𑀧𑀺 𑀘𑀺𑀭𑀧𑁆𑀧𑀯𑀢𑁆𑀢𑀺𑀬𑀁 𑀅𑀦𑀘𑁆𑀘𑀦𑁆𑀢𑀺𑀓𑀢𑀸𑀬 𑀧𑀸𑀢𑀧𑀭𑀺𑀬𑁄𑀲𑀸𑀦𑀸 𑀅𑀦𑀢𑀺𑀓𑁆𑀓𑀦𑁆𑀢𑀚𑀸𑀢𑀺𑀚𑀭𑀸𑀫𑀭𑀡𑀸 𑀏𑀯𑀸’’𑀢𑀺 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀤𑁂𑀯𑁂 𑀘 𑀧𑀲𑁆𑀲𑀦𑁆𑀢𑁂𑀦 𑀫𑀳𑀦𑁆𑀢𑀁 𑀲𑀁𑀯𑁂𑀕𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀫𑁂𑀢𑁆𑀢𑀸𑀬, 𑀓𑀭𑀼𑀡𑀸𑀬 𑀘 𑀅𑀦𑁄𑀥𑀺𑀲𑁄 𑀲𑀢𑁆𑀢𑀸 𑀨𑀭𑀺𑀢𑀩𑁆𑀩𑀸. 𑀏𑀯𑀁 𑀓𑀸𑀬𑁂𑀦, 𑀯𑀸𑀘𑀸𑀬, 𑀫𑀦𑀲𑀸 𑀘 𑀩𑁄𑀥𑀺𑀲𑀫𑁆𑀪𑀸𑀭𑁂 𑀦𑀺𑀭𑀦𑁆𑀢𑀭𑀁 𑀉𑀧𑀘𑀺𑀦𑀦𑁆𑀢𑁂𑀦 𑀬𑀣𑀸 𑀧𑀸𑀭𑀫𑀺𑀬𑁄 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀏𑀯𑀁 𑀲𑀓𑁆𑀓𑀘𑁆𑀘𑀓𑀸𑀭𑀺𑀦𑀸 𑀲𑀸𑀢𑀘𑁆𑀘𑀓𑀸𑀭𑀺𑀦𑀸 𑀅𑀦𑁄𑀮𑀻𑀦𑀯𑀼𑀢𑁆𑀢𑀺𑀦𑀸 𑀉𑀲𑁆𑀲𑀸𑀳𑁄 𑀧𑀯𑀢𑁆𑀢𑁂𑀢𑀩𑁆𑀩𑁄, 𑀯𑀻𑀭𑀺𑀬𑀧𑀸𑀭𑀫𑀻 𑀧𑀭𑀺𑀧𑀽𑀭𑁂𑀢𑀩𑁆𑀩𑀸.

𑀅𑀧𑀺𑀘 ‘‘𑀅𑀘𑀺𑀦𑁆𑀢𑁂𑀬𑁆𑀬𑀸𑀧𑀭𑀺𑀫𑁂𑀬𑁆𑀬𑀯𑀺𑀧𑀼𑀮𑁄𑀴𑀸𑀭𑀯𑀺𑀫𑀮𑀦𑀺𑀭𑀼𑀧𑀫𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀕𑀼𑀡𑀕𑀡𑀦𑀺𑀘𑀬𑀦𑀺𑀤𑀸𑀦𑀪𑀽𑀢𑀲𑁆𑀲 𑀩𑀼𑀤𑁆𑀥𑀪𑀸𑀯𑀲𑁆𑀲 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀲𑀫𑁆𑀧𑀳𑀁𑀲𑀦𑀬𑁄𑀕𑁆𑀕𑀁 𑀯𑀻𑀭𑀺𑀬𑀁 𑀦𑀸𑀫 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑀫𑁂𑀯, 𑀬𑀁 𑀦 𑀧𑀘𑀼𑀭𑀚𑀦𑀸 𑀲𑁄𑀢𑀼𑀫𑁆𑀧𑀺 𑀲𑀓𑁆𑀓𑀼𑀡𑀦𑁆𑀢𑀺, 𑀧𑀕𑁂𑀯 𑀧𑀝𑀺𑀧𑀚𑁆𑀚𑀺𑀢𑀼𑀁. 𑀢𑀣𑀸 𑀳𑀺 𑀢𑀺𑀯𑀺𑀥𑀸 𑀅𑀪𑀺𑀦𑀻𑀳𑀸𑀭𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺, 𑀘𑀢𑀲𑁆𑀲𑁄 𑀩𑀼𑀤𑁆𑀥𑀪𑀽𑀫𑀺𑀬𑁄, (𑀲𑀼. 𑀦𑀺. 𑀅𑀝𑁆𑀞. 𑁧.𑁩𑁪) 𑀘𑀢𑁆𑀢𑀸𑀭𑀺 𑀲𑀗𑁆𑀕𑀳𑀯𑀢𑁆𑀣𑀽𑀦𑀺 ¶ , (𑀤𑀻. 𑀦𑀺. 𑁩.𑁨𑁧𑁦; 𑀅. 𑀦𑀺. 𑁪.𑁩𑁨) 𑀓𑀭𑀼𑀡𑁂𑀓𑀭𑀲𑀢𑀸, 𑀩𑀼𑀤𑁆𑀥𑀥𑀫𑁆𑀫𑁂𑀲𑀼 𑀲𑀘𑁆𑀙𑀺𑀓𑀭𑀡𑁂𑀦 𑀯𑀺𑀲𑁂𑀲𑀧𑁆𑀧𑀘𑁆𑀘𑀬𑁄, 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺, 𑀲𑀩𑁆𑀩𑀥𑀫𑁆𑀫𑁂𑀲𑀼 𑀦𑀺𑀭𑀼𑀧𑀮𑁂𑀧𑁄, 𑀲𑀩𑁆𑀩𑀲𑀢𑁆𑀢𑁂𑀲𑀼 𑀧𑀺𑀬𑀧𑀼𑀢𑁆𑀢𑀲𑀜𑁆𑀜𑀸, 𑀲𑀁𑀲𑀸𑀭𑀤𑀼𑀓𑁆𑀔𑁂𑀳𑀺 𑀅𑀧𑀭𑀺𑀔𑁂𑀤𑁄, 𑀲𑀩𑁆𑀩𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑁄, 𑀢𑁂𑀦 𑀘 𑀦𑀺𑀭𑀢𑀺𑀫𑀸𑀦𑀢𑀸, 𑀅𑀥𑀺𑀲𑀻𑀮𑀸𑀤𑀺𑀅𑀥𑀺𑀝𑁆𑀞𑀸𑀦𑀁, 𑀢𑀢𑁆𑀣 𑀘 𑀅𑀘𑀜𑁆𑀘𑀮𑀢𑀸, 𑀓𑀼𑀲𑀮𑀓𑀺𑀭𑀺𑀬𑀸𑀲𑀼 𑀧𑀻𑀢𑀺𑀧𑀸𑀫𑁄𑀚𑁆𑀚𑀢𑀸, 𑀯𑀺𑀯𑁂𑀓𑀦𑀺𑀦𑁆𑀦𑀘𑀺𑀢𑁆𑀢𑀢𑀸, 𑀛𑀸𑀦𑀸𑀦𑀼𑀬𑁄𑀕𑁄, 𑀅𑀦𑀯𑀚𑁆𑀚𑀥𑀫𑁆𑀫𑁂𑀲𑀼 𑀅𑀢𑀺𑀢𑁆𑀢𑀺𑀬𑀢𑀸, 𑀬𑀣𑀸𑀲𑀼𑀢𑀲𑁆𑀲 𑀥𑀫𑁆𑀫𑀲𑁆𑀲 𑀧𑀭𑁂𑀲𑀁 𑀳𑀺𑀢𑀚𑁆𑀛𑀸𑀲𑀬𑁂𑀦 𑀤𑁂𑀲𑀦𑀸𑀬 𑀆𑀭𑀫𑁆𑀪𑀤𑀴𑁆𑀳𑀢𑀸, 𑀥𑀻𑀭𑀯𑀻𑀭𑀪𑀸𑀯𑁄, 𑀧𑀭𑀸𑀧𑀯𑀸𑀤𑀧𑀭𑀸𑀧𑀓𑀸𑀭𑁂𑀲𑀼 𑀯𑀺𑀓𑀸𑀭𑀸𑀪𑀸𑀯𑁄, 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁, 𑀲𑀫𑀸𑀧𑀢𑁆𑀢𑀻𑀲𑀼 𑀯𑀲𑀻𑀪𑀸𑀯𑁄, 𑀅𑀪𑀺𑀜𑁆𑀜𑀸𑀲𑀼 𑀩𑀮𑀧𑁆𑀧𑀢𑁆𑀢𑀺, 𑀮𑀓𑁆𑀔𑀡𑀢𑁆𑀢𑀬𑀸𑀯𑀩𑁄𑀥𑁄, 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀲𑀼 𑀅𑀪𑀺𑀬𑁄𑀕𑁂𑀦 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀁, 𑀦𑀯𑀮𑁄𑀓𑀼𑀢𑁆𑀢𑀭𑀸𑀯𑀓𑁆𑀓𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀓𑀸 𑀲𑀩𑁆𑀩𑀸𑀧𑀺 𑀩𑁄𑀥𑀺𑀲𑀫𑁆𑀪𑀸𑀭𑀧𑀝𑀺𑀧𑀢𑁆𑀢𑀺 𑀯𑀻𑀭𑀺𑀬𑀸𑀦𑀼𑀪𑀸𑀯𑁂𑀦𑁂𑀯 𑀲𑀫𑀺𑀚𑁆𑀛𑀢𑀻𑀢𑀺 𑀅𑀪𑀺𑀦𑀻𑀳𑀸𑀭𑀢𑁄 𑀬𑀸𑀯 𑀫𑀳𑀸𑀩𑁄𑀥𑀺 𑀅𑀦𑁄𑀲𑁆𑀲𑀚𑁆𑀚𑀦𑁆𑀢𑁂𑀦 𑀲𑀓𑁆𑀓𑀘𑁆𑀘𑀁 𑀦𑀺𑀭𑀦𑁆𑀢𑀭𑀁 𑀯𑀻𑀭𑀺𑀬𑀁 𑀬𑀣𑀸 𑀉𑀧𑀭𑀽𑀧𑀭𑀺 𑀯𑀺𑀲𑁂𑀲𑀸𑀯𑀳𑀁 𑀳𑁄𑀢𑀺, 𑀏𑀯𑀁 𑀲𑀫𑁆𑀧𑀸𑀤𑁂𑀢𑀩𑁆𑀩𑀁. 𑀲𑀫𑁆𑀧𑀚𑁆𑀚𑀫𑀸𑀦𑁂 𑀘 𑀬𑀣𑀸𑀯𑀼𑀢𑁆𑀢𑁂 𑀯𑀻𑀭𑀺𑀬𑁂, 𑀔𑀦𑁆𑀢𑀺𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀸𑀤𑀬𑁄 𑀘 𑀤𑀸𑀦𑀲𑀻𑀮𑀸𑀤𑀬𑁄 𑀘 𑀲𑀩𑁆𑀩𑁂𑀧𑀺 𑀩𑁄𑀥𑀺𑀲𑀫𑁆𑀪𑀸𑀭𑀸 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀲𑀫𑁆𑀧𑀦𑁆𑀦𑀸 𑀏𑀯 𑀳𑁄𑀦𑁆𑀢𑀻𑀢𑀺𑀔𑀦𑁆𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀧𑀝𑀺𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀢𑀺 ¶ 𑀲𑀢𑁆𑀢𑀸𑀦𑀁 𑀲𑀼𑀔𑀽𑀧𑀓𑀭𑀡𑀧𑀭𑀺𑀘𑁆𑀘𑀸𑀕𑁂𑀦 𑀩𑀳𑀼𑀥𑀸𑀦𑀼𑀕𑁆𑀕𑀳𑀓𑀭𑀡𑀁 𑀤𑀸𑀦𑁂𑀦 𑀧𑀝𑀺𑀧𑀢𑁆𑀢𑀺, 𑀲𑀻𑀮𑁂𑀦 𑀢𑁂𑀲𑀁 𑀚𑀻𑀯𑀺𑀢𑀲𑀸𑀧𑀢𑁂𑀬𑁆𑀬𑀤𑀸𑀭𑀭𑀓𑁆𑀔𑀸𑀪𑁂𑀤𑀧𑀺𑀬𑀳𑀺𑀢𑀯𑀘𑀦𑀸𑀯𑀺𑀳𑀺𑀁𑀲𑀸𑀤𑀺𑀓𑀭𑀡𑀸𑀦𑀺, 𑀦𑁂𑀓𑁆𑀔𑀫𑁆𑀫𑁂𑀦 𑀢𑁂𑀲𑀁 𑀆𑀫𑀺𑀲𑀧𑀝𑀺𑀕𑁆𑀕𑀳𑀡𑀥𑀫𑁆𑀫𑀤𑀸𑀦𑀸𑀤𑀺𑀦𑀸 𑀅𑀦𑁂𑀓𑀯𑀺𑀥𑀸 𑀳𑀺𑀢𑀘𑀭𑀺𑀬𑀸, 𑀧𑀜𑁆𑀜𑀸𑀬 𑀢𑁂𑀲𑀁 𑀳𑀺𑀢𑀓𑀭𑀡𑀽𑀧𑀸𑀬𑀓𑁄𑀲𑀮𑁆𑀮𑀁, 𑀯𑀻𑀭𑀺𑀬𑁂𑀦 𑀢𑀢𑁆𑀣 𑀉𑀲𑁆𑀲𑀸𑀳𑀸𑀭𑀫𑁆𑀪𑀅𑀲𑀁𑀳𑀻𑀭𑀓𑀭𑀡𑀸𑀦𑀺, 𑀔𑀦𑁆𑀢𑀺𑀬𑀸 𑀢𑀤𑀧𑀭𑀸𑀥𑀲𑀳𑀦𑀁, 𑀲𑀘𑁆𑀘𑁂𑀦 𑀦𑁂𑀲𑀁 𑀅𑀯𑀜𑁆𑀘𑀦𑀢𑀤𑀼𑀧𑀓𑀸𑀭𑀓𑀺𑀭𑀺𑀬𑀸𑀲𑀫𑀸𑀤𑀸𑀦𑀸𑀯𑀺𑀲𑀁𑀯𑀸𑀤𑀦𑀸𑀤𑀺, 𑀅𑀥𑀺𑀝𑁆𑀞𑀸𑀦𑁂𑀦 𑀢𑀤𑀼𑀧𑀓𑀭𑀡𑁂 𑀅𑀦𑀢𑁆𑀣𑀲𑀫𑁆𑀧𑀸𑀢𑁂𑀧𑀺 𑀅𑀘𑀮𑀦𑀁, 𑀫𑁂𑀢𑁆𑀢𑀸𑀬 𑀦𑁂𑀲𑀁 𑀳𑀺𑀢𑀲𑀼𑀔𑀸𑀦𑀼𑀘𑀺𑀦𑁆𑀢𑀦𑀁, 𑀉𑀧𑁂𑀓𑁆𑀔𑀸𑀬 𑀦𑁂𑀲𑀁 𑀉𑀧𑀓𑀸𑀭𑀸𑀧𑀓𑀸𑀭𑁂𑀲𑀼 𑀯𑀺𑀓𑀸𑀭𑀸𑀦𑀸𑀧𑀢𑁆𑀢𑀻𑀢𑀺 𑀏𑀯𑀁 𑀅𑀧𑀭𑀺𑀫𑀸𑀡𑁂 𑀲𑀢𑁆𑀢𑁂 𑀆𑀭𑀩𑁆𑀪 𑀅𑀦𑀼𑀓𑀫𑁆𑀧𑀺𑀢𑀲𑀩𑁆𑀩𑀲𑀢𑁆𑀢𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀼𑀣𑀼𑀚𑁆𑀚𑀦𑁂𑀳𑀺 𑀅𑀲𑀸𑀥𑀸𑀭𑀡𑁄 𑀅𑀧𑀭𑀺𑀫𑀸𑀡𑁄 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑀼𑀧𑀘𑀬𑁄 𑀏𑀢𑁆𑀣 𑀧𑀝𑀺𑀧𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑁄 𑀘𑁂𑀢𑀸𑀲𑀁 𑀧𑀘𑁆𑀘𑀬𑁄 𑀯𑀼𑀢𑁆𑀢𑁄, 𑀢𑀢𑁆𑀣 𑀘 𑀲𑀓𑁆𑀓𑀘𑁆𑀘𑀁 𑀲𑀫𑁆𑀧𑀸𑀤𑀦𑀁.

𑀓𑁄 𑀯𑀺𑀪𑀸𑀕𑁄𑀢𑀺 𑁋

𑀲𑀸𑀫𑀜𑁆𑀜𑀪𑁂𑀤𑀢𑁄 𑀏𑀢𑀸, 𑀤𑀲𑀯𑀺𑀥𑀸 𑀯𑀺𑀪𑀸𑀕𑀢𑁄;

𑀢𑀺𑀥𑀸 𑀳𑀼𑀢𑁆𑀯𑀸𑀦 𑀧𑀘𑁆𑀘𑁂𑀓𑀁, 𑀲𑀫𑀢𑀺𑀁𑀲𑀯𑀺𑀥𑀸 𑀲𑀫𑀁.

𑀤𑀲 𑀧𑀸𑀭𑀫𑀺𑀬𑁄 𑀤𑀲 𑀉𑀧𑀧𑀸𑀭𑀫𑀺𑀬𑁄 𑀤𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄𑀢𑀺 𑀳𑀺 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄. 𑀢𑀢𑁆𑀣 ‘‘𑀓𑀢𑀸𑀪𑀺𑀦𑀻𑀳𑀸𑀭𑀲𑁆𑀲 ¶ 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀭𑀳𑀺𑀢𑀓𑀭𑀡𑀸𑀪𑀺𑀦𑀺𑀦𑁆𑀦𑀸𑀲𑀬𑀧𑀬𑁄𑀕𑀲𑁆𑀲 𑀓𑀡𑁆𑀳𑀥𑀫𑁆𑀫𑀯𑁄𑀓𑀺𑀡𑁆𑀡𑀸 𑀲𑀼𑀓𑁆𑀓𑀸 𑀥𑀫𑁆𑀫𑀸 𑀧𑀸𑀭𑀫𑀺𑀬𑁄, 𑀢𑁂𑀳𑀺 𑀅𑀯𑁄𑀓𑀺𑀡𑁆𑀡𑀸 𑀲𑀼𑀓𑁆𑀓𑀸 𑀥𑀫𑁆𑀫𑀸 𑀉𑀧𑀧𑀸𑀭𑀫𑀺𑀬𑁄, 𑀅𑀓𑀡𑁆𑀳𑀸 𑀅𑀲𑀼𑀓𑁆𑀓𑀸 𑀥𑀫𑁆𑀫𑀸 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄’’𑀢𑀺 𑀓𑁂𑀘𑀺. ‘‘𑀲𑀫𑀼𑀤𑀸𑀕𑀫𑀦𑀓𑀸𑀮𑁂𑀲𑀼 𑀧𑀽𑀭𑀺𑀬𑀫𑀸𑀦𑀸 𑀧𑀸𑀭𑀫𑀺𑀬𑁄, 𑀩𑁄𑀥𑀺𑀲𑀢𑁆𑀢𑀪𑀽𑀫𑀺𑀬𑀁 𑀧𑀼𑀡𑁆𑀡𑀸 𑀉𑀧𑀧𑀸𑀭𑀫𑀺𑀬𑁄, 𑀩𑀼𑀤𑁆𑀥𑀪𑀽𑀫𑀺𑀬𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀼𑀡𑁆𑀡𑀸 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄. 𑀩𑁄𑀥𑀺𑀲𑀢𑁆𑀢𑀪𑀽𑀫𑀺𑀬𑀁 𑀯𑀸 𑀧𑀭𑀳𑀺𑀢𑀓𑀭𑀡𑀢𑁄 𑀧𑀸𑀭𑀫𑀺𑀬𑁄, 𑀅𑀢𑁆𑀢𑀳𑀺𑀢𑀓𑀭𑀡𑀢𑁄 𑀉𑀧𑀧𑀸𑀭𑀫𑀺𑀬𑁄, 𑀩𑀼𑀤𑁆𑀥𑀪𑀽𑀫𑀺𑀬𑀁 𑀩𑀮𑀯𑁂𑀲𑀸𑀭𑀚𑁆𑀚𑀲𑀫𑀥𑀺𑀕𑀫𑁂𑀦 𑀉𑀪𑀬𑀳𑀺𑀢𑀧𑀭𑀺𑀧𑀽𑀭𑀡𑀢𑁄 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄𑀢𑀺 𑀏𑀯𑀁 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀧𑀡𑀺𑀥𑀸𑀦𑀸𑀭𑀫𑁆𑀪𑀧𑀭𑀺𑀦𑀺𑀝𑁆𑀞𑀸𑀦𑁂𑀲𑀼 𑀢𑁂𑀲𑀁 𑀯𑀺𑀪𑀸𑀕𑁄’’𑀢𑀺 𑀅𑀧𑀭𑁂. ‘‘𑀤𑁄𑀲𑀼𑀧𑀲𑀫𑀓𑀭𑀼𑀡𑀸𑀧𑀓𑀢𑀺𑀓𑀸𑀦𑀁 𑀪𑀯𑀲𑀼𑀔𑀯𑀺𑀫𑀼𑀢𑁆𑀢𑀺𑀲𑀼𑀔𑀧𑀭𑀫𑀲𑀼𑀔𑀧𑁆𑀧𑀢𑁆𑀢𑀸𑀦𑀁 𑀧𑀼𑀜𑁆𑀜𑀽𑀧𑀘𑀬𑀪𑁂𑀤𑀢𑁄 𑀢𑀩𑁆𑀩𑀺𑀪𑀸𑀕𑁄’’𑀢𑀺 𑀅𑀜𑁆𑀜𑁂.

‘‘𑀮𑀚𑁆𑀚𑀸𑀲𑀢𑀺𑀫𑀸𑀦𑀸𑀧𑀲𑁆𑀲𑀬𑀸𑀦𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀥𑀺𑀧𑀢𑀻𑀦𑀁 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀕𑀭𑀼𑀓𑀸𑀦𑀁 𑀢𑀸𑀭𑀺𑀢𑀢𑀭𑀺𑀢𑀢𑀸𑀭𑀬𑀺𑀢𑀽𑀦𑀁 𑀅𑀦𑀼𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀧𑀸𑀭𑀫𑀻𑀉𑀧𑀧𑀸𑀭𑀫𑀻𑀧𑀭𑀫𑀢𑁆𑀣𑀧𑀸𑀭𑀫𑀻𑀳𑀺 𑀩𑁄𑀥𑀺𑀢𑁆𑀢𑀬𑀧𑁆𑀧𑀢𑁆𑀢𑀺𑀢𑁄 𑀬𑀣𑀸𑀯𑀼𑀢𑁆𑀢𑀯𑀺𑀪𑀸𑀕𑁄’’𑀢𑀺 𑀓𑁂𑀘𑀺. ‘‘𑀘𑀺𑀢𑁆𑀢𑀧𑀡𑀺𑀥𑀺𑀢𑁄 𑀬𑀸𑀯 𑀯𑀘𑀻𑀧𑀡𑀺𑀥𑀺, 𑀢𑀸𑀯 𑀧𑀯𑀢𑁆𑀢𑀸 𑀲𑀫𑁆𑀪𑀸𑀭𑀸 𑀧𑀸𑀭𑀫𑀺𑀬𑁄 ¶ , 𑀯𑀘𑀻𑀧𑀡𑀺𑀥𑀺𑀢𑁄 𑀬𑀸𑀯 𑀓𑀸𑀬𑀧𑀡𑀺𑀥𑀺, 𑀢𑀸𑀯 𑀧𑀯𑀢𑁆𑀢𑀸 𑀉𑀧𑀧𑀸𑀭𑀫𑀺𑀬𑁄, 𑀓𑀸𑀬𑀧𑀡𑀺𑀥𑀺𑀢𑁄 𑀧𑀪𑀼𑀢𑀺 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄’’𑀢𑀺 𑀅𑀧𑀭𑁂. 𑀅𑀜𑁆𑀜𑁂 𑀧𑀦 ‘‘𑀧𑀭𑀧𑀼𑀜𑁆𑀜𑀸𑀦𑀼𑀫𑁄𑀤𑀦𑀯𑀲𑁂𑀦 𑀧𑀯𑀢𑁆𑀢𑀸 𑀲𑀫𑁆𑀪𑀸𑀭𑀸 𑀧𑀸𑀭𑀫𑀺𑀬𑁄, 𑀧𑀭𑁂𑀲𑀁 𑀓𑀸𑀭𑀸𑀧𑀦𑀯𑀲𑁂𑀦 𑀧𑀯𑀢𑁆𑀢𑀸 𑀉𑀧𑀧𑀸𑀭𑀫𑀺𑀬𑁄, 𑀲𑀬𑀁 𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀸 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄’’𑀢𑀺 𑀯𑀤𑀦𑁆𑀢𑀺. 𑀢𑀣𑀸 ‘‘𑀪𑀯𑀲𑀼𑀔𑀸𑀯𑀳𑁄 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑁄 𑀧𑀸𑀭𑀫𑀻, 𑀅𑀢𑁆𑀢𑀦𑁄 𑀦𑀺𑀩𑁆𑀩𑀸𑀦𑀲𑀼𑀔𑀸𑀯𑀳𑁄 𑀉𑀧𑀧𑀸𑀭𑀫𑀻, 𑀧𑀭𑁂𑀲𑀁 𑀢𑀤𑀼𑀪𑀬𑀲𑀼𑀔𑀸𑀯𑀳𑁄 𑀧𑀭𑀫𑀢𑁆𑀣𑀧𑀸𑀭𑀫𑀻’’𑀢𑀺 𑀏𑀓𑁂.

𑀧𑀼𑀢𑁆𑀢𑀤𑀸𑀭𑀥𑀦𑀸𑀤𑀺𑀉𑀧𑀓𑀭𑀡𑀧𑀭𑀺𑀘𑁆𑀘𑀸𑀕𑁄 𑀧𑀦 𑀤𑀸𑀦𑀧𑀸𑀭𑀫𑀻, 𑀅𑀢𑁆𑀢𑀦𑁄 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑁄 𑀤𑀸𑀦𑀉𑀧𑀧𑀸𑀭𑀫𑀻, 𑀅𑀢𑁆𑀢𑀦𑁄 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑁄 𑀤𑀸𑀦𑀧𑀭𑀫𑀢𑁆𑀣𑀧𑀸𑀭𑀫𑀻. 𑀢𑀣𑀸 𑀧𑀼𑀢𑁆𑀢𑀤𑀸𑀭𑀸𑀤𑀺𑀓𑀲𑁆𑀲 𑀢𑀺𑀯𑀺𑀥𑀲𑁆𑀲𑀸𑀧𑀺 𑀳𑁂𑀢𑀼 𑀅𑀯𑀻𑀢𑀺𑀓𑁆𑀓𑀫𑀦𑀯𑀲𑁂𑀦 𑀢𑀺𑀲𑁆𑀲𑁄 𑀲𑀻𑀮𑀧𑀸𑀭𑀫𑀺𑀬𑁄, 𑀢𑁂𑀲𑀼 𑀏𑀯 𑀢𑀺𑀯𑀺𑀥𑁂𑀲𑀼 𑀯𑀢𑁆𑀣𑀽𑀲𑀼 𑀆𑀮𑀬𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀦𑀯𑀲𑁂𑀦 𑀢𑀺𑀲𑁆𑀲𑁄 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀺𑀬𑁄, 𑀉𑀧𑀓𑀭𑀡𑀅𑀗𑁆𑀕𑀚𑀻𑀯𑀺𑀢𑀢𑀡𑁆𑀳𑀁 𑀲𑀫𑀽𑀳𑀦𑀺𑀢𑁆𑀯𑀸 𑀲𑀢𑁆𑀢𑀸𑀦𑀁 𑀳𑀺𑀢𑀸𑀳𑀺𑀢𑀯𑀺𑀦𑀺𑀘𑁆𑀙𑀬𑀓𑀭𑀡𑀯𑀲𑁂𑀦 𑀢𑀺𑀲𑁆𑀲𑁄 𑀧𑀜𑁆𑀜𑀸𑀧𑀸𑀭𑀫𑀺𑀬𑁄, 𑀬𑀣𑀸𑀯𑀼𑀢𑁆𑀢𑀪𑁂𑀤𑀸𑀦𑀁 𑀧𑀭𑀺𑀘𑁆𑀘𑀸𑀕𑀸𑀤𑀻𑀦𑀁 𑀯𑀸𑀬𑀫𑀦𑀯𑀲𑁂𑀦 𑀢𑀺𑀲𑁆𑀲𑁄 𑀯𑀻𑀭𑀺𑀬𑀧𑀸𑀭𑀫𑀺𑀬𑁄, 𑀉𑀧𑀓𑀭𑀡𑀅𑀗𑁆𑀕𑀚𑀻𑀯𑀺𑀢𑀦𑁆𑀢𑀭𑀸𑀬𑀓𑀭𑀸𑀦𑀁 𑀔𑀫𑀦𑀯𑀲𑁂𑀦 𑀢𑀺𑀲𑁆𑀲𑁄 𑀔𑀦𑁆𑀢𑀺𑀧𑀸𑀭𑀫𑀺𑀬𑁄, 𑀉𑀧𑀓𑀭𑀡𑀅𑀗𑁆𑀕𑀚𑀻𑀯𑀺𑀢𑀳𑁂𑀢𑀼 𑀲𑀘𑁆𑀘𑀸𑀧𑀭𑀺𑀘𑁆𑀘𑀸𑀕𑀯𑀲𑁂𑀦 𑀢𑀺𑀲𑁆𑀲𑁄 𑀲𑀘𑁆𑀘𑀧𑀸𑀭𑀫𑀺𑀬𑁄, 𑀤𑀸𑀦𑀸𑀤𑀺𑀧𑀸𑀭𑀫𑀺𑀬𑁄 𑀅𑀓𑀼𑀧𑁆𑀧𑀸𑀥𑀺𑀝𑁆𑀞𑀸𑀦𑀯𑀲𑁂𑀦𑁂𑀯 𑀲𑀫𑀺𑀚𑁆𑀛𑀦𑁆𑀢𑀻𑀢𑀺 𑀉𑀧𑀓𑀭𑀡𑀸𑀤𑀺𑀯𑀺𑀦𑀸𑀲𑁂𑀧𑀺 𑀅𑀘𑀮𑀸𑀥𑀺𑀝𑁆𑀞𑀸𑀦𑀯𑀲𑁂𑀦 𑀢𑀺𑀲𑁆𑀲𑁄 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀺𑀬𑁄, 𑀉𑀧𑀓𑀭𑀡𑀸𑀤𑀺𑀯𑀺𑀖𑀸𑀢𑀓𑁂𑀲𑀼𑀧𑀺 𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀬 𑀅𑀯𑀺𑀚𑀳𑀦𑀯𑀲𑁂𑀦 𑀢𑀺𑀲𑁆𑀲𑁄 𑀫𑁂𑀢𑁆𑀢𑀸𑀧𑀸𑀭𑀫𑀺𑀬𑁄, 𑀬𑀣𑀸𑀯𑀼𑀢𑁆𑀢𑀯𑀢𑁆𑀣𑀼𑀢𑁆𑀢𑀬𑀲𑁆𑀲 𑀉𑀧𑀓𑀸𑀭𑀸𑀧𑀓𑀸𑀭𑁂𑀲𑀼 𑀲𑀢𑁆𑀢𑀲𑀗𑁆𑀔𑀸𑀭𑁂𑀲𑀼 𑀫𑀚𑁆𑀛𑀢𑁆𑀢𑀢𑀸𑀧𑀝𑀺𑀮𑀸𑀪𑀯𑀲𑁂𑀦 𑀢𑀺𑀲𑁆𑀲𑁄 𑀉𑀧𑁂𑀓𑁆𑀔𑀸𑀧𑀸𑀭𑀫𑀺𑀬𑁄𑀢𑀺 𑀏𑀯𑀫𑀸𑀤𑀺𑀦𑀸 𑀏𑀢𑀸𑀲𑀁 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄.

𑀓𑁄 ¶ 𑀲𑀗𑁆𑀕𑀳𑁄𑀢𑀺 𑀏𑀢𑁆𑀣 𑀧𑀦 𑁋

𑀬𑀣𑀸 𑀯𑀺𑀪𑀸𑀕𑀢𑁄 𑀢𑀺𑀁𑀲-𑀯𑀺𑀥𑀸 𑀲𑀗𑁆𑀕𑀳𑀢𑁄 𑀤𑀲;

𑀙𑀧𑁆𑀧𑀓𑀸𑀭𑀸𑀯 𑀏𑀢𑀸𑀲𑀼, 𑀬𑀼𑀕𑀴𑀸𑀤𑀻𑀳𑀺 𑀲𑀸𑀥𑀬𑁂.

𑀬𑀣𑀸 𑀳𑀺 𑀏𑀲𑀸 𑀯𑀺𑀪𑀸𑀕𑀢𑁄 𑀢𑀺𑀁𑀲𑀯𑀺𑀥𑀸𑀧𑀺 𑀤𑀸𑀦𑀧𑀸𑀭𑀫𑀺𑀆𑀤𑀺𑀪𑀸𑀯𑀢𑁄 𑀤𑀲𑀯𑀺𑀥𑀸, 𑀏𑀯𑀁 𑀤𑀸𑀦𑀲𑀻𑀮𑀔𑀦𑁆𑀢𑀺𑀯𑀻𑀭𑀺𑀬𑀛𑀸𑀦𑀧𑀜𑁆𑀜𑀸𑀲𑀪𑀸𑀯𑁂𑀦 𑀙𑀩𑁆𑀩𑀺𑀥𑀸. 𑀏𑀢𑀸𑀲𑀼 𑀳𑀺 𑀦𑁂𑀓𑁆𑀔𑀫𑁆𑀫𑀧𑀸𑀭𑀫𑀻 𑀲𑀻𑀮𑀧𑀸𑀭𑀫𑀺𑀬𑀸 𑀲𑀗𑁆𑀕𑀳𑀺𑀢𑀸 𑀢𑀲𑁆𑀲𑀸 𑀧𑀩𑁆𑀩𑀚𑁆𑀚𑀸𑀪𑀸𑀯𑁂. 𑀦𑀻𑀯𑀭𑀡𑀯𑀺𑀯𑁂𑀓𑀪𑀸𑀯𑁂 𑀧𑀦 𑀛𑀸𑀦𑀧𑀸𑀭𑀫𑀺𑀬𑀸, 𑀓𑀼𑀲𑀮𑀥𑀫𑁆𑀫𑀪𑀸𑀯𑁂 𑀙𑀳𑀺𑀧𑀺 𑀲𑀗𑁆𑀕𑀳𑀺𑀢𑀸, 𑀲𑀘𑁆𑀘𑀧𑀸𑀭𑀫𑀻 𑀲𑀻𑀮𑀧𑀸𑀭𑀫𑀺𑀬𑀸 𑀏𑀓𑀤𑁂𑀲𑀸 𑀏𑀯 𑀯𑀘𑀻𑀲𑀘𑁆𑀘𑀯𑀺𑀭𑀢𑀺𑀲𑀘𑁆𑀘𑀧𑀓𑁆𑀔𑁂. 𑀜𑀸𑀡𑀲𑀘𑁆𑀘𑀧𑀓𑁆𑀔𑁂 ¶ 𑀧𑀦 𑀧𑀜𑁆𑀜𑀸𑀧𑀸𑀭𑀫𑀺𑀬𑀸 𑀲𑀗𑁆𑀕𑀳𑀺𑀢𑀸, 𑀫𑁂𑀢𑁆𑀢𑀸𑀧𑀸𑀭𑀫𑀻 𑀛𑀸𑀦𑀧𑀸𑀭𑀫𑀺𑀬𑀸 𑀏𑀯, 𑀉𑀧𑁂𑀓𑁆𑀔𑀸𑀧𑀸𑀭𑀫𑀻 𑀛𑀸𑀦𑀧𑀜𑁆𑀜𑀸𑀧𑀸𑀭𑀫𑀻𑀳𑀺, 𑀅𑀥𑀺𑀝𑁆𑀞𑀸𑀦𑀧𑀸𑀭𑀫𑀻 𑀲𑀩𑁆𑀩𑀸𑀳𑀺𑀧𑀺 𑀲𑀗𑁆𑀕𑀳𑀺𑀢𑀸𑀢𑀺.

𑀏𑀢𑁂𑀲𑀜𑁆𑀘 𑀤𑀸𑀦𑀸𑀤𑀻𑀦𑀁 𑀙𑀦𑁆𑀦𑀁 𑀕𑀼𑀡𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀸𑀦𑀁 𑀧𑀜𑁆𑀘𑀤𑀲 𑀬𑀼𑀕𑀴𑀸𑀤𑀻𑀦𑀺 𑀧𑀜𑁆𑀘𑀤𑀲 𑀬𑀼𑀕𑀴𑀸𑀤𑀺𑀲𑀸𑀥𑀓𑀸𑀦𑀺 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀣𑀺𑀤𑀁? 𑀤𑀸𑀦𑀲𑀻𑀮𑀬𑀼𑀕𑀴𑁂𑀦 𑀧𑀭𑀳𑀺𑀢𑀸𑀳𑀺𑀢𑀸𑀦𑀁 𑀓𑀭𑀡𑀸𑀓𑀭𑀡𑀬𑀼𑀕𑀴𑀲𑀺𑀤𑁆𑀥𑀺, 𑀤𑀸𑀦𑀔𑀦𑁆𑀢𑀺𑀬𑀼𑀕𑀴𑁂𑀦 𑀅𑀮𑁄𑀪𑀸𑀤𑁄𑀲𑀬𑀼𑀕𑀴𑀲𑀺𑀤𑁆𑀥𑀺, 𑀤𑀸𑀦𑀯𑀻𑀭𑀺𑀬𑀬𑀼𑀕𑀴𑁂𑀦 𑀘𑀸𑀕𑀲𑀼𑀢𑀬𑀼𑀕𑀴𑀲𑀺𑀤𑁆𑀥𑀺, 𑀤𑀸𑀦𑀛𑀸𑀦𑀬𑀼𑀕𑀴𑁂𑀦 𑀓𑀸𑀫𑀤𑁄𑀲𑀧𑁆𑀧𑀳𑀸𑀦𑀬𑀼𑀕𑀴𑀲𑀺𑀤𑁆𑀥𑀺, 𑀤𑀸𑀦𑀧𑀜𑁆𑀜𑀸𑀬𑀼𑀕𑀴𑁂𑀦 𑀅𑀭𑀺𑀬𑀬𑀸𑀦𑀥𑀼𑀭𑀬𑀼𑀕𑀴𑀲𑀺𑀤𑁆𑀥𑀺, 𑀲𑀻𑀮𑀔𑀦𑁆𑀢𑀺𑀤𑁆𑀯𑀬𑁂𑀦 𑀧𑀬𑁄𑀕𑀸𑀲𑀬𑀲𑀼𑀤𑁆𑀥𑀤𑁆𑀯𑀬𑀲𑀺𑀤𑁆𑀥𑀺, 𑀲𑀻𑀮𑀯𑀻𑀭𑀺𑀬𑀤𑁆𑀯𑀬𑁂𑀦 𑀪𑀸𑀯𑀦𑀸𑀤𑁆𑀯𑀬𑀲𑀺𑀤𑁆𑀥𑀺, 𑀲𑀻𑀮𑀛𑀸𑀦𑀤𑁆𑀯𑀬𑁂𑀦 𑀤𑀼𑀲𑁆𑀲𑀻𑀮𑁆𑀬𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀤𑁆𑀯𑀬𑀲𑀺𑀤𑁆𑀥𑀺, 𑀲𑀻𑀮𑀧𑀜𑁆𑀜𑀸𑀤𑁆𑀯𑀬𑁂𑀦 𑀤𑀸𑀦𑀤𑁆𑀯𑀬𑀲𑀺𑀤𑁆𑀥𑀺, 𑀔𑀦𑁆𑀢𑀺𑀯𑀻𑀭𑀺𑀬𑀤𑁆𑀯𑀬𑁂𑀦 𑀔𑀫𑀸𑀢𑁂𑀚𑀤𑁆𑀯𑀬𑀲𑀺𑀤𑁆𑀥𑀺, 𑀔𑀦𑁆𑀢𑀺𑀛𑀸𑀦𑀤𑀼𑀓𑁂𑀦 𑀯𑀺𑀭𑁄𑀥𑀸𑀦𑀼𑀭𑁄𑀥𑀧𑁆𑀧𑀳𑀸𑀦𑀤𑀼𑀓𑀲𑀺𑀤𑁆𑀥𑀺, 𑀔𑀦𑁆𑀢𑀺𑀧𑀜𑁆𑀜𑀸𑀤𑀼𑀓𑁂𑀦 𑀲𑀼𑀜𑁆𑀜𑀢𑀸𑀔𑀦𑁆𑀢𑀺𑀧𑀝𑀺𑀯𑁂𑀥𑀤𑀼𑀓𑀲𑀺𑀤𑁆𑀥𑀺, 𑀯𑀻𑀭𑀺𑀬𑀛𑀸𑀦𑀤𑀼𑀓𑁂𑀦 𑀧𑀕𑁆𑀕𑀳𑀸𑀯𑀺𑀓𑁆𑀔𑁂𑀧𑀤𑀼𑀓𑀲𑀺𑀤𑁆𑀥𑀺, 𑀯𑀻𑀭𑀺𑀬𑀧𑀜𑁆𑀜𑀸𑀤𑀼𑀓𑁂𑀦 𑀲𑀭𑀡𑀤𑀼𑀓𑀲𑀺𑀤𑁆𑀥𑀺, 𑀛𑀸𑀦𑀧𑀜𑁆𑀜𑀸𑀤𑀼𑀓𑁂𑀦 𑀬𑀸𑀦𑀤𑀼𑀓𑀲𑀺𑀤𑁆𑀥𑀺. 𑀤𑀸𑀦𑀲𑀻𑀮𑀔𑀦𑁆𑀢𑀺𑀢𑀺𑀓𑁂𑀦 𑀮𑁄𑀪𑀤𑁄𑀲𑀫𑁄𑀳𑀧𑁆𑀧𑀳𑀸𑀦𑀢𑀺𑀓𑀲𑀺𑀤𑁆𑀥𑀺, 𑀤𑀸𑀦𑀲𑀻𑀮𑀯𑀻𑀭𑀺𑀬𑀢𑀺𑀓𑁂𑀦 𑀪𑁄𑀕𑀚𑀻𑀯𑀺𑀢𑀓𑀸𑀬𑀲𑀸𑀭𑀸𑀤𑀸𑀦𑀢𑀺𑀓𑀲𑀺𑀤𑁆𑀥𑀺, 𑀤𑀸𑀦𑀲𑀻𑀮𑀛𑀸𑀦𑀢𑀺𑀓𑁂𑀦 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀢𑀺𑀓𑀲𑀺𑀤𑁆𑀥𑀺, 𑀤𑀸𑀦𑀲𑀻𑀮𑀧𑀜𑁆𑀜𑀸𑀢𑀺𑀓𑁂𑀦 𑀆𑀫𑀺𑀲𑀸𑀪𑀬𑀥𑀫𑁆𑀫𑀤𑀸𑀦𑀢𑀺𑀓𑀲𑀺𑀤𑁆𑀥𑀻𑀢𑀺 𑀏𑀯𑀁 𑀇𑀢𑀭𑁂𑀳𑀺𑀧𑀺 𑀢𑀺𑀓𑁂𑀳𑀺, 𑀘𑀢𑀼𑀓𑁆𑀓𑀸𑀤𑀻𑀳𑀺 𑀘 𑀬𑀣𑀸𑀲𑀫𑁆𑀪𑀯𑀁 𑀢𑀺𑀓𑀸𑀦𑀺, 𑀘𑀢𑀼𑀓𑁆𑀓𑀸𑀤𑀻𑀦𑀺 𑀘 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀏𑀯𑀁 𑀙𑀩𑁆𑀩𑀺𑀥𑀸𑀦𑀫𑁆𑀧𑀺 𑀧𑀦 𑀇𑀫𑀸𑀲𑀁 𑀧𑀸𑀭𑀫𑀻𑀦𑀁 𑀘𑀢𑀽𑀳𑀺 𑀅𑀥𑀺𑀝𑁆𑀞𑀸𑀦𑁂𑀳𑀺 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑀧𑀸𑀭𑀫𑀻𑀦𑀁 𑀲𑀫𑀽𑀳𑀲𑀗𑁆𑀕𑀳𑀢𑁄 𑀳𑀺 𑀘𑀢𑁆𑀢𑀸𑀭𑀺 𑀅𑀥𑀺𑀝𑁆𑀞𑀸𑀦𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁? 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁, 𑀘𑀸𑀕𑀸𑀥𑀺𑀝𑁆𑀞𑀸𑀦𑀁, 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁, 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀦𑁆𑀢𑀺. 𑀢𑀢𑁆𑀣 𑀅𑀥𑀺𑀢𑀺𑀝𑁆𑀞𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸 𑀅𑀥𑀺𑀢𑀺𑀝𑁆𑀞𑀢𑀺, 𑀅𑀥𑀺𑀝𑁆𑀞𑀸𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀅𑀥𑀺𑀝𑁆𑀞𑀸𑀦𑀁, 𑀲𑀘𑁆𑀘𑀜𑁆𑀘 𑀢𑀁 𑀅𑀥𑀺𑀝𑁆𑀞𑀸𑀦𑀜𑁆𑀘, 𑀲𑀘𑁆𑀘𑀲𑁆𑀲 𑀯𑀸 𑀅𑀥𑀺𑀝𑁆𑀞𑀸𑀦𑀁, 𑀲𑀘𑁆𑀘𑀁 ¶ 𑀯𑀸 𑀅𑀥𑀺𑀝𑁆𑀞𑀸𑀦𑀫𑁂𑀢𑀲𑁆𑀲𑀸𑀢𑀺 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀢𑀢𑁆𑀣 𑀅𑀯𑀺𑀲𑁂𑀲𑀢𑁄 𑀢𑀸𑀯 𑀓𑀢𑀸𑀪𑀺𑀦𑀻𑀳𑀸𑀭𑀲𑁆𑀲 𑀅𑀦𑀼𑀓𑀫𑁆𑀧𑀺𑀢𑀲𑀩𑁆𑀩𑀲𑀢𑁆𑀢𑀲𑁆𑀲 𑀫𑀳𑀸𑀲𑀢𑁆𑀢𑀲𑁆𑀲 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀲𑀩𑁆𑀩𑀧𑀸𑀭𑀫𑀻𑀧𑀭𑀺𑀕𑁆𑀕𑀳𑀢𑁄 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁, 𑀢𑁂𑀲𑀁 𑀧𑀝𑀺𑀧𑀓𑁆𑀔𑀧𑀭𑀺𑀘𑁆𑀘𑀸𑀕𑀢𑁄 𑀘𑀸𑀕𑀸𑀥𑀺𑀝𑁆𑀞𑀸𑀦𑀁, 𑀲𑀩𑁆𑀩𑀧𑀸𑀭𑀫𑀺𑀢𑀸𑀕𑀼𑀡𑁂𑀳𑀺 𑀉𑀧𑀲𑀫𑀦𑀢𑁄 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁. 𑀢𑁂𑀳𑀺 𑀏𑀯 𑀧𑀭𑀳𑀺𑀢𑁂𑀲𑀼 𑀉𑀧𑀸𑀬𑀓𑁄𑀲𑀮𑁆𑀮𑀢𑁄 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁.

𑀯𑀺𑀲𑁂𑀲𑀢𑁄 𑀧𑀦 ‘‘𑀬𑀸𑀘𑀓𑀸𑀦𑀁 𑀚𑀦𑀸𑀦𑀁 𑀅𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀚𑀸𑀦𑀦𑀢𑁄, 𑀧𑀝𑀺𑀜𑁆𑀜𑀁 𑀅𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀤𑀸𑀦𑀢𑁄, 𑀤𑀸𑀦𑀁 𑀅𑀯𑀺𑀲𑀁𑀯𑀸𑀤𑁂𑀢𑁆𑀯𑀸 𑀅𑀦𑀼𑀫𑁄𑀤𑀦𑀢𑁄 ¶ , 𑀫𑀘𑁆𑀙𑀭𑀺𑀬𑀸𑀤𑀺𑀧𑀝𑀺𑀧𑀓𑁆𑀔𑀧𑀭𑀺𑀘𑁆𑀘𑀸𑀕𑀢𑁄, 𑀤𑁂𑀬𑁆𑀬𑀧𑀝𑀺𑀕𑁆𑀕𑀸𑀳𑀓𑀤𑀸𑀦𑀤𑁂𑀬𑁆𑀬𑀥𑀫𑁆𑀫𑀓𑁆𑀔𑀬𑁂𑀲𑀼 𑀮𑁄𑀪𑀤𑁄𑀲𑀫𑁄𑀳𑀪𑀬𑀯𑀽𑀧𑀲𑀫𑀦𑀢𑁄, 𑀬𑀣𑀸𑀭𑀳𑀁 𑀬𑀣𑀸𑀓𑀸𑀮𑀁 𑀬𑀣𑀸𑀯𑀺𑀥𑀸𑀦𑀜𑁆𑀘 𑀤𑀸𑀦𑀢𑁄, 𑀧𑀜𑁆𑀜𑀼𑀢𑁆𑀢𑀭𑀢𑁄 𑀘 𑀓𑀼𑀲𑀮𑀥𑀫𑁆𑀫𑀸𑀦𑀁 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀁 𑀤𑀸𑀦𑀁. 𑀢𑀣𑀸 𑀲𑀁𑀯𑀭𑀲𑀫𑀸𑀤𑀸𑀦𑀲𑁆𑀲 𑀅𑀯𑀻𑀢𑀺𑀓𑁆𑀓𑀫𑀦𑀢𑁄, 𑀤𑀼𑀲𑁆𑀲𑀻𑀮𑁆𑀬𑀧𑀭𑀺𑀘𑁆𑀘𑀸𑀕𑀢𑁄, 𑀤𑀼𑀘𑁆𑀘𑀭𑀺𑀢𑀯𑀽𑀧𑀲𑀫𑀦𑀢𑁄, 𑀧𑀜𑁆𑀜𑀼𑀢𑁆𑀢𑀭𑀢𑁄 𑀘 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀁 𑀲𑀻𑀮𑀁. 𑀬𑀣𑀸𑀧𑀝𑀺𑀜𑁆𑀜𑀁 𑀔𑀫𑀦𑀢𑁄, 𑀓𑀢𑀸𑀧𑀭𑀸𑀥𑀯𑀺𑀓𑀧𑁆𑀧𑀧𑀭𑀺𑀘𑁆𑀘𑀸𑀕𑀢𑁄, 𑀓𑁄𑀥𑀧𑀭𑀺𑀬𑀼𑀝𑁆𑀞𑀸𑀦𑀯𑀽𑀧𑀲𑀫𑀦𑀢𑁄, 𑀧𑀜𑁆𑀜𑀼𑀢𑁆𑀢𑀭𑀢𑁄 𑀘 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀔𑀦𑁆𑀢𑀺. 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀧𑀭𑀳𑀺𑀢𑀓𑀭𑀡𑀢𑁄, 𑀯𑀺𑀲𑀬𑀧𑀭𑀺𑀘𑁆𑀘𑀸𑀕𑀢𑁄, 𑀅𑀓𑀼𑀲𑀮𑀯𑀽𑀧𑀲𑀫𑀦𑀢𑁄, 𑀧𑀜𑁆𑀜𑀼𑀢𑁆𑀢𑀭𑀢𑁄 𑀘 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀁 𑀯𑀻𑀭𑀺𑀬𑀁. 𑀧𑀝𑀺𑀜𑁆𑀜𑀸𑀦𑀼𑀭𑀽𑀧𑀁 𑀮𑁄𑀓𑀳𑀺𑀢𑀸𑀦𑀼𑀘𑀺𑀦𑁆𑀢𑀦𑀢𑁄, 𑀦𑀻𑀯𑀭𑀡𑀧𑀭𑀺𑀘𑁆𑀘𑀸𑀕𑀢𑁄, 𑀘𑀺𑀢𑁆𑀢𑀯𑀽𑀧𑀲𑀫𑀦𑀢𑁄, 𑀧𑀜𑁆𑀜𑀼𑀢𑁆𑀢𑀭𑀢𑁄 𑀘 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀁 𑀛𑀸𑀦𑀁. 𑀬𑀣𑀸𑀧𑀝𑀺𑀜𑁆𑀜𑀁 𑀧𑀭𑀳𑀺𑀢𑀽𑀧𑀸𑀬𑀓𑁄𑀲𑀮𑁆𑀮𑀢𑁄, 𑀅𑀦𑀼𑀧𑀸𑀬𑀓𑀺𑀭𑀺𑀬𑀧𑀭𑀺𑀘𑁆𑀘𑀸𑀕𑀢𑁄, 𑀫𑁄𑀳𑀚𑀧𑀭𑀺𑀴𑀸𑀳𑀯𑀽𑀧𑀲𑀫𑀦𑀢𑁄, 𑀲𑀩𑁆𑀩𑀜𑁆𑀜𑀼𑀢𑀸𑀧𑀝𑀺𑀮𑀸𑀪𑀢𑁄 𑀘 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸 𑀧𑀜𑁆𑀜𑀸.

𑀢𑀢𑁆𑀣 𑀜𑁂𑀬𑁆𑀬𑀧𑀝𑀺𑀜𑁆𑀜𑀸𑀦𑀼𑀯𑀺𑀥𑀸𑀦𑁂𑀳𑀺 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁, 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑀧𑀭𑀺𑀘𑁆𑀘𑀸𑀕𑁂𑀳𑀺 𑀘𑀸𑀕𑀸𑀥𑀺𑀝𑁆𑀞𑀸𑀦𑀁, 𑀤𑁄𑀲𑀤𑀼𑀓𑁆𑀔𑀯𑀽𑀧𑀲𑀫𑁂𑀳𑀺 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁, 𑀅𑀦𑀼𑀩𑁄𑀥𑀧𑀝𑀺𑀯𑁂𑀥𑁂𑀳𑀺 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁. 𑀢𑀺𑀯𑀺𑀥𑀲𑀘𑁆𑀘𑀧𑀭𑀺𑀕𑁆𑀕𑀳𑀺𑀢𑀁 𑀤𑁄𑀲𑀢𑁆𑀢𑀬𑀯𑀺𑀭𑁄𑀥𑀺 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁, 𑀢𑀺𑀯𑀺𑀥𑀘𑀸𑀕𑀧𑀭𑀺𑀕𑁆𑀕𑀳𑀺𑀢𑀁 𑀤𑁄𑀲𑀢𑁆𑀢𑀬𑀯𑀺𑀭𑁄𑀥𑀺 𑀘𑀸𑀕𑀸𑀥𑀺𑀝𑁆𑀞𑀸𑀦𑀁, 𑀢𑀺𑀯𑀺𑀥𑀯𑀽𑀧𑀲𑀫𑀧𑀭𑀺𑀕𑁆𑀕𑀳𑀺𑀢𑀁 𑀤𑁄𑀲𑀢𑁆𑀢𑀬𑀯𑀺𑀭𑁄𑀥𑀺 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁, 𑀢𑀺𑀯𑀺𑀥𑀜𑀸𑀡𑀧𑀭𑀺𑀕𑁆𑀕𑀳𑀺𑀢𑀁 𑀤𑁄𑀲𑀢𑁆𑀢𑀬𑀯𑀺𑀭𑁄𑀥𑀺 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁. 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀘𑀸𑀕𑀽𑀧𑀲𑀫𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀸𑀦𑀺 𑀅𑀯𑀺𑀲𑀁𑀯𑀸𑀤𑀦𑀢𑁄, 𑀧𑀝𑀺𑀜𑁆𑀜𑀸𑀦𑀼𑀯𑀺𑀥𑀸𑀦𑀢𑁄 𑀘. 𑀘𑀸𑀕𑀸𑀥𑀺𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀲𑀘𑁆𑀘𑀽𑀧𑀲𑀫𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀸𑀦𑀺 𑀧𑀝𑀺𑀧𑀓𑁆𑀔𑀧𑀭𑀺𑀘𑁆𑀘𑀸𑀕𑀢𑁄, 𑀲𑀩𑁆𑀩𑀧𑀭𑀺𑀘𑁆𑀘𑀸𑀕𑀨𑀮𑀢𑁆𑀢𑀸 𑀘. 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀲𑀘𑁆𑀘𑀘𑀸𑀕𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀸𑀦𑀺 𑀓𑀺𑀮𑁂𑀲𑀧𑀭𑀺𑀴𑀸𑀳𑀽𑀧𑀲𑀫𑀦𑀢𑁄, 𑀓𑀫𑁆𑀫𑀧𑀭𑀺𑀴𑀸𑀳𑀽𑀧𑀲𑀫𑀦𑀢𑁄 𑀘. 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑀺𑀢𑀸𑀦𑀺 𑀲𑀘𑁆𑀘𑀘𑀸𑀕𑀽𑀧𑀲𑀫𑀸𑀥𑀺𑀝𑁆𑀞𑀸𑀦𑀸𑀦𑀺 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀢𑁄, 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀦𑀢𑁄 𑀘𑀸𑀢𑀺 𑀏𑀯𑀁 𑀲𑀩𑁆𑀩𑀸𑀧𑀺 𑀧𑀸𑀭𑀫𑀺𑀬𑁄 𑀲𑀘𑁆𑀘𑀧𑁆𑀧𑀪𑀸𑀯𑀺𑀢𑀸 𑀘𑀸𑀕𑀧𑀭𑀺𑀩𑁆𑀬𑀜𑁆𑀚𑀺𑀢𑀸 𑀉𑀧𑀲𑀫𑁄𑀧𑀩𑁆𑀭𑀽𑀳𑀺𑀢𑀸 𑀧𑀜𑁆𑀜𑀸𑀧𑀭𑀺𑀲𑀼𑀤𑁆𑀥𑀸. 𑀲𑀘𑁆𑀘𑀜𑁆𑀳𑀺 𑀏𑀢𑀸𑀲𑀁 𑀚𑀦𑀓𑀳𑁂𑀢𑀼, 𑀘𑀸𑀕𑁄 𑀧𑀝𑀺𑀕𑁆𑀕𑀸𑀳𑀓𑀳𑁂𑀢𑀼, 𑀉𑀧𑀲𑀫𑁄 𑀧𑀭𑀺𑀩𑀼𑀤𑁆𑀥𑀺𑀳𑁂𑀢𑀼 𑀧𑀜𑁆𑀜𑀸 𑀧𑀸𑀭𑀺𑀲𑀼𑀤𑁆𑀥𑀺𑀳𑁂𑀢𑀼. 𑀢𑀣𑀸 𑀆𑀤𑀺𑀫𑁆𑀳𑀺 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁 𑀲𑀘𑁆𑀘𑀧𑀝𑀺𑀜𑁆𑀜𑀢𑁆𑀢𑀸, 𑀫𑀚𑁆𑀛𑁂 𑀘𑀸𑀕𑀸𑀥𑀺𑀝𑁆𑀞𑀸𑀦𑀁 𑀓𑀢𑀧𑀡𑀺𑀥𑀸𑀦𑀲𑁆𑀲 ¶ 𑀧𑀭𑀳𑀺𑀢𑀸𑀬 𑀅𑀢𑁆𑀢𑀧𑀭𑀺𑀘𑁆𑀘𑀸𑀕𑀢𑁄, 𑀅𑀦𑁆𑀢𑁂 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁 𑀲𑀩𑁆𑀩𑀽𑀧𑀲𑀫𑀧𑀭𑀺𑀬𑁄𑀲𑀸𑀦𑀢𑁆𑀢𑀸. 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁 𑀢𑀲𑁆𑀫𑀺𑀁 𑀲𑀢𑀺 𑀲𑀫𑁆𑀪𑀯𑀢𑁄, 𑀅𑀲𑀢𑀺 𑀅𑀲𑀫𑁆𑀪𑀯𑀢𑁄, 𑀬𑀣𑀸𑀧𑀝𑀺𑀜𑁆𑀜𑀜𑁆𑀘 𑀲𑀫𑁆𑀪𑀯𑀢𑁄.

𑀢𑀢𑁆𑀣 ¶ 𑀫𑀳𑀸𑀧𑀼𑀭𑀺𑀲𑀸 𑀲𑀢𑀢𑀁 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀓𑀭𑁂𑀳𑀺 𑀕𑀭𑀼𑀧𑀺𑀬𑀪𑀸𑀯𑀓𑀭𑁂𑀳𑀺 𑀲𑀘𑁆𑀘𑀘𑀸𑀕𑀸𑀥𑀺𑀝𑁆𑀞𑀸𑀦𑁂𑀳𑀺 𑀕𑀺𑀳𑀺𑀪𑀽𑀢𑀸 𑀆𑀫𑀺𑀲𑀤𑀸𑀦𑁂𑀦 𑀧𑀭𑁂 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀺. 𑀢𑀣𑀸 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀓𑀭𑁂𑀳𑀺, 𑀕𑀭𑀼𑀧𑀺𑀬𑀪𑀸𑀯𑀓𑀭𑁂𑀳𑀺, 𑀉𑀧𑀲𑀫𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑁂𑀳𑀺 𑀘 𑀧𑀩𑁆𑀩𑀚𑀺𑀢𑀪𑀽𑀢𑀸 𑀥𑀫𑁆𑀫𑀤𑀸𑀦𑁂𑀦 𑀧𑀭𑁂 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀺.

𑀢𑀢𑁆𑀣 𑀅𑀦𑁆𑀢𑀺𑀫𑀪𑀯𑁂 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀁. 𑀧𑀭𑀺𑀧𑀼𑀡𑁆𑀡𑀘𑀢𑀼𑀭𑀥𑀺𑀝𑁆𑀞𑀸𑀦𑀲𑁆𑀲 𑀳𑀺 𑀘𑀭𑀺𑀫𑀓𑀪𑀯𑀽𑀧𑀧𑀢𑁆𑀢𑀻𑀢𑀺 𑀏𑀓𑁂. 𑀢𑀢𑁆𑀭𑀸𑀧𑀺 𑀳𑀺 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺𑀅𑀪𑀺𑀦𑀺𑀓𑁆𑀔𑀫𑀦𑁂𑀲𑀼 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀧𑀸𑀭𑀺𑀧𑀽𑀭𑀺𑀬𑀸 𑀲𑀫𑁆𑀧𑀢𑀺𑀚𑀸𑀢𑁄 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀦𑁆𑀢𑁆𑀯𑀸 𑀲𑀩𑁆𑀩𑀸 𑀤𑀺𑀲𑀸 𑀑𑀮𑁄𑀓𑁂𑀢𑁆𑀯𑀸 𑀲𑀘𑁆𑀘𑀸𑀦𑀼𑀧𑀭𑀺𑀯𑀢𑁆𑀢𑀺𑀦𑀸 𑀯𑀘𑀲𑀸 ‘‘𑀅𑀕𑁆𑀕𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀚𑁂𑀝𑁆𑀞𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲, 𑀲𑁂𑀝𑁆𑀞𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲𑀸’’𑀢𑀺 (𑀤𑀻. 𑀦𑀺. 𑁨.𑁩𑁧; 𑀫. 𑀦𑀺. 𑁩.𑁨𑁦𑁭) 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺, 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀚𑀺𑀡𑁆𑀡𑀸𑀢𑀼𑀭𑀫𑀢𑀧𑀩𑁆𑀩𑀚𑀺𑀢𑀤𑀲𑁆𑀲𑀸𑀯𑀺𑀦𑁄 𑀘𑀢𑀼𑀥𑀫𑁆𑀫𑀧𑁆𑀧𑀤𑁂𑀲𑀓𑁄𑀯𑀺𑀤𑀲𑁆𑀲 𑀬𑁄𑀩𑁆𑀩𑀦𑀸𑀭𑁄𑀕𑁆𑀬𑀚𑀻𑀯𑀺𑀢𑀲𑀫𑁆𑀧𑀢𑁆𑀢𑀺𑀫𑀤𑀸𑀦𑀁 𑀉𑀧𑀲𑀫𑁄, 𑀘𑀸𑀕𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀫𑀳𑀢𑁄 𑀜𑀸𑀢𑀺𑀧𑀭𑀺𑀯𑀝𑁆𑀝𑀲𑁆𑀲, 𑀳𑀢𑁆𑀣𑀕𑀢𑀲𑁆𑀲 𑀘 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀲𑁆𑀲 𑀅𑀦𑀧𑁂𑀓𑁆𑀔𑀧𑀭𑀺𑀘𑁆𑀘𑀸𑀕𑁄𑀢𑀺.

𑀤𑀼𑀢𑀺𑀬𑁂 𑀞𑀸𑀦𑁂 𑀅𑀪𑀺𑀲𑀫𑁆𑀩𑁄𑀥𑀺𑀬𑀁 𑀘𑀢𑀼𑀭𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀦𑁆𑀢𑀺 𑀓𑁂𑀘𑀺. 𑀢𑀢𑁆𑀣 𑀳𑀺 𑀬𑀣𑀸𑀧𑀝𑀺𑀜𑁆𑀜𑀁 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀅𑀪𑀺𑀲𑀫𑀬𑁄. 𑀢𑀢𑁄 𑀳𑀺 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁. 𑀘𑀸𑀕𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀲𑀩𑁆𑀩𑀓𑀺𑀮𑁂𑀲𑀼𑀧𑀓𑁆𑀓𑀺𑀮𑁂𑀲𑀧𑀭𑀺𑀘𑁆𑀘𑀸𑀕𑁄. 𑀢𑀢𑁄 𑀳𑀺 𑀘𑀸𑀕𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁. 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀧𑀭𑀫𑀽𑀧𑀲𑀫𑀲𑀫𑁆𑀧𑀢𑁆𑀢𑀺. 𑀢𑀢𑁄 𑀳𑀺 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁. 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀅𑀦𑀸𑀯𑀭𑀡𑀜𑀸𑀡𑀧𑀝𑀺𑀮𑀸𑀪𑁄. 𑀢𑀢𑁄 𑀳𑀺 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀦𑁆𑀢𑀺, 𑀢𑀁 𑀅𑀲𑀺𑀤𑁆𑀥𑀁 𑀅𑀪𑀺𑀲𑀫𑁆𑀩𑁄𑀥𑀺𑀬𑀸𑀧𑀺 𑀧𑀭𑀫𑀢𑁆𑀣𑀪𑀸𑀯𑀢𑁄.

𑀢𑀢𑀺𑀬𑁂 𑀞𑀸𑀦𑁂 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂 𑀘𑀢𑀼𑀭𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀜𑁆𑀜𑁂. 𑀢𑀢𑁆𑀣 𑀳𑀺 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀤𑁆𑀯𑀸𑀤𑀲𑀳𑀺 𑀆𑀓𑀸𑀭𑁂𑀳𑀺 𑀅𑀭𑀺𑀬𑀲𑀘𑁆𑀘𑀤𑁂𑀲𑀦𑀸𑀬 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁, 𑀘𑀸𑀕𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀲𑀤𑁆𑀥𑀫𑁆𑀫𑀫𑀳𑀸𑀬𑀸𑀕𑀓𑀭𑀡𑁂𑀦 𑀘𑀸𑀕𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁, 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀲𑀬𑀁 𑀉𑀧𑀲𑀦𑁆𑀢𑀲𑁆𑀲 𑀧𑀭𑁂𑀲𑀁 𑀉𑀧𑀲𑀫𑀦𑁂𑀦 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀁, 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 ¶ 𑀯𑀺𑀦𑁂𑀬𑁆𑀬𑀸𑀦𑀁 𑀆𑀲𑀬𑀸𑀤𑀺𑀧𑀭𑀺𑀚𑀸𑀦𑀦𑁂𑀦 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀦𑁆𑀢𑀺, 𑀢𑀤𑀧𑀺 𑀅𑀲𑀺𑀤𑁆𑀥𑀁 𑀅𑀧𑀭𑀺𑀬𑁄𑀲𑀺𑀢𑀢𑁆𑀢𑀸 𑀩𑀼𑀤𑁆𑀥𑀓𑀺𑀘𑁆𑀘𑀲𑁆𑀲.

𑀘𑀢𑀼𑀢𑁆𑀣𑁂 ¶ 𑀞𑀸𑀦𑁂 𑀧𑀭𑀺𑀦𑀺𑀩𑁆𑀩𑀸𑀦𑁂 𑀘𑀢𑀼𑀭𑀥𑀺𑀝𑁆𑀞𑀸𑀦𑀁 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀧𑀭𑁂. 𑀢𑀢𑁆𑀭 𑀳𑀺 𑀧𑀭𑀺𑀦𑀺𑀩𑁆𑀩𑀼𑀢𑀢𑁆𑀢𑀸 𑀧𑀭𑀫𑀢𑁆𑀣𑀲𑀘𑁆𑀘𑀲𑀫𑁆𑀧𑀢𑁆𑀢𑀺𑀬𑀸 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀁, 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁂𑀦 𑀘𑀸𑀕𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀁, 𑀲𑀩𑁆𑀩𑀲𑀗𑁆𑀔𑀸𑀭𑀽𑀧𑀲𑀫𑁂𑀦 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀁, 𑀧𑀜𑁆𑀜𑀸𑀧𑀬𑁄𑀚𑀦𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀦𑁆𑀢𑀺.

𑀢𑀢𑁆𑀭 𑀫𑀳𑀸𑀧𑀼𑀭𑀺𑀲𑀲𑁆𑀲 𑀯𑀺𑀲𑁂𑀲𑁂𑀦 𑀫𑁂𑀢𑁆𑀢𑀸𑀔𑁂𑀢𑁆𑀢𑁂 𑀅𑀪𑀺𑀚𑀸𑀢𑀺𑀬𑀁 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀫𑀪𑀺𑀩𑁆𑀬𑀢𑁆𑀢𑀁, 𑀯𑀺𑀲𑁂𑀲𑁂𑀦 𑀓𑀭𑀼𑀡𑀸𑀔𑁂𑀢𑁆𑀢𑁂 𑀅𑀪𑀺𑀲𑀫𑁆𑀩𑁄𑀥𑀺𑀬𑀁 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀫𑀪𑀺𑀩𑁆𑀬𑀢𑁆𑀢𑀁, 𑀯𑀺𑀲𑁂𑀲𑁂𑀦 𑀫𑀼𑀤𑀺𑀢𑀸𑀔𑁂𑀢𑁆𑀢𑁂 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂 𑀘𑀸𑀕𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀘𑀸𑀕𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀫𑀪𑀺𑀩𑁆𑀬𑀢𑁆𑀢𑀁, 𑀯𑀺𑀲𑁂𑀲𑁂𑀦 𑀉𑀧𑁂𑀓𑁆𑀔𑀸𑀔𑁂𑀢𑁆𑀢𑁂 𑀧𑀭𑀺𑀦𑀺𑀩𑁆𑀩𑀸𑀦𑁂 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀧𑀭𑀺𑀧𑀽𑀭𑀡𑀫𑀪𑀺𑀩𑁆𑀬𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀢𑁆𑀭𑀸𑀧𑀺 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀲𑀁𑀯𑀸𑀲𑁂𑀦 𑀲𑀻𑀮𑀁 𑀯𑁂𑀤𑀺𑀢𑀩𑁆𑀩𑀁, 𑀘𑀸𑀕𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀲𑀁𑀯𑁄𑀳𑀸𑀭𑁂𑀦 𑀲𑁄𑀘𑁂𑀬𑁆𑀬𑀁 𑀯𑁂𑀤𑀺𑀢𑀩𑁆𑀩𑀁, 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀆𑀧𑀤𑀸𑀲𑀼 𑀣𑀸𑀫𑁄 𑀯𑁂𑀤𑀺𑀢𑀩𑁆𑀩𑁄, 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀢𑀲𑁆𑀲 𑀲𑀸𑀓𑀘𑁆𑀙𑀸𑀬 𑀧𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀁 𑀲𑀻𑀮𑀸𑀚𑀻𑀯𑀘𑀺𑀢𑁆𑀢𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀤𑁄𑀲𑀸𑀕𑀢𑀺𑀁 𑀦 𑀕𑀘𑁆𑀙𑀢𑀺 𑀅𑀯𑀺𑀲𑀁𑀯𑀸𑀤𑀦𑀢𑁄, 𑀘𑀸𑀕𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀙𑀦𑁆𑀤𑀸𑀕𑀢𑀺𑀁 𑀦 𑀕𑀘𑁆𑀙𑀢𑀺 𑀅𑀦𑀪𑀺𑀲𑀗𑁆𑀕𑀢𑁄, 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀪𑀬𑀸𑀕𑀢𑀺𑀁 𑀦 𑀕𑀘𑁆𑀙𑀢𑀺 𑀅𑀦𑀼𑀧𑀭𑁄𑀥𑀢𑁄, 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀲𑀫𑀼𑀤𑀸𑀕𑀫𑁂𑀦 𑀫𑁄𑀳𑀸𑀕𑀢𑀺𑀁 𑀦 𑀕𑀘𑁆𑀙𑀢𑀺 𑀬𑀣𑀸𑀪𑀽𑀢𑀸𑀯𑀩𑁄𑀥𑀢𑁄.

𑀢𑀣𑀸 𑀧𑀞𑀫𑁂𑀦 𑀅𑀤𑀼𑀝𑁆𑀞𑁄 𑀅𑀥𑀺𑀯𑀸𑀲𑁂𑀢𑀺, 𑀤𑀼𑀢𑀺𑀬𑁂𑀦 𑀅𑀮𑀼𑀤𑁆𑀥𑁄 𑀧𑀝𑀺𑀲𑁂𑀯𑀢𑀺, 𑀢𑀢𑀺𑀬𑁂𑀦 𑀅𑀪𑀻𑀢𑁄 𑀧𑀭𑀺𑀯𑀚𑁆𑀚𑁂𑀢𑀺, 𑀘𑀢𑀼𑀢𑁆𑀣𑁂𑀦 𑀅𑀲𑀁𑀫𑀽𑀴𑁆𑀳𑁄 𑀯𑀺𑀦𑁄𑀤𑁂𑀢𑀺. 𑀧𑀞𑀫𑁂𑀦 𑀦𑁂𑀓𑁆𑀔𑀫𑁆𑀫𑀲𑀼𑀔𑀼𑀧𑁆𑀧𑀢𑁆𑀢𑀺, 𑀇𑀢𑀭𑁂𑀳𑀺 𑀧𑀯𑀺𑀯𑁂𑀓𑀉𑀧𑀲𑀫𑀲𑀫𑁆𑀩𑁄𑀥𑀺𑀲𑀼𑀔𑀼𑀧𑁆𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀺. 𑀢𑀣𑀸 𑀯𑀺𑀯𑁂𑀓𑀚𑀧𑀻𑀢𑀺𑀲𑀼𑀔𑀲𑀫𑀸𑀥𑀺𑀚𑀧𑀻𑀢𑀺𑀲𑀼𑀔𑀅𑀧𑀻𑀢𑀺𑀚𑀓𑀸𑀬𑀲𑀼𑀔 𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀚𑀉𑀧𑁂𑀓𑁆𑀔𑀸𑀲𑀼𑀔𑀼𑀧𑁆𑀧𑀢𑁆𑀢𑀺𑀬𑁄 𑀏𑀢𑁂𑀳𑀺 𑀘𑀢𑀽𑀳𑀺 𑀬𑀣𑀸𑀓𑁆𑀓𑀫𑀁 𑀳𑁄𑀦𑁆𑀢𑀻𑀢𑀺. 𑀏𑀯𑀫𑀦𑁂𑀓𑀕𑀼𑀡𑀸𑀦𑀼𑀩𑀦𑁆𑀥𑁂𑀳𑀺 𑀘𑀢𑀽𑀳𑀺 𑀅𑀥𑀺𑀝𑁆𑀞𑀸𑀦𑁂𑀳𑀺 𑀲𑀩𑁆𑀩𑀧𑀸𑀭𑀫𑀺𑀲𑀫𑀽𑀳𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘 𑀘𑀢𑀽𑀳𑀺 𑀅𑀥𑀺𑀝𑁆𑀞𑀸𑀦𑁂𑀳𑀺 𑀲𑀩𑁆𑀩𑀧𑀸𑀭𑀫𑀺𑀲𑀗𑁆𑀕𑀳𑁄, 𑀏𑀯𑀁 𑀓𑀭𑀼𑀡𑀸𑀧𑀜𑁆𑀜𑀸𑀳𑀺𑀧𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑁄𑀧𑀺 𑀳𑀺 𑀩𑁄𑀥𑀺𑀲𑀫𑁆𑀪𑀸𑀭𑁄 𑀓𑀭𑀼𑀡𑀸𑀧𑀜𑁆𑀜𑀸𑀳𑀺 𑀲𑀗𑁆𑀕𑀳𑀺𑀢𑁄. 𑀓𑀭𑀼𑀡𑀸𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑀺𑀢𑀸 𑀳𑀺 𑀤𑀸𑀦𑀸𑀤𑀺𑀕𑀼𑀡𑀸 𑀫𑀳𑀸𑀩𑁄𑀥𑀺𑀲𑀫𑁆𑀪𑀸𑀭𑀸 𑀪𑀯𑀦𑁆𑀢𑀺 𑀩𑀼𑀤𑁆𑀥𑀢𑁆𑀢𑀲𑀺𑀤𑁆𑀥𑀺𑀧𑀭𑀺𑀬𑁄𑀲𑀸𑀦𑀸𑀢𑀺. 𑀏𑀯𑀫𑁂𑀢𑀸𑀲𑀁 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑀓𑁄 ¶ ¶ 𑀲𑀫𑁆𑀧𑀸𑀤𑀦𑀽𑀧𑀸𑀬𑁄𑀢𑀺 𑁋

𑀲𑀩𑁆𑀩𑀸𑀲𑀁 𑀧𑀦 𑀢𑀸𑀲𑀫𑁆𑀧𑀺, 𑀉𑀧𑀸𑀬𑁄𑀢𑀺 𑀲𑀫𑁆𑀧𑀸𑀤𑀦𑁂;

𑀅𑀯𑁂𑀓𑀮𑁆𑀮𑀸𑀤𑀬𑁄 𑀅𑀢𑁆𑀢-𑀦𑀺𑀬𑁆𑀬𑀸𑀢𑀦𑀸𑀤𑀬𑁄 𑀫𑀢𑀸.

𑀲𑀓𑀮𑀲𑁆𑀲𑀸𑀧𑀺 𑀳𑀺 𑀧𑀼𑀜𑁆𑀜𑀸𑀤𑀺𑀲𑀫𑁆𑀪𑀸𑀭𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀉𑀤𑁆𑀤𑀺𑀲𑁆𑀲 𑀅𑀦𑀯𑀲𑁂𑀲𑀲𑀫𑁆𑀪𑀭𑀡𑀁 𑀅𑀯𑁂𑀓𑀮𑁆𑀮𑀓𑀸𑀭𑀺𑀢𑀸𑀬𑁄𑀕𑁂𑀦, 𑀢𑀢𑁆𑀣 𑀘 𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸 𑀆𑀤𑀭𑀩𑀳𑀼𑀫𑀸𑀦𑀬𑁄𑀕𑁂𑀦, 𑀲𑀸𑀢𑀘𑁆𑀘𑀓𑀸𑀭𑀺𑀢𑀸 𑀦𑀺𑀭𑀦𑁆𑀢𑀭𑀧𑀬𑁄𑀕𑁂𑀦, 𑀘𑀺𑀭𑀓𑀸𑀮𑀸𑀤𑀺𑀬𑁄𑀕𑁄 𑀘 𑀅𑀦𑁆𑀢𑀭𑀸 𑀅𑀯𑁄𑀲𑀸𑀦𑀸𑀧𑀚𑁆𑀚𑀦𑁂𑀦𑀸𑀢𑀺. 𑀢𑀁 𑀧𑀦𑀲𑁆𑀲 𑀓𑀸𑀮𑀧𑀭𑀺𑀫𑀸𑀡𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀇𑀢𑀺 𑀘𑀢𑀼𑀭𑀗𑁆𑀕𑀬𑁄𑀕𑁄 𑀏𑀢𑀸𑀲𑀁 𑀧𑀸𑀭𑀫𑀻𑀦𑀁 𑀲𑀫𑁆𑀧𑀸𑀤𑀦𑀽𑀧𑀸𑀬𑁄.

𑀢𑀣𑀸 𑀫𑀳𑀸𑀲𑀢𑁆𑀢𑁂𑀦 𑀩𑁄𑀥𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀸𑀬 𑀩𑀼𑀤𑁆𑀥𑀸𑀦𑀁 𑀧𑀼𑀭𑁂𑀢𑀭𑀫𑁂𑀯 𑀅𑀢𑁆𑀢𑀸 𑀦𑀺𑀬𑁆𑀬𑀸𑀢𑁂𑀢𑀩𑁆𑀩𑁄 ‘‘𑀇𑀫𑀸𑀳𑀁 𑀅𑀢𑁆𑀢𑀪𑀸𑀯𑀁 𑀩𑀼𑀤𑁆𑀥𑀸𑀦𑀁 𑀦𑀺𑀬𑁆𑀬𑀸𑀢𑁂𑀫𑀻’’𑀢𑀺. 𑀢𑀁 𑀢𑀁 𑀧𑀭𑀺𑀕𑁆𑀕𑀳𑀯𑀢𑁆𑀣𑀼𑀜𑁆𑀘 𑀧𑀝𑀺𑀮𑀸𑀪𑀢𑁄 𑀧𑀼𑀭𑁂𑀢𑀭𑀫𑁂𑀯 𑀤𑀸𑀦𑀫𑀼𑀔𑁂 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 ‘‘𑀬𑀁 𑀓𑀺𑀜𑁆𑀘𑀺 𑀫𑀬𑁆𑀳𑀁 𑀉𑀧𑁆𑀧𑀚𑁆𑀚𑀦𑀓𑀁 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀚𑀸𑀢𑀁, 𑀢𑀁 𑀲𑀩𑁆𑀩𑀁 𑀲𑀢𑀺 𑀬𑀸𑀘𑀓𑁂 𑀤𑀲𑁆𑀲𑀸𑀫𑀺, 𑀢𑁂𑀲𑀁 𑀧𑀦 𑀤𑀺𑀦𑁆𑀦𑀸𑀯𑀲𑁂𑀲𑀁 𑀏𑀯 𑀫𑀬𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺.

𑀏𑀯𑀜𑁆𑀳𑀺𑀲𑁆𑀲 𑀲𑀫𑁆𑀫𑀤𑁂𑀯 𑀧𑀭𑀺𑀘𑁆𑀘𑀸𑀕𑀸𑀬 𑀓𑀢𑁂 𑀘𑀺𑀢𑁆𑀢𑀸𑀪𑀺𑀲𑀗𑁆𑀔𑀸𑀭𑁂 𑀬𑀁 𑀉𑀧𑁆𑀧𑀚𑁆𑀚𑀢𑀺 𑀧𑀭𑀺𑀕𑁆𑀕𑀳𑀯𑀢𑁆𑀣𑀼 𑀅𑀯𑀺𑀜𑁆𑀜𑀸𑀡𑀓𑀁, 𑀲𑀯𑀺𑀜𑁆𑀜𑀸𑀡𑀓𑀁 𑀯𑀸, 𑀢𑀢𑁆𑀣 𑀬𑁂 𑀇𑀫𑁂 𑀧𑀼𑀩𑁆𑀩𑁂 𑀤𑀸𑀦𑁂 𑀅𑀓𑀢𑀧𑀭𑀺𑀘𑀬𑁄, 𑀧𑀭𑀺𑀕𑁆𑀕𑀳𑀯𑀢𑁆𑀣𑀼𑀲𑁆𑀲 𑀧𑀭𑀺𑀢𑁆𑀢𑀪𑀸𑀯𑁄, 𑀉𑀴𑀸𑀭𑀫𑀦𑀼𑀜𑁆𑀜𑀢𑀸, 𑀧𑀭𑀺𑀓𑁆𑀔𑀬𑀘𑀺𑀦𑁆𑀢𑀸𑀢𑀺 𑀘𑀢𑁆𑀢𑀸𑀭𑁄 𑀤𑀸𑀦𑀯𑀺𑀦𑀺𑀩𑀦𑁆𑀥𑀸. 𑀢𑁂𑀲𑀼 𑀬𑀤𑀸 𑀫𑀳𑀸𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀁𑀯𑀺𑀚𑁆𑀚𑀫𑀸𑀦𑁂𑀲𑀼 𑀤𑁂𑀬𑁆𑀬𑀥𑀫𑁆𑀫𑁂𑀲𑀼, 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀘 𑀬𑀸𑀘𑀓𑀚𑀦𑁂 𑀤𑀸𑀦𑁂 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺 𑀦 𑀓𑀫𑀢𑀺, 𑀢𑁂𑀦 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 ‘‘𑀅𑀤𑁆𑀥𑀸𑀳𑀁 𑀤𑀸𑀦𑁂 𑀧𑀼𑀩𑁆𑀩𑁂 𑀅𑀓𑀢𑀧𑀭𑀺𑀘𑀬𑁄, 𑀢𑁂𑀦 𑀫𑁂 𑀏𑀢𑀭𑀳𑀺 𑀤𑀸𑀢𑀼𑀓𑀫𑁆𑀬𑀢𑀸 𑀘𑀺𑀢𑁆𑀢𑁂 𑀦 𑀲𑀡𑁆𑀞𑀸𑀢𑀻’’𑀢𑀺. 𑀲𑁄 ‘‘𑀏𑀯𑀁 𑀫𑁂 𑀇𑀢𑁄 𑀧𑀭𑀁 𑀤𑀸𑀦𑀸𑀪𑀺𑀭𑀢𑀁 𑀘𑀺𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀳𑀦𑁆𑀤𑀸𑀳𑀁 𑀇𑀢𑁄 𑀧𑀝𑁆𑀞𑀸𑀬 𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀦𑀦𑀼 𑀫𑀬𑀸 𑀧𑀝𑀺𑀓𑀘𑁆𑀘𑁂𑀯 𑀧𑀭𑀺𑀕𑁆𑀕𑀳𑀯𑀢𑁆𑀣𑀼𑀁 𑀬𑀸𑀘𑀓𑀸𑀦𑀁 𑀧𑀭𑀺𑀘𑁆𑀘𑀢𑁆𑀢’’𑀦𑁆𑀢𑀺 𑀤𑀸𑀦𑀁 𑀤𑁂𑀢𑀺 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀺 𑀯𑁄𑀲𑁆𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄. 𑀏𑀯𑀁 𑀫𑀳𑀸𑀲𑀢𑁆𑀢𑀲𑁆𑀲 𑀧𑀞𑀫𑁄 𑀤𑀸𑀦𑀯𑀺𑀦𑀺𑀩𑀦𑁆𑀥𑁄 𑀳𑀢𑁄 𑀳𑁄𑀢𑀺 𑀯𑀺𑀳𑀢𑁄 𑀲𑀫𑀼𑀘𑁆𑀙𑀺𑀦𑁆𑀦𑁄.

𑀢𑀣𑀸 𑀫𑀳𑀸𑀲𑀢𑁆𑀢𑁄 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀧𑀭𑀺𑀢𑁆𑀢𑀪𑀸𑀯𑁂 𑀲𑀢𑀺 𑀧𑀘𑁆𑀘𑀬𑀯𑁂𑀓𑀮𑁆𑀮𑁂 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 ‘‘𑀅𑀳𑀁 𑀔𑁄 𑀧𑀼𑀩𑁆𑀩𑁂 𑀅𑀤𑀸𑀦𑀲𑀻𑀮𑀢𑀸𑀬 𑀏𑀢𑀭𑀳𑀺 𑀏𑀯𑀁 𑀧𑀘𑁆𑀘𑀬𑀯𑁂𑀓𑀮𑁆𑀮𑁄 𑀚𑀸𑀢𑁄, 𑀢𑀲𑁆𑀫𑀸 𑀇𑀤𑀸𑀦𑀺 𑀫𑀬𑀸 𑀧𑀭𑀺𑀢𑁆𑀢𑁂𑀦 𑀯𑀸 𑀳𑀻𑀦𑁂𑀦 𑀯𑀸 𑀬𑀣𑀸𑀮𑀤𑁆𑀥𑁂𑀦 ¶ 𑀤𑁂𑀬𑁆𑀬𑀥𑀫𑁆𑀫𑁂𑀦 𑀅𑀢𑁆𑀢𑀸𑀦𑀁 𑀧𑀻𑀴𑁂𑀢𑁆𑀯𑀸𑀧𑀺 𑀤𑀸𑀦𑀫𑁂𑀯 𑀤𑀸𑀢𑀩𑁆𑀩𑀁, 𑀬𑁂𑀦𑀸𑀳𑀁 𑀆𑀬𑀢𑀺𑀫𑁆𑀧𑀺 𑀤𑀸𑀦𑀧𑀸𑀭𑀫𑀺𑀁 𑀫𑀢𑁆𑀣𑀓𑀁 𑀧𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀲𑁄 𑀇𑀢𑀭𑀻𑀢𑀭𑁂𑀦 𑀤𑀸𑀦𑀁 𑀤𑁂𑀢𑀺 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀺 ¶ 𑀯𑁄𑀲𑁆𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄. 𑀏𑀯𑀁 𑀫𑀳𑀸𑀲𑀢𑁆𑀢𑀲𑁆𑀲 𑀤𑀼𑀢𑀺𑀬𑁄 𑀤𑀸𑀦𑀯𑀺𑀦𑀺𑀩𑀦𑁆𑀥𑁄 𑀳𑀢𑁄 𑀳𑁄𑀢𑀺 𑀯𑀺𑀳𑀢𑁄 𑀲𑀫𑀼𑀘𑁆𑀙𑀺𑀦𑁆𑀦𑁄.

𑀢𑀣𑀸 𑀫𑀳𑀸𑀲𑀢𑁆𑀢𑁄 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀉𑀴𑀸𑀭𑀫𑀦𑀼𑀜𑁆𑀜𑀢𑀸𑀬 𑀅𑀤𑀸𑀢𑀼𑀓𑀫𑁆𑀬𑀢𑀸𑀘𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀫𑀸𑀦𑁂 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 ‘‘𑀦𑀦𑀼 𑀢𑀬𑀸 𑀲𑀧𑁆𑀧𑀼𑀭𑀺𑀲 𑀉𑀴𑀸𑀭𑀢𑀫𑀸 𑀲𑀩𑁆𑀩𑀲𑁂𑀝𑁆𑀞𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺 𑀅𑀪𑀺𑀧𑀢𑁆𑀣𑀺𑀢𑀸, 𑀢𑀲𑁆𑀫𑀸 𑀢𑀤𑀢𑁆𑀣𑀁 𑀢𑀬𑀸 𑀉𑀴𑀸𑀭𑀫𑀦𑀼𑀜𑁆𑀜𑁂 𑀏𑀯 𑀤𑁂𑀬𑁆𑀬𑀥𑀫𑁆𑀫𑁂 𑀤𑀸𑀢𑀼𑀁 𑀬𑀼𑀢𑁆𑀢𑀭𑀽𑀧’’𑀦𑁆𑀢𑀺. 𑀲𑁄 𑀉𑀴𑀸𑀭𑀁, 𑀫𑀦𑀼𑀜𑁆𑀜𑀜𑁆𑀘 𑀤𑀸𑀦𑀁 𑀤𑁂𑀢𑀺 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀺 𑀯𑁄𑀲𑁆𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄. 𑀏𑀯𑀁 𑀫𑀳𑀸𑀧𑀼𑀭𑀺𑀲𑀲𑁆𑀲 𑀢𑀢𑀺𑀬𑁄 𑀤𑀸𑀦𑀯𑀺𑀦𑀺𑀩𑀦𑁆𑀥𑁄 𑀳𑀢𑁄 𑀳𑁄𑀢𑀺 𑀯𑀺𑀳𑀢𑁄 𑀲𑀫𑀼𑀘𑁆𑀙𑀺𑀦𑁆𑀦𑁄.

𑀢𑀣𑀸 𑀫𑀳𑀸𑀲𑀢𑁆𑀢𑁄 𑀤𑀸𑀦𑀁 𑀤𑁂𑀦𑁆𑀢𑁄 𑀬𑀤𑀸 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀧𑀭𑀺𑀓𑁆𑀔𑀬𑀁 𑀧𑀲𑁆𑀲𑀢𑀺, 𑀲𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 ‘‘𑀅𑀬𑀁 𑀔𑁄 𑀪𑁄𑀕𑀸𑀦𑀁 𑀲𑀪𑀸𑀯𑁄, 𑀬𑀤𑀺𑀤𑀁 𑀔𑀬𑀥𑀫𑁆𑀫𑀢𑀸 𑀯𑀬𑀥𑀫𑁆𑀫𑀢𑀸, 𑀅𑀧𑀺𑀘 𑀫𑁂 𑀧𑀼𑀩𑁆𑀩𑁂 𑀢𑀸𑀤𑀺𑀲𑀲𑁆𑀲 𑀤𑀸𑀦𑀲𑁆𑀲 𑀅𑀓𑀢𑀢𑁆𑀢𑀸 𑀏𑀯𑀁 𑀪𑁄𑀕𑀸𑀦𑀁 𑀧𑀭𑀺𑀓𑁆𑀔𑀬𑁄 𑀤𑀺𑀲𑁆𑀲𑀢𑀺, 𑀳𑀦𑁆𑀤𑀸𑀳𑀁 𑀬𑀣𑀸𑀮𑀤𑁆𑀥𑁂𑀦 𑀤𑁂𑀬𑁆𑀬𑀥𑀫𑁆𑀫𑁂𑀦 𑀧𑀭𑀺𑀢𑁆𑀢𑁂𑀦 𑀯𑀸, 𑀯𑀺𑀧𑀼𑀮𑁂𑀦 𑀯𑀸 𑀤𑀸𑀦𑀫𑁂𑀯 𑀤𑀤𑁂𑀬𑁆𑀬𑀁, 𑀬𑁂𑀦𑀸𑀳𑀁 𑀆𑀬𑀢𑀺𑀁 𑀤𑀸𑀦𑀧𑀸𑀭𑀫𑀺𑀬𑀸 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’𑀢𑀺. 𑀲𑁄 𑀬𑀣𑀸𑀮𑀤𑁆𑀥𑁂𑀦 𑀤𑀸𑀦𑀁 𑀤𑁂𑀢𑀺 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀺 𑀯𑁄𑀲𑁆𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄. 𑀏𑀯𑀁 𑀫𑀳𑀸𑀲𑀢𑁆𑀢𑀲𑁆𑀲 𑀘𑀢𑀼𑀢𑁆𑀣𑁄 𑀤𑀸𑀦𑀯𑀺𑀦𑀺𑀩𑀦𑁆𑀥𑁄 𑀳𑀢𑁄 𑀳𑁄𑀢𑀺 𑀯𑀺𑀳𑀢𑁄 𑀲𑀫𑀼𑀘𑁆𑀙𑀺𑀦𑁆𑀦𑁄. 𑀏𑀯𑀁 𑀬𑁂 𑀬𑁂 𑀤𑀸𑀦𑀧𑀸𑀭𑀫𑀺𑀬𑀸 𑀯𑀺𑀦𑀺𑀩𑀦𑁆𑀥𑀪𑀽𑀢𑀸 𑀅𑀦𑀢𑁆𑀣𑀸, 𑀢𑁂𑀲𑀁 𑀢𑁂𑀲𑀁 𑀬𑀣𑀸𑀭𑀳𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀝𑀺𑀯𑀺𑀦𑁄𑀤𑀦𑀁 𑀉𑀧𑀸𑀬𑁄. 𑀬𑀣𑀸 𑀘 𑀤𑀸𑀦𑀧𑀸𑀭𑀫𑀺𑀬𑀸, 𑀏𑀯𑀁 𑀲𑀻𑀮𑀧𑀸𑀭𑀫𑀺𑀆𑀤𑀻𑀲𑀼𑀧𑀺 𑀤𑀝𑁆𑀞𑀩𑁆𑀩𑀁.

𑀅𑀧𑀺𑀘 𑀬𑀁 𑀫𑀳𑀸𑀲𑀢𑁆𑀢𑀲𑁆𑀲 𑀩𑀼𑀤𑁆𑀥𑀸𑀦𑀁 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀁, 𑀢𑀁 𑀲𑀫𑁆𑀫𑀤𑁂𑀯 𑀲𑀩𑁆𑀩𑀧𑀸𑀭𑀫𑀻𑀦𑀁 𑀲𑀫𑁆𑀧𑀸𑀤𑀦𑀽𑀧𑀸𑀬𑁄, 𑀩𑀼𑀤𑁆𑀥𑀸𑀦𑀜𑁆𑀘 𑀅𑀢𑁆𑀢𑀸𑀦𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀞𑀺𑀢𑁄 𑀫𑀳𑀸𑀧𑀼𑀭𑀺𑀲𑁄 𑀢𑀢𑁆𑀣 𑀢𑀢𑁆𑀣 𑀩𑁄𑀥𑀺𑀲𑀫𑁆𑀪𑀸𑀭𑀧𑀸𑀭𑀺𑀧𑀽𑀭𑀺𑀬𑀸 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀲𑀭𑀻𑀭𑀲𑁆𑀲, 𑀲𑀼𑀔𑀽𑀧𑀓𑀭𑀡𑀸𑀦𑀜𑁆𑀘 𑀉𑀧𑀘𑁆𑀙𑁂𑀤𑀓𑁂𑀲𑀼 𑀤𑀼𑀲𑁆𑀲𑀳𑁂𑀲𑀼𑀧𑀺 𑀓𑀺𑀘𑁆𑀘𑁂𑀲𑀼 (𑀓𑀺𑀘𑁆𑀙𑁂𑀲𑀼 𑀘𑀭𑀺𑀬𑀸. 𑀅𑀝𑁆𑀞. 𑀧𑀓𑀺𑀡𑁆𑀡𑀓𑀓𑀣𑀸) 𑀤𑀼𑀭𑀪𑀺𑀲𑀫𑁆𑀪𑀯𑁂𑀲𑀼𑀧𑀺 𑀲𑀢𑁆𑀢𑀲𑀗𑁆𑀔𑀸𑀭𑀲𑀫𑀼𑀧𑀦𑀻𑀢𑁂𑀲𑀼 𑀅𑀦𑀢𑁆𑀣𑁂𑀲𑀼 𑀢𑀺𑀩𑁆𑀩𑁂𑀲𑀼 𑀧𑀸𑀡𑀳𑀭𑁂𑀲𑀼 ‘‘𑀅𑀬𑀁 𑀫𑀬𑀸 𑀅𑀢𑁆𑀢𑀪𑀸𑀯𑁄 𑀩𑀼𑀤𑁆𑀥𑀸𑀦𑀁 𑀧𑀭𑀺𑀘𑁆𑀘𑀢𑁆𑀢𑁄, 𑀬𑀁 𑀯𑀸 𑀢𑀁 𑀯𑀸 𑀏𑀢𑁆𑀣 𑀳𑁄𑀢𑀽’’𑀢𑀺 ¶ 𑀢𑀦𑁆𑀦𑀺𑀫𑀺𑀢𑁆𑀢𑀁 𑀦 𑀓𑀫𑁆𑀧𑀢𑀺 𑀦 𑀯𑁂𑀥𑀢𑀺 𑀈𑀲𑀓𑀫𑁆𑀧𑀺 𑀅𑀜𑁆𑀜𑀣𑀢𑁆𑀢𑀁 𑀦 𑀕𑀘𑁆𑀙𑀢𑀺, 𑀓𑀼𑀲𑀮𑀸𑀭𑀫𑁆𑀪𑁂 𑀅𑀜𑁆𑀜𑀤𑀢𑁆𑀣𑀼 𑀅𑀘𑀮𑀸𑀥𑀺𑀝𑁆𑀞𑀸𑀦𑁄 𑀘 𑀳𑁄𑀢𑀺, 𑀏𑀯𑀁 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀫𑁆𑀧𑀺 𑀏𑀢𑀸𑀲𑀁 𑀲𑀫𑁆𑀧𑀸𑀤𑀦𑀽𑀧𑀸𑀬𑁄.

𑀅𑀧𑀺𑀘 𑀲𑀫𑀸𑀲𑀢𑁄 𑀓𑀢𑀸𑀪𑀺𑀦𑀻𑀳𑀸𑀭𑀲𑁆𑀲 𑀅𑀢𑁆𑀢𑀦𑀺 𑀲𑀺𑀦𑁂𑀳𑀲𑁆𑀲 𑀧𑀭𑀺𑀬𑀸𑀤𑀸𑀦𑀁, (𑀧𑀭𑀺𑀲𑁄𑀲𑀦𑀁 𑀘𑀭𑀺𑀬𑀸. 𑀅𑀝𑁆𑀞. 𑀧𑀓𑀺𑀡𑁆𑀡𑀓𑀓𑀣𑀸) 𑀧𑀭𑁂𑀲𑀼 𑀘 𑀲𑀺𑀦𑁂𑀳𑀲𑁆𑀲 𑀧𑀭𑀺𑀯𑀟𑁆𑀠𑀦𑀁 𑀏𑀢𑀸𑀲𑀁 𑀲𑀫𑁆𑀧𑀸𑀤𑀦𑀽𑀧𑀸𑀬𑁄. 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀲𑀫𑀥𑀺𑀕𑀫𑀸𑀬 𑀳𑀺 𑀓𑀢𑀫𑀳𑀸𑀧𑀡𑀺𑀥𑀸𑀦𑀲𑁆𑀲 𑀫𑀳𑀸𑀲𑀢𑁆𑀢𑀲𑁆𑀲 𑀬𑀸𑀣𑀸𑀯𑀢𑁄 𑀧𑀭𑀺𑀚𑀸𑀦𑀦𑁂𑀦 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 ¶ 𑀅𑀦𑀼𑀧𑀮𑀺𑀢𑁆𑀢𑀲𑁆𑀲 𑀅𑀢𑁆𑀢𑀦𑀺 𑀲𑀺𑀦𑁂𑀳𑁄 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀺, 𑀫𑀳𑀸𑀓𑀭𑀼𑀡𑀸𑀲𑀫𑀸𑀬𑁄𑀕𑀯𑀲𑁂𑀦 (𑀲𑀫𑀸𑀲𑁂𑀯𑀦𑁂𑀦 𑀘𑀭𑀺𑀬𑀸. 𑀅𑀝𑁆𑀞. 𑀧𑀓𑀺𑀡𑁆𑀡𑀓𑀓𑀣𑀸) 𑀧𑀦 𑀧𑀺𑀬𑀧𑀼𑀢𑁆𑀢𑁂 𑀯𑀺𑀬 𑀲𑀩𑁆𑀩𑀲𑀢𑁆𑀢𑁂 𑀲𑀫𑁆𑀧𑀲𑁆𑀲𑀫𑀸𑀦𑀲𑁆𑀲 𑀢𑁂𑀲𑀼 𑀫𑁂𑀢𑁆𑀢𑀸𑀓𑀭𑀼𑀡𑀸𑀲𑀺𑀦𑁂𑀳𑁄 𑀧𑀭𑀺𑀯𑀟𑁆𑀠𑀢𑀺, 𑀢𑀢𑁄 𑀘 𑀢𑀁 𑀢𑀤𑀸𑀯𑀢𑁆𑀣𑀸𑀦𑀼𑀭𑀽𑀧𑀁 𑀅𑀢𑁆𑀢𑀧𑀭𑀲𑀦𑁆𑀢𑀸𑀦𑁂𑀲𑀼 𑀮𑁄𑀪𑀤𑁄𑀲𑀫𑁄𑀳𑀯𑀺𑀕𑀫𑁂𑀦 𑀯𑀺𑀤𑀽𑀭𑀻𑀓𑀢𑀫𑀘𑁆𑀙𑀭𑀺𑀬𑀸𑀤𑀺𑀩𑁄𑀥𑀺𑀲𑀫𑁆𑀪𑀸𑀭𑀧𑀝𑀺𑀧𑀓𑁆𑀔𑁄 𑀫𑀳𑀸𑀧𑀼𑀭𑀺𑀲𑁄 𑀤𑀸𑀦𑀧𑀺𑀬𑀯𑀘𑀦𑀅𑀢𑁆𑀣𑀘𑀭𑀺𑀬𑀸 𑀲𑀫𑀸𑀦𑀢𑁆𑀢𑀢𑀸𑀲𑀗𑁆𑀔𑀸𑀢𑁂𑀳𑀺 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 (𑀤𑀻. 𑀦𑀺. 𑁩.𑁩𑁧𑁩; 𑀅. 𑀦𑀺. 𑁪.𑁩𑁨) 𑀘𑀢𑀼𑀭𑀥𑀺𑀝𑁆𑀞𑀸𑀦𑀸𑀦𑀼𑀕𑀢𑁂𑀳𑀺 𑀅𑀘𑁆𑀘𑀦𑁆𑀢𑀁 𑀚𑀦𑀲𑁆𑀲 𑀲𑀗𑁆𑀕𑀳𑀓𑀭𑀡𑁂𑀦 𑀉𑀧𑀭𑀺 𑀬𑀸𑀦𑀢𑁆𑀢𑀬𑁂 𑀅𑀯𑀢𑀸𑀭𑀡𑀁, 𑀧𑀭𑀺𑀧𑀸𑀘𑀦𑀜𑁆𑀘 𑀓𑀭𑁄𑀢𑀺.

𑀫𑀳𑀸𑀲𑀢𑁆𑀢𑀸𑀦𑀜𑁆𑀳𑀺 𑀫𑀳𑀸𑀓𑀭𑀼𑀡𑀸, 𑀫𑀳𑀸𑀧𑀜𑁆𑀜𑀸 𑀘 𑀤𑀸𑀦𑁂𑀦 𑀅𑀮𑀗𑁆𑀓𑀢𑀸, 𑀤𑀸𑀦𑀁 𑀧𑀺𑀬𑀯𑀘𑀦𑁂𑀦, 𑀧𑀺𑀬𑀯𑀘𑀦𑀁 𑀅𑀢𑁆𑀣𑀘𑀭𑀺𑀬𑀸𑀬, 𑀅𑀢𑁆𑀣𑀘𑀭𑀺𑀬𑀸 𑀲𑀫𑀸𑀦𑀢𑁆𑀢𑀢𑀸𑀬 𑀅𑀮𑀗𑁆𑀓𑀢𑀸, 𑀲𑀗𑁆𑀕𑀳𑀺𑀢𑀸 𑀘. 𑀢𑁂𑀲𑀜𑁆𑀳𑀺 𑀲𑀩𑁆𑀩𑁂𑀧𑀺 𑀲𑀢𑁆𑀢𑁂 𑀅𑀢𑁆𑀢𑀦𑀸 𑀦𑀺𑀩𑁆𑀩𑀺𑀲𑁂𑀲𑁂 𑀓𑀢𑁆𑀯𑀸 𑀩𑁄𑀥𑀺𑀲𑀫𑁆𑀪𑀸𑀭𑁂𑀲𑀼 𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀁 𑀲𑀩𑁆𑀩𑀢𑁆𑀣 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑀢𑀸𑀬 𑀲𑀫𑀸𑀦𑀢𑁆𑀢𑀢𑀸𑀲𑀺𑀤𑁆𑀥𑀺. 𑀩𑀼𑀤𑁆𑀥𑀪𑀽𑀢𑀸𑀦𑀫𑁆𑀧𑀺 𑀘 𑀢𑁂𑀳𑁂𑀯 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀘𑀢𑀼𑀭𑀥𑀺𑀝𑁆𑀞𑀸𑀦𑁂𑀦 𑀧𑀭𑀺𑀧𑀽𑀭𑀺𑀢𑀸𑀪𑀺𑀩𑀼𑀤𑁆𑀥𑁂𑀳𑀺 𑀚𑀦𑀲𑁆𑀲 𑀅𑀘𑁆𑀘𑀦𑁆𑀢𑀺𑀓𑀲𑀗𑁆𑀕𑀳𑀓𑀭𑀡𑁂𑀦 𑀅𑀪𑀺𑀯𑀺𑀦𑀬𑀦𑀁 𑀲𑀺𑀚𑁆𑀛𑀢𑀺. 𑀤𑀸𑀦𑀜𑁆𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀘𑀸𑀕𑀸𑀥𑀺𑀝𑁆𑀞𑀸𑀦𑁂𑀦 𑀧𑀭𑀺𑀧𑀽𑀭𑀺𑀢𑀸𑀪𑀺𑀩𑀼𑀤𑁆𑀥𑀁. 𑀧𑀺𑀬𑀯𑀘𑀦𑀁 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑁂𑀦, 𑀅𑀢𑁆𑀣𑀘𑀭𑀺𑀬𑀸 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑁂𑀦, 𑀲𑀫𑀸𑀦𑀢𑁆𑀢𑀢𑀸 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑁂𑀦 𑀧𑀭𑀺𑀧𑀽𑀭𑀺𑀢𑀸𑀪𑀺𑀩𑀼𑀤𑁆𑀥𑀸. 𑀢𑀣𑀸𑀕𑀢𑀸𑀦𑀜𑁆𑀳𑀺 𑀲𑀩𑁆𑀩𑀲𑀸𑀯𑀓𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺 𑀲𑀫𑀸𑀦𑀢𑁆𑀢𑀢𑀸 𑀧𑀭𑀺𑀦𑀺𑀩𑁆𑀩𑀸𑀦𑁂. 𑀢𑀢𑁆𑀭 𑀳𑀺 𑀦𑁂𑀲𑀁 𑀅𑀯𑀺𑀲𑁂𑀲𑀢𑁄 𑀏𑀓𑀻𑀪𑀸𑀯𑁄. 𑀢𑁂𑀦𑁂𑀯𑀸𑀳 ‘‘𑀦𑀢𑁆𑀣𑀺 𑀯𑀺𑀫𑀼𑀢𑁆𑀢𑀺𑀬𑀸 𑀦𑀸𑀦𑀢𑁆𑀢’’𑀢𑀺. 𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀲𑀘𑁆𑀘𑁄 𑀘𑀸𑀕𑀻 𑀉𑀧𑀲𑀦𑁆𑀢𑁄, 𑀧𑀜𑁆𑀜𑀯𑀸 𑀅𑀦𑀼𑀓𑀫𑁆𑀧𑀓𑁄;

𑀲𑀫𑁆𑀪𑀢𑀲𑀩𑁆𑀩𑀲𑀫𑁆𑀪𑀸𑀭𑁄, 𑀓𑀁 𑀦𑀸𑀫𑀢𑁆𑀣𑀁 𑀦 𑀲𑀸𑀥𑀬𑁂.

𑀫𑀳𑀸𑀓𑀸𑀭𑀼𑀡𑀺𑀓𑁄 ¶ 𑀲𑀢𑁆𑀣𑀸, 𑀳𑀺𑀢𑁂𑀲𑀻 𑀘 𑀉𑀧𑁂𑀓𑁆𑀔𑀓𑁄;

𑀦𑀺𑀭𑀧𑁂𑀓𑁆𑀔𑁄 𑀘 𑀲𑀩𑁆𑀩𑀢𑁆𑀣, 𑀅𑀳𑁄 𑀅𑀘𑁆𑀙𑀭𑀺𑀬𑁄 𑀚𑀺𑀦𑁄.

𑀯𑀺𑀭𑀢𑁆𑀢𑁄 𑀲𑀩𑁆𑀩𑀥𑀫𑁆𑀫𑁂𑀲𑀼, 𑀲𑀢𑁆𑀢𑁂𑀲𑀼 𑀘 𑀉𑀧𑁂𑀓𑁆𑀔𑀓𑁄;

𑀲𑀤𑀸 𑀲𑀢𑁆𑀢𑀳𑀺𑀢𑁂 𑀬𑀼𑀢𑁆𑀢𑁄, 𑀅𑀳𑁄 𑀅𑀘𑁆𑀙𑀭𑀺𑀬𑁄 𑀚𑀺𑀦𑁄.

𑀲𑀩𑁆𑀩𑀤𑀸 𑀲𑀩𑁆𑀩𑀲𑀢𑁆𑀢𑀸𑀦𑀁, 𑀳𑀺𑀢𑀸𑀬 𑀘 𑀲𑀼𑀔𑀸𑀬 𑀘;

𑀉𑀬𑁆𑀬𑀼𑀢𑁆𑀢𑁄 𑀅𑀓𑀺𑀮𑀸𑀲𑀽 𑀘, 𑀅𑀳𑁄 𑀅𑀘𑁆𑀙𑀭𑀺𑀬𑁄 𑀚𑀺𑀦𑁄’’𑀢𑀺. (𑀘𑀭𑀺𑀬𑀸. 𑀅𑀝𑁆𑀞. 𑀧𑀓𑀺𑀡𑁆𑀡𑀓𑀓𑀣𑀸);

𑀓𑀺𑀢𑁆𑀢𑀓𑁂𑀦 ¶ 𑀓𑀸𑀮𑁂𑀦 𑀲𑀫𑁆𑀧𑀸𑀤𑀦𑀦𑁆𑀢𑀺 𑁋

𑀧𑀜𑁆𑀜𑀸𑀥𑀺𑀓𑀸𑀤𑀺𑀪𑁂𑀤𑁂𑀦, 𑀉𑀕𑁆𑀖𑀸𑀝𑀺𑀢𑀜𑁆𑀜𑀼𑀆𑀤𑀺𑀦𑀸;

𑀢𑀺𑀡𑁆𑀡𑀫𑁆𑀧𑀺 𑀩𑁄𑀥𑀺𑀲𑀢𑁆𑀢𑀸𑀦𑀁, 𑀯𑀲𑀸 𑀓𑀸𑀮𑁄 𑀢𑀺𑀥𑀸 𑀫𑀢𑁄.

𑀳𑁂𑀝𑁆𑀞𑀺𑀫𑁂𑀦 𑀳𑀺 𑀢𑀸𑀯 𑀧𑀭𑀺𑀘𑁆𑀙𑁂𑀤𑁂𑀦 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺, 𑀫𑀳𑀸𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀜𑁆𑀘, 𑀫𑀚𑁆𑀛𑀺𑀫𑁂𑀦 𑀅𑀝𑁆𑀞 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺, 𑀫𑀳𑀸𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀜𑁆𑀘, 𑀉𑀧𑀭𑀺𑀫𑁂𑀦 𑀧𑀦 𑀲𑁄𑀴𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺, 𑀫𑀳𑀸𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀜𑁆𑀘. 𑀏𑀢𑁂 𑀘 𑀪𑁂𑀤𑀸 𑀬𑀣𑀸𑀓𑁆𑀓𑀫𑀁 𑀧𑀜𑁆𑀜𑀸𑀥𑀺𑀓𑀲𑀤𑁆𑀥𑀸𑀥𑀺𑀓𑀯𑀻𑀭𑀺𑀬𑀸𑀥𑀺𑀓𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀧𑀜𑁆𑀜𑀸𑀥𑀺𑀓𑀸𑀦𑀜𑁆𑀳𑀺 𑀲𑀤𑁆𑀥𑀸 𑀫𑀦𑁆𑀤𑀸 𑀳𑁄𑀢𑀺, 𑀧𑀜𑁆𑀜𑀸 𑀢𑀺𑀓𑁆𑀔𑀸. 𑀲𑀤𑁆𑀥𑀸𑀥𑀺𑀓𑀸𑀦𑀁 𑀧𑀜𑁆𑀜𑀸 𑀫𑀚𑁆𑀛𑀺𑀫𑀸 𑀳𑁄𑀢𑀺. 𑀯𑀻𑀭𑀺𑀬𑀸𑀥𑀺𑀓𑀸𑀦𑀁 𑀧𑀜𑁆𑀜𑀸 𑀫𑀦𑁆𑀤𑀸. 𑀧𑀜𑁆𑀜𑀸𑀦𑀼𑀪𑀸𑀯𑁂𑀦 𑀘 𑀲𑀫𑁆𑀫𑀸𑀲𑀫𑁆𑀩𑁄𑀥𑀺 𑀅𑀪𑀺𑀕𑀦𑁆𑀢𑀩𑁆𑀩𑀸𑀢𑀺 (𑀲𑀼. 𑀦𑀺. 𑀅𑀝𑁆𑀞. 𑁧.𑁩𑁪 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

𑀅𑀧𑀭𑁂 𑀧𑀦 ‘‘𑀯𑀻𑀭𑀺𑀬𑀲𑁆𑀲 𑀢𑀺𑀓𑁆𑀔𑀫𑀚𑁆𑀛𑀺𑀫𑀫𑀼𑀤𑀼𑀪𑀸𑀯𑁂𑀦 𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀬𑀁 𑀓𑀸𑀮𑀯𑀺𑀪𑀸𑀕𑁄’’𑀢𑀺 𑀯𑀤𑀦𑁆𑀢𑀺, 𑀅𑀯𑀺𑀲𑁂𑀲𑁂𑀦 𑀧𑀦 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀢𑀺𑀓𑁆𑀔𑀫𑀚𑁆𑀛𑀺𑀫𑀫𑀼𑀤𑀼𑀪𑀸𑀯𑁂𑀦 𑀬𑀣𑀸𑀯𑀼𑀢𑁆𑀢𑀓𑀸𑀮𑀪𑁂𑀤𑁂𑀦 𑀩𑁄𑀥𑀺𑀲𑀫𑁆𑀪𑀸𑀭𑀸 𑀢𑁂𑀲𑀁 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀻𑀢𑀺 𑀢𑀬𑁄𑀧𑁂𑀢𑁂 𑀓𑀸𑀮𑀪𑁂𑀤𑀸 𑀬𑀼𑀢𑁆𑀢𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀏𑀯𑀁 𑀢𑀺𑀯𑀺𑀥𑀸 𑀳𑀺 𑀩𑁄𑀥𑀺𑀲𑀢𑁆𑀢𑀸 𑀅𑀪𑀺𑀦𑀻𑀳𑀸𑀭𑀓𑁆𑀔𑀡𑁂 𑀪𑀯𑀦𑁆𑀢𑀺 𑀏𑀓𑁄 𑀉𑀕𑁆𑀖𑀝𑀺𑀢𑀜𑁆𑀜𑀽, 𑀏𑀓𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀽, 𑀏𑀓𑁄 𑀦𑁂𑀬𑁆𑀬𑁄𑀢𑀺. 𑀢𑁂𑀲𑀼 𑀬𑁄 𑀉𑀕𑁆𑀖𑀝𑀺𑀢𑀜𑁆𑀜𑀽, 𑀲𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀫𑁆𑀫𑀼𑀔𑀸 𑀘𑀢𑀼𑀧𑁆𑀧𑀤𑀕𑀸𑀣𑀁 𑀲𑀼𑀡𑀦𑁆𑀢𑁄 𑀕𑀸𑀣𑀸𑀬 𑀢𑀢𑀺𑀬𑀧𑀤𑁂 𑀅𑀧𑀭𑀺𑀬𑁄𑀲𑀺𑀢𑁂 𑀏𑀯 𑀙𑀳𑀺 𑀅𑀪𑀺𑀜𑁆𑀜𑀸𑀳𑀺 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀅𑀥𑀺𑀕𑀦𑁆𑀢𑀼𑀁 𑀲𑀫𑀢𑁆𑀣𑀼𑀧𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀲𑀘𑁂 𑀲𑀸𑀯𑀓𑀩𑁄𑀥𑀺𑀬𑀁 𑀅𑀥𑀺𑀫𑀼𑀢𑁆𑀢𑁄 𑀲𑀺𑀬𑀸.

𑀤𑀼𑀢𑀺𑀬𑁄 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀘𑀢𑀼𑀧𑁆𑀧𑀤𑀕𑀸𑀣𑀁 𑀲𑀼𑀡𑀦𑁆𑀢𑁄 𑀅𑀧𑀭𑀺𑀬𑁄𑀲𑀺𑀢𑁂 𑀏𑀯 𑀕𑀸𑀣𑀸𑀬 𑀘𑀢𑀼𑀢𑁆𑀣𑀧𑀤𑁂 𑀙𑀳𑀺 𑀅𑀪𑀺𑀜𑁆𑀜𑀸𑀳𑀺 𑀅𑀭𑀳𑀢𑁆𑀢𑀁 𑀅𑀥𑀺𑀕𑀦𑁆𑀢𑀼𑀁 𑀲𑀫𑀢𑁆𑀣𑀼𑀧𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀬𑀤𑀺 𑀲𑀸𑀯𑀓𑀩𑁄𑀥𑀺𑀬𑀁 𑀅𑀥𑀺𑀫𑀼𑀢𑁆𑀢𑁄 𑀲𑀺𑀬𑀸.

𑀇𑀢𑀭𑁄 ¶ 𑀧𑀦 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀘𑀢𑀼𑀧𑁆𑀧𑀤𑀕𑀸𑀣𑀁 𑀲𑀼𑀢𑁆𑀯𑀸 𑀧𑀭𑀺𑀬𑁄𑀲𑀺𑀢𑀸𑀬 𑀕𑀸𑀣𑀸𑀬 𑀙𑀳𑀺 𑀅𑀪𑀺𑀜𑁆𑀜𑀸𑀳𑀺 𑀅𑀭𑀳𑀢𑁆𑀢𑀁 𑀅𑀥𑀺𑀕𑀦𑁆𑀢𑀼𑀁 𑀲𑀫𑀢𑁆𑀣𑀼𑀧𑀦𑀺𑀲𑁆𑀲𑀬𑁄 𑀳𑁄𑀢𑀺.

𑀢𑀬𑁄𑀧𑁂𑀢𑁂 𑀯𑀺𑀦𑀸 𑀓𑀸𑀮𑀪𑁂𑀤𑁂𑀦 𑀓𑀢𑀸𑀪𑀺𑀦𑀻𑀳𑀸𑀭𑀸, 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀮𑀤𑁆𑀥𑀩𑁆𑀬𑀸𑀓𑀭𑀡𑀸 𑀘 𑀅𑀦𑀼𑀓𑁆𑀓𑀫𑁂𑀦 ¶ 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑀸 𑀬𑀣𑀸𑀓𑁆𑀓𑀫𑀁 𑀬𑀣𑀸𑀯𑀼𑀢𑁆𑀢𑀪𑁂𑀤𑁂𑀦 𑀓𑀸𑀮𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀦𑁆𑀢𑀺. 𑀢𑁂𑀲𑀼 𑀢𑁂𑀲𑀼 𑀧𑀦 𑀓𑀸𑀮𑀪𑁂𑀤𑁂𑀲𑀼 𑀅𑀧𑀭𑀺𑀧𑀼𑀡𑁆𑀡𑁂𑀲𑀼 𑀢𑁂 𑀢𑁂 𑀫𑀳𑀸𑀲𑀢𑁆𑀢𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀯𑁂𑀲𑁆𑀲𑀦𑁆𑀢𑀭𑀤𑀸𑀦𑀲𑀤𑀺𑀲𑀁 𑀫𑀳𑀸𑀤𑀸𑀦𑀁 𑀤𑁂𑀦𑁆𑀢𑀸𑀧𑀺 𑀢𑀤𑀦𑀼𑀭𑀽𑀧𑁂 𑀲𑀻𑀮𑀸𑀤𑀺𑀲𑀩𑁆𑀩𑀧𑀸𑀭𑀫𑀺𑀥𑀫𑁆𑀫𑁂 𑀆𑀘𑀺𑀦𑀦𑁆𑀢𑀸𑀧𑀺 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀧𑀭𑀺𑀘𑁆𑀘𑀚𑀦𑁆𑀢𑀸𑀧𑀺 𑀜𑀸𑀢𑀢𑁆𑀣𑀘𑀭𑀺𑀬𑀁 𑀮𑁄𑀓𑀢𑁆𑀣𑀘𑀭𑀺𑀬𑀁 𑀩𑀼𑀤𑁆𑀥𑀢𑁆𑀣𑀘𑀭𑀺𑀬𑀁 𑀧𑀭𑀫𑀓𑁄𑀝𑀺𑀁 𑀧𑀸𑀧𑁂𑀦𑁆𑀢𑀸𑀧𑀺 𑀅𑀦𑁆𑀢𑀭𑀸𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀓𑀲𑁆𑀫𑀸? 𑀜𑀸𑀡𑀲𑁆𑀲 𑀅𑀧𑀭𑀺𑀧𑀘𑁆𑀘𑀦𑀢𑁄, 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑀸𑀦𑀜𑁆𑀘 𑀅𑀧𑀭𑀺𑀦𑀺𑀝𑁆𑀞𑀸𑀦𑀢𑁄. 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀦𑀺𑀧𑁆𑀨𑀸𑀤𑀺𑀢𑀁 𑀯𑀺𑀬 𑀳𑀺 𑀲𑀲𑁆𑀲𑀁 𑀬𑀣𑀸𑀯𑀼𑀢𑁆𑀢𑀓𑀸𑀮𑀧𑀭𑀺𑀘𑁆𑀙𑁂𑀤𑁂𑀦 𑀧𑀭𑀺𑀦𑀺𑀧𑁆𑀨𑀸𑀤𑀺𑀢𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺 𑀢𑀤𑀦𑁆𑀢𑀭𑀸 𑀧𑀦 𑀲𑀩𑁆𑀩𑀼𑀲𑁆𑀲𑀸𑀳𑁂𑀦 𑀯𑀸𑀬𑀫𑀦𑁆𑀢𑁂𑀦𑀸𑀧𑀺 𑀦 𑀲𑀓𑁆𑀓𑀸 𑀅𑀥𑀺𑀕𑀦𑁆𑀢𑀼𑀦𑁆𑀢𑀺 𑀧𑀸𑀭𑀫𑀺𑀧𑀸𑀭𑀺𑀧𑀽𑀭𑀺 𑀬𑀣𑀸𑀯𑀼𑀢𑁆𑀢𑀓𑀸𑀮𑀯𑀺𑀲𑁂𑀲𑁂𑀦 𑀲𑀫𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑁄 𑀆𑀦𑀺𑀲𑀁𑀲𑁄𑀢𑀺 𑁋

𑀬𑁂 𑀢𑁂 𑀓𑀢𑀸𑀪𑀺𑀦𑀻𑀳𑀸𑀭𑀸𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑁋

‘‘𑀏𑀯𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑀸, 𑀩𑁄𑀥𑀺𑀬𑀸 𑀦𑀺𑀬𑀢𑀸 𑀦𑀭𑀸;

𑀲𑀁𑀲𑀭𑀁 𑀤𑀻𑀖𑀫𑀤𑁆𑀥𑀸𑀦𑀁, 𑀓𑀧𑁆𑀧𑀓𑁄𑀝𑀺𑀲𑀢𑁂𑀳𑀺𑀧𑀺.

𑀅𑀯𑀻𑀘𑀺𑀫𑁆𑀳𑀺 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀢𑀣𑀸 𑀮𑁄𑀓𑀦𑁆𑀢𑀭𑁂𑀲𑀼 𑀘;

𑀦𑀺𑀚𑁆𑀛𑀸𑀫𑀢𑀡𑁆𑀳𑀸 𑀔𑀼𑀧𑁆𑀧𑀺𑀧𑀸𑀲𑀸, 𑀦 𑀳𑁄𑀦𑁆𑀢𑀺 𑀓𑀸𑀮𑀓𑀜𑁆𑀘𑀺𑀓𑀸. (𑀓𑀸𑀮𑀓𑀜𑁆𑀘𑀺𑀓𑀸 𑀘𑀭𑀺𑀬𑀸. 𑀅𑀝𑁆𑀞. 𑀧𑀓𑀺𑀡𑁆𑀡𑀓𑀓𑀣𑀸);

𑀦 𑀳𑁄𑀦𑁆𑀢𑀺 𑀔𑀼𑀤𑁆𑀤𑀓𑀸 𑀧𑀸𑀡𑀸, 𑀉𑀧𑀧𑀚𑁆𑀚𑀦𑁆𑀢𑀸𑀧𑀺 𑀤𑀼𑀕𑁆𑀕𑀢𑀺𑀁;

𑀚𑀸𑀬𑀫𑀸𑀦𑀸 𑀫𑀦𑀼𑀲𑁆𑀲𑁂𑀲𑀼, 𑀚𑀘𑁆𑀘𑀦𑁆𑀥𑀸 𑀦 𑀪𑀯𑀦𑁆𑀢𑀺 𑀢𑁂.

𑀲𑁄𑀢𑀯𑁂𑀓𑀮𑁆𑀮𑀢𑀸 𑀦𑀢𑁆𑀣𑀺, 𑀦 𑀪𑀯𑀦𑁆𑀢𑀺 𑀫𑀽𑀕𑀧𑀓𑁆𑀔𑀺𑀓𑀸;

𑀇𑀢𑁆𑀣𑀺𑀪𑀸𑀯𑀁 𑀦 𑀕𑀘𑁆𑀙𑀦𑁆𑀢𑀺, 𑀉𑀪𑀢𑁄𑀩𑁆𑀬𑀜𑁆𑀚𑀦𑀧𑀡𑁆𑀟𑀓𑀸.

𑀦 𑀪𑀯𑀦𑁆𑀢𑀺 𑀧𑀭𑀺𑀬𑀸𑀧𑀦𑁆𑀦𑀸, 𑀩𑁄𑀥𑀺𑀬𑀸 𑀦𑀺𑀬𑀢𑀸 𑀦𑀭𑀸;

𑀫𑀼𑀢𑁆𑀢𑀸 𑀆𑀦𑀦𑁆𑀢𑀭𑀺𑀓𑁂𑀳𑀺, 𑀲𑀩𑁆𑀩𑀢𑁆𑀣 𑀲𑀼𑀤𑁆𑀥𑀕𑁄𑀘𑀭𑀸.

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 ¶ ¶ 𑀦 𑀲𑁂𑀯𑀦𑁆𑀢𑀺, 𑀓𑀫𑁆𑀫𑀓𑀺𑀭𑀺𑀬𑀤𑀲𑁆𑀲𑀦𑀸;

𑀯𑀲𑀫𑀸𑀦𑀸𑀧𑀺 𑀲𑀕𑁆𑀕𑁂𑀲𑀼, 𑀅𑀲𑀜𑁆𑀜𑀁 𑀦𑀼𑀧𑀧𑀚𑁆𑀚𑀭𑁂.

𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀤𑁂𑀯𑁂𑀲𑀼, 𑀳𑁂𑀢𑀼 𑀦𑀸𑀫 𑀦 𑀯𑀺𑀚𑁆𑀚𑀢𑀺;

𑀦𑁂𑀓𑁆𑀔𑀫𑁆𑀫𑀦𑀺𑀦𑁆𑀦𑀸 𑀲𑀧𑁆𑀧𑀼𑀭𑀺𑀲𑀸, 𑀯𑀺𑀲𑀁𑀬𑀼𑀢𑁆𑀢𑀸 𑀪𑀯𑀸𑀪𑀯𑁂;

𑀘𑀭𑀦𑁆𑀢𑀺 𑀮𑁄𑀓𑀢𑁆𑀣𑀘𑀭𑀺𑀬𑀸𑀬𑁄, 𑀧𑀽𑀭𑁂𑀦𑁆𑀢𑀺 𑀲𑀩𑁆𑀩𑀧𑀸𑀭𑀫𑀻’’𑀢𑀺. (𑀅𑀝𑁆𑀞𑀲𑀸. 𑀦𑀺𑀤𑀸𑀦𑀓𑀣𑀸; 𑀘𑀭𑀺𑀬𑀸. 𑀧𑀓𑀺𑀡𑁆𑀡𑀓𑀓𑀣𑀸; 𑀅𑀧. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀩𑀼. 𑀯𑀁. 𑀅𑀝𑁆𑀞. 𑁨𑁭.𑀤𑀽𑀭𑁂𑀦𑀺𑀤𑀸𑀦𑀓𑀣𑀸); 𑁋

𑀏𑀯𑀁 𑀲𑀁𑀯𑀡𑁆𑀡𑀺𑀢𑀸 𑀆𑀦𑀺𑀲𑀁𑀲𑀸, 𑀬𑁂 𑀘 ‘‘𑀲𑀢𑁄 𑀲𑀫𑁆𑀧𑀚𑀸𑀦𑁄 𑀆𑀦𑀦𑁆𑀤 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁨𑁦𑁪) 𑀲𑁄𑀴𑀲 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀥𑀫𑁆𑀫𑀧𑁆𑀧𑀓𑀸𑀭𑀸, 𑀬𑁂 𑀘 ‘‘𑀲𑀻𑀢𑀁 𑀩𑁆𑀬𑀧𑀕𑀢𑀁 𑀳𑁄𑀢𑀺, 𑀉𑀡𑁆𑀳𑀜𑁆𑀘 𑀯𑀽𑀧𑀲𑀫𑀢𑀻’’𑀢𑀺𑀆𑀤𑀺𑀦𑀸, (𑀔𑀼. 𑀦𑀺. 𑁪-𑁩𑁧𑁩 𑀧𑀺𑀝𑁆𑀞𑁂) ‘‘𑀚𑀸𑀬𑀫𑀸𑀦𑁂 𑀔𑁄 𑀲𑀸𑀭𑀺𑀧𑀼𑀢𑁆𑀢, 𑀩𑁄𑀥𑀺𑀲𑀢𑁆𑀢𑁂 𑀅𑀬𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀲𑀗𑁆𑀓𑀫𑁆𑀧𑀢𑀺 𑀲𑀫𑁆𑀧𑀓𑀫𑁆𑀧𑀢𑀺 𑀲𑀫𑁆𑀧𑀯𑁂𑀥𑀢𑀻’’𑀢𑀺𑀆𑀤𑀺𑀦𑀸 𑀘 𑀤𑁆𑀯𑀢𑁆𑀢𑀺𑀁𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀧𑁆𑀧𑀓𑀸𑀭𑀸, 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 𑀩𑁄𑀥𑀺𑀲𑀢𑁆𑀢𑀸𑀦𑀁 𑀅𑀥𑀺𑀧𑁆𑀧𑀸𑀬𑀲𑀫𑀺𑀚𑁆𑀛𑀦𑀁, 𑀓𑀫𑁆𑀫𑀸𑀤𑀻𑀲𑀼 𑀘 𑀯𑀲𑀺𑀪𑀸𑀯𑁄𑀢𑀺 𑀏𑀯𑀫𑀸𑀤𑀬𑁄 𑀢𑀢𑁆𑀣 𑀢𑀢𑁆𑀣 𑀚𑀸𑀢𑀓𑀩𑀼𑀤𑁆𑀥𑀯𑀁𑀲𑀸𑀤𑀻𑀲𑀼 𑀤𑀲𑁆𑀲𑀺𑀢𑀧𑁆𑀧𑀓𑀸𑀭𑀸 𑀆𑀦𑀺𑀲𑀁𑀲𑀸, 𑀢𑁂 𑀲𑀩𑁆𑀩𑁂𑀧𑀺 𑀏𑀢𑀸𑀲𑀁 𑀆𑀦𑀺𑀲𑀁𑀲𑀸, 𑀢𑀣𑀸 𑀬𑀣𑀸𑀦𑀺𑀤𑀲𑁆𑀲𑀺𑀢𑀪𑁂𑀤𑀸 𑀅𑀮𑁄𑀪𑀸𑀤𑁄𑀲𑀸𑀤𑀺𑀕𑀼𑀡𑀬𑀼𑀕𑀴𑀸𑀤𑀬𑁄 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀧𑀺𑀘 𑀬𑀲𑁆𑀫𑀸 𑀩𑁄𑀥𑀺𑀲𑀢𑁆𑀢𑁄 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀺𑀢𑀼𑀲𑀫𑁄 𑀳𑁄𑀢𑀺 𑀳𑀺𑀢𑁂𑀲𑀺𑀢𑀸𑀬, 𑀤𑀓𑁆𑀔𑀺𑀡𑁂𑀬𑁆𑀬𑀓𑁄 𑀕𑀭𑀼 𑀪𑀸𑀯𑀦𑀻𑀬𑁄 𑀧𑀭𑀫𑀜𑁆𑀘 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀳𑁄𑀢𑀺 𑀕𑀼𑀡𑀯𑀺𑀲𑁂𑀲𑀬𑁄𑀕𑁂𑀦, 𑀬𑁂𑀪𑀼𑀬𑁆𑀬𑁂𑀦 𑀘 𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺, 𑀅𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺, 𑀤𑁂𑀯𑀢𑀸𑀳𑀺 𑀅𑀦𑀼𑀧𑀸𑀮𑀻𑀬𑀢𑀺, 𑀫𑁂𑀢𑁆𑀢𑀸𑀓𑀭𑀼𑀡𑀸𑀧𑀭𑀺𑀪𑀸𑀯𑀺𑀢𑀲𑀦𑁆𑀢𑀸𑀦𑀢𑀸𑀬 𑀯𑀸𑀴𑀫𑀺𑀕𑀸𑀤𑀻𑀳𑀺 𑀘 𑀅𑀦𑀪𑀺𑀪𑀯𑀦𑀻𑀬𑁄 𑀳𑁄𑀢𑀺, 𑀬𑀲𑁆𑀫𑀺𑀁 𑀬𑀲𑁆𑀫𑀺𑀜𑁆𑀘 𑀲𑀢𑁆𑀢𑀦𑀺𑀓𑀸𑀬𑁂 𑀧𑀘𑁆𑀘𑀸𑀚𑀸𑀬𑀢𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀉𑀴𑀸𑀭𑁂𑀦 𑀯𑀡𑁆𑀡𑁂𑀦 𑀉𑀴𑀸𑀭𑁂𑀦 𑀬𑀲𑁂𑀦 𑀉𑀴𑀸𑀭𑁂𑀦 𑀲𑀼𑀔𑁂𑀦 𑀉𑀴𑀸𑀭𑁂𑀦 𑀩𑀮𑁂𑀦 𑀉𑀴𑀸𑀭𑁂𑀦 𑀆𑀥𑀺𑀧𑀢𑁂𑀬𑁆𑀬𑁂𑀦 𑀅𑀜𑁆𑀜𑁂 𑀲𑀢𑁆𑀢𑁂 𑀅𑀪𑀺𑀪𑀯𑀢𑀺 𑀧𑀼𑀜𑁆𑀜𑀯𑀺𑀲𑁂𑀲𑀬𑁄𑀕𑀢𑁄.

𑀅𑀧𑁆𑀧𑀸𑀩𑀸𑀥𑁄 𑀳𑁄𑀢𑀺 𑀅𑀧𑁆𑀧𑀸𑀢𑀗𑁆𑀓𑁄, 𑀲𑀼𑀯𑀺𑀲𑀼𑀤𑁆𑀥𑀸 𑀘𑀲𑁆𑀲 𑀲𑀤𑁆𑀥𑀸 𑀳𑁄𑀢𑀺 𑀲𑀼𑀯𑀺𑀲𑀤𑀸, 𑀲𑀼𑀯𑀺𑀲𑀼𑀤𑁆𑀥𑀁 𑀯𑀻𑀭𑀺𑀬𑀁, 𑀲𑀢𑀺 𑀲𑀫𑀸𑀥𑀺 𑀧𑀜𑁆𑀜𑀸 𑀲𑀼𑀯𑀺𑀲𑀤𑀸, 𑀫𑀦𑁆𑀤𑀓𑀺𑀮𑁂𑀲𑁄 𑀳𑁄𑀢𑀺 𑀫𑀦𑁆𑀤𑀤𑀭𑀣𑁄 𑀫𑀦𑁆𑀤𑀧𑀭𑀺𑀴𑀸𑀳𑁄, 𑀓𑀺𑀮𑁂𑀲𑀸𑀦𑀁 𑀫𑀦𑁆𑀤𑀪𑀸𑀯𑁂𑀦𑁂𑀯 𑀲𑀼𑀩𑁆𑀩𑀘𑁄 𑀳𑁄𑀢𑀺 𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀻, 𑀔𑀫𑁄 𑀳𑁄𑀢𑀺 𑀲𑁄𑀭𑀢𑁄, 𑀲𑀔𑀺𑀮𑁄 𑀳𑁄𑀢𑀺 𑀧𑀝𑀺𑀲𑀦𑁆𑀥𑀸𑀭𑀓𑀼𑀲𑀮𑁄 ¶ , 𑀅𑀓𑁄𑀥𑀦𑁄 𑀳𑁄𑀢𑀺 𑀅𑀦𑀼𑀧𑀦𑀸𑀳𑀻, 𑀅𑀫𑀓𑁆𑀔𑀻 𑀳𑁄𑀢𑀺 𑀅𑀧𑀴𑀸𑀲𑀻, 𑀅𑀦𑀺𑀲𑁆𑀲𑀼𑀓𑀻 𑀳𑁄𑀢𑀺 𑀅𑀫𑀘𑁆𑀙𑀭𑀻, 𑀅𑀲𑀞𑁄 𑀳𑁄𑀢𑀺 𑀅𑀫𑀸𑀬𑀸𑀯𑀻, 𑀅𑀣𑀤𑁆𑀥𑁄 𑀳𑁄𑀢𑀺 𑀅𑀦𑀢𑀺𑀫𑀸𑀦𑀻, 𑀅𑀲𑀸𑀭𑀤𑁆𑀥𑁄 𑀳𑁄𑀢𑀺 𑀅𑀧𑁆𑀧𑀫𑀢𑁆𑀢𑁄 ¶ , 𑀧𑀭𑀢𑁄 𑀉𑀧𑀢𑀸𑀧𑀲𑀳𑁄 𑀳𑁄𑀢𑀺 𑀧𑀭𑁂𑀲𑀁 𑀅𑀦𑀼𑀧𑀢𑀸𑀧𑀻, 𑀬𑀲𑁆𑀫𑀺𑀜𑁆𑀘 𑀕𑀸𑀫𑀔𑁂𑀢𑁆𑀢𑁂 𑀧𑀝𑀺𑀯𑀲𑀢𑀺, 𑀢𑀢𑁆𑀣 𑀲𑀢𑁆𑀢𑀸𑀦𑀁 𑀪𑀬𑀸𑀤𑀬𑁄 𑀉𑀧𑀤𑁆𑀤𑀯𑀸 𑀬𑁂𑀪𑀼𑀬𑁆𑀬𑁂𑀦 𑀅𑀦𑀼𑀧𑁆𑀧𑀦𑁆𑀦𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀯𑀽𑀧𑀲𑀫𑀦𑁆𑀢𑀺, 𑀬𑁂𑀲𑀼 𑀘 𑀅𑀧𑀸𑀬𑁂𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀦 𑀢𑀢𑁆𑀣 𑀧𑀘𑀼𑀭𑀚𑀦𑁄 𑀯𑀺𑀬 𑀤𑀼𑀓𑁆𑀔𑁂𑀦 𑀅𑀥𑀺𑀫𑀢𑁆𑀢𑀁 𑀧𑀻𑀴𑀻𑀬𑀢𑀺, 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀲𑀁𑀯𑁂𑀕𑀪𑀬𑀫𑀸𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀫𑀳𑀸𑀧𑀼𑀭𑀺𑀲𑀲𑁆𑀲 𑀬𑀣𑀸𑀭𑀳𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑁂 𑀮𑀩𑁆𑀪𑀫𑀸𑀦𑀸 𑀏𑀢𑁂 𑀲𑀢𑁆𑀢𑀸𑀦𑀁 𑀧𑀺𑀢𑀼𑀲𑀫𑀢𑀸𑀤𑀓𑁆𑀔𑀺𑀡𑁂𑀬𑁆𑀬𑀢𑀸𑀤𑀬𑁄 𑀕𑀼𑀡𑀯𑀺𑀲𑁂𑀲𑀸 𑀆𑀦𑀺𑀲𑀁𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀣𑀸 𑀆𑀬𑀼𑀲𑀫𑁆𑀧𑀤𑀸 𑀭𑀽𑀧𑀲𑀫𑁆𑀧𑀤𑀸 𑀓𑀼𑀮𑀲𑀫𑁆𑀧𑀤𑀸 𑀇𑀲𑁆𑀲𑀭𑀺𑀬𑀲𑀫𑁆𑀧𑀤𑀸 𑀆𑀤𑁂𑀬𑁆𑀬𑀯𑀘𑀦𑀢𑀸 𑀫𑀳𑀸𑀦𑀼𑀪𑀸𑀯𑀢𑀸𑀢𑀺 𑀏𑀢𑁂𑀧𑀺 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀸𑀭𑀫𑀻𑀦𑀁 𑀆𑀦𑀺𑀲𑀁𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀆𑀬𑀼𑀲𑀫𑁆𑀧𑀤𑀸 𑀦𑀸𑀫 𑀢𑀲𑁆𑀲𑀁 𑀢𑀲𑁆𑀲𑀁 𑀉𑀧𑀧𑀢𑁆𑀢𑀺𑀬𑀁 𑀤𑀻𑀖𑀸𑀬𑀼𑀓𑀢𑀸 𑀘𑀺𑀭𑀝𑁆𑀞𑀺𑀢𑀺𑀓𑀢𑀸, 𑀢𑀸𑀬 𑀬𑀣𑀸𑀭𑀤𑁆𑀥𑀸𑀦𑀺 𑀓𑀼𑀲𑀮𑀲𑀫𑀸𑀤𑀸𑀦𑀸𑀦𑀺 𑀧𑀭𑀺𑀬𑁄𑀲𑀸𑀧𑁂𑀢𑀺, 𑀩𑀳𑀼𑀜𑁆𑀘 𑀓𑀼𑀲𑀮𑀁 𑀉𑀧𑀘𑀺𑀦𑁄𑀢𑀺. 𑀭𑀽𑀧𑀲𑀫𑁆𑀧𑀤𑀸 𑀦𑀸𑀫 𑀅𑀪𑀺𑀭𑀽𑀧𑀢𑀸 𑀤𑀲𑁆𑀲𑀦𑀻𑀬𑀢𑀸 𑀧𑀸𑀲𑀸𑀤𑀺𑀓𑀢𑀸, 𑀢𑀸𑀬 𑀭𑀽𑀧𑀧𑁆𑀧𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀧𑀲𑀸𑀤𑀸𑀯𑀳𑁄 𑀳𑁄𑀢𑀺 𑀲𑀫𑁆𑀪𑀸𑀯𑀦𑀻𑀬𑁄. 𑀓𑀼𑀮𑀲𑀫𑁆𑀧𑀤𑀸 𑀦𑀸𑀫 𑀉𑀴𑀸𑀭𑁂𑀲𑀼 𑀓𑀼𑀮𑁂𑀲𑀼 𑀅𑀪𑀺𑀦𑀺𑀩𑁆𑀩𑀢𑁆𑀢𑀺, 𑀢𑀸𑀬 [𑀚𑀸𑀢𑀺𑀫𑀤𑀸𑀤𑀺𑀫𑀤𑀲𑀢𑁆𑀢𑀸𑀦𑀫𑁆𑀧𑀺 (𑀫𑀤𑀫𑀢𑁆𑀢𑀸𑀦𑀫𑁆𑀧𑀺 𑀘𑀭𑀺𑀬𑀸. 𑀅𑀝𑁆𑀞. 𑀧𑀓𑀺𑀡𑁆𑀡𑀓𑀓𑀣𑀸)] 𑀉𑀧𑀲𑀗𑁆𑀓𑀫𑀦𑀻𑀬𑁄 𑀳𑁄𑀢𑀺 𑀧𑀬𑀺𑀭𑀼𑀧𑀸𑀲𑀦𑀻𑀬𑁄, 𑀢𑁂𑀦 𑀢𑁂 𑀦𑀺𑀩𑁆𑀩𑀺𑀲𑁂𑀯𑀦𑁂 𑀓𑀭𑁄𑀦𑁆𑀢𑀺. 𑀇𑀲𑁆𑀲𑀭𑀺𑀬𑀲𑀫𑁆𑀧𑀤𑀸 𑀦𑀸𑀫 𑀫𑀳𑀸𑀯𑀺𑀪𑀯𑀢𑀸, 𑀫𑀳𑁂𑀲𑀓𑁆𑀔𑀢𑀸, 𑀫𑀳𑀸𑀧𑀭𑀺𑀯𑀸𑀭𑀢𑀸 𑀘, 𑀢𑀸𑀳𑀺 𑀲𑀗𑁆𑀕𑀳𑀺𑀢𑀩𑁆𑀩𑁂 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 (𑀤𑀻. 𑀦𑀺. 𑁩.𑁩𑁧𑁩; 𑀅. 𑀦𑀺. 𑁧.𑁨𑁫𑁬) 𑀲𑀗𑁆𑀕𑀳𑀺𑀢𑀼𑀁, 𑀦𑀺𑀕𑁆𑀕𑀳𑁂𑀢𑀩𑁆𑀩𑁂 𑀥𑀫𑁆𑀫𑁂𑀦 𑀦𑀺𑀕𑁆𑀕𑀳𑁂𑀢𑀼𑀜𑁆𑀘 𑀲𑀫𑀢𑁆𑀣𑁄 𑀳𑁄𑀢𑀺. 𑀆𑀤𑁂𑀬𑁆𑀬𑀯𑀘𑀦𑀢𑀸 𑀦𑀸𑀫 𑀲𑀤𑁆𑀥𑁂𑀬𑁆𑀬𑀢𑀸 𑀧𑀘𑁆𑀘𑀬𑀺𑀓𑀢𑀸, 𑀢𑀸𑀬 𑀲𑀢𑁆𑀢𑀸𑀦𑀁 𑀧𑀫𑀸𑀡𑀪𑀽𑀢𑁄 𑀳𑁄𑀢𑀺, 𑀅𑀮𑀗𑁆𑀖𑀦𑀻𑀬𑀸 𑀘𑀲𑁆𑀲 𑀆𑀡𑀸 𑀳𑁄𑀢𑀺. 𑀫𑀳𑀸𑀦𑀼𑀪𑀸𑀯𑀢𑀸 𑀦𑀸𑀫 𑀧𑀪𑀸𑀯𑀫𑀳𑀦𑁆𑀢𑀢𑀸, 𑀢𑀸𑀬 𑀧𑀭𑁂𑀳𑀺 𑀦 𑀅𑀪𑀺𑀪𑀼𑀬𑁆𑀬𑀢𑀺, 𑀲𑀬𑀫𑁂𑀯 𑀧𑀦 𑀧𑀭𑁂 𑀅𑀜𑁆𑀜𑀤𑀢𑁆𑀣𑀼 𑀅𑀪𑀺𑀪𑀯𑀢𑀺 𑀥𑀫𑁆𑀫𑁂𑀦, 𑀲𑀫𑁂𑀦, 𑀬𑀣𑀸𑀪𑀽𑀢𑀕𑀼𑀡𑁂𑀳𑀺 𑀘, 𑀏𑀯𑀫𑁂𑀢𑁂𑀲𑀁 𑀆𑀬𑀼𑀲𑀫𑁆𑀧𑀤𑀸𑀤𑀬𑁄 𑀫𑀳𑀸𑀧𑀼𑀭𑀺𑀲𑀲𑁆𑀲 𑀧𑀸𑀭𑀫𑀻𑀦𑀁 𑀆𑀦𑀺𑀲𑀁𑀲𑀸, 𑀲𑀬𑀜𑁆𑀘 𑀅𑀧𑀭𑀺𑀫𑀸𑀡𑀲𑁆𑀲 𑀧𑀼𑀜𑁆𑀜𑀲𑀫𑁆𑀪𑀸𑀭𑀲𑁆𑀲 𑀧𑀭𑀺𑀯𑀼𑀤𑁆𑀥𑀺𑀳𑁂𑀢𑀼𑀪𑀽𑀢𑀸 𑀬𑀸𑀦𑀢𑁆𑀢𑀬𑁂 𑀲𑀢𑁆𑀢𑀸𑀦𑀁 𑀅𑀯𑀢𑀸𑀭𑀡𑀲𑁆𑀲 𑀧𑀭𑀺𑀧𑀸𑀘𑀦𑀲𑁆𑀲 𑀓𑀸𑀭𑀡𑀪𑀽𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀺𑀁 ¶ 𑀨𑀮𑀦𑁆𑀢𑀺 𑁋

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑀸 𑀢𑀸𑀲𑀁, 𑀚𑀜𑁆𑀜𑀸 𑀨𑀮𑀁 𑀲𑀫𑀸𑀲𑀢𑁄;

𑀯𑀺𑀢𑁆𑀣𑀸𑀭𑀢𑁄 𑀅𑀦𑀦𑁆𑀢𑀸𑀧-𑀫𑁂𑀬𑁆𑀬𑀸 𑀕𑀼𑀡𑀕𑀡𑀸 𑀫𑀢𑀸.

𑀲𑀫𑀸𑀲𑀢𑁄 𑀳𑀺 𑀢𑀸𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑁄 𑀏𑀢𑀸𑀲𑀁 𑀨𑀮𑀁. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀩𑀸𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡 (𑀤𑀻. 𑀦𑀺. 𑁨.𑁩𑁩 𑀆𑀤𑀬𑁄; 𑁩.𑁧𑁯𑁮; 𑀫. 𑀦𑀺. 𑁨.𑁩𑁮𑁬) 𑀅𑀲𑀻𑀢𑀸𑀦𑀼𑀩𑁆𑀬𑀜𑁆𑀚𑀦, 𑀩𑁆𑀬𑀸𑀫𑀧𑁆𑀧𑀪𑀸𑀤𑀺𑀅𑀦𑁂𑀓𑀕𑀼𑀡𑀕𑀡𑀲𑀫𑀼𑀚𑁆𑀚𑀮𑀭𑀽𑀧𑀓𑀸𑀬𑀲𑀫𑁆𑀧𑀢𑁆𑀢𑀺𑀅𑀥𑀺𑀝𑁆𑀞𑀸𑀦𑀸 𑀤𑀲𑀩𑀮- (𑀫. 𑀦𑀺. 𑁪.𑁮; 𑀅. 𑀦𑀺. 𑁧𑁦.𑁨𑁧) 𑀘𑀢𑀼𑀯𑁂𑀲𑀸𑀭𑀚𑁆𑀚- ¶ (𑀅. 𑀦𑀺. 𑁪.𑁮) 𑀙𑀅𑀲𑀸𑀥𑀸𑀭𑀡𑀜𑀸𑀡𑀅𑀝𑁆𑀞𑀸𑀭𑀲𑀸𑀯𑁂𑀡𑀺𑀓𑀩𑀼𑀤𑁆𑀥𑀥𑀫𑁆𑀫- (𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁦𑁫;) 𑀧𑀪𑀼𑀢𑀺𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀕𑀼𑀡𑀲𑀫𑀼𑀤𑀬𑁄𑀧𑀲𑁄𑀪𑀺𑀦𑀻 𑀥𑀫𑁆𑀫𑀓𑀸𑀬𑀲𑀺𑀭𑀻, 𑀬𑀸𑀯𑀢𑀸 𑀧𑀦 𑀩𑀼𑀤𑁆𑀥𑀕𑀼𑀡𑀸 𑀬𑁂 𑀅𑀦𑁂𑀓𑁂𑀳𑀺𑀧𑀺 𑀓𑀧𑁆𑀧𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸𑀧𑀺 𑀯𑀸𑀘𑀸𑀬 𑀧𑀭𑀺𑀬𑁄𑀲𑀸𑀧𑁂𑀢𑀼𑀁 𑀦 𑀲𑀓𑁆𑀓𑀸, 𑀇𑀤𑀫𑁂𑀯 𑀢𑀸𑀲𑀁 𑀨𑀮𑀁. 𑀯𑀼𑀢𑁆𑀢𑀜𑁆𑀘𑁂𑀢𑀁 𑀪𑀕𑀯𑀢𑀸 𑁋

‘‘𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁,

𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄;

𑀔𑀻𑀬𑁂𑀣 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂,

𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁦𑁪; 𑁩.𑁧𑁪𑁧; 𑀉𑀤𑀸. 𑀅𑀝𑁆𑀞. 𑁫𑁩; 𑀘𑀭𑀺𑀬𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸, 𑀧𑀓𑀺𑀡𑁆𑀡𑀓𑀓𑀣𑀸) 𑁋

𑀏𑀯𑀫𑁂𑀢𑁆𑀣 𑀧𑀸𑀭𑀫𑀻𑀲𑀼 𑀧𑀓𑀺𑀡𑁆𑀡𑀓𑀓𑀣𑀸 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀬𑀣𑀸𑀯𑀼𑀢𑁆𑀢𑀸𑀬 𑀧𑀝𑀺𑀧𑀤𑀸𑀬 𑀬𑀣𑀸𑀯𑀼𑀢𑁆𑀢𑀯𑀺𑀪𑀸𑀕𑀸𑀦𑀁 𑀧𑀸𑀭𑀫𑀻𑀦𑀁 𑀧𑀽𑀭𑀺𑀢𑀪𑀸𑀯𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸’’𑀢𑀺. 𑀲𑀢𑀺𑀧𑀺 𑀫𑀳𑀸𑀧𑀭𑀺𑀘𑁆𑀘𑀸𑀕𑀸𑀦𑀁 𑀤𑀸𑀦𑀧𑀸𑀭𑀫𑀺𑀪𑀸𑀯𑁂 𑀧𑀭𑀺𑀘𑁆𑀘𑀸𑀕𑀯𑀺𑀲𑁂𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀯𑀺𑀲𑁂𑀲𑀲𑀫𑁆𑀪𑀸𑀭𑀢𑀸𑀤𑀲𑁆𑀲𑀦𑀢𑁆𑀣𑀁, 𑀲𑀼𑀤𑀼𑀓𑁆𑀓𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘 𑀢𑁂𑀲𑀁 𑀯𑀺𑀲𑀼𑀁 𑀕𑀳𑀡𑀁, 𑀢𑀢𑁄𑀬𑁂𑀯 𑀘 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑀢𑁄 𑀦𑀬𑀦𑀧𑀭𑀺𑀘𑁆𑀘𑀸𑀕𑀲𑁆𑀲, 𑀧𑀭𑀺𑀕𑁆𑀕𑀳𑀧𑀭𑀺𑀘𑁆𑀘𑀸𑀕𑀪𑀸𑀯𑀲𑀸𑀫𑀜𑁆𑀜𑁂𑀧𑀺 𑀥𑀦𑀭𑀚𑁆𑀚𑀧𑀭𑀺𑀘𑁆𑀘𑀸𑀕𑀢𑁄 𑀧𑀼𑀢𑁆𑀢𑀤𑀸𑀭𑀧𑀭𑀺𑀘𑁆𑀘𑀸𑀕𑀲𑁆𑀲 𑀯𑀺𑀲𑀼𑀁 𑀕𑀳𑀡𑀁 𑀓𑀢𑀁, 𑀢𑀣𑀸𑀬𑁂𑀯 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 (𑀤𑀻. 𑀦𑀺. 𑀝𑀻. 𑁧.𑁭) 𑀯𑀼𑀢𑁆𑀢𑀁. 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦𑀧𑀺 𑀅𑀗𑁆𑀕𑀼𑀢𑁆𑀢𑀭𑀝𑀻𑀓𑀸𑀬𑀁, (𑀅. 𑀦𑀺. 𑀝𑀻. 𑁧.𑀏𑀓𑀧𑀼𑀕𑁆𑀕𑀮𑀯𑀕𑁆𑀕𑀲𑁆𑀲 𑀧𑀞𑀫𑁂) 𑀓𑀢𑁆𑀣𑀘𑀺 𑀧𑀦 𑀧𑀼𑀢𑁆𑀢𑀤𑀸𑀭𑀧𑀭𑀺𑀘𑁆𑀘𑀸𑀕𑁂 𑀯𑀺𑀲𑀼𑀁 𑀓𑀢𑁆𑀯𑀸 𑀦𑀬𑀦𑀧𑀭𑀺𑀘𑁆𑀘𑀸𑀕𑀫𑀜𑁆𑀜𑀢𑁆𑀭 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑀁 𑀯𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀭𑀚𑁆𑀚𑀧𑀭𑀺𑀘𑁆𑀘𑀸𑀕𑀫𑀜𑁆𑀜𑀢𑁆𑀭 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂 𑀯𑀤𑀦𑁆𑀢𑀺.

𑀕𑀢𑀧𑀘𑁆𑀘𑀸𑀕𑀢𑀺𑀓𑀯𑀢𑁆𑀢𑀲𑀗𑁆𑀔𑀸𑀢𑀸𑀬 ¶ (𑀤𑀻. 𑀦𑀺. 𑀅𑀝𑁆𑀞. 𑁧.𑁯; 𑀫. 𑀦𑀺. 𑀅𑀝𑁆𑀞. 𑁧.𑁧𑁦.𑁯; 𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁩𑁬𑁮; 𑀯𑀺𑀪. 𑀅𑀝𑁆𑀞. 𑁫𑁨𑁩; 𑀲𑀼. 𑀦𑀺. 𑀅𑀝𑁆𑀞. 𑁧.𑁧.𑁩𑁫) 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀲𑀤𑁆𑀥𑀺𑀁 𑀅𑀪𑀺𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀁 𑀧𑀼𑀩𑁆𑀩𑀬𑁄𑀕𑁄. 𑀤𑀸𑀦𑀸𑀤𑀻𑀲𑀼𑀬𑁂𑀯 𑀲𑀸𑀢𑀺𑀲𑀬𑀧𑀝𑀺𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀁 𑀧𑀼𑀩𑁆𑀩𑀘𑀭𑀺𑀬𑀸. 𑀬𑀸 𑀯𑀸 𑀘𑀭𑀺𑀬𑀸𑀧𑀺𑀝𑀓𑀲𑀗𑁆𑀕𑀳𑀺𑀢𑀸, 𑀲𑀸 𑀧𑀼𑀩𑁆𑀩𑀘𑀭𑀺𑀬𑀸. 𑀓𑁂𑀘𑀺 𑀧𑀦 ‘‘𑀅𑀪𑀺𑀦𑀻𑀳𑀸𑀭𑁄 𑀧𑀼𑀩𑁆𑀩𑀬𑁄𑀕𑁄. 𑀤𑀸𑀦𑀸𑀤𑀺𑀧𑀝𑀺𑀧𑀢𑁆𑀢𑀺 𑀯𑀸 𑀓𑀸𑀬𑀯𑀺𑀯𑁂𑀓𑀯𑀲𑁂𑀦 𑀏𑀓𑀘𑀭𑀺𑀬𑀸 𑀯𑀸 𑀧𑀼𑀩𑁆𑀩𑀘𑀭𑀺𑀬𑀸’’𑀢𑀺 𑀯𑀤𑀦𑁆𑀢𑀺. 𑀤𑀸𑀦𑀸𑀤𑀻𑀦𑀜𑁆𑀘𑁂𑀯 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀜𑁆𑀘 𑀲𑀁𑀲𑀸𑀭𑀦𑀺𑀩𑁆𑀩𑀸𑀦𑁂𑀲𑀼 𑀆𑀤𑀻𑀦𑀯𑀸𑀦𑀺𑀲𑀁𑀲𑀸𑀦𑀜𑁆𑀘 ¶ 𑀯𑀺𑀪𑀸𑀯𑀦𑀯𑀲𑁂𑀦, 𑀲𑀢𑁆𑀢𑀸𑀦𑀁 𑀩𑁄𑀥𑀺𑀢𑁆𑀢𑀬𑁂 𑀧𑀢𑀺𑀝𑁆𑀞𑀸𑀧𑀦𑀧𑀭𑀺𑀧𑀸𑀘𑀦𑀯𑀲𑁂𑀦 𑀘 𑀧𑀯𑀢𑁆𑀢𑀸 𑀓𑀣𑀸 𑀥𑀫𑁆𑀫𑀓𑁆𑀔𑀸𑀦𑀁. 𑀜𑀸𑀢𑀻𑀦𑀫𑀢𑁆𑀣𑀲𑁆𑀲 𑀘𑀭𑀺𑀬𑀸 𑀜𑀸𑀢𑀢𑁆𑀣𑀘𑀭𑀺𑀬𑀸, 𑀲𑀸𑀧𑀺 𑀓𑀭𑀼𑀡𑀸𑀬𑀦𑀯𑀲𑁂𑀦𑁂𑀯. 𑀆𑀤𑀺-𑀲𑀤𑁆𑀤𑁂𑀦 𑀮𑁄𑀓𑀢𑁆𑀣𑀘𑀭𑀺𑀬𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀯𑀲𑁂𑀦, 𑀅𑀦𑀯𑀚𑁆𑀚𑀓𑀫𑁆𑀫𑀸𑀬𑀢𑀦𑀲𑀺𑀧𑁆𑀧𑀸𑀬𑀢𑀦𑀯𑀺𑀚𑁆𑀚𑀸𑀝𑁆𑀞𑀸𑀦𑀧𑀭𑀺𑀘𑀬𑀯𑀲𑁂𑀦, 𑀔𑀦𑁆𑀥𑀸𑀬𑀢𑀦𑀸𑀤𑀺𑀧𑀭𑀺𑀘𑀬𑀯𑀲𑁂𑀦, 𑀮𑀓𑁆𑀔𑀡𑀢𑁆𑀢𑀬𑀢𑀻𑀭𑀡𑀯𑀲𑁂𑀦 𑀘 𑀜𑀸𑀡𑀘𑀸𑀭𑁄 𑀩𑀼𑀤𑁆𑀥𑀺𑀘𑀭𑀺𑀬𑀸, 𑀲𑀸 𑀧𑀦𑀢𑁆𑀣𑀢𑁄 𑀧𑀜𑁆𑀜𑀸𑀧𑀸𑀭𑀫𑀻𑀬𑁂𑀯, 𑀜𑀸𑀡𑀲𑀫𑁆𑀪𑀸𑀭𑀤𑀲𑁆𑀲𑀦𑀢𑁆𑀣𑀁 𑀧𑀦 𑀯𑀺𑀲𑀼𑀁 𑀕𑀳𑀡𑀁. 𑀓𑁄𑀝𑀺𑀦𑁆𑀢𑀺 𑀧𑀭𑀺𑀬𑀦𑁆𑀢𑀁 𑀉𑀓𑁆𑀓𑀁𑀲𑀁. 𑀢𑀣𑀸 𑀅𑀫𑁆𑀳𑀸𑀓𑀫𑁆𑀧𑀺 𑀪𑀕𑀯𑀸 𑀆𑀕𑀢𑁄𑀢𑀺 𑀏𑀢𑁆𑀣𑀸𑀧𑀺 ‘‘𑀤𑀸𑀦𑀧𑀸𑀭𑀫𑀺𑀁 𑀧𑀽𑀭𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀲𑀫𑁆𑀩𑀦𑁆𑀥𑁄.

𑀏𑀯𑀁 𑀧𑀸𑀭𑀫𑀺𑀧𑀽𑀭𑀡𑀯𑀲𑁂𑀦 ‘‘𑀢𑀣𑀸 𑀆𑀕𑀢𑁄’’𑀢𑀺 𑀧𑀤𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀯𑀲𑁂𑀦𑀧𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀕𑁆𑀕𑀳𑀡𑁂𑀦 𑀆𑀕𑀫𑀦𑀧𑀝𑀺𑀧𑀤𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀢𑀺 𑀫𑀕𑁆𑀕𑀨𑀮𑀧𑀓𑁆𑀔𑀺𑀓𑀸𑀦𑀜𑁆𑀜𑁂𑀯 𑀕𑀳𑁂𑀢𑀩𑁆𑀩𑀢𑁆𑀢𑀸, 𑀯𑀺𑀧𑀲𑁆𑀲𑀦𑀸𑀲𑀗𑁆𑀕𑀳𑀺𑀢𑀸 𑀏𑀯 𑀯𑀸 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀤𑀝𑁆𑀞𑀩𑁆𑀩𑀸 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀕𑀳𑀡𑀢𑁄. 𑀪𑀸𑀯𑁂𑀢𑁆𑀯𑀸𑀢𑀺 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀩𑁆𑀭𑀽𑀳𑁂𑀢𑁆𑀯𑀸𑀢𑀺 𑀯𑀟𑁆𑀠𑁂𑀢𑁆𑀯𑀸. 𑀏𑀢𑁆𑀣 𑀘 ‘‘𑀬𑁂𑀦 𑀅𑀪𑀺𑀦𑀻𑀳𑀸𑀭𑁂𑀦𑀸’’𑀢𑀺𑀆𑀤𑀺𑀦𑀸 𑀆𑀕𑀫𑀦𑀧𑀝𑀺𑀧𑀤𑀸𑀬𑀆𑀤𑀺𑀁 𑀤𑀲𑁆𑀲𑁂𑀢𑀺, ‘‘𑀤𑀸𑀦𑀧𑀸𑀭𑀫𑀺𑀁 𑀧𑀽𑀭𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀫𑀚𑁆𑀛𑁂, ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂’’𑀢𑀺𑀆𑀤𑀺𑀦𑀸 𑀧𑀭𑀺𑀬𑁄𑀲𑀸𑀦𑀁. 𑀢𑀲𑁆𑀫𑀸 ‘‘𑀆𑀕𑀢𑁄’’𑀢𑀺 𑀯𑀼𑀢𑁆𑀢𑀲𑁆𑀲 𑀆𑀕𑀫𑀦𑀲𑁆𑀲 𑀓𑀸𑀭𑀡𑀪𑀽𑀢𑀧𑀝𑀺𑀧𑀤𑀸𑀯𑀺𑀲𑁂𑀲𑀤𑀲𑁆𑀲𑀦𑀁𑀬𑁂𑀯 𑀢𑀺𑀡𑁆𑀡𑀁 𑀦𑀬𑀸𑀦𑀁 𑀯𑀺𑀲𑁂𑀲𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑁂𑀦 𑀅𑀢𑁆𑀣𑀬𑁄𑀚𑀦𑀢𑁆𑀢𑀬𑁂𑀦 𑀲𑀺𑀤𑁆𑀥𑀁 𑀧𑀞𑀫𑀓𑀸𑀭𑀡𑀫𑁂𑀯 𑀕𑀸𑀣𑀸𑀩𑀦𑁆𑀥𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑀣𑁂𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀥𑀮𑁄𑀓𑀫𑁆𑀳𑀺 𑀯𑀺𑀧𑀲𑁆𑀲𑀺𑀆𑀤𑀬𑁄 𑀫𑀼𑀦𑀬𑁄 𑀲𑀩𑁆𑀩𑀜𑁆𑀜𑀼𑀪𑀸𑀯𑀁 𑀬𑀣𑀸𑀯𑀼𑀢𑁆𑀢𑁂𑀦 𑀓𑀸𑀭𑀡𑀢𑁆𑀢𑀬𑁂𑀦 𑀆𑀕𑀢𑀸 𑀬𑀣𑁂𑀯, 𑀢𑀣𑀸 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸 𑀅𑀬𑀁 𑀲𑀓𑁆𑀬𑀫𑀼𑀦𑀺𑀧𑀺 𑀬𑁂𑀦 𑀓𑀸𑀭𑀡𑁂𑀦 𑀆𑀕𑀢𑁄, 𑀢𑁂𑀦𑁂𑀲 𑀢𑀣𑀸𑀕𑀢𑁄 𑀦𑀸𑀫 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑀦𑀸.

𑀲𑀫𑁆𑀧𑀢𑀺𑀚𑀸𑀢𑁄𑀢𑀺 ¶ 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀫𑀼𑀳𑀼𑀢𑁆𑀢𑀚𑀸𑀢𑁄, 𑀦 𑀧𑀦 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑀜𑁆𑀳𑀺 𑀫𑀳𑀸𑀲𑀢𑁆𑀢𑀁 𑀧𑀞𑀫𑀁 𑀩𑁆𑀭𑀳𑁆𑀫𑀸𑀦𑁄 𑀲𑀼𑀯𑀡𑁆𑀡𑀚𑀸𑀮𑁂𑀦 𑀧𑀝𑀺𑀕𑁆𑀕𑀡𑁆𑀳𑀺𑀁𑀲𑀼, 𑀢𑁂𑀲𑀁 𑀳𑀢𑁆𑀣𑀢𑁄 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀅𑀚𑀺𑀦𑀧𑁆𑀧𑀯𑁂𑀡𑀺𑀬𑀸, 𑀢𑁂𑀲𑀁 𑀳𑀢𑁆𑀣𑀢𑁄 𑀫𑀦𑀼𑀲𑁆𑀲𑀸 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂𑀦 𑀧𑀝𑀺𑀕𑁆𑀕𑀡𑁆𑀳𑀺𑀁𑀲𑀼, ‘‘𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑁄’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁧) 𑀯𑀓𑁆𑀔𑀢𑀺. ‘‘𑀓𑀣𑀜𑁆𑀘𑀸’’𑀢𑀺𑀆𑀤𑀺 𑀯𑀺𑀢𑁆𑀣𑀸𑀭𑀤𑀲𑁆𑀲𑀦𑀁. 𑀬𑀣𑀸𑀳 𑀪𑀕𑀯𑀸 𑀫𑀳𑀸𑀧𑀤𑀸𑀦𑀤𑁂𑀲𑀦𑀸𑀬𑀁. 𑀲𑁂𑀢𑀫𑁆𑀳𑀺 𑀙𑀢𑁆𑀢𑁂𑀢𑀺 𑀤𑀺𑀩𑁆𑀩𑀲𑁂𑀢𑀘𑁆𑀙𑀢𑁆𑀢𑁂. 𑀅𑀦𑀼𑀳𑀻𑀭𑀫𑀸𑀦𑁂𑀢𑀺 𑀥𑀸𑀭𑀺𑀬𑀫𑀸𑀦𑁂. ‘‘𑀅𑀦𑀼𑀥𑀸𑀭𑀺𑀬𑀫𑀸𑀦𑁂’’𑀢𑀺𑀧𑀺 𑀇𑀤𑀸𑀦𑀺 𑀧𑀸𑀞𑁄. ‘‘𑀏𑀢𑁆𑀣 𑀘 𑀙𑀢𑁆𑀢𑀕𑁆𑀕𑀳𑀡𑁂𑀦𑁂𑀯 𑀔𑀕𑁆𑀕𑀤𑀻𑀦𑀺 𑀧𑀜𑁆𑀘 𑀓𑀓𑀼𑀥𑀪𑀡𑁆𑀟𑀸𑀦𑀺𑀧𑀺 𑀕𑀳𑀺𑀢𑀸𑀦𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀔𑀕𑁆𑀕𑀢𑀸𑀮𑀯𑀡𑁆𑀝𑀫𑁄𑀭𑀳𑀢𑁆𑀣𑀓𑀯𑀸𑀮𑀩𑀻𑀚𑀦𑀻𑀉𑀡𑁆𑀳𑀻𑀲𑀧𑀝𑁆𑀝𑀸𑀧𑀺 𑀳𑀺 𑀙𑀢𑁆𑀢𑁂𑀦 𑀲𑀳 𑀢𑀤𑀸 𑀉𑀧𑀝𑁆𑀞𑀺𑀢𑀸 𑀅𑀳𑁂𑀲𑀼𑀁. 𑀙𑀢𑁆𑀢𑀸𑀤𑀻𑀦𑀺𑀬𑁂𑀯 𑀘 𑀢𑀤𑀸 𑀧𑀜𑁆𑀜𑀸𑀬𑀺𑀁𑀲𑀼, 𑀦 𑀙𑀢𑁆𑀢𑀸𑀤𑀺𑀕𑀸𑀳𑀓𑀸’’𑀢𑀺 ¶ (𑀤𑀻. 𑀦𑀺. 𑀝𑀻. 𑁧.𑁭) 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁, 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦𑀸𑀧𑀺 𑀅𑀗𑁆𑀕𑀼𑀢𑁆𑀢𑀭𑀝𑀻𑀓𑀸𑀬𑀁 (𑀅. 𑀦𑀺. 𑀝𑀻. 𑁧.𑀏𑀓𑀧𑀼𑀕𑁆𑀕𑀮𑀯𑀕𑁆𑀕𑀲𑁆𑀲 𑀧𑀞𑀫𑁂) 𑀏𑀯𑀁 𑀲𑀢𑀺 𑀢𑀸𑀮𑀯𑀡𑁆𑀝𑀸𑀤𑀻𑀦𑀫𑁆𑀧𑀺 𑀓𑀓𑀼𑀥𑀪𑀡𑁆𑀟𑀲𑀫𑀜𑁆𑀜𑀸. 𑀅𑀧𑀺𑀘 𑀔𑀕𑁆𑀕𑀸𑀤𑀻𑀦𑀺 𑀓𑀓𑀼𑀥𑀪𑀡𑁆𑀟𑀸𑀦𑀺, 𑀢𑀤𑀜𑁆𑀜𑀸𑀦𑀺𑀧𑀺 𑀢𑀸𑀮𑀯𑀡𑁆𑀝𑀸𑀤𑀻𑀦𑀺 𑀢𑀤𑀸 𑀉𑀧𑀝𑁆𑀞𑀺𑀢𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀢𑀣𑀸 𑀯𑀼𑀢𑁆𑀢𑀁.

𑀲𑀩𑁆𑀩𑀸 𑀘 𑀤𑀺𑀲𑀸𑀢𑀺 𑀤𑀲 𑀤𑀺𑀲𑀸. 𑀅𑀦𑀼𑀯𑀺𑀮𑁄𑀓𑁂𑀢𑀻𑀢𑀺 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀮𑁄𑀓𑀯𑀺𑀯𑀭𑀡𑀧𑀸𑀝𑀺𑀳𑀸𑀭𑀺𑀬𑁂 𑀚𑀸𑀢𑁂 𑀧𑀜𑁆𑀜𑀸𑀬𑀫𑀸𑀦𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀫𑀁𑀲𑀘𑀓𑁆𑀔𑀼𑀦𑀸𑀯 𑀑𑀮𑁄𑀓𑁂𑀢𑀻𑀢𑀺 𑀅𑀢𑁆𑀣𑁄. 𑀦𑀬𑀺𑀤𑀁 𑀲𑀩𑁆𑀩𑀤𑀺𑀲𑀸𑀦𑀼𑀯𑀺𑀮𑁄𑀓𑀦𑀁 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑀼𑀢𑁆𑀢𑀭𑀓𑀸𑀮𑀁 𑀧𑀞𑀫𑀫𑁂𑀯𑀸𑀦𑀼𑀯𑀺𑀮𑁄𑀓𑀦𑀢𑁄. 𑀫𑀳𑀸𑀲𑀢𑁆𑀢𑁄 𑀳𑀺 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀑𑀮𑁄𑀓𑁂𑀲𑀺. 𑀢𑀢𑁆𑀣 𑀤𑁂𑀯𑀫𑀦𑀼𑀲𑁆𑀲𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑀸 ‘‘𑀫𑀳𑀸𑀧𑀼𑀭𑀺𑀲 𑀇𑀥 𑀢𑀼𑀫𑁆𑀳𑁂𑀳𑀺 𑀲𑀤𑀺𑀲𑁄𑀧𑀺 𑀦𑀢𑁆𑀣𑀺, 𑀓𑀼𑀢𑁄 𑀢𑀬𑀸 𑀉𑀢𑁆𑀢𑀭𑀺𑀢𑀭𑁄’’𑀢𑀺 𑀆𑀳𑀁𑀲𑀼. 𑀏𑀯𑀁 𑀘𑀢𑀲𑁆𑀲𑁄 𑀤𑀺𑀲𑀸 𑀘𑀢𑀲𑁆𑀲𑁄 𑀅𑀦𑀼𑀤𑀺𑀲𑀸 𑀳𑁂𑀝𑁆𑀞𑀸 𑀉𑀧𑀭𑀻𑀢𑀺 𑀲𑀩𑁆𑀩𑀸 𑀤𑀺𑀲𑀸𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀲𑀩𑁆𑀩𑀢𑁆𑀣 𑀅𑀢𑁆𑀢𑀦𑀸 𑀲𑀤𑀺𑀲𑀫𑀤𑀺𑀲𑁆𑀯𑀸 ‘‘𑀅𑀬𑀁 𑀉𑀢𑁆𑀢𑀭𑀸 𑀤𑀺𑀲𑀸’’𑀢𑀺 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀅𑀕𑀫𑀸𑀲𑀻𑀢𑀺 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 (𑀤𑀻. 𑀦𑀺. 𑀝𑀻. 𑁧.𑁭) 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 (𑀅. 𑀦𑀺. 𑀝𑀻. 𑁧.𑀏𑀓𑀧𑀼𑀕𑁆𑀕𑀮𑀯𑀕𑁆𑀕𑀲𑁆𑀲 𑀧𑀞𑀫𑁂) 𑀘 𑀯𑀼𑀢𑁆𑀢𑀁. 𑀫𑀳𑀸𑀧𑀤𑀸𑀦𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀫𑁆𑀧𑀺 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁧) 𑀏𑀯𑀫𑁂𑀯 𑀯𑀡𑁆𑀡𑀺𑀢𑀁. 𑀢𑀲𑁆𑀫𑀸 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑀢𑁄 𑀧𑀞𑀫𑀁 𑀲𑀩𑁆𑀩𑀤𑀺𑀲𑀸𑀦𑀼𑀯𑀺𑀮𑁄𑀓𑀦𑀁 𑀓𑀢𑁆𑀯𑀸 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀕𑀦𑁆𑀢𑁆𑀯𑀸 𑀢𑀤𑀼𑀧𑀭𑀺 𑀆𑀲𑀪𑀺𑀁 𑀯𑀸𑀘𑀁 𑀪𑀸𑀲𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀥, 𑀧𑀦 𑀅𑀜𑁆𑀜𑀸𑀲𑀼 𑀘 𑀅𑀝𑁆𑀞𑀓𑀣𑀸𑀲𑀼 𑀲𑀫𑁂𑀳𑀺 ¶ 𑀧𑀸𑀤𑁂𑀳𑀺 𑀧𑀢𑀺𑀝𑁆𑀞𑀳𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀆𑀲𑀪𑀻𑀯𑀸𑀘𑀸𑀪𑀸𑀲𑀦𑀁 𑀢𑀸𑀯 𑀬𑀣𑀸𑀓𑁆𑀓𑀫𑀁 𑀏𑀯 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀲𑀢𑁆𑀢𑀫𑀧𑀤𑀽𑀧𑀭𑀺 𑀞𑀢𑁆𑀯𑀸 𑀲𑀩𑁆𑀩𑀤𑀺𑀲𑀸𑀦𑀼𑀯𑀺𑀮𑁄𑀓𑀦𑀁 𑀲𑀩𑁆𑀩𑀜𑁆𑀜𑀼𑀢𑀸𑀦𑀸𑀯𑀭𑀡𑀜𑀸𑀡𑀧𑀝𑀺𑀮𑀸𑀪𑀲𑁆𑀲𑀸’’𑀢𑀺𑀆𑀤𑀻𑀦𑀺 𑀯𑀤𑀢𑀺, 𑀏𑀯𑀫𑁆𑀧𑀺 𑀬𑀣𑀸 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀏𑀯 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. ‘‘𑀲𑀢𑁆𑀢𑀫𑀧𑀤𑀽𑀧𑀭𑀺 𑀞𑀢𑁆𑀯𑀸’’𑀢𑀺 𑀘 𑀧𑀸𑀞𑁄 𑀧𑀘𑁆𑀙𑀸 𑀧𑀫𑀸𑀤𑀮𑁂𑀔𑀯𑀲𑁂𑀦 𑀏𑀤𑀺𑀲𑁂𑀦 𑀯𑀘𑀦𑀓𑁆𑀓𑀫𑁂𑀦 𑀫𑀳𑀸𑀧𑀤𑀸𑀦𑀝𑁆𑀞𑀓𑀣𑀸𑀬𑀫𑀤𑀺𑀲𑁆𑀲𑀫𑀸𑀦𑀢𑁆𑀢𑀸𑀢𑀺. 𑀆𑀲𑀪𑀺𑀦𑁆𑀢𑀺 𑀉𑀢𑁆𑀢𑀫𑀁, 𑀅𑀓𑀫𑁆𑀧𑀦𑀺𑀓𑀁 𑀯𑀸, 𑀦𑀺𑀩𑁆𑀪𑀬𑀦𑁆𑀢𑀺 𑀅𑀢𑁆𑀣𑁄. 𑀉𑀲𑀪𑀲𑁆𑀲 𑀇𑀤𑀦𑁆𑀢𑀺 𑀳𑀺 𑀆𑀲𑀪𑀁, 𑀲𑀽𑀭𑀪𑀸𑀯𑁄, 𑀢𑁂𑀦 𑀬𑀼𑀢𑁆𑀢𑀢𑁆𑀢𑀸 𑀧𑀦𑀸𑀬𑀁 𑀯𑀸𑀘𑀸 ‘‘𑀆𑀲𑀪𑀻’’𑀢𑀺 𑀯𑀼𑀘𑁆𑀘𑀢𑀺. 𑀅𑀕𑁆𑀕𑁄𑀢𑀺 𑀲𑀩𑁆𑀩𑀧𑀞𑀫𑁄. 𑀚𑁂𑀝𑁆𑀞𑁄, 𑀲𑁂𑀝𑁆𑀞𑁄𑀢𑀺 𑀘 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑀤𑁆𑀤𑀢𑁆𑀣𑀫𑀢𑁆𑀢𑀢𑁄 𑀧𑀦 𑀅𑀕𑁆𑀕𑁄𑀢𑀺 𑀕𑀼𑀡𑁂𑀳𑀺 𑀲𑀩𑁆𑀩𑀧𑀥𑀸𑀦𑁄. 𑀚𑁂𑀝𑁆𑀞𑁄𑀢𑀺 𑀕𑀼𑀡𑀯𑀲𑁂𑀦𑁂𑀯 𑀲𑀩𑁆𑀩𑁂𑀲𑀁 𑀯𑀼𑀤𑁆𑀥𑀢𑀫𑁄, 𑀕𑀼𑀡𑁂𑀳𑀺 𑀫𑀳𑀮𑁆𑀮𑀓𑀢𑀫𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀝𑁆𑀞𑁄𑀢𑀺 𑀕𑀼𑀡𑀯𑀲𑁂𑀦𑁂𑀯 𑀲𑀩𑁆𑀩𑁂𑀲𑀁 𑀧𑀲𑀝𑁆𑀞𑀢𑀫𑁄. 𑀮𑁄𑀓𑀲𑁆𑀲𑀸𑀢𑀺 𑀯𑀺𑀪𑀢𑁆𑀢𑀸𑀯𑀥𑀺𑀪𑀽𑀢𑁂 𑀦𑀺𑀲𑁆𑀲𑀓𑁆𑀓𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀧𑀢𑁆𑀢𑀩𑁆𑀩𑀁 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀸𑀲𑀺 𑀢𑀩𑁆𑀩𑀲𑁂𑀦𑁂𑀯 𑀧𑀼𑀦𑀩𑁆𑀪𑀯𑀸𑀪𑀸𑀯𑀢𑁄.

𑀇𑀤𑀸𑀦𑀺 𑀢𑀣𑀸𑀕𑀫𑀦𑀁 𑀲𑀫𑁆𑀪𑀸𑀯𑁂𑀦𑁆𑀢𑁄 ‘‘𑀢𑀜𑁆𑀘𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀸𑀯𑁂𑀦 𑀢𑀣𑀁 𑀅𑀯𑀺𑀢𑀣𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀺𑀲𑁂𑀲𑀸𑀥𑀺𑀕𑀫𑀸𑀦𑀦𑁆𑀢𑀺 𑀕𑀼𑀡𑀯𑀺𑀲𑁂𑀲𑀸𑀥𑀺𑀕𑀫𑀸𑀦𑀁. 𑀢𑀤𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀺 ‘‘𑀬𑀜𑁆𑀳𑀻’’𑀢𑀺𑀆𑀤𑀺𑀦𑀸 ¶ . 𑀢𑀢𑁆𑀣 𑀬𑀦𑁆𑀢𑀺 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁, 𑀢𑁂𑀦 ‘‘𑀧𑀢𑀺𑀝𑁆𑀞𑀳𑀻’’𑀢𑀺 𑀏𑀢𑁆𑀣 𑀧𑀓𑀢𑀺𑀬𑀢𑁆𑀣𑀁𑀧𑀢𑀺𑀝𑁆𑀞𑀸𑀦𑀓𑀺𑀭𑀺𑀬𑀁 𑀧𑀭𑀸𑀫𑀲𑀢𑀺. 𑀇𑀤𑀫𑀲𑁆𑀲𑀸𑀢𑀺 𑀇𑀤𑀁 𑀧𑀢𑀺𑀝𑁆𑀞𑀳𑀦𑀁 𑀅𑀲𑁆𑀲 𑀪𑀕𑀯𑀢𑁄. 𑀧𑀝𑀺𑀮𑀸𑀪𑀲𑀤𑁆𑀤𑁂 𑀲𑀸𑀫𑀺𑀦𑀺𑀤𑁆𑀤𑁂𑀲𑁄 𑀘𑁂𑀲, 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄 𑀯𑀸. 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀦𑁆𑀢𑀺 𑀢𑀧𑁆𑀧𑀝𑀺𑀮𑀸𑀪𑀲𑀗𑁆𑀔𑀸𑀢𑀲𑁆𑀲 𑀆𑀬𑀢𑀺𑀁 𑀉𑀧𑁆𑀧𑀚𑁆𑀚𑀫𑀸𑀦𑀓𑀲𑁆𑀲 𑀳𑀺𑀢𑀲𑁆𑀲 𑀧𑀞𑀫𑀁 𑀧𑀯𑀢𑁆𑀢𑀁 𑀲𑀜𑁆𑀚𑀸𑀦𑀦𑀓𑀸𑀭𑀡𑀁. 𑀪𑀕𑀯𑀢𑁄 𑀳𑀺 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀕𑀼𑀡𑀯𑀺𑀲𑁂𑀲𑀸𑀥𑀺𑀕𑀫𑀦𑁂 𑀧𑀜𑁆𑀘 𑀫𑀳𑀸𑀲𑀼𑀧𑀺𑀦𑀸𑀤𑀬𑁄 𑀯𑀺𑀬 𑀏𑀢𑀸𑀦𑀺 𑀲𑀜𑁆𑀚𑀸𑀦𑀦𑀦𑀺𑀫𑀺𑀢𑁆𑀢𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺, 𑀬𑀣𑀸 𑀢𑀁 𑀮𑁄𑀓𑁂 𑀧𑀼𑀜𑁆𑀜𑀯𑀦𑁆𑀢𑀸𑀦𑀁 𑀧𑀼𑀜𑁆𑀜𑀨𑀮𑀯𑀺𑀲𑁂𑀲𑀸𑀥𑀺𑀕𑀫𑀦𑁂𑀢𑀺.

𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑀪𑀸𑀯𑀲𑁆𑀲𑀸𑀢𑀺 𑀲𑀩𑁆𑀩𑀮𑁄𑀓𑀸𑀦𑀫𑀼𑀢𑁆𑀢𑀫𑀪𑀸𑀯𑀲𑁆𑀲, 𑀲𑀩𑁆𑀩𑀮𑁄𑀓𑀸𑀢𑀺𑀓𑁆𑀓𑀫𑀦𑀪𑀸𑀯𑀲𑁆𑀲 𑀯𑀸. 𑀲𑀢𑁆𑀢 𑀧𑀤𑀸𑀦𑀺 𑀲𑀢𑁆𑀢𑀧𑀤𑀁, 𑀢𑀲𑁆𑀲 𑀯𑀻𑀢𑀺𑀳𑀸𑀭𑁄 𑀯𑀺𑀲𑁂𑀲𑁂𑀦 𑀅𑀢𑀺𑀳𑀭𑀡𑀁 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁄, 𑀲𑀢𑁆𑀢𑀧𑀤𑀦𑀺𑀓𑁆𑀔𑁂𑀧𑁄𑀢𑀺 𑀅𑀢𑁆𑀣𑁄. 𑀲𑁄 𑀧𑀦 𑀲𑀫𑀕𑀫𑀦𑁂 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀫𑀦𑁆𑀢𑀭𑁂 𑀫𑀼𑀝𑁆𑀞𑀺𑀭𑀢𑀦𑀫𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁.

‘‘𑀅𑀦𑁂𑀓𑀲𑀸𑀔𑀜𑁆𑀘 ¶ 𑀲𑀳𑀲𑁆𑀲𑀫𑀡𑁆𑀟𑀮𑀁,

𑀙𑀢𑁆𑀢𑀁 𑀫𑀭𑀽 𑀥𑀸𑀭𑀬𑀼𑀫𑀦𑁆𑀢𑀮𑀺𑀓𑁆𑀔𑁂;

𑀲𑀼𑀯𑀡𑁆𑀡𑀤𑀡𑁆𑀟𑀸 𑀯𑀻𑀢𑀺𑀧𑀢𑀦𑁆𑀢𑀺 𑀘𑀸𑀫𑀭𑀸,

𑀦 𑀤𑀺𑀲𑁆𑀲𑀭𑁂 𑀘𑀸𑀫𑀭𑀙𑀢𑁆𑀢𑀕𑀸𑀳𑀓𑀸’’𑀢𑀺. (𑀲𑀼. 𑀦𑀺. 𑁬𑁯𑁩); 𑁋

𑀲𑀼𑀢𑁆𑀢𑀦𑀺𑀧𑀸𑀢𑁂 𑀦𑀸𑀴𑀓𑀲𑀼𑀢𑁆𑀢𑁂 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁 𑀦𑀺𑀤𑀸𑀦𑀕𑀸𑀣𑀸𑀧𑀤𑀁 𑀲𑀦𑁆𑀥𑀸𑀬 ‘‘𑀲𑀼𑀯𑀡𑁆𑀡𑀤𑀡𑁆𑀟𑀸 𑀯𑀻𑀢𑀺𑀧𑀢𑀦𑁆𑀢𑀺 𑀘𑀸𑀫𑀭𑀸𑀢𑀺 𑀏𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣𑀸𑀢𑀺 𑀳𑀺 𑀏𑀢𑀲𑁆𑀫𑀺𑀁 𑀕𑀸𑀣𑀸𑀧𑀤𑁂𑀢𑀺 𑀅𑀢𑁆𑀣𑁄. 𑀫𑀳𑀸𑀧𑀤𑀸𑀦𑀲𑀼𑀢𑁆𑀢𑁂 𑀅𑀦𑀸𑀕𑀢𑀢𑁆𑀢𑀸 𑀧𑀦 𑀘𑀸𑀫𑀭𑀼𑀓𑁆𑀔𑁂𑀧𑀲𑁆𑀲 𑀢𑀣𑀸 𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀆𑀕𑀢𑀸𑀦𑀼𑀲𑀸𑀭𑁂𑀦 𑀳𑀺 𑀇𑀥 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀸𑀯𑀁 𑀯𑀤𑀢𑀺, 𑀘𑀫𑀭𑁄 𑀦𑀸𑀫 𑀫𑀺𑀕𑀯𑀺𑀲𑁂𑀲𑁄. 𑀬𑀲𑁆𑀲 𑀯𑀸𑀮𑁂𑀦 𑀭𑀸𑀚𑀓𑀓𑀼𑀥𑀪𑀽𑀢𑀁 𑀯𑀸𑀮𑀩𑀻𑀚𑀦𑀺𑀁 𑀓𑀭𑁄𑀦𑁆𑀢𑀺, 𑀢𑀲𑁆𑀲 𑀅𑀬𑀦𑁆𑀢𑀺 𑀘𑀸𑀫𑀭𑀻. 𑀢𑀲𑁆𑀲𑀸 𑀉𑀓𑁆𑀔𑁂𑀧𑁄 𑀢𑀣𑀸, 𑀯𑀼𑀢𑁆𑀢𑁄 𑀲𑁄𑀢𑀺 𑀯𑀼𑀢𑁆𑀢𑀘𑀸𑀫𑀭𑀼𑀓𑁆𑀔𑁂𑀧𑁄. 𑀅𑀭𑀳𑀢𑁆𑀢𑀯𑀺𑀫𑀼𑀢𑁆𑀢𑀺𑀯𑀭𑀯𑀺𑀫𑀮𑀲𑁂𑀢𑀘𑁆𑀙𑀢𑁆𑀢𑀧𑀝𑀺𑀮𑀸𑀪𑀲𑁆𑀲𑀸𑀢𑀺 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑀯𑀭𑀯𑀺𑀫𑀮𑀲𑁂𑀢𑀘𑁆𑀙𑀢𑁆𑀢𑀧𑀝𑀺𑀮𑀸𑀪𑀲𑁆𑀲. 𑀲𑀢𑁆𑀢𑀫𑀧𑀤𑀽𑀧𑀭𑀻𑀢𑀺 𑀏𑀢𑁆𑀣 𑀧𑀤-𑀲𑀤𑁆𑀤𑁄 𑀧𑀤𑀯𑀴𑀜𑁆𑀚𑀦𑀯𑀸𑀘𑀓𑁄, 𑀢𑀲𑁆𑀫𑀸 𑀲𑀢𑁆𑀢𑀫𑀲𑁆𑀲 𑀧𑀤𑀯𑀴𑀜𑁆𑀚𑀦𑀲𑁆𑀲 𑀉𑀧𑀭𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀘𑀸𑀭𑀢𑀸𑀬 𑀅𑀦𑀸𑀯𑀭𑀡𑀦𑁆𑀢𑀺 𑀆𑀳 ‘‘𑀲𑀩𑁆𑀩𑀜𑁆𑀜𑀼𑀢𑀸𑀦𑀸𑀯𑀭𑀡𑀜𑀸𑀡𑀧𑀝𑀺𑀮𑀸𑀪𑀲𑁆𑀲𑀸’’𑀢𑀺. 𑀢𑀣𑀸 𑀅𑀬𑀁 𑀪𑀕𑀯𑀸…𑀧𑁂… 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀸𑀯𑀦𑀸𑀢𑀺 𑀏𑀢𑁆𑀣 ‘‘𑀬𑀜𑁆𑀳𑀻’’𑀢𑀺𑀆𑀤𑀺 𑀅𑀥𑀺𑀓𑀸𑀭𑀢𑁆𑀢𑀸, 𑀕𑀫𑁆𑀬𑀫𑀸𑀦𑀢𑁆𑀢𑀸 𑀘 𑀦 𑀯𑀼𑀢𑁆𑀢𑀁, 𑀏𑀢𑁂𑀦 𑀘 𑀅𑀪𑀺𑀚𑀸𑀢𑀺𑀬𑀁 𑀥𑀫𑁆𑀫𑀢𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀯𑀺𑀲𑁂𑀲𑀸 𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀸𑀭𑀫𑀺𑀢𑀸𑀦𑀺𑀲𑁆𑀲𑀦𑁆𑀤𑀸 𑀳𑀺 𑀢𑁂.

𑀧𑁄𑀭𑀸𑀡𑀸𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸. 𑀕𑀯𑀫𑁆𑀧𑀢𑀺 𑀉𑀲𑀪𑁄 𑀲𑀫𑁂𑀳𑀺 𑀧𑀸𑀤𑁂𑀳𑀺 𑀯𑀲𑀽𑀦𑀁 𑀭𑀢𑀦𑀸𑀦𑀁 𑀥𑀸𑀭𑀡𑀢𑁄 𑀯𑀲𑀼𑀦𑁆𑀤𑀭𑀲𑀗𑁆𑀔𑀸𑀢𑀁 ¶ 𑀪𑀽𑀫𑀺𑀁 𑀨𑀼𑀲𑀻 𑀬𑀣𑀸, 𑀢𑀣𑀸 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀫𑀼𑀳𑀼𑀢𑁆𑀢𑀚𑀸𑀢𑁄 𑀲𑁄 𑀕𑁄𑀢𑀫𑁄 𑀲𑀫𑁂𑀳𑀺 𑀧𑀸𑀤𑁂𑀳𑀺 𑀯𑀲𑀼𑀦𑁆𑀥𑀭𑀁 𑀨𑀼𑀲𑀻𑀢𑀺 𑀅𑀢𑁆𑀣𑁄. 𑀯𑀺𑀓𑁆𑀓𑀫𑀻𑀢𑀺 𑀅𑀕𑀫𑀸𑀲𑀺. 𑀲𑀢𑁆𑀢 𑀧𑀤𑀸𑀦𑀻𑀢𑀺 𑀲𑀢𑁆𑀢𑀧𑀤𑀯𑀴𑀜𑁆𑀚𑀦𑀝𑁆𑀞𑀸𑀦𑀸𑀦𑀺. 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁, 𑀲𑀢𑁆𑀢𑀧𑀤𑀯𑀸𑀭𑁂𑀳𑀻𑀢𑀺 𑀯𑀸 𑀓𑀭𑀡𑀢𑁆𑀣𑁄 𑀉𑀢𑁆𑀢𑀭𑀧𑀤𑀮𑁄𑀧𑀯𑀲𑁂𑀦 𑀤𑀝𑁆𑀞𑀩𑁆𑀩𑁄. 𑀫𑀭𑀽𑀢𑀺 𑀤𑁂𑀯𑀸 𑀬𑀣𑀸𑀫𑀭𑀺𑀬𑀸𑀤𑀁 𑀫𑀭𑀡𑀲𑀪𑀸𑀯𑀢𑁄. 𑀲𑀫𑀸𑀢𑀺 𑀯𑀺𑀮𑁄𑀓𑀦𑀲𑀫𑀢𑀸𑀬 𑀲𑀫𑀸 𑀲𑀤𑀺𑀲𑀺𑀬𑁄. 𑀫𑀳𑀸𑀧𑀼𑀭𑀺𑀲𑁄 𑀳𑀺 𑀬𑀣𑀸 𑀏𑀓𑀁 𑀤𑀺𑀲𑀁 𑀯𑀺𑀮𑁄𑀓𑁂𑀲𑀺, 𑀏𑀯𑀁 𑀲𑁂𑀲𑀤𑀺𑀲𑀸𑀧𑀺, 𑀦 𑀓𑀢𑁆𑀣𑀘𑀺 𑀯𑀺𑀮𑁄𑀓𑀦𑁂 𑀯𑀺𑀦𑀺𑀩𑀦𑁆𑀥𑁄 𑀢𑀲𑁆𑀲 𑀅𑀳𑁄𑀲𑀺, 𑀲𑀫𑀸𑀢𑀺 𑀯𑀸 𑀯𑀺𑀮𑁄𑀓𑁂𑀢𑀼𑀁 𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀦 𑀳𑀺 𑀢𑀤𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀺𑀭𑀽𑀧𑀩𑀻𑀪𑀘𑁆𑀙𑀯𑀺𑀲𑀫𑀭𑀽𑀧𑀸𑀦𑀺 𑀯𑀺𑀮𑁄𑀓𑁂𑀢𑀼𑀫𑀬𑀼𑀢𑁆𑀢𑀸𑀦𑀺 𑀤𑀺𑀲𑀸𑀲𑀼 𑀉𑀧𑀝𑁆𑀞𑀳𑀦𑁆𑀢𑀺 ¶ , 𑀯𑀺𑀲𑁆𑀲𑀝𑁆𑀞𑀫𑀜𑁆𑀚𑀽𑀯𑀺𑀜𑁆𑀜𑁂𑀬𑁆𑀬𑀸𑀤𑀺𑀯𑀲𑁂𑀦 𑀅𑀝𑁆𑀞𑀗𑁆𑀕𑀼𑀧𑁂𑀢𑀁 𑀕𑀺𑀭𑀁 𑀅𑀩𑁆𑀪𑀼𑀤𑀻𑀭𑀬𑀺 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀝𑁆𑀞𑀺𑀢𑁄 𑀲𑀻𑀳𑁄 𑀬𑀣𑀸 𑀅𑀪𑀺𑀦𑀤𑀻𑀢𑀺 𑀅𑀢𑁆𑀣𑁄.

𑀏𑀯𑀁 𑀓𑀸𑀬𑀕𑀫𑀦𑀢𑁆𑀣𑁂𑀦 𑀕𑀢𑀲𑀤𑁆𑀤𑁂𑀦 𑀢𑀣𑀸𑀕𑀢𑀲𑀤𑁆𑀤𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀜𑀸𑀡𑀕𑀫𑀦𑀢𑁆𑀣𑁂𑀦 𑀦𑀺𑀤𑁆𑀤𑀺𑀲𑀺𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀬𑀣𑀸 𑀯𑀺𑀧𑀲𑁆𑀲𑀻 𑀪𑀕𑀯𑀸’’𑀢𑀺𑀆𑀤𑀻𑀲𑀼𑀧𑀺 ‘‘𑀦𑁂𑀓𑁆𑀔𑀫𑁆𑀫𑁂𑀦 𑀓𑀸𑀫𑀘𑁆𑀙𑀦𑁆𑀤𑀁 𑀧𑀳𑀸𑀬𑀸’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀦𑁂𑀓𑁆𑀔𑀫𑁆𑀫𑁂𑀦𑀸𑀢𑀺 𑀅𑀮𑁄𑀪𑀧𑀥𑀸𑀦𑁂𑀦 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦. 𑀓𑀼𑀲𑀮𑀸 𑀳𑀺 𑀥𑀫𑁆𑀫𑀸 𑀇𑀥 𑀦𑁂𑀓𑁆𑀔𑀫𑁆𑀫𑀁 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀓𑀸𑀫𑀘𑁆𑀙𑀦𑁆𑀤𑀧𑀝𑀺𑀧𑀓𑁆𑀔𑀢𑁆𑀢𑀸, 𑀦 𑀧𑀩𑁆𑀩𑀚𑁆𑀚𑀸𑀤𑀬𑁄 𑀏𑀯. ‘‘𑀧𑀞𑀫𑀚𑁆𑀛𑀸𑀦𑁂𑀦𑀸’’𑀢𑀺𑀧𑀺 𑀯𑀤𑀦𑁆𑀢𑀺 𑀓𑁂𑀘𑀺, 𑀢𑀤𑀬𑀼𑀢𑁆𑀢𑀫𑁂𑀯 𑀧𑀞𑀫𑀚𑁆𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀏𑀯 𑀇𑀥 𑀇𑀘𑁆𑀙𑀺𑀢𑀢𑁆𑀢𑀸. 𑀧𑀳𑀸𑀬𑀸𑀢𑀺 𑀧𑀚𑀳𑀺𑀢𑁆𑀯𑀸. 𑀕𑀢𑁄𑀢𑀺 𑀉𑀢𑁆𑀢𑀭𑀺𑀯𑀺𑀲𑁂𑀲𑀁 𑀜𑀸𑀡𑀕𑀫𑀦𑁂𑀦 𑀧𑀝𑀺𑀧𑀦𑁆𑀦𑁄. 𑀧𑀳𑀸𑀬𑀸𑀢𑀺 𑀯𑀸 𑀧𑀳𑀸𑀦𑀳𑁂𑀢𑀼, 𑀧𑀳𑀸𑀦𑁂 𑀯𑀸 𑀲𑀢𑀺. 𑀳𑁂𑀢𑀼𑀮𑀓𑁆𑀔𑀡𑀢𑁆𑀣𑁂𑀲𑀼 𑀳𑀺 𑀅𑀬𑀁 𑀢𑁆𑀯𑀸-𑀲𑀤𑁆𑀤𑁄 ‘‘𑀲𑀓𑁆𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁫𑁫) 𑀯𑀺𑀬. 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀧𑁆𑀧𑀳𑀸𑀦𑀳𑁂𑀢𑀼𑀓𑀜𑁆𑀘 ‘‘𑀕𑀢𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀅𑀯𑀩𑁄𑀥𑀲𑀗𑁆𑀔𑀸𑀢𑀁, 𑀧𑀝𑀺𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀯𑀸 𑀕𑀫𑀦𑀁 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀧𑁆𑀧𑀳𑀸𑀦𑁂𑀦 𑀘 𑀢𑀁 𑀮𑀓𑁆𑀔𑀻𑀬𑀢𑀺, 𑀏𑀲 𑀦𑀬𑁄 ‘‘𑀧𑀤𑀸𑀮𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼𑀧𑀺. 𑀅𑀩𑁆𑀬𑀸𑀧𑀸𑀤𑁂𑀦𑀸𑀢𑀺 𑀫𑁂𑀢𑁆𑀢𑀸𑀬. 𑀆𑀮𑁄𑀓𑀲𑀜𑁆𑀜𑀸𑀬𑀸𑀢𑀺 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀫𑀦𑀲𑀺𑀓𑀸𑀭𑁂𑀦 𑀉𑀧𑀝𑁆𑀞𑀺𑀢𑀸𑀮𑁄𑀓𑀲𑀜𑁆𑀚𑀸𑀦𑀦𑁂𑀦. 𑀅𑀯𑀺𑀓𑁆𑀔𑁂𑀧𑁂𑀦𑀸𑀢𑀺 𑀲𑀫𑀸𑀥𑀺𑀦𑀸. 𑀥𑀫𑁆𑀫𑀯𑀯𑀢𑁆𑀣𑀸𑀦𑁂𑀦𑀸𑀢𑀺 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀬𑀸𑀣𑀸𑀯𑀦𑀺𑀘𑁆𑀙𑀬𑁂𑀦, 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑁂𑀦𑀸𑀢𑀺𑀧𑀺 𑀯𑀤𑀦𑁆𑀢𑀺.

𑀏𑀯𑀁 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀦𑀻𑀯𑀭𑀡𑀧𑁆𑀧𑀳𑀸𑀦𑁂𑀦 ‘‘𑀅𑀪𑀺𑀚𑁆𑀛𑀁 𑀮𑁄𑀓𑁂 𑀧𑀳𑀸𑀬𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀬 𑀧𑀞𑀫𑀚𑁆𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀪𑀕𑀯𑀢𑁄 𑀜𑀸𑀡𑀕𑀫𑀦𑀯𑀺𑀲𑀺𑀝𑁆𑀞𑀁 𑀢𑀣𑀸𑀕𑀢𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀳 𑀉𑀧𑀸𑀬𑁂𑀦 𑀅𑀝𑁆𑀞𑀳𑀺 𑀲𑀫𑀸𑀧𑀢𑁆𑀢𑀻𑀳𑀺, 𑀅𑀝𑁆𑀞𑀸𑀭𑀲𑀳𑀺 𑀘 𑀫𑀳𑀸𑀯𑀺𑀧𑀲𑁆𑀲𑀦𑀸𑀳𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀜𑀸𑀡𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑀓𑀗𑁆𑀔𑀸𑀯𑀺𑀢𑀭𑀡𑀸𑀦𑀜𑁆𑀳𑀺 𑀯𑀺𑀦𑀺𑀩𑀦𑁆𑀥𑀪𑀽𑀢𑀲𑁆𑀲 𑀫𑁄𑀳𑀲𑁆𑀲 𑀤𑀽𑀭𑀻𑀓𑀭𑀡𑁂𑀦 𑀜𑀸𑀢𑀧𑀭𑀺𑀜𑁆𑀜𑀸𑀬𑀁 𑀞𑀺𑀢𑀲𑁆𑀲 𑀅𑀦𑀺𑀘𑁆𑀘𑀲𑀜𑁆𑀜𑀸𑀤𑀬𑁄 𑀲𑀺𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸𑀧𑀤𑀸𑀮𑀦𑀁 𑀯𑀺𑀧𑀲𑁆𑀲𑀦𑀸𑀬 𑀉𑀧𑀸𑀬𑁄. 𑀢𑀣𑀸 𑀛𑀸𑀦𑀲𑀫𑀸𑀧𑀢𑁆𑀢𑀻𑀲𑀼 𑀅𑀪𑀺𑀭𑀢𑀺𑀦𑀺𑀫𑀺𑀢𑁆𑀢𑁂𑀦 𑀧𑀸𑀫𑁄𑀚𑁆𑀚𑁂𑀦, 𑀢𑀢𑁆𑀣 𑀅𑀦𑀪𑀺𑀭𑀢𑀺𑀬𑀸 𑀯𑀺𑀦𑁄𑀤𑀺𑀢𑀸𑀬 𑀛𑀸𑀦𑀸𑀤𑀻𑀦𑀁 𑀲𑀫𑀥𑀺𑀕𑀫𑁄𑀢𑀺 𑀲𑀫𑀸𑀧𑀢𑁆𑀢𑀺𑀬𑀸 𑀅𑀭𑀢𑀺𑀯𑀺𑀦𑁄𑀤𑀦𑀁 𑀉𑀧𑀸𑀬𑁄. 𑀲𑀫𑀸𑀧𑀢𑁆𑀢𑀺𑀯𑀺𑀧𑀲𑁆𑀲𑀦𑀸𑀦𑀼𑀓𑁆𑀓𑀫𑁂𑀦 ¶ 𑀧𑀦 𑀉𑀧𑀭𑀺 𑀯𑀓𑁆𑀔𑀫𑀸𑀦𑀦𑀬𑁂𑀦 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁂𑀧𑀺 𑀦𑀻𑀯𑀭𑀡𑀲𑀪𑀸𑀯𑀸𑀬 𑀅𑀯𑀺𑀚𑁆𑀚𑀸𑀬 𑀳𑁂𑀝𑁆𑀞𑀸 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀯𑀲𑁂𑀦 𑀤𑀲𑁆𑀲𑀺𑀢𑀦𑀻𑀯𑀭𑀡𑁂𑀲𑀼𑀧𑀺 𑀲𑀗𑁆𑀕𑀳𑀤𑀲𑁆𑀲𑀦𑀢𑁆𑀣𑀁 𑀉𑀧𑁆𑀧𑀝𑀺𑀧𑀸𑀝𑀺𑀦𑀺𑀤𑁆𑀤𑁂𑀲𑁄 𑀤𑀝𑁆𑀞𑀩𑁆𑀩𑁄.

𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀧𑀯𑁂𑀲𑀦𑀦𑀺𑀩𑀦𑁆𑀥𑀦𑁂𑀦 ¶ 𑀦𑀻𑀯𑀭𑀡𑀸𑀦𑀺 𑀓𑀯𑀸𑀝𑀲𑀤𑀺𑀲𑀸𑀦𑀻𑀢𑀺 𑀆𑀳 ‘‘𑀦𑀻𑀯𑀭𑀡𑀓𑀯𑀸𑀝𑀁 𑀉𑀕𑁆𑀖𑀸𑀝𑁂𑀢𑁆𑀯𑀸’’𑀢𑀺. ‘‘𑀭𑀢𑁆𑀢𑀺𑀁 𑀅𑀦𑀼𑀯𑀺𑀢𑀓𑁆𑀓𑁂𑀢𑁆𑀯𑀸 𑀅𑀦𑀼𑀯𑀺𑀘𑀸𑀭𑁂𑀢𑁆𑀯𑀸 𑀤𑀺𑀯𑀸 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀢𑀻’’𑀢𑀺 𑀫𑀚𑁆𑀛𑀺𑀫𑀸𑀕𑀫𑀯𑀭𑁂 𑀫𑀽𑀮𑀧𑀡𑁆𑀡𑀸𑀲𑀓𑁂 𑀯𑀫𑁆𑀫𑀺𑀓𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁨𑁪𑁯) 𑀯𑀼𑀢𑁆𑀢𑀝𑁆𑀞𑀸𑀦𑁂 𑀯𑀺𑀬 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀯𑀽𑀧𑀲𑀫𑀸 [𑀥𑀽𑀫𑀸𑀬𑀦𑀸 (𑀤𑀻. 𑀦𑀺. 𑀝𑀻. 𑁧.𑁭)] 𑀅𑀥𑀺𑀧𑁆𑀧𑁂𑀢𑀸𑀢𑀺 𑀲𑀦𑁆𑀥𑀸𑀬 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀥𑀽𑀫𑀁 𑀯𑀽𑀧𑀲𑀫𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀗𑁆𑀔𑀸𑀢𑀁 𑀥𑀽𑀫𑀁 𑀯𑀽𑀧𑀲𑀫𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀯𑀺𑀢𑀓𑁆𑀓𑀯𑀺𑀘𑀸𑀭’’𑀫𑀺𑀘𑁆𑀘𑁂𑀯 𑀅𑀥𑀼𑀦𑀸 𑀧𑀸𑀞𑁄, 𑀲𑁄 𑀦 𑀧𑁄𑀭𑀸𑀡𑁄 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦, 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀘 𑀬𑀣𑀸𑀯𑀼𑀢𑁆𑀢𑀧𑀸𑀞𑀲𑁆𑀲𑁂𑀯 𑀉𑀤𑁆𑀥𑀢𑀢𑁆𑀢𑀸. 𑀯𑀺𑀭𑀸𑀚𑁂𑀢𑁆𑀯𑀸𑀢𑀺 𑀚𑀺𑀕𑀼𑀘𑁆𑀙𑀺𑀢𑁆𑀯𑀸, 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀸. 𑀢𑀤𑀼𑀪𑀬𑀢𑁆𑀣𑁄 𑀳𑁂𑀲 ‘‘𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁭; 𑀫. 𑀦𑀺. 𑁩.𑁧𑁫𑁫; 𑀧𑀸𑀭𑀸. 𑁧𑁧; 𑀯𑀺𑀪. 𑁬𑁨𑁫) 𑀯𑀺𑀬. 𑀓𑀸𑀫𑀁 𑀧𑀞𑀫𑀚𑁆𑀛𑀸𑀦𑀽𑀧𑀘𑀸𑀭𑁂 𑀏𑀯 𑀤𑀼𑀓𑁆𑀔𑀁, 𑀘𑀢𑀼𑀢𑁆𑀣𑀚𑁆𑀛𑀸𑀦𑀽𑀧𑀘𑀸𑀭𑁂 𑀏𑀯 𑀘 𑀲𑀼𑀔𑀁 𑀧𑀳𑀻𑀬𑀢𑀺, 𑀅𑀢𑀺𑀲𑀬𑀧𑁆𑀧𑀳𑀸𑀦𑀁 𑀧𑀦 𑀲𑀦𑁆𑀥𑀸𑀬𑀸𑀳 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀦 𑀲𑀼𑀔𑀤𑀼𑀓𑁆𑀔𑀁 𑀧𑀳𑀸𑀬𑀸’’𑀢𑀺.

𑀭𑀽𑀧𑀲𑀜𑁆𑀜𑀸𑀢𑀺 𑀲𑀜𑁆𑀜𑀸𑀲𑀻𑀲𑁂𑀦 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀘𑁂𑀯 𑀢𑀤𑀸𑀭𑀫𑁆𑀫𑀡𑀸𑀦𑀺 𑀘 𑀯𑀼𑀢𑁆𑀢𑀸𑀦𑀺. 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀫𑁆𑀧𑀺 𑀳𑀺 ‘‘𑀭𑀽𑀧’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 (𑀥. 𑀲. 𑁨𑁪𑁮) 𑀢𑀲𑁆𑀲 𑀆𑀭𑀫𑁆𑀫𑀡𑀫𑁆𑀧𑀺 𑀓𑀲𑀺𑀡𑀭𑀽𑀧𑀁 𑀧𑀼𑀭𑀺𑀫𑀧𑀤𑀮𑁄𑀧𑁂𑀦 ‘‘𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻’’𑀢𑀺𑀆𑀤𑀻𑀲𑀼 (𑀥. 𑀲. 𑁨𑁨𑁩 𑀆𑀤𑀬𑁄) 𑀢𑀲𑁆𑀫𑀸 𑀇𑀥 𑀭𑀽𑀧𑁂 𑀭𑀽𑀧𑀚𑁆𑀛𑀸𑀦𑁂 𑀢𑀁𑀲𑀳𑀕𑀢𑀸 𑀲𑀜𑁆𑀜𑀸 𑀭𑀽𑀧𑀲𑀜𑁆𑀜𑀸𑀢𑀺 𑀏𑀯𑀁 𑀲𑀜𑁆𑀜𑀸𑀲𑀻𑀲𑁂𑀦 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀭𑀽𑀧𑀁 𑀲𑀜𑁆𑀜𑀸 𑀅𑀲𑁆𑀲𑀸𑀢𑀺 𑀭𑀽𑀧𑀲𑀜𑁆𑀜𑀁, 𑀭𑀽𑀧𑀲𑀜𑁆𑀜𑀸𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀧𑀣𑀯𑀻𑀓𑀲𑀺𑀡𑀸𑀤𑀺𑀪𑁂𑀤𑀲𑁆𑀲 𑀢𑀤𑀸𑀭𑀫𑁆𑀫𑀡𑀲𑁆𑀲 𑀘𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀝𑀺𑀖𑀲𑀜𑁆𑀜𑀸𑀢𑀺 𑀘𑀓𑁆𑀔𑀸𑀤𑀻𑀦𑀁 𑀯𑀢𑁆𑀣𑀽𑀦𑀁, 𑀭𑀽𑀧𑀸𑀤𑀻𑀦𑀁 𑀆𑀭𑀫𑁆𑀫𑀡𑀸𑀦𑀜𑁆𑀘 𑀧𑀝𑀺𑀖𑀸𑀢𑁂𑀦 𑀧𑀝𑀺𑀳𑀦𑀦𑁂𑀦 𑀯𑀺𑀲𑀬𑀺𑀯𑀺𑀲𑀬𑀲𑀫𑁄𑀥𑀸𑀦𑁂𑀦 𑀲𑀫𑀼𑀧𑁆𑀧𑀦𑁆𑀦𑀸 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀳𑀕𑀢𑀸 𑀲𑀜𑁆𑀜𑀸. 𑀦𑀸𑀦𑀢𑁆𑀢𑀲𑀜𑁆𑀜𑀸𑀢𑀺 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑀜𑁆𑀜𑀸, 𑀤𑁆𑀯𑀸𑀤𑀲 𑀅𑀓𑀼𑀲𑀮𑀲𑀜𑁆𑀜𑀸, 𑀏𑀓𑀸𑀤𑀲 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀲𑀜𑁆𑀜𑀸, 𑀤𑁆𑀯𑁂 𑀅𑀓𑀼𑀲𑀮𑀯𑀺𑀧𑀸𑀓𑀲𑀜𑁆𑀜𑀸, 𑀏𑀓𑀸𑀤𑀲 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀲𑀜𑁆𑀜𑀸𑀢𑀺 𑀏𑀢𑀸𑀲𑀁 𑀘𑀢𑀼𑀘𑀢𑁆𑀢𑀸𑀮𑀻𑀲𑀲𑀜𑁆𑀜𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀏𑀢𑀸 𑀳𑀺 𑀬𑀲𑁆𑀫𑀸 𑀭𑀽𑀧𑀲𑀤𑁆𑀤𑀸𑀤𑀺𑀪𑁂𑀤𑁂 𑀦𑀸𑀦𑀢𑁆𑀢𑁂 𑀦𑀸𑀦𑀸𑀲𑀪𑀸𑀯𑁂 𑀕𑁄𑀘𑀭𑁂 𑀧𑀯𑀢𑁆𑀢𑀦𑁆𑀢𑀺, 𑀬𑀲𑁆𑀫𑀸 𑀘 𑀦𑀸𑀦𑀢𑁆𑀢𑀸 𑀦𑀸𑀦𑀸𑀲𑀪𑀸𑀯𑀸 𑀅𑀜𑁆𑀜𑀫𑀜𑁆𑀜𑀁 𑀅𑀲𑀤𑀺𑀲𑀸, 𑀢𑀲𑁆𑀫𑀸 ‘‘𑀦𑀸𑀦𑀢𑁆𑀢𑀲𑀜𑁆𑀜𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀅𑀦𑀺𑀘𑁆𑀘𑀲𑁆𑀲 ¶ , 𑀅𑀦𑀺𑀘𑁆𑀘𑀦𑁆𑀢𑀺 𑀯𑀸 𑀅𑀦𑀼𑀧𑀲𑁆𑀲𑀦𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸, 𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀁 𑀅𑀦𑀺𑀘𑁆𑀘𑀢𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸𑀬 𑀯𑀺𑀧𑀲𑁆𑀲𑀦𑀸𑀬𑁂𑀢𑀁 𑀦𑀸𑀫𑀁. 𑀦𑀺𑀘𑁆𑀘𑀲𑀜𑁆𑀜𑀦𑁆𑀢𑀺 𑀲𑀗𑁆𑀔𑀢𑀥𑀫𑁆𑀫𑁂 ‘‘𑀦𑀺𑀘𑁆𑀘𑀸 ¶ 𑀲𑀲𑁆𑀲𑀢𑀸’’𑀢𑀺 𑀧𑀯𑀢𑁆𑀢𑀫𑀺𑀘𑁆𑀙𑀸𑀲𑀜𑁆𑀜𑀁, 𑀲𑀜𑁆𑀜𑀸𑀲𑀻𑀲𑁂𑀦 𑀘𑁂𑀢𑁆𑀣 𑀤𑀺𑀝𑁆𑀞𑀺𑀘𑀺𑀢𑁆𑀢𑀸𑀦𑀫𑁆𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸𑀬 𑀅𑀦𑀼𑀧𑀲𑁆𑀲𑀦𑀸𑀬. 𑀦𑀦𑁆𑀤𑀺𑀦𑁆𑀢𑀺 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀁. 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀲𑀗𑁆𑀔𑀸𑀭𑁂𑀲𑀼 𑀯𑀺𑀭𑀚𑁆𑀚𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸𑀬 𑀅𑀦𑀼𑀧𑀲𑁆𑀲𑀦𑀸𑀬. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑀲𑁆𑀲 𑀅𑀦𑀼𑀧𑀲𑁆𑀲𑀦𑀸𑀬, ‘‘𑀢𑁂 𑀲𑀗𑁆𑀔𑀸𑀭𑀸 𑀦𑀺𑀭𑀼𑀚𑁆𑀛𑀦𑁆𑀢𑀺𑀬𑁂𑀯, 𑀆𑀬𑀢𑀺𑀁 𑀲𑀫𑀼𑀤𑀬𑀯𑀲𑁂𑀦 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀏𑀯𑀁 𑀯𑀸 𑀅𑀦𑀼𑀧𑀲𑁆𑀲𑀦𑀸 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸. 𑀢𑁂𑀦𑁂𑀯𑀸𑀳 ‘‘𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀭𑁄𑀥𑁂𑀢𑀺, 𑀦𑁄 𑀲𑀫𑀼𑀤𑁂𑀢𑀻’’𑀢𑀺. 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸 𑀳𑀺 𑀅𑀬𑀁 𑀩𑀮𑀧𑁆𑀧𑀢𑁆𑀢𑀸𑀢𑀺. 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀅𑀦𑀼𑀧𑀲𑁆𑀲𑀦𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸. 𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀳𑀺 𑀅𑀬𑀁. 𑀆𑀤𑀸𑀦𑀦𑁆𑀢𑀺 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀳𑀡𑀁. 𑀲𑀦𑁆𑀢𑀢𑀺𑀲𑀫𑀽𑀳𑀓𑀺𑀘𑁆𑀘𑀸𑀭𑀫𑁆𑀫𑀡𑀸𑀦𑀁 𑀯𑀲𑁂𑀦 𑀏𑀓𑀢𑁆𑀢𑀕𑁆𑀕𑀳𑀡𑀁 𑀖𑀦𑀲𑀜𑁆𑀜𑀸. 𑀆𑀬𑀽𑀳𑀦𑀁 𑀅𑀪𑀺𑀲𑀗𑁆𑀔𑀭𑀡𑀁. 𑀅𑀯𑀢𑁆𑀣𑀸𑀯𑀺𑀲𑁂𑀲𑀸𑀧𑀢𑁆𑀢𑀺 𑀯𑀺𑀧𑀭𑀺𑀡𑀸𑀫𑁄. 𑀥𑀼𑀯𑀲𑀜𑁆𑀜𑀦𑁆𑀢𑀺 𑀣𑀺𑀭𑀪𑀸𑀯𑀕𑁆𑀕𑀳𑀡𑀲𑀜𑁆𑀜𑀁. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀫𑀽𑀳𑀸𑀤𑀺𑀖𑀦𑀯𑀲𑁂𑀦 𑀲𑀓𑀺𑀘𑁆𑀘𑀧𑀭𑀺𑀘𑁆𑀙𑁂𑀤𑀢𑀸𑀬 𑀲𑀗𑁆𑀔𑀸𑀭𑀸𑀦𑀁 𑀲𑀯𑀺𑀕𑁆𑀕𑀳𑀢𑀁. 𑀧𑀡𑀺𑀥𑀺𑀦𑁆𑀢𑀺 𑀭𑀸𑀕𑀸𑀤𑀺𑀧𑀡𑀺𑀥𑀺𑀁. 𑀲𑀸 𑀧𑀦𑀢𑁆𑀣𑀢𑁄 𑀢𑀡𑁆𑀳𑀸𑀯𑀲𑁂𑀦 𑀲𑀗𑁆𑀔𑀸𑀭𑁂𑀲𑀼 𑀦𑀺𑀦𑁆𑀦𑀢𑀸.

𑀅𑀪𑀺𑀦𑀺𑀯𑁂𑀲𑀦𑁆𑀢𑀺 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁. 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑀩𑁆𑀩𑀥𑀫𑁆𑀫𑀢𑀻𑀭𑀡𑀁 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸. 𑀲𑀸𑀭𑀸𑀤𑀸𑀦𑀸𑀪𑀺𑀦𑀺𑀯𑀺𑀲𑁂𑀦𑁆𑀢𑀺 𑀅𑀲𑀸𑀭𑁂 𑀲𑀸𑀭𑀕𑁆𑀕𑀳𑀡𑀯𑀺𑀧𑀮𑁆𑀮𑀸𑀲𑀁. 𑀇𑀲𑁆𑀲𑀭𑀓𑀼𑀢𑁆𑀢𑀸𑀤𑀺𑀯𑀲𑁂𑀦 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄𑀢𑀺 𑀅𑀪𑀺𑀦𑀺𑀯𑁂𑀲𑁄 𑀲𑀫𑁆𑀫𑁄𑀳𑀸𑀪𑀺𑀦𑀺𑀯𑁂𑀲𑁄 𑀦𑀸𑀫. 𑀓𑁂𑀘𑀺 𑀧𑀦 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀫𑀢𑀻𑀢𑀫𑀤𑁆𑀥𑀸𑀦’𑀦𑁆𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀲𑀁𑀲𑀬𑀸𑀧𑀢𑁆𑀢𑀺 𑀲𑀫𑁆𑀫𑁄𑀳𑀸𑀪𑀺𑀦𑀺𑀯𑁂𑀲𑁄’’𑀢𑀺 𑀯𑀤𑀦𑁆𑀢𑀺. 𑀲𑀗𑁆𑀔𑀸𑀭𑁂𑀲𑀼 𑀮𑁂𑀡𑀢𑀸𑀡𑀪𑀸𑀯𑀕𑁆𑀕𑀳𑀡𑀁 𑀆𑀮𑀬𑀸𑀪𑀺𑀦𑀺𑀯𑁂𑀲𑁄. ‘‘𑀆𑀮𑀬𑀭𑀢𑀸 𑀆𑀮𑀬𑀲𑀫𑀼𑀤𑀺𑀢𑀸’’𑀢𑀺 (𑀤𑀻. 𑀦𑀺. 𑁨.𑁬𑁪; 𑀫. 𑀦𑀺. 𑁧.𑁨𑁮𑁧; 𑁨.𑁩𑁩𑁭; 𑀫𑀳𑀸𑀯. 𑁭, 𑁮) 𑀯𑀘𑀦𑀢𑁄 𑀆𑀮𑀬𑁄 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸, 𑀲𑀸𑀬𑁂𑀯 𑀘𑀓𑁆𑀔𑀸𑀤𑀻𑀲𑀼, 𑀭𑀽𑀧𑀸𑀤𑀻𑀲𑀼 𑀘 𑀅𑀪𑀺𑀦𑀺𑀯𑁂𑀲𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀆𑀮𑀬𑀸𑀪𑀺𑀦𑀺𑀯𑁂𑀲𑁄𑀢𑀺 𑀓𑁂𑀘𑀺. ‘‘𑀏𑀯𑀁𑀯𑀺𑀥𑀸 𑀲𑀗𑁆𑀔𑀸𑀭𑀸 𑀧𑀝𑀺𑀦𑀺𑀲𑁆𑀲𑀚𑁆𑀚𑀻𑀬𑀦𑁆𑀢𑀻’𑀢𑀺 𑀧𑀯𑀢𑁆𑀢𑀜𑀸𑀡𑀁 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸. 𑀯𑀝𑁆𑀝𑀢𑁄 𑀯𑀺𑀕𑀢𑀢𑁆𑀢𑀸 𑀯𑀺𑀯𑀝𑁆𑀝𑀁, 𑀦𑀺𑀩𑁆𑀩𑀸𑀦𑀁, 𑀢𑀢𑁆𑀣 𑀆𑀭𑀫𑁆𑀫𑀡𑀓𑀭𑀡𑀲𑀗𑁆𑀔𑀸𑀢𑁂𑀦 𑀅𑀦𑀼𑀧𑀲𑁆𑀲𑀦𑁂𑀦 𑀧𑀯𑀢𑁆𑀢𑀺𑀬𑀸 𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀸, 𑀕𑁄𑀢𑁆𑀭𑀪𑀼. 𑀲𑀁𑀬𑁄𑀕𑀸𑀪𑀺𑀦𑀺𑀯𑁂𑀲𑀦𑁆𑀢𑀺 𑀲𑀁𑀬𑀼𑀚𑁆𑀚𑀦𑀯𑀲𑁂𑀦 𑀲𑀗𑁆𑀔𑀸𑀭𑁂𑀲𑀼 𑀅𑀪𑀺𑀦𑀺𑀯𑀺𑀲𑀦𑀁. 𑀤𑀺𑀝𑁆𑀞𑁂𑀓𑀝𑁆𑀞𑁂𑀢𑀺 𑀤𑀺𑀝𑁆𑀞𑀺𑀬𑀸 𑀲𑀳𑀚𑀸𑀢𑁂𑀓𑀝𑁆𑀞𑁂, 𑀧𑀳𑀸𑀦𑁂𑀓𑀝𑁆𑀞𑁂 𑀘. 𑀑𑀴𑀸𑀭𑀺𑀓𑁂𑀢𑀺 𑀉𑀧𑀭𑀺𑀫𑀕𑁆𑀕𑀯𑀚𑁆𑀛𑁂 𑀓𑀺𑀮𑁂𑀲𑁂 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀼𑀢𑁆𑀢𑀁, 𑀅𑀜𑁆𑀜𑀣𑀸 𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑀸 𑀘 𑀤𑀼𑀢𑀺𑀬𑀫𑀕𑁆𑀕𑀯𑀚𑁆𑀛𑁂𑀳𑀺𑀧𑀺 𑀑𑀴𑀸𑀭𑀺𑀓𑀸𑀢𑀺 𑀢𑁂𑀲𑀫𑁆𑀧𑀺 𑀢𑀩𑁆𑀩𑀘𑀦𑀻𑀬𑀢𑀸 𑀲𑀺𑀬𑀸. 𑀅𑀡𑀼𑀲𑀳𑀕𑀢𑁂𑀢𑀺 𑀅𑀡𑀼𑀪𑀽𑀢𑁂. 𑀢𑀩𑁆𑀪𑀸𑀯𑀯𑀼𑀢𑁆𑀢𑀺𑀓𑁄 𑀳𑀺 𑀏𑀢𑁆𑀣 𑀲𑀳𑀕𑀢𑀲𑀤𑁆𑀤𑁄. 𑀇𑀤𑀁 𑀧𑀦 𑀳𑁂𑀝𑁆𑀞𑀺𑀫𑀫𑀕𑁆𑀕𑀯𑀚𑁆𑀛𑁂 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀼𑀢𑁆𑀢𑀁 ¶ . 𑀲𑀩𑁆𑀩𑀓𑀺𑀮𑁂𑀲𑁂𑀢𑀺 𑀅𑀯𑀲𑀺𑀝𑁆𑀞𑀲𑀩𑁆𑀩𑀓𑀺𑀮𑁂𑀲𑁂. 𑀦 𑀳𑀺 𑀧𑀞𑀫𑀸𑀤𑀺𑀫𑀕𑁆𑀕𑁂𑀳𑀺 𑀧𑀳𑀻𑀦𑀸 𑀓𑀺𑀮𑁂𑀲𑀸 𑀧𑀼𑀦 𑀧𑀳𑀻𑀬𑀦𑁆𑀢𑀺. 𑀲𑀩𑁆𑀩𑀲𑀤𑁆𑀤𑁄 𑀘𑁂𑀢𑁆𑀣 𑀲𑀧𑁆𑀧𑀤𑁂𑀲𑀯𑀺𑀲𑀬𑁄 ‘‘𑀲𑀩𑁆𑀩𑁂 𑀢𑀲𑀦𑁆𑀢𑀺 𑀤𑀡𑁆𑀟𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀯𑀺𑀬 (𑀥. 𑀧. 𑁧𑁨𑁯).

𑀓𑀓𑁆𑀔𑀴𑀢𑁆𑀢𑀁 ¶ 𑀓𑀞𑀺𑀦𑀪𑀸𑀯𑁄. 𑀧𑀕𑁆𑀖𑀭𑀡𑀁 𑀤𑁆𑀭𑀯𑀪𑀸𑀯𑁄. 𑀮𑁄𑀓𑀺𑀬𑀯𑀸𑀬𑀼𑀦𑀸 𑀪𑀲𑁆𑀢𑀲𑁆𑀲 𑀯𑀺𑀬 𑀬𑁂𑀦 𑀢𑀁𑀢𑀁𑀓𑀮𑀸𑀧𑀲𑁆𑀲 𑀉𑀤𑁆𑀥𑀼𑀫𑀸𑀬𑀦𑀁, 𑀣𑀫𑁆𑀪𑀪𑀸𑀯𑁄 𑀯𑀸, 𑀢𑀁 𑀯𑀺𑀢𑁆𑀣𑀫𑁆𑀪𑀦𑀁. 𑀯𑀺𑀚𑁆𑀚𑀫𑀸𑀦𑁂𑀧𑀺 𑀓𑀮𑀸𑀧𑀦𑁆𑀢𑀭𑀪𑀽𑀢𑀸𑀦𑀁 𑀓𑀮𑀸𑀧𑀦𑁆𑀢𑀭𑀪𑀽𑀢𑁂𑀳𑀺 𑀨𑀼𑀝𑁆𑀞𑀪𑀸𑀯𑁂 𑀢𑀁𑀢𑀁𑀪𑀽𑀢𑀯𑀺𑀯𑀺𑀢𑁆𑀢𑀢𑀸 𑀭𑀽𑀧𑀧𑀭𑀺𑀬𑀦𑁆𑀢𑁄 𑀆𑀓𑀸𑀲𑁄𑀢𑀺 𑀬𑁂𑀲𑀁 𑀬𑁄 𑀧𑀭𑀺𑀘𑁆𑀙𑁂𑀤𑁄, 𑀢𑁂𑀳𑀺 𑀲𑁄 𑀅𑀲𑀫𑁆𑀨𑀼𑀝𑁆𑀞𑁄𑀯, 𑀅𑀜𑁆𑀜𑀣𑀸 𑀪𑀽𑀢𑀸𑀦𑀁 𑀧𑀭𑀺𑀘𑁆𑀙𑁂𑀤𑀪𑀸𑀯𑁄 𑀦 𑀲𑀺𑀬𑀸 𑀩𑁆𑀬𑀸𑀧𑀺𑀢𑀪𑀸𑀯𑀸𑀧𑀢𑁆𑀢𑀺𑀢𑁄. 𑀬𑀲𑁆𑀫𑀺𑀁 𑀓𑀮𑀸𑀧𑁂 𑀪𑀽𑀢𑀸𑀦𑀁 𑀧𑀭𑀺𑀘𑁆𑀙𑁂𑀤𑁄, 𑀢𑁂𑀳𑀺 𑀢𑀢𑁆𑀣 𑀅𑀲𑀫𑁆𑀨𑀼𑀝𑁆𑀞𑀪𑀸𑀯𑁄 𑀅𑀲𑀫𑁆𑀨𑀼𑀝𑁆𑀞𑀮𑀓𑁆𑀔𑀡𑀁, 𑀢𑁂𑀦𑀸𑀳 𑀪𑀕𑀯𑀸 𑀆𑀓𑀸𑀲𑀥𑀸𑀢𑀼𑀦𑀺𑀤𑁆𑀤𑁂𑀲𑁂 ‘‘𑀅𑀲𑀫𑁆𑀨𑀼𑀝𑁆𑀞𑁄 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀻’’𑀢𑀺 (𑀥. 𑀲. 𑁬𑁩𑁭).

𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀦𑁆𑀦𑀺𑀧𑀸𑀢𑁂 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺 𑀭𑀼𑀧𑁆𑀧𑀦𑀁. 𑀘𑁂𑀢𑀦𑀸𑀧𑀥𑀸𑀦𑀢𑁆𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀦𑀁 𑀘𑁂𑀢𑀦𑀸𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁 ‘‘𑀲𑀗𑁆𑀔𑀸𑀭𑀸𑀦𑀁 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡’’𑀦𑁆𑀢𑀺. 𑀢𑀣𑀸 𑀳𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀺𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀯𑀺𑀪𑀗𑁆𑀕𑁂 ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁧𑁨) 𑀘𑁂𑀢𑀦𑀸𑀯 𑀯𑀺𑀪𑀢𑁆𑀢𑀸. 𑀅𑀪𑀺𑀲𑀗𑁆𑀔𑀸𑀭𑀮𑀓𑁆𑀔𑀡𑀸 𑀘 𑀘𑁂𑀢𑀦𑀸. 𑀬𑀣𑀸𑀳 ‘‘𑀢𑀢𑁆𑀣 𑀓𑀢𑀫𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄, 𑀓𑀼𑀲𑀮𑀸 𑀘𑁂𑀢𑀦𑀸’’𑀢𑀺𑀆𑀤𑀺 (𑀯𑀺𑀪. 𑁨𑁨𑁬) 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑁂 𑀞𑀧𑀦𑀁 𑀅𑀪𑀺𑀦𑀺𑀭𑁄𑀧𑀦𑀁. 𑀆𑀭𑀫𑁆𑀫𑀡𑀸𑀦𑀫𑀦𑀼𑀩𑀦𑁆𑀥𑀦𑀁 𑀅𑀦𑀼𑀫𑀚𑁆𑀚𑀦𑀁. 𑀲𑀯𑀺𑀧𑁆𑀨𑀸𑀭𑀺𑀓𑀢𑀸 𑀨𑀭𑀡𑀁. 𑀅𑀥𑀺𑀫𑀼𑀘𑁆𑀘𑀦𑀁 𑀲𑀤𑁆𑀤𑀳𑀦𑀁 𑀅𑀥𑀺𑀫𑁄𑀓𑁆𑀔𑁄. 𑀅𑀲𑁆𑀲𑀤𑁆𑀥𑀺𑀬𑁂𑀢𑀺 𑀅𑀲𑁆𑀲𑀤𑁆𑀥𑀺𑀬𑀳𑁂𑀢𑀼. 𑀦𑀺𑀫𑀺𑀢𑁆𑀢𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀏𑀲 𑀦𑀬𑁄 𑀓𑁄𑀲𑀚𑁆𑀚𑀸𑀤𑀻𑀲𑀼𑀧𑀺. 𑀓𑀸𑀬𑀘𑀺𑀢𑁆𑀢𑀧𑀭𑀺𑀴𑀸𑀳𑀽𑀧𑀲𑀫𑁄 𑀯𑀽𑀧𑀲𑀫𑀮𑀓𑁆𑀔𑀡𑀁. 𑀮𑀻𑀦𑀼𑀤𑁆𑀥𑀘𑁆𑀘𑀭𑀳𑀺𑀢𑁂 𑀅𑀥𑀺𑀘𑀺𑀢𑁆𑀢𑁂 𑀯𑀢𑁆𑀢𑀫𑀸𑀦𑁂 𑀧𑀕𑁆𑀕𑀳𑀦𑀺𑀕𑁆𑀕𑀳𑀲𑀫𑁆𑀧𑀳𑀁𑀲𑀦𑁂𑀲𑀼 𑀅𑀩𑁆𑀬𑀸𑀯𑀝𑀢𑀸𑀬 𑀅𑀚𑁆𑀛𑀼𑀧𑁂𑀓𑁆𑀔𑀦𑀁 𑀧𑀝𑀺𑀲𑀗𑁆𑀔𑀸𑀦𑀁 𑀧𑀓𑁆𑀔𑀧𑀸𑀢𑀼𑀧𑀘𑁆𑀙𑁂𑀤𑀢𑁄.

𑀫𑀼𑀲𑀸𑀯𑀸𑀤𑀸𑀤𑀻𑀦𑀁 𑀯𑀺𑀲𑀁𑀯𑀸𑀤𑀦𑀸𑀤𑀺𑀓𑀺𑀘𑁆𑀘𑀢𑀸𑀬 𑀮𑀽𑀔𑀸𑀦𑀁 𑀅𑀧𑀭𑀺𑀕𑁆𑀕𑀸𑀳𑀓𑀸𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀧𑀭𑀺𑀕𑁆𑀕𑀸𑀳𑀓𑀲𑀪𑀸𑀯𑀸 𑀲𑀫𑁆𑀫𑀸𑀯𑀸𑀘𑀸 𑀲𑀺𑀦𑀺𑀤𑁆𑀥𑀪𑀸𑀯𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂, 𑀲𑀫𑁆𑀫𑀸𑀯𑀸𑀘𑀸𑀧𑀘𑁆𑀘𑀬𑀲𑀼𑀪𑀸𑀲𑀺𑀢𑀁 𑀲𑁄𑀢𑀸𑀭𑀜𑁆𑀘 𑀧𑀼𑀕𑁆𑀕𑀮𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀲𑀸 𑀧𑀭𑀺𑀕𑁆𑀕𑀳𑀮𑀓𑁆𑀔𑀡𑀸. 𑀓𑀸𑀬𑀺𑀓𑀓𑀺𑀭𑀺𑀬𑀸 𑀓𑀺𑀜𑁆𑀘𑀺 𑀓𑀢𑁆𑀢𑀩𑁆𑀩𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀲𑀬𑀜𑁆𑀘 𑀲𑀫𑀼𑀝𑁆𑀞𑀸𑀦𑀁 𑀖𑀝𑀦𑀁 𑀳𑁄𑀢𑀻𑀢𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑀗𑁆𑀔𑀸𑀢𑀸 𑀯𑀺𑀭𑀢𑀺 𑀲𑀫𑀼𑀝𑁆𑀞𑀸𑀦𑀮𑀓𑁆𑀔𑀡𑀸𑀢𑀺 𑀤𑀝𑁆𑀞𑀩𑁆𑀩𑀸, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀸 𑀉𑀓𑁆𑀔𑀺𑀧𑀦𑀁 𑀲𑀫𑀼𑀝𑁆𑀞𑀸𑀦𑀁 ¶ 𑀓𑀸𑀬𑀺𑀓𑀓𑀺𑀭𑀺𑀬𑀸𑀬 𑀪𑀸𑀭𑀼𑀓𑁆𑀔𑀺𑀧𑀦𑀁 𑀯𑀺𑀬. 𑀚𑀻𑀯𑀫𑀸𑀦𑀲𑁆𑀲 𑀲𑀢𑁆𑀢𑀲𑁆𑀲, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀯𑀼𑀢𑁆𑀢𑀺𑀬𑀸, 𑀆𑀚𑀻𑀯𑀲𑁆𑀲𑁂𑀯 𑀯𑀸 𑀲𑀼𑀤𑁆𑀥𑀺 𑀯𑁄𑀤𑀸𑀦𑀁.

‘‘𑀲𑀗𑁆𑀔𑀸𑀭𑀸’’𑀢𑀺 𑀇𑀥 𑀘𑁂𑀢𑀦𑀸 𑀅𑀥𑀺𑀧𑁆𑀧𑁂𑀢𑀸, 𑀦 𑀧𑀦 ‘‘𑀲𑀗𑁆𑀔𑀸𑀭𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄’’𑀢𑀺𑀆𑀤𑀻𑀲𑀼 (𑀥. 𑀲. 𑁫𑁮𑁩, 𑁯𑁮𑁫; 𑀯𑀺𑀪. 𑁧, 𑁨𑁦, 𑁫𑁨) 𑀯𑀺𑀬 𑀲𑀫𑀧𑀜𑁆𑀜𑀸𑀲𑀘𑁂𑀢𑀲𑀺𑀓𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀗𑁆𑀔𑀸𑀭𑀸𑀦𑀁 𑀘𑁂𑀢𑀦𑀸𑀮𑀓𑁆𑀔𑀡’’𑀦𑁆𑀢𑀺. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀳𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀓𑀸𑀯 𑀘𑁂𑀢𑀦𑀸. 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀪𑀸𑀯𑁄 𑀦𑀫𑀦𑀁. 𑀆𑀬𑀢𑀦𑀁 𑀧𑀯𑀢𑁆𑀢𑀦𑀁. 𑀲𑀴𑀸𑀬𑀢𑀦𑀯𑀲𑁂𑀦 𑀳𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀯𑀢𑁆𑀢𑀺. 𑀢𑀡𑁆𑀳𑀸𑀬 𑀳𑁂𑀢𑀼𑀮𑀓𑁆𑀔𑀡𑀢𑀺 𑀏𑀢𑁆𑀣 𑀯𑀝𑁆𑀝𑀲𑁆𑀲 𑀚𑀦𑀓𑀳𑁂𑀢𑀼𑀪𑀸𑀯𑁄 𑀢𑀡𑁆𑀳𑀸𑀬 𑀳𑁂𑀢𑀼𑀮𑀓𑁆𑀔𑀡𑀁, 𑀫𑀕𑁆𑀕𑀲𑁆𑀲 𑀧𑀦 ¶ 𑀯𑀓𑁆𑀔𑀫𑀸𑀦𑀲𑁆𑀲 𑀦𑀺𑀩𑁆𑀩𑀸𑀦𑀲𑀫𑁆𑀧𑀸𑀧𑀓𑀢𑁆𑀢𑀦𑁆𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀆𑀭𑀫𑁆𑀫𑀡𑀲𑁆𑀲 𑀕𑀳𑀡𑀮𑀓𑁆𑀔𑀡𑀁. 𑀧𑀼𑀦 𑀉𑀧𑁆𑀧𑀢𑁆𑀢𑀺𑀬𑀸 𑀆𑀬𑀽𑀳𑀦𑀮𑀓𑁆𑀔𑀡𑀁. 𑀲𑀢𑁆𑀢𑀚𑀻𑀯𑀢𑁄 𑀲𑀼𑀜𑁆𑀜𑀢𑀸𑀮𑀓𑁆𑀔𑀡𑀁. 𑀧𑀤𑀳𑀦𑀁 𑀉𑀲𑁆𑀲𑀸𑀳𑀦𑀁. 𑀇𑀚𑁆𑀛𑀦𑀁 𑀲𑀫𑁆𑀧𑀢𑁆𑀢𑀺. 𑀯𑀝𑁆𑀝𑀢𑁄 𑀦𑀺𑀲𑁆𑀲𑀭𑀡𑀁 𑀦𑀺𑀬𑁆𑀬𑀸𑀦𑀁. 𑀅𑀯𑀺𑀧𑀭𑀻𑀢𑀪𑀸𑀯𑁄 𑀢𑀣𑀮𑀓𑁆𑀔𑀡𑀁. 𑀅𑀜𑁆𑀜𑀫𑀜𑁆𑀜𑀸𑀦𑀢𑀺𑀯𑀢𑁆𑀢𑀦𑀁 𑀏𑀓𑀭𑀲𑁄, 𑀅𑀦𑀽𑀦𑀸𑀥𑀺𑀓𑀪𑀸𑀯𑁄𑀯. 𑀬𑀼𑀕𑀦𑀤𑁆𑀥𑀸 𑀦𑀸𑀫 𑀲𑀫𑀣𑀯𑀺𑀧𑀲𑁆𑀲𑀦𑀸 𑀅𑀜𑁆𑀜𑀫𑀜𑁆𑀜𑁄𑀧𑀓𑀸𑀭𑀢𑀸𑀬 𑀬𑀼𑀕𑀴𑀯𑀲𑁂𑀦 𑀩𑀦𑁆𑀥𑀺𑀢𑀩𑁆𑀩𑀢𑁄. ‘‘𑀲𑀤𑁆𑀥𑀸𑀧𑀜𑁆𑀜𑀸 𑀧𑀕𑁆𑀕𑀳𑀸𑀯𑀺𑀓𑁆𑀔𑁂𑀧𑀸’’𑀢𑀺𑀧𑀺 𑀯𑀤𑀦𑁆𑀢𑀺. 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀦𑀸𑀫 𑀲𑀫𑀸𑀥𑀺. 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀦𑀸𑀫 𑀧𑀜𑁆𑀜𑀸. 𑀔𑀬𑁄𑀢𑀺 𑀓𑀺𑀮𑁂𑀲𑀓𑁆𑀔𑀬𑁄 𑀫𑀕𑁆𑀕𑁄, 𑀢𑀲𑁆𑀫𑀺𑀁 𑀧𑀯𑀢𑁆𑀢𑀲𑁆𑀲 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀲𑁆𑀲 𑀜𑀸𑀡𑀲𑁆𑀲 𑀲𑀫𑀼𑀘𑁆𑀙𑁂𑀤𑀦𑀮𑀓𑁆𑀔𑀡𑀁. 𑀓𑀺𑀮𑁂𑀲𑀸𑀦𑀫𑀦𑀼𑀧𑁆𑀧𑀸𑀤𑀧𑀭𑀺𑀬𑁄𑀲𑀸𑀦𑀢𑀸𑀬 𑀅𑀦𑀼𑀧𑁆𑀧𑀸𑀤𑁄, 𑀨𑀮𑀁. 𑀓𑀺𑀮𑁂𑀲𑀯𑀽𑀧𑀲𑀫𑁄 𑀧𑀲𑁆𑀲𑀤𑁆𑀥𑀺. 𑀙𑀦𑁆𑀤𑀲𑁆𑀲𑀸𑀢𑀺 𑀓𑀢𑁆𑀢𑀼𑀓𑀸𑀫𑀢𑀸𑀙𑀦𑁆𑀤𑀲𑁆𑀲. 𑀧𑀢𑀺𑀝𑁆𑀞𑀸𑀪𑀸𑀯𑁄 𑀫𑀽𑀮𑀮𑀓𑁆𑀔𑀡𑀁. 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑀢𑀸𑀬 𑀲𑀫𑁆𑀧𑀬𑀼𑀢𑁆𑀢-𑀥𑀫𑁆𑀫𑀸𑀦𑀫𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑀸 𑀲𑀫𑀼𑀝𑁆𑀞𑀸𑀧𑀦𑀮𑀓𑁆𑀔𑀡𑀁. 𑀯𑀺𑀲𑀬𑀸𑀤𑀺𑀲𑀦𑁆𑀦𑀺𑀧𑀸𑀢𑁂𑀦 𑀕𑀳𑁂𑀢𑀩𑁆𑀩𑀸𑀓𑀸𑀭𑁄 𑀲𑀫𑁄𑀥𑀸𑀦𑀁. 𑀬𑀸 ‘‘𑀲𑀗𑁆𑀕𑀢𑀻’’𑀢𑀺 𑀯𑀼𑀘𑁆𑀘𑀢𑀺 ‘‘𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄’’𑀢𑀺𑀆𑀤𑀻𑀲𑀼. 𑀲𑀫𑀁, 𑀲𑀫𑁆𑀫𑀸 𑀯𑀸 𑀑𑀤𑀳𑀦𑁆𑀢𑀺 𑀲𑀫𑁆𑀧𑀺𑀡𑁆𑀟𑀺𑀢𑀸 𑀪𑀯𑀦𑁆𑀢𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀅𑀦𑁂𑀦𑀸𑀢𑀺𑀧𑀺 𑀲𑀫𑁄𑀥𑀸𑀦𑀁, 𑀨𑀲𑁆𑀲𑁄, 𑀢𑀩𑁆𑀪𑀸𑀯𑁄 𑀲𑀫𑁄𑀥𑀸𑀦𑀮𑀓𑁆𑀔𑀡𑀁. 𑀲𑀫𑁄𑀲𑀭𑀦𑁆𑀢𑀺 𑀲𑀦𑁆𑀦𑀺𑀧𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀫𑁄𑀲𑀭𑀡𑀁, 𑀯𑁂𑀤𑀦𑀸. 𑀢𑀸𑀬 𑀳𑀺 𑀯𑀺𑀦𑀸 𑀅𑀧𑁆𑀧𑀯𑀢𑁆𑀢𑀫𑀸𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀯𑁂𑀤𑀦𑀸𑀦𑀼𑀪𑀯𑀦𑀦𑀺𑀫𑀺𑀢𑁆𑀢𑀁 𑀲𑀫𑁄𑀲𑀝𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀁, 𑀢𑀩𑁆𑀪𑀸𑀯𑁄 𑀲𑀫𑁄𑀲𑀭𑀡𑀮𑀓𑁆𑀔𑀡𑀁. 𑀧𑀸𑀲𑀸𑀤𑀸𑀤𑀻𑀲𑀼 𑀕𑁄𑀧𑀸𑀦𑀲𑀻𑀦𑀁 𑀓𑀽𑀝𑀁 𑀯𑀺𑀬 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀸𑀫𑁄𑀓𑁆𑀔𑀪𑀸𑀯𑁄 𑀧𑀫𑀼𑀔𑀮𑀓𑁆𑀔𑀡𑀁. 𑀲𑀢𑀺𑀬𑀸 𑀲𑀩𑁆𑀩𑀢𑁆𑀣𑀓𑀢𑁆𑀢𑀸 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀅𑀥𑀺𑀧𑀢𑀺𑀪𑀸𑀯𑁄 𑀆𑀥𑀺𑀧𑀢𑁂𑀬𑁆𑀬𑀮𑀓𑁆𑀔𑀡𑀁. 𑀢𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀢𑁄, 𑀢𑁂𑀲𑀁 𑀯𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀉𑀢𑁆𑀢𑀭𑀺 𑀧𑀥𑀸𑀦𑀁 𑀢𑀢𑀼𑀢𑁆𑀢𑀭𑀺, 𑀢𑀩𑁆𑀪𑀸𑀯𑁄 𑀢𑀢𑀼𑀢𑁆𑀢𑀭𑀺𑀬𑀮𑀓𑁆𑀔𑀡𑀁. 𑀧𑀜𑁆𑀜𑀼𑀢𑁆𑀢𑀭𑀸 𑀳𑀺 𑀓𑀼𑀲𑀮𑀸 𑀥𑀫𑁆𑀫𑀸. 𑀯𑀺𑀫𑀼𑀢𑁆𑀢𑀻𑀢𑀺 𑀨𑀮𑀁 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀘𑁆𑀘𑀺𑀢𑁆𑀣𑀸𑀢𑀺 𑀓𑀢𑁆𑀯𑀸. 𑀢𑀁 ¶ 𑀧𑀦 𑀲𑀻𑀮𑀸𑀤𑀺𑀕𑀼𑀡𑀲𑀸𑀭𑀲𑁆𑀲 𑀧𑀭𑀫𑀼𑀓𑁆𑀓𑀁𑀲𑀪𑀸𑀯𑁂𑀦 𑀲𑀸𑀭𑀁. 𑀢𑀢𑁄 𑀉𑀢𑁆𑀢𑀭𑀺 𑀥𑀫𑁆𑀫𑀲𑁆𑀲𑀸𑀪𑀸𑀯𑀢𑁄 𑀧𑀭𑀺𑀬𑁄𑀲𑀸𑀦𑀁. 𑀅𑀬𑀜𑁆𑀘 𑀮𑀓𑁆𑀔𑀡𑀯𑀺𑀪𑀸𑀕𑁄 𑀙𑀥𑀸𑀢𑀼𑀧𑀜𑁆𑀘𑀛𑀸𑀦𑀗𑁆𑀕𑀸𑀤𑀺𑀯𑀲𑁂𑀦 𑀢𑀁𑀢𑀁𑀲𑀼𑀢𑁆𑀢𑀧𑀤𑀸𑀦𑀼𑀲𑀸𑀭𑁂𑀦 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀫𑀸𑀕𑀢𑀦𑀬𑁂𑀦 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄𑀧𑀺 𑀓𑁄𑀘𑀺 𑀥𑀫𑁆𑀫𑁄 𑀧𑀭𑀺𑀬𑀸𑀬𑀦𑁆𑀢𑀭𑀧𑁆𑀧𑀓𑀸𑀲𑀦𑀢𑁆𑀣𑀁 𑀧𑀼𑀦 𑀤𑀲𑁆𑀲𑀺𑀢𑁄. 𑀢𑀢𑁄 𑀏𑀯 𑀘 ‘‘𑀙𑀦𑁆𑀤𑀫𑀽𑀮𑀓𑀸 𑀥𑀫𑁆𑀫𑀸 𑀫𑀦𑀲𑀺𑀓𑀸𑀭𑀲𑀫𑀼𑀝𑁆𑀞𑀸𑀦𑀸 𑀨𑀲𑁆𑀲𑀲𑀫𑁄𑀥𑀸𑀦𑀸 𑀯𑁂𑀤𑀦𑀸𑀲𑀫𑁄𑀲𑀭𑀡𑀸’’𑀢𑀺 ‘‘𑀧𑀜𑁆𑀜𑀼𑀢𑁆𑀢𑀭𑀸 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺, ‘‘𑀯𑀺𑀫𑀼𑀢𑁆𑀢𑀺𑀲𑀸𑀭𑀫𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺, ‘‘𑀦𑀺𑀩𑁆𑀩𑀸𑀦𑁄𑀕𑀥𑀜𑁆𑀳𑀺 𑀆𑀯𑀼𑀲𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺 [𑀲𑀁. 𑀦𑀺. 𑁩.𑁫𑁧𑁨 (𑀅𑀢𑁆𑀣𑀢𑁄 𑀲𑀫𑀸𑀦𑀁)] 𑀘 𑀲𑀼𑀢𑁆𑀢𑀧𑀤𑀸𑀦𑀁 𑀯𑀲𑁂𑀦 𑀙𑀦𑁆𑀤𑀲𑁆𑀲 𑀫𑀽𑀮𑀮𑀓𑁆𑀔𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀢𑀣𑀁 𑀅𑀯𑀺𑀢𑀣𑀁 𑀮𑀓𑁆𑀔𑀡𑀁 𑀆𑀕𑀢𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀏𑀯’’𑀦𑁆𑀢𑀺𑀆𑀤𑀺𑀦𑀸. 𑀢𑀁 𑀧𑀦 𑀕𑀫𑀦𑀁 𑀇𑀥 𑀜𑀸𑀡𑀕𑀫𑀦𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀜𑀸𑀡𑀕𑀢𑀺𑀬𑀸’’𑀢𑀺. 𑀲𑀢𑀺𑀧𑀺 𑀕𑀢𑀲𑀤𑁆𑀤𑀲𑁆𑀲 𑀅𑀯𑀩𑁄𑀥𑀦𑀢𑁆𑀣𑀪𑀸𑀯𑁂 𑀜𑀸𑀡𑀕𑀫𑀦𑀢𑁆𑀣𑁂𑀦𑁂𑀯𑁂𑀲𑁄 𑀲𑀺𑀤𑁆𑀥𑁄𑀢𑀺 𑀦 𑀯𑀼𑀢𑁆𑀢𑁄. 𑀆-𑀲𑀤𑁆𑀤𑀲𑁆𑀲 𑀘𑁂𑀢𑁆𑀣 𑀕𑀢𑀲𑀤𑁆𑀤𑀸𑀦𑀼𑀯𑀢𑁆𑀢𑀺𑀫𑀢𑁆𑀢𑀫𑁂𑀯. 𑀢𑁂𑀦𑀸𑀳 ‘‘𑀧𑀢𑁆𑀢𑁄 𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺.

𑀅𑀯𑀺𑀧𑀭𑀻𑀢𑀲𑀪𑀸𑀯𑀢𑁆𑀢𑀸 ‘‘𑀢𑀣𑀥𑀫𑁆𑀫𑀸 𑀦𑀸𑀫 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀅𑀯𑀺𑀧𑀭𑀻𑀢𑀲𑀪𑀸𑀯𑀢𑁄 ¶ 𑀢𑀣𑀸𑀦𑀺. 𑀅𑀫𑀼𑀲𑀸𑀲𑀪𑀸𑀯𑀢𑁄 𑀅𑀯𑀺𑀢𑀣𑀸𑀦𑀺. 𑀅𑀜𑁆𑀜𑀸𑀓𑀸𑀭𑀭𑀳𑀺𑀢𑀢𑁄 𑀅𑀦𑀜𑁆𑀜𑀣𑀸𑀦𑀺. 𑀲𑀘𑁆𑀘𑀲𑀁𑀬𑀼𑀢𑁆𑀢𑀸𑀤𑀻𑀲𑀼 𑀆𑀕𑀢𑀁 𑀧𑀭𑀺𑀧𑀼𑀡𑁆𑀡𑀲𑀘𑁆𑀘𑀘𑀢𑀼𑀓𑁆𑀓𑀓𑀣𑀁 𑀲𑀦𑁆𑀥𑀸𑀬 ‘‘𑀇𑀢𑀺 𑀯𑀺𑀢𑁆𑀣𑀸𑀭𑁄’’𑀢𑀺 𑀆𑀳. ‘‘𑀢𑀲𑁆𑀫𑀸’’𑀢𑀺 𑀯𑀢𑁆𑀯𑀸 𑀢𑀤𑀧𑀭𑀸𑀫𑀲𑀺𑀢𑀩𑁆𑀩𑀫𑁂𑀯 𑀤𑀲𑁆𑀲𑁂𑀢𑀺 ‘‘𑀢𑀣𑀸𑀦𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸’’𑀢𑀺 𑀇𑀫𑀺𑀦𑀸. 𑀏𑀲 𑀦𑀬𑁄 𑀈𑀤𑀺𑀲𑁂𑀲𑀼.

𑀏𑀯𑀁 𑀲𑀘𑁆𑀘𑀯𑀲𑁂𑀦 𑀘𑀢𑀼𑀢𑁆𑀣𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀅𑀯𑀺𑀧𑀭𑀻𑀢𑀲𑀪𑀸𑀯𑀢𑁆𑀢𑀸 𑀢𑀣𑀪𑀽𑀢𑀸𑀦𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀸𑀦𑀁 𑀯𑀲𑁂𑀦𑀸𑀧𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀚𑀸𑀢𑀺𑀧𑀘𑁆𑀘𑀬𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄𑀢𑀺 𑀚𑀸𑀢𑀺𑀧𑀘𑁆𑀘𑀬𑀸 𑀲𑀫𑁆𑀪𑀽𑀢𑀁 𑀳𑀼𑀢𑁆𑀯𑀸 𑀲𑀳𑀺𑀢𑀲𑁆𑀲 𑀅𑀢𑁆𑀢𑀦𑁄 𑀧𑀘𑁆𑀘𑀬𑀸𑀦𑀼𑀭𑀽𑀧𑀲𑁆𑀲 𑀉𑀤𑁆𑀥𑀁 𑀉𑀤𑁆𑀥𑀁 𑀆𑀕𑀢𑀲𑀪𑀸𑀯𑁄, 𑀅𑀦𑀼𑀧𑀯𑀢𑁆𑀢𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀫𑁆𑀪𑀽𑀢𑀝𑁆𑀞𑁄 𑀘 𑀲𑀫𑀼𑀤𑀸𑀕𑀢𑀝𑁆𑀞𑁄 𑀘 𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄 𑀧𑀼𑀩𑁆𑀩𑀧𑀤𑁂 𑀉𑀢𑁆𑀢𑀭𑀧𑀤𑀮𑁄𑀧𑀯𑀲𑁂𑀦. 𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑁂𑀧𑀺 𑀳𑀺 𑀧𑀼𑀮𑁆𑀮𑀺𑀗𑁆𑀕𑀫𑀺𑀘𑁆𑀙𑀦𑁆𑀢𑀺 𑀦𑁂𑀭𑀼𑀢𑁆𑀢𑀺𑀓𑀸. 𑀦 𑀘𑁂𑀢𑁆𑀣 𑀚𑀸𑀢𑀺𑀢𑁄 𑀚𑀭𑀸𑀫𑀭𑀡𑀁 𑀦 𑀳𑁄𑀢𑀺, 𑀦 𑀘 𑀚𑀸𑀢𑀺𑀁 𑀯𑀺𑀦𑀸 𑀅𑀜𑁆𑀜𑀢𑁄 𑀳𑁄𑀢𑀻𑀢𑀺 𑀚𑀸𑀢𑀺𑀧𑀘𑁆𑀘𑀬𑀲𑀫𑁆𑀪𑀽𑀢𑀝𑁆𑀞𑁄. 𑀇𑀢𑁆𑀣𑀫𑁂𑀯 𑀚𑀸𑀢𑀺𑀢𑁄 𑀲𑀫𑀼𑀤𑀸𑀕𑀘𑁆𑀙𑀢𑀻𑀢𑀺 𑀚𑀸𑀢𑀺 𑀧𑀘𑁆𑀘𑀬𑀲𑀫𑀼𑀤𑀸𑀕𑀢𑀝𑁆𑀞𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀸 𑀬𑀸 𑀚𑀸𑀢𑀺 𑀬𑀣𑀸 𑀬𑀣𑀸 𑀧𑀘𑁆𑀘𑀬𑁄 ¶ 𑀳𑁄𑀢𑀺, 𑀢𑀤𑀦𑀼𑀭𑀽𑀧𑀁 𑀧𑀸𑀢𑀼𑀪𑀽𑀢𑀲𑀪𑀸𑀯𑁄𑀢𑀺. 𑀧𑀘𑁆𑀘𑀬𑀧𑀓𑁆𑀔𑁂 𑀧𑀦 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀝𑁆𑀞𑁄𑀢𑀺 𑀏𑀢𑁆𑀣 𑀦 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀦 𑀘 𑀅𑀯𑀺𑀚𑁆𑀚𑀁 𑀯𑀺𑀦𑀸 𑀲𑀗𑁆𑀔𑀸𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀬𑀸 𑀬𑀸 𑀅𑀯𑀺𑀚𑁆𑀚𑀸 𑀬𑁂𑀲𑀁 𑀬𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀬𑀣𑀸 𑀬𑀣𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀬𑀁 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀝𑁆𑀞𑁄 𑀧𑀘𑁆𑀘𑀬𑀲𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀢𑀣𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀧𑀘𑁆𑀘𑀬𑀸𑀓𑀸𑀭𑀥𑀫𑁆𑀫𑀸𑀦𑀁. ‘‘𑀲𑀼𑀕𑀢𑁄’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧) 𑀯𑀺𑀬 𑀕𑀫𑀼𑀲𑀤𑁆𑀤𑀲𑁆𑀲 𑀩𑀼𑀤𑁆𑀥𑀺𑀬𑀢𑁆𑀣𑀢𑀁 𑀲𑀦𑁆𑀥𑀸𑀬 ‘‘𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁, 𑀦 𑀜𑀸𑀡𑀕𑀫𑀦𑀢𑁆𑀣𑀁. 𑀕𑀢𑀺𑀩𑀼𑀤𑁆𑀥𑀺𑀬𑀢𑁆𑀣𑀸 𑀳𑀺 𑀲𑀤𑁆𑀤𑀸 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀸𑀬𑀸. 𑀢𑀲𑁆𑀫𑀸 ‘‘𑀅𑀪𑀺𑀲𑀫𑁆𑀩𑀼𑀤𑁆𑀥𑀢𑁆𑀣𑁄 𑀳𑁂𑀢𑁆𑀣 𑀕𑀢𑀲𑀤𑁆𑀤𑁄’’𑀢𑀺 𑀅𑀥𑀺𑀓𑀸𑀭𑁄, 𑀕𑀫𑁆𑀬𑀫𑀸𑀦𑀢𑁆𑀢𑀸 𑀯𑀸 𑀦 𑀧𑀬𑀼𑀢𑁆𑀢𑁄.

𑀬𑀁 𑀭𑀽𑀧𑀸𑀭𑀫𑁆𑀫𑀡𑀁 𑀦𑀸𑀫 𑀅𑀢𑁆𑀣𑀺, 𑀢𑀁 𑀪𑀕𑀯𑀸 𑀚𑀸𑀦𑀸𑀢𑀺 𑀧𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀤𑁂𑀯𑀓𑁂…𑀧𑁂… 𑀧𑀚𑀸𑀬𑀸𑀢𑀺 𑀆𑀥𑀸𑀭𑁄 ‘‘𑀅𑀢𑁆𑀣𑀻’’𑀢𑀺 𑀧𑀤𑁂𑀢𑀺 𑀧𑀼𑀦 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀊𑀢𑀺 𑀢𑀁𑀦𑀺𑀯𑀸𑀲𑀲𑀢𑁆𑀢𑀸𑀧𑁂𑀓𑁆𑀔𑀸𑀬, 𑀆𑀧𑀸𑀣𑀕𑀫𑀦𑀸𑀧𑁂𑀓𑁆𑀔𑀸𑀬 𑀯𑀸 𑀯𑀼𑀢𑁆𑀢𑀁. 𑀢𑁂𑀦 𑀪𑀕𑀯𑀢𑀸 𑀯𑀺𑀪𑀚𑁆𑀚𑀫𑀸𑀦𑀁 𑀢𑀁 𑀭𑀽𑀧𑀸𑀬𑀢𑀦𑀁 𑀢𑀣𑀫𑁂𑀯 𑀳𑁄𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀣𑀸𑀯𑀺𑀢𑀣𑀪𑀸𑀯𑁂 𑀓𑀸𑀭𑀡𑀫𑀸𑀳 ‘‘𑀏𑀯𑀁 𑀚𑀸𑀦𑀢𑀸 𑀧𑀲𑁆𑀲𑀢𑀸’’𑀢𑀺. 𑀲𑀩𑁆𑀩𑀸𑀓𑀸𑀭𑀢𑁄 𑀜𑀸𑀢𑀢𑁆𑀢𑀸 𑀧𑀲𑁆𑀲𑀺𑀢𑀢𑁆𑀢𑀸𑀢𑀺 𑀳𑀺 𑀳𑁂𑀢𑁆𑀯𑀦𑁆𑀢𑁄𑀕𑀥𑀫𑁂𑀢𑀁 𑀧𑀤𑀤𑁆𑀯𑀬𑀁. 𑀇𑀝𑁆𑀞𑀸𑀦𑀺𑀝𑁆𑀞𑀸𑀤𑀺𑀯𑀲𑁂𑀦𑀸𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀫𑀚𑁆𑀛𑀢𑁆𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀣𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀭𑀺𑀢𑁆𑀢𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀢𑀤𑀼𑀪𑀬𑀸𑀤𑀺𑀪𑁂𑀤𑀫𑁆𑀧𑀺. 𑀮𑀩𑁆𑀪𑀫𑀸𑀦𑀓𑀧𑀤𑀯𑀲𑁂𑀦𑀸𑀢𑀺 ‘‘𑀭𑀽𑀧𑀸𑀬𑀢𑀦𑀁 𑀤𑀺𑀝𑁆𑀞𑀁 𑀲𑀤𑁆𑀤𑀸𑀬𑀢𑀦𑀁 𑀲𑀼𑀢𑀁 𑀕𑀦𑁆𑀥𑀸𑀬𑀢𑀦𑀁 𑀭𑀲𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀫𑀼𑀢𑀁 𑀲𑀩𑁆𑀩𑀁 𑀭𑀽𑀧𑀁 𑀫𑀦𑀲𑀸 𑀯𑀺𑀜𑁆𑀜𑀸𑀢’’𑀦𑁆𑀢𑀺 (𑀥. 𑀲. 𑁯𑁬𑁬) 𑀯𑀘𑀦𑀢𑁄 𑀤𑀺𑀝𑁆𑀞𑀧𑀤𑀜𑁆𑀘 𑀯𑀺𑀜𑁆𑀜𑀸𑀢𑀧𑀤𑀜𑁆𑀘 𑀭𑀽𑀧𑀸𑀭𑀫𑁆𑀫𑀡𑁂 𑀮𑀩𑁆𑀪𑀢𑀺. 𑀭𑀽𑀧𑀸𑀭𑀫𑁆𑀫𑀡𑀁 𑀇𑀝𑁆𑀞𑀁 𑀅𑀦𑀺𑀝𑁆𑀞𑀁 𑀫𑀚𑁆𑀛𑀢𑁆𑀢𑀁 𑀧𑀭𑀺𑀢𑁆𑀢𑀁 𑀅𑀢𑀻𑀢𑀁 𑀅𑀦𑀸𑀕𑀢𑀁 ¶ 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀤𑀺𑀝𑁆𑀞𑀁 𑀯𑀺𑀜𑁆𑀜𑀸𑀢𑀁 𑀭𑀽𑀧𑀁 𑀭𑀽𑀧𑀸𑀬𑀢𑀦𑀁 𑀭𑀽𑀧𑀥𑀸𑀢𑀼 𑀯𑀡𑁆𑀡𑀦𑀺𑀪𑀸 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀦𑀻𑀮𑀁 𑀧𑀻𑀢𑀓𑀦𑁆𑀢𑀺 𑀏𑀯𑀫𑀸𑀤𑀻𑀳𑀺 𑀅𑀦𑁂𑀓𑁂𑀳𑀺 𑀦𑀸𑀫𑁂𑀳𑀺. ‘‘𑀇𑀝𑁆𑀞𑀸𑀦𑀺𑀝𑁆𑀞𑀸𑀤𑀺𑀯𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀳𑀺 𑀅𑀦𑁂𑀓𑀦𑀸𑀫𑀪𑀸𑀯𑀁 𑀲𑀭𑀽𑀧𑀢𑁄 𑀦𑀺𑀤𑀲𑁆𑀲𑁂𑀢𑀺. 𑀢𑁂𑀭𑀲𑀳𑀺 𑀯𑀸𑀭𑁂𑀳𑀻𑀢𑀺 𑀥𑀫𑁆𑀫𑀲𑀗𑁆𑀕𑀡𑀺𑀬𑀁 𑀭𑀽𑀧𑀓𑀡𑁆𑀟𑁂 (𑀥. 𑀲. 𑁬𑁧𑁫) 𑀆𑀕𑀢𑁂 𑀢𑁂𑀭𑀲 𑀦𑀺𑀤𑁆𑀤𑁂𑀲𑀯𑀸𑀭𑁂 𑀲𑀦𑁆𑀥𑀸𑀬𑀸𑀳. 𑀏𑀓𑁂𑀓𑀲𑁆𑀫𑀺𑀁 𑀯𑀸𑀭𑁂 𑀘𑁂𑀢𑁆𑀣 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀯𑀯𑀢𑁆𑀣𑀸𑀧𑀦𑀦𑀬𑀸𑀦𑀁 𑀯𑀲𑁂𑀦 ‘‘𑀤𑁆𑀯𑀺𑀧𑀜𑁆𑀜𑀸𑀲𑀸𑀬 𑀦𑀬𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀢𑀣𑀫𑁂𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀦 𑀚𑀸𑀦𑀦𑁂𑀦 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀤𑁂𑀲𑀦𑀢𑀸𑀬, 𑀬𑀣𑀸𑀯𑀼𑀢𑁆𑀢𑁂𑀦 𑀘 𑀧𑀲𑁆𑀲𑀦𑁂𑀦 𑀅𑀯𑀺𑀧𑀭𑀻𑀢𑀤𑀲𑁆𑀲𑀺𑀢𑀸𑀬 𑀲𑀘𑁆𑀘𑀫𑁂𑀯. 𑀢𑀫𑀢𑁆𑀣𑀁 𑀘𑀢𑀼𑀭𑀗𑁆𑀕𑀼𑀢𑁆𑀢𑀭𑁂 𑀓𑀸𑀴𑀓𑀸𑀭𑀸𑀫𑀲𑀼𑀢𑁆𑀢𑁂𑀦 (𑀅. 𑀦𑀺. 𑁪.𑁨𑁪) 𑀲𑀸𑀥𑁂𑀦𑁆𑀢𑁄 ‘‘𑀯𑀼𑀢𑁆𑀢𑀜𑁆𑀘𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀘-𑀲𑀤𑁆𑀤𑁄 𑀘𑁂𑀢𑁆𑀣 𑀤𑀴𑁆𑀳𑀻𑀓𑀭𑀡𑀚𑁄𑀢𑀓𑁄, 𑀢𑁂𑀦 ¶ 𑀬𑀣𑀸𑀯𑀼𑀢𑁆𑀢𑀲𑁆𑀲𑀢𑁆𑀣𑀲𑁆𑀲 𑀤𑀴𑁆𑀳𑀻𑀓𑀭𑀡𑀁 𑀚𑁄𑀢𑁂𑀢𑀺, 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 𑀯𑀸 𑀅𑀝𑁆𑀞𑀸𑀦𑀧𑀬𑀼𑀢𑁆𑀢𑁄, 𑀦 𑀓𑁂𑀯𑀮𑀁 𑀫𑀬𑀸 𑀏𑀯, 𑀅𑀣 𑀔𑁄 𑀪𑀕𑀯𑀢𑀸𑀧𑀻𑀢𑀺. 𑀅𑀦𑀼𑀯𑀺𑀘𑀭𑀺𑀢𑀦𑁆𑀢𑀺 𑀧𑀭𑀺𑀘𑀭𑀺𑀢𑀁. 𑀚𑀸𑀦𑀸𑀫𑀺 𑀅𑀩𑁆𑀪𑀜𑁆𑀜𑀸𑀲𑀺𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀓𑀸𑀮𑁂𑀲𑀼 𑀜𑀸𑀡𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑁂𑀦 𑀅𑀦𑀸𑀕𑀢𑁂𑀧𑀺 𑀜𑀸𑀡𑀧𑁆𑀧𑀯𑀢𑁆𑀢𑀺 𑀤𑀲𑁆𑀲𑀺𑀢𑀸𑀬𑁂𑀯 𑀦𑀬𑀢𑁄 𑀤𑀲𑁆𑀲𑀺𑀢𑀢𑁆𑀢𑀸. 𑀯𑀺𑀤𑀺𑀢-𑀲𑀤𑁆𑀤𑁄 𑀧𑀦 𑀅𑀦𑀸𑀫𑀝𑁆𑀞𑀓𑀸𑀮𑀯𑀺𑀲𑁂𑀲𑁄 𑀓𑀸𑀮𑀢𑁆𑀢𑀬𑀲𑀸𑀥𑀸𑀭𑀡𑀢𑁆𑀢𑀸 ‘‘𑀤𑀺𑀝𑁆𑀞𑀁 𑀲𑀼𑀢𑁆𑀢𑀁 𑀫𑀼𑀢’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁧𑁮𑁭; 𑀫. 𑀦𑀺. 𑁧.𑁭; 𑀲𑀁. 𑀦𑀺. 𑁨.𑁨𑁦𑁮; 𑀅. 𑀦𑀺. 𑁪.𑁨𑁩; 𑀧𑀝𑀺. 𑀫. 𑁧.𑁧𑁨𑁧) 𑀯𑀺𑀬, 𑀧𑀸𑀓𑀝𑀁 𑀓𑀢𑁆𑀯𑀸 𑀜𑀸𑀢𑀦𑁆𑀢𑀺 𑀅𑀢𑁆𑀣𑁄, 𑀇𑀫𑀺𑀦𑀸 𑀘𑁂𑀢𑀁 𑀤𑀲𑁆𑀲𑁂𑀢𑀺 ‘‘𑀅𑀜𑁆𑀜𑁂 𑀚𑀸𑀦𑀦𑁆𑀢𑀺𑀬𑁂𑀯, 𑀫𑀬𑀸 𑀧𑀦 𑀧𑀸𑀓𑀝𑀁 𑀓𑀢𑁆𑀯𑀸 𑀯𑀺𑀤𑀺𑀢’’𑀦𑁆𑀢𑀺. 𑀪𑀕𑀯𑀢𑀸 𑀳𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀲𑀩𑁆𑀩𑀜𑁆𑀜𑀼𑀪𑀽𑀫𑀺 𑀦𑀸𑀫 𑀓𑀣𑀺𑀢𑀸. 𑀦 𑀉𑀧𑀝𑁆𑀞𑀸𑀲𑀻𑀢𑀺 𑀢𑀁 𑀙𑀤𑁆𑀯𑀸𑀭𑀺𑀓𑀫𑀸𑀭𑀫𑁆𑀫𑀡𑀁 𑀢𑀡𑁆𑀳𑀸𑀬 𑀯𑀸 𑀤𑀺𑀝𑁆𑀞𑀺𑀬𑀸 𑀯𑀸 𑀢𑀣𑀸𑀕𑀢𑁄 𑀅𑀢𑁆𑀢𑀢𑁆𑀢𑀦𑀺𑀬𑀯𑀲𑁂𑀦 𑀦 𑀉𑀧𑀝𑁆𑀞𑀸𑀲𑀺 𑀦 𑀉𑀧𑀕𑀘𑁆𑀙𑀢𑀺, 𑀇𑀫𑀺𑀦𑀸 𑀧𑀦 𑀧𑀤𑁂𑀦 𑀔𑀻𑀡𑀸𑀲𑀯𑀪𑀽𑀫𑀺 𑀓𑀣𑀺𑀢𑀸. 𑀬𑀣𑀸 𑀭𑀽𑀧𑀸𑀭𑀫𑁆𑀫𑀡𑀸𑀤𑀬𑁄 𑀥𑀫𑁆𑀫𑀸 𑀬𑀁𑀲𑀪𑀸𑀯𑀸, 𑀬𑀁𑀧𑀓𑀸𑀭𑀸 𑀘, 𑀢𑀣𑀸 𑀢𑁂 𑀥𑀫𑁆𑀫𑁂 𑀢𑀁𑀲𑀪𑀸𑀯𑁂 𑀢𑀁𑀧𑀓𑀸𑀭𑁂 𑀕𑀫𑀢𑀺 𑀧𑀲𑁆𑀲𑀢𑀺 𑀚𑀸𑀦𑀸𑀢𑀻𑀢𑀺 𑀢𑀣𑀸𑀕𑀢𑁄𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀢𑀣𑀤𑀲𑁆𑀲𑀻𑀅𑀢𑁆𑀣𑁂’’𑀢𑀺 𑀯𑀼𑀢𑁆𑀢𑀁. 𑀅𑀦𑁂𑀓𑀢𑁆𑀣𑀸 𑀳𑀺 𑀥𑀸𑀢𑀼𑀲𑀤𑁆𑀤𑀸. 𑀓𑁂𑀘𑀺 𑀧𑀦 𑀦𑀺𑀭𑀼𑀢𑁆𑀢𑀺𑀦𑀬𑁂𑀦, 𑀧𑀺𑀲𑁄𑀤𑀭𑀸𑀤𑀺𑀕𑀡𑀧𑀓𑁆𑀔𑁂𑀧𑁂𑀦 (𑀧𑀸𑀭𑀸. 𑀅𑀝𑁆𑀞. 𑁧; 𑀯𑀺𑀲𑀼𑀤𑁆𑀥𑀺. 𑁧.𑁧𑁪𑁨) 𑀯𑀸 𑀤𑀲𑁆𑀲𑀻-𑀲𑀤𑁆𑀤𑀮𑁄𑀧𑀁, 𑀆𑀕𑀢-𑀲𑀤𑁆𑀤𑀲𑁆𑀲 𑀘𑀸𑀕𑀫𑀁 𑀓𑀢𑁆𑀯𑀸 ‘‘𑀢𑀣𑀸𑀕𑀢𑁄’’𑀢𑀺 𑀧𑀤𑀲𑀺𑀤𑁆𑀥𑀺𑀫𑁂𑀢𑁆𑀣 𑀯𑀡𑁆𑀡𑁂𑀦𑁆𑀢𑀺, 𑀢𑀤𑀬𑀼𑀢𑁆𑀢𑀫𑁂𑀯 𑀯𑀺𑀚𑁆𑀚𑀫𑀸𑀦𑀧𑀤𑀁 𑀙𑀟𑁆𑀟𑁂𑀢𑁆𑀯𑀸 𑀅𑀯𑀺𑀚𑁆𑀚𑀫𑀸𑀦𑀧𑀤𑀲𑁆𑀲 𑀕𑀳𑀡𑀢𑁄. 𑀯𑀼𑀢𑁆𑀢𑀜𑁆𑀘 𑀩𑀼𑀤𑁆𑀥𑀯𑀁𑀲𑀝𑁆𑀞𑀓𑀣𑀸𑀬𑀁 𑁋

‘‘𑀢𑀣𑀸𑀓𑀸𑀭𑁂𑀦 𑀬𑁄 𑀥𑀫𑁆𑀫𑁂, 𑀚𑀸𑀦𑀸𑀢𑀺 𑀅𑀦𑀼𑀧𑀲𑁆𑀲𑀢𑀺;

𑀢𑀣𑀤𑀲𑁆𑀲𑀻𑀢𑀺 𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀫𑀸 𑀯𑀼𑀢𑁆𑀢𑁄 𑀢𑀣𑀸𑀕𑀢𑁄’’𑀢𑀺. (𑀩𑀼. 𑀯𑀁. 𑀅𑀝𑁆𑀞. 𑀭𑀢𑀦𑀘𑀗𑁆𑀓𑀫𑀦𑀓𑀡𑁆𑀟𑀯𑀡𑁆𑀡𑀦𑀸);

𑀏𑀢𑁆𑀣 ‘‘𑀅𑀦𑀼𑀧𑀲𑁆𑀲𑀢𑀻’’𑀢𑀺 𑀆𑀕𑀢𑀲𑀤𑁆𑀤𑀢𑁆𑀣𑀁 𑀯𑀢𑁆𑀯𑀸 𑀢𑀤𑀺𑀤𑀁 𑀜𑀸𑀡𑀧𑀲𑁆𑀲𑀦𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀚𑀸𑀦𑀸𑀢𑀻’’𑀢𑀺, 𑀲𑀤𑁆𑀤𑀸𑀥𑀺𑀕𑀢𑀫𑀢𑁆𑀣𑀁 𑀧𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀢𑀣𑀤𑀲𑁆𑀲𑀻’’𑀢𑀺 𑀘 𑀯𑀼𑀢𑁆𑀢𑀁.

𑀬𑀁 ¶ 𑀭𑀢𑁆𑀢𑀺𑀦𑁆𑀢𑀺 𑀬𑀲𑁆𑀲 𑀭𑀢𑁆𑀢𑀺𑀬𑀁, 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀯𑀸 𑀏𑀢𑀁 𑀉𑀧𑀬𑁄𑀕𑀯𑀘𑀦𑀁 𑀭𑀢𑁆𑀢𑁂𑀓𑀤𑁂𑀲𑀪𑀽𑀢𑀲𑁆𑀲 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀓𑁆𑀔𑀡𑀲𑁆𑀲 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀢𑀸, 𑀲𑀓𑀮𑀸𑀧𑀺 𑀯𑀸 𑀏𑀲𑀸 𑀭𑀢𑁆𑀢𑀺 𑀅𑀪𑀺𑀲𑀫𑁆𑀩𑁄𑀥𑀸𑀬 𑀧𑀤𑀳𑀦𑀓𑀸𑀮𑀢𑁆𑀢𑀸 𑀧𑀭𑀺𑀬𑀸𑀬𑁂𑀦 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀪𑀽𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀣𑀯𑀻𑀧𑀼𑀓𑁆𑀔𑀮𑀦𑀺𑀭𑀼𑀢𑁆𑀢𑀭𑀪𑀽𑀫𑀺𑀲𑀻𑀲𑀕𑀢𑀢𑁆𑀢𑀸 𑀦 𑀧𑀭𑀸𑀚𑀺𑀢𑁄 𑀅𑀜𑁆𑀜𑁂𑀳𑀺 𑀏𑀢𑁆𑀣𑀸𑀢𑀺 𑀅𑀧𑀭𑀸𑀚𑀺𑀢𑁄, 𑀲𑁆𑀯𑁂𑀯 𑀧𑀮𑁆𑀮𑀗𑁆𑀓𑁄𑀢𑀺 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑁄, 𑀢𑀲𑁆𑀫𑀺𑀁. 𑀢𑀺𑀡𑁆𑀡𑀁𑀫𑀸𑀭𑀸𑀦𑀦𑁆𑀢𑀺 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀤𑁂𑀯𑀧𑀼𑀢𑁆𑀢𑀫𑀸𑀭𑀸𑀦𑀁, 𑀇𑀤𑀜𑁆𑀘 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀯𑀼𑀢𑁆𑀢𑀁, 𑀧𑀭𑀺𑀬𑀸𑀬𑀢𑁄 𑀧𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀧𑀜𑁆𑀘𑀦𑁆𑀦𑀫𑁆𑀧𑀺 𑀫𑀸𑀭𑀸𑀦𑀁 ¶ 𑀫𑀤𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀫𑀢𑁆𑀣𑀓𑀦𑁆𑀢𑀺 𑀲𑀸𑀫𑀢𑁆𑀣𑀺𑀬𑀲𑀗𑁆𑀔𑀸𑀢𑀁 𑀲𑀻𑀲𑀁. 𑀏𑀢𑁆𑀣𑀦𑁆𑀢𑀭𑁂𑀢𑀺 𑀉𑀪𑀺𑀦𑁆𑀦𑀁 𑀭𑀢𑁆𑀢𑀻𑀦𑀫𑀦𑁆𑀢𑀭𑁂. ‘‘𑀧𑀞𑀫𑀩𑁄𑀥𑀺𑀬𑀸𑀧𑀻’’𑀢𑀺𑀆𑀤𑀺𑀦𑀸 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀧𑀭𑀺𑀫𑀸𑀡𑀓𑀸𑀮𑀫𑁂𑀯 𑀅𑀦𑁆𑀢𑁄𑀕𑀥𑀪𑁂𑀤𑁂𑀦 𑀦𑀺𑀬𑀫𑁂𑀢𑁆𑀯𑀸 𑀯𑀺𑀲𑁂𑀲𑁂𑀢𑀺. 𑀢𑀸𑀲𑀼 𑀧𑀦 𑀯𑀻𑀲𑀢𑀺𑀯𑀲𑁆𑀲𑀧𑀭𑀺𑀘𑁆𑀙𑀺𑀦𑁆𑀦𑀸 𑀧𑀞𑀫𑀩𑁄𑀥𑀻𑀢𑀺 𑀯𑀺𑀦𑀬𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁, 𑀢𑀜𑁆𑀘 𑀢𑀤𑀝𑁆𑀞𑀓𑀣𑀸𑀬𑀫𑁂𑀯 ‘‘𑀪𑀕𑀯𑀢𑁄 𑀳𑀺 𑀧𑀞𑀫𑀩𑁄𑀥𑀺𑀬𑀁 𑀯𑀻𑀲𑀢𑀺𑀯𑀲𑁆𑀲𑀦𑁆𑀢𑀭𑁂 𑀦𑀺𑀩𑀤𑁆𑀥𑀼𑀧𑀝𑁆𑀞𑀸𑀓𑁄 𑀦𑀸𑀫 𑀦𑀢𑁆𑀣𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁧𑁬) 𑀓𑀣𑀺𑀢𑀢𑁆𑀢𑀸 𑀧𑀞𑀫𑀩𑁄𑀥𑀺 𑀦𑀸𑀫 𑀯𑀻𑀲𑀢𑀺𑀯𑀲𑁆𑀲𑀸𑀦𑀻𑀢𑀺 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀧𑀦 ‘‘𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀸𑀬 𑀯𑀲𑁆𑀲𑁂𑀲𑀼 𑀆𑀤𑀺𑀢𑁄 𑀧𑀦𑁆𑀦𑀭𑀲 𑀯𑀲𑁆𑀲𑀸𑀦𑀺 𑀧𑀞𑀫𑀩𑁄𑀥𑀻’’𑀢𑀺 𑀯𑀼𑀢𑁆𑀢𑀁, 𑀏𑀯𑀜𑁆𑀘 𑀲𑀢𑀺 𑀫𑀚𑁆𑀛𑁂 𑀧𑀦𑁆𑀦𑀭𑀲 𑀯𑀲𑁆𑀲𑀸𑀦𑀺 𑀫𑀚𑁆𑀛𑀺𑀫𑀩𑁄𑀥𑀺, 𑀅𑀦𑁆𑀢𑁂 𑀧𑀦𑁆𑀦𑀭𑀲 𑀯𑀲𑁆𑀲𑀸𑀦𑀺 𑀧𑀘𑁆𑀙𑀺𑀫𑀩𑁄𑀥𑀻𑀢𑀺 𑀢𑀺𑀡𑁆𑀡𑀁 𑀩𑁄𑀥𑀻𑀦𑀁 𑀲𑀫𑀧𑁆𑀧𑀫𑀸𑀡𑀢𑀸 𑀲𑀺𑀬𑀸, 𑀢𑀫𑁆𑀧𑀺 𑀬𑀼𑀢𑁆𑀢𑀁. 𑀧𑀦𑁆𑀦𑀭𑀲𑀢𑀺𑀓𑁂𑀦 𑀳𑀺 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀸𑀦𑀺 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀧𑀦𑁆𑀦𑀭𑀲𑀯𑀲𑁆𑀲𑀧𑁆𑀧𑀫𑀸𑀡𑀸𑀬 𑀧𑀞𑀫𑀩𑁄𑀥𑀺𑀬𑀸 𑀯𑀻𑀲𑀢𑀺𑀯𑀲𑁆𑀲𑁂𑀲𑀼𑀬𑁂𑀯 𑀅𑀦𑁆𑀢𑁄𑀕𑀥𑀢𑁆𑀢𑀸 ‘‘𑀧𑀞𑀫𑀩𑁄𑀥𑀺𑀬𑀁 𑀯𑀻𑀲𑀢𑀺𑀯𑀲𑁆𑀲𑀦𑁆𑀢𑀭𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀏𑀯𑀫𑁆𑀧𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. ‘‘𑀬𑀁 𑀲𑀼𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀲𑀫𑁆𑀩𑀦𑁆𑀥𑁄.

𑀦𑀺𑀤𑁆𑀤𑁄𑀲𑀢𑀸𑀬 𑀅𑀦𑀼𑀧𑀯𑀚𑁆𑀚𑀁 𑀅𑀦𑀼𑀧𑀯𑀤𑀦𑀻𑀬𑀁. 𑀧𑀓𑁆𑀔𑀺𑀧𑀺𑀢𑀩𑁆𑀩𑀸𑀪𑀸𑀯𑁂𑀦 𑀅𑀦𑀽𑀦𑀁. 𑀅𑀧𑀦𑁂𑀢𑀩𑁆𑀩𑀸𑀪𑀸𑀯𑁂𑀦 𑀅𑀦𑀥𑀺𑀓𑀁. 𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀼𑀡𑁆𑀡𑀁. 𑀦𑀺𑀫𑁆𑀫𑀤𑀦𑀳𑁂𑀢𑀼 𑀦𑀺𑀫𑁆𑀫𑀤𑀦𑀁. 𑀯𑀸𑀮𑀕𑁆𑀕𑀫𑀢𑁆𑀢𑀫𑁆𑀧𑀻𑀢𑀺 𑀯𑀸𑀮𑀥𑀺𑀮𑁄𑀫𑀲𑁆𑀲 𑀓𑁄𑀝𑀺𑀧𑁆𑀧𑀫𑀸𑀡𑀫𑁆𑀧𑀺. 𑀅𑀯𑀓𑁆𑀔𑀮𑀺𑀢𑀦𑁆𑀢𑀺 𑀯𑀺𑀭𑀸𑀥𑀺𑀢𑀁 𑀫𑀼𑀲𑀸 𑀪𑀡𑀺𑀢𑀁. 𑀏𑀓𑀫𑀼𑀤𑁆𑀤𑀺𑀓𑀸𑀬𑀸𑀢𑀺 𑀏𑀓𑀭𑀸𑀚𑀮𑀜𑁆𑀙𑀦𑁂𑀦. 𑀏𑀓𑀦𑀸𑀴𑀺𑀬𑀸𑀢𑀺 𑀏𑀓𑀸𑀴𑁆𑀳𑀓𑁂𑀦, 𑀏𑀓𑀢𑀼𑀫𑁆𑀩𑁂𑀦 𑀯𑀸. 𑀏𑀓𑀢𑀼𑀮𑀸𑀬𑀸𑀢𑀺 𑀏𑀓𑀫𑀸𑀦𑁂𑀦. ‘‘𑀢𑀣𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀦𑁄 𑀅𑀜𑁆𑀜𑀣𑀸𑀢𑀺 𑀩𑁆𑀬𑀢𑀺𑀭𑁂𑀓𑀢𑁄 𑀤𑀲𑁆𑀲𑁂𑀢𑀺, 𑀢𑁂𑀦 𑀬𑀤𑀢𑁆𑀣𑀁 𑀪𑀸𑀲𑀺𑀢𑀁, 𑀏𑀓𑀦𑁆𑀢𑁂𑀦 𑀢𑀤𑀢𑁆𑀣𑀦𑀺𑀧𑁆𑀨𑀸𑀤𑀦𑀢𑁄 𑀬𑀣𑀸 𑀪𑀸𑀲𑀺𑀢𑀁 𑀪𑀕𑀯𑀢𑀸, 𑀢𑀣𑀸𑀬𑁂𑀯𑀸𑀢𑀺 𑀅𑀯𑀺𑀧𑀭𑀻𑀢𑀤𑁂𑀲𑀦𑀢𑀁 𑀤𑀲𑁆𑀲𑁂𑀢𑀺. ‘‘𑀕𑀤𑀢𑁆𑀣𑁄’’𑀢𑀺 𑀏𑀢𑁂𑀦 𑀢𑀣𑀁 𑀕𑀤𑀢𑀺 𑀪𑀸𑀲𑀢𑀻𑀢𑀺 𑀢𑀣𑀸𑀕𑀢𑁄 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁, 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀘 𑀆𑀓𑀸𑀭𑀸𑀕𑀫𑀁 𑀓𑀢𑁆𑀯𑀸, 𑀥𑀸𑀢𑀼𑀲𑀤𑁆𑀤𑀸𑀦𑀼𑀕𑀢𑁂𑀦 𑀯𑀸 𑀆𑀓𑀸𑀭𑁂𑀦𑀸𑀢𑀺 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀢𑀺.

𑀏𑀯𑀁 ‘‘𑀲𑀼𑀕𑀢𑁄’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧) 𑀯𑀺𑀬 𑀥𑀸𑀢𑀼𑀲𑀤𑁆𑀤𑀦𑀺𑀧𑁆𑀨𑀢𑁆𑀢𑀺𑀧𑀭𑀺𑀓𑀧𑁆𑀧𑁂𑀦 𑀦𑀺𑀭𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁂𑀦𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀕𑀤𑀦𑀦𑁆𑀢𑀺 𑀲𑀩𑁆𑀩𑀳𑀺𑀢𑀦𑀺𑀧𑁆𑀨𑀸𑀤𑀦𑀢𑁄 𑀪𑀼𑀲𑀁 𑀓𑀣𑀦𑀁 𑀯𑀘𑀦𑀁, 𑀢𑀩𑁆𑀪𑀸𑀯𑀫𑀢𑁆𑀢𑁄 𑀯𑀸 𑀆-𑀲𑀤𑁆𑀤𑁄.

𑀢𑀣𑀸 ¶ ¶ 𑀕𑀢𑀫𑀲𑁆𑀲𑀸𑀢𑀺 𑀢𑀣𑀸𑀕𑀢𑁄. 𑀬𑀣𑀸 𑀯𑀸𑀘𑀸𑀬 𑀕𑀢𑀁 𑀧𑀯𑀢𑁆𑀢𑀺, 𑀢𑀣𑀸 𑀓𑀸𑀬𑀲𑁆𑀲, 𑀬𑀣𑀸 𑀯𑀸 𑀓𑀸𑀬𑀲𑁆𑀲 𑀕𑀢𑀁 𑀧𑀯𑀢𑁆𑀢𑀺, 𑀢𑀣𑀸 𑀯𑀸𑀘𑀸𑀬 𑀅𑀲𑁆𑀲, 𑀢𑀲𑁆𑀫𑀸 𑀢𑀣𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀢𑀤𑁂𑀯 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀕𑀯𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑀺 ‘‘𑀕𑀢𑁄 𑀧𑀯𑀢𑁆𑀢𑁄, 𑀕𑀢𑀸 𑀧𑀯𑀢𑁆𑀢𑀸’’𑀢𑀺 𑀘 𑀏𑀢𑁂𑀦 𑀓𑀸𑀬𑀯𑀘𑀻𑀓𑀺𑀭𑀺𑀬𑀸𑀦𑀁 𑀅𑀜𑁆𑀜𑀫𑀜𑁆𑀜𑀸𑀦𑀼𑀮𑁄𑀫𑀦𑀯𑀘𑀦𑀺𑀘𑁆𑀙𑀸𑀬 𑀓𑀸𑀬𑀲𑁆𑀲, 𑀯𑀸𑀘𑀸𑀬 𑀘 𑀧𑀯𑀢𑁆𑀢𑀺 𑀇𑀥 𑀕𑀢-𑀲𑀤𑁆𑀤𑁂𑀦 𑀓𑀣𑀺𑀢𑀸𑀢𑀺 𑀤𑀲𑁆𑀲𑁂𑀢𑀺, ‘‘𑀏𑀯𑀁𑀪𑀽𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑀁, ‘‘𑀬𑀣𑀸 𑀢𑀣𑀸’’𑀢𑀺 𑀏𑀢𑁂𑀦 𑀬𑀁𑀢𑀁-𑀲𑀤𑁆𑀤𑀸𑀦𑀁 𑀅𑀩𑁆𑀬𑀪𑀺𑀘𑀸𑀭𑀺𑀢𑀲𑀫𑁆𑀩𑀦𑁆𑀥𑀢𑀸𑀬 ‘‘𑀢𑀣𑀸’’𑀢𑀺 𑀯𑀼𑀢𑁆𑀢𑁂 ‘‘𑀬𑀣𑀸’’𑀢𑀺 𑀅𑀬𑀫𑀢𑁆𑀣𑁄 𑀉𑀧𑀝𑁆𑀞𑀺𑀢𑁄𑀬𑁂𑀯 𑀳𑁄𑀢𑀻𑀢𑀺 𑀢𑀣𑀸𑀲𑀤𑁆𑀤𑀢𑁆𑀣𑀁, ‘‘𑀯𑀸𑀤𑀻 𑀓𑀸𑀭𑀻’’𑀢𑀺 𑀏𑀢𑁂𑀦 𑀧𑀯𑀢𑁆𑀢𑀺𑀲𑀭𑀽𑀧𑀁, ‘‘𑀪𑀕𑀯𑀢𑁄 𑀳𑀻’’𑀢𑀺 𑀏𑀢𑁂𑀦 𑀬𑀣𑀸𑀯𑀸𑀤𑀻𑀢𑀣𑀸𑀓𑀸𑀭𑀺𑀢𑀸𑀤𑀺𑀓𑀸𑀭𑀡𑀦𑁆𑀢𑀺. ‘‘𑀏𑀯𑀁𑀪𑀽𑀢𑀲𑁆𑀲𑀸’’𑀢𑀺 𑀬𑀣𑀸𑀯𑀸𑀤𑀻𑀢𑀣𑀸𑀓𑀸𑀭𑀺𑀢𑀸𑀤𑀺𑀦𑀸 𑀧𑀓𑀸𑀭𑁂𑀦 𑀧𑀯𑀢𑁆𑀢𑀲𑁆𑀲, 𑀇𑀫𑀁 𑀧𑀓𑀸𑀭𑀁 𑀯𑀸 𑀧𑀢𑁆𑀢𑀲𑁆𑀲. 𑀇𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀦𑀺𑀤𑁆𑀤𑀺𑀲𑀢𑀺. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀕𑀢-𑀲𑀤𑁆𑀤𑁄 𑀯𑀸𑀘𑀸𑀬 𑀧𑀯𑀢𑁆𑀢𑀺𑀫𑁆𑀧𑀺 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀓𑀸𑀫𑀁 𑀢𑀣𑀸𑀯𑀸𑀤𑀺𑀢𑀸𑀬 𑀢𑀣𑀸𑀕𑀢𑁄𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀲𑀺𑀤𑁆𑀥𑁄 𑀳𑁄𑀢𑀺, 𑀲𑁄 𑀧𑀦 𑀧𑀼𑀩𑁆𑀩𑁂 𑀧𑀓𑀸𑀭𑀦𑁆𑀢𑀭𑁂𑀦 𑀤𑀲𑁆𑀲𑀺𑀢𑁄𑀢𑀺 𑀧𑀸𑀭𑀺𑀲𑁂𑀲𑀦𑀬𑁂𑀦 𑀢𑀣𑀸𑀓𑀸𑀭𑀺𑀢𑀸𑀅𑀢𑁆𑀣𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀢𑀣𑀸𑀓𑀸𑀭𑀺𑀢𑀸𑀬 𑀢𑀣𑀸𑀕𑀢𑁄’’𑀢𑀺 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀘 𑁋

‘‘𑀬𑀣𑀸 𑀯𑀸𑀘𑀸 𑀕𑀢𑀸 𑀬𑀲𑁆𑀲,

𑀢𑀣𑀸 𑀓𑀸𑀬𑁄 𑀕𑀢𑁄 𑀬𑀢𑁄;

𑀬𑀣𑀸 𑀓𑀸𑀬𑁄 𑀢𑀣𑀸 𑀯𑀸𑀘𑀸,

𑀢𑀢𑁄 𑀲𑀢𑁆𑀣𑀸 𑀢𑀣𑀸𑀕𑀢𑁄’’𑀢𑀺.

𑀪𑀯𑀕𑁆𑀕𑀁 𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀁 𑀧𑀦𑁂𑀓𑁂 𑀯𑀤𑀦𑁆𑀢𑀺 ‘‘𑀢𑀺𑀭𑀺𑀬𑀁 𑀯𑀺𑀬 𑀉𑀧𑀭𑀺, 𑀅𑀥𑁄 𑀘 𑀲𑀦𑁆𑀢𑀺 𑀅𑀧𑀭𑀺𑀫𑀸𑀡𑀸 𑀮𑁄𑀓𑀥𑀸𑀢𑀼𑀬𑁄’’𑀢𑀺, 𑀢𑁂𑀲𑀁 𑀢𑀁 𑀧𑀝𑀺𑀲𑁂𑀥𑁂𑀢𑀼𑀁 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀨𑀮𑁂𑀦. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑁂𑀦𑀸𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀜𑀸𑀡𑀲𑀗𑁆𑀔𑀸𑀢𑁂𑀦 𑀤𑀲𑁆𑀲𑀦𑁂𑀦. 𑀢𑀼𑀮𑁄𑀢𑀺 𑀲𑀤𑀺𑀲𑁄. 𑀧𑀫𑀸𑀡𑀦𑁆𑀢𑀺 𑀫𑀺𑀦𑀦𑀓𑀸𑀭𑀡𑀁. 𑀧𑀭𑁂 𑀅𑀪𑀺𑀪𑀯𑀢𑀺 𑀕𑀼𑀡𑁂𑀦 𑀅𑀚𑁆𑀛𑁄𑀢𑁆𑀣𑀭𑀢𑀺 𑀅𑀥𑀺𑀓𑁄 𑀪𑀯𑀢𑀻𑀢𑀺 𑀅𑀪𑀺𑀪𑀽. 𑀧𑀭𑁂𑀳𑀺 𑀦 𑀅𑀪𑀺𑀪𑀽𑀢𑁄 𑀅𑀚𑁆𑀛𑁄𑀢𑁆𑀣𑀝𑁄𑀢𑀺 𑀅𑀦𑀪𑀺𑀪𑀽𑀢𑁄. 𑀅𑀜𑁆𑀜𑀤𑀢𑁆𑀣𑀽𑀢𑀺 𑀏𑀓𑀁𑀲𑀯𑀘𑀦𑁂 𑀦𑀺𑀧𑀸𑀢𑁄. 𑀤𑀲𑁆𑀲𑀦𑀯𑀲𑁂𑀦 𑀤𑀲𑁄, 𑀲𑀩𑁆𑀩𑀁 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀧𑀭𑁂 𑀅𑀢𑁆𑀢𑀦𑁄 𑀯𑀲𑀁 𑀯𑀢𑁆𑀢𑁂𑀢𑀻𑀢𑀺 𑀯𑀲𑀯𑀢𑁆𑀢𑀻.

‘‘𑀅𑀪𑀺𑀪𑀯𑀦𑀝𑁆𑀞𑁂𑀦 𑀢𑀣𑀸𑀕𑀢𑁄’’𑀢𑀺 𑀅𑀬𑀁 𑀦 𑀲𑀤𑁆𑀤𑀢𑁄 𑀮𑀩𑁆𑀪𑀢𑀺, 𑀲𑀤𑁆𑀤𑀢𑁄 𑀧𑀦 𑀏𑀯𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀭𑁂𑀯’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀕𑀤𑁄𑀢𑀺 𑀤𑀺𑀩𑁆𑀩𑀸𑀕𑀤𑁄 𑀅𑀕𑀁 𑀭𑁄𑀕𑀁 𑀤𑀸𑀢𑀺 𑀅𑀯𑀔𑀡𑁆𑀟𑀢𑀺, 𑀦𑀢𑁆𑀣𑀺 𑀯𑀸 𑀕𑀤𑁄 𑀭𑁄𑀕𑁄 𑀏𑀢𑁂𑀦𑀸𑀢𑀺 𑀓𑀢𑁆𑀯𑀸 ¶ , 𑀢𑀲𑁆𑀲𑀤𑀺𑀲𑀝𑁆𑀞𑁂𑀦 𑀇𑀥 𑀤𑁂𑀲𑀦𑀸𑀯𑀺𑀮𑀸𑀲𑀲𑁆𑀲, 𑀧𑀼𑀜𑁆𑀜𑀼𑀲𑁆𑀲𑀬𑀲𑁆𑀲 𑀘 𑀅𑀕𑀤𑀢𑀸 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀅𑀕𑀤𑁄 𑀯𑀺𑀬𑀸’’𑀢𑀺. 𑀬𑀸𑀬 𑀥𑀫𑁆𑀫𑀥𑀸𑀢𑀼𑀬𑀸 𑀤𑁂𑀲𑀦𑀸𑀯𑀺𑀚𑀫𑁆𑀪𑀦𑀧𑁆𑀧𑀢𑁆𑀢𑀸, 𑀲𑀸 𑀤𑁂𑀲𑀦𑀸𑀯𑀺𑀮𑀸𑀲𑁄. 𑀥𑀫𑁆𑀫𑀥𑀸𑀢𑀊𑀢𑀺 𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯. 𑀢𑁂𑀦 𑀳𑀺 𑀥𑀫𑁆𑀫𑀸𑀦𑀫𑀸𑀓𑀸𑀭𑀪𑁂𑀤𑀁 𑀜𑀢𑁆𑀯𑀸 𑀢𑀤𑀦𑀼𑀭𑀽𑀧𑀁 ¶ 𑀤𑁂𑀲𑀦𑀁 𑀦𑀺𑀬𑀸𑀫𑁂𑀢𑀺. 𑀤𑁂𑀲𑀦𑀸𑀯𑀺𑀮𑀸𑀲𑁄𑀬𑁂𑀯 𑀤𑁂𑀲𑀦𑀸𑀯𑀺𑀮𑀸𑀲𑀫𑀬𑁄 𑀬𑀣𑀸 ‘‘𑀤𑀸𑀦𑀫𑀬𑀁 𑀲𑀻𑀮𑀫𑀬’’𑀦𑁆𑀢𑀺 (𑀤𑀻. 𑀦𑀺. 𑁩.𑁩𑁦𑁫; 𑀇𑀢𑀺𑀯𑀼. 𑁬𑁦; 𑀦𑁂𑀢𑁆𑀢𑀺. 𑁩𑁪) 𑀅𑀥𑀼𑀦𑀸 𑀧𑀦 𑀧𑁄𑀢𑁆𑀣𑀓𑁂𑀲𑀼 𑀩𑀳𑀽𑀲𑀼𑀧𑀺 𑀫𑀬-𑀲𑀤𑁆𑀤𑁄 𑀦 𑀤𑀺𑀲𑁆𑀲𑀢𑀺. 𑀧𑀼𑀜𑁆𑀜𑀼𑀲𑁆𑀲𑀬𑁄𑀢𑀺 𑀉𑀲𑁆𑀲𑀦𑀁, 𑀅𑀢𑀺𑀭𑁂𑀓𑀁 𑀯𑀸 𑀜𑀸𑀡𑀸𑀤𑀺𑀲𑀫𑁆𑀪𑀸𑀭𑀪𑀽𑀢𑀁 𑀧𑀼𑀜𑁆𑀜𑀁. ‘‘𑀢𑁂𑀦𑀸’’𑀢𑀺𑀆𑀤𑀺 𑀑𑀧𑀫𑁆𑀫𑀲𑀫𑁆𑀧𑀸𑀤𑀦𑀁. 𑀢𑁂𑀦𑀸𑀢𑀺 𑀘 𑀢𑀤𑀼𑀪𑀬𑁂𑀦 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀘𑁂𑀯 𑀧𑀼𑀜𑁆𑀜𑀼𑀲𑁆𑀲𑀬𑁂𑀦 𑀘 𑀲𑁄 𑀪𑀕𑀯𑀸 𑀅𑀪𑀺𑀪𑀯𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀇𑀢𑀻’’𑀢𑀺𑀆𑀤𑀺𑀦𑀸 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀮𑁄𑀓𑀸𑀪𑀺𑀪𑀯𑀦𑁂𑀦 𑀢𑀣𑁄, 𑀦 𑀅𑀜𑁆𑀜𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀣𑀸𑀬 𑀕𑀢𑁄𑀢𑀺 𑀧𑀼𑀭𑀺𑀫𑀲𑀘𑁆𑀘𑀢𑁆𑀢𑀬𑀁 𑀲𑀦𑁆𑀥𑀸𑀬𑀸𑀳, 𑀢𑀣𑀁 𑀕𑀢𑁄𑀢𑀺 𑀧𑀦 𑀧𑀘𑁆𑀙𑀺𑀫𑀲𑀘𑁆𑀘𑀁. 𑀘𑀢𑀼𑀲𑀘𑁆𑀘𑀸𑀦𑀼𑀓𑁆𑀓𑀫𑁂𑀦 𑀘𑁂𑀢𑁆𑀣 𑀕𑀢-𑀲𑀤𑁆𑀤𑀲𑁆𑀲 𑀅𑀢𑁆𑀣𑀘𑀢𑀼𑀓𑁆𑀓𑀁 𑀯𑀼𑀢𑁆𑀢𑀁. 𑀯𑀸𑀘𑀓𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂 𑀉𑀧𑀲𑀕𑁆𑀕𑀦𑀺𑀧𑀸𑀢𑀸𑀦𑀁 𑀢𑀤𑀢𑁆𑀣𑀚𑁄𑀢𑀦𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄 𑀕𑀢-𑀲𑀤𑁆𑀤𑁄𑀬𑁂𑀯 𑀅𑀦𑀼𑀧𑀲𑀕𑁆𑀕𑁄 𑀅𑀯𑀕𑀢𑀢𑁆𑀣𑀁, 𑀅𑀢𑀻𑀢𑀢𑁆𑀣𑀜𑁆𑀘 𑀯𑀤𑀢𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀅𑀯𑀕𑀢𑁄 𑀅𑀢𑀻𑀢𑁄’’𑀢𑀺 𑀇𑀫𑀺𑀦𑀸.

‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀢𑀩𑁆𑀩𑀺𑀯𑀭𑀡𑀁. 𑀮𑁄𑀓𑀦𑁆𑀢𑀺 𑀤𑀼𑀓𑁆𑀔𑀲𑀘𑁆𑀘𑀪𑀽𑀢𑀁 𑀮𑁄𑀓𑀁. 𑀢𑀣𑀸𑀬 𑀢𑀻𑀭𑀡𑀧𑀭𑀺𑀜𑁆𑀜𑀸𑀬𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀁, 𑀦 𑀧𑀦 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀫𑀢𑁆𑀢𑀁. 𑀢𑀢𑁆𑀣 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀫𑁆𑀧𑀺 𑀓𑀢𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀮𑁄𑀓𑀲𑁆𑀫𑀸 𑀢𑀣𑀸𑀕𑀢𑁄 𑀯𑀺𑀲𑀁𑀬𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀲𑀘𑁆𑀘𑀘𑀢𑀼𑀓𑁆𑀓𑁂𑀧𑀺 𑀤𑀼𑀢𑀺𑀬𑀧𑀓𑁆𑀔𑀁 𑀯𑀼𑀢𑁆𑀢𑀁, 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀳𑁂𑀢𑀼𑀁 𑀯𑀸 𑀏𑀢𑁂𑀳𑀺 𑀤𑀲𑁆𑀲𑁂𑀢𑀺. 𑀢𑀢𑁄𑀬𑁂𑀯 𑀳𑀺 𑀢𑀸𑀦𑀺 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺. ‘‘𑀬𑀁 𑀪𑀺𑀓𑁆𑀔𑀯𑁂, 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀫𑀸𑀭𑀓𑀲𑁆𑀲 𑀲𑀩𑁆𑀭𑀳𑁆𑀫𑀓𑀲𑁆𑀲 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀲𑀩𑁆𑀩𑀁 𑀢𑀁 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀁, 𑀢𑀲𑁆𑀫𑀸 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀅. 𑀦𑀺. 𑁪.𑁨𑁩) 𑀅𑀗𑁆𑀕𑀼𑀢𑁆𑀢𑀭𑀸𑀕𑀫𑁂 𑀘𑀢𑀼𑀓𑁆𑀓𑀦𑀺𑀧𑀸𑀢𑁂 𑀆𑀕𑀢𑀁 𑀧𑀸𑀴𑀺𑀫𑀺𑀫𑀁 𑀧𑁂𑀬𑁆𑀬𑀸𑀮𑀫𑀼𑀔𑁂𑀦 𑀤𑀲𑁆𑀲𑁂𑀢𑀺, 𑀢𑀜𑁆𑀘 𑀅𑀢𑁆𑀣𑀲𑀫𑁆𑀩𑀦𑁆𑀥𑀢𑀸𑀬 𑀏𑀯, 𑀦 𑀇𑀫𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀢𑀸𑀬. 𑀲𑀸 𑀳𑀺 𑀧𑁂𑀬𑁆𑀬𑀸𑀮𑀦𑀺𑀤𑁆𑀤𑀺𑀝𑁆𑀞𑀸 𑀧𑀸𑀴𑀺 𑀢𑀣𑀤𑀲𑁆𑀲𑀺𑀢𑀸 𑀅𑀢𑁆𑀣𑀲𑁆𑀲 𑀲𑀸𑀥𑀺𑀓𑀸𑀢𑀺. ‘‘𑀢𑀲𑁆𑀲𑀧𑀺 𑀏𑀯𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀲𑀸𑀥𑁆𑀬𑀲𑀸𑀥𑀓𑀲𑀁𑀲𑀦𑁆𑀤𑀦𑀁 𑀓𑀭𑁄𑀢𑀺. ‘‘𑀇𑀤𑀫𑁆𑀧𑀺 𑀘𑀸’’𑀢𑀺𑀆𑀤𑀺𑀦𑀸 𑀢𑀣𑀸𑀕𑀢𑀧𑀤𑀲𑁆𑀲 𑀫𑀳𑀸𑀯𑀺𑀲𑀬𑀢𑀁 ¶ , 𑀅𑀝𑁆𑀞𑀯𑀺𑀥𑀲𑁆𑀲𑀸𑀧𑀺 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀲𑁆𑀲 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀇𑀤𑀦𑁆𑀢𑀺 𑀅𑀢𑀺𑀩𑁆𑀬𑀸𑀲𑀭𑀽𑀧𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀯𑀺𑀥𑀁 𑀓𑀸𑀭𑀡𑀁, 𑀧𑀺-𑀲𑀤𑁆𑀤𑁄, 𑀅𑀧𑀺-𑀲𑀤𑁆𑀤𑁄 𑀯𑀸 𑀲𑀫𑁆𑀪𑀸𑀯𑀦𑁂 ‘‘𑀇𑀢𑁆𑀣𑀫𑁆𑀧𑀺 𑀫𑀼𑀔𑀫𑀢𑁆𑀢𑀫𑁂𑀯, 𑀧𑀕𑁂𑀯 𑀅𑀜𑁆𑀜𑀣𑀸’’𑀢𑀺. 𑀢𑀣𑀸𑀕𑀢𑀪𑀸𑀯𑀤𑀻𑀧𑀦𑁂𑀢𑀺 𑀢𑀣𑀸𑀕𑀢𑀦𑀸𑀫𑀤𑀻𑀧𑀦𑁂. 𑀕𑀼𑀡𑁂𑀦 𑀳𑀺 𑀪𑀕𑀯𑀸 𑀢𑀣𑀸𑀕𑀢𑁄 𑀦𑀸𑀫, 𑀦𑀸𑀫𑁂𑀦 𑀘 𑀪𑀕𑀯𑀢𑀺 𑀢𑀣𑀸𑀕𑀢-𑀲𑀤𑁆𑀤𑁄𑀢𑀺. ‘‘𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀦𑀸𑀫𑀸𑀦𑀺, 𑀲𑀕𑀼𑀡𑁂𑀦 𑀫𑀳𑁂𑀲𑀺𑀦𑁄’’𑀢𑀺𑀆𑀤𑀺 (𑀉𑀤𑀸. 𑀅𑀝𑁆𑀞. 𑁩𑁦𑁬; 𑀧𑀝𑀺. 𑀫. 𑀅𑀝𑁆𑀞. 𑁧.𑁨𑁭𑁭) 𑀳𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀫𑀸𑀤𑀧𑀤𑀁 𑀯𑀺𑀬 𑀲𑀓𑀮𑀓𑀼𑀲𑀮𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀸 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑀸𑀦𑀁 𑀢𑀣𑀸𑀕𑀢𑀧𑀤𑀁 𑀲𑀗𑁆𑀕𑀸𑀳𑀓𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀸𑀓𑀸𑀭𑁂𑀦𑀸’’𑀢𑀺𑀆𑀤𑀺𑀫𑀸𑀳 ¶ . 𑀯𑀡𑁆𑀡𑁂𑀬𑁆𑀬𑀸𑀢𑀺 𑀧𑀭𑀺𑀓𑀧𑁆𑀧𑀯𑀘𑀦𑀫𑁂𑀢𑀁 ‘‘𑀯𑀡𑁆𑀡𑁂𑀬𑁆𑀬 𑀯𑀸, 𑀦 𑀯𑀸 𑀯𑀡𑁆𑀡𑁂𑀬𑁆𑀬𑀸’’𑀢𑀺. 𑀯𑀼𑀢𑁆𑀢𑀜𑁆𑀘 𑁋

‘‘𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁,

𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄;

𑀔𑀻𑀬𑁂𑀣 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂,

𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁦𑁪; 𑁩.𑁧𑁪𑁧; 𑀉𑀤𑀸. 𑀅𑀝𑁆𑀞. 𑁫𑁨; 𑀅𑀧. 𑀅𑀝𑁆𑀞. 𑁨.𑁭.𑁨𑁦; 𑀩𑀼. 𑀯𑀁. 𑀅𑀝𑁆𑀞. 𑀓𑁄𑀡𑁆𑀟𑀜𑁆𑀜𑀩𑀼𑀤𑁆𑀥𑀯𑀁𑀲𑀯𑀡𑁆𑀡𑀦𑀸; 𑀘𑀭𑀺𑀬𑀸. 𑀧𑀓𑀺𑀡𑁆𑀡𑀓𑀓𑀣𑀸); 𑁋

𑀲𑀫𑀢𑁆𑀣𑀦𑁂 𑀯𑀸 𑀏𑀢𑀁 ‘‘𑀲𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁨𑁩) 𑀯𑀺𑀬𑀸𑀢𑀺𑀧𑀺 𑀯𑀤𑀦𑁆𑀢𑀺 𑀓𑁂𑀘𑀺.

𑀅𑀬𑀁 𑀧𑀦𑁂𑀢𑁆𑀣 𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑁄 𑀦𑀬𑁄 𑁋 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀫𑁆𑀫𑀸𑀲𑀫𑁆𑀩𑁄𑀥𑀺, 𑀏𑀢𑁆𑀣𑀦𑁆𑀢𑀭𑁂 𑀫𑀳𑀸𑀩𑁄𑀥𑀺𑀬𑀸𑀦𑀧𑀝𑀺𑀧𑀢𑁆𑀢𑀺𑀬𑀸 𑀳𑀸𑀦𑀝𑁆𑀞𑀸𑀦𑀲𑀁𑀓𑀺𑀮𑁂𑀲𑀦𑀺𑀯𑀢𑁆𑀢𑀻𑀦𑀁 𑀅𑀪𑀸𑀯𑀢𑁄 𑀬𑀣𑀸𑀧𑀡𑀺𑀥𑀸𑀦𑀁 𑀢𑀣𑀸𑀕𑀢𑁄 𑀅𑀪𑀺𑀦𑀻𑀳𑀸𑀭𑀸𑀦𑀼𑀭𑀽𑀧𑀁 𑀧𑀝𑀺𑀧𑀦𑁆𑀦𑁄𑀢𑀺 𑀢𑀣𑀸𑀕𑀢𑁄. 𑀅𑀣 𑀯𑀸 𑀫𑀳𑀺𑀤𑁆𑀥𑀺𑀓𑀢𑀸𑀬, 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀉𑀓𑁆𑀓𑀁𑀲𑀸𑀥𑀺𑀕𑀫𑁂𑀦 𑀅𑀦𑀸𑀯𑀭𑀡𑀜𑀸𑀡𑀢𑀸𑀬 𑀘 𑀓𑀢𑁆𑀣𑀘𑀺𑀧𑀺 𑀧𑀝𑀺𑀖𑀸𑀢𑀸𑀪𑀸𑀯𑀢𑁄 𑀬𑀣𑀸𑀭𑀼𑀘𑀺, 𑀢𑀣𑀸 𑀓𑀸𑀬𑀯𑀘𑀻𑀘𑀺𑀢𑁆𑀢𑀸𑀦𑀁 𑀕𑀢𑀸𑀦𑀺 𑀕𑀫𑀦𑀸𑀦𑀺 𑀧𑀯𑀢𑁆𑀢𑀺𑀬𑁄 𑀏𑀢𑀲𑁆𑀲𑀸𑀢𑀺 𑀢𑀣𑀸𑀕𑀢𑁄. 𑀅𑀧𑀺𑀘 𑀬𑀲𑁆𑀫𑀸 𑀮𑁄𑀓𑁂 𑀯𑀺𑀥𑀬𑀼𑀢𑁆𑀢𑀕𑀢𑀧𑀓𑀸𑀭𑀲𑀤𑁆𑀤𑀸 𑀲𑀫𑀸𑀦𑀢𑁆𑀣𑀸 𑀤𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀬𑀣𑀸 𑀯𑀺𑀥𑀸 𑀯𑀺𑀧𑀲𑁆𑀲𑀺𑀆𑀤𑀬𑁄 𑀪𑀕𑀯𑀦𑁆𑀢𑁄 𑀦𑀺𑀔𑀺𑀮𑀲𑀩𑁆𑀩𑀜𑁆𑀜𑀼𑀕𑀼𑀡𑀲𑀫𑀗𑁆𑀕𑀺𑀢𑀸𑀬, 𑀅𑀬𑀫𑁆𑀧𑀺 𑀪𑀕𑀯𑀸 𑀢𑀣𑀸 𑀯𑀺𑀥𑁄𑀢𑀺 𑀢𑀣𑀸𑀕𑀢𑁄, 𑀬𑀣𑀸 𑀬𑀼𑀢𑁆𑀢𑀸 𑀘 𑀢𑁂 𑀪𑀕𑀯𑀦𑁆𑀢𑁄 𑀯𑀼𑀢𑁆𑀢𑀦𑀬𑁂𑀦, 𑀅𑀬𑀫𑁆𑀧𑀺 𑀪𑀕𑀯𑀸 𑀢𑀣𑀸 𑀬𑀼𑀢𑁆𑀢𑁄𑀢𑀺 𑀢𑀣𑀸𑀕𑀢𑁄. 𑀅𑀧𑀭𑁄 𑀦𑀬𑁄-𑀬𑀲𑁆𑀫𑀸 𑀲𑀘𑁆𑀘𑀁 𑀢𑀘𑁆𑀙𑀁 𑀢𑀣𑀦𑁆𑀢𑀺 𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀲𑁆𑀫𑀸 𑀢𑀣𑁂𑀦 𑀜𑀸𑀡𑁂𑀦 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄𑀢𑀺.

‘‘𑀧𑀳𑀸𑀬 ¶ 𑀓𑀸𑀫𑀸𑀤𑀺𑀫𑀮𑁂 𑀬𑀣𑀸 𑀕𑀢𑀸,

𑀲𑀫𑀸𑀥𑀺𑀜𑀸𑀡𑁂𑀳𑀺 𑀯𑀺𑀧𑀲𑁆𑀲𑀺𑀆𑀤𑀬𑁄;

𑀫𑀳𑁂𑀲𑀺𑀦𑁄 𑀲𑀓𑁆𑀬𑀫𑀼𑀦𑀻 𑀚𑀼𑀢𑀺𑀦𑁆𑀥𑀭𑁄,

𑀢𑀣𑀸 𑀕𑀢𑁄 𑀢𑁂𑀦 𑀢𑀣𑀸𑀕𑀢𑁄 𑀫𑀢𑁄.

𑀢𑀣𑀜𑁆𑀘 𑀥𑀸𑀢𑀸𑀬𑀢𑀦𑀸𑀤𑀺𑀮𑀓𑁆𑀔𑀡𑀁,

𑀲𑀪𑀸𑀯𑀲𑀸𑀫𑀜𑁆𑀜𑀯𑀺𑀪𑀸𑀕𑀪𑁂𑀤𑀢𑁄;

𑀲𑀬𑀫𑁆𑀪𑀼𑀜𑀸𑀡𑁂𑀦 ¶ 𑀚𑀺𑀦𑁄 𑀲𑀫𑀸𑀕𑀢𑁄,

𑀢𑀣𑀸𑀕𑀢𑁄 𑀯𑀼𑀘𑁆𑀘𑀢𑀺 𑀲𑀓𑁆𑀬𑀧𑀼𑀗𑁆𑀕𑀯𑁄.

𑀢𑀣𑀸𑀦𑀺 𑀲𑀘𑁆𑀘𑀸𑀦𑀺 𑀲𑀫𑀦𑁆𑀢𑀘𑀓𑁆𑀔𑀼𑀦𑀸,

𑀢𑀣𑀸 𑀇𑀤𑀧𑁆𑀧𑀘𑁆𑀘𑀬𑀢𑀸 𑀘 𑀲𑀩𑁆𑀩𑀲𑁄;

𑀅𑀦𑀜𑁆𑀜𑀦𑁂𑀬𑁆𑀬𑁂𑀦 𑀬𑀢𑁄 𑀯𑀺𑀪𑀸𑀯𑀺𑀢𑀸,

𑀬𑀸𑀣𑀸𑀯𑀢𑁄 𑀢𑁂𑀦 𑀚𑀺𑀦𑁄 𑀢𑀣𑀸𑀕𑀢𑁄.

𑀅𑀦𑁂𑀓𑀪𑁂𑀤𑀸𑀲𑀼𑀧𑀺 𑀮𑁄𑀓𑀥𑀸𑀢𑀽𑀲𑀼,

𑀚𑀺𑀦𑀲𑁆𑀲 𑀭𑀽𑀧𑀸𑀬𑀢𑀦𑀸𑀤𑀺𑀕𑁄𑀘𑀭𑁂;

𑀯𑀺𑀘𑀺𑀢𑁆𑀢𑀪𑁂𑀤𑁂 𑀢𑀣𑀫𑁂𑀯 𑀤𑀲𑁆𑀲𑀦𑀁,

𑀢𑀣𑀸𑀕𑀢𑁄 𑀢𑁂𑀦 𑀲𑀫𑀦𑁆𑀢𑀮𑁄𑀘𑀦𑁄.

𑀬𑀢𑁄 𑀘 𑀥𑀫𑁆𑀫𑀁 𑀢𑀣𑀫𑁂𑀯 𑀪𑀸𑀲𑀢𑀺,

𑀓𑀭𑁄𑀢𑀺 𑀯𑀸𑀘𑀸𑀬𑀦𑀼𑀮𑁄𑀫𑀫𑀢𑁆𑀢𑀦𑁄;

𑀕𑀼𑀡𑁂𑀳𑀺 𑀮𑁄𑀓𑀁 𑀅𑀪𑀺𑀪𑀼𑀬𑁆𑀬𑀺𑀭𑀻𑀬𑀢𑀺,

𑀢𑀣𑀸𑀕𑀢𑁄 𑀢𑁂𑀦𑀧𑀺 𑀮𑁄𑀓𑀦𑀸𑀬𑀓𑁄.

𑀬𑀣𑀸𑀪𑀺𑀦𑀻𑀳𑀸𑀭𑀫𑀢𑁄 𑀬𑀣𑀸𑀭𑀼𑀘𑀺,

𑀧𑀯𑀢𑁆𑀢𑀯𑀸𑀘𑀸𑀢𑀦𑀼𑀘𑀺𑀢𑁆𑀢𑀪𑀸𑀯𑀢𑁄;

𑀬𑀣𑀸𑀯𑀺𑀥𑀸 𑀬𑁂𑀦 𑀧𑀼𑀭𑀸 𑀫𑀳𑁂𑀲𑀺𑀦𑁄,

𑀢𑀣𑀸𑀯𑀺𑀥𑁄 𑀢𑁂𑀦 𑀚𑀺𑀦𑁄 𑀢𑀣𑀸𑀕𑀢𑁄.

𑀬𑀣𑀸 𑀘 𑀬𑀼𑀢𑁆𑀢𑀸 𑀲𑀼𑀕𑀢𑀸 𑀧𑀼𑀭𑀸𑀢𑀦𑀸,

𑀢𑀣𑀸𑀯 𑀬𑀼𑀢𑁆𑀢𑁄 𑀢𑀣𑀜𑀸𑀡𑀢𑁄 𑀘 𑀲𑁄;

𑀲𑀫𑀸𑀕𑀢𑁄 𑀢𑁂𑀦 𑀲𑀫𑀦𑁆𑀢𑀮𑁄𑀘𑀦𑁄,

𑀢𑀣𑀸𑀕𑀢𑁄 𑀯𑀼𑀘𑁆𑀘𑀢𑀺 𑀲𑀓𑁆𑀬𑀧𑀼𑀗𑁆𑀕𑀯𑁄’’𑀢𑀺. (𑀇𑀢𑀺𑀯𑀼. 𑀅𑀝𑁆𑀞. 𑁩𑁮 𑀣𑁄𑀓𑀁 𑀯𑀺𑀲𑀤𑀺𑀲𑀁); 𑁋

𑀲𑀗𑁆𑀕𑀳𑀕𑀸𑀣𑀸.

‘‘𑀓𑀢𑀫𑀜𑁆𑀘 ¶ ¶ 𑀢𑀁 𑀪𑀺𑀓𑁆𑀔𑀯𑁂’’𑀢𑀺 𑀅𑀬𑀁 𑀓𑀲𑁆𑀲 𑀧𑀼𑀘𑁆𑀙𑀸𑀢𑀺 𑀆𑀳 ‘‘𑀬𑁂𑀦𑀸’’𑀢𑀺𑀆𑀤𑀺. 𑀏𑀯𑀁 𑀲𑀸𑀫𑀜𑁆𑀜𑀢𑁄 𑀬𑀣𑀸𑀯𑀼𑀢𑁆𑀢𑀲𑁆𑀲 𑀲𑀻𑀮𑀫𑀢𑁆𑀢𑀓𑀲𑁆𑀲 𑀧𑀼𑀘𑁆𑀙𑀸𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀼𑀘𑁆𑀙𑀸𑀯𑀺𑀲𑁂𑀲𑀪𑀸𑀯𑀜𑀸𑀧𑀦𑀢𑁆𑀣𑀁 𑀫𑀳𑀸𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁧𑁫𑁦) 𑀆𑀕𑀢𑀸 𑀲𑀩𑁆𑀩𑀸𑀯 𑀧𑀼𑀘𑁆𑀙𑀸 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀤𑀲𑁆𑀲𑁂𑀢𑀺 ‘‘𑀢𑀢𑁆𑀣 𑀧𑀼𑀘𑁆𑀙𑀸 𑀦𑀸𑀫𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀢𑀢𑁆𑀣𑀸𑀢𑀺 ‘‘𑀢𑀁 𑀓𑀢𑀫𑀦𑁆𑀢𑀺 𑀧𑀼𑀘𑁆𑀙𑀢𑀻’’𑀢𑀺 𑀏𑀢𑁆𑀣 𑀬𑀤𑁂𑀢𑀁 𑀲𑀸𑀫𑀜𑁆𑀜𑀢𑁄 𑀧𑀼𑀘𑁆𑀙𑀸𑀯𑀘𑀦𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀺𑀁.

𑀧𑀓𑀢𑀺𑀬𑀸𑀢𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬, 𑀲𑀬𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑀓𑁆𑀔𑀡𑀦𑁆𑀢𑀺 𑀬𑁄 𑀓𑁄𑀘𑀺 𑀜𑀸𑀢𑀼𑀫𑀺𑀘𑁆𑀙𑀺𑀢𑁄 𑀲𑀪𑀸𑀯𑁄. 𑀅𑀜𑁆𑀜𑀸𑀢𑀦𑁆𑀢𑀺 𑀤𑀲𑁆𑀲𑀦𑀸𑀤𑀺𑀯𑀺𑀲𑁂𑀲𑀬𑀼𑀢𑁆𑀢𑁂𑀦, 𑀇𑀢𑀭𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺𑀧𑀺 𑀜𑀸𑀡𑁂𑀦 𑀅𑀜𑁆𑀜𑀸𑀢𑀁. 𑀅𑀯𑀢𑁆𑀣𑀸𑀯𑀺𑀲𑁂𑀲𑀸𑀦𑀺 𑀳𑀺 𑀜𑀸𑀡𑀤𑀲𑁆𑀲𑀦𑀢𑀼𑀮𑀦𑀢𑀻𑀭𑀡𑀸𑀦𑀺. 𑀅𑀤𑀺𑀝𑁆𑀞𑀦𑁆𑀢𑀺 𑀤𑀲𑁆𑀲𑀦𑀪𑀽𑀢𑁂𑀦 𑀜𑀸𑀡𑁂𑀦 𑀧𑀘𑁆𑀘𑀓𑁆𑀔𑀫𑀺𑀯 𑀅𑀤𑀺𑀝𑁆𑀞𑀁. 𑀅𑀢𑀼𑀮𑀺𑀢𑀦𑁆𑀢𑀺 ‘‘𑀏𑀢𑁆𑀢𑀓𑀫𑁂𑀢’’𑀦𑁆𑀢𑀺 𑀢𑀼𑀮𑀦𑀪𑀽𑀢𑁂𑀦 𑀅𑀢𑀼𑀮𑀺𑀢𑀁. 𑀅𑀢𑀻𑀭𑀺𑀢𑀦𑁆𑀢𑀺 ‘‘𑀏𑀯𑀫𑁂𑀯𑀺𑀤’’𑀦𑁆𑀢𑀺 𑀢𑀻𑀭𑀡𑀪𑀽𑀢𑁂𑀦 𑀅𑀓𑀢𑀜𑀸𑀡𑀓𑀺𑀭𑀺𑀬𑀸𑀲𑀫𑀸𑀧𑀦𑀁. 𑀅𑀯𑀺𑀪𑀽𑀢𑀦𑁆𑀢𑀺 𑀜𑀸𑀡𑀲𑁆𑀲 𑀅𑀧𑀸𑀓𑀝𑀪𑀽𑀢𑀁. 𑀅𑀯𑀺𑀪𑀸𑀯𑀺𑀢𑀦𑁆𑀢𑀺 𑀜𑀸𑀡𑁂𑀦 𑀅𑀧𑀸𑀓𑀝𑀓𑀢𑀁. 𑀢𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀲𑁆𑀲. 𑀅𑀤𑀺𑀝𑁆𑀞𑀁 𑀚𑁄𑀢𑀻𑀬𑀢𑀺 𑀧𑀓𑀸𑀲𑀻𑀬𑀢𑀺 𑀏𑀢𑀸𑀬𑀸𑀢𑀺 𑀅𑀤𑀺𑀝𑁆𑀞𑀚𑁄𑀢𑀦𑀸. 𑀲𑀁𑀲𑀦𑁆𑀤𑀦𑀢𑁆𑀣𑀸𑀬𑀸𑀢𑀺 𑀲𑀸𑀓𑀘𑁆𑀙𑀸𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑀓𑀭𑀡𑀢𑁆𑀣𑀸𑀬. 𑀲𑀁𑀲𑀦𑁆𑀤𑀦𑀜𑁆𑀳𑀺 𑀲𑀸𑀓𑀘𑁆𑀙𑀸𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑀓𑀭𑀡𑀁. 𑀤𑀺𑀝𑁆𑀞𑀁 𑀲𑀁𑀲𑀦𑁆𑀤𑀻𑀬𑀢𑀺 𑀏𑀢𑀸𑀬𑀸𑀢𑀺 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸. ‘‘𑀲𑀁𑀲𑀬𑀧𑀓𑁆𑀔𑀦𑁆𑀤𑁄’’𑀢𑀺𑀆𑀤𑀻𑀲𑀼 𑀤𑀴𑁆𑀳𑀢𑀭𑀁𑀦𑀺𑀯𑀺𑀝𑁆𑀞𑀸 𑀯𑀺𑀘𑀺𑀓𑀺𑀘𑁆𑀙𑀸 𑀲𑀁𑀲𑀬𑁄. 𑀦𑀸𑀢𑀺𑀲𑀁𑀲𑀧𑁆𑀧𑀦𑀫𑀢𑀺𑀪𑁂𑀤𑀫𑀢𑁆𑀢𑀁 𑀯𑀺𑀫𑀢𑀺. 𑀢𑀢𑁄𑀧𑀺 𑀅𑀧𑁆𑀧𑀢𑀭𑀁 ‘‘𑀏𑀯𑀁 𑀦𑀼 𑀔𑁄, 𑀦 𑀦𑀼 𑀔𑁄’’𑀢𑀺𑀆𑀤𑀺𑀦𑀸 𑀤𑁆𑀯𑀺𑀥𑀸 𑀯𑀺𑀬 𑀧𑀯𑀢𑁆𑀢𑀁 𑀤𑁆𑀯𑁂𑀴𑁆𑀳𑀓𑀁. 𑀤𑁆𑀯𑀺𑀥𑀸 𑀏𑀮𑀢𑀺 𑀓𑀫𑁆𑀧𑀢𑀺 𑀘𑀺𑀢𑁆𑀢𑀫𑁂𑀢𑁂𑀦𑀸𑀢𑀺 𑀳𑀺 𑀤𑁆𑀯𑁂𑀴𑁆𑀳𑀓𑀁 𑀳𑀧𑀘𑁆𑀘𑀬𑀁, 𑀲𑀓𑀢𑁆𑀣𑀯𑀼𑀢𑁆𑀢𑀺𑀓𑀧𑀘𑁆𑀘𑀬𑀜𑁆𑀘 𑀓𑀢𑁆𑀯𑀸, 𑀢𑁂𑀦 𑀚𑀸𑀢𑁄, 𑀢𑀁 𑀯𑀸 𑀚𑀸𑀢𑀁 𑀬𑀲𑁆𑀲𑀸𑀢𑀺 𑀤𑁆𑀯𑁂𑀴𑁆𑀳𑀓𑀚𑀸𑀢𑁄. 𑀯𑀺𑀫𑀢𑀺 𑀙𑀺𑀚𑁆𑀚𑀢𑀺 𑀏𑀢𑀸𑀬𑀸𑀢𑀺 𑀯𑀺𑀫𑀢𑀺𑀘𑁆𑀙𑁂𑀤𑀦𑀸. 𑀅𑀦𑀢𑁆𑀢𑀮𑀓𑁆𑀔𑀡𑀲𑀼𑀢𑁆𑀢𑀸𑀤𑀻𑀲𑀼 (𑀲𑀁. 𑀦𑀺. 𑁩.𑁫𑁯) 𑀆𑀕𑀢𑀁 𑀔𑀦𑁆𑀥𑀧𑀜𑁆𑀘𑀓𑀧𑀝𑀺𑀲𑀁𑀬𑀼𑀢𑁆𑀢𑀁 𑀧𑀼𑀘𑁆𑀙𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀩𑁆𑀩𑀁 𑀯𑀢𑁆𑀢𑀩𑁆𑀩’’𑀦𑁆𑀢𑀺. 𑀅𑀦𑀼𑀫𑀢𑀺𑀬𑀸 𑀧𑀼𑀘𑁆𑀙𑀸 𑀅𑀦𑀼𑀫𑀢𑀺𑀧𑀼𑀘𑁆𑀙𑀸. ‘‘𑀢𑀁 𑀓𑀺𑀁 𑀫𑀜𑁆𑀜𑀣 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀧𑀼𑀘𑁆𑀙𑀸𑀬 𑀳𑀺 ‘‘𑀓𑀸 𑀢𑀼𑀫𑁆𑀳𑀸𑀓𑀁 𑀅𑀦𑀼𑀫𑀢𑀻’’𑀢𑀺 𑀅𑀦𑀼𑀫𑀢𑀺 𑀧𑀼𑀘𑁆𑀙𑀺𑀢𑀸 𑀳𑁄𑀢𑀺. 𑀓𑀣𑁂𑀢𑀼𑀓𑀫𑁆𑀬𑀢𑀸𑀢𑀺 𑀓𑀣𑁂𑀢𑀼𑀓𑀸𑀫𑀢𑀸𑀬. ‘‘𑀅𑀜𑁆𑀜𑀸𑀡𑀢𑀸 𑀆𑀧𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨𑁯𑁫) 𑀯𑀺𑀬 𑀳𑀺 𑀏𑀢𑁆𑀣 𑀬-𑀓𑀸𑀭𑀮𑁄𑀧𑁄, 𑀓𑀭𑀡𑀢𑁆𑀣𑁂 𑀯𑀸 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀓𑀣𑁂𑀢𑀼𑀓𑀫𑁆𑀬𑀢𑀸𑀬 𑀯𑀸 𑀧𑀼𑀘𑁆𑀙𑀸 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀢𑀺𑀧𑀺 𑀯𑀝𑁆𑀝𑀢𑀺. 𑀅𑀢𑁆𑀣𑀢𑁄 𑀧𑀦 𑀲𑀩𑁆𑀩𑀸𑀧𑀺 𑀢𑀣𑀸 𑀧𑀯𑀢𑁆𑀢𑀯𑀘𑀦𑀁, 𑀢𑀤𑀼𑀧𑁆𑀧𑀸𑀤𑀓𑁄 𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀤𑀢𑁆𑀣𑀁 ¶ 𑀧𑀦𑀸𑀬𑀁 𑀦𑀺𑀤𑁆𑀤𑁂𑀲𑀦𑀬𑁄 𑀆𑀳𑀭𑀺𑀢𑁄, 𑀢𑀲𑁆𑀲 𑀧𑀼𑀘𑁆𑀙𑀸𑀯𑀺𑀲𑁂𑀲𑀪𑀸𑀯𑀲𑁆𑀲 𑀜𑀸𑀧𑀦𑀢𑁆𑀣𑀁 ‘‘𑀇𑀫𑀸𑀲𑀽’’𑀢𑀺𑀆𑀤𑀺𑀫𑀸𑀳. 𑀘𑀺𑀢𑁆𑀢𑀸𑀪𑁄𑀕𑁄 𑀲𑀫𑀦𑁆𑀦𑀸𑀳𑀸𑀭𑁄. 𑀪𑀼𑀲𑀁, 𑀲𑀫𑀦𑁆𑀢𑀢𑁄 𑀘 𑀲𑀁𑀲𑀧𑁆𑀧𑀦𑀸 𑀓𑀗𑁆𑀔𑀸 𑀆𑀲𑀧𑁆𑀧𑀦𑀸, 𑀧𑀭𑀺𑀲𑀧𑁆𑀧𑀦𑀸 𑀘. 𑀲𑀩𑁆𑀩𑀸 𑀓𑀗𑁆𑀔𑀸 𑀙𑀺𑀦𑁆𑀦𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑁂𑀦 𑀅𑀕𑁆𑀕𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄. 𑀧𑀭𑁂𑀲𑀁 𑀅𑀦𑀼𑀫𑀢𑀺𑀬𑀸, 𑀓𑀣𑁂𑀢𑀼𑀓𑀫𑁆𑀬𑀢𑀸𑀬 𑀘 𑀥𑀫𑁆𑀫𑀤𑁂𑀲𑀦𑀸𑀲𑀫𑁆𑀪𑀯𑀢𑁄, 𑀢𑀣𑀸 𑀏𑀯 𑀢𑀢𑁆𑀣 𑀢𑀢𑁆𑀣 ¶ 𑀤𑀺𑀝𑁆𑀞𑀢𑁆𑀢𑀸 𑀘 𑀯𑀼𑀢𑁆𑀢𑀁 ‘‘𑀅𑀯𑀲𑁂𑀲𑀸 𑀧𑀦 𑀤𑁆𑀯𑁂 𑀧𑀼𑀘𑁆𑀙𑀸 𑀩𑀼𑀤𑁆𑀥𑀸𑀦𑀁 𑀅𑀢𑁆𑀣𑀻’’𑀢𑀺. 𑀬𑀸 𑀧𑀦𑁂𑀢𑀸 ‘‘𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀸 𑀧𑀼𑀘𑁆𑀙𑀸 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸 𑀧𑀼𑀘𑁆𑀙𑀸 𑀏𑀓𑀸𑀥𑀺𑀝𑁆𑀞𑀸𑀦𑀸 𑀧𑀼𑀘𑁆𑀙𑀸 𑀅𑀦𑁂𑀓𑀸𑀥𑀺𑀝𑁆𑀞𑀸𑀦𑀸 𑀧𑀼𑀘𑁆𑀙𑀸’’𑀢𑀺𑀆𑀤𑀺𑀦𑀸 𑀅𑀧𑀭𑀸𑀧𑀺 𑀅𑀦𑁂𑀓𑀥𑀸 𑀧𑀼𑀘𑁆𑀙𑀸𑀬𑁄 𑀦𑀺𑀤𑁆𑀤𑁂𑀲𑁂 𑀆𑀕𑀢𑀸, 𑀢𑀸 𑀲𑀩𑁆𑀩𑀸𑀧𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀇𑀥 𑀅𑀯𑀺𑀘𑀬𑀦𑀁 ‘‘𑀅𑀮𑀁 𑀏𑀢𑁆𑀢𑀸𑀯𑀢𑀸𑀯, 𑀅𑀢𑁆𑀣𑀺𑀓𑁂𑀳𑀺 𑀧𑀦 𑀇𑀫𑀺𑀦𑀸 𑀦𑀬𑁂𑀦 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀺𑀘𑁂𑀢𑀩𑁆𑀩𑀸’’𑀢𑀺 𑀦𑀬𑀤𑀸𑀦𑀲𑁆𑀲 𑀲𑀺𑀚𑁆𑀛𑀦𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁮. 𑀧𑀼𑀘𑁆𑀙𑀸 𑀘 𑀦𑀸𑀫𑁂𑀲𑀸 𑀯𑀺𑀲𑁆𑀲𑀚𑁆𑀚𑀦𑀸𑀬 𑀲𑀢𑀺𑀬𑁂𑀯 𑀬𑀼𑀢𑁆𑀢𑀭𑀽𑀧𑀸𑀢𑀺 𑀘𑁄𑀤𑀦𑀸𑀬 ‘‘𑀇𑀤𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑀺𑀧𑀸𑀢𑀦𑀁 𑀅𑀢𑀺𑀧𑀸𑀢𑁄. 𑀅𑀢𑀺-𑀲𑀤𑁆𑀤𑁄 𑀘𑁂𑀢𑁆𑀣 𑀅𑀢𑀺𑀭𑁂𑀓𑀢𑁆𑀣𑁄. 𑀲𑀻𑀖𑀪𑀸𑀯𑁄 𑀏𑀯 𑀘 𑀅𑀢𑀺𑀭𑁂𑀓𑀢𑀸, 𑀢𑀲𑁆𑀫𑀸 𑀲𑀭𑀲𑁂𑀦𑁂𑀯 𑀧𑀢𑀦𑀲𑀪𑀸𑀯𑀲𑁆𑀲 𑀅𑀦𑁆𑀢𑀭𑀸 𑀏𑀯 𑀅𑀢𑀺𑀭𑁂𑀓𑀁 𑀧𑀸𑀢𑀦𑀁, 𑀲𑀡𑀺𑀓𑀁 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀲𑀻𑀖𑀁 𑀧𑀸𑀢𑀦𑀦𑁆𑀢𑀺 𑀅𑀢𑁆𑀣𑁄, 𑀅𑀪𑀺𑀪𑀯𑀦𑀢𑁆𑀣𑁄 𑀯𑀸, 𑀅𑀢𑀺𑀓𑁆𑀓𑀫𑁆𑀫 𑀲𑀢𑁆𑀣𑀸𑀤𑀻𑀳𑀺 𑀅𑀪𑀺𑀪𑀯𑀺𑀢𑁆𑀯𑀸 𑀧𑀸𑀢𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀯𑁄𑀳𑀸𑀭𑀯𑀘𑀦𑀫𑁂𑀢𑀁 ‘‘𑀅𑀢𑀺𑀧𑀸𑀢𑁄’’𑀢𑀺. 𑀅𑀢𑁆𑀣𑀢𑁄 𑀧𑀦 𑀧𑀓𑀭𑀡𑀸𑀤𑀺𑀯𑀲𑁂𑀦𑀸𑀥𑀺𑀕𑀢𑀢𑁆𑀢𑀸 𑀧𑀸𑀡𑀯𑀥𑁄 𑀧𑀸𑀡𑀖𑀸𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑁄𑀳𑀸𑀭𑀢𑁄𑀢𑀺 𑀧𑀜𑁆𑀜𑀢𑁆𑀢𑀺𑀢𑁄. 𑀲𑀢𑁆𑀢𑁄𑀢𑀺 𑀔𑀦𑁆𑀥𑀲𑀦𑁆𑀢𑀸𑀦𑁄. 𑀢𑀢𑁆𑀣 𑀳𑀺 𑀲𑀢𑁆𑀢𑀧𑀜𑁆𑀜𑀢𑁆𑀢𑀺. 𑀯𑀼𑀢𑁆𑀢𑀜𑁆𑀘 𑁋

‘‘𑀬𑀣𑀸 𑀳𑀺 𑀅𑀗𑁆𑀕𑀲𑀫𑁆𑀪𑀸𑀭𑀸, 𑀳𑁄𑀢𑀺 𑀲𑀤𑁆𑀤𑁄 𑀭𑀣𑁄 𑀇𑀢𑀺;

𑀏𑀯𑀁 𑀔𑀦𑁆𑀥𑁂𑀲𑀼 𑀲𑀦𑁆𑀢𑁂𑀲𑀼, 𑀳𑁄𑀢𑀺 𑀲𑀢𑁆𑀢𑁄𑀢𑀺 𑀲𑀫𑁆𑀫𑀼𑀢𑀻’’𑀢𑀺. (𑀲𑀁. 𑀦𑀺. 𑁧.𑁧𑁭𑁧);

𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀭𑀽𑀧𑀸𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂 𑀳𑀺 𑀯𑀺𑀓𑁄𑀧𑀺𑀢𑁂 𑀇𑀢𑀭𑀫𑁆𑀧𑀺 𑀢𑀁𑀲𑀫𑁆𑀩𑀦𑁆𑀥𑀢𑀸𑀬 𑀯𑀺𑀦𑀲𑁆𑀲𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 ‘‘𑀧𑀸𑀡𑀲𑁆𑀲 𑀅𑀢𑀺𑀧𑀸𑀢𑁄’’𑀢𑀺, ‘‘𑀧𑀸𑀡𑁄𑀢𑀺 𑀘𑁂𑀢𑁆𑀣 𑀯𑁄𑀳𑀸𑀭𑀢𑁄 𑀲𑀢𑁆𑀢𑁄’’𑀢𑀺 𑀘 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀦𑀦𑀼 𑀦𑀺𑀭𑀯𑀲𑁂𑀲𑀸𑀦𑀁 𑀧𑀸𑀡𑀸𑀦𑀁 𑀅𑀢𑀺𑀧𑀸𑀢𑀢𑁄 𑀯𑀺𑀭𑀢𑀺 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻𑀢𑀺 𑀲𑀩𑁆𑀩𑁂 𑀧𑀸𑀡𑀪𑀽𑀢𑁂’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑀅𑀝𑁆𑀞. 𑁧.𑁭) 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑀦𑁆𑀢𑀺? 𑀲𑀘𑁆𑀘𑀫𑁂𑀢𑀁, 𑀧𑀸𑀡𑀪𑀸𑀯𑀲𑀸𑀫𑀜𑁆𑀜𑁂𑀦 𑀧𑀦𑁂𑀢𑁆𑀣 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀢𑀢𑁆𑀣 𑀧𑀦 𑀲𑀩𑁆𑀩𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂𑀦 ¶ 𑀧𑀼𑀣𑀼𑀢𑁆𑀢𑀁 𑀲𑀼𑀯𑀺𑀜𑁆𑀜𑀸𑀬𑀫𑀸𑀦𑀫𑁂𑀯𑀸𑀢𑀺 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑀫𑀓𑀢𑁆𑀯𑀸 𑀪𑁂𑀤𑀯𑀘𑀦𑀺𑀘𑁆𑀙𑀸𑀯𑀲𑁂𑀦 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀲𑀸𑀫𑀜𑁆𑀜𑀢𑁄 𑀲𑀁𑀯𑀭𑀲𑀫𑀸𑀤𑀸𑀦𑀁, 𑀢𑀩𑁆𑀩𑀺𑀲𑁂𑀲𑀢𑁄 𑀲𑀁𑀯𑀭𑀪𑁂𑀤𑁄𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀜𑀸𑀧𑀦𑀢𑁆𑀣𑀫𑁆𑀧𑀺 𑀅𑀬𑀁 𑀯𑀘𑀦𑀪𑁂𑀤𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. ‘‘𑀧𑀸𑀡𑀲𑁆𑀲 𑀅𑀢𑀺𑀧𑀸𑀢𑁄’’𑀢𑀺𑀆𑀤𑀺 𑀳𑀺 𑀲𑀁𑀯𑀭𑀪𑁂𑀤𑀤𑀲𑁆𑀲𑀦𑀁. ‘‘𑀲𑀩𑁆𑀩𑁂 𑀧𑀸𑀡𑀪𑀽𑀢𑁂’’𑀢𑀺𑀆𑀤𑀺 𑀧𑀦 𑀲𑀁𑀯𑀭𑀲𑀫𑀸𑀤𑀸𑀦𑀤𑀲𑁆𑀲𑀦𑀦𑁆𑀢𑀺. 𑀲𑀤𑁆𑀤𑀯𑀺𑀤𑀽 𑀧𑀦 ‘‘𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀚𑀸𑀢𑀺𑀤𑀩𑁆𑀩𑀸𑀧𑁂𑀓𑁆𑀔𑀯𑀲𑁂𑀦 𑀯𑀘𑀦𑀪𑁂𑀤𑀫𑀢𑁆𑀢𑀁, 𑀅𑀢𑁆𑀣𑀢𑁄 𑀲𑀫𑀸𑀦’’𑀦𑁆𑀢𑀺 𑀯𑀤𑀦𑁆𑀢𑀺.

𑀢𑀲𑁆𑀫𑀺𑀁 𑀧𑀦 𑀧𑀸𑀡𑁂𑀢𑀺 𑀬𑀣𑀸𑀯𑀼𑀢𑁆𑀢𑁂 𑀤𑀼𑀩𑁆𑀩𑀺𑀥𑁂𑀧𑀺 𑀧𑀸𑀡𑁂. 𑀧𑀸𑀡𑀲𑀜𑁆𑀜𑀺𑀦𑁄𑀢𑀺 𑀧𑀸𑀡𑀲𑀜𑁆𑀜𑀸𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 ¶ . 𑀬𑀸𑀬 𑀧𑀦 𑀘𑁂𑀢𑀦𑀸𑀬 𑀧𑀯𑀢𑁆𑀢𑀫𑀸𑀦𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 𑀉𑀧𑀓𑁆𑀓𑀫𑀓𑀭𑀡𑀳𑁂𑀢𑀼 𑀢𑀁𑀫𑀳𑀸𑀪𑀽𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀫𑀳𑀸𑀪𑀽𑀢𑀸 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀲𑀸 𑀢𑀸𑀤𑀺𑀲𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀧𑀸𑀡𑀸𑀢𑀺𑀧𑀸𑀢𑁄𑀢𑀺 𑀆𑀳 ‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸’’𑀢𑀺, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀲𑁆𑀲 𑀓𑀸𑀬𑀯𑀘𑀻𑀧𑀬𑁄𑀕𑀲𑁆𑀲 𑀢𑀦𑁆𑀦𑀺𑀲𑁆𑀲𑀬𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 𑀲𑀫𑀼𑀝𑁆𑀞𑀸𑀧𑀺𑀓𑀸𑀢𑀺 𑀅𑀢𑁆𑀣𑁄. 𑀮𑀤𑁆𑀥𑀼𑀧𑀓𑁆𑀓𑀫𑀸𑀦𑀺 𑀳𑀺 𑀪𑀽𑀢𑀸𑀦𑀺 𑀧𑀼𑀭𑀺𑀫𑀪𑀽𑀢𑀸𑀦𑀺 𑀯𑀺𑀬 𑀦 𑀯𑀺𑀲𑀤𑀸𑀦𑀺, 𑀢𑀲𑁆𑀫𑀸 𑀲𑀫𑀸𑀦𑀚𑀸𑀢𑀺𑀬𑀸𑀦𑀁 𑀪𑀽𑀢𑀸𑀦𑀁 𑀓𑀸𑀭𑀡𑀸𑀦𑀺 𑀦 𑀳𑁄𑀦𑁆𑀢𑀻𑀢𑀺 𑀢𑁂𑀲𑀼𑀬𑁂𑀯 𑀉𑀧𑀓𑁆𑀓𑀫𑁂 𑀓𑀢𑁂 𑀢𑀢𑁄 𑀧𑀭𑀸𑀦𑀁 𑀅𑀲𑀢𑀺 𑀅𑀦𑁆𑀢𑀭𑀸𑀬𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀪𑀽𑀢𑀸𑀦𑀁, 𑀢𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀘 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀘𑁆𑀙𑁂𑀤𑁄 𑀳𑁄𑀢𑀺. ‘‘𑀓𑀸𑀬𑀯𑀘𑀻𑀤𑁆𑀯𑀸𑀭𑀸𑀦’’𑀦𑁆𑀢𑀺 𑀏𑀢𑁂𑀦 𑀯𑀺𑀢𑀡𑁆𑀟𑀯𑀸𑀤𑀺𑀫𑀢𑀁 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀸𑀬 𑀯𑀥𑀓𑀘𑁂𑀢𑀦𑀸𑀬 𑀧𑀸𑀡𑀸𑀢𑀺𑀧𑀸𑀢𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺.

𑀧𑀬𑁄𑀕𑀯𑀢𑁆𑀣𑀼𑀫𑀳𑀦𑁆𑀢𑀢𑀸𑀤𑀻𑀳𑀺 𑀫𑀳𑀸𑀲𑀸𑀯𑀚𑁆𑀚𑀢𑀸 𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀘𑁂𑀢𑀦𑀸𑀬 𑀩𑀮𑀯𑀪𑀸𑀯𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀏𑀓𑀲𑁆𑀲𑀸𑀧𑀺 𑀳𑀺 𑀧𑀬𑁄𑀕𑀲𑁆𑀲 𑀲𑀳𑀲𑀸 𑀦𑀺𑀧𑁆𑀨𑀸𑀤𑀦𑀯𑀲𑁂𑀦, 𑀓𑀺𑀘𑁆𑀘𑀲𑀸𑀥𑀺𑀓𑀸𑀬 𑀩𑀳𑀼𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀚𑀯𑀦𑁂𑀳𑀺 𑀮𑀤𑁆𑀥𑀸𑀲𑁂𑀯𑀦𑀸𑀬 𑀘 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀬 𑀯𑀲𑁂𑀦 𑀧𑀬𑁄𑀕𑀲𑁆𑀲 𑀫𑀳𑀦𑁆𑀢𑀪𑀸𑀯𑁄. 𑀲𑀢𑀺𑀧𑀺 𑀓𑀤𑀸𑀘𑀺 𑀔𑀼𑀤𑁆𑀤𑀓𑁂 𑀘𑁂𑀯 𑀫𑀳𑀦𑁆𑀢𑁂 𑀘 𑀧𑀸𑀡𑁂 𑀧𑀬𑁄𑀕𑀲𑁆𑀲 𑀲𑀫𑀪𑀸𑀯𑁂 𑀫𑀳𑀦𑁆𑀢𑀁 𑀳𑀦𑀦𑁆𑀢𑀲𑁆𑀲 𑀘𑁂𑀢𑀦𑀸 𑀢𑀺𑀩𑁆𑀩𑀢𑀭𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀢𑁆𑀣𑀼𑀲𑁆𑀲 𑀫𑀳𑀦𑁆𑀢𑀪𑀸𑀯𑁄. 𑀇𑀢𑀺 𑀉𑀪𑀬𑀫𑁆𑀧𑁂𑀢𑀁 𑀘𑁂𑀢𑀦𑀸𑀬 𑀩𑀮𑀯𑀪𑀸𑀯𑁂𑀦𑁂𑀯 𑀳𑁄𑀢𑀺. 𑀲𑀢𑀺𑀧𑀺 𑀘 𑀧𑀬𑁄𑀕𑀯𑀢𑁆𑀣𑀽𑀦𑀁 𑀅𑀫𑀳𑀦𑁆𑀢𑀪𑀸𑀯𑁂 𑀳𑀦𑁆𑀢𑀩𑁆𑀩𑀲𑁆𑀲 𑀕𑀼𑀡𑀫𑀳𑀢𑁆𑀢𑁂𑀦𑀧𑀺 𑀢𑀢𑁆𑀣 𑀧𑀯𑀢𑁆𑀢𑀉𑀧𑀓𑀸𑀭𑀘𑁂𑀢𑀦𑀸 𑀯𑀺𑀬 𑀔𑁂𑀢𑁆𑀢𑀯𑀺𑀲𑁂𑀲𑀦𑀺𑀧𑁆𑀨𑀢𑁆𑀢𑀺𑀬𑀸 𑀅𑀧𑀓𑀸𑀭𑀘𑁂𑀢𑀦𑀸𑀧𑀺 𑀩𑀮𑀯𑀢𑀻, 𑀢𑀺𑀩𑁆𑀩𑀢𑀭𑀸 𑀘 𑀉𑀧𑁆𑀧𑀚𑁆𑀚𑀢𑀻𑀢𑀺 𑀢𑀲𑁆𑀲𑀸 𑀫𑀳𑀸𑀲𑀸𑀯𑀚𑁆𑀚𑀢𑀸 𑀤𑀝𑁆𑀞𑀩𑁆𑀩𑀸 ¶ . 𑀢𑁂𑀦𑀸𑀳 ‘‘𑀕𑀼𑀡𑀯𑀦𑁆𑀢𑁂𑀲𑀽’’𑀢𑀺𑀆𑀤𑀺. ‘‘𑀓𑀺𑀮𑁂𑀲𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀧𑀦 𑀲𑀢𑀺𑀧𑀺 𑀧𑀬𑁄𑀕𑀯𑀢𑁆𑀣𑀼𑀕𑀼𑀡𑀸𑀦𑀁 𑀅𑀫𑀳𑀦𑁆𑀢𑀪𑀸𑀯𑁂 𑀓𑀺𑀮𑁂𑀲𑀼𑀧𑀓𑁆𑀓𑀫𑀸𑀦𑀁 𑀫𑀼𑀤𑀼𑀢𑀺𑀩𑁆𑀩𑀢𑀸𑀬 𑀘𑁂𑀢𑀦𑀸𑀬 𑀤𑀼𑀩𑁆𑀩𑀮𑀩𑀮𑀯𑀪𑀸𑀯𑀯𑀲𑁂𑀦 𑀅𑀧𑁆𑀧𑀲𑀸𑀯𑀚𑁆𑀚𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺.

𑀲𑀫𑁆𑀪𑀭𑀻𑀬𑀦𑁆𑀢𑀺 𑀲𑀳𑀭𑀻𑀬𑀦𑁆𑀢𑀺 𑀏𑀢𑁂𑀳𑀻𑀢𑀺 𑀲𑀫𑁆𑀪𑀸𑀭𑀸, 𑀅𑀗𑁆𑀕𑀸𑀦𑀺. 𑀢𑁂𑀲𑀼 𑀧𑀸𑀡𑀲𑀜𑁆𑀜𑀺𑀢𑀸, 𑀯𑀥𑀓𑀘𑀺𑀢𑁆𑀢𑀜𑁆𑀘 𑀧𑀼𑀩𑁆𑀩𑀪𑀸𑀕𑀺𑀬𑀸𑀦𑀺𑀧𑀺 𑀳𑁄𑀦𑁆𑀢𑀺. 𑀉𑀧𑀓𑁆𑀓𑀫𑁄 𑀧𑀦 𑀯𑀥𑀓𑀘𑁂𑀢𑀦𑀸𑀲𑀫𑀼𑀝𑁆𑀞𑀸𑀧𑀺𑀢𑁄 𑀲𑀳𑀚𑀸𑀢𑁄𑀯. 𑀧𑀜𑁆𑀘𑀲𑀫𑁆𑀪𑀸𑀭𑀯𑀢𑀻 𑀧𑀦 𑀧𑀸𑀡𑀸𑀢𑀺𑀧𑀸𑀢𑀘𑁂𑀢𑀦𑀸𑀢𑀺 𑀲𑀸 𑀧𑀜𑁆𑀘𑀲𑀫𑁆𑀪𑀸𑀭𑀯𑀺𑀦𑀺𑀫𑀼𑀢𑁆𑀢𑀸 𑀤𑀝𑁆𑀞𑀩𑁆𑀩𑀸. 𑀏𑀲 𑀦𑀬𑁄 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼𑀧𑀺.

𑀏𑀢𑁆𑀣𑀸𑀳 𑁋 𑀔𑀡𑁂 𑀔𑀡𑁂 𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀓𑁄 𑀳𑀦𑁆𑀢𑀺, 𑀓𑁄 𑀯𑀸 𑀳𑀜𑁆𑀜𑀢𑀺, 𑀬𑀤𑀺 𑀘𑀺𑀢𑁆𑀢𑀘𑁂𑀢𑀲𑀺𑀓𑀲𑀦𑁆𑀢𑀸𑀦𑁄, 𑀏𑀯𑀁 𑀲𑁄 𑀅𑀦𑀼𑀧𑀢𑀸𑀧𑀦𑀙𑁂𑀤𑀦𑀪𑁂𑀤𑀦𑀸𑀤𑀺𑀯𑀲𑁂𑀦 𑀦 𑀯𑀺𑀓𑁄𑀧𑀦𑀲𑀫𑀢𑁆𑀣𑁄, 𑀦𑀸𑀧𑀺 𑀯𑀺𑀓𑁄𑀧𑀦𑀻𑀬𑁄, 𑀅𑀣 𑀭𑀽𑀧𑀲𑀦𑁆𑀢𑀸𑀦𑁄, 𑀏𑀯𑀫𑁆𑀧𑀺 𑀲𑁄 𑀅𑀘𑁂𑀢𑀦𑀢𑀸𑀬 𑀓𑀝𑁆𑀞𑀓𑀮𑀺𑀗𑁆𑀕𑀭𑀽𑀧𑀫𑁄𑀢𑀺 𑀦 𑀢𑀢𑁆𑀣 𑀙𑁂𑀤𑀦𑀸𑀤𑀺𑀦𑀸 𑀧𑀸𑀡𑀸𑀢𑀺𑀧𑀸𑀢𑁄 𑀮𑀩𑁆𑀪𑀢𑀺 𑀬𑀣𑀸 𑀫𑀢𑀲𑀭𑀻𑀭𑁂. 𑀧𑀬𑁄𑀕𑁄𑀧𑀺 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀧𑀳𑀭𑀡𑀧𑁆𑀧𑀓𑀸𑀭𑀸𑀤𑀺𑀅𑀢𑀻𑀢𑁂𑀲𑀼 ¶ 𑀯𑀸 𑀲𑀗𑁆𑀔𑀸𑀭𑁂𑀲𑀼 𑀪𑀯𑁂𑀬𑁆𑀬, 𑀅𑀦𑀸𑀕𑀢𑁂𑀲𑀼 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀯𑀸. 𑀢𑀢𑁆𑀣 𑀦 𑀢𑀸𑀯 𑀅𑀢𑀻𑀢𑀸𑀦𑀸𑀕𑀢𑁂𑀲𑀼 𑀲𑀫𑁆𑀪𑀯𑀢𑀺 𑀢𑁂𑀲𑀁 𑀅𑀪𑀸𑀯𑀢𑁄. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀘 𑀲𑀗𑁆𑀔𑀸𑀭𑀸𑀦𑀁 𑀔𑀡𑀺𑀓𑀢𑁆𑀢𑀸 𑀲𑀭𑀲𑁂𑀦𑁂𑀯 𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑀢𑀸𑀬 𑀯𑀺𑀦𑀸𑀲𑀸𑀪𑀺𑀫𑀼𑀔𑁂𑀲𑀼 𑀦𑀺𑀧𑁆𑀧𑀬𑁄𑀚𑀦𑁄 𑀏𑀯 𑀧𑀬𑁄𑀕𑁄 𑀲𑀺𑀬𑀸. 𑀯𑀺𑀦𑀸𑀲𑀲𑁆𑀲 𑀘 𑀓𑀸𑀭𑀡𑀭𑀳𑀺𑀢𑀢𑁆𑀢𑀸 𑀦 𑀧𑀳𑀭𑀡𑀧𑁆𑀧𑀓𑀸𑀭𑀸𑀤𑀺𑀧𑀬𑁄𑀕𑀳𑁂𑀢𑀼𑀓𑀁 𑀫𑀭𑀡𑀁, 𑀦𑀺𑀭𑀻𑀳𑀓𑀢𑀸𑀬 𑀘 𑀲𑀗𑁆𑀔𑀸𑀭𑀸𑀦𑀁 𑀓𑀲𑁆𑀲 𑀲𑁄 𑀧𑀬𑁄𑀕𑁄, 𑀔𑀡𑀺𑀓𑀢𑁆𑀢𑀸 𑀯𑀥𑀸𑀥𑀺𑀧𑁆𑀧𑀸𑀬𑀲𑀫𑀓𑀸𑀮𑀪𑀺𑀚𑁆𑀚𑀦𑀓𑀲𑁆𑀲 𑀓𑀺𑀭𑀺𑀬𑀸𑀧𑀭𑀺𑀬𑁄𑀲𑀸𑀦𑀓𑀸𑀮𑀸𑀦𑀯𑀝𑁆𑀞𑀸𑀦𑀢𑁄 𑀓𑀲𑁆𑀲 𑀯𑀸 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀩𑀤𑁆𑀥𑁄𑀢𑀺?

𑀯𑀼𑀘𑁆𑀘𑀢𑁂 𑁋 𑀯𑀥𑀓𑀘𑁂𑀢𑀦𑀸𑀲𑀳𑀺𑀢𑁄 𑀲𑀗𑁆𑀔𑀸𑀭𑀸𑀦𑀁 𑀧𑀼𑀜𑁆𑀚𑁄 𑀲𑀢𑁆𑀢𑀲𑀗𑁆𑀔𑀸𑀢𑁄 𑀳𑀦𑁆𑀢𑀺, 𑀢𑁂𑀦 𑀧𑀯𑀢𑁆𑀢𑀺𑀢𑀯𑀥𑀧𑁆𑀧𑀬𑁄𑀕𑀦𑀺𑀫𑀺𑀢𑁆𑀢𑀸𑀧𑀕𑀢𑀼𑀲𑁆𑀫𑀸𑀯𑀺𑀜𑁆𑀜𑀸𑀡𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁄 𑀫𑀢𑀯𑁄𑀳𑀸𑀭𑀧𑁆𑀧𑀯𑀢𑁆𑀢𑀺𑀦𑀺𑀩𑀦𑁆𑀥𑀦𑁄 𑀬𑀣𑀸𑀯𑀼𑀢𑁆𑀢𑀯𑀥𑀧𑁆𑀧𑀬𑁄𑀕𑀸𑀓𑀭𑀡𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑁄 𑀭𑀽𑀧𑀸𑀭𑀽𑀧𑀥𑀫𑁆𑀫𑀲𑀫𑀽𑀳𑁄 𑀳𑀜𑁆𑀜𑀢𑀺, 𑀓𑁂𑀯𑀮𑁄 𑀯𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀲𑀦𑁆𑀢𑀸𑀦𑁄, 𑀯𑀥𑀧𑁆𑀧𑀬𑁄𑀕𑀸𑀯𑀺𑀲𑀬𑀪𑀸𑀯𑁂𑀧𑀺 𑀢𑀲𑁆𑀲 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀭𑀽𑀧𑀲𑀦𑁆𑀢𑀸𑀦𑀸𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀭𑀽𑀧𑀲𑀦𑁆𑀢𑀸𑀦𑁂 𑀧𑀭𑁂𑀦 𑀧𑀬𑁄𑀚𑀺𑀢𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀧𑀬𑁄𑀕𑀯𑀲𑁂𑀦 𑀢𑀦𑁆𑀦𑀺𑀩𑁆𑀩𑀢𑁆𑀢𑀺𑀯𑀺𑀩𑀦𑁆𑀥𑀓𑀯𑀺𑀲𑀤𑀺𑀲𑀭𑀽𑀧𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀳𑀢𑁂 𑀯𑀺𑀘𑁆𑀙𑁂𑀤𑁄 𑀳𑁄𑀢𑀻𑀢𑀺 𑀦 𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀅𑀲𑀫𑁆𑀪𑀯𑁄, 𑀦𑀸𑀧𑀺 𑀅𑀳𑁂𑀢𑀼𑀓𑁄 𑀧𑀸𑀡𑀸𑀢𑀺𑀧𑀸𑀢𑁄, 𑀦 𑀘 𑀧𑀬𑁄𑀕𑁄 𑀦𑀺𑀧𑁆𑀧𑀬𑁄𑀚𑀦𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀓𑀢𑀧𑀬𑁄𑀕𑀯𑀲𑁂𑀦 𑀢𑀤𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀦𑀸𑀭𑀳𑀲𑁆𑀲 𑀲𑀗𑁆𑀔𑀸𑀭𑀓𑀮𑀸𑀧𑀲𑁆𑀲 𑀢𑀣𑀸𑀅𑀦𑀼𑀧𑁆𑀧𑀢𑁆𑀢𑀺𑀢𑁄, 𑀔𑀡𑀺𑀓𑀸𑀦𑀁 ¶ 𑀲𑀗𑁆𑀔𑀸𑀭𑀸𑀦𑀁 𑀔𑀡𑀺𑀓𑀫𑀭𑀡𑀲𑁆𑀲 𑀇𑀥 𑀫𑀭𑀡𑀪𑀸𑀯𑁂𑀦 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸 𑀲𑀦𑁆𑀢𑀢𑀺𑀫𑀭𑀡𑀲𑁆𑀲 𑀘 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀲𑀳𑁂𑀢𑀼𑀓𑀪𑀸𑀯𑀢𑁄 𑀦 𑀅𑀳𑁂𑀢𑀼𑀓𑀁 𑀫𑀭𑀡𑀁, 𑀦 𑀘 𑀓𑀢𑁆𑀢𑀼𑀭𑀳𑀺𑀢𑁄 𑀧𑀸𑀡𑀸𑀢𑀺𑀧𑀸𑀢𑀧𑁆𑀧𑀬𑁄𑀕𑁄 𑀦𑀺𑀭𑀻𑀳𑀓𑁂𑀲𑀼𑀧𑀺 𑀲𑀗𑁆𑀔𑀸𑀭𑁂𑀲𑀼 𑀲𑀦𑁆𑀦𑀺𑀳𑀺𑀢𑀢𑀸𑀫𑀢𑁆𑀢𑁂𑀦 𑀉𑀧𑀓𑀸𑀭𑀓𑁂𑀲𑀼 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀨𑀮𑀼𑀧𑁆𑀧𑀸𑀤𑀦𑀦𑀺𑀬𑀢𑁂𑀲𑀼 𑀓𑀸𑀭𑀡𑁂𑀲𑀼 𑀓𑀢𑁆𑀢𑀼𑀯𑁄𑀳𑀸𑀭𑀲𑀺𑀤𑁆𑀥𑀺𑀢𑁄 𑀬𑀣𑀸 ‘‘𑀧𑀤𑀻𑀧𑁄 𑀧𑀓𑀸𑀲𑁂𑀢𑀺, 𑀦𑀺𑀲𑀸𑀓𑀭𑁄 𑀘𑀦𑁆𑀤𑀺𑀫𑀸’’𑀢𑀺, 𑀦 𑀘 𑀓𑁂𑀯𑀮𑀲𑁆𑀲 𑀯𑀥𑀸𑀥𑀺𑀧𑁆𑀧𑀸𑀬𑀲𑀳𑀪𑀼𑀦𑁄 𑀘𑀺𑀢𑁆𑀢𑀘𑁂𑀢𑀲𑀺𑀓𑀓𑀮𑀸𑀧𑀲𑁆𑀲 𑀧𑀸𑀡𑀸𑀢𑀺𑀧𑀸𑀢𑁄 𑀇𑀘𑁆𑀙𑀺𑀢𑁄 𑀲𑀦𑁆𑀢𑀸𑀦𑀯𑀲𑁂𑀦 𑀅𑀯𑀝𑁆𑀞𑀺𑀢𑀲𑁆𑀲𑁂𑀯 𑀧𑀝𑀺𑀚𑀸𑀦𑀦𑀢𑁄, 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀜𑁆𑀘 𑀧𑀤𑀻𑀧𑀸𑀤𑀻𑀦𑀁 𑀅𑀢𑁆𑀢𑀓𑀺𑀭𑀺𑀬𑀸𑀲𑀺𑀤𑁆𑀥𑀺 𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁂𑀯 𑀧𑀸𑀡𑀸𑀢𑀺𑀧𑀸𑀢𑁂𑀦 𑀓𑀫𑁆𑀫𑀩𑀤𑁆𑀥𑁄𑀢𑀺. 𑀅𑀬𑀜𑁆𑀘 𑀯𑀺𑀘𑀸𑀭𑁄 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼𑀧𑀺 𑀬𑀣𑀸𑀲𑀫𑁆𑀪𑀯𑀁 𑀯𑀺𑀪𑀸𑀯𑁂𑀢𑀩𑁆𑀩𑁄.

𑀲𑀸𑀳𑀢𑁆𑀣𑀺𑀓𑁄𑀢𑀺 𑀲𑀬𑀁 𑀫𑀸𑀭𑁂𑀦𑁆𑀢𑀲𑁆𑀲 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀧𑀳𑀭𑀡𑀁. 𑀆𑀡𑀢𑁆𑀢𑀺𑀓𑁄𑀢𑀺 𑀅𑀜𑁆𑀜𑀁 𑀆𑀡𑀸𑀧𑁂𑀦𑁆𑀢𑀲𑁆𑀲 ‘‘𑀏𑀯𑀁 𑀯𑀺𑀚𑁆𑀛𑀺𑀢𑁆𑀯𑀸 𑀯𑀸 𑀧𑀳𑀭𑀺𑀢𑁆𑀯𑀸 𑀯𑀸 𑀫𑀸𑀭𑁂𑀳𑀻’’𑀢𑀺 𑀆𑀡𑀸𑀧𑀦𑀁. 𑀦𑀺𑀲𑁆𑀲𑀕𑁆𑀕𑀺𑀬𑁄𑀢𑀺 𑀤𑀽𑀭𑁂 𑀞𑀺𑀢𑀁 𑀫𑀸𑀭𑁂𑀢𑀼𑀓𑀸𑀫𑀲𑁆𑀲 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀉𑀲𑀼𑀬𑀦𑁆𑀢𑀧𑀸𑀲𑀸𑀡𑀸𑀤𑀻𑀦𑀁 𑀦𑀺𑀲𑁆𑀲𑀚𑁆𑀚𑀦𑀁. 𑀣𑀸𑀯𑀭𑁄𑀢𑀺 𑀅𑀲𑀜𑁆𑀘𑀸𑀭𑀺𑀫𑁂𑀦 𑀉𑀧𑀓𑀭𑀡𑁂𑀦 𑀫𑀸𑀭𑁂𑀢𑀼𑀓𑀸𑀫𑀲𑁆𑀲 𑀑𑀧𑀸𑀢𑀸𑀧𑀲𑁆𑀲𑁂𑀦𑀉𑀧𑀦𑀺𑀓𑁆𑀔𑀺𑀧𑀦𑀁, 𑀪𑁂𑀲𑀚𑁆𑀚𑀲𑀁𑀯𑀺𑀥𑀸𑀦𑀜𑁆𑀘. 𑀯𑀺𑀚𑁆𑀚𑀸𑀫𑀬𑁄𑀢𑀺 𑀫𑀸𑀭𑀡𑀢𑁆𑀣𑀁 𑀫𑀦𑁆𑀢𑀧𑀭𑀺𑀚𑀧𑁆𑀧𑀦𑀁 𑀆𑀣𑀩𑁆𑀩𑀡𑀺𑀓𑀸𑀤𑀻𑀦𑀁 𑀯𑀺𑀬. 𑀆𑀣𑀩𑁆𑀩𑀡𑀺𑀓𑀸 𑀳𑀺 𑀆𑀣𑀩𑁆𑀩𑀡𑀁 𑀧𑀬𑁄𑀚𑁂𑀦𑁆𑀢𑀺 𑀦𑀕𑀭𑁂 𑀯𑀸 𑀭𑀼𑀤𑁆𑀥𑁂 𑀲𑀗𑁆𑀕𑀸𑀫𑁂 𑀯𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀧𑀝𑀺𑀲𑁂𑀦𑀸𑀬 𑀧𑀘𑁆𑀘𑀢𑁆𑀣𑀺𑀓𑁂𑀲𑀼 𑀧𑀘𑁆𑀘𑀸𑀫𑀺𑀢𑁆𑀢𑁂𑀲𑀼 𑀈𑀢𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀺 𑀉𑀧𑀤𑁆𑀤𑀯𑀁 𑀉𑀧𑁆𑀧𑀸𑀤𑁂𑀦𑁆𑀢𑀺 𑀭𑁄𑀕𑀁 𑀉𑀧𑁆𑀧𑀸𑀤𑁂𑀦𑁆𑀢𑀺 𑀧𑀚𑁆𑀚𑀭𑀓𑀁 𑀉𑀧𑁆𑀧𑀸𑀤𑁂𑀦𑁆𑀢𑀺 ¶ 𑀲𑀽𑀘𑀺𑀓𑀁 𑀉𑀧𑁆𑀧𑀸𑀤𑁂𑀦𑁆𑀢𑀺 𑀯𑀺𑀲𑀽𑀘𑀺𑀓𑀁 𑀓𑀭𑁄𑀦𑁆𑀢𑀺 𑀧𑀓𑁆𑀔𑀦𑁆𑀤𑀺𑀬𑀁 𑀓𑀭𑁄𑀦𑁆𑀢𑀺. 𑀯𑀺𑀚𑁆𑀚𑀸𑀥𑀭𑀸 𑀘 𑀯𑀺𑀚𑁆𑀚𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀦𑀕𑀭𑁂 𑀯𑀸 𑀭𑀼𑀤𑁆𑀥𑁂…𑀧𑁂… 𑀧𑀓𑁆𑀔𑀦𑁆𑀤𑀺𑀬𑀁 𑀓𑀭𑁄𑀦𑁆𑀢𑀺. 𑀇𑀤𑁆𑀥𑀺𑀫𑀬𑁄𑀢𑀺 𑀓𑀫𑁆𑀫𑀯𑀺𑀧𑀸𑀓𑀚𑀺𑀤𑁆𑀥𑀺𑀫𑀬𑁄 𑀤𑀸𑀞𑀸𑀓𑁄𑀝𑀦𑀸𑀤𑀻𑀦𑀺 𑀯𑀺𑀬. 𑀧𑀺𑀢𑀼𑀭𑀜𑁆𑀜𑁄 𑀓𑀺𑀭 𑀲𑀻𑀳𑀴𑀦𑀭𑀺𑀦𑁆𑀤𑀲𑁆𑀲 𑀤𑀸𑀞𑀸𑀓𑁄𑀝𑀦𑁂𑀦 𑀘𑀽𑀴𑀲𑀼𑀫𑀦𑀓𑀼𑀝𑀼𑀫𑁆𑀩𑀺𑀬𑀲𑁆𑀲 𑀫𑀭𑀡𑀁 𑀳𑁄𑀢𑀺. ‘‘𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂’’𑀢𑀺𑀆𑀤𑀺𑀦𑀸 𑀕𑀦𑁆𑀣𑀕𑀸𑀭𑀯𑀁 𑀧𑀭𑀺𑀳𑀭𑀺𑀢𑁆𑀯𑀸 𑀢𑀲𑁆𑀲 𑀅𑀦𑀽𑀦𑀪𑀸𑀯𑀫𑁆𑀧𑀺 𑀓𑀭𑁄𑀢𑀺 ‘‘𑀅𑀢𑁆𑀣𑀺𑀓𑁂𑀳𑀻’’𑀢𑀺𑀆𑀤𑀺𑀦𑀸. 𑀇𑀥 𑀅𑀯𑀼𑀢𑁆𑀢𑁄𑀧𑀺 𑀳𑀺 𑀏𑀲 𑀅𑀢𑁆𑀣𑁄 𑀅𑀢𑀺𑀤𑀺𑀲𑀦𑁂𑀦 𑀯𑀼𑀢𑁆𑀢𑁄 𑀯𑀺𑀬 𑀅𑀦𑀽𑀦𑁄 𑀧𑀭𑀺𑀧𑀼𑀡𑁆𑀡𑁄𑀢𑀺.

𑀤𑀼𑀲𑁆𑀲𑀻𑀮𑀲𑁆𑀲 𑀪𑀸𑀯𑁄 𑀤𑀼𑀲𑁆𑀲𑀻𑀮𑁆𑀬𑀁, 𑀬𑀣𑀸𑀯𑀼𑀢𑁆𑀢𑀸 𑀘𑁂𑀢𑀦𑀸. ‘‘𑀧𑀳𑀸𑀬𑀸’’𑀢𑀺 𑀏𑀢𑁆𑀣 𑀢𑁆𑀯𑀸-𑀲𑀤𑁆𑀤𑁄 𑀧𑀼𑀩𑁆𑀩𑀓𑀸𑀮𑁂𑀢𑀺 𑀆𑀳 ‘‘𑀧𑀳𑀻𑀦𑀓𑀸𑀮𑀢𑁄 𑀧𑀝𑁆𑀞𑀸𑀬𑀸’’𑀢𑀺, 𑀳𑁂𑀢𑀼𑀅𑀢𑁆𑀣𑀢𑀁 𑀯𑀸 𑀲𑀦𑁆𑀥𑀸𑀬 𑀏𑀯𑀁 𑀯𑀼𑀢𑁆𑀢𑀁. 𑀏𑀢𑁂𑀦 𑀳𑀺 𑀧𑀳𑀸𑀦𑀳𑁂𑀢𑀼𑀓𑀸 𑀇𑀥𑀸𑀥𑀺𑀧𑁆𑀧𑁂𑀢𑀸 𑀲𑀫𑀼𑀘𑁆𑀙𑁂𑀤𑀦𑀺𑀓𑀸 𑀯𑀺𑀭𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀫𑁆𑀫𑀓𑁆𑀔𑀬𑀜𑀸𑀡𑁂𑀦 𑀳𑀺 𑀧𑀸𑀡𑀸𑀢𑀺𑀧𑀸𑀢𑀤𑀼𑀲𑁆𑀲𑀻𑀮𑁆𑀬𑀲𑁆𑀲 ¶ 𑀧𑀳𑀻𑀦𑀢𑁆𑀢𑀸 𑀪𑀕𑀯𑀸 𑀅𑀘𑁆𑀘𑀦𑁆𑀢𑀫𑁂𑀯 𑀢𑀢𑁄 𑀧𑀝𑀺𑀯𑀺𑀭𑀢𑁄𑀢𑀺 𑀯𑀼𑀘𑁆𑀘𑀢𑀺 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀳𑀸𑀦𑀯𑀺𑀭𑀢𑀻𑀦𑀫𑀥𑀺𑀧𑁆𑀧𑁂𑀢𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 ‘‘𑀧𑀳𑀸𑀬 𑀧𑀝𑀺𑀯𑀺𑀭𑀢𑁄’’𑀢𑀺 𑀧𑀤𑁂𑀳𑀺 𑀯𑀼𑀢𑁆𑀢𑀸𑀦𑀁 𑀧𑀳𑀸𑀦𑀯𑀺𑀭𑀫𑀡𑀸𑀦𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑀸𑀮𑀢𑀸 𑀦𑀢𑁆𑀣𑀺, 𑀫𑀕𑁆𑀕𑀥𑀫𑁆𑀫𑀸𑀦𑀁 𑀧𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁, 𑀧𑀘𑁆𑀘𑀬𑀪𑀽𑀢𑀸𑀦𑀁 𑀲𑀫𑁆𑀫𑀸𑀯𑀸𑀘𑀸𑀤𑀻𑀦𑀜𑁆𑀘 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀽𑀢𑀸𑀦𑀁 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂 𑀅𑀧𑁂𑀓𑁆𑀔𑀺𑀢𑁂 𑀲𑀳𑀚𑀸𑀢𑀸𑀦𑀫𑁆𑀧𑀺 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀕𑀳𑀡𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀪𑀸𑀯𑁂𑀦 𑀯𑀺𑀬 𑀳𑁄𑀢𑀺. 𑀧𑀘𑁆𑀘𑀬𑁄 𑀳𑀺 𑀧𑀼𑀭𑀺𑀫𑀢𑀭𑀁 𑀧𑀘𑁆𑀘𑀬𑀲𑀢𑁆𑀢𑀺𑀬𑀸 𑀞𑀺𑀢𑁄, 𑀢𑀢𑁄 𑀧𑀭𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀧𑀘𑁆𑀘𑀬𑀲𑀢𑁆𑀢𑀺𑀁 𑀧𑀝𑀺𑀘𑁆𑀘 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀕𑀳𑀡𑀧𑁆𑀧𑀯𑀢𑁆𑀢𑀺𑀆𑀓𑀸𑀭𑀯𑀲𑁂𑀦 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀽𑀢𑁂𑀲𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀲𑀼 𑀧𑀳𑀸𑀬𑀓𑀥𑀫𑁆𑀫𑁂𑀲𑀼 𑀧𑀳𑀸𑀦𑀓𑀺𑀭𑀺𑀬𑀸𑀬 𑀧𑀼𑀭𑀺𑀫𑀓𑀸𑀮𑀯𑁄𑀳𑀸𑀭𑁄, 𑀢𑀧𑁆𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀲𑀼 𑀘 𑀯𑀺𑀭𑀢𑀻𑀲𑀼 𑀯𑀺𑀭𑀫𑀡𑀓𑀺𑀭𑀺𑀬𑀸𑀬 𑀅𑀧𑀭𑀓𑀸𑀮𑀯𑁄𑀳𑀸𑀭𑁄 𑀲𑀫𑁆𑀪𑀯𑀢𑀺. 𑀢𑀲𑁆𑀫𑀸 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀳𑀺 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀲𑀫𑁆𑀫𑀸𑀯𑀸𑀘𑀸𑀤𑀻𑀳𑀺 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄’’𑀢𑀺 𑀧𑀸𑀴𑀺𑀬𑀁 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀬𑀁 𑀧𑀦𑁂𑀢𑁆𑀣 𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑁄 𑀦𑀬𑁄 𑁋 𑀧𑀳𑀸𑀦𑀁 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀯𑀺𑀭𑀢𑀺𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸, 𑀢𑀲𑁆𑀫𑀸 𑀫𑀕𑁆𑀕𑁂𑀦 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀨𑀮𑁂𑀦 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀧𑀸𑀡𑁄 𑀅𑀢𑀺𑀧𑀸𑀢𑀻𑀬𑀢𑀺 𑀏𑀢𑁂𑀦𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑁄, 𑀧𑀸𑀡𑀖𑀸𑀢𑀳𑁂𑀢𑀼𑀪𑀽𑀢𑁄 𑀥𑀫𑁆𑀫𑀲𑀫𑀽𑀳𑁄. 𑀓𑁄 𑀧𑀦𑁂𑀲𑁄? 𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀤𑁄𑀲𑀫𑁄𑀳𑀯𑀺𑀳𑀺𑀁𑀲𑀸𑀤𑀬𑁄 𑀓𑀺𑀮𑁂𑀲𑀸. 𑀢𑁂 𑀳𑀺 𑀪𑀕𑀯𑀸 𑀅𑀭𑀺𑀬𑀫𑀕𑁆𑀕𑁂𑀦 𑀧𑀳𑀸𑀬 𑀲𑀫𑀼𑀕𑁆𑀖𑀸𑀝𑁂𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀤𑀼𑀲𑁆𑀲𑀻𑀮𑁆𑀬𑀢𑁄 𑀅𑀘𑁆𑀘𑀦𑁆𑀢𑀫𑁂𑀯 𑀧𑀝𑀺𑀯𑀺𑀭𑀢𑁄 𑀓𑀺𑀮𑁂𑀲𑁂𑀲𑀼 𑀧𑀳𑀻𑀦𑁂𑀲𑀼 𑀢𑀦𑁆𑀦𑀺𑀫𑀺𑀢𑁆𑀢𑀓𑀫𑁆𑀫𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑀢𑁄, 𑀢𑀲𑁆𑀫𑀸 𑀫𑀕𑁆𑀕𑁂𑀦 𑀧𑀸𑀡𑀸𑀢𑀺𑀧𑀸𑀢𑀁 𑀬𑀣𑀸𑀯𑀼𑀢𑁆𑀢𑀓𑀺𑀮𑁂𑀲𑀁 𑀧𑀳𑀸𑀬 𑀢𑁂𑀦𑁂𑀯 𑀧𑀸𑀡𑀸𑀢𑀺𑀧𑀸𑀢𑀸 𑀤𑀼𑀲𑁆𑀲𑀻𑀮𑁆𑀬𑀘𑁂𑀢𑀦𑀸 𑀧𑀝𑀺𑀯𑀺𑀭𑀢𑁄𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 ‘‘𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬𑀸’’𑀢𑀺𑀆𑀤𑀻𑀲𑀼𑀧𑀺.

𑀑𑀭𑀢𑁄 ¶ 𑀯𑀺𑀭𑀢𑁄𑀢𑀺 𑀧𑀭𑀺𑀬𑀸𑀬𑀯𑀘𑀦𑀫𑁂𑀢𑀁, 𑀧𑀢𑀺-𑀯𑀺𑀲𑀤𑁆𑀤𑀸𑀦𑀁 𑀯𑀸 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀢𑁄 𑀢𑀣𑀸 𑀯𑀼𑀢𑁆𑀢𑀁. 𑀑𑀭𑀢𑁄𑀢𑀺 𑀳𑀺 𑀅𑀯𑀭𑀢𑁄 𑀅𑀪𑀺𑀫𑀼𑀔𑀁 𑀭𑀢𑁄, 𑀢𑁂𑀦 𑀉𑀚𑀼𑀓𑀁 𑀯𑀺𑀭𑀫𑀡𑀯𑀲𑁂𑀦 𑀲𑀸𑀢𑀺𑀲𑀬𑀢𑀁 𑀤𑀲𑁆𑀲𑁂𑀢𑀺. 𑀧𑀝𑀺𑀭𑀢𑀲𑁆𑀲 𑀘𑁂𑀢𑀁 𑀅𑀢𑁆𑀣𑀯𑀘𑀦𑀁. 𑀯𑀺𑀭𑀢𑁄𑀢𑀺 𑀯𑀺𑀲𑁂𑀲𑁂𑀦 𑀭𑀢𑁄, 𑀢𑁂𑀦 𑀲𑀳 𑀯𑀸𑀲𑀦𑀸𑀬 𑀯𑀺𑀭𑀫𑀡𑀪𑀸𑀯𑀁, 𑀉𑀪𑀬𑁂𑀦 𑀧𑀦 𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀺𑀪𑀸𑀯𑀁 𑀯𑀺𑀪𑀸𑀯𑁂𑀢𑀺. 𑀏𑀯-𑀲𑀤𑁆𑀤𑁄 𑀧𑀦 𑀢𑀲𑁆𑀲𑀸 𑀯𑀺𑀭𑀢𑀺𑀬𑀸 𑀓𑀸𑀮𑀸𑀤𑀺𑀯𑀲𑁂𑀦 𑀅𑀧𑀭𑀺𑀬𑀦𑁆𑀢𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑁄. 𑀲𑁄 𑀉𑀪𑀬𑀢𑁆𑀣 𑀬𑁄𑀚𑁂𑀢𑀩𑁆𑀩𑁄. 𑀬𑀣𑀸 𑀳𑀺 𑀅𑀜𑁆𑀜𑁂 𑀲𑀫𑀸𑀤𑀺𑀦𑁆𑀦𑀯𑀺𑀭𑀢𑀺𑀓𑀸𑀧𑀺 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀢𑀸𑀬 𑀮𑀸𑀪𑀚𑀻𑀯𑀺𑀢𑀸𑀤𑀺𑀳𑁂𑀢𑀼 𑀲𑀫𑀸𑀤𑀸𑀦𑀁 𑀪𑀺𑀦𑁆𑀦𑀦𑁆𑀢𑀺, 𑀦 𑀏𑀯𑀁 𑀪𑀕𑀯𑀸, 𑀲𑀩𑁆𑀩𑀲𑁄 ¶ 𑀧𑀳𑀻𑀦𑀧𑀸𑀡𑀸𑀢𑀺𑀧𑀸𑀢𑀢𑁆𑀢𑀸 𑀧𑀦𑁂𑀲 𑀅𑀘𑁆𑀘𑀦𑁆𑀢𑀯𑀺𑀭𑀢𑁄 𑀏𑀯𑀸𑀢𑀺. ‘‘𑀦𑀢𑁆𑀣𑀺 𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀏𑀯-𑀲𑀤𑁆𑀤𑁂𑀦 𑀤𑀲𑁆𑀲𑀺𑀢𑀁 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀦𑀺𑀯𑀢𑁆𑀢𑁂𑀢𑀩𑁆𑀩𑀢𑁆𑀣𑀯𑀲𑁂𑀦 𑀲𑀫𑀢𑁆𑀣𑁂𑀢𑀺. 𑀢𑀢𑁆𑀣 𑀯𑀻𑀢𑀺𑀓𑁆𑀓𑀫𑀺𑀲𑁆𑀲𑀸𑀫𑀻𑀢𑀺 𑀉𑀧𑁆𑀧𑀚𑁆𑀚𑀦𑀓𑀸 𑀥𑀫𑁆𑀫𑀸𑀢𑀺 𑀲𑀳 𑀧𑀸𑀞𑀲𑁂𑀲𑁂𑀦 𑀲𑀫𑁆𑀩𑀦𑁆𑀥𑁄. 𑀢𑁂 𑀧𑀦 𑀅𑀦𑀯𑀚𑁆𑀚𑀥𑀫𑁆𑀫𑁂𑀳𑀺 𑀯𑁄𑀓𑀺𑀡𑁆𑀡𑀸 𑀅𑀦𑁆𑀢𑀭𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀦𑀓𑀸 𑀤𑀼𑀩𑁆𑀩𑀮𑀸 𑀲𑀸𑀯𑀚𑁆𑀚𑀸 𑀥𑀫𑁆𑀫𑀸, 𑀬𑀲𑁆𑀫𑀸 𑀘 ‘‘𑀓𑀸𑀬𑀯𑀘𑀻𑀧𑀬𑁄𑀕𑀁 𑀉𑀧𑀮𑀪𑀺𑀢𑁆𑀯𑀸 𑀇𑀫𑀲𑁆𑀲 𑀓𑀺𑀮𑁂𑀲𑀸 𑀉𑀧𑁆𑀧𑀦𑁆𑀦𑀸’’𑀢𑀺 𑀯𑀺𑀜𑁆𑀜𑀼𑀦𑀸 𑀲𑀓𑁆𑀓𑀸 𑀜𑀸𑀢𑀼𑀁, 𑀢𑀲𑁆𑀫𑀸 𑀢𑁂 𑀇𑀫𑀺𑀦𑀸𑀯 𑀧𑀭𑀺𑀬𑀸𑀬𑁂𑀦 ‘‘𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀸, 𑀦 𑀧𑀦 𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑀸𑀡𑀸𑀭𑀫𑁆𑀫𑀡𑀢𑁆𑀢𑀸. 𑀅𑀢𑁄 𑀲𑀲𑀫𑁆𑀪𑀸𑀭𑀓𑀣𑀸𑀬 𑀘𑀓𑁆𑀔𑀼𑀲𑁄𑀢𑁂𑀳𑀺, 𑀢𑀦𑁆𑀦𑀺𑀲𑁆𑀲𑀺𑀢𑀯𑀺𑀜𑁆𑀜𑀸𑀡𑁂𑀳𑀺 𑀯𑀸 𑀓𑀸𑀬𑀺𑀓𑀯𑀸𑀘𑀲𑀺𑀓𑀧𑀬𑁄𑀕𑀫𑀼𑀧𑀮𑀪𑀺𑀢𑁆𑀯𑀸 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀓𑀸𑀬𑀺𑀓𑀸𑀢𑀺 𑀓𑀸𑀬𑁂𑀦 𑀓𑀢𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀦𑀺𑀧𑁆𑀨𑀸𑀤𑀓𑀸 𑀩𑀮𑀯𑀦𑁆𑀢𑁄 𑀅𑀓𑀼𑀲𑀮𑀸. ‘‘𑀓𑀸𑀴𑀓𑀸’’ 𑀢𑀺𑀧𑀺 𑀝𑀻𑀓𑀸𑀬𑀁 𑀉𑀤𑁆𑀥𑀢𑀧𑀸𑀞𑁄, 𑀓𑀡𑁆𑀳𑀧𑀓𑁆𑀔𑀺𑀓𑀸 𑀩𑀮𑀯𑀦𑁆𑀢𑁄 𑀅𑀓𑀼𑀲𑀮𑀸𑀢𑀺 𑀅𑀢𑁆𑀣𑁄. ‘‘𑀇𑀫𑀺𑀦𑀸𑀯𑀸’’𑀢𑀺𑀆𑀤𑀺𑀦𑀸 𑀦𑀬𑀤𑀸𑀦𑀁 𑀓𑀭𑁄𑀢𑀺, 𑀢𑀜𑁆𑀘 𑀔𑁄 ‘‘𑀅𑀤𑀺𑀦𑁆𑀦𑀸𑀤𑀸𑀦𑀁 𑀧𑀳𑀸𑀬 𑀅𑀤𑀺𑀦𑁆𑀦𑀸𑀤𑀸𑀦𑀸 𑀧𑀝𑀺𑀯𑀺𑀭𑀢𑁄’’𑀢𑀺𑀆𑀤𑀺𑀧𑀤𑁂𑀲𑀼.

𑀧𑀸𑀧𑁂 𑀲𑀫𑁂𑀢𑀻𑀢𑀺 𑀲𑀫𑀡𑁄, 𑀕𑁄𑀢𑀫𑀲𑀫𑀜𑁆𑀜𑀸, 𑀢𑁂𑀦 𑀕𑁄𑀢𑁆𑀢𑁂𑀦𑀲𑀫𑁆𑀩𑀦𑁆𑀥𑁄 𑀕𑁄𑀢𑀫𑁄𑀢𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀲𑀫𑀡𑁄𑀢𑀺 𑀪𑀕𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑁄𑀢𑁆𑀢𑀯𑀲𑁂𑀦 𑀮𑀤𑁆𑀥𑀯𑁄𑀳𑀸𑀭𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀩𑁆𑀭𑀳𑁆𑀫𑀤𑀢𑁆𑀢𑁂𑀦 𑀪𑀸𑀲𑀺𑀢𑀯𑀡𑁆𑀡𑀸𑀦𑀼𑀲𑀦𑁆𑀥𑀺𑀬𑀸 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀧𑀯𑀢𑁆𑀢𑀦𑀢𑁄, 𑀢𑁂𑀦 𑀘 𑀪𑀺𑀓𑁆𑀔𑀼𑀲𑀗𑁆𑀖𑀯𑀡𑁆𑀡𑀲𑁆𑀲𑀸𑀧𑀺 𑀪𑀸𑀲𑀺𑀢𑀢𑁆𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑀯𑀡𑁆𑀡𑁄𑀧𑀺 𑀯𑀼𑀢𑁆𑀢𑀦𑀬𑁂𑀦 𑀤𑁂𑀲𑀺𑀢𑀩𑁆𑀩𑁄, 𑀲𑁄 𑀦 𑀤𑁂𑀲𑀺𑀢𑁄. 𑀓𑀺𑀁 𑀲𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀪𑀸𑀯𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦 𑀯𑀺𑀚𑁆𑀚𑀢𑀻𑀢𑀺 𑀅𑀦𑀼𑀬𑁄𑀕𑀫𑀧𑀦𑁂𑀦𑁆𑀢𑁄 ‘‘𑀦 𑀓𑁂𑀯𑀮𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀏𑀯𑀁 𑀲𑀢𑀺 𑀓𑀲𑁆𑀫𑀸 𑀦 𑀤𑁂𑀲𑀺𑀢𑁄𑀢𑀺 𑀧𑀼𑀦𑀸𑀦𑀼𑀬𑁄𑀕𑀁 𑀧𑀭𑀺𑀳𑀭𑀢𑀺 ‘‘𑀤𑁂𑀲𑀦𑀸 𑀧𑀦𑀸’’𑀢𑀺𑀆𑀤𑀺𑀦𑀸. 𑀏𑀯𑀦𑁆𑀢𑀺 𑀏𑀯𑀫𑁂𑀯.

𑀏𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 𑁋‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂, 𑀅𑀜𑁆𑀜𑁂 𑀘 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑁂 𑀩𑀼𑀤𑁆𑀥𑀕𑀼𑀡𑁂 𑀆𑀭𑀩𑁆𑀪 𑀉𑀧𑀭𑀺 𑀤𑁂𑀲𑀦𑀁 𑀯𑀟𑁆𑀠𑁂𑀢𑀼𑀓𑀸𑀫𑁄 𑀪𑀕𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 ‘‘𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 𑀩𑀼𑀤𑁆𑀥𑀕𑀼𑀡𑀯𑀲𑁂𑀦𑁂𑀯 𑀤𑁂𑀲𑀦𑀁 𑀆𑀭𑀪𑀺, 𑀦 𑀪𑀺𑀓𑁆𑀔𑀼𑀲𑀗𑁆𑀖𑀕𑀼𑀡𑀯𑀲𑁂𑀦𑀸𑀧𑀺. 𑀏𑀲𑀸 𑀳𑀺 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀧𑀓𑀢𑀺, 𑀬𑀤𑀺𑀤𑀁 𑀏𑀓𑀭𑀲𑁂𑀦𑁂𑀯 𑀤𑁂𑀲𑀦𑀁 𑀤𑀲𑁆𑀲𑁂𑀢𑀼𑀁 𑀮𑀩𑁆𑀪𑀫𑀸𑀦𑀲𑁆𑀲𑀸𑀧𑀺 𑀓𑀲𑁆𑀲𑀘𑀺 ¶ 𑀅𑀕𑁆𑀕𑀳𑀡𑀁. 𑀢𑀣𑀸 𑀳𑀺 𑀭𑀽𑀧𑀓𑀡𑁆𑀟𑁂 𑀤𑀼𑀓𑀸𑀤𑀻𑀲𑀼, 𑀢𑀦𑁆𑀦𑀺𑀤𑁆𑀤𑁂𑀲𑁂𑀲𑀼 𑀘 𑀳𑀤𑀬𑀯𑀢𑁆𑀣𑀼 𑀦 𑀕𑀳𑀺𑀢𑀁. 𑀇𑀢𑀭𑀯𑀢𑁆𑀣𑀽𑀳𑀺 𑀅𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀤𑁂𑀲𑀦𑀸𑀪𑁂𑀤𑁄 𑀳𑁄𑀢𑀻𑀢𑀺. 𑀬𑀣𑀸 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 ¶ 𑀏𑀓𑀦𑁆𑀢𑀢𑁄 𑀘𑀓𑁆𑀔𑀸𑀤𑀺𑀦𑀺𑀲𑁆𑀲𑀬𑀸𑀦𑀺, 𑀦 𑀏𑀯𑀁 𑀫𑀦𑁄𑀯𑀺𑀜𑁆𑀜𑀸𑀡𑀁 𑀏𑀓𑀦𑁆𑀢𑁂𑀦 𑀳𑀤𑀬𑀯𑀢𑁆𑀣𑀼𑀦𑀺𑀲𑁆𑀲𑀬𑀁 𑀆𑀭𑀼𑀧𑁆𑀧𑁂 𑀢𑀤𑀪𑀸𑀯𑀢𑁄, 𑀦𑀺𑀲𑁆𑀲𑀬𑀦𑀺𑀲𑁆𑀲𑀺𑀢𑀯𑀲𑁂𑀦 𑀘 𑀯𑀢𑁆𑀣𑀼𑀤𑀼𑀓𑀸𑀤𑀺𑀤𑁂𑀲𑀦𑀸 𑀧𑀯𑀢𑁆𑀢𑀸 ‘‘𑀅𑀢𑁆𑀣𑀺 𑀭𑀽𑀧𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀼, 𑀅𑀢𑁆𑀣𑀺 𑀭𑀽𑀧𑀁 𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀽’’𑀢𑀺𑀆𑀤𑀺𑀦𑀸. 𑀬𑀫𑁆𑀧𑀺 𑀫𑀦𑁄𑀯𑀺𑀜𑁆𑀜𑀸𑀡𑀁 𑀏𑀓𑀦𑁆𑀢𑀢𑁄 𑀳𑀤𑀬𑀯𑀢𑁆𑀣𑀼𑀦𑀺𑀲𑁆𑀲𑀬𑀁, 𑀢𑀲𑁆𑀲 𑀯𑀲𑁂𑀦 ‘‘𑀅𑀢𑁆𑀣𑀺 𑀭𑀽𑀧𑀁 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀽’’𑀢𑀺𑀆𑀤𑀺𑀦𑀸 𑀤𑀼𑀓𑀸𑀤𑀻𑀲𑀼 𑀯𑀼𑀘𑁆𑀘𑀫𑀸𑀦𑁂𑀲𑀼𑀧𑀺 𑀦 𑀢𑀤𑀦𑀼𑀭𑀽𑀧𑀸 𑀆𑀭𑀫𑁆𑀫𑀡𑀤𑀼𑀓𑀸𑀤𑀬𑁄 𑀲𑀫𑁆𑀪𑀯𑀦𑁆𑀢𑀺. 𑀦 𑀳𑀺 ‘‘𑀅𑀢𑁆𑀣𑀺 𑀭𑀽𑀧𑀁 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁, 𑀅𑀢𑁆𑀣𑀺 𑀭𑀽𑀧𑀁 𑀦 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡’’𑀦𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀢𑀤𑀦𑀸𑀭𑀫𑁆𑀫𑀡𑀭𑀽𑀧𑀲𑁆𑀲𑀸𑀪𑀸𑀯𑀢𑁄𑀢𑀺 𑀯𑀢𑁆𑀣𑀸𑀭𑀫𑁆𑀫𑀡𑀤𑀼𑀓𑀸 𑀪𑀺𑀦𑁆𑀦𑀕𑀢𑀺𑀓𑀸 𑀲𑀺𑀬𑀼𑀁, 𑀢𑀲𑁆𑀫𑀸 𑀦 𑀏𑀓𑀭𑀲𑀸 𑀤𑁂𑀲𑀦𑀸 𑀪𑀯𑁂𑀬𑁆𑀬𑀸𑀢𑀺 𑀦 𑀯𑀼𑀢𑁆𑀢𑀁, 𑀢𑀣𑀸 𑀦𑀺𑀓𑁆𑀔𑁂𑀧𑀓𑀡𑁆𑀟𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀺𑀪𑀸𑀕𑁂𑀦 𑀯𑀺𑀲𑀼𑀁 𑀅𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀧𑀤𑀯𑀺𑀲𑁆𑀲𑀚𑁆𑀚𑀦𑁂 ‘‘𑀯𑀺𑀘𑀸𑀭𑁄 𑀘𑀸’’𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀆𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀧𑀤𑀯𑀺𑀲𑁆𑀲𑀚𑀦𑁂 𑀮𑀩𑁆𑀪𑀫𑀸𑀦𑁄𑀧𑀺 𑀯𑀺𑀢𑀓𑁆𑀓𑁄 𑀦 𑀉𑀤𑁆𑀥𑀢𑁄. 𑀅𑀜𑁆𑀜𑀣𑀸 𑀳𑀺 ‘‘𑀯𑀺𑀢𑀓𑁆𑀓𑁄 𑀘𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀏𑀯𑀫𑁂𑀯𑀺𑀥𑀸𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑀕𑀼𑀡𑁄 𑀦 𑀤𑁂𑀲𑀺𑀢𑁄𑀢𑀺. 𑀓𑀸𑀫𑀁 𑀲𑀤𑁆𑀤𑀢𑁄 𑀏𑀯𑀁 𑀦 𑀤𑁂𑀲𑀺𑀢𑁄, 𑀅𑀢𑁆𑀣𑀢𑁄 𑀧𑀦 𑀩𑁆𑀭𑀳𑁆𑀫𑀤𑀢𑁆𑀢𑁂𑀦 𑀪𑀸𑀲𑀺𑀢𑀯𑀡𑁆𑀡𑀲𑁆𑀲 𑀅𑀦𑀼𑀲𑀦𑁆𑀥𑀺𑀤𑀲𑁆𑀲𑀦𑀯𑀲𑁂𑀦 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀆𑀭𑀤𑁆𑀥𑀢𑁆𑀢𑀸 𑀤𑀻𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀅𑀢𑁆𑀣𑀁 𑀧𑀦𑀸’’𑀢𑀺𑀆𑀤𑀺.

𑀢𑀢𑁆𑀣𑀸𑀬𑀁 𑀤𑀻𑀧𑀦𑀸 𑁋 ‘‘𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑀲𑀗𑁆𑀖𑁄 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄’’𑀢𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀦𑀦𑀼 𑀥𑀫𑁆𑀫𑀲𑁆𑀲𑀸𑀧𑀺 𑀯𑀡𑁆𑀡𑁄 𑀩𑁆𑀭𑀳𑁆𑀫𑀤𑀢𑁆𑀢𑁂𑀦 𑀪𑀸𑀲𑀺𑀢𑁄𑀢𑀺? 𑀲𑀘𑁆𑀘𑀁 𑀪𑀸𑀲𑀺𑀢𑁄, 𑀲𑁄 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀪𑀯𑀢𑁆𑀢𑀸, 𑀅𑀭𑀺𑀬𑀲𑀗𑁆𑀖𑀸𑀥𑀸𑀭𑀢𑁆𑀢𑀸 𑀘 𑀥𑀫𑁆𑀫𑀲𑁆𑀲 𑀥𑀫𑁆𑀫𑀸𑀦𑀼𑀪𑀸𑀯𑀲𑀺𑀤𑁆𑀥𑀢𑁆𑀢𑀸 𑀘 𑀢𑁂𑀲𑀁, 𑀢𑀤𑀼𑀪𑀬𑀯𑀡𑁆𑀡𑀤𑀻𑀧𑀦𑁂𑀦𑁂𑀯 𑀤𑀻𑀧𑀺𑀢𑁄𑀢𑀺 𑀯𑀺𑀲𑀼𑀁 𑀦 𑀉𑀤𑁆𑀥𑀢𑁄. 𑀲𑀤𑁆𑀥𑀫𑁆𑀫𑀸𑀦𑀼𑀪𑀸𑀯𑁂𑀦𑁂𑀯 𑀳𑀺 𑀪𑀕𑀯𑀸, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀘 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑁆𑀧𑀳𑀸𑀦𑀲𑀫𑀢𑁆𑀣𑁄 𑀳𑁄𑀢𑀺. 𑀅𑀢𑁆𑀣𑀸𑀧𑀢𑁆𑀢𑀺𑀯𑀲𑁂𑀦 𑀧𑀭𑀯𑀺𑀳𑁂𑀞𑀦𑀲𑁆𑀲 𑀧𑀭𑀺𑀯𑀚𑁆𑀚𑀺𑀢𑀪𑀸𑀯𑀤𑀻𑀧𑀦𑀢𑁆𑀣𑀁 𑀤𑀡𑁆𑀟𑀲𑀢𑁆𑀣𑀸𑀦𑀁 𑀦𑀺𑀓𑁆𑀔𑁂𑀧𑀯𑀘𑀦𑁆𑀢𑀺 𑀆𑀳 ‘‘𑀧𑀭𑀽𑀧𑀖𑀸𑀢𑀢𑁆𑀣𑀸𑀬𑀸’’𑀢𑀺𑀆𑀤𑀺. 𑀅𑀯𑀢𑁆𑀢𑀦𑀢𑁄𑀢𑀺 𑀅𑀧𑀯𑀢𑁆𑀢𑀦𑀢𑁄, 𑀅𑀲𑀜𑁆𑀘𑀭𑀡𑀢𑁄 𑀯𑀸. 𑀦𑀺𑀓𑁆𑀔𑀺𑀢𑁆𑀢𑁄 𑀤𑀡𑁆𑀟𑁄 𑀬𑁂𑀦𑀸𑀢𑀺 𑀦𑀺𑀓𑁆𑀔𑀺𑀢𑁆𑀢𑀤𑀡𑁆𑀟𑁄. 𑀢𑀣𑀸 𑀦𑀺𑀓𑁆𑀔𑀺𑀢𑁆𑀢𑀲𑀢𑁆𑀣𑁄. 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀘𑀢𑀼𑀳𑀢𑁆𑀣𑀧𑁆𑀧𑀫𑀸𑀡𑁄 𑀘𑁂𑀢𑁆𑀣 𑀤𑀡𑁆𑀟𑁄. 𑀢𑀤𑀯𑀲𑁂𑀲𑁄 𑀫𑀼𑀕𑁆𑀕𑀭𑀔𑀕𑁆𑀕𑀸𑀤𑀬𑁄 𑀲𑀢𑁆𑀣𑀁, 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺. 𑀯𑀺𑀳𑁂𑀞𑀦𑀪𑀸𑀯𑀢𑁄𑀢𑀺 𑀯𑀺𑀳𑀺𑀁 𑀲𑀦𑀪𑀸𑀯𑀢𑁄, 𑀏𑀢𑁂𑀦 𑀲𑀲𑀢𑀺 𑀳𑀺𑀁𑀲𑀢𑀺 𑀅𑀦𑁂𑀦𑀸𑀢𑀺 𑀲𑀢𑁆𑀣𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀧𑀭𑀽𑀧𑀖𑀸𑀢𑀢𑁆𑀣𑀸𑀬𑀸’’𑀢𑀺𑀆𑀤𑀺𑀦𑀸 𑀆𑀧𑀦𑁆𑀦𑀫𑀢𑁆𑀣𑀁 ¶ 𑀯𑀺𑀯𑀭𑀺𑀢𑀼𑀁 ‘‘𑀬𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀢𑀭𑁄 𑀚𑀺𑀡𑁆𑀡𑁄, 𑀢𑀲𑁆𑀲, 𑀢𑁂𑀦𑀯𑀸 𑀆𑀮𑀫𑁆𑀩𑀺𑀢𑁄 𑀤𑀡𑁆𑀟𑁄 𑀓𑀢𑁆𑀢𑀭𑀤𑀡𑁆𑀟𑁄. 𑀤𑀦𑁆𑀢𑀲𑁄𑀥𑀦𑀁 𑀓𑀸𑀢𑀼𑀁 𑀬𑁄𑀕𑁆𑀕𑀁 𑀓𑀝𑁆𑀞𑀁 𑀤𑀦𑁆𑀢𑀓𑀝𑁆𑀞𑀁, 𑀦 𑀧𑀦 𑀤𑀦𑁆𑀢𑀲𑁄𑀥𑀦𑀓𑀝𑁆𑀞𑀁. ‘‘𑀤𑀦𑁆𑀢𑀓𑀝𑁆𑀞𑀯𑀸𑀲𑀺𑀁 𑀯𑀸’’𑀢𑀺𑀧𑀺 𑀧𑀸𑀞𑁄, 𑀤𑀦𑁆𑀢𑀓𑀝𑁆𑀞𑀘𑁆𑀙𑁂𑀤𑀦𑀓𑀯𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀔𑀼𑀤𑁆𑀤𑀓𑀁 𑀦𑀔𑀘𑁆𑀙𑁂𑀤𑀦𑀸𑀤𑀺𑀓𑀺𑀘𑁆𑀘𑀦𑀺𑀧𑁆𑀨𑀸𑀤𑀓𑀁 ¶ 𑀲𑀢𑁆𑀣𑀁 𑀧𑀺𑀧𑁆𑀨𑀮𑀺𑀓𑀁. 𑀇𑀤𑀁 𑀧𑀦 𑀪𑀺𑀓𑁆𑀔𑀼𑀲𑀗𑁆𑀖𑀸𑀥𑀻𑀦𑀯𑀘𑀦𑀁. ‘‘𑀪𑀺𑀓𑁆𑀔𑀼𑀲𑀗𑁆𑀖𑀯𑀲𑁂𑀦𑀧𑀺 𑀤𑀻𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀢𑀸 𑀢𑀲𑁆𑀲𑀸𑀧𑀺 𑀏𑀓𑀤𑁂𑀲𑁂𑀦 𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀁.

𑀮𑀚𑁆𑀚𑀸-𑀲𑀤𑁆𑀤𑁄 𑀳𑀺𑀭𑀺𑀅𑀢𑁆𑀣𑁄𑀢𑀺 𑀆𑀳 ‘‘𑀧𑀸𑀧𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀸𑀬𑀸’’𑀢𑀺. 𑀥𑀫𑁆𑀫𑀕𑀭𑀼𑀢𑀸𑀬 𑀳𑀺 𑀩𑀼𑀤𑁆𑀥𑀸𑀦𑀁, 𑀥𑀫𑁆𑀫𑀲𑁆𑀲 𑀘 𑀅𑀢𑁆𑀢𑀸𑀥𑀻𑀦𑀢𑁆𑀢𑀸 𑀅𑀢𑁆𑀢𑀸𑀥𑀺𑀧𑀢𑀺𑀪𑀽𑀢𑀸 𑀮𑀚𑁆𑀚𑀸𑀯 𑀯𑀼𑀢𑁆𑀢𑀸, 𑀦 𑀮𑁄𑀓𑀸𑀥𑀺𑀧𑀢𑀺𑀪𑀽𑀢𑀁 𑀑𑀢𑁆𑀢𑀧𑁆𑀧𑀁. 𑀅𑀧𑀺𑀘 ‘‘𑀮𑀚𑁆𑀚𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀮𑀚𑁆𑀚𑀸𑀬 𑀑𑀢𑁆𑀢𑀧𑁆𑀧𑀫𑁆𑀧𑀺 𑀯𑀼𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀮𑀚𑁆𑀚𑀸𑀢𑀺 𑀳𑀺𑀭𑀺𑀑𑀢𑁆𑀢𑀧𑁆𑀧𑀸𑀦𑀫𑀥𑀺𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀧𑀸𑀧𑀚𑀺𑀕𑀼𑀘𑁆𑀙𑀦𑀁 𑀧𑀸𑀧𑀼𑀢𑁆𑀢𑀸𑀲𑀦𑀭𑀳𑀺𑀢𑀁, 𑀧𑀸𑀧𑀪𑀬𑀁 𑀯𑀸 𑀅𑀮𑀚𑁆𑀚𑀦𑀁 𑀦𑀸𑀫 𑀅𑀢𑁆𑀣𑀻𑀢𑀺. ‘‘𑀤𑀬𑀁 𑀫𑁂𑀢𑁆𑀢𑀘𑀺𑀢𑁆𑀢𑀢𑀁 𑀆𑀧𑀦𑁆𑀦𑁄’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀤𑀬𑀸-𑀲𑀤𑁆𑀤𑁄 ‘‘𑀤𑀬𑀸𑀧𑀦𑁆𑀦𑁄’’𑀢𑀺𑀆𑀤𑀻𑀲𑀼 𑀓𑀭𑀼𑀡𑀸𑀬𑀧𑀺 𑀯𑀢𑁆𑀢𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀅𑀬𑀁 𑀧𑀦 𑀤𑀬𑀸𑀲𑀤𑁆𑀤𑁄 𑀅𑀦𑀼𑀭𑀓𑁆𑀔𑀡𑀢𑁆𑀣𑀁 𑀅𑀦𑁆𑀢𑁄𑀦𑀻𑀢𑀁 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁄 𑀫𑁂𑀢𑁆𑀢𑀸𑀬, 𑀓𑀭𑀼𑀡𑀸𑀬 𑀘 𑀧𑀯𑀢𑁆𑀢𑀢𑀻𑀢𑀺 𑀇𑀥 𑀫𑁂𑀢𑁆𑀢𑀸𑀬 𑀧𑀯𑀢𑁆𑀢𑀫𑀸𑀦𑁄 𑀯𑀼𑀢𑁆𑀢𑁄 𑀓𑀭𑀼𑀡𑀸𑀬, 𑀯𑀓𑁆𑀔𑀫𑀸𑀦𑀢𑁆𑀢𑀸. 𑀫𑀺𑀤𑀢𑀺 𑀲𑀺𑀦𑁂𑀳𑀢𑀻𑀢𑀺 𑀫𑁂𑀢𑁆𑀢𑀸, 𑀲𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀫𑁂𑀢𑁆𑀢𑀁, 𑀫𑁂𑀢𑁆𑀢𑀁 𑀘𑀺𑀢𑁆𑀢𑀁 𑀏𑀢𑀲𑁆𑀲𑀸𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑁄, 𑀫𑁂𑀢𑁆𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀏𑀢𑀲𑁆𑀲𑀸𑀢𑀺 𑀯𑀸, 𑀢𑀲𑁆𑀲 𑀪𑀸𑀯𑁄 𑀫𑁂𑀢𑁆𑀢𑀘𑀺𑀢𑁆𑀢𑀢𑀸 𑀫𑁂𑀢𑁆𑀢𑀸 𑀏𑀯 𑀫𑀽𑀮𑀪𑀽𑀢𑁂𑀦 𑀢𑀦𑁆𑀦𑀺𑀫𑀺𑀢𑁆𑀢𑁂𑀦 𑀧𑀼𑀕𑁆𑀕𑀮𑀲𑁆𑀫𑀺𑀁 𑀩𑀼𑀤𑁆𑀥𑀺𑀬𑀸, 𑀲𑀤𑁆𑀤𑀲𑁆𑀲 𑀘 𑀧𑀯𑀢𑁆𑀢𑀦𑀢𑁄.

‘‘𑀧𑀸𑀡𑀪𑀽𑀢𑁂𑀢𑀺 𑀧𑀸𑀡𑀚𑀸𑀢𑁂’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀢𑀺 𑀧𑀸𑀡𑁄 𑀪𑀽𑀢𑁄 𑀬𑁂𑀲𑀦𑁆𑀢𑀺 𑀧𑀸𑀡𑀪𑀽𑀢𑀸𑀢𑀺 𑀦𑀺𑀩𑁆𑀩𑀘𑀦𑀁 𑀓𑀢𑁆𑀢𑀩𑁆𑀩𑀁. 𑀅𑀣 𑀯𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑀫𑀗𑁆𑀕𑀺𑀢𑀸𑀬 𑀧𑀸𑀡𑀲𑀗𑁆𑀔𑀸𑀢𑁂 𑀢𑀁𑀢𑀁𑀓𑀫𑁆𑀫𑀸𑀦𑀼𑀭𑀽𑀧𑀁 𑀧𑀯𑀢𑁆𑀢𑀦𑀢𑁄 𑀪𑀽𑀢𑀦𑀸𑀫𑀓𑁂 𑀲𑀢𑁆𑀢𑁂𑀢𑀺 𑀅𑀢𑁆𑀣𑁄. 𑀅𑀦𑀼𑀓𑀫𑁆𑀧𑀓𑁄𑀢𑀺 𑀓𑀭𑀼𑀡𑀸𑀬𑀦𑀓𑁄. 𑀬𑀲𑁆𑀫𑀸 𑀧𑀦 𑀫𑁂𑀢𑁆𑀢𑀸 𑀓𑀭𑀼𑀡𑀸𑀬 𑀯𑀺𑀲𑁂𑀲𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀧𑀼𑀭𑀺𑀫𑀧𑀤𑀢𑁆𑀣𑀪𑀽𑀢𑀸 𑀫𑁂𑀢𑁆𑀢𑀸 𑀏𑀯 𑀧𑀘𑁆𑀘𑀬𑀪𑀸𑀯𑁂𑀦 ‘‘𑀢𑀸𑀬 𑀏𑀯 𑀤𑀬𑀸𑀧𑀦𑁆𑀦𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀸. 𑀇𑀫𑀺𑀦𑀸 𑀳𑀺 𑀧𑀤𑁂𑀦 𑀓𑀭𑀼𑀡𑀸𑀬 𑀕𑀳𑀺𑀢𑀸𑀬 𑀬𑁂𑀳𑀺 𑀥𑀫𑁆𑀫𑁂𑀳𑀺 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀺 𑀲𑀫𑁆𑀧𑀚𑁆𑀚𑀢𑀺, 𑀢𑁂𑀳𑀺 𑀮𑀚𑁆𑀚𑀸𑀫𑁂𑀢𑁆𑀢𑀸𑀓𑀭𑀼𑀡𑀸𑀳𑀺 𑀲𑀫𑀗𑁆𑀕𑀺𑀪𑀸𑀯𑁄 𑀬𑀣𑀸𑀓𑁆𑀓𑀫𑀁 𑀧𑀤𑀢𑁆𑀢𑀬𑁂𑀦 𑀤𑀲𑁆𑀲𑀺𑀢𑁄. 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸𑀧𑀺 𑀳𑀺 𑀳𑀺𑀢𑀸𑀦𑀼𑀓𑀫𑁆𑀧𑀦𑀫𑁂𑀯𑀸𑀢𑀺 𑀅𑀯𑀲𑁆𑀲𑀁 𑀅𑀬𑀫𑀢𑁆𑀣𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑁄𑀢𑀺. 𑀇𑀫𑀸𑀬 𑀧𑀸𑀴𑀺𑀬𑀸, 𑀲𑀁𑀯𑀡𑁆𑀡𑀦𑀸𑀬 𑀘 𑀢𑀲𑁆𑀲𑀸 𑀯𑀺𑀭𑀢𑀺𑀬𑀸 𑀲𑀢𑁆𑀢𑀯𑀲𑁂𑀦 𑀅𑀧𑀭𑀺𑀬𑀦𑁆𑀢𑀢𑀁 𑀤𑀲𑁆𑀲𑁂𑀢𑀺.

𑀯𑀺𑀳𑀭𑀢𑀻𑀢𑀺 ¶ 𑀏𑀢𑁆𑀣 𑀯𑀺-𑀲𑀤𑁆𑀤𑁄 𑀯𑀺𑀘𑁆𑀙𑀺𑀦𑁆𑀤𑀦𑀢𑁆𑀣𑁂, 𑀳𑀭-𑀲𑀤𑁆𑀤𑁄 𑀦𑀬𑀦𑀢𑁆𑀣𑁂, 𑀦𑀬𑀦𑀜𑁆𑀘 𑀦𑀸𑀫𑁂𑀢𑀁 𑀇𑀥 𑀧𑀯𑀢𑁆𑀢𑀦𑀁, 𑀬𑀸𑀧𑀦𑀁, 𑀧𑀸𑀮𑀦𑀁 𑀯𑀸𑀢𑀺 𑀆𑀳 ‘‘𑀇𑀭𑀺𑀬𑀢𑀺 𑀬𑀧𑁂𑀢𑀺 𑀬𑀸𑀧𑁂𑀢𑀺 𑀧𑀸𑀮𑁂𑀢𑀻’’𑀢𑀺. 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺 𑀘𑁂𑀢𑁆𑀣 𑀧𑀭𑀺𑀬𑀸𑀬𑀯𑀘𑀦𑀁. 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀳𑀼𑀢𑁆𑀯𑀸 𑀏𑀓𑀲𑁆𑀫𑀺𑀁 𑀇𑀭𑀺𑀬𑀸𑀧𑀣𑁂 𑀉𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀁 𑀅𑀜𑁆𑀜𑁂𑀦 𑀇𑀭𑀺𑀬𑀸𑀧𑀣𑁂𑀦 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀳𑀭𑀢𑀺 𑀧𑀯𑀢𑁆𑀢𑁂𑀢𑀺, 𑀅𑀢𑁆𑀢𑀪𑀸𑀯𑀁 𑀯𑀸 𑀬𑀸𑀧𑁂𑀢𑀺 𑀧𑀸𑀮𑁂𑀢𑀻𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀯𑀸 𑀳𑀻𑀢𑀺 𑀏𑀢𑁆𑀣 𑀳𑀺-𑀲𑀤𑁆𑀤𑁄 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀫𑀢𑁆𑀢𑁂 𑀓𑀲𑁆𑀲𑀘𑀺𑀧𑀺 𑀢𑁂𑀦 𑀚𑁄𑀢𑀺𑀢𑀢𑁆𑀣𑀲𑁆𑀲 𑀅𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀏𑀯𑀁 𑀯𑀸 𑀪𑀺𑀓𑁆𑀔𑀯𑁂’’𑀢𑀺. 𑀯𑀺𑀲𑀼𑀁 𑀓𑀧𑁆𑀧𑀦𑀫𑁂𑀯 𑀅𑀢𑁆𑀣𑁄 𑀯𑀺𑀓𑀧𑁆𑀧𑀢𑁆𑀣𑁄𑀢𑀺 𑀲𑁄 𑀅𑀦𑁂𑀓𑀪𑀺𑀦𑁆𑀦𑁂𑀲𑀼𑀬𑁂𑀯 𑀅𑀢𑁆𑀣𑁂𑀲𑀼 ¶ 𑀮𑀩𑁆𑀪𑀢𑀺, 𑀅𑀦𑁂𑀓𑀪𑁂𑀤𑀸 𑀘 𑀅𑀢𑁆𑀣𑀸 𑀉𑀧𑀭𑀺𑀯𑀓𑁆𑀔𑀫𑀸𑀦𑀸 𑀏𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀉𑀧𑀭𑀺 𑀅𑀤𑀺𑀦𑁆𑀦𑀸…𑀧𑁂… 𑀅𑀧𑁂𑀓𑁆𑀔𑀺𑀢𑁆𑀯𑀸’’𑀢𑀺. ‘‘𑀏𑀯’’𑀦𑁆𑀢𑀺𑀆𑀤𑀺 𑀕𑀦𑁆𑀣𑀕𑀸𑀭𑀯𑀧𑀭𑀺𑀳𑀭𑀡𑀁, 𑀦𑀬𑀤𑀸𑀦𑀁 𑀯𑀸.

𑀇𑀤𑀸𑀦𑀺 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀁 𑀧𑀦𑁂𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦 𑀳𑀦𑀢𑀻𑀢𑀺 𑀦 𑀳𑀺𑀁𑀲𑀢𑀺. 𑀦 𑀖𑀸𑀢𑁂𑀢𑀻𑀢𑀺 𑀦 𑀯𑀥𑀢𑀺. 𑀢𑀢𑁆𑀣𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑁂. 𑀲𑀫𑀦𑀼𑀜𑁆𑀜𑁄𑀢𑀺 𑀲𑀦𑁆𑀢𑀼𑀝𑁆𑀞𑁄. 𑀅𑀳𑁄 𑀯𑀢 𑀭𑁂𑀢𑀺 𑀪𑁄𑀦𑁆𑀢𑁄 𑀏𑀓𑀁𑀲𑀢𑁄 𑀅𑀘𑁆𑀙𑀭𑀺𑀬𑀸𑀢𑀺 𑀅𑀢𑁆𑀣𑁄. 𑀆𑀘𑀸𑀭𑀲𑀻𑀮𑀫𑀢𑁆𑀢𑀓𑀦𑁆𑀢𑀺 𑀲𑀸𑀥𑀼𑀚𑀦𑀸𑀘𑀸𑀭𑀫𑀢𑁆𑀢𑀓𑀁, 𑀫𑀢𑁆𑀢-𑀲𑀤𑁆𑀤𑁄 𑀘𑁂𑀢𑁆𑀣 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄, 𑀢𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀺𑀕𑀼𑀡𑁂𑀳𑀺𑀧𑀺 𑀮𑁄𑀓𑀺𑀬𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀧𑀘𑁆𑀘𑀬𑀧𑀭𑀺𑀪𑁄𑀕𑀲𑀻𑀮𑀸𑀦𑀺 𑀇𑀥 𑀦 𑀯𑀺𑀪𑀢𑁆𑀢𑀸𑀦𑀺. 𑀏𑀯-𑀲𑀤𑁆𑀤𑁄 𑀧𑀤𑀧𑀽𑀭𑀡𑀫𑀢𑁆𑀢𑀁, 𑀫𑀢𑁆𑀢-𑀲𑀤𑁆𑀤𑁂𑀦 𑀯𑀸 𑀬𑀣𑀸𑀯𑀼𑀢𑁆𑀢𑀢𑁆𑀣𑀲𑁆𑀲𑀸𑀯𑀥𑀸𑀭𑀡𑀁 𑀓𑀭𑁄𑀢𑀺, 𑀏𑀯-𑀲𑀤𑁆𑀤𑁂𑀦 𑀆𑀘𑀸𑀭𑀲𑀻𑀮𑀫𑁂𑀯 𑀯𑀢𑁆𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁. 𑀏𑀯𑀫𑀻𑀤𑀺𑀲𑁂𑀲𑀼. ‘‘𑀇𑀢𑀺 𑀯𑀸 𑀳𑀺 𑀪𑀺𑀓𑁆𑀔𑀯𑁂 𑀧𑀼𑀣𑀼𑀚𑁆𑀚𑀦𑁄 𑀢𑀣𑀸𑀕𑀢𑀲𑁆𑀲 𑀯𑀡𑁆𑀡𑀁 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬𑀸’’𑀢𑀺 𑀯𑀘𑀦𑀲𑀸𑀫𑀢𑁆𑀣𑀺𑀬𑁂𑀦𑁂𑀯 𑀢𑀤𑀼𑀢𑁆𑀢𑀭𑀺 𑀕𑀼𑀡𑀁 𑀯𑀢𑁆𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺. ‘‘𑀢𑀁 𑀯𑁄 𑀉𑀧𑀭𑀺 𑀯𑀓𑁆𑀔𑀸𑀫𑀻’’𑀢𑀺 𑀘 𑀅𑀢𑁆𑀣𑀲𑁆𑀲𑀸𑀧𑀚𑁆𑀚𑀦𑀢𑁄 𑀢𑀣𑀸𑀧𑀦𑁆𑀦𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀧𑀭𑀺 𑀅𑀲𑀸𑀥𑀸𑀭𑀡𑀪𑀸𑀯’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀦 𑀓𑁂𑀯𑀮𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀯𑀺𑀯𑁂𑀘𑀦𑁂𑀦 𑀧𑀦 ‘‘𑀧𑀼𑀣𑀼𑀚𑁆𑀚𑀦𑁄’’𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀦𑁆𑀢𑀺 𑀤𑀲𑁆𑀲𑀺𑀢𑀁. ‘‘𑀇𑀢𑁄 𑀧𑀭’’𑀦𑁆𑀢𑀺𑀆𑀤𑀺𑀦𑀸 𑀕𑀦𑁆𑀣𑀕𑀸𑀭𑀯𑀁 𑀧𑀭𑀺𑀳𑀭𑀢𑀺. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀧𑀤𑀁 𑀧𑀼𑀩𑁆𑀩𑀧𑀤𑀁,𑀦 𑀧𑀼𑀩𑁆𑀩𑀧𑀤𑀁 𑀢𑀣𑀸, 𑀦 𑀧𑀼𑀩𑁆𑀩𑀁 𑀯𑀸 𑀅𑀧𑀼𑀩𑁆𑀩𑀁, 𑀢𑀫𑁂𑀯 𑀧𑀤𑀁 𑀢𑀣𑀸.

𑀲𑀤𑁆𑀤𑀦𑁆𑀢𑀭𑀬𑁄𑀕𑁂𑀦 𑀥𑀸𑀢𑀽𑀦𑀫𑀢𑁆𑀣𑀯𑀺𑀲𑁂𑀲𑀯𑀸𑀘𑀓𑀢𑁆𑀢𑀸 ‘‘𑀆𑀤𑀸𑀦’’𑀦𑁆𑀢𑀺 𑀏𑀢𑀲𑁆𑀲 𑀕𑀳𑀡𑀦𑁆𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀢𑁂𑀦𑀸𑀳 ‘‘𑀳𑀭𑀡’’𑀦𑁆𑀢𑀺𑀆𑀤𑀺. 𑀧𑀭𑀲𑁆𑀲𑀸𑀢𑀺 𑀅𑀢𑁆𑀢𑀲𑀦𑁆𑀢𑀓𑀢𑁄 𑀧𑀭𑀪𑀽𑀢𑀲𑁆𑀲 𑀲𑀦𑁆𑀢𑀓𑀲𑁆𑀲, 𑀬𑁄 𑀯𑀸 𑀅𑀢𑁆𑀢𑀢𑁄 𑀅𑀜𑁆𑀜𑁄, 𑀲𑁄 ¶ 𑀧𑀼𑀕𑁆𑀕𑀮𑁄 𑀧𑀭𑁄 𑀦𑀸𑀫, 𑀢𑀲𑁆𑀲 𑀇𑀤𑀁 𑀧𑀭𑀦𑁆𑀢𑀺𑀧𑀺 𑀬𑀼𑀚𑁆𑀚𑀢𑀺, ‘‘𑀧𑀭𑀲𑀁𑀳𑀭𑀡’’𑀦𑁆𑀢𑀺𑀧𑀺 𑀧𑀸𑀞𑁄, 𑀲𑀁-𑀲𑀤𑁆𑀤𑁄 𑀘𑁂𑀢𑁆𑀣 𑀥𑀦𑀢𑁆𑀣𑁄,𑀧𑀭𑀲𑀦𑁆𑀢𑀓𑀳𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀣𑁂𑀦𑁄 𑀯𑀼𑀘𑁆𑀘𑀢𑀺 𑀘𑁄𑀭𑁄, 𑀢𑀲𑁆𑀲 𑀪𑀸𑀯𑁄 𑀣𑁂𑀬𑁆𑀬𑀁, 𑀘𑁄𑀭𑀓𑀫𑁆𑀫𑀁. 𑀘𑁄𑀭𑀺𑀓𑀸𑀢𑀺 𑀘𑁄𑀭𑀲𑁆𑀲 𑀓𑀺𑀭𑀺𑀬𑀸. 𑀢𑀤𑀢𑁆𑀣𑀁 𑀯𑀺𑀯𑀭𑀢𑀺 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣𑀸𑀢𑀺 ‘‘𑀆𑀤𑀺𑀦𑁆𑀦𑀸𑀤𑀸𑀦’’𑀦𑁆𑀢𑀺 𑀧𑀤𑁂. 𑀧𑀭𑀧𑀭𑀺𑀕𑁆𑀕𑀳𑀺𑀢𑀫𑁂𑀯 𑀏𑀢𑁆𑀣 𑀅𑀤𑀺𑀦𑁆𑀦𑀁, 𑀦 𑀧𑀦 𑀤𑀦𑁆𑀢𑀧𑁄𑀡𑀲𑀺𑀓𑁆𑀔𑀸𑀧𑀤𑁂 𑀯𑀺𑀬 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀁 𑀅𑀢𑁆𑀢𑀲𑀦𑁆𑀢𑀓𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀬𑀢𑁆𑀣 𑀧𑀭𑁄’’𑀢𑀺𑀆𑀤𑀺 𑀉𑀪𑀬𑀢𑁆𑀣 𑀲𑀫𑁆𑀩𑀦𑁆𑀥𑁄 𑀆𑀯𑀼𑀢𑁆𑀢𑀺𑀬𑀸𑀤𑀺𑀦𑀬𑁂𑀦. 𑀢𑀲𑁆𑀫𑀸 ‘‘𑀢𑀁 𑀧𑀭𑀧𑀭𑀺𑀕𑁆𑀕𑀳𑀺𑀢𑀁 𑀦𑀸𑀫, 𑀢𑀲𑁆𑀫𑀺𑀁 𑀧𑀭𑀧𑀭𑀺𑀕𑁆𑀕𑀳𑀺𑀢𑁂’’𑀢𑀺 𑀘 𑀬𑁄𑀚𑁂𑀢𑀩𑁆𑀩𑀁. 𑀬𑀣𑀸𑀓𑀸𑀫𑀁 𑀓𑀭𑁄𑀢𑀻𑀢𑀺 𑀬𑀣𑀸𑀓𑀸𑀫𑀓𑀸𑀭𑀻, 𑀢𑀲𑁆𑀲 𑀪𑀸𑀯𑁄 𑀬𑀣𑀸𑀓𑀸𑀫𑀓𑀭𑀺𑀢𑀸, 𑀢𑀁. 𑀢𑀣𑀸𑀭𑀼𑀘𑀺𑀓𑀭𑀡𑀁 𑀆𑀧𑀚𑁆𑀚𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀲𑀲𑀦𑁆𑀢𑀓𑀢𑁆𑀢𑀸 𑀅𑀤𑀡𑁆𑀟𑀸𑀭𑀳𑁄 𑀥𑀦𑀤𑀡𑁆𑀟𑀭𑀸𑀚𑀤𑀡𑁆𑀟𑀯𑀲𑁂𑀦. 𑀅𑀦𑀼𑀧𑀯𑀚𑁆𑀚𑁄 𑀘 𑀘𑁄𑀤𑀦𑀸𑀲𑀸𑀭𑀡𑀸𑀤𑀺𑀯𑀲𑁂𑀦. 𑀢𑀁 𑀧𑀭𑀧𑀭𑀺𑀕𑁆𑀕𑀳𑀺𑀢𑀁 𑀆𑀤𑀺𑀬𑀢𑀺 𑀏𑀢𑁂𑀦𑀸𑀢𑀺 𑀢𑀤𑀸𑀤𑀸𑀬𑀓𑁄, 𑀲𑁆𑀯𑁂𑀯 𑀉𑀧𑀓𑁆𑀓𑀫𑁄, 𑀢𑀁 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀢𑀤𑀸𑀤𑀸𑀬𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸. 𑀣𑁂𑀬𑁆𑀬𑀸 𑀏𑀯 𑀘𑁂𑀢𑀦𑀸 𑀣𑁂𑀬𑁆𑀬𑀘𑁂𑀢𑀦𑀸. 𑀔𑀼𑀤𑁆𑀤𑀓𑀢𑀸𑀅𑀧𑁆𑀧𑀕𑁆𑀖𑀢𑀸𑀤𑀺𑀯𑀲𑁂𑀦 𑀳𑀻𑀦𑁂. 𑀫𑀳𑀦𑁆𑀢𑀢𑀸𑀫𑀳𑀕𑁆𑀖𑀢𑀸𑀤𑀺𑀯𑀲𑁂𑀦 𑀧𑀡𑀻𑀢𑁂. 𑀓𑀲𑁆𑀫𑀸? 𑀯𑀢𑁆𑀣𑀼𑀳𑀻𑀦𑀢𑀸𑀬𑀸𑀢𑀺 𑀕𑀫𑁆𑀬𑀫𑀸𑀦𑀢𑁆𑀢𑀸 𑀦 𑀯𑀼𑀢𑁆𑀢𑀁, 𑀳𑀻𑀦𑁂, 𑀳𑀻𑀦𑀕𑀼𑀡𑀸𑀦𑀁 𑀲𑀦𑁆𑀢𑀓𑁂 𑀘 𑀘𑁂𑀢𑀦𑀸 𑀤𑀼𑀩𑁆𑀩𑀮𑀸, 𑀧𑀡𑀻𑀢𑁂, 𑀧𑀡𑀻𑀢𑀕𑀼𑀡𑀸𑀦𑀁 𑀲𑀦𑁆𑀢𑀓𑁂 ¶ 𑀘 𑀩𑀮𑀯𑀢𑀻𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀢𑁂𑀳𑀺 𑀓𑀸𑀭𑀡𑁂𑀳𑀺 𑀅𑀧𑁆𑀧𑀲𑀸𑀯𑀚𑁆𑀚𑀫𑀳𑀸𑀲𑀸𑀯𑀚𑁆𑀚𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀆𑀘𑀭𑀺𑀬𑀸 𑀧𑀦 𑀳𑀻𑀦𑀧𑀡𑀻𑀢𑀢𑁄 𑀔𑀼𑀤𑁆𑀤𑀓𑀫𑀳𑀦𑁆𑀢𑁂 𑀯𑀺𑀲𑀼𑀁 𑀕𑀳𑁂𑀢𑁆𑀯𑀸 ‘‘𑀇𑀥𑀸𑀧𑀺 𑀔𑀼𑀤𑁆𑀤𑀓𑁂 𑀧𑀭𑀲𑀦𑁆𑀢𑀓𑁂 𑀅𑀧𑁆𑀧𑀲𑀸𑀯𑀚𑁆𑀚𑀁, 𑀫𑀳𑀦𑁆𑀢𑁂 𑀫𑀳𑀸𑀲𑀸𑀯𑀚𑁆𑀚𑀁. 𑀓𑀲𑁆𑀫𑀸? 𑀧𑀬𑁄𑀕𑀫𑀳𑀦𑁆𑀢𑀢𑀸𑀬. 𑀯𑀢𑁆𑀣𑀼𑀕𑀼𑀡𑀸𑀦𑀁 𑀧𑀦 𑀲𑀫𑀪𑀸𑀯𑁂 𑀲𑀢𑀺 𑀓𑀺𑀮𑁂𑀲𑀸𑀦𑀫𑀼𑀧𑀓𑁆𑀓𑀫𑀸𑀦𑀜𑁆𑀘 𑀫𑀼𑀤𑀼𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑀁, 𑀢𑀺𑀩𑁆𑀩𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑀦𑁆𑀢𑀺 𑀅𑀬𑀫𑁆𑀧𑀺 𑀦𑀬𑁄 𑀬𑁄𑀚𑁂𑀢𑀩𑁆𑀩𑁄’’𑀢𑀺 𑀯𑀤𑀦𑁆𑀢𑀺.

𑀲𑀸𑀳𑀢𑁆𑀣𑀺𑀓𑀸𑀤𑀬𑁄𑀢𑀺 𑀏𑀢𑁆𑀣 𑀧𑀭𑀲𑀦𑁆𑀢𑀓𑀲𑁆𑀲 𑀲𑀳𑀢𑁆𑀣𑀸 𑀕𑀳𑀡𑀁 𑀲𑀸𑀳𑀢𑁆𑀣𑀺𑀓𑁄. 𑀅𑀜𑁆𑀜𑁂 𑀆𑀡𑀸𑀧𑁂𑀢𑁆𑀯𑀸 𑀕𑀳𑀡𑀁 𑀆𑀡𑀢𑁆𑀢𑀺𑀓𑁄. 𑀅𑀦𑁆𑀢𑁄𑀲𑀼𑀗𑁆𑀓𑀖𑀸𑀢𑁂 𑀞𑀺𑀢𑁂𑀦 𑀩𑀳𑀺𑀲𑀼𑀗𑁆𑀓𑀖𑀸𑀢𑀁 𑀧𑀸𑀢𑁂𑀢𑁆𑀯𑀸 𑀕𑀳𑀡𑀁 𑀦𑀺𑀲𑁆𑀲𑀕𑁆𑀕𑀺𑀬𑁄. ‘‘𑀅𑀲𑀼𑀓𑀁 𑀪𑀡𑁆𑀟𑀁 𑀬𑀤𑀸 𑀲𑀓𑁆𑀓𑁄𑀲𑀺, 𑀢𑀤𑀸 𑀅𑀯𑀳𑀭𑀸’’𑀢𑀺 𑀅𑀢𑁆𑀣𑀲𑀸𑀥𑀓𑀸𑀯𑀳𑀸𑀭𑀦𑀺𑀧𑁆𑀨𑀸𑀤𑀓𑁂𑀦, 𑀆𑀡𑀸𑀧𑀦𑁂𑀦 𑀯𑀸, 𑀬𑀤𑀸 𑀓𑀤𑀸𑀘𑀺 𑀧𑀭𑀲𑀦𑁆𑀢𑀓𑀯𑀺𑀦𑀸𑀲𑀓𑁂𑀦 𑀲𑀧𑁆𑀧𑀺𑀢𑁂𑀮𑀓𑀼𑀫𑁆𑀪𑀺𑀆𑀤𑀻𑀲𑀼 𑀤𑀼𑀓𑀽𑀮𑀲𑀸𑀝𑀓𑀘𑀫𑁆𑀫𑀔𑀡𑁆𑀟𑀸𑀤𑀺𑀧𑀓𑁆𑀔𑀺𑀧𑀦𑀸𑀤𑀺𑀦𑀸 𑀯𑀸 𑀕𑀳𑀡𑀁 𑀣𑀸𑀯𑀭𑁄. 𑀫𑀦𑁆𑀢𑀧𑀭𑀺𑀚𑀧𑁆𑀧𑀦𑁂𑀦 𑀕𑀳𑀡𑀁 𑀯𑀺𑀚𑁆𑀚𑀸𑀫𑀬𑁄. 𑀯𑀺𑀦𑀸 𑀫𑀦𑁆𑀢𑁂𑀦, 𑀓𑀸𑀬𑀯𑀘𑀻𑀧𑀬𑁄𑀕𑁂𑀳𑀺 𑀢𑀸𑀤𑀺𑀲𑀇𑀤𑁆𑀥𑀺𑀬𑁄𑀕𑁂𑀦 𑀧𑀭𑀲𑀦𑁆𑀢𑀓𑀲𑁆𑀲 𑀆𑀓𑀟𑁆𑀠𑀦𑀁 𑀇𑀤𑁆𑀥𑀺𑀫𑀬𑁄. 𑀓𑀸𑀬𑀯𑀘𑀻𑀧𑀬𑁄𑀕𑁂𑀲𑀼 ¶ 𑀳𑀺 𑀲𑀦𑁆𑀢𑁂𑀲𑀼𑀬𑁂𑀯 𑀇𑀤𑁆𑀥𑀺𑀫𑀬𑁄 𑀅𑀯𑀳𑀭𑀡𑀧𑀬𑁄𑀕𑁄 𑀳𑁄𑀢𑀺, 𑀦𑁄 𑀅𑀲𑀦𑁆𑀢𑁂𑀲𑀼. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀅𑀦𑀸𑀧𑀢𑁆𑀢𑀺 𑀪𑀺𑀓𑁆𑀔𑀯𑁂, 𑀇𑀤𑁆𑀥𑀺𑀫𑀲𑁆𑀲 𑀇𑀤𑁆𑀥𑀺𑀯𑀺𑀲𑀬𑁂’’𑀢𑀺 (𑀧𑀸𑀭𑀸. 𑁧𑁫𑁯), 𑀢𑁂 𑀘 𑀔𑁄 𑀧𑀬𑁄𑀕𑀸 𑀬𑀣𑀸𑀦𑀼𑀭𑀽𑀧𑀁 𑀧𑀯𑀢𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀁 𑀧𑀦 𑀧𑀬𑁄𑀕𑀸𑀦𑀁 𑀲𑀩𑁆𑀩𑁂𑀲𑀁 𑀲𑀩𑁆𑀩𑀢𑁆𑀣 𑀅𑀯𑀳𑀸𑀭𑁂𑀲𑀼 𑀅𑀲𑀫𑁆𑀪𑀯𑀢𑁄 ‘‘𑀬𑀣𑀸𑀦𑀼𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀁.

𑀲𑀦𑁆𑀥𑀺𑀘𑁆𑀙𑁂𑀤𑀸𑀤𑀻𑀦𑀺 𑀓𑀢𑁆𑀯𑀸 𑀅𑀤𑀺𑀲𑁆𑀲𑀫𑀸𑀦𑁂𑀦 𑀯𑀸, 𑀓𑀽𑀝𑀫𑀸𑀦𑀓𑀽𑀝𑀓𑀳𑀸𑀧𑀡𑀸𑀤𑀻𑀳𑀺 𑀯𑀜𑁆𑀘𑀦𑁂𑀦 𑀯𑀸, 𑀅𑀯𑀳𑀭𑀡𑀁 𑀣𑁂𑀬𑁆𑀬𑀸𑀯𑀳𑀸𑀭𑁄. 𑀧𑀲𑀬𑁆𑀳 𑀩𑀮𑀲𑀸 𑀅𑀪𑀺𑀪𑀼𑀬𑁆𑀬 𑀲𑀦𑁆𑀢𑀚𑁆𑀚𑁂𑀢𑁆𑀯𑀸, 𑀪𑀬𑀁 𑀤𑀲𑁆𑀲𑁂𑀢𑁆𑀯𑀸 𑀯𑀸 𑀅𑀯𑀳𑀭𑀡𑀁 𑀧𑀲𑀬𑁆𑀳𑀸𑀯𑀳𑀸𑀭𑁄. 𑀧𑀭𑀪𑀡𑁆𑀟𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀯𑀳𑀭𑀡𑀁 𑀧𑀝𑀺𑀘𑁆𑀙𑀦𑁆𑀦𑀸𑀯𑀳𑀸𑀭𑁄. 𑀪𑀡𑁆𑀟𑁄𑀓𑀸𑀲𑀧𑀭𑀺𑀓𑀧𑁆𑀧𑀯𑀲𑁂𑀦 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀅𑀯𑀳𑀭𑀡𑀁 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄. 𑀓𑀼𑀲𑀁 𑀲𑀗𑁆𑀓𑀸𑀫𑁂𑀢𑁆𑀯𑀸 𑀅𑀯𑀳𑀭𑀡𑀁 𑀓𑀼𑀲𑀸𑀯𑀳𑀸𑀭𑁄. 𑀇𑀢𑀺-𑀲𑀤𑁆𑀤𑁂𑀦 𑀘𑁂𑀢𑁆𑀣 𑀆𑀤𑀺𑀅𑀢𑁆𑀣𑁂𑀦, 𑀦𑀺𑀤𑀲𑁆𑀲𑀦𑀦𑀬𑁂𑀦 𑀯𑀸 𑀅𑀯𑀲𑁂𑀲𑀸 𑀘𑀢𑁆𑀢𑀸𑀭𑁄 𑀧𑀜𑁆𑀘𑀓𑀸𑀧𑀺 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀜𑁆𑀘𑀦𑁆𑀦𑀜𑁆𑀳𑀺 𑀧𑀜𑁆𑀘𑀓𑀸𑀦𑀁 𑀲𑀫𑁄𑀥𑀸𑀦𑀪𑀽𑀢𑀸 𑀧𑀜𑁆𑀘𑀯𑀻𑀲𑀢𑀺 𑀅𑀯𑀳𑀸𑀭𑀸 𑀲𑀩𑁆𑀩𑁂𑀧𑀺 𑀅𑀤𑀺𑀦𑁆𑀦𑀸𑀤𑀸𑀦𑀫𑁂𑀯, 𑀅𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀸 𑀅𑀭𑀺𑀬𑀸𑀬 𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀸 𑀤𑀺𑀦𑁆𑀦𑀫𑁂𑀯𑀸𑀢𑀺 𑀅𑀢𑁆𑀣𑁄. ‘‘𑀤𑀺𑀦𑁆𑀦𑀸𑀤𑀸𑀬𑀻’’𑀢𑀺 𑀇𑀤𑀁 𑀧𑀬𑁄𑀕𑀢𑁄 𑀧𑀭𑀺𑀲𑀼𑀤𑁆𑀥𑀪𑀸𑀯𑀤𑀲𑁆𑀲𑀦𑀁. ‘‘𑀤𑀺𑀦𑁆𑀦𑀧𑀸𑀝𑀺𑀓𑀗𑁆𑀔𑀻’’𑀢𑀺 𑀇𑀤𑀁 𑀧𑀦 𑀆𑀲𑀬𑀢𑁄𑀢𑀺 𑀆𑀳 ‘‘𑀘𑀺𑀢𑁆𑀢𑁂𑀦𑀸’’𑀢𑀺𑀆𑀤𑀺.

𑀅𑀣𑁂𑀦𑁂𑀦𑀸𑀢𑀺 𑀏𑀢𑁆𑀣 -𑀲𑀤𑁆𑀤𑁄 𑀦-𑀲𑀤𑁆𑀤𑀲𑁆𑀲 𑀓𑀸𑀭𑀺𑀬𑁄, 𑀅-𑀲𑀤𑁆𑀤𑁄 𑀯𑀸 𑀏𑀓𑁄 𑀦𑀺𑀧𑀸𑀢𑁄 𑀦-𑀲𑀤𑁆𑀤𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀣𑁂𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀧𑀸𑀴𑀺𑀬𑀁 𑀤𑀺𑀲𑁆𑀲𑀫𑀸𑀦𑀯𑀸𑀓𑁆𑀬𑀸𑀯𑀢𑁆𑀣𑀺𑀓𑀯𑀺𑀪𑀢𑁆𑀢𑀺𑀬𑀦𑁆𑀢𑀧𑀝𑀺𑀭𑀽𑀧𑀓𑀢𑀸𑀓𑀭𑀡𑁂𑀦 𑀲𑀤𑁆𑀥𑀺𑀁 𑀲𑀫𑀸𑀲𑀤𑀲𑁆𑀲𑀦𑀫𑁂𑀢𑀁. 𑀧𑀓𑀭𑀡𑀸𑀥𑀺𑀕𑀢𑁂 𑀧𑀦 𑀅𑀢𑁆𑀣𑁂 𑀯𑀺𑀯𑁂𑀘𑀺𑀬𑀫𑀸𑀦𑁂 𑀇𑀥 𑀅𑀣𑁂𑀦𑀢𑁄𑀬𑁂𑀯 𑀲𑀼𑀘𑀺𑀪𑀽𑀢𑀢𑀸 𑀅𑀥𑀺𑀕𑀫𑀻𑀬𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀸𑀥𑀺𑀓𑀸𑀭𑀢𑁆𑀢𑀸𑀢𑀺 𑀆𑀳 ‘‘𑀅𑀣𑁂𑀦𑀢𑁆𑀢𑀸𑀬𑁂𑀯 𑀲𑀼𑀘𑀺𑀪𑀽𑀢𑁂𑀦𑀸’’𑀢𑀺 𑀢𑁂𑀦 𑀳𑁂𑀢𑀸𑀮𑀗𑁆𑀓𑀸𑀭𑀯𑀘𑀦𑀫𑁂𑀢𑀦𑁆𑀢𑀺 ¶ 𑀤𑀲𑁆𑀲𑁂𑀢𑀺. 𑀆𑀳𑀺𑀢𑁄 𑀅𑀳𑀁𑀫𑀸𑀦𑁄 𑀏𑀢𑁆𑀣𑀸𑀢𑀺 𑀅𑀢𑁆𑀢𑀸, 𑀅𑀢𑁆𑀢𑀪𑀸𑀯𑁄. 𑀪𑀕𑀯𑀢𑁄 𑀧𑀦 𑀲𑁄 𑀭𑀼𑀴𑁆𑀳𑀺𑀬𑀸 𑀬𑀣𑀸 𑀢𑀁 𑀦𑀺𑀘𑁆𑀙𑀦𑁆𑀤𑀭𑀸𑀕𑁂𑀲𑀼 𑀲𑀢𑁆𑀢𑀯𑁄𑀳𑀸𑀭𑁄. 𑀅𑀤𑀢𑀺 𑀯𑀸 𑀲𑀁𑀲𑀸𑀭𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀢𑀸, 𑀢𑁂𑀦𑀸𑀳 ‘‘𑀅𑀢𑁆𑀢𑀪𑀸𑀯𑁂𑀦𑀸’’𑀢𑀺. 𑀧𑀤𑀢𑁆𑀢𑀬𑁂𑀧𑀺 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀦𑁆𑀢𑀺 𑀜𑀸𑀧𑁂𑀢𑀼𑀁 ‘‘𑀅𑀣𑁂𑀦𑀁…𑀧𑁂… 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀅𑀣𑁂𑀦𑁂𑀦 𑀅𑀢𑁆𑀢𑀦𑀸 𑀅𑀣𑁂𑀦𑀢𑁆𑀢𑀸 𑀳𑀼𑀢𑁆𑀯𑀸 𑀲𑀼𑀘𑀺𑀪𑀽𑀢𑁂𑀦 𑀅𑀢𑁆𑀢𑀦𑀸 𑀲𑀼𑀘𑀺𑀪𑀽𑀢𑀢𑁆𑀢𑀸 𑀳𑀼𑀢𑁆𑀯𑀸 𑀯𑀺𑀳𑀭𑀢𑀻𑀢𑀺𑀧𑀺 𑀅𑀢𑁆𑀣𑁄.

𑀲𑁂𑀲𑀦𑁆𑀢𑀺 ¶ ‘‘𑀧𑀳𑀸𑀬 𑀧𑀝𑀺𑀯𑀺𑀭𑀢𑁄’’𑀢𑀺 𑀏𑀯𑀫𑀸𑀤𑀺𑀓𑀁. 𑀢𑀜𑁆𑀳𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀁. 𑀓𑀺𑀜𑁆𑀘𑀸𑀧𑀺 𑀦𑀬𑀺𑀥 𑀲𑀺𑀓𑁆𑀔𑀸𑀧𑀤𑀯𑁄𑀳𑀸𑀭𑁂𑀦 𑀯𑀺𑀭𑀢𑀺 𑀯𑀼𑀢𑁆𑀢𑀸, 𑀇𑀢𑁄 𑀅𑀜𑁆𑀜𑁂𑀲𑀼 𑀧𑀦 𑀲𑀼𑀢𑁆𑀢𑀧𑀤𑁂𑀲𑁂𑀲𑀼, 𑀯𑀺𑀦𑀬𑀸𑀪𑀺𑀥𑀫𑁆𑀫𑁂𑀲𑀼 𑀘 𑀧𑀯𑀢𑁆𑀢𑀯𑁄𑀳𑀸𑀭𑁂𑀦 𑀯𑀺𑀭𑀢𑀺𑀬𑁄, 𑀘𑁂𑀢𑀦𑀸 𑀘 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀦𑀫𑀥𑀺𑀝𑁆𑀞𑀸𑀦𑀪𑀸𑀯𑀢𑁄, 𑀢𑁂𑀲𑀫𑀜𑁆𑀜𑀢𑀭𑀓𑁄𑀝𑁆𑀞𑀸𑀲𑀪𑀸𑀯𑀢𑁄 𑀘 ‘‘𑀲𑀺𑀓𑁆𑀔𑀸𑀧𑀤’’𑀦𑁆𑀢𑁆𑀯𑁂𑀯 𑀯𑀢𑁆𑀢𑀩𑁆𑀩𑀸𑀢𑀺 𑀆𑀳 ‘‘𑀧𑀞𑀫𑀲𑀺𑀓𑁆𑀔𑀸𑀧𑀤𑁂’’𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 ‘‘𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄’’𑀢𑀺 𑀦 𑀯𑀼𑀢𑁆𑀢𑀁, 𑀅𑀥𑀺𑀓𑀸𑀭𑀯𑀲𑁂𑀦, 𑀧𑀦 𑀅𑀢𑁆𑀣𑀢𑁄 𑀘 𑀯𑀼𑀢𑁆𑀢𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀳𑀺 𑀮𑀚𑁆𑀚𑀸𑀤𑀬𑁄 𑀧𑀸𑀡𑀸𑀢𑀺𑀧𑀸𑀢𑀧𑁆𑀧𑀳𑀸𑀦𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀏𑀯𑀁 𑀅𑀤𑀺𑀦𑁆𑀦𑀸𑀤𑀸𑀦𑀧𑁆𑀧𑀳𑀸𑀦𑀲𑁆𑀲𑀸𑀧𑀻𑀢𑀺. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺. 𑀅𑀣 𑀯𑀸 𑀲𑀼𑀘𑀺𑀪𑀽𑀢𑁂𑀦𑀸𑀢𑀺 𑀳𑀺𑀭𑁄𑀢𑁆𑀢𑀧𑁆𑀧𑀸𑀤𑀺𑀲𑀫𑀦𑁆𑀦𑀸𑀕𑀫𑀦𑀁, 𑀅𑀳𑀺𑀭𑀺𑀓𑀸𑀤𑀻𑀦𑀜𑁆𑀘 𑀧𑀳𑀸𑀦𑀁 𑀯𑀼𑀢𑁆𑀢𑀫𑁂𑀯𑀸𑀢𑀺 ‘‘𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄’’𑀢𑀺 𑀦 𑀯𑀼𑀢𑁆𑀢𑀁.

𑀩𑁆𑀭𑀳𑁆𑀫-𑀲𑀤𑁆𑀤𑁄 𑀇𑀥 𑀲𑁂𑀝𑁆𑀞𑀯𑀸𑀘𑀓𑁄, 𑀅𑀩𑁆𑀭𑀳𑁆𑀫𑀸𑀦𑀁 𑀦𑀺𑀳𑀻𑀦𑀸𑀦𑀁, 𑀅𑀩𑁆𑀭𑀳𑁆𑀫𑀁 𑀯𑀸 𑀦𑀺𑀳𑀻𑀦𑀁 𑀘𑀭𑀺𑀬𑀁 𑀯𑀼𑀢𑁆𑀢𑀺 𑀅𑀩𑁆𑀭𑀳𑁆𑀫𑀘𑀭𑀺𑀬𑀁, 𑀫𑁂𑀣𑀼𑀦𑀥𑀫𑁆𑀫𑁄. 𑀩𑁆𑀭𑀳𑁆𑀫𑀁 𑀲𑁂𑀝𑁆𑀞𑀁 𑀆𑀘𑀸𑀭𑀦𑁆𑀢𑀺 𑀫𑁂𑀣𑀼𑀦𑀯𑀺𑀭𑀢𑀺𑀁. 𑀦 𑀆𑀘𑀭𑀢𑀻𑀢𑀺 𑀅𑀦𑀸𑀘𑀸𑀭𑀻, [𑀆𑀭𑀸𑀘𑀸𑀭𑀻 (𑀤𑀻. 𑀦𑀺. 𑁧.𑁮)] 𑀢𑀤𑀸𑀘𑀸𑀭𑀯𑀺𑀭𑀳𑀺𑀢𑁄𑀢𑀺 𑀅𑀢𑁆𑀣𑁄, 𑀢𑁂𑀦𑀸𑀳 ‘‘𑀅𑀩𑁆𑀭𑀳𑁆𑀫𑀘𑀭𑀺𑀬𑀢𑁄 𑀤𑀽𑀭𑀘𑀸𑀭𑀻’’𑀢𑀺. 𑀤𑀽𑀭𑁄 𑀫𑁂𑀣𑀼𑀦𑀲𑀗𑁆𑀔𑀸𑀢𑁄 𑀆𑀘𑀸𑀭𑁄, 𑀲𑁄 𑀯𑀺𑀭𑀳𑁂𑀦 𑀬𑀲𑁆𑀲𑀢𑁆𑀣𑀻𑀢𑀺 𑀤𑀽𑀭𑀘𑀸𑀭𑀻, 𑀫𑁂𑀣𑀼𑀦𑀥𑀫𑁆𑀫𑀢𑁄 𑀯𑀸 𑀤𑀽𑀭𑁄 𑀳𑀼𑀢𑁆𑀯𑀸 𑀢𑀩𑁆𑀩𑀺𑀭𑀢𑀺𑀁 𑀆𑀘𑀭𑀢𑀻𑀢𑀺 𑀤𑀽𑀭𑀘𑀸𑀭𑀻𑀢𑀺𑀧𑀺 𑀯𑀝𑁆𑀝𑀢𑀺. 𑀫𑀺𑀣𑀼𑀦𑀸𑀦𑀁 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑁂𑀦 𑀲𑀤𑀺𑀲𑀸𑀦𑀁 𑀉𑀪𑀺𑀦𑁆𑀦𑀁 𑀅𑀬𑀁 𑀫𑁂𑀣𑀼𑀦𑁄𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑀯𑀲𑁂𑀦𑀸’’𑀢𑀺𑀆𑀤𑀺𑀦𑀸. 𑀅𑀲𑀢𑀁 𑀥𑀫𑁆𑀫𑁄 𑀆𑀘𑀸𑀭𑁄𑀢𑀺 𑀅𑀲𑀤𑁆𑀥𑀫𑁆𑀫𑁄, 𑀢𑀲𑁆𑀫𑀸. 𑀅𑀪𑁂𑀤𑀯𑁄𑀳𑀸𑀭𑁂𑀦 𑀕𑀸𑀫𑀲𑀤𑁆𑀤𑁂𑀦𑁂𑀯 𑀕𑀸𑀫𑀯𑀸𑀲𑀺𑀦𑁄 𑀕𑀳𑀺𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀕𑀸𑀫𑀯𑀸𑀲𑀻𑀦’’𑀦𑁆𑀢𑀺, 𑀕𑀸𑀫𑁂 𑀯𑀲𑀢𑀁 𑀥𑀫𑁆𑀫𑁄𑀢𑀺𑀧𑀺 𑀬𑀼𑀚𑁆𑀚𑀢𑀺. ‘‘𑀤𑀽𑀭𑀘𑀸𑀭𑀻’’𑀢𑀺 𑀘𑁂𑀢𑁆𑀣 𑀯𑀘𑀦𑀢𑁄, 𑀧𑀸𑀴𑀺𑀬𑀁 𑀯𑀸 ‘‘𑀫𑁂𑀣𑀼𑀦𑀸’’ 𑀢𑁆𑀯𑁂𑀯 𑀅𑀯𑀢𑁆𑀯𑀸 ‘‘𑀕𑀸𑀫𑀥𑀫𑁆𑀫𑀸’’𑀢𑀺𑀧𑀺 𑀯𑀼𑀢𑁆𑀢𑀢𑁆𑀢𑀸

‘‘𑀇𑀥 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀲𑀫𑁆𑀫𑀸 𑀩𑁆𑀭𑀳𑁆𑀫𑀘𑀸𑀭𑀻 𑀧𑀝𑀺𑀚𑀸𑀦𑀫𑀸𑀦𑁄 𑀦 𑀳𑁂𑀯 𑀔𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀅𑀧𑀺𑀘 𑀔𑁄 𑀫𑀸𑀢𑀼𑀕𑀸𑀫𑀲𑁆𑀲 𑀉𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀦𑁆𑀳𑀸𑀧𑀦𑀲𑀫𑁆𑀩𑀸𑀳𑀦𑀁 𑀲𑀸𑀤𑀺𑀬𑀢𑀺, 𑀲𑁄 𑀢𑀁 𑀅𑀲𑁆𑀲𑀸𑀤𑁂𑀢𑀺, 𑀢𑀁 𑀦𑀺𑀓𑀸𑀫𑁂𑀢𑀺, 𑀢𑁂𑀦 𑀘 𑀯𑀺𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀇𑀤𑀫𑁆𑀧𑀺 𑀔𑁄 𑀩𑁆𑀭𑀸𑀳𑁆𑀫𑀡 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀔𑀡𑁆𑀟𑀫𑁆𑀧𑀺 𑀙𑀺𑀤𑁆𑀤𑀫𑁆𑀧𑀺 ¶ 𑀲𑀩𑀮𑀫𑁆𑀧𑀺 𑀓𑀫𑁆𑀫𑀸𑀲𑀫𑁆𑀧𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀩𑁆𑀭𑀸𑀳𑁆𑀫𑀡 𑀅𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺 𑀲𑀁𑀬𑀼𑀢𑁆𑀢𑁄 𑀫𑁂𑀣𑀼𑀦𑁂𑀦 𑀲𑀁𑀬𑁄𑀕𑁂𑀦, 𑀦 𑀧𑀭𑀺𑀫𑀼𑀘𑁆𑀘𑀢𑀺 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 ¶ 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺, 𑀦 𑀧𑀭𑀺𑀫𑀼𑀘𑁆𑀘𑀢𑀺 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺.

𑀧𑀼𑀦 𑀘𑀧𑀭𑀁…𑀧𑁂… 𑀦𑀧𑀺 𑀫𑀸𑀢𑀼𑀕𑀸𑀫𑀲𑁆𑀲 𑀉𑀘𑁆𑀙𑀸𑀤𑀦𑀧𑀭𑀺𑀫𑀦𑁆𑀤𑀦𑀦𑁆𑀳𑀸𑀧𑀦𑀲𑀫𑁆𑀩𑀸𑀳𑀦𑀁 𑀲𑀸𑀤𑀺𑀬𑀢𑀺, 𑀅𑀧𑀺𑀘 𑀔𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀲𑀜𑁆𑀚𑀕𑁆𑀖𑀢𑀺 𑀲𑀁𑀓𑀻𑀴𑀢𑀺 𑀲𑀁𑀓𑁂𑀮𑀸𑀬𑀢𑀺…𑀧𑁂… 𑀦𑀧𑀺 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀲𑀜𑁆𑀚𑀕𑁆𑀖𑀢𑀺 𑀲𑀁𑀓𑀻𑀴𑀢𑀺 𑀲𑀁𑀓𑁂𑀮𑀸𑀬𑀢𑀺, 𑀅𑀧𑀺𑀘 𑀔𑁄 𑀫𑀸𑀢𑀼𑀕𑀸𑀫𑀲𑁆𑀲 𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀁 𑀉𑀧𑀦𑀺𑀚𑁆𑀛𑀸𑀬𑀢𑀺 𑀧𑁂𑀓𑁆𑀔𑀢𑀺…𑀧𑁂… 𑀦𑀧𑀺 𑀫𑀸𑀢𑀼𑀕𑀸𑀫𑀲𑁆𑀲 𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀁 𑀉𑀧𑀦𑀺𑀚𑁆𑀛𑀸𑀬𑀢𑀺 𑀧𑁂𑀓𑁆𑀔𑀢𑀺, 𑀅𑀧𑀺𑀘 𑀔𑁄 𑀫𑀸𑀢𑀼𑀕𑀸𑀫𑀲𑁆𑀲 𑀲𑀤𑁆𑀤𑀁 𑀲𑀼𑀡𑀸𑀢𑀺 𑀢𑀺𑀭𑁄𑀓𑀼𑀝𑁆𑀝𑀁 𑀯𑀸 𑀢𑀺𑀭𑁄𑀧𑀸𑀓𑀸𑀭𑀁 𑀯𑀸 𑀳𑀲𑀦𑁆𑀢𑀺𑀬𑀸 𑀯𑀸 𑀪𑀡𑀦𑁆𑀢𑀺𑀬𑀸 𑀯𑀸 𑀕𑀸𑀬𑀦𑁆𑀢𑀺𑀬𑀸 𑀯𑀸 𑀭𑁄𑀤𑀦𑁆𑀢𑀺𑀬𑀸 𑀯𑀸…𑀧𑁂… 𑀦𑀧𑀺 𑀫𑀸𑀢𑀼𑀕𑀸𑀫𑀲𑁆𑀲 𑀲𑀤𑁆𑀤𑀁 𑀲𑀼𑀡𑀸𑀢𑀺 𑀢𑀺𑀭𑁄𑀓𑀼𑀝𑁆𑀝𑀁 𑀯𑀸 𑀢𑀺𑀭𑁄𑀧𑀸𑀓𑀸𑀭𑀁 𑀯𑀸 𑀳𑀲𑀦𑁆𑀢𑀺𑀬𑀸 𑀯𑀸 𑀪𑀡𑀦𑁆𑀢𑀺𑀬𑀸 𑀯𑀸 𑀕𑀸𑀬𑀦𑁆𑀢𑀺𑀬𑀸 𑀯𑀸 𑀭𑁄𑀤𑀦𑁆𑀢𑀺𑀬𑀸 𑀯𑀸, 𑀅𑀧𑀺𑀘 𑀔𑁄 𑀬𑀸𑀦𑀺𑀲𑁆𑀲 𑀢𑀸𑀦𑀺 𑀧𑀼𑀩𑁆𑀩𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀳𑀲𑀺𑀢𑀮𑀧𑀺𑀢𑀓𑀻𑀴𑀺𑀢𑀸𑀦𑀺, 𑀢𑀸𑀦𑀺 𑀅𑀦𑀼𑀲𑁆𑀲𑀭𑀢𑀺…𑀧𑁂… 𑀦𑀧𑀺 𑀬𑀸𑀦𑀺𑀲𑁆𑀲 𑀢𑀸𑀦𑀺 𑀧𑀼𑀩𑁆𑀩𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀳𑀲𑀺𑀢𑀮𑀧𑀺𑀢𑀓𑀻𑀴𑀺𑀢𑀸𑀦𑀺, 𑀢𑀸𑀦𑀺 𑀅𑀦𑀼𑀲𑁆𑀲𑀭𑀢𑀺, 𑀅𑀧𑀺𑀘 𑀔𑁄 𑀧𑀲𑁆𑀲𑀢𑀺 𑀕𑀳𑀧𑀢𑀺𑀁 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀁 𑀯𑀸 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀁 𑀲𑀫𑀗𑁆𑀕𑀺𑀪𑀽𑀢𑀁 𑀧𑀭𑀺𑀘𑀸𑀭𑀬𑀫𑀸𑀦𑀁…𑀧𑁂… 𑀦𑀧𑀺 𑀧𑀲𑁆𑀲𑀢𑀺 𑀕𑀳𑀧𑀢𑀺𑀁 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀁 𑀯𑀸 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀁 𑀲𑀫𑀗𑁆𑀕𑀺𑀪𑀽𑀢𑀁 𑀧𑀭𑀺𑀘𑀸𑀭𑀬𑀫𑀸𑀦𑀁, 𑀅𑀧𑀺𑀘 𑀔𑁄 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀧𑀡𑀺𑀥𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺 ‘‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀢𑀧𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄 𑀯𑀸’’𑀢𑀺. 𑀲𑁄 𑀢𑀁 𑀅𑀲𑁆𑀲𑀸𑀤𑁂𑀢𑀺, 𑀢𑀁 𑀦𑀺𑀓𑀸𑀫𑁂𑀢𑀺, 𑀢𑁂𑀦 𑀘 𑀯𑀺𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀇𑀤𑀫𑁆𑀧𑀺 𑀔𑁄 𑀩𑁆𑀭𑀸𑀳𑁆𑀫𑀡 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀔𑀡𑁆𑀟𑀫𑁆𑀧𑀺 𑀙𑀺𑀤𑁆𑀤𑀫𑁆𑀧𑀺 𑀲𑀩𑀮𑀫𑁆𑀧𑀺 𑀓𑀫𑁆𑀫𑀸𑀲𑀫𑁆𑀧𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀩𑁆𑀭𑀸𑀳𑁆𑀫𑀡, 𑀅𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺 𑀲𑀁𑀬𑀼𑀢𑁆𑀢𑁄 𑀫𑁂𑀣𑀼𑀦𑁂𑀦 𑀲𑀁𑀬𑁄𑀕𑁂𑀦, 𑀦 𑀧𑀭𑀺𑀫𑀼𑀘𑁆𑀘𑀢𑀺 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺, 𑀦 𑀧𑀭𑀺𑀫𑀼𑀘𑁆𑀘𑀢𑀺 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀻’’𑀢𑀺 (𑀅. 𑀦𑀺. 𑁭.𑁫𑁦) 𑁋

𑀅𑀗𑁆𑀕𑀼𑀢𑁆𑀢𑀭𑀸𑀕𑀫𑁂 𑀲𑀢𑁆𑀢𑀓𑀦𑀺𑀧𑀸𑀢𑁂 𑀚𑀸𑀡𑀼𑀲𑁄𑀡𑀺𑀲𑀼𑀢𑁆𑀢𑁂 𑀆𑀕𑀢𑀸 𑀲𑀢𑁆𑀢𑀯𑀺𑀥𑀫𑁂𑀣𑀼𑀦𑀲𑀁𑀬𑁄𑀕𑀸𑀧𑀺 𑀧𑀝𑀺𑀯𑀺𑀭𑀢𑀺 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀇𑀥𑀸𑀧𑀺 𑀅𑀲𑀤𑁆𑀥𑀫𑁆𑀫𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁂𑀦 𑀓𑀸𑀬𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀫𑀕𑁆𑀕𑁂𑀦𑀫𑀕𑁆𑀕𑀧𑀝𑀺𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀅𑀩𑁆𑀭𑀳𑁆𑀫𑀘𑀭𑀺𑀬𑀁 ¶ . 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀓𑁆𑀓𑀫𑁂 𑀫𑀺𑀘𑁆𑀙𑀸𑀘𑀸𑀭𑁂 𑀧𑀦 𑀅𑀕𑀫𑀦𑀻𑀬𑀝𑁆𑀞𑀸𑀦𑀯𑀻𑀢𑀺𑀓𑁆𑀓𑀫𑀘𑁂𑀢𑀦𑀸 𑀬𑀣𑀸𑀯𑀼𑀢𑁆𑀢𑀸 𑀓𑀸𑀫𑁂𑀲𑀼 𑀫𑀺𑀘𑁆𑀙𑀸𑀘𑀸𑀭𑁄𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀢𑀢𑁆𑀣 ¶ 𑀅𑀕𑀫𑀦𑀻𑀬𑀝𑁆𑀞𑀸𑀦𑀁 𑀦𑀸𑀫 𑀧𑀼𑀭𑀺𑀲𑀸𑀦𑀁 𑀢𑀸𑀯 𑀫𑀸𑀢𑀼𑀭𑀓𑁆𑀔𑀺𑀢𑀸𑀤𑀬𑁄 𑀤𑀲, 𑀥𑀦𑀓𑁆𑀓𑀻𑀢𑀸𑀤𑀬𑁄 𑀤𑀲𑀸𑀢𑀺 𑀯𑀻𑀲𑀢𑀺 𑀇𑀢𑁆𑀣𑀺𑀬𑁄. 𑀇𑀢𑁆𑀣𑀻𑀲𑀼 𑀧𑀦 𑀤𑀲𑀦𑁆𑀦𑀁 𑀥𑀦𑀓𑁆𑀓𑀻𑀢𑀸𑀤𑀻𑀦𑀁, 𑀲𑀸𑀭𑀓𑁆𑀔𑀲𑀧𑀭𑀺𑀤𑀡𑁆𑀟𑀸𑀦𑀜𑁆𑀘 𑀯𑀲𑁂𑀦 𑀤𑁆𑀯𑀸𑀤𑀲𑀦𑁆𑀦𑀁 𑀅𑀜𑁆𑀜𑁂 𑀧𑀼𑀭𑀺𑀲𑀸. 𑀬𑁂 𑀧𑀦𑁂𑀓𑁂 𑀯𑀤𑀦𑁆𑀢𑀺 ‘‘𑀘𑀢𑁆𑀢𑀸𑀭𑁄 𑀓𑀸𑀫𑁂𑀲𑀼 𑀫𑀺𑀘𑁆𑀙𑀸𑀘𑀸𑀭𑀸 𑀅𑀓𑀸𑀮𑁄, 𑀅𑀤𑁂𑀲𑁄, 𑀅𑀦𑀗𑁆𑀕𑁄, 𑀅𑀥𑀫𑁆𑀫𑁄 𑀘𑀸’’𑀢𑀺, 𑀢𑁂 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀫𑀢𑁆𑀢𑀁 𑀧𑀢𑀺 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀯𑀤𑀦𑁆𑀢𑀺. 𑀦 𑀳𑀺 𑀲𑀸𑀕𑀫𑀦𑀻𑀬𑀝𑁆𑀞𑀸𑀦𑁂 𑀧𑀯𑀢𑁆𑀢𑀸 𑀯𑀺𑀧𑁆𑀧𑀝𑀺𑀧𑀢𑁆𑀢𑀺 𑀫𑀺𑀘𑁆𑀙𑀸𑀘𑀸𑀭𑁄 𑀦𑀸𑀫 𑀲𑀫𑁆𑀪𑀯𑀢𑀺. 𑀲𑀸 𑀧𑀦𑁂𑀲𑀸 𑀤𑀼𑀯𑀺𑀥𑀸𑀧𑀺 𑀯𑀺𑀧𑁆𑀧𑀝𑀺𑀧𑀢𑁆𑀢𑀺 𑀕𑀼𑀡𑀯𑀺𑀭𑀳𑀺𑀢𑁂 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀕𑀼𑀡𑀲𑀫𑁆𑀧𑀦𑁆𑀦𑁂 𑀫𑀳𑀸𑀲𑀸𑀯𑀚𑁆𑀚𑀸. 𑀕𑀼𑀡𑀭𑀳𑀺𑀢𑁂𑀧𑀺 𑀘 𑀅𑀪𑀺𑀪𑀯𑀺𑀢𑁆𑀯𑀸 𑀯𑀺𑀧𑁆𑀧𑀝𑀺𑀧𑀢𑁆𑀢𑀺 𑀫𑀳𑀸𑀲𑀸𑀯𑀚𑁆𑀚𑀸, 𑀉𑀪𑀺𑀦𑁆𑀦𑀁 𑀲𑀫𑀸𑀦𑀘𑁆𑀙𑀦𑁆𑀤𑀪𑀸𑀯𑁂 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀲𑀫𑀸𑀦𑀘𑁆𑀙𑀦𑁆𑀤𑀪𑀸𑀯𑁂𑀧𑀺 𑀓𑀺𑀮𑁂𑀲𑀸𑀦𑀁, 𑀉𑀧𑀓𑁆𑀓𑀫𑀸𑀦𑀜𑁆𑀘 𑀫𑀼𑀤𑀼𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀢𑀺𑀩𑁆𑀩𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀲𑁆𑀲 𑀧𑀦 𑀅𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀤𑁆𑀯𑁂 𑀲𑀫𑁆𑀪𑀸𑀭𑀸 𑀲𑁂𑀯𑁂𑀢𑀼𑀓𑀸𑀫𑀢𑀸𑀘𑀺𑀢𑁆𑀢𑀁, 𑀫𑀕𑁆𑀕𑁂𑀦𑀫𑀕𑁆𑀕𑀧𑀝𑀺𑀧𑀢𑁆𑀢𑀻𑀢𑀺. 𑀫𑀺𑀘𑁆𑀙𑀸𑀘𑀸𑀭𑀲𑁆𑀲 𑀧𑀦 𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸 𑀅𑀕𑀫𑀦𑀻𑀬𑀯𑀢𑁆𑀣𑀼, 𑀢𑀲𑁆𑀫𑀺𑀁 𑀲𑁂𑀯𑀦𑀘𑀺𑀢𑁆𑀢𑀁, 𑀲𑁂𑀯𑀦𑀸𑀧𑀬𑁄𑀕𑁄, 𑀫𑀕𑁆𑀕𑁂𑀦𑀫𑀕𑁆𑀕𑀧𑀝𑀺𑀧𑀢𑁆𑀢𑀺𑀅𑀥𑀺𑀯𑀸𑀲𑀦𑀦𑁆𑀢𑀺 𑀏𑀯𑀁 𑀅𑀝𑁆𑀞𑀓𑀣𑀸𑀲𑀼 ‘‘𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸’’𑀢𑀺 (𑀥. 𑀲. 𑀅𑀓𑀼𑀲𑀮𑀓𑀫𑁆𑀫𑀧𑀣𑀓𑀣𑀸; 𑀫. 𑀦𑀺. 𑀅𑀝𑁆𑀞. 𑁧.𑁧.𑁮𑁯; 𑀲𑀁. 𑀦𑀺. 𑀅𑀝𑁆𑀞. 𑁨.𑁧𑁦𑁯-𑁧𑁧𑁧) 𑀯𑀼𑀢𑁆𑀢𑀢𑁆𑀢𑀸 𑀅𑀪𑀺𑀪𑀯𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀦𑁂 𑀫𑀕𑁆𑀕𑁂𑀦𑀫𑀕𑁆𑀕𑀧𑀝𑀺𑀧𑀢𑁆𑀢𑀺𑀅𑀥𑀺𑀯𑀸𑀲𑀦𑁂 𑀲𑀢𑀺𑀧𑀺 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀲𑁂𑀯𑀦𑀸𑀪𑀺𑀲𑀦𑁆𑀥𑀺𑀧𑀬𑁄𑀕𑀸𑀪𑀸𑀯𑀢𑁄 𑀅𑀪𑀺𑀪𑀼𑀬𑁆𑀬𑀫𑀸𑀦𑀲𑁆𑀲 𑀫𑀺𑀘𑁆𑀙𑀸𑀘𑀸𑀭𑁄 𑀦 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺 𑀓𑁂𑀘𑀺. 𑀲𑁂𑀯𑀦𑀘𑀺𑀢𑁆𑀢𑁂 𑀲𑀢𑀺 𑀧𑀬𑁄𑀕𑀸𑀪𑀸𑀯𑁄 𑀦 𑀧𑀫𑀸𑀡𑀁 𑀇𑀢𑁆𑀣𑀺𑀬𑀸 𑀲𑁂𑀯𑀦𑀧𑀬𑁄𑀕𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀅𑀪𑀸𑀯𑀢𑁄, 𑀧𑀼𑀭𑀺𑀲𑀲𑁆𑀲𑁂𑀯 𑀬𑁂𑀪𑀼𑀬𑁆𑀬𑁂𑀦 𑀲𑁂𑀯𑀦𑀧𑀬𑁄𑀕𑁄 𑀳𑁄𑀢𑀻𑀢𑀺 𑀇𑀢𑁆𑀣𑀺𑀬𑀸 𑀧𑀼𑀭𑁂𑀢𑀭𑀁 𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀬 [𑀦𑀺𑀧𑀦𑁆𑀦𑀸𑀬 (𑀥. 𑀲. 𑀅𑀦𑀼𑀝𑀻. 𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸)] 𑀫𑀺𑀘𑁆𑀙𑀸𑀘𑀸𑀭𑁄 𑀦 𑀲𑀺𑀬𑀸𑀢𑀺 𑀆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀧𑀼𑀭𑀺𑀲𑀲𑁆𑀲 𑀯𑀲𑁂𑀦 𑀉𑀓𑁆𑀓𑀁𑀲𑀢𑁄 ‘‘𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀳𑀺 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀓𑀺𑀘𑁆𑀘𑀓𑀭𑀡𑀓𑀸𑀮𑁂 𑀧𑀼𑀭𑀺𑀲𑀲𑁆𑀲𑀸𑀧𑀺 𑀲𑁂𑀯𑀦𑀸𑀧𑀬𑁄𑀕𑀸𑀪𑀸𑀯𑀢𑁄 𑀫𑀺𑀘𑁆𑀙𑀸𑀘𑀸𑀭𑁄 𑀦 𑀲𑀺𑀬𑀸𑀢𑀺 𑀯𑀤𑀦𑁆𑀢𑀺 𑀏𑀓𑁂.

𑀇𑀤𑀁 𑀧𑀦𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁 𑁋 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀧𑀯𑀢𑁆𑀢𑀺𑀢𑀲𑁆𑀲 𑀲𑁂𑀯𑀦𑀸𑀧𑀬𑁄𑀕𑁂𑀦𑁂𑀯 𑀲𑁂𑀯𑀦𑀘𑀺𑀢𑁆𑀢𑀢𑀸𑀲𑀺𑀤𑁆𑀥𑀺𑀢𑁄 𑀅𑀕𑀫𑀦𑀻𑀬𑀯𑀢𑁆𑀣𑀼, 𑀲𑁂𑀯𑀦𑀸𑀧𑀬𑁄𑀕𑁄, 𑀫𑀕𑁆𑀕𑁂𑀦𑀫𑀕𑁆𑀕𑀧𑀝𑀺𑀧𑀢𑁆𑀢𑀺𑀅𑀥𑀺𑀯𑀸𑀲𑀦𑀦𑁆𑀢𑀺 𑀢𑀬𑁄, 𑀩𑀮𑀓𑁆𑀓𑀸𑀭𑁂𑀦 𑀧𑀯𑀢𑁆𑀢𑀺𑀢𑀲𑁆𑀲 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀲𑁂𑀯𑀦𑀸𑀪𑀺𑀲𑀦𑁆𑀥𑀺𑀧𑀬𑁄𑀕𑀸𑀪𑀸𑀯𑀢𑁄 𑀅𑀕𑀫𑀦𑀻𑀬𑀯𑀢𑁆𑀣𑀼, 𑀢𑀲𑁆𑀫𑀺𑀁 𑀲𑁂𑀯𑀦𑀘𑀺𑀢𑁆𑀢𑀁 ¶ , 𑀫𑀕𑁆𑀕𑁂𑀦𑀫𑀕𑁆𑀕𑀧𑀝𑀺𑀧𑀢𑁆𑀢𑀺𑀅𑀥𑀺𑀯𑀸𑀲𑀦𑀦𑁆𑀢𑀺 𑀢𑀬𑁄, 𑀅𑀦𑀯𑀲𑁂𑀲𑀕𑁆𑀕𑀳𑀡𑁂𑀦 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀘𑀢𑁆𑀢𑀸𑀭𑁄𑀢𑀺, 𑀢𑀫𑁆𑀧𑀺 𑀓𑁂𑀘𑀺𑀬𑁂𑀯 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀪𑀺𑀥𑀫𑁆𑀫𑀸𑀦𑀼𑀝𑀻𑀓𑀸𑀬𑀁 (𑀥. 𑀲. 𑀅𑀦𑀼𑀝𑀻. 𑀅𑀓𑀼𑀲𑀮𑀓𑀫𑁆𑀫𑀧𑀣𑀓𑀣𑀸𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁. 𑀏𑀓𑁄 𑀧𑀬𑁄𑀕𑁄 𑀲𑀸𑀳𑀢𑁆𑀣𑀺𑀓𑁄𑀯.

𑁯. 𑀫𑀼𑀲𑀸𑀢𑀺 ¶ 𑀢𑀢𑀺𑀬𑀦𑁆𑀢𑁄, 𑀤𑀼𑀢𑀺𑀬𑀦𑁆𑀢𑁄 𑀯𑀸 𑀦𑀺𑀧𑀸𑀢𑁄 𑀫𑀺𑀘𑁆𑀙𑀸𑀧𑀭𑀺𑀬𑀸𑀬𑁄, 𑀓𑀺𑀭𑀺𑀬𑀸𑀧𑀥𑀸𑀦𑁄𑀢𑀺 𑀆𑀳 ‘‘𑀯𑀺𑀲𑀁𑀯𑀸𑀤𑀦𑀧𑀼𑀭𑁂𑀓𑁆𑀔𑀸𑀭𑀲𑁆𑀲𑀸’’𑀢𑀺𑀆𑀤𑀺. 𑀧𑀼𑀭𑁂 𑀓𑀭𑀡𑀁 𑀧𑀼𑀭𑁂𑀓𑁆𑀔𑀸𑀭𑁄, 𑀯𑀺𑀲𑀁𑀯𑀸𑀤𑀦𑀲𑁆𑀲 𑀧𑀼𑀭𑁂𑀓𑁆𑀔𑀸𑀭𑁄 𑀬𑀲𑁆𑀲𑀸𑀢𑀺 𑀢𑀣𑀸, 𑀢𑀲𑁆𑀲 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀣𑀪𑀜𑁆𑀚𑀦𑀓𑁄’’𑀢𑀺 𑀯𑀼𑀢𑁆𑀢𑀁, 𑀧𑀭𑀲𑁆𑀲 𑀳𑀺𑀢𑀯𑀺𑀦𑀸𑀲𑀓𑁄𑀢𑀺 𑀅𑀢𑁆𑀣𑁄. 𑀫𑀼𑀲𑀸𑀯𑀸𑀤𑁄 𑀧𑀦 𑀲𑀲𑀦𑁆𑀢𑀓𑀲𑁆𑀲 𑀅𑀤𑀸𑀢𑀼𑀓𑀸𑀫𑀢𑀸𑀬, 𑀳𑀲𑀸𑀥𑀺𑀧𑁆𑀧𑀸𑀬𑁂𑀦 𑀘 𑀪𑀯𑀢𑀺. 𑀯𑀘𑀲𑀸 𑀓𑀢𑀸 𑀯𑀸𑀬𑀸𑀫𑀧𑁆𑀧𑀥𑀸𑀦𑀸 𑀓𑀺𑀭𑀺𑀬𑀸 𑀯𑀘𑀻𑀧𑀬𑁄𑀕𑁄. 𑀢𑀣𑀸 𑀓𑀸𑀬𑁂𑀦 𑀓𑀢𑀸 𑀓𑀸𑀬𑀧𑀬𑁄𑀕𑁄. 𑀯𑀺𑀲𑀁𑀯𑀸𑀤𑀦𑀸𑀥𑀺𑀧𑁆𑀧𑀸𑀬𑁄 𑀧𑀼𑀩𑁆𑀩𑀪𑀸𑀕𑀓𑁆𑀔𑀡𑁂, 𑀢𑀗𑁆𑀔𑀡𑁂 𑀘. 𑀯𑀼𑀢𑁆𑀢𑀜𑁆𑀳𑀺 ‘‘𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 ‘𑀫𑀼𑀲𑀸 𑀪𑀡𑀺𑀲𑁆𑀲’𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 ‘𑀫𑀼𑀲𑀸 𑀪𑀡𑀸𑀫𑀻’𑀢𑀺’’ (𑀧𑀸𑀭𑀸. 𑁨𑁦𑁦; 𑀧𑀸𑀘𑀺. 𑁪) 𑀏𑀢𑀤𑁂𑀯 𑀳𑀺 𑀤𑁆𑀯𑀬𑀁 𑀅𑀗𑁆𑀕𑀪𑀽𑀢𑀁. 𑀇𑀢𑀭𑀁 ‘‘𑀪𑀡𑀺𑀢𑀲𑁆𑀲 𑀳𑁄𑀢𑀺 ‘𑀫𑀼𑀲𑀸 𑀫𑀬𑀸 𑀪𑀡𑀺𑀢’𑀦𑁆𑀢𑀺’’ (𑀧𑀸𑀭𑀸. 𑁨𑁦𑁦; 𑀧𑀸𑀘𑀺. 𑁪) 𑀯𑀼𑀢𑁆𑀢𑀁 𑀧𑀦 𑀳𑁄𑀢𑀼 𑀯𑀸, 𑀫𑀸 𑀯𑀸, 𑀅𑀓𑀸𑀭𑀡𑀫𑁂𑀢𑀁. 𑀅𑀲𑁆𑀲𑀸𑀢𑀺 𑀯𑀺𑀲𑀁𑀯𑀸𑀤𑀓𑀲𑁆𑀲. ‘‘𑀘𑁂𑀢𑀦𑀸’’𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀯𑀺𑀲𑀁 𑀯𑀸𑀤𑁂𑀢𑀺 𑀏𑀢𑁂𑀦𑀸𑀢𑀺 𑀯𑀺𑀲𑀁𑀯𑀸𑀤𑀦𑀁, 𑀢𑀤𑁂𑀯 𑀓𑀸𑀬𑀯𑀘𑀻𑀧𑀬𑁄𑀕𑁄, 𑀢𑀁 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀢𑀣𑀸, 𑀇𑀫𑀺𑀦𑀸 𑀫𑀼𑀲𑀸𑀲𑀗𑁆𑀔𑀸𑀢𑁂𑀦 𑀓𑀸𑀬𑀯𑀘𑀻𑀧𑀬𑁄𑀕𑁂𑀦, 𑀫𑀼𑀲𑀸𑀲𑀗𑁆𑀔𑀸𑀢𑀁 𑀯𑀸 𑀓𑀸𑀬𑀯𑀘𑀻𑀧𑀬𑁄𑀕𑀁 𑀯𑀤𑀢𑀺 𑀯𑀺𑀜𑁆𑀜𑀸𑀧𑁂𑀢𑀺, 𑀲𑀫𑀼𑀝𑁆𑀞𑀸𑀧𑁂𑀢𑀺 𑀯𑀸 𑀏𑀢𑁂𑀦𑀸𑀢𑀺 𑀫𑀼𑀲𑀸𑀯𑀸𑀤𑁄𑀢𑀺 𑀅𑀢𑁆𑀣𑀫𑀸𑀳. ‘‘𑀯𑀸𑀤𑁄’’𑀢𑀺 𑀯𑀼𑀢𑁆𑀢𑁂 𑀯𑀺𑀲𑀁𑀯𑀸𑀤𑀦𑀘𑀺𑀢𑁆𑀢𑀁, 𑀢𑀚𑁆𑀚𑁄 𑀯𑀸𑀬𑀸𑀫𑁄, 𑀧𑀭𑀲𑁆𑀲 𑀢𑀤𑀢𑁆𑀣𑀯𑀺𑀚𑀸𑀦𑀦𑀦𑁆𑀢𑀺 𑀮𑀓𑁆𑀔𑀡𑀢𑁆𑀢𑀬𑀁 𑀯𑀺𑀪𑀸𑀯𑀺𑀢𑀫𑁂𑀯 𑀳𑁄𑀢𑀺.

‘‘𑀅𑀢𑀣𑀁 𑀯𑀢𑁆𑀣𑀼’’𑀦𑁆𑀢𑀺 𑀮𑀓𑁆𑀔𑀡𑀁 𑀧𑀦 𑀅𑀯𑀺𑀪𑀸𑀯𑀺𑀢𑀫𑁂𑀯 𑀫𑀼𑀲𑀸-𑀲𑀤𑁆𑀤𑀲𑁆𑀲 𑀧𑀬𑁄𑀕𑀲𑀗𑁆𑀔𑀸𑀢𑀓𑀺𑀭𑀺𑀬𑀸𑀯𑀸𑀘𑀓𑀢𑁆𑀢𑀸. 𑀢𑀲𑁆𑀫𑀸 𑀇𑀥 𑀦𑀬𑁂 𑀮𑀓𑁆𑀔𑀡𑀲𑁆𑀲 𑀅𑀩𑁆𑀬𑀸𑀧𑀺𑀢𑀢𑀸𑀬, 𑀫𑀼𑀲𑀸-𑀲𑀤𑁆𑀤𑀲𑁆𑀲 𑀘 𑀯𑀺𑀲𑀁𑀯𑀸𑀤𑀺𑀢𑀩𑁆𑀩𑀢𑁆𑀣𑀯𑀸𑀘𑀓𑀢𑀸𑀲𑀫𑁆𑀪𑀯𑀢𑁄 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀫𑀼𑀲𑀸𑀯𑀸𑀤𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀭𑁄 𑀦𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀮𑀓𑁆𑀔𑀡𑀢𑁄𑀢𑀺 𑀲𑀪𑀸𑀯𑀢𑁄. 𑀢𑀣𑀸𑀢𑀺 𑀢𑁂𑀦 𑀢𑀣𑀸𑀓𑀸𑀭𑁂𑀦. 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑁄 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀺𑀓𑀸. 𑀇𑀫𑀲𑁆𑀫𑀺𑀁 𑀧𑀦 𑀦𑀬𑁂 𑀫𑀼𑀲𑀸 𑀯𑀢𑁆𑀣𑀼 𑀯𑀤𑀻𑀬𑀢𑀺 𑀯𑀼𑀘𑁆𑀘𑀢𑀺 𑀏𑀢𑁂𑀦𑀸𑀢𑀺 𑀫𑀼𑀲𑀸𑀯𑀸𑀤𑁄𑀢𑀺 𑀦𑀺𑀩𑁆𑀩𑀘𑀦𑀁 𑀤𑀝𑁆𑀞𑀩𑁆𑀩𑀁. ‘‘𑀲𑁄 𑀬𑀫𑀢𑁆𑀣’’𑀦𑁆𑀢𑀺𑀆𑀤𑀺𑀦𑀸 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀲𑁆𑀲 𑀯𑀢𑁆𑀣𑀼𑀯𑀲𑁂𑀦 𑀅𑀧𑁆𑀧𑀲𑀸𑀯𑀚𑁆𑀚𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑀫𑀸𑀳. 𑀬𑀲𑁆𑀲 𑀅𑀢𑁆𑀣𑀁 𑀪𑀜𑁆𑀚𑀢𑀺, 𑀢𑀲𑁆𑀲 𑀅𑀧𑁆𑀧𑀕𑀼𑀡𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑁄 ¶ , 𑀫𑀳𑀸𑀕𑀼𑀡𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑁄𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑁂 𑀯𑀺𑀬 𑀕𑀼𑀡𑀯𑀲𑁂𑀦𑀸𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀓𑀺𑀮𑁂𑀲𑀸𑀦𑀁 𑀫𑀼𑀤𑀼𑀢𑀺𑀩𑁆𑀩𑀢𑀸𑀯𑀲𑁂𑀦𑀸𑀧𑀺 𑀅𑀧𑁆𑀧𑀲𑀸𑀯𑀚𑁆𑀚𑀫𑀳𑀸𑀲𑀸𑀯𑀚𑁆𑀚𑀢𑀸 𑀮𑀩𑁆𑀪𑀢𑀺𑀬𑁂𑀯.

‘‘𑀅𑀧𑀺𑀘𑀸’’𑀢𑀺𑀆𑀤𑀺𑀦𑀸 𑀫𑀼𑀲𑀸𑀯𑀸𑀤𑀲𑀸𑀫𑀜𑁆𑀜𑀲𑁆𑀲𑀸𑀧𑀺 𑀅𑀧𑁆𑀧𑀲𑀸𑀯𑀚𑁆𑀚𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀅𑀤𑀸𑀢𑀼𑀓𑀸𑀫𑀢𑀸𑀬𑀸𑀢𑀺, 𑀳𑀺 𑀳𑀲𑀸𑀥𑀺𑀧𑁆𑀧𑀸𑀬𑁂𑀦𑀸𑀢𑀺 𑀘 𑀫𑀼𑀲𑀸𑀯𑀸𑀤𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁. 𑀉𑀪𑀬𑀢𑁆𑀣𑀸𑀧𑀺 𑀘 𑀯𑀺𑀲𑀁𑀯𑀸𑀤𑀦𑀧𑀼𑀭𑁂𑀓𑁆𑀔𑀸𑀭𑁂𑀦𑁂𑀯 𑀫𑀼𑀲𑀸𑀯𑀸𑀤𑁄, 𑀦 𑀧𑀦 𑀯𑀘𑀦𑀫𑀢𑁆𑀢𑁂𑀦. 𑀢𑀢𑁆𑀣 𑀧𑀦 𑀘𑁂𑀢𑀦𑀸 𑀩𑀮𑀯𑀢𑀻 𑀦 𑀳𑁄𑀢𑀻𑀢𑀺 𑀅𑀧𑁆𑀧𑀲𑀸𑀯𑀚𑁆𑀚𑀢𑀸 𑀯𑀼𑀢𑁆𑀢𑀸. 𑀦𑀤𑀻 𑀫𑀜𑁆𑀜𑁂𑀢𑀺 𑀦𑀤𑀻 𑀯𑀺𑀬. 𑀅𑀧𑁆𑀧𑀢𑀸𑀬 𑀊𑀦𑀲𑁆𑀲 𑀅𑀢𑁆𑀣𑀲𑁆𑀲 𑀧𑀽𑀭𑀡𑀯𑀲𑁂𑀦 𑀧𑀯𑀢𑁆𑀢𑀸 𑀓𑀣𑀸 𑀧𑀽𑀭𑀡𑀓𑀣𑀸, 𑀩𑀳𑀼𑀢𑀭𑀪𑀸𑀯𑁂𑀦 𑀯𑀼𑀢𑁆𑀢𑀓𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑁂𑀦𑀸𑀓𑀸𑀭𑁂𑀦 ¶ 𑀚𑀸𑀢𑁄 𑀢𑀚𑁆𑀚𑁄, 𑀢𑀲𑁆𑀲 𑀯𑀺𑀲𑀁𑀯𑀸𑀤𑀦𑀲𑁆𑀲 𑀅𑀦𑀼𑀭𑀽𑀧𑁄𑀢𑀺 𑀅𑀢𑁆𑀣𑁄. 𑀯𑀸𑀬𑀸𑀫𑁄𑀢𑀺 𑀯𑀸𑀬𑀸𑀫𑀲𑀻𑀲𑁂𑀦 𑀧𑀬𑁄𑀕𑀫𑀸𑀳. 𑀯𑀻𑀭𑀺𑀬𑀧𑁆𑀧𑀥𑀸𑀦𑀸 𑀳𑀺 𑀓𑀸𑀬𑀺𑀓𑀯𑀸𑀘𑀲𑀺𑀓𑀓𑀺𑀭𑀺𑀬𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸, 𑀦 𑀯𑀸𑀬𑀸𑀫𑀫𑀢𑁆𑀢𑀁. 𑀯𑀺𑀲𑀁𑀯𑀸𑀤𑀦𑀸𑀥𑀺𑀧𑁆𑀧𑀸𑀬𑁂𑀦 𑀧𑀬𑁄𑀕𑁂 𑀓𑀢𑁂𑀧𑀺 𑀅𑀧𑀭𑁂𑀦 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀅𑀯𑀺𑀜𑁆𑀜𑀸𑀢𑁂 𑀯𑀺𑀲𑀁𑀯𑀸𑀤𑀦𑀲𑁆𑀲 𑀅𑀲𑀺𑀚𑁆𑀛𑀦𑀢𑁄 𑀧𑀭𑀲𑁆𑀲 𑀢𑀤𑀢𑁆𑀣𑀯𑀺𑀚𑀸𑀦𑀦𑀫𑁆𑀧𑀺 𑀏𑀓𑀲𑀫𑁆𑀪𑀸𑀭𑀪𑀸𑀯𑁂𑀦 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀅𑀪𑀽𑀢𑀯𑀘𑀦𑀁, 𑀯𑀺𑀲𑀁𑀯𑀸𑀤𑀦𑀘𑀺𑀢𑁆𑀢𑀁, 𑀧𑀭𑀲𑁆𑀲 𑀢𑀤𑀢𑁆𑀣𑀯𑀺𑀚𑀸𑀦𑀦’’𑀦𑁆𑀢𑀺 𑀢𑀬𑁄 𑀲𑀫𑁆𑀪𑀸𑀭𑁂 𑀯𑀤𑀦𑁆𑀢𑀺. 𑀓𑀸𑀬𑀺𑀓𑁄𑀯 𑀲𑀸𑀳𑀢𑁆𑀣𑀺𑀓𑁄𑀢𑀺 𑀓𑁄𑀘𑀺 𑀫𑀜𑁆𑀜𑁂𑀬𑁆𑀬𑀸𑀢𑀺 𑀢𑀁 𑀦𑀺𑀯𑀸𑀭𑀡𑀢𑁆𑀣𑀁 ‘‘𑀲𑁄 𑀓𑀸𑀬𑁂𑀦 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀸𑀬 𑀘𑁂 𑀓𑀺𑀭𑀺𑀬𑀸𑀬 𑀧𑀭𑁄 𑀢𑀫𑀢𑁆𑀣𑀁 𑀚𑀸𑀦𑀸𑀢𑀻𑀢𑀺 𑀢𑀗𑁆𑀔𑀡𑁂 𑀯𑀸 𑀤𑀦𑁆𑀥𑀢𑀸𑀬 𑀯𑀺𑀘𑀸𑀭𑁂𑀢𑁆𑀯𑀸 𑀧𑀘𑁆𑀙𑀸 𑀯𑀸 𑀚𑀸𑀦𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀬𑀦𑁆𑀢𑀺 𑀯𑀺𑀲𑀁𑀯𑀸𑀤𑀓𑁄. 𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀧𑀺𑀓𑀘𑁂𑀢𑀦𑀸𑀓𑁆𑀔𑀡𑁂𑀬𑁂𑀯𑀸𑀢𑀺 𑀓𑀸𑀬𑀺𑀓𑀯𑀸𑀘𑀲𑀺𑀓𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀧𑀺𑀓𑀸𑀬 𑀘𑁂𑀢𑀦𑀸𑀬 𑀧𑀯𑀢𑁆𑀢𑀓𑁆𑀔𑀡𑁂 𑀏𑀯. 𑀫𑀼𑀲𑀸𑀯𑀸𑀤𑀓𑀫𑁆𑀫𑀼𑀦𑀸 𑀩𑀚𑁆𑀛𑀢𑀻𑀢𑀺 𑀯𑀺𑀲𑀁𑀯𑀸𑀤𑀦𑀘𑁂𑀢𑀦𑀸𑀲𑀗𑁆𑀔𑀸𑀢𑁂𑀦 𑀫𑀼𑀲𑀸𑀯𑀸𑀤𑀓𑀫𑁆𑀫𑀼𑀦𑀸 𑀲𑀫𑁆𑀩𑀦𑁆𑀥𑀻𑀬𑀢𑀺, 𑀅𑀮𑁆𑀮𑀻𑀬𑀢𑀻𑀢𑀺 𑀯𑀸 𑀅𑀢𑁆𑀣𑁄. 𑀲𑀘𑁂𑀧𑀺 𑀤𑀦𑁆𑀥𑀢𑀸𑀬 𑀯𑀺𑀘𑀸𑀭𑁂𑀢𑁆𑀯𑀸 𑀧𑀘𑁆𑀙𑀸 𑀘𑀺𑀭𑁂𑀦𑀸𑀧𑀺 𑀧𑀭𑁄 𑀢𑀤𑀢𑁆𑀣𑀁 𑀚𑀸𑀦𑀸𑀢𑀺, 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀬 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀢𑀗𑁆𑀔𑀡𑁂𑀬𑁂𑀯 𑀩𑀚𑁆𑀛𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀏𑀓𑁄 𑀧𑀬𑁄𑀕𑁄 𑀲𑀸𑀳𑀢𑁆𑀣𑀺𑀓𑁄𑀯𑀸’’𑀢𑀺 𑀇𑀤𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀲𑀼 𑀆𑀕𑀢𑀦𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀇𑀥 𑀲𑀗𑁆𑀕𑀳𑀝𑁆𑀞𑀓𑀣𑀸𑀬 𑀲𑀗𑁆𑀕𑀳𑀓𑀸𑀭𑀲𑁆𑀲 𑀅𑀢𑁆𑀢𑀦𑁄 𑀫𑀢𑀺𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀬𑀣𑀸…𑀧𑁂… 𑀢𑀣𑀸’’𑀢𑀺 𑀏𑀢𑁂𑀦 𑀲𑀸𑀳𑀢𑁆𑀣𑀺𑀓𑁄 𑀯𑀺𑀬 𑀆𑀡𑀢𑁆𑀢𑀺𑀓𑀸𑀤𑀬𑁄𑀧𑀺 𑀕𑀳𑁂𑀢𑀩𑁆𑀩𑀸, 𑀅𑀕𑁆𑀕𑀳𑀡𑁂 𑀓𑀸𑀭𑀡𑀁 𑀦𑀢𑁆𑀣𑀺 𑀧𑀭𑀲𑁆𑀲 𑀯𑀺𑀲𑀁𑀯𑀸𑀤𑀦𑀪𑀸𑀯𑁂𑀦 𑀢𑀲𑁆𑀲𑀤𑀺𑀲𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺 ¶ , ‘‘𑀇𑀤𑀫𑀲𑁆𑀲…𑀧𑁂… 𑀆𑀡𑀸𑀧𑁂𑀦𑁆𑀢𑁄𑀧𑀻’’𑀢𑀺 𑀆𑀡𑀢𑁆𑀢𑀺𑀓𑀲𑁆𑀲 𑀕𑀳𑀡𑁂 𑀓𑀸𑀭𑀡𑀁, ‘‘𑀧𑀡𑁆𑀡𑀁…𑀧𑁂… 𑀦𑀺𑀲𑁆𑀲𑀚𑁆𑀚𑀦𑁆𑀢𑁄𑀧𑀻’’𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀲𑁆𑀲, ‘‘𑀅𑀬𑀫𑀢𑁆𑀣𑁄…𑀧𑁂… 𑀞𑀧𑁂𑀦𑁆𑀢𑁄𑀧𑀻’’𑀢𑀺 𑀣𑀸𑀯𑀭𑀲𑁆𑀲. 𑀬𑀲𑁆𑀫𑀸 𑀯𑀺𑀲𑀁𑀯𑀸𑀤𑁂𑀢𑀻𑀢𑀺 𑀲𑀩𑁆𑀩𑀢𑁆𑀣 𑀲𑀫𑁆𑀩𑀦𑁆𑀥𑁄. 𑀧𑀡𑁆𑀡𑀁 𑀮𑀺𑀔𑀺𑀢𑁆𑀯𑀸𑀢𑀺 𑀢𑀸𑀮𑀸𑀤𑀻𑀦𑀁 𑀧𑀡𑁆𑀡𑀁 𑀅𑀓𑁆𑀔𑀭𑁂𑀦 𑀮𑀺𑀔𑀺𑀢𑁆𑀯𑀸, 𑀧𑀡𑁆𑀡𑀦𑁆𑀢𑀺 𑀯𑀸 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀺𑀭𑁄𑀓𑀼𑀝𑁆𑀝𑀸𑀤𑀻𑀲𑀽’’𑀢𑀺 [𑀓𑀼𑀟𑁆𑀟𑀸𑀤𑀻𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁧.𑁮)] 𑀧𑀡𑁆𑀡𑁂 𑀅𑀓𑁆𑀔𑀭𑀁 𑀮𑁂𑀔𑀦𑀺𑀬𑀸 𑀮𑀺𑀔𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀸𑀢𑀺 𑀅𑀢𑁆𑀢𑀦𑁄𑀫𑀢𑀺𑀬𑀸 𑀲𑀩𑁆𑀩𑀤𑀼𑀩𑁆𑀩𑀮𑀢𑁆𑀢𑀸 𑀅𑀦𑀢𑁆𑀢𑀼𑀓𑁆𑀓𑀁𑀲𑀦𑁂𑀦 𑀯𑀼𑀢𑁆𑀢𑀁. 𑀓𑀺𑀜𑁆𑀳𑁂𑀢𑁆𑀣 𑀯𑀺𑀘𑀸𑀭𑁂𑀢𑀩𑁆𑀩𑀓𑀸𑀭𑀡𑀁 𑀅𑀢𑁆𑀣𑀺 𑀲𑀬𑀫𑁂𑀯 𑀯𑀺𑀘𑀸𑀭𑀺𑀢𑀢𑁆𑀢𑀸.

𑀲𑀘𑁆𑀘𑀦𑁆𑀢𑀺 𑀯𑀘𑀻𑀲𑀘𑁆𑀘𑀁, 𑀲𑀘𑁆𑀘𑁂𑀦 𑀲𑀘𑁆𑀘𑀦𑁆𑀢𑀺 𑀧𑀼𑀭𑀺𑀫𑁂𑀦 𑀯𑀘𑀻𑀲𑀘𑁆𑀘𑁂𑀦 𑀧𑀘𑁆𑀙𑀺𑀫𑀁 𑀯𑀘𑀻𑀲𑀘𑁆𑀘𑀁. 𑀧𑀘𑁆𑀘𑀬𑀯𑀲𑁂𑀦 𑀥𑀸𑀢𑀼𑀧𑀤𑀦𑁆𑀢𑀮𑁄𑀧𑀁 𑀲𑀦𑁆𑀥𑀸𑀬 ‘‘𑀲𑀦𑁆𑀤𑀳𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀤𑁆𑀤𑀯𑀺𑀤𑀽 𑀧𑀦 𑁋

‘‘𑀯𑀺𑀧𑀼𑀩𑁆𑀩𑁄 𑀥𑀸 𑀓𑀭𑁄𑀢𑁆𑀬𑀢𑁆𑀣𑁂, 𑀅𑀪𑀺𑀧𑀼𑀩𑁆𑀩𑁄 𑀢𑀼 𑀪𑀸𑀲𑀦𑁂;

𑀦𑁆𑀬𑀸𑀲𑀁𑀧𑀼𑀩𑁆𑀩𑁄 𑀬𑀣𑀸𑀬𑁄𑀕𑀁, 𑀦𑁆𑀬𑀸𑀲𑀸𑀭𑁄𑀧𑀦𑀲𑀦𑁆𑀥𑀺𑀲𑀽’’𑀢𑀺. 𑁋

𑀥𑀸-𑀲𑀤𑁆𑀤𑀫𑁂𑀯 ¶ 𑀖𑀝𑀦𑀢𑁆𑀣𑁂 𑀧𑀞𑀦𑁆𑀢𑀺. 𑀢𑀲𑁆𑀫𑀸 𑀧𑀭𑀺𑀬𑀸𑀬𑀯𑀲𑁂𑀦 ‘‘𑀲𑀦𑁆𑀤𑀳𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺𑀧𑀺 𑀤𑀝𑁆𑀞𑀩𑁆𑀩𑀁. 𑀢𑀤𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀢𑀺 ‘‘𑀦 𑀅𑀦𑁆𑀢𑀭𑀦𑁆𑀢𑀭𑀸’’𑀢𑀺𑀆𑀤𑀺𑀦𑀸. ‘‘𑀬𑁄 𑀳𑀻’’𑀢𑀺𑀆𑀤𑀺 𑀢𑀩𑁆𑀩𑀺𑀯𑀭𑀡𑀁. 𑀅𑀦𑁆𑀢𑀭𑀺𑀢𑀢𑁆𑀢𑀸𑀢𑀺 𑀅𑀦𑁆𑀢𑀭𑀸 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸. 𑀦 𑀢𑀸𑀤𑀺𑀲𑁄𑀢𑀺 𑀦 𑀏𑀯𑀁𑀯𑀤𑀦𑀲𑀪𑀸𑀯𑁄. 𑀚𑀻𑀯𑀺𑀢𑀳𑁂𑀢𑀼𑀧𑀺, 𑀧𑀕𑁂𑀯 𑀅𑀜𑁆𑀜𑀳𑁂𑀢𑀽𑀢𑀺 𑀅𑀧𑀺-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑀢𑁆𑀣𑁄.

‘‘𑀲𑀘𑁆𑀘𑀢𑁄 𑀣𑁂𑀢𑀢𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁯) 𑀯𑀺𑀬 𑀣𑁂𑀢-𑀲𑀤𑁆𑀤𑁄 𑀣𑀺𑀭𑀧𑀭𑀺𑀬𑀸𑀬𑁄, 𑀣𑀺𑀭𑀪𑀸𑀯𑁄 𑀘 𑀲𑀘𑁆𑀘𑀯𑀸𑀤𑀺𑀢𑀸𑀥𑀺𑀓𑀸𑀭𑀢𑁆𑀢𑀸 𑀓𑀣𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀣𑀺𑀭𑀓𑀣𑁄𑀢𑀺 𑀅𑀢𑁆𑀣𑁄’’𑀢𑀺. 𑀣𑀺𑀢𑀲𑁆𑀲 𑀪𑀸𑀯𑁄𑀢𑀺 𑀳𑀺 𑀣𑁂𑀢𑁄, 𑀣𑀺𑀭𑀪𑀸𑀯𑁄, 𑀢𑁂𑀦 𑀬𑀼𑀢𑁆𑀢𑀢𑁆𑀢𑀸 𑀧𑀼𑀕𑁆𑀕𑀮𑁄 𑀇𑀥 𑀣𑁂𑀢𑁄 𑀦𑀸𑀫. 𑀳𑀮𑀺𑀤𑁆𑀤𑀻𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑀓𑀦𑁆𑀤𑀦𑀺𑀧𑁆𑀨𑀢𑁆𑀢𑀓𑁄 𑀕𑀘𑁆𑀙𑀯𑀺𑀲𑁂𑀲𑁄. 𑀣𑀼𑀲𑁄 𑀦𑀸𑀫 𑀥𑀜𑁆𑀜𑀢𑁆𑀢𑀘𑁄, 𑀥𑀜𑁆𑀜𑀧𑀮𑀸𑀲𑁄 𑀘. 𑀓𑀼𑀫𑁆𑀪𑀡𑁆𑀟𑀦𑁆𑀢𑀺 𑀫𑀳𑀸𑀨𑀮𑁄 𑀲𑀽𑀧𑀲𑀫𑁆𑀧𑀸𑀤𑀓𑁄 𑀮𑀢𑀸𑀯𑀺𑀲𑁂𑀲𑁄. 𑀇𑀦𑁆𑀤𑀔𑀻𑀮𑁄 𑀦𑀸𑀫 𑀕𑀫𑁆𑀪𑀻𑀭𑀦𑁂𑀫𑁄 𑀏𑀲𑀺𑀓𑀸𑀣𑀫𑁆𑀪𑁄. 𑀬𑀣𑀸 𑀳𑀮𑀺𑀤𑁆𑀤𑀺𑀭𑀸𑀕𑀸𑀤𑀬𑁄 𑀅𑀦𑀯𑀝𑁆𑀞𑀺𑀢𑀲𑀪𑀸𑀯𑀢𑀸𑀬 𑀦 𑀞𑀺𑀢𑀸, 𑀏𑀯𑀁 𑀦 𑀞𑀺𑀢𑀸 𑀓𑀣𑀸 𑀏𑀢𑀲𑁆𑀲𑀸𑀢𑀺 𑀦𑀞𑀺𑀢𑀓𑀣𑁄 [𑀦𑀣𑀺𑀭𑀓𑀣𑁄 (𑀤𑀻. 𑀦𑀺. 𑀅𑀝𑁆𑀞. 𑁧.𑁮)] 𑀬𑀣𑀸 𑀧𑀸𑀲𑀸𑀡𑀮𑁂𑀔𑀸𑀤𑀬𑁄 𑀅𑀯𑀝𑁆𑀞𑀺𑀢𑀲𑀪𑀸𑀯𑀢𑀸𑀬 𑀞𑀺𑀢𑀸, 𑀏𑀯𑀁 𑀞𑀺𑀢𑀸 𑀓𑀣𑀸 𑀏𑀢𑀲𑁆𑀲𑀸𑀢𑀺 𑀞𑀺𑀢𑀓𑀣𑁄𑀢𑀺 ¶ [𑀣𑀺𑀭𑀓𑀣𑁄 (𑀤𑀻. 𑀦𑀺. 𑀅𑀝𑁆𑀞. 𑁧.𑁮)] 𑀳𑀮𑀺𑀤𑁆𑀤𑀺𑀭𑀸𑀕𑀸𑀤𑀬𑁄 𑀬𑀣𑀸 𑀓𑀣𑀸𑀬 𑀉𑀧𑀫𑀸𑀬𑁄 𑀳𑁄𑀦𑁆𑀢𑀺, 𑀏𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀓𑀣𑀸𑀬 𑀳𑀺 𑀏𑀢𑀸 𑀉𑀧𑀫𑀸𑀬𑁄𑀢𑀺.

𑀧𑀢𑁆𑀢𑀺𑀲𑀗𑁆𑀔𑀸𑀢𑀸 𑀲𑀤𑁆𑀥𑀸 𑀅𑀬𑀢𑀺 𑀧𑀯𑀢𑁆𑀢𑀢𑀺 𑀏𑀢𑁆𑀣𑀸𑀢𑀺 𑀧𑀘𑁆𑀘𑀬𑀺𑀓𑁄𑀢𑀺 𑀆𑀳 ‘‘𑀧𑀢𑁆𑀢𑀺𑀬𑀸𑀬𑀺𑀢𑀩𑁆𑀩𑀓𑁄’’𑀢𑀺. 𑀧𑀢𑁆𑀢𑀺𑀬𑀸 𑀅𑀬𑀺𑀢𑀩𑁆𑀩𑀸 𑀧𑀯𑀢𑁆𑀢𑁂𑀢𑀩𑁆𑀩𑀸𑀢𑀺 𑀧𑀢𑁆𑀢𑀺𑀬𑀸𑀬𑀺𑀢𑀩𑁆𑀩𑀸 𑀬-𑀓𑀸𑀭𑀸𑀕𑀫𑁂𑀦, 𑀯𑀸𑀘𑀸. 𑀲𑀸 𑀏𑀢𑀲𑁆𑀲𑀸𑀢𑀺 𑀧𑀢𑁆𑀢𑀺𑀬𑀸𑀬𑀺𑀢𑀩𑁆𑀩𑀓𑁄, 𑀢𑁂𑀦𑀸𑀳 ‘‘𑀲𑀤𑁆𑀥𑀸𑀬𑀺𑀢𑀩𑁆𑀩𑀓𑁄’’𑀢𑀺. 𑀢𑀤𑁂𑀯𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑁂𑀦, 𑀅𑀦𑁆𑀯𑀬𑁂𑀦 𑀘 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀘𑁆𑀘𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺 𑀯𑀺𑀲𑀁𑀯𑀸𑀤𑀦𑀢𑁄. 𑀇𑀢𑀭𑀧𑀓𑁆𑀔𑁂 𑀘 𑀅𑀯𑀺𑀲𑀁𑀯𑀸𑀤𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀮𑁄𑀓’’𑀦𑁆𑀢𑀺 𑀏𑀢𑁂𑀦 ‘‘𑀮𑁄𑀓𑀲𑁆𑀲𑀸’’𑀢𑀺 𑀏𑀢𑁆𑀣 𑀓𑀫𑁆𑀫𑀢𑁆𑀣𑁂 𑀙𑀝𑁆𑀞𑀻𑀢𑀺 𑀤𑀲𑁆𑀲𑁂𑀢𑀺.

𑀲𑀢𑀺𑀧𑀺 𑀧𑀘𑁆𑀘𑁂𑀓𑀁 𑀧𑀸𑀞𑀓𑁆𑀓𑀫𑁂 𑀅𑀜𑁆𑀜𑀸𑀲𑀼 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸 𑀤𑀻𑀲𑀼 (𑀥. 𑀲. 𑀅𑀝𑁆𑀞. 𑀅𑀓𑀼𑀲𑀮𑀓𑀫𑁆𑀫𑀧𑀣𑀓𑀣𑀸; 𑀫. 𑀦𑀺. 𑁧.𑁮𑁯) 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁂𑀦 𑀢𑀺𑀡𑁆𑀡𑀫𑁆𑀧𑀺 𑀧𑀤𑀸𑀦𑀁 𑀏𑀓𑀢𑁆𑀣𑀲𑀁𑀯𑀡𑁆𑀡𑀦𑀁 𑀓𑀸𑀢𑀼𑀁 ‘‘𑀬𑀸𑀬 𑀯𑀸𑀘𑀸𑀬𑀸’’𑀢𑀺𑀆𑀤𑀺𑀫𑀸𑀳, 𑀬𑀸𑀬 𑀯𑀸𑀘𑀸𑀬 𑀓𑀭𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀭𑀲𑁆𑀲𑀸𑀢𑀺 𑀬𑀁 𑀪𑀺𑀦𑁆𑀤𑀺𑀢𑀼𑀁 𑀢𑀁 𑀯𑀸𑀘𑀁 𑀪𑀸𑀲𑀢𑀺, 𑀢𑀲𑁆𑀲. 𑀘-𑀲𑀤𑁆𑀤𑁄 𑀅𑀝𑁆𑀞𑀸𑀦𑀧𑀬𑀼𑀢𑁆𑀢𑁄, 𑀲𑁄 𑀤𑁆𑀯𑀦𑁆𑀤𑀕𑀩𑁆𑀪𑀪𑀸𑀯𑀁 𑀚𑁄𑀢𑁂𑀢𑀼𑀁 𑀓𑀫𑁆𑀫𑀤𑁆𑀯𑀬𑁂 𑀧𑀬𑀼𑀚𑁆𑀚𑀺𑀢𑀩𑁆𑀩𑁄. 𑀲𑀼𑀜𑁆𑀜𑀪𑀸𑀯𑀦𑁆𑀢𑀺 𑀧𑀺𑀬𑀯𑀺𑀭𑀳𑀺𑀢𑀢𑀸𑀬 𑀭𑀺𑀢𑁆𑀢𑀪𑀸𑀯𑀁. 𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀸 𑀲𑀤𑁆𑀤𑀲𑀪𑀸𑀯𑀸 𑀯𑀸𑀘𑀸, 𑀏𑀢𑁂𑀦 𑀧𑀺𑀬𑀜𑁆𑀘 𑀲𑀼𑀜𑁆𑀜𑀜𑁆𑀘 𑀧𑀺𑀬𑀲𑀼𑀜𑁆𑀜𑀁, 𑀢𑀁 𑀓𑀭𑁄𑀢𑀺 𑀏𑀢𑀸𑀬𑀸𑀢𑀺 𑀧𑀺𑀲𑀼𑀡𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦𑀸𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀧𑀺𑀲𑀢𑀻𑀢𑀺 𑀯𑀸 𑀧𑀺𑀲𑀼𑀡𑀸, 𑀲𑀫𑀕𑁆𑀕𑁂 𑀲𑀢𑁆𑀢𑁂 𑀅𑀯𑀬𑀯𑀪𑀽𑀢𑁂 𑀯𑀕𑁆𑀕𑀪𑀺𑀦𑁆𑀦𑁂 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑀨𑀭𑀼𑀲𑀦𑁆𑀢𑀺 ¶ 𑀲𑀺𑀦𑁂𑀳𑀸𑀪𑀸𑀯𑁂𑀦 𑀮𑀽𑀔𑀁. 𑀲𑀬𑀫𑁆𑀧𑀺 𑀨𑀭𑀼𑀲𑀸𑀢𑀺 𑀤𑁄𑀫𑀦𑀲𑁆𑀲𑀲𑀫𑀼𑀝𑁆𑀞𑀺𑀢𑀢𑁆𑀢𑀸 𑀲𑀪𑀸𑀯𑁂𑀦 𑀲𑀬𑀫𑁆𑀧𑀺 𑀓𑀓𑁆𑀓𑀲𑀸. 𑀨𑀭𑀼𑀲𑀲𑀪𑀸𑀯𑀢𑁄 𑀦𑁂𑀯 𑀓𑀡𑁆𑀡𑀲𑀼𑀔𑀸. 𑀅𑀢𑁆𑀣𑀯𑀺𑀧𑀦𑁆𑀦𑀢𑀸𑀬 𑀦 𑀳𑀤𑀬𑀗𑁆𑀕𑀫𑀸. 𑀏𑀢𑁆𑀣 𑀧𑀦 𑀧𑀞𑀫𑀦𑀬𑁂 𑀨𑀭𑀼𑀲𑀁 𑀓𑀭𑁄𑀢𑀻𑀢𑀺 𑀯𑀘𑀦𑀢𑁆𑀣𑁂𑀦 𑀯𑀸 𑀨𑀮𑀽𑀧𑀘𑀸𑀭𑁂𑀦 𑀯𑀸 𑀯𑀸𑀘𑀸𑀬 𑀨𑀭𑀼𑀲𑀲𑀤𑁆𑀤𑀧𑁆𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀤𑀼𑀢𑀺𑀬𑀦𑀬𑁂 𑀫𑀫𑁆𑀫𑀘𑁆𑀙𑁂𑀤𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀏𑀓𑀦𑁆𑀢𑀦𑀺𑀝𑁆𑀞𑀼𑀭𑀢𑀸𑀬 𑀭𑀼𑀴𑁆𑀳𑀺𑀲𑀤𑁆𑀤𑀯𑀲𑁂𑀦 𑀲𑀪𑀸𑀯𑁂𑀦, 𑀓𑀸𑀭𑀡𑀽𑀧𑀘𑀸𑀭𑁂𑀦 𑀯𑀸 𑀯𑀸𑀘𑀸𑀬 𑀨𑀭𑀼𑀲𑀲𑀤𑁆𑀤𑀧𑁆𑀧𑀯𑀢𑁆𑀢𑀺 𑀤𑀝𑁆𑀞𑀩𑁆𑀩𑀸.

𑀬𑁂𑀦𑀸𑀢𑀺 𑀧𑀮𑀸𑀧𑀲𑀗𑁆𑀔𑀸𑀢𑁂𑀦 𑀦𑀺𑀭𑀢𑁆𑀣𑀓𑀯𑀘𑀦𑁂𑀦. 𑀲𑀫𑁆𑀨𑀦𑁆𑀢𑀺 ‘‘𑀲’’𑀦𑁆𑀢𑀺 𑀯𑀼𑀢𑁆𑀢𑀁 𑀲𑀼𑀔𑀁, 𑀳𑀺𑀢𑀜𑁆𑀘 𑀨𑀮𑀢𑀺 𑀧𑀳𑀭𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀅𑀢𑁆𑀣𑁂𑀦 ‘‘𑀲𑀫𑁆𑀨’’𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀅𑀢𑁆𑀢𑀦𑁄, 𑀧𑀭𑁂𑀲𑀜𑁆𑀘 𑀅𑀦𑀼𑀧𑀓𑀸𑀭𑀓𑀁 𑀬𑀁 𑀓𑀺𑀜𑁆𑀘𑀺 𑀅𑀢𑁆𑀣𑀁, 𑀢𑁂𑀦𑀸𑀳 ‘‘𑀦𑀺𑀭𑀢𑁆𑀣𑀓’’𑀦𑁆𑀢𑀺, 𑀇𑀫𑀺𑀦𑀸 𑀲𑀫𑁆𑀨𑀁 𑀧𑀮𑀧𑀢𑀺 𑀏𑀢𑁂𑀦𑀸𑀢𑀺 𑀲𑀫𑁆𑀨𑀧𑁆𑀧𑀮𑀸𑀧𑁄𑀢𑀺 𑀯𑀘𑀦𑀢𑁆𑀣𑀁 𑀤𑀲𑁆𑀲𑁂𑀢𑀺.

‘‘𑀢𑁂𑀲’’𑀦𑁆𑀢𑀺𑀆𑀤𑀺𑀦𑀸 ¶ 𑀘𑁂𑀢𑀦𑀸𑀬 𑀨𑀮𑀯𑁄𑀳𑀸𑀭𑁂𑀦 𑀧𑀺𑀲𑀼𑀡𑀸𑀤𑀺𑀲𑀤𑁆𑀤𑀧𑁆𑀧𑀯𑀢𑁆𑀢𑀺 𑀯𑀼𑀢𑁆𑀢𑀸. ‘‘𑀲𑀸 𑀏𑀯𑀸’’𑀢𑀺𑀆𑀤𑀺𑀦𑀸 𑀧𑀦 𑀘𑁂𑀢𑀦𑀸𑀬 𑀧𑀯𑀢𑁆𑀢𑀺𑀧𑀭𑀺𑀓𑀧𑁆𑀧𑀦𑀸𑀬 𑀳𑁂𑀢𑀼𑀁 𑀯𑀺𑀪𑀸𑀯𑁂𑀢𑀺. 𑀢𑀢𑁆𑀣 ‘‘𑀧𑀳𑀸𑀬𑀸’’𑀢𑀺𑀆𑀤𑀺𑀯𑀘𑀦𑀲𑀦𑁆𑀦𑀺𑀥𑀸𑀦𑀢𑁄 𑀢𑀲𑁆𑀲𑀸𑀬𑁂𑀯 𑀘 𑀧𑀳𑀸𑀢𑀩𑁆𑀩𑀢𑀸 𑀬𑀼𑀢𑁆𑀢𑀺𑀢𑁄 𑀅𑀥𑀺𑀧𑁆𑀧𑁂𑀢𑀸𑀢𑀺 𑀅𑀢𑁆𑀣𑁄.

𑀢𑀢𑁆𑀣𑀸𑀢𑀺 𑀢𑀸𑀲𑀼 𑀧𑀺𑀲𑀼𑀡𑀯𑀸𑀘𑀸𑀤𑀻𑀲𑀼. 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀲𑁆𑀲𑀸𑀢𑀺 𑀮𑁄𑀪𑁂𑀦, 𑀤𑁄𑀲𑁂𑀦 𑀯𑀸 𑀯𑀺𑀩𑀸𑀥𑀺𑀢𑀘𑀺𑀢𑁆𑀢𑀲𑁆𑀲, 𑀉𑀧𑀢𑀸𑀧𑀺𑀢𑀘𑀺𑀢𑁆𑀢𑀲𑁆𑀲 𑀯𑀸, 𑀤𑀽𑀲𑀺𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, ‘‘𑀘𑁂𑀢𑀦𑀸’’𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀬𑁂𑀦 𑀲𑀳 𑀧𑀭𑁂𑀲𑀁 𑀪𑁂𑀤𑀸𑀬 𑀯𑀤𑀢𑀺, 𑀢𑀲𑁆𑀲 𑀅𑀢𑁆𑀢𑀦𑁄 𑀧𑀺𑀬𑀓𑀫𑁆𑀬𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀘𑁂𑀢𑀦𑀸 𑀧𑀺𑀲𑀼𑀡𑀯𑀸𑀘𑀸 𑀦𑀸𑀫 𑀧𑀺𑀲𑀼𑀡𑀁 𑀯𑀤𑀦𑁆𑀢𑀺 𑀏𑀢𑀸𑀬𑀸𑀢𑀺 𑀓𑀢𑁆𑀯𑀸. 𑀲𑀫𑀸𑀲𑀯𑀺𑀲𑀬𑁂 𑀳𑀺 𑀫𑀼𑀔𑁆𑀬𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄, 𑀩𑁆𑀬𑀸𑀲𑀯𑀺𑀲𑀬𑁂 𑀉𑀧𑀘𑀸𑀭𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀲𑁆𑀲 𑀬𑀢𑁄 𑀪𑁂𑀤𑀁 𑀓𑀭𑁄𑀢𑀺, 𑀢𑁂𑀲𑀼 𑀅𑀪𑀺𑀦𑁆𑀦𑁂𑀲𑀼 𑀅𑀧𑁆𑀧𑀲𑀸𑀯𑀚𑁆𑀚𑀁, 𑀪𑀺𑀦𑁆𑀦𑁂𑀲𑀼 𑀫𑀳𑀸𑀲𑀸𑀯𑀚𑁆𑀚𑀁. 𑀢𑀣𑀸 𑀓𑀺𑀮𑁂𑀲𑀸𑀦𑀁 𑀫𑀼𑀤𑀼𑀢𑀺𑀩𑁆𑀩𑀢𑀸𑀯𑀺𑀲𑁂𑀲𑁂𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑀁.

𑀬𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺, 𑀲𑁄 𑀪𑀺𑀚𑁆𑀚𑀢𑀼 𑀯𑀸, 𑀫𑀸 𑀯𑀸, 𑀢𑀲𑁆𑀲 𑀢𑀤𑀢𑁆𑀣𑀯𑀺𑀜𑁆𑀜𑀸𑀧𑀦𑀫𑁂𑀯 𑀧𑀫𑀸𑀡𑀦𑁆𑀢𑀺 𑀆𑀳 ‘‘𑀢𑀲𑁆𑀲 𑀢𑀤𑀢𑁆𑀣𑀯𑀺𑀚𑀸𑀦𑀦’’𑀦𑁆𑀢𑀺. 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀢𑀸𑀧𑀺𑀬𑀓𑀫𑁆𑀬𑀢𑀸𑀦𑀫𑁂𑀓𑁂𑀓𑀧𑀓𑁆𑀔𑀺𑀧𑀦𑁂𑀦 𑀘𑀢𑁆𑀢𑀸𑀭𑁄. 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀺 𑀧𑀦 𑀪𑀺𑀦𑁆𑀦𑁂 𑀏𑀯. 𑀇𑀫𑁂𑀲𑀦𑁆𑀢𑀺 𑀅𑀦𑀺𑀬𑀫𑀢𑀸𑀬 𑀧𑀭𑀫𑁆𑀫𑀼𑀔𑀸𑀧𑀯𑀢𑁆𑀢𑀸𑀦𑀫𑁆𑀧𑀺 𑀅𑀢𑁆𑀢𑀦𑁄 𑀩𑀼𑀤𑁆𑀥𑀺𑀬𑀁 𑀧𑀭𑀺𑀯𑀢𑁆𑀢𑀫𑀸𑀦𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑁂𑀲’’𑀦𑁆𑀢𑀺𑀆𑀤𑀺𑀫𑀸𑀳. 𑀇𑀢𑁄𑀢𑀺 𑀇𑀥 𑀧𑀤𑁂𑀲𑁂, 𑀯𑀼𑀢𑁆𑀢𑀸𑀦𑀁 𑀬𑁂𑀲𑀁 𑀲𑀦𑁆𑀢𑀺𑀓𑁂 𑀲𑀼𑀢𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁.

‘‘𑀤𑁆𑀯𑀺𑀦𑁆𑀦’’𑀦𑁆𑀢𑀺 𑀦𑀺𑀤𑀲𑁆𑀲𑀦𑀯𑀘𑀦𑀁 𑀩𑀳𑀽𑀦𑀫𑁆𑀧𑀺 𑀲𑀦𑁆𑀥𑀸𑀦𑀢𑁄. ‘‘𑀫𑀺𑀢𑁆𑀢𑀸𑀦’’𑀦𑁆𑀢𑀺𑀆𑀤𑀺 ‘‘𑀲𑀦𑁆𑀥𑀸𑀦’’𑀦𑁆𑀢𑀺 𑀏𑀢𑁆𑀣 𑀓𑀫𑁆𑀫𑀁, 𑀢𑁂𑀦 𑀧𑀸𑀴𑀺𑀬𑀁 ‘‘𑀪𑀺𑀦𑁆𑀦𑀸𑀦’’𑀦𑁆𑀢𑀺 𑀏𑀢𑀲𑁆𑀲 𑀓𑀫𑁆𑀫𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀦𑁆𑀥𑀸𑀦𑀓𑀭𑀡𑀜𑁆𑀘 𑀦𑀸𑀫 𑀢𑁂𑀲𑀫𑀦𑀼𑀭𑀽𑀧𑀓𑀭𑀡𑀫𑁂𑀯𑀸𑀢𑀺 ¶ 𑀯𑀼𑀢𑁆𑀢𑀁 ‘‘𑀅𑀦𑀼𑀓𑀢𑁆𑀢𑀸’’𑀢𑀺. 𑀅𑀦𑀼𑀧𑁆𑀧𑀤𑀸𑀢𑀸𑀢𑀺 𑀅𑀦𑀼𑀩𑀮𑀧𑁆𑀧𑀤𑀸𑀢𑀸, 𑀅𑀦𑀼𑀯𑀢𑁆𑀢𑀦𑀯𑀲𑁂𑀦 𑀯𑀸 𑀧𑀤𑀸𑀢𑀸. 𑀓𑀲𑁆𑀲 𑀧𑀦 𑀅𑀦𑀼𑀩𑀮𑀧𑁆𑀧𑀤𑀸𑀦𑀁, 𑀅𑀦𑀼𑀯𑀢𑁆𑀢𑀦𑀜𑁆𑀘𑀸𑀢𑀺? ‘‘𑀲𑀳𑀺𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀦𑁆𑀥𑀸𑀦𑀲𑁆𑀲𑀸𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀲𑀦𑁆𑀥𑀸𑀦𑀸𑀦𑀼𑀧𑁆𑀧𑀤𑀸𑀢𑀸’’𑀢𑀺. 𑀬𑀲𑁆𑀫𑀸 𑀧𑀦 𑀅𑀦𑀼𑀩𑀮𑀯𑀲𑁂𑀦, 𑀅𑀦𑀼𑀯𑀢𑁆𑀢𑀦𑀯𑀲𑁂𑀦 𑀘 𑀲𑀦𑁆𑀥𑀸𑀦𑀲𑁆𑀲 𑀧𑀤𑀸𑀦𑀁 𑀆𑀤𑀸𑀦𑀁, 𑀭𑀓𑁆𑀔𑀡𑀁 𑀯𑀸 𑀤𑀴𑁆𑀳𑀻𑀓𑀭𑀡𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀤𑀴𑁆𑀳𑀻𑀓𑀫𑁆𑀫𑀁 𑀓𑀢𑁆𑀢𑀸’’𑀢𑀺. 𑀆𑀭𑀫𑀦𑁆𑀢𑀺 𑀏𑀢𑁆𑀣𑀸𑀢𑀺 𑀆𑀭𑀸𑀫𑁄. 𑀭𑀫𑀺𑀢𑀩𑁆𑀩𑀝𑁆𑀞𑀸𑀦𑀁 𑀲𑀫𑀕𑁆𑀕𑁄𑀢𑀺 𑀳𑀺 𑀢𑀤𑀥𑀺𑀝𑁆𑀞𑀸𑀦𑀸𑀦𑀁 𑀯𑀲𑁂𑀦 𑀢𑀩𑁆𑀩𑀺𑀲𑁂𑀲𑀦𑀢𑀸 𑀯𑀼𑀢𑁆𑀢𑀸. ‘‘𑀲𑀫𑀕𑁆𑀕𑁂’’𑀢𑀺𑀧𑀺 𑀧𑀞𑀦𑁆𑀢𑀺, 𑀢𑀤𑀬𑀼𑀢𑁆𑀢𑀁 ‘‘𑀬𑀢𑁆𑀣𑀸’’𑀢𑀺𑀆𑀤𑀺𑀯𑀘𑀦𑁂𑀦 𑀯𑀺𑀭𑀼𑀤𑁆𑀥𑀢𑁆𑀢𑀸. 𑀬𑀲𑁆𑀫𑀸 𑀧𑀦 𑀆𑀓𑀸𑀭𑁂𑀦 𑀯𑀺𑀦𑀸𑀧𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀺, 𑀢𑀲𑁆𑀫𑀸 ‘‘𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁 𑀲𑀫𑀕𑁆𑀕𑁂𑀲𑀽𑀢𑀺 𑀲𑀫𑀕𑁆𑀕𑀪𑀽𑀢𑁂𑀲𑀼 𑀚𑀦𑀓𑀸𑀬𑁂𑀲𑀼, 𑀢𑁂𑀦𑀸𑀳 ‘‘𑀢𑁂 𑀧𑀳𑀸𑀬𑀸’’𑀢𑀺𑀆𑀤𑀺. 𑀢𑀧𑁆𑀧𑀓𑀢𑀺𑀬𑀢𑁆𑀣𑁄𑀧𑀺 𑀓𑀢𑁆𑀢𑀼𑀅𑀢𑁆𑀣𑁄𑀯𑀸𑀢𑀺 𑀤𑀲𑁆𑀲𑁂𑀢𑀺 ¶ ‘‘𑀦𑀦𑁆𑀤𑀢𑀻’’𑀢𑀺 𑀇𑀫𑀺𑀦𑀸. 𑀢𑀧𑁆𑀧𑀓𑀢𑀺𑀬𑀢𑁆𑀣𑁂𑀦 𑀳𑀺 ‘‘𑀤𑀺𑀲𑁆𑀯𑀸𑀧𑀺 𑀲𑀼𑀢𑁆𑀯𑀸𑀧𑀻’’𑀢𑀺 𑀯𑀘𑀦𑀁 𑀲𑀼𑀧𑀧𑀦𑁆𑀦𑀁 𑀳𑁄𑀢𑀺. 𑀲𑀫𑀕𑁆𑀕𑁂 𑀓𑀭𑁄𑀢𑀺 𑀏𑀢𑀸𑀬𑀸𑀢𑀺 𑀲𑀫𑀕𑁆𑀕𑀓𑀭𑀡𑀻. 𑀲𑀸𑀬𑁂𑀯 𑀯𑀸𑀘𑀸, 𑀢𑀁 𑀪𑀸𑀲𑀺𑀢𑀸𑀢𑀺 𑀅𑀢𑁆𑀣𑀫𑀸𑀳 ‘‘𑀬𑀸 𑀯𑀸𑀘𑀸’’𑀢𑀺𑀆𑀤𑀺𑀦𑀸. 𑀢𑀸𑀬 𑀯𑀸𑀘𑀸𑀬 𑀲𑀫𑀕𑁆𑀕𑀓𑀭𑀡𑀁 𑀦𑀸𑀫. ‘‘𑀲𑀼𑀔𑀸 𑀲𑀗𑁆𑀖𑀲𑁆𑀲 𑀲𑀸𑀫𑀕𑁆𑀕𑀻, 𑀲𑀫𑀕𑁆𑀕𑀸𑀦𑀁 𑀢𑀧𑁄 𑀲𑀼𑀔𑁄’’𑀢𑀺𑀆𑀤𑀺𑀦𑀸 (𑀥. 𑀧. 𑁧𑁯𑁪) 𑀲𑀫𑀕𑁆𑀕𑀸𑀦𑀺𑀲𑀁𑀲𑀤𑀲𑁆𑀲𑀦𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀸𑀫𑀕𑁆𑀕𑀺𑀕𑀼𑀡𑀧𑀭𑀺𑀤𑀻𑀧𑀺𑀓𑀫𑁂𑀯𑀸’’𑀢𑀺. 𑀇𑀢𑀭𑀦𑁆𑀢𑀺 𑀢𑀩𑁆𑀩𑀺𑀧𑀭𑀻𑀢𑀁 𑀪𑁂𑀤𑀦𑀺𑀓𑀁 𑀯𑀸𑀘𑀁.

𑀫𑀫𑁆𑀫𑀸𑀦𑀻𑀢𑀺 𑀤𑀼𑀝𑁆𑀞𑀸𑀭𑀽𑀦𑀺, 𑀢𑀲𑁆𑀲𑀤𑀺𑀲𑀢𑀸𑀬 𑀧𑀦 𑀇𑀥 𑀅𑀓𑁆𑀓𑁄𑀲𑀯𑀢𑁆𑀣𑀽𑀦𑀺 ‘‘𑀫𑀫𑁆𑀫𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀣𑀸 𑀳𑀺 𑀤𑀼𑀝𑁆𑀞𑀸𑀭𑀽𑀲𑀼 𑀬𑁂𑀦 𑀓𑁂𑀦𑀘𑀺 𑀯𑀢𑁆𑀣𑀼𑀦𑀸 𑀖𑀝𑀺𑀢𑁂𑀲𑀼 𑀘𑀺𑀢𑁆𑀢𑀁 𑀅𑀥𑀺𑀫𑀢𑁆𑀢𑀁 𑀤𑀼𑀓𑁆𑀔𑀧𑁆𑀧𑀢𑁆𑀢𑀁 𑀳𑁄𑀢𑀺, 𑀢𑀣𑀸 𑀢𑁂𑀲𑀼 𑀤𑀲𑀲𑀼𑀚𑀸𑀢𑀺𑀆𑀤𑀻𑀲𑀼 𑀅𑀓𑁆𑀓𑁄𑀲𑀯𑀢𑁆𑀣𑀽𑀲𑀼 𑀨𑀭𑀼𑀲𑀯𑀸𑀘𑀸𑀬 𑀨𑀼𑀲𑀺𑀢𑀫𑀢𑁆𑀢𑁂𑀲𑀽𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀫𑀫𑁆𑀫𑀸𑀦𑀺 𑀯𑀺𑀬 𑀫𑀫𑁆𑀫𑀸𑀦𑀺, 𑀬𑁂𑀲𑀼 𑀨𑀭𑀼𑀲𑀯𑀸𑀘𑀸𑀬 𑀙𑀼𑀧𑀺𑀢𑀫𑀢𑁆𑀢𑁂𑀲𑀼 𑀤𑀼𑀝𑁆𑀞𑀸𑀭𑀽𑀲𑀼 𑀯𑀺𑀬 𑀖𑀝𑁆𑀝𑀺𑀢𑁂𑀲𑀼 𑀘𑀺𑀢𑁆𑀢𑀁 𑀅𑀥𑀺𑀫𑀢𑁆𑀢𑀁 𑀤𑀼𑀓𑁆𑀔𑀧𑁆𑀧𑀢𑁆𑀢𑀁 𑀳𑁄𑀢𑀺, 𑀓𑀸𑀦𑀺 𑀧𑀦 𑀢𑀸𑀦𑀺? 𑀚𑀸𑀢𑀺𑀆𑀤𑀻𑀦𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀦𑀻’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁯) ‘‘𑀬𑀲𑁆𑀲 𑀲𑀭𑀻𑀭𑀧𑁆𑀧𑀤𑁂𑀲𑀲𑁆𑀲 𑀲𑀢𑁆𑀣𑀸𑀤𑀺𑀧𑀝𑀺𑀳𑀦𑁂𑀦 𑀪𑀼𑀲𑀁 𑀭𑀼𑀚𑁆𑀚𑀦𑀁, 𑀲𑁄 𑀫𑀫𑁆𑀫𑀁 𑀦𑀸𑀫. 𑀇𑀥 𑀧𑀦 𑀬𑀲𑁆𑀲 𑀘𑀺𑀢𑁆𑀢𑀲𑁆𑀲 𑀨𑀭𑀼𑀲𑀯𑀸𑀘𑀸𑀯𑀲𑁂𑀦 𑀤𑁄𑀫𑀦𑀲𑁆𑀲𑀲𑀗𑁆𑀔𑀸𑀢𑀁 𑀪𑀼𑀲𑀁 𑀭𑀼𑀚𑁆𑀚𑀦𑀁, 𑀢𑀁 𑀫𑀫𑁆𑀫𑀁 𑀯𑀺𑀬𑀸𑀢𑀺 𑀫𑀫𑁆𑀫’’𑀦𑁆𑀢𑀺 𑀅𑀧𑀭𑁂. 𑀢𑀸𑀦𑀺 𑀫𑀫𑁆𑀫𑀸𑀦𑀺 𑀙𑀺𑀚𑁆𑀚𑀦𑁆𑀢𑀺 𑀪𑀺𑀚𑁆𑀚𑀦𑁆𑀢𑀺 𑀬𑁂𑀦𑀸𑀢𑀺 𑀫𑀫𑁆𑀫𑀘𑁆𑀙𑁂𑀤𑀓𑁄, 𑀲𑁆𑀯𑁂𑀯 𑀓𑀸𑀬𑀯𑀘𑀻𑀧𑀬𑁄𑀕𑁄, 𑀢𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀢𑀣𑀸. 𑀏𑀓𑀦𑁆𑀢𑀨𑀭𑀼𑀲𑀘𑁂𑀢𑀦𑀸 𑀨𑀭𑀼𑀲𑀸 𑀯𑀸𑀘𑀸 𑀨𑀭𑀼𑀲𑀁 𑀯𑀤𑀦𑁆𑀢𑀺 𑀏𑀢𑀸𑀬𑀸𑀢𑀺 𑀓𑀢𑁆𑀯𑀸. ‘‘𑀨𑀭𑀼𑀲𑀘𑁂𑀢𑀦𑀸’’ 𑀇𑀘𑁆𑀘𑁂𑀯 𑀅𑀯𑀢𑁆𑀯𑀸 ‘‘𑀏𑀓𑀦𑁆𑀢𑀨𑀭𑀼𑀲𑀘𑁂𑀢𑀦𑀸’’𑀢𑀺 𑀯𑀘𑀦𑀁 𑀤𑀼𑀝𑁆𑀞𑀘𑀺𑀢𑁆𑀢𑀢𑀸𑀬 𑀏𑀯 𑀨𑀭𑀼𑀲𑀘𑁂𑀢𑀦𑀸 𑀅𑀥𑀺𑀧𑁆𑀧𑁂𑀢𑀸, 𑀦 𑀧𑀦 𑀲𑀯𑀦𑀨𑀭𑀼𑀲𑀢𑀸𑀫𑀢𑁆𑀢𑁂𑀦𑀸𑀢𑀺 𑀜𑀸𑀧𑀦𑀢𑁆𑀣𑀁. 𑀢𑀲𑁆𑀲𑀸𑀢𑀺 𑀏𑀓𑀦𑁆𑀢𑀨𑀭𑀼𑀲𑀘𑁂𑀢𑀦𑀸𑀬 𑀏𑀯. 𑀆𑀯𑀺𑀪𑀸𑀯𑀢𑁆𑀣𑀦𑁆𑀢𑀺 𑀨𑀭𑀼𑀲𑀯𑀸𑀘𑀸𑀪𑀸𑀯𑀲𑁆𑀲 𑀧𑀸𑀓𑀝𑀓𑀭𑀡𑀢𑁆𑀣𑀁. 𑀢𑀲𑁆𑀲𑀸𑀢𑀺 𑀯𑀸 𑀏𑀓𑀦𑁆𑀢𑀨𑀭𑀼𑀲𑀘𑁂𑀢𑀦𑀸𑀬 𑀏𑀯, 𑀨𑀭𑀼𑀲𑀯𑀸𑀘𑀸𑀪𑀸𑀯𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀣𑁂𑀯𑀸𑀢𑀺 𑀫𑀸𑀢𑀼𑀯𑀼𑀢𑁆𑀢𑀸𑀓𑀸𑀭𑁂𑀦𑁂𑀯, 𑀉𑀝𑁆𑀞𑀸𑀲𑀺 𑀅𑀦𑀼𑀩𑀦𑁆𑀥𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀲𑀘𑁆𑀘𑀓𑀺𑀭𑀺𑀬𑀦𑁆𑀢𑀺 𑀬𑀁 ‘‘𑀘𑀡𑁆𑀟𑀸 𑀢𑀁 𑀫𑀳𑀺𑀁𑀲𑀻 𑀅𑀦𑀼𑀩𑀦𑁆𑀥𑀢𑀽’’𑀢𑀺 𑀯𑀘𑀦𑀁 𑀫𑀼𑀔𑁂𑀦 𑀓𑀣𑁂𑀲𑀺, 𑀢𑀁 𑀫𑀸𑀢𑀼𑀘𑀺𑀢𑁆𑀢𑁂 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀢𑀁 𑀫𑀸 𑀳𑁄𑀢𑀼, 𑀬𑀁 𑀧𑀦 𑀉𑀧𑁆𑀧𑀮𑀧𑀢𑁆𑀢𑀫𑁆𑀧𑀺 𑀫𑀬𑁆𑀳𑀁 𑀉𑀧𑀭𑀺 𑀦 𑀧𑀢𑀢𑀽’’𑀢𑀺 ¶ 𑀓𑀸𑀭𑀡𑀁 𑀘𑀺𑀢𑁆𑀢𑁂𑀦 𑀘𑀺𑀦𑁆𑀢𑁂𑀲𑀺, 𑀢𑀤𑁂𑀯 𑀫𑀸𑀢𑀼𑀘𑀺𑀢𑁆𑀢𑁂 𑀅𑀢𑁆𑀣𑀺, 𑀢𑀲𑁆𑀫𑀸 ‘‘𑀢𑀫𑁂𑀯 𑀳𑁄𑀢𑀽’’𑀢𑀺 𑀲𑀘𑁆𑀘𑀓𑀭𑀡𑀁, 𑀓𑀢𑁆𑀢𑀩𑁆𑀩𑀲𑀘𑁆𑀘𑀁 𑀯𑀸. 𑀢𑀢𑁆𑀣𑁂𑀯𑀸𑀢𑀺 𑀉𑀝𑁆𑀞𑀸𑀦𑀝𑁆𑀞𑀸𑀦𑁂𑀬𑁂𑀯. 𑀩𑀤𑁆𑀥𑀸 𑀯𑀺𑀬𑀸𑀢𑀺 𑀬𑁄𑀢𑁆𑀢𑀸𑀤𑀺𑀦𑀸 𑀧𑀭𑀺𑀩𑀦𑁆𑀥𑀺 𑀯𑀺𑀬. 𑀏𑀯𑀁 𑀫𑀫𑁆𑀫𑀘𑁆𑀙𑁂𑀤𑀓𑁄𑀢𑀺 𑀏𑀢𑁆𑀣 𑀲𑀯𑀦𑀨𑀭𑀼𑀲𑀢𑀸𑀫𑀢𑁆𑀢𑁂𑀦 𑀫𑀫𑁆𑀫𑀘𑁆𑀙𑁂𑀤𑀓𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀧𑀬𑁄𑀕𑁄𑀢𑀺 ¶ 𑀯𑀘𑀻𑀧𑀬𑁄𑀕𑁄. 𑀘𑀺𑀢𑁆𑀢𑀲𑀡𑁆𑀳𑀢𑀸𑀬𑀸𑀢𑀺 𑀏𑀓𑀦𑁆𑀢𑀨𑀭𑀼𑀲𑀘𑁂𑀢𑀦𑀸𑀬 𑀅𑀪𑀸𑀯𑀫𑀸𑀳. 𑀢𑀢𑁄𑀬𑁂𑀯 𑀳𑀺 𑀨𑀭𑀼𑀲𑀯𑀸𑀘𑀸 𑀦 𑀳𑁄𑀢𑀺 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸, 𑀓𑀫𑁆𑀫𑀪𑀸𑀯𑀁 𑀧𑀦 𑀦 𑀲𑀓𑁆𑀓𑀸 𑀯𑀸𑀭𑁂𑀢𑀼𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀫𑀸𑀢𑀸𑀧𑀺𑀢𑀭𑁄 𑀳𑀻’’𑀢𑀺𑀆𑀤𑀺𑀦𑀸𑀧𑀺 𑀢𑀤𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀺. 𑀏𑀯𑀁 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀘𑁂𑀢𑀦𑀸𑀨𑀭𑀼𑀲𑀢𑀸𑀬 𑀨𑀭𑀼𑀲𑀯𑀸𑀘𑀸𑀪𑀸𑀯𑀁 𑀲𑀸𑀥𑁂𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀅𑀦𑁆𑀯𑀬𑀯𑀲𑁂𑀦 𑀲𑀸𑀥𑁂𑀢𑀼𑀁 ‘‘𑀬𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀨𑀭𑀼𑀲𑀸 𑀯𑀸𑀘𑀸 𑀦 𑀳𑁄𑀢𑀺 𑀨𑀭𑀼𑀲𑀸 𑀯𑀸𑀘𑀸 𑀳𑁄𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄 𑀲𑀸𑀢𑀺 𑀨𑀭𑀼𑀲𑀯𑀸𑀘𑀸. 𑀬𑀦𑁆𑀢𑀺 𑀧𑀼𑀕𑁆𑀕𑀮𑀁.

𑀏𑀢𑁆𑀣𑀸𑀧𑀺 𑀓𑀫𑁆𑀫𑀧𑀣𑀪𑀸𑀯𑀁 𑀅𑀧𑁆𑀧𑀢𑁆𑀢𑀸 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀇𑀢𑀭𑀸 𑀫𑀳𑀸𑀲𑀸𑀯𑀚𑁆𑀚𑀸. 𑀢𑀣𑀸 𑀓𑀺𑀮𑁂𑀲𑀸𑀦𑀁 𑀫𑀼𑀤𑀼𑀢𑀺𑀩𑁆𑀩𑀢𑀸𑀪𑁂𑀤𑁂𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀓𑁂𑀘𑀺 𑀧𑀦 ‘‘𑀬𑀁 𑀉𑀤𑁆𑀤𑀺𑀲𑁆𑀲 𑀨𑀭𑀼𑀲𑀯𑀸𑀘𑀸 𑀧𑀬𑀼𑀚𑁆𑀚𑀢𑀺, 𑀢𑀲𑁆𑀲 𑀲𑀫𑁆𑀫𑀼𑀔𑀸𑀬𑁂𑀯 𑀲𑀻𑀲𑀁 𑀏𑀢𑀻’’𑀢𑀺 𑀯𑀤𑀦𑁆𑀢𑀺, 𑀏𑀓𑁂 𑀧𑀦 ‘‘𑀧𑀭𑀫𑁆𑀫𑀼𑀔𑀸𑀧𑀺 𑀨𑀭𑀼𑀲𑀯𑀸𑀘𑀸 𑀳𑁄𑀢𑀺𑀬𑁂𑀯𑀸’’𑀢𑀺. 𑀢𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 𑀬𑀼𑀢𑁆𑀢𑁄 𑀲𑀺𑀬𑀸, 𑀲𑀫𑁆𑀫𑀼𑀔𑀸 𑀧𑀬𑁄𑀕𑁂 𑀅𑀕𑀸𑀭𑀯𑀸𑀤𑀻𑀦𑀁 𑀩𑀮𑀯𑀪𑀸𑀯𑀢𑁄 𑀲𑀺𑀬𑀸 𑀘𑁂𑀢𑀦𑀸 𑀩𑀮𑀯𑀢𑀻, 𑀧𑀭𑀲𑁆𑀲 𑀘 𑀢𑀤𑀢𑁆𑀣𑀯𑀺𑀚𑀸𑀦𑀦𑀁, 𑀦 𑀢𑀣𑀸 𑀧𑀭𑀫𑁆𑀫𑀼𑀔𑀸. 𑀬𑀣𑀸 𑀧𑀦 𑀅𑀓𑁆𑀓𑁄𑀲𑀺𑀢𑁂 𑀫𑀢𑁂 𑀆𑀴𑀳𑀦𑁂 𑀓𑀢𑀸 𑀔𑀫𑀦𑀸 𑀉𑀧𑀯𑀸𑀤𑀦𑁆𑀢𑀭𑀸𑀬𑀁 𑀦𑀺𑀯𑀢𑁆𑀢𑁂𑀢𑀺, 𑀏𑀯𑀁 𑀧𑀭𑀫𑁆𑀫𑀼𑀔𑀸 𑀧𑀬𑀼𑀢𑁆𑀢𑀸𑀧𑀺 𑀨𑀭𑀼𑀲𑀯𑀸𑀘𑀸 𑀳𑁄𑀢𑀺𑀬𑁂𑀯𑀸𑀢𑀺 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺, 𑀢𑀲𑁆𑀫𑀸 𑀉𑀪𑀬𑀢𑁆𑀣𑀸𑀧𑀺 𑀨𑀭𑀼𑀲𑀯𑀸𑀘𑀸 𑀲𑀫𑁆𑀪𑀯𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀧𑀭𑀲𑁆𑀲 𑀢𑀤𑀢𑁆𑀣𑀯𑀺𑀚𑀸𑀦𑀦𑀫𑀜𑁆𑀜𑀢𑁆𑀭 𑀢𑀬𑁄𑀯 𑀢𑀲𑁆𑀲𑀸 𑀲𑀫𑁆𑀪𑀸𑀭𑀸 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀸𑀢𑀺. 𑀓𑀼𑀧𑀺𑀢𑀘𑀺𑀢𑁆𑀢𑀦𑁆𑀢𑀺 𑀅𑀓𑁆𑀓𑁄𑀲𑀦𑀸𑀥𑀺𑀧𑁆𑀧𑀸𑀬𑁂𑀦𑁂𑀯 𑀯𑀼𑀢𑁆𑀢𑀁, 𑀦 𑀧𑀦 𑀫𑀭𑀡𑀸𑀥𑀺𑀧𑁆𑀧𑀸𑀬𑁂𑀦. 𑀫𑀭𑀡𑀸𑀥𑀺𑀧𑁆𑀧𑀸𑀬𑁂𑀦 𑀳𑀺 𑀲𑀢𑀺 𑀘𑀺𑀢𑁆𑀢𑀓𑁄𑀧𑁂 𑀅𑀢𑁆𑀣𑀲𑀺𑀤𑁆𑀥𑀺𑀬𑀸, 𑀢𑀤𑀪𑀸𑀯𑁂 𑀘 𑀬𑀣𑀸𑀭𑀳𑀁 𑀧𑀸𑀡𑀸𑀢𑀺𑀧𑀸𑀢𑀩𑁆𑀬𑀸𑀧𑀸𑀤𑀸𑀯 𑀳𑁄𑀦𑁆𑀢𑀺.

𑀏𑀮𑀁 𑀯𑀼𑀘𑁆𑀘𑀢𑀺 𑀤𑁄𑀲𑁄 𑀇𑀮𑀢𑀺 𑀘𑀺𑀢𑁆𑀢𑀁, 𑀧𑀼𑀕𑁆𑀕𑀮𑁄 𑀯𑀸 𑀓𑀫𑁆𑀧𑀢𑀺 𑀏𑀢𑁂𑀦𑀸𑀢𑀺 𑀓𑀢𑁆𑀯𑀸. 𑀏𑀢𑁆𑀣𑀸𑀢𑀺 𑁋

‘‘𑀦𑁂𑀮𑀗𑁆𑀕𑁄 𑀲𑁂𑀢𑀧𑀘𑁆𑀙𑀸𑀤𑁄, 𑀏𑀓𑀸𑀭𑁄 𑀯𑀢𑁆𑀢𑀢𑀻 𑀭𑀣𑁄;

𑀅𑀦𑀻𑀖𑀁 𑀧𑀲𑁆𑀲 𑀆𑀬𑀦𑁆𑀢𑀁, 𑀙𑀺𑀦𑁆𑀦𑀲𑁄𑀢𑀁 𑀅𑀩𑀦𑁆𑀥𑀦’’𑀦𑁆𑀢𑀺. (𑀲𑀁. 𑀦𑀺. 𑁪.𑁩𑁪𑁭; 𑀉𑀤𑀸. 𑁬𑁫; 𑀧𑁂𑀝𑀓𑁄. 𑁨𑁫); 𑁋

𑀇𑀫𑀺𑀲𑁆𑀲𑀸 𑀉𑀤𑀸𑀦𑀕𑀸𑀣𑀸𑀬. 𑀲𑀻𑀮𑀜𑁆𑀳𑁂𑀢𑁆𑀣 𑀦𑀺𑀤𑁆𑀤𑁄𑀲𑀢𑀸𑀬 ‘‘𑀦𑁂𑀮’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀆𑀬𑀲𑁆𑀫𑀢𑀸 𑀓𑀸𑀫𑀪𑀽𑀣𑁂𑀭𑁂𑀦 𑀧𑀼𑀝𑁆𑀞𑁄 𑀲𑀁𑀬𑀼𑀢𑁆𑀢𑀸𑀕𑀫𑀯𑀭𑁂 𑀲𑀴𑀸𑀬𑀢𑀦𑀯𑀕𑁆𑀕𑁂 ‘‘𑀦𑁂𑀮𑀗𑁆𑀕’’𑀦𑁆𑀢𑀺 𑀔𑁄 𑀪𑀦𑁆𑀢𑁂 𑀲𑀻𑀮𑀸𑀦𑀫𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀲𑀁. 𑀦𑀺. 𑁪.𑁩𑁪𑁭) 𑀯𑀸𑀘𑀸 𑀦𑀸𑀫 𑀲𑀤𑁆𑀤𑀲𑀪𑀸𑀯𑀸 𑀢𑀁𑀢𑀤𑀢𑁆𑀣𑀦𑀺𑀩𑀦𑁆𑀥𑀦𑀸𑀢𑀺 ¶ 𑀲𑀸𑀤𑀼𑀭𑀲𑀲𑀤𑀺𑀲𑀢𑁆𑀢𑀸 𑀫𑀥𑀼𑀭𑀫𑁂𑀯 𑀩𑁆𑀬𑀜𑁆𑀚𑀦𑀁, 𑀅𑀢𑁆𑀣𑁄 𑀘 𑀢𑀩𑁆𑀪𑀸𑀯𑀢𑁄𑀢𑀺 𑀅𑀢𑁆𑀣𑀫𑁂𑀯 𑀲𑀦𑁆𑀥𑀸𑀬 𑀩𑁆𑀬𑀜𑁆𑀚𑀦𑀫𑀥𑀼𑀭𑀢𑀸𑀬 ¶ , 𑀅𑀢𑁆𑀣𑀫𑀥𑀼𑀭𑀢𑀸𑀬𑀸’’𑀢𑀺 𑀘 𑀯𑀼𑀢𑁆𑀢𑀁. 𑀯𑀺𑀲𑁂𑀲𑀦𑀧𑀭𑀦𑀺𑀧𑀸𑀢𑁄𑀧𑀺 𑀳𑀺 𑀮𑁄𑀓𑁂 𑀤𑀺𑀲𑁆𑀲𑀢𑀺 ‘‘𑀅𑀕𑁆𑀬𑀸𑀳𑀺𑀢𑁄’’𑀢𑀺𑀆𑀤𑀻𑀲𑀼. 𑀅𑀧𑀺𑀘 𑀅𑀯𑀬𑀯𑀸𑀧𑁂𑀓𑁆𑀔𑀦𑁂 𑀲𑀢𑀺 ‘‘𑀫𑀥𑀼𑀭𑀁 𑀩𑁆𑀬𑀜𑁆𑀚𑀦𑀁 𑀬𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑁄. 𑀲𑀼𑀔𑀸𑀢𑀺 𑀲𑀼𑀔𑀓𑀭𑀡𑀻, 𑀲𑀼𑀔𑀳𑁂𑀢𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀡𑁆𑀡𑀲𑀽𑀮𑀦𑁆𑀢𑀺 𑀓𑀡𑁆𑀡𑀲𑀗𑁆𑀓𑀼𑀁. 𑀓𑀡𑁆𑀡𑀲𑀤𑁆𑀤𑁂𑀦 𑀘𑁂𑀢𑁆𑀣 𑀲𑁄𑀢𑀯𑀺𑀜𑁆𑀜𑀸𑀡𑀧𑀝𑀺𑀩𑀤𑁆𑀥𑀢𑀤𑀦𑀼𑀯𑀢𑁆𑀢𑀓𑀸 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑁄 𑀕𑀳𑀺𑀢𑀸. 𑀯𑁄𑀳𑀸𑀭𑀓𑀣𑀸 𑀳𑁂𑀲𑀸 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸, 𑀢𑀲𑁆𑀲𑀸 𑀯𑀡𑁆𑀡𑀦𑀸 𑀘, 𑀢𑀣𑀸 𑀘𑁂𑀯 𑀯𑀼𑀢𑁆𑀢𑀁 ‘‘𑀲𑀓𑀮𑀲𑀭𑀻𑀭𑁂 𑀓𑁄𑀧𑀁, 𑀧𑁂𑀫’’𑀦𑁆𑀢𑀺 𑀘. 𑀦 𑀳𑀺 𑀳𑀤𑀬𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑁄 𑀓𑁄𑀧𑁄, 𑀧𑁂𑀫𑁄 𑀘 𑀲𑀓𑀮𑀲𑀭𑀻𑀭𑁂 𑀯𑀢𑁆𑀢𑀢𑀺. 𑀏𑀲 𑀦𑀬𑁄 𑀈𑀤𑀺𑀲𑁂𑀲𑀼. 𑀲𑀼𑀔𑁂𑀦 𑀘𑀺𑀢𑁆𑀢𑀁 𑀧𑀯𑀺𑀲𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀤𑁆𑀯𑀬𑁂𑀦𑀸𑀢𑀺 𑀅𑀢𑁆𑀣𑁄, 𑀅𑀮𑀼𑀢𑁆𑀢𑀲𑀫𑀸𑀲𑁄 𑀘𑁂𑀲 𑀬𑀣𑀸 ‘‘𑀅𑀫𑀢𑀗𑁆𑀕𑀢𑁄’’𑀢𑀺. 𑀧𑀼𑀭𑁂𑀢𑀺 𑀕𑀼𑀡𑀧𑀸𑀭𑀺𑀧𑀼𑀭𑁂, 𑀢𑁂𑀦𑀸𑀳 ‘‘𑀕𑀼𑀡𑀧𑀭𑀺𑀧𑀼𑀡𑁆𑀡𑀢𑀸𑀬𑀸’’𑀢𑀺. 𑀧𑀼𑀭𑁂 𑀲𑀁𑀯𑀟𑁆𑀠𑀸 𑀧𑁄𑀭𑀻, 𑀢𑀸𑀤𑀺𑀲𑀸 𑀦𑀸𑀭𑀻 𑀯𑀺𑀬𑀸𑀢𑀺 𑀯𑀸𑀘𑀸𑀧𑀺 𑀧𑁄𑀭𑀻𑀢𑀺 𑀅𑀢𑁆𑀣𑀫𑀸𑀳 ‘‘𑀧𑀼𑀭𑁂’’𑀢𑀺𑀆𑀤𑀺𑀦𑀸. 𑀲𑀼𑀓𑀼𑀫𑀸𑀭𑀸𑀢𑀺 𑀲𑀼𑀢𑀭𑀼𑀡𑀸. 𑀉𑀧𑀫𑁂𑀬𑁆𑀬𑀧𑀓𑁆𑀔𑁂 𑀧𑀦 𑀅𑀨𑀭𑀼𑀲𑀢𑀸𑀬 𑀫𑀼𑀤𑀼𑀓𑀪𑀸𑀯𑁄 𑀏𑀯 𑀲𑀼𑀓𑀼𑀫𑀸𑀭𑀢𑀸. 𑀧𑀼𑀭𑀲𑁆𑀲𑀸𑀢𑀺 𑀏𑀢𑁆𑀣 𑀧𑀼𑀭-𑀲𑀤𑁆𑀤𑁄 𑀢𑀦𑁆𑀦𑀺𑀯𑀸𑀲𑀻𑀯𑀸𑀘𑀓𑁄 𑀲𑀳𑀘𑀭𑀡𑀯𑀲𑁂𑀦 ‘‘𑀕𑀸𑀫𑁄 𑀆𑀕𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬, 𑀢𑁂𑀦𑁂𑀯𑀸𑀳 ‘‘𑀦𑀕𑀭𑀯𑀸𑀲𑀻𑀦’’𑀦𑁆𑀢𑀺. 𑀏𑀲𑀸𑀢𑀺 𑀢𑀁𑀲𑀫𑁆𑀩𑀦𑁆𑀥𑀻𑀦𑀺𑀤𑁆𑀤𑁂𑀲𑀸 𑀯𑀸𑀘𑀸. 𑀏𑀯𑀭𑀽𑀧𑀻 𑀓𑀣𑀸𑀢𑀺 𑀅𑀢𑁆𑀣𑀢𑁆𑀢𑀬𑁂𑀦 𑀧𑀓𑀸𑀲𑀺𑀢𑀸 𑀓𑀣𑀸. 𑀓𑀦𑁆𑀢𑀸𑀢𑀺 𑀓𑀸𑀫𑀺𑀢𑀸 𑀢𑀼𑀝𑁆𑀞𑀸 𑀬𑀣𑀸 ‘‘𑀧𑀓𑁆𑀓𑀦𑁆𑀢𑁄’’𑀢𑀺, 𑀫𑀸𑀦-𑀲𑀤𑁆𑀤𑀲𑁆𑀲 𑀯𑀸 𑀅𑀦𑁆𑀢𑀩𑁆𑀬𑀧𑁆𑀧𑀤𑁂𑀲𑁄, 𑀓𑀸𑀫𑀺𑀬𑀫𑀸𑀦𑀸𑀢𑀺 𑀅𑀢𑁆𑀣𑁄. 𑀬𑀣𑀸 ‘‘𑀅𑀦𑀸𑀧𑀢𑁆𑀢𑀺 𑀅𑀲𑀫𑀦𑀼𑀪𑀸𑀲𑀦𑁆𑀢𑀲𑁆𑀲𑀸’’𑀢𑀺 (𑀧𑀸𑀭𑀸. 𑁪𑁧𑁬, 𑁪𑁩𑁦, 𑁪𑁪𑁧) 𑀫𑀦𑀁 𑀅𑀧𑁆𑀧𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀫𑀦𑀸𑀧𑀸, 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀯𑀼𑀟𑁆𑀠𑀺𑀓𑀭𑀸’’𑀢𑀺. 𑀢𑀣𑀸𑀓𑀸𑀭𑀺𑀦𑀻𑀢𑀺 𑀅𑀢𑁆𑀣𑁄. 𑀅𑀢𑁄 𑀩𑀳𑀼𑀦𑁄 𑀚𑀦𑀲𑁆𑀲𑀸𑀢𑀺 𑀇𑀥 𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀁, 𑀦 𑀢𑀼 𑀧𑀼𑀭𑀺𑀫𑀲𑁆𑀫𑀺𑀁 𑀯𑀺𑀬 𑀓𑀢𑁆𑀢𑀭𑀺.

𑀓𑀸𑀫𑀁 𑀢𑁂𑀳𑀺 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑁄 𑀅𑀢𑁆𑀣𑁄 𑀲𑀫𑁆𑀪𑀯𑀢𑀺, 𑀲𑁄 𑀧𑀦 𑀅𑀨𑀮𑀢𑁆𑀢𑀸 𑀪𑀸𑀲𑀺𑀢𑀢𑁆𑀣𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄𑀬𑁂𑀯 𑀦𑀸𑀫 𑀦 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀢𑁆𑀣𑀯𑀺𑀜𑁆𑀜𑀸𑀧𑀺𑀓𑀸’’𑀢𑀺. 𑀅𑀧𑀺𑀘 𑀧𑀬𑁄𑀚𑀦𑀢𑁆𑀣𑀸𑀪𑀸𑀯𑀢𑁄 𑀅𑀦𑀢𑁆𑀣𑀸, 𑀯𑀸𑀘𑀸, 𑀢𑀁 𑀯𑀺𑀜𑁆𑀜𑀸𑀧𑀺𑀓𑀸𑀢𑀺𑀧𑀺 𑀯𑀝𑁆𑀝𑀢𑀺. 𑀅𑀓𑀼𑀲𑀮𑀘𑁂𑀢𑀦𑀸 𑀲𑀫𑁆𑀨𑀧𑁆𑀧𑀮𑀸𑀧𑁄 𑀲𑀫𑁆𑀨𑀁 𑀧𑀮𑀧𑀦𑁆𑀢𑀺 𑀏𑀢𑀸𑀬𑀸𑀢𑀺 𑀓𑀢𑁆𑀯𑀸. 𑀆𑀲𑁂𑀯𑀦𑀁 𑀪𑀸𑀯𑀦𑀁 𑀩𑀳𑀼𑀮𑀻𑀓𑀭𑀡𑀁. 𑀬𑀁 𑀚𑀦𑀁 𑀕𑀸𑀳𑀸𑀧𑀬𑀺𑀢𑀼𑀁 𑀧𑀯𑀢𑁆𑀢𑀺𑀢𑁄, 𑀢𑁂𑀦 𑀅𑀕𑁆𑀕𑀳𑀺𑀢𑁂 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀕𑀳𑀺𑀢𑁂 𑀫𑀳𑀸𑀲𑀸𑀯𑀚𑁆𑀚𑁄. 𑀓𑀺𑀮𑁂𑀲𑀸𑀦𑀁 𑀫𑀼𑀤𑀼𑀢𑀺𑀩𑁆𑀩𑀢𑀸𑀯𑀲𑁂𑀦𑀸𑀧𑀺 𑀅𑀧𑁆𑀧𑀲𑀸𑀯𑀚𑁆𑀚𑀫𑀳𑀸𑀲𑀸𑀯𑀚𑁆𑀚𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀪𑀸𑀭𑀢𑀦𑀸𑀫𑀓𑀸𑀦𑀁 𑀤𑁆𑀯𑁂𑀪𑀸𑀢𑀼𑀓𑀭𑀸𑀚𑀽𑀦𑀁 𑀬𑀼𑀤𑁆𑀥𑀓𑀣𑀸, 𑀤𑀲𑀕𑀺𑀭𑀺𑀬𑀓𑁆𑀔𑁂𑀦 𑀲𑀻𑀢𑀸𑀬 𑀦𑀸𑀫 𑀤𑁂𑀯𑀺𑀬𑀸 𑀆𑀳𑀭𑀡𑀓𑀣𑀸, 𑀭𑀸𑀫𑀭𑀜𑁆𑀜𑀸 𑀧𑀘𑁆𑀘𑀸𑀳𑀭𑀡𑀓𑀣𑀸 ¶ , 𑀬𑀣𑀸 𑀢𑀁 𑀅𑀥𑀼𑀦𑀸 𑀩𑀸𑀳𑀺𑀭𑀓𑁂𑀳𑀺 𑀧𑀭𑀺𑀘𑀬𑀺𑀢𑀸 𑀲𑀓𑁆𑀓𑀝𑀪𑀸𑀲𑀸𑀬 𑀕𑀡𑁆𑀞𑀺𑀢𑀸 𑀭𑀸𑀫𑀧𑀼𑀭𑀸𑀡𑀪𑀸𑀭𑀢𑀧𑀼𑀭𑀸𑀡𑀸𑀤𑀺𑀓𑀣𑀸𑀢𑀺, 𑀏𑀯𑀫𑀸𑀤𑀺𑀓𑀸 𑀦𑀺𑀭𑀢𑁆𑀣𑀓𑀓𑀣𑀸 𑀲𑀫𑁆𑀨𑀧𑁆𑀧𑀮𑀸𑀧𑁄𑀢𑀺 𑀯𑀼𑀢𑁆𑀢𑀁 ‘‘𑀪𑀸𑀭𑀢…𑀧𑁂… 𑀧𑀼𑀭𑁂𑀓𑁆𑀔𑀸𑀭𑀢𑀸’’𑀢𑀺.

‘‘𑀓𑀸𑀮𑀯𑀸𑀤𑀻’’𑀢𑀺𑀆𑀤𑀺 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑀲𑁆𑀲 𑀧𑀝𑀺𑀧𑀢𑁆𑀢𑀺𑀲𑀦𑁆𑀤𑀲𑁆𑀲𑀦𑀁 𑀬𑀣𑀸 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄’’𑀢𑀺𑀆𑀤𑀺 (𑀤𑀻. 𑀦𑀺. 𑁧.𑁮, 𑁧𑁯𑁪) 𑀧𑀸𑀡𑀸𑀢𑀺𑀧𑀸𑀢𑀧𑁆𑀧𑀳𑀸𑀦𑀲𑁆𑀲 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀁. ‘‘𑀧𑀸𑀡𑀸𑀢𑀺𑀧𑀸𑀢𑀁 ¶ 𑀧𑀳𑀸𑀬 𑀯𑀺𑀳𑀭𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑁂 𑀓𑀣𑀁 𑀧𑀸𑀡𑀸𑀢𑀺𑀧𑀸𑀢𑀧𑁆𑀧𑀳𑀸𑀦𑀁 𑀳𑁄𑀢𑀻𑀢𑀺 𑀅𑀧𑁂𑀓𑁆𑀔𑀸𑀲𑀫𑁆𑀪𑀯𑀢𑁄 ‘‘𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀸 𑀧𑀦 𑀯𑀺𑀭𑀢𑀺 𑀓𑀣𑀦𑁆𑀢𑀺 𑀆𑀳 ‘‘𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢 𑀲𑀢𑁆𑀣𑁄’’𑀢𑀺. 𑀢𑀜𑁆𑀘 𑀤𑀡𑁆𑀟𑀲𑀢𑁆𑀣𑀦𑀺𑀥𑀸𑀦𑀁 𑀓𑀣𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀮𑀚𑁆𑀚𑀻’’𑀢𑀺𑀆𑀤𑀺. 𑀏𑀯𑀁 𑀉𑀢𑁆𑀢𑀭𑀼𑀢𑁆𑀢𑀭𑀁 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀉𑀧𑀸𑀬𑀲𑀦𑁆𑀤𑀲𑁆𑀲𑀦𑀁. 𑀢𑀣𑀸 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼𑀧𑀺 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀸𑀮𑀯𑀸𑀤𑀻𑀢𑀺𑀆𑀤𑀺 𑀲𑀫𑁆𑀨𑀧𑁆𑀧𑀮𑀸𑀧𑀸 𑀧𑀝𑀺𑀯𑀺𑀭𑀢𑀲𑁆𑀲 𑀧𑀝𑀺𑀧𑀢𑁆𑀢𑀺𑀲𑀦𑁆𑀤𑀲𑁆𑀲𑀦’’𑀦𑁆𑀢𑀺. 𑀅𑀢𑁆𑀣𑀲𑀁𑀳𑀺𑀢𑀸𑀧𑀺 𑀳𑀺 𑀯𑀸𑀘𑀸 𑀅𑀬𑀼𑀢𑁆𑀢𑀓𑀸𑀮𑀧𑀬𑁄𑀕𑁂𑀦 𑀅𑀢𑁆𑀣𑀸𑀯𑀳𑀸 𑀦 𑀲𑀺𑀬𑀸𑀢𑀺 𑀅𑀦𑀢𑁆𑀣𑀯𑀺𑀜𑁆𑀜𑀸𑀧𑀦𑀪𑀸𑀯𑀁 𑀅𑀦𑀼𑀮𑁄𑀫𑁂𑀢𑀺, 𑀢𑀲𑁆𑀫𑀸 𑀲𑀫𑁆𑀨𑀧𑁆𑀧𑀮𑀸𑀧𑀁 𑀧𑀚𑀳𑀦𑁆𑀢𑁂𑀦 𑀅𑀓𑀸𑀮𑀯𑀸𑀤𑀺𑀢𑀸 𑀧𑀭𑀺𑀯𑀚𑁆𑀚𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀮𑀯𑀸𑀤𑀻’’𑀢𑀺 𑀯𑀼𑀢𑁆𑀢𑀁. 𑀓𑀸𑀮𑁂 𑀯𑀤𑀦𑁆𑀢𑁂𑀦𑀸𑀧𑀺 𑀉𑀪𑀬𑀢𑁆𑀣 𑀅𑀲𑀸𑀥𑀦𑀢𑁄 𑀅𑀪𑀽𑀢𑀁 𑀧𑀭𑀺𑀯𑀚𑁆𑀚𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀪𑀽𑀢𑀯𑀸𑀤𑀻’’𑀢𑀺. 𑀪𑀽𑀢𑀜𑁆𑀘 𑀯𑀤𑀦𑁆𑀢𑁂𑀦 𑀬𑀁 𑀇𑀥𑀮𑁄𑀓𑀧𑀭𑀮𑁄𑀓𑀳𑀺𑀢𑀲𑀫𑁆𑀧𑀸𑀤𑀦𑀓𑀁, 𑀢𑀤𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀯𑀸𑀤𑀻’’𑀢𑀺. 𑀅𑀢𑁆𑀣𑀁 𑀯𑀤𑀦𑁆𑀢𑁂𑀦𑀸𑀧𑀺 𑀦 𑀮𑁄𑀓𑀺𑀬𑀥𑀫𑁆𑀫𑀦𑀺𑀲𑁆𑀲𑀺𑀢𑀫𑁂𑀯 𑀯𑀢𑁆𑀢𑀩𑁆𑀩𑀁, 𑀅𑀣 𑀔𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀲𑁆𑀲𑀺𑀢𑀫𑁆𑀧𑀻𑀢𑀺 𑀆𑀳 ‘‘𑀥𑀫𑁆𑀫𑀯𑀸𑀤𑀻’’𑀢𑀺. 𑀬𑀣𑀸 𑀘 𑀅𑀢𑁆𑀣𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀲𑁆𑀲𑀺𑀢𑁄 𑀳𑁄𑀢𑀺, 𑀢𑀣𑀸 𑀤𑀲𑁆𑀲𑀦𑀢𑁆𑀣𑀁 ‘‘𑀯𑀺𑀦𑀬𑀯𑀸𑀤𑀻’’𑀢𑀺 𑀯𑀼𑀢𑁆𑀢𑀁.

𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄, 𑀲𑀢𑀺𑀜𑀸𑀡𑀔𑀦𑁆𑀢𑀺𑀯𑀻𑀭𑀺𑀬𑀲𑀁𑀯𑀭𑁄𑀢𑀺 𑀳𑀺 𑀧𑀜𑁆𑀘𑀦𑁆𑀦𑀁 𑀲𑀁𑀯𑀭𑀯𑀺𑀦𑀬𑀸𑀦𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑀁, 𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀦𑁆𑀢𑀺 𑀧𑀜𑁆𑀘𑀦𑁆𑀦𑀁 𑀧𑀳𑀸𑀦𑀯𑀺𑀦𑀬𑀸𑀦𑀜𑁆𑀘 𑀯𑀲𑁂𑀦 𑀯𑀼𑀘𑁆𑀘𑀫𑀸𑀦𑁄 𑀅𑀢𑁆𑀣𑁄 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀳𑁂𑀢𑀼𑀪𑀸𑀯𑀢𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑁄 𑀳𑁄𑀢𑀺. 𑀏𑀯𑀁 𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑁄 𑀘 𑀅𑀢𑁆𑀣𑁄 𑀯𑀼𑀘𑁆𑀘𑀫𑀸𑀦𑁄 𑀤𑁂𑀲𑀦𑀸𑀓𑁄𑀲𑀮𑁆𑀮𑁂 𑀲𑀢𑀺 𑀲𑁄𑀪𑀢𑀺, 𑀓𑀺𑀘𑁆𑀘𑀓𑀭𑁄 𑀘 𑀳𑁄𑀢𑀺, 𑀦𑀸𑀜𑁆𑀜𑀣𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀢𑀫𑁂𑀯 𑀤𑁂𑀲𑀦𑀸𑀓𑁄𑀲𑀮𑁆𑀮𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀓𑀸𑀮𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀅𑀚𑁆𑀛𑀸𑀲𑀬𑀝𑁆𑀞𑀼𑀧𑁆𑀧𑀢𑁆𑀢𑀻𑀦𑀁, 𑀧𑀼𑀘𑁆𑀙𑀸𑀬 𑀘 𑀯𑀲𑁂𑀦 𑀑𑀢𑀺𑀡𑁆𑀡𑁂 𑀤𑁂𑀲𑀦𑀸𑀯𑀺𑀲𑀬𑁂 𑀏𑀓𑀁𑀲𑀸𑀤𑀺𑀩𑁆𑀬𑀸𑀓𑀭𑀡𑀯𑀺𑀪𑀸𑀕𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀞𑀧𑀦𑀸𑀳𑁂𑀢𑀼𑀤𑀸𑀳𑀭𑀡𑀲𑀁𑀲𑀦𑁆𑀤𑀦𑀸𑀦𑀺 𑀢𑀁𑀢𑀁𑀓𑀸𑀮𑀸𑀦𑀼𑀭𑀽𑀧𑀁 ¶ 𑀯𑀺𑀪𑀸𑀯𑁂𑀦𑁆𑀢𑀺𑀬𑀸 𑀧𑀭𑀺𑀫𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑀸𑀬 𑀕𑀫𑁆𑀪𑀻𑀭𑀼𑀤𑀸𑀦𑀧𑀳𑀽𑀢𑀢𑁆𑀣𑀯𑀺𑀢𑁆𑀣𑀸𑀭𑀲𑀗𑁆𑀕𑀸𑀳𑀺𑀓𑀸𑀬 𑀤𑁂𑀲𑀦𑀸𑀬 𑀧𑀭𑁂 𑀬𑀣𑀸𑀚𑁆𑀛𑀸𑀲𑀬𑀁 𑀧𑀭𑀫𑀢𑁆𑀣𑀲𑀺𑀤𑁆𑀥𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑁄 ‘‘𑀤𑁂𑀲𑀦𑀸𑀓𑀼𑀲𑀮𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀏𑀯𑀫𑁂𑀢𑁆𑀣𑀸𑀧𑀺 𑀅𑀢𑁆𑀣𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀯𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀸𑀮𑀦𑁆𑀢𑀺 𑀯𑀢𑁆𑀢𑀩𑁆𑀩𑀯𑀘𑀦𑀲𑁆𑀲 𑀅𑀦𑀼𑀭𑀽𑀧𑀓𑀸𑀮𑀁, 𑀢𑀢𑁆𑀣 𑀯𑀸 𑀧𑀬𑀼𑀚𑁆𑀚𑀺𑀢𑀩𑁆𑀩𑀓𑀸𑀮𑀁. 𑀲𑀪𑀸𑀯𑀯𑀲𑁂𑀦𑁂𑀯 𑀪𑀽𑀢𑀢𑀸𑀢𑀺 𑀆𑀳 ‘‘𑀲𑀪𑀸𑀯𑀫𑁂𑀯𑀸’’𑀢𑀺. 𑀅𑀢𑁆𑀣𑀁 𑀯𑀤𑀢𑀻𑀢𑀺 𑀅𑀢𑁆𑀣𑀯𑀸𑀤𑀻. 𑀅𑀢𑁆𑀣𑀯𑀤𑀦𑀜𑁆𑀘 𑀢𑀦𑁆𑀦𑀺𑀲𑁆𑀲𑀺𑀢𑀯𑀸𑀘𑀸𑀓𑀣𑀦𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁 ‘‘𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀫𑁂𑀯 𑀓𑀢𑁆𑀯𑀸’’𑀢𑀺. 𑀥𑀫𑁆𑀫𑀯𑀸𑀤𑀻’’𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀦𑀺𑀥𑁂𑀢𑀺 𑀲𑀦𑁆𑀦𑀺𑀥𑀸𑀦𑀁 𑀓𑀭𑁄𑀢𑀺 𑀏𑀢𑁆𑀣𑀸𑀢𑀺 𑀦𑀺𑀥𑀸𑀦𑀁. 𑀞𑀧𑀦𑁄𑀓𑀸𑀲𑁄. ‘‘𑀞𑀸𑀦𑀯𑀢𑀻’’𑀢𑀺 𑀯𑀼𑀢𑁆𑀢𑁂 𑀢𑀲𑁆𑀫𑀺𑀁 𑀞𑀸𑀦𑁂 ¶ 𑀞𑀧𑁂𑀢𑀼𑀁 𑀬𑀼𑀢𑁆𑀢𑀸𑀢𑀺𑀧𑀺 𑀅𑀢𑁆𑀣𑁄 𑀲𑀫𑁆𑀪𑀯𑀢𑀻𑀢𑀺 𑀆𑀳 ‘‘𑀳𑀤𑀬𑁂’’𑀢𑀺𑀆𑀤𑀺. 𑀦𑀺𑀥𑀸𑀦𑀯𑀢𑀻𑀧𑀺 𑀯𑀸𑀘𑀸 𑀓𑀸𑀮𑀬𑀼𑀢𑁆𑀢𑀸𑀯 𑀅𑀢𑁆𑀣𑀸𑀯𑀳𑀸, 𑀢𑀲𑁆𑀫𑀸 ‘‘𑀓𑀸𑀮𑁂𑀦𑀸’’𑀢𑀺 𑀇𑀤𑀁 ‘‘𑀦𑀺𑀥𑀸𑀦𑀯𑀢𑀺𑀁’’ 𑀯𑀸𑀘𑀁 𑀪𑀸𑀲𑀺𑀢𑀸’’𑀢𑀺 𑀏𑀢𑀲𑁆𑀲𑀸𑀧𑁂𑀓𑁆𑀔𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀏𑀯𑀭𑀽𑀧𑀺’’𑀦𑁆𑀢𑀺𑀆𑀤𑀺𑀦𑀸. 𑀇𑀘𑁆𑀙𑀺𑀢𑀢𑁆𑀣𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀁 𑀅𑀧𑀤𑀺𑀲𑀺𑀢𑀩𑁆𑀩𑁄, 𑀅𑀧𑀤𑀺𑀲𑀻𑀬𑀢𑀺 𑀯𑀸 𑀇𑀘𑁆𑀙𑀺𑀢𑀢𑁆𑀣𑁄 𑀅𑀦𑁂𑀦𑀸𑀢𑀺 𑀅𑀧𑀤𑁂𑀲𑁄, 𑀉𑀧𑀫𑀸, 𑀳𑁂𑀢𑀼𑀤𑀸𑀳𑀭𑀡𑀸𑀤𑀺𑀓𑀸𑀭𑀡𑀁 𑀯𑀸, 𑀢𑁂𑀦 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀸𑀧𑀤𑁂𑀲𑀸, 𑀯𑀸𑀘𑀸, 𑀢𑁂𑀦𑀸𑀳 ‘‘𑀲𑀉𑀧𑀫𑀁 𑀲𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀬𑀸𑀯𑀢𑀸 𑀧𑀭𑀺𑀬𑁄𑀲𑀸𑀦𑀁 𑀲𑀫𑁆𑀪𑀯𑀢𑀺, 𑀢𑀸𑀯𑀢𑀸 𑀫𑀭𑀺𑀬𑀸𑀤𑀁 𑀤𑀲𑁆𑀲𑁂𑀢𑁆𑀯𑀸, 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀣𑀸…𑀧𑁂… 𑀪𑀸𑀲𑀢𑀻’’𑀢𑀺. 𑀲𑀺𑀔𑀫𑀧𑁆𑀧𑀢𑁆𑀢𑀸 𑀳𑀺 𑀓𑀣𑀸 𑀅𑀢𑁆𑀣𑀸𑀯𑀳𑀸 𑀦𑀸𑀫 𑀦 𑀳𑁄𑀢𑀺. 𑀅𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀏𑀢𑁆𑀣 𑀅𑀢𑁆𑀣-𑀲𑀤𑁆𑀤𑁄 𑀪𑀸𑀲𑀺𑀢𑀢𑁆𑀣𑀧𑀭𑀺𑀬𑀸𑀬𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀦𑁂𑀓𑁂𑀳𑀺𑀧𑀻’’𑀢𑀺𑀆𑀤𑀺. 𑀪𑀸𑀲𑀺𑀢𑀢𑁆𑀣𑁄 𑀘 𑀦𑀸𑀫 𑀲𑀤𑁆𑀤𑀸𑀦𑀼𑀲𑀸𑀭𑁂𑀦 𑀅𑀥𑀺𑀕𑀢𑁄 𑀲𑀩𑁆𑀩𑁄𑀧𑀺 𑀧𑀓𑀢𑁆𑀬𑀢𑁆𑀣𑀧𑀘𑁆𑀘𑀬𑀢𑁆𑀣𑀪𑀸𑀯𑀢𑁆𑀣𑀸𑀤𑀺𑀓𑁄, 𑀢𑀢𑁄𑀬𑁂𑀯 𑀪𑀕𑀯𑀢𑁄 𑀯𑀘𑀦𑀁 𑀏𑀓𑀕𑀸𑀣𑀸𑀧𑀤𑀫𑁆𑀧𑀺 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸𑀤𑀺𑀏𑀓𑀢𑁆𑀢𑀸𑀤𑀺𑀦𑀦𑁆𑀤𑀺𑀬𑀸𑀯𑀢𑁆𑀢𑀸𑀤𑀺𑀦𑀬𑁂𑀳𑀺 𑀅𑀦𑁂𑀓𑁂𑀳𑀺𑀧𑀺 𑀦𑀺𑀤𑁆𑀥𑀸𑀭𑀡𑀓𑁆𑀔𑀫𑀢𑀸𑀬 𑀧𑀭𑀺𑀬𑀸𑀤𑀸𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀁 𑀅𑀢𑁆𑀣𑀫𑀸𑀯𑀳𑀢𑀻𑀢𑀺. 𑀏𑀯𑀁 𑀅𑀢𑁆𑀣𑀲𑀸𑀫𑀜𑁆𑀜𑀢𑁄 𑀲𑀁𑀯𑀡𑁆𑀡𑁂𑀢𑁆𑀯𑀸 𑀇𑀘𑁆𑀙𑀺𑀢𑀢𑁆𑀣𑀯𑀺𑀲𑁂𑀲𑀢𑁄𑀧𑀺 𑀲𑀁𑀯𑀡𑁆𑀡𑁂𑀢𑀼𑀁 ‘‘𑀬𑀁 𑀯𑀸’’𑀢𑀺𑀆𑀤𑀺𑀫𑀸𑀳. 𑀅𑀢𑁆𑀣𑀯𑀸𑀤𑀺𑀦𑀸 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀢𑁆𑀣𑁄𑀬𑁂𑀯 𑀳𑀺 𑀇𑀥 𑀕𑀳𑀺𑀢𑁄. 𑀦𑀦𑀼 𑀲𑀩𑁆𑀩𑁂𑀲𑀫𑁆𑀧𑀺 𑀯𑀘𑀦𑀁 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀢𑁆𑀣𑀲𑀳𑀺𑀢𑀁𑀬𑁂𑀯, 𑀓𑀺𑀫𑁂𑀢𑁆𑀣 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀻𑀢𑀺 𑀅𑀦𑁆𑀢𑁄𑀮𑀻𑀦𑀘𑁄𑀤𑀦𑀁 𑀧𑀭𑀺𑀲𑁄𑀥𑁂𑀢𑀺 ‘‘𑀦 𑀅𑀜𑁆𑀜’’𑀦𑁆𑀢𑀺𑀆𑀤𑀺𑀦𑀸. 𑀅𑀜𑁆𑀜𑀫𑀢𑁆𑀣𑀁 𑀧𑀞𑀫𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑀦𑀼𑀲𑀦𑁆𑀥𑀺𑀯𑀲𑁂𑀦 𑀧𑀘𑁆𑀙𑀸 𑀅𑀜𑁆𑀜𑀫𑀢𑁆𑀣𑀁 𑀦 𑀪𑀸𑀲𑀢𑀺. 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑀸𑀦𑀼𑀲𑀦𑁆𑀥𑀺𑀯𑀲𑁂𑀦𑁂𑀯 𑀧𑀭𑀺𑀬𑁄𑀲𑀸𑀧𑁂𑀢𑁆𑀯𑀸 𑀓𑀣𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁦. 𑀏𑀯𑀁 ¶ 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢𑀫𑀽𑀮𑀲𑀺𑀓𑁆𑀔𑀸𑀧𑀤𑀸𑀦𑀺 𑀯𑀺𑀪𑀚𑀺𑀢𑁆𑀯𑀸 𑀲𑀢𑀺𑀧𑀺 𑀅𑀪𑀺𑀚𑁆𑀛𑀸𑀤𑀺𑀧𑁆𑀧𑀳𑀸𑀦𑀲𑁆𑀲 𑀲𑀁𑀯𑀭𑀲𑀻𑀮𑀲𑀗𑁆𑀕𑀳𑁂 𑀉𑀧𑀭𑀺𑀕𑀼𑀡𑀲𑀗𑁆𑀕𑀳𑀢𑁄, 𑀮𑁄𑀓𑀺𑀬𑀧𑀼𑀣𑀼𑀚𑁆𑀚𑀦𑀸𑀯𑀺𑀲𑀬𑀢𑁄 𑀘 𑀉𑀢𑁆𑀢𑀭𑀺𑀤𑁂𑀲𑀦𑀸𑀬 𑀲𑀗𑁆𑀕𑀳𑀺𑀢𑀼𑀁 𑀢𑀁 𑀧𑀭𑀺𑀳𑀭𑀺𑀢𑁆𑀯𑀸 𑀧𑀘𑀼𑀭𑀚𑀦𑀧𑀸𑀓𑀝𑀁 𑀆𑀘𑀸𑀭𑀲𑀻𑀮𑀫𑁂𑀯 𑀯𑀺𑀪𑀚𑀦𑁆𑀢𑁄 𑀪𑀕𑀯𑀸 ‘‘𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸’’𑀢𑀺𑀆𑀤𑀺𑀫𑀸𑀳𑀸𑀢𑀺 𑀧𑀸𑀴𑀺𑀬𑀁 𑀲𑀫𑁆𑀩𑀦𑁆𑀥𑁄 𑀯𑀢𑁆𑀢𑀩𑁆𑀩𑁄. 𑀢𑀢𑁆𑀣 𑀯𑀺𑀚𑀸𑀬𑀦𑁆𑀢𑀺 𑀯𑀺𑀭𑀼𑀳𑀦𑁆𑀢𑀺 𑀏𑀢𑁂𑀳𑀻𑀢𑀺 𑀩𑀻𑀚𑀸𑀦𑀺. 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂 𑀲𑀤𑀺𑀲𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑁂𑀲𑀓𑀸𑀭𑀡𑀪𑀸𑀯𑀢𑁄 𑀯𑀺𑀭𑀼𑀳𑀦𑀲𑀫𑀢𑁆𑀣𑀸𑀦𑀁 𑀲𑀸𑀭𑀨𑀮𑀸𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀪𑀯𑀦𑁆𑀢𑀺, 𑀅𑀳𑀼𑀯𑀼𑀦𑁆𑀢𑀺 𑀘𑀸𑀢𑀺 𑀪𑀽𑀢𑀸, 𑀚𑀸𑀬𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀚𑀸𑀢𑀸, 𑀯𑀟𑁆𑀠𑀺𑀢𑀸 𑀘𑀸𑀢𑀺 𑀅𑀢𑁆𑀣𑁄. 𑀯𑀟𑁆𑀠𑀫𑀸𑀦𑀓𑀸𑀦𑀁 𑀯𑀟𑁆𑀠𑀺𑀢𑁆𑀯𑀸, 𑀞𑀺𑀢𑀸𑀦𑀜𑁆𑀘 𑀭𑀼𑀓𑁆𑀔𑀕𑀘𑁆𑀙𑀸𑀤𑀻𑀦𑀁 𑀬𑀣𑀸𑀓𑁆𑀓𑀫𑀫𑀥𑀺𑀯𑀘𑀦𑀁. 𑀯𑀺𑀭𑀼𑀴𑁆𑀳𑀫𑀽𑀮𑀸 𑀳𑀺 𑀦𑀻𑀮𑀪𑀸𑀯𑀁 𑀆𑀧𑀚𑁆𑀚𑀦𑁆𑀢𑀸 𑀢𑀭𑀼𑀡𑀭𑀼𑀓𑁆𑀔𑀕𑀘𑁆𑀙𑀸 𑀚𑀸𑀬𑀦𑁆𑀢𑀺 𑀯𑀟𑁆𑀠𑀦𑁆𑀢𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀯𑀟𑁆𑀠𑀺𑀢𑁆𑀯𑀸 𑀞𑀺𑀢𑀸 𑀫𑀳𑀦𑁆𑀢𑀸 𑀭𑀼𑀓𑁆𑀔𑀕𑀘𑁆𑀙𑀸 𑀚𑀸𑀢𑀸 𑀯𑀟𑁆𑀠𑀺𑀢𑀸𑀢𑀺. 𑀕𑀸𑀫𑁄𑀢𑀺 𑀲𑀫𑀽𑀳𑁄, 𑀲𑁄 𑀘 𑀲𑀼𑀤𑁆𑀥𑀝𑁆𑀞𑀓𑀥𑀫𑁆𑀫𑀭𑀸𑀲𑀺, 𑀩𑀻𑀚𑀸𑀦𑀁, 𑀪𑀽𑀢𑀸𑀦𑀜𑁆𑀘 𑀢𑀣𑀸𑀮𑀤𑁆𑀥𑀲𑀫𑀜𑁆𑀜𑀸𑀦𑀁 𑀅𑀝𑁆𑀞𑀥𑀫𑁆𑀫𑀸𑀦𑀁 𑀕𑀸𑀫𑁄, 𑀢𑁂𑀬𑁂𑀯 𑀯𑀸 𑀕𑀸𑀫𑁄𑀢𑀺 𑀢𑀣𑀸. 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀳𑀺 𑀲𑀫𑀼𑀤𑀸𑀬𑀲𑁆𑀲 𑀅𑀪𑀸𑀯𑀢𑁄 𑀤𑀼𑀯𑀺𑀥𑁂𑀦𑀸𑀧𑀺 𑀅𑀢𑁆𑀣𑁂𑀦 𑀢𑁂𑀬𑁂𑀯 𑀢𑀺𑀡𑀭𑀼𑀓𑁆𑀔𑀮𑀢𑀸𑀤𑀬𑁄 𑀕𑀬𑁆𑀳𑀦𑁆𑀢𑀺.

𑀅𑀧𑀺𑀘 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀳𑀭𑀺𑀢𑀪𑀸𑀯𑀫𑀸𑀧𑀦𑁆𑀦𑀸 𑀭𑀼𑀓𑁆𑀔𑀕𑀘𑁆𑀙𑀸𑀤𑀬𑁄 𑀤𑁂𑀯𑀢𑀸 𑀧𑀭𑀺𑀕𑁆𑀕𑀬𑁆𑀳𑀦𑁆𑀢𑀺, 𑀢𑀲𑁆𑀫𑀸 ¶ 𑀪𑀽𑀢𑀸𑀦𑀁 𑀦𑀺𑀯𑀸𑀲𑀦𑀝𑁆𑀞𑀸𑀦𑀢𑀸𑀬 𑀕𑀸𑀫𑁄𑀢𑀺 𑀪𑀽𑀢𑀕𑀸𑀫𑁄𑀢𑀺𑀧𑀺 𑀯𑀤𑀦𑁆𑀢𑀺, 𑀢𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀫𑀽𑀮𑀩𑀻𑀚’’𑀦𑁆𑀢𑀺𑀆𑀤𑀺𑀫𑀸𑀳. 𑀫𑀽𑀮𑀫𑁂𑀯 𑀩𑀻𑀚𑀁 𑀫𑀽𑀮𑀩𑀻𑀚𑀁. 𑀲𑁂𑀲𑁂𑀲𑀼𑀧𑀺 𑀅𑀬𑀁 𑀦𑀬𑁄. 𑀨𑀴𑀼𑀩𑀻𑀚𑀦𑁆𑀢𑀺 𑀧𑀩𑁆𑀩𑀩𑀻𑀚𑀁. 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂 𑀲𑀤𑀺𑀲𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑁂𑀲𑀓𑀸𑀭𑀡𑀪𑀸𑀯𑀢𑁄 𑀯𑀺𑀭𑀼𑀳𑀦𑀲𑀫𑀢𑁆𑀣𑁂 𑀲𑀸𑀭𑀨𑀮𑁂 𑀦𑀺𑀭𑀼𑀴𑁆𑀳𑁄 𑀩𑀻𑀚-𑀲𑀤𑁆𑀤𑁄 𑀢𑀤𑀢𑁆𑀣𑀲𑀺𑀤𑁆𑀥𑀺𑀬𑀸 𑀫𑀽𑀮𑀸𑀤𑀻𑀲𑀼𑀧𑀺 𑀓𑁂𑀲𑀼𑀘𑀺 𑀧𑀯𑀢𑁆𑀢𑀢𑀻𑀢𑀺 𑀫𑀽𑀮𑀸𑀤𑀺𑀢𑁄 𑀦𑀺𑀯𑀢𑁆𑀢𑀦𑀢𑁆𑀣𑀁 𑀏𑀓𑁂𑀦 𑀩𑀻𑀚-𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 ‘‘𑀩𑀻𑀚𑀩𑀻𑀚’’𑀦𑁆𑀢𑀺 𑀯𑀼𑀢𑁆𑀢𑀁 𑀬𑀣𑀸 ‘‘𑀭𑀽𑀧𑀁𑀭𑀽𑀧𑀁, 𑀤𑀼𑀓𑁆𑀔𑀤𑀼𑀓𑁆𑀔’’𑀦𑁆𑀢𑀺 𑀘. 𑀦𑀻𑀮𑀢𑀺𑀡𑀭𑀼𑀓𑁆𑀔𑀸𑀤𑀺𑀓𑀲𑁆𑀲𑀸𑀢𑀺 𑀅𑀮𑁆𑀮𑀢𑀺𑀡𑀲𑁆𑀲 𑀘𑁂𑀯 𑀅𑀮𑁆𑀮𑀭𑀼𑀓𑁆𑀔𑀸𑀤𑀺𑀓𑀲𑁆𑀲 𑀘. 𑀆𑀤𑀺-𑀲𑀤𑁆𑀤𑁂𑀦 𑀑𑀲𑀥𑀺𑀕𑀘𑁆𑀙𑀮𑀢𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀲𑀫𑀸𑀭𑀫𑁆𑀪𑁄 𑀇𑀥 𑀯𑀺𑀓𑁄𑀧𑀦𑀁, 𑀢𑀜𑁆𑀘 𑀙𑁂𑀤𑀦𑀸𑀤𑀺𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀙𑁂𑀤𑀦𑀪𑁂𑀤𑀦𑀧𑀘𑀦𑀸𑀤𑀺𑀪𑀸𑀯𑁂𑀦𑀸’’𑀢𑀺. 𑀦𑀦𑀼 𑀘 𑀭𑀼𑀓𑁆𑀔𑀸𑀤𑀬𑁄 𑀘𑀺𑀢𑁆𑀢𑀭𑀳𑀺𑀢𑀢𑀸𑀬 𑀦 𑀚𑀻𑀯𑀸, 𑀘𑀺𑀢𑁆𑀢𑀭𑀳𑀺𑀢𑀢𑀸 𑀘 𑀧𑀭𑀺𑀧𑁆𑀨𑀦𑁆𑀤𑀦𑀸𑀪𑀸𑀯𑀢𑁄, 𑀙𑀺𑀦𑁆𑀦𑁂 𑀯𑀺𑀭𑀼𑀳𑀦𑀢𑁄, 𑀯𑀺𑀲𑀤𑀺𑀲𑀚𑀸𑀢𑀺𑀓𑀪𑀸𑀯𑀢𑁄, 𑀘𑀢𑀼𑀬𑁄𑀦𑀺𑀅𑀧𑀭𑀺𑀬𑀸𑀧𑀦𑁆𑀦𑀢𑁄 𑀘 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀟𑁆𑀠𑀺 𑀧𑀦 𑀧𑀯𑀸𑀴𑀲𑀺𑀮𑀸𑀮𑀯𑀡𑀸𑀤𑀻𑀦𑀫𑁆𑀧𑀺 𑀯𑀺𑀚𑁆𑀚𑀢𑀻𑀢𑀺 𑀦 𑀢𑁂𑀲𑀁 𑀚𑀻𑀯𑀢𑀸𑀪𑀸𑀯𑁂 𑀓𑀸𑀭𑀡𑀁. 𑀯𑀺𑀲𑀬𑀕𑁆𑀕𑀳𑀡𑀜𑁆𑀘 𑀦𑁂𑀲𑀁 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑀁 𑀲𑀼𑀧𑀦𑀁 𑀯𑀺𑀬 𑀘𑀺𑀜𑁆𑀘𑀸𑀤𑀻𑀦𑀁, 𑀢𑀣𑀸 𑀓𑀝𑀼𑀓𑀫𑁆𑀩𑀺𑀮𑀸𑀲𑀸𑀤𑀺𑀦𑀸 𑀤𑁄𑀳𑀴𑀸𑀤𑀬𑁄. 𑀢𑀢𑁆𑀣 𑀓𑀲𑁆𑀫𑀸 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸 ¶ 𑀧𑀝𑀺𑀯𑀺𑀭𑀢𑀺 𑀇𑀘𑁆𑀙𑀺𑀢𑀸𑀢𑀺? 𑀲𑀫𑀡𑀲𑀸𑀭𑀼𑀧𑁆𑀧𑀢𑁄, 𑀢𑀦𑁆𑀦𑀺𑀲𑁆𑀲𑀺𑀢𑀲𑀢𑁆𑀢𑀸𑀦𑀼𑀓𑀫𑁆𑀧𑀦𑀢𑁄 𑀘. 𑀢𑁂𑀦𑁂𑀯𑀸𑀳 𑀆𑀴𑀯𑀓𑀸𑀦𑀁 𑀭𑀼𑀓𑁆𑀔𑀘𑁆𑀙𑁂𑀤𑀦𑀸𑀤𑀺𑀯𑀢𑁆𑀣𑀽𑀲𑀼 ‘‘𑀚𑀻𑀯𑀲𑀜𑁆𑀜𑀺𑀦𑁄 𑀳𑀺 𑀫𑁄𑀖𑀧𑀼𑀭𑀺𑀲𑀸 𑀫𑀦𑀼𑀲𑁆𑀲𑀸 𑀭𑀼𑀓𑁆𑀔𑀲𑁆𑀫𑀺’’𑀦𑁆𑀢𑀺𑀆𑀤𑀺 (𑀧𑀸𑀭𑀸. 𑁮𑁯).

𑀏𑀓𑀁 𑀪𑀢𑁆𑀢𑀁 𑀏𑀓𑀪𑀢𑁆𑀢𑀁, 𑀢𑀫𑀲𑁆𑀲 𑀅𑀢𑁆𑀣𑀺 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀏𑀓𑀯𑀸𑀭𑀫𑁂𑀯 𑀪𑀼𑀜𑁆𑀚𑀦𑀢𑁄𑀢𑀺 𑀏𑀓𑀪𑀢𑁆𑀢𑀺𑀓𑁄. 𑀢𑀬𑀺𑀤𑀁 𑀏𑀓𑀪𑀢𑁆𑀢𑀁 𑀓𑀤𑀸 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀧𑀸𑀢𑀭𑀸𑀲𑀪𑀢𑁆𑀢’’𑀦𑁆𑀢𑀺𑀆𑀤𑀺, 𑀤𑁆𑀯𑀻𑀲𑀼 𑀪𑀢𑁆𑀢𑁂𑀲𑀼 𑀧𑀸𑀢𑀭𑀸𑀲𑀪𑀢𑁆𑀢𑀁 𑀲𑀦𑁆𑀥𑀸𑀬𑀸𑀳𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀸𑀢𑁄 𑀅𑀲𑀺𑀢𑀩𑁆𑀩𑀦𑁆𑀢𑀺 𑀧𑀸𑀢𑀭𑀸𑀲𑀁. 𑀲𑀸𑀬𑀁 𑀅𑀲𑀺𑀢𑀩𑁆𑀩𑀦𑁆𑀢𑀺 𑀲𑀸𑀬𑀫𑀸𑀲𑀁, 𑀢𑀤𑁂𑀯 𑀪𑀢𑁆𑀢𑀁 𑀢𑀣𑀸. 𑀏𑀓-𑀲𑀤𑁆𑀤𑁄 𑀘𑁂𑀢𑁆𑀣 𑀫𑀚𑁆𑀛𑀦𑁆𑀳𑀺𑀓𑀓𑀸𑀮𑀧𑀭𑀺𑀘𑁆𑀙𑁂𑀤𑀪𑀸𑀯𑁂𑀦 𑀧𑀬𑀼𑀢𑁆𑀢𑁄, 𑀦 𑀢𑀤𑀦𑁆𑀢𑁄𑀕𑀥𑀯𑀸𑀭𑀪𑀸𑀯𑁂𑀦𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀢𑀲𑁆𑀫𑀸’’𑀢𑀺𑀆𑀤𑀺𑀦𑀸.

𑀭𑀢𑁆𑀢𑀺𑀬𑀸 𑀪𑁄𑀚𑀦𑀁 𑀉𑀢𑁆𑀢𑀭𑀧𑀤𑀮𑁄𑀧𑀢𑁄 𑀭𑀢𑁆𑀢𑀺𑀲𑀤𑁆𑀤𑁂𑀦 𑀯𑀼𑀢𑁆𑀢𑀁, 𑀢𑀤𑁆𑀥𑀺𑀢𑀯𑀲𑁂𑀦 𑀯𑀸 𑀢𑀣𑀸𑀬𑁂𑀯𑀸𑀥𑀺𑀧𑁆𑀧𑀸𑀬𑀲𑀫𑁆𑀪𑀯𑀢𑁄, 𑀢𑁂𑀦𑀸𑀳 ‘‘𑀭𑀢𑁆𑀢𑀺𑀬𑀸’’𑀢𑀺𑀆𑀤𑀺. 𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑀸 𑀅𑀬𑀁 𑀩𑀼𑀤𑁆𑀥𑀸𑀤𑀻𑀦𑀁 𑀅𑀭𑀺𑀬𑀸𑀦𑀁 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑁄 𑀪𑁄𑀚𑀦𑀲𑁆𑀲 𑀓𑀸𑀮𑁄 𑀦𑀸𑀫, 𑀢𑀤𑀜𑁆𑀜𑁄 𑀯𑀺𑀓𑀸𑀮𑁄. 𑀢𑀢𑁆𑀣 𑀤𑀼𑀢𑀺𑀬𑀧𑀤𑁂𑀦 𑀭𑀢𑁆𑀢𑀺𑀪𑁄𑀚𑀦𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀅𑀧𑀭𑀦𑁆𑀳𑁄𑀯 𑀇𑀥 𑀯𑀺𑀓𑀸𑀮𑁄𑀢𑀺 𑀧𑀸𑀭𑀺𑀲𑁂𑀲𑀦𑀬𑁂𑀦 𑀢𑀢𑀺𑀬𑀧𑀤𑀲𑁆𑀲 𑀅𑀢𑁆𑀣𑀁 𑀤𑀻𑀧𑁂𑀢𑀼𑀁 ‘‘𑀅𑀢𑀺𑀓𑁆𑀓𑀦𑁆𑀢𑁂 𑀫𑀚𑁆𑀛𑀦𑁆𑀳𑀺𑀓𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀪𑀸𑀯𑀲𑀸𑀥𑀦𑁄 𑀘𑁂𑀢𑁆𑀣 𑀪𑁄𑀚𑀦-𑀲𑀤𑁆𑀤𑁄 𑀅𑀚𑁆𑀛𑁄𑀳𑀭𑀡𑀢𑁆𑀣𑀯𑀸𑀘𑀓𑁄𑀢𑀺 𑀤𑀻𑀧𑁂𑀢𑀺 ‘‘𑀬𑀸𑀯 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀸 𑀪𑁄𑀚𑀦’’𑀦𑁆𑀢𑀺 𑀇𑀫𑀺𑀦𑀸. 𑀓𑀲𑁆𑀲 𑀧𑀦 𑀢𑀤𑀚𑁆𑀛𑁄𑀳𑀭𑀡𑀦𑁆𑀢𑀺? 𑀬𑀸𑀫𑀓𑀸𑀮𑀺𑀓𑀸𑀤𑀻𑀦𑀫𑀦𑀼𑀜𑁆𑀜𑀸𑀢𑀢𑁆𑀢𑀸, 𑀯𑀺𑀓𑀸𑀮𑀪𑁄𑀚𑀦𑀲𑀤𑁆𑀤𑀲𑁆𑀲 𑀘 𑀬𑀸𑀯𑀓𑀸𑀮𑀺𑀓𑀚𑁆𑀛𑁄𑀳𑀭𑀡𑁂𑀬𑁂𑀯 𑀦𑀺𑀭𑀼𑀴𑁆𑀳𑀢𑁆𑀢𑀸 ‘‘𑀬𑀸𑀯𑀓𑀸𑀮𑀺𑀓𑀲𑁆𑀲𑀸’’𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀝𑁆𑀞𑀓𑀣𑀸𑀯𑀲𑁂𑀲𑁄 𑀆𑀘𑀭𑀺𑀬𑀸𑀦𑀁 𑀦𑀬𑁄 𑁋 𑀪𑀼𑀜𑁆𑀚𑀺𑀢𑀩𑁆𑀩𑀝𑁆𑀞𑁂𑀦 𑀪𑁄𑀚𑀦𑀁, 𑀬𑀸𑀕𑀼𑀪𑀢𑁆𑀢𑀸𑀤𑀺 𑀲𑀩𑁆𑀩𑀁 𑀬𑀸𑀯𑀓𑀸𑀮𑀺𑀓𑀯𑀢𑁆𑀣𑀼 ¶ . 𑀬𑀣𑀸 𑀘 ‘‘𑀭𑀢𑁆𑀢𑀽𑀧𑀭𑀢𑁄’’𑀢𑀺 𑀏𑀢𑁆𑀣 𑀭𑀢𑁆𑀢𑀺𑀪𑁄𑀚𑀦𑀁 𑀭𑀢𑁆𑀢𑀺𑀲𑀤𑁆𑀤𑁂𑀦 𑀯𑀼𑀘𑁆𑀘𑀢𑀺, 𑀏𑀯𑀫𑁂𑀢𑁆𑀣 𑀪𑁄𑀚𑀦𑀚𑁆𑀛𑁄𑀳𑀭𑀡𑀁 𑀪𑁄𑀚𑀦𑀲𑀤𑁆𑀤𑁂𑀦. 𑀯𑀺𑀓𑀸𑀮𑁂 𑀪𑁄𑀚𑀦𑀁 𑀯𑀺𑀓𑀸𑀮𑀪𑁄𑀚𑀦𑀁, 𑀢𑀢𑁄 𑀯𑀺𑀓𑀸𑀮𑀪𑁄𑀚𑀦𑀸. 𑀯𑀺𑀓𑀸𑀮𑁂 𑀬𑀸𑀯𑀓𑀸𑀮𑀺𑀓𑀯𑀢𑁆𑀣𑀼𑀲𑁆𑀲 𑀅𑀚𑁆𑀛𑁄𑀳𑀭𑀡𑀸𑀢𑀺 𑀅𑀢𑁆𑀣𑁄𑀢𑀺. 𑀈𑀤𑀺𑀲𑀸 𑀕𑀼𑀡𑀯𑀺𑀪𑀽𑀢𑀺 𑀦 𑀩𑀼𑀤𑁆𑀥𑀓𑀸𑀮𑁂𑀬𑁂𑀯𑀸𑀢𑀺 𑀆𑀳 ‘‘𑀅𑀦𑁄𑀫𑀸𑀦𑀤𑀻𑀢𑀻𑀭𑁂’’𑀢𑀺𑀆𑀤𑀺. 𑀅𑀬𑀁 𑀧𑀦 𑀧𑀸𑀴𑀺𑀬𑀁 𑀅𑀦𑀼𑀲𑀦𑁆𑀥𑀺𑀓𑁆𑀓𑀫𑁄 𑁋 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀏𑀓𑀯𑀸𑀭𑀫𑁂𑀯 𑀪𑀼𑀜𑁆𑀚𑀦𑀢𑁄 ‘‘𑀏𑀓𑀪𑀢𑁆𑀢𑀺𑀓𑁄’’𑀢𑀺 𑀯𑀼𑀢𑁆𑀢𑁂 𑀭𑀢𑁆𑀢𑀺𑀪𑁄𑀚𑀦𑁄𑀧𑀺 𑀲𑀺𑀬𑀸𑀢𑀺 ¶ 𑀢𑀦𑁆𑀦𑀺𑀯𑀸𑀭𑀡𑀢𑁆𑀣𑀁 ‘‘𑀭𑀢𑁆𑀢𑀽𑀧𑀭𑀢𑁄’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀢𑀺 𑀲𑀸𑀬𑀦𑁆𑀳𑀪𑁄𑀚𑀻𑀧𑀺 𑀏𑀓𑀪𑀢𑁆𑀢𑀺𑀓𑁄 𑀲𑀺𑀬𑀸𑀢𑀺 𑀢𑀤𑀸𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀯𑀺𑀭𑀢𑁄 𑀯𑀺𑀓𑀸𑀮𑀪𑁄𑀚𑀦𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺.

𑀲𑀗𑁆𑀔𑁂𑀧𑀢𑁄 ‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡’’𑀦𑁆𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁯𑁦; 𑀥. 𑀧. 𑁧𑁮𑁩; 𑀦𑁂𑀢𑁆𑀢𑀺. 𑁩𑁦, 𑁫𑁦, 𑁧𑁧𑁬, 𑁧𑁨𑁪) 𑀦𑀬𑀧𑁆𑀧𑀯𑀢𑁆𑀢𑀁 𑀪𑀕𑀯𑀢𑁄 𑀲𑀸𑀲𑀦𑀁 𑀲𑀙𑀦𑁆𑀤𑀭𑀸𑀕𑀧𑁆𑀧𑀯𑀢𑁆𑀢𑀺𑀢𑁄 𑀦𑀘𑁆𑀘𑀸𑀤𑀻𑀦𑀁 𑀤𑀲𑁆𑀲𑀦𑀁 𑀦𑀸𑀦𑀼𑀮𑁄𑀫𑁂𑀢𑀻𑀢𑀺 𑀆𑀳 ‘‘𑀲𑀸𑀲𑀦𑀲𑁆𑀲 𑀅𑀦𑀦𑀼𑀮𑁄𑀫𑀢𑁆𑀢𑀸’’𑀢𑀺. 𑀯𑀺𑀲𑀼𑀘𑀢𑀺 𑀲𑀸𑀲𑀦𑀁 𑀯𑀺𑀚𑁆𑀛𑀢𑀺 𑀅𑀦𑀦𑀼𑀮𑁄𑀫𑀺𑀓𑀪𑀸𑀯𑁂𑀦𑀸𑀢𑀺 𑀯𑀺𑀲𑀽𑀓𑀁, 𑀧𑀝𑀺𑀯𑀺𑀭𑀼𑀤𑁆𑀥𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀭 𑀉𑀧𑀫𑀁 𑀤𑀲𑁆𑀲𑁂𑀢𑀺 ‘‘𑀧𑀝𑀸𑀡𑀻𑀪𑀽𑀢’’𑀦𑁆𑀢𑀺 𑀇𑀫𑀺𑀦𑀸, 𑀧𑀝𑀸𑀡𑀻𑀲𑀗𑁆𑀔𑀸𑀢𑀁 𑀓𑀻𑀮𑀁 𑀯𑀺𑀬 𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀯𑀺𑀲𑀽𑀓’’𑀦𑁆𑀢𑀺 𑀏𑀢𑀲𑁆𑀲 𑀧𑀝𑀸𑀡𑀻𑀪𑀽𑀢𑀦𑁆𑀢𑀺 𑀅𑀢𑁆𑀣𑀫𑀸𑀳𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀢𑁆𑀢𑀦𑀸 𑀧𑀬𑁄𑀚𑀺𑀬𑀫𑀸𑀦𑀁, 𑀧𑀭𑁂𑀳𑀺 𑀧𑀬𑁄𑀚𑀸𑀧𑀺𑀬𑀫𑀸𑀦𑀜𑁆𑀘 𑀦𑀘𑁆𑀘𑀁 𑀦𑀘𑁆𑀘𑀪𑀸𑀯𑀲𑀸𑀫𑀜𑁆𑀜𑀢𑁄 𑀧𑀸𑀴𑀺𑀬𑀁 𑀏𑀓𑁂𑀦𑁂𑀯 𑀦𑀘𑁆𑀘𑀲𑀤𑁆𑀤𑁂𑀦 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑀦𑀬𑁂𑀦 𑀕𑀳𑀺𑀢𑀁, 𑀏𑀓𑀲𑁂𑀲𑀦𑀬𑁂𑀦 𑀯𑀸. 𑀢𑀣𑀸 𑀕𑀻𑀢𑀯𑀸𑀤𑀺𑀢𑀲𑀤𑁆𑀤𑁂𑀳𑀺 𑀕𑀸𑀬𑀦𑀕𑀸𑀬𑀸𑀧𑀦𑀯𑀸𑀤𑀦𑀯𑀸𑀤𑀸𑀧𑀦𑀸𑀦𑀻𑀢𑀺 𑀆𑀳 ‘‘𑀦𑀘𑁆𑀘𑀦𑀦𑀘𑁆𑀘𑀸𑀧𑀦𑀸𑀤𑀺𑀯𑀲𑁂𑀦𑀸’’𑀢𑀺. 𑀲𑀼𑀤𑁆𑀥𑀳𑁂𑀢𑀼𑀢𑀸𑀚𑁄𑀢𑀦𑀯𑀲𑁂𑀦 𑀳𑀺 𑀤𑁆𑀯𑀸𑀥𑀺𑀧𑁆𑀧𑀸𑀬𑀺𑀓𑀸 𑀏𑀢𑁂 𑀲𑀤𑁆𑀤𑀸. 𑀦𑀘𑁆𑀘𑀜𑁆𑀘 𑀕𑀻𑀢𑀜𑁆𑀘 𑀯𑀸𑀤𑀺𑀢𑀜𑁆𑀘 𑀯𑀺𑀲𑀽𑀓𑀤𑀲𑁆𑀲𑀦𑀜𑁆𑀘 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀁, 𑀲𑀫𑀸𑀳𑀸𑀭𑀯𑀲𑁂𑀦𑁂𑀢𑁆𑀣 𑀏𑀓𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀬𑀣𑀸𑀧𑀸𑀞𑀁 𑀯𑀸𑀓𑁆𑀬𑀸𑀯𑀢𑁆𑀣𑀺𑀓𑀦𑁆𑀢𑀯𑀘𑀦𑁂𑀦 𑀲𑀳 𑀲𑀫𑀼𑀘𑁆𑀘𑀬𑀲𑀫𑀸𑀲𑀤𑀲𑁆𑀲𑀦𑀢𑁆𑀣𑀁 ‘‘𑀦𑀘𑁆𑀘𑀸 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀩𑁆𑀩𑀢𑁆𑀣 𑀈𑀤𑀺𑀲𑁂𑀲𑀼. (𑀤𑀲𑁆𑀲𑀦𑀯𑀺𑀲𑀬𑁂 𑀫𑀬𑀽𑀭𑀦𑀘𑁆𑀘𑀸𑀤𑀺𑀧𑀝𑀺𑀓𑁆𑀔𑀺𑀧𑀦𑁂𑀦 𑀦𑀘𑁆𑀘𑀸𑀧𑀦𑀯𑀺𑀲𑀬𑁂𑀧𑀺 𑀧𑀝𑀺𑀓𑁆𑀔𑀺𑀧𑀦𑀁 𑀤𑀝𑁆𑀞𑀩𑁆𑀩𑀁) ‘‘𑀦𑀘𑁆𑀘𑀸𑀤𑀻𑀦𑀺 𑀳𑀻’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀢𑁆𑀣𑀲𑀫𑀢𑁆𑀣𑀦𑀁. 𑀤𑀲𑁆𑀲𑀦𑁂𑀦 𑀘𑁂𑀢𑁆𑀣 𑀲𑀯𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀁 𑀯𑀺𑀭𑀽𑀧𑁂𑀓𑀲𑁂𑀲𑀦𑀬𑁂𑀦, 𑀬𑀣𑀸𑀲𑀓𑀁 𑀯𑀸 𑀯𑀺𑀲𑀬𑀲𑁆𑀲 𑀆𑀮𑁄𑀘𑀦𑀲𑀪𑀸𑀯𑀢𑀸𑀬 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀲𑀯𑀦𑀓𑀺𑀭𑀺𑀬𑀸𑀬𑀧𑀺 𑀤𑀲𑁆𑀲𑀦𑀲𑀗𑁆𑀔𑁂𑀧𑀲𑀫𑁆𑀪𑀯𑀢𑁄 ‘‘𑀤𑀲𑁆𑀲𑀦𑀸’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀧𑀜𑁆𑀘𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀦 𑀓𑀺𑀜𑁆𑀘𑀺 𑀥𑀫𑁆𑀫𑀁 𑀧𑀝𑀺𑀚𑀸𑀦𑀸𑀢𑀺 𑀅𑀜𑁆𑀜𑀢𑁆𑀭 𑀅𑀢𑀺𑀦𑀺𑀧𑀸𑀢𑀫𑀢𑁆𑀢𑀸’’𑀢𑀺.

‘‘𑀯𑀺𑀲𑀽𑀓𑀪𑀽𑀢𑀸 𑀤𑀲𑁆𑀲𑀦𑀸 𑀘𑀸’’𑀢𑀺 𑀏𑀢𑁂𑀦 𑀅𑀯𑀺𑀲𑀽𑀓𑀪𑀽𑀢𑀲𑁆𑀲 𑀧𑀦 𑀕𑀻𑀢𑀲𑁆𑀲 𑀲𑀯𑀦𑀁 𑀓𑀤𑀸𑀘𑀺 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬 𑀔𑀼𑀤𑁆𑀤𑀓𑀧𑀸𑀞𑀝𑁆𑀞𑀓𑀣𑀸𑀬 ‘‘𑀥𑀫𑁆𑀫𑀽𑀧𑀲𑀁𑀳𑀺𑀢𑀫𑁆𑀧𑀺 𑀘𑁂𑀢𑁆𑀣 𑀕𑀻𑀢𑀁 𑀦 𑀯𑀝𑁆𑀝𑀢𑀺, 𑀕𑀻𑀢𑀽𑀧𑀲𑀁𑀳𑀺𑀢𑁄 𑀧𑀦 𑀥𑀫𑁆𑀫𑁄 𑀯𑀝𑁆𑀝𑀢𑀻’’𑀢𑀺 (𑀔𑀼. 𑀧𑀸. 𑀅𑀝𑁆𑀞. 𑀧𑀘𑁆𑀙𑀺𑀫𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀓𑀢𑁆𑀣𑀘𑀺 𑀧𑀦 𑀦-𑀓𑀸𑀭𑀯𑀺𑀧𑀭𑀺𑀬𑀸𑀬𑁂𑀦 𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀉𑀪𑀬𑀢𑁆𑀣𑀸𑀧𑀺 𑀘 ¶ 𑀕𑀻𑀢𑁄 𑀘𑁂 𑀥𑀫𑁆𑀫𑀸𑀦𑀼𑀮𑁄𑀫𑀢𑁆𑀣𑀧𑀝𑀺𑀲𑀁𑀬𑀼𑀢𑁆𑀢𑁄𑀧𑀺 𑀦 𑀯𑀝𑁆𑀝𑀢𑀺, 𑀥𑀫𑁆𑀫𑁄 𑀘𑁂 𑀕𑀻𑀢𑀲𑀤𑁆𑀤𑀧𑀝𑀺𑀲𑀁𑀬𑀼𑀢𑁆𑀢𑁄𑀧𑀺 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀦 𑀪𑀺𑀓𑁆𑀔𑀯𑁂, 𑀕𑀻𑀢𑀲𑁆𑀲𑀭𑁂𑀦 ¶ 𑀥𑀫𑁆𑀫𑁄 𑀕𑀸𑀬𑀺𑀢𑀩𑁆𑀩𑁄, 𑀬𑁄 𑀕𑀸𑀬𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁧𑁪𑁯) 𑀳𑀺 𑀤𑁂𑀲𑀦𑀸𑀬 𑀏𑀯 𑀧𑀝𑀺𑀓𑁆𑀔𑁂𑀧𑁄, 𑀦 𑀲𑀯𑀦𑀸𑀬. 𑀇𑀫𑀲𑁆𑀲 𑀘 𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀺𑀲𑀼𑀁 𑀧𑀜𑁆𑀜𑀸𑀧𑀦𑀢𑁄 𑀯𑀺𑀜𑁆𑀜𑀸𑀬𑀢𑀺 ‘‘𑀕𑀻𑀢𑀲𑁆𑀲𑀭𑁂𑀦 𑀤𑁂𑀲𑀺𑀢𑁄𑀧𑀺 𑀥𑀫𑁆𑀫𑁄 𑀦 𑀕𑀻𑀢𑁄’’𑀢𑀺. 𑀬𑀜𑁆𑀘 𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀲𑀤𑁆𑀤𑀁 𑀦𑀺𑀤𑁆𑀥𑀭𑀦𑁆𑀢𑁂𑀦 ‘‘𑀬𑀁 𑀧𑀦 𑀅𑀢𑁆𑀣𑀦𑀺𑀲𑁆𑀲𑀺𑀢𑀁 𑀥𑀫𑁆𑀫𑀦𑀺𑀲𑁆𑀲𑀺𑀢𑀁 𑀓𑀼𑀫𑁆𑀪𑀤𑀸𑀲𑀺𑀕𑀻𑀢𑀫𑁆𑀧𑀺 𑀲𑀼𑀡𑀦𑁆𑀢𑀲𑁆𑀲 𑀧𑀲𑀸𑀤𑁄 𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀦𑀺𑀩𑁆𑀩𑀺𑀤𑀸 𑀯𑀸 𑀲𑀡𑁆𑀞𑀸𑀢𑀺, 𑀏𑀯𑀭𑀽𑀧𑁄 𑀲𑀤𑁆𑀤𑁄 𑀲𑁂𑀯𑀺𑀢𑀩𑁆𑀩𑁄’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁬𑁫) 𑀯𑀼𑀢𑁆𑀢𑀁, 𑀢𑀁 𑀅𑀲𑀫𑀸𑀤𑀸𑀦𑀲𑀺𑀓𑁆𑀔𑀸𑀧𑀤𑀲𑁆𑀲 𑀲𑁂𑀯𑀺𑀢𑀩𑁆𑀩𑀢𑀸𑀫𑀢𑁆𑀢𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀁. 𑀲𑀫𑀸𑀤𑀸𑀦𑀲𑀺𑀓𑁆𑀔𑀸𑀧𑀤𑀲𑁆𑀲 𑀳𑀺 𑀏𑀯𑀭𑀽𑀧𑀁 𑀲𑀼𑀡𑀦𑁆𑀢𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑀁𑀯𑀭𑀁 𑀪𑀺𑀚𑁆𑀚𑀢𑀺 𑀕𑀻𑀢𑀲𑀤𑁆𑀤𑀪𑀸𑀯𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀯𑀺𑀦𑀬𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 ‘‘𑀕𑀻𑀢𑀦𑁆𑀢𑀺 𑀦𑀝𑀸𑀤𑀻𑀦𑀁 𑀯𑀸 𑀕𑀻𑀢𑀁 𑀳𑁄𑀢𑀼, 𑀅𑀭𑀺𑀬𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀭𑀢𑀦𑀢𑁆𑀢𑀬𑀕𑀼𑀡𑀽𑀧𑀲𑀁𑀳𑀺𑀢𑀁 𑀲𑀸𑀥𑀼𑀓𑀻𑀴𑀦𑀕𑀻𑀢𑀁 𑀯𑀸, 𑀅𑀲𑀁𑀬𑀢𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀪𑀸𑀡𑀓𑀕𑀻𑀢𑀁 𑀯𑀸, 𑀅𑀦𑁆𑀢𑀫𑀲𑁄 𑀤𑀦𑁆𑀢𑀕𑀻𑀢𑀫𑁆𑀧𑀺, 𑀬𑀁 ‘‘𑀕𑀸𑀬𑀺𑀲𑁆𑀲𑀸𑀫𑀸’’𑀢𑀺 𑀧𑀼𑀩𑁆𑀩𑀪𑀸𑀕𑁂 𑀑𑀓𑀽𑀚𑀺𑀢𑀁 𑀓𑀭𑁄𑀦𑁆𑀢𑀺, 𑀲𑀩𑁆𑀩𑀫𑁂𑀢𑀁 𑀕𑀻𑀢𑀁 𑀦𑀸𑀫𑀸’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁮𑁩𑁫; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑁩𑁪.𑁨𑁫).

𑀓𑀺𑀜𑁆𑀘𑀸𑀧𑀺 𑀫𑀸𑀮𑀸-𑀲𑀤𑁆𑀤𑁄 𑀮𑁄𑀓𑁂 𑀩𑀤𑁆𑀥𑀧𑀼𑀧𑁆𑀨𑀯𑀸𑀘𑀓𑁄, 𑀲𑀸𑀲𑀦𑁂 𑀧𑀦 𑀭𑀼𑀴𑁆𑀳𑀺𑀬𑀸 𑀅𑀩𑀤𑁆𑀥𑀧𑀼𑀧𑁆𑀨𑁂𑀲𑀼𑀧𑀺 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀬𑀁 𑀓𑀺𑀜𑁆𑀘𑀺 𑀧𑀼𑀧𑁆𑀨𑀁 𑀩𑀤𑁆𑀥𑀫𑀩𑀤𑁆𑀥𑀁 𑀯𑀸, 𑀢𑀁 𑀲𑀩𑁆𑀩𑀁 ‘‘𑀫𑀸𑀮𑀸’’ 𑀢𑁆𑀯𑁂𑀯 𑀤𑀝𑁆𑀞𑀩𑁆𑀩𑀦𑁆𑀢𑀺 𑀆𑀳 ‘‘𑀬𑀁 𑀓𑀺𑀜𑁆𑀘𑀺 𑀧𑀼𑀧𑁆𑀨’’𑀦𑁆𑀢𑀺. ‘‘𑀬𑀁 𑀓𑀺𑀜𑁆𑀘𑀺 𑀕𑀦𑁆𑀥’’𑀦𑁆𑀢𑀺 𑀘𑁂𑀢𑁆𑀣 𑀯𑀸𑀲𑀘𑀼𑀡𑁆𑀡𑀥𑀽𑀧𑀸𑀤𑀺𑀓𑀁 𑀯𑀺𑀮𑁂𑀧𑀦𑀢𑁄 𑀅𑀜𑁆𑀜𑀁 𑀬𑀁 𑀓𑀺𑀜𑁆𑀘𑀺 𑀕𑀦𑁆𑀥𑀚𑀸𑀢𑀁. 𑀯𑀼𑀢𑁆𑀢𑀢𑁆𑀣𑀁 𑀯𑀺𑀬 𑀳𑀺 𑀯𑀼𑀘𑁆𑀘𑀫𑀸𑀦𑀢𑁆𑀣𑀫𑀦𑁆𑀢𑀭𑁂𑀦𑀸𑀧𑀺 𑀲𑀤𑁆𑀤𑁄 𑀅𑀢𑁆𑀣𑀯𑀺𑀲𑁂𑀲𑀯𑀸𑀘𑀓𑁄. 𑀙𑀯𑀺𑀭𑀸𑀕𑀓𑀭𑀡𑀦𑁆𑀢𑀺 𑀯𑀺𑀮𑁂𑀧𑀦𑁂𑀦 𑀙𑀯𑀺𑀬𑀸 𑀭𑀜𑁆𑀚𑀦𑀢𑁆𑀣𑀁 𑀧𑀺𑀲𑀺𑀢𑁆𑀯𑀸 𑀧𑀝𑀺𑀬𑀢𑁆𑀢𑀁 𑀬𑀁 𑀓𑀺𑀜𑁆𑀘𑀺 𑀕𑀦𑁆𑀥𑀘𑀼𑀡𑁆𑀡𑀁. 𑀧𑀺𑀴𑀦𑁆𑀥𑀦𑀁 𑀥𑀸𑀭𑀡𑀁. 𑀊𑀦𑀝𑁆𑀞𑀸𑀦𑀧𑀽𑀭𑀡𑀁 𑀫𑀡𑁆𑀟𑀦𑀁. 𑀕𑀦𑁆𑀥𑀯𑀲𑁂𑀦, 𑀙𑀯𑀺𑀭𑀸𑀕𑀯𑀲𑁂𑀦 𑀘 𑀲𑀸𑀤𑀺𑀬𑀦𑀁 𑀯𑀺𑀪𑀽𑀲𑀦𑀁. 𑀢𑀤𑁂𑀯𑀢𑁆𑀣𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀤𑀻𑀧𑁂𑀢𑀺 ‘‘𑀢𑀢𑁆𑀣 𑀧𑀺𑀴𑀦𑁆𑀥𑀦𑁆𑀢𑁄’’𑀢𑀺𑀆𑀤𑀺𑀦𑀸. 𑀢𑀣𑀸 𑀘𑁂𑀯 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬𑀫𑁆𑀧𑀺 (𑀫. 𑀦𑀺. 𑀅𑀝𑁆𑀞. 𑁩.𑁧𑁪𑁭) 𑀯𑀼𑀢𑁆𑀢𑀁, 𑀧𑀭𑀫𑀢𑁆𑀣𑀚𑁄𑀢𑀺𑀓𑀸𑀬𑀁 𑀧𑀦 𑀔𑀼𑀤𑁆𑀤𑀓𑀧𑀸𑀞𑀝𑁆𑀞𑀓𑀣𑀸𑀬𑀁 ‘‘𑀫𑀸𑀮𑀸𑀤𑀻𑀲𑀼 𑀥𑀸𑀭𑀡𑀸𑀤𑀻𑀦𑀺 𑀬𑀣𑀸𑀲𑀗𑁆𑀔𑁆𑀬𑀁 𑀬𑁄𑀚𑁂𑀢𑀩𑁆𑀩𑀸𑀦𑀻’’𑀢𑀺 (𑀔𑀼. 𑀧𑀸. 𑀅𑀝𑁆𑀞. 𑀧𑀘𑁆𑀙𑀺𑀫𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀧𑀺 𑀬𑁄𑀚𑁂𑀦𑁆𑀢𑁂𑀦 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀓𑀺𑀁 𑀧𑀦𑁂𑀢𑀁 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀬𑀸𑀬𑀸’’𑀢𑀺𑀆𑀤𑀺. 𑀬𑀸𑀬 𑀤𑀼𑀲𑁆𑀲𑀻𑀮𑁆𑀬𑀘𑁂𑀢𑀦𑀸𑀬 𑀓𑀭𑁄𑀢𑀺, 𑀲𑀸 𑀇𑀥 𑀓𑀸𑀭𑀡𑀁. ‘‘𑀢𑀢𑁄 𑀧𑀝𑀺𑀯𑀺𑀭𑀢𑁄’’𑀢𑀺 𑀳𑀺 𑀉𑀪𑀬𑀢𑁆𑀣 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁, 𑀏𑀢𑁂𑀦𑁂𑀯 ‘‘𑀫𑀸𑀮𑀸…𑀧𑁂… 𑀯𑀺𑀪𑀽𑀲𑀦𑀸𑀦𑀁 𑀞𑀸𑀦𑀁, 𑀫𑀸𑀮𑀸…𑀧𑁂… 𑀯𑀺𑀪𑀽𑀲𑀦𑀸𑀦𑁂𑀯 𑀯𑀸 𑀞𑀸𑀦’’𑀦𑁆𑀢𑀺 𑀲𑀫𑀸𑀲𑀫𑁆𑀧𑀺 𑀤𑀲𑁆𑀲𑁂𑀢𑀺. 𑀢𑀤𑀸𑀓𑀸𑀭𑀧𑁆𑀧𑀯𑀢𑁆𑀢𑁄 ¶ 𑀘𑁂𑀢𑀦𑀸𑀤𑀺𑀥𑀫𑁆𑀫𑁄𑀬𑁂𑀯 𑀳𑀺 𑀥𑀸𑀭𑀡𑀸𑀤𑀺𑀓𑀺𑀭𑀺𑀬𑀸. 𑀢𑀢𑁆𑀣 𑀘 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀓𑀸𑀭𑀡𑀁 𑀲𑀳𑀚𑀸𑀢𑀸𑀤𑁄𑀧𑀓𑀸𑀭𑀓𑀢𑁄, 𑀧𑀥𑀸𑀦𑀢𑁄 𑀘. ‘‘𑀘𑁂𑀢𑀬𑀺𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀢𑀺 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸’’𑀢𑀺 (𑀅. 𑀦𑀺. 𑁬.𑁬𑁩) 𑀳𑀺 ¶ 𑀯𑀼𑀢𑁆𑀢𑀁. 𑀥𑀸𑀭𑀡𑀸𑀤𑀺𑀪𑀽𑀢𑀸 𑀏𑀯 𑀘 𑀘𑁂𑀢𑀦𑀸 𑀞𑀸𑀦𑀦𑁆𑀢𑀺. 𑀞𑀸𑀦-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄 𑀤𑁆𑀯𑀦𑁆𑀤𑀧𑀤𑀢𑁄 𑀲𑀼𑀬𑁆𑀬𑀫𑀸𑀦𑀢𑁆𑀢𑀸.

𑀉𑀘𑁆𑀘𑀸𑀢𑀺 𑀉𑀘𑁆𑀘𑀲𑀤𑁆𑀤𑁂𑀦 𑀅𑀓𑀸𑀭𑀦𑁆𑀢𑁂𑀦 𑀲𑀫𑀸𑀦𑀢𑁆𑀣𑀁 𑀆𑀓𑀸𑀭𑀦𑁆𑀢𑀁 𑀏𑀓𑀁 𑀲𑀤𑁆𑀤𑀦𑁆𑀢𑀭𑀁 𑀅𑀘𑁆𑀘𑀼𑀕𑁆𑀕𑀢𑀯𑀸𑀘𑀓𑀦𑁆𑀢𑀺 𑀆𑀳 ‘‘𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺. 𑀲𑁂𑀢𑀺 𑀏𑀢𑁆𑀣𑀸𑀢𑀺 𑀲𑀬𑀦𑀁, 𑀫𑀜𑁆𑀘𑀸𑀤𑀺. 𑀲𑀫𑀡𑀲𑀸𑀭𑀼𑀧𑁆𑀧𑀭𑀳𑀺𑀢𑀢𑁆𑀢𑀸, 𑀕𑀳𑀝𑁆𑀞𑁂𑀳𑀺 𑀘 𑀲𑁂𑀝𑁆𑀞𑀲𑀫𑁆𑀫𑀢𑀢𑁆𑀢𑀸 𑀅𑀓𑀧𑁆𑀧𑀺𑀬𑀧𑀘𑁆𑀘𑀢𑁆𑀣𑀭𑀡𑀁 ‘‘𑀫𑀳𑀸𑀲𑀬𑀦’’𑀦𑁆𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀓𑀧𑁆𑀧𑀺𑀬𑀢𑁆𑀣𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀦𑀺𑀲𑀻𑀤𑀦𑀁 𑀧𑀦𑁂𑀢𑁆𑀣 𑀲𑀬𑀦𑁂𑀦𑁂𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀲𑁆𑀫𑀸 𑀧𑀦 𑀆𑀥𑀸𑀭𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀢𑀤𑀸𑀥𑀸𑀭𑀓𑀺𑀭𑀺𑀬𑀸𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀅𑀢𑁆𑀣𑀢𑁄 𑀧𑀦 𑀢𑀤𑀼𑀧𑀪𑁄𑀕𑀪𑀽𑀢𑀦𑀺𑀲𑀚𑁆𑀚𑀸𑀦𑀺𑀧𑀚𑁆𑀚𑀦𑁂𑀳𑀺 𑀯𑀺𑀭𑀢𑀺 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 ‘‘𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸’’𑀢𑀺 𑀏𑀲 𑀦𑀺𑀤𑁆𑀤𑁂𑀲𑁄 𑀏𑀓𑀲𑁂𑀲𑀦𑀬𑁂𑀦 𑀬𑀣𑀸 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺 (𑀫. 𑀦𑀺. 𑁩.𑁧𑁨𑁬; 𑀲𑀁. 𑀦𑀺. 𑁨.𑁧; 𑀉𑀤𑀸. 𑁧) 𑀏𑀢𑀲𑁆𑀫𑀺𑀫𑁆𑀧𑀺 𑀯𑀺𑀓𑀧𑁆𑀧𑁂 𑀆𑀲𑀦𑀧𑀼𑀩𑁆𑀩𑀓𑀢𑁆𑀢𑀸 𑀲𑀬𑀦𑀓𑀺𑀭𑀺𑀬𑀸𑀬 𑀲𑀬𑀦𑀕𑁆𑀕𑀳𑀡𑁂𑀦𑁂𑀯 𑀆𑀲𑀦𑀫𑁆𑀧𑀺 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀺𑀭𑀺𑀬𑀸𑀯𑀸𑀘𑀓𑀆𑀲𑀦𑀲𑀬𑀦𑀲𑀤𑁆𑀤𑀮𑁄𑀧𑀢𑁄 𑀉𑀢𑁆𑀢𑀭𑀧𑀤𑀮𑁄𑀧𑀦𑀺𑀤𑁆𑀤𑁂𑀲𑁄𑀢𑀺𑀧𑀺 𑀯𑀺𑀦𑀬𑀝𑀻𑀓𑀸𑀬𑀁 (𑀯𑀺. 𑀯𑀺. 𑀝𑀻. 𑁨.𑁧𑁦𑁬) 𑀯𑀼𑀢𑁆𑀢𑀁.

𑀚𑀸𑀢𑀫𑁂𑀯 𑀭𑀽𑀧𑀫𑀲𑁆𑀲 𑀦 𑀯𑀺𑀧𑁆𑀧𑀓𑀸𑀭𑀦𑁆𑀢𑀺 𑀚𑀸𑀢𑀭𑀽𑀧𑀁, 𑀲𑀢𑁆𑀣𑀼𑀯𑀡𑁆𑀡𑀁. 𑀭𑀜𑁆𑀚𑀻𑀬𑀢𑀺 𑀲𑁂𑀢𑀯𑀡𑁆𑀡𑀢𑀸𑀬, 𑀭𑀜𑁆𑀚𑀦𑁆𑀢𑀺 𑀯𑀸 𑀏𑀢𑁆𑀣 𑀲𑀢𑁆𑀢𑀸𑀢𑀺 𑀭𑀚𑀢𑀁 𑀬𑀣𑀸 ‘‘𑀦𑁂𑀲𑀁 𑀧𑀤𑀓𑁆𑀓𑀦𑁆𑀢’’𑀦𑁆𑀢𑀺. ‘‘𑀘𑀢𑁆𑀢𑀸𑀭𑁄 𑀯𑀻𑀳𑀬𑁄 𑀕𑀼𑀜𑁆𑀚𑀸, 𑀤𑁆𑀯𑁂 𑀕𑀼𑀜𑁆𑀚𑀸 𑀫𑀸𑀲𑀓𑁄 𑀪𑀯𑁂’’𑀢𑀺 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀯𑀻𑀲𑀢𑀺𑀫𑀸𑀲𑀓𑁄 𑀦𑀻𑀮𑀓𑀳𑀸𑀧𑀡𑁄 𑀯𑀸 𑀤𑀼𑀤𑁆𑀭𑀤𑀸𑀫𑀓𑀸𑀤𑀺𑀓𑁄 𑀯𑀸 𑀢𑀁𑀢𑀁𑀤𑁂𑀲𑀯𑁄𑀳𑀸𑀭𑀸𑀦𑀼𑀭𑀽𑀧𑀁 𑀓𑀢𑁄 𑀓𑀳𑀸𑀧𑀡𑁄. 𑀮𑁄𑀳𑀸𑀤𑀻𑀳𑀺 𑀓𑀢𑁄 𑀮𑁄𑀳𑀫𑀸𑀲𑀓𑀸𑀤𑀺𑀓𑁄. 𑀬𑁂 𑀯𑁄𑀳𑀸𑀭𑀁 𑀕𑀘𑁆𑀙𑀦𑁆𑀢𑀻𑀢𑀺 𑀧𑀭𑀺𑀬𑀸𑀤𑀸𑀦𑀯𑀘𑀦𑀁. 𑀯𑁄𑀳𑀸𑀭𑀦𑁆𑀢𑀺 𑀘 𑀓𑀬𑀯𑀺𑀓𑁆𑀓𑀬𑀯𑀲𑁂𑀦 𑀲𑀩𑁆𑀩𑁄𑀳𑀸𑀭𑀁. 𑀅𑀜𑁆𑀜𑁂𑀳𑀺 𑀕𑀸𑀳𑀸𑀧𑀦𑁂, 𑀉𑀧𑀦𑀺𑀓𑁆𑀔𑀺𑀢𑁆𑀢𑀲𑀸𑀤𑀺𑀬𑀦𑁂 𑀘 𑀧𑀝𑀺𑀕𑁆𑀕𑀳𑀡𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀦 𑀉𑀕𑁆𑀕𑀡𑁆𑀳𑀸𑀧𑁂𑀢𑀺 𑀦 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀲𑀸𑀤𑀺𑀬𑀢𑀻’’𑀢𑀺. 𑀅𑀣 𑀯𑀸 𑀢𑀺𑀯𑀺𑀥𑀁 𑀧𑀝𑀺𑀕𑁆𑀕𑀳𑀡𑀁 𑀓𑀸𑀬𑁂𑀦 𑀯𑀸𑀘𑀸𑀬 𑀫𑀦𑀲𑀸. 𑀢𑀢𑁆𑀣 𑀓𑀸𑀬𑁂𑀦 𑀧𑀝𑀺𑀕𑁆𑀕𑀳𑀡𑀁 𑀉𑀕𑁆𑀕𑀳𑀡𑀁. 𑀯𑀸𑀘𑀸𑀬 𑀧𑀝𑀺𑀕𑁆𑀕𑀳𑀡𑀁 𑀉𑀕𑁆𑀕𑀳𑀸𑀧𑀦𑀁. 𑀫𑀦𑀲𑀸 𑀧𑀝𑀺𑀕𑁆𑀕𑀳𑀡𑀁 𑀲𑀸𑀤𑀺𑀬𑀦𑀁. 𑀢𑀺𑀯𑀺𑀥𑀫𑁆𑀧𑁂𑀢𑀁 𑀧𑀝𑀺𑀕𑁆𑀕𑀳𑀡𑀁 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, 𑀏𑀓𑀲𑁂𑀲𑀦𑀬𑁂𑀦 𑀯𑀸 𑀕𑀳𑁂𑀢𑁆𑀯𑀸 𑀧𑀝𑀺𑀕𑁆𑀕𑀳𑀡𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ¶ ‘‘𑀦𑁂𑀯 𑀦𑀁 𑀉𑀕𑁆𑀕𑀡𑁆𑀳𑀸𑀢𑀻’’𑀢𑀺𑀆𑀤𑀺. 𑀏𑀲 𑀦𑀬𑁄 𑀆𑀫𑀓𑀥𑀜𑁆𑀜𑀧𑀝𑀺𑀕𑁆𑀕𑀳𑀡𑀸𑀢𑀺𑀆𑀤𑀻𑀲𑀼𑀧𑀺.

𑀦𑀻𑀯𑀸𑀭𑀸𑀤𑀺𑀉𑀧𑀥𑀜𑁆𑀜𑀲𑁆𑀲 𑀲𑀸𑀮𑀺𑀬𑀸𑀤𑀺𑀫𑀽𑀮𑀥𑀜𑁆𑀜𑀦𑁆𑀢𑁄𑀕𑀥𑀢𑁆𑀢𑀸 ‘‘𑀲𑀢𑁆𑀢𑀯𑀺𑀥𑀲𑁆𑀲𑀸𑀧𑀻’’𑀢𑀺 𑀯𑀼𑀢𑁆𑀢𑀁. 𑀲𑀝𑁆𑀞𑀺𑀤𑀺𑀦𑀧𑀭𑀺𑀧𑀸𑀓𑁄 𑀲𑀼𑀓𑀥𑀜𑁆𑀜𑀯𑀺𑀲𑁂𑀲𑁄 𑀲𑀸𑀮𑀺 𑀦𑀸𑀫 𑀲𑀮𑀻𑀬𑀢𑁂 𑀲𑀻𑀮𑀸𑀖𑀢𑁂𑀢𑀺 𑀓𑀢𑁆𑀯𑀸. 𑀤𑀩𑁆𑀩𑀕𑀼𑀡𑀧𑀓𑀸𑀲𑁂 𑀧𑀦 𑁋

‘‘𑀅𑀣 ¶ 𑀥𑀜𑁆𑀜𑀁 𑀢𑀺𑀥𑀸 𑀲𑀸𑀮𑀺-𑀲𑀝𑁆𑀞𑀺𑀓𑀯𑀻𑀳𑀺𑀪𑁂𑀤𑀢𑁄;

𑀲𑀸𑀮𑀬𑁄 𑀳𑁂𑀫𑀦𑁆𑀢𑀸 𑀢𑀢𑁆𑀭, 𑀲𑀝𑁆𑀞𑀺𑀓𑀸 𑀕𑀺𑀫𑁆𑀳𑀚𑀸 𑀅𑀧𑀺;

𑀯𑀻𑀳𑀬𑁄 𑀢𑁆𑀯𑀸𑀲𑀴𑁆𑀳𑀸𑀔𑁆𑀬𑀸𑀢𑀸, 𑀯𑀲𑁆𑀲𑀓𑀸𑀮𑀲𑀫𑀼𑀩𑁆𑀪 𑀯𑀸’’𑀢𑀺. 𑁋

𑀯𑀼𑀢𑁆𑀢𑀁. 𑀯𑀳𑀢𑀺, 𑀩𑁆𑀭𑀽𑀳𑁂𑀢𑀺 𑀯𑀸 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀦𑁆𑀢𑀺 𑀯𑀻𑀳𑀺, 𑀲𑀲𑁆𑀲𑀁. 𑀬𑀼𑀯𑀺𑀢𑀩𑁆𑀩𑁄 𑀫𑀺𑀲𑁆𑀲𑀺𑀢𑀩𑁆𑀩𑁄𑀢𑀺 𑀬𑀯𑁄. 𑀲𑁄 𑀳𑀺 𑀅𑀢𑀺𑀮𑀽𑀔𑀢𑀸𑀬 𑀅𑀜𑁆𑀜𑁂𑀦 𑀫𑀺𑀲𑁆𑀲𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀻𑀬𑀢𑀺. 𑀕𑀼𑀥𑀢𑀺 𑀧𑀭𑀺𑀯𑁂𑀥𑀢𑀺 𑀧𑀮𑀺𑀩𑀼𑀤𑁆𑀥𑀢𑀻𑀢𑀺 𑀕𑁄𑀥𑀽𑀫𑁄, 𑀬𑀁 ‘‘𑀫𑀺𑀮𑀓𑁆𑀔𑀪𑁄𑀚𑀦’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀲𑁄𑀪𑀦𑀢𑁆𑀢𑀸 𑀓𑀫𑀦𑀻𑀬𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀓𑀗𑁆𑀕𑀼, 𑀅𑀢𑀺𑀲𑀼𑀔𑀼𑀫𑀥𑀜𑁆𑀜𑀯𑀺𑀲𑁂𑀲𑁄. 𑀯𑀭𑀻𑀬𑀢𑀺 𑀅𑀢𑀺𑀮𑀽𑀔𑀢𑀸𑀬 𑀦𑀺𑀯𑀸𑀭𑀻𑀬𑀢𑀺, 𑀔𑀼𑀤𑁆𑀤𑀸𑀧𑀝𑀺𑀯𑀺𑀦𑀬𑀦𑀢𑁄 𑀯𑀸 𑀪𑀚𑀻𑀬𑀢𑀻𑀢𑀺 𑀯𑀭𑀓𑁄. 𑀓𑁄𑀭𑀁 𑀭𑀼𑀥𑀺𑀭𑀁 𑀤𑀽𑀲𑀢𑀻𑀢𑀺 𑀓𑀼𑀤𑁆𑀭𑀽𑀲𑀓𑁄, 𑀯𑀡𑁆𑀡𑀲𑀗𑁆𑀓𑀫𑀦𑁂𑀦 𑀬𑁄 ‘‘𑀕𑁄𑀯𑀟𑁆𑀠𑀦𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀢𑀸𑀦𑀺 𑀲𑀢𑁆𑀢𑀧𑀺 𑀲𑀧𑁆𑀧𑀪𑁂𑀤𑀸 𑀦𑀺𑀥𑀸𑀦𑁂 𑀧𑁄𑀲𑀦𑁂 𑀲𑀸𑀥𑀼𑀢𑁆𑀢𑁂𑀦 ‘‘𑀥𑀜𑁆𑀜𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. ‘‘𑀦 𑀓𑁂𑀯𑀮𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀲𑀫𑁆𑀧𑀝𑀺𑀘𑁆𑀙𑀦𑀁, 𑀧𑀭𑀸𑀫𑀲𑀦𑀜𑁆𑀘 𑀇𑀥 𑀧𑀝𑀺𑀕𑁆𑀕𑀳𑀡𑀲𑀤𑁆𑀤𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀫𑀻𑀤𑀺𑀲𑁂𑀲𑀼. ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂, 𑀯𑀲𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀅𑀘𑁆𑀙𑀯𑀲𑀁 𑀫𑀘𑁆𑀙𑀯𑀲𑀁 𑀲𑀼𑀲𑀼𑀓𑀸𑀯𑀲𑀁 𑀲𑀽𑀓𑀭𑀯𑀲𑀁 𑀕𑀤𑁆𑀭𑀪𑀯𑀲’’𑀦𑁆𑀢𑀺 (𑀫𑀳𑀸𑀯. 𑁨𑁬𑁨) 𑀯𑀼𑀢𑁆𑀢𑀢𑁆𑀢𑀸 𑀇𑀤𑀁 𑀧𑀜𑁆𑀘𑀯𑀺𑀥𑀫𑁆𑀧𑀺 𑀪𑁂𑀲𑀚𑁆𑀚𑀁 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀁 𑀦𑀸𑀫. 𑀢𑀲𑁆𑀲 𑀧𑀦 ‘‘𑀓𑀸𑀮𑁂 𑀧𑀝𑀺𑀕𑁆𑀕𑀳𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀝𑀺𑀕𑁆𑀕𑀳𑀡𑀁 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀅𑀜𑁆𑀜𑀢𑁆𑀭 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀸’’𑀢𑀺. 𑀫𑀁𑀲-𑀲𑀤𑁆𑀤𑁂𑀦 𑀫𑀘𑁆𑀙𑀸𑀦𑀫𑁆𑀧𑀺 𑀫𑀁𑀲𑀁 𑀕𑀳𑀺𑀢𑀁 𑀏𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀆𑀫𑀓𑀫𑀁𑀲𑀫𑀘𑁆𑀙𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀺𑀓𑁄𑀝𑀺𑀧𑀭𑀺𑀲𑀼𑀤𑁆𑀥𑀁 𑀫𑀘𑁆𑀙𑀫𑀁𑀲𑀁 𑀅𑀦𑀼𑀜𑁆𑀜𑀸𑀢𑀁 𑀅𑀤𑀺𑀝𑁆𑀞𑀁, 𑀅𑀲𑀼𑀢𑀁, 𑀅𑀧𑀭𑀺𑀲𑀗𑁆𑀓𑀺𑀢𑀦𑁆𑀢𑀺 𑀯𑀸 𑀧𑀬𑁄𑀕𑀲𑁆𑀲 𑀤𑀲𑁆𑀲𑀦𑀢𑁄 𑀯𑀺𑀭𑀽𑀧𑁂𑀓𑀲𑁂𑀲𑀦𑀬𑁄 𑀤𑀲𑁆𑀲𑀺𑀢𑁄 𑀅𑀦𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀸𑀫𑀁 𑀮𑁄𑀓𑀺𑀬𑀸 𑁋

‘‘𑀅𑀝𑁆𑀞𑀯𑀲𑁆𑀲𑀸 𑀪𑀯𑁂 𑀕𑁄𑀭𑀻, 𑀤𑀲𑀯𑀲𑁆𑀲𑀸 𑀢𑀼 𑀓𑀜𑁆𑀜𑀓𑀸;

𑀲𑀫𑁆𑀧𑀢𑁆𑀢𑁂 𑀤𑁆𑀯𑀸𑀤𑀲𑀯𑀲𑁆𑀲𑁂, 𑀓𑀼𑀫𑀸𑀭𑀻𑀢𑀺𑀪𑀺𑀥𑀻𑀬𑀢𑁂’’𑀢𑀺. 𑁋

𑀯𑀤𑀦𑁆𑀢𑀺 ¶ . 𑀇𑀥 𑀧𑀦 𑀧𑀼𑀭𑀺𑀲𑀦𑁆𑀢𑀭𑀕𑀢𑀸𑀕𑀢𑀯𑀲𑁂𑀦 𑀇𑀢𑁆𑀣𑀺𑀓𑀼𑀫𑀸𑀭𑀺𑀓𑀸𑀪𑁂𑀤𑁄𑀢𑀺 𑀆𑀳 ‘‘𑀇𑀢𑁆𑀣𑀻𑀢𑀺 𑀧𑀼𑀭𑀺𑀲𑀦𑁆𑀢𑀭𑀕𑀢𑀸’’𑀢𑀺𑀆𑀤𑀺. 𑀤𑀸𑀲𑀺𑀤𑀸𑀲𑀯𑀲𑁂𑀦𑁂𑀯𑀸𑀢𑀺 𑀤𑀸𑀲𑀺𑀤𑀸𑀲𑀯𑁄𑀳𑀸𑀭𑀯𑀲𑁂𑀦𑁂𑀯. 𑀏𑀯𑀁 𑀯𑀼𑀢𑁆𑀢𑁂𑀢𑀺 𑀢𑀸𑀤𑀺𑀲𑁂𑀦 𑀓𑀧𑁆𑀧𑀺𑀬𑀯𑀘𑀦𑁂𑀦 𑀯𑀼𑀢𑁆𑀢𑁂. 𑀯𑀺𑀦𑀬𑀝𑁆𑀞𑀓𑀣𑀸𑀲𑀼 𑀆𑀕𑀢𑀯𑀺𑀦𑀺𑀘𑁆𑀙𑀬𑀁 𑀲𑀦𑁆𑀥𑀸𑀬 ‘‘𑀯𑀺𑀦𑀬𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑁄 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸𑀤𑀻𑀲𑀼 (𑀧𑀸𑀭𑀸. 𑀅𑀝𑁆𑀞. 𑁩𑁬𑁪) 𑀕𑀳𑁂𑀢𑀩𑁆𑀩𑁄.

𑀩𑀻𑀚𑀁 𑀔𑀺𑀧𑀦𑁆𑀢𑀺 𑀏𑀢𑁆𑀣, 𑀔𑀺𑀢𑁆𑀢𑀁 𑀯𑀸 𑀩𑀻𑀚𑀁 𑀢𑀸𑀬𑀢𑀻𑀢𑀺 𑀔𑁂𑀢𑁆𑀢𑀁, 𑀓𑁂𑀤𑀸𑀭𑁄𑀢𑀺 𑀆𑀳 ‘‘𑀬𑀲𑁆𑀫𑀺𑀁 𑀧𑀼𑀩𑁆𑀩𑀡𑁆𑀡𑀁 𑀭𑀼𑀳𑀢𑀻’’𑀢𑀺. 𑀅𑀧𑀭𑀡𑁆𑀡𑀲𑁆𑀲 𑀧𑀼𑀩𑁆𑀩𑁂 𑀧𑀯𑀢𑁆𑀢𑀫𑀦𑁆𑀦𑀁 𑀧𑀼𑀩𑁆𑀩𑀡𑁆𑀡𑀁 𑀦-𑀓𑀸𑀭𑀲𑁆𑀲 𑀡-𑀓𑀸𑀭𑀁 𑀓𑀢𑁆𑀯𑀸, 𑀲𑀸𑀮𑀺𑀆𑀤𑀺 ¶ . 𑀯𑀲𑀦𑁆𑀢𑀺 𑀧𑀢𑀺𑀝𑁆𑀞𑀳𑀦𑁆𑀢𑀺 𑀅𑀧𑀭𑀡𑁆𑀡𑀸𑀦𑀺 𑀏𑀢𑁆𑀣𑀸𑀢𑀺 𑀯𑀢𑁆𑀣𑀽𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀯𑀢𑁆𑀣𑀼 𑀦𑀸𑀫𑀸’’𑀢𑀺𑀆𑀤𑀺𑀦𑀸. 𑀧𑀼𑀩𑁆𑀩𑀡𑁆𑀡𑀲𑁆𑀲 𑀅𑀧𑀭𑀁 𑀧𑀯𑀢𑁆𑀢𑀫𑀦𑁆𑀦𑀁 𑀅𑀧𑀭𑀡𑁆𑀡𑀁 𑀯𑀼𑀢𑁆𑀢𑀦𑀬𑁂𑀦. 𑀏𑀯𑀁 𑀅𑀝𑁆𑀞𑀓𑀣𑀸𑀦𑀬𑀸𑀦𑀼𑀭𑀽𑀧𑀁 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀔𑁂𑀢𑁆𑀢𑀁 𑀦𑀸𑀫 𑀬𑀢𑁆𑀣 𑀧𑀼𑀩𑁆𑀩𑀡𑁆𑀡𑀁 𑀯𑀸 𑀅𑀧𑀭𑀡𑁆𑀡𑀁 𑀯𑀸 𑀚𑀸𑀬𑀢𑀻’’𑀢𑀺 (𑀧𑀸𑀭𑀸. 𑁧𑁦𑁪) 𑀯𑀼𑀢𑁆𑀢𑀯𑀺𑀦𑀬𑀧𑀸𑀴𑀺𑀦𑀬𑀸𑀦𑀼𑀭𑀽𑀧𑀫𑁆𑀧𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀢𑁆𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀤𑀢𑁆𑀣𑀸𑀬𑀸𑀢𑀺 𑀔𑁂𑀢𑁆𑀢𑀢𑁆𑀣𑀸𑀬. 𑀅𑀓𑀢𑀪𑀽𑀫𑀺𑀪𑀸𑀕𑁄𑀢𑀺 𑀅𑀧𑀭𑀺𑀲𑀗𑁆𑀔𑀢𑁄 𑀢𑀤𑀼𑀤𑁆𑀤𑁂𑀲𑀺𑀓𑁄 𑀪𑀽𑀫𑀺𑀪𑀸𑀕𑁄. ‘‘𑀔𑁂𑀢𑁆𑀢𑀯𑀢𑁆𑀣𑀼 𑀲𑀻𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀧𑁄𑀓𑁆𑀔𑀭𑀡𑀻𑀓𑀽𑀧𑀸𑀤𑀬𑁄 𑀲𑀗𑁆𑀕𑀳𑀺𑀢𑀸.

𑀤𑀽𑀢𑀲𑁆𑀲 𑀇𑀤𑀁, 𑀤𑀽𑀢𑁂𑀦 𑀯𑀸 𑀓𑀸𑀢𑀼𑀫𑀭𑀳𑀢𑀻𑀢𑀺 𑀤𑀽𑀢𑁂𑀬𑁆𑀬𑀁. 𑀧𑀡𑁆𑀡𑀦𑁆𑀢𑀺 𑀮𑁂𑀔𑀲𑀸𑀲𑀦𑀁. 𑀲𑀸𑀲𑀦𑀦𑁆𑀢𑀺 𑀫𑀼𑀔𑀲𑀸𑀲𑀦𑀁. 𑀖𑀭𑀸 𑀖𑀭𑀦𑁆𑀢𑀺 𑀅𑀜𑁆𑀜𑀲𑁆𑀫𑀸 𑀖𑀭𑀸 𑀅𑀜𑁆𑀜𑀁 𑀖𑀭𑀁. 𑀔𑀼𑀤𑁆𑀤𑀓𑀕𑀫𑀦𑀦𑁆𑀢𑀺 𑀤𑀽𑀢𑁂𑀬𑁆𑀬𑀕𑀫𑀦𑀢𑁄 𑀅𑀧𑁆𑀧𑀢𑀭𑀕𑀫𑀦𑀁, 𑀅𑀦𑀤𑁆𑀥𑀸𑀦𑀕𑀫𑀦𑀁 𑀭𑀲𑁆𑀲𑀕𑀫𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀤𑀼𑀪𑀬𑁂𑀲𑀁 𑀅𑀦𑀼𑀬𑀼𑀜𑁆𑀚𑀦𑀁 𑀅𑀦𑀼𑀬𑁄𑀕𑁄𑀢𑀺 𑀆𑀳 ‘‘𑀢𑀤𑀼𑀪𑀬𑀓𑀭𑀡’’𑀦𑁆𑀢𑀺. 𑀢𑀲𑁆𑀫𑀸𑀢𑀺 𑀢𑀤𑀼𑀪𑀬𑀓𑀭𑀡𑀲𑁆𑀲𑁂𑀯 𑀅𑀦𑀼𑀬𑁄𑀕𑀪𑀸𑀯𑀢𑁄.

𑀓𑀬𑀦𑀁 𑀓𑀬𑁄, 𑀧𑀭𑀫𑁆𑀧𑀭𑀸 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀥𑀦𑀲𑁆𑀲 𑀤𑀸𑀦𑀁. 𑀓𑀻-𑀲𑀤𑁆𑀤𑀜𑁆𑀳𑀺 𑀤𑀩𑁆𑀩𑀯𑀺𑀦𑀺𑀫𑀬𑁂 𑀧𑀞𑀦𑁆𑀢𑀺 𑀯𑀺𑀓𑁆𑀓𑀬𑀦𑀁 𑀯𑀺𑀓𑁆𑀓𑀬𑁄, 𑀧𑀞𑀫𑀫𑁂𑀯 𑀅𑀢𑁆𑀢𑀦𑁄 𑀥𑀦𑀲𑁆𑀲 𑀧𑀭𑁂𑀲𑀁 𑀤𑀸𑀦𑀦𑁆𑀢𑀺 𑀯𑀤𑀦𑁆𑀢𑀺. 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀸𑀤𑀻𑀲𑀼 𑀧𑀦 ‘‘𑀓𑀬’’𑀦𑁆𑀢𑀺 𑀧𑀭𑀪𑀡𑁆𑀟𑀲𑁆𑀲 𑀕𑀳𑀡𑀁. 𑀯𑀺𑀓𑁆𑀓𑀬𑀦𑁆𑀢𑀺 𑀅𑀢𑁆𑀢𑀦𑁄 𑀪𑀡𑁆𑀟𑀲𑁆𑀲 𑀤𑀸𑀦’’𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁫𑁯𑁪) 𑀯𑀼𑀢𑁆𑀢𑀁. 𑀢𑀤𑁂𑀯 ‘‘𑀓𑀬𑀺𑀢𑀜𑁆𑀘 𑀳𑁄𑀢𑀺 𑀧𑀭𑀪𑀡𑁆𑀟𑀁 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑀁 𑀓𑀭𑁄𑀦𑁆𑀢𑁂𑀦, 𑀯𑀺𑀓𑁆𑀓𑀻𑀢𑀜𑁆𑀘 𑀅𑀢𑁆𑀢𑀦𑁄 𑀪𑀡𑁆𑀟𑀁 𑀧𑀭𑀳𑀢𑁆𑀣𑀕𑀢𑀁 𑀓𑀭𑁄𑀦𑁆𑀢𑁂𑀦𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁫𑁧𑁫) 𑀯𑀺𑀦𑀬𑀝𑁆𑀞𑀓𑀣𑀸𑀯𑀘𑀦𑁂𑀦 𑀲𑀫𑁂𑀢𑀺. 𑀯𑀜𑁆𑀘𑀦𑀁 𑀫𑀸𑀬𑀸𑀓𑀭𑀡𑀁, 𑀧𑀝𑀺𑀪𑀸𑀦𑀓𑀭𑀡𑀯𑀲𑁂𑀦 𑀉𑀧𑀸𑀬𑀓𑀼𑀲𑀮𑀢𑀸𑀬 𑀧𑀭𑀲𑀦𑁆𑀢𑀓𑀕𑁆𑀕𑀳𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀼𑀮𑀸 𑀦𑀸𑀫 𑀬𑀸𑀬 𑀢𑀼𑀮𑀻𑀬𑀢𑀺 𑀧𑀫𑀻𑀬𑀢𑀺, 𑀢𑀸𑀬 ¶ 𑀓𑀽𑀝𑀁 ‘‘𑀢𑀼𑀮𑀸𑀓𑀽𑀝’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀧𑀦 𑀓𑀭𑁄𑀦𑁆𑀢𑁄 𑀢𑀼𑀮𑀸𑀬 𑀭𑀽𑀧𑀅𑀗𑁆𑀕𑀕𑀳𑀡𑀸𑀓𑀸𑀭𑀧𑀝𑀺𑀘𑁆𑀙𑀦𑁆𑀦𑀲𑀡𑁆𑀞𑀸𑀦𑀯𑀲𑁂𑀦 𑀓𑀭𑁄𑀢𑀻𑀢𑀺 𑀘𑀢𑀼𑀩𑁆𑀩𑀺𑀥𑀢𑀸 𑀯𑀼𑀢𑁆𑀢𑀸. 𑀅𑀢𑁆𑀢𑀦𑀸 𑀕𑀳𑁂𑀢𑀩𑁆𑀩𑀁 𑀪𑀡𑁆𑀟𑀁 𑀧𑀘𑁆𑀙𑀸𑀪𑀸𑀕𑁂, 𑀧𑀭𑁂𑀲𑀁 𑀤𑀸𑀢𑀩𑁆𑀩𑀁 𑀧𑀼𑀩𑁆𑀩𑀪𑀸𑀕𑁂 𑀓𑀢𑁆𑀯𑀸 𑀫𑀺𑀦𑁂𑀦𑁆𑀢𑀻𑀢𑀺 𑀆𑀳 ‘‘𑀕𑀡𑁆𑀳𑀦𑁆𑀢𑁄 𑀧𑀘𑁆𑀙𑀸𑀪𑀸𑀕𑁂’’𑀢𑀺𑀆𑀤𑀺. 𑀅𑀓𑁆𑀓𑀫𑀢𑀺 𑀦𑀺𑀧𑁆𑀧𑀻𑀴𑀢𑀺, 𑀧𑀼𑀩𑁆𑀩𑀪𑀸𑀕𑁂 𑀅𑀓𑁆𑀓𑀫𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀽𑀮𑁂 𑀭𑀚𑁆𑀚𑀼𑀦𑁆𑀢𑀺 𑀢𑀼𑀮𑀸𑀬 𑀫𑀽𑀮𑁂 𑀬𑁄𑀚𑀺𑀢𑀁 𑀭𑀚𑁆𑀚𑀼𑀁. 𑀢𑀣𑀸 𑀅𑀕𑁆𑀕𑁂. 𑀢𑀦𑁆𑀢𑀺 𑀅𑀬𑀘𑀼𑀡𑁆𑀡𑀁.

𑀓𑀦𑀢𑀺 𑀤𑀺𑀩𑁆𑀩𑀢𑀻𑀢𑀺 𑀓𑀁𑀲𑁄, 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀫𑀬𑀸 𑀪𑁄𑀚𑀦𑀧𑀸𑀦𑀧𑀢𑁆𑀢𑀸. 𑀇𑀥 𑀧𑀦 𑀲𑁄𑀯𑀡𑁆𑀡𑀫𑀬𑁂 𑀧𑀸𑀦𑀧𑀢𑁆𑀢𑁂𑀢𑀺 𑀆𑀳 ‘‘𑀲𑀼𑀯𑀡𑁆𑀡𑀧𑀸𑀢𑀻’’𑀢𑀺. 𑀢𑀸𑀬 𑀯𑀜𑁆𑀘𑀦𑀦𑁆𑀢𑀺 𑀦𑀺𑀓𑀢𑀺𑀯𑀲𑁂𑀦 𑀯𑀜𑁆𑀘𑀦𑀁. ‘‘𑀧𑀢𑀺𑀭𑀽𑀧𑀓𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀲𑀦𑁆𑀢𑀓𑀕𑀳𑀡𑀜𑁆𑀳𑀺 𑀦𑀺𑀓𑀢𑀺, 𑀧𑀝𑀺𑀪𑀸𑀦𑀓𑀭𑀡𑀯𑀲𑁂𑀦 𑀧𑀦 𑀉𑀧𑀸𑀬𑀓𑀼𑀲𑀮𑀢𑀸𑀬 𑀯𑀜𑁆𑀘𑀦’’𑀦𑁆𑀢𑀺 𑀦𑀺𑀓𑀢𑀺𑀯𑀜𑁆𑀘𑀦𑀁 𑀪𑁂𑀤𑀢𑁄 𑀓𑀡𑁆𑀳𑀚𑀸𑀢𑀓𑀝𑁆𑀞𑀓𑀣𑀸𑀤𑀻𑀲𑀼 (𑀚𑀸. 𑀅𑀝𑁆𑀞. 𑁪.𑁧𑁦.𑁧𑁯; 𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁦; 𑀫. 𑀦𑀺. 𑀅𑀝𑁆𑀞. 𑁨.𑁧𑁪𑁯; 𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁧𑁧𑁬𑁫; 𑀅. 𑀦𑀺. 𑀅𑀝𑁆𑀞. 𑁨.𑁪.𑁧𑁯𑁮 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀯𑀼𑀢𑁆𑀢𑀁 ¶ , 𑀇𑀥 𑀧𑀦 𑀢𑀤𑀼𑀪𑀬𑀫𑁆𑀧𑀺 ‘‘𑀯𑀜𑁆𑀘𑀦’’𑀫𑀺𑀘𑁆𑀘𑁂𑀯. ‘‘𑀓𑀣’’𑀦𑁆𑀢𑀺𑀆𑀤𑀺𑀦𑀸 𑀳𑀺 𑀧𑀢𑀺𑀭𑀽𑀧𑀓𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀲𑀦𑁆𑀢𑀓𑀕𑀳𑀡𑀫𑁂𑀯 𑀯𑀺𑀪𑀸𑀯𑁂𑀢𑀺. 𑀲𑀫𑀕𑁆𑀖𑀢𑀭𑀦𑁆𑀢𑀺 𑀢𑀸𑀲𑀁 𑀧𑀸𑀢𑀻𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀫𑀓𑀁 𑀅𑀕𑁆𑀖𑀯𑀺𑀲𑁂𑀲𑀁. 𑀧𑀸𑀲𑀸𑀡𑁂𑀢𑀺 𑀪𑀽𑀢𑀸𑀪𑀽𑀢𑀪𑀸𑀯𑀲𑀜𑁆𑀚𑀸𑀦𑀦𑀓𑁂 𑀧𑀸𑀲𑀸𑀡𑁂. 𑀖𑀁𑀲𑀦𑁂𑀦𑁂𑀯 𑀲𑀼𑀯𑀡𑁆𑀡𑀪𑀸𑀯𑀲𑀜𑁆𑀜𑀸𑀧𑀦𑀁 𑀲𑀺𑀤𑁆𑀥𑀦𑁆𑀢𑀺 ‘‘𑀖𑀁𑀲𑀺𑀢𑁆𑀯𑀸’’𑀢𑁆𑀯𑁂𑀯 𑀯𑀼𑀢𑁆𑀢𑀁.

𑀳𑀤𑀬𑀦𑁆𑀢𑀺 𑀦𑀸𑀴𑀺𑀆𑀤𑀺𑀫𑀺𑀦𑀦𑀪𑀸𑀚𑀦𑀸𑀦𑀁 𑀅𑀩𑁆𑀪𑀦𑁆𑀢𑀭𑀁, 𑀢𑀲𑁆𑀫𑀺𑀁 𑀪𑁂𑀤𑁄 𑀙𑀺𑀤𑁆𑀤𑀓𑀭𑀡𑀁 𑀳𑀤𑀬𑀪𑁂𑀤𑁄. 𑀢𑀺𑀮𑀸𑀤𑀻𑀦𑀁 𑀦𑀸𑀴𑀺𑀆𑀤𑀻𑀳𑀺 𑀫𑀺𑀦𑀦𑀓𑀸𑀮𑁂 𑀉𑀲𑁆𑀲𑀸𑀧𑀺𑀢𑀸 𑀲𑀺𑀔𑀸𑀬𑁂𑀯 𑀲𑀺𑀔𑀸, 𑀢𑀲𑁆𑀲𑀸 𑀪𑁂𑀤𑁄 𑀳𑀸𑀧𑀦𑀁 𑀲𑀺𑀔𑀸𑀪𑁂𑀤𑁄.

𑀭𑀚𑁆𑀚𑀼𑀬𑀸 𑀪𑁂𑀤𑁄 𑀯𑀺𑀲𑀫𑀓𑀭𑀡𑀁 𑀭𑀚𑁆𑀚𑀼𑀪𑁂𑀤𑁄. 𑀢𑀸𑀦𑀻𑀢𑀺 𑀲𑀧𑁆𑀧𑀺𑀢𑁂𑀮𑀸𑀤𑀻𑀦𑀺. 𑀅𑀦𑁆𑀢𑁄𑀪𑀸𑀚𑀦𑁂𑀢𑀺 𑀧𑀞𑀫𑀁 𑀦𑀺𑀓𑁆𑀔𑀺𑀢𑁆𑀢𑀪𑀸𑀚𑀦𑁂. 𑀉𑀲𑁆𑀲𑀸𑀧𑁂𑀢𑁆𑀯𑀸𑀢𑀺 𑀉𑀕𑁆𑀕𑀫𑀸𑀧𑁂𑀢𑁆𑀯𑀸, 𑀉𑀤𑁆𑀥𑀁 𑀭𑀸𑀲𑀺𑀁 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀙𑀺𑀦𑁆𑀤𑀦𑁆𑀢𑁄𑀢𑀺 𑀅𑀧𑀦𑁂𑀦𑁆𑀢𑁄.

𑀓𑀢𑁆𑀢𑀩𑁆𑀩𑀓𑀫𑁆𑀫𑀢𑁄 𑀉𑀤𑁆𑀥𑀁 𑀓𑁄𑀝𑀦𑀁 𑀧𑀝𑀺𑀳𑀦𑀦𑀁 𑀉𑀓𑁆𑀓𑁄𑀝𑀦𑀁. 𑀅𑀪𑀽𑀢𑀓𑀸𑀭𑀻𑀦𑀁 𑀮𑀜𑁆𑀚𑀕𑁆𑀕𑀳𑀡𑀁, 𑀦 𑀧𑀦 𑀧𑀼𑀦 𑀓𑀫𑁆𑀫𑀸𑀬 𑀉𑀓𑁆𑀓𑁄𑀝𑀦𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀲𑁆𑀲𑀸𑀫𑀺𑀓𑁂…𑀧𑁂… 𑀕𑁆𑀕𑀳𑀡’’𑀦𑁆𑀢𑀺. 𑀉𑀧𑀸𑀬𑁂𑀳𑀻𑀢𑀺 𑀓𑀸𑀭𑀡𑀧𑀢𑀺𑀭𑀽𑀧𑀓𑁂𑀳𑀺. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀯𑀜𑁆𑀘𑀦𑁂. ‘‘𑀯𑀢𑁆𑀣𑀼’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀏𑀓𑀁 𑀯𑀢𑁆𑀣𑀼’’𑀦𑁆𑀢𑀺 𑀯𑀤𑀦𑁆𑀢𑁄 𑀅𑀜𑁆𑀜𑀸𑀦𑀺𑀧𑀺 𑀅𑀢𑁆𑀣𑀺 𑀩𑀳𑀽𑀦𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀜𑁆𑀜𑀸𑀦𑀺𑀧𑀺 𑀳𑀺 𑀲𑀲𑀯𑀢𑁆𑀣𑀼𑀆𑀤𑀻𑀦𑀺 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀸𑀦𑀺. 𑀫𑀺𑀕𑀦𑁆𑀢𑀺 𑀫𑀳𑀦𑁆𑀢𑀁 𑀫𑀺𑀕𑀁. 𑀢𑁂𑀦 𑀳𑀻𑀢𑀺 𑀫𑀺𑀕𑀕𑁆𑀕𑀳𑀡𑁂 𑀉𑀬𑁆𑀬𑁄𑀚𑀦𑀁, 𑀬𑁂𑀦 𑀯𑀸 𑀓𑀸𑀭𑀡𑁂𑀦 ‘‘𑀫𑀺𑀕𑀁 𑀫𑁂 𑀤𑁂𑀳𑀻’’𑀢𑀺 𑀆𑀳, 𑀢𑁂𑀦 𑀓𑀸𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀳𑀺-𑀲𑀤𑁆𑀤𑁄 ¶ 𑀦𑀺𑀧𑀸𑀢𑀫𑀢𑁆𑀢𑀁. 𑀬𑁄𑀕𑀯𑀲𑁂𑀦𑀸𑀢𑀺 𑀯𑀺𑀚𑁆𑀚𑀸𑀚𑀧𑁆𑀧𑀦𑀸𑀤𑀺𑀧𑀬𑁄𑀕𑀯𑀲𑁂𑀦. 𑀫𑀸𑀬𑀸𑀯𑀲𑁂𑀦𑀸𑀢𑀺 𑀫𑀦𑁆𑀢𑀚𑀧𑁆𑀧𑀦𑀁 𑀯𑀺𑀦𑀸 𑀅𑀪𑀽𑀢𑀲𑁆𑀲𑀸𑀧𑀺 𑀪𑀽𑀢𑀸𑀓𑀸𑀭𑀲𑀜𑁆𑀜𑀸𑀧𑀦𑀸𑀬 𑀘𑀓𑁆𑀔𑀼𑀫𑁄𑀳𑀦𑀫𑀸𑀬𑀸𑀬 𑀯𑀲𑁂𑀦. 𑀬𑀸𑀬 𑀳𑀺 𑀅𑀫𑀡𑀺𑀆𑀤𑀬𑁄𑀧𑀺 𑀫𑀡𑀺𑀆𑀤𑀺𑀆𑀓𑀸𑀭𑁂𑀦 𑀤𑀺𑀲𑁆𑀲𑀦𑁆𑀢𑀺. 𑀧𑀸𑀫𑀗𑁆𑀕𑁄 𑀦𑀸𑀫 𑀓𑀼𑀮𑀸𑀘𑀸𑀭𑀬𑀼𑀢𑁆𑀢𑁄 𑀆𑀪𑀭𑀡𑀯𑀺𑀲𑁂𑀲𑁄, 𑀬𑀁 𑀮𑁄𑀓𑁂 ‘‘𑀬𑀜𑁆𑀜𑁄𑀧𑀯𑀺𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀯𑀓𑁆𑀓𑀮𑀺𑀢𑁆𑀣𑁂𑀭𑀸𑀧𑀤𑀸𑀦𑁂𑀧𑀺 𑀯𑀼𑀢𑁆𑀢𑀁 𑁋

‘‘𑀧𑀲𑁆𑀲𑀣𑁂𑀢𑀁 𑀫𑀸𑀡𑀯𑀓𑀁, 𑀧𑀻𑀢𑀫𑀝𑁆𑀞𑀦𑀺𑀯𑀸𑀲𑀦𑀁;

𑀳𑁂𑀫𑀬𑀜𑁆𑀜𑁄𑀧𑀯𑀺𑀢𑁆𑀢𑀗𑁆𑀕𑀁, 𑀚𑀦𑀦𑁂𑀢𑁆𑀢𑀫𑀦𑁄𑀳𑀭’’𑀦𑁆𑀢𑀺. (𑀅𑀧. 𑁨.𑁫𑁪.𑁪𑁦);

𑀢𑀤𑀝𑁆𑀞𑀓𑀣𑀸𑀬𑀫𑁆𑀧𑀺 ‘‘𑀧𑀻𑀢𑀫𑀝𑁆𑀞𑀦𑀺𑀯𑀸𑀲𑀦𑀦𑁆𑀢𑀺 𑀲𑀺𑀮𑀺𑀝𑁆𑀞𑀲𑀼𑀯𑀡𑁆𑀡𑀯𑀡𑁆𑀡𑀯𑀢𑁆𑀣𑁂 𑀦𑀺𑀯𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀳𑁂𑀫𑀬𑀜𑁆𑀜𑁄𑀧𑀯𑀺𑀢𑁆𑀢𑀗𑁆𑀕𑀦𑁆𑀢𑀺 𑀲𑀼𑀯𑀡𑁆𑀡𑀧𑀸𑀫𑀗𑁆𑀕𑀮𑀕𑁆𑀕𑀺𑀢𑀕𑀢𑁆𑀢𑀦𑁆𑀢𑀺 𑀅𑀢𑁆𑀣𑁄’’𑀢𑀺 (𑀅𑀧. 𑀅𑀝𑁆𑀞. 𑁨.𑁫𑁪.𑁪𑁦) 𑀲𑀯𑀦𑀁 𑀲𑀞𑀦𑀁 𑀲𑀸𑀯𑀺, 𑀅𑀦𑀼𑀚𑀼𑀓𑀢𑀸, 𑀢𑁂𑀦𑀸𑀳 ‘‘𑀓𑀼𑀝𑀺𑀮𑀬𑁄𑀕𑁄’’𑀢𑀺, 𑀚𑀺𑀫𑁆𑀳𑀢𑀸𑀬𑁄𑀕𑁄𑀢𑀺 𑀅𑀢𑁆𑀣𑁄. ‘‘𑀏𑀢𑁂𑀲𑀁𑀬𑁂𑀯𑀸’’𑀢𑀺𑀆𑀤𑀺𑀦𑀸 ¶ 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑀁 𑀤𑀲𑁆𑀲𑁂𑀢𑀺. ‘‘𑀢𑀲𑁆𑀫𑀸’’𑀢𑀺𑀆𑀤𑀺 𑀮𑀤𑁆𑀥𑀕𑀼𑀡𑀤𑀲𑁆𑀲𑀦𑀁. 𑀬𑁂 𑀧𑀦 𑀘𑀢𑀼𑀦𑁆𑀦𑀫𑁆𑀧𑀺 𑀧𑀤𑀸𑀦𑀁 𑀪𑀺𑀦𑁆𑀦𑀸𑀥𑀺𑀓𑀭𑀡𑀢𑀁 𑀯𑀤𑀦𑁆𑀢𑀺, 𑀢𑁂𑀲𑀁 𑀯𑀸𑀤𑀫𑀸𑀳 ‘‘𑀓𑁂𑀘𑀻’’𑀢𑀺𑀆𑀤𑀺𑀦𑀸. 𑀢𑀢𑁆𑀣 ‘‘𑀓𑁂𑀘𑀻’’𑀢𑀺 𑀲𑀸𑀭𑀲𑀫𑀸𑀲𑀓𑀸𑀭𑀓𑀸 𑀆𑀘𑀭𑀺𑀬𑀸, 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄 𑀘, 𑀢𑁂𑀲𑀁 𑀢𑀁 𑀦 𑀬𑀼𑀢𑁆𑀢𑀁 𑀯𑀜𑁆𑀘𑀦𑁂𑀦 𑀲𑀗𑁆𑀕𑀳𑀺𑀢𑀲𑁆𑀲𑁂𑀯 𑀧𑀼𑀦 𑀕𑀳𑀺𑀢𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀢𑀁 𑀧𑀦𑀸’’𑀢𑀺𑀆𑀤𑀺𑀦𑀸.

𑀫𑀸𑀭𑀡𑀦𑁆𑀢𑀺 𑀫𑀼𑀝𑁆𑀞𑀺𑀧𑀳𑀸𑀭𑀓𑀲𑀸𑀢𑀸𑀴𑀦𑀸𑀤𑀻𑀳𑀺 𑀳𑀺𑀁𑀲𑀦𑀁 𑀯𑀺𑀳𑁂𑀞𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀢𑀼 𑀧𑀸𑀡𑀸𑀢𑀺𑀧𑀸𑀢𑀁. 𑀯𑀺𑀳𑁂𑀞𑀦𑀢𑁆𑀣𑁂𑀧𑀺 𑀳𑀺 𑀯𑀥-𑀲𑀤𑁆𑀤𑁄 𑀤𑀺𑀲𑁆𑀲𑀢𑀺 ‘‘𑀅𑀢𑁆𑀢𑀸𑀦𑀁 𑀯𑀥𑀺𑀢𑁆𑀯𑀸 𑀯𑀥𑀺𑀢𑁆𑀯𑀸 𑀭𑁄𑀤𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁮𑁮𑁦) 𑀫𑀸𑀭𑀡-𑀲𑀤𑁆𑀤𑁄𑀧𑀺 𑀇𑀥 𑀯𑀺𑀳𑁂𑀞𑀦𑁂𑀬𑁂𑀯 𑀯𑀢𑁆𑀢𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀓𑁂𑀘𑀺 𑀧𑀦 ‘‘𑀧𑀼𑀩𑁆𑀩𑁂 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬𑀸’𑀢𑀺𑀆𑀤𑀻𑀲𑀼 𑀲𑀬𑀁𑀓𑀸𑀭𑁄, 𑀇𑀥 𑀧𑀭𑀁𑀓𑀸𑀭𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀲𑀓𑁆𑀓𑀸 𑀢𑀣𑀸 𑀯𑀢𑁆𑀢𑀼𑀁 ‘‘𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸, 𑀙 𑀧𑀬𑁄𑀕𑀸’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸. 𑀬𑀣𑀸 𑀳𑀺 𑀅𑀧𑁆𑀧𑀝𑀺𑀕𑁆𑀕𑀸𑀳𑀪𑀸𑀯𑀲𑀸𑀫𑀜𑁆𑀜𑁂𑀧𑀺 𑀲𑀢𑀺 𑀧𑀩𑁆𑀩𑀚𑀺𑀢𑁂𑀳𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀩𑁆𑀩𑀯𑀢𑁆𑀣𑀼𑀯𑀺𑀲𑁂𑀲𑀪𑀸𑀯𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀇𑀢𑁆𑀣𑀺𑀓𑀼𑀫𑀸𑀭𑀺𑀤𑀸𑀲𑀺𑀤𑀸𑀲𑀸𑀤𑀬𑁄 𑀯𑀺𑀪𑀸𑀕𑁂𑀦 𑀯𑀼𑀢𑁆𑀢𑀸. 𑀬𑀣𑀸 𑀘 𑀧𑀭𑀲𑀦𑁆𑀢𑀓𑀲𑁆𑀲 𑀳𑀭𑀡𑀪𑀸𑀯𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑀪𑀸𑀯𑀲𑀸𑀫𑀜𑁆𑀜𑁂𑀧𑀺 𑀲𑀢𑀺 𑀢𑀼𑀮𑀸𑀓𑀽𑀝𑀸𑀤𑀬𑁄 𑀅𑀤𑀺𑀦𑁆𑀦𑀸𑀤𑀸𑀦𑀯𑀺𑀲𑁂𑀲𑀪𑀸𑀯𑀲𑀦𑁆𑀤𑀲𑁆𑀲𑀦𑀢𑁆𑀣𑀁 𑀯𑀺𑀪𑀸𑀕𑁂𑀦 𑀯𑀼𑀢𑁆𑀢𑀸, 𑀦 𑀏𑀯𑀁 𑀧𑀸𑀡𑀸𑀢𑀺𑀧𑀸𑀢𑀧𑀭𑀺𑀬𑀸𑀬𑀲𑁆𑀲 𑀯𑀥𑀲𑁆𑀲 𑀧𑀼𑀦 𑀕𑀳𑀡𑁂 𑀧𑀬𑁄𑀚𑀦𑀁 𑀅𑀢𑁆𑀣𑀺 𑀢𑀣𑀸𑀯𑀺𑀪𑀚𑀺𑀢𑀩𑁆𑀩𑀲𑁆𑀲𑀸𑀪𑀸𑀯𑀢𑁄, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁄𑀬𑁂𑀯𑀢𑁆𑀣𑁄 𑀲𑀼𑀦𑁆𑀤𑀭𑀢𑀭𑁄𑀢𑀺.

𑀯𑀺𑀧𑀭𑀸𑀫𑁄𑀲𑁄𑀢𑀺 ¶ 𑀯𑀺𑀲𑁂𑀲𑁂𑀦 𑀲𑀫𑀦𑁆𑀢𑀢𑁄 𑀪𑀼𑀲𑀁 𑀫𑁄𑀲𑀸𑀧𑀦𑀁 𑀫𑀼𑀬𑁆𑀳𑀦𑀓𑀭𑀡𑀁, 𑀣𑁂𑀦𑀦𑀁 𑀯𑀸. 𑀣𑁂𑀬𑁆𑀬𑀁 𑀘𑁄𑀭𑀺𑀓𑀸 𑀫𑁄𑀲𑁄𑀢𑀺 𑀳𑀺 𑀧𑀭𑀺𑀬𑀸𑀬𑁄. 𑀲𑁄 𑀓𑀸𑀭𑀡𑀯𑀲𑁂𑀦 𑀤𑀼𑀯𑀺𑀥𑁄𑀢𑀺 𑀆𑀳 ‘‘𑀳𑀺𑀫𑀯𑀺𑀧𑀭𑀸𑀫𑁄𑀲𑁄’’𑀢𑀺𑀆𑀤𑀺. 𑀫𑀼𑀲𑀦𑁆𑀢𑀻𑀢𑀺 𑀘𑁄𑀭𑁂𑀦𑁆𑀢𑀺, 𑀫𑁄𑀲𑁂𑀦𑁆𑀢𑀺 𑀯𑀸 𑀫𑀼𑀬𑁆𑀳𑀦𑀁 𑀓𑀭𑁄𑀦𑁆𑀢𑀺, 𑀫𑁄𑀲𑁂𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀓𑀁 𑀕𑀡𑁆𑀳𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀦𑁆𑀢𑀺 𑀘 𑀢𑀲𑁆𑀲𑀸 𑀓𑀺𑀭𑀺𑀬𑀸𑀬 𑀧𑀭𑀸𑀫𑀲𑀦𑀁. 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀁 𑀚𑀦𑀦𑁆𑀢𑀺 𑀧𑀭𑀧𑀓𑁆𑀔𑁂𑀧𑀺 𑀅𑀥𑀺𑀓𑀸𑀭𑁄. 𑀆𑀮𑁄𑀧𑀦𑀁 𑀯𑀺𑀮𑀼𑀫𑁆𑀧𑀦𑀁 𑀆𑀮𑁄𑀧𑁄. 𑀲𑀳𑀲𑀸 𑀓𑀭𑀡𑀁 𑀲𑀳𑀲𑀸𑀓𑀸𑀭𑁄. 𑀲𑀳𑀲𑀸 𑀧𑀯𑀢𑁆𑀢𑀺𑀢𑀸 𑀲𑀸𑀳𑀲𑀺𑀓𑀸, 𑀲𑀸𑀯 𑀓𑀺𑀭𑀺𑀬𑀸 𑀢𑀣𑀸.

𑀏𑀢𑁆𑀢𑀸𑀯𑀢𑀸𑀢𑀺 ‘‘𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬𑀸’’𑀢𑀺𑀆𑀤𑀺𑀦𑀸 ‘‘𑀲𑀳𑀲𑀸𑀓𑀸𑀭𑀸 𑀧𑀝𑀺𑀯𑀺𑀭𑀢𑁄’’𑀢𑀺 𑀧𑀭𑀺𑀬𑁄𑀲𑀸𑀦𑁂𑀦 𑀏𑀢𑀧𑁆𑀧𑀭𑀺𑀫𑀸𑀡𑁂𑀦 𑀧𑀸𑀞𑁂𑀦. 𑀅𑀦𑁆𑀢𑀭𑀪𑁂𑀤𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀸𑀴𑀺𑀬𑀁 𑀬𑀣𑀸𑀭𑀼𑀢𑀫𑀸𑀕𑀢𑀯𑀲𑁂𑀦𑁂𑀯 𑀙𑀩𑁆𑀩𑀻𑀲𑀢𑀺𑀲𑀺𑀓𑁆𑀔𑀸𑀧𑀤𑀲𑀗𑁆𑀕𑀳𑀫𑁂𑀢𑀁 𑀲𑀻𑀮𑀁 𑀬𑁂𑀪𑀼𑀬𑁆𑀬𑁂𑀦 𑀲𑀺𑀓𑁆𑀔𑀸𑀧𑀤𑀸𑀦𑀫𑀯𑀺𑀪𑀢𑁆𑀢𑀢𑁆𑀢𑀸 𑀘𑀽𑀴𑀲𑀻𑀮𑀁 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀤𑁂𑀲𑀦𑀸𑀯𑀲𑁂𑀦 𑀳𑀺 𑀇𑀥 𑀘𑀽𑀴𑀫𑀚𑁆𑀛𑀺𑀫𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀥𑀫𑁆𑀫𑀯𑀲𑁂𑀦. 𑀢𑀣𑀸 𑀳𑀺 𑀇𑀥𑀲𑀗𑁆𑀔𑀺𑀢𑁆𑀢𑁂𑀦 𑀉𑀤𑁆𑀤𑀺𑀝𑁆𑀞𑀸𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀯𑀺𑀪𑀢𑁆𑀢𑀸𑀦𑀁 𑀯𑀺𑀪𑀚𑀦𑀯𑀲𑁂𑀦 𑀫𑀚𑁆𑀛𑀺𑀫𑀲𑀻𑀮𑀤𑁂𑀲𑀦𑀸 𑀧𑀯𑀢𑁆𑀢𑀸, 𑀢𑁂𑀦𑁂𑀯𑀸𑀳 ‘‘𑀫𑀚𑁆𑀛𑀺𑀫𑀲𑀻𑀮𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄’’𑀢𑀺.𑀘𑀽𑀴𑀲𑀻𑀮𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀚𑁆𑀛𑀺𑀫𑀲𑀻𑀮𑀯𑀡𑁆𑀡𑀦𑀸

𑁧𑁧. ‘‘𑀬𑀣𑀸 ¶ 𑀯𑀸 𑀧𑀦𑁂𑀓𑁂 𑀪𑁄𑀦𑁆𑀢𑁄’’𑀢𑀺𑀆𑀤𑀺𑀤𑁂𑀲𑀦𑀸𑀬 𑀲𑀫𑁆𑀩𑀦𑁆𑀥𑀫𑀸𑀳 ‘‘𑀇𑀤𑀸𑀦𑀻’’𑀢𑀺𑀆𑀤𑀺𑀦𑀸. 𑀢𑀢𑁆𑀣𑀸𑀬𑀫𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑁄 𑀦𑀬𑁄 𑁋 𑀬𑀣𑀸𑀢𑀺 𑀑𑀧𑀫𑁆𑀫𑀢𑁆𑀣𑁂 𑀦𑀺𑀧𑀸𑀢𑁄. 𑀯𑀸𑀢𑀺 𑀯𑀺𑀓𑀧𑁆𑀧𑀦𑀢𑁆𑀣𑁂, 𑀢𑁂𑀦 𑀇𑀫𑀫𑀢𑁆𑀣𑀁 𑀯𑀺𑀓𑀧𑁆𑀧𑁂𑀢𑀺 ‘‘𑀉𑀲𑁆𑀲𑀸𑀳𑀁 𑀓𑀢𑁆𑀯𑀸 𑀫𑀫 𑀯𑀡𑁆𑀡𑀁 𑀯𑀤𑀫𑀸𑀦𑁄𑀧𑀺 𑀧𑀼𑀣𑀼𑀚𑁆𑀚𑀦𑁄 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄’’𑀢𑀺𑀆𑀤𑀺𑀦𑀸 𑀧𑀭𑀸𑀦𑀼𑀤𑁆𑀤𑁂𑀲𑀺𑀓𑀦𑀬𑁂𑀦 𑀯𑀸 𑀲𑀩𑁆𑀩𑀣𑀸𑀧𑀺 𑀆𑀘𑀸𑀭𑀲𑀻𑀮𑀫𑀢𑁆𑀢𑀫𑁂𑀯 𑀯𑀤𑁂𑀬𑁆𑀬, 𑀦 𑀢𑀤𑀼𑀢𑁆𑀢𑀭𑀺𑀁. ‘‘𑀬𑀣𑀸𑀧𑀦𑁂𑀓𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀪𑀸𑀯𑀁 𑀧𑀝𑀺𑀚𑀸𑀦𑀫𑀸𑀦𑀸, 𑀧𑀭𑁂𑀳𑀺 𑀘 𑀢𑀣𑀸 𑀲𑀫𑁆𑀪𑀸𑀯𑀺𑀬𑀫𑀸𑀦𑀸 𑀢𑀤𑀦𑀼𑀭𑀽𑀧𑀧𑀝𑀺𑀧𑀢𑁆𑀢𑀺𑀁 𑀅𑀚𑀸𑀦𑀦𑀢𑁄, 𑀅𑀲𑀫𑀢𑁆𑀣𑀦𑀢𑁄 𑀘 𑀦 𑀅𑀪𑀺𑀲𑀫𑁆𑀪𑀼𑀡𑀦𑁆𑀢𑀺, 𑀦 𑀏𑀯𑀫𑀬𑀁. 𑀅𑀬𑀁 𑀧𑀦 𑀲𑀫𑀡𑁄 𑀕𑁄𑀢𑀫𑁄 𑀲𑀩𑁆𑀩𑀣𑀸𑀧𑀺 𑀲𑀫𑀡𑀲𑀸𑀭𑀼𑀧𑁆𑀧𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀲𑀺𑀬𑁂𑀯𑀸’’𑀢𑀺 𑀏𑀯𑀁 𑀅𑀜𑁆𑀜𑀼𑀤𑁆𑀤𑁂𑀲𑀺𑀓𑀦𑀬𑁂𑀦 𑀯𑀸 𑀲𑀩𑁆𑀩𑀣𑀸𑀧𑀺 𑀆𑀘𑀸𑀭𑀲𑀻𑀮𑀫𑀢𑁆𑀢𑀫𑁂𑀯 𑀯𑀤𑁂𑀬𑁆𑀬, 𑀦 𑀢𑀤𑀼𑀢𑁆𑀢𑀭𑀺𑀦𑁆𑀢𑀺. 𑀧𑀦𑀸𑀢𑀺 ¶ 𑀯𑀘𑀦𑀸𑀮𑀗𑁆𑀓𑀸𑀭𑁂 𑀯𑀺𑀓𑀧𑁆𑀧𑀦𑀢𑁆𑀣𑁂𑀦𑁂𑀯 𑀉𑀧𑀦𑁆𑀬𑀸𑀲𑀸𑀤𑀺𑀅𑀢𑁆𑀣𑀲𑁆𑀲 𑀲𑀺𑀚𑁆𑀛𑀦𑀢𑁄. 𑀏𑀓𑁂𑀢𑀺 𑀅𑀜𑁆𑀜𑁂. ‘‘𑀏𑀓𑀘𑁆𑀘𑁂’’𑀢𑀺𑀧𑀺 𑀯𑀤𑀦𑁆𑀢𑀺. 𑀪𑁄𑀦𑁆𑀢𑁄𑀢𑀺 𑀲𑀸𑀥𑀽𑀦𑀁 𑀧𑀺𑀬𑀲𑀫𑀼𑀤𑀸𑀳𑀸𑀭𑁄. 𑀲𑀸𑀥𑀯𑁄 𑀳𑀺 𑀧𑀭𑁂 ‘‘𑀪𑁄𑀦𑁆𑀢𑁄’’𑀢𑀺 𑀯𑀸 ‘‘𑀤𑁂𑀯𑀸𑀦𑀁 𑀧𑀺𑀬𑀸’’𑀢𑀺 𑀯𑀸 ‘‘𑀆𑀬𑀲𑁆𑀫𑀦𑁆𑀢𑁄’’𑀢𑀺 𑀯𑀸 𑀲𑀫𑀸𑀮𑀧𑀦𑁆𑀢𑀺. 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺 𑀬𑀁 𑀓𑀺𑀜𑁆𑀘𑀺 𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑀢𑀸𑀬 𑀲𑀫𑀡𑀸. 𑀚𑀸𑀢𑀺𑀫𑀢𑁆𑀢𑁂𑀦 𑀘 𑀩𑁆𑀭𑀸𑀳𑁆𑀫𑀡𑀸𑀢𑀺.

𑀲𑀤𑁆𑀥𑀸 𑀦𑀸𑀫 𑀇𑀥 𑀘𑀢𑀼𑀩𑁆𑀩𑀺𑀥𑁂𑀲𑀼 𑀞𑀸𑀦𑁂𑀲𑀽𑀢𑀺 𑀆𑀳 ‘‘𑀓𑀫𑁆𑀫𑀜𑁆𑀘𑀸’’𑀢𑀺𑀆𑀤𑀺. 𑀓𑀫𑁆𑀫𑀓𑀫𑁆𑀫𑀨𑀮𑀲𑀫𑁆𑀩𑀦𑁆𑀥𑁂𑀦𑁂𑀯 𑀇𑀥𑀮𑁄𑀓𑀧𑀭𑀮𑁄𑀓𑀲𑀤𑁆𑀤𑀳𑀦𑀁 𑀤𑀝𑁆𑀞𑀩𑁆𑀩𑀁 ‘‘𑀏𑀢𑁆𑀣 𑀓𑀫𑁆𑀫𑀁 𑀯𑀺𑀧𑀘𑁆𑀘𑀢𑀺, 𑀓𑀫𑁆𑀫𑀨𑀮𑀜𑁆𑀘 𑀅𑀦𑀼𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀢𑀤𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀢𑁄 𑀜𑀸𑀧𑁂𑀢𑀺 ‘‘𑀅𑀬𑀁 𑀫𑁂’’𑀢𑀺𑀆𑀤𑀺𑀦𑀸. 𑀧𑀝𑀺𑀓𑀭𑀺𑀲𑁆𑀲𑀢𑀻𑀢𑀺 𑀧𑀘𑁆𑀘𑀼𑀧𑀓𑀸𑀭𑀁 𑀓𑀭𑀺𑀲𑁆𑀲𑀢𑀺. 𑀢𑀤𑁂𑀯 𑀲𑀫𑀢𑁆𑀣𑁂𑀢𑀼𑀁 ‘‘𑀏𑀯𑀁𑀤𑀺𑀦𑁆𑀦𑀸𑀦𑀺 𑀳𑀻’’𑀢𑀺𑀆𑀤𑀺𑀫𑀸𑀳. 𑀤𑁂𑀲𑀦𑀸𑀲𑀻𑀲𑀫𑀢𑁆𑀢𑀁 𑀧𑀥𑀸𑀦𑀁 𑀓𑀢𑁆𑀯𑀸 𑀦𑀺𑀤𑀲𑁆𑀲𑀦𑀢𑁄. 𑀢𑁂𑀦 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀧𑀘𑁆𑀘𑀬𑀁 𑀦𑀺𑀤𑀲𑁆𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀢𑁄 𑀧𑀦𑀸’’𑀢𑀺𑀆𑀤𑀺.

‘‘𑀲𑁂𑀬𑁆𑀬𑀣𑀺𑀤’’𑀦𑁆𑀢𑀺 𑀅𑀬𑀁 𑀲𑀤𑁆𑀤𑁄 ‘‘𑀲𑁄 𑀓𑀢𑀫𑁄’’𑀢𑀺 𑀅𑀢𑁆𑀣𑁂 𑀏𑀓𑁄 𑀦𑀺𑀧𑀸𑀢𑁄, 𑀦𑀺𑀧𑀸𑀢𑀲𑀫𑀼𑀤𑀸𑀬𑁄 𑀯𑀸, 𑀢𑁂𑀦 𑀘 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀧𑀤𑁂 𑀲𑀤𑁆𑀤𑀓𑁆𑀓𑀫𑁂𑀦 𑀅𑀧𑁆𑀧𑀥𑀸𑀦𑀪𑀽𑀢𑁄𑀧𑀺 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑁄 𑀯𑀺𑀪𑀚𑁆𑀚𑀺𑀢𑀩𑁆𑀩𑀝𑁆𑀞𑀸𑀦𑁂 𑀧𑀥𑀸𑀦𑀪𑀽𑀢𑁄 𑀯𑀺𑀬 𑀧𑀝𑀺𑀦𑀺𑀤𑁆𑀤𑀺𑀲𑀻𑀬𑀢𑀺. 𑀅𑀜𑁆𑀜𑁄 𑀳𑀺 𑀲𑀤𑁆𑀤𑀓𑁆𑀓𑀫𑁄 𑀅𑀜𑁆𑀜𑁄 𑀅𑀢𑁆𑀣𑀓𑁆𑀓𑀫𑁄𑀢𑀺 𑀆𑀳 ‘‘𑀓𑀢𑀫𑁄 𑀲𑁄 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑁄’’𑀢𑀺. 𑀢𑀲𑁆𑀫𑀺𑀜𑁆𑀳𑀺 𑀯𑀺𑀪𑀢𑁆𑀢𑁂 𑀢𑀩𑁆𑀩𑀺𑀲𑀬𑀲𑀫𑀸𑀭𑀫𑁆𑀪𑁄𑀧𑀺 𑀯𑀺𑀪𑀢𑁆𑀢𑁄𑀯 𑀳𑁄𑀢𑀺. 𑀇𑀫𑀫𑀢𑁆𑀣𑀜𑁆𑀳𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀲 𑀲𑀫𑀸𑀭𑀫𑁆𑀪𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀘 𑀧𑀸𑀴𑀺𑀬𑀁 ‘‘𑀫𑀽𑀮𑀩𑀻𑀚’’𑀦𑁆𑀢𑀺𑀆𑀤𑀺𑀦𑀸 𑀲𑁄 𑀦𑀺𑀤𑁆𑀤𑀺𑀝𑁆𑀞𑁄𑀢𑀺. 𑀫𑀽𑀮𑀫𑁂𑀯 𑀩𑀻𑀚𑀁 𑀫𑀽𑀮𑀩𑀻𑀚𑀁, 𑀫𑀽𑀮𑀁 𑀩𑀻𑀚𑀁 𑀏𑀢𑀲𑁆𑀲𑀸𑀢𑀺𑀧𑀺 𑀫𑀽𑀮𑀩𑀻𑀚𑀦𑁆𑀢𑀺 𑀇𑀥 𑀤𑁆𑀯𑀺𑀥𑀸 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀢𑁄 𑀦 𑀘𑁄𑀤𑁂𑀢𑀩𑁆𑀩𑀫𑁂𑀢𑀁 ‘‘𑀓𑀲𑁆𑀫𑀸 𑀧𑀦𑁂𑀢𑁆𑀣 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀁 𑀧𑀼𑀘𑁆𑀙𑀺𑀢𑁆𑀯𑀸 𑀩𑀻𑀚𑀕𑀸𑀫𑁄 𑀏𑀯 𑀯𑀺𑀪𑀢𑁆𑀢𑁄’’𑀢𑀺. 𑀢𑀢𑁆𑀣 𑀳𑀺 𑀧𑀞𑀫𑁂𑀦 𑀅𑀢𑁆𑀣𑁂𑀦 𑀩𑀻𑀚𑀕𑀸𑀫𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀤𑀼𑀢𑀺𑀬𑁂𑀦 𑀪𑀽𑀢𑀕𑀸𑀫𑁄, 𑀤𑀼𑀯𑀺𑀥𑁄𑀧𑁂𑀲 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦 ¶ 𑀯𑀸 𑀫𑀽𑀮𑀩𑀻𑀚𑀜𑁆𑀘 𑀫𑀽𑀮𑀩𑀻𑀚𑀜𑁆𑀘 𑀫𑀽𑀮𑀩𑀻𑀚𑀦𑁆𑀢𑀺 𑀏𑀓𑀲𑁂𑀲𑀦𑀬𑁂𑀦 𑀯𑀸 𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀢𑁂𑀦𑁂𑀯 𑀯𑀓𑁆𑀔𑀢𑀺 ‘‘𑀲𑀩𑁆𑀩𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺𑀁. 𑀅𑀢𑀻𑀯 𑀯𑀺𑀲𑀢𑀺 𑀪𑁂𑀲𑀚𑁆𑀚𑀧𑀬𑁄𑀕𑁂𑀲𑀽𑀢𑀺 𑀅𑀢𑀺𑀯𑀺𑀲𑀁, 𑀅𑀢𑀺𑀯𑀺𑀲𑀸 𑀯𑀸, 𑀬𑀸 ‘‘𑀫𑀳𑁄𑀲𑀥’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺 𑀓𑀘𑁆𑀙𑀓𑁄𑀢𑀺 𑀓𑀸𑀴𑀓𑀘𑁆𑀙𑀓𑁄, 𑀬𑀁 ‘‘𑀧𑀺𑀮𑀓𑁆𑀔𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀓𑀧𑀺𑀢𑁆𑀣𑀦𑁄𑀢𑀺 𑀅𑀫𑁆𑀩𑀺𑀮𑀗𑁆𑀓𑀼𑀭𑀨𑀮𑁄 𑀲𑁂𑀢𑀭𑀼𑀓𑁆𑀔𑁄. 𑀲𑁄 𑀳𑀺 𑀓𑀫𑁆𑀧𑀢𑀺 𑀘𑀮𑀢𑀻𑀢𑀺 𑀓𑀧𑀺𑀣𑀦𑁄 𑀣𑀦𑀧𑀘𑁆𑀘𑀬𑁂𑀦, 𑀓𑀧𑀻𑀢𑀺 𑀯𑀸 𑀫𑀓𑁆𑀓𑀝𑁄, 𑀢𑀲𑁆𑀲 ¶ 𑀣𑀦𑀲𑀤𑀺𑀲𑀁 𑀨𑀮𑀁 𑀬𑀲𑁆𑀲𑀸𑀢𑀺 𑀓𑀧𑀺𑀢𑁆𑀣𑀦𑁄. ‘‘𑀓𑀧𑀺𑀢𑁆𑀣𑀦𑁄𑀢𑀺 𑀧𑀺𑀧𑁆𑀧𑀮𑀺𑀭𑀼𑀓𑁆𑀔𑁄’’𑀢𑀺 (𑀯𑀺𑀲𑀼𑀤𑁆𑀥𑀺. 𑀝𑀻. 𑁧.𑁧𑁦𑁮) 𑀳𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀝𑀻𑀓𑀸𑀬𑀁 𑀯𑀼𑀢𑁆𑀢𑀁. 𑀨𑀴𑀼𑀩𑀻𑀚𑀁 𑀦𑀸𑀫 𑀧𑀩𑁆𑀩𑀩𑀻𑀚𑀁. 𑀅𑀚𑁆𑀚𑀓𑀦𑁆𑀢𑀺 𑀲𑁂𑀢𑀧𑀡𑁆𑀡𑀸𑀲𑀁. 𑀨𑀡𑀺𑀚𑁆𑀚𑀓𑀦𑁆𑀢𑀺 𑀲𑀫𑀻𑀭𑀡𑀁. 𑀳𑀺𑀭𑀺𑀯𑁂𑀭𑀦𑁆𑀢𑀺 𑀯𑀸𑀭𑀁. 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂 𑀲𑀤𑀺𑀲𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑁂𑀲𑀓𑀸𑀭𑀡𑀪𑀸𑀯𑀢𑁄 𑀯𑀺𑀭𑀼𑀳𑀦𑀲𑀫𑀢𑁆𑀣𑁂 𑀲𑀸𑀭𑀨𑀮𑁂 𑀦𑀺𑀭𑀼𑀴𑁆𑀳𑁄 𑀩𑀻𑀚𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀯𑀺𑀭𑀼𑀳𑀦𑀲𑀫𑀢𑁆𑀣𑀫𑁂𑀯𑀸’’𑀢𑀺 𑀇𑀫𑀺𑀦𑀸. 𑀇𑀢𑀭𑀜𑁆𑀳𑀺 𑀅𑀩𑀻𑀚𑀲𑀗𑁆𑀔𑁆𑀬𑀁 𑀕𑀢𑀁, 𑀢𑀜𑁆𑀘 𑀔𑁄 𑀭𑀼𑀓𑁆𑀔𑀢𑁄 𑀯𑀺𑀬𑁄𑀚𑀺𑀢𑀫𑁂𑀯. 𑀅𑀯𑀺𑀬𑁄𑀚𑀺𑀢𑀁 𑀧𑀦 𑀢𑀣𑀸 𑀯𑀸 𑀳𑁄𑀢𑀼, 𑀅𑀜𑁆𑀜𑀣𑀸 𑀯𑀸 ‘‘𑀪𑀽𑀢𑀕𑀸𑀫𑁄’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺 𑀬𑀣𑀸𑀯𑀼𑀢𑁆𑀢𑁂𑀦 𑀤𑀼𑀢𑀺𑀬𑀝𑁆𑀞𑁂𑀦. 𑀯𑀺𑀦𑀬𑀸 (𑀧𑀸𑀘𑀺. 𑁯𑁧) 𑀦𑀼𑀭𑀽𑀧𑀢𑁄 𑀢𑁂𑀲𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀦𑀸. 𑀬𑀫𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑁧𑁨. 𑀲𑀦𑁆𑀦𑀺𑀥𑀸𑀦𑀁 𑀲𑀦𑁆𑀦𑀺𑀥𑀺, 𑀢𑀸𑀬 𑀓𑀭𑀻𑀬𑀢𑁂𑀢𑀺 𑀲𑀦𑁆𑀦𑀺𑀥𑀺𑀓𑀸𑀭𑁄, 𑀅𑀦𑁆𑀦𑀧𑀸𑀦𑀸𑀤𑀺. 𑀏𑀯𑀁 𑀓𑀸𑀭-𑀲𑀤𑁆𑀤𑀲𑁆𑀲 𑀓𑀫𑁆𑀫𑀢𑁆𑀣𑀢𑀁 𑀲𑀦𑁆𑀥𑀸𑀬 ‘‘𑀲𑀦𑁆𑀦𑀺𑀥𑀺𑀓𑀸𑀭𑀧𑀭𑀺𑀪𑁄𑀕’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀬𑀫𑀧𑀭𑁄 𑀦𑀬𑁄 𑁋 𑀬𑀣𑀸 ‘‘𑀆𑀘𑀬𑀁 𑀕𑀸𑀫𑀺𑀦𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀅𑀦𑀼𑀦𑀸𑀲𑀺𑀓𑀮𑁄𑀧𑁂𑀦 ‘‘𑀆𑀘𑀬𑀕𑀸𑀫𑀺𑀦𑁄’’𑀢𑀺 (𑀥. 𑀲. 𑁧𑁦) 𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀏𑀯𑀫𑀺𑀥𑀸𑀧𑀺 ‘‘𑀲𑀦𑁆𑀦𑀺𑀥𑀺𑀓𑀸𑀭𑀁 𑀧𑀭𑀺𑀪𑁄𑀕’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀅𑀦𑀼𑀦𑀸𑀲𑀺𑀓𑀮𑁄𑀧𑁂𑀦 ‘‘𑀲𑀦𑁆𑀦𑀺𑀥𑀺𑀓𑀸𑀭𑀧𑀭𑀺𑀪𑁄𑀕’’𑀦𑁆𑀢𑀺 𑀯𑀼𑀢𑁆𑀢𑀁, 𑀲𑀦𑁆𑀦𑀺𑀥𑀺𑀁 𑀓𑀢𑁆𑀯𑀸 𑀧𑀭𑀺𑀪𑁄𑀕𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀦𑀬𑀯𑀲𑁂𑀦𑀸𑀢𑀺 𑀯𑀺𑀦𑀬𑀸𑀕𑀢𑀸𑀘𑀸𑀭𑀯𑀲𑁂𑀦. 𑀯𑀺𑀦𑀬𑀸𑀕𑀢𑀸𑀘𑀸𑀭𑁄 𑀳𑀺 𑀉𑀢𑁆𑀢𑀭𑀮𑁄𑀧𑁂𑀦 ‘‘𑀯𑀺𑀦𑀬𑁄’’𑀢𑀺 𑀯𑀼𑀢𑁆𑀢𑁄, 𑀓𑀸𑀬𑀯𑀸𑀘𑀸𑀦𑀁 𑀯𑀸 𑀯𑀺𑀦𑀬𑀦𑀁 𑀯𑀺𑀦𑀬𑁄. 𑀲𑀼𑀢𑁆𑀢𑀦𑁆𑀢𑀦𑀬𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀯𑀺𑀦𑀬𑀸𑀘𑀸𑀭𑁄𑀬𑁂𑀯 𑀇𑀥 𑀮𑀩𑁆𑀪𑀢𑀺. 𑀲𑀫𑁆𑀫𑀸 𑀓𑀺𑀮𑁂𑀲𑁂 𑀮𑀺𑀔𑀢𑀻𑀢𑀺 𑀲𑀮𑁆𑀮𑁂𑀔𑁄𑀢𑀺 𑀘 𑀯𑀺𑀦𑀬𑀸𑀘𑀸𑀭𑀲𑁆𑀲 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀲𑀼𑀢𑁆𑀢𑀦𑁆𑀢𑀦𑀬𑀧𑀝𑀺𑀧𑀢𑁆𑀢𑀺 𑀏𑀯. 𑀧𑀝𑀺𑀕𑁆𑀕𑀳𑀺𑀢𑀦𑁆𑀢𑀺 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀧𑀝𑀺𑀕𑁆𑀕𑀳𑀺𑀢𑀁. 𑀅𑀧𑀭𑀚𑁆𑀚𑀽𑀢𑀺 𑀅𑀧𑀭𑀲𑁆𑀫𑀺𑀁 𑀤𑀺𑀯𑀲𑁂. 𑀤𑀢𑁆𑀯𑀸𑀢𑀺 𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀤𑀢𑁆𑀯𑀸. 𑀞𑀧𑀸𑀧𑁂𑀢𑁆𑀯𑀸𑀢𑀺 𑀘 𑀅𑀢𑁆𑀢𑀦𑁄 𑀲𑀦𑁆𑀢𑀓𑀓𑀭𑀡𑁂𑀦 𑀞𑀧𑀸𑀧𑁂𑀢𑁆𑀯𑀸. 𑀢𑁂𑀲𑀫𑁆𑀧𑀺 𑀲𑀦𑁆𑀢𑀓𑀁 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀸𑀤𑀺𑀯𑀲𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀼𑀢𑁆𑀢𑀦𑁆𑀢𑀦𑀬𑀯𑀲𑁂𑀦 𑀲𑀮𑁆𑀮𑁂𑀔𑁄 𑀏𑀯 𑀦 𑀳𑁄𑀢𑀺.

𑀬𑀸𑀦𑀺 𑀘 𑀢𑁂𑀲𑀁 𑀅𑀦𑀼𑀮𑁄𑀫𑀸𑀦𑀻𑀢𑀺 𑀏𑀢𑁆𑀣 𑀲𑀸𑀦𑀼𑀮𑁄𑀫𑀥𑀜𑁆𑀜𑀭𑀲𑀁, 𑀫𑀥𑀼𑀓𑀧𑀼𑀧𑁆𑀨𑀭𑀲𑀁, 𑀧𑀓𑁆𑀓𑀟𑀸𑀓𑀭𑀲𑀜𑁆𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀲𑀩𑁆𑀩𑁂𑀧𑀺 𑀨𑀮𑀧𑀼𑀧𑁆𑀨𑀧𑀢𑁆𑀢𑀭𑀲𑀸 𑀅𑀦𑀼𑀮𑁄𑀫𑀧𑀸𑀦𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁, 𑀬𑀣𑀸𑀧𑀭𑀺𑀘𑁆𑀙𑁂𑀤𑀓𑀸𑀮𑀁 𑀅𑀦𑀥𑀺𑀝𑁆𑀞𑀺𑀢𑀁 𑀅𑀯𑀺𑀓𑀧𑁆𑀧𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀲𑀦𑁆𑀦𑀺𑀥𑀻𑀬𑀢𑁂𑀢𑀺 ¶ 𑀲𑀦𑁆𑀦𑀺𑀥𑀺, 𑀯𑀢𑁆𑀣𑀫𑁂𑀯. 𑀧𑀭𑀺𑀬𑀸𑀬𑀢𑀺 𑀓𑀧𑁆𑀧𑀻𑀬𑀢𑀻𑀢𑀺 𑀧𑀭𑀺𑀬𑀸𑀬𑁄, 𑀓𑀧𑁆𑀧𑀺𑀬𑀯𑀸𑀘𑀸𑀦𑀼𑀲𑀸𑀭𑁂𑀦 ¶ 𑀧𑀝𑀺𑀧𑀢𑁆𑀢𑀺, 𑀢𑀲𑁆𑀲 𑀓𑀣𑀸𑀢𑀺 𑀧𑀭𑀺𑀬𑀸𑀬𑀓𑀣𑀸. 𑀢𑀩𑁆𑀩𑀺𑀧𑀭𑀻𑀢𑁄 𑀦𑀺𑀧𑁆𑀧𑀭𑀺𑀬𑀸𑀬𑁄, 𑀓𑀧𑁆𑀧𑀺𑀬𑀫𑁆𑀧𑀺 𑀅𑀦𑀼𑀧𑀕𑁆𑀕𑀫𑁆𑀫 𑀲𑀦𑁆𑀢𑀼𑀝𑁆𑀞𑀺𑀯𑀲𑁂𑀦 𑀧𑀝𑀺𑀧𑀢𑁆𑀢𑀺, 𑀧𑀭𑀺𑀬𑀸𑀬-𑀲𑀤𑁆𑀤𑁄 𑀯𑀸 𑀓𑀸𑀭𑀡𑁂, 𑀢𑀲𑁆𑀫𑀸 𑀓𑀧𑁆𑀧𑀺𑀬𑀓𑀸𑀭𑀡𑀯𑀲𑁂𑀦 𑀯𑀼𑀢𑁆𑀢𑀸 𑀓𑀣𑀸 𑀧𑀭𑀺𑀬𑀸𑀬𑀓𑀣𑀸. 𑀢𑀤𑀧𑀺 𑀅𑀯𑀢𑁆𑀯𑀸 𑀲𑀦𑁆𑀢𑀼𑀝𑁆𑀞𑀺𑀯𑀲𑁂𑀦 𑀯𑀼𑀢𑁆𑀢𑀸 𑀦𑀺𑀧𑁆𑀧𑀭𑀺𑀬𑀸𑀬𑁄. ‘‘𑀲𑀘𑁂’’𑀢𑀺𑀆𑀤𑀺 𑀅𑀜𑁆𑀜𑀲𑁆𑀲 𑀤𑀸𑀦𑀸𑀓𑀸𑀭𑀤𑀲𑁆𑀲𑀦𑀁. 𑀧𑀸𑀴𑀺𑀬𑀸 𑀉𑀤𑁆𑀤𑀺𑀲𑀦𑀁 𑀉𑀤𑁆𑀤𑁂𑀲𑁄. 𑀅𑀢𑁆𑀣𑀲𑁆𑀲 𑀧𑀼𑀘𑁆𑀙𑀸 𑀧𑀭𑀺𑀧𑀼𑀘𑁆𑀙𑀦𑀁. ‘‘𑀅𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀇𑀫𑀺𑀦𑀸 𑀅𑀤𑀸𑀦𑁂 𑀲𑀮𑁆𑀮𑁂𑀔𑀓𑁄𑀧𑀦𑀁 𑀤𑀲𑁆𑀲𑁂𑀢𑀺. 𑀅𑀧𑁆𑀧𑀳𑁄𑀦𑁆𑀢𑁂𑀢𑀺 𑀓𑀸𑀢𑀼𑀁 𑀅𑀧𑁆𑀧𑀳𑁄𑀦𑀓𑁂 𑀲𑀢𑀺. 𑀧𑀘𑁆𑀘𑀸𑀲𑀸𑀬𑀸𑀢𑀺 𑀘𑀻𑀯𑀭𑀧𑀝𑀺𑀮𑀸𑀪𑀸𑀲𑀸𑀬. 𑀅𑀦𑀼𑀜𑁆𑀜𑀸𑀢𑀓𑀸𑀮𑁂𑀢𑀺 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑁄 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀫𑀸𑀲𑁄, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀫𑀸𑀲𑁂𑀦 𑀲𑀳 𑀳𑁂𑀫𑀦𑁆𑀢𑀺𑀓𑀸 𑀘𑀢𑁆𑀢𑀸𑀭𑁄 𑀫𑀸𑀲𑀸, 𑀧𑀺𑀝𑁆𑀞𑀺𑀲𑀫𑀬𑁂 𑀬𑁄 𑀓𑁄𑀘𑀺 𑀏𑀓𑁄 𑀫𑀸𑀲𑁄𑀢𑀺 𑀏𑀯𑀁 𑀢𑀢𑀺𑀬𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀸𑀤𑀻𑀲𑀼 𑀅𑀦𑀼𑀜𑁆𑀜𑀸𑀢𑀲𑀫𑀬𑁂. 𑀲𑀼𑀢𑁆𑀢𑀦𑁆𑀢𑀺 𑀘𑀻𑀯𑀭𑀲𑀺𑀩𑁆𑀩𑀦𑀲𑀼𑀢𑁆𑀢𑀁. 𑀯𑀺𑀦𑀬𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 𑀫𑀽𑀮𑀘𑀻𑀯𑀭𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀘𑁆𑀘𑀸𑀲𑀸𑀘𑀻𑀯𑀭𑀫𑁂𑀯 𑀫𑀽𑀮𑀘𑀻𑀯𑀭𑀁 𑀓𑀢𑁆𑀯𑀸 𑀞𑀧𑁂𑀢𑀩𑁆𑀩𑀁, 𑀢𑀁 𑀧𑀼𑀦 𑀫𑀸𑀲𑀧𑀭𑀺𑀳𑀸𑀭𑀁 𑀮𑀪𑀢𑀺, 𑀏𑀢𑁂𑀦 𑀉𑀧𑀸𑀬𑁂𑀦 𑀬𑀸𑀯 𑀇𑀘𑁆𑀙𑀢𑀺, 𑀢𑀸𑀯 𑀅𑀜𑁆𑀜𑀫𑀜𑁆𑀜𑀁 𑀫𑀽𑀮𑀘𑀻𑀯𑀭𑀁 𑀓𑀢𑁆𑀯𑀸 𑀞𑀧𑁂𑀢𑀼𑀁 𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀦𑀬𑁂𑀦, 𑀯𑀺𑀓𑀧𑁆𑀧𑀦𑀸𑀯𑀲𑁂𑀦 𑀯𑀸 𑀯𑀺𑀦𑀬𑀓𑀫𑁆𑀫𑀁 𑀓𑀢𑁆𑀯𑀸. 𑀓𑀲𑁆𑀫𑀸 𑀦 𑀯𑀝𑁆𑀝𑀢𑀻𑀢𑀺 𑀆𑀳 ‘‘𑀲𑀦𑁆𑀦𑀺𑀥𑀺 𑀘 𑀳𑁄𑀢𑀺 𑀲𑀮𑁆𑀮𑁂𑀔𑀜𑁆𑀘 𑀓𑁄𑀧𑁂𑀢𑀻’’𑀢𑀺.

𑀉𑀧𑀭𑀺 𑀫𑀡𑁆𑀟𑀧𑀲𑀤𑀺𑀲𑀁 𑀧𑀤𑀭𑀘𑁆𑀙𑀦𑁆𑀦𑀁, 𑀲𑀩𑁆𑀩𑀧𑀮𑀺𑀕𑀼𑀡𑁆𑀞𑀺𑀫𑀁 𑀯𑀸 𑀙𑀸𑀤𑁂𑀢𑁆𑀯𑀸 𑀓𑀢𑀁 𑀯𑀬𑁆𑀳𑀁. 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀫𑀬𑀸 𑀕𑁄𑀧𑀸𑀦𑀲𑀺𑀬𑁄 𑀤𑀢𑁆𑀯𑀸 𑀕𑀭𑀼𑀴𑀧𑀓𑁆𑀔𑀓𑀦𑀬𑁂𑀦 𑀓𑀢𑀸 𑀲𑀦𑁆𑀤𑀫𑀸𑀦𑀺𑀢𑀸. 𑀨𑀮𑀓𑀸𑀤𑀺𑀦𑀸 𑀓𑀢𑀁 𑀧𑀻𑀞𑀓𑀬𑀸𑀦𑀁 𑀲𑀺𑀯𑀺𑀓𑀸. 𑀅𑀦𑁆𑀢𑁄𑀮𑀺𑀓𑀸𑀲𑀗𑁆𑀔𑀸𑀢𑀸 𑀧𑀝𑀧𑁄𑀝𑀮𑀺𑀓𑀸 𑀧𑀸𑀝𑀗𑁆𑀓𑀻. ‘‘𑀏𑀓𑀪𑀺𑀓𑁆𑀔𑀼𑀲𑁆𑀲 𑀳𑀻’’𑀢𑀺𑀆𑀤𑀺 𑀢𑀤𑀢𑁆𑀣𑀲𑁆𑀲 𑀲𑀫𑀢𑁆𑀣𑀦𑀁. 𑀅𑀭𑀜𑁆𑀜𑀢𑁆𑀣𑀸𑀬𑀸𑀢𑀺 𑀅𑀭𑀜𑁆𑀜𑀕𑀫𑀦𑀢𑁆𑀣𑀸𑀬. 𑀥𑁄𑀢𑀧𑀸𑀤𑀓𑀢𑁆𑀣𑀸𑀬𑀸𑀢𑀺 𑀥𑁄𑀯𑀺𑀢𑀧𑀸𑀤𑀸𑀦𑀫𑀦𑀼𑀭𑀓𑁆𑀔𑀡𑀢𑁆𑀣𑀸𑀬. 𑀲𑀁𑀳𑀦𑀺𑀢𑀩𑁆𑀩𑀸 𑀩𑀦𑁆𑀥𑀺𑀢𑀩𑁆𑀩𑀸𑀢𑀺 𑀲𑀗𑁆𑀖𑀸𑀝𑀸, 𑀉𑀧𑀸𑀳𑀦𑀸𑀬𑁂𑀯 𑀲𑀗𑁆𑀖𑀸𑀝𑀸 𑀢𑀣𑀸, 𑀬𑀼𑀕𑀴𑀪𑀽𑀢𑀸 𑀉𑀧𑀸𑀳𑀦𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑀸𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀤𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀫𑀜𑁆𑀘𑁄𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀲𑀩𑁆𑀩𑁂𑀧𑀺 𑀳𑀺 𑀧𑀻𑀞𑀪𑀺𑀲𑀸𑀤𑀬𑁄 𑀦𑀺𑀲𑀻𑀤𑀦𑀲𑀬𑀦𑀬𑁄𑀕𑁆𑀕𑀸 𑀕𑀳𑁂𑀢𑀩𑁆𑀩𑀸 𑀢𑁂𑀲𑀼𑀧𑀺 𑀢𑀣𑀸𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁄.

𑀆𑀩𑀸𑀥𑀧𑀘𑁆𑀘𑀬𑀸 𑀏𑀯 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀸 𑀕𑀦𑁆𑀥𑀸 𑀯𑀝𑁆𑀝𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀓𑀡𑁆𑀟𑀼𑀓𑀘𑁆𑀙𑀼𑀙𑀯𑀺𑀤𑁄𑀲𑀸𑀤𑀺𑀆𑀩𑀸𑀥𑁂 𑀲𑀢𑀻’’𑀢𑀺 𑀇𑀫𑀺𑀦𑀸. ‘‘𑀮𑀓𑁆𑀔𑀡𑁂 𑀳𑀺 𑀲𑀢𑀺 𑀳𑁂𑀢𑀼𑀢𑁆𑀣𑁄𑀧𑀺 𑀓𑀢𑁆𑀣𑀘𑀺 𑀲𑀫𑁆𑀪𑀯𑀢𑀻’’𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀢𑀢𑁆𑀣 𑀓𑀡𑁆𑀟𑀽𑀢𑀺 ¶ 𑀔𑀚𑁆𑀚𑀼. 𑀓𑀘𑁆𑀙𑀽𑀢𑀺 𑀯𑀺𑀢𑀘𑁆𑀙𑀺𑀓𑀸. 𑀙𑀯𑀺𑀤𑁄𑀲𑁄𑀢𑀺 𑀓𑀺𑀮𑀸𑀲𑀸𑀤𑀺. 𑀆𑀳𑀭𑀸𑀧𑁂𑀢𑁆𑀯𑀸𑀢𑀺 𑀜𑀸𑀢𑀺𑀧𑀯𑀸𑀭𑀺𑀢𑀢𑁄 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀯𑀸 𑀦 𑀬𑁂𑀦 𑀓𑁂𑀦𑀘𑀺 𑀯𑀸 𑀆𑀓𑀸𑀭𑁂𑀦 𑀳𑀭𑀸𑀧𑁂𑀢𑁆𑀯𑀸. 𑀪𑁂𑀲𑀚𑁆𑀚𑀧𑀘𑁆𑀘𑀬𑁂𑀳𑀺 𑀕𑀺𑀮𑀸𑀦𑀲𑁆𑀲 𑀯𑀺𑀜𑁆𑀜𑀢𑁆𑀢𑀺𑀧𑀺 𑀯𑀝𑁆𑀝𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 ¶ , 𑀕𑀦𑁆𑀥𑀁 𑀕𑀳𑁂𑀢𑁆𑀯𑀸 𑀓𑀯𑀸𑀝𑁂 𑀧𑀜𑁆𑀘𑀗𑁆𑀕𑀼𑀮𑀺𑀓𑀁 𑀤𑀸𑀢𑀼𑀁, 𑀧𑀼𑀧𑁆𑀨𑀁 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑁂 𑀏𑀓𑀫𑀦𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁬𑁪) 𑀯𑀘𑀦𑀢𑁄 ‘‘𑀤𑁆𑀯𑀸𑀭𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀖𑀭𑀥𑀽𑀧𑀦𑀁 𑀯𑀺𑀳𑀸𑀭𑀯𑀸𑀲𑀦𑀸, 𑀘𑁂𑀢𑀺𑀬𑀖𑀭𑀯𑀸𑀲𑀦𑀸 𑀯𑀸. 𑀆𑀤𑀺-𑀲𑀤𑁆𑀤𑁂𑀦 𑀘𑁂𑀢𑀺𑀬𑀧𑀝𑀺𑀫𑀸𑀧𑀽𑀚𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺.

𑀓𑀺𑀮𑁂𑀲𑁂𑀳𑀺 𑀆𑀫𑀲𑀺𑀢𑀩𑁆𑀩𑀢𑁄 𑀆𑀫𑀺𑀲𑀁, 𑀬𑀁 𑀓𑀺𑀜𑁆𑀘𑀺 𑀉𑀧𑀪𑁄𑀕𑀸𑀭𑀳𑀁 𑀯𑀢𑁆𑀣𑀼, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀸𑀦𑀫𑁆𑀧𑀺 𑀧𑀲𑀗𑁆𑀕𑀁 𑀦𑀺𑀯𑀸𑀭𑁂𑀢𑀼𑀁 ‘‘𑀯𑀼𑀢𑁆𑀢𑀸𑀯𑀲𑁂𑀲𑀁 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀆𑀳, 𑀧𑀸𑀭𑀺𑀲𑁂𑀲𑀦𑀬𑀢𑁄 𑀕𑀳𑀺𑀢𑀢𑁆𑀢𑀸 𑀯𑀼𑀢𑁆𑀢𑀸𑀯𑀲𑁂𑀲𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀺𑀁 𑀧𑀦𑁂𑀢𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀲𑁂𑀬𑁆𑀬𑀣𑀺𑀤’’𑀦𑁆𑀢𑀺𑀆𑀤𑀺. 𑀢𑀣𑀸𑀭𑀽𑀧𑁂 𑀓𑀸𑀮𑁂𑀢𑀺 𑀕𑀸𑀫𑀁 𑀧𑀯𑀺𑀲𑀺𑀢𑀼𑀁 𑀤𑀼𑀓𑁆𑀓𑀭𑀸𑀤𑀺𑀓𑀸𑀮𑁂. 𑀯𑀮𑁆𑀮𑀽𑀭𑁄𑀢𑀺 𑀲𑀼𑀓𑁆𑀔𑀫𑀁𑀲𑀁. 𑀪𑀸𑀚𑀦-𑀲𑀤𑁆𑀤𑁄 𑀲𑀧𑁆𑀧𑀺𑀢𑁂𑀮𑀕𑀼𑀴𑀲𑀤𑁆𑀤𑁂𑀳𑀺 𑀬𑁄𑀚𑁂𑀢𑀩𑁆𑀩𑁄 𑀢𑀤𑀯𑀺𑀦𑀸𑀪𑀸𑀯𑀺𑀢𑁆𑀢𑀸. 𑀓𑀸𑀮𑀲𑁆𑀲𑁂𑀯𑀸𑀢𑀺 𑀧𑀕𑁂𑀯. 𑀉𑀤𑀓𑀓𑀤𑁆𑀤𑀫𑁂𑀢𑀺 𑀉𑀤𑀓𑁂 𑀘 𑀓𑀤𑁆𑀤𑀫𑁂 𑀘. 𑀦𑀺𑀫𑀺𑀢𑁆𑀢𑁂 𑀘𑁂𑀢𑀁 𑀪𑀼𑀫𑁆𑀫𑀁, 𑀪𑀸𑀯𑀮𑀓𑁆𑀔𑀡𑁂 𑀯𑀸. 𑀅𑀘𑁆𑀙𑀣𑀸𑀢𑀺 𑀦𑀺𑀲𑀻𑀤𑀣. 𑀪𑀼𑀜𑁆𑀚𑀦𑁆𑀢𑀲𑁆𑀲𑁂𑀯𑀸𑀢𑀺 𑀪𑀼𑀜𑁆𑀚𑀢𑁄 𑀏𑀯 𑀪𑀺𑀓𑁆𑀔𑀼𑀦𑁄, 𑀲𑀫𑁆𑀧𑀤𑀸𑀦𑀯𑀘𑀦𑀁, 𑀅𑀦𑀸𑀤𑀭𑀢𑁆𑀣𑁂 𑀯𑀸 𑀲𑀸𑀫𑀺𑀯𑀘𑀦𑀁. 𑀓𑀺𑀭𑀺𑀬𑀦𑁆𑀢𑀭𑀸𑀯𑀘𑁆𑀙𑁂𑀤𑀦𑀬𑁄𑀕𑁂𑀦 𑀳𑁂𑀢𑁆𑀣 𑀅𑀦𑀸𑀤𑀭𑀢𑀸. 𑀕𑀻𑀯𑀸𑀬𑀸𑀫𑀓𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀯𑀘𑀦𑀁, 𑀕𑀻𑀯𑀁 𑀆𑀬𑀫𑁂𑀢𑁆𑀯𑀸 𑀆𑀬𑀢𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄, 𑀬𑀣𑀸 𑀯𑀸 𑀪𑀼𑀢𑁆𑀢𑁂 𑀅𑀢𑀺𑀪𑀼𑀢𑁆𑀢𑀢𑀸𑀬 𑀕𑀻𑀯𑀸 𑀆𑀬𑀫𑀺𑀢𑀩𑁆𑀩𑀸 𑀳𑁄𑀢𑀺, 𑀢𑀣𑀸𑀢𑀺𑀧𑀺 𑀯𑀝𑁆𑀝𑀢𑀺. 𑀘𑀢𑀼𑀫𑀸𑀲𑀫𑁆𑀧𑀻𑀢𑀺 𑀯𑀲𑁆𑀲𑀸𑀦𑀲𑁆𑀲 𑀘𑀢𑁆𑀢𑀸𑀭𑁄 𑀫𑀸𑀲𑁂𑀧𑀺. 𑀓𑀼𑀝𑀼𑀫𑁆𑀩𑀁 𑀯𑀼𑀘𑁆𑀘𑀢𑀺 𑀥𑀦𑀁, 𑀢𑀤𑀲𑁆𑀲𑀢𑁆𑀣𑀻𑀢𑀺 𑀓𑀼𑀝𑀼𑀫𑁆𑀩𑀺𑀓𑁄, 𑀫𑀼𑀡𑁆𑀟𑁄 𑀘 𑀲𑁄 𑀓𑀼𑀝𑀼𑀫𑁆𑀩𑀺𑀓𑁄 𑀘𑀸𑀢𑀺 𑀫𑀼𑀡𑁆𑀟𑀓𑀼𑀝𑀼𑀫𑁆𑀩𑀺𑀓𑁄, 𑀢𑀲𑁆𑀲 𑀚𑀻𑀯𑀺𑀓𑀁 𑀢𑀣𑀸, 𑀢𑀁 𑀓𑀢𑁆𑀯𑀸 𑀚𑀻𑀯𑀢𑀻𑀢𑀺 𑀅𑀢𑁆𑀣𑁄. 𑀦𑀬𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁 𑀆𑀫𑀺𑀲𑀧𑀤𑁂𑀦 𑀤𑀲𑁆𑀲𑀺𑀢𑀸𑀦𑀁 𑀲𑀦𑁆𑀦𑀺𑀥𑀺𑀯𑀢𑁆𑀣𑀽𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀩𑁆𑀩𑀺𑀭𑀳𑀺𑀢𑀁 𑀲𑀫𑀡𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀺𑀓𑁆𑀔𑀼𑀦𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀕𑀼𑀴𑀧𑀺𑀡𑁆𑀟𑁄 𑀢𑀸𑀮𑀧𑀓𑁆𑀓𑀧𑁆𑀧𑀫𑀸𑀡’’𑀦𑁆𑀢𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀯𑀼𑀢𑁆𑀢𑀁. 𑀘𑀢𑀼𑀪𑀸𑀕𑀫𑀢𑁆𑀢𑀦𑁆𑀢𑀺 𑀓𑀼𑀝𑀼𑀫𑁆𑀩𑀫𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀏𑀓𑀸 𑀢𑀡𑁆𑀟𑀼𑀮𑀦𑀸𑀴𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀦 𑀢𑀲𑁆𑀲𑀸 𑀘𑀢𑀼𑀪𑀸𑀕𑁄 𑀏𑀓𑀧𑀢𑁆𑀣𑁄𑀢𑀺 𑀯𑀤𑀦𑁆𑀢𑀺. 𑀯𑀼𑀢𑁆𑀢𑀜𑁆𑀘 𑁋

‘‘𑀓𑀼𑀟𑀼𑀯𑁄 𑀧𑀲𑀢𑁄 𑀏𑀓𑁄, 𑀧𑀢𑁆𑀣𑁄 𑀢𑁂 𑀘𑀢𑀼𑀭𑁄 𑀲𑀺𑀬𑀼𑀁;

𑀆𑀴𑁆𑀳𑀓𑁄 𑀘𑀢𑀼𑀭𑁄 𑀧𑀢𑁆𑀣𑀸, 𑀤𑁄𑀡𑀁 𑀯𑀸 𑀘𑀢𑀼𑀭𑀸𑀴𑁆𑀳𑀓’’𑀦𑁆𑀢𑀺.

𑀓𑀲𑁆𑀫𑀸𑀢𑀺 ¶ 𑀯𑀼𑀢𑁆𑀢𑀁 ‘‘𑀢𑁂 𑀳𑀻’’𑀢𑀺𑀆𑀤𑀺. 𑀆𑀳𑀭𑀸𑀧𑁂𑀢𑁆𑀯𑀸𑀧𑀺 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺, 𑀧𑀕𑁂𑀯 𑀬𑀣𑀸𑀮𑀤𑁆𑀥𑀁. ‘‘𑀅𑀨𑀸𑀲𑀼𑀓𑀓𑀸𑀮𑁂’’𑀢𑀺𑀆𑀤𑀺𑀦𑀸 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀞𑀧𑀺𑀢𑀲𑁆𑀲 𑀧𑀭𑀺𑀪𑁄𑀕𑁄 𑀲𑀮𑁆𑀮𑁂𑀔𑀁 𑀦 𑀓𑁄𑀧𑁂𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀫𑁆𑀫𑀼𑀢𑀺𑀓𑀼𑀝𑀺𑀓𑀸𑀤𑀬𑁄 𑀘𑀢𑀲𑁆𑀲𑁄, 𑀅𑀯𑀸𑀲𑀸𑀕𑀸𑀭𑀪𑀽𑀢𑁂𑀦 𑀯𑀸 𑀉𑀧𑁄𑀲𑀣𑀸𑀕𑀸𑀭𑀸𑀤𑀺𑀦𑀸 𑀲𑀳 𑀧𑀜𑁆𑀘𑀓𑀼𑀝𑀺𑀬𑁄 𑀲𑀦𑁆𑀥𑀸𑀬 ‘‘𑀓𑀧𑁆𑀧𑀺𑀬𑀓𑀼𑀝𑀺𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀦𑁆𑀦𑀺𑀥𑀺 𑀦𑀸𑀫 𑀦𑀢𑁆𑀣𑀺 𑀢𑀢𑁆𑀣 𑀅𑀦𑁆𑀢𑁄𑀯𑀼𑀢𑁆𑀣𑀅𑀦𑁆𑀢𑁄𑀧𑀓𑁆𑀓𑀲𑁆𑀲 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. ‘‘𑀢𑀣𑀸𑀕𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀅𑀥𑀺𑀓𑀸𑀭𑀸𑀦𑀼𑀭𑀽𑀧𑀁 𑀅𑀢𑁆𑀣𑀁 𑀧𑀬𑁄𑀚𑁂𑀢𑀺. 𑀧𑀺𑀮𑁄𑀢𑀺𑀓𑀔𑀡𑁆𑀟𑀦𑁆𑀢𑀺 𑀚𑀺𑀡𑁆𑀡𑀘𑁄𑀴𑀔𑀡𑁆𑀟𑀁.

𑁧𑁩. ‘‘𑀕𑀻𑀯𑀁 ¶ 𑀧𑀲𑀸𑀭𑁂𑀢𑁆𑀯𑀸’’𑀢𑀺 𑀏𑀢𑁂𑀦 𑀲𑀬𑀫𑁂𑀯 𑀆𑀧𑀸𑀣𑀕𑀫𑀦𑁂 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀢𑀓𑀫𑁆𑀧𑀻𑀢𑀺 𑀯𑀺𑀦𑀺𑀘𑁆𑀙𑀬𑀯𑀺𑀘𑀸𑀭𑀡𑀸 𑀯𑀢𑁆𑀣𑀼𑀓𑀺𑀢𑁆𑀢𑀦𑀫𑁆𑀧𑀺. 𑀧𑀬𑁄𑀚𑀦𑀫𑀢𑁆𑀢𑀫𑁂𑀯𑀸𑀢𑀺 𑀧𑀤𑀢𑁆𑀣𑀬𑁄𑀚𑀦𑀫𑀢𑁆𑀢𑀫𑁂𑀯. 𑀬𑀲𑁆𑀲 𑀧𑀦 𑀧𑀤𑀲𑁆𑀲 𑀯𑀺𑀢𑁆𑀣𑀸𑀭𑀓𑀣𑀁 𑀯𑀺𑀦𑀸 𑀦 𑀲𑀓𑁆𑀓𑀸 𑀅𑀢𑁆𑀣𑁄 𑀯𑀺𑀜𑁆𑀜𑀸𑀢𑀼𑀁, 𑀢𑀢𑁆𑀣 𑀯𑀺𑀢𑁆𑀣𑀸𑀭𑀓𑀣𑀸𑀧𑀺 𑀧𑀤𑀢𑁆𑀣𑀲𑀗𑁆𑀕𑀳𑀫𑁂𑀯 𑀕𑀘𑁆𑀙𑀢𑀺.

𑀓𑀼𑀢𑀽𑀳𑀮𑀯𑀲𑁂𑀦 𑀧𑁂𑀓𑁆𑀔𑀺𑀢𑀩𑁆𑀩𑀢𑁄 𑀧𑁂𑀓𑁆𑀔𑀁, 𑀦𑀝𑀲𑀢𑁆𑀣𑀯𑀺𑀥𑀺𑀦𑀸 𑀧𑀬𑁄𑀕𑁄. 𑀦𑀝𑀲𑀫𑀽𑀳𑁂𑀦 𑀧𑀦 𑀚𑀦𑀲𑀫𑀽𑀳𑁂 𑀓𑀢𑁆𑀢𑀩𑁆𑀩𑀯𑀲𑁂𑀦 ‘‘𑀦𑀝𑀲𑀫𑁆𑀫𑀚𑁆𑀚’’𑀦𑁆𑀢𑀺 𑀯𑀼𑀢𑁆𑀢𑀁. 𑀚𑀦𑀸𑀦𑀁 𑀲𑀫𑁆𑀫𑀤𑁆𑀤𑁂 𑀲𑀫𑀽𑀳𑁂 𑀓𑀢𑀦𑁆𑀢𑀺 𑀳𑀺 𑀲𑀫𑁆𑀫𑀚𑁆𑀚𑀁. 𑀲𑀸𑀭𑀲𑀫𑀸𑀲𑁂 𑀧𑀦 ‘‘𑀧𑁂𑀓𑁆𑀔𑀸𑀫𑀳’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺, ‘‘𑀲𑀫𑁆𑀫𑀚𑁆𑀚𑀤𑀲𑁆𑀲𑀦𑀼𑀲𑁆𑀲𑀯’’𑀦𑁆𑀢𑀺 𑀢𑁂𑀲𑀁 𑀫𑀢𑁂 𑀅𑀢𑁆𑀣𑁄. 𑀪𑀸𑀭𑀢𑀦𑀸𑀫𑀓𑀸𑀦𑀁 𑀤𑁆𑀯𑁂𑀪𑀸𑀢𑀼𑀓𑀭𑀸𑀚𑀽𑀦𑀁, 𑀭𑀸𑀫𑀭𑀜𑁆𑀜𑁄 𑀘 𑀬𑀼𑀚𑁆𑀛𑀦𑀸𑀤𑀺𑀓𑀁 𑀢𑀧𑁆𑀧𑀲𑀼𑀢𑁂𑀳𑀺 𑀆𑀘𑀺𑀓𑁆𑀔𑀺𑀢𑀩𑁆𑀩𑀢𑁄 𑀅𑀓𑁆𑀔𑀸𑀦𑀁. 𑀕𑀦𑁆𑀢𑀼𑀫𑁆𑀧𑀺 𑀦 𑀯𑀝𑁆𑀝𑀢𑀺, 𑀧𑀕𑁂𑀯 𑀢𑀁 𑀲𑁄𑀢𑀼𑀁. 𑀧𑀸𑀡𑀺𑀦𑀸 𑀢𑀸𑀴𑀺𑀢𑀩𑁆𑀩𑀁 𑀲𑀭𑀁 𑀧𑀸𑀡𑀺𑀲𑁆𑀲𑀭𑀦𑁆𑀢𑀺 𑀆𑀳 ‘‘𑀓𑀁𑀲𑀢𑀸𑀴’’𑀦𑁆𑀢𑀺, 𑀮𑁄𑀳𑀫𑀬𑁄 𑀢𑀽𑀭𑀺𑀬𑀚𑀸𑀢𑀺𑀯𑀺𑀲𑁂𑀲𑁄 𑀓𑀁𑀲𑁄, 𑀮𑁄𑀳𑀫𑀬𑀧𑀢𑁆𑀢𑁄 𑀯𑀸, 𑀢𑀲𑁆𑀲 𑀢𑀸𑀴𑀦𑀲𑀤𑁆𑀤𑀦𑁆𑀢𑀺 𑀅𑀢𑁆𑀣𑁄. 𑀧𑀸𑀡𑀻𑀦𑀁 𑀢𑀸𑀴𑀦𑀲𑀭𑀦𑁆𑀢𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬 𑀧𑀸𑀡𑀺𑀢𑀸𑀴𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀖𑀦𑀲𑀗𑁆𑀔𑀸𑀢𑀸𑀦𑀁 𑀢𑀽𑀭𑀺𑀬𑀯𑀺𑀲𑁂𑀲𑀸𑀦𑀁 𑀢𑀸𑀴𑀦𑀁 𑀖𑀦𑀢𑀸𑀴𑀁 𑀦𑀸𑀫, 𑀤𑀡𑁆𑀟𑀫𑀬𑀲𑀫𑁆𑀫𑀢𑀸𑀴𑀁 𑀲𑀺𑀮𑀸𑀢𑀮𑀸𑀓𑀢𑀸𑀴𑀁 𑀯𑀸. 𑀫𑀦𑁆𑀢𑁂𑀦𑀸𑀢𑀺 𑀪𑀽𑀢𑀸𑀯𑀺𑀲𑀦𑀫𑀦𑁆𑀢𑁂𑀦. 𑀏𑀓𑁂𑀢𑀺 𑀲𑀸𑀭𑀲𑀫𑀸𑀲𑀸𑀘𑀭𑀺𑀬𑀸, 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄 𑀘, 𑀬𑀣𑀸 𑀘𑁂𑀢𑁆𑀣, 𑀏𑀯𑀫𑀺𑀢𑁄 𑀧𑀭𑁂𑀲𑀼𑀧𑀺 ‘‘𑀏𑀓𑁂’’𑀢𑀺 𑀆𑀕𑀢𑀝𑁆𑀞𑀸𑀦𑁂𑀲𑀼. 𑀢𑁂 𑀓𑀺𑀭 𑀤𑀻𑀖𑀦𑀺𑀓𑀸𑀬𑀲𑁆𑀲𑀢𑁆𑀣𑀯𑀺𑀲𑁂𑀲𑀯𑀸𑀤𑀺𑀦𑁄. 𑀘𑀢𑀼𑀭𑀲𑁆𑀲𑀅𑀫𑁆𑀩𑀡𑀓𑀢𑀸𑀴𑀁 𑀦𑀸𑀫 𑀭𑀼𑀓𑁆𑀔𑀲𑀸𑀭𑀤𑀡𑁆𑀟𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀘𑀢𑀼𑀭𑀲𑁆𑀲𑀅𑀫𑁆𑀩𑀡𑀁 𑀓𑀢𑁆𑀯𑀸 𑀘𑀢𑀽𑀲𑀼 𑀧𑀲𑁆𑀲𑁂𑀲𑀼 𑀥𑀫𑁆𑀫𑁂𑀦 𑀑𑀦𑀤𑁆𑀥𑀺𑀢𑁆𑀯𑀸 𑀯𑀸𑀤𑀺𑀢𑀪𑀡𑁆𑀟𑀲𑁆𑀲 𑀢𑀸𑀴𑀦𑀁. 𑀢𑀜𑁆𑀳𑀺 𑀏𑀓𑀸𑀤𑀲𑀤𑁄𑀡𑀧𑁆𑀧𑀫𑀸𑀡𑀫𑀸𑀦𑀯𑀺𑀲𑁂𑀲𑀲𑀡𑁆𑀞𑀸𑀦𑀢𑁆𑀢𑀸 ‘‘𑀅𑀫𑁆𑀩𑀡𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀩𑀺𑀫𑁆𑀩𑀺𑀲𑀓𑀦𑁆𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫𑀁. 𑀢𑀣𑀸 𑀓𑀼𑀫𑁆𑀪𑀲𑀡𑁆𑀞𑀸𑀦𑀢𑀸𑀬 𑀓𑀼𑀫𑁆𑀪𑁄, 𑀖𑀝𑁄𑀬𑁂𑀯 𑀯𑀸, 𑀢𑀲𑁆𑀲 𑀥𑀼𑀦𑀦𑀦𑁆𑀢𑀺 𑀔𑀼𑀤𑁆𑀤𑀓𑀪𑀸𑀡𑀓𑀸. 𑀅𑀩𑁆𑀪𑁄𑀓𑁆𑀓𑀺𑀭𑀡𑀁 𑀭𑀗𑁆𑀕𑀩𑀮𑀺𑀓𑀭𑀡𑀁. 𑀢𑁂 𑀳𑀺 𑀦𑀘𑁆𑀘𑀝𑁆𑀞𑀸𑀦𑁂 𑀤𑁂𑀯𑀢𑀸𑀦𑀁 𑀩𑀮𑀺𑀓𑀭𑀡𑀁 𑀦𑀸𑀫 𑀓𑀢𑁆𑀯𑀸 𑀓𑀻𑀴𑀦𑁆𑀢𑀺, 𑀬𑀁 ‘‘𑀦𑀦𑁆𑀤𑀻’’𑀢𑀺𑀧𑀺 𑀯𑀼𑀘𑁆𑀘𑀢𑀺 ¶ . 𑀇𑀢𑁆𑀣𑀺𑀧𑀼𑀭𑀺𑀲𑀲𑀁𑀬𑁄𑀕𑀸𑀤𑀺𑀓𑀺𑀮𑁂𑀲𑀚𑀦𑀓𑀁 𑀧𑀝𑀺𑀪𑀸𑀦𑀘𑀺𑀢𑁆𑀢𑀁 𑀲𑁄𑀪𑀦𑀓𑀭𑀡𑀢𑁄 𑀲𑁄𑀪𑀦𑀓𑀭𑀁 𑀦𑀸𑀫. ‘‘𑀲𑁄𑀪𑀦𑀖𑀭𑀓’’𑀦𑁆𑀢𑀺 𑀲𑀸𑀭𑀲𑀫𑀸𑀲𑁂 𑀯𑀼𑀢𑁆𑀢𑀁. 𑀘𑀡𑁆𑀟𑀸𑀬 𑀅𑀮𑀦𑁆𑀢𑀺 𑀘𑀡𑁆𑀟𑀸𑀮𑀁, 𑀅𑀬𑁄𑀕𑀼𑀴𑀓𑀻𑀴𑀸. 𑀘𑀡𑁆𑀟𑀸𑀮𑀸 𑀦𑀸𑀫 𑀳𑀻𑀦𑀚𑀸𑀢𑀺𑀓𑀸 𑀲𑀼𑀦𑀔𑀫𑀁𑀲𑀪𑁄𑀚𑀺𑀦𑁄, 𑀢𑁂𑀲𑀁 𑀇𑀤𑀦𑁆𑀢𑀺 𑀘𑀡𑁆𑀟𑀸𑀮𑀁. 𑀲𑀸𑀡𑁂 𑀉𑀤𑀓𑁂𑀦 𑀢𑁂𑀫𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀆𑀓𑁄𑀝𑀦𑀓𑀻𑀴𑀸 𑀲𑀸𑀡𑀥𑁄𑀯𑀦𑀓𑀻𑀴𑀸. 𑀯𑀁𑀲𑁂𑀦 𑀓𑀢𑀁 𑀓𑀻𑀴𑀦𑀁 𑀯𑀁𑀲𑀦𑁆𑀢𑀺 𑀆𑀳 ‘‘𑀯𑁂𑀴𑀼𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀓𑀻𑀴𑀦’’𑀦𑁆𑀢𑀺.

𑀦𑀺𑀔𑀡𑀺𑀢𑁆𑀯𑀸𑀢𑀺 𑀪𑀽𑀫𑀺𑀬𑀁 𑀦𑀺𑀔𑀸𑀢𑀁 𑀓𑀢𑁆𑀯𑀸. 𑀦𑀓𑁆𑀔𑀢𑁆𑀢𑀓𑀸𑀮𑁂𑀢𑀺 𑀦𑀓𑁆𑀔𑀢𑁆𑀢𑀬𑁄𑀕𑀙𑀡𑀓𑀸𑀮𑁂. 𑀢𑀫𑀢𑁆𑀣𑀁 𑀅𑀗𑁆𑀕𑀼𑀢𑁆𑀢𑀭𑀸𑀕𑀫𑁂 𑀤𑀲𑀓𑀦𑀺𑀧𑀸𑀢𑀧𑀸𑀴𑀺𑀬𑀸 (𑀅. 𑀦𑀺. 𑁧𑁦.𑁧𑁦𑁬) 𑀲𑀸𑀥𑁂𑀦𑁆𑀢𑁄 ‘‘𑀯𑀼𑀢𑁆𑀢𑀫𑁆𑀧𑀺𑀘𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀅𑀝𑁆𑀞𑀺𑀥𑁄𑀯𑀦𑁂. 𑀇𑀦𑁆𑀤𑀚𑀸𑀮𑁂𑀦𑀸𑀢𑀺 𑀅𑀝𑁆𑀞𑀺𑀥𑁄𑀯𑀦𑀫𑀦𑁆𑀢𑀁 𑀧𑀭𑀺𑀚𑀧𑁆𑀧𑁂𑀢𑁆𑀯𑀸 𑀬𑀣𑀸 𑀧𑀭𑁂 𑀅𑀝𑁆𑀞𑀻𑀦𑀺𑀬𑁂𑀯 𑀧𑀲𑁆𑀲𑀦𑁆𑀢𑀺, 𑀦 𑀫𑀁𑀲𑀸𑀤𑀻𑀦𑀺, 𑀏𑀯𑀁 𑀫𑀁𑀲𑀸𑀤𑀻𑀦𑀫𑀦𑁆𑀢𑀭𑀥𑀸𑀧𑀦𑀫𑀸𑀬𑀸𑀬. 𑀇𑀦𑁆𑀤𑀲𑁆𑀲 ¶ 𑀚𑀸𑀮𑀫𑀺𑀯 𑀳𑀺 𑀧𑀝𑀺𑀘𑁆𑀙𑀸𑀤𑀺𑀢𑀼𑀁 𑀲𑀫𑀢𑁆𑀣𑀦𑀢𑁄 ‘‘𑀇𑀦𑁆𑀤𑀚𑀸𑀮’’𑀦𑁆𑀢𑀺 𑀫𑀸𑀬𑀸 𑀯𑀼𑀘𑁆𑀘𑀢𑀺 𑀇𑀦𑁆𑀤𑀘𑀸𑀧𑀸𑀤𑀬𑁄 𑀯𑀺𑀬. 𑀅𑀝𑁆𑀞𑀺𑀥𑁄𑀯𑀦𑀦𑁆𑀢𑀺 𑀅𑀝𑁆𑀞𑀺𑀥𑁄𑀯𑀦𑀓𑀻𑀴𑀸.

𑀳𑀢𑁆𑀣𑀺𑀆𑀤𑀻𑀳𑀺 𑀲𑀤𑁆𑀥𑀺𑀁 𑀬𑀼𑀚𑁆𑀛𑀺𑀢𑀼𑀦𑁆𑀢𑀺 𑀳𑀢𑁆𑀣𑀺𑀆𑀤𑀻𑀲𑀼 𑀅𑀪𑀺𑀭𑀼𑀳𑀺𑀢𑁆𑀯𑀸 𑀅𑀜𑁆𑀜𑁂𑀳𑀺 𑀲𑀤𑁆𑀥𑀺𑀁 𑀬𑀼𑀚𑁆𑀛𑀦𑀁, 𑀳𑀢𑁆𑀣𑀺𑀆𑀤𑀻𑀳𑀺 𑀘 𑀲𑀤𑁆𑀥𑀺𑀁 𑀲𑀬𑀫𑁂𑀯 𑀬𑀼𑀚𑁆𑀛𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀳𑀢𑁆𑀣𑀺𑀆𑀤𑀻𑀳𑀺 𑀲𑀤𑁆𑀥𑀺𑀁 𑀅𑀜𑁆𑀜𑁂𑀳𑀺 𑀬𑀼𑀚𑁆𑀛𑀺𑀢𑀼𑀁, 𑀲𑀬𑀁 𑀯𑀸 𑀬𑀼𑀚𑁆𑀛𑀺𑀢𑀼𑀦𑁆𑀢𑀺 𑀳𑀺 𑀅𑀢𑁆𑀣𑁄. 𑀢𑁂𑀢𑀺 𑀳𑀢𑁆𑀣𑀺𑀆𑀤𑀬𑁄. 𑀅𑀜𑁆𑀜𑀫𑀜𑁆𑀜𑀁 𑀫𑀣𑁂𑀦𑁆𑀢𑀺 𑀯𑀺𑀮𑁄𑀣𑁂𑀦𑁆𑀢𑀻𑀢𑀺 𑀫𑀮𑁆𑀮𑀸, 𑀩𑀸𑀳𑀼𑀬𑀼𑀤𑁆𑀥𑀓𑀸𑀭𑀓𑀸, 𑀢𑁂𑀲𑀁 𑀬𑀼𑀤𑁆𑀥𑀁. 𑀲𑀫𑁆𑀧𑀳𑀸𑀭𑁄𑀢𑀺 𑀲𑀗𑁆𑀕𑀸𑀫𑁄. 𑀩𑀮𑀲𑁆𑀲 𑀲𑁂𑀦𑀸𑀬 𑀅𑀕𑁆𑀕𑀁 𑀕𑀡𑀦𑀓𑁄𑀝𑁆𑀞𑀸𑀲𑀁 𑀓𑀭𑁄𑀦𑁆𑀢𑀺 𑀏𑀢𑁆𑀣𑀸𑀢𑀺 𑀩𑀮𑀕𑁆𑀕𑀁, ‘‘𑀏𑀢𑁆𑀢𑀓𑀸 𑀳𑀢𑁆𑀣𑀻, 𑀏𑀢𑁆𑀢𑀓𑀸 𑀅𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀩𑀮𑀕𑀡𑀦𑀝𑁆𑀞𑀸𑀦𑀁. 𑀲𑁂𑀦𑀁 𑀯𑀺𑀬𑀽𑀳𑀦𑁆𑀢𑀺 𑀏𑀢𑁆𑀣 𑀯𑀺𑀪𑀚𑀺𑀢𑁆𑀯𑀸 𑀞𑀧𑁂𑀦𑁆𑀢𑀺, 𑀲𑁂𑀦𑀸𑀬 𑀯𑀸 𑀏𑀢𑁆𑀣 𑀩𑁆𑀬𑀽𑀳𑀦𑀁 𑀯𑀺𑀦𑁆𑀬𑀸𑀲𑁄𑀢𑀺 𑀲𑁂𑀦𑀸𑀩𑁆𑀬𑀽𑀳𑁄, ‘‘𑀇𑀢𑁄 𑀳𑀢𑁆𑀣𑀻 𑀳𑁄𑀦𑁆𑀢𑀼, 𑀇𑀢𑁄 𑀅𑀲𑁆𑀲𑀸 𑀳𑁄𑀦𑁆𑀢𑀽’’𑀢𑀺𑀆𑀤𑀺𑀦𑀸 𑀬𑀼𑀤𑁆𑀥𑀢𑁆𑀣𑀁 𑀘𑀢𑀼𑀭𑀗𑁆𑀕𑀩𑀮𑀸𑀬 𑀲𑁂𑀦𑀸𑀬 𑀤𑁂𑀲𑀯𑀺𑀲𑁂𑀲𑁂𑀲𑀼 𑀯𑀺𑀘𑀸𑀭𑀡𑀝𑁆𑀞𑀸𑀦𑀁, 𑀢𑀁 𑀧𑀦 𑀪𑁂𑀤𑀢𑁄 𑀲𑀓𑀝𑀩𑁆𑀬𑀽𑀳𑀸𑀤𑀺𑀯𑀲𑁂𑀦. 𑀆𑀤𑀺-𑀲𑀤𑁆𑀤𑁂𑀦 𑀘𑀓𑁆𑀓𑀧𑀤𑀼𑀫𑀩𑁆𑀬𑀽𑀳𑀸𑀦𑀁 𑀤𑀡𑁆𑀟𑀪𑁄𑀕𑀫𑀡𑁆𑀟𑀮𑀸𑀲𑀁𑀳𑀢𑀩𑁆𑀬𑀽𑀳𑀸𑀦𑀜𑁆𑀘 𑀕𑀳𑀡𑀁, ‘‘𑀢𑀬𑁄 𑀳𑀢𑁆𑀣𑀻 𑀧𑀘𑁆𑀙𑀺𑀫𑀁 𑀳𑀢𑁆𑀣𑀸𑀦𑀻𑀓𑀁, 𑀢𑀬𑁄 𑀅𑀲𑁆𑀲𑀸 𑀧𑀘𑁆𑀙𑀺𑀫𑀁 𑀅𑀲𑁆𑀲𑀸𑀦𑀻𑀓𑀁, 𑀢𑀬𑁄 𑀭𑀣𑀸 𑀧𑀘𑁆𑀙𑀺𑀫𑀁 𑀭𑀣𑀸𑀦𑀻𑀓𑀁, 𑀘𑀢𑁆𑀢𑀸𑀭𑁄 𑀧𑀼𑀭𑀺𑀲𑀸 𑀲𑀭𑀳𑀢𑁆𑀣𑀸 𑀧𑀢𑁆𑀢𑀻 𑀧𑀘𑁆𑀙𑀺𑀫𑀁 𑀧𑀢𑁆𑀢𑀸𑀦𑀻𑀓’’𑀦𑁆𑀢𑀺 (𑀧𑀸𑀘𑀺. 𑁩𑁨𑁪 𑀉𑀬𑁆𑀬𑁄𑀥𑀺𑀓𑀲𑀺𑀓𑁆𑀔𑀸𑀧𑀤𑁂) 𑀓𑀡𑁆𑀟𑀯𑀺𑀤𑁆𑀥𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀤𑀪𑀸𑀚𑀦𑀁 𑀲𑀦𑁆𑀥𑀸𑀬 ‘‘𑀢𑀬𑁄…𑀧𑁂…𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀲𑁆𑀲𑀸’’𑀢𑀺 𑀆𑀳. 𑀢𑀜𑁆𑀘 𑀔𑁄 ‘‘𑀤𑁆𑀯𑀸𑀤𑀲𑀧𑀼𑀭𑀺𑀲𑁄 𑀳𑀢𑁆𑀣𑀻, 𑀢𑀺𑀧𑀼𑀭𑀺𑀲𑁄 𑀅𑀲𑁆𑀲𑁄, 𑀘𑀢𑀼𑀧𑀼𑀭𑀺𑀲𑁄 ¶ 𑀭𑀣𑁄, 𑀘𑀢𑁆𑀢𑀸𑀭𑁄 𑀧𑀼𑀭𑀺𑀲𑀸 𑀲𑀭𑀳𑀢𑁆𑀣𑀸 𑀧𑀢𑁆𑀢𑀻’’𑀢𑀺 (𑀧𑀸𑀘𑀺. 𑁩𑁧𑁪 𑀉𑀬𑁆𑀬𑀼𑀢𑁆𑀢𑀲𑁂𑀦𑀸𑀲𑀺𑀓𑁆𑀔𑀸𑀧𑀤𑁂) 𑀯𑀼𑀢𑁆𑀢𑀮𑀓𑁆𑀔𑀡𑀢𑁄 𑀳𑀢𑁆𑀣𑀺𑀆𑀤𑀺𑀕𑀡𑀦𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁, 𑀏𑀢𑁂𑀦 𑀘 ‘‘𑀙 𑀳𑀢𑁆𑀣𑀺𑀦𑀺𑀬𑁄, 𑀏𑀓𑁄 𑀘 𑀳𑀢𑁆𑀣𑀻 𑀇𑀤𑀫𑁂𑀓’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁪𑁫) 𑀘𑀫𑁆𑀫𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀫𑀦𑀻𑀓𑀁 𑀧𑀝𑀺𑀓𑁆𑀔𑀺𑀧𑀢𑀺.

𑁧𑁪. 𑀓𑀸𑀭𑀡𑀁 𑀦𑀸𑀫 𑀨𑀮𑀲𑁆𑀲 𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀧𑀫𑀸𑀤𑁄…𑀧𑁂… 𑀞𑀸𑀦’’𑀦𑁆𑀢𑀺. 𑀧𑀤𑀸𑀦𑀻𑀢𑀺 𑀲𑀸𑀭𑀻𑀆𑀤𑀻𑀦𑀁 𑀧𑀢𑀺𑀝𑁆𑀞𑀸𑀦𑀸𑀦𑀺. 𑀅𑀝𑁆𑀞𑀸𑀧𑀤𑀦𑁆𑀢𑀺 𑀲𑀜𑁆𑀜𑀸𑀬 𑀤𑀻𑀖𑀢𑀸. ‘‘𑀅𑀝𑁆𑀞𑀧𑀤’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺. 𑀤𑀲𑀧𑀤𑀁 𑀦𑀸𑀫 𑀤𑁆𑀯𑀻𑀳𑀺 𑀧𑀦𑁆𑀢𑀻𑀢𑀺 𑀯𑀻𑀲𑀢𑀺𑀬𑀸 𑀧𑀤𑁂𑀳𑀺 𑀓𑀻𑀴𑀦𑀚𑀽𑀢𑀁. 𑀅𑀝𑁆𑀞𑀧𑀤𑀤𑀲𑀧𑀤𑁂𑀲𑀽𑀢𑀺 𑀅𑀝𑁆𑀞𑀧𑀤𑀤𑀲𑀧𑀤𑀨𑀮𑀓𑁂𑀲𑀼. 𑀆𑀓𑀸𑀲𑁂𑀬𑁂𑀯 𑀓𑀻𑀴𑀦𑀦𑁆𑀢𑀺 ‘‘𑀅𑀬𑀁 𑀲𑀸𑀭𑀻 𑀅𑀲𑀼𑀓𑀧𑀤𑀁 𑀫𑀬𑀸 𑀦𑀻𑀢𑀸, 𑀅𑀬𑀁 𑀅𑀲𑀼𑀓𑀧𑀤’’𑀦𑁆𑀢𑀺 𑀓𑁂𑀯𑀮𑀁 𑀫𑀼𑀔𑁂𑀦𑁂𑀯 𑀯𑀤𑀦𑁆𑀢𑀸𑀦𑀁 𑀆𑀓𑀸𑀲𑁂𑀬𑁂𑀯 𑀚𑀽𑀢𑀲𑁆𑀲 𑀓𑀻𑀴𑀦𑀁. 𑀦𑀸𑀦𑀸𑀧𑀣𑀫𑀡𑁆𑀟𑀮𑀦𑁆𑀢𑀺 𑀅𑀦𑁂𑀓𑀯𑀺𑀳𑀺𑀢𑀲𑀸𑀭𑀻𑀫𑀕𑁆𑀕𑀧𑀭𑀺𑀯𑀝𑁆𑀝𑀁. 𑀧𑀭𑀺𑀳𑀭𑀺𑀢𑀩𑁆𑀩𑀦𑁆𑀢𑀺 𑀲𑀸𑀭𑀺𑀬𑁄 𑀧𑀭𑀺𑀳𑀭𑀺𑀢𑀼𑀁 𑀬𑀼𑀢𑁆𑀢𑀓𑀁. 𑀇𑀢𑁄 𑀘𑀺𑀢𑁄 𑀘 𑀲𑀭𑀦𑁆𑀢𑀺 𑀧𑀭𑀺𑀯𑀢𑁆𑀢𑀦𑁆𑀢𑀻𑀢𑀺 𑀲𑀸𑀭𑀺𑀬𑁄, 𑀬𑁂𑀦 𑀓𑁂𑀦𑀘𑀺 𑀓𑀢𑀸𑀦𑀺 𑀅𑀓𑁆𑀔𑀩𑀻𑀚𑀸𑀦𑀺. 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀲𑀸𑀭𑀻𑀲𑀼, 𑀢𑀲𑁆𑀫𑀺𑀁 𑀯𑀸 𑀅𑀧𑀦𑀬𑀦𑀼𑀧𑀦𑀬𑀦𑁂. 𑀚𑀽𑀢𑀔𑀮𑀺𑀓𑁂𑀢𑀺 𑀚𑀽𑀢𑀫𑀡𑁆𑀟𑀮𑁂. ‘‘𑀚𑀽𑀢𑀨𑀮𑀓𑁂’’𑀢𑀺𑀧𑀺 𑀅𑀥𑀼𑀦𑀸 𑀧𑀸𑀞𑁄. 𑀧𑀸𑀲𑀓𑀁 𑀯𑀼𑀘𑁆𑀘𑀢𑀺 𑀙𑀲𑀼 𑀧𑀲𑁆𑀲𑁂𑀲𑀼 𑀏𑀓𑁂𑀓𑀁 𑀬𑀸𑀯 𑀙𑀓𑁆𑀓𑀁 𑀤𑀲𑁆𑀲𑁂𑀢𑁆𑀯𑀸 𑀓𑀢𑀓𑀻𑀴𑀦𑀓𑀁, 𑀢𑀁 𑀯𑀟𑁆𑀠𑁂𑀢𑁆𑀯𑀸 𑀬𑀣𑀸𑀮𑀤𑁆𑀥𑀁 ¶ 𑀏𑀓𑀓𑀸𑀤𑀺𑀯𑀲𑁂𑀦 𑀲𑀸𑀭𑀺𑀬𑁄 𑀅𑀧𑀦𑁂𑀦𑁆𑀢𑁄, 𑀉𑀧𑀦𑁂𑀦𑁆𑀢𑁄 𑀘 𑀓𑀻𑀴𑀦𑁆𑀢𑀺, 𑀧𑀲𑀢𑀺 𑀅𑀝𑁆𑀞𑀧𑀤𑀸𑀤𑀻𑀲𑀼 𑀩𑀸𑀥𑀢𑀺, 𑀨𑀼𑀲𑀢𑀺 𑀘𑀸𑀢𑀺 𑀳𑀺 𑀧𑀸𑀲𑀓𑁄, 𑀘𑀢𑀼𑀩𑁆𑀩𑀻𑀲𑀢𑀺𑀯𑀺𑀥𑁄 𑀅𑀓𑁆𑀔𑁄. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀅𑀝𑁆𑀞𑀓𑀁 𑀫𑀸𑀮𑀺𑀓𑀁 𑀯𑀼𑀢𑁆𑀢𑀁, 𑀲𑀸𑀯𑀝𑁆𑀝𑀜𑁆𑀘 𑀙𑀓𑀁 𑀫𑀢𑀁;

𑀘𑀢𑀼𑀓𑁆𑀓𑀁 𑀩𑀳𑀼𑀮𑀁 𑀜𑁂𑀬𑁆𑀬𑀁, 𑀤𑁆𑀯𑀺 𑀩𑀺𑀦𑁆𑀤𑀼𑀲𑀦𑁆𑀢𑀺𑀪𑀤𑁆𑀭𑀓𑀁;

𑀘𑀢𑀼𑀯𑀻𑀲𑀢𑀺 𑀆𑀬𑀸 𑀘, 𑀫𑀼𑀦𑀺𑀦𑁆𑀤𑁂𑀦 𑀧𑀓𑀸𑀲𑀺𑀢𑀸’’𑀢𑀺.

𑀢𑁂𑀦 𑀓𑀻𑀴𑀦𑀫𑀺𑀥 𑀧𑀸𑀲𑀓𑀓𑀻𑀴𑀦𑀁. 𑀖𑀝𑀦𑀁 𑀧𑀳𑀭𑀡𑀁, 𑀢𑁂𑀦 𑀓𑀻𑀴𑀸 𑀖𑀝𑀺𑀓𑀸𑀢𑀺 𑀆𑀳 ‘‘𑀤𑀻𑀖𑀤𑀡𑁆𑀟𑀓𑁂𑀦𑀸’’𑀢𑀺𑀆𑀤𑀺. 𑀖𑀝𑁂𑀦 𑀓𑀼𑀫𑁆𑀪𑁂𑀦 𑀓𑀻𑀴𑀸 𑀖𑀝𑀺𑀓𑀸𑀢𑀺 𑀏𑀓𑁂. 𑀫𑀜𑁆𑀚𑀺𑀝𑁆𑀞𑀺𑀓𑀸𑀬 𑀯𑀸𑀢𑀺 𑀫𑀜𑁆𑀚𑀺𑀝𑁆𑀞𑀺𑀲𑀗𑁆𑀔𑀸𑀢𑀲𑁆𑀲 𑀬𑁄𑀚𑀦𑀯𑀮𑁆𑀮𑀺𑀭𑀼𑀓𑁆𑀔𑀲𑁆𑀲 𑀲𑀸𑀭𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀓𑀲𑀸𑀯𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀺𑀢𑁆𑀣𑁄𑀤𑀓𑁂𑀦 𑀯𑀸𑀢𑀺 [𑀧𑀺𑀝𑁆𑀞𑁄𑀤𑀓𑁂𑀦 𑀯𑀸 (𑀅𑀝𑁆𑀞𑀓𑀣𑀸𑀬𑀁)] 𑀘 𑀧𑀓𑁆𑀓𑀫𑀥𑀼𑀲𑀺𑀢𑁆𑀣𑁄𑀤𑀓𑀁. 𑀲𑀮𑀸𑀓𑀳𑀢𑁆𑀣𑀦𑁆𑀢𑀺 𑀢𑀸𑀮𑀳𑀻𑀭𑀸𑀤𑀻𑀦𑀁 𑀓𑀮𑀸𑀧𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀩𑀳𑀽𑀲𑀼 𑀲𑀮𑀸𑀓𑀸𑀲𑀼 𑀯𑀺𑀲𑁂𑀲𑀭𑀳𑀺𑀢𑀁 𑀏𑀓𑀁 𑀲𑀮𑀸𑀓𑀁 𑀕𑀳𑁂𑀢𑁆𑀯𑀸 𑀢𑀸𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀢𑀜𑁆𑀜𑁂𑀯 𑀉𑀤𑁆𑀥𑀭𑀦𑁆𑀢𑀸 𑀲𑀮𑀸𑀓𑀳𑀢𑁆𑀣𑁂𑀦 𑀓𑀻𑀴𑀦𑁆𑀢𑀻𑀢𑀺 𑀓𑁂𑀘𑀺. 𑀕𑀼𑀴𑀓𑀻𑀴𑀸𑀢𑀺 𑀕𑀼𑀴𑀨𑀮𑀓𑀻𑀴𑀸, 𑀬𑁂𑀦 𑀓𑁂𑀦𑀘𑀺 𑀯𑀸 𑀓𑀢𑀕𑀼𑀴𑀓𑀻𑀴𑀸. 𑀧𑀡𑁆𑀡𑁂𑀦 𑀯𑀁𑀲𑀸𑀓𑀸𑀭𑁂𑀦 𑀓𑀢𑀸 𑀦𑀸𑀴𑀺𑀓𑀸 𑀧𑀡𑁆𑀡𑀦𑀸𑀴𑀺𑀓𑀸, 𑀢𑁂𑀦𑁂𑀯𑀸𑀳 ‘‘𑀢𑀁𑀥𑀫𑀦𑁆𑀢𑀸’’𑀢𑀺. 𑀔𑀼𑀤𑁆𑀤𑀓𑁂 𑀓-𑀧𑀘𑁆𑀘𑀬𑁄𑀢𑀺 ¶ 𑀤𑀲𑁆𑀲𑁂𑀢𑀺 ‘‘𑀔𑀼𑀤𑁆𑀤𑀓𑀦𑀗𑁆𑀕𑀮’’𑀦𑁆𑀢𑀺 𑀇𑀫𑀺𑀦𑀸. 𑀳𑀢𑁆𑀣𑀧𑀸𑀤𑀸𑀦𑀁 𑀫𑁄𑀓𑁆𑀔𑁂𑀦 𑀫𑁄𑀘𑀦𑁂𑀦 𑀘𑀬𑀢𑀺 𑀧𑀭𑀺𑀯𑀢𑁆𑀢𑀢𑀺 𑀏𑀢𑀸𑀬𑀸𑀢𑀺 𑀫𑁄𑀓𑁆𑀔𑀘𑀺𑀓𑀸, 𑀢𑁂𑀦𑀸𑀳 ‘‘𑀆𑀓𑀸𑀲𑁂 𑀯𑀸’’𑀢𑀺𑀆𑀤𑀺. 𑀧𑀭𑀺𑀩𑁆𑀪𑀫𑀦𑀢𑁆𑀢𑀸𑀬𑁂𑀯 𑀢𑀁 𑀘𑀓𑁆𑀓𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀺𑀩𑁆𑀪𑀫𑀦𑀘𑀓𑁆𑀓’’𑀦𑁆𑀢𑀺 𑀯𑀼𑀢𑁆𑀢𑀁.

𑀧𑀡𑁆𑀡𑁂𑀦 𑀓𑀢𑀸 𑀦𑀸𑀴𑀺 𑀧𑀡𑁆𑀡𑀦𑀸𑀴𑀺, 𑀇𑀫𑀺𑀦𑀸 𑀧𑀢𑁆𑀢𑀸𑀴𑁆𑀳𑀓𑀧𑀤𑀤𑁆𑀯𑀬𑀲𑁆𑀲 𑀬𑀣𑀸𑀓𑁆𑀓𑀫𑀁 𑀧𑀭𑀺𑀬𑀸𑀬𑀁 𑀤𑀲𑁆𑀲𑁂𑀢𑀺. 𑀢𑁂𑀦 𑀓𑀢𑀸 𑀧𑀦 𑀓𑀻𑀴𑀸 𑀧𑀢𑁆𑀢𑀸𑀴𑁆𑀳𑀓𑀸𑀢𑀺 𑀯𑀼𑀢𑁆𑀢𑀁 ‘‘𑀢𑀸𑀬𑀸’’𑀢𑀺𑀆𑀤𑀺. 𑀔𑀼𑀤𑁆𑀤𑀓𑁄 𑀭𑀣𑁄 𑀭𑀣𑀓𑁄 𑀓-𑀲𑀤𑁆𑀤𑀲𑁆𑀲 𑀔𑀼𑀤𑁆𑀤𑀓𑀢𑁆𑀣𑀯𑀘𑀦𑀢𑁄. 𑀏𑀲 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺. 𑀆𑀓𑀸𑀲𑁂 𑀯𑀸 𑀬𑀁 𑀜𑀸𑀧𑁂𑀢𑀺, 𑀢𑀲𑁆𑀲 𑀧𑀺𑀝𑁆𑀞𑀺𑀬𑀁 𑀯𑀸 𑀬𑀣𑀸 𑀯𑀸 𑀢𑀣𑀸 𑀯𑀸 𑀅𑀓𑁆𑀔𑀭𑀁 𑀮𑀺𑀔𑀺𑀢𑁆𑀯𑀸 ‘‘𑀏𑀯𑀫𑀺𑀤’’𑀦𑁆𑀢𑀺 𑀚𑀸𑀦𑀦𑁂𑀦 𑀓𑀻𑀴𑀸 𑀅𑀓𑁆𑀔𑀭𑀺𑀓𑀸, 𑀧𑀼𑀘𑁆𑀙𑀦𑁆𑀢𑀲𑁆𑀲 𑀫𑀼𑀔𑀸𑀕𑀢𑀁 𑀅𑀓𑁆𑀔𑀭𑀁 𑀕𑀳𑁂𑀢𑁆𑀯𑀸 𑀦𑀝𑁆𑀞𑀫𑀼𑀢𑁆𑀢𑀺𑀮𑀸𑀪𑀸𑀤𑀺𑀚𑀸𑀦𑀦𑀓𑀻𑀴𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀯𑀚𑁆𑀚-𑀲𑀤𑁆𑀤𑁄 𑀅𑀧𑀭𑀸𑀥𑀢𑁆𑀣𑁄𑀢𑀺 𑀆𑀳 ‘‘𑀬𑀣𑀸𑀯𑀚𑁆𑀚𑀁 𑀦𑀸𑀫𑀸’’𑀢𑀺𑀆𑀤𑀺. 𑀯𑀸𑀤𑀺𑀢𑀸𑀦𑀼𑀭𑀽𑀧𑀁 𑀦𑀘𑁆𑀘𑀦𑀁, 𑀕𑀸𑀬𑀦𑀁 𑀯𑀸 𑀬𑀣𑀸𑀯𑀚𑁆𑀚𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. ‘‘𑀏𑀯𑀁 𑀓𑀢𑁂 𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀏𑀯𑀁 𑀓𑀢𑁂 𑀧𑀭𑀸𑀚𑀬𑁄’’𑀢𑀺 𑀚𑀬𑀧𑀭𑀸𑀚𑀬𑀁 𑀧𑀼𑀭𑀓𑁆𑀔𑀢𑁆𑀯𑀸 𑀧𑀬𑁄𑀕𑀓𑀭𑀡𑀯𑀲𑁂𑀦 𑀧𑀭𑀺𑀳𑀸𑀭𑀧𑀣𑀸𑀤𑀻𑀦𑀫𑁆𑀧𑀺 𑀚𑀽𑀢𑀧𑁆𑀧𑀫𑀸𑀤𑀝𑁆𑀞𑀸𑀦𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀧𑀗𑁆𑀕𑀘𑀻𑀭𑀸𑀤𑀻𑀳𑀺 𑀘 𑀯𑀁𑀲𑀸𑀤𑀻𑀳𑀺 𑀓𑀢𑁆𑀢𑀩𑁆𑀩𑀸 𑀓𑀺𑀘𑁆𑀘𑀲𑀺𑀤𑁆𑀥𑀺, 𑀅𑀲𑀺𑀤𑁆𑀥𑀺 𑀘𑀸𑀢𑀺 𑀚𑀬𑀧𑀭𑀸𑀚𑀬𑀸𑀯𑀳𑁄 𑀧𑀬𑁄𑀕𑁄 𑀯𑀼𑀢𑁆𑀢𑁄, 𑀬𑀣𑀸𑀯𑀚𑁆𑀚𑀦𑁆𑀢𑀺 𑀘 𑀓𑀸𑀡𑀸𑀤𑀻𑀳𑀺 𑀲𑀤𑀺𑀲𑀸𑀓𑀸𑀭𑀤𑀲𑁆𑀲𑀦𑁂𑀳𑀺 𑀚𑀬𑀧𑀭𑀸𑀚𑀬𑀯𑀲𑁂𑀦 𑀚𑀽𑀢𑀓𑀻𑀴𑀺𑀓𑀪𑀸𑀯𑁂𑀦 𑀯𑀼𑀢𑁆𑀢𑀁. 𑀲𑀩𑁆𑀩𑁂𑀧𑀺 ¶ 𑀳𑁂𑀢𑁂 𑀚𑁄𑀢𑁂𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑀺 𑀏𑀢𑁂𑀳𑀺 𑀢𑀧𑁆𑀧𑀬𑁄𑀕𑀺𑀓𑀸 𑀚𑀬𑀧𑀭𑀸𑀚𑀬𑀯𑀲𑁂𑀦, 𑀚𑀯𑀦𑁆𑀢𑀺 𑀘 𑀕𑀘𑁆𑀙𑀦𑁆𑀢𑀺 𑀚𑀬𑀧𑀭𑀸𑀚𑀬𑀁 𑀏𑀢𑁂𑀳𑀻𑀢𑀺 𑀯𑀸 𑀅𑀢𑁆𑀣𑁂𑀦 𑀚𑀽𑀢𑀲𑀤𑁆𑀤𑀯𑀘𑀦𑀻𑀬𑀢𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺.

𑁧𑁫. 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀸𑀲𑀦𑀦𑁆𑀢𑀺 ‘‘𑀅𑀝𑁆𑀞𑀗𑁆𑀕𑀼𑀮𑀧𑀸𑀤𑀓𑀁 𑀓𑀸𑀭𑁂𑀢𑀩𑁆𑀩𑀁 𑀲𑀼𑀕𑀢𑀗𑁆𑀕𑀼𑀮𑁂𑀦𑀸’’𑀢𑀺 𑀯𑀼𑀢𑁆𑀢𑀧𑁆𑀧𑀫𑀸𑀡𑀢𑁄 𑀅𑀢𑀺𑀓𑁆𑀓𑀦𑁆𑀢𑀸𑀲𑀦𑀁. 𑀓𑀫𑁆𑀫𑀯𑀲𑁂𑀦 𑀧𑀬𑁄𑀚𑀦𑀢𑁄 ‘‘𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀻𑀢𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀯𑀸𑀴𑀭𑀽𑀧𑀸𑀦𑀻𑀢𑀺 𑀆𑀳𑀭𑀺𑀫𑀸𑀦𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀯𑀸𑀴𑀭𑀽𑀧𑀸𑀦𑀺. 𑀯𑀼𑀢𑁆𑀢𑀜𑁆𑀳𑀺 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂 ‘‘𑀧𑀮𑁆𑀮𑀗𑁆𑀓𑁄 𑀦𑀸𑀫 𑀆𑀳𑀭𑀺𑀫𑁂𑀳𑀺 𑀯𑀸𑀴𑁂𑀳𑀺 𑀓𑀢𑁄’’𑀢𑀺 (𑀧𑀸𑀘𑀺. 𑁯𑁮𑁪) ‘‘𑀅𑀓𑀧𑁆𑀧𑀺𑀬𑀭𑀽𑀧𑀸𑀓𑀼𑀮𑁄 𑀅𑀓𑀧𑁆𑀧𑀺𑀬𑀫𑀜𑁆𑀘𑁄 𑀧𑀮𑁆𑀮𑀗𑁆𑀓𑁄’’𑀢𑀺 𑀲𑀸𑀭𑀲𑀫𑀸𑀲𑁂 𑀯𑀼𑀢𑁆𑀢𑀁. 𑀤𑀻𑀖𑀮𑁄𑀫𑀓𑁄 𑀫𑀳𑀸𑀓𑁄𑀚𑀯𑁄𑀢𑀺 𑀘𑀢𑀼𑀭𑀗𑁆𑀕𑀼𑀮𑀸𑀥𑀺𑀓𑀮𑁄𑀫𑁄 𑀓𑀸𑀴𑀯𑀡𑁆𑀡𑁄 𑀫𑀳𑀸𑀓𑁄𑀚𑀯𑁄. 𑀓𑀼𑀯𑀼𑀘𑁆𑀘𑀢𑀺 𑀧𑀣𑀯𑀻, 𑀢𑀲𑁆𑀲𑀁 𑀚𑀯𑀢𑀺 𑀲𑁄𑀪𑀦𑀯𑀺𑀢𑁆𑀣𑀝𑀯𑀲𑁂𑀦𑀸𑀢𑀺 𑀓𑁄𑀚𑀯𑁄. ‘‘𑀘𑀢𑀼𑀭𑀗𑁆𑀕𑀼𑀮𑀸𑀥𑀺𑀓𑀸𑀦𑀺 𑀓𑀺𑀭 𑀢𑀲𑁆𑀲 𑀮𑁄𑀫𑀸𑀦𑀻’’𑀢𑀺 𑀯𑀘𑀦𑀢𑁄 𑀘𑀢𑀼𑀭𑀗𑁆𑀕𑀼𑀮𑀢𑁄 𑀳𑁂𑀝𑁆𑀞𑀸 ¶ 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀉𑀤𑁆𑀤𑀮𑁄𑀫𑀻 𑀏𑀓𑀦𑁆𑀢𑀮𑁄𑀫𑀻𑀢𑀺 𑀯𑀺𑀲𑁂𑀲𑀤𑀲𑁆𑀲𑀦𑀫𑁂𑀢𑀁, 𑀢𑀲𑁆𑀫𑀸 𑀬𑀤𑀺 𑀢𑀸𑀲𑀼 𑀦 𑀧𑀯𑀺𑀲𑀢𑀺, 𑀯𑀝𑁆𑀝𑀢𑀻𑀢𑀺 𑀕𑀳𑁂𑀢𑀩𑁆𑀩𑀁. 𑀯𑀸𑀦𑀯𑀺𑀘𑀺𑀢𑁆𑀢𑀦𑁆𑀢𑀺 𑀪𑀺𑀢𑁆𑀢𑀺𑀘𑁆𑀙𑀤𑀸𑀤𑀺𑀆𑀓𑀸𑀭𑁂𑀦 𑀯𑀸𑀦𑁂𑀦 𑀲𑀺𑀩𑁆𑀩𑀦𑁂𑀦 𑀯𑀺𑀘𑀺𑀢𑁆𑀭𑀁. 𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑀦𑁆𑀢𑀺 𑀫𑀺𑀕𑀮𑁄𑀫𑀧𑀓𑀢𑀫𑀢𑁆𑀣𑀭𑀡𑀁. 𑀲𑁂𑀢𑀢𑁆𑀣𑀭𑀡𑁄𑀢𑀺 𑀥𑀯𑀮𑀢𑁆𑀣𑀭𑀡𑁄. 𑀲𑀻𑀢𑀢𑁆𑀣𑀺𑀓𑁂𑀳𑀺 𑀲𑁂𑀯𑀺𑀢𑀩𑁆𑀩𑀢𑁆𑀢𑀸 𑀲𑁂𑀢𑀢𑁆𑀣𑀭𑀡𑁄, ‘‘𑀩𑀳𑀼𑀫𑀼𑀤𑀼𑀮𑁄𑀫𑀓𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀖𑀦𑀧𑀼𑀧𑁆𑀨𑀓𑁄𑀢𑀺 𑀲𑀩𑁆𑀩𑀣𑀸 𑀧𑀼𑀧𑁆𑀨𑀸𑀓𑀸𑀭𑀲𑀫𑁆𑀧𑀦𑁆𑀦𑁄. ‘‘𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑁄𑀢𑀺 𑀉𑀡𑁆𑀡𑀸𑀫𑀬𑁄 𑀮𑁄𑀳𑀺𑀢𑀢𑁆𑀣𑀭𑀡𑁄’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨𑁫𑁮) 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀯𑀼𑀢𑁆𑀢𑀁. 𑀆𑀫𑀮𑀓𑀧𑀢𑁆𑀢𑀸𑀓𑀸𑀭𑀸𑀳𑀺 𑀧𑀼𑀧𑁆𑀨𑀧𑀦𑁆𑀢𑀻𑀳𑀺 𑀬𑁂𑀪𑀼𑀬𑁆𑀬𑀢𑁄 𑀓𑀢𑀢𑁆𑀢𑀸 𑀆𑀫𑀮𑀓𑀧𑀢𑁆𑀢𑁄𑀢𑀺𑀧𑀺 𑀯𑀼𑀘𑁆𑀘𑀢𑀺.

𑀢𑀺𑀡𑁆𑀡𑀁 𑀢𑀽𑀮𑀸𑀦𑀦𑁆𑀢𑀺 𑀭𑀼𑀓𑁆𑀔𑀢𑀽𑀮𑀮𑀢𑀸𑀢𑀽𑀮𑀧𑁄𑀝𑀓𑀻𑀢𑀽𑀮𑀲𑀗𑁆𑀔𑀸𑀢𑀸𑀦𑀁 𑀢𑀺𑀡𑁆𑀡𑀁 𑀢𑀽𑀮𑀸𑀦𑀁. 𑀉𑀤𑀺𑀢𑀁 𑀤𑁆𑀯𑀻𑀲𑀼 𑀮𑁄𑀫𑀁 𑀤𑀲𑀸 𑀬𑀲𑁆𑀲𑀸𑀢𑀺 𑀉𑀤𑁆𑀤𑀮𑁄𑀫𑀻 𑀇-𑀓𑀸𑀭𑀲𑁆𑀲 𑀅𑀓𑀸𑀭𑀁, 𑀢-𑀓𑀸𑀭𑀲𑁆𑀲 𑀮𑁄𑀧𑀁, 𑀤𑁆𑀯𑀺𑀪𑀸𑀯𑀜𑁆𑀘 𑀓𑀢𑁆𑀯𑀸. 𑀏𑀓𑀲𑁆𑀫𑀺𑀁 𑀅𑀦𑁆𑀢𑁂 𑀮𑁄𑀫𑀁 𑀤𑀲𑀸 𑀬𑀲𑁆𑀲𑀸𑀢𑀺 𑀏𑀓𑀦𑁆𑀢𑀮𑁄𑀫𑀻. 𑀉𑀪𑀬𑀢𑁆𑀣 𑀓𑁂𑀘𑀻𑀢𑀺 𑀲𑀸𑀭𑀲𑀫𑀸𑀲𑀸𑀘𑀭𑀺𑀬𑀸, 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄 𑀘. 𑀢𑁂𑀲𑀁 𑀯𑀸𑀤𑁂 𑀧𑀦 𑀉𑀤𑀺𑀢𑀫𑁂𑀓𑀢𑁄 𑀉𑀕𑁆𑀕𑀢𑀁 𑀮𑁄𑀫𑀫𑀬𑀁 𑀧𑀼𑀧𑁆𑀨𑀁 𑀬𑀲𑁆𑀲𑀸𑀢𑀺 𑀉𑀤𑁆𑀤𑀮𑁄𑀫𑀻 𑀯𑀼𑀢𑁆𑀢𑀦𑀬𑁂𑀦. 𑀉𑀪𑀢𑁄 𑀅𑀦𑁆𑀢𑀢𑁄 𑀏𑀓𑀁 𑀲𑀤𑀺𑀲𑀁 𑀮𑁄𑀫𑀫𑀬𑀁 𑀧𑀼𑀧𑁆𑀨𑀁 𑀬𑀲𑁆𑀲𑀸𑀢𑀺 𑀏𑀓𑀦𑁆𑀢𑀮𑁄𑀫𑀻𑀢𑀺 𑀯𑀘𑀦𑀢𑁆𑀣𑁄. 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀉𑀤𑁆𑀤𑀮𑁄𑀫𑀻𑀢𑀺 𑀏𑀓𑀢𑁄 𑀉𑀕𑁆𑀕𑀢𑀮𑁄𑀫𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡𑀁. ‘𑀉𑀤𑁆𑀥𑀮𑁄𑀫𑀻’𑀢𑀺𑀧𑀺 𑀧𑀸𑀞𑁄. 𑀏𑀓𑀦𑁆𑀢𑀮𑁄𑀫𑀻𑀢𑀺 𑀉𑀪𑀢𑁄 𑀉𑀕𑁆𑀕𑀢𑀮𑁄𑀫𑀁 𑀉𑀡𑁆𑀡𑀸𑀫𑀬𑀢𑁆𑀣𑀭𑀡’’𑀦𑁆𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁫𑁪) 𑀯𑀼𑀢𑁆𑀢𑀁, 𑀦𑀸𑀫𑀫𑀢𑁆𑀢𑀫𑁂𑀲 𑀯𑀺𑀲𑁂𑀲𑁄. 𑀅𑀢𑁆𑀣𑀢𑁄 𑀧𑀦 𑀅𑀕𑁆𑀕𑀳𑀺𑀢𑀸𑀯𑀲𑁂𑀲𑁄 𑀅𑀝𑁆𑀞𑀓𑀣𑀸𑀤𑁆𑀯𑀬𑁂𑀧𑀺 𑀦𑀢𑁆𑀣𑀻𑀢𑀺 𑀤𑀝𑁆𑀞𑀩𑁆𑀩𑁄.

𑀓𑁄𑀲𑁂𑀬𑁆𑀬𑀜𑁆𑀘 𑀓𑀝𑁆𑀝𑀺𑀲𑁆𑀲𑀜𑁆𑀘 𑀓𑀝𑁆𑀝𑀺𑀲𑁆𑀲𑀸𑀦𑀺 𑀯𑀺𑀭𑀽𑀧𑁂𑀓𑀲𑁂𑀲𑀯𑀲𑁂𑀦. 𑀢𑁂𑀳𑀺 𑀧𑀓𑀢𑀫𑀢𑁆𑀣𑀭𑀡𑀁 𑀓𑀝𑁆𑀝𑀺𑀲𑁆𑀲𑀁. 𑀏𑀢𑀤𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀓𑁄𑀲𑁂𑀬𑁆𑀬𑀓𑀝𑁆𑀝𑀺𑀲𑁆𑀲𑀫𑀬𑀧𑀘𑁆𑀘𑀢𑁆𑀣𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁, 𑀓𑁄𑀲𑁂𑀬𑁆𑀬𑀲𑀼𑀢𑁆𑀢𑀸𑀦𑀫𑀦𑁆𑀢𑀭𑀦𑁆𑀢𑀭𑀁 𑀲𑀼𑀯𑀡𑁆𑀡𑀫𑀬𑀲𑀼𑀢𑁆𑀢𑀸𑀦𑀺 𑀧𑀯𑁂𑀲𑁂𑀢𑁆𑀯𑀸 𑀯𑀻𑀢𑀫𑀢𑁆𑀣𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀼𑀯𑀡𑁆𑀡𑀲𑀼𑀢𑁆𑀢𑀁 𑀓𑀺𑀭 ‘‘𑀓𑀝𑁆𑀝𑀺𑀲𑁆𑀲𑀁, 𑀓𑀲𑁆𑀲𑀝’’𑀦𑁆𑀢𑀺 ¶ 𑀘 𑀯𑀤𑀦𑁆𑀢𑀺. 𑀢𑁂𑀦𑁂𑀯 ‘‘𑀓𑁄𑀲𑁂𑀬𑁆𑀬𑀓𑀲𑁆𑀲𑀝𑀫𑀬’’𑀦𑁆𑀢𑀺 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 (𑀤𑀻. 𑀦𑀺. 𑀝𑀻. 𑁧.𑁧𑁫) 𑀯𑀼𑀢𑁆𑀢𑀁. 𑀓𑀝𑁆𑀝𑀺𑀲𑁆𑀲𑀁 𑀦𑀸𑀫 𑀯𑀸𑀓𑀯𑀺𑀲𑁂𑀲𑁄𑀢𑀺𑀧𑀺 𑀯𑀤𑀦𑁆𑀢𑀺. 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀦𑁆𑀢𑀺 𑀭𑀢𑀦𑁂𑀳𑀺 𑀲𑀁𑀲𑀺𑀩𑁆𑀩𑀺𑀢𑀁, 𑀲𑀼𑀯𑀡𑁆𑀡𑀮𑀺𑀢𑁆𑀢𑀦𑁆𑀢𑀺 𑀓𑁂𑀘𑀺. 𑀲𑀼𑀤𑁆𑀥𑀓𑁄𑀲𑁂𑀬𑁆𑀬𑀦𑁆𑀢𑀺 𑀭𑀢𑀦𑀧𑀭𑀺𑀲𑀺𑀩𑁆𑀩𑀦𑀭𑀳𑀺𑀢𑀁. 𑀯𑀺𑀦𑀬𑁂𑀢𑀺 𑀯𑀺𑀦𑀬𑀝𑁆𑀞𑀓𑀣𑀁, 𑀯𑀺𑀦𑀬𑀧𑀭𑀺𑀬𑀸𑀬𑀁 𑀯𑀸 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀥 𑀳𑀺 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂 ‘‘𑀞𑀧𑁂𑀢𑁆𑀯𑀸 𑀢𑀽𑀮𑀺𑀓𑀁 𑀲𑀩𑁆𑀩𑀸𑀦𑁂𑀯 𑀕𑁄𑀦𑀓𑀸𑀤𑀻𑀦𑀺 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀸𑀦𑀺 𑀯𑀝𑁆𑀝𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀯𑀺𑀦𑀬𑀧𑀭𑀺𑀬𑀸𑀬𑀁 𑀧𑀦 𑀧𑀢𑁆𑀯𑀸 𑀕𑀭𑀼𑀓𑁂 ¶ 𑀞𑀸𑀢𑀩𑁆𑀩𑀢𑁆𑀢𑀸 𑀲𑀼𑀤𑁆𑀥𑀓𑁄𑀲𑁂𑀬𑁆𑀬𑀫𑁂𑀯 𑀯𑀝𑁆𑀝𑀢𑀺, 𑀦𑁂𑀢𑀭𑀸𑀦𑀻𑀢𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄, 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂 𑀧𑀦 𑀭𑀢𑀦𑀧𑀭𑀺𑀲𑀺𑀩𑁆𑀩𑀦𑀭𑀳𑀺𑀢𑀸𑀧𑀺 𑀢𑀽𑀮𑀺𑀓𑀸 𑀦 𑀯𑀝𑁆𑀝𑀢𑀺, 𑀇𑀢𑀭𑀸𑀦𑀺 𑀯𑀝𑁆𑀝𑀦𑁆𑀢𑀺, 𑀲𑀘𑁂𑀧𑀺 𑀢𑀸𑀦𑀺 𑀭𑀢𑀦𑀧𑀭𑀺𑀲𑀺𑀩𑁆𑀩𑀺𑀢𑀸𑀦𑀺, 𑀪𑀽𑀫𑀢𑁆𑀣𑀭𑀡𑀯𑀲𑁂𑀦 𑀬𑀣𑀸𑀦𑀼𑀭𑀽𑀧𑀁 𑀫𑀜𑁆𑀘𑀧𑀻𑀞𑀸𑀤𑀻𑀲𑀼 𑀘 𑀉𑀧𑀦𑁂𑀢𑀼𑀁 𑀯𑀝𑁆𑀝𑀦𑁆𑀢𑀻𑀢𑀺. 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 𑀕𑀳𑀝𑁆𑀞𑀸𑀦𑀫𑁆𑀧𑀺 𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀢𑁂𑀲𑀁 𑀲𑀗𑁆𑀕𑀡𑁆𑀳𑀦𑀢𑁆𑀣𑀁 ‘‘𑀞𑀧𑁂𑀢𑁆𑀯𑀸…𑀧𑁂… 𑀦 𑀯𑀝𑁆𑀝𑀦𑁆𑀢𑀻𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀅𑀧𑀭𑁂. 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀦𑁆𑀢𑀺 𑀓𑀢𑁆𑀣𑀘𑀺 𑀧𑀸𑀞𑁄, 𑀧𑁄𑀭𑀸𑀡𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀦𑀘𑁆𑀘𑀬𑁄𑀕𑁆𑀕𑀦𑁆𑀢𑀺 𑀦𑀘𑁆𑀘𑀺𑀢𑀼𑀁 𑀧𑀳𑁄𑀦𑀓𑀁. 𑀓𑀭𑁄𑀦𑁆𑀢𑀺 𑀏𑀢𑁆𑀣 𑀦𑀘𑁆𑀘𑀦𑁆𑀢𑀺 𑀓𑀼𑀢𑁆𑀢𑀓𑀁, 𑀢𑀁 𑀧𑀦 𑀉𑀤𑁆𑀤𑀮𑁄𑀫𑀻𑀏𑀓𑀦𑁆𑀢𑀮𑁄𑀫𑀻𑀯𑀺𑀲𑁂𑀲𑀫𑁂𑀯. 𑀯𑀼𑀢𑁆𑀢𑀜𑁆𑀘 𑁋

‘‘𑀤𑁆𑀯𑀺𑀤𑀲𑁂𑀓𑀤𑀲𑀸𑀦𑁆𑀬𑀼𑀤𑁆𑀤-𑀮𑁄𑀫𑀻𑀏𑀓𑀦𑁆𑀢𑀮𑁄𑀫𑀺𑀦𑁄;

𑀢𑀤𑁂𑀯 𑀲𑁄𑀴𑀲𑀺𑀢𑁆𑀣𑀻𑀦𑀁, 𑀦𑀘𑁆𑀘𑀬𑁄𑀕𑁆𑀕𑀜𑁆𑀳𑀺 𑀓𑀼𑀢𑁆𑀢𑀓’’𑀦𑁆𑀢𑀺.

𑀳𑀢𑁆𑀣𑀺𑀦𑁄 𑀧𑀺𑀝𑁆𑀞𑀺𑀬𑀁 𑀅𑀢𑁆𑀣𑀭𑀁 𑀳𑀢𑁆𑀣𑀢𑁆𑀣𑀭𑀁. 𑀏𑀯𑀁 𑀲𑁂𑀲𑀧𑀤𑁂𑀲𑀼𑀧𑀺. 𑀅𑀚𑀺𑀦𑀘𑀫𑁆𑀫𑁂𑀳𑀻𑀢𑀺 𑀅𑀚𑀺𑀦𑀫𑀺𑀕𑀘𑀫𑁆𑀫𑁂𑀳𑀺, 𑀢𑀸𑀦𑀺 𑀓𑀺𑀭 𑀘𑀫𑁆𑀫𑀸𑀦𑀺 𑀲𑀼𑀔𑀼𑀫𑀢𑀭𑀸𑀦𑀺, 𑀢𑀲𑁆𑀫𑀸 𑀤𑀼𑀧𑀝𑁆𑀝𑀢𑀺𑀧𑀝𑁆𑀝𑀸𑀦𑀺 𑀓𑀢𑁆𑀯𑀸 𑀲𑀺𑀩𑁆𑀩𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀚𑀺𑀦𑀧𑁆𑀧𑀯𑁂𑀡𑀻’’𑀢𑀺, 𑀉𑀧𑀭𑀽𑀧𑀭𑀺 𑀞𑀧𑁂𑀢𑁆𑀯𑀸 𑀲𑀺𑀩𑁆𑀩𑀦𑀯𑀲𑁂𑀦 𑀳𑀺 𑀲𑀦𑁆𑀢𑀢𑀺𑀪𑀽𑀢𑀸 ‘‘𑀧𑀯𑁂𑀡𑀻’’𑀢𑀺 𑀯𑀼𑀘𑁆𑀘𑀢𑀺. 𑀓𑀤𑀮𑀻𑀫𑀺𑀕𑁄𑀢𑀺 𑀫𑀜𑁆𑀚𑀸𑀭𑀸𑀓𑀸𑀭𑀫𑀺𑀕𑁄, 𑀢𑀲𑁆𑀲 𑀥𑀫𑁆𑀫𑁂𑀦 𑀓𑀢𑀁 𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀁 𑀢𑀣𑀸. ‘‘𑀢𑀁 𑀓𑀺𑀭𑀸’’𑀢𑀺𑀆𑀤𑀺 𑀢𑀤𑀸𑀓𑀸𑀭𑀤𑀲𑁆𑀲𑀦𑀁, 𑀢𑀲𑁆𑀫𑀸 𑀲𑀼𑀤𑁆𑀥𑀫𑁂𑀯 𑀓𑀤𑀮𑀻𑀫𑀺𑀕𑀘𑀫𑁆𑀫𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀉𑀢𑁆𑀢𑀭𑀁 𑀉𑀧𑀭𑀺𑀪𑀸𑀕𑀁 𑀙𑀸𑀤𑁂𑀢𑀻𑀢𑀺 𑀉𑀢𑁆𑀢𑀭𑀘𑁆𑀙𑀤𑁄, 𑀯𑀺𑀢𑀸𑀦𑀁. 𑀢𑀫𑁆𑀧𑀺 𑀮𑁄𑀳𑀺𑀢𑀫𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀭𑀢𑁆𑀢𑀯𑀺𑀢𑀸𑀦𑁂𑀦𑀸’’𑀢𑀺. ‘‘𑀬𑀁 𑀯𑀢𑁆𑀢𑀢𑀺, 𑀢𑀁 𑀲𑀉𑀢𑁆𑀢𑀭𑀘𑁆𑀙𑁂𑀤’’𑀦𑁆𑀢𑀺 𑀏𑀢𑁆𑀣 𑀲𑁂𑀲𑁄, 𑀲𑀁𑀲𑀺𑀩𑁆𑀩𑀺𑀢𑀪𑀸𑀯𑁂𑀦 𑀲𑀤𑁆𑀥𑀺𑀁 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀭𑀢𑁆𑀢𑀯𑀺𑀢𑀸𑀦𑁂𑀲𑀼 𑀘 𑀓𑀸𑀲𑀸𑀯𑀁 𑀯𑀝𑁆𑀝𑀢𑀺, 𑀓𑀼𑀲𑀼𑀫𑁆𑀪𑀸𑀤𑀺𑀭𑀢𑁆𑀢𑀫𑁂𑀯 𑀦 𑀯𑀝𑁆𑀝𑀢𑀺, 𑀢𑀜𑁆𑀘 𑀔𑁄 𑀲𑀩𑁆𑀩𑀭𑀢𑁆𑀢𑀫𑁂𑀯. 𑀬𑀁 𑀧𑀦 𑀦𑀸𑀦𑀸𑀯𑀡𑁆𑀡𑀁 𑀯𑀸𑀦𑀘𑀺𑀢𑁆𑀢𑀁 𑀯𑀸 𑀮𑁂𑀧𑀘𑀺𑀢𑁆𑀢𑀁 𑀯𑀸, 𑀢𑀁 𑀯𑀝𑁆𑀝𑀢𑀺. 𑀧𑀘𑁆𑀘𑀢𑁆𑀣𑀭𑀡𑀲𑁆𑀲𑁂𑀯 𑀧𑀥𑀸𑀦𑀢𑁆𑀢𑀸 𑀢𑀧𑁆𑀧𑀝𑀺𑀩𑀤𑁆𑀥𑀁 𑀲𑁂𑀢𑀯𑀺𑀢𑀸𑀦𑀫𑁆𑀧𑀺 𑀦 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁. 𑀉𑀪𑀢𑁄𑀢𑀺 𑀉𑀪𑀬𑀢𑁆𑀣 𑀫𑀜𑁆𑀘𑀲𑁆𑀲 𑀲𑀻𑀲𑀪𑀸𑀕𑁂, 𑀧𑀸𑀤𑀪𑀸𑀕𑁂 𑀘𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀧𑀺 𑀲𑀉𑀢𑁆𑀢𑀭𑀘𑁆𑀙𑀤𑁂 𑀯𑀺𑀬 𑀯𑀺𑀦𑀺𑀘𑁆𑀙𑀬𑁄. 𑀧𑀤𑀼𑀫𑀯𑀡𑁆𑀡𑀁 𑀯𑀸𑀢𑀺 𑀦𑀸𑀢𑀺𑀭𑀢𑁆𑀢𑀁 𑀲𑀦𑁆𑀥𑀸𑀬𑀸𑀳. 𑀯𑀺𑀘𑀺𑀢𑁆𑀭𑀁 𑀯𑀸𑀢𑀺 𑀧𑀦 𑀲𑀩𑁆𑀩𑀣𑀸 𑀓𑀧𑁆𑀧𑀺𑀬𑀢𑁆𑀢𑀸 𑀯𑀼𑀢𑁆𑀢𑀁, 𑀦 𑀧𑀦 𑀉𑀪𑀢𑁄 𑀉𑀧𑀥𑀸𑀦𑁂𑀲𑀼 𑀅𑀓𑀧𑁆𑀧𑀺𑀬𑀢𑁆𑀢𑀸. 𑀦 𑀳𑀺 𑀮𑁄𑀳𑀺𑀢𑀓-𑀲𑀤𑁆𑀤𑁄 𑀘𑀺𑀢𑁆𑀢𑁂 𑀯𑀝𑁆𑀝𑀢𑀺. 𑀧𑀝𑀮𑀺𑀓𑀕𑁆𑀕𑀳𑀡𑁂𑀦𑁂𑀯 𑀘𑀺𑀢𑁆𑀢𑀓𑀲𑁆𑀲𑀸𑀧𑀺 𑀅𑀢𑁆𑀣𑀭𑀡𑀲𑁆𑀲 𑀲𑀗𑁆𑀕𑀳𑁂𑀢𑀩𑁆𑀩𑀧𑁆𑀧𑀲𑀗𑁆𑀕𑀢𑁄. 𑀲𑀘𑁂 𑀧𑀫𑀸𑀡𑀬𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀢𑁄 𑀲𑀫𑀢𑁆𑀣𑁂𑀢𑀼𑀁 ¶ 𑀆𑀳 ‘‘𑀫𑀳𑀸𑀉𑀧𑀥𑀸𑀦𑀁 𑀧𑀦 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺. 𑀫𑀳𑀸𑀉𑀧𑀥𑀸𑀦𑀦𑁆𑀢𑀺 𑀘 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀉𑀧𑀥𑀸𑀦𑀁. 𑀲𑀻𑀲𑀧𑁆𑀧𑀫𑀸𑀡𑀫𑁂𑀯 𑀳𑀺 𑀢𑀲𑁆𑀲 𑀧𑀫𑀸𑀡𑀁. 𑀯𑀼𑀢𑁆𑀢𑀜𑁆𑀘 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂, 𑀲𑀻𑀲𑀧𑁆𑀧𑀫𑀸𑀡𑀁 ¶ 𑀩𑀺𑀩𑁆𑀩𑁄𑀳𑀦𑀁 𑀓𑀸𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁯𑁭) 𑀲𑀻𑀲𑀧𑁆𑀧𑀫𑀸𑀡𑀜𑁆𑀘 𑀦𑀸𑀫 𑀬𑀲𑁆𑀲 𑀯𑀺𑀢𑁆𑀣𑀸𑀭𑀢𑁄 𑀢𑀻𑀲𑀼 𑀓𑀡𑁆𑀡𑁂𑀲𑀼 𑀤𑁆𑀯𑀺𑀦𑁆𑀦𑀁 𑀓𑀡𑁆𑀡𑀸𑀦𑀁 𑀅𑀦𑁆𑀢𑀭𑀁 𑀫𑀺𑀦𑀺𑀬𑀫𑀸𑀦𑀁 𑀯𑀺𑀤𑀢𑁆𑀣𑀺 𑀘𑁂𑀯 𑀘𑀢𑀼𑀭𑀗𑁆𑀕𑀼𑀮𑀜𑁆𑀘 𑀳𑁄𑀢𑀺. 𑀩𑀺𑀩𑁆𑀩𑁄𑀳𑀦𑀲𑁆𑀲 𑀫𑀚𑁆𑀛𑀝𑁆𑀞𑀸𑀦𑀁 𑀢𑀺𑀭𑀺𑀬𑀢𑁄 𑀫𑀼𑀝𑁆𑀞𑀺𑀭𑀢𑀦𑀁 𑀳𑁄𑀢𑀺, 𑀤𑀻𑀖𑀢𑁄 𑀧𑀦 𑀤𑀺𑀬𑀟𑁆𑀠𑀭𑀢𑀦𑀁 𑀯𑀸 𑀤𑁆𑀯𑀺𑀭𑀢𑀦𑀁 𑀯𑀸. 𑀢𑀁 𑀧𑀦 𑀅𑀓𑀧𑁆𑀧𑀺𑀬𑀢𑁆𑀢𑀸𑀬𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀦 𑀢𑀼 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸. 𑀤𑁆𑀯𑁂𑀧𑀻𑀢𑀺 𑀲𑀻𑀲𑀽𑀧𑀥𑀸𑀦𑀁, 𑀧𑀸𑀤𑀽𑀧𑀥𑀸𑀦𑀜𑁆𑀘. 𑀧𑀘𑁆𑀘𑀢𑁆𑀣𑀭𑀡𑀁 𑀤𑀢𑁆𑀯𑀸𑀢𑀺 𑀧𑀘𑁆𑀘𑀢𑁆𑀣𑀭𑀡𑀁 𑀓𑀢𑁆𑀯𑀸 𑀅𑀢𑁆𑀣𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄, 𑀇𑀤𑀜𑁆𑀘 𑀕𑀺𑀮𑀸𑀦𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬𑀁 ‘‘𑀅𑀕𑀺𑀮𑀸𑀦𑀲𑁆𑀲𑀸𑀧𑀺 𑀲𑀻𑀲𑀽𑀧𑀥𑀸𑀦𑀜𑁆𑀘 𑀧𑀸𑀤𑀽𑀧𑀥𑀸𑀦𑀜𑁆𑀘𑀸𑀢𑀺 𑀤𑁆𑀯𑀬𑀫𑁂𑀯 𑀯𑀝𑁆𑀝𑀢𑀺. 𑀕𑀺𑀮𑀸𑀦𑀲𑁆𑀲 𑀩𑀺𑀩𑁆𑀩𑁄𑀳𑀦𑀸𑀦𑀺 𑀲𑀦𑁆𑀣𑀭𑀺𑀢𑁆𑀯𑀸 𑀉𑀧𑀭𑀺 𑀧𑀘𑁆𑀘𑀢𑁆𑀣𑀭𑀡𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁨𑁯𑁭) 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀯𑀺𑀦𑀬𑁂 𑀪𑀕𑀯𑀢𑀸 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀓𑀣𑀁 𑀧𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺. 𑀬𑀣𑀸 𑀅𑀝𑁆𑀞𑀗𑁆𑀕𑀼𑀮𑀧𑀸𑀤𑀓𑀁 𑀳𑁄𑀢𑀺, 𑀏𑀯𑀁 𑀆𑀲𑀦𑁆𑀤𑀺𑀬𑀸 𑀧𑀸𑀤𑀘𑁆𑀙𑀺𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀮𑁆𑀮𑀗𑁆𑀓𑀲𑁆𑀲 𑀧𑀦 𑀆𑀳𑀭𑀺𑀫𑀸𑀦𑀺 𑀯𑀸𑀴𑀭𑀽𑀧𑀸𑀦𑀺 𑀆𑀳𑀭𑀺𑀢𑁆𑀯𑀸 𑀧𑀼𑀦 𑀅𑀧𑁆𑀧𑀝𑀺𑀩𑀤𑁆𑀥𑀢𑀸𑀓𑀸𑀭𑀡𑀫𑁆𑀧𑀺 𑀪𑁂𑀤𑀦𑀫𑁂𑀯. 𑀯𑀺𑀚𑀝𑁂𑀢𑁆𑀯𑀸𑀢𑀺 𑀚𑀝𑀁 𑀦𑀺𑀩𑁆𑀩𑁂𑀥𑁂𑀢𑁆𑀯𑀸. 𑀩𑀺𑀩𑁆𑀩𑁄𑀳𑀦𑀁 𑀓𑀸𑀢𑀼𑀦𑁆𑀢𑀺 𑀢𑀸𑀦𑀺 𑀯𑀺𑀚𑀝𑀺𑀢𑀢𑀽𑀮𑀸𑀦𑀺 𑀅𑀦𑁆𑀢𑁄 𑀧𑀓𑁆𑀔𑀺𑀧𑀺𑀢𑁆𑀯𑀸 𑀩𑀺𑀩𑁆𑀩𑁄𑀳𑀦𑀁 𑀓𑀸𑀢𑀼𑀁.

𑁧𑁬. ‘‘𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀤𑀸𑀭𑀓𑀸𑀦’’𑀦𑁆𑀢𑀺 𑀏𑀢𑁂𑀦 𑀅𑀡𑁆𑀟𑀚𑀚𑀮𑀸𑀩𑀼𑀚𑀸𑀦𑀫𑁂𑀯 𑀕𑀳𑀡𑀁, 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸𑀢𑀺 𑀘 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺, 𑀢𑁂𑀦𑁂𑀯𑀸𑀬𑀫𑀢𑁆𑀣𑁄 𑀲𑀺𑀚𑁆𑀛𑀢𑀺 ‘‘𑀅𑀦𑁂𑀓𑀤𑀺𑀯𑀲𑀸𑀦𑀺 𑀅𑀦𑁆𑀢𑁄𑀲𑀬𑀦𑀳𑁂𑀢𑀼 𑀏𑀲 𑀕𑀦𑁆𑀥𑁄’’𑀢𑀺. 𑀉𑀘𑁆𑀙𑀸𑀤𑁂𑀦𑁆𑀢𑀺 𑀉𑀩𑁆𑀩𑀝𑁆𑀝𑁂𑀦𑁆𑀢𑀺. 𑀲𑀡𑁆𑀞𑀸𑀦𑀲𑀫𑁆𑀧𑀸𑀤𑀦𑀢𑁆𑀣𑀦𑁆𑀢𑀺 𑀲𑀼𑀲𑀡𑁆𑀞𑀸𑀦𑀢𑀸𑀲𑀫𑁆𑀧𑀸𑀤𑀦𑀢𑁆𑀣𑀁. 𑀧𑀭𑀺𑀫𑀤𑁆𑀤𑀦𑁆𑀢𑀻𑀢𑀺 𑀲𑀫𑀦𑁆𑀢𑀢𑁄 𑀫𑀤𑁆𑀤𑀦𑁆𑀢𑀺.

𑀢𑁂𑀲𑀁𑀬𑁂𑀯 𑀤𑀸𑀭𑀓𑀸𑀦𑀦𑁆𑀢𑀺 𑀧𑀼𑀜𑁆𑀜𑀯𑀦𑁆𑀢𑀸𑀦𑀫𑁂𑀯 𑀤𑀸𑀭𑀓𑀸𑀦𑀁. 𑀢𑁂𑀲𑀫𑁂𑀯 𑀳𑀺 𑀧𑀓𑀭𑀡𑀸𑀦𑀼𑀭𑀽𑀧𑀢𑀸𑀬 𑀕𑀳𑀡𑀁. 𑀫𑀳𑀸𑀫𑀮𑁆𑀮𑀸𑀦𑀦𑁆𑀢𑀺 𑀫𑀳𑀢𑀁 𑀩𑀸𑀳𑀼𑀬𑀼𑀤𑁆𑀥𑀓𑀸𑀭𑀓𑀸𑀦𑀁. 𑀆𑀤𑀸𑀲𑁄 𑀦𑀸𑀫 𑀫𑀡𑁆𑀟𑀦𑀓𑀧𑀓𑀢𑀺𑀓𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀅𑀢𑁆𑀢𑀦𑁄 𑀫𑀼𑀔𑀙𑀸𑀬𑀸𑀧𑀲𑁆𑀲𑀦𑀢𑁆𑀣𑀁 𑀓𑀁𑀲𑀮𑁄𑀳𑀸𑀤𑀻𑀳𑀺 𑀓𑀢𑁄 𑀪𑀡𑁆𑀟𑀯𑀺𑀲𑁂𑀲𑁄. 𑀢𑀸𑀤𑀺𑀲𑀁 𑀲𑀦𑁆𑀥𑀸𑀬 ‘‘𑀬𑀁 𑀓𑀺𑀜𑁆𑀘𑀺…𑀧𑁂… 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀮𑀗𑁆𑀓𑀸𑀭𑀜𑁆𑀚𑀦𑀫𑁂𑀯 𑀦 𑀪𑁂𑀲𑀚𑁆𑀚𑀜𑁆𑀚𑀦𑀁. 𑀫𑀡𑁆𑀟𑀦𑀸𑀦𑀼𑀬𑁄𑀕𑀲𑁆𑀲 𑀳𑀺 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀢𑀫𑀺𑀥𑀸𑀦𑀥𑀺𑀧𑁆𑀧𑁂𑀢𑀁. 𑀮𑁄𑀓𑁂 𑀫𑀸𑀮𑀸-𑀲𑀤𑁆𑀤𑁄 𑀩𑀤𑁆𑀥𑀫𑀸𑀮𑀸𑀬𑀫𑁂𑀯 ‘‘𑀫𑀸𑀮𑀸 𑀫𑀸𑀮𑁆𑀬𑀁 𑀧𑀼𑀧𑁆𑀨𑀤𑀸𑀫𑁂’’𑀢𑀺 𑀯𑀘𑀦𑀢𑁄. 𑀲𑀸𑀲𑀦𑁂 𑀧𑀦 𑀲𑀼𑀤𑁆𑀥𑀧𑀼𑀧𑁆𑀨𑁂𑀲𑀼𑀧𑀺 𑀦𑀺𑀭𑀼𑀴𑁆𑀳𑁄𑀢𑀺 𑀆𑀳 ‘‘𑀅𑀩𑀤𑁆𑀥𑀫𑀸𑀮𑀸 𑀯𑀸’’𑀢𑀺. 𑀓𑀸𑀴𑀧𑀻𑀴𑀓𑀸𑀤𑀻𑀦𑀦𑁆𑀢𑀺 𑀓𑀸𑀴𑀯𑀡𑁆𑀡𑀧𑀻𑀴𑀓𑀸𑀤𑀻𑀦𑀁. 𑀫𑀢𑁆𑀢𑀺𑀓𑀓𑀓𑁆𑀓𑀦𑁆𑀢𑀺 𑀑𑀲𑀥𑁂𑀳𑀺 𑀅𑀪𑀺𑀲𑀗𑁆𑀔𑀢𑀁 𑀬𑁄𑀕𑀫𑀢𑁆𑀢𑀺𑀓𑀸𑀘𑀼𑀡𑁆𑀡𑀁. 𑀤𑁂𑀦𑁆𑀢𑀻𑀢𑀺 𑀯𑀺𑀮𑁂𑀧𑁂𑀦𑁆𑀢𑀺. 𑀘𑀮𑀺𑀢𑁂𑀢𑀺 𑀯𑀺𑀓𑀸𑀭𑀸𑀧𑀚𑁆𑀚𑀦𑀯𑀲𑁂𑀦 𑀘𑀮𑀦𑀁 𑀧𑀢𑁆𑀢𑁂 ¶ , 𑀓𑀼𑀧𑀺𑀢𑁂𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀢𑀺 𑀲𑀸𑀲𑀧𑀓𑀓𑁆𑀓𑁂𑀦. 𑀤𑁄𑀲𑁂𑀢𑀺 𑀓𑀸𑀴𑀧𑀻𑀴𑀓𑀸𑀤𑀻𑀦𑀁 𑀳𑁂𑀢𑀼𑀪𑀽𑀢𑁂 𑀮𑁄𑀳𑀺𑀢𑀤𑁄𑀲𑁂. 𑀔𑀸𑀤𑀺𑀢𑁂𑀢𑀺 𑀅𑀧𑀦𑀬𑀦𑀯𑀲𑁂𑀦 𑀔𑀸𑀤𑀺𑀢𑁂. 𑀲𑀦𑁆𑀦𑀺𑀲𑀺𑀦𑁆𑀦𑁂𑀢𑀺 𑀢𑀸𑀤𑀺𑀲𑁂 𑀤𑀼𑀝𑁆𑀞𑀮𑁄𑀳𑀺𑀢𑁂 𑀧𑀭𑀺𑀓𑁆𑀔𑀻𑀡𑁂. 𑀫𑀼𑀔𑀘𑀼𑀡𑁆𑀡𑀓𑁂𑀦𑀸𑀢𑀺 𑀫𑀼𑀔𑀯𑀺𑀮𑁂𑀧𑀦𑁂𑀦 ¶ . 𑀘𑀼𑀡𑁆𑀡𑁂𑀦𑁆𑀢𑀻𑀢𑀺 𑀯𑀺𑀮𑀺𑀫𑁆𑀧𑁂𑀦𑁆𑀢𑀺. 𑀢𑀁 𑀲𑀩𑁆𑀩𑀦𑁆𑀢𑀺 𑀫𑀢𑁆𑀢𑀺𑀓𑀸𑀓𑀓𑁆𑀓𑀲𑀸𑀲𑀧𑀢𑀺𑀮𑀳𑀮𑀺𑀤𑁆𑀤𑀺𑀓𑀓𑁆𑀓𑀤𑀸𑀦𑀲𑀗𑁆𑀔𑀸𑀢𑀁 𑀫𑀼𑀔𑀘𑀼𑀡𑁆𑀡𑀁, 𑀫𑀼𑀔𑀯𑀺𑀮𑁂𑀧𑀦𑀜𑁆𑀘 𑀦 𑀯𑀝𑁆𑀝𑀢𑀺. 𑀅𑀢𑁆𑀣𑀸𑀦𑀼𑀓𑁆𑀓𑀫𑀲𑀫𑁆𑀪𑀯𑀢𑁄 𑀳𑀺 𑀅𑀬𑀁 𑀧𑀤𑀤𑁆𑀯𑀬𑀲𑁆𑀲 𑀯𑀡𑁆𑀡𑀦𑀸. 𑀫𑀼𑀔𑀘𑀼𑀡𑁆𑀡𑀲𑀗𑁆𑀔𑀸𑀢𑀁 𑀫𑀼𑀔𑀯𑀺𑀮𑁂𑀧𑀦𑀦𑁆𑀢𑀺 𑀯𑀸 𑀧𑀤𑀤𑁆𑀯𑀬𑀲𑁆𑀲 𑀢𑀼𑀮𑁆𑀬𑀸𑀥𑀺𑀓𑀭𑀡𑀯𑀲𑁂𑀦 𑀅𑀢𑁆𑀣𑀯𑀺𑀪𑀸𑀯𑀦𑀸.

𑀳𑀢𑁆𑀣𑀩𑀦𑁆𑀥𑀦𑁆𑀢𑀺 𑀳𑀢𑁆𑀣𑁂 𑀩𑀦𑁆𑀥𑀺𑀢𑀩𑁆𑀩𑀫𑀸𑀪𑀭𑀡𑀁, 𑀢𑀁 𑀧𑀦 𑀲𑀗𑁆𑀔𑀓𑀧𑀸𑀮𑀸𑀤𑀬𑁄𑀢𑀺 𑀆𑀳 ‘‘𑀳𑀢𑁆𑀣𑁂’’𑀢𑀺𑀆𑀤𑀺. 𑀲𑀗𑁆𑀔𑁄 𑀏𑀯 𑀓𑀧𑀸𑀮𑀁 𑀢𑀣𑀸. ‘‘𑀅𑀧𑀭𑁂’’𑀢𑀺𑀆𑀤𑀺𑀦𑀸 𑀬𑀣𑀸𑀓𑁆𑀓𑀫𑀁 ‘‘𑀲𑀺𑀔𑀸𑀩𑀦𑁆𑀥’’𑀦𑁆𑀢𑀺𑀆𑀤𑀺 𑀧𑀤𑀸𑀦𑀫𑀢𑁆𑀣𑀁 𑀲𑀁𑀯𑀡𑁆𑀡𑁂𑀢𑀺. 𑀢𑀢𑁆𑀣 𑀲𑀺𑀔𑀦𑁆𑀢𑀺 𑀘𑀽𑀴𑀁. 𑀘𑀻𑀭𑀓𑀁 𑀦𑀸𑀫 𑀬𑁂𑀦 𑀘𑀽𑀴𑀸𑀬 𑀣𑀺𑀭𑀓𑀭𑀡𑀢𑁆𑀣𑀁, 𑀲𑁄𑀪𑀦𑀢𑁆𑀣𑀜𑁆𑀘 𑀯𑀺𑀚𑁆𑀛𑀢𑀺. 𑀫𑀼𑀢𑁆𑀢𑀸𑀬, 𑀫𑀼𑀢𑁆𑀢𑀸 𑀏𑀯 𑀯𑀸 𑀮𑀢𑀸 𑀫𑀼𑀢𑁆𑀢𑀸𑀮𑀢𑀸, 𑀫𑀼𑀢𑁆𑀢𑀸𑀯𑀴𑀺. 𑀤𑀡𑁆𑀟𑁄 𑀦𑀸𑀫 𑀘𑀢𑀼𑀳𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 ‘‘𑀘𑀢𑀼𑀳𑀢𑁆𑀣𑀤𑀡𑁆𑀟𑀁 𑀯𑀸’’𑀢𑀺. 𑀅𑀮𑀗𑁆𑀓𑀢𑀤𑀡𑁆𑀟𑀓𑀦𑁆𑀢𑀺 𑀧𑀦 𑀢𑀢𑁄 𑀑𑀫𑀓𑀁 𑀭𑀣𑀬𑀝𑁆𑀞𑀺𑀆𑀤𑀺𑀓𑀁 𑀲𑀦𑁆𑀥𑀸𑀬𑀸𑀳. 𑀪𑁂𑀲𑀚𑁆𑀚𑀦𑀸𑀴𑀺𑀓𑀦𑁆𑀢𑀺 𑀪𑁂𑀲𑀚𑁆𑀚𑀢𑀼𑀫𑁆𑀩𑀁. 𑀧𑀢𑁆𑀢𑀸𑀤𑀺𑀑𑀮𑀫𑁆𑀩𑀦𑀁 𑀯𑀸𑀫𑀁𑀲𑁂𑀬𑁂𑀯 𑀅𑀘𑀺𑀡𑁆𑀡𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀯𑀸𑀫𑀧𑀲𑁆𑀲𑁂 𑀑𑀮𑀕𑁆𑀕𑀺𑀢’’𑀦𑁆𑀢𑀺. 𑀓𑀡𑁆𑀡𑀺𑀓𑀸 𑀦𑀸𑀫 𑀓𑀽𑀝𑀁, 𑀢𑀸𑀬 𑀘 𑀭𑀢𑀦𑁂𑀦 𑀘 𑀧𑀭𑀺𑀓𑁆𑀔𑀺𑀢𑁆𑀢𑁄 𑀓𑁄𑀲𑁄 𑀬𑀲𑁆𑀲 𑀢𑀣𑀸. 𑀧𑀜𑁆𑀘𑀯𑀡𑁆𑀡𑀲𑀼𑀢𑁆𑀢𑀲𑀺𑀩𑁆𑀩𑀺𑀢𑀦𑁆𑀢𑀺 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀫𑀜𑁆𑀚𑀺𑀝𑁆𑀞𑀯𑀲𑁂𑀦 𑀧𑀜𑁆𑀘𑀯𑀡𑁆𑀡𑁂𑀳𑀺 𑀲𑀼𑀢𑁆𑀢𑁂𑀳𑀺 𑀲𑀺𑀩𑁆𑀩𑀺𑀢𑀁 𑀢𑀺𑀯𑀺𑀥𑀫𑁆𑀧𑀺 𑀙𑀢𑁆𑀢𑀁. 𑀭𑀢𑀦𑀫𑀢𑁆𑀢𑀸𑀬𑀸𑀫𑀁 𑀘𑀢𑀼𑀭𑀗𑁆𑀕𑀼𑀮𑀯𑀺𑀢𑁆𑀣𑀢𑀦𑁆𑀢𑀺 𑀢𑁂𑀲𑀁 𑀧𑀭𑀺𑀘𑀬𑀦𑀺𑀬𑀸𑀫𑁂𑀦 𑀯𑀸 𑀦𑀮𑀸𑀝𑁂 𑀩𑀦𑁆𑀥𑀺𑀢𑀼𑀁 𑀧𑀳𑁄𑀦𑀓𑀧𑁆𑀧𑀫𑀸𑀡𑁂𑀦 𑀯𑀸 𑀯𑀼𑀢𑁆𑀢𑀁. ‘‘𑀓𑁂𑀲𑀦𑁆𑀢𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑁆𑀯𑀸’’𑀢𑀺 𑀏𑀢𑁂𑀦 𑀢𑀤𑀦𑀚𑁆𑀛𑁄𑀢𑁆𑀣𑀭𑀡𑀯𑀲𑁂𑀦 𑀩𑀦𑁆𑀥𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀫𑁂𑀖𑀫𑀼𑀔𑁂𑀢𑀺 𑀅𑀩𑁆𑀪𑀦𑁆𑀢𑀭𑁂. ‘‘𑀫𑀡𑀺’’𑀦𑁆𑀢𑀺 𑀇𑀤𑀁 𑀲𑀺𑀭𑁄𑀫𑀡𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀘𑀽𑀴𑀸𑀫𑀡𑀺’’𑀦𑁆𑀢𑀺, 𑀘𑀽𑀴𑀸𑀬𑀁 𑀫𑀡𑀺𑀦𑁆𑀢𑀺 𑀅𑀢𑁆𑀣𑁄. 𑀘𑀫𑀭𑀲𑁆𑀲 𑀅𑀬𑀁 𑀘𑀸𑀫𑀭𑁄, 𑀲𑁆𑀯𑁂𑀯 𑀯𑀸𑀮𑁄, 𑀢𑁂𑀦 𑀓𑀢𑀸 𑀩𑀻𑀚𑀦𑀻 𑀘𑀸𑀫𑀭𑀯𑀸𑀮𑀩𑀻𑀚𑀦𑀻. 𑀅𑀜𑁆𑀜𑀸𑀲𑀁 𑀧𑀦 𑀫𑀓𑀲𑀩𑀻𑀚𑀦𑀻𑀯𑀸𑀓𑀫𑀬𑀩𑀻𑀚𑀦𑀻𑀉𑀲𑀻𑀭𑀫𑀬𑀩𑀻𑀚𑀦𑀻𑀫𑁄𑀭𑀧𑀺𑀜𑁆𑀙𑀫𑀬𑀩𑀻𑀚𑀦𑀻𑀦𑀁, 𑀯𑀺𑀥𑀽𑀧𑀦𑀢𑀸𑀮𑀯𑀡𑁆𑀝𑀸𑀦𑀜𑁆𑀘 𑀓𑀧𑁆𑀧𑀺𑀬𑀢𑁆𑀢𑀸 𑀢𑀲𑁆𑀲𑀸𑀬𑁂𑀯 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁.

𑁧𑁭. 𑀤𑀼𑀕𑁆𑀕𑀢𑀺𑀢𑁄, 𑀲𑀁𑀲𑀸𑀭𑀢𑁄 𑀘 𑀦𑀺𑀬𑁆𑀬𑀸𑀢𑀺 𑀏𑀢𑁂𑀦𑀸𑀢𑀺 𑀦𑀺𑀬𑁆𑀬𑀸𑀦𑀁, 𑀲𑀕𑁆𑀕𑀫𑀕𑁆𑀕𑁄, 𑀫𑁄𑀓𑁆𑀔𑀫𑀕𑁆𑀕𑁄 𑀘. 𑀢𑀁 𑀦𑀺𑀬𑁆𑀬𑀸𑀦𑀫𑀭𑀳𑀢𑀺, 𑀢𑀲𑁆𑀫𑀺𑀁 𑀯𑀸 𑀦𑀺𑀬𑁆𑀬𑀸𑀦𑁂 𑀦𑀺𑀬𑀼𑀢𑁆𑀢𑀸, 𑀢𑀁 𑀯𑀸 𑀦𑀺𑀬𑁆𑀬𑀸𑀦𑀁 𑀨𑀮𑀪𑀽𑀢𑀁 𑀏𑀢𑀺𑀲𑁆𑀲𑀸𑀢𑀺 𑀦𑀺𑀬𑁆𑀬𑀸𑀦𑀺𑀓𑀸, 𑀯𑀘𑀻𑀤𑀼𑀘𑁆𑀘𑀭𑀺𑀢𑀓𑀺𑀮𑁂𑀲𑀢𑁄 𑀦𑀺𑀬𑁆𑀬𑀸𑀢𑀻𑀢𑀺 𑀯𑀸 𑀦𑀺𑀬𑁆𑀬𑀸𑀦𑀺𑀓𑀸 𑀈-𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁, 𑀬-𑀓𑀸𑀭𑀲𑁆𑀲 𑀘 𑀓-𑀓𑀸𑀭𑀁 ¶ 𑀓𑀢𑁆𑀯𑀸. 𑀅𑀦𑀻𑀬-𑀲𑀤𑁆𑀤𑁄 𑀳𑀺 𑀩𑀳𑀼𑀮𑀸 𑀓𑀢𑁆𑀯𑀢𑁆𑀣𑀸𑀪𑀺𑀥𑀸𑀬𑀓𑁄. 𑀘𑁂𑀢𑀦𑀸𑀬 𑀲𑀤𑁆𑀥𑀺𑀁 𑀲𑀫𑁆𑀨𑀧𑁆𑀧𑀮𑀸𑀧𑀯𑀺𑀭𑀢𑀺 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀦𑀺𑀬𑁆𑀬𑀸𑀦𑀺𑀓𑀸, 𑀲𑀫𑁆𑀨𑀧𑁆𑀧𑀮𑀸𑀧𑁄, 𑀢𑀲𑁆𑀲𑀸 𑀪𑀸𑀯𑁄 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀁, 𑀢𑀲𑁆𑀫𑀸 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸. 𑀢𑀺𑀭𑀘𑁆𑀙𑀸𑀦𑀪𑀽𑀢𑀸𑀢𑀺 𑀢𑀺𑀭𑁄𑀓𑀭𑀡𑀪𑀽𑀢𑀸 𑀯𑀺𑀩𑀦𑁆𑀥𑀦𑀪𑀽𑀢𑀸. 𑀲𑁄𑀧𑀺 𑀦𑀸𑀫𑀸𑀢𑀺 𑀏𑀢𑁆𑀣 𑀦𑀸𑀫-𑀲𑀤𑁆𑀤𑁄 𑀕𑀭𑀳𑀸𑀬𑀁. 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑁂𑀢𑀺 𑀅𑀦𑀺𑀘𑁆𑀘𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀢𑁆𑀢𑀸 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑁂. 𑀓𑀸𑀫𑀲𑁆𑀲𑀸𑀤𑀯𑀲𑁂𑀦𑀸𑀢𑀺 𑀓𑀸𑀫𑀲𑀗𑁆𑀔𑀸𑀢𑀅𑀲𑁆𑀲𑀸𑀤𑀯𑀲𑁂𑀦. 𑀲𑀳 𑀅𑀢𑁆𑀣𑁂𑀦𑀸𑀢𑀺 𑀲𑀸𑀢𑁆𑀣𑀓𑀁, 𑀳𑀺𑀢𑀧𑀝𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀉𑀧𑀸𑀳𑀦𑀸𑀢𑀺 𑀬𑀸𑀦𑀓𑀣𑀸𑀲𑀫𑁆𑀩𑀦𑁆𑀥𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀼𑀝𑁆𑀞𑀼 𑀦𑀺𑀯𑁂𑀲𑀺𑀢𑀩𑁆𑀩𑁄𑀢𑀺 𑀲𑀼𑀦𑀺𑀯𑀺𑀝𑁆𑀞𑁄. 𑀢𑀣𑀸 𑀤𑀼𑀦𑁆𑀦𑀺𑀯𑀺𑀝𑁆𑀞𑁄. 𑀕𑀸𑀫-𑀲𑀤𑁆𑀤𑁂𑀦 𑀕𑀸𑀫𑀯𑀸𑀲𑀻 𑀚𑀦𑁄𑀧𑀺 𑀕𑀳𑀺𑀢𑁄𑀢𑀺 𑀆𑀳 ‘‘𑀅𑀲𑀼𑀓𑀕𑀸𑀫𑀯𑀸𑀲𑀺𑀦𑁄’’𑀢𑀺𑀆𑀤𑀺.

𑀲𑀽𑀭𑀓𑀣𑀸𑀢𑀺 ¶ 𑀏𑀢𑁆𑀣 𑀲𑀽𑀭-𑀲𑀤𑁆𑀤𑁄 𑀯𑀻𑀭𑀯𑀸𑀘𑀓𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀲𑀽𑀭𑁄 𑀅𑀳𑁄𑀲𑀻’’𑀢𑀺 𑀇𑀫𑀺𑀦𑀸. 𑀯𑀺𑀲𑀺𑀔𑀸 𑀦𑀸𑀫 𑀫𑀕𑁆𑀕𑀲𑀦𑁆𑀦𑀺𑀯𑁂𑀲𑁄, 𑀇𑀥 𑀧𑀦 𑀯𑀺𑀲𑀺𑀔𑀸𑀕𑀳𑀡𑁂𑀦 𑀢𑀦𑁆𑀦𑀺𑀯𑀸𑀲𑀺𑀦𑁄𑀧𑀺 𑀕𑀳𑀺𑀢𑀸 ‘‘𑀲𑀩𑁆𑀩𑁄 𑀕𑀸𑀫𑁄 𑀆𑀕𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬, 𑀢𑁂𑀦𑁂𑀯𑀸𑀳 ‘‘𑀲𑀤𑁆𑀥𑀸 𑀧𑀲𑀦𑁆𑀦𑀸’’𑀢𑀺𑀆𑀤𑀺.

𑀓𑀼𑀫𑁆𑀪𑀲𑁆𑀲 𑀞𑀸𑀦𑀁 𑀦𑀸𑀫 𑀉𑀤𑀓𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀉𑀤𑀓𑀝𑁆𑀞𑀸𑀦𑀓𑀣𑀸’’𑀢𑀺. 𑀉𑀤𑀓𑀢𑀺𑀢𑁆𑀣𑀓𑀣𑀸𑀢𑀺𑀧𑀺 𑀯𑀼𑀘𑁆𑀘𑀢𑀺 𑀢𑀢𑁆𑀣𑁂𑀯 𑀲𑀫𑀯𑀭𑁄𑀥𑀢𑁄. 𑀅𑀧𑀺𑀘 𑀓𑀼𑀫𑁆𑀪𑀲𑁆𑀲 𑀓𑀭𑀡𑀝𑁆𑀞𑀸𑀦𑀁 𑀓𑀼𑀫𑁆𑀪𑀝𑁆𑀞𑀸𑀦𑀁. 𑀢𑀤𑀧𑀤𑁂𑀲𑁂𑀦 𑀧𑀦 𑀓𑀼𑀫𑁆𑀪𑀤𑀸𑀲𑀺𑀬𑁄 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀓𑀼𑀫𑁆𑀪𑀤𑀸𑀲𑀺𑀓𑀣𑀸 𑀯𑀸’’𑀢𑀺 𑀇𑀫𑀺𑀦𑀸. 𑀧𑀼𑀩𑁆𑀩𑁂 𑀧𑁂𑀢𑀸 𑀓𑀸𑀮𑀗𑁆𑀓𑀢𑀸𑀢𑀺 𑀧𑀼𑀩𑁆𑀩𑀧𑁂𑀢𑀸. ‘‘𑀧𑁂𑀢𑁄 𑀧𑀭𑁂𑀢𑁄 𑀓𑀸𑀮𑀗𑁆𑀓𑀢𑁄’’𑀢𑀺 𑀳𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑀢𑀺𑀤𑀺𑀲𑀺𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑀣𑀸𑀳𑀺 𑀯𑀺𑀫𑀼𑀢𑁆𑀢𑀸𑀢𑀺 𑀇𑀥𑀸𑀕𑀢𑀸𑀳𑀺 𑀧𑀼𑀭𑀺𑀫𑀸𑀳𑀺, 𑀧𑀘𑁆𑀙𑀺𑀫𑀸𑀳𑀺 𑀘 𑀓𑀣𑀸𑀳𑀺 𑀯𑀺𑀫𑀼𑀢𑁆𑀢𑀸. 𑀦𑀸𑀦𑀸𑀲𑀪𑀸𑀯𑀸𑀢𑀺 𑀅𑀢𑁆𑀢-𑀲𑀤𑁆𑀤𑀲𑁆𑀲 𑀲𑀪𑀸𑀯𑀧𑀭𑀺𑀬𑀸𑀬𑀪𑀸𑀯𑀫𑀸𑀳. 𑀅𑀲𑀼𑀓𑁂𑀦 𑀦𑀸𑀫𑀸𑀢𑀺 𑀧𑀚𑀸𑀧𑀢𑀺𑀦𑀸 𑀩𑁆𑀭𑀳𑁆𑀫𑀼𑀦𑀸, 𑀇𑀲𑁆𑀲𑀭𑁂𑀦 𑀯𑀸. 𑀉𑀧𑁆𑀧𑀢𑁆𑀢𑀺𑀞𑀺𑀢𑀺𑀲𑀫𑁆𑀪𑀸𑀭𑀸𑀤𑀺𑀯𑀲𑁂𑀦 𑀮𑁄𑀓𑀁 𑀅𑀓𑁆𑀔𑀸𑀬𑀢𑀺 𑀏𑀢𑀸𑀬𑀸𑀢𑀺 𑀮𑁄𑀓𑀓𑁆𑀔𑀸𑀬𑀺𑀓𑀸, 𑀲𑀸 𑀧𑀦 𑀮𑁄𑀓𑀸𑀬𑀢𑀲𑀫𑀜𑁆𑀜𑁂 𑀯𑀺𑀢𑀡𑁆𑀟𑀲𑀢𑁆𑀣𑁂 𑀦𑀺𑀲𑁆𑀲𑀺𑀢𑀸 𑀲𑀮𑁆𑀮𑀸𑀧𑀓𑀣𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀮𑁄𑀓𑀸𑀬𑀢𑀯𑀺𑀢𑀡𑁆𑀟𑀲𑀮𑁆𑀮𑀸𑀧𑀓𑀣𑀸’’𑀢𑀺 𑀇𑀫𑀺𑀦𑀸. 𑀮𑁄𑀓𑀸 𑀩𑀸𑀮𑀚𑀦𑀸 𑀆𑀬𑀢𑀦𑁆𑀢𑀺 𑀏𑀢𑁆𑀣 𑀉𑀲𑁆𑀲𑀳𑀦𑁆𑀢𑀺 𑀯𑀸𑀤𑀲𑁆𑀲𑀸𑀤𑁂𑀦𑀸𑀢𑀺 𑀮𑁄𑀓𑀸𑀬𑀢𑀁, 𑀮𑁄𑀓𑁄 𑀯𑀸 𑀳𑀺𑀢𑀁 𑀦 𑀬𑀢𑀢𑀺 𑀦 𑀈𑀳𑀢𑀺 𑀢𑁂𑀦𑀸𑀢𑀺 𑀮𑁄𑀓𑀸𑀬𑀢𑀁. 𑀢𑀜𑁆𑀳𑀺 𑀕𑀦𑁆𑀣𑀁 𑀦𑀺𑀲𑁆𑀲𑀸𑀬 𑀲𑀢𑁆𑀢𑀸 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀦𑁆𑀢𑀺 ¶ . 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀁, 𑀲𑀕𑁆𑀕𑀫𑁄𑀓𑁆𑀔𑀯𑀺𑀭𑀼𑀤𑁆𑀥𑀁 𑀯𑀸 𑀓𑀣𑀁 𑀢𑀦𑁄𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀺𑀢𑀡𑁆𑀟𑁄, 𑀯𑀺𑀭𑀼𑀤𑁆𑀥𑁂𑀦 𑀯𑀸 𑀯𑀸𑀤𑀤𑀡𑁆𑀟𑁂𑀦 𑀢𑀸𑀴𑁂𑀦𑁆𑀢𑀺 𑀏𑀢𑁆𑀣 𑀯𑀸𑀤𑀺𑀦𑁄𑀢𑀺 𑀯𑀺𑀢𑀡𑁆𑀟𑁄, 𑀲𑀩𑁆𑀩𑀢𑁆𑀣 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑀤𑀲𑀺𑀤𑁆𑀥𑀺.

𑀲𑀸𑀕𑀭𑀤𑁂𑀯𑁂𑀦 𑀔𑀢𑁄𑀢𑀺 𑀏𑀢𑁆𑀣 𑀲𑀸𑀕𑀭𑀭𑀜𑁆𑀜𑁄 𑀧𑀼𑀢𑁆𑀢𑁂𑀳𑀺 𑀔𑀢𑁄𑀢𑀺𑀧𑀺 𑀯𑀤𑀦𑁆𑀢𑀺. 𑀯𑀺𑀚𑁆𑀚𑀢𑀺 𑀧𑀯𑁂𑀤𑀦𑀳𑁂𑀢𑀼𑀪𑀽𑀢𑀸 𑀫𑀼𑀤𑁆𑀥𑀸 𑀬𑀲𑁆𑀲𑀸𑀢𑀺 𑀲𑀫𑀼𑀤𑁆𑀤𑁄 𑀥-𑀓𑀸𑀭𑀲𑁆𑀲 𑀤-𑀓𑀸𑀭𑀁 𑀓𑀢𑁆𑀯𑀸, 𑀲𑀳-𑀲𑀤𑁆𑀤𑁄 𑀘𑁂𑀢𑁆𑀣 𑀯𑀺𑀚𑁆𑀚𑀫𑀸𑀦𑀢𑁆𑀣𑀯𑀸𑀘𑀓𑁄 ‘‘𑀲𑀮𑁄𑀫𑀓𑁄𑀲𑀧𑀓𑁆𑀔𑀓𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀪𑀯𑁄𑀢𑀺 𑀯𑀼𑀤𑁆𑀥𑀺 𑀪𑀯𑀢𑀺 𑀯𑀟𑁆𑀠𑀢𑀻𑀢𑀺 𑀓𑀢𑁆𑀯𑀸. 𑀯𑀺𑀪𑀯𑁄𑀢𑀺 𑀳𑀸𑀦𑀺 𑀢𑀩𑁆𑀩𑀺𑀭𑀳𑀢𑁄. 𑀤𑁆𑀯𑀦𑁆𑀤𑀢𑁄 𑀧𑀼𑀩𑁆𑀩𑁂 𑀲𑀼𑀬𑁆𑀬𑀫𑀸𑀦𑁄 𑀇𑀢𑀺𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀇𑀢𑀺 𑀪𑀯𑁄 𑀇𑀢𑀺 𑀅𑀪𑀯𑁄’’𑀢𑀺. 𑀬𑀁 𑀯𑀸 𑀢𑀁 𑀯𑀸𑀢𑀺 𑀬𑀁 𑀓𑀺𑀜𑁆𑀘𑀺, 𑀅𑀣 𑀢𑀁 𑀅𑀦𑀺𑀬𑀫𑀦𑁆𑀢𑀺 𑀅𑀢𑁆𑀣𑁄. 𑀅𑀪𑀽𑀢𑀜𑁆𑀳𑀺 𑀅𑀦𑀺𑀬𑀫𑀢𑁆𑀣𑀁 𑀲𑀳 𑀯𑀺𑀓𑀧𑁆𑀧𑁂𑀦 𑀬𑀁𑀢𑀁-𑀲𑀤𑁆𑀤𑁂𑀳𑀺 𑀤𑀻𑀧𑁂𑀦𑁆𑀢𑀺 𑀆𑀘𑀭𑀺𑀬𑀸. 𑀅𑀧𑀺𑀘 𑀪𑀯𑁄𑀢𑀺 𑀲𑀲𑁆𑀲𑀢𑁄. 𑀅𑀪𑀯𑁄𑀢𑀺 𑀉𑀘𑁆𑀙𑁂𑀤𑁄. 𑀪𑀯𑁄𑀢𑀺 𑀯𑀸 𑀓𑀸𑀫𑀲𑀼𑀔𑀁. 𑀅𑀪𑀯𑁄𑀢𑀺 𑀅𑀢𑁆𑀢𑀓𑀺𑀮𑀫𑀣𑁄.

𑀇𑀢𑀺 𑀇𑀫𑀸𑀬 𑀙𑀩𑁆𑀩𑀺𑀥𑀸𑀬 𑀇𑀢𑀺𑀪𑀯𑀸𑀪𑀯𑀓𑀣𑀸𑀬 𑀲𑀤𑁆𑀥𑀺𑀁 𑀩𑀸𑀢𑁆𑀢𑀺𑀁𑀲 𑀢𑀺𑀭𑀘𑁆𑀙𑀸𑀦𑀓𑀣𑀸 𑀦𑀸𑀫 𑀳𑁄𑀦𑁆𑀢𑀺. 𑀅𑀣 ¶ 𑀯𑀸 𑀧𑀸𑀴𑀺𑀬𑀁 𑀲𑀭𑀽𑀧𑀢𑁄 𑀅𑀦𑀸𑀕𑀢𑀸𑀧𑀺 𑀅𑀭𑀜𑁆𑀜𑀧𑀩𑁆𑀩𑀢𑀦𑀤𑀻𑀤𑀻𑀧𑀓𑀣𑀸 𑀇𑀢𑀺-𑀲𑀤𑁆𑀤𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀩𑀢𑁆𑀢𑀺𑀁𑀲 𑀢𑀺𑀭𑀘𑁆𑀙𑀸𑀦𑀓𑀣𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀸𑀴𑀺𑀬𑀜𑁆𑀳𑀺 ‘‘𑀇𑀢𑀺 𑀯𑀸’’𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀧𑀓𑀸𑀭𑀢𑁆𑀣𑁄, 𑀯𑀸-𑀲𑀤𑁆𑀤𑁄 𑀯𑀺𑀓𑀧𑁆𑀧𑀦𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀏𑀯𑀁𑀧𑀓𑀸𑀭𑀁, 𑀇𑀢𑁄 𑀅𑀜𑁆𑀜𑀁 𑀯𑀸 𑀢𑀸𑀤𑀺𑀲𑀁 𑀦𑀺𑀭𑀢𑁆𑀣𑀓𑀓𑀣𑀁 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀻’’𑀢𑀺, 𑀆𑀤𑀺𑀅𑀢𑁆𑀣𑁄 𑀯𑀸 𑀇𑀢𑀺-𑀲𑀤𑁆𑀤𑁄 𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸 ‘‘𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀸 𑀧𑀝𑀺𑀯𑀺𑀭𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁦, 𑁧𑁬𑁪; 𑀫. 𑀦𑀺. 𑁧.𑁨𑁯𑁩, 𑁪𑁧𑁧; 𑁨.𑁧𑁧, 𑁪𑁧𑁮; 𑁩.𑁧𑁪, 𑁧𑁦𑁨; 𑀅. 𑀦𑀺. 𑁧𑁦.𑁯𑁯) 𑀯𑀺𑀬, 𑀇𑀢𑀺 𑀏𑀯𑀫𑀸𑀤𑀺𑀁 𑀅𑀜𑁆𑀜𑀫𑁆𑀧𑀺 𑀢𑀸𑀤𑀺𑀲𑀁 𑀓𑀣𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁮. 𑀯𑀺𑀭𑀼𑀤𑁆𑀥𑀲𑁆𑀲 𑀕𑀳𑀡𑀁 𑀯𑀺𑀕𑁆𑀕𑀳𑁄, 𑀲𑁄 𑀬𑁂𑀲𑀦𑁆𑀢𑀺 𑀯𑀺𑀕𑁆𑀕𑀸𑀳𑀺𑀓𑀸, 𑀢𑁂𑀲𑀁 𑀢𑀣𑀸, 𑀯𑀺𑀭𑀼𑀤𑁆𑀥𑀁 𑀯𑀸 𑀕𑀡𑁆𑀳𑀸𑀢𑀺 𑀏𑀢𑀸𑀬𑀸𑀢𑀺 𑀯𑀺𑀕𑁆𑀕𑀸𑀳𑀺𑀓𑀸, 𑀲𑀸𑀬𑁂𑀯 𑀓𑀣𑀸 𑀢𑀣𑀸. 𑀲𑀸𑀭𑀫𑁆𑀪𑀓𑀣𑀸𑀢𑀺 𑀉𑀧𑀸𑀭𑀫𑁆𑀪𑀓𑀣𑀸. 𑀲𑀳𑀺𑀢𑀦𑁆𑀢𑀺 𑀧𑀼𑀩𑁆𑀩𑀸𑀧𑀭𑀸𑀯𑀺𑀭𑀼𑀤𑁆𑀥𑀁. 𑀢𑀢𑁄𑀬𑁂𑀯 𑀲𑀺𑀮𑀺𑀝𑁆𑀞𑀁. 𑀢𑀁 𑀧𑀦 𑀅𑀢𑁆𑀣𑀓𑀸𑀭𑀡𑀬𑀼𑀢𑁆𑀢𑀢𑀸𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀢𑁆𑀣𑀬𑀼𑀢𑁆𑀢𑀁 𑀓𑀸𑀭𑀡𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀦𑁆𑀢𑀺 𑀯𑀘𑀦𑀁. 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑀁 𑀲𑀧𑀢𑁆𑀢𑀕𑀢𑁄 𑀅𑀲𑀫𑀢𑁆𑀣𑁄 𑀬𑁄𑀥𑁄 𑀯𑀺𑀬 𑀦 𑀓𑀺𑀜𑁆𑀘𑀺 𑀚𑀸𑀦𑀸𑀲𑀺, 𑀓𑀺𑀦𑁆𑀢𑀼 𑀲𑀬𑀫𑁂𑀯 𑀧𑀭𑀸𑀚𑁂𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀸𑀤𑁄 𑀤𑁄𑀲𑁄𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀢𑀣𑀸 𑀘𑀭 ¶ 𑀯𑀺𑀘𑀭𑀸𑀢𑀺. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀆𑀘𑀭𑀺𑀬𑀓𑀼𑀮𑁂. 𑀦𑀺𑀩𑁆𑀩𑁂𑀥𑁂𑀳𑀻𑀢𑀺 𑀫𑀬𑀸 𑀭𑁄𑀧𑀺𑀢𑀁 𑀯𑀸𑀤𑀁 𑀯𑀺𑀲𑁆𑀲𑀚𑁆𑀚𑁂𑀳𑀺.

𑁧𑁯. 𑀤𑀽𑀢𑀲𑁆𑀲 𑀓𑀫𑁆𑀫𑀁 𑀤𑀽𑀢𑁂𑀬𑁆𑀬𑀁, 𑀢𑀲𑁆𑀲 𑀓𑀣𑀸 𑀢𑀣𑀸, 𑀢𑀲𑁆𑀲𑀁. 𑀇𑀥, 𑀅𑀫𑀼𑀢𑁆𑀭𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁, 𑀢𑁂𑀦𑀸𑀳 ‘‘𑀅𑀲𑀼𑀓𑀁 𑀦𑀸𑀫 𑀞𑀸𑀦’’𑀦𑁆𑀢𑀺. 𑀯𑀺𑀢𑁆𑀣𑀸𑀭𑀢𑁄 𑀯𑀺𑀦𑀺𑀘𑁆𑀙𑀬𑁄 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁪𑁩𑁬-𑁪𑁩𑁭) 𑀯𑀼𑀢𑁆𑀢𑁄𑀢𑀺 𑀲𑀗𑁆𑀔𑁂𑀧𑀢𑁄 𑀇𑀥 𑀤𑀲𑁆𑀲𑁂𑀢𑀼𑀁 ‘‘𑀲𑀗𑁆𑀔𑁂𑀧𑀢𑁄 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑀺𑀳𑀺𑀲𑀸𑀲𑀦𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀧𑀭𑀻𑀢𑀁 𑀲𑀸𑀲𑀦𑀁. 𑀅𑀜𑁆𑀜𑁂𑀲𑀦𑁆𑀢𑀺 𑀕𑀺𑀳𑀻𑀦𑀜𑁆𑀜𑁂𑀯.

𑁨𑁦. 𑀢𑀺𑀯𑀺𑀥𑁂𑀦𑀸𑀢𑀺 𑀲𑀸𑀫𑀦𑁆𑀢𑀚𑀧𑁆𑀧𑀦𑀇𑀭𑀺𑀬𑀸𑀧𑀣𑀲𑀦𑁆𑀦𑀺𑀲𑁆𑀲𑀺𑀢𑀧𑀘𑁆𑀘𑀬𑀧𑀝𑀺𑀲𑁂𑀯𑀦𑀪𑁂𑀤𑀢𑁄 𑀢𑀺𑀯𑀺𑀥𑁂𑀦. 𑀯𑀺𑀫𑁆𑀳𑀸𑀧𑀬𑀦𑁆𑀢𑀻𑀢𑀺 ‘‘𑀅𑀬𑀫𑀘𑁆𑀙𑀭𑀺𑀬𑀧𑀼𑀭𑀺𑀲𑁄’’𑀢𑀺 𑀅𑀢𑁆𑀢𑀦𑀺 𑀧𑀭𑁂𑀲𑀁 𑀯𑀺𑀫𑁆𑀳𑀬𑀁 𑀲𑀫𑁆𑀧𑀳𑀁𑀲𑀦𑀁 𑀅𑀘𑁆𑀙𑀭𑀺𑀬𑀁 𑀉𑀧𑁆𑀧𑀸𑀤𑁂𑀦𑁆𑀢𑀺. 𑀯𑀺𑀧𑀼𑀩𑁆𑀩𑀜𑁆𑀳𑀺 𑀫𑁆𑀳𑀺-𑀲𑀤𑁆𑀤𑀁 𑀲𑀫𑁆𑀧𑀳𑀁𑀲𑀦𑁂 𑀯𑀤𑀦𑁆𑀢𑀺 𑀲𑀤𑁆𑀤𑀯𑀺𑀤𑀽. 𑀲𑀫𑁆𑀧𑀳𑀁𑀲𑀦𑀸𑀓𑀸𑀭𑁄 𑀘 𑀅𑀘𑁆𑀙𑀭𑀺𑀬𑀁. 𑀮𑀧𑀦𑁆𑀢𑀻𑀢𑀺 𑀅𑀢𑁆𑀢𑀸𑀦𑀁 𑀯𑀸 𑀤𑀸𑀬𑀓𑀁 𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀬𑀣𑀸 𑀲𑁄 𑀓𑀺𑀜𑁆𑀘𑀺 𑀤𑀤𑀸𑀢𑀺, 𑀏𑀯𑀁 𑀉𑀓𑁆𑀓𑀸𑀘𑁂𑀢𑁆𑀯𑀸 𑀉𑀓𑁆𑀔𑀺𑀧𑀦𑀯𑀲𑁂𑀦 𑀤𑀻𑀧𑁂𑀢𑁆𑀯𑀸 𑀓𑀣𑁂𑀦𑁆𑀢𑀺. 𑀦𑀺𑀫𑀺𑀢𑁆𑀢𑀁 𑀲𑀻𑀮𑀫𑁂𑀢𑁂𑀲𑀦𑁆𑀢𑀺 𑀦𑁂𑀫𑀺𑀢𑁆𑀢𑀺𑀓𑀸𑀢𑀺 𑀢𑀤𑁆𑀥𑀺𑀢𑀯𑀲𑁂𑀦 𑀢𑀲𑁆𑀲𑀻𑀮𑀢𑁆𑀣𑁄 𑀬𑀣𑀸 ‘‘𑀧𑀁𑀲𑀼𑀓𑀽𑀮𑀺𑀓𑁄’’𑀢𑀺 (𑀫𑀳𑀸𑀦𑀺. 𑁫𑁨) 𑀅𑀧𑀺𑀘 𑀦𑀺𑀫𑀺𑀢𑁆𑀢𑁂𑀦 𑀯𑀤𑀦𑁆𑀢𑀺, 𑀦𑀺𑀫𑀺𑀢𑁆𑀢𑀁 𑀯𑀸 𑀓𑀭𑁄𑀦𑁆𑀢𑀻𑀢𑀺 𑀦𑁂𑀫𑀺𑀢𑁆𑀢𑀺𑀓𑀸. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀘 𑀧𑀭𑁂𑀲𑀁 𑀧𑀘𑁆𑀘𑀬𑀤𑀸𑀦𑀲𑀜𑁆𑀜𑀼𑀧𑁆𑀧𑀸𑀤𑀓𑀁 𑀓𑀸𑀬𑀯𑀘𑀻𑀓𑀫𑁆𑀫𑀁 𑀯𑀼𑀘𑁆𑀘𑀢𑀺. 𑀦𑀺𑀧𑁆𑀧𑁂𑀲𑁄 𑀦𑀺𑀧𑁆𑀧𑀺𑀲𑀦𑀁 𑀘𑀼𑀡𑁆𑀡𑀁 𑀯𑀺𑀬 𑀓𑀭𑀡𑀁. 𑀦𑀺𑀧𑁆𑀧𑀺𑀲𑀦𑁆𑀢𑀻𑀢𑀺 𑀯𑀸 𑀦𑀺𑀧𑁆𑀧𑁂𑀲𑀸, 𑀦𑀺𑀧𑁆𑀧𑁂𑀲𑀸𑀬𑁂𑀯 𑀦𑀺𑀧𑁆𑀧𑁂𑀲𑀺𑀓𑀸, 𑀦𑀺𑀧𑁆𑀧𑀺𑀲𑀦𑀁 𑀯𑀸 𑀦𑀺𑀧𑁆𑀧𑁂𑀲𑁄, 𑀢𑀁 𑀓𑀭𑁄𑀦𑁆𑀢𑀻𑀢𑀺𑀧𑀺 𑀦𑀺𑀧𑁆𑀧𑁂𑀲𑀺𑀓𑀸. 𑀦𑀺𑀧𑁆𑀧𑁂𑀲𑁄 𑀘 𑀦𑀸𑀫 ¶ 𑀪𑀝𑀧𑀼𑀭𑀺𑀲𑁄 𑀯𑀺𑀬 𑀮𑀸𑀪𑀲𑀓𑁆𑀓𑀸𑀭𑀢𑁆𑀣𑀁 𑀅𑀓𑁆𑀓𑁄𑀲𑀦𑀔𑀼𑀁𑀲𑀦𑀼𑀧𑁆𑀧𑀡𑁆𑀟𑀦𑀧𑀭𑀧𑀺𑀝𑁆𑀞𑀺𑀫𑀁𑀲𑀺𑀓𑀢𑀸. 𑀮𑀸𑀪𑁂𑀦 𑀮𑀸𑀪𑀦𑁆𑀢𑀺 𑀇𑀢𑁄 𑀮𑀸𑀪𑁂𑀦 𑀅𑀫𑀼𑀢𑁆𑀭 𑀮𑀸𑀪𑀁. 𑀦𑀺𑀚𑀺𑀕𑀻𑀲𑀦𑁆𑀢𑀺 𑀫𑀕𑁆𑀕𑀦𑁆𑀢𑀺 𑀧𑀭𑀺𑀬𑁂𑀲𑀦𑁆𑀢𑀻𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀓𑀼𑀳𑀓𑀸𑀤𑀬𑁄 𑀲𑀤𑁆𑀤𑀸 𑀓𑀼𑀳𑀸𑀦𑀸𑀤𑀻𑀦𑀺 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀢𑀁𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑁂𑀲𑀼 𑀧𑀯𑀢𑁆𑀢𑀸𑀢𑀺 𑀆𑀳 ‘‘𑀓𑀼𑀳𑀦𑀸…𑀧𑁂… 𑀅𑀥𑀺𑀯𑀘𑀦’’𑀦𑁆𑀢𑀺. 𑀅𑀝𑁆𑀞𑀓𑀣𑀜𑁆𑀘𑀸𑀢𑀺 𑀢𑀁𑀢𑀁𑀧𑀸𑀴𑀺𑀲𑀁𑀯𑀡𑁆𑀡𑀦𑀸𑀪𑀽𑀢𑀁 𑀧𑁄𑀭𑀸𑀡𑀝𑁆𑀞𑀓𑀣𑀜𑁆𑀘.

𑀫𑀚𑁆𑀛𑀺𑀫𑀲𑀻𑀮𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀳𑀸𑀲𑀻𑀮𑀯𑀡𑁆𑀡𑀦𑀸

𑁨𑁧. 𑀅𑀗𑁆𑀕𑀸𑀦𑀺 ¶ 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸 𑀅𑀗𑁆𑀕𑀲𑀳𑀘𑀭𑀺𑀢𑀁 𑀲𑀢𑁆𑀣𑀁 ‘‘𑀅𑀗𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀯𑀸. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄, 𑀢𑁂𑀦𑀸𑀳 ‘‘𑀳𑀢𑁆𑀣𑀧𑀸𑀤𑀸𑀤𑀻𑀲𑀽’’𑀢𑀺𑀆𑀤𑀺. 𑀓𑁂𑀘𑀺 𑀧𑀦 ‘‘𑀅𑀗𑁆𑀕𑀦𑁆𑀢𑀺 𑀅𑀗𑁆𑀕𑀯𑀺𑀓𑀸𑀭𑀁 𑀧𑀭𑁂𑀲𑀁 𑀅𑀗𑁆𑀕𑀯𑀺𑀓𑀸𑀭𑀤𑀲𑁆𑀲𑀦𑁂𑀦𑀸𑀧𑀺 𑀮𑀸𑀪𑀸𑀮𑀸𑀪𑀸𑀤𑀺𑀯𑀺𑀚𑀸𑀦𑀦’’𑀦𑁆𑀢𑀺 𑀯𑀤𑀦𑁆𑀢𑀺. 𑀦𑀺𑀫𑀺𑀢𑁆𑀢𑀲𑀢𑁆𑀣𑀦𑁆𑀢𑀺 𑀦𑀺𑀫𑀺𑀢𑁆𑀢𑁂𑀦 𑀲𑀜𑁆𑀚𑀸𑀦𑀦𑀧𑁆𑀧𑀓𑀸𑀭𑀤𑀻𑀧𑀓𑀁 𑀲𑀢𑁆𑀣𑀁, 𑀢𑀁 𑀯𑀢𑁆𑀣𑀼𑀦𑀸 𑀯𑀺𑀪𑀸𑀯𑁂𑀢𑀼𑀁 ‘‘𑀧𑀡𑁆𑀟𑀼𑀭𑀸𑀚𑀸’’𑀢𑀺𑀆𑀤𑀺𑀫𑀸𑀳. 𑀧𑀡𑁆𑀟𑀼𑀭𑀸𑀚𑀸𑀢𑀺 𑀘 ‘‘𑀤𑀓𑁆𑀔𑀺𑀡𑀸𑀭𑀸𑀫𑀸𑀥𑀺𑀧𑀢𑀺’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀲𑀻𑀳𑀴𑀤𑀻𑀧𑁂 𑀤𑀓𑁆𑀔𑀺𑀡𑀸𑀭𑀸𑀫𑀦𑀸𑀫𑀓𑀲𑁆𑀲 𑀲𑀗𑁆𑀖𑀸𑀭𑀸𑀫𑀲𑁆𑀲 𑀓𑀸𑀭𑀓𑁄𑀢𑀺 𑀯𑀤𑀦𑁆𑀢𑀺. ‘‘𑀤𑀓𑁆𑀔𑀺𑀡𑀫𑀥𑀼𑀭𑀸𑀥𑀺𑀧𑀢𑀻’’𑀢𑀺 𑀘 𑀓𑀢𑁆𑀣𑀘𑀺 𑀮𑀺𑀔𑀺𑀢𑀁, 𑀤𑀓𑁆𑀔𑀺𑀡𑀫𑀥𑀼𑀭𑀦𑀕𑀭𑀲𑁆𑀲 𑀅𑀥𑀺𑀧𑀢𑀻𑀢𑀺 𑀅𑀢𑁆𑀣𑁄. 𑀫𑀼𑀢𑁆𑀢𑀸𑀬𑁄𑀢𑀺 𑀫𑀼𑀢𑁆𑀢𑀺𑀓𑀸. 𑀫𑀼𑀝𑁆𑀞𑀺𑀬𑀸𑀢𑀺 𑀳𑀢𑁆𑀣𑀫𑀼𑀤𑁆𑀤𑀸𑀬. 𑀖𑀭𑀕𑁄𑀮𑀺𑀓𑀸𑀬𑀸𑀢𑀺 𑀲𑀭𑀩𑀼𑀦𑀸. 𑀲𑁄 ‘‘𑀫𑀼𑀢𑁆𑀢𑀸’’𑀢𑀺 𑀲𑀜𑁆𑀜𑀸𑀦𑀺𑀫𑀺𑀢𑁆𑀢𑁂𑀦𑀸𑀳, 𑀲𑀗𑁆𑀔𑁆𑀬𑀸𑀦𑀺𑀫𑀺𑀢𑁆𑀢𑁂𑀦 𑀧𑀦 ‘‘𑀢𑀺𑀲𑁆𑀲𑁄’’𑀢𑀺.

‘‘𑀫𑀳𑀦𑁆𑀢𑀸𑀦’’𑀦𑁆𑀢𑀺 𑀏𑀢𑁂𑀦 𑀅𑀧𑁆𑀧𑀓𑀁 𑀦𑀺𑀫𑀺𑀢𑁆𑀢𑀫𑁂𑀯, 𑀫𑀳𑀦𑁆𑀢𑀁 𑀧𑀦 𑀉𑀧𑁆𑀧𑀸𑀤𑁄𑀢𑀺 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀉𑀧𑁆𑀧𑀢𑀺𑀢𑀦𑁆𑀢𑀺 𑀉𑀧𑁆𑀧𑀢𑀦𑀁. 𑀲𑀼𑀪𑀸𑀲𑀼𑀪𑀨𑀮𑀁 𑀧𑀓𑀸𑀲𑁂𑀦𑁆𑀢𑁄 𑀉𑀧𑁆𑀧𑀚𑁆𑀚𑀢𑀺 𑀕𑀘𑁆𑀙𑀢𑀻𑀢𑀺 𑀉𑀧𑁆𑀧𑀸𑀤𑁄, 𑀉𑀧𑁆𑀧𑀸𑀢𑁄𑀧𑀺, 𑀲𑀼𑀪𑀸𑀲𑀼𑀪𑀲𑀽𑀘𑀺𑀓𑀸 𑀪𑀽𑀢𑀯𑀺𑀓𑀢𑀺. 𑀲𑁄 𑀳𑀺 𑀥𑀽𑀫𑁄 𑀯𑀺𑀬 𑀅𑀕𑁆𑀕𑀺𑀲𑁆𑀲 𑀓𑀫𑁆𑀫𑀨𑀮𑀲𑁆𑀲 𑀧𑀓𑀸𑀲𑀦𑀫𑀢𑁆𑀢𑀫𑁂𑀯 𑀓𑀭𑁄𑀢𑀺, 𑀦 𑀢𑀼 𑀢𑀫𑀼𑀧𑁆𑀧𑀸𑀤𑁂𑀢𑀻𑀢𑀺. 𑀇𑀤𑀦𑁆𑀢𑀺 𑀇𑀤𑀁 𑀦𑀸𑀫 𑀨𑀮𑀁. 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀦𑀸𑀫 𑀆𑀓𑀸𑀭𑁂𑀦. 𑀆𑀤𑀺𑀲𑀦𑁆𑀢𑀻𑀢𑀺 𑀦𑀺𑀤𑁆𑀤𑀺𑀲𑀦𑁆𑀢𑀺. 𑀧𑀼𑀩𑁆𑀩𑀡𑁆𑀳𑀲𑀫𑀬𑁂𑀢𑀺 𑀓𑀸𑀮𑀯𑀲𑁂𑀦. 𑀇𑀤𑀁 𑀦𑀸𑀫𑀸𑀢𑀺 𑀯𑀢𑁆𑀣𑀼𑀯𑀲𑁂𑀦 𑀯𑀤𑀢𑀺. 𑀬𑁄 𑀯𑀲𑀪𑀁, 𑀓𑀼𑀜𑁆𑀚𑀭𑀁, 𑀧𑀸𑀲𑀸𑀤𑀁, 𑀧𑀩𑁆𑀩𑀢𑀁 𑀯𑀸 𑀆𑀭𑀼𑀴𑁆𑀳𑀫𑀢𑁆𑀢𑀸𑀦𑀁 𑀲𑀼𑀧𑀺𑀦𑁂 𑀧𑀲𑁆𑀲𑀢𑀺, 𑀢𑀲𑁆𑀲 ‘‘𑀇𑀤𑀁 𑀦𑀸𑀫 𑀨𑀮’’𑀦𑁆𑀢𑀺𑀆𑀤𑀺𑀦𑀸 𑀳𑀺 𑀯𑀢𑁆𑀣𑀼𑀓𑀺𑀢𑁆𑀢𑀦𑀁 𑀳𑁄𑀢𑀺. 𑀲𑀼𑀧𑀺𑀦𑀓𑀦𑁆𑀢𑀺 𑀲𑀼𑀧𑀺𑀦𑀲𑀢𑁆𑀣𑀁. 𑀅𑀗𑁆𑀕𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀤𑀲𑁆𑀲𑀦𑀫𑀢𑁆𑀢𑁂𑀦 𑀧𑀼𑀩𑁆𑀩𑁂 ‘‘𑀅𑀗𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀥 𑀧𑀦 𑀫𑀳𑀸𑀦𑀼𑀪𑀸𑀯𑀢𑀸𑀤𑀺𑀦𑀺𑀧𑁆𑀨𑀸𑀤𑀓𑀮𑀓𑁆𑀔𑀡𑀯𑀺𑀲𑁂𑀲𑀤𑀲𑁆𑀲𑀦𑁂𑀦 ‘‘𑀮𑀓𑁆𑀔𑀡’’𑀦𑁆𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄, 𑀢𑁂𑀦𑀸𑀳 ‘‘𑀇𑀫𑀺𑀦𑀸 ¶ 𑀮𑀓𑁆𑀔𑀡𑁂𑀦𑀸’’𑀢𑀺𑀆𑀤𑀺. 𑀮𑀓𑁆𑀔𑀡𑀦𑁆𑀢𑀺 𑀳𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀲𑀼 𑀤𑀺𑀲𑁆𑀲𑀫𑀸𑀦𑀸𑀓𑀸𑀭𑀯𑀺𑀲𑁂𑀲𑀁 𑀲𑀢𑁆𑀢𑀺𑀲𑀺𑀭𑀺𑀯𑀘𑁆𑀙𑀕𑀤𑀸𑀧𑀸𑀲𑀸𑀤𑀸𑀤𑀺𑀓𑀫𑀥𑀺𑀧𑁆𑀧𑁂𑀢𑀁 𑀢𑀁 𑀢𑀁 𑀨𑀮𑀁 𑀮𑀓𑁆𑀔𑀻𑀬𑀢𑀺 𑀅𑀦𑁂𑀦𑀸𑀢𑀺 𑀓𑀢𑁆𑀯𑀸, 𑀲𑀢𑁆𑀣𑀁 𑀧𑀦 𑀢𑀧𑁆𑀧𑀓𑀸𑀲𑀦𑀢𑁄 𑀮𑀓𑁆𑀔𑀡𑀁. 𑀆𑀳𑀢𑁂𑀢𑀺 𑀧𑀼𑀭𑀸𑀡𑁂. 𑀅𑀦𑀸𑀳𑀢𑁂𑀢𑀺 𑀦𑀯𑁂. 𑀅𑀳𑀢𑁂𑀢𑀺 𑀧𑀦 𑀧𑀸𑀞𑁂 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄. 𑀇𑀢𑁄 𑀧𑀝𑁆𑀞𑀸𑀬𑀸𑀢𑀺 𑀤𑁂𑀯𑀭𑀓𑁆𑀔𑀲𑀫𑀦𑀼𑀲𑁆𑀲𑀸𑀤𑀺𑀪𑁂𑀤𑁂𑀦 𑀬𑀣𑀸𑀨𑀮𑀁 𑀧𑀭𑀺𑀓𑀧𑁆𑀧𑀺𑀢𑁂𑀦 𑀯𑀺𑀯𑀺𑀥𑀯𑀢𑁆𑀣𑀪𑀸𑀕𑁂 𑀇𑀢𑁄 𑀯𑀸 𑀏𑀢𑁆𑀢𑁄 𑀯𑀸 𑀲𑀜𑁆𑀙𑀺𑀦𑁆𑀦𑁂 𑀇𑀤𑀁 𑀦𑀸𑀫 𑀪𑁄𑀕𑀸𑀤𑀺𑀨𑀮𑀁 𑀳𑁄𑀢𑀺. 𑀏𑀯𑀭𑀽𑀧𑁂𑀦 𑀤𑀸𑀭𑀼𑀦𑀸𑀢𑀺 𑀧𑀮𑀸𑀲𑀲𑀺𑀭𑀺𑀨𑀮𑀸𑀤𑀺𑀤𑀸𑀭𑀼𑀦𑀸, 𑀢𑀣𑀸 𑀤𑀩𑁆𑀩𑀺𑀬𑀸. 𑀬𑀤𑀺 𑀤𑀩𑁆𑀩𑀺𑀳𑁄𑀫𑀸𑀤𑀻𑀦𑀺𑀧𑀺 𑀅𑀕𑁆𑀕𑀺𑀳𑁄𑀫𑀸𑀦𑁂𑀯 ¶ , 𑀅𑀣 𑀓𑀲𑁆𑀫𑀸 𑀯𑀺𑀲𑀼𑀁 𑀯𑀼𑀢𑁆𑀢𑀸𑀦𑀻𑀢𑀺 𑀆𑀳 ‘‘𑀏𑀯𑀭𑀽𑀧𑀸𑀬𑀸’’𑀢𑀺𑀆𑀤𑀺. 𑀤𑀩𑁆𑀩𑀺𑀳𑁄𑀫𑀸𑀤𑀻𑀦𑀺 𑀳𑁄𑀫𑁄𑀧𑀓𑀭𑀡𑀸𑀤𑀺𑀯𑀺𑀲𑁂𑀲𑁂𑀳𑀺 𑀨𑀮𑀯𑀺𑀲𑁂𑀲𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀅𑀕𑁆𑀕𑀺𑀳𑁄𑀫𑀁 𑀧𑀦 𑀯𑀼𑀢𑁆𑀢𑀸𑀯𑀲𑁂𑀲𑀲𑀸𑀥𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀤𑀩𑁆𑀩𑀺𑀳𑁄𑀫𑀸𑀤𑀻𑀦𑀻’’𑀢𑀺𑀆𑀤𑀺.

𑀓𑀼𑀡𑁆𑀟𑀓𑁄𑀢𑀺 𑀢𑀡𑁆𑀟𑀼𑀮𑀔𑀡𑁆𑀟𑀁, 𑀢𑀺𑀮𑀲𑁆𑀲 𑀇𑀤𑀦𑁆𑀢𑀺 𑀢𑁂𑀮𑀁, 𑀲𑀫𑀸𑀲𑀢𑀤𑁆𑀥𑀺𑀢𑀧𑀤𑀸𑀦𑀺 𑀧𑀲𑀺𑀤𑁆𑀥𑁂𑀲𑀼 𑀲𑀸𑀫𑀜𑁆𑀜𑀪𑀽𑀢𑀸𑀦𑀻𑀢𑀺 𑀯𑀺𑀲𑁂𑀲𑀓𑀭𑀡𑀢𑁆𑀣𑀁 ‘‘𑀢𑀺𑀮𑀢𑁂𑀮𑀸𑀤𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀓𑁆𑀔𑀺𑀧𑀦𑀦𑁆𑀢𑀺 𑀧𑀓𑁆𑀔𑀺𑀧𑀦𑀢𑁆𑀣𑀁. ‘‘𑀧𑀓𑁆𑀔𑀺𑀧𑀦𑀯𑀺𑀚𑁆𑀚’’𑀦𑁆𑀢𑀺𑀧𑀺 𑀧𑀸𑀞𑁄, 𑀧𑀓𑁆𑀔𑀺𑀧𑀦𑀳𑁂𑀢𑀼𑀪𑀽𑀢𑀁 𑀯𑀺𑀚𑁆𑀚𑀦𑁆𑀢𑀺 𑀅𑀢𑁆𑀣𑁄. 𑀤𑀓𑁆𑀔𑀺𑀡𑀓𑁆𑀔𑀓𑀚𑀡𑁆𑀡𑀼𑀮𑁄𑀳𑀺𑀢𑀸𑀤𑀻𑀳𑀻𑀢𑀺 𑀤𑀓𑁆𑀔𑀺𑀡𑀓𑁆𑀔𑀓𑀮𑁄𑀳𑀺𑀢𑀤𑀓𑁆𑀔𑀺𑀡𑀚𑀡𑁆𑀡𑀼𑀮𑁄𑀳𑀺𑀢𑀸𑀤𑀻𑀳𑀺. ‘‘𑀧𑀼𑀩𑁆𑀩𑁂’’𑀢𑀺𑀆𑀤𑀺𑀦𑀸 𑀅𑀗𑁆𑀕𑀅𑀗𑁆𑀕𑀯𑀺𑀚𑁆𑀚𑀸𑀦𑀁 𑀯𑀺𑀲𑁂𑀲𑀤𑀲𑁆𑀲𑀦𑁂𑀦 𑀧𑀼𑀦𑀭𑀼𑀢𑁆𑀢𑀪𑀸𑀯𑀫𑀧𑀦𑁂𑀢𑀺. 𑀅𑀗𑁆𑀕𑀼𑀮𑀝𑁆𑀞𑀺𑀁 𑀤𑀺𑀲𑁆𑀯𑀸𑀢𑀺 𑀅𑀗𑁆𑀕𑀼𑀮𑀺𑀪𑀽𑀢𑀁, 𑀅𑀗𑁆𑀕𑀼𑀮𑀺𑀬𑀸 𑀯𑀸 𑀚𑀸𑀢𑀁 𑀅𑀝𑁆𑀞𑀺𑀁 𑀧𑀲𑁆𑀲𑀺𑀢𑁆𑀯𑀸, 𑀅𑀗𑁆𑀕𑀼𑀮𑀺𑀘𑁆𑀙𑀯𑀺𑀫𑀢𑁆𑀢𑀁 𑀅𑀧𑀲𑁆𑀲𑀺𑀢𑁆𑀯𑀸 𑀢𑀤𑀝𑁆𑀞𑀺𑀯𑀺𑀧𑀲𑁆𑀲𑀦𑀯𑀲𑁂𑀦𑁂𑀯 𑀩𑁆𑀬𑀸𑀓𑀭𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀅𑀗𑁆𑀕𑀮𑀝𑁆𑀞𑀺𑀦𑁆𑀢𑀺 𑀲𑀭𑀻𑀭’’𑀦𑁆𑀢𑀺 (𑀤𑀻. 𑀦𑀺. 𑀝𑀻. 𑁧.𑁨𑁧) 𑀧𑀦 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀯𑀺𑀭𑀼𑀳𑀦𑀪𑀸𑀯𑁂𑀦 𑀮𑀝𑁆𑀞𑀺𑀲𑀤𑀺𑀲𑀢𑁆𑀢𑀸 𑀲𑀭𑀻𑀭𑀫𑁂𑀯 𑀅𑀗𑁆𑀕𑀮𑀝𑁆𑀞𑀻𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀓𑀼𑀮𑀧𑀼𑀢𑁆𑀢𑁄𑀢𑀺 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑁄, 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑁄 𑀘. 𑀤𑀺𑀲𑁆𑀯𑀸𑀧𑀻𑀢𑀺 𑀏𑀢𑁆𑀣 𑀅𑀧𑀺-𑀲𑀤𑁆𑀤𑁄 𑀅𑀤𑀺𑀲𑁆𑀯𑀸𑀧𑀻𑀢𑀺 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀅𑀩𑁆𑀪𑀺𑀦𑁄 𑀲𑀢𑁆𑀣𑀁 𑀅𑀩𑁆𑀪𑁂𑀬𑁆𑀬𑀁. 𑀫𑀸𑀲𑀼𑀭𑀓𑁆𑀔𑁂𑀦 𑀓𑀢𑁄 𑀕𑀦𑁆𑀣𑁄 𑀫𑀸𑀲𑀼𑀭𑀓𑁆𑀔𑁄. 𑀭𑀸𑀚𑀽𑀳𑀺 𑀧𑀭𑀺𑀪𑀽𑀢𑁆𑀢𑀁 𑀲𑀢𑁆𑀣𑀁 𑀭𑀸𑀚𑀲𑀢𑁆𑀣𑀁. 𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀔𑀢𑁆𑀢𑀯𑀺𑀚𑁆𑀚𑀸𑀧𑀓𑀭𑀡𑀸𑀦𑀺. 𑀲𑀺𑀯-𑀲𑀤𑁆𑀤𑁄 𑀲𑀦𑁆𑀢𑀺𑀅𑀢𑁆𑀣𑁄𑀢𑀺 𑀆𑀳 ‘‘𑀲𑀦𑁆𑀢𑀺𑀓𑀭𑀡𑀯𑀺𑀚𑁆𑀚𑀸’’𑀢𑀺, 𑀉𑀧𑀲𑀕𑁆𑀕𑀽𑀧𑀲𑀫𑀦𑀯𑀺𑀚𑁆𑀚𑀸𑀢𑀺 𑀅𑀢𑁆𑀣𑁄. 𑀲𑀺𑀯𑀸-𑀲𑀤𑁆𑀤𑀫𑁂𑀯 𑀭𑀲𑁆𑀲𑀁 𑀓𑀢𑁆𑀯𑀸 𑀏𑀯𑀫𑀳𑀸𑀢𑀺 𑀲𑀦𑁆𑀥𑀸𑀬 ‘‘𑀲𑀺𑀗𑁆𑀕𑀸𑀮𑀭𑀼𑀢𑀯𑀺𑀚𑁆𑀚𑀸’’𑀢𑀺 𑀯𑀤𑀦𑁆𑀢𑀺, 𑀲𑀺𑀗𑁆𑀕𑀸𑀮𑀸𑀦𑀁 𑀭𑀼𑀢𑁂 𑀲𑀼𑀪𑀸𑀲𑀼𑀪𑀲𑀜𑁆𑀚𑀸𑀦𑀦𑀯𑀺𑀚𑁆𑀚𑀸𑀢𑀺 𑀅𑀢𑁆𑀣𑁄. ‘‘𑀪𑀽𑀢𑀯𑁂𑀚𑁆𑀚𑀫𑀦𑁆𑀢𑁄𑀢𑀺 𑀪𑀽𑀢𑀯𑀲𑀻𑀓𑀭𑀡𑀫𑀦𑁆𑀢𑁄. 𑀪𑀽𑀭𑀺𑀖𑀭𑁂𑀢𑀺 𑀅𑀦𑁆𑀢𑁄𑀧𑀣𑀯𑀺𑀬𑀁 𑀓𑀢𑀖𑀭𑁂, 𑀫𑀢𑁆𑀢𑀺𑀓𑀸𑀫𑀬𑀖𑀭𑁂 𑀯𑀸. ‘‘𑀪𑀽𑀭𑀺𑀯𑀺𑀚𑁆𑀚𑀸 𑀲𑀲𑁆𑀲𑀩𑀼𑀤𑁆𑀥𑀺𑀓𑀭𑀡𑀯𑀺𑀚𑁆𑀚𑀸’’𑀢𑀺 𑀲𑀸𑀭𑀲𑀫𑀸𑀲𑁂. 𑀲𑀧𑁆𑀧𑀸𑀯𑁆𑀳𑀸𑀬𑀦𑀯𑀺𑀚𑁆𑀚𑀸𑀢𑀺 𑀲𑀧𑁆𑀧𑀸𑀕𑀫𑀦𑀯𑀺𑀚𑁆𑀚𑀸. 𑀯𑀺𑀲𑀯𑀦𑁆𑀢𑀫𑁂𑀯 𑀯𑀸𑀢𑀺 𑀯𑀺𑀲𑀯𑀫𑀸𑀦𑀫𑁂𑀯 𑀯𑀸. 𑀪𑀸𑀯𑀦𑀺𑀤𑁆𑀤𑁂𑀲𑀲𑁆𑀲 𑀳𑀺 𑀫𑀸𑀦-𑀲𑀤𑁆𑀤𑀲𑁆𑀲 𑀅𑀦𑁆𑀢𑀩𑁆𑀬𑀧𑁆𑀧𑀤𑁂𑀲𑁄. 𑀬𑀸𑀬 𑀓𑀭𑁄𑀦𑁆𑀢𑀺, 𑀲𑀸 𑀯𑀺𑀲𑀯𑀺𑀚𑁆𑀚𑀸𑀢𑀺 𑀬𑁄𑀚𑀦𑀸. ‘‘𑀯𑀺𑀲𑀢𑀦𑁆𑀢𑁆𑀭𑀫𑁂𑀯 𑀯𑀸’’𑀢𑀺𑀧𑀺 𑀧𑀸𑀞𑁄. 𑀏𑀯𑀁 𑀲𑀢𑀺 𑀲𑀭𑀽𑀧𑀤𑀲𑁆𑀲𑀦𑀁 𑀳𑁄𑀢𑀺, 𑀯𑀺𑀲𑀯𑀺𑀘𑀸𑀭𑀡𑀕𑀦𑁆𑀣𑁄𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀢𑀦𑁆𑀢𑁆𑀭𑀦𑁆𑀢𑀺 𑀳𑀺 𑀕𑀦𑁆𑀣𑀲𑁆𑀲 𑀧𑀭𑀲𑀫𑀜𑁆𑀜𑀸. 𑀲𑀧𑀓𑁆𑀔𑀓𑀅𑀧𑀓𑁆𑀔𑀓𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀸𑀦𑀦𑁆𑀢𑀺 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸𑀤𑀺𑀲𑀧𑀓𑁆𑀔𑀓𑀖𑀭𑀕𑁄𑀮𑀺𑀓𑀸𑀤𑀺𑀅𑀧𑀓𑁆𑀔𑀓𑀤𑁂𑀯𑀫𑀦𑀼𑀲𑁆𑀲𑀘𑀗𑁆𑀕𑁄𑀭𑀸𑀤𑀺𑀤𑁆𑀯𑀺𑀧𑀤- 𑀓𑀡𑁆𑀝𑀲𑀲𑀚𑀫𑁆𑀩𑀼𑀓𑀸𑀤𑀺𑀘𑀢𑀼𑀧𑁆𑀧𑀤𑀸𑀦𑀁 ¶ . 𑀭𑀼𑀢𑀁 𑀯𑀲𑁆𑀲𑀺𑀢𑀁. 𑀕𑀢𑀁 𑀕𑀫𑀦𑀁, 𑀏𑀢𑁂𑀦 ‘‘𑀲𑀓𑀼𑀡𑀯𑀺𑀚𑁆𑀚𑀸’’𑀢𑀺 𑀇𑀥 𑀫𑀺𑀕𑀲𑀤𑁆𑀤𑀲𑁆𑀲 ¶ 𑀮𑁄𑀧𑀁, 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀯𑀸 𑀤𑀲𑁆𑀲𑁂𑀢𑀺. 𑀲𑀓𑀼𑀡𑀜𑀸𑀡𑀦𑁆𑀢𑀺 𑀲𑀓𑀼𑀡𑀯𑀲𑁂𑀦 𑀲𑀼𑀪𑀸𑀲𑀼𑀪𑀨𑀮𑀲𑁆𑀲 𑀚𑀸𑀦𑀦𑀁. 𑀦𑀦𑀼 𑀲𑀓𑀼𑀡𑀯𑀺𑀚𑁆𑀚𑀸𑀬 𑀏𑀯 𑀯𑀸𑀬𑀲𑀯𑀺𑀚𑁆𑀚𑀸𑀧𑀯𑀺𑀝𑁆𑀞𑀸𑀢𑀺 𑀆𑀳 ‘‘𑀢𑀁 𑀯𑀺𑀲𑀼𑀜𑁆𑀜𑁂𑀯 𑀲𑀢𑁆𑀣’’𑀦𑁆𑀢𑀺. 𑀢𑀁𑀢𑀁𑀧𑀓𑀸𑀲𑀓𑀲𑀢𑁆𑀣𑀸𑀦𑀼𑀭𑀽𑀧𑀯𑀲𑁂𑀦 𑀳𑀺 𑀇𑀥 𑀢𑀲𑁆𑀲 𑀢𑀲𑁆𑀲 𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀭𑀺𑀧𑀓𑁆𑀓𑀕𑀢𑀪𑀸𑀯𑁄 𑀅𑀢𑁆𑀢𑀪𑀸𑀯𑀲𑁆𑀲, 𑀚𑀻𑀯𑀺𑀢𑀓𑀸𑀮𑀲𑁆𑀲 𑀘 𑀯𑀲𑁂𑀦 𑀕𑀳𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀇𑀤𑀸𑀦𑀻’’𑀢𑀺𑀆𑀤𑀺𑀦𑀸. 𑀆𑀤𑀺𑀝𑁆𑀞𑀜𑀸𑀦𑀦𑁆𑀢𑀺 𑀆𑀤𑀺𑀲𑀺𑀢𑀩𑁆𑀩𑀲𑁆𑀲 𑀜𑀸𑀡𑀁. 𑀲𑀭𑀭𑀓𑁆𑀔𑀡𑀦𑁆𑀢𑀺 𑀲𑀭𑀢𑁄 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀢𑁄 𑀯𑀸 𑀲𑀭𑀲𑁆𑀲 𑀭𑀓𑁆𑀔𑀡𑀁. ‘‘𑀲𑀩𑁆𑀩𑀲𑀗𑁆𑀕𑀸𑀳𑀺𑀓’’𑀦𑁆𑀢𑀺 𑀇𑀫𑀺𑀦𑀸 𑀫𑀺𑀕-𑀲𑀤𑁆𑀤𑀲𑁆𑀲 𑀲𑀩𑁆𑀩𑀲𑀓𑀼𑀡𑀘𑀢𑀼𑀧𑁆𑀧𑀤𑁂𑀲𑀼 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀺, 𑀏𑀓𑀲𑁂𑀲𑀦𑀺𑀤𑁆𑀤𑁂𑀲𑁄 𑀯𑀸 𑀏𑀲 𑀘𑀢𑀼𑀧𑁆𑀧𑀤𑁂𑀲𑁆𑀯𑁂𑀯 𑀫𑀺𑀕-𑀲𑀤𑁆𑀤𑀲𑁆𑀲 𑀦𑀺𑀭𑀼𑀴𑁆𑀳𑀢𑁆𑀢𑀸. 𑀲𑀩𑁆𑀩𑁂𑀲𑀫𑁆𑀧𑀺 𑀲𑀓𑀼𑀡𑀘𑀢𑀼𑀧𑁆𑀧𑀤𑀸𑀦𑀁 𑀭𑀼𑀢𑀚𑀸𑀦𑀦𑀲𑀢𑁆𑀣𑀲𑁆𑀲 𑀫𑀺𑀕𑀘𑀓𑁆𑀓𑀲𑀫𑀜𑁆𑀜𑀸, 𑀬𑀣𑀸 𑀢𑀁 𑀲𑀼𑀪𑀸𑀲𑀼𑀪𑀚𑀸𑀦𑀦𑀧𑁆𑀧𑀓𑀸𑀭𑁂 𑀲𑀩𑁆𑀩𑀢𑁄 𑀪𑀤𑁆𑀭𑀁 𑀘𑀓𑁆𑀓𑀸𑀤𑀺𑀲𑀫𑀜𑁆𑀜𑀸𑀢𑀺 𑀆𑀳 ‘‘𑀲𑀩𑁆𑀩…𑀧𑁂… 𑀯𑀼𑀢𑁆𑀢’’𑀦𑁆𑀢𑀺.

𑁨𑁨. ‘‘𑀲𑀸𑀫𑀺𑀦𑁄’’𑀢𑀺𑀆𑀤𑀺 𑀧𑀲𑀝𑁆𑀞𑀸𑀧𑀲𑀝𑁆𑀞𑀓𑀸𑀭𑀡𑀯𑀘𑀦𑀁. 𑀮𑀓𑁆𑀔𑀡𑀦𑁆𑀢𑀺 𑀢𑁂𑀲𑀁 𑀮𑀓𑁆𑀔𑀡𑀧𑁆𑀧𑀓𑀸𑀲𑀓𑀲𑀢𑁆𑀣𑀁. 𑀧𑀸𑀭𑀺𑀲𑁂𑀲𑀦𑀬𑁂𑀦 𑀅𑀯𑀲𑁂𑀲𑀁 𑀆𑀯𑀼𑀥𑀁. ‘‘𑀬𑀫𑁆𑀳𑀺 𑀓𑀼𑀮𑁂’’𑀢𑀺𑀆𑀤𑀺𑀦𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀢𑀣𑀸𑀚𑀸𑀦𑀦𑀳𑁂𑀢𑀼 𑀏𑀯 𑀲𑁂𑀲𑀁 𑀮𑀓𑁆𑀔𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀬𑀁 𑀯𑀺𑀲𑁂𑀲𑁄𑀢𑀺 ‘‘𑀮𑀓𑁆𑀔𑀡’’𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸 𑀮𑀓𑁆𑀔𑀡𑀢𑁄 𑀯𑀺𑀲𑁂𑀲𑁄. 𑀢𑀤𑀢𑁆𑀣𑀸𑀯𑀺𑀓𑀭𑀡𑀢𑁆𑀣𑀁 ‘‘𑀇𑀤𑀜𑁆𑀘𑁂𑀢𑁆𑀣 𑀯𑀢𑁆𑀣𑀽’’𑀢𑀺 𑀯𑀼𑀢𑁆𑀢𑀁 𑀅𑀕𑁆𑀕𑀺𑀁 𑀥𑀫𑀫𑀸𑀦𑀦𑁆𑀢𑀺 𑀅𑀕𑁆𑀕𑀺𑀁 𑀫𑀼𑀔𑀯𑀸𑀢𑁂𑀦 𑀚𑀸𑀮𑁂𑀦𑁆𑀢𑀁. 𑀫𑀓𑁆𑀔𑁂𑀲𑀻𑀢𑀺 𑀯𑀺𑀦𑀸𑀲𑁂𑀢𑀺. 𑀧𑀺𑀴𑀦𑁆𑀥𑀦𑀓𑀡𑁆𑀡𑀺𑀓𑀸𑀬𑀸𑀢𑀺 𑀓𑀡𑁆𑀡𑀸𑀮𑀗𑁆𑀓𑀸𑀭𑀲𑁆𑀲. 𑀕𑁂𑀳𑀓𑀡𑁆𑀡𑀺𑀓𑀸𑀬𑀸𑀢𑀺 𑀕𑁂𑀳𑀓𑀽𑀝𑀲𑁆𑀲, 𑀏𑀢𑁂𑀦 𑀏𑀓𑀲𑁂𑀲𑀦𑀬𑀁, 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑀁 𑀯𑀸 𑀉𑀧𑁂𑀢𑀁. 𑀓𑀘𑁆𑀙𑀧𑀮𑀓𑁆𑀔𑀡𑀦𑁆𑀢𑀺 𑀓𑀼𑀫𑁆𑀫𑀮𑀓𑁆𑀔𑀡𑀁. 𑀲𑀩𑁆𑀩𑀘𑀢𑀼𑀧𑁆𑀧𑀤𑀸𑀦𑀦𑁆𑀢𑀺 𑀫𑀺𑀕-𑀲𑀤𑁆𑀤𑀲𑁆𑀲 𑀘𑀢𑀼𑀧𑁆𑀧𑀤𑀯𑀸𑀘𑀓𑀢𑁆𑀢𑀫𑀸𑀳.

𑁨𑁩. 𑀅𑀲𑀼𑀓𑀤𑀺𑀯𑀲𑁂𑀢𑀺 𑀤𑀼𑀢𑀺𑀬𑀸𑀢𑀢𑀺𑀬𑀸𑀤𑀺𑀢𑀺𑀣𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀲𑀼𑀓𑀦𑀓𑁆𑀔𑀢𑁆𑀢𑁂𑀦𑀸𑀢𑀺 𑀅𑀲𑁆𑀲𑀬𑀼𑀚𑀪𑀭𑀡𑀻𑀓𑀢𑁆𑀢𑀺𑀓𑀸𑀭𑁄𑀳𑀡𑀻𑀆𑀤𑀺𑀦𑀓𑁆𑀔𑀢𑁆𑀢𑀬𑁄𑀕𑀯𑀲𑁂𑀦. 𑀯𑀺𑀧𑁆𑀧𑀯𑀼𑀢𑁆𑀣𑀸𑀦𑀦𑁆𑀢𑀺 𑀯𑀺𑀧𑁆𑀧𑀯𑀲𑀺𑀢𑀸𑀦𑀁 𑀲𑀤𑁂𑀲𑀢𑁄 𑀦𑀺𑀓𑁆𑀔𑀦𑁆𑀢𑀸𑀦𑀁. 𑀉𑀧𑀲𑀗𑁆𑀓𑀫𑀦𑀁 𑀉𑀧𑀬𑀸𑀦𑀁. 𑀅𑀧𑀬𑀸𑀦𑀁 𑀧𑀝𑀺𑀓𑁆𑀓𑀫𑀦𑀁. 𑀤𑀼𑀢𑀺𑀬𑀧𑀤𑁂𑀧𑀻𑀢𑀺 ‘‘𑀩𑀸𑀳𑀺𑀭𑀸𑀦𑀁 𑀭𑀜𑁆𑀜𑀁…𑀧𑁂… 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁂 𑀤𑀼𑀢𑀺𑀬𑀯𑀸𑀓𑁆𑀬𑁂𑀧𑀺. ‘‘𑀅𑀩𑁆𑀪𑀦𑁆𑀢𑀭𑀸𑀦𑀁 𑀭𑀜𑁆𑀜𑀁 𑀚𑀬𑁄’’𑀢𑀺𑀆𑀤𑀻𑀳𑀺 𑀤𑁆𑀯𑀻𑀳𑀺 𑀯𑀸𑀓𑁆𑀬𑁂𑀳𑀺 𑀯𑀼𑀢𑁆𑀢𑀸 𑀚𑀬𑀧𑀭𑀸𑀚𑀬𑀸 𑀧𑀸𑀓𑀝𑀸𑀬𑁂𑀯.

𑁨𑁪. 𑀭𑀸𑀳𑀽𑀢𑀺 𑀭𑀸𑀳𑀼 𑀦𑀸𑀫 𑀅𑀲𑀼𑀭𑀺𑀲𑁆𑀲𑀭𑁄 𑀅𑀲𑀼𑀭𑀭𑀸𑀚𑀸. 𑀢𑀣𑀸 𑀳𑀺 𑀫𑀳𑀸𑀲𑀫𑀬𑀲𑀼𑀢𑁆𑀢𑁂 𑀅𑀲𑀼𑀭𑀦𑀺𑀓𑀸𑀬𑁂 𑀯𑀼𑀢𑁆𑀢𑀁 𑁋

‘‘𑀲𑀢𑀜𑁆𑀘 ¶ ¶ 𑀩𑀮𑀺𑀧𑀼𑀢𑁆𑀢𑀸𑀦𑀁, 𑀲𑀩𑁆𑀩𑁂 𑀯𑁂𑀭𑁄𑀘𑀦𑀸𑀫𑀓𑀸;

𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀩𑀮𑀺𑀲𑁂𑀦𑀁, 𑀭𑀸𑀳𑀼𑀪𑀤𑁆𑀤𑀫𑀼𑀧𑀸𑀕𑀫𑀼’’𑀦𑁆𑀢𑀺. (𑀤𑀻. 𑀦𑀺. 𑁨.𑁩𑁩𑁯);

𑀢𑀲𑁆𑀲 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀕𑀳𑀡𑀁 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂 𑀘𑀦𑁆𑀤𑀺𑀫𑀲𑀼𑀢𑁆𑀢𑀲𑀽𑀭𑀺𑀬𑀲𑀼𑀢𑁆𑀢𑁂𑀳𑀺 𑀤𑀻𑀧𑁂𑀢𑀩𑁆𑀩𑀁. 𑀇𑀢𑀺-𑀲𑀤𑁆𑀤𑁄 𑀘𑁂𑀢𑁆𑀣 𑀆𑀤𑀺𑀅𑀢𑁆𑀣𑁄 ‘‘𑀘𑀦𑁆𑀤𑀕𑁆𑀕𑀸𑀳𑀸𑀤𑀬𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀢𑁂𑀦 𑀲𑀽𑀭𑀺𑀬𑀕𑁆𑀕𑀸𑀳𑀦𑀓𑁆𑀔𑀢𑁆𑀢𑀕𑁆𑀕𑀸𑀳𑀸 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀢𑀲𑁆𑀫𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀫𑀺𑀯 𑀦𑀓𑁆𑀔𑀢𑁆𑀢𑀸𑀦𑀫𑁆𑀧𑀺 𑀭𑀸𑀳𑀼𑀦𑀸 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁄 𑀏𑀯 𑀳𑀺 ‘‘𑀅𑀧𑀺 𑀘𑀸’’𑀢𑀺𑀆𑀤𑀺𑀦𑀸 𑀦𑀓𑁆𑀔𑀢𑁆𑀢𑀕𑀸𑀳𑁂 𑀤𑀼𑀢𑀺𑀬𑀦𑀬𑁄 𑀯𑀼𑀢𑁆𑀢𑁄. 𑀅𑀗𑁆𑀕𑀸𑀭𑀓𑀸𑀤𑀺𑀕𑀸𑀳𑀲𑀫𑀸𑀬𑁄𑀕𑁄𑀧𑀻𑀢𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀅𑀗𑁆𑀕𑀸𑀭𑀓𑀲𑀲𑀺𑀧𑀼𑀢𑁆𑀢𑀲𑀽𑀭𑀕𑀭𑀼𑀲𑀼𑀓𑁆𑀓𑀭𑀯𑀺𑀲𑀼𑀢𑀓𑁂𑀢𑀼𑀲𑀗𑁆𑀔𑀸𑀢𑀸𑀦𑀁 𑀕𑀸𑀳𑀸𑀦𑀁 𑀲𑀫𑀸𑀬𑁄𑀕𑁄 𑀅𑀧𑀺 𑀦𑀓𑁆𑀔𑀢𑁆𑀢𑀕𑀸𑀳𑁄𑀬𑁂𑀯 𑀲𑀳 𑀧𑀬𑁄𑀕𑁂𑀦 𑀕𑀳𑀡𑀢𑁄. 𑀲𑀳𑀧𑀬𑁄𑀕𑁄𑀧𑀺 𑀳𑀺 𑀯𑁂𑀤𑀲𑀫𑀬𑁂𑀦 𑀕𑀳𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀉𑀓𑁆𑀓𑀸𑀦𑀁 𑀧𑀢𑀦𑀦𑁆𑀢𑀺 𑀉𑀓𑁆𑀓𑁄𑀪𑀸𑀲𑀸𑀦𑀁 𑀧𑀢𑀦𑀁. 𑀯𑀸𑀢𑀲𑀗𑁆𑀖𑀸𑀢𑁂𑀲𑀼 𑀳𑀺 𑀯𑁂𑀕𑁂𑀦 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀖𑀝𑁆𑀝𑁂𑀦𑁆𑀢𑁂𑀲𑀼 𑀤𑀻𑀧𑀺𑀓𑁄𑀪𑀸𑀲𑁄 𑀯𑀺𑀬 𑀑𑀪𑀸𑀲𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀆𑀓𑀸𑀲𑀢𑁄 𑀧𑀢𑀢𑀺, 𑀢𑀢𑁆𑀭𑀸𑀬𑀁 𑀉𑀓𑁆𑀓𑀸𑀧𑀸𑀢𑀯𑁄𑀳𑀸𑀭𑁄. 𑀚𑁄𑀢𑀺𑀲𑀢𑁆𑀣𑁂𑀧𑀺 𑀯𑀼𑀢𑁆𑀢𑀁 𑁋

‘‘𑀫𑀳𑀸𑀲𑀺𑀔𑀸 𑀘 𑀲𑀼𑀓𑁆𑀔𑀕𑁆𑀕𑀸-𑀭𑀢𑁆𑀢𑀸𑀦𑀺𑀮𑀲𑀺𑀔𑁄𑀚𑁆𑀚𑀮𑀸;

𑀧𑁄𑀭𑀺𑀲𑀻 𑀘 𑀧𑀫𑀸𑀡𑁂𑀦, 𑀉𑀓𑁆𑀓𑀸 𑀦𑀸𑀦𑀸𑀯𑀺𑀥𑀸 𑀫𑀢𑀸’’𑀢𑀺.

𑀤𑀺𑀲𑀸𑀓𑀸𑀮𑀼𑀲𑀺𑀬𑀦𑁆𑀢𑀺 𑀤𑀺𑀲𑀸𑀲𑀼 𑀔𑁄𑀪𑀦𑀁, 𑀢𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺 ‘‘𑀅𑀕𑁆𑀕𑀺𑀲𑀺𑀔𑀥𑀽𑀫𑀲𑀺𑀔𑀸𑀤𑀻𑀳𑀺 𑀆𑀓𑀼𑀮𑀪𑀸𑀯𑁄 𑀯𑀺𑀬𑀸’’𑀢𑀺 𑀇𑀫𑀺𑀦𑀸, 𑀅𑀕𑁆𑀕𑀺𑀲𑀺𑀔𑀥𑀽𑀫𑀲𑀺𑀔𑀸𑀤𑀻𑀦𑀁 𑀩𑀳𑀼𑀥𑀸 𑀧𑀸𑀢𑀼𑀪𑀸𑀯𑁄 𑀏𑀯 𑀤𑀺𑀲𑀸𑀤𑀸𑀳𑁄 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀤𑁂𑀯 ‘‘𑀥𑀽𑀫𑀓𑁂𑀢𑀽’’𑀢𑀺 𑀮𑁄𑀓𑀺𑀬𑀸 𑀯𑀤𑀦𑁆𑀢𑀺. 𑀯𑀼𑀢𑁆𑀢𑀜𑁆𑀘 𑀚𑁄𑀢𑀺𑀲𑀢𑁆𑀣𑁂 𑁋

‘‘𑀓𑁂𑀢𑀼 𑀯𑀺𑀬 𑀲𑀺𑀔𑀸𑀯𑀢𑀻, 𑀚𑁄𑀢𑀺 𑀉𑀧𑁆𑀧𑀸𑀢𑀭𑀽𑀧𑀺𑀦𑀻’’𑀢𑀺.

𑀲𑀼𑀓𑁆𑀔𑀯𑀮𑀸𑀳𑀓𑀕𑀚𑁆𑀚𑀦𑀦𑁆𑀢𑀺 𑀯𑀼𑀝𑁆𑀞𑀺𑀫𑀦𑁆𑀢𑀭𑁂𑀦 𑀯𑀸𑀬𑀼𑀯𑁂𑀕𑀘𑀮𑀺𑀢𑀲𑁆𑀲 𑀯𑀮𑀸𑀳𑀓𑀲𑁆𑀲 𑀦𑀤𑀦𑀁. 𑀬𑀁 𑀮𑁄𑀓𑀺𑀬𑀸 ‘‘𑀦𑀺𑀖𑀸𑀢𑁄’’𑀢𑀺 𑀯𑀤𑀦𑁆𑀢𑀺. 𑀯𑀼𑀢𑁆𑀢𑀜𑁆𑀘 𑀚𑁄𑀢𑀺𑀲𑀢𑁆𑀣𑁂 𑁋

‘‘𑀬𑀤𑀸𑀦𑁆𑀢𑀮𑀺𑀓𑁆𑀔𑁂 𑀩𑀮𑀯𑀸, 𑀫𑀸𑀭𑀼𑀢𑁄 𑀫𑀸𑀭𑀼𑀢𑀸𑀳𑀢𑁄;

𑀧𑀢𑀢𑁆𑀬𑀥𑁄 𑀲 𑀦𑀻𑀖𑀸𑀢𑁄, 𑀚𑀸𑀬𑀢𑁂 𑀯𑀸𑀬𑀼𑀲𑀫𑁆𑀪𑀯𑁄’’𑀢𑀺.

𑀉𑀤𑀬𑀦𑀦𑁆𑀢𑀺 𑀮𑀕𑁆𑀕𑀦𑀫𑀸𑀬𑀽𑀳𑀦𑀁.

‘‘𑀬𑀤𑁄𑀤𑁂𑀢𑀺 𑀢𑀤𑀸 𑀮𑀕𑀦𑀁, 𑀭𑀸𑀲𑀻𑀦𑀫𑀦𑁆𑀯𑀬𑀁 𑀓𑀫𑀸’’𑀢𑀺 𑁋

𑀳𑀺 ¶ ¶ 𑀯𑀼𑀢𑁆𑀢𑀁. 𑀅𑀢𑁆𑀣𑀗𑁆𑀕𑀫𑀦𑀫𑁆𑀧𑀺 𑀢𑀢𑁄 𑀲𑀢𑁆𑀢𑀫𑀭𑀸𑀲𑀺𑀧𑁆𑀧𑀫𑀸𑀡𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀩𑁆𑀪𑀸 𑀥𑀽𑀫𑁄 𑀭𑀚𑁄 𑀭𑀸𑀳𑀽𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀅𑀯𑀺𑀲𑀼𑀤𑁆𑀥𑀢𑀸. 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀢𑀸 𑀯𑁄𑀤𑀸𑀦𑀁. 𑀯𑀼𑀢𑁆𑀢𑀜𑁆𑀘 ‘‘𑀘𑀢𑁆𑀢𑀸𑀭𑁄𑀫𑁂 𑀪𑀺𑀓𑁆𑀔𑀯𑁂, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑀸, 𑀬𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀦 𑀢𑀧𑀦𑁆𑀢𑀺 𑀦 𑀪𑀸𑀲𑀦𑁆𑀢𑀺 𑀦 𑀯𑀺𑀭𑁄𑀘𑀦𑁆𑀢𑀺. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀅𑀩𑁆𑀪𑀸 𑀪𑀺𑀓𑁆𑀔𑀯𑁂, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑀸, 𑀬𑁂𑀦…𑀧𑁂… 𑀥𑀽𑀫𑁄…𑀧𑁂… 𑀭𑀚𑁄…𑀧𑁂… 𑀭𑀸𑀳𑀼 𑀪𑀺𑀓𑁆𑀔𑀯𑁂…𑀧𑁂… 𑀇𑀫𑁂 𑀔𑁄…𑀧𑁂… 𑀦 𑀯𑀺𑀭𑁄𑀘𑀦𑁆𑀢𑀻’’𑀢𑀺 (𑀅. 𑀦𑀺. 𑁪.𑁫𑁦).

𑁨𑁫. 𑀤𑁂𑀯𑀲𑁆𑀲𑀸𑀢𑀺 𑀫𑁂𑀖𑀲𑁆𑀲. 𑀥𑀸𑀭𑀸𑀦𑀼𑀧𑁆𑀧𑀯𑁂𑀘𑁆𑀙𑀦𑀁 𑀯𑀲𑁆𑀲𑀦𑀁. 𑀅𑀯𑀕𑁆𑀕𑀸𑀳𑁄𑀢𑀺 𑀥𑀸𑀭𑀸𑀬 𑀅𑀯𑀕𑁆𑀕𑀳𑀡𑀁 𑀤𑀼𑀕𑁆𑀕𑀳𑀡𑀁, 𑀢𑁂𑀦𑀸𑀳 ‘‘𑀯𑀲𑁆𑀲𑀯𑀺𑀩𑀦𑁆𑀥𑁄’’𑀢𑀺. 𑀳𑀢𑁆𑀣𑀫𑀼𑀤𑁆𑀤𑀸𑀢𑀺 𑀳𑀢𑁆𑀣𑁂𑀦 𑀅𑀥𑀺𑀧𑁆𑀧𑁂𑀢𑀯𑀺𑀜𑁆𑀜𑀸𑀧𑀦𑀁, 𑀢𑀁 𑀧𑀦 𑀅𑀗𑁆𑀕𑀼𑀮𑀺𑀲𑀗𑁆𑀓𑁄𑀘𑀦𑁂𑀦 𑀕𑀡𑀦𑀸𑀬𑁂𑀯𑀸𑀢𑀺 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 (𑀤𑀻. 𑀦𑀺. 𑀝𑀻. 𑁧.𑁨𑁧) 𑀯𑀼𑀢𑁆𑀢𑀁. 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀧𑀦 ‘‘𑀳𑀢𑁆𑀣𑀫𑀼𑀤𑁆𑀤𑀸 𑀦𑀸𑀫 𑀅𑀗𑁆𑀕𑀼𑀮𑀺𑀧𑀩𑁆𑀩𑁂𑀲𑀼 𑀲𑀜𑁆𑀜𑀁 𑀞𑀧𑁂𑀢𑁆𑀯𑀸 𑀕𑀡𑀦𑀸’’𑀢𑀺 𑀤𑀲𑁆𑀲𑀺𑀢𑀸. 𑀕𑀡𑀦𑀸 𑀯𑀼𑀘𑁆𑀘𑀢𑀺 𑀅𑀘𑁆𑀙𑀺𑀤𑁆𑀤𑀓𑀕𑀡𑀦𑀸 𑀧𑀭𑀺𑀲𑁂𑀲𑀜𑀸𑀬𑁂𑀦, 𑀲𑀸 𑀧𑀦 𑀧𑀸𑀤𑀲𑀺𑀓𑀫𑀺𑀮𑀓𑁆𑀔𑀓𑀸𑀤𑀬𑁄 𑀯𑀺𑀬 ‘‘𑀏𑀓𑀁 𑀤𑁆𑀯𑁂’’𑀢𑀺𑀆𑀤𑀺𑀦𑀸 𑀦𑀯𑀦𑁆𑀢𑀯𑀺𑀥𑀺𑀦𑀸 𑀦𑀺𑀭𑀦𑁆𑀢𑀭𑀕𑀡𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀫𑀽𑀳𑀦𑀁 𑀲𑀗𑁆𑀓𑀮𑀦𑀁 𑀯𑀺𑀲𑀼𑀁 𑀉𑀧𑁆𑀧𑀸𑀤𑀦𑀁 𑀅𑀧𑀦𑀬𑀦𑀁 𑀧𑀝𑀼𑀧𑁆𑀧𑀸𑀤𑀦𑀁 [𑀲𑀝𑀼𑀧𑁆𑀧𑀸𑀤𑀦𑀁 (𑀅𑀝𑁆𑀞𑀓𑀣𑀸𑀬𑀁)] ‘‘𑀲𑀤𑀼𑀧𑁆𑀧𑀸𑀤𑀦’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀲𑀫𑁆𑀫𑀸 𑀉𑀧𑁆𑀧𑀸𑀤𑀦𑀦𑁆𑀢𑀺 𑀅𑀢𑁆𑀣𑁄. 𑀆𑀤𑀺-𑀲𑀤𑁆𑀤𑁂𑀦 𑀯𑁄𑀓𑀮𑀦𑀪𑀸𑀕𑀳𑀸𑀭𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀯𑁄𑀓𑀮𑀦𑀁 𑀯𑀺𑀲𑀼𑀁 𑀲𑀫𑀽𑀳𑀓𑀭𑀡𑀁, 𑀯𑁄𑀫𑀺𑀲𑁆𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀪𑀸𑀕𑀓𑀭𑀡𑀁 𑀪𑀸𑀕𑁄. 𑀪𑀼𑀜𑁆𑀚𑀦𑀁 𑀯𑀺𑀪𑀚𑀦𑀁 𑀳𑀸𑀭𑁄. 𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀸 𑀧𑀺𑀡𑁆𑀟𑀕𑀡𑀦𑀸 𑀤𑀺𑀲𑁆𑀯𑀸𑀢𑀺 𑀏𑀢𑁆𑀣 𑀤𑀺𑀝𑁆𑀞𑀫𑀢𑁆𑀢𑁂𑀦 𑀕𑀡𑁂𑀢𑁆𑀯𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄.

𑀧𑀝𑀺𑀪𑀸𑀦𑀓𑀯𑀻𑀢𑀺 𑀏𑀢𑁆𑀣 𑀅𑀗𑁆𑀕𑀼𑀢𑁆𑀢𑀭𑀸𑀕𑀫𑁂 (𑀅. 𑀦𑀺. 𑁪.𑁨𑁩𑁧) 𑀯𑀼𑀢𑁆𑀢𑀸𑀦𑀦𑁆𑀢𑀺 𑀲𑁂𑀲𑁄, 𑀓𑀯𑀻𑀦𑀁 𑀓𑀩𑁆𑀬𑀓𑀭𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀏𑀢𑁂𑀦 𑀓𑀯𑀻𑀳𑀺 𑀓𑀢𑀁, 𑀓𑀯𑀻𑀦𑀁 𑀯𑀸 𑀇𑀤𑀁 𑀓𑀸𑀯𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. ‘‘𑀅𑀢𑁆𑀢𑀦𑁄 𑀘𑀺𑀦𑁆𑀢𑀸𑀯𑀲𑁂𑀦𑀸’’𑀢𑀺𑀆𑀤𑀺 𑀢𑁂𑀲𑀁 𑀲𑀪𑀸𑀯𑀤𑀲𑁆𑀲𑀦𑀁. 𑀢𑀣𑀸 𑀳𑀺 𑀯𑀢𑁆𑀣𑀼𑀁, 𑀅𑀦𑀼𑀲𑀦𑁆𑀥𑀺𑀜𑁆𑀘 𑀲𑀬𑀫𑁂𑀯 𑀘𑀺𑀭𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 𑀓𑀭𑀡𑀯𑀲𑁂𑀦 𑀘𑀺𑀦𑁆𑀢𑀸𑀓𑀯𑀺 𑀯𑁂𑀤𑀺𑀢𑀩𑁆𑀩𑁄. 𑀓𑀺𑀜𑁆𑀘𑀺 𑀲𑀼𑀢𑁆𑀯𑀸 𑀲𑀼𑀢𑁂𑀦 𑀅𑀲𑀼𑀢𑀁 𑀅𑀦𑀼𑀲𑀦𑁆𑀥𑁂𑀢𑁆𑀯𑀸 𑀓𑀭𑀡𑀯𑀲𑁂𑀦 𑀲𑀼𑀢𑀓𑀯𑀺, 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀉𑀧𑀥𑀸𑀭𑁂𑀢𑁆𑀯𑀸 𑀢𑀲𑁆𑀲 𑀲𑀗𑁆𑀔𑀺𑀧𑀦𑀯𑀺𑀢𑁆𑀣𑀸𑀭𑀡𑀸𑀤𑀺𑀯𑀲𑁂𑀦 𑀅𑀢𑁆𑀣𑀓𑀯𑀺, 𑀬𑀁 𑀓𑀺𑀜𑁆𑀘𑀺 𑀧𑀭𑁂𑀦 𑀓𑀢𑀁 𑀓𑀩𑁆𑀩𑀁 𑀯𑀸 𑀦𑀸𑀝𑀓𑀁 𑀯𑀸 𑀤𑀺𑀲𑁆𑀯𑀸 𑀢𑀁𑀲𑀤𑀺𑀲𑀫𑁂𑀯 𑀅𑀜𑁆𑀜𑀁 𑀅𑀢𑁆𑀢𑀦𑁄 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀝𑀺𑀪𑀸𑀦𑁂𑀦 𑀓𑀭𑀡𑀯𑀲𑁂𑀦 𑀧𑀝𑀺𑀪𑀸𑀦𑀓𑀯𑀻𑀢𑀺. 𑀦𑁆𑀢𑀺 𑀢𑀫𑀢𑁆𑀣𑀁. 𑀢𑀧𑁆𑀧𑀝𑀺𑀪𑀸𑀕𑀦𑁆𑀢𑀺 ¶ 𑀢𑁂𑀦 𑀤𑀺𑀝𑁆𑀞𑁂𑀦 𑀲𑀤𑀺𑀲𑀁. ‘‘𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀏𑀢𑁆𑀣 𑀯𑀺𑀲𑁂𑀲𑀦𑀁, ‘‘𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀢𑁆𑀣 𑀯𑀸 𑀪𑀸𑀯𑀦𑀧𑀼𑀁𑀲𑀓𑀁. 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀝𑀺𑀪𑀸𑀦𑀯𑀲𑁂𑀦𑀸𑀢𑀺 𑀓𑀸𑀭𑀡𑀸𑀦𑀼𑀭𑀽𑀧𑀁 𑀧𑀯𑀢𑁆𑀢𑀦𑀓𑀜𑀸𑀡𑀯𑀲𑁂𑀦. 𑀚𑀻𑀯𑀺𑀓𑀢𑁆𑀣𑀸𑀬𑀸𑀢𑀺 𑀧𑀓𑀭𑀡𑀸𑀥𑀺𑀕𑀢𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀓𑀯𑀻𑀦𑀁 𑀇𑀤𑀦𑁆𑀢𑀺 𑀓𑀩𑁆𑀬𑀁, 𑀬𑀁 ‘‘𑀕𑀻𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁨𑁬. 𑀧𑀭𑀺𑀕𑁆𑀕𑀳𑀪𑀸𑀯𑁂𑀦 𑀤𑀸𑀭𑀺𑀓𑀸𑀬 𑀕𑀡𑁆𑀳𑀦𑀁 𑀆𑀯𑀸𑀳𑀦𑀁. 𑀢𑀣𑀸 𑀤𑀸𑀦𑀁 𑀯𑀺𑀯𑀸𑀳𑀦𑀁. 𑀇𑀥 𑀧𑀦 𑀢𑀣𑀸𑀓𑀭𑀡𑀲𑁆𑀲 ¶ 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄, 𑀳𑁂𑀢𑀼𑀕𑀩𑁆𑀪𑀯𑀲𑁂𑀦 𑀯𑀸, 𑀢𑁂𑀦𑀸𑀳 ‘‘𑀇𑀫𑀲𑁆𑀲 𑀤𑀸𑀭𑀓𑀲𑁆𑀲𑀸’’𑀢𑀺𑀆𑀤𑀺. 𑀇𑀢𑀻𑀢𑀺 𑀏𑀯𑀁𑀳𑁄𑀦𑁆𑀢𑁂𑀲𑀼, 𑀏𑀯𑀁𑀪𑀸𑀯𑀢𑁄 𑀯𑀸. 𑀉𑀝𑁆𑀞𑀸𑀦𑀦𑁆𑀢𑀺 𑀔𑁂𑀢𑁆𑀢𑀸𑀤𑀺𑀢𑁄 𑀉𑀧𑁆𑀧𑀦𑁆𑀦𑀫𑀸𑀬𑀁. 𑀇𑀡𑀦𑁆𑀢𑀺 𑀥𑀦𑀯𑀟𑁆𑀠𑀦𑀢𑁆𑀣𑀁 𑀧𑀭𑀲𑁆𑀲 𑀤𑀺𑀦𑁆𑀦𑀁 𑀧𑀭𑀺𑀬𑀼𑀤𑀜𑁆𑀘𑀦𑀁. 𑀧𑀼𑀩𑁆𑀩𑁂 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑁂 𑀅𑀲𑀫𑁆𑀧𑀢𑁆𑀢𑁂𑀧𑀺 𑀉𑀤𑁆𑀥𑀭𑀺𑀢𑀫𑀺𑀡𑀁 𑀉𑀝𑁆𑀞𑀸𑀦𑀁, 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑁂 𑀧𑀦 𑀲𑀫𑁆𑀧𑀢𑁆𑀢𑁂 𑀇𑀡𑀦𑁆𑀢𑀺 𑀓𑁂𑀘𑀺, 𑀢𑀤𑀬𑀼𑀢𑁆𑀢𑀫𑁂𑀯 𑀇𑀡𑀕𑀳𑀡𑁂𑀦𑁂𑀯 𑀲𑀺𑀚𑁆𑀛𑀦𑀢𑁄. 𑀧𑀭𑁂𑀲𑀁 𑀤𑀺𑀦𑁆𑀦𑀁 𑀇𑀡𑀁 𑀯𑀸 𑀥𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀣𑀸𑀯𑀭𑀦𑁆𑀢𑀺 𑀘𑀺𑀭𑀝𑁆𑀞𑀺𑀢𑀺𑀓𑀁. 𑀤𑁂𑀲𑀦𑁆𑀢𑀭𑁂 𑀤𑀺𑀕𑀼𑀡𑀢𑀺𑀕𑀼𑀡𑀸𑀤𑀺𑀕𑀳𑀡𑀯𑀲𑁂𑀦 𑀪𑀡𑁆𑀟𑀧𑁆𑀧𑀬𑁄𑀚𑀦𑀁 𑀧𑀬𑁄𑀕𑁄. 𑀢𑀢𑁆𑀣 𑀯𑀸 𑀅𑀜𑁆𑀜𑀢𑁆𑀣 𑀯𑀸 𑀬𑀣𑀸𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀯𑀟𑁆𑀠𑀺𑀕𑀳𑀡𑀯𑀲𑁂𑀦 𑀧𑀬𑁄𑀚𑀦𑀁 𑀉𑀤𑁆𑀥𑀸𑀭𑁄. ‘‘𑀪𑀡𑁆𑀟𑀫𑀽𑀮𑀭𑀳𑀺𑀢𑀸𑀦𑀁 𑀯𑀸𑀡𑀺𑀚𑀁 𑀓𑀢𑁆𑀯𑀸 𑀏𑀢𑁆𑀢𑀓𑁂𑀦 𑀉𑀤𑀬𑁂𑀦 𑀲𑀳 𑀫𑀽𑀮𑀁 𑀤𑁂𑀣𑀸’𑀢𑀺 𑀥𑀦𑀤𑀸𑀦𑀁 𑀧𑀬𑁄𑀕𑁄, 𑀢𑀸𑀯𑀓𑀸𑀮𑀺𑀓𑀤𑀸𑀦𑀁 𑀉𑀤𑁆𑀥𑀸𑀭𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀚𑁆𑀚 𑀧𑀬𑁄𑀚𑀺𑀢𑀁 𑀤𑀺𑀕𑀼𑀡𑀁 𑀘𑀢𑀼𑀕𑀼𑀡𑀁 𑀳𑁄𑀢𑀻𑀢𑀺 𑀬𑀤𑀺 𑀅𑀚𑁆𑀚 𑀧𑀬𑁄𑀚𑀺𑀢𑀁 𑀪𑀡𑁆𑀟𑀁, 𑀏𑀯𑀁 𑀅𑀧𑀭𑀚𑁆𑀚 𑀤𑀺𑀕𑀼𑀡𑀁, 𑀅𑀚𑁆𑀚 𑀘𑀢𑀼𑀕𑀼𑀡𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀪𑀲𑁆𑀲, 𑀲𑀼𑀪𑁂𑀦 𑀯𑀸 𑀕𑀫𑀦𑀁 𑀧𑀯𑀢𑁆𑀢𑀦𑀁 𑀲𑀼𑀪𑀕𑁄, 𑀢𑀲𑁆𑀲 𑀓𑀭𑀡𑀁 𑀲𑀼𑀪𑀕𑀓𑀭𑀡𑀁, 𑀢𑀁 𑀧𑀦 𑀧𑀺𑀬𑀫𑀦𑀸𑀧𑀲𑁆𑀲, 𑀲𑀲𑁆𑀲𑀺𑀭𑀻𑀓𑀲𑁆𑀲 𑀯𑀸 𑀓𑀭𑀡𑀫𑁂𑀯𑀸𑀢𑀺 𑀆𑀳 ‘‘𑀧𑀺𑀬𑀫𑀦𑀸𑀧𑀓𑀭𑀡’’𑀦𑁆𑀢𑀺𑀆𑀤𑀺. 𑀲𑀲𑁆𑀲𑀺𑀭𑀻𑀓𑀓𑀭𑀡𑀦𑁆𑀢𑀺 𑀲𑀭𑀻𑀭𑀲𑁄𑀪𑀕𑁆𑀕𑀓𑀭𑀡𑀁. 𑀯𑀺𑀮𑀻𑀦𑀲𑁆𑀲𑀸𑀢𑀺 𑀧𑀢𑀺𑀝𑁆𑀞𑀳𑀺𑀢𑁆𑀯𑀸𑀧𑀺 𑀧𑀭𑀺𑀧𑀓𑁆𑀓𑀫𑀧𑀸𑀧𑀼𑀡𑀺𑀢𑁆𑀯𑀸 𑀯𑀺𑀮𑁄𑀧𑀲𑁆𑀲. 𑀢𑀣𑀸 𑀧𑀭𑀺𑀧𑀓𑁆𑀓𑀪𑀸𑀯𑁂𑀦 𑀅𑀝𑁆𑀞𑀺𑀢𑀲𑁆𑀲. 𑀧𑀭𑀺𑀬𑀸𑀬𑀯𑀘𑀦𑀫𑁂𑀢𑀁 𑀧𑀤𑀘𑀢𑀼𑀓𑁆𑀓𑀁. 𑀪𑁂𑀲𑀚𑁆𑀚𑀤𑀸𑀦𑀦𑁆𑀢𑀺 𑀕𑀩𑁆𑀪𑀲𑀡𑁆𑀞𑀸𑀧𑀦𑀪𑁂𑀲𑀚𑁆𑀚𑀲𑁆𑀲 𑀤𑀸𑀦𑀁. 𑀢𑀻𑀳𑀺 𑀓𑀸𑀭𑀡𑁂𑀳𑀻𑀢𑀺 𑀏𑀢𑁆𑀣 𑀯𑀸𑀢𑁂𑀦, 𑀧𑀸𑀡𑀓𑁂𑀳𑀺 𑀯𑀸 𑀕𑀩𑁆𑀪𑁂 𑀯𑀺𑀦𑀲𑁆𑀲𑀦𑁆𑀢𑁂 𑀦 𑀧𑀼𑀭𑀺𑀫𑀓𑀫𑁆𑀫𑀼𑀦𑀸 𑀑𑀓𑀸𑀲𑁄 𑀓𑀢𑁄, 𑀢𑀧𑁆𑀧𑀘𑁆𑀘𑀬𑀸 𑀏𑀯 𑀓𑀫𑁆𑀫𑀁 𑀯𑀺𑀧𑀘𑁆𑀘𑀢𑀺, 𑀲𑀬𑀫𑁂𑀯 𑀧𑀦 𑀓𑀫𑁆𑀫𑀼𑀦𑀸 𑀑𑀓𑀸𑀲𑁂 𑀓𑀢𑁂 𑀦 𑀏𑀓𑀦𑁆𑀢𑁂𑀦 𑀯𑀸𑀢𑀸, 𑀧𑀸𑀡𑀓𑀸 𑀯𑀸 𑀅𑀧𑁂𑀓𑁆𑀔𑀺𑀢𑀩𑁆𑀩𑀸𑀢𑀺 𑀓𑀫𑁆𑀫𑀲𑁆𑀲 𑀯𑀺𑀲𑀼𑀁 𑀓𑀸𑀭𑀡𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 (𑀯𑀺. 𑀅𑀝𑁆𑀞. 𑁨.𑁧𑁮𑁫) 𑀧𑀦 𑀯𑀸𑀢𑁂𑀦 𑀧𑀸𑀡𑀓𑁂𑀳𑀺 𑀯𑀸 𑀕𑀩𑁆𑀪𑁄 𑀯𑀺𑀦𑀲𑁆𑀲𑀦𑁆𑀢𑁄 𑀓𑀫𑁆𑀫𑀁 𑀯𑀺𑀦𑀸 𑀦 𑀯𑀺𑀦𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀢𑀫𑀜𑁆𑀜𑀸𑀢𑁆𑀭 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀻𑀢𑀺 𑀯𑀼𑀢𑁆𑀢𑀁. 𑀦𑀺𑀩𑁆𑀩𑀸𑀧𑀦𑀻𑀬𑀦𑁆𑀢𑀺 𑀉𑀧𑀲𑀫𑀓𑀭𑀁. 𑀧𑀝𑀺𑀓𑀫𑁆𑀫𑀦𑁆𑀢𑀺 𑀬𑀣𑀸 𑀢𑁂 𑀦 𑀔𑀸𑀤𑀦𑁆𑀢𑀺, 𑀢𑀣𑀸 𑀧𑀝𑀺𑀓𑀭𑀡𑀁.

𑀩𑀦𑁆𑀥𑀓𑀭𑀡𑀦𑁆𑀢𑀺 ¶ 𑀬𑀣𑀸 𑀚𑀺𑀁 𑀘𑀸𑀮𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀅𑀦𑀸𑀮𑁄𑀴𑀺𑀢𑀓𑀭𑀡𑀁. 𑀧𑀭𑀺𑀯𑀢𑁆𑀢𑀦𑀢𑁆𑀣𑀦𑁆𑀢𑀺 𑀆𑀯𑀼𑀥𑀸𑀤𑀺𑀦𑀸 𑀲𑀳 𑀉𑀓𑁆𑀔𑀺𑀢𑁆𑀢𑀳𑀢𑁆𑀣𑀸𑀦𑀁 𑀅𑀜𑁆𑀜𑀢𑁆𑀣 𑀧𑀭𑀺𑀯𑀢𑁆𑀢𑀦𑀢𑁆𑀣𑀁, 𑀅𑀢𑁆𑀢𑀦𑀸 𑀕𑁄𑀧𑀺𑀢𑀝𑁆𑀞𑀸𑀦𑁂 𑀅𑀔𑀺𑀧𑁂𑀢𑁆𑀯𑀸 𑀧𑀭𑀢𑁆𑀣 𑀔𑀺𑀧𑀦𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀔𑀺𑀧𑀢𑀻𑀢𑀺 𑀘 𑀅𑀜𑁆𑀜𑀢𑁆𑀣 𑀔𑀺𑀧𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂𑀢𑀺 𑀅𑀟𑁆𑀟𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂. 𑀇𑀘𑁆𑀙𑀺𑀢𑀢𑁆𑀣𑀲𑁆𑀲 𑀤𑁂𑀯𑀢𑀸𑀬 𑀓𑀡𑁆𑀡𑁂 𑀓𑀣𑀦𑀯𑀲𑁂𑀦 𑀚𑀧𑁆𑀧𑀦𑀁 𑀓𑀡𑁆𑀡𑀚𑀧𑁆𑀧𑀦𑀦𑁆𑀢𑀺 𑀘 𑀯𑀤𑀦𑁆𑀢𑀺. 𑀤𑁂𑀯𑀢𑀁 𑀑𑀢𑀸𑀭𑁂𑀢𑁆𑀯𑀸𑀢𑀺 𑀏𑀢𑁆𑀣 𑀫𑀦𑁆𑀢𑀚𑀧𑁆𑀧𑀦𑁂𑀦 𑀤𑁂𑀯𑀢𑀸𑀬 𑀑𑀢𑀸𑀭𑀡𑀁. 𑀚𑀻𑀯𑀺𑀓𑀢𑁆𑀣𑀸𑀬𑀸𑀢𑀺 𑀬𑀣𑀸 𑀧𑀸𑀭𑀺𑀘𑀭𑀺𑀬𑀁 𑀓𑀢𑁆𑀯𑀸 𑀚𑀻𑀯𑀺𑀢𑀯𑀼𑀢𑁆𑀢𑀺 𑀳𑁄𑀢𑀺, 𑀢𑀣𑀸 𑀚𑀻𑀯𑀺𑀢𑀯𑀼𑀢𑁆𑀢𑀺𑀓𑀭𑀡𑀢𑁆𑀣𑀸𑀬. 𑀆𑀤𑀺𑀘𑁆𑀘𑀧𑀸𑀭𑀺𑀘𑀭𑀺𑀬𑀸𑀢𑀺 𑀓𑀭𑀫𑀸𑀮𑀸𑀳𑀺 𑀧𑀽𑀚𑀁 𑀓𑀢𑁆𑀯𑀸 𑀲𑀓𑀮𑀤𑀺𑀯𑀲𑀁 𑀆𑀤𑀺𑀘𑁆𑀘𑀸𑀪𑀺𑀫𑀼𑀔𑀸𑀯𑀝𑁆𑀞𑀸𑀦𑁂𑀦 𑀆𑀤𑀺𑀘𑁆𑀘𑀲𑁆𑀲 𑀧𑀭𑀺𑀘𑀭𑀡𑀁. ‘‘𑀢𑀣𑁂𑀯𑀸’’𑀢𑀺 𑀇𑀫𑀺𑀦𑀸 ‘‘𑀚𑀻𑀯𑀺𑀓𑀢𑁆𑀣𑀸𑀬𑀸’’𑀢𑀺 𑀧𑀤𑀫𑀸𑀓𑀟𑁆𑀠𑀢𑀺. 𑀲𑀺𑀭𑀺𑀯𑁆𑀳𑀸𑀬𑀦𑀦𑁆𑀢𑀺 𑀈-𑀓𑀸𑀭𑀢𑁄 𑀅-𑀓𑀸𑀭𑀮𑁄𑀧𑁂𑀦 𑀲𑀦𑁆𑀥𑀺𑀦𑀺𑀤𑁆𑀤𑁂𑀲𑁄, 𑀢𑁂𑀦𑀸𑀳 ‘‘𑀲𑀺𑀭𑀺𑀬𑀸 𑀅𑀯𑁆𑀳𑀸𑀬𑀦’’𑀦𑁆𑀢𑀺. ‘‘𑀲𑀺𑀭𑁂𑀦𑀸’’𑀢𑀺 𑀧𑀦 𑀞𑀸𑀦𑀯𑀲𑁂𑀦 𑀅𑀯𑁆𑀳𑀸𑀬𑀦𑀸𑀓𑀸𑀭𑀁 ¶ 𑀤𑀲𑁆𑀲𑁂𑀢𑀺. 𑀬𑁂 𑀢𑀼 𑀅-𑀓𑀸𑀭𑀢𑁄 𑀅-𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 ‘‘𑀲𑀺𑀭𑀯𑁆𑀳𑀸𑀬𑀦’’𑀦𑁆𑀢𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀧𑀸𑀞𑁂 𑀅𑀬𑀫𑀢𑁆𑀣𑁄 ‘‘𑀫𑀦𑁆𑀢𑀁 𑀚𑀧𑁆𑀧𑁂𑀢𑁆𑀯𑀸 𑀲𑀺𑀭𑀲𑀸 𑀇𑀘𑁆𑀙𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀯𑁆𑀳𑀸𑀬𑀦’’𑀦𑁆𑀢𑀺.

𑁨𑁭. 𑀤𑁂𑀯𑀝𑁆𑀞𑀸𑀦𑀦𑁆𑀢𑀺 𑀤𑁂𑀯𑀸𑀬𑀢𑀦𑀁. 𑀉𑀧𑀳𑀸𑀭𑀦𑁆𑀢𑀺 𑀧𑀽𑀚𑀁. 𑀲𑀫𑀺𑀤𑁆𑀥𑀺𑀓𑀸𑀮𑁂𑀢𑀺 𑀆𑀬𑀸𑀘𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀺𑀤𑁆𑀥𑀓𑀸𑀮𑁂. 𑀲𑀦𑁆𑀢𑀺𑀧𑀝𑀺𑀲𑁆𑀲𑀯𑀓𑀫𑁆𑀫𑀦𑁆𑀢𑀺 𑀤𑁂𑀯𑀢𑀸𑀬𑀸𑀘𑀦𑀸𑀬 𑀬𑀸 𑀲𑀦𑁆𑀢𑀺 𑀧𑀝𑀺𑀓𑀢𑁆𑀢𑀩𑁆𑀩𑀸, 𑀢𑀲𑁆𑀲𑀸 𑀧𑀝𑀺𑀲𑁆𑀲𑀯𑀓𑀭𑀡𑀁. 𑀲𑀦𑁆𑀢𑀻𑀢𑀺 𑀘𑁂𑀢𑁆𑀣 𑀫𑀦𑁆𑀢𑀚𑀧𑁆𑀧𑀦𑁂𑀦 𑀧𑀽𑀚𑀸𑀓𑀭𑀡𑀁, 𑀢𑀸𑀬 𑀲𑀦𑁆𑀢𑀺𑀬𑀸 𑀆𑀬𑀸𑀘𑀦𑀧𑁆𑀧𑀬𑁄𑀕𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀺𑀦𑁆𑀢𑀺 𑀬𑀁 ‘‘𑀲𑀘𑁂 𑀫𑁂 𑀇𑀤𑀁 𑀦𑀸𑀫 𑀲𑀫𑀺𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀺𑀁 𑀧𑀝𑀺𑀲𑁆𑀲𑀯𑀨𑀮𑀪𑀽𑀢𑁂 𑀬𑀣𑀸𑀪𑀺𑀧𑀢𑁆𑀣𑀺𑀢𑀓𑀫𑁆𑀫𑀲𑁆𑀫𑀺𑀁. 𑀢𑀲𑁆𑀲𑀸𑀢𑀺 𑀬𑁄 ‘‘𑀧𑀡𑀺𑀥𑀻’’𑀢𑀺 𑀘 𑀯𑀼𑀢𑁆𑀢𑁄, 𑀢𑀲𑁆𑀲 𑀧𑀝𑀺𑀲𑁆𑀲𑀯𑀲𑁆𑀲. 𑀬𑀣𑀸𑀧𑀝𑀺𑀲𑁆𑀲𑀯𑀜𑁆𑀳𑀺 𑀉𑀧𑀳𑀸𑀭𑁂 𑀓𑀢𑁂 𑀧𑀡𑀺𑀥𑀺𑀆𑀬𑀸𑀘𑀦𑀸 𑀓𑀢𑀸 𑀦𑀺𑀬𑁆𑀬𑀸𑀢𑀺𑀢𑀸 𑀳𑁄𑀢𑀻𑀢𑀺. 𑀕𑀳𑀺𑀢𑀫𑀦𑁆𑀢𑀲𑁆𑀲𑀸𑀢𑀺 𑀉𑀕𑁆𑀕𑀳𑀺𑀢𑀫𑀦𑁆𑀢𑀲𑁆𑀲. 𑀧𑀬𑁄𑀕𑀓𑀭𑀡𑀦𑁆𑀢𑀺 𑀉𑀧𑀘𑀸𑀭𑀓𑀫𑁆𑀫𑀓𑀭𑀡𑀁. 𑀇𑀢𑀻𑀢𑀺 𑀓𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄, 𑀢𑁂𑀦 𑀯𑀲𑁆𑀲𑀯𑁄𑀲𑁆𑀲-𑀲𑀤𑁆𑀤𑀸𑀦𑀁 𑀧𑀼𑀭𑀺𑀲𑀧𑀡𑁆𑀟𑀓𑁂𑀲𑀼 𑀧𑀯𑀢𑁆𑀢𑀺𑀁 𑀓𑀸𑀭𑀡𑀪𑀸𑀯𑁂𑀦 𑀤𑀲𑁆𑀲𑁂𑀢𑀺, 𑀧𑀡𑁆𑀟𑀓𑀢𑁄 𑀯𑀺𑀲𑁂𑀲𑁂𑀦 𑀅𑀲𑀢𑀺 𑀪𑀯𑀢𑀻𑀢𑀺 𑀯𑀲𑁆𑀲𑁄. 𑀧𑀼𑀭𑀺𑀲𑀮𑀺𑀗𑁆𑀕𑀢𑁄 𑀯𑀺𑀭𑀳𑁂𑀦 𑀅𑀯𑀅𑀲𑀢𑀺 𑀳𑀻𑀴𑀺𑀢𑁄 𑀳𑀼𑀢𑁆𑀯𑀸 𑀪𑀯𑀢𑀻𑀢𑀺 𑀯𑁄𑀲𑁆𑀲𑁄. 𑀯𑀺𑀲𑁂𑀲𑁄 𑀭𑀸𑀕𑀲𑁆𑀲𑀯𑁄 𑀬𑀲𑁆𑀲𑀸𑀢𑀺 𑀯𑀲𑁆𑀲𑁄. 𑀯𑀺𑀕𑀢𑁄 𑀭𑀸𑀕𑀲𑁆𑀲𑀯𑁄 𑀬𑀲𑁆𑀲𑀸𑀢𑀺 𑀯𑁄𑀲𑁆𑀲𑁄𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑀤𑀲𑀺𑀤𑁆𑀥𑀻𑀢𑀺𑀧𑀺 𑀯𑀤𑀦𑁆𑀢𑀺. 𑀯𑀲𑁆𑀲𑀓𑀭𑀡𑀁 𑀢𑀤𑀦𑀼𑀭𑀽𑀧𑀪𑁂𑀲𑀚𑁆𑀚𑁂𑀦. 𑀯𑁄𑀲𑁆𑀲𑀓𑀭𑀡𑀁 𑀧𑀦 𑀉𑀤𑁆𑀥𑀢𑀩𑀻𑀚𑀢𑀸𑀤𑀺𑀦𑀸𑀧𑀺, 𑀢𑁂𑀦𑁂𑀯 𑀚𑀸𑀢𑀓𑀝𑁆𑀞𑀓𑀣𑀸𑀬𑀁 ‘‘𑀯𑁄𑀲𑁆𑀲𑀯𑀭𑀸𑀢𑀺 𑀉𑀤𑁆𑀥𑀢𑀩𑀻𑀚𑀸 𑀑𑀭𑁄𑀥𑀧𑀸𑀮𑀓𑀸’’𑀢𑀺 𑀯𑀼𑀢𑁆𑀢𑀁 ¶ . 𑀅𑀘𑁆𑀙𑀦𑁆𑀤𑀺𑀓𑀪𑀸𑀯𑀫𑀢𑁆𑀢𑀦𑁆𑀢𑀺 𑀇𑀢𑁆𑀣𑀺𑀬𑀸 𑀅𑀓𑀸𑀫𑀪𑀸𑀯𑀫𑀢𑁆𑀢𑀁. 𑀮𑀺𑀗𑁆𑀕𑀦𑁆𑀢𑀺 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁.

𑀯𑀢𑁆𑀣𑀼𑀩𑀮𑀺𑀓𑀫𑁆𑀫𑀓𑀭𑀡𑀦𑁆𑀢𑀺 𑀖𑀭𑀯𑀢𑁆𑀣𑀼𑀲𑁆𑀫𑀺𑀁 𑀩𑀮𑀺𑀓𑀫𑁆𑀫𑀲𑁆𑀲 𑀓𑀭𑀡𑀁, 𑀢𑀁 𑀧𑀦 𑀉𑀧𑀤𑁆𑀤𑀯𑀧𑀝𑀺𑀩𑀸𑀳𑀦𑀢𑁆𑀣𑀁, 𑀯𑀟𑁆𑀠𑀦𑀢𑁆𑀣𑀜𑁆𑀘 𑀓𑀭𑁄𑀦𑁆𑀢𑀺, 𑀫𑀦𑁆𑀢𑀚𑀧𑁆𑀧𑀦𑁂𑀦 𑀅𑀢𑁆𑀢𑀦𑁄, 𑀅𑀜𑁆𑀜𑁂𑀲𑀜𑁆𑀘 𑀫𑀼𑀔𑀲𑀼𑀤𑁆𑀥𑀺𑀓𑀭𑀡𑀁. 𑀢𑁂𑀲𑀦𑁆𑀢𑀺 𑀅𑀜𑁆𑀜𑁂𑀲𑀁. 𑀬𑁄𑀕𑀦𑁆𑀢𑀺 𑀪𑁂𑀲𑀚𑁆𑀚𑀧𑀬𑁄𑀕𑀁. 𑀯𑀫𑀦𑀦𑁆𑀢𑀺 𑀧𑀘𑁆𑀙𑀺𑀦𑁆𑀤𑀦𑀁. 𑀉𑀤𑁆𑀥𑀁𑀯𑀺𑀭𑁂𑀘𑀦𑀦𑁆𑀢𑀺 𑀯𑀫𑀦𑀪𑁂𑀤𑀫𑁂𑀯 ‘‘𑀉𑀤𑁆𑀥𑀁 𑀤𑁄𑀲𑀸𑀦𑀁 𑀦𑀻𑀳𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀯𑀺𑀭𑁂𑀘𑀦𑀦𑁆𑀢𑀺 𑀧𑀓𑀢𑀺𑀯𑀺𑀭𑁂𑀘𑀦𑀫𑁂𑀯. 𑀅𑀥𑁄𑀯𑀺𑀭𑁂𑀘𑀦𑀦𑁆𑀢𑀺 𑀲𑀼𑀤𑁆𑀥𑀯𑀢𑁆𑀣𑀺𑀓𑀲𑀸𑀯𑀯𑀢𑁆𑀣𑀺𑀆𑀤𑀺𑀯𑀢𑁆𑀣𑀺𑀓𑀺𑀭𑀺𑀬𑀸 ‘‘𑀅𑀥𑁄 𑀤𑁄𑀲𑀸𑀦𑀁 𑀦𑀻𑀳𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀅𑀣𑁄 𑀯𑀫𑀦𑀁 𑀉𑀕𑁆𑀕𑀺𑀭𑀡𑀫𑁂𑀯, 𑀉𑀤𑁆𑀥𑀁𑀯𑀺𑀭𑁂𑀘𑀦𑀁 𑀤𑁄𑀲𑀦𑀻𑀳𑀭𑀡𑀁. 𑀢𑀣𑀸 𑀯𑀺𑀭𑁂𑀘𑀦𑀁 𑀯𑀺𑀭𑁂𑀓𑁄𑀯, 𑀅𑀥𑁄𑀯𑀺𑀭𑁂𑀘𑀦𑀁 𑀤𑁄𑀲𑀦𑀻𑀳𑀭𑀡𑀦𑁆𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄 𑀧𑀸𑀓𑀝𑁄 𑀳𑁄𑀢𑀺. 𑀤𑁄𑀲𑀸𑀦𑀦𑁆𑀢𑀺 𑀘 𑀧𑀺𑀢𑁆𑀢𑀸𑀤𑀺𑀤𑁄𑀲𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀫𑁆𑀳𑀦𑀻𑀳𑀭𑀡𑀸𑀤𑀺 𑀲𑀺𑀭𑁄𑀯𑀺𑀭𑁂𑀘𑀦𑀁. 𑀓𑀡𑁆𑀡𑀩𑀦𑁆𑀥𑀦𑀢𑁆𑀣𑀦𑁆𑀢𑀺 𑀙𑀺𑀦𑁆𑀦𑀓𑀡𑁆𑀡𑀸𑀦𑀁 𑀲𑀗𑁆𑀖𑀝𑀦𑀢𑁆𑀣𑀁. 𑀯𑀡𑀳𑀭𑀡𑀢𑁆𑀣𑀦𑁆𑀢𑀺 𑀅𑀭𑀼𑀧𑀦𑀬𑀦𑀢𑁆𑀣𑀁. 𑀅𑀓𑁆𑀔𑀺𑀢𑀧𑁆𑀧𑀦𑀢𑁂𑀮𑀦𑁆𑀢𑀺 𑀅𑀓𑁆𑀔𑀻𑀲𑀼 𑀉𑀲𑀼𑀫𑀲𑁆𑀲 𑀦𑀻𑀳𑀭𑀡𑀢𑁂𑀮𑀁. 𑀬𑁂𑀦 𑀅𑀓𑁆𑀔𑀺𑀫𑁆𑀳𑀺 𑀅𑀜𑁆𑀚𑀺𑀢𑁂 𑀉𑀡𑁆𑀳𑀁 𑀉𑀲𑀼𑀫𑀁 𑀦𑀺𑀓𑁆𑀔𑀫𑀢𑀺. 𑀬𑀁 𑀦𑀸𑀲𑀺𑀓𑀸𑀬 𑀕𑀡𑁆𑀳𑀻𑀬𑀢𑀺, 𑀢𑀁 𑀦𑀢𑁆𑀣𑀼. 𑀧𑀝𑀮𑀸𑀦𑀻𑀢𑀺 𑀅𑀓𑁆𑀔𑀺𑀧𑀝𑀮𑀸𑀦𑀺. 𑀦𑀻𑀳𑀭𑀡𑀲𑀫𑀢𑁆𑀣𑀦𑁆𑀢𑀺 𑀅𑀧𑀦𑀬𑀦𑀲𑀫𑀢𑁆𑀣𑀁. 𑀔𑀸𑀭𑀜𑁆𑀚𑀦𑀦𑁆𑀢𑀺 𑀔𑀸𑀭𑀓𑀫𑀜𑁆𑀚𑀦𑀁. 𑀲𑀻𑀢𑀫𑁂𑀯 𑀲𑀘𑁆𑀘𑀁 𑀦𑀺𑀭𑀼𑀢𑁆𑀢𑀺𑀦𑀬𑁂𑀦, 𑀢𑀲𑁆𑀲 𑀓𑀸𑀭𑀡𑀁 𑀅𑀜𑁆𑀚𑀦𑀁 𑀲𑀘𑁆𑀘𑀜𑁆𑀚𑀦𑀦𑁆𑀢𑀺 𑀆𑀳 ‘‘𑀲𑀻𑀢𑀮𑀪𑁂𑀲𑀚𑁆𑀚𑀜𑁆𑀚𑀦’’𑀦𑁆𑀢𑀺. 𑀲𑀮𑀸𑀓𑀯𑁂𑀚𑁆𑀚𑀓𑀫𑁆𑀫𑀦𑁆𑀢𑀺 𑀅𑀓𑁆𑀔𑀺𑀭𑁄𑀕𑀯𑁂𑀚𑁆𑀚𑀓𑀫𑁆𑀫𑀁. 𑀲𑀮𑀸𑀓𑀲𑀤𑀺𑀲𑀢𑁆𑀢𑀸 𑀲𑀮𑀸𑀓𑀲𑀗𑁆𑀔𑀸𑀢𑀲𑁆𑀲 𑀅𑀓𑁆𑀔𑀺𑀭𑁄𑀕𑀲𑁆𑀲 𑀯𑁂𑀚𑁆𑀚𑀓𑀫𑁆𑀫𑀦𑁆𑀢𑀺 ¶ 𑀳𑀺 𑀲𑀸𑀮𑀸𑀓𑀺𑀬𑀁. 𑀇𑀤𑀁 𑀧𑀦 𑀯𑀼𑀢𑁆𑀢𑀸𑀯𑀲𑁂𑀲𑀲𑁆𑀲 𑀅𑀓𑁆𑀔𑀺𑀭𑁄𑀕𑀧𑀝𑀺𑀓𑀫𑁆𑀫𑀲𑁆𑀲 𑀲𑀗𑁆𑀕𑀳𑀡𑀢𑁆𑀣𑀁 𑀯𑀼𑀢𑁆𑀢𑀁 ‘‘𑀢𑀧𑁆𑀧𑀦𑀸𑀤𑀬𑁄𑀧𑀺 𑀳𑀺 𑀲𑀸𑀮𑀸𑀓𑀺𑀬𑀸𑀦𑁂𑀯𑀸’’𑀢𑀺. 𑀧𑀝𑀺𑀯𑀺𑀤𑁆𑀥𑀲𑁆𑀲 𑀲𑀮𑀸𑀓𑀲𑁆𑀲 𑀦𑀺𑀓𑁆𑀔𑀫𑀦𑀢𑁆𑀣𑀁 𑀯𑁂𑀚𑁆𑀚𑀓𑀫𑁆𑀫𑀁 𑀲𑀮𑀸𑀓𑀯𑁂𑀚𑁆𑀚𑀓𑀫𑁆𑀫𑀦𑁆𑀢𑀺 𑀓𑁂𑀘𑀺, 𑀢𑀁 𑀧𑀦 𑀲𑀮𑁆𑀮𑀓𑀢𑁆𑀢𑀺𑀬𑀧𑀤𑁂𑀦𑁂𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀮𑁆𑀮𑀲𑁆𑀲 𑀧𑀝𑀺𑀯𑀺𑀤𑁆𑀥𑀲𑁆𑀲 𑀓𑀢𑁆𑀢𑀦𑀁 𑀉𑀩𑁆𑀩𑀸𑀳𑀦𑀁 𑀲𑀮𑁆𑀮𑀓𑀢𑁆𑀢𑀁, 𑀢𑀤𑀢𑁆𑀣𑀸𑀬 𑀯𑁂𑀚𑁆𑀚𑀓𑀫𑁆𑀫𑀁 𑀲𑀮𑁆𑀮𑀓𑀢𑁆𑀢𑀯𑁂𑀚𑁆𑀚𑀓𑀫𑁆𑀫𑀁. 𑀓𑀼𑀫𑀸𑀭𑀁 𑀪𑀭𑀢𑀻𑀢𑀺 𑀓𑀼𑀫𑀸𑀭𑀪𑀢𑁄, 𑀢𑀲𑁆𑀲 𑀪𑀸𑀯𑁄 𑀓𑁄𑀫𑀸𑀭𑀪𑀘𑁆𑀘𑀁, 𑀓𑀼𑀫𑀸𑀭𑁄 𑀏𑀯 𑀯𑀸 𑀓𑁄𑀫𑀸𑀭𑁄, 𑀪𑀢𑀦𑀁 𑀪𑀘𑁆𑀘𑀁, 𑀢𑀲𑁆𑀲 𑀪𑀘𑁆𑀘𑀁 𑀢𑀣𑀸, 𑀢𑀤𑀪𑀺𑀦𑀺𑀧𑁆𑀨𑀸𑀤𑀓𑀁 𑀯𑁂𑀚𑁆𑀚𑀓𑀫𑁆𑀫𑀦𑁆𑀢𑀺 𑀅𑀢𑁆𑀣𑁄. 𑀫𑀽𑀮𑀸𑀦𑀺 𑀧𑀥𑀸𑀦𑀸𑀦𑀺 𑀭𑁄𑀕𑀽𑀧𑀲𑀫𑀦𑁂 𑀲𑀫𑀢𑁆𑀣𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀫𑀽𑀮𑀪𑁂𑀲𑀚𑁆𑀚𑀸𑀦𑀺, 𑀫𑀽𑀮𑀸𑀦𑀁 𑀯𑀸 𑀩𑁆𑀬𑀸𑀥𑀻𑀦𑀁 𑀪𑁂𑀲𑀚𑁆𑀚𑀸𑀦𑀺 𑀢𑀣𑀸. 𑀫𑀽𑀮𑀸𑀦𑀼𑀩𑀦𑁆𑀥𑀯𑀲𑁂𑀦 𑀳𑀺 𑀤𑀼𑀯𑀺𑀥𑁄 𑀩𑁆𑀬𑀸𑀥𑀺. 𑀢𑀢𑁆𑀭 𑀫𑀽𑀮𑀩𑁆𑀬𑀸𑀥𑀺𑀫𑁆𑀳𑀺 𑀢𑀺𑀓𑀺𑀘𑁆𑀙𑀺𑀢𑁂 𑀬𑁂𑀪𑀼𑀬𑁆𑀬𑁂𑀦 𑀇𑀢𑀭𑀁 𑀯𑀽𑀧𑀲𑀫𑀢𑀺, 𑀢𑁂𑀦𑀸𑀳 ‘‘𑀓𑀸𑀬𑀢𑀺𑀓𑀺𑀘𑁆𑀙𑀢𑀁 𑀤𑀲𑁆𑀲𑁂𑀢𑀻’’𑀢𑀺𑀆𑀤𑀺 ¶ . 𑀢𑀢𑁆𑀣 𑀓𑀸𑀬𑀢𑀺𑀓𑀺𑀘𑁆𑀙𑀢𑀦𑁆𑀢𑀺 𑀫𑀽𑀮𑀪𑀸𑀯𑀢𑁄 𑀲𑀭𑀻𑀭𑀪𑀽𑀢𑁂𑀳𑀺 𑀪𑁂𑀲𑀚𑁆𑀚𑁂𑀳𑀺, 𑀲𑀭𑀻𑀭𑀪𑀽𑀢𑀸𑀦𑀁 𑀯𑀸 𑀭𑁄𑀕𑀸𑀦𑀁 𑀢𑀺𑀓𑀺𑀘𑁆𑀙𑀓𑀪𑀸𑀯𑀁. 𑀔𑀸𑀭𑀸𑀤𑀻𑀦𑀻𑀢𑀺 𑀔𑀸𑀭𑁄𑀤𑀓𑀸𑀤𑀻𑀦𑀺. 𑀢𑀤𑀦𑀼𑀭𑀽𑀧𑁂 𑀯𑀡𑁂𑀢𑀺 𑀯𑀽𑀧𑀲𑀫𑀺𑀢𑀲𑁆𑀲 𑀫𑀽𑀮𑀩𑁆𑀬𑀸𑀥𑀺𑀦𑁄 𑀅𑀦𑀼𑀘𑁆𑀙𑀯𑀺𑀓𑁂 𑀅𑀭𑀼𑀫𑁆𑀳𑀺. 𑀢𑁂𑀲𑀦𑁆𑀢𑀺 𑀫𑀽𑀮𑀪𑁂𑀲𑀚𑁆𑀚𑀸𑀦𑀁. 𑀅𑀧𑀦𑀬𑀦𑀁 𑀅𑀧𑀳𑀭𑀡𑀁, 𑀢𑁂𑀳𑀺 𑀅𑀢𑀺𑀓𑀺𑀘𑁆𑀙𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀜𑁆𑀘 𑀓𑁄𑀫𑀸𑀭𑀪𑀘𑁆𑀘𑀲𑀮𑁆𑀮𑀓𑀢𑁆𑀢𑀲𑀸𑀮𑀸𑀓𑀺𑀬𑀸𑀤𑀺𑀯𑀺𑀲𑁂𑀲𑀪𑀽𑀢𑀸𑀦𑀁 𑀢𑀦𑁆𑀢𑀻𑀦𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀢𑁆𑀢𑀸 𑀧𑀸𑀭𑀺𑀲𑁂𑀲𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀤𑀯𑀲𑁂𑀲𑀸𑀬 𑀢𑀦𑁆𑀢𑀺𑀬𑀸 𑀇𑀥 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄, 𑀲𑀩𑁆𑀩𑀸𑀦𑀺 𑀘𑁂𑀢𑀸𑀦𑀺 𑀆𑀚𑀻𑀯𑀳𑁂𑀢𑀼𑀓𑀸𑀦𑀺𑀬𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀸𑀦𑀺 ‘‘𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁧) 𑀯𑀼𑀢𑁆𑀢𑀢𑁆𑀢𑀸. 𑀬𑀁 𑀧𑀦 𑀢𑀢𑁆𑀣 𑀢𑀢𑁆𑀣 𑀧𑀸𑀴𑀺𑀬𑀁 ‘‘𑀇𑀢𑀺 𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀇𑀢𑀻-𑀢𑀺 𑀧𑀓𑀸𑀭𑀢𑁆𑀣𑁂 𑀦𑀺𑀧𑀸𑀢𑁄, 𑀯𑀸-𑀢𑀺 𑀯𑀺𑀓𑀧𑁆𑀧𑀦𑀢𑁆𑀣𑁂. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀫𑀺𑀦𑀸 𑀧𑀓𑀸𑀭𑁂𑀦, 𑀇𑀢𑁄 𑀅𑀜𑁆𑀜𑁂𑀦 𑀯𑀸𑀢𑀺. 𑀢𑁂𑀦 𑀬𑀸𑀦𑀺 𑀇𑀢𑁄 𑀩𑀸𑀳𑀺𑀭𑀓𑀧𑀩𑁆𑀩𑀚𑀺𑀢𑀸 𑀲𑀺𑀧𑁆𑀧𑀸𑀬𑀢𑀦𑀯𑀺𑀚𑁆𑀚𑀸𑀝𑁆𑀞𑀸𑀦𑀸𑀤𑀻𑀦𑀺 𑀚𑀻𑀯𑀺𑀓𑁄𑀧𑀸𑀬𑀪𑀽𑀢𑀸𑀦𑀺 𑀆𑀚𑀻𑀯𑀺𑀓𑀧𑀓𑀢𑀸 𑀉𑀧𑀚𑀻𑀯𑀦𑁆𑀢𑀺, 𑀢𑁂𑀲𑀁 𑀧𑀭𑀺𑀕𑁆𑀕𑀳𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀫𑀳𑀸𑀲𑀻𑀮𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀲𑀲𑁆𑀲𑀢𑀯𑀸𑀤𑀯𑀡𑁆𑀡𑀦𑀸

𑁨𑁮. 𑀇𑀤𑀸𑀦𑀺 𑀲𑀼𑀜𑁆𑀜𑀢𑀸𑀧𑀓𑀸𑀲𑀦𑀯𑀸𑀭𑀲𑁆𑀲𑀢𑁆𑀣𑀁 𑀯𑀡𑁆𑀡𑁂𑀦𑁆𑀢𑁄 𑀅𑀦𑀼𑀲𑀦𑁆𑀥𑀺𑀁 𑀧𑀓𑀸𑀲𑁂𑀢𑀼𑀁 ‘‘𑀏𑀯’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀼𑀢𑁆𑀢𑀯𑀡𑁆𑀡𑀲𑁆𑀲𑀸𑀢𑀺 𑀲𑀳𑀢𑁆𑀣𑁂 𑀙𑀝𑁆𑀞𑀺𑀯𑀘𑀦𑀁, 𑀲𑀸𑀫𑀺𑀅𑀢𑁆𑀣𑁂 𑀯𑀸 𑀅𑀦𑀼𑀲𑀦𑁆𑀥𑀺-𑀲𑀤𑁆𑀤𑀲𑁆𑀲 𑀪𑀸𑀯𑀓𑀫𑁆𑀫𑀯𑀲𑁂𑀦 𑀓𑀺𑀭𑀺𑀬𑀸𑀤𑁂𑀲𑀦𑀸𑀲𑀼 𑀧𑀯𑀢𑁆𑀢𑀦𑀢𑁄. 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀯𑀼𑀢𑁆𑀢𑀯𑀡𑁆𑀡𑀲𑁆𑀲𑀸𑀢𑀺 ‘‘𑀬𑀸𑀯𑀜𑁆𑀘𑀺𑀤𑀁 𑀢𑁂𑀦 𑀪𑀕𑀯𑀢𑀸’’𑀢𑀺𑀆𑀤𑀺𑀦𑀸 ¶ 𑀯𑀼𑀢𑁆𑀢𑀯𑀡𑁆𑀡𑀲𑁆𑀲. 𑀢𑀢𑁆𑀭 𑀧𑀸𑀴𑀺𑀬𑀁 𑀅𑀬𑀁 𑀲𑀫𑁆𑀩𑀦𑁆𑀥𑁄 𑁋 𑀦 𑀪𑀺𑀓𑁆𑀔𑀯𑁂, 𑀏𑀢𑁆𑀢𑀓𑀸 𑀏𑀯 𑀩𑀼𑀤𑁆𑀥𑀕𑀼𑀡𑀸 𑀬𑁂 𑀢𑀼𑀫𑁆𑀳𑀸𑀓𑀁 𑀧𑀸𑀓𑀝𑀸, 𑀅𑀧𑀸𑀓𑀝𑀸 𑀧𑀦 ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂, 𑀅𑀜𑁆𑀜𑁂 𑀥𑀫𑁆𑀫𑀸’’𑀢𑀺 𑀯𑀺𑀢𑁆𑀣𑀸𑀭𑁄. ‘‘𑀇𑀫𑁂 𑀤𑀺𑀝𑁆𑀞𑀺𑀝𑁆𑀞𑀸𑀦𑀸 𑀏𑀯𑀁 𑀕𑀳𑀺𑀢𑀸’’𑀢𑀺𑀆𑀤𑀺𑀦𑀸 𑀲𑀲𑁆𑀲𑀢𑀸𑀤𑀺𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀦𑀁 𑀬𑀣𑀸𑀕𑀳𑀺𑀢𑀸𑀓𑀸𑀭𑀲𑁆𑀲 𑀲𑀼𑀜𑁆𑀜𑀪𑀸𑀯𑀧𑁆𑀧𑀓𑀸𑀲𑀦𑀢𑁄, ‘‘𑀢𑀜𑁆𑀘 𑀧𑀚𑀸𑀦𑀦𑀁 𑀦 𑀧𑀭𑀸𑀫𑀲𑀢𑀻’’𑀢𑀺 𑀲𑀻𑀮𑀸𑀤𑀻𑀦𑀜𑁆𑀘 𑀅𑀧𑀭𑀸𑀫𑀲𑀦𑀻𑀬𑀪𑀸𑀯𑀤𑀻𑀧𑀦𑁂𑀦 𑀦𑀺𑀘𑁆𑀘𑀲𑀸𑀭𑀸𑀤𑀺𑀯𑀺𑀭𑀳𑀧𑁆𑀧𑀓𑀸𑀲𑀦𑀢𑁄, 𑀬𑀸𑀲𑀼 𑀯𑁂𑀤𑀦𑀸𑀲𑀼 𑀅𑀯𑀻𑀢𑀭𑀸𑀕𑀢𑀸𑀬 𑀩𑀸𑀳𑀺𑀭𑀸𑀦𑀁 𑀏𑀢𑀸𑀦𑀺 𑀤𑀺𑀝𑁆𑀞𑀺𑀯𑀺𑀩𑀦𑁆𑀥𑀓𑀸𑀦𑀺 𑀲𑀫𑁆𑀪𑀯𑀦𑁆𑀢𑀺, 𑀢𑀸𑀲𑀁 𑀧𑀘𑁆𑀘𑀬𑀪𑀽𑀢𑀸𑀦𑀜𑁆𑀘 𑀲𑀫𑁆𑀫𑁄𑀳𑀸𑀤𑀻𑀦𑀁 𑀯𑁂𑀤𑀓𑀓𑀸𑀭𑀓𑀲𑀪𑀸𑀯𑀸𑀪𑀸𑀯𑀤𑀲𑁆𑀲𑀦𑀫𑀼𑀔𑁂𑀦 𑀲𑀩𑁆𑀩𑀥𑀫𑁆𑀫𑀸𑀦𑀁 𑀅𑀢𑁆𑀢𑀢𑁆𑀢𑀦𑀺𑀬𑀢𑀸𑀯𑀺𑀭𑀳𑀤𑀻𑀧𑀦𑀢𑁄, 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀤𑀻𑀧𑀦𑀢𑁄 𑀘 𑀅𑀬𑀁 𑀤𑁂𑀲𑀦𑀸 ¶ 𑀲𑀼𑀜𑁆𑀜𑀢𑀸𑀯𑀺𑀪𑀸𑀯𑀦𑀧𑁆𑀧𑀥𑀸𑀦𑀸𑀢𑀺 𑀆𑀳 ‘‘𑀲𑀼𑀜𑁆𑀜𑀢𑀸𑀧𑀓𑀸𑀲𑀦𑀁 𑀆𑀭𑀪𑀻’’𑀢𑀺.

𑀧𑀭𑀺𑀬𑀢𑁆𑀢𑀻𑀢𑀺 𑀯𑀺𑀦𑀬𑀸𑀤𑀺𑀪𑁂𑀤𑀪𑀺𑀦𑁆𑀦𑀸 𑀫𑀦𑀲𑀸 𑀯𑀯𑀢𑁆𑀣𑀸𑀧𑀺𑀢𑀸 𑀢𑀦𑁆𑀢𑀺. 𑀤𑁂𑀲𑀦𑀸𑀢𑀺 𑀢𑀲𑁆𑀲𑀸 𑀢𑀦𑁆𑀢𑀺𑀬𑀸 𑀫𑀦𑀲𑀸 𑀯𑀯𑀢𑁆𑀣𑀸𑀧𑀺𑀢𑀸𑀬 𑀯𑀺𑀪𑀸𑀯𑀦𑀸, 𑀬𑀣𑀸𑀥𑀫𑁆𑀫𑀁 𑀥𑀫𑁆𑀫𑀸𑀪𑀺𑀮𑀸𑀧𑀪𑀽𑀢𑀸 𑀯𑀸 𑀧𑀜𑁆𑀜𑀸𑀧𑀦𑀸, 𑀅𑀦𑀼𑀮𑁄𑀫𑀸𑀤𑀺𑀯𑀲𑁂𑀦 𑀯𑀸 𑀓𑀣𑀦𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀤𑁂𑀲𑀦𑀸𑀦𑀁 𑀯𑀺𑀲𑁂𑀲𑁄 𑀧𑀼𑀩𑁆𑀩𑁂𑀬𑁂𑀯 𑀯𑀯𑀢𑁆𑀣𑀸𑀧𑀺𑀢𑁄𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀤𑁂𑀲𑀦𑀸𑀬, 𑀧𑀭𑀺𑀬𑀢𑁆𑀢𑀺𑀬’’𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀏𑀯𑀫𑀸𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀲𑀘𑁆𑀘𑀲𑀪𑀸𑀯𑀲𑀫𑀸𑀥𑀺𑀧𑀜𑁆𑀜𑀸𑀧𑀓𑀢𑀺𑀧𑀼𑀜𑁆𑀜𑀸𑀧𑀢𑁆𑀢𑀺𑀜𑁂𑀬𑁆𑀬𑀸𑀤𑀬𑁄 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀢𑀣𑀸 𑀳𑀺 𑀅𑀬𑀁 𑀥𑀫𑁆𑀫-𑀲𑀤𑁆𑀤𑁄 ‘‘𑀘𑀢𑀼𑀦𑁆𑀦𑀁 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸𑀦𑀁 𑀅𑀦𑀦𑀼𑀩𑁄𑀥𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧) 𑀲𑀘𑁆𑀘𑁂 𑀧𑀯𑀢𑁆𑀢𑀢𑀺, ‘‘𑀓𑀼𑀲𑀮𑀸 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧) 𑀲𑀪𑀸𑀯𑁂, ‘‘𑀏𑀯𑀁𑀥𑀫𑁆𑀫𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁧𑁩, 𑁯𑁪, 𑁧𑁪𑁫; 𑁩.𑁧𑁪𑁨; 𑀫. 𑀦𑀺. 𑁩.𑁧𑁬𑁭; 𑀲𑀁. 𑀦𑀺. 𑁫.𑁩𑁭𑁮) 𑀲𑀫𑀸𑀥𑀺𑀫𑁆𑀳𑀺, ‘‘𑀲𑀘𑁆𑀘𑀁 𑀥𑀫𑁆𑀫𑁄 𑀥𑀺𑀢𑀺 𑀘𑀸𑀕𑁄, 𑀲 𑀯𑁂 𑀧𑁂𑀘𑁆𑀘 𑀦 𑀲𑁄𑀘𑀢𑀺’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁯𑁦) 𑀧𑀜𑁆𑀜𑀸𑀬𑀁, ‘‘𑀚𑀸𑀢𑀺𑀥𑀫𑁆𑀫𑀸𑀦𑀁 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁩𑁧; 𑁩.𑁩𑁭𑁩; 𑀧𑀝𑀺. 𑀫. 𑁧.𑁩𑁩) 𑀧𑀓𑀢𑀺𑀬𑀁, ‘‘𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀲𑀼𑀔𑀫𑀸𑀯𑀳𑀸𑀢𑀻’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁧𑁮𑁪; 𑀣𑁂𑀭𑀕𑀸. 𑁩𑁦𑁩; 𑀚𑀸. 𑁧.𑁧𑁦.𑁧𑁦𑁨; 𑁧𑁫.𑁩𑁮𑁫) 𑀧𑀼𑀜𑁆𑀜𑁂, ‘‘𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨𑁩𑁩) 𑀆𑀧𑀢𑁆𑀢𑀺𑀬𑀁, ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑀼𑀔𑁂 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫𑀳𑀸𑀦𑀺. 𑁧𑁫𑁬; 𑀘𑀽𑀴𑀦𑀺. 𑁮𑁫; 𑀧𑀝𑀺. 𑀫. 𑁩.𑁫) 𑀜𑁂𑀬𑁆𑀬𑁂 𑀧𑀯𑀢𑁆𑀢𑀢𑀺. 𑀥𑀫𑁆𑀫𑀸 𑀳𑁄𑀦𑁆𑀢𑀻𑀢𑀺 𑀲𑀢𑁆𑀢𑀚𑀻𑀯𑀢𑁄 𑀲𑀼𑀜𑁆𑀜𑀸 𑀥𑀫𑁆𑀫𑀫𑀢𑁆𑀢𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀫𑀢𑁆𑀣𑀺𑀬𑀁 𑀕𑀼𑀡𑁂 𑀧𑀯𑀢𑁆𑀢𑀦𑀦𑁆𑀢𑀺 𑀆𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺.

𑀫𑀓𑀲𑀢𑀼𑀡𑁆𑀟𑀲𑀽𑀘𑀺𑀬𑀸𑀢𑀺 𑀲𑀽𑀘𑀺𑀫𑀼𑀔𑀫𑀓𑁆𑀔𑀺𑀓𑀸𑀬 𑀢𑀼𑀡𑁆𑀟𑀲𑀗𑁆𑀔𑀸𑀢𑀸𑀬 𑀲𑀽𑀘𑀺𑀬𑀸. 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑁄 𑀯𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑀸𑀢𑀺 𑀞𑀧𑁂𑀢𑁆𑀯𑀸 𑀢𑀣𑀸𑀕𑀢𑀁. ‘‘𑀤𑀼𑀤𑁆𑀤𑀲𑀸’’𑀢𑀺 𑀧𑀤𑁂𑀦𑁂𑀯 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀤𑀼𑀓𑁆𑀔𑁄𑀕𑀸𑀳𑀢𑀸 ¶ 𑀧𑀓𑀸𑀲𑀺𑀢𑀸𑀢𑀺 ‘‘𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀸’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀮𑀪𑀺𑀢𑀩𑁆𑀩𑀸𑀢𑀺 𑀮𑀩𑁆𑀪𑀦𑀻𑀬𑀸, 𑀲𑀸 𑀏𑀯 𑀮𑀩𑁆𑀪𑀦𑁂𑀬𑁆𑀬𑀸, 𑀮𑀪𑀻𑀬𑀢𑁂 𑀯𑀸 𑀮𑀩𑁆𑀪𑀦𑀁, 𑀢𑀫𑀭𑀳𑀢𑀻𑀢𑀺 𑀮𑀩𑁆𑀪𑀦𑁂𑀬𑁆𑀬𑀸, 𑀦 𑀮𑀩𑁆𑀪𑀦𑁂𑀬𑁆𑀬𑀸 𑀅𑀮𑀩𑁆𑀪𑀦𑁂𑀬𑁆𑀬𑀸, 𑀧𑀢𑀺𑀝𑁆𑀞𑀳𑀦𑁆𑀢𑀺 𑀏𑀢𑁆𑀣𑀸𑀢𑀺 𑀧𑀢𑀺𑀝𑁆𑀞𑀸, 𑀧𑀢𑀺𑀝𑁆𑀞𑀳𑀦𑀁 𑀯𑀸 𑀧𑀢𑀺𑀝𑁆𑀞𑀸, 𑀅𑀮𑀩𑁆𑀪𑀦𑁂𑀬𑁆𑀬𑀸 𑀧𑀢𑀺𑀝𑁆𑀞𑀸 𑀏𑀢𑁆𑀣𑀸𑀢𑀺 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀘𑁂 𑀓𑁄𑀘𑀺 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀅𑀚𑀸𑀦𑀦𑁆𑀢𑁄 𑀜𑀸𑀡𑁂𑀦 ¶ 𑀢𑁂 𑀥𑀫𑁆𑀫𑁂 𑀑𑀕𑀸𑀳𑀺𑀢𑀼𑀁 𑀉𑀲𑁆𑀲𑀸𑀳𑀁 𑀓𑀭𑁂𑀬𑁆𑀬, 𑀢𑀲𑁆𑀲 𑀢𑀁 𑀜𑀸𑀡𑀁 𑀅𑀧𑁆𑀧𑀢𑀺𑀝𑁆𑀞𑀫𑁂𑀯 𑀫𑀓𑀲𑀢𑀼𑀡𑁆𑀟𑀲𑀽𑀘𑀺 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑁂𑀢𑀺. 𑀑𑀕𑀸𑀳𑀺𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 ‘‘𑀏𑀢𑁆𑀢𑀓𑀸 𑀏𑀢𑁂 𑀈𑀤𑀺𑀲𑀸 𑀯𑀸’’𑀢𑀺 𑀢𑁂 𑀧𑀲𑁆𑀲𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀯𑀼𑀢𑁆𑀢𑀁 ‘‘𑀕𑀫𑁆𑀪𑀻𑀭𑀢𑁆𑀢𑀸 𑀏𑀯 𑀤𑀼𑀤𑁆𑀤𑀲𑀸’’𑀢𑀺. 𑀬𑁂 𑀧𑀦 𑀤𑀝𑁆𑀞𑀼𑀫𑁂𑀯 𑀦 𑀲𑀓𑁆𑀓𑀸, 𑀢𑁂𑀲𑀁 𑀑𑀕𑀸𑀳𑀺𑀢𑁆𑀯𑀸 𑀅𑀦𑀼 𑀅𑀦𑀼 𑀩𑀼𑀚𑁆𑀛𑀦𑁂 𑀓𑀣𑀸 𑀏𑀯 𑀦𑀢𑁆𑀣𑀻𑀢𑀺 𑀆𑀳 ‘‘𑀤𑀼𑀤𑁆𑀤𑀲𑀢𑁆𑀢𑀸 𑀏𑀯 𑀤𑀼𑀭𑀦𑀼𑀩𑁄𑀥𑀸𑀢𑀺. 𑀲𑀩𑁆𑀩𑀓𑀺𑀮𑁂𑀲𑀧𑀭𑀺𑀴𑀸𑀳𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀲𑀗𑁆𑀔𑀸𑀢𑀅𑀕𑁆𑀕𑀨𑀮𑀫𑀢𑁆𑀣𑀓𑁂 𑀲𑀫𑀼𑀧𑁆𑀧𑀦𑁆𑀦𑀢𑀸, 𑀧𑀼𑀭𑁂𑀘𑀭𑀸𑀦𑀼𑀘𑀭𑀯𑀲𑁂𑀦 𑀦𑀺𑀩𑁆𑀩𑀼𑀢𑀲𑀩𑁆𑀩𑀓𑀺𑀮𑁂𑀲𑀧𑀭𑀺𑀴𑀸𑀳𑀲𑀫𑀸𑀧𑀢𑁆𑀢𑀺𑀲𑀫𑁄𑀓𑀺𑀡𑁆𑀡𑀢𑁆𑀢𑀸 𑀘 𑀦𑀺𑀩𑁆𑀩𑀼𑀢𑀲𑀩𑁆𑀩𑀧𑀭𑀺𑀴𑀸𑀳𑀸. 𑀢𑀩𑁆𑀪𑀸𑀯𑀢𑁄 𑀲𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀦𑁆𑀢𑀸𑀭𑀫𑁆𑀫𑀡𑀸𑀦𑀺 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀅𑀦𑀼𑀧𑀲𑀦𑁆𑀢𑀲𑀪𑀸𑀯𑀸𑀦𑀁 𑀓𑀺𑀮𑁂𑀲𑀸𑀦𑀁, 𑀲𑀗𑁆𑀔𑀸𑀭𑀸𑀦𑀜𑁆𑀘 𑀅𑀪𑀸𑀯𑀢𑁄.

𑀅𑀣 𑀯𑀸 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀢𑀩𑁆𑀩𑀺𑀲𑀬𑀯𑀺𑀜𑁆𑀜𑀸𑀡𑀸𑀦𑀁 𑀅𑀦𑀦𑁆𑀢𑀪𑀸𑀯𑁄 𑀯𑀺𑀬 𑀲𑀼𑀲𑀫𑀽𑀳𑀢𑀯𑀺𑀓𑁆𑀔𑁂𑀧𑀢𑀸𑀬 𑀦𑀺𑀘𑁆𑀘𑀲𑀫𑀸𑀳𑀺𑀢𑀲𑁆𑀲 𑀫𑀦𑀲𑀺𑀓𑀸𑀭𑀲𑁆𑀲 𑀯𑀲𑁂𑀦 𑀢𑀤𑀸𑀭𑀫𑁆𑀫𑀡𑀥𑀫𑁆𑀫𑀸𑀦𑀁 𑀲𑀦𑁆𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀯𑀺𑀭𑀚𑁆𑀛𑀺𑀢𑁆𑀯𑀸 𑀦𑀺𑀫𑀺𑀢𑁆𑀢𑀧𑀝𑀺𑀯𑁂𑀥𑁄 𑀯𑀺𑀬 𑀇𑀲𑁆𑀲𑀸𑀲𑀸𑀦𑀁 𑀅𑀯𑀺𑀭𑀚𑁆𑀛𑀺𑀢𑁆𑀯𑀸 𑀥𑀫𑁆𑀫𑀸𑀦𑀁 𑀬𑀣𑀸𑀪𑀽𑀢𑀲𑀪𑀸𑀯𑀸𑀯𑀩𑁄𑀥𑁄 𑀲𑀸𑀤𑀼𑀭𑀲𑁄 𑀫𑀳𑀸𑀭𑀲𑁄𑀯 𑀳𑁄𑀢𑀻𑀢𑀺 𑀆𑀳 ‘‘𑀅𑀢𑀺𑀢𑁆𑀢𑀺𑀓𑀭𑀡𑀝𑁆𑀞𑁂𑀦𑀸’’𑀢𑀺, 𑀅𑀢𑀧𑁆𑀧𑀦𑀓𑀭𑀡𑀲𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀲𑁄𑀳𑀺𑀘𑁆𑀘𑀁 𑀢𑀺𑀢𑁆𑀢𑀺 𑀢𑀧𑁆𑀧𑀦𑀦𑁆𑀢𑀺 𑀳𑀺 𑀧𑀭𑀺𑀬𑀸𑀬𑁄. 𑀅𑀢𑀺𑀢𑁆𑀢𑀺𑀓𑀭𑀡𑀝𑁆𑀞𑁂𑀦𑀸𑀢𑀺 𑀧𑀢𑁆𑀣𑁂𑀢𑁆𑀯𑀸 𑀲𑀸𑀤𑀼𑀭𑀲𑀓𑀭𑀡𑀝𑁆𑀞𑁂𑀦𑀸𑀢𑀺𑀧𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀧𑀝𑀺𑀯𑁂𑀥𑀧𑁆𑀧𑀢𑁆𑀢𑀸𑀦𑀁 𑀢𑁂𑀲𑀼 𑀘 𑀩𑀼𑀤𑁆𑀥𑀸𑀦𑀫𑁂𑀯 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀬𑀪𑀸𑀯𑀽𑀧𑀕𑀫𑀦𑀢𑁄 𑀦 𑀢𑀓𑁆𑀓𑀩𑀼𑀤𑁆𑀥𑀺𑀬𑀸 𑀕𑁄𑀘𑀭𑀸𑀢𑀺 𑀆𑀳 ‘‘𑀉𑀢𑁆𑀢𑀫𑀜𑀸𑀡𑀯𑀺𑀲𑀬𑀢𑁆𑀢𑀸’’𑀢𑀺𑀆𑀤𑀺. 𑀦𑀺𑀧𑀼𑀡𑀸𑀢𑀺 𑀜𑁂𑀬𑁆𑀬𑁂𑀲𑀼 𑀢𑀺𑀓𑁆𑀔𑀧𑁆𑀧𑀯𑀢𑁆𑀢𑀺𑀬𑀸 𑀙𑁂𑀓𑀸. 𑀬𑀲𑁆𑀫𑀸 𑀧𑀦 𑀲𑁄 𑀙𑁂𑀓𑀪𑀸𑀯𑁄 𑀆𑀭𑀫𑁆𑀫𑀡𑁂 𑀅𑀧𑁆𑀧𑀝𑀺𑀳𑀢𑀯𑀼𑀢𑁆𑀢𑀺𑀢𑀸𑀬, 𑀲𑀼𑀔𑀼𑀫𑀜𑁂𑀬𑁆𑀬𑀕𑁆𑀕𑀳𑀡𑀲𑀫𑀢𑁆𑀣𑀢𑀸𑀬 𑀘 𑀲𑀼𑀧𑀸𑀓𑀝𑁄 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀡𑁆𑀳𑀲𑀼𑀔𑀼𑀫𑀲𑀪𑀸𑀯𑀢𑁆𑀢𑀸’’𑀢𑀺. 𑀧𑀡𑁆𑀟𑀺𑀢𑁂𑀳𑀺𑀬𑁂𑀯𑀸𑀢𑀺 𑀅𑀯𑀥𑀸𑀭𑀡𑀁 𑀲𑀫𑀢𑁆𑀣𑁂𑀢𑀼𑀁 ‘‘𑀩𑀸𑀮𑀸𑀦𑀁 𑀅𑀯𑀺𑀲𑀬𑀢𑁆𑀢𑀸’’𑀢𑀺 𑀆𑀳.

𑀅𑀬𑀁 𑀅𑀝𑁆𑀞𑀓𑀣𑀸𑀦𑀬𑀢𑁄 𑀅𑀧𑀭𑁄 𑀦𑀬𑁄 𑁋 𑀯𑀺𑀦𑀬𑀧𑀡𑁆𑀡𑀢𑁆𑀢𑀺𑀆𑀤𑀺𑀕𑀫𑁆𑀪𑀻𑀭𑀦𑁂𑀬𑁆𑀬𑀯𑀺𑀪𑀸𑀯𑀦𑀢𑁄 𑀕𑀫𑁆𑀪𑀻𑀭𑀸. 𑀓𑀤𑀸𑀘𑀺𑀬𑁂𑀯 𑀅𑀲𑀗𑁆𑀔𑁆𑀬𑁂𑀬𑁆𑀬𑁂 𑀫𑀳𑀸𑀓𑀧𑁆𑀧𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀧𑀺 𑀤𑀼𑀮𑁆𑀮𑀪𑀤𑀲𑁆𑀲𑀦𑀢𑀸𑀬 𑀤𑀼𑀤𑁆𑀤𑀲𑀸. 𑀤𑀲𑁆𑀲𑀦𑀜𑁆𑀘𑁂𑀢𑁆𑀣 𑀧𑀜𑁆𑀜𑀸𑀘𑀓𑁆𑀔𑀼𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑀦𑁆𑀯𑀬𑀲𑀗𑁆𑀔𑀸𑀢𑀲𑁆𑀲 𑀅𑀦𑀼𑀩𑁄𑀥𑀲𑁆𑀲 𑀓𑀲𑁆𑀲𑀘𑀺𑀤𑁂𑀯 𑀲𑀫𑁆𑀪𑀯𑀢𑁄 𑀤𑀼𑀭𑀦𑀼𑀩𑁄𑀥𑀸. 𑀲𑀦𑁆𑀢𑀲𑀪𑀸𑀯𑀢𑁄, 𑀯𑁂𑀦𑁂𑀬𑁆𑀬𑀸𑀦𑀜𑁆𑀘 𑀲𑀩𑁆𑀩𑀕𑀼𑀡𑀲𑀫𑁆𑀧𑀤𑀸𑀦𑀁 𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀲𑀦𑁆𑀢𑀸. 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀧𑀥𑀸𑀦𑀪𑀸𑀯𑀁 𑀦𑀻𑀢𑀢𑀸𑀬 𑀧𑀡𑀻𑀢𑀸. 𑀲𑀫𑀥𑀺𑀕𑀢𑀲𑀘𑁆𑀘𑀮𑀓𑁆𑀔𑀡𑀢𑀸𑀬 𑀅𑀢𑀓𑁆𑀓𑁂𑀳𑀺 𑀧𑀼𑀕𑁆𑀕𑀮𑁂𑀳𑀺, 𑀅𑀢𑀓𑁆𑀓𑁂𑀦 ¶ 𑀯𑀸 𑀜𑀸𑀡𑁂𑀦 𑀅𑀯𑀘𑀭𑀺𑀢𑀩𑁆𑀩𑀢𑁄 𑀅𑀢𑀓𑁆𑀓𑀸𑀯𑀘𑀭𑀸. 𑀦𑀺𑀧𑀼𑀡𑀁, 𑀦𑀺𑀧𑀼𑀡𑁂 𑀯𑀸 𑀅𑀢𑁆𑀣𑁂 𑀲𑀘𑁆𑀘𑀧𑀘𑁆𑀘𑀬𑀸𑀓𑀸𑀭𑀸𑀤𑀺𑀯𑀲𑁂𑀦 ¶ 𑀯𑀺𑀪𑀸𑀯𑀦𑀢𑁄 𑀦𑀺𑀧𑀼𑀡𑀸. 𑀮𑁄𑀓𑁂 𑀅𑀕𑁆𑀕𑀧𑀡𑁆𑀟𑀺𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀯𑁂𑀤𑀺𑀢𑀩𑁆𑀩𑀢𑁄 𑀧𑀓𑀸𑀲𑀺𑀢𑀩𑁆𑀩𑀢𑁄 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀸.

𑀅𑀦𑀸𑀯𑀭𑀡𑀜𑀸𑀡𑀧𑀝𑀺𑀮𑀸𑀪𑀢𑁄 𑀳𑀺 𑀪𑀕𑀯𑀸 ‘‘𑀲𑀩𑁆𑀩𑀯𑀺𑀤𑀽𑀳𑀫𑀲𑁆𑀫𑀺, (𑀫. 𑀦𑀺. 𑁧.𑁧𑁭𑁮; 𑁨.𑁩𑁪𑁨; 𑀥. 𑀧. 𑁩𑁫𑁩; 𑀫𑀳𑀸𑀯. 𑁧𑁧) 𑀤𑀲𑀩𑀮𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁨𑁧; 𑁨.𑁨𑁨) 𑀅𑀢𑁆𑀢𑀦𑁄 𑀲𑀩𑁆𑀩𑀜𑁆𑀜𑀼𑀢𑀸𑀤𑀺𑀕𑀼𑀡𑁂 𑀧𑀓𑀸𑀲𑁂𑀲𑀺, 𑀢𑁂𑀦𑁂𑀯𑀸𑀳 ‘‘𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀻’’𑀢𑀺. 𑀲𑀬𑀁-𑀲𑀤𑁆𑀤𑁂𑀦, 𑀦𑀺𑀤𑁆𑀥𑀸𑀭𑀺𑀢𑀸𑀯𑀥𑀸𑀭𑀡𑁂𑀦 𑀯𑀸 𑀦𑀺𑀯𑀢𑁆𑀢𑁂𑀢𑀩𑁆𑀩𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀜𑁆𑀜𑀦𑁂𑀬𑁆𑀬𑁄 𑀳𑀼𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, 𑀅𑀜𑁆𑀜𑁂𑀳𑀺 𑀅𑀩𑁄𑀥𑀺𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀪𑀺𑀜𑁆𑀜𑀸𑀢𑀺 𑀬-𑀓𑀸𑀭𑀮𑁄𑀧𑁄 ‘‘𑀅𑀜𑁆𑀜𑀸𑀡𑀢𑀸 𑀆𑀧𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 (𑀧𑀭𑀺. 𑁨𑁯𑁬) 𑀯𑀺𑀬𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦𑀸’’𑀢𑀺 𑀇𑀫𑀺𑀦𑀸. 𑀅𑀧𑀺𑀘 ‘‘𑀲𑀬𑀁 𑀅𑀪𑀺𑀜𑁆𑀜𑀸’’𑀢𑀺 𑀧𑀤𑀲𑁆𑀲 𑀅𑀦𑀜𑁆𑀜𑀦𑁂𑀬𑁆𑀬𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑀯𑀘𑀦𑀁, ‘‘𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺 𑀧𑀤𑀲𑁆𑀲 𑀧𑀦 𑀲𑀬𑀫𑁂𑀯…𑀧𑁂… 𑀓𑀢𑁆𑀯𑀸𑀢𑀺. 𑀲𑀬𑀁-𑀲𑀤𑁆𑀤𑀸 𑀳𑀺 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀏𑀢𑁆𑀣𑀸𑀧𑀺 𑀲𑀫𑁆𑀩𑀚𑁆𑀛𑀺𑀢𑀩𑁆𑀩𑁄. 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦𑀸𑀢𑀺 𑀘 𑀢𑀲𑁆𑀲 𑀳𑁂𑀢𑀼𑀯𑀘𑀦𑀁, 𑀓𑀭𑀡𑀯𑀘𑀦𑀁 𑀯𑀸.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀯𑀺𑀬 𑀲𑀘𑁆𑀙𑀺𑀓𑀸𑀢𑀩𑁆𑀩𑀲𑀪𑀸𑀯𑀁 𑀦 𑀳𑁄𑀢𑀺, 𑀆𑀲𑀯𑀓𑁆𑀔𑀬𑀜𑀸𑀡𑁂 𑀧𑀦 𑀅𑀥𑀺𑀕𑀢𑁂 𑀅𑀥𑀺𑀕𑀢𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀧𑀘𑁆𑀘𑀓𑁆𑀔𑀓𑀭𑀡𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀢𑀺 𑀆𑀳 ‘‘𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸’’𑀢𑀺. 𑀳𑁂𑀢𑀼𑀅𑀢𑁆𑀣𑁂 𑀘𑁂𑀢𑀁 𑀓𑀭𑀡𑀯𑀘𑀦𑀁, 𑀅𑀕𑁆𑀕𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀲𑁆𑀲 𑀅𑀪𑀺𑀯𑀺𑀲𑀺𑀝𑁆𑀞𑀜𑀸𑀡𑀲𑁆𑀲𑀸𑀥𑀺𑀕𑀫𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀅𑀪𑀺𑀯𑀺𑀲𑀺𑀝𑁆𑀞𑀜𑀸𑀡𑀦𑁆𑀢𑀺 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀜𑀸𑀡𑁂 𑀅𑀥𑀺𑀧𑁆𑀧𑁂𑀢𑁂 𑀓𑀭𑀡𑀢𑁆𑀣𑁂 𑀓𑀭𑀡𑀯𑀘𑀦𑀫𑁆𑀧𑀺 𑀬𑀼𑀚𑁆𑀚𑀢𑁂𑀯. 𑀧𑀯𑁂𑀤𑀦𑀜𑁆𑀘𑁂𑀢𑁆𑀣 𑀅𑀜𑁆𑀜𑀸𑀯𑀺𑀲𑀬𑀸𑀦𑀁 𑀲𑀘𑁆𑀘𑀸𑀤𑀻𑀦𑀁 𑀤𑁂𑀲𑀦𑀸𑀓𑀺𑀘𑁆𑀘𑀲𑀸𑀥𑀦𑀢𑁄, ‘‘𑀏𑀓𑁄𑀫𑁆𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁧; 𑀓𑀣𑀸. 𑁪𑁦𑁫) 𑀧𑀝𑀺𑀚𑀸𑀦𑀦𑀢𑁄 𑀘 𑀯𑁂𑀤𑀺𑀢𑀩𑁆𑀩𑀁. 𑀕𑀼𑀡𑀥𑀫𑁆𑀫𑁂𑀳𑀻𑀢𑀺 𑀕𑀼𑀡𑀲𑀗𑁆𑀔𑀸𑀢𑁂𑀳𑀺 𑀥𑀫𑁆𑀫𑁂𑀳𑀺. 𑀬𑀣𑀸𑀪𑀽𑀢𑀫𑁂𑀯 𑀬𑀣𑀸𑀪𑀼𑀘𑁆𑀘𑀁 𑀲𑀓𑀢𑁆𑀣𑁂 𑀡𑁆𑀬𑀧𑀘𑁆𑀘𑀬𑀯𑀲𑁂𑀦.

𑀯𑀤𑀫𑀸𑀦𑀸𑀢𑀺 𑀏𑀢𑁆𑀣 𑀲𑀢𑁆𑀢𑀺𑀅𑀢𑁆𑀣𑁄 𑀫𑀸𑀦𑀲𑀤𑁆𑀤𑁄 𑀬𑀣𑀸 ‘‘𑀏𑀓𑀧𑀼𑀕𑁆𑀕𑀮𑁄 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺, (𑀅. 𑀦𑀺. 𑁧.𑁧𑁭𑁦; 𑀓𑀣𑀸. 𑁪𑁦𑁫) 𑀢𑀲𑁆𑀫𑀸 𑀯𑀢𑁆𑀢𑀼𑀁 𑀉𑀲𑁆𑀲𑀸𑀳𑀁 𑀓𑀭𑁄𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀏𑀯𑀁𑀪𑀽𑀢𑀸 𑀳𑀺 𑀯𑀢𑁆𑀢𑀼𑀓𑀸𑀫𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑁂𑀦𑀸𑀳 ‘‘𑀢𑀣𑀸𑀕𑀢𑀲𑁆𑀲𑀸’’𑀢𑀺𑀆𑀤𑀺 ¶ . 𑀲𑀸𑀯𑀲𑁂𑀲𑀁 𑀯𑀤𑀦𑁆𑀢𑀸𑀧𑀺 𑀯𑀺𑀧𑀭𑀻𑀢𑀯𑀤𑀦𑁆𑀢𑀸 𑀯𑀺𑀬 𑀲𑀫𑁆𑀫𑀸 𑀯𑀤𑀦𑁆𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀬𑀣𑀸 𑀲𑀫𑁆𑀫𑀸 𑀯𑀤𑀦𑁆𑀢𑀺, 𑀢𑀣𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀳𑀸𑀧𑁂𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀳𑀺 𑀅𑀦𑀯𑀲𑁂𑀲𑀯𑀤𑀦𑀫𑁂𑀯 𑀲𑀫𑁆𑀫𑀸 𑀯𑀤𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀯𑀢𑁆𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀼’’𑀦𑁆𑀢𑀺 𑀇𑀫𑀺𑀦𑀸 𑀘 ‘‘𑀯𑀤𑁂𑀬𑁆𑀬𑀼’’𑀦𑁆𑀢𑀺 𑀏𑀢𑀲𑁆𑀲 𑀲𑀫𑀢𑁆𑀣𑀦𑀢𑁆𑀣𑀪𑀸𑀯𑀫𑀸𑀳 𑀬𑀣𑀸 ‘‘𑀲𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁩; 𑀧𑁂𑀝𑀓𑁄. 𑁨𑁨; 𑀫𑀺. 𑀧. 𑁧.𑁧.𑁯) 𑀬𑁂 𑀏𑀯𑀁 𑀪𑀕𑀯𑀢𑀸 𑀣𑁄𑀫𑀺𑀢𑀸, 𑀢𑁂 𑀥𑀫𑁆𑀫𑀸 𑀓𑀢𑀫𑁂𑀢𑀺 𑀬𑁄𑀚𑀦𑀸. ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂, 𑀅𑀜𑁆𑀜𑁂𑀯 𑀥𑀫𑁆𑀫𑀸’’𑀢𑀺𑀆𑀤𑀺𑀧𑀸𑀴𑀺𑀬𑀸 ¶ ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀯𑀘𑀦𑀲𑁆𑀲 𑀯𑀺𑀭𑁄𑀥𑀺𑀪𑀸𑀯𑀁 𑀘𑁄𑀤𑁂𑀦𑁆𑀢𑁄 ‘‘𑀬𑀤𑀺 𑀏𑀯’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀤𑀺 𑀏𑀯𑀦𑁆𑀢𑀺 𑀏𑀯𑀁 ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀯𑀘𑀦𑀁 𑀬𑀤𑀺 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄𑀢𑀺 ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀻𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀢𑁆𑀣𑀺-𑀲𑀤𑁆𑀤𑁄𑀧𑀺 𑀳𑀺 𑀇𑀥 𑀩𑀳𑀼𑀯𑀘𑀦𑁄𑀬𑁂𑀯 ‘‘𑀅𑀢𑁆𑀣𑀺 𑀔𑀻𑀭𑀸, 𑀅𑀢𑁆𑀣𑀺 𑀕𑀸𑀯𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀦𑀺𑀧𑀸𑀢𑀪𑀸𑀯𑀲𑁆𑀲𑁂𑀯 𑀇𑀘𑁆𑀙𑀺𑀢𑀢𑁆𑀢𑀸. 𑀬𑀤𑀺𑀧𑀺 𑀢𑀤𑀺𑀤𑀁 𑀜𑀸𑀡𑀁 𑀏𑀓𑀫𑁂𑀯 𑀲𑀪𑀸𑀯𑀢𑁄, 𑀢𑀣𑀸𑀧𑀺 𑀲𑀫𑁆𑀧𑀬𑁄𑀕𑀢𑁄, 𑀆𑀭𑀫𑁆𑀫𑀡𑀢𑁄 𑀘 𑀧𑀼𑀣𑀼𑀯𑀘𑀦𑀧𑁆𑀧𑀬𑁄𑀕𑀫𑀭𑀳𑀢𑀻𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺 ‘‘𑀧𑀼𑀣𑀼𑀘𑀺𑀢𑁆𑀢…𑀧𑁂… 𑀭𑀫𑁆𑀫𑀡𑀢𑁄’’𑀢𑀺 𑀇𑀫𑀺𑀦𑀸. 𑀧𑀼𑀣𑀼𑀘𑀺𑀢𑁆𑀢𑀲𑀫𑀸𑀬𑁄𑀕𑀢𑁄𑀢𑀺 𑀧𑀼𑀣𑀽𑀳𑀺 𑀘𑀺𑀢𑁆𑀢𑁂𑀳𑀺 𑀲𑀫𑁆𑀧𑀬𑁄𑀕𑀢𑁄. 𑀧𑀼𑀣𑀽𑀦𑀺 𑀆𑀭𑀫𑁆𑀫𑀡𑀸𑀦𑀺 𑀏𑀢𑀲𑁆𑀲𑀸𑀢𑀺 𑀧𑀼𑀣𑀼𑀆𑀭𑀫𑁆𑀫𑀡𑀁, 𑀢𑀩𑁆𑀪𑀸𑀯𑀢𑁄 𑀲𑀩𑁆𑀩𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀧𑀺𑀘 𑀧𑀼𑀣𑀼 𑀆𑀭𑀫𑁆𑀫𑀡𑀁 𑀆𑀭𑀫𑁆𑀫𑀡𑀫𑁂𑀢𑀲𑁆𑀲𑀸𑀢𑀺 𑀧𑀼𑀣𑀼𑀆𑀭𑀫𑁆𑀫𑀡𑀸𑀭𑀫𑁆𑀫𑀡𑀦𑁆𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀑𑀝𑁆𑀞𑀫𑀼𑀔𑁄, 𑀓𑀸𑀫𑀸𑀯𑀘𑀭’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀏𑀓𑀲𑁆𑀲 𑀆𑀭𑀫𑁆𑀫𑀡𑀲𑀤𑁆𑀤𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 ‘‘𑀧𑀼𑀣𑀼𑀆𑀭𑀫𑁆𑀫𑀡𑀢𑁄’’𑀢𑀺 𑀯𑀼𑀢𑁆𑀢𑀁, 𑀢𑁂𑀦𑀲𑁆𑀲 𑀧𑀼𑀣𑀼𑀜𑀸𑀡𑀓𑀺𑀘𑁆𑀘𑀲𑀸𑀥𑀓𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑁂𑀢𑀁 𑀜𑀸𑀡𑀁 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀁, 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁, 𑀧𑀜𑁆𑀘𑀕𑀢𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁, 𑀙𑀲𑀼 𑀅𑀲𑀸𑀥𑀸𑀭𑀡𑀜𑀸𑀡𑁂𑀲𑀼 𑀲𑁂𑀲𑀸𑀲𑀸𑀥𑀸𑀭𑀡𑀜𑀸𑀡𑀸𑀦𑀺, 𑀲𑀢𑁆𑀢𑀸𑀭𑀺𑀬𑀧𑀼𑀕𑁆𑀕𑀮𑀯𑀺𑀪𑀸𑀯𑀦𑀓𑀜𑀸𑀡𑀁, 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀅𑀓𑀫𑁆𑀧𑀦𑀜𑀸𑀡𑀁, 𑀦𑀯𑀲𑀢𑁆𑀢𑀸𑀯𑀸𑀲𑀧𑀭𑀺𑀚𑀸𑀦𑀦𑀜𑀸𑀡𑀁, 𑀤𑀲𑀩𑀮𑀜𑀸𑀡𑀦𑁆𑀢𑀺 𑀏𑀯𑀫𑀸𑀤𑀻𑀦𑀁 𑀅𑀦𑁂𑀓𑀲𑀢𑀲𑀳𑀲𑁆𑀲𑀪𑁂𑀤𑀸𑀦𑀁 𑀜𑀸𑀡𑀸𑀦𑀁 𑀬𑀣𑀸𑀲𑀫𑁆𑀪𑀯𑀁 𑀓𑀺𑀘𑁆𑀘𑀁 𑀲𑀸𑀥𑁂𑀢𑀺, 𑀢𑁂𑀲𑀁 𑀆𑀭𑀫𑁆𑀫𑀡𑀪𑀽𑀢𑀸𑀦𑀁 𑀅𑀦𑁂𑀓𑁂𑀲𑀫𑁆𑀧𑀺 𑀥𑀫𑁆𑀫𑀸𑀦𑀁 𑀢𑀤𑀸𑀭𑀫𑁆𑀫𑀡𑀪𑀸𑀯𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀢𑀜𑁆𑀳𑀻’’𑀢𑀺𑀆𑀤𑀺 𑀬𑀣𑀸𑀓𑁆𑀓𑀫𑀁 𑀢𑀩𑁆𑀩𑀺𑀯𑀭𑀡𑀁. ‘‘𑀬𑀣𑀸𑀳𑀸’’𑀢𑀺𑀆𑀤𑀺𑀦𑀸 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀸𑀴𑀺𑀁 𑀲𑀸𑀥𑀓𑀪𑀸𑀯𑁂𑀦 𑀤𑀲𑁆𑀲𑁂𑀢𑀺. 𑀢𑀢𑁆𑀣𑀸𑀢𑀺 𑀅𑀢𑀻𑀢𑀥𑀫𑁆𑀫𑁂. 𑀏𑀓𑀯𑀸𑀭𑀯𑀲𑁂𑀦 𑀧𑀼𑀣𑀼𑀆𑀭𑀫𑁆𑀫𑀡𑀪𑀸𑀯𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀦𑁂𑀓𑀯𑀸𑀭𑀯𑀲𑁂𑀦 𑀓𑀫𑀧𑁆𑀧𑀯𑀢𑁆𑀢𑀺𑀬𑀸 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀢𑁆𑀢𑀺𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀓𑀫𑁂𑀦𑀸𑀧𑀺 𑀳𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀯𑀺𑀲𑀬𑁂𑀲𑀼 𑀧𑀯𑀢𑁆𑀢𑀢𑀺, 𑀦 𑀢𑀣𑀸 𑀲𑀓𑀺𑀁𑀬𑁂𑀯 ¶ . 𑀬𑀣𑀸 𑀩𑀸𑀳𑀺𑀭𑀓𑀸 𑀯𑀤𑀦𑁆𑀢𑀺 ‘‘𑀲𑀓𑀺𑀁𑀬𑁂𑀯 𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀁 𑀚𑀸𑀦𑀸𑀢𑀺, 𑀦 𑀓𑀫𑁂𑀦𑀸’’𑀢𑀺.

𑀬𑀤𑀺 𑀏𑀯𑀁 𑀅𑀘𑀺𑀦𑁆𑀢𑁂𑀬𑁆𑀬𑀸𑀧𑀭𑀺𑀫𑁂𑀬𑁆𑀬𑀧𑁆𑀧𑀪𑁂𑀤𑀲𑁆𑀲 𑀜𑁂𑀬𑁆𑀬𑀲𑁆𑀲 𑀧𑀭𑀺𑀘𑁆𑀙𑁂𑀤𑀯𑀢𑀸 𑀏𑀓𑁂𑀦 𑀜𑀸𑀡𑁂𑀦 𑀦𑀺𑀭𑀯𑀲𑁂𑀲𑀢𑁄 𑀓𑀣𑀁 𑀧𑀝𑀺𑀯𑁂𑀥𑁄𑀢𑀺, 𑀓𑁄 𑀯𑀸 𑀏𑀯𑀫𑀸𑀳 ‘‘𑀧𑀭𑀺𑀘𑁆𑀙𑁂𑀤𑀯𑀦𑁆𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡’’𑀦𑁆𑀢𑀺. 𑀅𑀧𑀭𑀺𑀘𑁆𑀙𑁂𑀤𑀜𑁆𑀳𑀺 𑀢𑀁 𑀜𑀸𑀡𑀁 𑀜𑁂𑀬𑁆𑀬𑀫𑀺𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑀸𑀯𑀢𑀓𑀁 𑀜𑀸𑀡𑀁, 𑀢𑀸𑀯𑀢𑀓𑀁 𑀜𑁂𑀬𑁆𑀬𑀁. 𑀬𑀸𑀯𑀢𑀓𑀁 𑀜𑁂𑀬𑁆𑀬𑀁, 𑀢𑀸𑀯𑀢𑀓𑀁 𑀜𑀸𑀡’’𑀦𑁆𑀢𑀺 (𑀫𑀳𑀸𑀦𑀺. 𑁬𑁯, 𑁧𑁫𑁬; 𑀘𑀽𑀴𑀦𑀺. 𑁮𑁫; 𑀧𑀝𑀺. 𑀫. 𑁩.𑁫 𑀅𑀥𑀺𑀧𑁆𑀧𑀸𑀬𑀢𑁆𑀣𑀫𑁂𑀯 𑀕𑀳𑀺𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺) 𑀏𑀯𑀫𑁆𑀧𑀺 𑀚𑀸𑀢𑀺𑀪𑀽𑀫𑀺𑀲𑀪𑀸𑀯𑀸𑀤𑀺𑀯𑀲𑁂𑀦, 𑀤𑀺𑀲𑀸𑀤𑁂𑀲𑀓𑀸𑀮𑀸𑀤𑀺𑀯𑀲𑁂𑀦 𑀘 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑁂 𑀜𑁂𑀬𑁆𑀬𑁂 𑀓𑀫𑁂𑀦 𑀕𑀬𑁆𑀳𑀫𑀸𑀦𑁂 𑀅𑀦𑀯𑀲𑁂𑀲𑀧𑀝𑀺𑀯𑁂𑀥𑁄 𑀦 𑀲𑀫𑁆𑀪𑀯𑀢𑀺𑀬𑁂𑀯𑀸𑀢𑀺? 𑀦𑀬𑀺𑀤𑀫𑁂𑀯𑀁. 𑀬𑀜𑁆𑀳𑀺 𑀓𑀺𑀜𑁆𑀘𑀺 𑀪𑀕𑀯𑀢𑀸 𑀜𑀸𑀢𑀼𑀫𑀺𑀘𑁆𑀙𑀺𑀢𑀁 𑀲𑀓𑀮𑀫𑁂𑀓𑀤𑁂𑀲𑁄 𑀯𑀸, 𑀢𑀢𑁆𑀣 𑀅𑀧𑁆𑀧𑀝𑀺𑀳𑀢𑀘𑀸𑀭𑀺𑀢𑀸𑀬 𑀧𑀘𑁆𑀘𑀓𑁆𑀔𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀯𑀺𑀓𑁆𑀔𑁂𑀧𑀸𑀪𑀸𑀯𑀢𑁄 𑀘 𑀪𑀕𑀯𑀸 𑀲𑀩𑁆𑀩𑀓𑀸𑀮𑀁 𑀲𑀫𑀸𑀳𑀺𑀢𑁄𑀢𑀺 ¶ 𑀜𑀸𑀢𑀼𑀫𑀺𑀘𑁆𑀙𑀺𑀢𑀲𑁆𑀲 𑀧𑀘𑁆𑀘𑀓𑁆𑀔𑀪𑀸𑀯𑁄 𑀦 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁. 𑀯𑀼𑀢𑁆𑀢𑀜𑁆𑀳𑀺 ‘‘𑀆𑀓𑀗𑁆𑀔𑀸𑀧𑀝𑀺𑀩𑀤𑁆𑀥𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡’’𑀦𑁆𑀢𑀺𑀆𑀤𑀺, (𑀫𑀳𑀸𑀦𑀺. 𑁬𑁯, 𑁧𑁫𑁬; 𑀘𑀽𑀴𑀦𑀺. 𑁮𑁫; 𑀧𑀝𑀺. 𑀫. 𑁩.𑁫) 𑀦𑀦𑀼 𑀘𑁂𑀢𑁆𑀣 𑀤𑀽𑀭𑀢𑁄 𑀘𑀺𑀢𑁆𑀢𑀧𑀝𑀁 𑀧𑀲𑁆𑀲𑀦𑁆𑀢𑀸𑀦𑀁 𑀯𑀺𑀬, ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀯𑀺𑀧𑀲𑁆𑀲𑀦𑁆𑀢𑀸𑀦𑀁 𑀯𑀺𑀬 𑀘 𑀅𑀦𑁂𑀓𑀥𑀫𑁆𑀫𑀸𑀯𑀩𑁄𑀥𑀓𑀸𑀮𑁂 𑀅𑀦𑀺𑀭𑀽𑀧𑀺𑀢𑀭𑀽𑀧𑁂𑀦 𑀪𑀕𑀯𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀕𑀳𑁂𑀢𑀩𑁆𑀩𑀦𑁆𑀢𑀺? 𑀕𑀳𑁂𑀢𑀩𑁆𑀩𑀁 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑀢𑀸𑀬 𑀩𑀼𑀤𑁆𑀥𑀜𑀸𑀡𑀲𑁆𑀲. 𑀢𑁂𑀦𑁂𑀯𑀸𑀳 ‘‘𑀩𑀼𑀤𑁆𑀥𑀯𑀺𑀲𑀬𑁄 𑀅𑀘𑀺𑀦𑁆𑀢𑁂𑀬𑁆𑀬𑁄’’𑀢𑀺, (𑀅. 𑀦𑀺. 𑁪.𑁭𑁭) 𑀇𑀤𑀁 𑀧𑀦𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁 𑁋 𑀲𑀩𑁆𑀩𑀸𑀓𑀸𑀭𑁂𑀦 𑀲𑀩𑁆𑀩𑀥𑀫𑁆𑀫𑀸𑀯𑀩𑁄𑀥𑀦𑀲𑀫𑀢𑁆𑀣𑀲𑁆𑀲 𑀆𑀓𑀗𑁆𑀔𑀸𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀦𑁄 𑀅𑀦𑀸𑀯𑀭𑀡𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑁂𑀦 𑀪𑀕𑀯𑀸 𑀲𑀦𑁆𑀢𑀸𑀦𑁂𑀦 𑀲𑀩𑁆𑀩𑀥𑀫𑁆𑀫𑀧𑀝𑀺𑀯𑁂𑀥𑀲𑀫𑀢𑁆𑀣𑁄 𑀅𑀳𑁄𑀲𑀺 𑀲𑀩𑁆𑀩𑀦𑁂𑀬𑁆𑀬𑀸𑀯𑀭𑀡𑀲𑁆𑀲 𑀧𑀳𑀸𑀦𑀢𑁄, 𑀢𑀲𑁆𑀫𑀸 𑀲𑀩𑁆𑀩𑀜𑁆𑀜𑀽, 𑀦 𑀲𑀓𑀺𑀁𑀬𑁂𑀯 𑀲𑀩𑁆𑀩𑀥𑀫𑁆𑀫𑀸𑀯𑀩𑁄𑀥𑀢𑁄 𑀬𑀣𑀸𑀲𑀦𑁆𑀢𑀸𑀦𑁂𑀦 𑀲𑀩𑁆𑀩𑀲𑁆𑀲 𑀇𑀦𑁆𑀥𑀦𑀲𑁆𑀲 𑀤𑀳𑀦𑀲𑀫𑀢𑁆𑀣𑀢𑀸𑀬 𑀧𑀸𑀯𑀓𑁄 ‘‘𑀲𑀩𑁆𑀩𑀪𑀽’’𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀓𑀸𑀫𑀜𑁆𑀘𑀸𑀬𑀫𑀢𑁆𑀣𑁄 𑀧𑀼𑀩𑁆𑀩𑁂 𑀯𑀺𑀢𑁆𑀣𑀸𑀭𑀺𑀢𑁄𑀬𑁂𑀯, 𑀧𑀓𑀸𑀭𑀦𑁆𑀢𑀭𑁂𑀦 𑀧𑀦 𑀲𑁄𑀢𑀼𑀚𑀦𑀸𑀦𑀼𑀕𑁆𑀕𑀳𑀓𑀸𑀫𑀢𑀸𑀬, 𑀇𑀫𑀺𑀲𑁆𑀲𑀸 𑀘 𑀧𑁄𑀭𑀸𑀡𑀲𑀁𑀯𑀡𑁆𑀡𑀦𑀸𑀯𑀺𑀲𑁄𑀥𑀦𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀧𑀼𑀦 𑀯𑀺𑀪𑀸𑀯𑀺𑀢𑁄𑀢𑀺 𑀦 𑀘𑁂𑀢𑁆𑀣 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄, 𑀏𑀯𑀫𑀻𑀤𑀺𑀲𑁂𑀲𑀼. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀪𑀕𑀯𑀢𑁄 𑀤𑀲𑀩𑀮𑀸𑀤𑀺𑀜𑀸𑀡𑀸𑀦𑀺𑀧𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀸𑀦𑀺, 𑀲𑀩𑁆𑀩𑀤𑁂𑀲𑀯𑀺𑀲𑀬𑀢𑁆𑀢𑀸 𑀧𑀦 𑀢𑁂𑀲𑀁 𑀜𑀸𑀡𑀸𑀦𑀁 𑀦 𑀢𑁂𑀳𑀺 𑀩𑀼𑀤𑁆𑀥𑀕𑀼𑀡𑀸 𑀅𑀳𑀸𑀧𑁂𑀢𑁆𑀯𑀸 𑀕𑀳𑀺𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀦 𑀦𑀺𑀧𑁆𑀧𑀤𑁂𑀲𑀯𑀺𑀲𑀬𑀢𑁆𑀢𑀸 ¶ 𑀢𑀲𑁆𑀫𑀺𑀁 𑀕𑀳𑀺𑀢𑁂 𑀲𑀩𑁆𑀩𑁂𑀧𑀺 𑀩𑀼𑀤𑁆𑀥𑀕𑀼𑀡𑀸 𑀕𑀳𑀺𑀢𑀸 𑀏𑀯 𑀦𑀸𑀫 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀧𑀸𑀴𑀺𑀅𑀢𑁆𑀣𑀸𑀦𑀼𑀲𑀸𑀭𑁂𑀦 𑀢𑀤𑁂𑀯 𑀜𑀸𑀡𑀁 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀴𑀺𑀬𑀫𑁆𑀧𑀺 𑀳𑀺 ‘‘𑀬𑁂𑀳𑀺 𑀢𑀣𑀸𑀕𑀢𑀲𑁆𑀲 𑀬𑀣𑀸𑀪𑀼𑀘𑁆𑀘𑀁 𑀯𑀡𑁆𑀡𑀁 𑀲𑀫𑁆𑀫𑀸 𑀯𑀤𑀫𑀸𑀦𑀸 𑀯𑀤𑁂𑀬𑁆𑀬𑀼’’𑀦𑁆𑀢𑀺 𑀢𑀫𑁂𑀯 𑀧𑀓𑀸𑀲𑀺𑀢𑀁 𑀢𑀫𑀦𑁆𑀢𑀭𑁂𑀦 𑀅𑀜𑁆𑀜𑀲𑁆𑀲 𑀦𑀺𑀧𑁆𑀧𑀤𑁂𑀲𑀯𑀺𑀲𑀬𑀲𑁆𑀲 𑀅𑀪𑀸𑀯𑀢𑁄, 𑀦𑀺𑀧𑁆𑀧𑀤𑁂𑀲𑀯𑀺𑀲𑀬𑁂𑀦𑁂𑀯 𑀘 𑀬𑀣𑀸𑀪𑀼𑀘𑁆𑀘𑀁 𑀲𑀫𑁆𑀫𑀸 𑀯𑀤𑀦𑀲𑀫𑁆𑀪𑀯𑀢𑁄𑀢𑀺.

𑀅𑀜𑁆𑀜𑁂𑀯𑀸𑀢𑀺 𑀏𑀢𑁆𑀣 𑀏𑀯-𑀲𑀤𑁆𑀤𑁄 𑀲𑀦𑁆𑀦𑀺𑀝𑁆𑀞𑀸𑀧𑀦𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀜𑁆𑀜𑁂𑀯𑀸𑀢𑀺 𑀇𑀤𑀁 𑀧𑀦𑁂𑀢𑁆𑀣 𑀯𑀯𑀢𑁆𑀣𑀸𑀧𑀦𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀯𑀯𑀢𑁆𑀣𑀸𑀧𑀦𑀯𑀘𑀦𑀦𑁆𑀢𑀺 𑀘 𑀲𑀦𑁆𑀦𑀺𑀝𑁆𑀞𑀸𑀧𑀦𑀯𑀘𑀦𑀦𑁆𑀢𑀺 𑀅𑀢𑁆𑀣𑁄, 𑀲𑀦𑁆𑀦𑀺𑀝𑁆𑀞𑀸𑀧𑀦𑀜𑁆𑀘 𑀅𑀯𑀥𑀸𑀭𑀡𑀫𑁂𑀯. 𑀓𑀣𑀦𑁆𑀢𑀺 𑀆𑀳 ‘‘𑀅𑀜𑁆𑀜𑁂𑀯𑀸’’𑀢𑀺𑀆𑀤𑀺. ‘‘𑀦 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀆𑀤𑀬𑁄’’𑀢𑀺 𑀇𑀫𑀺𑀦𑀸 𑀅𑀯𑀥𑀸𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀁 𑀤𑀲𑁆𑀲𑁂𑀢𑀺. 𑀅𑀬𑀜𑁆𑀘 𑀏𑀯-𑀲𑀤𑁆𑀤𑁄 𑀅𑀦𑀺𑀬𑀢𑀤𑁂𑀲𑀢𑀸𑀬 𑀘-𑀲𑀤𑁆𑀤𑁄 𑀯𑀺𑀬 𑀬𑀢𑁆𑀣 𑀯𑀼𑀢𑁆𑀢𑁄, 𑀢𑀢𑁄 𑀅𑀜𑁆𑀜𑀢𑁆𑀣𑀸𑀧𑀺 𑀯𑀘𑀦𑀺𑀘𑁆𑀙𑀸𑀯𑀲𑁂𑀦 𑀉𑀧𑀢𑀺𑀝𑁆𑀞𑀢𑀻𑀢𑀺 𑀆𑀳 ‘‘𑀕𑀫𑁆𑀪𑀻𑀭𑀸𑀯𑀸’’𑀢𑀺𑀆𑀤𑀺. 𑀇𑀢𑀺-𑀲𑀤𑁆𑀤𑁂𑀦 𑀘 𑀆𑀤𑀺𑀅𑀢𑁆𑀣𑁂𑀦 𑀤𑀼𑀤𑁆𑀤𑀲𑀸𑀯 𑀦 𑀲𑀼𑀤𑀲𑀸, 𑀤𑀼𑀭𑀦𑀼𑀩𑁄𑀥𑀸𑀯 𑀦 𑀲𑀼𑀭𑀦𑀼𑀩𑁄𑀥𑀸, 𑀲𑀦𑁆𑀢𑀸𑀯 𑀦 𑀤𑀭𑀣𑀸, 𑀧𑀡𑀻𑀢𑀸𑀯 𑀦 𑀳𑀻𑀦𑀸, 𑀅𑀢𑀓𑁆𑀓𑀸𑀯𑀘𑀭𑀸𑀯 𑀦 𑀢𑀓𑁆𑀓𑀸𑀯𑀘𑀭𑀸, 𑀦𑀺𑀧𑀼𑀡𑀸𑀯 𑀦 𑀮𑀽𑀔𑀸, 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀸𑀯 𑀦 𑀩𑀸𑀮𑀯𑁂𑀤𑀦𑀻𑀬𑀸𑀢𑀺 𑀦𑀺𑀯𑀢𑁆𑀢𑀺𑀢𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀧𑀤𑁂𑀳𑀻𑀢𑀺 𑀬𑀸𑀯 ‘‘𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀸’’𑀢𑀺 𑀇𑀤𑀁 𑀧𑀤𑀁, 𑀢𑀸𑀯 𑀲𑀩𑁆𑀩𑀧𑀤𑁂𑀳𑀺.

𑀏𑀯𑀁 ¶ 𑀦𑀺𑀯𑀢𑁆𑀢𑁂𑀢𑀩𑁆𑀩𑀢𑀁 𑀬𑀼𑀢𑁆𑀢𑀺𑀬𑀸 𑀤𑀴𑁆𑀳𑀻𑀓𑀭𑁄𑀦𑁆𑀢𑁄 ‘‘𑀲𑀸𑀯𑀓𑀧𑀸𑀭𑀫𑀺𑀜𑀸𑀡’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀦𑁆𑀢𑀺 𑀲𑀸𑀯𑀓𑀸𑀦𑀁 𑀤𑀸𑀦𑀸𑀤𑀺𑀧𑀸𑀭𑀫𑀺𑀧𑀸𑀭𑀺𑀧𑀽𑀭𑀺𑀬𑀸 𑀦𑀺𑀧𑁆𑀨𑀦𑁆𑀦𑀁 𑀯𑀺𑀚𑁆𑀚𑀢𑁆𑀢𑀬𑀙𑀴𑀪𑀺𑀜𑁆𑀜𑀸𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀪𑁂𑀤𑀁 𑀜𑀸𑀡𑀁, 𑀢𑀣𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁. 𑀢𑀢𑁄𑀢𑀺 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀢𑁄. 𑀢𑀢𑁆𑀣𑀸𑀢𑀺 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑁂. 𑀢𑀢𑁄𑀧𑀻𑀢𑀺 𑀅𑀦𑀦𑁆𑀢𑀭𑀦𑀺𑀤𑁆𑀤𑀺𑀝𑁆𑀞𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀢𑁄𑀧𑀺. 𑀅𑀧𑀺-𑀲𑀤𑁆𑀤𑁂𑀦, 𑀧𑀺-𑀲𑀤𑁆𑀤𑁂𑀦 𑀯𑀸 𑀓𑁄 𑀧𑀦 𑀯𑀸𑀤𑁄 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀢𑁄𑀢𑀺 𑀲𑀫𑁆𑀪𑀸𑀯𑁂𑀢𑀺. 𑀢𑀢𑁆𑀣𑀸𑀧𑀻𑀢𑀺 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑁂𑀧𑀺. 𑀇𑀢𑁄 𑀧𑀦𑀸𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀢𑁄 𑀧𑀦, 𑀢𑀲𑁆𑀫𑀸 𑀏𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂 𑀯𑀯𑀢𑁆𑀣𑀸𑀦𑀁 𑀮𑀩𑁆𑀪𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀫𑁆𑀪𑀻𑀭𑁂𑀲𑀼 𑀯𑀺𑀲𑁂𑀲𑀸, 𑀕𑀫𑁆𑀪𑀻𑀭𑀸𑀦𑀁 𑀯𑀸 𑀯𑀺𑀲𑁂𑀲𑁂𑀦 𑀕𑀫𑁆𑀪𑀻𑀭𑀸. 𑀅𑀬𑀜𑁆𑀘 𑀕𑀫𑁆𑀪𑀻𑀭𑁄 𑀅𑀬𑀜𑁆𑀘 𑀕𑀫𑁆𑀪𑀻𑀭𑁄 𑀇𑀫𑁂 𑀇𑀫𑁂𑀲𑀁 𑀯𑀺𑀲𑁂𑀲𑁂𑀦 𑀕𑀫𑁆𑀪𑀻𑀭𑀸𑀢𑀺 𑀯𑀸 𑀕𑀫𑁆𑀪𑀻𑀭𑀢𑀭𑀸. 𑀢𑀭𑀲𑀤𑁆𑀤𑁂𑀦𑁂𑀯𑁂𑀢𑁆𑀣 𑀩𑁆𑀬𑀯𑀘𑁆𑀙𑁂𑀤𑀦𑀁 𑀲𑀺𑀤𑁆𑀥𑀁.

𑀏𑀢𑁆𑀣𑀸𑀬𑀁 𑀬𑁄𑀚𑀦𑀸 𑁋 𑀓𑀺𑀜𑁆𑀘𑀸𑀧𑀺 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁 𑀳𑁂𑀝𑁆𑀞𑀺𑀫𑀁 𑀳𑁂𑀝𑁆𑀞𑀺𑀫𑀁 𑀲𑁂𑀓𑁆𑀔𑀜𑀸𑀡𑀁 𑀧𑀼𑀣𑀼𑀚𑁆𑀚𑀦𑀜𑀸𑀡𑀜𑁆𑀘 𑀉𑀧𑀸𑀤𑀸𑀬 𑀕𑀫𑁆𑀪𑀻𑀭𑀁, 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀧𑀦 𑀉𑀧𑀸𑀤𑀸𑀬 𑀦 𑀢𑀣𑀸 𑀕𑀫𑁆𑀪𑀻𑀭𑀦𑁆𑀢𑀺 ‘‘𑀕𑀫𑁆𑀪𑀻𑀭𑀫𑁂𑀯𑀸’’𑀢𑀺 𑀦 𑀲𑀓𑁆𑀓𑀸 𑀩𑁆𑀬𑀯𑀘𑁆𑀙𑀺𑀚𑁆𑀚𑀺𑀢𑀼𑀁, 𑀢𑀣𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀫𑁆𑀧𑀺 ¶ 𑀬𑀣𑀸𑀯𑀼𑀢𑁆𑀢𑀁 𑀜𑀸𑀡𑀫𑀼𑀧𑀸𑀤𑀸𑀬 𑀕𑀫𑁆𑀪𑀻𑀭𑀁, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀦 𑀉𑀧𑀸𑀤𑀸𑀬 𑀦 𑀏𑀯𑀁 𑀕𑀫𑁆𑀪𑀻𑀭𑀦𑁆𑀢𑀺 ‘‘𑀕𑀫𑁆𑀪𑀻𑀭𑀫𑁂𑀯𑀸’’𑀢𑀺 𑀦 𑀲𑀓𑁆𑀓𑀸 𑀩𑁆𑀬𑀯𑀘𑁆𑀙𑀺𑀚𑁆𑀚𑀺𑀢𑀼𑀁, 𑀢𑀲𑁆𑀫𑀸 𑀢𑀢𑁆𑀣 𑀯𑀯𑀢𑁆𑀣𑀸𑀦𑀁 𑀦 𑀮𑀩𑁆𑀪𑀢𑀺. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀥𑀫𑁆𑀫𑀸 𑀧𑀦 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀸𑀤𑀻𑀦𑀫𑀺𑀯 𑀓𑀺𑀜𑁆𑀘𑀺 𑀉𑀧𑀸𑀤𑀸𑀬 𑀕𑀫𑁆𑀪𑀻𑀭𑀸𑀪𑀸𑀯𑀸𑀪𑀸𑀯𑀢𑁄 ‘‘𑀕𑀫𑁆𑀪𑀻𑀭𑀸 𑀏𑀯𑀸’’𑀢𑀺 𑀯𑀯𑀢𑁆𑀣𑀸𑀦𑀁 𑀮𑀩𑁆𑀪𑀢𑀻𑀢𑀺. 𑀬𑀣𑀸 𑀘𑁂𑀢𑁆𑀣 𑀯𑀯𑀢𑁆𑀣𑀸𑀦𑀁 𑀤𑀲𑁆𑀲𑀺𑀢𑀁, 𑀏𑀯𑀁 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁 𑀤𑀼𑀤𑁆𑀤𑀲𑀁. ‘‘𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀧𑀦 𑀢𑀢𑁄 𑀤𑀼𑀤𑁆𑀤𑀲𑀢𑀭𑀦𑁆𑀢𑀺 𑀢𑀢𑁆𑀣 𑀯𑀯𑀢𑁆𑀣𑀸𑀦𑀁 𑀦𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀯𑀯𑀢𑁆𑀣𑀸𑀦𑀲𑀫𑁆𑀪𑀯𑁄 𑀦𑁂𑀢𑀩𑁆𑀩𑁄, 𑀢𑁂𑀦𑁂𑀯𑀸𑀳 ‘‘𑀢𑀣𑀸 𑀤𑀼𑀤𑁆𑀤𑀲𑀸𑀯…𑀧𑁂… 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺.

𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲𑀸 𑀧𑀼𑀘𑁆𑀙𑀸𑀬 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀯𑀺𑀲𑁆𑀲𑀚𑁆𑀚𑀦𑀯𑀘𑀦𑀁. 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀤𑀺𑀝𑁆𑀞𑀻𑀦𑀁 𑀯𑀺𑀪𑀚𑀦𑀸𑀓𑀸𑀭𑁂𑀦. 𑀏𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀪𑀯𑀢𑀼 𑀢𑀸𑀯 𑀦𑀺𑀭𑀯𑀲𑁂𑀲𑀩𑀼𑀤𑁆𑀥𑀕𑀼𑀡𑀯𑀺𑀪𑀸𑀯𑀦𑀼𑀧𑀸𑀬𑀪𑀸𑀯𑀢𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀏𑀓𑀫𑁆𑀧𑀺 𑀧𑀼𑀣𑀼𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀜𑀸𑀡𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸 ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂, 𑀅𑀜𑁆𑀜𑁂𑀯 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁧𑁮) 𑀩𑀳𑀼𑀯𑀘𑀦𑁂𑀦 𑀉𑀤𑁆𑀤𑀺𑀝𑁆𑀞𑀁, 𑀢𑀲𑁆𑀲 𑀧𑀦 𑀯𑀺𑀲𑁆𑀲𑀚𑁆𑀚𑀦𑀁 𑀲𑀘𑁆𑀘𑀧𑀘𑁆𑀘𑀬𑀸𑀓𑀸𑀭𑀸𑀤𑀺𑀯𑀺𑀲𑀬𑀯𑀺𑀲𑁂𑀲𑀯𑀲𑁂𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀦 𑀯𑀺𑀪𑀚𑀦𑀦𑀬𑁂𑀦 𑀅𑀦𑀸𑀭𑀪𑀺𑀢𑁆𑀯𑀸 𑀲𑀦𑀺𑀲𑁆𑀲𑀬𑀸𑀦𑀁 𑀤𑀺𑀝𑁆𑀞𑀺𑀕𑀢𑀸𑀦𑀁 𑀯𑀺𑀪𑀚𑀦𑀦𑀬𑁂𑀦 𑀓𑀲𑁆𑀫𑀸 𑀆𑀭𑀤𑁆𑀥𑀦𑁆𑀢𑀺? 𑀢𑀢𑁆𑀣 𑀬𑀣𑀸 𑀲𑀘𑁆𑀘𑀧𑀘𑁆𑀘𑀬𑀸𑀓𑀸𑀭𑀸𑀤𑀻𑀦𑀁 𑀯𑀺𑀪𑀚𑀦𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑁂𑀯 𑀯𑀺𑀲𑀬𑁄, 𑀏𑀯𑀁 𑀦𑀺𑀭𑀯𑀲𑁂𑀲𑀤𑀺𑀝𑁆𑀞𑀺𑀕𑀢𑀯𑀺𑀪𑀚𑀦𑀫𑁆𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀩𑀼𑀤𑁆𑀥𑀸𑀦𑀜𑁆𑀳𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁, 𑀢𑀢𑁆𑀣 𑀞𑀸𑀦𑀸𑀦𑀻𑀢𑀺 𑀓𑀸𑀭𑀡𑀸𑀦𑀺. 𑀕𑀚𑁆𑀚𑀺𑀢𑀁 𑀫𑀳𑀦𑁆𑀢𑀁 𑀳𑁄𑀢𑀻𑀢𑀺 𑀤𑁂𑀲𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀅𑀦𑁂𑀓𑀯𑀺𑀥𑀢𑀸𑀬, 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀢𑀸𑀬 𑀘 𑀦𑀸𑀦𑀸𑀦𑀬𑁂𑀳𑀺 𑀧𑀯𑀢𑁆𑀢𑀫𑀸𑀦𑀁 𑀤𑁂𑀲𑀦𑀸𑀕𑀚𑁆𑀚𑀺𑀢𑀁 𑀫𑀳𑀦𑁆𑀢𑀁 𑀯𑀺𑀧𑀼𑀮𑀁, 𑀩𑀳𑀼𑀧𑁆𑀧𑀪𑁂𑀤𑀜𑁆𑀘 𑀳𑁄𑀢𑀺 ¶ . 𑀜𑀸𑀡𑀁 𑀅𑀦𑀼𑀧𑀯𑀺𑀲𑀢𑀻𑀢𑀺 𑀢𑀢𑁄 𑀏𑀯 𑀘 𑀤𑁂𑀲𑀦𑀸𑀜𑀸𑀡𑀁 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑁂 𑀯𑀺𑀪𑀸𑀕𑀲𑁄 𑀓𑀼𑀭𑀼𑀫𑀸𑀦𑀁 𑀅𑀦𑀼𑀧𑀯𑀺𑀲𑀢𑀺, 𑀢𑁂 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀩𑀼𑀤𑁆𑀥𑀜𑀸𑀡𑀲𑁆𑀲 𑀫𑀳𑀦𑁆𑀢𑀪𑀸𑀯𑁄 𑀧𑀜𑁆𑀜𑀸𑀬𑀢𑀻𑀢𑀺 𑀏𑀯𑀁𑀯𑀺𑀥𑀲𑁆𑀲 𑀦𑀸𑀫 𑀥𑀫𑁆𑀫𑀲𑁆𑀲 𑀤𑁂𑀲𑀓𑀁, 𑀧𑀝𑀺𑀯𑁂𑀥𑀓𑀜𑁆𑀘𑀸𑀢𑀺 𑀩𑀼𑀤𑁆𑀥𑀸𑀦𑀁 𑀤𑁂𑀲𑀦𑀸𑀜𑀸𑀡𑀲𑁆𑀲, 𑀧𑀝𑀺𑀯𑁂𑀥𑀜𑀸𑀡𑀲𑁆𑀲 𑀘 𑀉𑀴𑀸𑀭𑀪𑀸𑀯𑁄 𑀧𑀸𑀓𑀝𑁄 𑀳𑁄𑀢𑀺. 𑀤𑁂𑀲𑀦𑀸 𑀕𑀫𑁆𑀪𑀻𑀭𑀸 𑀳𑁄𑀢𑀻𑀢𑀺 𑀲𑀪𑀸𑀯𑁂𑀦 𑀕𑀫𑁆𑀪𑀻𑀭𑀸𑀦𑀁 𑀢𑁂𑀲𑀁 𑀘𑀢𑀼𑀩𑁆𑀩𑀺𑀥𑀸𑀦𑀫𑁆𑀧𑀺 𑀤𑁂𑀲𑀦𑀸 𑀤𑁂𑀲𑁂𑀢𑀩𑁆𑀩𑀯𑀲𑁂𑀦 𑀕𑀫𑁆𑀪𑀻𑀭𑀸𑀯 𑀳𑁄𑀢𑀺, 𑀲𑀸 𑀧𑀦 𑀩𑀼𑀤𑁆𑀥𑀸𑀦𑀁 𑀤𑁂𑀲𑀦𑀸 𑀲𑀩𑁆𑀩𑀢𑁆𑀣, 𑀲𑀩𑁆𑀩𑀤𑀸 𑀘 𑀬𑀸𑀦𑀢𑁆𑀢𑀬𑀫𑀼𑀔𑁂𑀦𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀢𑀺𑀮𑀓𑁆𑀔𑀡𑀸𑀳𑀢𑀸 𑀲𑀼𑀜𑁆𑀜𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀸’’𑀢𑀺, 𑀢𑀻𑀳𑀺 𑀮𑀓𑁆𑀔𑀡𑁂𑀳𑀺 𑀆𑀳𑀢𑀸, 𑀅𑀢𑁆𑀢𑀢𑁆𑀢𑀦𑀺𑀬𑀢𑁄 𑀲𑀼𑀜𑁆𑀜𑀪𑀸𑀯𑀧𑀝𑀺𑀲𑀜𑁆𑀜𑀼𑀢𑁆𑀢𑀸 𑀘𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 ¶ ‘‘𑀲𑀩𑁆𑀩𑀁 𑀯𑀘𑀻𑀓𑀫𑁆𑀫𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀁 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀻’’𑀢𑀺 (𑀫𑀳𑀸𑀦𑀺. 𑁬𑁯, 𑁧𑁫𑁬; 𑀘𑀽𑀴𑀦𑀺. 𑁮𑁫; 𑀧𑀝𑀺. 𑀫. 𑁩.𑁫; 𑀦𑁂𑀢𑁆𑀢𑀺. 𑁧𑁫) 𑀯𑀘𑀦𑀢𑁄 𑀲𑀩𑁆𑀩𑀸𑀧𑀺 𑀪𑀕𑀯𑀢𑁄 𑀤𑁂𑀲𑀦𑀸 𑀜𑀸𑀡𑀭𑀳𑀺𑀢𑀸 𑀦𑀸𑀫 𑀦𑀢𑁆𑀣𑀺, 𑀲𑀫𑀲𑀫𑀧𑀭𑀓𑁆𑀓𑀫𑀦𑀯𑀲𑁂𑀦 𑀲𑀻𑀳𑀲𑀫𑀸𑀦𑀯𑀼𑀢𑁆𑀢𑀺𑀢𑀸𑀬 𑀘 𑀲𑀩𑁆𑀩𑀢𑁆𑀣 𑀲𑀫𑀸𑀦𑀼𑀲𑁆𑀲𑀸𑀳𑀧𑁆𑀧𑀯𑀢𑁆𑀢𑀺, 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀯𑀲𑁂𑀦 𑀧𑀦 𑀤𑁂𑀲𑀦𑀸 𑀯𑀺𑀲𑁂𑀲𑀢𑁄 𑀜𑀸𑀡𑁂𑀦 𑀅𑀦𑀼𑀧𑀯𑀺𑀝𑁆𑀞𑀸, 𑀕𑀫𑁆𑀪𑀻𑀭𑀢𑀭𑀸 𑀘 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀓𑀣𑀁 𑀧𑀦 𑀯𑀺𑀦𑀬𑀧𑀡𑁆𑀡𑀢𑁆𑀢𑀺𑀁 𑀧𑀢𑁆𑀯𑀸 𑀤𑁂𑀲𑀦𑀸 𑀢𑀺𑀮𑀓𑁆𑀔𑀡𑀸𑀳𑀢𑀸, 𑀲𑀼𑀜𑁆𑀜𑀢𑀸𑀧𑀝𑀺𑀲𑀜𑁆𑀜𑀼𑀢𑁆𑀢𑀸 𑀘 𑀳𑁄𑀢𑀺, 𑀦𑀦𑀼 𑀢𑀢𑁆𑀣 𑀯𑀺𑀦𑀬𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀫𑁂𑀯𑀸𑀢𑀺? 𑀦 𑀢𑀢𑁆𑀣 𑀯𑀺𑀦𑀬𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀫𑁂𑀯. 𑀢𑀢𑁆𑀣𑀸𑀧𑀺 𑀳𑀺 𑀲𑀦𑁆𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀧𑀯𑀢𑁆𑀢𑀫𑀸𑀦𑀸 𑀤𑁂𑀲𑀦𑀸 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀢𑀸𑀤𑀺𑀯𑀺𑀪𑀸𑀯𑀺𑀦𑀻 𑀲𑀩𑁆𑀩𑀥𑀫𑁆𑀫𑀸𑀦𑀁 𑀅𑀢𑁆𑀢𑀢𑁆𑀢𑀦𑀺𑀬𑀢𑀸, 𑀲𑀼𑀜𑁆𑀜𑀪𑀸𑀯𑀧𑁆𑀧𑀓𑀸𑀲𑀺𑀦𑀻 𑀘 𑀳𑁄𑀢𑀺, 𑀢𑁂𑀦𑁂𑀯𑀸𑀳 ‘‘𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸’’𑀢𑀺𑀆𑀤𑀺. 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀦𑁆𑀢𑀺 𑀯𑀺𑀦𑀬𑀲𑁆𑀲 𑀧𑀜𑁆𑀜𑀸𑀧𑀦𑀁. 𑀜𑁆𑀜-𑀓𑀸𑀭𑀲𑁆𑀲 𑀧𑀦 𑀡𑁆𑀡-𑀓𑀸𑀭𑁂 𑀓𑀢𑁂 𑀯𑀺𑀦𑀬𑀧𑀡𑁆𑀡𑀢𑁆𑀢𑀺𑀦𑁆𑀢𑀺𑀧𑀺 𑀧𑀸𑀞𑁄. 𑀪𑀽𑀫𑀦𑁆𑀢𑀭𑀦𑁆𑀢𑀺 𑀥𑀫𑁆𑀫𑀸𑀦𑀁 𑀅𑀯𑀢𑁆𑀣𑀸𑀯𑀺𑀲𑁂𑀲𑀜𑁆𑀘 𑀞𑀸𑀦𑀯𑀺𑀲𑁂𑀲𑀜𑁆𑀘. 𑀪𑀯𑀦𑁆𑀢𑀺 𑀥𑀫𑁆𑀫𑀸 𑀏𑀢𑁆𑀣𑀸𑀢𑀺 𑀪𑀽𑀫𑀻𑀢𑀺 𑀳𑀺 𑀅𑀯𑀢𑁆𑀣𑀸𑀯𑀺𑀲𑁂𑀲𑁄, 𑀞𑀸𑀦𑀜𑁆𑀘 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀅𑀯𑀢𑁆𑀣𑀸𑀯𑀺𑀲𑁂𑀲𑁄 𑀲𑀢𑀺𑀆𑀤𑀺𑀥𑀫𑁆𑀫𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀺𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀸𑀤𑀺𑀪𑁂𑀤𑁄 ‘‘𑀯𑀘𑁆𑀙𑁄, 𑀤𑀫𑁆𑀫𑁄, 𑀩𑀮𑀻𑀩𑀤𑁆𑀤𑁄’’𑀢𑀺 𑀆𑀤𑀬𑁄 𑀯𑀺𑀬. 𑀞𑀸𑀦𑀯𑀺𑀲𑁂𑀲𑁄 𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑁄. 𑀧𑀘𑁆𑀘𑀬𑀸𑀓𑀸𑀭-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀲𑀫𑀬𑀦𑁆𑀢𑀭𑀦𑁆𑀢𑀺 𑀤𑀺𑀝𑁆𑀞𑀺𑀯𑀺𑀲𑁂𑀲𑀁, 𑀦𑀸𑀦𑀸𑀯𑀺𑀳𑀺𑀢𑀸 𑀤𑀺𑀝𑁆𑀞𑀺𑀬𑁄𑀢𑀺 𑀅𑀢𑁆𑀣𑁄, 𑀅𑀜𑁆𑀜𑀲𑀫𑀬𑀁 𑀯𑀸, 𑀩𑀸𑀳𑀺𑀭𑀓𑀲𑀫𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀁 𑀧𑀢𑁆𑀯𑀸 𑀫𑀳𑀦𑁆𑀢𑀁 𑀕𑀚𑁆𑀚𑀺𑀢𑀁 𑀳𑁄𑀢𑀻𑀢𑀺𑀆𑀤𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀕𑀚𑁆𑀚𑀺𑀢𑀁 𑀫𑀳𑀦𑁆𑀢𑀁…𑀧𑁂… 𑀧𑀝𑀺𑀲𑀁𑀬𑀼𑀢𑁆𑀢𑀸, 𑀢𑀲𑁆𑀫𑀸. 𑀙𑁂𑀚𑁆𑀚𑀕𑀸𑀫𑀺𑀦𑀻𑀢𑀺 𑀅𑀢𑁂𑀓𑀺𑀘𑁆𑀙𑀕𑀸𑀫𑀺𑀦𑀻.

𑀏𑀯𑀁 𑀑𑀢𑀺𑀡𑁆𑀡𑁂 𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀮𑀳𑀼𑀓𑀕𑀭𑀼𑀓𑀸𑀤𑀺𑀯𑀲𑁂𑀦 𑀢𑀤𑀦𑀼𑀭𑀽𑀧𑁂 𑀯𑀢𑁆𑀣𑀼𑀫𑁆𑀳𑀺 𑀑𑀢𑀭𑀦𑁆𑀢𑁂. 𑀬𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀁 𑀦𑀸𑀫 𑀅𑀢𑁆𑀣𑀺, 𑀢𑀢𑁆𑀣𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀣𑀸𑀫𑁄𑀢𑀺 𑀜𑀸𑀡𑀲𑀸𑀫𑀢𑁆𑀣𑀺𑀬𑀁. 𑀩𑀮𑀦𑁆𑀢𑀺 𑀅𑀓𑀫𑁆𑀧𑀦𑀲𑀗𑁆𑀔𑀸𑀢𑁄 𑀯𑀻𑀭𑀪𑀸𑀯𑁄. 𑀣𑀸𑀫𑁄 𑀩𑀮𑀦𑁆𑀢𑀺 𑀯𑀸 𑀲𑀸𑀫𑀢𑁆𑀣𑀺𑀬𑀯𑀘𑀦𑀫𑁂𑀯 𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑁂𑀲𑀦𑀸𑀜𑀸𑀡𑀯𑀲𑁂𑀦 ¶ 𑀬𑁄𑀚𑁂𑀢𑀩𑁆𑀩𑀁. 𑀧𑀘𑁆𑀘𑀯𑁂𑀓𑁆𑀔𑀡𑀸𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀜𑁆𑀳𑀺 𑀤𑁂𑀲𑀦𑀸𑀜𑀸𑀡𑀁. 𑀏𑀲𑀸𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀫𑁂𑀯 𑀯𑀼𑀘𑁆𑀘𑀫𑀸𑀦𑀧𑀤𑀫𑀧𑁂𑀓𑁆𑀔𑀺𑀢𑁆𑀯𑀸 𑀧𑀼𑀮𑁆𑀮𑀺𑀗𑁆𑀕𑁂𑀦 𑀦𑀺𑀤𑁆𑀤𑀺𑀲𑀢𑀺, 𑀏𑀲𑁄 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀲𑀗𑁆𑀔𑀸𑀢𑁄 𑀯𑀺𑀲𑀬𑁄 𑀅𑀜𑁆𑀜𑁂𑀲𑀁 𑀅𑀯𑀺𑀲𑀬𑁄𑀢𑀺 𑀅𑀢𑁆𑀣𑁄. 𑀇𑀢𑀻𑀢𑀺 𑀢𑀣𑀸𑀯𑀺𑀲𑀬𑀸𑀯𑀺𑀲𑀬𑀪𑀸𑀯𑀲𑁆𑀲 𑀳𑁂𑀢𑀼𑀪𑀸𑀯𑁂𑀦 𑀧𑀝𑀺𑀦𑀺𑀤𑁆𑀤𑁂𑀲𑀯𑀘𑀦𑀁 ¶ , 𑀦𑀺𑀤𑀲𑁆𑀲𑀦𑀢𑁆𑀣𑁄 𑀯𑀸 𑀇𑀢𑀺-𑀲𑀤𑁆𑀤𑁄, 𑀢𑁂𑀦 ‘‘𑀇𑀤𑀁 𑀮𑀳𑀼𑀓𑀁, 𑀇𑀤𑀁 𑀕𑀭𑀼𑀓’’𑀦𑁆𑀢𑀺𑀆𑀤𑀺𑀦𑀬𑀁 𑀦𑀺𑀤𑁆𑀤𑀺𑀲𑀢𑀺. 𑀏𑀯𑀫𑀧𑀭𑀢𑁆𑀣𑀸𑀧𑀺 𑀬𑀣𑀸𑀲𑀫𑁆𑀪𑀯𑀁.

𑀬𑀤𑀺𑀧𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂 (𑀤𑀻. 𑀦𑀺. 𑁨.𑁩𑁭𑁪; 𑀫. 𑀦𑀺. 𑁧.𑁧𑁦𑁭) 𑀯𑀺𑀪𑀢𑁆𑀢𑀸, 𑀢𑀣𑀸𑀧𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀸𑀤𑀺𑀯𑀲𑁂𑀦 𑀅𑀪𑀺𑀥𑀫𑁆𑀫𑁂𑀬𑁂𑀯 𑀢𑁂 𑀯𑀺𑀲𑁂𑀲𑀢𑁄 𑀯𑀺𑀪𑀢𑁆𑀢𑀸𑀢𑀺 𑀆𑀳 ‘‘𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸…𑀧𑁂… 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀯𑀺𑀪𑀚𑀺𑀢𑁆𑀯𑀸’’𑀢𑀺. 𑀢𑀢𑁆𑀣 𑀲𑀢𑁆𑀢 𑀨𑀲𑁆𑀲𑀸𑀢𑀺 𑀲𑀢𑁆𑀢𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀧𑀬𑁄𑀕𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀣𑀸 ‘‘𑀲𑀢𑁆𑀢 𑀯𑁂𑀤𑀦𑀸’’𑀢𑀺𑀆𑀤𑀺𑀧𑀺. 𑀮𑁄𑀓𑀼𑀢𑁆𑀢𑀭𑀸 𑀥𑀫𑁆𑀫𑀸 𑀦𑀸𑀫𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄 𑀯𑀸, 𑀢𑁂𑀦 𑀯𑀼𑀢𑁆𑀢𑀸𑀯𑀲𑁂𑀲𑀁 𑀅𑀪𑀺𑀥𑀫𑁆𑀫𑁂 𑀆𑀕𑀢𑀁 𑀥𑀫𑁆𑀫𑀸𑀦𑀁 𑀯𑀺𑀪𑀚𑀺𑀢𑀩𑁆𑀩𑀸𑀓𑀸𑀭𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀘𑀢𑀼𑀯𑀻𑀲𑀢𑀺𑀲𑀫𑀦𑁆𑀢𑀧𑀝𑁆𑀞𑀸𑀦𑀸𑀦𑀺 𑀏𑀢𑁆𑀣𑀸𑀢𑀺 𑀘𑀢𑀼𑀯𑀻𑀲𑀢𑀺𑀲𑀫𑀦𑁆𑀢𑀧𑀝𑁆𑀞𑀸𑀦𑀦𑁆𑀢𑀺 𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑁄. ‘‘𑀅𑀪𑀺𑀥𑀫𑁆𑀫𑀧𑀺𑀝𑀓’’𑀦𑁆𑀢𑀺 𑀏𑀢𑀲𑁆𑀲 𑀳𑀺 𑀇𑀤𑀁 𑀯𑀺𑀲𑁂𑀲𑀦𑀁. 𑀏𑀢𑁆𑀣 𑀘 𑀧𑀘𑁆𑀘𑀬𑀦𑀬𑀁 𑀅𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀯𑀲𑁂𑀦𑁂𑀯 𑀲𑀫𑀦𑁆𑀢𑀧𑀝𑁆𑀞𑀸𑀦𑀲𑁆𑀲 𑀘𑀢𑀼𑀯𑀻𑀲𑀢𑀺𑀯𑀺𑀥𑀢𑀸 𑀯𑀼𑀢𑁆𑀢𑀸. 𑀬𑀣𑀸𑀳 𑁋

‘‘𑀢𑀺𑀓𑀜𑁆𑀘 𑀧𑀝𑁆𑀞𑀸𑀦𑀯𑀭𑀁 𑀤𑀼𑀓𑀼𑀢𑁆𑀢𑀫𑀁,

𑀤𑀼𑀓𑀢𑀺𑀓𑀜𑁆𑀘𑁂𑀯 𑀢𑀺𑀓𑀤𑀼𑀓𑀜𑁆𑀘;

𑀢𑀺𑀓𑀢𑀺𑀓𑀜𑁆𑀘𑁂𑀯 𑀤𑀼𑀓𑀤𑀼𑀓𑀜𑁆𑀘,

𑀙 𑀅𑀦𑀼𑀮𑁄𑀫𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸…𑀧𑁂…

𑀙 𑀧𑀘𑁆𑀘𑀦𑀻𑀬𑀫𑁆𑀳𑀺…𑀧𑁂… 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀫𑁆𑀳𑀺…𑀧𑁂…

𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀫𑁆𑀳𑀺 𑀦𑀬𑀸 𑀲𑀼𑀕𑀫𑁆𑀪𑀻𑀭𑀸’’𑀢𑀺. [𑀧𑀝𑁆𑀞𑀸. 𑁧.𑁧.𑁪𑁧(𑀓), 𑁪𑁪(𑀔), 𑁪𑁮(𑀕), 𑁫𑁨(𑀖)];

𑀏𑀯𑀁 𑀥𑀫𑁆𑀫𑀯𑀲𑁂𑀦 𑀘𑀢𑀼𑀯𑀻𑀲𑀢𑀺𑀪𑁂𑀤𑁂𑀲𑀼 𑀢𑀺𑀓𑀧𑀝𑁆𑀞𑀸𑀦𑀸𑀤𑀻𑀲𑀼 𑀏𑀓𑁂𑀓𑀁 𑀧𑀘𑁆𑀘𑀬𑀦𑀬𑁂𑀦 𑀅𑀦𑀼𑀮𑁄𑀫𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀻𑀢𑀺 𑀙𑀦𑁆𑀦𑀯𑀼𑀢𑀺𑀲𑀫𑀦𑁆𑀢𑀧𑀝𑁆𑀞𑀸𑀦𑀸𑀦𑀺. 𑀢𑀢𑁆𑀣 𑀧𑀦 𑀥𑀫𑁆𑀫𑀸𑀦𑀼𑀮𑁄𑀫𑁂 𑀢𑀺𑀓𑀧𑀝𑁆𑀞𑀸𑀦𑁂 𑀓𑀼𑀲𑀮𑀢𑁆𑀢𑀺𑀓𑁂 𑀧𑀝𑀺𑀘𑁆𑀘𑀯𑀸𑀭𑁂 𑀧𑀘𑁆𑀘𑀬𑀸𑀦𑀼𑀮𑁄𑀫𑁂 𑀳𑁂𑀢𑀼𑀫𑀽𑀮𑀓𑁂 𑀳𑁂𑀢𑀼𑀧𑀘𑁆𑀘𑀬𑀯𑀲𑁂𑀦 𑀏𑀓𑀽𑀦𑀧𑀜𑁆𑀜𑀸𑀲 𑀧𑀼𑀘𑁆𑀙𑀸𑀦𑀬𑀸 𑀲𑀢𑁆𑀢 𑀯𑀺𑀲𑁆𑀲𑀚𑁆𑀚𑀦𑀦𑀬𑀸𑀢𑀺𑀆𑀤𑀺𑀦𑀸 𑀤𑀲𑁆𑀲𑀺𑀬𑀫𑀸𑀦𑀸 𑀅𑀦𑀦𑁆𑀢𑀪𑁂𑀤𑀸 𑀦𑀬𑀸𑀢𑀺 𑀆𑀳 ‘‘𑀅𑀦𑀦𑁆𑀢𑀦𑀬’’𑀦𑁆𑀢𑀺.

𑀦𑀯𑀳𑀸𑀓𑀸𑀭𑁂𑀳𑀻𑀢𑀺 𑀉𑀧𑁆𑀧𑀸𑀤𑀸𑀤𑀻𑀳𑀺 𑀦𑀯𑀳𑀺 𑀧𑀘𑁆𑀘𑀬𑀸𑀓𑀸𑀭𑁂𑀳𑀺. 𑀢𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀉𑀧𑁆𑀧𑀸𑀤𑁄 𑀳𑀼𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀧𑁆𑀧𑀚𑁆𑀚𑀢𑀺 𑀏𑀢𑀲𑁆𑀫𑀸 𑀨𑀮𑀦𑁆𑀢𑀺 𑀉𑀧𑁆𑀧𑀸𑀤𑁄, 𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀪𑀸𑀯𑁄. 𑀲𑀢𑀺 ¶ 𑀘 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦𑀸𑀲𑀢𑀺. 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀉𑀧𑁆𑀧𑀸𑀤𑁄 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀣𑀸 𑀧𑀯𑀢𑁆𑀢𑀢𑀺 𑀥𑀭𑀢𑀺 𑀏𑀢𑀲𑁆𑀫𑀺𑀁 𑀨𑀮𑀦𑁆𑀢𑀺 𑀧𑀯𑀢𑁆𑀢𑀁. 𑀦𑀺𑀫𑀻𑀬𑀢𑀺 𑀨𑀮𑀫𑁂𑀢𑀲𑁆𑀫𑀺𑀦𑁆𑀢𑀺 𑀦𑀺𑀫𑀺𑀢𑁆𑀢𑀁. ¶ (𑀦𑀺𑀤𑀤𑀸𑀢𑀺 𑀨𑀮𑀁 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁 𑀏𑀢𑁂𑀦𑀸𑀢𑀺 𑀦𑀺𑀤𑀸𑀦𑀁.) (𑀏𑀢𑁆𑀣𑀦𑁆𑀢𑀭𑁂 𑀅𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺) 𑀆𑀬𑀽𑀳𑀢𑀺 𑀨𑀮𑀁 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀼𑀧𑁆𑀧𑀢𑁆𑀢𑀺𑀬𑀸 𑀖𑀝𑁂𑀢𑀺 𑀏𑀢𑁂𑀦𑀸𑀢𑀺 𑀆𑀬𑀽𑀳𑀦𑀁. 𑀲𑀁𑀬𑀼𑀚𑁆𑀚𑀢𑀺 𑀨𑀮𑀁 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀦 𑀏𑀢𑀲𑁆𑀫𑀺𑀦𑁆𑀢𑀺 𑀲𑀁𑀬𑁄𑀕𑁄. 𑀬𑀢𑁆𑀣 𑀲𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀧𑀮𑀺𑀩𑀼𑀤𑁆𑀥𑀢𑀺 𑀨𑀮𑀫𑁂𑀢𑁂𑀦𑀸𑀢𑀺 𑀧𑀮𑀺𑀩𑁄𑀥𑁄. 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂 𑀲𑀢𑀺 𑀨𑀮𑀫𑀼𑀤𑀬𑀢𑀺 𑀏𑀢𑁂𑀦𑀸𑀢𑀺 𑀲𑀫𑀼𑀤𑀬𑁄. 𑀳𑀺𑀦𑁄𑀢𑀺 𑀓𑀸𑀭𑀡𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀳𑁂𑀢𑀼. 𑀅𑀯𑀺𑀚𑁆𑀚𑀸𑀬 𑀳𑀺 𑀲𑀢𑀺 𑀲𑀗𑁆𑀔𑀸𑀭𑀸 𑀧𑀯𑀢𑁆𑀢𑀦𑁆𑀢𑀺, 𑀥𑀭𑀦𑁆𑀢𑀺 𑀘, 𑀢𑁂 𑀅𑀯𑀺𑀚𑁆𑀚𑀸𑀬 𑀲𑀢𑀺 𑀅𑀢𑁆𑀢𑀦𑁄 𑀨𑀮𑀁 (𑀦𑀺𑀤𑀤𑀦𑁆𑀢𑀺) (𑀧𑀝𑀺. 𑀫. 𑁧.𑁪𑁫; 𑀤𑀻. 𑀦𑀺. 𑀝𑀻. 𑁧.𑁨𑁮 𑀧𑀲𑁆𑀲𑀺𑀢𑀩𑁆𑀩𑀁) 𑀪𑀯𑀸𑀤𑀻𑀲𑀼 𑀔𑀺𑀧𑀦𑁆𑀢𑀺, 𑀆𑀬𑀽𑀳𑀦𑁆𑀢𑀺 𑀅𑀢𑁆𑀢𑀦𑁄 𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀖𑀝𑁂𑀦𑁆𑀢𑀺, 𑀅𑀢𑁆𑀢𑀦𑁄 𑀨𑀮𑁂𑀦 𑀲𑀁𑀬𑀼𑀚𑁆𑀚𑀦𑁆𑀢𑀺, 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀲𑀬𑀁 𑀉𑀧𑁆𑀧𑀦𑁆𑀦𑀸 𑀢𑀁 𑀧𑀮𑀺𑀩𑀼𑀤𑁆𑀥𑀦𑁆𑀢𑀺, 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂 𑀉𑀤𑀬𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀳𑀺𑀦𑁄𑀢𑀺 𑀘 𑀲𑀗𑁆𑀔𑀸𑀭𑀸𑀦𑀁 𑀓𑀸𑀭𑀡𑀪𑀸𑀯𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀯𑀢𑁆𑀢𑀁 𑀳𑀼𑀢𑁆𑀯𑀸…𑀧𑁂… 𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀯𑀁 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸𑀦𑀁 𑀓𑀸𑀭𑀡𑀪𑀸𑀯𑀽𑀧𑀕𑀫𑀦𑀯𑀺𑀲𑁂𑀲𑀸 𑀉𑀧𑁆𑀧𑀸𑀤𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀲𑀗𑁆𑀔𑀸𑀭𑀸𑀤𑀻𑀦𑀁 𑀯𑀺𑀜𑁆𑀜𑀸𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀫𑀢𑁆𑀣𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀸𑀴𑀺𑀬𑀸 𑀲𑀸𑀥𑁂𑀦𑁆𑀢𑁂𑀦 ‘‘𑀬𑀣𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀺𑀝𑁆𑀞𑀢𑀺 𑀏𑀢𑁂𑀦𑀸𑀢𑀺 𑀞𑀺𑀢𑀺, 𑀧𑀘𑁆𑀘𑀬𑁄, 𑀉𑀧𑁆𑀧𑀸𑀤𑁄 𑀏𑀯 𑀞𑀺𑀢𑀺 𑀉𑀧𑁆𑀧𑀸𑀤𑀝𑁆𑀞𑀺𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀬𑀲𑁆𑀫𑀸 𑀧𑀦 ‘‘𑀆𑀲𑀯𑀲𑀫𑀼𑀤𑀬𑀸 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁄’’𑀢𑀺 (𑀫. 𑀦𑀺. 𑁧.𑁧𑁦𑁩) 𑀯𑀼𑀢𑁆𑀢𑀢𑁆𑀢𑀸 𑀆𑀲𑀯𑀸𑀯 𑀅𑀯𑀺𑀚𑁆𑀚𑀸𑀬 𑀧𑀘𑁆𑀘𑀬𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 ‘‘𑀧𑀘𑁆𑀘𑀬𑀲𑀫𑀼𑀧𑁆𑀧𑀦𑁆𑀦𑀸’’𑀢𑀺, 𑀅𑀯𑀺𑀚𑁆𑀚𑀸 𑀘 𑀲𑀗𑁆𑀔𑀸𑀭𑀸 𑀘 𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 𑀧𑀘𑁆𑀘𑀬𑀢𑁄 𑀏𑀯 𑀲𑀫𑀼𑀧𑁆𑀧𑀦𑁆𑀦𑀸, 𑀦 𑀯𑀺𑀦𑀸 𑀧𑀘𑁆𑀘𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂 𑀧𑀜𑁆𑀜𑀸𑀢𑀺 𑀲𑀗𑁆𑀔𑀸𑀭𑀸𑀦𑀁, 𑀅𑀯𑀺𑀚𑁆𑀚𑀸𑀬 𑀘 𑀉𑀧𑁆𑀧𑀸𑀤𑀸𑀤𑀺𑀓𑁂 𑀧𑀘𑁆𑀘𑀬𑀸𑀓𑀸𑀭𑁂 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀡𑀯𑀲𑁂𑀦 𑀧𑀯𑀢𑁆𑀢𑀸 𑀧𑀜𑁆𑀜𑀸. 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀦𑁆𑀢𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀪𑀸𑀯𑀢𑁄 𑀥𑀫𑁆𑀫𑀝𑁆𑀞𑀺𑀢𑀺𑀲𑀗𑁆𑀔𑀸𑀢𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀜𑀸𑀡𑀁. ‘‘𑀤𑁆𑀯𑀸𑀤𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸’’𑀢𑀺 𑀯𑀘𑀦𑀢𑁄 𑀳𑀺 𑀤𑁆𑀯𑀸𑀤𑀲 𑀧𑀘𑁆𑀘𑀬𑀸 𑀏𑀯 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀅𑀬𑀜𑁆𑀘 𑀦𑀬𑁄 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀏𑀯, 𑀅𑀣 𑀔𑁄 𑀅𑀢𑀻𑀢𑀸𑀦𑀸𑀕𑀢𑁂𑀲𑀼𑀧𑀺, 𑀦 𑀘 𑀅𑀯𑀺𑀚𑁆𑀚𑀸𑀬 𑀏𑀯 𑀲𑀗𑁆𑀔𑀸𑀭𑁂𑀲𑀼, 𑀅𑀣 𑀔𑁄 𑀲𑀗𑁆𑀔𑀸𑀭𑀸𑀤𑀻𑀦𑀁 𑀯𑀺𑀜𑁆𑀜𑀸𑀡𑀸𑀤𑀻𑀲𑀼𑀧𑀺 𑀮𑀩𑁆𑀪𑀢𑀻𑀢𑀺 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀧𑀘𑁆𑀘𑀬𑀸𑀓𑀸𑀭𑀲𑁆𑀲 𑀯𑀺𑀪𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺 𑀧𑀸𑀴𑀺𑀫𑀸𑀳𑀭𑀺. 𑀧𑀝𑁆𑀞𑀸𑀦𑁂 (𑀧𑀝𑁆𑀞𑀸. 𑁧.𑁧) 𑀧𑀦 𑀤𑀲𑁆𑀲𑀺𑀢𑀸 𑀳𑁂𑀢𑀸𑀤𑀺𑀧𑀘𑁆𑀘𑀬𑀸𑀏𑀯𑁂𑀢𑁆𑀣 𑀉𑀧𑁆𑀧𑀸𑀤𑀸𑀤𑀺𑀧𑀘𑁆𑀘𑀬𑀸𑀓𑀸𑀭𑁂𑀳𑀺 𑀕𑀳𑀺𑀢𑀸𑀢𑀺 𑀢𑁂𑀧𑀺 𑀬𑀣𑀸𑀲𑀫𑁆𑀪𑀯𑀁 𑀦𑀻𑀳𑀭𑀺𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀸. 𑀅𑀢𑀺𑀯𑀺𑀢𑁆𑀣𑀸𑀭𑀪𑀬𑁂𑀦 𑀧𑀦 𑀦 𑀬𑁄𑀚𑀬𑀺𑀫𑁆𑀳, 𑀅𑀢𑁆𑀣𑀺𑀓𑁂𑀳𑀺 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀤𑀺𑀢𑁄 (𑀯𑀺𑀲𑀼𑀤𑁆𑀥𑀺. 𑁨.𑁫𑁯𑁪) 𑀕𑀳𑁂𑀢𑀩𑁆𑀩𑀸.

𑀢𑀲𑁆𑀲 ¶ 𑀢𑀲𑁆𑀲 𑀥𑀫𑁆𑀫𑀲𑁆𑀲𑀸𑀢𑀺 𑀲𑀗𑁆𑀔𑀸𑀭𑀸𑀤𑀺𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀲𑁆𑀲. 𑀢𑀣𑀸 𑀢𑀣𑀸 𑀧𑀘𑁆𑀘𑀬𑀪𑀸𑀯𑁂𑀦𑀸𑀢𑀺 𑀉𑀧𑁆𑀧𑀸𑀤𑀸𑀤𑀺𑀳𑁂𑀢𑀸𑀤𑀺𑀧𑀘𑁆𑀘𑀬𑀲𑀢𑁆𑀢𑀺𑀬𑀸 ¶ . 𑀓𑀫𑁆𑀫𑀓𑀺𑀮𑁂𑀲𑀯𑀺𑀧𑀸𑀓𑀯𑀲𑁂𑀦 𑀢𑀻𑀡𑀺 𑀯𑀝𑁆𑀝𑀸𑀦𑀺 𑀬𑀲𑁆𑀲𑀸𑀢𑀺 𑀢𑀺𑀯𑀝𑁆𑀝𑀁. 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀯𑀲𑁂𑀦 𑀢𑀬𑁄 𑀅𑀤𑁆𑀥𑀸 𑀓𑀸𑀮𑀸 𑀏𑀢𑀲𑁆𑀲𑀸𑀢𑀺 𑀢𑀺𑀬𑀤𑁆𑀥𑀁. 𑀳𑁂𑀢𑀼𑀨𑀮𑀨𑀮𑀳𑁂𑀢𑀼𑀳𑁂𑀢𑀼𑀨𑀮𑀯𑀲𑁂𑀦 𑀢𑀬𑁄 𑀲𑀦𑁆𑀥𑀬𑁄 𑀏𑀢𑀲𑁆𑀲𑀸𑀢𑀺 𑀢𑀺𑀲𑀦𑁆𑀥𑀺. 𑀲𑀗𑁆𑀔𑀺𑀧𑁆𑀧𑀦𑁆𑀢𑀺 𑀏𑀢𑁆𑀣 𑀅𑀯𑀺𑀚𑁆𑀚𑀸𑀤𑀬𑁄, 𑀯𑀺𑀜𑁆𑀜𑀸𑀡𑀸𑀤𑀬𑁄 𑀘𑀸𑀢𑀺 𑀲𑀗𑁆𑀔𑁂𑀧𑀸, 𑀳𑁂𑀢𑀼, 𑀯𑀺𑀧𑀸𑀓𑁄 𑀘. 𑀅𑀣 𑀯𑀸 𑀳𑁂𑀢𑀼 𑀯𑀺𑀧𑀸𑀓𑁄𑀢𑀺 𑀲𑀗𑁆𑀔𑀺𑀧𑁆𑀧𑀦𑁆𑀢𑀻𑀢𑀺 𑀲𑀗𑁆𑀔𑁂𑀧𑀸. 𑀅𑀯𑀺𑀚𑁆𑀚𑀸𑀤𑀬𑁄, 𑀯𑀺𑀜𑁆𑀜𑀸𑀡𑀸𑀤𑀬𑁄 𑀘 𑀓𑁄𑀝𑁆𑀞𑀸𑀲𑀧𑀭𑀺𑀬𑀸𑀬𑁄 𑀯𑀸 𑀲𑀗𑁆𑀔𑁂𑀧𑀲𑀤𑁆𑀤𑁄. 𑀅𑀢𑀻𑀢𑀳𑁂𑀢𑀼𑀲𑀗𑁆𑀔𑁂𑀧𑀸𑀤𑀺𑀯𑀲𑁂𑀦 𑀘𑀢𑁆𑀢𑀸𑀭𑁄 𑀲𑀗𑁆𑀔𑁂𑀧𑀸 𑀬𑀲𑁆𑀲𑀸𑀢𑀺 𑀘𑀢𑀼𑀲𑀗𑁆𑀔𑁂𑀧𑀁. 𑀲𑀭𑀽𑀧𑀢𑁄 𑀅𑀯𑀼𑀢𑁆𑀢𑀸𑀧𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀗𑁆𑀔𑁂𑀧𑁂 𑀆𑀓𑀺𑀭𑀻𑀬𑀦𑁆𑀢𑀺 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀺𑀕𑁆𑀕𑀳𑀡𑁂𑀳𑀺 𑀧𑀓𑀸𑀲𑀻𑀬𑀦𑁆𑀢𑀻𑀢𑀺 𑀆𑀓𑀸𑀭𑀸, 𑀅𑀢𑀻𑀢𑀳𑁂𑀢𑀼𑀆𑀤𑀻𑀦𑀁 𑀧𑀓𑀸𑀭𑀸. 𑀢𑁂 𑀲𑀗𑁆𑀔𑁂𑀧𑁂 𑀧𑀜𑁆𑀘 𑀧𑀜𑁆𑀘 𑀓𑀢𑁆𑀯𑀸 𑀯𑀻𑀲𑀢𑀺 𑀆𑀓𑀸𑀭𑀸 𑀏𑀢𑀲𑁆𑀲𑀸𑀢𑀺 𑀯𑀻𑀲𑀢𑀸𑀓𑀸𑀭𑀁.

𑀔𑀢𑁆𑀢𑀺𑀬𑀸𑀤𑀺𑀪𑁂𑀤𑁂𑀦 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀸𑀧𑀺 𑀲𑀲𑁆𑀲𑀢𑀯𑀸𑀤𑀺𑀦𑁄 𑀚𑀸𑀢𑀺𑀲𑀢𑀲𑀳𑀲𑁆𑀲𑀸𑀦𑀼𑀲𑁆𑀲𑀭𑀡𑀸𑀤𑀺𑀓𑀲𑁆𑀲 𑀅𑀪𑀺𑀦𑀺𑀯𑁂𑀲𑀳𑁂𑀢𑀼𑀦𑁄 𑀯𑀲𑁂𑀦 𑀘𑀢𑁆𑀢𑀸𑀭𑁄𑀯 𑀳𑁄𑀦𑁆𑀢𑀺, 𑀦 𑀢𑀢𑁄 𑀉𑀤𑁆𑀥𑀁, 𑀅𑀥𑁄 𑀯𑀸𑀢𑀺 𑀲𑀲𑁆𑀲𑀢𑀯𑀸𑀤𑀻𑀦𑀁 𑀧𑀭𑀺𑀫𑀸𑀡𑀧𑀭𑀺𑀘𑁆𑀙𑁂𑀤𑀲𑁆𑀲 𑀅𑀦𑀜𑁆𑀜𑀯𑀺𑀲𑀬𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀢𑁆𑀢𑀸𑀭𑁄 𑀚𑀦𑀸’’𑀢𑀺𑀆𑀤𑀺𑀫𑀸𑀳. 𑀏𑀲 𑀦𑀬𑁄 𑀇𑀢𑀭𑁂𑀲𑀼𑀧𑀺. 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀚𑀦𑀸𑀢𑀺 𑀘𑀢𑁆𑀢𑀸𑀭𑁄 𑀚𑀦𑀲𑀫𑀽𑀳𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄 𑀢𑁂𑀲𑀼 𑀏𑀓𑁂𑀓𑀲𑁆𑀲𑀸𑀧𑀺 𑀅𑀦𑁂𑀓𑀧𑁆𑀧𑀪𑁂𑀤𑀢𑁄. 𑀢𑁂𑀢𑀺 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀯𑀸𑀤𑀺𑀦𑁄. 𑀇𑀤𑀁 𑀦𑀺𑀲𑁆𑀲𑀸𑀬𑀸𑀢𑀺 𑀇𑀤𑀧𑁆𑀧𑀘𑁆𑀘𑀬𑀢𑀸𑀬 𑀲𑀫𑁆𑀫𑀸 𑀅𑀕𑁆𑀕𑀳𑀡𑀁. 𑀢𑀢𑁆𑀣𑀸𑀧𑀺 𑀘 𑀳𑁂𑀢𑀼𑀨𑀮𑀪𑀸𑀯𑁂𑀦 𑀲𑀫𑁆𑀩𑀦𑁆𑀥𑀸𑀦𑀁 𑀥𑀫𑁆𑀫𑀸𑀦𑀁 𑀲𑀦𑁆𑀢𑀢𑀺𑀖𑀦𑀲𑁆𑀲 𑀅𑀪𑁂𑀤𑀺𑀢𑀢𑁆𑀢𑀸 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀪𑁂𑀤𑀦𑀺𑀩𑀦𑁆𑀥𑀦𑀁 𑀦𑀸𑀦𑀢𑁆𑀢𑀦𑀬𑀁 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀕𑀳𑀺𑀢𑀁 𑀏𑀓𑀢𑁆𑀢𑀕𑁆𑀕𑀳𑀡𑀁 𑀦𑀺𑀲𑁆𑀲𑀸𑀬. 𑀇𑀤𑀁 𑀕𑀡𑁆𑀳𑀦𑁆𑀢𑀻𑀢𑀺 𑀇𑀤𑀁 𑀲𑀲𑁆𑀲𑀢𑀕𑁆𑀕𑀳𑀡𑀁 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀦𑁆𑀢𑀺, 𑀇𑀫𑀺𑀦𑀸 𑀦𑀬𑁂𑀦 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀸𑀤𑀬𑁄𑀧𑀺 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀸. 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 ‘‘𑀆𑀢𑀧𑁆𑀧𑀫𑀦𑁆𑀯𑀸𑀬𑀸’’𑀢𑀺𑀆𑀤𑀺𑀦𑀸 𑀯𑀺𑀪𑀚𑀺𑀢𑁆𑀯𑀸, ‘‘𑀢𑀬𑀺𑀤𑀁 𑀪𑀺𑀓𑁆𑀔𑀯𑁂 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁩𑁬) 𑀯𑀸 𑀯𑀺𑀥𑀫𑀺𑀢𑁆𑀯𑀸. 𑀦𑀺𑀚𑁆𑀚𑀝𑀦𑁆𑀢𑀺 𑀅𑀦𑁄𑀦𑀤𑁆𑀥𑀁. 𑀦𑀺𑀕𑀼𑀫𑁆𑀩𑀦𑁆𑀢𑀺 𑀅𑀦𑀸𑀯𑀼𑀝𑀁. 𑀅𑀧𑀺𑀘 𑀯𑁂𑀴𑀼𑀆𑀤𑀻𑀦𑀁 𑀳𑁂𑀝𑁆𑀞𑀼𑀧𑀭𑀺𑀬𑀲𑀁𑀲𑀺𑀩𑁆𑀩𑀦𑀝𑁆𑀞𑁂𑀦 𑀚𑀝𑀸. 𑀓𑀼𑀲𑀸𑀤𑀻𑀦𑀁 𑀑𑀯𑀭𑀡𑀝𑁆𑀞𑁂𑀦 𑀕𑀼𑀫𑁆𑀩𑁄. 𑀢𑀲𑁆𑀲𑀤𑀺𑀲𑀢𑀸𑀬 𑀤𑀺𑀝𑁆𑀞𑀺𑀕𑀢𑀸𑀦𑀁 𑀩𑁆𑀬𑀸𑀓𑀼𑀮𑀸 𑀧𑀸𑀓𑀝𑀢𑀸 ‘‘𑀚𑀝𑀸, 𑀕𑀼𑀫𑁆𑀩𑁄’’𑀢𑀺 𑀘 𑀯𑀼𑀘𑁆𑀘𑀢𑀺, 𑀤𑀺𑀝𑁆𑀞𑀺𑀚𑀝𑀸𑀯𑀺𑀚𑀝𑀦𑁂𑀦, 𑀤𑀺𑀝𑁆𑀞𑀺𑀕𑀼𑀫𑁆𑀩𑀯𑀺𑀯𑀭𑀡𑁂𑀦 𑀘 𑀦𑀺𑀚𑁆𑀚𑀝𑀁 𑀦𑀺𑀕𑀼𑀫𑁆𑀩𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

‘‘𑀢𑀲𑁆𑀫𑀸’’𑀢𑀺𑀆𑀤𑀺𑀦𑀸 ¶ 𑀩𑀼𑀤𑁆𑀥𑀕𑀼𑀡𑁂 𑀆𑀭𑀩𑁆𑀪 𑀤𑁂𑀲𑀦𑀸𑀬 𑀲𑀫𑀼𑀝𑁆𑀞𑀺𑀢𑀢𑁆𑀢𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑁂𑀲𑀦𑀸𑀓𑀼𑀲𑀮𑁄 𑀪𑀕𑀯𑀸 𑀲𑀫𑀬𑀦𑁆𑀢𑀭𑀁 𑀯𑀺𑀕𑁆𑀕𑀳𑀡𑀯𑀲𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁨𑁯. 𑀅𑀢𑁆𑀣𑀺 𑀧𑀭𑀺𑀬𑀸𑀬𑁄 𑀲𑀦𑁆𑀢𑀺-𑀲𑀤𑁆𑀤𑁄, 𑀲𑁄 𑀘 𑀲𑀁𑀯𑀺𑀚𑁆𑀚𑀦𑁆𑀢𑀺𑀧𑀭𑀺𑀬𑀸𑀬𑁄, 𑀲𑀁𑀯𑀺𑀚𑁆𑀚𑀫𑀸𑀦𑀢𑀸 𑀘 𑀜𑀸𑀡𑁂𑀦 𑀉𑀧𑀮𑀩𑁆𑀪𑀫𑀸𑀦𑀢𑀸𑀢𑀺 𑀆𑀳 ‘‘𑀲𑀦𑁆𑀢𑀻’’𑀢𑀺𑀆𑀤𑀺. 𑀲𑀁𑀯𑀺𑀚𑁆𑀚𑀫𑀸𑀦𑀧𑀭𑀺𑀤𑀻𑀧𑀦𑁂𑀦 𑀧𑀦 ‘‘𑀲𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀢𑁂𑀲𑀁 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀯𑀺𑀚𑁆𑀚𑀫𑀸𑀦𑀢𑀸𑀬 𑀅𑀯𑀺𑀘𑁆𑀙𑀺𑀦𑁆𑀦𑀢𑀁, 𑀢𑀢𑁄 𑀘 𑀦𑁂𑀲𑀁 𑀫𑀺𑀘𑁆𑀙𑀸𑀕𑀸𑀳𑀢𑁄 𑀲𑀺𑀣𑀺𑀮𑀓𑀭𑀡𑀯𑀺𑀯𑁂𑀘𑀦𑁂𑀳𑀺 ¶ 𑀅𑀢𑁆𑀢𑀦𑁄 𑀤𑁂𑀲𑀦𑀸𑀬 𑀓𑀺𑀘𑁆𑀘𑀓𑀸𑀭𑀺𑀢𑀁, 𑀅𑀯𑀺𑀢𑀣𑀢𑀜𑁆𑀘 𑀤𑀻𑀧𑁂𑀢𑀺 𑀥𑀫𑁆𑀫𑀭𑀸𑀚𑀸. 𑀅𑀢𑁆𑀣𑀻𑀢𑀺 𑀘 𑀲𑀦𑁆𑀢𑀺𑀧𑀤𑁂𑀦 𑀲𑀫𑀸𑀦𑀢𑁆𑀣𑁄 𑀧𑀼𑀣𑀼𑀯𑀘𑀦𑀯𑀺𑀲𑀬𑁄 𑀏𑀓𑁄 𑀦𑀺𑀧𑀸𑀢𑁄 ‘‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁭𑁭; 𑀫. 𑀦𑀺. 𑁧.𑁧𑁧𑁦; 𑁩.𑁧𑁫𑁪; 𑀲𑀁. 𑀦𑀺. 𑁪.𑁧𑁨𑁭) 𑀯𑀺𑀬. 𑀆𑀮𑀧𑀦𑀯𑀘𑀦𑀦𑁆𑀢𑀺 𑀩𑀼𑀤𑁆𑀥𑀸𑀮𑀧𑀦𑀯𑀘𑀦𑀁. 𑀪𑀕𑀯𑀸𑀬𑁂𑀯 𑀳𑀺 ‘‘𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀯𑁄’’𑀢𑀺 𑀘 𑀆𑀮𑀧𑀢𑀺, 𑀦 𑀲𑀸𑀯𑀓𑀸. 𑀲𑀸𑀯𑀓𑀸 𑀧𑀦 ‘‘𑀆𑀯𑀼𑀲𑁄, 𑀆𑀬𑀲𑁆𑀫𑀸’’𑀢𑀺𑀆𑀤𑀺𑀲𑀫𑁆𑀩𑀦𑁆𑀥𑀦𑁂𑀦𑁂𑀯. ‘‘𑀏𑀓𑁂’’𑀢𑀺 𑀯𑀼𑀢𑁆𑀢𑁂 𑀏𑀓𑀘𑁆𑀘𑁂𑀢𑀺 𑀅𑀢𑁆𑀣𑁄 𑀏𑀯 𑀲𑀗𑁆𑀔𑁆𑀬𑀸𑀯𑀸𑀘𑀓𑀲𑁆𑀲 𑀏𑀓-𑀲𑀤𑁆𑀤𑀲𑁆𑀲 𑀦𑀺𑀬𑀢𑁂𑀓𑀯𑀘𑀦𑀢𑁆𑀢𑀸, 𑀦 𑀲𑀫𑀺𑀢𑀩𑀳𑀺𑀢𑀧𑀸𑀧𑀢𑀸𑀬 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺 𑀆𑀳 ‘‘𑀧𑀩𑁆𑀩𑀚𑁆𑀚𑀽𑀧𑀕𑀢𑀪𑀸𑀯𑁂𑀦𑀸’’𑀢𑀺𑀆𑀤𑀺. 𑀢𑀣𑀸 𑀯𑀸 𑀳𑁄𑀦𑁆𑀢𑀼, 𑀅𑀜𑁆𑀜𑀣𑀸 𑀯𑀸, 𑀲𑀫𑁆𑀫𑀼𑀢𑀺𑀫𑀢𑁆𑀢𑁂𑀦𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀮𑁄𑀓𑁂𑀦𑀸’’𑀢𑀺𑀆𑀤𑀺𑀦𑀸. 𑀲𑀲𑁆𑀲𑀢𑀸𑀤𑀺𑀯𑀲𑁂𑀦 𑀧𑀼𑀩𑁆𑀩𑀦𑁆𑀢𑀁 𑀓𑀧𑁆𑀧𑁂𑀦𑁆𑀢𑀻𑀢𑀺 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸. 𑀬𑀲𑁆𑀫𑀸 𑀧𑀦 𑀢𑁂𑀲𑀁 𑀧𑀼𑀩𑁆𑀩𑀦𑁆𑀢𑀁 𑀧𑀼𑀭𑀺𑀫𑀲𑀺𑀤𑁆𑀥𑁂𑀳𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀓𑀧𑁆𑀧𑁂𑀳𑀺 𑀓𑀧𑁆𑀧𑁂𑀢𑁆𑀯𑀸 𑀆𑀲𑁂𑀯𑀦𑀩𑀮𑀯𑀢𑀸𑀬, 𑀯𑀺𑀘𑀺𑀢𑁆𑀭𑀯𑀼𑀢𑁆𑀢𑀺𑀢𑀸𑀬 𑀘 𑀯𑀺𑀓𑀧𑁆𑀧𑁂𑀢𑁆𑀯𑀸 𑀅𑀧𑀭𑀪𑀸𑀕𑀲𑀺𑀤𑁆𑀥𑁂𑀳𑀺 𑀅𑀪𑀺𑀦𑀺𑀯𑁂𑀲𑀪𑀽𑀢𑁂𑀳𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀕𑀸𑀳𑁂𑀳𑀺 𑀕𑀡𑁆𑀳𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀺 𑀧𑀭𑀸𑀫𑀲𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀼𑀩𑁆𑀩𑀦𑁆𑀢𑀁 𑀓𑀧𑁆𑀧𑁂𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀻’’𑀢𑀺. 𑀧𑀼𑀭𑀺𑀫𑀪𑀸𑀕𑀧𑀘𑁆𑀙𑀺𑀫𑀪𑀸𑀕𑀲𑀺𑀤𑁆𑀥𑀸𑀦𑀁 𑀯𑀸 𑀢𑀡𑁆𑀳𑀸𑀉𑀧𑀸𑀤𑀸𑀦𑀸𑀦𑀁 𑀯𑀲𑁂𑀦 𑀬𑀣𑀸𑀓𑁆𑀓𑀫𑀁 𑀓𑀧𑁆𑀧𑀦𑀕𑀳𑀡𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀡𑁆𑀳𑀸𑀧𑀘𑁆𑀘𑀬𑀸 𑀳𑀺 𑀉𑀧𑀸𑀤𑀸𑀦𑀁 𑀲𑀫𑁆𑀪𑀯𑀢𑀺. 𑀧𑀳𑀼𑀢𑀧𑀲𑀁𑀲𑀸𑀦𑀺𑀦𑁆𑀤𑀸𑀢𑀺𑀲𑀬𑀲𑀁𑀲𑀕𑁆𑀕𑀦𑀺𑀘𑁆𑀘𑀬𑁄𑀕𑀸𑀤𑀺𑀯𑀺𑀲𑀬𑁂𑀲𑀼 𑀇𑀥 𑀦𑀺𑀘𑁆𑀘𑀬𑁄𑀕𑀯𑀲𑁂𑀦 𑀯𑀺𑀚𑁆𑀚𑀫𑀸𑀦𑀢𑁆𑀣𑁄 𑀲𑀫𑁆𑀪𑀯𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀩𑁆𑀩𑀦𑁆𑀢 𑀓𑀧𑁆𑀧𑁄 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀜𑁆𑀘 𑁋

‘‘𑀧𑀳𑀼𑀢𑁂 𑀘 𑀧𑀲𑀁𑀲𑀸𑀬𑀁, 𑀦𑀺𑀦𑁆𑀤𑀸𑀬𑀜𑁆𑀘𑀸𑀢𑀺𑀲𑀬𑀦𑁂;

𑀦𑀺𑀘𑁆𑀘𑀬𑁄𑀕𑁂 𑀘 𑀲𑀁𑀲𑀕𑁆𑀕𑁂, 𑀳𑁄𑀦𑁆𑀢𑀺𑀫𑁂 𑀫𑀦𑁆𑀢𑀼𑀆𑀤𑀬𑁄’’𑀢𑀺.

𑀓𑁄𑀝𑁆𑀞𑀸𑀲𑁂𑀲𑀽𑀢𑀺 ¶ 𑀏𑀢𑁆𑀣 𑀓𑁄𑀝𑁆𑀞𑀸𑀲𑀸𑀤𑀻𑀲𑀽𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑀆𑀤𑀺-𑀲𑀤𑁆𑀤𑀮𑁄𑀧𑁂𑀦, 𑀦𑀺𑀤𑀲𑁆𑀲𑀦𑀦𑀬𑁂𑀦 𑀘 𑀯𑀼𑀢𑁆𑀢𑀢𑁆𑀢𑀸. 𑀧𑀤𑀧𑀽𑀭𑀡𑀲𑀫𑀻𑀧𑀉𑀫𑁆𑀫𑀕𑁆𑀕𑀸𑀤𑀻𑀲𑀼𑀧𑀺 𑀳𑀺 𑀅𑀦𑁆𑀢-𑀲𑀤𑁆𑀤𑁄 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺 ‘‘𑀇𑀗𑁆𑀖 𑀢𑀸𑀯 𑀲𑀼𑀢𑁆𑀢𑀦𑁆𑀢𑁂 𑀯𑀸 𑀕𑀸𑀣𑀸𑀬𑁄 𑀯𑀸 𑀅𑀪𑀺𑀥𑀫𑁆𑀫𑀁 𑀯𑀸 𑀧𑀭𑀺𑀬𑀸𑀧𑀼𑀡𑀲𑁆𑀲𑀼 (𑀧𑀸𑀘𑀺. 𑁪𑁪𑁨), 𑀲𑀼𑀢𑁆𑀢𑀦𑁆𑀢𑁂 𑀑𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁧𑁨𑁨𑁧) 𑀘 𑀧𑀤𑀧𑀽𑀭𑀡𑁂 𑀅𑀦𑁆𑀢-𑀲𑀤𑁆𑀤𑁄 𑀯𑀢𑁆𑀢𑀢𑀺, ‘‘𑀕𑀸𑀫𑀦𑁆𑀢𑀲𑁂𑀦𑀸𑀲𑀦’’𑀦𑁆𑀢𑀺𑀆𑀤𑀻𑀲𑀼 (𑀯𑀺𑀲𑀼𑀤𑁆𑀥𑀺. 𑁧.𑁩𑁧) 𑀲𑀫𑀻𑀧𑁂, ‘‘𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄 𑀏𑀓𑁄 𑀅𑀦𑁆𑀢𑁄, 𑀅𑀢𑁆𑀣𑀻𑀢𑀺 𑀔𑁄 𑀓𑀘𑁆𑀘𑀸𑀦 𑀅𑀬𑀫𑁂𑀓𑁄 𑀅𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁫𑁮; 𑀲𑀁. 𑀦𑀺. 𑁨.𑁧𑁧𑁦) 𑀘 𑀉𑀫𑁆𑀫𑀕𑁆𑀕𑁂𑀢𑀺.

𑀅𑀦𑁆𑀢𑀧𑀽𑀭𑁄𑀢𑀺 𑀫𑀳𑀸𑀅𑀦𑁆𑀢𑀅𑀦𑁆𑀢𑀕𑀼𑀡𑁂𑀳𑀺 𑀧𑀽𑀭𑁄. ‘‘𑀲𑀸 𑀳𑀭𑀺𑀢𑀦𑁆𑀢𑀁 𑀯𑀸 𑀧𑀦𑁆𑀣𑀦𑁆𑀢𑀁 𑀯𑀸’’𑀢𑀺 (𑀫. 𑀦𑀺. 𑁧.𑁩𑁦𑁪) 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀫𑀳𑀸𑀳𑀢𑁆𑀣𑀺𑀧𑀤𑁄𑀧𑀫𑀲𑀼𑀢𑁆𑀢𑀦𑁆𑀢𑀧𑀸𑀴𑀺. 𑀢𑀢𑁆𑀣 𑀲𑀸𑀢𑀺 𑀢𑁂𑀚𑁄𑀥𑀸𑀢𑀼. 𑀳𑀭𑀺𑀢𑀦𑁆𑀢𑀦𑁆𑀢𑀺 𑀳𑀭𑀺𑀢𑀢𑀺𑀡𑀭𑀼𑀓𑁆𑀔𑀫𑀭𑀺𑀬𑀸𑀤𑀁 ¶ . 𑀧𑀦𑁆𑀣𑀦𑁆𑀢𑀦𑁆𑀢𑀺 𑀫𑀕𑁆𑀕𑀫𑀭𑀺𑀬𑀸𑀤𑀁. 𑀆𑀕𑀫𑁆𑀫 𑀅𑀦𑀸𑀳𑀸𑀭𑀸 𑀦𑀺𑀩𑁆𑀩𑀸𑀬𑀢𑀻𑀢𑀺 𑀲𑁂𑀲𑁄. ‘‘𑀅𑀦𑁆𑀢𑀫𑀺𑀤𑀁 𑀪𑀺𑀓𑁆𑀔𑀯𑁂, 𑀚𑀻𑀯𑀺𑀓𑀸𑀦𑀁 𑀬𑀤𑀺𑀤𑀁 𑀧𑀺𑀡𑁆𑀟𑁄𑀮𑁆𑀬’’𑀦𑁆𑀢𑀺 (𑀲𑀁. 𑀦𑀺. 𑁩.𑁮𑁦; 𑀇𑀢𑀺𑀯𑀼. 𑁯𑁧) 𑀧𑀺𑀡𑁆𑀟𑀺𑀬𑀸𑀮𑁄𑀧𑀲𑀼𑀢𑁆𑀢𑀦𑁆𑀢𑀧𑀸𑀴𑀺. 𑀢𑀢𑁆𑀣 𑀧𑀺𑀡𑁆𑀟𑀁 𑀉𑀮𑀢𑀺 𑀕𑀯𑁂𑀲𑀢𑀻𑀢𑀺 𑀧𑀺𑀡𑁆𑀟𑁄𑀮𑁄, 𑀧𑀺𑀡𑁆𑀟𑀸𑀘𑀸𑀭𑀺𑀓𑁄, 𑀢𑀲𑁆𑀲 𑀪𑀸𑀯𑁄 𑀧𑀺𑀡𑁆𑀟𑁄𑀮𑁆𑀬𑀁, 𑀧𑀺𑀡𑁆𑀟𑀘𑀭𑀡𑁂𑀦 𑀚𑀻𑀯𑀺𑀓𑀢𑀸𑀢𑀺 𑀅𑀢𑁆𑀣𑁄. 𑀏𑀲𑁂𑀯𑀸𑀢𑀺 𑀲𑀩𑁆𑀩𑀧𑀘𑁆𑀘𑀬𑀲𑀗𑁆𑀔𑀬𑀪𑀽𑀢𑁄 𑀦𑀺𑀩𑁆𑀩𑀸𑀦𑀥𑀫𑁆𑀫𑁄 𑀏𑀯, 𑀢𑁂𑀦𑀸𑀳 ‘‘𑀲𑀩𑁆𑀩…𑀧𑁂… 𑀯𑀼𑀘𑁆𑀘𑀢𑀻’’𑀢𑀺. 𑀏𑀢𑁂𑀦 𑀲𑀩𑁆𑀩𑀧𑀘𑁆𑀘𑀬𑀲𑀗𑁆𑀔𑀬𑀦𑀢𑁄 𑀅𑀲𑀗𑁆𑀔𑀢𑀁 𑀦𑀺𑀩𑁆𑀩𑀸𑀦𑀁 𑀲𑀗𑁆𑀔𑀢𑀪𑀽𑀢𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀭𑀪𑀸𑀕𑀁 𑀧𑀭𑀺𑀬𑁄𑀲𑀸𑀦𑀪𑀽𑀢𑀁, 𑀢𑀲𑁆𑀫𑀸 𑀏𑀢𑁆𑀣 𑀧𑀭𑀪𑀸𑀕𑁄𑀯 𑀅𑀢𑁆𑀣𑁄 𑀬𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀓𑁆𑀓𑀸𑀬𑁄𑀢𑀺 𑀲𑀓𑁆𑀓𑀸𑀬𑀕𑀸𑀳𑁄.

𑀓𑀧𑁆𑀧𑁄𑀢𑀺 𑀮𑁂𑀲𑁄. 𑀓𑀧𑁆𑀧𑀓𑀢𑁂𑀦𑀸𑀢𑀺 𑀢𑀺𑀡𑁆𑀡𑀁 𑀤𑀼𑀩𑁆𑀩𑀡𑁆𑀡𑀓𑀭𑀡𑀸𑀦𑀁 𑀅𑀜𑁆𑀜𑀢𑀭𑀤𑀼𑀩𑁆𑀩𑀡𑁆𑀡𑀓𑀢𑁂𑀦. 𑀆𑀤𑀺-𑀲𑀤𑁆𑀤𑁂𑀦 𑀘𑁂𑀢𑁆𑀣 𑀓𑀧𑁆𑀧-𑀲𑀤𑁆𑀤𑁄 𑀫𑀳𑀸𑀓𑀧𑁆𑀧𑀲𑀫𑀦𑁆𑀢𑀪𑀸𑀯𑀓𑀺𑀮𑁂𑀲𑀓𑀸𑀫𑀯𑀺𑀢𑀓𑁆𑀓𑀓𑀸𑀮𑀧𑀜𑁆𑀜𑀢𑁆𑀢𑀺𑀲𑀤𑀺𑀲𑀪𑀸𑀯𑀸𑀤𑀻𑀲𑀼𑀧𑀺 𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑁂𑀲 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺 𑀪𑀺𑀓𑁆𑀔𑀯𑁂, 𑀓𑀧𑁆𑀧𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁫𑁬) 𑀫𑀳𑀸𑀓𑀧𑁆𑀧𑁂 𑀯𑀢𑁆𑀢𑀢𑀺, ‘‘𑀓𑁂𑀯𑀮𑀓𑀧𑁆𑀧𑀁 𑀯𑁂𑀴𑀼𑀯𑀦𑀁 𑀑𑀪𑀸𑀲𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁯𑁪) 𑀲𑀫𑀦𑁆𑀢𑀪𑀸𑀯𑁂, ‘‘𑀲𑀗𑁆𑀓𑀧𑁆𑀧𑁄 𑀓𑀸𑀫𑁄 𑀭𑀸𑀕𑁄 𑀓𑀸𑀫𑁄 𑀲𑀗𑁆𑀓𑀧𑁆𑀧𑀭𑀸𑀕𑁄 𑀓𑀸𑀫𑁄’’𑀢𑀺𑀆𑀤𑀻𑀲𑀼 (𑀫𑀳𑀸𑀦𑀺. 𑁧; 𑀘𑀽𑀴𑀦𑀺. 𑁮) 𑀓𑀺𑀮𑁂𑀲𑀓𑀸𑀫𑁂, ‘‘𑀢𑀓𑁆𑀓𑁄 𑀯𑀺𑀢𑀓𑁆𑀓𑁄 𑀲𑀗𑁆𑀓𑀧𑁆𑀧𑁄’’𑀢𑀺𑀆𑀤𑀻𑀲𑀼 𑀯𑀺𑀢𑀓𑁆𑀓𑁂, ‘‘𑀬𑁂𑀦 𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁮𑁭) 𑀓𑀸𑀮𑁂 ¶ , ‘‘𑀇𑀘𑁆𑀘𑀸𑀬𑀲𑁆𑀫𑀸 𑀓𑀧𑁆𑀧𑁄’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁧𑁦𑁧𑁮) 𑀧𑀜𑁆𑀜𑀢𑁆𑀢𑀺𑀬𑀁, ‘‘𑀲𑀢𑁆𑀣𑀼𑀓𑀧𑁆𑀧𑁂𑀦 𑀯𑀢 𑀓𑀺𑀭 𑀪𑁄 𑀲𑀸𑀯𑀓𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑀬𑀫𑀸𑀦𑀸 𑀦 𑀚𑀸𑀦𑀺𑀫𑁆𑀳𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁬𑁦) 𑀲𑀤𑀺𑀲𑀪𑀸𑀯𑁂𑀢𑀺.

𑀢𑀡𑁆𑀳𑀸𑀤𑀺𑀝𑁆𑀞𑀻𑀲𑀼 𑀧𑀯𑀢𑁆𑀢𑀺𑀁 𑀫𑀳𑀸𑀦𑀺𑀤𑁆𑀤𑁂𑀲𑀧𑀸𑀴𑀺𑀬𑀸 (𑀫𑀳𑀸𑀦𑀺. 𑁨𑁮) 𑀲𑀸𑀥𑁂𑀦𑁆𑀢𑁄 ‘‘𑀯𑀼𑀢𑁆𑀢𑀫𑁆𑀧𑀺 𑀘𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀤𑁆𑀤𑀸𑀦𑀢𑁄𑀢𑀺 𑀲𑀗𑁆𑀔𑁂𑀧𑀢𑁄. ‘‘𑀢𑀲𑁆𑀫𑀸’’𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀸𑀬 𑀅𑀢𑁆𑀣𑀯𑀡𑁆𑀡𑀦𑀸𑀬 𑀕𑀼𑀡𑀯𑀘𑀦𑀁. 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦𑀸𑀢𑀺 𑀉𑀧𑀦𑀺𑀲𑁆𑀲𑀬𑀲𑀳𑀚𑀸𑀢𑀪𑀽𑀢𑀸𑀬 𑀅𑀪𑀺𑀦𑀦𑁆𑀤𑀦𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 𑀘𑁂𑀯 𑀲𑀲𑁆𑀲𑀢𑀸𑀤𑀺𑀆𑀓𑀸𑀭𑁂𑀦 𑀅𑀪𑀺𑀦𑀺𑀯𑀺𑀲𑀦𑁆𑀢𑀲𑁆𑀲 𑀫𑀺𑀘𑁆𑀙𑀸𑀕𑀸𑀳𑀲𑁆𑀲 𑀘 𑀯𑀲𑁂𑀦. 𑀧𑀼𑀩𑁆𑀩𑁂 𑀦𑀺𑀯𑀼𑀢𑁆𑀣𑀥𑀫𑁆𑀫𑀯𑀺𑀲𑀬𑀸𑀬 𑀓𑀧𑁆𑀧𑀦𑀸𑀬 𑀇𑀥 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀅𑀢𑀻𑀢𑀓𑀸𑀮𑀯𑀸𑀘𑀓𑁄𑀬𑁂𑀯 𑀧𑀼𑀩𑁆𑀩-𑀲𑀤𑁆𑀤𑁄, 𑀦 𑀧𑀦 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀧𑀥𑀸𑀦𑀸𑀤𑀺𑀯𑀸𑀘𑀓𑁄, 𑀭𑀽𑀧𑀸𑀤𑀺𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀓𑀧𑁆𑀧𑀦𑀯𑀢𑁆𑀣𑀼𑀦𑁄 𑀅𑀪𑀸𑀯𑀸 𑀅𑀦𑁆𑀢-𑀲𑀤𑁆𑀤𑁄 𑀘 𑀓𑁄𑀝𑁆𑀞𑀸𑀲𑀯𑀸𑀘𑀓𑁄, 𑀦 𑀧𑀦 𑀅𑀩𑁆𑀪𑀦𑁆𑀢𑀭𑀸𑀤𑀺𑀯𑀸𑀘𑀓𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀢𑀻𑀢𑀁 𑀔𑀦𑁆𑀥𑀓𑁄𑀝𑁆𑀞𑀸𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀧𑁆𑀧𑁂𑀢𑁆𑀯𑀸𑀢𑀺 𑀘 𑀢𑀲𑁆𑀫𑀺𑀁 𑀧𑀼𑀩𑁆𑀩𑀦𑁆𑀢𑁂 𑀢𑀡𑁆𑀳𑀸𑀬𑀦𑀸𑀪𑀺𑀦𑀺𑀯𑁂𑀲𑀦𑀸𑀦𑀁 𑀲𑀫𑀢𑁆𑀣𑀦𑀁 𑀧𑀭𑀺𑀦𑀺𑀝𑁆𑀞𑀸𑀧𑀦𑀫𑀸𑀳. 𑀞𑀺𑀢𑀸𑀢𑀺 𑀢𑀲𑁆𑀲𑀸 𑀮𑀤𑁆𑀥𑀺𑀬𑀸 𑀅𑀯𑀺𑀚𑀳𑀦𑀁, 𑀧𑀼𑀩𑁆𑀩𑀦𑁆𑀢𑀫𑁂𑀯 𑀅𑀦𑀼𑀕𑀢𑀸 𑀤𑀺𑀝𑁆𑀞𑀺 𑀢𑁂𑀲𑀫𑀢𑁆𑀣𑀻𑀢𑀺 𑀬𑁄𑀚𑀦𑀸. 𑀅𑀢𑁆𑀣𑀺𑀢𑀸, 𑀅𑀦𑀼𑀕𑀢𑀢𑀸 𑀘 𑀦𑀸𑀫 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑀺𑀬𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑀯𑀲𑁂𑀦𑀸’’𑀢𑀺 𑀇𑀫𑀺𑀦𑀸. ‘‘𑀢𑁂 𑀏𑀯’’𑀦𑁆𑀢𑀺𑀆𑀤𑀺𑀦𑀸 ‘‘𑀧𑀼𑀩𑁆𑀩𑀦𑁆𑀢𑀁 𑀆𑀭𑀩𑁆𑀪𑀸’’𑀢𑀺𑀆𑀤𑀺𑀧𑀸𑀴𑀺𑀬𑀸 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀢𑀺. 𑀢𑀢𑁆𑀣 𑀆𑀭𑀩𑁆𑀪𑀸𑀢𑀺 𑀆𑀮𑀫𑁆𑀩𑀺𑀢𑁆𑀯𑀸. 𑀯𑀺𑀲𑀬𑁄 𑀳𑀺 𑀢𑀲𑁆𑀲𑀸 𑀤𑀺𑀝𑁆𑀞𑀺𑀬𑀸 𑀧𑀼𑀩𑁆𑀩𑀦𑁆𑀢𑁄. 𑀯𑀺𑀲𑀬𑀪𑀸𑀯𑀢𑁄 𑀳𑁂𑀲 𑀢𑀲𑁆𑀲𑀸 𑀆𑀕𑀫𑀦𑀝𑁆𑀞𑀸𑀦𑀁 ¶ , 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀘𑀸𑀢𑀺 𑀯𑀼𑀢𑁆𑀢𑀁 ‘‘𑀆𑀕𑀫𑁆𑀫 𑀧𑀝𑀺𑀘𑁆𑀘𑀸’’𑀢𑀺. 𑀢𑀤𑁂𑀢𑀁 𑀅𑀜𑁆𑀜𑁂𑀲𑀁 𑀧𑀢𑀺𑀝𑁆𑀞𑀸𑀧𑀦𑀤𑀲𑁆𑀲𑀦𑀦𑁆𑀢𑀺 𑀆𑀳 ‘‘𑀅𑀜𑁆𑀜𑀫𑁆𑀧𑀺 𑀚𑀦𑀁 𑀤𑀺𑀝𑁆𑀞𑀺𑀕𑀢𑀺𑀢𑀁 𑀓𑀭𑁄𑀦𑁆𑀢𑀸’’𑀢𑀺.

𑀅𑀥𑀺𑀯𑀘𑀦𑀧𑀣𑀸𑀦𑀻𑀢𑀺 [𑀅𑀥𑀺𑀯𑀘𑀦𑀧𑀅𑀤𑀸𑀦𑀺 (𑀅𑀝𑁆𑀞𑀓𑀣𑀸𑀬𑀁)] 𑀭𑀼𑀴𑁆𑀳𑀺𑀫𑀢𑁆𑀢𑁂𑀦 𑀧𑀜𑁆𑀜𑀢𑁆𑀢𑀺𑀧𑀣𑀸𑀦𑀺. 𑀤𑀸𑀲𑀸𑀤𑀻𑀲𑀼 𑀳𑀺 𑀲𑀺𑀭𑀺𑀯𑀟𑁆𑀠𑀓𑀸𑀤𑀺𑀲𑀤𑁆𑀤𑀸 𑀯𑀺𑀬 𑀯𑀘𑀦𑀫𑀢𑁆𑀢𑀫𑁂𑀯 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀬𑀸 𑀢𑀣𑀸 𑀧𑀡𑁆𑀡𑀢𑁆𑀢𑀺𑀬𑁂𑀯 𑀅𑀥𑀺𑀯𑀘𑀦𑀁, 𑀲𑀸 𑀘 𑀯𑁄𑀳𑀸𑀭𑀲𑁆𑀲 𑀧𑀣𑁄𑀢𑀺. 𑀅𑀣 𑀯𑀸 𑀅𑀥𑀺-𑀲𑀤𑁆𑀤𑁄 𑀉𑀧𑀭𑀺𑀪𑀸𑀕𑁂, 𑀯𑀼𑀘𑁆𑀘𑀢𑀻𑀢𑀺 𑀯𑀘𑀦𑀁. 𑀅𑀥𑀺 𑀉𑀧𑀭𑀺𑀪𑀸𑀕𑁂 𑀯𑀘𑀦𑀁 𑀅𑀥𑀺𑀯𑀘𑀦𑀁. 𑀉𑀧𑀸𑀤𑀸𑀦𑀺𑀬𑀪𑀽𑀢𑀸𑀦𑀁 𑀭𑀽𑀧𑀸𑀤𑀻𑀦𑀁 [𑀉𑀧𑀸𑀤𑀸𑀪𑀽𑀢𑀭𑀽𑀧𑀸𑀤𑀻𑀦𑀁 (𑀤𑀻. 𑀦𑀺. 𑀝𑀻. 𑁧.𑁨𑁯)] 𑀉𑀧𑀭𑀺 𑀧𑀜𑁆𑀜𑀸𑀧𑀺𑀬𑀫𑀸𑀦𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺, 𑀢𑀲𑁆𑀫𑀸 𑀧𑀜𑁆𑀜𑀢𑁆𑀢𑀺𑀤𑀻𑀧𑀓𑀧𑀣𑀸𑀦𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀜𑁆𑀳𑁂𑀢𑀁 𑀯𑀼𑀘𑁆𑀘𑀢𑀺, 𑀬𑀤𑀺𑀤𑀁 ‘‘𑀅𑀢𑁆𑀢𑀸, 𑀮𑁄𑀓𑁄’’𑀢𑀺 𑀘, 𑀦 𑀭𑀽𑀧𑀯𑁂𑀤𑀦𑀸𑀤𑀬𑁄 𑀯𑀺𑀬 ¶ 𑀧𑀭𑀫𑀢𑁆𑀣𑁄𑀢𑀺. 𑀅𑀥𑀺𑀫𑀼𑀢𑁆𑀢𑀺-𑀲𑀤𑁆𑀤𑁄 𑀘𑁂𑀢𑁆𑀣 𑀅𑀥𑀺𑀯𑀘𑀦-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄 ‘‘𑀦𑀺𑀭𑀼𑀢𑁆𑀢𑀺𑀧𑀣𑁄’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁦𑁭 𑀤𑀼𑀓𑀫𑀸𑀢𑀺𑀓𑀸) 𑀯𑀺𑀬 𑀉𑀢𑁆𑀢𑀺𑀲𑀤𑁆𑀤𑀲𑁆𑀲 𑀯𑀘𑀦𑀧𑀭𑀺𑀬𑀸𑀬𑀢𑁆𑀢𑀸. ‘‘𑀪𑀽𑀢𑀁 𑀅𑀢𑁆𑀣’’𑀦𑁆𑀢𑀺𑀆𑀤𑀺𑀦𑀸 𑀧𑀦 𑀪𑀽𑀢𑀲𑀪𑀸𑀯𑀢𑁄 𑀅𑀢𑀺𑀭𑁂𑀓𑀁. 𑀢𑀫𑀢𑀺𑀥𑀸𑀯𑀺𑀢𑁆𑀯𑀸 𑀯𑀸 𑀫𑀼𑀘𑁆𑀘𑀦𑁆𑀢𑀻𑀢𑀺 𑀅𑀥𑀺𑀫𑀼𑀢𑁆𑀢𑀺𑀬𑁄, 𑀢𑀸𑀲𑀁 𑀧𑀣𑀸𑀦𑀺 𑀢𑀤𑁆𑀤𑀻𑀧𑀓𑀢𑁆𑀢𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀅𑀥𑀺𑀓𑀁 𑀯𑀸 𑀲𑀲𑁆𑀲𑀢𑀸𑀤𑀺𑀓𑀁 𑀫𑀼𑀘𑁆𑀘𑀦𑁆𑀢𑀻𑀢𑀺 𑀅𑀥𑀺𑀫𑀼𑀢𑁆𑀢𑀺𑀬𑁄. 𑀅𑀥𑀺𑀓𑀜𑁆𑀳𑀺 𑀲𑀲𑁆𑀲𑀢𑀸𑀤𑀺𑀁, 𑀧𑀓𑀢𑀺𑀆𑀤𑀺𑀁, 𑀤𑀩𑁆𑀩𑀸𑀤𑀺𑀁, 𑀚𑀻𑀯𑀸𑀤𑀺𑀁, 𑀓𑀸𑀬𑀸𑀤𑀺𑀜𑁆𑀘 𑀅𑀪𑀽𑀢𑀁 𑀅𑀢𑁆𑀣𑀁 𑀲𑀪𑀸𑀯𑀥𑀫𑁆𑀫𑁂𑀲𑀼 𑀅𑀚𑁆𑀛𑀸𑀭𑁄𑀧𑁂𑀢𑁆𑀯𑀸 𑀤𑀺𑀝𑁆𑀞𑀺𑀬𑁄 𑀧𑀯𑀢𑁆𑀢𑀦𑁆𑀢𑀺.

𑁩𑁦. 𑀅𑀪𑀺𑀯𑀤𑀦𑁆𑀢𑀻𑀢𑀺 ‘‘𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀯𑀤𑀦𑁆𑀢𑀺. ‘‘𑀅𑀬𑀫𑁂𑀯 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀅𑀪𑀺𑀪𑀯𑀺𑀢𑁆𑀯𑀸𑀧𑀺 𑀯𑀤𑀦𑁆𑀢𑀺. 𑀅𑀪𑀺𑀯𑀤𑀦𑀓𑀺𑀭𑀺𑀬𑀸𑀬 𑀅𑀚𑁆𑀚𑀸𑀧𑀺 𑀅𑀯𑀺𑀘𑁆𑀙𑁂𑀤𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀢𑁆𑀢𑀫𑀸𑀦𑀯𑀘𑀦𑀁 𑀓𑀢𑀦𑁆𑀢𑀺 𑀅𑀬𑀫𑁂𑀢𑁆𑀣 𑀧𑀸𑀴𑀺𑀯𑀡𑁆𑀡𑀦𑀸. 𑀓𑀣𑁂𑀢𑀼𑀓𑀫𑁆𑀬𑀢𑀸𑀬 𑀳𑁂𑀢𑀼𑀪𑀽𑀢𑀸𑀬 𑀧𑀼𑀘𑁆𑀙𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀺𑀘𑁆𑀙𑀸 𑀧𑀲𑁆𑀲𑀢𑀻𑀢𑀺 𑀤𑀺𑀝𑁆𑀞𑀺, 𑀤𑀺𑀝𑁆𑀞𑀺 𑀏𑀯 𑀤𑀺𑀝𑁆𑀞𑀺𑀕𑀢𑀁 ‘‘𑀫𑀼𑀢𑁆𑀢𑀕𑀢𑀁, (𑀅. 𑀦𑀺. 𑁯.𑁧𑁧) 𑀲𑀗𑁆𑀔𑀸𑀭𑀕𑀢’’𑀦𑁆𑀢𑀺𑀆𑀤𑀻𑀲𑀼 (𑀫𑀳𑀸𑀦𑀺. 𑁪𑁧) 𑀯𑀺𑀬 𑀕𑀢-𑀲𑀤𑁆𑀤𑀲𑁆𑀲 𑀢𑀩𑁆𑀪𑀸𑀯𑀯𑀼𑀢𑁆𑀢𑀺𑀢𑁄, 𑀕𑀦𑁆𑀢𑀩𑁆𑀩𑀸𑀪𑀸𑀯𑀢𑁄 𑀯𑀸 𑀤𑀺𑀝𑁆𑀞𑀺𑀬𑀸 𑀕𑀢𑀫𑀢𑁆𑀢𑀦𑁆𑀢𑀺 𑀤𑀺𑀝𑁆𑀞𑀺𑀕𑀢𑀁. 𑀤𑀺𑀝𑁆𑀞𑀺𑀬𑀸 𑀕𑀳𑀡𑀫𑀢𑁆𑀢𑀫𑁂𑀯, 𑀦𑀢𑁆𑀣𑀜𑁆𑀜𑀁 𑀅𑀯𑀕𑀦𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄, 𑀤𑀺𑀝𑁆𑀞𑀺𑀧𑀓𑀸𑀭𑁄 𑀯𑀸 𑀤𑀺𑀝𑁆𑀞𑀺𑀕𑀢𑀁. 𑀮𑁄𑀓𑀺𑀬𑀸 𑀳𑀺 𑀯𑀺𑀥𑀬𑀼𑀢𑁆𑀢𑀕𑀢𑀧𑀓𑀸𑀭𑀲𑀤𑁆𑀤𑁂 𑀲𑀫𑀸𑀦𑀢𑁆𑀣𑁂 𑀇𑀘𑁆𑀙𑀦𑁆𑀢𑀺. 𑀏𑀓𑀲𑁆𑀫𑀺𑀁𑀬𑁂𑀯 𑀔𑀦𑁆𑀥𑁂 ‘‘𑀅𑀢𑁆𑀢𑀸’’𑀢𑀺 𑀘 ‘‘𑀮𑁄𑀓𑁄’’𑀢𑀺 𑀘 𑀕𑀳𑀡𑀯𑀺𑀲𑁂𑀲𑀁 𑀉𑀧𑀸𑀤𑀸𑀬 𑀧𑀜𑁆𑀜𑀸𑀧𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀭𑀽𑀧𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀅𑀢𑁆𑀢𑀸𑀢𑀺 𑀘 𑀮𑁄𑀓𑁄𑀢𑀺 𑀘 𑀕𑀳𑁂𑀢𑁆𑀯𑀸’’𑀢𑀺. 𑀅𑀫𑀭𑀁 𑀦𑀺𑀘𑁆𑀘𑀁 𑀥𑀼𑀯𑀦𑁆𑀢𑀺 𑀲𑀲𑁆𑀲𑀢𑀯𑁂𑀯𑀘𑀦𑀸𑀦𑀺, 𑀫𑀭𑀡𑀸𑀪𑀸𑀯𑁂𑀦 𑀯𑀸 𑀅𑀫𑀭𑀁. 𑀉𑀧𑁆𑀧𑀸𑀤𑀸𑀪𑀸𑀯𑁂𑀦 𑀲𑀩𑁆𑀩𑀤𑀸𑀧𑀺 𑀅𑀢𑁆𑀣𑀺𑀢𑀸𑀬 𑀦𑀺𑀘𑁆𑀘𑀁. 𑀣𑀺𑀭𑀝𑁆𑀞𑁂𑀦 𑀯𑀺𑀓𑀸𑀭𑀸𑀪𑀸𑀯𑁂𑀦 𑀥𑀼𑀯𑀁. ‘‘𑀬𑀣𑀸𑀳𑀸’’𑀢𑀺𑀆𑀤𑀺𑀦𑀸 𑀫𑀳𑀸𑀦𑀺𑀤𑁆𑀤𑁂𑀲 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀸𑀴𑀻𑀳𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀺. 𑀢𑀢𑁆𑀣 ‘‘𑀭𑀽𑀧𑀁 𑀕𑀳𑁂𑀢𑁆𑀯𑀸’’𑀢𑀺 𑀧𑀸𑀞𑀲𑁂𑀲𑁂𑀦 𑀲𑀫𑁆𑀩𑀦𑁆𑀥𑁄. 𑀅𑀬𑀁 𑀧𑀦𑀢𑁆𑀣𑁄 𑁋 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀯𑁂𑀤𑀦𑀁, 𑀲𑀜𑁆𑀜𑀁, 𑀲𑀗𑁆𑀔𑀸𑀭𑁂, 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 𑀇𑀫𑀺𑀲𑁆𑀲𑀸 𑀧𑀜𑁆𑀘𑀯𑀺𑀥𑀸𑀬 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀯𑀲𑁂𑀦 𑀯𑀼𑀢𑁆𑀢𑁄, ‘‘𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦’’𑀦𑁆𑀢𑀺𑀆𑀤𑀺𑀓𑀸𑀬 𑀧𑀦 𑀧𑀜𑁆𑀘𑀤𑀲𑀯𑀺𑀥𑀸𑀬𑀧𑀺 ¶ 𑀢𑀤𑀯𑀲𑁂𑀲𑀸𑀬 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀯𑀲𑁂𑀦 𑀘𑀢𑁆𑀢𑀸𑀭𑁄 𑀔𑀦𑁆𑀥𑁂 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀢𑀤𑀜𑁆𑀜𑁄 ‘‘𑀮𑁄𑀓𑁄’’𑀢𑀺 𑀧𑀜𑁆𑀜𑀧𑁂𑀦𑁆𑀢𑀻𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀮𑀩𑁆𑀪𑀢𑁂𑀯. 𑀢𑀣𑀸 𑀏𑀓𑀁 𑀔𑀦𑁆𑀥𑀁 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀅𑀜𑁆𑀜𑁄 𑀅𑀢𑁆𑀢𑀦𑁄 𑀉𑀧𑀪𑁄𑀕𑀪𑀽𑀢𑁄 ‘‘𑀮𑁄𑀓𑁄’’𑀢𑀺 𑀘. 𑀲𑀲𑀦𑁆𑀢𑀢𑀺𑀧𑀢𑀺𑀢𑁂 𑀔𑀦𑁆𑀥𑁂 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀢𑀤𑀜𑁆𑀜𑁄 𑀧𑀭𑀲𑀦𑁆𑀢𑀢𑀺𑀧𑀢𑀺𑀢𑁄 ‘‘𑀮𑁄𑀓𑁄’’𑀢𑀺 𑀘 𑀧𑀜𑁆𑀜𑀧𑁂𑀢𑀻𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀣𑀸𑀳 ¶ 𑁋 ‘‘𑀲𑀲𑁆𑀲𑀢𑁄 𑀯𑀸𑀤𑁄 𑀏𑀢𑁂𑀲’’𑀦𑁆𑀢𑀺 𑀓𑀲𑁆𑀫𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁, 𑀦𑀦𑀼 𑀢𑁂𑀲𑀁 𑀅𑀢𑁆𑀢𑀸 𑀘 𑀮𑁄𑀓𑁄 𑀘 𑀲𑀲𑁆𑀲𑀢𑁄𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀦 𑀯𑀸𑀤𑁄𑀢𑀺? 𑀲𑀘𑁆𑀘𑀫𑁂𑀢𑀁, 𑀲𑀲𑁆𑀲𑀢𑀲𑀳𑀘𑀭𑀺𑀢𑀢𑀸𑀬 𑀧𑀦 𑀯𑀸𑀤𑁄𑀧𑀺 𑀲𑀲𑁆𑀲𑀢𑁄𑀢𑀺 𑀯𑀼𑀢𑁆𑀢𑁄 𑀬𑀣𑀸 ‘‘𑀓𑀼𑀦𑁆𑀢𑀸 𑀧𑀘𑀭𑀦𑁆𑀢𑀻’’𑀢𑀺, 𑀲𑀲𑁆𑀲𑀢𑁄 𑀇𑀢𑀺 𑀯𑀸𑀤𑁄 𑀏𑀢𑁂𑀲𑀦𑁆𑀢𑀺 𑀯𑀸 𑀢𑀢𑁆𑀣 𑀇𑀢𑀺-𑀲𑀤𑁆𑀤𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀲𑀲𑁆𑀲𑀢𑀁 𑀯𑀤𑀦𑁆𑀢𑀺 ‘‘𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀦𑁆𑀢𑀻𑀢𑀺 𑀲𑀲𑁆𑀲𑀢𑀯𑀸𑀤𑀸 𑀢𑀺𑀧𑀺 𑀬𑀼𑀚𑁆𑀚𑀢𑀺.

𑁩𑁧. 𑀆𑀢𑀸𑀧𑀦𑀪𑀸𑀯𑁂𑀦𑀸𑀢𑀺 𑀯𑀺𑀩𑀸𑀥𑀦𑀲𑁆𑀲 𑀪𑀸𑀯𑁂𑀦, 𑀯𑀺𑀩𑀸𑀥𑀦𑀝𑁆𑀞𑁂𑀦 𑀯𑀸. 𑀧𑀳𑀸𑀦𑀜𑁆𑀘𑁂𑀢𑁆𑀣 𑀯𑀺𑀩𑀸𑀥𑀦𑀁. 𑀧𑀤𑀳𑀦𑀯𑀲𑁂𑀦𑀸𑀢𑀺 𑀲𑀫𑀸𑀤𑀳𑀦𑀯𑀲𑁂𑀦. 𑀲𑀫𑀸𑀤𑀳𑀦𑀁 𑀧𑀦 𑀓𑁄𑀲𑀚𑁆𑀚𑀧𑀓𑁆𑀔𑁂 𑀧𑀢𑀺𑀢𑀼𑀫𑀤𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀉𑀲𑁆𑀲𑀸𑀳𑀦𑀁. 𑀬𑀣𑀸 𑀲𑀫𑀸𑀥𑀺 𑀯𑀺𑀲𑁂𑀲𑀪𑀸𑀕𑀺𑀬𑀢𑀁 𑀧𑀸𑀧𑀼𑀡𑀸𑀢𑀺, 𑀏𑀯𑀁 𑀯𑀻𑀭𑀺𑀬𑀲𑁆𑀲 𑀩𑀳𑀼𑀮𑀻𑀓𑀭𑀡𑀁 𑀅𑀦𑀼𑀬𑁄𑀕𑁄. 𑀇𑀢𑀺 𑀧𑀤𑀢𑁆𑀢𑀬𑁂𑀦 𑀯𑀻𑀭𑀺𑀬𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀯𑀁 𑀢𑀺𑀧𑁆𑀧𑀪𑁂𑀤𑀁 𑀯𑀻𑀭𑀺𑀬’’𑀦𑁆𑀢𑀺. 𑀬𑀣𑀸𑀓𑁆𑀓𑀫𑀜𑁆𑀳𑀺𑀳 𑀢𑀻𑀳𑀺 𑀧𑀤𑁂𑀳𑀺 𑀉𑀧𑀘𑀸𑀭𑀧𑁆𑀧𑀦𑀸𑀘𑀺𑀢𑁆𑀢𑀧𑀭𑀺𑀤𑀫𑀦𑀯𑀻𑀭𑀺𑀬𑀸𑀦𑀺 𑀤𑀲𑁆𑀲𑁂𑀢𑀺. 𑀦 𑀧𑀫𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀅𑀧𑁆𑀧𑀫𑀸𑀤𑁄, 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑁄. 𑀲𑁄 𑀧𑀦 𑀲𑀢𑀺𑀧𑀝𑁆𑀞𑀸𑀦𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀏𑀯. 𑀲𑀫𑁆𑀫𑀸 𑀉𑀧𑀸𑀬𑁂𑀦 𑀫𑀦𑀲𑀺 𑀓𑀭𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑀫𑁂𑀢𑁂𑀦𑀸𑀢𑀺 𑀲𑀫𑁆𑀫𑀸𑀫𑀦𑀲𑀺𑀓𑀸𑀭𑁄, 𑀲𑁄 𑀧𑀦 𑀜𑀸𑀡𑀫𑁂𑀯, 𑀦 𑀆𑀭𑀫𑁆𑀫𑀡𑀯𑀻𑀣𑀺𑀚𑀯𑀦𑀧𑀝𑀺𑀧𑀸𑀤𑀓𑀸, 𑀢𑁂𑀦𑀸𑀳 ‘‘𑀅𑀢𑁆𑀣𑀢𑁄 𑀜𑀸𑀡’’𑀦𑁆𑀢𑀺. 𑀧𑀣𑀫𑀦𑀲𑀺𑀓𑀸𑀭𑁄𑀢𑀺 𑀓𑀸𑀭𑀡𑀫𑀦𑀲𑀺𑀓𑀸𑀭𑁄. 𑀢𑀤𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀺 ‘‘𑀬𑀲𑁆𑀫𑀺𑀜𑁆𑀳𑀻’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀬𑀲𑁆𑀫𑀺𑀁 𑀫𑀦𑀲𑀺𑀓𑀸𑀭𑁂𑀢𑀺 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀭𑀡𑀽𑀧𑀸𑀬𑀪𑀽𑀢𑁂 𑀜𑀸𑀡𑀲𑀗𑁆𑀔𑀸𑀢𑁂 𑀫𑀦𑀲𑀺𑀓𑀸𑀭𑁂. ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂’’𑀢𑀺 𑀇𑀫𑀺𑀦𑀸 𑀲𑀤𑁆𑀤𑀦𑁆𑀢𑀭𑀲𑀫𑁆𑀧𑀬𑁄𑀕𑀸𑀤𑀺𑀦𑀸 𑀯𑀺𑀬 𑀧𑀓𑀭𑀡𑀯𑀲𑁂𑀦𑀸𑀧𑀺 𑀲𑀤𑁆𑀤𑁄 𑀯𑀺𑀲𑁂𑀲𑀯𑀺𑀲𑀬𑁄𑀢𑀺 𑀤𑀻𑀧𑁂𑀢𑀺. 𑀯𑀻𑀭𑀺𑀬𑀜𑁆𑀘𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀢𑀻𑀳𑀺 𑀧𑀤𑁂𑀳𑀺 𑀯𑀼𑀢𑁆𑀢𑀁 𑀢𑀺𑀧𑁆𑀧𑀪𑁂𑀤𑀁 𑀯𑀻𑀭𑀺𑀬𑀜𑁆𑀘. 𑀏𑀢𑁆𑀣𑀸𑀢𑀺 ‘‘𑀆𑀢𑀧𑁆𑀧…𑀧𑁂… 𑀫𑀦𑀲𑀺𑀓𑀸𑀭𑀫𑀦𑁆𑀯𑀸𑀬𑀸’’𑀢𑀺 𑀇𑀫𑀲𑁆𑀫𑀺𑀁 𑀧𑀸𑀞𑁂, 𑀲𑀻𑀮𑀯𑀺𑀲𑀼𑀤𑁆𑀥𑀺𑀬𑀸 𑀲𑀤𑁆𑀥𑀺𑀁 𑀘𑀢𑀼𑀦𑁆𑀦𑀁 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁 𑀅𑀥𑀺𑀕𑀫𑀦𑀧𑀝𑀺𑀧𑀤𑀸 𑀇𑀥 𑀯𑀢𑁆𑀢𑀩𑁆𑀩𑀸, 𑀲𑀸 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁪𑁦𑁧) 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀲𑀗𑁆𑀔𑁂𑀧𑀢𑁆𑀣𑁄’’𑀢𑀺. 𑀢𑀣𑀸𑀚𑀸𑀢𑀺𑀓𑀦𑁆𑀢𑀺 𑀢𑀣𑀸𑀲𑀪𑀸𑀯𑀁, 𑀏𑀢𑁂𑀦 𑀘𑀼𑀤𑁆𑀤𑀲𑀯𑀺𑀥𑁂𑀳𑀺 𑀘𑀺𑀢𑁆𑀢𑀧𑀭𑀺𑀤𑀫𑀦𑁂𑀳𑀺 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀧𑀕𑀼𑀡𑀢𑀸𑀧𑀸𑀤𑀦𑁂𑀦 𑀤𑀫𑀺𑀢𑀢𑀁 𑀤𑀲𑁆𑀲𑁂𑀢𑀺. 𑀘𑁂𑀢𑀲𑁄 𑀲𑀫𑀸𑀥𑀺 𑀘𑁂𑀢𑁄𑀲𑀫𑀸𑀥𑀺, 𑀲𑁄 𑀧𑀦 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲𑁂𑀯 𑀲𑀫𑀸𑀥𑀺. 𑀬𑀣𑀸-𑀲𑀤𑁆𑀤𑁄 ‘‘𑀬𑁂𑀦𑀸’’𑀢𑀺 𑀅𑀢𑁆𑀣𑁂 𑀦𑀺𑀧𑀸𑀢𑁄𑀢𑀺 𑀆𑀳 ‘‘𑀬𑁂𑀦 𑀲𑀫𑀸𑀥𑀺𑀦𑀸’’𑀢𑀺.

𑀯𑀺𑀚𑀫𑁆𑀪𑀦𑀪𑀽𑀢𑁂𑀳𑀺 ¶ 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀲𑀗𑁆𑀔𑀸𑀢𑁂𑀳𑀺 𑀛𑀸𑀦𑀸𑀦𑀼𑀪𑀸𑀯𑁂𑀳𑀺 𑀲𑀫𑁆𑀧𑀦𑁆𑀦𑁄𑀢𑀺 𑀛𑀸𑀦𑀸𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑁄. 𑀲𑁄 ¶ 𑀤𑀺𑀝𑁆𑀞𑀺𑀕𑀢𑀺𑀓𑁄 𑀏𑀯𑀁 𑀯𑀤𑀢𑀻𑀢𑀺 𑀯𑀢𑁆𑀢𑀫𑀸𑀦𑀯𑀘𑀦𑀁, 𑀢𑀣𑀸𑀯𑀤𑀦𑀲𑁆𑀲 𑀅𑀯𑀺𑀘𑁆𑀙𑁂𑀤𑀪𑀸𑀯𑁂𑀦 𑀲𑀩𑁆𑀩𑀓𑀸𑀮𑀺𑀓𑀢𑀸𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀦𑀺𑀬𑀫𑀺𑀢𑁂 𑀳𑀺 𑀓𑀸𑀮𑀯𑀺𑀲𑁂𑀲𑁂 𑀯𑀺𑀧𑁆𑀧𑀓𑀢𑀓𑀸𑀮𑀯𑀘𑀦𑀦𑁆𑀢𑀺. 𑀯𑀦𑀢𑀺 𑀬𑀸𑀘𑀢𑀺 𑀧𑀼𑀢𑁆𑀢𑀦𑁆𑀢𑀺 𑀯𑀜𑁆𑀛𑀸 𑀛-𑀧𑀘𑁆𑀘𑀬𑀁, 𑀦-𑀓𑀸𑀭𑀲𑁆𑀲 𑀘 𑀦𑀺𑀕𑁆𑀕𑀳𑀺𑀢𑀁 𑀓𑀢𑁆𑀯𑀸, 𑀯𑀥𑀢𑀺 𑀧𑀼𑀢𑁆𑀢𑀁, 𑀨𑀮𑀁 𑀯𑀸 𑀳𑀦𑀢𑀻𑀢𑀺𑀧𑀺 𑀯𑀜𑁆𑀛𑀸 𑀲𑀧𑀘𑁆𑀘𑀬𑀖𑁆𑀬-𑀓𑀸𑀭𑀲𑁆𑀲 𑀛-𑀓𑀸𑀭𑀁, 𑀦𑀺𑀕𑁆𑀕𑀳𑀺𑀢𑀸𑀕𑀫𑀜𑁆𑀘 𑀓𑀢𑁆𑀯𑀸. 𑀲𑀸 𑀯𑀺𑀬 𑀓𑀲𑁆𑀲𑀘𑀺 𑀨𑀮𑀲𑁆𑀲 𑀅𑀚𑀦𑁂𑀦𑀸𑀢𑀺 𑀯𑀜𑁆𑀛𑁄, 𑀢𑁂𑀦𑀸𑀳 ‘‘𑀯𑀜𑁆𑀛𑀧𑀲𑀽’’𑀢𑀺𑀆𑀤𑀺. 𑀏𑀯𑀁 𑀧𑀤𑀢𑁆𑀣𑀯𑀢𑀸 𑀇𑀫𑀺𑀦𑀸 𑀓𑀻𑀤𑀺𑀲𑀁 𑀲𑀸𑀫𑀢𑁆𑀣𑀺𑀬𑀢𑁆𑀣𑀁 𑀤𑀲𑁆𑀲𑁂𑀢𑀻𑀢𑀺 𑀅𑀦𑁆𑀢𑁄𑀮𑀻𑀦𑀘𑁄𑀤𑀦𑀁 𑀧𑀭𑀺𑀳𑀭𑀺𑀢𑀼𑀁 ‘‘𑀏𑀢𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀛𑀸𑀦𑀮𑀸𑀪𑀺𑀲𑁆𑀲 𑀯𑀺𑀲𑁂𑀲𑁂𑀦 𑀛𑀸𑀦𑀥𑀫𑁆𑀫𑀸 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀺, 𑀢𑀫𑁆𑀫𑀼𑀔𑁂𑀦 𑀧𑀦 𑀲𑁂𑀲𑀥𑀫𑁆𑀫𑀸𑀧𑀻𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀛𑀸𑀦𑀸𑀤𑀻𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀭𑀽𑀧𑀸𑀤𑀺𑀚𑀦𑀓𑀪𑀸𑀯𑀦𑁆𑀢𑀺 𑀭𑀽𑀧𑀸𑀤𑀻𑀦𑀁 𑀚𑀦𑀓𑀲𑀸𑀫𑀢𑁆𑀣𑀺𑀬𑀁. 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 ‘‘𑀦𑀬𑀺𑀫𑁂 𑀓𑀺𑀜𑁆𑀘𑀺 𑀚𑀦𑁂𑀦𑁆𑀢𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀓𑀲𑁆𑀫𑀸𑀢𑀺 𑀘𑁂? 𑀲𑀢𑀺 𑀳𑀺 𑀚𑀦𑀓𑀪𑀸𑀯𑁂 𑀭𑀽𑀧𑀸𑀤𑀺𑀥𑀫𑁆𑀫𑀸𑀦𑀁 𑀯𑀺𑀬, 𑀲𑀼𑀔𑀸𑀤𑀺𑀥𑀫𑁆𑀫𑀸𑀦𑀁 𑀯𑀺𑀬 𑀘 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀉𑀧𑁆𑀧𑀸𑀤𑀯𑀦𑁆𑀢𑀢𑀸 𑀯𑀺𑀜𑁆𑀜𑀸𑀬𑀢𑀺, 𑀉𑀧𑁆𑀧𑀸𑀤𑁂 𑀘 𑀲𑀢𑀺 𑀅𑀯𑀲𑁆𑀲𑀁𑀪𑀸𑀯𑀻 𑀦𑀺𑀭𑁄𑀥𑁄𑀢𑀺 𑀅𑀦𑀯𑀓𑀸𑀲𑀸𑀯 𑀦𑀺𑀘𑁆𑀘𑀢𑀸 𑀲𑀺𑀬𑀸, 𑀢𑀲𑁆𑀫𑀸 𑀢𑀁 𑀧𑀝𑀺𑀓𑁆𑀔𑀺𑀧𑀢𑀻𑀢𑀺.

𑀞𑀺𑀢𑁄𑀢𑀺 𑀦𑀺𑀘𑁆𑀘𑀮𑀁 𑀧𑀢𑀺𑀝𑁆𑀞𑀺𑀢𑁄, 𑀓𑀽𑀝𑀝𑁆𑀞-𑀲𑀤𑁆𑀤𑁄𑀬𑁂𑀯 𑀯𑀸 𑀮𑁄𑀓𑁂 𑀅𑀘𑁆𑀘𑀦𑁆𑀢𑀁 𑀦𑀺𑀘𑁆𑀘𑁂 𑀦𑀺𑀭𑀼𑀴𑁆𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀺𑀝𑁆𑀞𑀢𑀻𑀢𑀺 𑀞𑀸𑀬𑀻, 𑀏𑀲𑀺𑀓𑀸 𑀘 𑀲𑀸 𑀞𑀸𑀬𑀻 𑀘𑀸𑀢𑀺 𑀏𑀲𑀺𑀓𑀝𑁆𑀞𑀸𑀬𑀻, 𑀯𑀺𑀲𑁂𑀲𑀦𑀧𑀭𑀦𑀺𑀧𑀸𑀢𑁄 𑀘𑁂𑀲, 𑀢𑀲𑁆𑀫𑀸 𑀕𑀫𑁆𑀪𑀻𑀭𑀦𑁂𑀫𑁄 𑀦𑀺𑀘𑁆𑀘𑀮𑀝𑁆𑀞𑀺𑀢𑀺𑀓𑁄 𑀇𑀦𑁆𑀤𑀔𑀻𑀮𑁄 𑀯𑀺𑀬𑀸𑀢𑀺 𑀅𑀢𑁆𑀣𑁄, 𑀢𑁂𑀦𑀸𑀳 ‘‘𑀬𑀣𑀸’’𑀢𑀺𑀆𑀤𑀺. ‘‘𑀓𑀽𑀝𑀝𑁆𑀞𑁄’’𑀢𑀺 𑀇𑀫𑀺𑀦𑀸 𑀘𑁂𑀢𑁆𑀣 𑀅𑀦𑀺𑀘𑁆𑀘𑀢𑀸𑀪𑀸𑀯𑀫𑀸𑀳. ‘‘𑀏𑀲𑀺𑀓𑀝𑁆𑀞𑀸𑀬𑀻 𑀞𑀺𑀢𑁄’’𑀢𑀺 𑀇𑀫𑀺𑀦𑀸 𑀧𑀦 𑀬𑀣𑀸 𑀏𑀲𑀺𑀓𑀸 𑀯𑀸𑀢𑀧𑁆𑀧𑀳𑀸𑀭𑀸𑀤𑀻𑀳𑀺 𑀦 𑀘𑀮𑀢𑀺, 𑀏𑀯𑀁 𑀦 𑀓𑁂𑀦𑀘𑀺 𑀯𑀺𑀓𑀸𑀭𑀫𑀸𑀧𑀚𑁆𑀚𑀢𑀻𑀢𑀺 𑀯𑀺𑀓𑀸𑀭𑀸𑀪𑀸𑀯𑀁, 𑀯𑀺𑀓𑀸𑀭𑁄𑀧𑀺 𑀅𑀢𑁆𑀣𑀢𑁄 𑀯𑀺𑀦𑀸𑀲𑁄𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀉𑀪𑀬𑁂𑀦𑀸𑀧𑀺 𑀮𑁄𑀓𑀲𑁆𑀲 𑀯𑀺𑀦𑀸𑀲𑀸𑀪𑀸𑀯𑀁 𑀤𑀲𑁆𑀲𑁂𑀢𑀻’’𑀢𑀺.

𑀏𑀯𑀫𑀝𑁆𑀞𑀓𑀣𑀸𑀯𑀸𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑁂𑀘𑀺𑀯𑀸𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀘𑀺 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀼𑀜𑁆𑀚𑀢𑁄𑀢𑀺 [𑀫𑀼𑀜𑁆𑀚𑁂 (𑀅𑀝𑁆𑀞𑀓𑀣𑀸𑀬𑀁)] 𑀫𑀼𑀜𑁆𑀚𑀢𑀺𑀡𑀢𑁄. 𑀈𑀲𑀺𑀓𑀸𑀢𑀺 𑀓𑀴𑀻𑀭𑁄. 𑀬𑀤𑀺𑀤𑀁 𑀅𑀢𑁆𑀢𑀲𑀗𑁆𑀔𑀸𑀢𑀁 𑀥𑀫𑁆𑀫𑀚𑀸𑀢𑀁 𑀚𑀸𑀬𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀲𑀢𑁆𑀢𑀺𑀭𑀽𑀧𑀯𑀲𑁂𑀦 𑀧𑀼𑀩𑁆𑀩𑁂 𑀯𑀺𑀚𑁆𑀚𑀫𑀸𑀦𑀫𑁂𑀯 𑀩𑁆𑀬𑀢𑁆𑀢𑀺𑀭𑀽𑀧𑀯𑀲𑁂𑀦 𑀦𑀺𑀓𑁆𑀔𑀫𑀢𑀺, 𑀅𑀪𑀺𑀩𑁆𑀬𑀢𑁆𑀢𑀺𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. ‘‘𑀯𑀺𑀚𑁆𑀚𑀫𑀸𑀦𑀫𑁂𑀯𑀸’’𑀢𑀺 𑀳𑀺 𑀏𑀢𑁂𑀦 𑀓𑀸𑀭𑀡𑁂 𑀨𑀮𑀲𑁆𑀲 𑀅𑀢𑁆𑀣𑀺𑀪𑀸𑀯𑀤𑀲𑁆𑀲𑀦𑁂𑀦 𑀩𑁆𑀬𑀢𑁆𑀢𑀺𑀭𑀽𑀧𑀯𑀲𑁂𑀦 ¶ 𑀅𑀪𑀺𑀩𑁆𑀬𑀢𑁆𑀢𑀺𑀯𑀸𑀤𑀁 𑀤𑀲𑁆𑀲𑁂𑀢𑀺. 𑀲𑀸𑀮𑀺𑀕𑀩𑁆𑀪𑁂 𑀲𑀁𑀯𑀺𑀚𑁆𑀚𑀫𑀸𑀦𑀁 𑀲𑀸𑀮𑀺𑀲𑀻𑀲𑀁 𑀯𑀺𑀬 𑀳𑀺 𑀲𑀢𑁆𑀢𑀺𑀭𑀽𑀧𑀁, 𑀢𑀤𑀪𑀺𑀦𑀺𑀓𑁆𑀔𑀦𑁆𑀢𑀁 𑀯𑀺𑀬 𑀩𑁆𑀬𑀢𑁆𑀢𑀺𑀭𑀽𑀧𑀦𑁆𑀢𑀺. 𑀓𑀣𑀁 𑀧𑀦 𑀲𑀢𑁆𑀢𑀺𑀭𑀽𑀧𑀯𑀲𑁂𑀦 𑀯𑀺𑀚𑁆𑀚𑀫𑀸𑀦𑁄𑀬𑁂𑀯 𑀧𑀼𑀩𑁆𑀩𑁂 𑀅𑀦𑀪𑀺𑀩𑁆𑀬𑀢𑁆𑀢𑁄 𑀩𑁆𑀬𑀢𑁆𑀢𑀺𑀭𑀽𑀧𑀯𑀲𑁂𑀦 𑀅𑀪𑀺𑀩𑁆𑀬𑀢𑁆𑀢𑀺𑀁 𑀕𑀘𑁆𑀙𑀢𑀻𑀢𑀺? 𑀬𑀣𑀸 𑀅𑀦𑁆𑀥𑀓𑀸𑀭𑁂𑀦 𑀧𑀝𑀺𑀘𑁆𑀙𑀦𑁆𑀦𑁄 𑀖𑀝𑁄 𑀆𑀮𑁄𑀓𑁂𑀦 𑀅𑀪𑀺𑀩𑁆𑀬𑀢𑁆𑀢𑀺𑀁 𑀕𑀘𑁆𑀙𑀢𑀺, 𑀏𑀯𑀫𑀬𑀫𑁆𑀧𑀻𑀢𑀺.

𑀇𑀤𑀫𑁂𑀢𑁆𑀣 𑀯𑀺𑀘𑀸𑀭𑁂𑀢𑀩𑁆𑀩𑀁 𑁋 𑀓𑀺𑀁 𑀓𑀭𑁄𑀦𑁆𑀢𑁄 𑀆𑀮𑁄𑀓𑁄 𑀖𑀝𑀁 𑀧𑀓𑀸𑀲𑁂𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀬𑀤𑀺 𑀖𑀝𑀯𑀺𑀲𑀬𑀁 ¶ 𑀩𑀼𑀤𑁆𑀥𑀺𑀁 𑀓𑀭𑁄𑀦𑁆𑀢𑁄 𑀧𑀓𑀸𑀲𑁂𑀢𑀺, 𑀅𑀦𑀼𑀧𑁆𑀧𑀦𑁆𑀦𑀸𑀬 𑀏𑀯 𑀩𑀼𑀤𑁆𑀥𑀺𑀬𑀸 𑀉𑀧𑁆𑀧𑀢𑁆𑀢𑀺𑀤𑀻𑀧𑀦𑀢𑁄 𑀅𑀪𑀺𑀩𑁆𑀬𑀢𑁆𑀢𑀺𑀯𑀸𑀤𑁄 𑀳𑀸𑀬𑀢𑀺. 𑀅𑀣 𑀖𑀝𑀯𑀺𑀲𑀬𑀸𑀬 𑀩𑀼𑀤𑁆𑀥𑀺𑀬𑀸 𑀆𑀯𑀭𑀡𑀪𑀽𑀢𑀁 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀦𑁆𑀢𑁄 𑀧𑀓𑀸𑀲𑁂𑀢𑀺, 𑀏𑀯𑀫𑁆𑀧𑀺 𑀅𑀪𑀺𑀩𑁆𑀬𑀢𑁆𑀢𑀺𑀯𑀸𑀤𑁄 𑀳𑀸𑀬𑀢𑁂𑀯. 𑀲𑀢𑀺 𑀳𑀺 𑀖𑀝𑀯𑀺𑀲𑀬𑀸𑀬 𑀩𑀼𑀤𑁆𑀥𑀺𑀬𑀸 𑀓𑀣𑀁 𑀅𑀦𑁆𑀥𑀓𑀸𑀭𑁄 𑀢𑀲𑁆𑀲𑀸 𑀆𑀯𑀭𑀡𑀁 𑀳𑁄𑀢𑀻𑀢𑀺. 𑀬𑀣𑀸 𑀘 𑀖𑀝𑀲𑁆𑀲 𑀅𑀪𑀺𑀩𑁆𑀬𑀢𑁆𑀢𑀺 𑀦 𑀬𑀼𑀚𑁆𑀚𑀢𑀺, 𑀏𑀯𑀁 𑀤𑀺𑀝𑁆𑀞𑀺𑀕𑀢𑀺𑀓𑀧𑀭𑀺𑀓𑀧𑁆𑀧𑀺𑀢𑀲𑁆𑀲 𑀅𑀢𑁆𑀢𑀦𑁄𑀧𑀺 𑀅𑀪𑀺𑀩𑁆𑀬𑀢𑁆𑀢𑀺 𑀦 𑀬𑀼𑀚𑁆𑀚𑀢𑀺𑀬𑁂𑀯. 𑀢𑀢𑁆𑀣𑀸𑀧𑀺 𑀳𑀺 𑀬𑀤𑀺 𑀇𑀦𑁆𑀤𑁆𑀭𑀺𑀬𑀯𑀺𑀲𑀬𑀸𑀤𑀺𑀲𑀦𑁆𑀦𑀺𑀧𑀸𑀢𑁂𑀦 𑀅𑀦𑀼𑀧𑁆𑀧𑀦𑁆𑀦𑀸 𑀏𑀯 𑀩𑀼𑀤𑁆𑀥𑀺 𑀉𑀧𑁆𑀧𑀦𑁆𑀦𑀸, 𑀉𑀧𑁆𑀧𑀢𑁆𑀢𑀺𑀯𑀘𑀦𑁂𑀦𑁂𑀯 𑀅𑀪𑀺𑀩𑁆𑀬𑀢𑁆𑀢𑀺𑀯𑀸𑀤𑁄 𑀳𑀸𑀬𑀢𑀺 𑀅𑀪𑀺𑀩𑁆𑀬𑀢𑁆𑀢𑀺𑀫𑀢𑁆𑀢𑀫𑀢𑀺𑀓𑁆𑀓𑀫𑁆𑀫 𑀅𑀦𑀼𑀧𑁆𑀧𑀦𑁆𑀦𑀸𑀬 𑀏𑀯 𑀩𑀼𑀤𑁆𑀥𑀺𑀬𑀸 𑀉𑀧𑁆𑀧𑀢𑁆𑀢𑀺𑀤𑀻𑀧𑀦𑀢𑁄. 𑀢𑀣𑀸 𑀲𑀲𑁆𑀲𑀢𑀯𑀸𑀤𑁄𑀧𑀺 𑀢𑁂𑀦𑁂𑀯 𑀓𑀸𑀭𑀡𑁂𑀦. 𑀅𑀣 𑀩𑀼𑀤𑁆𑀥𑀺𑀧𑁆𑀧𑀯𑀢𑁆𑀢𑀺𑀬𑀸 𑀆𑀯𑀭𑀡𑀪𑀽𑀢𑀲𑁆𑀲 𑀅𑀦𑁆𑀥𑀓𑀸𑀭𑀝𑁆𑀞𑀸𑀦𑀺𑀬𑀲𑁆𑀲 𑀫𑁄𑀳𑀲𑁆𑀲 𑀯𑀺𑀥𑀫𑀦𑁂𑀦 𑀩𑀼𑀤𑁆𑀥𑀺 𑀉𑀧𑁆𑀧𑀦𑁆𑀦𑀸. 𑀏𑀯𑀫𑁆𑀧𑀺 𑀲𑀢𑀺 𑀅𑀢𑁆𑀣𑀯𑀺𑀲𑀬𑀸𑀬 𑀩𑀼𑀤𑁆𑀥𑀺𑀬𑀸 𑀓𑀣𑀁 𑀫𑁄𑀳𑁄 𑀢𑀲𑁆𑀲𑀸 𑀆𑀯𑀭𑀡𑀁 𑀳𑁄𑀢𑀻𑀢𑀺, 𑀳𑀸𑀬𑀢𑁂𑀯 𑀅𑀪𑀺𑀩𑁆𑀬𑀢𑁆𑀢𑀺𑀯𑀸𑀤𑁄, 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀪𑁂𑀤𑀲𑀩𑁆𑀪𑀸𑀯𑀢𑁄𑀧𑀺 𑀅𑀪𑀺𑀩𑁆𑀬𑀢𑁆𑀢𑀺𑀯𑀸𑀤𑁄 𑀳𑀸𑀬𑀢𑀺. 𑀦 𑀳𑀺 𑀅𑀪𑀺𑀩𑁆𑀬𑀜𑁆𑀚𑀦𑀓𑀸𑀦𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀫𑀡𑀺𑀧𑀤𑀻𑀧𑀸𑀤𑀻𑀦𑀁 𑀪𑁂𑀤𑁂𑀦 𑀅𑀪𑀺𑀩𑁆𑀬𑀜𑁆𑀚𑀺𑀢𑀩𑁆𑀩𑀸𑀦𑀁 𑀖𑀝𑀸𑀤𑀻𑀦𑀁 𑀪𑁂𑀤𑁄 𑀳𑁄𑀢𑀺, 𑀳𑁄𑀢𑀺 𑀘 𑀯𑀺𑀲𑀬𑀪𑁂𑀤𑁂𑀦 𑀩𑀼𑀤𑁆𑀥𑀺𑀪𑁂𑀤𑁄 𑀬𑀣𑀸𑀯𑀺𑀲𑀬𑀁 𑀩𑀼𑀤𑁆𑀥𑀺𑀬𑀸 𑀲𑀫𑁆𑀪𑀯𑀢𑁄𑀢𑀺 𑀪𑀺𑀬𑁆𑀬𑁄𑀧𑀺 𑀅𑀪𑀺𑀩𑁆𑀬𑀢𑁆𑀢𑀺 𑀦 𑀬𑀼𑀚𑁆𑀚𑀢𑀺𑀬𑁂𑀯, 𑀦 𑀘𑁂𑀢𑁆𑀣 𑀯𑀺𑀚𑁆𑀚𑀫𑀸𑀦𑀢𑀸𑀪𑀺𑀩𑁆𑀬𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑀺𑀓𑀧𑁆𑀧𑀦𑀸 𑀬𑀼𑀢𑁆𑀢𑀸 𑀯𑀺𑀚𑁆𑀚𑀫𑀸𑀦𑀢𑀸𑀪𑀺𑀩𑁆𑀬𑀢𑁆𑀢𑀺𑀓𑀺𑀭𑀺𑀬𑀸𑀲𑀗𑁆𑀔𑀸𑀢𑀸𑀬 𑀯𑀼𑀢𑁆𑀢𑀺𑀬𑀸 𑀯𑀼𑀢𑁆𑀢𑀺𑀫𑀢𑁄 𑀘 𑀅𑀦𑀜𑁆𑀜𑀣𑀸𑀦𑀼𑀚𑀸𑀦𑀦𑀢𑁄. 𑀅𑀦𑀜𑁆𑀜𑀸𑀬𑁂𑀯 𑀳𑀺 𑀢𑀣𑀸 𑀯𑀼𑀢𑁆𑀢𑀺𑀲𑀗𑁆𑀔𑀸𑀢𑀸 𑀓𑀺𑀭𑀺𑀬𑀸 𑀢𑀩𑁆𑀩𑀦𑁆𑀢𑀯𑀢𑁆𑀣𑀼𑀢𑁄, 𑀬𑀣𑀸 𑀨𑀲𑁆𑀲𑀸𑀤𑀻𑀳𑀺 𑀨𑀼𑀲𑀦𑀸𑀤𑀺𑀪𑀸𑀯𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀺𑀫𑀢𑁄 𑀅𑀦𑀜𑁆𑀜𑀸𑀬 𑀏𑀯 𑀯𑀺𑀚𑁆𑀚𑀫𑀸𑀦𑀢𑀸𑀪𑀺𑀩𑁆𑀬𑀢𑁆𑀢𑀺𑀲𑀗𑁆𑀔𑀸𑀢𑀸𑀬 𑀯𑀼𑀢𑁆𑀢𑀺𑀬𑀸 𑀧𑀭𑀺𑀓𑀧𑁆𑀧𑀺𑀢𑁄 𑀓𑁂𑀲𑀜𑁆𑀘𑀺 𑀅𑀪𑀺𑀩𑁆𑀬𑀢𑁆𑀢𑀺𑀯𑀸𑀤𑁄 𑀦 𑀬𑀼𑀢𑁆𑀢𑁄 𑀏𑀯𑀸𑀢𑀺. 𑀬𑁂 𑀧𑀦 ‘‘𑀈𑀲𑀺𑀓𑀝𑁆𑀞𑀸𑀬𑀻 𑀞𑀺𑀢𑁄’’𑀢𑀺 𑀧𑀞𑀺𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀫𑀺𑀘𑁆𑀙𑀦𑁆𑀢𑀺, 𑀢𑁂 𑀢𑀤𑀺𑀤𑀁 𑀓𑀸𑀭𑀡𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 ‘‘𑀢𑁂 𑀘 𑀲𑀢𑁆𑀢𑀸 𑀲𑀦𑁆𑀥𑀸𑀯𑀦𑁆𑀢𑀺 𑀲𑀁𑀲𑀭𑀦𑁆𑀢𑀺 𑀘𑀯𑀦𑁆𑀢𑀺 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺 𑀧𑀤𑁂𑀳𑀺 𑀅𑀢𑁆𑀣𑀲𑀫𑁆𑀩𑀦𑁆𑀥𑀫𑁆𑀧𑀺 𑀓𑀭𑁄𑀦𑁆𑀢𑀺, 𑀦 𑀅𑀝𑁆𑀞𑀓𑀣𑀸𑀬𑀫𑀺𑀯 𑀅𑀲𑀫𑁆𑀩𑀦𑁆𑀥𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀲𑁆𑀫𑀸 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑁂 𑀘 𑀲𑀢𑁆𑀢𑀸 𑀲𑀦𑁆𑀥𑀸𑀯𑀦𑁆𑀢𑀻𑀢𑀺 𑀏𑀢𑁆𑀣 𑀬𑁂 ¶ 𑀇𑀥 𑀫𑀦𑀼𑀲𑁆𑀲𑀪𑀸𑀯𑁂𑀦 𑀅𑀯𑀝𑁆𑀞𑀺𑀢𑀸, 𑀢𑁂𑀬𑁂𑀯 𑀤𑁂𑀯𑀪𑀸𑀯𑀸𑀤𑀺𑀉𑀧𑀕𑀫𑀦𑁂𑀦 𑀇𑀢𑁄 𑀅𑀜𑁆𑀜𑀢𑁆𑀣 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀣𑀸 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀦𑀸𑀲𑁄, 𑀅𑀓𑀢𑀲𑁆𑀲 𑀘 𑀅𑀩𑁆𑀪𑀸𑀕𑀫𑁄 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀧𑀭𑀸𑀧𑀭𑀦𑁆𑀢𑀺 𑀅𑀧𑀭𑀲𑁆𑀫𑀸 𑀪𑀯𑀸 𑀅𑀧𑀭𑀁 𑀪𑀯𑀁, 𑀅𑀧𑀭𑀫𑀧𑀭𑀁 𑀯𑀸, 𑀧𑀼𑀦𑀧𑁆𑀧𑀼𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀘𑀯𑀦𑁆𑀢𑀻’’𑀢𑀺 𑀧𑀤𑀫𑀼𑀮𑁆𑀮𑀺𑀗𑁆𑀕𑁂𑀢𑁆𑀯𑀸 ‘‘𑀏𑀯𑀁 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀅𑀢𑁆𑀣𑀁 𑀯𑀺𑀯𑀭𑀢𑀺, 𑀅𑀢𑁆𑀢𑀦𑁄 𑀢𑀣𑀸𑀕𑀳𑀺𑀢𑀲𑁆𑀲 𑀦𑀺𑀘𑁆𑀘𑀲𑀪𑀸𑀯𑀢𑁆𑀢𑀸 𑀦 𑀘𑀼𑀢𑀽𑀧𑀧𑀢𑁆𑀢𑀺𑀬𑁄. 𑀲𑀩𑁆𑀩𑀩𑁆𑀬𑀸𑀧𑀺𑀢𑀸𑀬 𑀦𑀸𑀧𑀺 𑀲𑀦𑁆𑀥𑀸𑀯𑀦𑀲𑀁𑀲𑀭𑀡𑀸𑀦𑀺, 𑀥𑀫𑁆𑀫𑀸𑀦𑀁𑀬𑁂𑀯 𑀧𑀦 𑀧𑀯𑀢𑁆𑀢𑀺𑀯𑀺𑀲𑁂𑀲𑁂𑀦 𑀏𑀯𑀁 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺 𑀏𑀯𑀁 𑀯𑁄𑀳𑀭𑀻𑀬𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁂𑀦 ‘‘𑀅𑀯𑀝𑁆𑀞𑀺𑀢𑀲𑀪𑀸𑀯𑀲𑁆𑀲 𑀅𑀢𑁆𑀢𑀦𑁄, 𑀥𑀫𑁆𑀫𑀺𑀦𑁄 𑀘 𑀥𑀫𑁆𑀫𑀫𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀯𑀺𑀦𑀲𑁆𑀲𑀢𑀺 𑀘𑀸’’𑀢𑀺 𑀇𑀫𑀁 𑀯𑀺𑀧𑀭𑀺𑀡𑀸𑀫𑀯𑀸𑀤𑀁 𑀤𑀲𑁆𑀲𑁂𑀢𑀺. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀇𑀫𑀺𑀲𑁆𑀲𑀁 𑀲𑀲𑁆𑀲𑀢𑀯𑀸𑀤𑀯𑀺𑀘𑀸𑀭𑀡𑀸𑀬𑀫𑁂𑀯 ‘‘𑀏𑀯𑀁𑀕𑀢𑀺𑀓𑀸’’𑀢𑀺 ¶ 𑀧𑀤𑀢𑁆𑀣𑀯𑀺𑀪𑀸𑀯𑀦𑁂 𑀯𑀓𑁆𑀔𑀸𑀫. 𑀇𑀤𑀸𑀦𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 𑀅𑀲𑀫𑁆𑀩𑀦𑁆𑀥𑀫𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀝𑁆𑀞𑀓𑀣𑀸𑀬𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀦𑁆𑀥𑀸𑀯𑀦𑁆𑀢𑀻𑀢𑀺𑀆𑀤𑀺𑀦𑀸 𑀯𑀘𑀦𑁂𑀦 𑀅𑀢𑁆𑀢𑀦𑁄 𑀯𑀸𑀤𑀁 𑀪𑀺𑀦𑁆𑀤𑀢𑀺 𑀯𑀺𑀦𑀸𑀲𑁂𑀢𑀺 𑀲𑀦𑁆𑀥𑀸𑀯𑀦𑀸𑀤𑀺𑀯𑀘𑀦𑀲𑀺𑀤𑁆𑀥𑀸𑀬 𑀅𑀦𑀺𑀘𑁆𑀘𑀢𑀸𑀬 𑀧𑀼𑀩𑁆𑀩𑁂 𑀅𑀢𑁆𑀢𑀦𑀸 𑀧𑀝𑀺𑀜𑁆𑀜𑀸𑀢𑀲𑁆𑀲 𑀲𑀲𑁆𑀲𑀢𑀯𑀸𑀤𑀲𑁆𑀲 𑀯𑀺𑀭𑀼𑀤𑁆𑀥𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. ‘‘𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲𑀸’’𑀢𑀺𑀆𑀤𑀺 𑀢𑀤𑀢𑁆𑀣𑀲𑀫𑀢𑁆𑀣𑀦𑀁. 𑀦 𑀦𑀺𑀩𑀤𑁆𑀥𑀦𑁆𑀢𑀺 𑀦 𑀣𑀺𑀭𑀁. ‘‘𑀲𑀦𑁆𑀥𑀸𑀯𑀦𑁆𑀢𑀻’’𑀢𑀺𑀆𑀤𑀺𑀯𑀘𑀦𑀁, 𑀲𑀲𑁆𑀲𑀢𑀯𑀸𑀤𑀜𑁆𑀘 𑀲𑀦𑁆𑀥𑀸𑀬 ‘‘𑀲𑀼𑀦𑁆𑀤𑀭𑀫𑁆𑀧𑀺 𑀅𑀲𑀼𑀦𑁆𑀤𑀭𑀫𑁆𑀧𑀺 𑀳𑁄𑀢𑀺𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀤𑀸 𑀲𑀭𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀲𑀲𑁆𑀲𑀢𑀺𑀬𑁄 𑀭-𑀓𑀸𑀭𑀲𑁆𑀲 𑀲-𑀓𑀸𑀭𑀁, 𑀤𑁆𑀯𑀺𑀪𑀸𑀯𑀜𑁆𑀘 𑀓𑀢𑁆𑀯𑀸, 𑀧𑀣𑀯𑀻𑀲𑀺𑀦𑁂𑀭𑀼𑀘𑀦𑁆𑀤𑀺𑀫𑀲𑀽𑀭𑀺𑀬𑀸, 𑀲𑀲𑁆𑀲𑀢𑀻𑀳𑀺 𑀲𑀫𑀁 𑀲𑀤𑀺𑀲𑀁 𑀢𑀣𑀸, 𑀪𑀸𑀯𑀦𑀧𑀼𑀁𑀲𑀓𑀯𑀘𑀦𑀜𑁆𑀘𑁂𑀢𑀁. ‘‘𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀳𑀺 𑀓𑀢𑁆𑀢𑀼𑀅𑀥𑀺𑀓𑀸𑀭𑁄. 𑀲𑀲𑁆𑀲𑀢𑀺𑀲𑀫𑀦𑁆𑀢𑀺 𑀯𑀸 𑀮𑀺𑀗𑁆𑀕𑀩𑁆𑀬𑀢𑁆𑀢𑀬𑁂𑀦 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄. 𑀲𑀲𑁆𑀲𑀢𑀺𑀲𑀫𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘 𑀅𑀢𑁆𑀣𑀺 𑀏𑀯𑀸𑀢𑀺 𑀅𑀢𑁆𑀣𑁄, 𑀇𑀢𑀺-𑀲𑀤𑁆𑀤𑁄 𑀘𑁂𑀢𑁆𑀣 𑀧𑀤𑀧𑀽𑀭𑀡𑀫𑀢𑁆𑀢𑀁. 𑀏𑀯-𑀲𑀤𑁆𑀤𑀲𑁆𑀲 𑀳𑀺 𑀏-𑀓𑀸𑀭𑁂 𑀧𑀭𑁂 𑀇𑀢𑀺-𑀲𑀤𑁆𑀤𑁂 𑀇-𑀓𑀸𑀭𑀲𑁆𑀲 𑀯-𑀓𑀸𑀭𑀫𑀺𑀘𑁆𑀙𑀦𑁆𑀢𑀺 𑀲𑀤𑁆𑀤𑀯𑀺𑀤𑀽. 𑀲𑀲𑁆𑀲𑀢𑀺𑀲𑀫𑀦𑁆𑀢𑀺 𑀲𑀲𑁆𑀲𑀢𑀁 𑀣𑀸𑀯𑀭𑀁 𑀦𑀺𑀘𑁆𑀘𑀓𑀸𑀮𑀦𑁆𑀢𑀺𑀧𑀺 𑀅𑀢𑁆𑀣𑁄, 𑀲𑀲𑁆𑀲𑀢𑀺𑀲𑀫-𑀲𑀤𑁆𑀤𑀲𑁆𑀲 𑀲𑀲𑁆𑀲𑀢𑀧𑀤𑁂𑀦 𑀲𑀫𑀸𑀦𑀢𑁆𑀣𑀢𑀁 𑀲𑀦𑁆𑀥𑀸𑀬 𑀝𑀻𑀓𑀸𑀬𑀁 (𑀤𑀻. 𑀦𑀺. 𑀝𑀻. 𑁧.𑁩𑁧) 𑀯𑀼𑀢𑁆𑀢𑁄.

𑀳𑁂𑀢𑀼𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀬𑁂𑀲𑀁 ‘‘𑀲𑀲𑁆𑀲𑀢𑁄’’𑀢𑀺 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀢𑀺, 𑀢𑁂𑀲𑀁 𑀳𑁂𑀢𑀼𑀁 𑀤𑀲𑁆𑀲𑁂𑀦𑁆𑀢𑁄 𑀅𑀬𑀁 𑀤𑀺𑀝𑁆𑀞𑀺𑀕𑀢𑀺𑀓𑁄 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀦 𑀳𑀺 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀬𑀸 𑀧𑀘𑁆𑀘𑀓𑁆𑀔𑀓𑀢𑀫𑀢𑁆𑀣𑀁 𑀅𑀢𑁆𑀢𑀦𑁄𑀬𑁂𑀯 𑀲𑀸𑀥𑁂𑀢𑀺, 𑀅𑀢𑁆𑀢𑀦𑁄 𑀧𑀦 𑀧𑀘𑁆𑀘𑀓𑁆𑀔𑀓𑀢𑁂𑀦 𑀅𑀢𑁆𑀣𑁂𑀦 𑀅𑀢𑁆𑀢𑀦𑁄 𑀅𑀧𑁆𑀧𑀘𑁆𑀘𑀓𑁆𑀔𑀪𑀽𑀢𑀫𑁆𑀧𑀺 𑀅𑀢𑁆𑀣𑀁 𑀲𑀸𑀥𑁂𑀢𑀺, 𑀅𑀢𑁆𑀢𑀦𑀸 𑀘 𑀬𑀣𑀸𑀦𑀺𑀘𑁆𑀙𑀺𑀢𑀁 𑀅𑀢𑁆𑀣𑀁 𑀧𑀭𑁂𑀧𑀺 𑀯𑀺𑀜𑁆𑀜𑀸𑀧𑁂𑀢𑀺, 𑀦 𑀅𑀦𑀺𑀘𑁆𑀙𑀺𑀢𑀁 ¶ , 𑀇𑀤𑀁 𑀧𑀦 𑀳𑁂𑀢𑀼𑀤𑀲𑁆𑀲𑀦𑀁 𑀏𑀢𑁂𑀲𑀼 𑀅𑀦𑁂𑀓𑁂𑀲𑀼 𑀚𑀸𑀢𑀺𑀲𑀢𑀲𑀳𑀲𑁆𑀲𑁂𑀲𑀼 𑀏𑀓𑁄𑀯𑀸𑀬𑀁 𑀫𑁂 𑀅𑀢𑁆𑀢𑀸 𑀘 𑀮𑁄𑀓𑁄 𑀘 𑀅𑀦𑀼𑀲𑁆𑀲𑀭𑀡𑀲𑀫𑁆𑀪𑀯𑀢𑁄. 𑀬𑁄 𑀳𑀺 𑀬𑀫𑀢𑁆𑀣𑀁 𑀅𑀦𑀼𑀪𑀯𑀢𑀺, 𑀲𑁄 𑀏𑀯 𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀦 𑀅𑀜𑁆𑀜𑁄. 𑀦 𑀳𑀺 𑀅𑀜𑁆𑀜𑁂𑀦 𑀅𑀦𑀼𑀪𑀽𑀢𑀫𑀢𑁆𑀣𑀁 𑀅𑀜𑁆𑀜𑁄 𑀅𑀦𑀼𑀲𑁆𑀲𑀭𑀺𑀢𑀼𑀁 𑀲𑀓𑁆𑀓𑁄𑀢𑀺 𑀬𑀣𑀸 𑀢𑀁 𑀩𑀼𑀤𑁆𑀥𑀭𑀓𑁆𑀔𑀺𑀢𑁂𑀦 𑀅𑀦𑀼𑀪𑀽𑀢𑀁 𑀥𑀫𑁆𑀫𑀭𑀓𑁆𑀔𑀺𑀢𑁄. 𑀬𑀣𑀸 𑀘𑁂𑀢𑀸𑀲𑀼, 𑀏𑀯𑀁 𑀇𑀢𑁄 𑀧𑀼𑀭𑀺𑀫𑀢𑀭𑀸𑀲𑀼𑀧𑀺 𑀚𑀸𑀢𑀻𑀲𑀼, 𑀢𑀲𑁆𑀫𑀸 ‘‘𑀲𑀲𑁆𑀲𑀢𑁄 𑀫𑁂 𑀅𑀢𑁆𑀢𑀸 𑀘 𑀮𑁄𑀓𑁄 𑀘, 𑀬𑀣𑀸 𑀘 𑀫𑁂, 𑀏𑀯𑀁 𑀅𑀜𑁆𑀜𑁂𑀲𑀫𑁆𑀧𑀺 𑀲𑀢𑁆𑀢𑀸𑀦𑀁 𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀲𑀲𑁆𑀲𑀢𑀯𑀲𑁂𑀦 𑀤𑀺𑀝𑁆𑀞𑀺𑀕𑀳𑀡𑀁 𑀧𑀓𑁆𑀔𑀦𑁆𑀤𑀦𑁆𑀢𑁄 𑀤𑀺𑀝𑁆𑀞𑀺𑀕𑀢𑀺𑀓𑁄 𑀧𑀭𑁂𑀧𑀺 𑀢𑀢𑁆𑀣 𑀧𑀢𑀺𑀝𑁆𑀞𑀧𑁂𑀢𑀺. 𑀧𑀸𑀴𑀺𑀬𑀁 𑀧𑀦 ‘‘𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀣𑀸𑀦𑀺 𑀅𑀪𑀺𑀯𑀤𑀦𑁆𑀢𑀺, 𑀲𑁄 𑀏𑀯𑀫𑀸𑀳𑀸’’𑀢𑀺 𑀯𑀘𑀦𑀢𑁄 𑀧𑀭𑀸𑀦𑀼𑀕𑀸𑀳𑀸𑀧𑀦𑀯𑀲𑁂𑀦 𑀇𑀥 𑀳𑁂𑀢𑀼𑀤𑀲𑁆𑀲𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀏𑀢𑀦𑁆𑀢𑀺 𑀅𑀢𑁆𑀢𑀦𑁄 𑀘 𑀮𑁄𑀓𑀲𑁆𑀲 𑀘 𑀲𑀲𑁆𑀲𑀢𑀪𑀸𑀯𑀁. ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑀤𑀲𑁆𑀲𑀦𑀁. 𑀞𑀸𑀦-𑀲𑀤𑁆𑀤𑁄 𑀓𑀸𑀭𑀡𑁂, 𑀢𑀜𑁆𑀘 𑀔𑁄 𑀇𑀥 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀬𑁂𑀯𑀸𑀢𑀺 𑀆𑀳 ‘‘𑀇𑀤’’𑀦𑁆𑀢𑀺𑀆𑀤𑀺. 𑀓𑀸𑀭𑀡𑀜𑁆𑀘 𑀦𑀸𑀫𑁂𑀢𑀁 𑀢𑀺𑀯𑀺𑀥𑀁 𑀲𑀫𑁆𑀧𑀸𑀧𑀓𑀁 𑀦𑀺𑀩𑁆𑀩𑀢𑁆𑀢𑀓𑀁 𑀜𑀸𑀧𑀓𑀦𑁆𑀢𑀺. 𑀢𑀢𑁆𑀣 𑀅𑀭𑀺𑀬𑀫𑀕𑁆𑀕𑁄 𑀦𑀺𑀩𑁆𑀩𑀸𑀦𑀲𑁆𑀲 𑀲𑀫𑁆𑀧𑀸𑀧𑀓𑀓𑀸𑀭𑀡𑀁, 𑀩𑀻𑀚𑀁 𑀅𑀗𑁆𑀓𑀼𑀭𑀲𑁆𑀲 𑀦𑀺𑀩𑁆𑀩𑀢𑁆𑀢𑀓𑀓𑀸𑀭𑀡𑀁, 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸𑀤𑀬𑁄 𑀅𑀦𑀺𑀘𑁆𑀘𑀢𑀸𑀤𑀻𑀦𑀁 𑀜𑀸𑀧𑀓𑀓𑀸𑀭𑀡𑀁, 𑀇𑀥𑀸𑀧𑀺 𑀜𑀸𑀧𑀓𑀓𑀸𑀭𑀡𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀜𑀸𑀧𑀓𑁄 𑀳𑀺 𑀅𑀢𑁆𑀣𑁄 𑀜𑀸𑀧𑁂𑀢𑀩𑁆𑀩𑀢𑁆𑀣𑀯𑀺𑀲𑀬𑀲𑁆𑀲 𑀜𑀸𑀡𑀲𑁆𑀲 𑀳𑁂𑀢𑀼𑀪𑀸𑀯𑀢𑁄 𑀓𑀸𑀭𑀡𑀁. 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 ¶ 𑀢𑀁 𑀜𑀸𑀡𑀁 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀞𑀸𑀦𑀁, 𑀯𑀲𑀢𑀺 𑀢𑀁 𑀜𑀸𑀡𑀫𑁂𑀢𑁆𑀣 𑀢𑀺𑀝𑁆𑀞𑀢𑀻𑀢𑀺 ‘‘𑀯𑀢𑁆𑀣𑀽’’𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑀣𑀸 𑀳𑀺 𑀪𑀕𑀯𑀢𑀸 𑀯𑀢𑁆𑀣𑀼-𑀲𑀤𑁆𑀤𑁂𑀦 𑀉𑀤𑁆𑀤𑀺𑀲𑀺𑀢𑁆𑀯𑀸𑀧𑀺 𑀞𑀸𑀦-𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺.

𑁩𑁨-𑁩𑁩. 𑀤𑀼𑀢𑀺𑀬𑀢𑀢𑀺𑀬𑀯𑀸𑀭𑀸𑀦𑀁 𑀧𑀞𑀫𑀯𑀸𑀭𑀢𑁄 𑀯𑀺𑀲𑁂𑀲𑁄 𑀦𑀢𑁆𑀣𑀺 𑀞𑀧𑁂𑀢𑁆𑀯𑀸 𑀓𑀸𑀮𑀪𑁂𑀤𑀦𑁆𑀢𑀺 𑀆𑀳 ‘‘𑀉𑀧𑀭𑀺 𑀯𑀸𑀭𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄’’𑀢𑀺. 𑀢𑀤𑁂𑀢𑀁 𑀓𑀸𑀮𑀪𑁂𑀤𑀁 𑀬𑀣𑀸𑀧𑀸𑀴𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀯𑀮𑀜𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀢𑀭𑁂𑀦 𑀤𑀼𑀢𑀺𑀬𑀢𑀢𑀺𑀬𑀯𑀸𑀭𑀸 𑀬𑀸𑀯 𑀤𑀲𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑀸, 𑀬𑀸𑀯 𑀘𑀢𑁆𑀢𑀸𑀮𑀻𑀲𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑀸 𑀘 𑀅𑀦𑀼𑀲𑁆𑀲𑀭𑀡𑀯𑀲𑁂𑀦 𑀯𑀼𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀤𑁂𑀯𑀁 𑀓𑀲𑁆𑀫𑀸 𑀲𑀲𑁆𑀲𑀢𑀯𑀸𑀤𑁄 𑀘𑀢𑀼𑀥𑀸 𑀯𑀺𑀪𑀢𑁆𑀢𑁄, 𑀦𑀦𑀼 𑀢𑀺𑀥𑀸 𑀓𑀸𑀮𑀪𑁂𑀤𑀫𑀓𑀢𑁆𑀯𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀢𑁆𑀢𑀺𑀓𑀯𑀸𑀤𑁄 𑀯𑀺𑀬 𑀤𑀼𑀯𑀺𑀥𑁂𑀦𑁂𑀯 𑀯𑀺𑀪𑀚𑀺𑀢𑀩𑁆𑀩𑁄 𑀲𑀺𑀬𑀸𑀢𑀺 𑀘𑁄𑀤𑀦𑀁 𑀲𑁄𑀥𑁂𑀢𑀼𑀁 ‘‘𑀫𑀦𑁆𑀤𑀧𑀜𑁆𑀜𑁄 𑀳𑀻’’𑀢𑀺𑀆𑀤𑀺𑀫𑀸𑀳. 𑀫𑀦𑁆𑀤𑀧𑀜𑁆𑀜𑀸𑀤𑀻𑀦𑀁 𑀢𑀺𑀡𑁆𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀮𑀸𑀪𑀻𑀦𑀁 𑀯𑀲𑁂𑀦 𑀢𑀺𑀥𑀸 𑀓𑀸𑀮𑀪𑁂𑀤𑀁 𑀓𑀢𑁆𑀯𑀸 𑀢𑀓𑁆𑀓𑀦𑁂𑀦 𑀲𑀳 𑀘𑀢𑀼𑀥𑀸 𑀯𑀺𑀪𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀦𑀼 𑀘 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀢𑀓𑁆𑀓𑀺𑀓𑀸𑀦𑀁 𑀯𑀺𑀬 𑀫𑀦𑁆𑀤𑀧𑀜𑁆𑀜𑀸𑀤𑀻𑀦𑀫𑁆𑀧𑀺 𑀯𑀺𑀲𑁂𑀲𑀮𑀸𑀪𑀻𑀦𑀁 𑀳𑀻𑀦𑀸𑀤𑀺𑀯𑀲𑁂𑀦 𑀅𑀦𑁂𑀓𑀪𑁂𑀤𑀲𑀫𑁆𑀪𑀯𑀢𑁄 ¶ 𑀩𑀳𑀼𑀥𑀸 𑀪𑁂𑀤𑁄 𑀲𑀺𑀬𑀸, 𑀅𑀣 𑀓𑀲𑁆𑀫𑀸 𑀲𑀩𑁆𑀩𑁂𑀧𑀺 𑀯𑀺𑀲𑁂𑀲𑀮𑀸𑀪𑀺𑀦𑁄 𑀢𑀬𑁄 𑀏𑀯 𑀭𑀸𑀲𑀻 𑀓𑀢𑁆𑀯𑀸 𑀯𑀼𑀢𑁆𑀢𑀸𑀢𑀺? 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀤𑀲𑁆𑀲𑁂𑀢𑀼𑀓𑀸𑀫𑀢𑁆𑀢𑀸. 𑀢𑀻𑀲𑀼 𑀳𑀺 𑀭𑀸𑀲𑀻𑀲𑀼 𑀬𑁂 𑀳𑀻𑀦𑀫𑀚𑁆𑀛𑀺𑀫𑀧𑀜𑁆𑀜𑀸, 𑀢𑁂 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀢𑁄 𑀊𑀦𑀓𑀫𑁂𑀯 𑀅𑀦𑀼𑀲𑁆𑀲𑀭𑀦𑁆𑀢𑀺. 𑀬𑁂 𑀧𑀦 𑀉𑀓𑁆𑀓𑀝𑁆𑀞𑀧𑀜𑁆𑀜𑀸, 𑀢𑁂 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀸𑀦𑀼𑀲𑁆𑀲𑀭𑀦𑁆𑀢𑀻𑀢𑀺 𑀢𑀢𑁆𑀣 𑀢𑀢𑁆𑀣 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀤𑀲𑁆𑀲𑁂𑀢𑀼𑀓𑀸𑀫𑀢𑁄 𑀅𑀦𑁂𑀓𑀚𑀸𑀢𑀺𑀲𑀢𑀲𑀳𑀲𑁆𑀲𑀤𑀲𑀘𑀢𑁆𑀢𑀸𑀭𑀻𑀲𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀸𑀦𑀼𑀲𑁆𑀲𑀭𑀡𑀯𑀲𑁂𑀦 𑀢𑀬𑁄 𑀏𑀯 𑀭𑀸𑀲𑀻 𑀓𑀢𑁆𑀯𑀸 𑀯𑀼𑀢𑁆𑀢𑀸𑀢𑀺. 𑀦 𑀢𑀢𑁄 𑀉𑀤𑁆𑀥𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀮𑀢𑁆𑀢𑀬𑀢𑁄, 𑀘𑀢𑁆𑀢𑀸𑀭𑀻𑀲𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑀓𑀧𑁆𑀧𑀢𑁄 𑀯𑀸 𑀉𑀤𑁆𑀥𑀁 𑀦𑀸𑀦𑀼𑀲𑁆𑀲𑀭𑀢𑀺, 𑀓𑀲𑁆𑀫𑀸? 𑀤𑀼𑀩𑁆𑀩𑀮𑀧𑀜𑁆𑀜𑀢𑁆𑀢𑀸. 𑀢𑁂𑀲𑀜𑁆𑀳𑀺 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀯𑀺𑀭𑀳𑀢𑁄 𑀤𑀼𑀩𑁆𑀩𑀮𑀸 𑀧𑀜𑁆𑀜𑀸 𑀳𑁄𑀢𑀻𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁.

𑁩𑁪. 𑀢𑀧𑁆𑀧𑀓𑀢𑀺𑀬𑀢𑁆𑀢𑁄𑀧𑀺 𑀓𑀢𑁆𑀢𑀼𑀢𑁆𑀣𑁄𑀬𑁂𑀯𑀸𑀢𑀺 𑀆𑀳 ‘‘𑀢𑀓𑁆𑀓𑀬𑀢𑀻’’𑀢𑀺. 𑀢𑀧𑁆𑀧𑀓𑀢𑀺𑀬𑀢𑁆𑀢𑀢𑁆𑀢𑀸 𑀏𑀯 𑀳𑀺 𑀤𑀼𑀢𑀺𑀬𑀦𑀬𑁄𑀧𑀺 𑀉𑀧𑀧𑀦𑁆𑀦𑁄 𑀳𑁄𑀢𑀺. 𑀢𑀢𑁆𑀣 𑀢𑀓𑁆𑀓𑀬𑀢𑀻𑀢𑀺 𑀊𑀳𑀬𑀢𑀺, 𑀲𑀲𑁆𑀲𑀢𑀸𑀤𑀺𑀆𑀓𑀸𑀭𑁂𑀦 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀅𑀪𑀺𑀦𑀺𑀭𑁄𑀧𑀬𑀢𑀻𑀢𑀺 𑀅𑀢𑁆𑀣𑁄. 𑀢𑀓𑁆𑀓𑁄𑀢𑀺 𑀆𑀓𑁄𑀝𑀦𑀮𑀓𑁆𑀔𑀡𑁄, 𑀯𑀺𑀦𑀺𑀘𑁆𑀙𑀬𑀮𑀓𑁆𑀔𑀡𑁄 𑀯𑀸 𑀤𑀺𑀝𑁆𑀞𑀺𑀝𑁆𑀞𑀸𑀦𑀪𑀽𑀢𑁄 𑀯𑀺𑀢𑀓𑁆𑀓𑁄. 𑀢𑁂𑀦 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀢𑀓𑁆𑀓𑀦𑀁 𑀲𑀦𑁆𑀥𑀸𑀬 ‘‘𑀢𑀓𑁆𑀓𑁂𑀢𑁆𑀯𑀸 𑀯𑀺𑀢𑀓𑁆𑀓𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁 𑀯𑀻𑀫𑀁𑀲𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑀯𑀘𑀦𑀫𑀢𑁆𑀢𑀁. 𑀦𑀺𑀩𑁆𑀩𑀘𑀦𑀁 𑀧𑀦 𑀢𑀓𑁆𑀓𑀺𑀧𑀤𑁂 𑀯𑀺𑀬 𑀤𑁆𑀯𑀺𑀥𑀸 𑀯𑀢𑁆𑀢𑀩𑁆𑀩𑀁. 𑀯𑀻𑀫𑀁𑀲𑀸 𑀦𑀸𑀫 𑀯𑀺𑀘𑀸𑀭𑀡𑀸, 𑀲𑀸 𑀘 𑀤𑀼𑀯𑀺𑀥𑀸 𑀧𑀜𑁆𑀜𑀸 𑀘𑁂𑀯 𑀧𑀜𑁆𑀜𑀸𑀧𑀢𑀺𑀭𑀽𑀧𑀺𑀓𑀸 𑀘. 𑀇𑀥 𑀧𑀦 𑀧𑀜𑁆𑀜𑀸𑀧𑀢𑀺𑀭𑀽𑀧𑀺𑀓𑀸𑀯, 𑀲𑀸 𑀘𑀢𑁆𑀣𑀢𑁄 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄, 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀲𑀗𑁆𑀔𑀸𑀢𑁄 𑀯𑀸 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄. 𑀧𑀼𑀩𑁆𑀩𑀪𑀸𑀕𑁂 𑀯𑀸 𑀫𑀺𑀘𑁆𑀙𑀸𑀤𑀲𑁆𑀲𑀦𑀪𑀽𑀢𑀁 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀁, 𑀢𑀤𑁂𑀢𑀫𑀢𑁆𑀣𑀢𑁆𑀢𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀼𑀮𑀦𑀸 𑀭𑀼𑀘𑁆𑀘𑀦𑀸 𑀔𑀫𑀦𑀸’’𑀢𑀺 𑀯𑀼𑀢𑁆𑀢𑀁. ‘‘𑀢𑀼𑀮𑀬𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼𑀧𑀺 𑀬𑀣𑀸𑀓𑁆𑀓𑀫𑀁 ‘‘𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑀸’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀲𑀫𑀦𑁆𑀢𑀢𑁄, 𑀧𑀼𑀦𑀧𑁆𑀧𑀼𑀦𑀁 𑀯𑀸 𑀆𑀳𑀦𑀦𑀁 𑀧𑀭𑀺𑀬𑀸𑀳𑀢𑀁, 𑀢𑀁 ¶ 𑀧𑀦 𑀯𑀺𑀢𑀓𑁆𑀓𑀲𑁆𑀲 𑀆𑀭𑀫𑁆𑀫𑀡𑀁 𑀊𑀳𑀦𑀫𑁂𑀯, 𑀪𑀸𑀯𑀦𑀧𑀼𑀁𑀲𑀓𑀜𑁆𑀘𑁂𑀢𑀁 𑀧𑀤𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀢𑁂𑀦 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀢𑀓𑁆𑀓𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸. 𑀧𑀭𑀺𑀬𑀸𑀬𑁂𑀦𑀸𑀢𑀺 𑀘 𑀓𑀸𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬𑀸𑀢𑀺 𑀢𑀺𑀥𑀸 𑀯𑀼𑀢𑁆𑀢𑀧𑁆𑀧𑀪𑁂𑀤𑀸𑀬. 𑀅𑀦𑀼𑀯𑀺𑀘𑀭𑀺𑀢𑀦𑁆𑀢𑀺 𑀅𑀦𑀼𑀧𑀯𑀢𑁆𑀢𑀺𑀢𑀁, 𑀯𑀻𑀫𑀁𑀲𑀸𑀦𑀼𑀕𑀢𑁂𑀦 𑀯𑀸 𑀯𑀺𑀘𑀸𑀭𑁂𑀦 𑀅𑀦𑀼𑀫𑀚𑁆𑀚𑀺𑀢𑀁. 𑀢𑀤𑀦𑀼𑀕𑀢𑀥𑀫𑁆𑀫𑀓𑀺𑀘𑁆𑀘𑀫𑁆𑀧𑀺 𑀳𑀺 𑀧𑀥𑀸𑀦𑀥𑀫𑁆𑀫𑁂 𑀆𑀭𑁄𑀧𑁂𑀢𑁆𑀯𑀸 𑀢𑀣𑀸 𑀯𑀼𑀘𑁆𑀘𑀢𑀺. 𑀧𑀝𑀺𑀪𑀸𑀢𑀺 𑀤𑀺𑀲𑁆𑀲𑀢𑀻𑀢𑀺 𑀧𑀝𑀺𑀪𑀸𑀦𑀁, 𑀬𑀣𑀸𑀲𑀫𑀸𑀳𑀺𑀢𑀸𑀓𑀸𑀭𑀯𑀺𑀲𑁂𑀲𑀯𑀺𑀪𑀸𑀯𑀓𑁄 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄, 𑀢𑀢𑁄 𑀚𑀸𑀢𑀦𑁆𑀢𑀺 𑀧𑀝𑀺𑀪𑀸𑀦𑀁, 𑀢𑀣𑀸 𑀧𑀜𑁆𑀜𑀸𑀬𑀦𑀁, 𑀲𑀬𑀁 𑀅𑀢𑁆𑀢𑀦𑁄 𑀧𑀝𑀺𑀪𑀸𑀦𑀁 𑀲𑀬𑀁𑀧𑀝𑀺𑀪𑀸𑀦𑀁 ¶ , 𑀢𑁂𑀦𑁂𑀯𑀸𑀳 ‘‘𑀅𑀢𑁆𑀢𑀦𑁄 𑀧𑀝𑀺𑀪𑀸𑀦𑀫𑀢𑁆𑀢𑀲𑀜𑁆𑀚𑀸𑀢’’𑀦𑁆𑀢𑀺. 𑀫𑀢𑁆𑀢-𑀲𑀤𑁆𑀤𑁂𑀦 𑀘𑁂𑀢𑁆𑀣 𑀯𑀺𑀲𑁂𑀲𑀸𑀥𑀺𑀕𑀫𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑀺. 𑀅𑀦𑀸𑀫𑀝𑁆𑀞𑀓𑀸𑀮𑀯𑀘𑀦𑁂 𑀯𑀢𑁆𑀢𑀫𑀸𑀦𑀯𑀲𑁂𑀦𑁂𑀯 𑀅𑀢𑁆𑀣𑀦𑀺𑀤𑁆𑀤𑁂𑀲𑁄 𑀉𑀧𑀧𑀦𑁆𑀦𑁄𑀢𑀺 𑀆𑀳 ‘‘𑀏𑀯𑀁 𑀯𑀤𑀢𑀻’’𑀢𑀺.

𑀧𑀸𑀴𑀺𑀬𑀁 ‘‘𑀢𑀓𑁆𑀓𑀻 𑀳𑁄𑀢𑀺 𑀯𑀻𑀫𑀁𑀲𑀻’’𑀢𑀺 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, 𑀏𑀓𑀲𑁂𑀲𑁂𑀦 𑀯𑀸 𑀯𑀼𑀢𑁆𑀢𑀁 𑀢𑀓𑁆𑀓𑀻𑀪𑁂𑀤𑀁 𑀯𑀺𑀪𑀚𑀦𑁆𑀢𑁄 ‘‘𑀢𑀢𑁆𑀣 𑀘𑀢𑀼𑀩𑁆𑀩𑀺𑀥𑁄’’𑀢𑀺𑀆𑀤𑀺𑀫𑀸𑀳. 𑀧𑀭𑁂𑀳𑀺 𑀧𑀼𑀦 𑀲𑀯𑀦𑀁 𑀅𑀦𑀼𑀲𑁆𑀲𑀼𑀢𑀺, 𑀲𑀸 𑀬𑀲𑁆𑀲𑀸𑀬𑀁 𑀅𑀦𑀼𑀲𑁆𑀲𑀼𑀢𑀺𑀓𑁄. 𑀧𑀼𑀭𑀺𑀫𑀁 𑀅𑀦𑀼𑀪𑀽𑀢𑀧𑀼𑀩𑁆𑀩𑀁 𑀚𑀸𑀢𑀺𑀁 𑀲𑀭𑀢𑀻𑀢𑀺 𑀚𑀸𑀢𑀺𑀲𑁆𑀲𑀭𑁄. 𑀮𑀩𑁆𑀪𑀢𑁂𑀢𑀺 𑀮𑀸𑀪𑁄, 𑀬𑀁 𑀓𑀺𑀜𑁆𑀘𑀺 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀁 𑀭𑀽𑀧𑀸𑀤𑀺, 𑀲𑀼𑀔𑀸𑀤𑀺 𑀘, 𑀦 𑀧𑀦 𑀛𑀸𑀦𑀸𑀤𑀺𑀯𑀺𑀲𑁂𑀲𑁄, 𑀢𑁂𑀦𑁂𑀯𑀸𑀳 𑀧𑀸𑀴𑀺𑀬𑀁 ‘‘𑀲𑁄 𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀯𑀻𑀫𑀁𑀲𑀸𑀦𑀼𑀯𑀺𑀘𑀭𑀺𑀢𑀁 𑀲𑀬𑀁𑀧𑀝𑀺𑀪𑀸𑀦𑀁 𑀏𑀯𑀫𑀸𑀳𑀸’’𑀢𑀺. 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀦𑁄 𑀧𑀝𑀺𑀪𑀸𑀦𑀫𑀢𑁆𑀢𑀲𑀜𑁆𑀚𑀸𑀢’’𑀦𑁆𑀢𑀺. 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁄𑀧𑀺 𑀯𑀤𑀢𑀺 ‘‘𑀫𑀢𑁆𑀢-𑀲𑀤𑁆𑀤𑁂𑀦 𑀯𑀺𑀲𑁂𑀲𑀸𑀥𑀺𑀕𑀫𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑀻’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁩𑁪) 𑀲𑁄 𑀏𑀢𑀲𑁆𑀲𑀸𑀢𑀺 𑀮𑀸𑀪𑀻. 𑀲𑀼𑀤𑁆𑀥𑁂𑀦 𑀧𑀼𑀭𑀺𑀫𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑁂𑀦, 𑀲𑀼𑀤𑁆𑀥𑀁 𑀯𑀸 𑀢𑀓𑁆𑀓𑀦𑀁 𑀲𑀼𑀤𑁆𑀥𑀢𑀓𑁆𑀓𑁄, 𑀲𑁄 𑀬𑀲𑁆𑀲𑀸𑀬𑀁 𑀲𑀼𑀤𑁆𑀥𑀢𑀓𑁆𑀓𑀺𑀓𑁄. 𑀢𑁂𑀦 𑀳𑀻𑀢𑀺 𑀉𑀬𑁆𑀬𑁄𑀚𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀢𑁂𑀦 𑀢𑀣𑀸 𑀯𑁂𑀲𑁆𑀲𑀦𑁆𑀢𑀭𑀭𑀜𑁆𑀜𑁄𑀯 𑀪𑀕𑀯𑀢𑀺 𑀲𑀫𑀸𑀦𑁂𑀢𑀺 𑀤𑀺𑀝𑁆𑀞𑀺𑀕𑁆𑀕𑀸𑀳𑀁 𑀉𑀬𑁆𑀬𑁄𑀚𑁂𑀢𑀺. 𑀮𑀸𑀪𑀺𑀢𑀸𑀬𑀸𑀢𑀺 𑀭𑀽𑀧𑀸𑀤𑀺𑀲𑀼𑀔𑀸𑀤𑀺𑀮𑀸𑀪𑀻𑀪𑀸𑀯𑀢𑁄. ‘‘𑀅𑀦𑀸𑀕𑀢𑁂𑀧𑀺 𑀏𑀯𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀇𑀤𑀁 𑀮𑀸𑀪𑀻𑀢𑀓𑁆𑀓𑀺𑀦𑁄 𑀏𑀯𑀫𑁆𑀧𑀺 𑀲𑀫𑁆𑀪𑀯𑀢𑀻𑀢𑀺 𑀲𑀫𑁆𑀪𑀯𑀤𑀲𑁆𑀲𑀦𑀯𑀲𑁂𑀦 𑀇𑀥𑀸𑀥𑀺𑀧𑁆𑀧𑁂𑀢𑀁 𑀢𑀓𑁆𑀓𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀦𑀸𑀕𑀢𑀁𑀲𑀢𑀓𑁆𑀓𑀦𑁂𑀦𑁂𑀯 𑀳𑀺 𑀲𑀲𑁆𑀲𑀢𑀕𑁆𑀕𑀸𑀳𑀻 𑀪𑀯𑀢𑀺. ‘‘𑀅𑀢𑀻𑀢𑁂𑀧𑀺 𑀏𑀯𑀁 𑀅𑀳𑁄𑀲𑀻’’𑀢𑀺 𑀇𑀤𑀁 𑀧𑀦 𑀅𑀦𑀸𑀕𑀢𑀁𑀲𑀢𑀓𑁆𑀓𑀦𑀲𑁆𑀲 𑀉𑀧𑀦𑀺𑀲𑁆𑀲𑀬𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀲𑁄 𑀳𑀺 ‘‘𑀬𑀣𑀸 𑀫𑁂 𑀇𑀤𑀸𑀦𑀺 𑀅𑀢𑁆𑀢𑀸 𑀲𑀼𑀔𑀻 𑀳𑁄𑀢𑀺, 𑀏𑀯𑀁 𑀅𑀢𑀻𑀢𑁂𑀧𑀻𑀢𑀺 𑀧𑀞𑀫𑀁 𑀅𑀢𑀻𑀢𑀁𑀲𑀸𑀦𑀼𑀢𑀓𑁆𑀓𑀦𑀁 𑀉𑀧𑀦𑀺𑀲𑁆𑀲𑀸𑀬 𑀅𑀦𑀸𑀕𑀢𑁂𑀧𑀺 𑀏𑀯𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀓𑁆𑀓𑀬𑀦𑁆𑀢𑁄 𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀺. ‘‘𑀏𑀯𑀁 𑀲𑀢𑀺 𑀇𑀤𑀁 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀅𑀦𑀺𑀘𑁆𑀘𑁂𑀲𑀼 𑀪𑀸𑀯𑁂𑀲𑀼 𑀅𑀜𑁆𑀜𑁄 𑀓𑀭𑁄𑀢𑀺, 𑀅𑀜𑁆𑀜𑁄 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀤𑁄𑀲𑁄 𑀆𑀧𑀚𑁆𑀚𑀢𑀺, 𑀢𑀣𑀸 𑀘 𑀲𑀢𑀺 𑀓𑀢𑀲𑁆𑀲 𑀯𑀺𑀦𑀸𑀲𑁄 𑀅𑀓𑀢𑀲𑁆𑀲 𑀘 𑀅𑀚𑁆𑀛𑀸𑀕𑀫𑁄 𑀲𑀺𑀬𑀸. 𑀦𑀺𑀘𑁆𑀘𑁂𑀲𑀼 𑀧𑀦 𑀪𑀸𑀯𑁂𑀲𑀼 𑀅𑀜𑁆𑀜𑁄 𑀓𑀭𑁄𑀢𑀺, 𑀅𑀜𑁆𑀜𑁄 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀤𑁄𑀲𑁄 𑀦𑀸𑀧𑀚𑁆𑀚𑀢𑀺. 𑀏𑀯𑀜𑁆𑀘 𑀲𑀢𑀺 𑀓𑀢𑀲𑁆𑀲 𑀅𑀯𑀺𑀦𑀸𑀲𑁄, 𑀅𑀓𑀢𑀲𑁆𑀲 𑀘 𑀅𑀦𑀚𑁆𑀛𑀸𑀕𑀫𑁄 𑀲𑀺𑀬𑀸𑀢𑀺 𑀢𑀓𑁆𑀓𑀺𑀓𑀲𑁆𑀲 𑀬𑀼𑀢𑁆𑀢𑀺𑀕𑀯𑁂𑀲𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀺.

𑀢𑀓𑁆𑀓𑀫𑀢𑁆𑀢𑁂𑀦𑁂𑀯𑀸𑀢𑀺 𑀲𑀼𑀤𑁆𑀥𑀢𑀓𑁆𑀓𑀦𑁂𑀦𑁂𑀯. 𑀫𑀢𑁆𑀢-𑀲𑀤𑁆𑀤𑁂𑀦 𑀳𑀺 𑀆𑀕𑀫𑀸𑀤𑀻𑀦𑀁, 𑀅𑀦𑀼𑀲𑁆𑀲𑀯𑀸𑀤𑀻𑀦𑀜𑁆𑀘 𑀅𑀪𑀸𑀯𑀁 ¶ 𑀤𑀲𑁆𑀲𑁂𑀢𑀺. ‘‘𑀦𑀦𑀼 𑀘 𑀯𑀺𑀲𑁂𑀲𑀮𑀸𑀪𑀺𑀦𑁄𑀧𑀺 𑀲𑀲𑁆𑀲𑀢𑀯𑀸𑀤𑀺𑀦𑁄 ¶ 𑀯𑀺𑀲𑁂𑀲𑀸𑀥𑀺𑀕𑀫𑀳𑁂𑀢𑀼 𑀅𑀦𑁂𑀓𑁂𑀲𑀼 𑀚𑀸𑀢𑀺𑀲𑀢𑀲𑀳𑀲𑁆𑀲𑁂𑀲𑀼, 𑀤𑀲𑀲𑀼 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑁂𑀲𑀼, 𑀘𑀢𑁆𑀢𑀸𑀮𑀻𑀲𑀸𑀬 𑀘 𑀲𑀁𑀯𑀝𑁆𑀝𑀯𑀺𑀯𑀝𑁆𑀝𑁂𑀲𑀼 𑀬𑀣𑀸𑀦𑀼𑀪𑀽𑀢𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀁, 𑀢𑀧𑁆𑀧𑀝𑀺𑀩𑀤𑁆𑀥𑀜𑁆𑀘 𑀥𑀫𑁆𑀫𑀚𑀸𑀢𑀁 ‘‘𑀅𑀢𑁆𑀢𑀸, 𑀮𑁄𑀓𑁄’’𑀢𑀺 𑀘 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀢𑀢𑁄 𑀧𑀼𑀭𑀺𑀫𑀢𑀭𑀸𑀲𑀼𑀧𑀺 𑀚𑀸𑀢𑀻𑀲𑀼 𑀢𑀣𑀸𑀪𑀽𑀢𑀲𑁆𑀲 𑀅𑀢𑁆𑀣𑀺𑀢𑀸𑀦𑀼𑀯𑀺𑀢𑀓𑁆𑀓𑀦𑀫𑀼𑀔𑁂𑀦 𑀅𑀦𑀸𑀕𑀢𑁂𑀧𑀺 𑀏𑀯𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀢𑀦𑁄 𑀪𑀯𑀺𑀲𑁆𑀲𑀫𑀸𑀦𑀸𑀦𑀼𑀢𑀓𑁆𑀓𑀦𑀁, 𑀲𑀩𑁆𑀩𑁂𑀲𑀫𑁆𑀧𑀺 𑀲𑀢𑁆𑀢𑀸𑀦𑀁 𑀢𑀣𑀸𑀪𑀸𑀯𑀸𑀦𑀼𑀢𑀓𑁆𑀓𑀦𑀜𑁆𑀘 𑀓𑀢𑁆𑀯𑀸 𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑀺𑀦𑁄 𑀚𑀸𑀢𑀸, 𑀏𑀯𑀜𑁆𑀘 𑀲𑀢𑀺 𑀲𑀩𑁆𑀩𑁄𑀧𑀺 𑀲𑀲𑁆𑀲𑀢𑀯𑀸𑀤𑀻 𑀅𑀦𑀼𑀲𑁆𑀲𑀼𑀢𑀺𑀓𑀚𑀸𑀢𑀺𑀲𑁆𑀲𑀭𑀮𑀸𑀪𑀻𑀢𑀓𑁆𑀓𑀺𑀓𑀸 𑀯𑀺𑀬 𑀅𑀢𑁆𑀢𑀦𑁄 𑀉𑀧𑀮𑀤𑁆𑀥𑀯𑀢𑁆𑀣𑀼𑀦𑀺𑀫𑀺𑀢𑁆𑀢𑁂𑀦 𑀢𑀓𑁆𑀓𑀦𑁂𑀦 𑀧𑀯𑀢𑁆𑀢𑀯𑀸𑀤𑀢𑁆𑀢𑀸 𑀢𑀓𑁆𑀓𑀻𑀧𑀓𑁆𑀔𑁂𑀬𑁂𑀯 𑀢𑀺𑀝𑁆𑀞𑁂𑀬𑁆𑀬, 𑀢𑀣𑀸 𑀘 𑀲𑀢𑀺 𑀯𑀺𑀲𑁂𑀲𑀪𑁂𑀤𑀭𑀳𑀺𑀢𑀢𑁆𑀢𑀸 𑀏𑀓𑁄𑀯𑀸𑀬𑀁 𑀲𑀲𑁆𑀲𑀢𑀯𑀸𑀤𑁄 𑀯𑀯𑀢𑁆𑀣𑀺𑀢𑁄 𑀪𑀯𑁂𑀬𑁆𑀬, 𑀅𑀯𑀲𑁆𑀲𑀜𑁆𑀘 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀢𑀓𑁆𑀓𑀦𑀫𑀺𑀘𑁆𑀙𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀯𑀺𑀲𑁂𑀲𑀮𑀸𑀪𑀻 𑀲𑀲𑁆𑀲𑀢𑀯𑀸𑀤𑀻 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀧𑀓𑁆𑀔𑀁, 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀧𑀓𑁆𑀔𑀁 𑀯𑀸 𑀪𑀚𑁂𑀬𑁆𑀬𑀸𑀢𑀺? 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀯𑀺𑀲𑁂𑀲𑀮𑀸𑀪𑀻𑀦𑀜𑁆𑀳𑀺 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀤𑀻𑀖𑀤𑀻𑀖𑀢𑀭𑀁 𑀤𑀻𑀖𑀢𑀫𑀓𑀸𑀮𑀸𑀦𑀼𑀲𑁆𑀲𑀭𑀡𑀁 𑀲𑀲𑁆𑀲𑀢𑀕𑁆𑀕𑀸𑀳𑀲𑁆𑀲 𑀅𑀲𑀸𑀥𑀸𑀭𑀡𑀓𑀸𑀭𑀡𑀁. 𑀢𑀣𑀸 𑀳𑀺 ‘‘𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀸𑀫𑀺. 𑀇𑀫𑀺𑀦𑀸𑀫𑀳𑀁 𑀏𑀢𑀁 𑀚𑀸𑀦𑀸𑀫𑀻’’𑀢𑀺 𑀅𑀦𑀼𑀲𑁆𑀲𑀭𑀡𑀫𑁂𑀯 𑀧𑀥𑀸𑀦𑀓𑀸𑀭𑀡𑀪𑀸𑀯𑁂𑀦 𑀤𑀲𑁆𑀲𑀺𑀢𑀁. 𑀬𑀁 𑀧𑀦 𑀢𑀲𑁆𑀲 ‘‘𑀇𑀫𑀺𑀦𑀸𑀫𑀳𑀁 𑀏𑀢𑀁 𑀚𑀸𑀦𑀸𑀫𑀻’’𑀢𑀺 𑀧𑀯𑀢𑁆𑀢𑀁 𑀢𑀓𑁆𑀓𑀦𑀁, 𑀦 𑀢𑀁 𑀇𑀥 𑀧𑀥𑀸𑀦𑀁 𑀅𑀦𑀼𑀲𑁆𑀲𑀭𑀡𑀁 𑀧𑀝𑀺𑀘𑁆𑀘 𑀢𑀲𑁆𑀲 𑀅𑀧𑀥𑀸𑀦𑀪𑀸𑀯𑀢𑁄, 𑀧𑀥𑀸𑀦𑀓𑀸𑀭𑀡𑁂𑀦 𑀘 𑀅𑀲𑀸𑀥𑀸𑀭𑀡𑁂𑀦 𑀦𑀺𑀤𑁆𑀤𑁂𑀲𑁄 𑀲𑀸𑀲𑀦𑁂, 𑀮𑁄𑀓𑁂𑀧𑀺 𑀘 𑀦𑀺𑀭𑀼𑀴𑁆𑀳𑁄 𑀬𑀣𑀸 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀬𑀯𑀗𑁆𑀓𑀼𑀭𑁄’’𑀢𑀺𑀆𑀤𑀺.

𑀏𑀯𑀁 𑀧𑀦𑀸𑀬𑀁 𑀤𑁂𑀲𑀦𑀸 𑀧𑀥𑀸𑀦𑀓𑀸𑀭𑀡𑀯𑀺𑀪𑀸𑀯𑀺𑀦𑀻, 𑀢𑀲𑁆𑀫𑀸 𑀲𑀢𑀺𑀧𑀺 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦, 𑀢𑀓𑁆𑀓𑀺𑀓𑀸𑀦𑀁 𑀳𑀻𑀦𑀸𑀤𑀺𑀯𑀲𑁂𑀦 𑀘 𑀫𑀦𑁆𑀤𑀧𑀜𑁆𑀜𑀸𑀤𑀻𑀦𑀁 𑀯𑀺𑀲𑁂𑀲𑀮𑀸𑀪𑀻𑀦𑀁 𑀩𑀳𑀼𑀥𑀸 𑀪𑁂𑀤𑁂 𑀅𑀜𑁆𑀜𑀢𑀭𑀪𑁂𑀤𑀲𑀗𑁆𑀕𑀳𑀯𑀲𑁂𑀦 𑀪𑀕𑀯𑀢𑀸 𑀘𑀢𑁆𑀢𑀸𑀭𑀺𑀝𑁆𑀞𑀸𑀦𑀸𑀦𑀺 𑀯𑀺𑀪𑀚𑀺𑀢𑁆𑀯𑀸 𑀯𑀯𑀢𑁆𑀣𑀺𑀢𑀸 𑀲𑀲𑁆𑀲𑀢𑀯𑀸𑀤𑀸𑀦𑀁 𑀘𑀢𑀼𑀩𑁆𑀩𑀺𑀥𑀢𑀸. 𑀦 𑀳𑀺, 𑀇𑀥 𑀲𑀸𑀯𑀲𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀥𑀫𑁆𑀫𑀭𑀸𑀚𑀸𑀢𑀺. 𑀬𑀤𑁂𑀯𑀁 𑀅𑀦𑀼𑀲𑁆𑀲𑀼𑀢𑀺𑀓𑀸𑀤𑀻𑀲𑀼𑀧𑀺 𑀅𑀦𑀼𑀲𑁆𑀲𑀯𑀸𑀤𑀻𑀦𑀁 𑀧𑀥𑀸𑀦𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺? 𑀦 𑀢𑁂𑀲𑀁 𑀅𑀜𑁆𑀜𑀸𑀬 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀅𑀪𑀸𑀯𑁂𑀦 𑀢𑀓𑁆𑀓𑀧𑀥𑀸𑀦𑀢𑁆𑀢𑀸, ‘‘𑀧𑀥𑀸𑀦𑀓𑀸𑀭𑀡𑁂𑀦 𑀘 𑀅𑀲𑀸𑀥𑀸𑀭𑀡𑁂𑀦 𑀦𑀺𑀤𑁆𑀤𑁂𑀲𑁄 𑀲𑀸𑀲𑀦𑁂, 𑀮𑁄𑀓𑁂𑀧𑀺 𑀘 𑀦𑀺𑀭𑀼𑀴𑁆𑀳𑁄’’𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄𑀢𑀺. 𑀅𑀣 𑀯𑀸 𑀯𑀺𑀲𑁂𑀲𑀸𑀥𑀺𑀕𑀫𑀦𑀺𑀫𑀺𑀢𑁆𑀢𑀭𑀳𑀺𑀢𑀲𑁆𑀲 𑀢𑀓𑁆𑀓𑀦𑀲𑁆𑀲 𑀲𑀲𑁆𑀲𑀢𑀕𑁆𑀕𑀸𑀳𑁂 𑀯𑀺𑀲𑀼𑀁 𑀓𑀸𑀭𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀺𑀲𑁂𑀲𑀸𑀥𑀺𑀕𑀫𑁄 𑀯𑀺𑀲𑀼𑀁 𑀲𑀲𑁆𑀲𑀢𑀕𑁆𑀕𑀸𑀳𑀓𑀸𑀭𑀡𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑁄, 𑀲𑁄 𑀘 𑀫𑀦𑁆𑀤𑀫𑀚𑁆𑀛𑀺𑀫𑀢𑀺𑀓𑁆𑀔𑀧𑀜𑁆𑀜𑀸𑀯𑀲𑁂𑀦 𑀢𑀺𑀯𑀺𑀥𑁄𑀢𑀺 𑀢𑀺𑀥𑀸 𑀯𑀺𑀪𑀚𑀺𑀢𑁆𑀯𑀸, 𑀲𑀩𑁆𑀩𑀢𑀓𑁆𑀓𑀺𑀦𑁄 ¶ 𑀘 𑀢𑀓𑁆𑀓𑀻𑀪𑀸𑀯𑀲𑀸𑀫𑀜𑁆𑀜𑀢𑁄 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀘𑀢𑀼𑀥𑀸 𑀏𑀯 𑀯𑀯𑀢𑁆𑀣𑀸𑀧𑀺𑀢𑁄 𑀲𑀲𑁆𑀲𑀢𑀯𑀸𑀤𑁄 𑀪𑀕𑀯𑀢𑀸𑀢𑀺.

𑁩𑁫. ‘‘𑀅𑀜𑁆𑀜𑀢𑀭𑁂𑀦𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀓𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀸𑀦𑀧𑀬𑀼𑀢𑁆𑀢𑀲𑁆𑀲 𑀧𑀦 𑀯𑀸-𑀲𑀤𑁆𑀤𑀲𑁆𑀲 𑀅𑀦𑀺𑀬𑀫𑀢𑁆𑀣𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀤𑁆𑀯𑀻𑀳𑀺 𑀯𑀸 𑀢𑀻𑀳𑀺 𑀯𑀸’’𑀢𑀺, 𑀢𑁂𑀦 𑀘𑀢𑀽𑀲𑀼 𑀯𑀢𑁆𑀣𑀽𑀲𑀼 𑀬𑀣𑀸𑀭𑀳𑀫𑁂𑀓𑀘𑁆𑀘𑀁 𑀏𑀓𑀘𑁆𑀘𑀲𑁆𑀲 𑀧𑀜𑁆𑀜𑀸𑀧𑀦𑁂 𑀲𑀳𑀓𑀸𑀭𑀻𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀩𑀳𑀺𑀤𑁆𑀥𑀸’’𑀢𑀺 𑀩𑀸𑀳𑁆𑀬𑀢𑁆𑀣𑀯𑀸𑀘𑀓𑁄 ¶ 𑀓𑀢𑁆𑀢𑀼𑀦𑀺𑀤𑁆𑀤𑀺𑀝𑁆𑀞𑁄 𑀦𑀺𑀧𑀸𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀩𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣𑀸𑀳 𑁋 𑀓𑀺𑀁 𑀧𑀦𑁂𑀢𑀸𑀦𑀺 𑀯𑀢𑁆𑀣𑀽𑀦𑀺 𑀅𑀢𑁆𑀢𑀦𑁄 𑀅𑀪𑀺𑀦𑀺𑀯𑁂𑀲𑀲𑁆𑀲 𑀳𑁂𑀢𑀼, 𑀉𑀤𑀸𑀳𑀼 𑀧𑀭𑁂𑀲𑀁 𑀧𑀢𑀺𑀝𑁆𑀞𑀸𑀧𑀦𑀲𑁆𑀲𑀸𑀢𑀺. 𑀓𑀺𑀜𑁆𑀘𑁂𑀢𑁆𑀣, 𑀬𑀤𑀺 𑀢𑀸𑀯 𑀅𑀢𑁆𑀢𑀦𑁄 𑀅𑀪𑀺𑀦𑀺𑀯𑁂𑀲𑀲𑁆𑀲 𑀳𑁂𑀢𑀼, 𑀅𑀣 𑀓𑀲𑁆𑀫𑀸 𑀅𑀦𑀼𑀲𑁆𑀲𑀭𑀡𑀢𑀓𑁆𑀓𑀦𑀸𑀦𑀺𑀬𑁂𑀯 𑀕𑀳𑀺𑀢𑀸𑀦𑀺, 𑀦 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀸𑀤𑀬𑁄. 𑀢𑀣𑀸 𑀳𑀺 𑀯𑀺𑀧𑀭𑀻𑀢𑀲𑀜𑁆𑀜𑀸𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀅𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀸𑀤𑀻𑀦𑀺𑀧𑀺 𑀤𑀺𑀝𑁆𑀞𑀺𑀬𑀸 𑀧𑀯𑀢𑁆𑀢𑀦𑀝𑁆𑀞𑁂𑀦 𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀦𑀺. 𑀅𑀣 𑀧𑀦 𑀧𑀭𑁂𑀲𑀁 𑀧𑀢𑀺𑀝𑁆𑀞𑀸𑀧𑀦𑀲𑁆𑀲 𑀳𑁂𑀢𑀼, 𑀅𑀦𑀼𑀲𑁆𑀲𑀭𑀡𑀳𑁂𑀢𑀼𑀪𑀽𑀢𑁄 𑀅𑀥𑀺𑀕𑀫𑁄 𑀯𑀺𑀬, 𑀢𑀓𑁆𑀓𑀦𑀧𑀭𑀺𑀬𑁂𑀝𑁆𑀞𑀺𑀪𑀽𑀢𑀸 𑀬𑀼𑀢𑁆𑀢𑀺 𑀯𑀺𑀬 𑀘 𑀆𑀕𑀫𑁄𑀧𑀺 𑀯𑀢𑁆𑀣𑀼𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑁄, 𑀉𑀪𑀬𑀣𑀸𑀧𑀺 𑀘 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀯𑀲𑁂𑀲𑀓𑀸𑀭𑀡𑀲𑁆𑀲 𑀲𑀫𑁆𑀪𑀯𑀢𑁄 ‘‘𑀦𑀢𑁆𑀣𑀺 𑀇𑀢𑁄 𑀩𑀳𑀺𑀤𑁆𑀥𑀸’’𑀢𑀺 𑀯𑀘𑀦𑀁 𑀦 𑀬𑀼𑀚𑁆𑀚𑀢𑁂𑀯𑀸𑀢𑀺? 𑀦𑁄 𑀦 𑀬𑀼𑀚𑁆𑀚𑀢𑀺, 𑀓𑀲𑁆𑀫𑀸? 𑀅𑀪𑀺𑀦𑀺𑀯𑁂𑀲𑀧𑀓𑁆𑀔𑁂 𑀢𑀸𑀯 𑀅𑀬𑀁 𑀤𑀺𑀝𑁆𑀞𑀺𑀕𑀢𑀺𑀓𑁄 𑀅𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑁂𑀳𑀺 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀯𑀺𑀧𑀮𑁆𑀮𑀸𑀲𑀲𑀜𑁆𑀜𑁄 𑀭𑀽𑀧𑀸𑀤𑀺𑀥𑀫𑁆𑀫𑀸𑀦𑀁 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀦𑀲𑀪𑀸𑀯𑀲𑁆𑀲 𑀅𑀦𑀯𑀩𑁄𑀥𑀢𑁄 𑀥𑀫𑁆𑀫𑀬𑀼𑀢𑁆𑀢𑀺𑀁 𑀅𑀢𑀺𑀥𑀸𑀯𑀦𑁆𑀢𑁄 𑀏𑀓𑀢𑁆𑀢𑀦𑀬𑀁 𑀫𑀺𑀘𑁆𑀙𑀸 𑀕𑀳𑁂𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀸𑀦𑀼𑀲𑁆𑀲𑀭𑀡𑀢𑀓𑁆𑀓𑀦𑁂𑀳𑀺 𑀔𑀦𑁆𑀥𑁂𑀲𑀼 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 (𑀤𑀻. 𑀦𑀺. 𑁩𑁧) 𑀅𑀪𑀺𑀦𑀺𑀯𑁂𑀲𑀁 𑀉𑀧𑀦𑁂𑀲𑀺, 𑀇𑀢𑀺 𑀆𑀲𑀦𑁆𑀦𑀓𑀸𑀭𑀡𑀢𑁆𑀢𑀸, 𑀧𑀥𑀸𑀦𑀓𑀸𑀭𑀡𑀢𑁆𑀢𑀸 𑀘 𑀢𑀕𑁆𑀕𑀳𑀡𑁂𑀦𑁂𑀯 𑀘 𑀇𑀢𑀭𑁂𑀲𑀫𑁆𑀧𑀺 𑀕𑀳𑀺𑀢𑀢𑁆𑀢𑀸 𑀅𑀦𑀼𑀲𑁆𑀲𑀭𑀡𑀢𑀓𑁆𑀓𑀦𑀸𑀦𑀺𑀬𑁂𑀯 𑀇𑀥 𑀕𑀳𑀺𑀢𑀸𑀦𑀺. 𑀧𑀢𑀺𑀝𑁆𑀞𑀸𑀧𑀦𑀧𑀓𑁆𑀔𑁂 𑀧𑀦 𑀆𑀕𑀫𑁄𑀧𑀺 𑀬𑀼𑀢𑁆𑀢𑀺𑀬𑀫𑁂𑀯 𑀞𑀺𑀢𑁄 𑀯𑀺𑀲𑁂𑀲𑁂𑀦 𑀦𑀺𑀭𑀸𑀕𑀫𑀸𑀦𑀁 𑀩𑀸𑀳𑀺𑀭𑀓𑀸𑀦𑀁 𑀢𑀓𑁆𑀓𑀕𑁆𑀕𑀸𑀳𑀺𑀪𑀸𑀯𑀢𑁄, 𑀢𑀲𑁆𑀫𑀸 𑀅𑀦𑀼𑀲𑁆𑀲𑀭𑀡𑀢𑀓𑁆𑀓𑀦𑀸𑀦𑀺𑀬𑁂𑀯 𑀲𑀲𑁆𑀲𑀢𑀕𑁆𑀕𑀸𑀳𑀲𑁆𑀲 𑀯𑀢𑁆𑀣𑀼𑀪𑀸𑀯𑁂𑀦 𑀕𑀳𑀺𑀢𑀸𑀦𑀺.

𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀤𑀼𑀯𑀺𑀥𑀁 𑀧𑀭𑀫𑀢𑁆𑀣𑀥𑀫𑁆𑀫𑀸𑀦𑀁 𑀮𑀓𑁆𑀔𑀡𑀁 𑀲𑀪𑀸𑀯𑀮𑀓𑁆𑀔𑀡𑀁, 𑀲𑀸𑀫𑀜𑁆𑀜𑀮𑀓𑁆𑀔𑀡𑀜𑁆𑀘. 𑀢𑀢𑁆𑀣 𑀲𑀪𑀸𑀯𑀮𑀓𑁆𑀔𑀡𑀸𑀯𑀩𑁄𑀥𑁄 𑀧𑀘𑁆𑀘𑀓𑁆𑀔𑀜𑀸𑀡𑀁, 𑀲𑀸𑀫𑀜𑁆𑀜𑀮𑀓𑁆𑀔𑀡𑀸𑀯𑀩𑁄𑀥𑁄 𑀅𑀦𑀼𑀫𑀸𑀦𑀜𑀸𑀡𑀁. 𑀆𑀕𑀫𑁄 𑀘 𑀲𑀼𑀢𑀫𑀬𑀸𑀬 𑀧𑀜𑁆𑀜𑀸𑀬 𑀲𑀸𑀥𑀦𑀢𑁄 ¶ 𑀅𑀦𑀼𑀫𑀸𑀦𑀜𑀸𑀡𑀫𑁂𑀯 𑀆𑀯𑀳𑀢𑀺, 𑀲𑀼𑀢𑀸𑀦𑀁 𑀧𑀦 𑀥𑀫𑁆𑀫𑀸𑀦𑀁 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀦𑁂𑀦 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀁 𑀞𑀺𑀢𑁄 𑀘𑀺𑀦𑁆𑀢𑀸𑀫𑀬𑀧𑀜𑁆𑀜𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀪𑀸𑀯𑀦𑀸𑀬 𑀧𑀘𑁆𑀘𑀓𑁆𑀔𑀜𑀸𑀡𑀁 𑀅𑀥𑀺𑀕𑀘𑁆𑀙𑀢𑀻𑀢𑀺 𑀏𑀯𑀁 𑀆𑀕𑀫𑁄𑀧𑀺 𑀢𑀓𑁆𑀓𑀦𑀯𑀺𑀲𑀬𑀁 𑀦𑀸𑀢𑀺𑀓𑁆𑀓𑀫𑀢𑀺, 𑀢𑀲𑁆𑀫𑀸 𑀘𑁂𑀲 𑀢𑀓𑁆𑀓𑀕𑁆𑀕𑀳𑀡𑁂𑀦 𑀕𑀳𑀺𑀢𑁄𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀅𑀝𑁆𑀞𑀓𑀣𑀸𑀬𑀁 𑀅𑀦𑀼𑀲𑁆𑀲𑀼𑀢𑀺𑀢𑀓𑁆𑀓𑀕𑁆𑀕𑀳𑀡𑁂𑀦 𑀯𑀺𑀪𑀸𑀯𑀺𑀢𑁄, 𑀏𑀯𑀁 𑀅𑀦𑀼𑀲𑁆𑀲𑀭𑀡𑀢𑀓𑁆𑀓𑀦𑁂𑀳𑀺 𑀅𑀲𑀗𑁆𑀕𑀳𑀺𑀢𑀲𑁆𑀲 𑀅𑀯𑀲𑀺𑀝𑁆𑀞𑀲𑁆𑀲 𑀓𑀸𑀭𑀡𑀲𑁆𑀲 𑀅𑀲𑀫𑁆𑀪𑀯𑀢𑁄 𑀬𑀼𑀢𑁆𑀢𑀫𑁂𑀯𑀺𑀤𑀁 ‘‘𑀦𑀢𑁆𑀣𑀺 𑀇𑀢𑁄 𑀩𑀳𑀺𑀤𑁆𑀥𑀸’’𑀢𑀺 𑀯𑀘𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀫𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁯), ‘‘𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑁧.𑁩𑁦) 𑀘 𑀯𑀘𑀦𑀢𑁄 𑀧𑀦 𑀧𑀢𑀺𑀝𑁆𑀞𑀸𑀧𑀦𑀯𑀢𑁆𑀣𑀽𑀦𑀺𑀬𑁂𑀯 𑀇𑀥 𑀤𑁂𑀲𑀺𑀢𑀸𑀦𑀺 𑀢𑀁𑀤𑁂𑀲𑀦𑀸𑀬 𑀏𑀯 𑀅𑀪𑀺𑀦𑀺𑀯𑁂𑀲𑀲𑁆𑀲𑀸𑀧𑀺 𑀲𑀺𑀚𑁆𑀛𑀦𑀢𑁄. 𑀅𑀦𑁂𑀓𑀪𑁂𑀤𑁂𑀲𑀼 𑀳𑀺 𑀤𑁂𑀲𑀺𑀢𑁂𑀲𑀼 𑀬𑀲𑁆𑀫𑀺𑀁 𑀤𑁂𑀲𑀺𑀢𑁂 𑀢𑀤𑀜𑁆𑀜𑁂𑀧𑀺 𑀤𑁂𑀲𑀺𑀢𑀸 𑀲𑀺𑀤𑁆𑀥𑀸 𑀳𑁄𑀦𑁆𑀢𑀺, 𑀢𑀫𑁂𑀯 𑀤𑁂𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀪𑀺𑀦𑀺𑀯𑁂𑀲𑀧𑀢𑀺𑀝𑁆𑀞𑀸𑀧𑀦𑁂𑀲𑀼 𑀘 𑀅𑀪𑀺𑀦𑀺𑀯𑁂𑀲𑁂 𑀤𑁂𑀲𑀺𑀢𑁂𑀧𑀺 𑀧𑀢𑀺𑀝𑁆𑀞𑀸𑀧𑀦𑀁 𑀦 𑀲𑀺𑀚𑁆𑀛𑀢𑀺 𑀅𑀪𑀺𑀦𑀺𑀯𑁂𑀲𑀲𑁆𑀲 𑀧𑀢𑀺𑀝𑁆𑀞𑀸𑀧𑀦𑁂 𑀅𑀦𑀺𑀬𑀫𑀢𑁄. 𑀅𑀪𑀺𑀦𑀺𑀯𑁂𑀲𑀺𑀦𑁄𑀧𑀺 𑀳𑀺 𑀓𑁂𑀘𑀺 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑀺 ¶ , 𑀓𑁂𑀘𑀺 𑀦 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑀺. 𑀧𑀢𑀺𑀝𑁆𑀞𑀸𑀧𑀦𑁂 𑀧𑀦 𑀤𑁂𑀲𑀺𑀢𑁂 𑀅𑀪𑀺𑀦𑀺𑀯𑁂𑀲𑁄𑀧𑀺 𑀲𑀺𑀚𑁆𑀛𑀢𑀺 𑀧𑀢𑀺𑀝𑁆𑀞𑀸𑀧𑀦𑀲𑁆𑀲 𑀅𑀪𑀺𑀦𑀺𑀯𑁂𑀲𑁂 𑀦𑀺𑀬𑀫𑀢𑁄. 𑀬𑁄 𑀳𑀺 𑀬𑀢𑁆𑀣 𑀧𑀭𑁂 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀲𑁄𑀧𑀺 𑀢𑀫𑀪𑀺𑀦𑀺𑀯𑀺𑀲𑀢𑀻𑀢𑀺.

𑁩𑁬. 𑀢𑀬𑀺𑀤𑀦𑁆𑀢𑀺 𑀏𑀢𑁆𑀣 𑀢-𑀲𑀤𑁆𑀤𑁂𑀦 ‘‘𑀲𑀲𑁆𑀲𑀢𑀁 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺 𑀏𑀢𑀲𑁆𑀲 𑀧𑀭𑀸𑀫𑀲𑀦𑀦𑁆𑀢𑀺 𑀆𑀳 ‘‘𑀢𑀁 𑀇𑀤𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀤𑀺𑀝𑁆𑀞𑀺𑀕𑀢’’𑀦𑁆𑀢𑀺. 𑀢𑀢𑁄𑀢𑀺 𑀢𑀲𑁆𑀫𑀸 𑀧𑀓𑀸𑀭𑀢𑁄 𑀚𑀸𑀦𑀦𑀢𑁆𑀢𑀸. 𑀧𑀭𑀫𑀯𑀚𑁆𑀚𑀢𑀸𑀬 𑀅𑀦𑁂𑀓𑀯𑀺𑀳𑀺𑀢𑀸𑀦𑀁 𑀅𑀦𑀢𑁆𑀣𑀸𑀦𑀁 𑀓𑀸𑀭𑀡𑀪𑀸𑀯𑀢𑁄 𑀤𑀺𑀝𑁆𑀞𑀺𑀬𑁄 𑀏𑀯 𑀞𑀸𑀦𑀸 𑀤𑀺𑀝𑁆𑀞𑀺𑀝𑁆𑀞𑀸𑀦𑀸. 𑀬𑀣𑀸𑀳 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸𑀳𑀁 𑀪𑀺𑀓𑁆𑀔𑀯𑁂, 𑀯𑀚𑁆𑀚𑀁 𑀯𑀤𑀸𑀫𑀻’’𑀢𑀺 𑀢𑀤𑁂𑀯𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀤𑀺𑀝𑁆𑀞𑀺𑀬𑁄𑀯 𑀤𑀺𑀝𑁆𑀞𑀺𑀝𑁆𑀞𑀸𑀦𑀸’’𑀢𑀺 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀻𑀦𑀁 𑀓𑀸𑀭𑀡𑀫𑁆𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀫𑁂𑀯 𑀤𑀺𑀝𑁆𑀞𑀻𑀦𑀁 𑀉𑀧𑁆𑀧𑀸𑀤𑀸𑀬 𑀲𑀫𑀼𑀝𑁆𑀞𑀸𑀦𑀝𑁆𑀞𑁂𑀦. ‘‘𑀬𑀣𑀸𑀳𑀸’’𑀢𑀺𑀆𑀤𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀴𑀺𑀬𑀸 (𑀧𑀝𑀺. 𑀫. 𑁧.𑁧𑁨𑁪) 𑀲𑀸𑀥𑀦𑀁. 𑀢𑀢𑁆𑀣 𑀔𑀦𑁆𑀥𑀸𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁 𑀆𑀭𑀫𑁆𑀫𑀡𑀝𑁆𑀞𑁂𑀦. 𑀯𑀼𑀢𑁆𑀢𑀜𑁆𑀳𑀺 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺, (𑀲𑀁. 𑀦𑀺. 𑁩.𑁮𑁧) 𑀅𑀯𑀺𑀚𑁆𑀚𑀸𑀧𑀺 𑀉𑀧𑀦𑀺𑀲𑁆𑀲𑀬𑀸𑀤𑀺𑀪𑀸𑀯𑁂𑀦. 𑀬𑀣𑀸𑀳 ‘‘𑀅𑀲𑁆𑀲𑀼𑀢𑀯𑀸 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄’’𑀢𑀺𑀆𑀤𑀺 (𑀫. 𑀦𑀺. 𑁧.𑁨; 𑀧𑀝𑀺. 𑀫. 𑁧.𑁧𑁩𑁧) 𑀨𑀲𑁆𑀲𑁄𑀧𑀺 𑀨𑀼𑀲𑀺𑀢𑁆𑀯𑀸 𑀕𑀳𑀡𑀽𑀧𑀸𑀬𑀝𑁆𑀞𑁂𑀦. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸 ¶ (𑀤𑀻. 𑀦𑀺. 𑁧.𑁧𑁧𑁮) 𑀨𑀼𑀲𑁆𑀲 𑀨𑀼𑀲𑁆𑀲 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑁧.𑁧𑁪𑁪) 𑀲𑀜𑁆𑀜𑀸𑀧𑀺 𑀆𑀓𑀸𑀭𑀫𑀢𑁆𑀢𑀕𑁆𑀕𑀳𑀡𑀝𑁆𑀞𑁂𑀦. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀲𑀜𑁆𑀜𑀸𑀦𑀺𑀤𑀸𑀦𑀸 𑀳𑀺 𑀧𑀧𑀜𑁆𑀘𑀲𑀗𑁆𑀔𑀸’’𑀢𑀺 (𑀲𑀼. 𑀦𑀺. 𑁮𑁮𑁦; 𑀫𑀳𑀸. 𑀦𑀺. 𑁧𑁦𑁯) 𑀧𑀣𑀯𑀺𑀁 𑀧𑀣𑀯𑀺𑀢𑁄 𑀲𑀜𑁆𑀜𑀢𑁆𑀯𑀸’’𑀢𑀺 (𑀫. 𑀦𑀺. 𑁧.𑁨) 𑀘 𑀆𑀤𑀺. 𑀯𑀺𑀢𑀓𑁆𑀓𑁄𑀧𑀺 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀦𑀝𑁆𑀞𑁂𑀦. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀓𑁆𑀓𑀜𑁆𑀘 𑀤𑀺𑀝𑁆𑀞𑀻𑀲𑀼 𑀧𑀓𑀧𑁆𑀧𑀬𑀺𑀢𑁆𑀯𑀸, 𑀲𑀘𑁆𑀘𑀁 𑀫𑀼𑀲𑀸𑀢𑀺 𑀤𑁆𑀯𑀬𑀥𑀫𑁆𑀫𑀫𑀸𑀳𑀽’’𑀢𑀺, (𑀲𑀼. 𑀦𑀺. 𑁮𑁯𑁨; 𑀫𑀳𑀸𑀦𑀺. 𑁧𑁨𑁧) ‘‘𑀢𑀓𑁆𑀓𑀻 𑀳𑁄𑀢𑀺 𑀯𑀻𑀫𑀁𑀲𑀻’’𑀢𑀺 (𑀤𑀻. 𑀦𑀺. 𑁧.𑁩𑁪) 𑀘 𑀆𑀤𑀺. 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄𑀧𑀺 𑀅𑀓𑀼𑀲𑀮𑀸𑀦𑀁 𑀲𑀸𑀥𑀸𑀭𑀡𑀓𑀸𑀭𑀡𑀝𑁆𑀞𑁂𑀦. 𑀢𑁂𑀦𑀸𑀳 ‘‘𑀢𑀲𑁆𑀲 𑀏𑀯𑀁 𑀅𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑁄 𑀙𑀦𑁆𑀦𑀁 𑀤𑀺𑀝𑁆𑀞𑀻𑀦𑀁 𑀅𑀜𑁆𑀜𑀢𑀭𑀸 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺. 𑀅𑀢𑁆𑀣𑀺 𑀫𑁂 𑀅𑀢𑁆𑀢𑀸’𑀢𑀺 𑀯𑀸 𑀅𑀲𑁆𑀲 𑀲𑀘𑁆𑀘𑀢𑁄 𑀣𑁂𑀢𑀢𑁄 𑀤𑀺𑀝𑁆𑀞𑀺𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺 (𑀫. 𑀦𑀺. 𑁧.𑁧𑁯) 𑀧𑀸𑀧𑀫𑀺𑀢𑁆𑀢𑁄𑀧𑀺 𑀤𑀺𑀝𑁆𑀞𑀸𑀦𑀼𑀕𑀢𑀺 𑀆𑀧𑀚𑁆𑀚𑀦𑀝𑁆𑀞𑁂𑀦. 𑀯𑀼𑀢𑁆𑀢𑀫𑁆𑀧𑀺 𑀘 ‘‘𑀩𑀸𑀳𑀺𑀭𑀁 𑀪𑀺𑀓𑁆𑀔𑀯𑁂, 𑀅𑀗𑁆𑀕𑀦𑁆𑀢𑀺 𑀓𑀭𑀺𑀢𑁆𑀯𑀸 𑀦𑀸𑀜𑁆𑀜𑀁 𑀏𑀓𑀗𑁆𑀕𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀫𑀳𑀢𑁄 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺, 𑀬𑀣𑀬𑀺𑀤𑀁 𑀪𑀺𑀓𑁆𑀔𑀯𑁂, 𑀧𑀸𑀧𑀫𑀺𑀢𑁆𑀢𑀢𑀸’’𑀢𑀺𑀆𑀤𑀺 (𑀅. 𑀦𑀺. 𑁧.𑁧𑁧𑁦) 𑀧𑀭𑀢𑁄𑀖𑁄𑀲𑁄𑀧𑀺 𑀤𑀼𑀭𑀓𑁆𑀔𑀸𑀢𑀥𑀫𑁆𑀫𑀲𑁆𑀲𑀯𑀦𑀝𑁆𑀞𑁂𑀦. 𑀢𑀣𑀸 𑀘𑁂𑀯 𑀯𑀼𑀢𑁆𑀢𑀁 ‘‘𑀤𑁆𑀯𑁂𑀫𑁂 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀬𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀉𑀧𑁆𑀧𑀸𑀤𑀸𑀬. 𑀓𑀢𑀫𑁂 𑀤𑁆𑀯𑁂? 𑀧𑀭𑀢𑁄 𑀘 𑀖𑁄𑀲𑁄, 𑀅𑀬𑁄𑀦𑀺𑀲𑁄 𑀘 𑀫𑀦𑀲𑀺𑀓𑀸𑀭𑁄’’𑀢𑀺𑀆𑀤𑀺 (𑀅. 𑀦𑀺. 𑁨.𑁧𑁨𑁬) 𑀧𑀭𑁂𑀳𑀺 𑀲𑀼𑀢𑀸, 𑀤𑁂𑀲𑀺𑀢𑀸 𑀯𑀸 𑀤𑁂𑀲𑀦𑀸 𑀧𑀭𑀢𑁄𑀖𑁄𑀲𑁄.

‘‘𑀔𑀦𑁆𑀥𑀸 𑀳𑁂𑀢𑀽’’𑀢𑀺𑀆𑀤𑀺𑀧𑀸𑀴𑀺 𑀢𑀤𑀢𑁆𑀣𑀯𑀺𑀪𑀸𑀯𑀺𑀦𑀻. 𑀢𑀢𑁆𑀣 𑀚𑀦𑀓𑀝𑁆𑀞𑁂𑀦 𑀳𑁂𑀢𑀼, 𑀉𑀧𑀢𑁆𑀣𑀫𑁆𑀪𑀓𑀝𑁆𑀞𑁂𑀦 𑀧𑀘𑁆𑀘𑀬𑁄. 𑀉𑀧𑀸𑀤𑀸𑀬𑀸𑀢𑀺 𑀉𑀧𑀸𑀤𑀺𑀬𑀺𑀢𑁆𑀯𑀸, 𑀧𑀝𑀺𑀘𑁆𑀘𑀸𑀢𑀺 𑀅𑀢𑁆𑀣𑁄. ‘‘𑀉𑀧𑁆𑀧𑀸𑀤𑀸𑀬𑀸’’𑀢𑀺𑀧𑀺 𑀧𑀸𑀞𑁄, 𑀉𑀧𑁆𑀧𑀚𑁆𑀚𑀦𑀸𑀬𑀸𑀢𑀺 ¶ 𑀅𑀢𑁆𑀣𑁄. 𑀲𑀫𑀼𑀝𑁆𑀞𑀸𑀢𑀺 𑀏𑀢𑁂𑀦𑀸𑀢𑀺 𑀲𑀫𑀼𑀝𑁆𑀞𑀸𑀦𑀁, 𑀔𑀦𑁆𑀥𑀸𑀤𑀬𑁄 𑀏𑀯. 𑀇𑀥 𑀧𑀦 𑀲𑀫𑀼𑀝𑁆𑀞𑀸𑀦𑀪𑀸𑀯𑁄𑀬𑁂𑀯 𑀲𑀫𑀼𑀝𑁆𑀞𑀸𑀦-𑀲𑀤𑁆𑀤𑁂𑀦 𑀯𑀼𑀢𑁆𑀢𑁄 𑀪𑀸𑀯𑀮𑁄𑀧𑀢𑁆𑀢𑀸, 𑀪𑀸𑀯𑀧𑁆𑀧𑀥𑀸𑀦𑀢𑁆𑀢𑀸 𑀘. 𑀆𑀤𑀺𑀦𑁆𑀦𑀸 𑀲𑀓𑀲𑀦𑁆𑀢𑀸𑀦𑁂. 𑀧𑀯𑀢𑁆𑀢𑀺𑀢𑀸 𑀲𑀧𑀭𑀲𑀦𑁆𑀢𑀸𑀦𑁂𑀲𑀼. 𑀧𑀭-𑀲𑀤𑁆𑀤𑁄 𑀅𑀪𑀺𑀡𑁆𑀳𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺. 𑀧𑀭𑀺𑀦𑀺𑀝𑁆𑀞𑀸𑀧𑀺𑀢𑀸𑀢𑀺 ‘‘𑀇𑀤𑀫𑁂𑀯 𑀤𑀲𑁆𑀲𑀦𑀁 𑀲𑀘𑁆𑀘𑀁, 𑀅𑀜𑁆𑀜𑀁 𑀧𑀦 𑀫𑁄𑀖𑀁 𑀢𑀼𑀘𑁆𑀙𑀁 𑀫𑀼𑀲𑀸’’𑀢𑀺 𑀅𑀪𑀺𑀦𑀺𑀯𑁂𑀲𑀲𑁆𑀲 𑀧𑀭𑀺𑀬𑁄𑀲𑀸𑀦𑀁 𑀫𑀢𑁆𑀣𑀓𑀁 𑀧𑀸𑀧𑀺𑀢𑀸𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀫𑀡𑀯𑀲𑁂𑀦𑀸𑀢𑀺 𑀅𑀝𑁆𑀞𑀲𑀼 𑀤𑀺𑀝𑁆𑀞𑀺𑀝𑁆𑀞𑀸𑀦𑁂𑀲𑀼 𑀔𑀦𑁆𑀥𑁂 𑀲𑀦𑁆𑀥𑀸𑀬𑀸𑀳. 𑀧𑀯𑀢𑁆𑀢𑀦𑀯𑀲𑁂𑀦𑀸𑀢𑀺 𑀅𑀯𑀺𑀚𑁆𑀚𑀸𑀨𑀲𑁆𑀲𑀲𑀜𑁆𑀜𑀸𑀯𑀺𑀢𑀓𑁆𑀓𑀸𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂. 𑀆𑀲𑁂𑀯𑀦𑀯𑀲𑁂𑀦𑀸𑀢𑀺 𑀧𑀸𑀧𑀫𑀺𑀢𑁆𑀢𑀧𑀭𑀢𑁄𑀖𑁄𑀲𑁂. 𑀬𑀤𑀺𑀧𑀺 𑀲𑀭𑀽𑀧𑀢𑁆𑀣𑀯𑀲𑁂𑀦 𑀯𑁂𑀯𑀘𑀦𑀁, 𑀲𑀗𑁆𑀓𑁂𑀢𑀢𑁆𑀣𑀯𑀲𑁂𑀦 𑀧𑀦 𑀏𑀯𑀁 𑀯𑀢𑁆𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁𑀯𑀺𑀥𑀧𑀭𑀮𑁄𑀓𑀸’’𑀢𑀺 𑀯𑀼𑀢𑁆𑀢𑀁. 𑀬𑁂𑀦 𑀓𑁂𑀦𑀘𑀺 𑀳𑀺 𑀯𑀺𑀲𑁂𑀲𑀦𑁂𑀦𑁂𑀯 𑀯𑁂𑀯𑀘𑀦𑀁 𑀲𑀸𑀢𑁆𑀣𑀓𑀁 𑀲𑀺𑀬𑀸. 𑀧𑀭𑀮𑁄𑀓𑁄 ¶ 𑀘 𑀓𑀫𑁆𑀫𑀯𑀲𑁂𑀦 𑀅𑀪𑀺𑀫𑀼𑀔𑁄 𑀲𑀫𑁆𑀧𑀭𑁂𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀺 𑀏𑀢𑁆𑀣𑀸𑀢𑀺 𑀅𑀪𑀺𑀲𑀫𑁆𑀧𑀭𑀸𑀬𑁄𑀢𑀺 𑀯𑀼𑀘𑁆𑀘𑀢𑀺. ‘‘𑀇𑀢𑀺 𑀔𑁄 𑀆𑀦𑀦𑁆𑀤, 𑀓𑀼𑀲𑀮𑀸𑀦𑀺 𑀲𑀻𑀮𑀸𑀦𑀺 𑀅𑀦𑀼𑀧𑀼𑀩𑁆𑀩𑁂𑀦 𑀅𑀕𑁆𑀕𑀸𑀬 𑀧𑀭𑁂𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁧𑁦.𑁨) 𑀯𑀺𑀬 𑀳𑀺 𑀘𑀼𑀭𑀸𑀤𑀺𑀕𑀡𑀯𑀲𑁂𑀦 𑀧𑀭-𑀲𑀤𑁆𑀤𑀁 𑀕𑀢𑀺𑀬𑀫𑀺𑀘𑁆𑀙𑀦𑁆𑀢𑀺 𑀲𑀤𑁆𑀤𑀯𑀺𑀤𑀽, 𑀅𑀬𑀫𑁂𑀢𑁆𑀣 𑀅𑀝𑁆𑀞𑀓𑀣𑀸𑀢𑁄 𑀅𑀧𑀭𑁄 𑀦𑀬𑁄.

𑀏𑀯𑀁𑀕𑀢𑀺𑀓𑀸𑀢𑀺 𑀏𑀯𑀁𑀕𑀫𑀦𑀸 𑀏𑀯𑀁𑀦𑀺𑀝𑁆𑀞𑀸, 𑀏𑀯𑀫𑀦𑀼𑀬𑀼𑀜𑁆𑀚𑀦𑁂𑀦 𑀪𑀺𑀚𑁆𑀚𑀦𑀦𑀲𑁆𑀲𑀦𑀧𑀭𑀺𑀬𑁄𑀲𑀸𑀦𑀸𑀢𑀺 𑀅𑀢𑁆𑀣𑁄. 𑀕𑀢𑀺-𑀲𑀤𑁆𑀤𑁄 𑀘𑁂𑀢𑁆𑀣 ‘‘𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑁆𑀯𑁂𑀯 𑀕𑀢𑀺𑀬𑁄 𑀪𑀯𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁫𑁮; 𑁨.𑁩𑁩, 𑁩𑁫; 𑁩.𑁧𑁯𑁯, 𑁨𑁦𑁦; 𑀫. 𑀦𑀺. 𑁨.𑁩𑁮𑁪, 𑁩𑁯𑁭) 𑀯𑀺𑀬 𑀦𑀺𑀝𑁆𑀞𑀸𑀦𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀫𑁂 𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀸 𑀤𑀺𑀝𑁆𑀞𑀺𑀝𑁆𑀞𑀸𑀦𑀸 𑀏𑀯𑀁 𑀧𑀭𑀫𑀢𑁆𑀣𑀢𑁄 𑀅𑀲𑀦𑁆𑀢𑀁 𑀅𑀢𑁆𑀢𑀸𑀦𑀁, 𑀲𑀲𑁆𑀲𑀢𑀪𑀸𑀯𑀜𑁆𑀘 𑀢𑀲𑁆𑀫𑀺𑀁 𑀅𑀚𑁆𑀛𑀸𑀭𑁄𑀧𑁂𑀢𑁆𑀯𑀸 𑀕𑀳𑀺𑀢𑀸, 𑀧𑀭𑀸𑀫𑀝𑁆𑀞𑀸 𑀘 𑀲𑀫𑀸𑀦𑀸 𑀩𑀸𑀮𑀮𑀧𑀦𑀸𑀬𑁂𑀯 𑀳𑀼𑀢𑁆𑀯𑀸 𑀬𑀸𑀯 𑀧𑀡𑁆𑀟𑀺𑀢𑀸 𑀦 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀺, 𑀢𑀸𑀯 𑀕𑀘𑁆𑀙𑀦𑁆𑀢𑀺, 𑀧𑀸𑀢𑀼𑀪𑀯𑀦𑁆𑀢𑀺 𑀘, 𑀧𑀡𑁆𑀟𑀺𑀢𑁂𑀳𑀺 𑀲𑀫𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑀸 𑀧𑀦 𑀅𑀦𑀯𑀝𑁆𑀞𑀺𑀢𑀯𑀢𑁆𑀣𑀼𑀓𑀸 𑀅𑀯𑀺𑀫𑀤𑁆𑀤𑀓𑁆𑀔𑀫𑀸 𑀲𑀽𑀭𑀺𑀬𑀼𑀕𑁆𑀕𑀫𑀦𑁂 𑀉𑀲𑁆𑀲𑀸𑀯𑀩𑀺𑀦𑁆𑀤𑀽 𑀯𑀺𑀬, 𑀔𑀚𑁆𑀚𑁄𑀧𑀦𑀓𑀸 𑀯𑀺𑀬 𑀘 𑀪𑀺𑀚𑁆𑀚𑀦𑁆𑀢𑀺, 𑀯𑀺𑀦𑀲𑁆𑀲𑀦𑁆𑀢𑀺 𑀘𑀸𑀢𑀺.

𑀢𑀢𑁆𑀣𑀸𑀬𑀁 𑀅𑀦𑀼𑀬𑀼𑀜𑁆𑀚𑀦𑁂 𑀲𑀗𑁆𑀔𑁂𑀧𑀓𑀣𑀸 𑁋 𑀬𑀤𑀺 𑀳𑀺 𑀧𑀭𑁂𑀳𑀺 𑀓𑀧𑁆𑀧𑀺𑀢𑁄 𑀅𑀢𑁆𑀢𑀸 𑀮𑁄𑀓𑁄 𑀯𑀸 𑀲𑀲𑁆𑀲𑀢𑁄 𑀲𑀺𑀬𑀸, 𑀢𑀲𑁆𑀲 𑀦𑀺𑀩𑁆𑀩𑀺𑀓𑀸𑀭𑀢𑀸𑀬 𑀧𑀼𑀭𑀺𑀫𑀭𑀽𑀧𑀸𑀯𑀺𑀚𑀳𑀦𑀢𑁄 𑀓𑀲𑁆𑀲𑀘𑀺 𑀯𑀺𑀲𑁂𑀲𑀸𑀥𑀸𑀦𑀲𑁆𑀲 𑀓𑀸𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀳𑀺𑀢𑀢𑁄 𑀦𑀺𑀯𑀢𑁆𑀢𑀦𑀢𑁆𑀣𑀁, 𑀳𑀺𑀢𑁂 𑀘 𑀧𑀝𑀺𑀧𑀚𑁆𑀚𑀦𑀢𑁆𑀣𑀁 𑀉𑀧𑀤𑁂𑀲𑁄 𑀏𑀯 𑀲𑀲𑁆𑀲𑀢𑀯𑀸𑀤𑀺𑀦𑁄 𑀦𑀺𑀧𑁆𑀧𑀬𑁄𑀚𑀦𑁄 𑀲𑀺𑀬𑀸, 𑀓𑀣𑀁 𑀯𑀸 𑀢𑁂𑀦 𑀲𑁄 𑀉𑀧𑀤𑁂𑀲𑁄 𑀧𑀯𑀢𑁆𑀢𑀻𑀬𑀢𑀺 𑀯𑀺𑀓𑀸𑀭𑀸𑀪𑀸𑀯𑀢𑁄. 𑀏𑀯𑀜𑁆𑀘 𑀲𑀢𑀺 𑀧𑀭𑀺𑀓𑀧𑁆𑀧𑀺𑀢𑀲𑁆𑀲 𑀅𑀢𑁆𑀢𑀦𑁄 𑀅𑀚𑀝𑀸𑀓𑀸𑀲𑀲𑁆𑀲 𑀯𑀺𑀬 𑀤𑀸𑀦𑀸𑀤𑀺𑀓𑀺𑀭𑀺𑀬𑀸, 𑀳𑀺𑀁𑀲𑀸𑀤𑀺𑀓𑀺𑀭𑀺𑀬𑀸 𑀘 𑀦 𑀲𑀫𑁆𑀪𑀯𑀢𑀺, 𑀢𑀣𑀸 𑀲𑀼𑀔𑀲𑁆𑀲, 𑀤𑀼𑀓𑁆𑀔𑀲𑁆𑀲 𑀘 𑀅𑀦𑀼𑀪𑀯𑀦𑀦𑀺𑀩𑀦𑁆𑀥𑁄 𑀏𑀯 𑀲𑀲𑁆𑀲𑀢𑀯𑀸𑀤𑀺𑀦𑁄 𑀦 𑀬𑀼𑀚𑁆𑀚𑀢𑀺 𑀓𑀫𑁆𑀫𑀩𑀤𑁆𑀥𑀸𑀪𑀸𑀯𑀢𑁄. 𑀚𑀸𑀢𑀺𑀆𑀤𑀻𑀦𑀜𑁆𑀘 𑀅𑀲𑀫𑁆𑀪𑀯𑀢𑁄 𑀯𑀺𑀫𑁄𑀓𑁆𑀔𑁄 𑀦 𑀪𑀯𑁂𑀬𑁆𑀬, 𑀅𑀣 𑀧𑀦 𑀥𑀫𑁆𑀫𑀫𑀢𑁆𑀢𑀁 𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀯𑀺𑀦𑀲𑁆𑀲𑀢𑀺 𑀘, 𑀬𑀲𑁆𑀲 𑀯𑀲𑁂𑀦𑀸𑀬𑀁 𑀓𑀺𑀭𑀺𑀬𑀸𑀤𑀺𑀯𑁄𑀳𑀸𑀭𑁄𑀢𑀺 𑀯𑀤𑁂𑀬𑁆𑀬, 𑀏𑀯𑀫𑁆𑀧𑀺 ¶ 𑀧𑀼𑀭𑀺𑀫𑀭𑀽𑀧𑀸𑀯𑀺𑀚𑀳𑀦𑁂𑀦 𑀅𑀯𑀝𑁆𑀞𑀺𑀢𑀲𑁆𑀲 𑀅𑀢𑁆𑀢𑀦𑁄 𑀥𑀫𑁆𑀫𑀫𑀢𑁆𑀢𑀦𑁆𑀢𑀺 𑀦 𑀲𑀓𑁆𑀓𑀸 𑀲𑀫𑁆𑀪𑀸𑀯𑁂𑀢𑀼𑀁, 𑀢𑁂 𑀯𑀸 𑀧𑀦𑀲𑁆𑀲 𑀥𑀫𑁆𑀫𑀸 𑀅𑀯𑀢𑁆𑀣𑀸𑀪𑀽𑀢𑀸, 𑀢𑀲𑁆𑀫𑀸 𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀅𑀜𑁆𑀜𑁂 𑀯𑀸 𑀲𑀺𑀬𑀼𑀁 𑀅𑀦𑀜𑁆𑀜𑁂 𑀯𑀸, 𑀬𑀤𑀺 𑀅𑀜𑁆𑀜𑁂, 𑀦 𑀢𑀸𑀳𑀺 𑀅𑀯𑀢𑁆𑀣𑀸𑀳𑀺 𑀢𑀲𑁆𑀲 𑀉𑀧𑁆𑀧𑀦𑁆𑀦𑀸𑀳𑀺𑀧𑀺 𑀓𑁄𑀘𑀺 𑀯𑀺𑀲𑁂𑀲𑁄 𑀅𑀢𑁆𑀣𑀺, 𑀬𑀸𑀳𑀺 𑀓𑀭𑁄𑀢𑀺 𑀧𑀝𑀺𑀲𑀁𑀯𑁂𑀤𑁂𑀢𑀺 𑀘𑀯𑀢𑀺 𑀉𑀧𑁆𑀧𑀚𑁆𑀚𑀢𑀺 𑀘𑀸𑀢𑀺 𑀇𑀘𑁆𑀙𑀺𑀢𑀁, 𑀏𑀯𑀜𑁆𑀘 𑀥𑀫𑁆𑀫𑀓𑀧𑁆𑀧𑀦𑀸𑀧𑀺 ¶ 𑀦𑀺𑀭𑀢𑁆𑀣𑀓𑀸 𑀲𑀺𑀬𑀸, 𑀢𑀲𑁆𑀫𑀸 𑀢𑀤𑀯𑀢𑁆𑀣𑁄 𑀏𑀯 𑀬𑀣𑀸𑀯𑀼𑀢𑁆𑀢𑀤𑁄𑀲𑁄, 𑀅𑀣𑀸𑀦𑀜𑁆𑀜𑁂, 𑀉𑀧𑁆𑀧𑀸𑀤𑀯𑀺𑀦𑀸𑀲𑀯𑀦𑁆𑀢𑀻𑀳𑀺 𑀅𑀯𑀢𑁆𑀣𑀸𑀳𑀺 𑀅𑀦𑀜𑁆𑀜𑀲𑁆𑀲 𑀅𑀢𑁆𑀢𑀦𑁄 𑀢𑀸𑀲𑀁 𑀯𑀺𑀬 𑀉𑀧𑁆𑀧𑀸𑀤𑀯𑀺𑀦𑀸𑀲𑀲𑀩𑁆𑀪𑀸𑀯𑀢𑁄 𑀓𑀼𑀢𑁄 𑀪𑀯𑁂𑀬𑁆𑀬 𑀦𑀺𑀘𑁆𑀘𑀢𑀸𑀯𑀓𑀸𑀲𑁄, 𑀢𑀸𑀲𑀫𑁆𑀧𑀺 𑀯𑀸 𑀅𑀢𑁆𑀢𑀦𑁄 𑀯𑀺𑀬 𑀦𑀺𑀘𑁆𑀘𑀢𑀸𑀧𑀯𑀢𑁆𑀢𑀺, 𑀢𑀲𑁆𑀫𑀸 𑀩𑀦𑁆𑀥𑀯𑀺𑀫𑁄𑀓𑁆𑀔𑀸𑀦𑀁 𑀅𑀲𑀫𑁆𑀪𑀯𑁄 𑀏𑀯𑀸𑀢𑀺 𑀦 𑀬𑀼𑀚𑁆𑀚𑀢𑀺𑀬𑁂𑀯 𑀲𑀲𑁆𑀲𑀢𑀯𑀸𑀤𑁄, 𑀦 𑀘𑁂𑀢𑁆𑀣 𑀓𑁄𑀘𑀺 𑀯𑀸𑀤𑀻 𑀥𑀫𑁆𑀫𑀸𑀦𑀁 𑀲𑀲𑁆𑀲𑀢𑀪𑀸𑀯𑁂 𑀧𑀭𑀺𑀲𑀼𑀤𑁆𑀤𑀁 𑀬𑀼𑀢𑁆𑀢𑀺𑀁 𑀯𑀢𑁆𑀢𑀼𑀁 𑀲𑀫𑀢𑁆𑀣𑁄 𑀪𑀯𑁂𑀬𑁆𑀬, 𑀬𑀼𑀢𑁆𑀢𑀺𑀭𑀳𑀺𑀢𑀜𑁆𑀘 𑀯𑀘𑀦𑀁 𑀦 𑀧𑀡𑁆𑀟𑀺𑀢𑀸𑀦𑀁 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀺, 𑀢𑁂𑀦𑀸𑀯𑁄𑀘𑀼𑀫𑁆𑀳 ‘‘𑀬𑀸𑀯 𑀧𑀡𑁆𑀟𑀺𑀢𑀸 𑀦 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀺, 𑀢𑀸𑀯 𑀕𑀘𑁆𑀙𑀦𑁆𑀢𑀺, 𑀧𑀸𑀢𑀼𑀪𑀯𑀦𑁆𑀢𑀺 𑀘𑀸’’𑀢𑀺.

𑀲𑀓𑀸𑀭𑀡𑀁 𑀲𑀕𑀢𑀺𑀓𑀦𑁆𑀢𑀺 𑀏𑀢𑁆𑀣 𑀲𑀳-𑀲𑀤𑁆𑀤𑁄 𑀯𑀺𑀚𑁆𑀚𑀫𑀸𑀦𑀢𑁆𑀣𑁄 ‘‘𑀲𑀮𑁄𑀫𑀓𑁄 𑀲𑀧𑀓𑁆𑀔𑀓𑁄’’𑀢𑀺𑀆𑀤𑀻𑀲𑀼 𑀯𑀺𑀬, 𑀦 𑀧𑀦 𑀲𑀫𑀯𑀸𑀬𑀢𑁆𑀣𑁄 𑀘-𑀲𑀤𑁆𑀤𑁂𑀦 ‘‘𑀢𑀬𑀺𑀤𑀁 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀲𑁆𑀲 𑀤𑀺𑀝𑁆𑀞𑀺𑀕𑀢𑀲𑁆𑀲 𑀲𑀫𑀼𑀘𑁆𑀘𑀺𑀦𑀺𑀢𑀢𑁆𑀢𑀸, ‘‘𑀢𑀜𑁆𑀘 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀻’’𑀢𑀺 𑀇𑀫𑀺𑀦𑀸 𑀘 𑀓𑀸𑀭𑀡𑀕𑀢𑀻𑀦𑀫𑁂𑀯 𑀧𑀚𑀸𑀦𑀦𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀬𑀺𑀤𑀁 𑀪𑀺𑀓𑁆𑀔𑀯𑁂, 𑀓𑀸𑀭𑀡𑀯𑀦𑁆𑀢𑀁 𑀕𑀢𑀺𑀯𑀦𑁆𑀢𑀁 𑀤𑀺𑀝𑁆𑀞𑀺𑀕𑀢𑀁 𑀢𑀣𑀸𑀕𑀢𑁄 𑀧𑀚𑀸𑀦𑀸𑀢𑀺, 𑀦 𑀓𑁂𑀯𑀮𑀜𑁆𑀘 𑀢𑀤𑁂𑀯, 𑀅𑀣 𑀔𑁄 𑀢𑀲𑁆𑀲 𑀓𑀸𑀭𑀡𑀕𑀢𑀺𑀲𑀗𑁆𑀔𑀸𑀢𑀁 𑀢𑀜𑁆𑀘 𑀲𑀩𑁆𑀩𑀦𑁆𑀢𑀺. ‘‘𑀢𑀢𑁄…𑀧𑁂… 𑀧𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀯𑀸𑀓𑁆𑀬𑀲𑁆𑀲 𑀅𑀢𑁆𑀣𑀁 𑀯𑀼𑀢𑁆𑀢𑀦𑀬𑁂𑀦 𑀲𑀁𑀯𑀡𑁆𑀡𑁂𑀢𑀺 ‘‘𑀢𑀢𑁄 𑀘𑀸’’𑀢𑀺𑀆𑀤𑀺𑀦𑀸. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑁂𑀯𑀺𑀥 𑀯𑀺𑀪𑀚𑀦𑀦𑁆𑀢𑀺 𑀧𑀓𑀭𑀡𑀸𑀦𑀼𑀭𑀽𑀧𑀫𑀢𑁆𑀣𑀁 𑀆𑀳 ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘𑀸’’𑀢𑀺, 𑀢𑀲𑁆𑀫𑀺𑀁 𑀯𑀸 𑀯𑀼𑀢𑁆𑀢𑁂 𑀢𑀤𑀥𑀺𑀝𑁆𑀞𑀸𑀦𑀢𑁄 𑀆𑀲𑀯𑀓𑁆𑀔𑀬𑀜𑀸𑀡𑀁, 𑀢𑀤𑀯𑀺𑀦𑀸𑀪𑀸𑀯𑀢𑁄 𑀯𑀸 𑀲𑀩𑁆𑀩𑀫𑁆𑀧𑀺 𑀤𑀲𑀩𑀮𑀸𑀤𑀺𑀜𑀸𑀡𑀁 𑀕𑀳𑀺𑀢𑀫𑁂𑀯𑀸𑀢𑀺𑀧𑀺 𑀢𑀤𑁂𑀯 𑀯𑀼𑀢𑁆𑀢𑀁.

𑀏𑀯𑀁𑀯𑀺𑀥𑀦𑁆𑀢𑀺 ‘‘𑀲𑀻𑀮𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀏𑀯𑀁𑀯𑀼𑀢𑁆𑀢𑀧𑁆𑀧𑀓𑀸𑀭𑀁. 𑀧𑀚𑀸𑀦𑀦𑁆𑀢𑁄𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁂𑀦, 𑀅𑀧𑀺-𑀲𑀤𑁆𑀤𑁂𑀦 𑀯𑀸 ‘‘𑀢𑀜𑁆𑀘𑀸’’𑀢𑀺 𑀯𑀼𑀢𑁆𑀢 𑀘-𑀲𑀤𑁆𑀤𑀲𑁆𑀲 𑀲𑀫𑁆𑀪𑀸𑀯𑀦𑀢𑁆𑀣𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀢𑁂𑀦 𑀢𑀢𑁄 𑀤𑀺𑀝𑁆𑀝𑀺𑀕𑀢𑀢𑁄 𑀉𑀢𑁆𑀢𑀭𑀺𑀢𑀭𑀁 𑀲𑀸𑀭𑀪𑀽𑀢𑀁 𑀲𑀻𑀮𑀸𑀤𑀺𑀕𑀼𑀡𑀯𑀺𑀲𑁂𑀲𑀫𑁆𑀧𑀺 𑀢𑀣𑀸𑀕𑀢𑁄 𑀦𑀸𑀪𑀺𑀦𑀺𑀯𑀺𑀲𑀢𑀺, 𑀓𑁄 𑀧𑀦 𑀯𑀸𑀤𑁄 𑀯𑀝𑁆𑀝𑀸𑀫𑀺𑀲𑁂𑀢𑀺 𑀲𑀫𑁆𑀪𑀸𑀯𑁂𑀢𑀺. ‘‘𑀅𑀳’’𑀦𑁆𑀢𑀺 𑀤𑀺𑀝𑁆𑀝𑀺𑀫𑀸𑀦𑀯𑀲𑁂𑀦 𑀧𑀭𑀸𑀫𑀲𑀦𑀸𑀓𑀸𑀭𑀤𑀲𑁆𑀲𑀦𑀁. 𑀧𑀚𑀸𑀦𑀸𑀫𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁂𑀦 𑀧𑀓𑀸𑀭𑀢𑁆𑀣𑁂𑀦, 𑀦𑀺𑀤𑀲𑁆𑀲𑀦𑀢𑁆𑀣𑁂𑀦 𑀯𑀸. ‘‘𑀫𑀫’’𑀦𑁆𑀢𑀺 𑀢𑀡𑁆𑀳𑀸𑀯𑀲𑁂𑀦 𑀧𑀭𑀸𑀫𑀲𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀧𑀭𑀸𑀫𑀸𑀲𑀯𑀲𑁂𑀦𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀲𑀗𑁆𑀔𑀸𑀢𑀧𑀭𑀸𑀫𑀸𑀲𑀯𑀲𑁂𑀦. 𑀥𑀫𑁆𑀫𑀲𑀪𑀸𑀯𑀫𑀢𑀺𑀓𑁆𑀓𑀫𑀺𑀢𑁆𑀯𑀸 ‘‘𑀅𑀳𑀁 𑀫𑀫’’𑀦𑁆𑀢𑀺 𑀧𑀭𑀢𑁄 𑀅𑀪𑀽𑀢𑀢𑁄 𑀆𑀫𑀲𑀦𑀁 𑀧𑀭𑀸𑀫𑀸𑀲𑁄, 𑀢𑀡𑁆𑀳𑀸𑀤𑀬𑁄 𑀏𑀯. 𑀦 𑀳𑀺 𑀢𑀁 𑀅𑀢𑁆𑀣𑀺, 𑀬𑀁 𑀔𑀦𑁆𑀥𑁂𑀲𑀼 ‘‘𑀅𑀳’’𑀦𑁆𑀢𑀺 𑀯𑀸 ‘‘𑀫𑀫’’𑀦𑁆𑀢𑀺 𑀯𑀸 𑀕𑀳𑁂𑀢𑀩𑁆𑀩𑀁 𑀲𑀺𑀬𑀸, 𑀅𑀧𑀭𑀸𑀫𑀲𑀢𑁄 ¶ 𑀅𑀧𑀭𑀸𑀫𑀲𑀦𑁆𑀢𑀲𑁆𑀲 𑀅𑀲𑁆𑀲 𑀢𑀣𑀸𑀕𑀢𑀲𑁆𑀲 𑀦𑀺𑀩𑁆𑀩𑀼𑀢𑀺 𑀯𑀺𑀤𑀺𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀧𑀭𑀸𑀫𑀲𑀢𑁄’’𑀢𑀺 𑀘𑁂𑀤𑀁 𑀦𑀺𑀩𑁆𑀩𑀼𑀢𑀺𑀧𑀯𑁂𑀤𑀦𑀸𑀬 (𑀦𑀺𑀩𑁆𑀩𑀼𑀢𑀺𑀯𑁂𑀤𑀦𑀲𑁆𑀲 𑀤𑀻. 𑀦𑀺. 𑀝𑀻. 𑁧.𑁩𑁬) 𑀳𑁂𑀢𑀼𑀕𑀩𑁆𑀪𑀯𑀺𑀲𑁂𑀲𑀦𑀁 ¶ . ‘‘𑀯𑀺𑀤𑀺𑀢𑀸’’𑀢𑀺 𑀧𑀤𑀫𑀧𑁂𑀓𑁆𑀔𑀺𑀢𑁆𑀯𑀸 𑀓𑀢𑁆𑀢𑀭𑀺 𑀲𑀸𑀫𑀺𑀯𑀘𑀦𑀁. 𑀅𑀧𑀭𑀸𑀫𑀲𑀢𑁄 𑀧𑀭𑀸𑀫𑀸𑀲𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀳𑁂𑀢𑀼 𑀅𑀲𑁆𑀲 𑀢𑀣𑀸𑀕𑀢𑀲𑁆𑀲 𑀓𑀢𑁆𑀢𑀼𑀪𑀽𑀢𑀲𑁆𑀲 𑀦𑀺𑀩𑁆𑀩𑀼𑀢𑀺 𑀅𑀲𑀗𑁆𑀔𑀢𑀥𑀸𑀢𑀼 𑀯𑀺𑀤𑀺𑀢𑀸, 𑀅𑀥𑀺𑀕𑀢𑀸𑀢𑀺 𑀯𑀸 𑀅𑀢𑁆𑀣𑁄. ‘‘𑀅𑀧𑀭𑀸𑀫𑀲𑀢𑁄’’𑀢𑀺 𑀳𑁂𑀤𑀁 𑀳𑁂𑀢𑀼𑀫𑁆𑀳𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁.

‘‘𑀅𑀧𑀭𑀸𑀫𑀸𑀲𑀧𑀘𑁆𑀘𑀬𑀸’’𑀢𑀺 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀧𑀯𑁂𑀤𑀦𑀸𑀬 𑀓𑀸𑀭𑀡𑀤𑀲𑁆𑀲𑀦𑀁. 𑀅𑀲𑁆𑀲𑀸𑀢𑀺 𑀓𑀢𑁆𑀢𑀸𑀭𑀁 𑀯𑀢𑁆𑀯𑀸𑀧𑀺 𑀧𑀘𑁆𑀘𑀢𑁆𑀢𑀜𑁆𑀜𑁂𑀯𑀸𑀢𑀺 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀧𑀼𑀦 𑀓𑀢𑁆𑀢𑀼𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀬𑀫𑁂𑀯 𑀅𑀢𑁆𑀢𑀦𑀸𑀬𑁂𑀯𑀸’’𑀢𑀺. 𑀲𑀬𑀁, 𑀅𑀢𑁆𑀢𑀦𑀸𑀢𑀺 𑀯𑀸 𑀪𑀸𑀯𑀦𑀧𑀼𑀁𑀲𑀓𑀁. 𑀦𑀺𑀧𑀸𑀢𑀧𑀤𑀜𑁆𑀳𑁂𑀢𑀁. ‘‘𑀅𑀧𑀭𑀸𑀫𑀲𑀢𑁄’’𑀢𑀺 𑀯𑀘𑀦𑀢𑁄 𑀧𑀭𑀸𑀫𑀸𑀲𑀸𑀦𑀫𑁂𑀯 𑀦𑀺𑀩𑁆𑀩𑀼𑀢𑀺 𑀇𑀥 𑀤𑁂𑀲𑀺𑀢𑀸, 𑀢𑀁𑀤𑁂𑀲𑀦𑀸𑀬 𑀏𑀯 𑀢𑀤𑀜𑁆𑀜𑁂𑀲𑀫𑁆𑀧𑀺 𑀦𑀺𑀩𑁆𑀩𑀼𑀢𑀺𑀬𑀸 𑀲𑀺𑀚𑁆𑀛𑀦𑀢𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀢𑁂𑀲𑀁 𑀧𑀭𑀸𑀫𑀸𑀲𑀓𑀺𑀮𑁂𑀲𑀸𑀦’’𑀦𑁆𑀢𑀺 𑀇𑀫𑀺𑀦𑀸, 𑀧𑀭𑀸𑀫𑀸𑀲𑀲𑀗𑁆𑀔𑀸𑀢𑀸𑀦𑀁 𑀓𑀺𑀮𑁂𑀲𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀓𑀸𑀫𑀁 ‘‘𑀅𑀧𑀭𑀸𑀫𑀲𑀢𑁄’’𑀢𑀺 𑀯𑀘𑀦𑀢𑁄 𑀧𑀭𑀸𑀫𑀸𑀲𑀸𑀦𑀫𑁂𑀯 𑀦𑀺𑀩𑁆𑀩𑀼𑀢𑀺 𑀇𑀥 𑀤𑁂𑀲𑀺𑀢𑀸𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀢𑀁𑀤𑁂𑀲𑀦𑀸𑀬 𑀧𑀦 𑀢𑀤𑀯𑀲𑁂𑀲𑀸𑀦𑀫𑁆𑀧𑀺 𑀓𑀺𑀮𑁂𑀲𑀸𑀦𑀁 𑀦𑀺𑀩𑁆𑀩𑀼𑀢𑀺 𑀤𑁂𑀲𑀺𑀢𑀸 𑀦𑀸𑀫 𑀪𑀯𑀢𑀺 𑀧𑀳𑀸𑀦𑁂𑀓𑀝𑁆𑀞𑀢𑀸𑀤𑀺𑀪𑀸𑀯𑀢𑁄, 𑀢𑀲𑁆𑀫𑀸 𑀢𑁂𑀲𑀫𑁆𑀧𑀺 𑀦𑀺𑀩𑁆𑀩𑀼𑀢𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 ‘‘𑀢𑁂𑀲𑀁 𑀧𑀭𑀸𑀫𑀸𑀲𑀓𑀺𑀮𑁂𑀲𑀸𑀦’’𑀦𑁆𑀢𑀺, 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀲𑀗𑁆𑀔𑀸𑀢𑀸𑀦𑀁 𑀧𑀭𑀸𑀫𑀸𑀲𑀸𑀦𑀁, 𑀢𑀤𑀜𑁆𑀜𑁂𑀲𑀜𑁆𑀘 𑀓𑀺𑀮𑁂𑀲𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀕𑁄𑀩𑀮𑀻𑀩𑀤𑁆𑀤𑀦𑀬𑁄 𑀳𑁂𑀲. 𑀦𑀺𑀩𑁆𑀩𑀼𑀢𑀻𑀢𑀺 𑀘 𑀦𑀺𑀩𑁆𑀩𑀸𑀬𑀦𑀪𑀽𑀢𑀸 𑀅𑀲𑀗𑁆𑀔𑀢𑀥𑀸𑀢𑀼, 𑀢𑀜𑁆𑀘 𑀪𑀕𑀯𑀸 𑀩𑁄𑀥𑀺𑀫𑀽𑀮𑁂𑀬𑁂𑀯 𑀧𑀢𑁆𑀢𑁄, 𑀢𑀲𑁆𑀫𑀸 𑀲𑀸 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀯𑀺𑀤𑀺𑀢𑀸𑀢𑀺.

𑀬𑀣𑀸𑀧𑀝𑀺𑀧𑀦𑁆𑀦𑁂𑀦𑀸𑀢𑀺 𑀬𑁂𑀦 𑀧𑀝𑀺𑀧𑀦𑁆𑀦𑁂𑀦. 𑀢𑀧𑁆𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀸𑀲𑀁𑀬𑁂𑀯…𑀧𑁂… 𑀆𑀤𑀺𑀫𑀸𑀳𑀸’’𑀢𑀺 𑀅𑀦𑀼𑀲𑀦𑁆𑀥𑀺𑀤𑀲𑁆𑀲𑀦𑀁. 𑀓𑀲𑁆𑀫𑀸 𑀧𑀦 𑀯𑁂𑀤𑀦𑀸𑀦𑀜𑁆𑀜𑁂𑀯 𑀓𑀫𑁆𑀫𑀝𑁆𑀞𑀸𑀦𑀫𑀸𑀘𑀺𑀓𑁆𑀔𑀢𑀻𑀢𑀺 𑀆𑀳 ‘‘𑀬𑀸𑀲𑀽’’𑀢𑀺𑀆𑀤𑀺, 𑀇𑀫𑀺𑀦𑀸 𑀤𑁂𑀲𑀦𑀸𑀯𑀺𑀮𑀸𑀲𑀁 𑀤𑀲𑁆𑀲𑁂𑀢𑀺. 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑁄 𑀳𑀺 𑀪𑀕𑀯𑀸 𑀤𑁂𑀲𑀦𑀸𑀓𑀼𑀲𑀮𑁄 𑀔𑀦𑁆𑀥𑀸𑀬𑀢𑀦𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑀸𑀲𑀼 𑀘𑀢𑀼𑀲𑀘𑁆𑀘𑀤𑁂𑀲𑀦𑀸𑀲𑀼 𑀲𑀫𑁆𑀪𑀯𑀦𑁆𑀢𑀻𑀲𑀼𑀧𑀺 𑀤𑀺𑀝𑁆𑀞𑀺𑀕𑀢𑀺𑀓𑀸 𑀯𑁂𑀤𑀦𑀸𑀲𑀼 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀺𑀕𑀳𑀦𑀁 𑀧𑀓𑁆𑀔𑀦𑁆𑀤𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀣𑀸𑀧𑀓𑁆𑀔𑀦𑁆𑀤𑀦𑀫𑀽𑀮𑀪𑀽𑀢𑀸 𑀯𑁂𑀤𑀦𑀸𑀬𑁂𑀯 𑀧𑀭𑀺𑀜𑁆𑀜𑀸𑀪𑀽𑀫𑀺𑀪𑀸𑀯𑁂𑀦 𑀉𑀤𑁆𑀥𑀭𑀢𑀻𑀢𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀯𑀸𑀤𑁂. 𑀏𑀯𑀁 𑀏𑀢𑁆𑀣𑀸𑀢𑀺𑀧𑀺. 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀁. 𑀏𑀢𑁆𑀣 𑀳𑀺 ¶ 𑀯𑁂𑀤𑀦𑀸𑀕𑀳𑀡𑁂𑀦 𑀕𑀳𑀺𑀢𑀸 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀲𑀘𑁆𑀘𑀁. 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑀕𑁆𑀕𑀳𑀡𑁂𑀦 𑀕𑀳𑀺𑀢𑁄 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁄 𑀲𑀫𑀼𑀤𑀬𑀲𑀘𑁆𑀘𑀁, 𑀅𑀢𑁆𑀣𑀗𑁆𑀕𑀫𑀦𑀺𑀲𑁆𑀲𑀭𑀡𑀧𑀭𑀺𑀬𑀸𑀬𑁂𑀳𑀺 𑀦𑀺𑀭𑁄𑀥𑀲𑀘𑁆𑀘𑀁, ‘‘𑀬𑀣𑀸𑀪𑀽𑀢𑀁 𑀯𑀺𑀤𑀺𑀢𑁆𑀯𑀸’’𑀢𑀺 𑀏𑀢𑁂𑀦 𑀫𑀕𑁆𑀕𑀲𑀘𑁆𑀘𑀦𑁆𑀢𑀺 𑀏𑀯𑀁 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. ‘‘𑀬𑀣𑀸𑀪𑀽𑀢𑀁 𑀯𑀺𑀤𑀺𑀢𑁆𑀯𑀸’’𑀢𑀺 𑀇𑀤𑀁 𑀯𑀺𑀪𑀚𑁆𑀚𑀩𑁆𑀬𑀸𑀓𑀭𑀡𑀢𑁆𑀣𑀧𑀤𑀦𑁆𑀢𑀺 𑀢𑀤𑀢𑁆𑀣𑀁 𑀯𑀺𑀪𑀚𑁆𑀚 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀲𑁂𑀲𑀢𑁄 𑀳𑀺 ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄’’𑀢𑀺𑀆𑀤𑀺𑀮𑀓𑁆𑀔𑀡𑀸𑀦𑀁 𑀯𑀲𑁂𑀦 𑀲𑀫𑀼𑀤𑀬𑀸𑀤𑀻𑀲𑀼 𑀅𑀢𑁆𑀣𑁄 𑀬𑀣𑀸𑀭𑀳𑀁 𑀯𑀺𑀪𑀚𑁆𑀚 𑀤𑀲𑁆𑀲𑁂𑀢𑀩𑁆𑀩𑁄. 𑀅𑀯𑀺𑀲𑁂𑀲𑀢𑁄 𑀧𑀦 𑀯𑁂𑀤𑀦𑀸𑀬 𑀲𑀫𑀼𑀤𑀬𑀸𑀤𑀻𑀦𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀆𑀭𑀫𑁆𑀫𑀡𑀧𑀝𑀺𑀯𑁂𑀥𑀯𑀲𑁂𑀦, 𑀫𑀕𑁆𑀕𑀧𑀜𑁆𑀜𑀸𑀬 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑀯𑀲𑁂𑀦 𑀚𑀸𑀦𑀺𑀢𑁆𑀯𑀸 ¶ 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀲𑀫𑀼𑀤𑀬𑀝𑁆𑀞𑁂𑀦𑀸𑀢𑀺 ‘‘𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀺, 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀫. 𑀦𑀺. 𑁧.𑁪𑁦𑁪; 𑀲𑀁. 𑀦𑀺. 𑁨.𑁨𑁧; 𑀉𑀤𑀸. 𑁧) 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀉𑀧𑁆𑀧𑀸𑀤𑁂𑀦 𑀘𑁂𑀯 𑀫𑀕𑁆𑀕𑁂𑀦 𑀅𑀲𑀫𑀼𑀕𑁆𑀖𑀸𑀝𑁂𑀦 𑀘. 𑀬𑀸𑀯 𑀳𑀺 𑀫𑀕𑁆𑀕𑁂𑀦 𑀦 𑀲𑀫𑀼𑀕𑁆𑀖𑀸𑀝𑀻𑀬𑀢𑀺, 𑀢𑀸𑀯 𑀧𑀘𑁆𑀘𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀦𑁆𑀢𑀺 𑀉𑀧𑁆𑀧𑀸𑀤𑀮𑀓𑁆𑀔𑀡𑀁, 𑀚𑀸𑀢𑀺𑀦𑁆𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀦𑁆𑀦𑀁 𑀮𑀓𑁆𑀔𑀡𑀸𑀦𑀦𑁆𑀢𑀺 𑀏𑀢𑁆𑀣 𑀘 𑀘𑀢𑀼𑀦𑁆𑀦𑀫𑁆𑀧𑀺 𑀧𑀘𑁆𑀘𑀬𑀸𑀦𑀁 𑀉𑀧𑁆𑀧𑀸𑀤𑀮𑀓𑁆𑀔𑀡𑀫𑁂𑀯 𑀅𑀕𑁆𑀕𑀳𑁂𑀢𑁆𑀯𑀸 𑀧𑀘𑁆𑀘𑀬𑀮𑀓𑁆𑀔𑀡𑀫𑁆𑀧𑀺 𑀕𑀳𑁂𑀢𑀩𑁆𑀩𑀁 𑀲𑀫𑀼𑀤𑀬𑀁 𑀧𑀝𑀺𑀘𑁆𑀘 𑀢𑁂𑀲𑀁 𑀬𑀣𑀸𑀭𑀳𑀁 𑀉𑀧𑀓𑀸𑀭𑀓𑀢𑁆𑀢𑀸. 𑀢𑀣𑀸 𑀘𑁂𑀯 𑀲𑀁𑀯𑀡𑁆𑀡𑀺𑀢𑀁 ‘‘𑀫𑀕𑁆𑀕𑁂𑀦 𑀅𑀲𑀫𑀼𑀕𑁆𑀖𑀸𑀝𑁂𑀦 𑀘𑀸’’𑀢𑀺. 𑀧𑀘𑁆𑀘𑀬𑀦𑀺𑀭𑁄𑀥𑀝𑁆𑀞𑁂𑀦𑀸𑀢𑀺 ‘‘𑀇𑀫𑀲𑁆𑀫𑀺𑀁 𑀦𑀺𑀭𑀼𑀤𑁆𑀥𑁂 𑀇𑀤𑀁 𑀦𑀺𑀭𑀼𑀤𑁆𑀥𑀁 𑀳𑁄𑀢𑀺, 𑀇𑀫𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺 (𑀫. 𑀦𑀺. 𑁧.𑁪𑁦𑁬; 𑀉𑀤𑀸. 𑁩; 𑀲𑀁. 𑀦𑀺. 𑁨.𑁪𑁧) 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀅𑀯𑀺𑀚𑁆𑀚𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀦𑀺𑀭𑁄𑀥𑁂𑀦 𑀘𑁂𑀯 𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀝𑁂𑀦 𑀘. 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀦𑁆𑀢𑀺 𑀦𑀺𑀭𑁄𑀥𑀮𑀓𑁆𑀔𑀡𑀁, 𑀪𑀗𑁆𑀕𑀦𑁆𑀢𑀺 𑀅𑀢𑁆𑀣𑁄. 𑀯𑀬𑀦𑁆𑀢𑀺 𑀦𑀺𑀭𑁄𑀥𑀁. 𑀬𑀦𑁆𑀢𑀺 𑀬𑀲𑁆𑀫𑀸 𑀧𑀘𑁆𑀘𑀬𑀪𑀸𑀯𑀲𑀗𑁆𑀔𑀸𑀢𑀳𑁂𑀢𑀼𑀢𑁄. 𑀯𑁂𑀤𑀦𑀁 𑀧𑀝𑀺𑀘𑁆𑀘𑀸𑀢𑀺 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀁 𑀆𑀭𑀫𑁆𑀫𑀡𑀸𑀤𑀺𑀧𑀘𑁆𑀘𑀬𑀪𑀽𑀢𑀁 𑀯𑁂𑀤𑀦𑀁 𑀮𑀪𑀺𑀢𑁆𑀯𑀸. 𑀲𑀼𑀔𑀁 𑀲𑁄𑀫𑀦𑀲𑁆𑀲𑀦𑁆𑀢𑀺 𑀲𑀼𑀔𑀜𑁆𑀘𑁂𑀯 𑀲𑁄𑀫𑀦𑀲𑁆𑀲𑀜𑁆𑀘. 𑀅𑀬𑀦𑁆𑀢𑀺 𑀧𑀼𑀭𑀺𑀫𑀯𑁂𑀤𑀦𑀸𑀬 𑀬𑀣𑀸𑀭𑀳𑀁 𑀧𑀘𑁆𑀙𑀺𑀫𑀼𑀧𑁆𑀧𑀦𑁆𑀦𑀸𑀦𑀁 𑀲𑀼𑀔𑀲𑁄𑀫𑀦𑀲𑁆𑀲𑀸𑀦𑀁 𑀧𑀘𑁆𑀘𑀬𑀪𑀸𑀯𑁄. 𑀅𑀲𑁆𑀲𑀸𑀤𑁄 𑀦𑀸𑀫 𑀅𑀲𑁆𑀲𑀸𑀤𑀺𑀢𑀩𑁆𑀩𑁄𑀢𑀺 𑀓𑀢𑁆𑀯𑀸.

𑀅𑀧𑀭𑁄 𑀦𑀬𑁄 𑁋 𑀬𑀦𑁆𑀢𑀺 𑀲𑀼𑀔𑀁, 𑀲𑁄𑀫𑀦𑀲𑁆𑀲𑀜𑁆𑀘. 𑀅𑀬𑀦𑁆𑀢𑀺 𑀘 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀦 𑀦𑀺𑀤𑁆𑀤𑀺𑀝𑁆𑀞𑀁 𑀲𑀼𑀔𑀲𑁄𑀫𑀦𑀲𑁆𑀲𑀫𑁂𑀯 𑀅𑀲𑁆𑀲𑀸𑀤𑀧𑀤𑀫𑀧𑁂𑀓𑁆𑀔𑀺𑀢𑁆𑀯𑀸 𑀧𑀼𑀮𑁆𑀮𑀺𑀗𑁆𑀕𑁂𑀦 𑀦𑀺𑀤𑁆𑀤𑀺𑀲𑀻𑀬𑀢𑀺, 𑀇𑀫𑀲𑁆𑀫𑀺𑀁 𑀧𑀦 𑀯𑀺𑀓𑀧𑁆𑀧𑁂 𑀲𑀼𑀔𑀲𑁄𑀫𑀦𑀲𑁆𑀲𑀸𑀦𑀁 𑀉𑀧𑁆𑀧𑀸𑀤𑁄𑀬𑁂𑀯 𑀢𑁂𑀳𑀺 𑀉𑀧𑁆𑀧𑀸𑀤𑀯𑀦𑁆𑀢𑁂𑀳𑀺 𑀦𑀺𑀤𑁆𑀤𑀺𑀝𑁆𑀞𑁄, 𑀲𑀢𑁆𑀢𑀺𑀬𑀸, 𑀲𑀢𑁆𑀢𑀺𑀫𑀢𑁄 𑀘 𑀅𑀪𑀺𑀦𑁆𑀦𑀢𑁆𑀢𑀸. 𑀦 𑀳𑀺 𑀲𑀼𑀔𑀲𑁄𑀫𑀦𑀲𑁆𑀲𑀫𑀦𑁆𑀢𑀭𑁂𑀦 𑀢𑁂𑀲𑀁 𑀉𑀧𑁆𑀧𑀸𑀤𑁄 𑀮𑀩𑁆𑀪𑀢𑀺. 𑀇𑀢𑀺 𑀧𑀼𑀭𑀺𑀫𑀯𑁂𑀤𑀦𑀁 𑀧𑀝𑀺𑀘𑁆𑀘 𑀲𑀼𑀔𑀲𑁄𑀫𑀦𑀲𑁆𑀲𑀼𑀧𑁆𑀧𑀸𑀤𑁄𑀧𑀺 𑀧𑀼𑀭𑀺𑀫𑀯𑁂𑀤𑀦𑀸𑀬 𑀅𑀲𑁆𑀲𑀸𑀤𑁄 𑀦𑀸𑀫 𑀅𑀲𑁆𑀲𑀸𑀤𑀻𑀬𑀢𑁂𑀢𑀺 𑀓𑀢𑁆𑀯𑀸 ¶ . 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀧𑀼𑀭𑀺𑀫𑀫𑀼𑀧𑁆𑀧𑀦𑁆𑀦𑀁 𑀯𑁂𑀤𑀦𑀁 𑀆𑀭𑀩𑁆𑀪 𑀲𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺𑀬𑀁 𑀬𑁄 𑀧𑀼𑀭𑀺𑀫𑀯𑁂𑀤𑀦𑀸𑀬 𑀧𑀘𑁆𑀘𑀬𑀪𑀸𑀯𑀲𑀗𑁆𑀔𑀸𑀢𑁄 𑀅𑀲𑁆𑀲𑀸𑀤𑁂𑀢𑀩𑁆𑀩𑀸𑀓𑀸𑀭𑁄, 𑀲𑁄𑀫𑀦𑀲𑁆𑀲𑀲𑁆𑀲 𑀯𑀸 𑀉𑀧𑁆𑀧𑀸𑀤𑀲𑀗𑁆𑀔𑀸𑀢𑁄 𑀢𑀤𑀲𑁆𑀲𑀸𑀤𑀦𑀸𑀓𑀸𑀭𑁄, 𑀅𑀬𑀁 𑀧𑀼𑀭𑀺𑀫𑀯𑁂𑀤𑀦𑀸𑀬 𑀅𑀲𑁆𑀲𑀸𑀤𑁄𑀢𑀺. 𑀓𑀣𑀁 𑀧𑀦 𑀯𑁂𑀤𑀦𑀁 𑀆𑀭𑀩𑁆𑀪 𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀦𑀦𑀼 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀦𑁆𑀢𑀺? 𑀘𑁂𑀢𑀲𑀺𑀓𑀲𑀼𑀔𑀲𑁆𑀲𑁂𑀯 𑀆𑀭𑀩𑁆𑀪 𑀧𑀯𑀢𑁆𑀢𑀺𑀬𑀫𑀥𑀺𑀧𑁆𑀧𑁂𑀢𑀢𑁆𑀢𑀸 𑀦𑀸𑀬𑀁 𑀤𑁄𑀲𑁄. 𑀆𑀭𑀩𑁆𑀪 𑀧𑀯𑀢𑁆𑀢𑀺𑀬𑀜𑁆𑀳𑀺 𑀯𑀺𑀲𑁂𑀲𑀦𑀫𑁂𑀯 𑀲𑁄𑀫𑀦𑀲𑁆𑀲𑀕𑁆𑀕𑀳𑀡𑀁 𑀲𑁄𑀫𑀦𑀲𑁆𑀲𑀁 𑀲𑀼𑀔𑀦𑁆𑀢𑀺 𑀬𑀣𑀸 ‘‘𑀭𑀼𑀓𑁆𑀔𑁄 𑀲𑀻𑀲𑀧𑀸’’𑀢𑀺 𑀅𑀜𑁆𑀜𑀧𑀘𑁆𑀘𑀬𑀯𑀲𑁂𑀦 𑀉𑀧𑁆𑀧𑀢𑁆𑀢𑀺𑀬𑀁 𑀧𑀦 𑀓𑀸𑀬𑀺𑀓𑀲𑀼𑀔𑀫𑁆𑀧𑀺 𑀅𑀲𑁆𑀲𑀸𑀤𑁄𑀬𑁂𑀯, 𑀬𑀣𑀸𑀮𑀸𑀪𑀓𑀣𑀸 𑀯𑀸 𑀏𑀲𑀸𑀢𑀺 𑀤𑀝𑁆𑀞𑀩𑁆𑀩𑀁.

‘‘𑀬𑀸 𑀯𑁂𑀤𑀦𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 𑀲𑀢𑁆𑀢𑀺𑀫𑀢𑀸 𑀲𑀢𑁆𑀢𑀺 𑀦𑀺𑀤𑀲𑁆𑀲𑀺𑀢𑀸. 𑀢𑀢𑁆𑀭𑀸𑀬𑀫𑀢𑁆𑀣𑁄 𑁋 𑀬𑀸 𑀯𑁂𑀤𑀦𑀸 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀸, 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀦𑀝𑁆𑀞𑁂𑀦 𑀤𑀼𑀓𑁆𑀔𑀸, 𑀚𑀭𑀸𑀬, 𑀫𑀭𑀡𑁂𑀦 𑀘𑀸𑀢𑀺 𑀤𑁆𑀯𑀺𑀥𑀸 𑀯𑀺𑀧𑀭𑀺𑀡𑀸𑀫𑁂𑀢𑀩𑁆𑀩𑀝𑁆𑀞𑁂𑀦 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸. 𑀢𑀲𑁆𑀲𑀸 𑀏𑀯𑀁𑀪𑀽𑀢𑀸𑀬 𑀅𑀬𑀁 𑀅𑀦𑀺𑀘𑁆𑀘𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀪𑀸𑀯𑁄 ¶ 𑀯𑁂𑀤𑀦𑀸𑀬 𑀲𑀩𑁆𑀩𑀸𑀬𑀧𑀺𑀆𑀤𑀻𑀦𑀯𑁄𑀢𑀺. 𑀆𑀤𑀻𑀦𑀁 𑀧𑀭𑀫𑀓𑀸𑀭𑀼𑀜𑁆𑀜𑀁 𑀯𑀸𑀢𑀺 𑀧𑀯𑀢𑁆𑀢𑀢𑀺 𑀏𑀢𑀲𑁆𑀫𑀸𑀢𑀺 𑀳𑀺 𑀆𑀤𑀻𑀦𑀯𑁄. 𑀅𑀧𑀺𑀘𑀆𑀤𑀻𑀦𑀁 𑀅𑀢𑀺𑀯𑀺𑀬 𑀓𑀧𑀡𑀁 𑀧𑀯𑀢𑁆𑀢𑀦𑀝𑁆𑀞𑁂𑀦 𑀓𑀧𑀡𑀫𑀦𑀼𑀲𑁆𑀲𑁄 𑀆𑀤𑀻𑀦𑀯𑁄, 𑀅𑀬𑀫𑁆𑀧𑀺 𑀏𑀯𑀁𑀲𑀪𑀸𑀯𑁄𑀢𑀺 𑀢𑀣𑀸 𑀯𑀼𑀘𑁆𑀘𑀢𑀺. 𑀲𑀢𑁆𑀢𑀺𑀫𑀢𑀸 𑀳𑀺 𑀲𑀢𑁆𑀢𑀺 𑀅𑀪𑀺𑀦𑁆𑀦𑀸 𑀢𑀤𑀯𑀺𑀦𑀸𑀪𑀸𑀯𑀢𑁄.

𑀏𑀢𑁆𑀣 𑀘 ‘‘𑀅𑀦𑀺𑀘𑁆𑀘𑀸’’𑀢𑀺 𑀇𑀫𑀺𑀦𑀸 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀯𑀲𑁂𑀦 𑀉𑀧𑁂𑀓𑁆𑀔𑀸𑀯𑁂𑀤𑀦𑀸𑀬, 𑀲𑀩𑁆𑀩𑀸𑀲𑀼 𑀯𑀸 𑀯𑁂𑀤𑀦𑀸𑀲𑀼𑀆𑀤𑀻𑀦𑀯𑀫𑀸𑀳, ‘‘𑀤𑀼𑀓𑁆𑀔𑀸’’𑀢𑀺 𑀇𑀫𑀺𑀦𑀸 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀯𑀲𑁂𑀦𑀤𑀼𑀓𑁆𑀔𑀯𑁂𑀤𑀦𑀸𑀬, ‘‘𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’’𑀢𑀺 𑀇𑀫𑀺𑀦𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀯𑀲𑁂𑀦 𑀲𑀼𑀔𑀯𑁂𑀤𑀦𑀸𑀬. 𑀅𑀯𑀺𑀲𑁂𑀲𑁂𑀦 𑀯𑀸 𑀢𑀻𑀡𑀺𑀧𑀺 𑀧𑀤𑀸𑀦𑀺 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀯𑁂𑀤𑀦𑀸𑀦𑀁 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀙𑀦𑁆𑀤𑀭𑀸𑀕𑀯𑀺𑀦𑀬𑁄𑀢𑀺 𑀙𑀦𑁆𑀤𑀲𑀗𑁆𑀔𑀸𑀢𑀭𑀸𑀕𑀯𑀺𑀦𑀬𑀦𑀁 𑀯𑀺𑀦𑀸𑀲𑁄. ‘‘𑀅𑀢𑁆𑀣𑀯𑀲𑀸 𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁄’’𑀢𑀺 𑀯𑀘𑀦𑀢𑁄 𑀬𑀁 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀧𑀭𑀺𑀬𑀸𑀬𑀯𑀘𑀦𑀫𑁂𑀯𑀺𑀤𑀁 𑀧𑀤𑀤𑁆𑀯𑀬𑀁. 𑀬𑀣𑀸𑀪𑀽𑀢𑀁 𑀯𑀺𑀤𑀺𑀢𑁆𑀯𑀸𑀢𑀺 𑀫𑀕𑁆𑀕𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀫𑀕𑁆𑀕𑀦𑀺𑀩𑁆𑀩𑀸𑀦𑀯𑀲𑁂𑀦 𑀯𑀸 𑀬𑀣𑀸𑀓𑁆𑀓𑀫𑀁 𑀬𑁄𑀚𑀦𑀸𑀧𑀺 𑀯𑀝𑁆𑀝𑀢𑀺. 𑀯𑁂𑀤𑀦𑀸𑀬𑀸𑀢𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. 𑀦𑀺𑀲𑁆𑀲𑀭𑀡𑀦𑁆𑀢𑀺 𑀦𑁂𑀓𑁆𑀔𑀫𑁆𑀫𑀁. 𑀬𑀸𑀯 𑀳𑀺 𑀯𑁂𑀤𑀦𑀸𑀧𑀝𑀺𑀩𑀤𑁆𑀥𑀁 𑀙𑀦𑁆𑀤𑀭𑀸𑀕𑀁 𑀦𑀧𑁆𑀧𑀚𑀳𑀢𑀺, 𑀢𑀸𑀯𑀸𑀬𑀁 𑀧𑀼𑀭𑀺𑀲𑁄 𑀯𑁂𑀤𑀦𑀸𑀬 𑀅𑀮𑁆𑀮𑀻𑀦𑁄𑀬𑁂𑀯 𑀳𑁄𑀢𑀺. 𑀬𑀤𑀸 𑀧𑀦 𑀢𑀁 𑀙𑀦𑁆𑀤𑀭𑀸𑀕𑀁 𑀧𑀚𑀳𑀢𑀺, 𑀢𑀤𑀸𑀬𑀁 𑀧𑀼𑀭𑀺𑀲𑁄 𑀯𑁂𑀤𑀦𑀸𑀬 𑀦𑀺𑀲𑁆𑀲𑀝𑁄 𑀯𑀺𑀲𑀁𑀬𑀼𑀢𑁆𑀢𑁄 𑀳𑁄𑀢𑀺, 𑀢𑀲𑁆𑀫𑀸 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁 𑀯𑁂𑀤𑀦𑀸𑀬 𑀦𑀺𑀲𑁆𑀲𑀭𑀡𑀁 𑀯𑀼𑀢𑁆𑀢𑀁. 𑀢𑀩𑁆𑀩𑀘𑀦𑁂𑀦 ¶ 𑀧𑀦 𑀯𑁂𑀤𑀦𑀸𑀲𑀳𑀚𑀸𑀢𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀪𑀽𑀢𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺𑀧𑀺 𑀧𑀜𑁆𑀘𑀳𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀳𑀺 𑀦𑀺𑀲𑁆𑀲𑀭𑀡𑀯𑀘𑀦𑀁 𑀲𑀺𑀤𑁆𑀥𑀫𑁂𑀯. 𑀯𑁂𑀤𑀦𑀸𑀲𑀻𑀲𑁂𑀦 𑀳𑀺 𑀤𑁂𑀲𑀦𑀸 𑀆𑀕𑀢𑀸, 𑀢𑀢𑁆𑀣 𑀧𑀦 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀮𑀓𑁆𑀔𑀡𑀳𑀸𑀭𑀯𑀲𑁂𑀦𑀸𑀧𑀺 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑀺 𑀆𑀬𑀲𑁆𑀫𑀢𑀸 𑀫𑀳𑀸𑀓𑀘𑁆𑀘𑀸𑀦𑀢𑁆𑀣𑁂𑀭𑁂𑀦 𑁋

‘‘𑀯𑀼𑀢𑁆𑀢𑀫𑁆𑀳𑀺 𑀏𑀓𑀥𑀫𑁆𑀫𑁂, 𑀬𑁂 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀸 𑀓𑁂𑀘𑀺;

𑀯𑀼𑀢𑁆𑀢𑀸 𑀪𑀯𑀦𑁆𑀢𑀺 𑀲𑀩𑁆𑀩𑁄, 𑀲𑁄 𑀳𑀸𑀭𑁄 𑀮𑀓𑁆𑀔𑀡𑁄 𑀦𑀸𑀫𑀸’’𑀢𑀺. (𑀦𑁂𑀢𑁆𑀢𑀺. 𑁪𑁮𑁫);

𑀓𑀸𑀫𑀼𑀧𑀸𑀤𑀸𑀦𑀫𑀽𑀮𑀓𑀢𑁆𑀢𑀸 𑀲𑁂𑀲𑀼𑀧𑀸𑀤𑀸𑀦𑀸𑀦𑀁 𑀧𑀳𑀻𑀦𑁂 𑀘 𑀓𑀸𑀫𑀼𑀧𑀸𑀤𑀸𑀦𑁂 𑀉𑀧𑀸𑀤𑀸𑀦𑀲𑁂𑀲𑀸𑀪𑀸𑀯𑀢𑁄 ‘‘𑀯𑀺𑀕𑀢𑀙𑀦𑁆𑀤𑀭𑀸𑀕𑀢𑀸𑀬 𑀅𑀦𑀼𑀧𑀸𑀤𑀸𑀦𑁄’’𑀢𑀺 𑀯𑀼𑀢𑁆𑀢𑀁, 𑀏𑀢𑁂𑀦 ‘‘𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑁄’’𑀢𑀺 𑀏𑀢𑀲𑁆𑀲𑀢𑁆𑀣𑀁 𑀲𑀗𑁆𑀔𑁂𑀧𑁂𑀦 𑀤𑀲𑁆𑀲𑁂𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀯𑀺𑀕𑀢𑀙𑀦𑁆𑀤𑀭𑀸𑀕𑀢𑀸𑀬 𑀅𑀦𑀼𑀧𑀸𑀤𑀸𑀦𑁄, 𑀅𑀦𑀼𑀧𑀸𑀤𑀸𑀦𑀢𑁆𑀢𑀸 𑀘 𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑁄𑀢𑀺. 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀢𑀼𑀁, 𑀲𑀫𑀢𑁆𑀣𑁂𑀢𑀼𑀁 𑀯𑀸 ‘‘𑀬𑀲𑁆𑀫𑀺’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀲𑁆𑀫𑀺𑀁 𑀉𑀧𑀸𑀤𑀸𑀦𑁂𑀢𑀺 𑀲𑁂𑀲𑀼𑀧𑀸𑀤𑀸𑀦𑀫𑀽𑀮𑀪𑀽𑀢𑁂 𑀓𑀸𑀫𑀼𑀧𑀸𑀤𑀸𑀦𑁂. 𑀢𑀲𑁆𑀲𑀸𑀢𑀺 𑀓𑀸𑀫𑀼𑀧𑀸𑀤𑀸𑀦𑀲𑁆𑀲. 𑀅𑀦𑀼𑀧𑀸𑀤𑀺𑀬𑀺𑀢𑁆𑀯𑀸𑀢𑀺 𑀙𑀦𑁆𑀤𑀭𑀸𑀕𑀯𑀲𑁂𑀦 𑀅𑀦𑀸𑀤𑀺𑀬𑀺𑀢𑁆𑀯𑀸, 𑀏𑀢𑁂𑀦 ‘‘𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑁄’’𑀢𑀺 𑀧𑀤𑀲𑁆𑀲 𑀬-𑀓𑀸𑀭𑀮𑁄𑀧𑁂𑀦 𑀲𑀫𑀸𑀲𑀪𑀸𑀯𑀁, 𑀩𑁆𑀬𑀸𑀲𑀪𑀸𑀯𑀁 𑀯𑀸 𑀤𑀲𑁆𑀲𑁂𑀢𑀺.

𑁩𑁭. ‘‘𑀇𑀫𑁂 ¶ 𑀔𑁄’’𑀢𑀺𑀆𑀤𑀺 𑀬𑀣𑀸𑀧𑀼𑀝𑁆𑀞𑀲𑁆𑀲 𑀥𑀫𑁆𑀫𑀲𑁆𑀲 𑀯𑀺𑀲𑁆𑀲𑀚𑁆𑀚𑀺𑀢𑀪𑀸𑀯𑁂𑀦 𑀦𑀺𑀕𑀫𑀦𑀯𑀘𑀦𑀁, ‘‘𑀧𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀧𑀚𑀸𑀦𑀦𑀫𑁂𑀯 𑀘 𑀇𑀫-𑀲𑀤𑁆𑀤𑁂𑀦 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑁂 𑀢𑁂’’𑀢𑀺𑀆𑀤𑀺𑀫𑀸𑀳. 𑀬𑁂 𑀢𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀥𑀫𑁆𑀫𑁂…𑀧𑁂… 𑀅𑀧𑀼𑀘𑁆𑀙𑀺𑀁, 𑀬𑁂𑀳𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀥𑀫𑁆𑀫𑁂𑀳𑀺…𑀧𑁂… 𑀯𑀤𑁂𑀬𑁆𑀬𑀼𑀁, 𑀢𑀜𑁆𑀘…𑀧𑁂… 𑀧𑀚𑀸𑀦𑀸𑀢𑀻𑀢𑀺 𑀏𑀯𑀁 𑀦𑀺𑀤𑁆𑀤𑀺𑀝𑁆𑀞𑀸 𑀇𑀫𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀥𑀫𑁆𑀫𑀸 𑀕𑀫𑁆𑀪𑀻𑀭𑀸…𑀧𑁂… 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀸 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀬𑁄𑀚𑀦𑀸. ‘‘𑀏𑀯’’𑀦𑁆𑀢𑀺𑀆𑀤𑀺 𑀧𑀺𑀡𑁆𑀟𑀢𑁆𑀣𑀤𑀲𑁆𑀲𑀦𑀁. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 ‘‘𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑁄 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄’’𑀢𑀺 𑀇𑀫𑀺𑀦𑀸 𑀅𑀕𑁆𑀕𑀫𑀕𑁆𑀕𑀨𑀮𑀼𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺, ‘‘𑀯𑁂𑀤𑀦𑀸𑀦𑀁, 𑀲𑀫𑀼𑀤𑀬𑀜𑁆𑀘𑀸’’𑀢𑀺𑀆𑀤𑀺𑀦𑀸 𑀘 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀁. 𑀢𑀣𑀸𑀧𑀺 𑀬𑀲𑁆𑀲𑀸 𑀥𑀫𑁆𑀫𑀥𑀸𑀢𑀼𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀇𑀫𑀁 𑀤𑀺𑀝𑁆𑀞𑀺𑀕𑀢𑀁 𑀲𑀓𑀸𑀭𑀡𑀁 𑀲𑀕𑀢𑀺𑀓𑀁 𑀧𑀪𑁂𑀤𑀢𑁄 𑀯𑀺𑀪𑀚𑀺𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺, 𑀢𑀲𑁆𑀲𑀸 𑀧𑀤𑀝𑁆𑀞𑀸𑀦𑁂𑀦 𑀘𑁂𑀯 𑀲𑀤𑁆𑀥𑀺𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀉𑀧𑁆𑀧𑀢𑁆𑀢𑀺𑀪𑀽𑀫𑀺𑀬𑀸 𑀘 𑀢𑀤𑁂𑀯 𑀧𑀸𑀓𑀝𑀢𑀭𑀁 𑀓𑀢𑁆𑀢𑀼𑀓𑀸𑀫𑁄 𑀥𑀫𑁆𑀫𑀭𑀸𑀚𑀸 𑀏𑀯𑀁 𑀤𑀲𑁆𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑀤𑁂𑀯 𑀦𑀺𑀬𑁆𑀬𑀸𑀢𑀺𑀢’’𑀦𑁆𑀢𑀺, 𑀦𑀺𑀕𑀫𑀺𑀢𑀁 𑀦𑀺𑀝𑁆𑀞𑀸𑀧𑀺𑀢𑀦𑁆𑀢𑀺 𑀅𑀢𑁆𑀣𑁄 ¶ . 𑀅𑀦𑁆𑀢𑀭𑀸𑀢𑀺 𑀧𑀼𑀘𑁆𑀙𑀺𑀢𑀯𑀺𑀲𑁆𑀲𑀚𑁆𑀚𑀺𑀢𑀥𑀫𑁆𑀫𑀤𑀲𑁆𑀲𑀦𑀯𑀘𑀦𑀸𑀦𑀫𑀦𑁆𑀢𑀭𑀸 𑀤𑀺𑀝𑁆𑀞𑀺𑀬𑁄 𑀯𑀺𑀪𑀢𑁆𑀢𑀸 𑀢𑀲𑁆𑀲 𑀧𑀚𑀸𑀦𑀦𑀸𑀓𑀸𑀭𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁄.

𑀧𑀞𑀫𑀪𑀸𑀡𑀯𑀸𑀭𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸.

𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀯𑀡𑁆𑀡𑀦𑀸

𑁩𑁮. ‘‘𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸’’𑀢𑀺 𑀢𑀤𑁆𑀥𑀺𑀢𑀧𑀤𑀁 𑀲𑀫𑀸𑀲𑀧𑀤𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀸’’𑀢𑀺 𑀯𑀼𑀢𑁆𑀢𑀁. 𑀲𑀢𑁆𑀢𑁂𑀲𑀼, 𑀲𑀗𑁆𑀔𑀸𑀭𑁂𑀲𑀼 𑀘 𑀏𑀓𑀘𑁆𑀘𑀁 𑀲𑀲𑁆𑀲𑀢𑀫𑁂𑀢𑀲𑁆𑀲𑀸𑀢𑀺 𑀏𑀓𑀘𑁆𑀘𑀲𑀲𑁆𑀲𑀢𑁄, 𑀯𑀸𑀤𑁄, 𑀲𑁄 𑀏𑀢𑁂𑀲𑀦𑁆𑀢𑀺 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸 𑀢𑀤𑁆𑀥𑀺𑀢𑀯𑀲𑁂𑀦, 𑀲𑀫𑀸𑀲𑀯𑀲𑁂𑀦 𑀧𑀦 𑀏𑀓𑀘𑁆𑀘𑀲𑀲𑁆𑀲𑀢𑁄 𑀯𑀸𑀤𑁄 𑀏𑀢𑁂𑀲𑀦𑁆𑀢𑀺 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀸. 𑀏𑀲 𑀦𑀬𑁄 𑀏𑀓𑀘𑁆𑀘𑀅𑀲𑀲𑁆𑀲𑀢𑀺𑀓𑀧𑀤𑁂𑀧𑀺. 𑀦𑀦𑀼 𑀘 ‘‘𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸’’𑀢𑀺 𑀯𑀼𑀢𑁆𑀢𑁂 𑀢𑀤𑀜𑁆𑀜𑁂𑀲𑀁 𑀏𑀓𑀘𑁆𑀘𑀅𑀲𑀲𑁆𑀲𑀢𑀺𑀓𑀪𑀸𑀯𑀲𑀦𑁆𑀦𑀺𑀝𑁆𑀞𑀸𑀦𑀁 𑀲𑀺𑀤𑁆𑀥𑀫𑁂𑀯𑀸𑀢𑀺? 𑀲𑀘𑁆𑀘𑀁 𑀅𑀢𑁆𑀣𑀢𑁄, 𑀲𑀤𑁆𑀤𑀢𑁄 𑀧𑀦 𑀅𑀲𑀺𑀤𑁆𑀥𑀫𑁂𑀯 𑀢𑀲𑁆𑀫𑀸 𑀲𑀤𑁆𑀤𑀢𑁄 𑀧𑀸𑀓𑀝𑀢𑀭𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀢𑀣𑀸 𑀯𑀼𑀢𑁆𑀢𑀁. 𑀦 𑀳𑀺 𑀇𑀥 𑀲𑀸𑀯𑀲𑁂𑀲𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀥𑀫𑁆𑀫𑀲𑁆𑀲𑀸𑀫𑀻. ‘‘𑀇𑀲𑁆𑀲𑀭𑁄 𑀦𑀺𑀘𑁆𑀘𑁄, 𑀅𑀜𑁆𑀜𑁂 𑀲𑀢𑁆𑀢𑀸 𑀅𑀦𑀺𑀘𑁆𑀘𑀸’’𑀢𑀺 𑀏𑀯𑀁𑀧𑀯𑀢𑁆𑀢𑀯𑀸𑀤𑀸 𑀲𑀢𑁆𑀢𑁂𑀓𑀘𑁆𑀘𑀲𑀲𑁆𑀲𑀢𑀺𑀓𑀸 𑀲𑁂𑀬𑁆𑀬𑀣𑀸𑀧𑀺 𑀇𑀲𑁆𑀲𑀭𑀯𑀸𑀤𑀸. 𑀢𑀣𑀸 ‘‘𑀦𑀺𑀘𑁆𑀘𑁄 𑀩𑁆𑀭𑀳𑁆𑀫𑀸, 𑀅𑀜𑁆𑀜𑁂 𑀅𑀦𑀺𑀘𑁆𑀘𑀸’’𑀢𑀺 𑀏𑀯𑀁𑀧𑀯𑀢𑁆𑀢𑀯𑀸𑀤𑀸𑀧𑀺. ‘‘𑀧𑀭𑀫𑀸𑀡𑀯𑁄 𑀦𑀺𑀘𑁆𑀘𑀸, 𑀤𑁆𑀯𑀺𑀅𑀡𑀼𑀓𑀸𑀤𑀬𑁄 𑀅𑀦𑀺𑀘𑁆𑀘𑀸’’𑀢𑀺 (𑀯𑀺𑀲𑀺𑀲𑀺𑀓𑀤𑀲𑁆𑀲𑀦𑁂 𑀲𑀢𑁆𑀢𑀫𑀧𑀭𑀺𑀘𑁆𑀙𑁂𑀤𑁂 𑀧𑀞𑀫𑀓𑀡𑁆𑀟𑁂 𑀧𑀲𑁆𑀲𑀺𑀢𑀩𑁆𑀩𑀁) 𑀏𑀯𑀁𑀧𑀯𑀢𑁆𑀢𑀯𑀸𑀤𑀸 𑀲𑀗𑁆𑀔𑀸𑀭𑁂𑀓𑀘𑁆𑀘𑀲𑀲𑁆𑀲𑀢𑀺𑀓𑀸 𑀲𑁂𑀬𑁆𑀬𑀣𑀸𑀧𑀺 𑀓𑀸𑀡𑀸𑀤𑀸. 𑀢𑀣𑀸 ‘‘𑀘𑀓𑁆𑀔𑀸𑀤𑀬𑁄 𑀅𑀦𑀺𑀘𑁆𑀘𑀸, 𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘’’𑀦𑁆𑀢𑀺 (𑀦𑁆𑀬𑀸𑀬𑀤𑀲𑁆𑀲𑀦𑁂, 𑀯𑀺𑀲𑁂𑀲𑀺𑀓𑀤𑀲𑁆𑀲𑀦𑁂 𑀘 𑀧𑀲𑁆𑀲𑀺𑀢𑀩𑁆𑀩𑀁) 𑀏𑀯𑀁𑀧𑀯𑀢𑁆𑀢𑀯𑀸𑀤𑀸𑀧𑀺 ¶ . 𑀇𑀥𑀸𑀢𑀺 ‘‘𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸’’𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂, 𑀇𑀫𑀺𑀲𑁆𑀲𑀸 𑀯𑀸 𑀤𑁂𑀲𑀦𑀸𑀬. 𑀕𑀳𑀺𑀢𑀸𑀢𑀺 𑀯𑀼𑀢𑁆𑀢𑀸, 𑀤𑁂𑀲𑀺𑀢𑀩𑁆𑀩𑀪𑀸𑀯𑁂𑀦 𑀯𑀸 𑀤𑁂𑀲𑀦𑀸𑀜𑀸𑀡𑁂𑀦 𑀲𑀫𑀸𑀤𑀺𑀦𑁆𑀦𑀸 𑀢𑀣𑀸 𑀘𑁂𑀯 𑀤𑁂𑀲𑀺𑀢𑀢𑁆𑀢𑀸. 𑀢𑀣𑀸 𑀳𑀺 𑀇𑀥 𑀧𑀼𑀭𑀺𑀫𑀓𑀸 𑀢𑀬𑁄 𑀯𑀸𑀤𑀸 𑀲𑀢𑁆𑀢𑀯𑀲𑁂𑀦, 𑀘𑀢𑀼𑀢𑁆𑀣𑁄 𑀲𑀗𑁆𑀔𑀸𑀭𑀯𑀲𑁂𑀦 𑀤𑁂𑀲𑀺𑀢𑁄. ‘‘𑀲𑀗𑁆𑀔𑀸𑀭𑁂𑀓𑀘𑁆𑀘𑀲𑀲𑁆𑀲𑀢𑀺𑀓𑀸’’𑀢𑀺 𑀇𑀤𑀁 𑀧𑀦 𑀢𑁂𑀳𑀺 𑀲𑀲𑁆𑀲𑀢𑀪𑀸𑀯𑁂𑀦 𑀕𑀬𑁆𑀳𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀬𑀸𑀣𑀸𑀯𑀲𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀧𑀦 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀫𑀢𑀤𑀲𑁆𑀲𑀦𑀯𑀲𑁂𑀦. 𑀢𑀲𑁆𑀲 𑀳𑀺 𑀲𑀲𑁆𑀲𑀢𑀸𑀪𑀺𑀫𑀢𑀁 𑀅𑀲𑀗𑁆𑀔𑀢𑀫𑁂𑀯𑀸𑀢𑀺 𑀮𑀤𑁆𑀥𑀺. 𑀢𑁂𑀦𑁂𑀯𑀸𑀳 𑀧𑀸𑀴𑀺𑀬𑀁 ‘‘𑀘𑀺𑀢𑁆𑀢𑀦𑁆𑀢𑀺 𑀯𑀸…𑀧𑁂… 𑀞𑀲𑁆𑀲𑀢𑀻’’𑀢𑀺. 𑀦 𑀳𑀺 𑀬𑀲𑁆𑀲 𑀲𑀪𑀸𑀯𑀲𑁆𑀲 𑀧𑀘𑁆𑀘𑀬𑁂𑀳𑀺 𑀅𑀪𑀺𑀲𑀗𑁆𑀔𑀢𑀪𑀸𑀯𑀁 𑀧𑀝𑀺𑀚𑀸𑀦𑀸𑀢𑀺, 𑀢𑀲𑁆𑀲𑁂𑀯 𑀦𑀺𑀘𑁆𑀘𑀥𑀼𑀯𑀸𑀤𑀺𑀪𑀸𑀯𑁄 𑀅𑀦𑀼𑀫𑁆𑀫𑀢𑁆𑀢𑀓𑁂𑀦 𑀲𑀓𑁆𑀓𑀸 𑀧𑀝𑀺𑀚𑀸𑀦𑀺𑀢𑀼𑀁, 𑀏𑀢𑁂𑀦 𑀘 ‘‘𑀉𑀧𑁆𑀧𑀸𑀤𑀯𑀬𑀥𑀼𑀯𑀢𑀸𑀬𑀼𑀢𑁆𑀢𑀸 𑀲𑀪𑀸𑀯𑀸 𑀲𑀺𑀬𑀸 𑀦𑀺𑀘𑁆𑀘𑀸, 𑀲𑀺𑀬𑀸 𑀅𑀦𑀺𑀘𑁆𑀘𑀸, 𑀲𑀺𑀬𑀸 ¶ 𑀦 𑀯𑀢𑁆𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑀝𑀻. 𑁧.𑁩𑁮) 𑀧𑀯𑀢𑁆𑀢𑀲𑀢𑁆𑀢𑀪𑀗𑁆𑀕𑀯𑀸𑀤𑀲𑁆𑀲 𑀅𑀬𑀼𑀢𑁆𑀢𑀢𑀸 𑀯𑀺𑀪𑀸𑀯𑀺𑀢𑀸 𑀳𑁄𑀢𑀺.

𑀢𑀢𑁆𑀭𑀸𑀬𑀁 𑀅𑀬𑀼𑀢𑁆𑀢𑀢𑀸𑀯𑀺𑀪𑀸𑀯𑀦𑀸 𑁋 𑀬𑀤𑀺 𑀳𑀺 ‘‘𑀬𑁂𑀦 𑀲𑀪𑀸𑀯𑁂𑀦 𑀬𑁄 𑀥𑀫𑁆𑀫𑁄 𑀅𑀢𑁆𑀣𑀻𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀦𑁂𑀯 𑀲𑀪𑀸𑀯𑁂𑀦 𑀲𑁄 𑀥𑀫𑁆𑀫𑁄 𑀦𑀢𑁆𑀣𑀻’’𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀲𑀺𑀬𑀸 𑀅𑀦𑁂𑀓𑀦𑁆𑀢𑀯𑀸𑀤𑁄. 𑀅𑀣 𑀅𑀜𑁆𑀜𑁂𑀦, 𑀦 𑀲𑀺𑀬𑀸 𑀅𑀦𑁂𑀓𑀦𑁆𑀢𑀯𑀸𑀤𑁄. 𑀦 𑀘𑁂𑀢𑁆𑀣 𑀤𑁂𑀲𑀦𑁆𑀢𑀭𑀸𑀤𑀺𑀲𑀫𑁆𑀩𑀦𑁆𑀥𑀪𑀸𑀯𑁄 𑀬𑀼𑀢𑁆𑀢𑁄 𑀯𑀢𑁆𑀢𑀼𑀁 𑀢𑀲𑁆𑀲 𑀲𑀩𑁆𑀩𑀮𑁄𑀓𑀲𑀺𑀤𑁆𑀥𑀢𑁆𑀢𑀸, 𑀯𑀺𑀯𑀸𑀤𑀸𑀪𑀸𑀯𑀢𑁄 𑀘. 𑀬𑁂 𑀧𑀦 𑀯𑀤𑀦𑁆𑀢𑀺 ‘‘𑀬𑀣𑀸 𑀲𑀼𑀯𑀡𑁆𑀡𑀖𑀝𑁂𑀦 𑀫𑀓𑀼𑀝𑁂 𑀓𑀢𑁂 𑀖𑀝𑀪𑀸𑀯𑁄 𑀦𑀲𑁆𑀲𑀢𑀺, 𑀫𑀓𑀼𑀝𑀪𑀸𑀯𑁄 𑀉𑀧𑁆𑀧𑀚𑁆𑀚𑀢𑀺, 𑀲𑀼𑀯𑀡𑁆𑀡𑀪𑀸𑀯𑁄 𑀢𑀺𑀝𑁆𑀞𑀢𑀺𑀬𑁂𑀯, 𑀏𑀯𑀁 𑀲𑀩𑁆𑀩𑀲𑀪𑀸𑀯𑀸𑀦𑀁 𑀓𑁄𑀘𑀺 𑀥𑀫𑁆𑀫𑁄 𑀦𑀲𑁆𑀲𑀢𑀺, 𑀓𑁄𑀘𑀺 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺, 𑀲𑀪𑀸𑀯𑁄 𑀏𑀯 𑀢𑀺𑀝𑁆𑀞𑀢𑀻’’𑀢𑀺. 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀓𑀺𑀁 𑀢𑀁 𑀲𑀼𑀯𑀡𑁆𑀡𑀁, 𑀬𑀁 𑀖𑀝𑁂, 𑀫𑀓𑀼𑀝𑁂 𑀘 𑀅𑀯𑀝𑁆𑀞𑀺𑀢𑀁, 𑀬𑀤𑀺 𑀭𑀽𑀧𑀸𑀤𑀺, 𑀲𑁄 𑀲𑀤𑁆𑀤𑁄 𑀯𑀺𑀬 𑀅𑀦𑀺𑀘𑁆𑀘𑁄. 𑀅𑀣 𑀭𑀽𑀧𑀸𑀤𑀺𑀲𑀫𑀽𑀳𑁄 𑀲𑀫𑁆𑀫𑀼𑀢𑀺𑀫𑀢𑁆𑀢𑀁, 𑀦 𑀢𑀲𑁆𑀲 𑀅𑀢𑁆𑀣𑀺𑀢𑀸 𑀯𑀸 𑀦𑀢𑁆𑀣𑀺𑀢𑀸 𑀯𑀸 𑀦𑀺𑀘𑁆𑀘𑀢𑀸 𑀯𑀸 𑀮𑀩𑁆𑀪𑀢𑀻’’𑀢𑀺, 𑀢𑀲𑁆𑀫𑀸 𑀅𑀦𑁂𑀓𑀦𑁆𑀢𑀯𑀸𑀤𑁄 𑀦 𑀲𑀺𑀬𑀸. 𑀥𑀫𑁆𑀫𑀸𑀦𑀜𑁆𑀘 𑀥𑀫𑁆𑀫𑀺𑀦𑁄 𑀅𑀜𑁆𑀜𑀣𑀸𑀦𑀜𑁆𑀜𑀣𑀸 𑀘 𑀧𑀯𑀢𑁆𑀢𑀺𑀬𑀁 𑀤𑁄𑀲𑁄 𑀯𑀼𑀢𑁆𑀢𑁄𑀬𑁂𑀯 𑀲𑀲𑁆𑀲𑀢𑀯𑀸𑀤𑀯𑀺𑀘𑀸𑀭𑀡𑀸𑀬𑀁. 𑀢𑀲𑁆𑀫𑀸 𑀲𑁄 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀺𑀘 𑀦 𑀦𑀺𑀘𑁆𑀘𑀸𑀦𑀺𑀘𑁆𑀘𑀦𑀯𑀢𑁆𑀢𑀩𑁆𑀩𑀭𑀽𑀧𑁄 𑀅𑀢𑁆𑀢𑀸, 𑀮𑁄𑀓𑁄 𑀘 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀢𑀸𑀧𑀭𑀺𑀚𑀸𑀦𑀦𑀢𑁄 𑀬𑀣𑀸 𑀦𑀺𑀘𑁆𑀘𑀸𑀤𑀻𑀦𑀁 𑀅𑀜𑁆𑀜𑀢𑀭𑀁 𑀭𑀽𑀧𑀁, 𑀬𑀣𑀸 𑀯𑀸 𑀤𑀻𑀧𑀸𑀤𑀬𑁄. 𑀦 𑀳𑀺 𑀭𑀽𑀧𑀸𑀤𑀻𑀦𑀁 𑀉𑀤𑀬𑀩𑁆𑀩𑀬𑀲𑀪𑀸𑀯𑀸𑀦𑀁 𑀦𑀺𑀘𑁆𑀘𑀸𑀦𑀺𑀘𑁆𑀘𑀦𑀯𑀢𑁆𑀢𑀩𑁆𑀩𑀲𑀪𑀸𑀯𑀢𑀸 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁, 𑀚𑀻𑀯𑀲𑁆𑀲 𑀘 𑀦𑀺𑀘𑁆𑀘𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀭𑀽𑀧𑀁 𑀲𑀺𑀬𑀸𑀢𑀺, 𑀏𑀯𑀁 𑀲𑀢𑁆𑀢𑀪𑀗𑁆𑀕𑁄 𑀯𑀺𑀬 𑀲𑁂𑀲𑀪𑀗𑁆𑀕𑀸𑀦𑀫𑁆𑀧𑀺 𑀅𑀲𑀫𑁆𑀪𑀯𑁄𑀬𑁂𑀯𑀸𑀢𑀺 𑀲𑀢𑁆𑀢𑀪𑀗𑁆𑀕𑀯𑀸𑀤𑀲𑁆𑀲 𑀅𑀬𑀼𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸 (𑀤𑀻. 𑀦𑀺. 𑀝𑀻. 𑁧.𑁩𑁮).

𑀦𑀦𑀼 𑀘 ‘‘𑀏𑀓𑀘𑁆𑀘𑁂 𑀥𑀫𑁆𑀫𑀸 𑀲𑀲𑁆𑀲𑀢𑀸, 𑀏𑀓𑀘𑁆𑀘𑁂 𑀅𑀲𑀲𑁆𑀲𑀢𑀸’’𑀢𑀺 𑀏𑀢𑀲𑁆𑀫𑀺𑀁 𑀯𑀸𑀤𑁂 𑀘𑀓𑁆𑀔𑀸𑀤𑀻𑀦𑀁 𑀅𑀲𑀲𑁆𑀲𑀢𑀪𑀸𑀯𑀲𑀦𑁆𑀦𑀺𑀝𑁆𑀞𑀸𑀦𑀁 𑀬𑀣𑀸𑀲𑀪𑀸𑀯𑀸𑀯𑀩𑁄𑀥𑁄 𑀏𑀯, 𑀅𑀣 𑀏𑀯𑀁𑀯𑀸𑀤𑀻𑀦𑀁 𑀓𑀣𑀁 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀲𑀺𑀬𑀸𑀢𑀺, 𑀓𑁄 𑀯𑀸 𑀏𑀯𑀫𑀸𑀳 ‘‘𑀘𑀓𑁆𑀔𑀸𑀤𑀻𑀦𑀁 𑀅𑀲𑀲𑁆𑀲𑀢𑀪𑀸𑀯𑀲𑀦𑁆𑀦𑀺𑀝𑁆𑀞𑀸𑀦𑀁 𑀫𑀺𑀘𑁆𑀙𑀸𑀤𑀲𑁆𑀲𑀦’’𑀦𑁆𑀢𑀺? 𑀅𑀲𑀲𑁆𑀲𑀢𑁂𑀲𑀼𑀬𑁂𑀯 𑀧𑀦 ¶ 𑀓𑁂𑀲𑀜𑁆𑀘𑀺 𑀥𑀫𑁆𑀫𑀸𑀦𑀁 𑀲𑀲𑁆𑀲𑀢𑀪𑀸𑀯𑀲𑀦𑁆𑀦𑀺𑀝𑁆𑀞𑀸𑀦𑀁 𑀇𑀥 𑀫𑀺𑀘𑁆𑀙𑀸𑀤𑀲𑁆𑀲𑀦𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, 𑀢𑁂𑀦 𑀧𑀦 𑀏𑀓𑀯𑀸𑀤𑁂 𑀧𑀯𑀢𑁆𑀢𑀫𑀸𑀦𑁂𑀦 𑀘𑀓𑁆𑀔𑀸𑀤𑀻𑀦𑀁 𑀅𑀲𑀲𑁆𑀲𑀢𑀪𑀸𑀯𑀸𑀯𑀩𑁄𑀥𑁄 𑀯𑀺𑀤𑀽𑀲𑀺𑀢𑁄 𑀲𑀁𑀲𑀝𑁆𑀞𑀪𑀸𑀯𑀢𑁄 𑀯𑀺𑀲𑀲𑀁𑀲𑀝𑁆𑀞𑁄 𑀯𑀺𑀬 𑀲𑀧𑁆𑀧𑀺𑀧𑀺𑀡𑁆𑀟𑁄, 𑀢𑀢𑁄 𑀘 𑀢𑀲𑁆𑀲 𑀲𑀓𑀺𑀘𑁆𑀘𑀓𑀭𑀡𑀸𑀲𑀫𑀢𑁆𑀣𑀢𑀸𑀬 𑀲𑀫𑁆𑀫𑀸𑀤𑀲𑁆𑀲𑀦𑀧𑀓𑁆𑀔𑁂 𑀞𑀧𑁂𑀢𑀩𑁆𑀩𑀢𑀁 𑀦𑀸𑀭𑀳𑀢𑀻𑀢𑀺. 𑀅𑀲𑀲𑁆𑀲𑀢𑀪𑀸𑀯𑁂𑀦 𑀦𑀺𑀘𑁆𑀙𑀺𑀢𑀸𑀧𑀺 𑀯𑀸 𑀘𑀓𑁆𑀔𑀼𑀆𑀤𑀬𑁄 ¶ 𑀲𑀫𑀸𑀭𑁄𑀧𑀺𑀢𑀚𑀻𑀯𑀲𑀪𑀸𑀯𑀸 𑀏𑀯 𑀤𑀺𑀝𑁆𑀞𑀺𑀕𑀢𑀺𑀓𑁂𑀳𑀺 𑀕𑀬𑁆𑀳𑀦𑁆𑀢𑀻𑀢𑀺 𑀢𑀤𑀯𑀩𑁄𑀥𑀲𑁆𑀲 𑀫𑀺𑀘𑁆𑀙𑀸𑀤𑀲𑁆𑀲𑀦𑀪𑀸𑀯𑁄 𑀦 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁. 𑀢𑁂𑀦𑁂𑀯𑀸𑀳 𑀧𑀸𑀴𑀺𑀬𑀁 ‘‘𑀘𑀓𑁆𑀔𑀼𑀁 𑀇𑀢𑀺𑀧𑀺…𑀧𑁂… 𑀓𑀸𑀬𑁄 𑀇𑀢𑀺𑀧𑀺 𑀅𑀬𑀁 𑀅𑀢𑁆𑀢𑀸’’𑀢𑀺𑀆𑀤𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀲𑀗𑁆𑀔𑀢𑀸𑀬, 𑀲𑀗𑁆𑀔𑀢𑀸𑀬 𑀘 𑀥𑀸𑀢𑀼𑀬𑀸 𑀯𑀲𑁂𑀦 𑀬𑀣𑀸𑀓𑁆𑀓𑀫𑀁 ‘‘𑀏𑀓𑀘𑁆𑀘𑁂 𑀥𑀫𑁆𑀫𑀸 𑀲𑀲𑁆𑀲𑀢𑀸, 𑀏𑀓𑀘𑁆𑀘𑁂 𑀅𑀲𑀲𑁆𑀲𑀢𑀸’’𑀢𑀺 𑀏𑀯𑀁𑀧𑀯𑀢𑁆𑀢𑁄 𑀯𑀺𑀪𑀚𑁆𑀚𑀯𑀸𑀤𑁄𑀧𑀺 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑁄𑀬𑁂𑀯 𑀪𑀯𑁂𑀬𑁆𑀬𑀸𑀢𑀺 𑀏𑀯𑀫𑁆𑀧𑀓𑀸𑀭𑀸 𑀘𑁄𑀤𑀦𑀸 𑀅𑀦𑀯𑀓𑀸𑀲𑀸 𑀳𑁄𑀢𑀺 𑀅𑀯𑀺𑀧𑀭𑀻𑀢𑀥𑀫𑁆𑀫𑀲𑀪𑀸𑀯𑀧𑀝𑀺𑀧𑀢𑁆𑀢𑀺𑀪𑀸𑀯𑀢𑁄. 𑀅𑀯𑀺𑀧𑀭𑀻𑀢𑀥𑀫𑁆𑀫𑀲𑀪𑀸𑀯𑀧𑀝𑀺𑀧𑀢𑁆𑀢𑀺𑀬𑁂𑀯 𑀳𑁂𑀲 𑀯𑀼𑀢𑁆𑀢𑀦𑀬𑁂𑀦 𑀅𑀲𑀁𑀲𑀝𑁆𑀞𑀢𑁆𑀢𑀸, 𑀅𑀦𑀸𑀭𑁄𑀧𑀺𑀢𑀚𑀻𑀯𑀲𑀪𑀸𑀯𑀢𑁆𑀢𑀸 𑀘.

𑀏𑀢𑁆𑀣𑀸𑀳 𑁋 𑀧𑀼𑀭𑀺𑀫𑀲𑁆𑀫𑀺𑀫𑁆𑀧𑀺𑀲𑀲𑁆𑀲𑀢𑀯𑀸𑀤𑁂 𑀅𑀲𑀲𑁆𑀲𑀢𑀸𑀦𑀁 𑀥𑀫𑁆𑀫𑀸𑀦𑀁 ‘‘𑀲𑀲𑁆𑀲𑀢𑀸’’𑀢𑀺 𑀕𑀳𑀡𑀁 𑀯𑀺𑀲𑁂𑀲𑀢𑁄 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀪𑀯𑀢𑀺. 𑀲𑀲𑁆𑀲𑀢𑀸𑀦𑀁 𑀧𑀦 ‘‘𑀲𑀲𑁆𑀲𑀢𑀸’’𑀢𑀺 𑀕𑀸𑀳𑁄 𑀦 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀬𑀣𑀸𑀲𑀪𑀸𑀯𑀕𑁆𑀕𑀸𑀳𑀪𑀸𑀯𑀢𑁄. 𑀏𑀯𑀜𑁆𑀘 𑀲𑀢𑀺 𑀇𑀫𑀲𑁆𑀲 𑀯𑀸𑀤𑀲𑁆𑀲 𑀯𑀸𑀤𑀦𑁆𑀢𑀭𑀢𑀸 𑀦 𑀯𑀢𑁆𑀢𑀩𑁆𑀩𑀸, 𑀇𑀥 𑀯𑀺𑀬 𑀧𑀼𑀭𑀺𑀫𑁂𑀧𑀺 𑀏𑀓𑀘𑁆𑀘𑁂𑀲𑁆𑀯𑁂𑀯 𑀥𑀫𑁆𑀫𑁂𑀲𑀼 𑀲𑀲𑁆𑀲𑀢𑀕𑁆𑀕𑀸𑀳𑀲𑀫𑁆𑀪𑀯𑀢𑁄𑀢𑀺, 𑀯𑀢𑁆𑀢𑀩𑁆𑀩𑀸𑀬𑁂𑀯 𑀅𑀲𑀲𑁆𑀲𑀢𑁂𑀲𑁆𑀯𑁂𑀯 ‘‘𑀓𑁂𑀘𑀺𑀤𑁂𑀯 𑀥𑀫𑁆𑀫𑀸 𑀲𑀲𑁆𑀲𑀢𑀸, 𑀓𑁂𑀘𑀺 𑀅𑀲𑀲𑁆𑀲𑀢𑀸’’𑀢𑀺 𑀧𑀭𑀺𑀓𑀧𑁆𑀧𑀦𑀸𑀯𑀲𑁂𑀦 𑀕𑀳𑁂𑀢𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀪𑀸𑀕𑀧𑁆𑀧𑀯𑀢𑁆𑀢𑀺𑀬𑀸 𑀇𑀫𑀲𑁆𑀲 𑀯𑀸𑀤𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸. 𑀦𑀦𑀼 𑀘 𑀏𑀓𑀤𑁂𑀲𑀲𑁆𑀲 𑀲𑀫𑀼𑀤𑀸𑀬𑀦𑁆𑀢𑁄𑀕𑀥𑀢𑁆𑀢𑀸 𑀅𑀬𑀁 𑀲𑀧𑁆𑀧𑀤𑁂𑀲𑀲𑀲𑁆𑀲𑀢𑀕𑁆𑀕𑀸𑀳𑁄 𑀧𑀼𑀭𑀺𑀫𑀲𑁆𑀫𑀺𑀁 𑀦𑀺𑀧𑁆𑀧𑀤𑁂𑀲𑀲𑀲𑁆𑀲𑀢𑀕𑁆𑀕𑀸𑀳𑁂 𑀲𑀫𑁄𑀥𑀸𑀦𑀁 𑀕𑀘𑁆𑀙𑁂𑀬𑁆𑀬𑀸𑀢𑀻? 𑀢𑀣𑀸𑀧𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀯𑀸𑀤𑀻 𑀢𑀩𑁆𑀩𑀺𑀲𑀬𑀯𑀺𑀲𑁂𑀲𑀯𑀲𑁂𑀦 𑀯𑀸𑀤𑀤𑁆𑀯𑀬𑀲𑁆𑀲 𑀧𑀯𑀢𑁆𑀢𑀢𑁆𑀢𑀸. 𑀅𑀜𑁆𑀜𑁂 𑀏𑀯 𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑀸 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀲𑀲𑁆𑀲𑀢𑀸’’𑀢𑀺 𑀅𑀪𑀺𑀦𑀺𑀯𑀺𑀝𑁆𑀞𑀸, 𑀅𑀜𑁆𑀜𑁂 ‘‘𑀏𑀓𑀘𑁆𑀘𑁂𑀯 𑀲𑀲𑁆𑀲𑀢𑀸, 𑀏𑀓𑀘𑁆𑀘𑁂 𑀅𑀲𑀲𑁆𑀲𑀢𑀸’’𑀢𑀺. 𑀲𑀗𑁆𑀔𑀸𑀭𑀸𑀦𑀁 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁, 𑀏𑀓𑀤𑁂𑀲𑀧𑀭𑀺𑀕𑁆𑀕𑀳𑁄 𑀘 𑀯𑀸𑀤𑀤𑁆𑀯𑀬𑀲𑁆𑀲 𑀧𑀭𑀺𑀩𑁆𑀬𑀢𑁆𑀢𑁄𑀬𑁂𑀯. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀅𑀦𑁂𑀓𑀯𑀺𑀥𑀲𑀫𑀼𑀲𑁆𑀲𑀬𑁂, 𑀏𑀓𑀯𑀺𑀥𑀲𑀫𑀼𑀲𑁆𑀲𑀬𑁂 𑀘 𑀔𑀦𑁆𑀥𑀧𑀩𑀦𑁆𑀥𑁂𑀦 𑀅𑀪𑀺𑀦𑀺𑀯𑁂𑀲𑀪𑀸𑀯𑀢𑁄 𑀢𑀣𑀸 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀘𑀢𑀼𑀩𑁆𑀩𑀺𑀥𑁄𑀧𑀺 𑀳𑀺 𑀲𑀲𑁆𑀲𑀢𑀯𑀸𑀤𑀻 𑀚𑀸𑀢𑀺𑀯𑀺𑀲𑁂𑀲𑀯𑀲𑁂𑀦 𑀦𑀸𑀦𑀸𑀯𑀺𑀥𑀭𑀽𑀧𑀓𑀸𑀬𑀲𑀦𑁆𑀦𑀺𑀲𑁆𑀲𑀬𑁂 𑀏𑀯 𑀅𑀭𑀽𑀧𑀥𑀫𑁆𑀫𑀧𑀼𑀜𑁆𑀚𑁂 𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑀻 𑀚𑀸𑀢𑁄 𑀅𑀪𑀺𑀜𑁆𑀜𑀸𑀡𑁂𑀦, 𑀅𑀦𑀼𑀲𑁆𑀲𑀯𑀸𑀤𑀻𑀳𑀺 𑀘 𑀭𑀽𑀧𑀓𑀸𑀬𑀪𑁂𑀤𑀕𑀳𑀡𑀢𑁄. 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀢𑀢𑁄 𑀘𑀼𑀢𑁄 𑀅𑀫𑀼𑀢𑁆𑀭 𑀉𑀤𑀧𑀸𑀤𑀺’’𑀦𑁆𑀢𑀺, (𑀤𑀻. 𑀦𑀺. 𑁧.𑁨𑁪𑁪; 𑀫. 𑀦𑀺. 𑁧.𑁧𑁪𑁮; 𑀧𑀸𑀭𑀸. 𑁧𑁨) ‘‘𑀘𑀯𑀦𑁆𑀢𑀺 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁫𑁫; 𑀫. 𑀦𑀺. 𑁧.𑁧𑁪𑁮; 𑀧𑀸𑀭𑀸. 𑁧𑁨) 𑀘 𑀆𑀤𑀺. 𑀯𑀺𑀲𑁂𑀲𑀮𑀸𑀪𑀻 𑀧𑀦 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑁄 𑀅𑀦𑀼𑀧𑀥𑀸𑀭𑀺𑀢𑀪𑁂𑀤𑀲𑀫𑀼𑀲𑁆𑀲𑀬𑁂 𑀥𑀫𑁆𑀫𑀧𑀩𑀦𑁆𑀥𑁂 𑀲𑀲𑁆𑀲𑀢𑀸𑀓𑀸𑀭𑀕𑀳𑀡𑁂𑀦 𑀅𑀪𑀺𑀦𑀺𑀯𑁂𑀲𑀁 𑀚𑀦𑁂𑀲𑀺 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀔𑀦𑁆𑀥𑀲𑀦𑁆𑀢𑀸𑀦𑀯𑀺𑀲𑀬𑀢𑁆𑀢𑀸 𑀢𑀤𑀪𑀺𑀦𑀺𑀯𑁂𑀲𑀲𑁆𑀲. 𑀢𑀣𑀸 𑀳𑀺 𑀢𑀻𑀲𑀼𑀧𑀺 𑀯𑀸𑀤𑁂𑀲𑀼 ‘‘𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺 ¶ , 𑀢𑀢𑁄 𑀧𑀭𑀁 𑀦𑀸𑀦𑀼𑀲𑁆𑀲𑀭𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀢𑀓𑁆𑀓𑀻𑀦𑀁 𑀧𑀦 𑀉𑀪𑀺𑀦𑁆𑀦𑀫𑁆𑀧𑀺 ¶ 𑀲𑀲𑁆𑀲𑀢𑁂𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀻𑀦𑀁 𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑀯𑀺𑀲𑁂𑀲𑁄 𑀭𑀽𑀧𑀸𑀭𑀽𑀧𑀥𑀫𑁆𑀫𑀯𑀺𑀲𑀬𑀢𑀸𑀬 𑀲𑀼𑀧𑀸𑀓𑀝𑁄𑀬𑁂𑀯𑀸𑀢𑀺.

𑁩𑁯. 𑀲𑀁𑀯𑀝𑁆𑀝𑀝𑁆𑀞𑀸𑀬𑀻𑀯𑀺𑀯𑀝𑁆𑀝𑀯𑀺𑀯𑀝𑁆𑀝𑀝𑁆𑀞𑀸𑀬𑀻𑀲𑀗𑁆𑀔𑀸𑀢𑀸𑀦𑀁 𑀢𑀺𑀡𑁆𑀡𑀫𑁆𑀧𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀸𑀦𑀫𑀢𑀺𑀓𑁆𑀓𑀫𑁂𑀦 𑀧𑀼𑀦 𑀲𑀁𑀯𑀝𑁆𑀝𑀦𑀢𑁄, 𑀅𑀤𑁆𑀥𑀸-𑀲𑀤𑁆𑀤𑀲𑁆𑀲 𑀘 𑀓𑀸𑀮𑀧𑀭𑀺𑀬𑀸𑀬𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀤𑀻𑀖𑀲𑁆𑀲𑀸’’𑀢𑀺𑀆𑀤𑀺. 𑀅𑀢𑀺𑀓𑁆𑀓𑀫𑁆𑀫 𑀅𑀬𑀦𑀁 𑀧𑀯𑀢𑁆𑀢𑀦𑀁 𑀅𑀘𑁆𑀘𑀬𑁄. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀁, 𑀉𑀧𑀲𑀕𑁆𑀕𑀯𑀲𑁂𑀦 𑀘 𑀅𑀢𑁆𑀣𑀯𑀺𑀲𑁂𑀲𑀯𑀸𑀘𑀓𑀢𑁆𑀢𑀸 𑀲𑀁-𑀲𑀤𑁆𑀤𑁂𑀦 𑀬𑀼𑀢𑁆𑀢𑁄 𑀯𑀝𑁆𑀝-𑀲𑀤𑁆𑀤𑁄 𑀯𑀺𑀦𑀸𑀲𑀯𑀸𑀘𑀻𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀦𑀲𑁆𑀲𑀢𑀻’’𑀢𑀺, 𑀯𑀢𑀼-𑀲𑀤𑁆𑀤𑁄 𑀯𑀸 𑀕𑀢𑀺𑀬𑀫𑁂𑀯. 𑀲𑀗𑁆𑀔𑀬𑀢𑁆𑀣𑀚𑁄𑀢𑀓𑁂𑀦 𑀧𑀦 𑀲𑀁-𑀲𑀤𑁆𑀤𑁂𑀦 𑀬𑀼𑀢𑁆𑀢𑀢𑁆𑀢𑀸 𑀢𑀤𑀢𑁆𑀣𑀲𑀫𑁆𑀩𑀦𑁆𑀥𑀦𑁂𑀦 𑀯𑀺𑀦𑀸𑀲𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀯𑀺𑀦𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸. 𑀲𑀗𑁆𑀔𑀬𑀯𑀲𑁂𑀦 𑀯𑀢𑁆𑀢𑀢𑀻𑀢𑀺 𑀳𑀺 𑀲𑀤𑁆𑀤𑀢𑁄 𑀅𑀢𑁆𑀣𑁄, 𑀢-𑀓𑀸𑀭𑀲𑁆𑀲 𑀘𑁂𑀢𑁆𑀣 𑀝-𑀓𑀸𑀭𑀸𑀤𑁂𑀲𑁄. 𑀯𑀺𑀧𑀢𑁆𑀢𑀺𑀓𑀭𑀫𑀳𑀸𑀫𑁂𑀖𑀲𑀫𑀼𑀧𑁆𑀧𑀢𑁆𑀢𑀺𑀢𑁆𑀢𑁄 𑀳𑀺 𑀧𑀝𑁆𑀞𑀸𑀬 𑀬𑀸𑀯 𑀅𑀡𑀼𑀲𑀳𑀕𑀢𑁄𑀧𑀺 𑀲𑀗𑁆𑀔𑀸𑀭𑁄 𑀦 𑀳𑁄𑀢𑀺, 𑀢𑀸𑀯 𑀮𑁄𑀓𑁄 𑀲𑀁𑀯𑀝𑁆𑀝𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀧𑀸𑀴𑀺𑀬𑀁 𑀮𑁄𑀓𑁄𑀢𑀺 𑀧𑀣𑀯𑀻𑀆𑀤𑀺𑀪𑀸𑀚𑀦𑀮𑁄𑀓𑁄 𑀅𑀥𑀺𑀧𑁆𑀧𑁂𑀢𑁄 𑀢𑀤𑀯𑀲𑁂𑀲𑀲𑁆𑀲 𑀩𑀸𑀳𑀼𑀮𑁆𑀮𑀢𑁄, 𑀢𑀤𑁂𑀯 𑀲𑀦𑁆𑀥𑀸𑀬 ‘‘𑀬𑁂𑀪𑀼𑀬𑁆𑀬𑁂𑀦𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀬𑁂’’𑀢𑀺𑀆𑀤𑀺𑀦𑀸. 𑀉𑀧𑀭𑀺𑀩𑁆𑀭𑀳𑁆𑀫𑀮𑁄𑀓𑁂𑀲𑀽𑀢𑀺 𑀆𑀪𑀲𑁆𑀲𑀭𑀪𑀽𑀫𑀺𑀢𑁄 𑀉𑀧𑀭𑀺𑀪𑀽𑀫𑀻𑀲𑀼. 𑀅𑀕𑁆𑀕𑀺𑀦𑀸 𑀓𑀧𑁆𑀧𑀯𑀼𑀝𑁆𑀞𑀸𑀦𑀜𑁆𑀳𑀺 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀢𑁂𑀦𑁂𑀯𑀸𑀳 𑀧𑀸𑀴𑀺𑀬𑀁 ‘‘𑀆𑀪𑀲𑁆𑀲𑀭𑀲𑀁𑀯𑀢𑁆𑀢𑀦𑀺𑀓𑀸 𑀳𑁄𑀦𑁆𑀢𑀻’’𑀢𑀺. 𑀓𑀲𑁆𑀫𑀸 𑀢𑀤𑁂𑀯 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀢𑀲𑁆𑀲𑁂𑀯 𑀩𑀳𑀼𑀮𑀁 𑀧𑀯𑀢𑁆𑀢𑀦𑀢𑁄. 𑀅𑀬𑀜𑁆𑀳𑀺 𑀯𑀸𑀭𑀦𑀺𑀬𑀫𑁄 𑁋

‘‘𑀲𑀢𑁆𑀢𑀲𑀢𑁆𑀢𑀕𑁆𑀕𑀺𑀦𑀸 𑀯𑀸𑀭𑀸, 𑀅𑀝𑁆𑀞𑀫𑁂 𑀅𑀝𑁆𑀞𑀫𑁂 𑀤𑀓𑀸;

𑀘𑀢𑀼𑀲𑀝𑁆𑀞𑀺 𑀬𑀤𑀸 𑀧𑀼𑀡𑁆𑀡𑀸, 𑀏𑀓𑁄 𑀯𑀸𑀬𑀼𑀯𑀭𑁄 𑀲𑀺𑀬𑀸’’𑀢𑀺. (𑀅𑀪𑀺𑀥𑀫𑁆𑀫𑀢𑁆𑀣𑀯𑀺𑀪𑀸𑀯𑀦𑀻𑀝𑀻𑀓𑀸𑀬 𑀧𑀜𑁆𑀘𑀫𑀧𑀭𑀺𑀘𑁆𑀙𑁂𑀤𑀯𑀡𑁆𑀡𑀦𑀸𑀬𑀫𑁆𑀧𑀺);

𑀆𑀭𑀼𑀧𑁆𑀧𑁂𑀲𑀼 𑀯𑀸𑀢𑀺 𑀏𑀢𑁆𑀣 𑀯𑀺𑀓𑀧𑁆𑀧𑀦𑀢𑁆𑀣𑁂𑀦 𑀯𑀸-𑀲𑀤𑁆𑀤𑁂𑀦 𑀲𑀁𑀯𑀝𑁆𑀝𑀫𑀸𑀦𑀮𑁄𑀓𑀥𑀸𑀢𑀽𑀳𑀺 𑀅𑀜𑁆𑀜𑀮𑁄𑀓𑀥𑀸𑀢𑀽𑀲𑀼 𑀯𑀸𑀢𑀺 𑀯𑀺𑀓𑀧𑁆𑀧𑁂𑀢𑀺. 𑀦 𑀳𑀺 𑀲𑀩𑁆𑀩𑁂 𑀅𑀧𑀸𑀬𑀲𑀢𑁆𑀢𑀸 𑀢𑀤𑀸 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁 𑀅𑀧𑀸𑀬𑁂𑀲𑀼 𑀤𑀻𑀖𑀢𑀭𑀸𑀬𑀼𑀓𑀸𑀦𑀁 𑀫𑀦𑀼𑀲𑁆𑀲𑀮𑁄𑀓𑀽𑀧𑀧𑀢𑁆𑀢𑀺𑀬𑀸 𑀅𑀲𑀫𑁆𑀪𑀯𑀢𑁄, 𑀫𑀦𑀼𑀲𑁆𑀲𑀮𑁄𑀓𑀽𑀧𑀧𑀢𑁆𑀢𑀺𑀜𑁆𑀘 𑀯𑀺𑀦𑀸 𑀢𑀤𑀸 𑀢𑁂𑀲𑀁 𑀢𑀢𑁆𑀭𑀽𑀧𑀧𑀢𑁆𑀢𑀺𑀬𑀸 𑀅𑀦𑀼𑀧𑀧𑀢𑁆𑀢𑀺𑀢𑁄. 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄𑀧𑀺 𑀳𑀺 𑀲𑀁𑀯𑀝𑁆𑀞𑀫𑀸𑀦𑁂 𑀓𑀧𑁆𑀧𑁂 𑀦𑀺𑀭𑀬𑀢𑁄 𑀦 𑀫𑀼𑀘𑁆𑀘𑀢𑀺, 𑀧𑀺𑀝𑁆𑀞𑀺𑀘𑀓𑁆𑀓𑀯𑀸𑀴𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀅𑀝𑁆𑀞𑀓𑀣𑀸𑀲𑀼 (𑀅. 𑀦𑀺. 𑀅𑀝𑁆𑀞. 𑁧.𑁩𑁧𑁧) 𑀯𑀼𑀢𑁆𑀢𑀁. 𑀲𑀢𑀺𑀧𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀫𑀦𑀲𑀸 𑀦𑀺𑀩𑁆𑀩𑀢𑁆𑀢𑀪𑀸𑀯𑁂 𑀩𑀸𑀳𑀺𑀭𑀧𑀘𑁆𑀘𑀬𑁂𑀳𑀺 𑀯𑀺𑀦𑀸 𑀫𑀦𑀲𑀸𑀯 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 ¶ 𑀭𑀽𑀧𑀸𑀯𑀘𑀭𑀲𑀢𑁆𑀢𑀸 𑀏𑀯 ‘‘𑀫𑀦𑁄𑀫𑀬𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀦 𑀧𑀦 𑀩𑀸𑀳𑀺𑀭𑀧𑀘𑁆𑀘𑀬𑀧𑀝𑀺𑀬𑀢𑁆𑀢𑀸 𑀢𑀤𑀜𑁆𑀜𑁂𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀫𑀦𑁄𑀫𑀬𑀸’’𑀢𑀺 𑀆𑀳. 𑀬𑀤𑁂𑀯𑀁 𑀓𑀸𑀫𑀸𑀯𑀘𑀭𑀲𑀢𑁆𑀢𑀸𑀦𑀫𑁆𑀧𑀺 𑀑𑀧𑀧𑀸𑀢𑀺𑀓𑀸𑀦𑀁 𑀫𑀦𑁄𑀫𑀬𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺, 𑀅𑀥𑀺𑀘𑀺𑀢𑁆𑀢𑀪𑀽𑀢𑁂𑀦 𑀅𑀢𑀺𑀲𑀬𑀫𑀦𑀲𑀸 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑁂𑀲𑀼𑀬𑁂𑀯 𑀫𑀦𑁄𑀫𑀬𑀯𑁄𑀳𑀸𑀭𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁂𑀦 𑀛𑀸𑀦-𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 ¶ ‘‘𑀛𑀸𑀦𑀫𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀫𑁆𑀧𑀺 𑀅𑀭𑀽𑀧𑀸𑀯𑀘𑀭𑀲𑀢𑁆𑀢𑀸𑀦𑀁 𑀫𑀦𑁄𑀫𑀬𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺? 𑀦 𑀢𑀢𑁆𑀣 𑀩𑀸𑀳𑀺𑀭𑀧𑀘𑁆𑀘𑀬𑁂𑀳𑀺 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀢𑀸𑀲𑀗𑁆𑀓𑀸𑀬 𑀅𑀪𑀸𑀯𑁂𑀦 𑀫𑀦𑀲𑀸 𑀏𑀯 𑀦𑀺𑀩𑁆𑀩𑀢𑁆𑀢𑀸𑀢𑀺 𑀅𑀯𑀥𑀸𑀭𑀡𑀸𑀲𑀫𑁆𑀪𑀯𑀢𑁄. 𑀦𑀺𑀭𑀼𑀴𑁆𑀳𑁄𑀯𑀸𑀬𑀁 𑀮𑁄𑀓𑁂 𑀫𑀦𑁄𑀫𑀬𑀯𑁄𑀳𑀸𑀭𑁄 𑀭𑀽𑀧𑀸𑀯𑀘𑀭𑀲𑀢𑁆𑀢𑁂𑀲𑀼. 𑀢𑀣𑀸 𑀳𑀺 𑀅𑀦𑁆𑀦𑀫𑀬𑁄 𑀧𑀸𑀦𑀫𑀬𑁄 𑀫𑀦𑁄𑀫𑀬𑁄 𑀆𑀦𑀦𑁆𑀤𑀫𑀬𑁄 𑀯𑀺𑀜𑁆𑀜𑀸𑀡𑀫𑀬𑁄𑀢𑀺 𑀧𑀜𑁆𑀘𑀥𑀸 𑀅𑀢𑁆𑀢𑀸𑀦𑀁 𑀯𑁂𑀤𑀯𑀸𑀤𑀺𑀦𑁄 𑀧𑀭𑀺𑀓𑀧𑁆𑀧𑁂𑀦𑁆𑀢𑀺. 𑀉𑀘𑁆𑀙𑁂𑀤𑀯𑀸𑀤𑁂𑀧𑀺 𑀯𑀓𑁆𑀔𑀢𑀺 ‘‘𑀤𑀺𑀩𑁆𑀩𑁄 𑀭𑀽𑀧𑀻 𑀫𑀦𑁄𑀫𑀬𑁄’’𑀢𑀺, (𑀤𑀻. 𑀦𑀺. 𑁧.𑁮𑁭) 𑀢𑁂 𑀧𑀦 𑀛𑀸𑀦𑀸𑀦𑀼𑀪𑀸𑀯𑀢𑁄 𑀧𑀻𑀢𑀺𑀪𑀓𑁆𑀔𑀸 𑀲𑀬𑀁𑀧𑀪𑀸 𑀅𑀦𑁆𑀢𑀮𑀺𑀓𑁆𑀔𑀘𑀭𑀸𑀢𑀺 𑀆𑀳 ‘‘𑀧𑀻𑀢𑀺 𑀢𑁂𑀲’’𑀦𑁆𑀢𑀺𑀆𑀤𑀺, 𑀢𑁂𑀲𑀁 𑀅𑀢𑁆𑀢𑀦𑁄𑀯 𑀧𑀪𑀸 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀲𑁄𑀪𑀦𑀸 𑀯𑀸 𑀞𑀸𑀬𑀻 𑀲𑀪𑀸 𑀏𑀢𑁂𑀲𑀦𑁆𑀢𑀺 𑀲𑀼𑀪𑀝𑁆𑀞𑀸𑀬𑀺𑀦𑁄𑀢𑀺𑀧𑀺 𑀬𑀼𑀚𑁆𑀚𑀢𑀺. 𑀉𑀓𑁆𑀓𑀁𑀲𑁂𑀦𑀸𑀢𑀺 𑀆𑀪𑀲𑁆𑀲𑀭𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀭𑀺𑀢𑁆𑀢𑀸𑀪𑀸𑀧𑁆𑀧𑀫𑀸𑀡𑀸𑀪𑀸 𑀧𑀦 𑀤𑁆𑀯𑁂, 𑀘𑀢𑁆𑀢𑀸𑀭𑁄 𑀘 𑀓𑀧𑁆𑀧𑁂 𑀢𑀺𑀝𑁆𑀞𑀦𑁆𑀢𑀺. 𑀅𑀝𑁆𑀞 𑀓𑀧𑁆𑀧𑁂𑀢𑀺 𑀘𑀢𑀼𑀦𑁆𑀦𑀫𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀸𑀦𑀁 𑀲𑀫𑀼𑀤𑀸𑀬𑀪𑀽𑀢𑁂 𑀅𑀝𑁆𑀞 𑀫𑀳𑀸𑀓𑀧𑁆𑀧𑁂.

𑁪𑁦. 𑀯𑀺𑀦𑀸𑀲𑀯𑀸𑀘𑀻𑀬𑁂𑀯 𑀯𑀝𑁆𑀝-𑀲𑀤𑁆𑀤𑁄 𑀧𑀝𑀺𑀲𑁂𑀥𑀚𑁄𑀢𑀓𑁂𑀦 𑀉𑀧𑀲𑀕𑁆𑀕𑁂𑀦 𑀬𑀼𑀢𑁆𑀢𑀢𑁆𑀢𑀸 𑀲𑀡𑁆𑀞𑀸𑀳𑀦𑀢𑁆𑀣𑀜𑀸𑀧𑀓𑁄𑀢𑀺 𑀆𑀳 ‘‘𑀲𑀡𑁆𑀞𑀸𑀢𑀻’’𑀢𑀺, 𑀅𑀦𑁂𑀓𑀢𑁆𑀣𑀢𑁆𑀢𑀸 𑀯𑀸 𑀥𑀸𑀢𑀽𑀦𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀯𑀟𑁆𑀠𑀢𑀻𑀢𑀺 𑀯𑀸 𑀅𑀢𑁆𑀣𑁄. 𑀲𑀫𑁆𑀧𑀢𑁆𑀢𑀺𑀫𑀳𑀸𑀫𑁂𑀖𑀲𑀫𑀼𑀧𑁆𑀧𑀢𑁆𑀢𑀺𑀢𑁄 𑀳𑀺 𑀧𑀝𑁆𑀞𑀸𑀬 𑀧𑀣𑀯𑀻𑀲𑀦𑁆𑀥𑀸𑀭𑀓𑀼𑀤𑀓𑀢𑀁𑀲𑀦𑁆𑀥𑀸𑀭𑀓𑀯𑀸𑀬𑀼𑀆𑀤𑀻𑀦𑀁 𑀲𑀫𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀬𑀸𑀯 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀧𑀸𑀢𑀼𑀪𑀸𑀯𑁄, 𑀢𑀸𑀯 𑀮𑁄𑀓𑁄 𑀯𑀺𑀯𑀝𑁆𑀝𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀧𑀓𑀢𑀺𑀬𑀸𑀢𑀺 𑀲𑀪𑀸𑀯𑁂𑀦, 𑀢𑀲𑁆𑀲 ‘‘𑀲𑀼𑀜𑁆𑀜’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀢𑀣𑀸𑀲𑀼𑀜𑁆𑀜𑀢𑀸𑀬 𑀓𑀸𑀭𑀡𑀫𑀸𑀳 ‘‘𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀁 𑀦𑀢𑁆𑀣𑀺𑀢𑀸𑀬𑀸’’𑀢𑀺. 𑀧𑀼𑀭𑀺𑀫𑀢𑀭𑀁 𑀅𑀜𑁆𑀜𑁂𑀲𑀁 𑀲𑀢𑁆𑀢𑀸𑀦𑀫𑀦𑀼𑀧𑁆𑀧𑀦𑁆𑀦𑀢𑁆𑀢𑀸𑀢𑀺 𑀪𑀸𑀯𑁄, 𑀢𑁂𑀦 𑀬𑀣𑀸 𑀏𑀓𑀘𑁆𑀘𑀸𑀦𑀺 𑀯𑀺𑀫𑀸𑀦𑀸𑀦𑀺 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀁 𑀙𑀟𑁆𑀟𑀺𑀢𑀢𑁆𑀢𑀸 𑀲𑀼𑀜𑁆𑀜𑀸𑀦𑀺, 𑀦 𑀏𑀯𑀫𑀺𑀤𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀅𑀧𑀭𑁄 𑀦𑀬𑁄 𑁋 𑀲𑀓𑀓𑀫𑁆𑀫𑀲𑁆𑀲 𑀧𑀞𑀫𑀁 𑀓𑀭𑀡𑀁 𑀧𑀓𑀢𑀺, 𑀢𑀸𑀬 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄, 𑀢𑁂𑀦 𑀬𑀣𑀸 𑀏𑀢𑀲𑁆𑀲 𑀅𑀢𑁆𑀢𑀦𑁄 𑀓𑀫𑁆𑀫𑀩𑀮𑁂𑀦 𑀧𑀞𑀫𑀁 𑀦𑀺𑀩𑁆𑀩𑀢𑁆𑀢𑀺, 𑀦 𑀏𑀯𑀁 𑀅𑀜𑁆𑀜𑁂𑀲𑀁 𑀢𑀲𑁆𑀲 𑀧𑀼𑀭𑀺𑀫𑀢𑀭𑀁, 𑀲𑀫𑀸𑀦𑀓𑀸𑀮𑁂 𑀯𑀸 𑀦𑀺𑀩𑁆𑀩𑀢𑁆𑀢𑀺 𑀅𑀢𑁆𑀣𑀺, 𑀢𑀣𑀸 ¶ 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀁 𑀦𑀢𑁆𑀣𑀺𑀢𑀸𑀬 𑀲𑀼𑀜𑁆𑀜𑀫𑀺𑀤𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀇𑀥 𑀩𑁆𑀭𑀳𑁆𑀫𑀓𑀸𑀬𑀺𑀓𑀸, 𑀢𑁂𑀲𑀁 𑀦𑀺𑀯𑀸𑀲𑀢𑀸𑀬 𑀪𑀽𑀫𑀺𑀧𑀺 ‘‘𑀩𑁆𑀭𑀳𑁆𑀫𑀓𑀸𑀬𑀺𑀓𑀸’’𑀢𑀺 𑀯𑀼𑀢𑁆𑀢𑀸, 𑀩𑁆𑀭𑀳𑁆𑀫𑀓𑀸𑀬𑀺𑀓𑀪𑀽𑀫𑀻𑀢𑀺 𑀧𑀦 𑀧𑀸𑀞𑁂𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀦𑀁 𑀲𑀫𑁆𑀩𑀦𑁆𑀥𑀺𑀦𑀻 𑀪𑀽𑀫𑀻𑀢𑀺 𑀅𑀢𑁆𑀣𑁄. 𑀓𑀢𑁆𑀢𑀸 𑀲𑀬𑀁 𑀓𑀸𑀭𑀓𑁄. 𑀓𑀸𑀭𑁂𑀢𑀸 𑀧𑀭𑁂𑀲𑀁 𑀆𑀡𑀸𑀧𑀓𑁄. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀓𑀣𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑁨.𑁪𑁦𑁮) 𑀯𑀼𑀢𑁆𑀢𑀦𑀬𑁂𑀦, 𑀏𑀢𑁂𑀦 𑀦𑀺𑀩𑁆𑀩𑀢𑁆𑀢𑀓𑁆𑀓𑀫𑀁 𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀪𑀸𑀯𑁂 𑀘 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀓𑀫𑁆𑀫𑀁 𑀉𑀧𑀦𑀺𑀲𑁆𑀲𑀬𑀪𑀸𑀯𑁂𑀦 𑀧𑀘𑁆𑀘𑀬𑁄 𑀏𑀢𑀺𑀲𑁆𑀲𑀸𑀢𑀺 𑀓𑀫𑁆𑀫𑀧𑀘𑁆𑀘𑀬𑀸. 𑀅𑀣 𑀯𑀸 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀁 𑀯𑀺𑀧𑀘𑁆𑀘𑀦𑀓𑀓𑀫𑁆𑀫𑀲𑁆𑀲 𑀲𑀳𑀓𑀸𑀭𑀻𑀓𑀸𑀭𑀓𑀪𑀸𑀯𑀢𑁄 𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑀸𑀢𑀺 𑀓𑀫𑁆𑀫𑀧𑀘𑁆𑀘𑀬𑀸. 𑀉𑀢𑀼 𑀲𑀫𑀼𑀝𑁆𑀞𑀸𑀦𑀫𑁂𑀢𑀺𑀲𑁆𑀲𑀸𑀢𑀺 𑀉𑀢𑀼𑀲𑀫𑀼𑀝𑁆𑀞𑀸𑀦𑀸. ‘‘𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀸’’𑀢𑀺𑀧𑀺 𑀲𑀫𑀸𑀲𑀯𑀲𑁂𑀦 𑀧𑀸𑀞𑁄 𑀓𑀫𑁆𑀫𑀲𑀳𑀸𑀬𑁄 𑀧𑀘𑁆𑀘𑀬𑁄, 𑀯𑀼𑀢𑁆𑀢𑀦𑀬𑁂𑀦 𑀯𑀸 𑀓𑀫𑁆𑀫𑀲𑁆𑀲 𑀲𑀳𑀸𑀬𑀪𑀽𑀢𑁄 𑀧𑀘𑁆𑀘𑀬𑁄𑀢𑀺 𑀓𑀫𑁆𑀫𑀧𑀘𑁆𑀘𑀬𑁄, 𑀲𑁄 𑀏𑀯 𑀉𑀢𑀼 𑀢𑀣𑀸, 𑀲𑁄𑀯 𑀲𑀫𑀼𑀝𑁆𑀞𑀸𑀦𑀫𑁂𑀢𑀺𑀲𑁆𑀲𑀸𑀢𑀺 𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀆𑀦𑀸. 𑀭𑀢𑀦𑀪𑀽𑀫𑀻𑀢𑀺 𑀉𑀓𑁆𑀓𑀁𑀲𑀕𑀢𑀧𑀼𑀜𑁆𑀜𑀓𑀫𑁆𑀫𑀸𑀦𑀼𑀪𑀸𑀯𑀢𑁄 ¶ 𑀭𑀢𑀦𑀪𑀽𑀢𑀸 𑀪𑀽𑀫𑀺, 𑀦 𑀓𑁂𑀯𑀮𑀁 𑀪𑀽𑀫𑀺𑀬𑁂𑀯, 𑀅𑀣 𑀔𑁄 𑀢𑀧𑁆𑀧𑀭𑀺𑀯𑀸𑀭𑀸𑀧𑀻𑀢𑀺 𑀆𑀳 ‘‘𑀧𑀓𑀢𑀻’’𑀢𑀺𑀆𑀤𑀺. 𑀧𑀓𑀢𑀺𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂𑀢𑀺 𑀧𑀼𑀭𑀺𑀫𑀓𑀧𑁆𑀧𑁂𑀲𑀼 𑀧𑀼𑀭𑀺𑀫𑀓𑀸𑀦𑀁 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂. 𑀏𑀢𑁆𑀣𑀸𑀢𑀺 ‘‘𑀩𑁆𑀭𑀳𑁆𑀫𑀯𑀺𑀫𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀸𑀬 𑀩𑁆𑀭𑀳𑁆𑀫𑀓𑀸𑀬𑀺𑀓𑀪𑀽𑀫𑀺𑀬𑀸. 𑀲𑀸𑀫𑀜𑁆𑀜𑀯𑀺𑀲𑁂𑀲𑀯𑀲𑁂𑀦 𑀘𑁂𑀢𑀁 𑀆𑀥𑀸𑀭𑀤𑁆𑀯𑀬𑀁. 𑀓𑀣𑀁 𑀧𑀡𑀻𑀢𑀸𑀬 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀬𑀸 𑀞𑀺𑀢𑀸𑀦𑀁 𑀳𑀻𑀦𑀸𑀬 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀸 𑀉𑀧𑀧𑀢𑁆𑀢𑀺 𑀳𑁄𑀢𑀻𑀢𑀺 𑀆𑀳 ‘‘𑀅𑀣 𑀲𑀢𑁆𑀢𑀸𑀦’’𑀦𑁆𑀢𑀺𑀆𑀤𑀺, 𑀦𑀺𑀓𑀦𑁆𑀢𑀺𑀯𑀲𑁂𑀦 𑀧𑀞𑀫𑀚𑁆𑀛𑀸𑀦𑀁 𑀪𑀸𑀯𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀧𑀓𑀢𑀺𑀬𑀸 𑀲𑀪𑀸𑀯𑁂𑀦 𑀦𑀺𑀓𑀦𑁆𑀢𑀺 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀲𑀺𑀢𑀝𑁆𑀞𑀸𑀦𑁂𑀢𑀺 𑀯𑀼𑀢𑁆𑀣𑀧𑀼𑀩𑁆𑀩𑀝𑁆𑀞𑀸𑀦𑁂. 𑀢𑀢𑁄 𑀑𑀢𑀭𑀦𑁆𑀢𑀻𑀢𑀺 𑀉𑀧𑀧𑀢𑁆𑀢𑀺𑀯𑀲𑁂𑀦 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀢𑁄 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀁 𑀅𑀧𑀲𑀓𑁆𑀓𑀦𑁆𑀢𑀺, 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀸𑀬𑀼𑀓𑁂𑀢𑀺 𑀬𑀁 𑀉𑀴𑀸𑀭𑀧𑀼𑀜𑁆𑀜𑀓𑀫𑁆𑀫𑀁 𑀓𑀢𑀁, 𑀢𑀲𑁆𑀲 𑀉𑀧𑀚𑁆𑀚𑀦𑀸𑀭𑀳𑀯𑀺𑀧𑀸𑀓𑀧𑀩𑀦𑁆𑀥𑀢𑁄 𑀅𑀧𑁆𑀧𑀧𑀭𑀺𑀫𑀸𑀡𑀸𑀬𑀼𑀓𑁂. 𑀢𑀲𑁆𑀲 𑀤𑁂𑀯𑀮𑁄𑀓𑀲𑁆𑀲𑀸𑀢𑀺 𑀢𑀲𑁆𑀫𑀺𑀁 𑀤𑁂𑀯𑀮𑁄𑀓𑁂, 𑀦𑀺𑀲𑁆𑀲𑀬𑀯𑀲𑁂𑀦 𑀯𑀸 𑀲𑀫𑁆𑀩𑀦𑁆𑀥𑀦𑀺𑀤𑁆𑀤𑁂𑀲𑁄. 𑀆𑀬𑀼𑀧𑁆𑀧𑀫𑀸𑀡𑁂𑀦𑁂𑀯𑀸𑀢𑀺 𑀧𑀭𑀫𑀸𑀬𑀼𑀧𑁆𑀧𑀫𑀸𑀡𑁂𑀦𑁂𑀯. 𑀧𑀭𑀺𑀢𑁆𑀢𑀦𑁆𑀢𑀺 𑀅𑀧𑁆𑀧𑀓𑀁. 𑀅𑀦𑁆𑀢𑀭𑀸𑀯 𑀘𑀯𑀦𑁆𑀢𑀻𑀢𑀺 𑀭𑀸𑀚𑀓𑁄𑀝𑁆𑀞𑀸𑀕𑀸𑀭𑁂 𑀧𑀓𑁆𑀔𑀺𑀢𑁆𑀢𑀢𑀡𑁆𑀟𑀼𑀮𑀦𑀸𑀴𑀺 𑀯𑀺𑀬 𑀧𑀼𑀜𑁆𑀜𑀓𑁆𑀔𑀬𑀸 𑀳𑀼𑀢𑁆𑀯𑀸 𑀲𑀓𑀓𑀫𑁆𑀫𑀧𑁆𑀧𑀫𑀸𑀡𑁂𑀦 𑀢𑀲𑁆𑀲 𑀤𑁂𑀯𑀮𑁄𑀓𑀲𑁆𑀲 𑀧𑀭𑀫𑀸𑀬𑀼𑀅𑀦𑁆𑀢𑀭𑀸 𑀏𑀯 𑀘𑀯𑀦𑁆𑀢𑀺.

𑀓𑀺𑀁 𑀧𑀦𑁂𑀢𑀁 𑀧𑀭𑀫𑀸𑀬𑀼 𑀦𑀸𑀫, 𑀓𑀣𑀁 𑀯𑀸 𑀢𑀁 𑀧𑀭𑀺𑀘𑁆𑀙𑀺𑀦𑁆𑀦𑀧𑁆𑀧𑀫𑀸𑀡𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀬𑁄 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑀯𑀺𑀲𑁂𑀲𑁂 𑀯𑀺𑀧𑀸𑀓𑀧𑁆𑀧𑀩𑀦𑁆𑀥𑀲𑁆𑀲 𑀞𑀺𑀢𑀺𑀓𑀸𑀮𑀦𑀺𑀬𑀫𑁄 ¶ 𑀧𑀼𑀭𑀺𑀫𑀲𑀺𑀤𑁆𑀥𑀪𑀯𑀧𑀢𑁆𑀣𑀦𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀲𑀭𑀻𑀭𑀸𑀯𑀬𑀯𑀯𑀡𑁆𑀡𑀲𑀡𑁆𑀞𑀸𑀦𑀧𑁆𑀧𑀫𑀸𑀡𑀸𑀤𑀺𑀯𑀺𑀲𑁂𑀲𑀸 𑀯𑀺𑀬 𑀢𑀁𑀢𑀁𑀕𑀢𑀺𑀦𑀺𑀓𑀸𑀬𑀸𑀤𑀻𑀲𑀼 𑀬𑁂𑀪𑀼𑀬𑁆𑀬𑁂𑀦 𑀦𑀺𑀬𑀢𑀧𑀭𑀺𑀘𑁆𑀙𑁂𑀤𑁄 𑀳𑁄𑀢𑀺, 𑀕𑀩𑁆𑀪𑀲𑁂𑀬𑁆𑀬𑀓𑀓𑀸𑀫𑀸𑀯𑀘𑀭𑀤𑁂𑀯𑀭𑀽𑀧𑀸𑀯𑀘𑀭𑀲𑀢𑁆𑀢𑀸𑀦𑀁 𑀲𑀼𑀓𑁆𑀓𑀲𑁄𑀡𑀺𑀢𑀸𑀤𑀺𑀉𑀢𑀼𑀪𑁄𑀚𑀦𑀸𑀤𑀺𑀉𑀢𑀼𑀆𑀤𑀺𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀽𑀧𑀢𑁆𑀣𑀫𑁆𑀪𑀺𑀢𑁄 𑀘, 𑀲𑁄 𑀆𑀬𑀼𑀳𑁂𑀢𑀼𑀓𑀢𑁆𑀢𑀸 𑀓𑀸𑀭𑀡𑀽𑀧𑀘𑀸𑀭𑁂𑀦 𑀆𑀬𑀼, 𑀉𑀓𑁆𑀓𑀁𑀲𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀧𑀭𑀫𑀸𑀬𑀽𑀢𑀺 𑀘 𑀯𑀼𑀘𑁆𑀘𑀢𑀺. 𑀬𑀣𑀸𑀲𑀓𑀁 𑀔𑀡𑀫𑀢𑁆𑀢𑀸𑀯𑀝𑁆𑀞𑀸𑀬𑀻𑀦𑀫𑁆𑀧𑀺 𑀳𑀺 𑀅𑀢𑁆𑀢𑀦𑀸 𑀲𑀳𑀚𑀸𑀢𑀸𑀦𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀞𑀧𑀦𑀸𑀓𑀸𑀭𑀯𑀼𑀢𑁆𑀢𑀺𑀢𑀸𑀬 𑀧𑀯𑀢𑁆𑀢𑀓𑀸𑀦𑀺 𑀭𑀽𑀧𑀸𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀺 𑀦 𑀓𑁂𑀯𑀮𑀁 𑀦𑁂𑀲𑀁 𑀔𑀡𑀝𑁆𑀞𑀺𑀢𑀺𑀬𑀸 𑀏𑀯 𑀓𑀸𑀭𑀡𑀪𑀸𑀯𑁂𑀦 𑀅𑀦𑀼𑀧𑀸𑀮𑀓𑀸𑀦𑀺, 𑀅𑀣 𑀔𑁄 𑀬𑀸𑀯 𑀪𑀗𑁆𑀕𑀼𑀧𑀘𑁆𑀙𑁂𑀤𑀸 [𑀪𑀯𑀗𑁆𑀕𑀼𑀧𑀘𑁆𑀙𑁂𑀤𑀸 (𑀤𑀻. 𑀦𑀺. 𑀝𑀻. 𑁧.𑁪𑁦)] 𑀅𑀦𑀼𑀧𑀩𑀦𑁆𑀥𑀲𑁆𑀲 𑀅𑀯𑀺𑀘𑁆𑀙𑁂𑀤𑀳𑁂𑀢𑀼𑀪𑀸𑀯𑁂𑀦𑀸𑀧𑀺. 𑀢𑀲𑁆𑀫𑀸 𑀘𑁂𑀲 𑀆𑀬𑀼𑀳𑁂𑀢𑀼𑀓𑁄𑀬𑁂𑀯, 𑀢𑀁 𑀧𑀦 𑀤𑁂𑀯𑀸𑀦𑀁, 𑀦𑁂𑀭𑀬𑀺𑀓𑀸𑀦𑀜𑁆𑀘 𑀬𑁂𑀪𑀼𑀬𑁆𑀬𑁂𑀦 𑀦𑀺𑀬𑀢𑀧𑀭𑀺𑀘𑁆𑀙𑁂𑀤𑀁, 𑀉𑀢𑁆𑀢𑀭𑀓𑀼𑀭𑀼𑀓𑀸𑀦𑀁 𑀧𑀦 𑀏𑀓𑀦𑁆𑀢𑀦𑀺𑀬𑀢𑀧𑀭𑀺𑀘𑁆𑀙𑁂𑀤𑀫𑁂𑀯. 𑀅𑀯𑀲𑀺𑀝𑁆𑀞𑀫𑀦𑀼𑀲𑁆𑀲𑀧𑁂𑀢𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀧𑀦 𑀘𑀺𑀭𑀝𑁆𑀞𑀺𑀢𑀺𑀲𑀁𑀯𑀢𑁆𑀢𑀦𑀺𑀓𑀓𑀫𑁆𑀫𑀩𑀳𑀼𑀮𑁂 𑀓𑀸𑀮𑁂 𑀢𑀁𑀓𑀫𑁆𑀫𑀲𑀳𑀺𑀢𑀲𑀦𑁆𑀢𑀸𑀦𑀚𑀦𑀺𑀢𑀲𑀼𑀓𑁆𑀓𑀲𑁄𑀡𑀺𑀢𑀧𑀘𑁆𑀘𑀬𑀸𑀦𑀁, 𑀢𑀫𑁆𑀫𑀽𑀮𑀓𑀸𑀦𑀜𑁆𑀘 𑀘𑀦𑁆𑀤𑀺𑀫𑀲𑀽𑀭𑀺𑀬𑀲𑀫𑀯𑀺𑀲𑀫𑀧𑀭𑀺𑀯𑀢𑁆𑀢𑀦𑀸𑀤𑀺𑀚𑀦𑀺𑀢𑀉𑀢𑀼𑀆𑀳𑀸𑀭𑀸𑀤𑀺𑀲𑀫𑀯𑀺𑀲𑀫𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀘𑀺𑀭𑀸𑀘𑀺𑀭𑀓𑀸𑀮𑀢𑀸𑀬 𑀅𑀦𑀺𑀬𑀢𑀧𑀭𑀺𑀘𑁆𑀙𑁂𑀤𑀁, 𑀢𑀲𑁆𑀲 𑀘 𑀬𑀣𑀸 𑀧𑀼𑀭𑀺𑀫𑀲𑀺𑀤𑁆𑀥𑀪𑀯𑀧𑀢𑁆𑀣𑀦𑀸𑀯𑀲𑁂𑀦 𑀢𑀁𑀢𑀁𑀕𑀢𑀺𑀦𑀺𑀓𑀸𑀬𑀸𑀤𑀻𑀲𑀼 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀺𑀲𑁂𑀲𑀦𑀺𑀬𑀫𑁄 𑀲𑀺𑀤𑁆𑀥𑁄, 𑀤𑀲𑁆𑀲𑀦𑀸𑀦𑀼𑀲𑁆𑀲𑀯𑀸𑀤𑀻𑀳𑀺 𑀢𑀣𑀸𑀬𑁂𑀯 𑀆𑀤𑀺𑀢𑁄 𑀕𑀳𑀡𑀲𑀺𑀤𑁆𑀥𑀺𑀬𑀸, 𑀏𑀯𑀁 𑀢𑀸𑀲𑀼 𑀢𑀸𑀲𑀼 𑀉𑀧𑀧𑀢𑁆𑀢𑀻𑀲𑀼 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀁 ¶ 𑀬𑁂𑀪𑀼𑀬𑁆𑀬𑁂𑀦 𑀲𑀫𑀧𑁆𑀧𑀫𑀸𑀡𑀁 𑀞𑀺𑀢𑀺𑀓𑀸𑀮𑀁 𑀤𑀲𑁆𑀲𑀦𑀸𑀦𑀼𑀲𑁆𑀲𑀯𑁂𑀳𑀺 𑀮𑀪𑀺𑀢𑁆𑀯𑀸 𑀢𑀁 𑀧𑀭𑀫𑀢𑀁 𑀅𑀚𑁆𑀛𑁄𑀲𑀸𑀬 𑀧𑀯𑀢𑁆𑀢𑀺𑀢𑀪𑀯𑀧𑀢𑁆𑀣𑀦𑀸𑀯𑀲𑁂𑀦 𑀆𑀤𑀺𑀢𑁄 𑀧𑀭𑀺𑀘𑁆𑀙𑁂𑀤𑀦𑀺𑀬𑀫𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀲𑁆𑀫𑀸 𑀧𑀦 𑀓𑀫𑁆𑀫𑀁 𑀢𑀸𑀲𑀼 𑀢𑀸𑀲𑀼 𑀉𑀧𑀧𑀢𑁆𑀢𑀻𑀲𑀼 𑀬𑀣𑀸 𑀢𑀁𑀢𑀁𑀉𑀧𑀧𑀢𑁆𑀢𑀺𑀦𑀺𑀲𑁆𑀲𑀺𑀢𑀯𑀡𑁆𑀡𑀸𑀤𑀺𑀦𑀺𑀩𑁆𑀩𑀢𑁆𑀢𑀦𑁂 𑀲𑀫𑀢𑁆𑀣𑀁, 𑀏𑀯𑀁 𑀦𑀺𑀬𑀢𑀸𑀬𑀼𑀧𑀭𑀺𑀘𑁆𑀙𑁂𑀤𑀸𑀲𑀼 𑀉𑀧𑀧𑀢𑁆𑀢𑀻𑀲𑀼 𑀧𑀭𑀺𑀘𑁆𑀙𑁂𑀤𑀸𑀢𑀺𑀓𑁆𑀓𑀫𑁂𑀦 𑀯𑀺𑀧𑀸𑀓𑀦𑀺𑀩𑁆𑀩𑀢𑁆𑀢𑀦𑁂 𑀲𑀫𑀢𑁆𑀣𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀆𑀬𑀼𑀧𑁆𑀧𑀫𑀸𑀡𑁂𑀦𑁂𑀯 𑀘𑀯𑀦𑁆𑀢𑀻’’𑀢𑀺. 𑀬𑀲𑁆𑀫𑀸 𑀧𑀦 𑀉𑀧𑀢𑁆𑀣𑀫𑁆𑀪𑀓𑀧𑀘𑁆𑀘𑀬𑀲𑀳𑀸𑀬𑁂𑀳𑀺 𑀅𑀦𑀼𑀧𑀸𑀮𑀓𑀧𑀘𑁆𑀘𑀬𑁂𑀳𑀺 𑀉𑀧𑀸𑀤𑀺𑀦𑁆𑀦𑀓𑀓𑁆𑀔𑀦𑁆𑀥𑀸𑀦𑀁 𑀧𑀯𑀢𑁆𑀢𑁂𑀢𑀩𑁆𑀩𑀸𑀓𑀸𑀭𑁄 𑀅𑀢𑁆𑀣𑀢𑁄 𑀧𑀭𑀫𑀸𑀬𑀼𑀓𑀲𑁆𑀲 𑀳𑁄𑀢𑀺 𑀬𑀣𑀸𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀸𑀦𑀢𑀺𑀓𑁆𑀓𑀫𑀦𑀢𑁄, 𑀢𑀲𑁆𑀫𑀸 𑀲𑀢𑀺𑀧𑀺 𑀓𑀫𑁆𑀫𑀸𑀯𑀲𑁂𑀲𑁂 𑀞𑀸𑀦𑀁 𑀦 𑀲𑀫𑁆𑀪𑀯𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀦𑁄 𑀧𑀼𑀜𑁆𑀜𑀩𑀮𑁂𑀦 𑀞𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻’’𑀢𑀺. ‘‘𑀆𑀬𑀼𑀓𑁆𑀔𑀬𑀸 𑀯𑀸 𑀧𑀼𑀜𑁆𑀜𑀓𑁆𑀔𑀬𑀸 𑀯𑀸 𑀆𑀪𑀲𑁆𑀲𑀭𑀓𑀸𑀬𑀸 𑀘𑀯𑀺𑀢𑁆𑀯𑀸’’𑀢𑀺 𑀯𑀘𑀦𑀢𑁄 𑀧𑀦𑁂𑀢𑁆𑀣 𑀓𑀸𑀫𑀸𑀯𑀘𑀭𑀤𑁂𑀯𑀸𑀦𑀁 𑀯𑀺𑀬 ¶ 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀦𑀫𑁆𑀧𑀺 𑀬𑁂𑀪𑀼𑀬𑁆𑀬𑁂𑀦𑁂𑀯 𑀦𑀺𑀬𑀢𑀸𑀬𑀼𑀧𑀭𑀺𑀘𑁆𑀙𑁂𑀤𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀳𑀺 𑀤𑁂𑀯𑀮𑁄𑀓𑀢𑁄 𑀤𑁂𑀯𑀧𑀼𑀢𑁆𑀢𑀸 𑀆𑀬𑀼𑀓𑁆𑀔𑀬𑁂𑀦 𑀧𑀼𑀜𑁆𑀜𑀓𑁆𑀔𑀬𑁂𑀦 𑀆𑀳𑀸𑀭𑀓𑁆𑀔𑀬𑁂𑀦 𑀓𑁄𑀧𑁂𑀦𑀸𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀘𑀯𑀦𑁆𑀢𑀻𑀢𑀺 𑀅𑀝𑁆𑀞𑀓𑀣𑀸𑀲𑀼 (𑀥. 𑀧. 𑀅𑀝𑁆𑀞. 𑁧.𑀅𑀧𑁆𑀧𑀫𑀸𑀤𑀯𑀕𑁆𑀕𑁂) 𑀯𑀼𑀢𑁆𑀢𑀁. 𑀓𑀧𑁆𑀧𑀁 𑀯𑀸 𑀉𑀧𑀟𑁆𑀠𑀓𑀧𑁆𑀧𑀁 𑀯𑀸𑀢𑀺 𑀏𑀢𑁆𑀣 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁄 𑀅𑀥𑀺𑀧𑁆𑀧𑁂𑀢𑁄, 𑀲𑁄 𑀘 𑀢𑀣𑀸𑀭𑀽𑀧𑁄 𑀓𑀸𑀮𑁄𑀬𑁂𑀯, 𑀯𑀸-𑀲𑀤𑁆𑀤𑁄 𑀧𑀦 𑀓𑀧𑁆𑀧𑀲𑁆𑀲 𑀢𑀢𑀺𑀬𑀪𑀸𑀕𑀁 𑀯𑀸 𑀢𑀢𑁄 𑀊𑀦𑀫𑀥𑀺𑀓𑀁 𑀯𑀸𑀢𑀺 𑀯𑀺𑀓𑀧𑁆𑀧𑀦𑀢𑁆𑀣𑁄.

𑁪𑁧. 𑀅𑀦𑀪𑀺𑀭𑀢𑀻𑀢𑀺 𑀏𑀓𑀓𑀯𑀺𑀳𑀸𑀭𑁂𑀦 𑀅𑀦𑀪𑀺𑀭𑀫𑀡𑀲𑀗𑁆𑀔𑀸𑀢𑀸 𑀅𑀜𑁆𑀜𑁂𑀳𑀺 𑀲𑀫𑀸𑀕𑀫𑀺𑀘𑁆𑀙𑀸𑀬𑁂𑀯. 𑀢𑀢𑁆𑀣 ‘‘𑀏𑀓𑀓𑀲𑁆𑀲 𑀤𑀻𑀖𑀭𑀢𑁆𑀢𑀁 𑀦𑀺𑀯𑀲𑀺𑀢𑀢𑁆𑀢𑀸’’𑀢𑀺 𑀧𑀸𑀴𑀺𑀬𑀁 𑀯𑀘𑀦𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀧𑀭𑀲𑁆𑀲𑀸𑀧𑀻’’𑀢𑀺𑀆𑀤𑀺. 𑀏𑀯𑀫𑀦𑁆𑀯𑀬𑀫𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀦𑀦𑀼 𑀉𑀓𑁆𑀓𑀡𑁆𑀞𑀺𑀢𑀸𑀧𑀺 𑀲𑀺𑀬𑀸𑀢𑀺 𑀘𑁄𑀤𑀦𑀸𑀲𑁄𑀥𑀦𑀯𑀲𑁂𑀦 𑀩𑁆𑀬𑀢𑀺𑀭𑁂𑀓𑀁 𑀤𑀲𑁆𑀲𑁂𑀢𑀺 ‘‘𑀬𑀸 𑀧𑀦𑀸’’𑀢𑀺𑀆𑀤𑀺𑀦𑀸. 𑀧𑀺𑀬𑀯𑀢𑁆𑀣𑀼𑀯𑀺𑀭𑀳𑁂𑀦, 𑀧𑀺𑀬𑀯𑀢𑁆𑀣𑀼𑀅𑀮𑀸𑀪𑁂𑀦 𑀯𑀸 𑀘𑀺𑀢𑁆𑀢𑀯𑀺𑀕𑁆𑀖𑀸𑀢𑁄 𑀉𑀓𑁆𑀓𑀡𑁆𑀞𑀺𑀢𑀸, 𑀲𑀸 𑀧𑀦𑀢𑁆𑀣𑀢𑁄 𑀤𑁄𑀫𑀦𑀲𑁆𑀲𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀯, 𑀢𑁂𑀦𑀸𑀳 ‘‘𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺. 𑀲𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀢𑁆𑀣𑀺 𑀛𑀸𑀦𑀸𑀦𑀼𑀪𑀸𑀯𑀧𑀳𑀻𑀦𑀢𑁆𑀢𑀸. 𑀢𑀡𑁆𑀳𑀸𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀸 𑀘𑀺𑀢𑁆𑀢𑀲𑁆𑀲 𑀧𑀼𑀭𑀺𑀫𑀸𑀯𑀢𑁆𑀣𑀸𑀬 𑀉𑀩𑁆𑀩𑀺𑀚𑁆𑀚𑀦𑀸 𑀨𑀦𑁆𑀤𑀦𑀸 𑀏𑀯 𑀇𑀥 𑀧𑀭𑀺𑀢𑀲𑁆𑀲𑀦𑀸. 𑀲𑀸 𑀳𑀺 𑀤𑀻𑀖𑀭𑀢𑁆𑀢𑀁 𑀛𑀸𑀦𑀭𑀢𑀺𑀬𑀸 𑀞𑀺𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀸𑀦𑀪𑀺𑀭𑀢𑀺𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀸 ‘‘𑀅𑀳𑀁 𑀫𑀫’’𑀦𑁆𑀢𑀺 𑀕𑀳𑀡𑀲𑁆𑀲 𑀘 𑀓𑀸𑀭𑀡𑀪𑀽𑀢𑀸. 𑀢𑁂𑀦 𑀯𑀓𑁆𑀔𑀢𑀺 ‘‘𑀢𑀡𑁆𑀳𑀸𑀢𑀲𑁆𑀲 𑀦𑀸𑀧𑀺 𑀤𑀺𑀝𑁆𑀞𑀺𑀢𑀲𑁆𑀲𑀦𑀸𑀧𑀺 𑀯𑀝𑁆𑀝𑀢𑀻’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁪𑁧) 𑀦𑀦𑀼 𑀯𑀼𑀢𑁆𑀢𑀁 𑀅𑀢𑁆𑀣𑀼𑀤𑁆𑀥𑀸𑀭𑁂 𑀇𑀫𑀁𑀬𑁂𑀯 𑀧𑀸𑀴𑀺𑀁 𑀦𑀻𑀳𑀭𑀺𑀢𑁆𑀯𑀸 ‘‘𑀅𑀳𑁄 𑀯𑀢 𑀅𑀜𑁆𑀜𑁂𑀧𑀺 𑀲𑀢𑁆𑀢𑀸 𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑁂𑀬𑁆𑀬𑀼𑀦𑁆𑀢𑀺 𑀅𑀬𑀁 𑀢𑀡𑁆𑀳𑀸𑀢𑀲𑁆𑀲𑀦𑀸 𑀦𑀸𑀫𑀸’’𑀢𑀺? 𑀲𑀘𑁆𑀘𑀁, 𑀢𑀁 𑀧𑀦 𑀤𑀺𑀝𑁆𑀞𑀺𑀢𑀲𑁆𑀲𑀦𑀸𑀬 𑀯𑀺𑀲𑀼𑀁 𑀉𑀤𑀸𑀳𑀭𑀡𑀁 𑀤𑀲𑁆𑀲𑁂𑀦𑁆𑀢𑁂𑀦 𑀢𑀡𑁆𑀳𑀸𑀢𑀲𑁆𑀲𑀦𑀫𑁂𑀯 𑀢𑀢𑁄 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀦 𑀧𑀦 𑀏𑀢𑁆𑀣 𑀤𑀺𑀝𑁆𑀞𑀺𑀢𑀲𑁆𑀲𑀦𑀸𑀬 𑀅𑀮𑀩𑁆𑀪𑀫𑀸𑀦𑀢𑁆𑀢𑀸𑀢𑀺 𑀦 𑀤𑁄𑀲𑁄. 𑀇𑀤𑀸𑀦𑀺 𑀲𑀫𑀸𑀦𑀲𑀤𑁆𑀤𑀯𑀘𑀦𑀻𑀬𑀸𑀦𑀁 𑀅𑀢𑁆𑀣𑀸𑀦𑀫𑀼𑀤𑁆𑀥𑀭𑀡𑀁 𑀓𑀢𑁆𑀯𑀸 𑀇𑀥𑀸𑀥𑀺𑀧𑁆𑀧𑁂𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀲𑀸 𑀧𑀦𑁂𑀲𑀸’’𑀢𑀺𑀆𑀤𑀺𑀫𑀸𑀳. 𑀧𑀝𑀺𑀖𑀲𑀗𑁆𑀔𑀸𑀢𑁄 𑀘𑀺𑀢𑁆𑀢𑀼𑀢𑁆𑀭𑀸𑀲𑁄 𑀏𑀯 𑀢𑀸𑀲𑀢𑀲𑁆𑀲𑀦𑀸. 𑀏𑀯𑀫𑀜𑁆𑀜𑀢𑁆𑀣𑀸𑀧𑀺 𑀬𑀣𑀸𑀭𑀳𑀁. ‘‘𑀚𑀸𑀢𑀺𑀁 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺 𑀯𑀺𑀪𑀗𑁆𑀕𑀧𑀸𑀴𑀺, (𑀯𑀺𑀪. 𑁯𑁨𑁧) 𑀢𑀢𑁆𑀭𑀸𑀬𑀫𑀢𑁆𑀣𑀓𑀣𑀸 ¶ 𑁋 𑀚𑀸𑀢𑀺𑀁 𑀧𑀝𑀺𑀘𑁆𑀘 𑀪𑀬𑀦𑁆𑀢𑀺 𑀚𑀸𑀢𑀺𑀧𑀘𑁆𑀘𑀬𑀸 𑀉𑀧𑁆𑀧𑀦𑁆𑀦𑀪𑀬𑀁. 𑀪𑀬𑀸𑀦𑀓𑀦𑁆𑀢𑀺 𑀆𑀓𑀸𑀭𑀦𑀺𑀤𑁆𑀤𑁂𑀲𑁄. 𑀙𑀫𑁆𑀪𑀺𑀢𑀢𑁆𑀢𑀦𑁆𑀢𑀺 𑀪𑀬𑀯𑀲𑁂𑀦 𑀕𑀢𑁆𑀢𑀓𑀫𑁆𑀧𑁄, 𑀯𑀺𑀲𑁂𑀲𑀢𑁄 𑀳𑀤𑀬𑀫𑀁𑀲𑀘𑀮𑀦𑀁. 𑀮𑁄𑀫𑀳𑀁𑀲𑁄𑀢𑀺 𑀮𑁄𑀫𑀸𑀦𑀁 𑀳𑀁𑀲𑀦𑀁, 𑀪𑀺𑀢𑁆𑀢𑀺𑀬𑀁 𑀦𑀸𑀕𑀤𑀦𑁆𑀢𑀸𑀦𑀫𑀺𑀯 𑀉𑀤𑁆𑀥𑀕𑁆𑀕𑀪𑀸𑀯𑁄, 𑀇𑀫𑀺𑀦𑀸 𑀧𑀤𑀤𑁆𑀯𑀬𑁂𑀦 𑀓𑀺𑀘𑁆𑀘𑀢𑁄 𑀪𑀬𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀘𑁂𑀢𑀲𑁄 𑀉𑀢𑁆𑀭𑀸𑀲𑁄𑀢𑀺 𑀲𑀪𑀸𑀯𑀢𑁄 𑀤𑀲𑁆𑀲𑀺𑀢𑀦𑁆𑀢𑀺. 𑀝𑀻𑀓𑀸𑀬𑀁 𑀧𑀦 ‘‘𑀪𑀬𑀸𑀦𑀓𑀦𑁆𑀢𑀺 𑀪𑁂𑀭𑀯𑀸𑀭𑀫𑁆𑀫𑀡𑀦𑀺𑀫𑀺𑀢𑁆𑀢𑀁 𑀩𑀮𑀯𑀪𑀬𑀁, 𑀢𑁂𑀦 𑀲𑀭𑀻𑀭𑀲𑁆𑀲 𑀣𑀤𑁆𑀥𑀪𑀸𑀯𑁄 𑀙𑀫𑁆𑀪𑀺𑀢𑀢𑁆𑀢’’𑀦𑁆𑀢𑀺 ¶ (𑀤𑀻. 𑀦𑀺. 𑀝𑀻. 𑁧.𑁪𑁧) 𑀯𑀼𑀢𑁆𑀢𑀁, 𑀅𑀦𑁂𑀦𑁂𑀯 𑀪𑀬𑀦𑁆𑀢𑀺 𑀏𑀢𑁆𑀣 𑀔𑀼𑀤𑁆𑀤𑀓𑀪𑀬𑀁 𑀤𑀲𑁆𑀲𑀺𑀢𑀁, 𑀇𑀢𑀺 𑀏𑀢𑁆𑀣 𑀧𑀬𑁄𑀕𑁂 𑀅𑀬𑀁 𑀢𑀲𑁆𑀲𑀦𑀸𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄. 𑀧𑀭𑀺𑀢𑀲𑁆𑀲𑀺𑀢𑀯𑀺𑀧𑁆𑀨𑀦𑁆𑀤𑀺𑀢𑀫𑁂𑀯𑀸𑀢𑀺 𑀏𑀢𑁆𑀣 ‘‘𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁂𑀦 𑀘𑁂𑀯 𑀢𑀡𑁆𑀳𑀸𑀲𑀗𑁆𑀔𑀸𑀢𑁂𑀦 𑀘 𑀧𑀭𑀺𑀢𑀲𑁆𑀲𑀺𑀢𑁂𑀦 𑀯𑀺𑀧𑁆𑀨𑀦𑁆𑀤𑀺𑀢𑀫𑁂𑀯 𑀘𑀮𑀺𑀢𑀫𑁂𑀯 𑀓𑀫𑁆𑀧𑀺𑀢𑀫𑁂𑀯𑀸’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁦𑁫-𑁧𑁧𑁭) 𑀅𑀝𑁆𑀞𑀓𑀣𑀸𑀬𑀫𑀢𑁆𑀣𑀁 𑀯𑀓𑁆𑀔𑀢𑀺. 𑀢𑁂𑀦 𑀯𑀺𑀜𑁆𑀜𑀸𑀬𑀢𑀺 𑀮𑀩𑁆𑀪𑀫𑀸𑀦𑀫𑁆𑀧𑀺 𑀢𑀡𑁆𑀳𑀸𑀢𑀲𑁆𑀲𑀦𑀫𑀦𑁆𑀢𑀭𑁂𑀦 𑀤𑀺𑀝𑁆𑀞𑀺𑀢𑀲𑁆𑀲𑀦𑀸𑀬𑁂𑀯 𑀦𑀺𑀳𑀝𑀸𑀢𑀺. ‘‘𑀢𑁂𑀧𑀻’’𑀢𑀺𑀆𑀤𑀺 𑀲𑀻𑀳𑁄𑀧𑀫𑀲𑀼𑀢𑁆𑀢𑀦𑁆𑀢𑀧𑀸𑀴𑀺 (𑀅. 𑀦𑀺. 𑁪.𑁩𑁩) 𑀢𑀢𑁆𑀣 𑀢𑁂𑀧𑀻𑀢𑀺 𑀤𑀻𑀖𑀸𑀬𑀼𑀓𑀸 𑀤𑁂𑀯𑀸𑀧𑀺. 𑀪𑀬𑀦𑁆𑀢𑀺 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀧𑀭𑀺𑀘𑀺𑀡𑁆𑀡𑀦𑁆𑀢𑁂 𑀲𑀩𑁆𑀩𑀲𑀗𑁆𑀔𑀸𑀭𑀢𑁄 𑀪𑀸𑀬𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀪𑀬𑀜𑀸𑀡𑀁. 𑀲𑀁𑀯𑁂𑀕𑀦𑁆𑀢𑀺 𑀲𑀳𑁄𑀢𑁆𑀢𑀧𑁆𑀧𑀜𑀸𑀡𑀁, 𑀑𑀢𑁆𑀢𑀧𑁆𑀧𑀫𑁂𑀯 𑀯𑀸. 𑀲𑀦𑁆𑀢𑀸𑀲𑀦𑁆𑀢𑀺 𑀆𑀤𑀻𑀦𑀯𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀳𑀺 𑀲𑀗𑁆𑀔𑀸𑀭𑁂𑀳𑀺 𑀲𑀦𑁆𑀢𑀸𑀲𑀦𑀜𑀸𑀡𑀁. 𑀉𑀧𑀧𑀢𑁆𑀢𑀺𑀯𑀲𑁂𑀦𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑁂𑀯.

𑀲𑀳𑀩𑁆𑀬𑀢𑀦𑁆𑀢𑀺 𑀲𑀳𑀸𑀬𑀪𑀸𑀯𑀫𑀺𑀘𑁆𑀙𑁂𑀯 𑀲𑀤𑁆𑀤𑀢𑁄 𑀅𑀢𑁆𑀣𑁄 𑀲𑀳𑀩𑁆𑀬-𑀲𑀤𑁆𑀤𑀲𑁆𑀲 𑀲𑀳𑀸𑀬𑀢𑁆𑀣𑁂 𑀧𑀯𑀢𑁆𑀢𑀦𑀢𑁄. 𑀲𑁄 𑀳𑀺 𑀲𑀳 𑀩𑁆𑀬𑀸𑀬𑀢𑀺 𑀧𑀯𑀢𑁆𑀢𑀢𑀺, 𑀤𑁄𑀲𑀁 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀻𑀢𑀺 𑀲𑀳𑀩𑁆𑀬𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀪𑀸𑀯𑁄 𑀲𑀳𑀩𑁆𑀬𑀢𑀸. 𑀲𑀳𑀸𑀬𑀪𑀸𑀯𑁄 𑀧𑀦 𑀲𑀳𑀪𑀸𑀯𑁄𑀬𑁂𑀯 𑀦𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑀢𑁄 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀳𑀪𑀸𑀯’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀲𑀸𑀥𑀦𑀲𑀫𑀯𑀸𑀬𑀢𑁆𑀣𑁄 𑀯𑀸 𑀲𑀳-𑀲𑀤𑁆𑀤𑁄 𑀅𑀥𑀺𑀓𑀺𑀘𑁆𑀘𑀧𑀤𑁂 𑀅𑀥𑀺𑀲𑀤𑁆𑀤𑁄 𑀯𑀺𑀬, 𑀢𑀲𑁆𑀫𑀸 𑀲𑀳 𑀏𑀓𑀢𑁄 𑀯𑀢𑁆𑀢𑀫𑀸𑀦𑀲𑁆𑀲 𑀪𑀸𑀯𑁄 𑀲𑀳𑀩𑁆𑀬𑀁 𑀬𑀣𑀸 ‘‘𑀤𑀸𑀲𑀩𑁆𑀬’’𑀦𑁆𑀢𑀺 𑀢𑀤𑁂𑀯 𑀲𑀳𑀩𑁆𑀬𑀢𑀸, 𑀲𑀓𑀢𑁆𑀣𑀯𑀼𑀢𑁆𑀢𑀺𑀯𑀲𑁂𑀦 𑀇𑀫𑀫𑁂𑀯𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀳𑀪𑀸𑀯’’𑀦𑁆𑀢𑀺. 𑀅𑀧𑀺𑀘 𑀲𑀳 𑀯𑀸𑀢𑀺 𑀧𑀯𑀢𑁆𑀢𑀢𑀻𑀢𑀺 𑀲𑀳𑀯𑁄, 𑀢𑀲𑁆𑀲 𑀪𑀸𑀯𑁄 𑀲𑀳𑀩𑁆𑀬𑀁 𑀬𑀣𑀸 ‘‘𑀯𑀻𑀭𑀲𑁆𑀲 𑀪𑀸𑀯𑁄 𑀯𑀻𑀭𑀺𑀬’’𑀦𑁆𑀢𑀺, 𑀢𑀤𑁂𑀯 𑀲𑀳𑀩𑁆𑀬𑀢𑀸𑀢𑀺 𑀏𑀯𑀁 𑀯𑀺𑀫𑀸𑀦𑀝𑁆𑀞𑀓𑀣𑀸𑀬𑀁 (𑀯𑀺. 𑀯. 𑀅𑀝𑁆𑀞. 𑁧𑁭𑁨) 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀤𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺𑀧𑀺 𑀤𑀝𑁆𑀞𑀩𑁆𑀩𑀁.

𑁪𑁨. 𑀇𑀫𑁂 𑀲𑀢𑁆𑀢𑁂 𑀅𑀪𑀺𑀪𑀯𑀺𑀢𑁆𑀯𑀸𑀢𑀺 𑀲𑁂𑀲𑁄. 𑀅𑀪𑀺𑀪𑀯𑀦𑀸 𑀘𑁂𑀢𑁆𑀣 𑀧𑀸𑀧𑀲𑀪𑀸𑀯𑁂𑀦 𑀚𑁂𑀝𑁆𑀞𑀪𑀸𑀯𑁂𑀦 ‘‘𑀢𑁂 𑀲𑀢𑁆𑀢𑁂 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑁄’’𑀢𑀺 𑀅𑀢𑁆𑀢𑀦𑁄 𑀫𑀜𑁆𑀜𑀦𑀸𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀚𑁂𑀝𑁆𑀞𑀓𑁄𑀳𑀫𑀲𑁆𑀫𑀻’’𑀢𑀺. 𑀅𑀜𑁆𑀜𑀤𑀢𑁆𑀣𑀽𑀢𑀺 𑀤𑀲𑁆𑀲𑀦𑁂 𑀅𑀦𑁆𑀢𑀭𑀸𑀬𑀸𑀪𑀸𑀯𑀯𑀘𑀦𑁂𑀦, 𑀤𑀲𑁄𑀢𑀺 𑀏𑀢𑁆𑀣 𑀤𑀲𑁆𑀲𑀦𑁂𑀬𑁆𑀬𑀯𑀺𑀲𑁂𑀲𑀧𑀭𑀺𑀕𑁆𑀕𑀳𑀸𑀪𑀸𑀯𑁂𑀦 𑀘 𑀅𑀦𑀸𑀯𑀭𑀡𑀤𑀲𑁆𑀲𑀸𑀯𑀺𑀢𑀁 𑀧𑀝𑀺𑀚𑀸𑀦𑀸𑀢𑀻𑀢𑀺 𑀆𑀳 ‘‘𑀲𑀩𑁆𑀩𑀁 𑀧𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄’’𑀢𑀺. 𑀤𑀲𑁆𑀲𑀦𑁂𑀬𑁆𑀬𑀯𑀺𑀲𑁂𑀲𑀲𑁆𑀲 𑀳𑀺 𑀧𑀤𑁂𑀲𑀪𑀽𑀢𑀲𑁆𑀲 𑀅𑀕𑁆𑀕𑀳𑀡𑁂 𑀲𑀢𑀺 𑀕𑀳𑁂𑀢𑀩𑁆𑀩𑀲𑁆𑀲 𑀦𑀺𑀧𑁆𑀧𑀤𑁂𑀲𑀢𑀸 𑀯𑀺𑀜𑁆𑀜𑀸𑀬𑀢𑀺 𑀬𑀣𑀸 ‘‘𑀤𑀺𑀓𑁆𑀔𑀺𑀢𑁄 𑀦 ¶ 𑀤𑀤𑀸𑀢𑀻’’𑀢𑀺, 𑀤𑁂𑀬𑁆𑀬𑀥𑀫𑁆𑀫𑀯𑀺𑀲𑁂𑀲𑀲𑁆𑀲 𑀘𑁂𑀢𑁆𑀣 𑀧𑀤𑁂𑀲𑀪𑀽𑀢𑀲𑁆𑀲 𑀅𑀕𑁆𑀕𑀳𑀡𑀢𑁄 𑀧𑀩𑁆𑀩𑀚𑀺𑀢𑁄 𑀲𑀩𑁆𑀩𑀫𑁆𑀧𑀺 𑀦 𑀤𑀤𑀸𑀢𑀻𑀢𑀺 𑀕𑀳𑁂𑀢𑀩𑁆𑀩𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀦𑀺𑀧𑁆𑀧𑀤𑁂𑀲𑀢𑀸 𑀯𑀺𑀜𑁆𑀜𑀸𑀬𑀢𑀺. 𑀏𑀯𑀫𑀻𑀤𑀺𑀲𑁂𑀲𑀼. 𑀯𑀲𑁂 𑀯𑀢𑁆𑀢𑁂𑀫𑀻𑀢𑀺 𑀯𑀲𑀯𑀢𑁆𑀢𑀻. ¶ 𑀅𑀳𑀁-𑀲𑀤𑁆𑀤𑀬𑁄𑀕𑀢𑁄 𑀳𑀺 𑀲𑀩𑁆𑀩𑀢𑁆𑀣 𑀅𑀫𑁆𑀳𑀬𑁄𑀕𑁂𑀦 𑀯𑀘𑀦𑀢𑁆𑀣𑁄. 𑀲𑀢𑁆𑀢𑀪𑀸𑀚𑀦𑀪𑀽𑀢𑀲𑁆𑀲 𑀮𑁄𑀓𑀲𑁆𑀲 𑀦𑀺𑀫𑁆𑀫𑀸𑀢𑀸 𑀘𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀧𑀣𑀯𑀻’’𑀢𑀺𑀆𑀤𑀺 𑀘𑁂𑀢𑁆𑀣 𑀪𑀸𑀚𑀦𑀮𑁄𑀓𑀯𑀲𑁂𑀦 𑀅𑀥𑀺𑀧𑁆𑀧𑀸𑀬𑀓𑀣𑀦𑀁. 𑀲𑀚𑀺𑀢𑀸𑀢𑀺 𑀭𑀘𑀺𑀢𑀸, 𑀯𑀺𑀪𑀚𑀺𑀢𑀸 𑀯𑀸, 𑀢𑁂𑀦𑀸𑀳 ‘‘𑀢𑁆𑀯𑀁 𑀔𑀢𑁆𑀢𑀺𑀬𑁄 𑀦𑀸𑀫𑀸’’𑀢𑀺𑀆𑀤𑀺. 𑀘𑀺𑀡𑁆𑀡𑀯𑀲𑀺𑀢𑀸𑀬𑀸𑀢𑀺 𑀲𑀫𑀸𑀘𑀺𑀡𑁆𑀡𑀧𑀜𑁆𑀘𑀯𑀺𑀥𑀯𑀲𑀺𑀪𑀸𑀯𑀢𑁄. 𑀢𑀢𑁆𑀣𑀸𑀢𑀺 𑀪𑀽𑀢𑀪𑀩𑁆𑀬𑁂𑀲𑀼. 𑀅𑀦𑁆𑀢𑁄𑀯𑀢𑁆𑀣𑀺𑀫𑁆𑀳𑀻𑀢𑀺 𑀅𑀦𑁆𑀢𑁄𑀕𑀩𑁆𑀪𑀸𑀲𑀬𑁂. 𑀧𑀞𑀫𑀘𑀺𑀢𑁆𑀢𑀓𑁆𑀔𑀡𑁂𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀓𑁆𑀔𑀡𑁂. 𑀤𑀼𑀢𑀺𑀬𑀢𑁄𑀢𑀺 𑀧𑀞𑀫𑀪𑀯𑀗𑁆𑀕𑀘𑀺𑀢𑁆𑀢𑀓𑁆𑀔𑀡𑀢𑁄. 𑀧𑀞𑀫𑀇𑀭𑀺𑀬𑀸𑀧𑀣𑁂𑀢𑀺 𑀬𑁂𑀦 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀸𑀢𑀺, 𑀢𑀲𑁆𑀫𑀺𑀁 𑀇𑀭𑀺𑀬𑀸𑀧𑀣𑁂. 𑀇𑀢𑀺 𑀅𑀢𑀻𑀢𑀯𑀲𑁂𑀦, 𑀪𑀽𑀢-𑀲𑀤𑁆𑀤𑀲𑁆𑀲 𑀯𑀢𑁆𑀢𑀫𑀸𑀦𑀯𑀲𑁂𑀦 𑀘 𑀪𑀩𑁆𑀬-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀝𑀻𑀓𑀸𑀬𑀁 (𑀤𑀻. 𑀦𑀺. 𑀝𑀻. 𑁧.𑁪𑁨) 𑀧𑀦 𑀪𑀩𑁆𑀬-𑀲𑀤𑁆𑀤𑀢𑁆𑀣𑁄 𑀅𑀦𑀸𑀕𑀢𑀯𑀲𑁂𑀦𑀸𑀧𑀺 𑀯𑀼𑀢𑁆𑀢𑁄. 𑀅𑀳𑁂𑀲𑀼𑀦𑁆𑀢𑀺 𑀳𑀺 𑀪𑀽𑀢𑀸. 𑀪𑀯𑀦𑁆𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀘𑀸𑀢𑀺 𑀪𑀩𑁆𑀬𑀸 𑀢𑀩𑁆𑀩𑀸𑀦𑀻𑀬𑀸 𑀯𑀺𑀬 𑀡𑁆𑀬𑀧𑀘𑁆𑀘𑀬𑀲𑁆𑀲 𑀓𑀢𑁆𑀢𑀭𑀺𑀧𑀺 𑀧𑀯𑀢𑁆𑀢𑀦𑀢𑁄.

‘‘𑀇𑀲𑁆𑀲𑀭𑁄 𑀓𑀢𑁆𑀢𑀸 𑀦𑀺𑀫𑁆𑀫𑀸𑀢𑀸’’𑀢𑀺 𑀯𑀢𑁆𑀯𑀸𑀧𑀺 𑀧𑀼𑀦 ‘‘𑀫𑀬𑀸 𑀇𑀫𑁂 𑀲𑀢𑁆𑀢𑀸 𑀦𑀺𑀫𑁆𑀫𑀺𑀢𑀸’’𑀢𑀺 𑀯𑀘𑀦𑀁 𑀓𑀺𑀫𑀢𑁆𑀣𑀺𑀬𑀦𑁆𑀢𑀺 𑀆𑀳 ‘‘𑀇𑀤𑀸𑀦𑀺 𑀓𑀸𑀭𑀡𑀯𑀲𑁂𑀦𑀸’’𑀢𑀺𑀆𑀤𑀺 [𑀓𑀸𑀭𑀡𑀢𑁄 (𑀅𑀝𑁆𑀞𑀓𑀣𑀸𑀬𑀁)] 𑀓𑀸𑀭𑀡𑀯𑀲𑁂𑀦 𑀲𑀸𑀥𑁂𑀢𑀼𑀓𑀸𑀫𑀢𑀸𑀬 𑀧𑀝𑀺𑀜𑁆𑀜𑀸𑀓𑀭𑀡𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀦𑀼 𑀘𑁂𑀲 𑀩𑁆𑀭𑀳𑁆𑀫𑀸 𑀅𑀦𑀯𑀝𑁆𑀞𑀺𑀢𑀤𑀲𑁆𑀲𑀦𑀢𑁆𑀢𑀸 𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀼𑀭𑀺𑀫𑀢𑀭𑀚𑀸𑀢𑀺𑀧𑀭𑀺𑀘𑀺𑀢𑀫𑁆𑀧𑀺 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀯𑀲𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑀧𑀝𑀺𑀩𑀤𑁆𑀥𑁂𑀦 𑀲𑀢𑁆𑀢𑀦𑀺𑀫𑁆𑀫𑀸𑀦𑁂𑀦 𑀯𑀺𑀧𑀮𑁆𑀮𑀝𑁆𑀞𑁄 ‘‘𑀫𑀬𑀸 𑀇𑀫𑁂 𑀲𑀢𑁆𑀢𑀸 𑀦𑀺𑀫𑁆𑀫𑀺𑀢𑀸’’𑀢𑀺𑀆𑀤𑀺𑀦𑀸 𑀇𑀲𑁆𑀲𑀭𑀓𑀼𑀢𑁆𑀢𑀤𑀲𑁆𑀲𑀦𑀁 𑀧𑀓𑁆𑀔𑀦𑁆𑀤𑀫𑀸𑀦𑁄 𑀅𑀪𑀺𑀦𑀺𑀯𑀺𑀲𑀦𑀯𑀲𑁂𑀦 𑀧𑀢𑀺𑀝𑁆𑀞𑀺𑀢𑁄, 𑀦 𑀧𑀦 𑀧𑀢𑀺𑀝𑁆𑀞𑀸𑀧𑀦𑀯𑀲𑁂𑀦. 𑀅𑀣 𑀓𑀲𑁆𑀫𑀸 𑀓𑀸𑀭𑀡𑀯𑀲𑁂𑀦 𑀲𑀸𑀥𑁂𑀢𑀼𑀓𑀸𑀫𑁄 𑀧𑀝𑀺𑀜𑁆𑀜𑀁 𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀦 𑀘𑁂𑀯𑀁 𑀤𑀝𑁆𑀞𑀩𑁆𑀩𑀁. 𑀢𑁂𑀲𑀫𑁆𑀧𑀺 𑀳𑀺 ‘‘𑀏𑀯𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀦𑁆𑀢𑀸𑀦𑀫𑁆𑀧𑀺 𑀢𑀣𑀸𑀅𑀪𑀺𑀦𑀺𑀯𑁂𑀲𑀲𑁆𑀲 𑀯𑀓𑁆𑀔𑀫𑀸𑀦𑀢𑁆𑀢𑀸 𑀧𑀭𑁂𑀲𑀁 𑀧𑀢𑀺𑀝𑁆𑀞𑀸𑀧𑀦𑀓𑁆𑀓𑀫𑁂𑀦𑁂𑀯 𑀢𑀲𑁆𑀲 𑀲𑁄 𑀅𑀪𑀺𑀦𑀺𑀯𑁂𑀲𑁄 𑀚𑀸𑀢𑁄, 𑀦 𑀢𑀼 𑀅𑀪𑀺𑀦𑀺𑀯𑀺𑀲𑀦𑀫𑀢𑁆𑀢𑁂𑀦, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀽’’𑀢𑀺𑀆𑀤𑀺. 𑀧𑀸𑀴𑀺𑀬𑀁 𑀫𑀦𑀲𑁄 𑀧𑀡𑀺𑀥𑀻𑀢𑀺 𑀫𑀦𑀲𑁄 𑀧𑀢𑁆𑀣𑀦𑀸, 𑀢𑀣𑀸 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀫𑀢𑁆𑀢𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀢𑁆𑀣𑀪𑀸𑀯𑀦𑁆𑀢𑀺 𑀇𑀤𑀧𑁆𑀧𑀓𑀸𑀭𑀪𑀸𑀯𑀁. 𑀬𑀲𑁆𑀫𑀸 𑀧𑀦 𑀲𑁄 𑀧𑀓𑀸𑀭𑁄 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑁄𑀬𑁂𑀯𑀺𑀥𑀸𑀥𑀺𑀧𑁆𑀧𑁂𑀢𑁄, 𑀢𑀲𑁆𑀫𑀸 ‘‘𑀩𑁆𑀭𑀳𑁆𑀫𑀪𑀸𑀯’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀬𑀁 𑀧𑀓𑀸𑀭𑁄 𑀇𑀢𑁆𑀣𑀁, 𑀢𑀲𑁆𑀲 ¶ 𑀪𑀸𑀯𑁄 𑀇𑀢𑁆𑀣𑀢𑁆𑀢𑀦𑁆𑀢𑀺 𑀳𑀺 𑀦𑀺𑀩𑁆𑀩𑀘𑀦𑀁. 𑀓𑁂𑀯𑀮𑀦𑁆𑀢𑀺 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑁂𑀦 𑀅𑀲𑀫𑁆𑀫𑀺𑀲𑁆𑀲𑀁 𑀲𑀼𑀤𑁆𑀥𑀁. 𑀫𑀜𑁆𑀜𑀦𑀸𑀫𑀢𑁆𑀢𑁂𑀦𑁂𑀯𑀸𑀢𑀺 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀫𑀢𑁆𑀢𑁂𑀦𑁂𑀯, 𑀦 𑀅𑀥𑀺𑀫𑀸𑀦𑀯𑀲𑁂𑀦. 𑀯𑀗𑁆𑀓𑀙𑀺𑀤𑁆𑀤𑁂𑀦 𑀯𑀗𑁆𑀓𑀆𑀡𑀻 𑀯𑀺𑀬 𑀑𑀦𑀫𑀺𑀢𑁆𑀯𑀸 𑀯𑀗𑁆𑀓𑀮𑀤𑁆𑀥𑀺𑀓𑁂𑀦 𑀯𑀗𑁆𑀓𑀮𑀤𑁆𑀥𑀺𑀓𑀸 𑀑𑀦𑀫𑀺𑀢𑁆𑀯𑀸 𑀢𑀲𑁆𑀲𑁂𑀯 𑀩𑁆𑀭𑀳𑁆𑀫𑀼𑀦𑁄 𑀧𑀸𑀤𑀫𑀽𑀮𑀁 𑀕𑀘𑁆𑀙𑀦𑁆𑀢𑀺, 𑀢𑀁𑀧𑀓𑁆𑀔𑀓𑀸 𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦𑀦𑀼 𑀘 𑀤𑁂𑀯𑀸𑀦𑀁 𑀉𑀧𑀧𑀢𑁆𑀢𑀺𑀲𑀫𑀦𑀦𑁆𑀢𑀭𑀁 ‘‘𑀇𑀫𑀸𑀬 𑀦𑀸𑀫 𑀕𑀢𑀺𑀬𑀸 𑀘𑀯𑀺𑀢𑁆𑀯𑀸 𑀇𑀫𑀺𑀦𑀸 𑀦𑀸𑀫 𑀓𑀫𑁆𑀫𑀼𑀦𑀸 𑀇𑀥𑀽𑀧𑀧𑀦𑁆𑀦𑀸’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸 𑀳𑁄𑀢𑀺, 𑀅𑀣 𑀓𑀲𑁆𑀫𑀸 𑀢𑁂𑀲𑀁 𑀏𑀯𑀁 𑀫𑀜𑁆𑀜𑀦𑀸 𑀲𑀺𑀬𑀸𑀢𑀺? 𑀧𑀼𑀭𑀺𑀫𑀚𑀸𑀢𑀻𑀲𑀼 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑁂 𑀲𑀫𑁆𑀫𑀤𑁂𑀯 𑀦𑀺𑀯𑀺𑀝𑁆𑀞𑀚𑁆𑀛𑀸𑀲𑀬𑀸𑀦𑀫𑁂𑀯 𑀢𑀣𑀸𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀧𑀯𑀢𑁆𑀢𑀺𑀢𑁄. 𑀢𑀸𑀤𑀺𑀲𑀸𑀦𑀫𑁂𑀯 𑀳𑀺 𑀢𑀣𑀸𑀧𑀘𑁆𑀘𑀯𑁂𑀓𑁆𑀔𑀡𑀸 ¶ 𑀲𑀫𑁆𑀪𑀯𑀢𑀺, 𑀲𑀸 𑀘 𑀔𑁄 𑀬𑁂𑀪𑀼𑀬𑁆𑀬𑀯𑀲𑁂𑀦, 𑀇𑀫𑁂 𑀧𑀦 𑀧𑀼𑀭𑀺𑀫𑀸𑀲𑀼𑀧𑀺 𑀚𑀸𑀢𑀻𑀲𑀼 𑀇𑀲𑁆𑀲𑀭𑀓𑀼𑀢𑁆𑀢𑀤𑀺𑀝𑁆𑀞𑀺𑀯𑀲𑁂𑀦 𑀦𑀺𑀩𑀤𑁆𑀥𑀸𑀪𑀺𑀦𑀺𑀯𑁂𑀲𑀸 𑀏𑀯𑀫𑁂𑀯 𑀫𑀜𑁆𑀜𑀫𑀸𑀦𑀸 𑀅𑀳𑁂𑀲𑀼𑀦𑁆𑀢𑀺. 𑀢𑀣𑀸 𑀳𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁 ‘‘𑀇𑀫𑀺𑀦𑀸 𑀫𑀬’’𑀦𑁆𑀢𑀺𑀆𑀤𑀺.

𑁪𑁩. 𑀈𑀲𑀢𑀺 𑀅𑀪𑀺𑀪𑀯𑀢𑀻𑀢𑀺 𑀈𑀲𑁄, 𑀫𑀳𑀦𑁆𑀢𑁄 𑀈𑀲𑁄 𑀫𑀳𑁂𑀲𑁄, 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀫𑀳𑁂𑀲𑀢𑀸𑀬 𑀧𑀭𑁂𑀳𑀺 ‘‘𑀫𑀳𑁂𑀲𑁄’’ 𑀇𑀢𑀺 𑀅𑀓𑁆𑀔𑀸𑀬𑀢𑀻𑀢𑀺 𑀫𑀳𑁂𑀲𑀓𑁆𑀔𑁄, 𑀫𑀳𑁂𑀲𑀓𑁆𑀔𑀸𑀦𑀁 𑀅𑀢𑀺𑀲𑀬𑁂𑀦 𑀫𑀳𑁂𑀲𑀓𑁆𑀔𑁄𑀢𑀺 𑀫𑀳𑁂𑀲𑀓𑁆𑀔𑀢𑀭𑁄𑀢𑀺 𑀯𑀘𑀦𑀢𑁆𑀣𑁄. 𑀲𑁄 𑀧𑀦 𑀫𑀳𑁂𑀲𑀓𑁆𑀔𑀢𑀭𑀪𑀸𑀯𑁄 𑀆𑀥𑀺𑀧𑀢𑁂𑀬𑁆𑀬𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀪𑀽𑀢𑀸𑀬 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀇𑀲𑁆𑀲𑀭𑀺𑀬𑀧𑀭𑀺𑀯𑀸𑀭𑀯𑀲𑁂𑀦 𑀫𑀳𑀸𑀬𑀲𑀢𑀭𑁄’’𑀢𑀺.

𑁪𑁪. 𑀓𑀺𑀁 𑀧𑀦𑁂𑀢𑀁 𑀓𑀸𑀭𑀡𑀦𑁆𑀢𑀺 𑀅𑀦𑀼𑀬𑁄𑀕𑁂𑀦𑀸𑀳 ‘‘𑀲𑁄 𑀢𑀢𑁄’’𑀢𑀺𑀆𑀤𑀺, 𑀢𑁂𑀦 ‘‘𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀁 𑀇𑀥𑀸𑀕𑀫𑀦𑀫𑁂𑀯 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀇𑀥𑁂𑀯 𑀆𑀕𑀘𑁆𑀙𑀢𑀻𑀢𑀺 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀮𑁄𑀓𑁂 𑀏𑀯 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀆𑀕𑀘𑁆𑀙𑀢𑀺. 𑀏𑀢𑀦𑁆𑀢𑀺 ‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀪𑀺𑀓𑁆𑀔𑀯𑁂, 𑀯𑀺𑀚𑁆𑀚𑀢𑀻’’𑀢𑀺 𑀯𑀘𑀦𑀁. 𑀧𑀸𑀴𑀺𑀬𑀁 𑀬𑀁 𑀅𑀜𑁆𑀜𑀢𑀭𑁄 𑀲𑀢𑁆𑀢𑁄𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀓𑀸𑀭𑀡𑀢𑁆𑀣𑁂 𑀯𑀸 𑀏𑀲 𑀦𑀺𑀧𑀸𑀢𑁄, 𑀳𑁂𑀢𑀼𑀫𑁆𑀳𑀺 𑀯𑀸 𑀧𑀘𑁆𑀘𑀢𑁆𑀢𑀦𑀺𑀤𑁆𑀤𑁂𑀲𑁄, 𑀬𑁂𑀦 𑀞𑀸𑀦𑁂𑀦𑀸𑀢𑀺 𑀅𑀢𑁆𑀣𑁄, 𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁 𑀯𑀸 𑀏𑀢𑀁. ‘‘𑀇𑀢𑁆𑀣𑀢𑁆𑀢𑀁 𑀆𑀕𑀘𑁆𑀙𑀢𑀻’’𑀢𑀺 𑀏𑀢𑁆𑀣 𑀬𑀤𑁂𑀢𑀁 𑀇𑀢𑁆𑀣𑀢𑁆𑀢𑀲𑁆𑀲 𑀆𑀕𑀫𑀦𑀲𑀗𑁆𑀔𑀸𑀢𑀁 𑀞𑀸𑀦𑀁, 𑀢𑀤𑁂𑀢𑀁 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀏𑀲 𑀦 𑀲𑁄 𑀧𑀩𑁆𑀩𑀚𑀢𑀺, 𑀘𑁂𑀢𑁄𑀲𑀫𑀸𑀥𑀺𑀁 𑀨𑀼𑀲𑀢𑀺, 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀢𑀻𑀢𑀺 𑀏𑀢𑁂𑀲𑀼𑀧𑀺 𑀧𑀤𑁂𑀲𑀼. ‘‘𑀞𑀸𑀦𑀁 𑀔𑁄 𑀧𑀦𑁂𑀢𑀁 𑀪𑀺𑀓𑁆𑀔𑀯𑁂, 𑀯𑀺𑀚𑁆𑀚𑀢𑀺, 𑀬𑀁 𑀅𑀜𑁆𑀜𑀢𑀭𑁄 𑀲𑀢𑁆𑀢𑁄’’𑀢𑀺 𑀳𑀺 𑀇𑀫𑀸𑀦𑀺 𑀧𑀤𑀸𑀦𑀺 ‘‘𑀧𑀩𑁆𑀩𑀚𑀢𑀻’’𑀢𑀺𑀆𑀤𑀻𑀳𑀺𑀧𑀺 𑀧𑀤𑁂𑀳𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀦 𑀕𑀘𑁆𑀙𑀢𑀻𑀢𑀺 𑀅𑀕𑀸𑀭𑀁, 𑀕𑁂𑀳𑀁, 𑀅𑀕𑀸𑀭𑀲𑁆𑀲 𑀳𑀺𑀢𑀁 𑀆𑀕𑀸𑀭𑀺𑀬𑀁, 𑀓𑀲𑀺𑀕𑁄𑀭𑀓𑁆𑀔𑀸𑀤𑀺𑀓𑀫𑁆𑀫𑀁, 𑀢𑀫𑁂𑀢𑁆𑀣 𑀦𑀢𑁆𑀣𑀻𑀢𑀺 𑀅𑀦𑀸𑀕𑀸𑀭𑀺𑀬𑀁, 𑀧𑀩𑁆𑀩𑀚𑁆𑀚𑀸, 𑀢𑁂𑀦𑀸𑀳 ‘‘𑀅𑀕𑀸𑀭𑀲𑁆𑀫𑀸’’𑀢𑀺𑀆𑀤𑀺. 𑀧-𑀲𑀤𑁆𑀤𑁂𑀦 𑀯𑀺𑀲𑀺𑀝𑁆𑀞𑁄 𑀯𑀚-𑀲𑀤𑁆𑀤𑁄 𑀉𑀧𑀲𑀗𑁆𑀓𑀫𑀦𑁂𑀢𑀺 𑀯𑀼𑀢𑁆𑀢𑀁 ‘‘𑀉𑀧𑀕𑀘𑁆𑀙𑀢𑀻’’𑀢𑀺. 𑀧𑀭𑀦𑁆𑀢𑀺 ¶ 𑀧𑀘𑁆𑀙𑀸, 𑀅𑀢𑀺𑀲𑀬𑀁 𑀯𑀸, 𑀅𑀜𑁆𑀜𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀦𑁆𑀢𑀺𑀧𑀺 𑀅𑀢𑁆𑀣𑁄. ‘‘𑀦 𑀲𑀭𑀢𑀻’’𑀢𑀺 𑀯𑀼𑀢𑁆𑀢𑁂𑀬𑁂𑀯 𑀅𑀬𑀫𑀢𑁆𑀣𑁄 𑀆𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀲𑀭𑀺𑀢𑀼’’𑀦𑁆𑀢𑀺𑀆𑀤𑀺𑀦𑀸. 𑀅𑀧𑀲𑁆𑀲𑀦𑁆𑀢𑁄𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀅𑀧𑀲𑁆𑀲𑀦𑀳𑁂𑀢𑀼, 𑀧𑀲𑁆𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀳𑀼𑀢𑁆𑀯𑀸𑀢𑀺𑀧𑀺 𑀯𑀝𑁆𑀝𑀢𑀺. 𑀫𑀸𑀦-𑀲𑀤𑁆𑀤𑁄 𑀯𑀺𑀬 𑀳𑀺 𑀅𑀦𑁆𑀢-𑀲𑀤𑁆𑀤𑁄 𑀇𑀥 𑀲𑀸𑀫𑀢𑁆𑀣𑀺𑀬𑀢𑁆𑀣𑁄. 𑀲𑀤𑀸𑀪𑀸𑀯𑀢𑁄𑀢𑀺 𑀲𑀩𑁆𑀩𑀤𑀸 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀚𑀭𑀸𑀯𑀲𑁂𑀦𑀸𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁂𑀦 𑀫𑀭𑀡𑀯𑀲𑁂𑀦𑀸𑀧𑀻𑀢𑀺 𑀲𑀫𑁆𑀧𑀺𑀡𑁆𑀟𑁂𑀢𑀺.

𑁪𑁫. 𑀔𑀺𑀟𑁆𑀟𑀸𑀧𑀤𑁄𑀲𑀺𑀦𑁄𑀢𑀺 𑀓𑀢𑁆𑀢𑀼𑀯𑀲𑁂𑀦 𑀧𑀤𑀲𑀺𑀤𑁆𑀥𑀺, 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸𑀢𑀺 𑀧𑀦 𑀲𑀓𑀢𑁆𑀣𑀯𑀼𑀢𑁆𑀢𑀺𑀯𑀲𑁂𑀦, 𑀲𑀤𑁆𑀤𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀧𑀦 𑀅𑀢𑁆𑀣𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀔𑀺𑀟𑁆𑀟𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀔𑀺𑀟𑁆𑀟𑀸𑀧𑀤𑁄𑀲𑀓𑀸’’𑀢𑀺 𑀯𑀸 𑀯𑀢𑁆𑀢𑀩𑁆𑀩𑁂 𑀇-𑀓𑀸𑀭𑀸𑀕𑀫𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑀁. 𑀧𑀤𑀼𑀲𑁆𑀲𑀦𑀁 𑀯𑀸 𑀧𑀤𑁄𑀲𑁄, 𑀔𑀺𑀟𑁆𑀟𑀸𑀬 𑀧𑀤𑁄𑀲𑁄 𑀔𑀺𑀟𑁆𑀟𑀸𑀧𑀤𑁄𑀲𑁄, 𑀲𑁄 𑀏𑀢𑁂𑀲𑀦𑁆𑀢𑀺 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸. ‘‘𑀧𑀤𑀽𑀲𑀺𑀓𑀸𑀢𑀺𑀧𑀺 𑀧𑀸𑀴𑀺𑀁 𑀮𑀺𑀔𑀦𑁆𑀢𑀻’’𑀢𑀺 𑀅𑀜𑁆𑀜𑀦𑀺𑀓𑀸𑀬𑀺𑀓𑀸𑀦𑀁 𑀧𑀫𑀸𑀤𑀮𑁂𑀔𑀢𑀁 𑀤𑀲𑁆𑀲𑁂𑀢𑀺 ¶ . 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀺𑀓𑀸𑀬𑀺𑀓𑀸𑀦𑀜𑁆𑀳𑀺 𑀯𑀸𑀘𑀦𑀸𑀫𑀕𑁆𑀕𑀯𑀲𑁂𑀦 𑀅𑀬𑀁 𑀲𑀁𑀯𑀡𑁆𑀡𑀦𑀸 𑀧𑀯𑀢𑁆𑀢𑀸. 𑀅𑀧𑀺𑀘 𑀢𑁂𑀦 𑀧𑁄𑀢𑁆𑀣𑀓𑀸𑀭𑀼𑀴𑁆𑀳𑀓𑀸𑀮𑁂 𑀧𑀫𑀸𑀤𑀮𑁂𑀔𑀁 𑀤𑀲𑁆𑀲𑁂𑀢𑀺. 𑀢𑀫𑁆𑀧𑀺 𑀳𑀺 𑀧𑀤𑀢𑁆𑀣𑀲𑁄𑀥𑀦𑀸𑀬 𑀅𑀝𑁆𑀞𑀓𑀣𑀸𑀬 𑀲𑁄𑀥𑀺𑀢𑀦𑀺𑀬𑀸𑀫𑁂𑀦𑁂𑀯 𑀕𑀳𑁂𑀢𑀩𑁆𑀩𑀁, 𑀢𑁂𑀦𑀸𑀳 ‘‘𑀲𑀸 𑀅𑀝𑁆𑀞𑀓𑀣𑀸𑀬𑀁 𑀦𑀢𑁆𑀣𑀻’’𑀢𑀺. 𑀯𑁂𑀮𑀁 𑀅𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀯𑁂𑀮𑀁, 𑀢𑀁. 𑀪𑀸𑀯𑀦𑀧𑀼𑀁𑀲𑀓𑀜𑁆𑀘𑁂𑀢𑀁, 𑀢𑁂𑀦𑀸𑀳 ‘‘𑀅𑀢𑀺𑀘𑀺𑀭’’𑀦𑁆𑀢𑀺, 𑀆𑀳𑀸𑀭𑀽𑀧𑀪𑁄𑀕𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀢𑀺𑀥𑀫𑁆𑀫-𑀲𑀤𑁆𑀤𑁄 𑀳𑀲𑁆𑀲𑀔𑀺𑀟𑁆𑀟𑀸-𑀲𑀤𑁆𑀤𑁂𑀳𑀺 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄 ‘‘𑀳𑀲𑁆𑀲𑀔𑀺𑀟𑁆𑀟𑀸𑀲𑀼 𑀭𑀢𑀺𑀥𑀫𑁆𑀫𑁄 𑀭𑀫𑀡𑀲𑀪𑀸𑀯𑁄’’𑀢𑀺. 𑀳𑀲𑀦𑀁 𑀳𑀲𑁆𑀲𑁄, 𑀓𑁂𑀴𑀺𑀳𑀲𑁆𑀲𑁄. 𑀔𑁂𑀟𑀦𑀁 𑀓𑀻𑀴𑀦𑀁 𑀔𑀺𑀟𑁆𑀟𑀸, 𑀓𑀸𑀬𑀺𑀓𑀯𑀸𑀘𑀲𑀺𑀓𑀓𑀻𑀴𑀸. 𑀅𑀦𑀼𑀬𑁄𑀕𑀯𑀲𑁂𑀦 𑀢𑀁𑀲𑀫𑀸𑀧𑀦𑁆𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀳𑀲𑁆𑀲𑀭𑀢𑀺𑀥𑀫𑁆𑀫𑀜𑁆𑀘𑁂𑀯𑀸’’𑀢𑀺𑀆𑀤𑀺. 𑀓𑀻𑀴𑀸 𑀬𑁂𑀲𑀁 𑀢𑁂 𑀓𑁂𑀴𑀺𑀦𑁄, 𑀢𑁂𑀲𑀁 𑀳𑀲𑁆𑀲𑁄 𑀢𑀣𑀸. 𑀓𑀻𑀴𑀸𑀳𑀲𑁆𑀲𑀧𑀬𑁄𑀕𑁂𑀦 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀜𑁆𑀘𑁂𑀢𑁆𑀣 𑀓𑁂𑀴𑀺𑀳𑀲𑁆𑀲𑀲𑀼𑀔𑀁. 𑀢𑀤𑀯𑀲𑀺𑀝𑁆𑀞𑀓𑀻𑀴𑀸𑀧𑀬𑁄𑀕𑁂𑀦 𑀉𑀧𑁆𑀧𑀚𑁆𑀚𑀦𑀓𑀁 𑀓𑀸𑀬𑀺𑀓𑀯𑀸𑀘𑀲𑀺𑀓𑀓𑀻𑀴𑀸𑀲𑀼𑀔𑀁.

‘‘𑀢𑁂 𑀓𑀺𑀭𑀸’’𑀢𑀺𑀆𑀤𑀺 𑀯𑀺𑀢𑁆𑀣𑀸𑀭𑀤𑀲𑁆𑀲𑀦𑀁. 𑀓𑀺𑀭-𑀲𑀤𑁆𑀤𑁄 𑀳𑁂𑀢𑁆𑀣 𑀯𑀺𑀢𑁆𑀣𑀸𑀭𑀚𑁄𑀢𑀓𑁄𑀬𑁂𑀯, 𑀦 𑀢𑀼 𑀅𑀦𑀼𑀲𑁆𑀲𑀯𑀦𑀸𑀭𑀼𑀘𑀺𑀬𑀸𑀤𑀺𑀚𑁄𑀢𑀓𑁄 𑀢𑀣𑀸𑀬𑁂𑀯 𑀧𑀸𑀴𑀺𑀬𑀁, 𑀅𑀝𑁆𑀞𑀓𑀣𑀸𑀲𑀼 𑀘 𑀯𑀼𑀢𑁆𑀢𑀢𑁆𑀢𑀸. 𑀲𑀺𑀭𑀺𑀯𑀺𑀪𑀯𑁂𑀦𑀸𑀢𑀺 𑀲𑀭𑀻𑀭𑀲𑁄𑀪𑀕𑁆𑀕𑀸𑀤𑀺𑀲𑀺𑀭𑀺𑀬𑀸, 𑀧𑀭𑀺𑀯𑀸𑀭𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀘. 𑀦𑀓𑁆𑀔𑀢𑁆𑀢𑀦𑁆𑀢𑀺 𑀙𑀡𑀁. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀦𑀓𑁆𑀔𑀢𑁆𑀢𑀬𑁄𑀕𑁂𑀦 𑀓𑀢𑀢𑁆𑀢𑀸 𑀢𑀣𑀸𑀬𑁄𑀕𑁄 𑀯𑀸 𑀳𑁄𑀢𑀼, 𑀫𑀸 𑀯𑀸, 𑀦𑀓𑁆𑀔𑀢𑁆𑀢𑀫𑀺𑀘𑁆𑀘𑁂𑀯 𑀯𑀼𑀘𑁆𑀘𑀢𑀺. 𑀆𑀳𑀸𑀭𑀦𑁆𑀢𑀺 𑀏𑀢𑁆𑀣 𑀓𑁄 𑀤𑁂𑀯𑀸𑀦𑀫𑀸𑀳𑀸𑀭𑁄, 𑀓𑀸 𑀘 𑀢𑁂𑀲𑀫𑀸𑀳𑀸𑀭𑀯𑁂𑀮𑀸𑀢𑀺? 𑀲𑀩𑁆𑀩𑁂𑀲𑀫𑁆𑀧𑀺 𑀓𑀸𑀫𑀸𑀯𑀘𑀭𑀤𑁂𑀯𑀸𑀦𑀁 𑀲𑀼𑀥𑀸𑀳𑀸𑀭𑁄. 𑀤𑁆𑀯𑀸𑀤𑀲𑀧𑀸𑀧𑀥𑀫𑁆𑀫𑀯𑀺𑀕𑁆𑀖𑀸𑀢𑁂𑀦 ¶ 𑀳𑀺 𑀲𑀼𑀔𑀲𑁆𑀲 𑀥𑀸𑀭𑀡𑀢𑁄 𑀤𑁂𑀯𑀸𑀦𑀁 𑀪𑁄𑀚𑀦𑀁 ‘‘𑀲𑀼𑀥𑀸’’𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀧𑀦 𑀲𑁂𑀢𑀸 𑀲𑀗𑁆𑀔𑀽𑀧𑀫𑀸 𑀅𑀢𑀼𑀮𑁆𑀬𑀤𑀲𑁆𑀲𑀦𑀸 𑀲𑀼𑀘𑀺 𑀲𑀼𑀕𑀦𑁆𑀥𑀸 𑀧𑀺𑀬𑀭𑀽𑀧𑀸. 𑀬𑀁 𑀲𑀦𑁆𑀥𑀸𑀬 𑀲𑀼𑀥𑀸𑀪𑁄𑀚𑀦𑀚𑀸𑀢𑀓𑁂 𑀯𑀼𑀢𑁆𑀢𑀁 𑁋

‘‘𑀲𑀗𑁆𑀔𑀽𑀧𑀫𑀁 𑀲𑁂𑀢’𑀫𑀢𑀼𑀮𑁆𑀬𑀤𑀲𑁆𑀲𑀦𑀁,

𑀲𑀼𑀘𑀺𑀁 𑀲𑀼𑀕𑀦𑁆𑀥𑀁 𑀧𑀺𑀬𑀭𑀽𑀧’𑀫𑀩𑁆𑀪𑀼𑀢𑀁;

𑀅𑀤𑀺𑀝𑁆𑀞𑀧𑀼𑀩𑁆𑀩𑀁 𑀫𑀫 𑀚𑀸𑀢𑀼 𑀘𑀓𑁆𑀔𑀼𑀪𑀺,

𑀓𑀸 𑀤𑁂𑀯𑀢𑀸 𑀧𑀸𑀡𑀺𑀲𑀼 𑀓𑀺𑀁 𑀲𑀼𑀥𑁄’𑀤𑀳𑀻’’𑀢𑀺. (𑀚𑀸. 𑁨.𑁨𑁧.𑁨𑁨𑁭);

‘‘𑀪𑀼𑀢𑁆𑀢𑀸 𑀘 𑀲𑀸 𑀤𑁆𑀯𑀸𑀤𑀲𑀳𑀦𑁆𑀢𑀺 𑀧𑀸𑀧𑀓𑁂,

𑀔𑀼𑀤𑁆𑀤𑀁 𑀧𑀺𑀧𑀸𑀲𑀁 𑀅𑀭𑀢𑀺𑀁 𑀤𑀭𑀓𑁆𑀮𑀫𑀁;

𑀓𑁄𑀥𑀽𑀧𑀦𑀸𑀳𑀜𑁆𑀘 𑀯𑀺𑀯𑀸𑀤𑀧𑁂𑀲𑀼𑀡𑀁,

𑀲𑀻𑀢𑀼𑀡𑁆𑀳 𑀢𑀦𑁆𑀤𑀺𑀜𑁆𑀘 𑀭𑀲𑀼𑀢𑁆𑀢𑀫𑀁 𑀇𑀤’’𑀦𑁆𑀢𑀺 𑀘. (𑀚𑀸. 𑁨.𑁨𑁧.𑁨𑁨𑁯);

𑀲𑀸 𑀘 𑀳𑁂𑀝𑁆𑀞𑀺𑀫𑁂𑀳𑀺 𑀳𑁂𑀝𑁆𑀞𑀺𑀫𑁂𑀳𑀺 𑀉𑀧𑀭𑀺𑀫𑀸𑀦𑀁 𑀉𑀧𑀭𑀺𑀫𑀸𑀦𑀁 𑀧𑀡𑀻𑀢𑀢𑀫𑀸 𑀳𑁄𑀢𑀺, 𑀢𑀁 𑀬𑀣𑀸𑀲𑀓𑀁 𑀧𑀭𑀺𑀫𑀺𑀢𑀤𑀺𑀯𑀲𑀯𑀲𑁂𑀦 ¶ 𑀤𑀺𑀯𑀲𑁂 𑀤𑀺𑀯𑀲𑁂 𑀪𑀼𑀜𑁆𑀚𑀦𑁆𑀢𑀺. 𑀓𑁂𑀘𑀺 𑀧𑀦 𑀯𑀤𑀦𑁆𑀢𑀺 ‘‘𑀩𑀺𑀴𑀸𑀭𑀧𑀤𑀧𑁆𑀧𑀫𑀸𑀡𑀁 𑀲𑀼𑀥𑀸𑀳𑀸𑀭𑀁 𑀢𑁂 𑀪𑀼𑀜𑁆𑀚𑀦𑁆𑀢𑀺, 𑀲𑁄 𑀚𑀺𑀯𑁆𑀳𑀸𑀬 𑀞𑀧𑀺𑀢𑀫𑀢𑁆𑀢𑁄 𑀬𑀸𑀯 𑀓𑁂𑀲𑀕𑁆𑀕𑀦𑀔𑀕𑁆𑀕𑀸 𑀓𑀸𑀬𑀁 𑀨𑀭𑀢𑀺, 𑀬𑀣𑀸𑀲𑀓𑀁 𑀕𑀡𑀺𑀢𑀤𑀺𑀯𑀲𑀯𑀲𑁂𑀦 𑀲𑀢𑁆𑀢 𑀤𑀺𑀯𑀲𑁂 𑀬𑀸𑀧𑀦𑀲𑀫𑀢𑁆𑀣𑁄 𑀳𑁄𑀢𑀻’’𑀢𑀺. 𑀓𑁂𑀘𑀺𑀯𑀸𑀤𑁂 𑀧𑀦𑁂𑀢𑁆𑀣 𑀩𑀺𑀴𑀸𑀭𑀧𑀤-𑀲𑀤𑁆𑀤𑁄 𑀲𑀼𑀯𑀡𑁆𑀡𑀲𑀗𑁆𑀔𑀸𑀢𑀲𑁆𑀲 𑀲𑀗𑁆𑀔𑁆𑀬𑀸𑀯𑀺𑀲𑁂𑀲𑀲𑁆𑀲 𑀯𑀸𑀘𑀓𑁄. 𑀧𑀫𑀸𑀡𑀢𑁄 𑀧𑀦 𑀉𑀤𑀼𑀫𑁆𑀩𑀭𑀨𑀮𑀧𑁆𑀧𑀫𑀸𑀡𑀁, 𑀬𑀁 𑀧𑀸𑀡𑀺𑀢𑀮𑀁 𑀓𑀩𑀴𑀕𑁆𑀕𑀳𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀫𑀥𑀼𑀓𑁄𑀲𑁂 𑁋

‘‘𑀧𑀸𑀡𑀺𑀭𑀓𑁆𑀔𑁄 𑀧𑀺𑀘𑀼 𑀘𑀸𑀧𑀺, 𑀲𑀼𑀯𑀡𑁆𑀡𑀓𑀫𑀼𑀤𑀼𑀫𑁆𑀩𑀭𑀁;

𑀩𑀺𑀴𑀸𑀭𑀧𑀤𑀓𑀁 𑀧𑀸𑀡𑀺-𑀢𑀮𑀁 𑀢𑀁 𑀓𑀩𑀴𑀕𑁆𑀕𑀳’’𑀦𑁆𑀢𑀺.

‘‘𑀦𑀺𑀭𑀦𑁆𑀢𑀭𑀁 𑀔𑀸𑀤𑀦𑁆𑀢𑀸𑀧𑀺 𑀧𑀺𑀯𑀦𑁆𑀢𑀸𑀧𑀻’’𑀢𑀺 𑀇𑀤𑀁 𑀧𑀭𑀺𑀓𑀧𑁆𑀧𑀦𑀸𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀧𑀦 𑀏𑀯𑀁 𑀦𑀺𑀬𑀫𑀯𑀲𑁂𑀦 𑀢𑀣𑀸 𑀔𑀸𑀤𑀦𑀧𑀺𑀯𑀦𑀸𑀦𑀫𑀦𑀺𑀬𑀫𑀪𑀸𑀯𑀢𑁄. 𑀓𑀫𑁆𑀫𑀚𑀢𑁂𑀚𑀲𑁆𑀲 𑀩𑀮𑀯𑀪𑀸𑀯𑁄 𑀉𑀴𑀸𑀭𑀧𑀼𑀜𑁆𑀜𑀦𑀺𑀩𑁆𑀩𑀢𑁆𑀢𑀢𑁆𑀢𑀸, 𑀉𑀴𑀸𑀭𑀕𑀭𑀼𑀲𑀺𑀦𑀺𑀤𑁆𑀥𑀲𑀼𑀥𑀸𑀳𑀸𑀭𑀚𑀻𑀭𑀡𑀢𑁄 𑀘. 𑀓𑀭𑀚𑀓𑀸𑀬𑀲𑁆𑀲 𑀫𑀦𑁆𑀤𑀪𑀸𑀯𑁄 𑀧𑀦 𑀲𑀼𑀔𑀼𑀫𑀸𑀮𑀪𑀸𑀯𑀢𑁄. 𑀢𑁂𑀦𑁂𑀯 𑀳𑀺 𑀪𑀕𑀯𑀸 𑀇𑀦𑁆𑀤𑀲𑀸𑀮𑀕𑀼𑀳𑀸𑀬𑀁 𑀧𑀓𑀢𑀺𑀧𑀣𑀯𑀺𑀬𑀁 𑀧𑀢𑀺𑀆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 ‘‘𑀑𑀴𑀸𑀭𑀺𑀓𑀁 𑀓𑀸𑀬𑀁 𑀅𑀥𑀺𑀝𑁆𑀞𑁂𑀳𑀻’’𑀢𑀺 𑀅𑀯𑁄𑀘. 𑀫𑀦𑀼𑀲𑁆𑀲𑀸𑀦𑀁 𑀧𑀦 𑀓𑀫𑁆𑀫𑀚𑀢𑁂𑀚𑀲𑁆𑀲 𑀫𑀦𑁆𑀤𑀪𑀸𑀯𑁄, 𑀓𑀭𑀚𑀓𑀸𑀬𑀲𑁆𑀲 𑀩𑀮𑀯𑀪𑀸𑀯𑁄 𑀘 𑀯𑀼𑀢𑁆𑀢𑀯𑀺𑀧𑀭𑀻𑀢𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀓𑀭𑀚𑀓𑀸𑀬𑁄𑀢𑀺 𑀏𑀢𑁆𑀣 𑀓𑁄 𑀯𑀼𑀘𑁆𑀘𑀢𑀺 𑀲𑀭𑀻𑀭𑀁, 𑀢𑀢𑁆𑀣 𑀧𑀯𑀢𑁆𑀢𑁄. 𑀭𑀚𑁄 ¶ 𑀓𑀭𑀚𑁄, 𑀓𑀺𑀁 𑀢𑀁? 𑀲𑀼𑀓𑁆𑀓𑀲𑁄𑀡𑀺𑀢𑀁. 𑀢𑀜𑁆𑀳𑀺 ‘‘𑀭𑀸𑀕𑁄 𑀭𑀚𑁄 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀻’’𑀢𑀺 (𑀫𑀳𑀸𑀦𑀺. 𑁨𑁦𑁯; 𑀘𑀽𑀴𑀦𑀺. 𑁭𑁪) 𑀏𑀯𑀁 𑀯𑀼𑀢𑁆𑀢𑀭𑀸𑀕𑀭𑀚𑀨𑀮𑀢𑁆𑀢𑀸 𑀲𑀭𑀻𑀭𑀯𑀸𑀘𑀓𑁂𑀦 𑀓-𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀓𑀸𑀭𑀡𑀯𑁄𑀳𑀸𑀭𑁂𑀦 ‘‘𑀓𑀭𑀚𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀲𑀼𑀓𑁆𑀓𑀲𑁄𑀡𑀺𑀢𑀲𑀗𑁆𑀔𑀸𑀢𑁂𑀦 𑀓𑀭𑀚𑁂𑀦 𑀲𑀫𑁆𑀪𑀽𑀢𑁄 𑀓𑀸𑀬𑁄 𑀓𑀭𑀚𑀓𑀸𑀬𑁄𑀢𑀺 𑀆𑀘𑀭𑀺𑀬𑀸. 𑀢𑀣𑀸 𑀳𑀺 𑀓𑀸𑀬𑁄 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑁄𑀢𑀺 𑀯𑀼𑀢𑁆𑀢𑁄. 𑀫𑀳𑀸𑀅𑀲𑁆𑀲𑀧𑀽𑀭𑀲𑀼𑀢𑁆𑀢𑀦𑁆𑀢𑀝𑀻𑀓𑀸𑀬𑀁 𑀧𑀦 ‘‘𑀓𑀭𑀻𑀬𑀢𑀺 𑀕𑀩𑁆𑀪𑀸𑀲𑀬𑁂 𑀔𑀺𑀧𑀻𑀬𑀢𑀻𑀢𑀺 𑀓𑀭𑁄, 𑀲𑀫𑁆𑀪𑀯𑁄, 𑀓𑀭𑀢𑁄 𑀚𑀸𑀢𑁄𑀢𑀺 𑀓𑀭𑀚𑁄, 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑁄𑀢𑀺 𑀅𑀢𑁆𑀣𑁄. 𑀫𑀸𑀢𑀼𑀆𑀤𑀻𑀦𑀁 𑀲𑀡𑁆𑀞𑀸𑀧𑀦𑀯𑀲𑁂𑀦 𑀓𑀭𑀢𑁄 𑀳𑀢𑁆𑀣𑀢𑁄 𑀚𑀸𑀢𑁄𑀢𑀺 𑀓𑀭𑀚𑁄𑀢𑀺 𑀅𑀧𑀭𑁂. 𑀉𑀪𑀬𑀣𑀸𑀧𑀺 𑀓𑀭𑀚𑀓𑀸𑀬𑀦𑁆𑀢𑀺 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀫𑀸𑀳𑀸’’𑀢𑀺 𑀯𑀼𑀢𑁆𑀢𑀁. 𑀓𑀭𑁄𑀢𑀺 𑀧𑀼𑀢𑁆𑀢𑁂 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀓𑀭𑁄, 𑀲𑀼𑀓𑁆𑀓𑀲𑁄𑀡𑀺𑀢𑀁, 𑀢𑁂𑀦 𑀚𑀸𑀢𑁄 𑀓𑀭𑀚𑁄𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀣𑀸 𑀅𑀲𑀫𑁆𑀪𑀽𑀢𑁄𑀧𑀺 𑀘 𑀤𑁂𑀯𑀸𑀤𑀻𑀦𑀁 𑀓𑀸𑀬𑁄 𑀢𑀩𑁆𑀩𑁄𑀳𑀸𑀭𑁂𑀦 ‘‘𑀓𑀭𑀚𑀓𑀸𑀬𑁄’’𑀢𑀺 𑀯𑀼𑀘𑁆𑀘𑀢𑀺 𑀬𑀣𑀸 ‘‘𑀧𑀽𑀢𑀺𑀓𑀸𑀬𑁄, 𑀚𑀭𑀲𑀺𑀗𑁆𑀕𑀸𑀮𑁄’’𑀢𑀺. 𑀢𑁂𑀲𑀦𑁆𑀢𑀺 𑀫𑀦𑀼𑀲𑁆𑀲𑀸𑀦𑀁. 𑀅𑀘𑁆𑀙𑀬𑀸𑀕𑀼 𑀦𑀸𑀫 𑀧𑀲𑀦𑁆𑀦𑀸 𑀅𑀓𑀲𑀝𑀸 𑀬𑀸𑀕𑀼. 𑀯𑀢𑁆𑀣𑀼𑀦𑁆𑀢𑀺 𑀓𑀭𑀚𑀓𑀸𑀬𑀁. 𑀏𑀓𑀁 𑀆𑀳𑀸𑀭𑀯𑁂𑀮𑀦𑁆𑀢𑀺 𑀏𑀓𑀤𑀺𑀯𑀲𑀫𑀢𑁆𑀢𑀁, 𑀓𑁂𑀲𑀜𑁆𑀘𑀺 𑀫𑀢𑁂𑀦 𑀧𑀦 𑀲𑀢𑁆𑀢𑀸𑀳𑀁.

𑀏𑀯𑀁 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀤𑀲𑁆𑀲𑁂𑀢𑁆𑀯𑀸 𑀉𑀧𑀫𑀸𑀯𑀲𑁂𑀦𑀧𑀺 𑀢𑀫𑀸𑀯𑀺𑀓𑀭𑁄𑀦𑁆𑀢𑁄 ‘‘𑀬𑀣𑀸 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀢𑀧𑀸𑀲𑀸𑀡𑁂𑀢𑀺 𑀅𑀘𑁆𑀘𑀼𑀡𑁆𑀳𑀧𑀸𑀲𑀸𑀡𑁂. 𑀭𑀢𑁆𑀢𑀲𑁂𑀢𑀧𑀤𑀼𑀫𑀢𑁄 𑀅𑀯𑀲𑀺𑀝𑁆𑀞𑀁 𑀉𑀧𑁆𑀧𑀮𑀁. 𑀅𑀓𑀣𑀸𑀬𑀦𑁆𑀢𑀺 ¶ 𑀫𑀳𑀸𑀅𑀝𑁆𑀞𑀓𑀣𑀸𑀬𑀁. 𑀅𑀯𑀺𑀲𑁂𑀲𑁂𑀦𑀸𑀢𑀺 ‘‘𑀤𑁂𑀯𑀸𑀦’’𑀦𑁆𑀢𑀺 𑀅𑀯𑀺𑀲𑁂𑀲𑁂𑀦, 𑀤𑁂𑀯𑀸𑀦𑀁 𑀓𑀫𑁆𑀫𑀚𑀢𑁂𑀚𑁄 𑀩𑀮𑀯𑀸 𑀳𑁄𑀢𑀺, 𑀓𑀭𑀚𑀁 𑀫𑀦𑁆𑀤𑀦𑁆𑀢𑀺 𑀯𑀸 𑀓𑀫𑁆𑀫𑀚𑀢𑁂𑀚𑀓𑀭𑀚𑀓𑀸𑀬𑀸𑀦𑀁 𑀩𑀮𑀯𑀫𑀦𑁆𑀤𑀢𑀸𑀲𑀗𑁆𑀔𑀸𑀢 𑀓𑀸𑀭𑀡𑀲𑀸𑀫𑀜𑁆𑀜𑁂𑀦. 𑀢𑀤𑁂𑀢𑀜𑁆𑀳𑀺 𑀓𑀸𑀭𑀡𑀁 𑀲𑀩𑁆𑀩𑁂𑀲𑀫𑁆𑀧𑀺 𑀤𑁂𑀯𑀸𑀦𑀁 𑀲𑀫𑀸𑀦𑀫𑁂𑀯, 𑀢𑀲𑁆𑀫𑀸 𑀲𑀩𑁆𑀩𑁂𑀧𑀺 𑀤𑁂𑀯𑀸 𑀕𑀳𑁂𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀩𑀴𑀻𑀓𑀸𑀭𑀪𑀽𑀢𑀁 𑀲𑀼𑀥𑀸𑀳𑀸𑀭𑀁 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑀻𑀢𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑀽𑀧𑀚𑀻𑀯𑀺𑀦𑁄. 𑀓𑁂𑀘𑀻𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄. ‘‘𑀔𑀺𑀟𑁆𑀟𑀸𑀧𑀤𑀼𑀲𑁆𑀲𑀦𑀫𑀢𑁆𑀢𑁂𑀦𑁂𑀯 𑀳𑁂𑀢𑁂 𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸𑀢𑀺 𑀯𑀼𑀢𑁆𑀢𑀸’’𑀢𑀺 𑀅𑀬𑀁 𑀧𑀸𑀞𑁄 ‘‘𑀢𑁂𑀬𑁂𑀯 𑀘𑀯𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀏𑀢𑀲𑁆𑀲𑀸𑀦𑀦𑁆𑀢𑀭𑁂 𑀧𑀞𑀺𑀢𑀩𑁆𑀩𑁄 𑀢𑀤𑀦𑀼𑀲𑀦𑁆𑀥𑀺𑀓𑀢𑁆𑀢𑀸. 𑀅𑀬𑀜𑁆𑀳𑁂𑀢𑁆𑀣𑀸𑀦𑀼𑀲𑀦𑁆𑀥𑀺 𑁋 𑀬𑀤𑀺 𑀲𑀩𑁆𑀩𑁂𑀧𑀺 𑀏𑀯𑀁 𑀓𑀭𑁄𑀦𑁆𑀢𑀸 𑀓𑀸𑀫𑀸𑀯𑀘𑀭𑀤𑁂𑀯𑀸 𑀘𑀯𑁂𑀬𑁆𑀬𑀼𑀁, 𑀅𑀣 𑀓𑀲𑁆𑀫𑀸 ‘‘𑀔𑀺𑀟𑁆𑀟𑀸𑀧𑀤𑁄𑀲𑀺𑀓𑀸’’𑀢𑀺 𑀦𑀸𑀫𑀯𑀺𑀲𑁂𑀲𑁂𑀦 𑀪𑀕𑀯𑀢𑀸 𑀯𑀼𑀢𑁆𑀢𑀸𑀢𑀺? 𑀯𑀺𑀘𑀸𑀭𑀡𑀸𑀬 𑀏𑀯𑀫𑀸𑀳𑀸𑀢𑀺, 𑀏𑀢𑁂𑀦 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀲𑀩𑁆𑀩𑁂𑀧𑀺 𑀤𑁂𑀯𑀸 𑀏𑀯𑀁 𑀘𑀯𑀦𑁆𑀢𑀸𑀧𑀺 𑀔𑀺𑀟𑁆𑀟𑀸𑀬 𑀧𑀤𑀼𑀲𑁆𑀲𑀦𑀲𑀪𑀸𑀯𑀫𑀢𑁆𑀢𑀁 𑀧𑀢𑀺 𑀦𑀸𑀫𑀯𑀺𑀲𑁂𑀲𑁂𑀦 ¶ 𑀢𑀣𑀸 𑀯𑀼𑀢𑁆𑀢𑀸’’𑀢𑀺. 𑀬𑀤𑁂𑀓𑁂 𑀯𑀤𑁂𑀬𑁆𑀬𑀼𑀁 ‘‘𑀓𑁂𑀘𑀺𑀯𑀸𑀤𑀧𑀢𑀺𑀝𑁆𑀞𑀸𑀧𑀓𑁄𑀬𑀁 𑀧𑀸𑀞𑁄’’𑀢𑀺, 𑀢𑀤𑀬𑀼𑀢𑁆𑀢𑀫𑁂𑀯 𑀇𑀢𑀺-𑀲𑀤𑁆𑀤𑀦𑁆𑀢𑀭𑀺𑀓𑀢𑁆𑀢𑀸, 𑀅𑀦𑁆𑀢𑁂 𑀘 𑀢𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀅𑀢𑁆𑀣𑀺𑀓𑁂𑀳𑀺 𑀧𑀦 𑀢𑀲𑁆𑀲 𑀓𑁂𑀘𑀺𑀯𑀸𑀤𑀲𑀫𑀯𑀭𑁄𑀥𑀦𑀁 𑀅𑀦𑁆𑀢𑁂 𑀇𑀢𑀺𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄𑀢𑀺.

𑁪𑁭-𑁪𑁮. 𑀫𑀦𑁄𑀧𑀤𑁄𑀲𑀺𑀦𑁄𑀢𑀺 𑀓𑀢𑁆𑀢𑀼𑀯𑀲𑁂𑀦 𑀧𑀤𑀲𑀺𑀤𑁆𑀥𑀺, 𑀫𑀦𑁄𑀧𑀤𑁄𑀲𑀺𑀓𑀸𑀢𑀺 𑀘 𑀲𑀓𑀢𑁆𑀣𑀯𑀼𑀢𑁆𑀢𑀺𑀯𑀲𑁂𑀦, 𑀅𑀢𑁆𑀣𑀫𑀢𑁆𑀢𑀁 𑀧𑀦 𑀤𑀲𑁆𑀲𑁂𑀢𑀼𑀁 ‘‘𑀫𑀦𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀫𑀦𑁄𑀧𑀤𑁄𑀲𑀓𑀸’’𑀢𑀺 𑀯𑀸 𑀯𑀢𑁆𑀢𑀩𑁆𑀩𑁂 𑀇-𑀓𑀸𑀭𑀸𑀕𑀫𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑀁. 𑀫𑀦𑁂𑀦𑀸𑀢𑀺 𑀇𑀲𑁆𑀲𑀸𑀧𑀓𑀢𑀢𑁆𑀢𑀸 𑀧𑀤𑀼𑀝𑁆𑀞𑁂𑀦 𑀫𑀦𑀲𑀸. 𑀅𑀧𑀭𑁄 𑀦𑀬𑁄 𑁋 𑀉𑀲𑀽𑀬𑀦𑀯𑀲𑁂𑀦 𑀫𑀦𑀲𑀸 𑀧𑀤𑁄𑀲𑁄 𑀫𑀦𑁄𑀧𑀤𑁄𑀲𑁄, 𑀯𑀺𑀦𑀸𑀲𑀪𑀽𑀢𑁄 𑀲𑁄 𑀏𑀢𑁂𑀲𑀫𑀢𑁆𑀣𑀻𑀢𑀺 𑀫𑀦𑁄𑀧𑀤𑁄𑀲𑀺𑀓𑀸𑀢𑀺. ‘‘𑀢𑁂 𑀅𑀜𑁆𑀜𑀫𑀜𑁆𑀜𑀫𑁆𑀳𑀺 𑀧𑀤𑀼𑀝𑁆𑀞𑀘𑀺𑀢𑁆𑀢𑀸 𑀓𑀺𑀮𑀦𑁆𑀢𑀓𑀸𑀬𑀸 𑀓𑀺𑀮𑀦𑁆𑀢𑀘𑀺𑀢𑁆𑀢𑀸 𑀢𑁂 𑀤𑁂𑀯𑀸 𑀢𑀫𑁆𑀳𑀸 𑀓𑀸𑀬𑀸 𑀘𑀯𑀦𑁆𑀢𑀻’’𑀢𑀺 𑀯𑀘𑀦𑀢𑁄 ‘‘𑀏𑀢𑁂 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸’’𑀢𑀺 𑀆𑀳. 𑀫𑀦𑁂𑀦 𑀧𑀤𑀼𑀲𑁆𑀲𑀦𑀫𑀢𑁆𑀢𑁂𑀦𑁂𑀯 𑀳𑁂𑀢𑁂 𑀫𑀦𑁄𑀧𑀤𑁄𑀲𑀺𑀓𑀸𑀢𑀺 𑀯𑀼𑀢𑁆𑀢𑀸. ‘‘𑀢𑁂𑀲𑀼 𑀓𑀺𑀭𑀸’’𑀢𑀺𑀆𑀤𑀺 𑀯𑀺𑀢𑁆𑀣𑀸𑀭𑁄. 𑀭𑀣𑁂𑀦 𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀢𑀻𑀢𑀺 𑀉𑀧𑀮𑀓𑁆𑀔𑀡𑀫𑀢𑁆𑀢𑀁 𑀅𑀜𑁆𑀜𑁂𑀳𑀺 𑀅𑀜𑁆𑀜𑀢𑁆𑀣𑀸𑀧𑀺 𑀧𑀝𑀺𑀧𑀚𑁆𑀚𑀦𑀲𑀫𑁆𑀪𑀯𑀢𑁄. 𑀏𑀢𑀦𑁆𑀢𑀺 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀁. 𑀉𑀤𑁆𑀥𑀼𑀫𑀸𑀢𑁄 𑀯𑀺𑀬𑀸𑀢𑀺 𑀧𑀻𑀢𑀺𑀬𑀸 𑀓𑀭𑀡𑀪𑀽𑀢𑀸𑀬 𑀉𑀦𑁆𑀦𑀢𑁄 𑀯𑀺𑀬. 𑀪𑀺𑀚𑁆𑀚𑀫𑀸𑀦𑁄 𑀯𑀺𑀬𑀸𑀢𑀺 𑀢𑀸𑀬 𑀪𑀺𑀚𑁆𑀚𑀦𑁆𑀢𑁄 𑀯𑀺𑀬, 𑀧𑀻𑀢𑀺𑀬𑀸 𑀯𑀸 𑀓𑀢𑁆𑀢𑀼𑀪𑀽𑀢𑀸𑀬 𑀪𑀜𑁆𑀚𑀺𑀢𑁄 𑀯𑀺𑀬. 𑀓𑀼𑀤𑁆𑀥𑀸 𑀦𑀸𑀫 𑀲𑀼𑀯𑀺𑀚𑀸𑀦𑀦𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀓𑀼𑀤𑁆𑀥𑀪𑀸𑀯𑀫𑀲𑁆𑀲 𑀜𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀅𑀓𑀼𑀤𑁆𑀥𑁄 𑀭𑀓𑁆𑀔𑀢𑀻𑀢𑀺 𑀓𑀼𑀤𑁆𑀥𑀲𑁆𑀲 𑀲𑁄 𑀓𑁄𑀥𑁄 𑀇𑀢𑀭𑀲𑁆𑀫𑀺𑀁 𑀅𑀓𑀼𑀚𑁆𑀛𑀦𑁆𑀢𑁂 𑀅𑀦𑀼𑀧𑀸𑀤𑀸𑀦𑁄 𑀘𑁂𑀯 𑀏𑀓𑀯𑀸𑀭𑀫𑀢𑁆𑀢𑀁 𑀉𑀧𑁆𑀧𑀢𑁆𑀢𑀺𑀬𑀸 𑀅𑀦𑀸𑀲𑁂𑀯𑀦𑁄 𑀘 𑀳𑀼𑀢𑁆𑀯𑀸 𑀘𑀸𑀯𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀉𑀤𑀓𑀦𑁆𑀢𑀁 𑀧𑀢𑁆𑀯𑀸 𑀅𑀕𑁆𑀕𑀺 𑀯𑀺𑀬 𑀦𑀺𑀩𑁆𑀩𑀸𑀬𑀢𑀺, 𑀢𑀲𑁆𑀫𑀸 𑀅𑀓𑀼𑀤𑁆𑀥𑁄 𑀇𑀢𑀭𑀁 𑀘𑀯𑀦𑀢𑁄 𑀭𑀓𑁆𑀔𑀢𑀺. 𑀉𑀪𑁄𑀲𑀼 𑀧𑀦 𑀓𑀼𑀤𑁆𑀥𑁂𑀲𑀼 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀅𑀜𑁆𑀜𑀫𑀜𑁆𑀜𑀫𑁆𑀳𑀺 𑀧𑀭𑀺𑀯𑀟𑁆𑀠𑀦𑀯𑀲𑁂𑀦 𑀢𑀺𑀔𑀺𑀡𑀲𑀫𑀼𑀤𑀸𑀘𑀸𑀭𑁄 𑀦𑀺𑀲𑁆𑀲𑀬𑀤𑀳𑀦𑀭𑀲𑁄 𑀓𑁄𑀥𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀳𑀤𑀬𑀯𑀢𑁆𑀣𑀼𑀁 𑀦𑀺𑀤𑀳𑀦𑁆𑀢𑁄 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀸𑀮𑀓𑀭𑀚𑀓𑀸𑀬𑀁 𑀯𑀺𑀦𑀸𑀲𑁂𑀢𑀺, 𑀢𑀢𑁄 𑀲𑀓𑀮𑁄𑀧𑀺 𑀅𑀢𑁆𑀢𑀪𑀸𑀯𑁄 𑀅𑀦𑁆𑀢𑀭𑀥𑀸𑀬𑀢𑀺 ¶ , 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀫𑀸𑀳 ‘‘𑀉𑀪𑁄𑀲𑀼 𑀧𑀦𑀸’’𑀢𑀺𑀆𑀤𑀺. 𑀢𑀣𑀸 𑀘𑀸𑀳 𑀧𑀸𑀴𑀺𑀬𑀁 ‘‘𑀢𑁂 𑀅𑀜𑁆𑀜𑀫𑀜𑁆𑀜𑀫𑁆𑀳𑀺 𑀧𑀤𑀼𑀝𑁆𑀞𑀘𑀺𑀢𑁆𑀢𑀸 𑀓𑀺𑀮𑀦𑁆𑀢𑀓𑀸𑀬𑀸 𑀓𑀺𑀮𑀦𑁆𑀢𑀘𑀺𑀢𑁆𑀢𑀸 𑀢𑁂 𑀤𑁂𑀯𑀸 𑀢𑀫𑁆𑀳𑀸 𑀓𑀸𑀬𑀸 𑀘𑀯𑀦𑁆𑀢𑀻’’𑀢𑀺. 𑀏𑀓𑀲𑁆𑀲 𑀓𑁄𑀥𑁄 𑀇𑀢𑀭𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀲𑀧𑀺 𑀓𑁄𑀥𑁄 𑀇𑀢𑀭𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀓𑁄𑀥𑀲𑁆𑀲 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀧𑀭𑀺𑀯𑀟𑁆𑀠𑀦𑀸𑀬 𑀏𑀯 𑀧𑀘𑁆𑀘𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀘𑀯𑀦𑀸𑀬 𑀦𑀺𑀲𑁆𑀲𑀬𑀤𑀳𑀦𑀭𑀲𑁂𑀦 𑀅𑀢𑁆𑀢𑀦𑁄𑀬𑁂𑀯 𑀓𑁄𑀥𑁂𑀦 𑀳𑀤𑀬𑀯𑀢𑁆𑀣𑀼𑀁 𑀦𑀺𑀤𑀳𑀦𑁆𑀢𑁂𑀦 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀸𑀮𑀲𑁆𑀲 ¶ 𑀓𑀭𑀚𑀓𑀸𑀬𑀲𑁆𑀲 𑀘𑀯𑀦𑀢𑁄. 𑀓𑀦𑁆𑀤𑀦𑁆𑀢𑀸𑀦𑀁𑀬𑁂𑀯 𑀑𑀭𑁄𑀥𑀸𑀦𑀦𑁆𑀢𑀺 𑀅𑀦𑀸𑀤𑀭𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸𑀢𑀺 𑀅𑀬𑀁 𑀢𑁂𑀲𑀁 𑀓𑀭𑀚𑀓𑀸𑀬𑀫𑀦𑁆𑀤𑀢𑀸𑀬, 𑀢𑀣𑀸𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀘 𑀓𑁄𑀥𑀲𑁆𑀲 𑀩𑀮𑀯𑀢𑀸𑀬 𑀞𑀸𑀦𑀲𑁄 𑀘𑀯𑀦𑀪𑀸𑀯𑁄 𑀏𑀢𑁂𑀲𑀼 𑀤𑁂𑀯𑁂𑀲𑀼 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀥𑀫𑁆𑀫𑀦𑀺𑀬𑀸𑀫𑁄 𑀲𑀪𑀸𑀯𑁄𑀢𑀺 𑀅𑀢𑁆𑀣𑁄.

𑁪𑁯-𑁫𑁨. 𑀘𑀓𑁆𑀔𑀸𑀤𑀻𑀦𑀁 𑀪𑁂𑀤𑀁 𑀧𑀲𑁆𑀲𑀢𑀻𑀢𑀺 𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀦𑁆𑀦𑀺𑀧𑀸𑀢𑁂 𑀯𑀺𑀓𑀸𑀭𑀸𑀧𑀢𑁆𑀢𑀺𑀤𑀲𑁆𑀲𑀦𑀢𑁄, 𑀅𑀦𑁆𑀢𑁂 𑀘 𑀅𑀤𑀲𑁆𑀲𑀦𑀽𑀧𑀕𑀫𑀦𑀢𑁄 𑀯𑀺𑀦𑀸𑀲𑀁 𑀧𑀲𑁆𑀲𑀢𑀺 𑀑𑀴𑀸𑀭𑀺𑀓𑀢𑁆𑀢𑀸 𑀭𑀽𑀧𑀥𑀫𑁆𑀫𑀪𑁂𑀤𑀲𑁆𑀲. 𑀧𑀘𑁆𑀘𑀬𑀁 𑀤𑀢𑁆𑀯𑀸𑀢𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑀲𑀢𑁆𑀢𑀺𑀁 𑀤𑀢𑁆𑀯𑀸, 𑀧𑀘𑁆𑀘𑀬𑁄 𑀳𑀼𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀦 𑀧𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀩𑀮𑀯𑀢𑀭𑀫𑁆𑀧𑀺 𑀲𑀫𑀸𑀦𑀁 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀦 𑀧𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀩𑀮𑀯𑀢𑀭𑀦𑁆𑀢𑀺 𑀘 𑀘𑀺𑀢𑁆𑀢𑀲𑁆𑀲 𑀮𑀳𑀼𑀢𑀭𑀪𑁂𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀏𑀓𑀲𑁆𑀫𑀺𑀁 𑀭𑀽𑀧𑁂 𑀥𑀭𑀦𑁆𑀢𑁂𑀬𑁂𑀯 𑀲𑁄𑀴𑀲 𑀘𑀺𑀢𑁆𑀢𑀸𑀦𑀺 𑀪𑀺𑀚𑁆𑀚𑀦𑁆𑀢𑀺. 𑀘𑀺𑀢𑁆𑀢𑀲𑁆𑀲 𑀪𑁂𑀤𑀁 𑀦 𑀧𑀲𑁆𑀲𑀢𑀻𑀢𑀺 𑀏𑀢𑁆𑀣 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀦𑁆𑀢𑀫𑁆𑀧𑀺 𑀘𑀺𑀢𑁆𑀢𑀁 𑀧𑀭𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁂𑀦𑁂𑀯 𑀪𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀧𑀼𑀭𑀺𑀫𑀘𑀺𑀢𑁆𑀢𑀲𑁆𑀲 𑀅𑀪𑀸𑀯𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀺𑀬 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀢𑁄 𑀪𑀸𑀯𑀧𑀓𑁆𑀔𑁄 𑀩𑀮𑀯𑀢𑀭𑁄 𑀧𑀸𑀓𑀝𑁄𑀯 𑀳𑁄𑀢𑀺, 𑀦 𑀅𑀪𑀸𑀯𑀧𑀓𑁆𑀔𑁄𑀢𑀺 𑀇𑀤𑀁 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀺𑀢𑁆𑀢𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀜𑁆𑀘𑀢𑁆𑀣𑁄 𑀅𑀮𑀸𑀪𑀘𑀓𑁆𑀓𑀦𑀺𑀤𑀲𑁆𑀲𑀦𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀬𑀲𑁆𑀫𑀸 𑀧𑀦 𑀢𑀓𑁆𑀓𑀻𑀯𑀸𑀤𑀻 𑀦𑀸𑀦𑀢𑁆𑀢𑀦𑀬𑀲𑁆𑀲 𑀤𑀼𑀭𑀯𑀥𑀸𑀦𑀢𑀸𑀬, 𑀏𑀓𑀢𑁆𑀢𑀦𑀬𑀲𑁆𑀲 𑀘 𑀫𑀺𑀘𑁆𑀙𑀸𑀕𑀳𑀺𑀢𑀢𑁆𑀢𑀸 ‘‘𑀬𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁 𑀲𑀩𑁆𑀩𑀤𑀸𑀧𑀺 𑀏𑀯𑀭𑀽𑀧𑁂𑀦 𑀧𑀯𑀢𑁆𑀢𑀢𑀺, 𑀅𑀬𑀁 𑀫𑁂 𑀅𑀢𑁆𑀢𑀸 𑀦𑀺𑀘𑁆𑀘𑁄’’𑀢𑀺𑀆𑀤𑀺𑀦𑀸 𑀅𑀪𑀺𑀦𑀺𑀯𑁂𑀲𑀁 𑀚𑀦𑁂𑀲𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 ‘‘𑀲𑁄 𑀢𑀁 𑀅𑀧𑀲𑁆𑀲𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀲𑀳 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀺.

𑀅𑀦𑁆𑀢𑀸𑀦𑀦𑁆𑀢𑀯𑀸𑀤𑀯𑀡𑁆𑀡𑀦𑀸

𑁫𑁩. 𑀅𑀦𑁆𑀢𑀸𑀦𑀦𑁆𑀢𑀲𑀳𑀘𑀭𑀺𑀢𑁄 𑀯𑀸𑀤𑁄 𑀅𑀦𑁆𑀢𑀸𑀦𑀦𑁆𑀢𑁄 𑀬𑀣𑀸 ‘‘𑀓𑀼𑀦𑁆𑀢𑀸 𑀧𑀘𑀭𑀦𑁆𑀢𑀻’’𑀢𑀺, 𑀅𑀦𑁆𑀢𑀸𑀦𑀦𑁆𑀢𑀲𑀦𑁆𑀦𑀺𑀲𑁆𑀲𑀬𑁄 𑀯𑀸 𑀬𑀣𑀸 ‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻’’𑀢𑀺, 𑀲𑁄 𑀏𑀢𑁂𑀲𑀦𑁆𑀢𑀺 𑀅𑀦𑁆𑀢𑀸𑀦𑀦𑁆𑀢𑀺𑀓𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑁆𑀢𑀸𑀦𑀦𑁆𑀢𑀯𑀸𑀤𑀸’’𑀢𑀺 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀦𑀬𑁂𑀦 𑀅𑀦𑁆𑀢𑀸𑀦𑀦𑁆𑀢𑀲𑀳𑀘𑀭𑀺𑀢𑁄, 𑀢𑀦𑁆𑀦𑀺𑀲𑁆𑀲𑀬𑁄 𑀯𑀸, 𑀅𑀦𑁆𑀢𑀸𑀦𑀦𑁆𑀢𑁂𑀲𑀼 𑀯𑀸 𑀧𑀯𑀢𑁆𑀢𑁄 𑀯𑀸𑀤𑁄 𑀏𑀢𑁂𑀲𑀦𑁆𑀢𑀺 𑀅𑀦𑁆𑀢𑀸𑀦𑀦𑁆𑀢𑀯𑀸𑀤𑀸. 𑀇𑀤𑀸𑀦𑀺 ‘‘𑀅𑀦𑁆𑀢𑀯𑀸 𑀅𑀬𑀁 𑀮𑁄𑀓𑁄’’𑀢𑀺𑀆𑀤𑀺𑀦𑀸 𑀯𑀓𑁆𑀔𑀫𑀸𑀦𑀧𑀸𑀞𑀸𑀦𑀼𑀭𑀽𑀧𑀁 𑀅𑀢𑁆𑀣𑀁 𑀯𑀺𑀪𑀚𑀦𑁆𑀢𑁄 ‘‘𑀅𑀦𑁆𑀢𑀁 𑀯𑀸’’𑀢𑀺𑀆𑀤𑀺𑀫𑀸𑀳. 𑀅𑀫𑀢𑀺 𑀕𑀘𑁆𑀙𑀢𑀺 ¶ 𑀪𑀸𑀯𑁄 𑀑𑀲𑀸𑀦𑀫𑁂𑀢𑁆𑀣𑀸𑀢𑀺 𑀳𑀺 𑀅𑀦𑁆𑀢𑁄, 𑀫𑀭𑀺𑀬𑀸𑀤𑀸 ¶ , 𑀢𑀧𑁆𑀧𑀝𑀺𑀲𑁂𑀥𑀦𑁂𑀦 𑀅𑀦𑀦𑁆𑀢𑁄. 𑀅𑀦𑁆𑀢𑁄 𑀘 𑀅𑀦𑀦𑁆𑀢𑁄 𑀘 𑀅𑀦𑁆𑀢𑀸𑀦𑀦𑁆𑀢𑁄 𑀘 𑀦𑁂𑀯𑀦𑁆𑀢𑀦𑀸𑀦𑀦𑁆𑀢𑁄 𑀘 𑀅𑀦𑁆𑀢𑀸𑀦𑀦𑁆𑀢𑁄 𑀢𑁆𑀯𑁂𑀯 𑀯𑀼𑀢𑁆𑀢𑁄 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, 𑀏𑀓𑀲𑁂𑀲𑁂𑀦𑀯𑀸 ‘‘𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁨𑁬; 𑀲𑀁. 𑀦𑀺. 𑁨.𑁧; 𑀉𑀤𑀸. 𑁧) 𑀯𑀺𑀬. 𑀘𑀢𑀼𑀢𑁆𑀣𑀧𑀤𑀜𑁆𑀳𑁂𑀢𑁆𑀣 𑀢𑀢𑀺𑀬𑀧𑀤𑁂𑀦 𑀲𑀫𑀸𑀦𑀢𑁆𑀣𑀦𑁆𑀢𑀺 𑀅𑀦𑁆𑀢𑀸𑀦𑀦𑁆𑀢𑀧𑀤𑁂𑀦𑁂𑀯 𑀬𑀣𑀸𑀯𑀼𑀢𑁆𑀢𑀦𑀬𑀤𑁆𑀯𑀬𑁂𑀦 𑀘𑀢𑀼𑀥𑀸 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀓𑀲𑁆𑀲 𑀧𑀦𑀸𑀬𑀁 𑀅𑀦𑁆𑀢𑀸𑀦𑀦𑁆𑀢𑁄𑀢𑀺? 𑀮𑁄𑀓𑀻𑀬𑀢𑀺 𑀲𑀁𑀲𑀸𑀭𑀦𑀺𑀲𑁆𑀲𑀭𑀡𑀢𑁆𑀣𑀺𑀓𑁂𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑁂𑀳𑀺 𑀅𑀯𑀧𑀲𑁆𑀲𑀻𑀬𑀢𑀺, 𑀮𑁄𑀓𑀺𑀬𑀦𑁆𑀢𑀺 𑀯𑀸 𑀏𑀢𑁆𑀣 𑀢𑁂𑀳𑀺 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑀺, 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺 ‘‘𑀮𑁄𑀓𑁄’’𑀢𑀺 𑀲𑀗𑁆𑀔𑁆𑀬𑀁 𑀕𑀢𑀲𑁆𑀲 𑀅𑀢𑁆𑀢𑀦𑁄. 𑀢𑁂𑀦𑀸𑀳 𑀧𑀸𑀴𑀺𑀬𑀁 ‘‘𑀅𑀦𑁆𑀢𑀸𑀦𑀦𑁆𑀢𑀁 𑀮𑁄𑀓𑀲𑁆𑀲 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺. 𑀓𑁄 𑀧𑀦𑁂𑀲𑁄 𑀅𑀢𑁆𑀢𑀸𑀢𑀺? 𑀛𑀸𑀦𑀯𑀺𑀲𑀬𑀪𑀽𑀢𑀁 𑀓𑀲𑀺𑀡𑀦𑀺𑀫𑀺𑀢𑁆𑀢𑀁. 𑀅𑀬𑀜𑁆𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑁄 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁, 𑀅𑀧𑀭𑀺𑀬𑀦𑁆𑀢𑀁 𑀯𑀸 𑀯𑀟𑁆𑀠𑀦𑀯𑀲𑁂𑀦, 𑀢𑀤𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀘 𑀢𑀢𑁆𑀣 𑀮𑁄𑀓𑀲𑀜𑁆𑀜𑀻 𑀯𑀺𑀳𑀭𑀢𑀺, 𑀢𑀣𑀸 𑀘 𑀅𑀝𑁆𑀞𑀓𑀣𑀸𑀬𑀁 𑀯𑀓𑁆𑀔𑀢𑀺 ‘‘𑀢𑀁 ‘𑀮𑁄𑀓𑁄’𑀢𑀺 𑀕𑀳𑁂𑀢𑁆𑀯𑀸’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁫𑁪-𑁬𑁦) 𑀓𑁂𑀘𑀺 𑀧𑀦 𑀯𑀤𑀦𑁆𑀢𑀺 ‘‘𑀛𑀸𑀦𑀁, 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀘 𑀇𑀥 𑀅𑀢𑁆𑀢𑀸, 𑀮𑁄𑀓𑁄𑀢𑀺 𑀘 𑀕𑀳𑀺𑀢𑀸’’𑀢𑀺, 𑀢𑀁 𑀅𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺.

𑀏𑀢𑁆𑀣𑀸𑀳 𑁋 𑀬𑀼𑀢𑁆𑀢𑀁 𑀢𑀸𑀯 𑀧𑀼𑀭𑀺𑀫𑀸𑀦𑀁 𑀢𑀺𑀡𑁆𑀡𑀫𑁆𑀧𑀺 𑀯𑀸𑀤𑀻𑀦𑀁 𑀅𑀦𑁆𑀢𑀸𑀦𑀦𑁆𑀢𑀺𑀓𑀢𑁆𑀢𑀁 𑀅𑀦𑁆𑀢𑀜𑁆𑀘 𑀅𑀦𑀦𑁆𑀢𑀜𑁆𑀘 𑀅𑀦𑁆𑀢𑀸𑀦𑀦𑁆𑀢𑀜𑁆𑀘 𑀆𑀭𑀩𑁆𑀪 𑀧𑀯𑀢𑁆𑀢𑀯𑀸𑀤𑀢𑁆𑀢𑀸, 𑀧𑀘𑁆𑀙𑀺𑀫𑀲𑁆𑀲 𑀧𑀦 𑀢𑀓𑁆𑀓𑀺𑀓𑀲𑁆𑀲 𑀢𑀤𑀼𑀪𑀬𑀧𑀝𑀺𑀲𑁂𑀥𑀦𑀯𑀲𑁂𑀦 𑀧𑀯𑀢𑁆𑀢𑀯𑀸𑀤𑀢𑁆𑀢𑀸 𑀓𑀣𑀁 𑀅𑀦𑁆𑀢𑀸𑀦𑀦𑁆𑀢𑀺𑀓𑀢𑁆𑀢𑀦𑁆𑀢𑀺? 𑀢𑀤𑀼𑀪𑀬𑀧𑀝𑀺𑀲𑁂𑀥𑀦𑀯𑀲𑁂𑀦 𑀧𑀯𑀢𑁆𑀢𑀯𑀸𑀤𑀢𑁆𑀢𑀸 𑀏𑀯. 𑀅𑀦𑁆𑀢𑀸𑀦𑀦𑁆𑀢𑀧𑀝𑀺𑀲𑁂𑀥𑀦𑀯𑀸𑀤𑁄𑀧𑀺 𑀳𑀺 𑀲𑁄 𑀅𑀦𑁆𑀢𑀸𑀦𑀦𑁆𑀢𑀯𑀺𑀲𑀬𑁄𑀬𑁂𑀯 𑀢𑀫𑀸𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸. 𑀏𑀢𑀤𑀢𑁆𑀣𑀫𑁂𑀯 𑀳𑀺 𑀲𑀦𑁆𑀥𑀸𑀬 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀦𑁆𑀢𑀁 𑀯𑀸 𑀅𑀦𑁆𑀢𑀦𑁆𑀢𑀁 𑀯𑀸 𑀅𑀦𑁆𑀢𑀸𑀦𑀦𑁆𑀢𑀁 𑀯𑀸 𑀦𑁂𑀯𑀦𑁆𑀢𑀸𑀦𑀸𑀦𑀦𑁆𑀢𑀁 𑀯𑀸 𑀆𑀭𑀩𑁆𑀪 𑀧𑀯𑀢𑁆𑀢𑀯𑀸𑀤𑀸’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀬𑀣𑀸 𑀢𑀢𑀺𑀬𑀯𑀸𑀤𑁂 𑀤𑁂𑀲𑀧𑀪𑁂𑀤𑀯𑀲𑁂𑀦 𑀏𑀓𑀲𑁆𑀲𑁂𑀯 𑀮𑁄𑀓𑀲𑁆𑀲 𑀅𑀦𑁆𑀢𑀯𑀢𑀸, 𑀅𑀦𑀦𑁆𑀢𑀯𑀢𑀸 𑀘 𑀲𑀫𑁆𑀪𑀯𑀢𑀺, 𑀏𑀯𑀫𑁂𑀢𑁆𑀣 𑀢𑀓𑁆𑀓𑀻𑀯𑀸𑀤𑁂𑀧𑀺 𑀓𑀸𑀮𑀧𑀪𑁂𑀤𑀯𑀲𑁂𑀦 𑀏𑀓𑀲𑁆𑀲𑁂𑀯 𑀢𑀤𑀼𑀪𑀬𑀲𑀫𑁆𑀪𑀯𑀢𑁄 𑀅𑀜𑁆𑀜𑀫𑀜𑁆𑀜𑀧𑀝𑀺𑀲𑁂𑀥𑁂𑀦 𑀢𑀤𑀼𑀪𑀬𑀜𑁆𑀜𑁂𑀯 𑀯𑀼𑀘𑁆𑀘𑀢𑀺, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀘 𑀧𑀝𑀺𑀲𑁂𑀥𑀸𑀦𑀁 𑀧𑀭𑀺𑀬𑀼𑀤𑀸𑀲𑀢𑀸. 𑀓𑀣𑀁? 𑀅𑀦𑁆𑀢𑀯𑀦𑁆𑀢𑀧𑀝𑀺𑀲𑁂𑀥𑁂𑀦 𑀳𑀺 𑀅𑀦𑀦𑁆𑀢𑀯𑀸 𑀯𑀼𑀘𑁆𑀘𑀢𑀺, 𑀅𑀦𑀦𑁆𑀢𑀯𑀦𑁆𑀢𑀧𑀝𑀺𑀲𑁂𑀥𑁂𑀦 𑀘 𑀅𑀦𑁆𑀢𑀯𑀸. 𑀤𑁆𑀯𑀺𑀧𑀝𑀺𑀲𑁂𑀥𑁄 𑀳𑀺 𑀧𑀓𑀢𑀺𑀬𑀢𑁆𑀣𑀜𑀸𑀧𑀓𑁄. 𑀇𑀢𑀺 𑀧𑀝𑀺𑀲𑁂𑀥𑀦𑀯𑀲𑁂𑀦 𑀅𑀦𑁆𑀢𑀸𑀦𑀦𑁆𑀢𑀲𑀗𑁆𑀔𑀸𑀢𑀲𑁆𑀲 𑀉𑀪𑀬𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀬𑀼𑀢𑁆𑀢𑁄𑀬𑁂𑀯 𑀢𑀩𑁆𑀩𑀺𑀲𑀬𑀲𑁆𑀲 𑀧𑀘𑁆𑀙𑀺𑀫𑀲𑁆𑀲𑀸𑀧𑀺 𑀅𑀦𑁆𑀢𑀸𑀦𑀦𑁆𑀢𑀺𑀓𑀪𑀸𑀯𑁄𑀢𑀺. 𑀬𑀤𑁂𑀯𑀁 𑀲𑁄 𑀅𑀦𑁆𑀢𑀸𑀦𑀦𑁆𑀢𑀺𑀓𑀯𑀸𑀤𑀪𑀸𑀯𑀢𑁄 𑀢𑀢𑀺𑀬𑀯𑀸𑀤𑀲𑀫𑀯𑀭𑁄𑀥𑁂𑀬𑁂𑀯 𑀲𑀺𑀬𑀸𑀢𑀺? 𑀦, 𑀓𑀸𑀮𑀧𑀪𑁂𑀤𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀤𑁂𑀲𑀧𑀪𑁂𑀤𑀯𑀲𑁂𑀦 𑀳𑀺 𑀅𑀦𑁆𑀢𑀸𑀦𑀦𑁆𑀢𑀺𑀓𑁄 𑀢𑀢𑀺𑀬𑀯𑀸𑀤𑀻 𑀯𑀺𑀬 𑀧𑀘𑁆𑀙𑀺𑀫𑁄𑀧𑀺 ¶ 𑀢𑀓𑁆𑀓𑀺𑀓𑁄 𑀓𑀸𑀮𑀧𑀪𑁂𑀤𑀯𑀲𑁂𑀦 𑀅𑀦𑁆𑀢𑀸𑀦𑀦𑁆𑀢𑀺𑀓𑁄 𑀳𑁄𑀢𑀺. 𑀓𑀣𑀁? 𑀬𑀲𑁆𑀫𑀸 𑀅𑀬𑀁 𑀮𑁄𑀓𑀲𑀜𑁆𑀜𑀺𑀢𑁄 𑀅𑀢𑁆𑀢𑀸 𑀅𑀦𑀦𑁆𑀢𑁄 𑀓𑀤𑀸 𑀘𑀺 𑀲𑀓𑁆𑀔𑀺𑀤𑀺𑀝𑁆𑀞𑁄𑀢𑀺 𑀅𑀥𑀺𑀕𑀢𑀯𑀺𑀲𑁂𑀲𑁂𑀳𑀺 𑀫𑀳𑁂𑀲𑀻𑀳𑀺 𑀅𑀦𑀼𑀲𑀼𑀬𑁆𑀬𑀢𑀺, 𑀢𑀲𑁆𑀫𑀸 𑀦𑁂𑀯𑀦𑁆𑀢𑀯𑀸. 𑀬𑀲𑁆𑀫𑀸 𑀧𑀦𑀸𑀬𑀁 𑀅𑀦𑁆𑀢𑀯𑀸 𑀓𑀤𑀸𑀘𑀺, 𑀲𑀓𑁆𑀔𑀺𑀤𑀺𑀝𑁆𑀞𑁄𑀢𑀺 𑀢𑁂𑀳𑀺𑀬𑁂𑀯 𑀅𑀦𑀼𑀲𑀼𑀬𑁆𑀬𑀢𑀺, 𑀢𑀲𑁆𑀫𑀸 𑀦𑀸𑀦𑀦𑁆𑀢𑀯𑀸𑀢𑀺. 𑀅𑀬𑀁 𑀢𑀓𑁆𑀓𑀺𑀓𑁄 𑀅𑀯𑀟𑁆𑀠𑀺𑀢𑀪𑀸𑀯𑀧𑀼𑀩𑁆𑀩𑀓𑀢𑁆𑀢𑀸 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀦𑀁 𑀯𑀟𑁆𑀠𑀺𑀢𑀪𑀸𑀯𑀲𑁆𑀲 𑀉𑀪𑀬𑀣𑀸 𑀮𑀩𑁆𑀪𑀫𑀸𑀦𑀲𑁆𑀲 𑀧𑀭𑀺𑀓𑀧𑁆𑀧𑀺𑀢𑀲𑁆𑀲 𑀅𑀢𑁆𑀢𑀦𑁄 𑀅𑀧𑁆𑀧𑀘𑁆𑀘𑀓𑁆𑀔𑀓𑀸𑀭𑀺𑀢𑀸𑀬 ¶ 𑀅𑀦𑀼𑀲𑁆𑀲𑀯𑀸𑀤𑀺𑀫𑀢𑁆𑀢𑁂 𑀞𑀢𑁆𑀯𑀸 𑀯𑀟𑁆𑀠𑀺𑀢𑀓𑀸𑀮𑀯𑀲𑁂𑀦 ‘‘𑀦𑁂𑀯𑀦𑁆𑀢𑀯𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀢𑀺, 𑀅𑀯𑀟𑁆𑀠𑀺𑀢𑀓𑀸𑀮𑀯𑀲𑁂𑀦 𑀧𑀦 ‘‘𑀦𑀸𑀦𑀦𑁆𑀢𑀯𑀸’’𑀢𑀺, 𑀦 𑀧𑀦 𑀅𑀦𑁆𑀢𑀢𑀸𑀦𑀦𑁆𑀢𑀢𑀸𑀦𑀁 𑀅𑀘𑁆𑀘𑀦𑁆𑀢𑀫𑀪𑀸𑀯𑁂𑀦 𑀬𑀣𑀸 𑀢𑀁 ‘‘𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸’’𑀢𑀺. 𑀬𑀣𑀸 𑀘𑀸𑀦𑀼𑀲𑁆𑀲𑀼𑀢𑀺𑀓𑀢𑀓𑁆𑀓𑀺𑀦𑁄, 𑀏𑀯𑀁 𑀚𑀸𑀢𑀺𑀲𑁆𑀲𑀭𑀢𑀓𑁆𑀓𑀺𑀆𑀤𑀻𑀦𑀫𑁆𑀧𑀺 𑀯𑀲𑁂𑀦 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀁.

𑀓𑁂𑀘𑀺 𑀧𑀦 𑀬𑀤𑀺 𑀧𑀦𑀸𑀬𑀁 𑀅𑀢𑁆𑀢𑀸 𑀅𑀦𑁆𑀢𑀯𑀸, 𑀏𑀯𑀁 𑀲𑀢𑀺 𑀤𑀽𑀭𑀤𑁂𑀲𑁂 𑀉𑀧𑀧𑀚𑁆𑀚𑀦𑀸𑀦𑀼𑀲𑁆𑀲𑀭𑀡𑀸𑀤𑀺𑀓𑀺𑀘𑁆𑀘𑀦𑀺𑀩𑁆𑀩𑀢𑁆𑀢𑀺 𑀦 𑀲𑀺𑀬𑀸. 𑀅𑀣 𑀅𑀦𑀦𑁆𑀢𑀯𑀸, 𑀏𑀯𑀜𑁆𑀘 𑀇𑀥 𑀞𑀺𑀢𑀲𑁆𑀲𑁂𑀯 𑀤𑁂𑀯𑀮𑁄𑀓𑀦𑀺𑀭𑀬𑀸𑀤𑀻𑀲𑀼 𑀲𑀼𑀔𑀤𑀼𑀓𑁆𑀔𑀸𑀦𑀼𑀪𑀯𑀦𑀁 𑀲𑀺𑀬𑀸. 𑀲𑀘𑁂 𑀧𑀦 𑀅𑀦𑁆𑀢𑀯𑀸 𑀘𑁂𑀯 𑀅𑀦𑀦𑁆𑀢𑀯𑀸 𑀘, 𑀏𑀯𑀫𑁆𑀧𑀺 𑀢𑀤𑀼𑀪𑀬𑀤𑁄𑀲𑀲𑀫𑀸𑀬𑁄𑀕𑁄 𑀲𑀺𑀬𑀸. 𑀢𑀲𑁆𑀫𑀸 ‘‘𑀅𑀦𑁆𑀢𑀯𑀸, 𑀅𑀦𑀦𑁆𑀢𑀯𑀸’’𑀢𑀺 𑀘 𑀅𑀩𑁆𑀬𑀸𑀓𑀭𑀡𑀻𑀬𑁄 𑀅𑀢𑁆𑀢𑀸𑀢𑀺 𑀏𑀯𑀁 𑀢𑀓𑁆𑀓𑀦𑀯𑀲𑁂𑀦 𑀘𑀢𑀼𑀢𑁆𑀣𑀯𑀸𑀤𑀧𑁆𑀧𑀯𑀢𑁆𑀢𑀺𑀁 𑀯𑀡𑁆𑀡𑁂𑀦𑁆𑀢𑀺. 𑀬𑀤𑀺 𑀧𑀦𑁂𑀲 𑀯𑀼𑀢𑁆𑀢𑀦𑀬𑁂𑀦 𑀅𑀦𑁆𑀢𑀸𑀦𑀦𑁆𑀢𑀺𑀓𑁄 𑀪𑀯𑁂𑀬𑁆𑀬, 𑀅𑀣 𑀓𑀲𑁆𑀫𑀸 ‘‘𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀏𑀯𑀫𑀸𑀳𑀁𑀲𑀼 ‘𑀅𑀦𑁆𑀢𑀯𑀸 𑀅𑀬𑀁 𑀮𑁄𑀓𑁄 𑀧𑀭𑀺𑀯𑀝𑀼𑀫𑁄’𑀢𑀺, 𑀢𑁂𑀲𑀁 𑀫𑀼𑀲𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁫𑁭) 𑀢𑀲𑁆𑀲 𑀧𑀼𑀭𑀺𑀫𑀯𑀸𑀤𑀢𑁆𑀢𑀬𑀧𑀝𑀺𑀓𑁆𑀔𑁂𑀧𑁄 𑀯𑀼𑀢𑁆𑀢𑁄𑀢𑀺? 𑀧𑀼𑀭𑀺𑀫𑀯𑀸𑀤𑀢𑁆𑀢𑀬𑀲𑁆𑀲 𑀢𑁂𑀦 𑀬𑀣𑀸𑀥𑀺𑀧𑁆𑀧𑁂𑀢𑀧𑁆𑀧𑀓𑀸𑀭𑀯𑀺𑀮𑀓𑁆𑀔𑀡𑀪𑀸𑀯𑀢𑁄. 𑀢𑁂𑀦𑁂𑀯 𑀳𑀺 𑀓𑀸𑀭𑀡𑁂𑀦 𑀢𑀣𑀸 𑀧𑀝𑀺𑀓𑁆𑀔𑁂𑀧𑁄 𑀯𑀼𑀢𑁆𑀢𑁄, 𑀦 𑀧𑀦 𑀢𑀲𑁆𑀲 𑀅𑀦𑁆𑀢𑀸𑀦𑀦𑁆𑀢𑀺𑀓𑀢𑁆𑀢𑀸𑀪𑀸𑀯𑁂𑀦, 𑀦 𑀘 𑀧𑀭𑀺𑀬𑀦𑁆𑀢𑀭𑀳𑀺𑀢𑀤𑀺𑀝𑁆𑀞𑀺𑀯𑀸𑀘𑀸𑀳𑀺 𑀧𑀝𑀺𑀓𑁆𑀔𑁂𑀧𑁂𑀦, 𑀅𑀯𑀲𑁆𑀲𑀜𑁆𑀘𑁂𑀢𑀁 𑀏𑀯𑀫𑁂𑀯 𑀜𑀸𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀳𑁂𑀲 𑀅𑀫𑀭𑀸𑀯𑀺𑀓𑁆𑀔𑁂𑀧𑀧𑀓𑁆𑀔𑀜𑁆𑀜𑁂𑀯 𑀪𑀚𑁂𑀬𑁆𑀬 𑀘𑀢𑀼𑀢𑁆𑀣𑀯𑀸𑀤𑁄. 𑀦 𑀳𑀺 𑀅𑀦𑁆𑀢𑀢𑀸𑀅𑀦𑀦𑁆𑀢𑀢𑀸𑀢𑀤𑀼𑀪𑀬𑀯𑀺𑀦𑀺𑀫𑀼𑀢𑁆𑀢𑁄 𑀅𑀢𑁆𑀢𑀦𑁄 𑀧𑀓𑀸𑀭𑁄 𑀅𑀢𑁆𑀣𑀺, 𑀢𑀓𑁆𑀓𑀻𑀯𑀸𑀤𑀻 𑀘 𑀬𑀼𑀢𑁆𑀢𑀺𑀫𑀕𑁆𑀕𑀓𑁄𑀬𑁂𑀯. 𑀓𑀸𑀮𑀪𑁂𑀤𑀯𑀲𑁂𑀦 𑀘 𑀏𑀓𑀲𑁆𑀫𑀺𑀫𑁆𑀧𑀺 𑀮𑁄𑀓𑁂 𑀢𑀤𑀼𑀪𑀬𑀁 𑀦𑁄 𑀦 𑀬𑀼𑀚𑁆𑀚𑀢𑀻𑀢𑀺. 𑀪𑀯𑀢𑀼 𑀢𑀸𑀯 𑀧𑀘𑁆𑀙𑀺𑀫𑀯𑀸𑀤𑀻𑀤𑁆𑀯𑀬𑀲𑁆𑀲 𑀅𑀦𑁆𑀢𑀸𑀦𑀦𑁆𑀢𑀺𑀓𑀪𑀸𑀯𑁄 𑀬𑀼𑀢𑁆𑀢𑁄 𑀅𑀦𑁆𑀢𑀸𑀦𑀦𑁆𑀢𑀸𑀦𑀁 𑀯𑀲𑁂𑀦 𑀉𑀪𑀬𑀯𑀺𑀲𑀬𑀢𑁆𑀢𑀸 𑀢𑁂𑀲𑀁 𑀯𑀸𑀤𑀲𑁆𑀲. 𑀓𑀣𑀁 𑀧𑀦 𑀧𑀼𑀭𑀺𑀫𑀯𑀸𑀤𑀻𑀤𑁆𑀯𑀬𑀲𑁆𑀲 𑀧𑀘𑁆𑀘𑁂𑀓𑀁 𑀅𑀦𑁆𑀢𑀸𑀦𑀦𑁆𑀢𑀺𑀓𑀪𑀸𑀯𑁄 𑀬𑀼𑀢𑁆𑀢𑁄 𑀲𑀺𑀬𑀸 ¶ 𑀏𑀓𑁂𑀓𑀯𑀺𑀲𑀬𑀢𑁆𑀢𑀸 𑀢𑁂𑀲𑀁 𑀯𑀸𑀤𑀲𑁆𑀲𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑀫𑀼𑀤𑀸𑀬𑁂 𑀧𑀯𑀢𑁆𑀢𑀫𑀸𑀦-𑀲𑀤𑁆𑀤𑀲𑁆𑀲 𑀅𑀯𑀬𑀯𑁂𑀧𑀺 𑀉𑀧𑀘𑀸𑀭𑀯𑀼𑀢𑁆𑀢𑀺𑀢𑁄. 𑀲𑀫𑀼𑀤𑀺𑀢𑁂𑀲𑀼 𑀳𑀺 𑀅𑀦𑁆𑀢𑀸𑀦𑀦𑁆𑀢𑀯𑀸𑀤𑀻𑀲𑀼 𑀧𑀯𑀢𑁆𑀢𑀫𑀸𑀦𑁄 𑀅𑀦𑁆𑀢𑀸𑀦𑀦𑁆𑀢𑀺 𑀓-𑀲𑀤𑁆𑀤𑁄 𑀢𑀢𑁆𑀣 𑀦𑀺𑀭𑀼𑀴𑁆𑀳𑀢𑀸𑀬 𑀢𑀤𑀯𑀬𑀯𑁂𑀲𑀼𑀧𑀺 𑀧𑀘𑁆𑀘𑁂𑀓𑀁 𑀅𑀦𑁆𑀢𑀸𑀦𑀦𑁆𑀢𑀺𑀓𑀯𑀸𑀤𑀻𑀲𑀼 𑀧𑀯𑀢𑁆𑀢𑀢𑀺 𑀬𑀣𑀸 ‘‘𑀅𑀭𑀽𑀧𑀚𑁆𑀛𑀸𑀦𑁂𑀲𑀼 𑀧𑀘𑁆𑀘𑁂𑀓𑀁 𑀅𑀝𑁆𑀞𑀯𑀺𑀫𑁄𑀓𑁆𑀔𑀧𑀭𑀺𑀬𑀸𑀬𑁄’’, 𑀬𑀣𑀸 𑀘 ‘‘𑀮𑁄𑀓𑁂 𑀲𑀢𑁆𑀢𑀸𑀲𑀬𑁄’’𑀢𑀺. 𑀅𑀣 𑀯𑀸 𑀅𑀪𑀺𑀦𑀺𑀯𑁂𑀲𑀢𑁄 𑀧𑀼𑀭𑀺𑀫𑀓𑀸𑀮𑁂 𑀧𑀯𑀢𑁆𑀢𑀯𑀺𑀢𑀓𑁆𑀓𑀯𑀲𑁂𑀦 𑀅𑀬𑀁 𑀢𑀢𑁆𑀣 𑀯𑁄𑀳𑀸𑀭𑁄 𑀓𑀢𑁄. 𑀢𑁂𑀲𑀜𑁆𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀢𑀣𑀸𑀭𑀽𑀧𑀘𑁂𑀢𑁄𑀲𑀫𑀸𑀥𑀺𑀲𑀫𑀥𑀺𑀕𑀫𑀢𑁄 𑀧𑀼𑀩𑁆𑀩𑀓𑀸𑀮𑁂 ‘‘𑀅𑀦𑁆𑀢𑀯𑀸 𑀦𑀼 𑀔𑁄 𑀅𑀬𑀁 𑀮𑁄𑀓𑁄, 𑀉𑀤𑀸𑀳𑀼 𑀅𑀦𑀦𑁆𑀢𑀯𑀸’’𑀢𑀺 𑀉𑀪𑀬𑀸𑀓𑀸𑀭𑀸𑀯𑀮𑀫𑁆𑀩𑀺𑀦𑁄 𑀯𑀺𑀢𑀓𑁆𑀓𑀲𑁆𑀲 𑀯𑀲𑁂𑀦 𑀦𑀺𑀭𑀼𑀴𑁆𑀳𑁄 𑀅𑀦𑁆𑀢𑀸𑀦𑀦𑁆𑀢𑀺𑀓𑀪𑀸𑀯𑁄 𑀧𑀘𑁆𑀙𑀸 𑀯𑀺𑀲𑁂𑀲𑀮𑀸𑀪𑁂𑀦 𑀢𑁂𑀲𑀼 𑀅𑀦𑁆𑀢𑀸𑀦𑀦𑁆𑀢𑀯𑀸𑀤𑁂𑀲𑀼 𑀏𑀓𑀲𑁆𑀲𑁂𑀯 𑀯𑀸𑀤𑀲𑁆𑀲 𑀲𑀗𑁆𑀕𑀳𑁂 𑀉𑀧𑁆𑀧𑀦𑁆𑀦𑁂𑀧𑀺 𑀧𑀼𑀭𑀺𑀫𑀲𑀺𑀤𑁆𑀥𑀭𑀼𑀴𑁆𑀳𑀺𑀬𑀸 𑀯𑁄𑀳𑀸𑀭𑀻𑀬𑀢𑀺 𑀬𑀣𑀸 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀫𑀭𑀡𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁩𑁩) 𑀅𑀭𑀳𑀢𑀺 𑀲𑀢𑁆𑀢𑀧𑀭𑀺𑀬𑀸𑀬𑁄, 𑀬𑀣𑀸 𑀘 𑀪𑀯𑀦𑁆𑀢𑀭𑀕𑀢𑁂𑀧𑀺 𑀫𑀡𑁆𑀟𑀽𑀓𑀸𑀤𑀺𑀯𑁄𑀳𑀸𑀭𑁄𑀢𑀺.

𑁫𑁪-𑁬𑁦. 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀯𑀟𑁆𑀠𑀦𑀸𑀬 ¶ 𑀳𑁂𑀝𑁆𑀞𑀸, 𑀉𑀧𑀭𑀺, 𑀢𑀺𑀭𑀺𑀬𑀜𑁆𑀘 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀕𑀢𑀸𑀕𑀢𑀯𑀲𑁂𑀦 𑀅𑀦𑁆𑀢𑀸𑀦𑀦𑁆𑀢𑀪𑀸𑀯𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑁆𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁. 𑀉𑀤𑁆𑀥𑀫𑀥𑁄 𑀅𑀯𑀟𑁆𑀠𑁂𑀢𑁆𑀯𑀸 𑀢𑀺𑀭𑀺𑀬𑀁 𑀯𑀟𑁆𑀠𑁂𑀢𑁆𑀯𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸’’𑀢𑀺 𑀅𑀥𑀺𑀓𑀸𑀭𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀢𑀓𑁆𑀓𑀬𑀢𑀻𑀢𑀺 𑀢𑀓𑁆𑀓𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁪) 𑀲𑀤𑁆𑀤𑀢𑁄, ‘‘𑀘𑀢𑀼𑀩𑁆𑀩𑀺𑀥𑁄 𑀢𑀓𑁆𑀓𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁪) 𑀅𑀢𑁆𑀣𑀢𑁄 𑀘 𑀲𑀲𑁆𑀲𑀢𑀯𑀸𑀤𑁂 𑀯𑀼𑀢𑁆𑀢𑀦𑀬𑁂𑀦. 𑀤𑀺𑀝𑁆𑀞𑀧𑀼𑀩𑁆𑀩𑀸𑀦𑀼𑀲𑀸𑀭𑁂𑀦𑀸𑀢𑀺 𑀤𑀲𑁆𑀲𑀦𑀪𑀽𑀢𑁂𑀦 𑀯𑀺𑀜𑁆𑀜𑀸𑀡𑁂𑀦 𑀉𑀧𑀮𑀤𑁆𑀥𑀧𑀼𑀩𑁆𑀩𑀲𑁆𑀲 𑀅𑀦𑁆𑀢𑀯𑀦𑁆𑀢𑀸𑀤𑀺𑀦𑁄 𑀅𑀦𑀼𑀲𑁆𑀲𑀭𑀡𑁂𑀦, 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀦𑀼𑀲𑁆𑀲𑀼𑀢𑀺𑀢𑀓𑁆𑀓𑀻𑀲𑀼𑀤𑁆𑀥𑀢𑀓𑁆𑀓𑀻𑀦𑀫𑁆𑀧𑀺 𑀇𑀥 𑀲𑀗𑁆𑀕𑀳𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀅𑀣 𑀯𑀸 𑀤𑀺𑀝𑁆𑀞𑀕𑁆𑀕𑀳𑀡𑁂𑀦𑁂𑀯 ‘‘𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁦, 𑁧𑁯𑁪) 𑀯𑀺𑀬 𑀲𑀼𑀢𑀸𑀤𑀻𑀦𑀫𑁆𑀧𑀺 𑀕𑀳𑀺𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀅𑀦𑁆𑀢𑀯𑀸’’𑀢𑀺𑀆𑀤𑀺𑀦𑀸 𑀇𑀘𑁆𑀙𑀺𑀢𑀲𑁆𑀲 𑀅𑀢𑁆𑀢𑀦𑁄 𑀲𑀩𑁆𑀩𑀤𑀸𑀪𑀸𑀯𑀧𑀭𑀸𑀫𑀲𑀦𑀯𑀲𑁂𑀦𑁂𑀯 𑀇𑀫𑁂𑀲𑀁 𑀯𑀸𑀤𑀸𑀦𑀁 𑀧𑀯𑀢𑁆𑀢𑀦𑀢𑁄 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀲𑀢𑁆𑀢𑁂𑀯 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄, 𑀲𑁂𑀲𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑁄’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁯𑁭, 𑁯𑁮).

𑀅𑀫𑀭𑀸𑀯𑀺𑀓𑁆𑀔𑁂𑀧𑀯𑀸𑀤𑀯𑀡𑁆𑀡𑀦𑀸

𑁬𑁧. 𑀦 ¶ 𑀫𑀭𑀢𑀻𑀢𑀺 ‘‘𑀏𑀯𑀫𑁂𑀯𑀸’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀸𑀪𑀸𑀯𑁂𑀦 𑀦 𑀉𑀧𑀘𑁆𑀙𑀺𑀚𑁆𑀚𑀢𑀺, 𑀅𑀦𑁂𑀓𑀦𑁆𑀢𑀺𑀓𑀸𑀬𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀺𑀬𑀦𑁆𑀢𑀭𑀳𑀺𑀢𑀸𑀢𑀺 𑀑𑀲𑀸𑀦𑀯𑀺𑀕𑀢𑀸, 𑀅𑀦𑀺𑀝𑁆𑀞𑀗𑁆𑀕𑀢𑀸𑀢𑀺 𑀅𑀢𑁆𑀣𑁄. 𑀯𑀺𑀯𑀺𑀥𑁄𑀢𑀺 ‘‘𑀏𑀯𑀫𑁆𑀧𑀺 𑀫𑁂 𑀦𑁄’’𑀢𑀺𑀆𑀤𑀺𑀦𑀸 𑀦𑀸𑀦𑀧𑁆𑀧𑀓𑀸𑀭𑁄. 𑀔𑁂𑀧𑁄𑀢𑀺 𑀲𑀓𑀯𑀸𑀤𑁂𑀦 𑀧𑀭𑀯𑀸𑀤𑀸𑀦𑀁 𑀔𑀺𑀧𑀦𑀁. 𑀓𑁄 𑀧𑀦𑁂𑀲𑁄 𑀅𑀫𑀭𑀸𑀯𑀺𑀓𑁆𑀔𑁂𑀧𑁄𑀢𑀺? 𑀢𑀣𑀸𑀧𑀯𑀢𑁆𑀢𑁄 𑀤𑀺𑀝𑁆𑀞𑀺𑀧𑁆𑀧𑀥𑀸𑀦𑁄 𑀢𑀸𑀤𑀺𑀲𑀸𑀬 𑀯𑀸𑀘𑀸𑀬 𑀲𑀫𑀼𑀝𑁆𑀞𑀸𑀧𑀓𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀬𑁂𑀯. 𑀅𑀫𑀭𑀸𑀬 𑀤𑀺𑀝𑁆𑀞𑀺𑀬𑀸, 𑀯𑀸𑀘𑀸𑀬 𑀘 𑀯𑀺𑀓𑁆𑀔𑀺𑀧𑀦𑁆𑀢𑀺, 𑀯𑀺𑀯𑀺𑀥𑀫𑀧𑀦𑁂𑀦𑁆𑀢𑀻𑀢𑀺 𑀯𑀸 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀦𑁄, 𑀢𑁂𑀬𑁂𑀯 ‘‘𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸’’𑀢𑀺𑀧𑀺 𑀬𑀼𑀚𑁆𑀚𑀢𑀺. ‘‘𑀫𑀘𑁆𑀙𑀚𑀸𑀢𑀺’’ 𑀘𑁆𑀘𑁂𑀯 𑀅𑀯𑀢𑁆𑀯𑀸 ‘‘𑀏𑀓𑀸’’𑀢𑀺 𑀯𑀤𑀦𑁆𑀢𑁄 𑀫𑀘𑁆𑀙𑀚𑀸𑀢𑀺𑀯𑀺𑀲𑁂𑀲𑁄 𑀏𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀇𑀢𑁄 𑀘𑀺𑀢𑁄 𑀘 𑀲𑀦𑁆𑀥𑀸𑀯𑀢𑀺 𑀏𑀓𑀲𑁆𑀫𑀺𑀁 𑀲𑀪𑀸𑀯𑁂 𑀅𑀦𑀯𑀝𑁆𑀞𑀸𑀦𑀢𑁄. 𑀬𑀣𑀸 𑀕𑀸𑀳𑀁 𑀦 𑀉𑀧𑀕𑀘𑁆𑀙𑀢𑀺, 𑀢𑀣𑀸 𑀲𑀦𑁆𑀥𑀸𑀯𑀦𑀢𑁄, 𑀏𑀢𑁂𑀦 𑀅𑀫𑀭𑀸𑀬 𑀯𑀺𑀓𑁆𑀔𑁂𑀧𑁄 𑀢𑀣𑀸, 𑀲𑁄 𑀯𑀺𑀬𑀸𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑁄𑀢𑀺 𑀅𑀢𑁆𑀣𑀫𑀸𑀳 ‘‘𑀲𑀸 𑀉𑀫𑁆𑀫𑀼𑀚𑁆𑀚𑀦𑀦𑀺𑀫𑀼𑀚𑁆𑀚𑀦𑀸𑀤𑀺𑀯𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀺𑀓𑁆𑀔𑁂𑀧𑀧𑀤𑀢𑁆𑀣𑁂𑀦 𑀉𑀧𑀫𑀺𑀢𑀢𑁆𑀢𑀸. 𑀅𑀬𑀫𑁂𑀯 𑀳𑀺 𑀅𑀢𑁆𑀣𑁄 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦𑀸𑀧𑀺 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 (𑀲𑀸𑀭𑀢𑁆𑀣. 𑀝𑀻. 𑁧.𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀯𑀼𑀢𑁆𑀢𑁄. 𑀅𑀫𑀭𑀸 𑀯𑀺𑀬 𑀯𑀺𑀓𑁆𑀔𑁂𑀧𑁄 𑀅𑀫𑀭𑀸𑀯𑀺𑀓𑁆𑀔𑁂𑀧𑁄𑀢𑀺 𑀓𑁂𑀘𑀺. 𑀅𑀣 𑀯𑀸 𑀅𑀫𑀭𑀸 𑀯𑀺𑀬 𑀯𑀺𑀓𑁆𑀔𑀺𑀧𑀦𑁆𑀢𑀻𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀦𑁄, 𑀢𑁂𑀬𑁂𑀯 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸.

𑁬𑁨. 𑀯𑀺𑀓𑁆𑀔𑁂𑀧𑀯𑀸𑀤𑀺𑀦𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂, 𑀅𑀩𑁆𑀬𑀸𑀓𑀢𑀥𑀫𑁆𑀫𑁂 𑀘 (𑀅𑀓𑀼𑀲𑀮𑀥𑀫𑁆𑀫𑁂𑀧𑀺 𑀤𑀻. 𑀦𑀺. 𑀝𑀻. 𑁧.𑁬𑁨) 𑀲𑀪𑀸𑀯𑀪𑁂𑀤𑀯𑀲𑁂𑀦 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀜𑀸𑀡𑀁 𑀦𑀢𑁆𑀣𑀻𑀢𑀺 𑀓𑀼𑀲𑀮𑀸𑀓𑀼𑀲𑀮𑀧𑀤𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦𑁂𑀯 ¶ 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀯𑀺𑀖𑀸𑀢𑁄 𑀯𑀺𑀳𑁂𑀲𑀸 𑀓𑀸𑀬𑀺𑀓𑀤𑀼𑀓𑁆𑀔𑀁 ‘‘𑀯𑀺𑀧𑁆𑀧𑀝𑀺𑀲𑀸𑀭𑀼𑀧𑁆𑀧𑀢𑁆𑀢𑀺𑀬𑀸’’𑀢𑀺 𑀤𑁄𑀫𑀦𑀲𑁆𑀲𑀲𑁆𑀲 𑀳𑁂𑀢𑀼𑀪𑀸𑀯𑁂𑀦 𑀯𑀘𑀦𑀢𑁄, 𑀢𑁂𑀦𑀸𑀳 ‘‘𑀤𑀼𑀓𑁆𑀔𑀁 𑀪𑀯𑁂𑀬𑁆𑀬𑀸’’𑀢𑀺. 𑀫𑀼𑀲𑀸𑀯𑀸𑀤𑁂𑀢𑀺 𑀦𑀺𑀫𑀺𑀢𑁆𑀢𑁂 𑀪𑀼𑀫𑁆𑀫𑀯𑀘𑀦𑀁, 𑀦𑀺𑀲𑁆𑀲𑀓𑁆𑀓𑀢𑁆𑀣𑁂 𑀯𑀸. 𑀫𑀼𑀲𑀸𑀯𑀸𑀤𑀳𑁂𑀢𑀼, 𑀫𑀼𑀲𑀸𑀯𑀸𑀤𑀢𑁄 𑀯𑀸 𑀑𑀢𑁆𑀢𑀧𑁆𑀧𑁂𑀦 𑀘𑁂𑀯 𑀳𑀺𑀭𑀺𑀬𑀸 𑀘𑀸𑀢𑀺 𑀅𑀢𑁆𑀣𑁄. 𑀓𑀻𑀤𑀺𑀲𑀁 𑀅𑀫𑀭𑀸𑀯𑀺𑀓𑁆𑀔𑁂𑀧𑀫𑀸𑀧𑀚𑁆𑀚𑀢𑀻𑀢𑀺 𑀆𑀳 ‘‘𑀅𑀧𑀭𑀺𑀬𑀦𑁆𑀢𑀯𑀺𑀓𑁆𑀔𑁂𑀧’’𑀦𑁆𑀢𑀺, 𑀢𑁂𑀦 𑀅𑀫𑀭𑀸𑀲𑀤𑀺𑀲𑀯𑀺𑀓𑁆𑀔𑁂𑀧𑀲𑀗𑁆𑀔𑀸𑀢𑀁 𑀤𑀼𑀢𑀺𑀬𑀦𑀬𑀁 𑀦𑀺𑀯𑀢𑁆𑀢𑁂𑀢𑀺. 𑀬𑀣𑀸𑀯𑀼𑀢𑁆𑀢𑁂 𑀳𑀺 𑀦𑀬𑀤𑁆𑀯𑀬𑁂 𑀧𑀞𑀫𑀦𑀬𑀯𑀲𑁂𑀦𑀸𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄, 𑀤𑀼𑀢𑀺𑀬𑀦𑀬𑀯𑀲𑁂𑀦 𑀧𑀦 𑀅𑀫𑀭𑀸𑀲𑀤𑀺𑀲𑀯𑀺𑀓𑁆𑀔𑁂𑀧𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀁 𑀓𑀼𑀲𑀮𑀦𑁆𑀢𑀺 𑀧𑀼𑀝𑁆𑀞𑁄’’𑀢𑀺𑀆𑀤𑀺𑀯𑀘𑀦𑀁 𑀯𑀓𑁆𑀔𑀢𑀺.

‘‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄’’𑀢𑀺 𑀬𑀁 𑀢𑀬𑀸 𑀧𑀼𑀝𑁆𑀞𑀁, 𑀢𑀁 𑀏𑀯𑀦𑁆𑀢𑀺𑀧𑀺 𑀫𑁂 𑀮𑀤𑁆𑀥𑀺 𑀦𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀩𑁆𑀩𑀢𑁆𑀣 𑀬𑀣𑀸𑀭𑀳𑀁. 𑀅𑀦𑀺𑀬𑀫𑀺𑀢𑀯𑀺𑀓𑁆𑀔𑁂𑀧𑁄𑀢𑀺 𑀲𑀲𑁆𑀲𑀢𑀸𑀤𑀻𑀲𑀼 𑀏𑀓𑀲𑁆𑀫𑀺𑀫𑁆𑀧𑀺 ¶ 𑀧𑀓𑀸𑀭𑁂 𑀅𑀝𑁆𑀞𑀢𑁆𑀯𑀸 𑀯𑀺𑀓𑁆𑀔𑁂𑀧𑀓𑀭𑀡𑀁, 𑀧𑀭𑀯𑀸𑀤𑀺𑀦𑀸 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀧𑀓𑀸𑀭𑁂 𑀧𑀼𑀘𑁆𑀙𑀺𑀢𑁂 𑀢𑀲𑁆𑀲 𑀧𑀝𑀺𑀓𑁆𑀔𑁂𑀧𑀯𑀺𑀓𑁆𑀔𑁂𑀧𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀅𑀧𑀭𑀺𑀬𑀦𑁆𑀢𑀯𑀺𑀓𑁆𑀔𑁂𑀧𑀤𑀲𑁆𑀲𑀦𑀁𑀬𑁂𑀯 𑀅𑀝𑁆𑀞𑀓𑀣𑀸𑀬𑀁 𑀓𑀢𑀁 ‘‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄𑀢𑀺 𑀅𑀦𑀺𑀬𑀫𑀺𑀢𑀯𑀺𑀓𑁆𑀔𑁂𑀧𑁄’’𑀢𑀺𑀆𑀤𑀺𑀦𑀸, ‘‘𑀇𑀤𑀁 𑀓𑀼𑀲𑀮𑀦𑁆𑀢𑀺 𑀯𑀸 𑀅𑀓𑀼𑀲𑀮𑀦𑁆𑀢𑀺 𑀯𑀸 𑀧𑀼𑀝𑁆𑀞𑁄’’𑀢𑀺𑀆𑀤𑀺𑀦𑀸 𑀘. ‘‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄’’𑀢𑀺𑀆𑀤𑀺𑀦𑀸 𑀳𑀺 𑀅𑀦𑀺𑀬𑀫𑁂𑀢𑁆𑀯𑀸, 𑀦𑀺𑀬𑀫𑁂𑀢𑁆𑀯𑀸 𑀘 𑀲𑀲𑁆𑀲𑀢𑁂𑀓𑀘𑁆𑀘𑀲𑀲𑁆𑀲𑀢𑀼𑀘𑁆𑀙𑁂𑀤𑀢𑀓𑁆𑀓𑀻𑀯𑀸𑀤𑀸𑀦𑀁 𑀧𑀝𑀺𑀲𑁂𑀥𑀦𑁂𑀦 𑀢𑀁 𑀢𑀁 𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀢𑁂𑀯 𑀅𑀧𑀭𑀺𑀬𑀦𑁆𑀢𑀯𑀺𑀓𑁆𑀔𑁂𑀧𑀯𑀸𑀤𑀢𑁆𑀢𑀸. ‘‘𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀦𑁄’’𑀢𑀺 𑀤𑀲𑁆𑀲𑁂𑀢𑁆𑀯𑀸 𑀅𑀢𑁆𑀢𑀦𑀸 𑀧𑀦 𑀅𑀦𑀯𑀝𑁆𑀞𑀺𑀢𑀯𑀸𑀤𑀢𑁆𑀢𑀸 𑀦 𑀓𑀺𑀲𑁆𑀫𑀺𑀜𑁆𑀘𑀺 𑀧𑀓𑁆𑀔𑁂 𑀅𑀯𑀢𑀺𑀝𑁆𑀞𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀬𑀁 𑀧𑀦 𑀇𑀤𑀁…𑀧𑁂… 𑀦 𑀩𑁆𑀬𑀸𑀓𑀭𑁄𑀢𑀻’’𑀢𑀺 𑀆𑀳. 𑀇𑀤𑀸𑀦𑀺 𑀓𑀼𑀲𑀮𑀸𑀤𑀻𑀦𑀁 𑀅𑀩𑁆𑀬𑀸𑀓𑀭𑀡𑁂𑀦 𑀢𑀤𑁂𑀯 𑀅𑀦𑀯𑀝𑁆𑀞𑀸𑀦𑀁 𑀯𑀺𑀪𑀸𑀯𑁂𑀢𑀺 ‘‘𑀇𑀤𑀁 𑀓𑀼𑀲𑀮𑀦𑁆𑀢𑀺 𑀧𑀼𑀝𑁆𑀞𑁄’’𑀢𑀺𑀆𑀤𑀺𑀦𑀸. 𑀢𑁂𑀦𑁂𑀯𑀸𑀳 ‘‘𑀏𑀓𑀲𑁆𑀫𑀺𑀫𑁆𑀧𑀺 𑀧𑀓𑁆𑀔𑁂 𑀦 𑀢𑀺𑀝𑁆𑀞𑀢𑀻’’𑀢𑀺. 𑀓𑀺𑀁 𑀦𑁄 𑀦𑁄𑀢𑀺 𑀢𑁂 𑀮𑀤𑁆𑀥𑀻𑀢𑀺 𑀦𑁂𑀯 𑀦 𑀳𑁄𑀢𑀻𑀢𑀺 𑀢𑀯 𑀮𑀤𑁆𑀥𑀺 𑀳𑁄𑀢𑀺 𑀓𑀺𑀦𑁆𑀢𑀺 𑀅𑀢𑁆𑀣𑁄. 𑀦𑁄 𑀦𑁄𑀢𑀺𑀧𑀺 𑀫𑁂 𑀦𑁄𑀢𑀺 𑀦𑁂𑀯 𑀦 𑀳𑁄𑀢𑀻𑀢𑀺𑀧𑀺 𑀫𑁂 𑀮𑀤𑁆𑀥𑀺 𑀦𑁄 𑀳𑁄𑀢𑀺.

𑁬𑁩. 𑀅𑀢𑁆𑀢𑀦𑁄 𑀧𑀡𑁆𑀟𑀺𑀢𑀪𑀸𑀯𑀯𑀺𑀲𑀬𑀸𑀦𑀜𑁆𑀜𑁂𑀯 𑀭𑀸𑀕𑀸𑀤𑀻𑀦𑀁 𑀯𑀲𑁂𑀦 𑀬𑁄𑀚𑀦𑀁 𑀓𑀸𑀢𑀼𑀁 ‘‘𑀅𑀚𑀸𑀦𑀦𑁆𑀢𑁄𑀧𑀻’’𑀢𑀺𑀆𑀤𑀺𑀫𑀸𑀳. 𑀲𑀳𑀲𑀸𑀢𑀺 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀯𑁂𑀕𑁂𑀦. ‘‘𑀪𑀤𑁆𑀭𑀫𑀼𑀔𑀸𑀢𑀺 𑀧𑀡𑁆𑀟𑀺𑀢𑀸𑀦𑀁 𑀲𑀫𑀼𑀤𑀸𑀘𑀺𑀡𑁆𑀡𑀫𑀸𑀮𑀧𑀦𑀁, 𑀲𑀼𑀦𑁆𑀤𑀭𑀫𑀼𑀔𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀩𑁆𑀬𑀸𑀓𑀭𑀡𑁂, 𑀦𑀺𑀫𑀺𑀢𑁆𑀢𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀙𑀦𑁆𑀤𑀭𑀸𑀕𑀧𑀤𑀸𑀦𑀁 𑀲𑀫𑀸𑀦𑀢𑁆𑀣𑀪𑀸𑀯𑁂𑀧𑀺 𑀯𑀺𑀓𑀧𑁆𑀧𑀦𑀚𑁄𑀢𑀓𑁂𑀦 𑀯𑀸-𑀲𑀤𑁆𑀤𑁂𑀦 𑀬𑁄𑀕𑁆𑀬𑀢𑁆𑀢𑀸 𑀕𑁄𑀩𑀮𑀻𑀩𑀤𑁆𑀤𑀸𑀤𑀺𑀦𑀬𑁂𑀦 𑀪𑀺𑀦𑁆𑀦𑀢𑁆𑀣𑀢𑀸𑀯 𑀬𑀼𑀢𑁆𑀢𑀸𑀢𑀺 𑀆𑀳 ‘‘𑀙𑀦𑁆𑀤𑁄 𑀤𑀼𑀩𑁆𑀩𑀮𑀭𑀸𑀕𑁄, 𑀭𑀸𑀕𑁄 𑀩𑀮𑀯𑀭𑀸𑀕𑁄’’𑀢𑀺. 𑀤𑁄𑀲𑀧𑀝𑀺𑀖𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀢𑀓𑀫𑁆𑀧𑀺 𑀦𑀸𑀫𑀸𑀢𑀺 𑀏𑀢𑁆𑀣 𑀅𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑁂 𑀯𑀢𑁆𑀢𑀢𑀺, 𑀦𑀸𑀫-𑀲𑀤𑁆𑀤𑁄 𑀕𑀭𑀳𑀸𑀬𑀁. 𑀦 𑀓𑁂𑀯𑀮𑀁 𑀇𑀢𑁄 𑀉𑀢𑁆𑀢𑀭𑀺𑀢𑀭𑀫𑁂𑀯, 𑀅𑀣 𑀔𑁄 𑀏𑀢𑁆𑀢𑀓𑀫𑁆𑀧𑀺 𑀦 𑀚𑀸𑀦𑀸𑀫𑀺 𑀦𑀸𑀫, 𑀧𑀕𑁂𑀯 𑀢𑀤𑀼𑀢𑁆𑀢𑀭𑀺𑀚𑀸𑀦𑀦𑁂𑀢𑀺 𑀅𑀢𑁆𑀣𑁄. 𑀧𑀭𑁂𑀳𑀺 𑀓𑀢𑀲𑀓𑁆𑀓𑀸𑀭𑀲𑀫𑀸𑀦𑀯𑀺𑀲𑀬𑀸𑀦𑀁 𑀧𑀦 𑀭𑀸𑀕𑀸𑀤𑀻𑀦𑀁 𑀯𑀲𑁂𑀦 𑀅𑀬𑀁 𑀬𑁄𑀚𑀦𑀸 𑁋 𑀓𑀼𑀲𑀮𑀸𑀓𑀼𑀲𑀮𑀁 𑀬𑀣𑀸𑀪𑀽𑀢𑀁 ¶ 𑀅𑀧𑀚𑀸𑀦𑀦𑁆𑀢𑁄𑀧𑀺 𑀬𑁂𑀲𑀫𑀳𑀁 𑀲𑀫𑀯𑀸𑀬𑁂𑀦 𑀓𑀼𑀲𑀮𑀫𑁂𑀯 ‘‘𑀓𑀼𑀲𑀮’’𑀦𑁆𑀢𑀺, 𑀅𑀓𑀼𑀲𑀮𑀫𑁂𑀯 ‘‘𑀅𑀓𑀼𑀲𑀮’’𑀦𑁆𑀢𑀺 𑀘 𑀩𑁆𑀬𑀸𑀓𑀭𑁂𑀬𑁆𑀬𑀁, 𑀢𑁂𑀲𑀼 𑀢𑀣𑀸 𑀩𑁆𑀬𑀸𑀓𑀭𑀡𑀳𑁂𑀢𑀼 ‘‘𑀅𑀳𑁄 𑀯𑀢 𑀭𑁂 𑀧𑀡𑁆𑀟𑀺𑀢𑁄’’𑀢𑀺 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀓𑀭𑁄𑀦𑁆𑀢𑁂𑀲𑀼 𑀫𑀫 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀅𑀲𑁆𑀲𑀸𑀢𑀺. 𑀤𑁄𑀲𑀧𑀝𑀺𑀖𑁂𑀲𑀼𑀧𑀺 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀬𑁄𑀚𑁂𑀢𑀩𑁆𑀩𑀁. ‘‘𑀢𑀁 𑀫𑀫𑀲𑁆𑀲 𑀉𑀧𑀸𑀤𑀸𑀦𑀁, 𑀲𑁄 𑀫𑀫𑀲𑁆𑀲 𑀯𑀺𑀖𑀸𑀢𑁄’’𑀢𑀺 𑀇𑀤𑀁 𑀅𑀪𑀺𑀥𑀫𑁆𑀫𑀦𑀬𑁂𑀦 (𑀥. 𑀲. 𑁧𑁨𑁧𑁯 𑀆𑀤𑀬𑁄) 𑀬𑀣𑀸𑀮𑀸𑀪𑀯𑀘𑀦𑀁 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀙𑀦𑁆𑀤𑀭𑀸𑀕𑀤𑁆𑀯𑀬’’𑀦𑁆𑀢𑀺𑀆𑀤𑀺. 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄 ¶ 𑀏𑀯 𑀳𑀺 ‘‘𑀉𑀧𑀸𑀤𑀸𑀦’’𑀦𑁆𑀢𑀺 𑀅𑀪𑀺𑀥𑀫𑁆𑀫𑁂 𑀯𑀼𑀢𑁆𑀢𑀸 (𑀥. 𑀲. 𑁧𑁨𑁧𑁯 𑀆𑀤𑀬𑁄) 𑀇𑀤𑀸𑀦𑀺 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀅𑀯𑀺𑀲𑁂𑀲𑀬𑁄𑀚𑀦𑀁 𑀤𑀲𑁆𑀲𑁂𑀢𑀺 ‘‘𑀉𑀪𑀬𑀫𑁆𑀧𑀺 𑀯𑀸’’𑀢𑀺𑀆𑀤𑀺𑀦𑀸. 𑀲𑀼𑀢𑁆𑀢𑀦𑁆𑀢𑁂 𑀳𑀺 𑀤𑁄𑀲𑁄𑀧𑀺 ‘‘𑀉𑀧𑀸𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑁄 ‘‘𑀓𑁄𑀥𑀼𑀧𑀸𑀤𑀸𑀦𑀯𑀺𑀦𑀺𑀩𑀦𑁆𑀥𑀸 𑀯𑀺𑀖𑀸𑀢𑀁 𑀆𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑀝𑀻. 𑁧.𑁬𑁩) ‘‘𑀉𑀪𑀬𑀫𑁆𑀧𑀻’’𑀢𑀺 𑀘 𑀅𑀢𑁆𑀣𑀢𑁄 𑀯𑀼𑀢𑁆𑀢𑀁, 𑀦 𑀲𑀤𑁆𑀤𑀢𑁄 𑀘𑀢𑀼𑀦𑁆𑀦𑀫𑁆𑀧𑀺 𑀲𑀤𑁆𑀤𑀸𑀦𑀫𑀢𑁆𑀣𑀤𑁆𑀯𑀬𑀯𑀸𑀘𑀓𑀢𑁆𑀢𑀸. 𑀤𑀴𑁆𑀳𑀕𑁆𑀕𑀳𑀡𑀦𑁆𑀢𑀺 𑀅𑀫𑀼𑀜𑁆𑀘𑀦𑀕𑁆𑀕𑀳𑀡𑀁. 𑀧𑀝𑀺𑀖𑁄𑀧𑀺 𑀳𑀺 𑀆𑀭𑀫𑁆𑀫𑀡𑀁 𑀦 𑀫𑀼𑀜𑁆𑀘𑀢𑀺 𑀉𑀧𑀦𑀸𑀳𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀦𑀢𑁄, 𑀮𑁄𑀪𑀲𑁆𑀲𑁂𑀯 𑀉𑀧𑀸𑀤𑀸𑀦𑀪𑀸𑀯𑁂𑀦 𑀧𑀸𑀓𑀝𑀢𑁆𑀢𑀸 𑀤𑁄𑀲𑀲𑁆𑀲𑀸𑀧𑀺 𑀉𑀧𑀸𑀤𑀸𑀦𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀯𑀼𑀢𑁆𑀢𑀁. 𑀯𑀺𑀳𑀦𑀦𑀁 𑀯𑀺𑀳𑀺𑀁𑀲𑀦𑀁 𑀯𑀺𑀩𑀸𑀥𑀦𑀁. 𑀭𑀸𑀕𑁄𑀧𑀺 𑀳𑀺 𑀧𑀭𑀺𑀴𑀸𑀳𑀯𑀲𑁂𑀦 𑀲𑀸𑀭𑀤𑁆𑀥𑀯𑀼𑀢𑁆𑀢𑀺𑀢𑀸𑀬 𑀦𑀺𑀲𑁆𑀲𑀬𑀁 𑀯𑀺𑀳𑀦𑀢𑀺. ‘‘𑀭𑀸𑀕𑁄 𑀳𑀻’’𑀢𑀺𑀆𑀤𑀺𑀦𑀸 𑀭𑀸𑀕𑀤𑁄𑀲𑀸𑀦𑀁 𑀉𑀧𑀸𑀤𑀸𑀦𑀪𑀸𑀯𑁂 𑀯𑀺𑀲𑁂𑀲𑀤𑀲𑁆𑀲𑀦𑀫𑀼𑀔𑁂𑀦 𑀢𑀤𑀢𑁆𑀣𑀲𑀫𑀢𑁆𑀣𑀦𑀁. 𑀯𑀺𑀦𑀸𑀲𑁂𑀢𑀼𑀓𑀸𑀫𑀢𑀸𑀬 𑀆𑀭𑀫𑁆𑀫𑀡𑀁 𑀕𑀡𑁆𑀳𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑀻𑀢𑀺 𑀢𑀲𑁆𑀫𑀸 𑀕𑀳𑀡𑀯𑀺𑀳𑀦𑀦𑀢𑁄.

𑁬𑁪. 𑀧𑀟𑀢𑀺 𑀲𑀪𑀸𑀯𑀥𑀫𑁆𑀫𑁂 𑀚𑀸𑀦𑀸𑀢𑀺, 𑀬𑀣𑀸𑀲𑀪𑀸𑀯𑀁 𑀯𑀸 𑀕𑀘𑁆𑀙𑀢𑀻𑀢𑀺 𑀧𑀡𑁆𑀟𑀸, 𑀲𑀸 𑀬𑁂𑀲𑀁 𑀢𑁂 𑀧𑀡𑁆𑀟𑀺𑀢𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀧𑀡𑁆𑀟𑀺𑀘𑁆𑀘𑁂𑀦𑀸’’𑀢𑀺𑀆𑀤𑀺𑀦𑀸. 𑀧𑀡𑁆𑀟𑀺𑀢𑀲𑁆𑀲 𑀪𑀸𑀯𑁄 𑀧𑀡𑁆𑀟𑀺𑀘𑁆𑀘𑀁, 𑀧𑀜𑁆𑀜𑀸. 𑀬𑁂𑀦 𑀳𑀺 𑀥𑀫𑁆𑀫𑁂𑀦 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀪𑀽𑀢𑁂𑀦 𑀬𑀼𑀢𑁆𑀢𑁄 ‘‘𑀧𑀡𑁆𑀟𑀺𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀲𑁄𑀬𑁂𑀯 𑀥𑀫𑁆𑀫𑁄 𑀧𑀡𑁆𑀟𑀺𑀘𑁆𑀘𑀁. 𑀢𑁂𑀦 𑀲𑀼𑀢𑀘𑀺𑀦𑁆𑀢𑀸𑀫𑀬𑀧𑀜𑁆𑀜𑀸 𑀯𑀼𑀢𑁆𑀢𑀸 𑀢𑀸𑀲𑀫𑁂𑀯 𑀯𑀺𑀲𑀬𑀪𑀸𑀯𑀢𑁄. 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀳𑀺 𑀪𑀸𑀯𑀦𑀸𑀫𑀬𑀧𑀜𑁆𑀜𑀸. ‘‘𑀦𑀺𑀧𑀼𑀡𑀸’’𑀢𑀺 𑀇𑀫𑀺𑀦𑀸 𑀧𑀦 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀁 𑀧𑀝𑀺𑀲𑀦𑁆𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀁 𑀲𑀸𑀪𑀸𑀯𑀺𑀓𑀜𑀸𑀡𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀡𑁆𑀳𑀲𑀼𑀔𑀼𑀫𑀩𑀼𑀤𑁆𑀥𑀺𑀦𑁄’’𑀢𑀺. 𑀅𑀢𑁆𑀣𑀦𑁆𑀢𑀭𑀦𑁆𑀢𑀺 𑀅𑀢𑁆𑀣𑀦𑀸𑀦𑀢𑁆𑀢𑀁, 𑀅𑀢𑁆𑀣𑀫𑁂𑀯 𑀯𑀸. ‘‘𑀯𑀺𑀜𑁆𑀜𑀸𑀢𑀧𑀭𑀧𑁆𑀧𑀯𑀸𑀤𑀸’’𑀢𑀺 𑀏𑀢𑁂𑀦 𑀓𑀢-𑀲𑀤𑁆𑀤𑀲𑁆𑀲 𑀓𑀺𑀭𑀺𑀬𑀸𑀲𑀸𑀫𑀜𑁆𑀜𑀯𑀸𑀘𑀓𑀢𑁆𑀢𑀸 ‘‘𑀓𑀢𑀯𑀺𑀚𑁆𑀚𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀓𑀢-𑀲𑀤𑁆𑀤𑁄 𑀜𑀸𑀡𑀸𑀦𑀼𑀬𑀼𑀢𑁆𑀢𑀢𑀁 𑀯𑀤𑀢𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀓𑀢𑀯𑀸𑀤𑀧𑀭𑀺𑀘𑀬𑀸’’𑀢𑀺 𑀏𑀢𑁂𑀦 𑀧𑀦 ‘‘𑀓𑀢𑀲𑀺𑀧𑁆𑀧𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀲𑀫𑀼𑀤𑀸𑀘𑀺𑀡𑁆𑀡𑀯𑀸𑀤𑀢𑀁. 𑀉𑀪𑀺𑀦𑁆𑀦𑀫𑀦𑁆𑀢𑀭𑀸 𑀧𑀦 𑀲𑀫𑀼𑀘𑁆𑀘𑀬𑀤𑁆𑀯𑀬𑁂𑀦 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑀁, 𑀏𑀓𑀲𑁂𑀲𑀁 𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀸𑀮𑀯𑁂𑀥𑀻𑀦𑀁 𑀭𑀽𑀧𑀁 𑀲𑀪𑀸𑀯𑁄 𑀯𑀺𑀬 𑀭𑀽𑀧𑀫𑁂𑀢𑁂𑀲𑀦𑁆𑀢𑀺 𑀯𑀸𑀮𑀯𑁂𑀥𑀺𑀭𑀽𑀧𑀸𑀢𑀺 𑀆𑀳 ‘‘𑀯𑀸𑀮𑀯𑁂𑀥𑀺𑀥𑀦𑀼𑀕𑁆𑀕𑀳𑀲𑀤𑀺𑀲𑀸’’𑀢𑀺. 𑀲𑀢𑀥𑀸 𑀪𑀺𑀦𑁆𑀦𑀲𑁆𑀲 𑀯𑀸𑀮𑀕𑁆𑀕𑀲𑁆𑀲 𑀅𑀁𑀲𑀼𑀓𑁄𑀝𑀺𑀯𑁂𑀥𑀓𑀥𑀦𑀼𑀕𑁆𑀕𑀳𑀲𑀤𑀺𑀲𑀸𑀢𑀺 𑀅𑀢𑁆𑀣𑁄. 𑀢𑀸𑀤𑀺𑀲𑁄𑀬𑁂𑀯 𑀳𑀺 ‘‘𑀯𑀸𑀮𑀯𑁂𑀥𑀻’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀫𑀜𑁆𑀜𑁂-𑀲𑀤𑁆𑀤𑁄 𑀉𑀧𑀫𑀸𑀚𑁄𑀢𑀓𑁄𑀢𑀺 𑀯𑀼𑀢𑁆𑀢𑀁 ‘‘𑀪𑀺𑀦𑁆𑀤𑀦𑁆𑀢𑀸 𑀯𑀺𑀬𑀸’’𑀢𑀺. 𑀧𑀜𑁆𑀜𑀸𑀕𑀢𑁂𑀦𑀸𑀢𑀺 𑀧𑀜𑁆𑀜𑀸𑀧𑀪𑁂𑀤𑁂𑀦, 𑀧𑀜𑁆𑀜𑀸𑀬 𑀏𑀯 𑀯𑀸. 𑀲𑀫𑀦𑀼𑀬𑀼𑀜𑁆𑀚𑀦𑀸 𑀮𑀤𑁆𑀥𑀺𑀬𑀸 𑀧𑀼𑀘𑁆𑀙𑀸. 𑀲𑀫𑀦𑀼𑀕𑀸𑀳𑀦𑀸 𑀢𑀁𑀓𑀸𑀭𑀡𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀓𑀺𑀁 𑀓𑀼𑀲𑀮’’𑀦𑁆𑀢𑀺𑀆𑀤𑀺𑀦𑀸. 𑀲𑀫𑀦𑀼𑀪𑀸𑀲𑀦𑀸𑀧𑀺 ¶ 𑀑𑀯𑀸𑀤𑀯𑀲𑁂𑀦 𑀲𑀫𑀦𑀼𑀬𑀼𑀜𑁆𑀚𑀦𑀸𑀬𑁂𑀯𑀸𑀢𑀺 𑀆𑀳 ¶ ‘‘𑀲𑀫𑀦𑀼𑀬𑀼𑀜𑁆𑀚𑁂𑀬𑁆𑀬𑀼’’𑀦𑁆𑀢𑀺. ‘‘𑀦 𑀲𑀫𑁆𑀧𑀸𑀬𑁂𑀬𑁆𑀬’’𑀦𑁆𑀢𑀺 𑀏𑀢𑁆𑀣 𑀤-𑀓𑀸𑀭𑀲𑁆𑀲 𑀬-𑀓𑀸𑀭𑀸𑀤𑁂𑀲𑀢𑀁, 𑀏𑀬𑁆𑀬-𑀲𑀤𑁆𑀤𑀲𑁆𑀲 𑀘 𑀲𑀸𑀫𑀢𑁆𑀣𑀺𑀬𑀢𑁆𑀣𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀲𑀫𑁆𑀧𑀸𑀤𑁂𑀬𑁆𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁬𑁫-𑁬𑁬. 𑀫𑀦𑁆𑀤𑀸 𑀅𑀢𑀺𑀓𑁆𑀔𑀸 𑀧𑀜𑁆𑀜𑀸 𑀬𑀲𑁆𑀲𑀸𑀢𑀺 𑀫𑀦𑁆𑀤𑀧𑀜𑁆𑀜𑁄, 𑀢𑁂𑀦𑀸𑀳 ‘‘𑀅𑀧𑀜𑁆𑀜𑀲𑁆𑀲𑁂𑀯𑁂𑀢𑀁 𑀦𑀸𑀫’’𑀦𑁆𑀢𑀺. ‘‘𑀫𑁄𑀳𑀫𑀽𑀳𑁄’’𑀢𑀺 𑀯𑀢𑁆𑀢𑀩𑁆𑀩𑁂 𑀳-𑀓𑀸𑀭𑀮𑁄𑀧𑁂𑀦 ‘‘𑀫𑁄𑀫𑀽𑀳𑁄’’𑀢𑀺 𑀯𑀼𑀢𑁆𑀢𑀁, 𑀢𑀜𑁆𑀘 𑀅𑀢𑀺𑀲𑀬𑀢𑁆𑀣𑀤𑀻𑀧𑀓𑀁 𑀧𑀭𑀺𑀬𑀸𑀬𑀤𑁆𑀯𑀬𑀲𑁆𑀲 𑀅𑀢𑀺𑀭𑁂𑀓𑀢𑁆𑀣𑀪𑀸𑀯𑀢𑁄𑀢𑀺 𑀬𑀣𑀸 ‘‘𑀧𑀤𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀢𑀺𑀲𑀫𑁆𑀫𑀽𑀴𑁆𑀳𑁄’’𑀢𑀺. 𑀲𑀺𑀤𑁆𑀥𑁂 𑀳𑀺 𑀲𑀢𑀺 𑀧𑀼𑀦𑀸𑀭𑀫𑁆𑀪𑁄 𑀦𑀺𑀬𑀫𑀸𑀬 𑀯𑀸 𑀳𑁄𑀢𑀺, 𑀅𑀢𑁆𑀣𑀦𑁆𑀢𑀭𑀯𑀺𑀜𑁆𑀜𑀸𑀧𑀦𑀸𑀬 𑀯𑀸. 𑀬𑀣𑀸 𑀧𑀼𑀩𑁆𑀩𑁂 𑀓𑀫𑁆𑀫𑀼𑀦𑀸 𑀆𑀕𑀢𑁄, 𑀢𑀣𑀸 𑀇𑀥𑀸𑀧𑀻𑀢𑀺 𑀢𑀣𑀸𑀕𑀢𑁄, 𑀲𑀢𑁆𑀢𑁄. 𑀏𑀢𑁆𑀣 𑀘 𑀓𑀸𑀫𑀁 𑀧𑀼𑀭𑀺𑀫𑀸𑀦𑀫𑁆𑀧𑀺 𑀢𑀺𑀡𑁆𑀡𑀁 𑀓𑀼𑀲𑀮𑀸𑀤𑀺𑀥𑀫𑁆𑀫𑀲𑀪𑀸𑀯𑀸𑀦𑀯𑀩𑁄𑀥𑀢𑁄 𑀅𑀢𑁆𑀣𑁂𑀯 𑀫𑀦𑁆𑀤𑀪𑀸𑀯𑁄, 𑀢𑁂𑀲𑀁 𑀧𑀦 𑀅𑀢𑁆𑀢𑀦𑁄 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀯𑀩𑁄𑀥𑀲𑁆𑀲 𑀅𑀯𑀩𑁄𑀥𑀦𑀢𑁄 𑀯𑀺𑀲𑁂𑀲𑁄 𑀅𑀢𑁆𑀣𑀻𑀢𑀺. 𑀧𑀘𑁆𑀙𑀺𑀫𑁄𑀬𑁂𑀯 𑀢𑀤𑀪𑀸𑀯𑀢𑁄 𑀫𑀦𑁆𑀤𑀫𑁄𑀫𑀽𑀳𑀪𑀸𑀯𑁂𑀦 𑀯𑀼𑀢𑁆𑀢𑁄. 𑀦𑀦𑀼 𑀘 𑀧𑀘𑁆𑀙𑀺𑀫𑀲𑁆𑀲𑀸𑀧𑀺 𑀅𑀢𑁆𑀢𑀦𑁄 𑀥𑀫𑁆𑀫𑀸𑀦𑀯𑀩𑁄𑀥𑀲𑁆𑀲 𑀅𑀯𑀩𑁄𑀥𑁄 𑀅𑀢𑁆𑀣𑀺𑀬𑁂𑀯 ‘‘𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄’𑀢𑀺 𑀇𑀢𑀺 𑀘𑁂 𑀫𑁂 𑀅𑀲𑁆𑀲, ‘𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄’𑀢𑀺 𑀇𑀢𑀺 𑀢𑁂 𑀦𑀁 𑀩𑁆𑀬𑀸𑀓𑀭𑁂𑀬𑁆𑀬𑀁, 𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄’’𑀢𑀺𑀆𑀤𑀺𑀯𑀘𑀦𑀢𑁄𑀢𑀺? 𑀓𑀺𑀜𑁆𑀘𑀸𑀧𑀺 𑀅𑀢𑁆𑀣𑀺, 𑀦 𑀧𑀦 𑀢𑀲𑁆𑀲 𑀧𑀼𑀭𑀺𑀫𑀸𑀦𑀁 𑀯𑀺𑀬 𑀅𑀧𑀭𑀺𑀜𑁆𑀜𑀸𑀢𑀥𑀫𑁆𑀫𑀩𑁆𑀬𑀸𑀓𑀭𑀡𑀦𑀺𑀫𑀺𑀢𑁆𑀢𑀫𑀼𑀲𑀸𑀯𑀸𑀤𑀸𑀤𑀺𑀪𑀸𑀬𑀦𑀚𑀺𑀕𑀼𑀘𑁆𑀙𑀦𑀸𑀓𑀸𑀭𑁄 𑀅𑀢𑁆𑀣𑀺, 𑀅𑀣 𑀔𑁄 𑀫𑀳𑀸𑀫𑀽𑀴𑁆𑀳𑁄𑀬𑁂𑀯𑀸𑀢𑀺 𑀢𑀣𑀸𑀯𑁂𑀲 𑀯𑀼𑀢𑁆𑀢𑁄. 𑀅𑀣 𑀯𑀸 ‘‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄’’𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀸𑀬 𑀯𑀺𑀓𑁆𑀔𑁂𑀧𑀓𑀭𑀡𑀢𑁆𑀣𑀁 ‘‘𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄’’𑀢𑀺 𑀇𑀢𑀺 𑀘𑁂 𑀫𑀁 𑀧𑀼𑀘𑁆𑀙𑀲𑀻𑀢𑀺 𑀧𑀼𑀘𑁆𑀙𑀸𑀞𑀧𑀦𑀫𑁂𑀯 𑀢𑁂𑀦 𑀤𑀲𑁆𑀲𑀻𑀬𑀢𑀺, 𑀦 𑀅𑀢𑁆𑀢𑀦𑁄 𑀥𑀫𑁆𑀫𑀸𑀦𑀯𑀩𑁄𑀥𑀸𑀯𑀩𑁄𑀥𑁄𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁂𑀦 ‘‘𑀫𑀦𑁆𑀤𑁄 𑀫𑁄𑀫𑀽𑀳𑁄’’𑀢𑀺 𑀯𑀼𑀢𑁆𑀢𑁄. 𑀢𑁂𑀦𑁂𑀯 𑀳𑀺 𑀢𑀣𑀸𑀯𑀸𑀤𑀻𑀦𑀁 𑀲𑀜𑁆𑀘𑀬𑀁 𑀩𑁂𑀮𑀝𑁆𑀞𑀧𑀼𑀢𑁆𑀢𑀁 𑀆𑀭𑀩𑁆𑀪 ‘‘𑀅𑀬𑀜𑁆𑀘 𑀇𑀫𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀩𑁆𑀩𑀩𑀸𑀮𑁄 𑀲𑀩𑁆𑀩𑀫𑀽𑀴𑁆𑀳𑁄’’𑀢𑀺 (𑀤𑀻. 𑀦𑀺. 𑁧.𑁧𑁮𑁧) 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄’’𑀢𑀺 𑀲𑀲𑁆𑀲𑀢𑀤𑀲𑁆𑀲𑀦𑀯𑀲𑁂𑀦, 𑀲𑀫𑁆𑀫𑀸𑀤𑀺𑀝𑁆𑀞𑀺𑀯𑀲𑁂𑀦 𑀯𑀸 𑀧𑀼𑀘𑁆𑀙𑀸. 𑀬𑀤𑀺 𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑁄 𑀲𑀲𑁆𑀲𑀢𑀤𑀲𑁆𑀲𑀦𑀯𑀲𑁂𑀦 𑀧𑀼𑀘𑁆𑀙𑁂𑀬𑁆𑀬, 𑀬𑀤𑀺 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁄 𑀲𑀫𑁆𑀫𑀸𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀤𑁆𑀯𑀺𑀥𑀸𑀧𑀺 𑀅𑀢𑁆𑀣𑁄 𑀯𑀝𑁆𑀝𑀢𑀺. ‘‘𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄’’𑀢𑀺 𑀦𑀢𑁆𑀣𑀺𑀓𑀤𑀲𑁆𑀲𑀦𑀯𑀲𑁂𑀦, 𑀲𑀫𑁆𑀫𑀸𑀤𑀺𑀝𑁆𑀞𑀺𑀯𑀲𑁂𑀦 𑀯𑀸, ‘‘𑀅𑀢𑁆𑀣𑀺 𑀘 𑀦𑀢𑁆𑀣𑀺 𑀘 𑀧𑀭𑁄 𑀮𑁄𑀓𑁄’’𑀢𑀺 𑀉𑀘𑁆𑀙𑁂𑀤𑀤𑀲𑁆𑀲𑀦𑀯𑀲𑁂𑀦, 𑀲𑀫𑁆𑀫𑀸𑀤𑀺𑀝𑁆𑀞𑀺𑀯𑀲𑁂𑀦 𑀯𑀸, ‘‘𑀦𑁂𑀯𑀢𑁆𑀣𑀺 𑀦 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄’’𑀢𑀺 𑀯𑀼𑀢𑁆𑀢𑀧𑀓𑀸𑀭𑀢𑁆𑀢𑀬𑀧𑀝𑀺𑀓𑁆𑀔𑁂𑀧𑁂 𑀲𑀢𑀺 𑀧𑀓𑀸𑀭𑀦𑁆𑀢𑀭𑀲𑁆𑀲 𑀅𑀲𑀫𑁆𑀪𑀯𑀢𑁄 𑀅𑀢𑁆𑀣𑀺𑀢𑀸𑀦𑀢𑁆𑀣𑀺𑀢𑀸𑀳𑀺 𑀦 𑀯𑀢𑁆𑀢𑀩𑁆𑀩𑀸𑀓𑀸𑀭𑁄 𑀧𑀭𑁄 𑀮𑁄𑀓𑁄𑀢𑀺 𑀯𑀺𑀓𑁆𑀔𑁂𑀧𑀜𑁆𑀜𑁂𑀯 𑀧𑀼𑀭𑀓𑁆𑀔𑀸𑀭𑁂𑀦 ¶ , 𑀲𑀫𑁆𑀫𑀸𑀤𑀺𑀝𑁆𑀞𑀺𑀯𑀲𑁂𑀦 𑀯𑀸 𑀧𑀼𑀘𑁆𑀙𑀸. 𑀲𑁂𑀲𑀘𑀢𑀼𑀓𑁆𑀓𑀢𑁆𑀢𑀬𑁂𑀧𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀜𑁆𑀜𑀲𑀗𑁆𑀔𑀸𑀭𑀢𑁆𑀢𑀺𑀓𑁄 𑀯𑀺𑀬 𑀳𑀺 𑀓𑀸𑀬𑀲𑀗𑁆𑀔𑀸𑀭𑀢𑁆𑀢𑀺𑀓𑁂𑀦 𑀧𑀼𑀭𑀺𑀫𑀘𑀢𑀼𑀓𑁆𑀓𑀲𑀗𑁆𑀕𑀳𑀺𑀢𑁄 𑀏𑀯 𑀅𑀢𑁆𑀣𑁄 𑀲𑁂𑀲𑀘𑀢𑀼𑀓𑁆𑀓𑀢𑁆𑀢𑀬𑁂𑀦 𑀲𑀢𑁆𑀢𑀧𑀭𑀸𑀫𑀸𑀲𑀧𑀼𑀜𑁆𑀜𑀸𑀤𑀺𑀲𑀨𑀮𑀢𑀸𑀘𑁄𑀤𑀦𑀸𑀦𑀬𑁂𑀦 (𑀅𑀢𑁆𑀢𑀧𑀭𑀸𑀫𑀸𑀲𑀧𑀼𑀜𑁆𑀜𑀸𑀤𑀺𑀨𑀮𑀢𑀸𑀘𑁄𑀤𑀦𑀸𑀦𑀬𑁂𑀦 𑀤𑀻. 𑀦𑀺. 𑀝𑀻. 𑁧.𑁬𑁫, 𑁬𑁬) 𑀲𑀗𑁆𑀕𑀳𑀺𑀢𑁄. 𑀏𑀢𑁆𑀣 𑀳𑀺 𑀢𑀢𑀺𑀬𑀘𑀢𑀼𑀓𑁆𑀓𑁂𑀦 ¶ 𑀧𑀼𑀜𑁆𑀜𑀸𑀤𑀺𑀓𑀫𑁆𑀫𑀲𑀨𑀮𑀢𑀸𑀬, 𑀲𑁂𑀲𑀘𑀢𑀼𑀓𑁆𑀓𑀢𑁆𑀢𑀬𑁂𑀦 𑀘 𑀲𑀢𑁆𑀢𑀧𑀭𑀸𑀫𑀸𑀲𑀢𑀸𑀬 𑀘𑁄𑀤𑀦𑀸𑀦𑀬𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑁄 𑀧𑀦 𑀲𑀲𑁆𑀲𑀢𑀸𑀤𑀻𑀦𑀁 𑀅𑀢𑁆𑀢𑀦𑁄 𑀅𑀭𑀼𑀘𑁆𑀘𑀦𑀢𑀸𑀬 𑀲𑀩𑁆𑀩𑀢𑁆𑀣 ‘‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄’’𑀢𑀺𑀆𑀤𑀺𑀦𑀸 𑀯𑀺𑀓𑁆𑀔𑁂𑀧𑀜𑁆𑀜𑁂𑀯 𑀓𑀭𑁄𑀢𑀺. 𑀢𑀢𑁆𑀣 ‘‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄’’𑀢𑀺𑀆𑀤𑀺 𑀢𑀢𑁆𑀣 𑀢𑀢𑁆𑀣 𑀧𑀼𑀘𑁆𑀙𑀺𑀢𑀸𑀓𑀸𑀭𑀧𑀝𑀺𑀲𑁂𑀥𑀦𑀯𑀲𑁂𑀦 𑀯𑀺𑀓𑁆𑀔𑁂𑀧𑀸𑀓𑀸𑀭𑀤𑀲𑁆𑀲𑀦𑀁. 𑀓𑀲𑁆𑀫𑀸 𑀧𑀦 𑀯𑀺𑀓𑁆𑀔𑁂𑀧𑀯𑀸𑀤𑀺𑀦𑁄 𑀧𑀝𑀺𑀓𑁆𑀔𑁂𑀧𑁄𑀯 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑁄. 𑀦𑀦𑀼 𑀯𑀺𑀓𑁆𑀔𑁂𑀧𑀧𑀓𑁆𑀔𑀲𑁆𑀲 ‘‘𑀏𑀯𑀫𑁂𑀯’’𑀦𑁆𑀢𑀺 𑀅𑀦𑀼𑀚𑀸𑀦𑀦𑀫𑁆𑀧𑀺 𑀯𑀺𑀓𑁆𑀔𑁂𑀧𑀧𑀓𑁆𑀔𑁂 𑀅𑀯𑀝𑁆𑀞𑀸𑀦𑀢𑁄 𑀬𑀼𑀢𑁆𑀢𑀭𑀽𑀧𑀁 𑀲𑀺𑀬𑀸𑀢𑀺? 𑀦, 𑀢𑀢𑁆𑀣𑀸𑀧𑀺 𑀢𑀲𑁆𑀲 𑀲𑀫𑁆𑀫𑀽𑀴𑁆𑀳𑀢𑁆𑀢𑀸, 𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑁂𑀯 𑀘 𑀯𑀺𑀓𑁆𑀔𑁂𑀧𑀯𑀸𑀤𑀲𑁆𑀲 𑀧𑀯𑀢𑁆𑀢𑀦𑀢𑁄. 𑀢𑀣𑀸 𑀳𑀺 𑀲𑀜𑁆𑀘𑀬𑁄 𑀩𑁂𑀮𑀝𑁆𑀞𑀧𑀼𑀢𑁆𑀢𑁄 𑀭𑀜𑁆𑀜𑀸 𑀅𑀚𑀸𑀢𑀲𑀢𑁆𑀢𑀼𑀦𑀸 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀧𑀼𑀝𑁆𑀞𑁄 𑀧𑀭𑀮𑁄𑀓𑀢𑁆𑀣𑀺𑀢𑀸𑀤𑀻𑀦𑀁 𑀧𑀝𑀺𑀲𑁂𑀥𑀦𑀫𑀼𑀔𑁂𑀦𑁂𑀯 𑀯𑀺𑀓𑁆𑀔𑁂𑀧𑀁 𑀩𑁆𑀬𑀸𑀓𑀸𑀲𑀺.

𑀏𑀢𑁆𑀣𑀸𑀳 𑁋 𑀦𑀦𑀼 𑀘𑀸𑀬𑀁 𑀲𑀩𑁆𑀩𑁄𑀧𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑁄 𑀓𑀼𑀲𑀮𑀸𑀤𑀬𑁄 𑀥𑀫𑁆𑀫𑁂, 𑀧𑀭𑀮𑁄𑀓𑀢𑁆𑀣𑀺𑀢𑀸𑀤𑀻𑀦𑀺 𑀘 𑀬𑀣𑀸𑀪𑀽𑀢𑀁 𑀅𑀦𑀯𑀩𑀼𑀚𑁆𑀛𑀫𑀸𑀦𑁄 𑀢𑀢𑁆𑀣 𑀢𑀢𑁆𑀣 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀧𑀼𑀘𑁆𑀙𑀸𑀬 𑀯𑀺𑀓𑁆𑀔𑁂𑀧𑀦𑀫𑀢𑁆𑀢𑀁 𑀆𑀧𑀚𑁆𑀚𑀢𑀺, 𑀅𑀣 𑀢𑀲𑁆𑀲 𑀓𑀣𑀁 𑀤𑀺𑀝𑁆𑀞𑀺𑀕𑀢𑀺𑀓𑀪𑀸𑀯𑁄 𑀲𑀺𑀬𑀸. 𑀦 𑀳𑀺 𑀅𑀯𑀢𑁆𑀢𑀼𑀓𑀸𑀫𑀲𑁆𑀲 𑀯𑀺𑀬 𑀧𑀼𑀘𑁆𑀙𑀺𑀢𑀢𑁆𑀣𑀫𑀚𑀸𑀦𑀦𑁆𑀢𑀲𑁆𑀲 𑀯𑀺𑀓𑁆𑀔𑁂𑀧𑀓𑀭𑀡𑀫𑀢𑁆𑀢𑁂𑀦 𑀤𑀺𑀝𑁆𑀞𑀺𑀕𑀢𑀺𑀓𑀢𑀸 𑀬𑀼𑀢𑁆𑀢𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀦 𑀳𑁂𑀯 𑀔𑁄 𑀧𑀼𑀘𑁆𑀙𑀸𑀬 𑀯𑀺𑀓𑁆𑀔𑁂𑀧𑀓𑀭𑀡𑀫𑀢𑁆𑀢𑁂𑀦 𑀢𑀲𑁆𑀲 𑀤𑀺𑀝𑁆𑀞𑀺𑀕𑀢𑀺𑀓𑀢𑀸, 𑀅𑀣 𑀔𑁄 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀯𑀲𑁂𑀦. 𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀳𑀺 𑀫𑀺𑀘𑁆𑀙𑀸𑀪𑀺𑀦𑀺𑀯𑀺𑀝𑁆𑀞𑁄𑀬𑁂𑀯 𑀧𑀼𑀕𑁆𑀕𑀮𑁄 𑀫𑀦𑁆𑀤𑀩𑀼𑀤𑁆𑀥𑀺𑀢𑀸𑀬 𑀓𑀼𑀲𑀮𑀸𑀤𑀺𑀥𑀫𑁆𑀫𑁂, 𑀧𑀭𑀮𑁄𑀓𑀢𑁆𑀣𑀺𑀢𑀸𑀤𑀻𑀦𑀺 𑀘 𑀬𑀸𑀣𑀸𑀯𑀢𑁄 𑀅𑀧𑁆𑀧𑀝𑀺𑀩𑀼𑀚𑁆𑀛𑀫𑀸𑀦𑁄 𑀅𑀢𑁆𑀢𑀦𑀸 𑀅𑀯𑀺𑀜𑁆𑀜𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀭𑀁 𑀯𑀺𑀜𑁆𑀜𑀸𑀧𑁂𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀫𑀼𑀲𑀸𑀯𑀸𑀤𑀪𑀬𑁂𑀦 𑀘 𑀯𑀺𑀓𑁆𑀔𑁂𑀧𑀫𑀸𑀧𑀚𑁆𑀚𑀢𑀻𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀬𑀸𑀲𑀁 𑀲𑀢𑁆𑀢𑁂𑀯 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄, 𑀲𑁂𑀲𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑁄’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁯𑁭, 𑁯𑁮) 𑀅𑀣 𑀯𑀸 𑀧𑀼𑀜𑁆𑀜𑀧𑀸𑀧𑀸𑀦𑀁, 𑀢𑀩𑁆𑀩𑀺𑀧𑀸𑀓𑀸𑀦𑀜𑁆𑀘 𑀅𑀦𑀯𑀩𑁄𑀥𑁂𑀦, 𑀅𑀲𑀤𑁆𑀤𑀳𑀦𑁂𑀦 𑀘 𑀢𑀩𑁆𑀩𑀺𑀲𑀬𑀸𑀬 𑀧𑀼𑀘𑁆𑀙𑀸𑀬 𑀯𑀺𑀓𑁆𑀔𑁂𑀧𑀓𑀭𑀡𑀫𑁂𑀯 𑀲𑀼𑀦𑁆𑀤𑀭𑀦𑁆𑀢𑀺 𑀔𑀦𑁆𑀢𑀺𑀁 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀯𑀺𑀲𑀼𑀁𑀬𑁂𑀯𑁂𑀲𑀸 𑀏𑀓𑀸 𑀤𑀺𑀝𑁆𑀞𑀺 𑀲𑀢𑁆𑀢𑀪𑀗𑁆𑀕𑀤𑀺𑀝𑁆𑀞𑀺 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀘 𑀯𑀼𑀢𑁆𑀢𑀁 ¶ ‘‘𑀧𑀭𑀺𑀬𑀦𑁆𑀢𑀭𑀳𑀺𑀢𑀸 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀤𑀺𑀝𑁆𑀞𑀺 𑀘𑁂𑀯 𑀯𑀸𑀘𑀸’’ 𑀘𑀸𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁬𑁧). 𑀬𑀁 𑀧𑀦𑁂𑀢𑀁 𑀯𑀼𑀢𑁆𑀢𑀁 ‘‘𑀇𑀫𑁂𑀧𑀺 𑀘𑀢𑁆𑀢𑀸𑀭𑁄 𑀧𑀼𑀩𑁆𑀩𑁂 𑀧𑀯𑀢𑁆𑀢𑀥𑀫𑁆𑀫𑀸𑀦𑀼𑀲𑀸𑀭𑁂𑀦𑁂𑀯 𑀤𑀺𑀝𑁆𑀞𑀺𑀬𑀸 𑀕𑀳𑀺𑀢𑀢𑁆𑀢𑀸 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑁂𑀲𑀼 𑀧𑀯𑀺𑀝𑁆𑀞𑀸’’𑀢𑀺, 𑀢𑀤𑁂𑀢𑀲𑁆𑀲 𑀅𑀫𑀭𑀸𑀯𑀺𑀓𑁆𑀔𑁂𑀧𑀯𑀸𑀤𑀲𑁆𑀲 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀗𑁆𑀕𑀳𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀓𑀣𑀁 𑀧𑀦𑀲𑁆𑀲 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀗𑁆𑀕𑀳𑁄𑀢𑀺? 𑀉𑀘𑁆𑀙𑁂𑀤𑀯𑀲𑁂𑀦 𑀅𑀦𑀪𑀺𑀦𑀺𑀯𑁂𑀲𑀦𑀢𑁄. 𑀦𑀢𑁆𑀣𑀺 𑀳𑀺 𑀓𑁄𑀘𑀺 𑀥𑀫𑁆𑀫𑀸𑀦𑀁 𑀬𑀣𑀸𑀪𑀽𑀢𑀯𑁂𑀤𑀻 𑀯𑀺𑀯𑀸𑀤𑀩𑀳𑀼𑀮𑀢𑁆𑀢𑀸 𑀮𑁄𑀓𑀲𑁆𑀲. ‘‘𑀏𑀯𑀫𑁂𑀯’’𑀦𑁆𑀢𑀺 𑀧𑀦 𑀲𑀤𑁆𑀤𑀦𑁆𑀢𑀭𑁂𑀦 𑀥𑀫𑁆𑀫𑀦𑀺𑀚𑁆𑀛𑀸𑀦𑀦𑀸 𑀅𑀦𑀸𑀤𑀺𑀓𑀸𑀮𑀺𑀓𑀸 𑀮𑁄𑀓𑁂, 𑀢𑀲𑁆𑀫𑀸 𑀲𑀲𑁆𑀲𑀢𑀮𑁂𑀲𑀲𑁆𑀲 𑀏𑀢𑁆𑀣 𑀮𑀩𑁆𑀪𑀦𑀢𑁄 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀏𑀢𑀲𑁆𑀲 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀯𑀸𑀤𑀯𑀡𑁆𑀡𑀦𑀸

𑁬𑁭. 𑀅𑀥𑀺𑀘𑁆𑀘 ¶ 𑀬𑀤𑀺𑀘𑁆𑀙𑀓𑀁 𑀬𑀁 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀓𑀲𑁆𑀲𑀘𑀺 𑀩𑀼𑀤𑁆𑀥𑀺𑀧𑀼𑀩𑁆𑀩𑀁 𑀯𑀺𑀦𑀸 𑀲𑀫𑀼𑀧𑁆𑀧𑀦𑁆𑀦𑁄𑀢𑀺 𑀅𑀢𑁆𑀢𑀮𑁄𑀓𑀲𑀜𑁆𑀜𑀺𑀢𑀸𑀦𑀁 𑀔𑀦𑁆𑀥𑀸𑀦𑀁 𑀅𑀥𑀺𑀘𑁆𑀘𑀼𑀧𑁆𑀧𑀢𑁆𑀢𑀺𑀆𑀓𑀸𑀭𑀸𑀭𑀫𑁆𑀫𑀡𑀤𑀲𑁆𑀲𑀦𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀢𑀤𑀸𑀓𑀸𑀭𑀲𑀦𑁆𑀦𑀺𑀲𑁆𑀲𑀬𑁂𑀦𑁂𑀯 𑀧𑀯𑀢𑁆𑀢𑀺𑀢𑁄, 𑀢𑀤𑀸𑀓𑀸𑀭𑀲𑀳𑀘𑀭𑀺𑀢𑀢𑁄 𑀘 𑀬𑀣𑀸 ‘‘𑀫𑀜𑁆𑀘𑀸 𑀖𑁄𑀲𑀦𑁆𑀢𑀺, 𑀓𑀼𑀦𑁆𑀢𑀸 𑀧𑀘𑀭𑀦𑁆𑀢𑀻’’𑀢𑀺, 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀤𑀲𑁆𑀲𑀦𑀁 𑀯𑀸 𑀅𑀦𑁆𑀢𑀧𑀤𑀮𑁄𑀧𑁂𑀦 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀬𑀣𑀸 ‘‘𑀭𑀽𑀧𑀪𑀯𑁄 𑀭𑀽𑀧’’𑀦𑁆𑀢𑀺, 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀓𑀸𑀭𑀡𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀓𑀸𑀭𑀡𑀫𑀦𑁆𑀢𑀭𑁂𑀦 𑀬𑀤𑀺𑀘𑁆𑀙𑀓𑀁 𑀲𑀫𑀼𑀧𑁆𑀧𑀦𑁆𑀦𑀁.

𑁬𑁮-𑁭𑁩. 𑀅𑀲𑀜𑁆𑀜𑀲𑀢𑁆𑀢𑀸𑀢𑀺 𑀏𑀢𑁆𑀣 𑀏𑀢𑀁 𑀅𑀲𑀜𑁆𑀜𑀸𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀤𑁂𑀲𑀦𑀸𑀲𑀻𑀲𑀦𑁆𑀢𑀺 𑀤𑁂𑀲𑀦𑀸𑀬 𑀚𑁂𑀝𑁆𑀞𑀓𑀁 𑀧𑀥𑀸𑀦𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸, 𑀢𑁂𑀦 𑀲𑀜𑁆𑀜𑀁 𑀥𑀼𑀭𑀁 𑀓𑀢𑁆𑀯𑀸 𑀪𑀕𑀯𑀢𑀸 𑀅𑀬𑀁 𑀤𑁂𑀲𑀦𑀸 𑀓𑀢𑀸, 𑀦 𑀧𑀦 𑀢𑀢𑁆𑀣 𑀅𑀜𑁆𑀜𑁂𑀲𑀁 𑀅𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀅𑀢𑁆𑀣𑀺𑀢𑀸𑀬𑀸𑀢𑀺 𑀤𑀲𑁆𑀲𑁂𑀢𑀺, 𑀢𑁂𑀦𑁂𑀯𑀸𑀳 ‘‘𑀅𑀘𑀺𑀢𑁆𑀢𑀼𑀧𑁆𑀧𑀸𑀤𑀸’’𑀢𑀺𑀆𑀤𑀺. 𑀪𑀕𑀯𑀸 𑀳𑀺 𑀬𑀣𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀲𑀫𑀸𑀥𑀺𑀁, 𑀧𑀜𑁆𑀜𑀁 𑀯𑀸 𑀥𑀼𑀭𑀁 𑀓𑀢𑁆𑀯𑀸 𑀤𑁂𑀲𑁂𑀢𑀺, 𑀏𑀯𑀁 𑀮𑁄𑀓𑀺𑀬𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀘𑀺𑀢𑁆𑀢𑀁, 𑀲𑀜𑁆𑀜𑀁 𑀯𑀸. 𑀢𑀢𑁆𑀣 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀮𑁄𑀓𑀼𑀢𑁆𑀢𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺 (𑀥. 𑀲. 𑁨𑁭𑁭), 𑀧𑀜𑁆𑀘𑀗𑁆𑀕𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀺 (𑀤𑀻. 𑀦𑀺. 𑁩.𑁩𑁫𑁫) 𑀧𑀜𑁆𑀘𑀜𑀸𑀡𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀺, (𑀤𑀻. 𑀦𑀺. 𑁩.𑁩𑁫𑁫; 𑀯𑀺𑀪. 𑁮𑁦𑁪) 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻’’𑀢𑀺, 𑀢𑀣𑀸 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, (𑀥. 𑀲. 𑁧) 𑀓𑀺𑀁 𑀘𑀺𑀢𑁆𑀢𑁄 𑀢𑁆𑀯𑀁 𑀪𑀺𑀓𑁆𑀔𑀼 (𑀧𑀸𑀭𑀸. 𑁧𑁪𑁬, 𑁧𑁮𑁦) 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, (𑀥. 𑀧. 𑁧; 𑀦𑁂𑀢𑁆𑀢𑀺. 𑁯𑁦; 𑀧𑁂𑀝𑀓𑁄. 𑁮𑁩, 𑁮𑁪) 𑀲𑀦𑁆𑀢𑀺 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 ¶ 𑀦𑀸𑀦𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄, (𑀤𑀻. 𑀦𑀺. 𑁩.𑁩𑁩𑁨, 𑁩𑁪𑁧, 𑁩𑁫𑁭; 𑀅. 𑀦𑀺. 𑁭.𑁪𑁪; 𑀅. 𑀦𑀺. 𑁯.𑁨𑁪; 𑀘𑀽𑀴𑀦𑀺. 𑁮𑁩) 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦’’𑀦𑁆𑀢𑀺 (𑀤𑀻. 𑀦𑀺. 𑁩.𑁩𑁫𑁮) 𑀘 𑀏𑀯𑀫𑀸𑀤𑀻𑀦𑀺 𑀲𑀼𑀢𑁆𑀢𑀸𑀦𑀺 𑀏𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀸𑀦𑀺. 𑀢𑀺𑀢𑁆𑀣𑀁 𑀯𑀼𑀘𑁆𑀘𑀢𑀺 𑀫𑀺𑀘𑁆𑀙𑀸𑀮𑀤𑁆𑀥𑀺 𑀢𑀢𑁆𑀣𑁂𑀯 𑀩𑀸𑀳𑀼𑀮𑁆𑀮𑁂𑀦 𑀧𑀭𑀺𑀩𑁆𑀪𑀫𑀦𑀢𑁄 𑀢𑀭𑀦𑁆𑀢𑀺 𑀩𑀸𑀮𑀸 𑀏𑀢𑁆𑀣𑀸𑀢𑀺 𑀓𑀢𑁆𑀯𑀸, 𑀢𑀤𑁂𑀯 𑀅𑀦𑀧𑁆𑀧𑀓𑀸𑀦𑀫𑀦𑀢𑁆𑀣𑀸𑀦𑀁 𑀢𑀺𑀢𑁆𑀣𑀺𑀬𑀸𑀦𑀜𑁆𑀘 𑀲𑀜𑁆𑀚𑀸𑀢𑀺𑀤𑁂𑀲𑀝𑁆𑀞𑁂𑀦, 𑀦𑀺𑀯𑀸𑀲𑀝𑁆𑀞𑁂𑀦 𑀯𑀸 𑀆𑀬𑀢𑀦𑀦𑁆𑀢𑀺 𑀢𑀺𑀢𑁆𑀣𑀸𑀬𑀢𑀦𑀁, 𑀢𑀲𑁆𑀫𑀺𑀁, 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀫𑀬𑁂𑀢𑀺 𑀅𑀢𑁆𑀣𑁄. 𑀢𑀺𑀢𑁆𑀣𑀺𑀬𑀸 𑀳𑀺 𑀉𑀧𑀧𑀢𑁆𑀢𑀺𑀯𑀺𑀲𑁂𑀲𑁂 𑀯𑀺𑀫𑀼𑀢𑁆𑀢𑀺𑀲𑀜𑁆𑀜𑀺𑀦𑁄, 𑀲𑀜𑁆𑀜𑀸𑀯𑀺𑀭𑀸𑀕𑀸𑀯𑀺𑀭𑀸𑀕𑁂𑀲𑀼 𑀆𑀤𑀻𑀦𑀯𑀸𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀦𑁄 𑀘 𑀳𑀼𑀢𑁆𑀯𑀸 𑀅𑀲𑀜𑁆𑀜𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀓𑁆𑀔𑀡𑀪𑀽𑀫𑀺𑀬𑀁 𑀉𑀧𑀧𑀚𑁆𑀚𑀦𑁆𑀢𑀺, 𑀦 𑀲𑀸𑀲𑀦𑀺𑀓𑀸, 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀓𑀘𑁆𑀘𑁄 𑀢𑀺𑀢𑁆𑀣𑀸𑀬𑀢𑀦𑁂 𑀧𑀩𑁆𑀩𑀚𑀺𑀢𑁆𑀯𑀸’’𑀢𑀺. 𑀯𑀸𑀬𑁄𑀓𑀲𑀺𑀡𑁂 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 𑀘𑀢𑀼𑀢𑁆𑀣𑁂 𑀪𑀽𑀢𑀓𑀲𑀺𑀡𑁂 𑀧𑀞𑀫𑀸𑀤𑀻𑀦𑀺 𑀢𑀻𑀡𑀺 𑀛𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀢𑀺𑀬𑀚𑁆𑀛𑀸𑀦𑁂 𑀘𑀺𑀡𑁆𑀡𑀯𑀲𑀻 𑀳𑀼𑀢𑁆𑀯𑀸 𑀢𑀢𑁄 𑀯𑀼𑀝𑁆𑀞𑀸𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀥𑀺𑀕𑀫𑀸𑀬 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸, 𑀢𑁂𑀦𑁂𑀯𑀸𑀳 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸’’𑀢𑀺.

𑀓𑀲𑁆𑀫𑀸 ¶ 𑀧𑀦𑁂𑀢𑁆𑀣 𑀯𑀸𑀬𑁄𑀓𑀲𑀺𑀡𑁂𑀬𑁂𑀯 𑀧𑀭𑀺𑀓𑀫𑁆𑀫𑀁 𑀯𑀼𑀢𑁆𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀬𑀣𑁂𑀯 𑀳𑀺 𑀭𑀽𑀧𑀧𑀝𑀺𑀪𑀸𑀕𑀪𑀽𑀢𑁂𑀲𑀼 𑀓𑀲𑀺𑀡𑀯𑀺𑀲𑁂𑀲𑁂𑀲𑀼 𑀭𑀽𑀧𑀯𑀺𑀪𑀸𑀯𑀦𑁂𑀦 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀲𑀗𑁆𑀔𑀸𑀢𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀯𑀺𑀲𑁂𑀲𑁄 𑀲𑀘𑁆𑀙𑀺𑀓𑀭𑀻𑀬𑀢𑀺, 𑀏𑀯𑀁 𑀅𑀧𑀭𑀺𑀩𑁆𑀬𑀢𑁆𑀢𑀯𑀺𑀕𑁆𑀕𑀳𑀢𑀸𑀬 𑀅𑀭𑀽𑀧𑀧𑀝𑀺𑀪𑀸𑀕𑀪𑀽𑀢𑁂 𑀓𑀲𑀺𑀡𑀯𑀺𑀲𑁂𑀲𑁂 𑀅𑀭𑀽𑀧𑀯𑀺𑀪𑀸𑀯𑀦𑁂𑀦 𑀅𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀲𑀗𑁆𑀔𑀸𑀢𑁄 𑀭𑀽𑀧𑀲𑀫𑀸𑀧𑀢𑁆𑀢𑀺𑀯𑀺𑀲𑁂𑀲𑁄 𑀅𑀥𑀺𑀕𑀫𑀻𑀬𑀢𑀺, 𑀢𑀲𑁆𑀫𑀸 𑀏𑀢𑁆𑀣 ‘‘𑀲𑀜𑁆𑀜𑀸 𑀭𑁄𑀕𑁄 𑀲𑀜𑁆𑀜𑀸 𑀕𑀡𑁆𑀟𑁄’’𑀢𑀺𑀆𑀤𑀺𑀦𑀸, (𑀫. 𑀦𑀺. 𑁩.𑁨𑁪) ‘‘𑀥𑀺 𑀘𑀺𑀢𑁆𑀢𑀁, 𑀥𑀺𑀩𑁆𑀩𑀢𑁂 𑀢𑀁 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑀝𑀻. 𑁧.𑁬𑁮-𑁭𑁩) 𑀘 𑀦𑀬𑁂𑀦 𑀅𑀭𑀽𑀧𑀧𑀯𑀢𑁆𑀢𑀺𑀬𑀸 𑀆𑀤𑀻𑀦𑀯𑀤𑀲𑁆𑀲𑀦𑁂𑀦, 𑀢𑀤𑀪𑀸𑀯𑁂 𑀘 𑀲𑀦𑁆𑀢𑀧𑀡𑀻𑀢𑀪𑀸𑀯𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀸 𑀅𑀪𑀺𑀲𑀗𑁆𑀔𑀭𑀡𑀁, 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸 𑀧𑀦 𑀲𑀤𑁆𑀥𑀺𑀁 𑀉𑀧𑀘𑀸𑀭𑁂𑀦 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀯𑀺𑀲𑁂𑀲𑁂𑀦 𑀧𑀞𑀫𑀸𑀭𑀼𑀧𑁆𑀧𑀚𑁆𑀛𑀸𑀦𑀁. 𑀬𑀤𑀺 𑀏𑀯𑀁 ‘‘𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑀓𑀲𑀺𑀡𑁂𑀧𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀢𑀲𑁆𑀲𑀸𑀧𑀺 𑀳𑀺 𑀅𑀭𑀽𑀧𑀧𑀝𑀺𑀪𑀸𑀕𑀢𑀸 𑀮𑀩𑁆𑀪𑀢𑀻𑀢𑀺? 𑀯𑀢𑁆𑀢𑀩𑁆𑀩𑀫𑁂𑀯𑁂𑀢𑀁 𑀓𑁂𑀲𑀜𑁆𑀘𑀺, 𑀅𑀯𑀘𑀦𑀁 𑀧𑀦 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀅𑀕𑁆𑀕𑀳𑀺𑀢𑀪𑀸𑀯𑁂𑀦. 𑀬𑀣𑀸 𑀳𑀺 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸 𑀯𑀺𑀭𑀚𑁆𑀚𑀦𑀻𑀬𑀥𑀫𑁆𑀫𑀪𑀸𑀯𑀫𑀢𑁆𑀢𑁂 𑀧𑀭𑀺𑀦𑀺𑀩𑁆𑀩𑀺𑀦𑁆𑀤𑀸 (𑀯𑀺𑀭𑀚𑁆𑀚𑀦𑀻𑀬𑀥𑀫𑁆𑀫 𑀪𑀸𑀯𑀫𑀢𑁆𑀢𑁂𑀦 𑀧𑀭𑀺𑀦𑀺𑀧𑁆𑀨𑀦𑁆𑀦𑀸 𑀤𑀻. 𑀦𑀺. 𑀝𑀻. 𑁧.𑁬-𑁭𑁩) 𑀯𑀺𑀭𑀚𑁆𑀚𑀦𑀻𑀬𑀥𑀫𑁆𑀫𑀧𑀝𑀺𑀪𑀸𑀕𑀪𑀽𑀢𑁂 𑀘 𑀯𑀺𑀲𑀬𑀯𑀺𑀲𑁂𑀲𑁂 𑀧𑀸𑀢𑀼𑀪𑀯𑀢𑀺, 𑀏𑀯𑀁 𑀅𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀧𑀻𑀢𑀺 𑀯𑀼𑀘𑁆𑀘𑀫𑀸𑀦𑁂 𑀦 𑀓𑁄𑀘𑀺 𑀯𑀺𑀭𑁄𑀥𑁄. 𑀢𑀺𑀢𑁆𑀣𑀺𑀬𑁂𑀳𑁂𑀯 𑀧𑀦 𑀢𑀲𑁆𑀲𑀸 𑀲𑀫𑀸𑀧𑀢𑁆𑀢𑀺𑀬𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑀸𑀬, 𑀢𑁂𑀲𑀜𑁆𑀘 𑀯𑀺𑀲𑀬𑀧𑀤𑁂𑀲𑀦𑀺𑀫𑀺𑀢𑁆𑀢𑀲𑁆𑀲𑁂𑀯 𑀢𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀢𑁆𑀢𑀺𑀢𑁄 𑀢𑀁 𑀓𑀸𑀭𑀡𑀁 𑀧𑀲𑁆𑀲𑀦𑁆𑀢𑁂𑀳𑀺 ¶ 𑀧𑀼𑀩𑁆𑀩𑀸𑀘𑀭𑀺𑀬𑁂𑀳𑀺 𑀘𑀢𑀼𑀢𑁆𑀣𑁂𑀬𑁂𑀯 𑀪𑀽𑀢𑀓𑀲𑀺𑀡𑁂 𑀅𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀧𑀭𑀺𑀓𑀫𑁆𑀫𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀯𑀡𑁆𑀡𑀓𑀲𑀺𑀡𑁂𑀲𑀼 𑀯𑀺𑀬 𑀧𑀼𑀭𑀺𑀫𑀪𑀽𑀢𑀓𑀲𑀺𑀡𑀢𑁆𑀢𑀬𑁂𑀧𑀺 𑀯𑀡𑁆𑀡𑀧𑀝𑀺𑀘𑁆𑀙𑀸𑀬𑀸𑀯 𑀧𑀡𑁆𑀡𑀢𑁆𑀢𑀺𑀆𑀭𑀫𑁆𑀫𑀡𑀁 𑀛𑀸𑀦𑀲𑁆𑀲 𑀮𑁄𑀓𑀯𑁄𑀳𑀸𑀭𑀸𑀦𑀼𑀭𑁄𑀥𑁂𑀦𑁂𑀯 𑀧𑀯𑀢𑁆𑀢𑀺𑀢𑁄, 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁯𑁬) 𑀧𑀣𑀯𑀻𑀓𑀲𑀺𑀡𑀲𑁆𑀲 𑀆𑀤𑀸𑀲𑀘𑀦𑁆𑀤𑀫𑀡𑁆𑀟𑀮𑀽𑀧𑀫𑀸𑀯𑀘𑀦𑀜𑁆𑀘 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀘𑀢𑀼𑀢𑁆𑀣𑁂 𑀧𑀦 𑀪𑀽𑀢𑀓𑀲𑀺𑀡𑁂 𑀪𑀽𑀢𑀧𑀝𑀺𑀘𑁆𑀙𑀸𑀬𑀸 𑀏𑀯 𑀛𑀸𑀦𑀲𑁆𑀲 𑀕𑁄𑀘𑀭𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀢𑀲𑁆𑀲𑁂𑀯 𑀅𑀭𑀽𑀧𑀧𑀝𑀺𑀪𑀸𑀕𑀢𑀸 𑀬𑀼𑀢𑁆𑀢𑀸, 𑀢𑀲𑁆𑀫𑀸 𑀯𑀸𑀬𑁄𑀓𑀲𑀺𑀡𑁂𑀬𑁂𑀯 𑀧𑀭𑀺𑀓𑀫𑁆𑀫𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀣𑀁 𑀧𑀲𑁆𑀲𑀢𑀻𑀢𑀺 𑀆𑀳 ‘‘𑀘𑀺𑀢𑁆𑀢𑁂 𑀲𑀢𑀻’’𑀢𑀺𑀆𑀤𑀺. 𑀲𑀦𑁆𑀢𑁄𑀢𑀺 𑀦𑀺𑀩𑁆𑀩𑀼𑀢𑁄, 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀫𑁂𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀮𑀁 𑀓𑀢𑁆𑀯𑀸𑀢𑀺 𑀫𑀭𑀡𑀁 𑀓𑀢𑁆𑀯𑀸, 𑀬𑁄 𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀚𑀻𑀯𑀦𑀓𑀸𑀮𑁄 𑀉𑀧𑀢𑁆𑀣𑀫𑁆𑀪𑀓𑀧𑀘𑁆𑀘𑀬𑁂𑀳𑀺 𑀓𑀭𑀻𑀬𑀢𑀺, 𑀢𑀁 𑀓𑀭𑀺𑀢𑁆𑀯𑀸𑀢𑀺𑀧𑀺 𑀅𑀢𑁆𑀣𑁄. 𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀅𑀲𑀜𑁆𑀜𑀲𑀢𑁆𑀢𑀲𑀗𑁆𑀔𑀸𑀢𑁂 𑀲𑀢𑁆𑀢𑀦𑀺𑀓𑀸𑀬𑁂 𑀭𑀽𑀧𑀧𑀝𑀺𑀲𑀦𑁆𑀥𑀺𑀯𑀲𑁂𑀦𑁂𑀯 𑀉𑀧𑀧𑀚𑁆𑀚𑀢𑀺, 𑀅𑀜𑁆𑀜𑁂𑀲𑀼 𑀯𑀸 𑀘𑀓𑁆𑀓𑀯𑀸𑀴𑁂𑀲𑀼 𑀢𑀲𑁆𑀲𑀸 𑀪𑀽𑀫𑀺𑀬𑀸 𑀅𑀢𑁆𑀣𑀺𑀢𑀸𑀬 𑀅𑀦𑁂𑀓𑀯𑀺𑀥𑀪𑀸𑀯𑀁 𑀲𑀦𑁆𑀥𑀸𑀬 𑀧𑀼𑀣𑀼𑀯𑀘𑀦𑀦𑀺𑀤𑁆𑀤𑁂𑀲𑁄𑀢𑀺𑀧𑀺 𑀤𑀝𑁆𑀞𑀩𑁆𑀩𑀁. 𑀇𑀥𑁂𑀯𑀸𑀢𑀺 𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀬𑁂𑀯. 𑀢𑀢𑁆𑀣𑀸𑀢𑀺 𑀅𑀲𑀜𑁆𑀜𑀻𑀪𑀯𑁂. 𑀬𑀤𑀺 𑀭𑀽𑀧𑀓𑁆𑀔𑀦𑁆𑀥𑀫𑀢𑁆𑀢𑀫𑁂𑀯 𑀅𑀲𑀜𑁆𑀜𑀻𑀪𑀯𑁂 𑀧𑀸𑀢𑀼𑀪𑀯𑀢𑀺, 𑀓𑀣𑀁 𑀅𑀭𑀽𑀧𑀲𑀦𑁆𑀦𑀺𑀲𑁆𑀲𑀬𑁂𑀦 𑀯𑀺𑀦𑀸 𑀢𑀢𑁆𑀣 𑀭𑀽𑀧𑀁 𑀧𑀯𑀢𑁆𑀢𑀢𑀺, 𑀦𑀦𑀼 𑀲𑀺𑀬𑀸 𑀅𑀭𑀽𑀧𑀲𑀦𑁆𑀦𑀺𑀲𑁆𑀲𑀺𑀢𑀸𑀬𑁂𑀯 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀧𑁆𑀧𑀢𑁆𑀢𑀺 𑀇𑀥𑁂𑀯 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀢𑀣𑀸 𑀉𑀧𑁆𑀧𑀢𑁆𑀢𑀺𑀬𑀸 𑀅𑀤𑀲𑁆𑀲𑀦𑀢𑁄𑀢𑀺 ¶ ? 𑀦𑀸𑀬𑀫𑀦𑀼𑀬𑁄𑀕𑁄 𑀅𑀜𑁆𑀜𑀢𑁆𑀣𑀸𑀧𑀺 𑀅𑀧𑁆𑀧𑀯𑀺𑀝𑁆𑀞𑁄, 𑀓𑀣𑀁 𑀧𑀦 𑀭𑀽𑀧𑀲𑀦𑁆𑀦𑀺𑀲𑁆𑀲𑀬𑁂𑀦 𑀯𑀺𑀦𑀸 𑀅𑀭𑀽𑀧𑀥𑀸𑀢𑀼𑀬𑀸 𑀅𑀭𑀽𑀧𑀁 𑀧𑀯𑀢𑁆𑀢𑀢𑀻𑀢𑀺. 𑀇𑀤𑀫𑁆𑀧𑀺 𑀳𑀺 𑀢𑁂𑀦 𑀲𑀫𑀸𑀦𑀚𑀸𑀢𑀺𑀬𑀫𑁂𑀯. 𑀓𑀲𑁆𑀫𑀸? 𑀇𑀥𑁂𑀯 𑀅𑀤𑀲𑁆𑀲𑀦𑀢𑁄, 𑀓𑀣𑀜𑁆𑀘 𑀓𑀩𑀴𑀻𑀓𑀸𑀭𑀸𑀳𑀸𑀭𑁂𑀦 𑀯𑀺𑀦𑀸 𑀭𑀽𑀧𑀥𑀸𑀢𑀼𑀬𑀸 𑀭𑀽𑀧𑀁 𑀧𑀯𑀢𑁆𑀢𑀢𑀻𑀢𑀺. 𑀇𑀤𑀫𑁆𑀧𑀺 𑀘 𑀢𑀁𑀲𑀪𑀸𑀯𑀫𑁂𑀯, 𑀓𑀺𑀁 𑀓𑀸𑀭𑀡𑀸? 𑀇𑀥 𑀅𑀤𑀲𑁆𑀲𑀦𑀢𑁄𑀬𑁂𑀯. 𑀇𑀢𑀺 𑀅𑀜𑁆𑀜𑀢𑁆𑀣𑀸𑀧𑀺 𑀢𑀣𑀸 𑀧𑀯𑀢𑁆𑀢𑀺𑀤𑀲𑁆𑀲𑀦𑀢𑁄, 𑀓𑀺𑀫𑁂𑀢𑁂𑀦 𑀅𑀜𑁆𑀜𑀦𑀺𑀤𑀲𑁆𑀲𑀦𑁂𑀦 𑀇𑀥𑁂𑀯 𑀅𑀦𑀼𑀬𑁄𑀕𑁂𑀦. 𑀅𑀧𑀺𑀘 𑀬𑀣𑀸 𑀬𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀓𑀸𑀭𑀡𑀁 𑀭𑀽𑀧𑁂 𑀅𑀯𑀺𑀕𑀢𑀢𑀡𑁆𑀳𑀁, 𑀢𑀲𑁆𑀲 𑀲𑀳 𑀭𑀽𑀧𑁂𑀦 𑀲𑀫𑁆𑀪𑀯𑀢𑁄 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀺 𑀭𑀽𑀧𑀲𑀸𑀧𑁂𑀓𑁆𑀔𑀢𑀸𑀬 𑀓𑀸𑀭𑀡𑀲𑁆𑀲. 𑀬𑀲𑁆𑀲 𑀧𑀦 𑀦𑀺𑀩𑁆𑀩𑀢𑁆𑀢𑀺𑀓𑀸𑀭𑀡𑀁 𑀭𑀽𑀧𑁂 𑀯𑀺𑀕𑀢𑀢𑀡𑁆𑀳𑀁, 𑀢𑀲𑁆𑀲 𑀯𑀺𑀦𑀸 𑀭𑀽𑀧𑁂𑀦 𑀧𑀯𑀢𑁆𑀢𑀺 𑀭𑀽𑀧𑀦𑀺𑀭𑀧𑁂𑀓𑁆𑀔𑀢𑀸𑀬 𑀓𑀸𑀭𑀡𑀲𑁆𑀲, 𑀏𑀯𑀁 𑀬𑀲𑁆𑀲 𑀭𑀽𑀧𑀧𑁆𑀧𑀩𑀦𑁆𑀥𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀓𑀸𑀭𑀡𑀁 𑀅𑀭𑀽𑀧𑁂 𑀯𑀺𑀕𑀢𑀢𑀡𑁆𑀳𑀁, 𑀢𑀲𑁆𑀲 𑀯𑀺𑀦𑀸 𑀅𑀭𑀽𑀧𑁂𑀦 𑀧𑀯𑀢𑁆𑀢𑀺 𑀅𑀭𑀽𑀧𑀦𑀺𑀭𑀧𑁂𑀓𑁆𑀔𑀢𑀸𑀬 𑀓𑀸𑀭𑀡𑀲𑁆𑀲, 𑀏𑀯𑀁 𑀪𑀸𑀯𑀦𑀸𑀩𑀮𑀸𑀪𑀸𑀯𑀢𑁄 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀭𑀽𑀧𑀸𑀭𑀽𑀧𑀲𑀫𑁆𑀪𑀯𑁄 𑀯𑀺𑀬, 𑀪𑀸𑀯𑀦𑀸𑀩𑀮𑁂𑀦 𑀘𑀢𑀼𑀯𑁄𑀓𑀸𑀭𑀪𑀯𑁂 𑀅𑀭𑀽𑀧𑀲𑁆𑀲𑁂𑀯 ¶ 𑀲𑀫𑁆𑀪𑀯𑁄 𑀯𑀺𑀬 𑀘. 𑀅𑀲𑀜𑁆𑀜𑀻𑀪𑀯𑁂𑀧𑀺 𑀪𑀸𑀯𑀦𑀸𑀩𑀮𑁂𑀦 𑀭𑀽𑀧𑀲𑁆𑀲𑁂𑀯 𑀲𑀫𑁆𑀪𑀯𑁄 𑀤𑀝𑁆𑀞𑀩𑁆𑀩𑁄𑀢𑀺.

𑀓𑀣𑀁 𑀧𑀦 𑀢𑀢𑁆𑀣 𑀓𑁂𑀯𑀮𑁄 𑀭𑀽𑀧𑀧𑁆𑀧𑀩𑀦𑁆𑀥𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀭𑀳𑀺𑀢𑁄 𑀘𑀺𑀭𑀓𑀸𑀮𑀁 𑀧𑀯𑀢𑁆𑀢𑀢𑀻𑀢𑀺 𑀧𑀘𑁆𑀘𑁂𑀢𑀩𑁆𑀩𑀁, 𑀓𑀺𑀢𑁆𑀢𑀓𑀁 𑀯𑀸 𑀓𑀸𑀮𑀁 𑀧𑀯𑀢𑁆𑀢𑀢𑀻𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 ‘‘𑀬𑀣𑀸 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀦 𑀓𑁂𑀯𑀮𑀁 𑀇𑀥 𑀘𑁂𑀯 𑀅𑀜𑁆𑀜𑀢𑁆𑀣 𑀘 𑀯𑀼𑀢𑁆𑀢𑁄 𑀆𑀕𑀫𑁄𑀬𑁂𑀯 𑀏𑀢𑀤𑀢𑁆𑀣𑀜𑀸𑀧𑀦𑁂, 𑀅𑀣 𑀔𑁄 𑀅𑀬𑀁 𑀧𑀦𑁂𑀢𑁆𑀣 𑀬𑀼𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀚𑀺𑀬𑀸𑀯𑁂𑀕𑀼𑀓𑁆𑀔𑀺𑀢𑁆𑀢𑁄𑀢𑀺 𑀥𑀦𑀼𑀚𑀺𑀬𑀸𑀬 𑀯𑁂𑀕𑁂𑀦 𑀔𑀺𑀧𑀺𑀢𑁄. 𑀛𑀸𑀦𑀯𑁂𑀕𑁄 𑀦𑀸𑀫 𑀛𑀸𑀦𑀸𑀦𑀼𑀪𑀸𑀯𑁄 𑀨𑀮𑀤𑀸𑀦𑁂 𑀲𑀫𑀢𑁆𑀣𑀢𑀸. 𑀢𑀢𑁆𑀢𑀓𑀫𑁂𑀯 𑀓𑀸𑀮𑀦𑁆𑀢𑀺 𑀉𑀓𑁆𑀓𑀁𑀲𑀢𑁄 𑀧𑀜𑁆𑀘 𑀫𑀳𑀸𑀓𑀧𑁆𑀧𑀲𑀢𑀸𑀦𑀺. 𑀢𑀺𑀝𑁆𑀞𑀦𑁆𑀢𑀻𑀢𑀺 𑀬𑀣𑀸𑀦𑀺𑀩𑁆𑀩𑀢𑁆𑀢𑀇𑀭𑀺𑀬𑀸𑀧𑀣𑀫𑁂𑀯 𑀘𑀺𑀢𑁆𑀢𑀓𑀫𑁆𑀫𑀭𑀽𑀧𑀓𑀲𑀤𑀺𑀲𑀸 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀛𑀸𑀦𑀯𑁂𑀕𑁂𑀢𑀺 𑀅𑀲𑀜𑁆𑀜𑀲𑀫𑀸𑀧𑀢𑁆𑀢𑀺𑀧𑀭𑀺𑀓𑁆𑀔𑀺𑀢𑁆𑀢𑁂 𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑀫𑁆𑀫𑀯𑁂𑀕𑁂, 𑀧𑀜𑁆𑀘𑀫𑀚𑁆𑀛𑀸𑀦𑀓𑀫𑁆𑀫𑀯𑁂𑀕𑁂 𑀯𑀸. 𑀅𑀦𑁆𑀢𑀭𑀥𑀸𑀬𑀢𑀻𑀢𑀺 𑀧𑀘𑁆𑀘𑀬𑀦𑀺𑀭𑁄𑀥𑁂𑀦 𑀦𑀺𑀭𑀼𑀚𑁆𑀛𑀢𑀺 𑀦 𑀧𑀯𑀢𑁆𑀢𑀢𑀺. 𑀇𑀥𑀸𑀢𑀺 𑀓𑀸𑀫𑀸𑀯𑀘𑀭𑀪𑀯𑁂𑀢𑀺 𑀅𑀢𑁆𑀣𑁄 𑀅𑀜𑁆𑀜𑀢𑁆𑀣 𑀢𑁂𑀲𑀫𑀦𑀼𑀧𑁆𑀧𑀢𑁆𑀢𑀺𑀢𑁄. 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀬𑁂𑀯 𑀲𑀜𑁆𑀜𑀸𑀲𑀻𑀲𑁂𑀦 𑀯𑀼𑀢𑁆𑀢𑁄. 𑀓𑀣𑀁 𑀧𑀦 𑀅𑀦𑁂𑀓𑀓𑀧𑁆𑀧𑀲𑀢𑀫𑀢𑀺𑀓𑁆𑀓𑀫𑁂𑀦 𑀘𑀺𑀭𑀦𑀺𑀭𑀼𑀤𑁆𑀥𑀢𑁄 𑀯𑀺𑀜𑁆𑀜𑀸𑀡𑀢𑁄 𑀇𑀥 𑀯𑀺𑀜𑁆𑀜𑀸𑀡𑀫𑀼𑀧𑁆𑀧𑀚𑁆𑀚𑀢𑀺. 𑀦 𑀳𑀺 𑀦𑀺𑀭𑀼𑀤𑁆𑀥𑁂 𑀘𑀓𑁆𑀔𑀼𑀧𑀲𑀸𑀤𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀫𑀼𑀧𑁆𑀧𑀚𑁆𑀚𑀫𑀸𑀦𑀁 𑀤𑀺𑀝𑁆𑀞𑀦𑁆𑀢𑀺? 𑀦𑀬𑀺𑀤𑀫𑁂𑀓𑀦𑁆𑀢𑀢𑁄 𑀤𑀝𑁆𑀞𑀩𑁆𑀩𑀁. 𑀦𑀺𑀭𑀼𑀤𑁆𑀥𑀫𑁆𑀧𑀺 𑀳𑀺 𑀘𑀺𑀢𑁆𑀢𑀁 𑀲𑀫𑀸𑀦𑀚𑀸𑀢𑀺𑀓𑀲𑁆𑀲 𑀅𑀦𑁆𑀢𑀭𑀸 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀲𑀫𑀦𑀦𑁆𑀢𑀭𑀧𑀘𑁆𑀘𑀬𑀫𑀢𑁆𑀢𑀁 𑀳𑁄𑀢𑀺𑀬𑁂𑀯, 𑀦 𑀩𑀻𑀚𑀁. 𑀩𑀻𑀚𑀁 𑀧𑀦 𑀓𑀫𑁆𑀫𑀫𑁂𑀯, 𑀢𑀲𑁆𑀫𑀸 𑀓𑀫𑁆𑀫𑀢𑁄 𑀩𑀻𑀚𑀪𑀽𑀢𑀢𑁄 𑀆𑀭𑀫𑁆𑀫𑀡𑀸𑀤𑀻𑀳𑀺 𑀧𑀘𑁆𑀘𑀬𑁂𑀳𑀺 𑀅𑀲𑀜𑁆𑀜𑀻𑀪𑀯𑀢𑁄 𑀘𑀼𑀢𑀸𑀦𑀁 𑀓𑀸𑀫𑀥𑀸𑀢𑀼𑀬𑀸 𑀉𑀧𑀧𑀢𑁆𑀢𑀺𑀯𑀺𑀜𑁆𑀜𑀸𑀡𑀁 𑀳𑁄𑀢𑀺𑀬𑁂𑀯, 𑀢𑁂𑀦𑀸𑀳 ‘‘𑀇𑀥 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀏𑀢𑁆𑀣 𑀘 𑀬𑀣𑀸 𑀦𑀸𑀫 𑀉𑀢𑀼𑀦𑀺𑀬𑀸𑀫𑁂𑀦 𑀧𑀼𑀧𑁆𑀨𑀕𑁆𑀕𑀳𑀡𑁂 𑀦𑀺𑀬𑀢𑀓𑀸𑀮𑀸𑀦𑀁 𑀭𑀼𑀓𑁆𑀔𑀸𑀦𑀁 𑀯𑀺𑀤𑀸𑀭𑀡𑀲𑀗𑁆𑀔𑀸𑀢𑁂 𑀯𑁂𑀔𑁂 𑀤𑀺𑀦𑁆𑀦𑁂 𑀯𑁂𑀔𑀩𑀮𑁂𑀦 𑀅𑀦𑀺𑀬𑀫𑀢𑀸 𑀳𑁄𑀢𑀺 𑀧𑀼𑀧𑁆𑀨𑀕𑁆𑀕𑀳𑀡𑀲𑁆𑀲, 𑀏𑀯𑀫𑁂𑀯 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀅𑀯𑀺𑀧𑁆𑀧𑀬𑁄𑀕𑁂𑀦 𑀯𑀢𑁆𑀢𑀫𑀸𑀦𑁂𑀲𑀼 𑀭𑀽𑀧𑀸𑀭𑀽𑀧𑀥𑀫𑁆𑀫𑁂𑀲𑀼 𑀭𑀽𑀧𑀸𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀲𑀗𑁆𑀔𑀸𑀢𑁂 𑀯𑁂𑀔𑁂 𑀤𑀺𑀦𑁆𑀦𑁂 𑀢𑀲𑁆𑀲 𑀲𑀫𑀸𑀧𑀢𑁆𑀢𑀺𑀯𑁂𑀔𑀩𑀮𑀲𑁆𑀲 𑀅𑀦𑀼𑀭𑀽𑀧𑀢𑁄 ¶ 𑀅𑀭𑀽𑀧𑀪𑀯𑁂, 𑀅𑀲𑀜𑁆𑀜𑀪𑀯𑁂 𑀘 𑀬𑀣𑀸𑀓𑁆𑀓𑀫𑀁 𑀭𑀽𑀧𑀭𑀳𑀺𑀢𑀸, 𑀅𑀭𑀽𑀧𑀭𑀳𑀺𑀢𑀸 𑀘 𑀔𑀦𑁆𑀥𑀸𑀦𑀁 𑀧𑀯𑀢𑁆𑀢𑀺 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀧𑀼𑀦 𑀲𑀜𑁆𑀜𑀼𑀧𑁆𑀧𑀸𑀤𑀸 𑀘 𑀧𑀦 ‘‘𑀢𑁂 𑀤𑁂𑀯𑀸 𑀢𑀫𑁆𑀳𑀸 𑀓𑀸𑀬𑀸 𑀘𑀯𑀦𑁆𑀢𑀻’’𑀢𑀺 𑀲𑀜𑁆𑀜𑀼𑀧𑁆𑀧𑀸𑀤𑁄 𑀢𑁂𑀲𑀁 𑀘𑀯𑀦𑀲𑁆𑀲 𑀓𑀸𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑁄, ‘‘𑀲𑀜𑁆𑀜𑀼𑀧𑁆𑀧𑀸𑀤𑀸’’𑀢𑀺 𑀯𑀘𑀦𑀁 𑀯𑀸 𑀓𑀺𑀫𑀢𑁆𑀣𑀤𑀲𑁆𑀲𑀦𑀦𑁆𑀢𑀺 𑀘𑁄𑀤𑀦𑀸𑀬 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀇𑀥 𑀧𑀝𑀺𑀲𑀦𑁆𑀥𑀺𑀲𑀜𑁆𑀜𑀼𑀧𑁆𑀧𑀸𑀤𑁂𑀦 𑀢𑁂𑀲𑀁 𑀘𑀯𑀦𑀲𑁆𑀲 𑀧𑀜𑁆𑀜𑀸𑀬𑀦𑀢𑁄 𑀜𑀸𑀧𑀓𑀳𑁂𑀢𑀼𑀪𑀸𑀯𑁂𑀦 𑀯𑀼𑀢𑁆𑀢𑁄, ‘‘𑀲𑀜𑁆𑀜𑀼𑀧𑁆𑀧𑀸𑀤𑀸’’𑀢𑀺 𑀯𑀘𑀦𑀁 𑀯𑀸 𑀢𑁂𑀲𑀁 𑀘𑀯𑀦𑀲𑁆𑀲 ¶ 𑀧𑀜𑁆𑀜𑀸𑀬𑀦𑀪𑀸𑀯𑀤𑀲𑁆𑀲𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑀜𑁆𑀜𑀼𑀧𑁆𑀧𑀸𑀤𑀸’’𑀢𑀺 𑀳𑀺 𑀏𑀢𑀲𑁆𑀲 𑀲𑀜𑁆𑀜𑀼𑀧𑁆𑀧𑀸𑀤𑁂𑀦 𑀳𑁂𑀢𑀼𑀪𑀽𑀢𑁂𑀦 𑀘𑀯𑀦𑁆𑀢𑀺, 𑀲𑀜𑁆𑀜𑀼𑀧𑁆𑀧𑀸𑀤𑀸 𑀯𑀸 𑀉𑀧𑁆𑀧𑀸𑀤𑀲𑀜𑁆𑀜𑀸 𑀢𑁂 𑀤𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀦𑁆𑀢𑀪𑀸𑀯𑀸𑀬𑀸𑀢𑀺 𑀦𑀺𑀩𑁆𑀩𑀸𑀦𑀸𑀬. 𑀦𑀦𑀼 𑀘𑁂𑀢𑁆𑀣 𑀚𑀸𑀢𑀺𑀲𑀢𑀲𑀳𑀲𑁆𑀲𑀤𑀲𑀲𑀁𑀯𑀝𑁆𑀝𑀸𑀤𑀻𑀦𑀫𑀢𑁆𑀣𑀓𑁂, 𑀢𑀤𑀩𑁆𑀪𑀦𑁆𑀢𑀭𑁂 𑀯𑀸 𑀧𑀯𑀢𑁆𑀢𑀸𑀬 𑀅𑀲𑀜𑁆𑀜𑀽𑀧𑀧𑀢𑁆𑀢𑀺𑀬𑀸 𑀯𑀲𑁂𑀦 𑀮𑀸𑀪𑀻𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀯𑀸𑀤𑁄𑀧𑀺 𑀮𑀸𑀪𑀻𑀲𑀲𑁆𑀲𑀢𑀯𑀸𑀤𑁄 𑀯𑀺𑀬 𑀅𑀦𑁂𑀓𑀪𑁂𑀤𑁄 𑀲𑀫𑁆𑀪𑀯𑀢𑀻𑀢𑀺? 𑀲𑀘𑁆𑀘𑀫𑁂𑀯, 𑀅𑀦𑀦𑁆𑀢𑀭𑀢𑁆𑀢𑀸 𑀧𑀦 𑀆𑀲𑀦𑁆𑀦𑀸𑀬 𑀅𑀲𑀜𑁆𑀜𑀽𑀧𑀧𑀢𑁆𑀢𑀺𑀬𑀸 𑀯𑀲𑁂𑀦 𑀮𑀸𑀪𑀻𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀯𑀸𑀤𑁄 𑀦𑀬𑀤𑀲𑁆𑀲𑀦𑀯𑀲𑁂𑀦 𑀏𑀓𑁄𑀯 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀗𑁆𑀕𑀳𑀢𑁄 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀯𑀸𑀤𑀲𑁆𑀲 𑀲𑀲𑁆𑀲𑀢𑀯𑀸𑀤𑁂 𑀆𑀕𑀢𑁄 𑀲𑀩𑁆𑀩𑁄𑀧𑀺 𑀤𑁂𑀲𑀦𑀸𑀦𑀬𑁄 𑀬𑀣𑀸𑀲𑀫𑁆𑀪𑀯𑀁 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀯𑀸𑀤𑁂𑀧𑀺 𑀕𑀳𑁂𑀢𑀩𑁆𑀩𑁄𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀪𑀕𑀯𑀢𑀸 𑀮𑀸𑀪𑀻𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀯𑀸𑀤𑁄 𑀅𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑁄, 𑀅𑀯𑀲𑁆𑀲𑀜𑁆𑀘𑀲𑁆𑀲 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀗𑁆𑀕𑀳𑁄 𑀇𑀘𑁆𑀙𑀺𑀢𑀩𑁆𑀩𑁄 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀲𑀢𑁆𑀢𑀸𑀦𑀫𑀚𑁆𑀛𑀸𑀲𑀬𑀲𑁆𑀲 𑀲𑀲𑁆𑀲𑀢𑀼𑀘𑁆𑀙𑁂𑀤𑀯𑀲𑁂𑀦𑁂𑀯 𑀤𑀼𑀯𑀺𑀥𑀢𑁆𑀢𑀸, 𑀢𑁂𑀲𑀼 𑀘 𑀉𑀘𑁆𑀙𑁂𑀤𑀧𑁆𑀧𑀲𑀗𑁆𑀕𑀸𑀪𑀸𑀯𑀢𑁄. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀆𑀲𑀬-𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀯𑀼𑀢𑁆𑀢𑀁 ‘‘𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺 𑀘𑀸’’𑀢𑀺, 𑀢𑀣𑀸 𑀘 𑀯𑀓𑁆𑀔𑀢𑀺 ‘‘𑀬𑀸𑀲𑀁 𑀲𑀢𑁆𑀢𑁂𑀯 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄, 𑀲𑁂𑀲𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑁄’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁯𑁭, 𑁯𑁮).

𑀦𑀦𑀼 𑀘 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀯𑀸𑀤𑀲𑁆𑀲 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀗𑁆𑀕𑀳𑁄 𑀦 𑀬𑀼𑀢𑁆𑀢𑁄 ‘‘𑀅𑀳𑀜𑁆𑀳𑀺 𑀧𑀼𑀩𑁆𑀩𑁂 𑀦𑀸𑀳𑁄𑀲𑀺’’𑀦𑁆𑀢𑀺𑀆𑀤𑀺𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀅𑀧𑀼𑀩𑁆𑀩𑀲𑀢𑁆𑀢𑀧𑀸𑀢𑀼𑀪𑀸𑀯𑀕𑀸𑀳𑀓𑀢𑁆𑀢𑀸. 𑀲𑀲𑁆𑀲𑀢𑀤𑀺𑀝𑁆𑀞𑀺 𑀧𑀦 𑀅𑀢𑁆𑀢𑀦𑁄, 𑀮𑁄𑀓𑀲𑁆𑀲 𑀘 𑀲𑀤𑀸𑀪𑀸𑀯𑀕𑀸𑀳𑀺𑀦𑀻 ‘‘𑀅𑀢𑁆𑀣𑀺𑀢𑁆𑀯𑁂𑀯 𑀲𑀲𑁆𑀲𑀢𑀺𑀲𑀫’’𑀦𑁆𑀢𑀺 𑀧𑀯𑀢𑁆𑀢𑀦𑀢𑁄𑀢𑀺? 𑀦𑁄 𑀦 𑀬𑀼𑀢𑁆𑀢𑁄 𑀅𑀦𑀸𑀕𑀢𑀓𑁄𑀝𑀺𑀅𑀤𑀲𑁆𑀲𑀦𑁂𑀦 𑀲𑀲𑁆𑀲𑀢𑀕𑁆𑀕𑀸𑀳𑀲𑀫𑀯𑀭𑁄𑀥𑀢𑁆𑀢𑀸. 𑀬𑀤𑀺𑀧𑀺 𑀳𑀺 𑀅𑀬𑀁 𑀯𑀸𑀤𑁄 ‘‘𑀲𑁄𑀫𑁆𑀳𑀺 𑀏𑀢𑀭𑀳𑀺 𑀅𑀳𑀼𑀢𑁆𑀯𑀸 𑀲𑀦𑁆𑀢𑀢𑀸𑀬 𑀧𑀭𑀺𑀡𑀢𑁄’’𑀢𑀺 (𑀤𑀻. 𑀦𑀺. 𑁧.𑁬𑁮) 𑀅𑀢𑁆𑀢𑀦𑁄, 𑀮𑁄𑀓𑀲𑁆𑀲 𑀘 𑀅𑀢𑀻𑀢𑀓𑁄𑀝𑀺𑀧𑀭𑀸𑀫𑀲𑀦𑀯𑀲𑁂𑀦 𑀧𑀯𑀢𑁆𑀢𑁄, 𑀢𑀣𑀸𑀧𑀺 𑀯𑀢𑁆𑀢𑀫𑀸𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀢𑁂𑀲𑀁 𑀓𑀢𑁆𑀣𑀘𑀺 𑀅𑀦𑀸𑀕𑀢𑁂 𑀧𑀭𑀺𑀬𑀦𑁆𑀢𑀁 𑀧𑀲𑁆𑀲𑀢𑀺, 𑀯𑀺𑀲𑁂𑀲𑁂𑀦 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀓𑀸𑀮𑁂𑀲𑀼 𑀅𑀧𑀭𑀺𑀬𑀦𑁆𑀢𑀤𑀲𑁆𑀲𑀦𑀧𑀪𑀸𑀯𑀺𑀢𑁄 𑀲𑀲𑁆𑀲𑀢𑀯𑀸𑀤𑁄, 𑀬𑀣𑀸𑀳 ‘‘𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀢𑀻’’𑀢𑀺 (𑀤𑀻. 𑀦𑀺. 𑁧.𑁩𑁧 𑀅𑀢𑁆𑀣𑀢𑁄 𑀲𑀫𑀸𑀦𑀁) 𑀬𑀤𑁂𑀯𑀁 𑀲𑀺𑀬𑀸 𑀇𑀫𑀲𑁆𑀲 𑀘 𑀯𑀸𑀤𑀲𑁆𑀲, 𑀲𑀲𑁆𑀲𑀢𑀯𑀸𑀤𑀸𑀤𑀻𑀦𑀜𑁆𑀘 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑁂𑀲𑀼 𑀲𑀗𑁆𑀕𑀳𑁄 𑀦 𑀬𑀼𑀢𑁆𑀢𑁄𑀬𑁂𑀯 𑀅𑀦𑀸𑀕𑀢𑀓𑀸𑀮𑀧𑀭𑀸𑀫𑀲𑀦𑀯𑀲𑁂𑀦 ¶ 𑀧𑀯𑀢𑁆𑀢𑀢𑁆𑀢𑀸𑀢𑀺? 𑀬𑀼𑀢𑁆𑀢𑁄 𑀏𑀯 𑀲𑀫𑀼𑀤𑀸𑀕𑀫𑀲𑁆𑀲 𑀅𑀢𑀻𑀢𑀓𑁄𑀝𑁆𑀞𑀸𑀲𑀺𑀓𑀢𑁆𑀢𑀸. 𑀢𑀣𑀸 𑀳𑀺 𑀦𑁂𑀲𑀁 𑀲𑀫𑀼𑀤𑀸𑀕𑀫𑁄 ¶ 𑀅𑀢𑀻𑀢𑀁𑀲𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀳𑀺, 𑀢𑀧𑁆𑀧𑀢𑀺𑀭𑀽𑀧𑀓𑀸𑀦𑀼𑀲𑁆𑀲𑀯𑀸𑀤𑀺𑀧𑀪𑀸𑀯𑀺𑀢𑁂𑀳𑀺 𑀘 𑀢𑀓𑁆𑀓𑀦𑁂𑀳𑀺 𑀲𑀗𑁆𑀕𑀳𑀺𑀢𑁄𑀢𑀺, 𑀢𑀣𑀸 𑀘𑁂𑀯 𑀲𑀁𑀯𑀡𑁆𑀡𑀺𑀢𑀁. 𑀅𑀣 𑀯𑀸 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑁂𑀦 𑀥𑀫𑁆𑀫𑀲𑁆𑀲𑀸𑀫𑀺𑀦𑀸 𑀦𑀺𑀭𑀯𑀲𑁂𑀲𑀢𑁄 𑀅𑀕𑀢𑀺𑀁, 𑀕𑀢𑀺𑀜𑁆𑀘 𑀬𑀣𑀸𑀪𑀽𑀢𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑀺𑀢𑀸 𑀏𑀢𑀸 𑀤𑀺𑀝𑁆𑀞𑀺𑀬𑁄, 𑀢𑀲𑁆𑀫𑀸 𑀬𑀸𑀯𑀢𑀺𑀓𑀸 𑀤𑀺𑀝𑁆𑀞𑀺𑀬𑁄 𑀪𑀕𑀯𑀢𑀸 𑀤𑁂𑀲𑀺𑀢𑀸, 𑀬𑀣𑀸 𑀘 𑀤𑁂𑀲𑀺𑀢𑀸, 𑀢𑀸𑀯𑀢𑀺𑀓𑀸 𑀢𑀣𑀸 𑀘𑁂𑀯 𑀲𑀦𑁆𑀦𑀺𑀝𑁆𑀞𑀸𑀦𑀢𑁄 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀸, 𑀦 𑀘𑁂𑀢𑁆𑀣 𑀬𑀼𑀢𑁆𑀢𑀺𑀯𑀺𑀘𑀸𑀭𑀡𑀸 𑀓𑀸𑀢𑀩𑁆𑀩𑀸 𑀩𑀼𑀤𑁆𑀥𑀯𑀺𑀲𑀬𑀢𑁆𑀢𑀸. 𑀅𑀘𑀺𑀦𑁆𑀢𑁂𑀬𑁆𑀬𑁄 𑀳𑀺 𑀩𑀼𑀤𑁆𑀥𑀸𑀦𑀁 𑀩𑀼𑀤𑁆𑀥𑀯𑀺𑀲𑀬𑁄, 𑀢𑀣𑀸 𑀘 𑀯𑀓𑁆𑀔𑀢𑀺 ‘‘𑀢𑀢𑁆𑀣 𑀦 𑀏𑀓𑀦𑁆𑀢𑁂𑀦 𑀓𑀸𑀭𑀡𑀁 𑀧𑀭𑀺𑀬𑁂𑀲𑀺𑀢𑀩𑁆𑀩’’𑀦𑁆𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁭𑁮-𑁮𑁨).

𑀤𑀼𑀢𑀺𑀬𑀪𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀯𑀸𑀤𑀯𑀡𑁆𑀡𑀦𑀸

𑁭𑁪. ‘‘𑀅𑀧𑀭𑀦𑁆𑀢𑁂𑀜𑀸𑀡𑀁 (𑀥. 𑀲. 𑁧𑁦𑁬𑁭), 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁭𑁪) 𑀯𑀺𑀬 𑀅𑀧𑀭𑀦𑁆𑀢 𑁋𑀲𑀤𑁆𑀤𑀸𑀦𑀁 𑀬𑀣𑀸𑀓𑁆𑀓𑀫𑀁 𑀅𑀦𑀸𑀕𑀢𑀓𑀸𑀮𑀓𑁄𑀝𑁆𑀞𑀸𑀲𑀯𑀸𑀘𑀓𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀦𑀸𑀕𑀢𑀓𑁄𑀝𑁆𑀞𑀸𑀲𑀲𑀗𑁆𑀔𑀸𑀢’’𑀦𑁆𑀢𑀺. ‘‘𑀧𑀼𑀩𑁆𑀩𑀦𑁆𑀢𑀁 𑀓𑀧𑁆𑀧𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦 ‘‘𑀅𑀧𑀭𑀦𑁆𑀢𑀁 𑀓𑀧𑁆𑀧𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀘𑁂𑀢𑁆𑀣 𑀯𑀓𑁆𑀔𑀸𑀫.

𑀲𑀜𑁆𑀜𑀻𑀯𑀸𑀤𑀯𑀡𑁆𑀡𑀦𑀸

𑁭𑁫. 𑀆𑀖𑀸𑀢𑀦𑀸 𑀉𑀤𑁆𑀥𑀦𑁆𑀢𑀺 𑀉𑀤𑁆𑀥𑀫𑀸𑀖𑀸𑀢𑀦𑀁, 𑀫𑀭𑀡𑀢𑁄 𑀉𑀤𑁆𑀥𑀁 𑀧𑀯𑀢𑁆𑀢𑁄 𑀅𑀢𑁆𑀢𑀸𑀢𑀺 𑀅𑀢𑁆𑀣𑁄. ‘‘𑀉𑀤𑁆𑀥𑀫𑀸𑀖𑀸𑀢𑀦’’𑀦𑁆𑀢𑀺 𑀧𑀯𑀢𑁆𑀢𑁄 𑀯𑀸𑀤𑁄 𑀉𑀤𑁆𑀥𑀫𑀸𑀖𑀸𑀢𑀦𑁄 𑀲𑀳𑀘𑀭𑀡𑀯𑀲𑁂𑀦, 𑀢𑀤𑁆𑀥𑀺𑀢𑀯𑀲𑁂𑀦 𑀘, 𑀅𑀦𑁆𑀢𑀮𑁄𑀧𑀦𑀺𑀤𑁆𑀤𑁂𑀲𑁄 𑀯𑀸 𑀏𑀲. 𑀲𑁄 𑀏𑀢𑁂𑀲𑀦𑁆𑀢𑀺 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀸. 𑀏𑀯𑀁 𑀲𑀤𑁆𑀤𑀢𑁄 𑀦𑀺𑀧𑁆𑀨𑀦𑁆𑀦𑀁 𑀅𑀢𑁆𑀣𑀢𑁄 𑀏𑀯 𑀤𑀲𑁆𑀲𑁂𑀢𑀼𑀁 ‘‘𑀉𑀤𑁆𑀥𑀫𑀸𑀖𑀸𑀢𑀦𑀸 𑀅𑀢𑁆𑀢𑀸𑀦𑀁 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀆𑀖𑀸𑀢𑀦𑀸 𑀉𑀤𑁆𑀥𑀁 𑀉𑀧𑀭𑀺𑀪𑀽𑀢𑀁 𑀅𑀢𑁆𑀢𑀪𑀸𑀯𑀦𑁆𑀢𑀺 𑀅𑀢𑁆𑀣𑁄. 𑀢𑁂 𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑀸 ‘‘𑀉𑀤𑁆𑀥𑀁 𑀫𑀭𑀡𑀢𑁄 𑀅𑀢𑁆𑀢𑀸 𑀦𑀺𑀩𑁆𑀩𑀺𑀓𑀸𑀭𑁄’’𑀢𑀺 𑀯𑀤𑀦𑁆𑀢𑀺. ‘‘𑀲𑁄 𑀏𑀢𑁂𑀲’’𑀦𑁆𑀢𑀺𑀆𑀤𑀺𑀦𑀸 𑀅𑀲𑁆𑀲𑀢𑁆𑀣𑀺𑀬𑀢𑁆𑀣𑀁 𑀤𑀲𑁆𑀲𑁂𑀢𑀺 𑀬𑀣𑀸 ‘‘𑀩𑀼𑀤𑁆𑀥𑀫𑀲𑁆𑀲 𑀅𑀢𑁆𑀣𑀻𑀢𑀺 𑀩𑀼𑀤𑁆𑀥𑁄’’𑀢𑀺. 𑀅𑀬𑀁 𑀅𑀝𑁆𑀞𑀓𑀣𑀸𑀢𑁄 𑀅𑀧𑀭𑁄 𑀦𑀬𑁄 𑁋 𑀲𑀜𑁆𑀜𑀻𑀢𑀺 𑀧𑀯𑀢𑁆𑀢𑁄 𑀯𑀸𑀤𑁄 𑀲𑀜𑁆𑀜𑀻 𑀲𑀳𑀘𑀭𑀡𑀸𑀤𑀺𑀦𑀬𑁂𑀦, 𑀲𑀜𑁆𑀜𑀻 𑀯𑀸𑀤𑁄 𑀏𑀢𑁂𑀲𑀦𑁆𑀢𑀺 𑀲𑀜𑁆𑀜𑀻𑀯𑀸𑀤𑀸 𑀲𑀫𑀸𑀲𑀯𑀲𑁂𑀦. 𑀲𑀜𑁆𑀜𑀻𑀯𑀸𑀤𑁄 𑀏𑀯 𑀯𑀸𑀤𑁄 𑀏𑀢𑁂𑀲𑀦𑁆𑀢𑀺 𑀳𑀺 𑀅𑀢𑁆𑀣𑁄.

𑁭𑁬-𑁭𑁭. 𑀭𑀽𑀧𑀻 ¶ ¶ 𑀅𑀢𑁆𑀢𑀸𑀢𑀺 𑀏𑀢𑁆𑀣 𑀓𑀲𑀺𑀡𑀭𑀽𑀧𑀁 ‘‘𑀅𑀢𑁆𑀢𑀸’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀭𑀽𑀧𑀯𑀺𑀦𑀺𑀫𑀼𑀢𑁆𑀢𑁂𑀦 𑀅𑀢𑁆𑀢𑀦𑀸 𑀪𑀯𑀺𑀢𑀩𑁆𑀩𑀁 ‘‘𑀭𑀽𑀧𑀫𑀲𑁆𑀲 𑀅𑀢𑁆𑀣𑀻’’𑀢𑀺 𑀯𑀼𑀢𑁆𑀢𑁂 𑀲𑀜𑁆𑀜𑀸𑀬 𑀯𑀺𑀬 𑀭𑀽𑀧𑀲𑁆𑀲𑀸𑀧𑀺 𑀅𑀢𑁆𑀢𑀦𑀺𑀬𑀢𑁆𑀢𑀸. 𑀦 𑀳𑀺 ‘‘𑀲𑀜𑁆𑀜𑀻 𑀅𑀢𑁆𑀢𑀸’’𑀢𑀺 𑀏𑀢𑁆𑀣 𑀲𑀜𑁆𑀜𑀸 𑀏𑀯 𑀅𑀢𑁆𑀢𑀸, 𑀅𑀣 𑀔𑁄 ‘‘𑀲𑀜𑁆𑀜𑀸 𑀅𑀲𑁆𑀲 𑀅𑀢𑁆𑀣𑀻’’𑀢𑀺 𑀅𑀢𑁆𑀣𑁂𑀦 𑀅𑀢𑁆𑀢𑀦𑀺𑀬𑀸𑀯, 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀢𑀢𑁆𑀣 𑀧𑀯𑀢𑁆𑀢𑀲𑀜𑁆𑀜𑀜𑁆𑀘𑀲𑁆𑀲 ‘𑀲𑀜𑁆𑀜𑀸’𑀢𑀺 𑀕𑀳𑁂𑀢𑁆𑀯𑀸’’𑀢𑀺? 𑀦 𑀔𑁄 𑀧𑀦𑁂𑀢𑀫𑁂𑀯𑀁 𑀤𑀝𑁆𑀞𑀩𑁆𑀩𑀁 ‘‘𑀭𑀽𑀧𑀫𑀲𑁆𑀲 𑀅𑀢𑁆𑀣𑀻𑀢𑀺 𑀭𑀽𑀧𑀻’’𑀢𑀺, 𑀅𑀣 𑀔𑁄 ‘‘𑀭𑀼𑀧𑁆𑀧𑀦𑀲𑀻𑀮𑁄 𑀭𑀽𑀧𑀻’’𑀢𑀺. 𑀭𑀼𑀧𑁆𑀧𑀦𑀜𑁆𑀘𑁂𑀢𑁆𑀣 𑀭𑀽𑀧𑀲𑀭𑀺𑀓𑁆𑀔𑀢𑀸𑀬 𑀓𑀲𑀺𑀡𑀭𑀽𑀧𑀲𑁆𑀲 𑀯𑀟𑁆𑀠𑀺𑀢𑀸𑀯𑀟𑁆𑀠𑀺𑀢𑀓𑀸𑀮𑀯𑀲𑁂𑀦 𑀯𑀺𑀲𑁂𑀲𑀸𑀧𑀢𑁆𑀢𑀺. 𑀲𑀸 𑀳𑀺 ‘‘𑀦𑀢𑁆𑀣𑀻’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀧𑀭𑀺𑀢𑁆𑀢𑀯𑀺𑀧𑀼𑀮𑀢𑀸𑀤𑀺𑀯𑀺𑀲𑁂𑀲𑀲𑀩𑁆𑀪𑀸𑀯𑀢𑁄. 𑀬𑀤𑁂𑀯𑀁 𑀲𑀺𑀬𑀸 ‘‘𑀭𑀼𑀧𑁆𑀧𑀦𑀲𑀻𑀮𑁄 𑀭𑀽𑀧𑀻’’𑀢𑀺, 𑀅𑀣 𑀇𑀫𑀲𑁆𑀲 𑀯𑀸𑀤𑀲𑁆𑀲 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀗𑁆𑀕𑀳𑁄 𑀦 𑀬𑀼𑀚𑁆𑀚𑀢𑀺 𑀭𑀼𑀧𑁆𑀧𑀦𑀲𑀻𑀮𑀲𑁆𑀲 𑀪𑁂𑀤𑀲𑀩𑁆𑀪𑀸𑀯𑀢𑁄𑀢𑀺? 𑀬𑀼𑀚𑁆𑀚𑀢𑁂𑀯 𑀓𑀸𑀬𑀪𑁂𑀤𑀢𑁄 𑀉𑀤𑁆𑀥𑀁 𑀧𑀭𑀺𑀓𑀧𑁆𑀧𑀺𑀢𑀲𑁆𑀲 𑀅𑀢𑁆𑀢𑀦𑁄 𑀦𑀺𑀩𑁆𑀩𑀺𑀓𑀸𑀭𑀢𑀸𑀬 𑀢𑁂𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸’’𑀢𑀺. 𑀅𑀣 𑀯𑀸 ‘‘𑀭𑀽𑀧𑀫𑀲𑁆𑀲 𑀅𑀢𑁆𑀣𑀻𑀢𑀺 𑀭𑀽𑀧𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀦 𑀓𑁄𑀘𑀺 𑀤𑁄𑀲𑁄 𑀓𑀧𑁆𑀧𑀦𑀸𑀲𑀺𑀤𑁆𑀥𑁂𑀦 𑀪𑁂𑀤𑁂𑀦 𑀅𑀪𑁂𑀤𑀲𑁆𑀲𑀸𑀧𑀺 𑀦𑀺𑀤𑁆𑀤𑁂𑀲𑀤𑀲𑁆𑀲𑀦𑀢𑁄 𑀬𑀣𑀸 ‘‘𑀲𑀺𑀮𑀸𑀧𑀼𑀢𑁆𑀢𑀓𑀲𑁆𑀲 𑀲𑀭𑀻𑀭’’𑀦𑁆𑀢𑀺.

𑀅𑀧𑀺𑀘 𑀅𑀯𑀬𑀯𑀯𑀲𑁂𑀦 𑀅𑀯𑀬𑀯𑀺𑀦𑁄 𑀢𑀣𑀸𑀦𑀺𑀤𑁆𑀤𑁂𑀲𑀦𑀺𑀤𑀲𑁆𑀲𑀦𑀢𑁄 𑀬𑀣𑀸 ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻’’𑀢𑀺 (𑀲𑀁. 𑀦𑀺. 𑁫.𑁩𑁯𑁦), 𑀭𑀼𑀧𑁆𑀧𑀦𑀁 𑀯𑀸 𑀭𑀽𑀧𑀁, 𑀭𑀽𑀧𑀲𑀪𑀸𑀯𑁄, 𑀢𑀤𑀲𑁆𑀲 𑀅𑀢𑁆𑀣𑀻𑀢𑀺 𑀭𑀽𑀧𑀻, 𑀅𑀢𑁆𑀢𑀸 ‘‘𑀭𑀽𑀧𑀺𑀦𑁄 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁧.𑀤𑀼𑀓𑀫𑀸𑀢𑀺𑀓𑀸) 𑀯𑀺𑀬, 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀭𑀽𑀧𑀲𑀪𑀸𑀯𑀢𑁆𑀢𑀸 ‘‘𑀭𑀽𑀧𑀻 𑀅𑀢𑁆𑀢𑀸’’𑀢𑀺 𑀯𑀘𑀦𑀁 𑀜𑀸𑀬𑀸𑀕𑀢𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀓𑀲𑀺𑀡𑀭𑀽𑀧𑀁 𑀅𑀢𑁆𑀢𑀸’’𑀢𑀺. ‘‘𑀕𑀳𑁂𑀢𑁆𑀯𑀸’’𑀢𑀺 𑀏𑀢𑁂𑀦 𑀘𑁂𑀢𑀲𑁆𑀲 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀓𑀲𑀺𑀡𑀭𑀽𑀧𑁂. 𑀅𑀲𑁆𑀲𑀸𑀢𑀺 𑀧𑀭𑀺𑀓𑀧𑁆𑀧𑀺𑀢𑀲𑁆𑀲 𑀅𑀢𑁆𑀢𑀦𑁄, 𑀆𑀚𑀻𑀯𑀓𑀸𑀤𑀬𑁄 𑀢𑀓𑁆𑀓𑀫𑀢𑁆𑀢𑁂𑀦 𑀧𑀜𑁆𑀜𑀧𑁂𑀦𑁆𑀢𑀺 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀆𑀚𑀻𑀯𑀓𑀸 𑀳𑀺 𑀢𑀓𑁆𑀓𑀺𑀓𑀸𑀬𑁂𑀯, 𑀦 𑀮𑀸𑀪𑀺𑀦𑁄. 𑀦𑀺𑀬𑀢𑀯𑀸𑀤𑀺𑀢𑀸𑀬 𑀳𑀺 𑀓𑀫𑁆𑀫𑀨𑀮𑀧𑀝𑀺𑀓𑁆𑀔𑁂𑀧𑀢𑁄 𑀦𑀢𑁆𑀣𑀺 𑀢𑁂𑀲𑀁 𑀛𑀸𑀦𑀲𑀫𑀸𑀧𑀢𑁆𑀢𑀺𑀮𑀸𑀪𑁄. 𑀢𑀣𑀸 𑀳𑀺𑀓𑀡𑁆𑀳𑀸𑀪𑀺𑀚𑀸𑀢𑀺𑀆𑀤𑀻𑀲𑀼 𑀓𑀸𑀴𑀓𑀸𑀤𑀺𑀭𑀽𑀧𑀁 ‘‘𑀅𑀢𑁆𑀢𑀸’’𑀢𑀺 𑀏𑀓𑀘𑁆𑀘𑁂 𑀆𑀚𑀻𑀯𑀓𑀸 𑀧𑀝𑀺𑀚𑀸𑀦𑀦𑁆𑀢𑀺. 𑀧𑀼𑀭𑀺𑀫𑀦𑀬𑁂𑀦 𑀘𑁂𑀢𑁆𑀣 𑀮𑀸𑀪𑀻𑀦𑀁 𑀤𑀲𑁆𑀲𑁂𑀢𑀺, 𑀧𑀘𑁆𑀙𑀺𑀫𑀦𑀬𑁂𑀦 𑀧𑀦 𑀢𑀓𑁆𑀓𑀺𑀓𑀁. 𑀏𑀯𑀫𑀻𑀤𑀺𑀲𑁂𑀲𑀼. 𑀭𑁄𑀕-𑀲𑀤𑁆𑀤𑁄 𑀪𑀗𑁆𑀕𑀧𑀭𑀺𑀬𑀸𑀬𑁄 𑀪𑀗𑁆𑀕𑀲𑁆𑀲𑀸𑀧𑀺 𑀭𑀼𑀚𑁆𑀚𑀦𑀪𑀸𑀯𑀢𑁄, 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀭𑁄𑀕-𑀲𑀤𑁆𑀤𑀲𑁆𑀲 𑀦𑀺𑀘𑁆𑀘𑀧𑀭𑀺𑀬𑀸𑀬𑀢𑀸 𑀉𑀧𑀧𑀦𑁆𑀦𑀸 𑀳𑁄𑀢𑀺, 𑀢𑁂𑀦𑀸𑀳 ‘‘𑀦𑀺𑀘𑁆𑀘𑁄’’𑀢𑀺. 𑀭𑁄𑀕-𑀲𑀤𑁆𑀤𑁄 𑀯𑀸 𑀩𑁆𑀬𑀸𑀥𑀺𑀧𑀭𑀺𑀬𑀸𑀬𑁄. 𑀅𑀭𑁄𑀕𑁄𑀢𑀺 𑀧𑀦 𑀭𑁄𑀕𑀭𑀳𑀺𑀢𑀢𑀸𑀲𑀻𑀲𑁂𑀦 𑀦𑀺𑀩𑁆𑀩𑀺𑀓𑀸𑀭𑀢𑀸𑀬 𑀦𑀺𑀘𑁆𑀘𑀢𑀁 𑀤𑀺𑀝𑁆𑀞𑀺𑀕𑀢𑀺𑀓𑁄 𑀧𑀝𑀺𑀚𑀸𑀦𑀸𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀘𑁆𑀘𑁄’’𑀢𑀺 𑀯𑀼𑀢𑁆𑀢𑀁 ¶ . 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀦𑀢𑁆𑀣𑀺𑀪𑀸𑀯𑀸𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀸𑀦𑀺 𑀬𑀣𑀸𑀭𑀳𑀫𑀭𑀽𑀧𑀲𑀫𑀸𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀦𑀸𑀫. 𑀦𑀺𑀫𑁆𑀩𑀧𑀡𑁆𑀡𑁂 𑀢𑀧𑁆𑀧𑀭𑀺𑀫𑀸𑀡𑁄 𑀢𑀺𑀢𑁆𑀢𑀓𑀭𑀲𑁄 𑀯𑀺𑀬 𑀲𑀭𑀻𑀭𑀧𑁆𑀧𑀭𑀺𑀫𑀸𑀡𑁄 𑀅𑀭𑀽𑀧𑀻 𑀅𑀢𑁆𑀢𑀸 𑀲𑀭𑀻𑀭𑁂 𑀢𑀺𑀝𑁆𑀞𑀢𑀻𑀢𑀺 𑀢𑀓𑁆𑀓𑀫𑀢𑁆𑀢𑁂𑀦𑁂𑀯 𑀦𑀺𑀕𑀡𑁆𑀞𑀸 ‘‘𑀅𑀭𑀽𑀧𑀻 𑀅𑀢𑁆𑀢𑀸 𑀲𑀜𑁆𑀜𑀻’’𑀢𑀺 𑀧𑀜𑁆𑀜𑀧𑁂𑀦𑁆𑀢𑀻𑀢𑀺 𑀆𑀳 ‘‘𑀦𑀺𑀕𑀡𑁆𑀞𑀸𑀤𑀬𑁄 𑀯𑀺𑀬𑀸’’𑀢𑀺.

𑀢𑀢𑀺𑀬𑀸 ¶ 𑀧𑀦𑀸𑀢𑀺 ‘‘𑀭𑀽𑀧𑀻 𑀘 𑀅𑀭𑀽𑀧𑀻 𑀘 𑀅𑀢𑁆𑀢𑀸’’𑀢𑀺 𑀮𑀤𑁆𑀥𑀺. 𑀫𑀺𑀲𑁆𑀲𑀓𑀕𑀸𑀳𑀯𑀲𑁂𑀦𑀸𑀢𑀺 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀁 𑀬𑀣𑀸𑀯𑀼𑀢𑁆𑀢𑀸𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀏𑀓𑁄𑀯 ‘‘𑀅𑀢𑁆𑀢𑀸’’𑀢𑀺, 𑀢𑀢𑁆𑀣 𑀧𑀯𑀢𑁆𑀢𑀲𑀜𑁆𑀜𑀜𑁆𑀘𑀲𑁆𑀲 ‘‘𑀲𑀜𑁆𑀜𑀸’’𑀢𑀺 𑀕𑀳𑀡𑀯𑀲𑁂𑀦. 𑀅𑀬𑀜𑁆𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑁄 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀢𑀸𑀲𑀁 𑀦𑀺𑀫𑀺𑀢𑁆𑀢𑀁 𑀭𑀽𑀧𑀪𑀸𑀯𑁂𑀦, 𑀅𑀭𑀽𑀧𑀪𑀸𑀯𑁂𑀦 𑀘 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 ‘‘𑀭𑀽𑀧𑀻 𑀘 𑀅𑀭𑀽𑀧𑀻 𑀘𑀸’’𑀢𑀺 𑀅𑀪𑀺𑀦𑀺𑀯𑁂𑀲𑀁 𑀚𑀦𑁂𑀲𑀺 𑀅𑀣𑁂𑀢𑀯𑀸𑀤𑀺𑀦𑁄 𑀯𑀺𑀬, 𑀢𑀓𑁆𑀓𑀫𑀢𑁆𑀢𑁂𑀦𑁂𑀯 𑀯𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀫𑀺𑀲𑁆𑀲𑀓𑀕𑀳𑀡𑀯𑀲𑁂𑀦 ‘‘𑀭𑀽𑀧𑀻 𑀘 𑀅𑀭𑀽𑀧𑀻 𑀘 𑀅𑀢𑁆𑀢𑀸’’𑀢𑀺 𑀅𑀪𑀺𑀦𑀺𑀯𑀺𑀲𑁆𑀲 𑀅𑀝𑁆𑀞𑀸𑀲𑀺. 𑀘𑀢𑀼𑀢𑁆𑀣𑀸𑀢𑀺 ‘‘𑀦𑁂𑀯 𑀅𑀭𑀽𑀧𑀻 𑀘 𑀦𑀸𑀭𑀽𑀧𑀻 𑀘 𑀅𑀢𑁆𑀢𑀸’’𑀢𑀺 𑀮𑀤𑁆𑀥𑀺. 𑀢𑀓𑁆𑀓𑀕𑀸𑀳𑁂𑀦𑁂𑀯𑀸𑀢𑀺 𑀲𑀗𑁆𑀔𑀸𑀭𑀲𑁂𑀲𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀥𑀫𑁆𑀫𑀸 𑀯𑀺𑀬 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀲𑀓𑀺𑀘𑁆𑀘𑀲𑀸𑀥𑀦𑀸𑀲𑀫𑀢𑁆𑀣𑀢𑀸𑀬 𑀔𑀫𑁆𑀪𑀓𑀼𑀘𑁆𑀙𑀺 [𑀣𑀫𑁆𑀪𑀓𑀼𑀝𑁆𑀝 (𑀤𑀻. 𑀦𑀺. 𑀝𑀻. 𑁧𑁭𑁬-𑁭𑁭)] 𑀳𑀢𑁆𑀣𑀧𑀸𑀤𑀸𑀤𑀺𑀲𑀗𑁆𑀖𑀸𑀢𑁄 𑀯𑀺𑀬 𑀦𑁂𑀯 𑀭𑀽𑀧𑀻, 𑀭𑀽𑀧𑀲𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄 𑀦 𑀘 𑀅𑀭𑀽𑀧𑀻𑀢𑀺 𑀏𑀯𑀁 𑀧𑀯𑀢𑁆𑀢𑀢𑀓𑁆𑀓𑀕𑀸𑀳𑁂𑀦𑁂𑀯.

𑀅𑀬𑀁 𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑁄 𑀦𑀬𑁄 𑁋 𑀦𑁂𑀯𑀭𑀽𑀧𑀻 𑀦𑀸𑀭𑀽𑀧𑀻𑀢𑀺 𑀏𑀢𑁆𑀣 𑀳𑀺 𑀅𑀦𑁆𑀢𑀸𑀦𑀦𑁆𑀢𑀺𑀓𑀘𑀢𑀼𑀢𑁆𑀣𑀯𑀸𑀤𑁂 𑀯𑀺𑀬 𑀅𑀜𑁆𑀜𑀫𑀜𑁆𑀜𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀢𑀺𑀧𑀺 𑀘 𑀢𑀢𑀺𑀬𑀯𑀸𑀤𑁂𑀦 𑀇𑀫𑀲𑁆𑀲 𑀲𑀫𑀸𑀦𑀢𑁆𑀣𑀪𑀸𑀯𑁂 𑀢𑀢𑁆𑀣 𑀤𑁂𑀲𑀓𑀸𑀮𑀪𑁂𑀤𑀯𑀲𑁂𑀦 𑀯𑀺𑀬 𑀇𑀥 𑀓𑀸𑀮𑀯𑀢𑁆𑀣𑀼𑀪𑁂𑀤𑀯𑀲𑁂𑀦 𑀢𑀢𑀺𑀬𑀘𑀢𑀼𑀢𑁆𑀣𑀯𑀸𑀤𑀸𑀦𑀁 𑀯𑀺𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀓𑀸𑀮𑀪𑁂𑀤𑀯𑀲𑁂𑀦 𑀳𑀺 𑀇𑀥 𑀢𑀢𑀺𑀬𑀯𑀸𑀤𑀲𑁆𑀲 𑀧𑀯𑀢𑁆𑀢𑀺 𑀭𑀽𑀧𑀸𑀭𑀽𑀧𑀦𑀺𑀫𑀺𑀢𑁆𑀢𑀸𑀦𑀁 𑀲𑀳𑀅𑀦𑀼𑀧𑀝𑁆𑀞𑀸𑀦𑀢𑁄. 𑀘𑀢𑀼𑀢𑁆𑀣𑀯𑀸𑀤𑀲𑁆𑀲 𑀧𑀦 𑀯𑀢𑁆𑀣𑀼𑀪𑁂𑀤𑀯𑀲𑁂𑀦 𑀧𑀯𑀢𑁆𑀢𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀲𑀫𑀽𑀳𑀪𑀸𑀯𑀢𑁄𑀢𑀺. 𑀤𑀼𑀢𑀺𑀬𑀘𑀢𑀼𑀓𑁆𑀓𑀁 𑀅𑀦𑁆𑀢𑀸𑀦𑀦𑁆𑀢𑀺𑀓𑀯𑀸𑀤𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁 𑀲𑀩𑁆𑀩𑀣𑀸 𑀲𑀤𑁆𑀤𑀢𑁆𑀣𑀢𑁄 𑀲𑀫𑀸𑀦𑀢𑁆𑀣𑀢𑁆𑀢𑀸. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀫𑁆𑀧𑀺 ‘‘𑀅𑀫𑀢𑀺 𑀕𑀘𑁆𑀙𑀢𑀺 𑀪𑀸𑀯𑁄 𑀑𑀲𑀸𑀦𑀫𑁂𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀅𑀫𑁆𑀳𑁂𑀳𑀺 𑀯𑀼𑀢𑁆𑀢𑀫𑁂𑀯, 𑀓𑁂𑀯𑀮𑀁 𑀧𑀦 𑀢𑀢𑁆𑀣 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀦𑀸𑀯𑀲𑁂𑀦 𑀧𑀯𑀢𑁆𑀢𑁄, 𑀇𑀥 𑀅𑀧𑀭𑀦𑁆𑀢𑀓𑀧𑁆𑀧𑀦𑀸𑀯𑀲𑁂𑀦𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀧𑀸𑀓𑀝𑁄𑀬𑁂𑀯. 𑀓𑀸𑀫𑀜𑁆𑀘 𑀦𑀸𑀦𑀢𑁆𑀢𑀲𑀜𑁆𑀜𑀻 𑀅𑀢𑁆𑀢𑀸𑀢𑀺 𑀅𑀬𑀫𑁆𑀧𑀺 𑀯𑀸𑀤𑁄 𑀲𑀫𑀸𑀧𑀦𑁆𑀦𑀓𑀯𑀲𑁂𑀦 𑀮𑀩𑁆𑀪𑀢𑀺. 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀯𑀲𑁂𑀦 𑀲𑀜𑁆𑀜𑀸𑀪𑁂𑀤𑀲𑀫𑁆𑀪𑀯𑀢𑁄. 𑀢𑀣𑀸𑀧𑀺 𑀲𑀫𑀸𑀧𑀢𑁆𑀢𑀺𑀬𑀁 ¶ 𑀏𑀓𑀭𑀽𑀧𑁂𑀦𑁂𑀯 𑀲𑀜𑁆𑀜𑀸𑀬 𑀉𑀧𑀝𑁆𑀞𑀸𑀦𑀢𑁄 𑀮𑀸𑀪𑀻𑀯𑀲𑁂𑀦 𑀏𑀓𑀢𑁆𑀢𑀲𑀜𑁆𑀜𑀺𑀢𑀸 𑀲𑀸𑀢𑀺𑀲𑀬𑀁 𑀬𑀼𑀢𑁆𑀢𑀸𑀢𑀺 𑀆𑀳 ‘‘𑀲𑀫𑀸𑀧𑀦𑁆𑀦𑀓𑀯𑀲𑁂𑀦 𑀏𑀓𑀢𑁆𑀢𑀲𑀜𑁆𑀜𑀻’’𑀢𑀺. 𑀏𑀓𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀏𑀯 𑀯𑀸 𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀢𑀺𑀧𑀺 𑀘 𑀲𑀫𑀸𑀧𑀢𑁆𑀢𑀺𑀪𑁂𑀤𑀢𑁄 𑀲𑀜𑁆𑀜𑀸𑀪𑁂𑀤𑀲𑀫𑁆𑀪𑀯𑁂 𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂𑀬𑁂𑀯 𑀲𑀜𑁆𑀜𑀸𑀦𑀸𑀦𑀢𑁆𑀢𑀲𑁆𑀲 𑀑𑀴𑀸𑀭𑀺𑀓𑀲𑁆𑀲 𑀲𑀫𑁆𑀪𑀯𑀢𑁄 𑀢𑀓𑁆𑀓𑀻𑀯𑀲𑁂𑀦𑁂𑀯 𑀦𑀸𑀦𑀢𑁆𑀢𑀲𑀜𑁆𑀜𑀺𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀫𑀸𑀧𑀦𑁆𑀦𑀓𑀯𑀲𑁂𑀦 𑀦𑀸𑀦𑀢𑁆𑀢𑀲𑀜𑁆𑀜𑀻’’𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀢𑁆𑀢𑀓𑀲𑀺𑀡𑀯𑀲𑁂𑀦𑀸𑀢𑀺 𑀅𑀯𑀟𑁆𑀠𑀺𑀢𑀢𑁆𑀢𑀸 𑀅𑀧𑁆𑀧𑀓𑀓𑀲𑀺𑀡𑀯𑀲𑁂𑀦, 𑀓𑀲𑀺𑀡𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀲𑀜𑁆𑀜𑀸𑀬 𑀯𑀺𑀲𑀬𑀤𑀲𑁆𑀲𑀦𑀁. 𑀯𑀺𑀲𑀬𑀯𑀲𑁂𑀦 𑀳𑀺 𑀲𑀜𑁆𑀜𑀸𑀬 𑀧𑀭𑀺𑀢𑁆𑀢𑀢𑀸, 𑀇𑀫𑀺𑀦𑀸 𑀘 𑀲𑀢𑀺𑀧𑀺 𑀲𑀜𑁆𑀜𑀸𑀯𑀺𑀦𑀺𑀫𑀼𑀢𑁆𑀢𑀥𑀫𑁆𑀫𑁂 ‘‘𑀲𑀜𑁆𑀜𑀸𑀬𑁂𑀯 𑀅𑀢𑁆𑀢𑀸’’𑀢𑀺 𑀯𑀤𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄 𑀯𑀺𑀧𑀼𑀮𑀓𑀲𑀺𑀡𑀯𑀲𑁂𑀦𑀸𑀢𑀺 𑀏𑀢𑁆𑀣𑀸𑀧𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀦𑁆𑀢𑀸𑀦𑀦𑁆𑀢𑀺𑀓𑀯𑀸𑀤𑁂 𑀘𑁂𑀯 𑀇𑀥 𑀘 𑀅𑀦𑁆𑀢𑀸𑀦𑀦𑁆𑀢𑀘𑀢𑀼𑀓𑁆𑀓𑁂 𑀧𑀞𑀫𑀤𑀼𑀢𑀺𑀬𑀯𑀸𑀤𑁂𑀲𑀼 𑀲𑀤𑁆𑀤𑀢𑁆𑀣𑀫𑀢𑁆𑀢𑀢𑁄 𑀲𑀫𑀸𑀦𑁂𑀲𑀼𑀧𑀺 𑀲𑀪𑀸𑀯𑀢𑁄 𑀢𑁂𑀳𑀺 𑀤𑁆𑀯𑀻𑀳𑀺 𑀯𑀸𑀤𑁂𑀳𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀸𑀤𑀸𑀦𑀁 𑀯𑀺𑀲𑁂𑀲𑁄 𑀲𑀺𑀤𑁆𑀥𑁄 𑀳𑁄𑀢𑀺, 𑀅𑀜𑁆𑀜𑀣𑀸 ¶ 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀲𑀼 𑀯𑀸𑀤𑁂𑀲𑀼 𑀲𑀢𑀺𑀧𑀺 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑀓𑀧𑁆𑀧𑀦𑀪𑁂𑀤𑀫𑀢𑁆𑀢𑁂𑀦 𑀓𑁂𑀳𑀺𑀘𑀺 𑀯𑀺𑀲𑁂𑀲𑁂 𑀓𑁂𑀳𑀺𑀘𑀺 𑀅𑀯𑀺𑀲𑁂𑀲𑁄𑀬𑁂𑀯 𑀲𑀺𑀬𑀸𑀢𑀺.

𑀅𑀬𑀁 𑀧𑀦 𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑁄 𑀦𑀬𑁄 𑁋 ‘‘𑀅𑀗𑁆𑀕𑀼𑀝𑁆𑀞𑀧𑁆𑀧𑀫𑀸𑀡𑁄 𑀅𑀢𑁆𑀢𑀸, 𑀅𑀡𑀼𑀫𑀢𑁆𑀢𑁄 𑀅𑀢𑁆𑀢𑀸’’𑀢𑀺𑀆𑀤𑀺𑀮𑀤𑁆𑀥𑀺𑀯𑀲𑁂𑀦 𑀧𑀭𑀺𑀢𑁆𑀢𑁄 𑀘 𑀲𑁄 𑀲𑀜𑁆𑀜𑀻 𑀘𑀸𑀢𑀺 𑀧𑀭𑀺𑀢𑁆𑀢𑀲𑀜𑁆𑀜𑀻 𑀓𑀸𑀧𑀺𑀮𑀓𑀸𑀡𑀸𑀤𑀧𑀪𑀼𑀢𑀬𑁄 [𑀓𑀧𑀺𑀮𑀓𑀡𑀸𑀤𑀸𑀤𑀬𑁄 (𑀤𑀻. 𑀦𑀺. 𑀝𑀻. 𑁧.𑁭𑁬-𑁭𑁭)] 𑀯𑀺𑀬. 𑀅𑀢𑁆𑀢𑀦𑁄 𑀲𑀩𑁆𑀩𑀕𑀢𑀪𑀸𑀯𑀧𑀝𑀺𑀚𑀸𑀦𑀦𑀯𑀲𑁂𑀦 𑀅𑀧𑁆𑀧𑀫𑀸𑀡𑁄 𑀘 𑀲𑁄 𑀲𑀜𑁆𑀜𑀻 𑀘𑀸𑀢𑀺 𑀅𑀧𑁆𑀧𑀫𑀸𑀡𑀲𑀜𑁆𑀜𑀻𑀢𑀺.

𑀤𑀺𑀩𑁆𑀩𑀘𑀓𑁆𑀔𑀼𑀧𑀭𑀺𑀪𑀡𑁆𑀟𑀢𑁆𑀢𑀸 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀲𑁆𑀲 𑀤𑀺𑀩𑁆𑀩𑀘𑀓𑁆𑀔𑀼𑀧𑀪𑀸𑀯𑀚𑀦𑀺𑀢𑁂𑀦 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑁂𑀦 𑀤𑀺𑀲𑁆𑀲𑀫𑀸𑀦𑀸𑀧𑀺 𑀲𑀢𑁆𑀢𑀸𑀦𑀁 𑀲𑀼𑀔𑀸𑀤𑀺𑀲𑀫𑀗𑁆𑀕𑀺𑀢𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀯 𑀤𑀺𑀝𑁆𑀞𑀸 𑀦𑀸𑀫𑀸𑀢𑀺 𑀆𑀳 ‘‘𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸’’𑀢𑀺𑀆𑀤𑀺. 𑀘𑀢𑀼𑀓𑁆𑀓𑀦𑀬𑀁, 𑀧𑀜𑁆𑀘𑀓𑀦𑀬𑀜𑁆𑀘 𑀲𑀦𑁆𑀥𑀸𑀬 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀪𑀽𑀫𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀺𑀕𑀢𑀺𑀓𑀯𑀺𑀲𑀬𑀸𑀲𑀼 𑀳𑀺 𑀧𑀜𑁆𑀘𑀯𑁄𑀓𑀸𑀭𑀛𑀸𑀦𑀪𑀽𑀫𑀻𑀲𑀼 𑀯𑁂𑀳𑀧𑁆𑀨𑀮𑀪𑀽𑀫𑀺𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀬𑀣𑀸𑀭𑀳𑀁 𑀘𑀢𑀼𑀓𑁆𑀓𑀦𑀬𑁂 𑀢𑀺𑀓𑀚𑁆𑀛𑀸𑀦𑀲𑁆𑀲, 𑀧𑀜𑁆𑀘𑀓𑀦𑀬𑁂 𑀘 𑀘𑀢𑀼𑀓𑁆𑀓𑀚𑁆𑀛𑀸𑀦𑀲𑁆𑀲 𑀯𑀺𑀧𑀸𑀓𑀝𑁆𑀞𑀸𑀦𑀢𑁆𑀢𑀸 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀪𑀽𑀫𑀺𑀬𑁄 𑀦𑀸𑀫. 𑀲𑀼𑀤𑁆𑀥𑀸𑀯𑀸𑀲𑀸 𑀧𑀦 𑀢𑁂𑀲𑀫𑀯𑀺𑀲𑀬𑀸. 𑀦𑀺𑀩𑁆𑀩𑀢𑁆𑀢𑀫𑀸𑀦𑀦𑁆𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀁. 𑀦𑀦𑀼 𑀘 ‘‘𑀏𑀓𑀦𑁆𑀢𑀲𑀼𑀔𑀻 𑀅𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀯𑀸𑀤𑀸𑀦𑀁 𑀅𑀧𑀭𑀦𑁆𑀢𑀤𑀺𑀝𑁆𑀞𑀺𑀪𑀸𑀯𑀢𑁄 ‘‘𑀦𑀺𑀩𑁆𑀩𑀢𑁆𑀢𑀫𑀸𑀦𑀁 𑀤𑀺𑀲𑁆𑀯𑀸’’𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀘𑀦𑀁 𑀅𑀦𑀼𑀧𑀧𑀦𑁆𑀦𑀫𑁂𑀯 𑀲𑀺𑀬𑀸. 𑀅𑀦𑀸𑀕𑀢𑀯𑀺𑀲𑀬𑀸 𑀳𑀺 𑀏𑀢𑁂 𑀯𑀸𑀤𑀸𑀢𑀺? 𑀉𑀧𑀧𑀦𑁆𑀦𑀫𑁂𑀯 𑀅𑀦𑀸𑀕𑀢𑀲𑁆𑀲 𑀏𑀓𑀦𑁆𑀢𑀲𑀼𑀔𑀻𑀪𑀸𑀯𑀸𑀤𑀺𑀓𑀲𑁆𑀲 𑀧𑀓𑀧𑁆𑀧𑀦𑀸𑀬 ¶ 𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑀺𑀩𑁆𑀩𑀢𑁆𑀢𑀺𑀤𑀲𑁆𑀲𑀦𑁂𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀦𑀺𑀩𑁆𑀩𑀢𑁆𑀢𑀫𑀸𑀦𑀁 𑀤𑀺𑀲𑁆𑀯𑀸 ‘𑀏𑀓𑀦𑁆𑀢𑀲𑀼𑀔𑀻’𑀢𑀺 𑀕𑀡𑁆𑀳𑀸𑀢𑀻’’𑀢𑀺. 𑀏𑀢𑁆𑀣 𑀘 𑀢𑀲𑁆𑀲𑀁 𑀢𑀲𑁆𑀲𑀁 𑀪𑀽𑀫𑀺𑀬𑀁 𑀩𑀸𑀳𑀼𑀮𑁆𑀮𑁂𑀦 𑀲𑀼𑀔𑀸𑀤𑀺𑀲𑀳𑀺𑀢𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑀁 𑀧𑀝𑀺𑀘𑁆𑀘 𑀢𑁂𑀲𑀁 ‘‘𑀏𑀓𑀦𑁆𑀢𑀲𑀼𑀔𑀻’’𑀢𑀺𑀆𑀤𑀺𑀕𑀳𑀡𑀢𑁄 𑀢𑀤𑀦𑀼𑀭𑀽𑀧𑀸𑀬𑁂𑀯 𑀪𑀽𑀫𑀺 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀤𑁆𑀤𑀦𑁆𑀢𑀭𑀸𑀪𑀺𑀲𑀫𑁆𑀩𑀦𑁆𑀥𑀯𑀲𑁂𑀦 𑀯𑀺𑀬 𑀳𑀺 𑀅𑀢𑁆𑀣𑀧𑀓𑀭𑀡𑀸𑀤𑀺𑀯𑀲𑁂𑀦𑀧𑀺 𑀅𑀢𑁆𑀣𑀯𑀺𑀲𑁂𑀲𑁄 𑀮𑀩𑁆𑀪𑀢𑀺. ‘‘𑀏𑀓𑀦𑁆𑀢𑀲𑀼𑀔𑀻’’𑀢𑀺𑀆𑀤𑀻𑀲𑀼 𑀘 𑀏𑀓𑀦𑁆𑀢𑀪𑀸𑀯𑁄 𑀩𑀳𑀼𑀮𑀁 𑀧𑀯𑀢𑁆𑀢𑀺𑀫𑀢𑁆𑀢𑀁 𑀧𑀢𑀺 𑀧𑀬𑀼𑀢𑁆𑀢𑁄. 𑀢𑀣𑀸𑀧𑀯𑀢𑁆𑀢𑀺𑀫𑀢𑁆𑀢𑀤𑀲𑁆𑀲𑀦𑁂𑀦 𑀢𑁂𑀲𑀁 𑀏𑀯𑀁 𑀕𑀳𑀡𑀢𑁄. 𑀅𑀣 𑀯𑀸 𑀳𑀢𑁆𑀣𑀺𑀤𑀲𑁆𑀲𑀓𑀅𑀦𑁆𑀥𑀸 𑀯𑀺𑀬 𑀤𑀺𑀝𑁆𑀞𑀺𑀕𑀢𑀺𑀓𑀸 𑀬𑀁 𑀬𑀤𑁂𑀯 𑀧𑀲𑁆𑀲𑀦𑁆𑀢𑀺, 𑀢𑀁 𑀢𑀤𑁂𑀯 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑀉𑀤𑀸𑀦𑁂 ‘‘𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀪𑀺𑀓𑁆𑀔𑀯𑁂, 𑀧𑀭𑀺𑀩𑁆𑀩𑀸𑀚𑀓𑀸 𑀅𑀦𑁆𑀥𑀸 𑀅𑀘𑀓𑁆𑀔𑀼𑀓𑀸’’𑀢𑀺𑀆𑀤𑀺, (𑀉𑀤𑀸. 𑁫𑁫) 𑀢𑀲𑁆𑀫𑀸 𑀅𑀮𑀫𑁂𑀢𑁆𑀣 𑀬𑀼𑀢𑁆𑀢𑀺𑀫𑀕𑁆𑀕𑀦𑀸𑀢𑀺. ‘‘𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀲𑀫𑀢𑁆𑀣𑁂𑀢𑀼𑀁 ‘‘𑀯𑀺𑀲𑁂𑀲𑀢𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀲𑀜𑁆𑀜𑀻𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀯𑀡𑁆𑀡𑀦𑀸

𑁭𑁮-𑁮𑁩. 𑀅𑀣 ¶ 𑀦 𑀓𑁄𑀘𑀺 𑀯𑀺𑀲𑁂𑀲𑁄 𑀅𑀢𑁆𑀣𑀻𑀢𑀺 𑀘𑁄𑀤𑀦𑀁 𑀲𑁄𑀥𑁂𑀢𑀺 ‘‘𑀓𑁂𑀯𑀮𑀜𑁆𑀳𑀻’’𑀢𑀺𑀆𑀤𑀺𑀦𑀸. ‘‘𑀅𑀲𑀜𑁆𑀜𑀻’’𑀢𑀺 𑀘 ‘‘𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻’’𑀢𑀺 𑀘 𑀕𑀡𑁆𑀳𑀦𑁆𑀢𑀸𑀦𑀁 𑀢𑀸 𑀤𑀺𑀝𑁆𑀞𑀺𑀬𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀸𑀭𑀡𑀦𑁆𑀢𑀺 𑀯𑀺𑀲𑁂𑀲𑀓𑀸𑀭𑀡𑀁, 𑀤𑀺𑀝𑁆𑀞𑀺𑀲𑀫𑀼𑀤𑀸𑀕𑀫𑀓𑀸𑀭𑀡𑀁 𑀯𑀸. 𑀲𑀢𑀺𑀧𑀺 𑀓𑀺𑀜𑁆𑀘𑀺 𑀓𑀸𑀭𑀡𑀧𑀭𑀺𑀬𑁂𑀲𑀦𑀲𑀫𑁆𑀪𑀯𑁂 𑀤𑀺𑀝𑁆𑀞𑀺𑀕𑀢𑀺𑀓𑀯𑀸𑀤𑀸𑀦𑀁 𑀅𑀦𑀸𑀤𑀭𑀺𑀬𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀏𑀓𑀦𑁆𑀢𑁂𑀦 𑀓𑀸𑀭𑀡𑀁 𑀧𑀭𑀺𑀬𑁂𑀲𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸𑀢𑀺 𑀆𑀳 ‘‘𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲𑀸’’𑀢𑀺𑀆𑀤𑀺, 𑀏𑀢𑁂𑀦 𑀧𑀭𑀺𑀬𑁂𑀲𑀦𑀓𑁆𑀔𑀫𑀸𑀪𑀸𑀯𑀢𑁄𑀢𑀺 𑀅𑀧𑀭𑀺𑀬𑁂𑀲𑀺𑀢𑀩𑁆𑀩𑀓𑀸𑀭𑀡𑀁 𑀤𑀲𑁆𑀲𑁂𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀲𑀜𑁆𑀜𑀻𑀯𑀸𑀤𑁂 𑀅𑀲𑀜𑁆𑀜𑀻𑀪𑀯𑁂 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀯𑀲𑁂𑀦 𑀧𑀯𑀢𑁆𑀢𑁄 𑀧𑀞𑀫𑀯𑀸𑀤𑁄, ‘‘𑀲𑀜𑁆𑀜𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀲𑀜𑁆𑀜𑀁𑀬𑁂𑀯 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀓𑀺𑀜𑁆𑀘𑀦𑀪𑀸𑀯𑁂𑀦 𑀞𑀺𑀢𑀸𑀬 𑀅𑀜𑁆𑀜𑀸𑀬 𑀲𑀜𑁆𑀜𑀸𑀬 𑀅𑀪𑀸𑀯𑀢𑁄 ‘‘𑀅𑀲𑀜𑁆𑀜𑀻’’𑀢𑀺 𑀧𑀯𑀢𑁆𑀢𑁄 𑀤𑀼𑀢𑀺𑀬𑀯𑀸𑀤𑁄, 𑀢𑀣𑀸 𑀲𑀜𑁆𑀜𑀸𑀬 𑀲𑀳 𑀭𑀽𑀧𑀥𑀫𑁆𑀫𑁂, 𑀲𑀩𑁆𑀩𑁂 𑀏𑀯 𑀯𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑁄 𑀢𑀢𑀺𑀬𑀯𑀸𑀤𑁄, 𑀢𑀓𑁆𑀓𑀕𑀸𑀳𑀯𑀲𑁂𑀦𑁂𑀯 𑀘𑀢𑀼𑀢𑁆𑀣𑀯𑀸𑀤𑁄 𑀧𑀯𑀢𑁆𑀢𑁄.

𑀤𑀼𑀢𑀺𑀬𑀘𑀢𑀼𑀓𑁆𑀓𑁂𑀧𑀺 𑀓𑀲𑀺𑀡𑀭𑀽𑀧𑀲𑁆𑀲 𑀅𑀲𑀜𑁆𑀚𑀸𑀦𑀦𑀲𑀪𑀸𑀯𑀢𑀸𑀬 𑀅𑀲𑀜𑁆𑀜𑀻𑀢𑀺 𑀓𑀢𑁆𑀯𑀸 𑀅𑀦𑁆𑀢𑀸𑀦𑀦𑁆𑀢𑀺𑀓𑀯𑀸𑀤𑁂 𑀯𑀼𑀢𑁆𑀢𑀦𑀬𑁂𑀦 𑀘𑀢𑁆𑀢𑀸𑀭𑁄 𑀯𑀺𑀓𑀧𑁆𑀧𑀸 𑀧𑀯𑀢𑁆𑀢𑀸. 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑁂 𑀧𑀦 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀪𑀯𑁂 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀲𑁆𑀲𑁂𑀯 𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀲𑀼 ¶ , 𑀲𑀩𑁆𑀩𑀢𑁆𑀣 𑀯𑀸 𑀧𑀝𑀼𑀲𑀜𑁆𑀜𑀸𑀓𑀺𑀘𑁆𑀘𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀸𑀬 𑀲𑀼𑀔𑀼𑀫𑀸𑀬 𑀲𑀜𑁆𑀜𑀸𑀬 𑀅𑀢𑁆𑀣𑀺𑀪𑀸𑀯𑀧𑀝𑀺𑀚𑀸𑀦𑀦𑀯𑀲𑁂𑀦 𑀧𑀞𑀫𑀯𑀸𑀤𑁄, 𑀅𑀲𑀜𑁆𑀜𑀻𑀯𑀸𑀤𑁂 𑀯𑀼𑀢𑁆𑀢𑀦𑀬𑁂𑀦 𑀲𑀼𑀔𑀼𑀫𑀸𑀬 𑀲𑀜𑁆𑀜𑀸𑀬 𑀯𑀲𑁂𑀦, 𑀲𑀜𑁆𑀚𑀸𑀦𑀦𑀲𑀪𑀸𑀯𑀢𑀸𑀧𑀝𑀺𑀚𑀸𑀦𑀦𑀯𑀲𑁂𑀦 𑀘 𑀤𑀼𑀢𑀺𑀬𑀯𑀸𑀤𑀸𑀤𑀬𑁄 𑀧𑀯𑀢𑁆𑀢𑀸𑀢𑀺. 𑀏𑀯𑀁 𑀓𑁂𑀦𑀘𑀺 𑀧𑀓𑀸𑀭𑁂𑀦 𑀲𑀢𑀺𑀧𑀺 𑀓𑀸𑀭𑀡𑀧𑀭𑀺𑀬𑁂𑀲𑀦𑀲𑀫𑁆𑀪𑀯𑁂 𑀤𑀺𑀝𑁆𑀞𑀺𑀕𑀢𑀺𑀓𑀯𑀸𑀤𑀸𑀦𑀁 𑀧𑀭𑀺𑀬𑁂𑀲𑀦𑀓𑁆𑀔𑀫𑀸𑀪𑀸𑀯𑀢𑁄 𑀆𑀤𑀭𑀁 𑀓𑀢𑁆𑀯𑀸 𑀫𑀳𑀼𑀲𑁆𑀲𑀸𑀳𑁂𑀦 𑀢𑁂𑀲𑀁 𑀓𑀸𑀭𑀡𑀁 𑀦 𑀧𑀭𑀺𑀬𑁂𑀲𑀺𑀢𑀩𑁆𑀩𑀦𑁆𑀢𑀺. 𑀏𑀢𑁂𑀲𑀁 𑀧𑀦 𑀲𑀜𑁆𑀜𑀻𑀅𑀲𑀜𑁆𑀜𑀻𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸𑀦𑀁 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀗𑁆𑀕𑀳𑁄 ‘‘𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸’’𑀢𑀺 𑀯𑀘𑀦𑀢𑁄 𑀧𑀸𑀓𑀝𑁄𑀬𑁂𑀯.

𑀉𑀘𑁆𑀙𑁂𑀤𑀯𑀸𑀤𑀯𑀡𑁆𑀡𑀦𑀸

𑁮𑁪. 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀯𑀺𑀦𑀸𑀲𑀸𑀲𑀫𑁆𑀪𑀯𑀢𑁄 𑀅𑀢𑁆𑀣𑀺𑀪𑀸𑀯𑀳𑁂𑀢𑀼𑀓𑁄 𑀉𑀘𑁆𑀙𑁂𑀤𑁄𑀢𑀺 𑀤𑀲𑁆𑀲𑁂𑀢𑀼𑀁 𑀯𑀺𑀚𑁆𑀚𑀫𑀸𑀦𑀯𑀸𑀘𑀓𑁂𑀦 𑀲𑀦𑁆𑀢-𑀲𑀤𑁆𑀤𑁂𑀦 ‘‘𑀲𑀢𑁄’’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀯𑀺𑀚𑁆𑀚𑀫𑀸𑀦𑀲𑁆𑀲𑀸’’𑀢𑀺. 𑀯𑀺𑀚𑁆𑀚𑀫𑀸𑀦𑀢𑀸𑀧𑀬𑀼𑀢𑁆𑀢𑁄 𑀘𑁂𑀲 𑀤𑀺𑀝𑁆𑀞𑀺𑀕𑀢𑀺𑀓𑀯𑀸𑀤𑀯𑀺𑀲𑀬𑁄 𑀲𑀢𑁆𑀢𑁄𑀬𑁂𑀯 𑀇𑀥 𑀅𑀥𑀺𑀧𑁆𑀧𑁂𑀢𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀧𑀸𑀴𑀺𑀬𑀁 ‘‘𑀲𑀢𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀢𑁂𑀦 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 𑁋 𑀬𑀣𑀸 𑀳𑁂𑀢𑀼𑀨𑀮𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀲𑀪𑀸𑀯𑀥𑀫𑁆𑀫𑀸𑀦𑀁 𑀲𑀢𑀺𑀧𑀺 𑀏𑀓𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀪𑀺𑀦𑁆𑀦𑀲𑀦𑁆𑀢𑀢𑀺𑀧𑀢𑀺𑀢𑁂𑀳𑀺 𑀯𑀺𑀲𑁂𑀲𑁂 𑀳𑁂𑀢𑀼𑀨𑀮𑀪𑀽𑀢𑀸𑀦𑀁 𑀧𑀭𑀫𑀢𑁆𑀣𑀢𑁄 𑀪𑀺𑀦𑁆𑀦𑀲𑀪𑀸𑀯𑀢𑁆𑀢𑀸 ¶ 𑀪𑀺𑀦𑁆𑀦𑀲𑀦𑁆𑀢𑀸𑀦𑀧𑀢𑀺𑀢𑀸𑀦𑀁 𑀯𑀺𑀬 𑀅𑀘𑁆𑀘𑀦𑁆𑀢𑀁 𑀪𑁂𑀤𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀦𑀸𑀦𑀢𑁆𑀢𑀦𑀬𑀲𑁆𑀲 𑀫𑀺𑀘𑁆𑀙𑀸𑀕𑀳𑀡𑀁 𑀉𑀘𑁆𑀙𑁂𑀤𑀸𑀪𑀺𑀦𑀺𑀯𑁂𑀲𑀲𑁆𑀲 𑀓𑀸𑀭𑀡𑀁, 𑀏𑀯𑀁 𑀳𑁂𑀢𑀼𑀨𑀮𑀪𑀽𑀢𑀸𑀦𑀁 𑀯𑀺𑀚𑁆𑀚𑀫𑀸𑀦𑁂𑀧𑀺 𑀲𑀪𑀸𑀯𑀪𑁂𑀤𑁂 𑀏𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀏𑀓𑀢𑁆𑀢𑀦𑀬𑁂𑀦 𑀅𑀘𑁆𑀘𑀦𑁆𑀢𑀫𑀪𑁂𑀤𑀕𑀳𑀡𑀫𑁆𑀧𑀺 𑀓𑀸𑀭𑀡𑀫𑁂𑀯𑀸𑀢𑀺. 𑀲𑀦𑁆𑀢𑀸𑀦𑀯𑀲𑁂𑀦 𑀳𑀺 𑀧𑀯𑀢𑁆𑀢𑀫𑀸𑀦𑁂𑀲𑀼 𑀔𑀦𑁆𑀥𑁂𑀲𑀼 𑀖𑀦𑀯𑀺𑀦𑀺𑀩𑁆𑀪𑁄𑀕𑀸𑀪𑀸𑀯𑁂𑀦 𑀢𑁂𑀲𑀁 𑀇𑀥 𑀲𑀢𑁆𑀢𑀕𑀸𑀳𑁄, 𑀲𑀢𑁆𑀢𑀲𑁆𑀲 𑀘 𑀅𑀢𑁆𑀣𑀺𑀪𑀸𑀯𑀕𑀸𑀳𑀳𑁂𑀢𑀼𑀓𑁄 𑀉𑀘𑁆𑀙𑁂𑀤𑀯𑀸𑀤𑁄, 𑀅𑀦𑀼𑀧𑀼𑀩𑁆𑀩𑀦𑀺𑀭𑁄𑀥𑀯𑀲𑁂𑀦 𑀧𑀦 𑀦𑀺𑀭𑀦𑁆𑀢𑀭𑀯𑀺𑀦𑀸𑀲𑁄 𑀇𑀥 ‘‘𑀉𑀘𑁆𑀙𑁂𑀤𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄 𑀬𑀸𑀯𑀸𑀬𑀁 𑀅𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀫𑀸𑀦𑁄 𑀪𑀯𑀢𑀺, 𑀢𑀸𑀯𑀸𑀬𑀁 𑀯𑀺𑀚𑁆𑀚𑀢𑀺𑀬𑁂𑀯𑀸𑀢𑀺 𑀕𑀳𑀡𑀢𑁄𑀢𑀺 𑀆𑀳 ‘‘𑀉𑀧𑀘𑁆𑀙𑁂𑀤’’𑀦𑁆𑀢𑀺. 𑀉-𑀲𑀤𑁆𑀤𑁄 𑀳𑀺 𑀉𑀧-𑀲𑀤𑁆𑀤𑀧𑀭𑀺𑀬𑀸𑀬𑁄, 𑀲𑁄 𑀘 𑀉𑀧𑀲𑀗𑁆𑀓𑀫𑀦𑀢𑁆𑀣𑁄, 𑀉𑀧𑀲𑀗𑁆𑀓𑀫𑀦𑀜𑁆𑀘𑁂𑀢𑁆𑀣 𑀅𑀦𑀼𑀧𑀼𑀩𑁆𑀩𑀫𑀼𑀧𑁆𑀧𑀚𑁆𑀚𑀺𑀢𑁆𑀯𑀸 𑀅𑀧𑀭𑀸𑀧𑀭𑀁 𑀦𑀺𑀭𑁄𑀥𑀯𑀲𑁂𑀦 𑀦𑀺𑀭𑀦𑁆𑀢𑀭𑀢𑀸. 𑀅𑀧𑀺𑀘 𑀧𑀼𑀦𑀸𑀦𑀼𑀧𑁆𑀧𑀚𑁆𑀚𑀫𑀸𑀦𑀯𑀲𑁂𑀦 𑀦𑀺𑀭𑀼𑀤𑀬𑀯𑀺𑀦𑀸𑀲𑁄𑀬𑁂𑀯 𑀉𑀘𑁆𑀙𑁂𑀤𑁄 𑀦𑀸𑀫 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀕𑀳𑀡𑀢𑁄𑀢𑀺 𑀆𑀳 ‘‘𑀉𑀧𑀘𑁆𑀙𑁂𑀤’’𑀦𑁆𑀢𑀺. 𑀉-𑀲𑀤𑁆𑀤𑁄, 𑀳𑀺 𑀉𑀧-𑀲𑀤𑁆𑀤𑁄 𑀘 𑀏𑀢𑁆𑀣 𑀉𑀧𑀭𑀺𑀪𑀸𑀕𑀢𑁆𑀣𑁄. 𑀦𑀺𑀭𑀼𑀤𑁆𑀥𑀢𑁄 𑀧𑀭𑀪𑀸𑀕𑁄 𑀘 𑀇𑀥 𑀉𑀧𑀭𑀺𑀪𑀸𑀕𑁄𑀢𑀺 𑀯𑀼𑀘𑁆𑀘𑀢𑀺.

𑀦𑀺𑀭𑀦𑁆𑀢𑀭𑀯𑀲𑁂𑀦 ¶ , 𑀦𑀺𑀭𑀼𑀤𑀬𑀯𑀲𑁂𑀦 𑀯𑀸 𑀯𑀺𑀲𑁂𑀲𑁂𑀦 𑀦𑀸𑀲𑁄 𑀯𑀺𑀦𑀸𑀲𑁄, 𑀲𑁄 𑀧𑀦 𑀫𑀁𑀲𑀘𑀓𑁆𑀔𑀼𑀧𑀜𑁆𑀜𑀸𑀘𑀓𑁆𑀔𑀽𑀦𑀁 𑀤𑀲𑁆𑀲𑀦𑀧𑀣𑀸𑀢𑀺𑀓𑁆𑀓𑀫𑀦𑀢𑁄 𑀅𑀤𑀲𑁆𑀲𑀦𑀫𑁂𑀯𑀸𑀢𑀺 𑀆𑀳 ‘‘𑀅𑀤𑀲𑁆𑀲𑀦’’𑀦𑁆𑀢𑀺. 𑀅𑀤𑀲𑁆𑀲𑀦𑁂 𑀳𑀺 𑀦𑀸𑀲-𑀲𑀤𑁆𑀤𑁄 𑀮𑁄𑀓𑁂 𑀦𑀺𑀭𑀼𑀴𑁆𑀳𑁄 ‘‘𑀤𑁆𑀯𑁂 𑀘𑀸𑀧𑀭𑁂 𑀯𑀡𑁆𑀡𑀯𑀺𑀓𑀸𑀭𑀦𑀸𑀲𑀸’’𑀢𑀺𑀆𑀤𑀻𑀲𑀼 (𑀓𑀸𑀲𑀺𑀓𑀸 𑁬-𑁩-𑁧𑁦𑁯 𑀲𑀼𑀢𑁆𑀢𑀁 𑀧𑀲𑁆𑀲𑀺𑀢𑀩𑁆𑀩𑀁) 𑀯𑀺𑀬. 𑀪𑀸𑀯𑀯𑀺𑀕𑀫𑀦𑁆𑀢𑀺 𑀲𑀪𑀸𑀯𑀸𑀧𑀕𑀫𑀁. 𑀬𑀣𑀸𑀥𑀫𑁆𑀫𑀁 𑀪𑀯𑀦𑀁 𑀪𑀸𑀯𑁄𑀢𑀺 𑀳𑀺 𑀅𑀢𑁆𑀣𑁂𑀦 𑀇𑀥 𑀪𑀸𑀯-𑀲𑀤𑁆𑀤𑁄 𑀲𑀪𑀸𑀯𑀯𑀸𑀘𑀓𑁄. 𑀬𑁄 𑀧𑀦 𑀦𑀺𑀭𑀦𑁆𑀢𑀭𑀁 𑀦𑀺𑀭𑀼𑀤𑀬𑀯𑀺𑀦𑀸𑀲𑀯𑀲𑁂𑀦 𑀉𑀘𑁆𑀙𑀺𑀚𑁆𑀚𑀢𑀺, 𑀲𑁄 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀞𑀸𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 ‘‘𑀪𑀸𑀯𑀸𑀧𑀕𑀫𑁄’’𑀢𑀺 𑀯𑀼𑀘𑁆𑀘𑀢𑀺. ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀉𑀘𑁆𑀙𑁂𑀤𑀯𑀸𑀤𑀲𑁆𑀲 𑀬𑀣𑀸𑀧𑀸𑀞𑀁 𑀲𑀫𑀼𑀤𑀸𑀕𑀫𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑁂𑀦 𑀤𑀲𑁆𑀲𑁂𑀢𑀺, 𑀢𑁂𑀦 𑀯𑀓𑁆𑀔𑀢𑀺 ‘‘𑀢𑀣𑀸 𑀘 𑀅𑀜𑁆𑀜𑀣𑀸 𑀘 𑀯𑀺𑀓𑀧𑁆𑀧𑁂𑀢𑁆𑀯𑀸𑀯𑀸’’𑀢𑀺. 𑀢𑀢𑁆𑀣𑀸𑀢𑀺 ‘‘𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺 𑀯𑀘𑀦𑁂. 𑀮𑀸𑀪𑀻𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀮𑀸𑀪𑀻. 𑀢𑀤𑀯𑀲𑁂𑀲𑀮𑀸𑀪𑀻 𑀘𑁂𑀯 𑀲𑀩𑁆𑀩𑀲𑁄 𑀅𑀮𑀸𑀪𑀻 𑀘 𑀇𑀥 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀝𑁆𑀞𑀸𑀦𑁂 ‘‘𑀅𑀮𑀸𑀪𑀻’’ 𑀢𑁆𑀯𑁂𑀯 𑀯𑀼𑀘𑁆𑀘𑀢𑀺.

𑀘𑀼𑀢𑀺𑀦𑁆𑀢𑀺 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀫𑁆𑀧𑀺 𑀘𑀼𑀢𑀺𑀫𑁂𑀯. 𑀏𑀲 𑀦𑀬𑁄 𑀘𑀼𑀢𑀺𑀫𑀢𑁆𑀢𑀫𑁂𑀯𑀸𑀢𑀺 𑀏𑀢𑁆𑀣𑀸𑀧𑀺. 𑀉𑀧𑀧𑀢𑁆𑀢𑀺𑀁 𑀅𑀧𑀲𑁆𑀲𑀦𑁆𑀢𑁄𑀢𑀺 𑀤𑀝𑁆𑀞𑀼𑀁 𑀲𑀫𑀢𑁆𑀣𑁂𑀧𑀺 𑀲𑀢𑀺 𑀅𑀦𑁄𑀮𑁄𑀓𑀦𑀯𑀲𑁂𑀦 𑀅𑀧𑀲𑁆𑀲𑀦𑁆𑀢𑁄. 𑀦 𑀉𑀧𑀧𑀸𑀢𑀦𑁆𑀢𑀺 𑀧𑀼𑀩𑁆𑀩𑀬𑁄𑀕𑀸𑀪𑀸𑀯𑁂𑀦, 𑀧𑀭𑀺𑀓𑀫𑁆𑀫𑀸𑀓𑀭𑀡𑁂𑀦 𑀯𑀸 𑀉𑀧𑀧𑀢𑁆𑀢𑀺𑀁 𑀤𑀝𑁆𑀞𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀜𑁆𑀘 𑀓𑀢𑁆𑀯𑀸 𑀦𑀬𑀤𑁆𑀯𑀬𑁂 𑀯𑀺𑀲𑁂𑀲𑁄 𑀧𑀸𑀓𑀝𑁄 𑀳𑁄𑀢𑀺. 𑀓𑁄 𑀧𑀭𑀮𑁄𑀓𑀁 𑀚𑀸𑀦𑀸𑀢𑀺, 𑀦 𑀚𑀸𑀦𑀸𑀢𑀺𑀬𑁂𑀯𑀸𑀢𑀺 𑀦𑀢𑁆𑀣𑀺𑀓𑀯𑀸𑀤𑀯𑀲𑁂𑀦 𑀉𑀘𑁆𑀙𑁂𑀤𑀁 𑀕𑀡𑁆𑀳𑀸𑀢𑀻𑀢𑀺 𑀲𑀳 𑀧𑀸𑀞𑀲𑁂𑀲𑁂𑀦 𑀲𑀫𑁆𑀩𑀦𑁆𑀥𑁄, 𑀦𑀢𑁆𑀣𑀺𑀓𑀯𑀸𑀤𑀯𑀲𑁂𑀦 𑀫𑀳𑀸𑀫𑀽𑀴𑁆𑀳𑀪𑀸𑀯𑁂𑀦𑁂𑀯 ‘‘𑀇𑀢𑁄 𑀅𑀜𑁆𑀜𑁄 𑀧𑀭𑀮𑁄𑀓𑁄 𑀅𑀢𑁆𑀣𑀻’’𑀢𑀺 𑀅𑀦𑀯𑀩𑁄𑀥𑀦𑀢𑁄 𑀇𑀫𑀁 𑀤𑀺𑀝𑁆𑀞𑀺𑀁 𑀕𑀡𑁆𑀳𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀏𑀢𑁆𑀢𑀓𑁄𑀬𑁂𑀯 𑀯𑀺𑀲𑀬𑁄, 𑀬𑁆𑀯𑀸𑀬𑀁 𑀇𑀦𑁆𑀤𑁆𑀭𑀺𑀬𑀕𑁄𑀘𑀭𑁄’’𑀢𑀺 𑀅𑀢𑁆𑀢𑀦𑁄 𑀥𑀻𑀢𑀼𑀬𑀸 𑀳𑀢𑁆𑀣𑀕𑁆𑀕𑀡𑁆𑀳𑀦𑀓𑀭𑀸𑀚𑀸 𑀯𑀺𑀬 𑀓𑀸𑀫𑀲𑀼𑀔𑀸𑀪𑀺𑀭𑀢𑁆𑀢𑀢𑀸𑀬𑀧𑀺 𑀕𑀡𑁆𑀳𑀸𑀢𑀻𑀢𑀺 𑀆𑀳 ‘‘𑀓𑀸𑀫𑀲𑀼𑀔𑀕𑀺𑀤𑁆𑀥𑀢𑀸𑀬 𑀯𑀸’’𑀢𑀺. 𑀯𑀡𑁆𑀝𑀢𑁄 𑀧𑀢𑀺𑀢𑀧𑀡𑁆𑀡𑀸𑀦𑀁 𑀯𑀡𑁆𑀝𑁂𑀦 𑀅𑀧𑀝𑀺𑀲𑀦𑁆𑀥𑀺𑀓𑀪𑀸𑀯𑀁 ¶ 𑀲𑀦𑁆𑀥𑀸𑀬 ‘‘𑀦 𑀧𑀼𑀦 𑀯𑀺𑀭𑀼𑀳𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀯𑀫𑁂𑀯 𑀲𑀢𑁆𑀢𑀸𑀢𑀺 𑀬𑀣𑀸 𑀧𑀡𑁆𑀟𑀼𑀧𑀮𑀸𑀲𑁄 𑀩𑀦𑁆𑀥𑀦𑀸 𑀧𑀯𑀼𑀢𑁆𑀢𑁄 𑀧𑀼𑀦 𑀦 𑀧𑀝𑀺𑀲𑀦𑁆𑀥𑀻𑀬𑀢𑀺, 𑀏𑀯𑀫𑁂𑀯 𑀲𑀩𑁆𑀩𑁂𑀧𑀺 𑀲𑀢𑁆𑀢𑀸 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸 𑀫𑀭𑀡𑀧𑀭𑀺𑀬𑁄𑀲𑀸𑀦𑀸 𑀅𑀧𑁄𑀦𑁄𑀩𑁆𑀪𑀯𑀺𑀓𑀸 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀫𑀭𑀡𑀫𑁂𑀯 𑀦𑀺𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀉𑀤𑀓𑀧𑀼𑀩𑁆𑀩𑀼𑀴𑀓𑀽𑀧𑀫𑀸 𑀳𑀺 𑀲𑀢𑁆𑀢𑀸 𑀧𑀼𑀦 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀢𑁄𑀢𑀺 𑀢𑀲𑁆𑀲 𑀮𑀤𑁆𑀥𑀺. 𑀢𑀣𑀸𑀢𑀺 ‘‘𑀮𑀸𑀪𑀻 𑀅𑀦𑀼𑀲𑁆𑀲𑀭𑀦𑁆𑀢𑁄’’𑀢𑀺𑀆𑀤𑀺𑀦𑀸 [𑀅𑀭𑀳𑀢𑁄 (𑀅𑀝𑁆𑀞)] 𑀦𑀺𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀅𑀜𑁆𑀜𑀣𑀸𑀢𑀺 𑀢𑀓𑁆𑀓𑀦𑀲𑁆𑀲 𑀅𑀦𑁂𑀓𑀧𑁆𑀧𑀓𑀸𑀭𑀲𑀫𑁆𑀪𑀯𑀢𑁄 𑀢𑀢𑁄 𑀅𑀜𑁆𑀜𑁂𑀦𑀧𑀺 𑀧𑀓𑀸𑀭𑁂𑀦. 𑀮𑀸𑀪𑀺𑀦𑁄𑀧𑀺 𑀘𑀼𑀢𑀺𑀢𑁄 ¶ 𑀉𑀤𑁆𑀥𑀁 𑀉𑀧𑀧𑀸𑀢𑀲𑁆𑀲 𑀅𑀤𑀲𑁆𑀲𑀦𑀫𑀢𑁆𑀢𑀁 𑀧𑀢𑀺 𑀢𑀓𑁆𑀓𑀦𑁂𑀦𑁂𑀯 𑀇𑀫𑀸 𑀤𑀺𑀝𑁆𑀞𑀺𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀓𑀧𑁆𑀧𑁂𑀢𑁆𑀯𑀸𑀯𑀸’’𑀢𑀺. 𑀢𑀣𑀸 𑀘 𑀯𑀺𑀓𑀧𑁆𑀧𑁂𑀢𑁆𑀯𑀸𑀯 𑀉𑀧𑁆𑀧𑀦𑁆𑀦𑀸 𑀅𑀜𑁆𑀜𑀣𑀸 𑀘 𑀯𑀺𑀓𑀧𑁆𑀧𑁂𑀢𑁆𑀯𑀸𑀯 𑀉𑀧𑁆𑀧𑀦𑁆𑀦𑀸𑀢𑀺 𑀳𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 ‘‘𑀤𑁆𑀯𑁂 𑀚𑀦𑀸’’𑀢𑀺𑀆𑀤𑀺𑀦𑀸 𑀉𑀘𑁆𑀙𑁂𑀤𑀕𑁆𑀕𑀸𑀳𑀓𑀧𑁆𑀧𑀪𑁂𑀤𑀤𑀲𑁆𑀲𑀦𑁂𑀦 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀬𑀣𑀸 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀯𑀸𑀤𑀸 𑀏𑀓𑀦𑁆𑀢𑀅𑀮𑀸𑀪𑀻𑀯𑀲𑁂𑀦𑁂𑀯 𑀤𑁂𑀲𑀺𑀢𑀸, 𑀬𑀣𑀸 𑀘 𑀉𑀤𑁆𑀥𑀫𑀸𑀖𑀸𑀢𑀦𑀺𑀓𑀲𑀜𑁆𑀜𑀻𑀯𑀸𑀤𑁂 𑀘𑀢𑀼𑀢𑁆𑀣𑀘𑀢𑀼𑀓𑁆𑀓𑁂 𑀲𑀜𑁆𑀜𑀻𑀯𑀸𑀤𑀸 𑀏𑀓𑀦𑁆𑀢𑀮𑀸𑀪𑀻𑀯𑀲𑁂𑀦𑁂𑀯 𑀤𑁂𑀲𑀺𑀢𑀸, 𑀦𑀬𑀺𑀫𑁂. 𑀇𑀫𑁂 𑀧𑀦 𑀲𑀲𑁆𑀲𑀢𑁂𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀸𑀤𑀬𑁄 𑀯𑀺𑀬 𑀮𑀸𑀪𑀻𑀅𑀮𑀸𑀪𑀻𑀯𑀲𑁂𑀦𑁂𑀯 𑀤𑁂𑀲𑀺𑀢𑀸𑀢𑀺. 𑀬𑀤𑁂𑀯𑀁 𑀓𑀲𑁆𑀫𑀸 𑀲𑀲𑁆𑀲𑀢𑀯𑀸𑀤𑀸𑀤𑀻𑀲𑀼 𑀯𑀺𑀬 𑀮𑀸𑀪𑀻𑀯𑀲𑁂𑀦, 𑀢𑀓𑁆𑀓𑀻𑀯𑀲𑁂𑀦 𑀘 𑀧𑀘𑁆𑀘𑁂𑀓𑀁 𑀤𑁂𑀲𑀦𑀫𑀓𑀢𑁆𑀯𑀸 𑀲𑀲𑁆𑀲𑀢𑀯𑀸𑀤𑀸𑀤𑀺𑀤𑁂𑀲𑀦𑀸𑀳𑀺 𑀅𑀜𑁆𑀜𑀣𑀸 𑀇𑀥 𑀤𑁂𑀲𑀦𑀸 𑀓𑀢𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑀺𑀢𑁄. 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄, 𑀢𑁂 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀯𑀺𑀯𑀺𑀥𑁂𑀦𑀸𑀓𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀦 𑀅𑀜𑁆𑀜𑀣𑀸. 𑀬𑀤𑀺 𑀳𑀺 𑀇𑀥𑀸𑀧𑀺 𑀘 𑀢𑀣𑀸𑀤𑁂𑀲𑀦𑀸𑀬 𑀦𑀺𑀩𑀦𑁆𑀥𑀦𑀪𑀽𑀢𑁄 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑁄 𑀪𑀯𑁂𑀬𑁆𑀬, 𑀢𑀣𑀸𑀭𑀽𑀧𑀫𑁂𑀯 𑀪𑀕𑀯𑀸 𑀯𑀤𑁂𑀬𑁆𑀬, 𑀓𑀣𑀁? ‘‘𑀇𑀥 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀆𑀢𑀧𑁆𑀧𑀫𑀦𑁆𑀯𑀸𑀬…𑀧𑁂… 𑀬𑀣𑀸 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺, 𑀲𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀅𑀭𑀳𑀢𑁄 𑀘𑀼𑀢𑀺𑀘𑀺𑀢𑁆𑀢𑀁 𑀧𑀲𑁆𑀲𑀢𑀺, 𑀧𑀼𑀣𑀽𑀦𑀁 𑀯𑀸 𑀧𑀭𑀲𑀢𑁆𑀢𑀸𑀦𑀁, 𑀦 𑀳𑁂𑀯 𑀔𑁄 𑀢𑀤𑀼𑀤𑁆𑀥𑀁 𑀉𑀧𑀧𑀢𑁆𑀢𑀺𑀁. 𑀲𑁄 𑀏𑀯𑀫𑀸𑀳 ‘𑀬𑀢𑁄 𑀔𑁄 𑀪𑁄 𑀅𑀬𑀁 𑀅𑀢𑁆𑀢𑀸 𑀭𑀽𑀧𑀻 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑁄 𑀓𑀸𑀬𑀲𑁆𑀲 𑀪𑀤𑁄 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺, 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸’𑀢𑀺𑀆𑀤𑀺𑀦𑀸’’ 𑀯𑀺𑀲𑁂𑀲𑀮𑀸𑀪𑀺𑀦𑁄, 𑀢𑀓𑁆𑀓𑀺𑀦𑁄 𑀘 𑀯𑀺𑀲𑀼𑀁 𑀓𑀢𑁆𑀯𑀸. 𑀬𑀲𑁆𑀫𑀸 𑀧𑀦 𑀢𑀣𑀸𑀤𑁂𑀲𑀦𑀸𑀬 𑀦𑀺𑀩𑀦𑁆𑀥𑀦𑀪𑀽𑀢𑁄 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑁄 𑀦 𑀇𑀥 𑀪𑀯𑀢𑀺, 𑀢𑀲𑁆𑀫𑀸 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀲𑀲𑁆𑀲𑀢𑀯𑀸𑀤𑀸𑀤𑀺𑀤𑁂𑀲𑀦𑀸𑀳𑀺 𑀅𑀜𑁆𑀜𑀣𑀸𑀬𑁂𑀯𑀸𑀬𑀁 𑀤𑁂𑀲𑀦𑀸 𑀓𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀣 𑀯𑀸 𑀲𑀲𑁆𑀲𑀢𑁂𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀸𑀤𑀻𑀲𑀼 𑀯𑀺𑀬 𑀦 𑀇𑀥 𑀢𑀓𑁆𑀓𑀻𑀯𑀸𑀤𑀢𑁄 𑀯𑀺𑀲𑁂𑀲𑀮𑀸𑀪𑀻𑀯𑀸𑀤𑁄 𑀪𑀺𑀦𑁆𑀦𑀸𑀓𑀸𑀭𑁄, 𑀅𑀣 𑀔𑁄 𑀲𑀫𑀸𑀦𑀧𑁆𑀧𑀓𑀸𑀭𑀢𑀸𑀬 𑀲𑀫𑀸𑀦𑀸𑀓𑀸𑀭𑁄𑀬𑁂𑀯𑀸𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀧𑀓𑀸𑀲𑀦𑀢𑁆𑀣𑀁 𑀅𑀬𑀫𑀼𑀘𑁆𑀙𑁂𑀤𑀯𑀸𑀤𑁄 𑀪𑀕𑀯𑀢𑀸 𑀧𑀼𑀭𑀺𑀫𑀯𑀸𑀤𑁂𑀳𑀺 𑀯𑀺𑀲𑀺𑀝𑁆𑀞𑀸𑀓𑀸𑀭𑀪𑀸𑀯𑁂𑀦 𑀤𑁂𑀲𑀺𑀢𑁄. 𑀲𑀫𑁆𑀪𑀯𑀢𑀺 𑀳𑀺 𑀇𑀥 𑀢𑀓𑁆𑀓𑀺𑀦𑁄𑀧𑀺 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦 𑀅𑀥𑀺𑀕𑀫𑀯𑀢𑁄 𑀯𑀺𑀬 𑀅𑀪𑀺𑀦𑀺𑀯𑁂𑀲𑁄. 𑀅𑀧𑀺𑀘 𑀦 𑀇𑀫𑀸 𑀤𑀺𑀝𑁆𑀞𑀺𑀬𑁄 𑀪𑀕𑀯𑀢𑀸 𑀅𑀦𑀸𑀕𑀢𑁂 𑀏𑀯𑀁𑀪𑀸𑀯𑀻𑀯𑀲𑁂𑀦 ¶ 𑀤𑁂𑀲𑀺𑀢𑀸, 𑀦𑀸𑀧𑀺 𑀏𑀯𑀫𑁂𑀢𑁂 𑀪𑀯𑁂𑀬𑁆𑀬𑀼𑀦𑁆𑀢𑀺 𑀧𑀭𑀺𑀓𑀧𑁆𑀧𑀦𑀸𑀯𑀲𑁂𑀦, 𑀅𑀣 𑀔𑁄 ¶ 𑀬𑀣𑀸 𑀬𑀣𑀸 𑀤𑀺𑀝𑁆𑀞𑀺𑀕𑀢𑀺𑀓𑁂𑀳𑀺 ‘‘𑀇𑀤𑀫𑁂𑀯 𑀲𑀘𑁆𑀘𑀁, 𑀫𑁄𑀖𑀫𑀜𑁆𑀜’’𑀦𑁆𑀢𑀺 (𑀫. 𑀦𑀺. 𑁨.𑁧𑁮𑁭, 𑁨𑁦𑁩, 𑁪𑁨𑁭; 𑁩.𑁨𑁭, 𑁨𑁮; 𑀉𑀤𑀸. 𑁫𑁫) 𑀫𑀜𑁆𑀜𑀺𑀢𑀸, 𑀢𑀣𑀸 𑀢𑀣𑀸𑀬𑁂𑀯 𑀇𑀫𑁂 𑀤𑀺𑀝𑁆𑀞𑀺𑀕𑀢𑀸 𑀬𑀣𑀸𑀪𑀼𑀘𑁆𑀘𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀓𑀸𑀲𑀺𑀢𑀸, 𑀬𑁂𑀳𑀺 𑀕𑀫𑁆𑀪𑀻𑀭𑀸𑀤𑀺𑀧𑁆𑀧𑀓𑀸𑀭𑀸 𑀅𑀧𑀼𑀣𑀼𑀚𑁆𑀚𑀦𑀕𑁄𑀘𑀭𑀸 𑀩𑀼𑀤𑁆𑀥𑀥𑀫𑁆𑀫𑀸 𑀧𑀓𑀸𑀲𑀦𑁆𑀢𑀺, 𑀬𑁂𑀲𑀜𑁆𑀘 𑀧𑀭𑀺𑀓𑀺𑀢𑁆𑀢𑀦𑁂𑀦 𑀢𑀣𑀸𑀕𑀢𑀸 𑀲𑀫𑁆𑀫𑀤𑁂𑀯 𑀣𑁄𑀫𑀺𑀢𑀸 𑀳𑁄𑀦𑁆𑀢𑀺.

𑀅𑀧𑀭𑁄 𑀦𑀬𑁄 𑁋 𑀬𑀣𑀸 𑀉𑀘𑁆𑀙𑁂𑀤𑀯𑀸𑀤𑀻𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑁂𑀳𑀺 𑀉𑀢𑁆𑀢𑀭𑀼𑀢𑁆𑀢𑀭𑀪𑀯𑀤𑀲𑁆𑀲𑀻𑀳𑀺 𑀅𑀧𑀭𑀪𑀯𑀤𑀲𑁆𑀲𑀻𑀦𑀁 𑀢𑁂𑀲𑀁 𑀯𑀸𑀤𑀧𑀝𑀺𑀲𑁂𑀥𑀯𑀲𑁂𑀦 𑀲𑀓𑀲𑀓𑀯𑀸𑀤𑀸 𑀧𑀢𑀺𑀝𑁆𑀞𑀸𑀧𑀺𑀢𑀸, 𑀢𑀣𑀸𑀬𑁂𑀯𑀸𑀬𑀁 𑀤𑁂𑀲𑀦𑀸 𑀓𑀢𑀸𑀢𑀺 𑀧𑀼𑀭𑀺𑀫𑀤𑁂𑀲𑀦𑀸𑀳𑀺 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀧𑀯𑀢𑁆𑀢𑀺𑀪𑁂𑀤𑁄 𑀦 𑀘𑁄𑀤𑁂𑀢𑀩𑁆𑀩𑁄, 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀭𑀽𑀧𑀪𑀯𑀪𑁂𑀤𑀯𑀲𑁂𑀦 𑀉𑀘𑁆𑀙𑁂𑀤𑀯𑀸𑀤𑁄 𑀘𑀢𑀼𑀥𑀸 𑀯𑀺𑀪𑀚𑀺𑀢𑁆𑀯𑀸 𑀯𑀺𑀬 𑀓𑀸𑀫𑀭𑀽𑀧𑀪𑀯𑀪𑁂𑀤𑀯𑀲𑁂𑀦𑀸𑀧𑀺 𑀅𑀦𑁂𑀓𑀥𑀸 𑀯𑀺𑀪𑀚𑀺𑀢𑁆𑀯𑀸𑀬𑁂𑀯 𑀯𑀢𑁆𑀢𑀩𑁆𑀩𑁄, 𑀏𑀯𑀁 𑀲𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀲𑀢𑁆𑀢𑀓𑀢𑁄 𑀩𑀳𑀼𑀢𑀭𑀪𑁂𑀤𑁄 𑀉𑀘𑁆𑀙𑁂𑀤𑀯𑀸𑀤𑁄 𑀆𑀧𑀚𑁆𑀚𑀢𑀻𑀢𑀺, 𑀅𑀣 𑀯𑀸 𑀧𑀘𑁆𑀘𑁂𑀓𑀁 𑀓𑀸𑀫𑀭𑀽𑀧𑀪𑀯𑀪𑁂𑀤𑀯𑀲𑁂𑀦 𑀯𑀺𑀬 𑀅𑀭𑀽𑀧𑀪𑀯𑀯𑀲𑁂𑀦𑀸𑀧𑀺 𑀦 𑀯𑀺𑀪𑀚𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑁄, 𑀏𑀯𑀫𑁆𑀧𑀺 𑀲𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀲𑀢𑁆𑀢𑀓𑀢𑁄 𑀅𑀧𑁆𑀧𑀢𑀭𑀪𑁂𑀤𑁄𑀯 𑀉𑀘𑁆𑀙𑁂𑀤𑀯𑀸𑀤𑁄 𑀆𑀧𑀚𑁆𑀚𑀢𑀻𑀢𑀺 𑀘 𑀏𑀯𑀁𑀧𑀓𑀸𑀭𑀸𑀧𑀺 𑀘𑁄𑀤𑀦𑀸 𑀅𑀦𑀯𑀓𑀸𑀲𑀸 𑀏𑀯 𑀳𑁄𑀢𑀺. 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀜𑁆𑀳𑀺 𑀬𑀣𑀸𑀪𑀺𑀫𑀢𑀁 𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺.

𑁮𑁫. 𑀫𑀸𑀢𑀸𑀧𑀺𑀢𑀽𑀦𑀁 𑀏𑀢𑀦𑁆𑀢𑀺 𑀢𑀁𑀲𑀫𑁆𑀩𑀦𑁆𑀥𑀦𑀢𑁄 𑀏𑀢𑀁 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀓𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀓𑁆𑀓𑀲𑁄𑀡𑀺𑀢𑀦𑁆𑀢𑀺 𑀧𑀺𑀢𑀼 𑀲𑀼𑀓𑁆𑀓𑀁, 𑀫𑀸𑀢𑀼 𑀲𑁄𑀡𑀺𑀢𑀜𑁆𑀘, 𑀉𑀪𑀺𑀦𑁆𑀦𑀁 𑀯𑀸 𑀲𑀼𑀓𑁆𑀓𑀲𑀗𑁆𑀔𑀸𑀢𑀁 𑀲𑁄𑀡𑀺𑀢𑀁. 𑀫𑀸𑀢𑀸𑀧𑁂𑀢𑁆𑀢𑀺𑀓𑁂𑀢𑀺 𑀦𑀺𑀫𑀺𑀢𑁆𑀢𑁂 𑀘𑁂𑀢𑀁 𑀪𑀼𑀫𑁆𑀫𑀁. 𑀇𑀢𑀻𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀧𑀤𑁂𑀳𑀺. ‘‘𑀭𑀽𑀧𑀓𑀸𑀬𑀯𑀲𑁂𑀦𑀸’’𑀢𑀺 𑀅𑀯𑀢𑁆𑀯𑀸 ‘‘𑀭𑀽𑀧𑀓𑀸𑀬𑀲𑀻𑀲𑁂𑀦𑀸’’𑀢𑀺 𑀯𑀤𑀦𑁆𑀢𑁄 𑀅𑀭𑀽𑀧𑀫𑁆𑀧𑀺 𑀢𑁂𑀲𑀁 ‘‘𑀅𑀢𑁆𑀢𑀸’’𑀢𑀺 𑀕𑀳𑀡𑀁 𑀜𑀸𑀧𑁂𑀢𑀺. 𑀇𑀫𑀺𑀦𑀸 𑀧𑀓𑀸𑀭𑁂𑀦 𑀇𑀢𑁆𑀣𑀦𑁆𑀢𑀺 𑀆𑀳 ‘‘𑀏𑀯𑀫𑁂𑀓𑁂’’𑀢𑀺. 𑀏𑀯𑀁-𑀲𑀤𑁆𑀤𑁄 𑀳𑁂𑀢𑁆𑀣 𑀇𑀤𑀫𑀢𑁆𑀣𑁄, 𑀇𑀫𑀺𑀦𑀸 𑀧𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀓𑁂𑀢𑀺 𑀏𑀓𑀘𑁆𑀘𑁂, 𑀅𑀜𑁆𑀜𑁂 𑀯𑀸.

𑁮𑁬. 𑀫𑀦𑀼𑀲𑁆𑀲𑀸𑀦𑀁 𑀧𑀼𑀩𑁆𑀩𑁂 𑀕𑀳𑀺𑀢𑀢𑁆𑀢𑀸, 𑀅𑀜𑁆𑀜𑁂𑀲𑀜𑁆𑀘 𑀅𑀲𑀫𑁆𑀪𑀯𑀢𑁄 ‘‘𑀓𑀸𑀫𑀸𑀯𑀘𑀭𑁄’’𑀢𑀺 𑀏𑀢𑁆𑀣 𑀙𑀓𑀸𑀫𑀸𑀯𑀘𑀭𑀤𑁂𑀯𑀧𑀭𑀺𑀬𑀸𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀓𑀩𑀴𑀻𑀓𑀸𑀭𑁄 𑀘𑁂𑀢𑁆𑀣 𑀬𑀣𑀸𑀯𑀼𑀢𑁆𑀢𑀲𑀼𑀥𑀸𑀳𑀸𑀭𑁄.

𑁮𑁭. 𑀛𑀸𑀦𑀫𑀦𑁂𑀦 ¶ 𑀦𑀺𑀩𑁆𑀩𑀢𑁆𑀢𑁄𑀢𑀺 𑀏𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀫𑀳𑀸𑀯𑀬𑀯𑁄 𑀅𑀗𑁆𑀕𑁄, 𑀢𑀢𑁆𑀣 𑀯𑀺𑀲𑀼𑀁 𑀧𑀯𑀢𑁆𑀢𑁄 𑀧𑀘𑁆𑀘𑀗𑁆𑀕𑁄, 𑀲𑀩𑁆𑀩𑁂𑀳𑀺 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀳𑀺 𑀬𑀼𑀢𑁆𑀢𑁄 𑀢𑀣𑀸. 𑀢𑁂𑀲𑀦𑁆𑀢𑀺 𑀘𑀓𑁆𑀔𑀼𑀲𑁄𑀢𑀺𑀦𑁆𑀤𑁆𑀭𑀺𑀬𑀸𑀦𑀁. 𑀇𑀢𑀭𑁂𑀲𑀦𑁆𑀢𑀺 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀺𑀦𑁆𑀤𑁆𑀭𑀺𑀬𑀸𑀦𑀁. 𑀢𑁂𑀲𑀫𑁆𑀧𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀡𑁆𑀞𑀸𑀦𑀁 𑀧𑀼𑀭𑀺𑀲𑀯𑁂𑀲𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 ‘‘𑀲𑀫𑀸𑀦𑁂𑀧𑀺 𑀢𑀢𑁆𑀣 𑀉𑀪𑀬𑀮𑀺𑀗𑁆𑀕𑀸𑀪𑀸𑀯𑁂 𑀧𑀼𑀭𑀺𑀲𑀲𑀡𑁆𑀞𑀸𑀦𑀸𑀯 𑀢𑀢𑁆𑀣 𑀩𑁆𑀭𑀳𑁆𑀫𑀸𑀦𑁄, 𑀦 𑀇𑀢𑁆𑀣𑀺𑀲𑀡𑁆𑀞𑀸𑀦𑀸’’𑀢𑀺.

𑁮𑁮-𑁯𑁨. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦-𑀲𑀤𑁆𑀤𑁄 ¶ 𑀇𑀥 𑀪𑀯𑁂𑀬𑁂𑀯𑀸𑀢𑀺 𑀆𑀳 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀪𑀯’’𑀦𑁆𑀢𑀺. 𑀏𑀢𑁆𑀣𑀸𑀳 𑁋 𑀬𑀼𑀢𑁆𑀢𑀁 𑀢𑀸𑀯 𑀧𑀼𑀭𑀺𑀫𑁂𑀲𑀼 𑀢𑀻𑀲𑀼 𑀯𑀸𑀤𑁂𑀲𑀼 ‘‘𑀓𑀸𑀬𑀲𑁆𑀲 𑀪𑁂𑀤𑀸’’𑀢𑀺 𑀯𑀢𑁆𑀢𑀼𑀁 𑀧𑀜𑁆𑀘𑀯𑁄𑀓𑀸𑀭𑀪𑀯𑀧𑀭𑀺𑀬𑀸𑀧𑀦𑁆𑀦𑀁 𑀅𑀢𑁆𑀢𑀪𑀸𑀯𑀫𑀸𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸 𑀢𑁂𑀲𑀁 𑀯𑀸𑀤𑀸𑀦𑀁, 𑀘𑀢𑀼𑀯𑁄𑀓𑀸𑀭𑀪𑀯𑀧𑀭𑀺𑀬𑀸𑀧𑀦𑁆𑀦𑀁 𑀧𑀦 𑀅𑀢𑁆𑀢𑀪𑀸𑀯𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑁂𑀲𑀼 𑀘𑀢𑀼𑀢𑁆𑀣𑀸𑀤𑀻𑀲𑀼 𑀘𑀢𑀽𑀲𑀼 𑀯𑀸𑀤𑁂𑀲𑀼 𑀓𑀲𑁆𑀫𑀸 ‘‘𑀓𑀸𑀬𑀲𑁆𑀲 𑀪𑁂𑀤𑀸’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀅𑀭𑀽𑀧𑀻𑀦𑀁 𑀓𑀸𑀬𑁄 𑀯𑀺𑀚𑁆𑀚𑀢𑀺. 𑀬𑁄 𑀪𑁂𑀤𑁄𑀢𑀺 𑀯𑀼𑀘𑁆𑀘𑁂𑀬𑁆𑀬𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀭𑀽𑀧𑀢𑁆𑀢𑀪𑀸𑀯𑁂 𑀧𑀦 𑀧𑀯𑀢𑁆𑀢𑀯𑁄𑀳𑀸𑀭𑁂𑀦𑁂𑀯 𑀤𑀺𑀝𑁆𑀞𑀺𑀕𑀢𑀺𑀓𑁄 𑀅𑀭𑀽𑀧𑀢𑁆𑀢𑀪𑀸𑀯𑁂𑀧𑀺 𑀓𑀸𑀬𑀯𑁄𑀳𑀸𑀭𑀁 𑀆𑀭𑁄𑀧𑁂𑀢𑁆𑀯𑀸 𑀏𑀯𑀫𑀸𑀳. 𑀮𑁄𑀓𑀲𑁆𑀫𑀺𑀜𑁆𑀳𑀺 𑀤𑀺𑀲𑁆𑀲𑀢𑀺 𑀅𑀜𑁆𑀜𑀢𑁆𑀣𑀪𑀽𑀢𑁄𑀧𑀺 𑀯𑁄𑀳𑀸𑀭𑁄 𑀢𑀤𑀜𑁆𑀜𑀢𑁆𑀣𑀲𑀫𑀸𑀭𑁄𑀧𑀺𑀢𑁄 𑀬𑀣𑀸 𑀢𑀁 ‘‘𑀲𑀲𑀯𑀺𑀲𑀸𑀡𑀁, 𑀔𑀁 𑀧𑀼𑀧𑁆𑀨’’𑀦𑁆𑀢𑀺. 𑀬𑀣𑀸 𑀘 𑀤𑀺𑀝𑁆𑀞𑀺𑀕𑀢𑀺𑀓𑀸 𑀤𑀺𑀝𑁆𑀞𑀺𑀬𑁄 𑀧𑀜𑁆𑀜𑀧𑁂𑀦𑁆𑀢𑀺, 𑀢𑀣𑀸𑀬𑁂𑀯 𑀪𑀕𑀯𑀸𑀧𑀺 𑀤𑁂𑀲𑁂𑀢𑀻𑀢𑀺. 𑀅𑀧𑀺𑀘 𑀦𑀸𑀫𑀓𑀸𑀬𑀪𑀸𑀯𑀢𑁄 𑀨𑀲𑁆𑀲𑀸𑀤𑀺𑀥𑀫𑁆𑀫𑀲𑀫𑀽𑀳𑀪𑀽𑀢𑁂 𑀅𑀭𑀽𑀧𑀢𑁆𑀢𑀪𑀸𑀯𑁂 𑀓𑀸𑀬𑀦𑀺𑀤𑁆𑀤𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀲𑀫𑀽𑀳𑀝𑁆𑀞𑁂𑀦𑀧𑀺 𑀳𑀺 ‘‘𑀓𑀸𑀬𑁄’’𑀢𑀺 𑀯𑀼𑀘𑁆𑀘𑀢𑀺 ‘‘𑀳𑀢𑁆𑀣𑀺𑀓𑀸𑀬𑁄 𑀅𑀲𑁆𑀲𑀓𑀸𑀬𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀏𑀢𑁆𑀣 𑀘 𑀓𑀸𑀫𑀸𑀯𑀘𑀭𑀤𑁂𑀯𑀢𑁆𑀢𑀪𑀸𑀯𑀸𑀤𑀺𑀦𑀺𑀭𑀯𑀲𑁂𑀲𑀯𑀺𑀪𑀯𑀧𑀢𑀺𑀝𑁆𑀞𑀸𑀧𑀓𑀸𑀦𑀁 𑀤𑀼𑀢𑀺𑀬𑀸𑀤𑀺𑀯𑀸𑀤𑀸𑀦𑀁 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀪𑀸𑀯𑁄 𑀬𑀼𑀢𑁆𑀢𑁄 𑀳𑁄𑀢𑀼 𑀅𑀦𑀸𑀕𑀢𑀤𑁆𑀥𑀯𑀺𑀲𑀬𑀢𑁆𑀢𑀸 𑀢𑁂𑀲𑀁 𑀯𑀸𑀤𑀸𑀦𑀁, 𑀓𑀣𑀁 𑀧𑀦 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀧𑀘𑁆𑀘𑀓𑁆𑀔𑀪𑀽𑀢𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀸𑀧𑀕𑀫𑀧𑀢𑀺𑀝𑁆𑀞𑀸𑀧𑀓𑀲𑁆𑀲 𑀧𑀞𑀫𑀯𑀸𑀤𑀲𑁆𑀲 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀪𑀸𑀯𑁄 𑀬𑀼𑀚𑁆𑀚𑁂𑀬𑁆𑀬 𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑁆𑀥𑀯𑀺𑀲𑀬𑀢𑁆𑀢𑀸 𑀢𑀲𑁆𑀲 𑀯𑀸𑀤𑀲𑁆𑀲. 𑀤𑀼𑀢𑀺𑀬𑀯𑀸𑀤𑀸𑀤𑀻𑀦𑀜𑁆𑀳𑀺 𑀧𑀼𑀭𑀺𑀫𑀧𑀼𑀭𑀺𑀫𑀯𑀸𑀤𑀲𑀗𑁆𑀕𑀳𑀺𑀢𑀲𑁆𑀲𑁂𑀯 𑀅𑀢𑁆𑀢𑀦𑁄 𑀅𑀦𑀸𑀕𑀢𑁂 𑀢𑀤𑀼𑀢𑁆𑀢𑀭𑀺𑀪𑀯𑀽𑀧𑀧𑀦𑁆𑀦𑀲𑁆𑀲 𑀲𑀫𑀼𑀘𑁆𑀙𑁂𑀤𑀩𑁄𑀥𑀦𑀢𑁄 𑀬𑀼𑀚𑁆𑀚𑀢𑀺 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀢𑀸, 𑀢𑀣𑀸 𑀘𑁂𑀯 𑀯𑀼𑀢𑁆𑀢𑀁 ‘‘𑀦𑁄 𑀘 𑀔𑁄 𑀪𑁄 𑀅𑀬𑀁 𑀅𑀢𑁆𑀢𑀸 𑀏𑀢𑁆𑀢𑀸𑀯𑀢𑀸 𑀲𑀫𑁆𑀫𑀸 𑀲𑀫𑀼𑀘𑁆𑀙𑀺𑀦𑁆𑀦𑁄 𑀳𑁄𑀢𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑁧.𑁮𑁫) 𑀬𑀁 𑀧𑀦 𑀢𑀢𑁆𑀣 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀺 𑀔𑁄 𑀪𑁄 𑀅𑀜𑁆𑀜𑁄 𑀅𑀢𑁆𑀢𑀸’’𑀢𑀺, (𑀤𑀻. 𑀦𑀺. 𑁧.𑁮𑁭) 𑀢𑀁 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀸𑀤𑀺𑀳𑁂𑀝𑁆𑀞𑀺𑀫𑀢𑁆𑀢𑀪𑀸𑀯𑀯𑀺𑀲𑁂𑀲𑀸𑀧𑁂𑀓𑁆𑀔𑀸𑀬 𑀯𑀼𑀢𑁆𑀢𑀁, 𑀦 𑀲𑀩𑁆𑀩𑀣𑀸 𑀅𑀜𑁆𑀜𑀪𑀸𑀯𑀢𑁄. 𑀧𑀞𑀫𑀯𑀸𑀤𑀲𑁆𑀲 𑀧𑀦 𑀅𑀦𑀸𑀕𑀢𑁂 𑀢𑀤𑀼𑀢𑁆𑀢𑀭𑀺𑀪𑀯𑀽𑀧𑀧𑀦𑁆𑀦𑀲𑁆𑀲 𑀅𑀢𑁆𑀢𑀦𑁄 𑀲𑀫𑀼𑀘𑁆𑀙𑁂𑀤𑀩𑁄𑀥𑀦𑀸𑀪𑀸𑀯𑀢𑁄 ¶ , ‘‘𑀅𑀢𑁆𑀣𑀺 𑀔𑁄 𑀪𑁄 𑀅𑀜𑁆𑀜𑁄 𑀅𑀢𑁆𑀢𑀸’’𑀢𑀺 𑀏𑀢𑁆𑀣 𑀅𑀜𑁆𑀜𑀪𑀸𑀯𑁂𑀦 𑀅𑀕𑁆𑀕𑀳𑀡𑀢𑁄 𑀘 𑀦 𑀬𑀼𑀚𑁆𑀚𑀢𑁂𑀯 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀢𑀸𑀢𑀺? 𑀦𑁄 𑀦 𑀬𑀼𑀚𑁆𑀚𑀢𑀺 𑀇𑀥𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑁂𑀧𑀺 𑀧𑀞𑀫𑀯𑀸𑀤𑀯𑀺𑀲𑀬𑀲𑁆𑀲 𑀅𑀦𑀸𑀕𑀢𑀓𑀸𑀮𑀺𑀓𑀲𑁆𑀲𑁂𑀯 𑀢𑁂𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀧𑀞𑀫𑀯𑀸𑀤𑀺𑀦𑀸𑀧𑀺 𑀳𑀺 𑀇𑀥𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀲𑁆𑀲 𑀅𑀢𑁆𑀢𑀦𑁄 𑀧𑀭𑀁 𑀫𑀭𑀡𑀸 𑀉𑀘𑁆𑀙𑁂𑀤𑁄 𑀅𑀦𑀸𑀕𑀢𑀓𑀸𑀮𑀯𑀲𑁂𑀦𑁂𑀯 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀫𑀸 𑀘𑀲𑁆𑀲 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀢𑀸𑀬 𑀦 𑀓𑁄𑀘𑀺 𑀯𑀺𑀭𑁄𑀥𑁄𑀢𑀺.

𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀯𑀡𑁆𑀡𑀦𑀸

𑁯𑁩. 𑀜𑀸𑀡𑁂𑀦 𑀤𑀝𑁆𑀞𑀩𑁆𑀩𑁄𑀢𑀺 𑀤𑀺𑀝𑁆𑀞𑁄, 𑀤𑀺𑀝𑁆𑀞𑁄 𑀘 𑀲𑁄 𑀲𑀪𑀸𑀯𑀝𑁆𑀞𑁂𑀦 𑀥𑀫𑁆𑀫𑁄 𑀘𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑁄, 𑀤𑀲𑁆𑀲𑀦𑀪𑀽𑀢𑁂𑀦 𑀜𑀸𑀡𑁂𑀦 𑀉𑀧𑀮𑀤𑁆𑀥𑀲𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀲𑁄 𑀧𑀦 𑀅𑀓𑁆𑀔𑀸𑀦𑀫𑀺𑀦𑁆𑀤𑁆𑀭𑀺𑀬𑀸𑀦𑀁 𑀅𑀪𑀺𑀫𑀼𑀔𑀻𑀪𑀽𑀢𑁄 𑀯𑀺𑀲𑀬𑁄𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀘𑁆𑀘𑀓𑁆𑀔𑀥𑀫𑁆𑀫𑁄 𑀯𑀼𑀘𑁆𑀘𑀢𑀻’’𑀢𑀺. 𑀢𑀢𑁆𑀣 𑀬𑁄 𑀅𑀦𑀺𑀦𑁆𑀤𑁆𑀭𑀺𑀬𑀯𑀺𑀲𑀬𑁄, 𑀲𑁄𑀧𑀺 𑀲𑀼𑀧𑀸𑀓𑀝𑀪𑀸𑀯𑁂𑀦 𑀇𑀦𑁆𑀤𑁆𑀭𑀺𑀬𑀯𑀺𑀲𑀬𑁄 𑀯𑀺𑀬 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀢𑁂𑀦𑁂𑀯𑀸𑀳 ‘‘𑀢𑀢𑁆𑀣 𑀢𑀢𑁆𑀣 ¶ 𑀧𑀝𑀺𑀮𑀤𑁆𑀥𑀢𑁆𑀢𑀪𑀸𑀯𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑁂 𑀬𑀣𑀸𑀓𑀫𑁆𑀫𑀁 𑀧𑀝𑀺𑀮𑀪𑀺𑀢𑀩𑁆𑀩𑀢𑁆𑀢𑀪𑀸𑀯𑀲𑁆𑀲 𑀯𑀸𑀘𑀓𑀁 𑀧𑀤𑀁, 𑀦𑀸𑀫𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀦𑀺𑀩𑁆𑀩𑀸𑀦𑀜𑁆𑀘𑁂𑀢𑁆𑀣 𑀤𑀼𑀓𑁆𑀔𑀯𑀽𑀧𑀲𑀫𑀦𑀫𑁂𑀯, 𑀦 𑀅𑀕𑁆𑀕𑀨𑀮𑀁, 𑀦 𑀘 𑀅𑀲𑀗𑁆𑀔𑀢𑀥𑀸𑀢𑀼 𑀢𑁂𑀲𑀫𑀯𑀺𑀲𑀬𑀢𑁆𑀢𑀸𑀢𑀺 𑀆𑀳 ‘‘𑀤𑀼𑀓𑁆𑀔𑀯𑀽𑀧𑀲𑀫𑀦’’𑀦𑁆𑀢𑀺. 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑁂 𑀧𑀯𑀢𑁆𑀢𑁄 𑀯𑀸𑀤𑁄 𑀏𑀢𑁂𑀲𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸𑀢𑀺𑀧𑀺 𑀬𑀼𑀚𑁆𑀚𑀢𑀺.

𑁯𑁪. 𑀓𑀸𑀫𑀦𑀻𑀬𑀢𑁆𑀢𑀸 𑀓𑀸𑀫𑀸 𑀘 𑀢𑁂 𑀅𑀦𑁂𑀓𑀸𑀯𑀬𑀯𑀸𑀦𑀁 𑀲𑀫𑀽𑀳𑀪𑀸𑀯𑀢𑁄 𑀲𑀢𑁆𑀢𑀸𑀦𑀜𑁆𑀘 𑀩𑀦𑁆𑀥𑀦𑀢𑁄 𑀕𑀼𑀡𑀸 𑀘𑀸𑀢𑀺 𑀓𑀸𑀫𑀕𑀼𑀡𑀸𑀢𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀫𑀦𑀸𑀧𑀺𑀬𑀭𑀽𑀧𑀸𑀤𑀻𑀳𑀻’’𑀢𑀺𑀆𑀤𑀺. 𑀬𑀸𑀯 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀜𑁆𑀘𑁂𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀼𑀝𑁆𑀞𑀼 𑀅𑀧𑁆𑀧𑀺𑀢𑁄𑀢𑀺 𑀲𑀫𑁆𑀫𑀸 𑀞𑀧𑀺𑀢𑁄. 𑀞𑀧𑀦𑀸 𑀘𑁂𑀢𑁆𑀣 𑀅𑀮𑁆𑀮𑀻𑀬𑀦𑀸𑀢𑀺 𑀆𑀳 ‘‘𑀅𑀮𑁆𑀮𑀻𑀦𑁄’’𑀢𑀺. 𑀧𑀭𑀺𑀢𑁄 𑀢𑀢𑁆𑀣 𑀢𑀢𑁆𑀣 𑀓𑀸𑀫𑀕𑀼𑀡𑁂𑀲𑀼 𑀬𑀣𑀸𑀲𑀓𑀁 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘𑀸𑀭𑁂𑀢𑀺 𑀕𑁄𑀘𑀭𑀁 𑀕𑀡𑁆𑀳𑀸𑀧𑁂𑀢𑀻𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑁂𑀦𑀸𑀳 ‘‘𑀇𑀢𑁄 𑀘𑀺𑀢𑁄 𑀘 𑀉𑀧𑀦𑁂𑀢𑀻’’𑀢𑀺. 𑀧𑀭𑀺-𑀲𑀤𑁆𑀤𑀯𑀺𑀲𑀺𑀝𑁆𑀞𑁄 𑀯𑀸 𑀇𑀥 𑀘𑀭-𑀲𑀤𑁆𑀤𑁄 𑀓𑀻𑀴𑀸𑀬𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀧𑀮𑀴𑀢𑀻’’𑀢𑀺𑀆𑀤𑀺 [𑀮𑀴𑀢𑀺 (𑀅𑀝𑁆𑀞𑀓𑀣𑀸𑀬𑀁)]. 𑀧𑀮𑀴𑀢𑀻𑀢𑀺 𑀳𑀺 𑀧𑀓𑀸𑀭𑁂𑀦 𑀮𑀴𑀢𑀺, 𑀯𑀺𑀮𑀸𑀲𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀦𑀸 𑀉𑀢𑁆𑀢𑀫𑀓𑀸𑀫𑀕𑀼𑀡𑀺𑀓𑀸𑀦𑀫𑁂𑀯 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀫𑀦𑁆𑀥𑀸𑀢𑀼𑀫𑀳𑀸𑀭𑀸𑀚𑀯𑀲𑀯𑀢𑁆𑀢𑀻𑀤𑁂𑀯𑀭𑀸𑀚𑀓𑀸𑀫𑀕𑀼𑀡𑀸 𑀳𑀺 𑀉𑀢𑁆𑀢𑀫𑀢𑀸𑀬 𑀦𑀺𑀤𑀲𑁆𑀲𑀺𑀢𑀸, 𑀓𑀲𑁆𑀫𑀸𑀢𑀺 𑀆𑀳 ‘‘𑀏𑀯𑀭𑀽𑀧𑁂’’𑀢𑀺𑀆𑀤𑀺.

𑁯𑁫. 𑀅𑀜𑁆𑀜𑀣𑀸𑀪𑀸𑀯𑀸𑀢𑀺 ¶ 𑀓𑀸𑀭𑀡𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀲𑀼𑀢𑁆𑀢𑀧𑀤𑁂𑀲𑀼 𑀤𑁂𑀲𑀺𑀢𑀦𑀬𑁂𑀦, 𑀏𑀢𑁂𑀦 𑀲𑁄𑀓𑀸𑀤𑀻𑀦𑀫𑀼𑀧𑁆𑀧𑀚𑁆𑀚𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀜𑀸𑀢𑀺𑀪𑁄𑀕𑀭𑁄𑀕𑀲𑀻𑀮𑀤𑀺𑀝𑁆𑀞𑀺𑀩𑁆𑀬𑀲𑀦𑁂𑀳𑀺 𑀨𑀼𑀝𑁆𑀞𑀲𑁆𑀲 𑀘𑁂𑀢𑀲𑁄 𑀅𑀩𑁆𑀪𑀦𑁆𑀢𑀭𑀁 𑀦𑀺𑀚𑁆𑀛𑀸𑀬𑀦𑀁 𑀲𑁄𑀘𑀦𑀁 𑀅𑀦𑁆𑀢𑁄𑀦𑀺𑀚𑁆𑀛𑀸𑀬𑀦𑀁, 𑀢𑀤𑁂𑀯 𑀮𑀓𑁆𑀔𑀡𑀫𑁂𑀢𑀲𑁆𑀲𑀸𑀢𑀺 𑀅𑀦𑁆𑀢𑁄𑀦𑀺𑀚𑁆𑀛𑀸𑀬𑀦𑀮𑀓𑁆𑀔𑀡𑁄. 𑀢𑀲𑁆𑀫𑀺𑀁 𑀲𑁄𑀓𑁂 𑀲𑀫𑀼𑀝𑁆𑀞𑀸𑀦𑀳𑁂𑀢𑀼𑀪𑀽𑀢𑁂 𑀦𑀺𑀲𑁆𑀲𑀺𑀢𑀁 𑀢𑀦𑁆𑀦𑀺𑀲𑁆𑀲𑀺𑀢𑀁. 𑀪𑀼𑀲𑀁 𑀯𑀺𑀮𑀧𑀦𑀁 𑀮𑀸𑀮𑀧𑁆𑀧𑀦𑀁, 𑀢𑀦𑁆𑀦𑀺𑀲𑁆𑀲𑀺𑀢𑀫𑁂𑀯 𑀮𑀸𑀮𑀧𑁆𑀧𑀦𑀁, 𑀢𑀤𑁂𑀯 𑀮𑀓𑁆𑀔𑀡𑀫𑀲𑁆𑀲𑀸𑀢𑀺 𑀢𑀦𑁆𑀦𑀺𑀲𑁆𑀲𑀺𑀢𑀮𑀸𑀮𑀧𑁆𑀧𑀦𑀮𑀓𑁆𑀔𑀡𑁄. 𑀧𑀲𑀸𑀤𑀲𑀗𑁆𑀔𑀸𑀢𑁂 𑀓𑀸𑀬𑁂 𑀦𑀺𑀲𑁆𑀲𑀺𑀢𑀲𑁆𑀲 𑀤𑀼𑀓𑁆𑀔𑀲𑀳𑀕𑀢𑀓𑀸𑀬𑀯𑀺𑀜𑁆𑀜𑀸𑀡𑀲𑁆𑀲 𑀧𑀝𑀺𑀧𑀻𑀴𑀦𑀁 𑀓𑀸𑀬𑀧𑀝𑀺𑀧𑀻𑀴𑀦𑀁, 𑀲𑀲𑀫𑁆𑀪𑀸𑀭𑀓𑀣𑀦𑀁 𑀯𑀸 𑀏𑀢𑀁 𑀬𑀣𑀸 ‘‘𑀥𑀦𑀼𑀦𑀸 𑀯𑀺𑀚𑁆𑀛𑀢𑀻’’𑀢𑀺 𑀢𑀤𑀼𑀧𑀦𑀺𑀲𑁆𑀲𑀬𑀲𑁆𑀲 𑀯𑀸 𑀅𑀦𑀺𑀝𑁆𑀞𑀭𑀽𑀧𑀲𑁆𑀲 𑀧𑀘𑁆𑀙𑀸 𑀧𑀯𑀢𑁆𑀢𑀦𑀢𑁄 ‘‘𑀭𑀽𑀧𑀓𑀸𑀬𑀲𑁆𑀲 𑀧𑀝𑀺𑀧𑀻𑀴𑀦’’𑀦𑁆𑀢𑀺𑀧𑀺 𑀯𑀝𑁆𑀝𑀢𑀺. 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀫𑀦𑀲𑁄 𑀯𑀺𑀳𑁂𑀲𑀦𑀁 𑀫𑀦𑁄𑀯𑀺𑀖𑀸𑀢𑀁. 𑀢𑀤𑁂𑀯 𑀮𑀓𑁆𑀔𑀡𑀫𑀲𑁆𑀲𑀸𑀢𑀺 𑀲𑀩𑁆𑀩𑀢𑁆𑀣 𑀬𑁄𑀚𑁂𑀢𑀩𑁆𑀩𑀁. 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀦𑀸 𑀨𑀼𑀝𑁆𑀞𑀲𑁆𑀲 𑀧𑀭𑀺𑀤𑁂𑀯𑀦𑀸𑀬𑀧𑀺 𑀅𑀲𑀓𑁆𑀓𑀼𑀡𑀦𑁆𑀢𑀲𑁆𑀲 𑀅𑀦𑁆𑀢𑁄𑀕𑀢𑀲𑁄𑀓𑀲𑀫𑀼𑀝𑁆𑀞𑀺𑀢𑁄 𑀪𑀼𑀲𑁄 𑀆𑀬𑀸𑀲𑁄 𑀉𑀧𑀸𑀬𑀸𑀲𑁄. 𑀲𑁄 𑀧𑀦 𑀘𑁂𑀢𑀲𑁄 𑀅𑀧𑁆𑀧𑀲𑀦𑁆𑀦𑀸𑀓𑀸𑀭𑁄 𑀏𑀯𑀸𑀢𑀺 𑀆𑀳 ‘‘𑀯𑀺𑀲𑀸𑀤𑀮𑀓𑁆𑀔𑀡𑁄’’𑀢𑀺. 𑀲𑀸𑀤𑀦𑀁 𑀧𑀲𑀸𑀤𑀦𑀁 𑀲𑀸𑀤𑁄, 𑀧𑀲𑀦𑁆𑀦𑀢𑀸. 𑀅𑀦𑀼𑀧𑀲𑀕𑁆𑀕𑁄𑀧𑀺 𑀳𑀺 𑀲𑀤𑁆𑀤𑁄 𑀲𑀉𑀧𑀲𑀕𑁆𑀕𑁄 𑀯𑀺𑀬 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀩𑁄𑀥𑀓𑁄 𑀬𑀣𑀸 ‘‘𑀕𑁄𑀢𑁆𑀭𑀪𑀽’’𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣. 𑀢𑀢𑁄 𑀯𑀺𑀕𑀫𑀦𑀁 𑀯𑀺𑀲𑀸𑀤𑁄, 𑀅𑀧𑁆𑀧𑀲𑀦𑁆𑀦𑀪𑀸𑀯𑁄.

𑁯𑁬. 𑀯𑀺𑀢𑀓𑁆𑀓𑀦𑀁 ¶ 𑀯𑀺𑀢𑀓𑁆𑀓𑀺𑀢𑀁, 𑀢𑀁 𑀧𑀦𑀢𑁆𑀣𑀢𑁄 𑀯𑀺𑀢𑀓𑁆𑀓𑁄𑀯, 𑀢𑀣𑀸 𑀯𑀺𑀘𑀸𑀭𑀺𑀢𑀦𑁆𑀢𑀺 𑀏𑀢𑁆𑀣𑀸𑀧𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀪𑀺𑀦𑀺𑀭𑁄𑀧𑀦𑀯𑀲𑁂𑀦 𑀧𑀯𑀢𑁆𑀢𑁄 𑀯𑀺𑀢𑀓𑁆𑀓𑁄’’𑀢𑀺𑀆𑀤𑀺. 𑀏𑀢𑁂𑀦𑀸𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑁂 𑀧𑀭𑀸𑀫𑀲𑀺𑀢𑁆𑀯𑀸 𑀓𑀭𑀡𑀦𑀺𑀤𑁆𑀤𑁂𑀲𑁄, 𑀳𑁂𑀢𑀼𑀦𑀺𑀤𑁆𑀤𑁂𑀲𑁄 𑀯𑀸. 𑀢𑁂𑀦𑁂𑀢𑀫𑀢𑁆𑀣𑀁 𑀤𑀻𑀧𑁂𑀢𑀺 ‘‘𑀔𑁄𑀪𑀓𑀭𑀲𑀪𑀸𑀯𑀢𑁆𑀢𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀢𑀁𑀲𑀳𑀺𑀢𑀫𑁆𑀧𑀺 𑀛𑀸𑀦𑀁 𑀢𑁂𑀳𑀺 𑀲𑀉𑀧𑁆𑀧𑀻𑀴𑀦𑀁 𑀯𑀺𑀬 𑀳𑁄𑀢𑀻’’𑀢𑀺, 𑀢𑁂𑀦𑀸𑀳 ‘‘𑀲𑀓𑀡𑁆𑀝𑀓𑀁 [𑀪𑀓𑀡𑁆𑀟𑀓𑀁 (𑀅𑀝𑁆𑀞𑀓𑀣𑀸𑀬𑀁)] 𑀯𑀺𑀬 𑀔𑀸𑀬𑀢𑀻’’𑀢𑀺. 𑀑𑀴𑀸𑀭𑀺𑀓𑀪𑀸𑀯𑁄 𑀳𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀗𑁆𑀔𑀸𑀢𑁂𑀦 𑀓𑀡𑁆𑀝𑀓𑁂𑀦 𑀲𑀳 𑀧𑀯𑀢𑁆𑀢𑀓𑀣𑀸. 𑀓𑀡𑁆𑀝𑀓𑀲𑀳𑀺𑀢𑀪𑀸𑀯𑁄 𑀘 𑀲𑀉𑀧𑁆𑀧𑀻𑀴𑀦𑀢𑀸 𑀏𑀯, 𑀮𑁄𑀓𑁂 𑀳𑀺 𑀲𑀓𑀡𑁆𑀝𑀓𑀁 𑀨𑀭𑀼𑀲𑀓𑀁 𑀑𑀴𑀸𑀭𑀺𑀓𑀦𑁆𑀢𑀺 𑀯𑀤𑀦𑁆𑀢𑀺.

𑁯𑁭. 𑀧𑀻𑀢𑀺𑀕𑀢𑀁 𑀧𑀻𑀢𑀺𑀬𑁂𑀯 ‘‘𑀤𑀺𑀝𑁆𑀞𑀺𑀕𑀢’’𑀦𑁆𑀢𑀺𑀆𑀤𑀻𑀲𑀼 (𑀥. 𑀲. 𑁩𑁮𑁧; 𑀫𑀳𑀸𑀦𑀺. 𑁧𑁨) 𑀯𑀺𑀬 𑀕𑀢-𑀲𑀤𑁆𑀤𑀲𑁆𑀲 𑀢𑀩𑁆𑀪𑀸𑀯𑀯𑀼𑀢𑁆𑀢𑀺𑀢𑁄. 𑀅𑀬𑀜𑁆𑀳𑀺 𑀲𑀁𑀯𑀡𑁆𑀡𑀓𑀸𑀦𑀁 𑀧𑀓𑀢𑀺, 𑀬𑀤𑀺𑀤𑀁 𑀅𑀦𑀢𑁆𑀣𑀓𑀧𑀤𑀁, 𑀢𑀼𑀮𑁆𑀬𑀸𑀥𑀺𑀓𑀭𑀡𑀧𑀤𑀜𑁆𑀘 𑀞𑀧𑁂𑀢𑁆𑀯𑀸 𑀅𑀢𑁆𑀣𑀯𑀡𑁆𑀡𑀦𑀸. 𑀢𑀣𑀸 𑀳𑀺 𑀢𑀢𑁆𑀣 𑀢𑀢𑁆𑀣 𑀤𑀺𑀲𑁆𑀲𑀢𑀺. ‘‘𑀬𑁄𑀧𑀦𑀸𑀢𑀺 ¶ 𑀬𑁄 𑀬𑀸𑀤𑀺𑀲𑁄, (𑀧𑀸𑀭𑀸. 𑁪𑁫) 𑀦𑀺𑀩𑁆𑀩𑀸𑀦𑀥𑀸𑀢𑀽𑀢𑀺 𑀦𑀺𑀩𑁆𑀩𑀸𑀬𑀦𑀫𑀢𑁆𑀢’’𑀦𑁆𑀢𑀺 𑀘 𑀆𑀤𑀺. 𑀬𑀸𑀬 𑀦𑀺𑀫𑀺𑀢𑁆𑀢𑀪𑀽𑀢𑀸𑀬 𑀉𑀩𑁆𑀩𑀺𑀮𑀸𑀯𑀦𑀧𑀻𑀢𑀺𑀬𑀸 𑀉𑀧𑁆𑀧𑀦𑁆𑀦𑀸𑀬 𑀘𑀺𑀢𑁆𑀢𑀁 𑀉𑀩𑁆𑀩𑀺𑀮𑀸𑀯𑀺𑀢𑀁 𑀦𑀸𑀫, 𑀲𑀸𑀬𑁂𑀯 𑀉𑀩𑁆𑀩𑀺𑀮𑀸𑀯𑀺𑀢𑀢𑁆𑀢𑀁 𑀪𑀸𑀯𑀯𑀸𑀘𑀓𑀲𑁆𑀲 𑀦𑀺𑀫𑀺𑀢𑁆𑀢𑁂 𑀧𑀯𑀢𑁆𑀢𑀦𑀢𑁄. 𑀇𑀢𑀺 𑀧𑀻𑀢𑀺𑀬𑀸 𑀉𑀧𑁆𑀧𑀦𑁆𑀦𑀸𑀬 𑀏𑀯 𑀘𑀺𑀢𑁆𑀢𑀲𑁆𑀲 𑀉𑀩𑁆𑀩𑀺𑀮𑀸𑀯𑀦𑀢𑁄 𑀢𑀲𑁆𑀲 𑀉𑀩𑁆𑀩𑀺𑀮𑀸𑀯𑀺𑀢𑀪𑀸𑀯𑁄 𑀧𑀻𑀢𑀺𑀬𑀸 𑀓𑀢𑁄 𑀦𑀸𑀫𑀸𑀢𑀺 𑀆𑀳 ‘‘𑀉𑀩𑁆𑀩𑀺𑀮𑀪𑀸𑀯𑀓𑀭𑀡’’𑀦𑁆𑀢𑀺.