📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀤𑀻𑀖𑀦𑀺𑀓𑀸𑀬𑁂

𑀲𑀻𑀮𑀓𑁆𑀔𑀦𑁆𑀥𑀯𑀕𑁆𑀕𑀅𑀪𑀺𑀦𑀯𑀝𑀻𑀓𑀸

(𑀤𑀼𑀢𑀺𑀬𑁄 𑀪𑀸𑀕𑁄)

𑁨. 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑀭𑀸𑀚𑀸𑀫𑀘𑁆𑀘𑀓𑀣𑀸𑀯𑀡𑁆𑀡𑀦𑀸

𑁧𑁫𑁦. 𑀇𑀤𑀸𑀦𑀺 ¶ ¶ 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀲𑁆𑀲 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄 𑀅𑀦𑀼𑀧𑁆𑀧𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁…𑀧𑁂… 𑀲𑀼𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀼𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸𑀢𑀺 𑀅𑀦𑀼𑀓𑁆𑀓𑀫𑁂𑀦 𑀧𑀤𑀯𑀡𑁆𑀡𑀦𑀸, 𑀧𑀤𑀁 𑀧𑀤𑀁 𑀧𑀢𑀺 𑀅𑀦𑀼𑀓𑁆𑀓𑀫𑁂𑀦 𑀯𑀡𑁆𑀡𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀜𑁆𑀳𑀺, 𑀉𑀢𑁆𑀢𑀸𑀦𑀁 𑀯𑀸 𑀧𑀤𑀫𑀜𑁆𑀜𑀢𑁆𑀭 𑀯𑀡𑁆𑀡𑀦𑀸𑀧𑀺 ‘‘𑀅𑀦𑀼𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸’’ 𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸’’𑀢𑀺𑀧𑀺 𑀧𑀞𑀦𑁆𑀢𑀺, 𑀧𑀼𑀩𑁆𑀩𑁂 𑀅𑀯𑀡𑁆𑀡𑀺𑀢𑀧𑀤𑀯𑀡𑁆𑀡𑀦𑀸𑀢𑀺 𑀅𑀢𑁆𑀣𑁄. 𑀤𑀼𑀕𑁆𑀕𑀚𑀦𑀧𑀤𑀝𑁆𑀞𑀸𑀦𑀯𑀺𑀲𑁂𑀲𑀲𑀫𑁆𑀧𑀤𑀸𑀤𑀺𑀬𑁄𑀕𑀢𑁄 𑀧𑀥𑀸𑀦𑀪𑀸𑀯𑁂𑀦 𑀭𑀸𑀚𑀽𑀳𑀺 𑀕𑀳𑀺𑀢𑀝𑁆𑀞𑁂𑀦 𑀏𑀯𑀁𑀦𑀸𑀫𑀓𑀁, 𑀦 𑀧𑀦 𑀦𑀸𑀫𑀫𑀢𑁆𑀢𑁂𑀦𑀸𑀢𑀺 𑀆𑀳 ‘‘𑀢𑀜𑁆𑀳𑀻’’𑀢𑀺𑀆𑀤𑀺. 𑀦𑀦𑀼 ¶ 𑀫𑀳𑀸𑀯𑀕𑁆𑀕𑁂 𑀫𑀳𑀸𑀕𑁄𑀯𑀺𑀦𑁆𑀤𑀲𑀼𑀢𑁆𑀢𑁂 𑀆𑀕𑀢𑁄 𑀏𑀲 𑀧𑀼𑀭𑁄𑀳𑀺𑀢𑁄 𑀏𑀯, 𑀦 𑀭𑀸𑀚𑀸, 𑀓𑀲𑁆𑀫𑀸 𑀲𑁄 𑀭𑀸𑀚𑀲𑀤𑁆𑀤𑀯𑀘𑀦𑀻𑀬𑀪𑀸𑀯𑁂𑀦 𑀕𑀳𑀺𑀢𑁄𑀢𑀺? 𑀫𑀳𑀸𑀕𑁄𑀯𑀺𑀦𑁆𑀤𑁂𑀦 𑀧𑀼𑀭𑁄𑀳𑀺𑀢𑁂𑀦 𑀧𑀭𑀺𑀕𑁆𑀕𑀳𑀺𑀢𑀫𑁆𑀧𑀺 𑀘𑁂𑀢𑀁 𑀭𑁂𑀡𑀼𑀦𑀸 𑀦𑀸𑀫 𑀫𑀕𑀥𑀭𑀸𑀚𑁂𑀦 𑀧𑀭𑀺𑀕𑁆𑀕𑀳𑀺𑀢𑀫𑁂𑀯𑀸𑀢𑀺 𑀅𑀢𑁆𑀣𑀲𑀫𑁆𑀪𑀯𑀢𑁄 𑀏𑀯𑀁 𑀯𑀼𑀢𑁆𑀢𑀁, 𑀦 𑀧𑀦 𑀲𑁄 𑀭𑀸𑀚𑀲𑀤𑁆𑀤𑀯𑀘𑀦𑀻𑀬𑀪𑀸𑀯𑁂𑀦 𑀕𑀳𑀺𑀢𑁄 𑀢𑀲𑁆𑀲 𑀭𑀸𑀚𑀸𑀪𑀸𑀯𑀢𑁄. 𑀫𑀳𑀸𑀕𑁄𑀯𑀺𑀦𑁆𑀤𑀧𑀭𑀺𑀕𑁆𑀕𑀳𑀺𑀢𑀪𑀸𑀯𑀓𑀺𑀢𑁆𑀢𑀦𑀜𑁆𑀳𑀺 𑀢𑀤𑀸 𑀭𑁂𑀡𑀼𑀭𑀜𑁆𑀜𑀸 𑀧𑀭𑀺𑀕𑁆𑀕𑀳𑀺𑀢𑀪𑀸𑀯𑀽𑀧𑀮𑀓𑁆𑀔𑀡𑀁. 𑀲𑁄 𑀳𑀺 𑀢𑀲𑁆𑀲 𑀲𑀩𑁆𑀩𑀓𑀺𑀘𑁆𑀘𑀓𑀸𑀭𑀓𑁄 𑀧𑀼𑀭𑁄𑀳𑀺𑀢𑁄, 𑀇𑀤𑀫𑁆𑀧𑀺 𑀘 𑀮𑁄𑀓𑁂 𑀲𑀫𑀼𑀤𑀸𑀘𑀺𑀡𑁆𑀡𑀁 ¶ ‘‘𑀭𑀸𑀚𑀓𑀫𑁆𑀫𑀧𑀲𑀼𑀢𑁂𑀦 𑀓𑀢𑀫𑁆𑀧𑀺 𑀭𑀜𑁆𑀜𑀸 𑀓𑀢’’𑀦𑁆𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀫𑀦𑁆𑀥𑀸𑀢𑀼𑀭𑀜𑁆𑀜𑀸 𑀘𑁂𑀯 𑀫𑀳𑀸𑀕𑁄𑀯𑀺𑀦𑁆𑀤𑀁 𑀩𑁄𑀥𑀺𑀲𑀢𑁆𑀢𑀁 𑀧𑀼𑀭𑁄𑀳𑀺𑀢𑀫𑀸𑀡𑀸𑀧𑁂𑀢𑁆𑀯𑀸 𑀭𑁂𑀡𑀼𑀭𑀜𑁆𑀜𑀸 𑀘 𑀅𑀜𑁆𑀜𑁂𑀳𑀺 𑀘 𑀭𑀸𑀚𑀽𑀳𑀺 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀭𑀸𑀚𑀕𑀳𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀫𑀳𑀸𑀕𑁄𑀯𑀺𑀦𑁆𑀤𑁄’’𑀢𑀺 𑀫𑀳𑀸𑀦𑀼𑀪𑀸𑀯𑁄 𑀏𑀓𑁄 𑀧𑀼𑀭𑀸𑀢𑀦𑁄 𑀭𑀸𑀚𑀸𑀢𑀺 𑀯𑀤𑀦𑁆𑀢𑀺. 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸𑀢𑀺 𑀭𑀸𑀚𑀥𑀸𑀦𑀻𑀪𑀸𑀯𑁂𑀦 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸. 𑀕𑀬𑁆𑀳𑀢𑀻𑀢𑀺 𑀳𑀺 𑀕𑀳𑀁, 𑀭𑀸𑀚𑀽𑀦𑀁, 𑀭𑀸𑀚𑀽𑀳𑀺 𑀯𑀸 𑀕𑀳𑀦𑁆𑀢𑀺 𑀭𑀸𑀚𑀕𑀳𑀁. 𑀦𑀕𑀭𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄.

𑀅𑀜𑁆𑀜𑁂𑀧𑁂𑀢𑁆𑀣 𑀧𑀓𑀸𑀭𑁂𑀢𑀺 𑀦𑀕𑀭𑀫𑀸𑀧𑀦𑁂𑀦 𑀭𑀜𑁆𑀜𑀸 𑀓𑀸𑀭𑀺𑀢𑀲𑀩𑁆𑀩𑀕𑁂𑀳𑀢𑁆𑀢𑀸 𑀭𑀸𑀚𑀕𑀳𑀁, 𑀕𑀺𑀚𑁆𑀛𑀓𑀽𑀝𑀸𑀤𑀻𑀳𑀺 𑀧𑀜𑁆𑀘𑀳𑀺 𑀧𑀩𑁆𑀩𑀢𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀧𑀩𑁆𑀩𑀢𑀭𑀸𑀚𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀕𑁂𑀳𑀲𑀤𑀺𑀲𑀦𑁆𑀢𑀺𑀧𑀺 𑀭𑀸𑀚𑀕𑀳𑀁, 𑀲𑀫𑁆𑀧𑀦𑁆𑀦𑀪𑀯𑀦𑀢𑀸𑀬 𑀭𑀸𑀚𑀫𑀸𑀦𑀁 𑀕𑁂𑀳𑀦𑁆𑀢𑀺𑀧𑀺 𑀭𑀸𑀚𑀕𑀳𑀁, 𑀲𑀼𑀲𑀁𑀯𑀺𑀳𑀺𑀢𑀸𑀭𑀓𑁆𑀔𑀢𑀸𑀬 𑀅𑀦𑀢𑁆𑀣𑀸𑀯𑀳𑀺𑀢𑀼𑀓𑀸𑀫𑁂𑀦 𑀉𑀧𑀕𑀢𑀸𑀦𑀁 𑀧𑀝𑀺𑀭𑀸𑀚𑀽𑀦𑀁 𑀕𑀳𑀁 𑀕𑀳𑀡𑀪𑀽𑀢𑀦𑁆𑀢𑀺𑀧𑀺 𑀭𑀸𑀚𑀕𑀳𑀁, 𑀭𑀸𑀚𑀽𑀳𑀺 𑀤𑀺𑀲𑁆𑀯𑀸 𑀲𑀫𑁆𑀫𑀸 𑀧𑀢𑀺𑀝𑁆𑀞𑀸𑀧𑀺𑀢𑀢𑁆𑀢𑀸 𑀢𑁂𑀲𑀁 𑀕𑀳𑀁 𑀕𑁂𑀳𑀪𑀽𑀢𑀦𑁆𑀢𑀺𑀧𑀺 𑀭𑀸𑀚𑀕𑀳𑀁, 𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀢𑀸𑀤𑀻𑀳𑀺 𑀭𑀸𑀚𑀢𑀺, 𑀦𑀺𑀯𑀸𑀲𑀲𑀼𑀔𑀢𑀸𑀤𑀺𑀦𑀸 𑀘 𑀲𑀢𑁆𑀢𑁂𑀳𑀺 𑀫𑀫𑀢𑁆𑀢𑀯𑀲𑁂𑀦 𑀕𑀬𑁆𑀳𑀢𑀺 𑀧𑀭𑀺𑀕𑁆𑀕𑀬𑁆𑀳𑀢𑀻𑀢𑀺𑀧𑀺 𑀭𑀸𑀚𑀕𑀳𑀦𑁆𑀢𑀺 𑀏𑀤𑀺𑀲𑁂 𑀧𑀓𑀸𑀭𑁂. 𑀦𑀸𑀫𑀫𑀢𑁆𑀢𑀫𑁂𑀯 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀲𑁄 𑀧𑀦 𑀧𑀤𑁂𑀲𑁄 𑀯𑀺𑀲𑁂𑀲𑀝𑁆𑀞𑀸𑀦𑀪𑀸𑀯𑁂𑀦 𑀉𑀴𑀸𑀭𑀲𑀢𑁆𑀢𑀧𑀭𑀺𑀪𑁄𑀕𑁄𑀢𑀺 𑀆𑀳 ‘‘𑀢𑀁 𑀧𑀦𑁂𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 ‘‘𑀩𑀼𑀤𑁆𑀥𑀓𑀸𑀮𑁂, 𑀘𑀓𑁆𑀓𑀯𑀢𑁆𑀢𑀺𑀓𑀸𑀮𑁂 𑀘𑀸’’𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁 𑀅𑀜𑁆𑀜𑀤𑀸𑀧𑀺 𑀓𑀤𑀸𑀘𑀺 𑀲𑀫𑁆𑀪𑀯𑀢𑁄, ‘‘𑀦𑀕𑀭𑀁 𑀳𑁄𑀢𑀻’’𑀢𑀺 𑀘 𑀇𑀤𑀁 𑀉𑀧𑀮𑀓𑁆𑀔𑀡𑀫𑁂𑀯 𑀫𑀦𑀼𑀲𑁆𑀲𑀸𑀯𑀸𑀲𑀲𑁆𑀲𑁂𑀯 𑀅𑀲𑀫𑁆𑀪𑀯𑀢𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀲𑁂𑀲𑀓𑀸𑀮𑁂 𑀲𑀼𑀜𑁆𑀜𑀁 𑀳𑁄𑀢𑀻’’𑀢𑀺𑀆𑀤𑀺. 𑀢𑁂𑀲𑀦𑁆𑀢𑀺 𑀬𑀓𑁆𑀔𑀸𑀦𑀁. 𑀯𑀲𑀦𑀯𑀦𑀦𑁆𑀢𑀺 𑀆𑀧𑀸𑀦𑀪𑀽𑀫𑀺𑀪𑀽𑀢𑀁 𑀉𑀧𑀯𑀦𑀁.

𑀅𑀯𑀺𑀲𑁂𑀲𑁂𑀦𑀸𑀢𑀺 𑀯𑀺𑀳𑀸𑀭𑀪𑀸𑀯𑀲𑀸𑀫𑀜𑁆𑀜𑁂𑀦, 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀲𑀺𑀤𑁆𑀥𑀁 𑀯𑀺𑀲𑁂𑀲𑀧𑀭𑀸𑀫𑀲𑀦𑀫𑀦𑁆𑀢𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺, (𑀅. 𑀦𑀺. 𑁫.𑁧𑁦𑁧; 𑀧𑀸𑀘𑀺. 𑁧𑁪𑁭; 𑀧𑀭𑀺. 𑁪𑁪𑁧) 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, (𑀥. 𑀲. 𑁧𑁬𑁦) 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, (𑀤𑀻. 𑀦𑀺. 𑁩.𑁭𑁧, 𑁩𑁦𑁮; 𑀫. 𑀦𑀺. 𑁧.𑁭𑁭, 𑁪𑁫𑁯, 𑁫𑁦𑁯; 𑁨.𑁩𑁦𑁯, 𑁩𑁧𑁫; 𑁩.𑁨𑁩𑁦; 𑀯𑀺𑀪. 𑁬𑁪𑁨) 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀦𑀺𑀫𑀺𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁪𑁫𑁯) 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀲𑀺𑀤𑁆𑀥𑁂𑀦 𑀯𑀺𑀲𑁂𑀲𑀧𑀭𑀸𑀫𑀲𑀦𑁂𑀦 𑀬𑀣𑀸𑀓𑁆𑀓𑀫𑀁 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑀸𑀤𑀺𑀯𑀺𑀲𑁂𑀲𑀯𑀺𑀳𑀸𑀭𑀲𑀫𑀗𑁆𑀕𑀻𑀧𑀭𑀺𑀤𑀻𑀧𑀦𑀁 ¶ ¶ , 𑀦 𑀏𑀯𑀫𑀺𑀤𑀁, 𑀇𑀤𑀁 𑀧𑀦 𑀢𑀣𑀸 𑀯𑀺𑀲𑁂𑀲𑀧𑀭𑀸𑀫𑀲𑀦𑀫𑀦𑁆𑀢𑀭𑁂𑀦 𑀅𑀜𑁆𑀜𑀢𑀭𑀯𑀺𑀳𑀸𑀭𑀲𑀫𑀗𑁆𑀕𑀻𑀧𑀭𑀺𑀤𑀻𑀧𑀦𑀦𑁆𑀢𑀺.

𑀲𑀢𑀺𑀧𑀺 𑀘 𑀯𑀼𑀢𑁆𑀢𑀦𑀬𑁂𑀦 𑀅𑀜𑁆𑀜𑀢𑀭𑀯𑀺𑀳𑀸𑀭𑀲𑀫𑀗𑁆𑀕𑀻𑀧𑀭𑀺𑀤𑀻𑀧𑀦𑁂 𑀇𑀥 𑀇𑀭𑀺𑀬𑀸𑀧𑀣𑀲𑀗𑁆𑀔𑀸𑀢𑀯𑀺𑀲𑁂𑀲𑀯𑀺𑀳𑀸𑀭𑀲𑀫𑀗𑁆𑀕𑀻𑀧𑀭𑀺𑀤𑀻𑀧𑀦𑀫𑁂𑀯 𑀲𑀫𑁆𑀪𑀯𑀢𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀇𑀥 𑀧𑀦𑀸’’𑀢𑀺𑀆𑀤𑀺𑀦𑀸. 𑀓𑀲𑁆𑀫𑀸 𑀧𑀦 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀲𑀺𑀤𑁆𑀥𑀲𑁆𑀲 𑀯𑀺𑀲𑁂𑀲𑀧𑀭𑀸𑀫𑀲𑀦𑀲𑁆𑀲𑀸𑀪𑀸𑀯𑁂𑀧𑀺 𑀇𑀥 𑀯𑀺𑀲𑁂𑀲𑀯𑀺𑀳𑀸𑀭𑀲𑀫𑀗𑁆𑀕𑀻𑀧𑀭𑀺𑀤𑀻𑀧𑀦𑀁 𑀲𑀫𑁆𑀪𑀯𑀢𑀻𑀢𑀺? 𑀯𑀺𑀲𑁂𑀲𑀯𑀺𑀳𑀸𑀭𑀲𑀫𑀗𑁆𑀕𑀻𑀧𑀭𑀺𑀤𑀻𑀧𑀦𑀲𑁆𑀲 𑀲𑀤𑁆𑀤𑀦𑁆𑀢𑀭𑀲𑀗𑁆𑀔𑀸𑀢𑀯𑀺𑀲𑁂𑀲𑀯𑀘𑀦𑀲𑁆𑀲 𑀅𑀪𑀸𑀯𑀢𑁄 𑀏𑀯. 𑀯𑀺𑀲𑁂𑀲𑀯𑀘𑀦𑁂 𑀳𑀺 𑀅𑀲𑀢𑀺 𑀯𑀺𑀲𑁂𑀲𑀫𑀺𑀘𑁆𑀙𑀢𑀸 𑀯𑀺𑀲𑁂𑀲𑁄 𑀧𑀬𑁄𑀚𑀺𑀢𑀩𑁆𑀩𑁄𑀢𑀺. 𑀅𑀧𑀺𑀘 𑀇𑀭𑀺𑀬𑀸𑀧𑀣𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀲𑁆𑀲 𑀅𑀢𑁆𑀣𑀢𑁄 𑀲𑀺𑀤𑁆𑀥𑀢𑁆𑀢𑀸 𑀢𑀣𑀸𑀤𑀻𑀧𑀦𑀫𑁂𑀯 𑀲𑀫𑁆𑀪𑀯𑀢𑀻𑀢𑀺. 𑀓𑀲𑁆𑀫𑀸 𑀘𑀸𑀬𑀫𑀢𑁆𑀣𑁄 𑀲𑀺𑀤𑁆𑀥𑁄𑀢𑀺? 𑀤𑀺𑀩𑁆𑀩𑀯𑀺𑀳𑀸𑀭𑀸𑀤𑀻𑀦𑀫𑁆𑀧𑀺 𑀲𑀸𑀥𑀸𑀭𑀡𑀢𑁄. 𑀓𑀤𑀸𑀘𑀺𑀧𑀺 𑀳𑀺 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀯𑀺𑀦𑀸 𑀦 𑀪𑀯𑀢𑀺 𑀢𑀫𑀦𑁆𑀢𑀭𑁂𑀦 𑀅𑀢𑁆𑀢𑀪𑀸𑀯𑀧𑀭𑀺𑀳𑀭𑀡𑀸𑀪𑀸𑀯𑀢𑁄𑀢𑀺.

𑀇𑀭𑀺𑀬𑀦𑀁 𑀧𑀯𑀢𑁆𑀢𑀦𑀁 𑀇𑀭𑀺𑀬𑀸, 𑀓𑀸𑀬𑀺𑀓𑀓𑀺𑀭𑀺𑀬𑀸, 𑀢𑀲𑁆𑀲𑀸 𑀧𑀯𑀢𑁆𑀢𑀦𑀼𑀧𑀸𑀬𑀪𑀸𑀯𑀢𑁄 𑀧𑀣𑁄𑀢𑀺 𑀇𑀭𑀺𑀬𑀸𑀧𑀣𑁄, 𑀞𑀸𑀦𑀦𑀺𑀲𑀚𑁆𑀚𑀸𑀤𑀬𑁄. 𑀦 𑀳𑀺 𑀞𑀸𑀦𑀦𑀺𑀲𑀚𑁆𑀚𑀸𑀤𑀺𑀅𑀯𑀢𑁆𑀣𑀸𑀳𑀺 𑀯𑀺𑀦𑀸 𑀓𑀜𑁆𑀘𑀺 𑀓𑀸𑀬𑀺𑀓𑀁 𑀓𑀺𑀭𑀺𑀬𑀁 𑀧𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑀸, 𑀢𑀲𑁆𑀫𑀸 𑀲𑁄 𑀢𑀸𑀬 𑀧𑀯𑀢𑁆𑀢𑀦𑀼𑀧𑀸𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀳𑀭𑀢𑀺 𑀧𑀯𑀢𑁆𑀢𑀢𑀺 𑀏𑀢𑁂𑀦, 𑀯𑀺𑀳𑀭𑀡𑀫𑀢𑁆𑀢𑀁 𑀯𑀸 𑀢𑀦𑁆𑀢𑀺 𑀯𑀺𑀳𑀸𑀭𑁄, 𑀲𑁄 𑀏𑀯 𑀯𑀺𑀳𑀸𑀭𑁄 𑀢𑀣𑀸, 𑀅𑀢𑁆𑀣𑀢𑁄 𑀧𑀦𑁂𑀲 𑀞𑀸𑀦𑀦𑀺𑀲𑀚𑁆𑀚𑀸𑀤𑀺𑀆𑀓𑀸𑀭𑀧𑁆𑀧𑀯𑀢𑁆𑀢𑁄 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀧𑁆𑀧𑀩𑀦𑁆𑀥𑁄𑀯. 𑀤𑀺𑀯𑀺 𑀪𑀯𑁄 𑀤𑀺𑀩𑁆𑀩𑁄, 𑀢𑀢𑁆𑀣 𑀩𑀳𑀼𑀮𑀁 𑀧𑀯𑀢𑁆𑀢𑀺𑀬𑀸 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀺𑀤𑁂𑀯𑀮𑁄𑀓𑁂 𑀪𑀯𑁄𑀢𑀺 𑀅𑀢𑁆𑀣𑁄, 𑀬𑁄 𑀯𑀸 𑀢𑀢𑁆𑀣 𑀤𑀺𑀩𑁆𑀩𑀸𑀦𑀼𑀪𑀸𑀯𑁄, 𑀢𑀤𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀤𑀺𑀩𑁆𑀩𑁄, 𑀅𑀪𑀺𑀜𑁆𑀜𑀸𑀪𑀺𑀦𑀻𑀳𑀸𑀭𑀸𑀤𑀺𑀯𑀲𑁂𑀦 𑀯𑀸 𑀫𑀳𑀸𑀕𑀢𑀺𑀓𑀢𑁆𑀢𑀸 𑀤𑀺𑀩𑁆𑀩𑁄, 𑀲𑁄𑀯 𑀯𑀺𑀳𑀸𑀭𑁄, 𑀤𑀺𑀩𑁆𑀩𑀪𑀸𑀯𑀸𑀯𑀳𑁄 𑀯𑀸 𑀯𑀺𑀳𑀸𑀭𑁄 𑀤𑀺𑀩𑁆𑀩𑀯𑀺𑀳𑀸𑀭𑁄, 𑀫𑀳𑀕𑁆𑀕𑀢𑀚𑁆𑀛𑀸𑀦𑀸𑀦𑀺. 𑀦𑁂𑀢𑁆𑀢𑀺𑀬𑀁 [𑀦𑁂𑀢𑁆𑀢𑀺. 𑁮𑁬 (𑀅𑀢𑁆𑀣𑀢𑁄 𑀲𑀫𑀸𑀦𑀁)] 𑀧𑀦 𑀘𑀢𑀲𑁆𑀲𑁄 𑀆𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺𑀬𑁄 𑀆𑀦𑁂𑀜𑁆𑀚𑀯𑀺𑀳𑀸𑀭𑀸𑀢𑀺 𑀯𑀺𑀲𑀼𑀁 𑀯𑀼𑀢𑁆𑀢𑀁, 𑀢𑀁 𑀧𑀦 𑀫𑁂𑀢𑁆𑀢𑀸𑀚𑁆𑀛𑀸𑀦𑀸𑀤𑀻𑀦𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀢𑀸 𑀯𑀺𑀬 𑀢𑀸𑀲𑀁 𑀪𑀸𑀯𑀦𑀸𑀯𑀺𑀲𑁂𑀲𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀤𑀺𑀩𑁆𑀩𑀪𑀸𑀯𑀸𑀯𑀳𑀲𑀸𑀫𑀜𑁆𑀜𑀢𑁄 𑀢𑀸𑀧𑀺 ‘‘𑀤𑀺𑀩𑁆𑀩𑀯𑀺𑀳𑀸𑀭𑀸’’ 𑀢𑁆𑀯𑁂𑀯 𑀯𑀼𑀢𑁆𑀢𑀸. 𑀩𑁆𑀭𑀳𑁆𑀫𑀸𑀦𑀁, 𑀩𑁆𑀭𑀳𑁆𑀫𑀪𑀽𑀢𑀸 𑀯𑀸 𑀳𑀺𑀢𑀽𑀧𑀲𑀁𑀳𑀸𑀭𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀲𑁂𑀝𑁆𑀞𑀪𑀽𑀢𑀸 𑀯𑀺𑀳𑀸𑀭𑀸𑀢𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀸, 𑀫𑁂𑀢𑁆𑀢𑀸𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄. 𑀅𑀭𑀺𑀬𑀸 𑀉𑀢𑁆𑀢𑀫𑀸, 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸 𑀯𑀸 𑀅𑀭𑀺𑀬𑀸𑀦𑀁 𑀯𑀺𑀳𑀸𑀭𑀸𑀢𑀺 𑀅𑀭𑀺𑀬𑀯𑀺𑀳𑀸𑀭𑀸, 𑀘𑀢𑀲𑁆𑀲𑁄𑀧𑀺 𑀨𑀮𑀲𑀫𑀸𑀧𑀢𑁆𑀢𑀺𑀬𑁄. 𑀇𑀥 𑀧𑀦 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀁, 𑀢𑀩𑁆𑀩𑀲𑁂𑀦 𑀧𑀯𑀢𑁆𑀢𑀸 𑀅𑀧𑁆𑀧𑀫𑀜𑁆𑀜𑀸𑀬𑁄 ¶ , 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀅𑀕𑁆𑀕𑀨𑀮𑀲𑀫𑀸𑀧𑀢𑁆𑀢𑀺 𑀘 𑀪𑀕𑀯𑀢𑁄 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑀸.

𑀅𑀜𑁆𑀜𑀢𑀭𑀯𑀺𑀳𑀸𑀭𑀲𑀫𑀗𑁆𑀕𑀻𑀧𑀭𑀺𑀤𑀻𑀧𑀦𑀦𑁆𑀢𑀺 𑀢𑀸𑀲𑀫𑁂𑀓𑀢𑁄 𑀅𑀧𑁆𑀧𑀯𑀢𑁆𑀢𑀢𑁆𑀢𑀸 𑀏𑀓𑁂𑀦 𑀯𑀸 𑀤𑁆𑀯𑀻𑀳𑀺 𑀯𑀸 𑀲𑀫𑀗𑁆𑀕𑀻𑀪𑀸𑀯𑀧𑀭𑀺𑀤𑀻𑀧𑀦𑀁, 𑀪𑀸𑀯𑀮𑁄𑀧𑁂𑀦𑀸𑀬𑀁 𑀪𑀸𑀯𑀧𑁆𑀧𑀥𑀸𑀦𑁂𑀦 𑀯𑀸 𑀦𑀺𑀤𑁆𑀤𑁂𑀲𑁄. 𑀪𑀕𑀯𑀸 𑀳𑀺 𑀮𑁄𑀪𑀤𑁄𑀲𑀫𑁄𑀳𑀼𑀲𑁆𑀲𑀦𑁆𑀦𑁂 𑀮𑁄𑀓𑁂 ¶ 𑀲𑀓𑀧𑀝𑀺𑀧𑀢𑁆𑀢𑀺𑀬𑀸 𑀯𑁂𑀦𑁂𑀬𑁆𑀬𑀸𑀦𑀁 𑀯𑀺𑀦𑀬𑀦𑀢𑁆𑀣𑀁 𑀢𑀁 𑀢𑀁 𑀯𑀺𑀳𑀸𑀭𑁂 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀢𑀣𑀸 𑀳𑀺 𑀬𑀤𑀸 𑀲𑀢𑁆𑀢𑀸 𑀓𑀸𑀫𑁂𑀲𑀼 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀓𑀺𑀭 𑀪𑀕𑀯𑀸 𑀤𑀺𑀩𑁆𑀩𑁂𑀦 𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺 𑀢𑁂𑀲𑀁 𑀅𑀮𑁄𑀪𑀓𑀼𑀲𑀮𑀫𑀽𑀮𑀼𑀧𑁆𑀧𑀸𑀤𑀦𑀢𑁆𑀣𑀁 ‘‘𑀅𑀧𑁆𑀧𑁂𑀯 𑀦𑀸𑀫 𑀇𑀫𑀁 𑀧𑀝𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀏𑀢𑁆𑀣 𑀭𑀼𑀘𑀺𑀫𑀼𑀧𑁆𑀧𑀸𑀤𑁂𑀢𑁆𑀯𑀸 𑀓𑀸𑀫𑁂𑀲𑀼 𑀯𑀺𑀭𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺. 𑀬𑀤𑀸 𑀧𑀦 𑀇𑀲𑁆𑀲𑀭𑀺𑀬𑀢𑁆𑀣𑀁 𑀲𑀢𑁆𑀢𑁂𑀲𑀼 𑀯𑀺𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺 𑀢𑁂𑀲𑀁 𑀅𑀤𑁄𑀲𑀓𑀼𑀲𑀮𑀫𑀽𑀮𑀼𑀧𑁆𑀧𑀸𑀤𑀦𑀢𑁆𑀣𑀁 ‘‘𑀅𑀧𑁆𑀧𑁂𑀯 𑀦𑀸𑀫 𑀇𑀫𑀁 𑀧𑀝𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀏𑀢𑁆𑀣 𑀭𑀼𑀘𑀺𑀫𑀼𑀧𑁆𑀧𑀸𑀤𑁂𑀢𑁆𑀯𑀸 𑀅𑀤𑁄𑀲𑁂𑀦 𑀤𑁄𑀲𑀁 𑀯𑀽𑀧𑀲𑀫𑁂𑀬𑁆𑀬𑀼’’𑀦𑁆𑀢𑀺. 𑀬𑀤𑀸 𑀧𑀦 𑀧𑀩𑁆𑀩𑀚𑀺𑀢𑀸 𑀥𑀫𑁆𑀫𑀸𑀥𑀺𑀓𑀭𑀡𑀁 𑀯𑀺𑀯𑀤𑀦𑁆𑀢𑀺, 𑀢𑀤𑀸 𑀅𑀭𑀺𑀬𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺 𑀢𑁂𑀲𑀁 𑀅𑀫𑁄𑀳𑀓𑀼𑀲𑀮𑀫𑀽𑀮𑀼𑀧𑁆𑀧𑀸𑀤𑀦𑀢𑁆𑀣𑀁 ‘‘𑀅𑀧𑁆𑀧𑁂𑀯 𑀦𑀸𑀫 𑀇𑀫𑀁 𑀧𑀝𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀏𑀢𑁆𑀣 𑀭𑀼𑀘𑀺𑀫𑀼𑀧𑁆𑀧𑀸𑀤𑁂𑀢𑁆𑀯𑀸 𑀅𑀫𑁄𑀳𑁂𑀦 𑀫𑁄𑀳𑀁 𑀯𑀽𑀧𑀲𑀫𑁂𑀬𑁆𑀬𑀼’’𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀇𑀫𑁂𑀳𑀺 𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂𑀳𑀺 𑀲𑀢𑁆𑀢𑀸𑀦𑀁 𑀯𑀺𑀯𑀺𑀥𑀁 𑀳𑀺𑀢𑀲𑀼𑀔𑀁 𑀳𑀭𑀢𑀺, 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀘 𑀏𑀓𑀁 𑀇𑀭𑀺𑀬𑀸𑀧𑀣𑀩𑀸𑀥𑀦𑀁 𑀅𑀜𑁆𑀜𑁂𑀦 𑀇𑀭𑀺𑀬𑀸𑀧𑀣𑁂𑀦 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑀭𑀺𑀧𑀢𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀳𑀭𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀢𑀭𑀯𑀺𑀳𑀸𑀭𑀲𑀫𑀗𑁆𑀕𑀻𑀧𑀭𑀺𑀤𑀻𑀧𑀦’’𑀦𑁆𑀢𑀺.

‘‘𑀢𑁂𑀦𑀸’’𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀲𑀁𑀯𑀡𑁆𑀡𑀦𑀸𑀬 𑀕𑀼𑀡𑀤𑀲𑁆𑀲𑀦𑀁, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄, 𑀬𑀣𑀸𑀯𑀼𑀢𑁆𑀢𑀢𑁆𑀣𑀲𑀫𑀢𑁆𑀣𑀦𑀁 𑀯𑀸. 𑀢𑁂𑀦 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀣𑀸 𑀯𑀤𑀫𑀸𑀦𑁄 𑀧𑀦 𑀯𑀺𑀳𑀭𑀢𑀻𑀢𑀺 𑀏𑀢𑁆𑀣 𑀯𑀺-𑀲𑀤𑁆𑀤𑁄 𑀯𑀺𑀘𑁆𑀙𑁂𑀤𑀦𑀢𑁆𑀣𑀚𑁄𑀢𑀓𑁄, ‘‘𑀳𑀭𑀢𑀻’’𑀢𑀺 𑀏𑀢𑀲𑁆𑀲 𑀘 𑀦𑁂𑀢𑀺 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄𑀢𑀺 𑀜𑀸𑀧𑁂𑀢𑀺 ‘‘𑀞𑀺𑀢𑁄𑀧𑀻’’𑀢𑀺𑀆𑀤𑀺𑀦𑀸 𑀯𑀺𑀘𑁆𑀙𑁂𑀤𑀦𑀬𑀦𑀸𑀓𑀸𑀭𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀏𑀯𑀜𑁆𑀳𑀺 𑀲𑀢𑀺 𑀢𑀢𑁆𑀣 𑀓𑀲𑁆𑀲 𑀓𑁂𑀦 𑀯𑀺𑀘𑁆𑀙𑀺𑀦𑁆𑀤𑀦𑀁, 𑀓𑀣𑀁 𑀓𑀲𑁆𑀲 𑀦𑀬𑀦𑀦𑁆𑀢𑀺 𑀅𑀦𑁆𑀢𑁄𑀮𑀻𑀦𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳. ‘‘𑀲𑁄 𑀳𑀻’’𑀢𑀺𑀆𑀤𑀻𑀢𑀺 𑀅𑀬𑀫𑁆𑀧𑀺 𑀲𑀫𑁆𑀩𑀦𑁆𑀥𑁄 𑀉𑀧𑀧𑀦𑁆𑀦𑁄 𑀳𑁄𑀢𑀺. 𑀬𑀤𑀺𑀧𑀺 𑀪𑀕𑀯𑀸 𑀏𑀓𑁂𑀦𑁂𑀯 𑀇𑀭𑀺𑀬𑀸𑀧𑀣𑁂𑀦 𑀘𑀺𑀭𑀢𑀭𑀁 𑀓𑀸𑀮𑀁 𑀧𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀣𑀸𑀧𑀺 𑀉𑀧𑀸𑀤𑀺𑀦𑁆𑀦𑀓𑀲𑁆𑀲 𑀦𑀸𑀫 𑀲𑀭𑀻𑀭𑀲𑁆𑀲 𑀅𑀬𑀁 𑀲𑀪𑀸𑀯𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀁 𑀇𑀭𑀺𑀬𑀸𑀧𑀣𑀩𑀸𑀥𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀧𑀭𑀺𑀧𑀢𑀦𑁆𑀢𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀅𑀧𑀢𑀫𑀸𑀦𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀪𑀕𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀦𑁆𑀢𑁄 𑀯𑁂𑀦𑁂𑀬𑁆𑀬𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄, 𑀦𑀸𑀦𑀸𑀲𑀫𑀸𑀧𑀢𑁆𑀢𑀻𑀳𑀺 𑀘 𑀓𑀸𑀮𑀁 ¶ 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀯𑀲𑀢𑀺, 𑀲𑀢𑁆𑀢𑀸𑀦𑀁, 𑀅𑀢𑁆𑀢𑀦𑁄 𑀘 𑀯𑀺𑀯𑀺𑀥𑀁 𑀲𑀼𑀔𑀁 𑀳𑀭𑀢𑀺, 𑀢𑀲𑁆𑀫𑀸 𑀯𑀺𑀯𑀺𑀥𑀁 𑀳𑀭𑀢𑀻𑀢𑀺 𑀯𑀺𑀳𑀭𑀢𑀻𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀕𑁄𑀘𑀭𑀕𑀸𑀫𑀦𑀺𑀤𑀲𑁆𑀲𑀦𑀢𑁆𑀣𑀁 ‘‘𑀭𑀸𑀚𑀕𑀳𑁂’’𑀢𑀺 𑀯𑀢𑁆𑀯𑀸 𑀩𑀼𑀤𑁆𑀥𑀸𑀦𑀫𑀦𑀼𑀭𑀽𑀧𑀦𑀺𑀯𑀸𑀲𑀝𑁆𑀞𑀸𑀦𑀤𑀲𑁆𑀲𑀦𑀢𑁆𑀣𑀁 𑀧𑀼𑀦 ‘‘𑀅𑀫𑁆𑀩𑀯𑀦𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀫𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀅𑀲𑁆𑀲𑀸𑀢𑀺 𑀪𑀕𑀯𑀢𑁄. 𑀢𑀲𑁆𑀲𑀸𑀢𑀺 𑀭𑀸𑀚𑀕𑀳𑀲𑀗𑁆𑀔𑀸𑀢𑀲𑁆𑀲 𑀕𑁄𑀘𑀭𑀕𑀸𑀫𑀲𑁆𑀲. 𑀬𑀲𑁆𑀲 𑀲𑀫𑀻𑀧𑀯𑀲𑁂𑀦 ‘‘𑀭𑀸𑀚𑀕𑀳𑁂’’𑀢𑀺 𑀪𑀼𑀫𑁆𑀫𑀯𑀘𑀦𑀁 𑀧𑀯𑀢𑁆𑀢𑀢𑀺, 𑀲𑁄𑀧𑀺 𑀢𑀲𑁆𑀲 𑀲𑀫𑀻𑀧𑀯𑀲𑁂𑀦 𑀯𑀢𑁆𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀭𑀸𑀚𑀕𑀳𑀲𑀫𑀻𑀧𑁂 𑀅𑀫𑁆𑀩𑀯𑀦𑁂’’𑀢𑀺 𑀇𑀫𑀺𑀦𑀸. 𑀲𑀫𑀻𑀧𑀢𑁆𑀣𑁂𑀢𑀺 𑀅𑀫𑁆𑀩𑀯𑀦𑀲𑁆𑀲 𑀲𑀫𑀻𑀧𑀢𑁆𑀣𑁂. 𑀏𑀢𑀦𑁆𑀢𑀺 ‘‘𑀭𑀸𑀚𑀕𑀳𑁂’’𑀢𑀺 𑀯𑀘𑀦𑀁. 𑀪𑀼𑀫𑁆𑀫𑀯𑀘𑀦𑀦𑁆𑀢𑀺 𑀆𑀥𑀸𑀭𑀯𑀘𑀦𑀁. 𑀪𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀳𑀺 𑀪𑀼𑀫𑁆𑀫𑀁, 𑀆𑀥𑀸𑀭𑁄, 𑀢𑀤𑁂𑀯 𑀯𑀘𑀦𑀁 𑀢𑀣𑀸, 𑀪𑀼𑀫𑁆𑀫𑁂 𑀧𑀯𑀢𑁆𑀢𑀁 𑀯𑀸 𑀯𑀘𑀦𑀁 𑀯𑀺𑀪𑀢𑁆𑀢𑀺 𑀪𑀼𑀫𑁆𑀫𑀯𑀘𑀦𑀁 ¶ , 𑀢𑁂𑀦 𑀬𑀼𑀢𑁆𑀢𑀁 𑀢𑀣𑀸, 𑀲𑀢𑁆𑀢𑀫𑀻𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀧𑀤𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑀸𑀫𑀁 𑀪𑀕𑀯𑀸 𑀅𑀫𑁆𑀩𑀯𑀦𑁂𑀬𑁂𑀯 𑀯𑀺𑀳𑀭𑀢𑀺. 𑀢𑀲𑁆𑀲𑀫𑀻𑀧𑀢𑁆𑀢𑀸 𑀧𑀦 𑀕𑁄𑀘𑀭𑀕𑀸𑀫𑀤𑀲𑁆𑀲𑀦𑀢𑁆𑀣𑀁 𑀪𑀼𑀫𑁆𑀫𑀯𑀘𑀦𑀯𑀲𑁂𑀦 ‘‘𑀭𑀸𑀚𑀕𑀳𑁂’’𑀢𑀺𑀧𑀺 𑀯𑀼𑀢𑁆𑀢𑀁 𑀬𑀣𑀸 𑀢𑀁 ‘‘𑀕𑀗𑁆𑀕𑀸𑀬𑀁 𑀕𑀸𑀯𑁄 𑀘𑀭𑀦𑁆𑀢𑀺, 𑀓𑀽𑀧𑁂 𑀕𑀕𑁆𑀕𑀓𑀼𑀮’’𑀦𑁆𑀢𑀺 𑀘𑀸𑀢𑀺. 𑀅𑀦𑁂𑀦𑁂𑀯 𑀬𑀤𑀺 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺, 𑀅𑀣 𑀦 𑀯𑀢𑁆𑀢𑀩𑁆𑀩𑀁 ‘‘𑀅𑀫𑁆𑀩𑀯𑀦𑁂’’𑀢𑀺. 𑀬𑀤𑀺 𑀘 𑀅𑀫𑁆𑀩𑀯𑀦𑁂, 𑀏𑀯𑀫𑁆𑀧𑀺 𑀦 𑀯𑀢𑁆𑀢𑀩𑁆𑀩𑀁 ‘‘𑀭𑀸𑀚𑀕𑀳𑁂’’𑀢𑀺. 𑀦 𑀳𑀺 ‘‘𑀧𑀸𑀝𑀮𑀺𑀧𑀼𑀢𑁆𑀢𑁂 𑀧𑀸𑀲𑀸𑀤𑁂 𑀯𑀲𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀇𑀥 𑀅𑀥𑀺𑀓𑀭𑀡𑀸𑀥𑀺𑀓𑀭𑀡𑀲𑁆𑀲 𑀅𑀪𑀸𑀯𑀢𑁄 𑀅𑀥𑀺𑀓𑀭𑀡𑀲𑁆𑀲 𑀤𑁆𑀯𑀬𑀦𑀺𑀤𑁆𑀤𑁂𑀲𑁄 𑀬𑀼𑀢𑁆𑀢𑁄 𑀲𑀺𑀬𑀸𑀢𑀺 𑀘𑁄𑀤𑀦𑀸 𑀅𑀦𑀯𑀓𑀸𑀲𑀸 𑀓𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀼𑀫𑀸𑀭𑀪𑀢𑁄 𑀏𑀯 𑀓𑁄𑀫𑀸𑀭𑀪𑀘𑁆𑀘𑁄 𑀲𑀓𑀢𑁆𑀣𑀯𑀼𑀢𑁆𑀢𑀺𑀧𑀘𑁆𑀘𑀬𑁂𑀦, 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀯𑀸 𑀬𑀣𑀸 ‘‘𑀪𑀺𑀲𑀕𑁆𑀕𑀫𑁂𑀯 𑀪𑁂𑀲𑀚𑁆𑀚’’𑀦𑁆𑀢𑀺. ‘‘𑀬𑀣𑀸𑀳𑀸’’𑀢𑀺𑀆𑀤𑀺𑀦𑀸 𑀔𑀦𑁆𑀥𑀓𑀧𑀸𑀴𑀺𑀯𑀲𑁂𑀦 𑀢𑀤𑀢𑁆𑀣𑀁 𑀲𑀸𑀥𑁂𑀢𑀺. 𑀓𑀲𑁆𑀫𑀸 𑀘 𑀅𑀫𑁆𑀩𑀯𑀦𑀁 𑀚𑀻𑀯𑀓𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀅𑀦𑀼𑀬𑁄𑀕𑁂𑀦 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳.

𑀤𑁄𑀲𑀸𑀪𑀺𑀲𑀦𑁆𑀦𑀦𑁆𑀢𑀺 𑀯𑀸𑀢𑀧𑀺𑀢𑁆𑀢𑀸𑀤𑀺𑀯𑀲𑁂𑀦 𑀉𑀲𑁆𑀲𑀦𑁆𑀦𑀤𑁄𑀲𑀁. 𑀯𑀺𑀭𑁂𑀘𑁂𑀢𑁆𑀯𑀸𑀢𑀺 𑀤𑁄𑀲𑀧𑁆𑀧𑀓𑁄𑀧𑀢𑁄 𑀯𑀺𑀯𑁂𑀘𑁂𑀢𑁆𑀯𑀸. 𑀲𑀺𑀯𑁂𑀬𑁆𑀬𑀓𑀁 𑀤𑀼𑀲𑁆𑀲𑀬𑀼𑀕𑀦𑁆𑀢𑀺 𑀲𑀺𑀯𑀺𑀭𑀝𑁆𑀞𑁂 𑀚𑀸𑀢𑀁 𑀫𑀳𑀕𑁆𑀖𑀁 𑀤𑀼𑀲𑁆𑀲𑀬𑀼𑀕𑀁. 𑀤𑀺𑀯𑀲𑀲𑁆𑀲 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀦𑁆𑀢𑀺 𑀏𑀓𑀲𑁆𑀲𑁂𑀯 𑀤𑀺𑀯𑀲𑀲𑁆𑀲 𑀤𑁆𑀯𑀺𑀯𑀸𑀭𑁂 𑀯𑀸 𑀢𑀺𑀯𑀸𑀭𑁂 𑀯𑀸 𑀪𑀸𑀕𑁂, 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀏𑀢𑀁 𑀲𑀸𑀫𑀺𑀯𑀘𑀦𑀁, 𑀏𑀓𑀲𑁆𑀫𑀺𑀁𑀬𑁂𑀯 𑀤𑀺𑀯𑀲𑁂 𑀤𑁆𑀯𑀺𑀯𑀸𑀭𑀁 𑀯𑀸 𑀢𑀺𑀯𑀸𑀭𑀁 𑀯𑀸𑀢𑀺 𑀅𑀢𑁆𑀣𑁄. 𑀢𑀫𑁆𑀩𑀧𑀝𑁆𑀝𑀯𑀡𑁆𑀡𑁂𑀦𑀸𑀢𑀺 𑀢𑀫𑁆𑀩𑀮𑁄𑀳𑀧𑀝𑁆𑀝𑀯𑀡𑁆𑀡𑁂𑀦. 𑀲𑀘𑀻𑀯𑀭𑀪𑀢𑁆𑀢𑁂𑀦𑀸𑀢𑀺 𑀘𑀻𑀯𑀭𑁂𑀦, 𑀪𑀢𑁆𑀢𑁂𑀦 𑀘. ‘‘𑀢𑀁 𑀲𑀦𑁆𑀥𑀸𑀬𑀸’’𑀢𑀺 𑀇𑀫𑀺𑀦𑀸 𑀦 𑀪𑀕𑀯𑀸 𑀅𑀫𑁆𑀩𑀯𑀦𑀫𑀢𑁆𑀢𑁂𑀬𑁂𑀯 𑀯𑀺𑀳𑀭𑀢𑀺, 𑀅𑀣 𑀔𑁄 𑀏𑀯𑀁 𑀓𑀢𑁂 𑀯𑀺𑀳𑀸𑀭𑁂. 𑀲𑁄 𑀧𑀦 𑀢𑀤𑀥𑀺𑀓𑀭𑀡𑀢𑀸𑀬 𑀯𑀺𑀲𑀼𑀁 𑀅𑀥𑀺𑀓𑀭𑀡𑀪𑀸𑀯𑁂𑀦 𑀦 𑀯𑀼𑀢𑁆𑀢𑁄𑀢𑀺 𑀲𑀦𑁆𑀥𑀸𑀬𑀪𑀸𑀲𑀺𑀢𑀫𑀢𑁆𑀣𑀁 ¶ 𑀤𑀲𑁆𑀲𑁂𑀢𑀺. 𑀲𑀸𑀫𑀜𑁆𑀜𑁂 𑀳𑀺 𑀲𑀢𑀺 𑀲𑀦𑁆𑀥𑀸𑀬𑀪𑀸𑀲𑀺𑀢𑀦𑀺𑀤𑁆𑀥𑀸𑀭𑀡𑀁.

𑀅𑀟𑁆𑀠𑁂𑀦 𑀢𑁂𑀴𑀲 𑀅𑀟𑁆𑀠𑀢𑁂𑀴𑀲. 𑀢𑀸𑀤𑀺𑀲𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺. 𑀅𑀟𑁆𑀠𑁄 𑀧𑀦𑁂𑀢𑁆𑀣 𑀲𑀢𑀲𑁆𑀲𑁂𑀯. 𑀬𑁂𑀦 𑀳𑀺 𑀧𑀬𑀼𑀢𑁆𑀢𑁄 𑀢𑀩𑁆𑀪𑀸𑀕𑀯𑀸𑀘𑀓𑁄 𑀅𑀟𑁆𑀠𑀲𑀤𑁆𑀤𑁄, 𑀲𑁄 𑀘 𑀔𑁄 𑀧𑀡𑁆𑀡𑀸𑀲𑀸𑀯, 𑀢𑀲𑁆𑀫𑀸 𑀧𑀜𑁆𑀜𑀸𑀲𑀸𑀬 𑀊𑀦𑀸𑀦𑀺 𑀢𑁂𑀴𑀲 𑀪𑀺𑀓𑁆𑀔𑀼𑀲𑀢𑀸𑀦𑀻𑀢𑀺 𑀅𑀢𑁆𑀣𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 ‘‘𑀅𑀟𑁆𑀠𑀲𑀢𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀟𑁆𑀠𑀫𑁂𑀯 𑀲𑀢𑀁 𑀲𑀢𑀲𑁆𑀲 𑀯𑀸 𑀅𑀟𑁆𑀠𑀁 𑀢𑀣𑀸.

𑀭𑀸𑀚𑀢𑀻𑀢𑀺 𑀅𑀢𑁆𑀢𑀦𑁄 𑀇𑀲𑁆𑀲𑀭𑀺𑀬𑀲𑀫𑁆𑀧𑀢𑁆𑀢𑀺𑀬𑀸 𑀤𑀺𑀩𑁆𑀩𑀢𑀺 𑀲𑁄𑀪𑀢𑀺 𑀘. 𑀭𑀜𑁆𑀚𑁂𑀢𑀻𑀢𑀺 𑀤𑀸𑀦𑀸𑀤𑀺𑀦𑀸, 𑀲𑀲𑁆𑀲𑀫𑁂𑀥𑀸𑀤𑀺𑀦𑀸 𑀘 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀭𑀫𑁂𑀢𑀺, 𑀅𑀢𑁆𑀢𑀦𑀺 𑀯𑀸 𑀭𑀸𑀕𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀘-𑀲𑀤𑁆𑀤𑁄 𑀘𑁂𑀢𑁆𑀣 𑀯𑀺𑀓𑀧𑁆𑀧𑀦𑀢𑁆𑀣𑁄. 𑀚𑀦𑀧𑀤𑀯𑀸𑀘𑀺𑀦𑁄 𑀧𑀼𑀣𑀼𑀯𑀘𑀦𑀧𑀭𑀢𑁆𑀢𑀸 ‘‘𑀫𑀕𑀥𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀚𑀦𑀧𑁆𑀧𑀤𑀸𑀧𑀤𑁂𑀲𑁂𑀦 𑀯𑀸 𑀢𑀩𑁆𑀩𑀸𑀲𑀺𑀓𑀸𑀦𑀁 𑀕𑀳𑀺𑀢𑀢𑁆𑀢𑀸. 𑀭𑀜𑁆𑀜𑁄𑀢𑀺 𑀧𑀺𑀢𑀼 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄. 𑀲𑀲𑀢𑀺 𑀳𑀺𑀁𑀲𑀢𑀻𑀢𑀺 𑀲𑀢𑁆𑀢𑀼, 𑀯𑁂𑀭𑀻, 𑀅𑀚𑀸𑀢𑁄𑀬𑁂𑀯 𑀲𑀢𑁆𑀢𑀼 𑀅𑀚𑀸𑀢𑀲𑀢𑁆𑀢𑀼. ‘‘𑀦𑁂𑀫𑀺𑀢𑁆𑀢𑀓𑁂𑀳𑀺 𑀦𑀺𑀤𑁆𑀤𑀺𑀝𑁆𑀞𑁄’’𑀢𑀺 𑀯𑀘𑀦𑁂𑀦 𑀘 𑀅𑀚𑀸𑀢𑀲𑁆𑀲 𑀢𑀲𑁆𑀲 𑀲𑀢𑁆𑀢𑀼𑀪𑀸𑀯𑁄 𑀦 𑀢𑀸𑀯 𑀳𑁄𑀢𑀺, 𑀲𑀢𑁆𑀢𑀼𑀪𑀸𑀯𑀲𑁆𑀲 𑀧𑀦 𑀢𑀣𑀸 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀏𑀯𑀁 𑀯𑁄𑀳𑀭𑀻𑀬𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀚𑀸𑀢𑀲𑁆𑀲𑁂𑀯 ¶ 𑀧𑀦 𑀢𑀲𑁆𑀲 ‘‘𑀭𑀜𑁆𑀜𑁄 𑀮𑁄𑀳𑀺𑀢𑀁 𑀧𑀺𑀯𑁂𑀬𑁆𑀬’’𑀦𑁆𑀢𑀺 𑀤𑁂𑀯𑀺𑀬𑀸 𑀤𑁄𑀳𑀴𑀲𑁆𑀲 𑀧𑀯𑀢𑁆𑀢𑀢𑁆𑀢𑀸 𑀅𑀚𑀸𑀢𑁄𑀬𑁂𑀯𑁂𑀲 𑀭𑀜𑁆𑀜𑁄 𑀲𑀢𑁆𑀢𑀽𑀢𑀺𑀧𑀺 𑀯𑀤𑀦𑁆𑀢𑀺.

‘‘𑀢𑀲𑁆𑀫𑀺’’𑀦𑁆𑀢𑀺𑀆𑀤𑀺𑀦𑀸 𑀢𑀤𑀢𑁆𑀣𑀁 𑀯𑀺𑀯𑀭𑀢𑀺, 𑀲𑀫𑀢𑁆𑀣𑁂𑀢𑀺 𑀘. 𑀤𑁄𑀳𑀴𑁄𑀢𑀺 𑀅𑀪𑀺𑀮𑀸𑀲𑁄. 𑀪𑀸𑀭𑀺𑀬𑁂𑀢𑀺 𑀕𑀭𑀼𑀓𑁂, 𑀅𑀜𑁆𑀜𑁂𑀲𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁂 𑀯𑀸. 𑀅𑀲𑀓𑁆𑀓𑁄𑀦𑁆𑀢𑀻𑀢𑀺 𑀅𑀲𑀓𑁆𑀓𑀼𑀡𑀫𑀸𑀦𑀸. 𑀅𑀓𑀣𑁂𑀦𑁆𑀢𑀻𑀢𑀺 𑀅𑀓𑀣𑀬𑀫𑀸𑀦𑀸 𑀲𑀫𑀸𑀦𑀸. 𑀦𑀺𑀩𑀦𑁆𑀥𑀺𑀢𑁆𑀯𑀸𑀢𑀺 𑀯𑀘𑀲𑀸 𑀩𑀦𑁆𑀥𑀺𑀢𑁆𑀯𑀸. 𑀲𑀼𑀯𑀡𑁆𑀡𑀲𑀢𑁆𑀣𑀓𑁂𑀦𑀸𑀢𑀺 𑀲𑀼𑀯𑀡𑁆𑀡𑀫𑀬𑁂𑀦 𑀲𑀢𑁆𑀣𑀓𑁂𑀦, 𑀖𑀦𑀲𑀼𑀯𑀡𑁆𑀡𑀓𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀬𑁄𑀫𑀬𑀜𑁆𑀳𑀺 𑀭𑀜𑁆𑀜𑁄 𑀲𑀭𑀻𑀭𑀁 𑀉𑀧𑀦𑁂𑀢𑀼𑀁 𑀅𑀬𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀲𑀼𑀯𑀡𑁆𑀡𑀧𑀭𑀺𑀓𑁆𑀔𑀢𑁂𑀦 𑀯𑀸 𑀅𑀬𑁄𑀫𑀬𑀲𑀢𑁆𑀣𑁂𑀦𑀸𑀢𑀺 𑀅𑀢𑁆𑀣𑁂𑀧𑀺 𑀅𑀬𑀫𑁂𑀯𑀸𑀥𑀺𑀧𑁆𑀧𑀸𑀬𑁄. 𑀩𑀸𑀳𑀼𑀁 𑀨𑀸𑀮𑀸𑀧𑁂𑀢𑁆𑀯𑀸𑀢𑀺 𑀮𑁄𑀳𑀺𑀢𑀲𑀺𑀭𑀸𑀯𑁂𑀥𑀯𑀲𑁂𑀦 𑀩𑀸𑀳𑀼𑀁 𑀨𑀸𑀮𑀸𑀧𑁂𑀢𑁆𑀯𑀸. 𑀓𑁂𑀯𑀮𑀲𑁆𑀲 𑀮𑁄𑀳𑀺𑀢𑀲𑁆𑀲 𑀕𑀩𑁆𑀪𑀺𑀦𑀺𑀬𑀸 𑀤𑀼𑀚𑁆𑀚𑀻𑀭𑀪𑀸𑀯𑀢𑁄 𑀉𑀤𑀓𑁂𑀦 𑀲𑀫𑁆𑀪𑀺𑀦𑁆𑀤𑀺𑀢𑁆𑀯𑀸 𑀧𑀸𑀬𑁂𑀲𑀺. 𑀳𑀜𑁆𑀜𑀺𑀲𑁆𑀲𑀢𑀻𑀢𑀺 𑀳𑀜𑁆𑀜𑀺𑀲𑁆𑀲𑀢𑁂, 𑀆𑀬𑀢𑀺𑀁 𑀳𑀦𑀻𑀬𑀢𑁂𑀢𑀺 𑀅𑀢𑁆𑀣𑁄. 𑀦𑁂𑀫𑀺𑀢𑁆𑀢𑀓𑀸𑀦𑀁 𑀯𑀘𑀦𑀁 𑀢𑀣𑀁 𑀯𑀸 𑀲𑀺𑀬𑀸, 𑀯𑀺𑀢𑀣𑀁 𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀧𑀼𑀢𑁆𑀢𑁄𑀢𑀺 𑀯𑀸 𑀥𑀻𑀢𑀸𑀢𑀺 𑀯𑀸 𑀦 𑀧𑀜𑁆𑀜𑀸𑀬𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀅𑀢𑁆𑀢𑀦𑁄’’𑀢𑀺𑀆𑀤𑀺𑀦𑀸 𑀅𑀜𑁆𑀜𑀫𑁆𑀧𑀺 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀯𑀸𑀭𑁂𑀲𑀺. 𑀭𑀜𑁆𑀜𑁄 𑀪𑀸𑀯𑁄 𑀭𑀚𑁆𑀚𑀁, 𑀭𑀚𑁆𑀚𑀲𑁆𑀲 𑀲𑀫𑀻𑀧𑁂 𑀧𑀯𑀢𑁆𑀢𑀢𑀻𑀢𑀺 𑀑𑀧𑀭𑀚𑁆𑀚𑀁, 𑀞𑀸𑀦𑀦𑁆𑀢𑀭𑀁.

𑀫𑀳𑀸𑀢𑀺 ¶ 𑀫𑀳𑀢𑀻. 𑀲𑀫𑀸𑀲𑁂 𑀯𑀺𑀬 𑀳𑀺 𑀯𑀸𑀓𑁆𑀬𑁂𑀧𑀺 𑀫𑀳𑀦𑁆𑀢𑀲𑀤𑁆𑀤𑀲𑁆𑀲 𑀫𑀳𑀸𑀤𑁂𑀲𑁄. 𑀥𑀼𑀭𑀸𑀢𑀺 𑀕𑀡𑀲𑁆𑀲 𑀥𑀼𑀭𑀪𑀽𑀢𑀸, 𑀥𑁄𑀭𑀬𑁆𑀳𑀸 𑀚𑁂𑀝𑁆𑀞𑀓𑀸𑀢𑀺 𑀅𑀢𑁆𑀣𑁄. 𑀥𑀼𑀭𑀁 𑀦𑀻𑀳𑀭𑀸𑀫𑀻𑀢𑀺 𑀕𑀡𑀥𑀼𑀭𑀫𑀸𑀯𑀳𑀸𑀫𑀺, 𑀕𑀡𑀩𑀦𑁆𑀥𑀺𑀬𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀲𑁄 𑀦 𑀲𑀓𑁆𑀓𑀸’’𑀢𑀺𑀆𑀤𑀺𑀦𑀸 𑀧𑀼𑀦 𑀘𑀺𑀦𑁆𑀢𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑁂𑀦𑀸𑀢𑀺 𑀅𑀳𑀺𑀫𑁂𑀔𑀮𑀺𑀓𑀓𑀼𑀫𑀸𑀭𑀯𑀡𑁆𑀡𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀦𑀸. 𑀢𑁂𑀦𑀸𑀢𑀺 𑀅𑀧𑁆𑀧𑀸𑀬𑀼𑀓𑀪𑀸𑀯𑁂𑀦. 𑀳𑀻𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀢𑁂𑀦 𑀳𑀻𑀢𑀺 𑀯𑀸 𑀉𑀬𑁆𑀬𑁄𑀚𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀼𑀫𑀸𑀭𑀁…𑀧𑁂… 𑀉𑀬𑁆𑀬𑁄𑀚𑁂𑀲𑀻’’𑀢𑀺. 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀇𑀤𑀫𑀢𑁆𑀣𑁄, 𑀇𑀫𑀺𑀦𑀸 𑀔𑀦𑁆𑀥𑀓𑁂 𑀆𑀕𑀢𑀦𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑁂 𑀔𑁄𑀢𑀺𑀆𑀤𑀻𑀳𑀺𑀧𑀺 𑀔𑀦𑁆𑀥𑀓𑀧𑀸𑀴𑀺𑀬𑁂𑀯 (𑀘𑀽𑀴𑀯. 𑁩𑁩𑁯).

𑀧𑁄𑀢𑁆𑀣𑀦𑀺𑀬𑀦𑁆𑀢𑀺 𑀙𑀼𑀭𑀺𑀓𑀁. 𑀬𑀁 ‘‘𑀦𑀔𑀭’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀤𑀺𑀯𑀸 𑀤𑀺𑀯𑀲𑁂𑀢𑀺 (𑀤𑀻. 𑀦𑀺. 𑀝𑀻. 𑁧.𑁧𑁫𑁦) 𑀤𑀺𑀯𑀲𑀲𑁆𑀲𑀧𑀺 𑀤𑀺𑀯𑀸. 𑀲𑀸𑀫𑁆𑀬𑀢𑁆𑀣𑁂 𑀳𑁂𑀢𑀁 𑀪𑀼𑀫𑁆𑀫𑀯𑀘𑀦𑀁 ‘‘𑀤𑀺𑀯𑀸 𑀤𑀺𑀯𑀲𑀲𑁆𑀲𑀸’’𑀢𑀺 𑀅𑀜𑁆𑀜𑀢𑁆𑀣 𑀤𑀲𑁆𑀲𑀦𑀢𑁄. 𑀤𑀺𑀯𑀲𑁆𑀲 𑀤𑀺𑀯𑀲𑁂𑀢𑀺𑀧𑀺 𑀯𑀝𑁆𑀝𑀢𑀺 𑀅𑀓𑀸𑀭𑀦𑁆𑀢𑀲𑁆𑀲𑀧𑀺 𑀤𑀺𑀯𑀲𑀤𑁆𑀤𑀲𑁆𑀲 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀦𑁂𑀧𑀸𑀢𑀺𑀓𑀫𑁆𑀧𑀺 𑀤𑀺𑀯𑀸𑀲𑀤𑁆𑀤𑀫𑀺𑀘𑁆𑀙𑀦𑁆𑀢𑀺 𑀲𑀤𑁆𑀤𑀯𑀺𑀤𑀽, 𑀫𑀚𑁆𑀛𑀦𑁆𑀳𑀺𑀓𑀯𑁂𑀮𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀲𑀸 𑀳𑀺 𑀤𑀺𑀯𑀲𑀲𑁆𑀲 𑀯𑀺𑀲𑁂𑀲𑁄 𑀤𑀺𑀯𑀲𑁄𑀢𑀺. ‘‘𑀪𑀻𑀢𑁄’’𑀢𑀺𑀆𑀤𑀺 𑀧𑀭𑀺𑀬𑀸𑀬𑁄, 𑀓𑀸𑀬𑀣𑀫𑁆𑀪𑀦𑁂𑀦 𑀯𑀸 𑀪𑀻𑀢𑁄. 𑀳𑀤𑀬𑀫𑀁𑀲𑀘𑀮𑀦𑁂𑀦 𑀉𑀩𑁆𑀩𑀺𑀕𑁆𑀕𑁄. ‘‘𑀚𑀸𑀦𑁂𑀬𑁆𑀬𑀼𑀁 𑀯𑀸, 𑀫𑀸 𑀯𑀸’’𑀢𑀺 𑀧𑀭𑀺𑀲𑀗𑁆𑀓𑀸𑀬 𑀉𑀲𑁆𑀲𑀗𑁆𑀓𑀻. 𑀜𑀸𑀢𑁂 𑀲𑀢𑀺 𑀅𑀢𑁆𑀢𑀦𑁄 𑀆𑀕𑀘𑁆𑀙𑀫𑀸𑀦𑀪𑀬𑀯𑀲𑁂𑀦 𑀉𑀢𑁆𑀭𑀲𑁆𑀢𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑀦𑁆𑀢𑀺 𑀤𑁂𑀯𑀤𑀢𑁆𑀢𑁂𑀦 𑀯𑀼𑀢𑁆𑀢𑀸𑀓𑀸𑀭𑀁 𑀯𑀺𑀧𑁆𑀧𑀓𑀸𑀭𑀦𑁆𑀢𑀺 𑀅𑀧𑀓𑀸𑀭𑀁 𑀅𑀦𑀼𑀧𑀓𑀸𑀭𑀁, 𑀯𑀺𑀧𑀭𑀻𑀢𑀓𑀺𑀘𑁆𑀘𑀁 𑀯𑀸. 𑀲𑀩𑁆𑀩𑁂 𑀪𑀺𑀓𑁆𑀔𑀽𑀢𑀺 𑀤𑁂𑀯𑀤𑀢𑁆𑀢𑀧𑀭𑀺𑀲𑀁 𑀲𑀦𑁆𑀥𑀸𑀬𑀸𑀳.

𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 ¶ 𑀅𑀧𑀦𑀬𑀦𑀯𑀲𑁂𑀦 𑀯𑀺𑀮𑀼𑀫𑁆𑀧𑀺𑀢𑁆𑀯𑀸. 𑀭𑀚𑁆𑀚𑁂𑀦𑀸𑀢𑀺 𑀯𑀺𑀚𑀺𑀢𑁂𑀦. 𑀏𑀓𑀲𑁆𑀲 𑀭𑀜𑁆𑀜𑁄 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑀁 ‘‘𑀭𑀚𑁆𑀚’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁, 𑀭𑀸𑀚𑀪𑀸𑀯𑁂𑀦 𑀯𑀸.

𑀫𑀦𑀲𑁄 𑀅𑀢𑁆𑀣𑁄 𑀇𑀘𑁆𑀙𑀸 𑀫𑀦𑁄𑀭𑀣𑁄 𑀭-𑀓𑀸𑀭𑀸𑀕𑀫𑀁, 𑀢-𑀓𑀸𑀭𑀮𑁄𑀧𑀜𑁆𑀘 𑀓𑀢𑁆𑀯𑀸, 𑀘𑀺𑀢𑁆𑀢𑀲𑁆𑀲 𑀯𑀸 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀯𑀺𑀩𑁆𑀪𑀫𑀓𑀭𑀡𑀢𑁄 𑀫𑀦𑀲𑁄 𑀭𑀣𑁄 𑀇𑀯 𑀫𑀦𑁄𑀭𑀣𑁄, 𑀫𑀦𑁄 𑀏𑀯 𑀭𑀣𑁄 𑀯𑀺𑀬𑀸𑀢𑀺 𑀯𑀸 𑀫𑀦𑁄𑀭𑀣𑁄𑀢𑀺𑀧𑀺 𑀦𑁂𑀭𑀼𑀢𑁆𑀢𑀺𑀓𑀸 𑀯𑀤𑀦𑁆𑀢𑀺. 𑀲𑀼𑀓𑀺𑀘𑁆𑀘𑀓𑀸𑀭𑀺𑀫𑁆𑀳𑀻𑀢𑀺 𑀲𑀼𑀓𑀺𑀘𑁆𑀘𑀓𑀸𑀭𑀻 𑀅𑀫𑁆𑀳𑀺. 𑀅𑀯𑀫𑀸𑀦𑀦𑁆𑀢𑀺 𑀅𑀯𑀫𑀜𑁆𑀜𑀦𑀁 𑀅𑀦𑀸𑀤𑀭𑀁. 𑀫𑀽𑀮𑀖𑀘𑁆𑀘𑀦𑁆𑀢𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑀁 𑀲𑀦𑁆𑀥𑀸𑀬𑀸𑀳, 𑀪𑀸𑀯𑀦𑀧𑀼𑀁𑀲𑀓𑀫𑁂𑀢𑀁. 𑀭𑀸𑀚𑀓𑀼𑀮𑀸𑀦𑀁 𑀓𑀺𑀭 𑀲𑀢𑁆𑀣𑁂𑀦 𑀖𑀸𑀢𑀦𑀁 𑀭𑀸𑀚𑀽𑀦𑀫𑀦𑀸𑀘𑀺𑀡𑁆𑀡𑀁, 𑀢𑀲𑁆𑀫𑀸 𑀲𑁄 ‘‘𑀦𑀦𑀼 𑀪𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑀸𑀧𑀦𑀕𑁂𑀳𑀁 𑀦𑀸𑀫 𑀉𑀡𑁆𑀳𑀕𑀳𑀸𑀧𑀦𑀕𑁂𑀳𑀁, 𑀢𑀁 𑀧𑀦 𑀥𑀽𑀫𑁂𑀦𑁂𑀯 𑀅𑀘𑁆𑀙𑀺𑀦𑁆𑀦𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀥𑀽𑀫𑀖𑀭’’𑀦𑁆𑀢𑀺. 𑀓𑀫𑁆𑀫𑀓𑀭𑀡𑀢𑁆𑀣𑀸𑀬𑀸𑀢𑀺 𑀢𑀸𑀧𑀦 𑀓𑀫𑁆𑀫𑀓𑀭𑀡𑀢𑁆𑀣𑀫𑁂𑀯. 𑀓𑁂𑀦𑀘𑀺 𑀙𑀸𑀤𑀺𑀢𑀢𑁆𑀢𑀸 𑀉𑀘𑁆𑀘𑁄 𑀅𑀗𑁆𑀕𑁄𑀢𑀺 𑀉𑀘𑁆𑀘𑀗𑁆𑀕𑁄 ¶ , 𑀬𑀲𑁆𑀲 𑀓𑀲𑁆𑀲𑀘𑀺 𑀕𑀳𑀡𑀢𑁆𑀣𑀁 𑀧𑀝𑀺𑀘𑁆𑀙𑀦𑁆𑀦𑁄 𑀉𑀦𑁆𑀦𑀢𑀗𑁆𑀕𑁄𑀢𑀺 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀘𑁆𑀘𑀗𑁆𑀕𑀁 𑀓𑀢𑁆𑀯𑀸 𑀧𑀯𑀺𑀲𑀺𑀢𑀼𑀁 𑀫𑀸 𑀤𑁂𑀣𑀸’’𑀢𑀺. ‘‘𑀉𑀘𑁆𑀙𑀗𑁆𑀕𑁂 𑀓𑀢𑁆𑀯𑀸’’𑀢𑀺𑀧𑀺 𑀧𑀸𑀞𑁄, 𑀏𑀯𑀁 𑀲𑀢𑀺 𑀫𑀚𑁆𑀛𑀺𑀫𑀗𑁆𑀕𑁄𑀯, 𑀉𑀘𑁆𑀙𑀗𑁆𑀕𑁂 𑀓𑀺𑀜𑁆𑀘𑀺 𑀕𑀳𑁂𑀢𑀩𑁆𑀩𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀫𑁄𑀴𑀺𑀬𑀦𑁆𑀢𑀺 𑀘𑀽𑀴𑀸𑀬𑀁 ‘‘𑀙𑁂𑀢𑁆𑀯𑀸𑀦 𑀫𑁄𑀴𑀺𑀁 𑀯𑀭𑀕𑀦𑁆𑀥𑀯𑀸𑀲𑀺𑀢’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑀅𑀝𑁆𑀞. 𑁨.𑁧; 𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁫𑁫; 𑀅𑀧. 𑀅𑀝𑁆𑀞. 𑁧.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀩𑀼. 𑀯𑀁. 𑀅𑀝𑁆𑀞. 𑁨𑁭.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸; 𑀚𑀸. 𑀅𑀝𑁆𑀞. 𑁧.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸) 𑀯𑀺𑀬. 𑀢𑁂𑀦𑀸𑀳 ‘‘𑀫𑁄𑀴𑀺𑀁 𑀩𑀦𑁆𑀥𑀺𑀢𑁆𑀯𑀸’’𑀢𑀺. 𑀘𑀢𑀼𑀫𑀥𑀼𑀭𑁂𑀦𑀸𑀢𑀺 𑀲𑀧𑁆𑀧𑀺𑀲𑀓𑁆𑀓𑀭𑀫𑀥𑀼𑀦𑀸𑀴𑀺𑀓𑁂𑀭𑀲𑁆𑀦𑁂𑀳𑀲𑀗𑁆𑀔𑀸𑀢𑁂𑀳𑀺 𑀘𑀢𑀽𑀳𑀺 𑀫𑀥𑀼𑀭𑁂𑀳𑀺 𑀅𑀪𑀺𑀲𑀗𑁆𑀔𑀢𑀧𑀸𑀦𑀯𑀺𑀲𑁂𑀲𑁂𑀦𑀸𑀢𑀺 𑀯𑀤𑀦𑁆𑀢𑀺, 𑀢𑀁 𑀫𑀳𑀸𑀥𑀫𑁆𑀫𑀲𑀫𑀸𑀤𑀸𑀦𑀲𑀼𑀢𑁆𑀢𑀧𑀸𑀴𑀺𑀬𑀸 (𑀫. 𑀦𑀺. 𑁧.𑁪𑁭𑁩) 𑀦 𑀲𑀫𑁂𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘‘𑀤𑀥𑀺 𑀘 𑀫𑀥𑀼 𑀘 𑀲𑀧𑁆𑀧𑀺 𑀘 𑀨𑀸𑀡𑀺𑀢𑀜𑁆𑀘 𑀏𑀓𑀚𑁆𑀛𑀁 𑀲𑀁𑀲𑀝𑁆𑀞’’𑀦𑁆𑀢𑀺, (𑀫. 𑀦𑀺. 𑁧.𑁪𑁮𑁫) 𑀢𑀤𑀝𑁆𑀞𑀓𑀣𑀸𑀬𑀜𑁆𑀘 𑀯𑀼𑀢𑁆𑀢𑀁 ‘‘𑀤𑀥𑀺 𑀘 𑀫𑀥𑀼 𑀘𑀸𑀢𑀺 𑀲𑀼𑀧𑀭𑀺𑀲𑀼𑀤𑁆𑀥𑀁 𑀤𑀥𑀺 𑀘 𑀲𑀼𑀫𑀥𑀼𑀭𑀁 𑀫𑀥𑀼 𑀘. 𑀏𑀓𑀚𑁆𑀛𑀁 𑀲𑀁𑀲𑀝𑁆𑀞𑀦𑁆𑀢𑀺 𑀏𑀓𑀢𑁄 𑀓𑀢𑁆𑀯𑀸 𑀫𑀺𑀲𑁆𑀲𑀺𑀢𑀁 𑀆𑀮𑀼𑀴𑀺𑀢𑀁. 𑀢𑀲𑁆𑀲 𑀢𑀦𑁆𑀢𑀺 𑀢𑀲𑁆𑀲 𑀢𑀁 𑀘𑀢𑀼𑀫𑀥𑀼𑀭𑀪𑁂𑀲𑀚𑁆𑀚𑀁 𑀧𑀺𑀯𑀢𑁄’’𑀢𑀺 ‘‘𑀅𑀢𑁆𑀢𑀼𑀧𑀓𑁆𑀓𑀫𑁂𑀦 𑀫𑀭𑀡𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀫𑀦𑀲𑀺 𑀓𑀢𑁆𑀯𑀸 𑀭𑀸𑀚𑀸 𑀢𑀲𑁆𑀲𑀸 𑀲𑀭𑀻𑀭𑀁 𑀮𑁂𑀳𑀺𑀢𑁆𑀯𑀸 𑀬𑀸𑀧𑁂𑀢𑀺. 𑀦 𑀳𑀺 𑀅𑀭𑀺𑀬𑀸 𑀅𑀢𑁆𑀢𑀸𑀦𑀁 𑀯𑀺𑀦𑀺𑀧𑀸𑀢𑁂𑀦𑁆𑀢𑀺.

𑀫𑀕𑁆𑀕𑀨𑀮𑀲𑀼𑀔𑁂𑀦𑀸𑀢𑀺 𑀫𑀕𑁆𑀕𑀨𑀮𑀲𑀼𑀔𑀯𑀢𑀸, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀨𑀮𑀲𑀼𑀔𑀽𑀧𑀲𑀜𑁆𑀳𑀺𑀢𑁂𑀦 𑀘𑀗𑁆𑀓𑀫𑁂𑀦 𑀬𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀳𑀸𑀭𑁂𑀲𑁆𑀲𑀸𑀫𑀻𑀢𑀺 𑀅𑀧𑀦𑁂𑀲𑁆𑀲𑀸𑀫𑀺. 𑀯𑀻𑀢𑀘𑁆𑀘𑀺𑀢𑁂𑀳𑀻𑀢𑀺 𑀯𑀺𑀕𑀢𑀅𑀘𑁆𑀘𑀺𑀢𑁂𑀳𑀺 𑀚𑀸𑀮𑀯𑀺𑀕𑀢𑁂𑀳𑀺 𑀲𑀼𑀤𑁆𑀥𑀗𑁆𑀕𑀸𑀭𑁂𑀳𑀺. 𑀓𑁂𑀦𑀘𑀺 𑀲𑀜𑁆𑀜𑀢𑁆𑀢𑁄𑀢𑀺 𑀓𑁂𑀦𑀘𑀺 𑀲𑀫𑁆𑀫𑀸 𑀜𑀸𑀧𑀺𑀢𑁄, 𑀑𑀯𑀤𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀲𑁆𑀲𑀼𑀓𑀭𑀡𑀢𑁆𑀣𑀸𑀬𑀸𑀢𑀺 𑀫𑀲𑁆𑀲𑀼𑀯𑀺𑀲𑁄𑀥𑀦𑀢𑁆𑀣𑀸𑀬. 𑀫𑀦𑀁 𑀓𑀭𑁄𑀣𑀸𑀢𑀺 𑀬𑀣𑀸 𑀭𑀜𑁆𑀜𑁄 𑀫𑀦𑀁 𑀳𑁄𑀢𑀺, 𑀢𑀣𑀸 𑀓𑀭𑁄𑀣. 𑀧𑀼𑀩𑁆𑀩𑁂𑀢𑀺 𑀧𑀼𑀭𑀺𑀫𑀪𑀯𑁂. 𑀘𑁂𑀢𑀺𑀬𑀗𑁆𑀕𑀡𑁂𑀢𑀺 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑀦𑀝𑁆𑀞𑀸𑀦𑀪𑀽𑀢𑁂 𑀘𑁂𑀢𑀺𑀬𑀲𑁆𑀲 𑀪𑀽𑀫𑀺𑀢𑀮𑁂. 𑀦𑀺𑀲𑀚𑁆𑀚𑀦𑀢𑁆𑀣𑀸𑀬𑀸𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀲𑀻𑀤𑀦𑀢𑁆𑀣𑀸𑀬. 𑀧𑀜𑁆𑀜𑀢𑁆𑀢𑀓𑀝𑀲𑀸𑀭𑀓𑀦𑁆𑀢𑀺 𑀧𑀜𑁆𑀜𑀧𑁂𑀢𑀩𑁆𑀩𑀉𑀢𑁆𑀢𑀫𑀓𑀺𑀮𑀜𑁆𑀚𑀁. 𑀢𑀣𑀸𑀯𑀺𑀥𑁄 ¶ 𑀓𑀺𑀮𑀜𑁆𑀚𑁄 𑀳𑀺 ‘‘𑀓𑀝𑀲𑀸𑀭𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀓𑀫𑁆𑀫𑀤𑁆𑀯𑀬𑀲𑁆𑀲. 𑀢𑀁 𑀧𑀦 𑀫𑀦𑁄𑀧𑀤𑁄𑀲𑀯𑀲𑁂𑀦𑁂𑀯 𑀢𑁂𑀦 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀣𑀸𑀳 𑁋

‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, 𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸;

𑀫𑀦𑀲𑀸 𑀘𑁂 𑀧𑀤𑀼𑀝𑁆𑀞𑁂𑀦, 𑀪𑀸𑀲𑀢𑀺 𑀯𑀸 𑀓𑀭𑁄𑀢𑀺 𑀯𑀸;

𑀢𑀢𑁄 𑀦𑀁 𑀤𑀼𑀓𑁆𑀔𑀫𑀦𑁆𑀯𑁂𑀢𑀺, 𑀘𑀓𑁆𑀓𑀁𑀯 𑀯𑀳𑀢𑁄 𑀧𑀤’’𑀦𑁆𑀢𑀺. (𑀥. 𑀧. 𑁧; 𑀦𑁂𑀢𑁆𑀢𑀺. 𑁯𑁦);

𑀧𑀭𑀺𑀘𑀸𑀭𑀓𑁄𑀢𑀺 𑀲𑀳𑀸𑀬𑀓𑁄. 𑀅𑀪𑁂𑀤𑁂𑀧𑀺 𑀪𑁂𑀤𑀫𑀺𑀯 𑀯𑁄𑀳𑀸𑀭𑁄 𑀮𑁄𑀓𑁂 𑀧𑀸𑀓𑀝𑁄𑀢𑀺 𑀯𑀼𑀢𑁆𑀢𑀁 ‘‘𑀬𑀓𑁆𑀔𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀻’’𑀢𑀺. 𑀏𑀓𑀸𑀬𑀧𑀺 𑀳𑀺 𑀉𑀧𑁆𑀧𑀸𑀤𑀓𑀺𑀭𑀺𑀬𑀸𑀬 ¶ 𑀇𑀥 𑀪𑁂𑀤𑀯𑁄𑀳𑀸𑀭𑁄, 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀳𑀼𑀢𑁆𑀯𑀸, 𑀧𑀯𑀢𑁆𑀢𑀺𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀻𑀢𑀺 𑀯𑀸 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁, 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀸 𑀧𑀯𑀢𑁆𑀢𑀦𑀲𑀗𑁆𑀔𑀸𑀢𑀁 𑀲𑀸𑀢𑀺𑀲𑀬𑀦𑀺𑀩𑁆𑀩𑀢𑁆𑀢𑀦𑀁 𑀜𑀸𑀧𑁂𑀢𑀼𑀁 𑀏𑀓𑀸𑀬𑁂𑀯 𑀓𑀺𑀭𑀺𑀬𑀸 𑀧𑀤𑀤𑁆𑀯𑀬𑁂𑀦 𑀯𑀼𑀢𑁆𑀢𑀸. 𑀢𑀣𑀸𑀯𑀘𑀦𑀜𑁆𑀳𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀦𑁂𑀬𑁂𑀯 𑀤𑀺𑀲𑁆𑀲𑀢𑀺 ‘‘𑀫𑀓𑁆𑀓𑀝𑀓𑁄 𑀦𑀸𑀫 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺 (𑀥. 𑀧. 𑀅𑀝𑁆𑀞. 𑁧.𑁫) 𑀓𑀡𑁆𑀝𑀓𑁄 𑀦𑀸𑀫…𑀧𑁂… 𑀦𑀺𑀩𑁆𑀩𑀢𑁆𑀢𑀺, (𑀚𑀸. 𑀅𑀝𑁆𑀞. 𑁧.𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸) 𑀫𑀡𑁆𑀟𑀽𑀓𑁄 𑀦𑀸𑀫…𑀧𑁂… 𑀦𑀺𑀩𑁆𑀩𑀢𑁆𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀤𑁆𑀯𑀺𑀦𑁆𑀦𑀁 𑀯𑀸 𑀧𑀤𑀸𑀦𑀁 𑀪𑀸𑀯𑀢𑁆𑀣𑀫𑀧𑁂𑀓𑁆𑀔𑀺𑀢𑁆𑀯𑀸 ‘‘𑀬𑀓𑁆𑀔𑁄’’𑀢𑀺𑀆𑀤𑀻𑀲𑀼 𑀲𑀸𑀫𑀺𑀅𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁 𑀓𑀢𑀁 𑀧𑀼𑀭𑀺𑀫𑀸𑀬 𑀧𑀘𑁆𑀙𑀺𑀫𑀯𑀺𑀲𑁂𑀲𑀦𑀢𑁄, 𑀧𑀭𑀺𑀘𑀸𑀭𑀓𑀲𑁆𑀲…𑀧𑁂… 𑀬𑀓𑁆𑀔𑀲𑁆𑀲 𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀻𑀢𑀺 𑀅𑀢𑁆𑀣𑁄, 𑀳𑁂𑀢𑁆𑀯𑀢𑁆𑀣𑁂 𑀯𑀸 𑀏𑀢𑁆𑀣 𑀢𑁆𑀯𑀸-𑀲𑀤𑁆𑀤𑁄 𑀬𑀓𑁆𑀔𑀲𑁆𑀲 𑀪𑀸𑀯𑀢𑁄 𑀧𑀯𑀢𑁆𑀢𑀦𑀳𑁂𑀢𑀽𑀢𑀺. 𑀅𑀲𑁆𑀲 𑀧𑀦 𑀭𑀜𑁆𑀜𑁄 𑀫𑀳𑀸𑀧𑀼𑀜𑁆𑀜𑀲𑁆𑀲𑀧𑀺 𑀲𑀫𑀸𑀦𑀲𑁆𑀲 𑀢𑀢𑁆𑀣 𑀩𑀳𑀼𑀮𑀁 𑀦𑀺𑀩𑁆𑀩𑀢𑁆𑀢𑀧𑀼𑀩𑁆𑀩𑀢𑀸𑀬 𑀘𑀺𑀭𑀧𑀭𑀺𑀘𑀺𑀢𑀦𑀺𑀓𑀦𑁆𑀢𑀺 𑀯𑀲𑁂𑀦 𑀢𑀢𑁆𑀣𑁂𑀯 𑀦𑀺𑀩𑁆𑀩𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀁 𑀤𑀺𑀯𑀲𑀫𑁂𑀯𑀸𑀢𑀺 𑀭𑀜𑁆𑀜𑁄 𑀫𑀭𑀡𑀤𑀺𑀯𑀲𑁂𑀬𑁂𑀯. 𑀔𑁄𑀪𑁂𑀢𑁆𑀯𑀸𑀢𑀺 𑀧𑀼𑀢𑁆𑀢𑀲𑁆𑀦𑁂𑀳𑀲𑁆𑀲 𑀩𑀮𑀯𑀪𑀸𑀯𑀢𑁄, 𑀢𑀁𑀲𑀳𑀚𑀸𑀢𑀧𑀻𑀢𑀺 𑀯𑁂𑀕𑀲𑁆𑀲 𑀘 𑀲𑀯𑀺𑀧𑁆𑀨𑀸𑀭𑀢𑀸𑀬 𑀢𑀁 𑀲𑀫𑀼𑀝𑁆𑀞𑀸𑀦𑀭𑀽𑀧𑀥𑀫𑁆𑀫𑁂𑀳𑀺 𑀨𑀭𑀡𑀯𑀲𑁂𑀦 𑀲𑀓𑀮𑀲𑀭𑀻𑀭𑀁 𑀆𑀮𑁄𑀴𑁂𑀢𑁆𑀯𑀸. 𑀢𑁂𑀦𑀸𑀳 ‘‘𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀅𑀝𑁆𑀞𑀸𑀲𑀻’’𑀢𑀺. 𑀧𑀺𑀢𑀼𑀕𑀼𑀡𑀦𑁆𑀢𑀺 𑀧𑀺𑀢𑀼𑀦𑁄 𑀅𑀢𑁆𑀢𑀦𑀺 𑀲𑀺𑀦𑁂𑀳𑀕𑀼𑀡𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀬𑀺 𑀚𑀸𑀢𑁂𑀧𑀻’’𑀢𑀺𑀆𑀤𑀺. 𑀯𑀺𑀲𑁆𑀲𑀚𑁆𑀚𑁂𑀣 𑀯𑀺𑀲𑁆𑀲𑀚𑁆𑀚𑁂𑀣𑀸𑀢𑀺 𑀢𑀼𑀭𑀺𑀢𑀯𑀲𑁂𑀦, 𑀲𑁄𑀓𑀯𑀲𑁂𑀦 𑀘 𑀯𑀼𑀢𑁆𑀢𑀁.

𑀅𑀦𑀼𑀝𑁆𑀞𑀼𑀪𑀺𑀢𑁆𑀯𑀸𑀢𑀺 𑀅𑀙𑀟𑁆𑀟𑁂𑀢𑁆𑀯𑀸.

𑀦𑀸𑀴𑀸𑀕𑀺𑀭𑀺𑀳𑀢𑁆𑀣𑀺𑀁 𑀫𑀼𑀜𑁆𑀘𑀸𑀧𑁂𑀢𑁆𑀯𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀧𑀓𑀸𑀭𑀢𑁆𑀣𑁄, 𑀢𑁂𑀦 ‘‘𑀅𑀪𑀺𑀫𑀸𑀭𑀓𑀧𑀼𑀭𑀺𑀲𑀧𑁂𑀲𑁂𑀦𑀸𑀤𑀺𑀧𑁆𑀧𑀓𑀸𑀭𑁂𑀦𑀸’’𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁆𑀢𑀬𑀁 𑀧𑀘𑁆𑀘𑀸𑀫𑀲𑀢𑀺, 𑀓𑀢𑁆𑀣𑀘𑀺 𑀧𑀦 𑀲𑁄 𑀦 ¶ 𑀤𑀺𑀝𑁆𑀞𑁄. 𑀧𑀜𑁆𑀘 𑀯𑀢𑁆𑀣𑀽𑀦𑀻𑀢𑀺 ‘‘𑀲𑀸𑀥𑀼 𑀪𑀦𑁆𑀢𑁂 𑀪𑀺𑀓𑁆𑀔𑀽 𑀬𑀸𑀯𑀚𑀻𑀯𑀁 𑀆𑀭𑀜𑁆𑀜𑀺𑀓𑀸 𑀅𑀲𑁆𑀲𑀽’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁦𑁯; 𑀘𑀽𑀴𑀯. 𑁩𑁪𑁩) 𑀯𑀺𑀦𑀬𑁂 𑀯𑀼𑀢𑁆𑀢𑀸𑀦𑀺 𑀧𑀜𑁆𑀘 𑀯𑀢𑁆𑀣𑀽𑀦𑀺. 𑀬𑀸𑀘𑀺𑀢𑁆𑀯𑀸𑀢𑀺 𑀏𑀢𑁆𑀣 𑀬𑀸𑀘𑀦𑀁 𑀯𑀺𑀬 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦 𑀳𑀺 𑀲𑁄 𑀧𑀝𑀺𑀧𑀚𑁆𑀚𑀺𑀢𑀼𑀓𑀸𑀫𑁄 𑀬𑀸𑀘𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑀺𑀦𑀬𑁂 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁧𑁦) 𑀯𑀼𑀢𑁆𑀢𑁄𑀬𑁂𑀯. 𑀲𑀜𑁆𑀜𑀸𑀧𑁂𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀗𑁆𑀖𑀪𑁂𑀤𑀁 𑀓𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀤𑀜𑁆𑀘 𑀢𑀲𑁆𑀲 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀲𑁄 𑀧𑀦 𑀅𑀓𑀢𑁂𑀧𑀺 𑀲𑀗𑁆𑀖𑀪𑁂𑀤𑁂 𑀢𑁂𑀳𑀺 𑀲𑀜𑁆𑀜𑀸𑀧𑁂𑀢𑀺𑀬𑁂𑀯. 𑀉𑀡𑁆𑀳𑀮𑁄𑀳𑀺𑀢𑀦𑁆𑀢𑀺 𑀩𑀮𑀯𑀲𑁄𑀓𑀲𑀫𑀼𑀝𑁆𑀞𑀺𑀢𑀁 𑀉𑀡𑁆𑀳𑀪𑀽𑀢𑀁 𑀮𑁄𑀳𑀺𑀢𑀁. 𑀫𑀳𑀸𑀦𑀺𑀭𑀬𑁂𑀢𑀺 𑀅𑀯𑀻𑀘𑀺𑀦𑀺𑀭𑀬𑁂. 𑀯𑀺𑀢𑁆𑀣𑀸𑀭𑀓𑀣𑀸𑀦𑀬𑁄𑀢𑀺 𑀅𑀚𑀸𑀢𑀲𑀢𑁆𑀢𑀼𑀧𑀲𑀸𑀤𑀦𑀸𑀤𑀺𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀯𑀢𑁆𑀢𑀩𑁆𑀩𑀸𑀬 𑀓𑀣𑀸𑀬 𑀦𑀬𑀫𑀢𑁆𑀢𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 ¶ 𑀲𑀸 𑀦 𑀯𑀼𑀢𑁆𑀢𑀸, 𑀦𑀦𑀼 𑀲𑀗𑁆𑀕𑀻𑀢𑀺𑀓𑀣𑀸 𑀯𑀺𑀬 𑀔𑀦𑁆𑀥𑀓𑁂 (𑀘𑀽𑀴𑀯. 𑁩𑁪𑁩) 𑀆𑀕𑀢𑀸𑀧𑀺 𑀲𑀸 𑀯𑀢𑁆𑀢𑀩𑁆𑀩𑀸𑀢𑀺 𑀘𑁄𑀤𑀦𑀸𑀬 𑀆𑀳 ‘‘𑀆𑀕𑀢𑀢𑁆𑀢𑀸 𑀧𑀦 𑀲𑀩𑁆𑀩𑀁 𑀦 𑀯𑀼𑀢𑁆𑀢’’𑀦𑁆𑀢𑀺, 𑀔𑀦𑁆𑀥𑀓𑁂 𑀆𑀕𑀢𑀢𑁆𑀢𑀸, 𑀓𑀺𑀜𑁆𑀘𑀺𑀫𑀢𑁆𑀢𑀲𑁆𑀲 𑀘 𑀯𑀘𑀦𑀓𑁆𑀓𑀫𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀦 𑀏𑀢𑁆𑀣 𑀓𑁄𑀘𑀺 𑀯𑀺𑀭𑁄𑀥𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀏𑀯’’𑀦𑁆𑀢𑀺𑀆𑀤𑀺 𑀬𑀣𑀸𑀦𑀼𑀲𑀦𑁆𑀥𑀺𑀦𑀸 𑀦𑀺𑀕𑀫𑀦𑀁.

𑀓𑁄𑀲𑀮𑀭𑀜𑁆𑀜𑁄𑀢𑀺 𑀧𑀲𑁂𑀦𑀤𑀺𑀓𑁄𑀲𑀮𑀲𑁆𑀲 𑀧𑀺𑀢𑀼 𑀫𑀳𑀸𑀓𑁄𑀲𑀮𑀭𑀜𑁆𑀜𑁄. 𑀦𑀦𑀼 𑀯𑀺𑀤𑁂𑀳𑀲𑁆𑀲 𑀭𑀜𑁆𑀜𑁄 𑀥𑀻𑀢𑀸 𑀯𑁂𑀤𑁂𑀳𑀻𑀢𑀺 𑀅𑀢𑁆𑀣𑁄 𑀲𑀫𑁆𑀪𑀯𑀢𑀻𑀢𑀺 𑀘𑁄𑀤𑀦𑀫𑀧𑀦𑁂𑀢𑀺 ‘‘𑀦 𑀯𑀺𑀤𑁂𑀳𑀭𑀜𑁆𑀜𑁄’’𑀢𑀺 𑀇𑀫𑀺𑀦𑀸. 𑀅𑀣 𑀓𑁂𑀦𑀝𑁆𑀞𑁂𑀦𑀸𑀢𑀺 𑀆𑀳 ‘‘𑀧𑀡𑁆𑀟𑀺𑀢𑀸𑀥𑀺𑀯𑀘𑀦𑀫𑁂𑀢’’𑀦𑁆𑀢𑀺, 𑀧𑀡𑁆𑀟𑀺𑀢𑀯𑁂𑀯𑀘𑀦𑀁, 𑀧𑀡𑁆𑀟𑀺𑀢𑀦𑀸𑀫𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀅𑀬𑀁 𑀧𑀦 𑀧𑀤𑀢𑁆𑀣𑁄 𑀓𑁂𑀦 𑀦𑀺𑀩𑁆𑀩𑀘𑀦𑁂𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀢𑀢𑁆𑀭𑀸𑀬’’𑀦𑁆𑀢𑀺𑀆𑀤𑀺. 𑀯𑀺𑀤𑀦𑁆𑀢𑀻𑀢𑀺 𑀚𑀸𑀦𑀦𑁆𑀢𑀺. 𑀯𑁂𑀤𑁂𑀦𑀸𑀢𑀺 𑀓𑀭𑀡𑀪𑀽𑀢𑁂𑀦 𑀜𑀸𑀡𑁂𑀦. ‘‘𑀈𑀳𑀢𑀻’’𑀢𑀺 𑀏𑀢𑀲𑁆𑀲 𑀧𑀯𑀢𑁆𑀢𑀢𑀻𑀢𑀺𑀧𑀺 𑀅𑀢𑁆𑀣𑁄 𑀝𑀻𑀓𑀸𑀬𑀁 𑀯𑀼𑀢𑁆𑀢𑁄. 𑀯𑁂𑀤𑁂𑀳𑀻𑀢𑀺 𑀇𑀥 𑀦𑀤𑀸𑀤𑀺𑀕𑀡𑁄𑀢𑀺 𑀆𑀳 ‘‘𑀯𑁂𑀤𑁂𑀳𑀺𑀬𑀸’’𑀢𑀺.

𑀲𑁄𑀬𑁂𑀯 𑀅𑀳𑁄 𑀢𑀤𑀳𑁄, 𑀲𑀢𑁆𑀢𑀫𑀻𑀯𑀘𑀦𑁂𑀦 𑀧𑀦 ‘‘𑀢𑀤𑀳𑀽’’𑀢𑀺 𑀧𑀤𑀲𑀺𑀤𑁆𑀥𑀺. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀤𑀺𑀯𑀲𑁂. 𑀉𑀧𑀲𑀤𑁆𑀤𑁂𑀦 𑀯𑀺𑀲𑀺𑀝𑁆𑀞𑁄 𑀯𑀲𑀲𑀤𑁆𑀤𑁄 𑀉𑀧𑀯𑀲𑀦𑁂𑀬𑁂𑀯, 𑀦 𑀯𑀲𑀦𑀫𑀢𑁆𑀢𑁂, 𑀉𑀧𑀯𑀲𑀦𑀜𑁆𑀘 𑀲𑀫𑀸𑀤𑀸𑀦𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀮𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀲𑀻𑀮𑁂𑀦𑀸𑀢𑀺 𑀲𑀸𑀲𑀦𑁂 𑀅𑀭𑀺𑀬𑀼𑀧𑁄𑀲𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀦𑀲𑀦𑁂𑀦𑀸𑀢𑀺 𑀅𑀪𑀼𑀜𑁆𑀚𑀦𑀫𑀢𑁆𑀢𑀲𑀗𑁆𑀔𑀸𑀢𑀁 𑀩𑀸𑀳𑀺𑀭𑀼𑀧𑁄𑀲𑀣𑀁. 𑀯𑀸-𑀲𑀤𑁆𑀤𑁄 𑀘𑁂𑀢𑁆𑀣 𑀅𑀦𑀺𑀬𑀫𑀢𑁆𑀣𑁄, 𑀢𑁂𑀦 𑀏𑀓𑀘𑁆𑀘𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁, 𑀤𑀼𑀲𑁆𑀲𑀻𑀮𑁆𑀬𑀸𑀤𑀺𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀣𑀸 𑀳𑀺 𑀕𑁄𑀧𑀸𑀮𑀓𑀼𑀧𑁄𑀲𑀣𑁄 𑀅𑀪𑀺𑀚𑁆𑀛𑀸𑀲𑀳𑀕𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑁄, 𑀦𑀺𑀕𑀡𑁆𑀞𑀼𑀧𑁄𑀲𑀣𑁄 𑀫𑁄𑀲𑀯𑀚𑁆𑀚𑀸𑀤𑀺𑀯𑀲𑁂𑀦. 𑀬𑀣𑀸𑀳 𑀯𑀺𑀲𑀸𑀔𑀼𑀧𑁄𑀲𑀣𑁂 ‘‘𑀲𑁄 𑀢𑁂𑀦 𑀅𑀪𑀺𑀚𑁆𑀛𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀤𑀺𑀯𑀲𑀁 𑀅𑀢𑀺𑀦𑀸𑀫𑁂𑀢𑀻’’𑀢𑀺, (𑀅. 𑀦𑀺. 𑁩.𑁭𑁧) ‘‘𑀇𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀲𑀘𑁆𑀘𑁂 𑀲𑀫𑀸𑀤𑀧𑁂𑀢𑀩𑁆𑀩𑀸, 𑀫𑀼𑀲𑀸𑀯𑀸𑀤𑁂 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀫𑀸𑀤𑀧𑁂𑀢𑀻’’𑀢𑀺 (𑀅. 𑀦𑀺. 𑁩.𑁭𑁧) 𑀘 𑀆𑀤𑀺.

𑀏𑀯𑀁 𑀅𑀥𑀺𑀧𑁆𑀧𑁂𑀢𑀢𑁆𑀣𑀸𑀦𑀼𑀭𑀽𑀧𑀁 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀦𑀺𑀩𑁆𑀩𑀘𑀦𑀸𑀦𑀼𑀭𑀽𑀧𑀁 𑀅𑀥𑀺𑀧𑁆𑀧𑁂𑀢𑀢𑁆𑀣𑀁 ¶ 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣𑀸𑀢𑀺 𑀉𑀧𑁄𑀲𑀣𑀲𑀤𑁆𑀤𑁂. 𑀲𑀫𑀸𑀦𑀲𑀤𑁆𑀤𑀯𑀘𑀦𑀻𑀬𑀸𑀦𑀁 𑀅𑀦𑁂𑀓𑀧𑁆𑀧𑀪𑁂𑀤𑀸𑀦𑀁 𑀅𑀢𑁆𑀣𑀸𑀦𑀫𑀼𑀤𑁆𑀥𑀭𑀡𑀁 𑀅𑀢𑁆𑀣𑀼𑀤𑁆𑀥𑀸𑀭𑁄 𑀲𑀫𑀸𑀦𑀲𑀤𑁆𑀤𑀯𑀘𑀦𑀻𑀬𑁂𑀲𑀼 𑀯𑀸 𑀅𑀢𑁆𑀣𑁂𑀲𑀼 𑀅𑀥𑀺𑀧𑁆𑀧𑁂𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀉𑀤𑁆𑀥𑀭𑀡𑀁 𑀅𑀢𑁆𑀣𑀼𑀤𑁆𑀥𑀸𑀭𑁄𑀢𑀺𑀧𑀺 𑀯𑀝𑁆𑀝𑀢𑀺. 𑀅𑀦𑁂𑀓𑀢𑁆𑀣𑀤𑀲𑁆𑀲𑀦𑀜𑁆𑀳𑀺 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑁆𑀲 𑀉𑀤𑁆𑀥𑀭𑀡𑀢𑁆𑀣𑀫𑁂𑀯. 𑀦𑀦𑀼 𑀘 ‘‘𑀅𑀢𑁆𑀣𑀫𑀢𑁆𑀢𑀁 𑀧𑀢𑀺 𑀲𑀤𑁆𑀤𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀅𑀢𑁆𑀣𑀼𑀤𑁆𑀥𑀸𑀭𑁂 ¶ 𑀘𑁄𑀤𑀦𑀸, 𑀲𑁄𑀥𑀦𑀸 𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀬𑁂𑀯. 𑀅𑀧𑀺𑀘 𑀯𑀺𑀲𑁂𑀲𑀲𑀤𑁆𑀤𑀲𑁆𑀲 𑀅𑀯𑀸𑀘𑀓𑀪𑀸𑀯𑀢𑁄 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀤𑀺𑀯𑀺𑀲𑀬𑁄𑀧𑀺 𑀉𑀧𑁄𑀲𑀣𑀲𑀤𑁆𑀤𑁄 𑀲𑀸𑀫𑀜𑁆𑀜𑀭𑀽𑀧𑁄 𑀏𑀯, 𑀅𑀣 𑀓𑀲𑁆𑀫𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀤𑀺𑀯𑀺𑀲𑁂𑀲𑀯𑀺𑀲𑀬𑁄 𑀯𑀼𑀢𑁆𑀢𑁄𑀢𑀺? 𑀲𑀘𑁆𑀘𑀫𑁂𑀢𑀁, 𑀅𑀬𑀁 𑀧𑀦𑀢𑁆𑀣𑁄 𑀢𑀸𑀤𑀺𑀲𑀁 𑀲𑀤𑁆𑀤𑀲𑀸𑀫𑀜𑁆𑀜𑀫𑀦𑀸𑀤𑀺𑀬𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀪𑀯𑀢𑁆𑀣𑀤𑀲𑁆𑀲𑀦𑀯𑀲𑁂𑀦𑁂𑀯 𑀯𑀼𑀢𑁆𑀢𑁄𑀢𑀺, 𑀏𑀯𑀁 𑀲𑀩𑁆𑀩𑀢𑁆𑀣. 𑀲𑀻𑀮𑀤𑀺𑀝𑁆𑀞𑀺𑀯𑀲𑁂𑀦 (𑀲𑀻𑀮𑀲𑀼𑀤𑁆𑀥𑀺𑀯𑀲𑁂𑀦 𑀤𑀻. 𑀦𑀺. 𑀝𑀻. 𑁧.𑁧𑁫𑁦) 𑀉𑀧𑁂𑀢𑁂𑀳𑀺 𑀲𑀫𑀕𑁆𑀕𑁂𑀳𑀺 𑀯𑀲𑀻𑀬𑀢𑀺 𑀦 𑀉𑀝𑁆𑀞𑀻𑀬𑀢𑀻𑀢𑀺 𑀉𑀧𑁄𑀲𑀣𑁄, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄. 𑀲𑀫𑀸𑀤𑀸𑀦𑀯𑀲𑁂𑀦, 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀯𑀸 𑀉𑀧𑁂𑀘𑁆𑀘 𑀅𑀭𑀺𑀬𑀯𑀸𑀲𑀸𑀤𑀺𑀅𑀢𑁆𑀣𑀸𑀬 𑀯𑀲𑀺𑀢𑀩𑁆𑀩𑁄 𑀆𑀯𑀲𑀺𑀢𑀩𑁆𑀩𑁄𑀢𑀺 𑀉𑀧𑁄𑀲𑀣𑁄, 𑀲𑀻𑀮𑀁. 𑀅𑀦𑀲𑀦𑀸𑀤𑀺𑀯𑀲𑁂𑀦 𑀉𑀧𑁂𑀘𑁆𑀘 𑀯𑀲𑀺𑀢𑀩𑁆𑀩𑁄 𑀅𑀦𑀼𑀯𑀲𑀺𑀢𑀩𑁆𑀩𑁄𑀢𑀺 𑀉𑀧𑁄𑀲𑀣𑁄, 𑀯𑀢𑀲𑀫𑀸𑀤𑀸𑀦𑀲𑀗𑁆𑀔𑀸𑀢𑁄 𑀉𑀧𑀯𑀸𑀲𑁄. 𑀦𑀯𑀫𑀳𑀢𑁆𑀣𑀺𑀓𑀼𑀮𑀧𑀭𑀺𑀬𑀸𑀧𑀦𑁆𑀦𑁂 𑀳𑀢𑁆𑀣𑀺𑀦𑀸𑀕𑁂 𑀓𑀺𑀜𑁆𑀘𑀺 𑀓𑀺𑀭𑀺𑀬𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀢𑀁𑀓𑀼𑀮𑀲𑀫𑁆𑀪𑀽𑀢𑀢𑀸𑀫𑀢𑁆𑀢𑀁 𑀧𑀢𑀺 𑀭𑀼𑀴𑁆𑀳𑀺𑀯𑀲𑁂𑀦𑁂𑀯 𑀉𑀧𑁄𑀲𑀣𑁄𑀢𑀺 𑀲𑀫𑀜𑁆𑀜𑀸, 𑀢𑀲𑁆𑀫𑀸 𑀢𑀢𑁆𑀣 𑀦𑀸𑀫𑀧𑀜𑁆𑀜𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀭𑀬𑁄 𑀉𑀧𑀕𑀦𑁆𑀢𑁆𑀯𑀸 𑀉𑀲𑁂𑀢𑀺 𑀤𑀸𑀳𑁂𑀢𑀻𑀢𑀺 𑀉𑀧𑁄𑀲𑀣𑁄, 𑀉𑀲𑀲𑀤𑁆𑀤𑁄 𑀤𑀸𑀳𑁂𑀢𑀺𑀧𑀺 𑀲𑀤𑁆𑀤𑀯𑀺𑀤𑀽 𑀯𑀤𑀦𑁆𑀢𑀺. 𑀤𑀺𑀯𑀲𑁂 𑀧𑀦 𑀉𑀧𑁄𑀲𑀣 𑀲𑀤𑁆𑀤𑀧𑀯𑀢𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸𑀬𑁂𑀯. ‘‘𑀲𑀼𑀤𑁆𑀥𑀲𑁆𑀲 𑀯𑁂 𑀲𑀤𑀸𑀨𑀕𑁆𑀕𑀽’’𑀢𑀺𑀆𑀤𑀻𑀲𑀼 𑀲𑀼𑀤𑁆𑀥𑀲𑁆𑀲𑀸𑀢𑀺 𑀲𑀩𑁆𑀩𑀲𑁄 𑀓𑀺𑀮𑁂𑀲𑀫𑀮𑀸𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑀲𑁆𑀲. 𑀯𑁂𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀩𑁆𑀬𑀢𑁆𑀢𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀲𑀤𑀸𑀢𑀺 𑀦𑀺𑀘𑁆𑀘𑀓𑀸𑀮𑀫𑁆𑀧𑀺. 𑀨𑀕𑁆𑀕𑀽𑀢𑀺 𑀨𑀕𑁆𑀕𑀼𑀡𑀻𑀦𑀓𑁆𑀔𑀢𑁆𑀢𑀫𑁂𑀯 𑀬𑀼𑀢𑁆𑀢𑀁 𑀪𑀯𑀢𑀺, 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀘𑁂𑀢𑀲𑁆𑀲 𑀲𑀺𑀤𑁆𑀥𑀺. 𑀬𑀲𑁆𑀲 𑀳𑀺 𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑀲𑁆𑀲 𑀦𑀸𑀫 𑀩𑁆𑀭𑀸𑀳𑁆𑀫𑀡𑀲𑁆𑀲 𑀨𑀕𑁆𑀕𑀼𑀡𑀫𑀸𑀲𑁂 𑀉𑀢𑁆𑀢𑀭𑀨𑀕𑁆𑀕𑀼𑀡𑀻𑀬𑀼𑀢𑁆𑀢𑀤𑀺𑀯𑀲𑁂 𑀢𑀺𑀢𑁆𑀣𑀦𑁆𑀳𑀸𑀦𑀁 𑀓𑀭𑁄𑀦𑁆𑀢𑀲𑁆𑀲 𑀲𑀁𑀯𑀘𑁆𑀙𑀭𑀫𑁆𑀧𑀺 𑀓𑀢𑀧𑀸𑀧𑀧𑀯𑀸𑀳𑀦𑀁 𑀳𑁄𑀢𑀻𑀢𑀺 𑀮𑀤𑁆𑀥𑀺. 𑀢𑀢𑁄 𑀢𑀁 𑀯𑀺𑀯𑁂𑀘𑁂𑀢𑀼𑀁 𑀇𑀤𑀁 𑀫𑀚𑁆𑀛𑀺𑀫𑀸𑀕𑀫𑀸𑀯𑀭𑁂 𑀫𑀽𑀮𑀧𑀡𑁆𑀡𑀸𑀲𑀓𑁂 𑀯𑀢𑁆𑀣𑀲𑀼𑀢𑁆𑀢𑁂 𑀪𑀕𑀯𑀢𑀸 𑀯𑀼𑀢𑁆𑀢𑀁. 𑀲𑀼𑀤𑁆𑀥𑀲𑁆𑀲𑀼𑀧𑁄𑀲𑀣𑁄 𑀲𑀤𑀸𑀢𑀺 𑀬𑀣𑀸𑀯𑀼𑀢𑁆𑀢𑀓𑀺𑀮𑁂𑀲𑀫𑀮𑀲𑀼𑀤𑁆𑀥𑀺𑀬𑀸 𑀧𑀭𑀺𑀲𑀼𑀤𑁆𑀥𑀲𑁆𑀲 𑀉𑀧𑁄𑀲𑀣𑀗𑁆𑀕𑀸𑀦𑀺, 𑀯𑀢𑀲𑀫𑀸𑀤𑀸𑀦𑀸𑀦𑀺 𑀘 𑀅𑀲𑀫𑀸𑀤𑀺𑀬𑀢𑁄𑀧𑀺 𑀦𑀺𑀘𑁆𑀘𑀓𑀸𑀮𑀁 𑀉𑀧𑁄𑀲𑀣𑀯𑀸𑀲𑁄 𑀏𑀯 𑀪𑀯𑀢𑀻𑀢𑀺 𑀅𑀢𑁆𑀣𑁄. ‘‘𑀦 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀻𑀲𑀼 ‘‘𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀦 𑀕𑀦𑁆𑀢𑀩𑁆𑀩𑁄’’𑀢𑀺 𑀦𑀻𑀳𑀭𑀺𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀉𑀧𑀯𑀲𑀺𑀢𑀩𑁆𑀩𑀤𑀺𑀯𑀲𑁄𑀢𑀺 𑀉𑀧𑀯𑀲𑀦𑀓𑀭𑀡𑀤𑀺𑀯𑀲𑁄, 𑀅𑀥𑀺𑀓𑀭𑀡𑁂 𑀯𑀸 𑀢𑀩𑁆𑀩𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀺𑀩𑁆𑀩𑀘𑀦𑁂𑀦 𑀲𑀫𑁂𑀢𑀺. 𑀅𑀦𑁆𑀢𑁄𑀕𑀥𑀸𑀯𑀥𑀸𑀭𑀡𑁂𑀦, 𑀅𑀜𑁆𑀜𑀢𑁆𑀣𑀸𑀧𑁄𑀳𑀦𑁂𑀦 𑀘 𑀦𑀺𑀯𑀸𑀭𑀡𑀁 𑀲𑀦𑁆𑀥𑀸𑀬 ‘‘𑀲𑁂𑀲𑀤𑁆𑀯𑀬𑀦𑀺𑀯𑀸𑀭𑀡𑀢𑁆𑀣’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀧𑀦𑁆𑀦𑀭𑀲𑁂’’𑀢𑀺 𑀧𑀤𑀫𑀸𑀭𑀩𑁆𑀪 𑀤𑀺𑀯𑀲𑀯𑀲𑁂𑀦 𑀬𑀣𑀸𑀯𑀼𑀢𑁆𑀢𑀦𑀺𑀩𑁆𑀩𑀘𑀦𑀁 𑀓𑀢𑀦𑁆𑀢𑀺 ¶ 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀦𑁂𑀯 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀧𑀜𑁆𑀘𑀤𑀲𑀦𑁆𑀦𑀁 𑀢𑀺𑀣𑀻𑀦𑀁 𑀧𑀽𑀭𑀡𑀯𑀲𑁂𑀦 ‘‘𑀧𑀦𑁆𑀦𑀭𑀲𑁄’’𑀢𑀺 𑀳𑀺 𑀤𑀺𑀯𑀲𑁄 𑀯𑀼𑀢𑁆𑀢𑁄.

‘‘𑀢𑀸𑀦𑀺 𑀏𑀢𑁆𑀣 𑀲𑀦𑁆𑀢𑀻’’𑀢𑀺 𑀏𑀢𑁆𑀢𑀓𑁂𑀬𑁂𑀯 𑀯𑀼𑀢𑁆𑀢𑁂 𑀦𑀦𑁆𑀯𑁂𑀢𑀸𑀦𑀺 𑀅𑀜𑁆𑀜𑀢𑁆𑀣𑀸𑀧𑀺 𑀲𑀦𑁆𑀢𑀻𑀢𑀺 𑀘𑁄𑀤𑀦𑀸 𑀲𑀺𑀬𑀸𑀢𑀺 𑀢𑀁 𑀦𑀺𑀯𑀸𑀭𑁂𑀢𑀼𑀁 ‘‘𑀢𑀤𑀸 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑁂𑀦 𑀩𑀳𑀼𑀲𑁄, 𑀅𑀢𑀺𑀲𑀬𑀢𑁄 𑀯𑀸 𑀏𑀢𑁆𑀣 𑀢𑀤𑁆𑀥𑀺𑀢𑀯𑀺𑀲𑀬𑁄 ¶ 𑀧𑀬𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀘𑀸𑀢𑀼𑀫𑀸𑀲𑀻, 𑀘𑀸𑀢𑀼𑀫𑀸𑀲𑀺𑀦𑀻𑀢𑀺 𑀘 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀇𑀢𑁆𑀣𑀺𑀮𑀺𑀗𑁆𑀕𑁂𑀬𑁂𑀯 𑀧𑀭𑀺𑀬𑀸𑀬𑀯𑀘𑀦𑀁. 𑀧𑀭𑀺𑀬𑁄𑀲𑀸𑀦𑀪𑀽𑀢𑀸𑀢𑀺 𑀘 𑀧𑀽𑀭𑀡𑀪𑀸𑀯𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺 𑀢𑀸𑀬 𑀲𑀳𑁂𑀯 𑀘𑀢𑀼𑀫𑀸𑀲𑀧𑀭𑀺𑀧𑀼𑀡𑁆𑀡𑀪𑀸𑀯𑀢𑁄. 𑀇𑀥𑀸𑀢𑀺 𑀧𑀸𑀴𑀺𑀬𑀁. 𑀢𑀻𑀳𑀺 𑀆𑀓𑀸𑀭𑁂𑀳𑀺 𑀧𑀽𑀭𑁂𑀢𑀻𑀢𑀺 𑀧𑀼𑀡𑁆𑀡𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀫𑀸𑀲𑀧𑀼𑀡𑁆𑀡𑀢𑀸𑀬𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀢𑀤𑀸 𑀓𑀢𑁆𑀢𑀺𑀓𑀫𑀸𑀲𑀲𑁆𑀲 𑀧𑀼𑀡𑁆𑀡𑀢𑀸𑀬 𑀫𑀸𑀲𑀧𑀼𑀡𑁆𑀡𑀢𑀸. 𑀧𑀼𑀭𑀺𑀫𑀧𑀼𑀡𑁆𑀡𑀫𑀺𑀢𑁄 𑀳𑀺 𑀧𑀝𑁆𑀞𑀸𑀬 𑀬𑀸𑀯 𑀅𑀧𑀭𑀸 𑀧𑀼𑀡𑁆𑀡𑀫𑀻, 𑀢𑀸𑀯 𑀏𑀓𑁄 𑀫𑀸𑀲𑁄𑀢𑀺 𑀢𑀢𑁆𑀣 𑀯𑁄𑀳𑀸𑀭𑁄. 𑀯𑀲𑁆𑀲𑀸𑀦𑀲𑁆𑀲 𑀉𑀢𑀼𑀦𑁄 𑀧𑀼𑀡𑁆𑀡𑀢𑀸𑀬 𑀉𑀢𑀼𑀧𑀼𑀡𑁆𑀡𑀢𑀸. 𑀓𑀢𑁆𑀢𑀺𑀓𑀫𑀸𑀲𑀮𑀓𑁆𑀔𑀺𑀢𑀲𑁆𑀲 𑀲𑀁𑀯𑀘𑁆𑀙𑀭𑀲𑁆𑀲 𑀧𑀼𑀡𑁆𑀡𑀢𑀸𑀬 𑀲𑀁𑀯𑀘𑁆𑀙𑀭𑀧𑀼𑀡𑁆𑀡𑀢𑀸. 𑀧𑀼𑀭𑀺𑀫𑀓𑀢𑁆𑀢𑀺𑀓𑀫𑀸𑀲𑀢𑁄 𑀧𑀪𑀼𑀢𑀺 𑀬𑀸𑀯 𑀅𑀧𑀭𑀓𑀢𑁆𑀢𑀺𑀓𑀫𑀸𑀲𑁄, 𑀢𑀸𑀯 𑀏𑀓𑁄 𑀓𑀢𑁆𑀢𑀺𑀓𑀲𑀁𑀯𑀘𑁆𑀙𑀭𑁄𑀢𑀺 𑀏𑀯𑀁 𑀲𑀁𑀯𑀘𑁆𑀙𑀭𑀧𑀼𑀡𑁆𑀡𑀢𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑁄𑀓𑀺𑀓𑀸𑀦𑀁 𑀫𑀢𑁂𑀦 𑀧𑀦 𑀫𑀸𑀲𑀯𑀲𑁂𑀦 𑀲𑀁𑀯𑀘𑁆𑀙𑀭𑀲𑀫𑀜𑁆𑀜𑀸 𑀮𑀓𑁆𑀔𑀺𑀢𑀸. 𑀢𑀣𑀸 𑀘 𑀮𑀓𑁆𑀔𑀡𑀁 𑀕𑀭𑀼𑀲𑀗𑁆𑀓𑀦𑁆𑀢𑀺𑀯𑀲𑁂𑀦. 𑀯𑀼𑀢𑁆𑀢𑀜𑁆𑀳𑀺 𑀚𑁄𑀢𑀺𑀲𑀢𑁆𑀣𑁂 𑁋

‘‘𑀦𑀓𑁆𑀔𑀢𑁆𑀢𑁂𑀦 𑀲𑀳𑁄𑀤𑀬-𑀫𑀢𑁆𑀣𑀁 𑀬𑀸𑀢𑀺 𑀲𑀽𑀭𑀫𑀦𑁆𑀢𑀺;

𑀢𑀲𑁆𑀲 𑀲𑀗𑁆𑀓𑀁 𑀢𑀢𑁆𑀭 𑀯𑀢𑁆𑀢𑀩𑁆𑀩𑀁, 𑀯𑀲𑁆𑀲𑀁 𑀫𑀸𑀲𑀓𑀫𑁂𑀦𑁂𑀯𑀸’’𑀢𑀺.

𑀫𑀺𑀦𑀻𑀬𑀢𑀺 𑀤𑀺𑀯𑀲𑁄 𑀏𑀢𑁂𑀦𑀸𑀢𑀺 𑀫𑀸. 𑀢𑀲𑁆𑀲 𑀳𑀺 𑀕𑀢𑀺𑀬𑀸 𑀤𑀺𑀯𑀲𑁄 𑀫𑀺𑀦𑀺𑀢𑀩𑁆𑀩𑁄 ‘‘𑀧𑀸𑀝𑀺𑀧𑀤𑁄 𑀤𑀼𑀢𑀺𑀬𑀸, 𑀢𑀢𑀺𑀬𑀸’’𑀢𑀺𑀆𑀤𑀺𑀦𑀸. 𑀏𑀢𑁆𑀣 𑀧𑀼𑀡𑁆𑀡𑁄𑀢𑀺 𑀏𑀢𑀺𑀲𑁆𑀲𑀸 𑀭𑀢𑁆𑀢𑀺𑀬𑀸 𑀲𑀩𑁆𑀩𑀓𑀮𑀸𑀧𑀸𑀭𑀺𑀧𑀽𑀭𑀺𑀬𑀸 𑀧𑀼𑀡𑁆𑀡𑁄. 𑀘𑀦𑁆𑀤𑀲𑁆𑀲 𑀳𑀺 𑀲𑁄𑀴𑀲𑀫𑁄 𑀪𑀸𑀕𑁄 ‘‘𑀓𑀮𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀤𑀸 𑀘 𑀘𑀦𑁆𑀤𑁄 𑀲𑀩𑁆𑀩𑀸𑀲𑀫𑁆𑀧𑀺 𑀲𑁄𑀴𑀲𑀦𑁆𑀦𑀁 𑀓𑀮𑀸𑀦𑀁 𑀯𑀲𑁂𑀦 𑀧𑀭𑀺𑀧𑀼𑀡𑁆𑀡𑁄 𑀳𑀼𑀢𑁆𑀯𑀸 𑀤𑀺𑀲𑁆𑀲𑀢𑀺. 𑀏𑀢𑁆𑀣 𑀘 ‘‘𑀢𑀤𑀳𑀼𑀧𑁄𑀲𑀣𑁂 𑀧𑀦𑁆𑀦𑀭𑀲𑁂’’𑀢𑀺 𑀧𑀤𑀸𑀦𑀺 𑀤𑀺𑀯𑀲𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, ‘‘𑀓𑁄𑀫𑀼𑀤𑀺𑀬𑀸’’𑀢𑀺𑀆𑀤𑀻𑀦𑀺 𑀢𑀤𑁂𑀓𑀤𑁂𑀲𑀭𑀢𑁆𑀢𑀺𑀯𑀲𑁂𑀦.

𑀓𑀲𑁆𑀫𑀸 𑀧𑀦 𑀭𑀸𑀚𑀸 𑀅𑀫𑀘𑁆𑀘𑀧𑀭𑀺𑀯𑀼𑀢𑁄 𑀦𑀺𑀲𑀺𑀦𑁆𑀦𑁄, 𑀦 𑀏𑀓𑀓𑁄𑀯𑀸𑀢𑀺 𑀘𑁄𑀤𑀦𑀸𑀬 𑀲𑁄𑀥𑀦𑀸𑀮𑁂𑀲𑀁 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀧𑀤𑀢𑁆𑀣𑀫𑁂𑀯 𑀅𑀯𑀢𑁆𑀯𑀸 ‘‘𑀏𑀯𑀭𑀽𑀧𑀸𑀬𑀸’’𑀢𑀺𑀆𑀤𑀻𑀦𑀺𑀧𑀺 𑀯𑀤𑀢𑀺. 𑀏𑀢𑁂𑀳𑀺 𑀘𑀸𑀬𑀁 𑀲𑁄𑀥𑀦𑀸𑀮𑁂𑀲𑁄 𑀤𑀲𑁆𑀲𑀺𑀢𑁄 ‘‘𑀏𑀯𑀁 𑀭𑀼𑀘𑀺𑀬𑀫𑀸𑀦𑀸𑀬 𑀭𑀢𑁆𑀢𑀺𑀬𑀸 𑀢𑀤𑀸 𑀧𑀯𑀢𑁆𑀢𑀢𑁆𑀢𑀸 𑀢𑀣𑀸 𑀧𑀭𑀺𑀯𑀼𑀢𑁄 𑀦𑀺𑀲𑀺𑀦𑁆𑀦𑁄’’𑀢𑀺. 𑀥𑁄𑀯𑀺𑀬𑀫𑀸𑀦𑀤𑀺𑀲𑀸𑀪𑀸𑀕𑀸𑀬𑀸𑀢𑀺 ¶ 𑀏𑀢𑁆𑀣𑀸𑀧𑀺 𑀯𑀺𑀬𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀭𑀚𑀢𑀯𑀺𑀫𑀸𑀦𑀦𑀺𑀘𑁆𑀙𑀭𑀺𑀢𑁂𑀳𑀻𑀢𑀺 𑀭𑀚𑀢𑀯𑀺𑀫𑀸𑀦𑀢𑁄 𑀦𑀺𑀓𑁆𑀔𑀦𑁆𑀢𑁂𑀳𑀺, 𑀭𑀚𑀢𑀯𑀺𑀫𑀸𑀦𑀧𑁆𑀧𑀪𑀸𑀬 𑀯𑀸 𑀯𑀺𑀧𑁆𑀨𑀼𑀭𑀺𑀢𑁂𑀳𑀺. ‘‘𑀯𑀺𑀲𑀭𑁄’’𑀢𑀺 𑀇𑀤𑀁 𑀫𑀼𑀢𑁆𑀢𑀸𑀯𑀴𑀺𑀆𑀤𑀻𑀦𑀫𑁆𑀧𑀺 𑀯𑀺𑀲𑁂𑀲𑀦𑀧𑀤𑀁. 𑀅𑀩𑁆𑀪𑀁 𑀥𑀽𑀫𑁄 𑀭𑀚𑁄 𑀭𑀸𑀳𑀽𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀉𑀧𑀓𑁆𑀓𑀺𑀮𑁂𑀲𑀸 𑀧𑀸𑀴𑀺𑀦𑀬𑁂𑀦 (𑀅. 𑀦𑀺. 𑁪.𑁫𑁦; 𑀧𑀸𑀘𑀺. 𑁪𑁪𑁭). 𑀭𑀸𑀚𑀸𑀫𑀘𑁆𑀘𑁂𑀳𑀻𑀢𑀺 𑀭𑀸𑀚𑀓𑀼𑀮𑀲𑀫𑀼𑀤𑀸𑀕𑀢𑁂𑀳𑀺 𑀅𑀫𑀘𑁆𑀘𑁂𑀳𑀺. 𑀅𑀣 𑀯𑀸 𑀅𑀦𑀼𑀬𑀼𑀢𑁆𑀢𑀓𑀭𑀸𑀚𑀽𑀳𑀺 𑀘𑁂𑀯 𑀅𑀫𑀘𑁆𑀘𑁂𑀳𑀺 𑀘𑀸𑀢𑀺 𑀅𑀢𑁆𑀣𑁄. 𑀓𑀜𑁆𑀘𑀦𑀸𑀲𑀦𑁂𑀢𑀺 𑀲𑀻𑀳𑀸𑀲𑀦𑁂. ‘‘𑀭𑀜𑁆𑀜𑀁 𑀢𑀼 𑀳𑁂𑀫𑀫𑀸𑀲𑀦𑀁, 𑀲𑀻𑀳𑀸𑀲𑀦𑀫𑀣𑁄 𑀯𑀸𑀴𑀩𑀻𑀚𑀦𑀺𑀢𑁆𑀣𑀻 𑀘 𑀘𑀸𑀫𑀭’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸 𑀦𑀺𑀲𑀺𑀦𑁆𑀦𑁄𑀢𑀺 𑀦𑀺𑀲𑀻𑀤𑀦𑀫𑀢𑁆𑀢𑁂 𑀘𑁄𑀤𑀦𑀸. 𑀏𑀢 𑀦𑁆𑀢𑀺 𑀓𑀦𑁆𑀤𑀦𑀁, 𑀧𑀩𑁄𑀥𑀦𑀁 𑀯𑀸. 𑀇𑀢𑀻𑀢𑀺 𑀇𑀫𑀺𑀦𑀸 𑀳𑁂𑀢𑀼𑀦𑀸. 𑀦𑀓𑁆𑀔𑀢𑁆𑀢 𑀦𑁆𑀢𑀺 𑀓𑀢𑁆𑀢𑀺𑀓𑀸𑀦𑀓𑁆𑀔𑀢𑁆𑀢𑀙𑀡𑀁. 𑀲𑀫𑁆𑀫𑀸 𑀖𑁄𑀲𑀺𑀢𑀩𑁆𑀩𑀁 𑀏𑀢𑀭𑀳𑀺 𑀦𑀓𑁆𑀔𑀢𑁆𑀢𑀦𑁆𑀢𑀺 𑀲𑀗𑁆𑀖𑀼𑀝𑁆𑀞𑀁. 𑀧𑀜𑁆𑀘𑀯𑀡𑁆𑀡𑀓𑀼𑀲𑀼𑀫𑁂𑀳𑀺 ¶ 𑀮𑀸𑀚𑁂𑀦, 𑀧𑀼𑀡𑁆𑀡𑀖𑀝𑁂𑀳𑀺 𑀘 𑀧𑀝𑀺𑀫𑀡𑁆𑀟𑀺𑀢𑀁 𑀖𑀭𑁂𑀲𑀼 𑀤𑁆𑀯𑀸𑀭𑀁 𑀬𑀲𑁆𑀲 𑀢𑀤𑁂𑀢𑀁 𑀦𑀕𑀭𑀁 𑀧𑀜𑁆𑀘…𑀧𑁂… 𑀤𑁆𑀯𑀸𑀭𑀁. 𑀥𑀚𑁄 𑀯𑀝𑁄. 𑀧𑀝𑀸𑀓𑁄 𑀧𑀝𑁆𑀝𑁄𑀢𑀺 𑀲𑀻𑀳𑀴𑀺𑀬𑀸 𑀯𑀤𑀦𑁆𑀢𑀺. 𑀢𑀤𑀸 𑀓𑀺𑀭 𑀧𑀤𑀻𑀧𑀼𑀚𑁆𑀚𑀮𑀦𑀲𑀻𑀲𑁂𑀦 𑀓𑀢𑀦𑀓𑁆𑀔𑀢𑁆𑀢𑀁. 𑀢𑀣𑀸 𑀳𑀺 𑀉𑀫𑁆𑀫𑀸𑀤𑀦𑁆𑀢𑀺𑀚𑀸𑀢𑀓𑀸𑀤𑀻𑀲𑀼𑀧𑀺 (𑀚𑀸. 𑁨.𑁧𑁮.𑁫𑁭) 𑀓𑀢𑁆𑀢𑀺𑀓𑀫𑀸𑀲𑁂 𑀏𑀯𑀫𑁂𑀯 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑀫𑀼𑀚𑁆𑀚𑀮𑀺𑀢𑀤𑀻𑀧𑀫𑀸𑀮𑀸𑀮𑀗𑁆𑀓𑀢𑀲𑀩𑁆𑀩𑀤𑀺𑀲𑀸𑀪𑀸𑀕’’𑀦𑁆𑀢𑀺. 𑀯𑀻𑀣𑀺 𑀦𑀸𑀫 𑀭𑀣𑀺𑀓𑀸 𑀫𑀳𑀸𑀫𑀕𑁆𑀕𑁄. 𑀭𑀘𑁆𑀙𑀸 𑀦𑀸𑀫 𑀅𑀦𑀺𑀩𑁆𑀩𑀺𑀤𑁆𑀥𑀸 𑀔𑀼𑀤𑁆𑀤𑀓𑀫𑀕𑁆𑀕𑁄. 𑀢𑀢𑁆𑀣 𑀢𑀢𑁆𑀣 𑀦𑀺𑀲𑀺𑀦𑁆𑀦𑀯𑀲𑁂𑀦 𑀲𑀫𑀸𑀦𑀪𑀸𑀕𑁂𑀦 𑀧𑀸𑀝𑀺𑀬𑁂𑀓𑁆𑀓𑀁 𑀦𑀓𑁆𑀔𑀢𑁆𑀢𑀓𑀻𑀴𑀁 𑀅𑀦𑀼𑀪𑀯𑀫𑀸𑀦𑁂𑀦 𑀲𑀫𑀪𑀺𑀓𑀺𑀡𑁆𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀏𑀯𑀁 𑀯𑀢𑁆𑀯𑀸𑀧𑀺 𑀢𑀢𑁆𑀣𑁂𑀯 𑀇𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑀦𑁆𑀢𑀺 𑀅𑀢𑁆𑀣𑁄.

𑀉𑀤𑀸𑀦𑀁 𑀉𑀤𑀸𑀳𑀸𑀭𑁄𑀢𑀺 𑀅𑀢𑁆𑀣𑀢𑁄 𑀏𑀓𑀁. 𑀫𑀸𑀦𑀦𑁆𑀢𑀺 𑀫𑀸𑀦𑀧𑀢𑁆𑀢𑀁 𑀓𑀢𑁆𑀢𑀼𑀪𑀽𑀢𑀁. 𑀙𑀟𑁆𑀟𑀦𑀯𑀲𑁂𑀦 𑀅𑀯𑀲𑁂𑀓𑁄. 𑀲𑁄𑀢𑀯𑀲𑁂𑀦 𑀑𑀖𑁄. 𑀧𑀻𑀢𑀺𑀯𑀘𑀦𑀦𑁆𑀢𑀺 𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑀯𑀘𑀦𑀁 𑀓𑀫𑁆𑀫𑀪𑀽𑀢𑀁. 𑀳𑀤𑀬𑀦𑁆𑀢𑀺 𑀘𑀺𑀢𑁆𑀢𑀁 𑀓𑀢𑁆𑀢𑀼𑀪𑀽𑀢𑀁. 𑀕𑀳𑁂𑀢𑀼𑀦𑁆𑀢𑀺 𑀩𑀳𑀺 𑀅𑀦𑀺𑀘𑁆𑀙𑀭𑀡𑀯𑀲𑁂𑀦 𑀕𑀡𑁆𑀳𑀺𑀢𑀼𑀁, 𑀳𑀤𑀬𑀦𑁆𑀢𑁄𑀬𑁂𑀯 𑀞𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀥𑀺𑀓𑀁 𑀳𑀼𑀢𑁆𑀯𑀸’’𑀢𑀺𑀆𑀤𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀯𑀘𑀦𑀁 𑀧𑀝𑀺𑀕𑁆𑀕𑀸𑀳𑀓 𑀦𑀺𑀭𑀧𑁂𑀓𑁆𑀔𑀁 𑀓𑁂𑀯𑀮𑀁 𑀉𑀴𑀸𑀭𑀸𑀬 𑀧𑀻𑀢𑀺𑀬𑀸 𑀯𑀲𑁂𑀦 𑀲𑀭𑀲𑀢𑁄 𑀲𑀳𑀲𑀸𑀯 𑀫𑀼𑀔𑀢𑁄 𑀦𑀺𑀘𑁆𑀙𑀭𑀢𑀺, 𑀢𑀤𑁂𑀯𑀺𑀥 ‘‘𑀉𑀤𑀸𑀦’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺.

𑀤𑁄𑀲𑁂𑀳𑀺 𑀇𑀢𑀸 𑀕𑀢𑀸 𑀅𑀧𑀕𑀢𑀸𑀢𑀺 𑀤𑁄𑀲𑀺𑀦𑀸 𑀢-𑀓𑀸𑀭𑀲𑁆𑀲 𑀦-𑀓𑀸𑀭𑀁 𑀓𑀢𑁆𑀯𑀸 𑀬𑀣𑀸 ‘‘𑀓𑀺𑀮𑁂𑀲𑁂 𑀚𑀺𑀢𑁄 𑀯𑀺𑀚𑀺𑀢𑀸𑀯𑀻𑀢𑀺 𑀚𑀺𑀦𑁄’’𑀢𑀺 𑀆𑀳 ‘‘𑀤𑁄𑀲𑀸𑀧𑀕𑀢𑀸’’𑀢𑀺. 𑀬𑀤𑀺𑀧𑀺 𑀲𑀼𑀢𑁆𑀢𑁂 𑀯𑀼𑀢𑁆𑀢𑀁 ‘‘𑀘𑀢𑁆𑀢𑀸𑀭𑁄𑀫𑁂 𑀪𑀺𑀓𑁆𑀔𑀯𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑀸, 𑀬𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀦 ¶ 𑀢𑀧𑀦𑁆𑀢𑀺 𑀦 𑀪𑀸𑀲𑀦𑁆𑀢𑀺 𑀦 𑀯𑀺𑀭𑁄𑀘𑀦𑁆𑀢𑀺. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀅𑀩𑁆𑀪𑀸 𑀪𑀺𑀓𑁆𑀔𑀯𑁂…𑀧𑁂… 𑀫𑀳𑀺𑀓𑀸. 𑀥𑀽𑀫𑁄 𑀭𑀚𑁄. 𑀭𑀸𑀳𑀼 𑀪𑀺𑀓𑁆𑀔𑀯𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑁄’’𑀢𑀺, (𑀘𑀽𑀴𑀯. 𑁪𑁪𑁭) 𑀢𑀣𑀸𑀧𑀺 𑀢𑀢𑀺𑀬𑀼𑀧𑀓𑁆𑀓𑀺𑀮𑁂𑀲𑀲𑁆𑀲 𑀧𑀪𑁂𑀤𑀤𑀲𑁆𑀲𑀦 𑀯𑀲𑁂𑀦 𑀅𑀝𑁆𑀞𑀓𑀣𑀸𑀦𑀬𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀘𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀅𑀬𑀫𑀢𑁆𑀣𑁄 𑀘 𑀭𑀫𑀡𑀻𑀬𑀸𑀤𑀺𑀲𑀤𑁆𑀤𑀬𑁄𑀕𑀢𑁄 𑀜𑀸𑀬𑀢𑀻𑀢𑀺 𑀆𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀅𑀦𑀻𑀬-𑀲𑀤𑁆𑀤𑁄𑀧𑀺 𑀩𑀳𑀼𑀮𑀸 𑀓𑀢𑁆𑀯𑀢𑁆𑀣𑀸𑀪𑀺𑀥𑀸𑀬𑀓𑁄 𑀬𑀣𑀸 ‘‘𑀦𑀺𑀬𑁆𑀬𑀸𑀦𑀺𑀓𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁯𑁬) 𑀤𑀲𑁆𑀲𑁂𑀢𑀺 ‘‘𑀭𑀫𑀬𑀢𑀻’’𑀢𑀺 𑀇𑀫𑀺𑀦𑀸. 𑀚𑀼𑀡𑁆𑀳𑀸𑀯𑀲𑁂𑀦 𑀭𑀢𑁆𑀢𑀺𑀬𑀸 𑀲𑀼𑀭𑀽𑀧𑀢𑁆𑀢𑀫𑀸𑀳 ‘‘𑀯𑀼𑀢𑁆𑀢𑀤𑁄𑀲𑀯𑀺𑀫𑀼𑀢𑁆𑀢𑀸𑀬𑀸’’𑀢𑀺𑀆𑀤𑀺𑀦𑀸. 𑀅𑀩𑁆𑀪𑀸𑀤𑀬𑁄 𑀘𑁂𑀢𑁆𑀣 𑀯𑀼𑀢𑁆𑀢𑀤𑁄𑀲𑀸. 𑀅𑀬𑀜𑁆𑀘 𑀳𑁂𑀢𑀼 ‘‘𑀤𑀲𑁆𑀲𑀺𑀢𑀼𑀁 𑀬𑀼𑀢𑁆𑀢𑀸’’𑀢𑀺 𑀏𑀢𑁆𑀣𑀸𑀧𑀺 𑀲𑀫𑁆𑀩𑀚𑁆𑀛𑀺𑀢𑀩𑁆𑀩𑁄. 𑀢𑁂𑀦 𑀓𑀸𑀭𑀡𑁂𑀦, 𑀉𑀢𑀼𑀲𑀫𑁆𑀧𑀢𑁆𑀢𑀺𑀬𑀸 𑀘 𑀧𑀸𑀲𑀸𑀤𑀺𑀓𑀢𑀸 𑀤𑀝𑁆𑀞𑀩𑁆𑀩𑀸. 𑀈𑀤𑀺𑀲𑀸𑀬 𑀭𑀢𑁆𑀢𑀺𑀬𑀸 𑀬𑀼𑀢𑁆𑀢𑁄 𑀤𑀺𑀯𑀲𑁄 𑀫𑀸𑀲𑁄 𑀉𑀢𑀼 𑀲𑀁𑀯𑀘𑁆𑀙𑀭𑁄𑀢𑀺 𑀏𑀯𑀁 𑀤𑀺𑀯𑀲𑀫𑀸𑀲𑀸𑀤𑀻𑀦𑀁 𑀮𑀓𑁆𑀔𑀡𑀸 𑀲𑀮𑁆𑀮𑀓𑁆𑀔𑀡𑀼𑀧𑀸𑀬𑀸 𑀪𑀯𑀺𑀢𑀼𑀁 𑀬𑀼𑀢𑁆𑀢𑀸, 𑀢𑀲𑁆𑀫𑀸 𑀮𑀓𑁆𑀔𑀺𑀢𑀩𑁆𑀩𑀸𑀢𑀺 𑀮𑀓𑁆𑀔𑀡𑀺𑀬𑀸, 𑀲𑀸 𑀏𑀯 𑀮𑀓𑁆𑀔𑀜𑁆𑀜𑀸 𑀬-𑀯𑀢𑁄 𑀡-𑀓𑀸𑀭𑀲𑁆𑀲 𑀜-𑀓𑀸𑀭𑀸𑀤𑁂𑀲𑀯𑀲𑁂𑀦 𑀬𑀣𑀸 ‘‘𑀧𑁄𑀓𑁆𑀔𑀭𑀜𑁆𑀜𑁄 𑀲𑀼𑀫𑀸𑀧𑀺𑀢𑀸’’𑀢𑀺 𑀆𑀳 ‘‘𑀤𑀺𑀯𑀲𑀫𑀸𑀲𑀸𑀤𑀻𑀦’’𑀦𑁆𑀢𑀺𑀆𑀤𑀺.

‘‘𑀬𑀁 ¶ 𑀦𑁄 𑀧𑀬𑀺𑀭𑀼𑀧𑀸𑀲𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑁂𑀬𑁆𑀬𑀸’’𑀢𑀺 𑀯𑀘𑀦𑀢𑁄 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸𑀢𑀺 𑀏𑀢𑁆𑀣 𑀧𑀭𑀫𑀢𑁆𑀣𑀲𑀫𑀡𑁄, 𑀧𑀭𑀫𑀢𑁆𑀣𑀩𑁆𑀭𑀸𑀳𑁆𑀫𑀡𑁄 𑀘 𑀅𑀥𑀺𑀧𑁆𑀧𑁂𑀢𑁄, 𑀦 𑀧𑀦 𑀧𑀩𑁆𑀩𑀚𑁆𑀚𑀸𑀫𑀢𑁆𑀢𑀲𑀫𑀡𑁄, 𑀦 𑀘 𑀚𑀸𑀢𑀺𑀫𑀢𑁆𑀢𑀩𑁆𑀭𑀸𑀳𑁆𑀫𑀡𑁄𑀢𑀺 𑀯𑀼𑀢𑁆𑀢𑀁 ‘‘𑀲𑀫𑀺𑀢𑀧𑀸𑀧𑀢𑀸𑀬𑀸’’𑀢𑀺𑀆𑀤𑀺. 𑀩𑀳𑀢𑀺 𑀧𑀸𑀧𑁂 𑀩𑀳𑀺 𑀓𑀭𑁄𑀢𑀻𑀢𑀺 𑀩𑁆𑀭𑀸𑀳𑁆𑀫𑀡𑁄 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀩𑀳𑀼𑀯𑀘𑀦𑁂 𑀯𑀢𑁆𑀢𑀩𑁆𑀩𑁂 𑀏𑀓𑀯𑀘𑀦𑀁, 𑀏𑀓𑀯𑀘𑀦𑁂 𑀯𑀸 𑀯𑀢𑁆𑀢𑀩𑁆𑀩𑁂 𑀩𑀳𑀼𑀯𑀘𑀦𑀁 𑀯𑀘𑀦𑀩𑁆𑀬𑀢𑁆𑀢𑀬𑁄 𑀯𑀘𑀦𑀯𑀺𑀧𑀮𑁆𑀮𑀸𑀲𑁄𑀢𑀺 𑀅𑀢𑁆𑀣𑁄. 𑀇𑀥 𑀧𑀦 ‘‘𑀧𑀬𑀺𑀭𑀼𑀧𑀸𑀲𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀧𑀬𑀺𑀭𑀼𑀧𑀸𑀲𑀢𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀩𑀳𑀼𑀯𑀘𑀦𑁂 𑀯𑀢𑁆𑀢𑀩𑁆𑀩𑁂 𑀏𑀓𑀯𑀘𑀦𑀯𑀲𑁂𑀦 𑀯𑀘𑀦𑀩𑁆𑀬𑀢𑁆𑀢𑀬𑁄 𑀤𑀲𑁆𑀲𑀺𑀢𑁄. 𑀅𑀢𑁆𑀢𑀦𑀺, 𑀕𑀭𑀼𑀝𑁆𑀞𑀸𑀦𑀺𑀬𑁂 𑀘 𑀳𑀺 𑀏𑀓𑀲𑁆𑀫𑀺𑀫𑁆𑀧𑀺 𑀩𑀳𑀼𑀯𑀘𑀦𑀧𑁆𑀧𑀬𑁄𑀕𑁄 𑀦𑀺𑀭𑀼𑀴𑁆𑀳𑁄. 𑀧𑀬𑀺𑀭𑀼𑀧𑀸𑀲𑀢𑁄𑀢𑀺 𑀘 𑀯𑀡𑁆𑀡𑀯𑀺𑀧𑀭𑀺𑀬𑀸𑀬𑀦𑀺𑀤𑁆𑀤𑁂𑀲𑁄 𑀏𑀲 𑀬𑀣𑀸 ‘‘𑀧𑀬𑀺𑀭𑀼𑀤𑀸𑀳𑀸𑀲𑀻’’𑀢𑀺. 𑀅𑀬𑀜𑁆𑀳𑀺 𑀩𑀳𑀼𑀮𑀁 𑀤𑀺𑀝𑁆𑀞𑀧𑀬𑁄𑀕𑁄, 𑀬𑀤𑀺𑀤𑀁 𑀧𑀭𑀺𑀲𑀤𑁆𑀤𑁂 𑀬-𑀓𑀸𑀭𑀧𑀭𑁂 𑀯𑀡𑁆𑀡𑀯𑀺𑀧𑀭𑀺𑀬𑀸𑀬𑁄. 𑀢𑀣𑀸 𑀳𑀺 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀯𑀤𑀦𑁆𑀢𑀺 ‘‘𑀧𑀭𑀺𑀬𑀸𑀤𑀻𑀦𑀁 𑀭𑀬𑀸𑀤𑀺𑀯𑀡𑁆𑀡𑀲𑁆𑀲 𑀬𑀭𑀸𑀤𑀻𑀳𑀺 𑀯𑀺𑀧𑀭𑀺𑀬𑀸𑀬𑁄’’𑀢𑀺. 𑀬𑀦𑁆𑀢𑀺 𑀲𑀫𑀡𑀁 𑀯𑀸 𑀩𑁆𑀭𑀸𑀳𑁆𑀫𑀡𑀁 𑀯𑀸. 𑀇𑀫𑀺𑀦𑀸 𑀲𑀩𑁆𑀩𑁂𑀦𑀧𑀺 𑀯𑀘𑀦𑁂𑀦𑀸𑀢𑀺 ‘‘𑀭𑀫𑀡𑀻𑀬𑀸 𑀯𑀢𑀸’’𑀢𑀺𑀆𑀤𑀺𑀯𑀘𑀦𑁂𑀦. 𑀑𑀪𑀸𑀲𑀦𑀺𑀫𑀺𑀢𑁆𑀢𑀓𑀫𑁆𑀫𑀦𑁆𑀢𑀺 𑀑𑀪𑀸𑀲𑀪𑀽𑀢𑀁 𑀦𑀺𑀫𑀺𑀢𑁆𑀢𑀓𑀫𑁆𑀫𑀁 ¶ , 𑀧𑀭𑀺𑀩𑁆𑀬𑀢𑁆𑀢𑀁 𑀦𑀺𑀫𑀺𑀢𑁆𑀢𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀫𑀳𑀸𑀧𑀭𑀸𑀥𑀢𑀸𑀬𑀸𑀢𑀺 𑀫𑀳𑀸𑀤𑁄𑀲𑀢𑀸𑀬.

‘‘𑀢𑁂𑀦 𑀳𑀻’’𑀢𑀺𑀆𑀤𑀺 𑀢𑀤𑀢𑁆𑀣𑀯𑀺𑀯𑀭𑀡𑀁. 𑀤𑁂𑀯𑀤𑀢𑁆𑀢𑁄 𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀯𑀲𑁂𑀦 𑀅𑀢𑁆𑀣𑀼𑀧𑀦𑀬𑀦𑁂, 𑀢𑁂𑀦 𑀬𑀣𑀸 𑀭𑀸𑀚𑀸 𑀅𑀚𑀸𑀢𑀲𑀢𑁆𑀢𑀼 𑀅𑀢𑁆𑀢𑀦𑁄 𑀧𑀺𑀢𑀼 𑀅𑀭𑀺𑀬𑀲𑀸𑀯𑀓𑀲𑁆𑀲 𑀲𑀢𑁆𑀣𑀼 𑀉𑀧𑀝𑁆𑀞𑀸𑀓𑀲𑁆𑀲 𑀖𑀸𑀢𑀦𑁂𑀦 𑀫𑀳𑀸𑀧𑀭𑀸𑀥𑁄, 𑀏𑀯𑀁 𑀪𑀕𑀯𑀢𑁄 𑀫𑀳𑀸𑀦𑀢𑁆𑀣𑀓𑀭𑀲𑁆𑀲 𑀤𑁂𑀯𑀤𑀢𑁆𑀢𑀲𑁆𑀲 𑀅𑀧𑀲𑁆𑀲𑀬𑀪𑀸𑀯𑁂𑀦𑀸𑀧𑀻𑀢𑀺 𑀇𑀫𑀫𑀢𑁆𑀣𑀁 𑀉𑀧𑀦𑁂𑀢𑀺. 𑀢𑀲𑁆𑀲 𑀧𑀺𑀝𑁆𑀞𑀺𑀙𑀸𑀬𑀸𑀬𑀸𑀢𑀺 𑀯𑁄𑀳𑀸𑀭𑀫𑀢𑁆𑀢𑀁, 𑀢𑀲𑁆𑀲 𑀚𑀻𑀯𑀓𑀲𑁆𑀲 𑀧𑀺𑀝𑁆𑀞𑀺𑀅𑀧𑀲𑁆𑀲𑀬𑁂𑀦, 𑀢𑀁 𑀧𑀫𑀼𑀔𑀁 𑀓𑀢𑁆𑀯𑀸 𑀅𑀧𑀲𑁆𑀲𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀓𑁆𑀔𑁂𑀧𑀧𑀘𑁆𑀙𑁂𑀤𑀦𑀢𑁆𑀣𑀦𑁆𑀢𑀺 𑀯𑀓𑁆𑀔𑀫𑀸𑀦𑀸𑀬 𑀅𑀢𑁆𑀢𑀦𑁄 𑀓𑀣𑀸𑀬 𑀉𑀧𑁆𑀧𑀚𑁆𑀚𑀦𑀓𑀯𑀺𑀓𑁆𑀔𑁂𑀧𑀲𑁆𑀲 𑀧𑀘𑁆𑀙𑀺𑀦𑁆𑀤𑀦𑀢𑁆𑀣𑀁, 𑀅𑀦𑀼𑀧𑁆𑀧𑀚𑁆𑀚𑀦𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀢𑀲𑁆𑀲𑀁 𑀳𑀻’’𑀢𑀺𑀆𑀤𑀺. 𑀅𑀲𑀺𑀓𑁆𑀔𑀺𑀢𑀸𑀦𑀦𑁆𑀢𑀺 𑀓𑀸𑀬𑀯𑀘𑀻𑀲𑀁𑀬𑀫𑀦𑁂 𑀯𑀺𑀕𑀢𑀲𑀺𑀓𑁆𑀔𑀸𑀦𑀁. 𑀓𑀼𑀮𑀽𑀧𑀓𑁂𑀢𑀺 𑀓𑀼𑀮𑀫𑀼𑀧𑀕𑀢𑁂 𑀲𑀢𑁆𑀣𑀸𑀭𑁂. 𑀕𑀳𑀺𑀢𑀸𑀲𑀸𑀭𑀢𑀸𑀬𑀸𑀢𑀺 𑀕𑀳𑁂𑀢𑀩𑁆𑀩𑀕𑀼𑀡𑀲𑀸𑀭𑀯𑀺𑀕𑀢𑀢𑀸𑀬. 𑀦𑀺𑀩𑁆𑀩𑀺𑀓𑁆𑀔𑁂𑀧𑀦𑁆𑀢𑀺 𑀅𑀜𑁆𑀜𑁂𑀲𑀫𑀧𑀦𑀬𑀦𑀯𑀺𑀭𑀳𑀺𑀢𑀁.

𑀪𑀤𑁆𑀤𑀦𑁆𑀢𑀺 𑀅𑀯𑀲𑁆𑀲𑀬𑀲𑀫𑁆𑀧𑀦𑁆𑀦𑀢𑀸𑀬 𑀲𑀼𑀦𑁆𑀤𑀭𑀁.

𑁧𑁫𑁧. 𑀅𑀬𑀜𑁆𑀘𑀢𑁆𑀣𑁄 𑀇𑀫𑀸𑀬 𑀧𑀸𑀴𑀺𑀘𑁆𑀙𑀸𑀬𑀸𑀬 𑀅𑀥𑀺𑀕𑀢𑁄, 𑀇𑀫𑀫𑀢𑁆𑀣𑀫𑁂𑀯 𑀯𑀸 𑀅𑀦𑁆𑀢𑁄𑀕𑀥𑀁 𑀓𑀢𑁆𑀯𑀸 𑀧𑀸𑀴𑀺𑀬𑀫𑁂𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺𑀦𑀸. 𑀅𑀲𑀢𑁆𑀣𑀸𑀧𑀺 𑀲𑀫𑀸𑀦𑁄 𑀲𑀢𑁆𑀣𑀸 𑀧𑀝𑀺𑀜𑁆𑀜𑀸𑀢𑁄 𑀬𑁂𑀦𑀸𑀢𑀺 𑀲𑀢𑁆𑀣𑀼𑀧𑀝𑀺𑀜𑁆𑀜𑀸𑀢𑁄, 𑀢𑀲𑁆𑀲 𑀅𑀩𑀼𑀤𑁆𑀥𑀲𑁆𑀲𑀸𑀧𑀺 𑀲𑀫𑀸𑀦𑀲𑁆𑀲 𑀩𑀼𑀤𑁆𑀥𑀧𑀝𑀺𑀜𑁆𑀜𑀸𑀢𑀲𑁆𑀲 ‘‘𑀅𑀳𑀫𑁂𑀓𑁄 𑀮𑁄𑀓𑁂 𑀅𑀢𑁆𑀣𑀥𑀫𑁆𑀫𑀸𑀦𑀼𑀲𑀸𑀲𑀓𑁄’’𑀢𑀺 𑀆𑀘𑀭𑀺𑀬𑀧𑀝𑀺𑀜𑁆𑀜𑀸𑀢𑀪𑀸𑀯𑀁 𑀯𑀸 𑀲𑀦𑁆𑀥𑀸𑀬 𑀏𑀯𑀁 𑀯𑀼𑀢𑁆𑀢𑀁. ‘‘𑀲𑁄 𑀓𑀺𑀭𑀸’’𑀢𑀺𑀆𑀤𑀺𑀦𑀸 𑀅𑀦𑀼𑀲𑁆𑀲𑀼𑀢𑀺𑀫𑀢𑁆𑀢𑀁 𑀧𑀢𑀺 𑀧𑁄𑀭𑀸𑀡𑀝𑁆𑀞𑀓𑀣𑀸𑀦𑀬𑁄𑀯 𑀓𑀺𑀭𑀲𑀤𑁆𑀤𑁂𑀦 𑀯𑀼𑀢𑁆𑀢𑁄. 𑀏𑀲 𑀦𑀬𑁄 𑀧𑀭𑀢𑁄 𑀫𑀓𑁆𑀔𑀮𑀺𑀧𑀤𑀦𑀺𑀩𑁆𑀩𑀘𑀦𑁂𑀧𑀺 ¶ . 𑀏𑀓𑀽𑀦𑀤𑀸𑀲𑀲𑀢𑀁 𑀧𑀽𑀭𑀬𑀫𑀸𑀦𑁄𑀢𑀺 𑀏𑀓𑁂𑀦𑀽𑀦𑀤𑀸𑀲𑀲𑀢𑀁 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀅𑀦𑀽𑀦𑀤𑀸𑀲𑀲𑀢𑀁 𑀓𑀢𑁆𑀯𑀸 𑀧𑀽𑀭𑀬𑀫𑀸𑀦𑁄. 𑀏𑀯𑀁 𑀚𑀸𑀬𑀫𑀸𑀦𑁄 𑀘𑁂𑀲 𑀫𑀗𑁆𑀕𑀮𑀤𑀸𑀲𑁄 𑀚𑀸𑀢𑁄. 𑀚𑀸𑀢𑀭𑀽𑀧𑁂𑀦𑁂𑀯𑀸𑀢𑀺 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀯𑀺𑀚𑀸𑀢𑀯𑁂𑀲𑁂𑀦𑁂𑀯, 𑀬𑀣𑀸 𑀯𑀸 𑀲𑀢𑁆𑀢𑀸 𑀅𑀦𑀺𑀯𑀢𑁆𑀣𑀸 𑀅𑀧𑀸𑀭𑀼𑀢𑀸 𑀚𑀸𑀬𑀦𑁆𑀢𑀺, 𑀢𑀣𑀸 𑀚𑀸𑀢𑀭𑀽𑀧𑁂𑀦𑁂𑀯. 𑀉𑀧𑀲𑀗𑁆𑀓𑀫𑀦𑁆𑀢𑀻𑀢𑀺 𑀉𑀧𑀕𑀢𑀸 𑀪𑀚𑀦𑁆𑀢𑀸 𑀳𑁄𑀦𑁆𑀢𑀺. 𑀢𑀤𑁂𑀯 𑀧𑀩𑁆𑀩𑀚𑁆𑀚𑀁 𑀅𑀕𑁆𑀕𑀳𑁂𑀲𑀻𑀢𑀺 𑀢𑀤𑁂𑀯 𑀦𑀕𑁆𑀕𑀭𑀽𑀧𑀁 ‘‘𑀅𑀬𑀫𑁂𑀯 𑀧𑀩𑁆𑀩𑀚𑁆𑀚𑀸 𑀦𑀸𑀫 𑀲𑀺𑀬𑀸’’𑀢𑀺 𑀧𑀩𑁆𑀩𑀚𑁆𑀚𑀁 𑀓𑀢𑁆𑀯𑀸 𑀅𑀕𑁆𑀕𑀳𑁂𑀲𑀺. 𑀧𑀩𑁆𑀩𑀚𑀺𑀁𑀲𑀽𑀢𑀺 𑀢𑀁 𑀧𑀩𑁆𑀩𑀚𑀺𑀢𑀫𑀦𑀼𑀧𑀩𑁆𑀩𑀚𑀺𑀁𑀲𑀼.

‘‘𑀧𑀩𑁆𑀩𑀚𑀺𑀢𑀲𑀫𑀽𑀳𑀲𑀗𑁆𑀔𑀸𑀢𑁄’’𑀢𑀺 𑀏𑀢𑁂𑀦 𑀧𑀩𑁆𑀩𑀚𑀺𑀢𑀲𑀫𑀽𑀳𑀢𑀸𑀫𑀢𑁆𑀢𑁂𑀦 𑀲𑀗𑁆𑀖𑁄, 𑀦 𑀦𑀺𑀬𑁆𑀬𑀸𑀦𑀺𑀓𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀲𑀻𑀮𑀲𑀸𑀫𑀜𑁆𑀜𑀯𑀲𑁂𑀦 𑀲𑀁𑀳𑀢𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀲𑁆𑀲 𑀅𑀢𑁆𑀣𑀻𑀢𑀺 ¶ 𑀅𑀲𑁆𑀲 𑀲𑀢𑁆𑀣𑀼𑀧𑀝𑀺𑀜𑁆𑀜𑀸𑀢𑀲𑁆𑀲 𑀧𑀭𑀺𑀯𑀸𑀭𑀪𑀸𑀯𑁂𑀦 𑀅𑀢𑁆𑀣𑀺. ‘‘𑀲𑀗𑁆𑀖𑀻 𑀕𑀡𑀻’’𑀢𑀺 𑀘𑁂𑀤𑀁 𑀧𑀭𑀺𑀬𑀸𑀬𑀯𑀘𑀦𑀁, 𑀲𑀗𑁆𑀓𑁂𑀢𑀫𑀢𑁆𑀢𑀢𑁄 𑀦𑀸𑀦𑀦𑁆𑀢𑀺 𑀆𑀳 ‘‘𑀲𑁆𑀯𑁂𑀯𑀸’’𑀢𑀺𑀆𑀤𑀺. 𑀲𑁆𑀯𑁂𑀯𑀸𑀢𑀺 𑀘 𑀧𑀩𑁆𑀩𑀚𑀺𑀢𑀲𑀫𑀽𑀳𑀲𑀗𑁆𑀔𑀸𑀢𑁄 𑀏𑀯. 𑀓𑁂𑀘𑀺 𑀧𑀦 ‘‘𑀧𑀩𑁆𑀩𑀚𑀺𑀢𑀲𑀫𑀽𑀳𑀯𑀲𑁂𑀦 𑀲𑀗𑁆𑀖𑀻, 𑀕𑀳𑀝𑁆𑀞𑀲𑀫𑀽𑀳𑀯𑀲𑁂𑀦 𑀕𑀡𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 𑀕𑀡𑁂 𑀏𑀯 𑀮𑁄𑀓𑁂 𑀲𑀗𑁆𑀖-𑀲𑀤𑁆𑀤𑀲𑁆𑀲 𑀦𑀺𑀭𑀼𑀴𑁆𑀳𑀢𑁆𑀢𑀸. 𑀅𑀘𑁂𑀮𑀓𑀯𑀢𑀘𑀭𑀺𑀬𑀸𑀤𑀺 𑀅𑀢𑁆𑀢𑀦𑀸 𑀧𑀭𑀺𑀓𑀧𑁆𑀧𑀺𑀢𑀫𑀢𑁆𑀢𑀁 𑀆𑀘𑀸𑀭𑁄. 𑀧𑀜𑁆𑀜𑀸𑀢𑁄 𑀧𑀸𑀓𑀝𑁄 𑀲𑀗𑁆𑀖𑀻𑀆𑀤𑀺𑀪𑀸𑀯𑁂𑀦. 𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄𑀢𑀺 𑀅𑀢𑁆𑀣𑀢𑁄 𑀏𑀓𑀁. 𑀢𑀢𑁆𑀣 𑀮𑀩𑁆𑀪𑀫𑀸𑀦𑀸𑀧𑁆𑀧𑀺𑀘𑁆𑀙𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑁆𑀧𑀺𑀘𑁆𑀙𑀢𑀸𑀬 𑀯𑀢𑁆𑀣𑀫𑁆𑀧𑀺 𑀦 𑀦𑀺𑀯𑀸𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀢𑀲𑁆𑀫𑀺𑀁 𑀲𑀸𑀲𑀦𑀺𑀓𑁂 𑀯𑀺𑀬 𑀲𑀦𑁆𑀢𑀕𑀼𑀡𑀦𑀺𑀕𑁆𑀕𑀽𑀳𑀡𑀮𑀓𑁆𑀔𑀡𑀸 𑀅𑀧𑁆𑀧𑀺𑀘𑁆𑀙𑀢𑀸 𑀮𑀩𑁆𑀪𑀢𑀺. 𑀬𑀲𑁄𑀢𑀺 𑀓𑀺𑀢𑁆𑀢𑀺𑀲𑀤𑁆𑀤𑁄. 𑀢𑀭𑀦𑁆𑀢𑀺 𑀏𑀢𑁂𑀦 𑀲𑀁𑀲𑀸𑀭𑁄𑀖𑀦𑁆𑀢𑀺 𑀏𑀯𑀁 𑀲𑀫𑁆𑀫𑀢𑀢𑀸𑀬 𑀮𑀤𑁆𑀥𑀺 𑀢𑀺𑀢𑁆𑀣𑀁 𑀦𑀸𑀫 ‘‘𑀲𑀸𑀥𑀽’’𑀢𑀺 𑀲𑀫𑁆𑀫𑀢𑁄, 𑀦 𑀘 𑀲𑀸𑀥𑀽𑀳𑀺 𑀲𑀫𑁆𑀫𑀢𑁄𑀢𑀺 𑀅𑀢𑁆𑀣𑀫𑀸𑀳 ‘‘𑀅𑀬’’𑀦𑁆𑀢𑀺𑀆𑀤𑀺𑀦𑀸. 𑀦 𑀳𑀺 𑀢𑀲𑁆𑀲 𑀲𑀸𑀥𑀽𑀳𑀺 𑀲𑀫𑁆𑀫𑀢𑀢𑀸 𑀮𑀩𑁆𑀪𑀢𑀺. 𑀲𑀼𑀦𑁆𑀤𑀭𑁄 𑀲𑀧𑁆𑀧𑀼𑀭𑀺𑀲𑁄𑀢𑀺 𑀤𑁆𑀯𑀺𑀥𑀸 𑀅𑀢𑁆𑀣𑁄. 𑀅𑀲𑁆𑀲𑀼𑀢𑀯𑀢𑁄𑀢𑀺 𑀅𑀲𑁆𑀲𑀼𑀢𑀸𑀭𑀺𑀬𑀥𑀫𑁆𑀫𑀲𑁆𑀲, 𑀓𑀢𑁆𑀢𑀼𑀢𑁆𑀣𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. ‘‘𑀇𑀫𑀸𑀦𑀺 𑀫𑁂 𑀯𑀢𑀲𑀫𑀸𑀤𑀸𑀦𑀸𑀦𑀺 𑀏𑀢𑁆𑀢𑀓𑀁 𑀓𑀸𑀮𑀁 𑀲𑀼𑀘𑀺𑀡𑁆𑀡𑀸𑀦𑀻’’𑀢𑀺 𑀩𑀳𑀽 𑀭𑀢𑁆𑀢𑀺𑀬𑁄 𑀚𑀸𑀦𑀸𑀢𑀺. 𑀢𑀸 𑀧𑀦𑀲𑁆𑀲 𑀭𑀢𑁆𑀢𑀺𑀬𑁄 𑀘𑀺𑀭𑀓𑀸𑀮𑀪𑀽𑀢𑀸𑀢𑀺 𑀓𑀢𑁆𑀯𑀸 ‘‘𑀘𑀺𑀭𑀁 𑀧𑀩𑁆𑀩𑀚𑀺𑀢𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀅𑀦𑁆𑀢𑀢𑁆𑀣𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑁄 𑀘𑁂𑀲 𑀬𑀣𑀸 ‘‘𑀫𑀸𑀲𑀚𑀸𑀢𑁄’’𑀢𑀺. 𑀅𑀣 𑀢𑀲𑁆𑀲 𑀧𑀤𑀤𑁆𑀯𑀬𑀲𑁆𑀲 𑀓𑁄 𑀯𑀺𑀲𑁂𑀲𑁄𑀢𑀺 𑀘𑁂? 𑀘𑀺𑀭𑀧𑀩𑁆𑀩𑀚𑀺𑀢𑀕𑁆𑀕𑀳𑀡𑁂𑀦𑀲𑁆𑀲 𑀩𑀼𑀤𑁆𑀥𑀺𑀲𑀻𑀮𑀢𑀸, 𑀭𑀢𑁆𑀢𑀜𑁆𑀜𑀽𑀕𑀳𑀡𑁂𑀦 𑀢𑀢𑁆𑀣 𑀲𑀫𑁆𑀧𑀚𑀸𑀦𑀢𑀸 𑀤𑀲𑁆𑀲𑀺𑀢𑀸, 𑀅𑀬𑀫𑁂𑀢𑀲𑁆𑀲 𑀯𑀺𑀲𑁂𑀲𑁄𑀢𑀺. 𑀓𑀺𑀁 𑀧𑀦 𑀅𑀢𑁆𑀣𑀁 𑀲𑀦𑁆𑀥𑀸𑀬 𑀲𑁄 𑀅𑀫𑀘𑁆𑀘𑁄 𑀆𑀳𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀘𑀺𑀭𑀧𑀩𑁆𑀩𑀚𑀺𑀢𑀲𑁆𑀲𑀸’’𑀢𑀺𑀆𑀤𑀺. 𑀑𑀓𑀧𑁆𑀧𑀦𑀻𑀬𑀸𑀢𑀺 𑀲𑀤𑁆𑀤𑀳𑀦𑀻𑀬𑀸. 𑀅𑀤𑁆𑀥𑀸𑀦𑀦𑁆𑀢𑀺 𑀤𑀻𑀖𑀓𑀸𑀮𑀁. 𑀓𑀺𑀢𑁆𑀢𑀓𑁄 𑀧𑀦 𑀲𑁄𑀢𑀺 𑀆𑀳 ‘‘𑀤𑁆𑀯𑁂 𑀢𑀬𑁄 𑀭𑀸𑀚𑀧𑀭𑀺𑀯𑀝𑁆𑀝𑁂’’𑀢𑀺, 𑀤𑁆𑀯𑀺𑀦𑁆𑀦𑀁, 𑀢𑀺𑀡𑁆𑀡𑀁 𑀯𑀸 𑀭𑀸𑀚𑀽𑀦𑀁 𑀭𑀚𑁆𑀚𑀸𑀦𑀼𑀲𑀸𑀲𑀦𑀧𑀝𑀺𑀧𑀸𑀝𑀺𑀬𑁄𑀢𑀺 𑀅𑀢𑁆𑀣𑁄. ‘‘𑀅𑀤𑁆𑀥𑀕𑀢𑁄’’𑀢𑀺 𑀯𑀢𑁆𑀯𑀸𑀧𑀺 𑀧𑀼𑀦 𑀓𑀢𑀁 𑀯𑀬𑀕𑁆𑀕𑀳𑀡𑀁 𑀑𑀲𑀸𑀦𑀯𑀬𑀸𑀧𑁂𑀓𑁆𑀔𑀁 𑀧𑀤𑀤𑁆𑀯𑀬𑀲𑁆𑀲 𑀅𑀢𑁆𑀣𑀯𑀺𑀲𑁂𑀲𑀲𑀫𑁆𑀪𑀯𑀢𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀧𑀘𑁆𑀙𑀺𑀫𑀯𑀬’’𑀦𑁆𑀢𑀺 𑀇𑀫𑀺𑀦𑀸. 𑀉𑀪𑀬𑀦𑁆𑀢𑀺 ‘‘𑀅𑀤𑁆𑀥𑀕𑀢𑁄, 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄’’𑀢𑀺 𑀧𑀤𑀤𑁆𑀯𑀬𑀁.

𑀓𑀸𑀚𑀭𑁄 ¶ 𑀦𑀸𑀫 𑀏𑀓𑁄 𑀭𑀼𑀓𑁆𑀔𑀯𑀺𑀲𑁂𑀲𑁄, 𑀬𑁄 ‘‘𑀧𑀡𑁆𑀡𑀓𑀭𑀼𑀓𑁆𑀔𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀤𑀺𑀲𑁆𑀯𑀸 𑀯𑀺𑀬 𑀅𑀦𑀢𑁆𑀢𑀫𑀦𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀩𑁆𑀩𑁂 𑀧𑀺𑀢𑀭𑀸 𑀲𑀤𑁆𑀥𑀺𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀤𑁂𑀲𑀦𑀸𑀬 𑀲𑀼𑀢𑀧𑀼𑀩𑁆𑀩𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀛𑀸𑀦𑀸…𑀧𑁂… 𑀓𑀸𑀫𑁄’’𑀢𑀺. 𑀢𑀺𑀮𑀓𑁆𑀔𑀡𑀩𑁆𑀪𑀸𑀳𑀢𑀦𑁆𑀢𑀺 𑀢𑀻𑀳𑀺 𑀮𑀓𑁆𑀔𑀡𑁂𑀳𑀺 𑀅𑀪𑀺𑀖𑀝𑀺𑀢𑀁. 𑀤𑀲𑁆𑀲𑀦𑁂𑀦𑀸𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀲𑁄 𑀳𑀺 𑀤𑀺𑀲𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀅𑀮𑁆𑀮𑀸𑀧𑀲𑀮𑁆𑀮𑀸𑀧𑀁 𑀓𑀢𑁆𑀯𑀸 ¶ , 𑀢𑀢𑁄 𑀅𑀓𑀺𑀭𑀺𑀬𑀯𑀸𑀤𑀁 𑀲𑀼𑀢𑁆𑀯𑀸 𑀘 𑀅𑀦𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀕𑀼𑀡𑀓𑀣𑀸𑀬𑀸𑀢𑀺 𑀅𑀪𑀽𑀢𑀕𑀼𑀡𑀓𑀣𑀸𑀬. 𑀢𑁂𑀦𑀸𑀳 ‘‘𑀲𑀼𑀝𑁆𑀞𑀼𑀢𑀭𑀁 𑀅𑀦𑀢𑁆𑀢𑀫𑀦𑁄’’𑀢𑀺. 𑀬𑀤𑀺 𑀅𑀦𑀢𑁆𑀢𑀫𑀦𑁄, 𑀓𑀲𑁆𑀫𑀸 𑀢𑀼𑀡𑁆𑀳𑀻 𑀅𑀳𑁄𑀲𑀻𑀢𑀺 𑀘𑁄𑀤𑀦𑀁 𑀯𑀺𑀲𑁄𑀥𑁂𑀢𑀺 ‘‘𑀅𑀦𑀢𑁆𑀢𑀫𑀦𑁄 𑀲𑀫𑀸𑀦𑁄𑀧𑀻’’𑀢𑀺𑀆𑀤𑀺𑀦𑀸.

𑁧𑁫𑁨. 𑀕𑁄𑀲𑀸𑀮𑀸𑀬𑀸𑀢𑀺 𑀏𑀯𑀁𑀦𑀸𑀫𑀓𑁂 𑀕𑀸𑀫𑁂𑀢𑀺 𑀯𑀼𑀢𑁆𑀢𑀁. 𑀯𑀲𑁆𑀲𑀸𑀦𑀓𑀸𑀮𑁂 𑀕𑀼𑀦𑁆𑀦𑀁 𑀧𑀢𑀺𑀝𑁆𑀞𑀺𑀢𑀲𑀸𑀮𑀸𑀬𑀸𑀢𑀺 𑀧𑀦 𑀅𑀢𑁆𑀣𑁂 𑀢𑀩𑁆𑀩𑀲𑁂𑀦 𑀢𑀲𑁆𑀲 𑀦𑀸𑀫𑀁 𑀲𑀸𑀢𑀺𑀲𑀬𑀫𑀼𑀧𑀧𑀦𑁆𑀦𑀁 𑀳𑁄𑀢𑀺 𑀩𑀳𑀼𑀮𑀫𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸, 𑀢𑀣𑀸𑀧𑀺 𑀲𑁄 𑀧𑁄𑀭𑀸𑀡𑁂𑀳𑀺 𑀅𑀦𑀦𑀼𑀲𑁆𑀲𑀼𑀢𑁄𑀢𑀺 𑀏𑀓𑀘𑁆𑀘𑀯𑀸𑀤𑁄 𑀦𑀸𑀫 𑀓𑀢𑁄. ‘‘𑀫𑀸 𑀔𑀮𑀻𑀢𑀺 𑀲𑀸𑀫𑀺𑀓𑁄 𑀆𑀳𑀸’’𑀢𑀺 𑀇𑀫𑀺𑀦𑀸 𑀢𑀣𑀸𑀯𑀘𑀦𑀫𑀼𑀧𑀸𑀤𑀸𑀬 𑀢𑀲𑁆𑀲 𑀆𑀔𑁆𑀬𑀸𑀢𑀧𑀤𑁂𑀦 𑀲𑀫𑀜𑁆𑀜𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀜𑁆𑀜𑀸𑀬 𑀳𑀺 𑀯𑀢𑁆𑀢𑀼𑀫𑀺𑀘𑁆𑀙𑀸𑀬 𑀆𑀔𑁆𑀬𑀸𑀢𑀧𑀤𑀫𑁆𑀧𑀺 𑀦𑀸𑀫𑀺𑀓𑀁 𑀪𑀯𑀢𑀺 𑀬𑀣𑀸 ‘‘𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄’’𑀢𑀺 (𑀫𑀳𑀸𑀯. 𑁧𑁭). 𑀲𑁂𑀲𑀦𑁆𑀢𑀺 ‘‘𑀲𑁄 𑀧𑀡𑁆𑀡𑁂𑀦 𑀯𑀸’’𑀢𑀺𑀆𑀤𑀺𑀯𑀘𑀦𑀁.

𑁧𑁫𑁩. 𑀤𑀸𑀲𑀸𑀤𑀻𑀲𑀼 𑀲𑀺𑀭𑀺𑀯𑀟𑁆𑀠𑀓𑀸𑀤𑀺𑀦𑀸𑀫𑀫𑀺𑀯 𑀅𑀚𑀺𑀢𑁄𑀢𑀺 𑀢𑀲𑁆𑀲 𑀦𑀸𑀫𑀫𑀢𑁆𑀢𑀁. 𑀓𑁂𑀲𑁂𑀳𑀺 𑀯𑀸𑀬𑀺𑀢𑁄 𑀓𑀫𑁆𑀩𑀮𑁄 𑀬𑀲𑁆𑀲𑀸𑀢𑀺𑀧𑀺 𑀬𑀼𑀚𑁆𑀚𑀢𑀺. 𑀧𑀝𑀺𑀓𑀺𑀝𑁆𑀞𑀢𑀭𑀦𑁆𑀢𑀺 𑀦𑀺𑀳𑀻𑀦𑀢𑀭𑀁. ‘‘𑀬𑀣𑀸𑀳𑀸’’𑀢𑀺𑀆𑀤𑀺𑀦𑀸 𑀅𑀗𑁆𑀕𑀼𑀢𑁆𑀢𑀭𑀸𑀕𑀫𑁂 𑀢𑀺𑀓𑀦𑀺𑀧𑀸𑀢𑁂 𑀫𑀓𑁆𑀔𑀮𑀺𑀲𑀼𑀢𑁆𑀢 (𑀅. 𑀦𑀺. 𑁩.𑁧𑁩𑁮) 𑀫𑀸𑀳𑀭𑀺. 𑀢𑀦𑁆𑀢𑀸𑀯𑀼𑀢𑀸𑀦𑀻𑀢𑀺 𑀢𑀦𑁆𑀢𑁂 𑀯𑀻𑀢𑀸𑀦𑀺. ‘‘𑀲𑀻𑀢𑁂 𑀲𑀻𑀢𑁄’’𑀢𑀺𑀆𑀤𑀺𑀦𑀸 𑀙𑀳𑀸𑀓𑀸𑀭𑁂𑀳𑀺 𑀢𑀲𑁆𑀲 𑀧𑀝𑀺𑀓𑀺𑀝𑁆𑀞𑀢𑀭𑀁 𑀤𑀲𑁆𑀲𑁂𑀢𑀺.

𑁧𑁫𑁪. 𑀧𑀓𑀼𑀚𑁆𑀛𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁂𑀲𑀼 𑀩𑁆𑀬𑀸𑀧𑀚𑁆𑀚𑀢𑀻𑀢𑀺 𑀧𑀓𑀼𑀥𑁄. 𑀯𑀘𑁆𑀘𑀁 𑀓𑀢𑁆𑀯𑀸𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁂𑀦 𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸𑀧𑀺 𑀓𑁂𑀦𑀘𑀺 𑀅𑀲𑀼𑀘𑀺𑀦𑀸 𑀫𑀓𑁆𑀔𑀺𑀢𑁆𑀯𑀸𑀧𑀻𑀢𑀺 𑀇𑀫𑀫𑀢𑁆𑀣𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀯𑀸𑀮𑀺𑀓𑀸𑀣𑀽𑀧𑀁 𑀓𑀢𑁆𑀯𑀸𑀢𑀺 𑀯𑀢𑀲𑀫𑀸𑀤𑀸𑀦𑀲𑀻𑀲𑁂𑀦 𑀯𑀸𑀮𑀺𑀓𑀸𑀲𑀜𑁆𑀘𑀬𑀁 𑀓𑀢𑁆𑀯𑀸, 𑀢𑀣𑀸𑀭𑀽𑀧𑁂 𑀅𑀦𑀼𑀧𑀕𑀫𑀦𑀻𑀬𑀝𑁆𑀞𑀸𑀦𑁂 𑀧𑀼𑀦 𑀯𑀢𑀁 𑀲𑀫𑀸𑀤𑀸𑀬 𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁫𑁬. ‘‘𑀕𑀡𑁆𑀞𑀦𑀓𑀺𑀮𑁂𑀲𑁄’’𑀢𑀺 𑀏𑀢𑀲𑁆𑀲 ‘‘𑀧𑀮𑀺𑀩𑀼𑀦𑁆𑀥𑀦𑀓𑀺𑀮𑁂𑀲𑁄’’𑀢𑀺 𑀅𑀢𑁆𑀣𑀯𑀘𑀦𑀁, 𑀲𑀁𑀲𑀸𑀭𑁂 𑀧𑀭𑀺𑀩𑀼𑀦𑁆𑀥𑀦𑀓𑀺𑀘𑁆𑀘𑁄 𑀔𑁂𑀢𑁆𑀢𑀯𑀢𑁆𑀣𑀼𑀧𑀼𑀢𑁆𑀢𑀤𑀸𑀭𑀸𑀤𑀺𑀯𑀺𑀲𑀬𑁄 𑀭𑀸𑀕𑀸𑀤𑀺𑀓𑀺𑀮𑁂𑀲𑁄𑀢𑀺 𑀅𑀢𑁆𑀣𑁄. ‘‘𑀏𑀯𑀁𑀯𑀸𑀤𑀺𑀢𑀸𑀬𑀸’’𑀢𑀺 𑀇𑀫𑀺𑀦𑀸 𑀮𑀤𑁆𑀥𑀺𑀯𑀲𑁂𑀦𑀲𑁆𑀲 𑀦𑀸𑀫𑀁, 𑀦 𑀧𑀦𑀢𑁆𑀣𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀬𑀸𑀯 𑀳𑀺 𑀲𑁄 𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀝𑀺𑀢𑁄, 𑀢𑀸𑀯 𑀅𑀢𑁆𑀣𑀺𑀬𑁂𑀯. 𑀅𑀬𑀁 𑀧𑀦 𑀯𑀘𑀦𑀢𑁆𑀣𑁄 𑁋 ‘‘𑀦𑀢𑁆𑀣𑀺 𑀫𑀬𑁆𑀳𑀁 𑀕𑀡𑁆𑀞𑁄’’𑀢𑀺 𑀕𑀡𑁆𑀳𑀸𑀢𑀻𑀢𑀺 𑀦𑀺𑀕𑀡𑁆𑀞𑁄𑀢𑀺. 𑀦𑀸𑀝𑀲𑁆𑀲𑀸𑀢𑀺 𑀏𑀯𑀁𑀦𑀸𑀫𑀓𑀲𑁆𑀲.

𑀓𑁄𑀫𑀸𑀭𑀪𑀘𑁆𑀘𑀚𑀻𑀯𑀓𑀓𑀣𑀸𑀯𑀡𑁆𑀡𑀦𑀸

𑁧𑁫𑁭. 𑀲𑀩𑁆𑀩𑀣𑀸 ¶ ¶ 𑀢𑀼𑀡𑁆𑀳𑀻𑀪𑀽𑀢𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀏𑀲 𑀦𑀸𑀕…𑀧𑁂… 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀲𑀼𑀧𑀡𑁆𑀡𑁄𑀢𑀺 𑀕𑀭𑀼𑀴𑁄, 𑀕𑀭𑀼𑀟𑁄 𑀯𑀸 𑀲𑀓𑁆𑀓𑀝𑀫𑀢𑁂𑀦. ‘‘𑀟-𑀴𑀸𑀦’𑀫𑀯𑀺𑀲𑁂𑀲𑁄’’𑀢𑀺 𑀳𑀺 𑀢𑀢𑁆𑀣 𑀯𑀤𑀦𑁆𑀢𑀺. 𑀬𑀣𑀸𑀥𑀺𑀧𑁆𑀧𑀸𑀬𑀁 𑀦 𑀯𑀢𑁆𑀢𑀢𑀻𑀢𑀺 𑀓𑀢𑁆𑀯𑀸 ‘‘𑀅𑀦𑀢𑁆𑀣𑁄 𑀯𑀢 𑀫𑁂’’𑀢𑀺 𑀯𑀼𑀢𑁆𑀢𑀁. 𑀉𑀧𑀲𑀦𑁆𑀢𑀲𑁆𑀲𑀸𑀢𑀺 𑀲𑀩𑁆𑀩𑀣𑀸 𑀲𑀜𑁆𑀜𑀫𑁂𑀦 𑀉𑀧𑀲𑀫𑀁 𑀕𑀢𑀲𑁆𑀲. 𑀚𑀻𑀯𑀓𑀲𑁆𑀲 𑀢𑀼𑀡𑁆𑀳𑀻𑀪𑀸𑀯𑁄 𑀫𑀫 𑀅𑀥𑀺𑀧𑁆𑀧𑀸𑀬𑀲𑁆𑀲 𑀫𑀤𑁆𑀤𑀦𑀲𑀤𑀺𑀲𑁄, 𑀢𑀲𑁆𑀫𑀸 𑀢𑀤𑁂𑀯 𑀢𑀼𑀡𑁆𑀳𑀻𑀪𑀸𑀯𑀁 𑀧𑀼𑀘𑁆𑀙𑀺𑀢𑁆𑀯𑀸 𑀓𑀣𑀸𑀧𑀦𑁂𑀦 𑀫𑀫 𑀅𑀥𑀺𑀧𑁆𑀧𑀸𑀬𑁄 𑀲𑀫𑁆𑀧𑀸𑀤𑁂𑀢𑀩𑁆𑀩𑁄𑀢𑀺 𑀅𑀬𑀫𑁂𑀢𑁆𑀣 𑀭𑀜𑁆𑀜𑁄 𑀅𑀥𑀺𑀧𑁆𑀧𑀸𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀳𑀢𑁆𑀣𑀺𑀫𑁆𑀳𑀺 𑀔𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀓𑀺𑀦𑁆𑀢𑀺 𑀓𑀸𑀭𑀡𑀧𑀼𑀘𑁆𑀙𑀸𑀬𑀁 𑀦𑀺𑀧𑀸𑀢𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺 𑀇𑀫𑀺𑀦𑀸, 𑀬𑁂𑀦 𑀢𑀼𑀯𑀁 𑀢𑀼𑀡𑁆𑀳𑀻, 𑀓𑀺𑀁 𑀢𑀁 𑀓𑀸𑀭𑀡𑀦𑁆𑀢𑀺 𑀯𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀬𑀣𑀸𑀲𑀫𑁆𑀪𑀯𑀁 𑀓𑀸𑀭𑀡𑀁 𑀉𑀤𑁆𑀥𑀭𑀺𑀢𑁆𑀯𑀸 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑁂𑀲’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀣𑀸 𑀏𑀢𑁂𑀲𑀦𑁆𑀢𑀺 𑀏𑀢𑁂𑀲𑀁 𑀓𑀼𑀮𑀽𑀧𑀓𑁄 𑀅𑀢𑁆𑀣𑀺 𑀬𑀣𑀸, 𑀇𑀫𑁂𑀲𑀁 𑀦𑀼 𑀔𑁄 𑀢𑀺𑀡𑁆𑀡𑀁 𑀓𑀸𑀭𑀡𑀸𑀦𑀁 𑀅𑀜𑁆𑀜𑀢𑀭𑁂𑀦 𑀓𑀸𑀭𑀡𑁂𑀦 𑀢𑀼𑀡𑁆𑀳𑀻 𑀪𑀯𑀲𑀻𑀢𑀺 𑀧𑀼𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑀣𑀸𑀧𑁂𑀢𑀻𑀢𑀺 𑀓𑀣𑀸𑀧𑁂𑀢𑀼𑀓𑀸𑀫𑁄 𑀳𑁄𑀢𑀺. 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦𑀸𑀢𑀺 𑀏𑀢𑁆𑀣 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀅𑀪𑀺𑀫𑀼𑀔𑀁 𑀞𑀺𑀢𑁂𑀦𑀸𑀢𑀺 𑀅𑀢𑁆𑀣𑁄, 𑀧𑀸𑀤𑀚𑀸𑀡𑀼 𑀓𑀧𑁆𑀧𑀭 𑀳𑀢𑁆𑀣 𑀲𑀻𑀲𑀲𑀗𑁆𑀔𑀸𑀢𑀸𑀦𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀲𑀫𑀁 𑀓𑀢𑁆𑀯𑀸 𑀑𑀦𑀸𑀫𑁂𑀢𑁆𑀯𑀸 𑀅𑀪𑀺𑀫𑀼𑀔𑀁 𑀞𑀺𑀢𑁂𑀦 𑀧𑀞𑀫𑀁 𑀯𑀦𑁆𑀤𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀫𑁆𑀧𑀺 𑀯𑀤𑀦𑁆𑀢𑀺 ‘‘𑀦𑀯𑀓𑀢𑀭𑁂𑀦𑀼𑀧𑀸𑀮𑀺 𑀪𑀺𑀓𑁆𑀔𑀼𑀦𑀸 𑀯𑀼𑀟𑁆𑀠𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀸𑀤𑁂 𑀯𑀦𑁆𑀤𑀦𑁆𑀢𑁂𑀦 𑀇𑀫𑁂 𑀧𑀜𑁆𑀘 𑀥𑀫𑁆𑀫𑁂 𑀅𑀚𑁆𑀛𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀧𑀸𑀤𑀸 𑀯𑀦𑁆𑀤𑀺𑀢𑀩𑁆𑀩𑀸’𑀢𑀺𑀆𑀤𑀺𑀓𑀁 (𑀧𑀭𑀺. 𑁪𑁬𑁯) 𑀯𑀺𑀦𑀬𑀧𑀸𑀴𑀺𑀫𑀸𑀳𑀭𑀺𑀢𑁆𑀯𑀸 𑀏𑀓𑀁𑀲𑀓𑀭𑀡𑀅𑀜𑁆𑀚𑀮𑀺𑀧𑀕𑁆𑀕𑀳𑀡𑀧𑀸𑀤𑀲𑀫𑁆𑀩𑀸𑀳𑀦𑀧𑁂𑀫𑀕𑀸𑀭𑀯𑀼𑀧𑀝𑁆𑀞𑀸𑀧𑀦𑀯𑀲𑁂𑀦 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑀯𑀦𑁆𑀤𑀦𑀸’’𑀢𑀺, 𑀢𑀫𑁂𑀢𑁆𑀣𑀸𑀦𑀥𑀺𑀧𑁆𑀧𑁂𑀢𑀁 𑀤𑀽𑀭𑀢𑁄 𑀯𑀦𑁆𑀤𑀦𑁂 𑀬𑀣𑀸𑀯𑀼𑀢𑁆𑀢𑀧𑀜𑁆𑀘𑀗𑁆𑀕𑀲𑁆𑀲 𑀅𑀧𑀭𑀺𑀧𑀼𑀡𑁆𑀡𑀢𑁆𑀢𑀸. 𑀯𑀦𑁆𑀤𑀦𑀸 𑀘𑁂𑀢𑁆𑀣 𑀧𑀡𑀫𑀦𑀸 𑀅𑀜𑁆𑀚𑀮𑀺𑀧𑀕𑁆𑀕𑀳𑀡𑀓𑀭𑀧𑀼𑀝𑀲𑀫𑀸𑀬𑁄𑀕𑁄. ‘‘𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸’’𑀢𑀺 𑀘 𑀓𑀸𑀬𑀧𑀡𑀸𑀫𑁄 𑀯𑀼𑀢𑁆𑀢𑁄, ‘‘𑀫𑀫 𑀲𑀢𑁆𑀣𑀼𑀦𑁄’’𑀢𑀺𑀆𑀤𑀺𑀦𑀸 𑀧𑀦 𑀯𑀘𑀻𑀧𑀡𑀸𑀫𑁄, 𑀢𑀤𑀼𑀪𑀬𑀧𑀼𑀭𑁂𑀘𑀭𑀸𑀦𑀼𑀘𑀭𑀯𑀲𑁂𑀦 𑀫𑀦𑁄𑀧𑀡𑀸𑀫𑁄𑀢𑀺. 𑀓𑀸𑀫𑀁 𑀲𑀩𑁆𑀩𑀸𑀧𑀺 𑀢𑀣𑀸𑀕𑀢𑀲𑁆𑀲 𑀧𑀝𑀺𑀧𑀢𑁆𑀢𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀭𑀽𑀧𑀸𑀯, 𑀢𑀣𑀸𑀧𑀺 𑀕𑀩𑁆𑀪𑁄𑀓𑁆𑀓𑀦𑁆𑀢𑀺 𑀅𑀪𑀺𑀚𑀸𑀢𑀺 𑀅𑀪𑀺𑀦𑀺𑀓𑁆𑀔𑀫𑀦 𑀅𑀪𑀺𑀲𑀫𑁆𑀩𑁄𑀥𑀺 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦 (𑀲𑀁. 𑀦𑀺. 𑁫.𑁧𑁦𑁮𑁧; 𑀧𑀝𑀺. 𑀫. 𑁩.𑁩𑁦) 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀤𑁂𑀯𑁄𑀭𑁄𑀳𑀦𑀸𑀦𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀢𑀺𑀯𑀺𑀬 𑀲𑀼𑀧𑀸𑀓𑀝𑀸𑀦𑀺, 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀧𑀝𑀺𑀩𑀸𑀳𑀺𑀢𑀼𑀦𑁆𑀢𑀺 𑀢𑀸𑀦𑀺𑀬𑁂𑀯𑁂𑀢𑁆𑀣 𑀉𑀤𑁆𑀥𑀝𑀸𑀦𑀺.

𑀇𑀢𑁆𑀣𑀁 ¶ 𑀇𑀫𑀁 𑀧𑀓𑀸𑀭𑀁 𑀪𑀽𑀢𑁄 𑀧𑀢𑁆𑀢𑁄𑀢𑀺 𑀇𑀢𑁆𑀣𑀫𑁆𑀪𑀽𑀢𑁄, 𑀢𑀲𑁆𑀲 𑀆𑀔𑁆𑀬𑀸𑀦𑀁 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀁, 𑀲𑁄𑀬𑁂𑀯𑀢𑁆𑀣𑁄 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁄. 𑀅𑀣 𑀯𑀸 𑀇𑀢𑁆𑀣𑀁 𑀏𑀯𑀁𑀧𑀓𑀸𑀭𑁄 𑀪𑀽𑀢𑁄 𑀚𑀸𑀢𑁄𑀢𑀺 𑀇𑀢𑁆𑀣𑀫𑁆𑀪𑀽𑀢𑁄, 𑀢𑀸𑀤𑀺𑀲𑁄𑀢𑀺 𑀆𑀔𑁆𑀬𑀸𑀦𑀁 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀁, 𑀢𑀤𑁂𑀯𑀢𑁆𑀣𑁄 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁄, 𑀢𑀲𑁆𑀫𑀺𑀁 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀩𑁆𑀪𑀼𑀕𑁆𑀕𑀢𑁄𑀢𑀺 𑀏𑀢𑁆𑀣 ¶ 𑀳𑀺 𑀅𑀪𑀺𑀲𑀤𑁆𑀤𑁄 𑀧𑀥𑀸𑀦𑀯𑀲𑁂𑀦 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑀚𑁄𑀢𑀓𑁄 𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑁄 𑀅𑀪𑀺𑀪𑀯𑀺𑀢𑁆𑀯𑀸 𑀉𑀕𑁆𑀕𑀫𑀦𑀓𑀺𑀭𑀺𑀬𑀸𑀧𑀓𑀸𑀭𑀲𑁆𑀲 𑀤𑀻𑀧𑀦𑀢𑁄, 𑀢𑁂𑀦 𑀧𑀬𑁄𑀕𑀢𑁄 ‘‘𑀢𑀁 𑀔𑁄 𑀧𑀦 𑀪𑀕𑀯𑀦𑁆𑀢’’𑀦𑁆𑀢𑀺 𑀇𑀤𑀁 𑀉𑀧𑀬𑁄𑀕𑀯𑀘𑀦𑀁 𑀲𑀸𑀫𑀺𑀅𑀢𑁆𑀣𑁂 𑀲𑀫𑀸𑀦𑀫𑁆𑀧𑀺 𑀅𑀧𑁆𑀧𑀥𑀸𑀦𑀯𑀲𑁂𑀦 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑀤𑀻𑀧𑀦𑀢𑁄 ‘‘𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁂’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀢𑀲𑁆𑀲 𑀔𑁄 𑀧𑀦 𑀪𑀕𑀯𑀢𑁄𑀢𑀺 𑀅𑀢𑁆𑀣𑁄’’𑀢𑀺. 𑀦𑀦𑀼 𑀘 ‘‘𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀫𑀪𑀻’’𑀢𑀺 𑀏𑀢𑁆𑀣 𑀯𑀺𑀬 ‘‘𑀢𑀁 𑀔𑁄 𑀧𑀦 𑀪𑀕𑀯𑀦𑁆𑀢’’𑀦𑁆𑀢𑀺 𑀏𑀢𑁆𑀣 𑀅𑀪𑀺𑀲𑀤𑁆𑀤𑁄 𑀅𑀧𑁆𑀧𑀬𑀼𑀢𑁆𑀢𑁄, 𑀓𑀣𑀫𑁂𑀢𑁆𑀣 𑀢𑀁𑀧𑀬𑁄𑀕𑀢𑁄 𑀉𑀧𑀬𑁄𑀕𑀯𑀘𑀦𑀁 𑀲𑀺𑀬𑀸𑀢𑀺? 𑀅𑀢𑁆𑀣𑀢𑁄 𑀧𑀬𑀼𑀢𑁆𑀢𑀢𑁆𑀢𑀸. 𑀅𑀢𑁆𑀣𑀲𑀤𑁆𑀤𑀧𑀬𑁄𑀕𑁂𑀲𑀼 𑀳𑀺 𑀅𑀢𑁆𑀣𑀧𑀬𑁄𑀕𑁄𑀬𑁂𑀯 𑀧𑀥𑀸𑀦𑁄𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 ‘‘𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀫𑀪𑀻’’𑀢𑀺 𑀏𑀢𑁆𑀣 𑀅𑀪𑀺𑀲𑀤𑁆𑀤𑀧𑀬𑁄𑀕𑀢𑁄 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑁂 𑀉𑀧𑀬𑁄𑀕𑀯𑀘𑀦𑀁 𑀓𑀢𑀁, 𑀏𑀯𑀫𑀺𑀥𑀸𑀧𑀺 ‘‘𑀢𑀁 𑀔𑁄 𑀧𑀦 𑀪𑀕𑀯𑀦𑁆𑀢𑀁 𑀅𑀪𑀺 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀉𑀕𑁆𑀕𑀢𑁄’’𑀢𑀺 𑀅𑀪𑀺𑀲𑀤𑁆𑀤𑀧𑀬𑁄𑀕𑀢𑁄 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑁂 𑀉𑀧𑀬𑁄𑀕𑀯𑀘𑀦𑀁 𑀓𑀢𑀦𑁆𑀢𑀺. 𑀬𑀣𑀸 𑀳𑀺 ‘‘𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀫𑀪𑀻’’𑀢𑀺 𑀏𑀢𑁆𑀣 ‘‘𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀫𑀪𑀺 𑀫𑀸𑀢𑀼𑀯𑀺𑀲𑀬𑁂, 𑀫𑀸𑀢𑀼𑀬𑀸 𑀯𑀸 𑀲𑀸𑀥𑀽’’𑀢𑀺 𑀏𑀯𑀁 𑀅𑀥𑀺𑀓𑀭𑀡𑀢𑁆𑀣𑁂, 𑀲𑀸𑀫𑀺𑀅𑀢𑁆𑀣𑁂 𑀯𑀸 𑀪𑀼𑀫𑁆𑀫𑀯𑀘𑀦𑀲𑁆𑀲, 𑀲𑀸𑀫𑀺𑀯𑀘𑀦𑀲𑁆𑀲 𑀯𑀸 𑀧𑀲𑀗𑁆𑀕𑁂 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀚𑁄𑀢𑀓𑁂𑀦 𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑁂𑀦 𑀅𑀪𑀺𑀲𑀤𑁆𑀤𑁂𑀦 𑀧𑀬𑁄𑀕𑀢𑁄 𑀉𑀧𑀬𑁄𑀕𑀯𑀘𑀦𑀁 𑀓𑀢𑀁, 𑀏𑀯𑀫𑀺𑀥𑀸𑀧𑀺 𑀲𑀸𑀫𑀺𑀅𑀢𑁆𑀣𑁂 𑀲𑀸𑀫𑀺𑀯𑀘𑀦𑀧𑁆𑀧𑀲𑀗𑁆𑀕𑁂 𑀬𑀣𑀸 𑀘 𑀢𑀢𑁆𑀣 ‘‘𑀤𑁂𑀯𑀤𑀢𑁆𑀢𑁄 𑀫𑀸𑀢𑀼𑀯𑀺𑀲𑀬𑁂, 𑀫𑀸𑀢𑀼 𑀲𑀫𑁆𑀩𑀦𑁆𑀥𑀻 𑀯𑀸 𑀲𑀸𑀥𑀼𑀢𑁆𑀢𑀧𑁆𑀧𑀓𑀸𑀭𑀧𑁆𑀧𑀢𑁆𑀢𑁄’’𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺, 𑀏𑀯𑀫𑀺𑀥𑀸𑀧𑀺 ‘‘𑀪𑀕𑀯𑀢𑁄 𑀲𑀫𑁆𑀩𑀦𑁆𑀥𑀻 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 𑀅𑀪𑀺𑀪𑀯𑀺𑀢𑁆𑀯𑀸 𑀉𑀕𑁆𑀕𑀫𑀦𑀧𑁆𑀧𑀓𑀸𑀭𑀧𑁆𑀧𑀢𑁆𑀢𑁄’’𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀢𑀢𑁆𑀣 𑀳𑀺 𑀤𑁂𑀯𑀤𑀢𑁆𑀢𑀕𑁆𑀕𑀳𑀡𑀁 𑀯𑀺𑀬 𑀇𑀥 𑀓𑀺𑀢𑁆𑀢𑀺𑀲𑀤𑁆𑀤𑀕𑁆𑀕𑀳𑀡𑀁, ‘‘𑀫𑀸𑀢𑀭’’𑀦𑁆𑀢𑀺 𑀯𑀘𑀦𑀁 𑀯𑀺𑀬 ‘‘𑀪𑀕𑀯𑀦𑁆𑀢’’𑀦𑁆𑀢𑀺 𑀯𑀘𑀦𑀁, 𑀲𑀸𑀥𑀼𑀲𑀤𑁆𑀤𑁄 𑀯𑀺𑀬 𑀉𑀕𑁆𑀕𑀢𑀲𑀤𑁆𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀮𑁆𑀬𑀸𑀡𑁄𑀢𑀺 𑀪𑀤𑁆𑀤𑀓𑁄. 𑀓𑀮𑁆𑀬𑀸𑀡𑀪𑀸𑀯𑁄 𑀘𑀲𑁆𑀲 𑀓𑀮𑁆𑀬𑀸𑀡𑀕𑀼𑀡𑀯𑀺𑀲𑀬𑀢𑀸𑀬𑀸𑀢𑀺 𑀆𑀳 ‘‘𑀓𑀮𑁆𑀬𑀸𑀡𑀕𑀼𑀡𑀲𑀫𑀦𑁆𑀦𑀸𑀕𑀢𑁄’’𑀢𑀺, 𑀓𑀮𑁆𑀬𑀸𑀡𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀢𑀩𑁆𑀩𑀺𑀲𑀬𑀢𑀸𑀬 𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀢𑀁 𑀯𑀺𑀲𑀬𑀢𑀸 𑀳𑁂𑀢𑁆𑀣 𑀲𑀫𑀦𑁆𑀦𑀸𑀕𑀫𑁄, 𑀓𑀮𑁆𑀬𑀸𑀡𑀕𑀼𑀡𑀯𑀺𑀲𑀬𑀢𑀸𑀬 𑀢𑀦𑁆𑀦𑀺𑀲𑁆𑀲𑀺𑀢𑁄𑀢𑀺 ¶ 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀝𑁆𑀞𑁄𑀢𑀺 𑀧𑀭𑀺𑀬𑀸𑀬𑀯𑀘𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀝𑁆𑀞𑀕𑀼𑀡𑀯𑀺𑀲𑀬𑀢𑀸 𑀏𑀯 𑀳𑀺 𑀓𑀺𑀢𑁆𑀢𑀺𑀲𑀤𑁆𑀤𑀲𑁆𑀲 𑀲𑁂𑀝𑁆𑀞𑀢𑀸 ‘‘𑀪𑀕𑀯𑀸𑀢𑀺 𑀯𑀘𑀦𑀁 𑀲𑁂𑀝𑁆𑀞𑀁, 𑀪𑀕𑀯𑀸𑀢𑀺 𑀯𑀘𑀦𑀫𑀼𑀢𑁆𑀢𑀫’’𑀦𑁆𑀢𑀺𑀆𑀤𑀻𑀲𑀼 (𑀯𑀺𑀲𑀼𑀤𑁆𑀥𑀺. 𑁧.𑁧𑁪𑁨; 𑀧𑀸𑀭𑀸. 𑀅𑀝𑁆𑀞. 𑁧.𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸; 𑀉𑀤𑀸. 𑀅𑀝𑁆𑀞. 𑁧; 𑀇𑀢𑀺𑀯𑀼. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸; 𑀫𑀳𑀸𑀦𑀺. 𑀅𑀝𑁆𑀞. 𑁪𑁯) 𑀯𑀺𑀬. ‘‘𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 𑀕𑀼𑀡𑀸𑀦𑀁 𑀲𑀁𑀓𑀺𑀢𑁆𑀢𑀦𑀢𑁄, 𑀲𑀤𑁆𑀤𑀦𑀻𑀬𑀢𑁄 𑀘 𑀯𑀡𑁆𑀡𑁄𑀬𑁂𑀯 𑀓𑀺𑀢𑁆𑀢𑀺𑀲𑀤𑁆𑀤𑁄 𑀦𑀸𑀫𑀸𑀢𑀺 𑀆𑀳 ‘‘𑀓𑀺𑀢𑁆𑀢𑀺𑀬𑁂𑀯𑀸’’𑀢𑀺. 𑀯𑀡𑁆𑀡𑁄 𑀏𑀯 𑀳𑀺 𑀓𑀺𑀢𑁆𑀢𑁂𑀢𑀩𑁆𑀩𑀢𑁄 𑀓𑀺𑀢𑁆𑀢𑀺, 𑀲𑀤𑁆𑀤𑀦𑀻𑀬𑀢𑁄 𑀲𑀤𑁆𑀤𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀺𑀧𑀭𑀺𑀬𑀸𑀬𑁄 𑀳𑀺 𑀲𑀤𑁆𑀤𑀲𑀤𑁆𑀤𑁄 𑀬𑀣𑀸 ‘‘𑀉𑀴𑀸𑀭𑀲𑀤𑁆𑀤𑀸 𑀇𑀲𑀬𑁄, 𑀕𑀼𑀡𑀯𑀦𑁆𑀢𑁄 𑀢𑀧𑀲𑁆𑀲𑀺𑀦𑁄’’𑀢𑀺. 𑀓𑀺𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑁄 𑀲𑀤𑁆𑀤𑁄 𑀓𑀺𑀢𑁆𑀢𑀺𑀲𑀤𑁆𑀤𑁄𑀢𑀺 𑀪𑀺𑀦𑁆𑀦𑀸𑀥𑀺𑀓𑀭𑀡𑀢𑀁 𑀤𑀲𑁆𑀲𑁂𑀢𑀺 ‘‘𑀣𑀼𑀢𑀺𑀖𑁄𑀲𑁄’’𑀢𑀺 𑀇𑀫𑀺𑀦𑀸. 𑀓𑀺𑀢𑁆𑀢𑀺𑀲𑀤𑁆𑀤𑁄 𑀳𑁂𑀢𑁆𑀣 𑀣𑀼𑀢𑀺𑀧𑀭𑀺𑀬𑀸𑀬𑁄 𑀓𑀺𑀢𑁆𑀢𑀦𑀫𑀪𑀺𑀢𑁆𑀣𑀯𑀦𑀁 𑀓𑀺𑀢𑁆𑀢𑀻𑀢𑀺. 𑀣𑀼𑀢𑀺𑀯𑀲𑁂𑀦 𑀧𑀯𑀢𑁆𑀢𑁄 𑀖𑁄𑀲𑁄 𑀣𑀼𑀢𑀺𑀖𑁄𑀲𑁄, 𑀅𑀪𑀺𑀢𑁆𑀣𑀯𑀼𑀤𑀸𑀳𑀸𑀭𑁄𑀢𑀺 𑀅𑀢𑁆𑀣𑁄. 𑀅𑀪𑀺𑀲𑀤𑁆𑀤𑁄 𑀅𑀪𑀺𑀪𑀯𑀦𑁂, 𑀅𑀪𑀺𑀪𑀯𑀦𑀜𑁆𑀘𑁂𑀢𑁆𑀣 ¶ 𑀅𑀚𑁆𑀛𑁄𑀢𑁆𑀣𑀭𑀡𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸’’𑀢𑀺, 𑀅𑀦𑀜𑁆𑀜𑀲𑀸𑀥𑀸𑀭𑀡𑁂 𑀕𑀼𑀡𑁂 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸 𑀅𑀪𑀺𑀩𑁆𑀬𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀺𑀦𑁆𑀢𑀺-𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄𑀢𑀺 𑀘𑁄𑀤𑀦𑀸𑀬 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀫𑀸𑀳𑀸𑀢𑀺 𑀅𑀦𑀼𑀲𑀦𑁆𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑀧𑀤𑀸𑀦𑀁 𑀲𑀫𑁆𑀩𑀚𑁆𑀛𑀦𑀁 𑀧𑀤𑀲𑀫𑁆𑀩𑀦𑁆𑀥𑁄. 𑀲𑁄 𑀪𑀕𑀯𑀸𑀢𑀺 𑀬𑁄 𑀲𑁄 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀓𑀺𑀮𑁂𑀲𑁂 𑀪𑀜𑁆𑀚𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀤𑁂𑀯𑀸𑀦𑀫𑀢𑀺𑀤𑁂𑀯𑁄 𑀲𑀓𑁆𑀓𑀸𑀦𑀫𑀢𑀺𑀲𑀓𑁆𑀓𑁄 𑀩𑁆𑀭𑀳𑁆𑀫𑀸𑀦𑀫𑀢𑀺𑀩𑁆𑀭𑀳𑁆𑀫𑀸 𑀮𑁄𑀓𑀦𑀸𑀣𑁄 𑀪𑀸𑀕𑁆𑀬𑀯𑀦𑁆𑀢𑀢𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀲𑀤𑁂𑀯𑀓𑁂 𑀮𑁄𑀓𑁂 ‘‘𑀪𑀕𑀯𑀸’’𑀢𑀺 𑀧𑀢𑁆𑀣𑀝𑀓𑀺𑀢𑁆𑀢𑀺𑀲𑀤𑁆𑀤𑁄, 𑀲𑁄 𑀪𑀕𑀯𑀸. 𑀬𑀁 𑀢𑀁-𑀲𑀤𑁆𑀤𑀸 𑀳𑀺 𑀦𑀺𑀘𑁆𑀘𑀲𑀫𑁆𑀩𑀦𑁆𑀥𑀸. ‘‘𑀪𑀕𑀯𑀸’’𑀢𑀺 𑀘 𑀇𑀤𑀫𑀸𑀤𑀺𑀧𑀤𑀁 𑀲𑀢𑁆𑀣𑀼 𑀦𑀸𑀫𑀓𑀺𑀢𑁆𑀢𑀦𑀁. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 ‘‘𑀪𑀕𑀯𑀸𑀢𑀺 𑀦𑁂𑀢𑀁 𑀦𑀸𑀫𑀁 𑀫𑀸𑀢𑀭𑀸 𑀓𑀢𑀁, 𑀦 𑀧𑀺𑀢𑀭𑀸 𑀓𑀢’’𑀦𑁆𑀢𑀺𑀆𑀤𑀺 (𑀫𑀳𑀸𑀦𑀺. 𑁬; 𑀘𑀽𑀴𑀦𑀺. 𑁨). 𑀧𑀭𑀢𑁄 𑀧𑀦 ‘‘𑀪𑀕𑀯𑀸’’𑀢𑀺 𑀧𑀤𑀁 𑀕𑀼𑀡𑀓𑀺𑀢𑁆𑀢𑀦𑀁. 𑀬𑀣𑀸 𑀓𑀫𑁆𑀫𑀝𑁆𑀞𑀸𑀦𑀺𑀓𑁂𑀦‘‘𑀅𑀭𑀳’’𑀦𑁆𑀢𑀺𑀆𑀤𑀻𑀲𑀼 𑀦𑀯𑀲𑀼 𑀞𑀸𑀦𑁂𑀲𑀼 𑀧𑀘𑁆𑀘𑁂𑀓𑀁 𑀇𑀢𑀺𑀧𑀺𑀲𑀤𑁆𑀤𑀁 𑀬𑁄𑀚𑁂𑀢𑁆𑀯𑀸 𑀩𑀼𑀤𑁆𑀥𑀕𑀼𑀡𑀸 𑀅𑀦𑀼𑀲𑁆𑀲𑀭𑀻𑀬𑀦𑁆𑀢𑀺, 𑀏𑀯𑀫𑀺𑀥 𑀩𑀼𑀤𑁆𑀥𑀕𑀼𑀡𑀲𑀁𑀓𑀺𑀢𑁆𑀢𑀓𑁂𑀦𑀸𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑀺𑀧𑀺 𑀅𑀭𑀳𑀁…𑀧𑁂… 𑀇𑀢𑀺𑀧𑀺 𑀪𑀕𑀯𑀸’’𑀢𑀺 𑀆𑀳. 𑀏𑀯𑀜𑁆𑀳𑀺 𑀲𑀢𑀺‘‘𑀅𑀭𑀳’’𑀦𑁆𑀢𑀺𑀆𑀤𑀻𑀳𑀺 𑀦𑀯𑀳𑀺 𑀧𑀤𑁂𑀳𑀺 𑀬𑁂 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀢𑀺𑀯𑀺𑀬 𑀧𑀸𑀓𑀝𑀸 𑀧𑀜𑁆𑀜𑀸𑀢𑀸 𑀩𑀼𑀤𑁆𑀥𑀕𑀼𑀡𑀸, 𑀢𑁂 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀺𑀪𑀸𑀯𑀺𑀢𑀸 𑀳𑁄𑀦𑁆𑀢𑀺 ‘‘𑀇𑀢𑀺𑀧𑀻’’𑀢𑀺 𑀧𑀤𑀤𑁆𑀯𑀬𑁂𑀦 𑀢𑁂𑀲𑀁 𑀦𑀸𑀦𑀧𑁆𑀧𑀓𑀸𑀭𑀢𑀸𑀤𑀻𑀧𑀦𑀢𑁄. ‘‘𑀇𑀢𑀺𑀧𑁂𑀢𑀁 𑀪𑀽𑀢𑀁, 𑀇𑀢𑀺𑀧𑁂𑀢𑀁 ¶ 𑀢𑀘𑁆𑀙’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁬) 𑀯𑀺𑀬 𑀳𑀺 𑀇𑀢𑀺-𑀲𑀤𑁆𑀤𑁄 𑀇𑀥 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀓𑀭𑀡𑀢𑁆𑀣𑁄, 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑁂𑀦 𑀘 𑀦𑁂𑀲𑀁 𑀦𑀸𑀦𑀧𑁆𑀧𑀓𑀸𑀭𑀪𑀸𑀯𑁄 𑀤𑀻𑀧𑀺𑀢𑁄, 𑀢𑀸𑀦𑀺 𑀘 𑀕𑀼𑀡𑀲𑀮𑁆𑀮𑀓𑁆𑀔𑀡𑀓𑀸𑀭𑀡𑀸𑀦𑀺 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸𑀦𑀁 𑀯𑀺𑀜𑁆𑀜𑀼𑀚𑀸𑀢𑀺𑀓𑀸𑀦𑀁 𑀧𑀘𑁆𑀘𑀓𑁆𑀔𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀸𑀦𑀺 𑀲𑀁𑀓𑀺𑀢𑁆𑀢𑁂𑀦𑁆𑀢𑁂𑀦 𑀯𑀺𑀜𑁆𑀜𑀼𑀦𑀸 𑀘𑀺𑀢𑁆𑀢𑀲𑁆𑀲 𑀲𑀫𑁆𑀫𑀼𑀔𑀻𑀪𑀽𑀢𑀸𑀦𑁂𑀯 𑀓𑀢𑁆𑀯𑀸 𑀲𑀁𑀓𑀺𑀢𑁆𑀢𑁂𑀢𑀩𑁆𑀩𑀸𑀦𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀆𑀳. 𑀏𑀯𑀜𑁆𑀳𑀺 𑀦𑀺𑀭𑀽𑀧𑁂𑀢𑁆𑀯𑀸 𑀓𑀺𑀢𑁆𑀢𑁂𑀦𑁆𑀢𑁂 𑀬𑀲𑁆𑀲 𑀲𑀁𑀓𑀺𑀢𑁆𑀢𑁂𑀢𑀺, 𑀢𑀲𑁆𑀲 𑀪𑀕𑀯𑀢𑀺 𑀅𑀢𑀺𑀯𑀺𑀬 𑀧𑀲𑀸𑀤𑁄 𑀳𑁄𑀢𑀺.

𑀆𑀭𑀓𑀢𑁆𑀢𑀸𑀢𑀺 𑀓𑀺𑀮𑁂𑀲𑁂𑀳𑀺 𑀲𑀼𑀯𑀺𑀤𑀽𑀭𑀢𑁆𑀢𑀸. 𑀅𑀭𑀻𑀦𑀦𑁆𑀢𑀺 𑀓𑀺𑀮𑁂𑀲𑀸𑀭𑀻𑀦𑀁. 𑀅𑀭𑀸𑀦𑀦𑁆𑀢𑀺 𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀅𑀭𑀸𑀦𑀁. 𑀳𑀢𑀢𑁆𑀢𑀸𑀢𑀺 𑀯𑀺𑀤𑁆𑀥𑀁𑀲𑀺𑀢𑀢𑁆𑀢𑀸. 𑀧𑀘𑁆𑀘𑀬𑀸𑀤𑀻𑀦𑀦𑁆𑀢𑀺 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀸𑀦𑀜𑁆𑀘𑁂𑀯 𑀧𑀽𑀚𑀸 𑀯𑀺𑀲𑁂𑀲𑀸𑀦𑀜𑁆𑀘. 𑀭𑀳𑀸𑀪𑀸𑀯𑀸𑀢𑀺 𑀘𑀓𑁆𑀔𑀼𑀭𑀳𑀸𑀤𑀻𑀦𑀫𑀪𑀸𑀯𑀢𑁄. 𑀭𑀳𑁄𑀧𑀸𑀧𑀓𑀭𑀡𑀸𑀪𑀸𑀯𑁄 𑀳𑀺 𑀧𑀤𑀫𑀦𑀢𑀺𑀓𑁆𑀓𑀫𑁆𑀫 𑀭𑀳𑀸𑀪𑀸𑀯𑁄𑀢𑀺 𑀯𑀼𑀢𑁆𑀢𑀁. 𑀏𑀯𑀫𑁆𑀧𑀺 𑀳𑀺 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺. 𑀢𑀢𑁄𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄 (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁩). 𑀬𑀣𑀸 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄, 𑀏𑀯𑀁 𑀢𑀁𑀲𑀁𑀯𑀡𑁆𑀡𑀦𑀸𑀬 𑀧𑀭𑀫𑀢𑁆𑀣𑀫𑀜𑁆𑀚𑀽𑀲𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑀝𑀻. 𑁧.𑁧𑁨𑁪) 𑀦𑁂𑀲𑀁 𑀯𑀺𑀢𑁆𑀣𑀸𑀭𑁄 𑀕𑀳𑁂𑀢𑀩𑁆𑀩𑁄.

𑀬𑀲𑁆𑀫𑀸 𑀚𑀻𑀯𑀓𑁄 𑀩𑀳𑀼𑀲𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀩𑀼𑀤𑁆𑀥𑀕𑀼𑀡𑁂 𑀲𑀼𑀢𑁆𑀯𑀸 𑀞𑀺𑀢𑁄, 𑀤𑀺𑀝𑁆𑀞𑀲𑀘𑁆𑀘𑀢𑀸𑀬 𑀘 𑀲𑀢𑁆𑀣𑀼𑀲𑀸𑀲𑀦𑁂 ¶ 𑀯𑀺𑀕𑀢𑀓𑀣𑀁𑀓𑀣𑁄, 𑀲𑀢𑁆𑀣𑀼𑀕𑀼𑀡𑀓𑀣𑀦𑁂 𑀘 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄, 𑀢𑀲𑁆𑀫𑀸 𑀲𑁄 𑀏𑀯𑀁 𑀯𑀺𑀢𑁆𑀣𑀸𑀭𑀢𑁄 𑀏𑀯 𑀆𑀳𑀸𑀢𑀺 𑀯𑀼𑀢𑁆𑀢𑀁 ‘‘𑀚𑀻𑀯𑀓𑁄 𑀧𑀦𑀸’’𑀢𑀺𑀆𑀤𑀺. ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀦𑀸 𑀲𑀸𑀫𑀢𑁆𑀣𑀺𑀬𑀢𑁆𑀣𑀫𑀸𑀳. 𑀣𑀸𑀫𑁄 𑀤𑁂𑀲𑀦𑀸𑀜𑀸𑀡𑀫𑁂𑀯, 𑀩𑀮𑀁 𑀧𑀦 𑀤𑀲𑀩𑀮𑀜𑀸𑀡𑀁. 𑀯𑀺𑀲𑁆𑀲𑀢𑁆𑀣𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀧𑀤𑀁, 𑀅𑀦𑀸𑀲𑀗𑁆𑀓𑀦𑁆𑀢𑀺 𑀅𑀢𑁆𑀣𑁄.

𑀧𑀜𑁆𑀘𑀯𑀡𑁆𑀡𑀸𑀬𑀸𑀢𑀺 𑀔𑀼𑀤𑁆𑀤𑀺𑀓𑀸𑀤𑀺𑀯𑀲𑁂𑀦 𑀧𑀜𑁆𑀘𑀧𑀓𑀸𑀭𑀸𑀬. 𑀦𑀺𑀭𑀦𑁆𑀢𑀭𑀁 𑀨𑀼𑀝𑀁 𑀅𑀳𑁄𑀲𑀺 𑀓𑀢𑀸𑀥𑀺𑀓𑀸𑀭𑀪𑀸𑀯𑀢𑁄. 𑀓𑀫𑁆𑀫𑀦𑁆𑀢𑀭𑀸𑀬𑀯𑀲𑁂𑀦 𑀳𑀺𑀲𑁆𑀲 𑀭𑀜𑁆𑀜𑁄 𑀕𑀼𑀡𑀲𑀭𑀻𑀭𑀁 𑀔𑀢𑀽𑀧𑀳𑀢𑀁 𑀳𑁄𑀢𑀺. 𑀓𑀲𑁆𑀫𑀸 𑀧𑀦𑁂𑀲 𑀚𑀻𑀯𑀓𑀫𑁂𑀯 𑀕𑀫𑀦𑀲𑀚𑁆𑀚𑀸𑀬 𑀆𑀡𑀸𑀧𑁂𑀢𑀻𑀢𑀺 𑀆𑀳 ‘‘𑀇𑀫𑀸𑀬𑀸’’𑀢𑀺𑀆𑀤𑀺.

𑁧𑁫𑁮. ‘‘𑀉𑀢𑁆𑀢𑀫’’𑀦𑁆𑀢𑀺 𑀯𑀢𑁆𑀯𑀸 𑀦 𑀓𑁂𑀯𑀮𑀁 𑀉𑀢𑁆𑀢𑀫𑀪𑀸𑀯𑁄𑀬𑁂𑀯𑁂𑀢𑁆𑀣 𑀓𑀸𑀭𑀡𑀁, 𑀅𑀣 𑀔𑁄 𑀅𑀧𑁆𑀧𑀲𑀤𑁆𑀤𑀢𑀸𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀲𑁆𑀲𑀬𑀸𑀦𑀭𑀣𑀬𑀸𑀦𑀸𑀦𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀳𑀢𑁆𑀣𑀺𑀬𑀸𑀦𑁂𑀲𑀼 𑀘 𑀦𑀺𑀩𑁆𑀩𑀺𑀲𑁂𑀯𑀦𑀫𑁂𑀯 𑀕𑀡𑁆𑀳𑀦𑁆𑀢𑁄 𑀳𑀢𑁆𑀣𑀺𑀦𑀺𑀬𑁄𑀧𑀺 𑀓𑀧𑁆𑀧𑀸𑀧𑁂𑀲𑀺. 𑀧𑀤𑀸𑀦𑀼𑀧𑀤𑀦𑁆𑀢𑀺 𑀧𑀤𑀫𑀦𑀼𑀕𑀢𑀁 𑀧𑀤𑀁 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀲𑁆𑀲 𑀳𑀢𑁆𑀣𑀺𑀬𑀸𑀦𑀲𑁆𑀲 𑀧𑀤𑁂 𑀢𑁂𑀲𑀁 𑀧𑀤𑀁 𑀓𑀢𑁆𑀯𑀸, 𑀧𑀤𑀲𑀤𑁆𑀤𑁄 𑀘𑁂𑀢𑁆𑀣 𑀧𑀤𑀯𑀴𑀜𑁆𑀚𑁂. 𑀦𑀺𑀩𑁆𑀩𑀼𑀢𑀲𑁆𑀲𑀸𑀢𑀺 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀯𑀽𑀧𑀲𑀫𑀲𑁆𑀲 ¶ . 𑀦𑀺𑀩𑁆𑀩𑀼𑀢𑁂𑀳𑁂𑀯𑀸𑀢𑀺 𑀅𑀧𑁆𑀧𑀲𑀤𑁆𑀤𑀢𑀸𑀬 𑀲𑀤𑁆𑀤𑀲𑀗𑁆𑀔𑁄𑀪𑀦𑀯𑀽𑀧𑀲𑀫𑁂𑀳𑁂𑀯.

𑀓𑀭𑁂𑀡𑀽𑀢𑀺 𑀳𑀢𑁆𑀣𑀺𑀦𑀺𑀧𑀭𑀺𑀬𑀸𑀬𑀯𑀘𑀦𑀁. 𑀓𑀡𑀢𑀺 𑀲𑀤𑁆𑀤𑀁 𑀓𑀭𑁄𑀢𑀻𑀢𑀺 𑀳𑀺 𑀓𑀭𑁂𑀡𑀼, 𑀓𑀭𑁄𑀯 𑀬𑀲𑁆𑀲𑀸, 𑀦 𑀤𑀻𑀖𑁄 𑀤𑀦𑁆𑀢𑁄𑀢𑀺 𑀯𑀸 𑀓𑀭𑁂𑀡𑀼, ‘‘𑀓𑀭𑁂𑀡𑀼𑀓𑀸’’𑀢𑀺𑀧𑀺 𑀧𑀸𑀞𑁄, 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑀤𑀲𑀺𑀤𑁆𑀥𑀺. 𑀆𑀭𑁄𑀳𑀦𑀲𑀚𑁆𑀚𑀦𑀁 𑀓𑀼𑀣𑀸𑀤𑀻𑀦𑀁 𑀩𑀦𑁆𑀥𑀦𑀫𑁂𑀯. 𑀑𑀧𑀯𑀬𑁆𑀳𑀦𑁆𑀢𑀺 𑀭𑀸𑀚𑀸𑀦𑀫𑀼𑀧𑀯𑀳𑀺𑀢𑀼𑀁 𑀲𑀫𑀢𑁆𑀣𑀁. ‘‘𑀑𑀧𑀕𑀼𑀬𑁆𑀳’’𑀦𑁆𑀢𑀺𑀧𑀺 𑀧𑀞𑀦𑁆𑀢𑀺, 𑀭𑀸𑀚𑀸𑀦𑀫𑀼𑀧𑀕𑀽𑀳𑀺𑀢𑀼𑀁 𑀕𑁄𑀧𑀺𑀢𑀼𑀁 𑀲𑀫𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. ‘‘𑀏𑀯𑀁 𑀓𑀺𑀭𑀲𑁆𑀲𑀸’’𑀢𑀺𑀆𑀤𑀺 𑀧𑀡𑁆𑀟𑀺𑀢𑀪𑀸𑀯𑀯𑀺𑀪𑀸𑀯𑀦𑀁. 𑀓𑀣𑀸 𑀯𑀢𑁆𑀢𑀢𑀻𑀢𑀺 𑀮𑀤𑁆𑀥𑁄𑀓𑀸𑀲𑀪𑀸𑀯𑁂𑀦 𑀥𑀫𑁆𑀫𑀓𑀣𑀸 𑀧𑀯𑀢𑁆𑀢𑀢𑀺. ‘‘𑀭𑀜𑁆𑀜𑁄 𑀆𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 𑀆𑀲𑀦𑁆𑀦𑀘𑀸𑀭𑀻𑀪𑀸𑀯𑁂𑀦 𑀳𑀢𑁆𑀣𑀺𑀦𑀻𑀲𑀼 𑀇𑀢𑁆𑀣𑀺𑀬𑁄 𑀦𑀺𑀲𑀚𑁆𑀚𑀸𑀧𑀺𑀢𑀸’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁧𑁫𑁮) 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀇𑀢𑁆𑀣𑀺𑀬𑁄 𑀦𑀺𑀲𑁆𑀲𑀸𑀬 𑀧𑀼𑀭𑀺𑀲𑀸𑀦𑀁 𑀪𑀬𑀁 𑀦𑀸𑀫 𑀦𑀢𑁆𑀣𑀺, 𑀲𑀼𑀔𑀁 𑀇𑀢𑁆𑀣𑀺𑀧𑀭𑀺𑀯𑀼𑀢𑁄 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀢𑀢𑁆𑀣 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯. 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀧𑀦 𑀆𑀘𑀭𑀺𑀬𑁂𑀦 𑀏𑀯𑀁 𑀯𑀼𑀢𑁆𑀢𑀁 𑀲𑀺𑀬𑀸. 𑀭𑀜𑁆𑀜𑁄 𑀧𑀭𑁂𑀲𑀁 𑀤𑀽𑀭𑀼𑀧𑀲𑀗𑁆𑀓𑀫𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀢𑀸 𑀧𑀼𑀭𑀺𑀲𑀯𑁂𑀲𑀁 𑀕𑀸𑀳𑀸𑀧𑁂𑀢𑁆𑀯𑀸 𑀆𑀯𑀼𑀥𑀳𑀢𑁆𑀣𑀸 𑀓𑀸𑀭𑀺𑀢𑀸. 𑀳𑀢𑁆𑀣𑀺𑀦𑀺𑀓𑀸𑀲𑀢𑀸𑀦𑀻𑀢𑀺 𑀏𑀢𑁆𑀣 𑀳𑀢𑁆𑀣𑀺𑀦𑀺𑀬𑁄 𑀏𑀯 𑀳𑀢𑁆𑀣𑀺𑀦𑀺𑀓𑀸. ‘‘𑀧𑀜𑁆𑀘 𑀳𑀢𑁆𑀣𑀺𑀦𑀺𑀬𑀸 𑀲𑀢𑀸𑀦𑀻’’𑀢𑀺𑀧𑀺 𑀓𑀢𑁆𑀣𑀘𑀺 𑀧𑀸𑀞𑁄, 𑀲𑁄 𑀅𑀬𑀼𑀢𑁆𑀢𑁄𑀯 ‘‘𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀻’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧) 𑀯𑀺𑀬 𑀈𑀤𑀺𑀲𑁂𑀲𑀼 𑀧𑀘𑁆𑀙𑀺𑀫𑀧𑀤𑀲𑁆𑀲 𑀲𑀫𑀸𑀲𑀲𑁆𑀲𑁂𑀯 𑀤𑀲𑁆𑀲𑀦𑀢𑁄. 𑀓𑀲𑁆𑀲𑀘𑀺𑀤𑁂𑀯𑀸𑀢𑀺 𑀲𑀦𑁆𑀦𑀺𑀧𑀢𑀺𑀢𑁂 𑀫𑀳𑀸𑀚𑀦𑁂 𑀬𑀲𑁆𑀲 𑀓𑀲𑁆𑀲𑀘𑀺 𑀏𑀯, 𑀢𑀤𑀜𑁆𑀜𑁂𑀲𑀫𑁆𑀧𑀺 𑀆𑀬𑀢𑀺𑀁 𑀫𑀕𑁆𑀕𑀨𑀮𑀸𑀦𑀫𑀼𑀧𑀦𑀺𑀲𑁆𑀲𑀬𑁄𑀢𑀺 𑀆𑀳 ‘‘𑀲𑀸 𑀫𑀳𑀸𑀚𑀦𑀲𑁆𑀲 𑀉𑀧𑀓𑀸𑀭𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺.

𑀧𑀝𑀺𑀯𑁂𑀤𑁂𑀲𑀻𑀢𑀺 𑀜𑀸𑀧𑁂𑀲𑀺. 𑀉𑀧𑀘𑀸𑀭𑀯𑀘𑀦𑀦𑁆𑀢𑀺 𑀯𑁄𑀳𑀸𑀭𑀯𑀘𑀦𑀫𑀢𑁆𑀢𑀁 𑀢𑁂𑀦𑁂𑀯 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑁆𑀲 𑀅𑀧𑀭𑀺𑀬𑁄𑀲𑀸𑀦𑀢𑁄 ¶ . 𑀢𑁂𑀦𑀸𑀳 ‘‘𑀢𑀤𑁂𑀯 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀓𑀭𑁄𑀳𑀻’’𑀢𑀺. 𑀇𑀫𑀺𑀦𑀸𑀬𑁂𑀯 𑀳𑀺 𑀢𑀤𑀢𑁆𑀣𑀧𑀭𑀺𑀬𑁄𑀲𑀸𑀦𑀁. 𑀫𑀜𑁆𑀜𑀲𑀻𑀢𑀺 𑀧𑀓𑀢𑀺𑀬𑀸𑀯 𑀚𑀸𑀦𑀸𑀲𑀺. 𑀢𑀤𑁂𑀯𑀸𑀢𑀺 𑀕𑀫𑀦𑀸𑀕𑀫𑀦𑀫𑁂𑀯. 𑀬𑀤𑀺 𑀕𑀦𑁆𑀢𑀼𑀓𑀸𑀫𑁄, 𑀕𑀘𑁆𑀙, 𑀅𑀣 𑀦 𑀕𑀦𑁆𑀢𑀼𑀓𑀸𑀫𑁄, 𑀫𑀸 𑀕𑀘𑁆𑀙, 𑀅𑀢𑁆𑀢𑀦𑁄 𑀭𑀼𑀘𑀺𑀬𑁂𑀯𑁂𑀢𑁆𑀣 𑀧𑀫𑀸𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁫𑁯. 𑀧𑀸𑀝𑀺𑀏𑀓𑁆𑀓𑀸𑀬𑁂𑀯 𑀲𑀦𑁆𑀥𑀺𑀯𑀲𑁂𑀦 𑀧𑀘𑁆𑀘𑁂𑀓𑀸. ‘‘𑀫𑀳𑀜𑁆𑀘’’𑀦𑁆𑀢𑀺 𑀧𑀤𑁂 𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀫𑀳𑀢𑀸’’𑀢𑀺. 𑀫𑀳𑀦𑁆𑀢𑀲𑁆𑀲 𑀪𑀸𑀯𑁄 𑀫𑀳𑀜𑁆𑀘𑀁. 𑀦 𑀓𑁂𑀯𑀮𑀁 𑀦𑀺𑀕𑁆𑀕𑀳𑀻𑀢𑀦𑁆𑀢𑀯𑀲𑁂𑀦𑁂𑀯 𑀧𑀸𑀞𑁄, 𑀅𑀣 𑀔𑁄 𑀆𑀓𑀸𑀭𑀦𑁆𑀢𑀯𑀲𑁂𑀦𑀸𑀧𑀻𑀢𑀺 𑀆𑀳 ¶ ‘‘𑀫𑀳𑀘𑁆𑀘𑀸𑀢𑀺𑀧𑀺 𑀧𑀸𑀴𑀻’’𑀢𑀺. 𑀬𑀣𑀸 ‘‘𑀔𑀢𑁆𑀢𑀺𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀔𑀢𑁆𑀬𑀸’’𑀢𑀺, 𑀏𑀯𑀁 ‘‘𑀫𑀳𑀢𑀺𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀫𑀳𑀢𑁆𑀬𑀸. 𑀧𑀼𑀦 𑀘-𑀓𑀸𑀭𑀁 𑀓𑀢𑁆𑀯𑀸 𑀫𑀳𑀘𑁆𑀘𑀸𑀢𑀺 𑀲𑀦𑁆𑀥𑀺𑀯𑀲𑁂𑀦 𑀧𑀤𑀲𑀺𑀤𑁆𑀥𑀺. 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 𑀯𑀢𑁆𑀢𑀩𑁆𑀩𑁂 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀯𑀺𑀧𑀮𑁆𑀮𑀸𑀲𑁄 𑀮𑀺𑀗𑁆𑀕𑀯𑀺𑀧𑀭𑀺𑀬𑀸𑀬𑁄. 𑀯𑀺𑀲𑁂𑀲𑀦𑀜𑁆𑀳𑀺 𑀪𑀺𑀬𑁆𑀬𑁄 𑀯𑀺𑀲𑁂𑀲𑁆𑀬𑀮𑀺𑀗𑁆𑀕𑀸𑀤𑀺𑀕𑀸𑀳𑀓𑀁. 𑀢𑀺𑀬𑁄𑀚𑀦𑀲𑀢𑀸𑀦𑀦𑁆𑀢𑀺 𑀧𑀘𑁆𑀘𑁂𑀓𑀁 𑀢𑀺𑀬𑁄𑀚𑀦𑀲𑀢𑀧𑀭𑀺𑀫𑀡𑁆𑀟𑀮𑀸𑀦𑀁. 𑀤𑁆𑀯𑀺𑀦𑁆𑀦𑀁 𑀫𑀳𑀸𑀭𑀝𑁆𑀞𑀸𑀦𑀁 𑀇𑀲𑁆𑀲𑀭𑀺𑀬𑀲𑀺𑀭𑀻𑀢𑀺 𑀅𑀗𑁆𑀕𑀫𑀕𑀥𑀭𑀝𑁆𑀞𑀸𑀦𑀫𑀸𑀥𑀺𑀧𑀘𑁆𑀘𑀫𑀸𑀳. 𑀢𑀤𑀢𑁆𑀣𑀁 𑀯𑀺𑀯𑀭𑀢𑀺 ‘‘𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸. 𑀧𑀝𑀺𑀫𑀼𑀓𑁆𑀓𑀯𑁂𑀞𑀦𑀸𑀦𑀻𑀢𑀺 𑀆𑀩𑀦𑁆𑀥𑀲𑀺𑀭𑁄𑀯𑁂𑀞𑀦𑀸𑀦𑀺. 𑀆𑀲𑀢𑁆𑀢𑀔𑀕𑁆𑀕𑀸𑀦𑀻𑀢𑀺 𑀅𑀁𑀲𑁂 𑀑𑀮𑀫𑁆𑀩𑀦𑀯𑀲𑁂𑀦 𑀲𑀦𑁆𑀦𑀤𑁆𑀥𑀸𑀲𑀻𑀦𑀺. 𑀫𑀡𑀺𑀤𑀡𑁆𑀟𑀢𑁄𑀫𑀭𑁂𑀢𑀺 𑀫𑀡𑀺𑀤𑀡𑁆𑀟𑀗𑁆𑀓𑀼𑀲𑁂.

‘‘𑀅𑀧𑀭𑀸𑀧𑀻’’𑀢𑀺𑀆𑀤𑀺𑀦𑀸 𑀧𑀤𑀲𑀸 𑀧𑀭𑀺𑀯𑀸𑀭𑀸 𑀯𑀼𑀢𑁆𑀢𑀸. 𑀔𑀼𑀚𑁆𑀚𑀯𑀸𑀫𑀦𑀓𑀸 𑀯𑁂𑀲𑀯𑀲𑁂𑀦, 𑀓𑀺𑀭𑀸𑀢𑀲𑀯𑀭𑀅𑀦𑁆𑀥𑀓𑀸𑀤𑀬𑁄 𑀚𑀸𑀢𑀺𑀯𑀲𑁂𑀦 𑀢𑀸𑀲𑀁 𑀧𑀭𑀺𑀘𑀸𑀭𑀓𑀺𑀦𑀺𑀬𑁄 𑀤𑀲𑁆𑀲𑀺𑀢𑀸. 𑀯𑀺𑀲𑁆𑀲𑀸𑀲𑀺𑀓𑀧𑀼𑀭𑀺𑀲𑀸𑀢𑀺 𑀯𑀲𑁆𑀲𑀯𑀭𑁂 𑀲𑀦𑁆𑀥𑀸𑀬𑀸𑀳. 𑀓𑀼𑀮𑀪𑁄𑀕𑀇𑀲𑁆𑀲𑀭𑀺𑀬𑀸𑀤𑀺𑀯𑀲𑁂𑀦 𑀫𑀳𑀢𑀻 𑀫𑀢𑁆𑀢𑀸 𑀧𑀫𑀸𑀡𑀫𑁂𑀢𑁂𑀲𑀦𑁆𑀢𑀺 𑀫𑀳𑀸𑀫𑀢𑁆𑀢𑀸, 𑀫𑀳𑀸𑀦𑀼𑀪𑀸𑀯𑀸 𑀭𑀸𑀚𑀸𑀫𑀘𑁆𑀘𑀸. 𑀯𑀺𑀚𑁆𑀚𑀸𑀥𑀭𑀢𑀭𑀼𑀡𑀸 𑀯𑀺𑀬𑀸𑀢𑀺 𑀫𑀦𑁆𑀢𑀸𑀦𑀼𑀪𑀸𑀯𑁂𑀦 𑀯𑀺𑀚𑁆𑀚𑀸𑀫𑀬𑀺𑀤𑁆𑀥𑀺𑀲𑀫𑁆𑀧𑀦𑁆𑀦𑀸 𑀯𑀺𑀚𑁆𑀚𑀸𑀥𑀭𑀓𑀼𑀫𑀸𑀭𑀓𑀸 𑀯𑀺𑀬. 𑀭𑀝𑁆𑀞𑀺𑀬𑀧𑀼𑀢𑁆𑀢𑀸𑀢𑀺 𑀪𑁄𑀚𑀧𑀼𑀢𑁆𑀢𑀸. 𑀭𑀝𑁆𑀞𑁂 𑀧𑀭𑀺𑀘𑀭𑀦𑁆𑀢𑀻𑀢𑀺 𑀳𑀺 𑀮𑀼𑀤𑁆𑀤𑀓𑀸 𑀭𑀝𑁆𑀞𑀺𑀬𑀸, 𑀢𑁂𑀲𑀁 𑀦𑀸𑀦𑀸𑀯𑀼𑀥𑀧𑀭𑀺𑀘𑀬𑀢𑀸𑀬 𑀭𑀸𑀚𑀪𑀝𑀪𑀽𑀢𑀸 𑀧𑀼𑀢𑁆𑀢𑀸𑀢𑀺 𑀅𑀢𑁆𑀣𑁄, 𑀅𑀦𑁆𑀢𑀭𑀭𑀝𑁆𑀞𑀪𑁄𑀚𑀓𑀸𑀦𑀁 𑀯𑀸 𑀧𑀼𑀢𑁆𑀢𑀸 𑀭𑀝𑁆𑀞𑀺𑀬𑀧𑀼𑀢𑁆𑀢𑀸, 𑀔𑀢𑁆𑀢𑀺𑀬𑀸 𑀪𑁄𑀚𑀭𑀸𑀚𑀸𑀦𑁄. ‘‘𑀅𑀦𑀼𑀬𑀼𑀢𑁆𑀢𑀸 𑀪𑀯𑀦𑁆𑀢𑀼 𑀢𑁂’’𑀢𑀺𑀆𑀤𑀻𑀲𑀼 𑀯𑀺𑀬 𑀳𑀺 𑀝𑀻𑀓𑀸𑀬𑀁 (𑀤𑀻. 𑀦𑀺. 𑀝𑀻. 𑁧.𑁧𑁫𑁯) 𑀯𑀼𑀢𑁆𑀢𑁄 𑀪𑁄𑀚𑀲𑀤𑁆𑀤𑁄 𑀪𑁄𑀚𑀓𑀯𑀸𑀘𑀓𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀉𑀲𑁆𑀲𑀸𑀧𑁂𑀢𑁆𑀯𑀸𑀢𑀺 𑀉𑀤𑁆𑀥𑀁 𑀧𑀲𑀸𑀭𑁂𑀢𑁆𑀯𑀸. 𑀚𑀬𑀲𑀤𑁆𑀤𑀦𑁆𑀢𑀺 ‘‘𑀚𑀬𑀢𑀼 𑀫𑀳𑀸𑀭𑀸𑀚𑀸’’𑀢𑀺𑀆𑀤𑀺𑀚𑀬𑀧𑀝𑀺𑀩𑀤𑁆𑀥𑀁 𑀲𑀤𑁆𑀤𑀁. 𑀥𑀦𑀼𑀧𑀦𑁆𑀢𑀺𑀧𑀭𑀺𑀓𑁆𑀔𑁂𑀧𑁄𑀢𑀺 𑀥𑀦𑀼𑀧𑀦𑁆𑀢𑀺𑀧𑀭𑀺𑀯𑀸𑀭𑁄. 𑀲𑀩𑁆𑀩𑀢𑁆𑀣 𑀢𑀁𑀕𑀸𑀳𑀓𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀳𑀢𑁆𑀣𑀺𑀖𑀝𑀸𑀢𑀺 𑀳𑀢𑁆𑀣𑀺𑀲𑀫𑀽𑀳𑀸. 𑀧𑀳𑀭𑀫𑀸𑀦𑀸𑀢𑀺 𑀨𑀼𑀲𑀫𑀸𑀦𑀸. 𑀅𑀜𑁆𑀜𑀫𑀜𑁆𑀜𑀲𑀗𑁆𑀖𑀝𑁆𑀝𑀦𑀸𑀢𑀺 𑀅𑀯𑀺𑀘𑁆𑀙𑁂𑀤𑀕𑀫𑀦𑁂𑀦 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀸. 𑀲𑁂𑀡𑀺𑀬𑁄𑀢𑀺 𑀕𑀦𑁆𑀥𑀺𑀓𑀲𑁂𑀡𑀻𑀤𑀼𑀲𑁆𑀲𑀺𑀓𑀲𑁂𑀡𑀻𑀆𑀤𑀬𑁄 ‘‘𑀅𑀦𑀧𑀮𑁄𑀓𑁂𑀢𑁆𑀯𑀸 𑀭𑀸𑀚𑀸𑀦𑀁 𑀯𑀸 𑀲𑀗𑁆𑀖𑀁 𑀯𑀸 𑀕𑀡𑀁 𑀯𑀸 𑀧𑀽𑀕𑀁 𑀯𑀸 𑀲𑁂𑀡𑀺𑀁 𑀯𑀸 𑀅𑀜𑁆𑀜𑀢𑁆𑀭 𑀓𑀧𑁆𑀧𑀸 𑀯𑀼𑀝𑁆𑀞𑀸𑀧𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁬𑁮𑁨) 𑀯𑀺𑀬. ‘‘𑀅𑀝𑁆𑀞𑀸𑀭𑀲 𑀅𑀓𑁆𑀔𑁄𑀪𑀺𑀡𑀻 𑀲𑁂𑀦𑀺𑀬𑁄’’𑀢𑀺 𑀓𑀢𑁆𑀣𑀘𑀺 𑀮𑀺𑀔𑀦𑁆𑀢𑀺, 𑀲𑁄 𑀅𑀦𑁂𑀓𑁂𑀲𑀼𑀧𑀺 𑀧𑁄𑀢𑁆𑀣𑀓𑁂𑀲𑀼 𑀦 𑀤𑀺𑀝𑁆𑀞𑁄. 𑀅𑀦𑁂𑀓𑀲𑀗𑁆𑀔𑁆𑀬𑀸 𑀘 𑀲𑁂𑀦𑀸 𑀳𑁂𑀝𑁆𑀞𑀸 ¶ 𑀕𑀡𑀺𑀢𑀸𑀢𑀺 𑀅𑀬𑀼𑀢𑁆𑀢𑁄𑀬𑁂𑀯. 𑀢𑀤𑀸 𑀲𑀩𑁆𑀩𑀸𑀯𑀼𑀥𑀢𑁄 𑀲𑀭𑁄𑀯 𑀤𑀽𑀭𑀕𑀸𑀫𑀻𑀢𑀺 𑀓𑀢𑁆𑀯𑀸 𑀲𑀭𑀧𑀢𑀦𑀸𑀢𑀺𑀓𑁆𑀓𑀫𑀧𑁆𑀧𑀫𑀸𑀡𑁂𑀦 𑀭𑀜𑁆𑀜𑁄 𑀧𑀭𑀺𑀲𑀁 𑀲𑀁𑀯𑀺𑀤𑀳𑀢𑀺. 𑀓𑀺𑀫𑀢𑁆𑀣𑀦𑁆𑀢𑀺 𑀆𑀳 ‘‘𑀲𑀘𑁂’’𑀢𑀺𑀆𑀤𑀺.

𑀲𑀬𑀁 ¶ 𑀪𑀸𑀬𑀦𑀝𑁆𑀞𑁂𑀦 𑀘𑀺𑀢𑁆𑀢𑀼𑀢𑁆𑀭𑀸𑀲𑁄 𑀪𑀬𑀁 𑀬𑀣𑀸 𑀢𑀣𑀸 𑀪𑀸𑀬𑀢𑀻𑀢𑀺 𑀓𑀢𑁆𑀯𑀸. 𑀪𑀸𑀬𑀺𑀢𑀩𑁆𑀩𑁂 𑀏𑀯 𑀯𑀢𑁆𑀣𑀼𑀲𑁆𑀫𑀺𑀁 𑀪𑀬𑀢𑁄 𑀉𑀧𑀝𑁆𑀞𑀺𑀢𑁂 ‘‘𑀪𑀸𑀬𑀺𑀢𑀩𑁆𑀩𑀫𑀺𑀤’’𑀦𑁆𑀢𑀺 𑀪𑀸𑀬𑀺𑀢𑀩𑁆𑀩𑀸𑀓𑀸𑀭𑁂𑀦 𑀢𑀻𑀭𑀡𑀢𑁄 𑀜𑀸𑀡𑀁 𑀪𑀬𑀁 𑀪𑀬𑀢𑁄 𑀢𑀻𑀭𑁂𑀢𑀻𑀢𑀺 𑀓𑀢𑁆𑀯𑀸. 𑀢𑁂𑀦𑁂𑀯𑀸𑀳 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁭𑁫𑁧) ‘‘𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑀁 𑀧𑀦 𑀪𑀸𑀬𑀢𑀺, 𑀦 𑀪𑀸𑀬𑀢𑀻𑀢𑀺? 𑀦 𑀪𑀸𑀬𑀢𑀺. 𑀢𑀜𑁆𑀳𑀺 ‘𑀅𑀢𑀻𑀢𑀸 𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀅𑀦𑀸𑀕𑀢𑀸 𑀦𑀺𑀭𑀼𑀚𑁆𑀛𑀺𑀲𑁆𑀲𑀦𑁆𑀢𑀻’𑀢𑀺 𑀢𑀻𑀭𑀡𑀫𑀢𑁆𑀢𑀫𑁂𑀯 𑀳𑁄𑀢𑀻’’𑀢𑀺. 𑀪𑀸𑀬𑀦𑀝𑁆𑀞𑀸𑀦𑀝𑁆𑀞𑁂𑀦 𑀆𑀭𑀫𑁆𑀫𑀡𑀁 𑀪𑀬𑀁 𑀪𑀸𑀬𑀢𑀺 𑀏𑀢𑀲𑁆𑀫𑀸𑀢𑀺 𑀓𑀢𑁆𑀯𑀸. 𑀪𑀸𑀬𑀦𑀳𑁂𑀢𑀼𑀝𑁆𑀞𑁂𑀦 𑀑𑀢𑁆𑀢𑀧𑁆𑀧𑀁 𑀪𑀬𑀁 𑀧𑀸𑀧𑀢𑁄 𑀪𑀸𑀬𑀢𑀺 𑀏𑀢𑁂𑀦𑀸𑀢𑀺 𑀓𑀢𑁆𑀯𑀸. 𑀪𑀬𑀸𑀦𑀓𑀦𑁆𑀢𑀺 𑀪𑀸𑀬𑀦𑀸𑀓𑀸𑀭𑁄. 𑀢𑁂𑀧𑀻𑀢𑀺 𑀤𑀻𑀖𑀸𑀬𑀼𑀓𑀸 𑀤𑁂𑀯𑀸𑀧𑀺. 𑀥𑀫𑁆𑀫𑀤𑁂𑀲𑀦𑀦𑁆𑀢𑀺 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀧𑀦𑁆𑀦𑀭𑀲𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑀁 𑀥𑀫𑁆𑀫𑀤𑁂𑀲𑀦𑀁. 𑀬𑁂𑀪𑀼𑀬𑁆𑀬𑁂𑀦𑀸𑀢𑀺 𑀞𑀧𑁂𑀢𑁆𑀯𑀸 𑀔𑀻𑀡𑀸𑀲𑀯𑀤𑁂𑀯𑁂 𑀢𑀤𑀜𑁆𑀜𑁂𑀲𑀁 𑀯𑀲𑁂𑀦 𑀩𑀸𑀳𑀼𑀮𑁆𑀮𑀢𑁄. 𑀔𑀻𑀡𑀸𑀲𑀯𑀢𑁆𑀢𑀸 𑀳𑀺 𑀢𑁂𑀲𑀁 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑀫𑁆𑀧𑀺 𑀦 𑀉𑀧𑁆𑀧𑀚𑁆𑀚𑀢𑀺. 𑀓𑀸𑀫𑀁 𑀲𑀻𑀳𑁄𑀧𑀫𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 (𑀅. 𑀦𑀺. 𑀅𑀝𑁆𑀞. 𑁨.𑁪.𑁩𑁩) 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑀫𑁆𑀧𑀺 𑀢𑀤𑀢𑁆𑀣𑀪𑀸𑀯𑁂𑀦 𑀯𑀼𑀢𑁆𑀢𑀁, 𑀇𑀥 𑀧𑀦 𑀧𑀓𑀭𑀡𑀸𑀦𑀼𑀭𑀽𑀧𑀢𑁄 𑀜𑀸𑀡𑀪𑀬𑀫𑁂𑀯 𑀕𑀳𑀺𑀢𑀁. 𑀲𑀁𑀯𑁂𑀕𑀦𑁆𑀢𑀺 𑀲𑀳𑁄𑀢𑁆𑀢𑀧𑁆𑀧𑀜𑀸𑀡𑀁. 𑀲𑀦𑁆𑀢𑀸𑀲𑀦𑁆𑀢𑀺 𑀲𑀩𑁆𑀩𑀲𑁄 𑀉𑀩𑁆𑀩𑀺𑀚𑁆𑀚𑀦𑀁. 𑀪𑀸𑀬𑀺𑀢𑀩𑁆𑀩𑀝𑁆𑀞𑁂𑀦 𑀪𑀬𑀫𑁂𑀯 𑀪𑀻𑀫𑀪𑀸𑀯𑁂𑀦 𑀪𑁂𑀭𑀯𑀦𑁆𑀢𑀺 𑀪𑀬𑀪𑁂𑀭𑀯𑀁, 𑀪𑀻𑀢𑀩𑁆𑀩𑀯𑀢𑁆𑀣𑀼. 𑀢𑁂𑀦𑀸𑀳 ‘‘𑀆𑀕𑀘𑁆𑀙𑀢𑀻’’𑀢𑀺, 𑀏𑀢𑀁 𑀦𑀭𑀁 𑀢𑀁 𑀪𑀬𑀪𑁂𑀭𑀯𑀁 𑀆𑀕𑀘𑁆𑀙𑀢𑀺 𑀦𑀽𑀦𑀸𑀢𑀺 𑀅𑀢𑁆𑀣𑁄.

𑀪𑀻𑀭𑀼𑀁 𑀧𑀲𑀁𑀲𑀦𑁆𑀢𑀻𑀢𑀺 𑀧𑀸𑀧𑀢𑁄 𑀪𑀸𑀬𑀦𑀢𑁄 𑀉𑀢𑁆𑀭𑀸𑀲𑀦𑀢𑁄 𑀪𑀻𑀭𑀼𑀁 𑀧𑀲𑀁𑀲𑀦𑁆𑀢𑀺 𑀧𑀡𑁆𑀟𑀺𑀢𑀸. 𑀦 𑀳𑀺 𑀢𑀢𑁆𑀣 𑀲𑀽𑀭𑀦𑁆𑀢𑀺 𑀢𑀲𑁆𑀫𑀺𑀁 𑀧𑀸𑀧𑀓𑀭𑀡𑁂 𑀲𑀽𑀭𑀁 𑀧𑀕𑀩𑁆𑀪𑀥𑀁𑀲𑀺𑀦𑀁 𑀦 𑀳𑀺 𑀧𑀲𑀁𑀲𑀦𑁆𑀢𑀺. 𑀢𑁂𑀦𑀸𑀳 ‘‘𑀪𑀬𑀸 𑀳𑀺 𑀲𑀦𑁆𑀢𑁄 𑀦 𑀓𑀭𑁄𑀦𑁆𑀢𑀺 𑀧𑀸𑀧’’𑀦𑁆𑀢𑀺. 𑀢𑀢𑁆𑀣 𑀪𑀬𑀸𑀢𑀺 𑀧𑀸𑀧𑀼𑀢𑁆𑀭𑀸𑀲𑀢𑁄, 𑀑𑀢𑁆𑀢𑀧𑁆𑀧𑀳𑁂𑀢𑀽𑀢𑀺 𑀅𑀢𑁆𑀣𑁄.

𑀙𑀫𑁆𑀪𑀺𑀢𑀲𑁆𑀲𑀸𑀢𑀺 𑀣𑀫𑁆𑀪𑀺𑀢𑀲𑁆𑀲, 𑀣-𑀓𑀸𑀭𑀲𑁆𑀲 𑀙-𑀓𑀸𑀭𑀸𑀤𑁂𑀲𑁄. 𑀢𑀤𑀢𑁆𑀣𑀫𑀸𑀳 ‘‘𑀲𑀓𑀮𑀲𑀭𑀻𑀭𑀘𑀮𑀦’’𑀦𑁆𑀢𑀺, 𑀪𑀬𑀯𑀲𑁂𑀦 𑀲𑀓𑀮𑀓𑀸𑀬𑀧𑀓𑀫𑁆𑀧𑀦𑀦𑁆𑀢𑀺 𑀅𑀢𑁆𑀣𑁄. 𑀉𑀬𑁆𑀬𑁄𑀥𑀦𑀁 𑀲𑀫𑁆𑀧𑀳𑀸𑀭𑁄.

𑀏𑀓𑁂𑀢𑀺 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄. ‘‘𑀭𑀸𑀚𑀕𑀳𑁂’’𑀢𑀺𑀆𑀤𑀺 𑀢𑁂𑀲𑀫𑀥𑀺𑀧𑁆𑀧𑀸𑀬𑀯𑀺𑀯𑀭𑀡𑀁. 𑀏𑀓𑁂𑀓𑀲𑁆𑀫𑀺𑀁 𑀫𑀳𑀸𑀤𑁆𑀯𑀸𑀭𑁂 𑀤𑁆𑀯𑁂 𑀤𑁆𑀯𑁂 𑀓𑀢𑁆𑀯𑀸 𑀘𑀢𑀼𑀲𑀝𑁆𑀞𑀺 𑀔𑀼𑀤𑁆𑀤𑀓𑀤𑁆𑀯𑀸𑀭𑀸𑀦𑀺. ‘‘𑀢𑀤𑀸’’𑀢𑀺𑀆𑀤𑀺𑀦𑀸 𑀅𑀓𑀸𑀭𑀡𑀪𑀸𑀯𑁂 𑀳𑁂𑀢𑀼𑀁 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 𑀲𑀓𑀯𑀸𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀚𑀻𑀯𑀓𑁄 𑀓𑀺𑀭𑀸’’𑀢𑀺𑀆𑀤𑀺 𑀆𑀲𑀗𑁆𑀓𑀦𑀸𑀓𑀸𑀭𑀤𑀲𑁆𑀲𑀦𑀁. 𑀅𑀲𑁆𑀲𑀸𑀢𑀺 𑀅𑀚𑀸𑀢𑀲𑀢𑁆𑀢𑀼𑀭𑀜𑁆𑀜𑁄. 𑀉𑀓𑁆𑀓𑀡𑁆𑀞𑀺𑀢𑁄𑀢𑀺 𑀅𑀦𑀪𑀺𑀭𑀢𑁄. 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑀼𑀓𑀸𑀫𑁄 ¶ 𑀫𑀜𑁆𑀜𑁂𑀢𑀺 𑀲𑀫𑁆𑀩𑀦𑁆𑀥𑁄 ¶ . 𑀪𑀸𑀬𑀺𑀢𑁆𑀯𑀸𑀢𑀺 𑀪𑀸𑀬𑀦𑀳𑁂𑀢𑀼. 𑀢𑀲𑁆𑀲𑀸𑀢𑀺 𑀚𑀻𑀯𑀓𑀲𑁆𑀲. 𑀲𑀫𑁆𑀫𑀲𑀤𑁆𑀤𑁄 𑀲𑀫𑀸𑀦𑀢𑁆𑀣𑁄, 𑀲𑀫𑀸𑀦𑀪𑀸𑀯𑁄 𑀘 𑀯𑀬𑁂𑀦𑀸𑀢𑀺 𑀆𑀳 ‘‘𑀯𑀬𑀲𑁆𑀲𑀸𑀪𑀺𑀮𑀸𑀧𑁄’’𑀢𑀺. 𑀯𑀬𑁂𑀦 𑀲𑀫𑀸𑀦𑁄 𑀯𑀬𑀲𑁆𑀲𑁄 𑀬𑀣𑀸 ‘‘𑀏𑀓𑀭𑀸𑀚𑀸 𑀳𑀭𑀺𑀲𑁆𑀲𑀯𑀡𑁆𑀡𑁄’’𑀢𑀺 (𑀚𑀸. 𑁧.𑁨.𑁧𑁭). 𑀲𑀫𑀸𑀦𑀲𑀤𑁆𑀤𑀲𑁆𑀲 𑀳𑀺 𑀲𑀸𑀤𑁂𑀲𑀫𑀺𑀘𑁆𑀙𑀦𑁆𑀢𑀺 𑀲𑀤𑁆𑀤𑀯𑀺𑀤𑀽, 𑀢𑁂𑀦 𑀅𑀪𑀺𑀮𑀸𑀧𑁄 𑀆𑀮𑀧𑀦𑀁 𑀢𑀣𑀸, 𑀭𑀼𑀴𑁆𑀳𑀻𑀦𑀺𑀤𑁆𑀤𑁂𑀲𑁄 𑀏𑀲, ‘‘𑀫𑀸𑀭𑀺𑀲𑀸’’𑀢𑀺 𑀆𑀮𑀧𑀦𑀫𑀺𑀯. 𑀬𑀣𑀸 𑀳𑀺 𑀫𑀸𑀭𑀺𑀲𑀸𑀢𑀺 𑀦𑀺𑀤𑁆𑀤𑀼𑀓𑁆𑀔𑀢𑀸𑀪𑀺𑀮𑀸𑀧𑁄 𑀲𑀤𑀼𑀓𑁆𑀔𑁂𑀧𑀺 𑀦𑁂𑀭𑀬𑀺𑀓𑁂 𑀯𑀼𑀘𑁆𑀘𑀢𑀺 ‘‘𑀬𑀤𑀸 𑀔𑁄 𑀢𑁂 𑀫𑀸𑀭𑀺𑀲 𑀲𑀗𑁆𑀓𑀼𑀦𑀸 𑀲𑀗𑁆𑀓𑀼 𑀳𑀤𑀬𑁂 𑀲𑀫𑀸𑀕𑀘𑁆𑀙𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼, (𑀫. 𑀦𑀺. 𑁧.𑁫𑁧𑁨) 𑀏𑀯𑀁 𑀬𑁄 𑀓𑁄𑀘𑀺 𑀲𑀳𑀸𑀬𑁄 𑀅𑀲𑀫𑀸𑀦𑀯𑀬𑁄𑀧𑀺 ‘‘𑀲𑀫𑁆𑀫𑀸’’𑀢𑀺 𑀯𑀼𑀘𑁆𑀘𑀢𑀻𑀢𑀺, 𑀢𑀲𑁆𑀫𑀸 𑀲𑀳𑀸𑀬𑀸𑀪𑀺𑀮𑀸𑀧𑁄 𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀓𑀘𑁆𑀘𑀺 𑀦 𑀯𑀜𑁆𑀘𑁂𑀲𑀻𑀢𑀺 𑀧𑀸𑀴𑀺𑀬𑀸 𑀲𑀫𑁆𑀩𑀦𑁆𑀥𑁄. ‘‘𑀦 𑀧𑀮𑀫𑁆𑀪𑁂𑀲𑀻’’𑀢𑀺 𑀯𑀼𑀢𑁆𑀢𑁂𑀧𑀺 𑀇𑀥 𑀧𑀭𑀺𑀓𑀧𑁆𑀧𑀢𑁆𑀣𑁄𑀯 𑀲𑀫𑁆𑀪𑀯𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀦 𑀯𑀺𑀧𑁆𑀧𑀮𑀫𑁆𑀪𑁂𑀬𑁆𑀬𑀸𑀲𑀻’’𑀢𑀺, 𑀦 𑀧𑀮𑁄𑀪𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄. 𑀓𑀣𑀸𑀬 𑀲𑀮𑁆𑀮𑀸𑀧𑁄, 𑀲𑁄 𑀏𑀯 𑀦𑀺𑀕𑁆𑀖𑁄𑀲𑁄 𑀢𑀣𑀸.

𑀯𑀺𑀦𑀲𑁆𑀲𑁂𑀬𑁆𑀬𑀸𑀢𑀺 𑀘𑀺𑀢𑁆𑀢𑀯𑀺𑀖𑀸𑀢𑁂𑀦 𑀯𑀺𑀳𑀜𑁆𑀜𑁂𑀬𑁆𑀬. ‘‘𑀦 𑀢𑀁 𑀤𑁂𑀯𑀸’’𑀢𑀺𑀆𑀤𑀺𑀯𑀘𑀦𑀁 𑀲𑀦𑁆𑀥𑀸𑀬 ‘‘𑀤𑀴𑁆𑀳𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀼𑀭𑀺𑀢𑀯𑀲𑁂𑀦𑀺𑀤𑀫𑀸𑀫𑁂𑀟𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀢𑀭𑀫𑀸𑀦𑁄𑀯𑀸’’𑀢𑀺 𑀇𑀫𑀺𑀦𑀸. ‘‘𑀅𑀪𑀺𑀓𑁆𑀓𑀫 𑀫𑀳𑀸𑀭𑀸𑀚𑀸’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀲𑀲𑀫𑁆𑀩𑀦𑁆𑀥𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀳𑀸𑀭𑀸𑀚 𑀘𑁄𑀭𑀩𑀮𑀁 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳.

𑀲𑀸𑀫𑀜𑁆𑀜𑀨𑀮𑀧𑀼𑀘𑁆𑀙𑀸𑀯𑀡𑁆𑀡𑀦𑀸

𑁧𑁬𑁦. 𑀅𑀬𑀁 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁄𑀓𑀸𑀲𑁄 𑀦𑀸𑀕𑀲𑁆𑀲 𑀪𑀽𑀫𑀺 𑀦𑀸𑀫. 𑀢𑁂𑀦𑀸𑀳 ‘‘𑀯𑀺𑀳𑀸𑀭𑀲𑁆𑀲𑀸’’𑀢𑀺𑀆𑀤𑀺. 𑀪𑀕𑀯𑀢𑁄 𑀢𑁂𑀚𑁄𑀢𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑁄. 𑀭𑀜𑁆𑀜𑁄 𑀲𑀭𑀻𑀭𑀁 𑀨𑀭𑀺 𑀬𑀣𑀸 𑀢𑀁 𑀲𑁄𑀡𑀤𑀡𑁆𑀟𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑁆𑀢𑁄𑀯𑀦𑀲𑀡𑁆𑀟𑀕𑀢𑀲𑁆𑀲. ‘‘𑀅𑀢𑁆𑀢𑀦𑁄 𑀅𑀧𑀭𑀸𑀥𑀁 𑀲𑀭𑀺𑀢𑁆𑀯𑀸 𑀫𑀳𑀸𑀪𑀬𑀁 𑀉𑀧𑁆𑀧𑀚𑁆𑀚𑀻’’𑀢𑀺 𑀇𑀤𑀁 𑀲𑁂𑀤𑀫𑀼𑀜𑁆𑀘𑀦𑀲𑁆𑀲 𑀓𑀸𑀭𑀡𑀤𑀲𑁆𑀲𑀦𑀁. 𑀦 𑀳𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑀢𑁄 𑀲𑁂𑀤𑀫𑀼𑀜𑁆𑀘𑀦𑀁 𑀲𑀫𑁆𑀪𑀯𑀢𑀺 𑀓𑀸𑀬𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺𑀳𑁂𑀢𑀼𑀪𑀸𑀯𑀢𑁄.

𑀏𑀓𑁂𑀢𑀺 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄𑀬𑁂𑀯. 𑀢𑀤𑀬𑀼𑀢𑁆𑀢𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀇𑀫𑀺𑀦𑀸’’𑀢𑀺𑀆𑀤𑀺𑀦𑀸. 𑀅𑀪𑀺𑀫𑀸𑀭𑁂𑀢𑀺 𑀥𑀦𑀼𑀕𑁆𑀕𑀳𑁂. 𑀥𑀦𑀧𑀸𑀮𑀦𑁆𑀢𑀺 𑀦𑀸𑀴𑀸𑀕𑀺𑀭𑀺𑀁. 𑀲𑁄 𑀳𑀺 𑀢𑀤𑀸 𑀦𑀸𑀕𑀭𑁂𑀳𑀺 𑀧𑀽𑀚𑀺𑀢𑀥𑀦𑀭𑀸𑀲𑀺𑀦𑁄 𑀮𑀩𑁆𑀪𑀦𑀢𑁄 ‘‘𑀥𑀦𑀧𑀸𑀮𑁄’’𑀢𑀺 𑀯𑁄𑀳𑀭𑀻𑀬𑀢𑀺. 𑀦 𑀓𑁂𑀯𑀮𑀁 𑀤𑀺𑀝𑁆𑀞𑀧𑀼𑀩𑁆𑀩𑀢𑁄𑀬𑁂𑀯, 𑀅𑀣 𑀔𑁄 𑀧𑀓𑀢𑀺𑀬𑀸𑀧𑀺 𑀪𑀕𑀯𑀸 𑀲𑀜𑁆𑀜𑀸𑀢𑁄𑀢𑀺 ¶ 𑀤𑀲𑁆𑀲𑁂𑀢𑀼𑀁 ‘‘𑀪𑀕𑀯𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀆𑀓𑀺𑀡𑁆𑀡𑀯𑀭𑀮𑀓𑁆𑀔𑀡𑁄𑀢𑀺 𑀩𑀢𑁆𑀢𑀺𑀁𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁂 𑀲𑀦𑁆𑀥𑀸𑀬𑀸𑀳. 𑀅𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢𑁄𑀢𑀺 𑀅𑀲𑀻𑀢𑀸𑀦𑀼𑀩𑁆𑀬𑀜𑁆𑀚𑀦𑁂 (𑀚𑀺𑀦𑀸𑀮𑀗𑁆𑀓𑀸𑀭𑀝𑀻𑀓𑀸𑀬 𑀯𑀺𑀚𑀸𑀢𑀫𑀗𑁆𑀕𑀮𑀯𑀡𑁆𑀡𑀦𑀸𑀬𑀁 𑀯𑀺𑀢𑁆𑀣𑀸𑀭𑁄). 𑀙𑀩𑁆𑀩𑀡𑁆𑀡𑀸𑀳𑀺 𑀭𑀲𑁆𑀫𑀻𑀳𑀻𑀢𑀺 𑀢𑀤𑀸 𑀯𑀢𑁆𑀢𑀫𑀸𑀦𑀸 𑀭𑀲𑁆𑀫𑀺𑀬𑁄. 𑀇𑀲𑁆𑀲𑀭𑀺𑀬𑀮𑀻𑀴𑀸𑀬𑀸𑀢𑀺 ¶ 𑀇𑀲𑁆𑀲𑀭𑀺𑀬𑀯𑀺𑀮𑀸𑀲𑁂𑀦. 𑀦𑀦𑀼 𑀘 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀇𑀲𑁆𑀲𑀭𑀺𑀬𑀮𑀻𑀮𑀸𑀬 𑀧𑀼𑀘𑁆𑀙𑀸 𑀅𑀕𑀸𑀭𑀯𑁄𑀬𑁂𑀯 𑀲𑀺𑀬𑀸𑀢𑀺 𑀘𑁄𑀤𑀦𑀸𑀬 ‘‘𑀧𑀓𑀢𑀺 𑀳𑁂𑀲𑀸’’𑀢𑀺𑀆𑀤𑀺𑀫𑀸𑀳, 𑀧𑀓𑀢𑀺𑀬𑀸 𑀧𑀼𑀘𑁆𑀙𑀦𑀢𑁄 𑀦 𑀅𑀕𑀸𑀭𑀯𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀧𑀼𑀭𑁂 𑀓𑀢𑁂𑀧𑀺 𑀅𑀢𑁆𑀣𑀢𑁄 𑀢𑀲𑁆𑀲 𑀧𑀼𑀭𑀢𑁄 𑀦𑀺𑀲𑀺𑀦𑁆𑀦𑁄 𑀦𑀸𑀫. 𑀢𑁂𑀦𑀸𑀳 ‘‘𑀧𑀭𑀺𑀯𑀸𑀭𑁂𑀢𑁆𑀯𑀸’’𑀢𑀺𑀆𑀤𑀺.

𑁧𑁬𑁧. 𑀬𑁂𑀦, 𑀢𑁂𑀦𑀸𑀢𑀺 𑀘 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀬𑀢𑁆𑀣, 𑀢𑀢𑁆𑀣𑀸’’𑀢𑀺 𑀇𑀫𑀺𑀦𑀸. 𑀬𑁂𑀦 𑀫𑀡𑁆𑀟𑀮𑀲𑁆𑀲 𑀤𑁆𑀯𑀸𑀭𑀁, 𑀢𑁂𑀦𑀽𑀧𑀲𑀗𑁆𑀓𑀫𑀻𑀢𑀺 𑀲𑀫𑁆𑀧𑀢𑁆𑀢𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀇𑀥 𑀉𑀧𑀕𑀫𑀦𑀫𑁂𑀯 𑀬𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀉𑀧𑀕𑀢𑁄’’𑀢𑀺. 𑀅𑀦𑀼𑀘𑁆𑀙𑀯𑀺𑀓𑁂 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂𑀢𑀺 𑀬𑀢𑁆𑀣 𑀯𑀺𑀜𑁆𑀜𑀼𑀚𑀸𑀢𑀺𑀓𑀸 𑀅𑀝𑁆𑀞𑀁𑀲𑀼, 𑀢𑀲𑁆𑀫𑀺𑀁. 𑀓𑁄 𑀧𑀦𑁂𑀲 𑀅𑀦𑀼𑀘𑁆𑀙𑀯𑀺𑀓𑀧𑀤𑁂𑀲𑁄 𑀦𑀸𑀫? 𑀅𑀢𑀺𑀤𑀽𑀭𑀢𑀸𑀤𑀺𑀙𑀦𑀺𑀲𑀚𑁆𑀚𑀤𑁄𑀲𑀯𑀺𑀭𑀳𑀺𑀢𑁄 𑀧𑀤𑁂𑀲𑁄, 𑀦𑀧𑀘𑁆𑀙𑀢𑀸𑀤𑀺𑀅𑀝𑁆𑀞𑀦𑀺𑀲𑀚𑁆𑀚𑀤𑁄𑀲𑀯𑀺𑀭𑀳𑀺𑀢𑁄 𑀯𑀸. 𑀬𑀣𑀸𑀳𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑁋

‘‘𑀦 𑀧𑀘𑁆𑀙𑀢𑁄 𑀦 𑀧𑀼𑀭𑀢𑁄, 𑀦𑀸𑀧𑀺 𑀆𑀲𑀦𑁆𑀦𑀤𑀽𑀭𑀢𑁄;

𑀦 𑀓𑀘𑁆𑀙𑁂 𑀦𑁄 𑀧𑀝𑀺𑀯𑀸𑀢𑁂, 𑀦 𑀘𑀸𑀧𑀺 𑀑𑀦𑀢𑀼𑀦𑁆𑀦𑀢𑁂;

𑀇𑀫𑁂 𑀤𑁄𑀲𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸, 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀅𑀳𑀽’’𑀢𑀺. (𑀔𑀼. 𑀧𑀸. 𑀅𑀝𑁆𑀞. 𑀏𑀯𑀫𑀺𑀘𑁆𑀘𑀸𑀤𑀺𑀧𑀸𑀞𑀯𑀡𑁆𑀡𑀦𑀸; 𑀲𑀼. 𑀦𑀺. 𑀅𑀝𑁆𑀞. 𑁨.𑁨𑁬𑁧);

𑀢𑀤𑀸 𑀪𑀺𑀓𑁆𑀔𑀼𑀲𑀗𑁆𑀖𑁂 𑀢𑀼𑀡𑁆𑀳𑀻𑀪𑀸𑀯𑀲𑁆𑀲 𑀅𑀦𑀯𑀲𑁂𑀲𑀢𑁄 𑀩𑁆𑀬𑀸𑀧𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀼𑀡𑁆𑀳𑀻𑀪𑀽𑀢𑀁 𑀢𑀼𑀡𑁆𑀳𑀻𑀪𑀽𑀢’’𑀦𑁆𑀢𑀺 𑀯𑀺𑀘𑁆𑀙𑀸𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀢𑁄…𑀧𑁂… 𑀫𑁂𑀯𑀸’’𑀢𑀺, 𑀬𑀢𑁄 𑀬𑀢𑁄 𑀪𑀺𑀓𑁆𑀔𑀼𑀢𑁄𑀢𑀺 𑀅𑀢𑁆𑀣𑁄. 𑀳𑀢𑁆𑀣𑁂𑀦, 𑀳𑀢𑁆𑀣𑀲𑁆𑀲 𑀯𑀸 𑀓𑀼𑀓𑀢𑀪𑀸𑀯𑁄 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀁, 𑀅𑀲𑀜𑁆𑀜𑀫𑁄, 𑀅𑀲𑀫𑁆𑀧𑀚𑀜𑁆𑀜𑀓𑀺𑀭𑀺𑀬𑀸 𑀘. 𑀢𑀣𑀸 𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀯𑀸-𑀲𑀤𑁆𑀤𑁄 𑀅𑀯𑀼𑀢𑁆𑀢𑀯𑀺𑀓𑀧𑁆𑀧𑀦𑁂, 𑀢𑁂𑀦 𑀢𑀤𑀜𑁆𑀜𑁄𑀧𑀺 𑀘𑀓𑁆𑀔𑀼𑀲𑁄𑀢𑀸𑀤𑀺𑀅𑀲𑀜𑁆𑀜𑀫𑁄 𑀦𑀢𑁆𑀣𑀻𑀢𑀺 𑀯𑀺𑀪𑀸𑀯𑀺𑀢𑁄. 𑀢𑀢𑁆𑀣 𑀧𑀦 𑀘𑀓𑁆𑀔𑀼𑀅𑀲𑀁𑀬𑀫𑁄 𑀲𑀩𑁆𑀩𑀧𑀞𑀫𑁄 𑀤𑀼𑀦𑁆𑀦𑀺𑀯𑀸𑀭𑀺𑀢𑁄 𑀘𑀸𑀢𑀺 𑀢𑀤𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀯𑀺𑀧𑁆𑀧𑀲𑀦𑁆𑀦𑀭𑀳𑀤𑀫𑀺𑀯𑀸𑀢𑀺 𑀅𑀦𑀸𑀯𑀺𑀮𑁄𑀤𑀓𑀲𑀭𑀫𑀺𑀯. 𑀬𑁂𑀦𑁂𑀢𑀭𑀳𑀺…𑀧𑁂… 𑀇𑀫𑀺𑀦𑀸 𑀫𑁂…𑀧𑁂… 𑀳𑁄𑀢𑀽𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑁄 𑀳𑀺 𑀅𑀢𑁆𑀣𑀓𑁆𑀓𑀫𑁄, 𑀅𑀜𑁆𑀜𑁄 𑀲𑀤𑁆𑀤𑀓𑁆𑀓𑀫𑁄𑀢𑀺 ¶ 𑀆𑀳 ‘‘𑀬𑁂𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀓𑀸𑀬𑀺𑀓-𑀯𑀸𑀘𑀲𑀺𑀓𑁂𑀦 𑀉𑀧𑀲𑀫𑁂𑀦 𑀮𑀤𑁆𑀥𑁂𑀦 𑀫𑀸𑀦𑀲𑀺𑀓𑁄𑀧𑀺 𑀉𑀧𑀲𑀫𑁄 𑀅𑀦𑀼𑀫𑀸𑀦𑀢𑁄 𑀮𑀤𑁆𑀥𑁄 𑀏𑀯𑀸𑀢𑀺 𑀓𑀢𑁆𑀯𑀸 ‘‘𑀫𑀸𑀦𑀲𑀺𑀓𑁂𑀦 𑀘𑀸’’𑀢𑀺 𑀯𑀼𑀢𑁆𑀢𑀁. 𑀲𑀻𑀮𑀽𑀧𑀲𑀫𑁂𑀦𑀸𑀢𑀺 𑀲𑀻𑀮𑀲𑀜𑁆𑀜𑀫𑁂𑀦. 𑀯𑀼𑀢𑁆𑀢𑀫𑀢𑁆𑀣𑀁 𑀮𑁄𑀓𑀧𑀓𑀢𑀺𑀬𑀸 𑀲𑀸𑀥𑁂𑀦𑁆𑀢𑁄 ‘‘𑀤𑀼𑀮𑁆𑀮𑀪𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀮𑀤𑁆𑀥𑀸𑀢𑀺 𑀮𑀪𑀺𑀢𑁆𑀯𑀸.

𑀉𑀧𑀲𑀫𑀦𑁆𑀢𑀺 𑀆𑀘𑀸𑀭𑀲𑀫𑁆𑀧𑀢𑁆𑀢𑀺𑀲𑀗𑁆𑀔𑀸𑀢𑀁 𑀲𑀁𑀬𑀫𑀁. ‘‘𑀏𑀯’’𑀦𑁆𑀢𑀺𑀆𑀤𑀺𑀦𑀸 𑀢𑀣𑀸 𑀇𑀘𑁆𑀙𑀸𑀬 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺 ¶ . 𑀲𑁄𑀢𑀺 𑀅𑀬𑁆𑀬𑀓𑁄, 𑀉𑀤𑀬𑀪𑀤𑁆𑀤𑁄 𑀯𑀸. ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺 𑀢𑀤𑀢𑁆𑀣-𑀲𑀫𑀢𑁆𑀣𑀦𑀁. 𑀖𑀸𑀢𑁂𑀲𑁆𑀲𑀢𑀺𑀬𑁂𑀯𑀸𑀢𑀺 𑀢𑀁𑀓𑀸𑀮𑀸𑀧𑁂𑀓𑁆𑀔𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀖𑀸𑀢𑁂𑀲𑀻’’𑀢𑀺. 𑀇𑀤𑀜𑁆𑀳𑀺 𑀲𑀫𑁆𑀧𑀢𑀺𑀧𑁂𑀓𑁆𑀔𑀯𑀘𑀦𑀁. 𑀧𑀜𑁆𑀘𑀧𑀭𑀺𑀯𑀝𑁆𑀝𑁄𑀢𑀺 𑀧𑀜𑁆𑀘𑀭𑀸𑀚𑀧𑀭𑀺𑀯𑀝𑁆𑀝𑁄.

𑀓𑀲𑁆𑀫𑀸 𑀏𑀯𑀫𑀸𑀳, 𑀦𑀦𑀼 𑀪𑀕𑀯𑀦𑁆𑀢𑀫𑀼𑀤𑁆𑀤𑀺𑀲𑁆𑀲 𑀭𑀸𑀚𑀸 𑀦 𑀓𑀺𑀜𑁆𑀘𑀺 𑀯𑀤𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀘𑀻𑀪𑁂𑀤𑁂𑀢𑀺 𑀬𑀣𑀸𑀯𑀼𑀢𑁆𑀢𑀉𑀤𑀸𑀦𑀯𑀘𑀻𑀪𑁂𑀤𑁂. 𑀢𑀼𑀡𑁆𑀳𑀻 𑀦𑀺𑀭𑀯𑁄𑀢𑀺 𑀧𑀭𑀺𑀬𑀸𑀬𑀯𑀘𑀦𑀫𑁂𑀢𑀁. ‘‘𑀅𑀬’’𑀦𑁆𑀢𑀺𑀆𑀤𑀺 𑀘𑀺𑀢𑁆𑀢𑀚𑀸𑀦𑀦𑀸𑀓𑀸𑀭𑀤𑀲𑁆𑀲𑀦𑀁. 𑀅𑀬𑀁…𑀧𑁂… 𑀦 𑀲𑀓𑁆𑀔𑀺𑀲𑁆𑀲𑀢𑀻𑀢𑀺 𑀜𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀘𑀦𑀸𑀦𑀦𑁆𑀢𑀭𑀦𑁆𑀢𑀺 𑀉𑀤𑀸𑀦𑀯𑀘𑀦𑀸𑀦𑀦𑁆𑀢𑀭𑀁. 𑀬𑁂𑀦𑀸𑀢𑀺 𑀬𑀢𑁆𑀣 𑀧𑀤𑁂𑀲𑁂, 𑀬𑁂𑀦 𑀯𑀸 𑀲𑁄𑀢𑀧𑀣𑁂𑀦. 𑀬𑁂𑀦 𑀧𑁂𑀫𑀦𑁆𑀢𑀺 𑀏𑀢𑁆𑀣𑀸𑀧𑀺 𑀬𑀣𑀸𑀭𑀳𑀫𑁂𑀲 𑀦𑀬𑁄.

𑀓𑀢𑀸𑀧𑀭𑀸𑀥𑀲𑁆𑀲 𑀆𑀮𑀧𑀦𑀁 𑀦𑀸𑀫 𑀤𑀼𑀓𑁆𑀓𑀭𑀦𑁆𑀢𑀺 𑀲𑀦𑁆𑀥𑀸𑀬 ‘‘𑀫𑀼𑀔𑀁 𑀦𑀧𑁆𑀧𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀆𑀕𑀫𑀸 𑀔𑁄 𑀢𑁆𑀯𑀁 𑀫𑀳𑀸𑀭𑀸𑀚 𑀬𑀣𑀸𑀧𑁂𑀫’’𑀦𑁆𑀢𑀺 𑀯𑀘𑀦𑀦𑀺𑀤𑁆𑀤𑀺𑀝𑁆𑀞𑀁 𑀯𑀸 𑀢𑀤𑀸 𑀢𑀤𑀢𑁆𑀣𑀤𑀻𑀧𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀁 𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀁 𑀪𑀕𑀯𑀢𑁄 𑀫𑀥𑀼𑀭𑀯𑀘𑀦𑀫𑁆𑀧𑀺 𑀲𑀦𑁆𑀥𑀸𑀬 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀓𑀫𑁆𑀧𑀺 𑀳𑀺 𑀅𑀢𑁆𑀣𑀁 𑀪𑀕𑀯𑀸 𑀬𑀣𑀸 𑀲𑁄𑀢𑀽𑀦𑀁 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀢𑀣𑀸 𑀤𑁂𑀲𑁂𑀢𑀺. 𑀬𑀁 𑀲𑀦𑁆𑀥𑀸𑀬 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁 ‘‘𑀪𑀕𑀯𑀢𑀸 𑀅𑀩𑁆𑀬𑀸𑀓𑀢𑀁 𑀢𑀦𑁆𑀢𑀺𑀧𑀤𑀁 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑁂𑀲𑀜𑁆𑀜𑁂𑀯 𑀅𑀢𑁆𑀣𑁄𑀧𑀺 𑀪𑀸𑀲𑀺𑀢𑁄’’𑀢𑀺. 𑀧𑀜𑁆𑀘𑀳𑀸𑀓𑀸𑀭𑁂𑀳𑀻𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀲𑀫𑀪𑀸𑀯𑀸𑀤𑀺𑀲𑀗𑁆𑀔𑀸𑀢𑁂𑀳𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀫𑀳𑀸𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁩𑁮, 𑁧𑁬𑁨) 𑁋

‘‘𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀢𑀸𑀤𑀻 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻, 𑀘𑀢𑁆𑀢𑀸𑀯𑀻𑀢𑀺 𑀢𑀸𑀤𑀻, 𑀢𑀺𑀡𑁆𑀡𑀸𑀯𑀻𑀢𑀺 𑀢𑀸𑀤𑀻, 𑀫𑀼𑀢𑁆𑀢𑀸𑀯𑀻𑀢𑀺 𑀢𑀸𑀤𑀻, 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻.

𑀓𑀣𑀁 𑀅𑀭𑀳𑀸 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻? 𑀅𑀭𑀳𑀸 𑀮𑀸𑀪𑁂𑀧𑀺 𑀢𑀸𑀤𑀻, 𑀅𑀮𑀸𑀪𑁂𑀧𑀺, 𑀬𑀲𑁂𑀧𑀺, 𑀅𑀬𑀲𑁂𑀧𑀺, 𑀧𑀲𑀁𑀲𑀸𑀬𑀧𑀺, 𑀦𑀺𑀦𑁆𑀤𑀸𑀬𑀧𑀺, 𑀲𑀼𑀔𑁂𑀧𑀺, 𑀤𑀼𑀓𑁆𑀔𑁂𑀧𑀺 𑀢𑀸𑀤𑀻, 𑀏𑀓𑀁 𑀘𑁂 𑀩𑀸𑀳𑀁 𑀕𑀦𑁆𑀥𑁂𑀦 𑀮𑀺𑀫𑁆𑀧𑁂𑀬𑁆𑀬𑀼𑀁, 𑀏𑀓𑀁 𑀘𑁂 𑀩𑀸𑀳𑀁 𑀯𑀸𑀲𑀺𑀬𑀸 ¶ 𑀢𑀘𑁆𑀙𑁂𑀬𑁆𑀬𑀼𑀁, 𑀅𑀫𑀼𑀲𑁆𑀫𑀺𑀁 𑀦𑀢𑁆𑀣𑀺 𑀭𑀸𑀕𑁄, 𑀅𑀫𑀼𑀲𑁆𑀫𑀺𑀁 𑀦𑀢𑁆𑀣𑀺 𑀧𑀝𑀺𑀖𑀁, 𑀅𑀦𑀼𑀦𑀬𑀧𑀝𑀺𑀖𑀯𑀺𑀧𑁆𑀧𑀳𑀻𑀦𑁄, 𑀉𑀕𑁆𑀖𑀸𑀢𑀺𑀦𑀺𑀖𑀸𑀢𑀺𑀯𑀻𑀢𑀺𑀯𑀢𑁆𑀢𑁄, 𑀅𑀦𑀼𑀭𑁄𑀥𑀯𑀺𑀭𑁄𑀥𑀲𑀫𑀢𑀺𑀓𑁆𑀓𑀦𑁆𑀢𑁄, 𑀏𑀯𑀁 𑀅𑀭𑀳𑀸 𑀇𑀝𑁆𑀞𑀸𑀦𑀺𑀝𑁆𑀞𑁂 𑀢𑀸𑀤𑀻.

𑀓𑀣𑀁 𑀅𑀭𑀳𑀸 𑀘𑀢𑁆𑀢𑀸𑀯𑀻𑀢𑀺 𑀢𑀸𑀤𑀻? 𑀅𑀭𑀳𑀢𑁄…𑀧𑁂… 𑀣𑀫𑁆𑀪𑁄, 𑀲𑀸𑀭𑀫𑁆𑀪𑁄, 𑀫𑀸𑀦𑁄, 𑀅𑀢𑀺𑀫𑀸𑀦𑁄, 𑀫𑀤𑁄, 𑀧𑀫𑀸𑀤𑁄, 𑀲𑀩𑁆𑀩𑁂 𑀓𑀺𑀮𑁂𑀲𑀸, 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸, 𑀲𑀩𑁆𑀩𑁂 𑀤𑀭𑀣𑀸, 𑀲𑀩𑁆𑀩𑁂 𑀧𑀭𑀺𑀴𑀸𑀳𑀸 ¶ , 𑀲𑀩𑁆𑀩𑁂 𑀲𑀦𑁆𑀢𑀸𑀧𑀸, 𑀲𑀩𑁆𑀩𑀸 𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀸 𑀘𑀢𑁆𑀢𑀸 𑀯𑀦𑁆𑀢𑀸 𑀫𑀼𑀢𑁆𑀢𑀸 𑀧𑀳𑀻𑀦𑀸 𑀧𑀝𑀺𑀦𑀺𑀲𑁆𑀲𑀝𑁆𑀞𑀸, 𑀏𑀯𑀁 𑀅𑀭𑀳𑀸 𑀘𑀢𑁆𑀢𑀸𑀯𑀻𑀢𑀺 𑀢𑀸𑀤𑀻.

𑀓𑀣𑀁 𑀅𑀭𑀳𑀸 𑀢𑀺𑀡𑁆𑀡𑀸𑀯𑀻𑀢𑀺 𑀢𑀸𑀤𑀻? 𑀅𑀭𑀳𑀸 𑀓𑀸𑀫𑁄𑀖𑀁 𑀢𑀺𑀡𑁆𑀡𑁄, 𑀪𑀯𑁄𑀖𑀁 𑀢𑀺𑀡𑁆𑀡𑁄, 𑀤𑀺𑀝𑁆𑀞𑁄𑀖𑀁 𑀢𑀺𑀡𑁆𑀡𑁄, 𑀅𑀯𑀺𑀚𑁆𑀚𑁄𑀖𑀁 𑀢𑀺𑀡𑁆𑀡𑁄, 𑀲𑀩𑁆𑀩𑀁 𑀲𑀁𑀲𑀸𑀭𑀧𑀣𑀁 𑀢𑀺𑀡𑁆𑀡𑁄 𑀉𑀢𑁆𑀢𑀺𑀡𑁆𑀡𑁄 𑀦𑀺𑀢𑁆𑀢𑀺𑀡𑁆𑀡𑁄 𑀅𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄 𑀯𑀻𑀢𑀺𑀯𑀢𑁆𑀢𑁄, 𑀲𑁄 𑀯𑀼𑀝𑁆𑀞𑀯𑀸𑀲𑁄 𑀘𑀺𑀡𑁆𑀡𑀘𑀭𑀡𑁄 𑀚𑀸𑀢𑀺𑀫𑀭𑀡𑀲𑀗𑁆𑀔𑀬𑁄, 𑀚𑀸𑀢𑀺𑀫𑀭𑀡𑀲𑀁𑀲𑀸𑀭𑁄 (𑀫𑀳𑀸𑀦𑀺. 𑁩𑁮) 𑀦𑀢𑁆𑀣𑀺 𑀢𑀲𑁆𑀲 𑀧𑀼𑀦𑀩𑁆𑀪𑀯𑁄𑀢𑀺, 𑀏𑀯𑀁 𑀅𑀭𑀳𑀸 𑀢𑀺𑀡𑁆𑀡𑀸𑀯𑀻𑀢𑀺 𑀢𑀸𑀤𑀻.

𑀓𑀣𑀁 𑀅𑀭𑀳𑀸 𑀫𑀼𑀢𑁆𑀢𑀸𑀯𑀻𑀢𑀺 𑀢𑀸𑀤𑀻? 𑀅𑀭𑀳𑀢𑁄 𑀭𑀸𑀕𑀸 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁, 𑀤𑁄𑀲𑀸, 𑀫𑁄𑀳𑀸, 𑀓𑁄𑀥𑀸, 𑀉𑀧𑀦𑀸𑀳𑀸, 𑀫𑀓𑁆𑀔𑀸, 𑀧𑀴𑀸𑀲𑀸, 𑀇𑀲𑁆𑀲𑀸𑀬, 𑀫𑀘𑁆𑀙𑀭𑀺𑀬𑀸, 𑀫𑀸𑀬𑀸𑀬, 𑀲𑀸𑀞𑁂𑀬𑁆𑀬𑀸, 𑀣𑀫𑁆𑀪𑀸, 𑀲𑀸𑀭𑀫𑁆𑀪𑀸, 𑀫𑀸𑀦𑀸, 𑀅𑀢𑀺𑀫𑀸𑀦𑀸, 𑀫𑀤𑀸, 𑀧𑀫𑀸𑀤𑀸, 𑀲𑀩𑁆𑀩𑀓𑀺𑀮𑁂𑀲𑁂𑀳𑀺, 𑀲𑀩𑁆𑀩𑀤𑀼𑀘𑁆𑀘𑀭𑀺𑀢𑁂𑀳𑀺, 𑀲𑀩𑁆𑀩𑀤𑀭𑀣𑁂𑀳𑀺, 𑀲𑀩𑁆𑀩𑀧𑀭𑀺𑀴𑀸𑀳𑁂𑀳𑀺, 𑀲𑀩𑁆𑀩𑀲𑀦𑁆𑀢𑀸𑀧𑁂𑀳𑀺, 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀘𑀺𑀢𑁆𑀢𑀁 𑀫𑀼𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁; 𑀏𑀯𑀁 𑀅𑀭𑀳𑀸 𑀫𑀼𑀢𑁆𑀢𑀸𑀯𑀻𑀢𑀺 𑀢𑀸𑀤𑀻.

𑀓𑀣𑀁 𑀅𑀭𑀳𑀸 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻? 𑀅𑀭𑀳𑀸 ‘𑀲𑀻𑀮𑁂 𑀲𑀢𑀺 𑀲𑀻𑀮𑀯𑀸’𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻, ‘𑀲𑀤𑁆𑀥𑀸𑀬 𑀲𑀢𑀺 𑀲𑀤𑁆𑀥𑁄’𑀢𑀺, ‘𑀯𑀻𑀭𑀺𑀬𑁂 𑀲𑀢𑀺 𑀯𑀻𑀭𑀺𑀬𑀯𑀸’𑀢𑀺, ‘𑀲𑀢𑀺𑀬𑀸 𑀲𑀢𑀺 𑀲𑀢𑀺𑀫𑀸’𑀢𑀺, ‘𑀲𑀫𑀸𑀥𑀺𑀫𑁆𑀳𑀺 𑀲𑀢𑀺 𑀲𑀫𑀸𑀳𑀺𑀢𑁄’𑀢𑀺, ‘𑀧𑀜𑁆𑀜𑀸𑀬 𑀲𑀢𑀺 𑀧𑀜𑁆𑀜𑀯𑀸’𑀢𑀺, ‘𑀯𑀺𑀚𑁆𑀚𑀸𑀬 𑀲𑀢𑀺 𑀢𑁂𑀯𑀺𑀚𑁆𑀚𑁄’𑀢𑀺, ‘𑀅𑀪𑀺𑀜𑁆𑀜𑀸𑀬 𑀲𑀢𑀺 𑀙𑀴𑀪𑀺𑀜𑁆𑀜𑁄’𑀢𑀺 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻, 𑀏𑀯𑀁 𑀅𑀭𑀳𑀸 𑀢𑀁𑀦𑀺𑀤𑁆𑀤𑁂𑀲𑀸 𑀢𑀸𑀤𑀻’’𑀢𑀺.

𑀪𑀕𑀯𑀸 𑀧𑀦 𑀲𑀩𑁆𑀩𑁂𑀲𑀫𑁆𑀧𑀺 𑀢𑀸𑀤𑀻𑀦𑀫𑀢𑀺𑀲𑀬𑁄 𑀢𑀸𑀤𑀻. 𑀢𑁂𑀦𑀸𑀳 ‘‘𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄’’𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀪𑀕𑀯𑀢𑀸 𑀓𑀸𑀴𑀓𑀸𑀭𑀸𑀫𑀲𑀼𑀢𑁆𑀢𑀦𑁆𑀢𑁂 ‘‘𑀇𑀢𑀺 𑀔𑁄 𑀪𑀺𑀓𑁆𑀔𑀯𑁂 ¶ 𑀢𑀣𑀸𑀕𑀢𑁄 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀢𑀸𑀤𑀻𑀬𑁂𑀯 𑀢𑀸𑀤𑀻, 𑀢𑀫𑁆𑀳𑀸 𑀘 𑀧𑀦 𑀢𑀸𑀤𑀺𑀫𑁆𑀳𑀸 𑀅𑀜𑁆𑀜𑁄 𑀢𑀸𑀤𑀻 𑀉𑀢𑁆𑀢𑀭𑀺𑀢𑀭𑁄 𑀯𑀸 𑀧𑀡𑀻𑀢𑀢𑀭𑁄 𑀯𑀸 𑀦𑀢𑁆𑀣𑀻𑀢𑀺 𑀯𑀤𑀸𑀫𑀻’’𑀢𑀺 (𑀅. 𑀦𑀺. 𑁪.𑁨𑁪). 𑀅𑀣 𑀯𑀸 𑀧𑀜𑁆𑀘𑀯𑀺𑀥𑀸𑀭𑀺𑀬𑀺𑀤𑁆𑀥𑀺𑀲𑀺𑀤𑁆𑀥𑁂𑀳𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀢𑀸𑀤𑀺𑀮𑀓𑁆𑀔𑀡𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀆𑀬𑀲𑁆𑀫𑀢𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑁋

‘‘𑀓𑀢𑀫𑀸 𑀅𑀭𑀺𑀬𑀸 𑀇𑀤𑁆𑀥𑀺? 𑀇𑀥 𑀪𑀺𑀓𑁆𑀔𑀼 𑀲𑀘𑁂 𑀆𑀓𑀗𑁆𑀔𑀢𑀺 ‘𑀧𑀝𑀺𑀓𑀽𑀮𑁂 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺, 𑀲𑀘𑁂 𑀆𑀓𑀗𑁆𑀔𑀢𑀺 ‘𑀅𑀧𑁆𑀧𑀝𑀺𑀓𑀽𑀮𑁂 ¶ 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺, 𑀲𑀘𑁂 𑀆𑀓𑀗𑁆𑀔𑀢𑀺 ‘𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺, 𑀲𑀘𑁂 𑀆𑀓𑀗𑁆𑀔𑀢𑀺 ‘𑀅𑀧𑁆𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑁂𑀬𑁆𑀬’𑀦𑁆𑀢𑀺, 𑀧𑀝𑀺𑀓𑀽𑀮𑀲𑀜𑁆𑀜𑀻 𑀢𑀢𑁆𑀣 𑀯𑀺𑀳𑀭𑀢𑀺, 𑀲𑀘𑁂 𑀆𑀓𑀗𑁆𑀔𑀢𑀺 ‘𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑁂𑀬𑁆𑀬𑀁 𑀲𑀢𑁄 𑀲𑀫𑁆𑀧𑀚𑀸𑀦𑁄’𑀢𑀺, 𑀉𑀧𑁂𑀓𑁆𑀔𑀓𑁄 𑀢𑀢𑁆𑀣 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄’’𑀢𑀺 (𑀧𑀝𑀺. 𑀫. 𑁩.𑁧𑁭).

𑀩𑀳𑀺𑀤𑁆𑀥𑀸𑀢𑀺 𑀲𑀸𑀲𑀦𑀢𑁄 𑀩𑀳𑀺𑀲𑀫𑀬𑁂.

𑁧𑁬𑁨. 𑀏𑀲𑀸𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀯𑀦𑁆𑀤𑀦𑀸𑀓𑀸𑀭𑁄. 𑀢𑀫𑀢𑁆𑀣𑀁 𑀮𑁄𑀓𑀲𑀺𑀤𑁆𑀥𑀸𑀬 𑀉𑀧𑀫𑀸𑀬 𑀲𑀸𑀥𑁂𑀢𑀼𑀁 ‘‘𑀭𑀸𑀚𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀑𑀓𑀸𑀲𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑀝𑁆𑀞𑀸𑀦𑀁.

𑀦 𑀫𑁂 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂 𑀪𑀸𑀭𑁄 𑀅𑀢𑁆𑀣𑀻𑀢𑀺 𑀲𑀢𑁆𑀣𑀼 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑀢𑀸𑀬 𑀅𑀢𑁆𑀣𑀢𑁄 𑀆𑀧𑀦𑁆𑀦𑀸𑀬 𑀤𑀲𑁆𑀲𑀦𑀁. ‘‘𑀬𑀤𑀺 𑀆𑀓𑀗𑁆𑀔𑀲𑀻’’𑀢𑀺 𑀯𑀼𑀢𑁆𑀢𑁂𑀬𑁂𑀯 𑀳𑀺 𑀏𑀲 𑀅𑀢𑁆𑀣𑁄 𑀆𑀧𑀦𑁆𑀦𑁄 𑀳𑁄𑀢𑀺. 𑀲𑀩𑁆𑀩𑀁 𑀢𑁂 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀻𑀢𑀺 𑀏𑀢𑁆𑀣𑀸𑀧𑀺 𑀅𑀬𑀁 𑀦𑀬𑁄. ‘‘𑀬𑀁 𑀆𑀓𑀗𑁆𑀔𑀲𑀺, 𑀢𑀁 𑀧𑀼𑀘𑁆𑀙𑀸’’𑀢𑀺 𑀯𑀘𑀦𑁂𑀦𑁂𑀯 𑀳𑀺 𑀅𑀬𑀫𑀢𑁆𑀣𑁄 𑀲𑀺𑀚𑁆𑀛𑀢𑀺. 𑀅𑀲𑀸𑀥𑀸𑀭𑀡𑀁 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀤𑀺 ‘‘𑀬𑀤𑀸𑀓𑀗𑁆𑀔𑀲𑀻’’𑀢𑀺 𑀦 𑀯𑀤𑀦𑁆𑀢𑀺, 𑀅𑀣 𑀓𑀣𑀁 𑀯𑀤𑀦𑁆𑀢𑀻𑀢𑀺 𑀆𑀳 ‘‘𑀲𑀼𑀢𑁆𑀯𑀸’’𑀢𑀺𑀆𑀤𑀺. 𑀧𑀤𑁂𑀲𑀜𑀸𑀡𑁂𑀬𑁂𑀯 𑀞𑀺𑀢𑀢𑁆𑀢𑀸 𑀢𑀣𑀸 𑀯𑀤𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀩𑀼𑀤𑁆𑀥𑀸 𑀧𑀦 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

‘‘𑀧𑀼𑀘𑁆𑀙𑀸𑀯𑀼𑀲𑁄 𑀬𑀤𑀸𑀓𑀗𑁆𑀔𑀲𑀻’’𑀢𑀺𑀆𑀤𑀻𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀬𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦 𑀆𑀕𑀢𑀸𑀦𑀺, 𑀢𑀁 𑀤𑀲𑁆𑀲𑀦𑀢𑁆𑀣𑀁 ‘‘𑀬𑀓𑁆𑀔𑀦𑀭𑀺𑀦𑁆𑀤𑀤𑁂𑀯𑀲𑀫𑀡𑀩𑁆𑀭𑀸𑀳𑁆𑀫𑀡𑀧𑀭𑀺𑀩𑁆𑀩𑀸𑀚𑀓𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 ‘‘𑀧𑀼𑀘𑁆𑀙𑀸𑀯𑀼𑀲𑁄 𑀬𑀤𑀸𑀓𑀗𑁆𑀔𑀲𑀻’’𑀢𑀺 𑀆𑀴𑀯𑀓𑀲𑁆𑀲 𑀬𑀓𑁆𑀔𑀲𑁆𑀲 ¶ 𑀑𑀓𑀸𑀲𑀓𑀭𑀡𑀁, ‘‘𑀧𑀼𑀘𑁆𑀙 𑀫𑀳𑀸𑀭𑀸𑀚𑀸’’𑀢𑀺 𑀦𑀭𑀺𑀦𑁆𑀤𑀸𑀦𑀁, ‘‘𑀧𑀼𑀘𑁆𑀙 𑀯𑀸𑀲𑀯𑀸’’𑀢𑀺𑀆𑀤𑀺 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲, ‘‘𑀢𑁂𑀦 𑀳𑀻’’𑀢𑀺𑀆𑀤𑀺 𑀲𑀫𑀡𑀸𑀦𑀁, ‘‘𑀩𑀸𑀯𑀭𑀺𑀲𑁆𑀲 𑀘𑀸’’𑀢𑀺𑀆𑀤𑀺 𑀩𑁆𑀭𑀸𑀳𑁆𑀫𑀡𑀸𑀦𑀁, ‘‘𑀧𑀼𑀘𑁆𑀙 𑀫𑀁 𑀲𑀪𑀺𑀬𑀸’’𑀢𑀺𑀆𑀤𑀺 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀑𑀓𑀸𑀲𑀓𑀭𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀸𑀲𑀯𑀸𑀢𑀺 𑀤𑁂𑀯𑀸𑀦𑀫𑀺𑀦𑁆𑀤𑀸𑀮𑀧𑀦𑀁. 𑀢𑀤𑁂𑀢𑀜𑁆𑀳𑀺 𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑁂. 𑀫𑀦𑀲𑀺𑀘𑁆𑀙𑀲𑀻𑀢𑀺 𑀫𑀦𑀲𑀸 𑀇𑀘𑁆𑀙𑀲𑀺.

𑀓𑀢𑀸𑀯𑀓𑀸𑀲𑀸𑀢𑀺 𑀬𑀲𑁆𑀫𑀸 𑀢𑀼𑀫𑁆𑀳𑁂 𑀫𑀬𑀸 𑀓𑀢𑁄𑀓𑀸𑀲𑀸, 𑀢𑀲𑁆𑀫𑀸 𑀩𑀸𑀯𑀭𑀺𑀲𑁆𑀲 𑀘 𑀢𑀼𑀬𑁆𑀳𑀁 𑀅𑀚𑀺𑀢𑀲𑁆𑀲 𑀘 𑀲𑀩𑁆𑀩𑁂𑀲𑀜𑁆𑀘 𑀲𑁂𑀲𑀸𑀦𑀁 𑀬𑀁 𑀓𑀺𑀜𑁆𑀘𑀺 𑀲𑀩𑁆𑀩𑀁 𑀲𑀁𑀲𑀬𑀁 𑀬𑀣𑀸 𑀫𑀦𑀲𑀸 𑀇𑀘𑁆𑀙𑀣, 𑀢𑀣𑀸 𑀧𑀼𑀘𑁆𑀙𑀯𑁆𑀳𑁄 𑀧𑀼𑀘𑁆𑀙𑀣𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 𑀩𑀸𑀯𑀭𑀺𑀲𑁆𑀲 𑀲𑀁𑀲𑀬𑀁 𑀫𑀦𑀲𑀸 𑀧𑀼𑀘𑁆𑀙𑀯𑁆𑀳𑁄, 𑀢𑀼𑀫𑁆𑀳𑀸𑀓𑀁 𑀧𑀦 𑀲𑀩𑁆𑀩𑁂𑀲𑀁 𑀲𑀁𑀲𑀬𑀁 𑀫𑀦𑀲𑀸 𑀘 ¶ 𑀅𑀜𑁆𑀜𑀣𑀸 𑀘 𑀬𑀣𑀸 𑀇𑀘𑁆𑀙𑀣, 𑀢𑀣𑀸 𑀧𑀼𑀘𑁆𑀙𑀯𑁆𑀳𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀩𑀸𑀯𑀭𑀻 𑀳𑀺 ‘‘𑀅𑀢𑁆𑀢𑀦𑁄 𑀲𑀁𑀲𑀬𑀁 𑀫𑀦𑀲𑀸𑀯 𑀧𑀼𑀘𑁆𑀙𑀣𑀸’’𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁂 𑀆𑀡𑀸𑀧𑁂𑀲𑀺. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀅𑀦𑀸𑀯𑀭𑀡𑀤𑀲𑁆𑀲𑀸𑀯𑀻, 𑀬𑀤𑀺 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺;

𑀫𑀦𑀲𑀸 𑀧𑀼𑀘𑁆𑀙𑀺𑀢𑁂 𑀧𑀜𑁆𑀳𑁂, 𑀯𑀸𑀘𑀸𑀬 𑀯𑀺𑀲𑁆𑀲𑀚𑁂𑀲𑁆𑀲𑀢𑀻’’𑀢𑀺. (𑀲𑀼. 𑀦𑀺. 𑁧𑁦𑁧𑁧);

𑀢𑀤𑁂𑀢𑀁 𑀧𑀸𑀭𑀸𑀬𑀦𑀯𑀕𑁆𑀕𑁂. 𑀢𑀣𑀸 ‘‘𑀧𑀼𑀘𑁆𑀙 𑀫𑀁 𑀲𑀪𑀺𑀬𑀸’’𑀢𑀺𑀆𑀤𑀺𑀧𑀺.

𑀩𑀼𑀤𑁆𑀥𑀪𑀽𑀫𑀺𑀦𑁆𑀢𑀺 𑀩𑀼𑀤𑁆𑀥𑀝𑁆𑀞𑀸𑀦𑀁, 𑀆𑀲𑀯𑀓𑁆𑀔𑀬𑀜𑀸𑀡𑀁, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘. 𑀩𑁄𑀥𑀺𑀲𑀢𑁆𑀢𑀪𑀽𑀫𑀺 𑀦𑀸𑀫 𑀩𑁄𑀥𑀺𑀲𑀢𑁆𑀢𑀝𑁆𑀞𑀸𑀦𑀁 𑀧𑀸𑀭𑀫𑀻𑀲𑀫𑁆𑀪𑀭𑀡𑀜𑀸𑀡𑀁, 𑀪𑀽𑀫𑀺𑀲𑀤𑁆𑀤𑁄 𑀯𑀸 𑀅𑀯𑀢𑁆𑀣𑀸𑀯𑀸𑀘𑀓𑁄, 𑀩𑀼𑀤𑁆𑀥𑀸𑀯𑀢𑁆𑀣𑀁, 𑀩𑁄𑀥𑀺𑀲𑀢𑁆𑀢𑀸𑀯𑀢𑁆𑀣𑀸𑀬𑀦𑁆𑀢𑀺 𑀘 𑀅𑀢𑁆𑀣𑁄. 𑀏𑀓𑀢𑁆𑀢𑀦𑀬𑁂𑀦 𑀳𑀺 𑀧𑀯𑀢𑁆𑀢𑁂𑀲𑀼 𑀔𑀦𑁆𑀥𑁂𑀲𑀼 𑀅𑀯𑀢𑁆𑀣𑀸𑀬𑁂𑀯 𑀢𑀁 𑀢𑀤𑀸𑀓𑀸𑀭𑀦𑀺𑀲𑁆𑀲𑀺𑀢𑀸.

𑀬𑁄 𑀪𑀕𑀯𑀸 𑀩𑁄𑀥𑀺𑀲𑀢𑁆𑀢𑀪𑀽𑀫𑀺𑀬𑀁 𑀧𑀤𑁂𑀲𑀜𑀸𑀡𑁂 𑀞𑀺𑀢𑁄 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀺, 𑀢𑀲𑁆𑀲 𑀢𑀤𑁂𑀯 𑀅𑀘𑁆𑀙𑀭𑀺𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀣𑀦𑁆𑀢𑀺 𑀆𑀳 ‘‘𑀓𑁄𑀡𑁆𑀟𑀜𑁆𑀜 𑀧𑀜𑁆𑀳𑀸𑀦𑀻’’𑀢𑀺𑀆𑀤𑀺. 𑀢𑀢𑁆𑀣 𑀓𑁄𑀡𑁆𑀟𑀜𑁆𑀜𑀸𑀢𑀺 𑀕𑁄𑀢𑁆𑀢𑀯𑀲𑁂𑀦 𑀲𑀭𑀪𑀗𑁆𑀕𑀫𑀸𑀮𑀧𑀦𑁆𑀢𑀺. 𑀯𑀺𑀬𑀸𑀓𑀭𑁄𑀳𑀻𑀢𑀺 𑀩𑁆𑀬𑀸𑀓𑀭𑁄𑀳𑀺. 𑀲𑀸𑀥𑀼𑀭𑀽𑀧𑀸𑀢𑀺 𑀲𑀸𑀥𑀼𑀲𑀪𑀸𑀯𑀸. 𑀥𑀫𑁆𑀫𑁄𑀢𑀺 𑀲𑀦𑀦𑁆𑀢𑀦𑁄 𑀧𑀯𑁂𑀡𑀻𑀥𑀫𑁆𑀫𑁄. 𑀬𑀦𑁆𑀢𑀺 𑀆𑀕𑀫𑀦𑀓𑀺𑀭𑀺𑀬𑀸𑀧𑀭𑀸𑀫𑀲𑀦𑀁, 𑀬𑁂𑀦 𑀯𑀸 𑀓𑀸𑀭𑀡𑁂𑀦 𑀆𑀕𑀘𑁆𑀙𑀢𑀺, 𑀢𑁂𑀦 𑀯𑀺𑀬𑀸𑀓𑀭𑁄𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀼𑀤𑁆𑀥𑀦𑁆𑀢𑀺 𑀲𑀻𑀮𑀧𑀜𑁆𑀜𑀸𑀤𑀻𑀳𑀺 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀁, 𑀕𑀭𑀼𑀦𑁆𑀢𑀺 𑀅𑀢𑁆𑀣𑁄. 𑀏𑀲 𑀪𑀸𑀭𑁄𑀢𑀺 𑀲𑀁𑀲𑀬𑀼𑀧𑀘𑁆𑀙𑁂𑀤𑀦𑀲𑀗𑁆𑀔𑀸𑀢𑁄 𑀏𑀲𑁄 𑀪𑀸𑀭𑁄, 𑀆𑀕𑀢𑁄 𑀪𑀸𑀭𑁄 𑀢𑀬𑀸 𑀅𑀯𑀲𑁆𑀲𑀁 𑀯𑀳𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑀬𑀸 ¶ 𑀓𑀢𑀸𑀯𑀓𑀸𑀲𑀸 𑀪𑁄𑀦𑁆𑀢𑁄 𑀧𑀼𑀘𑁆𑀙𑀦𑁆𑀢𑀼. 𑀓𑀲𑁆𑀫𑀸𑀢𑀺 𑀘𑁂? 𑀅𑀳𑀜𑁆𑀳𑀺 𑀢𑀁 𑀢𑀁 𑀯𑁄 𑀩𑁆𑀬𑀸𑀓𑀭𑀺𑀲𑁆𑀲𑀁 𑀜𑀢𑁆𑀯𑀸 𑀲𑀬𑀁 𑀮𑁄𑀓𑀫𑀺𑀫𑀁, 𑀧𑀭𑀜𑁆𑀘𑀸𑀢𑀺. 𑀲𑀬𑀦𑁆𑀢𑀺 𑀘 𑀲𑀬𑀫𑁂𑀯 𑀧𑀭𑀽𑀧𑀤𑁂𑀲𑁂𑀦 𑀯𑀺𑀦𑀸. 𑀏𑀯𑀁 𑀲𑀭𑀪𑀗𑁆𑀕𑀓𑀸𑀮𑁂 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀜𑁆𑀳𑀸𑀦𑀦𑁆𑀢𑀺 𑀥𑀫𑁆𑀫𑀬𑀸𑀕𑀧𑀜𑁆𑀳𑀸𑀦𑀁. 𑀅𑀦𑁆𑀢𑀓𑀭𑀦𑁆𑀢𑀺 𑀦𑀺𑀝𑁆𑀞𑀸𑀦𑀓𑀭𑀁. 𑀲𑀼𑀘𑀺𑀭𑀢𑁂𑀦𑀸𑀢𑀺 𑀏𑀯𑀁 𑀦𑀸𑀫𑀓𑁂𑀦 𑀩𑁆𑀭𑀸𑀳𑁆𑀫𑀡𑁂𑀦. 𑀧𑀼𑀝𑁆𑀞𑀼𑀦𑁆𑀢𑀺 𑀧𑀼𑀘𑁆𑀙𑀺𑀢𑀼𑀁. 𑀚𑀸𑀢𑀺𑀬𑀸𑀢𑀺 𑀧𑀝𑀺𑀲𑀦𑁆𑀥𑀺𑀬𑀸, ‘‘𑀯𑀺𑀚𑀸𑀢𑀺𑀬𑀸’’𑀢𑀺𑀧𑀺 𑀯𑀤𑀦𑁆𑀢𑀺. 𑀧𑀁𑀲𑀼𑀁 𑀓𑀻𑀴𑀦𑁆𑀢𑁄 𑀲𑀫𑁆𑀪𑀯𑀓𑀼𑀫𑀸𑀭𑁄 𑀦𑀺𑀲𑀺𑀦𑁆𑀦𑁄𑀯 𑀳𑀼𑀢𑁆𑀯𑀸 𑀧𑀯𑀸𑀭𑁂𑀲𑀻𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀢𑀕𑁆𑀖𑀸𑀢𑀺 𑀏𑀓𑀁𑀲𑀢𑁆𑀣𑁂 𑀦𑀺𑀧𑀸𑀢𑁄. 𑀬𑀣𑀸𑀧𑀺 𑀓𑀼𑀲𑀮𑁄 𑀢𑀣𑀸𑀢𑀺 𑀬𑀣𑀸 𑀲𑀩𑁆𑀩𑀥𑀫𑁆𑀫𑀓𑀼𑀲𑀮𑁄 𑀲𑀩𑁆𑀩𑀥𑀫𑁆𑀫𑀯𑀺𑀤𑀽 𑀩𑀼𑀤𑁆𑀥𑁄 𑀚𑀸𑀦𑀸𑀢𑀺 𑀓𑀣𑁂𑀢𑀺, 𑀢𑀣𑀸 𑀢𑁂 𑀅𑀳𑀫𑀓𑁆𑀔𑀺𑀲𑁆𑀲𑀦𑁆𑀢𑀺 𑀅𑀢𑁆𑀣𑁄. 𑀚𑀸𑀦𑀸𑀢𑀺-𑀲𑀤𑁆𑀤𑁄 𑀳𑀺 𑀇𑀥 𑀲𑀫𑁆𑀩𑀦𑁆𑀥𑀫𑀼𑀧𑀕𑀘𑁆𑀙𑀢𑀺 ¶ . 𑀬𑀣𑀸𑀳 ‘‘𑀬𑁂𑀦 𑀬𑀲𑁆𑀲 𑀳𑀺 𑀲𑀫𑁆𑀩𑀦𑁆𑀥𑁄, 𑀤𑀽𑀭𑀝𑁆𑀞𑀫𑁆𑀧𑀺 𑀘 𑀢𑀲𑁆𑀲 𑀢’’𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸). 𑀚𑀸𑀦𑀦𑀸 𑀘𑁂𑀢𑁆𑀣 𑀓𑀣𑀦𑀸. 𑀬𑀣𑀸 ‘‘𑀇𑀫𑀺𑀦𑀸 𑀇𑀫𑀁 𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄 𑀆𑀘𑀭𑀺𑀬𑁂𑀦. 𑀭𑀸𑀚𑀸 𑀘 𑀔𑁄 𑀢𑀁 𑀬𑀤𑀺 𑀓𑀸𑀳𑀢𑀺 𑀯𑀸, 𑀦 𑀯𑀸𑀢𑀺 𑀬𑁄 𑀢𑀁 𑀇𑀥 𑀧𑀼𑀘𑁆𑀙𑀺𑀢𑀼𑀁 𑀧𑁂𑀲𑁂𑀲𑀺, 𑀲𑁄 𑀓𑁄𑀭𑀩𑁆𑀬𑀭𑀸𑀚𑀸 𑀢𑀁 𑀢𑀬𑀸 𑀧𑀼𑀘𑁆𑀙𑀺𑀢𑀫𑀢𑁆𑀣𑀁, 𑀢𑀬𑀸 𑀯𑀸 𑀧𑀼𑀝𑁆𑀞𑁂𑀦 𑀫𑀬𑀸 𑀅𑀓𑁆𑀔𑀸𑀢𑀫𑀢𑁆𑀣𑀁 𑀬𑀤𑀺 𑀓𑀭𑁄𑀢𑀼 𑀯𑀸, 𑀦 𑀯𑀸 𑀓𑀭𑁄𑀢𑀼, 𑀅𑀳𑀁 𑀧𑀦 𑀬𑀣𑀸𑀥𑀫𑁆𑀫𑀁 𑀢𑁂 𑀅𑀓𑁆𑀔𑀺𑀲𑁆𑀲𑀁 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀚𑀸𑀢𑀓𑀝𑁆𑀞𑀓𑀣𑀸𑀬𑀁 𑀧𑀦 𑁋

‘‘𑀭𑀸𑀚𑀸 𑀘 𑀔𑁄 𑀢𑀦𑁆𑀢𑀺 𑀅𑀳𑀁 𑀢𑀁 𑀧𑀜𑁆𑀳𑀁 𑀬𑀣𑀸 𑀢𑀼𑀫𑁆𑀳𑀸𑀓𑀁 𑀭𑀸𑀚𑀸 𑀚𑀸𑀦𑀸𑀢𑀺 𑀚𑀸𑀦𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀣𑀸 𑀅𑀓𑁆𑀔𑀺𑀲𑁆𑀲𑀁. 𑀢𑀢𑁄 𑀉𑀢𑁆𑀢𑀭𑀺 𑀭𑀸𑀚𑀸 𑀬𑀣𑀸 𑀚𑀸𑀦𑀸𑀢𑀺, 𑀢𑀣𑀸 𑀬𑀤𑀺 𑀓𑀭𑀺𑀲𑁆𑀲𑀢𑀺 𑀯𑀸, 𑀦 𑀯𑀸 𑀓𑀭𑀺𑀲𑁆𑀲𑀢𑀺, 𑀓𑀭𑁄𑀦𑁆𑀢𑀲𑁆𑀲 𑀯𑀸 𑀅𑀓𑀭𑁄𑀦𑁆𑀢𑀲𑁆𑀲 𑀯𑀸 𑀢𑀲𑁆𑀲𑁂𑀯𑁂𑀢𑀁 𑀪𑀯𑀺𑀲𑁆𑀲𑀢𑀺, 𑀫𑀬𑁆𑀳𑀁 𑀧𑀦 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀻’’𑀢𑀺 (𑀚𑀸. 𑀅𑀝𑁆𑀞. 𑁫.𑁧𑁬.𑁧𑁭𑁨) 𑁋

𑀚𑀸𑀦𑀸𑀢𑀺-𑀲𑀤𑁆𑀤𑁄 𑀯𑀸𑀓𑁆𑀬𑀤𑁆𑀯𑀬𑀲𑀸𑀥𑀸𑀭𑀡𑀯𑀲𑁂𑀦 𑀯𑀼𑀢𑁆𑀢𑁄.

𑁧𑁬𑁩. 𑀲𑀺𑀧𑁆𑀧𑀫𑁂𑀯 𑀲𑀺𑀧𑁆𑀧𑀸𑀬𑀢𑀦𑀁 𑀆𑀬𑀢𑀦𑀲𑀤𑁆𑀤𑀲𑁆𑀲 𑀢𑀩𑁆𑀪𑀸𑀯𑀯𑀼𑀢𑁆𑀢𑀺𑀢𑁆𑀢𑀸. 𑀅𑀧𑀺𑀘 𑀲𑀺𑀓𑁆𑀔𑀺𑀢𑀩𑁆𑀩𑀢𑀸𑀬 𑀲𑀺𑀧𑁆𑀧𑀜𑁆𑀘 𑀢𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀯𑀼𑀢𑁆𑀢𑀺𑀬𑀸 𑀓𑀸𑀭𑀡𑀪𑀸𑀯𑀢𑁄, 𑀦𑀺𑀲𑁆𑀲𑀬𑀪𑀸𑀯𑀢𑁄 𑀯𑀸 𑀆𑀬𑀢𑀦𑀜𑁆𑀘𑀸𑀢𑀺 𑀲𑀺𑀧𑁆𑀧𑀸𑀬𑀢𑀦𑀁. 𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀏𑀓𑁄𑀯 𑀦𑀺𑀧𑀸𑀢𑁄, 𑀦𑀺𑀧𑀸𑀢𑀲𑀫𑀼𑀤𑀸𑀬𑁄 𑀯𑀸. 𑀢𑀲𑁆𑀲 𑀢𑁂 𑀓𑀢𑀫𑁂𑀢𑀺 ¶ 𑀇𑀥 𑀅𑀢𑁆𑀣𑁄𑀢𑀺 𑀆𑀳 ‘‘𑀓𑀢𑀫𑁂 𑀧𑀦 𑀢𑁂’’𑀢𑀺. 𑀇𑀫𑁂 𑀓𑀢𑀫𑁂𑀢𑀺𑀧𑀺 𑀧𑀘𑁆𑀘𑁂𑀓𑀫𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣. 𑀇𑀤𑀜𑁆𑀘 𑀯𑀢𑁆𑀢𑀩𑁆𑀩𑀸𑀧𑁂𑀓𑁆𑀔𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑁂 𑀲𑀺𑀧𑁆𑀧𑀸𑀬𑀢𑀦𑀺𑀓𑀸 𑀓𑀢𑀫𑁂𑀢𑀺 𑀅𑀢𑁆𑀣𑁄. ‘‘𑀧𑀼𑀣𑀼𑀲𑀺𑀧𑁆𑀧𑀸𑀬𑀢𑀦𑀸𑀦𑀻’’𑀢𑀺 𑀳𑀺 𑀲𑀸𑀥𑀸𑀭𑀡𑀢𑁄 𑀲𑀺𑀧𑁆𑀧𑀸𑀦𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀉𑀧𑀭𑀺 𑀢𑀁𑀢𑀁𑀲𑀺𑀧𑁆𑀧𑀽𑀧𑀚𑀻𑀯𑀺𑀦𑁄𑀯 𑀦𑀺𑀤𑁆𑀤𑀺𑀝𑁆𑀞𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀓𑀣𑀸𑀬. 𑀓𑀲𑁆𑀫𑀸𑀢𑀺 𑀘𑁂? 𑀧𑀧𑀜𑁆𑀘𑀁 𑀧𑀭𑀺𑀳𑀭𑀺𑀢𑀼𑀓𑀸𑀫𑀢𑁆𑀢𑀸. 𑀅𑀜𑁆𑀜𑀣𑀸 𑀳𑀺 𑀬𑀣𑀸𑀥𑀺𑀧𑁆𑀧𑁂𑀢𑀸𑀦𑀺 𑀢𑀸𑀯 𑀲𑀺𑀧𑁆𑀧𑀸𑀬𑀢𑀦𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀢𑀁𑀢𑀁𑀲𑀺𑀧𑁆𑀧𑀽𑀧𑀚𑀻𑀯𑀺𑀦𑁄𑀧𑀺 𑀤𑀲𑁆𑀲𑁂𑀢𑀩𑁆𑀩𑀸 𑀲𑀺𑀬𑀼𑀁 𑀢𑁂𑀲𑀫𑁂𑀯𑁂𑀢𑁆𑀣 𑀧𑀥𑀸𑀦𑀢𑁄 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀏𑀯𑀜𑁆𑀘 𑀲𑀢𑀺 𑀓𑀣𑀸𑀧𑀧𑀜𑁆𑀘𑁄 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀢𑀁 𑀧𑀧𑀜𑁆𑀘𑀁 𑀧𑀭𑀺𑀳𑀭𑀺𑀢𑀼𑀁 𑀲𑀺𑀧𑁆𑀧𑀽𑀧𑀚𑀻𑀯𑀻𑀳𑀺 𑀢𑀁𑀢𑀁𑀲𑀺𑀧𑁆𑀧𑀸𑀬𑀢𑀦𑀸𑀦𑀺 𑀲𑀗𑁆𑀕𑀳𑁂𑀢𑁆𑀯𑀸 𑀏𑀯𑀫𑀸𑀳𑀸𑀢𑀺 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀳𑀢𑁆𑀣𑀸𑀭𑁄𑀳𑀸𑀢𑀺𑀆𑀤𑀻𑀳𑀺 𑀬𑁂 𑀢𑀁 𑀢𑀁 𑀲𑀺𑀧𑁆𑀧𑀁 𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑀺, 𑀢𑁂 𑀤𑀲𑁆𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸𑀢𑀺 𑀆𑀳 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺. 𑀲𑀺𑀧𑁆𑀧𑀁 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑀻𑀢𑀺 𑀲𑀺𑀧𑁆𑀧𑀽𑀧𑀚𑀻𑀯𑀺𑀦𑁄.

𑀳𑀢𑁆𑀣𑀺𑀫𑀸𑀭𑁄𑀳𑀦𑁆𑀢𑀻𑀢𑀺 𑀳𑀢𑁆𑀣𑀸𑀭𑁄𑀳𑀸, 𑀳𑀢𑁆𑀣𑀸𑀭𑀼𑀴𑁆𑀳𑀬𑁄𑀥𑀸. 𑀳𑀢𑁆𑀣𑀺𑀁 𑀆𑀭𑁄𑀳𑀸𑀧𑀬𑀦𑁆𑀢𑀻𑀢𑀺 𑀳𑀢𑁆𑀣𑀸𑀭𑁄𑀳𑀸, 𑀳𑀢𑁆𑀣𑀸𑀘𑀭𑀺𑀬 𑀳𑀢𑁆𑀣𑀺𑀯𑁂𑀚𑁆𑀚 𑀳𑀢𑁆𑀣𑀺𑀫𑁂𑀡𑁆𑀟𑀸𑀤𑀬𑁄. 𑀬𑁂𑀦 𑀳𑀺 𑀧𑀬𑁄𑀕𑁂𑀦 𑀧𑀼𑀭𑀺𑀲𑁄 𑀳𑀢𑁆𑀣𑀺𑀦𑁄 𑀆𑀭𑁄𑀳𑀦𑀬𑁄𑀕𑁆𑀕𑁄 𑀳𑁄𑀢𑀺, 𑀢𑀁 𑀳𑀢𑁆𑀣𑀺𑀲𑁆𑀲 𑀧𑀬𑁄𑀕𑀁 𑀯𑀺𑀥𑀸𑀬𑀦𑁆𑀢𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑁂𑀢𑁂𑀲𑀁 𑀕𑀳𑀡𑀁. 𑀢𑁂𑀦𑀸𑀳 ‘‘𑀲𑀩𑁆𑀩𑁂𑀧𑀻’’𑀢𑀺𑀆𑀤𑀺. 𑀢𑀢𑁆𑀣 ¶ 𑀳𑀢𑁆𑀣𑀸𑀘𑀭𑀺𑀬𑀸 𑀦𑀸𑀫 𑀬𑁂 𑀳𑀢𑁆𑀣𑀺𑀦𑁄, 𑀳𑀢𑁆𑀣𑀸𑀭𑁄𑀳𑀓𑀸𑀦𑀜𑁆𑀘 𑀲𑀺𑀓𑁆𑀔𑀸𑀧𑀓𑀸. 𑀳𑀢𑁆𑀣𑀺𑀯𑁂𑀚𑁆𑀚𑀸 𑀦𑀸𑀫 𑀳𑀢𑁆𑀣𑀺𑀪𑀺𑀲𑀓𑁆𑀓𑀸. 𑀳𑀢𑁆𑀣𑀺𑀫𑁂𑀡𑁆𑀟𑀸 𑀦𑀸𑀫 𑀳𑀢𑁆𑀣𑀻𑀦𑀁 𑀧𑀸𑀤𑀭𑀓𑁆𑀔𑀓𑀸. 𑀳𑀢𑁆𑀣𑀺𑀁 𑀫𑀡𑁆𑀟𑀬𑀦𑁆𑀢𑀺 𑀭𑀓𑁆𑀔𑀦𑁆𑀢𑀻𑀢𑀺 𑀳𑀢𑁆𑀣𑀺𑀫𑀡𑁆𑀟𑀸, 𑀢𑁂𑀬𑁂𑀯 𑀳𑀢𑁆𑀣𑀺𑀫𑁂𑀡𑁆𑀟𑀸, 𑀳𑀢𑁆𑀣𑀺𑀁 𑀫𑀺𑀦𑁂𑀦𑁆𑀢𑀺 𑀲𑀫𑁆𑀫𑀸 𑀯𑀺𑀤𑀳𑀦𑁂𑀦 𑀳𑀺𑀁𑀲𑀦𑁆𑀢𑀻𑀢𑀺 𑀯𑀸 𑀳𑀢𑁆𑀣𑀺𑀫𑁂𑀡𑁆𑀟𑀸. 𑀆𑀤𑀺-𑀲𑀤𑁆𑀤𑁂𑀦 𑀳𑀢𑁆𑀣𑀻𑀦𑀁 𑀬𑀯𑀧𑀤𑀸𑀬𑀓𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀲𑁆𑀲𑀸𑀭𑁄𑀳𑀸𑀢𑀺 𑀏𑀢𑁆𑀣𑀸𑀧𑀺 𑀲𑀼𑀤𑁆𑀥𑀳𑁂𑀢𑀼𑀓𑀢𑁆𑀢𑀼𑀯𑀲𑁂𑀦 𑀬𑀣𑀸𑀯𑀼𑀢𑁆𑀢𑁄𑀯 𑀅𑀢𑁆𑀣𑁄. 𑀭𑀣𑁂 𑀦𑀺𑀬𑀼𑀢𑁆𑀢𑀸 𑀭𑀣𑀺𑀓𑀸. 𑀭𑀣𑀭𑀓𑁆𑀔𑀸 𑀦𑀸𑀫 𑀭𑀣𑀲𑁆𑀲 𑀆𑀡𑀺𑀭𑀓𑁆𑀔𑀓𑀸. 𑀥𑀦𑀼𑀁 𑀕𑀡𑁆𑀳𑀦𑁆𑀢𑀻𑀢𑀺 𑀥𑀦𑀼𑀕𑁆𑀕𑀳𑀸, 𑀇𑀲𑁆𑀲𑀸𑀲𑀸, 𑀥𑀦𑀼𑀁 𑀕𑀡𑁆𑀳𑀸𑀧𑁂𑀦𑁆𑀢𑀻𑀢𑀺 𑀥𑀦𑀼𑀕𑁆𑀕𑀳𑀸, 𑀥𑀦𑀼𑀲𑀺𑀧𑁆𑀧𑀲𑀺𑀓𑁆𑀔𑀸𑀧𑀓𑀸 𑀥𑀦𑁆𑀯𑀸𑀘𑀭𑀺𑀬𑀸.

𑀘𑁂𑀮𑁂𑀦 𑀘𑁂𑀮𑀧𑀝𑀸𑀓𑀸𑀬 𑀬𑀼𑀤𑁆𑀥𑁂 𑀅𑀓𑀦𑁆𑀢𑀺 𑀕𑀘𑁆𑀙𑀦𑁆𑀢𑀻𑀢𑀺 𑀘𑁂𑀮𑀓𑀸, 𑀚𑀬𑀤𑁆𑀥𑀚𑀕𑀸𑀳𑀓𑀸𑀢𑀺 𑀆𑀳 ‘‘𑀬𑁂 𑀬𑀼𑀤𑁆𑀥𑁂’’𑀢𑀺𑀆𑀤𑀺. 𑀚𑀬𑀥𑀚𑀦𑁆𑀢𑀺 𑀚𑀬𑀦𑀢𑁆𑀣𑀁, 𑀚𑀬𑀓𑀸𑀮𑁂 𑀯𑀸 𑀧𑀕𑁆𑀕𑀳𑀺𑀢𑀥𑀚𑀁. 𑀧𑀼𑀭𑀢𑁄𑀢𑀺 𑀲𑁂𑀦𑀸𑀬 𑀧𑀼𑀩𑁆𑀩𑁂. 𑀬𑀣𑀸 𑀢𑀣𑀸 𑀞𑀺𑀢𑁂 𑀲𑁂𑀦𑀺𑀓𑁂 𑀩𑁆𑀬𑀽𑀳𑀯𑀺𑀘𑀸𑀭𑀡𑀯𑀲𑁂𑀦 𑀢𑀢𑁄 𑀢𑀢𑁄 𑀘𑀮𑀬𑀦𑁆𑀢𑀺 𑀉𑀘𑁆𑀘𑀸𑀮𑁂𑀦𑁆𑀢𑀻𑀢𑀺 𑀘𑀮𑀓𑀸𑀢𑀺 𑀯𑀼𑀢𑁆𑀢𑀁 ‘‘𑀇𑀥 𑀭𑀜𑁆𑀜𑁄’’𑀢𑀺𑀆𑀤𑀺. 𑀲𑀓𑀼𑀡𑀕𑁆𑀖𑀺𑀆𑀤𑀬𑁄 𑀯𑀺𑀬 𑀫𑀁𑀲𑀧𑀺𑀡𑁆𑀟𑀁 𑀧𑀭𑀲𑁂𑀦𑀸𑀲𑀫𑀽𑀳𑀲𑀗𑁆𑀔𑀸𑀢𑀁 𑀧𑀺𑀡𑁆𑀟𑀁 𑀲𑀸𑀳𑀲𑀺𑀓𑀢𑀸𑀬 𑀙𑁂𑀢𑁆𑀯𑀸 𑀙𑁂𑀢𑁆𑀯𑀸 ¶ 𑀤𑀬𑀦𑁆𑀢𑀺 𑀉𑀧𑁆𑀧𑀢𑀺𑀢𑁆𑀯𑀸 𑀉𑀧𑁆𑀧𑀢𑀺𑀢𑁆𑀯𑀸 𑀦𑀺𑀕𑁆𑀕𑀘𑁆𑀙𑀦𑁆𑀢𑀻𑀢𑀺 𑀧𑀺𑀡𑁆𑀟𑀤𑀸𑀬𑀓𑀸. 𑀢𑁂𑀦𑀸𑀳 ‘‘𑀢𑁂 𑀓𑀺𑀭𑀸’’𑀢𑀺𑀆𑀤𑀺. 𑀲𑀸𑀳𑀲𑀁 𑀓𑀭𑁄𑀦𑁆𑀢𑀻𑀢𑀺 𑀲𑀸𑀳𑀲𑀺𑀓𑀸, 𑀢𑁂𑀬𑁂𑀯 𑀫𑀳𑀸𑀬𑁄𑀥𑀸. 𑀧𑀺𑀡𑁆𑀟𑀫𑀺𑀯𑀸𑀢𑀺 𑀢𑀸𑀮𑀨𑀮𑀧𑀺𑀡𑁆𑀟𑀫𑀺𑀯𑀸𑀢𑀺 𑀯𑀤𑀦𑁆𑀢𑀺, ‘‘𑀫𑀁𑀲𑀧𑀺𑀡𑁆𑀟𑀫𑀺𑀯𑀸’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁧𑁬𑁩) 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁. 𑀲𑀩𑁆𑀩𑀢𑁆𑀣 ‘‘𑀆𑀘𑀭𑀺𑀬𑁂𑀦𑀸’’𑀢𑀺 𑀯𑀼𑀢𑁆𑀢𑁂 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁄𑀯 𑀕𑀳𑁂𑀢𑀩𑁆𑀩𑁄. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀺𑀡𑁆𑀟𑁂 𑀚𑀦𑀲𑀫𑀽𑀳𑀲𑀗𑁆𑀔𑀸𑀢𑁂 𑀲𑀫𑁆𑀫𑀤𑁆𑀤𑁂 𑀤𑀬𑀦𑁆𑀢𑀺 𑀉𑀧𑁆𑀧𑀢𑀦𑁆𑀢𑀸 𑀯𑀺𑀬 𑀕𑀘𑁆𑀙𑀦𑁆𑀢𑀻𑀢𑀺 𑀧𑀺𑀡𑁆𑀟𑀤𑀸𑀬𑀓𑀸, 𑀤𑀬-𑀲𑀤𑁆𑀤𑁄 𑀕𑀢𑀺𑀬𑀁, 𑀅𑀬-𑀲𑀤𑁆𑀤𑀲𑁆𑀲 𑀯𑀸 𑀤-𑀓𑀸𑀭𑀸𑀕𑀫𑁂𑀦 𑀦𑀺𑀧𑁆𑀨𑀢𑁆𑀢𑀺.

𑀉𑀕𑁆𑀕𑀢𑀼𑀕𑁆𑀕𑀢𑀸𑀢𑀺 𑀲𑀗𑁆𑀕𑀸𑀫𑀁 𑀧𑀢𑁆𑀯𑀸 𑀚𑀯𑀧𑀭𑀓𑁆𑀓𑀫𑀸𑀤𑀺𑀯𑀲𑁂𑀦 𑀅𑀢𑀺𑀯𑀺𑀬 𑀉𑀕𑁆𑀕𑀢𑀸. 𑀢𑀤𑁂𑀯𑀸𑀢𑀺 𑀧𑀭𑁂𑀳𑀺 𑀯𑀼𑀢𑁆𑀢𑀁 𑀢𑀫𑁂𑀯 𑀲𑀻𑀲𑀁 𑀯𑀸 𑀆𑀯𑀼𑀥𑀁 𑀯𑀸. 𑀧𑀓𑁆𑀔𑀦𑁆𑀤𑀦𑁆𑀢𑀻𑀢𑀺 𑀯𑀻𑀭𑀲𑀽𑀭𑀪𑀸𑀯𑁂𑀦 𑀅𑀲𑀚𑁆𑀚𑀫𑀸𑀦𑀸 𑀧𑀭𑀲𑁂𑀦𑀫𑀦𑀼𑀧𑀯𑀺𑀲𑀦𑁆𑀢𑀺. 𑀣𑀸𑀫𑀚𑀯𑀩𑀮𑀧𑀭𑀓𑁆𑀓𑀫𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀫𑀳𑀸𑀦𑀸𑀕𑀲𑀤𑀺𑀲𑀢𑀸. 𑀢𑁂𑀦𑀸𑀳 ‘‘𑀳𑀢𑁆𑀣𑀺𑀆𑀤𑀻𑀲𑀼𑀧𑀻’’𑀢𑀺𑀆𑀤𑀺. 𑀏𑀓𑀦𑁆𑀢𑀲𑀽𑀭𑀸𑀢𑀺 𑀏𑀓𑀘𑀭𑀲𑀽𑀭𑀸 𑀅𑀦𑁆𑀢𑀲𑀤𑁆𑀤𑀲𑁆𑀲 𑀢𑀩𑁆𑀪𑀸𑀯𑀯𑀼𑀢𑁆𑀢𑀺𑀢𑁄, 𑀲𑀽𑀭𑀪𑀸𑀯𑁂𑀦 𑀏𑀓𑀸𑀓𑀺𑀦𑁄 𑀳𑀼𑀢𑁆𑀯𑀸 𑀬𑀼𑀚𑁆𑀛𑀦𑀓𑀸𑀢𑀺 𑀅𑀢𑁆𑀣𑁄. 𑀲𑀚𑀸𑀮𑀺𑀓𑀸𑀢𑀺 𑀲𑀯𑀫𑁆𑀫𑀺𑀓𑀸. 𑀲𑀦𑁆𑀦𑀸𑀳𑁄 𑀓𑀗𑁆𑀓𑀝𑁄 𑀯𑀫𑁆𑀫𑀁 𑀓𑀯𑀘𑁄 𑀉𑀭𑀘𑁆𑀙𑀤𑁄 𑀚𑀸𑀮𑀺𑀓𑀸𑀢𑀺 𑀳𑀺 𑀅𑀢𑁆𑀣𑀢𑁄 𑀏𑀓𑀁. 𑀲𑀘𑀫𑁆𑀫𑀺𑀓𑀸𑀢𑀺 𑀚𑀸𑀮𑀺𑀓𑀸 𑀯𑀺𑀬 𑀲𑀭𑀻𑀭𑀧𑀭𑀺𑀢𑁆𑀢𑀸𑀡𑁂𑀦 𑀘𑀫𑁆𑀫𑁂𑀦 𑀲𑀘𑀫𑁆𑀫𑀺𑀓𑀸. 𑀘𑀫𑁆𑀫𑀓𑀜𑁆𑀘𑀼𑀓𑀦𑁆𑀢𑀺 𑀘𑀫𑁆𑀫𑀫𑀬𑀓𑀜𑁆𑀘𑀼𑀓𑀁. 𑀧𑀯𑀺𑀲𑀺𑀢𑁆𑀯𑀸𑀢𑀺 𑀢𑀲𑁆𑀲 𑀅𑀦𑁆𑀢𑁄 𑀳𑀼𑀢𑁆𑀯𑀸, 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀭𑀧𑀭𑀺𑀢𑁆𑀢𑀸𑀡𑀁 𑀘𑀫𑁆𑀫𑀦𑁆𑀢𑀺 𑀘𑀫𑁆𑀫𑀧𑀝𑀺𑀲𑀺𑀩𑁆𑀩𑀺𑀢𑀁 𑀘𑁂𑀮𑀓𑀁, 𑀘𑀫𑁆𑀫𑀫𑀬𑀁 𑀯𑀸 𑀨𑀮𑀓𑀁. 𑀩𑀮𑀯𑀲𑀺𑀦𑁂𑀳𑀸𑀢𑀺 𑀲𑀸𑀫𑀺𑀦𑀺 𑀅𑀢𑀺𑀲𑀬𑀧𑁂𑀫𑀸. 𑀖𑀭𑀤𑀸𑀲𑀬𑁄𑀥𑀸𑀢𑀺 𑀅𑀦𑁆𑀢𑁄𑀚𑀸𑀢𑀤𑀸𑀲𑀧𑀭𑀺𑀬𑀸𑀧𑀦𑁆𑀦𑀸 𑀬𑁄𑀥𑀸, ‘‘𑀖𑀭𑀤𑀸𑀲𑀺𑀓𑀧𑀼𑀢𑁆𑀢𑀸’’𑀢𑀺𑀧𑀺 𑀧𑀸𑀞𑁄, 𑀅𑀦𑁆𑀢𑁄𑀚𑀸𑀢𑀤𑀸𑀲𑀻𑀦𑀁 𑀧𑀼𑀢𑁆𑀢𑀸𑀢𑀺 𑀅𑀢𑁆𑀣𑁄.

𑀆𑀴𑀸𑀭𑀁 ¶ 𑀯𑀼𑀘𑁆𑀘𑀢𑀺 𑀫𑀳𑀸𑀦𑀲𑀁, 𑀢𑀢𑁆𑀣 𑀦𑀺𑀬𑀼𑀢𑁆𑀢𑀸 𑀆𑀴𑀸𑀭𑀺𑀓𑀸. 𑀧𑀽𑀯𑀺𑀓𑀸𑀢𑀺 𑀧𑀽𑀯𑀲𑀫𑁆𑀧𑀸𑀤𑀓𑀸, 𑀬𑁂 𑀧𑀽𑀯𑀫𑁂𑀯 𑀦𑀸𑀦𑀧𑁆𑀧𑀓𑀸𑀭𑀢𑁄 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑁆𑀢𑀸 𑀚𑀻𑀯𑀦𑁆𑀢𑀺. 𑀓𑁂𑀲𑀦𑀔𑀲𑀡𑁆𑀞𑀧𑀦𑀸𑀤𑀺𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀁 𑀅𑀮𑀗𑁆𑀓𑀸𑀭𑀯𑀺𑀥𑀺𑀁 𑀓𑀧𑁆𑀧𑁂𑀦𑁆𑀢𑀺 𑀲𑀁𑀯𑀺𑀤𑀳𑀦𑁆𑀢𑀻𑀢𑀺 𑀓𑀧𑁆𑀧𑀓𑀸. 𑀘𑀼𑀡𑁆𑀡𑀯𑀺𑀮𑁂𑀧𑀦𑀸𑀤𑀻𑀳𑀺 𑀫𑀮𑀳𑀭𑀡𑀯𑀡𑁆𑀡𑀲𑀫𑁆𑀧𑀸𑀤𑀦𑀯𑀺𑀥𑀺𑀦𑀸 𑀦𑁆𑀳𑀸𑀧𑁂𑀦𑁆𑀢𑀺 𑀦𑀳𑀸𑀦𑀁 𑀓𑀭𑁄𑀦𑁆𑀢𑀻𑀢𑀺 𑀦𑁆𑀳𑀸𑀧𑀺𑀓𑀸. 𑀦𑀯𑀦𑁆𑀢𑀸𑀤𑀺𑀯𑀺𑀥𑀺𑀦𑀸 𑀧𑀯𑀢𑁆𑀢𑁄 𑀕𑀡𑀦𑀕𑀦𑁆𑀣𑁄 𑀅𑀦𑁆𑀢𑀭𑀸 𑀙𑀺𑀤𑁆𑀤𑀸𑀪𑀸𑀯𑁂𑀦 𑀅𑀘𑁆𑀙𑀺𑀤𑁆𑀤𑀓𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀤𑁂𑀯 𑀧𑀞𑁂𑀦𑁆𑀢𑀻𑀢𑀺 𑀅𑀘𑁆𑀙𑀺𑀤𑁆𑀤𑀓𑀧𑀸𑀞𑀓𑀸. 𑀳𑀢𑁆𑀣𑁂𑀦 𑀅𑀥𑀺𑀧𑁆𑀧𑀸𑀬𑀯𑀺𑀜𑁆𑀜𑀸𑀧𑀦𑀁, 𑀕𑀡𑀦𑀁 𑀯𑀸 𑀳𑀢𑁆𑀣𑀫𑀼𑀤𑁆𑀤𑀸. 𑀅𑀗𑁆𑀕𑀼𑀮𑀺𑀲𑀗𑁆𑀓𑁄𑀘𑀦𑀜𑁆𑀳𑀺 𑀫𑀼𑀤𑁆𑀤𑀸𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀦 𑀘 𑀯𑀺𑀜𑁆𑀜𑀸𑀧𑀦𑀁, 𑀕𑀡𑀦𑀁 𑀯𑀸 𑀳𑁄𑀢𑀺. 𑀳𑀢𑁆𑀣𑀲𑀤𑁆𑀤𑁄 𑀘𑁂𑀢𑁆𑀣 𑀢𑀤𑁂𑀓𑀤𑁂𑀲𑁂𑀲𑀼 𑀅𑀗𑁆𑀕𑀼𑀮𑀻𑀲𑀼 𑀤𑀝𑁆𑀞𑀩𑁆𑀩𑁄 ‘‘𑀦 𑀪𑀼𑀜𑁆𑀚𑀫𑀸𑀦𑁄 𑀲𑀩𑁆𑀩𑀁 ¶ 𑀳𑀢𑁆𑀣𑀁 𑀫𑀼𑀔𑁂 𑀧𑀓𑁆𑀔𑀺𑀧𑀺𑀲𑁆𑀲𑀸𑀫𑀻’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁬𑁧𑁮) 𑀯𑀺𑀬, 𑀢𑀫𑀼𑀧𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑀻𑀢𑀺 𑀫𑀼𑀤𑁆𑀤𑀺𑀓𑀸. 𑀢𑁂𑀦𑀸𑀳 ‘‘𑀳𑀢𑁆𑀣𑀫𑀼𑀤𑁆𑀤𑀸𑀬𑀸’’𑀢𑀺𑀆𑀤𑀺.

𑀅𑀬𑀓𑀸𑀭𑁄 𑀓𑀫𑁆𑀫𑀸𑀭𑀓𑀸𑀭𑀓𑁄. 𑀤𑀦𑁆𑀢𑀓𑀸𑀭𑁄 𑀪𑀫𑀓𑀸𑀭𑁄. 𑀘𑀺𑀢𑁆𑀢𑀓𑀸𑀭𑁄 𑀮𑁂𑀧𑀘𑀺𑀢𑁆𑀢𑀓𑀸𑀭𑁄. 𑀆𑀤𑀺-𑀲𑀤𑁆𑀤𑁂𑀦 𑀓𑁄𑀝𑁆𑀝𑀓𑀮𑁂𑀔𑀓𑀯𑀺𑀮𑀻𑀯𑀓𑀸𑀭𑀇𑀝𑁆𑀞𑀓𑀓𑀸𑀭𑀤𑀸𑀭𑀼𑀓𑀸𑀭𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂. 𑀓𑀭𑀡𑀦𑀺𑀧𑁆𑀨𑀸𑀤𑀦𑀯𑀲𑁂𑀦 𑀤𑀲𑁆𑀲𑁂𑀢𑁆𑀯𑀸. 𑀲𑀦𑁆𑀤𑀺𑀝𑁆𑀞𑀺𑀓𑀫𑁂𑀯𑀸𑀢𑀺 𑀅𑀲𑀫𑁆𑀧𑀭𑀸𑀬𑀺𑀓𑀢𑀸𑀬 𑀲𑀸𑀫𑀁 𑀤𑀝𑁆𑀞𑀩𑁆𑀩𑀁, 𑀲𑀬𑀫𑀦𑀼𑀪𑀯𑀺𑀢𑀩𑁆𑀩𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀉𑀧𑀚𑀻𑀯𑀦𑁆𑀢𑀻𑀢𑀺 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑀺. 𑀲𑀼𑀔𑀺𑀢𑀦𑁆𑀢𑀺 𑀲𑀼𑀔𑀧𑁆𑀧𑀢𑁆𑀢𑀁. 𑀣𑀸𑀫𑀩𑀮𑀽𑀧𑁂𑀢𑀪𑀸𑀯𑁄𑀯 𑀧𑀻𑀡𑀦𑀦𑁆𑀢𑀺 𑀆𑀳 ‘‘𑀧𑀻𑀡𑀺𑀢𑀁 𑀣𑀸𑀫𑀩𑀮𑀽𑀧𑁂𑀢’’𑀦𑁆𑀢𑀺. 𑀉𑀧𑀭𑀻𑀢𑀺 𑀤𑁂𑀯𑀮𑁄𑀓𑁂. 𑀢𑀣𑀸 𑀉𑀤𑁆𑀥𑀦𑁆𑀢𑀺𑀧𑀺. 𑀲𑁄 𑀳𑀺 𑀫𑀦𑀼𑀲𑁆𑀲𑀮𑁄𑀓𑀢𑁄 𑀉𑀧𑀭𑀺𑀫𑁄. 𑀅𑀕𑁆𑀕𑀁 𑀯𑀺𑀬𑀸𑀢𑀺 𑀅𑀕𑁆𑀕𑀁, 𑀨𑀮𑀁. ‘‘𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀨𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀢𑁄 𑀢𑀁 𑀓𑀫𑁆𑀫𑀲𑁆𑀲 𑀅𑀕𑁆𑀕𑀺𑀲𑀺𑀔𑀸 𑀯𑀺𑀬 𑀳𑁄𑀢𑀻’’𑀢𑀺 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁. 𑀅𑀧𑀺𑀘 𑀲𑀕𑁆𑀕𑀦𑁆𑀢𑀺 𑀉𑀢𑁆𑀢𑀫𑀁, 𑀨𑀮𑀁. 𑀲𑀕𑁆𑀕𑀦𑁆𑀢𑀺 𑀲𑀼𑀝𑁆𑀞𑀼 𑀅𑀕𑁆𑀕𑀁, 𑀭𑀽𑀧𑀲𑀤𑁆𑀤𑀸𑀤𑀺𑀤𑀲𑀯𑀺𑀥𑀁 𑀅𑀢𑁆𑀢𑀦𑁄 𑀨𑀮𑀁 𑀦𑀺𑀧𑁆𑀨𑀸𑀤𑁂𑀢𑀼𑀁 𑀅𑀭𑀳𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀅𑀕𑁆𑀕𑀺𑀓𑀸𑀯 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀲𑁄𑀯𑀕𑁆𑀕𑀺𑀓𑀸, 𑀤𑀓𑁆𑀔𑀺𑀡𑀸𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀘 𑀲𑀩𑁆𑀩𑀢𑁆𑀣 𑀇𑀢𑁆𑀣𑀺𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄. 𑀲𑀼𑀔𑁄𑀢𑀺 𑀲𑀼𑀔𑀽𑀧𑀸𑀬𑁄 𑀇𑀝𑁆𑀞𑁄 𑀓𑀦𑁆𑀢𑁄. 𑀅𑀕𑁆𑀕𑁂𑀢𑀺 𑀉𑀴𑀸𑀭𑁂. 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁 𑀩𑀸𑀳𑀺𑀭𑀁 𑀭𑀽𑀧𑀁, 𑀅𑀢𑁆𑀢𑀦𑁄 𑀯𑀡𑁆𑀡𑀧𑁄𑀓𑁆𑀔𑀭𑀢𑀸 𑀯𑀡𑁆𑀡𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀤𑀓𑁆𑀔𑀦𑁆𑀢𑀺 𑀯𑀟𑁆𑀠𑀦𑁆𑀢𑀺 𑀏𑀢𑀸𑀬𑀸𑀢𑀺 𑀤𑀓𑁆𑀔𑀺𑀡𑀸, 𑀧𑀭𑀺𑀘𑁆𑀘𑀸𑀕𑀫𑀬𑀁 𑀧𑀼𑀜𑁆𑀜𑀦𑁆𑀢𑀺 𑀆𑀳 ‘‘𑀤𑀓𑁆𑀔𑀺𑀡𑀁 𑀤𑀸𑀦’’𑀦𑁆𑀢𑀺.

𑀫𑀕𑁆𑀕𑁄 𑀲𑀸𑀫𑀜𑁆𑀜𑀁 𑀲𑀫𑀺𑀢𑀧𑀸𑀧𑀲𑀗𑁆𑀔𑀸𑀢𑀲𑁆𑀲 𑀲𑀫𑀡𑀲𑁆𑀲 𑀪𑀸𑀯𑁄𑀢𑀺 𑀓𑀢𑁆𑀯𑀸, 𑀢𑀲𑁆𑀲 𑀯𑀺𑀧𑀸𑀓𑀢𑁆𑀢𑀸 𑀅𑀭𑀺𑀬𑀨𑀮𑀁 𑀲𑀸𑀫𑀜𑁆𑀜𑀨𑀮𑀁. ‘‘𑀬𑀣𑀸𑀳𑀸’’𑀢𑀺𑀆𑀤𑀺𑀦𑀸 𑀫𑀳𑀸𑀯𑀕𑁆𑀕𑀲𑀁𑀬𑀼𑀢𑁆𑀢𑀧𑀸𑀴𑀺𑀯𑀲𑁂𑀦 𑀢𑀤𑀢𑁆𑀣𑀁 𑀲𑀸𑀥𑁂𑀢𑀺. 𑀢𑀁 𑀏𑀲 𑀭𑀸𑀚𑀸 𑀦 𑀚𑀸𑀦𑀸𑀢𑀺 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑀢𑀸𑀬. 𑀬𑀲𑁆𑀫𑀸 𑀧𑀦𑁂𑀲 ‘‘𑀤𑀸𑀲𑀓𑀲𑁆𑀲𑀓𑀸𑀤𑀺𑀪𑀽𑀢𑀸𑀦𑀁 𑀧𑀩𑁆𑀩𑀚𑀺𑀢𑀸𑀦𑀁 𑀮𑁄𑀓𑀢𑁄 𑀅𑀪𑀺𑀯𑀸𑀤𑀦𑀸𑀤𑀺𑀮𑀸𑀪𑁄 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀦𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑁄𑀘𑀺 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀈𑀤𑀺𑀲𑀫𑀢𑁆𑀣𑀁 𑀚𑀸𑀦𑀦𑁆𑀢𑁄’’𑀢𑀺 𑀯𑀻𑀫𑀁𑀲𑀦𑁆𑀢𑁄 𑀧𑀽𑀭𑀡𑀸𑀤𑀺𑀓𑁂 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀲𑀁 𑀓𑀣𑀸𑀬 𑀅𑀦𑀥𑀺𑀕𑀢𑀯𑀺𑀢𑁆𑀢𑁄 𑀪𑀕𑀯𑀦𑁆𑀢𑀫𑁆𑀧𑀺 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀤𑀸𑀲𑀓𑀲𑁆𑀲𑀓𑁄𑀧𑀫𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀢𑀻’’𑀢𑀺.

𑀭𑀸𑀚𑀸𑀫𑀘𑁆𑀘𑀸𑀢𑀺 ¶ ¶ 𑀭𑀸𑀚𑀓𑀼𑀮𑀲𑀫𑀼𑀤𑀸𑀕𑀢𑀸 𑀅𑀫𑀘𑁆𑀘𑀸, 𑀅𑀦𑀼𑀬𑀼𑀢𑁆𑀢𑀓𑀭𑀸𑀚𑀸𑀦𑁄 𑀘𑁂𑀯 𑀅𑀫𑀘𑁆𑀘𑀸 𑀘𑀸𑀢𑀺𑀧𑀺 𑀅𑀢𑁆𑀣𑁄. 𑀓𑀡𑁆𑀳𑀧𑀓𑁆𑀔𑀦𑁆𑀢𑀺 𑀬𑀣𑀸𑀧𑀼𑀘𑁆𑀙𑀺𑀢𑁂 𑀅𑀢𑁆𑀣𑁂 𑀮𑀩𑁆𑀪𑀫𑀸𑀦𑀤𑀺𑀝𑁆𑀞𑀺𑀕𑀢𑀽𑀧𑀲𑀁𑀳𑀺𑀢𑀁 𑀲𑀁𑀓𑀺𑀮𑁂𑀲𑀧𑀓𑁆𑀔𑀁. 𑀲𑀼𑀓𑁆𑀓𑀧𑀓𑁆𑀔𑀦𑁆𑀢𑀺 𑀢𑀩𑁆𑀩𑀺𑀥𑀼𑀭𑀁 𑀉𑀧𑀭𑀺 𑀲𑀼𑀢𑁆𑀢𑀸𑀕𑀢𑀁 𑀯𑁄𑀤𑀸𑀦𑀧𑀓𑁆𑀔𑀁. 𑀲𑀫𑀡𑀓𑁄𑀮𑀸𑀳𑀮𑀦𑁆𑀢𑀺 𑀲𑀫𑀡𑀓𑁄𑀢𑀽𑀳𑀮𑀁 𑀢𑀁 𑀢𑀁 𑀲𑀫𑀡𑀯𑀸𑀤𑀸𑀦𑀁 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑀁. 𑀲𑀫𑀡𑀪𑀡𑁆𑀟𑀦𑀦𑁆𑀢𑀺 𑀢𑁂𑀦𑁂𑀯 𑀯𑀺𑀭𑁄𑀥𑁂𑀦 ‘‘𑀏𑀯𑀁𑀯𑀸𑀤𑀻𑀦𑀁 𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀬𑀁 𑀤𑁄𑀲𑁄, 𑀏𑀯𑀁𑀯𑀸𑀤𑀻𑀦𑀁 𑀢𑁂𑀲𑀁 𑀅𑀬𑀁 𑀤𑁄𑀲𑁄’’𑀢𑀺 𑀏𑀯𑀁 𑀢𑀁 𑀢𑀁 𑀯𑀸𑀤𑀲𑁆𑀲 𑀧𑀭𑀺𑀪𑀸𑀲𑀦𑀁. 𑀇𑀲𑁆𑀲𑀭𑀸𑀦𑀼𑀯𑀢𑁆𑀢𑀓𑁄 𑀳𑀺 𑀮𑁄𑀓𑁄𑀢𑀺 𑀥𑀫𑁆𑀫𑀢𑀸𑀤𑀲𑁆𑀲𑀦𑁂𑀦 𑀢𑀤𑀢𑁆𑀣𑀲𑀫𑀢𑁆𑀣𑀦𑀁. 𑀅𑀢𑁆𑀢𑀦𑁄 𑀤𑁂𑀲𑀦𑀸𑀓𑁄𑀲𑀮𑁆𑀮𑁂𑀦 𑀭𑀜𑁆𑀜𑁄 𑀪𑀸𑀭𑀁 𑀓𑀭𑁄𑀦𑁆𑀢𑁄, 𑀦 𑀢𑀤𑀜𑁆𑀜𑁂𑀦 𑀧𑀭𑀯𑀫𑁆𑀪𑀦𑀸𑀤𑀺𑀓𑀸𑀭𑀡𑁂𑀦.

𑁧𑁬𑁪. 𑀦𑀼-𑀲𑀤𑁆𑀤𑁄 𑀯𑀺𑀬 𑀦𑁄-𑀲𑀤𑁆𑀤𑁄𑀧𑀺 𑀧𑀼𑀘𑁆𑀙𑀸𑀬𑀁 𑀦𑀺𑀧𑀸𑀢𑁄𑀢𑀺 𑀆𑀳 ‘‘𑀅𑀪𑀺𑀚𑀸𑀦𑀸𑀲𑀺 𑀦𑀽’’𑀢𑀺. 𑀅𑀬𑀜𑁆𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀦 𑀓𑁂𑀯𑀮𑀁 𑀅𑀪𑀺𑀚𑀸𑀦𑀸𑀲𑀺𑀧𑀤𑁂𑀦𑁂𑀯, 𑀅𑀣 𑀔𑁄 ‘‘𑀧𑀼𑀘𑁆𑀙𑀺𑀢𑀸’’𑀢𑀺 𑀧𑀤𑁂𑀦 𑀘𑀸𑀢𑀺 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀓𑀣𑀁 𑀬𑁄𑀚𑁂𑀢𑀩𑁆𑀩𑁄𑀢𑀺 𑀅𑀦𑀼𑀬𑁄𑀕𑀫𑀧𑀦𑁂𑀢𑀺 ‘‘𑀇𑀤𑀜𑁆𑀳𑀻’’𑀢𑀺𑀆𑀤𑀺𑀦𑀸. 𑀧𑀼𑀘𑁆𑀙𑀺𑀢𑀸 𑀦𑀽𑀢𑀺 𑀧𑀼𑀩𑁆𑀩𑁂 𑀧𑀼𑀘𑁆𑀙𑀁 𑀓𑀢𑁆𑀢𑀸 𑀦𑀼. 𑀦𑀁 𑀧𑀼𑀝𑁆𑀞𑀪𑀸𑀯𑀦𑁆𑀢𑀺 𑀢𑀸𑀤𑀺𑀲𑀁 𑀧𑀼𑀘𑁆𑀙𑀺𑀢𑀪𑀸𑀯𑀁 𑀅𑀪𑀺𑀚𑀸𑀦𑀸𑀲𑀺 𑀦𑀼. 𑀦 𑀢𑁂 𑀲𑀫𑁆𑀫𑀼𑀝𑁆𑀞𑀦𑁆𑀢𑀺 𑀢𑀯 𑀦 𑀧𑀫𑀼𑀝𑁆𑀞𑀁 𑀯𑀢𑀸𑀢𑀺 𑀅𑀢𑁆𑀣𑁄. 𑀅𑀨𑀸𑀲𑀼𑀓𑀪𑀸𑀯𑁄𑀢𑀺 𑀢𑀣𑀸 𑀪𑀸𑀲𑀦𑁂𑀦 𑀅𑀲𑀼𑀔𑀪𑀸𑀯𑁄. 𑀧𑀡𑁆𑀟𑀺𑀢𑀧𑀢𑀺𑀭𑀽𑀧𑀓𑀸𑀦𑀦𑁆𑀢𑀺 (𑀲𑀸𑀫𑀁 𑀯𑀺𑀬 𑀅𑀢𑁆𑀢𑀦𑁄 𑀲𑀓𑁆𑀓𑀸𑀭𑀸𑀦𑀁 𑀧𑀡𑁆𑀟𑀺𑀢𑀪𑀸𑀲𑀸𑀦𑀁) 𑀆𑀫𑀁 𑀯𑀺𑀬 𑀧𑀓𑁆𑀓𑀸𑀦𑀁 𑀧𑀡𑁆𑀟𑀺𑀢𑀸 𑀪𑀸𑀲𑀸𑀦𑀁. (𑀤𑀻. 𑀦𑀺. 𑀝𑀻. 𑁧.𑁧𑁬𑁩) 𑀧𑀸𑀴𑀺𑀧𑀤𑀅𑀢𑁆𑀣𑀩𑁆𑀬𑀜𑁆𑀚𑀦𑁂𑀲𑀽𑀢𑀺 𑀧𑀸𑀴𑀺𑀲𑀗𑁆𑀔𑀸𑀢𑁂 𑀧𑀤𑁂, 𑀢𑀤𑀢𑁆𑀣𑁂 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀓𑁆𑀔𑀭𑁂 𑀘, 𑀯𑀸𑀓𑁆𑀬𑀧𑀭𑀺𑀬𑀸𑀬𑁄 𑀯𑀸 𑀩𑁆𑀬𑀜𑁆𑀚𑀦𑀲𑀤𑁆𑀤𑁄 ‘‘𑀅𑀓𑁆𑀔𑀭𑀁 𑀧𑀤𑀁 𑀩𑁆𑀬𑀜𑁆𑀚𑀦’’𑀦𑁆𑀢𑀺𑀆𑀤𑀻𑀲𑀼 (𑀦𑁂𑀢𑁆𑀢𑀺. 𑁨𑁮) 𑀯𑀺𑀬. 𑀪𑀕𑀯𑀢𑁄 𑀭𑀽𑀧𑀁 𑀲𑀪𑀸𑀯𑁄 𑀯𑀺𑀬 𑀭𑀽𑀧𑀫𑀲𑁆𑀲𑀸𑀢𑀺 𑀪𑀕𑀯𑀦𑁆𑀢𑀭𑀽𑀧𑁄, 𑀪𑀕𑀯𑀸 𑀯𑀺𑀬 𑀏𑀓𑀦𑁆𑀢𑀧𑀡𑁆𑀟𑀺𑀢𑁄𑀢𑀺 𑀅𑀢𑁆𑀣𑁄.

𑀧𑀽𑀭𑀡𑀓𑀲𑁆𑀲𑀧𑀯𑀸𑀤𑀯𑀡𑁆𑀡𑀦𑀸

𑁧𑁬𑁫. 𑀏𑀓𑀫𑀺𑀤𑀸𑀳𑀦𑁆𑀢𑀺 𑀏𑀢𑁆𑀣 𑀇𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀏𑀓𑀁 𑀲𑀫𑀬𑀫𑀺𑀘𑁆𑀘𑁂𑀯 𑀅𑀢𑁆𑀣𑁄. 𑀲𑀫𑁆𑀫𑁄𑀤𑁂𑀢𑀺 𑀲𑀫𑁆𑀫𑁄𑀤𑀦𑀁 𑀓𑀭𑁄𑀢𑀻𑀢𑀺 𑀲𑀫𑁆𑀫𑁄𑀤𑀦𑀻𑀬𑀁. 𑀅𑀦𑀻𑀬𑀲𑀤𑁆𑀤𑁄 𑀳𑀺 𑀩𑀳𑀼𑀮𑀸 𑀓𑀢𑁆𑀯𑀢𑁆𑀣𑀸𑀪𑀺𑀥𑀸𑀬𑀓𑁄 𑀬𑀣𑀸 ‘‘𑀦𑀺𑀬𑁆𑀬𑀸𑀦𑀺𑀓𑀸’’𑀢𑀺, (𑀥. 𑀲. 𑀲𑀼𑀢𑁆𑀢𑀦𑁆𑀢𑀤𑀼𑀓𑀫𑀸𑀢𑀺𑀓𑀸 𑁯𑁭) 𑀲𑀫𑁆𑀫𑁄𑀤𑀦𑀁 𑀯𑀸 𑀚𑀦𑁂𑀢𑀻𑀢𑀺 𑀲𑀫𑁆𑀫𑁄𑀤𑀦𑀺𑀬𑀁 𑀢𑀤𑁆𑀥𑀺𑀢𑀯𑀲𑁂𑀦. 𑀲𑀭𑀺𑀢𑀩𑁆𑀩𑀦𑁆𑀢𑀺 𑀲𑀸𑀭𑀡𑀻𑀬𑀁, 𑀲𑀭𑀡𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀦𑁆𑀢𑀺 𑀯𑀸 𑀲𑀸𑀭𑀡𑀺𑀬𑀁, 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀫𑁄𑀤𑀚𑀦𑀓𑀁 𑀲𑀭𑀺𑀢𑀩𑁆𑀩𑀬𑀼𑀢𑁆𑀢𑀓’’𑀦𑁆𑀢𑀺 𑀯𑀼𑀢𑁆𑀢𑀁, 𑀲𑀭𑀺𑀢𑀩𑁆𑀩𑀬𑀼𑀢𑁆𑀢𑀓𑀦𑁆𑀢𑀺 𑀘 𑀲𑀭𑀡𑀸𑀦𑀼𑀘𑁆𑀙𑀯𑀺𑀓𑀦𑁆𑀢𑀺 𑀅𑀢𑁆𑀣𑁄.

𑁧𑁬𑁬. 𑀲𑀳𑀢𑁆𑀣𑀸𑀢𑀺 ¶ 𑀲𑀳𑀢𑁆𑀣𑁂𑀦𑁂𑀯, 𑀢𑁂𑀦 𑀲𑀼𑀤𑁆𑀥𑀓𑀢𑁆𑀢𑀸𑀭𑀁 𑀤𑀲𑁆𑀲𑁂𑀢𑀺, 𑀆𑀡𑀢𑁆𑀢𑀺𑀬𑀸𑀢𑀺 𑀧𑀦 𑀳𑁂𑀢𑀼𑀓𑀢𑁆𑀢𑀸𑀭𑀁, 𑀦𑀺𑀲𑁆𑀲𑀕𑁆𑀕𑀺𑀬𑀣𑀸𑀯𑀭𑀸𑀤𑀬𑁄𑀧𑀺 𑀇𑀥 𑀲𑀳𑀢𑁆𑀣 𑀓𑀭𑀡𑁂𑀦𑁂𑀯 𑀲𑀗𑁆𑀕𑀳𑀺𑀢𑀸. 𑀳𑀢𑁆𑀣𑀸𑀤𑀻𑀦𑀻𑀢𑀺 𑀳𑀢𑁆𑀣𑀧𑀸𑀤𑀓𑀡𑁆𑀡𑀦𑀸𑀲𑀸𑀤𑀻𑀦𑀺. 𑀧𑀘𑀦𑀁 𑀤𑀳𑀦𑀁 𑀯𑀺𑀩𑀸𑀥𑀦𑀦𑁆𑀢𑀺 𑀆𑀳 ‘‘𑀤𑀡𑁆𑀟𑁂𑀦 𑀉𑀧𑁆𑀧𑀻𑀴𑁂𑀦𑁆𑀢𑀲𑁆𑀲𑀸’’𑀢𑀺. 𑀧𑀧𑀜𑁆𑀘𑀲𑀽𑀤𑀦𑀺𑀬𑀁 𑀦𑀸𑀫 𑀫𑀚𑁆𑀛𑀺𑀫𑀸𑀕𑀫𑀝𑁆𑀞𑀓𑀣𑀸𑀬𑀁 ¶ 𑀧𑀦 ‘‘𑀧𑀘𑀢𑁄’’𑀢𑀺 𑀏𑀢𑀲𑁆𑀲 ‘‘𑀢𑀚𑁆𑀚𑁂𑀦𑁆𑀢𑀲𑁆𑀲 𑀯𑀸’’𑀢𑀺 (𑀫. 𑀦𑀺. 𑀅𑀝𑁆𑀞. 𑁩.𑁯𑁭) 𑀤𑀼𑀢𑀺𑀬𑁄𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀇𑀥 𑀧𑀦 𑀢𑀚𑁆𑀚𑀦𑀁, 𑀧𑀭𑀺𑀪𑀸𑀲𑀦𑀜𑁆𑀘 𑀤𑀡𑁆𑀟𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 ‘‘𑀤𑀡𑁆𑀟𑁂𑀦 𑀉𑀧𑁆𑀧𑀻𑀴𑁂𑀦𑁆𑀢𑀲𑁆𑀲 𑀇𑀘𑁆𑀘𑁂𑀯 𑀯𑀼𑀢𑁆𑀢’’𑀦𑁆𑀢𑀺 (𑀤𑀻. 𑀦𑀺. 𑀝𑀻. 𑁧.𑁧𑁬𑁬) 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁, 𑀅𑀥𑀼𑀦𑀸 𑀧𑀦 𑀧𑁄𑀢𑁆𑀣𑀓𑁂𑀲𑀼 ‘‘𑀢𑀚𑁆𑀚𑁂𑀦𑁆𑀢𑀲𑁆𑀲 𑀯𑀸’’𑀢𑀺 𑀧𑀸𑀞𑁄𑀧𑀺 𑀩𑀳𑀼𑀲𑁄 𑀤𑀺𑀲𑁆𑀲𑀢𑀺. 𑀲𑁄𑀓𑀦𑁆𑀢𑀺 𑀲𑁄𑀓𑀓𑀸𑀭𑀡𑀁, 𑀲𑁄𑀘𑀦𑀦𑁆𑀢𑀺𑀧𑀺 𑀬𑀼𑀚𑁆𑀚𑀢𑀺 𑀓𑀸𑀭𑀡𑀲𑀫𑁆𑀧𑀸𑀤𑀦𑁂𑀦 𑀨𑀮𑀲𑁆𑀲𑀧𑀺 𑀓𑀢𑁆𑀢𑀩𑁆𑀩𑀢𑁄. 𑀧𑀭𑁂𑀳𑀻𑀢𑀺 𑀅𑀢𑁆𑀢𑀦𑁄 𑀯𑀘𑀦𑀓𑀭𑁂𑀳𑀺 𑀓𑀫𑁆𑀫𑀪𑀽𑀢𑁂𑀳𑀺. 𑀨𑀦𑁆𑀤𑀢𑁄𑀢𑀺 𑀏𑀢𑁆𑀣 𑀧𑀭𑀲𑁆𑀲 𑀨𑀦𑁆𑀤𑀦𑀯𑀲𑁂𑀦 𑀲𑀼𑀤𑁆𑀥𑀓𑀢𑁆𑀢𑀼𑀢𑁆𑀣𑁄 𑀦 𑀮𑀩𑁆𑀪𑀢𑀺, 𑀅𑀣 𑀔𑁄 𑀅𑀢𑁆𑀢𑀦𑁄 𑀨𑀦𑁆𑀤𑀦𑀯𑀲𑁂𑀦𑁂𑀯𑀸𑀢𑀺 𑀆𑀳 ‘‘𑀧𑀭𑀁 𑀨𑀦𑁆𑀤𑀦𑁆𑀢𑀁 𑀨𑀦𑁆𑀤𑀦𑀓𑀸𑀮𑁂 𑀲𑀬𑀫𑁆𑀧𑀺 𑀨𑀦𑁆𑀤𑀢𑁄’’𑀢𑀺, 𑀅𑀢𑁆𑀢𑀦𑀸 𑀓𑀢𑁂𑀦 𑀧𑀭𑀲𑁆𑀲 𑀯𑀺𑀩𑀸𑀥𑀦𑀧𑀬𑁄𑀕𑁂𑀦 𑀲𑀬𑀫𑁆𑀧𑀺 𑀨𑀦𑁆𑀤𑀢𑁄𑀢𑀺 𑀅𑀢𑁆𑀣𑁄. ‘‘𑀅𑀢𑀺𑀧𑀸𑀢𑀸𑀧𑀬𑀢𑁄’’𑀢𑀺 𑀧𑀤𑀁 𑀲𑀼𑀤𑁆𑀥𑀓𑀢𑁆𑀢𑀭𑀺, 𑀳𑁂𑀢𑀼𑀓𑀢𑁆𑀢𑀭𑀺 𑀘 𑀧𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀳𑀦𑀦𑁆𑀢𑀲𑁆𑀲𑀸𑀧𑀺 𑀳𑀦𑀸𑀧𑁂𑀦𑁆𑀢𑀲𑁆𑀲𑀸𑀧𑀻’’𑀢𑀺 𑀇𑀫𑀺𑀦𑀸. 𑀲𑀩𑁆𑀩𑀢𑁆𑀣𑀸𑀢𑀺 ‘‘𑀆𑀤𑀺𑀬𑀢𑁄’’𑀢𑀺𑀆𑀤𑀻𑀲𑀼. 𑀓𑀭𑀡𑀓𑀸𑀭𑀡𑀯𑀲𑁂𑀦𑀸𑀢𑀺 𑀲𑀬𑀁𑀓𑀸𑀭𑀧𑀭𑀁𑀓𑀸𑀭𑀯𑀲𑁂𑀦.

𑀖𑀭𑀪𑀺𑀢𑁆𑀢𑀺𑀬𑀸 𑀅𑀦𑁆𑀢𑁄 𑀘 𑀩𑀳𑀺 𑀘 𑀲𑀦𑁆𑀥𑀺 𑀖𑀭𑀲𑀦𑁆𑀥𑀺. 𑀓𑀺𑀜𑁆𑀘𑀺𑀧𑀺 𑀅𑀲𑁂𑀲𑁂𑀢𑁆𑀯𑀸 𑀦𑀺𑀭𑀯𑀲𑁂𑀲𑁄 𑀮𑁄𑀧𑁄 𑀯𑀺𑀮𑀼𑀫𑁆𑀧𑀦𑀁 𑀦𑀺𑀮𑁆𑀮𑁄𑀧𑁄𑀢𑀺 𑀆𑀳 ‘‘𑀫𑀳𑀸𑀯𑀺𑀮𑁄𑀧’’𑀦𑁆𑀢𑀺. 𑀏𑀓𑀸𑀕𑀸𑀭𑁂 𑀦𑀺𑀬𑀼𑀢𑁆𑀢𑁄 𑀯𑀺𑀮𑁄𑀧𑁄 𑀏𑀓𑀸𑀕𑀸𑀭𑀺𑀓𑁄. 𑀢𑁂𑀦𑀸𑀳 ‘‘𑀏𑀓𑀫𑁂𑀯𑀸’’𑀢𑀺𑀆𑀤𑀺. ‘‘𑀧𑀭𑀺𑀧𑀦𑁆𑀣𑁂 𑀢𑀺𑀝𑁆𑀞𑀢𑁄’’𑀢𑀺 𑀏𑀢𑁆𑀣 𑀅𑀘𑁆𑀙𑀺𑀦𑁆𑀤𑀦𑀢𑁆𑀣𑀫𑁂𑀯 𑀢𑀺𑀝𑁆𑀞𑀢𑀻𑀢𑀺 𑀅𑀬𑀫𑀢𑁆𑀣𑁄 𑀧𑀓𑀭𑀡𑀢𑁄 𑀲𑀺𑀤𑁆𑀥𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀆𑀕𑀢𑀸𑀕𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸. ‘‘𑀧𑀭𑀺𑀢𑁄 𑀲𑀩𑁆𑀩𑀲𑁄 𑀧𑀦𑁆𑀣𑁂 𑀳𑀦𑀦𑀁 𑀧𑀭𑀺𑀧𑀦𑁆𑀣𑁄’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁧𑁬𑁬) 𑀅𑀬𑀫𑀢𑁆𑀣𑁄𑀧𑀺 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑁄. 𑀓𑀭𑁄𑀫𑀻𑀢𑀺 𑀲𑀜𑁆𑀜𑀸𑀬𑀸𑀢𑀺 𑀲𑀜𑁆𑀘𑁂𑀢𑀦𑀺𑀓𑀪𑀸𑀯𑀫𑀸𑀳, 𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 ‘‘𑀲𑀜𑁆𑀘𑀺𑀘𑁆𑀘 𑀓𑀭𑁄𑀢𑁄𑀧𑀺 𑀦 𑀓𑀭𑀻𑀬𑀢𑀺 𑀦𑀸𑀫, 𑀧𑀕𑁂𑀯 𑀅𑀲𑀜𑁆𑀘𑀺𑀘𑁆𑀘𑀸’’𑀢𑀺. 𑀧𑀸𑀧𑀁 𑀦 𑀓𑀭𑀻𑀬𑀢𑀻𑀢𑀺 𑀧𑀼𑀩𑁆𑀩𑁂 𑀅𑀲𑀢𑁄 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀧𑀸𑀧𑀁 𑀅𑀓𑀢𑀫𑁂𑀯 𑀦𑀸𑀫. 𑀢𑁂𑀦𑀸𑀳 ‘‘𑀦𑀢𑁆𑀣𑀺 𑀧𑀸𑀧’’𑀦𑁆𑀢𑀺.

𑀬𑀤𑀺 𑀏𑀯𑀁 𑀓𑀣𑀁 𑀲𑀢𑁆𑀢𑀸 𑀧𑀸𑀧𑁂 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀯𑀸𑀤𑁂 𑀧𑀭𑁂𑀳𑀺 𑀆𑀭𑁄𑀧𑀺𑀢𑀁 𑀤𑁄𑀲𑀫𑀧𑀦𑁂𑀢𑀼𑀓𑀸𑀫𑁄 𑀧𑀽𑀭𑀡𑁄 𑀇𑀫𑀫𑀢𑁆𑀣𑀫𑁆𑀧𑀺 𑀤𑀲𑁆𑀲𑁂𑀢𑀻𑀢𑀺 𑀆𑀳 ‘‘𑀲𑀢𑁆𑀢𑀸 𑀧𑀦𑀸’’𑀢𑀺𑀆𑀤𑀺. 𑀲𑀜𑁆𑀜𑀸𑀫𑀢𑁆𑀢𑀫𑁂𑀢𑀁 ‘‘𑀧𑀸𑀧𑀁 𑀓𑀭𑁄𑀦𑁆𑀢𑀻’’𑀢𑀺, 𑀧𑀸𑀧𑀁 ¶ 𑀧𑀦 𑀦𑀢𑁆𑀣𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀓𑀺𑀭𑀲𑁆𑀲 𑀳𑁄𑀢𑀺 𑁋 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀳𑀺𑀁𑀲𑀸𑀤𑀺𑀓𑀺𑀭𑀺𑀬𑀸 𑀅𑀢𑁆𑀢𑀸𑀦𑀁 𑀦 𑀧𑀸𑀧𑀼𑀡𑀸𑀢𑀺 𑀢𑀲𑁆𑀲 𑀦𑀺𑀘𑁆𑀘𑀢𑀸𑀬 𑀦𑀺𑀩𑁆𑀩𑀺𑀓𑀸𑀭𑀢𑁆𑀢𑀸, 𑀲𑀭𑀻𑀭𑀁 𑀧𑀦 𑀅𑀘𑁂𑀢𑀦𑀁 𑀓𑀝𑁆𑀞𑀓𑀮𑀺𑀗𑁆𑀕𑀭𑀽𑀧𑀫𑀁, 𑀢𑀲𑁆𑀫𑀺𑀁 𑀯𑀺𑀓𑁄𑀧𑀺𑀢𑁂𑀧𑀺 𑀦 𑀓𑀺𑀜𑁆𑀘𑀺 𑀧𑀸𑀧𑀦𑁆𑀢𑀺. 𑀧𑀭𑀺𑀬𑀦𑁆𑀢𑁄 𑀯𑀼𑀘𑁆𑀘𑀢𑀺 𑀦𑁂𑀫𑀺 𑀧𑀭𑀺𑀬𑁄𑀲𑀸𑀦𑁂 𑀞𑀺𑀢𑀢𑁆𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑀆𑀘𑀭𑀺𑀬𑁂𑀦 ‘‘𑀦𑀺𑀲𑀺𑀢𑀔𑀼𑀭𑀫𑀬𑀦𑁂𑀫𑀺𑀦𑀸’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁧𑁬𑁬). 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀘𑀓𑁆𑀓𑀧𑀭𑀺𑀬𑁄𑀲𑀸𑀦𑀫𑁂𑀯 𑀧𑀭𑀺𑀬𑀦𑁆𑀢𑁄, 𑀔𑀼𑀭𑁂𑀦 𑀲𑀤𑀺𑀲𑁄 𑀧𑀭𑀺𑀬𑀦𑁆𑀢𑁄 𑀬𑀲𑁆𑀲𑀸𑀢𑀺 𑀔𑀼𑀭𑀧𑀭𑀺𑀬𑀦𑁆𑀢𑁄. 𑀔𑀼𑀭𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀔𑀼𑀭𑀥𑀸𑀭𑀸 𑀕𑀳𑀺𑀢𑀸 𑀢𑀤𑀯𑀭𑁄𑀥𑀢𑁄. 𑀧𑀸𑀴𑀺𑀬𑀁 𑀘𑀓𑁆𑀓𑁂𑀦𑀸𑀢𑀺 𑀘𑀓𑁆𑀓𑀸𑀓𑀸𑀭𑀓𑀢𑁂𑀦 𑀆𑀯𑀼𑀥𑀯𑀺𑀲𑁂𑀲𑁂𑀦. 𑀢𑀁 𑀫𑀁𑀲𑀔𑀮𑀓𑀭𑀡𑀲𑀗𑁆𑀔𑀸𑀢𑀁 𑀦𑀺𑀤𑀸𑀦𑀁 𑀓𑀸𑀭𑀡𑀁 𑀬𑀲𑁆𑀲𑀸𑀢𑀺 𑀢𑀢𑁄𑀦𑀺𑀤𑀸𑀦𑀁, ‘‘𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲 𑀢𑁄𑀆𑀤𑁂𑀲𑁄, 𑀲𑀫𑀸𑀲𑁂 𑀘𑀲𑁆𑀲 𑀮𑁄𑀧𑀸𑀪𑀸𑀯𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑁨𑁧) 𑀅𑀝𑁆𑀞𑀓𑀣𑀸𑀲𑀼 ¶ 𑀯𑀼𑀢𑁆𑀢𑁄. ‘‘𑀧𑀘𑁆𑀘𑀢𑁆𑀢𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀫𑁆𑀧𑀺 𑀬𑀼𑀚𑁆𑀚𑀢𑀻’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸) 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄. ‘‘𑀓𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑀲𑀫𑀼𑀤𑀸𑀬𑁄’’𑀢𑀺𑀧𑀺 𑀅𑀓𑁆𑀔𑀭𑀘𑀺𑀦𑁆𑀢𑀓𑀸.

𑀕𑀗𑁆𑀕𑀸𑀬 𑀤𑀓𑁆𑀔𑀺𑀡𑀤𑀺𑀲𑀸 𑀅𑀧𑁆𑀧𑀢𑀺𑀭𑀽𑀧𑀤𑁂𑀲𑁄, 𑀉𑀢𑁆𑀢𑀭𑀤𑀺𑀲𑀸 𑀧𑀦 𑀧𑀢𑀺𑀭𑀽𑀧𑀤𑁂𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀤𑀓𑁆𑀔𑀺𑀡𑀜𑁆𑀘𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀜𑁆𑀘 𑀤𑁂𑀲𑀤𑀺𑀲𑀸𑀧𑀤𑁂𑀲𑁂𑀦 𑀢𑀦𑁆𑀦𑀺𑀯𑀸𑀲𑀺𑀦𑁄 𑀲𑀦𑁆𑀥𑀸𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀤𑀓𑁆𑀔𑀺𑀡𑀢𑀻𑀭𑁂’’𑀢𑀺𑀆𑀤𑀺𑀫𑀸𑀳. 𑀳𑀦𑀦𑀤𑀸𑀦𑀓𑀺𑀭𑀺𑀬𑀸 𑀳𑀺 𑀢𑀤𑀸𑀬𑀢𑁆𑀢𑀸. 𑀫𑀳𑀸𑀬𑀸𑀕𑀦𑁆𑀢𑀺 𑀫𑀳𑀸𑀯𑀺𑀚𑀺𑀢𑀭𑀜𑁆𑀜𑁄 𑀬𑀜𑁆𑀜𑀲𑀤𑀺𑀲𑀫𑁆𑀧𑀺 𑀫𑀳𑀸𑀬𑀸𑀕𑀁. 𑀤𑀫𑀲𑀤𑁆𑀤𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑁆𑀲, 𑀉𑀧𑁄𑀲𑀣𑀲𑀻𑀮𑀲𑁆𑀲 𑀘 𑀯𑀸𑀘𑀓𑁄𑀢𑀺 𑀆𑀳 ‘‘𑀇𑀦𑁆𑀤𑁆𑀭𑀺𑀬𑀤𑀫𑁂𑀦 𑀉𑀧𑁄𑀲𑀣𑀓𑀫𑁆𑀫𑁂𑀦𑀸’’𑀢𑀺. 𑀓𑁂𑀘𑀺 𑀧𑀦 𑀉𑀧𑁄𑀲𑀣𑀓𑀫𑁆𑀫𑁂𑀦𑀸’𑀢𑀺 𑀇𑀤𑀁 𑀇𑀦𑁆𑀤𑁆𑀭𑀺𑀬𑀤𑀫𑀲𑁆𑀲 𑀯𑀺𑀲𑁂𑀲𑀦𑀁, 𑀢𑀲𑁆𑀫𑀸 ‘𑀉𑀧𑁄𑀲𑀣𑀓𑀫𑁆𑀫𑀪𑀽𑀢𑁂𑀦 𑀇𑀦𑁆𑀤𑁆𑀭𑀺𑀬𑀤𑀫𑁂𑀦𑀸’𑀢𑀺’’ 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀫𑁂𑀯 𑀢𑀤𑀼𑀪𑀬𑀢𑁆𑀣𑀯𑀸𑀘𑀓𑀢𑁆𑀢𑀸 𑀤𑀫𑀲𑀤𑁆𑀤𑀲𑁆𑀲, 𑀅𑀢𑁆𑀣𑀤𑁆𑀯𑀬𑀲𑁆𑀲 𑀘 𑀯𑀺𑀲𑁂𑀲𑀯𑀼𑀢𑁆𑀢𑀺𑀢𑁄. 𑀅𑀥𑀼𑀦𑀸 𑀳𑀺 𑀓𑀢𑁆𑀣𑀘𑀺 𑀧𑁄𑀢𑁆𑀣𑀓𑁂 𑀯𑀸-𑀲𑀤𑁆𑀤𑁄, 𑀘-𑀲𑀤𑁆𑀤𑁄𑀧𑀺 𑀤𑀺𑀲𑁆𑀲𑀢𑀺. 𑀲𑀻𑀮𑀲𑀁𑀬𑀫𑁂𑀦𑀸𑀢𑀺 𑀢𑀤𑀜𑁆𑀜𑁂𑀦 𑀓𑀸𑀬𑀺𑀓𑀯𑀸𑀘𑀲𑀺𑀓𑀲𑀁𑀯𑀭𑁂𑀦. 𑀲𑀘𑁆𑀘𑀯𑀘𑀦𑁂𑀦𑀸𑀢𑀺 𑀅𑀫𑁄𑀲𑀯𑀚𑁆𑀚𑁂𑀦. 𑀢𑀲𑁆𑀲 𑀯𑀺𑀲𑀼𑀁 𑀯𑀘𑀦𑀁 𑀮𑁄𑀓𑁂 𑀕𑀭𑀼𑀢𑀭𑀧𑀼𑀜𑁆𑀜𑀲𑀫𑁆𑀫𑀢𑀪𑀸𑀯𑀢𑁄. 𑀬𑀣𑀸 𑀳𑀺 𑀧𑀸𑀧𑀥𑀫𑁆𑀫𑁂𑀲𑀼 𑀫𑀼𑀲𑀸𑀯𑀸𑀤𑁄 𑀕𑀭𑀼𑀢𑀭𑁄, 𑀏𑀯𑀁 𑀧𑀼𑀜𑁆𑀜𑀥𑀫𑁆𑀫𑁂𑀲𑀼 𑀅𑀫𑁄𑀲𑀯𑀚𑁆𑀚𑁄. 𑀢𑁂𑀦𑀸𑀳 𑀪𑀕𑀯𑀸 𑀇𑀢𑀺𑀯𑀼𑀢𑁆𑀢𑀓𑁂 𑁋

‘‘𑀏𑀓𑀥𑀫𑁆𑀫𑀁 ¶ 𑀅𑀢𑀻𑀢𑀲𑁆𑀲, 𑀫𑀼𑀲𑀸𑀯𑀸𑀤𑀺𑀲𑁆𑀲 𑀚𑀦𑁆𑀢𑀼𑀦𑁄;

𑀯𑀺𑀢𑀺𑀡𑁆𑀡𑀧𑀭𑀮𑁄𑀓𑀲𑁆𑀲, 𑀦𑀢𑁆𑀣𑀺 𑀧𑀸𑀧𑀁 𑀅𑀓𑀸𑀭𑀺𑀬’’𑀦𑁆𑀢𑀺. (𑀇𑀢𑀺𑀯𑀼. 𑁨𑁭);

𑀧𑀯𑀢𑁆𑀢𑀻𑀢𑀺 𑀬𑁄 𑀓𑀭𑁄𑀢𑀺, 𑀢𑀲𑁆𑀲 𑀲𑀦𑁆𑀢𑀸𑀦𑁂 𑀨𑀮𑀼𑀧𑁆𑀧𑀸𑀤𑀧𑀘𑁆𑀘𑀬𑀪𑀸𑀯𑁂𑀦 𑀉𑀧𑁆𑀧𑀢𑁆𑀢𑀺. 𑀏𑀯𑀜𑁆𑀳𑀺 ‘‘𑀦𑀢𑁆𑀣𑀺 𑀓𑀫𑁆𑀫𑀁, 𑀦𑀢𑁆𑀣𑀺 𑀓𑀫𑁆𑀫𑀨𑀮’’𑀦𑁆𑀢𑀺 𑀅𑀓𑀺𑀭𑀺𑀬𑀯𑀸𑀤𑀲𑁆𑀲 𑀧𑀭𑀺𑀧𑀼𑀡𑁆𑀡𑀢𑀸. 𑀲𑀢𑀺 𑀳𑀺 𑀓𑀫𑁆𑀫𑀨𑀮𑁂 𑀓𑀫𑁆𑀫𑀸𑀦𑀫𑀓𑀺𑀭𑀺𑀬𑀪𑀸𑀯𑁄 𑀓𑀣𑀁 𑀪𑀯𑀺𑀲𑁆𑀲𑀢𑀺. 𑀲𑀩𑁆𑀩𑀣𑀸𑀧𑀻𑀢𑀺 ‘‘𑀓𑀭𑁄𑀢𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀲𑀩𑁆𑀩𑀧𑁆𑀧𑀓𑀸𑀭𑁂𑀦𑀧𑀺.

𑀮𑀩𑀼𑀚𑀦𑁆𑀢𑀺 𑀮𑀺𑀓𑀼𑀘𑀁. 𑀧𑀸𑀧𑀧𑀼𑀜𑁆𑀜𑀸𑀦𑀁 𑀓𑀺𑀭𑀺𑀬𑀫𑁂𑀯 𑀧𑀝𑀺𑀓𑁆𑀔𑀺𑀧𑀢𑀺, 𑀦 𑀭𑀜𑁆𑀜𑀸 𑀧𑀼𑀝𑁆𑀞𑀁 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁 𑀩𑁆𑀬𑀸𑀓𑀭𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀜𑁆𑀳𑀺 𑀅𑀯𑀥𑀸𑀭𑀡𑀁 𑀯𑀺𑀧𑀸𑀓𑀧𑀝𑀺𑀓𑁆𑀔𑁂𑀧𑀦𑀺𑀯𑀢𑁆𑀢𑀦𑀢𑁆𑀣𑀁. 𑀬𑁄 𑀳𑀺 𑀓𑀫𑁆𑀫𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀢𑁂𑀦 𑀅𑀢𑁆𑀣𑀢𑁄 𑀯𑀺𑀧𑀸𑀓𑁄𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑁄𑀬𑁂𑀯 𑀦𑀸𑀫 𑀳𑁄𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀓𑀫𑁆𑀫𑀁 𑀧𑀝𑀺𑀩𑀸𑀳𑀦𑁆𑀢𑁂𑀦𑀸𑀧𑀻’’𑀢𑀺𑀆𑀤𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁭𑁦-𑁧𑁭𑁨).

𑀧𑀝𑀺𑀭𑀸𑀚𑀽𑀳𑀺 𑀅𑀦𑀪𑀺𑀪𑀯𑀦𑀻𑀬𑀪𑀸𑀯𑁂𑀦 𑀯𑀺𑀲𑁂𑀲𑀢𑁄 𑀚𑀺𑀢𑀦𑁆𑀢𑀺 𑀯𑀺𑀚𑀺𑀢𑀁, 𑀏𑀓𑀲𑁆𑀲 𑀭𑀜𑁆𑀜𑁄 𑀆𑀡𑀸𑀧𑀯𑀢𑁆𑀢𑀺𑀤𑁂𑀲𑁄. ‘‘𑀫𑀸 𑀫𑀬𑁆𑀳𑀁 𑀯𑀺𑀚𑀺𑀢𑁂 𑀯𑀲𑀣𑀸’’𑀢𑀺 𑀅𑀧𑀲𑀸𑀤𑀦𑀸 𑀧𑀩𑁆𑀩𑀚𑀺𑀢𑀲𑁆𑀲 𑀧𑀩𑁆𑀩𑀸𑀚𑀦𑀲𑀗𑁆𑀔𑀸𑀢𑀸 𑀯𑀺𑀳𑁂𑀞𑀦𑀸𑀬𑁂𑀯𑀸𑀢𑀺 ¶ 𑀯𑀼𑀢𑁆𑀢𑀁 ‘‘𑀯𑀺𑀳𑁂𑀞𑁂𑀢𑀩𑁆𑀩’’𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 ‘‘𑀏𑀯𑀫𑁂𑀢’’𑀦𑁆𑀢𑀺 𑀉𑀧𑀥𑀸𑀭𑀡𑀁 𑀲𑀮𑁆𑀮𑀓𑁆𑀔𑀡𑀁 𑀉𑀕𑁆𑀕𑀡𑁆𑀳𑀦𑀁, 𑀢𑀤𑀫𑀺𑀦𑀸 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀆𑀳 ‘‘𑀲𑀸𑀭𑀢𑁄 𑀅𑀕𑁆𑀕𑀡𑁆𑀳𑀦𑁆𑀢𑁄’’𑀢𑀺. 𑀢𑀲𑁆𑀲 𑀧𑀦 𑀅𑀢𑁆𑀣𑀲𑁆𑀲 𑀅𑀤𑁆𑀥𑀦𑀺𑀬𑀪𑀸𑀯𑀸𑀧𑀸𑀤𑀦𑀯𑀲𑁂𑀦 𑀘𑀺𑀢𑁆𑀢𑁂𑀦 𑀲𑀦𑁆𑀥𑀸𑀭𑀡𑀁 𑀦𑀺𑀓𑁆𑀓𑀼𑀚𑁆𑀚𑀦𑀁, 𑀢𑀤𑀫𑀺𑀦𑀸 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀲𑀸𑀭𑀯𑀲𑁂𑀦𑁂𑀯…𑀧𑁂… 𑀅𑀝𑁆𑀞𑀧𑁂𑀦𑁆𑀢𑁄’’𑀢𑀺 𑀇𑀫𑀺𑀦𑀸. 𑀲𑀸𑀭𑀯𑀲𑁂𑀦𑁂𑀯𑀸𑀢𑀺 𑀉𑀢𑁆𑀢𑀫𑀯𑀲𑁂𑀦𑁂𑀯, 𑀅𑀯𑀺𑀢𑀣𑀢𑁆𑀢𑀸 𑀯𑀸 𑀧𑀭𑁂𑀳𑀺 𑀅𑀦𑀼𑀘𑁆𑀘𑀸𑀮𑀺𑀢𑁄 𑀣𑀺𑀭𑀪𑀽𑀢𑁄 𑀅𑀢𑁆𑀣𑁄 𑀅𑀨𑁂𑀕𑁆𑀕𑀼𑀪𑀸𑀯𑁂𑀦 𑀲𑀸𑀭𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀁𑀯𑀲𑁂𑀦𑁂𑀯𑀸𑀢𑀺 𑀅𑀢𑁆𑀣𑁄. 𑀦𑀺𑀲𑁆𑀲𑀭𑀡𑀦𑁆𑀢𑀺 𑀯𑀝𑁆𑀝𑀢𑁄 𑀦𑀺𑀬𑁆𑀬𑀸𑀦𑀁. 𑀧𑀭𑀫𑀢𑁆𑀣𑁄𑀢𑀺 𑀅𑀯𑀺𑀧𑀭𑀻𑀢𑀢𑁆𑀣𑁄, 𑀉𑀢𑁆𑀢𑀫𑀲𑁆𑀲 𑀯𑀸 𑀜𑀸𑀡𑀲𑁆𑀲𑀸𑀭𑀫𑁆𑀫𑀡𑀪𑀽𑀢𑁄 𑀅𑀢𑁆𑀣𑁄. 𑀩𑁆𑀬𑀜𑁆𑀚𑀦𑀁 𑀧𑀦 𑀢𑁂𑀦 𑀉𑀕𑁆𑀕𑀳𑀺𑀢𑀜𑁆𑀘𑁂𑀯 𑀦𑀺𑀓𑁆𑀓𑀼𑀚𑁆𑀚𑀺𑀢𑀜𑁆𑀘 𑀢𑀣𑀸𑀬𑁂𑀯 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀪𑀸𑀲𑀺𑀢𑀢𑁆𑀢𑀸.

𑀫𑀓𑁆𑀔𑀮𑀺𑀕𑁄𑀲𑀸𑀮𑀯𑀸𑀤𑀯𑀡𑁆𑀡𑀦𑀸

𑁧𑁬𑁮. 𑀉𑀪𑀬𑁂𑀦𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑀧𑀝𑀺𑀲𑁂𑀥𑀯𑀘𑀦𑁂𑀦. ‘‘𑀯𑀺𑀚𑁆𑀚𑀫𑀸𑀦𑀫𑁂𑀯𑀸’’𑀢𑀺 𑀇𑀫𑀺𑀦𑀸 𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀲𑁆𑀲𑁂𑀯 𑀧𑀝𑀺𑀓𑁆𑀔𑀺𑀧𑀦𑁂 𑀢𑀲𑁆𑀲 𑀅𑀜𑁆𑀜𑀸𑀡𑀫𑁂𑀯 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀁𑀓𑀺𑀮𑁂𑀲𑀧𑀘𑁆𑀘𑀬𑀦𑁆𑀢𑀺 𑀲𑀁𑀓𑀺𑀮𑀺𑀲𑁆𑀲𑀦𑀲𑁆𑀲 𑀫𑀮𑀻𑀦𑀲𑁆𑀲 𑀓𑀸𑀭𑀡𑀁 ¶ . 𑀯𑀺𑀲𑀼𑀤𑁆𑀥𑀺𑀧𑀘𑁆𑀘𑀬𑀦𑁆𑀢𑀺 𑀲𑀁𑀓𑀺𑀮𑁂𑀲𑀢𑁄 𑀯𑀺𑀲𑀼𑀤𑁆𑀥𑀺𑀬𑀸 𑀯𑁄𑀤𑀸𑀦𑀲𑁆𑀲 𑀧𑀘𑁆𑀘𑀬𑀁. 𑀅𑀢𑁆𑀢𑀓𑀸𑀭𑁂𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲 𑀏-𑀓𑀸𑀭𑀯𑀲𑁂𑀦 𑀧𑀤𑀲𑀺𑀤𑁆𑀥𑀺 𑀬𑀣𑀸 ‘‘𑀯𑀦𑀧𑁆𑀧𑀕𑀼𑀫𑁆𑀩𑁂 𑀬𑀣𑀸 𑀨𑀼𑀲𑀺𑀢𑀕𑁆𑀕𑁂’’𑀢𑀺, (𑀔𑀼. 𑀧𑀸. 𑁧𑁩; 𑀲𑀼. 𑀦𑀺. 𑁨𑁩𑁬) 𑀧𑀘𑁆𑀘𑀢𑁆𑀢𑀢𑁆𑀣𑁂 𑀯𑀸 𑀪𑀼𑀫𑁆𑀫𑀯𑀘𑀦𑀁 𑀬𑀣𑀸 ‘‘𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺’’𑀦𑁆𑀢𑀺 (𑀤𑀻. 𑀦𑀺. 𑁧.𑁧𑁯𑁪), 𑀢𑀤𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀅𑀢𑁆𑀢𑀓𑀸𑀭𑁄’’𑀢𑀺 𑀇𑀫𑀺𑀦𑀸. 𑀲𑁄 𑀘 𑀢𑁂𑀦 𑀢𑁂𑀦 𑀲𑀢𑁆𑀢𑁂𑀦 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀓𑀫𑁆𑀫𑀁, 𑀅𑀢𑁆𑀢𑀦𑀸 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀧𑀬𑁄𑀕𑁄 𑀯𑀸. 𑀢𑁂𑀦𑀸𑀳 ‘‘𑀬𑁂𑀦𑀸’’𑀢𑀺𑀆𑀤𑀺. 𑀲𑀩𑁆𑀩𑀜𑁆𑀜𑀼𑀢𑀦𑁆𑀢𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁. 𑀢𑀦𑁆𑀢𑀺 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀁. 𑀤𑀼𑀢𑀺𑀬𑀧𑀤𑁂𑀦𑀸𑀢𑀺 ‘‘𑀦𑀢𑁆𑀣𑀺 𑀧𑀭𑀓𑀸𑀭𑁂’’𑀢𑀺 𑀧𑀤𑁂𑀦. 𑀧𑀭𑀓𑀸𑀭𑁄 𑀘 𑀦𑀸𑀫 𑀧𑀭𑀲𑁆𑀲 𑀯𑀸𑀳𑀲𑀸 𑀇𑀚𑁆𑀛𑀦𑀓𑀧𑀬𑁄𑀕𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀁 𑀧𑀭𑀓𑀸𑀭’’𑀦𑁆𑀢𑀺𑀆𑀤𑀺. 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀦𑁆𑀢𑀺 𑀑𑀯𑀸𑀤𑀪𑀽𑀢𑀫𑀦𑀼𑀲𑀸𑀲𑀦𑀺𑀁, 𑀧𑀞𑀫𑀁 𑀯𑀸 𑀑𑀯𑀸𑀤𑁄, 𑀧𑀘𑁆𑀙𑀸 𑀅𑀦𑀼𑀲𑀸𑀲𑀦𑀻. ‘‘𑀧𑀭𑀓𑀸𑀭’’𑀦𑁆𑀢𑀺 𑀧𑀤𑀲𑁆𑀲 𑀉𑀧𑀮𑀓𑁆𑀔𑀡𑀯𑀲𑁂𑀦 𑀅𑀢𑁆𑀣𑀤𑀲𑁆𑀲𑀦𑀜𑁆𑀘𑁂𑀢𑀁, 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀧𑀭𑀓𑀸𑀭𑀸𑀯𑀲𑁆𑀲𑀬𑁄 𑀦𑀢𑁆𑀣𑀻𑀢𑀺 𑀆𑀳 ‘‘𑀞𑀧𑁂𑀢𑁆𑀯𑀸 𑀫𑀳𑀸𑀲𑀢𑁆𑀢’’𑀦𑁆𑀢𑀺. 𑀅𑀢𑁆𑀣𑁂𑀯𑁂𑀲 𑀮𑁄𑀓𑀺𑀬𑀥𑀫𑁆𑀫𑁂 𑀬𑀣𑀸 𑀢𑀁 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀴𑀸𑀭𑀼𑀤𑀓𑁂 𑀦𑀺𑀲𑁆𑀲𑀸𑀬 𑀧𑀜𑁆𑀘𑀸𑀪𑀺𑀜𑁆𑀜𑀸𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀮𑀸𑀪𑁄, 𑀢𑀜𑁆𑀘 𑀧𑀘𑁆𑀙𑀺𑀫𑀪𑀯𑀺𑀓𑀫𑀳𑀸𑀲𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀲𑁆𑀲𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑁄 𑀢𑁂𑀲𑀫𑁆𑀧𑀺 𑀢𑀤𑀪𑀸𑀯𑀢𑁄. 𑀫𑀦𑀼𑀲𑁆𑀲𑀲𑁄𑀪𑀕𑁆𑀬𑀢𑀦𑁆𑀢𑀺 𑀫𑀦𑀼𑀲𑁆𑀲𑁂𑀲𑀼 𑀲𑀼𑀪𑀕𑀪𑀸𑀯𑀁. 𑀏𑀯𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀓𑀫𑁆𑀫𑀯𑀸𑀤𑀲𑁆𑀲, 𑀓𑀺𑀭𑀺𑀬𑀯𑀸𑀤𑀲𑁆𑀲 𑀘 𑀧𑀝𑀺𑀓𑁆𑀔𑀺𑀧𑀦𑁂𑀦. 𑀚𑀺𑀦𑀘𑀓𑁆𑀓𑁂𑀢𑀺 ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂 𑀓𑀫𑁆𑀫𑀁 𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓’’𑀦𑁆𑀢𑀺𑀆𑀤𑀺 (𑀅. 𑀦𑀺. 𑁪.𑁨𑁩𑁨) 𑀦𑀬𑀧𑁆𑀧𑀯𑀢𑁆𑀢𑁂 𑀓𑀫𑁆𑀫𑀸𑀦𑀁, 𑀓𑀫𑁆𑀫𑀨𑀮𑀸𑀦𑀜𑁆𑀘 𑀅𑀢𑁆𑀣𑀺𑀢𑀸𑀧𑀭𑀺𑀤𑀻𑀧𑀦𑁂 𑀩𑀼𑀤𑁆𑀥𑀲𑀸𑀲𑀦𑁂. 𑀧𑀘𑁆𑀘𑀦𑀻𑀓𑀓𑀣𑀦𑀁 𑀧𑀳𑀸𑀭𑀤𑀸𑀦𑀲𑀤𑀺𑀲𑀦𑁆𑀢𑀺 ‘‘𑀧𑀳𑀸𑀭𑀁 𑀤𑁂𑀢𑀺 𑀦𑀸𑀫𑀸’’𑀢𑀺.

𑀬𑀣𑀸𑀯𑀼𑀢𑁆𑀢𑀅𑀢𑁆𑀢𑀓𑀸𑀭𑀧𑀭𑀓𑀸𑀭𑀸𑀪𑀸𑀯𑀢𑁄 ¶ 𑀏𑀯 𑀲𑀢𑁆𑀢𑀸𑀦𑀁 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁄 𑀦𑀸𑀫 𑀓𑁄𑀘𑀺 𑀦𑀢𑁆𑀣𑀻𑀢𑀺 𑀲𑀦𑁆𑀥𑀸𑀬 ‘‘𑀦𑀢𑁆𑀣𑀺𑀧𑀼𑀭𑀺𑀲𑀓𑀸𑀭𑁂’’𑀢𑀺 𑀢𑀲𑁆𑀲 𑀧𑀝𑀺𑀓𑁆𑀔𑀺𑀧𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀤𑁂𑀯𑀢𑁆𑀢𑀫𑁆𑀧𑀻’’𑀢𑀺𑀆𑀤𑀺𑀦𑀸, ‘‘𑀫𑀦𑀼𑀲𑁆𑀲𑀲𑁄𑀪𑀕𑁆𑀬𑀢’’𑀦𑁆𑀢𑀺𑀆𑀤𑀺𑀦𑀸 𑀘 𑀯𑀼𑀢𑁆𑀢𑀧𑁆𑀧𑀓𑀸𑀭𑀸. ‘‘𑀩𑀮𑁂 𑀧𑀢𑀺𑀝𑁆𑀞𑀺𑀢𑀸’’𑀢𑀺 𑀯𑀢𑁆𑀯𑀸 𑀯𑀻𑀭𑀺𑀬𑀫𑁂𑀯𑀺𑀥 𑀩𑀮𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀻𑀭𑀺𑀬𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀲𑀢𑁆𑀢𑀸𑀦𑀜𑁆𑀳𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀆𑀯𑀳𑀁 𑀯𑀻𑀭𑀺𑀬𑀩𑀮𑀁 𑀦𑀢𑁆𑀣𑀻𑀢𑀺 𑀲𑁄 𑀧𑀝𑀺𑀓𑁆𑀔𑀺𑀧𑀢𑀺, 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁 𑀯𑁄𑀤𑀸𑀦𑀺𑀬𑀩𑀮𑀲𑁆𑀲 𑀧𑀝𑀺𑀓𑁆𑀔𑀺𑀧𑀦𑀁 𑀲𑀁𑀓𑀺𑀮𑁂𑀲𑀺𑀓𑀲𑁆𑀲𑀸𑀧𑀺 𑀩𑀮𑀲𑁆𑀲 𑀢𑁂𑀦 𑀧𑀝𑀺𑀓𑁆𑀔𑀺𑀧𑀦𑀢𑁄. 𑀬𑀤𑀺 𑀯𑀻𑀭𑀺𑀬𑀸𑀤𑀻𑀦𑀺 𑀧𑀼𑀭𑀺𑀲𑀓𑀸𑀭𑀯𑁂𑀯𑀘𑀦𑀸𑀦𑀺, 𑀅𑀣 𑀓𑀲𑁆𑀫𑀸 𑀢𑁂𑀲𑀁 𑀯𑀺𑀲𑀼𑀁 𑀕𑀳𑀡𑀦𑁆𑀢𑀺 𑀆𑀳 ‘‘𑀇𑀤𑀁 𑀦𑁄 𑀯𑀻𑀭𑀺𑀬𑁂𑀦𑀸’’𑀢𑀺𑀆𑀤𑀺. 𑀇𑀤𑀁 𑀦𑁄 𑀯𑀻𑀭𑀺𑀬𑁂𑀦𑀸𑀢𑀺 𑀇𑀤𑀁 𑀨𑀮𑀁 𑀅𑀫𑁆𑀳𑀸𑀓𑀁 𑀯𑀻𑀭𑀺𑀬𑁂𑀦 𑀧𑀯𑀢𑁆𑀢𑀁. 𑀧𑀯𑀢𑁆𑀢𑀯𑀘𑀦𑀧𑀝𑀺𑀓𑁆𑀔𑁂𑀧𑀓𑀭𑀡𑀯𑀲𑁂𑀦𑀸𑀢𑀺 𑀅𑀜𑁆𑀜𑁂𑀲𑀁 𑀧𑀯𑀢𑁆𑀢𑀯𑁄𑀳𑀸𑀭𑀯𑀘𑀦𑀲𑁆𑀲 𑀧𑀝𑀺𑀓𑁆𑀔𑁂𑀧𑀓𑀭𑀡𑀯𑀲𑁂𑀦 ¶ . 𑀯𑀻𑀭𑀺𑀬𑀣𑀸𑀫𑀧𑀭𑀓𑁆𑀓𑀫𑀲𑀫𑁆𑀩𑀦𑁆𑀥𑀦𑁂𑀦 𑀧𑀯𑀢𑁆𑀢𑀩𑀮𑀯𑀸𑀤𑀻𑀦𑀁 𑀯𑀸𑀤𑀲𑁆𑀲 𑀧𑀝𑀺𑀓𑁆𑀔𑁂𑀧𑀓𑀭𑀡𑀯𑀲𑁂𑀦 ‘‘𑀦𑀢𑁆𑀣𑀺 𑀩𑀮’’𑀦𑁆𑀢𑀺 𑀧𑀤𑀫𑀺𑀯 𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀢𑁂𑀦 𑀆𑀤𑀻𑀬𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀜𑁆𑀘 𑀯𑀘𑀦𑀻𑀬𑀢𑁆𑀣𑀢𑁄 𑀯𑀼𑀢𑁆𑀢𑀁, 𑀯𑀘𑀦𑀢𑁆𑀣𑀢𑁄 𑀧𑀦 𑀢𑀲𑁆𑀲𑀸 𑀢𑀲𑁆𑀲𑀸 𑀓𑀺𑀭𑀺𑀬𑀸𑀬 𑀉𑀲𑁆𑀲𑀦𑁆𑀦𑀝𑁆𑀞𑁂𑀦 𑀩𑀮𑀁. 𑀲𑀽𑀭𑀯𑀻𑀭𑀪𑀸𑀯𑀸𑀯𑀳𑀝𑁆𑀞𑁂𑀦 𑀯𑀻𑀭𑀺𑀬𑀁. 𑀢𑀤𑁂𑀯 𑀤𑀴𑁆𑀳𑀪𑀸𑀯𑀢𑁄, 𑀧𑁄𑀭𑀺𑀲𑀥𑀼𑀭𑀁 𑀯𑀳𑀦𑁆𑀢𑁂𑀦 𑀧𑀯𑀢𑁆𑀢𑁂𑀢𑀩𑁆𑀩𑀢𑁄 𑀘 𑀧𑀼𑀭𑀺𑀲𑀣𑀸𑀫𑁄. 𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀧𑀼𑀭𑀺𑀲𑀧𑀭𑀓𑁆𑀓𑀫𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀯𑀺𑀲𑀢𑁆𑀢𑀢𑀸𑀬 𑀲𑀢𑁆𑀢𑀸. 𑀅𑀲𑁆𑀲𑀲𑀦𑀧𑀲𑁆𑀲𑀲𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀧𑀸𑀡𑀦𑀢𑁄 𑀧𑀸𑀡𑀸𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀲𑀫𑀸𑀦𑁂𑀧𑀺 𑀧𑀤𑀤𑁆𑀯𑀬𑁂 𑀏𑀓𑀺𑀦𑁆𑀤𑁆𑀭𑀺𑀬𑀸𑀤𑀺𑀯𑀲𑁂𑀦 𑀧𑀸𑀡𑁂 𑀯𑀺𑀪𑀚𑀺𑀢𑁆𑀯𑀸 𑀲𑀢𑁆𑀢𑀢𑁄 𑀯𑀺𑀲𑁂𑀲𑀁 𑀓𑀢𑁆𑀯𑀸 𑀏𑀲 𑀯𑀤𑀢𑀻𑀢𑀺 𑀆𑀳 ‘‘𑀏𑀓𑀺𑀦𑁆𑀤𑁆𑀭𑀺𑀬𑁄’’𑀢𑀺𑀆𑀤𑀺. 𑀪𑀯𑀦𑁆𑀢𑀻𑀢𑀺 𑀪𑀽𑀢𑀸𑀢𑀺 𑀲𑀢𑁆𑀢𑀧𑀸𑀡𑀧𑀭𑀺𑀬𑀸𑀬𑁂𑀧𑀺 𑀲𑀢𑀺 𑀅𑀡𑁆𑀟𑀓𑁄𑀲𑀸𑀤𑀻𑀲𑀼 𑀲𑀫𑁆𑀪𑀯𑀦𑀝𑁆𑀞𑁂𑀦 𑀢𑀢𑁄 𑀯𑀺𑀲𑁂𑀲𑀸𑀯, 𑀢𑁂𑀦 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀅𑀡𑁆𑀟…𑀧𑁂… 𑀯𑀤𑀢𑀻’’𑀢𑀺 𑀇𑀫𑀺𑀦𑀸. 𑀯𑀢𑁆𑀣𑀺𑀓𑁄𑀲𑁄 𑀕𑀩𑁆𑀪𑀸𑀲𑀬𑁄. 𑀚𑀻𑀯𑀦𑀢𑁄 𑀧𑀸𑀡𑀁 𑀥𑀸𑀭𑁂𑀦𑁆𑀢𑁄 𑀯𑀺𑀬 𑀯𑀟𑁆𑀠𑀦𑀢𑁄 𑀚𑀻𑀯𑀸. 𑀢𑁂𑀦𑀸𑀳 ‘‘𑀲𑀸𑀮𑀺𑀬𑀯𑀸’’𑀢𑀺𑀆𑀤𑀺. 𑀆𑀤𑀺𑀲𑀤𑁆𑀤𑁂𑀦 𑀯𑀺𑀭𑀼𑀴𑁆𑀳𑀥𑀫𑁆𑀫𑀸 𑀢𑀺𑀡𑀭𑀼𑀓𑁆𑀔𑀸 𑀕𑀳𑀺𑀢𑀸. 𑀦𑀢𑁆𑀣𑀺 𑀏𑀢𑁂𑀲𑀁 𑀲𑀁𑀓𑀺𑀮𑁂𑀲𑀯𑀺𑀲𑀼𑀤𑁆𑀥𑀻𑀲𑀼 𑀯𑀲𑁄 𑀲𑀸𑀫𑀢𑁆𑀣𑀺𑀬𑀦𑁆𑀢𑀺 𑀅𑀯𑀲𑀸. 𑀢𑀣𑀸 𑀅𑀩𑀮𑀸 𑀅𑀯𑀻𑀭𑀺𑀬𑀸. 𑀢𑁂𑀦𑀸𑀳 ‘‘𑀢𑁂𑀲’’𑀦𑁆𑀢𑀺𑀆𑀤𑀺. 𑀦𑀺𑀬𑀢𑀸𑀢𑀺 𑀦𑀺𑀬𑀫𑀦𑀸, 𑀅𑀙𑁂𑀚𑁆𑀚𑀲𑀼𑀢𑁆𑀢𑀸𑀯𑀼𑀢𑀲𑁆𑀲 𑀅𑀪𑁂𑀚𑁆𑀚𑀫𑀡𑀺𑀦𑁄 𑀯𑀺𑀬 𑀦𑀺𑀬𑀢𑀧𑁆𑀧𑀯𑀢𑁆𑀢𑀺𑀢𑀸𑀬 𑀕𑀢𑀺𑀚𑀸𑀢𑀺𑀩𑀦𑁆𑀥𑀸𑀧𑀯𑀕𑁆𑀕𑀯𑀲𑁂𑀦 𑀦𑀺𑀬𑀸𑀫𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀸𑀲𑀼 𑀢𑀸𑀲𑀼 𑀚𑀸𑀢𑀻𑀲𑀼. 𑀙𑀦𑁆𑀦𑀁 𑀅𑀪𑀺𑀚𑀸𑀢𑀻𑀦𑀁 𑀲𑀫𑁆𑀩𑀦𑁆𑀥𑀻𑀪𑀽𑀢𑀸𑀦𑀁 𑀕𑀫𑀦𑀁 𑀲𑀫𑀯𑀸𑀬𑁂𑀦 𑀲𑀫𑀸𑀕𑀫𑁄. 𑀲𑀫𑁆𑀩𑀦𑁆𑀥𑀻𑀦𑀺𑀭𑀧𑁂𑀓𑁆𑀔𑁄𑀧𑀺 𑀪𑀸𑀯𑀲𑀤𑁆𑀤𑁄 𑀲𑀫𑁆𑀩𑀦𑁆𑀥𑀻𑀲𑀳𑀺𑀢𑁄 𑀯𑀺𑀬 𑀧𑀓𑀢𑀺𑀬𑀢𑁆𑀣𑀯𑀸𑀘𑀓𑁄𑀢𑀺 𑀆𑀳 ‘‘𑀲𑀪𑀸𑀯𑁄𑀬𑁂𑀯𑀸’’𑀢𑀺, 𑀬𑀣𑀸 𑀓𑀡𑁆𑀝𑀓𑀲𑁆𑀲 𑀢𑀺𑀓𑁆𑀔𑀢𑀸, 𑀓𑀧𑀺𑀢𑁆𑀣𑀨𑀮𑀸𑀤𑀻𑀦𑀁 𑀧𑀭𑀺𑀫𑀡𑁆𑀟𑀮𑀢𑀸, 𑀫𑀺𑀕𑀧𑀓𑁆𑀔𑀻𑀦𑀁 𑀯𑀺𑀘𑀺𑀢𑁆𑀢𑀸𑀓𑀸𑀭𑀢𑀸 𑀘, 𑀏𑀯𑀁 𑀲𑀩𑁆𑀩𑀲𑁆𑀲𑀸𑀧𑀺 𑀮𑁄𑀓𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑀫𑀦𑁆𑀢𑀭𑁂𑀦 𑀢𑀣𑀸 𑀢𑀣𑀸 𑀧𑀭𑀺𑀡𑀸𑀫𑁄 𑀅𑀓𑀼𑀢𑁆𑀢𑀺𑀫𑁄 𑀲𑀪𑀸𑀯𑁄𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑁂𑀦𑀸’’𑀢𑀺𑀆𑀤𑀺. 𑀧𑀭𑀺𑀡𑀫𑀦𑀁 𑀦𑀸𑀦𑀧𑁆𑀧𑀓𑀸𑀭𑀢𑀸𑀧𑀢𑁆𑀢𑀺. 𑀬𑁂𑀦𑀸𑀢𑀺 𑀲𑀢𑁆𑀢𑀧𑀸𑀡𑀸𑀤𑀺𑀦𑀸. 𑀬𑀣𑀸 𑀪𑀯𑀺𑀢𑀩𑁆𑀩𑀁, 𑀢𑀣𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀙𑀴𑀪𑀺𑀚𑀸𑀢𑀺𑀬𑁄 ¶ 𑀧𑀭𑀢𑁄 𑀯𑀺𑀢𑁆𑀣𑀸𑀭𑀻𑀬𑀺𑀲𑁆𑀲𑀦𑁆𑀢𑀺. ‘‘𑀲𑀼𑀔𑀜𑁆𑀘 𑀤𑀼𑀓𑁆𑀔𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀻’’𑀢𑀺 𑀯𑀤𑀦𑁆𑀢𑁄 𑀫𑀓𑁆𑀔𑀮𑀺 𑀅𑀤𑀼𑀓𑁆𑀔𑀫𑀲𑀼𑀔𑀪𑀽𑀫𑀺𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦 𑀚𑀸𑀦𑀸𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀸 𑀅𑀤𑀼𑀓𑁆𑀔𑀫𑀲𑀼𑀔𑀪𑀽𑀫𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀻’’𑀢𑀺. 𑀅𑀬𑀁 ‘‘𑀲𑀼𑀔𑀜𑁆𑀘 𑀤𑀼𑀓𑁆𑀔𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀻’’𑀢𑀺 ¶ 𑀯𑀘𑀦𑀁 𑀓𑀭𑀡𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀸 𑀆𑀘𑀭𑀺𑀬𑀲𑁆𑀲 𑀫𑀢𑀺. 𑀧𑁄𑀢𑁆𑀣𑀓𑁂𑀲𑀼 𑀧𑀦 ‘‘𑀅𑀜𑁆𑀜𑀸 𑀲𑀼𑀔𑀤𑀼𑀓𑁆𑀔𑀪𑀽𑀫𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀻’’𑀢𑀺 𑀅𑀬𑀫𑁂𑀯 𑀧𑀸𑀞𑁄 𑀤𑀺𑀝𑁆𑀞𑁄, 𑀦 ‘‘𑀅𑀤𑀼𑀓𑁆𑀔𑀫𑀲𑀼𑀔𑀪𑀽𑀫𑀻’’𑀢𑀺. 𑀏𑀯𑀁 𑀲𑀢𑀺 ‘‘𑀙𑀲𑁆𑀯𑁂𑀯𑀸𑀪𑀺𑀚𑀸𑀢𑀻𑀲𑀽’’𑀢𑀺 𑀯𑀘𑀦𑀁 𑀅𑀥𑀺𑀓𑀭𑀡𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀙𑀲𑀼 𑀏𑀯 𑀅𑀪𑀺𑀚𑀸𑀢𑀻𑀲𑀼 𑀲𑀼𑀔𑀤𑀼𑀓𑁆𑀔𑀧𑀝𑀺𑀲𑀁𑀯𑁂𑀤𑀦𑀁, 𑀦 𑀢𑁂𑀳𑀺 𑀅𑀜𑁆𑀜𑀢𑁆𑀣, 𑀢𑀸𑀬𑁂𑀯 𑀲𑀼𑀔𑀤𑀼𑀓𑁆𑀔𑀪𑀽𑀫𑀺, 𑀦 𑀢𑀤𑀜𑁆𑀜𑀸𑀢𑀺 𑀤𑀲𑁆𑀲𑁂𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀫𑁂𑀯 𑀘 𑀬𑀼𑀢𑁆𑀢𑀢𑀭𑁄 𑀧𑀝𑀺𑀓𑁆𑀔𑁂𑀧𑀺𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀪𑀽𑀫𑀺𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀬𑀤𑀺 𑀳𑀺 ‘‘𑀲𑀼𑀔𑀜𑁆𑀘 𑀤𑀼𑀓𑁆𑀔𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀻’’𑀢𑀺 𑀯𑀘𑀦𑁂𑀦 𑀧𑀝𑀺𑀓𑁆𑀔𑁂𑀧𑀺𑀢𑀩𑁆𑀩𑀲𑁆𑀲 𑀤𑀲𑁆𑀲𑀦𑀁 𑀲𑀺𑀬𑀸, 𑀅𑀣 ‘‘𑀅𑀜𑁆𑀜𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀦𑀢𑁆𑀣𑀻’’𑀢𑀺 𑀤𑀲𑁆𑀲𑁂𑀬𑁆𑀬, 𑀦 ‘‘𑀅𑀤𑀼𑀓𑁆𑀔𑀫𑀲𑀼𑀔𑀪𑀽𑀫𑀻’’𑀢𑀺 𑀤𑀲𑁆𑀲𑀦𑀳𑁂𑀢𑀼𑀯𑀘𑀦𑀲𑁆𑀲 𑀪𑀽𑀫𑀺𑀅𑀢𑁆𑀣𑀸𑀪𑀸𑀯𑀢𑁄. 𑀤𑀲𑁆𑀲𑁂𑀢𑀺 𑀘𑁂𑀢𑀁 𑀢𑀸𑀲𑀁 𑀪𑀽𑀫𑀺𑀬𑀸 𑀅𑀪𑀸𑀯𑀫𑁂𑀯, 𑀢𑁂𑀦 𑀯𑀺𑀜𑁆𑀜𑀸𑀬𑀢𑀺 𑀅𑀬𑀁 𑀧𑀸𑀞𑁄, 𑀅𑀬𑀜𑁆𑀘𑀢𑁆𑀣𑁄 𑀬𑀼𑀢𑁆𑀢𑀢𑀭𑁄𑀢𑀺.

𑀧𑀫𑀼𑀔𑀬𑁄𑀦𑀻𑀦𑀦𑁆𑀢𑀺 𑀫𑀦𑀼𑀲𑁆𑀲𑁂𑀲𑀼 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸𑀤𑀺𑀯𑀲𑁂𑀦, 𑀢𑀺𑀭𑀘𑁆𑀙𑀸𑀦𑀸𑀤𑀻𑀲𑀼 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀯𑀲𑁂𑀦 𑀧𑀥𑀸𑀦𑀬𑁄𑀦𑀻𑀦𑀁, 𑀧𑀥𑀸𑀦𑀢𑀸 𑀘𑁂𑀢𑁆𑀣 𑀉𑀢𑁆𑀢𑀫𑀢𑀸. 𑀢𑁂𑀦𑀸𑀳 ‘‘𑀉𑀢𑁆𑀢𑀫𑀬𑁄𑀦𑀻𑀦’’𑀦𑁆𑀢𑀺. 𑀲𑀝𑁆𑀞𑀺 𑀲𑀢𑀸𑀦𑀻𑀢𑀺 𑀙 𑀲𑀳𑀲𑁆𑀲𑀸𑀦𑀺. ‘‘𑀧𑀜𑁆𑀘 𑀘 𑀓𑀫𑁆𑀫𑀼𑀦𑁄 𑀲𑀢𑀸𑀦𑀻’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀤𑀲𑁆𑀲𑀦𑀁 ‘‘𑀧𑀜𑁆𑀘 𑀓𑀫𑁆𑀫𑀲𑀢𑀸𑀦𑀺 𑀘𑀸’’𑀢𑀺. ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 ‘‘𑀓𑁂𑀯𑀮𑀁 𑀢𑀓𑁆𑀓𑀫𑀢𑁆𑀢𑀓𑁂𑀦 𑀦𑀺𑀭𑀢𑁆𑀣𑀓𑀁 𑀤𑀺𑀝𑁆𑀞𑀺𑀁 𑀤𑀻𑀧𑁂𑀢𑀻’’𑀢𑀺 𑀇𑀫𑀫𑁂𑀯𑀢𑁆𑀣𑀫𑀢𑀺𑀤𑀺𑀲𑀢𑀺. 𑀏𑀢𑁆𑀣 𑀘 ‘‘𑀢𑀓𑁆𑀓𑀫𑀢𑁆𑀢𑀓𑁂𑀦𑀸’’𑀢𑀺 𑀯𑀤𑀦𑁆𑀢𑁄 𑀬𑀲𑁆𑀫𑀸 𑀢𑀓𑁆𑀓𑀺𑀓𑀸 𑀅𑀯𑀲𑁆𑀲𑀬𑀪𑀽𑀢𑀢𑀣𑀢𑁆𑀣𑀕𑁆𑀕𑀳𑀡𑀅𑀗𑁆𑀓𑀼𑀲𑀦𑀬𑀫𑀦𑁆𑀢𑀭𑁂𑀦 𑀦𑀺𑀭𑀗𑁆𑀓𑀼𑀲𑀢𑀸𑀬 𑀧𑀭𑀺𑀓𑀧𑁆𑀧𑀦𑀲𑁆𑀲 𑀬𑀁 𑀓𑀺𑀜𑁆𑀘𑀺 𑀅𑀢𑁆𑀢𑀦𑀸 𑀧𑀭𑀺𑀓𑀧𑁆𑀧𑀺𑀢𑀁 𑀲𑀸𑀭𑀢𑁄 𑀫𑀜𑁆𑀜𑀫𑀸𑀦𑀸 𑀢𑀣𑁂𑀯 𑀅𑀪𑀺𑀦𑀺𑀯𑀺𑀲𑁆𑀲 𑀢𑀢𑁆𑀣 𑀘 𑀤𑀺𑀝𑁆𑀞𑀺𑀕𑀸𑀳𑀁 𑀕𑀡𑁆𑀳𑀦𑁆𑀢𑀺, 𑀢𑀲𑁆𑀫𑀸 𑀦 𑀢𑁂𑀲𑀁 𑀤𑀺𑀝𑁆𑀞𑀺𑀯𑀢𑁆𑀣𑀼𑀲𑁆𑀫𑀺𑀁 𑀯𑀺𑀜𑁆𑀜𑀽𑀳𑀺 𑀯𑀺𑀘𑀸𑀭𑀡𑀸 𑀓𑀸𑀢𑀩𑁆𑀩𑀸𑀢𑀺 𑀇𑀫𑀫𑀥𑀺𑀧𑁆𑀧𑀸𑀬𑀁 𑀯𑀺𑀪𑀸𑀯𑁂𑀢𑀺. 𑀓𑁂𑀘𑀻𑀢𑀺 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄. 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀯𑀲𑁂𑀦𑀸𑀢𑀺 𑀘𑀓𑁆𑀔𑀸𑀤𑀺𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀯𑀲𑁂𑀦. 𑀢𑁂 𑀳𑀺 ‘‘𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀲𑀗𑁆𑀔𑀸𑀢𑀸𑀦𑀺 𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 ‘𑀧𑀜𑁆𑀘 𑀓𑀫𑁆𑀫𑀸𑀦𑀻’𑀢𑀺 𑀢𑀺𑀢𑁆𑀣𑀺𑀬𑀸 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺 ‘‘𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀸𑀦𑀺 𑀘 ‘𑀢𑀻𑀡𑀺 𑀓𑀫𑁆𑀫𑀸𑀦𑀻’𑀢𑀺’’. 𑀓𑀫𑁆𑀫𑀦𑁆𑀢𑀺 𑀮𑀤𑁆𑀥𑀻𑀢𑀺 𑀢𑀤𑀼𑀪𑀬𑀁 𑀑𑀴𑀸𑀭𑀺𑀓𑀢𑁆𑀢𑀸 𑀧𑀭𑀺𑀧𑀼𑀡𑁆𑀡𑀓𑀫𑁆𑀫𑀦𑁆𑀢𑀺 𑀮𑀤𑁆𑀥𑀺. 𑀫𑀦𑁄𑀓𑀫𑁆𑀫𑀁 𑀅𑀦𑁄𑀴𑀸𑀭𑀺𑀓𑀢𑁆𑀢𑀸 𑀉𑀧𑀟𑁆𑀠𑀓𑀫𑁆𑀫𑀦𑁆𑀢𑀺 𑀮𑀤𑁆𑀥𑀻𑀢𑀺 𑀬𑁄𑀚𑀦𑀸. ‘‘𑀤𑁆𑀯𑀸𑀲𑀝𑁆𑀞𑀺 𑀧𑀝𑀺𑀧𑀤𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑁄 ‘‘𑀤𑁆𑀯𑀝𑁆𑀞𑀺𑀧𑀝𑀺𑀧𑀤𑀸’’𑀢𑀺 𑀯𑀤𑀢𑀻𑀢𑀺 𑀆𑀳 ‘‘𑀤𑁆𑀯𑀸𑀲𑀝𑁆𑀞𑀺 𑀧𑀝𑀺𑀧𑀤𑀸’’𑀢𑀺. 𑀲𑀤𑁆𑀤𑀭𑀘𑀓𑀸 𑀧𑀦 ‘‘𑀤𑁆𑀯𑀸𑀲𑀝𑁆𑀞𑀺𑀬𑀸 𑀲𑀮𑁄𑀧𑁄, 𑀅𑀢𑁆𑀢𑀫𑀸’’𑀢𑀺 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀫𑁂𑀯 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀬𑀸 𑀬𑁄𑀕𑀢𑁄 𑀅𑀲𑀺𑀤𑁆𑀥𑀢𑁆𑀢𑀸 ¶ . 𑀬𑀤𑀺 𑀳𑀺 𑀲𑀸 𑀬𑁄𑀕𑁂𑀦 𑀲𑀺𑀤𑁆𑀥𑀸 𑀅𑀲𑁆𑀲, 𑀏𑀯𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀬𑁂𑀯 𑀲𑀺𑀬𑀸, 𑀢𑀣𑀸 𑀘 𑀲𑀢𑀺 𑀆𑀘𑀭𑀺𑀬𑀸𑀦𑀁 𑀫𑀢𑁂𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀯𑀤𑀦𑁆𑀢𑀺. ‘‘𑀘𑀼𑀮𑁆𑀮𑀸𑀲𑀻𑀢𑀺 𑀲𑀳𑀲𑁆𑀲𑀸𑀦𑀻’’𑀢𑀺𑀆𑀤𑀺𑀓𑀸 𑀧𑀦 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀧𑀬𑁄𑀕𑀸 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀬𑁂𑀯. 𑀤𑀺𑀲𑁆𑀲𑀢𑀺 𑀳𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀤𑀻𑀲𑀼 𑁋

‘‘𑀘𑀼𑀮𑁆𑀮𑀸𑀲𑀻𑀢𑀺 ¶ 𑀲𑀳𑀲𑁆𑀲𑀸𑀦𑀺, 𑀓𑀧𑁆𑀧𑀸 𑀢𑀺𑀝𑁆𑀞𑀦𑁆𑀢𑀺 𑀬𑁂 𑀫𑀭𑀽;

𑀦 𑀢𑁆𑀯𑁂𑀯 𑀢𑁂𑀧𑀺 𑀢𑀺𑀝𑁆𑀞𑀦𑁆𑀢𑀺, 𑀤𑁆𑀯𑀻𑀳𑀺 𑀘𑀺𑀢𑁆𑀢𑁂𑀳𑀺 𑀲𑀫𑁄𑀳𑀺𑀢𑀸’’𑀢𑀺. (𑀯𑀺𑀲𑀼𑀤𑁆𑀥𑀺. 𑁨.𑁭𑁧𑁫; 𑀫𑀳𑀸𑀦𑀺. 𑁧𑁦, 𑁩𑁯);

𑀏𑀓𑀲𑁆𑀫𑀺𑀁 𑀓𑀧𑁆𑀧𑁂𑀢𑀺 𑀘𑀢𑀼𑀦𑁆𑀦𑀫𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀸𑀦𑀁 𑀅𑀜𑁆𑀜𑀢𑀭𑀪𑀽𑀢𑁂 𑀏𑀓𑀲𑁆𑀫𑀺𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁂. 𑀢𑀢𑁆𑀣𑀸𑀧𑀺 𑀘 𑀯𑀺𑀯𑀝𑁆𑀝𑀝𑁆𑀞𑀸𑀬𑀻𑀲𑀜𑁆𑀜𑀺𑀢𑀁 𑀏𑀓𑀫𑁂𑀯 𑀲𑀦𑁆𑀥𑀸𑀬 ‘‘𑀤𑁆𑀯𑀝𑁆𑀞𑀦𑁆𑀢𑀭𑀓𑀧𑁆𑀧𑀸’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀲𑁄 𑀅𑀲𑁆𑀲𑀼𑀢𑀲𑀸𑀲𑀦𑀥𑀫𑁆𑀫𑁄 𑀇𑀢𑀭𑁂 𑀚𑀸𑀦𑀸𑀢𑀺 𑀩𑀸𑀳𑀺𑀭𑀓𑀸𑀦𑀫𑀯𑀺𑀲𑀬𑀢𑁆𑀢𑀸, 𑀅𑀚𑀸𑀦𑀦𑁆𑀢𑁄 𑀏𑀯𑀫𑀸𑀳𑀸𑀢𑀺 𑀅𑀢𑁆𑀣𑁄.

𑀉𑀭𑀩𑁆𑀪𑁂 𑀳𑀦𑀦𑁆𑀢𑀺, 𑀳𑀦𑁆𑀢𑁆𑀯𑀸 𑀯𑀸 𑀚𑀻𑀯𑀺𑀢𑀁 𑀓𑀧𑁆𑀧𑁂𑀦𑁆𑀢𑀻𑀢𑀺 𑀑𑀭𑀩𑁆𑀪𑀺𑀓𑀸. 𑀏𑀲 𑀦𑀬𑁄 𑀲𑀸𑀓𑀼𑀡𑀺𑀓𑀸𑀤𑀻𑀲𑀼𑀧𑀺. 𑀮𑀼𑀤𑁆𑀤𑀸𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑀓𑀸 𑀬𑁂 𑀓𑁂𑀘𑀺 𑀘𑀸𑀢𑀼𑀧𑁆𑀧𑀤𑀚𑀻𑀯𑀺𑀓𑀸 𑀦𑁂𑀲𑀸𑀤𑀸. 𑀫𑀸𑀕𑀯𑀺𑀓𑀧𑀤𑀲𑁆𑀫𑀺𑀜𑁆𑀳𑀺 𑀭𑁄𑀳𑀺𑀢𑀸𑀤𑀺𑀫𑀺𑀕𑀚𑀸𑀢𑀺𑀬𑁂𑀯 𑀕𑀳𑀺𑀢𑀸. 𑀩𑀦𑁆𑀥𑀦𑀸𑀕𑀸𑀭𑁂 𑀦𑀺𑀬𑁄𑀚𑁂𑀦𑁆𑀢𑀻𑀢𑀺 𑀩𑀦𑁆𑀥𑀦𑀸𑀕𑀸𑀭𑀺𑀓𑀸. 𑀓𑀼𑀭𑀽𑀭𑀓𑀫𑁆𑀫𑀦𑁆𑀢𑀸𑀢𑀺 𑀤𑀸𑀭𑀼𑀡𑀓𑀫𑁆𑀫𑀦𑁆𑀢𑀸. 𑀅𑀬𑀁 𑀲𑀩𑁆𑀩𑁄𑀧𑀺 𑀓𑀡𑁆𑀳𑀓𑀫𑁆𑀫𑀧𑀲𑀼𑀢𑀢𑀸𑀬 𑀓𑀡𑁆𑀳𑀸𑀪𑀺𑀚𑀸𑀢𑀻𑀢𑀺 𑀯𑀤𑀢𑀺 𑀓𑀡𑁆𑀳𑀲𑁆𑀲 𑀥𑀫𑁆𑀫𑀲𑁆𑀲 𑀅𑀪𑀺𑀚𑀸𑀢𑀺 𑀅𑀩𑁆𑀪𑀼𑀧𑁆𑀧𑀢𑁆𑀢𑀺 𑀬𑀲𑁆𑀲𑀸𑀢𑀺 𑀓𑀢𑁆𑀯𑀸. 𑀪𑀺𑀓𑁆𑀔𑀽𑀢𑀺 𑀩𑀼𑀤𑁆𑀥𑀲𑀸𑀲𑀦𑁂 𑀪𑀺𑀓𑁆𑀔𑀽. 𑀓𑀡𑁆𑀝𑀓𑁂𑀢𑀺 𑀙𑀦𑁆𑀤𑀭𑀸𑀕𑁂. 𑀲𑀜𑁆𑀜𑁄𑀕𑀯𑀲𑁂𑀦 𑀢𑁂𑀲𑀁 𑀧𑀓𑁆𑀔𑀺𑀧𑀦𑀁. 𑀓𑀡𑁆𑀝𑀓𑀲𑀤𑀺𑀲𑀙𑀦𑁆𑀤𑀭𑀸𑀕𑁂𑀦 𑀲𑀜𑁆𑀜𑀼𑀢𑁆𑀢𑀸 𑀪𑀼𑀜𑁆𑀚𑀦𑁆𑀢𑀻𑀢𑀺 𑀳𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀓𑀡𑁆𑀝𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸𑀢𑀺 𑀘𑁂? 𑀬𑀲𑁆𑀫𑀸 ‘‘𑀢𑁂 𑀧𑀡𑀻𑀢𑀧𑀡𑀻𑀢𑁂 𑀧𑀘𑁆𑀘𑀬𑁂 𑀧𑀝𑀺𑀲𑁂𑀯𑀦𑁆𑀢𑀻’’𑀢𑀺 𑀢𑀲𑁆𑀲 𑀫𑀺𑀘𑁆𑀙𑀸𑀕𑀸𑀳𑁄, 𑀢𑀲𑁆𑀫𑀸 𑀜𑀸𑀬𑀮𑀤𑁆𑀥𑁂𑀧𑀺 𑀧𑀘𑁆𑀘𑀬𑁂 𑀪𑀼𑀜𑁆𑀚𑀫𑀸𑀦𑀸 𑀆𑀚𑀻𑀯𑀓𑀲𑀫𑀬𑀲𑁆𑀲 𑀯𑀺𑀮𑁄𑀫𑀕𑀸𑀳𑀺𑀢𑀸𑀬 𑀧𑀘𑁆𑀘𑀬𑁂𑀲𑀼 𑀓𑀡𑁆𑀝𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀔𑀸𑀤𑀦𑁆𑀢𑀺 𑀦𑀸𑀫𑀸𑀢𑀺 𑀯𑀤𑀢𑀺 𑀓𑀡𑁆𑀝𑀓𑀯𑀼𑀢𑁆𑀢𑀺𑀓𑀸𑀢𑀺 𑀓𑀡𑁆𑀝𑀓𑁂𑀦 𑀬𑀣𑀸𑀯𑀼𑀢𑁆𑀢𑁂𑀦 𑀲𑀳 𑀚𑀻𑀯𑀺𑀓𑀸. 𑀅𑀬𑀜𑁆𑀳𑀺𑀲𑁆𑀲 𑀧𑀸𑀴𑀺𑀬𑁂𑀯𑀸𑀢𑀺 𑀅𑀬𑀁 𑀫𑀓𑁆𑀔𑀮𑀺𑀲𑁆𑀲 𑀯𑀸𑀤𑀤𑀻𑀧𑀦𑀸 𑀅𑀢𑁆𑀢𑀦𑀸 𑀭𑀘𑀺𑀢𑀸 𑀧𑀸𑀴𑀺𑀬𑁂𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀲𑀫𑀢𑁆𑀣𑁂𑀢𑀺. 𑀓𑀡𑁆𑀝𑀓𑀯𑀼𑀢𑁆𑀢𑀺𑀓𑀸 𑀏𑀯 𑀦𑀸𑀫 𑀏𑀓𑁂 𑀅𑀧𑀭𑁂 𑀧𑀩𑁆𑀩𑀚𑀺𑀢𑀸 𑀩𑀸𑀳𑀺𑀭𑀓𑀸 𑀲𑀦𑁆𑀢𑀺, 𑀢𑁂 𑀦𑀻𑀮𑀸𑀪𑀺𑀚𑀸𑀢𑀻𑀢𑀺 𑀯𑀤𑀢𑀻𑀢𑀺 𑀅𑀢𑁆𑀣𑁄. 𑀢𑁂 𑀳𑀺 𑀲𑀯𑀺𑀲𑁂𑀲𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸. 𑀢𑀣𑀸 𑀳𑀺 𑀢𑁂 𑀓𑀡𑁆𑀝𑀓𑁂 𑀯𑀢𑁆𑀢𑀦𑁆𑀢𑀸 𑀯𑀺𑀬 𑀪𑀯𑀦𑁆𑀢𑀻𑀢𑀺 𑀓𑀡𑁆𑀝𑀓𑀯𑀼𑀢𑁆𑀢𑀺𑀓𑀸𑀢𑀺 𑀯𑀼𑀢𑁆𑀢𑀸. 𑀦𑀻𑀮𑀲𑁆𑀲 𑀥𑀫𑁆𑀫𑀲𑁆𑀲 𑀅𑀪𑀺𑀚𑀸𑀢𑀺 𑀬𑀲𑁆𑀲𑀸𑀢𑀺 𑀦𑀻𑀮𑀸𑀪𑀺𑀚𑀸𑀢𑀺. 𑀏𑀯𑀫𑀺𑀢𑀭𑁂𑀲𑀼𑀧𑀺.

𑀅𑀫𑁆𑀳𑀸𑀓𑀁 ¶ 𑀲𑀜𑁆𑀜𑁄𑀚𑀦𑀕𑀡𑁆𑀞𑁄 𑀦𑀢𑁆𑀣𑀻𑀢𑀺 𑀯𑀸𑀤𑀺𑀦𑁄 𑀩𑀸𑀳𑀺𑀭𑀓𑀧𑀩𑁆𑀩𑀚𑀺𑀢𑀸 𑀦𑀺𑀕𑀡𑁆𑀞𑀸. 𑀏𑀓𑀫𑁂𑀯 𑀲𑀸𑀝𑀓𑀁 𑀧𑀭𑀺𑀤𑀳𑀦𑁆𑀢𑀸 𑀏𑀓𑀲𑀸𑀝𑀓𑀸. 𑀓𑀡𑁆𑀳𑀢𑁄 𑀧𑀭𑀺𑀲𑀼𑀤𑁆𑀥𑁄 𑀦𑀻𑀮𑁄, 𑀢𑀢𑁄 𑀧𑀦 𑀮𑁄𑀳𑀺𑀢𑁄𑀢𑀺𑀆𑀤𑀺𑀦𑀸 𑀬𑀣𑀸𑀓𑁆𑀓𑀫𑀁 𑀢𑀲𑁆𑀲 𑀧𑀭𑀺𑀲𑀼𑀤𑁆𑀥𑀁 𑀯𑀸𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑁂 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀡𑁆𑀟𑀭𑀢𑀭𑀸𑀢𑀺 𑀪𑀼𑀜𑁆𑀚𑀦𑀦𑀳𑀸𑀦𑀧𑀝𑀺𑀓𑁆𑀔𑁂𑀧𑀸𑀤𑀺𑀯𑀢𑀲𑀫𑀸𑀬𑁄𑀕𑁂𑀦 𑀧𑀭𑀺𑀲𑀼𑀤𑁆𑀥𑀢𑀭𑀸 𑀓𑀡𑁆𑀳𑀦𑀻𑀮𑀫𑀼𑀧𑀸𑀤𑀸𑀬 𑀮𑁄𑀳𑀺𑀢𑀲𑁆𑀲𑀸𑀧𑀺 𑀧𑀭𑀺𑀲𑀼𑀤𑁆𑀥𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀢𑁄. 𑀑𑀤𑀸𑀢𑀯𑀲𑀦𑀸𑀢𑀺 𑀑𑀤𑀸𑀢𑀯𑀢𑁆𑀣𑀧𑀭𑀺𑀤𑀳𑀦𑀸. 𑀅𑀘𑁂𑀮𑀓𑀲𑀸𑀯𑀓𑀸𑀢𑀺 𑀆𑀚𑀻𑀯𑀓𑀲𑀸𑀯𑀓𑀪𑀽𑀢𑀸. 𑀢𑁂 𑀓𑀺𑀭 𑀆𑀚𑀻𑀯𑀓𑀮𑀤𑁆𑀥𑀺𑀬𑀸 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀢𑀸𑀬 𑀦𑀺𑀕𑀡𑁆𑀞𑁂𑀳𑀺𑀧𑀺 𑀧𑀡𑁆𑀟𑀭𑀢𑀭𑀸 𑀳𑀮𑀺𑀤𑁆𑀤𑀸𑀪𑀸𑀦𑀫𑁆𑀧𑀺 ¶ 𑀧𑀼𑀭𑀺𑀫𑁂 𑀉𑀧𑀸𑀤𑀸𑀬 𑀧𑀭𑀺𑀲𑀼𑀤𑁆𑀥𑀪𑀸𑀯𑀧𑁆𑀧𑀢𑁆𑀢𑀺𑀢𑁄. ‘‘𑀏𑀯’’𑀦𑁆𑀢𑀺𑀆𑀤𑀺𑀦𑀸 𑀢𑀲𑁆𑀲 𑀙𑀦𑁆𑀤𑀸𑀕𑀫𑀦𑀁 𑀤𑀲𑁆𑀲𑁂𑀢𑀺. 𑀦𑀦𑁆𑀤𑀸𑀤𑀻𑀦𑀁 𑀲𑀸𑀯𑀓𑀪𑀽𑀢𑀸 𑀧𑀩𑁆𑀩𑀚𑀺𑀢𑀸 𑀆𑀚𑀻𑀯𑀓𑀸. 𑀢𑀣𑀸 𑀆𑀚𑀻𑀯𑀓𑀺𑀦𑀺𑀬𑁄. 𑀦𑀦𑁆𑀤𑀸𑀤𑀬𑁄 𑀓𑀺𑀭 𑀢𑀣𑀸𑀭𑀽𑀧𑀁 𑀆𑀚𑀻𑀯𑀓𑀧𑀝𑀺𑀧𑀢𑁆𑀢𑀺𑀁 𑀉𑀓𑁆𑀓𑀁𑀲𑀁 𑀧𑀸𑀧𑁂𑀢𑁆𑀯𑀸 𑀞𑀺𑀢𑀸, 𑀢𑀲𑁆𑀫𑀸 𑀦𑀺𑀕𑀡𑁆𑀞𑁂𑀳𑀺 𑀆𑀚𑀻𑀯𑀓𑀲𑀸𑀯𑀓𑁂𑀳𑀺 𑀧𑀩𑁆𑀩𑀚𑀺𑀢𑁂𑀳𑀺 𑀧𑀡𑁆𑀟𑀭𑀢𑀭𑀸 𑀯𑀼𑀢𑁆𑀢𑀸 𑀧𑀭𑀫𑀲𑀼𑀓𑁆𑀓𑀸𑀪𑀺𑀚𑀸𑀢𑀻𑀢𑀺 𑀅𑀬𑀁 𑀢𑀲𑁆𑀲 𑀮𑀤𑁆𑀥𑀺.

𑀧𑀼𑀭𑀺𑀲𑀪𑀽𑀫𑀺𑀬𑁄𑀢𑀺 𑀧𑀥𑀸𑀦𑀦𑀺𑀤𑁆𑀤𑁂𑀲𑁄. 𑀇𑀢𑁆𑀣𑀻𑀦𑀫𑁆𑀧𑀺 𑀳𑁂𑀢𑀸 𑀪𑀽𑀫𑀺𑀬𑁄 𑀏𑀲 𑀇𑀘𑁆𑀙𑀢𑁂𑀯. 𑀲𑀢𑁆𑀢 𑀤𑀺𑀯𑀲𑁂𑀢𑀺 𑀅𑀘𑁆𑀘𑀦𑁆𑀢𑀲𑀜𑁆𑀜𑁄𑀕𑀯𑀘𑀦𑀁, 𑀏𑀢𑁆𑀢𑀓𑀫𑁆𑀧𑀺 𑀫𑀦𑁆𑀤𑀸 𑀫𑁄𑀫𑀽𑀳𑀸𑀢𑀺. 𑀲𑀫𑁆𑀩𑀸𑀥𑀝𑁆𑀞𑀸𑀦𑀢𑁄𑀢𑀺 𑀫𑀸𑀢𑀼𑀓𑀼𑀘𑁆𑀙𑀺𑀁 𑀲𑀦𑁆𑀥𑀸𑀬𑀸𑀳. 𑀭𑁄𑀤𑀦𑁆𑀢𑀺 𑀘𑁂𑀯 𑀯𑀺𑀭𑀯𑀦𑁆𑀢𑀺 𑀘 𑀢𑀫𑀦𑀼𑀲𑁆𑀲𑀭𑀺𑀢𑁆𑀯𑀸. 𑀔𑁂𑀤𑀦𑀁, 𑀓𑀻𑀴𑀦𑀜𑁆𑀘 𑀔𑀺𑀟𑁆𑀟𑀸𑀲𑀤𑁆𑀤𑁂𑀦𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 𑀔𑀺𑀟𑁆𑀟𑀸𑀪𑀽𑀫𑀺 𑀯𑀼𑀢𑁆𑀢𑀸. 𑀧𑀤𑀲𑁆𑀲 𑀦𑀺𑀓𑁆𑀔𑀺𑀧𑀦𑀁 𑀧𑀤𑀦𑀺𑀓𑁆𑀔𑀺𑀧𑀦𑀁. 𑀬𑀤𑀸 𑀢𑀣𑀸 𑀧𑀤𑀁 𑀦𑀺𑀓𑁆𑀔𑀺𑀧𑀺𑀢𑀼𑀁 𑀲𑀫𑀢𑁆𑀣𑁄, 𑀢𑀤𑀸 𑀧𑀤𑀯𑀻𑀫𑀁𑀲𑀪𑀽𑀫𑀺 𑀦𑀸𑀫𑀸𑀢𑀺 𑀪𑀸𑀯𑁄. 𑀯𑀢𑀸𑀯𑀢𑀲𑁆𑀲 𑀚𑀸𑀦𑀦𑀓𑀸𑀮𑁂. 𑀪𑀺𑀓𑁆𑀔𑀼 𑀘 𑀧𑀦𑁆𑀦𑀓𑁄𑀢𑀺𑀆𑀤𑀺𑀧𑀺 𑀢𑁂𑀲𑀁 𑀩𑀸𑀳𑀺𑀭𑀓𑀸𑀦𑀁 𑀧𑀸𑀴𑀺𑀬𑁂𑀯. 𑀢𑀢𑁆𑀣 𑀧𑀦𑁆𑀦𑀓𑁄𑀢𑀺 𑀪𑀺𑀓𑁆𑀔𑀸𑀬 𑀯𑀺𑀘𑀭𑀡𑀓𑁄, 𑀢𑁂𑀲𑀁 𑀯𑀸 𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑀺𑀧𑀦𑁆𑀦𑀓𑁄. 𑀚𑀺𑀦𑁄𑀢𑀺 𑀚𑀺𑀡𑁆𑀡𑁄 𑀚𑀭𑀸𑀯𑀲𑁂𑀦 𑀳𑀻𑀦𑀥𑀸𑀢𑀼𑀓𑁄, 𑀅𑀢𑁆𑀢𑀦𑁄 𑀯𑀸 𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑀺𑀧𑀓𑁆𑀔𑀁 𑀚𑀺𑀦𑀺𑀢𑁆𑀯𑀸 𑀞𑀺𑀢𑁄. 𑀲𑁄 𑀓𑀺𑀭 𑀢𑀣𑀸𑀪𑀽𑀢𑁄 𑀥𑀫𑁆𑀫𑀫𑁆𑀧𑀺 𑀓𑀲𑁆𑀲𑀘𑀺 𑀦 𑀓𑀣𑁂𑀲𑀺. 𑀢𑁂𑀦𑀸𑀳 ‘‘𑀦 𑀓𑀺𑀜𑁆𑀘𑀺 𑀆𑀳𑀸’’𑀢𑀺. 𑀑𑀝𑁆𑀞𑀯𑀤𑀦𑀸𑀤𑀺𑀯𑀺𑀧𑁆𑀧𑀓𑀸𑀭𑁂 𑀓𑀢𑁂𑀧𑀺 𑀔𑀫𑀦𑀯𑀲𑁂𑀦 𑀦 𑀓𑀺𑀜𑁆𑀘𑀺 𑀓𑀣𑁂𑀢𑀻𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀮𑀸𑀪𑀺𑀦𑁆𑀢𑀺 ‘‘𑀲𑁄 𑀦 𑀓𑀼𑀫𑁆𑀪𑀺𑀫𑀼𑀔𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑁂 (𑀤𑀻. 𑀦𑀺. 𑁧.𑁩𑁯𑁪; 𑀫. 𑀦𑀺. 𑁧.𑁧𑁫𑁫) 𑀯𑀼𑀢𑁆𑀢𑀅𑀮𑀸𑀪𑀳𑁂𑀢𑀼𑀲𑀫𑀸𑀬𑁄𑀕𑁂𑀦 𑀅𑀮𑀸𑀪𑀺𑀁. 𑀢𑀢𑁄𑀬𑁂𑀯 𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑀧𑀭𑁂𑀢𑀢𑀸𑀬 𑀲𑀬𑀦𑀧𑀭𑀸𑀬𑀦𑀝𑁆𑀞𑁂𑀦 𑀲𑀫𑀡𑀁 𑀧𑀦𑁆𑀦𑀪𑀽𑀫𑀻𑀢𑀺 𑀯𑀤𑀢𑀺.

𑀆𑀚𑀻𑀯𑀯𑀼𑀢𑁆𑀢𑀺𑀲𑀢𑀸𑀦𑀻𑀢𑀺 𑀲𑀢𑁆𑀢𑀸𑀦𑀫𑀸𑀚𑀻𑀯𑀪𑀽𑀢𑀸𑀦𑀺 𑀚𑀻𑀯𑀺𑀓𑀸𑀯𑀼𑀢𑁆𑀢𑀺𑀲𑀢𑀸𑀦𑀺. ‘‘𑀧𑀭𑀺𑀩𑁆𑀩𑀸𑀚𑀓𑀲𑀢𑀸𑀦𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁂𑀧𑀺 𑀘𑁂𑀲 𑀲𑀪𑀸𑀯𑀮𑀺𑀗𑁆𑀕𑀫𑀚𑀸𑀦𑀦𑁆𑀢𑁄 ‘‘𑀧𑀭𑀺𑀩𑁆𑀩𑀸𑀚𑀓𑀲𑀢𑁂’’𑀢𑀺 ¶ 𑀯𑀤𑀢𑀺. 𑀏𑀯𑀫𑀜𑁆𑀜𑁂𑀲𑀼𑀧𑀺. 𑀢𑁂𑀦𑀸𑀳 ‘‘𑀧𑀭𑀺𑀩𑁆𑀩𑀸𑀚𑀓𑀧𑀩𑁆𑀩𑀚𑁆𑀚𑀸𑀲𑀢𑀸𑀦𑀻’’𑀢𑀺. 𑀦𑀸𑀕𑀪𑀯𑀦𑀁 𑀦𑀸𑀕𑀫𑀡𑁆𑀟𑀮𑀁 𑀬𑀣𑀸 ‘‘𑀫𑀳𑀺𑀁𑀲𑀓𑀫𑀡𑁆𑀟𑀮’’𑀦𑁆𑀢𑀺. 𑀧𑀭𑀫𑀸𑀡𑀼𑀆𑀤𑀺 𑀭𑀚𑁄. 𑀧𑀲𑀼𑀕𑁆𑀕𑀳𑀡𑁂𑀦 𑀏𑀴𑀓𑀚𑀸𑀢𑀺 𑀕𑀳𑀺𑀢𑀸. 𑀫𑀺𑀕𑀕𑁆𑀕𑀳𑀡𑁂𑀦 𑀭𑀼𑀭𑀼𑀕𑀯𑀬𑀸𑀤𑀺 𑀫𑀺𑀕𑀚𑀸𑀢𑀺. 𑀕𑀡𑁆𑀞𑀺𑀫𑁆𑀳𑀻𑀢𑀺 𑀨𑀴𑀼𑀫𑁆𑀳𑀺, 𑀧𑀩𑁆𑀩𑁂𑀢𑀺 𑀅𑀢𑁆𑀣𑁄. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀺𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀯𑀲𑁂𑀦, 𑀢𑁂𑀲𑀜𑁆𑀘 𑀅𑀦𑁆𑀢𑀭𑀪𑁂𑀤𑀯𑀲𑁂𑀦 𑀩𑀳𑀽 𑀤𑁂𑀯𑀸. 𑀢𑀢𑁆𑀣 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀏𑀓𑀘𑁆𑀘𑀅𑀦𑁆𑀢𑀭𑀪𑁂𑀤𑁄 𑀫𑀳𑀸𑀲𑀫𑀬𑀲𑀼𑀢𑁆𑀢𑁂𑀦 (𑀤𑀻. 𑀦𑀺. 𑁨.𑁩𑁩𑁧) 𑀤𑀻𑀧𑁂𑀢𑀩𑁆𑀩𑁄. ‘‘𑀲𑁄 𑀧𑀦𑀸’’𑀢𑀺𑀆𑀤𑀺𑀦𑀸 𑀅𑀚𑀸𑀦𑀦𑁆𑀢𑁄 𑀧𑀦𑁂𑀲 𑀩𑀳𑀽 𑀤𑁂𑀯𑁂𑀧𑀺 𑀲𑀢𑁆𑀢 𑀏𑀯 𑀯𑀤𑀢𑀻𑀢𑀺 𑀢𑀲𑁆𑀲 𑀅𑀧𑁆𑀧𑀫𑀸𑀡𑀢𑀁 𑀤𑀲𑁆𑀲𑁂𑀢𑀺. 𑀫𑀦𑀼𑀲𑁆𑀲𑀸𑀧𑀺 𑀅𑀦𑀦𑁆𑀢𑀸𑀢𑀺 𑀤𑀻𑀧𑀤𑁂𑀲𑀓𑀼𑀮𑀯𑀁𑀲𑀸𑀚𑀻𑀯𑀸𑀤𑀺𑀯𑀺𑀪𑀸𑀕𑀯𑀲𑁂𑀦. 𑀧𑀺𑀲𑀸𑀘𑀸 𑀏𑀯 𑀧𑁂𑀲𑀸𑀘𑀸, 𑀢𑁂 𑀅𑀧𑀭𑀧𑁂𑀢𑀸𑀤𑀺𑀯𑀲𑁂𑀦 𑀫𑀳𑀦𑁆𑀢𑀫𑀳𑀦𑁆𑀢𑀸, 𑀩𑀳𑀼𑀢𑀭𑀸𑀢𑀺 𑀅𑀢𑁆𑀣𑁄. 𑀩𑀸𑀳𑀺𑀭𑀓𑀲𑀫𑀬𑁂 𑀧𑀦 ‘‘𑀙𑀤𑁆𑀤𑀦𑁆𑀢𑀤𑀳𑀫𑀦𑁆𑀤𑀸𑀓𑀺𑀦𑀺𑀬𑁄 𑀓𑀼𑀯𑀸𑀴𑀺𑀬𑀫𑀼𑀘𑀮𑀺𑀦𑁆𑀤𑀦𑀸𑀫𑁂𑀦 𑀯𑁄𑀳𑀭𑀺𑀢𑀸’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁧𑁬𑁮) 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁.

𑀕𑀡𑁆𑀞𑀺𑀓𑀸𑀢𑀺 ¶ 𑀧𑀩𑁆𑀩𑀕𑀡𑁆𑀞𑀺𑀓𑀸. 𑀧𑀩𑁆𑀩𑀕𑀡𑁆𑀞𑀺𑀫𑁆𑀳𑀺 𑀳𑀺 𑀧𑀯𑀼𑀝𑀲𑀤𑁆𑀤𑁄. 𑀫𑀳𑀸𑀧𑀧𑀸𑀢𑀸𑀢𑀺 𑀫𑀳𑀸𑀢𑀝𑀸. 𑀧𑀸𑀭𑀺𑀲𑁂𑀲𑀦𑀬𑁂𑀦 𑀔𑀼𑀤𑁆𑀤𑀓𑀧𑀧𑀸𑀢𑀲𑀢𑀸𑀦𑀺. 𑀏𑀯𑀁 𑀲𑀼𑀧𑀺𑀦𑁂𑀲𑀼𑀧𑀺. ‘‘𑀫𑀳𑀸𑀓𑀧𑁆𑀧𑀺𑀦𑁄’’𑀢𑀺 𑀇𑀤𑀁 ‘‘𑀫𑀳𑀸𑀓𑀧𑁆𑀧𑀸𑀦’’𑀦𑁆𑀢𑀺 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀲𑀤𑁆𑀤𑀢𑁄 𑀧𑀦𑁂𑀲 𑀅𑀚𑀸𑀦𑀦𑁆𑀢𑁄 𑀏𑀯𑀁 𑀯𑀤𑀢𑀻𑀢𑀺 𑀦 𑀯𑀺𑀘𑀸𑀭𑀡𑀓𑁆𑀔𑀫𑀁. 𑀢𑀣𑀸 ‘‘𑀘𑀼𑀮𑁆𑀮𑀸𑀲𑀻𑀢𑀺 𑀲𑀢𑀲𑀳𑀲𑁆𑀲𑀸𑀦𑀻’’𑀢𑀺 𑀇𑀤𑀫𑁆𑀧𑀺. 𑀲𑁄 𑀳𑀺 ‘‘𑀘𑀢𑀼𑀭𑀸𑀲𑀻𑀢𑀺 𑀲𑀢𑀲𑀳𑀲𑁆𑀲𑀸𑀦𑀻’’𑀢𑀺 𑀯𑀢𑁆𑀢𑀼𑀫𑀲𑀓𑁆𑀓𑁄𑀦𑁆𑀢𑁄 𑀏𑀯𑀁 𑀯𑀤𑀢𑀺. 𑀲𑀤𑁆𑀤𑀭𑀘𑀓𑀸 𑀧𑀦 ‘‘𑀘𑀢𑀼𑀭𑀸𑀲𑀻𑀢𑀺𑀬𑀸 𑀢𑀼𑀮𑁄𑀧𑁄, 𑀘𑀲𑁆𑀲 𑀘𑀼, 𑀭𑀲𑁆𑀲 𑀮𑁄, 𑀤𑁆𑀯𑀺𑀢𑁆𑀢𑀜𑁆𑀘𑀸’’𑀢𑀺 𑀯𑀤𑀦𑁆𑀢𑀺. 𑀏𑀢𑁆𑀢𑀓𑀸 𑀫𑀳𑀸𑀲𑀭𑀸𑀢𑀺 𑀏𑀢𑀧𑁆𑀧𑀫𑀸𑀡𑀯𑀢𑀸 𑀫𑀳𑀸𑀲𑀭𑀢𑁄, 𑀲𑀢𑁆𑀢𑀫𑀳𑀸𑀲𑀭𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀭𑀸𑀢𑀺 𑀢𑀲𑁆𑀲 𑀯𑀸𑀤𑀸𑀦𑀼𑀲𑁆𑀲𑀯𑀦𑁂 𑀦𑀺𑀧𑀸𑀢𑁄. 𑀧𑀡𑁆𑀟𑀺𑀢𑁄𑀧𑀺…𑀧𑁂… 𑀦 𑀕𑀘𑁆𑀙𑀢𑀺, 𑀓𑀲𑁆𑀫𑀸? 𑀲𑀢𑁆𑀢𑀸𑀦𑀁 𑀲𑀁𑀲𑀭𑀡𑀓𑀸𑀮𑀲𑁆𑀲 𑀦𑀺𑀬𑀢𑀪𑀸𑀯𑀢𑁄.

‘‘𑀅𑀘𑁂𑀮𑀓𑀯𑀢𑁂𑀦 𑀯𑀸 𑀅𑀜𑁆𑀜𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀻’’𑀢𑀺 𑀯𑀼𑀢𑁆𑀢𑀫𑀢𑀺𑀤𑀺𑀲𑀢𑀺 ‘‘𑀢𑀸𑀤𑀺𑀲𑁂𑀦𑁂𑀯𑀸’’𑀢𑀺 𑀇𑀫𑀺𑀦𑀸. 𑀢𑀧𑁄𑀓𑀫𑁆𑀫𑁂𑀦𑀸𑀢𑀺 𑀢𑀧𑀓𑀭𑀡𑁂𑀦. 𑀏𑀢𑁆𑀣𑀸𑀧𑀺 ‘‘𑀢𑀸𑀤𑀺𑀲𑁂𑀦𑁂𑀯𑀸’’𑀢𑀺 𑀅𑀥𑀺𑀓𑀸𑀭𑁄. 𑀬𑁄…𑀧𑁂… 𑀯𑀺𑀲𑀼𑀚𑁆𑀛𑀢𑀺, 𑀲𑁄 𑀅𑀧𑀭𑀺𑀧𑀓𑁆𑀓𑀁 𑀓𑀫𑁆𑀫𑀁 𑀧𑀭𑀺𑀧𑀸𑀘𑁂𑀢𑀺 𑀦𑀸𑀫𑀸𑀢𑀺 𑀬𑁄𑀚𑀦𑀸. 𑀅𑀦𑁆𑀢𑀭𑀸𑀢𑀺 𑀘𑀢𑀼𑀭𑀸𑀲𑀻𑀢𑀺𑀫𑀳𑀸𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀫𑀩𑁆𑀪𑀦𑁆𑀢𑀭𑁂. 𑀨𑀼𑀲𑁆𑀲 𑀨𑀼𑀲𑁆𑀲𑀸𑀢𑀺 𑀧𑀢𑁆𑀯𑀸 𑀧𑀢𑁆𑀯𑀸. 𑀯𑀼𑀢𑁆𑀢𑀧𑀭𑀺𑀫𑀸𑀡𑀁 𑀓𑀸𑀮𑀦𑁆𑀢𑀺 𑀘𑀢𑀼𑀭𑀸𑀲𑀻𑀢𑀺𑀫𑀳𑀸𑀓𑀧𑁆𑀧𑀲𑀢𑀲𑀳𑀲𑁆𑀲𑀧𑀫𑀸𑀡𑀁 𑀓𑀸𑀮𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀧𑀭𑀺𑀧𑀓𑁆𑀓𑀁 𑀲𑀁𑀲𑀭𑀡𑀦𑀺𑀫𑀺𑀢𑁆𑀢𑀁 𑀓𑀫𑁆𑀫𑀁 𑀲𑀻𑀮𑀸𑀤𑀺𑀦𑀸 𑀲𑀻𑀖𑀁𑀬𑁂𑀯 𑀯𑀺𑀲𑀼𑀤𑁆𑀥𑀧𑁆𑀧𑀢𑁆𑀢𑀺𑀬𑀸 ¶ 𑀧𑀭𑀺𑀧𑀸𑀘𑁂𑀢𑀺 𑀦𑀸𑀫. 𑀧𑀭𑀺𑀧𑀓𑁆𑀓𑀁 𑀓𑀫𑁆𑀫𑀁 𑀨𑀼𑀲𑁆𑀲 𑀨𑀼𑀲𑁆𑀲 𑀓𑀸𑀮𑁂𑀦 𑀧𑀭𑀺𑀧𑀓𑁆𑀓𑀪𑀸𑀯𑀸𑀦𑀸𑀧𑀸𑀤𑀦𑁂𑀦 𑀩𑁆𑀬𑀦𑁆𑀢𑀺𑀁 𑀯𑀺𑀕𑀫𑀦𑀁 𑀓𑀭𑁄𑀢𑀺 𑀦𑀸𑀫𑀸𑀢𑀺. 𑀤𑁄𑀡𑁂𑀦𑀸𑀢𑀺 𑀧𑀭𑀺𑀫𑀺𑀦𑀦𑀤𑁄𑀡𑀢𑀼𑀫𑁆𑀩𑁂𑀦. 𑀭𑀽𑀧𑀓𑀯𑀲𑁂𑀦𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀫𑀺𑀢𑀁 𑀯𑀺𑀬𑀸’’𑀢𑀺. 𑀦 𑀳𑀸𑀧𑀦𑀯𑀟𑁆𑀠𑀦𑀁 𑀧𑀡𑁆𑀟𑀺𑀢𑀩𑀸𑀮𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀦 𑀲𑀁𑀲𑀸𑀭𑁄’’𑀢𑀺𑀆𑀤𑀺𑀦𑀸. 𑀯𑀟𑁆𑀠𑀦𑀁 𑀉𑀓𑁆𑀓𑀁𑀲𑁄. 𑀳𑀸𑀧𑀦𑀁 𑀅𑀯𑀓𑀁𑀲𑁄.

𑀓𑀢𑀲𑀼𑀢𑁆𑀢𑀕𑀼𑀴𑁂𑀢𑀺 𑀓𑀢𑀲𑀼𑀢𑁆𑀢𑀯𑀝𑁆𑀝𑀺𑀬𑀁. 𑀧𑀮𑁂𑀢𑀻𑀢𑀺 𑀧𑀭𑁂𑀢𑀺 𑀬𑀣𑀸 ‘‘𑀅𑀪𑀺𑀲𑀫𑁆𑀧𑀭𑀸𑀬𑁄’’𑀢𑀺, (𑀫𑀳𑀸𑀦𑀺. 𑁬𑁯; 𑀘𑀽𑀴𑀦𑀺. 𑁮𑁫; 𑀧𑀝𑀺. 𑀫. 𑁩.𑁪) 𑀭-𑀓𑀸𑀭𑀲𑁆𑀲 𑀧𑀦 𑀮-𑀓𑀸𑀭𑀁 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀁 𑀬𑀣𑀸 ‘‘𑀧𑀮𑀺𑀩𑀼𑀤𑁆𑀥𑁄’’𑀢𑀺 (𑀘𑀽𑀴𑀦𑀺. 𑁧𑁫; 𑀫𑀺. 𑀧. 𑁩.𑁬). 𑀲𑁄 𑀘 𑀘𑀼𑀭𑀸𑀤𑀺𑀕𑀡𑀯𑀲𑁂𑀦 𑀕𑀢𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀕𑀘𑁆𑀙𑀢𑀻’’𑀢𑀺. 𑀇𑀫𑀸𑀬 𑀉𑀧𑀫𑀸𑀬 𑀘𑁂𑀲 𑀲𑀢𑁆𑀢𑀸𑀦𑀁 𑀲𑀁𑀲𑀸𑀭𑁄 𑀅𑀦𑀼𑀓𑁆𑀓𑀫𑁂𑀦 𑀔𑀻𑀬𑀢𑁂𑀯, 𑀦 𑀯𑀟𑁆𑀠𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑀢𑁆𑀢𑀸𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀻𑀢𑀺 𑀆𑀳 ‘‘𑀲𑀼𑀢𑁆𑀢𑁂 𑀔𑀻𑀡𑁂’’𑀢𑀺𑀆𑀤𑀺. 𑀢𑀢𑁆𑀣𑁂𑀯𑀸𑀢𑀺 𑀔𑀻𑀬𑀦𑀝𑁆𑀞𑀸𑀦𑁂𑀬𑁂𑀯.

𑀅𑀚𑀺𑀢𑀓𑁂𑀲𑀓𑀫𑁆𑀩𑀮𑀯𑀸𑀤𑀯𑀡𑁆𑀡𑀦𑀸

𑁧𑁭𑁧. 𑀤𑀺𑀦𑁆𑀦𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀲𑀻𑀲𑁂𑀦 𑀤𑀸𑀦𑀘𑁂𑀢𑀦𑀸𑀬𑁂𑀯 𑀯𑀼𑀢𑁆𑀢𑀸. 𑀢𑀁𑀫𑀼𑀔𑁂𑀦 𑀘 𑀨𑀮𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀤𑀺𑀦𑁆𑀦𑀲𑁆𑀲 𑀨𑀮𑀸𑀪𑀸𑀯’’𑀦𑁆𑀢𑀺 𑀇𑀫𑀺𑀦𑀸. 𑀤𑀺𑀦𑁆𑀦𑀜𑁆𑀳𑀺 𑀫𑀼𑀔𑁆𑀬𑀢𑁄 𑀅𑀦𑁆𑀦𑀸𑀤𑀺𑀯𑀢𑁆𑀣𑀼, 𑀢𑀁 𑀓𑀣𑀫𑁂𑀲 𑀧𑀝𑀺𑀓𑁆𑀔𑀺𑀧𑀺𑀲𑁆𑀲𑀢𑀺 ¶ . 𑀏𑀲 𑀦𑀬𑁄 𑀬𑀺𑀝𑁆𑀞𑀁 𑀳𑀼𑀢𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀲𑀩𑁆𑀩𑀲𑀸𑀥𑀸𑀭𑀡𑀁 𑀫𑀳𑀸𑀤𑀸𑀦𑀁 𑀫𑀳𑀸𑀬𑀸𑀕𑁄. 𑀧𑀸𑀳𑀼𑀦𑀪𑀸𑀯𑁂𑀦 𑀓𑀢𑁆𑀢𑀩𑁆𑀩𑀲𑀓𑁆𑀓𑀸𑀭𑁄 𑀧𑀸𑀳𑀼𑀦𑀓𑀲𑀓𑁆𑀓𑀸𑀭𑁄. 𑀨𑀮𑀦𑁆𑀢𑀺 𑀆𑀦𑀺𑀲𑀁𑀲𑀨𑀮𑀁, 𑀦𑀺𑀲𑁆𑀲𑀦𑁆𑀤𑀨𑀮𑀜𑁆𑀘. 𑀯𑀺𑀧𑀸𑀓𑁄𑀢𑀺 𑀲𑀤𑀺𑀲𑀨𑀮𑀁. 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀤𑀸𑀦𑁂 𑀞𑀸𑀦𑀦𑁆𑀢𑀭𑀸𑀤𑀺𑀧𑀢𑁆𑀢𑀺 𑀯𑀺𑀬 𑀳𑀺 𑀆𑀦𑀺𑀲𑀁𑀲𑁄, 𑀲𑀗𑁆𑀔𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀸𑀦𑁂 (𑀚𑀸. 𑁧.𑁧𑁦.𑁩𑁯) 𑀢𑀸𑀡𑀮𑀸𑀪𑀫𑀢𑁆𑀢𑀁 𑀯𑀺𑀬 𑀦𑀺𑀲𑁆𑀲𑀦𑁆𑀤𑁄, 𑀧𑀝𑀺𑀲𑀦𑁆𑀥𑀺𑀲𑀗𑁆𑀔𑀸𑀢𑀁 𑀲𑀤𑀺𑀲𑀨𑀮𑀁 𑀯𑀺𑀧𑀸𑀓𑁄. 𑀅𑀬𑀁 𑀮𑁄𑀓𑁄, 𑀧𑀭𑀮𑁄𑀓𑁄𑀢𑀺 𑀘 𑀓𑀫𑁆𑀫𑀼𑀦𑀸 𑀮𑀤𑁆𑀥𑀩𑁆𑀩𑁄 𑀯𑀼𑀢𑁆𑀢𑁄 𑀨𑀮𑀸𑀪𑀸𑀯𑀫𑁂𑀯 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀦𑀢𑁄. 𑀧𑀘𑁆𑀘𑀓𑁆𑀔𑀤𑀺𑀝𑁆𑀞𑁄 𑀳𑀺 𑀮𑁄𑀓𑁄 𑀓𑀣𑀁 𑀢𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑁄 𑀲𑀺𑀬𑀸. ‘‘𑀲𑀩𑁆𑀩𑁂 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀓𑀸𑀭𑀡𑀫𑀸𑀳, 𑀬𑀢𑁆𑀣 𑀬𑀢𑁆𑀣 𑀪𑀯𑀬𑁄𑀦𑀺𑀆𑀤𑀻𑀲𑀼 𑀞𑀺𑀢𑀸 𑀇𑀫𑁂 𑀲𑀢𑁆𑀢𑀸, 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑁆𑀢𑀺, 𑀦𑀺𑀭𑀼𑀤𑀬𑀯𑀺𑀦𑀸𑀲𑀯𑀲𑁂𑀦 𑀯𑀺𑀦𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀲𑀽𑀢𑀺 𑀫𑀸𑀢𑀸𑀧𑀺𑀢𑀽𑀲𑀼. 𑀨𑀮𑀸𑀪𑀸𑀯𑀯𑀲𑁂𑀦𑁂𑀯 𑀯𑀤𑀢𑀺, 𑀦 𑀫𑀸𑀢𑀸𑀧𑀺𑀢𑀽𑀦𑀁, 𑀦𑀸𑀧𑀺 𑀢𑁂𑀲𑀼 𑀇𑀤𑀸𑀦𑀺 𑀓𑀭𑀺𑀬𑀫𑀸𑀦𑀲𑀓𑁆𑀓𑀸𑀭𑀸𑀲𑀓𑁆𑀓𑀸𑀭𑀸𑀦𑀫𑀪𑀸𑀯𑀯𑀲𑁂𑀦 𑀢𑁂𑀲𑀁 𑀮𑁄𑀓𑁂 𑀧𑀘𑁆𑀘𑀓𑁆𑀔𑀢𑁆𑀢𑀸. 𑀧𑀼𑀩𑁆𑀩𑀼𑀴𑀲𑁆𑀲 𑀯𑀺𑀬 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀉𑀧𑁆𑀧𑀸𑀤𑁄 𑀦𑀸𑀫 𑀓𑁂𑀯𑀮𑁄, 𑀦 𑀘𑀯𑀺𑀢𑁆𑀯𑀸 𑀆𑀕𑀫𑀦𑀧𑀼𑀩𑁆𑀩𑀓𑁄 𑀅𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ¶ ‘‘𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀘𑀯𑀺𑀢𑁆𑀯𑀸 𑀉𑀧𑀧𑀚𑁆𑀚𑀦𑀓𑀸 𑀲𑀢𑁆𑀢𑀸 𑀦𑀸𑀫 𑀦𑀢𑁆𑀣𑀻’’𑀢𑀺. 𑀲𑀫𑀡𑁂𑀦 𑀦𑀸𑀫 𑀬𑀸𑀣𑀸𑀯𑀢𑁄 𑀚𑀸𑀦𑀦𑁆𑀢𑁂𑀦 𑀓𑀲𑁆𑀲𑀘𑀺 𑀅𑀓𑀣𑁂𑀢𑁆𑀯𑀸 𑀲𑀜𑁆𑀜𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀅𑀳𑁄𑀧𑀼𑀭𑀺𑀲𑀺𑀓𑀸 𑀦𑀸𑀫 𑀲𑀺𑀬𑀸. 𑀓𑀺𑀜𑁆𑀳𑀺 𑀧𑀭𑁄 𑀧𑀭𑀲𑁆𑀲 𑀓𑀭𑀺𑀲𑁆𑀲𑀢𑀺, 𑀢𑀣𑀸 𑀘 𑀅𑀢𑁆𑀢𑀦𑁄 𑀲𑀫𑁆𑀧𑀸𑀤𑀦𑀲𑁆𑀲 𑀓𑀲𑁆𑀲𑀘𑀺 𑀅𑀯𑀲𑁆𑀲𑀬𑁄 𑀏𑀯 𑀦 𑀲𑀺𑀬𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑀢𑁄𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀬𑁂 𑀇𑀫𑀜𑁆𑀘…𑀧𑁂… 𑀧𑀯𑁂𑀤𑁂𑀦𑁆𑀢𑀻’’𑀢𑀺 𑀆𑀳. 𑀅𑀬𑀁 𑀅𑀝𑁆𑀞𑀓𑀣𑀸𑀯𑀲𑁂𑀲𑀓𑁄 𑀅𑀢𑁆𑀣𑁄.

𑀘𑀢𑀽𑀲𑀼 𑀫𑀳𑀸𑀪𑀽𑀢𑁂𑀲𑀼 𑀦𑀺𑀬𑀼𑀢𑁆𑀢𑁄 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄, 𑀅𑀢𑁆𑀣𑀫𑀢𑁆𑀢𑀢𑁄 𑀧𑀦 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀼𑀫𑀳𑀸𑀪𑀽𑀢𑀫𑀬𑁄’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀫𑀢𑁆𑀢𑀺𑀓𑀸𑀬 𑀦𑀺𑀩𑁆𑀩𑀢𑁆𑀢𑀁 𑀪𑀸𑀚𑀦𑀁 𑀫𑀢𑁆𑀢𑀺𑀓𑀸𑀫𑀬𑀁, 𑀏𑀯𑀫𑀬𑀫𑁆𑀧𑀺 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀺 𑀦𑀺𑀩𑁆𑀩𑀢𑁆𑀢𑁄 𑀘𑀢𑀼𑀫𑀳𑀸𑀪𑀽𑀢𑀫𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀚𑁆𑀛𑀢𑁆𑀢𑀺𑀓𑀧𑀣𑀯𑀻𑀥𑀸𑀢𑀽𑀢𑀺 𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑀸 𑀧𑀣𑀯𑀻𑀥𑀸𑀢𑀼. 𑀩𑀸𑀳𑀺𑀭𑀧𑀣𑀯𑀻𑀥𑀸𑀢𑀼𑀦𑁆𑀢𑀺 𑀩𑀳𑀺𑀤𑁆𑀥𑀸 𑀫𑀳𑀸𑀧𑀣𑀯𑀺𑀁, 𑀢𑁂𑀦 𑀧𑀣𑀯𑀻𑀬𑁂𑀯 𑀓𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀦𑀼𑀕𑀘𑁆𑀙𑀢𑀻𑀢𑀺 𑀅𑀦𑀼𑀩𑀦𑁆𑀥𑀢𑀺. 𑀉𑀪𑀬𑁂𑀦𑀸𑀧𑀻𑀢𑀺 𑀧𑀤𑀤𑁆𑀯𑀬𑁂𑀦𑀧𑀺. 𑀉𑀧𑁂𑀢𑀺 𑀉𑀧𑀕𑀘𑁆𑀙𑀢𑀻𑀢𑀺 𑀩𑀸𑀳𑀺𑀭𑀧𑀣𑀯𑀺𑀓𑀸𑀬𑀢𑁄 𑀢𑀤𑁂𑀓𑀤𑁂𑀲𑀪𑀽𑀢𑀸 𑀧𑀣𑀯𑀻 𑀆𑀕𑀦𑁆𑀢𑁆𑀯𑀸 𑀅𑀚𑁆𑀛𑀢𑁆𑀢𑀺𑀓𑀪𑀸𑀯𑀧𑁆𑀧𑀢𑁆𑀢𑀺 𑀳𑀼𑀢𑁆𑀯𑀸 𑀲𑀢𑁆𑀢𑀪𑀸𑀯𑁂𑀦 𑀲𑀡𑁆𑀞𑀺𑀢𑀸, 𑀲𑀸 𑀘 𑀫𑀳𑀸𑀧𑀣𑀯𑀻 𑀖𑀝𑀸𑀤𑀺𑀕𑀢𑀧𑀣𑀯𑀻 𑀯𑀺𑀬 𑀇𑀤𑀸𑀦𑀺 𑀢𑀫𑁂𑀯 𑀩𑀸𑀳𑀺𑀭𑀁 𑀧𑀣𑀯𑀺𑀓𑀸𑀬𑀁 𑀲𑀫𑀼𑀤𑀸𑀬𑀪𑀽𑀢𑀁 𑀧𑀼𑀦 𑀉𑀧𑁂𑀢𑀺 𑀉𑀧𑀕𑀘𑁆𑀙𑀢𑀺, 𑀲𑀩𑁆𑀩𑀲𑁄 𑀢𑁂𑀦 𑀩𑀸𑀳𑀺𑀭𑀧𑀣𑀯𑀺𑀓𑀸𑀬𑁂𑀦 𑀦𑀺𑀩𑁆𑀩𑀺𑀲𑁂𑀲𑀢𑀁 𑀏𑀓𑀻𑀪𑀸𑀯𑀫𑁂𑀯 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀆𑀧𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀏𑀢𑁆𑀣 𑀧𑀚𑁆𑀚𑀼𑀦𑁆𑀦𑁂𑀦 𑀫𑀳𑀸𑀲𑀫𑀼𑀤𑁆𑀤𑀢𑁄 𑀕𑀳𑀺𑀢𑀆𑀧𑁄 𑀯𑀺𑀬 𑀯𑀲𑁆𑀲𑁄𑀤𑀓𑀪𑀸𑀯𑁂𑀦 𑀧𑀼𑀦𑀧𑀺 𑀫𑀳𑀸𑀲𑀫𑀼𑀤𑁆𑀤𑀁, 𑀲𑀽𑀭𑀺𑀬𑀭𑀁𑀲𑀺𑀢𑁄 𑀕𑀳𑀺𑀢𑀇𑀦𑁆𑀤𑀕𑁆𑀕𑀺𑀲𑀗𑁆𑀔𑀸𑀢𑀢𑁂𑀚𑁄 𑀯𑀺𑀬 𑀧𑀼𑀦𑀧𑀺 𑀲𑀽𑀭𑀺𑀬𑀭𑀁𑀲𑀺𑀁, 𑀫𑀳𑀸𑀯𑀸𑀬𑀼𑀓𑁆𑀔𑀦𑁆𑀥𑀢𑁄 𑀦𑀺𑀕𑁆𑀕𑀢𑀫𑀳𑀸𑀯𑀸𑀢𑁄 𑀯𑀺𑀬 𑀧𑀼𑀦𑀧𑀺 𑀫𑀳𑀸𑀯𑀸𑀬𑀼𑀓𑁆𑀔𑀦𑁆𑀥𑀁 𑀉𑀧𑁂𑀢𑀺 𑀉𑀧𑀕𑀘𑁆𑀙𑀢𑀻𑀢𑀺 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑁂𑀦 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀅𑀥𑀺𑀧𑁆𑀧𑀸𑀬𑁄.

𑀫𑀦𑀘𑁆𑀙𑀝𑁆𑀞𑀸𑀦𑀺 ¶ 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀫𑀦𑀫𑁂𑀯 𑀙𑀝𑁆𑀞𑀁 𑀬𑁂𑀲𑀁 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸𑀦𑀁, 𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀦𑁆𑀢𑀺 𑀢𑁂𑀲𑀁 𑀯𑀺𑀲𑀬𑀪𑀸𑀯𑀸𑀢𑀺 𑀯𑀤𑀦𑁆𑀢𑀺. 𑀯𑀺𑀲𑀬𑀻𑀕𑀳𑀡𑁂𑀦 𑀳𑀺 𑀯𑀺𑀲𑀬𑀸𑀧𑀺 𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀺. 𑀓𑀣𑀁 𑀕𑀡𑀺𑀢𑀸 𑀫𑀜𑁆𑀘𑀧𑀜𑁆𑀘𑀫𑀸𑀢𑀺 𑀆𑀳 ‘‘𑀫𑀜𑁆𑀘𑁄 𑀘𑁂𑀯…𑀧𑁂… 𑀅𑀢𑁆𑀣𑁄’’𑀢𑀺. 𑀆𑀴𑀸𑀳𑀦𑀁 𑀲𑀼𑀲𑀸𑀦𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓𑀁. 𑀕𑀼𑀡𑀸𑀕𑀼𑀡𑀧𑀤𑀸𑀦𑀻𑀢𑀺 𑀕𑀼𑀡𑀤𑁄𑀲𑀓𑁄𑀝𑁆𑀞𑀸𑀲𑀸𑀦𑀺. 𑀲𑀭𑀻𑀭𑀫𑁂𑀯 𑀯𑀸 𑀧𑀤𑀸𑀦𑀺 𑀢𑀁𑀢𑀁𑀓𑀺𑀭𑀺𑀬𑀸𑀬 𑀧𑀚𑁆𑀚𑀺𑀢𑀩𑁆𑀩𑀢𑁄. 𑀧𑀸𑀭𑀸𑀯𑀢𑀧𑀓𑁆𑀔𑀺𑀯𑀡𑁆𑀡𑀸𑀦𑀻𑀢𑀺 𑀧𑀸𑀭𑀸𑀯𑀢𑀲𑁆𑀲 𑀦𑀸𑀫 𑀧𑀓𑁆𑀔𑀺𑀦𑁄 𑀯𑀡𑁆𑀡𑀸𑀦𑀺. ‘‘𑀧𑀸𑀭𑀸𑀯𑀢𑀧𑀓𑁆𑀔𑀯𑀡𑁆𑀡𑀸𑀦𑀻’’𑀢𑀺 𑀧𑀸𑀞𑁄, 𑀧𑀸𑀭𑀸𑀯𑀢𑀲𑀓𑀼𑀡𑀲𑁆𑀲 𑀧𑀢𑁆𑀢𑀯𑀡𑁆𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀪𑀲𑁆𑀫𑀦𑁆𑀢𑀸𑀢𑀺 ¶ 𑀙𑀸𑀭𑀺𑀓𑀸𑀧𑀭𑀺𑀬𑀦𑁆𑀢𑀸. 𑀢𑁂𑀦𑀸𑀳 ‘‘𑀙𑀸𑀭𑀺𑀓𑀸𑀯𑀲𑀸𑀦𑀫𑁂𑀯𑀸’’𑀢𑀺. 𑀆𑀳𑀼𑀢𑀺𑀲𑀤𑁆𑀤𑁂𑀦𑁂𑀢𑁆𑀣 ‘‘𑀤𑀺𑀦𑁆𑀦𑀁 𑀬𑀺𑀝𑁆𑀞𑀁 𑀳𑀼𑀢’’𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀤𑀸𑀦𑀁 𑀲𑀩𑁆𑀩𑀫𑁆𑀧𑀺 𑀕𑀳𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀧𑀸𑀳𑀼𑀦𑀓𑀲𑀓𑁆𑀓𑀸𑀭𑀸𑀤𑀺𑀪𑁂𑀤𑀁 𑀤𑀺𑀦𑁆𑀦𑀤𑀸𑀦’’𑀦𑁆𑀢𑀺 𑀇𑀫𑀺𑀦𑀸, 𑀯𑀺𑀭𑀽𑀧𑁂𑀓𑀲𑁂𑀲𑀦𑀺𑀤𑁆𑀤𑁂𑀲𑁄 𑀯𑀸 𑀏𑀲. 𑀅𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑀸𑀬𑀢𑁄 𑀅𑀢𑁆𑀣𑁄 𑀲𑀤𑁆𑀤𑀢𑁄 𑀢𑀲𑁆𑀲 𑀅𑀦𑀥𑀺𑀕𑀫𑀺𑀢𑀢𑁆𑀢𑀸. 𑀏𑀯𑀫𑀻𑀤𑀺𑀲𑁂𑀲𑀼. 𑀤𑀩𑁆𑀩𑀦𑁆𑀢𑀺 𑀫𑀼𑀬𑁆𑀳𑀦𑁆𑀢𑀻𑀢𑀺 𑀤𑀢𑁆𑀢𑀽, 𑀩𑀸𑀮𑀧𑀼𑀕𑁆𑀕𑀮𑀸, 𑀢𑁂𑀳𑀺 𑀤𑀢𑁆𑀢𑀽𑀳𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀩𑀸𑀮𑀸 𑀤𑁂𑀦𑁆𑀢𑀻’’𑀢𑀺𑀆𑀤𑀺. 𑀧𑀸𑀴𑀺𑀬𑀁 ‘‘𑀮𑁄𑀓𑁄 𑀅𑀢𑁆𑀣𑀻’’𑀢𑀺 𑀫𑀢𑀺 𑀬𑁂𑀲𑀁 𑀢𑁂 𑀅𑀢𑁆𑀣𑀺𑀓𑀸, ‘‘𑀅𑀢𑁆𑀣𑀻’’𑀢𑀺 𑀘𑁂𑀤𑀁 𑀦𑁂𑀧𑀸𑀢𑀺𑀓𑀧𑀤𑀁, 𑀢𑁂𑀲𑀁 𑀯𑀸𑀤𑁄 𑀅𑀢𑁆𑀣𑀺𑀓𑀯𑀸𑀤𑁄, 𑀢𑀁 𑀅𑀢𑁆𑀣𑀺𑀓𑀯𑀸𑀤𑀁.

𑀢𑀢𑁆𑀣𑀸𑀢𑀺 𑀢𑁂𑀲𑀼 𑀬𑀣𑀸𑀯𑀼𑀢𑁆𑀢𑁂𑀲𑀼 𑀢𑀻𑀲𑀼 𑀫𑀺𑀘𑁆𑀙𑀸𑀯𑀸𑀤𑀻𑀲𑀼. 𑀓𑀫𑁆𑀫𑀁 𑀧𑀝𑀺𑀩𑀸𑀳𑀢𑀺 𑀅𑀓𑀺𑀭𑀺𑀬𑀯𑀸𑀤𑀺𑀪𑀸𑀯𑀢𑁄. 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀢𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀆𑀬𑀢𑀺𑀁 𑀉𑀧𑀧𑀢𑁆𑀢𑀺𑀬𑀸 𑀧𑀝𑀺𑀓𑁆𑀔𑀺𑀧𑀦𑀢𑁄. 𑀯𑀺𑀧𑀸𑀓𑀦𑁆𑀢𑀺 𑀘 𑀆𑀦𑀺𑀲𑀁𑀲𑀦𑀺𑀲𑁆𑀲𑀦𑁆𑀤𑀲𑀤𑀺𑀲𑀨𑀮𑀯𑀲𑁂𑀦 𑀢𑀺𑀯𑀺𑀥𑀫𑁆𑀧𑀺 𑀯𑀺𑀧𑀸𑀓𑀁. 𑀉𑀪𑀬𑀁 𑀧𑀝𑀺𑀩𑀸𑀳𑀢𑀺 𑀲𑀩𑁆𑀩𑀲𑁄 𑀳𑁂𑀢𑀼𑀧𑀝𑀺𑀲𑁂𑀥𑀦𑁂𑀦𑁂𑀯 𑀨𑀮𑀲𑁆𑀲𑀸𑀧𑀺 𑀧𑀝𑀺𑀲𑁂𑀥𑀺𑀢𑀢𑁆𑀢𑀸. 𑀉𑀪𑀬𑀦𑁆𑀢𑀺 𑀘 𑀓𑀫𑁆𑀫𑀁 𑀯𑀺𑀧𑀸𑀓𑀫𑁆𑀧𑀺. 𑀲𑁄 𑀳𑀺 ‘‘𑀅𑀳𑁂𑀢𑀽 𑀅𑀧𑁆𑀧𑀘𑁆𑀘𑀬𑀸 𑀲𑀢𑁆𑀢𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺, 𑀯𑀺𑀲𑀼𑀚𑁆𑀛𑀦𑁆𑀢𑀺 𑀘𑀸’’𑀢𑀺 𑀯𑀤𑀦𑁆𑀢𑁄 𑀓𑀫𑁆𑀫𑀲𑁆𑀲 𑀯𑀺𑀬 𑀯𑀺𑀧𑀸𑀓𑀲𑁆𑀲𑀸𑀧𑀺 𑀲𑀁𑀓𑀺𑀮𑁂𑀲𑀯𑀺𑀲𑀼𑀤𑁆𑀥𑀻𑀦𑀁 𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀚𑁄𑀢𑀦𑀢𑁄 𑀢𑀤𑀼𑀪𑀬𑀁 𑀧𑀝𑀺𑀩𑀸𑀳𑀢𑀺 𑀦𑀸𑀫. 𑀯𑀺𑀧𑀸𑀓𑁄 𑀧𑀝𑀺𑀩𑀸𑀳𑀺𑀢𑁄 𑀳𑁄𑀢𑀺 𑀅𑀲𑀢𑀺 𑀓𑀫𑁆𑀫𑀲𑁆𑀫𑀺𑀁 𑀯𑀺𑀧𑀸𑀓𑀸𑀪𑀸𑀯𑀢𑁄. 𑀓𑀫𑁆𑀫𑀁 𑀧𑀝𑀺𑀩𑀸𑀳𑀺𑀢𑀁 𑀳𑁄𑀢𑀺 𑀅𑀲𑀢𑀺 𑀯𑀺𑀧𑀸𑀓𑁂 𑀓𑀫𑁆𑀫𑀲𑁆𑀲 𑀦𑀺𑀭𑀢𑁆𑀣𑀓𑀢𑀸𑀧𑀢𑁆𑀢𑀺𑀢𑁄. 𑀇𑀢𑀻𑀢𑀺 𑀯𑀼𑀢𑁆𑀢𑀢𑁆𑀣𑀦𑀺𑀤𑀲𑁆𑀲𑀦𑀁. 𑀅𑀢𑁆𑀣𑀢𑁄𑀢𑀺 𑀲𑀭𑀽𑀧𑀢𑁄, 𑀯𑀺𑀲𑀼𑀁 𑀯𑀺𑀲𑀼𑀁 𑀢𑀁𑀢𑀁𑀤𑀺𑀝𑁆𑀞𑀺𑀤𑀻𑀧𑀓𑀪𑀸𑀯𑁂𑀦 𑀧𑀸𑀴𑀺𑀬𑀁 𑀆𑀕𑀢𑀸𑀧𑀺 𑀢𑀤𑀼𑀪𑀬𑀧𑀝𑀺𑀩𑀸𑀳𑀓𑀸𑀯𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑁂𑀓𑀁 𑀢𑀺𑀯𑀺𑀥𑀤𑀺𑀝𑁆𑀞𑀺𑀓𑀸 𑀏𑀯 𑀢𑁂 𑀉𑀪𑀬𑀧𑀝𑀺𑀩𑀸𑀳𑀓𑀢𑁆𑀢𑀸. ‘‘𑀉𑀪𑀬𑀧𑁆𑀧𑀝𑀺𑀩𑀸𑀳𑀓𑀸’’𑀢𑀺 𑀳𑀺 𑀳𑁂𑀢𑀼𑀯𑀘𑀦𑀁 𑀳𑁂𑀢𑀼𑀕𑀩𑁆𑀪𑀢𑁆𑀢𑀸 𑀢𑀲𑁆𑀲 𑀯𑀺𑀲𑁂𑀲𑀦𑀲𑁆𑀲. 𑀅𑀳𑁂𑀢𑀼𑀓𑀯𑀸𑀤𑀸 𑀘𑁂𑀯𑀸𑀢𑀺𑀆𑀤𑀺 𑀧𑀝𑀺𑀜𑁆𑀜𑀸𑀯𑀘𑀦𑀁 𑀢𑀧𑁆𑀨𑀮𑀪𑀸𑀯𑁂𑀦 𑀦𑀺𑀘𑁆𑀙𑀺𑀢𑀢𑁆𑀢𑀸. 𑀢𑀲𑁆𑀫𑀸 𑀯𑀺𑀧𑀸𑀓𑀧𑀝𑀺𑀩𑀸𑀳𑀓𑀢𑁆𑀢𑀸 𑀦𑀢𑁆𑀣𑀺𑀓𑀯𑀸𑀤𑀸, 𑀓𑀫𑁆𑀫𑀧𑀝𑀺𑀩𑀸𑀳𑀓𑀢𑁆𑀢𑀸 𑀅𑀓𑀺𑀭𑀺𑀬𑀯𑀸𑀤𑀸, 𑀢𑀤𑀼𑀪𑀬𑀧𑀝𑀺𑀩𑀸𑀳𑀓𑀢𑁆𑀢𑀸 𑀅𑀳𑁂𑀢𑀼𑀓𑀯𑀸𑀤𑀸𑀢𑀺 𑀬𑀣𑀸𑀮𑀸𑀪𑀁 𑀳𑁂𑀢𑀼𑀨𑀮𑀢𑀸𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀬𑁄 𑀳𑀺 𑀯𑀺𑀧𑀸𑀓𑀧𑀝𑀺𑀩𑀸𑀳𑀦𑁂𑀦 𑀦𑀢𑁆𑀣𑀺𑀓𑀤𑀺𑀝𑁆𑀞𑀺𑀓𑁄 𑀉𑀘𑁆𑀙𑁂𑀤𑀯𑀸𑀤𑀻, 𑀲𑁄 𑀅𑀢𑁆𑀣𑀢𑁄 𑀓𑀫𑁆𑀫𑀧𑀝𑀺𑀩𑀸𑀳𑀦𑁂𑀦 𑀅𑀓𑀺𑀭𑀺𑀬𑀤𑀺𑀝𑁆𑀞𑀺𑀓𑁄, 𑀉𑀪𑀬𑀧𑀝𑀺𑀩𑀸𑀳𑀦𑁂𑀦 𑀅𑀳𑁂𑀢𑀼𑀓𑀤𑀺𑀝𑁆𑀞𑀺𑀓𑁄 𑀘 𑀳𑁄𑀢𑀺. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

‘‘𑀬𑁂 𑀯𑀸 𑀧𑀦𑀸’’𑀢𑀺𑀆𑀤𑀺𑀦𑀸 𑀢𑁂𑀲𑀫𑀦𑀼𑀤𑀺𑀝𑁆𑀞𑀺𑀓𑀸𑀦𑀁 𑀦𑀺𑀬𑀸𑀫𑁄𑀓𑁆𑀓𑀦𑁆𑀢𑀺𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄. 𑀢𑀢𑁆𑀣 𑀢𑁂𑀲𑀦𑁆𑀢𑀺 ¶ 𑀧𑀽𑀭𑀡𑀸𑀤𑀻𑀦𑀁. 𑀲𑀚𑁆𑀛𑀸𑀬𑀦𑁆𑀢𑀻𑀢𑀺 𑀢𑀁 𑀤𑀺𑀝𑁆𑀞𑀺𑀤𑀻𑀧𑀓𑀁 𑀕𑀦𑁆𑀣𑀁 𑀬𑀣𑀸 ¶ 𑀢𑀣𑀸 𑀢𑁂𑀳𑀺 𑀓𑀢𑀁 𑀉𑀕𑁆𑀕𑀳𑁂𑀢𑁆𑀯𑀸 𑀧𑀞𑀦𑁆𑀢𑀺. 𑀯𑀻𑀫𑀁𑀲𑀦𑁆𑀢𑀻𑀢𑀺 𑀢𑀲𑁆𑀲 𑀅𑀢𑁆𑀣𑀁 𑀯𑀺𑀘𑀸𑀭𑁂𑀦𑁆𑀢𑀺. ‘‘𑀢𑁂𑀲’’𑀦𑁆𑀢𑀺𑀆𑀤𑀺 𑀯𑀻𑀫𑀁𑀲𑀦𑀸𑀓𑀸𑀭𑀤𑀲𑁆𑀲𑀦𑀁. ‘‘𑀓𑀭𑁄𑀢𑁄…𑀧𑁂… 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀏𑀯𑀁 𑀯𑀻𑀫𑀁𑀲𑀦𑁆𑀢𑀸𑀦𑀁 𑀢𑁂𑀲𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂𑀢𑀺 𑀬𑀣𑀸𑀧𑀭𑀺𑀓𑀧𑁆𑀧𑀺𑀢𑁂 𑀓𑀫𑁆𑀫𑀨𑀮𑀸𑀪𑀸𑀯𑀸𑀤𑀺𑀓𑁂 ‘‘𑀓𑀭𑁄𑀢𑁄 𑀦 𑀓𑀭𑀻𑀬𑀢𑀺 𑀧𑀸𑀧’’𑀦𑁆𑀢𑀺𑀆𑀤𑀺 𑀦𑀬𑀧𑁆𑀧𑀯𑀢𑁆𑀢𑀸𑀬 𑀫𑀺𑀘𑁆𑀙𑀸𑀤𑀲𑁆𑀲𑀦𑀲𑀗𑁆𑀔𑀸𑀢𑀸𑀬 𑀮𑀤𑁆𑀥𑀺𑀬𑀸 𑀆𑀭𑀫𑁆𑀫𑀡𑁂. 𑀫𑀺𑀘𑁆𑀙𑀸𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 𑀫𑀺𑀘𑁆𑀙𑀸𑀲𑀢𑀺𑀲𑀗𑁆𑀔𑀸𑀢𑀸 𑀮𑀤𑁆𑀥𑀺𑀲𑀳𑀕𑀢𑀸 𑀢𑀡𑁆𑀳𑀸 𑀲𑀦𑁆𑀢𑀺𑀝𑁆𑀞𑀢𑀺. ‘‘𑀓𑀭𑁄𑀢𑁄 𑀦 𑀓𑀭𑀻𑀬𑀢𑀺 𑀧𑀸𑀧’’𑀦𑁆𑀢𑀺𑀆𑀤𑀺𑀯𑀲𑁂𑀦 𑀳𑀺 𑀅𑀦𑀼𑀲𑁆𑀲𑀯𑀽𑀧𑀮𑀤𑁆𑀥𑁂 𑀅𑀢𑁆𑀣𑁂 𑀢𑀤𑀸𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀦𑁂𑀳𑀺 𑀲𑀯𑀺𑀕𑁆𑀕𑀳𑁂 𑀯𑀺𑀬 𑀲𑀭𑀽𑀧𑀢𑁄 𑀘𑀺𑀢𑁆𑀢𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀘𑀺𑀭𑀓𑀸𑀮𑀧𑀭𑀺𑀘𑀬𑁂𑀦 ‘‘𑀏𑀯𑀫𑁂𑀢’’𑀦𑁆𑀢𑀺 𑀦𑀺𑀚𑁆𑀛𑀸𑀦𑀓𑁆𑀔𑀫𑀪𑀸𑀯𑀽𑀧𑀕𑀫𑀦𑁂, 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀘 𑀢𑀣𑀸 𑀢𑀣𑀸 𑀕𑀳𑀺𑀢𑁂 𑀧𑀼𑀦𑀧𑁆𑀧𑀼𑀦𑀁 𑀢𑀣𑁂𑀯 𑀆𑀲𑁂𑀯𑀦𑁆𑀢𑀲𑁆𑀲 𑀩𑀳𑀼𑀮𑀻𑀓𑀭𑁄𑀦𑁆𑀢𑀲𑁆𑀲 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁂𑀦 𑀲𑀫𑀸𑀦𑀻𑀬𑀫𑀸𑀦𑀸 𑀫𑀺𑀘𑁆𑀙𑀸𑀯𑀸𑀬𑀸𑀫𑀼𑀧𑀢𑁆𑀣𑀫𑁆𑀪𑀺𑀢𑀸 𑀅𑀢𑀁𑀲𑀪𑀸𑀯𑀫𑁆𑀧𑀺 ‘‘𑀢𑀁𑀲𑀪𑀸𑀯’’𑀦𑁆𑀢𑀺 𑀕𑀡𑁆𑀳𑀦𑁆𑀢𑀻 𑀫𑀺𑀘𑁆𑀙𑀸𑀮𑀤𑁆𑀥𑀺𑀲𑀳𑀕𑀢𑀸 𑀢𑀡𑁆𑀳𑀸 𑀫𑀼𑀲𑀸 𑀯𑀺𑀢𑀣𑀁 𑀲𑀭𑀡𑀢𑁄 𑀧𑀯𑀢𑁆𑀢𑀦𑀢𑁄 𑀫𑀺𑀘𑁆𑀙𑀸𑀲𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀘𑀢𑀼𑀭𑀗𑁆𑀕𑀼𑀢𑁆𑀢𑀭𑀝𑀻𑀓𑀸𑀬𑀫𑁆𑀧𑀺 (𑀅. 𑀦𑀺. 𑀅𑀝𑁆𑀞. 𑁨.𑁪.𑁩𑁦) 𑀘𑁂𑀲 𑀅𑀢𑁆𑀣𑁄 𑀯𑀼𑀢𑁆𑀢𑁄𑀬𑁂𑀯. 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀤𑀬𑁄 𑀯𑀺𑀬 𑀳𑀺 𑀫𑀺𑀘𑁆𑀙𑀸𑀲𑀢𑀺 𑀦𑀸𑀫 𑀧𑀸𑀝𑀺𑀬𑁂𑀓𑁆𑀓𑁄 𑀓𑁄𑀘𑀺 𑀥𑀫𑁆𑀫𑁄 𑀦𑀢𑁆𑀣𑀺, 𑀢𑀡𑁆𑀳𑀸𑀲𑀻𑀲𑁂𑀦 𑀕𑀳𑀺𑀢𑀸𑀦𑀁 𑀘𑀢𑀼𑀦𑁆𑀦𑀫𑁆𑀧𑀺 𑀅𑀓𑀼𑀲𑀮𑀓𑁆𑀔𑀦𑁆𑀥𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀫𑀚𑁆𑀛𑀺𑀫𑀸𑀕𑀫𑀝𑁆𑀞𑀓𑀣𑀸𑀬𑀫𑁆𑀧𑀺 𑀲𑀮𑁆𑀮𑁂𑀔𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁧.𑁮𑁩) 𑀯𑀼𑀢𑁆𑀢𑀁.

𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀻𑀢𑀺 𑀬𑀣𑀸𑀲𑀓𑀁 𑀯𑀺𑀢𑀓𑁆𑀓𑀸𑀤𑀺𑀧𑀘𑁆𑀘𑀬𑀮𑀸𑀪𑁂𑀦 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀅𑀯𑀝𑁆𑀞𑀺𑀢𑀢𑀸𑀬 𑀅𑀦𑁂𑀓𑀕𑁆𑀕𑀢𑀁 𑀧𑀳𑀸𑀬 𑀏𑀓𑀕𑁆𑀕𑀁 𑀅𑀧𑁆𑀧𑀺𑀢𑀁 𑀯𑀺𑀬 𑀳𑁄𑀢𑀺, 𑀘𑀺𑀢𑁆𑀢𑀲𑀻𑀲𑁂𑀦 𑀘𑁂𑀢𑁆𑀣 𑀫𑀺𑀘𑁆𑀙𑀸𑀲𑀫𑀸𑀥𑀺 𑀏𑀯 𑀯𑀼𑀢𑁆𑀢𑁄. 𑀲𑁄 𑀳𑀺 𑀧𑀘𑁆𑀘𑀬𑀯𑀺𑀲𑁂𑀲𑁂𑀳𑀺 𑀮𑀤𑁆𑀥𑀪𑀸𑀯𑀦𑀸𑀩𑀮𑁄 𑀈𑀤𑀺𑀲𑁂 𑀞𑀸𑀦𑁂 𑀲𑀫𑀸𑀥𑀸𑀦𑀧𑀢𑀺𑀭𑀽𑀧𑀓𑀓𑀺𑀘𑁆𑀘𑀓𑀭𑁄𑀬𑁂𑀯 𑀳𑁄𑀢𑀺 𑀯𑀸𑀮𑀯𑀺𑀚𑁆𑀛𑀦𑀸𑀤𑀻𑀲𑀼 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀚𑀯𑀦𑀸𑀦𑀺 𑀚𑀯𑀦𑁆𑀢𑀻𑀢𑀺 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀢𑁂𑀦𑀸𑀓𑀸𑀭𑁂𑀦 𑀧𑀼𑀩𑁆𑀩𑀪𑀸𑀕𑀺𑀬𑁂𑀲𑀼 𑀚𑀯𑀦𑀯𑀸𑀭𑁂𑀲𑀼 𑀧𑀯𑀢𑁆𑀢𑁂𑀲𑀼 𑀲𑀦𑁆𑀦𑀺𑀝𑁆𑀞𑀸𑀦𑀪𑀽𑀢𑁂 𑀲𑀩𑁆𑀩𑀧𑀘𑁆𑀙𑀺𑀫𑁂 𑀚𑀯𑀦𑀯𑀸𑀭𑁂 𑀲𑀢𑁆𑀢 𑀚𑀯𑀦𑀸𑀦𑀺 𑀚𑀯𑀦𑁆𑀢𑀺. ‘‘𑀧𑀞𑀫𑀚𑀯𑀦𑁂 𑀲𑀢𑁂𑀓𑀺𑀘𑁆𑀙𑀸 𑀳𑁄𑀦𑁆𑀢𑀺, 𑀢𑀣𑀸 𑀤𑀼𑀢𑀺𑀬𑀸𑀤𑀻𑀲𑀽’’𑀢𑀺 𑀇𑀤𑀁 𑀥𑀫𑁆𑀫𑀲𑀪𑀸𑀯𑀤𑀲𑁆𑀲𑀦𑀫𑁂𑀯, 𑀦 𑀧𑀦 𑀢𑀲𑁆𑀫𑀺𑀁 𑀔𑀡𑁂 𑀢𑁂𑀲𑀁 𑀢𑀺𑀓𑀺𑀘𑁆𑀙𑀸 𑀓𑁂𑀦𑀘𑀺 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀤𑀲𑁆𑀲𑀦𑀁 𑀢𑁂𑀲𑁆𑀯𑁂𑀯 𑀞𑀢𑁆𑀯𑀸 𑀲𑀢𑁆𑀢𑀫𑀚𑀯𑀦𑀲𑁆𑀲 𑀅𑀯𑀲𑁆𑀲𑀫𑀼𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀦𑀺𑀯𑀢𑁆𑀢𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸, 𑀏𑀯𑀁 𑀮𑀳𑀼𑀧𑀭𑀺𑀯𑀢𑁆𑀢𑁂 𑀘 𑀘𑀺𑀢𑁆𑀢𑀯𑀸𑀭𑁂 𑀑𑀯𑀸𑀤𑀸𑀦𑀼𑀲𑀸𑀲𑀦 𑀯𑀲𑁂𑀦 𑀢𑀺𑀓𑀺𑀘𑁆𑀙𑀸𑀬 𑀅𑀲𑀫𑁆𑀪𑀯𑀢𑁄. 𑀢𑁂𑀦𑀸𑀳 ‘‘𑀩𑀼𑀤𑁆𑀥𑀸𑀦𑀫𑁆𑀧𑀺 𑀅𑀢𑁂𑀓𑀺𑀘𑁆𑀙𑀸 𑀅𑀦𑀺𑀯𑀢𑁆𑀢𑀺𑀦𑁄’’𑀢𑀺 ¶ . 𑀅𑀭𑀺𑀝𑁆𑀞𑀓𑀡𑁆𑀝𑀓𑀲𑀤𑀺𑀲𑀸𑀢𑀺 𑀅𑀭𑀺𑀝𑁆𑀞𑀪𑀺𑀓𑁆𑀔𑀼𑀓𑀡𑁆𑀝𑀓𑀲𑀸𑀫𑀡𑁂𑀭𑀲𑀤𑀺𑀲𑀸, 𑀢𑁂 𑀯𑀺𑀬 𑀅𑀢𑁂𑀓𑀺𑀘𑁆𑀙𑀸 𑀅𑀦𑀺𑀯𑀢𑁆𑀢𑀺𑀦𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑀢𑀺𑀓𑀸𑀬𑁂𑀯 𑀚𑀸𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁆𑀣𑀸𑀢𑀺 𑀢𑁂𑀲𑀼 𑀢𑀻𑀲𑀼 𑀫𑀺𑀘𑁆𑀙𑀸𑀤𑀲𑁆𑀲𑀦𑁂𑀲𑀼. 𑀓𑁄𑀘𑀺 𑀏𑀓𑀁 𑀤𑀲𑁆𑀲𑀦𑀁 𑀑𑀓𑁆𑀓𑀫𑀢𑀻𑀢𑀺 𑀬𑀲𑁆𑀲 𑀏𑀓𑀲𑁆𑀫𑀺𑀁𑀬𑁂𑀯 𑀅𑀪𑀺𑀦𑀺𑀯𑁂𑀲𑁄, 𑀆𑀲𑁂𑀯𑀦𑀸 𑀘 𑀧𑀯𑀢𑁆𑀢𑀸, 𑀲𑁄 𑀏𑀓𑀫𑁂𑀯 𑀤𑀲𑁆𑀲𑀦𑀁 𑀑𑀓𑁆𑀓𑀫𑀢𑀺. 𑀓𑁄𑀘𑀺 𑀤𑁆𑀯𑁂, 𑀓𑁄𑀘𑀺 𑀢𑀻𑀡𑀺𑀧𑀻𑀢𑀺 𑀬𑀲𑁆𑀲 𑀤𑁆𑀯𑀻𑀲𑀼, 𑀢𑀻𑀲𑀼𑀧𑀺 𑀯𑀸 𑀅𑀪𑀺𑀦𑀺𑀯𑁂𑀲𑁄, 𑀆𑀲𑁂𑀯𑀦𑀸 𑀘 𑀧𑀯𑀢𑁆𑀢𑀸, 𑀲𑁄 𑀤𑁆𑀯𑁂 ¶ , 𑀢𑀻𑀡𑀺𑀧𑀺 𑀑𑀓𑁆𑀓𑀫𑀢𑀺, 𑀏𑀢𑁂𑀦 𑀧𑀦 𑀯𑀘𑀦𑁂𑀦 𑀬𑀸 𑀧𑀼𑀩𑁆𑀩𑁂 ‘‘𑀇𑀢𑀺 𑀲𑀩𑁆𑀩𑁂𑀧𑁂𑀢𑁂 𑀅𑀢𑁆𑀣𑀢𑁄 𑀉𑀪𑀬𑀧𑁆𑀧𑀝𑀺𑀩𑀸𑀳𑀓𑀸’’𑀢𑀺𑀆𑀤𑀺𑀦𑀸 𑀉𑀪𑀬𑀧𑁆𑀧𑀝𑀺𑀩𑀸𑀳𑀓𑀢𑀸𑀫𑀼𑀔𑁂𑀦 𑀤𑀻𑀧𑀺𑀢𑀸 𑀅𑀢𑁆𑀣𑀢𑁄 𑀲𑀺𑀤𑁆𑀥𑀸 𑀲𑀩𑁆𑀩𑀤𑀺𑀝𑁆𑀞𑀺𑀓𑀢𑀸, 𑀲𑀸 𑀧𑀼𑀩𑁆𑀩𑀪𑀸𑀕𑀺𑀬𑀸. 𑀬𑀸 𑀧𑀦 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑁄𑀓𑁆𑀓𑀦𑁆𑀢𑀺𑀪𑀽𑀢𑀸, 𑀲𑀸 𑀬𑀣𑀸𑀲𑀓𑀁 𑀧𑀘𑁆𑀘𑀬𑀲𑀫𑀼𑀤𑀸𑀕𑀫𑀲𑀺𑀤𑁆𑀥𑀺𑀢𑁄 𑀪𑀺𑀦𑁆𑀦𑀸𑀭𑀫𑁆𑀫𑀡𑀸𑀦𑀁 𑀯𑀺𑀬 𑀯𑀺𑀲𑁂𑀲𑀸𑀥𑀺𑀕𑀫𑀸𑀦𑀁 𑀏𑀓𑀚𑁆𑀛𑀁 𑀅𑀦𑀼𑀧𑁆𑀧𑀢𑁆𑀢𑀺𑀬𑀸 𑀅𑀜𑁆𑀜𑀫𑀜𑁆𑀜𑀁 𑀅𑀩𑁆𑀩𑁄𑀓𑀺𑀡𑁆𑀡𑀸 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀏𑀓𑀲𑁆𑀫𑀺𑀁 𑀑𑀓𑁆𑀓𑀦𑁆𑀢𑁂𑀧𑀻’’𑀢𑀺𑀆𑀤𑀺𑀦𑀸 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀤𑀺𑀝𑁆𑀞𑀻𑀦𑀁 𑀲𑀫𑀸𑀦𑀲𑀸𑀫𑀢𑁆𑀣𑀺𑀬𑀢𑀁, 𑀲𑀫𑀸𑀦𑀨𑀮𑀢𑀜𑁆𑀘 𑀯𑀺𑀪𑀸𑀯𑁂𑀢𑀺. 𑀲𑀕𑁆𑀕𑀸𑀯𑀭𑀡𑀸𑀤𑀺𑀦𑀸 𑀳𑁂𑀢𑀸 𑀲𑀫𑀸𑀦𑀲𑀸𑀫𑀢𑁆𑀣𑀺𑀬𑀸 𑀘𑁂𑀯 𑀲𑀫𑀸𑀦𑀨𑀮𑀸 𑀘, 𑀢𑀲𑁆𑀫𑀸 𑀢𑀺𑀲𑁆𑀲𑁄𑀧𑀺 𑀘𑁂𑀢𑀸 𑀏𑀓𑀲𑁆𑀲 𑀉𑀧𑁆𑀧𑀦𑁆𑀦𑀸𑀧𑀺 𑀅𑀩𑁆𑀩𑁄𑀓𑀺𑀡𑁆𑀡𑀸 𑀏𑀯, 𑀏𑀓𑀸𑀬 𑀯𑀺𑀧𑀸𑀓𑁂 𑀤𑀺𑀦𑁆𑀦𑁂 𑀇𑀢𑀭𑀸 𑀢𑀲𑁆𑀲𑀸 𑀅𑀦𑀼𑀩𑀮𑀧𑁆𑀧𑀤𑀸𑀬𑀺𑀓𑀸𑀬𑁄𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀧𑀢𑁆𑀢𑁄 𑀲𑀕𑁆𑀕𑀫𑀕𑁆𑀕𑀸𑀯𑀭𑀡𑀜𑁆𑀘𑁂𑀯𑀸’’𑀢𑀺𑀆𑀤𑀺𑀁 𑀯𑀢𑁆𑀯𑀸 ‘‘𑀅𑀪𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀢𑀤𑁂𑀯𑀢𑁆𑀣𑀁 𑀆𑀯𑀺𑀓𑀭𑁄𑀢𑀺. 𑀫𑁄𑀓𑁆𑀔𑀫𑀕𑁆𑀕𑀸𑀯𑀭𑀡𑀦𑁆𑀢𑀺 𑀦𑀺𑀩𑁆𑀩𑀸𑀦𑀧𑀣𑀪𑀽𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀦𑀺𑀯𑀸𑀭𑀡𑀁. 𑀧𑀕𑁂𑀯𑀸𑀢𑀺 𑀧𑀝𑀺𑀓𑁆𑀔𑁂𑀧𑀢𑁆𑀣𑁂 𑀦𑀺𑀧𑀸𑀢𑁄, 𑀫𑁄𑀓𑁆𑀔𑀲𑀗𑁆𑀔𑀸𑀢𑀁 𑀧𑀦 𑀦𑀺𑀩𑁆𑀩𑀸𑀦𑀁 𑀕𑀦𑁆𑀢𑀼𑀁 𑀓𑀸 𑀦𑀸𑀫 𑀓𑀣𑀸𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀧𑀕𑁂𑀯𑀸𑀢𑀺 𑀧𑀸 𑀏𑀯, 𑀧𑀞𑀫𑀢𑀭𑀫𑁂𑀯 𑀫𑁄𑀓𑁆𑀔𑀁 𑀕𑀦𑁆𑀢𑀼𑀫𑀪𑀩𑁆𑀩𑁄, 𑀫𑁄𑀓𑁆𑀔𑀕𑀫𑀦𑀢𑁄𑀧𑀺 𑀤𑀽𑀭𑀢𑀭𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀫𑀜𑁆𑀜𑀢𑁆𑀣𑀸𑀧𑀺 𑀬𑀣𑀸𑀭𑀳𑀁.

‘‘𑀯𑀝𑁆𑀝𑀔𑀸𑀡𑀼 𑀦𑀸𑀫𑁂𑀲 𑀲𑀢𑁆𑀢𑁄’’𑀢𑀺 𑀇𑀤𑀁 𑀯𑀘𑀦𑀁 𑀦𑁂𑀬𑁆𑀬𑀢𑁆𑀣𑀫𑁂𑀯, 𑀦 𑀦𑀻𑀢𑀢𑁆𑀣𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀧𑀧𑀜𑁆𑀘𑀲𑀽𑀤𑀦𑀺𑀬𑀁 𑀦𑀸𑀫 𑀫𑀚𑁆𑀛𑀺𑀫𑀸𑀕𑀫𑀝𑁆𑀞𑀓𑀣𑀸𑀬𑀁 ‘‘𑀓𑀺𑀁 𑀧𑀦𑁂𑀲 𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀦𑀺𑀬𑀢𑁄 𑀳𑁄𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀲𑁆𑀫𑀺𑀫𑁆𑀧𑀻𑀢𑀺? 𑀏𑀓𑀲𑁆𑀫𑀺𑀁𑀬𑁂𑀯 𑀦𑀺𑀬𑀢𑁄, 𑀆𑀲𑁂𑀯𑀦𑀯𑀲𑁂𑀦 𑀧𑀦 𑀪𑀯𑀦𑁆𑀢𑀭𑁂𑀧𑀺 𑀢𑀁 𑀢𑀁 𑀤𑀺𑀝𑁆𑀞𑀺𑀁 𑀭𑁄𑀘𑁂𑀢𑀺𑀬𑁂𑀯𑀸’’𑀢𑀺 (𑀫. 𑀦𑀺. 𑀅𑀝𑁆𑀞. 𑁩.𑁧𑁦𑁩). 𑀅𑀓𑀼𑀲𑀮𑀜𑁆𑀳𑀺 𑀦𑀸𑀫𑁂𑀢𑀁 𑀅𑀩𑀮𑀁 𑀤𑀼𑀩𑁆𑀩𑀮𑀁, 𑀦 𑀓𑀼𑀲𑀮𑀁 𑀯𑀺𑀬 𑀲𑀩𑀮𑀁 𑀫𑀳𑀸𑀩𑀮𑀁, 𑀢𑀲𑁆𑀫𑀸 ‘‘𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀦𑀺𑀬𑀢𑁄’’𑀢𑀺 𑀢𑀢𑁆𑀣 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄 𑀯𑀺𑀬 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑁄𑀧𑀺 𑀅𑀘𑁆𑀘𑀦𑁆𑀢𑀺𑀓𑁄 𑀲𑀺𑀬𑀸, 𑀦 𑀘 𑀅𑀘𑁆𑀘𑀦𑁆𑀢𑀺𑀓𑁄. 𑀬𑀤𑁂𑀯𑀁 𑀯𑀝𑁆𑀝𑀔𑀸𑀡𑀼𑀚𑁄𑀢𑀦𑀸 𑀓𑀣𑀁 𑀬𑀼𑀚𑁆𑀚𑁂𑀬𑁆𑀬𑀸𑀢𑀺 𑀆𑀳 ¶ ‘‘𑀆𑀲𑁂𑀯𑀦𑀯𑀲𑁂𑀦𑀸’’𑀢𑀺𑀆𑀤𑀺, 𑀢𑀲𑁆𑀫𑀸 𑀬𑀣𑀸 𑀲𑀢𑁆𑀢𑀗𑁆𑀕𑀼𑀢𑁆𑀢𑀭𑀧𑀸𑀴𑀺𑀬𑀁 ‘‘𑀲𑀓𑀺𑀁 𑀦𑀺𑀫𑀼𑀕𑁆𑀕𑁄𑀧𑀺 𑀦𑀺𑀫𑀼𑀕𑁆𑀕𑁄 𑀏𑀯 𑀩𑀸𑀮𑁄’’𑀢𑀺 [𑀅. 𑀦𑀺. 𑁭.𑁧𑁫 (𑀅𑀢𑁆𑀣𑀢𑁄 𑀲𑀫𑀸𑀦𑀁)] 𑀯𑀼𑀢𑁆𑀢𑀁, 𑀏𑀯𑀁 𑀯𑀝𑁆𑀝𑀔𑀸𑀡𑀼𑀚𑁄𑀢𑀦𑀸𑀧𑀺 𑀯𑀼𑀢𑁆𑀢𑀸. 𑀬𑀸𑀤𑀺𑀲𑁂 𑀳𑀺 𑀧𑀘𑁆𑀘𑀬𑁂 𑀧𑀝𑀺𑀘𑁆𑀘 𑀅𑀬𑀁 𑀢𑀁 𑀢𑀁 𑀤𑀲𑁆𑀲𑀦𑀁 𑀑𑀓𑁆𑀓𑀦𑁆𑀢𑁄, 𑀧𑀼𑀦 𑀓𑀤𑀸𑀘𑀺 𑀢𑀧𑁆𑀧𑀝𑀺𑀧𑀓𑁆𑀔𑁂 𑀧𑀘𑁆𑀘𑀬𑁂 𑀧𑀝𑀺𑀘𑁆𑀘 𑀢𑀢𑁄 𑀲𑀻𑀲𑀼𑀓𑁆𑀔𑀺𑀧𑀦𑀫𑀲𑁆𑀲 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀢𑀲𑁆𑀫𑀸 𑀢𑀢𑁆𑀣, (𑀫. 𑀦𑀺. 𑀅𑀝𑁆𑀞. 𑁩.𑁧𑁦𑁨) 𑀇𑀥 𑀘 𑀅𑀝𑁆𑀞𑀓𑀣𑀸𑀬𑀁 ‘‘𑀏𑀯𑀭𑀽𑀧𑀲𑁆𑀲 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀪𑀯𑀢𑁄 𑀯𑀼𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀬𑁂𑀪𑀼𑀬𑁆𑀬𑀕𑁆𑀕𑀳𑀡𑀁 𑀓𑀢𑀁, 𑀇𑀢𑀺 𑀆𑀲𑁂𑀯𑀦𑀯𑀲𑁂𑀦 𑀪𑀯𑀦𑁆𑀢𑀭𑁂𑀧𑀺 𑀢𑀁𑀢𑀁𑀤𑀺𑀝𑁆𑀞𑀺𑀬𑀸 𑀭𑁄𑀘𑀦𑀢𑁄 𑀬𑁂𑀪𑀼𑀬𑁆𑀬𑁂𑀦𑀲𑁆𑀲 𑀪𑀯𑀢𑁄 𑀯𑀼𑀝𑁆𑀞𑀸𑀦𑀁 𑀦𑀢𑁆𑀣𑀻𑀢𑀺 𑀓𑀢𑁆𑀯𑀸 𑀯𑀝𑁆𑀝𑀔𑀸𑀡𑀼𑀓𑁄 𑀦𑀸𑀫𑁂𑀲 𑀚𑀸𑀢𑁄, 𑀦 𑀧𑀦 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑀲𑁆𑀲 𑀅𑀘𑁆𑀘𑀦𑁆𑀢𑀺𑀓𑀢𑀸𑀬𑀸𑀢𑀺 𑀦𑀻𑀳𑀭𑀺𑀢𑁆𑀯𑀸 𑀜𑀸𑀢𑀩𑁆𑀩𑀢𑁆𑀣𑀢𑀸𑀬 𑀦𑁂𑀬𑁆𑀬𑀢𑁆𑀣𑀫𑀺𑀤𑀁, 𑀦 𑀦𑀻𑀢𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀲𑀦𑁆𑀥𑀸𑀬 𑀅𑀪𑀺𑀥𑀫𑁆𑀫𑁂𑀧𑀺 ‘‘𑀅𑀭𑀳𑀸, 𑀬𑁂 𑀘 𑀧𑀼𑀣𑀼𑀚𑁆𑀚𑀦𑀸 𑀫𑀕𑁆𑀕𑀁 𑀦 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀺, 𑀢𑁂 𑀭𑀽𑀧𑀓𑁆𑀔𑀦𑁆𑀥𑀜𑁆𑀘 𑀦 𑀧𑀭𑀺𑀚𑀸𑀦𑀦𑁆𑀢𑀺, 𑀯𑁂𑀤𑀦𑀸𑀓𑁆𑀔𑀦𑁆𑀥𑀜𑁆𑀘 𑀦 𑀧𑀭𑀺𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺 ¶ (𑀬𑀫. 𑁧.𑀔𑀦𑁆𑀥𑀬𑀫𑀓 𑁨𑁧𑁦) 𑀯𑀼𑀢𑁆𑀢𑀁. 𑀧𑀣𑀯𑀺𑀕𑁄𑀧𑀓𑁄𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑁂𑀦 𑀧𑀣𑀯𑀺𑀧𑀸𑀮𑀓𑁄. 𑀢𑀤𑀢𑁆𑀣𑀁 𑀲𑀫𑀢𑁆𑀣𑁂𑀢𑀼𑀁 ‘‘𑀬𑁂𑀪𑀼𑀬𑁆𑀬𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀏𑀯𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀧𑀭𑀫𑀲𑀸𑀯𑀚𑁆𑀚𑀸𑀦𑀼𑀲𑀸𑀭𑁂𑀦 𑀲𑁄𑀢𑀽𑀦𑀁 𑀲𑀢𑀺𑀫𑀼𑀧𑁆𑀧𑀸𑀤𑁂𑀦𑁆𑀢𑁄 ‘‘𑀢𑀲𑁆𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀯𑀁 𑀲𑀁𑀲𑀸𑀭𑀔𑀸𑀡𑀼𑀪𑀸𑀯𑀲𑁆𑀲𑀸𑀧𑀺 𑀧𑀘𑁆𑀘𑀬𑁄 𑀅𑀧𑀡𑁆𑀡𑀓𑀚𑀸𑀢𑁄, 𑀢𑀲𑁆𑀫𑀸 𑀧𑀭𑀺𑀯𑀚𑁆𑀚𑁂𑀬𑁆𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀓𑀮𑁆𑀬𑀸𑀡𑀚𑀦𑀦𑁆𑀢𑀺 𑀓𑀮𑁆𑀬𑀸𑀡𑀥𑀫𑁆𑀫𑀯𑀺𑀭𑀳𑀺𑀢𑀚𑀦𑀁 𑀅𑀲𑀸𑀥𑀼𑀚𑀦𑀁. 𑀆𑀲𑀻𑀯𑀺𑀲𑀦𑁆𑀢𑀺 𑀆𑀲𑀼𑀫𑀸𑀕𑀢𑀳𑀮𑀸𑀳𑀮𑀁. 𑀪𑀽𑀢𑀺𑀓𑀸𑀫𑁄𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑀸𑀦𑀁 𑀯𑀲𑁂𑀦 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀯𑀼𑀟𑁆𑀠𑀺𑀓𑀸𑀫𑁄. 𑀯𑀺𑀘𑀓𑁆𑀔𑀡𑁄𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀯𑀺𑀯𑀺𑀥𑀢𑁆𑀣𑀲𑁆𑀲 𑀧𑀲𑁆𑀲𑀓𑁄, 𑀥𑀻𑀭𑁄𑀢𑀺 𑀅𑀢𑁆𑀣𑁄.

𑀧𑀓𑀼𑀥𑀓𑀘𑁆𑀘𑀸𑀬𑀦𑀯𑀸𑀤𑀯𑀡𑁆𑀡𑀦𑀸

𑁧𑁭𑁪. ‘‘𑀅𑀓𑀝𑀸’’𑀢𑀺 𑀏𑀢𑁆𑀣 𑀢-𑀓𑀸𑀭𑀲𑁆𑀲 𑀝-𑀓𑀸𑀭𑀸𑀤𑁂𑀲𑁄𑀢𑀺 𑀆𑀳 ‘‘𑀅𑀓𑀢𑀸’’𑀢𑀺, 𑀲𑀫𑁂𑀦, 𑀯𑀺𑀲𑀫𑁂𑀦 𑀯𑀸 𑀓𑁂𑀦𑀘𑀺𑀧𑀺 𑀳𑁂𑀢𑀼𑀦𑀸 𑀅𑀓𑀢𑀸, 𑀦 𑀯𑀺𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀅𑀓𑀝𑀯𑀺𑀥𑀸𑀢𑀺 𑀏𑀢𑁆𑀣𑀸𑀧𑀺. 𑀦𑀢𑁆𑀣𑀺 𑀓𑀢𑀯𑀺𑀥𑁄 𑀓𑀭𑀡𑀯𑀺𑀥𑀺 𑀏𑀢𑁂𑀲𑀦𑁆𑀢𑀺 𑀅𑀓𑀝𑀯𑀺𑀥𑀸. 𑀧𑀤𑀤𑁆𑀯𑀬𑁂𑀦𑀸𑀧𑀺 𑀮𑁄𑀓𑁂 𑀓𑁂𑀦𑀘𑀺 𑀳𑁂𑀢𑀼𑀧𑀘𑁆𑀘𑀬𑁂𑀦 𑀦𑁂𑀲𑀁 𑀅𑀦𑀺𑀩𑁆𑀩𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀏𑀯𑀁 𑀓𑀭𑁄𑀳𑀻’’𑀢𑀺𑀆𑀤𑀺. 𑀇𑀤𑁆𑀥𑀺𑀬𑀸𑀧𑀺 𑀦 𑀦𑀺𑀫𑁆𑀫𑀺𑀢𑀸𑀢𑀺 𑀓𑀲𑁆𑀲𑀘𑀺 𑀇𑀤𑁆𑀥𑀺𑀫𑀢𑁄 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, 𑀤𑁂𑀯𑀲𑁆𑀲, 𑀇𑀲𑁆𑀲𑀭𑀸𑀤𑀺𑀦𑁄 𑀘 𑀇𑀤𑁆𑀥𑀺𑀬𑀸𑀧𑀺 𑀦 𑀦𑀺𑀫𑁆𑀫𑀺𑀢𑀸. 𑀅𑀦𑀺𑀫𑁆𑀫𑀸𑀧𑀺𑀢𑀸𑀢𑀺 𑀓𑀲𑁆𑀲𑀘𑀺 ¶ 𑀅𑀦𑀺𑀫𑁆𑀫𑀸𑀧𑀺𑀢𑀸. 𑀓𑀸𑀫𑀁 𑀲𑀤𑁆𑀤𑀢𑁄 𑀬𑀼𑀢𑁆𑀢𑀁, 𑀅𑀢𑁆𑀣𑀢𑁄 𑀘 𑀧𑀼𑀭𑀺𑀫𑁂𑀦 𑀲𑀫𑀸𑀦𑀁, 𑀢𑀣𑀸𑀧𑀺 𑀧𑀸𑀴𑀺𑀬𑀫𑀝𑁆𑀞𑀓𑀣𑀸𑀬𑀜𑁆𑀘 𑀅𑀦𑀸𑀕𑀢𑀫𑁂𑀯 𑀅𑀕𑀳𑁂𑀢𑀩𑁆𑀩𑀪𑀸𑀯𑁂 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀢𑀁 𑀦𑁂𑀯 𑀧𑀸𑀴𑀺𑀬’’𑀦𑁆𑀢𑀺𑀆𑀤𑀺𑀦𑀸.

𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀲𑀁𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁦) 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀇𑀤𑀫𑁂𑀢𑁆𑀣 𑀬𑁄𑀚𑀦𑀸𑀫𑀢𑁆𑀢𑀁 𑁋 𑀯𑀜𑁆𑀛𑀸𑀢𑀺 𑀳𑀺 𑀯𑀜𑁆𑀛𑀧𑀲𑀼𑀯𑀜𑁆𑀛𑀢𑀸𑀮𑀸𑀤𑀬𑁄 𑀯𑀺𑀬 𑀅𑀨𑀮𑀸 𑀓𑀲𑁆𑀲𑀘𑀺 𑀅𑀚𑀦𑀓𑀸, 𑀢𑁂𑀦 𑀧𑀣𑀯𑀺𑀓𑀸𑀬𑀸𑀤𑀻𑀦𑀁 𑀭𑀽𑀧𑀸𑀤𑀺𑀚𑀦𑀓𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀭𑀽𑀧𑀲𑀤𑁆𑀤𑀸𑀤𑀬𑁄 𑀳𑀺 𑀧𑀣𑀯𑀺𑀓𑀸𑀬𑀸𑀤𑀻𑀳𑀺 𑀅𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀓𑀸𑀢𑀺 𑀢𑀲𑁆𑀲 𑀮𑀤𑁆𑀥𑀺. 𑀧𑀩𑁆𑀩𑀢𑀲𑁆𑀲 𑀓𑀽𑀝𑀫𑀺𑀯 𑀞𑀺𑀢𑀸𑀢𑀺 𑀓𑀽𑀝𑀝𑁆𑀞𑀸, 𑀬𑀣𑀸 𑀧𑀩𑁆𑀩𑀢𑀓𑀽𑀝𑀁 𑀓𑁂𑀦𑀘𑀺 𑀅𑀦𑀺𑀩𑁆𑀩𑀢𑁆𑀢𑀺𑀢𑀁 𑀓𑀲𑁆𑀲𑀘𑀺 𑀘 𑀅𑀦𑀺𑀩𑁆𑀩𑀢𑁆𑀢𑀓𑀁, 𑀏𑀯𑀫𑁂𑀢𑁂𑀧𑀺 𑀲𑀢𑁆𑀢𑀓𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀫𑀺𑀤𑀁 ‘‘𑀩𑀻𑀚𑀢𑁄 𑀅𑀗𑁆𑀓𑀼𑀭𑀸𑀤𑀺 𑀚𑀸𑀬𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀯𑀺𑀚𑁆𑀚𑀫𑀸𑀦𑀫𑁂𑀯 𑀢𑀢𑁄 𑀦𑀺𑀓𑁆𑀔𑀫𑀢𑀺, 𑀦 𑀅𑀯𑀺𑀚𑁆𑀚𑀫𑀸𑀦𑀁, 𑀇𑀢𑀭𑀣𑀸 𑀅𑀜𑁆𑀜𑀢𑁄𑀧𑀺 𑀅𑀜𑁆𑀜𑀲𑁆𑀲 𑀉𑀧𑀮𑀤𑁆𑀥𑀺 𑀲𑀺𑀬𑀸, 𑀏𑀯𑀫𑁂𑀢𑁂𑀧𑀺 𑀲𑀢𑁆𑀢𑀓𑀸𑀬𑀸, 𑀢𑀲𑁆𑀫𑀸 𑀏𑀲𑀺𑀓𑀝𑁆𑀞𑀸𑀬𑀺𑀝𑁆𑀞𑀺𑀢𑀸𑀢𑀺. 𑀞𑀺𑀢𑀢𑁆𑀢𑀸𑀢𑀺 𑀦𑀺𑀩𑁆𑀩𑀺𑀓𑀸𑀭𑀪𑀸𑀯𑁂𑀦 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀢𑁆𑀢𑀸. 𑀦 𑀘𑀮𑀦𑁆𑀢𑀻𑀢𑀺 𑀦 𑀯𑀺𑀓𑀸𑀭𑀫𑀸𑀧𑀚𑁆𑀚𑀦𑁆𑀢𑀺. 𑀯𑀺𑀓𑀸𑀭𑀸𑀪𑀸𑀯𑀢𑁄 𑀳𑀺 𑀢𑁂𑀲𑀁 𑀲𑀢𑁆𑀢𑀦𑁆𑀦𑀁 𑀓𑀸𑀬𑀸𑀦𑀁 𑀏𑀲𑀺𑀓𑀝𑁆𑀞𑀸𑀬𑀺𑀝𑁆𑀞𑀺𑀢𑀢𑀸, 𑀅𑀦𑀺𑀜𑁆𑀚𑀦𑀜𑁆𑀘 𑀅𑀢𑁆𑀢𑀦𑁄 𑀧𑀓𑀢𑀺𑀬𑀸 𑀅𑀯𑀝𑁆𑀞𑀸𑀦𑀫𑁂𑀯. 𑀢𑁂𑀦𑀸𑀳 ‘‘𑀦 𑀯𑀺𑀧𑀭𑀺𑀡𑀫𑀦𑁆𑀢𑀻’’𑀢𑀺. 𑀧𑀓𑀢𑀺𑀦𑁆𑀢𑀺 𑀲𑀪𑀸𑀯𑀁 ¶ . 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑁆𑀢𑀸 𑀏𑀯 𑀦 𑀅𑀜𑁆𑀜𑀫𑀜𑁆𑀜𑀁 𑀉𑀧𑀳𑀦𑀦𑁆𑀢𑀺. 𑀲𑀢𑀺 𑀳𑀺 𑀯𑀺𑀓𑀸𑀭𑀫𑀸𑀧𑀸𑀤𑁂𑀢𑀩𑁆𑀩𑀪𑀸𑀯𑁂 𑀉𑀧𑀖𑀸𑀢𑀓𑀢𑀸 𑀲𑀺𑀬𑀸, 𑀢𑀣𑀸 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑀪𑀸𑀯𑁂 𑀲𑀢𑀺 𑀅𑀦𑀼𑀕𑁆𑀕𑀸𑀳𑀓𑀢𑀸𑀧𑀻𑀢𑀺 𑀢𑀤𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀦𑀸𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀣𑀯𑀻𑀬𑁂𑀯 𑀓𑀸𑀬𑁂𑀓𑀤𑁂𑀲𑀢𑁆𑀢𑀸 𑀧𑀣𑀯𑀺𑀓𑀸𑀬𑁄 𑀬𑀣𑀸 ‘‘𑀲𑀫𑀼𑀤𑁆𑀤𑁄 𑀤𑀺𑀝𑁆𑀞𑁄’’𑀢𑀺, 𑀧𑀣𑀯𑀺𑀲𑀫𑀽𑀳𑁄 𑀯𑀸 𑀓𑀸𑀬𑀲𑀤𑁆𑀤𑀲𑁆𑀲 𑀲𑀫𑀽𑀳𑀯𑀸𑀘𑀓𑀢𑁆𑀢𑀸 𑀬𑀣𑀸 ‘‘𑀳𑀢𑁆𑀣𑀺𑀓𑀸𑀬𑁄’’𑀢𑀺. 𑀚𑀻𑀯𑀲𑀢𑁆𑀢𑀫𑀸𑀦𑀁 𑀓𑀸𑀬𑀸𑀦𑀁 𑀦𑀺𑀘𑁆𑀘𑀢𑀸𑀬 𑀦𑀺𑀩𑁆𑀩𑀺𑀓𑀸𑀭𑀪𑀸𑀯𑀢𑁄 𑀦 𑀳𑀦𑁆𑀢𑀩𑁆𑀩𑀢𑀸, 𑀦 𑀖𑀸𑀢𑁂𑀢𑀩𑁆𑀩𑀢𑀸 𑀘, 𑀢𑀲𑁆𑀫𑀸 𑀦𑁂𑀯 𑀓𑁄𑀘𑀺 𑀳𑀦𑁆𑀢𑀸, 𑀖𑀸𑀢𑁂𑀢𑀸 𑀯𑀸 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀲𑀢𑁆𑀢𑀦𑁆𑀦𑀁 𑀢𑁆𑀯𑁂𑀯 𑀓𑀸𑀬𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀤𑀺 𑀓𑁄𑀘𑀺 𑀳𑀦𑁆𑀢𑀸 𑀦𑀢𑁆𑀣𑀺, 𑀓𑀣𑀁 𑀢𑁂𑀲𑀁 𑀲𑀢𑁆𑀣𑀧𑁆𑀧𑀳𑀸𑀭𑁄𑀢𑀺 𑀢𑀢𑁆𑀣 𑀘𑁄𑀤𑀦𑀸𑀬𑀸𑀳 ‘‘𑀬𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀢𑁆𑀢𑀦𑁆𑀦𑀁 𑀢𑁆𑀯𑁂𑀯𑀸𑀢𑀺 𑀲𑀢𑁆𑀢𑀦𑁆𑀦𑀫𑁂𑀯. 𑀇𑀢𑀺𑀲𑀤𑁆𑀤𑁄 𑀳𑁂𑀢𑁆𑀣 𑀦𑀺𑀧𑀸𑀢𑀫𑀢𑁆𑀢𑀁. 𑀧𑀳𑀢𑀦𑁆𑀢𑀺 𑀧𑀳𑀭𑀺𑀢𑀁. 𑀏𑀓𑀢𑁄𑀥𑀸𑀭𑀸𑀤𑀺𑀓𑀁 𑀲𑀢𑁆𑀣𑀁. 𑀅𑀦𑁆𑀢𑀭𑁂𑀦𑁂𑀯 𑀧𑀯𑀺𑀲𑀢𑀺, 𑀦 𑀢𑁂𑀲𑀼. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑁂𑀯𑀮𑀁 ‘‘𑀅𑀳𑀁 𑀇𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀫𑀻’’𑀢𑀺 𑀢𑁂𑀲𑀁 𑀢𑀣𑀸 𑀲𑀜𑁆𑀜𑀸𑀫𑀢𑁆𑀢𑀫𑁂𑀯, 𑀳𑀦𑀦𑀖𑀸𑀢𑀦𑀸𑀤𑀺 𑀧𑀦 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑁂𑀯 𑀓𑀸𑀬𑀸𑀦𑀁 𑀅𑀯𑀺𑀓𑁄𑀧𑀦𑀻𑀬𑀪𑀸𑀯𑀢𑁄𑀢𑀺.

𑀦𑀺𑀕𑀡𑁆𑀞𑀦𑀸𑀝𑀧𑀼𑀢𑁆𑀢𑀯𑀸𑀤𑀯𑀡𑁆𑀡𑀦𑀸

𑁧𑁭𑁭. 𑀘𑀢𑁆𑀢𑀸𑀭𑁄 ¶ 𑀬𑀸𑀫𑀸 𑀪𑀸𑀕𑀸 𑀘𑀢𑀼𑀬𑀸𑀫𑀁, 𑀘𑀢𑀼𑀬𑀸𑀫𑀁 𑀏𑀯 𑀘𑀸𑀢𑀼𑀬𑀸𑀫𑀁. 𑀪𑀸𑀕𑀢𑁆𑀣𑁄 𑀳𑀺 𑀇𑀥 𑀬𑀸𑀫-𑀲𑀤𑁆𑀤𑁄 𑀬𑀣𑀸 ‘‘𑀭𑀢𑁆𑀢𑀺𑀬𑀸 𑀧𑀞𑀫𑁄 𑀬𑀸𑀫𑁄’’𑀢𑀺 (𑀲𑀁. 𑀦𑀺. 𑀅𑀝𑁆𑀞. 𑁩.𑁩𑁬𑁮). 𑀲𑁄 𑀧𑀦𑁂𑀢𑁆𑀣 𑀪𑀸𑀕𑁄 𑀲𑀁𑀯𑀭𑀮𑀓𑁆𑀔𑀺𑀢𑁄𑀢𑀺 𑀆𑀳 ‘‘𑀘𑀢𑀼𑀓𑁄𑀝𑁆𑀞𑀸𑀲𑁂𑀦 𑀲𑀁𑀯𑀭𑁂𑀦 𑀲𑀁𑀯𑀼𑀢𑁄’’𑀢𑀺, 𑀲𑀁𑀬𑀫𑀢𑁆𑀣𑁄 𑀯𑀸 𑀬𑀸𑀫𑀲𑀤𑁆𑀤𑁄 𑀬𑀫𑀦𑀁 𑀲𑀜𑁆𑀜𑀫𑀦𑀁 𑀬𑀸𑀫𑁄𑀢𑀺 𑀓𑀢𑁆𑀯𑀸. ‘‘𑀬𑀢𑀢𑁆𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀳𑀺 𑀅𑀦𑀼𑀧𑀲𑀕𑁆𑀕𑁄𑀧𑀺 𑀲𑀉𑀧𑀲𑀕𑁆𑀕𑁄 𑀯𑀺𑀬 𑀲𑀜𑁆𑀜𑀫𑀢𑁆𑀣𑀯𑀸𑀘𑀓𑁄, 𑀲𑁄 𑀧𑀦 𑀘𑀢𑀽𑀳𑀺 𑀆𑀓𑀸𑀭𑁂𑀳𑀻𑀢𑀺 𑀆𑀳 ‘‘𑀘𑀢𑀼𑀓𑁄𑀝𑁆𑀞𑀸𑀲𑁂𑀦 𑀲𑀁𑀯𑀭𑁂𑀦𑀸’’𑀢𑀺. 𑀆𑀓𑀸𑀭𑁄 𑀓𑁄𑀝𑁆𑀞𑀸𑀲𑁄𑀢𑀺 𑀳𑀺 𑀅𑀢𑁆𑀣𑀢𑁄 𑀏𑀓𑀁. 𑀯𑀸𑀭𑀺𑀢𑁄 𑀲𑀩𑁆𑀩𑀯𑀸𑀭𑀺 𑀬𑀲𑁆𑀲𑀸𑀬𑀁 𑀲𑀩𑁆𑀩𑀯𑀸𑀭𑀺𑀯𑀸𑀭𑀺𑀢𑁄 𑀬𑀣𑀸 ‘‘𑀅𑀕𑁆𑀬𑀸𑀳𑀺𑀢𑁄’’𑀢𑀺. 𑀢𑁂𑀦𑀸𑀳 ‘‘𑀯𑀸𑀭𑀺𑀢𑀲𑀩𑁆𑀩𑀉𑀤𑀓𑁄’’𑀢𑀺. 𑀯𑀸𑀭𑀺𑀲𑀤𑁆𑀤𑁂𑀦 𑀘𑁂𑀢𑁆𑀣 𑀯𑀸𑀭𑀺𑀧𑀭𑀺𑀪𑁄𑀕𑁄 𑀯𑀼𑀢𑁆𑀢𑁄 𑀬𑀣𑀸 ‘‘𑀭𑀢𑁆𑀢𑀽𑀧𑀭𑀢𑁄’’𑀢𑀺. 𑀧𑀝𑀺𑀓𑁆𑀔𑀺𑀢𑁆𑀢𑁄 𑀲𑀩𑁆𑀩𑀲𑀻𑀢𑁄𑀤𑀓𑁄 𑀢𑀧𑁆𑀧𑀭𑀺𑀪𑁄𑀕𑁄 𑀬𑀲𑁆𑀲𑀸𑀢𑀺 𑀢𑀣𑀸. 𑀢𑀦𑁆𑀢𑀺 𑀲𑀻𑀢𑁄𑀤𑀓𑀁. 𑀲𑀩𑁆𑀩𑀯𑀸𑀭𑀺𑀬𑀼𑀢𑁆𑀢𑁄𑀢𑀺 𑀲𑀁𑀯𑀭𑀮𑀓𑁆𑀔𑀡𑀫𑀢𑁆𑀢𑀁 𑀓𑀣𑀺𑀢𑀁. 𑀲𑀩𑁆𑀩𑀯𑀸𑀭𑀺𑀥𑀼𑀢𑁄𑀢𑀺 𑀧𑀸𑀧𑀦𑀺𑀚𑁆𑀚𑀭𑀮𑀓𑁆𑀔𑀡𑀁. 𑀲𑀩𑁆𑀩𑀯𑀸𑀭𑀺𑀨𑀼𑀝𑁄𑀢𑀺 𑀓𑀫𑁆𑀫𑀓𑁆𑀔𑀬𑀮𑀓𑁆𑀔𑀡𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀩𑁆𑀩𑁂𑀦𑀸’’𑀢𑀺𑀆𑀤𑀺𑀫𑀸𑀳, 𑀲𑀩𑁆𑀩𑁂𑀦 𑀧𑀸𑀧𑀯𑀸𑀭𑀡𑁂𑀦 𑀬𑀼𑀢𑁆𑀢𑁄𑀢𑀺 𑀳𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀲𑀁𑀯𑀭𑀮𑀓𑁆𑀔𑀡𑁂𑀦 𑀧𑀸𑀧𑀯𑀸𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀥𑀼𑀢𑀧𑀸𑀧𑁄𑀢𑀺 𑀲𑀩𑁆𑀩𑁂𑀦 𑀦𑀺𑀚𑁆𑀚𑀭𑀮𑀓𑁆𑀔𑀡𑁂𑀦 𑀧𑀸𑀧𑀯𑀸𑀭𑀡𑁂𑀦 𑀯𑀺𑀥𑀼𑀢𑀧𑀸𑀧𑁄. 𑀨𑀼𑀝𑁆𑀞𑁄𑀢𑀺 𑀅𑀝𑁆𑀞𑀦𑁆𑀦𑀫𑁆𑀧𑀺 𑀓𑀫𑁆𑀫𑀸𑀦𑀁 𑀔𑁂𑀧𑀦𑁂𑀦 𑀫𑁄𑀓𑁆𑀔𑀧𑁆𑀧𑀢𑁆𑀢𑀺𑀬𑀸 𑀓𑀫𑁆𑀫𑀓𑁆𑀔𑀬𑀮𑀓𑁆𑀔𑀡𑁂𑀦 𑀲𑀩𑁆𑀩𑁂𑀦 𑀧𑀸𑀧𑀯𑀸𑀭𑀡𑁂𑀦 𑀨𑀼𑀝𑁆𑀞𑁄, 𑀢𑀁 𑀧𑀢𑁆𑀯𑀸 𑀞𑀺𑀢𑁄𑀢𑀺 𑀅𑀢𑁆𑀣𑁄. ‘‘𑀤𑁆𑀯𑁂𑀬𑁂𑀯 𑀕𑀢𑀺𑀬𑁄 𑀪𑀯𑀦𑁆𑀢𑀺, 𑀅𑀦𑀜𑁆𑀜𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁫𑁮; 𑁨.𑁩𑁪; 𑁩.𑁧𑁯𑁯, 𑁨𑁦𑁦; 𑀫. 𑀦𑀺. 𑁨.𑁩𑁮𑁪, 𑁩𑁯𑁮) 𑀯𑀺𑀬 𑀕𑀫𑀼𑀲𑀤𑁆𑀤𑁄 𑀦𑀺𑀝𑁆𑀞𑀸𑀦𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 ‘‘𑀓𑁄𑀝𑀺𑀧𑁆𑀧𑀢𑁆𑀢𑀘𑀺𑀢𑁆𑀢𑁄’’𑀢𑀺, 𑀫𑁄𑀓𑁆𑀔𑀸𑀥𑀺𑀕𑀫𑁂𑀦 𑀉𑀢𑁆𑀢𑀫𑀫𑀭𑀺𑀬𑀸𑀤𑀧𑁆𑀧𑀢𑁆𑀢𑀘𑀺𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀓𑀸𑀬𑀸𑀤𑀻𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀲𑀁𑀬𑀫𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄 ¶ 𑀲𑀁𑀬𑀢𑀘𑀺𑀢𑁆𑀢𑁄. 𑀅𑀢𑀻𑀢𑁂 𑀳𑁂𑀢𑁆𑀣 𑀢-𑀲𑀤𑁆𑀤𑁄. 𑀲𑀁𑀬𑀫𑁂𑀢𑀩𑁆𑀩𑀲𑁆𑀲 𑀅𑀯𑀲𑁂𑀲𑀲𑁆𑀲 𑀅𑀪𑀸𑀯𑀢𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑁄. 𑀓𑀺𑀜𑁆𑀘𑀺 𑀲𑀸𑀲𑀦𑀸𑀦𑀼𑀮𑁄𑀫𑀦𑁆𑀢𑀺 𑀧𑀸𑀧𑀯𑀸𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀲𑀼𑀤𑁆𑀥𑀮𑀤𑁆𑀥𑀺𑀢𑀸𑀬𑀸𑀢𑀺 ‘‘𑀅𑀢𑁆𑀣𑀺 𑀚𑀻𑀯𑁄, 𑀲𑁄 𑀘 𑀲𑀺𑀬𑀸 𑀦𑀺𑀘𑁆𑀘𑁄, 𑀲𑀺𑀬𑀸 𑀅𑀦𑀺𑀘𑁆𑀘𑁄’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁧𑁭𑁭). 𑀏𑀯𑀫𑀸𑀤𑀺𑀫𑀮𑀻𑀦𑀮𑀤𑁆𑀥𑀺𑀢𑀸𑀬. 𑀲𑀩𑁆𑀩𑀸𑀢𑀺 𑀓𑀫𑁆𑀫𑀧𑀓𑀢𑀺𑀯𑀺𑀪𑀸𑀕𑀸𑀤𑀺𑀯𑀺𑀲𑀬𑀸𑀧𑀺 𑀲𑀩𑁆𑀩𑀸 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑁄. 𑀤𑀺𑀝𑁆𑀞𑀺𑀬𑁂𑀯𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑁄 𑀏𑀯 𑀚𑀸𑀢𑀸.

𑀲𑀜𑁆𑀘𑀬𑀩𑁂𑀮𑀝𑁆𑀞𑀧𑀼𑀢𑁆𑀢𑀯𑀸𑀤𑀯𑀡𑁆𑀡𑀦𑀸

𑁧𑁭𑁯-𑁧𑁮𑁧. 𑀅𑀫𑀭𑀸𑀯𑀺𑀓𑁆𑀔𑁂𑀧𑁂 ¶ 𑀯𑀼𑀢𑁆𑀢𑀦𑀬𑁄 𑀏𑀯𑀸𑀢𑀺 𑀩𑁆𑀭𑀳𑁆𑀫𑀚𑀸𑀮𑁂 𑀅𑀫𑀭𑀸𑀯𑀺𑀓𑁆𑀔𑁂𑀧𑀯𑀸𑀤𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁧.𑁬𑁧) 𑀯𑀼𑀢𑁆𑀢𑀦𑀬𑁄 𑀏𑀯. 𑀓𑀲𑁆𑀫𑀸? 𑀯𑀺𑀓𑁆𑀔𑁂𑀧𑀩𑁆𑀬𑀸𑀓𑀭𑀡𑀪𑀸𑀯𑀢𑁄, 𑀢𑀣𑁂𑀯 𑀘 𑀢𑀢𑁆𑀣 𑀯𑀺𑀓𑁆𑀔𑁂𑀧𑀯𑀸𑀤𑀲𑁆𑀲 𑀆𑀕𑀢𑀢𑁆𑀢𑀸.

𑀧𑀞𑀫𑀲𑀦𑁆𑀤𑀺𑀝𑁆𑀞𑀺𑀓𑀲𑀸𑀫𑀜𑁆𑀜𑀨𑀮𑀯𑀡𑁆𑀡𑀦𑀸

𑁧𑁮𑁨. 𑀧𑀻𑀴𑁂𑀢𑁆𑀯𑀸𑀢𑀺 𑀢𑁂𑀮𑀬𑀦𑁆𑀢𑁂𑀦 𑀉𑀧𑁆𑀧𑀻𑀴𑁂𑀢𑁆𑀯𑀸, 𑀇𑀫𑀺𑀦𑀸 𑀭𑀜𑁆𑀜𑁄 𑀆𑀪𑁄𑀕𑀫𑀸𑀳. 𑀯𑀤𑀢𑁄 𑀳𑀺 𑀆𑀪𑁄𑀕𑀯𑀲𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑀦𑀺𑀘𑁆𑀙𑀬𑁄. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀘 𑀢𑀤𑀸𑀪𑁄𑀕𑀜𑁆𑀜𑀽, 𑀧𑀭𑀫𑁆𑀧𑀭𑀸𑀪𑀢𑀢𑁆𑀣𑀲𑁆𑀲𑀸𑀯𑀺𑀭𑁄𑀥𑀺𑀦𑁄 𑀘, 𑀢𑀲𑁆𑀫𑀸 𑀲𑀩𑁆𑀩𑀢𑁆𑀣 𑀬𑀣𑀸 𑀢𑀣𑀸 𑀯𑀘𑀦𑁄𑀓𑀸𑀲𑀮𑀤𑁆𑀥𑀪𑀸𑀯𑀫𑀢𑁆𑀢𑁂𑀦 𑀅𑀢𑁆𑀣𑁄 𑀦 𑀯𑀼𑀢𑁆𑀢𑁄, 𑀅𑀣 𑀔𑁄 𑀢𑁂𑀲𑀁 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑀯𑀲𑁂𑀦𑀸𑀢𑀺 𑀕𑀳𑁂𑀢𑀩𑁆𑀩𑀁, 𑀏𑀯𑀜𑁆𑀘 𑀓𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀅𑀢𑁆𑀣𑀼𑀤𑁆𑀥𑀸𑀭𑀸𑀤𑀺𑀯𑀲𑁂𑀦 𑀅𑀢𑁆𑀣𑀯𑀺𑀯𑁂𑀘𑀦𑀸 𑀓𑀢𑀸𑀢𑀺.

𑁧𑁮𑁩. 𑀬𑀣𑀸 𑀢𑁂 𑀭𑀼𑀘𑁆𑀘𑁂𑀬𑁆𑀬𑀸𑀢𑀺 𑀇𑀤𑀸𑀦𑀺 𑀫𑀬𑀸 𑀧𑀼𑀘𑁆𑀙𑀺𑀬𑀫𑀸𑀦𑁄 𑀅𑀢𑁆𑀣𑁄 𑀬𑀣𑀸 𑀢𑀯 𑀘𑀺𑀢𑁆𑀢𑁂 𑀭𑀼𑀘𑁆𑀘𑁂𑀬𑁆𑀬, 𑀢𑀬𑀸 𑀘𑀺𑀢𑁆𑀢𑁂 𑀭𑀼𑀘𑁆𑀘𑁂𑀣𑀸𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀢𑁆𑀣𑁂 𑀳𑁂𑀢𑀁 𑀓𑀺𑀭𑀺𑀬𑀸𑀧𑀤𑀁. 𑀫𑀬𑀸 𑀯𑀸 𑀤𑀸𑀦𑀺 𑀧𑀼𑀘𑁆𑀙𑀺𑀬𑀫𑀸𑀦𑀫𑀢𑁆𑀣𑀁 𑀢𑀯 𑀲𑀫𑁆𑀧𑀤𑀸𑀦𑀪𑀽𑀢𑀲𑁆𑀲 𑀭𑁄𑀘𑁂𑀬𑁆𑀬𑀸𑀢𑀺𑀧𑀺 𑀯𑀝𑁆𑀝𑀢𑀺. 𑀖𑀭𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀚𑀸𑀢𑁄 𑀅𑀦𑁆𑀢𑁄𑀚𑀸𑀢𑁄. 𑀥𑀦𑁂𑀦 𑀓𑀻𑀢𑁄 𑀥𑀦𑀓𑁆𑀓𑀻𑀢𑁄. 𑀩𑀦𑁆𑀥𑀕𑁆𑀕𑀸𑀳𑀕𑀳𑀺𑀢𑁄 𑀓𑀭𑀫𑀭𑀸𑀦𑀻𑀢𑁄. 𑀲𑀸𑀫𑀫𑁂𑀯 𑀬𑁂𑀦 𑀓𑁂𑀦𑀘𑀺 𑀳𑁂𑀢𑀼𑀦𑀸 𑀤𑀸𑀲𑀪𑀸𑀯𑀫𑀼𑀧𑀕𑀢𑁄 𑀲𑀸𑀫𑀁𑀤𑀸𑀲𑀩𑁆𑀬𑁄𑀧𑀕𑀢𑁄. 𑀲𑀸𑀫𑀦𑁆𑀢𑀺 𑀳𑀺 𑀲𑀬𑀫𑁂𑀯. 𑀤𑀸𑀲𑀩𑁆𑀬𑀦𑁆𑀢𑀺 𑀤𑀸𑀲𑀪𑀸𑀯𑀁. 𑀓𑁄𑀘𑀺 𑀤𑀸𑀲𑁄𑀧𑀺 𑀲𑀫𑀸𑀦𑁄 𑀅𑀮𑀲𑁄 𑀓𑀫𑁆𑀫𑀁 𑀅𑀓𑀭𑁄𑀦𑁆𑀢𑁄 ‘‘𑀓𑀫𑁆𑀫𑀓𑀸𑀭𑁄’’𑀢𑀺 𑀦 𑀯𑀼𑀘𑁆𑀘𑀢𑀺, 𑀲𑁄 𑀧𑀦 𑀦 𑀢𑀣𑀸𑀪𑀽𑀢𑁄𑀢𑀺 𑀯𑀺𑀲𑁂𑀲𑀦𑀫𑁂𑀢𑀦𑁆𑀢𑀺 𑀆𑀳 ‘‘𑀅𑀦𑀮𑀲𑁄’’𑀢𑀺𑀆𑀤𑀺. 𑀤𑀽𑀭𑀢𑁄𑀢𑀺 𑀤𑀽𑀭𑀤𑁂𑀲𑀢𑁄 𑀆𑀕𑀢𑀁. 𑀧𑀞𑀫𑀫𑁂𑀯𑀸𑀢𑀺 𑀅𑀢𑁆𑀢𑀦𑁄 𑀆𑀲𑀦𑁆𑀦𑀢𑀭𑀝𑁆𑀞𑀸𑀦𑀼𑀧𑀲𑀗𑁆𑀓𑀫𑀦𑀢𑁄 𑀧𑀕𑁂𑀯 𑀧𑀼𑀭𑁂𑀢𑀭𑀫𑁂𑀯. 𑀉𑀝𑁆𑀞𑀳𑀢𑀻𑀢𑀺 𑀕𑀸𑀭𑀯𑀯𑀲𑁂𑀦 𑀉𑀝𑁆𑀞𑀳𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀧𑀘𑁆𑀘𑀼𑀝𑁆𑀞𑀸𑀢𑀻𑀢𑀺 𑀯𑀸 𑀅𑀢𑁆𑀣𑁄. 𑀧𑀘𑁆𑀙𑀸𑀢𑀺 𑀲𑀸𑀫𑀺𑀓𑀲𑁆𑀲 𑀦𑀺𑀧𑀚𑁆𑀚𑀸𑀬 𑀧𑀘𑁆𑀙𑀸. 𑀲𑀬𑀦𑀢𑁄 𑀅𑀯𑀼𑀝𑁆𑀞𑀺𑀢𑁂𑀢𑀺 𑀭𑀢𑁆𑀢𑀺𑀬𑀸 𑀯𑀺𑀪𑀸𑀬𑀦𑀯𑁂𑀮𑀸𑀬 𑀲𑁂𑀬𑁆𑀬𑀢𑁄 𑀅𑀯𑀼𑀝𑁆𑀞𑀺𑀢𑁂. 𑀧𑀘𑁆𑀘𑀽𑀲𑀓𑀸𑀮𑀢𑁄𑀢𑀺 𑀅𑀢𑀻𑀢𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀓𑀸𑀮𑀢𑁄 ¶ . 𑀬𑀸𑀯 𑀲𑀸𑀫𑀺𑀦𑁄 𑀭𑀢𑁆𑀢𑀺𑀁 𑀦𑀺𑀤𑁆𑀤𑁄𑀓𑁆𑀓𑀫𑀦𑀦𑁆𑀢𑀺 𑀅𑀧𑀭𑀸𑀬 𑀪𑀸𑀯𑀺𑀦𑀺𑀬𑀸 𑀭𑀢𑁆𑀢𑀺𑀬𑀸 𑀧𑀤𑁄𑀲𑀯𑁂𑀮𑀸𑀬𑀁 𑀬𑀸𑀯 𑀦𑀺𑀤𑁆𑀤𑁄𑀓𑁆𑀓𑀫𑀦𑀁. 𑀬𑀸 𑀅𑀢𑀻𑀢𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀯𑁂𑀮𑀸, 𑀪𑀸𑀯𑀺𑀦𑀺𑀬𑀸 𑀘 𑀧𑀤𑁄𑀲𑀯𑁂𑀮𑀸, 𑀏𑀢𑁆𑀣𑀦𑁆𑀢𑀭𑁂 𑀲𑀩𑁆𑀩𑀓𑀺𑀘𑁆𑀘𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀦𑀺𑀧𑀢𑀢𑀻𑀢𑀺 𑀯𑀼𑀢𑁆𑀢𑀁 ¶ 𑀳𑁄𑀢𑀺. 𑀓𑀺𑀁 𑀓𑀸𑀭𑀫𑁂𑀯𑀸𑀢𑀺 𑀓𑀺𑀁 𑀓𑀭𑀡𑀻𑀬𑀫𑁂𑀯 𑀓𑀺𑀦𑁆𑀢𑀺 𑀧𑀼𑀘𑁆𑀙𑀸𑀬 𑀓𑀸𑀢𑀩𑁆𑀩𑀢𑁄, 𑀧𑀼𑀘𑁆𑀙𑀺𑀢𑁆𑀯𑀸 𑀓𑀸𑀢𑀩𑁆𑀩𑀯𑁂𑀬𑁆𑀬𑀸𑀯𑀘𑁆𑀘𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀲𑁆𑀲𑀯𑁂𑀦𑁂𑀯 𑀲𑀫𑀻𑀧𑀘𑀸𑀭𑀺𑀢𑀸 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀧𑀝𑀺𑀲𑀼𑀡𑀦𑁆𑀢𑁄 𑀯𑀺𑀘𑀭𑀢𑀻’’𑀢𑀺. 𑀧𑀝𑀺𑀓𑀼𑀤𑁆𑀥𑀁 𑀫𑀼𑀔𑀁 𑀑𑀮𑁄𑀓𑁂𑀢𑀼𑀁 𑀦 𑀯𑀺𑀲𑀳𑀢𑀻𑀢𑀺𑀧𑀺 𑀤𑀲𑁆𑀲𑁂𑀢𑀺 ‘‘𑀢𑀼𑀝𑁆𑀞𑀧𑀳𑀝𑁆𑀞’’𑀦𑁆𑀢𑀺 𑀇𑀫𑀺𑀦𑀸.

𑀤𑁂𑀯𑁄 𑀯𑀺𑀬𑀸𑀢𑀺 𑀆𑀥𑀺𑀧𑀘𑁆𑀘𑀧𑀭𑀺𑀯𑀸𑀭𑀸𑀤𑀺𑀲𑀫𑀦𑁆𑀦𑀸𑀕𑀢𑁄 𑀧𑀥𑀸𑀦𑀤𑁂𑀯𑁄 𑀯𑀺𑀬, 𑀢𑁂𑀦 𑀫𑀜𑁆𑀜𑁂-𑀲𑀤𑁆𑀤𑁄 𑀇𑀥 𑀉𑀧𑀫𑀢𑁆𑀣𑁄𑀢𑀺 𑀜𑀸𑀧𑁂𑀢𑀺 𑀬𑀣𑀸 ‘‘𑀅𑀓𑁆𑀔𑀸𑀳𑀢𑀁 𑀫𑀜𑁆𑀜𑁂 𑀅𑀝𑁆𑀞𑀸𑀲𑀺 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀅𑀦𑁆𑀢𑁂𑀧𑀼𑀭𑀁 𑀉𑀧𑀲𑁄𑀪𑀬𑀫𑀸𑀦’’𑀦𑁆𑀢𑀺 (𑀤𑀻. 𑀦𑀺. 𑁨.𑁨𑁪𑁫). 𑀲𑁄 𑀯𑀢𑀲𑁆𑀲𑀸𑀳𑀦𑁆𑀢𑀺 𑀏𑀢𑁆𑀣 𑀲𑁄 𑀯𑀢 𑀅𑀲𑁆𑀲𑀁 𑀅𑀳𑀦𑁆𑀢𑀺 𑀧𑀤𑀘𑁆𑀙𑁂𑀤𑁄, 𑀲𑁄 𑀭𑀸𑀚𑀸 𑀯𑀺𑀬 𑀅𑀳𑀫𑁆𑀧𑀺 𑀪𑀯𑁂𑀬𑁆𑀬𑀁. 𑀓𑁂𑀦𑀸𑀢𑀺 𑀘𑁂? 𑀬𑀤𑀺 𑀧𑀼𑀜𑁆𑀜𑀸𑀦𑀺 𑀓𑀭𑁂𑀬𑁆𑀬𑀁, 𑀢𑁂𑀦𑀸𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀲𑁄 𑀯𑀢 𑀅𑀳’’𑀦𑁆𑀢𑀺𑀆𑀤𑀺. 𑀯𑀢𑀲𑀤𑁆𑀤𑁄 𑀉𑀧𑀫𑀸𑀬𑀁. 𑀢𑁂𑀦𑀸𑀳 ‘‘𑀏𑀯𑀭𑀽𑀧𑁄’’𑀢𑀺. 𑀧𑀼𑀜𑁆𑀜𑀸𑀦𑀻𑀢𑀺 𑀉𑀴𑀸𑀭𑀢𑀭𑀁 𑀧𑀼𑀜𑁆𑀜𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀅𑀜𑁆𑀜𑀤𑀸 𑀓𑀢𑀧𑀼𑀜𑁆𑀜𑀢𑁄 𑀉𑀴𑀸𑀭𑀸𑀬 𑀧𑀩𑁆𑀩𑀚𑁆𑀚𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. ‘‘𑀲𑁄 𑀯𑀢𑀲𑁆𑀲𑀸𑀬’’𑀦𑁆𑀢𑀺𑀧𑀺 𑀧𑀸𑀞𑁂 𑀲𑁄 𑀭𑀸𑀚𑀸 𑀯𑀺𑀬 𑀅𑀬𑀁 𑀅𑀳𑀫𑁆𑀧𑀺 𑀅𑀲𑁆𑀲𑀁. 𑀓𑀣𑀁? ‘‘𑀬𑀤𑀺 𑀧𑀼𑀜𑁆𑀜𑀸𑀦𑀺 𑀓𑀭𑁂𑀬𑁆𑀬’’𑀦𑁆𑀢𑀺 𑀅𑀢𑁆𑀣𑀲𑀫𑁆𑀪𑀯𑀢𑁄 ‘‘𑀅𑀬𑀫𑁂𑀯𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀅𑀲𑁆𑀲𑀦𑁆𑀢𑀺 𑀳𑀺 𑀉𑀢𑁆𑀢𑀫𑀧𑀼𑀭𑀺𑀲𑀬𑁄𑀕𑁂 𑀅𑀳𑀁-𑀲𑀤𑁆𑀤𑁄 𑀅𑀧𑁆𑀧𑀬𑀼𑀢𑁆𑀢𑁄𑀧𑀺 𑀅𑀬𑀁-𑀲𑀤𑁆𑀤𑁂𑀦 𑀧𑀭𑀸𑀫𑀲𑀦𑀢𑁄 𑀧𑀬𑀼𑀢𑁆𑀢𑁄 𑀯𑀺𑀬 𑀳𑁄𑀢𑀺. 𑀲𑁄 𑀅𑀳𑀁 𑀏𑀯𑀭𑀽𑀧𑁄 𑀅𑀲𑁆𑀲𑀁 𑀯𑀢, 𑀬𑀤𑀺 𑀧𑀼𑀜𑁆𑀜𑀸𑀦𑀺 𑀓𑀭𑁂𑀬𑁆𑀬𑀦𑁆𑀢𑀺 𑀧𑀞𑀫𑀧𑀸𑀞𑀲𑁆𑀲 𑀅𑀢𑁆𑀣𑀫𑀺𑀘𑁆𑀙𑀦𑁆𑀢𑀺 𑀓𑁂𑀘𑀺. 𑀏𑀯𑀁 𑀲𑀢𑀺 𑀤𑀼𑀢𑀺𑀬𑀧𑀸𑀞𑁂 ‘‘𑀅𑀬𑀫𑁂𑀯𑀢𑁆𑀣𑁄’’𑀢𑀺 𑀅𑀯𑀢𑁆𑀢𑀩𑁆𑀩𑁄 𑀲𑀺𑀬𑀸 𑀢𑀢𑁆𑀣 𑀅𑀬𑀁-𑀲𑀤𑁆𑀤𑁂𑀦 𑀅𑀳𑀁-𑀲𑀤𑁆𑀤𑀲𑁆𑀲 𑀧𑀭𑀸𑀫𑀲𑀦𑀢𑁄, ‘‘𑀲𑁄’’𑀢𑀺 𑀘 𑀧𑀭𑀸𑀫𑀲𑀺𑀢𑀩𑁆𑀩𑀲𑁆𑀲 𑀅𑀜𑁆𑀜𑀲𑁆𑀲 𑀲𑀫𑁆𑀪𑀯𑀢𑁄. 𑀬𑀦𑁆𑀢𑀺 𑀤𑀸𑀦𑀁. 𑀲𑀢𑀪𑀸𑀕𑀫𑁆𑀧𑀻𑀢𑀺 𑀲𑀢𑀪𑀽𑀢𑀁 𑀪𑀸𑀕𑀫𑁆𑀧𑀺, 𑀭𑀜𑁆𑀜𑀸 𑀤𑀺𑀦𑁆𑀦𑀤𑀸𑀦𑀁 𑀲𑀢𑀥𑀸 𑀓𑀢𑁆𑀯𑀸 𑀢𑀢𑁆𑀣 𑀏𑀓𑀪𑀸𑀕𑀫𑁆𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀸𑀯𑀚𑀻𑀯𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺 𑀤𑀸𑀢𑀼𑀦𑁆𑀢𑀺 𑀬𑀸𑀯𑀚𑀻𑀯𑀁 𑀤𑀸𑀦𑀢𑁆𑀣𑀸𑀬 𑀉𑀲𑁆𑀲𑀸𑀳𑀁 𑀓𑀭𑁄𑀦𑁆𑀢𑁄𑀧𑀺 𑀲𑀢𑀪𑀸𑀕𑀫𑀢𑁆𑀢𑀫𑁆𑀧𑀺 𑀤𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀢𑀲𑁆𑀫𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻𑀢𑀺 𑀧𑀩𑁆𑀩𑀚𑁆𑀚𑀸𑀬𑀁 𑀉𑀲𑁆𑀲𑀸𑀳𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀬𑀁𑀦𑀽𑀦𑀸’’𑀢𑀺 𑀦𑀺𑀧𑀸𑀢𑁄 𑀧𑀭𑀺𑀯𑀺𑀢𑀓𑁆𑀓𑀦𑀢𑁆𑀣𑁂𑀢𑀺 𑀯𑀼𑀢𑁆𑀢𑀁 ‘‘𑀏𑀯𑀁 𑀘𑀺𑀦𑁆𑀢𑀦𑀪𑀸𑀯’’𑀦𑁆𑀢𑀺.

𑀓𑀸𑀬𑁂𑀦 𑀧𑀺𑀳𑀺𑀢𑁄𑀢𑀺 𑀓𑀸𑀬𑁂𑀦 𑀲𑀁𑀯𑀭𑀺𑀢𑀩𑁆𑀩𑀲𑁆𑀲 𑀓𑀸𑀬𑀤𑁆𑀯𑀸𑀭𑁂𑀦 𑀧𑀯𑀢𑁆𑀢𑀦𑀓𑀲𑁆𑀲 𑀧𑀸𑀧𑀥𑀫𑁆𑀫𑀲𑁆𑀲 𑀲𑀁𑀯𑀭𑀡𑀯𑀲𑁂𑀦 𑀧𑀺𑀤𑀳𑀺𑀢𑁄. 𑀉𑀲𑁆𑀲𑀼𑀓𑁆𑀓𑀯𑀘𑀦𑀯𑀲𑁂𑀦 𑀧𑀦𑀢𑁆𑀣𑁄 𑀯𑀺𑀳𑀭𑁂𑀬𑁆𑀬-𑀧𑀤𑁂𑀦 𑀲𑀫𑁆𑀩𑀚𑁆𑀛𑀺𑀢𑀩𑁆𑀩𑀢𑁆𑀢𑀸𑀢𑀺 𑀆𑀳 ‘‘𑀅𑀓𑀼𑀲𑀮𑀧𑀯𑁂𑀲𑀦𑀤𑁆𑀯𑀸𑀭𑀁 𑀣𑀓𑁂𑀢𑁆𑀯𑀸’’𑀢𑀺. 𑀳𑀼𑀢𑁆𑀯𑀸𑀢𑀺 𑀳𑀺 𑀲𑁂𑀲𑁄. 𑀅𑀓𑀼𑀲𑀮𑀧𑀯𑁂𑀲𑀦𑀤𑁆𑀯𑀸𑀭𑀦𑁆𑀢𑀺 𑀘 𑀓𑀸𑀬𑀓𑀫𑁆𑀫𑀪𑀽𑀢𑀸𑀦𑀫𑀓𑀼𑀲𑀮𑀸𑀦𑀁 𑀧𑀯𑁂𑀲𑀦𑀪𑀽𑀢𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀁 𑀤𑁆𑀯𑀸𑀭𑀁. 𑀲𑁂𑀲𑀧𑀤𑀤𑁆𑀯𑀬𑁂𑀧𑀻𑀢𑀺 ¶ ‘‘𑀯𑀸𑀘𑀸𑀬 𑀲𑀁𑀯𑀼𑀢𑁄, 𑀫𑀦𑀲𑀸 𑀲𑀁𑀯𑀼𑀢𑁄’’𑀢𑀺 𑀧𑀤𑀤𑁆𑀯𑀬𑁂𑀧𑀺. 𑀖𑀸𑀲𑀘𑁆𑀙𑀸𑀤𑀦𑁂𑀦 𑀧𑀭𑀫𑀢𑀸𑀬𑀸𑀢𑀺 𑀖𑀸𑀲𑀘𑁆𑀙𑀸𑀤𑀦𑀧𑀭𑀺𑀬𑁂𑀲𑀦𑁂 𑀲𑀮𑁆𑀮𑁂𑀔𑀯𑀲𑁂𑀦 𑀧𑀭𑀫𑀢𑀸𑀬, 𑀉𑀓𑁆𑀓𑀝𑁆𑀞𑀪𑀸𑀯𑁂 𑀯𑀸 𑀲𑀡𑁆𑀞𑀺𑀢𑁄 𑀖𑀸𑀲𑀘𑁆𑀙𑀸𑀤𑀦𑀫𑀢𑁆𑀢𑀫𑁂𑀯 𑀧𑀭𑀫𑀁 𑀧𑀫𑀸𑀡𑀁 𑀓𑁄𑀝𑀺 𑀏𑀢𑀲𑁆𑀲 ¶ , 𑀦 𑀢𑀢𑁄 𑀧𑀭𑀁 𑀓𑀺𑀜𑁆𑀘𑀺 𑀆𑀫𑀺𑀲𑀚𑀸𑀢𑀁 𑀧𑀭𑀺𑀬𑁂𑀲𑀢𑀺, 𑀧𑀘𑁆𑀘𑀸𑀲𑀺𑀲𑀢𑀺 𑀘𑀸𑀢𑀺 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑁄, 𑀢𑀲𑁆𑀲 𑀪𑀸𑀯𑁄 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑀢𑀸𑀢𑀺𑀧𑀺 𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑁄 𑀦𑀬𑁄. 𑀖𑀲𑀺𑀢𑀩𑁆𑀩𑁄 𑀅𑀲𑀺𑀢𑀩𑁆𑀩𑁄𑀢𑀺 𑀖𑀸𑀲𑁄, 𑀆𑀳𑀸𑀭𑁄, 𑀆𑀪𑀼𑀲𑁄 𑀙𑀸𑀤𑁂𑀢𑀺 𑀧𑀭𑀺𑀤𑀳𑀢𑀺 𑀏𑀢𑁂𑀦𑀸𑀢𑀺 𑀅𑀘𑁆𑀙𑀸𑀤𑀦𑀁, 𑀦𑀺𑀯𑀸𑀲𑀦𑀁, 𑀅𑀧𑀺𑀘 𑀖𑀲𑀦𑀁 𑀖𑀸𑀲𑁄, 𑀆𑀪𑀼𑀲𑁄 𑀙𑀸𑀤𑀻𑀬𑀢𑁂 𑀅𑀘𑁆𑀙𑀸𑀤𑀦𑀦𑁆𑀢𑀺𑀧𑀺 𑀬𑀼𑀚𑁆𑀚𑀢𑀺. 𑀏𑀢𑀤𑀢𑁆𑀣𑀫𑁆𑀧𑀻𑀢𑀺 𑀖𑀸𑀲𑀘𑁆𑀙𑀸𑀤𑀦𑀢𑁆𑀣𑀸𑀬𑀸𑀧𑀺. 𑀅𑀦𑁂𑀲𑀦𑀦𑁆𑀢𑀺 𑀏𑀓𑀯𑀻𑀲𑀢𑀺𑀯𑀺𑀥𑀫𑁆𑀧𑀺 𑀅𑀦𑀦𑀼𑀭𑀽𑀧𑀫𑁂𑀲𑀦𑀁.

𑀯𑀺𑀯𑁂𑀓𑀝𑁆𑀞𑀓𑀸𑀬𑀸𑀦𑀦𑁆𑀢𑀺 𑀕𑀡𑀲𑀗𑁆𑀕𑀡𑀺𑀓𑀢𑁄 𑀧𑀯𑀺𑀯𑀺𑀢𑁆𑀢𑁂 𑀞𑀺𑀢𑀓𑀸𑀬𑀸𑀦𑀁, 𑀲𑀫𑁆𑀩𑀦𑁆𑀥𑀻𑀪𑀽𑀢𑀸𑀦𑀁 𑀓𑀸𑀬𑀯𑀺𑀯𑁂𑀓𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀸𑀦𑀦𑁆𑀢𑀺 𑀛𑀸𑀦𑀸𑀪𑀺𑀭𑀢𑀸𑀦𑀁. 𑀧𑀭𑀫𑀯𑁄𑀤𑀸𑀦𑀧𑁆𑀧𑀢𑁆𑀢𑀸𑀦𑀦𑁆𑀢𑀺 𑀢𑀸𑀬 𑀏𑀯 𑀛𑀸𑀦𑀸𑀪𑀺𑀭𑀢𑀺𑀬𑀸 𑀧𑀭𑀫𑀁 𑀉𑀢𑁆𑀢𑀫𑀁 𑀯𑁄𑀤𑀸𑀦𑀁 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀁 𑀧𑀢𑁆𑀢𑀸𑀦𑀁. 𑀦𑀺𑀭𑀼𑀧𑀥𑀻𑀦𑀦𑁆𑀢𑀺 𑀓𑀺𑀮𑁂𑀲𑀽𑀧𑀥𑀺𑀅𑀪𑀺𑀲𑀗𑁆𑀔𑀸𑀭𑀽𑀧𑀥𑀻𑀳𑀺 𑀅𑀘𑁆𑀘𑀦𑁆𑀢𑀯𑀺𑀕𑀢𑀸𑀦𑀁. 𑀯𑀺𑀲𑀗𑁆𑀔𑀸𑀭𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁, 𑀢𑀤𑀥𑀺𑀕𑀫𑀦𑁂𑀢𑀸 𑀯𑀺𑀲𑀗𑁆𑀔𑀸𑀭𑀕𑀢𑀸, 𑀅𑀭𑀳𑀦𑁆𑀢𑁄, 𑀢𑁂𑀲𑀁. ‘‘𑀏𑀯𑀁 𑀯𑀼𑀢𑁆𑀢𑁂’’𑀢𑀺 𑀇𑀫𑀺𑀦𑀸 𑀫𑀳𑀸𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁭, 𑁯) 𑀆𑀕𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀘 𑀧𑀞𑀫𑁄 𑀯𑀺𑀯𑁂𑀓𑁄 𑀇𑀢𑀭𑁂𑀳𑀺 𑀤𑁆𑀯𑀻𑀳𑀺 𑀯𑀺𑀯𑁂𑀓𑁂𑀳𑀺 𑀲𑀳𑀸𑀧𑀺 𑀯𑀢𑁆𑀢𑀩𑁆𑀩𑁄 𑀇𑀢𑀭𑁂𑀲𑀼 𑀲𑀺𑀤𑁆𑀥𑁂𑀲𑀼 𑀢𑀲𑁆𑀲𑀸𑀧𑀺 𑀲𑀺𑀚𑁆𑀛𑀦𑀢𑁄, 𑀯𑀺𑀦𑀸 𑀘 𑀢𑀲𑁆𑀫𑀺𑀁 𑀲𑀺𑀤𑁆𑀥𑁂𑀧𑀺 𑀇𑀢𑀭𑁂 𑀲𑀫𑀲𑀺𑀚𑁆𑀛𑀦𑀢𑁄. 𑀢𑀣𑀸 𑀤𑀼𑀢𑀺𑀬𑁄𑀧𑀺. 𑀢𑀢𑀺𑀬𑁄 𑀧𑀦 𑀇𑀢𑀭𑁂𑀳𑀺 𑀲𑀳𑁂𑀯 𑀯𑀢𑁆𑀢𑀩𑁆𑀩𑁄. 𑀦 𑀯𑀺𑀦𑀸 𑀇𑀢𑀭𑁂𑀲𑀼 𑀲𑀺𑀤𑁆𑀥𑁂𑀲𑀼𑀬𑁂𑀯 𑀢𑀲𑁆𑀲 𑀲𑀺𑀚𑁆𑀛𑀦𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀕𑀡𑀲𑀗𑁆𑀕𑀡𑀺𑀓𑀁 𑀧𑀳𑀸𑀬𑀸’’𑀢𑀺𑀆𑀤𑀺 𑀢𑀤𑀥𑀺𑀧𑁆𑀧𑀸𑀬𑀯𑀺𑀪𑀸𑀯𑀦𑀁. 𑀢𑀢𑁆𑀣 𑀕𑀡𑁂 𑀚𑀦𑀲𑀫𑀸𑀕𑀫𑁂 𑀲𑀦𑁆𑀦𑀺𑀧𑀢𑀦𑀁 𑀕𑀡𑀲𑀗𑁆𑀕𑀡𑀺𑀓𑀸, 𑀢𑀁 𑀧𑀳𑀸𑀬. 𑀓𑀸𑀬𑁂𑀦 𑀏𑀓𑁄 𑀯𑀺𑀳𑀭𑀢𑀺 𑀯𑀺𑀘𑀭𑀢𑀺 𑀧𑀼𑀕𑁆𑀕𑀮𑀯𑀲𑁂𑀦 𑀅𑀲𑀳𑀸𑀬𑀢𑁆𑀢𑀸. 𑀘𑀺𑀢𑁆𑀢𑁂 𑀓𑀺𑀮𑁂𑀲𑀸𑀦𑀁 𑀲𑀦𑁆𑀦𑀺𑀧𑀢𑀦𑀁 𑀘𑀺𑀢𑁆𑀢𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀸, 𑀢𑀁 𑀧𑀳𑀸𑀬. 𑀏𑀓𑁄 𑀯𑀺𑀳𑀭𑀢𑀺 𑀓𑀺𑀮𑁂𑀲𑀯𑀲𑁂𑀦 𑀅𑀲𑀳𑀸𑀬𑀢𑁆𑀢𑀸. 𑀫𑀕𑁆𑀕𑀲𑁆𑀲 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑁆𑀢𑀸, 𑀕𑁄𑀢𑁆𑀭𑀪𑀼𑀆𑀤𑀻𑀦𑀜𑁆𑀘 𑀆𑀭𑀫𑁆𑀫𑀡𑀓𑀭𑀡𑀫𑀢𑁆𑀢𑀢𑁆𑀢𑀸 𑀦 𑀢𑁂𑀲𑀁 𑀯𑀲𑁂𑀦 𑀲𑀸𑀢𑀺𑀲𑀬𑀸 𑀦𑀺𑀩𑁆𑀩𑀼𑀢𑀺𑀲𑀼𑀔𑀲𑀫𑁆𑀨𑀼𑀲𑀦𑀸, 𑀨𑀮𑀲𑀫𑀸𑀧𑀢𑁆𑀢𑀺𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀧𑀦 𑀲𑀸𑀢𑀺𑀲𑀬𑀸𑀢𑀺 𑀆𑀳 ‘‘𑀨𑀮𑀲𑀫𑀸𑀧𑀢𑁆𑀢𑀺𑀁 𑀯𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀯𑀸’’𑀢𑀺. 𑀨𑀮𑀧𑀭𑀺𑀬𑁄𑀲𑀸𑀦𑁄 𑀳𑀺 𑀦𑀺𑀭𑁄𑀥𑁄. 𑀧𑀯𑀺𑀲𑀺𑀢𑁆𑀯𑀸𑀢𑀺 𑀲𑀫𑀸𑀧𑀚𑁆𑀚𑀦𑀯𑀲𑁂𑀦 𑀅𑀦𑁆𑀢𑁄𑀓𑀢𑁆𑀯𑀸. 𑀦𑀺𑀩𑁆𑀩𑀸𑀦𑀁 𑀧𑀢𑁆𑀯𑀸𑀢𑀺 𑀏𑀢𑁆𑀣 𑀉𑀲𑁆𑀲𑀼𑀓𑁆𑀓𑀯𑀘𑀦𑀫𑁂𑀢𑀁 𑀆𑀭𑀫𑁆𑀫𑀡𑀓𑀭𑀡𑁂𑀦, 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀦𑀺𑀭𑁄𑀥𑁂𑀦 𑀘 ¶ 𑀦𑀺𑀩𑁆𑀩𑀼𑀢𑀺𑀧𑀚𑁆𑀚𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀘𑁄𑀤𑀦𑀢𑁆𑀣𑁂𑀢𑀺 𑀚𑀸𑀦𑀸𑀧𑁂𑀢𑀼𑀁 𑀉𑀲𑁆𑀲𑀸𑀳𑀓𑀭𑀡𑀢𑁆𑀣𑁂.

𑁧𑁮𑁪. 𑀅𑀪𑀺𑀳𑀭𑀺𑀢𑁆𑀯𑀸𑀢𑀺 𑀅𑀪𑀺𑀫𑀼𑀔𑀪𑀸𑀯𑁂𑀦 𑀦𑁂𑀢𑁆𑀯𑀸. 𑀦𑀦𑁆𑀢𑀺 𑀢𑀣𑀸 𑀧𑀩𑁆𑀩𑀚𑁆𑀚𑀸𑀬 𑀯𑀺𑀳𑀭𑀦𑁆𑀢𑀁. 𑀅𑀪𑀺𑀳𑀸𑀭𑁄𑀢𑀺 𑀦𑀺𑀫𑀦𑁆𑀢𑀦𑀯𑀲𑁂𑀦 𑀅𑀪𑀺𑀳𑀭𑀡𑀁. ‘‘𑀘𑀻𑀯𑀭𑀸𑀤𑀻𑀳𑀺 𑀧𑀬𑁄𑀚𑀦𑀁 𑀲𑀸𑀥𑁂𑀲𑁆𑀲𑀸𑀫𑀻’’𑀢𑀺 𑀯𑀘𑀦𑀲𑁂𑀲𑁂𑀦 𑀬𑁄𑀚𑀦𑀸. 𑀢𑀣𑀸 ‘‘𑀬𑁂𑀦𑀢𑁆𑀣𑁄, 𑀢𑀁 𑀯𑀤𑁂𑀬𑁆𑀬𑀸𑀣𑀸’’𑀢𑀺. 𑀘𑀻𑀯𑀭𑀸𑀤𑀺𑀯𑁂𑀓𑀮𑁆𑀮𑀦𑁆𑀢𑀺 𑀘𑀻𑀯𑀭𑀸𑀤𑀻𑀦𑀁 𑀮𑀽𑀔𑀢𑀸𑀬 𑀯𑀺𑀓𑀮𑀪𑀸𑀯𑀁. 𑀢𑀤𑀼𑀪𑀬𑀫𑁆𑀧𑀻𑀢𑀺 𑀢𑀤𑁂𑀯 𑀅𑀪𑀺𑀳𑀸𑀭𑀤𑁆𑀯𑀬𑀫𑁆𑀧𑀺. 𑀲𑀧𑁆𑀧𑀸𑀬𑀦𑁆𑀢𑀺 𑀲𑀩𑁆𑀩𑀕𑁂𑀮𑀜𑁆𑀜𑀸𑀧𑀳𑀭𑀡𑀯𑀲𑁂𑀦 𑀉𑀧𑀓𑀸𑀭𑀸𑀯𑀳𑀁. 𑀪𑀸𑀯𑀺𑀦𑁄 𑀅𑀦𑀢𑁆𑀣𑀲𑁆𑀲 𑀅𑀚𑀦𑀦𑀯𑀲𑁂𑀦 𑀧𑀭𑀺𑀧𑀸𑀮𑀦𑀁 𑀭𑀓𑁆𑀔𑀸𑀕𑀼𑀢𑁆𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀧𑀦 𑀅𑀦𑀢𑁆𑀣𑀲𑁆𑀲 ¶ 𑀦𑀺𑀲𑁂𑀥𑀯𑀲𑁂𑀦 𑀧𑀭𑀺𑀧𑀸𑀮𑀦𑀁 𑀆𑀯𑀭𑀡𑀕𑀼𑀢𑁆𑀢𑀺. 𑀓𑀺𑀫𑀢𑁆𑀣𑀺𑀬𑀁 ‘‘𑀥𑀫𑁆𑀫𑀺𑀓’𑀦𑁆𑀢𑀺 𑀯𑀺𑀲𑁂𑀲𑀦𑀦𑁆𑀢𑀺 𑀆𑀳 ‘‘𑀲𑀸 𑀧𑀦𑁂𑀲𑀸’’𑀢𑀺𑀆𑀤𑀺. 𑀯𑀺𑀳𑀸𑀭𑀲𑀻𑀫𑀸𑀬𑀸𑀢𑀺 𑀉𑀧𑀘𑀸𑀭𑀲𑀻𑀫𑀸𑀬, 𑀮𑀸𑀪𑀲𑀻𑀫𑀸𑀬 𑀯𑀸.

𑁧𑁮𑁫. 𑀓𑁂𑀯𑀮𑁄 𑀬𑀤𑀺-𑀏𑀯𑀁-𑀲𑀤𑁆𑀤𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀢𑁆𑀣𑀸𑀧𑁂𑀓𑁆𑀔𑀓𑁄𑀢𑀺 𑀯𑀼𑀢𑁆𑀢𑀁 ‘‘𑀬𑀤𑀺 𑀢𑀯 𑀤𑀸𑀲𑁄’’𑀢𑀺𑀆𑀤𑀺. 𑀏𑀯𑀁 𑀲𑀦𑁆𑀢𑁂𑀢𑀺 𑀏𑀯𑀁 𑀮𑀩𑁆𑀪𑀫𑀸𑀦𑁂 𑀲𑀢𑀺. 𑀤𑀼𑀢𑀺𑀬𑀁 𑀉𑀧𑀸𑀤𑀸𑀬 𑀧𑀞𑀫𑀪𑀸𑀯𑁄, 𑀢𑀲𑁆𑀫𑀸 ‘‘𑀧𑀞𑀫’’𑀦𑁆𑀢𑀺 𑀪𑀡𑀦𑁆𑀢𑁄 𑀅𑀜𑁆𑀜𑀲𑁆𑀲𑀸𑀧𑀺 𑀅𑀢𑁆𑀣𑀺𑀢𑀁 𑀤𑀻𑀧𑁂𑀢𑀺. 𑀢𑀤𑁂𑀯 𑀘 𑀓𑀸𑀭𑀡𑀁 𑀓𑀢𑁆𑀯𑀸 𑀭𑀸𑀚𑀸𑀧𑀺 𑀏𑀯𑀫𑀸𑀳𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀞𑀫𑀦𑁆𑀢𑀺 𑀪𑀡𑀦𑁆𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀢𑀺 𑀧𑀞𑀫𑀲𑀤𑁆𑀤𑁂𑀦 𑀅𑀜𑁆𑀜𑀲𑁆𑀲𑀸𑀧𑀺 𑀅𑀢𑁆𑀣𑀺𑀢𑀸𑀤𑀻𑀧𑀦𑁂𑀦𑁂𑀯.

𑀤𑀼𑀢𑀺𑀬𑀲𑀦𑁆𑀤𑀺𑀝𑁆𑀞𑀺𑀓𑀲𑀸𑀫𑀜𑁆𑀜𑀨𑀮𑀯𑀡𑁆𑀡𑀦𑀸

𑁧𑁮𑁬. 𑀓𑀲𑀢𑀻𑀢𑀺 𑀯𑀺𑀮𑁂𑀔𑀢𑀺 𑀓𑀲𑀺𑀁 𑀓𑀭𑁄𑀢𑀺. 𑀕𑀳𑀧𑀢𑀺𑀓𑁄𑀢𑀺 𑀏𑀢𑁆𑀣 𑀓-𑀲𑀤𑁆𑀤𑁄 𑀅𑀧𑁆𑀧𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 ‘‘𑀏𑀓𑀕𑁂𑀳𑀫𑀢𑁆𑀢𑁂 𑀚𑁂𑀝𑁆𑀞𑀓𑁄’’𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀕𑀳𑀲𑁆𑀲 𑀧𑀢𑀺 𑀕𑀳𑀧𑀢𑀺, 𑀔𑀼𑀤𑁆𑀤𑀓𑁄 𑀕𑀳𑀧𑀢𑀺 𑀕𑀳𑀧𑀢𑀺𑀓𑁄 𑀏𑀓𑀲𑁆𑀫𑀺𑀜𑁆𑀜𑁂𑀯 𑀕𑁂𑀳𑀫𑀢𑁆𑀢𑁂 𑀚𑁂𑀝𑁆𑀞𑀓𑀢𑁆𑀢𑀸𑀢𑀺, 𑀔𑀼𑀤𑁆𑀤𑀓𑀪𑀸𑀯𑁄 𑀧𑀦𑀲𑁆𑀲 𑀕𑁂𑀳𑀯𑀲𑁂𑀦𑁂𑀯𑀸𑀢𑀺 𑀓𑀢𑁆𑀯𑀸 ‘‘𑀏𑀓𑀕𑁂𑀳𑀫𑀢𑁆𑀢𑁂’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀳𑀺 𑀅𑀦𑁂𑀓𑀓𑀼𑀮𑀚𑁂𑀝𑁆𑀞𑀓𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀕𑀳𑀁, 𑀕𑁂𑀳𑀦𑁆𑀢𑀺 𑀘 𑀅𑀢𑁆𑀣𑀢𑁄 𑀲𑀫𑀸𑀦𑀫𑁂𑀯. 𑀓𑀭𑀲𑀤𑁆𑀤𑁄 𑀩𑀮𑀺𑀫𑁆𑀳𑀻𑀢𑀺 𑀯𑀼𑀢𑁆𑀢𑀁 ‘‘𑀩𑀮𑀺𑀲𑀗𑁆𑀔𑀸𑀢’’𑀦𑁆𑀢𑀺. 𑀓𑀭𑁄𑀢𑀻𑀢𑀺 𑀅𑀪𑀺𑀦𑀺𑀧𑁆𑀨𑀸𑀤𑁂𑀢𑀺 𑀲𑀫𑁆𑀧𑀸𑀤𑁂𑀢𑀺. 𑀯𑀟𑁆𑀠𑁂𑀢𑀻𑀢𑀺 𑀉𑀧𑀭𑀽𑀧𑀭𑀺 𑀉𑀧𑁆𑀧𑀸𑀤𑀦𑁂𑀦 𑀫𑀳𑀦𑁆𑀢𑀁 𑀲𑀦𑁆𑀦𑀺𑀘𑀬𑀁 𑀓𑀭𑁄𑀢𑀺.

𑀓𑀲𑁆𑀫𑀸 𑀢𑀤𑀼𑀪𑀬𑀫𑁆𑀧𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀣𑀸 𑀳𑀻’’𑀢𑀺𑀆𑀤𑀺. 𑀅𑀧𑁆𑀧𑀫𑁆𑀧𑀺 𑀧𑀳𑀸𑀬 𑀧𑀩𑁆𑀩𑀚𑀺𑀢𑀼𑀁 𑀤𑀼𑀓𑁆𑀓𑀭𑀦𑁆𑀢𑀺 𑀤𑀲𑁆𑀲𑀦𑀜𑁆𑀘 𑀧𑀕𑁂𑀯 𑀫𑀳𑀦𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀧𑀦𑀢𑁆𑀣𑀁. 𑀏𑀲𑀸 𑀳𑀺 𑀓𑀣𑀺𑀓𑀸𑀦𑀁 ¶ 𑀧𑀓𑀢𑀺, 𑀬𑀤𑀺𑀤𑀁 𑀬𑁂𑀦 𑀓𑁂𑀦𑀘𑀺 𑀧𑀓𑀸𑀭𑁂𑀦 𑀅𑀢𑁆𑀣𑀦𑁆𑀢𑀭𑀯𑀺𑀜𑁆𑀜𑀸𑀧𑀦𑀦𑁆𑀢𑀺. 𑀅𑀧𑁆𑀧𑀫𑁆𑀧𑀺 𑀧𑀳𑀸𑀬 𑀧𑀩𑁆𑀩𑀚𑀺𑀢𑀼𑀁 𑀤𑀼𑀓𑁆𑀓𑀭𑀪𑀸𑀯𑁄 𑀧𑀦 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑀓𑁂 𑀮𑀝𑀼𑀓𑀺𑀓𑁄𑀧𑀫𑀲𑀼𑀢𑁆𑀢𑁂𑀦 (𑀫. 𑀦𑀺. 𑁨.𑁧𑁪𑁮 𑀆𑀤𑀬𑁄) 𑀤𑀻𑀧𑁂𑀢𑀩𑁆𑀩𑁄. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘‘𑀲𑁂𑀬𑁆𑀬𑀣𑀸𑀧𑀺 𑀉𑀤𑀸𑀬𑀺 𑀧𑀼𑀭𑀺𑀲𑁄 𑀤𑀮𑀺𑀤𑁆𑀤𑁄 𑀅𑀲𑁆𑀲𑀓𑁄 𑀅𑀦𑀸𑀴𑁆𑀳𑀺𑀬𑁄, 𑀢𑀲𑁆𑀲’𑀲𑁆𑀲 𑀏𑀓𑀁 𑀅𑀕𑀸𑀭𑀓𑀁 𑀑𑀮𑀼𑀕𑁆𑀕𑀯𑀺𑀮𑀼𑀕𑁆𑀕𑀁 𑀓𑀸𑀓𑀸𑀢𑀺𑀤𑀸𑀬𑀺𑀁 𑀦𑀧𑀭𑀫𑀭𑀽𑀧𑀁, 𑀏𑀓𑀸 𑀔𑀝𑁄𑀧𑀺𑀓𑀸 𑀑𑀮𑀼𑀕𑁆𑀕𑀯𑀺𑀮𑀼𑀕𑁆𑀕𑀸 𑀦𑀧𑀭𑀫𑀭𑀽𑀧𑀸’’𑀢𑀺 𑀯𑀺𑀢𑁆𑀣𑀸𑀭𑁄. 𑀬𑀤𑀺 𑀅𑀧𑁆𑀧𑀫𑁆𑀧𑀺 𑀪𑁄𑀕𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑀼𑀁 𑀤𑀼𑀓𑁆𑀓𑀭𑀁, 𑀓𑀲𑁆𑀫𑀸 𑀤𑀸𑀲𑀯𑀸𑀭𑁂𑀧𑀺 𑀪𑁄𑀕𑀕𑁆𑀕𑀳𑀡𑀁 𑀦 𑀓𑀢𑀦𑁆𑀢𑀺 𑀆𑀳 ‘‘𑀤𑀸𑀲𑀯𑀸𑀭𑁂 𑀧𑀦𑀸’’𑀢𑀺𑀆𑀤𑀺. 𑀅𑀢𑁆𑀢𑀦𑁄𑀧𑀺 𑀅𑀦𑀺𑀲𑁆𑀲𑀭𑁄𑀢𑀺 𑀅𑀢𑁆𑀢𑀸𑀦𑀫𑁆𑀧𑀺 𑀲𑀬𑀫𑀦𑀺𑀲𑁆𑀲𑀭𑁄. 𑀬𑀣𑀸 𑀘 𑀤𑀸𑀲𑀲𑁆𑀲 𑀪𑁄𑀕𑀸𑀧𑀺 𑀅𑀪𑁄𑀕𑀸𑀬𑁂𑀯 𑀧𑀭𑀸𑀬𑀢𑁆𑀢𑀪𑀸𑀯𑀢𑁄, 𑀏𑀯𑀁 𑀜𑀸𑀢𑀬𑁄𑀧𑀻𑀢𑀺 𑀤𑀸𑀲𑀯𑀸𑀭𑁂 𑀜𑀸𑀢𑀺𑀧𑀭𑀺𑀯𑀝𑁆𑀝𑀕𑁆𑀕𑀳𑀡𑀫𑁆𑀧𑀺 𑀦 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀭𑀺𑀯𑀝𑁆𑀝𑀢𑀺 𑀧𑀭𑀫𑁆𑀧𑀭𑀪𑀸𑀯𑁂𑀦 𑀲𑀫𑀦𑁆𑀢𑀢𑁄 𑀆𑀯𑀝𑁆𑀝𑀢𑀻𑀢𑀺 𑀧𑀭𑀺𑀯𑀝𑁆𑀝𑁄, 𑀜𑀸𑀢𑀺𑀬𑁂𑀯. 𑀢𑁂𑀦𑀸𑀳 ‘‘𑀜𑀸𑀢𑀺𑀬𑁂𑀯 𑀜𑀸𑀢𑀺𑀧𑀭𑀺𑀯𑀝𑁆𑀝𑁄’’𑀢𑀺.

𑀧𑀡𑀻𑀢𑀢𑀭𑀲𑀸𑀫𑀜𑁆𑀜𑀨𑀮𑀯𑀡𑁆𑀡𑀦𑀸

𑁧𑁮𑁯. 𑀢𑀦𑁆𑀢𑀺 ¶ 𑀬𑀣𑀸 𑀤𑀸𑀲𑀯𑀸𑀭𑁂 ‘‘𑀏𑀯𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁, 𑀦 𑀢𑀣𑀸 𑀇𑀥 𑀓𑀲𑁆𑀲𑀓𑀯𑀸𑀭𑁂, 𑀢𑀤𑀯𑀘𑀦𑀁 𑀓𑀲𑁆𑀫𑀸𑀢𑀺 𑀅𑀦𑀼𑀬𑀼𑀜𑁆𑀚𑁂𑀬𑁆𑀬 𑀘𑁂𑀢𑀺 𑀅𑀢𑁆𑀣𑁄. 𑀏𑀯𑀫𑁂𑀯𑀸𑀢𑀺 𑀯𑀼𑀘𑁆𑀘𑀫𑀸𑀦𑁂𑀢𑀺 𑀬𑀣𑀸 𑀧𑀞𑀫𑀤𑀼𑀢𑀺𑀬𑀸𑀦𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀺, 𑀢𑀣𑀸𑀬𑁂𑀯 𑀧𑀜𑁆𑀜𑀧𑁂𑀢𑀼𑀁 𑀲𑀓𑁆𑀓𑀸 𑀦𑀼 𑀔𑁄𑀢𑀺 𑀯𑀼𑀢𑁆𑀢𑁂. 𑀏𑀯𑀭𑀽𑀧𑀸𑀳𑀻𑀢𑀺 𑀬𑀣𑀸𑀯𑀼𑀢𑁆𑀢𑀤𑀸𑀲𑀓𑀲𑁆𑀲𑀓𑀽𑀧𑀫𑀸𑀲𑀤𑀺𑀲𑀸𑀳𑀺 𑀉𑀧𑀫𑀸𑀳𑀺. 𑀲𑀸𑀫𑀜𑁆𑀜𑀨𑀮𑀁 𑀤𑀻𑀧𑁂𑀢𑀼𑀁 𑀧𑀳𑁄𑀢𑀺 𑀅𑀦𑀦𑁆𑀢𑀧𑀝𑀺𑀪𑀸𑀦𑀢𑀸𑀬 𑀯𑀺𑀘𑀺𑀢𑁆𑀢𑀦𑀬𑀤𑁂𑀲𑀦𑀪𑀸𑀯𑀢𑁄. 𑀢𑀢𑁆𑀣𑀸𑀢𑀺 𑀏𑀯𑀁 𑀤𑀻𑀧𑀦𑁂. 𑀧𑀭𑀺𑀬𑀦𑁆𑀢𑀁 𑀦𑀸𑀫 𑀦𑀢𑁆𑀣𑀺 𑀅𑀦𑀦𑁆𑀢𑀦𑀬𑀤𑁂𑀲𑀦𑀪𑀸𑀯𑀢𑁄, 𑀲𑀯𑀦𑁂 𑀯𑀸 𑀅𑀲𑀦𑁆𑀢𑁄𑀲𑀦𑁂𑀦 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀲𑁄𑀢𑀼𑀓𑀸𑀫𑀢𑀸𑀚𑀦𑀦𑀢𑁄 𑀲𑁄𑀢𑀼𑀓𑀸𑀫𑀢𑀸𑀬 𑀧𑀭𑀺𑀬𑀦𑁆𑀢𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀢𑀣𑀸𑀧𑀻𑀢𑀺 ‘‘𑀤𑁂𑀲𑀦𑀸𑀬 𑀉𑀢𑁆𑀢𑀭𑀼𑀢𑁆𑀢𑀭𑀸𑀥𑀺𑀓𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀪𑀸𑀯𑁂 𑀲𑀢𑀺𑀧𑀻’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁧𑁮𑁯) 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁, 𑀲𑀢𑀺𑀧𑀺 𑀏𑀯𑀁 𑀅𑀧𑀭𑀺𑀬𑀦𑁆𑀢𑀪𑀸𑀯𑁂𑀢𑀺𑀧𑀺 𑀬𑀼𑀚𑁆𑀚𑀢𑀺. 𑀅𑀦𑀼𑀫𑀸𑀦𑀜𑀸𑀡𑁂𑀦 𑀘𑀺𑀦𑁆𑀢𑁂𑀢𑁆𑀯𑀸. 𑀉𑀧𑀭𑀺 𑀯𑀺𑀲𑁂𑀲𑀦𑁆𑀢𑀺 𑀢𑀁 𑀞𑀧𑁂𑀢𑁆𑀯𑀸 𑀢𑀤𑀼𑀧𑀭𑀺 𑀯𑀺𑀲𑁂𑀲𑀫𑁂𑀯 𑀲𑀸𑀫𑀜𑁆𑀜𑀨𑀮𑀁 𑀧𑀼𑀘𑁆𑀙𑀦𑁆𑀢𑁄. 𑀓𑀲𑁆𑀫𑀸𑀢𑀺 𑀆𑀳 ‘‘𑀲𑀯𑀦𑁂’’𑀢𑀺𑀆𑀤𑀺. 𑀏𑀢𑁂𑀦 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺 𑁋 𑀅𑀦𑁂𑀓𑀢𑁆𑀣𑀸 𑀲𑀫𑀸𑀦𑀸𑀧𑀺 𑀲𑀤𑁆𑀤𑀸 𑀯𑀢𑁆𑀢𑀺𑀘𑁆𑀙𑀸𑀦𑀼𑀧𑀼𑀩𑁆𑀩𑀺𑀓𑀸𑀬𑁂𑀯 𑀢𑀁𑀢𑀤𑀢𑁆𑀣𑀤𑀻𑀧𑀓𑀸𑀢𑀺.

𑀲𑀸𑀥𑀼𑀓𑀁 𑀲𑀸𑀥𑀽𑀢𑀺 𑀏𑀓𑀢𑁆𑀣𑀫𑁂𑀢𑀁 𑀲𑀸𑀥𑀼𑀲𑀤𑁆𑀤𑀲𑁆𑀲𑁂𑀯 𑀓-𑀓𑀸𑀭𑁂𑀦 𑀯𑀟𑁆𑀠𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸. 𑀢𑁂𑀦𑁂𑀯 𑀳𑀺 𑀲𑀸𑀥𑀼𑀓𑀲𑀤𑁆𑀤𑀲𑁆𑀲𑀢𑁆𑀣𑀁 𑀯𑀤𑀦𑁆𑀢𑁂𑀦 𑀲𑀸𑀥𑀼𑀲𑀤𑁆𑀤𑁄 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 ¶ 𑀉𑀤𑀸𑀳𑀝𑁄. 𑀢𑁂𑀦 𑀘 𑀦𑀦𑀼 𑀲𑀸𑀥𑀼𑀓𑀲𑀤𑁆𑀤𑀲𑁆𑀲𑁂𑀯 𑀅𑀢𑁆𑀣𑀼𑀤𑁆𑀥𑀸𑀭𑁄 𑀯𑀢𑁆𑀢𑀩𑁆𑀩𑁄, 𑀦 𑀲𑀸𑀥𑀼𑀲𑀤𑁆𑀤𑀲𑁆𑀲𑀸𑀢𑀺 𑀘𑁄𑀤𑀦𑀸 𑀦𑀺𑀲𑁂𑀥𑀺𑀢𑀸. 𑀆𑀬𑀸𑀘𑀦𑁂𑀢𑀺 𑀅𑀪𑀺𑀫𑀼𑀔𑀁 𑀬𑀸𑀘𑀦𑁂, 𑀅𑀪𑀺𑀧𑀢𑁆𑀣𑀦𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀝𑀺𑀘𑁆𑀙𑀦𑁂𑀢𑀺 𑀧𑀝𑀺𑀕𑁆𑀕𑀳𑀡𑁂. 𑀲𑀫𑁆𑀧𑀳𑀁𑀲𑀦𑁂𑀢𑀺 𑀲𑀁𑀯𑀺𑀚𑁆𑀚𑀫𑀸𑀦𑀕𑀼𑀡𑀯𑀲𑁂𑀦 𑀳𑀁𑀲𑀦𑁂 𑀢𑁄𑀲𑀦𑁂, 𑀉𑀤𑀕𑁆𑀕𑀢𑀸𑀓𑀭𑀡𑁂𑀢𑀺 𑀅𑀢𑁆𑀣𑁄.

𑀲𑀸𑀥𑀼 𑀥𑀫𑁆𑀫𑀭𑀼𑀘𑀻𑀢𑀺 𑀕𑀸𑀣𑀸 𑀉𑀫𑁆𑀫𑀸𑀤𑀦𑁆𑀢𑀻𑀚𑀸𑀢𑀓𑁂 (𑀚𑀸. 𑁨.𑁧𑁮.𑁧𑁦𑁧). 𑀢𑀢𑁆𑀣𑀸𑀬𑀫𑀝𑁆𑀞𑀓𑀣𑀸𑀯𑀺𑀦𑀺𑀘𑁆𑀙𑀬𑀧𑀯𑁂𑀡𑀻 𑁋 𑀲𑀼𑀘𑀭𑀺𑀢𑀥𑀫𑁆𑀫𑁂 𑀭𑁄𑀘𑁂𑀢𑀻𑀢𑀺 𑀥𑀫𑁆𑀫𑀭𑀼𑀘𑀺, 𑀥𑀫𑁆𑀫𑀭𑀢𑁄𑀢𑀺 𑀅𑀢𑁆𑀣𑁄. 𑀢𑀸𑀤𑀺𑀲𑁄 𑀳𑀺 𑀚𑀻𑀯𑀺𑀢𑀁 𑀚𑀳𑀦𑁆𑀢𑁄𑀧𑀺 𑀅𑀓𑀢𑁆𑀢𑀩𑁆𑀩𑀁 𑀦 𑀓𑀭𑁄𑀢𑀺. 𑀧𑀜𑁆𑀜𑀸𑀡𑀯𑀸𑀢𑀺 𑀧𑀜𑁆𑀜𑀯𑀸 𑀜𑀸𑀡𑀲𑀫𑁆𑀧𑀦𑁆𑀦𑁄. 𑀫𑀺𑀢𑁆𑀢𑀸𑀦𑀫𑀤𑁆𑀤𑀼𑀩𑁆𑀪𑁄𑀢𑀺 𑀫𑀺𑀢𑁆𑀢𑀸𑀦𑀁 𑀅𑀤𑀼𑀲𑁆𑀲𑀦𑀪𑀸𑀯𑁄. ‘‘𑀅𑀤𑀽𑀲𑀓𑁄 𑀅𑀦𑀼𑀧𑀖𑀸𑀢𑀓𑁄’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁧𑁮𑁯) 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁. ‘‘𑀅𑀤𑁆𑀭𑀼𑀩𑁆𑀪𑁄’’𑀢𑀺𑀧𑀺 𑀧𑀸𑀞𑁄 𑀤-𑀓𑀸𑀭𑀲𑁆𑀲 𑀤𑁆𑀭-𑀓𑀸𑀭𑀁 𑀓𑀢𑁆𑀯𑀸.

𑀤𑀴𑁆𑀳𑀻𑀓𑀫𑁆𑀫𑁂𑀢𑀺 𑀲𑀸𑀢𑀘𑁆𑀘𑀓𑀺𑀭𑀺𑀬𑀸𑀬𑀁. 𑀆𑀡𑀢𑁆𑀢𑀺𑀬𑀦𑁆𑀢𑀺 𑀆𑀡𑀸𑀧𑀦𑁂. 𑀇𑀥𑀸𑀧𑀻𑀢𑀺 𑀲𑀸𑀫𑀜𑁆𑀜𑀨𑀮𑁂𑀧𑀺. 𑀅𑀲𑁆𑀲𑀸𑀢𑀺 𑀲𑀸𑀥𑀼𑀓𑀲𑀤𑁆𑀤𑀲𑁆𑀲. ‘‘𑀲𑀼𑀡𑁄𑀳𑀺 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀻’’𑀢𑀺 𑀳𑀺 𑀲𑀸𑀥𑀼𑀓𑀲𑀤𑁆𑀤𑁂𑀦 𑀲𑀯𑀦𑀫𑀦𑀲𑀺𑀓𑀸𑀭𑀸𑀦𑀁 𑀲𑀸𑀢𑀘𑁆𑀘𑀓𑀺𑀭𑀺𑀬𑀸𑀧𑀺 𑀢𑀤𑀸𑀡𑀸𑀧𑀦𑀫𑁆𑀧𑀺 𑀚𑁄𑀢𑀺𑀢𑀁 𑀳𑁄𑀢𑀺. 𑀆𑀬𑀸𑀘𑀦𑁂𑀦𑁂𑀯 𑀘 𑀉𑀬𑁆𑀬𑁄𑀚𑀦𑀲𑀸𑀫𑀜𑁆𑀜𑀢𑁄 𑀆𑀡𑀢𑁆𑀢𑀺 𑀲𑀗𑁆𑀕𑀳𑀺𑀢𑀸𑀢𑀺 𑀦 𑀲𑀸 𑀯𑀺𑀲𑀼𑀁 𑀅𑀢𑁆𑀣𑀼𑀤𑁆𑀥𑀸𑀭𑁂 𑀯𑀼𑀢𑁆𑀢𑀸. 𑀆𑀡𑀸𑀭𑀳𑀲𑁆𑀲 𑀳𑀺 𑀆𑀡𑀢𑁆𑀢𑀺 ¶ , 𑀢𑀤𑀦𑀭𑀳𑀲𑁆𑀲 𑀆𑀬𑀸𑀘𑀦𑀦𑁆𑀢𑀺 𑀯𑀺𑀲𑁂𑀲𑁄. 𑀲𑀼𑀦𑁆𑀤𑀭𑁂𑀧𑀻𑀢𑀺 𑀲𑀼𑀦𑁆𑀤𑀭𑀢𑁆𑀣𑁂𑀧𑀺. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑁂𑀦 𑀲𑀸𑀥𑀼𑀓𑀲𑀤𑁆𑀤𑀲𑁆𑀲 𑀅𑀢𑁆𑀣𑀢𑁆𑀢𑀬𑁂𑀦 𑀧𑀓𑀸𑀲𑀺𑀢𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁, 𑀢𑀲𑁆𑀲 𑀯𑀸 𑀅𑀢𑁆𑀣𑀢𑁆𑀢𑀬𑀲𑁆𑀲 𑀇𑀥 𑀬𑁄𑀕𑁆𑀬𑀢𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀤𑀴𑁆𑀳𑀻𑀓𑀫𑁆𑀫𑀢𑁆𑀣𑁂𑀦 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀼𑀕𑁆𑀕𑀳𑀺𑀢𑀁 𑀕𑀡𑁆𑀳𑀦𑁆𑀢𑁄𑀢𑀺 𑀲𑀼𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑁄. 𑀲𑀼𑀦𑁆𑀤𑀭𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀁. 𑀪𑀤𑁆𑀤𑀓𑀦𑁆𑀢𑀺 𑀧𑀲𑀢𑁆𑀣𑀁, ‘‘𑀥𑀫𑁆𑀫’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀲𑀼𑀦𑁆𑀤𑀭𑀁 𑀪𑀤𑁆𑀤𑀓𑀦𑁆𑀢𑀺 𑀯𑀸 𑀲𑀯𑀦𑀸𑀦𑀼𑀕𑁆𑀕𑀳𑀡𑁂 𑀧𑀭𑀺𑀬𑀸𑀬𑀯𑀘𑀦𑀁.

𑀫𑀦𑀲𑀺 𑀓𑀭𑁄𑀳𑀻𑀢𑀺 𑀏𑀢𑁆𑀣 𑀦 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀦𑀮𑀓𑁆𑀔𑀡𑁄 𑀫𑀦𑀲𑀺𑀓𑀸𑀭𑁄, 𑀅𑀣 𑀔𑁄 𑀯𑀻𑀣𑀺𑀧𑀝𑀺𑀧𑀸𑀤𑀦𑀚𑀯𑀦𑀧𑀝𑀺𑀧𑀸𑀤𑀦𑀫𑀦𑀲𑀺𑀓𑀸𑀭𑀧𑀼𑀩𑁆𑀩𑀓𑁂 𑀘𑀺𑀢𑁆𑀢𑁂 𑀞𑀧𑀦𑀮𑀓𑁆𑀔𑀡𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀯𑀚𑁆𑀚, 𑀲𑀫𑀦𑁆𑀦𑀸𑀳𑀭𑀸’’𑀢𑀺 𑀆𑀳. 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀫𑀦𑀲𑀺𑀓𑀸𑀭𑀤𑁆𑀯𑀬𑀧𑀼𑀩𑁆𑀩𑀓𑀸𑀬 𑀘𑀺𑀢𑁆𑀢𑀧𑀝𑀺𑀧𑀸𑀝𑀺𑀬𑀸 𑀏𑀓𑀸𑀭𑀫𑁆𑀫𑀡𑁂 𑀞𑀧𑀦𑀯𑀲𑁂𑀦 𑀅𑀦𑀼𑀤𑁆𑀥𑀢𑀘𑀺𑀢𑁆𑀢𑁄 𑀳𑀼𑀢𑁆𑀯𑀸. 𑀦𑀺𑀲𑀸𑀫𑁂𑀳𑀻𑀢𑀺 𑀲𑀼𑀡𑀸𑀳𑀺, 𑀅𑀦𑀕𑁆𑀖𑀭𑀢𑀦𑀫𑀺𑀯 𑀯𑀸 𑀲𑀼𑀯𑀡𑁆𑀡𑀫𑀜𑁆𑀚𑀼𑀲𑀸𑀬 𑀤𑀼𑀮𑁆𑀮𑀪𑀥𑀫𑁆𑀫𑀭𑀢𑀦𑀁 𑀘𑀺𑀢𑁆𑀢𑁂 𑀧𑀝𑀺𑀲𑀸𑀫𑁂𑀳𑀻𑀢𑀺𑀧𑀺 𑀅𑀢𑁆𑀣𑁄 ¶ . 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑁂 𑀓𑀭𑁄𑀳𑀻’’𑀢𑀺. 𑀏𑀯𑀁 𑀧𑀤𑀤𑁆𑀯𑀬𑀲𑁆𑀲 𑀧𑀘𑁆𑀘𑁂𑀓𑀁 𑀬𑁄𑀚𑀦𑀸𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀝𑀺𑀬𑁄𑀕𑀻𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑁄𑀢𑀺𑀦𑁆𑀤𑁆𑀭𑀺𑀬𑀯𑀺𑀓𑁆𑀔𑁂𑀧𑀯𑀸𑀭𑀡𑀁 𑀲𑀯𑀦𑁂 𑀦𑀺𑀬𑁄𑀚𑀦𑀯𑀲𑁂𑀦 𑀓𑀺𑀭𑀺𑀬𑀦𑁆𑀢𑀭𑀧𑀝𑀺𑀲𑁂𑀥𑀦𑀢𑁄, 𑀢𑁂𑀦 𑀲𑁄𑀢𑀁 𑀑𑀤𑀳𑀸𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀫𑀦𑀺𑀦𑁆𑀤𑁆𑀭𑀺𑀬𑀯𑀺𑀓𑁆𑀔𑁂𑀧𑀯𑀸𑀭𑀡𑀁 𑀫𑀦𑀲𑀺𑀓𑀸𑀭𑁂𑀦 𑀤𑀴𑁆𑀳𑀻𑀓𑀫𑁆𑀫𑀦𑀺𑀬𑁄𑀚𑀦𑁂𑀦 𑀅𑀜𑁆𑀜𑀘𑀺𑀦𑁆𑀢𑀸𑀧𑀝𑀺𑀲𑁂𑀥𑀦𑀢𑁄. 𑀩𑁆𑀬𑀜𑁆𑀚𑀦𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑀯𑀸𑀭𑀡𑀁 ‘‘𑀲𑀸𑀥𑀼𑀓’’𑀦𑁆𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸. 𑀅𑀢𑁆𑀣𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑀯𑀸𑀭𑀡𑁂𑀧𑀺 𑀏𑀲 𑀦𑀬𑁄.

𑀥𑀸𑀭𑀡𑀽𑀧𑀧𑀭𑀺𑀓𑁆𑀔𑀸𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀢𑀼𑀮𑀦𑀢𑀻𑀭𑀡𑀸𑀤𑀺𑀓𑁂, 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑁂𑀥𑁂 𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀩𑁆𑀬𑀜𑁆𑀚𑁂𑀢𑀺 𑀧𑀓𑀸𑀲𑁂𑀢𑀺, 𑀲𑀬𑀫𑁂𑀢𑁂𑀦𑀸𑀢𑀺 𑀯𑀸 𑀩𑁆𑀬𑀜𑁆𑀚𑀦𑀁, 𑀲𑀪𑀸𑀯𑀦𑀺𑀭𑀼𑀢𑁆𑀢𑀺, 𑀲𑀳 𑀩𑁆𑀬𑀜𑁆𑀚𑀦𑁂𑀦𑀸𑀢𑀺 𑀲𑀩𑁆𑀬𑀜𑁆𑀚𑀦𑁄, 𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀲𑀳𑀧𑁆𑀧𑀯𑀢𑁆𑀢𑀺 𑀳𑀺 ‘‘𑀲𑀫𑁆𑀧𑀦𑁆𑀦𑀢𑀸 𑀲𑀫𑀯𑀸𑀬𑀢𑀸 𑀯𑀺𑀚𑁆𑀚𑀫𑀸𑀦𑀢𑀸’’𑀢𑀺𑀆𑀤𑀺𑀦𑀸 𑀅𑀦𑁂𑀓𑀯𑀺𑀥𑀸, 𑀇𑀥 𑀧𑀦 𑀲𑀫𑁆𑀧𑀦𑁆𑀦𑀢𑀸𑀬𑁂𑀯 𑀢𑀤𑀜𑁆𑀜𑀲𑁆𑀲 𑀅𑀲𑀫𑁆𑀪𑀯𑀢𑁄, 𑀢𑀲𑁆𑀫𑀸 ‘‘𑀲𑀳 𑀩𑁆𑀬𑀜𑁆𑀚𑀦𑁂𑀦𑀸’’𑀢𑀺 𑀦𑀺𑀩𑁆𑀩𑀘𑀦𑀁 𑀓𑀢𑁆𑀯𑀸𑀧𑀺 ‘‘𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑁄’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁧𑁮𑁯) 𑀅𑀢𑁆𑀣𑁄 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁, 𑀬𑀣𑀸 𑀢𑀁 ‘‘𑀦 𑀓𑀼𑀲𑀮𑀸 𑀅𑀓𑀼𑀲𑀮𑀸, 𑀓𑀼𑀲𑀮𑀧𑀝𑀺𑀧𑀓𑁆𑀔𑀸’’𑀢𑀺 (𑀥. 𑀲. 𑁧) 𑀅𑀭𑀡𑀻𑀬𑀢𑁄 𑀉𑀧𑀕𑀦𑁆𑀢𑀩𑁆𑀩𑀢𑁄 𑀅𑀦𑀼𑀥𑀸𑀢𑀩𑁆𑀩𑀢𑁄 𑀅𑀢𑁆𑀣𑁄, 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀤𑀺, 𑀲𑀳 𑀅𑀢𑁆𑀣𑁂𑀦𑀸𑀢𑀺 𑀲𑀸𑀢𑁆𑀣𑁄, 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑀲𑀫𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀲𑀸𑀥𑀼𑀓𑀧𑀤𑀁 𑀏𑀓𑀫𑁂𑀯 𑀲𑀫𑀸𑀦𑀁 𑀆𑀯𑀼𑀢𑁆𑀢𑀺𑀦𑀬𑀸𑀤𑀺𑀯𑀲𑁂𑀦 𑀉𑀪𑀬𑀢𑁆𑀣 𑀬𑁄𑀚𑁂𑀢𑀩𑁆𑀩𑀁. 𑀓𑀣𑀦𑁆𑀢𑀺 𑀆𑀳 ‘‘𑀬𑀲𑁆𑀫𑀸’’𑀢𑀺𑀆𑀤𑀺. 𑀥𑀫𑁆𑀫𑁄 𑀦𑀸𑀫 𑀢𑀦𑁆𑀢𑀺. 𑀤𑁂𑀲𑀦𑀸 𑀦𑀸𑀫 𑀢𑀲𑁆𑀲𑀸 𑀫𑀦𑀲𑀸 𑀯𑀯𑀢𑁆𑀣𑀸𑀧𑀺𑀢𑀸𑀬 𑀢𑀦𑁆𑀢𑀺𑀬𑀸 𑀤𑁂𑀲𑀦𑀸. 𑀅𑀢𑁆𑀣𑁄 𑀦𑀸𑀫 𑀢𑀦𑁆𑀢𑀺𑀬𑀸 𑀅𑀢𑁆𑀣𑁄. 𑀧𑀝𑀺𑀯𑁂𑀥𑁄 𑀦𑀸𑀫 𑀢𑀦𑁆𑀢𑀺𑀬𑀸, 𑀢𑀦𑁆𑀢𑀺𑀅𑀢𑁆𑀣𑀲𑁆𑀲 𑀘 𑀬𑀣𑀸𑀪𑀽𑀢𑀸𑀯𑀩𑁄𑀥𑁄. 𑀬𑀲𑁆𑀫𑀸 𑀘𑁂𑀢𑁂 𑀥𑀫𑁆𑀫𑀤𑁂𑀲𑀦𑀸𑀢𑁆𑀣𑀧𑀝𑀺𑀯𑁂𑀥𑀸 𑀲𑀲𑀸𑀤𑀻𑀳𑀺 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑁄 𑀫𑀦𑁆𑀤𑀩𑀼𑀤𑁆𑀥𑀻𑀳𑀺 𑀤𑀼𑀓𑁆𑀔𑁄𑀕𑀸𑀳𑀸, 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀸 𑀘, 𑀢𑀲𑁆𑀫𑀸 𑀕𑀫𑁆𑀪𑀻𑀭𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀲𑁆𑀫𑀸…𑀧𑁂… 𑀫𑀦𑀲𑀺 𑀓𑀭𑁄𑀳𑀻’’𑀢𑀺. 𑀏𑀢𑁆𑀣 𑀘 𑀧𑀝𑀺𑀯𑁂𑀥𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄 ¶ 𑀥𑀫𑁆𑀫𑀢𑁆𑀣𑀸𑀦𑀁 𑀤𑀼𑀓𑁆𑀔𑁄𑀕𑀸𑀳𑀢𑀸, 𑀤𑁂𑀲𑀦𑀸𑀜𑀸𑀡𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄 𑀤𑁂𑀲𑀦𑀸𑀬, 𑀉𑀧𑁆𑀧𑀸𑀤𑁂𑀢𑀼𑀫𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬, 𑀢𑀩𑁆𑀩𑀺𑀲𑀬𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀘 𑀤𑀼𑀓𑁆𑀓𑀭𑀪𑀸𑀯𑀢𑁄 𑀧𑀝𑀺𑀯𑁂𑀥𑀲𑁆𑀲 𑀤𑀼𑀓𑁆𑀔𑁄𑀕𑀸𑀳𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀫𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀦𑀺𑀤𑀸𑀦𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀫𑁂𑀯.

‘‘𑀲𑀼𑀡𑀸𑀳𑀺 𑀲𑀸𑀥𑀼𑀓’’𑀦𑁆𑀢𑀺 ‘‘𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀻’’𑀢𑀺 𑀯𑀤𑀦𑁆𑀢𑁄 𑀦 𑀓𑁂𑀯𑀮𑀁 𑀅𑀢𑁆𑀣𑀓𑁆𑀓𑀫𑀢𑁄 𑀏𑀯 𑀅𑀬𑀁 𑀬𑁄𑀚𑀦𑀸, 𑀅𑀣 𑀔𑁄 𑀲𑀤𑁆𑀤𑀓𑁆𑀓𑀫𑀢𑁄𑀧𑀺 𑀉𑀪𑀬𑀢𑁆𑀣 𑀲𑀫𑁆𑀩𑀦𑁆𑀥𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀲𑀓𑁆𑀓𑀸 𑀫𑀳𑀸𑀭𑀸𑀚𑀸’’𑀢𑀺 𑀇𑀥𑀸𑀧𑀺 ‘‘𑀅𑀜𑁆𑀜𑀫𑁆𑀧𑀺 𑀤𑀺𑀝𑁆𑀞𑁂𑀯 ¶ 𑀥𑀫𑁆𑀫𑁂 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁…𑀧𑁂… 𑀧𑀡𑀻𑀢𑀢𑀭𑀜𑁆𑀘𑀸’’𑀢𑀺 𑀇𑀤𑀫𑀦𑀼𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀏𑀯𑀁 𑀧𑀝𑀺𑀜𑁆𑀜𑀸𑀢𑀁 𑀲𑀸𑀫𑀜𑁆𑀜𑀨𑀮𑀤𑁂𑀲𑀦’’𑀦𑁆𑀢𑀺. 𑀯𑀺𑀢𑁆𑀣𑀸𑀭𑀢𑁄 𑀪𑀸𑀲𑀦𑀦𑁆𑀢𑀺 𑀅𑀢𑁆𑀣𑀫𑁂𑀯 𑀤𑀴𑁆𑀳𑀁 𑀓𑀭𑁄𑀢𑀺 ‘‘𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀲𑀁𑀔𑀺𑀢𑁆𑀢𑀤𑀻𑀧𑀦’’𑀦𑁆𑀢𑀺𑀆𑀤𑀺𑀦𑀸. 𑀳𑀺-𑀲𑀤𑁆𑀤𑁄 𑀘𑁂𑀢𑁆𑀣 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀤𑁂𑀲𑀦𑀁 𑀦𑀸𑀫 𑀉𑀤𑁆𑀤𑀺𑀲𑀦𑀁. 𑀪𑀸𑀲𑀦𑀁 𑀦𑀸𑀫 𑀦𑀺𑀤𑁆𑀤𑀺𑀲𑀦𑀁 𑀧𑀭𑀺𑀩𑁆𑀬𑀢𑁆𑀢𑀓𑀣𑀦𑀁. 𑀢𑁂𑀦𑀸𑀬𑀫𑀢𑁆𑀣𑁄 𑀲𑀫𑁆𑀪𑀯𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀲𑀕𑀸𑀣𑀸𑀯𑀕𑁆𑀕𑀲𑀁𑀬𑀼𑀢𑁆𑀢𑁂 𑀯𑀗𑁆𑀕𑀻𑀲𑀲𑀼𑀢𑁆𑀢𑁂 (𑀲𑀁. 𑀦𑀺. 𑁧.𑁨𑁧𑁪) 𑀕𑀸𑀣𑀸𑀧𑀤𑁂𑀦 𑀲𑀸𑀥𑁂𑀢𑀼𑀁 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀸𑀴𑀺𑀓𑀸𑀬𑀺𑀯 𑀦𑀺𑀕𑁆𑀖𑁄𑀲𑁄𑀢𑀺 𑀲𑀸𑀴𑀺𑀓𑀸𑀬 𑀦𑀺𑀕𑁆𑀖𑁄𑀲𑁄 𑀯𑀺𑀬, 𑀬𑀣𑀸 𑀲𑀸𑀴𑀺𑀓𑀸𑀬 𑀆𑀮𑀸𑀧𑁄 𑀫𑀥𑀼𑀭𑁄 𑀓𑀡𑁆𑀡𑀲𑀼𑀔𑁄 𑀧𑁂𑀫𑀦𑀻𑀬𑁄, 𑀏𑀯𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀪𑀸𑀦𑀦𑁆𑀢𑀺 𑀘𑁂𑀢𑀲𑁆𑀲 𑀯𑀺𑀲𑁂𑀲𑀦𑀁 𑀮𑀺𑀗𑁆𑀕𑀪𑁂𑀤𑀲𑁆𑀲𑀧𑀺 𑀯𑀺𑀲𑁂𑀲𑀦𑀲𑁆𑀲 𑀤𑀺𑀲𑁆𑀲𑀦𑀢𑁄 𑀬𑀣𑀸 ‘‘𑀕𑀼𑀡𑁄 𑀧𑀫𑀸𑀡’’𑀦𑁆𑀢𑀺. 𑀧𑀝𑀺𑀪𑀸𑀦𑀦𑁆𑀢𑀺 𑀘 𑀲𑀤𑁆𑀤𑁄 𑀯𑀼𑀘𑁆𑀘𑀢𑀺 𑀧𑀝𑀺𑀪𑀸𑀢𑀺 𑀢𑀁𑀢𑀤𑀸𑀓𑀸𑀭𑁂𑀦 𑀤𑀺𑀲𑁆𑀲𑀢𑀻𑀢𑀺 𑀓𑀢𑁆𑀯𑀸. 𑀉𑀤𑀻𑀭𑀬𑀻𑀢𑀺 𑀉𑀘𑁆𑀘𑀸𑀭𑀬𑀺, 𑀯𑀼𑀘𑁆𑀘𑀢𑀺 𑀯𑀸, 𑀓𑀫𑁆𑀫𑀕𑀩𑁆𑀪𑀜𑁆𑀘𑁂𑀢𑀁 𑀓𑀺𑀭𑀺𑀬𑀸𑀧𑀤𑀁. 𑀇𑀫𑀺𑀦𑀸 𑀘𑁂𑀢𑀁 𑀤𑀻𑀧𑁂𑀢𑀺 𑁋 𑀆𑀬𑀲𑁆𑀫𑀦𑁆𑀢𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀣𑁄𑀫𑁂𑀢𑀼𑀓𑀸𑀫𑁂𑀦 𑀤𑁂𑀲𑀦𑀸𑀪𑀸𑀲𑀦𑀸𑀦𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁂𑀦 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑁂𑀦 𑀆𑀬𑀲𑁆𑀫𑀢𑀸 𑀯𑀗𑁆𑀕𑀻𑀲𑀢𑁆𑀣𑁂𑀭𑁂𑀦 ‘‘𑀲𑀗𑁆𑀔𑀺𑀢𑁆𑀢𑁂𑀦, 𑀯𑀺𑀢𑁆𑀣𑀸𑀭𑁂𑀦𑀸’’𑀢𑀺 𑀘 𑀯𑀺𑀲𑁂𑀲𑀦𑀁 𑀓𑀢𑀁, 𑀢𑁂𑀦𑀸𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻𑀢𑀺.

𑀏𑀯𑀁 𑀯𑀼𑀢𑁆𑀢𑁂𑀢𑀺 ‘‘𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂. ‘‘𑀦 𑀓𑀺𑀭 𑀪𑀕𑀯𑀸 𑀲𑀗𑁆𑀔𑁂𑀧𑁂𑀦𑁂𑀯 𑀤𑁂𑀲𑁂𑀲𑁆𑀲𑀢𑀺, 𑀅𑀣 𑀔𑁄 𑀯𑀺𑀢𑁆𑀣𑀸𑀭𑁂𑀦𑀧𑀺 𑀪𑀸𑀲𑀺𑀲𑁆𑀲𑀢𑀻’’𑀢𑀺 𑀳𑀺 𑀢𑀁 𑀧𑀤𑀁 𑀲𑀼𑀢𑁆𑀯𑀸𑀯 𑀉𑀲𑁆𑀲𑀸𑀳𑀚𑀸𑀢𑁄 𑀲𑀜𑁆𑀚𑀸𑀢𑀼𑀲𑁆𑀲𑀸𑀳𑁄, 𑀳𑀝𑁆𑀞𑀢𑀼𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀅𑀬𑀫𑀸𑀘𑀭𑀺𑀬𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀅𑀧𑀺𑀘 ‘‘𑀢𑁂𑀦 𑀳𑀺 𑀫𑀳𑀸𑀭𑀸𑀚 𑀲𑀼𑀡𑁄𑀳𑀺 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀁 𑀲𑀩𑁆𑀩𑀫𑁆𑀧𑀺 𑀉𑀬𑁆𑀬𑁄𑀚𑀦𑀧𑀝𑀺𑀜𑁆𑀜𑀸𑀓𑀭𑀡𑀧𑁆𑀧𑀓𑀸𑀭𑀁 𑀉𑀲𑁆𑀲𑀸𑀳𑀚𑀦𑀦𑀓𑀸𑀭𑀡𑀁 𑀲𑀩𑁆𑀩𑁂𑀦𑁂𑀯 𑀉𑀲𑁆𑀲𑀸𑀳𑀲𑀫𑁆𑀪𑀯𑀢𑁄, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑁂𑀢𑀺 ‘‘𑀲𑀼𑀡𑁄𑀳𑀺, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀺, 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀲𑀩𑁆𑀩𑁂𑀳𑁂𑀯 𑀢𑀻𑀳𑀺𑀧𑀺 𑀧𑀤𑁂𑀳𑀺 𑀉𑀲𑁆𑀲𑀸𑀳𑀚𑀸𑀢𑁄𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀧𑀘𑁆𑀘𑀲𑁆𑀲𑁄𑀲𑀻𑀢𑀺 𑀧𑀢𑀺 𑀅𑀲𑁆𑀲𑁄𑀲𑀺 𑀪𑀕𑀯𑀢𑁄 𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯 𑀧𑀘𑁆𑀙𑀸 𑀅𑀲𑁆𑀲𑁄𑀲𑀺, ‘‘𑀲𑀓𑁆𑀓𑀸 𑀧𑀦 𑀪𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 𑀧𑀼𑀦 ‘‘𑀏𑀯𑀁 𑀪𑀦𑁆𑀢𑁂’’𑀢𑀺 𑀅𑀲𑁆𑀲𑁄𑀲𑀻𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀧𑀢𑀺𑀲𑁆𑀲𑀯𑀦𑀁 𑀅𑀢𑁆𑀣𑀢𑁄 𑀲𑀫𑁆𑀧𑀝𑀺𑀘𑁆𑀙𑀦𑀫𑁂𑀯𑀸𑀢𑀺 ¶ 𑀆𑀳 ‘‘𑀲𑀫𑁆𑀧𑀝𑀺𑀘𑁆𑀙𑀺, 𑀧𑀝𑀺𑀕𑁆𑀕𑀳𑁂𑀲𑀻’’𑀢𑀺. 𑀢𑁂𑀦𑁂𑀯 𑀳𑀺 ‘‘𑀇𑀢𑀺 𑀅𑀢𑁆𑀣𑁄’’𑀢𑀺 𑀅𑀯𑀢𑁆𑀯𑀸 ‘‘𑀇𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁.

𑁧𑁯𑁦. ‘‘𑀅𑀣𑀲𑁆𑀲 ¶ 𑀪𑀕𑀯𑀸 𑀏𑀢𑀤𑀯𑁄𑀘𑀸’’𑀢𑀺 𑀯𑀘𑀦𑀲𑀫𑁆𑀩𑀦𑁆𑀥𑀫𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀏𑀢𑀁 𑀅𑀯𑁄𑀘𑀸’’𑀢𑀺 𑀧𑀤𑀁 𑀯𑀺𑀪𑀚𑀺𑀢𑁆𑀯𑀸 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀸𑀦𑀻’’𑀢𑀺𑀆𑀤𑀺𑀫𑀸𑀳. ‘‘𑀇𑀥𑀸’’𑀢𑀺 𑀇𑀫𑀺𑀦𑀸 𑀯𑀼𑀘𑁆𑀘𑀫𑀸𑀦𑀁 𑀅𑀥𑀺𑀓𑀭𑀡𑀁 𑀢𑀣𑀸𑀕𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀁 𑀮𑁄𑀓𑀫𑁂𑀯𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀤𑁂𑀲𑁄𑀧𑀤𑁂𑀲𑁂 𑀦𑀺𑀧𑀸𑀢𑁄’’𑀢𑀺 𑀇𑀫𑀺𑀦𑀸. 𑀤𑁂𑀲𑀲𑁆𑀲 𑀉𑀧𑀤𑀺𑀲𑀦𑀁 𑀤𑁂𑀲𑁄𑀧𑀤𑁂𑀲𑁄, 𑀢𑀲𑁆𑀫𑀺𑀁. 𑀬𑀤𑀺 𑀲𑀩𑁆𑀩𑀢𑁆𑀣 𑀤𑁂𑀲𑁄𑀧𑀤𑁂𑀲𑁂, 𑀅𑀣𑀸𑀬𑀫𑀢𑁆𑀣𑁄 𑀦 𑀯𑀢𑁆𑀢𑀩𑁆𑀩𑁄 𑀅𑀯𑀼𑀢𑁆𑀢𑁂𑀧𑀺 𑀮𑀩𑁆𑀪𑀫𑀸𑀦𑀢𑁆𑀢𑀸𑀢𑀺 𑀘𑁄𑀤𑀦𑀸𑀬𑀸𑀳 ‘‘𑀲𑁆𑀯𑀸𑀬’’𑀦𑁆𑀢𑀺𑀆𑀤𑀺. 𑀲𑀸𑀫𑀜𑁆𑀜𑀪𑀽𑀢𑀁 𑀇𑀥𑀲𑀤𑁆𑀤𑀁 𑀕𑀡𑁆𑀳𑀺𑀢𑁆𑀯𑀸 ‘‘𑀲𑁆𑀯𑀸𑀬’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀢𑀼 𑀬𑀣𑀸𑀯𑀺𑀲𑁂𑀲𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀓𑀢𑁆𑀣𑀘𑀺 𑀧𑀤𑀧𑀽𑀭𑀡𑀫𑀢𑁆𑀢𑀫𑁂𑀯𑀸’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁯𑁦). 𑀮𑁄𑀓𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺 𑀮𑁄𑀓𑀲𑀤𑁆𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑀢𑁄. 𑀇𑀥 𑀮𑁄𑀓𑁂𑀢𑀺 𑀘 𑀚𑀸𑀢𑀺𑀓𑁆𑀔𑁂𑀢𑁆𑀢𑀁, 𑀢𑀢𑁆𑀣𑀸𑀧𑀺 𑀅𑀬𑀁 𑀘𑀓𑁆𑀓𑀯𑀸𑀴𑁄 𑀅𑀥𑀺𑀧𑁆𑀧𑁂𑀢𑁄. 𑀲𑀸𑀲𑀦𑀫𑀼𑀧𑀸𑀤𑀸𑀬 𑀯𑀼𑀘𑁆𑀘𑀢𑀺 ‘‘𑀲𑀫𑀡𑁄’’𑀢𑀺 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀢𑁄. 𑀅𑀬𑀜𑁆𑀳𑀺 𑀘𑀢𑀼𑀓𑀗𑁆𑀕𑀼𑀢𑁆𑀢𑀭𑀧𑀸𑀴𑀺. 𑀢𑀢𑁆𑀣 𑀧𑀞𑀫𑁄 𑀲𑀫𑀡𑁄𑀢𑀺 𑀲𑁄𑀢𑀸𑀧𑀦𑁆𑀦𑁄. 𑀤𑀼𑀢𑀺𑀬𑁄 𑀲𑀫𑀡𑁄𑀢𑀺 𑀲𑀓𑀤𑀸𑀕𑀸𑀫𑀻. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀢𑀢𑁆𑀣𑁂𑀯 𑁋

‘‘𑀓𑀢𑀫𑁄 𑀘 𑀪𑀺𑀓𑁆𑀔𑀯𑁂 𑀧𑀞𑀫𑁄 𑀲𑀫𑀡𑁄? 𑀇𑀥 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀻’’𑀢𑀺, (𑀅. 𑀦𑀺. 𑁪.𑁨𑁪𑁧) ‘‘𑀓𑀢𑀫𑁄 𑀘 𑀪𑀺𑀓𑁆𑀔𑀯𑁂 𑀤𑀼𑀢𑀺𑀬𑁄 𑀲𑀫𑀡𑁄? 𑀇𑀥 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸 𑀲𑀓𑀤𑀸𑀕𑀸𑀫𑀻 𑀳𑁄𑀢𑀻’’𑀢𑀺 (𑀅. 𑀦𑀺. 𑁪.𑁨𑁪𑁧) 𑀘 𑀆𑀤𑀺.

𑀑𑀓𑀸𑀲𑀦𑁆𑀢𑀺 𑀓𑀜𑁆𑀘𑀺 𑀧𑀤𑁂𑀲𑀫𑀼𑀧𑀸𑀤𑀸𑀬 𑀯𑀼𑀘𑁆𑀘𑀢𑀺 ‘‘𑀢𑀺𑀝𑁆𑀞𑀫𑀸𑀦𑀲𑁆𑀲𑀸’’𑀢𑀺 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀢𑁄.

𑀇𑀥𑁂𑀯 𑀢𑀺𑀝𑁆𑀞𑀫𑀸𑀦𑀲𑁆𑀲𑀸𑀢𑀺 𑀇𑀫𑀺𑀲𑁆𑀲𑀁𑀬𑁂𑀯 𑀇𑀦𑁆𑀤𑀲𑀸𑀮𑀕𑀼𑀳𑀸𑀬𑀁 𑀧𑀢𑀺𑀝𑁆𑀞𑀫𑀸𑀦𑀲𑁆𑀲, 𑀤𑁂𑀯𑀪𑀽𑀢𑀲𑁆𑀲 𑀫𑁂 𑀲𑀢𑁄𑀢𑀺 𑀤𑁂𑀯𑀪𑀸𑀯𑁂𑀦, 𑀤𑁂𑀯𑁄 𑀳𑀼𑀢𑁆𑀯𑀸 𑀯𑀸 𑀪𑀽𑀢𑀲𑁆𑀲 𑀲𑀫𑀸𑀦𑀲𑁆𑀲. 𑀫𑁂𑀢𑀺 𑀅𑀦𑀸𑀤𑀭𑀬𑁄𑀕𑁂 𑀲𑀸𑀫𑀺𑀯𑀘𑀦𑀁. 𑀧𑀼𑀦 𑀫𑁂𑀢𑀺 𑀓𑀢𑁆𑀢𑀼𑀢𑁆𑀣𑁂. 𑀇𑀤𑀜𑁆𑀳𑀺 𑀲𑀓𑁆𑀓𑀧𑀜𑁆𑀳𑀢𑁄 𑀉𑀤𑀸𑀳𑀝𑀁.

𑀧𑀤𑀧𑀽𑀭𑀡𑀫𑀢𑁆𑀢𑀫𑁂𑀯 𑀑𑀓𑀸𑀲𑀸𑀧𑀤𑀺𑀲𑀦𑀲𑁆𑀲𑀸𑀧𑀺 𑀅𑀲𑀫𑁆𑀪𑀯𑁂𑀦 𑀅𑀢𑁆𑀣𑀦𑁆𑀢𑀭𑀲𑁆𑀲 𑀅𑀩𑁄𑀥𑀦𑀢𑁄. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀢𑀣𑀸𑀕𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀫𑁂𑀯 𑀲𑀦𑁆𑀥𑀸𑀬 ‘‘𑀮𑁄𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀁 𑀉𑀬𑁆𑀬𑁄𑀚𑀦𑀧𑀝𑀺𑀜𑁆𑀜𑀸𑀓𑀭𑀡𑀯𑀺𑀲𑀬𑁂 𑀆𑀮𑀧𑀦𑀦𑁆𑀢𑀺 ¶ 𑀧𑀼𑀦 ‘‘𑀫𑀳𑀸𑀭𑀸𑀚𑀸’’𑀢𑀺 𑀆𑀮𑀧𑀢𑀺. ‘‘𑀅𑀭𑀳’’𑀦𑁆𑀢𑀺 𑀆𑀤𑀬𑁄 𑀲𑀤𑁆𑀤𑀸 𑀯𑀺𑀢𑁆𑀣𑀸𑀭𑀺𑀢𑀸𑀢𑀺 𑀬𑁄𑀚𑀦𑀸. 𑀅𑀢𑁆𑀣𑀢𑁄 𑀳𑀺 𑀯𑀺𑀢𑁆𑀣𑀸𑀭𑀡𑀁 𑀲𑀤𑁆𑀤𑀫𑀼𑀔𑁂𑀦𑁂𑀯 𑀳𑁄𑀢𑀻𑀢𑀺 𑀉𑀪𑀬𑀢𑁆𑀣 𑀲𑀤𑁆𑀤𑀕𑁆𑀕𑀳𑀡𑀁 𑀓𑀢𑀁. 𑀬𑀲𑁆𑀫𑀸 𑀧𑀦 ‘‘𑀅𑀧𑀭𑁂𑀳𑀺𑀧𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀢𑀣𑀸𑀕𑀢𑁄’’𑀢𑀺𑀆𑀤𑀺𑀦𑀸 (𑀉𑀤𑀸. 𑀅𑀝𑁆𑀞. 𑁧𑁮; 𑀇𑀢𑀺𑀯𑀼. 𑀅𑀝𑁆𑀞. 𑁩𑁮) 𑀢𑀣𑀸𑀕𑀢-𑀲𑀤𑁆𑀤𑁄 ¶ 𑀉𑀤𑀸𑀦𑀝𑁆𑀞𑀓𑀣𑀸𑀤𑀻𑀲𑀼, ‘‘𑀅𑀭𑀳’’𑀦𑁆𑀢𑀺 𑀆𑀤𑀬𑁄 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀝𑀻𑀓𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑀝𑀻. 𑁧.𑁧𑁩𑁦) 𑀅𑀧𑀭𑁂𑀳𑀺𑀧𑀺 𑀧𑀓𑀸𑀭𑁂𑀳𑀺 𑀯𑀺𑀢𑁆𑀣𑀸𑀭𑀺𑀢𑀸 𑀆𑀘𑀭𑀺𑀬𑁂𑀦, 𑀢𑀲𑁆𑀫𑀸 𑀢𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑀧𑀺 𑀢𑁂𑀲𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸𑀕𑀢𑀲𑁆𑀲 𑀲𑀢𑁆𑀢𑀦𑀺𑀓𑀸𑀬𑀦𑁆𑀢𑁄𑀕𑀥𑀢𑀸𑀬 ‘‘𑀇𑀥 𑀧𑀦 𑀲𑀢𑁆𑀢𑀮𑁄𑀓𑁄 𑀅𑀥𑀺𑀧𑁆𑀧𑁂𑀢𑁄’’𑀢𑀺 𑀯𑀢𑁆𑀯𑀸 𑀢𑀢𑁆𑀣𑀸𑀬𑀁 𑀬𑀲𑁆𑀫𑀺𑀁 𑀲𑀢𑁆𑀢𑀦𑀺𑀓𑀸𑀬𑁂, 𑀬𑀲𑁆𑀫𑀺𑀜𑁆𑀘 𑀑𑀓𑀸𑀲𑁂 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀢𑁆𑀢𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀤𑁂𑀯𑀮𑁄𑀓𑁂, 𑀦 𑀩𑁆𑀭𑀳𑁆𑀫𑀮𑁄𑀓𑁂𑀢𑀺 𑀏𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺.

𑀢𑀲𑁆𑀲𑀸𑀧𑀭𑁂𑀦𑀸𑀢𑀺 𑀢𑀲𑁆𑀲 𑀦𑀺𑀕𑀫𑀲𑁆𑀲 𑀅𑀧𑀭𑁂𑀦, 𑀢𑀢𑁄 𑀩𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁄𑀢𑀺 𑀫𑀳𑀸𑀲𑀸𑀮𑀢𑁄. 𑀑𑀭𑀢𑁄 𑀫𑀚𑁆𑀛𑁂𑀢𑀺 𑀅𑀩𑁆𑀪𑀦𑁆𑀢𑀭𑀁 𑀫𑀚𑁆𑀛𑀺𑀫𑀧𑀤𑁂𑀲𑁄. 𑀏𑀯𑀁 𑀧𑀭𑀺𑀘𑁆𑀙𑀺𑀦𑁆𑀦𑁂𑀢𑀺 𑀧𑀜𑁆𑀘𑀦𑀺𑀫𑀺𑀢𑁆𑀢𑀩𑀤𑁆𑀥𑀸 𑀲𑀻𑀫𑀸 𑀯𑀺𑀬 𑀧𑀜𑁆𑀘𑀳𑀺 𑀬𑀣𑀸𑀯𑀼𑀢𑁆𑀢𑀦𑀺𑀫𑀺𑀢𑁆𑀢𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑁂. 𑀅𑀟𑁆𑀠𑀢𑁂𑀬𑁆𑀬𑀬𑁄𑀚𑀦𑀲𑀢𑁂𑀢𑀺 𑀧𑀡𑁆𑀡𑀸𑀲𑀬𑁄𑀚𑀦𑁂𑀳𑀺 𑀊𑀦𑀢𑀺𑀬𑁄𑀚𑀦𑀲𑀢𑁂. 𑀅𑀬𑀜𑁆𑀳𑀺 𑀫𑀚𑁆𑀛𑀺𑀫𑀚𑀦𑀧𑀤𑁄 𑀫𑀼𑀤𑀺𑀗𑁆𑀕𑀲𑀡𑁆𑀞𑀸𑀦𑁄, 𑀦 𑀲𑀫𑀧𑀭𑀺𑀯𑀝𑁆𑀝𑁄, 𑀦 𑀘 𑀲𑀫𑀘𑀢𑀼𑀭𑀲𑁆𑀲𑁄, 𑀉𑀚𑀼𑀓𑁂𑀦 𑀓𑀢𑁆𑀣𑀘𑀺 𑀅𑀲𑀻𑀢𑀺𑀬𑁄𑀚𑀦𑁄 𑀳𑁄𑀢𑀺, 𑀓𑀢𑁆𑀣𑀘𑀺 𑀬𑁄𑀚𑀦𑀲𑀢𑀺𑀓𑁄, 𑀢𑀣𑀸𑀧𑀺 𑀘𑁂𑀲 𑀓𑀼𑀝𑀺𑀮𑀧𑀭𑀺𑀘𑁆𑀙𑁂𑀤𑁂𑀦 𑀫𑀺𑀦𑀺𑀬𑀫𑀸𑀦𑁄 𑀧𑀭𑀺𑀬𑀦𑁆𑀢 𑀧𑀭𑀺𑀓𑁆𑀔𑁂𑀧𑀢𑁄 𑀦𑀯𑀬𑁄𑀚𑀦𑀲𑀢𑀺𑀓𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀯𑀬𑁄𑀚𑀦𑀲𑀢𑁂’’𑀢𑀺. 𑀅𑀲𑀻𑀢𑀺𑀫𑀳𑀸𑀣𑁂𑀭𑀸𑀢𑀺 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁 𑀲𑀼𑀦𑀸𑀧𑀭𑀦𑁆𑀢𑀓𑀲𑁆𑀲 𑀧𑀼𑀡𑁆𑀡𑀢𑁆𑀣𑁂𑀭𑀲𑁆𑀲𑀸𑀧𑀺 𑀫𑀳𑀸𑀲𑀸𑀯𑀓𑁂𑀲𑀼 𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸. 𑀲𑀼𑀦𑀸𑀧𑀭𑀦𑁆𑀢𑀚𑀦𑀧𑀤𑁄 𑀳𑀺 𑀧𑀘𑁆𑀘𑀦𑁆𑀢𑀯𑀺𑀲𑀬𑁄. 𑀢𑀣𑀸 𑀳𑀺 ‘‘𑀘𑀦𑁆𑀤𑀦𑀫𑀡𑁆𑀟𑀮𑀫𑀸𑀴𑀧𑀝𑀺𑀕𑁆𑀕𑀳𑀡𑁂 𑀪𑀕𑀯𑀸 𑀦 𑀢𑀢𑁆𑀣 𑀅𑀭𑀼𑀡𑀁 𑀉𑀝𑁆𑀞𑀧𑁂𑀢𑀻’’𑀢𑀺 𑀫𑀚𑁆𑀛𑀺𑀫𑀸𑀕𑀫- (𑀫. 𑀦𑀺. 𑀅𑀝𑁆𑀞. 𑁪.𑁩𑁯𑁭) 𑀲𑀁𑀬𑀼𑀢𑁆𑀢𑀸𑀕𑀫𑀝𑁆𑀞𑀓𑀣𑀸𑀲𑀼 (𑀲𑀁. 𑀦𑀺. 𑀅𑀝𑁆𑀞. 𑁩.𑁪.𑁮𑁮-𑁮𑁯) 𑀯𑀼𑀢𑁆𑀢𑀁. 𑀲𑀸𑀭𑀧𑁆𑀧𑀢𑁆𑀢𑀸𑀢𑀺 𑀓𑀼𑀮𑀪𑁄𑀕𑀺𑀲𑁆𑀲𑀭𑀺𑀬𑀸𑀤𑀺𑀯𑀲𑁂𑀦, 𑀲𑀻𑀮𑀲𑀸𑀭𑀸𑀤𑀺𑀯𑀲𑁂𑀦 𑀘 𑀲𑀸𑀭𑀪𑀽𑀢𑀸. 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀢𑀺𑀩𑁆𑀭𑀳𑁆𑀫𑀸𑀬𑀼𑀧𑁄𑀓𑁆𑀔𑀭𑀲𑀸𑀢𑀺𑀆𑀤𑀺𑀩𑁆𑀭𑀸𑀳𑁆𑀫𑀡𑀸 𑀘𑁂𑀯 𑀅𑀦𑀸𑀣𑀧𑀺𑀡𑁆𑀟𑀺𑀓𑀸𑀤𑀺𑀕𑀳𑀧𑀢𑀺𑀓𑀸 𑀘.

𑀢𑀢𑁆𑀣𑀸𑀢𑀺 𑀫𑀚𑁆𑀛𑀺𑀫𑀧𑀤𑁂𑀲𑁂, 𑀢𑀲𑁆𑀫𑀺𑀁𑀬𑁂𑀯 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀘𑀦𑁂 𑀯𑀸. 𑀲𑀼𑀚𑀸𑀢𑀸𑀬𑀸𑀢𑀺 𑀏𑀯𑀁𑀦𑀸𑀫𑀺𑀓𑀸𑀬 𑀧𑀞𑀫𑀁 𑀲𑀭𑀡𑀕𑀫𑀦𑀺𑀓𑀸𑀬 𑀬𑀲𑀢𑁆𑀣𑁂𑀭𑀫𑀸𑀢𑀼𑀬𑀸. 𑀘𑀢𑀽𑀲𑀼 𑀧𑀦𑁂𑀢𑁂𑀲𑀼 𑀯𑀺𑀓𑀧𑁆𑀧𑁂𑀲𑀼 𑀧𑀞𑀫𑁄 𑀩𑀼𑀤𑁆𑀥𑀪𑀸𑀯𑀸𑀬 𑀆𑀲𑀦𑁆𑀦𑀢𑀭𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦 ¶ 𑀯𑀼𑀢𑁆𑀢𑁄. 𑀆𑀲𑀦𑁆𑀦𑀢𑀭𑀸𑀬 𑀳𑀺 𑀧𑀝𑀺𑀧𑀢𑁆𑀢𑀺𑀬𑀸 𑀞𑀺𑀢𑁄𑀧𑀺 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀘𑁆𑀘𑀢𑀺 𑀉𑀧𑁆𑀧𑀸𑀤𑀲𑁆𑀲 𑀏𑀓𑀦𑁆𑀢𑀺𑀓𑀢𑁆𑀢𑀸, 𑀧𑀕𑁂𑀯 𑀧𑀝𑀺𑀧𑀢𑁆𑀢𑀺𑀬𑀸 𑀫𑀢𑁆𑀣𑀓𑁂 𑀞𑀺𑀢𑁄. 𑀤𑀼𑀢𑀺𑀬𑁄 𑀩𑀼𑀤𑁆𑀥𑀪𑀸𑀯𑀸𑀯𑀳𑀧𑀩𑁆𑀩𑀚𑁆𑀚𑀢𑁄 𑀧𑀝𑁆𑀞𑀸𑀬 𑀆𑀲𑀦𑁆𑀦𑀫𑀢𑁆𑀢𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦, 𑀢𑀢𑀺𑀬𑁄 𑀩𑀼𑀤𑁆𑀥𑀓𑀭𑀥𑀫𑁆𑀫𑀧𑀸𑀭𑀺𑀧𑀽𑀭𑀺𑀢𑁄 𑀧𑀝𑁆𑀞𑀸𑀬 𑀩𑀼𑀤𑁆𑀥𑀪𑀸𑀯𑀸𑀬 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦. 𑀦 𑀳𑀺 𑀫𑀳𑀸𑀲𑀢𑁆𑀢𑀸𑀦𑀁 𑀅𑀦𑁆𑀢𑀺𑀫𑀪𑀯𑀽𑀧𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀁 𑀦𑀸𑀫 𑀅𑀢𑁆𑀣𑀺 𑀩𑀼𑀤𑁆𑀥𑀢𑁆𑀣𑀸𑀬 𑀓𑀸𑀮𑀫𑀸𑀕𑀫𑀬𑀫𑀸𑀦𑁂𑀦𑁂𑀯 𑀢𑀢𑁆𑀣 𑀧𑀢𑀺𑀝𑁆𑀞𑀦𑀢𑁄. 𑀘𑀢𑀼𑀢𑁆𑀣𑁄 𑀩𑀼𑀤𑁆𑀥𑀪𑀸𑀯𑀓𑀭𑀥𑀫𑁆𑀫𑀲𑀫𑀸𑀭𑀫𑁆𑀪𑀢𑁄 𑀧𑀝𑁆𑀞𑀸𑀬 𑀩𑁄𑀥𑀺𑀬𑀸 𑀦𑀺𑀬𑀢𑀪𑀸𑀯𑀤𑀲𑁆𑀲𑀦𑁂𑀦. 𑀩𑁄𑀥𑀺𑀬𑀸 𑀳𑀺 𑀦𑀺𑀬𑀢𑀪𑀸𑀯𑀧𑁆𑀧𑀢𑁆𑀢𑀺𑀢𑁄 𑀧𑀪𑀼𑀢𑀺 ‘‘𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀺𑀜𑁆𑀜𑀽𑀳𑀺 𑀯𑀢𑁆𑀢𑀼𑀁 𑀲𑀓𑁆𑀓𑀸 𑀉𑀧𑁆𑀧𑀸𑀤𑀲𑁆𑀲 𑀏𑀓𑀦𑁆𑀢𑀺𑀓𑀢𑁆𑀢𑀸. 𑀬𑀣𑀸 𑀧𑀦 ‘‘𑀲𑀦𑁆𑀤𑀦𑁆𑀢𑀺 𑀦𑀤𑀺𑀬𑁄’’𑀢𑀺 𑀲𑀦𑁆𑀤𑀦𑀓𑀺𑀭𑀺𑀬𑀸𑀬 𑀅𑀯𑀺𑀘𑁆𑀙𑁂𑀤𑀫𑀼𑀧𑀸𑀤𑀸𑀬 𑀯𑀢𑁆𑀢𑀫𑀸𑀦𑀧𑁆𑀧𑀬𑁄𑀕𑁄 ¶ , 𑀏𑀯𑀁 𑀉𑀧𑁆𑀧𑀸𑀤𑀢𑁆𑀣𑀸𑀬 𑀧𑀝𑀺𑀧𑀚𑁆𑀚𑀦𑀓𑀺𑀭𑀺𑀬𑀸𑀬 𑀅𑀯𑀺𑀘𑁆𑀙𑁂𑀤𑀫𑀼𑀧𑀸𑀤𑀸𑀬 𑀘𑀢𑀽𑀲𑀼𑀧𑀺 𑀯𑀺𑀓𑀧𑁆𑀧𑁂𑀲𑀼 ‘‘𑀉𑀧𑁆𑀧𑀚𑁆𑀚𑀢𑀺 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁, 𑀧𑀯𑀢𑁆𑀢𑀸𑀧𑀭𑀢𑀯𑀢𑁆𑀢𑀫𑀸𑀦𑀯𑀘𑀦𑀜𑁆𑀘𑁂𑀢𑀁. 𑀘𑀢𑀼𑀩𑁆𑀩𑀺𑀥𑀜𑁆𑀳𑀺 𑀯𑀢𑁆𑀢𑀫𑀸𑀦𑀮𑀓𑁆𑀔𑀡𑀁 𑀲𑀤𑁆𑀤𑀲𑀢𑁆𑀣𑁂 𑀧𑀓𑀸𑀲𑀺𑀢𑀁 𑁋

‘‘𑀦𑀺𑀘𑁆𑀘𑀧𑀯𑀢𑁆𑀢𑀺 𑀲𑀫𑀻𑀧𑁄, 𑀧𑀯𑀢𑁆𑀢𑀼𑀧𑀭𑀢𑁄 𑀢𑀣𑀸;

𑀧𑀯𑀢𑁆𑀢𑀸𑀧𑀭𑀢𑁄 𑀘𑁂𑀯, 𑀯𑀢𑁆𑀢𑀫𑀸𑀦𑁄 𑀘𑀢𑀼𑀩𑁆𑀩𑀺𑀥𑁄’’𑀢𑀺.

𑀬𑀲𑁆𑀫𑀸 𑀧𑀦 𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸𑀦𑀁 𑀯𑀺𑀬 𑀦 𑀧𑀝𑀺𑀧𑀸𑀝𑀺𑀬𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀸𑀤𑀻𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀳𑁂𑀯 𑀧𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀓𑀮𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀕𑀼𑀡𑀭𑀸𑀲𑀺 𑀆𑀕𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀦𑀺𑀧𑁆𑀨𑀢𑁆𑀢𑀲𑀩𑁆𑀩𑀓𑀺𑀘𑁆𑀘𑀢𑁆𑀢𑀸 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑁄 𑀦𑀸𑀫𑀸𑀢𑀺 𑀏𑀓𑀗𑁆𑀕𑀼𑀢𑁆𑀢𑀭𑀯𑀡𑁆𑀡𑀦𑀸𑀬𑀁 (𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁭𑁦) 𑀯𑀼𑀢𑁆𑀢𑀁. 𑀅𑀲𑀢𑀺 𑀳𑀺 𑀦𑀺𑀧𑁆𑀨𑀢𑁆𑀢𑀲𑀩𑁆𑀩𑀓𑀺𑀘𑁆𑀘𑀢𑁆𑀢𑁂 𑀦 𑀢𑀸𑀯𑀢𑀸 ‘‘𑀉𑀧𑁆𑀧𑀦𑁆𑀦𑁄’’𑀢𑀺 𑀯𑀢𑁆𑀢𑀼𑀫𑀭𑀳𑀢𑀺. 𑀲𑀩𑁆𑀩𑀧𑀞𑀫𑀁 𑀉𑀧𑁆𑀧𑀦𑁆𑀦𑀪𑀸𑀯𑀦𑁆𑀢𑀺 𑀘𑀢𑀽𑀲𑀼 𑀯𑀺𑀓𑀧𑁆𑀧𑁂𑀲𑀼 𑀲𑀩𑁆𑀩𑀧𑀞𑀫𑀁 ‘‘𑀢𑀣𑀸𑀕𑀢𑁄 𑀲𑀼𑀚𑀸𑀢𑀸𑀬…𑀧𑁂… 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁 𑀢𑀣𑀸𑀕𑀢𑀲𑁆𑀲 𑀉𑀧𑁆𑀧𑀦𑁆𑀦𑀢𑀸𑀲𑀗𑁆𑀔𑀸𑀢𑀁 𑀅𑀢𑁆𑀣𑀺𑀪𑀸𑀯𑀁. 𑀢𑀤𑁂𑀯 𑀲𑀦𑁆𑀥𑀸𑀬 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 𑀩𑀼𑀤𑁆𑀥𑀪𑀸𑀯𑀸𑀬 𑀆𑀲𑀦𑁆𑀦𑀢𑀭𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲𑁂𑀯 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀅𑀬𑀫𑁂𑀯 𑀳𑀺 𑀅𑀢𑁆𑀣𑁄 𑀫𑀼𑀔𑁆𑀬𑀢𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀢𑁆𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀢𑀣𑀸𑀕𑀢𑁄…𑀧𑁂… 𑀅𑀢𑁆𑀣𑁄’’𑀢𑀺.

𑀏𑀢𑁆𑀣 𑀘 ‘‘𑀉𑀧𑁆𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑁂 𑀅𑀢𑀻𑀢𑀓𑀸𑀮𑀯𑀲𑁂𑀦 𑀓𑁄𑀘𑀺 𑀅𑀢𑁆𑀣𑀁 𑀕𑀡𑁆𑀳𑁂𑀬𑁆𑀬𑀸𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀉𑀧𑁆𑀧𑀦𑁆𑀦𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀉𑀧𑁆𑀧𑀦𑁆𑀦𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧𑁭) 𑀯𑀺𑀬 𑀳𑀺 𑀇𑀥 𑀉𑀧𑁆𑀧𑀦𑁆𑀦𑀲𑀤𑁆𑀤𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑀺𑀓𑁄. 𑀦𑀦𑀼 𑀘 𑀅𑀭𑀳𑀢𑁆𑀢𑀨𑀮𑀲𑀫𑀗𑁆𑀕𑀻𑀲𑀗𑁆𑀔𑀸𑀢𑁄 𑀉𑀧𑁆𑀧𑀦𑁆𑀦𑁄𑀬𑁂𑀯 𑀢𑀣𑀸𑀕𑀢𑁄 𑀧𑀯𑁂𑀤𑀦𑀤𑁂𑀲𑀦𑀸𑀤𑀻𑀦𑀺 𑀲𑀸𑀥𑁂𑀢𑀺, 𑀅𑀣 𑀓𑀲𑁆𑀫𑀸 ¶ 𑀬𑀣𑀸𑀯𑀼𑀢𑁆𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑀧𑀭𑀺𑀬𑁄𑀲𑀸𑀦𑁄 𑀉𑀧𑁆𑀧𑀚𑁆𑀚𑀫𑀸𑀦𑁄𑀬𑁂𑀯 𑀢𑀣𑀸𑀕𑀢𑁄 𑀅𑀥𑀺𑀧𑁆𑀧𑁂𑀢𑁄. 𑀦 𑀳𑀺 𑀲𑁄 𑀧𑀯𑁂𑀤𑀦𑀤𑁂𑀲𑀦𑀸𑀤𑀻𑀦𑀺 𑀲𑀸𑀥𑁂𑀢𑀺 𑀫𑀥𑀼𑀧𑀸𑀬𑀸𑀲𑀪𑁄𑀚𑀦𑀢𑁄 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑁄, 𑀢𑀸𑀯 𑀢𑁂𑀲𑀁 𑀓𑀺𑀘𑁆𑀘𑀸𑀦𑀫𑀲𑀸𑀥𑀦𑀢𑁄𑀢𑀺? 𑀦 𑀳𑁂𑀯𑀁 𑀤𑀝𑁆𑀞𑀩𑁆𑀩𑀁, 𑀩𑀼𑀤𑁆𑀥𑀪𑀸𑀯𑀸𑀬 𑀆𑀲𑀦𑁆𑀦𑀢𑀭𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀕𑀳𑀡𑁂𑀦𑁂𑀯 𑀅𑀭𑀳𑀢𑁆𑀢𑀨𑀮𑀲𑀫𑀗𑁆𑀕𑀻𑀲𑀗𑁆𑀔𑀸𑀢𑀲𑁆𑀲 𑀉𑀧𑁆𑀧𑀦𑁆𑀦𑀲𑁆𑀲𑀸𑀧𑀺 𑀕𑀳𑀺𑀢𑀢𑁆𑀢𑀸. 𑀓𑀸𑀭𑀡𑀕𑁆𑀕𑀳𑀡𑁂𑀦𑁂𑀯 𑀳𑀺 𑀨𑀮𑀫𑁆𑀧𑀺 𑀕𑀳𑀺𑀢𑀁 𑀢𑀤𑀯𑀺𑀦𑀸𑀪𑀸𑀯𑀺𑀢𑁆𑀢𑀸. 𑀇𑀢𑀺 𑀧𑀯𑁂𑀤𑀦𑀤𑁂𑀲𑀦𑀸𑀤𑀺𑀲𑀸𑀥𑀓𑀲𑁆𑀲 𑀅𑀭𑀳𑀢𑁆𑀢𑀨𑀮𑀲𑀫𑀗𑁆𑀕𑀺𑀦𑁄𑀧𑀺 𑀢𑀣𑀸𑀕𑀢𑀲𑁆𑀲 𑀕𑀳𑁂𑀢𑀩𑁆𑀩𑀢𑁆𑀢𑀸 𑀦𑁂𑀬𑁆𑀬𑀢𑁆𑀣𑀫𑀺𑀤𑀁 ‘‘𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀘𑀦𑀁 𑀤𑀝𑁆𑀞𑀩𑁆𑀩𑀦𑁆𑀢𑀺. 𑀢𑀣𑀸 𑀳𑀺 𑀅𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬𑀁 (𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁭𑁦) 𑀉𑀧𑁆𑀧𑀚𑁆𑀚𑀫𑀸𑀦𑁄, 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄𑀢𑀺 𑀢𑀻𑀳𑀺 𑀓𑀸𑀮𑁂𑀳𑀺 𑀅𑀢𑁆𑀣𑀯𑀺𑀪𑀚𑀦𑁂 ‘‘𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀮𑀤𑁆𑀥𑀩𑁆𑀬𑀸𑀓𑀭𑀡𑀢𑁄 𑀬𑀸𑀯 𑀅𑀦𑀸𑀕𑀸𑀫𑀺𑀨𑀮𑀸 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫, 𑀅𑀭𑀳𑀢𑁆𑀢𑀫𑀕𑁆𑀕𑀓𑁆𑀔𑀡𑁂 𑀧𑀦 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫, 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑁄 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁. 𑀅𑀬𑀫𑁂𑀢𑁆𑀣 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑀲𑁆𑀲 𑀫𑀢𑀺. 𑀬𑀲𑁆𑀫𑀸 𑀧𑀦 𑀏𑀓𑀗𑁆𑀕𑀼𑀢𑁆𑀢𑀭𑀝𑁆𑀞𑀓𑀣𑀸𑀬𑀁 ‘‘𑀏𑀓𑀧𑀼𑀕𑁆𑀕𑀮𑁄 𑀪𑀺𑀓𑁆𑀔𑀯𑁂 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀅. 𑀦𑀺. 𑁧.𑁧𑁭𑁦) 𑀲𑀼𑀢𑁆𑀢𑀧𑀤𑀯𑀡𑁆𑀡𑀦𑀸𑀬𑀁 ¶ ‘‘𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑁂 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑀁𑀬𑁂𑀯 𑀲𑀦𑁆𑀥𑀸𑀬 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁, ‘‘𑀉𑀧𑁆𑀧𑀦𑁆𑀦𑁄 𑀳𑁄𑀢𑀻𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄’’𑀢𑀺 (𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁭𑁦) 𑀆𑀕𑀢𑀁, 𑀢𑀲𑁆𑀫𑀸 𑀇𑀥𑀸𑀧𑀺 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑀫𑁂𑀯 𑀲𑀦𑁆𑀥𑀸𑀬 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀲𑀩𑁆𑀩𑀧𑀞𑀫𑀁 𑀉𑀧𑁆𑀧𑀦𑁆𑀦𑀪𑀸𑀯𑀁 𑀲𑀦𑁆𑀥𑀸𑀬𑀸’’𑀢𑀺 𑀇𑀫𑀺𑀦𑀸. 𑀢𑁂𑀦𑀸𑀳 ‘‘𑀉𑀧𑁆𑀧𑀦𑁆𑀦𑁄 𑀳𑁄𑀢𑀻𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄’’𑀢𑀺. 𑀲𑀩𑁆𑀩𑀧𑀞𑀫𑀁 𑀉𑀧𑁆𑀧𑀦𑁆𑀦𑀪𑀸𑀯𑀦𑁆𑀢𑀺 𑀘 𑀲𑀩𑁆𑀩𑀯𑁂𑀦𑁂𑀬𑁆𑀬𑀸𑀦𑀁 𑀧𑀞𑀫𑀢𑀭𑀁 𑀅𑀭𑀳𑀢𑁆𑀢𑀨𑀮𑀯𑀲𑁂𑀦 𑀉𑀧𑁆𑀧𑀦𑁆𑀦𑀪𑀸𑀯𑀦𑁆𑀢𑀺 𑀅𑀢𑁆𑀣𑁄. ‘‘𑀉𑀧𑁆𑀧𑀦𑁆𑀦𑁄 𑀳𑁄𑀢𑀻’’𑀢𑀺 𑀘 𑀇𑀫𑀺𑀦𑀸 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑀯𑀲𑁂𑀦 𑀅𑀢𑀻𑀢𑀓𑀸𑀮𑀁 𑀤𑀲𑁆𑀲𑁂𑀢𑀻𑀢𑀺. 𑀅𑀬𑀫𑁂𑀯 𑀘 𑀦𑀬𑁄 𑀅𑀗𑁆𑀕𑀼𑀢𑁆𑀢𑀭𑀝𑀻𑀓𑀸𑀓𑀸𑀭𑁂𑀦 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀅𑀥𑀺𑀧𑁆𑀧𑁂𑀢𑁄𑀢𑀺.

𑀲𑁄 𑀪𑀕𑀯𑀸𑀢𑀺 𑀬𑁄 𑀲𑁄 𑀢𑀣𑀸𑀕𑀢𑁄 ‘‘𑀅𑀭𑀳’’𑀦𑁆𑀢𑀺𑀆𑀤𑀺𑀦𑀸 𑀧𑀓𑀺𑀢𑁆𑀢𑀺𑀢𑀕𑀼𑀡𑁄, 𑀲𑁄 𑀪𑀕𑀯𑀸. 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀇𑀫𑀲𑀤𑁆𑀤𑁂𑀦 𑀦𑀺𑀤𑀲𑁆𑀲𑁂𑀢𑀺 𑀯𑀼𑀘𑁆𑀘𑀫𑀸𑀦𑀢𑁆𑀣𑀲𑁆𑀲 𑀧𑀭𑀸𑀫𑀲𑀦𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀦𑀬𑀺𑀤𑀁 𑀫𑀳𑀸𑀚𑀦𑀲𑁆𑀲 𑀲𑀫𑁆𑀫𑀼𑀔𑀫𑀢𑁆𑀢𑀁 𑀲𑀦𑁆𑀥𑀸𑀬 ‘‘𑀇𑀫𑀁 𑀮𑁄𑀓’’𑀦𑁆𑀢𑀺 𑀯𑀼𑀢𑁆𑀢𑀁, 𑀅𑀣 𑀔𑁄 ‘‘𑀲𑀤𑁂𑀯𑀓’’𑀦𑁆𑀢𑀺𑀆𑀤𑀺𑀦𑀸 𑀯𑀓𑁆𑀔𑀫𑀸𑀦𑀁 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁 𑀲𑀦𑁆𑀥𑀸𑀬𑀸𑀢𑀺. ‘‘𑀲𑀳 𑀤𑁂𑀯𑁂𑀳𑀺 𑀲𑀤𑁂𑀯𑀓’’𑀦𑁆𑀢𑀺𑀆𑀤𑀺𑀦𑀸 𑀬𑀣𑀸𑀯𑀸𑀓𑁆𑀬𑀁 𑀧𑀤𑀦𑀺𑀩𑁆𑀩𑀘𑀦𑀁 𑀯𑀼𑀢𑁆𑀢𑀁, 𑀬𑀣𑀸𑀧𑀤𑀁 𑀧𑀦 ‘‘𑀲𑀤𑁂𑀯𑀓𑁄’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀁, 𑀇𑀫𑁂 𑀘 𑀢𑀕𑁆𑀕𑀼𑀡𑀲𑀁𑀯𑀺𑀜𑁆𑀜𑀸𑀡𑀩𑀸𑀳𑀺𑀭𑀢𑁆𑀣𑀲𑀫𑀸𑀲𑀸. 𑀏𑀢𑁆𑀣 𑀳𑀺 𑀅𑀯𑀬𑀯𑁂𑀦 𑀯𑀺𑀕𑁆𑀕𑀳𑁄, 𑀲𑀫𑀼𑀤𑀸𑀬𑁄 𑀲𑀫𑀸𑀲𑀢𑁆𑀣𑁄 𑀳𑁄𑀢𑀺 𑀮𑁄𑀓𑀸𑀯𑀬𑀯𑁂𑀦 ¶ 𑀓𑀢𑀯𑀺𑀕𑁆𑀕𑀳𑁂𑀦 𑀮𑁄𑀓𑀲𑀫𑀼𑀤𑀸𑀬𑀲𑁆𑀲 𑀬𑀣𑀸𑀭𑀳𑀁 𑀮𑀩𑁆𑀪𑀫𑀸𑀦𑀢𑁆𑀢𑀸. 𑀲𑀫𑀯𑀸𑀬𑀚𑁄𑀢𑀓𑀲𑀳𑀲𑀤𑁆𑀤𑀬𑁄𑀕𑁂 𑀳𑀺 𑀅𑀬𑀫𑁂𑀯 𑀲𑀫𑀸𑀲𑁄 𑀯𑀺𑀜𑁆𑀜𑀸𑀬𑀢𑀺. 𑀤𑁂𑀯𑁂𑀳𑀻𑀢𑀺 𑀘 𑀧𑀜𑁆𑀘𑀓𑀸𑀫𑀸𑀯𑀘𑀭𑀤𑁂𑀯𑁂𑀳𑀺, 𑀅𑀭𑀽𑀧𑀸𑀯𑀘𑀭𑀤𑁂𑀯𑁂𑀳𑀺 𑀯𑀸. 𑀩𑁆𑀭𑀳𑁆𑀫𑀼𑀦𑀸𑀢𑀺 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀩𑁆𑀭𑀳𑁆𑀫𑀼𑀦𑀸, 𑀭𑀽𑀧𑀸𑀯𑀘𑀭𑀩𑁆𑀭𑀳𑁆𑀫𑀼𑀦𑀸 𑀏𑀯 𑀯𑀸, 𑀩𑀳𑀼𑀓𑀢𑁆𑀢𑀼𑀓𑀸𑀤𑀻𑀦𑀫𑀺𑀯 𑀦𑁂𑀲𑀁 𑀲𑀺𑀤𑁆𑀥𑀺. 𑀧𑀚𑀸𑀢𑀢𑁆𑀢𑀸𑀢𑀺 𑀬𑀣𑀸𑀲𑀓𑀁 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀧𑀓𑀸𑀭𑁂𑀦 𑀦𑀺𑀩𑁆𑀩𑀢𑁆𑀢𑀓𑀢𑁆𑀢𑀸.

𑀏𑀯𑀁 𑀯𑀘𑀦𑀢𑁆𑀣𑀢𑁄 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀯𑀘𑀦𑀻𑀬𑀢𑁆𑀣𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀜𑁆𑀘𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁 𑀧𑀸𑀭𑀺𑀲𑁂𑀲𑀜𑀸𑀬𑁂𑀦 𑀇𑀢𑀭𑁂𑀲𑀁 𑀧𑀤𑀦𑁆𑀢𑀭𑁂𑀳𑀺 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸. 𑀙𑀝𑁆𑀞𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁 𑀧𑀘𑁆𑀘𑀸𑀲𑀢𑁆𑀢𑀺𑀜𑀸𑀬𑁂𑀦. 𑀢𑀢𑁆𑀣 𑀳𑀺 𑀫𑀸𑀭𑁄 𑀚𑀸𑀢𑁄, 𑀢𑀦𑁆𑀦𑀺𑀯𑀸𑀲𑀻 𑀘. 𑀬𑀲𑁆𑀫𑀸 𑀘𑁂𑀲 𑀤𑀸𑀫𑀭𑀺𑀓𑀭𑀸𑀚𑀧𑀼𑀢𑁆𑀢𑁄 𑀯𑀺𑀬 𑀢𑀢𑁆𑀣 𑀯𑀲𑀺𑀢𑀢𑁆𑀢𑀸 𑀧𑀸𑀓𑀝𑁄, 𑀢𑀲𑁆𑀫𑀸 𑀲𑀦𑁆𑀢𑁂𑀲𑀼𑀧𑀺 𑀅𑀜𑁆𑀜𑁂𑀲𑀼 𑀯𑀲𑀯𑀢𑁆𑀢𑀺𑀫𑀳𑀸𑀭𑀸𑀚𑀸𑀤𑀻𑀲𑀼 𑀧𑀸𑀓𑀝𑀢𑀭𑁂𑀦 𑀢𑁂𑀦𑁂𑀯 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑁄𑀢𑀺, 𑀅𑀬𑀜𑁆𑀘 𑀦𑀬𑁄 𑀫𑀚𑁆𑀛𑀺𑀫𑀸𑀕𑀫𑀝𑁆𑀞𑀓𑀣𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁨.𑁨𑁯𑁦) 𑀧𑀓𑀸𑀲𑀺𑀢𑁄𑀯. 𑀫𑀸𑀭𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀢𑀁𑀲𑀫𑁆𑀩𑀦𑁆𑀥𑀺𑀦𑁄 𑀤𑁂𑀯𑀸𑀧𑀺 𑀕𑀳𑀺𑀢𑀸 𑀑𑀓𑀸𑀲𑀮𑁄𑀓𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢𑀮𑁄𑀓𑀲𑁆𑀲 𑀕𑀳𑀡𑀢𑁄. 𑀏𑀯𑀜𑁆𑀳𑀺 𑀯𑀲𑀯𑀢𑁆𑀢𑀺𑀲𑀢𑁆𑀢𑀮𑁄𑀓𑀲𑁆𑀲 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁 𑀳𑁄𑀢𑀺. 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀩𑁆𑀭𑀳𑁆𑀫𑀕𑁆𑀕𑀳𑀡𑀫𑁆𑀧𑀺 𑀧𑀘𑁆𑀘𑀸𑀲𑀢𑁆𑀢𑀺𑀜𑀸𑀬𑁂𑀦. 𑀧𑀘𑁆𑀘𑀢𑁆𑀣𑀺𑀓𑀧𑀘𑁆𑀘𑀸𑀫𑀺𑀢𑁆𑀢𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀦𑁆𑀢𑀺 𑀧𑀘𑁆𑀘𑀢𑁆𑀣𑀺𑀓𑀸 𑀏𑀯 𑀧𑀘𑁆𑀘𑀸𑀫𑀺𑀢𑁆𑀢𑀸, 𑀢𑁂𑀬𑁂𑀯 𑀲𑀫𑀡𑀩𑁆𑀭𑀸𑀳𑁆𑀫𑀡𑀸, 𑀢𑁂𑀲𑀁 𑀕𑀳𑀡𑀁 𑀢𑀣𑀸, 𑀢𑁂𑀦 𑀩𑀸𑀳𑀺𑀭𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀁 𑀯𑀼𑀢𑁆𑀢𑀁, 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁 𑀅𑀧𑀘𑁆𑀘𑀢𑁆𑀣𑀺𑀓𑀧𑀘𑁆𑀘𑀸𑀫𑀺𑀢𑁆𑀢𑀸𑀦𑀫𑁆𑀧𑀺 𑀢𑁂𑀲𑀁 𑀇𑀫𑀺𑀦𑀸 𑀕𑀳𑀡𑀢𑁄. 𑀲𑀫𑀺𑀢𑀧𑀸𑀧𑀩𑀸𑀳𑀺𑀢𑀧𑀸𑀧𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀦𑁆𑀢𑀺 ¶ 𑀧𑀦 𑀲𑀸𑀲𑀦𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀸𑀫𑀁 ‘‘𑀲𑀤𑁂𑀯𑀓’’𑀦𑁆𑀢𑀺𑀆𑀤𑀺𑀯𑀺𑀲𑁂𑀲𑀦𑀸𑀦𑀁 𑀯𑀲𑁂𑀦𑁂𑀯 𑀲𑀢𑁆𑀢𑀯𑀺𑀲𑀬𑁄𑀧𑀺 𑀮𑁄𑀓𑀲𑀤𑁆𑀤𑁄 𑀯𑀺𑀜𑁆𑀜𑀸𑀬𑀢𑀺 𑀲𑀫𑀯𑀸𑀬𑀢𑁆𑀣𑀯𑀲𑁂𑀦 𑀢𑀼𑀮𑁆𑀬𑀬𑁄𑀕𑀯𑀺𑀲𑀬𑀢𑁆𑀢𑀸 𑀢𑁂𑀲𑀁, ‘‘𑀲𑀮𑁄𑀫𑀓𑁄 𑀲𑀧𑀓𑁆𑀔𑀓𑁄’’𑀢𑀺𑀆𑀤𑀻𑀲𑀼 𑀧𑀦 𑀯𑀺𑀚𑁆𑀚𑀫𑀸𑀦𑀢𑁆𑀣𑀯𑀲𑁂𑀦 𑀅𑀢𑀼𑀮𑁆𑀬𑀬𑁄𑀕𑀯𑀺𑀲𑀬𑁂𑀧𑀺 𑀅𑀬𑀁 𑀲𑀫𑀸𑀲𑁄 𑀮𑀩𑁆𑀪𑀢𑀻𑀢𑀺 𑀩𑁆𑀬𑀪𑀺𑀘𑀸𑀭𑀤𑀲𑁆𑀲𑀦𑀢𑁄 𑀅𑀩𑁆𑀬𑀪𑀺𑀘𑀸𑀭𑁂𑀦𑀢𑁆𑀣𑀜𑀸𑀧𑀓𑀁 𑀧𑀚𑀸𑀕𑀳𑀡𑀦𑁆𑀢𑀺 𑀆𑀳 ‘‘𑀧𑀚𑀸𑀯𑀘𑀦𑁂𑀦 𑀲𑀢𑁆𑀢𑀮𑁄𑀓𑀕𑁆𑀕𑀳𑀡’’𑀦𑁆𑀢𑀺, 𑀦 𑀧𑀦 𑀮𑁄𑀓𑀲𑀤𑁆𑀤𑁂𑀦 𑀲𑀢𑁆𑀢𑀮𑁄𑀓𑀲𑁆𑀲 𑀅𑀕𑁆𑀕𑀳𑀺𑀢𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀢𑀻𑀳𑀺 𑀧𑀤𑁂𑀳𑀺 𑀑𑀓𑀸𑀲𑀮𑁄𑀓𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢𑀮𑁄𑀓𑁄’’𑀢𑀺. 𑀲𑀤𑁂𑀯𑀓𑀸𑀤𑀺𑀯𑀘𑀦𑁂𑀦 𑀉𑀧𑀧𑀢𑁆𑀢𑀺𑀤𑁂𑀯𑀸𑀦𑀁, 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻𑀯𑀘𑀦𑁂𑀦 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀦𑀜𑁆𑀘 𑀕𑀳𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀤𑁂𑀯…𑀧𑁂… 𑀫𑀦𑀼𑀲𑁆𑀲𑀕𑁆𑀕𑀳𑀡’’𑀦𑁆𑀢𑀺. 𑀢𑀢𑁆𑀣 𑀲𑀫𑁆𑀫𑀼𑀢𑀺𑀤𑁂𑀯𑀸 𑀭𑀸𑀚𑀸𑀦𑁄 ¶ . 𑀅𑀯𑀲𑁂𑀲𑀫𑀦𑀼𑀲𑁆𑀲𑀕𑁆𑀕𑀳𑀡𑀦𑁆𑀢𑀺 𑀲𑀫𑁆𑀫𑀼𑀢𑀺𑀤𑁂𑀯𑁂𑀳𑀺, 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀘 𑀅𑀯𑀲𑀺𑀝𑁆𑀞𑀫𑀦𑀼𑀲𑁆𑀲𑀸𑀦𑀁 𑀕𑀳𑀡𑀁. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀧𑀤𑁂𑀲𑀼. 𑀢𑀻𑀳𑀺 𑀧𑀤𑁂𑀳𑀻𑀢𑀺 𑀲𑀤𑁂𑀯𑀓𑀲𑀫𑀸𑀭𑀓𑀲𑀩𑁆𑀭𑀳𑁆𑀫𑀓𑀧𑀤𑁂𑀳𑀺. 𑀤𑁆𑀯𑀻𑀳𑀻𑀢𑀺 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻𑀲𑀤𑁂𑀯𑀫𑀦𑀼𑀲𑁆𑀲𑀧𑀤𑁂𑀳𑀺. 𑀲𑀫𑀸𑀲𑀧𑀤𑀢𑁆𑀣𑁂𑀲𑀼 𑀲𑀢𑁆𑀢𑀮𑁄𑀓𑀲𑁆𑀲𑀧𑀺 𑀯𑀼𑀢𑁆𑀢𑀦𑀬𑁂𑀦 𑀕𑀳𑀺𑀢𑀢𑁆𑀢𑀸 ‘‘𑀑𑀓𑀸𑀲𑀮𑁄𑀓𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢𑀮𑁄𑀓𑁄’’𑀢𑀺 𑀯𑀼𑀢𑁆𑀢𑀁.

‘‘𑀅𑀧𑀭𑁄 𑀦𑀬𑁄’’𑀢𑀺𑀆𑀤𑀺𑀦𑀸 𑀅𑀧𑀭𑀫𑁆𑀧𑀺 𑀯𑀘𑀦𑀻𑀬𑀢𑁆𑀣𑀫𑀸𑀳. 𑀅𑀭𑀽𑀧𑀺𑀦𑁄𑀧𑀺 𑀲𑀢𑁆𑀢𑀸 𑀅𑀢𑁆𑀢𑀦𑁄 𑀆𑀦𑁂𑀜𑁆𑀚𑀯𑀺𑀳𑀸𑀭𑁂𑀦 𑀯𑀺𑀳𑀭𑀦𑁆𑀢𑁄 ‘‘𑀤𑀺𑀩𑁆𑀩𑀦𑁆𑀢𑀻𑀢𑀺 𑀤𑁂𑀯𑀸’’𑀢𑀺 𑀇𑀤𑀁 𑀦𑀺𑀩𑁆𑀩𑀘𑀦𑀁 𑀮𑀤𑁆𑀥𑀼𑀫𑀭𑀳𑀦𑁆𑀢𑀻𑀢𑀺 𑀆𑀳 ‘‘𑀲𑀤𑁂𑀯𑀓𑀕𑁆𑀕𑀳𑀡𑁂𑀦 𑀅𑀭𑀽𑀧𑀸𑀯𑀘𑀭𑀮𑁄𑀓𑁄 𑀕𑀳𑀺𑀢𑁄’’𑀢𑀺. 𑀢𑁂𑀦𑁂𑀯𑀸𑀳 𑀪𑀕𑀯𑀸 𑀩𑁆𑀭𑀳𑁆𑀫𑀚𑀸𑀮𑀸𑀤𑀻𑀲𑀼 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢’’𑀦𑁆𑀢𑀺𑀆𑀤𑀺, (𑀅. 𑀦𑀺. 𑁩.𑁧𑁯𑁭) 𑀅𑀭𑀽𑀧𑀸𑀯𑀘𑀭𑀪𑀽𑀢𑁄 𑀑𑀓𑀸𑀲𑀮𑁄𑀓𑁄, 𑀲𑀢𑁆𑀢𑀮𑁄𑀓𑁄 𑀘 𑀕𑀳𑀺𑀢𑁄𑀢𑀺 𑀅𑀢𑁆𑀣𑁄. 𑀏𑀯𑀁 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁄, 𑀭𑀽𑀧𑀻 𑀩𑁆𑀭𑀳𑁆𑀫𑀮𑁄𑀓𑁄𑀢𑀺 𑀏𑀢𑁆𑀣𑀸𑀧𑀺. 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑀲𑁆𑀲 𑀲𑀯𑀺𑀲𑁂𑀲𑀁 𑀫𑀸𑀭𑀯𑀲𑁂 𑀧𑀯𑀢𑁆𑀢𑀦𑀢𑁄 𑀯𑀼𑀢𑁆𑀢𑀁 ‘‘𑀲𑀫𑀸𑀭𑀓𑀕𑁆𑀕𑀳𑀡𑁂𑀦 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁄’’𑀢𑀺. 𑀲𑁄 𑀳𑀺 𑀢𑀲𑁆𑀲 𑀤𑀸𑀫𑀭𑀺𑀓𑀲𑁆𑀲 𑀯𑀺𑀬 𑀯𑀲𑀧𑀯𑀢𑁆𑀢𑀦𑁄𑀓𑀸𑀲𑁄. 𑀭𑀽𑀧𑀻 𑀩𑁆𑀭𑀳𑁆𑀫𑀮𑁄𑀓𑁄 𑀕𑀳𑀺𑀢𑁄 𑀧𑀸𑀭𑀺𑀲𑁂𑀲𑀜𑀸𑀬𑁂𑀦 𑀅𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑀲𑁆𑀲 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸. 𑀘𑀢𑀼𑀧𑀭𑀺𑀲𑀯𑀲𑁂𑀦𑀸𑀢𑀺 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀲𑀫𑀡𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀢𑀸𑀯𑀢𑀺𑀁𑀲𑀫𑀸𑀭𑀩𑁆𑀭𑀳𑁆𑀫𑀲𑀗𑁆𑀔𑀸𑀢𑀸𑀲𑀼 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀔𑀢𑁆𑀢𑀺𑀬𑀸𑀤𑀺𑀘𑀢𑀼𑀧𑀭𑀺𑀲𑀯𑀲𑁂𑀦𑁂𑀯 𑀢𑀤𑀜𑁆𑀜𑀸𑀲𑀁 𑀲𑀤𑁂𑀯𑀓𑀸𑀤𑀺𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸. 𑀓𑀣𑀁 𑀧𑀦𑁂𑀢𑁆𑀣 𑀘𑀢𑀼𑀧𑀭𑀺𑀲𑀯𑀲𑁂𑀦 𑀫𑀦𑀼𑀲𑁆𑀲𑀮𑁄𑀓𑁄 𑀕𑀳𑀺𑀢𑁄𑀢𑀺? ‘‘𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑀡𑀧𑀭𑀺𑀲𑀸, 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀸 𑀘 𑀕𑀳𑀺𑀢𑀸, ‘‘𑀲𑀤𑁂𑀯𑀫𑀦𑀼𑀲𑁆𑀲’’𑀦𑁆𑀢𑀺 𑀇𑀫𑀺𑀦𑀸 𑀔𑀢𑁆𑀢𑀺𑀬𑀧𑀭𑀺𑀲𑀸, 𑀕𑀳𑀧𑀢𑀺𑀧𑀭𑀺𑀲𑀸 𑀘𑀸𑀢𑀺. ‘‘𑀧𑀚’’𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀇𑀫𑀸𑀬𑁂𑀯 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀯𑀼𑀢𑁆𑀢𑀸. 𑀘𑀢𑀼𑀧𑀭𑀺𑀲𑀲𑀗𑁆𑀔𑀸𑀢𑀁 𑀧𑀚𑀦𑁆𑀢𑀺 𑀳𑀺 𑀇𑀥 𑀅𑀢𑁆𑀣𑁄.

𑀅𑀜𑁆𑀜𑀣𑀸 𑀕𑀳𑁂𑀢𑀩𑁆𑀩𑀫𑀸𑀳 ‘‘𑀲𑀫𑁆𑀫𑀼𑀢𑀺𑀤𑁂𑀯𑁂𑀳𑀺 𑀯𑀸 𑀲𑀳 𑀫𑀦𑀼𑀲𑁆𑀲𑀮𑁄𑀓𑁄’’𑀢𑀺. 𑀓𑀣𑀁 𑀧𑀦 𑀕𑀳𑀺𑀢𑁄𑀢𑀺? ‘‘𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀕𑀳𑀺𑀢𑀸, ‘‘𑀲𑀤𑁂𑀯𑀫𑀦𑀼𑀲𑁆𑀲’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑁆𑀫𑀼𑀢𑀺𑀤𑁂𑀯𑀲𑀗𑁆𑀔𑀸𑀢𑀸 𑀔𑀢𑁆𑀢𑀺𑀬𑀸, 𑀕𑀳𑀧𑀢𑀺𑀲𑀼𑀤𑁆𑀤𑀲𑀗𑁆𑀔𑀸𑀢𑀸 𑀘 𑀅𑀯𑀲𑁂𑀲𑀫𑀦𑀼𑀲𑁆𑀲𑀸𑀢𑀺. 𑀇𑀢𑁄 𑀧𑀦 𑀅𑀜𑁆𑀜𑁂𑀲𑀁 𑀫𑀦𑀼𑀲𑁆𑀲𑀲𑀢𑁆𑀢𑀸𑀦𑀫𑀪𑀸𑀯𑀢𑁄 ¶ ‘‘𑀧𑀚’’𑀦𑁆𑀢𑀺 𑀇𑀫𑀺𑀦𑀸 𑀏𑀢𑁂𑀬𑁂𑀯 𑀘𑀢𑀽𑀳𑀺 𑀧𑀓𑀸𑀭𑁂𑀳𑀺 𑀞𑀺𑀢𑀸 𑀫𑀦𑀼𑀲𑁆𑀲𑀲𑀢𑁆𑀢𑀸 𑀯𑀼𑀢𑁆𑀢𑀸. 𑀘𑀢𑀼𑀓𑀼𑀮𑀧𑁆𑀧𑀪𑁂𑀤𑀁 𑀧𑀚𑀦𑁆𑀢𑀺 𑀳𑀺 𑀇𑀥 𑀅𑀢𑁆𑀣𑁄. 𑀏𑀯𑀁 𑀯𑀺𑀓𑀧𑁆𑀧𑀤𑁆𑀯𑀬𑁂𑀧𑀺 𑀧𑀚𑀸𑀕𑀳𑀡𑁂𑀦 𑀘𑀢𑀼𑀧𑀭𑀺𑀲𑀸𑀤𑀺𑀯𑀲𑁂𑀦 𑀫𑀦𑀼𑀲𑁆𑀲𑀸𑀦𑀜𑁆𑀜𑁂𑀯 𑀕𑀳𑀺𑀢𑀢𑁆𑀢𑀸 ¶ 𑀇𑀤𑀸𑀦𑀺 𑀅𑀯𑀲𑁂𑀲𑀲𑀢𑁆𑀢𑁂𑀧𑀺 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀲𑁂𑀲𑀲𑀩𑁆𑀩𑀲𑀢𑁆𑀢𑀮𑁄𑀓𑁄 𑀯𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣𑀸𑀧𑀺 𑀘𑀢𑀼𑀧𑀭𑀺𑀲𑀯𑀲𑁂𑀦 𑀕𑀳𑀺𑀢𑁂𑀦 𑀫𑀦𑀼𑀲𑁆𑀲𑀮𑁄𑀓𑁂𑀦 𑀲𑀳 𑀅𑀯𑀲𑁂𑀲𑀲𑀩𑁆𑀩𑀲𑀢𑁆𑀢𑀮𑁄𑀓𑁄 𑀕𑀳𑀺𑀢𑁄, 𑀲𑀫𑁆𑀫𑀼𑀢𑀺𑀤𑁂𑀯𑁂𑀳𑀺 𑀯𑀸 𑀲𑀳 𑀅𑀯𑀲𑁂𑀲𑀲𑀩𑁆𑀩𑀲𑀢𑁆𑀢𑀮𑁄𑀓𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀦𑀸𑀕𑀕𑀭𑀼𑀴𑀸𑀤𑀺𑀯𑀲𑁂𑀦 𑀘 𑀅𑀯𑀲𑁂𑀲𑀲𑀩𑁆𑀩𑀲𑀢𑁆𑀢𑀮𑁄𑀓𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀘𑀢𑀼𑀧𑀭𑀺𑀲𑀲𑀳𑀺𑀢𑁄 𑀅𑀯𑀲𑁂𑀲𑀲𑀼𑀤𑁆𑀤𑀦𑀸𑀕𑀲𑀼𑀧𑀡𑁆𑀡𑀦𑁂𑀭𑀬𑀺𑀓𑀸𑀤𑀺𑀲𑀢𑁆𑀢𑀮𑁄𑀓𑁄, 𑀘𑀢𑀼𑀓𑀼𑀮𑀧𑁆𑀧𑀪𑁂𑀤𑀫𑀦𑀼𑀲𑁆𑀲𑀲𑀳𑀺𑀢𑁄 𑀯𑀸 𑀅𑀯𑀲𑁂𑀲𑀦𑀸𑀕𑀲𑀼𑀧𑀡𑁆𑀡𑀦𑁂𑀭𑀬𑀺𑀓𑀸𑀤𑀺𑀲𑀢𑁆𑀢𑀮𑁄𑀓𑁄 𑀕𑀳𑀺𑀢𑁄𑀢𑀺.

𑀏𑀢𑁆𑀢𑀸𑀯𑀢𑀸 𑀪𑀸𑀕𑀲𑁄 𑀮𑁄𑀓𑀁 𑀕𑀳𑁂𑀢𑁆𑀯𑀸 𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀦 𑀢𑁂𑀦 𑀯𑀺𑀲𑁂𑀲𑁂𑀦 𑀅𑀪𑀸𑀕𑀲𑁄 𑀮𑁄𑀓𑀁 𑀕𑀳𑁂𑀢𑁆𑀯𑀸 𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑁂𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀢𑁄𑀢𑀺 𑀉𑀓𑁆𑀓𑀁𑀲𑀕𑀢𑀺𑀧𑀭𑀺𑀘𑁆𑀙𑁂𑀤𑀢𑁄, 𑀢𑀩𑁆𑀩𑀺𑀚𑀸𑀦𑀦𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀞𑀫𑀦𑀬𑁂𑀦 𑀳𑀺 𑀧𑀜𑁆𑀘𑀲𑀼 𑀕𑀢𑀻𑀲𑀼 𑀤𑁂𑀯𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀸𑀯 𑀧𑀜𑁆𑀘𑀓𑀸𑀫𑀕𑀼𑀡𑀲𑀫𑀗𑁆𑀕𑀺𑀢𑀸𑀬, 𑀤𑀻𑀖𑀸𑀬𑀼𑀓𑀢𑀸𑀬𑀸𑀢𑀺 𑀏𑀯𑀫𑀸𑀤𑀻𑀳𑀺 𑀯𑀺𑀲𑁂𑀲𑁂𑀳𑀺 𑀲𑁂𑀝𑁆𑀞𑀸. 𑀤𑀼𑀢𑀺𑀬𑀦𑀬𑁂𑀦 𑀧𑀦 𑀅𑀭𑀽𑀧𑀺𑀦𑁄 𑀤𑀽𑀭𑀲𑀫𑀼𑀕𑁆𑀖𑀸𑀝𑀺𑀢𑀓𑀺𑀮𑁂𑀲𑀤𑀼𑀓𑁆𑀔𑀢𑀸𑀬, 𑀲𑀦𑁆𑀢𑀧𑀡𑀻𑀢𑀆𑀦𑁂𑀜𑁆𑀚𑀯𑀺𑀳𑀸𑀭𑀲𑀫𑀗𑁆𑀕𑀺𑀢𑀸𑀬, 𑀅𑀢𑀺𑀯𑀺𑀬 𑀤𑀻𑀖𑀸𑀬𑀼𑀓𑀢𑀸𑀬𑀸𑀢𑀺 𑀏𑀯𑀫𑀸𑀤𑀻𑀳𑀺 𑀯𑀺𑀲𑁂𑀲𑁂𑀳𑀺 𑀅𑀢𑀺𑀯𑀺𑀬 𑀉𑀓𑁆𑀓𑀝𑁆𑀞𑀸. 𑀆𑀘𑀭𑀺𑀬𑁂𑀳𑀺 𑀧𑀦 𑀤𑀼𑀢𑀺𑀬𑀦𑀬𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀯𑀁 𑀧𑀞𑀫𑀧𑀤𑁂𑀦𑁂𑀯 𑀧𑀥𑀸𑀦𑀦𑀬𑁂𑀦 𑀲𑀩𑁆𑀩𑀮𑁄𑀓𑀲𑁆𑀲 𑀲𑀘𑁆𑀙𑀺𑀓𑀢𑀪𑀸𑀯𑁂 𑀲𑀺𑀤𑁆𑀥𑁂𑀧𑀺 𑀇𑀫𑀺𑀦𑀸 𑀓𑀸𑀭𑀡𑀯𑀺𑀲𑁂𑀲𑁂𑀦 𑀲𑁂𑀲𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀢𑀢𑁄 𑀬𑁂𑀲’’𑀦𑁆𑀢𑀺𑀆𑀤𑀺𑀦𑀸. 𑀢𑀢𑁄𑀢𑀺 𑀧𑀞𑀫𑀧𑀤𑀢𑁄 𑀧𑀭𑀁 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀙𑀓𑀸𑀫𑀸𑀯𑀘𑀭𑀺𑀲𑁆𑀲𑀭𑁄’’ 𑀢𑀺𑀬𑁂𑀯 𑀯𑀼𑀢𑁆𑀢𑁂 𑀲𑀓𑁆𑀓𑀸𑀤𑀻𑀦𑀫𑁆𑀧𑀺 𑀢𑀲𑁆𑀲 𑀆𑀥𑀺𑀧𑀘𑁆𑀘𑀁 𑀲𑀺𑀬𑀸𑀢𑀺 𑀆𑀲𑀗𑁆𑀓𑀸𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀯𑀲𑀯𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑁂𑀦 𑀲𑀸𑀳𑀲𑀺𑀓𑀓𑀭𑀡𑁂𑀦 𑀯𑀲𑀯𑀢𑁆𑀢𑀸𑀧𑀦𑀫𑁂𑀯 𑀢𑀲𑁆𑀲𑀸𑀥𑀺𑀧𑀘𑁆𑀘𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑁄 𑀳𑀺 𑀙𑀝𑁆𑀞𑀤𑁂𑀯𑀮𑁄𑀓𑁂𑀧𑀺 𑀅𑀦𑀺𑀲𑁆𑀲𑀭𑁄 𑀢𑀢𑁆𑀣 𑀯𑀲𑀯𑀢𑁆𑀢𑀺𑀤𑁂𑀯𑀭𑀸𑀚𑀲𑁆𑀲𑁂𑀯 𑀇𑀲𑁆𑀲𑀭𑀢𑁆𑀢𑀸. 𑀢𑁂𑀦𑀸𑀳 𑀪𑀕𑀯𑀸 𑀅𑀗𑁆𑀕𑀼𑀢𑁆𑀢𑀭𑀸𑀕𑀫𑀯𑀭𑁂 𑀅𑀝𑁆𑀞𑀦𑀺𑀧𑀸𑀢𑁂 𑀤𑀸𑀦𑀸𑀦𑀺𑀲𑀁𑀲𑀲𑀼𑀢𑁆𑀢𑁂 ‘‘𑀢𑀢𑁆𑀭 𑀪𑀺𑀓𑁆𑀔𑀯𑁂 𑀯𑀲𑀯𑀢𑁆𑀢𑀻 𑀤𑁂𑀯𑀧𑀼𑀢𑁆𑀢𑁄 𑀤𑀸𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀁 𑀅𑀢𑀺𑀭𑁂𑀓𑀁 𑀓𑀭𑀺𑀢𑁆𑀯𑀸…𑀧𑁂… 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻 𑀤𑁂𑀯𑁂 𑀤𑀲𑀳𑀺 𑀞𑀸𑀦𑁂𑀳𑀺 𑀅𑀥𑀺𑀕𑀡𑁆𑀳𑀸𑀢𑀻’’𑀢𑀺 (𑀅. 𑀦𑀺. 𑁮.𑁩𑁬) 𑀯𑀺𑀢𑁆𑀣𑀸𑀭𑁄. 𑀫𑀚𑁆𑀛𑀺𑀫𑀸𑀕𑀫𑀝𑁆𑀞𑀓𑀣𑀸𑀬𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀢𑀢𑁆𑀭 𑀳𑀺 𑀯𑀲𑀯𑀢𑁆𑀢𑀺𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀢𑀺, 𑀫𑀸𑀭𑁄 𑀧𑀦 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀇𑀲𑁆𑀲𑀭𑀺𑀬𑀁 𑀧𑀯𑀢𑁆𑀢𑁂𑀦𑁆𑀢𑁄 𑀭𑀚𑁆𑀚𑀧𑀘𑁆𑀘𑀦𑁆𑀢𑁂 𑀤𑀸𑀫𑀭𑀺𑀓𑀭𑀸𑀚𑀧𑀼𑀢𑁆𑀢𑁄 𑀯𑀺𑀬 𑀯𑀲𑀢𑀻’’𑀢𑀺 (𑀫. 𑀦𑀺. 𑁧.𑁬𑁦) ‘‘𑀩𑁆𑀭𑀳𑁆𑀫𑀸 𑀫𑀳𑀸𑀦𑀼𑀪𑀸𑀯𑁄’’𑀢𑀺𑀆𑀤𑀺 ¶ 𑀤𑀲𑀲𑀳𑀲𑁆𑀲𑀺𑀬𑀁 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀯𑀲𑁂𑀦 𑀯𑀤𑀢𑀺. ‘‘𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀢𑁄’’𑀢𑀺 𑀳𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. ‘‘𑀏𑀓𑀗𑁆𑀕𑀼𑀮𑀺𑀬𑀸’’𑀢𑀺𑀆𑀤𑀺 𑀏𑀓𑀤𑁂𑀲𑁂𑀦 𑀫𑀳𑀸𑀦𑀼𑀪𑀸𑀯𑀢𑀸𑀤𑀲𑁆𑀲𑀦𑀁. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀲𑁂𑀝𑁆𑀞𑀁 𑀦𑀯𑀮𑁄𑀓𑀼𑀢𑁆𑀢𑀭𑀁. 𑀧𑀼𑀣𑀽𑀢𑀺 𑀩𑀳𑀼𑀓𑀸, 𑀯𑀺𑀲𑀼𑀁 𑀪𑀽𑀢𑀸 𑀯𑀸. 𑀉𑀓𑁆𑀓𑀝𑁆𑀞𑀝𑁆𑀞𑀸𑀦𑀸𑀦𑀦𑁆𑀢𑀺 𑀉𑀓𑁆𑀓𑀁𑀲𑀕𑀢𑀺𑀓𑀸𑀦𑀁. 𑀪𑀸𑀯𑀸𑀦𑀼𑀓𑁆𑀓𑀫𑁄𑀢𑀺 𑀪𑀸𑀯𑀯𑀲𑁂𑀦 𑀧𑀭𑁂𑀲𑀫𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 ‘‘𑀲𑀤𑁂𑀯𑀓’’𑀦𑁆𑀢𑀺𑀆𑀤𑀺𑀧𑀤𑀸𑀦𑀁 𑀅𑀦𑀼𑀓𑁆𑀓𑀫𑁄, 𑀪𑀸𑀯𑀯𑀲𑁂𑀦 ¶ 𑀅𑀦𑀼𑀲𑀦𑁆𑀥𑀺𑀓𑁆𑀓𑀫𑁄 𑀯𑀸 𑀪𑀸𑀯𑀸𑀦𑀼𑀓𑁆𑀓𑀫𑁄, 𑀅𑀢𑁆𑀣𑀸𑀦𑀜𑁆𑀘𑁂𑀯 𑀧𑀤𑀸𑀦𑀜𑁆𑀘 𑀅𑀦𑀼𑀲𑀦𑁆𑀥𑀸𑀦𑀧𑀝𑀺𑀧𑀸𑀝𑀻𑀢𑀺 𑀅𑀢𑁆𑀣𑁄, 𑀅𑀬𑀫𑁂𑀯 𑀯𑀸 𑀧𑀸𑀞𑁄 𑀢𑀣𑀸𑀬𑁂𑀯 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸 𑁧) 𑀤𑀺𑀝𑁆𑀞𑀢𑁆𑀢𑀸, 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 (𑀲𑀸𑀭𑀢𑁆𑀣. 𑀝𑀻. 𑁧.𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸) 𑀘 𑀯𑀡𑁆𑀡𑀺𑀢𑀢𑁆𑀢𑀸. ‘‘𑀯𑀺𑀪𑀸𑀯𑀦𑀸𑀦𑀼𑀓𑁆𑀓𑀫𑁄’’𑀢𑀺𑀧𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀲𑁄 𑀧𑀦 𑀢𑁂𑀲𑀼 𑀅𑀤𑀺𑀝𑁆𑀞𑀢𑁆𑀢𑀸 𑀦 𑀲𑀼𑀦𑁆𑀤𑀭𑁄.

𑀇𑀤𑀸𑀦𑀺 𑀧𑁄𑀭𑀸𑀡𑀓𑀸𑀦𑀁 𑀲𑀁𑀯𑀡𑁆𑀡𑀦𑀸𑀦𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀧𑁄𑀭𑀸𑀡𑀸 𑀧𑀦𑀸𑀳𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀜𑁆𑀜𑀧𑀤𑁂𑀦 𑀦𑀺𑀭𑀯𑀲𑁂𑀲𑀲𑀢𑁆𑀢𑀮𑁄𑀓𑀲𑁆𑀲 𑀕𑀳𑀺𑀢𑀢𑁆𑀢𑀸 𑀲𑀩𑁆𑀩𑀢𑁆𑀣 𑀅𑀯𑀲𑁂𑀲𑀮𑁄𑀓𑀦𑁆𑀢𑀺 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀢𑀺𑀪𑀯𑀽𑀧𑀕𑁂 𑀲𑀢𑁆𑀢𑁂’’𑀢𑀺, 𑀢𑁂𑀥𑀸𑀢𑀼𑀓𑀲𑀗𑁆𑀔𑀸𑀢𑁂 𑀢𑀬𑁄 𑀪𑀯𑁂 𑀉𑀧𑀕𑀢𑀲𑀢𑁆𑀢𑁂𑀢𑀺 𑀅𑀢𑁆𑀣𑁄. 𑀢𑀻𑀳𑀸𑀓𑀸𑀭𑁂𑀳𑀻𑀢𑀺 𑀤𑁂𑀯𑀫𑀸𑀭𑀩𑁆𑀭𑀳𑁆𑀫𑀲𑀳𑀺𑀢𑀢𑀸𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀆𑀓𑀸𑀭𑁂𑀳𑀺. 𑀢𑀻𑀲𑀼 𑀧𑀤𑁂𑀲𑀽𑀢𑀺 ‘‘𑀲𑀤𑁂𑀯𑀓’’𑀦𑁆𑀢𑀺𑀆𑀤𑀻𑀲𑀼 𑀢𑀻𑀲𑀼 𑀧𑀤𑁂𑀲𑀼. 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀢𑁆𑀣𑀯𑀲𑁂𑀦 𑀲𑀗𑁆𑀕𑀳𑁂𑀢𑁆𑀯𑀸. 𑀢𑁂𑀬𑁂𑀯 𑀢𑀺𑀪𑀯𑀽𑀧𑀕𑁂 𑀲𑀢𑁆𑀢𑁂 ‘‘𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁, 𑀲𑀤𑁂𑀯𑀫𑀦𑀼𑀲𑁆𑀲’’𑀦𑁆𑀢𑀺 𑀧𑀤𑀤𑁆𑀯𑀬𑁂 𑀧𑀓𑁆𑀔𑀺𑀧𑀢𑀻𑀢𑀺 𑀜𑀸𑀧𑁂𑀢𑀼𑀁 ‘‘𑀧𑀼𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦𑀸𑀢𑀺 𑀲𑀤𑁂𑀯𑀓𑀢𑁆𑀢𑀸𑀤𑀺𑀦𑀸, 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻𑀪𑀸𑀯𑀸𑀤𑀺𑀦𑀸 𑀘 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦. ‘‘𑀢𑀺𑀪𑀯𑀽𑀧𑀕𑁂 𑀲𑀢𑁆𑀢𑁂’’𑀢𑀺 𑀯𑀢𑁆𑀯𑀸 ‘‘𑀢𑁂𑀥𑀸𑀢𑀼𑀓𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀸 𑀑𑀓𑀸𑀲𑀮𑁄𑀓𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢𑀮𑁄𑀓𑁄 𑀕𑀳𑀺𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑀺. 𑀢𑁂𑀥𑀸𑀢𑀼𑀓𑀫𑁂𑀯 𑀧𑀭𑀺𑀬𑀸𑀤𑀺𑀦𑁆𑀦𑀦𑁆𑀢𑀺 𑀧𑁄𑀭𑀸𑀡𑀸 𑀧𑀦𑀸𑀳𑀽𑀢𑀺 𑀬𑁄𑀚𑀦𑀸.

𑀲𑀸𑀫𑀦𑁆𑀢𑀺 𑀅𑀢𑁆𑀢𑀦𑀸. 𑀅𑀜𑁆𑀜𑀢𑁆𑀣𑀸𑀧𑁄𑀳𑀦𑁂𑀦, 𑀅𑀦𑁆𑀢𑁄𑀕𑀥𑀸𑀯𑀥𑀸𑀭𑀡𑁂𑀦 𑀯𑀸 𑀢𑀧𑁆𑀧𑀝𑀺𑀲𑁂𑀥𑀦𑀫𑀸𑀳 ‘‘𑀅𑀧𑀭𑀦𑁂𑀬𑁆𑀬𑁄 𑀳𑀼𑀢𑁆𑀯𑀸’’𑀢𑀺, 𑀅𑀧𑀭𑁂𑀳𑀺 𑀅𑀦𑀪𑀺𑀚𑀸𑀦𑀸𑀧𑁂𑀢𑀩𑁆𑀩𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀪𑀺𑀜𑁆𑀜𑀸𑀢𑀺 𑀬-𑀓𑀸𑀭𑀮𑁄𑀧𑀦𑀺𑀤𑁆𑀤𑁂𑀲𑁄 𑀬𑀣𑀸 ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄’’𑀢𑀺 (𑀫. 𑀦𑀺. 𑁧.𑁨𑁩, 𑁪𑁨𑁨; 𑁨.𑁨𑁪; 𑁩.𑁭𑁫; 𑀲𑀁. 𑀦𑀺. 𑁪.𑁧𑁨𑁦; 𑀅. 𑀦𑀺. 𑁬.𑁫𑁮; 𑀫𑀳𑀸𑀦𑀺. 𑁨𑁦𑁬) 𑀯𑀼𑀢𑁆𑀢𑀁 ‘‘𑀅𑀪𑀺𑀜𑁆𑀜𑀸𑀬𑀸’’𑀢𑀺. 𑀅𑀪𑀺𑀲𑀤𑁆𑀤𑁂𑀦 𑀦 𑀯𑀺𑀲𑁂𑀲𑀦𑀫𑀢𑁆𑀢𑀁 𑀚𑁄𑀢𑀺𑀢𑀁, 𑀅𑀣 𑀔𑁄 𑀯𑀺𑀲𑁂𑀲𑀦𑀫𑀼𑀔𑁂𑀦 𑀓𑀭𑀡𑀫𑁆𑀧𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀅𑀥𑀺𑀓𑁂𑀦 𑀜𑀸𑀡𑁂𑀦𑀸’’𑀢𑀺 𑀇𑀫𑀺𑀦𑀸. 𑀅𑀦𑀼𑀫𑀸𑀦𑀸𑀤𑀺𑀧𑀝𑀺𑀓𑁆𑀔𑁂𑀧𑁄𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 ¶ 𑀉𑀧𑀫𑀸𑀦𑀅𑀢𑁆𑀣𑀸𑀧𑀢𑁆𑀢𑀺𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀲𑀫𑁆𑀧𑀬𑁄𑀕𑀯𑀺𑀧𑁆𑀧𑀬𑁄𑀕𑀲𑀳𑀘𑀭𑀡𑀸𑀤𑀺𑀦𑀸 𑀓𑀸𑀭𑀡𑀮𑁂𑀲𑀫𑀢𑁆𑀢𑁂𑀦 𑀧𑀯𑁂𑀤𑀦𑀁 𑀲𑀗𑁆𑀕𑀡𑁆𑀳𑀸𑀢𑀺 𑀏𑀓𑀧𑁆𑀧𑀫𑀸𑀡𑀢𑁆𑀢𑀸. 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑀢𑀸𑀬 𑀳𑀺 𑀲𑀩𑁆𑀩𑀥𑀫𑁆𑀫𑀧𑀘𑁆𑀘𑀓𑁆𑀔𑀸 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄. 𑀩𑁄𑀥𑁂𑀢𑀺 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀲𑀤𑁆𑀤𑀢𑁄 𑀅𑀢𑁆𑀣𑀯𑀘𑀦𑀁. 𑀧𑀓𑀸𑀲𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑀢𑁄. 𑀏𑀯𑀁 𑀲𑀩𑁆𑀩𑀢𑁆𑀣 𑀯𑀺𑀯𑁂𑀘𑀺𑀢𑀩𑁆𑀩𑁄.

𑀅𑀦𑀼𑀢𑁆𑀢𑀭𑀁 𑀯𑀺𑀯𑁂𑀓𑀲𑀼𑀔𑀦𑁆𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀁. 𑀳𑀺𑀢𑁆𑀯𑀸𑀧𑀻𑀢𑀺 𑀧𑀺-𑀲𑀤𑁆𑀤𑀕𑁆𑀕𑀳𑀡𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀅𑀦𑁆𑀢𑀭𑀸 𑀞𑀺𑀢𑀺𑀓𑀸𑀧𑀺 𑀓𑀤𑀸𑀘𑀺 𑀪𑀕𑀯𑀢𑁄 𑀤𑁂𑀲𑀦𑀸 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀓𑀢𑀁. 𑀪𑀕𑀯𑀸 𑀳𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀬𑀲𑁆𑀫𑀺𑀁 𑀔𑀡𑁂 𑀧𑀭𑀺𑀲𑀸 𑀲𑀸𑀥𑀼𑀓𑀸𑀭𑀁 𑀯𑀸 𑀤𑁂𑀢𑀺, 𑀬𑀣𑀸𑀲𑀼𑀢𑀁 𑀯𑀸 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀢𑀁 𑀔𑀡𑀫𑁆𑀧𑀺 𑀧𑀼𑀩𑁆𑀩𑀸𑀪𑁄𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀬𑀣𑀸𑀧𑀭𑀺𑀘𑁆𑀙𑁂𑀤𑀜𑁆𑀘 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀧𑀼𑀩𑁆𑀩𑁂 ¶ 𑀞𑀺𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀅𑀝𑁆𑀞𑀓𑀣𑀸𑀲𑀼 (𑀫. 𑀦𑀺. 𑀅𑀝𑁆𑀞. 𑁨.𑁩𑁮𑁭) 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀤𑁂𑀲𑁂𑀦𑁆𑀢𑁄𑀢𑀺 𑀉𑀕𑁆𑀖𑀝𑀺𑀢𑀜𑁆𑀜𑀼𑀲𑁆𑀲 𑀯𑀲𑁂𑀦 𑀅𑀧𑁆𑀧𑀁 𑀯𑀸 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀲𑁆𑀲, 𑀦𑁂𑀬𑁆𑀬𑀲𑁆𑀲 𑀘 𑀯𑀲𑁂𑀦 𑀩𑀳𑀼𑀁 𑀯𑀸 𑀤𑁂𑀲𑁂𑀦𑁆𑀢𑁄. 𑀓𑀣𑀁 𑀤𑁂𑀲𑁂𑀢𑀻𑀢𑀺 𑀆𑀳 ‘‘𑀆𑀤𑀺𑀫𑁆𑀳𑀺𑀧𑀻’’𑀢𑀺𑀆𑀤𑀺. 𑀥𑀫𑁆𑀫𑀲𑁆𑀲 𑀓𑀮𑁆𑀬𑀸𑀡𑀢𑀸 𑀦𑀺𑀬𑁆𑀬𑀸𑀦𑀺𑀓𑀢𑀸𑀬, 𑀦𑀺𑀬𑁆𑀬𑀸𑀦𑀺𑀓𑀢𑀸 𑀘 𑀲𑀩𑁆𑀩𑀲𑁄 𑀅𑀦𑀯𑀚𑁆𑀚𑀪𑀸𑀯𑁂𑀦𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀦𑀯𑀚𑁆𑀚𑀫𑁂𑀯 𑀓𑀢𑁆𑀯𑀸’’𑀢𑀺. 𑀤𑁂𑀲𑀦𑀸𑀬𑀸𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 𑀤𑁂𑀲𑀓𑀸𑀬𑀢𑁆𑀢𑁂𑀦 𑀳𑀺 𑀆𑀡𑀸𑀤𑀺𑀯𑀺𑀥𑀺𑀦𑀸 𑀅𑀢𑀺𑀲𑀚𑁆𑀚𑀦𑀁 𑀧𑀩𑁄𑀥𑀦𑀁 𑀤𑁂𑀲𑀦𑀸𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘𑀸𑀧𑀺 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀲𑀫𑀼𑀤𑀸𑀬𑁄 𑀦𑀸𑀫 𑀧𑀭𑀫𑀢𑁆𑀣𑀢𑁄 𑀓𑁄𑀘𑀺 𑀦𑀢𑁆𑀣𑀺, 𑀬𑁂𑀲𑀼 𑀧𑀦 𑀅𑀯𑀬𑀯𑁂𑀲𑀼 𑀲𑀫𑀼𑀤𑀸𑀬𑀭𑀽𑀧𑁂𑀦 𑀅𑀯𑁂𑀓𑁆𑀔𑀺𑀢𑁂𑀲𑀼 𑀕𑀸𑀣𑀸𑀤𑀺𑀲𑀫𑀜𑁆𑀜𑀸, 𑀢𑀁 𑀢𑀢𑁄 𑀪𑀺𑀦𑁆𑀦𑀁 𑀯𑀺𑀬 𑀓𑀢𑁆𑀯𑀸 𑀲𑀁𑀲𑀸𑀫𑀺𑀯𑁄𑀳𑀸𑀭𑀫𑀸𑀭𑁄𑀧𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑁆𑀣𑀺 𑀤𑁂𑀲𑀦𑀸𑀬 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺 𑀆𑀳. 𑀲𑀸𑀲𑀦𑀲𑁆𑀲𑀸𑀢𑀺 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀲𑁆𑀲. 𑀲𑀸𑀲𑀺𑀢𑀩𑁆𑀩𑀧𑀼𑀕𑁆𑀕𑀮𑀕𑀢𑁂𑀦 𑀳𑀺 𑀬𑀣𑀸𑀧𑀭𑀸𑀥𑀸𑀤𑀺𑀦𑀸 𑀲𑀸𑀲𑀺𑀢𑀩𑁆𑀩𑀪𑀸𑀯𑁂𑀦 𑀅𑀦𑀼𑀲𑀸𑀲𑀦𑀁, 𑀢𑀤𑀗𑁆𑀕𑀯𑀺𑀦𑀬𑀸𑀤𑀺𑀯𑀲𑁂𑀦 𑀯𑀺𑀦𑀬𑀦𑀦𑁆𑀢𑀺 𑀓𑀢𑁆𑀯𑀸 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑁄 ‘‘𑀲𑀸𑀲𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀢𑁆𑀣𑀺 𑀲𑀸𑀲𑀦𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀘𑀢𑀼𑀧𑁆𑀧𑀤𑀺𑀓𑀸𑀬𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂, 𑀢𑁂𑀦 𑀏𑀯𑀁 𑀅𑀧𑁆𑀧𑀓𑀢𑀭𑀸𑀬𑀧𑀺 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀓𑀮𑁆𑀬𑀸𑀡𑀢𑀸, 𑀧𑀕𑁂𑀯 𑀩𑀳𑀼𑀢𑀭𑀸𑀬𑀸𑀢𑀺 𑀲𑀫𑁆𑀪𑀸𑀯𑁂𑀢𑀺. 𑀧𑀤𑀜𑁆𑀘𑁂𑀢𑁆𑀣 𑀕𑀸𑀣𑀸𑀬 𑀘𑀢𑀼𑀢𑁆𑀣𑀁𑀲𑁄, 𑀬𑀁 ‘‘𑀧𑀸𑀤𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀏𑀢𑁂𑀦𑁂𑀯 𑀢𑀺𑀧𑀸𑀤𑀺𑀓𑀙𑀧𑀸𑀤𑀺𑀓𑀸𑀲𑀼𑀧𑀺 𑀬𑀣𑀸𑀲𑀫𑁆𑀪𑀯𑀁 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀺. 𑀏𑀯𑀁 𑀲𑀼𑀢𑁆𑀢𑀸𑀯𑀬𑀯𑁂 𑀓𑀮𑁆𑀬𑀸𑀡𑀢𑁆𑀢𑀬𑀁 𑀤𑀲𑁆𑀲𑁂𑀢𑁆𑀯𑀸 𑀲𑀓𑀮𑁂𑀧𑀺 𑀲𑀼𑀢𑁆𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀸𑀦𑀼𑀲𑀦𑁆𑀥𑀺𑀓𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀸𑀢𑀺𑀩𑀳𑀼𑀯𑀺𑀪𑀸𑀕𑀁 𑀬𑀣𑀸𑀦𑀼𑀲𑀦𑁆𑀥𑀺𑀦𑀸 𑀏𑀓𑀸𑀦𑀼𑀲𑀦𑁆𑀥𑀺𑀓𑀁 ¶ 𑀲𑀦𑁆𑀥𑀸𑀬 ‘‘𑀏𑀓𑀸𑀦𑀼𑀲𑀦𑁆𑀥𑀺𑀓𑀲𑁆𑀲𑀸’’𑀢𑀺 𑀆𑀳. 𑀇𑀢𑀭𑀲𑁆𑀫𑀺𑀁 𑀧𑀦 𑀢𑁂𑀦𑁂𑀯 𑀥𑀫𑁆𑀫𑀯𑀺𑀪𑀸𑀕𑁂𑀦 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀸 𑀮𑀩𑁆𑀪𑀦𑁆𑀢𑀻𑀢𑀺 ‘‘𑀅𑀦𑁂𑀓𑀸𑀦𑀼𑀲𑀦𑁆𑀥𑀺𑀓𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀺𑀤𑀸𑀦𑀦𑁆𑀢𑀺 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀞𑀧𑀺𑀢𑀁 𑀓𑀸𑀮𑀤𑁂𑀲𑀤𑁂𑀲𑀓𑀧𑀭𑀺𑀲𑀸𑀤𑀺𑀅𑀧𑀤𑀺𑀲𑀦𑀮𑀓𑁆𑀔𑀡𑀁 𑀦𑀺𑀤𑀸𑀦𑀕𑀦𑁆𑀣𑀁. 𑀇𑀤𑀫𑀯𑁄𑀘𑀸𑀢𑀺 𑀦𑀺𑀕𑀫𑀦𑀁 𑀉𑀧𑀮𑀓𑁆𑀔𑀡𑀫𑁂𑀯 ‘‘𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺 𑀦𑀺𑀕𑀫𑀦𑀲𑁆𑀲𑀧𑀺 𑀕𑀳𑁂𑀢𑀩𑁆𑀩𑀢𑁄. 𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑀞𑀧𑀺𑀢𑀸𑀦𑀺𑀧𑀺 𑀳𑀺 𑀦𑀺𑀤𑀸𑀦𑀦𑀺𑀕𑀫𑀦𑀸𑀦𑀺 𑀲𑀢𑁆𑀣𑀼 𑀤𑁂𑀲𑀦𑀸𑀬 𑀅𑀦𑀼𑀯𑀺𑀥𑀸𑀦𑀢𑁄 𑀢𑀤𑀦𑁆𑀢𑁄𑀕𑀥𑀸𑀦𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀦𑁆𑀢𑁂 𑀅𑀦𑀼𑀲𑀦𑁆𑀥𑀻𑀢𑀺 𑀲𑀩𑁆𑀩𑀧𑀘𑁆𑀙𑀺𑀫𑁄 𑀅𑀦𑀼𑀲𑀦𑁆𑀥𑀺.

‘‘𑀲𑀻𑀮𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸’’𑀢𑀺𑀆𑀤𑀺𑀦𑀸 𑀲𑀸𑀲𑀦𑀲𑁆𑀲 𑀇𑀥 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀢𑀁 𑀯𑀺𑀪𑀸𑀯𑁂𑀢𑀺. 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀸𑀲𑀦𑀥𑀫𑁆𑀫𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑁋

‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸;

𑀲𑀘𑀺𑀢𑁆𑀢𑀧𑀭𑀺𑀬𑁄𑀤𑀧𑀦𑀁, 𑀏𑀢𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺. (𑀤𑀻. 𑀦𑀺. 𑁨.𑁯𑁦; 𑀥. 𑀧. 𑁧𑁮𑁩; 𑀦𑁂𑀢𑁆𑀢𑀺. 𑁩𑁦, 𑁫𑁦, 𑁧𑁧𑁬, 𑁧𑁨𑁪);

𑀏𑀯𑀁 ¶ 𑀯𑀼𑀢𑁆𑀢𑀲𑁆𑀲 𑀲𑀢𑁆𑀣𑀼𑀲𑀸𑀲𑀦𑀲𑁆𑀲 𑀧𑀓𑀸𑀲𑀓𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀏𑀯 𑀲𑀻𑀮𑀸𑀤𑀺𑀅𑀢𑁆𑀣𑀯𑀲𑁂𑀦 𑀓𑀮𑁆𑀬𑀸𑀡𑀢𑁆𑀢𑀬𑀯𑀺𑀪𑀸𑀯𑀦𑁂 𑀯𑀼𑀢𑁆𑀢𑁄. 𑀇𑀥 𑀧𑀦 𑀧𑀝𑀺𑀧𑀢𑁆𑀢𑀺𑀬𑁂𑀯. 𑀢𑁂𑀦 𑀯𑀓𑁆𑀔𑀢𑀺 ‘‘𑀇𑀥 𑀤𑁂𑀲𑀦𑀸𑀬 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺. 𑀲𑀻𑀮𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸 𑀆𑀤𑀺 𑀦𑀸𑀫 𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀪𑀽𑀢𑀸𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀦𑀁 𑀫𑀽𑀮𑀪𑀸𑀯𑀢𑁄. 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀅𑀦𑀯𑀚𑁆𑀚𑀥𑀫𑁆𑀫𑀸𑀦𑀁. 𑀤𑀺𑀝𑁆𑀞𑀻𑀢𑀺 𑀯𑀺𑀧𑀲𑁆𑀲𑀦𑀸, 𑀅𑀯𑀺𑀦𑀸𑀪𑀸𑀯𑀢𑁄 𑀧𑀦𑁂𑀢𑁆𑀣 𑀲𑀫𑀸𑀥𑀺𑀕𑁆𑀕𑀳𑀡𑀁. 𑀫𑀳𑀸𑀯𑀕𑁆𑀕𑀲𑀁𑀬𑀼𑀢𑁆𑀢𑁂 𑀩𑀸𑀳𑀺𑀬𑀲𑀼𑀢𑁆𑀢𑀧𑀤𑀫𑀺𑀤𑀁 (𑀲𑀁. 𑀦𑀺. 𑁫.𑁩𑁮𑁧). 𑀓𑀸𑀫𑀁 𑀲𑀼𑀢𑁆𑀢𑁂 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀦𑁆𑀢𑀤𑁆𑀯𑀬𑀯𑀺𑀕𑀫𑁂𑀦 𑀢𑁂𑀲𑀁 𑀫𑀚𑁆𑀛𑀺𑀫𑀧𑀝𑀺𑀧𑀤𑀸𑀪𑀸𑀯𑁄 𑀯𑀼𑀢𑁆𑀢𑁄, 𑀫𑀚𑁆𑀛𑀺𑀫𑀪𑀸𑀯𑀲𑀸𑀫𑀜𑁆𑀜𑀢𑁄 𑀧𑀦 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀆𑀭𑀫𑁆𑀪𑀦𑀺𑀧𑁆𑀨𑀢𑁆𑀢𑀻𑀦𑀁 𑀫𑀚𑁆𑀛𑀺𑀫𑀪𑀸𑀯𑀲𑁆𑀲𑀸𑀧𑀺 𑀲𑀸𑀥𑀓𑀪𑀸𑀯𑁂 𑀬𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀢𑁆𑀣𑀺 𑀪𑀺𑀓𑁆𑀔𑀯𑁂, 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸𑀢𑀺 𑀏𑀯𑀁 𑀯𑀼𑀢𑁆𑀢𑁄 𑀅𑀭𑀺𑀬𑀫𑀕𑁆𑀕𑁄 𑀫𑀚𑁆𑀛𑀁 𑀦𑀸𑀫𑀸’’𑀢𑀺, 𑀲𑀻𑀮𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀸𑀦𑀁 𑀆𑀭𑀫𑁆𑀪𑀸𑀦𑀁, 𑀨𑀮𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀸𑀦𑀜𑁆𑀘 𑀦𑀺𑀧𑁆𑀨𑀢𑁆𑀢𑀻𑀦𑀁 𑀯𑁂𑀫𑀚𑁆𑀛𑀪𑀸𑀯𑀢𑁄 𑀅𑀭𑀺𑀬𑀫𑀕𑁆𑀕𑁄 𑀫𑀚𑁆𑀛𑀁 𑀦𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀯𑀲𑁂𑀦 𑀨𑀮𑀁 𑀧𑀭𑀺𑀬𑁄𑀲𑀸𑀦𑀁 𑀦𑀸𑀫, 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀯𑀲𑁂𑀦 𑀧𑀦 𑀦𑀺𑀩𑁆𑀩𑀸𑀦𑀁. 𑀲𑀸𑀲𑀦𑀧𑀭𑀺𑀬𑁄𑀲𑀸𑀦𑀸 𑀳𑀺 𑀦𑀺𑀩𑁆𑀩𑀸𑀦𑀥𑀸𑀢𑀼. 𑀫𑀕𑁆𑀕𑀲𑁆𑀲 𑀦𑀺𑀧𑁆𑀨𑀢𑁆𑀢𑀺 𑀨𑀮𑀯𑀲𑁂𑀦, 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀘 𑀳𑁄𑀢𑀺 𑀢𑀢𑁄 𑀧𑀭𑀁 𑀓𑀢𑁆𑀢𑀩𑁆𑀩𑀸𑀪𑀸𑀯𑀢𑁄𑀢𑀺 𑀯𑀸 𑀏𑀯𑀁 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀸𑀲𑀦𑀲𑁆𑀲 𑀧𑀭𑀺𑀬𑁄𑀲𑀸𑀦𑀢𑀁 𑀆𑀕𑀫𑁂𑀦 𑀲𑀸𑀥𑁂𑀢𑀼𑀁 ‘‘𑀏𑀢𑀤𑀢𑁆𑀣𑀁 𑀇𑀤’’𑀦𑁆𑀢𑀺𑀆𑀤𑀺𑀫𑀸𑀳. 𑀏𑀢𑀤𑁂𑀯 ¶ 𑀨𑀮𑀁 𑀅𑀢𑁆𑀣𑁄 𑀬𑀲𑁆𑀲𑀸𑀢𑀺 𑀏𑀢𑀤𑀢𑁆𑀣𑀁. 𑀩𑁆𑀭𑀸𑀳𑁆𑀫𑀡𑀸𑀢𑀺 𑀧𑀺𑀗𑁆𑀕𑀮𑀓𑁄𑀘𑁆𑀙𑀩𑁆𑀭𑀸𑀳𑁆𑀫𑀡𑀁 𑀪𑀕𑀯𑀸 𑀆𑀮𑀧𑀢𑀺. 𑀇𑀤𑀜𑁆𑀳𑀺 𑀫𑀚𑁆𑀛𑀺𑀫𑀸𑀕𑀫𑁂 𑀫𑀽𑀮𑀧𑀡𑁆𑀡𑀸𑀲𑀓𑁂 𑀘𑀽𑀴𑀲𑀸𑀭𑁄𑀧𑀫𑀲𑀼𑀢𑁆𑀢 (𑀫. 𑀦𑀺. 𑁧.𑁩𑁧𑁨 𑀆𑀤𑀬𑁄) 𑀧𑀤𑀁. 𑀏𑀢𑀤𑁂𑀯 𑀨𑀮𑀁 𑀲𑀸𑀭𑀁 𑀬𑀲𑁆𑀲𑀸𑀢𑀺 𑀏𑀢𑀁𑀲𑀸𑀭𑀁 𑀦𑀺𑀕𑁆𑀕𑀳𑀺𑀢𑀸𑀕𑀫𑁂𑀦. 𑀢𑀣𑀸 𑀏𑀢𑀁𑀧𑀭𑀺𑀬𑁄𑀲𑀸𑀦𑀁. 𑀦𑀺𑀩𑁆𑀩𑀸𑀦𑁄𑀕𑀥𑀦𑁆𑀢𑀺 𑀦𑀺𑀩𑁆𑀩𑀸𑀦𑀦𑁆𑀢𑁄𑀕𑀥𑀁. 𑀆𑀯𑀼𑀲𑁄 𑀯𑀺𑀲𑀸𑀔𑀸𑀢𑀺 𑀥𑀫𑁆𑀫𑀤𑀺𑀦𑁆𑀦𑀸𑀬 𑀣𑁂𑀭𑀺𑀬𑀸 𑀯𑀺𑀲𑀸𑀔𑀕𑀳𑀧𑀢𑀺𑀫𑀸𑀮𑀧𑀦𑀁. 𑀇𑀤𑀜𑁆𑀳𑀺 𑀘𑀽𑀴𑀯𑁂𑀤𑀮𑁆𑀮𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁪𑁬𑁦 𑀆𑀤𑀬𑁄) ‘‘𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦’’𑀦𑁆𑀢𑀺𑀆𑀤𑀺𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀢𑁄 ‘‘𑀇𑀥 𑀤𑁂𑀲𑀦𑀸𑀬 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀏𑀯𑀁 𑀲𑀤𑁆𑀤𑀧𑀩𑀦𑁆𑀥𑀯𑀲𑁂𑀦 𑀤𑁂𑀲𑀦𑀸𑀬 𑀓𑀮𑁆𑀬𑀸𑀡𑀢𑁆𑀢𑀬𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 𑀢𑀤𑀢𑁆𑀣𑀯𑀲𑁂𑀦𑀧𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀕𑀯𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀅𑀢𑁆𑀣𑀢𑁄𑀧𑀺 𑀳𑀺 𑀢𑀲𑁆𑀲𑀸𑀥𑀺𑀧𑁆𑀧𑁂𑀢𑀪𑀸𑀯𑀁 𑀳𑀺-𑀲𑀤𑁆𑀤𑁂𑀦 𑀲𑀫𑀢𑁆𑀣𑁂𑀢𑀺. 𑀢𑀣𑀸 𑀲𑀫𑀢𑁆𑀣𑀦𑀫𑀼𑀔𑁂𑀦 𑀘 𑀅𑀢𑁆𑀣𑀯𑀲𑁂𑀦 𑀓𑀮𑁆𑀬𑀸𑀡𑀢𑁆𑀢𑀬𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀻𑀢𑀺. 𑀅𑀢𑁆𑀣𑀢𑁄 𑀧𑀦𑁂𑀢𑀁 𑀤𑀲𑁆𑀲𑁂𑀦𑁆𑀢𑁄 𑀬𑁄 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀓𑀢𑀯𑀺𑀥𑀺 𑀲𑀤𑁆𑀤𑀧𑀩𑀦𑁆𑀥𑁄 𑀕𑀸𑀣𑀸𑀲𑀼𑀢𑁆𑀢𑀯𑀲𑁂𑀦 𑀯𑀯𑀢𑁆𑀣𑀺𑀢𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀬𑁂𑀯 𑀇𑀥 𑀤𑁂𑀲𑀦𑀸𑀢𑀺 𑀯𑀼𑀢𑁆𑀢𑁄, 𑀢𑀲𑁆𑀲 𑀘𑀢𑁆𑀣𑁄 𑀯𑀺𑀲𑁂𑀲𑀢𑁄 𑀲𑀻𑀮𑀸𑀤𑀺 𑀏𑀯𑀸𑀢𑀺 𑀆𑀳 ‘‘𑀆𑀤𑀺𑀫𑁆𑀳𑀺 𑀲𑀻𑀮’’𑀦𑁆𑀢𑀺𑀆𑀤𑀺. 𑀯𑀺𑀲𑁂𑀲𑀓𑀣𑀦𑀜𑁆𑀳𑁂𑀢𑀁. 𑀲𑀸𑀫𑀜𑁆𑀜𑀢𑁄 𑀧𑀦 𑀲𑀻𑀮𑀕𑁆𑀕𑀳𑀡𑁂𑀦 𑀲𑀲𑀫𑁆𑀪𑀸𑀭𑀲𑀻𑀮𑀁 𑀕𑀳𑀺𑀢𑀁, 𑀢𑀣𑀸 𑀫𑀕𑁆𑀕𑀕𑁆𑀕𑀳𑀡𑁂𑀦 𑀲𑀲𑀫𑁆𑀪𑀸𑀭𑀫𑀕𑁆𑀕𑁄𑀢𑀺 𑀅𑀢𑁆𑀣𑀢𑁆𑀢𑀬𑀯𑀲𑁂𑀦 𑀅𑀦𑀯𑀲𑁂𑀲𑀢𑁄 𑀧𑀭𑀺𑀬𑀢𑁆𑀢𑀺𑀅𑀢𑁆𑀣𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺. 𑀇𑀢𑀭𑀣𑀸 𑀳𑀺 𑀓𑀮𑁆𑀬𑀸𑀡𑀢𑁆𑀢𑀬𑀯𑀺𑀪𑀸𑀕𑁄 𑀅𑀲𑀩𑁆𑀩𑀲𑀸𑀥𑀸𑀭𑀡𑁄 𑀲𑀺𑀬𑀸. 𑀏𑀢𑁆𑀣 𑀘 𑀲𑀻𑀮𑀫𑀽𑀮𑀓𑀢𑁆𑀢𑀸 𑀲𑀸𑀲𑀦𑀲𑁆𑀲 𑀲𑀻𑀮𑁂𑀦 𑀆𑀤𑀺𑀓𑀮𑁆𑀬𑀸𑀡𑀢𑀸 𑀯𑀼𑀢𑁆𑀢𑀸, 𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀬𑀸 𑀯𑁂𑀫𑀚𑁆𑀛𑀪𑀸𑀯𑀢𑁄 𑀫𑀕𑁆𑀕𑁂𑀦 𑀫𑀚𑁆𑀛𑁂𑀓𑀮𑁆𑀬𑀸𑀡𑀢𑀸. 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀢𑁄 ¶ 𑀉𑀢𑁆𑀢𑀭𑀺 𑀓𑀭𑀡𑀻𑀬𑀸𑀪𑀸𑀯𑀢𑁄 𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀢𑀸. 𑀢𑁂𑀦𑀸𑀢𑀺 𑀲𑀻𑀮𑀸𑀤𑀺𑀤𑀲𑁆𑀲𑀦𑁂𑀦. 𑀅𑀢𑁆𑀣𑀯𑀲𑁂𑀦 𑀳𑀺 𑀇𑀥 𑀤𑁂𑀲𑀦𑀸𑀬 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀪𑀸𑀯𑁄 𑀯𑀼𑀢𑁆𑀢𑁄. ‘‘𑀢𑀲𑁆𑀫𑀸’’𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀲𑁄𑀢𑀽𑀦𑀫𑀦𑀼𑀲𑀸𑀲𑀦𑀻𑀤𑀲𑁆𑀲𑀦𑀁.

𑀏𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀓𑀸𑀭𑁂𑀦 𑀓𑀣𑀦𑀸. 𑀓𑀣𑀺𑀓𑀲𑀡𑁆𑀞𑀺𑀢𑀻𑀢𑀺 𑀥𑀫𑁆𑀫𑀓𑀣𑀺𑀓𑀲𑁆𑀲 𑀲𑀡𑁆𑀞𑀸𑀦𑀁 𑀓𑀣𑀦𑀯𑀲𑁂𑀦 𑀲𑀫𑀯𑀝𑁆𑀞𑀸𑀦𑀁.

𑀯𑀡𑁆𑀡𑀦𑀸 𑀅𑀢𑁆𑀣𑀯𑀺𑀯𑀭𑀡𑀸, 𑀧𑀲𑀁𑀲𑀦𑀸 𑀯𑀸. 𑀦 𑀲𑁄 𑀲𑀸𑀢𑁆𑀣𑀁 𑀤𑁂𑀲𑁂𑀢𑀺 𑀦𑀺𑀬𑁆𑀬𑀸𑀦𑀢𑁆𑀣𑀯𑀺𑀭𑀳𑀢𑁄 𑀢𑀲𑁆𑀲𑀸 𑀤𑁂𑀲𑀦𑀸𑀬. 𑀢𑀲𑁆𑀫𑀸𑀢𑀺 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀦𑀺𑀬𑁆𑀬𑀸𑀦𑀢𑁆𑀣𑀤𑁂𑀲𑀦𑀢𑁄. 𑀏𑀓𑀩𑁆𑀬𑀜𑁆𑀚𑀦𑀸𑀤𑀺𑀬𑀼𑀢𑁆𑀢𑀸𑀢𑀺 𑀲𑀺𑀣𑀺𑀮𑀥𑀦𑀺𑀢𑀸𑀤𑀺𑀪𑁂𑀤𑁂𑀲𑀼 𑀤𑀲𑀲𑀼 ¶ 𑀩𑁆𑀬𑀜𑁆𑀚𑀦𑁂𑀲𑀼 𑀏𑀓𑀧𑁆𑀧𑀓𑀸𑀭𑁂𑀦𑁂𑀯, 𑀤𑁆𑀯𑀺𑀧𑁆𑀧𑀓𑀸𑀭𑁂𑀦𑁂𑀯 𑀯𑀸 𑀩𑁆𑀬𑀜𑁆𑀚𑀦𑁂𑀦 𑀬𑀼𑀢𑁆𑀢𑀸 𑀤𑀫𑀺𑀴𑀪𑀸𑀲𑀸 𑀯𑀺𑀬. 𑀲𑀩𑁆𑀩𑀦𑀺𑀭𑁄𑀝𑁆𑀞𑀩𑁆𑀬𑀜𑁆𑀚𑀦𑀸𑀢𑀺 𑀯𑀺𑀯𑀝𑀓𑀭𑀡𑀢𑀸𑀬 𑀑𑀝𑁆𑀞𑁂 𑀅𑀨𑀼𑀲𑀸𑀧𑁂𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀢𑁄 𑀲𑀩𑁆𑀩𑀣𑀸 𑀑𑀝𑁆𑀞𑀨𑀼𑀲𑀦𑀭𑀳𑀺𑀢𑀯𑀺𑀫𑀼𑀢𑁆𑀢𑀩𑁆𑀬𑀜𑁆𑀚𑀦𑀸 𑀓𑀺𑀭𑀸𑀢𑀪𑀸𑀲𑀸 𑀯𑀺𑀬. 𑀲𑀩𑁆𑀩𑀯𑀺𑀲𑁆𑀲𑀝𑁆𑀞𑀩𑁆𑀬𑀜𑁆𑀚𑀦𑀸𑀢𑀺 𑀲𑀩𑁆𑀩𑀲𑁆𑀲𑁂𑀯 𑀯𑀺𑀲𑁆𑀲𑀚𑁆𑀚𑀦𑀻𑀬𑀬𑀼𑀢𑁆𑀢𑀢𑀸𑀬 𑀲𑀩𑁆𑀩𑀣𑀸 𑀯𑀺𑀲𑁆𑀲𑀕𑁆𑀕𑀩𑁆𑀬𑀜𑁆𑀚𑀦𑀸 𑀲𑀯𑀭𑀪𑀸𑀲𑀸 𑀯𑀺𑀬. 𑀲𑀩𑁆𑀩𑀦𑀺𑀕𑁆𑀕𑀳𑀺𑀢𑀩𑁆𑀬𑀜𑁆𑀚𑀦𑀸𑀢𑀺 𑀲𑀩𑁆𑀩𑀲𑁆𑀲𑁂𑀯 𑀲𑀸𑀦𑀼𑀲𑀸𑀭𑀢𑀸𑀬 𑀲𑀩𑁆𑀩𑀣𑀸 𑀩𑀺𑀦𑁆𑀤𑀼𑀲𑀳𑀺𑀢𑀩𑁆𑀬𑀜𑁆𑀚𑀦𑀸 𑀧𑀸𑀭𑀲𑀺𑀓𑀸𑀤𑀺𑀫𑀺𑀮𑀓𑁆𑀔𑀼𑀪𑀸𑀲𑀸 𑀯𑀺𑀬. 𑀏𑀯𑀁 ‘‘𑀤𑀫𑀺𑀴𑀓𑀺𑀭𑀸𑀢𑀲𑀯𑀭𑀫𑀺𑀮𑀓𑁆𑀔𑀽𑀦𑀁 𑀪𑀸𑀲𑀸 𑀯𑀺𑀬𑀸’’𑀢𑀺 𑀇𑀤𑀁 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀫𑀺𑀮𑀓𑁆𑀔𑀽𑀢𑀺 𑀘 𑀧𑀸𑀭𑀲𑀺𑀓𑀸𑀤𑀬𑁄. 𑀲𑀩𑁆𑀩𑀸𑀧𑁂𑀲𑀸 𑀩𑁆𑀬𑀜𑁆𑀚𑀦𑁂𑀓𑀤𑁂𑀲𑀯𑀲𑁂𑀦𑁂𑀯 𑀧𑀯𑀢𑁆𑀢𑀺𑀬𑀸 𑀅𑀧𑀭𑀺𑀧𑀼𑀡𑁆𑀡𑀩𑁆𑀬𑀜𑁆𑀚𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀩𑁆𑀬𑀜𑁆𑀚𑀦𑀧𑀸𑀭𑀺𑀧𑀽𑀭𑀺𑀬𑀸 𑀅𑀪𑀸𑀯𑀢𑁄 𑀅𑀩𑁆𑀬𑀜𑁆𑀚𑀦𑀸 𑀦𑀸𑀫𑀸’’𑀢𑀺.

𑀞𑀸𑀦𑀓𑀭𑀡𑀸𑀦𑀺 𑀲𑀺𑀣𑀺𑀮𑀸𑀦𑀺 𑀓𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀫𑀓𑁆𑀔𑀭𑀁 𑀧𑀜𑁆𑀘𑀲𑀼 𑀯𑀕𑁆𑀕𑁂𑀲𑀼 𑀧𑀞𑀫𑀢𑀢𑀺𑀬𑀁 𑀲𑀺𑀣𑀺𑀮𑀁. 𑀢𑀸𑀦𑀺 𑀅𑀲𑀺𑀣𑀺𑀮𑀸𑀦𑀺 𑀓𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀫𑀓𑁆𑀔𑀭𑀁 𑀢𑁂𑀲𑁆𑀯𑁂𑀯 𑀤𑀼𑀢𑀺𑀬𑀘𑀢𑀼𑀢𑁆𑀣𑀁 𑀥𑀦𑀺𑀢𑀁. 𑀤𑁆𑀯𑀺𑀫𑀢𑁆𑀢𑀓𑀸𑀮𑀫𑀓𑁆𑀔𑀭𑀁 𑀤𑀻𑀖𑀁. 𑀏𑀓𑀫𑀢𑁆𑀢𑀓𑀸𑀮𑀁 𑀭𑀲𑁆𑀲𑀁.

𑀧𑀫𑀸𑀡𑀁 𑀏𑀓𑀫𑀢𑁆𑀢𑀲𑁆𑀲, 𑀦𑀺𑀫𑀻𑀲𑀼𑀫𑀻𑀲𑀢𑁄’ 𑀩𑁆𑀭𑀯𑀼𑀁;

𑀅𑀗𑁆𑀕𑀼𑀮𑀺𑀨𑁄𑀝𑀓𑀸𑀮𑀲𑁆𑀲, 𑀧𑀫𑀸𑀡𑁂𑀦𑀸𑀧𑀺 𑀅𑀩𑁆𑀭𑀯𑀼𑀁.

𑀲𑀜𑁆𑀜𑁄𑀕𑀧𑀭𑀁, 𑀤𑀻𑀖𑀜𑁆𑀘 𑀕𑀭𑀼𑀓𑀁. 𑀅𑀲𑀁𑀬𑁄𑀕𑀧𑀭𑀁 𑀭𑀲𑁆𑀲𑀁 𑀮𑀳𑀼𑀓𑀁. 𑀞𑀸𑀦𑀓𑀭𑀡𑀸𑀦𑀺 𑀦𑀺𑀕𑁆𑀕𑀳𑁂𑀢𑁆𑀯𑀸 𑀅𑀯𑀺𑀯𑀝𑁂𑀦 𑀫𑀼𑀔𑁂𑀦 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀦𑀺𑀕𑁆𑀕𑀳𑀺𑀢𑀁. 𑀧𑀭𑀧𑀤𑁂𑀦 𑀲𑀫𑁆𑀩𑀚𑁆𑀛𑀺𑀢𑁆𑀯𑀸 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀲𑀫𑁆𑀩𑀦𑁆𑀥𑀁. 𑀢𑀣𑀸 𑀅𑀲𑀫𑁆𑀩𑀚𑁆𑀛𑀺𑀢𑀩𑁆𑀩𑀁 𑀯𑀯𑀢𑁆𑀣𑀺𑀢𑀁. 𑀞𑀸𑀦𑀓𑀭𑀡𑀸𑀦𑀺 𑀯𑀺𑀲𑁆𑀲𑀝𑁆𑀞𑀸𑀦𑀺 𑀓𑀢𑁆𑀯𑀸 𑀯𑀺𑀯𑀝𑁂𑀦 𑀫𑀼𑀔𑁂𑀦 𑀉𑀘𑁆𑀘𑀸𑀭𑁂𑀢𑀩𑁆𑀩𑀁 𑀯𑀺𑀫𑀼𑀢𑁆𑀢𑀁. 𑀤𑀲𑀥𑀸𑀢𑀺𑀆𑀤𑀻𑀲𑀼 𑀏𑀯𑀁 𑀲𑀺𑀣𑀺𑀮𑀸𑀤𑀺𑀯𑀲𑁂𑀦 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀲𑀗𑁆𑀔𑀸𑀢𑀲𑁆𑀲 𑀅𑀓𑁆𑀔𑀭𑀼𑀧𑁆𑀧𑀸𑀤𑀓𑀘𑀺𑀢𑁆𑀢𑀲𑁆𑀲 𑀤𑀲𑀳𑀺 𑀧𑀓𑀸𑀭𑁂𑀳𑀺 𑀩𑁆𑀬𑀜𑁆𑀚𑀦𑀸𑀦𑀁 𑀧𑀪𑁂𑀤𑁄𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀸𑀦𑀺 𑀳𑀺 𑀅𑀓𑁆𑀔𑀭𑀸𑀦𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺, 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀲𑁆𑀲 ¶ 𑀘 𑀩𑁆𑀬𑀜𑁆𑀚𑀦𑀢𑁄 𑀧𑀓𑀸𑀲𑀦𑀢𑁄 𑀩𑁆𑀬𑀜𑁆𑀚𑀦𑀸𑀦𑀻𑀢𑀺, 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸 𑀯𑀸 𑀓𑀭𑀡𑀪𑀽𑀢𑀸𑀬 𑀩𑁆𑀬𑀜𑁆𑀚𑀦𑀸𑀦𑀁 𑀤𑀲𑀥𑀸 𑀧𑀪𑁂𑀤𑁄𑀢𑀺𑀧𑀺 𑀬𑀼𑀚𑁆𑀚𑀢𑀺.

𑀅𑀫𑀓𑁆𑀔𑁂𑀢𑁆𑀯𑀸𑀢𑀺 𑀅𑀫𑀺𑀮𑁂𑀘𑁆𑀙𑁂𑀢𑁆𑀯𑀸 𑀅𑀯𑀺𑀦𑀸𑀲𑁂𑀢𑁆𑀯𑀸, 𑀅𑀳𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀤𑀢𑁆𑀣𑀫𑀸𑀳 ‘‘𑀧𑀭𑀺𑀧𑀼𑀡𑁆𑀡𑀩𑁆𑀬𑀜𑁆𑀚𑀦𑀫𑁂𑀯 𑀓𑀢𑁆𑀯𑀸’’𑀢𑀺, 𑀬𑀫𑀢𑁆𑀣𑀁 𑀪𑀕𑀯𑀸 𑀜𑀸𑀧𑁂𑀢𑀼𑀁 𑀏𑀓𑀕𑀸𑀣𑀁, 𑀏𑀓𑀯𑀸𑀓𑁆𑀬𑀫𑁆𑀧𑀺 𑀤𑁂𑀲𑁂𑀢𑀺, 𑀢𑀫𑀢𑁆𑀣𑀁 𑀧𑀭𑀺𑀫𑀡𑁆𑀟𑀮𑀧𑀤𑀩𑁆𑀬𑀜𑁆𑀚𑀦𑀸𑀬 𑀏𑀯 𑀤𑁂𑀲𑀦𑀸𑀬 𑀤𑁂𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀸𑀢𑀺 𑀧𑀭𑀺𑀧𑀼𑀡𑁆𑀡𑀩𑁆𑀬𑀜𑁆𑀚𑀦𑀥𑀫𑁆𑀫𑀤𑁂𑀲𑀦𑀢𑁄 ¶ . 𑀓𑁂𑀯𑀮𑀲𑀤𑁆𑀤𑁄 𑀇𑀥 𑀅𑀦𑀯𑀲𑁂𑀲𑀯𑀸𑀘𑀓𑁄. 𑀦 𑀅𑀯𑁄𑀫𑀺𑀲𑁆𑀲𑀢𑀸𑀤𑀺𑀯𑀸𑀘𑀓𑁄𑀢𑀺 𑀆𑀳 ‘‘𑀲𑀓𑀮𑀸𑀥𑀺𑀯𑀘𑀦’’𑀦𑁆𑀢𑀺. 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀲𑀩𑁆𑀩𑀲𑁄 𑀧𑀼𑀡𑁆𑀡𑀁. 𑀢𑀁 𑀧𑀦𑀢𑁆𑀣𑀢𑁄 𑀊𑀦𑀸𑀥𑀺𑀓𑀦𑀺𑀲𑁂𑀥𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀦𑀽𑀦𑀸𑀥𑀺𑀓𑀯𑀘𑀦’’𑀦𑁆𑀢𑀺. 𑀢𑀢𑁆𑀣 𑀬𑀤𑀢𑁆𑀣𑀁 𑀤𑁂𑀲𑀺𑀢𑁄, 𑀢𑀲𑁆𑀲 𑀲𑀸𑀥𑀓𑀢𑁆𑀢𑀸 𑀅𑀦𑀽𑀦𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀢𑀩𑁆𑀩𑀺𑀥𑀼𑀭𑀲𑁆𑀲 𑀧𑀦 𑀅𑀲𑀸𑀥𑀓𑀢𑁆𑀢𑀸 𑀅𑀦𑀥𑀺𑀓𑀢𑀸. 𑀉𑀧𑀦𑁂𑀢𑀩𑁆𑀩𑀲𑁆𑀲 𑀯𑀸 𑀯𑁄𑀤𑀸𑀦𑀢𑁆𑀣𑀲𑁆𑀲 𑀅𑀯𑀼𑀢𑁆𑀢𑀲𑁆𑀲 𑀅𑀪𑀸𑀯𑀢𑁄 𑀅𑀦𑀽𑀦𑀢𑀸, 𑀅𑀧𑀦𑁂𑀢𑀩𑁆𑀩𑀲𑁆𑀲 𑀲𑀁𑀓𑀺𑀮𑁂𑀲𑀢𑁆𑀣𑀲𑁆𑀲 𑀯𑀼𑀢𑁆𑀢𑀲𑁆𑀲 𑀅𑀪𑀸𑀯𑀢𑁄 𑀅𑀦𑀥𑀺𑀓𑀢𑀸. 𑀲𑀓𑀮𑀦𑁆𑀢𑀺 𑀲𑀩𑁆𑀩𑀪𑀸𑀕𑀯𑀦𑁆𑀢𑀁. 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀲𑀩𑁆𑀩𑀲𑁄 𑀧𑀼𑀡𑁆𑀡𑀫𑁂𑀯. 𑀢𑁂𑀦𑀸𑀳 ‘‘𑀏𑀓𑀤𑁂𑀲𑁂𑀦𑀸𑀧𑀺 𑀅𑀧𑀭𑀺𑀧𑀼𑀡𑁆𑀡𑀸 𑀦𑀢𑁆𑀣𑀻’’𑀢𑀺. 𑀅𑀧𑀭𑀺𑀲𑀼𑀤𑁆𑀥𑀸 𑀤𑁂𑀲𑀦𑀸 𑀳𑁄𑀢𑀺 𑀢𑀡𑁆𑀳𑀸𑀬 𑀲𑀁𑀓𑀺𑀮𑀺𑀝𑁆𑀞𑀢𑁆𑀢𑀸. 𑀮𑁄𑀓𑁂𑀳𑀺 𑀢𑀡𑁆𑀳𑀸𑀬 𑀆𑀫𑀲𑀺𑀢𑀩𑁆𑀩𑀢𑁄 𑀮𑁄𑀓𑀸𑀫𑀺𑀲𑀸, 𑀘𑀻𑀯𑀭𑀸𑀤𑀬𑁄 𑀧𑀘𑁆𑀘𑀬𑀸, 𑀢𑁂𑀲𑀼 𑀅𑀕𑀥𑀺𑀢𑀘𑀺𑀢𑁆𑀢𑀢𑀸𑀬 𑀮𑁄𑀓𑀸𑀫𑀺𑀲𑀦𑀺𑀭𑀧𑁂𑀓𑁆𑀔𑁄. 𑀳𑀺𑀢𑀨𑀭𑀡𑁂𑀦𑀸𑀢𑀺 𑀳𑀺𑀢𑀢𑁄 𑀨𑀭𑀡𑁂𑀦 𑀳𑀺𑀢𑀽𑀧𑀲𑀁𑀳𑀸𑀭𑁂𑀦 𑀯𑀺𑀲𑁂𑀲𑀦𑀪𑀽𑀢𑁂𑀦. 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀓𑀭𑀡𑀪𑀽𑀢𑀸𑀬 𑀫𑀼𑀤𑀼𑀳𑀤𑀬𑁄. 𑀉𑀮𑁆𑀮𑀼𑀫𑁆𑀧𑀦𑀲𑀪𑀸𑀯𑀲𑀡𑁆𑀞𑀺𑀢𑁂𑀦𑀸𑀢𑀺 𑀲𑀓𑀮𑀲𑀁𑀓𑀺𑀮𑁂𑀲𑀢𑁄, 𑀯𑀝𑁆𑀝𑀤𑀼𑀓𑁆𑀔𑀢𑁄 𑀘 𑀉𑀤𑁆𑀥𑀭𑀡𑀸𑀓𑀸𑀭𑀲𑀡𑁆𑀞𑀺𑀢𑁂𑀦, 𑀓𑀸𑀭𑀼𑀜𑁆𑀜𑀸𑀥𑀺𑀧𑁆𑀧𑀸𑀬𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀇𑀢𑁄 𑀧𑀝𑁆𑀞𑀸𑀬 𑀤𑀲𑁆𑀲𑀸𑀫𑀺, 𑀏𑀯𑀜𑁆𑀘 𑀤𑀲𑁆𑀲𑀸𑀫𑀻’’𑀢𑀺 𑀲𑀫𑀸𑀤𑀸𑀢𑀩𑁆𑀩𑀝𑁆𑀞𑁂𑀦 𑀤𑀸𑀦𑀁 𑀯𑀢𑀁. 𑀧𑀡𑁆𑀟𑀺𑀢𑀧𑀜𑁆𑀜𑀢𑁆𑀢𑀢𑀸𑀬 𑀲𑁂𑀝𑁆𑀞𑀝𑁆𑀞𑁂𑀦 𑀩𑁆𑀭𑀳𑁆𑀫𑀁, 𑀩𑁆𑀭𑀳𑁆𑀫𑀸𑀦𑀁 𑀯𑀸 𑀲𑁂𑀝𑁆𑀞𑀸𑀦𑀁 𑀘𑀭𑀺𑀬𑀦𑁆𑀢𑀺 𑀤𑀸𑀦𑀫𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀁. 𑀫𑀘𑁆𑀙𑀭𑀺𑀬𑀮𑁄𑀪𑀸𑀤𑀺𑀦𑀺𑀕𑁆𑀕𑀳𑀡𑁂𑀦 𑀲𑀫𑀸𑀘𑀺𑀡𑁆𑀡𑀢𑁆𑀢𑀸 𑀤𑀸𑀦𑀫𑁂𑀯 𑀲𑀼𑀘𑀺𑀡𑁆𑀡𑀁. 𑀇𑀤𑁆𑀥𑀻𑀢𑀺 𑀤𑁂𑀯𑀺𑀤𑁆𑀥𑀺. 𑀚𑀼𑀢𑀻𑀢𑀺 𑀧𑀪𑀸, 𑀆𑀦𑀼𑀪𑀸𑀯𑁄 𑀯𑀸. 𑀩𑀮𑀯𑀻𑀭𑀺𑀬𑀽𑀧𑀧𑀢𑁆𑀢𑀻𑀢𑀺 𑀫𑀳𑀢𑀸 𑀩𑀮𑁂𑀦, 𑀯𑀻𑀭𑀺𑀬𑁂𑀦 𑀘 𑀲𑀫𑀦𑁆𑀦𑀸𑀕𑀫𑁄. 𑀦𑀸𑀕𑀸𑀢𑀺 𑀯𑀭𑀼𑀡𑀦𑀸𑀕𑀭𑀸𑀚𑀸𑀦𑀁 𑀯𑀺𑀥𑀼𑀭𑀧𑀡𑁆𑀟𑀺𑀢𑀲𑁆𑀲 𑀆𑀮𑀧𑀦𑀁.

𑀤𑀸𑀦𑀧𑀢𑀻𑀢𑀺 𑀤𑀸𑀦𑀲𑀸𑀫𑀺𑀦𑁄. 𑀑𑀧𑀸𑀦𑀪𑀽𑀢𑀦𑁆𑀢𑀺 𑀉𑀤𑀓𑀢𑀺𑀢𑁆𑀣𑀫𑀺𑀯 𑀪𑀽𑀢𑀁.

𑀥𑀻𑀭𑀸𑀢𑀺 𑀲𑁄 𑀯𑀺𑀥𑀼𑀭𑀧𑀡𑁆𑀟𑀺𑀢𑀫𑀸𑀮𑀧𑀢𑀺.

𑀫𑀥𑀼𑀲𑁆𑀲𑀯𑁄𑀢𑀺 𑀫𑀥𑀼𑀭𑀲𑀲𑀦𑁆𑀤𑀦𑀁. 𑀧𑀼𑀜𑁆𑀜𑀦𑁆𑀢𑀺 𑀧𑀼𑀜𑁆𑀜𑀨𑀮𑀁, 𑀓𑀸𑀭𑀡𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑀁. 𑀩𑁆𑀭𑀳𑁆𑀫𑀁, 𑀩𑁆𑀭𑀳𑁆𑀫𑀸𑀦𑀁 𑀯𑀸 𑀘𑀭𑀺𑀬𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀯𑁂𑀬𑁆𑀬𑀸𑀯𑀘𑁆𑀘𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀢𑀺𑀢𑁆𑀢𑀺𑀭𑀺𑀬𑀦𑁆𑀢𑀺 ¶ 𑀢𑀺𑀢𑁆𑀢𑀺𑀭𑀲𑀓𑀼𑀡𑀭𑀸𑀚𑁂𑀦 𑀪𑀸𑀲𑀺𑀢𑀁.

𑀅𑀜𑁆𑀜𑀢𑁆𑀭 𑀢𑀸𑀳𑀻𑀢𑀺 𑀧𑀭𑀤𑀸𑀭𑀪𑀽𑀢𑀸𑀳𑀺 𑀯𑀚𑁆𑀚𑁂𑀢𑁆𑀯𑀸. 𑀅𑀫𑁆𑀳𑀦𑁆𑀢𑀺 𑀅𑀫𑁆𑀳𑀸𑀓𑀁.

𑀢𑀧𑀲𑁆𑀲𑀻 ¶ , 𑀮𑀽𑀔𑁄, 𑀚𑁂𑀕𑀼𑀘𑁆𑀙𑀻, 𑀧𑀯𑀺𑀯𑀺𑀢𑁆𑀢𑁄𑀢𑀺 𑀘𑀢𑀼𑀩𑁆𑀩𑀺𑀥𑀲𑁆𑀲 𑀤𑀼𑀓𑁆𑀓𑀭𑀲𑁆𑀲 𑀓𑀢𑀢𑁆𑀢𑀸 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁. 𑀲𑀼𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀮𑁄𑀫𑀳𑀁𑀲𑀦𑀲𑀼𑀢𑁆𑀢𑀁 𑀫𑀚𑁆𑀛𑀺𑀫𑀸𑀕𑀫𑁂 𑀫𑀽𑀮𑀧𑀡𑁆𑀡𑀸𑀲𑀓𑁂, ‘‘𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢’’𑀦𑁆𑀢𑀺𑀧𑀺 (𑀫. 𑀦𑀺. 𑁧.𑁧𑁪𑁬) 𑀢𑀁 𑀯𑀤𑀦𑁆𑀢𑀺.

𑀇𑀤𑁆𑀥𑀦𑁆𑀢𑀺 𑀲𑀫𑀺𑀤𑁆𑀥𑀁. 𑀨𑀻𑀢𑀦𑁆𑀢𑀺 𑀨𑀼𑀮𑁆𑀮𑀺𑀢𑀁. 𑀯𑀺𑀢𑁆𑀣𑀸𑀭𑀺𑀓𑀦𑁆𑀢𑀺 𑀯𑀺𑀢𑁆𑀣𑀸𑀭𑀪𑀽𑀢𑀁. 𑀩𑀸𑀳𑀼𑀚𑀜𑁆𑀜𑀦𑁆𑀢𑀺 𑀩𑀳𑀽𑀳𑀺 𑀚𑀦𑁂𑀳𑀺 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑁂𑀦 𑀜𑀸𑀢𑀁. 𑀧𑀼𑀣𑀼𑀪𑀽𑀢𑀦𑁆𑀢𑀺 𑀩𑀳𑀼𑀪𑀽𑀢𑀁. 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀻𑀢𑀺 𑀏𑀢𑁆𑀣 𑀤𑁂𑀯𑀮𑁄𑀓𑀢𑁄 𑀬𑀸𑀯 𑀫𑀦𑀼𑀲𑁆𑀲𑀮𑁄𑀓𑀸 𑀲𑀼𑀧𑀓𑀸𑀲𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 𑀧𑀸𑀲𑀸𑀤𑀺𑀓𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁩.𑁧𑁭𑁦) 𑀯𑀼𑀢𑁆𑀢𑀁, 𑀬𑀸𑀯 𑀤𑁂𑀯𑀸 𑀘 𑀫𑀦𑀼𑀲𑁆𑀲𑀸 𑀘𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀲𑀓𑀮𑀲𑀸𑀲𑀦𑀁 𑀇𑀥 ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸. ‘‘𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑀸𑀦𑀸𑀥𑀺𑀓𑀭𑀡𑀸𑀦𑀺 𑀲𑀩𑁆𑀩𑀧𑀤𑀸𑀦𑀺 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺𑀆𑀤𑀺𑀫𑀸𑀳. ‘‘𑀏𑀯𑀁 𑀤𑁂𑀲𑁂𑀦𑁆𑀢𑁄 𑀘𑀸’’𑀢𑀺 𑀳𑀺 𑀇𑀫𑀺𑀦𑀸 𑀩𑁆𑀭𑀳𑁆𑀫𑀘𑀭𑀺𑀬𑀲𑀤𑁆𑀤𑁂𑀦 𑀥𑀫𑁆𑀫𑀲𑀤𑁆𑀤𑀸𑀤𑀻𑀦𑀁 𑀲𑀫𑀸𑀦𑀢𑁆𑀣𑀢𑀁 𑀤𑀲𑁆𑀲𑁂𑀢𑀺, ‘‘𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺 𑀯𑀢𑁆𑀯𑀸𑀧𑀺 ‘‘𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀻’’𑀢𑀺 𑀯𑀘𑀦𑀁 𑀲𑀭𑀽𑀧𑀢𑁄 𑀅𑀢𑁆𑀣𑀧𑁆𑀧𑀓𑀸𑀲𑀦𑀢𑁆𑀣𑀦𑁆𑀢𑀺 𑀘 𑀯𑀺𑀪𑀸𑀯𑁂𑀢𑀺.

𑁧𑁯𑁧. 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑀫𑁆𑀧𑀤𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀆𑀤𑀺𑀓𑀮𑁆𑀬𑀸𑀡𑀢𑀸𑀤𑀺𑀧𑁆𑀧𑀪𑁂𑀤𑀕𑀼𑀡𑀲𑀫𑁆𑀧𑀤𑀁. 𑀤𑀽𑀭𑀲𑀫𑀼𑀲𑁆𑀲𑀸𑀭𑀺𑀢𑀫𑀸𑀦𑀲𑁆𑀲𑁂𑀯 𑀲𑀸𑀲𑀦𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀲𑀫𑁆𑀪𑀯𑀢𑀺, 𑀦 𑀫𑀸𑀦𑀚𑀸𑀢𑀺𑀓𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 ‘‘𑀦𑀺𑀳𑀢𑀫𑀸𑀦𑀢𑁆𑀢𑀸’’𑀢𑀺. 𑀉𑀲𑁆𑀲𑀦𑁆𑀦𑀢𑁆𑀢𑀸𑀢𑀺 𑀩𑀳𑀼𑀮𑀪𑀸𑀯𑀢𑁄. 𑀪𑁄𑀕𑀭𑀽𑀧𑀸𑀤𑀺𑀯𑀢𑁆𑀣𑀼𑀓𑀸 𑀫𑀤𑀸 𑀲𑀼𑀧𑁆𑀧𑀳𑁂𑀬𑁆𑀬𑀸 𑀳𑁄𑀦𑁆𑀢𑀺 𑀦𑀺𑀫𑀺𑀢𑁆𑀢𑀲𑁆𑀲 𑀅𑀦𑀯𑀝𑁆𑀞𑀸𑀦𑀢𑁄, 𑀦 𑀢𑀣𑀸 𑀓𑀼𑀮𑀯𑀺𑀚𑁆𑀚𑀸𑀤𑀺𑀫𑀤𑀸 𑀦𑀺𑀫𑀺𑀢𑁆𑀢𑀲𑁆𑀲 𑀲𑀫𑀯𑀝𑁆𑀞𑀸𑀦𑀢𑁄. 𑀢𑀲𑁆𑀫𑀸 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀓𑀼𑀮𑀻𑀦𑀸𑀦𑀁 𑀧𑀩𑁆𑀩𑀚𑀺𑀢𑀸𑀦𑀫𑁆𑀧𑀺 𑀚𑀸𑀢𑀺𑀯𑀺𑀚𑁆𑀚𑀁 𑀦𑀺𑀲𑁆𑀲𑀸𑀬 𑀫𑀸𑀦𑀚𑀧𑁆𑀧𑀦𑀁 𑀤𑀼𑀧𑁆𑀧𑀚𑀳𑀦𑁆𑀢𑀺 𑀆𑀳 ‘‘𑀬𑁂𑀪𑀼𑀬𑁆𑀬𑁂𑀦…𑀧𑁂… 𑀫𑀸𑀦𑀁 𑀓𑀭𑁄𑀦𑁆𑀢𑀻’’𑀢𑀺. 𑀯𑀺𑀚𑀸𑀢𑀺𑀢𑀸𑀬𑀸𑀢𑀺 𑀯𑀺𑀧𑀭𑀻𑀢𑀚𑀸𑀢𑀺𑀢𑀸𑀬, 𑀳𑀻𑀦𑀚𑀸𑀢𑀺𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀬𑁂𑀪𑀼𑀬𑁆𑀬𑁂𑀦 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸 𑀲𑀼𑀚𑀸𑀢𑀺𑀓𑀸 𑀏𑀯, 𑀦 𑀤𑀼𑀚𑁆𑀚𑀸𑀢𑀺𑀓𑀸𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀲𑀻𑀮𑁂 𑀧𑀢𑀺𑀝𑁆𑀞𑀳𑀺𑀢𑀼𑀁 𑀦 𑀉𑀲𑁆𑀲𑀳𑀦𑁆𑀢𑀺, 𑀲𑀼𑀯𑀺𑀲𑀼𑀤𑁆𑀥𑀁 𑀓𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀻𑀮𑀫𑁂𑀯 𑀳𑀺 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸, 𑀧𑀢𑀺𑀝𑁆𑀞𑀸𑀢𑀼𑀦𑁆𑀢𑀺 𑀯𑀸 𑀲𑀘𑁆𑀘𑀧𑀝𑀺𑀯𑁂𑀥𑁂𑀦 𑀮𑁄𑀓𑀼𑀢𑁆𑀢𑀭𑀸𑀬 𑀧𑀢𑀺𑀝𑁆𑀞𑀸𑀬 𑀧𑀢𑀺𑀝𑁆𑀞𑀸𑀢𑀼𑀁. 𑀲𑀸 𑀳𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸 𑀦𑀸𑀫.

𑀏𑀯𑀁 𑀩𑁆𑀬𑀢𑀺𑀭𑁂𑀓𑀢𑁄 𑀅𑀢𑁆𑀣𑀁 𑀯𑀢𑁆𑀯𑀸 𑀅𑀦𑁆𑀯𑀬𑀢𑁄𑀧𑀺 𑀯𑀤𑀢𑀺 ‘‘𑀕𑀳𑀧𑀢𑀺𑀤𑀸𑀭𑀓𑀸 𑀧𑀦𑀸’’𑀢𑀺𑀆𑀤𑀺𑀦𑀸. 𑀓𑀘𑁆𑀙𑁂𑀳𑀺 ¶ 𑀲𑁂𑀤𑀁 𑀫𑀼𑀜𑁆𑀘𑀦𑁆𑀢𑁂𑀳𑀻𑀢𑀺 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁. 𑀢𑀣𑀸 𑀧𑀺𑀝𑁆𑀞𑀺𑀬𑀸 𑀮𑁄𑀡𑀁 𑀧𑀼𑀧𑁆𑀨𑀫𑀸𑀦𑀸𑀬𑀸𑀢𑀺, 𑀲𑁂𑀤𑀁 𑀫𑀼𑀜𑁆𑀘𑀦𑁆𑀢𑀓𑀘𑁆𑀙𑀸 ¶ 𑀮𑁄𑀡𑀁 𑀧𑀼𑀧𑁆𑀨𑀫𑀸𑀦𑀧𑀺𑀝𑁆𑀞𑀺𑀓𑀸 𑀳𑀼𑀢𑁆𑀯𑀸, 𑀢𑁂𑀳𑀺 𑀯𑀸 𑀧𑀓𑀸𑀭𑁂𑀳𑀺 𑀮𑀓𑁆𑀔𑀺𑀢𑀸𑀢𑀺 𑀅𑀢𑁆𑀣𑁄. 𑀪𑀽𑀫𑀺𑀁 𑀓𑀲𑀺𑀢𑁆𑀯𑀸𑀢𑀺 𑀪𑀽𑀫𑀺𑀬𑀸 𑀓𑀲𑁆𑀲𑀦𑀢𑁄, 𑀔𑁂𑀢𑁆𑀢𑀽𑀧𑀚𑀻𑀯𑀦𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀸𑀤𑀺𑀲𑀲𑁆𑀲𑀸𑀢𑀺 𑀚𑀸𑀢𑀺𑀫𑀦𑁆𑀢𑀽𑀧𑀦𑀺𑀲𑁆𑀲𑀬𑀲𑁆𑀲. 𑀤𑀼𑀩𑁆𑀩𑀮𑀁 𑀫𑀸𑀦𑀁. 𑀩𑀮𑀯𑀁 𑀤𑀧𑁆𑀧𑀁. 𑀓𑀫𑁆𑀫𑀦𑁆𑀢𑀺 𑀧𑀭𑀺𑀓𑀫𑁆𑀫𑀁. ‘‘𑀇𑀢𑀭𑁂𑀳𑀻’’𑀢𑀺𑀆𑀤𑀺𑀦𑀸 ‘‘𑀉𑀲𑁆𑀲𑀦𑁆𑀦𑀢𑁆𑀢𑀸’’𑀢𑀺 𑀳𑁂𑀢𑀼𑀧𑀤𑀁 𑀯𑀺𑀯𑀭𑀢𑀺. ‘‘𑀇𑀢𑀻’’𑀢𑀺 𑀯𑀢𑁆𑀯𑀸 𑀢𑀤𑀧𑀭𑀸𑀫𑀲𑀺𑀢𑀩𑁆𑀩𑀁 𑀤𑀲𑁆𑀲𑁂𑀢𑀺 ‘‘𑀦𑀺𑀳𑀢𑀫𑀸𑀦𑀢𑁆𑀢𑀸’’𑀢𑀺𑀆𑀤𑀺𑀦𑀸, 𑀇𑀢𑀺𑀲𑀤𑁆𑀤𑁄 𑀯𑀸 𑀦𑀺𑀤𑀲𑁆𑀲𑀦𑁂, 𑀏𑀯𑀁 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀈𑀤𑀺𑀲𑁂𑀲𑀼.

𑀧𑀘𑁆𑀘𑀸𑀚𑀸𑀢𑁄𑀢𑀺 𑀏𑀢𑁆𑀣 𑀆𑀓𑀸𑀭𑁄 𑀉𑀧𑀲𑀕𑁆𑀕𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀧𑀢𑀺𑀚𑀸𑀢𑁄’’𑀢𑀺. 𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀭𑀸𑀕𑀸𑀤𑀻𑀦𑀁 𑀅𑀘𑁆𑀘𑀦𑁆𑀢𑀫𑁂𑀯 𑀧𑀳𑀸𑀦𑀤𑀻𑀧𑀦𑀢𑁄 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑀸𑀬 𑀲𑀩𑁆𑀩𑀣𑀸 𑀲𑀼𑀤𑁆𑀥𑀁. 𑀥𑀫𑁆𑀫𑀲𑁆𑀲 𑀲𑀸𑀫𑀻 𑀢𑀤𑀼𑀧𑁆𑀧𑀸𑀤𑀓𑀝𑁆𑀞𑁂𑀦, 𑀥𑀫𑁆𑀫𑁂𑀦 𑀯𑀸 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀲𑀸𑀫𑀻𑀢𑀺 𑀥𑀫𑁆𑀫𑀲𑁆𑀲𑀸𑀫𑀻. 𑀲𑀤𑁆𑀥𑀦𑁆𑀢𑀺 𑀧𑁄𑀣𑀼𑀚𑁆𑀚𑀦𑀺𑀓𑀲𑀤𑁆𑀥𑀸𑀯𑀲𑁂𑀦 𑀲𑀤𑁆𑀤𑀳𑀦𑀁. 𑀯𑀺𑀜𑁆𑀜𑀽𑀚𑀸𑀢𑀺𑀓𑀸𑀦𑀜𑁆𑀳𑀺 𑀥𑀫𑁆𑀫𑀲𑀫𑁆𑀧𑀢𑁆𑀢𑀺𑀕𑀳𑀡𑀧𑀼𑀩𑁆𑀩𑀺𑀓𑀸 𑀲𑀤𑁆𑀥𑀸𑀲𑀺𑀤𑁆𑀥𑀺 𑀘𑀢𑀽𑀲𑀼 𑀧𑀼𑀕𑁆𑀕𑀮𑁂𑀲𑀼 𑀥𑀫𑁆𑀫𑀧𑁆𑀧𑀫𑀸𑀡𑀥𑀫𑁆𑀫𑀧𑁆𑀧𑀲𑀦𑁆𑀦𑀧𑀼𑀕𑁆𑀕𑀮𑀪𑀸𑀯𑀢𑁄. ‘‘𑀬𑁄 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑀥𑀫𑁆𑀫𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸’’𑀢𑀺 𑀲𑀤𑁆𑀥𑀁 𑀧𑀝𑀺𑀮𑀪𑀢𑀺. 𑀬𑁄𑀚𑀦𑀲𑀢𑀦𑁆𑀢𑀭𑁂𑀧𑀺 𑀯𑀸 𑀧𑀤𑁂𑀲𑁂. 𑀚𑀸𑀬𑀫𑁆𑀧𑀢𑀺𑀓𑀸𑀢𑀺 𑀚𑀸𑀦𑀺𑀧𑀢𑀺𑀓𑀸. 𑀓𑀸𑀫𑀁 ‘‘𑀚𑀸𑀬𑀫𑁆𑀧𑀢𑀺𑀓𑀸’’𑀢𑀺 𑀯𑀼𑀢𑁆𑀢𑁂𑀬𑁂𑀯 𑀖𑀭𑀲𑀸𑀫𑀺𑀓𑀖𑀭𑀲𑀸𑀫𑀺𑀦𑀻𑀯𑀲𑁂𑀦 𑀤𑁆𑀯𑀺𑀦𑁆𑀦𑀫𑁂𑀯 𑀕𑀳𑀡𑀁 𑀯𑀺𑀜𑁆𑀜𑀸𑀬𑀢𑀺, 𑀬𑀲𑁆𑀲 𑀧𑀦 𑀧𑀼𑀭𑀺𑀲𑀲𑁆𑀲 𑀅𑀦𑁂𑀓𑀸 𑀧𑀚𑀸𑀧𑀢𑀺𑀬𑁄, 𑀢𑀲𑁆𑀲 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀏𑀓𑀸𑀬𑀧𑀺 𑀢𑀸𑀯 𑀲𑀁𑀯𑀸𑀲𑁄 𑀲𑀫𑁆𑀩𑀸𑀥𑁄𑀬𑁂𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀤𑁆𑀯𑁂’’𑀢𑀺 𑀯𑀼𑀢𑁆𑀢𑀁. 𑀭𑀸𑀕𑀸𑀤𑀺𑀦𑀸 𑀓𑀺𑀜𑁆𑀘𑀦𑀁, 𑀔𑁂𑀢𑁆𑀢𑀯𑀢𑁆𑀣𑀸𑀤𑀺𑀦𑀸 𑀧𑀮𑀺𑀩𑁄𑀥𑀦𑀁, 𑀢𑀤𑀼𑀪𑀬𑁂𑀦 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀓𑀺𑀜𑁆𑀘𑀦𑀧𑀮𑀺𑀩𑁄𑀥𑀦𑁄, 𑀲𑁄𑀬𑁂𑀯𑀢𑁆𑀣𑁄 𑀢𑀣𑀸. 𑀭𑀸𑀕𑁄 𑀏𑀯 𑀭𑀚𑁄, 𑀢𑀤𑀸𑀤𑀺𑀓𑀸 𑀤𑁄𑀲𑀫𑁄𑀳𑀭𑀚𑀸. 𑀯𑀼𑀢𑁆𑀢𑀜𑁆𑀳𑀺 ‘‘𑀭𑀸𑀕𑁄 𑀭𑀚𑁄 𑀦 𑀘 𑀧𑀦 𑀭𑁂𑀡𑀼 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺 (𑀫𑀳𑀸𑀦𑀺. 𑁨𑁦𑁯; 𑀘𑀽𑀴𑀦𑀺. 𑁭𑁪) 𑀆𑀕𑀫𑀦𑀧𑀣𑀢𑀸𑀧𑀺 𑀉𑀝𑁆𑀞𑀸𑀦𑀝𑁆𑀞𑀸𑀦𑀢𑀸 𑀏𑀯𑀸𑀢𑀺 𑀤𑁆𑀯𑁂𑀧𑀺 𑀲𑀁𑀯𑀡𑁆𑀡𑀦𑀸 𑀏𑀓𑀢𑁆𑀣𑀸, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀅𑀮𑀕𑁆𑀕𑀦𑀝𑁆𑀞𑁂𑀦𑀸𑀢𑀺 𑀅𑀲𑀚𑁆𑀚𑀦𑀝𑁆𑀞𑁂𑀦 𑀅𑀧𑁆𑀧𑀝𑀺𑀩𑀦𑁆𑀥𑀲𑀪𑀸𑀯𑁂𑀦. 𑀭𑀽𑀧𑀓𑀯𑀲𑁂𑀦, 𑀢𑀤𑁆𑀥𑀺𑀢𑀯𑀲𑁂𑀦 𑀯𑀸 𑀅𑀩𑁆𑀪𑁄𑀓𑀸𑀲𑁄𑀢𑀺 𑀤𑀲𑁆𑀲𑁂𑀢𑀼𑀁 𑀯𑀺𑀬-𑀲𑀤𑁆𑀤𑀕𑁆𑀕𑀳𑀡𑀁. 𑀏𑀯𑀁 𑀅𑀓𑀼𑀲𑀮𑀓𑀼𑀲𑀮𑀧𑁆𑀧𑀯𑀢𑁆𑀢𑀻𑀦𑀁 𑀞𑀸𑀦𑀸𑀞𑀸𑀦𑀪𑀸𑀯𑁂𑀦 𑀖𑀭𑀸𑀯𑀸𑀲𑀧𑀩𑁆𑀩𑀚𑁆𑀚𑀸𑀦𑀁 𑀲𑀫𑁆𑀩𑀸𑀥𑀩𑁆𑀪𑁄𑀓𑀸𑀲𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀬𑀸 𑀏𑀯 𑀅𑀝𑁆𑀞𑀸𑀦𑀝𑁆𑀞𑀸𑀦𑀪𑀸𑀯𑁂𑀦 𑀢𑁂𑀲𑀁 𑀢𑀩𑁆𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀭𑀚𑀸𑀦𑀁 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀁 𑀯𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀯𑀺𑀲𑀼𑀁 𑀯𑀺𑀲𑀼𑀁 𑀧𑀤𑀼𑀤𑁆𑀥𑀸𑀭𑀫𑀓𑀢𑁆𑀯𑀸 𑀲𑀫𑀸𑀲𑀢𑁄 𑀅𑀢𑁆𑀣𑀯𑀡𑁆𑀡𑀦𑀸 𑀲𑀗𑁆𑀔𑁂𑀧𑀓𑀣𑀸. 𑀏𑀓𑀫𑁆𑀧𑀺 𑀤𑀺𑀯𑀲𑀦𑁆𑀢𑀺 𑀏𑀓𑀤𑀺𑀯𑀲𑀫𑀢𑁆𑀢𑀫𑁆𑀧𑀺. 𑀅𑀔𑀡𑁆𑀟𑀁 𑀓𑀢𑁆𑀯𑀸𑀢𑀺 𑀤𑀼𑀓𑁆𑀓𑀝𑀫𑀢𑁆𑀢𑀲𑁆𑀲𑀸𑀧𑀺 𑀅𑀦𑀸𑀧𑀚𑁆𑀚𑀦𑁂𑀦 ¶ 𑀅𑀙𑀺𑀤𑁆𑀤𑀁 𑀓𑀢𑁆𑀯𑀸. 𑀘𑀭𑀺𑀫𑀓𑀘𑀺𑀢𑁆𑀢𑀦𑁆𑀢𑀺 𑀘𑀼𑀢𑀺𑀘𑀺𑀢𑁆𑀢𑀁. 𑀓𑀺𑀮𑁂𑀲𑀫𑀮𑁂𑀦𑀸𑀢𑀺 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀸𑀤𑀺𑀫𑀮𑁂𑀦. 𑀅𑀫𑀮𑀻𑀦𑀦𑁆𑀢𑀺 𑀅𑀲𑀁𑀓𑀺𑀮𑀺𑀝𑁆𑀞𑀁. 𑀧𑀭𑀺𑀬𑁄𑀤𑀸𑀢𑀝𑁆𑀞𑁂𑀦 𑀦𑀺𑀫𑁆𑀫𑀮𑀪𑀸𑀯𑁂𑀦 𑀲𑀗𑁆𑀔𑀁 𑀯𑀺𑀬 𑀮𑀺𑀔𑀺𑀢𑀁 𑀥𑁄𑀢𑀦𑁆𑀢𑀺 𑀲𑀗𑁆𑀔𑀮𑀺𑀔𑀺𑀢𑀁. 𑀅𑀢𑁆𑀣𑀫𑀢𑁆𑀢𑀁 𑀧𑀦 ¶ 𑀤𑀲𑁆𑀲𑁂𑀢𑀼𑀁 ‘‘𑀮𑀺𑀔𑀺𑀢𑀲𑀗𑁆𑀔𑀲𑀤𑀺𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀥𑁄𑀢𑀲𑀗𑁆𑀔𑀲𑀧𑁆𑀧𑀝𑀺𑀪𑀸𑀕𑀦𑁆𑀢𑀺 𑀢𑀤𑀢𑁆𑀣𑀲𑁆𑀲𑁂𑀯 𑀯𑀺𑀯𑀭𑀡𑀁. 𑀅𑀧𑀺𑀘 𑀮𑀺𑀔𑀺𑀢𑀁 𑀲𑀗𑁆𑀔𑀁 𑀲𑀗𑁆𑀔𑀮𑀺𑀔𑀺𑀢𑀁 𑀬𑀣𑀸 ‘‘𑀅𑀕𑁆𑀬𑀸𑀳𑀺𑀢𑁄’’𑀢𑀺, 𑀢𑀲𑁆𑀲𑀤𑀺𑀲𑀢𑁆𑀢𑀸 𑀧𑀦 𑀇𑀤𑀁 𑀲𑀗𑁆𑀔𑀮𑀺𑀔𑀺𑀢𑀦𑁆𑀢𑀺𑀧𑀺 𑀤𑀲𑁆𑀲𑁂𑀢𑀺, 𑀪𑀸𑀯𑀦𑀧𑀼𑀁𑀲𑀓𑀜𑁆𑀘𑁂𑀢𑀁. 𑀅𑀚𑁆𑀛𑀸𑀯𑀲𑀢𑀸𑀢𑀺 𑀏𑀢𑁆𑀣 𑀅𑀥𑀺-𑀲𑀤𑁆𑀤𑁂𑀦 𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑁂𑀦 𑀬𑁄𑀕𑀢𑁄 ‘‘𑀅𑀕𑀸𑀭’’𑀦𑁆𑀢𑀺 𑀏𑀢𑀁 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀕𑀸𑀭𑀫𑀚𑁆𑀛𑁂’’𑀢𑀺. 𑀬𑀁 𑀦𑀽𑀦 𑀬𑀤𑀺 𑀧𑀦 𑀧𑀩𑁆𑀩𑀚𑁂𑀬𑁆𑀬𑀁, 𑀲𑀸𑀥𑀼 𑀯𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀲𑀸𑀬𑁂𑀦 𑀭𑀢𑁆𑀢𑀸𑀦𑀺 𑀓𑀸𑀲𑀸𑀬𑀸𑀦𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀓𑀲𑀸𑀬𑀭𑀲𑀧𑀻𑀢𑀢𑀸𑀬𑀸’’𑀢𑀺 𑀇𑀫𑀺𑀦𑀸. 𑀓𑀲𑁆𑀫𑀸 𑀘𑁂𑀢𑀸𑀦𑀺 𑀕𑀳𑀺𑀢𑀸𑀦𑀻𑀢𑀺 𑀆𑀳 ‘‘𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀸𑀦𑀻’’𑀢𑀺. 𑀅𑀘𑁆𑀙𑀸𑀤𑁂𑀢𑁆𑀯𑀸𑀢𑀺 𑀯𑁄𑀳𑀸𑀭𑀯𑀘𑀦𑀫𑀢𑁆𑀢𑀁, 𑀧𑀭𑀺𑀤𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄, 𑀢𑀜𑁆𑀘 𑀔𑁄 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀯𑀲𑁂𑀦. 𑀅𑀕𑀸𑀭𑀯𑀸𑀲𑁄 𑀅𑀕𑀸𑀭𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀢𑀲𑁆𑀲 𑀳𑀺𑀢𑀁 𑀯𑀼𑀟𑁆𑀠𑀺𑀆𑀯𑀳𑀁 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀁. 𑀢𑀁 𑀅𑀦𑀕𑀸𑀭𑀺𑀬𑀦𑁆𑀢𑀺 𑀢𑀲𑁆𑀫𑀺𑀁 𑀅𑀦𑀕𑀸𑀭𑀺𑀬𑁂.

𑁧𑁯𑁨. 𑀲𑀳𑀲𑁆𑀲𑀢𑁄𑀢𑀺 𑀓𑀳𑀸𑀧𑀡𑀲𑀳𑀲𑁆𑀲𑀢𑁄. 𑀪𑁄𑀕𑀓𑁆𑀔𑀦𑁆𑀥𑁄 𑀪𑁄𑀕𑀭𑀸𑀲𑀺. 𑀆𑀩𑀦𑁆𑀥𑀦𑀝𑁆𑀞𑁂𑀦𑀸𑀢𑀺 ‘‘𑀧𑀼𑀢𑁆𑀢𑁄 𑀦𑀢𑁆𑀢𑀸 𑀧𑀦𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀧𑁂𑀫𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀩𑀦𑁆𑀥𑀦𑀝𑁆𑀞𑁂𑀦, 𑀏𑀢𑁂𑀦 𑀆𑀩𑀦𑁆𑀥𑀦𑀢𑁆𑀣𑁄 𑀧𑀭𑀺𑀯𑀝𑁆𑀝-𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀧𑀺𑀢𑀸𑀫𑀳𑀧𑀺𑀢𑀼𑀧𑀼𑀢𑁆𑀢𑀸𑀤𑀺𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀝𑁆𑀞𑁂𑀦 𑀧𑀭𑀺𑀯𑀝𑁆𑀝𑁄𑀢𑀺𑀧𑀺 𑀬𑀼𑀚𑁆𑀚𑀢𑀺. ‘‘𑀅𑀫𑁆𑀳𑀸𑀓𑀫𑁂𑀢𑁂’’𑀢𑀺 𑀜𑀸𑀬𑀦𑁆𑀢𑀻𑀢𑀺 𑀜𑀸𑀢𑀬𑁄.

𑁧𑁯𑁩. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀧𑀺𑀳𑀺𑀢𑀓𑀸𑀬𑀯𑀘𑀻𑀤𑁆𑀯𑀸𑀭𑁄 𑀲𑀫𑀸𑀦𑁄 𑀢𑁂𑀦 𑀲𑀁𑀯𑀭𑁂𑀦 𑀉𑀧𑁂𑀢𑁄 𑀦𑀸𑀫𑀸𑀢𑀺 𑀓𑀢𑁆𑀯𑀸 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀯𑀼𑀢𑁆𑀢𑀁. 𑀆𑀘𑀸𑀭𑀕𑁄𑀘𑀭𑀸𑀦𑀁 𑀯𑀺𑀢𑁆𑀣𑀸𑀭𑁄 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀤𑀻𑀲𑀼 (𑀯𑀺𑀪. 𑀅𑀝𑁆𑀞. 𑁫𑁦𑁩) 𑀕𑀳𑁂𑀢𑀩𑁆𑀩𑁄. ‘‘𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄’’𑀢𑀺𑀆𑀤𑀺 𑀘 𑀢𑀲𑁆𑀲𑁂𑀯 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑀪𑀸𑀯𑀲𑁆𑀲 𑀧𑀘𑁆𑀘𑀬𑀤𑀲𑁆𑀲𑀦𑀁. 𑀅𑀡𑀼𑀲𑀤𑀺𑀲𑀢𑀸𑀬 𑀅𑀧𑁆𑀧𑀫𑀢𑁆𑀢𑀓𑀁 ‘‘𑀅𑀡𑀽’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀧𑁆𑀧𑀫𑀢𑁆𑀢𑀓𑁂𑀲𑀽’’𑀢𑀺. 𑀅𑀲𑀜𑁆𑀘𑀺𑀘𑁆𑀘 𑀆𑀧𑀦𑁆𑀦𑀅𑀦𑀼𑀔𑀼𑀤𑁆𑀤𑀓𑀸𑀧𑀢𑁆𑀢𑀺𑀯𑀲𑁂𑀦, 𑀲𑀳𑀲𑀸 𑀉𑀧𑁆𑀧𑀦𑁆𑀦𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀘 𑀅𑀧𑁆𑀧𑀫𑀢𑁆𑀢𑀓𑀢𑀸. 𑀪𑀬𑀤𑀲𑁆𑀲𑀻𑀢𑀺 𑀪𑀬𑀤𑀲𑁆𑀲𑀦𑀲𑀻𑀮𑁄. 𑀲𑀫𑁆𑀫𑀸𑀢𑀺 𑀅𑀯𑀺𑀧𑀭𑀻𑀢𑀁, 𑀲𑀼𑀦𑁆𑀤𑀭𑀁 𑀯𑀸, 𑀢𑀩𑁆𑀪𑀸𑀯𑁄 𑀘 𑀲𑀓𑁆𑀓𑀘𑁆𑀘𑀁 𑀬𑀸𑀯𑀚𑀻𑀯𑀁 𑀅𑀯𑀻𑀢𑀺𑀓𑁆𑀓𑀫𑀯𑀲𑁂𑀦. ‘‘𑀲𑀺𑀓𑁆𑀔𑀸𑀧𑀤𑁂𑀲𑀽’’𑀢𑀺 𑀯𑀼𑀢𑁆𑀢𑁂𑀬𑁂𑀯 𑀢𑀤𑀯𑀬𑀯𑀪𑀽𑀢𑀁 ¶ ‘‘𑀲𑀺𑀓𑁆𑀔𑀸𑀧𑀤𑀁 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀻’’𑀢𑀺 𑀅𑀢𑁆𑀣𑀲𑁆𑀲 𑀕𑀫𑁆𑀬𑀫𑀸𑀦𑀢𑁆𑀢𑀸 𑀓𑀫𑁆𑀫𑀧𑀤𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀢𑀁 𑀢𑀁 𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺, 𑀢𑀁 𑀢𑀁 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑀁, 𑀲𑀺𑀓𑁆𑀔𑀸𑀬 𑀯𑀸 𑀅𑀥𑀺𑀕𑀫𑀼𑀧𑀸𑀬𑀁, 𑀢𑀲𑁆𑀲𑀸 𑀯𑀸 𑀦𑀺𑀲𑁆𑀲𑀬𑀦𑁆𑀢𑀺 𑀅𑀢𑁆𑀣𑁄.

𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄’’𑀢𑀺𑀆𑀤𑀺𑀯𑀘𑀦𑁂. 𑀆𑀘𑀸𑀭𑀕𑁄𑀘𑀭𑀕𑁆𑀕𑀳𑀡𑁂𑀦𑁂𑀯𑀸𑀢𑀺 ‘‘𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄’’𑀢𑀺 𑀯𑀘𑀦𑁂𑀦𑁂𑀯. 𑀢𑁂𑀦𑀸𑀳 ‘‘𑀓𑀼𑀲𑀮𑁂 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑁂 𑀕𑀳𑀺𑀢𑁂𑀧𑀻’’𑀢𑀺. 𑀦 𑀳𑀺 𑀆𑀘𑀸𑀭𑀕𑁄𑀘𑀭𑀲𑀤𑁆𑀤𑀫𑀢𑁆𑀢𑁂𑀦 𑀓𑀼𑀲𑀮𑀓𑀸𑀬𑀯𑀘𑀻𑀓𑀫𑁆𑀫𑀕𑁆𑀕𑀳𑀡𑀁 𑀲𑀫𑁆𑀪𑀯𑀢𑀺, 𑀇𑀫𑀺𑀦𑀸 𑀧𑀼𑀦𑀭𑀼𑀢𑁆𑀢𑀺𑀢𑀸𑀬 𑀘𑁄𑀤𑀦𑀸𑀮𑁂𑀲𑀁 𑀤𑀲𑁆𑀲𑁂𑀢𑀺. 𑀢𑀲𑁆𑀲𑀸𑀢𑀺 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀲𑁆𑀲. 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀉𑀧𑁆𑀧𑀢𑁆𑀢𑀺𑀬𑀸 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀲𑁆𑀲 ¶ 𑀤𑁆𑀯𑀸𑀭𑀲𑁆𑀲 𑀓𑀫𑁆𑀫𑀸𑀧𑀤𑁂𑀲𑁂𑀦 𑀤𑀲𑁆𑀲𑀦𑀢𑁆𑀣𑀁, 𑀏𑀢𑁂𑀦 𑀬𑀣𑀸𑀯𑀼𑀢𑁆𑀢𑀘𑁄𑀤𑀦𑀸𑀬 𑀲𑁄𑀥𑀦𑀁 𑀤𑀲𑁆𑀲𑁂𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀺𑀤𑁆𑀥𑁂𑀧𑀺 𑀲𑀢𑀺 𑀧𑀼𑀦𑀸𑀭𑀫𑁆𑀪𑁄 𑀦𑀺𑀬𑀫𑀸𑀬 𑀯𑀸 𑀳𑁄𑀢𑀺, 𑀅𑀢𑁆𑀣𑀦𑁆𑀢𑀭𑀩𑁄𑀥𑀦𑀸𑀬 𑀯𑀸, 𑀇𑀥 𑀧𑀦 𑀅𑀢𑁆𑀣𑀦𑁆𑀢𑀭𑀁 𑀩𑁄𑀥𑁂𑀢𑀺, 𑀢𑀲𑁆𑀫𑀸 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺. 𑀓𑀼𑀲𑀮𑁂𑀦𑀸𑀢𑀺 𑀘 𑀲𑀩𑁆𑀩𑀲𑁄 𑀅𑀦𑁂𑀲𑀦𑀧𑀳𑀸𑀦𑀢𑁄 𑀅𑀦𑀯𑀚𑁆𑀚𑁂𑀦. 𑀓𑀣𑀁 𑀢𑁂𑀦 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀤𑀲𑁆𑀲𑀦𑀦𑁆𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀉𑀧𑁆𑀧𑀦𑁆𑀦𑁂𑀦 𑀅𑀦𑀯𑀚𑁆𑀚𑁂𑀦 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀤𑀼𑀪𑀬𑀫𑁂𑀯 𑀳𑀺 𑀆𑀚𑀻𑀯𑀳𑁂𑀢𑀼𑀓𑀁 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁.

𑀇𑀤𑀸𑀦𑀺 𑀲𑀼𑀢𑁆𑀢𑀦𑁆𑀢𑀭𑁂𑀦 𑀲𑀁𑀲𑀦𑁆𑀤𑀺𑀢𑀼𑀁 ‘‘𑀫𑀼𑀡𑁆𑀟𑀺𑀓𑀧𑀼𑀢𑁆𑀢𑀲𑀼𑀢𑁆𑀢𑀦𑁆𑀢𑀯𑀲𑁂𑀦 𑀯𑀸 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺 𑀆𑀳. 𑀯𑀸-𑀲𑀤𑁆𑀤𑁄 𑀘𑁂𑀢𑁆𑀣 𑀲𑀼𑀢𑁆𑀢𑀦𑁆𑀢𑀭𑀲𑀁𑀲𑀦𑁆𑀤𑀦𑀸𑀲𑀗𑁆𑀔𑀸𑀢𑀅𑀢𑁆𑀣𑀦𑁆𑀢𑀭𑀯𑀺𑀓𑀧𑁆𑀧𑀦𑀢𑁆𑀣𑁄. 𑀫𑀼𑀡𑁆𑀟𑀺𑀓𑀧𑀼𑀢𑁆𑀢𑀲𑀼𑀢𑁆𑀢𑀦𑁆𑀢𑀁 𑀦𑀸𑀫 𑀫𑀚𑁆𑀛𑀺𑀫𑀸𑀕𑀫𑀯𑀭𑁂 𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑀓𑁂, 𑀬𑀁 ‘‘𑀲𑀫𑀡𑀫𑀼𑀡𑁆𑀟𑀺𑀓𑀧𑀼𑀢𑁆𑀢𑀲𑀼𑀢𑁆𑀢’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀣𑀧𑀢𑀻𑀢𑀺 𑀧𑀜𑁆𑀘𑀓𑀗𑁆𑀕𑀁 𑀦𑀸𑀫 𑀯𑀟𑁆𑀠𑀓𑀺𑀁 𑀪𑀕𑀯𑀸 𑀆𑀮𑀧𑀢𑀺. 𑀣𑀧𑀢𑀺-𑀲𑀤𑁆𑀤𑁄 𑀳𑀺 𑀯𑀟𑁆𑀠𑀓𑀺𑀧𑀭𑀺𑀬𑀸𑀬𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀸 ‘‘𑀓𑀢𑀫𑁂 𑀘 𑀣𑀧𑀢𑀺 𑀓𑀼𑀲𑀮𑀸 𑀲𑀻𑀮𑀸? 𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀓𑀼𑀲𑀮𑀁 𑀯𑀘𑀻𑀓𑀫𑁆𑀫’’𑀦𑁆𑀢𑀺 𑀲𑀻𑀮𑀲𑁆𑀲 𑀓𑀼𑀲𑀮𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀫𑁆𑀧𑀺 𑀔𑁄 𑀅𑀳𑀁 𑀣𑀧𑀢𑀺 𑀲𑀻𑀮𑀲𑁆𑀫𑀺𑀁 𑀯𑀤𑀸𑀫𑀻’’𑀢𑀺 (𑀫. 𑀦𑀺. 𑁨.𑁨𑁬𑁫) 𑀏𑀯𑀁 𑀧𑀯𑀢𑁆𑀢𑀸𑀬 𑀫𑀼𑀡𑁆𑀟𑀺𑀓𑀧𑀼𑀢𑁆𑀢𑀲𑀼𑀢𑁆𑀢𑀤𑁂𑀲𑀦𑀸𑀬 ‘‘𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑀼𑀲𑀮𑁂𑀦𑀸’’𑀢𑀺 𑀲𑀻𑀮𑀲𑁆𑀲 𑀓𑀼𑀲𑀮𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀅𑀬𑀁 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀤𑁂𑀲𑀦𑀸 𑀏𑀓𑀲𑀗𑁆𑀕𑀳𑀸 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺 𑀬𑀣𑀸 𑀢𑀁 𑀕𑀗𑁆𑀕𑁄𑀤𑀓𑁂𑀦 𑀬𑀫𑀼𑀦𑁄𑀤𑀓𑀁, 𑀢𑀲𑁆𑀫𑀸 𑀈𑀤𑀺𑀲𑀻𑀧𑀺 𑀪𑀕𑀯𑀢𑁄 𑀤𑁂𑀲𑀦𑀸𑀯𑀺𑀪𑀽𑀢𑀺 𑀅𑀢𑁆𑀣𑁂𑀯𑀸𑀢𑀺 ¶ . 𑀲𑀻𑀮𑀲𑁆𑀫𑀺𑀁 𑀯𑀤𑀸𑀫𑀻𑀢𑀺 𑀲𑀻𑀮𑀦𑁆𑀢𑀺 𑀯𑀤𑀸𑀫𑀺, 𑀲𑀻𑀮𑀲𑁆𑀫𑀺𑀁 𑀯𑀸 𑀆𑀥𑀸𑀭𑀪𑀽𑀢𑁂 𑀅𑀦𑁆𑀢𑁄𑀕𑀥𑀁 𑀧𑀭𑀺𑀬𑀸𑀧𑀦𑁆𑀦𑀁, 𑀦𑀺𑀤𑁆𑀥𑀸𑀭𑀡𑀲𑀫𑀼𑀤𑀸𑀬𑀪𑀽𑀢𑁂 𑀯𑀸 𑀏𑀓𑀁 𑀲𑀻𑀮𑀦𑁆𑀢𑀺 𑀯𑀤𑀸𑀫𑀺.

𑀢𑀺𑀯𑀺𑀥𑁂𑀦𑀸𑀢𑀺 𑀘𑀽𑀴𑀲𑀻𑀮𑀫𑀚𑁆𑀛𑀺𑀫𑀲𑀻𑀮𑀫𑀳𑀸𑀲𑀻𑀮𑀢𑁄 𑀢𑀺𑀯𑀺𑀥𑁂𑀦. ‘‘𑀫𑀦𑀘𑁆𑀙𑀝𑁆𑀞𑁂𑀲𑀽’’𑀢𑀺 𑀇𑀫𑀺𑀦𑀸 𑀓𑀸𑀬𑀧𑀜𑁆𑀘𑀫𑀸𑀦𑀫𑁂𑀯 𑀕𑀳𑀡𑀁 𑀦𑀺𑀯𑀢𑁆𑀢𑁂𑀢𑀺. 𑀉𑀧𑀭𑀺 𑀦𑀺𑀤𑁆𑀤𑁂𑀲𑁂 𑀯𑀓𑁆𑀔𑀫𑀸𑀦𑁂𑀲𑀼 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼. 𑀢𑀺𑀯𑀺𑀥𑁂𑀦𑀸𑀢𑀺 𑀘𑀢𑀽𑀲𑀼 𑀧𑀘𑁆𑀘𑁂𑀓𑀁 𑀬𑀣𑀸𑀮𑀸𑀪𑀬𑀣𑀸𑀩𑀮𑀬𑀣𑀸𑀲𑀸𑀭𑀼𑀧𑁆𑀧𑀢𑀸𑀯𑀲𑁂𑀦 𑀢𑀺𑀩𑁆𑀩𑀺𑀥𑁂𑀦.

𑀘𑀽𑀴𑀫𑀚𑁆𑀛𑀺𑀫𑀫𑀳𑀸𑀲𑀻𑀮𑀯𑀡𑁆𑀡𑀦𑀸

𑁧𑁯𑁪-𑁨𑁧𑁧. 𑀏𑀯𑀦𑁆𑀢𑀺 ‘‘𑀲𑁄 𑀏𑀯𑀁 𑀧𑀩𑁆𑀩𑀚𑀺𑀢𑁄 𑀲𑀫𑀸𑀦𑁄 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦. ‘‘𑀲𑀻𑀮𑀲𑁆𑀫𑀺’’𑀦𑁆𑀢𑀺 𑀇𑀤𑀁 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁 𑀢𑀢𑁄 𑀏𑀓𑀲𑁆𑀲 𑀦𑀺𑀤𑁆𑀥𑀸𑀭𑀡𑀻𑀬𑀢𑁆𑀢𑀸𑀢𑀺 𑀆𑀳 ‘‘𑀏𑀓𑀁 𑀲𑀻𑀮’’𑀦𑁆𑀢𑀺. 𑀅𑀧𑀺𑀘 𑀇𑀫𑀺𑀦𑀸 𑀆𑀥𑀸𑀭𑁂 𑀪𑀼𑀫𑁆𑀫𑀁 𑀤𑀲𑁆𑀲𑁂𑀢𑀺 𑀲𑀫𑀼𑀤𑀸𑀬𑀲𑁆𑀲 𑀅𑀯𑀬𑀯𑀸𑀥𑀺𑀝𑁆𑀞𑀸𑀦𑀢𑁆𑀢𑀸 𑀬𑀣𑀸 ‘‘𑀭𑀼𑀓𑁆𑀔𑁂 𑀲𑀸𑀔𑀸’’𑀢𑀺. ‘‘𑀇𑀤’’𑀦𑁆𑀢𑀺 𑀧𑀤𑁂𑀦 𑀓𑀢𑁆𑀯𑀢𑁆𑀣𑀯𑀲𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀁 𑀪𑀼𑀫𑁆𑀫𑀯𑀘𑀦𑀲𑁆𑀲 ¶ 𑀓𑀢𑁆𑀯𑀢𑁆𑀣𑁂 𑀧𑀯𑀢𑁆𑀢𑀦𑀢𑁄 𑀬𑀣𑀸 ‘‘𑀯𑀦𑀧𑁆𑀧𑀕𑀼𑀫𑁆𑀩𑁂 𑀬𑀣 𑀨𑀼𑀲𑀺𑀢𑀕𑁆𑀕𑁂’’𑀢𑀺 (𑀔𑀼. 𑀧𑀸. 𑁬.𑁧𑁩; 𑀲𑀼. 𑀦𑀺. 𑁨𑁩𑁬) 𑀤𑀲𑁆𑀲𑁂𑀢𑀺 ‘‘𑀧𑀘𑁆𑀘𑀢𑁆𑀢𑀯𑀘𑀦𑀢𑁆𑀣𑁂 𑀯𑀸 𑀏𑀢𑀁 𑀪𑀼𑀫𑁆𑀫’’𑀦𑁆𑀢𑀺 𑀇𑀫𑀺𑀦𑀸. 𑀅𑀬𑀫𑁂𑀯𑀢𑁆𑀣𑁄𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀢𑁆𑀣𑁄 𑀏𑀯. 𑀩𑁆𑀭𑀳𑁆𑀫𑀚𑀸𑀮𑁂𑀢𑀺 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁, (𑀤𑀻. 𑀦𑀺. 𑀅𑀝𑁆𑀞. 𑁧.𑁭) 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀧𑀤𑁂 𑀯𑀸. 𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀅𑀢𑁆𑀣𑁄. ‘‘𑀇𑀤𑀫𑀲𑁆𑀲 𑀳𑁄𑀢𑀺 𑀲𑀻𑀮𑀲𑁆𑀫𑀺’’𑀦𑁆𑀢𑀺 𑀏𑀢𑁆𑀣 𑀫𑀳𑀸𑀲𑀻𑀮𑀧𑀭𑀺𑀬𑁄𑀲𑀸𑀦𑁂𑀦 𑀦𑀺𑀤𑁆𑀥𑀸𑀭𑀺𑀬𑀫𑀸𑀦𑀲𑁆𑀲 𑀅𑀪𑀸𑀯𑀢𑁄 𑀧𑀘𑁆𑀘𑀢𑁆𑀢𑀯𑀘𑀦𑀢𑁆𑀣𑁄𑀬𑁂𑀯 𑀲𑀫𑁆𑀪𑀯𑀢𑀻𑀢𑀺 𑀆𑀳 ‘‘𑀇𑀤𑀁 𑀅𑀲𑁆𑀲 𑀲𑀻𑀮𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄’’𑀢𑀺, 𑀢𑀢𑁄𑀬𑁂𑀯 𑀘 𑀧𑀸𑀴𑀺𑀬𑀁 𑀅𑀧𑀺𑀕𑁆𑀕𑀳𑀡𑀫𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑁨𑁧𑁨. 𑀅𑀢𑁆𑀢𑀸𑀦𑀼𑀯𑀸𑀤𑀧𑀭𑀸𑀦𑀼𑀯𑀸𑀤𑀤𑀡𑁆𑀟𑀪𑀬𑀸𑀤𑀻𑀦𑀺 𑀅𑀲𑀁𑀯𑀭𑀫𑀽𑀮𑀓𑀸𑀦𑀺 𑀪𑀬𑀸𑀦𑀺. ‘‘𑀲𑀻𑀮𑀲𑁆𑀲𑀸𑀲𑀁𑀯𑀭𑀢𑁄𑀢𑀺 𑀲𑀻𑀮𑀲𑁆𑀲 𑀅𑀲𑀁𑀯𑀭𑀡𑀢𑁄, 𑀲𑀻𑀮𑀲𑀁𑀯𑀭𑀸𑀪𑀸𑀯𑀢𑁄𑀢𑀺 𑀅𑀢𑁆𑀣𑁄’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁨𑁮𑁦) 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁, ‘‘𑀬𑀤𑀺𑀤𑀁 𑀲𑀻𑀮𑀲𑀁𑀯𑀭𑀢𑁄’’𑀢𑀺 𑀧𑀦 𑀧𑀤𑀲𑁆𑀲 ‘‘𑀬𑀁 𑀇𑀤𑀁 𑀪𑀬𑀁 𑀲𑀻𑀮𑀲𑀁𑀯𑀭𑀢𑁄 𑀪𑀯𑁂𑀬𑁆𑀬𑀸’’𑀢𑀺 𑀅𑀢𑁆𑀣𑀯𑀘𑀦𑀢𑁄, ‘‘𑀲𑀻𑀮𑀲𑀁𑀯𑀭𑀳𑁂𑀢𑀼 𑀪𑀬𑀁 𑀦 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 𑀘 𑀅𑀢𑁆𑀣𑀲𑁆𑀲 𑀉𑀧𑀧𑀢𑁆𑀢𑀺𑀢𑁄 𑀲𑀻𑀮𑀲𑀁𑀯𑀭𑀢𑁄 𑀲𑀻𑀮𑀲𑀁𑀯𑀭𑀳𑁂𑀢𑀽𑀢𑀺 𑀅𑀢𑁆𑀣𑁄𑀬𑁂𑀯 𑀲𑀫𑁆𑀪𑀯𑀢𑀺. ‘‘𑀬𑀁 𑀇𑀤𑀁 𑀪𑀬𑀁 𑀲𑀻𑀮𑀲𑀁𑀯𑀭𑀢𑁄 𑀪𑀯𑁂𑀬𑁆𑀬𑀸’’𑀢𑀺 𑀳𑀺 𑀧𑀸𑀞𑁄𑀧𑀺 𑀤𑀺𑀲𑁆𑀲𑀢𑀺. ‘‘𑀲𑀁𑀯𑀭𑀢𑁄’’𑀢𑀺 𑀳𑁂𑀢𑀼𑀁 𑀯𑀢𑁆𑀯𑀸 𑀢𑀤𑀥𑀺𑀕𑀫𑀺𑀢𑀅𑀢𑁆𑀣𑀯𑀲𑁂𑀦 ‘‘𑀅𑀲𑀁𑀯𑀭𑀫𑀽𑀮𑀓𑀲𑁆𑀲 𑀪𑀬𑀲𑁆𑀲 𑀅𑀪𑀸𑀯𑀸’’𑀢𑀺𑀧𑀺 𑀳𑁂𑀢𑀼𑀁 ¶ 𑀯𑀤𑀢𑀺. 𑀬𑀣𑀸𑀯𑀺𑀥𑀸𑀦𑀯𑀺𑀳𑀺𑀢𑁂𑀦𑀸𑀢𑀺 𑀬𑀣𑀸𑀯𑀺𑀥𑀸𑀦𑀁 𑀲𑀫𑁆𑀧𑀸𑀤𑀺𑀢𑁂𑀦. 𑀔𑀢𑁆𑀢𑀺𑀬𑀸𑀪𑀺𑀲𑁂𑀓𑁂𑀦𑀸𑀢𑀺 𑀔𑀢𑁆𑀢𑀺𑀬𑀪𑀸𑀯𑀸𑀯𑀳𑁂𑀦 𑀅𑀪𑀺𑀲𑁂𑀓𑁂𑀦. 𑀫𑀼𑀤𑁆𑀥𑀦𑀺 𑀅𑀯𑀲𑀺𑀢𑁆𑀢𑁄𑀢𑀺 𑀫𑀢𑁆𑀣𑀓𑁂𑀬𑁂𑀯 𑀅𑀪𑀺𑀲𑀺𑀢𑁆𑀢𑁄. 𑀏𑀢𑁆𑀣 𑀘 ‘‘𑀬𑀣𑀸𑀯𑀺𑀥𑀸𑀦𑀯𑀺𑀳𑀺𑀢𑁂𑀦𑀸’’𑀢𑀺 𑀇𑀫𑀺𑀦𑀸 𑀧𑁄𑀭𑀸𑀡𑀓𑀸𑀘𑀺𑀡𑁆𑀡𑀯𑀺𑀥𑀸𑀦𑀲𑀫𑀗𑁆𑀕𑀺𑀢𑀸𑀲𑀗𑁆𑀔𑀸𑀢𑀁 𑀏𑀓𑀁 𑀅𑀗𑁆𑀕𑀁 𑀤𑀲𑁆𑀲𑁂𑀢𑀺, ‘‘𑀔𑀢𑁆𑀢𑀺𑀬𑀸𑀪𑀺𑀲𑁂𑀓𑁂𑀦𑀸’’𑀢𑀺 𑀇𑀫𑀺𑀦𑀸 𑀔𑀢𑁆𑀢𑀺𑀬𑀪𑀸𑀯𑀸𑀯𑀳𑀢𑀸𑀲𑀗𑁆𑀔𑀸𑀢𑀁, ‘‘𑀫𑀼𑀤𑁆𑀥𑀦𑀺 𑀅𑀯𑀲𑀺𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑀫𑀼𑀤𑁆𑀥𑀦𑀺𑀬𑁂𑀯 𑀅𑀪𑀺𑀲𑀺𑀜𑁆𑀘𑀺𑀢𑀪𑀸𑀯𑀲𑀗𑁆𑀔𑀸𑀢𑀁. 𑀇𑀢𑀺 𑀢𑀺𑀯𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀔𑀢𑁆𑀢𑀺𑀬𑀸𑀪𑀺𑀲𑁂𑀓𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀬𑁂𑀦 𑀅𑀪𑀺𑀲𑀺𑀢𑁆𑀢𑀭𑀸𑀚𑀽𑀦𑀁 𑀭𑀸𑀚𑀸𑀦𑀼𑀪𑀸𑀯𑁄 𑀲𑀫𑀺𑀚𑁆𑀛𑀢𑀺. 𑀓𑁂𑀦 𑀧𑀦𑀸𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻𑀢𑀺? 𑀧𑁄𑀭𑀸𑀡𑀓𑀲𑀢𑁆𑀣𑀸𑀕𑀢𑀦𑀬𑁂𑀦. 𑀯𑀼𑀢𑁆𑀢𑀜𑁆𑀳𑀺 𑀅𑀕𑁆𑀕𑀜𑁆𑀜𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 𑀫𑀳𑀸𑀲𑀫𑁆𑀫𑀢𑀸𑀪𑀺𑀲𑁂𑀓𑀯𑀺𑀪𑀸𑀯𑀦𑀸𑀬 ‘‘𑀢𑁂 𑀧𑀦𑀲𑁆𑀲 𑀔𑁂𑀢𑁆𑀢𑀲𑀸𑀫𑀺𑀦𑁄 𑀢𑀻𑀳𑀺 𑀲𑀗𑁆𑀔𑁂𑀳𑀺 𑀅𑀪𑀺𑀲𑁂𑀓𑀫𑁆𑀧𑀺 𑀅𑀓𑀁𑀲𑀽’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁩.𑁧𑁩𑁧) 𑀫𑀚𑁆𑀛𑀺𑀫𑀸𑀕𑀫𑀝𑁆𑀞𑀓𑀣𑀸𑀬𑀜𑁆𑀘 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀁 ‘‘𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁂𑀦𑀸𑀢𑀺 𑀢𑀻𑀳𑀺 𑀲𑀗𑁆𑀔𑁂𑀳𑀺 𑀔𑀢𑁆𑀢𑀺𑀬𑀸𑀪𑀺𑀲𑁂𑀓𑁂𑀦 𑀫𑀼𑀤𑁆𑀥𑀦𑀺 𑀅𑀪𑀺𑀲𑀺𑀢𑁆𑀢𑁂𑀦𑀸’’𑀢𑀺 (𑀫. 𑀦𑀺. 𑀅𑀝𑁆𑀞. 𑁧.𑁧𑁬𑁦) 𑀲𑀻𑀳𑀴𑀝𑁆𑀞𑀓𑀣𑀸𑀬𑀫𑁆𑀧𑀺 𑀘𑀽𑀴𑀲𑀻𑀳𑀦𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 ‘‘𑀧𑀞𑀫𑀁 𑀢𑀸𑀯 𑀅𑀪𑀺𑀲𑁂𑀓𑀁 𑀕𑀡𑁆𑀳𑀦𑁆𑀢𑀸𑀦𑀁 𑀭𑀸𑀚𑀽𑀦𑀁 𑀲𑀼𑀯𑀡𑁆𑀡𑀫𑀬𑀸𑀤𑀻𑀦𑀺 𑀢𑀻𑀡𑀺 𑀲𑀗𑁆𑀔𑀸𑀦𑀺 𑀘 𑀕𑀗𑁆𑀕𑁄𑀤𑀓𑀜𑁆𑀘 𑀔𑀢𑁆𑀢𑀺𑀬𑀓𑀜𑁆𑀜𑀜𑁆𑀘 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀬𑀁 𑀧𑀦 𑀢𑀢𑁆𑀣𑀸𑀕𑀢𑀦𑀬𑁂𑀦 𑀅𑀪𑀺𑀲𑁂𑀓𑀯𑀺𑀥𑀸𑀦𑀯𑀺𑀦𑀺𑀘𑁆𑀙𑀬𑁄 𑁋 𑀅𑀪𑀺𑀲𑁂𑀓𑀫𑀗𑁆𑀕𑀮𑀢𑁆𑀣𑀜𑁆𑀳𑀺 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀲𑁆𑀲 𑀫𑀡𑁆𑀟𑀧𑀲𑁆𑀲 𑀅𑀦𑁆𑀢𑁄𑀓𑀢𑀲𑁆𑀲 𑀉𑀤𑀼𑀫𑁆𑀩𑀭𑀲𑀸𑀔𑀫𑀡𑁆𑀟𑀧𑀲𑁆𑀲 𑀫𑀚𑁆𑀛𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁂 𑀉𑀤𑀼𑀫𑁆𑀩𑀭𑀪𑀤𑁆𑀤𑀧𑀻𑀞𑀫𑁆𑀳𑀺 𑀅𑀪𑀺𑀲𑁂𑀓𑀸𑀭𑀳𑀁 𑀅𑀪𑀺𑀚𑀘𑁆𑀘𑀁 𑀔𑀢𑁆𑀢𑀺𑀬𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀞𑀫𑀁 𑀢𑀸𑀯 𑀫𑀗𑁆𑀕𑀮𑀸𑀪𑀭𑀡𑀪𑀽𑀲𑀺𑀢𑀸 ¶ 𑀚𑀸𑀢𑀺𑀲𑀫𑁆𑀧𑀦𑁆𑀦𑀸 𑀔𑀢𑁆𑀢𑀺𑀬𑀓𑀜𑁆𑀜𑀸 𑀕𑀗𑁆𑀕𑁄𑀤𑀓𑀧𑀼𑀡𑁆𑀡𑀁 𑀲𑀼𑀯𑀡𑁆𑀡𑀫𑀬𑀲𑀸𑀫𑀼𑀤𑁆𑀤𑀺𑀓𑀤𑀓𑁆𑀔𑀺𑀡𑀸𑀯𑀝𑁆𑀝𑀲𑀗𑁆𑀔𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀲𑀓𑁆𑀓𑀘𑁆𑀘𑀁 𑀕𑀳𑁂𑀢𑁆𑀯𑀸 𑀲𑀻𑀲𑁄𑀧𑀭𑀺 𑀉𑀲𑁆𑀲𑀸𑀧𑁂𑀢𑁆𑀯𑀸 𑀢𑁂𑀦 𑀢𑀲𑁆𑀲 𑀫𑀼𑀤𑁆𑀥𑀦𑀺 𑀅𑀪𑀺𑀲𑁂𑀓𑁄𑀤𑀓𑀁 𑀅𑀪𑀺𑀲𑀺𑀜𑁆𑀘𑀢𑀺, 𑀏𑀯𑀜𑁆𑀘 𑀯𑀤𑁂𑀢𑀺 ‘‘𑀤𑁂𑀯 𑀢𑀁 𑀲𑀩𑁆𑀩𑁂𑀧𑀺 𑀔𑀢𑁆𑀢𑀺𑀬𑀕𑀡𑀸 𑀅𑀢𑁆𑀢𑀸𑀦𑀫𑀸𑀭𑀓𑁆𑀔𑀢𑁆𑀣𑀁 𑀇𑀫𑀺𑀦𑀸 𑀅𑀪𑀺𑀲𑁂𑀓𑁂𑀦 𑀅𑀪𑀺𑀲𑁂𑀓𑀺𑀓𑀁 𑀫𑀳𑀸𑀭𑀸𑀚𑀁 𑀓𑀭𑁄𑀦𑁆𑀢𑀺, 𑀢𑁆𑀯𑀁 𑀭𑀸𑀚𑀥𑀫𑁆𑀫𑁂𑀲𑀼 𑀞𑀺𑀢𑁄 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀳𑀺, 𑀏𑀢𑁂𑀲𑀼 𑀔𑀢𑁆𑀢𑀺𑀬𑀕𑀡𑁂𑀲𑀼 𑀢𑁆𑀯𑀁 𑀧𑀼𑀢𑁆𑀢𑀲𑀺𑀦𑁂𑀳𑀸𑀦𑀼𑀓𑀫𑁆𑀧𑀸𑀬 𑀲𑀳𑀺𑀢𑀘𑀺𑀢𑁆𑀢𑁄, 𑀳𑀺𑀢𑀲𑀫𑀫𑁂𑀢𑁆𑀢𑀘𑀺𑀢𑁆𑀢𑁄 𑀘 𑀪𑀯, 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀬𑀸 𑀢𑁂𑀲𑀁 𑀭𑀓𑁆𑀔𑀺𑀢𑁄 𑀘 𑀪𑀯𑀸𑀳𑀻’’𑀢𑀺. 𑀢𑀢𑁄 𑀧𑀼𑀦 𑀧𑀼𑀭𑁄𑀳𑀺𑀢𑁄𑀧𑀺 𑀧𑁄𑀭𑁄𑀳𑀺𑀘𑁆𑀘𑀞𑀸𑀦𑀸𑀦𑀼𑀭𑀽𑀧𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁄 𑀕𑀗𑁆𑀕𑁄𑀤𑀓𑀧𑀼𑀡𑁆𑀡𑀁 𑀭𑀚𑀢𑀫𑀬𑀁 𑀲𑀗𑁆𑀔𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀲𑀓𑁆𑀓𑀘𑁆𑀘𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀲𑀻𑀲𑁄𑀧𑀭𑀺 𑀉𑀲𑁆𑀲𑀸𑀧𑁂𑀢𑁆𑀯𑀸 𑀢𑁂𑀦 𑀢𑀲𑁆𑀲 𑀫𑀼𑀤𑁆𑀥𑀦𑀺 𑀅𑀪𑀺𑀲𑁂𑀓𑁄𑀤𑀓𑀁 𑀅𑀪𑀺𑀲𑀺𑀜𑁆𑀘𑀢𑀺, 𑀏𑀯𑀜𑁆𑀘 𑀯𑀤𑁂𑀢𑀺 ‘‘𑀤𑁂𑀯 𑀢𑀁 𑀲𑀩𑁆𑀩𑁂𑀧𑀺 𑀩𑁆𑀭𑀸𑀳𑁆𑀫𑀡𑀕𑀡𑀸 ¶ 𑀅𑀢𑁆𑀢𑀸𑀦𑀫𑀸𑀭𑀓𑁆𑀔𑀢𑁆𑀣𑀁 𑀇𑀫𑀺𑀦𑀸 𑀅𑀪𑀺𑀲𑁂𑀓𑁂𑀦 𑀅𑀪𑀺𑀲𑁂𑀓𑀺𑀓𑀁 𑀫𑀳𑀸𑀭𑀸𑀚𑀁 𑀓𑀭𑁄𑀦𑁆𑀢𑀺, 𑀢𑁆𑀯𑀁 𑀭𑀸𑀚𑀥𑀫𑁆𑀫𑁂𑀲𑀼 𑀞𑀺𑀢𑁄 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀳𑀺, 𑀏𑀢𑁂𑀲𑀼 𑀩𑁆𑀭𑀸𑀳𑁆𑀫𑀡𑀕𑀡𑁂𑀲𑀼 𑀢𑁆𑀯𑀁 𑀧𑀼𑀢𑁆𑀢𑀲𑀺𑀦𑁂𑀳𑀸𑀦𑀼𑀓𑀫𑁆𑀧𑀸𑀬 𑀲𑀳𑀺𑀢𑀘𑀺𑀢𑁆𑀢𑁄, 𑀳𑀺𑀢𑀲𑀫𑀫𑁂𑀢𑁆𑀢𑀘𑀺𑀢𑁆𑀢𑁄 𑀘 𑀪𑀯, 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀬𑀸 𑀢𑁂𑀲𑀁 𑀭𑀓𑁆𑀔𑀺𑀢𑁄 𑀘 𑀪𑀯𑀸𑀳𑀻’’𑀢𑀺. 𑀢𑀢𑁄 𑀧𑀼𑀦 𑀲𑁂𑀝𑁆𑀞𑀺𑀧𑀺 𑀲𑁂𑀝𑁆𑀞𑀺𑀝𑁆𑀞𑀸𑀦𑀪𑀽𑀲𑀦𑀪𑀽𑀲𑀺𑀢𑁄 𑀕𑀗𑁆𑀕𑁄𑀤𑀓𑀧𑀼𑀡𑁆𑀡𑀁 𑀭𑀢𑀦𑀫𑀬𑀁 𑀲𑀗𑁆𑀔𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀲𑀓𑁆𑀓𑀘𑁆𑀘𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀲𑀻𑀲𑁄𑀧𑀭𑀺 𑀉𑀲𑁆𑀲𑀸𑀧𑁂𑀢𑁆𑀯𑀸 𑀢𑁂𑀦 𑀢𑀲𑁆𑀲 𑀫𑀼𑀤𑁆𑀥𑀦𑀺 𑀅𑀪𑀺𑀲𑁂𑀓𑁄𑀤𑀓𑀁 𑀅𑀪𑀺𑀲𑀺𑀜𑁆𑀘𑀢𑀺, 𑀏𑀯𑀜𑁆𑀘 𑀯𑀤𑁂𑀢𑀺 ‘‘𑀤𑁂𑀯 𑀢𑀁 𑀲𑀩𑁆𑀩𑁂𑀧𑀺 𑀕𑀳𑀧𑀢𑀺𑀕𑀡𑀸 𑀅𑀢𑁆𑀢𑀸𑀦𑀫𑀸𑀭𑀓𑁆𑀔𑀢𑁆𑀣𑀁 𑀇𑀫𑀺𑀦𑀸 𑀅𑀪𑀺𑀲𑁂𑀓𑁂𑀦 𑀅𑀪𑀺𑀲𑁂𑀓𑀺𑀓𑀁 𑀫𑀳𑀸𑀭𑀸𑀚𑀁 𑀓𑀭𑁄𑀦𑁆𑀢𑀺, 𑀢𑁆𑀯𑀁 𑀭𑀸𑀚𑀥𑀫𑁆𑀫𑁂𑀲𑀼 𑀞𑀺𑀢𑁄 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀳𑀺, 𑀏𑀢𑁂𑀲𑀼 𑀕𑀳𑀧𑀢𑀺𑀕𑀡𑁂𑀲𑀼 𑀢𑁆𑀯𑀁 𑀧𑀼𑀢𑁆𑀢𑀲𑀺𑀦𑁂𑀳𑀸𑀦𑀼𑀓𑀫𑁆𑀧𑀸𑀬 𑀲𑀳𑀺𑀢𑀘𑀺𑀢𑁆𑀢𑁄, 𑀳𑀺𑀢𑀲𑀫𑀫𑁂𑀢𑁆𑀢𑀘𑀺𑀢𑁆𑀢𑁄 𑀘 𑀪𑀯, 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺𑀬𑀸 𑀢𑁂𑀲𑀁 𑀭𑀓𑁆𑀔𑀺𑀢𑁄 𑀘 𑀪𑀯𑀸𑀳𑀻’’𑀢𑀺. 𑀢𑁂 𑀧𑀦 𑀢𑀲𑁆𑀲 𑀏𑀯𑀁 𑀯𑀤𑀦𑁆𑀢𑀸 ‘‘𑀲𑀘𑁂 𑀢𑁆𑀯𑀁 𑀅𑀫𑁆𑀳𑀸𑀓𑀁 𑀯𑀘𑀦𑀸𑀦𑀼𑀭𑀽𑀧𑀁 𑀭𑀚𑁆𑀚𑀁 𑀓𑀭𑀺𑀲𑁆𑀲𑀲𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀓𑀭𑀺𑀲𑁆𑀲𑀲𑀺, 𑀢𑀯 𑀫𑀼𑀤𑁆𑀥𑀸 𑀲𑀢𑁆𑀢𑀥𑀸 𑀨𑀮𑀢𑀽’’𑀢𑀺 𑀏𑀯𑀁 𑀭𑀜𑁆𑀜𑁄 𑀅𑀪𑀺𑀲𑀧𑀦𑁆𑀢𑀺 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀦𑁆𑀢𑀺. 𑀯𑀟𑁆𑀠𑀓𑀻𑀲𑀽𑀓𑀭𑀚𑀸𑀢𑀓𑀸𑀤𑀻𑀳𑀺 𑀘𑀸𑀬𑀫𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄, 𑀅𑀪𑀺𑀲𑁂𑀓𑁄𑀧𑀓𑀭𑀡𑀸𑀦𑀺𑀧𑀺 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀤𑀻𑀲𑀼 (𑀧𑀸𑀭𑀸. 𑀅𑀝𑁆𑀞. 𑁧.𑀢𑀢𑀺𑀬𑀲𑀗𑁆𑀕𑀻𑀢𑀺𑀓𑀣𑀸) 𑀕𑀳𑁂𑀢𑀩𑁆𑀩𑀸𑀦𑀻𑀢𑀺.

𑀬𑀲𑁆𑀫𑀸 𑀦𑀺𑀳𑀢𑀧𑀘𑁆𑀘𑀸𑀫𑀺𑀢𑁆𑀢𑁄, 𑀢𑀲𑁆𑀫𑀸 𑀦 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑀯𑀚𑁆𑀚𑀢𑀸 𑀓𑀼𑀲𑀮𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀓𑀼𑀲𑀮𑀁 𑀲𑀻𑀮𑀧𑀤𑀝𑁆𑀞𑀸𑀦𑁂𑀳𑀻’’𑀢𑀺𑀆𑀤𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑀼𑀲𑀮𑀲𑀻𑀮𑀧𑀤𑀝𑁆𑀞𑀸𑀦𑀸 𑀅𑀯𑀺𑀧𑁆𑀧𑀝𑀺𑀲𑀸𑀭𑀧𑀸𑀫𑁄𑀚𑁆𑀚𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀥𑀫𑁆𑀫𑀸, 𑀅𑀯𑀺𑀧𑁆𑀧𑀝𑀺𑀲𑀸𑀭𑀸𑀤𑀺𑀦𑀺𑀫𑀺𑀢𑁆𑀢𑀜𑁆𑀘 𑀉𑀧𑁆𑀧𑀦𑁆𑀦𑀁 𑀘𑁂𑀢𑀲𑀺𑀓𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀘𑁂𑀢𑀲𑀺𑀓𑀲𑀼𑀔𑀲𑀫𑀼𑀝𑁆𑀞𑀸𑀦𑁂𑀳𑀺 𑀘 𑀧𑀡𑀻𑀢𑀭𑀽𑀧𑁂𑀳𑀺 𑀨𑀼𑀝𑁆𑀞𑀲𑀭𑀻𑀭𑀲𑁆𑀲 𑀉𑀧𑁆𑀧𑀦𑁆𑀦𑀁 𑀓𑀸𑀬𑀺𑀓𑀲𑀼𑀔𑀦𑁆𑀢𑀺.

𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀓𑀣𑀸𑀯𑀡𑁆𑀡𑀦𑀸

𑁨𑁧𑁩. 𑀲𑀸𑀫𑀜𑁆𑀜𑀲𑁆𑀲 ¶ 𑀯𑀺𑀲𑁂𑀲𑀸𑀧𑁂𑀓𑁆𑀔𑀢𑀸𑀬 𑀇𑀥𑀸𑀥𑀺𑀧𑁆𑀧𑁂𑀢𑁄𑀧𑀺 𑀯𑀺𑀲𑁂𑀲𑁄 𑀢𑁂𑀦 𑀅𑀧𑀭𑀺𑀘𑁆𑀘𑀢𑁆𑀢𑁄 𑀏𑀯 𑀳𑁄𑀢𑀻𑀢𑀺 𑀆𑀳 ‘‘𑀘𑀓𑁆𑀔𑀼𑀲𑀤𑁆𑀤𑁄 𑀓𑀢𑁆𑀣𑀘𑀺 𑀩𑀼𑀤𑁆𑀥𑀘𑀓𑁆𑀔𑀼𑀫𑁆𑀳𑀺 𑀯𑀢𑁆𑀢𑀢𑀻’’𑀢𑀺𑀆𑀤𑀺. 𑀯𑀺𑀚𑁆𑀚𑀫𑀸𑀦𑀫𑁂𑀯 𑀳𑀺 𑀅𑀪𑀺𑀥𑁂𑀬𑁆𑀬𑀪𑀸𑀯𑁂𑀦 𑀯𑀺𑀲𑁂𑀲𑀢𑁆𑀣𑀁 𑀯𑀺𑀲𑁂𑀲𑀦𑁆𑀢𑀭𑀦𑀺𑀯𑀢𑁆𑀢𑀦𑁂𑀦 𑀯𑀺𑀲𑁂𑀲𑀲𑀤𑁆𑀤𑁄 𑀯𑀺𑀪𑀸𑀯𑁂𑀢𑀺, 𑀦 𑀅𑀯𑀺𑀚𑁆𑀚𑀫𑀸𑀦𑀁. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 𑀩𑀼𑀤𑁆𑀥𑀸𑀦𑀫𑁂𑀯 𑀘𑀓𑁆𑀔𑀼 𑀤𑀲𑁆𑀲𑀦𑀦𑁆𑀢𑀺 ¶ 𑀩𑀼𑀤𑁆𑀥𑀘𑀓𑁆𑀔𑀼, 𑀆𑀲𑀬𑀸𑀦𑀼𑀲𑀬𑀜𑀸𑀡𑀁, 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀜𑁆𑀘. 𑀲𑀫𑀦𑁆𑀢𑀢𑁄 𑀲𑀩𑁆𑀩𑀲𑁄 𑀤𑀲𑁆𑀲𑀦𑀝𑁆𑀞𑁂𑀦 𑀘𑀓𑁆𑀔𑀽𑀢𑀺 𑀲𑀫𑀦𑁆𑀢𑀘𑀓𑁆𑀔𑀼, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. 𑀢𑀣𑀽𑀧𑀫𑀦𑁆𑀢𑀺 𑀧𑀩𑁆𑀩𑀢𑀫𑀼𑀤𑁆𑀥𑀽𑀧𑀫𑀁, 𑀥𑀫𑁆𑀫𑀫𑀬𑀁 𑀧𑀸𑀲𑀸𑀤𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀼𑀫𑁂𑀥 𑀲𑀫𑀦𑁆𑀢𑀘𑀓𑁆𑀔𑀼 𑀢𑁆𑀯𑀁 𑀚𑀦𑀢𑀫𑀯𑁂𑀓𑁆𑀔𑀲𑁆𑀲𑀽𑀢𑀺 𑀅𑀢𑁆𑀣𑁄. 𑀅𑀭𑀺𑀬𑀫𑀕𑁆𑀕𑀢𑁆𑀢𑀬𑀧𑀜𑁆𑀜𑀸𑀢𑀺 𑀳𑁂𑀝𑁆𑀞𑀺𑀫𑀸𑀭𑀺𑀬𑀫𑀕𑁆𑀕𑀢𑁆𑀢𑀬𑀧𑀜𑁆𑀜𑀸. ‘‘𑀥𑀫𑁆𑀫𑀘𑀓𑁆𑀔𑀼 𑀦𑀸𑀫 𑀳𑁂𑀝𑁆𑀞𑀺𑀫𑀸 𑀢𑀬𑁄 𑀫𑀕𑁆𑀕𑀸, 𑀢𑀻𑀡𑀺 𑀘 𑀨𑀮𑀸𑀦𑀻’’𑀢𑀺 𑀲𑀴𑀸𑀬𑀢𑀦𑀯𑀕𑁆𑀕𑀝𑁆𑀞𑀓𑀣𑀸𑀬𑀁 (𑀲𑀁. 𑀦𑀺. 𑀅𑀝𑁆𑀞. 𑁩.𑁪.𑁪𑁧𑁮) 𑀯𑀼𑀢𑁆𑀢𑀁, 𑀇𑀥 𑀧𑀦 𑀫𑀕𑁆𑀕𑁂𑀳𑁂𑀯 𑀨𑀮𑀸𑀦𑀺 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀘𑀢𑀼𑀲𑀘𑁆𑀘𑀲𑀗𑁆𑀔𑀸𑀢𑁂 𑀥𑀫𑁆𑀫𑁂 𑀘𑀓𑁆𑀔𑀽𑀢𑀺 𑀳𑀺 𑀥𑀫𑁆𑀫𑀘𑀓𑁆𑀔𑀼. 𑀧𑀜𑁆𑀜𑀸𑀬𑁂𑀯 𑀤𑀲𑁆𑀲𑀦𑀝𑁆𑀞𑁂𑀦 𑀘𑀓𑁆𑀔𑀽𑀢𑀺 𑀧𑀜𑁆𑀜𑀸𑀘𑀓𑁆𑀔𑀼, 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀲𑀯𑀓𑁆𑀔𑀬𑀜𑀸𑀡𑀁. 𑀤𑀺𑀩𑁆𑀩𑀘𑀓𑁆𑀔𑀼𑀫𑁆𑀳𑀻𑀢𑀺 𑀤𑀼𑀢𑀺𑀬𑀯𑀺𑀚𑁆𑀚𑀸𑀬. 𑀇𑀥𑀸𑀢𑀺 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸’’𑀢𑀺 𑀇𑀫𑀲𑁆𑀫𑀺𑀁 𑀧𑀸𑀞𑁂. 𑀅𑀬𑀦𑁆𑀢𑀺 𑀘𑀓𑁆𑀔𑀼𑀲𑀤𑁆𑀤𑁄. ‘‘𑀧𑀲𑀸𑀤𑀘𑀓𑁆𑀔𑀼𑀯𑁄𑀳𑀸𑀭𑁂𑀦𑀸’’𑀢𑀺 𑀇𑀫𑀺𑀦𑀸 𑀇𑀥 𑀘𑀓𑁆𑀔𑀼𑀲𑀤𑁆𑀤𑁄 𑀘𑀓𑁆𑀔𑀼𑀧𑀲𑀸𑀤𑁂𑀬𑁂𑀯 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀯𑀢𑁆𑀢𑀢𑀺, 𑀧𑀭𑀺𑀬𑀸𑀬𑀢𑁄 𑀧𑀦 𑀦𑀺𑀲𑁆𑀲𑀬𑀯𑁄𑀳𑀸𑀭𑁂𑀦 𑀦𑀺𑀲𑁆𑀲𑀺𑀢𑀲𑁆𑀲 𑀯𑀢𑁆𑀢𑀩𑁆𑀩𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀧𑀺 𑀬𑀣𑀸 ‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻’’𑀢𑀺 𑀤𑀲𑁆𑀲𑁂𑀢𑀺. 𑀇𑀥𑀸𑀧𑀺 𑀲𑀲𑀫𑁆𑀪𑀸𑀭𑀓𑀣𑀸 𑀅𑀯𑀲𑀺𑀝𑁆𑀞𑀸𑀢𑀺 𑀓𑀢𑁆𑀯𑀸 𑀲𑁂𑀲𑀧𑀤𑁂𑀲𑀼𑀧𑀻𑀢𑀺 𑀧𑀺-𑀲𑀤𑁆𑀤𑀕𑁆𑀕𑀳𑀡𑀁, ‘‘𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻’’𑀢𑀺𑀆𑀤𑀺𑀧𑀤𑁂𑀲𑀼𑀧𑀻𑀢𑀺 𑀅𑀢𑁆𑀣𑁄. 𑀯𑀺𑀯𑀺𑀥𑀁 𑀅𑀲𑀦𑀁 𑀔𑁂𑀤𑀦𑀁 𑀩𑁆𑀬𑀸𑀲𑁂𑀓𑁄, 𑀓𑀺𑀮𑁂𑀲𑁄 𑀏𑀯 𑀩𑁆𑀬𑀸𑀲𑁂𑀓𑁄, 𑀢𑁂𑀦 𑀯𑀺𑀭𑀳𑀺𑀢𑁄 𑀢𑀣𑀸, 𑀯𑀺𑀭𑀳𑀺𑀢𑀢𑀸 𑀘 𑀅𑀲𑀫𑁆𑀫𑀺𑀲𑁆𑀲𑀢𑀸, 𑀅𑀲𑀫𑁆𑀫𑀺𑀲𑁆𑀲𑀪𑀸𑀯𑁄 𑀘 𑀲𑀫𑁆𑀧𑀬𑁄𑀕𑀸𑀪𑀸𑀯𑀢𑁄 𑀧𑀭𑀺𑀲𑀼𑀤𑁆𑀥𑀢𑀸𑀢𑀺 𑀆𑀳 ‘‘𑀅𑀲𑀫𑁆𑀫𑀺𑀲𑁆𑀲𑀁 𑀧𑀭𑀺𑀲𑀼𑀤𑁆𑀥’’𑀦𑁆𑀢𑀺, 𑀓𑀺𑀮𑁂𑀲𑀤𑀼𑀓𑁆𑀔𑁂𑀦 𑀅𑀯𑁄𑀫𑀺𑀲𑁆𑀲𑀁, 𑀢𑀢𑁄 𑀘 𑀲𑀼𑀯𑀺𑀲𑀼𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀲𑀢𑀺 𑀘 𑀲𑀼𑀯𑀺𑀲𑀼𑀤𑁆𑀥𑁂 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂 𑀦𑀻𑀯𑀭𑀡𑁂𑀲𑀼 𑀧𑀥𑀸𑀦𑀪𑀽𑀢𑀧𑀸𑀧𑀥𑀫𑁆𑀫𑀯𑀺𑀕𑀫𑁂𑀦 𑀅𑀥𑀺𑀘𑀺𑀢𑁆𑀢𑀸𑀦𑀼𑀬𑁄𑀕𑁄 𑀳𑀢𑁆𑀣𑀕𑀢𑁄 𑀏𑀯 𑀳𑁄𑀢𑀺, 𑀢𑀲𑁆𑀫𑀸 𑀅𑀥𑀺𑀘𑀺𑀢𑁆𑀢𑀲𑀼𑀔𑀫𑁂𑀯 ‘‘𑀅𑀩𑁆𑀬𑀸𑀲𑁂𑀓𑀲𑀼𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀅𑀥𑀺𑀘𑀺𑀢𑁆𑀢𑀲𑀼𑀔’’𑀦𑁆𑀢𑀺 𑀇𑀫𑀺𑀦𑀸.

𑀲𑀢𑀺𑀲𑀫𑁆𑀧𑀚𑀜𑁆𑀜𑀓𑀣𑀸𑀯𑀡𑁆𑀡𑀦𑀸

𑁨𑁧𑁪. 𑀲𑀫𑀦𑁆𑀢𑀢𑁄 𑀧𑀓𑀸𑀭𑁂𑀳𑀺, 𑀧𑀓𑀝𑁆𑀞𑀁 𑀯𑀸 𑀲𑀯𑀺𑀲𑁂𑀲𑀁 𑀚𑀸𑀦𑀸𑀢𑀻𑀢𑀺 𑀲𑀫𑁆𑀧𑀚𑀸𑀦𑁄, 𑀢𑀲𑁆𑀲 𑀪𑀸𑀯𑁄 𑀲𑀫𑁆𑀧𑀚𑀜𑁆𑀜𑀁, 𑀢𑀣𑀸𑀧𑀯𑀢𑁆𑀢𑀜𑀸𑀡𑀁, 𑀢𑀲𑁆𑀲 𑀯𑀺𑀪𑀚𑀦𑀁 𑀲𑀫𑁆𑀧𑀚𑀜𑁆𑀜𑀪𑀸𑀚𑀦𑀻𑀬𑀁, 𑀢𑀲𑁆𑀫𑀺𑀁 𑀲𑀫𑁆𑀧𑀚𑀜𑁆𑀜𑀪𑀸𑀚𑀦𑀻𑀬𑀫𑁆𑀳𑀺. ‘‘𑀕𑀫𑀦’’𑀦𑁆𑀢𑀺 𑀇𑀫𑀺𑀦𑀸 𑀅𑀪𑀺𑀓𑁆𑀓𑀫𑀦𑀁 𑀅𑀪𑀺𑀓𑁆𑀓𑀦𑁆𑀢𑀦𑁆𑀢𑀺 𑀪𑀸𑀯𑀲𑀸𑀥𑀦𑀫𑀸𑀳. 𑀢𑀣𑀸 𑀧𑀝𑀺𑀓𑁆𑀓𑀫𑀦𑀁 𑀧𑀝𑀺𑀓𑁆𑀓𑀦𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀦𑀺𑀯𑀢𑁆𑀢𑀦’’𑀦𑁆𑀢𑀺. 𑀕𑀫𑀦𑀜𑁆𑀘𑁂𑀢𑁆𑀣 𑀦𑀺𑀯𑀢𑁆𑀢𑁂𑀢𑁆𑀯𑀸, 𑀅𑀦𑀺𑀯𑀢𑁆𑀢𑁂𑀢𑁆𑀯𑀸 𑀘 𑀕𑀫𑀦𑀁, 𑀦𑀺𑀯𑀢𑁆𑀢𑀦𑀁 𑀧𑀦 ¶ 𑀦𑀺𑀯𑀢𑁆𑀢𑀺𑀫𑀢𑁆𑀢𑀫𑁂𑀯, 𑀅𑀜𑁆𑀜𑀫𑀜𑁆𑀜𑀫𑀼𑀧𑀸𑀤𑀸𑀦𑀓𑀺𑀭𑀺𑀬𑀸𑀫𑀢𑁆𑀢𑀜𑁆𑀘𑁂𑀢𑀁 𑀤𑁆𑀯𑀬𑀁. 𑀓𑀣𑀁 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀕𑀫𑀦𑁂’’𑀢𑀺𑀆𑀤𑀺. 𑀅𑀪𑀺𑀳𑀭𑀦𑁆𑀢𑁄𑀢𑀺 𑀕𑀫𑀦𑀯𑀲𑁂𑀦 𑀓𑀸𑀬𑀁 𑀉𑀧𑀦𑁂𑀦𑁆𑀢𑁄. 𑀧𑀝𑀺𑀦𑀺𑀯𑀢𑁆𑀢𑁂𑀦𑁆𑀢𑁄𑀢𑀺 ¶ 𑀢𑀢𑁄 𑀧𑀼𑀦 𑀦𑀺𑀯𑀢𑁆𑀢𑁂𑀦𑁆𑀢𑁄. 𑀅𑀧𑀦𑀸𑀫𑁂𑀦𑁆𑀢𑁄𑀢𑀺 𑀅𑀧𑀓𑁆𑀓𑀫𑀦𑀯𑀲𑁂𑀦 𑀧𑀭𑀺𑀡𑀸𑀫𑁂𑀦𑁆𑀢𑁄. 𑀆𑀲𑀦𑀲𑁆𑀲𑀸𑀢𑀺 𑀧𑀻𑀞𑀓𑀸𑀤𑀺𑀆𑀲𑀦𑀲𑁆𑀲. 𑀧𑀼𑀭𑀺𑀫𑀅𑀗𑁆𑀕𑀸𑀪𑀺𑀫𑀼𑀔𑁄𑀢𑀺 𑀅𑀝𑀦𑀺𑀓𑀸𑀤𑀺𑀧𑀼𑀭𑀺𑀫𑀸𑀯𑀬𑀯𑀸𑀪𑀺𑀫𑀼𑀔𑁄. 𑀲𑀁𑀲𑀭𑀦𑁆𑀢𑁄𑀢𑀺 𑀲𑀁𑀲𑀧𑁆𑀧𑀦𑁆𑀢𑁄. 𑀧𑀘𑁆𑀙𑀺𑀫𑀅𑀗𑁆𑀕𑀧𑀤𑁂𑀲𑀦𑁆𑀢𑀺 𑀅𑀝𑀦𑀺𑀓𑀸𑀤𑀺𑀧𑀘𑁆𑀙𑀺𑀫𑀸𑀬𑀯𑀧𑁆𑀧𑀤𑁂𑀲𑀁. 𑀧𑀘𑁆𑀘𑀸𑀲𑀁𑀲𑀭𑀦𑁆𑀢𑁄𑀢𑀺 𑀧𑀝𑀺𑀆𑀲𑀧𑁆𑀧𑀦𑁆𑀢𑁄. ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀦𑀺𑀧𑀦𑁆𑀦𑀲𑁆𑀲𑁂𑀯 𑀅𑀪𑀺𑀫𑀼𑀔𑀁 𑀲𑀁𑀲𑀧𑁆𑀧𑀦𑀧𑀝𑀺𑀆𑀲𑀧𑁆𑀧𑀦𑀸𑀦𑀺 𑀤𑀲𑁆𑀲𑁂𑀢𑀺. 𑀞𑀸𑀦𑀦𑀺𑀲𑀚𑁆𑀚𑀸𑀲𑀬𑀦𑁂𑀲𑀼 𑀳𑀺 𑀬𑁄 𑀕𑀫𑀦𑀯𑀺𑀥𑀼𑀭𑁄 𑀓𑀸𑀬𑀲𑁆𑀲 𑀧𑀼𑀭𑀢𑁄 𑀅𑀪𑀺𑀳𑀸𑀭𑁄, 𑀲𑁄 𑀅𑀪𑀺𑀓𑁆𑀓𑀫𑁄. 𑀧𑀘𑁆𑀙𑀢𑁄 𑀅𑀧𑀳𑀸𑀭𑁄 𑀧𑀝𑀺𑀓𑁆𑀓𑀫𑁄𑀢𑀺 𑀮𑀓𑁆𑀔𑀡𑀁.

𑀲𑀫𑁆𑀧𑀚𑀸𑀦𑀦𑀁 𑀲𑀫𑁆𑀧𑀚𑀸𑀦𑀁, 𑀢𑁂𑀦 𑀅𑀢𑁆𑀢𑀦𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀓𑀭𑀡𑀲𑀻𑀮𑁄 𑀲𑀫𑁆𑀧𑀚𑀸𑀦𑀓𑀸𑀭𑀻𑀢𑀺 𑀆𑀳 ‘‘𑀲𑀫𑁆𑀧𑀚𑀜𑁆𑀜𑁂𑀦 𑀲𑀩𑁆𑀩𑀓𑀺𑀘𑁆𑀘𑀓𑀸𑀭𑀻’’𑀢𑀺. ‘‘𑀲𑀫𑁆𑀧𑀚𑀜𑁆𑀜𑀫𑁂𑀯 𑀯𑀸 𑀓𑀸𑀭𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀧𑀚𑀸𑀦𑀲𑁆𑀲 𑀓𑀭𑀡𑀲𑀻𑀮𑁄 𑀲𑀫𑁆𑀧𑀚𑀸𑀦𑀓𑀸𑀭𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀲𑁄 𑀳𑀻’’𑀢𑀺𑀆𑀤𑀺 𑀤𑀼𑀢𑀺𑀬𑀯𑀺𑀓𑀧𑁆𑀧𑀲𑁆𑀲 𑀲𑀫𑀢𑁆𑀣𑀦𑀁. ‘‘𑀲𑀫𑁆𑀧𑀚𑀜𑁆𑀜’’𑀦𑁆𑀢𑀺 𑀘 𑀇𑀫𑀺𑀦𑀸 𑀲𑀫𑁆𑀧𑀚𑀸𑀦-𑀲𑀤𑁆𑀤𑀲𑁆𑀲 𑀲𑀫𑁆𑀧𑀚𑀜𑁆𑀜𑀧𑀭𑀺𑀬𑀸𑀬𑀢𑀸 𑀯𑀼𑀢𑁆𑀢𑀸. 𑀢𑀣𑀸 𑀳𑀺 𑀆𑀘𑀭𑀺𑀬𑀸𑀦𑀦𑁆𑀤𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁 ‘‘𑀲𑀫𑀦𑁆𑀢𑀢𑁄, 𑀲𑀫𑁆𑀫𑀸, 𑀲𑀫𑀁 𑀯𑀸 𑀧𑀚𑀸𑀦𑀦𑀁 𑀲𑀫𑁆𑀧𑀚𑀸𑀦𑀁, 𑀢𑀤𑁂𑀯 𑀲𑀫𑁆𑀧𑀚𑀜𑁆𑀜’’𑀦𑁆𑀢𑀺 (𑀯𑀺𑀪. 𑀫𑀽𑀮𑀝𑀻. 𑁨.𑁫𑁨𑁩) 𑀅𑀬𑀁 𑀅𑀝𑁆𑀞𑀓𑀣𑀸𑀢𑁄 𑀅𑀧𑀭𑁄 𑀦𑀬𑁄 𑁋 𑀬𑀣𑀸 𑀅𑀢𑀺𑀓𑁆𑀓𑀦𑁆𑀢𑀸𑀤𑀻𑀲𑀼 𑀅𑀲𑀫𑁆𑀫𑁄𑀳𑀁 𑀉𑀧𑁆𑀧𑀸𑀤𑁂𑀢𑀺, 𑀢𑀣𑀸 𑀲𑀫𑁆𑀧𑀚𑀸𑀦𑀲𑁆𑀲 𑀓𑀸𑀭𑁄 𑀓𑀭𑀡𑀁 𑀲𑀫𑁆𑀧𑀚𑀸𑀦𑀓𑀸𑀭𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀫𑁆𑀧𑀚𑀸𑀦𑀓𑀸𑀭𑀻𑀢𑀺.

𑀥𑀫𑁆𑀫𑀢𑁄 𑀯𑀟𑁆𑀠𑀺𑀲𑀗𑁆𑀔𑀸𑀢𑁂𑀦 𑀅𑀢𑁆𑀣𑁂𑀦 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀸𑀢𑁆𑀣𑀓𑀁, 𑀅𑀪𑀺𑀓𑁆𑀓𑀦𑁆𑀢𑀸𑀤𑀺, 𑀲𑀸𑀢𑁆𑀣𑀓𑀲𑁆𑀲 𑀲𑀫𑁆𑀧𑀚𑀸𑀦𑀦𑀁 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁. 𑀲𑀧𑁆𑀧𑀸𑀬𑀲𑁆𑀲 𑀅𑀢𑁆𑀢𑀦𑁄 𑀧𑀢𑀺𑀭𑀽𑀧𑀲𑁆𑀲 𑀲𑀫𑁆𑀧𑀚𑀸𑀦𑀦𑀁 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁. 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀪𑀺𑀓𑁆𑀔𑀸𑀘𑀸𑀭𑀕𑁄𑀘𑀭𑁂, 𑀅𑀜𑁆𑀜𑀢𑁆𑀣 𑀘 𑀧𑀯𑀢𑁆𑀢𑁂𑀲𑀼 𑀅𑀯𑀺𑀚𑀳𑀺𑀢𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀔𑀸𑀢𑁂 𑀕𑁄𑀘𑀭𑁂 𑀲𑀫𑁆𑀧𑀚𑀸𑀦𑀦𑀁 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁. 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, 𑀳𑀺 𑀏𑀓𑀲𑁂𑀲𑀦𑀬𑁂𑀦 𑀯𑀸 𑀕𑁄𑀘𑀭𑀲𑀤𑁆𑀤𑁄 𑀢𑀤𑀢𑁆𑀣𑀤𑁆𑀯𑀬𑁂𑀧𑀺 𑀧𑀯𑀢𑁆𑀢𑀢𑀺. 𑀅𑀢𑀺𑀓𑁆𑀓𑀫𑀸𑀤𑀻𑀲𑀼 𑀅𑀲𑀫𑁆𑀫𑀼𑀬𑁆𑀳𑀦𑀲𑀗𑁆𑀔𑀸𑀢𑀁 𑀅𑀲𑀫𑁆𑀫𑁄𑀳𑀫𑁂𑀯 𑀲𑀫𑁆𑀧𑀚𑀜𑁆𑀜𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁. 𑀘𑀺𑀢𑁆𑀢𑀯𑀲𑁂𑀦𑁂𑀯𑀸𑀢𑀺 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦𑁂𑀯, 𑀘𑀺𑀢𑁆𑀢𑀯𑀲𑀫𑀦𑀼𑀕𑀢𑁂𑀦𑁂𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑁂𑀢𑁆𑀯𑀸, 𑀧𑀝𑀺𑀲𑀗𑁆𑀔𑀸𑀬𑀸𑀢𑀺 𑀅𑀢𑁆𑀣𑁄. 𑀲𑀗𑁆𑀖𑀤𑀲𑁆𑀲𑀦𑁂𑀦𑁂𑀯 𑀉𑀧𑁄𑀲𑀣𑀧𑀯𑀸𑀭𑀡𑀸𑀤𑀺𑀅𑀢𑁆𑀣𑀸𑀬 𑀕𑀫𑀦𑀁 𑀲𑀗𑁆𑀕𑀳𑀺𑀢𑀁. 𑀆𑀤𑀺𑀲𑀤𑁆𑀤𑁂𑀦 𑀓𑀲𑀺𑀡𑀧𑀭𑀺𑀓𑀫𑁆𑀫𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀁 𑀢𑀤𑀢𑁆𑀣𑀫𑁂𑀯 𑀯𑀺𑀯𑀭𑀺𑀢𑀼𑀁 ‘‘𑀘𑁂𑀢𑀺𑀬𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀻𑀢𑀺 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄 𑀏𑀲. 𑀲𑀫𑀣𑀯𑀺𑀧𑀲𑁆𑀲𑀦𑀼𑀧𑁆𑀧𑀸𑀤𑀦𑀫𑁆𑀧𑀺 𑀳𑀺 𑀪𑀺𑀓𑁆𑀔𑀼𑀦𑁄 𑀯𑀟𑁆𑀠𑀺𑀬𑁂𑀯. 𑀢𑀢𑁆𑀣𑀸𑀢𑀺 𑀅𑀲𑀼𑀪𑀸𑀭𑀫𑁆𑀫𑀡𑁂. 𑀓𑁂𑀘𑀻𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄. 𑀆𑀫𑀺𑀲𑀢𑁄𑀢𑀺 ¶ 𑀘𑀻𑀯𑀭𑀸𑀤𑀺𑀆𑀫𑀺𑀲𑀧𑀘𑁆𑀘𑀬𑀢𑁄. 𑀓𑀲𑁆𑀫𑀸𑀢𑀺 𑀆𑀳 ‘‘𑀢𑀁 𑀦𑀺𑀲𑁆𑀲𑀸𑀬𑀸’’𑀢𑀺𑀆𑀤𑀺.

𑀢𑀲𑁆𑀫𑀺𑀦𑁆𑀢𑀺 ¶ 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀯𑀲𑁂𑀦 𑀧𑀭𑀺𑀕𑁆𑀕𑀳𑀺𑀢𑀅𑀢𑁆𑀣𑁂. 𑀬𑀲𑁆𑀫𑀸 𑀧𑀦 𑀥𑀫𑁆𑀫𑀢𑁄 𑀯𑀟𑁆𑀠𑀺𑀬𑁂𑀯 𑀅𑀢𑁆𑀣𑁄 𑀦𑀸𑀫, 𑀢𑀲𑁆𑀫𑀸 𑀬𑀁 ‘‘𑀲𑀸𑀢𑁆𑀣𑀓’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁 𑀕𑀫𑀦𑀁, 𑀢𑀁 𑀲𑀩𑁆𑀩𑀫𑁆𑀧𑀺 𑀲𑀧𑁆𑀧𑀸𑀬𑀫𑁂𑀯𑀸𑀢𑀺 𑀲𑀺𑀬𑀸 𑀅𑀯𑀺𑀲𑁂𑀲𑁂𑀦 𑀓𑀲𑁆𑀲𑀘𑀺 𑀆𑀲𑀗𑁆𑀓𑀸𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀘𑁂𑀢𑀺𑀬𑀤𑀲𑁆𑀲𑀦𑀁 𑀢𑀸𑀯𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀫𑀳𑀸𑀧𑀽𑀚𑀸𑀬𑀸𑀢𑀺 𑀫𑀳𑀢𑀺𑀬𑀸 𑀧𑀽𑀚𑀸𑀬, 𑀩𑀳𑀽𑀦𑀁 𑀧𑀽𑀚𑀸𑀤𑀺𑀯𑀲𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀺𑀢𑁆𑀢𑀓𑀫𑁆𑀫𑀭𑀽𑀧𑀓𑀸𑀦𑀻 𑀯𑀺𑀬𑀸𑀢𑀺 𑀘𑀺𑀢𑁆𑀢𑀓𑀫𑁆𑀫𑀓𑀢𑀧𑀝𑀺𑀫𑀸𑀬𑁄 𑀯𑀺𑀬, 𑀬𑀦𑁆𑀢𑀧𑀬𑁄𑀕𑁂𑀦 𑀯𑀸 𑀦𑀸𑀦𑀧𑁆𑀧𑀓𑀸𑀭𑀯𑀺𑀘𑀺𑀢𑁆𑀢𑀓𑀺𑀭𑀺𑀬𑀸 𑀧𑀝𑀺𑀫𑀸𑀬𑁄 𑀯𑀺𑀬. 𑀢𑀢𑁆𑀭𑀸𑀢𑀺 𑀢𑀸𑀲𑀼 𑀧𑀭𑀺𑀲𑀸𑀲𑀼. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄. 𑀅𑀲𑀫𑀧𑁂𑀓𑁆𑀔𑀦𑀁 𑀦𑀸𑀫 𑀕𑁂𑀳𑀲𑁆𑀲𑀺𑀢𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸𑀯𑀲𑁂𑀦 𑀆𑀭𑀫𑁆𑀫𑀡𑀲𑁆𑀲 𑀅𑀬𑁄𑀦𑀺𑀲𑁄 𑀕𑀳𑀡𑀁. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀉𑀧𑁂𑀓𑁆𑀔𑀸 𑀩𑀸𑀮𑀲𑁆𑀲 𑀫𑀽𑀴𑁆𑀳𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲𑀸’’𑀢𑀺𑀆𑀤𑀺 (𑀫. 𑀦𑀺. 𑁩.𑁩𑁦𑁮) 𑀫𑀸𑀢𑀼𑀕𑀸𑀫𑀲𑀫𑁆𑀨𑀲𑁆𑀲𑀯𑀲𑁂𑀦 𑀓𑀸𑀬𑀲𑀁𑀲𑀕𑁆𑀕𑀸𑀧𑀢𑁆𑀢𑀺. 𑀳𑀢𑁆𑀣𑀺𑀆𑀤𑀺𑀲𑀫𑁆𑀫𑀤𑁆𑀤𑁂𑀦 𑀚𑀻𑀯𑀺𑀢𑀦𑁆𑀢𑀭𑀸𑀬𑁄. 𑀯𑀺𑀲𑀪𑀸𑀕𑀭𑀽𑀧𑀤𑀲𑁆𑀲𑀦𑀸𑀤𑀺𑀦𑀸 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁄. ‘‘𑀤𑀲𑀤𑁆𑀯𑀸𑀤𑀲𑀬𑁄𑀚𑀦𑀦𑁆𑀢𑀭𑁂 𑀧𑀭𑀺𑀲𑀸 𑀲𑀦𑁆𑀦𑀺𑀧𑀢𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑁂𑀯. 𑀫𑀳𑀸𑀧𑀭𑀺𑀲𑀧𑀭𑀺𑀯𑀸𑀭𑀸𑀦𑀦𑁆𑀢𑀺 𑀓𑀤𑀸𑀘𑀺 𑀥𑀫𑁆𑀫𑀲𑁆𑀲𑀯𑀦𑀸𑀤𑀺𑀅𑀢𑁆𑀣𑀸𑀬 𑀇𑀢𑁆𑀣𑀺𑀧𑀼𑀭𑀺𑀲𑀲𑀫𑁆𑀫𑀺𑀲𑁆𑀲𑀧𑀭𑀺𑀯𑀸𑀭𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀦𑁆𑀢𑀺 𑀅𑀲𑀼𑀪𑀤𑀲𑁆𑀲𑀦𑀲𑁆𑀲 𑀲𑀸𑀢𑁆𑀣𑀓𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀁. 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀧𑀝𑀺𑀯𑀘𑀦𑀤𑀸𑀦𑀯𑀲𑁂𑀦 𑀪𑀺𑀓𑁆𑀔𑀽𑀦𑀁 𑀅𑀦𑀼𑀯𑀢𑁆𑀢𑀦𑀓𑀣𑀸 𑀆𑀘𑀺𑀡𑁆𑀡𑀸, 𑀢𑀲𑁆𑀫𑀸 𑀧𑀝𑀺𑀯𑀘𑀦𑀲𑁆𑀲 𑀅𑀤𑀸𑀦𑀯𑀲𑁂𑀦 𑀅𑀦𑀦𑀼𑀯𑀢𑁆𑀢𑀦𑀓𑀣𑀸 𑀢𑀲𑁆𑀲 𑀤𑀼𑀢𑀺𑀬𑀸 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀤𑁆𑀯𑁂 𑀓𑀣𑀸 𑀦𑀸𑀫 𑀦 𑀓𑀣𑀺𑀢𑀧𑀼𑀩𑁆𑀩𑀸’’𑀢𑀺. 𑀤𑁆𑀯𑁂 𑀓𑀣𑀸𑀢𑀺 𑀳𑀺 𑀯𑀘𑀦𑀓𑀭𑀡𑀸𑀓𑀭𑀡𑀓𑀣𑀸. 𑀢𑀢𑁆𑀣 𑀯𑀘𑀦𑀓𑀭𑀡𑀓𑀣𑀸𑀬𑁂𑀯 𑀓𑀣𑀺𑀢𑀧𑀼𑀩𑁆𑀩𑀸, 𑀤𑀼𑀢𑀺𑀬𑀸 𑀦 𑀓𑀣𑀺𑀢𑀧𑀼𑀩𑁆𑀩𑀸. 𑀢𑀲𑁆𑀫𑀸 𑀲𑀼𑀩𑁆𑀩𑀘𑀢𑁆𑀢𑀸 𑀧𑀝𑀺𑀯𑀘𑀦𑀫𑀤𑀸𑀲𑀻𑀢𑀺 𑀅𑀢𑁆𑀣𑁄.

𑀏𑀯𑀦𑁆𑀢𑀺 𑀇𑀫𑀺𑀦𑀸. ‘‘𑀲𑀘𑁂 𑀧𑀦 𑀘𑁂𑀢𑀺𑀬𑀲𑁆𑀲 𑀫𑀳𑀸𑀧𑀽𑀚𑀸𑀬𑀸’’𑀢𑀺𑀆𑀤𑀺𑀓𑀁 𑀲𑀩𑁆𑀩𑀫𑁆𑀧𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀧𑀘𑁆𑀘𑀸𑀫𑀲𑀢𑀺, 𑀦 ‘‘𑀧𑀼𑀭𑀺𑀲𑀲𑁆𑀲 𑀫𑀸𑀢𑀼𑀕𑀸𑀫𑀸𑀲𑀼𑀪’’𑀦𑁆𑀢𑀺𑀆𑀤𑀺𑀓𑀫𑁂𑀯. 𑀧𑀭𑀺𑀕𑁆𑀕𑀳𑀺𑀢𑀁 𑀲𑀸𑀢𑁆𑀣𑀓𑀁, 𑀲𑀧𑁆𑀧𑀸𑀬𑀜𑁆𑀘 𑀬𑁂𑀦 𑀲𑁄 𑀧𑀭𑀺𑀕𑁆𑀕𑀳𑀺𑀢𑀲𑀸𑀢𑁆𑀣𑀓𑀲𑀧𑁆𑀧𑀸𑀬𑁄, 𑀢𑀲𑁆𑀲, 𑀢𑁂𑀦 𑀬𑀣𑀸𑀦𑀼𑀧𑀼𑀩𑁆𑀩𑀺𑀓𑀁 𑀲𑀫𑁆𑀧𑀚𑀜𑁆𑀜𑀧𑀭𑀺𑀕𑁆𑀕𑀳𑀡𑀁 𑀤𑀲𑁆𑀲𑁂𑀢𑀺. 𑀯𑀼𑀘𑁆𑀘𑀫𑀸𑀦𑀬𑁄𑀕𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀪𑀸𑀯𑀦𑀸𑀬 𑀆𑀭𑀫𑁆𑀫𑀡𑀁 𑀓𑀫𑁆𑀫𑀝𑁆𑀞𑀸𑀦𑀁, 𑀢𑀤𑁂𑀯 𑀪𑀸𑀯𑀦𑀸𑀬 ¶ 𑀯𑀺𑀲𑀬𑀪𑀸𑀯𑀢𑁄 𑀕𑁄𑀘𑀭𑀦𑁆𑀢𑀺 𑀆𑀳 ‘‘𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀔𑀸𑀢𑀁 𑀕𑁄𑀘𑀭’’𑀦𑁆𑀢𑀺. 𑀉𑀕𑁆𑀕𑀳𑁂𑀢𑁆𑀯𑀸𑀢𑀺 𑀬𑀣𑀸 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀉𑀕𑁆𑀕𑀳𑀓𑁄𑀲𑀮𑁆𑀮𑀲𑁆𑀲 𑀲𑀫𑁆𑀧𑀸𑀤𑀦𑀯𑀲𑁂𑀦 𑀉𑀕𑁆𑀕𑀳𑀡𑀁 𑀓𑀢𑁆𑀯𑀸. 𑀪𑀺𑀓𑁆𑀔𑀸𑀘𑀸𑀭𑀕𑁄𑀘𑀭𑁂𑀢𑀺 𑀪𑀺𑀓𑁆𑀔𑀸𑀘𑀸𑀭𑀲𑀗𑁆𑀔𑀸𑀢𑁂 𑀕𑁄𑀘𑀭𑁂, 𑀅𑀦𑁂𑀦 𑀓𑀫𑁆𑀫𑀝𑁆𑀞𑀸𑀦𑁂, 𑀪𑀺𑀓𑁆𑀔𑀸𑀘𑀸𑀭𑁂 𑀘 𑀕𑁄𑀘𑀭𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀢𑀺.

𑀇𑀥𑀸𑀢𑀺 𑀲𑀸𑀲𑀦𑁂. 𑀳𑀭𑀢𑀻𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀧𑀯𑀢𑁆𑀢𑀦𑀯𑀲𑁂𑀦 𑀦𑁂𑀢𑀺, 𑀬𑀸𑀯 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀫𑀸 𑀅𑀦𑀼𑀬𑀼𑀜𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀦 𑀧𑀘𑁆𑀘𑀸𑀳𑀭𑀢𑀻𑀢𑀺 𑀆𑀳𑀸𑀭𑀽𑀧𑀬𑁄𑀕𑀢𑁄 𑀬𑀸𑀯 𑀤𑀺𑀯𑀸𑀞𑀸𑀦𑀼𑀧𑀲𑀗𑁆𑀓𑀫𑀦𑀸 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀧𑀝𑀺𑀦𑁂𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀘𑀢𑀽𑀲𑀼 𑀪𑀺𑀓𑁆𑀔𑀽𑀲𑀼. 𑀆𑀯𑀭𑀡𑀻𑀬𑁂𑀳𑀻𑀢𑀺 𑀦𑀻𑀯𑀭𑀡𑁂𑀳𑀺. 𑀧𑀕𑁂𑀯𑀸𑀢𑀺 𑀧𑀸𑀢𑁄𑀬𑁂𑀯 ¶ . 𑀲𑀭𑀻𑀭𑀧𑀭𑀺𑀓𑀫𑁆𑀫𑀦𑁆𑀢𑀺 𑀫𑀼𑀔𑀥𑁄𑀯𑀦𑀸𑀤𑀺𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁. 𑀤𑁆𑀯𑁂 𑀢𑀬𑁄 𑀧𑀮𑁆𑀮𑀗𑁆𑀓𑁂𑀢𑀺 𑀤𑁆𑀯𑁂 𑀢𑀬𑁄 𑀦𑀺𑀲𑀚𑁆𑀚𑀸𑀯𑀸𑀭𑁂. 𑀊𑀭𑀼𑀩𑀤𑁆𑀥𑀸𑀲𑀦𑀜𑁆𑀳𑁂𑀢𑁆𑀣 𑀧𑀮𑁆𑀮𑀗𑁆𑀓𑁄. 𑀉𑀲𑀼𑀫𑀦𑁆𑀢𑀺 𑀤𑁆𑀯𑁂 𑀢𑀻𑀡𑀺 𑀉𑀡𑁆𑀳𑀸𑀧𑀦𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀜𑁆𑀚𑀺𑀢𑁆𑀯𑀸𑀢𑀺 𑀢𑀤𑀳𑁂 𑀫𑀽𑀮𑀪𑀽𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀬𑀼𑀜𑁆𑀚𑀺𑀢𑁆𑀯𑀸. 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀫𑀼𑀔𑁂𑀦𑁂𑀯, 𑀓𑀫𑁆𑀫𑀝𑁆𑀞𑀸𑀦𑀫𑀯𑀺𑀚𑀳𑀦𑁆𑀢𑁄 𑀏𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑁂𑀦 ‘‘𑀧𑀢𑁄𑀧𑀺 𑀅𑀘𑁂𑀢𑀦𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁧𑁪; 𑀫. 𑀦𑀺. 𑀅𑀝𑁆𑀞. 𑁧.𑁨𑁦𑁯; 𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁧𑁬𑁮; 𑀯𑀺𑀪. 𑀅𑀝𑁆𑀞. 𑁫𑁨𑁩) 𑀯𑀓𑁆𑀔𑀫𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀁, 𑀬𑀣𑀸𑀧𑀭𑀺𑀳𑀭𑀺𑀬𑀫𑀸𑀦𑀁 𑀯𑀸 𑀅𑀯𑀺𑀚𑀳𑀺𑀢𑁆𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀕𑀦𑁆𑀢𑁆𑀯𑀸𑀢𑀺 𑀧𑀸𑀧𑀼𑀡𑀺𑀢𑁆𑀯𑀸. 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀘𑁂, 𑀢𑀤𑁂𑀯 𑀦𑀺𑀧𑀘𑁆𑀘𑀓𑀸𑀭𑀲𑀸𑀥𑀦𑀁. 𑀅𑀜𑁆𑀜𑀜𑁆𑀘𑁂, 𑀅𑀦𑀺𑀧𑀘𑁆𑀘𑀓𑀸𑀭𑀓𑀭𑀡𑀫𑀺𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑀩𑁆𑀩𑀺𑀲𑀬𑁂𑀦 𑀢𑀁 𑀞𑀧𑁂𑀢𑁆𑀯𑀸. ‘‘𑀫𑀳𑀦𑁆𑀢𑀁 𑀘𑁂𑀢𑀺𑀬𑀁 𑀘𑁂’’𑀢𑀺𑀆𑀤𑀺𑀦𑀸 𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀲𑁆𑀲 𑀧𑀧𑀜𑁆𑀘𑀸𑀪𑀸𑀯𑀤𑀲𑁆𑀲𑀦𑀁. 𑀅𑀜𑁆𑀜𑁂𑀦 𑀧𑀦 𑀢𑀣𑀸𑀧𑀺 𑀅𑀜𑁆𑀜𑀣𑀸𑀧𑀺 𑀯𑀦𑁆𑀤𑀺𑀢𑀩𑁆𑀩𑀫𑁂𑀯. 𑀢𑀣𑁂𑀯𑀸𑀢𑀺 𑀢𑀺𑀓𑁆𑀔𑀢𑁆𑀢𑀼𑀫𑁂𑀯. 𑀧𑀭𑀺𑀪𑁄𑀕𑀘𑁂𑀢𑀺𑀬𑀢𑁄 𑀲𑀸𑀭𑀻𑀭𑀺𑀓𑀘𑁂𑀢𑀺𑀬𑀁 𑀕𑀭𑀼𑀢𑀭𑀦𑁆𑀢𑀺 𑀓𑀢𑁆𑀯𑀸 ‘‘𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸’’𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀯𑀲𑁂𑀦 𑀯𑀼𑀢𑁆𑀢𑀁. 𑀬𑀣𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀘𑁂𑀢𑀺𑀬𑀁 𑀩𑀸𑀥𑀬𑀫𑀸𑀦𑀸 𑀩𑁄𑀥𑀺𑀲𑀸𑀔𑀸 𑀳𑀭𑀺𑀢𑀩𑁆𑀩𑀸’’𑀢𑀺, (𑀫. 𑀦𑀺. 𑀅𑀝𑁆𑀞. 𑁪.𑁧𑁨𑁮; 𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁭𑁫; 𑀯𑀺𑀪. 𑀅𑀝𑁆𑀞. 𑁮𑁦𑁯) 𑀅𑀬𑀁 𑀆𑀘𑀭𑀺𑀬𑀲𑁆𑀲 𑀫𑀢𑀺, ‘‘𑀩𑁄𑀥𑀺𑀬𑀗𑁆𑀕𑀡𑀁 𑀧𑀢𑁆𑀢𑁂𑀦𑀸𑀧𑀻’’𑀢𑀺 𑀧𑀦 𑀯𑀘𑀦𑀢𑁄 𑀬𑀤𑀺 𑀘𑁂𑀢𑀺𑀬𑀗𑁆𑀕𑀡𑀢𑁄 𑀕𑀢𑁂 𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑁂 𑀩𑁄𑀥𑀺𑀬𑀗𑁆𑀕𑀡𑀁 𑀪𑀯𑁂𑀬𑁆𑀬, 𑀲𑀸𑀧𑀺 𑀯𑀦𑁆𑀤𑀺𑀢𑀩𑁆𑀩𑀸𑀢𑀺 𑀫𑀕𑁆𑀕𑀸𑀦𑀼𑀓𑁆𑀓𑀫𑁂𑀦𑁂𑀯 ‘‘𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸’’𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀯𑀘𑀦𑀁, 𑀦 𑀢𑀼 𑀕𑀭𑀼𑀓𑀸𑀢𑀩𑁆𑀩𑀢𑀸𑀦𑀼𑀓𑁆𑀓𑀫𑁂𑀦. 𑀏𑀯𑀜𑁆𑀳𑀺 𑀲𑀢𑀺 𑀩𑁄𑀥𑀺𑀬𑀗𑁆𑀕𑀡𑀁 𑀧𑀞𑀫𑀁 𑀧𑀢𑁆𑀢𑁂𑀦𑀸𑀧𑀺 𑀩𑁄𑀥𑀺𑀁 𑀯𑀦𑁆𑀤𑀺𑀢𑁆𑀯𑀸 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑀩𑁆𑀩𑀁, 𑀏𑀓𑀫𑁂𑀯 𑀧𑀢𑁆𑀢𑁂𑀦𑀸𑀧𑀺 𑀢𑀤𑁂𑀯 𑀯𑀦𑁆𑀤𑀺𑀢𑀩𑁆𑀩𑀁, 𑀢𑀤𑀼𑀪𑀬𑀫𑁆𑀧𑀺 ¶ 𑀅𑀧𑁆𑀧𑀢𑁆𑀢𑁂𑀦 𑀦 𑀯𑀦𑁆𑀤𑀺𑀢𑀩𑁆𑀩𑀦𑁆𑀢𑀺 𑀅𑀬𑀫𑀢𑁆𑀣𑁄 𑀲𑀼𑀯𑀺𑀜𑁆𑀜𑀸𑀢𑁄 𑀳𑁄𑀢𑀺. 𑀪𑀺𑀓𑁆𑀔𑀸𑀘𑀸𑀭𑀕𑀢𑀫𑀕𑁆𑀕𑁂𑀦 𑀳𑀺 𑀧𑀢𑁆𑀢𑀝𑁆𑀞𑀸𑀦𑁂 𑀓𑀢𑁆𑀢𑀩𑁆𑀩𑀅𑀦𑁆𑀢𑀭𑀸𑀯𑀢𑁆𑀢𑀤𑀲𑁆𑀲𑀦𑀫𑁂𑀢𑀁, 𑀦 𑀧𑀦 𑀥𑀼𑀯𑀯𑀢𑁆𑀢𑀤𑀲𑁆𑀲𑀦𑀁. 𑀧𑀼𑀩𑁆𑀩𑁂 𑀳𑁂𑀲 𑀓𑀢𑀯𑀢𑁆𑀢𑁄𑀬𑁂𑀯. 𑀢𑁂𑀦𑀸𑀳 ‘‘𑀧𑀕𑁂𑀯 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑀯𑀢𑁆𑀢𑀁 𑀓𑀢𑁆𑀯𑀸’’𑀢𑀺𑀆𑀤𑀺. 𑀩𑀼𑀤𑁆𑀥𑀕𑀼𑀡𑀸𑀦𑀼𑀲𑁆𑀲𑀭𑀡𑀯𑀲𑁂𑀦𑁂𑀯 𑀩𑁄𑀥𑀺𑀆𑀤𑀺𑀧𑀭𑀺𑀪𑁄𑀕𑀘𑁂𑀢𑀺𑀬𑁂𑀧𑀺 𑀦𑀺𑀧𑀘𑁆𑀘𑀓𑀭𑀡𑀁 𑀉𑀧𑀧𑀦𑁆𑀦𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀯𑀺𑀬 𑀦𑀺𑀧𑀘𑁆𑀘𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸. 𑀧𑀝𑀺𑀲𑀸𑀫𑀺𑀢𑀝𑁆𑀞𑀸𑀦𑀦𑁆𑀢𑀺 𑀲𑁄𑀧𑀸𑀦𑀫𑀽𑀮𑀪𑀸𑀯𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀁, 𑀩𑀼𑀤𑁆𑀥𑀸𑀭𑀫𑁆𑀫𑀡𑀧𑀻𑀢𑀺𑀯𑀺𑀲𑀬𑀪𑀽𑀢𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑀢𑁄 𑀩𑀸𑀳𑀺𑀭𑀝𑁆𑀞𑀸𑀦𑀁 𑀧𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀕𑀸𑀫𑀲𑀫𑀻𑀧𑁂𑀢𑀺 𑀕𑀸𑀫𑀽𑀧𑀘𑀸𑀭𑁂. 𑀢𑀸𑀯 𑀧𑀜𑁆𑀳𑀁 𑀯𑀸 𑀧𑀼𑀘𑁆𑀙𑀦𑁆𑀢𑀺, 𑀥𑀫𑁆𑀫𑀁 𑀯𑀸 𑀲𑁄𑀢𑀼𑀓𑀸𑀫𑀸 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀚𑀦𑀲𑀗𑁆𑀕𑀳𑀢𑁆𑀣𑀦𑁆𑀢𑀺 ‘‘𑀫𑀬𑀺 𑀅𑀓𑀣𑁂𑀦𑁆𑀢𑁂 𑀏𑀢𑁂𑀲𑀁 𑀓𑁄 𑀓𑀣𑁂𑀲𑁆𑀲𑀢𑀻’’𑀢𑀺 𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦 𑀫𑀳𑀸𑀚𑀦𑀲𑁆𑀲 𑀲𑀗𑁆𑀕𑀳𑀡𑀢𑁆𑀣𑀁. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀯𑀘𑀦𑀁 𑀲𑀫𑀢𑁆𑀣𑁂𑀢𑀼𑀁 ‘‘𑀥𑀫𑁆𑀫𑀓𑀣𑀸 𑀳𑀺 𑀓𑀫𑁆𑀫𑀝𑁆𑀞𑀸𑀦𑀯𑀺𑀦𑀺𑀫𑀼𑀢𑁆𑀢𑀸 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 ¶ ‘‘𑀥𑀫𑁆𑀫𑀓𑀣𑀸 𑀦𑀸𑀫 𑀓𑀸𑀢𑀩𑁆𑀩𑀸𑀬𑁂𑀯𑀸’’𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀯𑀤𑀦𑁆𑀢𑀺, 𑀬𑀲𑁆𑀫𑀸 𑀯𑀸 𑀥𑀫𑁆𑀫𑀓𑀣𑀸 𑀓𑀫𑁆𑀫𑀝𑁆𑀞𑀸𑀦𑀯𑀺𑀦𑀺𑀫𑀼𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀘𑀭𑀺𑀬𑀸𑀦𑀦𑁆𑀤𑀢𑁆𑀣𑁂𑀭𑁂𑀦 (𑀯𑀺𑀪. 𑀫𑀽𑀮𑀝𑀻. 𑁫𑁨𑁩) 𑀧𑀦 ‘‘𑀢𑀲𑁆𑀫𑀸’’𑀢𑀺 𑀏𑀢𑀲𑁆𑀲 ‘‘𑀓𑀣𑁂𑀢𑀩𑁆𑀩𑀸𑀬𑁂𑀯𑀸𑀢𑀺 𑀯𑀤𑀦𑁆𑀢𑀻’’𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄 𑀯𑀼𑀢𑁆𑀢𑁄. 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯𑀸𑀢𑀺 𑀅𑀢𑁆𑀢𑀦𑀸 𑀧𑀭𑀺𑀳𑀭𑀺𑀬𑀫𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀚𑀳𑀦𑀯𑀲𑁂𑀦, 𑀢𑀤𑀦𑀼𑀕𑀼𑀡𑀁𑀬𑁂𑀯 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸𑀢𑀺 𑀅𑀢𑁆𑀣𑁄, 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯𑀸’’𑀢𑀺 𑀅𑀥𑀺𑀓𑀸𑀭𑁄. 𑀢𑀢𑁆𑀣𑀸𑀢𑀺 𑀕𑀸𑀫𑀢𑁄 𑀦𑀺𑀓𑁆𑀔𑀫𑀦𑀝𑁆𑀞𑀸𑀦𑁂𑀬𑁂𑀯.

‘‘𑀧𑁄𑀭𑀸𑀡𑀓𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸 𑀧𑁄𑀭𑀸𑀡𑀓𑀸𑀘𑀺𑀡𑁆𑀡𑀤𑀲𑁆𑀲𑀦𑁂𑀦 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀤𑀴𑁆𑀳𑀁 𑀓𑀭𑁄𑀢𑀺. 𑀲𑀫𑁆𑀧𑀢𑁆𑀢𑀧𑀭𑀺𑀘𑁆𑀙𑁂𑀤𑁂𑀦𑁂𑀯𑀸𑀢𑀺 ‘‘𑀧𑀭𑀺𑀘𑀺𑀢𑁄 𑀅𑀧𑀭𑀺𑀘𑀺𑀢𑁄’’𑀢𑀺𑀆𑀤𑀺𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀲𑀫𑁆𑀧𑀢𑁆𑀢𑀓𑁄𑀝𑀺𑀬𑀸 𑀏𑀯, 𑀲𑀫𑀸𑀕𑀫𑀫𑀢𑁆𑀢𑁂𑀦𑁂𑀯𑀸𑀢𑀺 𑀅𑀢𑁆𑀣𑁄. 𑀆𑀦𑀼𑀪𑀸𑀯𑁂𑀦𑀸𑀢𑀺 𑀅𑀦𑀼𑀕𑁆𑀕𑀳𑀩𑀮𑁂𑀦. 𑀪𑀬𑁂𑀢𑀺 𑀧𑀭𑀘𑀓𑁆𑀓𑀸𑀤𑀺𑀪𑀬𑁂. 𑀙𑀸𑀢𑀓𑁂𑀢𑀺 𑀤𑀼𑀩𑁆𑀪𑀺𑀓𑁆𑀔𑁂.

‘‘𑀧𑀘𑁆𑀙𑀺𑀫𑀬𑀸𑀫𑁂𑀧𑀺 𑀦𑀺𑀲𑀚𑁆𑀚𑀸𑀘𑀗𑁆𑀓𑀫𑁂𑀳𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁. 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀓𑀭𑀫𑀸𑀦𑀲𑁆𑀲𑁂𑀯, 𑀅𑀦𑀸𑀤𑀭𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀓𑀫𑁆𑀫𑀚𑀢𑁂𑀚𑁄𑀢𑀺 𑀕𑀳𑀡𑀺𑀁 𑀲𑀦𑁆𑀥𑀸𑀬𑀸𑀳. 𑀧𑀚𑁆𑀚𑀮𑀢𑀻𑀢𑀺 𑀉𑀡𑁆𑀳𑀪𑀸𑀯𑀁 𑀚𑀦𑁂𑀢𑀺. 𑀢𑀢𑁄𑀬𑁂𑀯 𑀉𑀧𑀸𑀤𑀺𑀦𑁆𑀦𑀓𑀁 𑀕𑀡𑁆𑀳𑀸𑀢𑀺, 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺. 𑀓𑀫𑁆𑀫𑀝𑁆𑀞𑀸𑀦𑀁 𑀯𑀻𑀣𑀺𑀁 𑀦𑀸𑀭𑁄𑀳𑀢𑀺 ¶ 𑀔𑀼𑀤𑀸𑀧𑀭𑀺𑀲𑁆𑀲𑀫𑁂𑀦 𑀓𑀺𑀮𑀦𑁆𑀢𑀓𑀸𑀬𑀲𑁆𑀲 𑀲𑀫𑀸𑀥𑀸𑀦𑀸𑀪𑀸𑀯𑀢𑁄. 𑀅𑀦𑀼𑀧𑀸𑀤𑀺𑀦𑁆𑀦𑀁 𑀑𑀤𑀦𑀸𑀤𑀺𑀯𑀢𑁆𑀣𑀼. 𑀉𑀧𑀸𑀤𑀺𑀦𑁆𑀦𑀁 𑀉𑀤𑀭𑀧𑀝𑀮𑀁. 𑀅𑀦𑁆𑀢𑁄𑀓𑀼𑀘𑁆𑀙𑀺𑀬𑀜𑁆𑀳𑀺 𑀑𑀤𑀦𑀸𑀤𑀺𑀯𑀢𑁆𑀣𑀼𑀲𑁆𑀫𑀺𑀁 𑀅𑀲𑀢𑀺 𑀓𑀫𑁆𑀫𑀚𑀢𑁂𑀚𑁄 𑀉𑀝𑁆𑀞𑀳𑀺𑀢𑁆𑀯𑀸 𑀉𑀤𑀭𑀧𑀝𑀮𑀁 𑀕𑀡𑁆𑀳𑀸𑀢𑀺, ‘‘𑀙𑀸𑀢𑁄𑀲𑁆𑀫𑀺, 𑀆𑀳𑀸𑀭𑀁 𑀫𑁂 𑀤𑁂𑀣𑀸’’𑀢𑀺 𑀯𑀤𑀸𑀧𑁂𑀢𑀺, 𑀪𑀼𑀢𑁆𑀢𑀓𑀸𑀮𑁂 𑀉𑀤𑀭𑀧𑀝𑀮𑀁 𑀫𑀼𑀜𑁆𑀘𑀺𑀢𑁆𑀯𑀸 𑀯𑀢𑁆𑀣𑀼𑀁 𑀕𑀡𑁆𑀳𑀸𑀢𑀺, 𑀅𑀣 𑀲𑀢𑁆𑀢𑁄 𑀏𑀓𑀕𑁆𑀕𑁄 𑀳𑁄𑀢𑀺, 𑀬𑀢𑁄 ‘‘𑀙𑀸𑀬𑀸𑀭𑀓𑁆𑀔𑀲𑁄 𑀯𑀺𑀬 𑀓𑀫𑁆𑀫𑀚𑀢𑁂𑀚𑁄’’𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑁄. 𑀲𑁄 𑀧𑀕𑁂𑀯𑀸𑀢𑀺 𑀏𑀢𑁆𑀣 ‘‘𑀢𑀲𑁆𑀫𑀸’’𑀢𑀺 𑀲𑁂𑀲𑁄. 𑀕𑁄𑀭𑀽𑀧𑀸𑀦𑀦𑁆𑀢𑀺 𑀕𑀼𑀦𑁆𑀦𑀁, 𑀕𑁄𑀲𑀫𑀽𑀳𑀸𑀦𑀁 𑀯𑀸, 𑀯𑀚𑀢𑁄 𑀕𑁄𑀘𑀭𑀢𑁆𑀣𑀸𑀬 𑀦𑀺𑀓𑁆𑀔𑀫𑀦𑀯𑁂𑀮𑀸𑀬𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀯𑀺𑀧𑀭𑀻𑀢𑀦𑀬𑁂𑀦 𑀉𑀧𑀸𑀤𑀺𑀦𑁆𑀦𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀦𑀼𑀧𑀸𑀤𑀺𑀦𑁆𑀦𑀓𑀁 𑀕𑀡𑁆𑀳𑀸𑀢𑀺. 𑀅𑀦𑁆𑀢𑀭𑀸𑀪𑀢𑁆𑀢𑁂𑀢𑀺 𑀪𑀢𑁆𑀢𑀲𑁆𑀲 𑀅𑀦𑁆𑀢𑀭𑁂, 𑀬𑀸𑀯 𑀪𑀢𑁆𑀢𑀁 𑀦 𑀪𑀼𑀜𑁆𑀚𑀢𑀺, 𑀢𑀸𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦 𑀆𑀳𑀸𑀭𑀜𑁆𑀘 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸’’𑀢𑀺. 𑀅𑀯𑀲𑁂𑀲𑀝𑁆𑀞𑀸𑀦𑁂𑀢𑀺 𑀬𑀸𑀕𑀼𑀬𑀸 𑀅𑀕𑁆𑀕𑀳𑀺𑀢𑀝𑁆𑀞𑀸𑀦𑁂. 𑀢𑀢𑁄𑀢𑀺 𑀪𑀼𑀜𑁆𑀚𑀦𑀢𑁄. 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀧𑀝𑁆𑀞𑀸𑀦𑀲𑁆𑀲 𑀅𑀦𑀯𑀘𑁆𑀙𑁂𑀤𑀤𑀲𑁆𑀲𑀦𑀫𑁂𑀢𑀁, 𑀉𑀢𑁆𑀢𑀭𑀼𑀢𑁆𑀢𑀭𑀺𑀦𑁆𑀢𑀺 𑀅𑀢𑁆𑀣𑁄, 𑀬𑀣𑀸 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀁 𑀧𑀯𑀢𑁆𑀢𑀸𑀬 𑀲𑀭𑀧𑀝𑀺𑀧𑀸𑀝𑀺𑀬𑀸 𑀅𑀦𑀯𑀘𑁆𑀙𑁂𑀤𑁄, 𑀏𑀯𑀫𑁂𑀢𑀲𑁆𑀲𑀸𑀧𑀺 𑀓𑀫𑁆𑀫𑀝𑁆𑀞𑀸𑀦𑀼𑀧𑀝𑁆𑀞𑀸𑀦𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀏𑀤𑀺𑀲𑀸 𑀘𑀸’’𑀢𑀺𑀆𑀤𑀺𑀦𑀸 𑀢𑀣𑀸 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀲𑁆𑀲𑀸𑀧𑀺 𑀲𑀸𑀢𑁆𑀣𑀓𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀆𑀲𑀦𑀦𑁆𑀢𑀺 𑀦𑀺𑀲𑀚𑁆𑀚𑀸𑀲𑀦𑀁.

𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄𑀢𑀺 𑀪𑀸𑀯𑀦𑀸𑀦𑀼𑀬𑁄𑀕𑁂 𑀅𑀦𑀼𑀓𑁆𑀔𑀺𑀢𑁆𑀢𑀥𑀼𑀭𑁄 𑀅𑀦𑀸𑀭𑀤𑁆𑀥𑀯𑀻𑀭𑀺𑀬𑁄. 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀅𑀧𑀭𑀺𑀧𑀽𑀭𑀡𑁂𑀦 ¶ 𑀲𑀩𑁆𑀩𑀯𑀢𑁆𑀢𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸. 𑀧𑀜𑁆𑀘𑀯𑀺𑀥𑀘𑁂𑀢𑁄𑀔𑀻𑀮𑀯𑀺𑀦𑀺𑀩𑀦𑁆𑀥𑀘𑀺𑀢𑁆𑀢𑁄𑀢𑀺 𑀧𑀜𑁆𑀘𑀯𑀺𑀥𑁂𑀦 𑀘𑁂𑀢𑁄𑀔𑀻𑀮𑁂𑀦, 𑀯𑀺𑀦𑀺𑀩𑀦𑁆𑀥𑁂𑀦 𑀘 𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀫𑀚𑁆𑀛𑀺𑀫𑀸𑀕𑀫𑁂 𑀘𑁂𑀢𑁄𑀔𑀻𑀮𑀲𑀼𑀢𑁆𑀢𑁂 𑁋

‘‘𑀓𑀢𑀫𑀲𑁆𑀲 𑀧𑀜𑁆𑀘 𑀘𑁂𑀢𑁄𑀔𑀻𑀮𑀸 𑀅𑀧𑁆𑀧𑀳𑀻𑀦𑀸 𑀳𑁄𑀦𑁆𑀢𑀺? 𑀇𑀥 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀓𑀗𑁆𑀔𑀢𑀺, 𑀥𑀫𑁆𑀫𑁂 𑀓𑀗𑁆𑀔𑀢𑀺, 𑀲𑀗𑁆𑀖𑁂 𑀓𑀗𑁆𑀔𑀢𑀺, 𑀲𑀺𑀓𑁆𑀔𑀸𑀬 𑀓𑀗𑁆𑀔𑀢𑀺, 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀓𑀼𑀧𑀺𑀢𑁄 𑀳𑁄𑀢𑀻’’𑀢𑀺, (𑀫. 𑀦𑀺. 𑁧.𑁧𑁮𑁫)

‘‘𑀓𑀢𑀫𑀲𑁆𑀲 𑀧𑀜𑁆𑀘 𑀘𑁂𑀢𑀲𑁄 𑀯𑀺𑀦𑀺𑀩𑀦𑁆𑀥𑀸 𑀅𑀲𑀫𑀼𑀘𑁆𑀙𑀺𑀦𑁆𑀦𑀸 𑀳𑁄𑀦𑁆𑀢𑀺? 𑀇𑀥 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀼 𑀓𑀸𑀫𑁂 𑀅𑀯𑀻𑀢𑀭𑀸𑀕𑁄 𑀳𑁄𑀢𑀺, 𑀓𑀸𑀬𑁂 𑀅𑀯𑀻𑀢𑀭𑀸𑀕𑁄 𑀳𑁄𑀢𑀺, 𑀭𑀽𑀧𑁂 𑀅𑀯𑀻𑀢𑀭𑀸𑀕𑁄 𑀳𑁄𑀢𑀺, 𑀬𑀸𑀯𑀤𑀢𑁆𑀣𑀁 𑀉𑀤𑀭𑀸𑀯𑀤𑁂𑀳𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀁 𑀧𑀲𑁆𑀲𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺, 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀧𑀡𑀺𑀥𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀻’’𑀢𑀺 (𑀫. 𑀦𑀺. 𑁧.𑁧𑁮𑁬). 𑀘 𑁋

𑀯𑀺𑀢𑁆𑀣𑀸𑀭𑁄 ¶ . 𑀆𑀘𑀭𑀺𑀬𑁂𑀦 (𑀤𑀻. 𑀦𑀺. 𑀝𑀻. 𑁧.𑁨𑁧𑁫) 𑀧𑀦 𑀧𑀜𑁆𑀘𑀯𑀺𑀥𑀘𑁂𑀢𑁄𑀯𑀺𑀦𑀺𑀩𑀦𑁆𑀥𑀘𑀺𑀢𑁆𑀢𑀪𑀸𑀯𑁄𑀬𑁂𑀯 𑀧𑀤𑁂𑀓𑀤𑁂𑀲𑀫𑀼𑀮𑁆𑀮𑀺𑀗𑁆𑀕𑁂𑀢𑁆𑀯𑀸 𑀤𑀲𑁆𑀲𑀺𑀢𑁄. 𑀘𑀺𑀢𑁆𑀢𑀲𑁆𑀲 𑀓𑀘𑀯𑀭𑀔𑀸𑀡𑀼𑀓𑀪𑀸𑀯𑁄 𑀳𑀺 𑀘𑁂𑀢𑁄𑀔𑀻𑀮𑁄, 𑀘𑀺𑀢𑁆𑀢𑀁 𑀩𑀦𑁆𑀥𑀺𑀢𑁆𑀯𑀸 𑀫𑀼𑀝𑁆𑀞𑀺𑀬𑀁 𑀯𑀺𑀬 𑀓𑀢𑁆𑀯𑀸 𑀕𑀡𑁆𑀳𑀦𑀪𑀸𑀯𑁄 𑀘𑁂𑀢𑀲𑁄 𑀯𑀺𑀦𑀺𑀩𑀦𑁆𑀥𑁄. 𑀧𑀞𑀫𑁄 𑀘𑁂𑀢𑁆𑀣 𑀯𑀺𑀘𑀺𑀓𑀺𑀘𑁆𑀙𑀸𑀤𑁄𑀲𑀯𑀲𑁂𑀦, 𑀤𑀼𑀢𑀺𑀬𑁄 𑀮𑁄𑀪𑀯𑀲𑁂𑀦𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀘𑀭𑀺𑀢𑁆𑀯𑀸𑀢𑀺 𑀯𑀺𑀘𑀭𑀺𑀢𑁆𑀯𑀸. 𑀓𑀫𑁆𑀫𑀝𑁆𑀞𑀸𑀦𑀯𑀺𑀭𑀳𑀯𑀲𑁂𑀦 𑀢𑀼𑀘𑁆𑀙𑁄.

𑀪𑀸𑀯𑀦𑀸𑀲𑀳𑀺𑀢𑀫𑁂𑀯 𑀪𑀺𑀓𑁆𑀔𑀸𑀬 𑀕𑀢𑀁, 𑀧𑀘𑁆𑀘𑀸𑀕𑀢𑀜𑁆𑀘 𑀬𑀲𑁆𑀲𑀸𑀢𑀺 𑀕𑀢𑀧𑀘𑁆𑀘𑀸𑀕𑀢𑀺𑀓𑀁, 𑀢𑀤𑁂𑀯 𑀯𑀢𑁆𑀢𑀁, 𑀢𑀲𑁆𑀲 𑀯𑀲𑁂𑀦. 𑀅𑀢𑁆𑀢𑀓𑀸𑀫𑀸𑀢𑀺 𑀅𑀢𑁆𑀢𑀦𑁄 𑀳𑀺𑀢𑀲𑀼𑀔𑀫𑀺𑀘𑁆𑀙𑀦𑁆𑀢𑀸, 𑀥𑀫𑁆𑀫𑀘𑁆𑀙𑀦𑁆𑀤𑀯𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁄 𑀳𑀺 𑀳𑀺𑀢𑀁, 𑀲𑀼𑀔𑀜𑁆𑀘 𑀢𑀦𑁆𑀦𑀺𑀫𑀺𑀢𑁆𑀢𑀓𑀦𑁆𑀢𑀺. 𑀅𑀣 𑀯𑀸 𑀯𑀺𑀜𑁆𑀜𑀽𑀦𑀁 𑀅𑀢𑁆𑀢𑀢𑁄 𑀦𑀺𑀩𑁆𑀩𑀺𑀲𑁂𑀲𑀢𑁆𑀢𑀸, 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀘 𑀥𑀫𑁆𑀫𑁄 𑀅𑀢𑁆𑀢𑀸 𑀦𑀸𑀫, 𑀢𑀁 𑀓𑀸𑀫𑁂𑀦𑁆𑀢𑀺 𑀇𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀢𑀓𑀸𑀫𑀸. 𑀅𑀥𑀼𑀦𑀸 𑀧𑀦 𑀅𑀢𑁆𑀣𑀓𑀸𑀫𑀸𑀢𑀺 𑀳𑀺𑀢𑀯𑀸𑀘𑀓𑁂𑀦 𑀅𑀢𑁆𑀣𑀲𑀤𑁆𑀤𑁂𑀦 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀥𑀫𑁆𑀫𑀲𑀜𑁆𑀜𑀼𑀢𑁆𑀢𑀁 𑀳𑀺𑀢𑀫𑀺𑀘𑁆𑀙𑀦𑁆𑀢𑀸, 𑀳𑀺𑀢𑀪𑀽𑀢𑀁 𑀯𑀸 𑀥𑀫𑁆𑀫𑀫𑀺𑀘𑁆𑀙𑀦𑁆𑀢𑀸𑀢𑀺 𑀢𑀲𑁆𑀲𑀢𑁆𑀣𑁄. 𑀇𑀡𑀝𑁆𑀝𑀸𑀢𑀺 𑀇𑀡𑁂𑀦 𑀧𑀻𑀴𑀺𑀢𑀸. 𑀢𑀣𑀸 𑀲𑁂𑀲𑀧𑀤𑀤𑁆𑀯𑀬𑁂𑀧𑀺. 𑀏𑀢𑁆𑀣𑀸𑀢𑀺 𑀲𑀸𑀲𑀦𑁂.

𑀉𑀲𑀪𑀁 𑀦𑀸𑀫 𑀯𑀻𑀲𑀢𑀺 𑀬𑀝𑁆𑀞𑀺𑀬𑁄, 𑀕𑀸𑀯𑀼𑀢𑀁 𑀦𑀸𑀫 𑀅𑀲𑀻𑀢𑀺 𑀉𑀲𑀪𑀸. 𑀢𑀸𑀬 𑀲𑀜𑁆𑀜𑀸𑀬𑀸𑀢𑀺 𑀢𑀸𑀤𑀺𑀲𑀸𑀬 𑀧𑀸𑀲𑀸𑀡𑀲𑀜𑁆𑀜𑀸𑀬, 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁂𑀦 ‘‘𑀏𑀢𑁆𑀢𑀓𑀁 𑀞𑀸𑀦𑀫𑀸𑀕𑀢𑀸’’𑀢𑀺 𑀚𑀸𑀦𑀦𑁆𑀢𑀸 𑀕𑀘𑁆𑀙𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀦𑁆𑀢𑀺 𑀓𑀺𑀮𑁂𑀲𑀁. 𑀓𑀫𑁆𑀫𑀝𑁆𑀞𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀧𑀸𑀤𑀼𑀤𑁆𑀥𑀸𑀭𑀡𑀫𑀓𑀢𑁆𑀣𑀼𑀓𑀸𑀫𑀢𑁄 𑀢𑀺𑀝𑁆𑀞𑀢𑀺, 𑀧𑀘𑁆𑀙𑀸𑀕𑀢𑁄 𑀧𑀦 𑀞𑀺𑀢𑀺𑀫𑀦𑀢𑀺𑀓𑁆𑀓𑀫𑀺𑀢𑀼𑀓𑀸𑀫𑀢𑁄. 𑀲𑁄𑀢𑀺 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑁄 𑀪𑀺𑀓𑁆𑀔𑀼. 𑀅𑀬𑀦𑁆𑀢𑀺 𑀧𑀘𑁆𑀙𑀸𑀕𑀢𑁄 ¶ . 𑀏𑀢𑀦𑁆𑀢𑀺 𑀧𑀭𑀲𑁆𑀲 𑀚𑀸𑀦𑀦𑀁. 𑀢𑀢𑁆𑀣𑁂𑀯𑀸𑀢𑀺 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑁂𑀬𑁂𑀯. 𑀲𑁄𑀬𑁂𑀯 𑀦𑀬𑁄𑀢𑀺 ‘‘𑀅𑀬𑀁 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀓𑀸 𑀬𑁄 𑀧𑀢𑀺𑀝𑁆𑀞𑀸𑀦𑁂 𑀯𑀼𑀢𑁆𑀢𑁄, 𑀲𑁄 𑀏𑀯 𑀦𑀺𑀲𑀚𑁆𑀚𑀸𑀬𑀧𑀺 𑀦𑀬𑁄. 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀸𑀦𑀁 𑀙𑀺𑀦𑁆𑀦𑀪𑀢𑁆𑀢𑀪𑀸𑀯𑀪𑀬𑁂𑀦𑀸𑀧𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀧𑀭𑀺𑀩𑁆𑀭𑀽𑀳𑁂𑀢𑀻𑀢𑀺 𑀇𑀤𑀫𑁆𑀧𑀺 𑀧𑀭𑀲𑁆𑀲 𑀚𑀸𑀦𑀦𑁂𑀦𑁂𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀼𑀭𑀺𑀫𑀧𑀸𑀤𑁂𑀬𑁂𑀯𑀸𑀢𑀺 𑀧𑀞𑀫𑀁 𑀓𑀫𑁆𑀫𑀝𑁆𑀞𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀉𑀤𑁆𑀥𑀭𑀺𑀢𑀧𑀸𑀤𑀯𑀴𑀜𑁆𑀚𑁂𑀬𑁂𑀯. 𑀏𑀢𑀻𑀢𑀺 𑀕𑀘𑁆𑀙𑀢𑀺. ‘‘𑀆𑀮𑀺𑀦𑁆𑀤𑀓𑀯𑀸𑀲𑀻 𑀫𑀳𑀸𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑁄 𑀯𑀺𑀬𑀸’’𑀢𑀺𑀆𑀤𑀺𑀦𑀸 𑀅𑀝𑁆𑀞𑀸𑀦𑁂𑀬𑁂𑀯𑁂𑀢𑀁 𑀓𑀣𑀺𑀢𑀁. ‘‘𑀓𑁆𑀯𑀸𑀬𑀁 𑀏𑀯𑀁 𑀧𑀝𑀺𑀧𑀦𑁆𑀦𑀧𑀼𑀩𑁆𑀩𑁄’’𑀢𑀺 𑀆𑀲𑀗𑁆𑀓𑀁 𑀦𑀺𑀯𑀢𑁆𑀢𑁂𑀢𑀺.

𑀫𑀤𑁆𑀤𑀦𑁆𑀢𑀸𑀢𑀺 𑀥𑀜𑁆𑀜𑀓𑀭𑀡𑀝𑁆𑀞𑀸𑀦𑁂 𑀲𑀸𑀮𑀺𑀲𑀻𑀲𑀸𑀤𑀻𑀦𑀺 𑀫𑀤𑁆𑀤𑀦𑁆𑀢𑀸. 𑀅𑀲𑁆𑀲𑀸𑀢𑀺 𑀣𑁂𑀭𑀲𑁆𑀲, 𑀉𑀪𑀬𑀸𑀧𑁂𑀓𑁆𑀔𑀯𑀘𑀦𑀫𑁂𑀢𑀁. 𑀅𑀲𑁆𑀲 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀤𑀺𑀯𑀲𑁂 𑀘𑀗𑁆𑀓𑀫𑀦𑀓𑁄𑀝𑀺𑀬𑀦𑁆𑀢𑀺 𑀘 ¶ . 𑀅𑀥𑀺𑀕𑀫𑀧𑁆𑀧𑀺𑀘𑁆𑀙𑀢𑀸𑀬 𑀯𑀺𑀓𑁆𑀔𑁂𑀧𑀁 𑀓𑀢𑁆𑀯𑀸, 𑀦𑀺𑀩𑀦𑁆𑀥𑀺𑀢𑁆𑀯𑀸 𑀘 𑀧𑀝𑀺𑀚𑀸𑀦𑀺𑀢𑁆𑀯𑀸𑀬𑁂𑀯 𑀆𑀭𑁄𑀘𑁂𑀲𑀺.

𑀧𑀞𑀫𑀁 𑀢𑀸𑀯𑀸𑀢𑀺 𑀧𑀤𑀲𑁄𑀪𑀦𑀢𑁆𑀣𑀁 𑀧𑀭𑀺𑀬𑀸𑀬𑀯𑀘𑀦𑀁. 𑀫𑀳𑀸𑀧𑀥𑀸𑀦𑀦𑁆𑀢𑀺 𑀪𑀕𑀯𑀢𑁄 𑀤𑀼𑀓𑁆𑀓𑀭𑀘𑀭𑀺𑀬𑀁, 𑀅𑀫𑁆𑀳𑀸𑀓𑀁 𑀅𑀢𑁆𑀣𑀸𑀬 𑀮𑁄𑀓𑀦𑀸𑀣𑁂𑀦 𑀙𑀩𑁆𑀩𑀲𑁆𑀲𑀸𑀦𑀺 𑀓𑀢𑀁 𑀤𑀼𑀓𑁆𑀓𑀭𑀘𑀭𑀺𑀬𑀁 ‘‘𑀏𑀯𑀸𑀳𑀁 𑀬𑀣𑀸𑀩𑀮𑀁 𑀧𑀽𑀚𑁂𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀣𑁄. 𑀧𑀝𑀺𑀧𑀢𑁆𑀢𑀺𑀧𑀽𑀚𑀸𑀬𑁂𑀯 𑀳𑀺 𑀧𑀲𑀢𑁆𑀣𑀢𑀭𑀸 𑀲𑀢𑁆𑀣𑀼𑀧𑀽𑀚𑀸, 𑀦 𑀢𑀣𑀸 𑀆𑀫𑀺𑀲𑀧𑀽𑀚𑀸. 𑀞𑀸𑀦𑀘𑀗𑁆𑀓𑀫𑀫𑁂𑀯𑀸𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀇𑀭𑀺𑀬𑀸𑀧𑀣𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀪𑁄𑀚𑀦𑀓𑀸𑀮𑀸𑀤𑀻𑀲𑀼 𑀅𑀯𑀲𑁆𑀲𑀁 𑀓𑀢𑁆𑀢𑀩𑁆𑀩𑀦𑀺𑀲𑀚𑁆𑀚𑀸𑀬 𑀧𑀝𑀺𑀓𑁆𑀔𑁂𑀧𑀯𑀲𑁂𑀦. 𑀏𑀯𑀲𑀤𑁆𑀤𑁂𑀦 𑀳𑀺 𑀇𑀢𑀭𑀸𑀬 𑀦𑀺𑀲𑀚𑁆𑀚𑀸𑀬, 𑀲𑀬𑀦𑀲𑁆𑀲 𑀘 𑀦𑀺𑀯𑀢𑁆𑀢𑀦𑀁 𑀓𑀭𑁄𑀢𑀺. 𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀉𑀤𑁆𑀥𑀝𑁂 𑀧𑀝𑀺𑀦𑀺𑀯𑀢𑁆𑀢𑁂𑀦𑁆𑀢𑁄𑀢𑀺 𑀲𑀫𑁆𑀧𑀬𑀼𑀢𑁆𑀢𑁂𑀦 𑀉𑀤𑁆𑀥𑀭𑀺𑀢𑀧𑀸𑀤𑁂𑀬𑁂𑀯 𑀧𑀼𑀦 𑀞𑀧𑀦𑀁 𑀲𑀦𑁆𑀥𑀸𑀬𑀸𑀳. ‘‘𑀕𑀸𑀫𑀲𑀫𑀻𑀧𑀁 𑀕𑀦𑁆𑀢𑁆𑀯𑀸’’𑀢𑀺 𑀯𑀢𑁆𑀯𑀸 𑀢𑀤𑀢𑁆𑀣𑀁 𑀯𑀺𑀯𑀭𑀢𑀺 ‘‘𑀕𑀸𑀯𑀻 𑀦𑀽’’𑀢𑀺𑀆𑀤𑀺𑀦𑀸. 𑀓𑀘𑁆𑀙𑀓𑀦𑁆𑀢𑀭𑀢𑁄𑀢𑀺 𑀉𑀧𑀓𑀘𑁆𑀙𑀦𑁆𑀢𑀭𑀢𑁄, 𑀉𑀧𑀓𑀘𑁆𑀙𑁂 𑀮𑀕𑁆𑀕𑀺𑀢𑀓𑀫𑀡𑁆𑀟𑀮𑀼𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀤𑀓𑀕𑀡𑁆𑀟𑀽𑀲𑀦𑁆𑀢𑀺 𑀉𑀤𑀓𑀸𑀯𑀕𑀡𑁆𑀟𑀓𑀸𑀭𑀓𑀁. 𑀓𑀢𑀺𑀦𑀁 𑀢𑀺𑀣𑀻𑀦𑀁 𑀧𑀽𑀭𑀡𑀻 𑀓𑀢𑀺𑀫𑀻, ‘‘𑀧𑀜𑁆𑀘𑀫𑀻 𑀦𑀼 𑀔𑁄 𑀧𑀓𑁆𑀔𑀲𑁆𑀲, 𑀅𑀝𑁆𑀞𑀫𑀻’’𑀢𑀺𑀆𑀤𑀺𑀦𑀸 𑀤𑀺𑀯𑀲𑀁 𑀯𑀸 𑀧𑀼𑀘𑁆𑀙𑀺𑀢𑁄𑀢𑀺 𑀅𑀢𑁆𑀣𑁄. 𑀅𑀦𑀸𑀭𑁄𑀘𑀦𑀲𑁆𑀲 𑀅𑀓𑀢𑁆𑀢𑀩𑁆𑀩𑀢𑁆𑀢𑀸 𑀆𑀭𑁄𑀘𑁂𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀅𑀦𑀼𑀚𑀸𑀦𑀸𑀫𑀺 𑀪𑀺𑀓𑁆𑀔𑀯𑁂 𑀲𑀩𑁆𑀩𑁂𑀳𑁂𑀯 𑀧𑀓𑁆𑀔𑀕𑀡𑀦𑀁 𑀉𑀕𑁆𑀕𑀳𑁂𑀢𑀼’’𑀦𑁆𑀢𑀺𑀆𑀤𑀺 (𑀫𑀳𑀸𑀯. 𑁧𑁫𑁬).

‘‘𑀉𑀤𑀓𑀁 𑀕𑀺𑀮𑀺𑀢𑁆𑀯𑀸 𑀆𑀭𑁄𑀘𑁂𑀢𑀻’’𑀢𑀺 𑀯𑀼𑀢𑁆𑀢𑀦𑀬𑁂𑀦. 𑀢𑀢𑁆𑀣𑀸𑀢𑀺 𑀕𑀸𑀫𑀤𑁆𑀯𑀸𑀭𑁂. 𑀦𑀺𑀝𑁆𑀞𑀼𑀪𑀦𑀦𑁆𑀢𑀺 𑀉𑀤𑀓𑀦𑀺𑀝𑁆𑀞𑀼𑀪𑀦𑀝𑁆𑀞𑀸𑀦𑀁. 𑀢𑁂𑀲𑀽𑀢𑀺 𑀫𑀦𑀼𑀲𑁆𑀲𑁂𑀲𑀼. 𑀜𑀸𑀡𑀘𑀓𑁆𑀔𑀼𑀲𑀫𑁆𑀧𑀦𑁆𑀦𑀢𑁆𑀢𑀸 𑀘𑀓𑁆𑀔𑀼𑀫𑀸. 𑀈𑀤𑀺𑀲𑁄𑀢𑀺 𑀲𑀼𑀲𑀫𑁆𑀫𑀝𑁆𑀞𑀘𑁂𑀢𑀺𑀬𑀗𑁆𑀕𑀡𑀸𑀤𑀺𑀓𑁄. 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀦𑁆𑀢𑀺 𑀔𑀻𑀡𑀸𑀲𑀯𑀪𑀸𑀯𑁂𑀦 𑀧𑀯𑀸𑀭𑀡𑀁.

𑀯𑀻𑀣𑀺𑀁 𑀑𑀢𑀭𑀺𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀅𑀦𑁄𑀮𑁄𑀓𑁂𑀢𑁆𑀯𑀸 𑀧𑀞𑀫𑀫𑁂𑀯 𑀯𑀻𑀣𑀺𑀬𑁄 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸𑀢𑀺 𑀆𑀳 ‘‘𑀯𑀻𑀣𑀺𑀬𑁄 𑀲𑀮𑁆𑀮𑀓𑁆𑀔𑁂𑀢𑁆𑀯𑀸’’𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀧𑀸𑀲𑀸𑀤𑀺𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑁂𑀦 𑀧𑀝𑀺𑀓𑁆𑀓𑀦𑁆𑀢𑁂𑀦𑀸’’𑀢𑀺𑀆𑀤𑀺 ¶ (𑀧𑀸𑀭𑀸. 𑁪𑁩𑁨). 𑀢𑀁 𑀕𑀫𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀘𑀸’’𑀢𑀺𑀆𑀤𑀺𑀫𑀸𑀳. ‘‘𑀦 𑀳𑀺 𑀚𑀯𑁂𑀦 𑀧𑀺𑀡𑁆𑀟𑀧𑀸𑀢𑀺𑀬𑀥𑀼𑀢𑀗𑁆𑀕𑀁 𑀦𑀸𑀫 𑀓𑀺𑀜𑁆𑀘𑀺 𑀅𑀢𑁆𑀣𑀻’’𑀢𑀺 𑀇𑀫𑀺𑀦𑀸 𑀚𑀯𑁂𑀦 𑀕𑀫𑀦𑁂 𑀮𑁄𑀮𑀼𑀧𑁆𑀧𑀘𑀸𑀭𑀺𑀢𑀸 𑀯𑀺𑀬 𑀅𑀲𑀸𑀭𑀼𑀧𑁆𑀧𑀢𑀁 𑀤𑀲𑁆𑀲𑁂𑀢𑀺. 𑀉𑀤𑀓𑀲𑀓𑀝𑀦𑁆𑀢𑀺 𑀉𑀤𑀓𑀲𑀸𑀭𑀲𑀓𑀝𑀁. 𑀢𑀜𑁆𑀳𑀺 𑀯𑀺𑀲𑀫𑀪𑀽𑀫𑀺𑀪𑀸𑀕𑀧𑁆𑀧𑀢𑁆𑀢𑀁 𑀦𑀺𑀘𑁆𑀘𑀮𑀫𑁂𑀯 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀢𑀤𑀦𑀼𑀭𑀽𑀧𑀦𑁆𑀢𑀺 𑀪𑀺𑀓𑁆𑀔𑀸𑀤𑀸𑀦𑀸𑀦𑀼𑀭𑀽𑀧𑀁. ‘‘𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀁 𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺. 𑀭𑀣𑀲𑁆𑀲 𑀅𑀓𑁆𑀔𑀸𑀦𑀁 𑀢𑁂𑀮𑁂𑀦 𑀅𑀩𑁆𑀪𑀜𑁆𑀚𑀦𑀁, 𑀯𑀡𑀲𑁆𑀲 𑀮𑁂𑀧𑀦𑀁, 𑀧𑀼𑀢𑁆𑀢𑀫𑀁𑀲𑀲𑁆𑀲 𑀔𑀸𑀤𑀦𑀜𑁆𑀘 𑀢𑀺𑀥𑀸 𑀉𑀧𑀫𑀸 𑀬𑀲𑁆𑀲 𑀆𑀳𑀭𑀡𑀲𑁆𑀲𑀸𑀢𑀺 𑀢𑀣𑀸. 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀦𑁆𑀢𑀺 ‘‘𑀬𑀸𑀯𑀤𑁂𑀯 ¶ 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸, 𑀬𑀸𑀧𑀦𑀸𑀬𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁩; 𑁨.𑁨𑁪, 𑁩𑁮𑁭; 𑀲𑀁. 𑀦𑀺. 𑁪.𑁧𑁨𑁦; 𑀅. 𑀦𑀺. 𑁬.𑁫𑁮; 𑁫.𑁯; 𑀯𑀺𑀪. 𑁫𑁧𑁮; 𑀫𑀳𑀸𑀦𑀺. 𑁨𑁦𑁬) 𑀯𑀼𑀢𑁆𑀢𑁂𑀳𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀓𑀢𑁆𑀯𑀸. ‘‘𑀦𑁂𑀯 𑀤𑀯𑀸𑀬𑀸’’𑀢𑀺𑀆𑀤𑀺 𑀧𑀦 𑀧𑀝𑀺𑀓𑁆𑀔𑁂𑀧𑀫𑀢𑁆𑀢𑀤𑀲𑁆𑀲𑀦𑀁. 𑀪𑀢𑁆𑀢𑀓𑀺𑀮𑀫𑀣𑀦𑁆𑀢𑀺 𑀪𑀢𑁆𑀢𑀯𑀲𑁂𑀦 𑀉𑀧𑁆𑀧𑀦𑁆𑀦𑀓𑀺𑀮𑀫𑀣𑀁. 𑀧𑀼𑀭𑁂𑀪𑀢𑁆𑀢𑀸𑀤𑀺 𑀤𑀺𑀯𑀸𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀬𑀸𑀫𑀸𑀤𑀺 𑀭𑀢𑁆𑀢𑀺𑀯𑀲𑁂𑀦.

𑀕𑀢𑀧𑀘𑁆𑀘𑀸𑀕𑀢𑁂𑀲𑀼 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀳𑀭𑀡𑀁 𑀯𑀢𑁆𑀢𑀦𑁆𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀳𑀭𑀡𑀧𑀘𑁆𑀘𑀸𑀳𑀭𑀡𑀲𑀗𑁆𑀔𑀸𑀢’’𑀦𑁆𑀢𑀺 𑀆𑀳. ‘‘𑀬𑀤𑀺 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀳𑁄𑀢𑀻’’𑀢𑀺 𑀇𑀤𑀁 ‘‘𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸’’𑀢𑀺𑀆𑀤𑀻𑀲𑀼𑀧𑀺 𑀲𑀩𑁆𑀩𑀢𑁆𑀣 𑀲𑀫𑁆𑀩𑀚𑁆𑀛𑀺𑀢𑀩𑁆𑀩𑀁. 𑀢𑀢𑁆𑀣 𑀧𑀘𑁆𑀘𑁂𑀓𑀩𑁄𑀥𑀺𑀬𑀸 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀤𑀸 𑀓𑀧𑁆𑀧𑀸𑀦𑀁 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺, 𑀲𑀢𑀲𑀳𑀲𑁆𑀲𑀜𑁆𑀘 𑀢𑀚𑁆𑀚𑀸 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀁, 𑀲𑀸𑀯𑀓𑀩𑁄𑀥𑀺𑀬𑀸 𑀅𑀕𑁆𑀕𑀲𑀸𑀯𑀓𑀸𑀦𑀁 𑀏𑀓𑀫𑀲𑀗𑁆𑀔𑁆𑀬𑁂𑀬𑁆𑀬𑀁, 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘, 𑀫𑀳𑀸𑀲𑀸𑀯𑀓𑀸𑀦𑀁 (𑀣𑁂𑀭𑀕𑀸. 𑀅𑀝𑁆𑀞. 𑁨.𑀯𑀗𑁆𑀕𑀻𑀲𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸 𑀯𑀺𑀢𑁆𑀣𑀸𑀭𑁄) 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑁂𑀯, 𑀇𑀢𑀭𑁂𑀲𑀁 𑀧𑀦 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀼 𑀯𑀺𑀯𑀝𑁆𑀝𑀼𑀧𑀦𑀺𑀲𑁆𑀲𑀬𑀯𑀲𑁂𑀦 𑀓𑀸𑀮𑀦𑀺𑀬𑀫𑀫𑀦𑁆𑀢𑀭𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀓𑀼𑀲𑀮𑀁. ‘‘𑀲𑁂𑀬𑁆𑀬𑀣𑀸𑀧𑀻’’𑀢𑀺𑀆𑀤𑀺𑀦𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑀦𑁆𑀢𑀭𑁂 𑀏𑀢𑀤𑀕𑁆𑀕𑀝𑁆𑀞𑀧𑀺𑀢𑀸𑀦𑀁 𑀣𑁂𑀭𑀸𑀦𑀁 𑀲𑀓𑁆𑀔𑀺𑀤𑀲𑁆𑀲𑀦𑀁. 𑀢𑀢𑁆𑀣 𑀣𑁂𑀭𑁄 𑀩𑀸𑀳𑀺𑀬𑁄 𑀤𑀸𑀭𑀼𑀘𑀻𑀭𑀺𑀬𑁄𑀢𑀺 𑀩𑀸𑀳𑀺𑀬𑀯𑀺𑀲𑀬𑁂 𑀲𑀜𑁆𑀚𑀸𑀢𑀲𑀁𑀯𑀟𑁆𑀠𑀢𑀸𑀬 𑀩𑀸𑀳𑀺𑀬𑁄, 𑀤𑀸𑀭𑀼𑀘𑀻𑀭𑀧𑀭𑀺𑀳𑀭𑀡𑀢𑁄 𑀤𑀸𑀭𑀼𑀘𑀻𑀭𑀺𑀬𑁄𑀢𑀺 𑀘 𑀲𑀫𑀜𑁆𑀜𑀺𑀢𑁄 𑀣𑁂𑀭𑁄. 𑀲𑁄 𑀳𑀸𑀬𑀲𑁆𑀫𑀸 𑁋

‘‘𑀢𑀲𑁆𑀫𑀸 𑀢𑀺𑀳 𑀢𑁂 𑀩𑀸𑀳𑀺𑀬 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀲𑀼𑀢𑁂, 𑀫𑀼𑀢𑁂, 𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’𑀢𑀺, 𑀏𑀯𑀜𑁆𑀳𑀺 𑀢𑁂 𑀩𑀸𑀳𑀺𑀬 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀬𑀢𑁄 𑀔𑁄 𑀢𑁂 𑀩𑀸𑀳𑀺𑀬 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀲𑀼𑀢𑁂, 𑀫𑀼𑀢𑁂, 𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀢𑀢𑁄 𑀢𑁆𑀯𑀁 𑀩𑀸𑀳𑀺𑀬 𑀦 𑀢𑁂𑀦. 𑀬𑀢𑁄 𑀢𑁆𑀯𑀁 𑀩𑀸𑀳𑀺𑀬 𑀦 𑀢𑁂𑀦, 𑀢𑀢𑁄 𑀩𑀸𑀳𑀺𑀬 𑀦 𑀢𑀢𑁆𑀣. 𑀬𑀢𑁄 𑀢𑁆𑀯𑀁 𑀩𑀸𑀳𑀺𑀬 𑀦 𑀢𑀢𑁆𑀣, 𑀢𑀢𑁄 𑀢𑁆𑀯𑀁 𑀩𑀸𑀳𑀺𑀬 𑀦𑁂𑀯𑀺𑀥 𑀦 𑀳𑀼𑀭𑀁 𑀦 𑀉𑀪𑀬𑀫𑀦𑁆𑀢𑀭𑁂𑀦, 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸’𑀢𑀺’’ (𑀉𑀤𑀸. 𑁧𑁦).

𑀏𑀢𑁆𑀢𑀓𑀸𑀬 ¶ 𑀤𑁂𑀲𑀦𑀸𑀬 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺. 𑀏𑀯𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀸𑀤𑀻𑀦𑀫𑁆𑀧𑀺 𑀫𑀳𑀸𑀧𑀜𑁆𑀜𑀢𑀸𑀤𑀺𑀤𑀻𑀧𑀦𑀸𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀯𑀺𑀢𑁆𑀣𑀸𑀭𑀢𑁄 𑀯𑀢𑁆𑀢𑀩𑁆𑀩𑀸𑀦𑀺. 𑀯𑀺𑀲𑁂𑀲𑀢𑁄 𑀧𑀦 𑀅𑀗𑁆𑀕𑀼𑀢𑁆𑀢𑀭𑀸𑀕𑀫𑁂 𑀏𑀢𑀤𑀕𑁆𑀕𑀲𑀼𑀢𑁆𑀢𑀧𑀤𑀸𑀦𑀺 (𑀅. 𑀦𑀺. 𑁧.𑁧𑁮𑁮) 𑀲𑀺𑀔𑀸𑀧𑀢𑁆𑀢𑀦𑁆𑀢𑀺 𑀓𑁄𑀝𑀺𑀧𑁆𑀧𑀢𑁆𑀢𑀁 𑀦𑀺𑀝𑁆𑀞𑀸𑀦𑀧𑁆𑀧𑀢𑁆𑀢𑀁 𑀲𑀩𑁆𑀩𑀣𑀸 𑀧𑀭𑀺𑀧𑀼𑀡𑁆𑀡𑀢𑁄.

𑀢𑀦𑁆𑀢𑀺 ¶ 𑀅𑀲𑀫𑁆𑀫𑀼𑀬𑁆𑀳𑀦𑀁. 𑀏𑀯𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. ‘‘𑀅𑀢𑁆𑀢𑀸 𑀅𑀪𑀺𑀓𑁆𑀓𑀫𑀢𑀻’’𑀢𑀺 𑀇𑀫𑀺𑀦𑀸 𑀤𑀺𑀝𑁆𑀞𑀺𑀕𑀸𑀳𑀯𑀲𑁂𑀦, ‘‘𑀅𑀳𑀁 𑀅𑀪𑀺𑀓𑁆𑀓𑀫𑀸𑀫𑀻’’𑀢𑀺 𑀇𑀫𑀺𑀦𑀸 𑀫𑀸𑀦𑀕𑀸𑀳𑀯𑀲𑁂𑀦, 𑀢𑀤𑀼𑀪𑀬𑀲𑁆𑀲 𑀧𑀦 𑀯𑀺𑀦𑀸 𑀢𑀡𑁆𑀳𑀸𑀬 𑀅𑀧𑁆𑀧𑀯𑀢𑁆𑀢𑀦𑀢𑁄 𑀢𑀡𑁆𑀳𑀸𑀕𑀸𑀳𑀯𑀲𑁂𑀦𑀸𑀢𑀺 𑀢𑀻𑀳𑀺𑀧𑀺 𑀫𑀜𑁆𑀜𑀦𑀸𑀳𑀺 𑀅𑀦𑁆𑀥𑀩𑀸𑀮𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀪𑀺𑀓𑁆𑀓𑀫𑁂 𑀲𑀫𑁆𑀫𑀼𑀬𑁆𑀳𑀦𑀁 𑀤𑀲𑁆𑀲𑁂𑀢𑀺. ‘‘𑀢𑀣𑀸 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁄’’𑀢𑀺 𑀯𑀢𑁆𑀯𑀸 𑀢𑀤𑁂𑀯 𑀅𑀲𑀫𑁆𑀫𑀼𑀬𑁆𑀳𑀦𑀁 𑀬𑁂𑀦 𑀖𑀦𑀯𑀺𑀦𑀺𑀩𑁆𑀪𑁄𑀕𑁂𑀦 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀪𑀺𑀓𑁆𑀓𑀫𑀸𑀫𑀻’’𑀢𑀺𑀆𑀤𑀺𑀫𑀸𑀳. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀯𑀸𑀬𑁄𑀥𑀸𑀢𑀽𑀢𑀺 𑀢𑁂𑀦𑁂𑀯 𑀅𑀪𑀺𑀓𑁆𑀓𑀫𑀦𑀘𑀺𑀢𑁆𑀢𑁂𑀦 𑀲𑀫𑀼𑀝𑁆𑀞𑀸𑀦𑀸, 𑀢𑀁𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀺𑀓𑀸 𑀯𑀸 𑀯𑀸𑀬𑁄𑀥𑀸𑀢𑀼. 𑀯𑀺𑀜𑁆𑀜𑀢𑁆𑀢𑀺𑀦𑁆𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀁. 𑀚𑀦𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺 𑀢𑀲𑁆𑀲𑀸 𑀯𑀺𑀓𑀸𑀭𑀪𑀸𑀯𑀢𑁄. 𑀇𑀢𑀻𑀢𑀺 𑀢𑀲𑁆𑀫𑀸 𑀉𑀧𑁆𑀧𑀚𑁆𑀚𑀦𑀢𑁄. 𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑀯𑀲𑁂𑀦𑀸𑀢𑀺 𑀓𑀺𑀭𑀺𑀬𑀫𑀬𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀯𑀸𑀬𑁄𑀥𑀸𑀢𑀼𑀬𑀸 𑀯𑀺𑀘𑀮𑀦𑀸𑀓𑀸𑀭𑀲𑀗𑁆𑀔𑀸𑀢𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀯𑀲𑁂𑀦. 𑀢𑀲𑁆𑀲𑀸𑀢𑀺 𑀅𑀝𑁆𑀞𑀺𑀲𑀗𑁆𑀖𑀸𑀝𑀲𑁆𑀲. 𑀅𑀪𑀺𑀓𑁆𑀓𑀫𑀢𑁄𑀢𑀺 𑀅𑀪𑀺𑀓𑁆𑀓𑀫𑀦𑁆𑀢𑀲𑁆𑀲. 𑀑𑀫𑀢𑁆𑀢𑀸𑀢𑀺 𑀅𑀯𑀫𑀢𑁆𑀢𑀸 𑀮𑀸𑀫𑀓𑀧𑁆𑀧𑀫𑀸𑀡𑀸. 𑀯𑀸𑀬𑁄𑀥𑀸𑀢𑀼𑀢𑁂𑀚𑁄𑀥𑀸𑀢𑀼𑀯𑀲𑁂𑀦 𑀇𑀢𑀭𑀸 𑀤𑁆𑀯𑁂 𑀥𑀸𑀢𑀼𑀬𑁄.

𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀸 𑀘𑁂𑀢𑁆𑀣 𑀯𑀸𑀬𑁄𑀥𑀸𑀢𑀼𑀬𑀸 𑀅𑀦𑀼𑀕𑀢𑀸 𑀢𑁂𑀚𑁄𑀥𑀸𑀢𑀼 𑀉𑀤𑁆𑀥𑀭𑀡𑀲𑁆𑀲 𑀧𑀘𑁆𑀘𑀬𑁄. 𑀉𑀤𑁆𑀥𑀭𑀡𑀕𑀢𑀺𑀓𑀸 𑀳𑀺 𑀢𑁂𑀚𑁄𑀥𑀸𑀢𑀼, 𑀢𑁂𑀦 𑀢𑀲𑁆𑀲𑀸 𑀉𑀤𑁆𑀥𑀭𑀡𑁂 𑀯𑀸𑀬𑁄𑀥𑀸𑀢𑀼𑀬𑀸 𑀅𑀦𑀼𑀕𑀢𑀪𑀸𑀯𑁄 𑀳𑁄𑀢𑀺, 𑀢𑀲𑁆𑀫𑀸 𑀇𑀫𑀸𑀲𑀁 𑀤𑁆𑀯𑀺𑀦𑁆𑀦𑀫𑁂𑀢𑁆𑀣 𑀲𑀸𑀫𑀢𑁆𑀣𑀺𑀬𑀢𑁄 𑀅𑀥𑀺𑀫𑀢𑁆𑀢𑀢𑀸, 𑀢𑀣𑀸 𑀅𑀪𑀸𑀯𑀢𑁄 𑀧𑀦 𑀇𑀢𑀭𑀸𑀲𑀁 𑀑𑀫𑀢𑁆𑀢𑀢𑀸𑀢𑀺. 𑀬𑀲𑁆𑀫𑀸 𑀧𑀦 𑀢𑁂𑀚𑁄𑀥𑀸𑀢𑀼𑀬𑀸 𑀅𑀦𑀼𑀕𑀢𑀸 𑀯𑀸𑀬𑁄𑀥𑀸𑀢𑀼 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑀸𑀦𑀁 𑀧𑀘𑁆𑀘𑀬𑁄. 𑀓𑀺𑀭𑀺𑀬𑀕𑀢𑀺𑀓𑀸𑀬 𑀳𑀺 𑀯𑀸𑀬𑁄𑀥𑀸𑀢𑀼𑀬𑀸 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑁂𑀲𑀼 𑀲𑀸𑀢𑀺𑀲𑀬𑁄 𑀩𑁆𑀬𑀸𑀧𑀸𑀭𑁄, 𑀢𑁂𑀦 𑀢𑀲𑁆𑀲𑀸 𑀢𑀢𑁆𑀣 𑀢𑁂𑀚𑁄𑀥𑀸𑀢𑀼𑀬𑀸 𑀅𑀦𑀼𑀕𑀢𑀪𑀸𑀯𑁄 𑀳𑁄𑀢𑀺, 𑀢𑀲𑁆𑀫𑀸 𑀇𑀫𑀸𑀲𑀁 𑀤𑁆𑀯𑀺𑀦𑁆𑀦𑀫𑁂𑀢𑁆𑀣 𑀲𑀸𑀫𑀢𑁆𑀣𑀺𑀬𑀢𑁄 𑀅𑀥𑀺𑀫𑀢𑁆𑀢𑀢𑀸, 𑀇𑀢𑀭𑀸𑀲𑀜𑁆𑀘 𑀢𑀤𑀪𑀸𑀯𑀢𑁄 𑀑𑀫𑀢𑁆𑀢𑀢𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀢𑀣𑀸 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑁂𑀲𑀽’’𑀢𑀺 𑀇𑀫𑀺𑀦𑀸. 𑀲𑀢𑀺𑀧𑀺 𑀘𑁂𑀢𑁆𑀣 𑀅𑀦𑀼𑀕𑀫𑀓𑀸𑀦𑀼𑀕𑀦𑁆𑀢𑀩𑁆𑀩𑀢𑀸𑀯𑀺𑀲𑁂𑀲𑁂 𑀢𑁂𑀚𑁄𑀥𑀸𑀢𑀼𑀯𑀸𑀬𑁄𑀥𑀸𑀢𑀼𑀪𑀸𑀯𑀫𑀢𑁆𑀢𑀁 𑀲𑀦𑁆𑀥𑀸𑀬 𑀢𑀣𑀸𑀲𑀤𑁆𑀤𑀕𑁆𑀕𑀳𑀡𑀁 𑀓𑀢𑀁. 𑀧𑀞𑀫𑁂 𑀳𑀺 𑀦𑀬𑁂 𑀢𑁂𑀚𑁄𑀥𑀸𑀢𑀼𑀬𑀸 𑀅𑀦𑀼𑀕𑀫𑀓𑀢𑀸, 𑀯𑀸𑀬𑁄𑀥𑀸𑀢𑀼𑀬𑀸 𑀅𑀦𑀼𑀕𑀦𑁆𑀢𑀩𑁆𑀩𑀢𑀸, 𑀤𑀼𑀢𑀺𑀬𑁂 𑀧𑀦 𑀯𑀸𑀬𑁄𑀥𑀸𑀢𑀼𑀬𑀸 𑀅𑀦𑀼𑀕𑀫𑀓𑀢𑀸, 𑀢𑁂𑀚𑁄𑀥𑀸𑀢𑀼𑀬𑀸 𑀅𑀦𑀼𑀕𑀦𑁆𑀢𑀩𑁆𑀩𑀢𑀸𑀢𑀺. 𑀢𑀢𑁆𑀣 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑀢𑁄 𑀧𑀸𑀤𑀲𑁆𑀲 𑀉𑀓𑁆𑀔𑀺𑀧𑀦𑀁 𑀉𑀤𑁆𑀥𑀭𑀡𑀁, 𑀞𑀺𑀢𑀝𑁆𑀞𑀸𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀼𑀭𑀢𑁄 𑀳𑀭𑀡𑀁 𑀅𑀢𑀺𑀳𑀭𑀡𑀁. 𑀔𑀸𑀡𑀼𑀆𑀤𑀺𑀧𑀭𑀺𑀳𑀭𑀡𑀢𑁆𑀣𑀁, 𑀧𑀢𑀺𑀝𑁆𑀞𑀺𑀢𑀧𑀸𑀤𑀖𑀝𑁆𑀝𑀦𑀸𑀧𑀭𑀺𑀳𑀭𑀡𑀢𑁆𑀣𑀁 𑀯𑀸 𑀧𑀲𑁆𑀲𑁂𑀦 𑀳𑀭𑀡𑀁 ¶ 𑀯𑀻𑀢𑀺𑀳𑀭𑀡𑀁, 𑀬𑀸𑀯 𑀧𑀢𑀺𑀝𑁆𑀞𑀺𑀢𑀧𑀸𑀤𑁄, 𑀢𑀸𑀯 𑀳𑀭𑀡𑀁 𑀅𑀢𑀺𑀳𑀭𑀡𑀁, 𑀢𑀢𑁄 𑀧𑀭𑀁 𑀳𑀭𑀡𑀁 𑀯𑀻𑀢𑀺𑀳𑀭𑀡𑀦𑁆𑀢𑀺 𑀯𑀸 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀬𑀲𑁆𑀫𑀸 ¶ 𑀧𑀣𑀯𑀻𑀥𑀸𑀢𑀼𑀬𑀸 𑀅𑀦𑀼𑀕𑀢𑀸 𑀆𑀧𑁄𑀥𑀸𑀢𑀼 𑀯𑁄𑀲𑁆𑀲𑀚𑁆𑀚𑀦𑁂 𑀧𑀘𑁆𑀘𑀬𑁄. 𑀕𑀭𑀼𑀢𑀭𑀲𑀪𑀸𑀯𑀸 𑀳𑀺 𑀆𑀧𑁄𑀥𑀸𑀢𑀼, 𑀢𑁂𑀦 𑀢𑀲𑁆𑀲𑀸 𑀯𑁄𑀲𑁆𑀲𑀚𑁆𑀚𑀦𑁂 𑀧𑀣𑀯𑀻𑀥𑀸𑀢𑀼𑀬𑀸 𑀅𑀦𑀼𑀕𑀢𑀪𑀸𑀯𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀸𑀲𑀁 𑀤𑁆𑀯𑀺𑀦𑁆𑀦𑀫𑁂𑀢𑁆𑀣 𑀲𑀸𑀫𑀢𑁆𑀣𑀺𑀬𑀢𑁄 𑀅𑀥𑀺𑀫𑀢𑁆𑀢𑀢𑀸, 𑀇𑀢𑀭𑀸𑀲𑀜𑁆𑀘 𑀢𑀤𑀪𑀸𑀯𑀢𑁄 𑀑𑀫𑀢𑁆𑀢𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑁄𑀲𑁆𑀲𑀚𑁆𑀚𑀦𑁂…𑀧𑁂… 𑀩𑀮𑀯𑀢𑀺𑀬𑁄’’𑀢𑀺. 𑀬𑀲𑁆𑀫𑀸 𑀧𑀦 𑀆𑀧𑁄𑀥𑀸𑀢𑀼𑀬𑀸 𑀅𑀦𑀼𑀕𑀢𑀸 𑀧𑀣𑀯𑀻𑀥𑀸𑀢𑀼 𑀲𑀦𑁆𑀦𑀺𑀓𑁆𑀔𑁂𑀧𑀦𑀲𑁆𑀲 𑀧𑀘𑁆𑀘𑀬𑁄. 𑀧𑀢𑀺𑀝𑁆𑀞𑀸𑀪𑀸𑀯𑁂 𑀯𑀺𑀬 𑀧𑀢𑀺𑀝𑁆𑀞𑀸𑀧𑀦𑁂𑀧𑀺 𑀢𑀲𑁆𑀲𑀸 𑀲𑀸𑀢𑀺𑀲𑀬𑀓𑀺𑀘𑁆𑀘𑀢𑁆𑀢𑀸 𑀆𑀧𑁄𑀥𑀸𑀢𑀼𑀬𑀸 𑀢𑀲𑁆𑀲𑀸 𑀅𑀦𑀼𑀕𑀢𑀪𑀸𑀯𑁄 𑀳𑁄𑀢𑀺, 𑀢𑀣𑀸 𑀖𑀝𑁆𑀝𑀦𑀓𑀺𑀭𑀺𑀬𑀸𑀬 𑀧𑀣𑀯𑀻𑀥𑀸𑀢𑀼𑀬𑀸 𑀯𑀲𑁂𑀦 𑀲𑀦𑁆𑀦𑀺𑀭𑀼𑀚𑁆𑀛𑀦𑀲𑁆𑀲 𑀲𑀺𑀚𑁆𑀛𑀦𑀢𑁄 𑀢𑀲𑁆𑀲𑀸 𑀲𑀦𑁆𑀦𑀺𑀭𑀼𑀚𑁆𑀛𑀦𑁂𑀧𑀺 𑀆𑀧𑁄𑀥𑀸𑀢𑀼𑀬𑀸 𑀅𑀦𑀼𑀕𑀢𑀪𑀸𑀯𑁄 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑀣𑀸 𑀲𑀦𑁆𑀦𑀺𑀓𑁆𑀔𑁂𑀧𑀦𑀲𑀦𑁆𑀦𑀺𑀭𑀼𑀚𑁆𑀛𑀦𑁂𑀲𑀽’’𑀢𑀺.

𑀅𑀦𑀼𑀕𑀫𑀓𑀸𑀦𑀼𑀕𑀦𑁆𑀢𑀩𑁆𑀩𑀢𑀸𑀯𑀺𑀲𑁂𑀲𑁂𑀧𑀺 𑀲𑀢𑀺 𑀧𑀣𑀯𑀻𑀥𑀸𑀢𑀼𑀆𑀧𑁄𑀥𑀸𑀢𑀼𑀪𑀸𑀯𑀫𑀢𑁆𑀢𑀁 𑀲𑀦𑁆𑀥𑀸𑀬 𑀢𑀣𑀸𑀲𑀤𑁆𑀤𑀕𑁆𑀕𑀳𑀡𑀁 𑀓𑀢𑀁. 𑀧𑀞𑀫𑁂 𑀳𑀺 𑀦𑀬𑁂 𑀧𑀣𑀯𑀻𑀥𑀸𑀢𑀼𑀬𑀸 𑀅𑀦𑀼𑀕𑀫𑀓𑀢𑀸, 𑀆𑀧𑁄𑀥𑀸𑀢𑀼𑀬𑀸 𑀅𑀦𑀼𑀕𑀦𑁆𑀢𑀩𑁆𑀩𑀢𑀸, 𑀤𑀼𑀢𑀺𑀬𑁂 𑀧𑀦 𑀆𑀧𑁄𑀥𑀸𑀢𑀼𑀬𑀸 𑀅𑀦𑀼𑀕𑀫𑀓𑀢𑀸, 𑀧𑀣𑀯𑀻𑀥𑀸𑀢𑀼𑀬𑀸 𑀅𑀦𑀼𑀕𑀦𑁆𑀢𑀩𑁆𑀩𑀢𑀸𑀢𑀺. 𑀯𑁄𑀲𑁆𑀲𑀚𑁆𑀚𑀦𑀜𑁆𑀘𑁂𑀢𑁆𑀣 𑀧𑀸𑀤𑀲𑁆𑀲 𑀑𑀦𑀸𑀫𑀦𑀯𑀲𑁂𑀦 𑀯𑁄𑀲𑁆𑀲𑀕𑁆𑀕𑁄, 𑀢𑀢𑁄 𑀧𑀭𑀁 𑀪𑀽𑀫𑀺𑀆𑀤𑀻𑀲𑀼 𑀧𑀢𑀺𑀝𑁆𑀞𑀸𑀧𑀦𑀁 𑀲𑀦𑁆𑀦𑀺𑀓𑁆𑀔𑁂𑀧𑀦𑀁, 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀦𑀺𑀫𑁆𑀫𑀤𑁆𑀤𑀦𑀯𑀲𑁂𑀦 𑀕𑀫𑀦𑀲𑁆𑀲 𑀲𑀦𑁆𑀦𑀺𑀭𑁄𑀥𑁄 𑀲𑀦𑁆𑀦𑀺𑀭𑀼𑀚𑁆𑀛𑀦𑀁.

𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀅𑀢𑀺𑀓𑁆𑀓𑀫𑀦𑁂, 𑀢𑁂𑀲𑀼 𑀯𑀸 𑀬𑀣𑀸𑀯𑀼𑀢𑁆𑀢𑁂𑀲𑀼 𑀉𑀤𑁆𑀥𑀭𑀡𑀸𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑀯𑁄𑀲𑁆𑀲𑀚𑁆𑀚𑀦𑀲𑀦𑁆𑀦𑀺𑀓𑁆𑀔𑁂𑀧𑀦𑀲𑀦𑁆𑀦𑀺𑀭𑀼𑀚𑁆𑀛𑀦𑀲𑀗𑁆𑀔𑀸𑀢𑁂𑀲𑀼 𑀙𑀲𑀼 𑀓𑁄𑀝𑁆𑀞𑀸𑀲𑁂𑀲𑀼. 𑀉𑀤𑁆𑀥𑀭𑀡𑁂𑀢𑀺 𑀉𑀤𑁆𑀥𑀭𑀡𑀓𑁆𑀔𑀡𑁂. 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀢𑀺 𑀉𑀤𑁆𑀥𑀭𑀡𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀭𑀽𑀧𑀥𑀫𑁆𑀫𑀸, 𑀢𑀁𑀲𑀫𑀼𑀝𑁆𑀞𑀸𑀧𑀓𑀸 𑀘 𑀅𑀭𑀽𑀧𑀥𑀫𑁆𑀫𑀸. 𑀅𑀢𑀺𑀳𑀭𑀡𑀁 𑀦 𑀧𑀸𑀧𑀼𑀡𑀦𑁆𑀢𑀺 𑀔𑀡𑀫𑀢𑁆𑀢𑀸𑀯𑀝𑁆𑀞𑀸𑀦𑀢𑁄. 𑀲𑀩𑁆𑀩𑀢𑁆𑀣 𑀏𑀲 𑀦𑀬𑁄. 𑀢𑀢𑁆𑀣 𑀢𑀢𑁆𑀣𑁂𑀯𑀸𑀢𑀺 𑀬𑀢𑁆𑀣 𑀬𑀢𑁆𑀣 𑀉𑀤𑁆𑀥𑀭𑀡𑀸𑀤𑀺𑀓𑁂 𑀉𑀧𑁆𑀧𑀦𑁆𑀦𑀸, 𑀢𑀢𑁆𑀣 𑀢𑀢𑁆𑀣𑁂𑀯. 𑀦 𑀳𑀺 𑀥𑀫𑁆𑀫𑀸𑀦𑀁 𑀤𑁂𑀲𑀦𑁆𑀢𑀭𑀲𑀗𑁆𑀓𑀫𑀦𑀁 𑀅𑀢𑁆𑀣𑀺 𑀮𑀳𑀼𑀧𑀭𑀺𑀯𑀢𑁆𑀢𑀦𑀢𑁄. 𑀧𑀩𑁆𑀩𑀁 𑀧𑀩𑁆𑀩𑀦𑁆𑀢𑀺 𑀧𑀭𑀺𑀘𑁆𑀙𑁂𑀤𑀁 𑀧𑀭𑀺𑀘𑁆𑀙𑁂𑀤𑀁. 𑀲𑀦𑁆𑀥𑀺 𑀲𑀦𑁆𑀥𑀻𑀢𑀺 𑀕𑀡𑁆𑀞𑀺 𑀕𑀡𑁆𑀞𑀺. 𑀑𑀥𑀺 𑀑𑀥𑀻𑀢𑀺 𑀪𑀸𑀕𑀁 𑀪𑀸𑀕𑀁. 𑀲𑀩𑁆𑀩𑀜𑁆𑀘𑁂𑀢𑀁 𑀉𑀤𑁆𑀥𑀭𑀡𑀸𑀤𑀺𑀓𑁄𑀝𑁆𑀞𑀸𑀲𑁂 𑀲𑀦𑁆𑀥𑀸𑀬 𑀲𑀪𑀸𑀕𑀲𑀦𑁆𑀢𑀢𑀺𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀭𑁄 𑀏𑀯 𑀳𑀺 𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀧𑀯𑀢𑁆𑀢𑀺𑀓𑁆𑀔𑀡𑁄 𑀕𑀫𑀦𑀬𑁄𑀕𑀕𑀫𑀦𑀲𑁆𑀲𑀸𑀤𑀸𑀦𑀁 𑀤𑁂𑀯𑀧𑀼𑀢𑁆𑀢𑀸𑀦𑀁 𑀳𑁂𑀝𑁆𑀞𑀼𑀧𑀭𑀺𑀬𑁂𑀦 𑀧𑀝𑀺𑀫𑀼𑀔𑀁 𑀥𑀸𑀯𑀦𑁆𑀢𑀸𑀦𑀁 𑀲𑀺𑀭𑀲𑀺, 𑀧𑀸𑀤𑁂 𑀘 𑀩𑀦𑁆𑀥𑀔𑀼𑀭𑀥𑀸𑀭𑀸𑀲𑀫𑀸𑀕𑀫𑀢𑁄𑀧𑀺 𑀲𑀻𑀖𑀢𑀭𑁄, 𑀬𑀣𑀸 𑀢𑀺𑀮𑀸𑀦𑀁 𑀪𑀺𑀚𑁆𑀚𑀬𑀫𑀸𑀦𑀸𑀦𑀁 𑀧𑀝𑀧𑀝𑀸𑀬𑀦𑁂𑀦 ¶ 𑀪𑁂𑀤𑁄 𑀮𑀓𑁆𑀔𑀻𑀬𑀢𑀺, 𑀏𑀯𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑁂𑀦𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀧𑀝𑀧𑀝𑀸𑀬𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁, 𑀉𑀧𑁆𑀧𑀸𑀤𑀯𑀲𑁂𑀦 𑀧𑀝𑀧𑀝-𑀲𑀤𑁆𑀤𑀁 𑀅𑀓𑀭𑁄𑀦𑁆𑀢𑀸𑀧𑀺 𑀓𑀭𑁄𑀦𑁆𑀢𑀸 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀢𑀺𑀮𑀪𑁂𑀤𑀮𑀓𑁆𑀔𑀡𑀁 𑀧𑀝𑀧𑀝𑀸𑀬𑀦𑀁 𑀯𑀺𑀬 𑀳𑀺 𑀲𑀗𑁆𑀔𑀢𑀪𑁂𑀤𑀮𑀓𑁆𑀔𑀡𑀁 𑀉𑀧𑁆𑀧𑀸𑀤𑁄 𑀉𑀧𑁆𑀧𑀦𑁆𑀦𑀸𑀦𑀫𑁂𑀓𑀦𑁆𑀢𑀢𑁄 𑀪𑀺𑀦𑁆𑀦𑀢𑁆𑀢𑀸. 𑀢𑀢𑁆𑀣𑀸𑀢𑀺 𑀅𑀪𑀺𑀓𑁆𑀓𑀫𑀦𑁂. 𑀓𑁄 𑀏𑀓𑁄 𑀅𑀪𑀺𑀓𑁆𑀓𑀫𑀢𑀺 𑀦𑀸𑀪𑀺𑀓𑁆𑀓𑀫𑀢𑀺𑀬𑁂𑀯. 𑀓𑀲𑁆𑀲 𑀯𑀸 𑀏𑀓𑀲𑁆𑀲 𑀅𑀪𑀺𑀓𑁆𑀓𑀫𑀦𑀁 𑀲𑀺𑀬𑀸, 𑀦 𑀲𑀺𑀬𑀸 𑀏𑀯. 𑀓𑀲𑁆𑀫𑀸? 𑀧𑀭𑀫𑀢𑁆𑀣𑀢𑁄 𑀳𑀺…𑀧𑁂… 𑀥𑀸𑀢𑀽𑀦𑀁 𑀲𑀬𑀦𑀁, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀅𑀦𑁆𑀥𑀩𑀸𑀮𑀧𑀼𑀣𑀼𑀚𑁆𑀚𑀦𑀲𑀫𑁆𑀫𑀽𑀴𑁆𑀳𑀲𑁆𑀲 𑀅𑀢𑁆𑀢𑀦𑁄 𑀅𑀪𑀺𑀓𑁆𑀓𑀫𑀦𑀦𑀺𑀯𑀢𑁆𑀢𑀦𑀜𑁆𑀳𑁂𑀢𑀁 𑀯𑀘𑀦𑀁. 𑀅𑀣 𑀯𑀸 ¶ ‘‘𑀓𑁄 𑀏𑀓𑁄…𑀧𑁂… 𑀅𑀪𑀺𑀓𑁆𑀓𑀫𑀦’’𑀦𑁆𑀢𑀺 𑀘𑁄𑀤𑀦𑀸𑀬 ‘‘𑀧𑀭𑀫𑀢𑁆𑀣𑀢𑁄 𑀳𑀻’’𑀢𑀺𑀆𑀤𑀺𑀦𑀸 𑀲𑁄𑀥𑀦𑀸 𑀯𑀼𑀢𑁆𑀢𑀸.

𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂𑀢𑀺 𑀬𑀣𑀸𑀯𑀼𑀢𑁆𑀢𑁂 𑀙𑀩𑁆𑀩𑀺𑀥𑁂𑀧𑀺 𑀓𑁄𑀝𑁆𑀞𑀸𑀲𑁂 𑀕𑀫𑀦𑀸𑀤𑀺𑀓𑀲𑁆𑀲 𑀅𑀧𑀘𑁆𑀘𑀸𑀫𑀝𑁆𑀞𑀢𑁆𑀢𑀸. ‘‘𑀲𑀤𑁆𑀥𑀺𑀁 𑀭𑀽𑀧𑁂𑀦 𑀉𑀧𑁆𑀧𑀚𑁆𑀚𑀢𑁂, 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀘 𑀲𑀺𑀮𑁄𑀓𑀧𑀤𑁂𑀦 𑀲𑀳 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀧𑀞𑀫𑀧𑀤𑀲𑀫𑁆𑀩𑀦𑁆𑀥𑁂 𑀭𑀽𑀧𑁂𑀦𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀲𑀳𑀼𑀧𑁆𑀧𑀚𑁆𑀚𑀦𑀓𑁂𑀦 𑀭𑀽𑀧𑁂𑀦. 𑀤𑀼𑀢𑀺𑀬𑀧𑀤𑀲𑀫𑁆𑀩𑀦𑁆𑀥𑁂 𑀧𑀦 ‘‘𑀭𑀽𑀧𑁂𑀦𑀸’’𑀢𑀺 𑀇𑀤𑀁 𑀬𑀁 𑀢𑀢𑁄 𑀦𑀺𑀭𑀼𑀚𑁆𑀛𑀫𑀸𑀦𑀘𑀺𑀢𑁆𑀢𑀢𑁄 𑀉𑀧𑀭𑀺 𑀲𑀢𑁆𑀢𑀭𑀲𑀫𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁, 𑀢𑀤𑁂𑀯 𑀢𑀲𑁆𑀲 𑀦𑀺𑀭𑀼𑀚𑁆𑀛𑀫𑀸𑀦𑀘𑀺𑀢𑁆𑀢𑀲𑁆𑀲 𑀦𑀺𑀭𑁄𑀥𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀦𑀓𑀁 𑀲𑀢𑁆𑀢𑀭𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀁 𑀭𑀽𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀜𑁆𑀜𑀣𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀲𑀫𑀸𑀦𑀸𑀬𑀼𑀓𑀸 𑀲𑀺𑀬𑀼𑀁. 𑀬𑀤𑀺 𑀘 𑀲𑀺𑀬𑀼𑀁, 𑀅𑀣 ‘‘𑀭𑀽𑀧𑀁 𑀕𑀭𑀼𑀧𑀭𑀺𑀡𑀸𑀫𑀁 𑀤𑀦𑁆𑀥𑀦𑀺𑀭𑁄𑀥’’𑀦𑁆𑀢𑀺𑀆𑀤𑀺 (𑀯𑀺𑀪. 𑀅𑀝𑁆𑀞. 𑀧𑀓𑀺𑀡𑁆𑀡𑀓𑀓𑀣𑀸) 𑀅𑀝𑁆𑀞𑀓𑀣𑀸𑀯𑀘𑀦𑁂𑀳𑀺, ‘‘𑀦𑀸𑀳𑀁 𑀪𑀺𑀓𑁆𑀔𑀯𑁂 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀮𑀳𑀼𑀧𑀭𑀺𑀯𑀢𑁆𑀢𑀁, 𑀬𑀣𑀬𑀺𑀤𑀁 𑀘𑀺𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁧.𑁩𑁮) 𑀏𑀯𑀫𑀸𑀤𑀺𑀧𑀸𑀴𑀺𑀯𑀘𑀦𑁂𑀳𑀺 𑀘 𑀯𑀺𑀭𑁄𑀥𑁄 𑀲𑀺𑀬𑀸. 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀳𑀺 𑀲𑀸𑀭𑀫𑁆𑀫𑀡𑀲𑀪𑀸𑀯𑀸 𑀬𑀣𑀸𑀩𑀮𑀁 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑀏𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀢𑀁𑀲𑀪𑀸𑀯𑀦𑀺𑀧𑁆𑀨𑀢𑁆𑀢𑀺𑀅𑀦𑀦𑁆𑀢𑀭𑀁 𑀦𑀺𑀭𑁄𑀥𑁄, 𑀭𑀽𑀧𑀥𑀫𑁆𑀫𑀸 𑀧𑀦 𑀅𑀦𑀸𑀭𑀫𑁆𑀫𑀡𑀸 𑀧𑀓𑀸𑀲𑁂𑀢𑀩𑁆𑀩𑀸, 𑀏𑀯𑀁 𑀢𑁂𑀲𑀁 𑀧𑀓𑀸𑀲𑁂𑀢𑀩𑁆𑀩𑀪𑀸𑀯𑀦𑀺𑀧𑁆𑀨𑀢𑁆𑀢𑀺 𑀲𑁄𑀴𑀲𑀳𑀺 𑀘𑀺𑀢𑁆𑀢𑁂𑀳𑀺 𑀳𑁄𑀢𑀺, 𑀢𑀲𑁆𑀫𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑀸𑀢𑀻𑀢𑁂𑀦 𑀲𑀳 𑀲𑀢𑁆𑀢𑀭𑀲𑀘𑀺𑀢𑁆𑀢𑀓𑁆𑀔𑀡𑀸𑀬𑀼𑀓𑀢𑀸 𑀭𑀽𑀧𑀥𑀫𑁆𑀫𑀸𑀦𑀫𑀺𑀘𑁆𑀙𑀺𑀢𑀸𑀢𑀺. 𑀮𑀳𑀼𑀧𑀭𑀺𑀯𑀢𑁆𑀢𑀦𑀯𑀺𑀜𑁆𑀜𑀸𑀡𑀯𑀺𑀲𑁂𑀲𑀲𑁆𑀲 𑀲𑀗𑁆𑀕𑀢𑀺𑀫𑀢𑁆𑀢𑀧𑀘𑁆𑀘𑀬𑀢𑀸𑀬 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁, 𑀯𑀺𑀲𑀬𑀲𑀗𑁆𑀕𑀢𑀺𑀫𑀢𑁆𑀢𑀢𑀸𑀬 𑀘 𑀯𑀺𑀜𑁆𑀜𑀸𑀡𑀲𑁆𑀲 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸, 𑀤𑀦𑁆𑀥𑀫𑀳𑀸𑀪𑀽𑀢𑀧𑀘𑁆𑀘𑀬𑀢𑀸𑀬 𑀭𑀽𑀧𑀲𑁆𑀲 𑀕𑀭𑀼𑀧𑀭𑀺𑀯𑀢𑁆𑀢𑀺𑀢𑀸. 𑀬𑀣𑀸𑀪𑀽𑀢𑀁 𑀦𑀸𑀦𑀸𑀥𑀸𑀢𑀼𑀜𑀸𑀡𑀁 𑀔𑁄 𑀧𑀦 𑀢𑀣𑀸𑀕𑀢𑀲𑁆𑀲𑁂𑀯, 𑀢𑁂𑀦 𑀘 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁄 𑀭𑀽𑀧𑀥𑀫𑁆𑀫𑁄𑀯 𑀯𑀼𑀢𑁆𑀢𑁄, 𑀧𑀘𑁆𑀙𑀸𑀚𑀸𑀢𑀧𑀘𑁆𑀘𑀬𑁄 𑀘 𑀢𑀣𑁂𑀯𑀸𑀢𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀲𑀫𑀸𑀦𑀓𑁆𑀔𑀡𑀢𑀸 𑀦 𑀬𑀼𑀚𑁆𑀚𑀢𑁂𑀯, 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀘𑀭𑀺𑀬𑁂𑀦 (𑀤𑀻. 𑀦𑀺. 𑀝𑀻. 𑁧.𑁨𑁧𑁪) 𑀯𑀼𑀢𑁆𑀢𑀁 ¶ , 𑀢𑀤𑁂𑀢𑀁 𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀬𑀸 𑀯𑀺𑀜𑁆𑀜𑀢𑁆𑀢𑀺𑀬𑀸 𑀏𑀓𑀦𑀺𑀭𑁄𑀥𑀪𑀸𑀯𑀲𑁆𑀲 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀁. 𑀢𑀢𑁄 𑀲𑀯𑀺𑀜𑁆𑀜𑀢𑁆𑀢𑀺𑀓𑁂𑀦 𑀧𑀼𑀭𑁂𑀢𑀭𑀁 𑀲𑀢𑁆𑀢𑀭𑀲𑀫𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑁂𑀦 𑀭𑀽𑀧𑁂𑀦 𑀲𑀤𑁆𑀥𑀺𑀁 𑀅𑀜𑁆𑀜𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀜𑁆𑀜𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺, 𑀅𑀜𑁆𑀜𑀁 𑀉𑀧𑁆𑀧𑀚𑁆𑀚𑀢𑁂 𑀘𑀺𑀢𑁆𑀢𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀜𑁆𑀜𑁄 𑀳𑀺 𑀲𑀤𑁆𑀤𑀓𑁆𑀓𑀫𑁄, 𑀅𑀜𑁆𑀜𑁄 𑀅𑀢𑁆𑀣𑀓𑁆𑀓𑀫𑁄𑀢𑀺. 𑀬𑀜𑁆𑀳𑀺 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀁, 𑀢𑀁 𑀦𑀺𑀭𑀼𑀚𑁆𑀛𑀦𑁆𑀢𑀁 𑀅𑀜𑁆𑀜𑀲𑁆𑀲 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑀪𑀸𑀯𑁂𑀦𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀮𑀤𑁆𑀥𑀧𑀘𑁆𑀘𑀬𑀫𑁂𑀯 𑀅𑀜𑁆𑀜𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑁂 𑀘𑀺𑀢𑁆𑀢𑀁, 𑀅𑀯𑀢𑁆𑀣𑀸𑀯𑀺𑀲𑁂𑀲𑀢𑁄 𑀘𑁂𑀢𑁆𑀣 𑀅𑀜𑁆𑀜𑀣𑀸. 𑀬𑀤𑀺 𑀏𑀯𑀁 𑀢𑁂𑀲𑀫𑀼𑀪𑀺𑀦𑁆𑀦𑀁 𑀅𑀦𑁆𑀢𑀭𑁄 𑀮𑀩𑁆𑀪𑁂𑀬𑁆𑀬𑀸𑀢𑀺 𑀘𑁄𑀤𑀦𑀁 ‘‘𑀦𑁄’’𑀢𑀺 𑀅𑀧𑀦𑁂𑀢𑀼𑀫𑀸𑀳 ‘‘𑀅𑀯𑀻𑀘𑀺 𑀫𑀦𑀼𑀲𑀫𑁆𑀩𑀦𑁆𑀥𑁄’’𑀢𑀺, 𑀬𑀣𑀸 𑀯𑀻𑀘𑀺 𑀅𑀦𑁆𑀢𑀭𑁄 𑀦 𑀮𑀩𑁆𑀪𑀢𑀺, 𑀢𑀤𑁂𑀯𑁂𑀤𑀦𑁆𑀢𑀺 𑀅𑀯𑀺𑀲𑁂𑀲𑀁 𑀯𑀺𑀤𑀽 𑀫𑀜𑁆𑀜𑀦𑁆𑀢𑀺, 𑀏𑀯𑀁 𑀅𑀦𑀼 𑀅𑀦𑀼 𑀲𑀫𑁆𑀩𑀦𑁆𑀥𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑁄, 𑀭𑀽𑀧𑀲𑀦𑁆𑀢𑀸𑀦𑁄 𑀘 𑀦𑀤𑀻𑀲𑁄𑀢𑁄𑀯 𑀦𑀤𑀺𑀬𑀁 ¶ 𑀉𑀤𑀓𑀧𑁆𑀧𑀯𑀸𑀳𑁄 𑀯𑀺𑀬 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀅𑀯𑀻𑀘𑀻𑀢𑀺 𑀳𑀺 𑀦𑀺𑀭𑀦𑁆𑀢𑀭𑀢𑀸𑀯𑀲𑁂𑀦 𑀪𑀸𑀯𑀦𑀧𑀼𑀁𑀲𑀓𑀯𑀘𑀦𑀁.

𑀅𑀪𑀺𑀫𑀼𑀔𑀁 𑀮𑁄𑀓𑀺𑀢𑀁 𑀆𑀮𑁄𑀓𑀺𑀢𑀦𑁆𑀢𑀺 𑀆𑀳 ‘‘𑀧𑀼𑀭𑀢𑁄𑀧𑁂𑀓𑁆𑀔𑀦’’𑀦𑁆𑀢𑀺. 𑀬𑀁𑀤𑀺𑀲𑀸𑀪𑀺𑀫𑀼𑀔𑁄 𑀕𑀘𑁆𑀙𑀢𑀺, 𑀢𑀺𑀝𑁆𑀞𑀢𑀺, 𑀦𑀺𑀲𑀻𑀤𑀢𑀺, 𑀲𑀬𑀢𑀺 𑀯𑀸, 𑀢𑀤𑀪𑀺𑀫𑀼𑀔𑀁 𑀧𑁂𑀓𑁆𑀔𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀲𑁆𑀫𑀸 𑀘 𑀢𑀸𑀤𑀺𑀲𑀫𑀸𑀮𑁄𑀓𑀺𑀢𑀁 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀢𑀤𑀦𑀼𑀕𑀢𑀤𑀺𑀲𑀸𑀮𑁄𑀓𑀦𑀁 𑀯𑀺𑀮𑁄𑀓𑀺𑀢𑀦𑁆𑀢𑀺 𑀆𑀳 ‘‘𑀅𑀦𑀼𑀤𑀺𑀲𑀸𑀧𑁂𑀓𑁆𑀔𑀦’’𑀦𑁆𑀢𑀺, 𑀅𑀪𑀺𑀫𑀼𑀔𑀤𑀺𑀲𑀸𑀦𑀼𑀭𑀽𑀧𑀕𑀢𑁂𑀲𑀼 𑀯𑀸𑀫𑀤𑀓𑁆𑀔𑀺𑀡𑀧𑀲𑁆𑀲𑁂𑀲𑀼 𑀯𑀺𑀯𑀺𑀥𑀸 𑀧𑁂𑀓𑁆𑀔𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀳𑁂𑀝𑁆𑀞𑀸𑀉𑀧𑀭𑀺𑀧𑀘𑁆𑀙𑀸𑀧𑁂𑀓𑁆𑀔𑀦𑀜𑁆𑀳𑀺 ‘‘𑀑𑀮𑁄𑀓𑀺𑀢𑀉𑀮𑁆𑀮𑁄𑀓𑀺𑀢𑀸𑀧𑀮𑁄𑀓𑀺𑀢𑀸𑀦𑀻’’𑀢𑀺 𑀕𑀳𑀺𑀢𑀸𑀦𑀺. 𑀲𑀸𑀭𑀼𑀧𑁆𑀧𑀯𑀲𑁂𑀦𑀸𑀢𑀺 𑀲𑀫𑀡𑀧𑀢𑀺𑀭𑀽𑀧𑀯𑀲𑁂𑀦, 𑀇𑀫𑀺𑀦𑀸𑀯 𑀅𑀲𑀸𑀭𑀼𑀧𑁆𑀧𑀯𑀲𑁂𑀦 𑀇𑀢𑀭𑁂𑀲𑀫𑀕𑁆𑀕𑀳𑀡𑀦𑁆𑀢𑀺 𑀲𑀺𑀚𑁆𑀛𑀢𑀺. 𑀲𑀫𑁆𑀫𑀚𑁆𑀚𑀦𑀧𑀭𑀺𑀪𑀡𑁆𑀟𑀸𑀤𑀺𑀓𑀭𑀡𑁂 𑀑𑀮𑁄𑀓𑀺𑀢𑀲𑁆𑀲, 𑀉𑀮𑁆𑀮𑁄𑀓𑀳𑀭𑀡𑀸𑀤𑀻𑀲𑀼 𑀉𑀮𑁆𑀮𑁄𑀓𑀺𑀢𑀲𑁆𑀲, 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀧𑀭𑀺𑀲𑁆𑀲𑀬𑀧𑀭𑀺𑀯𑀚𑁆𑀚𑀦𑀸𑀤𑀻𑀲𑀼 𑀅𑀧𑀮𑁄𑀓𑀺𑀢𑀲𑁆𑀲 𑀘 𑀲𑀺𑀬𑀸 𑀲𑀫𑁆𑀪𑀯𑁄𑀢𑀺 𑀆𑀳 ‘‘𑀇𑀫𑀺𑀦𑀸 𑀯𑀸’’𑀢𑀺𑀆𑀤𑀺, 𑀏𑀢𑁂𑀦 𑀉𑀧𑀮𑀓𑁆𑀔𑀡𑀫𑀢𑁆𑀢𑀜𑁆𑀘𑁂𑀢𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀓𑀸𑀬𑀲𑀓𑁆𑀔𑀺𑀦𑁆𑀢𑀺 𑀓𑀸𑀬𑁂𑀦 𑀲𑀘𑁆𑀙𑀺𑀓𑀢𑀁 𑀧𑀘𑁆𑀘𑀓𑁆𑀔𑀓𑀸𑀭𑀺𑀦𑀁, 𑀲𑀸𑀥𑀓𑀦𑁆𑀢𑀺 𑀅𑀢𑁆𑀣𑁄. 𑀲𑁄 𑀳𑀺 𑀆𑀬𑀲𑁆𑀫𑀸 𑀯𑀺𑀧𑀲𑁆𑀲𑀦𑀸𑀓𑀸𑀮𑁂 ‘‘𑀬𑀫𑁂𑀯𑀸𑀳𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀁 𑀦𑀺𑀲𑁆𑀲𑀸𑀬 𑀲𑀸𑀲𑀦𑁂 𑀅𑀦𑀪𑀺𑀭𑀢𑀺𑀆𑀤𑀺𑀯𑀺𑀧𑁆𑀧𑀓𑀸𑀭𑀁 𑀧𑀢𑁆𑀢𑁄, 𑀢𑀫𑁂𑀯 𑀲𑀼𑀝𑁆𑀞𑀼 𑀦𑀺𑀕𑁆𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀉𑀲𑁆𑀲𑀸𑀳𑀚𑀸𑀢𑁄 𑀩𑀮𑀯𑀳𑀺𑀭𑁄𑀢𑁆𑀢𑀧𑁆𑀧𑁄, 𑀢𑀢𑁆𑀣 𑀘 𑀓𑀢𑀸𑀥𑀺𑀓𑀸𑀭𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑁄, 𑀢𑁂𑀦𑁂𑀯 𑀦𑀁 𑀲𑀢𑁆𑀣𑀸 ‘‘𑀏𑀢𑀤𑀕𑁆𑀕𑀁 𑀪𑀺𑀓𑁆𑀔𑀯𑁂 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀸𑀦𑀁, 𑀬𑀤𑀺𑀤𑀁 𑀦𑀦𑁆𑀤𑁄’’𑀢𑀺 (𑀅. 𑀦𑀺. 𑁧.𑁨𑁩𑁦) 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺. 𑀦𑀦𑁆𑀤𑀲𑁆𑀲𑀸𑀢𑀺 𑀓𑀢𑁆𑀢𑀼𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀇𑀢𑀻𑀢𑀺 𑀇𑀫𑀺𑀦𑀸 𑀆𑀮𑁄𑀓𑀦𑁂𑀦.

𑀲𑀸𑀢𑁆𑀣𑀓𑀢𑀸 ¶ 𑀘 𑀲𑀧𑁆𑀧𑀸𑀬𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀲𑁆𑀲𑀸𑀢𑀺 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀯𑀺𑀚𑀳𑀦𑀲𑁆𑀲𑁂𑀯 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑁂. 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀪𑀸𑀯𑀢𑁄 𑀏𑀢𑁆𑀣𑀸𑀢𑀺 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑁂. 𑀅𑀢𑁆𑀢𑀦𑁄 𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦𑁂𑀯𑀸𑀢𑀺 𑀔𑀦𑁆𑀥𑀸𑀤𑀺𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦𑁂𑀯 𑀆𑀮𑁄𑀓𑀦𑀯𑀺𑀮𑁄𑀓𑀦𑀁 𑀓𑀸𑀢𑀩𑁆𑀩𑀁, 𑀦 𑀅𑀜𑁆𑀜𑁄 𑀉𑀧𑀸𑀬𑁄 𑀕𑀯𑁂𑀲𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯𑀸𑀢𑀺 𑀯𑀓𑁆𑀔𑀫𑀸𑀦𑀓𑀫𑁆𑀫𑀝𑁆𑀞𑀸𑀦𑀫𑀼𑀔𑁂𑀦𑁂𑀯. 𑀬𑀲𑁆𑀫𑀸 𑀧𑀦 𑀆𑀮𑁄𑀓𑀺𑀢𑀸𑀤𑀺 𑀦𑀸𑀫 𑀥𑀫𑁆𑀫𑀫𑀢𑁆𑀢𑀲𑁆𑀲𑁂𑀯 𑀧𑀯𑀢𑁆𑀢𑀺𑀯𑀺𑀲𑁂𑀲𑁄, 𑀢𑀲𑁆𑀫𑀸 𑀢𑀲𑁆𑀲 𑀬𑀸𑀣𑀸𑀯𑀢𑁄 𑀚𑀸𑀦𑀦𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀩𑁆𑀪𑀦𑁆𑀢𑀭𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀮𑁄𑀓𑁂𑀢𑀸𑀢𑀺 𑀆𑀮𑁄𑀓𑁂𑀦𑁆𑀢𑁄. 𑀢𑀣𑀸 𑀯𑀺𑀮𑁄𑀓𑁂𑀢𑀸. 𑀯𑀺𑀜𑁆𑀜𑀢𑁆𑀢𑀺𑀦𑁆𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀁. 𑀇𑀢𑀻𑀢𑀺 𑀢𑀲𑁆𑀫𑀸 𑀉𑀧𑁆𑀧𑀚𑁆𑀚𑀦𑀢𑁄. 𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑀯𑀲𑁂𑀦𑀸𑀢𑀺 𑀓𑀺𑀭𑀺𑀬𑀫𑀬𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀬 𑀯𑀸𑀬𑁄𑀥𑀸𑀢𑀼𑀬𑀸 𑀯𑀺𑀘𑀮𑀦𑀸𑀓𑀸𑀭𑀲𑀗𑁆𑀔𑀸𑀢𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀯𑀲𑁂𑀦. 𑀅𑀓𑁆𑀔𑀺𑀤𑀮𑀦𑁆𑀢𑀺 𑀅𑀓𑁆𑀔𑀺𑀧𑀝𑀮𑀁. 𑀅𑀥𑁄 𑀲𑀻𑀤𑀢𑀻𑀢𑀺 𑀑𑀲𑀻𑀤𑀦𑁆𑀢𑀁 𑀯𑀺𑀬 𑀳𑁂𑀝𑁆𑀞𑀸 𑀕𑀘𑁆𑀙𑀢𑀺. 𑀉𑀤𑁆𑀥𑀁 𑀮𑀗𑁆𑀖𑁂𑀢𑀻𑀢𑀺 𑀮𑀗𑁆𑀖𑁂𑀦𑁆𑀢𑀁 𑀯𑀺𑀬 𑀉𑀧𑀭𑀺 ¶ 𑀕𑀘𑁆𑀙𑀢𑀺. 𑀬𑀦𑁆𑀢𑀓𑁂𑀦𑀸𑀢𑀺 𑀅𑀓𑁆𑀔𑀺𑀤𑀮𑁂𑀲𑀼 𑀬𑁄𑀚𑀺𑀢𑀭𑀚𑁆𑀚𑀼𑀬𑁄 𑀕𑀳𑁂𑀢𑁆𑀯𑀸 𑀧𑀭𑀺𑀩𑁆𑀪𑀫𑀦𑀓𑀘𑀓𑁆𑀓𑁂𑀦. 𑀢𑀢𑁄𑀢𑀺 𑀢𑀣𑀸 𑀅𑀓𑁆𑀔𑀺𑀤𑀮𑀸𑀦𑀫𑁄𑀲𑀻𑀤𑀦𑀼𑀮𑁆𑀮𑀗𑁆𑀖𑀦𑀢𑁄. 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀲𑁆𑀲 𑀫𑀽𑀮𑀓𑀸𑀭𑀡𑀧𑀭𑀺𑀚𑀸𑀦𑀦𑀁 𑀫𑀽𑀮𑀧𑀭𑀺𑀜𑁆𑀜𑀸. 𑀆𑀕𑀦𑁆𑀢𑀼𑀓𑀲𑁆𑀲 𑀅𑀩𑁆𑀪𑀸𑀕𑀢𑀲𑁆𑀲, 𑀢𑀸𑀯𑀓𑀸𑀮𑀺𑀓𑀲𑁆𑀲 𑀘 𑀢𑀗𑁆𑀔𑀡𑀫𑀢𑁆𑀢𑀧𑀯𑀢𑁆𑀢𑀓𑀲𑁆𑀲 𑀪𑀸𑀯𑁄 𑀆𑀕𑀦𑁆𑀢𑀼𑀓𑀢𑀸𑀯𑀓𑀸𑀮𑀺𑀓𑀪𑀸𑀯𑁄, 𑀢𑁂𑀲𑀁 𑀯𑀲𑁂𑀦.

𑀢𑀢𑁆𑀣𑀸𑀢𑀺 𑀢𑁂𑀲𑀼 𑀕𑀸𑀣𑀸𑀬 𑀤𑀲𑁆𑀲𑀺𑀢𑁂𑀲𑀼 𑀲𑀢𑁆𑀢𑀲𑀼 𑀘𑀺𑀢𑁆𑀢𑁂𑀲𑀼. 𑀅𑀗𑁆𑀕𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀦𑁆𑀢𑀺 𑀧𑀥𑀸𑀦𑀪𑀽𑀢𑀅𑀗𑁆𑀕𑀓𑀺𑀘𑁆𑀘𑀁 𑀦𑀺𑀧𑁆𑀨𑀸𑀤𑁂𑀦𑁆𑀢𑀁, 𑀲𑀭𑀻𑀭𑀁 𑀳𑀼𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀯𑀗𑁆𑀕𑀜𑁆𑀳𑀺 𑀧𑀝𑀺𑀲𑀦𑁆𑀥𑀺𑀲𑀤𑀺𑀲𑀢𑁆𑀢𑀸 𑀧𑀥𑀸𑀦𑀫𑀗𑁆𑀕𑀁, 𑀧𑀥𑀸𑀦𑀜𑁆𑀘 ‘‘𑀲𑀭𑀻𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀅𑀯𑀺𑀘𑁆𑀙𑁂𑀤𑀧𑁆𑀧𑀯𑀢𑁆𑀢𑀺𑀳𑁂𑀢𑀼𑀪𑀸𑀯𑁂𑀦 𑀯𑀸 𑀓𑀸𑀭𑀡𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀆𑀯𑀝𑁆𑀝𑁂𑀢𑁆𑀯𑀸𑀢𑀺 𑀪𑀯𑀗𑁆𑀕𑀲𑀸𑀫𑀜𑁆𑀜𑀯𑀲𑁂𑀦 𑀯𑀼𑀢𑁆𑀢𑀁, 𑀧𑀯𑀢𑁆𑀢𑀸𑀓𑀸𑀭𑀯𑀺𑀲𑁂𑀲𑀯𑀲𑁂𑀦 𑀧𑀦 𑀅𑀢𑀻𑀢𑀸𑀤𑀺𑀦𑀸 𑀢𑀺𑀩𑁆𑀩𑀺𑀥𑀁, 𑀢𑀢𑁆𑀣 𑀘 𑀪𑀯𑀗𑁆𑀕𑀼𑀧𑀘𑁆𑀙𑁂𑀤𑀲𑁆𑀲𑁂𑀯 𑀆𑀯𑀝𑁆𑀝𑀦𑀁. 𑀢𑀦𑁆𑀦𑀺𑀭𑁄𑀥𑀸𑀢𑀺 𑀢𑀲𑁆𑀲 𑀦𑀺𑀭𑀼𑀚𑁆𑀛𑀦𑀢𑁄, 𑀅𑀦𑀦𑁆𑀢𑀭𑀧𑀘𑁆𑀘𑀬𑀯𑀲𑁂𑀦 𑀳𑁂𑀢𑀼𑀯𑀘𑀦𑀁. ‘‘𑀧𑀞𑀫𑀚𑀯𑀦𑁂𑀧𑀺…𑀧𑁂… 𑀲𑀢𑁆𑀢𑀫𑀚𑀯𑀦𑁂𑀧𑀻’’𑀢𑀺 𑀇𑀤𑀁 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑀻𑀣𑀺𑀬𑀁 ‘‘𑀅𑀬𑀁 𑀇𑀢𑁆𑀣𑀻, 𑀅𑀬𑀁 𑀧𑀼𑀭𑀺𑀲𑁄’’𑀢𑀺 𑀭𑀚𑁆𑀚𑀦𑀤𑀼𑀲𑁆𑀲𑀦𑀫𑀼𑀬𑁆𑀳𑀦𑀸𑀦𑀫𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀆𑀯𑀚𑁆𑀚𑀦𑀯𑁄𑀝𑁆𑀞𑀩𑁆𑀩𑀦𑀸𑀦𑀁 𑀧𑀼𑀭𑁂𑀢𑀭𑀁 𑀧𑀯𑀢𑁆𑀢𑀸𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀲𑁂𑀦 𑀅𑀬𑁄𑀦𑀺𑀲𑁄 𑀆𑀯𑀚𑁆𑀚𑀦𑀯𑁄𑀝𑁆𑀞𑀩𑁆𑀩𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀦𑀢𑁄 𑀇𑀝𑁆𑀞𑁂 𑀇𑀢𑁆𑀣𑀺𑀭𑀽𑀧𑀸𑀤𑀺𑀫𑁆𑀳𑀺 𑀮𑁄𑀪𑀲𑀳𑀕𑀢𑀫𑀢𑁆𑀢𑀁 𑀚𑀯𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀦𑀺𑀝𑁆𑀞𑁂 𑀘 𑀤𑁄𑀲𑀲𑀳𑀕𑀢𑀫𑀢𑁆𑀢𑀁, 𑀦 𑀧𑀦𑁂𑀓𑀦𑁆𑀢𑀭𑀚𑁆𑀚𑀦𑀤𑀼𑀲𑁆𑀲𑀦𑀸𑀤𑀺, 𑀫𑀦𑁄𑀤𑁆𑀯𑀸𑀭𑁂 ¶ 𑀏𑀯 𑀏𑀓𑀦𑁆𑀢𑀭𑀚𑁆𑀚𑀦𑀤𑀼𑀲𑁆𑀲𑀦𑀸𑀤𑀺 𑀳𑁄𑀢𑀺, 𑀢𑀲𑁆𑀲 𑀧𑀦 𑀫𑀦𑁄𑀤𑁆𑀯𑀸𑀭𑀺𑀓𑀲𑁆𑀲 𑀭𑀚𑁆𑀚𑀦𑀤𑀼𑀲𑁆𑀲𑀦𑀸𑀤𑀺𑀦𑁄 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑀁 𑀫𑀽𑀮𑀁, 𑀬𑀣𑀸𑀯𑀼𑀢𑁆𑀢𑀁 𑀯𑀸 𑀲𑀩𑁆𑀩𑀫𑁆𑀧𑀺 𑀪𑀯𑀗𑁆𑀕𑀸𑀤𑀺, 𑀏𑀯𑀁 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀲𑁆𑀲 𑀫𑀽𑀮𑀓𑀸𑀭𑀡𑀯𑀲𑁂𑀦 𑀫𑀽𑀮𑀧𑀭𑀺𑀜𑁆𑀜𑀸 𑀯𑀼𑀢𑁆𑀢𑀸, 𑀆𑀕𑀦𑁆𑀢𑀼𑀓𑀢𑀸𑀯𑀓𑀸𑀮𑀺𑀓𑀢𑀸 𑀧𑀦 𑀧𑀜𑁆𑀘𑀤𑁆𑀯𑀸𑀭𑀺𑀓 𑀚𑀯𑀦𑀲𑁆𑀲𑁂𑀯 𑀅𑀧𑀼𑀩𑁆𑀩𑀪𑀸𑀯𑀯𑀲𑁂𑀦, 𑀇𑀢𑁆𑀢𑀭𑀢𑀸𑀯𑀲𑁂𑀦 𑀘. 𑀬𑀼𑀤𑁆𑀥𑀫𑀡𑁆𑀟𑀮𑁂𑀢𑀺 𑀲𑀗𑁆𑀕𑀸𑀫𑀧𑁆𑀧𑀤𑁂𑀲𑁂. 𑀳𑁂𑀝𑁆𑀞𑀼𑀧𑀭𑀺𑀬𑀯𑀲𑁂𑀦𑀸𑀢𑀺 𑀳𑁂𑀝𑁆𑀞𑀸 𑀘 𑀉𑀧𑀭𑀺 𑀘 𑀧𑀭𑀺𑀯𑀢𑁆𑀢𑀫𑀸𑀦𑀯𑀲𑁂𑀦, 𑀅𑀧𑀭𑀸𑀧𑀭𑀁 𑀪𑀯𑀗𑁆𑀕𑀼𑀧𑁆𑀧𑀢𑁆𑀢𑀺𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀪𑀯𑀗𑁆𑀕𑀼𑀧𑁆𑀧𑀸𑀤𑀯𑀲𑁂𑀦 𑀳𑀺 𑀢𑁂𑀲𑀁 𑀪𑀺𑀚𑁆𑀚𑀺𑀢𑁆𑀯𑀸 𑀧𑀢𑀦𑀁, 𑀇𑀫𑀺𑀦𑀸 𑀧𑀦 𑀳𑁂𑀝𑁆𑀞𑀺𑀫𑀲𑁆𑀲, 𑀉𑀧𑀭𑀺𑀫𑀲𑁆𑀲 𑀘 𑀪𑀯𑀗𑁆𑀕𑀲𑁆𑀲 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑀢𑁄 𑀯𑀺𑀲𑀤𑀺𑀲𑀲𑁆𑀲 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀲𑁆𑀲 𑀉𑀧𑁆𑀧𑀸𑀤𑀁 𑀤𑀲𑁆𑀲𑁂𑀢𑀺 𑀢𑀲𑁆𑀲 𑀯𑀲𑁂𑀦𑁂𑀯 𑀭𑀚𑁆𑀚𑀦𑀸𑀤𑀺𑀧𑀯𑀢𑁆𑀢𑀦𑀢𑁄. 𑀢𑁂𑀦𑁂𑀯𑀸𑀳 ‘‘𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀁 𑀳𑁄𑀢𑀻’’𑀢𑀺.

𑀆𑀧𑀸𑀣𑀦𑁆𑀢𑀺 𑀕𑁄𑀘𑀭𑀪𑀸𑀯𑀁. 𑀲𑀓𑀓𑀺𑀘𑁆𑀘𑀦𑀺𑀧𑁆𑀨𑀸𑀤𑀦𑀯𑀲𑁂𑀦𑀸𑀢𑀺 𑀆𑀯𑀚𑁆𑀚𑀦𑀸𑀤𑀺𑀓𑀺𑀘𑁆𑀘𑀦𑀺𑀧𑁆𑀨𑀸𑀤𑀦𑀯𑀲𑁂𑀦. 𑀢𑀦𑁆𑀢𑀺 𑀚𑀯𑀦𑀁. 𑀘𑀓𑁆𑀔𑀼𑀤𑁆𑀯𑀸𑀭𑁂 𑀭𑀽𑀧𑀲𑁆𑀲 𑀆𑀧𑀸𑀣𑀕𑀫𑀦𑁂𑀦 𑀆𑀯𑀚𑁆𑀚𑀦𑀸𑀤𑀻𑀦𑀁 𑀧𑀯𑀢𑁆𑀢𑀦𑀢𑁄 𑀧𑀯𑀢𑁆𑀢𑀺𑀓𑀸𑀭𑀡𑀯𑀲𑁂𑀦𑁂𑀯 ‘‘𑀕𑁂𑀳𑀪𑀽𑀢𑁂’’𑀢𑀺 𑀯𑀼𑀢𑁆𑀢𑀁, 𑀦 𑀦𑀺𑀲𑁆𑀲𑀬𑀯𑀲𑁂𑀦. 𑀆𑀕𑀦𑁆𑀢𑀼𑀓𑀧𑀼𑀭𑀺𑀲𑁄 𑀯𑀺𑀬𑀸𑀢𑀺 𑀅𑀩𑁆𑀪𑀸𑀕𑀢𑀧𑀼𑀭𑀺𑀲𑁄 𑀯𑀺𑀬. 𑀤𑀼𑀯𑀺𑀥𑀸 𑀳𑀺 𑀆𑀕𑀦𑁆𑀢𑀼𑀓𑀸 𑀅𑀢𑀺𑀣𑀺𑀅𑀩𑁆𑀪𑀸𑀕𑀢𑀯𑀲𑁂𑀦. 𑀢𑀢𑁆𑀣 𑀓𑀢𑀧𑀭𑀺𑀘𑀬𑁄 ‘‘𑀅𑀢𑀺𑀣𑀻’’𑀢𑀺 𑀯𑀼𑀘𑁆𑀘𑀢𑀺, 𑀅𑀓𑀢𑀧𑀭𑀺𑀘𑀬𑁄 ‘‘𑀅𑀩𑁆𑀪𑀸𑀕𑀢𑁄’’𑀢𑀺, 𑀅𑀬𑀫𑁂𑀯𑀺𑀥𑀸𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ‘‘𑀬𑀣𑀸 𑀧𑀭𑀕𑁂𑀳𑁂’’𑀢𑀺𑀆𑀤𑀺 ¶ . 𑀢𑀲𑁆𑀲𑀸𑀢𑀺 𑀚𑀯𑀦𑀲𑁆𑀲 𑀭𑀚𑁆𑀚𑀦𑀤𑀼𑀲𑁆𑀲𑀦𑀫𑀼𑀬𑁆𑀳𑀦𑀁 𑀅𑀬𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀲𑀺𑀦𑁂𑀲𑀽𑀢𑀺 𑀦𑀺𑀲𑀺𑀦𑁆𑀦𑁂𑀲𑀼. 𑀆𑀡𑀸𑀓𑀭𑀡𑀦𑁆𑀢𑀺 𑀅𑀢𑁆𑀢𑀦𑁄 𑀯𑀲𑀓𑀭𑀡𑀁.

𑀲𑀤𑁆𑀥𑀺𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺 𑀨𑀲𑁆𑀲𑀸𑀤𑀻𑀳𑀺. 𑀢𑀢𑁆𑀣 𑀢𑀢𑁆𑀣𑁂𑀯 𑀲𑀓𑀓𑀺𑀘𑁆𑀘𑀦𑀺𑀧𑁆𑀨𑀸𑀤𑀦𑀝𑁆𑀞𑀸𑀦𑁂 𑀪𑀺𑀚𑁆𑀚𑀦𑁆𑀢𑀺. 𑀇𑀢𑀻𑀢𑀺 𑀢𑀲𑁆𑀫𑀸 𑀆𑀯𑀚𑁆𑀚𑀦𑀸𑀤𑀺𑀯𑁄𑀝𑁆𑀞𑀩𑁆𑀩𑀦𑀧𑀭𑀺𑀬𑁄𑀲𑀸𑀦𑀸𑀦𑀁 𑀪𑀺𑀚𑁆𑀚𑀦𑀢𑁄. 𑀇𑀢𑁆𑀢𑀭𑀸𑀦𑀻𑀢𑀺 𑀅𑀘𑀺𑀭𑀝𑁆𑀞𑀺𑀢𑀺𑀓𑀸𑀦𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀯𑀘𑀦𑁂 𑀅𑀬𑀁 𑀉𑀧𑀫𑀸𑀢𑀺 𑀅𑀢𑁆𑀣𑁄. 𑀉𑀤𑀬𑀩𑁆𑀩𑀬𑀧𑀭𑀺𑀘𑁆𑀙𑀺𑀦𑁆𑀦𑁄 𑀢𑀸𑀯 𑀢𑀢𑁆𑀢𑀓𑁄 𑀓𑀸𑀮𑁄 𑀏𑀢𑁂𑀲𑀦𑁆𑀢𑀺 𑀢𑀸𑀯𑀓𑀸𑀮𑀺𑀓𑀸𑀦𑀺, 𑀢𑀲𑁆𑀲 𑀪𑀸𑀯𑁄, 𑀢𑀁𑀯𑀲𑁂𑀦.

𑀏𑀢𑀦𑁆𑀢𑀺 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀲𑀫𑀼𑀤𑀸𑀬𑁂. 𑀤𑀲𑁆𑀲𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀲𑁆𑀲 𑀯𑀲𑁂𑀦𑁂𑀯 𑀆𑀮𑁄𑀓𑀦𑀯𑀺𑀮𑁄𑀓𑀦𑀧𑀜𑁆𑀜𑀸𑀬𑀦𑀢𑁄 𑀆𑀯𑀚𑁆𑀚𑀦𑀸𑀤𑀻𑀦𑀫𑀕𑁆𑀕𑀳𑀡𑀁.

𑀲𑀫𑀯𑀸𑀬𑁂𑀢𑀺 𑀲𑀸𑀫𑀕𑁆𑀕𑀺𑀬𑀁. 𑀢𑀢𑁆𑀣𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀯𑀲𑁂𑀦 𑀆𑀮𑁄𑀓𑀦𑀯𑀺𑀮𑁄𑀓𑀦 𑀧𑀜𑁆𑀜𑀸𑀬𑀫𑀸𑀦𑁂. 𑀦𑀺𑀫𑀺𑀢𑁆𑀢𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀁, 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀓𑁄 𑀓𑁄 𑀏𑀓𑁄 ¶ 𑀆𑀮𑁄𑀓𑁂𑀢𑀺 𑀦 𑀢𑁆𑀯𑁂𑀯 𑀆𑀮𑁄𑀓𑁂𑀢𑀺. 𑀓𑁄 𑀘 𑀏𑀓𑁄 𑀯𑀺𑀮𑁄𑀓𑁂𑀢𑀺 𑀦𑀢𑁆𑀯𑁂𑀯 𑀯𑀺𑀮𑁄𑀓𑁂𑀢𑀻𑀢𑀺 𑀅𑀢𑁆𑀣𑁄.

‘‘𑀢𑀣𑀸’’𑀢𑀺𑀆𑀤𑀺 𑀆𑀬𑀢𑀦𑀯𑀲𑁂𑀦, 𑀥𑀸𑀢𑀼𑀯𑀲𑁂𑀦 𑀘 𑀤𑀲𑁆𑀲𑀦𑀁. 𑀘𑀓𑁆𑀔𑀼𑀭𑀽𑀧𑀸𑀦𑀺 𑀬𑀣𑀸𑀭𑀳𑀁 𑀤𑀲𑁆𑀲𑀦𑀲𑁆𑀲 𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑀧𑀘𑁆𑀘𑀬𑁄, 𑀢𑀣𑀸 𑀆𑀯𑀚𑁆𑀚𑀦𑀸 𑀅𑀦𑀦𑁆𑀢𑀭𑀸𑀤𑀺𑀧𑀘𑁆𑀘𑀬𑁄, 𑀆𑀮𑁄𑀓𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄𑀢𑀺 𑀤𑀲𑁆𑀲𑀦𑀲𑁆𑀲 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀧𑀭𑀺𑀬𑀸𑀬𑀢𑁄 𑀧𑀘𑁆𑀘𑀬𑀢𑀸 𑀯𑀼𑀢𑁆𑀢𑀸. 𑀲𑀳𑀚𑀸𑀢𑀧𑀘𑁆𑀘𑀬𑁄𑀧𑀺 𑀤𑀲𑁆𑀲𑀦𑀲𑁆𑀲𑁂𑀯, 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁 𑀅𑀜𑁆𑀜𑀫𑀜𑁆𑀜𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀸𑀤𑀺𑀧𑀘𑁆𑀘𑀬𑀸𑀦𑀫𑁆𑀧𑀺 𑀮𑀩𑁆𑀪𑀦𑀢𑁄, ‘‘𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀸’’𑀢𑀺𑀧𑀺 𑀅𑀥𑀼𑀦𑀸 𑀧𑀸𑀞𑁄 𑀤𑀺𑀲𑁆𑀲𑀢𑀺. ‘‘𑀏𑀯’’𑀦𑁆𑀢𑀺𑀆𑀤𑀺 𑀦𑀺𑀕𑀫𑀦𑀁.

𑀇𑀤𑀸𑀦𑀺 𑀬𑀣𑀸𑀧𑀸𑀞𑀁 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑁂𑀲𑀼 𑀲𑀫𑁆𑀧𑀚𑀸𑀦𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀲𑀫𑀺𑀜𑁆𑀚𑀺𑀢𑁂 𑀧𑀲𑀸𑀭𑀺𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀩𑁆𑀩𑀸𑀦𑀦𑁆𑀢𑀺 𑀧𑀩𑁆𑀩𑀪𑀽𑀢𑀸𑀦𑀁. 𑀢𑀁𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑁂𑀦𑁂𑀯 𑀳𑀺 𑀲𑀩𑁆𑀩𑁂𑀲𑀁 𑀳𑀢𑁆𑀣𑀧𑀸𑀤𑀸𑀦𑀁 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀁 𑀳𑁄𑀢𑀺, 𑀧𑀩𑁆𑀩𑀫𑁂𑀢𑁂𑀲𑀦𑁆𑀢𑀺 𑀯𑀸 𑀧𑀩𑁆𑀩𑀸 𑀬𑀣𑀸 ‘‘𑀲𑀤𑁆𑀥𑁄’’𑀢𑀺, 𑀧𑀩𑁆𑀩𑀯𑀦𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀯𑀲𑁂𑀦𑁂𑀯𑀸𑀢𑀺 𑀘𑀺𑀢𑁆𑀢𑀭𑀼𑀘𑀺𑀬𑀸 𑀏𑀯, 𑀘𑀺𑀢𑁆𑀢𑀲𑀸𑀫𑀢𑁆𑀣𑀺𑀬𑀸 𑀯𑀸. 𑀬𑀁 𑀬𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺 𑀲𑀸𑀢𑁆𑀣𑁂𑀧𑀺 𑀅𑀦𑀢𑁆𑀣𑁂𑀧𑀺 𑀲𑀫𑀺𑀜𑁆𑀚𑀺𑀢𑀼𑀁, 𑀧𑀲𑀸𑀭𑀺𑀢𑀼𑀁 𑀯𑀸, 𑀢𑀁𑀢𑀁𑀘𑀺𑀢𑁆𑀢𑀸𑀦𑀼𑀕𑀢𑁂𑀦𑁂𑀯 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀫𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣𑀸𑀢𑀺 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑁂𑀲𑀼 𑀅𑀢𑁆𑀣𑀸𑀦𑀢𑁆𑀣𑀧𑀭𑀺𑀕𑁆𑀕𑀡𑁆𑀳𑀦𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀔𑀡𑁂 𑀔𑀡𑁂𑀢𑀺 𑀢𑀣𑀸 𑀞𑀺𑀢𑀓𑁆𑀔𑀡𑀲𑁆𑀲 𑀩𑁆𑀬𑀸𑀧𑀦𑀺𑀘𑁆𑀙𑀸𑀯𑀘𑀦𑀁. 𑀯𑁂𑀤𑀦𑀸𑀢𑀺 𑀲𑀦𑁆𑀣𑀫𑁆𑀪𑀦𑀸𑀤𑀻𑀳𑀺 𑀭𑀼𑀚𑁆𑀚𑀦𑀸. ‘‘𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀧𑀭𑀫𑁆𑀧𑀭𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀺. 𑀢𑀣𑀸 ‘‘𑀢𑀸 𑀯𑁂𑀤𑀦𑀸 ¶ 𑀦𑀼𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀺𑀦𑀸𑀧𑀺. 𑀧𑀼𑀭𑀺𑀫𑀁 𑀧𑀼𑀭𑀺𑀫𑀜𑁆𑀳𑀺 𑀧𑀘𑁆𑀙𑀺𑀫𑀲𑁆𑀲 𑀧𑀘𑁆𑀙𑀺𑀫𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀓𑀸𑀮𑁂𑀢𑀺 𑀲𑀫𑀺𑀜𑁆𑀚𑀺𑀢𑀼𑀁, 𑀧𑀲𑀸𑀭𑀺𑀢𑀼𑀁 𑀯𑀸 𑀬𑀼𑀢𑁆𑀢𑀓𑀸𑀮𑁂. 𑀨𑀸𑀢𑀺𑀦𑁆𑀢𑀺 𑀯𑀼𑀤𑁆𑀥𑀺𑀁. 𑀛𑀸𑀦𑀸𑀤𑀺 𑀧𑀦 𑀯𑀺𑀲𑁂𑀲𑁄.

𑀢𑀢𑁆𑀭𑀸𑀬𑀁 𑀦𑀬𑁄𑀢𑀺 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀅𑀧𑀭𑀺𑀕𑁆𑀕𑀡𑁆𑀳𑀦𑁂 𑀯𑀢𑁆𑀣𑀼𑀲𑀦𑁆𑀤𑀲𑁆𑀲𑀦𑀲𑀁𑀗𑁆𑀔𑀸𑀢𑁄 𑀦𑀬𑁄. 𑀢𑀤𑀧𑀭𑀺𑀕𑁆𑀕𑀳𑀡𑁂 𑀆𑀤𑀻𑀦𑀯𑀤𑀲𑁆𑀲𑀦𑁂𑀦𑁂𑀯 𑀧𑀭𑀺𑀕𑁆𑀕𑀳𑀡𑁂𑀧𑀺 𑀆𑀦𑀺𑀲𑀁𑀲𑁄 𑀯𑀺𑀪𑀸𑀯𑀺𑀢𑁄𑀢𑀺 𑀢𑁂𑀲𑀫𑀺𑀥 𑀉𑀤𑀸𑀳𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀫𑀳𑀸𑀘𑁂𑀢𑀺𑀬𑀗𑁆𑀕𑀡𑁂𑀢𑀺 𑀤𑀼𑀝𑁆𑀞𑀕𑀸𑀫𑀡𑀺𑀭𑀜𑁆𑀜𑀸 𑀓𑀢𑀲𑁆𑀲 𑀳𑁂𑀫𑀫𑀸𑀮𑀻𑀦𑀸𑀫𑀓𑀲𑁆𑀲 𑀫𑀳𑀸𑀘𑁂𑀢𑀺𑀬𑀲𑁆𑀲 𑀅𑀗𑁆𑀕𑀡𑁂. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀤𑀻𑀧𑀧𑁆𑀧𑀲𑀸𑀤𑀓𑁄 𑀣𑁂𑀭𑁄, 𑀭𑀸𑀚𑀺𑀦𑁄 𑀅𑀬𑁆𑀬𑀓𑀲𑁆𑀲 𑀫𑁂;

𑀏𑀯𑀁 𑀓𑀺𑀭𑀸𑀳 𑀦𑀢𑁆𑀢𑀸 𑀢𑁂, 𑀤𑀼𑀝𑁆𑀞𑀕𑀸𑀫𑀡𑀺 𑀪𑀽𑀧𑀢𑀺.

𑀫𑀳𑀸𑀧𑀼𑀜𑁆𑀜𑁄 ¶ 𑀫𑀳𑀸𑀣𑀽𑀧𑀁, 𑀲𑁄𑀡𑁆𑀡𑀫𑀸𑀮𑀺𑀁 𑀫𑀦𑁄𑀭𑀫𑀁;

𑀯𑀻𑀲𑀁 𑀳𑀢𑁆𑀣𑀲𑀢𑀁 𑀉𑀘𑁆𑀘𑀁, 𑀓𑀸𑀭𑁂𑀲𑁆𑀲𑀢𑀺 𑀅𑀦𑀸𑀕𑀢𑁂’’𑀢𑀺.

𑀪𑀽𑀫𑀺𑀧𑁆𑀧𑀤𑁂𑀲𑁄 𑀘𑁂𑀢𑁆𑀣 𑀅𑀗𑁆𑀕𑀡𑀁 ‘‘𑀉𑀤𑀗𑁆𑀕𑀡𑁂 𑀢𑀢𑁆𑀣 𑀧𑀧𑀁 𑀅𑀯𑀺𑀦𑁆𑀤𑀼’’𑀦𑁆𑀢𑀺𑀆𑀤𑀺𑀲𑀼 (𑀚𑀸. 𑁧.𑁧.𑁨) 𑀯𑀺𑀬, 𑀢𑀲𑁆𑀫𑀸 𑀉𑀧𑀘𑀸𑀭𑀪𑀽𑀢𑁂 𑀲𑀼𑀲𑀗𑁆𑀔𑀢𑁂 𑀪𑀽𑀫𑀺𑀧𑁆𑀧𑀤𑁂𑀲𑁂𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀕𑀺𑀳𑀻 𑀚𑀸𑀢𑁄𑀢𑀺 𑀓𑀸𑀬𑀲𑀁𑀲𑀕𑁆𑀕𑀲𑀫𑀸𑀧𑀚𑁆𑀚𑀦𑀳𑁂𑀢𑀼𑀦𑀸 𑀉𑀓𑁆𑀓𑀡𑁆𑀞𑀺𑀢𑁄 𑀳𑀼𑀢𑁆𑀯𑀸 𑀳𑀻𑀦𑀸𑀬𑀸𑀯𑀢𑁆𑀢𑁄. 𑀛𑀸𑀬𑀻𑀢𑀺 𑀛𑀸𑀬𑀦𑀁 𑀟𑀬𑁆𑀳𑀦𑀫𑀸𑀧𑀚𑁆𑀚𑀺. 𑀫𑀳𑀸𑀘𑁂𑀢𑀺𑀬𑀗𑁆𑀕𑀡𑁂𑀧𑀺 𑀘𑀻𑀯𑀭𑀓𑀼𑀝𑀺𑀁 𑀓𑀢𑁆𑀯𑀸 𑀢𑀢𑁆𑀣 𑀲𑀚𑁆𑀛𑀸𑀬𑀁 𑀕𑀡𑁆𑀳𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀘𑀻𑀯𑀭𑀓𑀼𑀝𑀺𑀤𑀡𑁆𑀟𑀓𑁂’’𑀢𑀺, 𑀘𑀻𑀯𑀭𑀓𑀼𑀝𑀺𑀬𑀸 𑀘𑀻𑀯𑀭𑀙𑀤𑀦𑀢𑁆𑀣𑀸𑀬 𑀓𑀢𑀤𑀡𑁆𑀟𑀓𑁂𑀢𑀺 𑀅𑀢𑁆𑀣𑁄. ‘‘𑀫𑀡𑀺𑀲𑀧𑁆𑀧𑁄 𑀦𑀸𑀫 𑀲𑀻𑀳𑀴𑀤𑀻𑀧𑁂 𑀯𑀺𑀚𑁆𑀚𑀫𑀸𑀦𑀸 𑀏𑀓𑀸 𑀲𑀧𑁆𑀧𑀚𑀸𑀢𑀻𑀢𑀺 𑀯𑀤𑀦𑁆𑀢𑀻’’𑀢𑀺 𑀆𑀘𑀭𑀺𑀬𑀸𑀦𑀦𑁆𑀤𑀢𑁆𑀣𑁂𑀭𑁂𑀦, (𑀯𑀺𑀪. 𑀫𑀽𑀮𑀝𑀻. 𑁨𑁪𑁨) 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 (𑀤𑀻. 𑀦𑀺. 𑀝𑀻. 𑁧.𑁨𑁧𑁪) 𑀘 𑀯𑀼𑀢𑁆𑀢𑀁. ‘‘𑀓𑁂𑀘𑀺, 𑀅𑀧𑀭𑁂, 𑀅𑀜𑁆𑀜𑁂’’𑀢𑀺 𑀯𑀸 𑀅𑀯𑀢𑁆𑀯𑀸 ‘‘𑀯𑀤𑀦𑁆𑀢𑀺’’𑀘𑁆𑀘𑁂𑀯 𑀯𑀘𑀦𑀜𑁆𑀘 𑀲𑀸𑀭𑀢𑁄 𑀕𑀳𑁂𑀢𑀩𑁆𑀩𑀢𑀸𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀅𑀜𑁆𑀜𑀣𑀸 𑀕𑀳𑁂𑀢𑀩𑁆𑀩𑀲𑁆𑀲 𑀅𑀯𑀘𑀦𑀢𑁄, 𑀢𑀲𑁆𑀫𑀸 𑀦 𑀦𑀻𑀮𑀲𑀧𑁆𑀧𑀸𑀤𑀺 𑀇𑀥 ‘‘𑀫𑀡𑀺𑀲𑀧𑁆𑀧𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀫𑀳𑀸𑀣𑁂𑀭𑀯𑀢𑁆𑀣𑀼𑀦𑀸𑀢𑀺 𑀏𑀯𑀁𑀦𑀸𑀫𑀓𑀲𑁆𑀲 𑀣𑁂𑀭𑀲𑁆𑀲 𑀯𑀢𑁆𑀣𑀼𑀦𑀸. 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑀻𑀢𑀺 𑀢𑀢𑁆𑀣 𑀦𑀺𑀲𑀺𑀦𑁆𑀦𑁂𑀲𑀼 𑀩𑀳𑀽𑀲𑀼 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀏𑀓𑁂𑀦 𑀅𑀦𑁆𑀢𑁂𑀯𑀸𑀲𑀺𑀓𑁂𑀦. 𑀢𑁂𑀦𑀸𑀳 ‘‘𑀢𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀧𑀼𑀘𑁆𑀙𑀺𑀁𑀲𑀽’’𑀢𑀺. 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 ‘‘𑀅𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀸 𑀦𑀸𑀫𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑀅𑀝𑁆𑀞. 𑁧.𑁨𑁧𑁪) 𑀯𑀓𑁆𑀔𑀫𑀸𑀦𑀧𑁆𑀧𑀓𑀸𑀭𑀁 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀁. 𑀧𑀓𑀭𑀡𑀢𑁄𑀧𑀺 𑀳𑀺 𑀅𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻𑀢𑀺. 𑀢𑀢𑁆𑀣 𑀞𑀺𑀢𑀸𑀦𑀁 𑀧𑀼𑀘𑁆𑀙𑀦𑁆𑀢𑀸𑀦𑀁 𑀲𑀗𑁆𑀕𑀳𑀡𑀯𑀲𑁂𑀦 ‘‘𑀢𑀼𑀫𑁆𑀳𑁂𑀳𑀻’’𑀢𑀺 𑀧𑀼𑀦 𑀧𑀼𑀣𑀼𑀯𑀘𑀦𑀓𑀭𑀡𑀁. 𑀏𑀯𑀁 𑀭𑀽𑀧𑀁 𑀲𑀪𑀸𑀯𑁄 𑀬𑀲𑁆𑀲𑀸𑀢𑀺 𑀏𑀯𑀭𑀽𑀧𑁄 𑀦𑀺𑀕𑁆𑀕𑀳𑀺𑀢𑀮𑁄𑀧𑀯𑀲𑁂𑀦 𑀢𑁂𑀦 ¶ , 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀲𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀯𑀫𑁂𑀢𑁆𑀣𑀸𑀧𑀻𑀢𑀺 𑀅𑀧𑀺-𑀲𑀤𑁆𑀤𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀧𑀓𑁆𑀔𑀫𑀧𑁂𑀓𑁆𑀔𑀦𑀁 𑀓𑀭𑁄𑀢𑀺. 𑀅𑀬𑀁 𑀦𑀬𑁄 𑀉𑀧𑀭𑀺𑀧𑀺.

𑀲𑀼𑀢𑁆𑀢𑀸𑀓𑀟𑁆𑀠𑀦𑀯𑀲𑁂𑀦𑀸𑀢𑀺 𑀬𑀦𑁆𑀢𑁂 𑀬𑁄𑀚𑀺𑀢𑀲𑀼𑀢𑁆𑀢𑀸𑀦𑀁 𑀆𑀯𑀺𑀜𑁆𑀙𑀦𑀯𑀲𑁂𑀦. 𑀤𑀸𑀭𑀼𑀬𑀦𑁆𑀢𑀲𑁆𑀲𑀸𑀢𑀺 𑀤𑀸𑀭𑀼𑀦𑀸 𑀓𑀢𑀬𑀦𑁆𑀢𑀭𑀽𑀧𑀲𑁆𑀲. 𑀢𑀁 𑀢𑀁 𑀓𑀺𑀭𑀺𑀬𑀁 𑀬𑀸𑀢𑀺 𑀧𑀸𑀧𑀼𑀡𑀸𑀢𑀺, 𑀳𑀢𑁆𑀣𑀧𑀸𑀤𑀸𑀤𑀻𑀳𑀺 𑀯𑀸 𑀢𑀁 𑀢𑀁 𑀆𑀓𑀸𑀭𑀁 𑀓𑀼𑀭𑀼𑀫𑀸𑀦𑀁 𑀬𑀸𑀢𑀺 𑀕𑀘𑁆𑀙𑀢𑀻𑀢𑀺 𑀬𑀦𑁆𑀢𑀁, 𑀦𑀝𑀓𑀸𑀤𑀺𑀧𑀜𑁆𑀘𑀸𑀮𑀺𑀓𑀸𑀭𑀽𑀧𑀁, 𑀤𑀸𑀭𑀼𑀦𑀸 𑀓𑀢𑀁 𑀬𑀦𑁆𑀢𑀁 𑀢𑀣𑀸, 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁. 𑀢𑀣𑀸 𑀳𑀺 𑀦𑀁 𑀧𑁄𑀢𑁆𑀣𑁂𑀦 𑀯𑀢𑁆𑀣𑁂𑀦 𑀅𑀮𑀗𑁆𑀓𑀭𑀺𑀬𑀢𑁆𑀢𑀸 𑀧𑁄𑀢𑁆𑀣𑀮𑀺𑀓𑀸, 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀬𑀲𑁆𑀲𑀸 𑀲𑀚𑀻𑀯𑀲𑁆𑀲𑁂𑀯𑀸𑀢𑀺 𑀧𑀜𑁆𑀘𑀸𑀮𑀺𑀓𑀸𑀢𑀺 𑀘 𑀯𑁄𑀳𑀭𑀦𑁆𑀢𑀺. 𑀳𑀢𑁆𑀣𑀧𑀸𑀤𑀮𑀴𑀦𑀦𑁆𑀢𑀺 𑀳𑀢𑁆𑀣𑀧𑀸𑀤𑀸𑀦𑀁 𑀓𑀫𑁆𑀧𑀦𑀁, 𑀳𑀢𑁆𑀣𑀧𑀸𑀤𑁂𑀳𑀺 𑀯𑀸 𑀮𑀻𑀴𑀸𑀓𑀭𑀡𑀁.

𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂𑀢𑀺 ¶ 𑀏𑀢𑁆𑀣 𑀲𑀗𑁆𑀖𑀸𑀝𑀺𑀘𑀻𑀯𑀭𑀸𑀦𑀁 𑀲𑀫𑀸𑀦𑀥𑀸𑀭𑀡𑀢𑀸𑀬 𑀏𑀓𑀢𑁄𑀤𑀲𑁆𑀲𑀦𑀁 𑀕𑀦𑁆𑀣𑀕𑀭𑀼𑀢𑀸𑀧𑀦𑀬𑀦𑀢𑁆𑀣𑀁, 𑀅𑀦𑁆𑀢𑀭𑀯𑀸𑀲𑀓𑀲𑁆𑀲 𑀦𑀺𑀯𑀸𑀲𑀦𑀯𑀲𑁂𑀦, 𑀲𑁂𑀲𑀸𑀦𑀁 𑀧𑀸𑀭𑀼𑀧𑀦𑀯𑀲𑁂𑀦𑀸𑀢𑀺 𑀬𑀣𑀸𑀭𑀳𑀫𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀲𑀗𑁆𑀖𑀸𑀝𑀺𑀘𑀻𑀯𑀭𑀥𑀸𑀭𑀡𑀧𑀢𑁆𑀢𑀥𑀸𑀭𑀡𑁂𑀲𑀼. 𑀯𑀼𑀢𑁆𑀢𑀧𑁆𑀧𑀓𑀸𑀭𑁄𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀯𑀺𑀥𑀺𑀦𑀸 𑀲𑀼𑀢𑁆𑀢𑁂 𑀯𑀼𑀢𑁆𑀢𑀧𑁆𑀧𑀪𑁂𑀤𑁄.

𑀉𑀡𑁆𑀳𑀧𑀓𑀢𑀺𑀓𑀲𑁆𑀲𑀸𑀢𑀺 𑀉𑀡𑁆𑀳𑀸𑀮𑀼𑀓𑀲𑁆𑀲 𑀧𑀭𑀺𑀴𑀸𑀳𑀩𑀳𑀼𑀮𑀓𑀸𑀬𑀲𑁆𑀲. 𑀲𑀻𑀢𑀸𑀮𑀼𑀓𑀲𑁆𑀲𑀸𑀢𑀺 𑀲𑀻𑀢𑀩𑀳𑀼𑀮𑀓𑀸𑀬𑀲𑁆𑀲. 𑀖𑀦𑀦𑁆𑀢𑀺 𑀅𑀧𑁆𑀧𑀺𑀢𑀁. 𑀤𑀼𑀧𑀝𑁆𑀝𑀦𑁆𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. ‘‘𑀉𑀢𑀼𑀤𑁆𑀥𑀝𑀸𑀦𑀁 𑀤𑀼𑀲𑁆𑀲𑀸𑀦𑀁 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁, 𑀤𑀺𑀕𑀼𑀡𑀁 𑀉𑀢𑁆𑀢𑀭𑀸𑀲𑀗𑁆𑀕𑀁, 𑀤𑀺𑀕𑀼𑀡𑀁 𑀅𑀦𑁆𑀢𑀭𑀯𑀸𑀲𑀓𑀁, 𑀧𑀁𑀲𑀼𑀓𑀽𑀮𑁂 𑀬𑀸𑀯𑀤𑀢𑁆𑀣’’𑀦𑁆𑀢𑀺 (𑀫𑀳𑀸𑀯. 𑁩𑁪𑁮) 𑀳𑀺 𑀯𑀼𑀢𑁆𑀢𑀁. 𑀯𑀺𑀧𑀭𑀻𑀢𑀦𑁆𑀢𑀺 𑀢𑀤𑀼𑀪𑀬𑀢𑁄 𑀯𑀺𑀧𑀭𑀻𑀢𑀁, 𑀢𑁂𑀲𑀁 𑀢𑀺𑀡𑁆𑀡𑀫𑁆𑀧𑀺 𑀅𑀲𑀧𑁆𑀧𑀸𑀬𑀁. 𑀓𑀲𑁆𑀫𑀸𑀢𑀺 𑀆𑀳 ‘‘𑀅𑀕𑁆𑀕𑀴𑀸𑀤𑀺𑀤𑀸𑀦𑁂𑀦𑀸’’𑀢𑀺𑀆𑀤𑀺. 𑀉𑀤𑁆𑀥𑀭𑀺𑀢𑁆𑀯𑀸 𑀅𑀮𑁆𑀮𑀻𑀬𑀸𑀧𑀦𑀔𑀡𑁆𑀟𑀁 𑀅𑀕𑁆𑀕𑀴𑀁. 𑀆𑀤𑀺𑀲𑀤𑁆𑀤𑁂𑀦 𑀢𑀼𑀦𑁆𑀦𑀓𑀫𑁆𑀫𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀣𑀸-𑀲𑀤𑁆𑀤𑁄 𑀅𑀦𑀼𑀓𑀟𑁆𑀠𑀦𑀢𑁆𑀣𑁄, 𑀅𑀲𑀧𑁆𑀧𑀸𑀬𑀫𑁂𑀯𑀸𑀢𑀺. 𑀧𑀝𑁆𑀝𑀼𑀡𑁆𑀡𑀤𑁂𑀲𑁂 𑀧𑀸𑀡𑀓𑁂𑀳𑀺 𑀲𑀜𑁆𑀚𑀸𑀢𑀯𑀢𑁆𑀣𑀁 𑀧𑀝𑁆𑀝𑀼𑀡𑁆𑀡𑀁. 𑀯𑀸𑀓𑀯𑀺𑀲𑁂𑀲𑀫𑀬𑀁 𑀲𑁂𑀢𑀯𑀡𑁆𑀡𑀁 𑀤𑀼𑀓𑀽𑀮𑀁. 𑀆𑀤𑀺𑀲𑀤𑁆𑀤𑁂𑀦 𑀓𑁄𑀲𑁂𑀬𑁆𑀬𑀓𑀫𑁆𑀩𑀮𑀸𑀤𑀺𑀓𑀁 𑀲𑀸𑀦𑀼𑀮𑁄𑀫𑀁 𑀓𑀧𑁆𑀧𑀺𑀬𑀘𑀻𑀯𑀭𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀲𑁆𑀫𑀸𑀢𑀺 𑀯𑀼𑀢𑁆𑀢𑀁 ‘‘𑀢𑀸𑀤𑀺𑀲𑀜𑁆𑀳𑀻’’𑀢𑀺𑀆𑀤𑀺. 𑀅𑀭𑀜𑁆𑀜𑁂 𑀏𑀓𑀓𑀲𑁆𑀲 𑀦𑀺𑀯𑀸𑀲𑀦𑁆𑀢𑀭𑀸𑀬𑀓𑀭𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑁂𑀓𑀤𑁂𑀲𑀫𑀸𑀳. 𑀘𑁄𑀭𑀸𑀤𑀺𑀲𑀸𑀥𑀸𑀭𑀡𑀢𑁄 𑀘 𑀢𑀣𑀸 𑀯𑀼𑀢𑁆𑀢𑀁. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀢𑀁 𑀅𑀲𑀧𑁆𑀧𑀸𑀬𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑁂𑀦𑁂𑀯 𑀬𑀣𑀸𑀯𑀼𑀢𑁆𑀢𑀫𑀲𑀧𑁆𑀧𑀸𑀬𑀁 𑀅𑀦𑁂𑀓𑀦𑁆𑀢𑀁 𑀢𑀣𑀸𑀭𑀽𑀧𑀧𑀘𑁆𑀘𑀬𑁂𑀦 𑀓𑀲𑁆𑀲𑀘𑀺 𑀓𑀤𑀸𑀘𑀺 𑀲𑀧𑁆𑀧𑀸𑀬𑀲𑀫𑁆𑀪𑀯𑀢𑁄. 𑀇𑀤𑀁 𑀧𑀦 𑀤𑁆𑀯𑀬𑀁 𑀏𑀓𑀦𑁆𑀢𑀫𑁂𑀯 𑀅𑀲𑀧𑁆𑀧𑀸𑀬𑀁 𑀓𑀲𑁆𑀲𑀘𑀺 𑀓𑀤𑀸𑀘𑀺𑀧𑀺 𑀲𑀧𑁆𑀧𑀸𑀬𑀸𑀪𑀸𑀯𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀫𑀺𑀘𑁆𑀙𑀸 𑀆𑀚𑀻𑀯𑀦𑁆𑀢𑀺 𑀏𑀢𑁂𑀦𑀸𑀢𑀺 𑀫𑀺𑀘𑁆𑀙𑀸𑀚𑀻𑀯𑁄, 𑀅𑀦𑁂𑀲𑀦𑀯𑀲𑁂𑀦 𑀧𑀘𑁆𑀘𑀬𑀧𑀭𑀺𑀬𑁂𑀲𑀦𑀧𑀬𑁄𑀕𑁄. 𑀦𑀺𑀫𑀺𑀢𑁆𑀢𑀓𑀫𑁆𑀫𑀸𑀤𑀻𑀳𑀺 𑀧𑀯𑀢𑁆𑀢𑁄 𑀫𑀺𑀘𑁆𑀙𑀸𑀚𑀻𑀯𑁄 𑀢𑀣𑀸, 𑀏𑀢𑁂𑀦 𑀏𑀓𑀯𑀻𑀲𑀢𑀺𑀯𑀺𑀥𑀁 𑀅𑀦𑁂𑀲𑀦𑀧𑀬𑁄𑀕𑀫𑀸𑀳. 𑀯𑀼𑀢𑁆𑀢𑀜𑁆𑀳𑀺 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀬𑀁 𑀔𑀼𑀤𑁆𑀤𑀓𑀧𑀸𑀞𑀝𑁆𑀞𑀓𑀣𑀸𑀬𑀜𑁆𑀘 𑀫𑁂𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑁋

‘‘𑀬𑁄 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑁆𑀢𑀸𑀦𑀁 𑀦 𑀲𑀫𑁆𑀫𑀸 𑀧𑀬𑁄𑀚𑁂𑀢𑀺, 𑀔𑀡𑁆𑀟𑀲𑀻𑀮𑁄 𑀳𑁄𑀢𑀺 ¶ , 𑀏𑀓𑀯𑀻𑀲𑀢𑀺𑀯𑀺𑀥𑀁 𑀅𑀦𑁂𑀲𑀦𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺. 𑀲𑁂𑀬𑁆𑀬𑀣𑀺𑀤𑀁? 𑀯𑁂𑀴𑀼𑀤𑀸𑀦𑀁, 𑀧𑀢𑁆𑀢𑀤𑀸𑀦𑀁, 𑀧𑀼𑀧𑁆𑀨, 𑀨𑀮, 𑀤𑀦𑁆𑀢𑀓𑀝𑁆𑀞, 𑀫𑀼𑀔𑁄𑀤𑀓, 𑀲𑀺𑀦𑀸𑀦, 𑀘𑀼𑀡𑁆𑀡, 𑀫𑀢𑁆𑀢𑀺𑀓𑀸𑀤𑀸𑀦𑀁, 𑀘𑀸𑀝𑀼𑀓𑀫𑁆𑀬𑀢𑀁, 𑀫𑀼𑀕𑁆𑀕𑀲𑀽𑀧𑁆𑀬𑀢𑀁, 𑀧𑀸𑀭𑀺𑀪𑀝𑀼𑀢𑀁, 𑀚𑀗𑁆𑀖𑀧𑁂𑀲𑀦𑀺𑀓𑀁, 𑀯𑁂𑀚𑁆𑀚𑀓𑀫𑁆𑀫𑀁, 𑀤𑀽𑀢𑀓𑀫𑁆𑀫𑀁, 𑀧𑀳𑀺𑀡𑀕𑀫𑀦𑀁, 𑀧𑀺𑀡𑁆𑀟𑀧𑀝𑀺𑀧𑀺𑀡𑁆𑀟𑀁, 𑀤𑀸𑀦𑀸𑀦𑀼𑀧𑁆𑀧𑀤𑀸𑀦𑀁, 𑀯𑀢𑁆𑀣𑀼𑀯𑀺𑀚𑁆𑀚𑀁, 𑀦𑀓𑁆𑀔𑀢𑁆𑀢𑀯𑀺𑀚𑁆𑀚𑀁, 𑀅𑀗𑁆𑀕𑀯𑀺𑀚𑁆𑀚’’𑀦𑁆𑀢𑀺.

𑀅𑀪𑀺𑀥𑀫𑁆𑀫𑀝𑀻𑀓𑀸𑀓𑀸𑀭𑁂𑀦 𑀧𑀦 ¶ 𑀆𑀘𑀭𑀺𑀬𑀸𑀦𑀦𑁆𑀤𑀢𑁆𑀣𑁂𑀭𑁂𑀦 𑀏𑀯𑀁 𑀯𑀼𑀢𑁆𑀢𑀁 𑁋

‘‘𑀏𑀓𑀯𑀻𑀲𑀢𑀺 𑀅𑀦𑁂𑀲𑀦𑀸 𑀦𑀸𑀫 𑀯𑁂𑀚𑁆𑀚𑀓𑀫𑁆𑀫𑀁 𑀓𑀭𑁄𑀢𑀺, 𑀤𑀽𑀢𑀓𑀫𑁆𑀫𑀁 𑀓𑀭𑁄𑀢𑀺, 𑀧𑀳𑀺𑀡𑀓𑀫𑁆𑀫𑀁 𑀓𑀭𑁄𑀢𑀺, 𑀕𑀡𑁆𑀟𑀁 𑀨𑀸𑀮𑁂𑀢𑀺, 𑀅𑀭𑀼𑀫𑀓𑁆𑀔𑀦𑀁 𑀤𑁂𑀢𑀺, 𑀉𑀤𑁆𑀥𑀁𑀯𑀺𑀭𑁂𑀘𑀦𑀁 𑀤𑁂𑀢𑀺, 𑀅𑀥𑁄𑀯𑀺𑀭𑁂𑀘𑀦𑀁 𑀤𑁂𑀢𑀺, 𑀦𑀢𑁆𑀣𑀼𑀢𑁂𑀮𑀁 𑀧𑀘𑀢𑀺, 𑀯𑀡𑀢𑁂𑀮𑀁 𑀧𑀘𑀢𑀺, 𑀯𑁂𑀴𑀼𑀤𑀸𑀦𑀁 𑀤𑁂𑀢𑀺, 𑀧𑀢𑁆𑀢, 𑀧𑀼𑀧𑁆𑀨, 𑀨𑀮, 𑀲𑀺𑀦𑀸𑀦, 𑀤𑀦𑁆𑀢𑀓𑀝𑁆𑀞, 𑀫𑀼𑀔𑁄𑀤𑀓, 𑀘𑀼𑀡𑁆𑀡, 𑀫𑀢𑁆𑀢𑀺𑀓𑀸𑀤𑀸𑀦𑀁 𑀤𑁂𑀢𑀺, 𑀘𑀸𑀝𑀼𑀓𑀫𑁆𑀫𑀁 𑀓𑀭𑁄𑀢𑀺, 𑀫𑀼𑀕𑁆𑀕𑀲𑀽𑀧𑀺𑀬𑀁, 𑀧𑀸𑀭𑀺𑀪𑀝𑀼𑀁, 𑀚𑀗𑁆𑀖𑀧𑁂𑀲𑀦𑀺𑀓𑀁 𑀤𑁆𑀯𑀸𑀯𑀻𑀲𑀢𑀺𑀫𑀁 𑀤𑀽𑀢𑀓𑀫𑁆𑀫𑁂𑀦 𑀲𑀤𑀺𑀲𑀁, 𑀢𑀲𑁆𑀫𑀸 𑀏𑀓𑀯𑀻𑀲𑀢𑀻’’𑀢𑀺 (𑀥. 𑀲. 𑀫𑀽𑀮𑀝𑀻. 𑁧𑁫𑁦-𑁫𑁧).

𑀅𑀝𑁆𑀞𑀓𑀣𑀸𑀯𑀘𑀦𑀜𑁆𑀘𑁂𑀢𑁆𑀣 𑀩𑁆𑀭𑀳𑁆𑀫𑀚𑀸𑀮𑀸𑀤𑀺𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀯𑀼𑀢𑁆𑀢𑀁, 𑀝𑀻𑀓𑀸𑀯𑀘𑀦𑀁 𑀧𑀦 𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑀸𑀤𑀺𑀅𑀪𑀺𑀥𑀫𑁆𑀫𑀦𑀬𑁂𑀦, 𑀅𑀢𑁄 𑀘𑁂𑀢𑁆𑀣 𑀓𑁂𑀲𑀜𑁆𑀘𑀺 𑀯𑀺𑀲𑀫𑀢𑀸𑀢𑀺 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀅𑀧𑀺𑀘 ‘‘𑀦𑀺𑀫𑀺𑀢𑁆𑀢𑀓𑀫𑁆𑀫𑀸𑀤𑀻’’𑀢𑀺 𑀇𑀫𑀺𑀦𑀸 𑀦𑀺𑀫𑀺𑀢𑁆𑀢𑁄𑀪𑀸𑀲𑀧𑀭𑀺𑀓𑀣𑀸𑀬𑁄 𑀯𑀼𑀢𑁆𑀢𑀸. ‘‘𑀫𑀺𑀘𑁆𑀙𑀸𑀚𑀻𑀯𑁄’’𑀢𑀺 𑀧𑀦 𑀬𑀣𑀸𑀯𑀼𑀢𑁆𑀢𑀧𑀬𑁄𑀕𑁄, 𑀢𑀲𑁆𑀫𑀸 𑀦𑀺𑀫𑀺𑀢𑁆𑀢𑀓𑀫𑁆𑀫𑀜𑁆𑀘 𑀫𑀺𑀘𑁆𑀙𑀸𑀚𑀻𑀯𑁄 𑀘, 𑀢𑀩𑁆𑀩𑀲𑁂𑀦 𑀉𑀧𑁆𑀧𑀦𑁆𑀦𑀁 𑀅𑀲𑀧𑁆𑀧𑀸𑀬𑀁 𑀲𑀻𑀮𑀯𑀺𑀦𑀸𑀲𑀦𑁂𑀦 𑀅𑀦𑀢𑁆𑀣𑀸𑀯𑀳𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑁂𑀧𑀺 𑀳𑀺 𑀓𑀢𑁆𑀣𑀘𑀺 𑀧𑀼𑀮𑁆𑀮𑀺𑀗𑁆𑀕𑀧𑀬𑁄𑀕𑁄 𑀤𑀺𑀲𑁆𑀲𑀢𑀺 𑀬𑀣𑀸 ‘‘𑀘𑀺𑀢𑁆𑀢𑀼𑀧𑁆𑀧𑀸𑀤𑁄’’𑀢𑀺. 𑀅𑀢𑀺𑀭𑀼𑀘𑀺𑀬𑁂 𑀭𑀸𑀕𑀸𑀤𑀬𑁄, 𑀅𑀢𑀺𑀅𑀭𑀼𑀘𑀺𑀬𑁂 𑀘 𑀤𑁄𑀲𑀸𑀤𑀬𑁄𑀢𑀺 𑀆𑀳 ‘‘𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’’𑀢𑀺. 𑀢𑀦𑁆𑀢𑀺 𑀢𑀤𑀼𑀪𑀬𑀁. 𑀓𑀫𑁆𑀫𑀝𑁆𑀞𑀸𑀦𑀸𑀯𑀺𑀚𑀳𑀦𑀯𑀲𑁂𑀦𑀸𑀢𑀺 𑀯𑀓𑁆𑀔𑀫𑀸𑀦𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀅𑀯𑀺𑀚𑀳𑀦𑀯𑀲𑁂𑀦.

‘‘𑀅𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀸 𑀦𑀸𑀫𑀸’’𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑀢𑁄 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀢𑀢𑁆𑀣 𑀘𑀻𑀯𑀭𑀫𑁆𑀧𑀺 𑀅𑀘𑁂𑀢𑀦’’𑀦𑁆𑀢𑀺𑀆𑀤𑀺𑀦𑀸 𑀘𑀻𑀯𑀭𑀲𑁆𑀲 𑀯𑀺𑀬 ‘‘𑀓𑀸𑀬𑁄𑀧𑀺 𑀅𑀘𑁂𑀢𑀦𑁄’’𑀢𑀺 𑀓𑀸𑀬𑀲𑁆𑀲 𑀅𑀢𑁆𑀢𑀲𑀼𑀜𑁆𑀜𑀢𑀸𑀯𑀺𑀪𑀸𑀯𑀦𑁂𑀦 𑀢𑀫𑀢𑁆𑀣𑀁 𑀧𑀭𑀺𑀤𑀻𑀧𑁂𑀦𑁆𑀢𑁄 ‘‘𑀢𑀲𑁆𑀫𑀸 𑀦𑁂𑀯 𑀲𑀼𑀦𑁆𑀤𑀭𑀁 𑀘𑀻𑀯𑀭𑀁 𑀮𑀪𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲 𑀇𑀢𑀭𑀻𑀢𑀭𑀲𑀦𑁆𑀢𑁄𑀲𑀲𑁆𑀲 𑀓𑀸𑀭𑀡𑀁 𑀯𑀺𑀪𑀸𑀯𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀳𑀺 𑀲𑀫𑁆𑀩𑀦𑁆𑀥𑁄 𑀯𑀢𑁆𑀢𑀩𑁆𑀩𑁄 𑁋 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀩𑁆𑀪𑀦𑁆𑀢𑀭𑁂’’𑀢𑀺𑀆𑀤𑀺𑀫𑀸𑀳. 𑀅𑀢𑁆𑀢𑀲𑀼𑀜𑁆𑀜𑀢𑀸𑀯𑀺𑀪𑀸𑀯𑀦𑁂𑀦 𑀧𑀦 𑀢𑀤𑀢𑁆𑀣𑀁 𑀧𑀭𑀺𑀤𑀻𑀧𑀺𑀢𑀼𑀁 𑀯𑀼𑀢𑁆𑀢𑀁 ‘‘𑀢𑀢𑁆𑀣 𑀘𑀻𑀯𑀭’’𑀦𑁆𑀢𑀺𑀆𑀤𑀺. 𑀇𑀤𑀸𑀦𑀺 𑀅𑀢𑁆𑀢𑀲𑀼𑀜𑁆𑀜𑀢𑀸𑀯𑀺𑀪𑀸𑀯𑀦𑀲𑁆𑀲 𑀧𑀬𑁄𑀚𑀦𑀪𑀽𑀢𑀁 𑀇𑀢𑀭𑀻𑀢𑀭𑀲𑀦𑁆𑀢𑁄𑀲𑀲𑀗𑁆𑀔𑀸𑀢𑀁 𑀮𑀤𑁆𑀥𑀕𑀼𑀡𑀁 𑀧𑀓𑀸𑀲𑁂𑀦𑁆𑀢𑁄 𑀆𑀳 ‘‘𑀢𑀲𑁆𑀫𑀸 𑀦𑁂𑀯 𑀲𑀼𑀦𑁆𑀤𑀭’’𑀦𑁆𑀢𑀺𑀆𑀤𑀻𑀢𑀺.

𑀢𑀢𑁆𑀣 ¶ ¶ 𑀅𑀩𑁆𑀪𑀦𑁆𑀢𑀭𑁂𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀘𑀻𑀯𑀭𑀧𑀸𑀭𑀼𑀧𑀦𑁂. 𑀢𑁂𑀲𑀼 𑀯𑀸 𑀧𑀸𑀭𑀼𑀧𑀓𑀢𑁆𑀢𑀧𑀸𑀭𑀼𑀧𑀺𑀢𑀩𑁆𑀩𑀘𑀻𑀯𑀭𑁂𑀲𑀼. 𑀓𑀸𑀬𑁄𑀧𑀻𑀢𑀺 𑀅𑀢𑁆𑀢𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑁄 𑀓𑀸𑀬𑁄𑀧𑀺. ‘‘𑀢𑀲𑁆𑀫𑀸’’𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁, 𑀅𑀘𑁂𑀢𑀦𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀳𑀦𑁆𑀢𑀺 𑀓𑀫𑁆𑀫𑀪𑀽𑀢𑁄 𑀓𑀸𑀬𑁄. 𑀥𑀸𑀢𑀼𑀬𑁄𑀢𑀺 𑀘𑀻𑀯𑀭𑀲𑀗𑁆𑀔𑀸𑀢𑁄 𑀩𑀸𑀳𑀺𑀭𑀸 𑀥𑀸𑀢𑀼𑀬𑁄. 𑀥𑀸𑀢𑀼𑀲𑀫𑀽𑀳𑀦𑁆𑀢𑀺 𑀓𑀸𑀬𑀲𑀗𑁆𑀔𑀸𑀢𑀁 𑀅𑀚𑁆𑀛𑀢𑁆𑀢𑀺𑀓𑀁 𑀥𑀸𑀢𑀼𑀲𑀫𑀽𑀳𑀁. 𑀧𑁄𑀢𑁆𑀣𑀓𑀭𑀽𑀧𑀧𑀝𑀺𑀘𑁆𑀙𑀸𑀤𑀦𑁂 𑀥𑀸𑀢𑀼𑀬𑁄 𑀥𑀸𑀢𑀼𑀲𑀫𑀽𑀳𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀺 𑀯𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀲𑀦𑀁 𑀲𑁆𑀦𑁂𑀳𑀲𑁂𑀘𑀦𑀁, 𑀧𑀽𑀭𑀡𑀁 𑀯𑀸 𑀧𑁄𑀢𑁆𑀣𑀁, 𑀮𑁂𑀧𑀦𑀔𑀦𑀦𑀓𑀺𑀭𑀺𑀬𑀸, 𑀢𑁂𑀦 𑀓𑀢𑀦𑁆𑀢𑀺 𑀧𑁄𑀢𑁆𑀣𑀓𑀁, 𑀢𑀫𑁂𑀯 𑀭𑀽𑀧𑀁 𑀢𑀣𑀸, 𑀔𑀦𑀦𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀁 𑀤𑀸𑀭𑀼𑀫𑀢𑁆𑀢𑀺𑀓𑀸𑀤𑀺𑀭𑀽𑀧𑀫𑀺𑀥𑀸𑀥𑀺𑀧𑁆𑀧𑁂𑀢𑀁. 𑀢𑀲𑁆𑀫𑀸𑀢𑀺 𑀅𑀘𑁂𑀢𑀦𑀢𑁆𑀢𑀸, 𑀅𑀢𑁆𑀢𑀲𑀼𑀜𑁆𑀜𑀪𑀸𑀯𑀢𑁄 𑀯𑀸.

𑀦𑀸𑀕𑀸𑀦𑀁 𑀦𑀺𑀯𑀸𑀲𑁄 𑀯𑀫𑁆𑀫𑀺𑀓𑁄 𑀦𑀸𑀕𑀯𑀫𑁆𑀫𑀺𑀓𑁄. 𑀘𑀺𑀢𑁆𑀢𑀻𑀓𑀭𑀡𑀝𑁆𑀞𑀸𑀦𑀪𑀽𑀢𑁄 𑀭𑀼𑀓𑁆𑀔𑁄 𑀘𑁂𑀢𑀺𑀬𑀭𑀼𑀓𑁆𑀔𑁄. 𑀓𑁂𑀳𑀺𑀘𑀺 𑀲𑀓𑁆𑀓𑀢𑀲𑁆𑀲𑀸𑀧𑀺 𑀓𑁂𑀳𑀺𑀘𑀺 𑀅𑀲𑀓𑁆𑀓𑀢𑀲𑁆𑀲 𑀓𑀸𑀬𑀲𑁆𑀲 𑀉𑀧𑀫𑀸𑀦𑀪𑀸𑀯𑁂𑀦 𑀬𑁄𑀕𑁆𑀬𑀢𑁆𑀢𑀸 𑀢𑁂𑀲𑀫𑀺𑀥 𑀓𑀣𑀦𑀁. 𑀢𑁂𑀳𑀻𑀢𑀺 𑀫𑀸𑀮𑀸𑀕𑀦𑁆𑀥𑀕𑀽𑀣𑀫𑀼𑀢𑁆𑀢𑀸𑀤𑀻𑀳𑀺. 𑀅𑀢𑁆𑀢𑀲𑀼𑀜𑁆𑀜𑀢𑀸𑀬 𑀦𑀸𑀕𑀯𑀫𑁆𑀫𑀺𑀓𑀘𑁂𑀢𑀺𑀬𑀭𑀼𑀓𑁆𑀔𑀸𑀤𑀻𑀳𑀺 𑀯𑀺𑀬 𑀓𑀸𑀬𑀲𑀗𑁆𑀔𑀸𑀢𑁂𑀦 𑀅𑀢𑁆𑀢𑀦𑀸 𑀲𑁄𑀫𑀦𑀲𑁆𑀲𑀁 𑀯𑀸 𑀤𑁄𑀫𑀦𑀲𑁆𑀲𑀁 𑀯𑀸 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀮𑀪𑀺𑀲𑁆𑀲𑀸𑀫𑀺 𑀯𑀸, 𑀦𑁄 𑀯𑀸’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀧𑀼𑀩𑁆𑀩𑀓𑁂𑀦 ‘‘𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀣𑀲𑀫𑁆𑀧𑀲𑁆𑀲𑀦𑁂𑀦𑁂𑀯 𑀕𑀳𑁂𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁 𑀪𑀯𑀢𑀻𑀢𑀺 𑀆𑀳 ‘‘𑀲𑀳𑀲𑀸𑀯 𑀅𑀕𑁆𑀕𑀳𑁂𑀢𑁆𑀯𑀸’’𑀢𑀺𑀆𑀤𑀺.

𑀕𑀭𑀼𑀧𑀢𑁆𑀢𑁄𑀢𑀺 𑀅𑀢𑀺𑀪𑀸𑀭𑀪𑀽𑀢𑁄 𑀧𑀢𑁆𑀢𑁄. 𑀘𑀢𑁆𑀢𑀸𑀭𑁄 𑀯𑀸 𑀧𑀜𑁆𑀘 𑀯𑀸 𑀕𑀡𑁆𑀞𑀺𑀓𑀸 𑀘𑀢𑀼𑀧𑀜𑁆𑀘𑀕𑀡𑁆𑀞𑀺𑀓𑀸 𑀬𑀣𑀸 ‘‘𑀤𑁆𑀯𑀢𑁆𑀢𑀺𑀧𑀢𑁆𑀢𑀸 (𑀧𑀸𑀘𑀺. 𑁨𑁩𑁨), 𑀙𑀧𑁆𑀧𑀜𑁆𑀘𑀯𑀸𑀘𑀸’’𑀢𑀺 (𑀧𑀸𑀘𑀺. 𑁬𑁧) 𑀅𑀜𑁆𑀜𑀧𑀤𑀪𑀽𑀢𑀲𑁆𑀲 𑀳𑀺 𑀯𑀸-𑀲𑀤𑁆𑀤𑀲𑁆𑀲𑁂𑀯 𑀅𑀢𑁆𑀣𑁄 𑀇𑀥 𑀧𑀥𑀸𑀦𑁄 𑀘𑀢𑀼𑀕𑀡𑁆𑀞𑀺𑀓𑀸𑀳𑀢𑁄 𑀯𑀸 𑀧𑀜𑁆𑀘𑀕𑀡𑁆𑀞𑀺𑀓𑀸𑀳𑀢𑁄 𑀯𑀸 𑀧𑀢𑁆𑀢𑁄 𑀤𑀼𑀩𑁆𑀩𑀺𑀲𑁄𑀥𑀦𑀻𑀬𑁄𑀢𑀺 𑀯𑀺𑀓𑀧𑁆𑀧𑀦𑀯𑀲𑁂𑀦 𑀅𑀢𑁆𑀣𑀲𑁆𑀲 𑀕𑀬𑁆𑀳𑀫𑀸𑀦𑀢𑁆𑀢𑀸. 𑀆𑀳𑀢𑀸 𑀘𑀢𑀼𑀧𑀜𑁆𑀘𑀕𑀡𑁆𑀞𑀺𑀓𑀸 𑀬𑀲𑁆𑀲𑀸𑀢𑀺 𑀘𑀢𑀼𑀧𑀜𑁆𑀘𑀕𑀡𑁆𑀞𑀺𑀓𑀸𑀳𑀢𑁄 𑀬𑀣𑀸 ‘‘𑀅𑀕𑁆𑀬𑀸𑀳𑀺𑀢𑁄’’𑀢𑀺, 𑀘𑀢𑀼𑀧𑀜𑁆𑀘𑀕𑀡𑁆𑀞𑀺𑀓𑀸𑀳𑀺 𑀯𑀸 𑀆𑀳𑀢𑁄 𑀢𑀣𑀸, 𑀤𑀼𑀩𑁆𑀩𑀺𑀲𑁄𑀥𑀦𑀻𑀬𑀪𑀸𑀯𑀲𑁆𑀲 𑀳𑁂𑀢𑀼𑀕𑀩𑁆𑀪𑀯𑀘𑀦𑀜𑁆𑀘𑁂𑀢𑀁. 𑀓𑀸𑀫𑀜𑁆𑀘𑀊𑀦𑀧𑀜𑁆𑀘𑀩𑀦𑁆𑀥𑀦𑀲𑀺𑀓𑁆𑀔𑀸𑀧𑀤𑁂 (𑀧𑀸𑀭𑀸. 𑁬𑁧𑁨) 𑀧𑀜𑁆𑀘𑀕𑀡𑁆𑀞𑀺𑀓𑀸𑀳𑀢𑁄𑀧𑀺 𑀧𑀢𑁆𑀢𑁄 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀪𑀸𑀯𑁂𑀦 𑀯𑀼𑀢𑁆𑀢𑁄, 𑀤𑀼𑀩𑁆𑀩𑀺𑀲𑁄𑀥𑀦𑀻𑀬𑀢𑀸𑀫𑀢𑁆𑀢𑁂𑀦 𑀧𑀦 𑀧𑀮𑀺𑀩𑁄𑀥𑀓𑀭𑀡𑀢𑁄 𑀇𑀥 𑀅𑀲𑀧𑁆𑀧𑀸𑀬𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀤𑀼𑀤𑁆𑀥𑁄𑀢𑀧𑀢𑁆𑀢𑁄𑀢𑀺 𑀅𑀕𑀡𑁆𑀞𑀺𑀓𑀸𑀳𑀢𑀫𑁆𑀧𑀺 𑀧𑀓𑀢𑀺𑀬𑀸𑀯 𑀤𑀼𑀩𑁆𑀩𑀺𑀲𑁄𑀥𑀦𑀻𑀬𑀧𑀢𑁆𑀢𑀁 𑀲𑀦𑁆𑀥𑀸𑀬𑀸𑀳. ‘‘𑀢𑀁 𑀥𑁄𑀯𑀦𑁆𑀢𑀲𑁆𑀲𑁂𑀯𑀸’’𑀢𑀺𑀆𑀤𑀺 𑀢𑀤𑀼𑀪𑀬𑀲𑁆𑀲𑀸𑀧𑀺 ¶ 𑀅𑀲𑀧𑁆𑀧𑀸𑀬𑀪𑀸𑀯𑁂 𑀓𑀸𑀭𑀡𑀁. ‘‘𑀫𑀡𑀺𑀯𑀡𑁆𑀡𑀧𑀢𑁆𑀢𑁄 𑀧𑀦 𑀮𑁄𑀪𑀦𑀻𑀬𑁄’’𑀢𑀺 𑀇𑀫𑀺𑀦𑀸 𑀓𑀺𑀜𑁆𑀘𑀸𑀧𑀺 𑀲𑁄 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀓𑀧𑁆𑀧𑀺𑀬𑁄, 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀧𑀦 𑀅𑀦𑁆𑀢𑀭𑀸𑀬𑀓𑀭𑀡𑀢𑁄 𑀅𑀲𑀧𑁆𑀧𑀸𑀬𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀧𑀢𑁆𑀢𑀁 𑀪𑀫𑀁 𑀆𑀭𑁄𑀧𑁂𑀢𑁆𑀯𑀸 𑀫𑀚𑁆𑀚𑀺𑀢𑁆𑀯𑀸 𑀧𑀘𑀦𑁆𑀢𑀺 ‘𑀫𑀡𑀺𑀯𑀡𑁆𑀡𑀁 𑀓𑀭𑀺𑀲𑁆𑀲𑀸𑀫𑀸’𑀢𑀺, 𑀦 𑀯𑀝𑁆𑀝𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁧.𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑁄) 𑀳𑀺 𑀯𑀺𑀦𑀬𑀝𑁆𑀞𑀓𑀣𑀸𑀲𑀼 𑀧𑀘𑀦𑀓𑀺𑀭𑀺𑀬𑀸𑀫𑀢𑁆𑀢𑀫𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀢𑀣𑀸 𑀳𑀺 𑀯𑀤𑀦𑁆𑀢𑀺 ¶ ‘‘𑀫𑀡𑀺𑀯𑀡𑁆𑀡𑀁 𑀧𑀦 𑀧𑀢𑁆𑀢𑀁 𑀅𑀜𑁆𑀜𑁂𑀦 𑀓𑀢𑀁 𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 (𑀲𑀸𑀭𑀢𑁆𑀣. 𑀝𑀻. 𑁨.𑁮𑁫) ‘‘𑀢𑀸𑀤𑀺𑀲𑀜𑁆𑀳𑀺 𑀅𑀭𑀜𑁆𑀜𑁂 𑀏𑀓𑀓𑀲𑁆𑀲 𑀦𑀺𑀯𑀸𑀲𑀦𑁆𑀢𑀭𑀸𑀬𑀓𑀭’’𑀦𑁆𑀢𑀺𑀆𑀤𑀺𑀦𑀸 𑀘𑀻𑀯𑀭𑁂 𑀯𑀼𑀢𑁆𑀢𑀦𑀬𑁂𑀦 ‘‘𑀦𑀺𑀫𑀺𑀢𑁆𑀢𑀓𑀫𑁆𑀫𑀸𑀤𑀺𑀯𑀲𑁂𑀦 𑀮𑀤𑁆𑀥𑁄 𑀧𑀦 𑀏𑀓𑀦𑁆𑀢𑀅𑀓𑀧𑁆𑀧𑀺𑀬𑁄 𑀲𑀻𑀮𑀯𑀺𑀦𑀸𑀲𑀦𑁂𑀦 𑀅𑀦𑀢𑁆𑀣𑀸𑀯𑀳𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀅𑀫𑁆𑀳𑁂𑀳𑀺 𑀯𑀼𑀢𑁆𑀢𑀦𑀬𑁄𑀧𑀺 𑀬𑀣𑀸𑀭𑀳𑀁 𑀦𑁂𑀢𑀩𑁆𑀩𑁄. 𑀲𑁂𑀯𑀫𑀸𑀦𑀲𑁆𑀲𑀸𑀢𑀺 𑀳𑁂𑀢𑁆𑀯𑀦𑁆𑀢𑁄 𑀕𑀥𑀯𑀘𑀦𑀁 𑀅𑀪𑀺𑀯𑀟𑁆𑀠𑀦𑀧𑀭𑀺𑀳𑀸𑀬𑀦𑀲𑁆𑀲.

‘‘𑀅𑀩𑁆𑀪𑀦𑁆𑀢𑀭𑁂’’𑀢𑀺𑀆𑀤𑀺 𑀲𑀗𑁆𑀔𑁂𑀧𑁄. ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀅𑀢𑁆𑀢𑀲𑀼𑀜𑁆𑀜𑀢𑀸𑀯𑀺𑀪𑀸𑀯𑀦𑁂𑀦 𑀯𑀺𑀢𑁆𑀣𑀸𑀭𑁄. 𑀲𑀡𑁆𑀟𑀸𑀲𑁂𑀦𑀸𑀢𑀺 𑀓𑀫𑁆𑀫𑀸𑀭𑀸𑀦𑀁 𑀅𑀬𑁄𑀕𑀳𑀡𑀯𑀺𑀲𑁂𑀲𑁂𑀦. 𑀅𑀕𑁆𑀕𑀺𑀯𑀡𑁆𑀡𑀧𑀢𑁆𑀢𑀕𑁆𑀕𑀳𑀡𑁂𑀢𑀺 𑀅𑀕𑁆𑀕𑀺𑀦𑀸 𑀛𑀸𑀧𑀺𑀢𑀢𑁆𑀢𑀸 𑀅𑀕𑁆𑀕𑀺𑀯𑀡𑁆𑀡𑀪𑀽𑀢𑀧𑀢𑁆𑀢𑀲𑁆𑀲 𑀕𑀳𑀡𑁂. 𑀭𑀸𑀕𑀸𑀤𑀺𑀧𑀭𑀺𑀴𑀸𑀳𑀚𑀦𑀓𑀧𑀢𑁆𑀢𑀲𑁆𑀲 𑀈𑀤𑀺𑀲𑀫𑁂𑀯 𑀉𑀧𑀫𑀸𑀦𑀁 𑀬𑀼𑀢𑁆𑀢𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀁.

‘‘𑀅𑀧𑀺𑀘𑀸’’𑀢𑀺𑀆𑀤𑀺𑀦𑀸 𑀲𑀗𑁆𑀖𑀸𑀝𑀺𑀘𑀻𑀯𑀭𑀧𑀢𑁆𑀢𑀥𑀸𑀭𑀡𑁂𑀲𑀼 𑀏𑀓𑀢𑁄 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀤𑀲𑁆𑀲𑁂𑀢𑀺. 𑀙𑀺𑀦𑁆𑀦𑀳𑀢𑁆𑀣𑀧𑀸𑀤𑁂 𑀅𑀦𑀸𑀣𑀫𑀦𑀼𑀲𑁆𑀲𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀻𑀮𑀫𑀓𑁆𑀔𑀺𑀓𑀸 𑀦𑀸𑀫 𑀆𑀲𑀸𑀝𑀺𑀓𑀓𑀸𑀭𑀺𑀓𑀸. 𑀕𑀯𑀸𑀤𑀻𑀦𑀜𑁆𑀳𑀺 𑀯𑀡𑁂𑀲𑀼 𑀦𑀻𑀮𑀫𑀓𑁆𑀔𑀺𑀓𑀸𑀳𑀺 𑀓𑀢𑀸 𑀅𑀦𑀬𑀩𑁆𑀬𑀲𑀦𑀳𑁂𑀢𑀼𑀪𑀽𑀢𑀸 𑀅𑀡𑁆𑀟𑀓𑀸 𑀆𑀲𑀸𑀝𑀺𑀓𑀸 𑀦𑀸𑀫 𑀯𑀼𑀘𑁆𑀘𑀢𑀺. 𑀅𑀦𑀸𑀣𑀲𑀸𑀮𑀸𑀬𑀦𑁆𑀢𑀺 𑀅𑀦𑀸𑀣𑀸𑀦𑀁 𑀦𑀺𑀯𑀸𑀲𑀲𑀸𑀮𑀸𑀬𑀁. 𑀤𑀬𑀸𑀮𑀼𑀓𑀸𑀢𑀺 𑀓𑀭𑀼𑀡𑀸𑀩𑀳𑀼𑀮𑀸. 𑀯𑀡𑀫𑀢𑁆𑀢𑀘𑁄𑀴𑀓𑀸𑀦𑀻𑀢𑀺 𑀯𑀡𑀧𑁆𑀧𑀫𑀸𑀡𑁂𑀦 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀸𑀬 𑀙𑀺𑀦𑁆𑀦𑀘𑁄𑀴𑀔𑀡𑁆𑀟𑀓𑀸𑀦𑀺. 𑀓𑁂𑀲𑀜𑁆𑀘𑀻𑀢𑀺 𑀩𑀳𑀽𑀲𑀼 𑀓𑁂𑀲𑀜𑁆𑀘𑀺 𑀅𑀦𑀸𑀣𑀫𑀦𑀼𑀲𑁆𑀲𑀸𑀦𑀁. 𑀣𑀽𑀮𑀸𑀦𑀻𑀢𑀺 𑀣𑀤𑁆𑀥𑀸𑀦𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑀸𑀧𑀼𑀡𑀦𑁂, 𑀪𑀸𑀯𑀮𑀓𑁆𑀔𑀡𑁂, 𑀦𑀺𑀫𑀺𑀢𑁆𑀢𑁂 𑀯𑀸 𑀏𑀢𑀁 𑀪𑀼𑀫𑁆𑀫𑀁. 𑀓𑀲𑁆𑀫𑀸𑀢𑀺 𑀯𑀼𑀢𑁆𑀢𑀁 ‘‘𑀯𑀡𑀧𑀝𑀺𑀘𑁆𑀙𑀸𑀤𑀦𑀫𑀢𑁆𑀢𑁂𑀦𑁂𑀯𑀸’’𑀢𑀺𑀆𑀤𑀺. 𑀘𑁄𑀴𑀓𑁂𑀦, 𑀓𑀧𑀸𑀮𑁂𑀦𑀸𑀢𑀺 𑀘 𑀅𑀢𑁆𑀣𑀬𑁄𑀕𑁂 𑀓𑀫𑁆𑀫𑀢𑁆𑀣𑁂 𑀢𑀢𑀺𑀬𑀸, 𑀓𑀭𑀡𑀢𑁆𑀣𑁂 𑀯𑀸. 𑀯𑀡𑀧𑀝𑀺𑀘𑁆𑀙𑀸𑀤𑀦𑀫𑀢𑁆𑀢𑁂𑀦𑁂𑀯 𑀪𑁂𑀲𑀚𑁆𑀚𑀓𑀭𑀡𑀫𑀢𑁆𑀢𑁂𑀦𑁂𑀯𑀸𑀢𑀺 𑀧𑀦 𑀯𑀺𑀲𑁂𑀲𑀦𑀁, 𑀦 𑀧𑀦 𑀫𑀡𑁆𑀟𑀦𑀸𑀦𑀼𑀪𑀯𑀦𑀸𑀤𑀺𑀧𑁆𑀧𑀓𑀸𑀭𑁂𑀦 𑀅𑀢𑁆𑀣𑁄𑀢𑀺. 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀤𑀻𑀳𑀺 𑀦𑀺𑀘𑁆𑀘𑀸𑀢𑀼𑀭𑀲𑁆𑀲 𑀓𑀸𑀬𑀲𑁆𑀲 𑀧𑀭𑀺𑀪𑁄𑀕𑀪𑀽𑀢𑀸𑀦𑀁 𑀧𑀢𑁆𑀢𑀘𑀻𑀯𑀭𑀸𑀦𑀁 𑀏𑀤𑀺𑀲𑀫𑁂𑀯 𑀉𑀧𑀫𑀸𑀦𑀫𑀼𑀧𑀧𑀦𑁆𑀦𑀦𑁆𑀢𑀺 𑀢𑀣𑀸 𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀲𑀼𑀔𑀼𑀫𑀢𑁆𑀢𑀲𑀮𑁆𑀮𑀓𑁆𑀔𑀡𑁂𑀦 𑀉𑀢𑁆𑀢𑀫𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲 𑀓𑀭𑀡𑀲𑀻𑀮𑀢𑁆𑀢𑀸, 𑀧𑀼𑀭𑀺𑀫𑁂𑀳𑀺 𑀘 𑀲𑀫𑁆𑀧𑀚𑀸𑀦𑀓𑀸𑀭𑀻𑀳𑀺 𑀉𑀢𑁆𑀢𑀫𑀢𑁆𑀢𑀸 𑀉𑀢𑁆𑀢𑀫𑀲𑀫𑁆𑀧𑀚𑀸𑀦𑀓𑀸𑀭𑀻.

𑀅𑀲𑀦𑀸𑀤𑀺𑀓𑀺𑀭𑀺𑀬𑀸𑀬 ¶ 𑀓𑀫𑁆𑀫𑀯𑀺𑀲𑁂𑀲𑀬𑁄𑀕𑀢𑁄 𑀅𑀲𑀺𑀢𑀸𑀤𑀺𑀧𑀤𑁂𑀳𑁂𑀯 𑀓𑀫𑁆𑀫𑀯𑀺𑀲𑁂𑀲𑀲𑀳𑀺𑀢𑁄 𑀓𑀺𑀭𑀺𑀬𑀸𑀯𑀺𑀲𑁂𑀲𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀲𑀺𑀢𑁂𑀢𑀺 𑀧𑀺𑀡𑁆𑀟𑀧𑀸𑀢𑀪𑁄𑀚𑀦𑁂’’𑀢𑀺𑀆𑀤𑀺. 𑀅𑀝𑁆𑀞𑀯𑀺𑀥𑁄𑀧𑀺 𑀅𑀢𑁆𑀣𑁄𑀢𑀺 𑀅𑀝𑁆𑀞𑀧𑁆𑀧𑀓𑀸𑀭𑁄𑀧𑀺 𑀧𑀬𑁄𑀚𑀦𑀯𑀺𑀲𑁂𑀲𑁄.

𑀢𑀢𑁆𑀣 𑀧𑀺𑀡𑁆𑀟𑀧𑀸𑀢𑀪𑁄𑀚𑀦𑀸𑀤𑀻𑀲𑀼 𑀅𑀢𑁆𑀣𑁄 𑀦𑀸𑀫 𑀇𑀫𑀺𑀦𑀸 𑀫𑀳𑀸𑀲𑀺𑀯𑀢𑁆𑀣𑁂𑀭𑀯𑀸𑀤𑀯𑀲𑁂𑀦 ‘‘𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁪.𑁧𑁨𑁦; 𑀅. 𑀦𑀺. 𑁬.𑁫𑁮; 𑁮.𑁯; 𑀥. 𑀲. 𑁧𑁩𑁫𑁫; 𑀫𑀳𑀸𑀦𑀺. 𑁨𑁦𑁬) 𑀲𑀼𑀢𑁆𑀢𑁂 ¶ 𑀯𑀼𑀢𑁆𑀢𑀁 𑀅𑀝𑁆𑀞𑀯𑀺𑀥𑀫𑁆𑀧𑀺 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀺. 𑀫𑀳𑀸𑀲𑀺𑀯𑀢𑁆𑀣𑁂𑀭𑁄 (𑀥. 𑀲. 𑁧.𑁧𑁩𑁫𑁫) 𑀳𑀺 ‘‘𑀳𑁂𑀝𑁆𑀞𑀸 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀧𑀝𑀺𑀓𑁆𑀔𑁂𑀧𑁄 𑀦𑀸𑀫, 𑀉𑀧𑀭𑀺 𑀧𑀦 𑀅𑀝𑁆𑀞𑀗𑁆𑀕𑀸𑀦𑀺 𑀧𑀬𑁄𑀚𑀦𑀯𑀲𑁂𑀦 𑀲𑀫𑁄𑀥𑀸𑀦𑁂𑀢𑀩𑁆𑀩𑀸𑀦𑀻’’𑀢𑀺 𑀯𑀤𑀢𑀺. 𑀢𑀢𑁆𑀣 ‘‘𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸’’𑀢𑀺 𑀏𑀓𑀫𑀗𑁆𑀕𑀁, ‘‘𑀬𑀸𑀧𑀦𑀸𑀬𑀸’’𑀢𑀺 𑀏𑀓𑀁, ‘‘𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸’’𑀢𑀺 𑀏𑀓𑀁, ‘‘𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬𑀸’’𑀢𑀺 𑀏𑀓𑀁, ‘‘𑀇𑀢𑀺 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀻’’𑀢𑀺 𑀏𑀓𑀁, ‘‘𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀏𑀓𑀁, ‘‘𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀓𑀁, ‘‘𑀅𑀦𑀯𑀚𑁆𑀚𑀢𑀸 𑀘𑀸’’𑀢𑀺 𑀏𑀓𑀁, 𑀨𑀸𑀲𑀼𑀯𑀺𑀳𑀸𑀭𑁄 𑀧𑀦 𑀪𑁄𑀚𑀦𑀸𑀦𑀺𑀲𑀁𑀲𑀫𑀢𑁆𑀢𑀦𑁆𑀢𑀺 𑀏𑀯𑀁 𑀅𑀝𑁆𑀞 𑀅𑀗𑁆𑀕𑀸𑀦𑀺 𑀧𑀬𑁄𑀚𑀦𑀯𑀲𑁂𑀦 𑀲𑀫𑁄𑀥𑀸𑀦𑁂𑀢𑀩𑁆𑀩𑀸𑀦𑀺. 𑀅𑀜𑁆𑀜𑀣𑀸 𑀧𑀦 ‘‘𑀦𑁂𑀯 𑀤𑀯𑀸𑀬𑀸’’𑀢𑀺 𑀏𑀓𑀫𑀗𑁆𑀕𑀁, ‘‘𑀦 𑀫𑀤𑀸𑀬𑀸’’𑀢𑀺 𑀏𑀓𑀁, ‘‘𑀦 𑀫𑀡𑁆𑀟𑀦𑀸𑀬𑀸’’𑀢𑀺 𑀏𑀓𑀁, ‘‘𑀦 𑀯𑀺𑀪𑀽𑀲𑀦𑀸𑀬𑀸’’𑀢𑀺 𑀏𑀓𑀁, ‘‘𑀬𑀸𑀯𑀤𑁂𑀯 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸 𑀬𑀸𑀧𑀦𑀸𑀬𑀸’’𑀢𑀺 𑀏𑀓𑀁, ‘‘𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬𑀸’’𑀢𑀺 𑀏𑀓𑀁, ‘‘𑀇𑀢𑀺 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀺, 𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀏𑀓𑀁, ‘‘𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀓𑀁, ‘‘𑀅𑀦𑀯𑀚𑁆𑀚𑀢𑀸 𑀘 𑀨𑀸𑀲𑀼𑀯𑀺𑀳𑀸𑀭𑁄 𑀘𑀸’’𑀢𑀺 𑀧𑀦 𑀪𑁄𑀚𑀦𑀸𑀦𑀺𑀲𑀁𑀲𑀫𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀸𑀦𑀺 𑀅𑀝𑁆𑀞𑀗𑁆𑀕𑀸𑀦𑀺 𑀇𑀥𑀸𑀦𑀥𑀺𑀧𑁆𑀧𑁂𑀢𑀸𑀦𑀺. 𑀓𑀲𑁆𑀫𑀸𑀢𑀺 𑀘𑁂? 𑀧𑀬𑁄𑀚𑀦𑀸𑀦𑀫𑁂𑀯 𑀅𑀪𑀸𑀯𑀢𑁄, 𑀢𑁂𑀲𑀫𑁂𑀯 𑀘 𑀇𑀥 𑀅𑀢𑁆𑀣𑀲𑀤𑁆𑀤𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀦𑀦𑀼 𑀘 ‘‘𑀦𑁂𑀯𑀤𑀯𑀸𑀬𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁄’’𑀢𑀺 𑀫𑀭𑀺𑀬𑀸𑀤𑀯𑀘𑀦𑁂𑀦 𑀤𑀼𑀢𑀺𑀬𑀦𑀬𑀲𑁆𑀲𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀻𑀢𑀺? 𑀦, ‘‘𑀦𑁂𑀯 𑀤𑀯𑀸𑀬𑀸’’𑀢𑀺𑀆𑀤𑀺𑀦𑀸 𑀧𑀝𑀺𑀓𑁆𑀔𑁂𑀧𑀗𑁆𑀕𑀤𑀲𑁆𑀲𑀦𑀫𑀼𑀔𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀧𑀸𑀴𑀺𑀬𑀸 𑀤𑁂𑀲𑀺𑀢𑀢𑁆𑀢𑀸, 𑀬𑀣𑀸𑀤𑁂𑀲𑀺𑀢𑀢𑀦𑁆𑀢𑀺𑀓𑁆𑀓𑀫𑀲𑁆𑀲𑁂𑀯 𑀫𑀭𑀺𑀬𑀸𑀤𑀪𑀸𑀯𑁂𑀦 𑀤𑀲𑁆𑀲𑀦𑀢𑁄. 𑀧𑀸𑀞𑀓𑁆𑀓𑀫𑁂𑀦𑁂𑀯 𑀳𑀺 ‘‘𑀦𑁂𑀯 𑀤𑀯𑀸𑀬𑀸𑀢𑀺𑀆𑀤𑀺𑀦𑀸 𑀦𑀬𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀦 𑀅𑀢𑁆𑀣𑀓𑁆𑀓𑀫𑁂𑀦, 𑀢𑁂𑀦 𑀧𑀦 ‘‘𑀇𑀫𑀲𑁆𑀲 𑀓𑀸𑀬𑀲𑁆𑀲 𑀞𑀺𑀢𑀺𑀬𑀸𑀢𑀺𑀆𑀤𑀺𑀦𑀸 𑀦𑀬𑁂𑀦𑀸’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺.

𑀢𑀺𑀥𑀸 ¶ 𑀤𑁂𑀦𑁆𑀢𑁂 𑀤𑁆𑀯𑀺𑀥𑀸 𑀕𑀸𑀳𑀁 𑀲𑀦𑁆𑀥𑀸𑀬 ‘‘𑀧𑀝𑀺𑀕𑁆𑀕𑀳𑀡𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁, 𑀪𑁄𑀚𑀦𑀸𑀤𑀺𑀕𑀳𑀡𑀢𑁆𑀣𑀸𑀬 𑀳𑀢𑁆𑀣𑀑𑀢𑀸𑀭𑀡𑀁 𑀪𑀼𑀜𑁆𑀚𑀦𑀸𑀤𑀺𑀅𑀢𑁆𑀣𑀸𑀬 𑀆𑀮𑁄𑀧𑀓𑀭𑀡𑀦𑁆𑀢𑀺𑀆𑀤𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀪𑀼𑀜𑁆𑀚𑀦𑀸𑀤𑀺𑀧𑀬𑁄𑀕𑁄 𑀯𑀸𑀬𑁄𑀥𑀸𑀢𑀼𑀯𑀲𑁂𑀦𑁂𑀯 𑀯𑀺𑀪𑀸𑀯𑀺𑀢𑁄. 𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦𑁂𑀯𑀸𑀢𑀺 𑀏𑀢𑁆𑀣 𑀏𑀯-𑀲𑀤𑁆𑀤𑁂𑀦 𑀦𑀺𑀯𑀢𑁆𑀢𑁂𑀢𑀩𑁆𑀩𑀁 𑀤𑀲𑁆𑀲𑁂𑀢𑀺 ‘‘𑀦 𑀓𑁄𑀘𑀻’’𑀢𑀺𑀆𑀤𑀺𑀦𑀸. 𑀓𑀼𑀜𑁆𑀘𑀺𑀓𑀸 𑀦𑀸𑀫 𑀅𑀯𑀸𑀧𑀼𑀭𑀡𑀁, 𑀬𑀁 ‘‘𑀢𑀸𑀴𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀬𑀦𑁆𑀢𑀓𑁂𑀦𑀸𑀢𑀺 𑀘𑀓𑁆𑀓𑀬𑀦𑁆𑀢𑀓𑁂𑀦. 𑀬𑀢𑀢𑀺 𑀉𑀕𑁆𑀖𑀸𑀝𑀦𑀦𑀺𑀕𑁆𑀖𑀸𑀝𑀦𑀉𑀓𑁆𑀔𑀺𑀧𑀦𑀦𑀺𑀓𑁆𑀔𑀺𑀧𑀦𑀸𑀤𑀻𑀲𑀼 𑀯𑀸𑀬𑀫𑀢𑀺 𑀏𑀢𑁂𑀦𑀸𑀢𑀺 𑀳𑀺 𑀬𑀦𑁆𑀢𑀓𑀁. 𑀲𑀜𑁆𑀘𑀼𑀡𑁆𑀡𑀓𑀭𑀡𑀁 𑀫𑀼𑀲𑀮𑀓𑀺𑀘𑁆𑀘𑀁. 𑀅𑀦𑁆𑀢𑁄𑀓𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑀦𑀁 𑀉𑀤𑀼𑀓𑁆𑀔𑀮𑀓𑀺𑀘𑁆𑀘𑀁. 𑀆𑀮𑁄𑀴𑀺𑀢𑀯𑀺𑀮𑁄𑀴𑀺𑀢𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀁 𑀳𑀢𑁆𑀣𑀓𑀺𑀘𑁆𑀘𑀁. 𑀇𑀢𑀻𑀢𑀺 𑀏𑀯𑀁. 𑀢𑀢𑁆𑀣𑀸𑀢𑀺 𑀳𑀢𑁆𑀣𑀓𑀺𑀘𑁆𑀘𑀲𑀸𑀥𑀦𑁂, 𑀪𑀸𑀯𑀮𑀓𑁆𑀔𑀡𑁂, 𑀦𑀺𑀫𑀺𑀢𑁆𑀢𑁂 𑀯𑀸 𑀪𑀼𑀫𑁆𑀫𑀁. 𑀢𑀦𑀼𑀓𑀔𑁂𑀴𑁄𑀢𑀺 𑀧𑀲𑀦𑁆𑀦𑀔𑁂𑀴𑁄. 𑀩𑀳𑀮𑀔𑁂𑀴𑁄𑀢𑀺 𑀆𑀯𑀺𑀮𑀔𑁂𑀴𑁄. 𑀚𑀺𑀯𑁆𑀳𑀸𑀲𑀗𑁆𑀔𑀸𑀢𑁂𑀦 𑀳𑀢𑁆𑀣𑁂𑀦 𑀆𑀮𑁄𑀴𑀺𑀢𑀯𑀺𑀮𑁄𑀴𑀺𑀢𑀯𑀲𑁂𑀦 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀯𑀢𑁆𑀢𑀓𑀁 𑀚𑀺𑀯𑁆𑀳𑀸𑀳𑀢𑁆𑀣𑀧𑀭𑀺𑀯𑀢𑁆𑀢𑀓𑀁. 𑀓𑀝𑀘𑁆𑀙𑀼, 𑀤𑀩𑁆𑀩𑀻𑀢𑀺 𑀓𑀢𑁆𑀣𑀘𑀺 𑀧𑀭𑀺𑀬𑀸𑀬𑀯𑀘𑀦𑀁. ‘‘𑀧𑀼𑀫𑁂 𑀓𑀝𑀘𑁆𑀙𑀼 𑀤𑀩𑁆𑀩𑀺𑀢𑁆𑀣𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀇𑀥 𑀧𑀦 𑀬𑁂𑀦 𑀪𑁄𑀚𑀦𑀸𑀤𑀻𑀦𑀺 𑀅𑀦𑁆𑀢𑁄𑀓𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀲𑁄 𑀓𑀝𑀘𑁆𑀙𑀼, 𑀬𑀸𑀬 𑀧𑀦 𑀢𑁂𑀲𑀫𑀼𑀤𑁆𑀥𑀭𑀡𑀸𑀤𑀻𑀦𑀺 𑀓𑀭𑁄𑀢𑀺, 𑀲𑀸 ¶ 𑀤𑀩𑁆𑀩𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀮𑀸𑀮𑀲𑀦𑁆𑀣𑀸𑀭𑀦𑁆𑀢𑀺 𑀧𑀢𑀺𑀝𑁆𑀞𑀸𑀦𑀪𑀽𑀢𑀁 𑀧𑀮𑀸𑀮𑀸𑀤𑀺𑀲𑀦𑁆𑀣𑀸𑀭𑀁. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀳𑁂𑀢𑀁. 𑀥𑀸𑀭𑁂𑀦𑁆𑀢𑁄𑀢𑀺 𑀧𑀢𑀺𑀝𑁆𑀞𑀸𑀦𑀪𑀸𑀯𑁂𑀦 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄. 𑀧𑀣𑀯𑀻𑀲𑀦𑁆𑀥𑀸𑀭𑀓𑀚𑀮𑀲𑁆𑀲 𑀢𑀁𑀲𑀦𑁆𑀥𑀸𑀭𑀓𑀯𑀸𑀬𑀼𑀦𑀸 𑀯𑀺𑀬 𑀧𑀭𑀺𑀪𑀼𑀢𑁆𑀢𑀸𑀳𑀸𑀭𑀲𑁆𑀲 𑀯𑀸𑀬𑁄𑀥𑀸𑀢𑀼𑀦𑀸𑀯 𑀆𑀫𑀸𑀲𑀬𑁂 𑀅𑀯𑀝𑁆𑀞𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀯𑀸𑀬𑁄𑀥𑀸𑀢𑀼𑀯𑀲𑁂𑀦𑁂𑀯 𑀢𑀺𑀝𑁆𑀞𑀢𑀻’’𑀢𑀺 𑀇𑀫𑀺𑀦𑀸. 𑀢𑀣𑀸 𑀧𑀭𑀺𑀪𑀼𑀢𑁆𑀢𑀜𑁆𑀳𑀺 𑀆𑀳𑀸𑀭𑀁 𑀯𑀸𑀬𑁄𑀥𑀸𑀢𑀼 𑀳𑁂𑀝𑁆𑀞𑀸 𑀘 𑀢𑀺𑀭𑀺𑀬𑀜𑁆𑀘 𑀖𑀦𑀁 𑀧𑀭𑀺𑀯𑀝𑀼𑀫𑀁 𑀓𑀢𑁆𑀯𑀸 𑀬𑀸𑀯 𑀧𑀓𑁆𑀓𑀸 𑀲𑀦𑁆𑀦𑀺𑀭𑀼𑀚𑁆𑀛𑀦𑀯𑀲𑁂𑀦 𑀆𑀫𑀸𑀲𑀬𑁂 𑀧𑀢𑀺𑀝𑁆𑀞𑀺𑀢𑀁 𑀓𑀭𑁄𑀢𑀻𑀢𑀺. 𑀉𑀤𑁆𑀥𑀦𑀁 𑀦𑀸𑀫 𑀬𑀢𑁆𑀣 𑀉𑀓𑁆𑀔𑀮𑀺𑀬𑀸𑀤𑀻𑀦𑀺 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀘𑀦𑁆𑀢𑀺, 𑀬𑀸 ‘‘𑀘𑀼𑀮𑁆𑀮𑀻’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀭𑀲𑁆𑀲𑀤𑀡𑁆𑀟𑁄 𑀤𑀡𑁆𑀟𑀓𑁄. 𑀧𑀢𑁄𑀤𑁄 𑀬𑀝𑁆𑀞𑀺. 𑀇𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑀢𑀺𑀤𑀺𑀲𑀢𑀺. 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲𑁂𑀯 𑀳𑀺 𑀥𑀸𑀢𑀼𑀯𑀲𑁂𑀦 𑀯𑀺𑀪𑀸𑀯𑀦𑀸. 𑀢𑀢𑁆𑀣 𑀅𑀢𑀺𑀳𑀭𑀢𑀻𑀢𑀺 𑀬𑀸𑀯 𑀫𑀼𑀔𑀸 𑀅𑀪𑀺𑀳𑀭𑀢𑀺. 𑀯𑀻𑀢𑀺𑀳𑀭𑀢𑀻𑀢𑀺 𑀢𑀢𑁄 𑀓𑀼𑀘𑁆𑀙𑀺𑀬𑀁 𑀯𑀺𑀫𑀺𑀲𑁆𑀲𑀁 𑀓𑀭𑁄𑀦𑁆𑀢𑁄 𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁨𑁧𑁪) 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁄, 𑀆𑀘𑀭𑀺𑀬𑀸𑀦𑀦𑁆𑀤𑀢𑁆𑀣𑁂𑀭𑁄 𑀧𑀦 ‘‘𑀢𑀢𑁄 𑀬𑀸𑀯 𑀓𑀼𑀘𑁆𑀙𑀺, 𑀢𑀸𑀯 𑀳𑀭𑀢𑀻’’𑀢𑀺 (𑀯𑀺𑀪. 𑀫𑀽𑀮𑀝𑀻. 𑁫𑁨𑁩) 𑀆𑀳. 𑀢𑀤𑀼𑀪𑀬𑀫𑁆𑀧𑀺 𑀅𑀢𑁆𑀣𑀢𑁄 𑀏𑀓𑀫𑁂𑀯 𑀉𑀪𑀬𑀢𑁆𑀣𑀸𑀧𑀺 𑀓𑀼𑀘𑁆𑀙𑀺𑀲𑀫𑁆𑀩𑀦𑁆𑀥𑀫𑀢𑁆𑀢𑀁 𑀳𑀭𑀡𑀲𑁆𑀲𑁂𑀯 𑀅𑀥𑀺𑀧𑁆𑀧𑁂𑀢𑀢𑁆𑀢𑀸.

𑀅𑀧𑀺𑀘 𑀅𑀢𑀺𑀳𑀭𑀢𑀻𑀢𑀺 𑀫𑀼𑀔𑀤𑁆𑀯𑀸𑀭𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑁄 𑀳𑀭𑀢𑀺. 𑀯𑀻𑀢𑀺𑀳𑀭𑀢𑀻𑀢𑀺 𑀓𑀼𑀘𑁆𑀙𑀺𑀕𑀢𑀁 𑀧𑀲𑁆𑀲𑀢𑁄 𑀳𑀭𑀢𑀺. 𑀥𑀸𑀭𑁂𑀢𑀻𑀢𑀺 𑀆𑀫𑀸𑀲𑀬𑁂 𑀧𑀢𑀺𑀝𑁆𑀞𑀺𑀢𑀁 𑀓𑀭𑁄𑀢𑀺 ¶ . 𑀧𑀭𑀺𑀯𑀢𑁆𑀢𑁂𑀢𑀻𑀢𑀺 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑀦𑀁 𑀓𑀭𑁄𑀢𑀺. 𑀲𑀜𑁆𑀘𑀼𑀡𑁆𑀡𑁂𑀢𑀻𑀢𑀺 𑀫𑀼𑀲𑀮𑁂𑀦 𑀯𑀺𑀬 𑀲𑀜𑁆𑀘𑀼𑀡𑁆𑀡𑀦𑀁 𑀓𑀭𑁄𑀢𑀺. 𑀯𑀺𑀲𑁄𑀲𑁂𑀢𑀻𑀢𑀺 𑀯𑀺𑀲𑁄𑀲𑀦𑀁 𑀦𑀸𑀢𑀺𑀲𑀼𑀓𑁆𑀔𑀁 𑀓𑀭𑁄𑀢𑀺. 𑀦𑀻𑀳𑀭𑀢𑀻𑀢𑀺 𑀓𑀼𑀘𑁆𑀙𑀺𑀢𑁄 𑀩𑀳𑀺 𑀦𑀺𑀤𑁆𑀥𑀸𑀭𑁂𑀢𑀺. 𑀧𑀣𑀯𑀻𑀥𑀸𑀢𑀼𑀓𑀺𑀘𑁆𑀘𑁂𑀲𑀼𑀧𑀺 𑀬𑀣𑀸𑀯𑀼𑀢𑁆𑀢𑁄𑀬𑁂𑀯 𑀅𑀢𑁆𑀣𑁄. 𑀢𑀸𑀦𑀺 𑀧𑀦 𑀆𑀳𑀸𑀭𑀲𑁆𑀲 𑀥𑀸𑀭𑀡𑀧𑀭𑀺𑀯𑀢𑁆𑀢𑀦𑀲𑀜𑁆𑀘𑀼𑀡𑁆𑀡𑀦𑀯𑀺𑀲𑁄𑀲𑀦𑀸𑀦𑀺 𑀧𑀣𑀯𑀻𑀲𑀳𑀺𑀢𑀸 𑀏𑀯 𑀯𑀸𑀬𑁄𑀥𑀸𑀢𑀼 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀓𑁂𑀯𑀮𑀸, 𑀢𑀲𑁆𑀫𑀸 𑀢𑀸𑀦𑀺 𑀧𑀣𑀯𑀻𑀥𑀸𑀢𑀼𑀬𑀸𑀧𑀺 𑀓𑀺𑀘𑁆𑀘𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀺. 𑀲𑀺𑀦𑁂𑀳𑁂𑀢𑀻𑀢𑀺 𑀢𑁂𑀫𑁂𑀢𑀺. 𑀅𑀮𑁆𑀮𑀢𑁆𑀢𑀜𑁆𑀘 𑀅𑀦𑀼𑀧𑀸𑀮𑁂𑀢𑀻𑀢𑀺 𑀬𑀣𑀸 𑀯𑀸𑀬𑁄𑀥𑀸𑀢𑀼𑀆𑀤𑀻𑀳𑀺 𑀅𑀢𑀺𑀯𑀺𑀬 𑀲𑁄𑀲𑀦𑀁 𑀦 𑀳𑁄𑀢𑀺, 𑀢𑀣𑀸 𑀅𑀮𑁆𑀮𑀪𑀸𑀯𑀜𑁆𑀘 𑀦𑀸𑀢𑀺𑀅𑀮𑁆𑀮𑀢𑀸𑀓𑀭𑀡𑀯𑀲𑁂𑀦 𑀅𑀦𑀼𑀧𑀸𑀮𑁂𑀢𑀺. 𑀅𑀜𑁆𑀚𑀲𑁄𑀢𑀺 𑀆𑀳𑀸𑀭𑀲𑁆𑀲 𑀧𑀯𑀺𑀲𑀦𑀧𑀭𑀺𑀯𑀢𑁆𑀢𑀦𑀦𑀺𑀓𑁆𑀔𑀫𑀦𑀸𑀤𑀻𑀦𑀁 𑀫𑀕𑁆𑀕𑁄. 𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀧𑀭𑀺𑀬𑁂𑀲𑀦𑀚𑁆𑀛𑁄𑀳𑀭𑀡𑀸𑀤𑀺𑀯𑀺𑀚𑀸𑀦𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀭𑀺𑀬𑁂𑀲𑀦𑀚𑁆𑀛𑁄𑀳𑀭𑀡𑀸𑀤𑀺𑀓𑀺𑀘𑁆𑀘𑁂. 𑀢𑀁𑀢𑀁𑀯𑀺𑀚𑀸𑀦𑀦𑀲𑁆𑀲 𑀧𑀘𑁆𑀘𑀬𑀪𑀽𑀢𑁄 𑀢𑀁𑀦𑀺𑀧𑁆𑀨𑀸𑀤𑀓𑁄𑀬𑁂𑀯 𑀧𑀬𑁄𑀕𑁄 𑀲𑀫𑁆𑀫𑀸𑀧𑀬𑁄𑀕𑁄 𑀦𑀸𑀫. 𑀬𑁂𑀦 𑀳𑀺 𑀧𑀬𑁄𑀕𑁂𑀦 𑀧𑀭𑀺𑀬𑁂𑀲𑀦𑀸𑀤𑀺 𑀦𑀺𑀧𑁆𑀨𑀚𑁆𑀚𑀢𑀺,. 𑀲𑁄 𑀢𑀩𑁆𑀩𑀺𑀲𑀬𑀯𑀺𑀚𑀸𑀦𑀦𑀫𑁆𑀧𑀺 𑀦𑀺𑀧𑁆𑀨𑀸𑀤𑁂𑀢𑀺 𑀦𑀸𑀫 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀢𑀫𑀦𑁆𑀯𑀸𑀬 𑀆𑀕𑀫𑁆𑀫𑀸𑀢𑀺 𑀅𑀢𑁆𑀣𑁄. 𑀆𑀪𑀼𑀚𑀢𑀻𑀢𑀺 𑀧𑀭𑀺𑀬𑁂𑀲𑀦𑀯𑀲𑁂𑀦, 𑀅𑀚𑁆𑀛𑀸𑀳𑀭𑀡𑀚𑀺𑀡𑁆𑀡𑀸𑀚𑀺𑀡𑁆𑀡𑀢𑀸𑀤𑀺𑀧𑀝𑀺𑀲𑀁𑀯𑁂𑀤𑀦𑀯𑀲𑁂𑀦 𑀘 𑀢𑀸𑀦𑀺 𑀧𑀭𑀺𑀬𑁂𑀲𑀦𑀚𑁆𑀛𑁄𑀳𑀭𑀡𑀚𑀺𑀡𑁆𑀡𑀸𑀚𑀺𑀡𑁆𑀡𑀢𑀸𑀤𑀻𑀦𑀺 𑀆𑀯𑀚𑁆𑀚𑁂𑀢𑀺 𑀯𑀺𑀚𑀸𑀦𑀸𑀢𑀺. 𑀆𑀯𑀚𑁆𑀚𑀦𑀧𑀼𑀩𑁆𑀩𑀓𑀢𑁆𑀢𑀸 𑀯𑀺𑀚𑀸𑀦𑀦𑀲𑁆𑀲 𑀯𑀺𑀚𑀸𑀦𑀦𑀫𑁆𑀧𑁂𑀢𑁆𑀣 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀲𑀫𑁆𑀫𑀸𑀧𑀬𑁄𑀕𑁄 𑀦𑀸𑀫 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺. 𑀢𑀫𑀦𑁆𑀯𑀸𑀬 𑀆𑀕𑀫𑁆𑀫. ‘‘𑀅𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀸 𑀦𑀸𑀫 𑀓𑁄𑀘𑀺 𑀪𑀼𑀜𑁆𑀚𑀦𑀓𑁄 𑀦𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀆𑀪𑀼𑀚𑀢𑀺 𑀲𑀫𑀦𑁆𑀦𑀸𑀳𑀭𑀢𑀺, 𑀯𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀆𑀪𑁄𑀕𑀧𑀼𑀩𑁆𑀩𑀓𑁄 𑀳𑀺 𑀲𑀩𑁆𑀩𑁄 𑀯𑀺𑀜𑁆𑀜𑀸𑀡𑀩𑁆𑀬𑀸𑀧𑀸𑀭𑁄𑀢𑀺 ‘‘𑀆𑀪𑀼𑀚𑀢𑀺’’𑀘𑁆𑀘𑁂𑀯 𑀯𑀼𑀢𑁆𑀢𑀁.

𑀕𑀫𑀦𑀢𑁄𑀢𑀺 ¶ 𑀪𑀺𑀓𑁆𑀔𑀸𑀘𑀸𑀭𑀯𑀲𑁂𑀦 𑀕𑁄𑀘𑀭𑀕𑀸𑀫𑀁 𑀉𑀤𑁆𑀤𑀺𑀲𑁆𑀲 𑀕𑀫𑀦𑀢𑁄. 𑀧𑀘𑁆𑀘𑀸𑀕𑀫𑀦𑀫𑁆𑀧𑀺 𑀕𑀫𑀦𑀲𑀪𑀸𑀯𑀢𑁆𑀢𑀸 𑀇𑀫𑀺𑀦𑀸𑀯 𑀲𑀗𑁆𑀕𑀳𑀺𑀢𑀁. 𑀧𑀭𑀺𑀬𑁂𑀲𑀦𑀢𑁄𑀢𑀺 𑀕𑁄𑀘𑀭𑀕𑀸𑀫𑁂 𑀪𑀺𑀓𑁆𑀔𑀸𑀬 𑀆𑀳𑀺𑀡𑁆𑀟𑀦𑀢𑁄. 𑀧𑀭𑀺𑀬𑁂𑀲𑀦𑀲𑀪𑀸𑀯𑀢𑁆𑀢𑀸 𑀇𑀫𑀺𑀦𑀸𑀯 𑀧𑀝𑀺𑀓𑁆𑀓𑀫𑀦𑀲𑀸𑀮𑀸𑀤𑀺𑀉𑀧𑀲𑀗𑁆𑀓𑀫𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀁. 𑀧𑀭𑀺𑀪𑁄𑀕𑀢𑁄𑀢𑀺 𑀤𑀦𑁆𑀢𑀫𑀼𑀲𑀮𑁂𑀳𑀺 𑀲𑀜𑁆𑀘𑀼𑀡𑁆𑀡𑁂𑀢𑁆𑀯𑀸 𑀚𑀺𑀯𑁆𑀳𑀸𑀬 𑀲𑀫𑁆𑀧𑀭𑀺𑀯𑀢𑁆𑀢𑀦𑀓𑁆𑀔𑀡𑁂𑀬𑁂𑀯 𑀅𑀦𑁆𑀢𑀭𑀳𑀺𑀢𑀯𑀡𑁆𑀡𑀕𑀦𑁆𑀥𑀲𑀗𑁆𑀔𑀸𑀭𑀯𑀺𑀲𑁂𑀲𑀁 𑀲𑀼𑀯𑀸𑀦𑀤𑁄𑀡𑀺𑀬𑀁 𑀲𑀼𑀯𑀸𑀦𑀯𑀫𑀣𑀼 𑀯𑀺𑀬 𑀧𑀭𑀫𑀚𑁂𑀕𑀼𑀘𑁆𑀙𑀁 𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀦𑀢𑁄. 𑀆𑀲𑀬𑀢𑁄𑀢𑀺 𑀏𑀯𑀁 𑀧𑀭𑀺𑀪𑀼𑀢𑁆𑀢𑀲𑁆𑀲 𑀆𑀳𑀸𑀭𑀲𑁆𑀲 𑀧𑀺𑀢𑁆𑀢𑀲𑁂𑀫𑁆𑀳𑀧𑀼𑀩𑁆𑀩𑀮𑁄𑀳𑀺𑀢𑀸𑀲𑀬𑀪𑀸𑀯𑀽𑀧𑀕𑀫𑀦𑁂𑀦 𑀧𑀭𑀫𑀚𑀺𑀕𑀼𑀘𑁆𑀙𑀦𑀳𑁂𑀢𑀼𑀪𑀽𑀢𑀢𑁄 𑀆𑀫𑀸𑀲𑀬𑀲𑁆𑀲 𑀉𑀧𑀭𑀺 𑀧𑀢𑀺𑀝𑁆𑀞𑀸𑀦𑀓𑀧𑀺𑀢𑁆𑀢𑀸𑀤𑀺𑀘𑀢𑀼𑀩𑁆𑀩𑀺𑀥𑀸𑀲𑀬𑀢𑁄. 𑀆𑀲𑀬𑀢𑀺 𑀏𑀓𑀚𑁆𑀛𑀁 𑀧𑀯𑀢𑁆𑀢𑀫𑀸𑀦𑁄𑀧𑀺 ¶ 𑀓𑀫𑁆𑀫𑀩𑀮𑀯𑀯𑀢𑁆𑀣𑀺𑀢𑁄 𑀳𑀼𑀢𑁆𑀯𑀸 𑀫𑀭𑀺𑀬𑀸𑀤𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀅𑀲𑀗𑁆𑀓𑀭𑀢𑁄 𑀢𑀺𑀝𑁆𑀞𑀢𑀺 𑀧𑀯𑀢𑁆𑀢𑀢𑀺 𑀏𑀢𑁆𑀣𑀸𑀢𑀺 𑀳𑀺 𑀆𑀲𑀬𑁄, 𑀆𑀫𑀸𑀲𑀬𑀲𑁆𑀲 𑀉𑀧𑀭𑀺 𑀧𑀢𑀺𑀝𑁆𑀞𑀸𑀦𑀓𑁄 𑀧𑀺𑀢𑁆𑀢𑀸𑀤𑀺 𑀘𑀢𑀼𑀩𑁆𑀩𑀺𑀥𑀸𑀲𑀬𑁄. 𑀫𑀭𑀺𑀬𑀸𑀤𑀢𑁆𑀣𑁄 𑀳𑀺 𑀅𑀬𑀫𑀸𑀓𑀸𑀭𑁄. 𑀦𑀺𑀥𑀸𑀦𑀢𑁄𑀢𑀺 𑀆𑀫𑀸𑀲𑀬𑀢𑁄. 𑀦𑀺𑀥𑁂𑀢𑀺 𑀬𑀣𑀸𑀪𑀼𑀢𑁆𑀢𑁄 𑀆𑀳𑀸𑀭𑁄 𑀦𑀺𑀘𑀺𑀢𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀳𑀺 𑀆𑀫𑀸𑀲𑀬𑁄 ‘‘𑀦𑀺𑀥𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀧𑀭𑀺𑀧𑀓𑁆𑀓𑀢𑁄𑀢𑀺 𑀪𑀼𑀢𑁆𑀢𑀸𑀳𑀸𑀭𑀧𑀭𑀺𑀧𑀸𑀘𑀦𑁂𑀦 𑀕𑀳𑀡𑀻𑀲𑀗𑁆𑀔𑀸𑀢𑁂𑀦 𑀓𑀫𑁆𑀫𑀚𑀢𑁂𑀚𑀲𑀸 𑀅𑀧𑀭𑀺𑀧𑀸𑀓𑀢𑁄. 𑀧𑀭𑀺𑀧𑀓𑁆𑀓𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀓𑀫𑁆𑀫𑀚𑀢𑁂𑀚𑀲𑀸𑀯 𑀧𑀭𑀺𑀧𑀸𑀓𑀢𑁄. 𑀨𑀮𑀢𑁄𑀢𑀺 𑀦𑀺𑀧𑁆𑀨𑀢𑁆𑀢𑀺𑀢𑁄, 𑀲𑀫𑁆𑀫𑀸𑀧𑀭𑀺𑀧𑀘𑁆𑀘𑀫𑀸𑀦𑀲𑁆𑀲, 𑀅𑀲𑀫𑁆𑀫𑀸𑀧𑀭𑀺𑀧𑀘𑁆𑀘𑀫𑀸𑀦𑀲𑁆𑀲 𑀘 𑀪𑀼𑀢𑁆𑀢𑀸𑀳𑀸𑀭𑀲𑁆𑀲 𑀬𑀣𑀸𑀓𑁆𑀓𑀫𑀁 𑀓𑁂𑀲𑀸𑀤𑀺𑀓𑀼𑀡𑀧𑀤𑀤𑁆𑀤𑀼𑀆𑀤𑀺𑀭𑁄𑀕𑀸𑀪𑀺𑀦𑀺𑀧𑁆𑀨𑀢𑁆𑀢𑀺𑀲𑀗𑁆𑀔𑀸𑀢𑀧𑀬𑁄𑀚𑀦𑀢𑁄𑀢𑀺 𑀯𑀸 𑀅𑀢𑁆𑀣𑁄. ‘‘𑀇𑀤𑀫𑀲𑁆𑀲 𑀨𑀮’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀦𑀺𑀲𑁆𑀲𑀦𑁆𑀤𑀦𑀢𑁄𑀢𑀺 𑀅𑀓𑁆𑀔𑀺𑀓𑀡𑁆𑀡𑀸𑀤𑀻𑀲𑀼 𑀅𑀦𑁂𑀓𑀤𑁆𑀯𑀸𑀭𑁂𑀲𑀼 𑀇𑀢𑁄 𑀘𑀺𑀢𑁄 𑀘 𑀯𑀺𑀲𑁆𑀲𑀦𑁆𑀤𑀦𑀢𑁄. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀅𑀦𑁆𑀦𑀁 𑀧𑀸𑀦𑀁 𑀔𑀸𑀤𑀦𑀻𑀬𑀁, 𑀪𑁄𑀚𑀦𑀜𑁆𑀘 𑀫𑀳𑀸𑀭𑀳𑀁;

𑀏𑀓𑀤𑁆𑀯𑀸𑀭𑁂𑀦 𑀧𑀯𑀺𑀲𑀺𑀢𑁆𑀯𑀸, 𑀦𑀯𑀤𑁆𑀯𑀸𑀭𑁂𑀳𑀺 𑀲𑀦𑁆𑀤𑀢𑀻’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁩𑁦𑁩);

𑀲𑀫𑁆𑀫𑀓𑁆𑀔𑀦𑀢𑁄𑀢𑀺 𑀳𑀢𑁆𑀣𑀑𑀝𑁆𑀞𑀸𑀤𑀺𑀅𑀗𑁆𑀕𑁂𑀲𑀼 𑀦𑀯𑀲𑀼 𑀤𑁆𑀯𑀸𑀭𑁂𑀲𑀼 𑀧𑀭𑀺𑀪𑁄𑀕𑀓𑀸𑀮𑁂, 𑀧𑀭𑀺𑀪𑀼𑀢𑁆𑀢𑀓𑀸𑀮𑁂 𑀘 𑀬𑀣𑀸𑀭𑀳𑀁 𑀲𑀩𑁆𑀩𑀲𑁄 𑀫𑀓𑁆𑀔𑀦𑀢𑁄. 𑀲𑀩𑁆𑀩𑀢𑁆𑀣 𑀆𑀳𑀸𑀭𑁂 𑀧𑀝𑀺𑀓𑁆𑀓𑀽𑀮𑀢𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀸𑀢𑀺 𑀲𑀳 𑀧𑀸𑀞𑀲𑁂𑀲𑁂𑀦 𑀬𑁄𑀚𑀦𑀸. 𑀢𑀁𑀢𑀁𑀓𑀺𑀭𑀺𑀬𑀸𑀦𑀺𑀧𑁆𑀨𑀢𑁆𑀢𑀺𑀧𑀝𑀺𑀧𑀸𑀝𑀺𑀯𑀲𑁂𑀦 𑀘𑀸𑀬𑀁 ‘‘𑀕𑀫𑀦𑀢𑁄’’𑀢𑀺𑀆𑀤𑀺𑀓𑀸 𑀅𑀦𑀼𑀧𑀼𑀩𑁆𑀩𑀻 𑀞𑀧𑀺𑀢𑀸. 𑀲𑀫𑁆𑀫𑀓𑁆𑀔𑀦𑀁 𑀧𑀦 𑀧𑀭𑀺𑀪𑁄𑀕𑀸𑀤𑀻𑀲𑀼 𑀮𑀩𑁆𑀪𑀫𑀸𑀦𑀫𑁆𑀧𑀺 𑀦𑀺𑀲𑁆𑀲𑀦𑁆𑀤𑀯𑀲𑁂𑀦 𑀯𑀺𑀲𑁂𑀲𑀢𑁄 𑀧𑀝𑀺𑀓𑁆𑀓𑀽𑀮𑀦𑁆𑀢𑀺 𑀲𑀩𑁆𑀩𑀧𑀘𑁆𑀙𑀸 𑀞𑀧𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀢𑁆𑀢𑀓𑀸𑀮𑁂𑀢𑀺 𑀬𑀼𑀢𑁆𑀢𑀓𑀸𑀮𑁂, 𑀬𑀣𑀸𑀯𑀼𑀢𑁆𑀢𑁂𑀦 𑀯𑀸 𑀢𑁂𑀚𑁂𑀦 𑀧𑀭𑀺𑀧𑀘𑁆𑀘𑀦𑀢𑁄 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀪𑀸𑀯𑀁 𑀧𑀢𑁆𑀢𑀓𑀸𑀮𑁂. 𑀯𑁂𑀕𑀲𑀦𑁆𑀥𑀸𑀭𑀡𑁂𑀦 𑀉𑀧𑁆𑀧𑀦𑁆𑀦𑀧𑀭𑀺𑀴𑀸𑀳𑀢𑁆𑀢𑀸 𑀲𑀓𑀮𑀲𑀭𑀻𑀭𑀢𑁄 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺. 𑀢𑀢𑁄𑀬𑁂𑀯 𑀅𑀓𑁆𑀔𑀻𑀦𑀺 𑀧𑀭𑀺𑀩𑁆𑀪𑀫𑀦𑁆𑀢𑀺, 𑀘𑀺𑀢𑁆𑀢𑀜𑁆𑀘 𑀏𑀓𑀕𑁆𑀕𑀁 𑀦 𑀳𑁄𑀢𑀺. 𑀅𑀜𑁆𑀜𑁂 𑀘 𑀲𑀽𑀮𑀪𑀕𑀦𑁆𑀤𑀭𑀸𑀤𑀬𑁄 𑀭𑁄𑀕𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑀩𑁆𑀩𑀁 𑀢𑀦𑁆𑀢𑀺 𑀲𑁂𑀤𑀫𑀼𑀘𑁆𑀘𑀦𑀸𑀤𑀺𑀓𑀁.

𑀅𑀝𑁆𑀞𑀸𑀦𑁂𑀢𑀺 ¶ 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑁂 𑀔𑁂𑀢𑁆𑀢𑀤𑁂𑀯𑀸𑀬𑀢𑀦𑀸𑀤𑀺𑀓𑁂 𑀅𑀬𑀼𑀢𑁆𑀢𑀝𑁆𑀞𑀸𑀦𑁂. 𑀢𑀸𑀤𑀺𑀲𑁂 𑀳𑀺 𑀓𑀭𑁄𑀦𑁆𑀢𑀁 𑀓𑀼𑀤𑁆𑀥𑀸 𑀫𑀦𑀼𑀲𑁆𑀲𑀸, 𑀅𑀫𑀦𑀼𑀲𑁆𑀲𑀸 𑀯𑀸 𑀚𑀻𑀯𑀺𑀢𑀓𑁆𑀔𑀬𑀫𑁆𑀧𑀺 𑀧𑀸𑀧𑁂𑀦𑁆𑀢𑀺. 𑀆𑀧𑀢𑁆𑀢𑀻𑀢𑀺 𑀧𑀦 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀻𑀦𑀁 𑀬𑀣𑀸𑀭𑀳𑀁 𑀤𑀼𑀓𑁆𑀓𑀝𑀧𑀸𑀘𑀺𑀢𑁆𑀢𑀺𑀬𑀸. 𑀧𑀢𑀺𑀭𑀽𑀧𑁂 𑀞𑀸𑀦𑁂𑀢𑀺 𑀯𑀼𑀢𑁆𑀢𑀯𑀺𑀧𑀭𑀻𑀢𑁂 𑀞𑀸𑀦𑁂. 𑀲𑀩𑁆𑀩𑀁 𑀢𑀦𑁆𑀢𑀺 𑀆𑀧𑀢𑁆𑀢𑀺𑀆𑀤𑀺𑀓𑀁.

𑀦𑀺𑀓𑁆𑀔𑀫𑀸𑀧𑁂𑀢𑀸 ¶ 𑀅𑀢𑁆𑀢𑀸 𑀦𑀸𑀫 𑀅𑀢𑁆𑀣𑀺, 𑀢𑀲𑁆𑀲 𑀓𑀸𑀫𑀢𑀸𑀬 𑀦𑀺𑀓𑁆𑀔𑀫𑀦𑀦𑁆𑀢𑀺 𑀩𑀸𑀮𑀫𑀜𑁆𑀜𑀦𑀁 𑀦𑀺𑀯𑀢𑁆𑀢𑁂𑀢𑀼𑀁 ‘‘𑀅𑀓𑀸𑀫𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁, 𑀅𑀢𑁆𑀢𑀦𑁄 𑀅𑀦𑀺𑀘𑁆𑀙𑀸𑀬 𑀅𑀧𑀬𑁄𑀕𑁂𑀦 𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦𑁂𑀯 𑀦𑀺𑀓𑁆𑀔𑀫𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀦𑁆𑀦𑀺𑀘𑀺𑀢𑀸𑀢𑀺 𑀲𑀫𑀼𑀘𑁆𑀘𑀬𑁂𑀦 𑀞𑀺𑀢𑀸. 𑀯𑀸𑀬𑀼𑀯𑁂𑀕𑀲𑀫𑀼𑀧𑁆𑀧𑀻𑀴𑀺𑀢𑀸𑀢𑀺 𑀯𑀸𑀬𑁄𑀥𑀸𑀢𑀼𑀬𑀸 𑀯𑁂𑀕𑁂𑀦 𑀲𑀫𑀦𑁆𑀢𑀢𑁄 𑀅𑀯𑀧𑀻𑀴𑀺𑀢𑀸, 𑀦𑀺𑀓𑁆𑀔𑀫𑀦𑀲𑁆𑀲 𑀘𑁂𑀢𑀁 𑀳𑁂𑀢𑀼𑀯𑀘𑀦𑀁. ‘‘𑀲𑀦𑁆𑀦𑀺𑀘𑀺𑀢𑀸 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸’’𑀢𑀺 𑀯𑀢𑁆𑀯𑀸 ‘‘𑀲𑁄 𑀧𑀦𑀸𑀬𑀁 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑁄’’𑀢𑀺 𑀧𑀼𑀦 𑀯𑀘𑀦𑀁 𑀲𑀫𑀸𑀳𑀸𑀭𑀤𑁆𑀯𑀦𑁆𑀤𑁂𑀧𑀺 𑀧𑀼𑀮𑁆𑀮𑀺𑀗𑁆𑀕𑀧𑀬𑁄𑀕𑀲𑁆𑀲 𑀲𑀫𑁆𑀪𑀯𑀢𑀸𑀤𑀲𑁆𑀲𑀦𑀢𑁆𑀣𑀁. 𑀏𑀓𑀢𑁆𑀢𑀫𑁂𑀯 𑀳𑀺 𑀢𑀲𑁆𑀲 𑀦𑀺𑀬𑀢𑀮𑀓𑁆𑀔𑀡𑀦𑁆𑀢𑀺. 𑀅𑀢𑁆𑀢𑀦𑀸 𑀦𑀺𑀭𑀧𑁂𑀓𑁆𑀔𑀁 𑀦𑀺𑀲𑁆𑀲𑀝𑁆𑀞𑀢𑁆𑀢𑀸 𑀦𑁂𑀯 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀲𑀦𑁆𑀢𑀓𑀁 𑀯𑀸 𑀳𑁄𑀢𑀺, 𑀓𑀲𑁆𑀲𑀘𑀺𑀧𑀺 𑀤𑀻𑀬𑀦𑀯𑀲𑁂𑀦 𑀅𑀦𑀺𑀲𑁆𑀲𑀚𑁆𑀚𑀺𑀢𑀢𑁆𑀢𑀸, 𑀚𑀺𑀕𑀼𑀘𑁆𑀙𑀦𑀻𑀬𑀢𑁆𑀢𑀸 𑀘 𑀦 𑀧𑀭𑀲𑁆𑀲𑀧𑀻𑀢𑀺 𑀅𑀢𑁆𑀣𑁄. 𑀲𑀭𑀻𑀭𑀦𑀺𑀲𑁆𑀲𑀦𑁆𑀤𑁄𑀯𑀸𑀢𑀺 𑀲𑀭𑀻𑀭𑀢𑁄 𑀯𑀺𑀲𑁆𑀲𑀦𑁆𑀤𑀦𑀫𑁂𑀯 𑀦𑀺𑀓𑁆𑀔𑀫𑀦𑀫𑀢𑁆𑀢𑀁. 𑀲𑀭𑀻𑀭𑁂 𑀲𑀢𑀺 𑀲𑁄 𑀳𑁄𑀢𑀺, 𑀦𑀸𑀲𑀢𑀻𑀢𑀺 𑀲𑀭𑀻𑀭𑀲𑁆𑀲 𑀆𑀦𑀺𑀲𑀁𑀲𑀫𑀢𑁆𑀢𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀤𑀬𑀼𑀢𑁆𑀢𑀫𑁂𑀯 𑀦𑀺𑀤𑀲𑁆𑀲𑀦𑁂𑀦 𑀯𑀺𑀲𑀫𑀪𑀸𑀯𑀢𑁄. 𑀢𑀢𑁆𑀣 𑀳𑀺 ‘‘𑀧𑀝𑀺𑀚𑀕𑁆𑀕𑀦𑀫𑀢𑁆𑀢𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁, 𑀧𑀝𑀺𑀲𑁄𑀥𑀦𑀫𑀢𑁆𑀢𑀁 𑀏𑀯𑀸𑀢𑀺 𑀘𑀲𑁆𑀲 𑀅𑀢𑁆𑀣𑁄. 𑀯𑁂𑀴𑀼𑀦𑀸𑀴𑀺𑀆𑀤𑀺𑀉𑀤𑀓𑀪𑀸𑀚𑀦𑀁 𑀉𑀤𑀓𑀢𑀼𑀫𑁆𑀩𑁄. 𑀢𑀦𑁆𑀢𑀺 𑀙𑀟𑁆𑀟𑀺𑀢𑀉𑀤𑀓𑀁.

‘‘𑀕𑀢𑁂𑀢𑀺 𑀕𑀫𑀦𑁂’’𑀢𑀺 𑀧𑀼𑀩𑁆𑀩𑁂 𑀅𑀪𑀺𑀓𑁆𑀓𑀫𑀧𑀝𑀺𑀓𑁆𑀓𑀫𑀕𑀳𑀡𑁂𑀦 𑀕𑀫𑀦𑁂𑀧𑀺 𑀧𑀼𑀭𑀢𑁄, 𑀧𑀘𑁆𑀙𑀢𑁄 𑀘 𑀓𑀸𑀬𑀲𑁆𑀲 𑀅𑀢𑀺𑀳𑀭𑀡𑀁 𑀯𑀼𑀢𑁆𑀢𑀦𑁆𑀢𑀺 𑀇𑀥 𑀕𑀫𑀦𑀫𑁂𑀯 𑀕𑀳𑀺𑀢’’𑀦𑁆𑀢𑀺 (𑀯𑀺𑀪. 𑀫𑀽𑀮𑀝𑀻. 𑁫𑁨𑁫) 𑀆𑀘𑀭𑀺𑀬𑀸𑀦𑀦𑁆𑀤𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁, 𑀢𑀁 𑀓𑁂𑀘𑀺𑀯𑀸𑀤𑁄 𑀦𑀸𑀫 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀓𑀢𑀁. 𑀓𑀲𑁆𑀫𑀸𑀢𑀺 𑀘𑁂? 𑀕𑀫𑀦𑁂 𑀧𑀯𑀢𑁆𑀢𑀲𑁆𑀲 𑀧𑀼𑀭𑀢𑁄, 𑀧𑀘𑁆𑀙𑀢𑁄 𑀘 𑀓𑀸𑀬𑀸𑀢𑀺𑀳𑀭𑀡𑀲𑁆𑀲 𑀢𑀤𑀯𑀺𑀦𑀸𑀪𑀸𑀯𑀢𑁄 𑀧𑀤𑀯𑀻𑀢𑀺𑀳𑀸𑀭𑀦𑀺𑀬𑀫𑀺𑀢𑀸𑀬 𑀕𑀫𑀦𑀓𑀺𑀭𑀺𑀬𑀸𑀬 𑀏𑀯 𑀲𑀗𑁆𑀕𑀳𑀺𑀢𑀢𑁆𑀢𑀸, 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀤𑀻𑀳𑀺 (𑀅𑀪𑀺. 𑀅𑀝𑁆𑀞. 𑁨.𑁫𑁨𑁩) 𑀘 𑀯𑀺𑀭𑁄𑀥𑀦𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑀕𑀫𑀦𑀲𑁆𑀲 𑀉𑀪𑀬𑀢𑁆𑀣 𑀲𑀫𑀯𑀭𑁄𑀥𑀢𑁆𑀢𑀁, 𑀪𑁂𑀤𑀢𑁆𑀢𑀜𑁆𑀘 𑁋

‘‘𑀏𑀢𑁆𑀣 𑀘 𑀏𑀓𑁄 𑀇𑀭𑀺𑀬𑀸𑀧𑀣𑁄 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀆𑀕𑀢𑁄. 𑀲𑁄 𑀳𑁂𑀝𑁆𑀞𑀸 ‘𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂’𑀢𑀺 𑀏𑀢𑁆𑀣 𑀪𑀺𑀓𑁆𑀔𑀸𑀘𑀸𑀭𑀕𑀸𑀫𑀁 𑀕𑀘𑁆𑀙𑀢𑁄 𑀘 𑀆𑀕𑀘𑁆𑀙𑀢𑁄 𑀘 𑀅𑀤𑁆𑀥𑀸𑀦𑀕𑀫𑀦𑀯𑀲𑁂𑀦 𑀓𑀣𑀺𑀢𑁄. ‘𑀕𑀢𑁂 𑀞𑀺𑀢𑁂 𑀦𑀺𑀲𑀺𑀦𑁆𑀦𑁂’𑀢𑀺 𑀏𑀢𑁆𑀣 𑀯𑀺𑀳𑀸𑀭𑁂 𑀘𑀼𑀡𑁆𑀡𑀺𑀓𑀧𑀸𑀤𑀼𑀤𑁆𑀥𑀸𑀭𑀇𑀭𑀺𑀬𑀸𑀧𑀣𑀯𑀲𑁂𑀦 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄’’𑀢𑀺.

‘‘𑀕𑀢𑁂’’𑀢𑀺𑀆𑀤𑀻𑀲𑀼 𑀅𑀯𑀢𑁆𑀣𑀸𑀪𑁂𑀤𑁂𑀦 𑀓𑀺𑀭𑀺𑀬𑀸𑀪𑁂𑀤𑁄𑀬𑁂𑀯, 𑀦 𑀧𑀦 𑀅𑀢𑁆𑀣𑀪𑁂𑀤𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀕𑀘𑁆𑀙𑀦𑁆𑀢𑁄 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺 ¶ . 𑀢𑀢𑁆𑀣 𑀲𑀼𑀢𑁆𑀢𑁂𑀢𑀺 𑀤𑀻𑀖𑀦𑀺𑀓𑀸𑀬𑁂, 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀘 𑀲𑀗𑁆𑀕𑀻𑀢𑁂 ¶ 𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑁂 (𑀤𑀻. 𑀦𑀺. 𑁨.𑁩𑁭𑁨; 𑀫. 𑀦𑀺. 𑁧.𑁧𑁦𑁫) 𑀅𑀤𑁆𑀥𑀸𑀦𑀇𑀭𑀺𑀬𑀸𑀧𑀣𑀸𑀢𑀺 𑀘𑀺𑀭𑀧𑀯𑀢𑁆𑀢𑀓𑀸 𑀤𑀻𑀖𑀓𑀸𑀮𑀺𑀓𑀸 𑀇𑀭𑀺𑀬𑀸𑀧𑀣𑀸 𑀅𑀤𑁆𑀥𑀸𑀦𑀲𑀤𑁆𑀤𑀲𑁆𑀲 𑀘𑀺𑀭𑀓𑀸𑀮𑀯𑀘𑀦𑀢𑁄 ‘‘𑀅𑀤𑁆𑀥𑀦𑀺𑀬𑀁 𑀅𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀓’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁧𑁮𑁪; 𑁩.𑁧𑁭𑁭; 𑀧𑀸𑀭𑀸. 𑁨𑁧) 𑀯𑀺𑀬, 𑀅𑀤𑁆𑀥𑀸𑀦𑀕𑀫𑀦𑀧𑀯𑀢𑁆𑀢𑀓𑀸 𑀯𑀸 𑀤𑀻𑀖𑀫𑀕𑁆𑀕𑀺𑀓𑀸 𑀇𑀭𑀺𑀬𑀸𑀧𑀣𑀸. 𑀅𑀤𑁆𑀥𑀸𑀦𑀲𑀤𑁆𑀤𑁄 𑀳𑀺 𑀤𑀻𑀖𑀫𑀕𑁆𑀕𑀧𑀭𑀺𑀬𑀸𑀬𑁄 ‘‘𑀅𑀤𑁆𑀥𑀸𑀦𑀕𑀫𑀦𑀲𑀫𑀬𑁄’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁨𑁧𑁩, 𑁨𑁧𑁭) 𑀯𑀺𑀬. 𑀫𑀚𑁆𑀛𑀺𑀫𑀸𑀢𑀺 𑀪𑀺𑀓𑁆𑀔𑀸𑀘𑀸𑀭𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀦𑀸𑀢𑀺𑀘𑀺𑀭𑀓𑀸𑀮𑀺𑀓𑀸, 𑀦𑀸𑀢𑀺𑀤𑀻𑀖𑀫𑀕𑁆𑀕𑀺𑀓𑀸 𑀯𑀸 𑀇𑀭𑀺𑀬𑀸𑀧𑀣𑀸. 𑀘𑀼𑀡𑁆𑀡𑀺𑀬𑀇𑀭𑀺𑀬𑀸𑀧𑀣𑀸𑀢𑀺 𑀯𑀺𑀳𑀸𑀭𑁂, 𑀅𑀜𑁆𑀜𑀢𑁆𑀣 𑀯𑀸 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀯𑀢𑁆𑀢𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀅𑀧𑁆𑀧𑀫𑀢𑁆𑀢𑀓𑀪𑀸𑀯𑁂𑀦 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀺𑀬𑀪𑀽𑀢𑀸 𑀇𑀭𑀺𑀬𑀸𑀧𑀣𑀸. 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀳𑀺 ‘‘𑀘𑀼𑀡𑁆𑀡𑀯𑀺𑀘𑀼𑀡𑁆𑀡’’𑀦𑁆𑀢𑀺 𑀮𑁄𑀓𑁂 𑀯𑀤𑀦𑁆𑀢𑀺. ‘‘𑀔𑀼𑀤𑁆𑀤𑀓𑀘𑀼𑀡𑁆𑀡𑀺𑀓𑀇𑀭𑀺𑀬𑀸𑀧𑀣𑀸’’𑀢𑀺𑀧𑀺 𑀧𑀸𑀞𑁄, 𑀔𑀼𑀤𑁆𑀤𑀓𑀸 𑀳𑀼𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦 𑀘𑀼𑀡𑁆𑀡𑀺𑀓𑀸 𑀇𑀭𑀺𑀬𑀸𑀧𑀣𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀏𑀯𑀁 𑀅𑀯𑀢𑁆𑀣𑀸𑀪𑁂𑀤𑁂𑀦 𑀇𑀭𑀺𑀬𑀸𑀧𑀣𑀪𑁂𑀤𑀫𑀢𑁆𑀢𑀲𑁆𑀲 𑀓𑀣𑀦𑀢𑁄. 𑀢𑁂𑀲𑀼𑀧𑀻𑀢𑀺 ‘‘𑀕𑀢𑁂 𑀞𑀺𑀢𑁂’’𑀢𑀺𑀆𑀤𑀻𑀲𑀼𑀧𑀺. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀅𑀪𑀺𑀓𑁆𑀓𑀦𑁆𑀢𑁂’’𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦.

𑀅𑀧𑀭𑀪𑀸𑀕𑁂𑀢𑀺 𑀕𑀫𑀦𑀇𑀭𑀺𑀬𑀸𑀧𑀣𑀢𑁄 𑀅𑀧𑀭𑀪𑀸𑀕𑁂. 𑀞𑀺𑀢𑁄𑀢𑀺 𑀞𑀺𑀢𑀇𑀭𑀺𑀬𑀸𑀧𑀣𑀲𑀫𑁆𑀧𑀦𑁆𑀦𑁄. 𑀏𑀢𑁆𑀣𑁂𑀯𑀸𑀢𑀺 𑀘𑀗𑁆𑀓𑀫𑀦𑁂𑀬𑁂𑀯. 𑀏𑀯𑀁 𑀲𑀩𑁆𑀩𑀢𑁆𑀣 𑀬𑀣𑀸𑀭𑀳𑀁.

𑀕𑀫𑀦𑀞𑀸𑀦𑀦𑀺𑀲𑀚𑁆𑀚𑀸𑀦𑀁 𑀯𑀺𑀬 𑀦𑀺𑀲𑀻𑀤𑀦𑀲𑀬𑀦𑀲𑁆𑀲 𑀓𑀫𑀯𑀘𑀦𑀫𑀬𑀼𑀢𑁆𑀢𑀁 𑀬𑁂𑀪𑀼𑀬𑁆𑀬𑁂𑀦 𑀢𑀣𑀸 𑀓𑀫𑀸𑀪𑀸𑀯𑀢𑁄𑀢𑀺 ‘‘𑀉𑀝𑁆𑀞𑀸𑀬’’ 𑀫𑀺𑀘𑁆𑀘𑁂𑀯 𑀯𑀼𑀢𑁆𑀢𑀁.

𑀚𑀸𑀕𑀭𑀺𑀢𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀢𑁄 𑀘𑁂𑀢𑁆𑀣 𑀪𑀯𑀗𑁆𑀕𑁄𑀢𑀭𑀡𑀯𑀲𑁂𑀦 𑀦𑀺𑀤𑁆𑀤𑁄𑀓𑁆𑀓𑀫𑀦𑀫𑁂𑀯 𑀲𑀬𑀦𑀁, 𑀦 𑀧𑀦 𑀧𑀺𑀝𑁆𑀞𑀺𑀧𑀲𑀸𑀭𑀡𑀫𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀓𑀺𑀭𑀺𑀬𑀸𑀫𑀬𑀧𑀯𑀢𑁆𑀢𑀸𑀦’’𑀦𑁆𑀢𑀺𑀆𑀤𑀺𑀦𑀸. 𑀤𑀺𑀯𑀸𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑁂 (𑀧𑀸𑀭𑀸. 𑁭𑁭) 𑀯𑀺𑀬 𑀧𑀺𑀝𑁆𑀞𑀺𑀧𑀲𑀸𑀭𑀡𑀲𑁆𑀲𑀸𑀧𑀺 𑀲𑀬𑀦𑀇𑀭𑀺𑀬𑀸𑀧𑀣𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸 𑀏𑀢𑁆𑀣𑀸𑀯𑀭𑁄𑀥𑀦𑀁 𑀤𑀝𑁆𑀞𑀩𑁆𑀩𑀁. 𑀓𑀭𑀡𑀁 𑀓𑀺𑀭𑀺𑀬𑀸, 𑀓𑀸𑀬𑀸𑀤𑀺𑀓𑀺𑀘𑁆𑀘𑀁, 𑀢𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 𑀓𑀺𑀭𑀺𑀬𑀸𑀫𑀬𑀸𑀦𑀺 𑀢𑀤𑁆𑀥𑀺𑀢𑀲𑀤𑁆𑀤𑀸𑀦𑀫𑀦𑁂𑀓𑀢𑁆𑀣𑀯𑀼𑀢𑁆𑀢𑀺𑀢𑁄. 𑀅𑀣 𑀯𑀸 𑀆𑀯𑀚𑁆𑀚𑀦𑀤𑁆𑀯𑀬𑀓𑀺𑀘𑁆𑀘𑀁 𑀓𑀺𑀭𑀺𑀬𑀸, 𑀢𑀸𑀬 𑀧𑀓𑀢𑀸𑀦𑀺, 𑀦𑀺𑀩𑁆𑀩𑀢𑁆𑀢𑀸𑀦𑀺 𑀯𑀸 𑀓𑀺𑀭𑀺𑀬𑀸𑀫𑀬𑀸𑀦𑀺. 𑀆𑀯𑀚𑁆𑀚𑀦𑀯𑀲𑁂𑀦 𑀳𑀺 𑀪𑀯𑀗𑁆𑀕𑀼𑀧𑀘𑁆𑀙𑁂𑀤𑁂 𑀲𑀢𑀺 𑀯𑀻𑀣𑀺𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀬𑀸 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀢𑁆𑀢𑀦𑁆𑀢𑀺 𑀧𑀭𑀺𑀯𑀢𑁆𑀢𑀦𑁆𑀢𑀻𑀢𑀺 𑀧𑀯𑀢𑁆𑀢𑀸𑀦𑀺. 𑀓𑀢𑁆𑀣𑀘𑀺 𑀧𑀦 ‘‘𑀘𑀺𑀢𑁆𑀢𑀸𑀦’’𑀦𑁆𑀢𑀺 𑀧𑀸𑀞𑁄, 𑀲𑁄 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀤𑀻𑀳𑀺, (𑀯𑀺𑀪. 𑀅𑀝𑁆𑀞. 𑁫𑁨𑁩) 𑀢𑀝𑁆𑀝𑀻𑀓𑀸𑀳𑀺 𑀘 𑀯𑀺𑀭𑀼𑀤𑁆𑀥𑀢𑁆𑀢𑀸 𑀦 𑀧𑁄𑀭𑀸𑀡𑀧𑀸𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀓𑀺𑀭𑀺𑀬𑀸𑀫𑀬𑀸𑀦𑀺 𑀏𑀯 𑀧𑀯𑀢𑁆𑀢𑀸𑀦𑀺 𑀢𑀣𑀸, 𑀚𑀯𑀦𑀁, 𑀲𑀩𑁆𑀩𑀫𑁆𑀧𑀺 𑀯𑀸 𑀙𑀤𑁆𑀯𑀸𑀭𑀺𑀓𑀯𑀻𑀣𑀺𑀘𑀺𑀢𑁆𑀢𑀁. 𑀢𑁂𑀦𑀸𑀳 𑀅𑀪𑀺𑀥𑀫𑁆𑀫𑀝𑀻𑀓𑀸𑀬𑀁 (𑀯𑀺𑀪. 𑀫𑀽𑀮𑀝𑀻. 𑁫𑁨𑁫) ‘‘𑀓𑀸𑀬𑀸𑀤𑀺𑀓𑀺𑀭𑀺𑀬𑀸𑀫𑀬𑀢𑁆𑀢𑀸 ¶ , 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀺𑀢𑀢𑁆𑀢𑀸 𑀘 𑀚𑀯𑀦𑀁, 𑀲𑀩𑁆𑀩𑀫𑁆𑀧𑀺 𑀯𑀸 𑀙𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀁 𑀓𑀺𑀭𑀺𑀬𑀸𑀫𑀬𑀧𑀯𑀢𑁆𑀢𑀁 𑀦𑀸𑀫𑀸’’𑀢𑀺. 𑀅𑀧𑁆𑀧𑀯𑀢𑁆𑀢𑀦𑁆𑀢𑀺 𑀦𑀺𑀤𑁆𑀤𑁄𑀓𑁆𑀓𑀫𑀦𑀓𑀸𑀮𑁂 𑀅𑀦𑀼𑀧𑁆𑀧𑀚𑁆𑀚𑀦𑀁 𑀲𑀼𑀢𑁆𑀢𑀁 𑀦𑀸𑀫𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀦𑁂𑀬𑁆𑀬𑀢𑁆𑀣𑀯𑀘𑀦𑀜𑁆𑀳𑀺 ¶ 𑀇𑀤𑀁, 𑀇𑀢𑀭𑀣𑀸 𑀙𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀸𑀦𑀁 𑀧𑀼𑀭𑁂𑀘𑀭𑀸𑀦𑀼𑀘𑀭𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀤𑁆𑀯𑀸𑀭𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀸𑀦𑀁 𑀧𑀯𑀢𑁆𑀢𑀁 𑀲𑀼𑀢𑁆𑀢𑀁 𑀦𑀸𑀫 𑀲𑀺𑀬𑀸, 𑀏𑀯𑀜𑁆𑀘 𑀓𑀢𑁆𑀯𑀸 𑀦𑀺𑀤𑁆𑀤𑁄𑀓𑁆𑀓𑀫𑀦𑀓𑀸𑀮𑀢𑁄 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀉𑀧𑁆𑀧𑀚𑁆𑀚𑀦𑁆𑀢𑀸𑀦𑀁 𑀤𑁆𑀯𑀸𑀭𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀸𑀦𑀫𑁆𑀧𑀺 𑀧𑀯𑀢𑁆𑀢𑀁 𑀚𑀸𑀕𑀭𑀺𑀢𑁂 𑀲𑀗𑁆𑀕𑀬𑁆𑀳𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀘𑀺𑀢𑁆𑀢𑀲𑁆𑀲 𑀧𑀬𑁄𑀕𑀓𑀸𑀭𑀡𑀪𑀽𑀢𑁂 𑀑𑀝𑁆𑀞𑀸𑀤𑀺𑀓𑁂 𑀧𑀝𑀺𑀘𑁆𑀘 𑀬𑀣𑀸𑀲𑀓𑀁 𑀞𑀸𑀦𑁂 𑀲𑀤𑁆𑀤𑁄 𑀚𑀸𑀬𑀢𑀻𑀢𑀺 𑀆𑀳 ‘‘𑀑𑀝𑁆𑀞𑁂 𑀘 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺. 𑀓𑀺𑀜𑁆𑀘𑀸𑀧𑀺 𑀲𑀤𑁆𑀤𑁄 𑀬𑀣𑀸𑀞𑀸𑀦𑀁 𑀚𑀸𑀬𑀢𑀺, 𑀑𑀝𑁆𑀞𑀸𑀮𑀦𑀸𑀤𑀺𑀦𑀸 𑀧𑀦 𑀧𑀬𑁄𑀕𑁂𑀦𑁂𑀯 𑀚𑀸𑀬𑀢𑀺, 𑀦 𑀯𑀺𑀦𑀸 𑀢𑁂𑀦 𑀧𑀬𑁄𑀕𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑁂𑀘𑀺 𑀧𑀦 𑀯𑀤𑀦𑁆𑀢𑀺 ‘‘𑀑𑀝𑁆𑀞𑁂 𑀘𑀸𑀢𑀺𑀆𑀤𑀺 𑀲𑀤𑁆𑀤𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀦𑀺𑀤𑀲𑁆𑀲𑀦’’𑀦𑁆𑀢𑀺, 𑀢𑀤𑀬𑀼𑀢𑁆𑀢𑀫𑁂𑀯 𑀢𑀣𑀸 𑀅𑀯𑀘𑀦𑀢𑁄. 𑀦 𑀳𑀺 ‘‘𑀑𑀝𑁆𑀞𑁂 𑀘 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 𑀲𑀲𑀫𑀼𑀘𑁆𑀘𑀬𑁂𑀦 𑀓𑀫𑁆𑀫𑀯𑀘𑀦𑁂𑀦 𑀞𑀸𑀦𑀯𑀘𑀦𑀁 𑀲𑀫𑁆𑀪𑀯𑀢𑀻𑀢𑀺. 𑀢𑀤𑀦𑀼𑀭𑀽𑀧𑀦𑁆𑀢𑀺 𑀢𑀲𑁆𑀲 𑀲𑀤𑁆𑀤𑀲𑁆𑀲 𑀅𑀦𑀼𑀭𑀽𑀧𑀁. 𑀪𑀸𑀲𑀦𑀲𑁆𑀲 𑀧𑀝𑀺𑀲𑀜𑁆𑀘𑀺𑀓𑁆𑀔𑀦𑀯𑀺𑀭𑁄𑀥𑀢𑁄 𑀢𑀼𑀡𑁆𑀳𑀻𑀪𑀸𑀯𑀧𑀓𑁆𑀔𑁂 ‘‘𑀅𑀧𑀭𑀪𑀸𑀕𑁂 𑀪𑀸𑀲𑀺𑀢𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀻’’𑀢𑀺 𑀦 𑀯𑀼𑀢𑁆𑀢𑀁, 𑀢𑁂𑀦 𑀘 𑀯𑀺𑀜𑁆𑀜𑀸𑀬𑀢𑀺 ‘‘𑀢𑀼𑀡𑁆𑀳𑀻𑀪𑀽𑀢𑁄𑀯 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀻𑀢𑀺 𑀅𑀢𑁆𑀣𑁄’’𑀢𑀺.

𑀪𑀸𑀲𑀦𑀢𑀼𑀡𑁆𑀳𑀻𑀪𑀸𑀯𑀸𑀦𑀁 𑀲𑀪𑀸𑀯𑀢𑁄 𑀪𑁂𑀤𑁂 𑀲𑀢𑀺 𑀅𑀬𑀁 𑀯𑀺𑀪𑀸𑀕𑁄 𑀬𑀼𑀢𑁆𑀢𑁄 𑀲𑀺𑀬𑀸, 𑀦𑀸𑀲𑀢𑀻𑀢𑀺 𑀅𑀦𑀼𑀬𑁄𑀕𑁂𑀦𑀸𑀳 ‘‘𑀉𑀧𑀸𑀤𑀸𑀭𑀽𑀧𑀧𑀯𑀢𑁆𑀢𑀺𑀬𑀜𑁆𑀳𑀻’’𑀢𑀺𑀆𑀤𑀺. 𑀉𑀧𑀸𑀤𑀸𑀭𑀽𑀧𑀲𑁆𑀲 𑀲𑀤𑁆𑀤𑀸𑀬𑀢𑀦𑀲𑁆𑀲 𑀧𑀯𑀢𑁆𑀢𑀺 𑀢𑀣𑀸, 𑀲𑀤𑁆𑀤𑀸𑀬𑀢𑀦𑀲𑁆𑀲 𑀧𑀯𑀢𑁆𑀢𑀦𑀁 𑀪𑀸𑀲𑀦𑀁, 𑀅𑀧𑁆𑀧𑀯𑀢𑁆𑀢𑀦𑀁 𑀢𑀼𑀡𑁆𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀬𑀲𑁆𑀫𑀸 𑀧𑀦 𑀫𑀳𑀸𑀲𑀺𑀯𑀢𑁆𑀣𑁂𑀭𑀯𑀸𑀤𑁂 𑀅𑀦𑀦𑁆𑀢𑀭𑁂 𑀅𑀦𑀦𑁆𑀢𑀭𑁂 𑀇𑀭𑀺𑀬𑀸𑀧𑀣𑁂 𑀧𑀯𑀢𑁆𑀢𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀢𑀢𑁆𑀣 𑀢𑀢𑁆𑀣𑁂𑀯 𑀦𑀺𑀭𑁄𑀥𑀤𑀲𑁆𑀲𑀦𑀯𑀲𑁂𑀦 𑀲𑀫𑁆𑀧𑀚𑀸𑀦𑀓𑀸𑀭𑀺𑀢𑀸 𑀕𑀳𑀺𑀢𑀸, 𑀢𑀲𑁆𑀫𑀸 𑀢𑀁 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑁂 (𑀤𑀻. 𑀦𑀺. 𑁨.𑁩𑁭𑁬; 𑀫. 𑀦𑀺. 𑁧.𑁧𑁦𑁯) 𑀆𑀕𑀢𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀯𑀺𑀧𑀲𑁆𑀲𑀦𑀸𑀯𑀸𑀭𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀦 𑀘𑀢𑀼𑀩𑁆𑀩𑀺𑀥𑀲𑀫𑁆𑀧𑀚𑀜𑁆𑀜𑀯𑀺𑀪𑀸𑀕𑀯𑀲𑁂𑀦, 𑀅𑀢𑁄 𑀢𑀢𑁆𑀣𑁂𑀯 𑀢𑀫𑀥𑀺𑀧𑁆𑀧𑁂𑀢𑀁, 𑀦 𑀇𑀥𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀬𑀺𑀤’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀲𑀫𑁆𑀫𑁄𑀳𑀲𑀗𑁆𑀔𑀸𑀢𑀁 𑀥𑀼𑀭𑀁 𑀚𑁂𑀝𑁆𑀞𑀓𑀁 𑀬𑀲𑁆𑀲 𑀯𑀘𑀦𑀲𑁆𑀲𑀸𑀢𑀺 𑀅𑀲𑀫𑁆𑀫𑁄𑀳𑀥𑀼𑀭𑀁, 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑁂𑀬𑁂𑀯 𑀢𑀲𑁆𑀲 𑀯𑀘𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀪𑀸𑀯𑀲𑁆𑀲 𑀳𑁂𑀢𑀼𑀕𑀩𑁆𑀪𑀫𑀺𑀤𑀁 𑀯𑀘𑀦𑀁. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀲𑀩𑁆𑀩𑀫𑁆𑀧𑀺 𑀘𑀢𑀼𑀩𑁆𑀩𑀺𑀥𑀁 𑀲𑀫𑁆𑀧𑀚𑀜𑁆𑀜𑀁 𑀮𑀩𑁆𑀪𑀢𑀺 𑀬𑀸𑀯𑀤𑁂𑀯 𑀲𑀸𑀫𑀜𑁆𑀜𑀨𑀮𑀯𑀺𑀲𑁂𑀲𑀤𑀲𑁆𑀲𑀦𑀧𑀥𑀸𑀦𑀢𑁆𑀢𑀸 ¶ 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬, 𑀢𑀲𑁆𑀫𑀸 𑀢𑀁 𑀇𑀥 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀇𑀫𑀲𑁆𑀫𑀺𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀅𑀪𑀺𑀓𑁆𑀓𑀦𑁆𑀢𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀦𑀦𑀼 ‘‘𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀏𑀢𑀲𑁆𑀲 𑀉𑀤𑁆𑀤𑁂𑀲𑀲𑁆𑀲𑀸𑀬𑀁 𑀦𑀺𑀤𑁆𑀤𑁂𑀲𑁄, 𑀅𑀣 𑀓𑀲𑁆𑀫𑀸 𑀲𑀫𑁆𑀧𑀚𑀜𑁆𑀜𑀯𑀲𑁂𑀦𑁂𑀯 𑀯𑀺𑀢𑁆𑀣𑀸𑀭𑁄 𑀓𑀢𑁄𑀢𑀺 𑀘𑁄𑀤𑀦𑀁 𑀲𑁄𑀥𑁂𑀦𑁆𑀢𑁄 ‘‘𑀲𑀫𑁆𑀧𑀚𑀸𑀦𑀓𑀸𑀭𑀻𑀢𑀺 𑀘𑀸’’𑀢𑀺𑀆𑀤𑀺𑀫𑀸𑀳, 𑀲𑀢𑀺𑀲𑀫𑁆𑀧𑀬𑀼𑀢𑁆𑀢𑀲𑁆𑀲𑁂𑀯 𑀲𑀫𑁆𑀧𑀚𑀸𑀦𑀲𑁆𑀲 𑀯𑀲𑁂𑀦 𑀅𑀢𑁆𑀣𑀲𑁆𑀲 𑀯𑀺𑀤𑀺𑀢𑀩𑁆𑀩𑀢𑁆𑀢𑀸 𑀏𑀯𑀁 𑀯𑀺𑀢𑁆𑀣𑀸𑀭𑁄 𑀓𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀲𑀢𑀺𑀲𑀫𑁆𑀧𑀬𑀼𑀢𑁆𑀢𑀲𑁆𑀲𑁂𑀯𑀸’’𑀢𑀺 𑀘 𑀇𑀫𑀺𑀦𑀸 𑀬𑀣𑀸 𑀲𑀫𑁆𑀧𑀚𑀜𑁆𑀜𑀲𑁆𑀲 𑀓𑀺𑀘𑁆𑀘𑀢𑁄 𑀧𑀥𑀸𑀦𑀢𑀸 ¶ 𑀕𑀳𑀺𑀢𑀸, 𑀏𑀯𑀁 𑀲𑀢𑀺𑀬𑀸𑀧𑀻𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀦 𑀧𑀦𑁂𑀢𑀁 𑀲𑀢𑀺𑀬𑀸 𑀲𑀫𑁆𑀧𑀚𑀜𑁆𑀜𑁂𑀦 𑀲𑀳 𑀪𑀸𑀯𑀫𑀢𑁆𑀢𑀤𑀲𑁆𑀲𑀦𑀁. 𑀦 𑀳𑀺 𑀓𑀤𑀸𑀘𑀺 𑀲𑀢𑀺𑀭𑀳𑀺𑀢𑀸 𑀜𑀸𑀡𑀧𑁆𑀧𑀯𑀢𑁆𑀢𑀺 𑀅𑀢𑁆𑀣𑀻𑀢𑀺.

𑀦𑀦𑀼 𑀘 𑀲𑀫𑁆𑀧𑀚𑀜𑁆𑀜𑀯𑀲𑁂𑀦𑁂𑀯𑀸𑀬𑀁 𑀯𑀺𑀢𑁆𑀣𑀸𑀭𑁄, 𑀅𑀣 𑀓𑀲𑁆𑀫𑀸 𑀲𑀢𑀺𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀲𑀫𑁆𑀧𑀚𑀜𑁆𑀜𑀲𑁆𑀲 𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀘𑁄𑀤𑀦𑀫𑁆𑀧𑀺 𑀲𑁄𑀥𑁂𑀢𑀺 ‘‘𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀏𑀢𑀲𑁆𑀲 𑀳𑀺 𑀧𑀤𑀲𑁆𑀲 𑀅𑀬𑀁 𑀯𑀺𑀢𑁆𑀣𑀸𑀭𑁄’’𑀢𑀺 𑀇𑀫𑀺𑀦𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀏𑀯𑀁 𑀏𑀓𑀢𑁄 𑀉𑀤𑁆𑀤𑀺𑀝𑁆𑀞𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀢𑁆𑀣𑀸𑀭𑀢𑁆𑀢𑀸 𑀉𑀤𑁆𑀤𑁂𑀲𑁂 𑀯𑀺𑀬 𑀦𑀺𑀤𑁆𑀤𑁂𑀲𑁂𑀧𑀺 𑀢𑀤𑀼𑀪𑀬𑀁 𑀲𑀫𑀥𑀼𑀭𑀪𑀸𑀯𑁂𑀦𑁂𑀯 𑀕𑀳𑀺𑀢𑀦𑁆𑀢𑀺. 𑀇𑀫𑀺𑀦𑀸𑀧𑀺 𑀳𑀺 𑀲𑀢𑀺𑀬𑀸 𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀥𑀼𑀭𑀢𑀁𑀬𑁂𑀯 𑀯𑀺𑀪𑀸𑀯𑁂𑀢𑀺 𑀏𑀓𑀢𑁄 𑀉𑀤𑁆𑀤𑀺𑀝𑁆𑀞𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀢𑁆𑀣𑀸𑀭𑀪𑀸𑀯𑀤𑀲𑁆𑀲𑀦𑁂𑀦 𑀢𑀤𑀢𑁆𑀣𑀲𑁆𑀲 𑀲𑀺𑀤𑁆𑀥𑀢𑁆𑀢𑀸. 𑀇𑀤𑀸𑀦𑀺 𑀯𑀺𑀪𑀗𑁆𑀕𑀦𑀬𑁂𑀦𑀸𑀧𑀺 𑀢𑀤𑀢𑁆𑀣𑀁 𑀲𑀫𑀢𑁆𑀣𑁂𑀢𑀼𑀁 ‘‘𑀯𑀺𑀪𑀗𑁆𑀕𑀧𑁆𑀧𑀓𑀭𑀡𑁂 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸𑀧𑀺 𑀳𑀺 𑀲𑀫𑁆𑀧𑀚𑀜𑁆𑀜𑀲𑁆𑀲 𑀯𑀺𑀬 𑀲𑀢𑀺𑀬𑀸𑀧𑁂𑀢𑁆𑀣 𑀧𑀥𑀸𑀦𑀢𑀁𑀬𑁂𑀯 𑀯𑀺𑀪𑀸𑀯𑁂𑀢𑀺. 𑀢𑀢𑁆𑀣 𑀏𑀢𑀸𑀦𑀺 𑀧𑀤𑀸𑀦𑀻𑀢𑀺 ‘‘𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀻’’𑀢𑀺𑀆𑀤𑀻𑀦𑀺 𑀉𑀤𑁆𑀤𑁂𑀲𑀧𑀤𑀸𑀦𑀺. 𑀯𑀺𑀪𑀢𑁆𑀢𑀸𑀦𑁂𑀯𑀸𑀢𑀺 𑀲𑀢𑀺𑀬𑀸 𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑁆𑀧𑀬𑁄𑀕𑀫𑀓𑀢𑁆𑀯𑀸 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀺𑀪𑀢𑁆𑀢𑀸𑀦𑀺𑀬𑁂𑀯.

𑀫𑀚𑁆𑀛𑀺𑀫𑀪𑀸𑀡𑀓𑀸, 𑀧𑀦 𑀆𑀪𑀺𑀥𑀫𑁆𑀫𑀺𑀓𑀸 (𑀯𑀺𑀪. 𑀅𑀝𑁆𑀞. 𑁫𑁨𑁩) 𑀘 𑀏𑀯𑀁 𑀯𑀤𑀦𑁆𑀢𑀺 𑁋 𑀏𑀓𑁄 𑀪𑀺𑀓𑁆𑀔𑀼 𑀕𑀘𑁆𑀙𑀦𑁆𑀢𑁄 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑁄 𑀅𑀜𑁆𑀜𑀁 𑀯𑀺𑀢𑀓𑁆𑀓𑁂𑀦𑁆𑀢𑁄 𑀕𑀘𑁆𑀙𑀢𑀺, 𑀏𑀓𑁄 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀕𑀘𑁆𑀙𑀢𑀺. 𑀢𑀣𑀸 𑀏𑀓𑁄 𑀢𑀺𑀝𑁆𑀞𑀦𑁆𑀢𑁄 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑁄 𑀅𑀜𑁆𑀜𑀁 𑀯𑀺𑀢𑀓𑁆𑀓𑁂𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀏𑀓𑁄 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀢𑀺𑀝𑁆𑀞𑀢𑀺. 𑀏𑀓𑁄 𑀦𑀺𑀲𑀻𑀤𑀦𑁆𑀢𑁄 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑁄 𑀅𑀜𑁆𑀜𑀁 𑀯𑀺𑀢𑀓𑁆𑀓𑁂𑀦𑁆𑀢𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀦𑀺𑀲𑀻𑀤𑀢𑀺. 𑀏𑀓𑁄 𑀲𑀬𑀦𑁆𑀢𑁄 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑁄 𑀅𑀜𑁆𑀜𑀁 𑀯𑀺𑀢𑀓𑁆𑀓𑁂𑀦𑁆𑀢𑁄 𑀲𑀬𑀢𑀺, 𑀏𑀓𑁄 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀲𑀬𑀢𑀺. 𑀏𑀢𑁆𑀢𑀓𑁂𑀦 𑀧𑀦 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁 𑀦 𑀧𑀸𑀓𑀝𑀁 𑀳𑁄𑀢𑀻𑀢𑀺 𑀘𑀗𑁆𑀓𑀫𑀦𑁂𑀦 𑀤𑀻𑀧𑁂𑀦𑁆𑀢𑀺. 𑀬𑁄 𑀳𑀺 𑀪𑀺𑀓𑁆𑀔𑀼 𑀘𑀗𑁆𑀓𑀫𑀁 𑀑𑀢𑀭𑀺𑀢𑁆𑀯𑀸 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀞𑀺𑀢𑁄 𑀧𑀭𑀺𑀕𑁆𑀕𑀡𑁆𑀳𑀸𑀢𑀺 ‘‘𑀧𑀸𑀘𑀻𑀦𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀧𑀯𑀢𑁆𑀢𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 ¶ 𑀧𑀘𑁆𑀙𑀺𑀫𑀘𑀗𑁆𑀓𑀫𑀦𑀓𑁄𑀝𑀺𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸, 𑀧𑀘𑁆𑀙𑀺𑀫𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀧𑀯𑀢𑁆𑀢𑀸𑀧𑀺 𑀧𑀸𑀘𑀻𑀦𑀘𑀗𑁆𑀓𑀫𑀦𑀓𑁄𑀝𑀺𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸, 𑀘𑀗𑁆𑀓𑀫𑀦𑀯𑁂𑀫𑀚𑁆𑀛𑁂 𑀧𑀯𑀢𑁆𑀢𑀸 𑀉𑀪𑁄 𑀓𑁄𑀝𑀺𑀬𑁄 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸, 𑀘𑀗𑁆𑀓𑀫𑀦𑁂 𑀧𑀯𑀢𑁆𑀢𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀞𑀸𑀦𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸, 𑀞𑀸𑀦𑁂 𑀧𑀯𑀢𑁆𑀢𑀸 𑀦𑀺𑀲𑀚𑁆𑀚𑀁, 𑀦𑀺𑀲𑀚𑁆𑀚𑀸𑀬 𑀧𑀯𑀢𑁆𑀢𑀸 𑀲𑀬𑀦𑀁 𑀅𑀧𑁆𑀧𑀢𑁆𑀯𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸’’𑀢𑀺 𑀏𑀯𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄𑀬𑁂𑀯 𑀪𑀯𑀗𑁆𑀕𑀁 𑀑𑀢𑀸𑀭𑁂𑀢𑀺, 𑀉𑀝𑁆𑀞𑀳𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸𑀯 𑀉𑀝𑁆𑀞𑀳𑀢𑀺. 𑀅𑀬𑀁 𑀪𑀺𑀓𑁆𑀔𑀼 𑀕𑀢𑀸𑀤𑀻𑀲𑀼 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫 𑀳𑁄𑀢𑀺.

𑀏𑀯𑀁 𑀧𑀦 𑀲𑀼𑀢𑁆𑀢𑁂 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀪𑀽𑀢𑀁 𑀳𑁄𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀪𑀽𑀢𑀁 𑀦 𑀓𑀸𑀢𑀩𑁆𑀩𑀁, 𑀢𑀲𑁆𑀫𑀸 𑀬𑁄 ¶ 𑀪𑀺𑀓𑁆𑀔𑀼 𑀬𑀸𑀯 𑀲𑀓𑁆𑀓𑁄𑀢𑀺, 𑀢𑀸𑀯 𑀘𑀗𑁆𑀓𑀫𑀺𑀢𑁆𑀯𑀸 𑀞𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀲𑀬𑀫𑀸𑀦𑁄 𑀏𑀯𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀬𑀢𑀺 ‘‘𑀓𑀸𑀬𑁄 𑀅𑀘𑁂𑀢𑀦𑁄, 𑀫𑀜𑁆𑀘𑁄 𑀅𑀘𑁂𑀢𑀦𑁄, 𑀓𑀸𑀬𑁄 𑀦 𑀚𑀸𑀦𑀸𑀢𑀺 ‘𑀅𑀳𑀁 𑀫𑀜𑁆𑀘𑁂 𑀲𑀬𑀺𑀢𑁄’𑀢𑀺, 𑀫𑀜𑁆𑀘𑁄𑀧𑀺 𑀦 𑀚𑀸𑀦𑀸𑀢𑀺 ‘𑀫𑀬𑀺 𑀓𑀸𑀬𑁄 𑀲𑀬𑀺𑀢𑁄’𑀢𑀺. 𑀅𑀘𑁂𑀢𑀦𑁄 𑀓𑀸𑀬𑁄 𑀅𑀘𑁂𑀢𑀦𑁂 𑀫𑀜𑁆𑀘𑁂 𑀲𑀬𑀺𑀢𑁄’’𑀢𑀺. 𑀏𑀯𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄𑀬𑁂𑀯 𑀘𑀺𑀢𑁆𑀢𑀁 𑀪𑀯𑀗𑁆𑀕𑀁 𑀑𑀢𑀸𑀭𑁂𑀢𑀺, 𑀧𑀩𑀼𑀚𑁆𑀛𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸𑀯 𑀧𑀩𑀼𑀚𑁆𑀛𑀢𑀺, 𑀅𑀬𑀁 𑀲𑀼𑀢𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫 𑀳𑁄𑀢𑀺.

‘‘𑀓𑀸𑀬𑀸𑀤𑀺𑀓𑀺𑀭𑀺𑀬𑀸𑀦𑀺𑀧𑁆𑀨𑀢𑁆𑀢𑀦𑁂𑀦 𑀢𑀫𑁆𑀫𑀬𑀢𑁆𑀢𑀸, 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀺𑀢𑀢𑁆𑀢𑀸 𑀘 𑀚𑀯𑀦𑀁, 𑀲𑀩𑁆𑀩𑀫𑁆𑀧𑀺 𑀯𑀸 𑀙𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀁 𑀓𑀺𑀭𑀺𑀬𑀸𑀫𑀬𑀧𑀯𑀢𑁆𑀢𑀁 𑀦𑀸𑀫, 𑀢𑀲𑁆𑀫𑀺𑀁 𑀲𑀢𑀺 𑀚𑀸𑀕𑀭𑀺𑀢𑀁 𑀦𑀸𑀫 𑀳𑁄𑀢𑀻’’𑀢𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀪𑀺𑀓𑁆𑀔𑀼 𑀚𑀸𑀕𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫. 𑀅𑀧𑀺𑀘 𑀭𑀢𑁆𑀢𑀺𑀦𑁆𑀤𑀺𑀯𑀁 𑀙 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀧𑀜𑁆𑀘 𑀓𑁄𑀝𑁆𑀞𑀸𑀲𑁂 𑀚𑀕𑁆𑀕𑀦𑁆𑀢𑁄𑀧𑀺 𑀚𑀸𑀕𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫 𑀳𑁄𑀢𑀺.

𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄𑀧𑀺, 𑀩𑀸𑀢𑁆𑀢𑀺𑀁𑀲 𑀢𑀺𑀭𑀘𑁆𑀙𑀸𑀦𑀓𑀣𑀸 𑀧𑀳𑀸𑀬 𑀤𑀲𑀓𑀣𑀸𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀁 𑀲𑀧𑁆𑀧𑀸𑀬𑀓𑀣𑀁 𑀓𑀣𑁂𑀦𑁆𑀢𑁄𑀧𑀺 𑀪𑀸𑀲𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫.

𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀘𑀺𑀢𑁆𑀢𑀭𑀼𑀘𑀺𑀬𑀁 𑀫𑀦𑀲𑀺𑀓𑀸𑀭𑀁 𑀧𑀯𑀢𑁆𑀢𑁂𑀦𑁆𑀢𑁄𑀧𑀺 𑀤𑀼𑀢𑀺𑀬𑀚𑁆𑀛𑀸𑀦𑀁 𑀲𑀫𑀸𑀧𑀦𑁆𑀦𑁄𑀧𑀺 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫. 𑀤𑀼𑀢𑀺𑀬𑀜𑁆𑀳𑀺 𑀛𑀸𑀦𑀁 𑀯𑀘𑀻𑀲𑀗𑁆𑀔𑀸𑀭𑀯𑀺𑀭𑀳𑀢𑁄 𑀯𑀺𑀲𑁂𑀲𑀢𑁄 𑀢𑀼𑀡𑁆𑀳𑀻𑀪𑀸𑀯𑁄 𑀦𑀸𑀫𑀸𑀢𑀺. 𑀅𑀬𑀫𑁆𑀧𑀺 𑀦𑀬𑁄 𑀧𑀼𑀭𑀺𑀫𑀦𑀬𑀢𑁄 𑀯𑀺𑀲𑁂𑀲𑀦𑀬𑀢𑁆𑀢𑀸 𑀇𑀥𑀸𑀧𑀺 𑀆𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑁄. 𑀢𑀣𑀸 𑀳𑁂𑀲 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀤𑀻𑀲𑀼 (𑀯𑀺𑀪. 𑀅𑀝𑁆𑀞. 𑁫𑁨𑁩) ‘‘𑀅𑀬𑀁 𑀧𑀦𑁂𑀢𑁆𑀣 𑀅𑀧𑀭𑁄𑀧𑀺 𑀦𑀬𑁄’’𑀢𑀺 𑀆𑀭𑀪𑀺𑀢𑁆𑀯𑀸 ¶ 𑀬𑀣𑀸𑀯𑀼𑀢𑁆𑀢𑀦𑀬𑁄 𑀯𑀺𑀪𑀸𑀯𑀺𑀢𑁄𑀢𑀺. ‘‘𑀏𑀯𑀁 𑀔𑁄 𑀫𑀳𑀸𑀭𑀸𑀚𑀸’’𑀢𑀺𑀆𑀤𑀺 𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀕𑀫𑀦𑀁, 𑀢𑀲𑁆𑀫𑀸 𑀢𑀢𑁆𑀣 𑀦𑀺𑀤𑁆𑀤𑁂𑀲𑀸𑀦𑀼𑀭𑀽𑀧𑀁 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯’’𑀦𑁆𑀢𑀺𑀆𑀤𑀺𑀫𑀸𑀳. 𑀲𑀢𑀺𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀲𑀫𑁆𑀧𑀚𑀜𑁆𑀜𑀲𑁆𑀲𑀸𑀢𑀺 𑀳𑀺 𑀦𑀺𑀤𑁆𑀤𑁂𑀲𑀸𑀦𑀼𑀭𑀽𑀧𑀁 𑀅𑀢𑁆𑀣𑀯𑀘𑀦𑀁. 𑀢𑀢𑁆𑀣 𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄𑀬𑁂𑀯. 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀅𑀪𑀺𑀓𑁆𑀓𑀦𑁆𑀢𑀧𑀝𑀺𑀓𑁆𑀓𑀦𑁆𑀢𑀸𑀤𑀻𑀲𑀼 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀧𑀘𑁆𑀘𑁂𑀓𑀁 𑀘𑀢𑀼𑀩𑁆𑀩𑀺𑀥𑁂𑀦 𑀧𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄.

𑀲𑀦𑁆𑀢𑁄𑀲𑀓𑀣𑀸𑀯𑀡𑁆𑀡𑀦𑀸

𑁨𑁧𑁫. 𑀅𑀢𑁆𑀣𑀤𑀲𑁆𑀲𑀦𑁂𑀦 𑀧𑀤𑀲𑁆𑀲𑀧𑀺 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸 𑀧𑀤𑀫𑀦𑀧𑁂𑀓𑁆𑀔𑀺𑀢𑁆𑀯𑀸 𑀲𑀦𑁆𑀢𑁄𑀲𑀲𑁆𑀲 𑀅𑀢𑁆𑀢𑀦𑀺 𑀅𑀢𑁆𑀣𑀺𑀢𑀸𑀬 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄𑀢𑀺 𑀧𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑀫𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀢𑀭𑀻𑀢𑀭𑀧𑀘𑁆𑀘𑀬𑀲𑀦𑁆𑀢𑁄𑀲𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀯𑀼𑀢𑁆𑀢𑀁. 𑀲𑀦𑁆𑀢𑀼𑀲𑁆𑀲𑀢𑀺 𑀦 𑀮𑀼𑀤𑁆𑀥𑁄 𑀪𑀯𑀢𑀻𑀢𑀺 𑀳𑀺 𑀧𑀤𑀦𑀺𑀩𑁆𑀩𑀘𑀦𑀁. 𑀅𑀧𑀺𑀘 𑀧𑀤𑀦𑀺𑀩𑁆𑀩𑀘𑀦𑀯𑀲𑁂𑀦 𑀅𑀢𑁆𑀣𑁂 𑀯𑀼𑀢𑁆𑀢𑁂 𑀬𑀲𑁆𑀲 𑀲𑀦𑁆𑀢𑁄𑀲𑀲𑁆𑀲 𑀅𑀢𑁆𑀢𑀦𑀺 𑀅𑀢𑁆𑀣𑀺𑀪𑀸𑀯𑀢𑁄 𑀲𑀦𑁆𑀢𑀼𑀝𑁆𑀞𑁄 𑀦𑀸𑀫, 𑀲𑁄 𑀅𑀧𑀸𑀓𑀝𑁄𑀢𑀺 𑀢𑀁 𑀧𑀸𑀓𑀝𑀓𑀭𑀡𑀢𑁆𑀣𑀁 ‘‘𑀇𑀢𑀭𑀻𑀢𑀭𑀧𑀘𑁆𑀘𑀬𑀲𑀦𑁆𑀢𑁄𑀲𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀅𑀢𑁆𑀣𑀫𑀢𑁆𑀢𑀫𑀸𑀳, 𑀘𑀻𑀯𑀭𑀸𑀤𑀺𑀓𑁂 ¶ 𑀬𑀢𑁆𑀣 𑀓𑀢𑁆𑀣𑀘𑀺 𑀓𑀧𑁆𑀧𑀺𑀬𑀧𑀘𑁆𑀘𑀬𑁂 𑀲𑀦𑁆𑀢𑁄𑀲𑁂𑀦 𑀲𑀫𑀗𑁆𑀕𑀻𑀪𑀽𑀢𑁄𑀢𑀺 𑀅𑀢𑁆𑀣𑁄. 𑀇𑀢𑀭-𑀲𑀤𑁆𑀤𑁄 𑀳𑀺 𑀅𑀦𑀺𑀬𑀫𑀯𑀘𑀦𑁄 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀼𑀘𑁆𑀘𑀫𑀸𑀦𑁄 𑀬𑀁 𑀓𑀺𑀜𑁆𑀘𑀺-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀢𑁆𑀣 𑀓𑀢𑁆𑀣𑀘𑀺 𑀓𑀧𑁆𑀧𑀺𑀬𑀧𑀘𑁆𑀘𑀬𑁂’’𑀢𑀺. 𑀅𑀣 𑀯𑀸 𑀇𑀢𑀭𑀁 𑀯𑀼𑀘𑁆𑀘𑀢𑀺 𑀳𑀻𑀦𑀁 𑀧𑀡𑀻𑀢𑀢𑁄 𑀅𑀜𑁆𑀜𑀢𑁆𑀢𑀸, 𑀢𑀣𑀸 𑀧𑀡𑀻𑀢𑀫𑁆𑀧𑀺 𑀳𑀻𑀦𑀢𑁄 𑀅𑀜𑁆𑀜𑀢𑁆𑀢𑀸. 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀸𑀲𑀺𑀤𑁆𑀥𑀸 𑀳𑀺 𑀇𑀢𑀭𑀢𑀸, 𑀢𑀲𑁆𑀫𑀸 𑀳𑀻𑀦𑁂𑀦 𑀯𑀸 𑀧𑀡𑀻𑀢𑁂𑀦 𑀯𑀸 𑀘𑀻𑀯𑀭𑀸𑀤𑀺𑀓𑀧𑁆𑀧𑀺𑀬𑀧𑀘𑁆𑀘𑀬𑁂𑀦 𑀲𑀦𑁆𑀢𑁄𑀲𑁂𑀦 𑀲𑀫𑀗𑁆𑀕𑀻𑀪𑀽𑀢𑁄𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀦𑁆𑀢𑀼𑀲𑁆𑀲𑀢𑀺 𑀢𑁂𑀦, 𑀲𑀦𑁆𑀢𑀼𑀲𑁆𑀲𑀦𑀫𑀢𑁆𑀢𑀦𑁆𑀢𑀺 𑀯𑀸 𑀲𑀦𑁆𑀢𑁄𑀲𑁄, 𑀢𑀣𑀸 𑀧𑀯𑀢𑁆𑀢𑁄 𑀅𑀮𑁄𑀪𑁄, 𑀅𑀮𑁄𑀪𑀧𑀥𑀸𑀦𑀸 𑀯𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸. 𑀮𑀪𑀦𑀁 𑀮𑀸𑀪𑁄, 𑀅𑀢𑁆𑀢𑀦𑁄 𑀮𑀸𑀪𑀲𑁆𑀲 𑀅𑀦𑀼𑀭𑀽𑀧𑀁 𑀲𑀦𑁆𑀢𑁄𑀲𑁄 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀩𑀮𑀦𑁆𑀢𑀺 𑀓𑀸𑀬𑀩𑀮𑀁, 𑀅𑀢𑁆𑀢𑀦𑁄 𑀩𑀮𑀲𑁆𑀲 𑀅𑀦𑀼𑀭𑀽𑀧𑀁 𑀲𑀦𑁆𑀢𑁄𑀲𑁄 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀲𑀸𑀭𑀼𑀧𑁆𑀧𑀦𑁆𑀢𑀺 𑀲𑀧𑁆𑀧𑀸𑀬𑀁 𑀧𑀢𑀺𑀭𑀽𑀧𑀁 𑀪𑀺𑀓𑁆𑀔𑀼𑀦𑁄 𑀅𑀦𑀼𑀘𑁆𑀙𑀯𑀺𑀓𑀢𑀸, 𑀅𑀢𑁆𑀢𑀦𑁄 𑀲𑀸𑀭𑀼𑀧𑁆𑀧𑀲𑁆𑀲 𑀅𑀦𑀼𑀭𑀽𑀧𑀁 𑀲𑀦𑁆𑀢𑁄𑀲𑁄 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀅𑀧𑀭𑁄 𑀦𑀬𑁄 𑁋 𑀮𑀩𑁆𑀪𑀢𑁂𑀢𑀺 𑀮𑀸𑀪𑁄, 𑀬𑁄 𑀬𑁄 𑀮𑀸𑀪𑁄 𑀬𑀣𑀸𑀮𑀸𑀪𑀁, 𑀇𑀢𑀭𑀻𑀢𑀭𑀧𑀘𑁆𑀘𑀬𑁄, 𑀬𑀣𑀸𑀮𑀸𑀪𑁂𑀦 𑀲𑀦𑁆𑀢𑁄𑀲𑁄 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀩𑀮𑀲𑁆𑀲 𑀅𑀦𑀼𑀭𑀽𑀧𑀁 𑀧𑀯𑀢𑁆𑀢𑀢𑀻𑀢𑀺 𑀬𑀣𑀸𑀩𑀮𑀁, 𑀅𑀢𑁆𑀢𑀦𑁄 𑀩𑀮𑀸𑀦𑀼𑀘𑁆𑀙𑀯𑀺𑀓𑀧𑀘𑁆𑀘𑀬𑁄, 𑀬𑀣𑀸-𑀲𑀤𑁆𑀤𑁄 𑀘𑁂𑀢𑁆𑀣 𑀲𑀲𑀸𑀥𑀦𑀁 𑀅𑀦𑀼𑀭𑀽𑀧𑀓𑀺𑀭𑀺𑀬𑀁 ¶ 𑀯𑀤𑀢𑀺, 𑀬𑀣𑀸 𑀢𑀁 ‘‘𑀅𑀥𑀺𑀘𑀺𑀢𑁆𑀢’’𑀦𑁆𑀢𑀺 𑀏𑀢𑁆𑀣 𑀅𑀥𑀺-𑀲𑀤𑁆𑀤𑁄 𑀲𑀲𑀸𑀥𑀦𑀁 𑀅𑀥𑀺𑀓𑀭𑀡𑀓𑀺𑀭𑀺𑀬𑀦𑁆𑀢𑀺. 𑀬𑀣𑀸𑀩𑀮𑁂𑀦 𑀲𑀦𑁆𑀢𑁄𑀲𑁄 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀲𑀸𑀭𑀼𑀧𑁆𑀧𑀢𑀺 𑀧𑀢𑀺𑀭𑀽𑀧𑀁 𑀪𑀯𑀢𑀺, 𑀲𑁄𑀪𑀦𑀁 𑀯𑀸 𑀆𑀭𑁄𑀧𑁂𑀢𑀻𑀢𑀺 𑀲𑀸𑀭𑀼𑀧𑁆𑀧𑀁, 𑀬𑀁 𑀬𑀁 𑀲𑀸𑀭𑀼𑀧𑁆𑀧𑀁 𑀬𑀣𑀸𑀲𑀸𑀭𑀼𑀧𑁆𑀧𑀁, 𑀪𑀺𑀓𑁆𑀔𑀼𑀦𑁄 𑀲𑀧𑁆𑀧𑀸𑀬𑀧𑀘𑁆𑀘𑀬𑁄, 𑀬𑀣𑀸𑀲𑀸𑀭𑀼𑀧𑁆𑀧𑁂𑀦 𑀲𑀦𑁆𑀢𑁄𑀲𑁄 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄. 𑀬𑀣𑀸𑀯𑀼𑀢𑁆𑀢𑀁 𑀧𑀪𑁂𑀤𑀫𑀦𑀼𑀕𑀢𑀸 𑀯𑀡𑁆𑀡𑀦𑀸 𑀧𑀪𑁂𑀤𑀯𑀡𑁆𑀡𑀦𑀸.

𑀇𑀥𑀸𑀢𑀺 𑀲𑀸𑀲𑀦𑁂. 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀻𑀢𑀺 𑀅𑀧𑁆𑀧𑀢𑁆𑀢𑀧𑀢𑁆𑀣𑀦𑀪𑀸𑀯𑀫𑀸𑀳, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀻𑀢𑀺 𑀧𑀢𑁆𑀢𑀧𑀢𑁆𑀣𑀦𑀸𑀪𑀸𑀯𑀁. 𑀧𑀞𑀫𑁂𑀦 𑀅𑀧𑁆𑀧𑀢𑁆𑀢𑀧𑀢𑁆𑀣𑀦𑀸𑀪𑀸𑀯𑁂𑀬𑁂𑀯 𑀯𑀼𑀢𑁆𑀢𑁂 𑀬𑀣𑀸𑀮𑀤𑁆𑀥𑀢𑁄 𑀅𑀜𑁆𑀜𑀲𑁆𑀲 𑀅𑀧𑀢𑁆𑀣𑀦𑀸 𑀦𑀸𑀫 𑀅𑀧𑁆𑀧𑀺𑀘𑁆𑀙𑀢𑀸𑀬𑀧𑀺 𑀲𑀺𑀬𑀸 𑀧𑀯𑀢𑁆𑀢𑀺𑀆𑀓𑀸𑀭𑁄𑀢𑀺 𑀅𑀧𑁆𑀧𑀺𑀘𑁆𑀙𑀢𑀸𑀧𑀲𑀗𑁆𑀕𑀪𑀸𑀯𑀢𑁄 𑀢𑀢𑁄𑀧𑀺 𑀦𑀺𑀯𑀢𑁆𑀢𑀫𑁂𑀯 𑀲𑀦𑁆𑀢𑁄𑀲𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀢𑀼𑀁 𑀤𑀼𑀢𑀺𑀬𑁂𑀦 𑀧𑀢𑁆𑀢𑀧𑀢𑁆𑀣𑀦𑀸𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀫𑀼𑀧𑀭𑀺𑀧𑀺. 𑀧𑀓𑀢𑀺𑀤𑀼𑀩𑁆𑀩𑀮𑁄𑀢𑀺 𑀆𑀩𑀸𑀥𑀸𑀤𑀺𑀯𑀺𑀭𑀳𑁂𑀧𑀺 𑀲𑀪𑀸𑀯𑀤𑀼𑀩𑁆𑀩𑀮𑁄. 𑀲𑀫𑀸𑀦𑁄 𑀲𑀻𑀮𑀸𑀤𑀺𑀪𑀸𑀕𑁄 𑀬𑀲𑁆𑀲𑀸𑀢𑀺 𑀲𑀪𑀸𑀕𑁄, 𑀲𑀳 𑀯𑀸 𑀲𑀻𑀮𑀸𑀤𑀻𑀳𑀺 𑀕𑀼𑀡𑀪𑀸𑀕𑁂𑀳𑀺 𑀯𑀢𑁆𑀢𑀢𑀻𑀢𑀺 𑀲𑀪𑀸𑀕𑁄, 𑀮𑀚𑁆𑀚𑀻𑀧𑁂𑀲𑀮𑁄 𑀪𑀺𑀓𑁆𑀔𑀼, 𑀢𑁂𑀦. 𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀧𑀓𑀢𑀺𑀤𑀼𑀩𑁆𑀩𑀮𑀸𑀤𑀻𑀦𑀁 𑀕𑀭𑀼𑀘𑀻𑀯𑀭𑀁 𑀦 𑀨𑀸𑀲𑀼𑀪𑀸𑀯𑀸𑀯𑀳𑀁, 𑀲𑀭𑀻𑀭𑀔𑁂𑀤𑀸𑀯𑀳𑀜𑁆𑀘 𑀳𑁄𑀢𑀻𑀢𑀺 𑀧𑀬𑁄𑀚𑀦𑀯𑀲𑁂𑀦 𑀧𑀭𑀺𑀯𑀢𑁆𑀢𑀦𑀁 𑀯𑀼𑀢𑁆𑀢𑀁, 𑀦 𑀅𑀢𑁆𑀭𑀺𑀘𑁆𑀙𑀢𑀸𑀤𑀺𑀯𑀲𑁂𑀦. 𑀅𑀢𑁆𑀭𑀺𑀘𑁆𑀙𑀢𑀸𑀤𑀺𑀧𑁆𑀧𑀓𑀸𑀭𑁂𑀦 𑀳𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀮𑀳𑀼𑀓𑀘𑀻𑀯𑀭𑀧𑀭𑀺𑀪𑁄𑀕𑁄 𑀲𑀦𑁆𑀢𑁄𑀲𑀯𑀺𑀭𑁄𑀥𑀻 𑀳𑁄𑀢𑀺, 𑀢𑀲𑁆𑀲 𑀧𑀦 𑀢𑀤𑀪𑀸𑀯𑀢𑁄 𑀬𑀣𑀸𑀯𑀼𑀢𑁆𑀢𑀧𑁆𑀧𑀬𑁄𑀚𑀦𑀯𑀲𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀮𑀳𑀼𑀓𑀘𑀻𑀯𑀭𑀧𑀭𑀺𑀪𑁄𑀕𑁄𑀧𑀺 𑀦 𑀲𑀦𑁆𑀢𑁄𑀲𑀯𑀺𑀭𑁄𑀥𑀻𑀢𑀺 𑀆𑀳 ‘‘𑀮𑀳𑀼𑀓𑁂𑀦 𑀬𑀸𑀧𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀻’’𑀢𑀺. 𑀧𑀬𑁄𑀚𑀦𑀯𑀲𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀮𑀳𑀼𑀓𑀘𑀻𑀯𑀭𑀧𑀭𑀺𑀪𑁄𑀕𑁄𑀧𑀺 𑀦 𑀢𑀸𑀯 𑀲𑀦𑁆𑀢𑁄𑀲𑀯𑀺𑀭𑁄𑀥𑀻, 𑀧𑀕𑁂𑀯 𑀢𑀣𑀸 𑀅𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀪𑁄𑀕𑁂𑀢𑀺 𑀲𑀫𑁆𑀪𑀸𑀯𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀤𑀲𑁆𑀲𑀦𑀢𑁆𑀣𑀜𑁆𑀳𑁂𑀢𑁆𑀣 𑀅𑀧𑀺-𑀲𑀤𑁆𑀤𑀕𑁆𑀕𑀳𑀡𑀁. 𑀘𑀻𑀯𑀭𑀦𑀺𑀤𑁆𑀤𑁂𑀲𑁂𑀧𑀺 ¶ ‘‘𑀧𑀢𑁆𑀢𑀘𑀻𑀯𑀭𑀸𑀤𑀻𑀦𑀁 𑀅𑀜𑁆𑀜𑀢𑀭’’𑀦𑁆𑀢𑀺 𑀯𑀘𑀦𑀁 𑀬𑀣𑀸𑀭𑀼𑀢𑀁 𑀕𑀳𑀺𑀢𑀸𑀯𑀲𑁂𑀲𑀧𑀘𑁆𑀘𑀬𑀲𑀦𑁆𑀢𑁄𑀲𑀲𑁆𑀲 𑀘𑀻𑀯𑀭𑀲𑀦𑁆𑀢𑁄𑀲𑁂 𑀲𑀫𑀯𑀭𑁄𑀥𑀺𑀢𑀸𑀤𑀲𑁆𑀲𑀦𑀢𑁆𑀣𑀁. ‘‘𑀣𑁂𑀭𑀓𑁄 𑀅𑀬𑀫𑀸𑀬𑀲𑁆𑀫𑀸 𑀫𑀮𑁆𑀮𑀓𑁄’’𑀢𑀺𑀆𑀤𑀻𑀲𑀼 𑀣𑁂𑀭𑀯𑁄𑀳𑀸𑀭𑀲𑁆𑀲 𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑁂𑀧𑀺 𑀧𑀯𑀢𑁆𑀢𑀺𑀢𑁄 𑀤𑀲𑀯𑀲𑁆𑀲𑀢𑁄 𑀧𑀪𑀼𑀢𑀺 𑀘𑀺𑀭𑀯𑀲𑁆𑀲𑀧𑀩𑁆𑀩𑀚𑀺𑀢𑁂𑀲𑁆𑀯𑁂𑀯 𑀇𑀥 𑀧𑀯𑀢𑁆𑀢𑀺𑀜𑀸𑀧𑀦𑀢𑁆𑀣𑀁 ‘‘𑀣𑁂𑀭𑀸𑀦𑀁 𑀘𑀺𑀭𑀧𑀩𑁆𑀩𑀚𑀺𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀣𑁂𑀭𑀸𑀦𑀦𑁆𑀢𑀺 𑀯𑀸 𑀲𑀗𑁆𑀖𑀢𑁆𑀣𑁂𑀭𑀁 𑀯𑀤𑀢𑀺. 𑀘𑀺𑀭𑀧𑀩𑁆𑀩𑀚𑀺𑀢𑀸𑀦𑀦𑁆𑀢𑀺 𑀧𑀦 𑀢𑀤𑀯𑀲𑁂𑀲𑁂 𑀯𑀼𑀟𑁆𑀠𑀪𑀺𑀓𑁆𑀔𑀽. 𑀲𑀗𑁆𑀓𑀸𑀭𑀓𑀽𑀝𑀸𑀤𑀺𑀢𑁄𑀢𑀺 𑀓𑀘𑀯𑀭𑀭𑀸𑀲𑀺𑀆𑀤𑀺𑀢𑁄. 𑀅𑀦𑀦𑁆𑀢𑀓𑀸𑀦𑀻𑀢𑀺 𑀦𑀦𑁆𑀢𑀓𑀸𑀦𑀺 𑀧𑀺𑀮𑁄𑀢𑀺𑀓𑀸𑀦𑀺. ‘‘𑀅-𑀓𑀸𑀭𑁄 ¶ 𑀘𑁂𑀢𑁆𑀣 𑀦𑀺𑀧𑀸𑀢𑀫𑀢𑁆𑀢’’𑀦𑁆𑀢𑀺 (𑀯𑀺. 𑀯. 𑀅𑀝𑁆𑀞. 𑁧𑁧𑁬𑁫) 𑀯𑀺𑀫𑀸𑀦𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑀣𑀸 𑀘𑀸𑀳𑀼 ‘‘𑀦𑀦𑁆𑀢𑀓𑀁 𑀓𑀧𑁆𑀧𑀝𑁄 𑀚𑀺𑀡𑁆𑀡𑀯𑀲𑀦𑀁 𑀢𑀼 𑀧𑀝𑀘𑁆𑀘𑀭’’𑀦𑁆𑀢𑀺 𑀦𑀢𑁆𑀣𑀺 𑀤𑀲𑀸𑀲𑀗𑁆𑀔𑀸𑀢𑁄 𑀅𑀦𑁆𑀢𑁄 𑀓𑁄𑀝𑀺 𑀬𑁂𑀲𑀦𑁆𑀢𑀺 𑀳𑀺 𑀦𑀦𑁆𑀢𑀓𑀸𑀦𑀺, 𑀦-𑀲𑀤𑁆𑀤𑀲𑁆𑀲 𑀢𑀼 𑀅𑀦𑀸𑀤𑁂𑀲𑁂 𑀅𑀦𑀦𑁆𑀢𑀓𑀸𑀦𑀻𑀢𑀺𑀧𑀺 𑀬𑀼𑀚𑁆𑀚𑀢𑀺. 𑀲𑀗𑁆𑀓𑁂𑀢𑀓𑁄𑀯𑀺𑀤𑀸𑀦𑀁 𑀧𑀦 𑀆𑀘𑀭𑀺𑀬𑀸𑀦𑀁 𑀢𑀣𑀸 𑀅𑀯𑀼𑀢𑁆𑀢𑀢𑁆𑀢𑀸 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. ‘‘𑀲𑀦𑀦𑁆𑀢𑀓𑀸𑀦𑀻’’𑀢𑀺𑀧𑀺 𑀧𑀸𑀞𑁄, 𑀦𑀦𑁆𑀢𑀓𑁂𑀦 𑀲𑀳 𑀲𑀁𑀲𑀺𑀩𑁆𑀩𑀺𑀢𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀺 𑀘𑀻𑀯𑀭𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀗𑁆𑀖𑀸𑀝𑀺𑀦𑁆𑀢𑀺 𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀁 𑀘𑀻𑀯𑀭𑀁. 𑀢𑀻𑀡𑀺𑀧𑀺 𑀳𑀺 𑀘𑀻𑀯𑀭𑀸𑀦𑀺 𑀲𑀗𑁆𑀖𑀝𑀺𑀢𑀢𑁆𑀢𑀸 ‘‘𑀲𑀗𑁆𑀖𑀸𑀝𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀫𑀳𑀕𑁆𑀖𑀁 𑀘𑀻𑀯𑀭𑀁, 𑀩𑀳𑀽𑀦𑀺 𑀯𑀸 𑀘𑀻𑀯𑀭𑀸𑀦𑀺 𑀮𑀪𑀺𑀢𑁆𑀯𑀸 𑀢𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀤𑀜𑁆𑀜𑀲𑁆𑀲 𑀕𑀳𑀡𑀫𑁆𑀧𑀺 𑀫𑀳𑀺𑀘𑁆𑀙𑀢𑀸𑀤𑀺𑀦𑀬𑁂 𑀅𑀝𑁆𑀞𑀢𑁆𑀯𑀸 𑀬𑀣𑀸𑀲𑀸𑀭𑀼𑀧𑁆𑀧𑀦𑀬𑁂 𑀏𑀯 𑀞𑀺𑀢𑀢𑁆𑀢𑀸 𑀦 𑀲𑀦𑁆𑀢𑁄𑀲𑀯𑀺𑀭𑁄𑀥𑀻𑀢𑀺 𑀆𑀳 ‘‘𑀢𑁂𑀲𑀁…𑀧𑁂… 𑀥𑀸𑀭𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀻’’𑀢𑀺. 𑀬𑀣𑀸𑀲𑀸𑀭𑀼𑀧𑁆𑀧𑀦𑀬𑁂𑀦 𑀬𑀣𑀸𑀮𑀤𑁆𑀥𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀤𑀜𑁆𑀜𑀕𑀳𑀡𑀫𑁆𑀧𑀺 𑀦 𑀢𑀸𑀯 𑀲𑀦𑁆𑀢𑁄𑀲𑀯𑀺𑀭𑁄𑀥𑀻, 𑀧𑀕𑁂𑀯 𑀅𑀦𑀜𑁆𑀜𑀕𑀳𑀡𑁂𑀦 𑀬𑀣𑀸𑀮𑀤𑁆𑀥𑀲𑁆𑀲𑁂𑀯 𑀬𑀣𑀸𑀲𑀸𑀭𑀼𑀧𑁆𑀧𑀁 𑀧𑀭𑀺𑀪𑁄𑀕𑁂𑀢𑀺 𑀲𑀫𑁆𑀪𑀸𑀯𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀤𑀲𑁆𑀲𑀦𑀢𑁆𑀣𑀜𑁆𑀳𑁂𑀢𑁆𑀣 𑀅𑀧𑀺-𑀲𑀤𑁆𑀤𑀕𑁆𑀕𑀳𑀡𑀁, 𑀏𑀯𑀁 𑀲𑁂𑀲𑀧𑀘𑁆𑀘𑀬𑁂𑀲𑀼𑀧𑀺 𑀬𑀣𑀸𑀩𑀮𑀬𑀣𑀸𑀲𑀸𑀭𑀼𑀧𑁆𑀧𑀦𑀺𑀤𑁆𑀤𑁂𑀲𑁂𑀲𑀼 𑀅𑀧𑀺-𑀲𑀤𑁆𑀤𑀕𑁆𑀕𑀳𑀡𑁂 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀓𑀢𑀺𑀯𑀺𑀭𑀼𑀤𑁆𑀥𑀦𑁆𑀢𑀺 𑀲𑀪𑀸𑀯𑁂𑀦𑁂𑀯 𑀅𑀲𑀧𑁆𑀧𑀸𑀬𑀁. 𑀲𑀫𑀡𑀥𑀫𑁆𑀫𑀓𑀭𑀡𑀲𑀻𑀲𑁂𑀦 𑀲𑀧𑁆𑀧𑀸𑀬𑀧𑀘𑁆𑀘𑀬𑀧𑀭𑀺𑀬𑁂𑀲𑀦𑀁, 𑀧𑀭𑀺𑀪𑀼𑀜𑁆𑀚𑀦𑀜𑁆𑀘 𑀯𑀺𑀲𑁂𑀲𑀢𑁄 𑀬𑀼𑀢𑁆𑀢𑀢𑀭𑀦𑁆𑀢𑀺 𑀅𑀢𑁆𑀣𑀦𑁆𑀢𑀭𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 ‘‘𑀬𑀸𑀧𑁂𑀦𑁆𑀢𑁄𑀧𑀻’’𑀢𑀺 𑀅𑀯𑀢𑁆𑀯𑀸 ‘‘𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀻’’𑀢𑀺 𑀯𑀼𑀢𑁆𑀢𑀁. 𑀫𑀺𑀲𑁆𑀲𑀓𑀸𑀳𑀸𑀭𑀦𑁆𑀢𑀺 𑀢𑀡𑁆𑀟𑀼𑀮𑀫𑀼𑀕𑁆𑀕𑀸𑀤𑀻𑀳𑀺 𑀦𑀸𑀦𑀸𑀯𑀺𑀥𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑁂𑀳𑀺 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 𑀆𑀳𑀸𑀭𑀁.

𑀅𑀜𑁆𑀜𑀫𑁆𑀧𑀺 𑀲𑁂𑀦𑀸𑀲𑀦𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑁄 𑀳𑀻’’𑀢𑀺𑀆𑀤𑀺. 𑀧𑀞𑀫𑁂 𑀳𑀺 𑀦𑀬𑁂 𑀬𑀣𑀸𑀮𑀤𑁆𑀥𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂𑀦, 𑀤𑀼𑀢𑀺𑀬𑁂 𑀧𑀦 𑀬𑀣𑀸𑀧𑀢𑁆𑀢𑀲𑁆𑀲 𑀅𑀲𑀫𑁆𑀧𑀝𑀺𑀘𑁆𑀙𑀦𑁂𑀦 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄 𑀯𑀼𑀢𑁆𑀢𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀳𑀺-𑀲𑀤𑁆𑀤𑁄 𑀘𑁂𑀢𑁆𑀣 𑀧𑀓𑁆𑀔𑀦𑁆𑀢𑀭𑀚𑁄𑀢𑀓𑁄. 𑀫𑀚𑁆𑀛𑀺𑀫𑀸𑀕𑀫𑀝𑁆𑀞𑀓𑀣𑀸𑀬𑀁 𑀧𑀦 𑀧𑀺-𑀲𑀤𑁆𑀤𑁄 𑀤𑀺𑀲𑁆𑀲𑀢𑀺. ‘‘𑀉𑀢𑁆𑀢𑀫𑀲𑁂𑀦𑀸𑀲𑀦𑀁 𑀦𑀸𑀫 𑀧𑀫𑀸𑀤𑀝𑁆𑀞𑀸𑀦’’𑀦𑁆𑀢𑀺 𑀯𑀢𑁆𑀯𑀸 𑀢𑀩𑁆𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀺𑀤𑁆𑀤𑀸𑀪𑀺𑀪𑀽𑀢𑀲𑁆𑀲𑀸𑀢𑀺 𑀣𑀺𑀦𑀫𑀺𑀤𑁆𑀤𑁄𑀓𑁆𑀓𑀫𑀦𑁂𑀦 𑀘𑀺𑀢𑁆𑀢𑀘𑁂𑀢𑀲𑀺𑀓𑀕𑁂𑀮𑀜𑁆𑀜𑀪𑀸𑀯𑀢𑁄 𑀪𑀯𑀗𑁆𑀕𑀲𑀦𑁆𑀢𑀢𑀺𑀲𑀗𑁆𑀔𑀸𑀢𑀸𑀬 𑀦𑀺𑀤𑁆𑀤𑀸𑀬 𑀅𑀪𑀺𑀪𑀽𑀢𑀲𑁆𑀲, 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀧𑀝𑀺𑀩𑀼𑀚𑁆𑀛𑀢𑁄𑀢𑀺 𑀢𑀣𑀸𑀭𑀽𑀧𑁂𑀦 𑀆𑀭𑀫𑁆𑀫𑀡𑀦𑁆𑀢𑀭𑁂𑀦 ¶ 𑀧𑀝𑀺𑀩𑀼𑀚𑁆𑀛𑀦𑁆𑀢𑀲𑁆𑀲 𑀧𑀝𑀺𑀩𑀼𑀚𑁆𑀛𑀦𑀳𑁂𑀢𑀼 ¶ 𑀓𑀸𑀫𑀯𑀺𑀢𑀓𑁆𑀓𑀸 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀧𑀝𑀺𑀩𑀼𑀚𑁆𑀛𑀦𑀢𑁄’’𑀢𑀺𑀧𑀺 𑀳𑀺 𑀓𑀢𑁆𑀣𑀘𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀅𑀬𑀫𑁆𑀧𑀻𑀢𑀺 𑀧𑀞𑀫𑀦𑀬𑀁 𑀉𑀧𑀸𑀤𑀸𑀬 𑀯𑀼𑀢𑁆𑀢𑀁.

𑀢𑁂𑀲𑀁 𑀆𑀪𑀢𑁂𑀦𑀸𑀢𑀺 𑀢𑁂𑀳𑀺 𑀣𑁂𑀭𑀸𑀤𑀻𑀳𑀺 𑀆𑀪𑀢𑁂𑀦, 𑀢𑁂𑀲𑀁 𑀯𑀸 𑀬𑁂𑀦 𑀓𑁂𑀦𑀘𑀺 𑀲𑀦𑁆𑀢𑀓𑁂𑀦𑀸𑀢𑀺 𑀅𑀚𑁆𑀛𑀸𑀳𑀭𑀺𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀫𑀼𑀢𑁆𑀢𑀳𑀭𑀻𑀢𑀓𑀦𑁆𑀢𑀺 𑀕𑁄𑀫𑀼𑀢𑁆𑀢𑀧𑀭𑀺𑀪𑀸𑀯𑀺𑀢𑀁, 𑀧𑀽𑀢𑀺𑀪𑀸𑀯𑁂𑀦 𑀯𑀸 𑀫𑁄𑀘𑀺𑀢𑀁 𑀙𑀟𑁆𑀟𑀺𑀢𑀁 𑀳𑀭𑀻𑀢𑀓𑀁, 𑀇𑀤𑀸𑀦𑀺 𑀧𑀦 𑀧𑁄𑀢𑁆𑀣𑀓𑁂𑀲𑀼 ‘‘𑀕𑁄𑀫𑀼𑀢𑁆𑀢𑀳𑀭𑀻𑀢𑀓’’𑀦𑁆𑀢𑀺 𑀧𑀸𑀞𑁄, 𑀲𑁄 𑀦 𑀧𑁄𑀭𑀸𑀡𑀧𑀸𑀞𑁄 𑀢𑀩𑁆𑀩𑀡𑁆𑀡𑀦𑀸𑀬 (𑀤𑀻. 𑀦𑀺. 𑀝𑀻. 𑁧.𑁨𑁧𑁫) 𑀯𑀺𑀭𑀼𑀤𑁆𑀥𑀢𑁆𑀢𑀸. 𑀘𑀢𑀼𑀫𑀥𑀼𑀭𑀦𑁆𑀢𑀺 𑀫𑀚𑁆𑀛𑀺𑀫𑀸𑀕𑀫𑀯𑀭𑁂 𑀫𑀳𑀸𑀥𑀫𑁆𑀫𑀲𑀫𑀸𑀤𑀸𑀦𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁪𑁮𑁪 𑀆𑀤𑀬𑁄) 𑀯𑀼𑀢𑁆𑀢𑀁 𑀤𑀥𑀺𑀫𑀥𑀼𑀲𑀧𑁆𑀧𑀺𑀨𑀸𑀡𑀺𑀢𑀲𑀗𑁆𑀔𑀸𑀢𑀁 𑀘𑀢𑀼𑀫𑀥𑀼𑀭𑀁, 𑀏𑀓𑀲𑁆𑀫𑀺𑀜𑁆𑀘 𑀪𑀸𑀚𑀦𑁂 𑀘𑀢𑀼𑀫𑀥𑀼𑀭𑀁 𑀞𑀧𑁂𑀢𑁆𑀯𑀸 𑀢𑁂𑀲𑀼 𑀬𑀤𑀺𑀘𑁆𑀙𑀲𑀺, 𑀢𑀁 𑀕𑀡𑁆𑀳𑀸𑀳𑀺 𑀪𑀦𑁆𑀢𑁂𑀢𑀺 𑀅𑀢𑁆𑀣𑁄. ‘‘𑀲𑀘𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀢𑀤𑀼𑀪𑀬𑀲𑁆𑀲 𑀭𑁄𑀕𑀯𑀽𑀧𑀲𑀫𑀦𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀩𑀼𑀤𑁆𑀥𑀸𑀤𑀻𑀳𑀺 𑀯𑀡𑁆𑀡𑀺𑀢𑀦𑁆𑀢𑀺 ‘‘𑀧𑀽𑀢𑀺𑀫𑀼𑀢𑁆𑀢𑀪𑁂𑀲𑀚𑁆𑀚𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁭𑁩, 𑁧𑁨𑁮) 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀤𑀻𑀳𑀺 𑀧𑀲𑀢𑁆𑀣𑀁. 𑀅𑀧𑁆𑀧𑀺𑀘𑁆𑀙𑀢𑀸𑀯𑀺𑀲𑀺𑀝𑁆𑀞𑀸𑀬 𑀲𑀦𑁆𑀢𑀼𑀝𑁆𑀞𑀺𑀬𑀸 𑀦𑀺𑀬𑁄𑀚𑀦𑀢𑁄 𑀧𑀭𑀫𑁂𑀦 𑀉𑀓𑁆𑀓𑀁𑀲𑀕𑀢𑁂𑀦 𑀲𑀦𑁆𑀢𑁄𑀲𑁂𑀦 𑀲𑀦𑁆𑀢𑀼𑀲𑁆𑀲𑀢𑀻𑀢𑀺 𑀧𑀭𑀫𑀲𑀦𑁆𑀢𑀼𑀝𑁆𑀞𑁄.

𑀓𑀸𑀫𑀜𑁆𑀘 𑀲𑀦𑁆𑀢𑁄𑀲𑀧𑁆𑀧𑀪𑁂𑀤𑀸 𑀬𑀣𑀸𑀯𑀼𑀢𑁆𑀢𑀢𑁄𑀧𑀺 𑀅𑀥𑀺𑀓𑀢𑀭𑀸 𑀘𑀻𑀯𑀭𑁂 𑀯𑀻𑀲𑀢𑀺 𑀲𑀦𑁆𑀢𑁄𑀲𑀸, 𑀧𑀺𑀡𑁆𑀟𑀧𑀸𑀢𑁂 𑀧𑀦𑁆𑀦𑀭𑀲, 𑀲𑁂𑀦𑀸𑀲𑀦𑁂 𑀘 𑀧𑀦𑁆𑀦𑀭𑀲, 𑀕𑀺𑀮𑀸𑀦𑀧𑀘𑁆𑀘𑀬𑁂 𑀯𑀻𑀲𑀢𑀻𑀢𑀺, 𑀇𑀥 𑀧𑀦 𑀲𑀗𑁆𑀔𑁂𑀧𑁂𑀦 𑀤𑁆𑀯𑀸𑀤𑀲𑀯𑀺𑀥𑁄𑀬𑁂𑀯 𑀲𑀦𑁆𑀢𑁄𑀲𑁄 𑀯𑀼𑀢𑁆𑀢𑁄. 𑀢𑀤𑀥𑀺𑀓𑀢𑀭𑀧𑁆𑀧𑀪𑁂𑀤𑁄 𑀧𑀦 𑀘𑀢𑀼𑀭𑀗𑁆𑀕𑀼𑀢𑁆𑀢𑀭𑁂 𑀫𑀳𑀸𑀅𑀭𑀺𑀬𑀯𑀁𑀲𑀲𑀼𑀢𑁆𑀢𑀝𑁆𑀞𑀓𑀣𑀸𑀬 (𑀅. 𑀦𑀺. 𑀅𑀝𑁆𑀞. 𑁨.𑁪.𑁨𑁮) 𑀕𑀳𑁂𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀇𑀫𑀺𑀦𑀸 𑀧𑀦𑀸’’𑀢𑀺𑀆𑀤𑀺. 𑀏𑀯𑀁 ‘‘𑀇𑀥 𑀫𑀳𑀸𑀭𑀸𑀚 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀻’’𑀢𑀺 𑀏𑀢𑁆𑀣 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀦𑀺𑀤𑁆𑀤𑀺𑀝𑁆𑀞𑁂𑀦 𑀲𑀦𑁆𑀢𑀼𑀝𑁆𑀞𑀧𑀤𑁂𑀦𑁂𑀯 𑀲𑀦𑁆𑀢𑁄𑀲𑀧𑁆𑀧𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀓𑀸𑀬𑀧𑀭𑀺𑀳𑀸𑀭𑀺𑀓𑁂𑀦 𑀘𑀻𑀯𑀭𑁂𑀦 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑁂𑀦 𑀧𑀺𑀡𑁆𑀟𑀧𑀸𑀢𑁂𑀦𑀸’’𑀢𑀺𑀆𑀤𑀺 𑀤𑁂𑀲𑀦𑀸𑀦𑀼𑀭𑀽𑀧𑀁 𑀢𑁂𑀦 𑀲𑀦𑁆𑀢𑁄𑀲𑁂𑀦 𑀲𑀦𑁆𑀢𑀼𑀝𑁆𑀞𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀧𑀘𑁆𑀘𑀬𑀧𑁆𑀧𑀪𑁂𑀤𑀁, 𑀢𑀲𑁆𑀲 𑀘 𑀓𑀸𑀬𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀬𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑁄 𑀏𑀯𑀫𑀸𑀳𑀸𑀢𑀺 𑀅𑀬𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄. 𑀓𑀸𑀫𑀜𑁆𑀘𑀲𑁆𑀲 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑁂𑀳𑁂𑀯 𑀬𑀣𑀸𑀓𑁆𑀓𑀫𑀁 𑀓𑀸𑀬𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀬𑁂𑀳𑀺 𑀲𑀦𑁆𑀢𑀼𑀝𑁆𑀞𑀢𑀸 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸, 𑀢𑀣𑀸𑀧𑀺 𑀲𑁂𑀲𑀧𑀭𑀺𑀓𑁆𑀔𑀸𑀭𑀘𑀢𑀼𑀓𑁆𑀓𑁂𑀦 𑀘 𑀯𑀺𑀦𑀸 𑀯𑀺𑀘𑀭𑀡𑀫𑀬𑀼𑀢𑁆𑀢𑀁, 𑀲𑀩𑁆𑀩𑀢𑁆𑀣 𑀘 𑀓𑀸𑀬𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀬𑀢𑀸 𑀮𑀤𑁆𑀥𑀩𑁆𑀩𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 𑀅𑀬𑀁 𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀤𑀦𑁆𑀢𑀓𑀝𑁆𑀞𑀘𑁆𑀙𑁂𑀤𑀦𑀯𑀸𑀲𑀻𑀢𑀺 𑀮𑀓𑁆𑀔𑀡𑀫𑀢𑁆𑀢𑀁 𑀢𑀤𑀜𑁆𑀜𑀓𑀺𑀘𑁆𑀘𑀲𑁆𑀲𑀸𑀧𑀺 𑀢𑀸𑀬 𑀲𑀸𑀥𑁂𑀢𑀩𑁆𑀩𑀢𑁆𑀢𑀸, 𑀢𑁂𑀦 𑀯𑀓𑁆𑀔𑀢𑀺 ‘‘𑀫𑀜𑁆𑀘𑀧𑀻𑀞𑀸𑀦𑀁 𑀅𑀗𑁆𑀕𑀧𑀸𑀤𑀘𑀻𑀯𑀭𑀓𑀼𑀝𑀺𑀤𑀡𑁆𑀟𑀓𑀲𑀚𑁆𑀚𑀦𑀓𑀸𑀮𑁂 𑀘𑀸’’𑀢𑀺𑀆𑀤𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀲𑀼 ‘‘𑀦 𑀳𑁂𑀢𑀁 𑀓𑀢𑁆𑀣𑀘𑀺𑀧𑀺 𑀧𑀸𑀴𑀺𑀬𑀫𑀸𑀕𑀢’’𑀦𑁆𑀢𑀺.

𑀩𑀦𑁆𑀥𑀦𑀦𑁆𑀢𑀺 ¶ 𑀓𑀸𑀬𑀩𑀦𑁆𑀥𑀦𑀁. 𑀧𑀭𑀺𑀲𑁆𑀲𑀸𑀯𑀦𑁂𑀦 𑀧𑀭𑀺𑀲𑁆𑀲𑀸𑀯𑀦𑀜𑁆𑀘, 𑀢𑁂𑀦 𑀲𑀳𑀸𑀢𑀺 𑀯𑀸 𑀅𑀢𑁆𑀣𑁄. 𑀬𑀼𑀢𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀲𑀗𑁆𑀔𑀸𑀢𑁄 𑀬𑁄𑀕𑁄 𑀬𑀲𑁆𑀲, 𑀢𑀲𑁆𑀫𑀺𑀁 𑀯𑀸 𑀬𑁄𑀕𑁄 𑀬𑀼𑀢𑁆𑀢𑁄𑀢𑀺 𑀬𑀼𑀢𑁆𑀢𑀬𑁄𑀕𑁄, 𑀢𑀲𑁆𑀲.

𑀓𑀸𑀬𑀁 ¶ 𑀧𑀭𑀺𑀳𑀭𑀦𑁆𑀢𑀺 𑀧𑁄𑀲𑁂𑀦𑁆𑀢𑀺, 𑀓𑀸𑀬𑀲𑁆𑀲 𑀯𑀸 𑀧𑀭𑀺𑀳𑀸𑀭𑁄 𑀧𑁄𑀲𑀦𑀫𑀢𑁆𑀢𑀁 𑀧𑀬𑁄𑀚𑀦𑀫𑁂𑀢𑁂𑀳𑀻𑀢𑀺 𑀓𑀸𑀬𑀧𑀭𑀺𑀳𑀸𑀭𑀺𑀬𑀸 𑀓-𑀓𑀸𑀭𑀲𑁆𑀲 𑀬-𑀓𑀸𑀭𑀁 𑀓𑀢𑁆𑀯𑀸. 𑀧𑁄𑀲𑀦𑀜𑁆𑀘𑁂𑀢𑁆𑀣 𑀯𑀟𑁆𑀠𑀦𑀁, 𑀪𑀭𑀡𑀁 𑀯𑀸, 𑀢𑀣𑀸 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀬𑀸𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀩𑀳𑀺𑀤𑁆𑀥𑀸𑀯 𑀓𑀸𑀬𑀲𑁆𑀲 𑀉𑀧𑀓𑀸𑀭𑀓𑀪𑀸𑀯𑁂𑀦 𑀓𑀸𑀬𑀧𑀭𑀺𑀳𑀸𑀭𑀺𑀬𑀢𑀸, 𑀅𑀚𑁆𑀛𑁄𑀳𑀭𑀡𑀯𑀲𑁂𑀦 𑀲𑀭𑀻𑀭𑀝𑁆𑀞𑀺𑀢𑀺𑀬𑀸 𑀉𑀧𑀓𑀸𑀭𑀓𑀪𑀸𑀯𑁂𑀦 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀬𑀢𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀢𑁂𑀦𑀸𑀳 ‘‘𑀢𑀺𑀘𑀻𑀯𑀭𑀁 𑀢𑀸𑀯𑀸’’𑀢𑀺𑀆𑀤𑀺. ‘‘𑀧𑀭𑀺𑀳𑀭𑀢𑀻’’𑀢𑀺 𑀏𑀢𑀲𑁆𑀲 𑀧𑁄𑀲𑁂𑀢𑀻𑀢𑀺 𑀅𑀢𑁆𑀣𑀯𑀘𑀦𑀁. 𑀇𑀢𑀻𑀢𑀺 𑀦𑀺𑀤𑀲𑁆𑀲𑀦𑁂 𑀦𑀺𑀧𑀸𑀢𑁄, 𑀏𑀯𑀁 𑀯𑀼𑀢𑁆𑀢𑀦𑀬𑁂𑀦 𑀓𑀸𑀬𑀧𑀭𑀺𑀳𑀸𑀭𑀺𑀬𑀁 𑀳𑁄𑀢𑀻𑀢𑀺 𑀓𑀸𑀭𑀡𑀚𑁄𑀢𑀦𑁂 𑀯𑀸, 𑀢𑀲𑁆𑀫𑀸 𑀧𑁄𑀲𑀦𑀢𑁄 𑀓𑀸𑀬𑀧𑀭𑀺𑀳𑀸𑀭𑀺𑀬𑀁 𑀳𑁄𑀢𑀻𑀢𑀺. 𑀏𑀯𑀫𑀼𑀧𑀭𑀺𑀧𑀺. 𑀘𑀻𑀯𑀭𑀓𑀡𑁆𑀡𑁂𑀦𑀸𑀢𑀺 𑀘𑀻𑀯𑀭𑀧𑀭𑀺𑀬𑀦𑁆𑀢𑁂𑀦.

𑀓𑀼𑀝𑀺𑀧𑀭𑀺𑀪𑀡𑁆𑀟𑀓𑀭𑀡𑀓𑀸𑀮𑁂𑀢𑀺 𑀓𑀼𑀝𑀺𑀬𑀸 𑀲𑀫𑀦𑁆𑀢𑀢𑁄 𑀯𑀺𑀮𑀺𑀫𑁆𑀧𑀦𑁂𑀦 𑀲𑀫𑁆𑀫𑀝𑁆𑀞𑀓𑀭𑀡𑀓𑀸𑀮𑁂.

𑀅𑀗𑁆𑀕𑀁 𑀦𑀸𑀫 𑀫𑀜𑁆𑀘𑀧𑀻𑀞𑀸𑀦𑀁 𑀧𑀸𑀤𑀽𑀧𑀭𑀺 𑀞𑀧𑀺𑀢𑁄 𑀧𑀥𑀸𑀦𑀲𑀫𑁆𑀪𑀸𑀭𑀯𑀺𑀲𑁂𑀲𑁄. 𑀬𑀢𑁆𑀣 𑀧𑀤𑀭𑀲𑀜𑁆𑀘𑀺𑀦𑀦𑀧𑀺𑀝𑁆𑀞𑀺𑀅𑀧𑀲𑁆𑀲𑀬𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀬𑁄 ‘‘𑀅𑀝𑀦𑀻’’𑀢𑀺𑀧𑀺 𑀯𑀼𑀘𑁆𑀘𑀢𑀺.

𑀫𑀥𑀼𑀤𑁆𑀤𑀼𑀫𑀧𑀼𑀧𑁆𑀨𑀁 𑀫𑀥𑀼𑀓𑀁 𑀦𑀸𑀫, 𑀫𑀓𑁆𑀔𑀺𑀓𑀸𑀫𑀥𑀽𑀳𑀺 𑀓𑀢𑀧𑀽𑀯𑀁 𑀯𑀸. 𑀧𑀭𑀺𑀓𑁆𑀔𑀸𑀭𑀫𑀢𑁆𑀢𑀸 𑀧𑀭𑀺𑀓𑁆𑀔𑀸𑀭𑀧𑀫𑀸𑀡𑀁. 𑀲𑁂𑀬𑁆𑀬𑀁 𑀧𑀯𑀺𑀲𑀦𑁆𑀢𑀲𑁆𑀲𑀸𑀢𑀺 𑀧𑀘𑁆𑀘𑀢𑁆𑀣𑀭𑀡𑀓𑀼𑀜𑁆𑀘𑀺𑀓𑀸𑀦𑀁 𑀢𑀸𑀤𑀺𑀲𑁂 𑀓𑀸𑀮𑁂 𑀧𑀭𑀺𑀪𑀼𑀢𑁆𑀢𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀢𑀢𑁆𑀭𑀝𑁆𑀞𑀓𑀁 𑀧𑀘𑁆𑀘𑀢𑁆𑀣𑀭𑀡’’𑀦𑁆𑀢𑀺. 𑀅𑀢𑁆𑀢𑀦𑁄 𑀲𑀦𑁆𑀢𑀓𑀪𑀸𑀯𑁂𑀦 𑀧𑀘𑁆𑀘𑀢𑁆𑀣𑀭𑀡𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀢𑀢𑁆𑀣𑁂𑀯 𑀲𑁂𑀦𑀸𑀲𑀦𑁂 𑀢𑀺𑀝𑁆𑀞𑀦𑀓𑀜𑁆𑀳𑀺 ‘‘𑀢𑀢𑁆𑀭𑀝𑁆𑀞𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀓𑀧𑁆𑀧𑀦𑀯𑀘𑀦𑀢𑁄 𑀧𑀦 𑀢𑁂𑀲𑀫𑀜𑁆𑀜𑀢𑀭𑀲𑁆𑀲 𑀦𑀯𑀫𑀢𑀸, 𑀬𑀣𑀸𑀯𑀼𑀢𑁆𑀢𑀧𑀝𑀺𑀧𑀸𑀝𑀺𑀬𑀸 𑀘𑁂𑀢𑁆𑀣 𑀦𑀯𑀫𑀪𑀸𑀯𑁄, 𑀦 𑀢𑀼 𑀢𑁂𑀲𑀁 𑀢𑀣𑀸𑀧𑀢𑀺𑀦𑀺𑀬𑀢𑀪𑀸𑀯𑁂𑀦. 𑀓𑀲𑁆𑀫𑀸𑀢𑀺 𑀘𑁂? 𑀢𑀣𑀸𑀬𑁂𑀯 𑀢𑁂𑀲𑀫𑀥𑀸𑀭𑀡𑀢𑁄. 𑀏𑀲 𑀦𑀬𑁄 𑀤𑀲𑀫𑀸𑀤𑀻𑀲𑀼𑀧𑀺. 𑀢𑁂𑀮𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀳𑀭𑀺𑀢𑀸 𑀯𑁂𑀴𑀼𑀦𑀸𑀴𑀺𑀆𑀤𑀺𑀓𑀸 𑀢𑁂𑀮𑀦𑀸𑀴𑀺. 𑀦𑀦𑀼 𑀲𑀦𑁆𑀢𑀼𑀝𑁆𑀞𑀧𑀼𑀕𑁆𑀕𑀮𑀤𑀲𑁆𑀲𑀦𑁂 𑀲𑀦𑁆𑀢𑀼𑀝𑁆𑀞𑁄𑀯 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀺𑀓𑁄 𑀤𑀲𑁆𑀲𑁂𑀢𑀩𑁆𑀩𑁄𑀢𑀺 𑀅𑀦𑀼𑀬𑁄𑀕𑁂 𑀬𑀣𑀸𑀭𑀳𑀁 𑀢𑁂𑀲𑀫𑁆𑀧𑀺 𑀲𑀦𑁆𑀢𑀼𑀝𑁆𑀞𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑁂𑀲𑀼 𑀘𑀸’’𑀢𑀺𑀆𑀤𑀺𑀫𑀸𑀳. 𑀫𑀳𑀦𑁆𑀢𑁄 𑀧𑀭𑀺𑀓𑁆𑀔𑀸𑀭𑀲𑀗𑁆𑀔𑀸𑀢𑁄 𑀪𑀸𑀭𑁄 𑀏𑀢𑁂𑀲𑀦𑁆𑀢𑀺 𑀫𑀳𑀸𑀪𑀸𑀭𑀸, 𑀅𑀬𑀁 𑀅𑀥𑀼𑀦𑀸 𑀧𑀸𑀞𑁄, 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀧𑀦 ‘‘𑀫𑀳𑀸𑀕𑀚𑀸’’𑀢𑀺 𑀧𑀸𑀞𑀲𑁆𑀲 𑀤𑀺𑀝𑁆𑀞𑀢𑁆𑀢𑀸 ‘‘𑀤𑀼𑀧𑁆𑀧𑁄𑀲𑀪𑀸𑀯𑁂𑀦 ¶ 𑀫𑀳𑀸𑀕𑀚𑀸 𑀯𑀺𑀬𑀸𑀢𑀺 𑀫𑀳𑀸𑀕𑀚𑀸’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁨𑁧𑁫) 𑀯𑀼𑀢𑁆𑀢𑀁, 𑀦 𑀢𑁂 𑀏𑀢𑁆𑀢𑀓𑁂𑀳𑀺 𑀧𑀭𑀺𑀓𑁆𑀔𑀸𑀭𑁂𑀳𑀺 ‘‘𑀫𑀳𑀺𑀘𑁆𑀙𑀸, 𑀅𑀲𑀦𑁆𑀢𑀼𑀝𑁆𑀞𑀸, 𑀤𑀼𑀩𑁆𑀪𑀭𑀸, 𑀩𑀸𑀳𑀼𑀮𑁆𑀮𑀯𑀼𑀢𑁆𑀢𑀺𑀦𑁄’’𑀢𑀺 𑀘 𑀯𑀢𑁆𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀤𑀺 𑀇𑀢𑀭𑁂𑀧𑀺 𑀲𑀦𑁆𑀢𑀼𑀝𑁆𑀞𑀸 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀲𑀪𑀸𑀯𑀸, 𑀓𑀺𑀫𑁂𑀢𑁂𑀲𑀫𑁆𑀧𑀺 𑀯𑀲𑁂𑀦 𑀅𑀬𑀁 𑀤𑁂𑀲𑀦𑀸 𑀇𑀘𑁆𑀙𑀺𑀢𑀸𑀢𑀺 𑀘𑁄𑀤𑀦𑀁 𑀲𑁄𑀥𑁂𑀢𑀼𑀁 ‘‘𑀪𑀕𑀯𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀺𑀓𑀲𑁆𑀲 𑀯𑀲𑁂𑀦 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀇𑀘𑁆𑀙𑀺𑀢𑀪𑀸𑀯𑁄 𑀓𑀣𑀁 𑀯𑀺𑀜𑁆𑀜𑀸𑀬𑀢𑀻𑀢𑀺 𑀅𑀦𑀼𑀬𑁄𑀕𑀫𑁆𑀧𑀺 𑀅𑀧𑀦𑁂𑀢𑀺 ‘‘𑀲𑁄 𑀳𑀻’’𑀢𑀺𑀆𑀤𑀺𑀦𑀸, 𑀢𑀲𑁆𑀲𑁂𑀯 𑀢𑀣𑀸 𑀧𑀓𑁆𑀓𑀦𑁆𑀢𑀪𑀸𑀯𑁂𑀦 ‘‘𑀓𑀸𑀬𑀧𑀭𑀺𑀳𑀸𑀭𑀺𑀓𑁂𑀦 𑀘𑀻𑀯𑀭𑁂𑀦𑀸’’𑀢𑀺𑀆𑀤𑀺 𑀧𑀸𑀴𑀺𑀬𑀸 𑀬𑁄𑀕𑁆𑀬𑀢𑁄 𑀢𑀲𑁆𑀲 𑀯𑀲𑁂𑀦 𑀇𑀘𑁆𑀙𑀺𑀢𑀪𑀸𑀯𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀘𑀦𑀻𑀬𑀲𑁆𑀲 𑀳𑁂𑀢𑀼𑀪𑀸𑀯𑀤𑀲𑁆𑀲𑀦𑁂𑀦 𑀳𑀺 𑀯𑀸𑀘𑀓𑀲𑁆𑀲𑀸𑀧𑀺 𑀳𑁂𑀢𑀼𑀪𑀸𑀯𑁄 𑀤𑀲𑁆𑀲𑀺𑀢𑁄𑀢𑀺 ¶ . 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀇𑀢𑀺 𑀇𑀫𑀲𑁆𑀲𑀸’’𑀢𑀺𑀆𑀤𑀺 𑀮𑀤𑁆𑀥𑀕𑀼𑀡𑀯𑀘𑀦𑀫𑁆𑀧𑀺 𑀉𑀧𑀧𑀦𑁆𑀦𑀁 𑀳𑁄𑀢𑀺. 𑀲𑀮𑁆𑀮𑀳𑀼𑀓𑀸 𑀯𑀼𑀢𑁆𑀢𑀺 𑀚𑀻𑀯𑀺𑀓𑀸 𑀬𑀲𑁆𑀲𑀸𑀢𑀺 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺, 𑀢𑀲𑁆𑀲 𑀪𑀸𑀯𑁄 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺𑀢𑀸, 𑀢𑀁. 𑀓𑀸𑀬𑀧𑀸𑀭𑀺𑀳𑀸𑀭𑀺𑀬𑁂𑀦𑀸𑀢𑀺 𑀪𑀸𑀯𑀧𑁆𑀧𑀥𑀸𑀦𑀦𑀺𑀤𑁆𑀤𑁂𑀲𑁄, 𑀪𑀸𑀯𑀮𑁄𑀧𑀦𑀺𑀤𑁆𑀤𑁂𑀲𑁄 𑀯𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀓𑀸𑀬𑀁 𑀧𑀭𑀺𑀳𑀭𑀡𑀫𑀢𑁆𑀢𑀓𑁂𑀦𑀸’’𑀢𑀺 𑀇𑀫𑀺𑀦𑀸, 𑀓𑀸𑀬𑀧𑁄𑀲𑀦𑀧𑁆𑀧𑀫𑀸𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀬𑁂𑀦𑀸𑀢𑀺 𑀏𑀢𑁆𑀣𑀸𑀧𑀺. 𑀯𑀼𑀢𑁆𑀢𑀦𑀬𑁂𑀦 𑀘𑁂𑀢𑁆𑀣 𑀤𑁆𑀯𑀺𑀥𑀸 𑀯𑀘𑀦𑀢𑁆𑀣𑁄, 𑀝𑀻𑀓𑀸𑀬𑀁 (𑀤𑀻. 𑀦𑀺. 𑀝𑀻. 𑁧.𑁨𑁧𑁫) 𑀧𑀦 𑀧𑀞𑀫𑀲𑁆𑀲 𑀯𑀘𑀦𑀢𑁆𑀣𑀲𑁆𑀲 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀢𑀸 𑀤𑀼𑀢𑀺𑀬𑁄𑀯 𑀇𑀥 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀫𑀫𑀸𑀬𑀦𑀢𑀡𑁆𑀳𑀸𑀬 𑀆𑀲𑀗𑁆𑀕𑁄. 𑀧𑀭𑀺𑀕𑁆𑀕𑀳𑀢𑀡𑁆𑀳𑀸𑀬 𑀩𑀦𑁆𑀥𑁄. 𑀚𑀺𑀬𑀸𑀫𑀼𑀢𑁆𑀢𑁄𑀢𑀺 𑀥𑀦𑀼𑀚𑀺𑀬𑀸𑀬 𑀫𑀼𑀢𑁆𑀢𑁄. 𑀬𑀽𑀣𑀸𑀢𑀺 𑀳𑀢𑁆𑀣𑀺𑀕𑀡𑀢𑁄. 𑀢𑀺𑀥𑀸 𑀧𑀪𑀺𑀦𑁆𑀦𑀫𑀤𑁄 𑀫𑀤𑀳𑀢𑁆𑀣𑀻. 𑀯𑀦𑀧𑀩𑁆𑀪𑀸𑀭𑀦𑁆𑀢𑀺 𑀯𑀦𑁂 𑀧𑀩𑁆𑀪𑀸𑀭𑀁.

𑀘𑀢𑀽𑀲𑀼 𑀤𑀺𑀲𑀸𑀲𑀼 𑀲𑀼𑀔𑀯𑀺𑀳𑀸𑀭𑀺𑀢𑀸𑀬 𑀲𑀼𑀔𑀯𑀺𑀳𑀸𑀭𑀝𑁆𑀞𑀸𑀦𑀪𑀽𑀢𑀸, ‘‘𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁩𑁦𑁮; 𑀫. 𑀦𑀺. 𑁧.𑁭𑁭, 𑁪𑁫𑁯, 𑁫𑁦𑁯; 𑁨.𑁩𑁦𑁯) 𑀯𑀸 𑀦𑀬𑁂𑀦 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀸𑀨𑀭𑀡𑀝𑁆𑀞𑀸𑀦𑀪𑀽𑀢𑀸 𑀘𑀢𑀲𑁆𑀲𑁄 𑀤𑀺𑀲𑀸 𑀏𑀢𑀲𑁆𑀲𑀸𑀢𑀺 𑀘𑀢𑀼𑀤𑁆𑀤𑀺𑀲𑁄, 𑀲𑁄 𑀏𑀯 𑀘𑀸𑀢𑀼𑀤𑁆𑀤𑀺𑀲𑁄, 𑀘𑀢𑀲𑁆𑀲𑁄 𑀯𑀸 𑀤𑀺𑀲𑀸 𑀘𑀢𑀼𑀤𑁆𑀤𑀺𑀲𑀁, 𑀯𑀼𑀢𑁆𑀢𑀦𑀬𑁂𑀦 𑀢𑀫𑀲𑁆𑀲𑀸𑀢𑀺 𑀘𑀸𑀢𑀼𑀤𑁆𑀤𑀺𑀲𑁄 𑀬𑀣𑀸 ‘‘𑀲𑀤𑁆𑀥𑁄’’𑀢𑀺. 𑀢𑀸𑀲𑁆𑀯𑁂𑀯 𑀤𑀺𑀲𑀸𑀲𑀼 𑀓𑀢𑁆𑀣𑀘𑀺𑀧𑀺 𑀲𑀢𑁆𑀢𑁂 𑀯𑀸 𑀲𑀗𑁆𑀔𑀸𑀭𑁂 𑀯𑀸 𑀪𑀬𑁂𑀦 𑀦 𑀧𑀝𑀺𑀳𑀦𑀢𑀺, 𑀲𑀬𑀁 𑀯𑀸 𑀢𑁂𑀳𑀺 𑀦 𑀧𑀝𑀺𑀳𑀜𑁆𑀜𑀢𑁂𑀢𑀺 𑀅𑀧𑁆𑀧𑀝𑀺𑀖𑁄. 𑀲𑀦𑁆𑀢𑀼𑀲𑁆𑀲𑀫𑀸𑀦𑁄𑀢𑀺 𑀲𑀓𑁂𑀦, 𑀲𑀦𑁆𑀢𑁂𑀦 𑀯𑀸, 𑀲𑀫𑀫𑁂𑀯 𑀯𑀸 𑀢𑀼𑀲𑁆𑀲𑀦𑀓𑁄. 𑀇𑀢𑀭𑀻𑀢𑀭𑁂𑀦𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦, 𑀉𑀘𑁆𑀘𑀸𑀯𑀘𑁂𑀦 𑀯𑀸. 𑀧𑀭𑀺𑀘𑁆𑀘 𑀲𑀬𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺 𑀓𑀸𑀬𑀘𑀺𑀢𑁆𑀢𑀸𑀦𑀺, 𑀢𑀸𑀦𑀺 𑀯𑀸 𑀧𑀭𑀺𑀲𑀬𑀦𑁆𑀢𑀺 𑀅𑀪𑀺𑀪𑀯𑀦𑁆𑀢𑀻𑀢𑀺 𑀧𑀭𑀺𑀲𑁆𑀲𑀬𑀸, 𑀲𑀻𑀳𑀩𑁆𑀬𑀕𑁆𑀖𑀸𑀤𑀬𑁄 𑀩𑀸𑀳𑀺𑀭𑀸, 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄 𑀘 𑀅𑀚𑁆𑀛𑀢𑁆𑀢𑀺𑀓𑀸 𑀓𑀸𑀬𑀘𑀺𑀢𑁆𑀢𑀼𑀧𑀤𑁆𑀤𑀯𑀸, 𑀉𑀧𑀬𑁄𑀕𑀢𑁆𑀣𑁂 ¶ 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀲𑀳𑀺𑀢𑀸𑀢𑀺 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀬𑀸, 𑀯𑀻𑀭𑀺𑀬𑀸𑀤𑀺𑀥𑀫𑁆𑀫𑁂𑀳𑀺 𑀘 𑀬𑀣𑀸𑀭𑀳𑀁 𑀔𑀦𑁆𑀢𑀸, 𑀕𑀳𑀦𑁆𑀢𑀸 𑀘𑀸𑀢𑀺 𑀅𑀢𑁆𑀣𑁄. 𑀣𑀤𑁆𑀥𑀪𑀸𑀯𑀓𑀭𑀪𑀬𑀸𑀪𑀸𑀯𑁂𑀦 𑀅𑀙𑀫𑁆𑀪𑀻. 𑀏𑀓𑁄 𑀘𑀭𑁂𑀢𑀺 𑀅𑀲𑀳𑀸𑀬𑁄 𑀏𑀓𑀸𑀓𑀻 𑀳𑀼𑀢𑁆𑀯𑀸 𑀘𑀭𑀺𑀢𑀼𑀁 𑀯𑀺𑀳𑀭𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬. 𑀲𑀫𑀢𑁆𑀣𑀦𑁂 𑀳𑀺 𑀏𑀬𑁆𑀬-𑀲𑀤𑁆𑀤𑁄 𑀬𑀣𑀸 ‘‘𑀓𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁩) 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑀢𑀸𑀬 𑀏𑀓𑀯𑀺𑀳𑀸𑀭𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺 𑀇𑀫𑀺𑀦𑀸. 𑀲𑀡𑁆𑀞𑀸𑀦𑁂𑀦 𑀔𑀕𑁆𑀕𑀲𑀤𑀺𑀲𑀁 𑀏𑀓𑀫𑁂𑀯 𑀫𑀢𑁆𑀣𑀓𑁂 𑀉𑀝𑁆𑀞𑀺𑀢𑀁 𑀯𑀺𑀲𑀸𑀡𑀁 𑀬𑀲𑁆𑀲𑀸𑀢𑀺 𑀔𑀕𑁆𑀕𑁄; 𑀔𑀕𑁆𑀕𑀲𑀤𑁆𑀤𑁂𑀦 𑀢𑀁𑀲𑀤𑀺𑀲𑀯𑀺𑀲𑀸𑀡𑀲𑁆𑀲 𑀕𑀳𑀺𑀢𑀢𑁆𑀢𑀸, 𑀫𑀳𑀺𑀁𑀲𑀧𑁆𑀧𑀫𑀸𑀡𑁄 𑀫𑀺𑀕𑀯𑀺𑀲𑁂𑀲𑁄, 𑀬𑁄 𑀮𑁄𑀓𑁂 ‘‘𑀧𑀮𑀸𑀲𑀸𑀤𑁄, 𑀕𑀡𑁆𑀞𑀓𑁄’’𑀢𑀺 𑀘 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀯𑀺𑀲𑀸𑀡𑁂𑀦 𑀏𑀓𑀻𑀪𑀸𑀯𑁂𑀦 𑀲𑀤𑀺𑀲𑁄𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀏𑀓𑀯𑀺𑀳𑀸𑀭𑀺𑀢𑀸𑀬 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄𑀢𑀺 𑀤𑀲𑁆𑀲𑁂𑀢𑀼𑀫𑁆𑀧𑀺 𑀏𑀯𑀁 𑀯𑀼𑀢𑁆𑀢𑀁. 𑀯𑀺𑀢𑁆𑀣𑀸𑀭𑁄 𑀧𑀦𑀲𑁆𑀲𑀸 𑀅𑀢𑁆𑀣𑁄 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁, (𑀲𑀼. 𑀦𑀺. 𑀅𑀝𑁆𑀞. 𑁧.𑁪𑁨) 𑀘𑀽𑀴𑀦𑀺𑀤𑁆𑀤𑁂𑀲𑁂 (𑀘𑀽𑀴𑀦𑀺. 𑁧𑁨𑁮) 𑀘 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀯𑀡𑁆𑀡𑀺𑀢𑀦𑁆𑀢𑀺 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑁂 𑀪𑀕𑀯𑀢𑀸 𑀢𑀣𑀸 𑀤𑁂𑀲𑀦𑀸𑀬 𑀯𑀺𑀯𑀭𑀺𑀢𑀁, 𑀣𑁄𑀫𑀺𑀢𑀁 𑀯𑀸. 𑀔𑀕𑁆𑀕𑀲𑁆𑀲 ¶ 𑀦𑀸𑀫 𑀫𑀺𑀕𑀲𑁆𑀲 𑀯𑀺𑀲𑀸𑀡𑁂𑀦 𑀓𑀧𑁆𑀧𑁄 𑀲𑀤𑀺𑀲𑁄 𑀢𑀣𑀸. 𑀓𑀧𑁆𑀧-𑀲𑀤𑁆𑀤𑁄 𑀳𑁂𑀢𑁆𑀣 ‘‘𑀲𑀢𑁆𑀣𑀼𑀓𑀧𑁆𑀧𑁂𑀦 𑀯𑀢 𑀪𑁄 𑀓𑀺𑀭 𑀲𑀸𑀯𑀓𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑀬𑀫𑀸𑀦𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁬𑁦) 𑀯𑀺𑀬 𑀧𑀝𑀺𑀪𑀸𑀕𑁂 𑀯𑀢𑁆𑀢𑀢𑀺, 𑀢𑀲𑁆𑀲 𑀪𑀸𑀯𑁄 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑀢𑀸, 𑀢𑀁 𑀲𑁄 𑀆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀯𑀸𑀢𑀸𑀪𑀺𑀖𑀸𑀢𑀸𑀤𑀻𑀳𑀺 𑀲𑀺𑀬𑀸 𑀲𑀓𑀼𑀡𑁄 𑀙𑀺𑀦𑁆𑀦𑀧𑀓𑁆𑀔𑁄, 𑀅𑀲𑀜𑁆𑀚𑀸𑀢𑀧𑀓𑁆𑀔𑁄 𑀯𑀸, 𑀇𑀥 𑀧𑀦 𑀟𑁂𑀢𑀼𑀁 𑀲𑀫𑀢𑁆𑀣𑁄 𑀲𑀧𑀓𑁆𑀔𑀺𑀓𑁄𑀯 𑀅𑀥𑀺𑀧𑁆𑀧𑁂𑀢𑁄𑀢𑀺 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀧𑀸𑀴𑀺𑀬𑀁 ‘‘𑀧𑀓𑁆𑀔𑀻 𑀲𑀓𑀼𑀡𑁄’’𑀢𑀺 𑀯𑀼𑀢𑁆𑀢𑀁, 𑀦 𑀢𑀼 ‘‘𑀆𑀓𑀸𑀲𑁂 𑀅𑀦𑁆𑀢𑀮𑀺𑀓𑁆𑀔𑁂 𑀘𑀗𑁆𑀓𑀫𑀢𑀻’’𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁩.𑁧𑁧) 𑀯𑀺𑀬 𑀧𑀭𑀺𑀬𑀸𑀬𑀫𑀢𑁆𑀢𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀆𑀳 ‘‘𑀧𑀓𑁆𑀔𑀬𑀼𑀢𑁆𑀢𑁄 𑀲𑀓𑀼𑀡𑁄’’𑀢𑀺. 𑀉𑀧𑁆𑀧𑀢𑀢𑀻𑀢𑀺 𑀉𑀤𑁆𑀥𑀁 𑀧𑀢𑀢𑀺 𑀕𑀘𑁆𑀙𑀢𑀺, 𑀧𑀓𑁆𑀔𑀦𑁆𑀤𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀥𑀼𑀦𑀦𑁆𑀢𑀸𑀢𑀺 𑀯𑀺𑀪𑀺𑀦𑁆𑀤𑀦𑁆𑀢𑀸, 𑀯𑀺𑀘𑀸𑀮𑁂𑀦𑁆𑀢𑀸 𑀯𑀸. 𑀅𑀚𑁆𑀚𑀢𑀦𑀸𑀬𑀸𑀢𑀺 𑀅𑀚𑁆𑀚𑀪𑀸𑀯𑀢𑁆𑀣𑀸𑀬. 𑀢𑀣𑀸 𑀲𑁆𑀯𑀸𑀢𑀦𑀸𑀬𑀸𑀢𑀺 𑀏𑀢𑁆𑀣𑀸𑀧𑀺. 𑀅𑀢𑁆𑀢𑀦𑁄 𑀧𑀢𑁆𑀢𑀁 𑀏𑀯 𑀪𑀸𑀭𑁄 𑀬𑀲𑁆𑀲𑀸𑀢𑀺 𑀲𑀧𑀢𑁆𑀢𑀪𑀸𑀭𑁄. 𑀫𑀫𑀸𑀬𑀦𑀢𑀡𑁆𑀳𑀸𑀪𑀸𑀯𑁂𑀦 𑀦𑀺𑀲𑁆𑀲𑀗𑁆𑀕𑁄. 𑀧𑀭𑀺𑀕𑁆𑀕𑀳𑀢𑀡𑁆𑀳𑀸𑀪𑀸𑀯𑁂𑀦 𑀦𑀺𑀭𑀧𑁂𑀓𑁆𑀔𑁄. 𑀬𑁂𑀦 𑀓𑀸𑀫𑀦𑁆𑀢𑀺 𑀬𑀢𑁆𑀣 𑀅𑀢𑁆𑀢𑀦𑁄 𑀭𑀼𑀘𑀺, 𑀢𑀢𑁆𑀣. 𑀪𑀸𑀯𑀦𑀧𑀼𑀁𑀲𑀓𑀁 𑀯𑀸 𑀏𑀢𑀁. 𑀬𑁂𑀦 𑀬𑀣𑀸 𑀧𑀯𑀢𑁆𑀢𑁄 𑀓𑀸𑀫𑁄𑀢𑀺 𑀳𑀺 𑀬𑁂𑀦𑀓𑀸𑀫𑁄, 𑀢𑀁, 𑀬𑀣𑀸𑀓𑀸𑀫𑀦𑁆𑀢𑀺 𑀅𑀢𑁆𑀣𑁄.

𑀦𑀻𑀯𑀭𑀡𑀧𑁆𑀧𑀳𑀸𑀦𑀓𑀣𑀸𑀯𑀡𑁆𑀡𑀦𑀸

𑁨𑁧𑁬. 𑀧𑀼𑀩𑁆𑀩𑁂 ¶ 𑀯𑀼𑀢𑁆𑀢𑀲𑁆𑀲𑁂𑀯 𑀅𑀢𑁆𑀣𑀘𑀢𑀼𑀓𑁆𑀓𑀲𑁆𑀲 𑀧𑀼𑀦 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀓𑀣𑀦𑀁 𑀓𑀺𑀫𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀅𑀦𑀼𑀬𑁄𑀕𑀁 𑀉𑀤𑁆𑀥𑀭𑀺𑀢𑁆𑀯𑀸 𑀲𑁄𑀥𑁂𑀢𑀺 ‘‘𑀲𑁄…𑀧𑁂… 𑀓𑀺𑀁 𑀤𑀲𑁆𑀲𑁂𑀢𑀻’’𑀢𑀺𑀆𑀤𑀺𑀦𑀸. 𑀧𑀘𑁆𑀘𑀬𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀲𑀫𑁆𑀪𑀸𑀭𑀧𑀸𑀭𑀺𑀧𑀽𑀭𑀺𑀁. 𑀇𑀫𑁂 𑀘𑀢𑁆𑀢𑀸𑀭𑁄𑀢𑀺 𑀲𑀻𑀮𑀲𑀁𑀯𑀭𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀲𑀫𑁆𑀧𑀚𑀜𑁆𑀜𑀁 𑀲𑀦𑁆𑀢𑁄𑀲𑁄𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸 𑀘𑀢𑁆𑀢𑀸𑀭𑁄 𑀆𑀭𑀜𑁆𑀜𑀺𑀓𑀲𑁆𑀲 𑀲𑀫𑁆𑀪𑀸𑀭𑀸. 𑀦 𑀇𑀚𑁆𑀛𑀢𑀻𑀢𑀺 𑀦 𑀲𑀫𑁆𑀧𑀚𑁆𑀚𑀢𑀺 𑀦 𑀲𑀨𑀮𑁄 𑀪𑀯𑀢𑀺. 𑀦 𑀓𑁂𑀯𑀮𑀁 𑀅𑀦𑀺𑀚𑁆𑀛𑀦𑀫𑀢𑁆𑀢𑀁, 𑀅𑀣 𑀔𑁄 𑀅𑀬𑀫𑁆𑀧𑀺 𑀤𑁄𑀲𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀢𑀺𑀭𑀘𑁆𑀙𑀸𑀦𑀕𑀢𑁂𑀳𑀺 𑀯𑀸’’𑀢𑀺𑀆𑀤𑀺𑀦𑀸. 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀻𑀢𑀺 ‘‘𑀅𑀲𑀼𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀭𑀜𑁆𑀜𑁂 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀯𑀺𑀬, 𑀯𑀦𑀘𑀭𑀓𑀸𑀦𑀁 𑀯𑀺𑀬 𑀘 𑀦𑀺𑀯𑀸𑀲𑀦𑀫𑀢𑁆𑀢𑀫𑁂𑀯, 𑀦 𑀧𑀦 𑀅𑀭𑀜𑁆𑀜𑀯𑀸𑀲𑀸𑀦𑀼𑀘𑁆𑀙𑀯𑀺𑀓𑀸 𑀓𑀸𑀘𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀅𑀢𑁆𑀣𑀻’’𑀢𑀺 𑀅𑀧𑀯𑀸𑀤𑀯𑀲𑁂𑀦 𑀯𑀘𑀦𑀻𑀬𑀪𑀸𑀯𑀫𑀸𑀧𑀚𑁆𑀚𑀢𑀺, 𑀇𑀫𑀲𑁆𑀲𑀢𑁆𑀣𑀲𑁆𑀲 𑀧𑀦 𑀤𑀲𑁆𑀲𑀦𑁂𑀦 𑀯𑀺𑀭𑀼𑀚𑁆𑀛𑀦𑀢𑁄 𑀲𑀤𑁆𑀥𑀺𑀁-𑀲𑀤𑁆𑀤𑁄 𑀦 𑀧𑁄𑀭𑀸𑀡𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀆𑀭𑀜𑁆𑀜𑀓𑁂𑀳𑀺 𑀢𑀺𑀭𑀘𑁆𑀙𑀸𑀦𑀕𑀢𑁂𑀳𑀺, 𑀯𑀦𑀘𑀭𑀯𑀺𑀲𑀪𑀸𑀕𑀚𑀦𑁂𑀳𑀺 𑀯𑀸 𑀲𑀤𑁆𑀥𑀺𑀁 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀯𑀲𑁂𑀦 𑀯𑀲𑀦𑀻𑀬𑀪𑀸𑀯𑀁 𑀆𑀧𑀚𑁆𑀚𑀢𑀺. ‘‘𑀦 𑀪𑀺𑀓𑁆𑀔𑀯𑁂 𑀧𑀡𑀺𑀥𑀸𑀬 𑀅𑀭𑀜𑁆𑀜𑁂 𑀯𑀢𑁆𑀣𑀩𑁆𑀩𑀁, 𑀬𑁄 𑀯𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨𑁨𑁩) 𑀯𑀺𑀬 𑀳𑀺 𑀯𑀢𑁆𑀣𑀩𑁆𑀩-𑀲𑀤𑁆𑀤𑁄 𑀯𑀲𑀺𑀢𑀩𑁆𑀩𑀧𑀭𑀺𑀬𑀸𑀬𑁄. 𑀢𑀣𑀸 𑀳𑀺 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀫𑁆𑀧𑀺 𑀯𑀼𑀢𑁆𑀢𑀁 ‘‘𑀏𑀯𑀭𑀽𑀧𑀲𑁆𑀲 𑀳𑀺 𑀅𑀭𑀜𑁆𑀜𑀯𑀸𑀲𑁄 𑀓𑀸𑀴𑀫𑀓𑁆𑀓𑀝𑀅𑀘𑁆𑀙𑀢𑀭𑀘𑁆𑀙𑀤𑀻𑀧𑀺𑀫𑀺𑀕𑀸𑀦𑀁 𑀅𑀝𑀯𑀺𑀯𑀸𑀲𑀲𑀤𑀺𑀲𑁄 𑀳𑁄𑀢𑀻’’𑀢𑀺 (𑀯𑀺𑀪. 𑀅𑀝𑁆𑀞. 𑁫𑁨𑁬) 𑀅𑀥𑀺𑀯𑀢𑁆𑀣𑀸𑀢𑀺 𑀅𑀥𑀺𑀯𑀲𑀦𑁆𑀢𑀸. 𑀧𑀞𑀫𑀁 𑀪𑁂𑀭𑀯𑀲𑀤𑁆𑀤𑀁 𑀲𑀸𑀯𑁂𑀦𑁆𑀢𑀺. 𑀢𑀸𑀯𑀢𑀸 𑀅𑀧𑀮𑀸𑀬𑀦𑁆𑀢𑀲𑁆𑀲 𑀳𑀢𑁆𑀣𑁂𑀳𑀺𑀧𑀺 𑀲𑀻𑀲𑀁 𑀧𑀳𑀭𑀺𑀢𑁆𑀯𑀸 ¶ 𑀧𑀮𑀸𑀧𑀦𑀸𑀓𑀸𑀭𑀁 𑀓𑀭𑁄𑀦𑁆𑀢𑀻𑀢𑀺 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀓𑀣𑀺𑀢𑀁. 𑀏𑀯𑀁 𑀩𑁆𑀬𑀢𑀺𑀭𑁂𑀓𑀢𑁄 𑀧𑀘𑁆𑀘𑀬𑀲𑀫𑁆𑀧𑀢𑁆𑀢𑀺𑀬𑀸 𑀤𑀲𑁆𑀲𑀺𑀢𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀦𑁆𑀯𑀬𑀢𑁄𑀧𑀺 𑀧𑀓𑀸𑀲𑁂𑀢𑀼𑀁 ‘‘𑀬𑀲𑁆𑀲 𑀧𑀦𑁂𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀣𑀁 𑀇𑀚𑁆𑀛𑀢𑀻𑀢𑀺 𑀆𑀳 ‘‘𑀲𑁄 𑀳𑀻’’𑀢𑀺𑀆𑀤𑀺. 𑀓𑀸𑀴𑀓𑁄 𑀢𑀺𑀮𑀓𑁄𑀢𑀺 𑀯𑀡𑁆𑀡𑀯𑀺𑀓𑀸𑀭𑀸𑀧𑀦𑀭𑁄𑀕𑀯𑀲𑁂𑀦 𑀅𑀜𑁆𑀜𑀢𑁆𑀣 𑀧𑀭𑀺𑀬𑀸𑀬𑀯𑀘𑀦𑀁. 𑀯𑀼𑀢𑁆𑀢𑀜𑁆𑀳𑀺 𑁋

‘‘𑀤𑀼𑀦𑁆𑀦𑀸𑀫𑀓𑀜𑁆𑀘 𑀅𑀭𑀺𑀲𑀁, 𑀙𑀤𑁆𑀤𑀺𑀓𑁄 𑀯𑀫𑀣𑀽𑀭𑀺𑀢𑁄;

𑀤𑀯𑀣𑀼 𑀧𑀭𑀺𑀢𑀸𑀧𑁄𑀣, 𑀢𑀺𑀮𑀓𑁄 𑀢𑀺𑀮𑀓𑀸𑀴𑀓𑁄’’𑀢𑀺.

𑀢𑀺𑀮𑀲𑀡𑁆𑀞𑀸𑀦𑀁 𑀯𑀺𑀬 𑀚𑀸𑀬𑀢𑀻𑀢𑀺 𑀳𑀺 𑀢𑀺𑀮𑀓𑁄, 𑀓𑀸𑀴𑁄 𑀳𑀼𑀢𑁆𑀯𑀸 𑀚𑀸𑀬𑀢𑀻𑀢𑀺 𑀓𑀸𑀴𑀓𑁄. 𑀇𑀥 𑀧𑀦 𑀧𑀡𑁆𑀡𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑀁 𑀣𑀼𑀮𑁆𑀮𑀯𑀚𑁆𑀚𑀁 𑀓𑀸𑀴𑀓𑀲𑀤𑀺𑀲𑀢𑁆𑀢𑀸 𑀓𑀸𑀴𑀓𑀁, 𑀫𑀺𑀘𑁆𑀙𑀸𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑀁 𑀅𑀡𑀼𑀫𑀢𑁆𑀢𑀯𑀚𑁆𑀚𑀁 𑀢𑀺𑀮𑀓𑀲𑀤𑀺𑀲𑀢𑁆𑀢𑀸 𑀢𑀺𑀮𑀓𑀦𑁆𑀢𑀺 ¶ 𑀅𑀬𑀁 𑀯𑀺𑀲𑁂𑀲𑁄. 𑀢𑀦𑁆𑀢𑀺 𑀢𑀣𑀸 𑀉𑀧𑁆𑀧𑀸𑀤𑀺𑀢𑀁 𑀧𑀻𑀢𑀺𑀁. 𑀯𑀺𑀕𑀢𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀢𑁄 𑀔𑀬𑀯𑀬𑀯𑀲𑁂𑀦 𑀲𑀫𑁆𑀫𑀲𑀦𑀁. 𑀔𑀻𑀬𑀦𑀝𑁆𑀞𑁂𑀦 𑀳𑀺 𑀔𑀬𑁄𑀯 𑀯𑀺𑀕𑀢𑁄, 𑀯𑀺𑀧𑀭𑀻𑀢𑁄 𑀯𑀸 𑀳𑀼𑀢𑁆𑀯𑀸 𑀅𑀬𑀦𑀝𑁆𑀞𑁂𑀦 𑀯𑀬𑁄𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀅𑀭𑀺𑀬𑀪𑀽𑀫𑀺 𑀦𑀸𑀫 𑀮𑁄𑀓𑀼𑀢𑁆𑀢𑀭𑀪𑀽𑀫𑀺. 𑀇𑀢𑀻𑀢𑀺 𑀅𑀭𑀺𑀬𑀪𑀽𑀫𑀺𑀑𑀓𑁆𑀓𑀫𑀦𑀢𑁄, 𑀤𑁂𑀯𑀢𑀸𑀦𑀁 𑀯𑀡𑁆𑀡𑀪𑀡𑀦𑀢𑁄 𑀯𑀸, 𑀢𑀢𑁆𑀣 𑀢𑀢𑁆𑀣 𑀤𑁂𑀯𑀢𑀸𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀬𑀲𑁄 𑀧𑀢𑁆𑀣𑀝𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀏𑀯𑀜𑁆𑀘 𑀓𑀢𑁆𑀯𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀁 𑀅𑀬𑀲𑀧𑀢𑁆𑀣𑀭𑀡𑀫𑁆𑀧𑀺 𑀤𑁂𑀯𑀢𑀸𑀦𑀫𑀸𑀭𑁄𑀘𑀦𑀯𑀲𑁂𑀦𑀸𑀢𑀺 𑀕𑀳𑁂𑀢𑀩𑁆𑀩𑀁.

𑀯𑀺𑀯𑀺𑀢𑁆𑀢-𑀲𑀤𑁆𑀤𑁄 𑀚𑀦𑀯𑀺𑀯𑁂𑀓𑁂𑀢𑀺 𑀆𑀳 ‘‘𑀲𑀼𑀜𑁆𑀜’’𑀦𑁆𑀢𑀺. 𑀢𑀁 𑀧𑀦 𑀚𑀦𑀲𑀤𑁆𑀤𑀦𑀺𑀕𑁆𑀖𑁄𑀲𑀸𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑀁 𑀲𑀤𑁆𑀤𑀓𑀡𑁆𑀝𑀓𑀢𑁆𑀢𑀸 𑀛𑀸𑀦𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀦𑁆𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀚𑀦𑀓𑀕𑁆𑀕𑀳𑀡𑁂𑀦𑁂𑀯 𑀳𑀺 𑀇𑀥 𑀚𑀜𑁆𑀜𑀁 𑀕𑀳𑀺𑀢𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀯𑀺𑀪𑀗𑁆𑀕𑁂 ‘‘𑀬𑀤𑁂𑀯 𑀢𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀁, 𑀢𑀤𑁂𑀯 𑀢𑀁 𑀯𑀺𑀚𑀦𑀯𑀸𑀢’’𑀦𑁆𑀢𑀺 (𑀯𑀺𑀪. 𑁫𑁩𑁩). 𑀅𑀧𑁆𑀧𑀲𑀤𑁆𑀤𑀦𑁆𑀢𑀺 𑀘 𑀧𑀓𑀢𑀺𑀲𑀤𑁆𑀤𑀸𑀪𑀸𑀯𑀫𑀸𑀳. 𑀅𑀧𑁆𑀧𑀦𑀺𑀕𑁆𑀖𑁄𑀲𑀦𑁆𑀢𑀺 𑀦𑀕𑀭𑀦𑀺𑀕𑁆𑀖𑁄𑀲𑀸𑀤𑀺𑀲𑀤𑁆𑀤𑀸𑀪𑀸𑀯𑀁. 𑀈𑀤𑀺𑀲𑁂𑀲𑀼 𑀳𑀺 𑀩𑁆𑀬𑀜𑁆𑀚𑀦𑀁 𑀲𑀸𑀯𑀲𑁂𑀲𑀁 𑀯𑀺𑀬, 𑀅𑀢𑁆𑀣𑁄 𑀧𑀦 𑀦𑀺𑀭𑀯𑀲𑁂𑀲𑁄𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁. 𑀫𑀚𑁆𑀛𑀺𑀫𑀸𑀕𑀫𑀝𑁆𑀞𑀓𑀣𑀸𑀯𑀡𑁆𑀡𑀦𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁩.𑁩𑁬𑁪) 𑀧𑀦 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁄 𑀏𑀯𑀫𑀸𑀳 ‘‘𑀅𑀧𑁆𑀧𑀲𑀤𑁆𑀤𑀲𑁆𑀲 𑀧𑀭𑀺𑀢𑁆𑀢𑀧𑀭𑀺𑀬𑀸𑀬𑀁 𑀫𑀦𑀲𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘𑀩𑁆𑀬𑀜𑁆𑀚𑀦𑀁 𑀲𑀸𑀯𑀲𑁂𑀲𑀁 𑀲𑀺𑀬𑀸’𑀢𑀺. 𑀢𑁂𑀦𑀸𑀳 ‘𑀦 𑀳𑀺 𑀢𑀲𑁆𑀲𑀸’𑀢𑀺𑀆𑀤𑀺. 𑀅𑀧𑁆𑀧𑀲𑀤𑁆𑀤𑁄 𑀧𑀦𑁂𑀢𑁆𑀣 𑀅𑀪𑀸𑀯𑀢𑁆𑀣𑁄𑀢𑀺𑀧𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁 ‘𑀅𑀧𑁆𑀧𑀸𑀩𑀸𑀥𑀢𑀜𑁆𑀘 𑀲𑀜𑁆𑀚𑀸𑀦𑀸𑀫𑀻’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁨𑁫) 𑀯𑀺𑀬𑀸’’𑀢𑀺. 𑀢𑀫𑀢𑁆𑀣𑀁 𑀯𑀺𑀪𑀗𑁆𑀕𑀧𑀸𑀴𑀺𑀬𑀸 (𑀯𑀺𑀪. 𑁫𑁨𑁮) 𑀲𑀁𑀲𑀦𑁆𑀤𑀦𑁆𑀢𑁄 ‘‘𑀏𑀢𑀤𑁂𑀯𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑀤𑁂𑀯𑀸𑀢𑀺 𑀘 𑀫𑀬𑀸 𑀲𑀁𑀯𑀡𑁆𑀡𑀺𑀬𑀫𑀸𑀦𑀁 𑀦𑀺𑀲𑁆𑀲𑀤𑁆𑀤𑀢𑀁 𑀏𑀯𑀸𑀢𑀺 𑀅𑀢𑁆𑀣𑁄. 𑀲𑀦𑁆𑀢𑀺𑀓𑁂𑀧𑀻𑀢𑀺 𑀕𑀸𑀫𑀸𑀤𑀻𑀦𑀁 𑀲𑀫𑀻𑀧𑁂𑀧𑀺 𑀏𑀤𑀺𑀲𑀁 𑀯𑀺𑀯𑀺𑀢𑁆𑀢𑀁 𑀦𑀸𑀫, 𑀧𑀕𑁂𑀯 𑀤𑀽𑀭𑁂𑀢𑀺 𑀅𑀢𑁆𑀣𑁄. 𑀅𑀦𑀸𑀓𑀺𑀡𑁆𑀡𑀦𑁆𑀢𑀺 𑀅𑀲𑀗𑁆𑀓𑀺𑀡𑁆𑀡𑀁 𑀅𑀲𑀫𑁆𑀩𑀸𑀥𑀁. 𑀬𑀲𑁆𑀲 𑀲𑁂𑀦𑀸𑀲𑀦𑀲𑁆𑀲 𑀲𑀫𑀦𑁆𑀢𑀸 𑀕𑀸𑀯𑀼𑀢𑀫𑁆𑀧𑀺 𑀅𑀟𑁆𑀠𑀬𑁄𑀚𑀦𑀫𑁆𑀧𑀺 𑀧𑀩𑁆𑀩𑀢𑀕𑀳𑀦𑀁 𑀯𑀦𑀕𑀳𑀦𑀁 𑀦𑀤𑀻𑀕𑀳𑀦𑀁 𑀳𑁄𑀢𑀺, 𑀦 𑀓𑁄𑀘𑀺 𑀅𑀯𑁂𑀮𑀸𑀬 𑀉𑀧𑀲𑀗𑁆𑀓𑀫𑀺𑀢𑀼𑀁 ¶ 𑀲𑀓𑁆𑀓𑁄𑀢𑀺, 𑀇𑀤𑀁 𑀲𑀦𑁆𑀢𑀺𑀓𑁂𑀧𑀺 𑀅𑀦𑀸𑀓𑀺𑀡𑁆𑀡𑀁 𑀦𑀸𑀫. 𑀲𑁂𑀢𑀻𑀢𑀺 𑀲𑀬𑀢𑀺. 𑀆𑀲𑀢𑀻𑀢𑀺 𑀦𑀺𑀲𑀻𑀤𑀢𑀺. ‘‘𑀏𑀢𑁆𑀣𑀸’’𑀢𑀺 𑀇𑀫𑀺𑀦𑀸 𑀲𑁂𑀦-𑀲𑀤𑁆𑀤𑀲𑁆𑀲, 𑀆𑀲𑀦-𑀲𑀤𑁆𑀤𑀲𑁆𑀲 𑀘 𑀅𑀥𑀺𑀓𑀭𑀡𑀢𑁆𑀣𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀘-𑀲𑀤𑁆𑀤𑁂𑀦 𑀘 𑀢𑀤𑀼𑀪𑀬𑀧𑀤𑀲𑁆𑀲 𑀘𑀢𑁆𑀣𑀲𑀫𑀸𑀲𑀪𑀸𑀯𑀁. ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺𑀦𑀸 𑀯𑀺𑀪𑀗𑁆𑀕𑀧𑀸𑀴𑀺𑀫𑁂𑀯 𑀆𑀳𑀭𑀢𑀺.

𑀇𑀤𑀸𑀦𑀺 𑀢𑀲𑁆𑀲𑀸𑀬𑁂𑀯𑀢𑁆𑀣𑀁 𑀲𑁂𑀦𑀸𑀲𑀦𑀧𑁆𑀧𑀪𑁂𑀤𑀤𑀲𑁆𑀲𑀦𑀯𑀲𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀪𑀗𑁆𑀕𑀧𑀸𑀴𑀺𑀬𑀁 𑀦𑀺𑀤𑀲𑁆𑀲𑀦𑀦𑀬𑁂𑀦 𑀲𑀭𑀽𑀧𑀢𑁄 𑀤𑀲𑁆𑀲𑀺𑀢𑀲𑁂𑀦𑀸𑀲𑀦𑀲𑁆𑀲𑁂𑀯 𑀳𑀺 𑀅𑀬𑀁 𑀯𑀺𑀪𑀸𑀕𑁄. 𑀢𑀢𑁆𑀣 𑀯𑀺𑀳𑀸𑀭𑁄 𑀧𑀸𑀓𑀸𑀭𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀓𑀮𑁄 ¶ 𑀆𑀯𑀸𑀲𑁄. 𑀅𑀟𑁆𑀠𑀬𑁄𑀕𑁄 𑀤𑀻𑀖𑀧𑀸𑀲𑀸𑀤𑁄, ‘‘𑀕𑀭𑀼𑀴𑀲𑀡𑁆𑀞𑀸𑀦𑀧𑀸𑀲𑀸𑀤𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀧𑀸𑀲𑀸𑀤𑁄 𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑁄. 𑀳𑀫𑁆𑀫𑀺𑀬𑀁 𑀫𑀼𑀡𑁆𑀟𑀘𑁆𑀙𑀤𑀦𑀧𑀸𑀲𑀸𑀤𑁄. 𑀅𑀝𑁆𑀝𑁄 𑀧𑀝𑀺𑀭𑀸𑀚𑀽𑀦𑀁 𑀧𑀝𑀺𑀩𑀸𑀳𑀦𑀬𑁄𑀕𑁆𑀕𑁄 𑀘𑀢𑀼𑀧𑀜𑁆𑀘𑀪𑀽𑀫𑀓𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄. 𑀫𑀸𑀴𑁄 𑀏𑀓𑀓𑀽𑀝𑀲𑀗𑁆𑀕𑀳𑀺𑀢𑁄 𑀅𑀦𑁂𑀓𑀓𑁄𑀡𑀯𑀦𑁆𑀢𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄. 𑀅𑀧𑀭𑁄 𑀦𑀬𑁄 𑁋 𑀯𑀺𑀳𑀸𑀭𑁄 𑀤𑀻𑀖𑀫𑀼𑀔𑀧𑀸𑀲𑀸𑀤𑁄. 𑀅𑀟𑁆𑀠𑀬𑁄𑀕𑁄 𑀏𑀓𑀧𑀲𑁆𑀲𑀙𑀤𑀦𑀓𑀕𑁂𑀳𑀁. 𑀢𑀲𑁆𑀲 𑀓𑀺𑀭 𑀏𑀓𑀧𑀲𑁆𑀲𑁂 𑀪𑀺𑀢𑁆𑀢𑀺 𑀉𑀘𑁆𑀘𑀢𑀭𑀸 𑀳𑁄𑀢𑀺, 𑀇𑀢𑀭𑀧𑀲𑁆𑀲𑁂 𑀦𑀻𑀘𑀸, 𑀢𑁂𑀦 𑀢𑀁 𑀏𑀓𑀙𑀤𑀦𑀓𑀁 𑀳𑁄𑀢𑀺. 𑀧𑀸𑀲𑀸𑀤𑁄 𑀆𑀬𑀢𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑁄. 𑀳𑀫𑁆𑀫𑀺𑀬𑀁 𑀫𑀼𑀡𑁆𑀟𑀘𑁆𑀙𑀤𑀦𑀓𑀁 𑀘𑀦𑁆𑀤𑀺𑀓𑀗𑁆𑀕𑀡𑀬𑀼𑀢𑁆𑀢𑀁. 𑀕𑀼𑀳𑀸 𑀓𑁂𑀯𑀮𑀸 𑀧𑀩𑁆𑀩𑀢𑀕𑀼𑀳𑀸. 𑀮𑁂𑀡𑀁 𑀤𑁆𑀯𑀸𑀭𑀩𑀦𑁆𑀥𑀁 𑀧𑀩𑁆𑀪𑀸𑀭𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. ‘‘𑀫𑀡𑁆𑀟𑀧𑁄𑀢𑀺 𑀲𑀸𑀔𑀸𑀫𑀡𑁆𑀟𑀧𑁄’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁨𑁧𑁬) 𑀏𑀯𑀁 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦, 𑀅𑀗𑁆𑀕𑀼𑀢𑁆𑀢𑀭𑀝𑀻𑀓𑀸𑀓𑀸𑀭𑁂𑀦 𑀘 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁.

𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀁 (𑀯𑀺𑀪. 𑀅𑀝𑁆𑀞. 𑁫𑁨𑁭) 𑀧𑀦 𑀯𑀺𑀳𑀸𑀭𑁄𑀢𑀺 𑀲𑀫𑀦𑁆𑀢𑀸 𑀧𑀭𑀺𑀳𑀸𑀭𑀧𑀣𑀁, 𑀅𑀦𑁆𑀢𑁄𑀬𑁂𑀯 𑀘 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀓𑀢𑀲𑁂𑀦𑀸𑀲𑀦𑀁. 𑀅𑀟𑁆𑀠𑀬𑁄𑀕𑁄𑀢𑀺 𑀲𑀼𑀧𑀡𑁆𑀡𑀯𑀗𑁆𑀓𑀕𑁂𑀳𑀁. 𑀧𑀸𑀲𑀸𑀤𑁄𑀢𑀺 𑀤𑁆𑀯𑁂 𑀓𑀡𑁆𑀡𑀺𑀓𑀸𑀦𑀺 𑀕𑀳𑁂𑀢𑁆𑀯𑀸 𑀓𑀢𑁄 𑀤𑀻𑀖𑀧𑀸𑀲𑀸𑀤𑁄. 𑀅𑀝𑁆𑀝𑁄𑀢𑀺 𑀧𑀝𑀺𑀭𑀸𑀚𑀸𑀤𑀺𑀧𑀝𑀺𑀩𑀸𑀳𑀦𑀢𑁆𑀣𑀁 𑀇𑀝𑁆𑀞𑀓𑀸𑀳𑀺 𑀓𑀢𑁄 𑀩𑀳𑀮𑀪𑀺𑀢𑁆𑀢𑀺𑀓𑁄 𑀘𑀢𑀼𑀧𑀜𑁆𑀘𑀪𑀽𑀫𑀓𑁄 𑀧𑀢𑀺𑀲𑁆𑀲𑀬𑀯𑀺𑀲𑁂𑀲𑁄. 𑀫𑀸𑀴𑁄𑀢𑀺 𑀪𑁄𑀚𑀦𑀲𑀸𑀮𑀸𑀲𑀤𑀺𑀲𑁄 𑀫𑀡𑁆𑀟𑀮𑀫𑀸𑀴𑁄. 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀏𑀓𑀓𑀽𑀝𑀲𑀗𑁆𑀕𑀳𑀺𑀢𑁄 𑀘𑀢𑀼𑀭𑀲𑁆𑀲𑀧𑀸𑀲𑀸𑀤𑁄’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁮𑁨-𑁪𑁮𑁭) 𑀯𑀼𑀢𑁆𑀢𑀁. 𑀮𑁂𑀡𑀦𑁆𑀢𑀺 𑀧𑀩𑁆𑀩𑀢𑀁 𑀔𑀡𑀺𑀢𑁆𑀯𑀸 𑀯𑀸 𑀧𑀩𑁆𑀪𑀸𑀭𑀲𑁆𑀲 𑀅𑀧𑁆𑀧𑀳𑁄𑀦𑀓𑀝𑁆𑀞𑀸𑀦𑁂 𑀓𑀼𑀝𑁆𑀝𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀯𑀸 𑀓𑀢𑀲𑁂𑀦𑀸𑀲𑀦𑀁. 𑀕𑀼𑀳𑀸𑀢𑀺 𑀪𑀽𑀫𑀺𑀤𑀭𑀺 𑀯𑀸 𑀬𑀢𑁆𑀣 𑀭𑀢𑁆𑀢𑀺𑀦𑁆𑀤𑀺𑀯𑀁 𑀤𑀻𑀧𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀧𑀩𑁆𑀩𑀢𑀕𑀼𑀳𑀸 𑀯𑀸 𑀪𑀽𑀫𑀺𑀕𑀼𑀳𑀸 𑀯𑀸𑀢𑀺 𑀯𑀼𑀢𑁆𑀢𑀁.

𑀢𑀁 𑀆𑀯𑀲𑀣𑀪𑀽𑀢𑀁 𑀧𑀢𑀺𑀲𑁆𑀲𑀬𑀲𑁂𑀦𑀸𑀲𑀦𑀁 𑀯𑀺𑀳𑀭𑀺𑀢𑀩𑁆𑀩𑀝𑁆𑀞𑁂𑀦, 𑀯𑀺𑀳𑀸𑀭𑀝𑁆𑀞𑀸𑀦𑀝𑁆𑀞𑁂𑀦 𑀘 𑀯𑀺𑀳𑀸𑀭𑀲𑁂𑀦𑀸𑀲𑀦𑀁 𑀦𑀸𑀫. 𑀫𑀲𑀸𑀭𑀓𑀸𑀤𑀺𑀘𑀢𑀼𑀩𑁆𑀩𑀺𑀥𑁄 𑀫𑀜𑁆𑀘𑁄. 𑀢𑀣𑀸 𑀧𑀻𑀞𑀁. 𑀉𑀡𑁆𑀡𑀪𑀺𑀲𑀺𑀆𑀤𑀺𑀧𑀜𑁆𑀘𑀯𑀺𑀥𑀸 𑀪𑀺𑀲𑀺. 𑀲𑀻𑀲𑀧𑁆𑀧𑀫𑀸𑀡𑀁 𑀩𑀺𑀫𑁆𑀩𑁄𑀳𑀦𑀁. 𑀯𑀺𑀢𑁆𑀣𑀸𑀭𑀢𑁄 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀢𑀸, 𑀤𑀻𑀖𑀢𑁄 𑀫𑀜𑁆𑀘𑀯𑀺𑀢𑁆𑀣𑀸𑀭𑀧𑁆𑀧𑀫𑀸𑀡𑀢𑀸 𑀘𑁂𑀢𑁆𑀣 𑀲𑀻𑀲𑀧𑁆𑀧𑀫𑀸𑀡𑀁. 𑀫𑀲𑀸𑀭𑀓𑀸𑀤𑀻𑀦𑀺 𑀫𑀜𑁆𑀘𑀧𑀻𑀞𑀪𑀸𑀯𑀢𑁄, 𑀪𑀺𑀲𑀺𑀉𑀧𑀥𑀸𑀦𑀜𑁆𑀘 𑀫𑀜𑁆𑀘𑀧𑀻𑀞𑀲𑀫𑁆𑀩𑀦𑁆𑀥𑀢𑁄 𑀫𑀜𑁆𑀘𑀧𑀻𑀞𑀲𑁂𑀦𑀸𑀲𑀦𑀁. 𑀫𑀜𑁆𑀘𑀧𑀻𑀞𑀪𑀽𑀢𑀜𑁆𑀳𑀺 𑀲𑁂𑀦𑀸𑀲𑀦𑀁, 𑀫𑀜𑁆𑀘𑀧𑀻𑀞𑀲𑀫𑁆𑀩𑀦𑁆𑀥𑀜𑁆𑀘 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, 𑀏𑀓𑀲𑁂𑀲𑁂𑀦 𑀯𑀸 ‘‘𑀫𑀜𑁆𑀘𑀧𑀻𑀞𑀲𑁂𑀦𑀸𑀲𑀦’’𑀦𑁆𑀢𑀺 ¶ 𑀯𑀼𑀘𑁆𑀘𑀢𑀺. 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀏𑀯𑀫𑁂𑀯 𑀯𑀤𑀢𑀺. 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀧𑀦 ‘‘𑀫𑀜𑁆𑀘𑀧𑀻𑀞𑀲𑁂𑀦𑀸𑀲𑀦𑀦𑁆𑀢𑀺 𑀫𑀜𑁆𑀘𑀧𑀻𑀞𑀜𑁆𑀘𑁂𑀯 𑀫𑀜𑁆𑀘𑀧𑀻𑀞𑀲𑀫𑁆𑀩𑀦𑁆𑀥𑀲𑁂𑀦𑀸𑀲𑀦𑀜𑁆𑀘𑀸’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁨𑁧𑁬) 𑀯𑀼𑀢𑁆𑀢𑀁. 𑀘𑀺𑀫𑀺𑀮𑀺𑀓𑀸 ¶ 𑀦𑀸𑀫 𑀲𑀼𑀥𑀸𑀧𑀭𑀺𑀓𑀫𑁆𑀫𑀓𑀢𑀸𑀬 𑀪𑀽𑀫𑀺𑀬𑀸 𑀯𑀡𑁆𑀡𑀸𑀦𑀼𑀭𑀓𑁆𑀔𑀡𑀢𑁆𑀣𑀁 𑀧𑀝𑀔𑀡𑁆𑀟𑀸𑀤𑀻𑀳𑀺 𑀲𑀺𑀩𑁆𑀩𑁂𑀢𑁆𑀯𑀸 𑀓𑀢𑀸. 𑀘𑀫𑁆𑀫𑀔𑀡𑁆𑀟𑁄 𑀦𑀸𑀫 𑀲𑀻𑀳𑀩𑁆𑀬𑀕𑁆𑀖𑀤𑀻𑀧𑀺𑀢𑀭𑀘𑁆𑀙𑀘𑀫𑁆𑀫𑀸𑀤𑀻𑀲𑀼𑀧𑀺 𑀬𑀁 𑀓𑀺𑀜𑁆𑀘𑀺 𑀘𑀫𑁆𑀫𑀁. 𑀅𑀝𑁆𑀞𑀓𑀣𑀸𑀲𑀼 (𑀧𑀸𑀘𑀺. 𑀅𑀝𑁆𑀞. 𑁧𑁧𑁨; 𑀯𑀺. 𑀲𑀗𑁆𑀕. 𑀅𑀝𑁆𑀞. 𑁮𑁨) 𑀳𑀺 𑀲𑁂𑀦𑀸𑀲𑀦𑀧𑀭𑀺𑀪𑁄𑀕𑁂 𑀧𑀝𑀺𑀓𑁆𑀔𑀺𑀢𑁆𑀢𑀘𑀫𑁆𑀫𑀁 𑀦 𑀤𑀺𑀲𑁆𑀲𑀢𑀺. 𑀢𑀺𑀡𑀲𑀦𑁆𑀣𑀸𑀭𑁄𑀢𑀺 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀢𑀺𑀡𑀸𑀦𑀁 𑀲𑀦𑁆𑀣𑀸𑀭𑁄. 𑀏𑀲𑁂𑀯 𑀦𑀬𑁄 𑀧𑀡𑁆𑀡𑀲𑀦𑁆𑀣𑀸𑀭𑁂𑀧𑀺. 𑀘𑀺𑀫𑀺𑀮𑀺𑀓𑀸𑀤𑀺 𑀪𑀽𑀫𑀺𑀬𑀁 𑀲𑀦𑁆𑀣𑀭𑀺𑀢𑀩𑁆𑀩𑀢𑀸𑀬 𑀲𑀦𑁆𑀣𑀢𑀲𑁂𑀦𑀸𑀲𑀦𑀁. 𑀬𑀢𑁆𑀣 𑀯𑀸 𑀧𑀦 𑀪𑀺𑀓𑁆𑀔𑀽 𑀧𑀝𑀺𑀓𑁆𑀓𑀫𑀦𑁆𑀢𑀻𑀢𑀺 𑀞𑀧𑁂𑀢𑁆𑀯𑀸 𑀯𑀸 𑀏𑀢𑀸𑀦𑀺 𑀫𑀜𑁆𑀘𑀸𑀤𑀻𑀦𑀺 𑀬𑀢𑁆𑀣 𑀪𑀺𑀓𑁆𑀔𑀽 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀲𑀩𑁆𑀩𑀫𑁂𑀢𑀁 𑀲𑁂𑀦𑀸𑀲𑀦𑀁 𑀦𑀸𑀫𑀸𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀅𑀯𑀲𑁂𑀲𑀁 𑀭𑀼𑀓𑁆𑀔𑀫𑀽𑀮𑀸𑀤𑀺𑀧𑀝𑀺𑀓𑁆𑀓𑀫𑀺𑀢𑀩𑁆𑀩𑀝𑁆𑀞𑀸𑀦𑀁 𑀅𑀪𑀺𑀲𑀗𑁆𑀔𑀭𑀡𑀸𑀪𑀸𑀯𑀢𑁄 𑀓𑁂𑀯𑀮𑀁 𑀲𑀬𑀦𑀲𑁆𑀲, 𑀦𑀺𑀲𑁆𑀲𑀚𑁆𑀚𑀸𑀬 𑀘 𑀑𑀓𑀸𑀲𑀪𑀽𑀢𑀢𑁆𑀢𑀸 𑀑𑀓𑀸𑀲𑀲𑁂𑀦𑀸𑀲𑀦𑀁. 𑀲𑁂𑀦𑀸𑀲𑀦𑀕𑁆𑀕𑀳𑀡𑁂𑀦𑀸𑀢𑀺 ‘‘𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦’’𑀦𑁆𑀢𑀺 𑀇𑀫𑀺𑀦𑀸 𑀲𑁂𑀦𑀸𑀲𑀦𑀲𑀤𑁆𑀤𑁂𑀦 𑀯𑀺𑀯𑀺𑀢𑁆𑀢𑀲𑁂𑀦𑀸𑀲𑀦𑀲𑁆𑀲 𑀯𑀸 𑀆𑀤𑀸𑀦𑁂𑀦, 𑀯𑀘𑀦𑁂𑀦 𑀯𑀸 𑀕𑀳𑀺𑀢𑀫𑁂𑀯 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 𑀯𑀺𑀲𑁂𑀲𑁂 𑀅𑀯𑀝𑁆𑀞𑀸𑀦𑀢𑁄, 𑀯𑀺𑀲𑁂𑀲𑀢𑁆𑀣𑀺𑀦𑀸 𑀘 𑀯𑀺𑀲𑁂𑀲𑀲𑁆𑀲 𑀧𑀬𑀼𑀚𑁆𑀚𑀺𑀢𑀩𑁆𑀩𑀢𑁄.

𑀬𑀤𑁂𑀯𑀁 𑀓𑀲𑁆𑀫𑀸 ‘‘𑀅𑀭𑀜𑁆𑀜’’𑀦𑁆𑀢𑀺𑀆𑀤𑀺 𑀧𑀼𑀦 𑀯𑀼𑀢𑁆𑀢𑀦𑁆𑀢𑀺 𑀅𑀦𑀼𑀬𑁄𑀕𑁂𑀦 ‘‘𑀇𑀥 𑀧𑀦𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀏𑀯𑀁 𑀕𑀳𑀺𑀢𑁂𑀲𑀼𑀧𑀺 𑀲𑁂𑀦𑀸𑀲𑀦𑁂𑀲𑀼 𑀬𑀣𑀸𑀯𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀘𑁆𑀙𑀯𑀺𑀓𑀫𑁂𑀯 𑀲𑁂𑀦𑀸𑀲𑀦𑀁 𑀤𑀲𑁆𑀲𑁂𑀢𑀼𑀓𑀸𑀫𑀢𑁆𑀢𑀸 𑀧𑀼𑀦 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀪𑀺𑀓𑁆𑀔𑀼𑀦𑀻𑀦𑀁 𑀯𑀲𑁂𑀦 𑀆𑀕𑀢’’𑀦𑁆𑀢𑀺 𑀇𑀤𑀁 𑀯𑀺𑀦𑀬𑁂 𑀆𑀕𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀅𑀪𑀺𑀥𑀫𑁆𑀫𑁂. 𑀯𑀺𑀦𑀬𑁂 𑀳𑀺 𑀕𑀡𑀫𑁆𑀳𑀸𑀑𑀳𑀻𑀬𑀦𑀲𑀺𑀓𑁆𑀔𑀸𑀧𑀤𑁂 (𑀧𑀸𑀘𑀺. 𑁬𑁯𑁧) 𑀪𑀺𑀓𑁆𑀔𑀼𑀦𑀻𑀦𑀁 𑀆𑀭𑀜𑁆𑀜𑀓𑀥𑀼𑀢𑀗𑁆𑀕𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀇𑀤𑀫𑁆𑀧𑀺 𑀘 𑀢𑀸𑀲𑀁 𑀅𑀭𑀜𑁆𑀜𑀁 𑀦𑀸𑀫, 𑀦 𑀧𑀦 𑀧𑀜𑁆𑀘𑀥𑀦𑀼𑀲𑀢𑀺𑀓𑀁 𑀧𑀘𑁆𑀙𑀺𑀫𑀁 𑀅𑀭𑀜𑁆𑀜𑀫𑁂𑀯 𑀲𑁂𑀦𑀸𑀲𑀦𑀁, 𑀇𑀤𑀫𑁆𑀧𑀺 𑀘 𑀢𑀸𑀲𑀁 𑀕𑀡𑀫𑁆𑀳𑀸𑀑𑀳𑀻𑀬𑀦𑀸𑀧𑀢𑁆𑀢𑀺𑀓𑀭𑀁, 𑀦 𑀢𑀼 𑀧𑀜𑁆𑀘𑀥𑀦𑀼𑀲𑀢𑀺𑀓𑀸𑀤𑀺𑀫𑁂𑀯 𑀅𑀭𑀜𑁆𑀜𑀁. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 𑁋

‘‘𑀏𑀓𑀸 𑀯𑀸 𑀕𑀡𑀫𑁆𑀳𑀸 𑀑𑀳𑀻𑀬𑁂𑀬𑁆𑀬𑀸𑀢𑀺 𑀅𑀕𑀸𑀫𑀓𑁂 𑀅𑀭𑀜𑁆𑀜𑁂 𑀤𑀼𑀢𑀺𑀬𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀤𑀲𑁆𑀲𑀦𑀽𑀧𑀘𑀸𑀭𑀁 𑀯𑀸 𑀲𑀯𑀦𑀽𑀧𑀘𑀸𑀭𑀁 𑀯𑀸 𑀯𑀺𑀚𑀳𑀦𑁆𑀢𑀺𑀬𑀸 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲, 𑀯𑀺𑀚𑀳𑀺𑀢𑁂 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺.

𑀯𑀺𑀦𑀬𑀝𑁆𑀞𑀓𑀣𑀸𑀲𑀼𑀧𑀺 (𑀧𑀸𑀘𑀺. 𑀅𑀝𑁆𑀞. 𑁬𑁯𑁨) 𑀳𑀺 𑀢𑀣𑀸𑀯 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺. 𑀅𑀪𑀺𑀥𑀫𑁆𑀫𑁂 𑀧𑀦 ‘‘𑀅𑀭𑀜𑁆𑀜𑀦𑁆𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸 𑀲𑀩𑁆𑀩𑀫𑁂𑀢𑀁 𑀅𑀭𑀜𑁆𑀜’’𑀦𑁆𑀢𑀺 (𑀯𑀺𑀪. 𑁫𑁨𑁯) 𑀆𑀕𑀢𑀁. 𑀯𑀺𑀦𑀬𑀲𑀼𑀢𑁆𑀢𑀦𑁆𑀢𑀸 𑀳𑀺 𑀉𑀪𑁄𑀧𑀺 𑀧𑀭𑀺𑀬𑀸𑀬𑀤𑁂𑀲𑀦𑀸 𑀦𑀸𑀫, 𑀅𑀪𑀺𑀥𑀫𑁆𑀫𑁄 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀸, 𑀢𑀲𑁆𑀫𑀸 𑀬𑀁 𑀦 𑀕𑀸𑀫𑀧𑀤𑁂𑀲𑀦𑁆𑀢𑁄𑀕𑀥𑀁, 𑀢𑀁 𑀅𑀭𑀜𑁆𑀜𑀦𑁆𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀤𑀲𑁆𑀲𑁂𑀢𑀼𑀁 𑀢𑀣𑀸 𑀯𑀼𑀢𑁆𑀢𑀁. 𑀇𑀦𑁆𑀤𑀔𑀻𑀮𑀸 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 ¶ 𑀬𑀁 𑀞𑀸𑀦𑀁 𑀧𑀯𑀢𑁆𑀢𑀁 ¶ , 𑀲𑀩𑁆𑀩𑀫𑁂𑀢𑀁 𑀅𑀭𑀜𑁆𑀜𑀁 𑀦𑀸𑀫𑀸𑀢𑀺 𑀘𑁂𑀢𑁆𑀣 𑀅𑀢𑁆𑀣𑁄. 𑀆𑀭𑀜𑁆𑀜𑀓𑀁 𑀦𑀸𑀫…𑀧𑁂… 𑀧𑀘𑁆𑀙𑀺𑀫𑀦𑁆𑀢𑀺 𑀇𑀤𑀁 𑀧𑀦 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀆𑀭𑀜𑁆𑀜𑀓𑀲𑀺𑀓𑁆𑀔𑀸𑀧𑀤𑁂 (𑀧𑀸𑀭𑀸. 𑁬𑁫𑁨) 𑀆𑀭𑀜𑁆𑀜𑀺𑀓𑀁 𑀪𑀺𑀓𑁆𑀔𑀼𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀭𑀽𑀧𑀁, 𑀢𑀲𑁆𑀫𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀥𑀼𑀢𑀗𑁆𑀕𑀦𑀺𑀤𑁆𑀤𑁂𑀲𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁯) 𑀬𑀁 𑀢𑀲𑁆𑀲 𑀮𑀓𑁆𑀔𑀡𑀁 𑀯𑀼𑀢𑁆𑀢𑀁, 𑀢𑀁 𑀬𑀼𑀢𑁆𑀢𑀫𑁂𑀯, 𑀅𑀢𑁄 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀦𑁆𑀤𑀘𑁆𑀙𑀸𑀬𑀦𑁆𑀢𑀺 𑀲𑀻𑀢𑀘𑁆𑀙𑀸𑀬𑀁. 𑀢𑁂𑀦𑀸𑀳 ‘‘𑀢𑀢𑁆𑀣 𑀳𑀻’’𑀢𑀺𑀆𑀤𑀺. 𑀭𑀼𑀓𑁆𑀔𑀫𑀽𑀮𑀦𑁆𑀢𑀺 𑀭𑀼𑀓𑁆𑀔𑀲𑀫𑀻𑀧𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑀸𑀯𑀢𑀸 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂 𑀲𑀫𑀦𑁆𑀢𑀸 𑀙𑀸𑀬𑀸 𑀨𑀭𑀢𑀺, 𑀦𑀺𑀯𑀸𑀢𑁂 𑀧𑀡𑁆𑀡𑀸𑀦𑀺 𑀦𑀺𑀧𑀢𑀦𑁆𑀢𑀺, 𑀏𑀢𑁆𑀢𑀸𑀯𑀢𑀸 𑀭𑀼𑀓𑁆𑀔𑀫𑀽𑀮’’𑀦𑁆𑀢𑀺. 𑀧𑀩𑁆𑀩𑀢𑀦𑁆𑀢𑀺 𑀲𑀼𑀤𑁆𑀥𑀧𑀸𑀲𑀸𑀡𑀲𑀼𑀤𑁆𑀥𑀧𑀁𑀲𑀼𑀉𑀪𑀬𑀫𑀺𑀲𑁆𑀲𑀓𑀯𑀲𑁂𑀦 𑀢𑀺𑀯𑀺𑀥𑁄𑀧𑀺 𑀧𑀩𑁆𑀩𑀢𑁄 𑀅𑀥𑀺𑀧𑁆𑀧𑁂𑀢𑁄, 𑀦 𑀲𑀺𑀮𑀸𑀫𑀬𑁄 𑀏𑀯. 𑀲𑁂𑀮-𑀲𑀤𑁆𑀤𑁄 𑀧𑀦 𑀅𑀯𑀺𑀲𑁂𑀲𑀢𑁄 𑀧𑀩𑁆𑀩𑀢𑀧𑀭𑀺𑀬𑀸𑀬𑁄𑀢𑀺 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀁. ‘‘𑀢𑀢𑁆𑀣 𑀳𑀻’’𑀢𑀺𑀆𑀤𑀺𑀦𑀸 𑀢𑀤𑀼𑀪𑀬𑀲𑁆𑀲 𑀅𑀦𑀼𑀭𑀽𑀧𑀢𑀁 𑀤𑀲𑁆𑀲𑁂𑀢𑀺. 𑀤𑀺𑀲𑀸𑀲𑀼 𑀔𑀸𑀬𑀫𑀸𑀦𑀸𑀲𑀽𑀢𑀺 𑀤𑀲𑀲𑀼 𑀤𑀺𑀲𑀸𑀲𑀼 𑀅𑀪𑀺𑀫𑀼𑀔𑀻𑀪𑀸𑀯𑁂𑀦 𑀤𑀺𑀲𑁆𑀲𑀫𑀸𑀦𑀸𑀲𑀼. 𑀢𑀣𑀸𑀭𑀽𑀧𑁂𑀦𑀧𑀺 𑀓𑀸𑀭𑀡𑁂𑀦 𑀲𑀺𑀬𑀸 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸𑀢𑀺 𑀏𑀢𑀁 𑀯𑀼𑀢𑁆𑀢𑀁, 𑀲𑀩𑁆𑀩𑀤𑀺𑀲𑀸𑀳𑀺 𑀆𑀕𑀢𑁂𑀦 𑀯𑀸𑀢𑁂𑀦 𑀩𑀻𑀚𑀺𑀬𑀫𑀸𑀦𑀪𑀸𑀯𑀳𑁂𑀢𑀼𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀓𑁂𑀘𑀺. 𑀓𑀁 𑀯𑀼𑀘𑁆𑀘𑀢𑀺 𑀉𑀤𑀓𑀁 𑀧𑀺𑀧𑀸𑀲𑀯𑀺𑀦𑁄𑀤𑀦𑀲𑁆𑀲 𑀓𑀸𑀭𑀓𑀢𑁆𑀢𑀸. ‘‘𑀬𑀁 𑀦𑀤𑀻𑀢𑀼𑀫𑁆𑀩𑀦𑁆𑀢𑀺𑀧𑀺 𑀦𑀤𑀻𑀓𑀼𑀜𑁆𑀚𑀦𑁆𑀢𑀺𑀧𑀺 𑀯𑀤𑀦𑁆𑀢𑀺, 𑀢𑀁 𑀓𑀦𑁆𑀤𑀭𑀦𑁆𑀢𑀺 𑀅𑀧𑀩𑁆𑀩𑀢𑀧𑀤𑁂𑀲𑁂𑀧𑀺 𑀯𑀺𑀤𑀼𑀕𑁆𑀕𑀦𑀤𑀻𑀦𑀺𑀯𑀢𑁆𑀢𑀦𑀧𑀤𑁂𑀲𑀁 𑀓𑀦𑁆𑀤𑀭𑀦𑁆𑀢𑀺 𑀤𑀲𑁆𑀲𑁂𑀢𑀻’’𑀢𑀺 (𑀯𑀺𑀪. 𑀫𑀽𑀮𑀝𑀻. 𑁫𑁩𑁦) 𑀆𑀘𑀭𑀺𑀬𑀸𑀦𑀦𑁆𑀤𑀢𑁆𑀣𑁂𑀭𑁄, 𑀢𑁂𑀦𑁂𑀯 𑀯𑀺𑀜𑁆𑀜𑀸𑀬𑀢𑀺 ‘‘𑀦𑀤𑀻𑀢𑀼𑀫𑁆𑀩𑀦𑀤𑀻𑀓𑀼𑀜𑁆𑀚𑀲𑀤𑁆𑀤𑀸 𑀦𑀤𑀻𑀦𑀺𑀯𑀢𑁆𑀢𑀦𑀧𑀤𑁂𑀲𑀯𑀸𑀘𑀓𑀸’’𑀢𑀺. 𑀦𑀤𑀻𑀦𑀺𑀯𑀢𑁆𑀢𑀦𑀧𑀤𑁂𑀲𑁄 𑀘 𑀦𑀸𑀫 𑀦𑀤𑀺𑀬𑀸 𑀦𑀺𑀓𑁆𑀔𑀫𑀦𑀉𑀤𑀓𑁂𑀦 𑀧𑀼𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑀢𑁄 𑀯𑀺𑀤𑀼𑀕𑁆𑀕𑀧𑀤𑁂𑀲𑁄. ‘‘𑀅𑀧𑀩𑁆𑀩𑀢𑀧𑀤𑁂𑀲𑁂𑀧𑀻’’𑀢𑀺 𑀯𑀤𑀦𑁆𑀢𑁄 𑀧𑀦 𑀅𑀝𑁆𑀞𑀓𑀣𑀸𑀬𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑁂𑀦 𑀧𑀞𑀫𑀁 𑀧𑀩𑁆𑀩𑀢𑀧𑀤𑁂𑀲𑀦𑁆𑀢𑀺 𑀯𑀼𑀢𑁆𑀢𑀁, 𑀬𑀣𑀸𑀯𑀼𑀢𑁆𑀢𑁄 𑀧𑀦 𑀦𑀤𑀻𑀧𑀤𑁂𑀲𑁄𑀧𑀺 𑀓𑀦𑁆𑀤𑀭𑁄 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺.

‘‘𑀢𑀢𑁆𑀣 𑀳𑀻’’𑀢𑀺𑀆𑀤𑀺𑀦𑀸𑀧𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑁂𑀦𑁂𑀯 𑀢𑀲𑁆𑀲𑀸𑀦𑀼𑀭𑀽𑀧𑀪𑀸𑀯𑀫𑀸𑀳. 𑀉𑀲𑁆𑀲𑀸𑀧𑁂𑀢𑁆𑀯𑀸𑀢𑀺 𑀧𑀼𑀜𑁆𑀚𑀁 𑀓𑀢𑁆𑀯𑀸. ‘‘𑀤𑁆𑀯𑀺𑀦𑁆𑀦𑀁 𑀧𑀩𑁆𑀩𑀢𑀸𑀦𑀫𑁆𑀧𑀺 𑀆𑀲𑀦𑁆𑀦𑀢𑀭𑁂 𑀞𑀺𑀢𑀸𑀦𑀁 𑀑𑀯𑀭𑀓𑀸𑀤𑀺𑀲𑀤𑀺𑀲𑀁 𑀯𑀺𑀯𑀭𑀁 𑀳𑁄𑀢𑀺, 𑀏𑀓𑀲𑁆𑀫𑀺𑀁𑀬𑁂𑀯 𑀧𑀦 𑀧𑀩𑁆𑀩𑀢𑁂 𑀉𑀫𑀗𑁆𑀕𑀲𑀤𑀺𑀲’’𑀦𑁆𑀢𑀺 𑀯𑀤𑀦𑁆𑀢𑀺 𑀆𑀘𑀭𑀺𑀬𑀸. 𑀏𑀓𑀲𑁆𑀫𑀺𑀁𑀬𑁂𑀯 𑀳𑀺 𑀉𑀫𑀗𑁆𑀕𑀲𑀤𑀺𑀲𑀁 𑀅𑀦𑁆𑀢𑁄𑀮𑁂𑀡𑀁 𑀳𑁄𑀢𑀺 𑀉𑀧𑀭𑀺 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸, 𑀦 𑀤𑁆𑀯𑀻𑀲𑀼 𑀢𑀣𑀸 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸, 𑀢𑀲𑁆𑀫𑀸 ‘‘𑀉𑀫𑀗𑁆𑀕𑀲𑀤𑀺𑀲’’𑀦𑁆𑀢𑀺 𑀇𑀤𑀁 ‘‘𑀏𑀓𑀲𑁆𑀫𑀺𑀁 𑀬𑁂𑀯𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀦𑀻𑀬𑀁. ‘‘𑀫𑀳𑀸𑀯𑀺𑀯𑀭’’𑀦𑁆𑀢𑀺 𑀇𑀤𑀁 𑀧𑀦 𑀉𑀪𑀬𑁂𑀳𑀺𑀧𑀺. 𑀉𑀫𑀗𑁆𑀕𑀲𑀤𑀺𑀲𑀦𑁆𑀢𑀺 𑀘 ‘‘𑀲𑀼𑀤𑀼𑀗𑁆𑀕𑀸𑀲𑀤𑀺𑀲’’𑀦𑁆𑀢𑀺 (𑀤𑀻. 𑀦𑀺. 𑀝𑀻. 𑁧.𑁨𑁧𑁬) 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀁. 𑀲𑀼𑀤𑀼𑀗𑁆𑀕𑀸𑀢𑀺 𑀳𑀺 𑀪𑀽𑀫𑀺𑀖𑀭𑀲𑁆𑀲𑁂𑀢𑀁 ¶ 𑀅𑀥𑀺𑀯𑀘𑀦𑀁, ‘‘𑀢𑀁 𑀕𑀳𑁂𑀢𑁆𑀯𑀸 𑀲𑀼𑀤𑀼𑀗𑁆𑀕𑀸𑀬 𑀭𑀯𑀦𑁆𑀢𑀁 𑀬𑀓𑁆𑀔𑀺𑀦𑀻 𑀔𑀺𑀧𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀧𑀘𑀸𑀭𑀝𑁆𑀞𑀸𑀦𑀦𑁆𑀢𑀺 𑀧𑀓𑀢𑀺𑀲𑀜𑁆𑀘𑀸𑀭𑀯𑀲𑁂𑀦 𑀫𑀦𑀼𑀲𑁆𑀲𑁂𑀳𑀺 𑀦 𑀲𑀜𑁆𑀘𑀭𑀺𑀢𑀩𑁆𑀩𑀝𑁆𑀞𑀸𑀦𑀁. 𑀓𑀲𑁆𑀲𑀦𑀯𑀧𑁆𑀧𑀦𑀸𑀤𑀺𑀯𑀲𑁂𑀦 𑀳𑀺 𑀧𑀓𑀢𑀺𑀲𑀜𑁆𑀘𑀸𑀭𑀧𑀝𑀺𑀓𑁆𑀔𑁂𑀧𑁄 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ‘‘𑀬𑀢𑁆𑀣 ¶ 𑀦 𑀓𑀲𑀦𑁆𑀢𑀺 𑀦 𑀯𑀧𑀦𑁆𑀢𑀻’’𑀢𑀺. 𑀆𑀤𑀺𑀲𑀤𑁆𑀤𑁂𑀦 𑀧𑀦 ‘‘𑀯𑀦𑀧𑀢𑁆𑀣𑀦𑁆𑀢𑀺 𑀯𑀦𑀲𑀡𑁆𑀞𑀸𑀦𑀫𑁂𑀢𑀁 𑀲𑁂𑀦𑀸𑀲𑀦𑀸𑀦𑀁 𑀅𑀥𑀺𑀯𑀘𑀦𑀁, 𑀯𑀦𑀧𑀢𑁆𑀣𑀦𑁆𑀢𑀺 𑀪𑀻𑀲𑀦𑀓𑀸𑀦𑀫𑁂𑀢𑀁, 𑀯𑀦𑀧𑀢𑁆𑀣𑀦𑁆𑀢𑀺 𑀲𑀮𑁄𑀫𑀳𑀁𑀲𑀸𑀦𑀫𑁂𑀢𑀁, 𑀯𑀦𑀧𑀢𑁆𑀣𑀦𑁆𑀢𑀺 𑀧𑀭𑀺𑀬𑀦𑁆𑀢𑀸𑀦𑀫𑁂𑀢𑀁, 𑀯𑀦𑀧𑀢𑁆𑀣𑀦𑁆𑀢𑀺 𑀦 𑀫𑀦𑀼𑀲𑁆𑀲𑀽𑀧𑀘𑀸𑀭𑀸𑀦𑀫𑁂𑀢𑀁 𑀲𑁂𑀦𑀸𑀲𑀦𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀯𑀺𑀪. 𑁫𑁩𑁧) 𑀇𑀫𑀁 𑀯𑀺𑀪𑀗𑁆𑀕𑀧𑀸𑀴𑀺𑀲𑁂𑀲𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀢𑁆𑀣𑁄𑀢𑀺 𑀳𑀺 𑀧𑀩𑁆𑀩𑀢𑀲𑁆𑀲 𑀲𑀫𑀸𑀦𑀪𑀽𑀫𑀺, 𑀬𑁄 ‘‘𑀲𑀸𑀦𑀽’’𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲𑀤𑀺𑀲𑀢𑁆𑀢𑀸 𑀧𑀦 𑀫𑀦𑀼𑀲𑁆𑀲𑀸𑀦𑀫𑀲𑀜𑁆𑀘𑀭𑀡𑀪𑀽𑀢𑀁 𑀯𑀦𑀁, 𑀢𑀲𑁆𑀫𑀸 𑀧𑀢𑁆𑀣𑀲𑀤𑀺𑀲𑀁 𑀯𑀦𑀁 𑀯𑀦𑀧𑀢𑁆𑀣𑁄𑀢𑀺 𑀯𑀺𑀲𑁂𑀲𑀦𑀧𑀭𑀦𑀺𑀧𑀸𑀢𑁄 𑀤𑀝𑁆𑀞𑀩𑁆𑀩𑁄. 𑀲𑀩𑁆𑀩𑁂𑀲𑀁 𑀲𑀩𑁆𑀩𑀸𑀲𑀼 𑀤𑀺𑀲𑀸𑀲𑀼 𑀅𑀪𑀺𑀫𑀼𑀔𑁄 𑀑𑀓𑀸𑀲𑁄 𑀅𑀩𑁆𑀪𑁄𑀓𑀸𑀲𑁄𑀢𑀺 𑀆𑀳 ‘‘𑀅𑀘𑁆𑀙𑀦𑁆𑀦’’𑀦𑁆𑀢𑀺, 𑀓𑁂𑀦𑀘𑀺 𑀙𑀤𑀦𑁂𑀦 𑀅𑀦𑁆𑀢𑀫𑀲𑁄 𑀭𑀼𑀓𑁆𑀔𑀲𑀸𑀔𑀸𑀬𑀧𑀺 𑀦 𑀙𑀸𑀤𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀤𑀡𑁆𑀟𑀓𑀸𑀦𑀁 𑀉𑀧𑀭𑀺 𑀘𑀻𑀯𑀭𑀁 𑀙𑀸𑀤𑁂𑀢𑁆𑀯𑀸 𑀓𑀢𑀸 𑀘𑀻𑀯𑀭𑀓𑀼𑀝𑀺. 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸𑀢𑀺 𑀦𑀻𑀳𑀭𑀺𑀢𑁆𑀯𑀸. 𑀅𑀦𑁆𑀢𑁄𑀧𑀩𑁆𑀪𑀸𑀭𑀮𑁂𑀡𑀲𑀤𑀺𑀲𑁄 𑀧𑀮𑀸𑀮𑀭𑀸𑀲𑀺𑀬𑁂𑀯 𑀅𑀥𑀺𑀧𑁆𑀧𑁂𑀢𑁄, 𑀇𑀢𑀭𑀣𑀸 𑀢𑀺𑀡𑀧𑀡𑁆𑀡𑀲𑀦𑁆𑀣𑀸𑀭𑀲𑀗𑁆𑀕𑁄𑀧𑀺 𑀲𑀺𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀩𑁆𑀪𑀸𑀭𑀮𑁂𑀡𑀲𑀤𑀺𑀲𑁂 𑀆𑀮𑀬𑁂’’𑀢𑀺, 𑀧𑀩𑁆𑀪𑀸𑀭𑀲𑀤𑀺𑀲𑁂, 𑀮𑁂𑀡𑀲𑀤𑀺𑀲𑁂 𑀯𑀸𑀢𑀺 𑀅𑀢𑁆𑀣𑁄. 𑀕𑀘𑁆𑀙𑀕𑀼𑀫𑁆𑀩𑀸𑀤𑀻𑀦𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀧𑀼𑀭𑀺𑀫𑀦𑀬𑀁 𑀲𑀫𑁆𑀧𑀺𑀡𑁆𑀟𑁂𑀢𑀺.

𑀧𑀺𑀡𑁆𑀟𑀧𑀸𑀢𑀲𑁆𑀲 𑀧𑀭𑀺𑀬𑁂𑀲𑀦𑀁 𑀧𑀺𑀡𑁆𑀟𑀧𑀸𑀢𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀢𑀢𑁄 𑀧𑀝𑀺𑀓𑁆𑀓𑀦𑁆𑀢𑁄 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄𑀢𑀺 𑀆𑀳 ‘‘𑀧𑀺𑀡𑁆𑀟𑀧𑀸𑀢𑀧𑀭𑀺𑀬𑁂𑀲𑀦𑀢𑁄 𑀧𑀝𑀺𑀓𑁆𑀓𑀦𑁆𑀢𑁄’’𑀢𑀺. 𑀧𑀮𑁆𑀮𑀗𑁆𑀓𑀦𑁆𑀢𑀺 𑀏𑀢𑁆𑀣 𑀧𑀭𑀺-𑀲𑀤𑁆𑀤𑁄 ‘‘𑀲𑀫𑀦𑁆𑀢𑀢𑁄’’𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂, 𑀢𑀲𑁆𑀫𑀸 𑀧𑀭𑀺𑀲𑀫𑀦𑁆𑀢𑀢𑁄 𑀅𑀗𑁆𑀓𑀦𑀁 𑀆𑀲𑀦𑀁 𑀧𑀮𑁆𑀮𑀗𑁆𑀓𑁄 𑀭-𑀓𑀸𑀭𑀲𑁆𑀲 𑀮-𑀓𑀸𑀭𑀁, 𑀤𑁆𑀯𑀺𑀪𑀸𑀯𑀜𑁆𑀘 𑀓𑀢𑁆𑀯𑀸 𑀬𑀣𑀸 ‘‘𑀧𑀮𑀺𑀩𑀼𑀤𑁆𑀥𑁄’’𑀢𑀺, (𑀫𑀺. 𑀧. 𑁬.𑁩.𑁬) 𑀲𑀫𑀦𑁆𑀢𑀪𑀸𑀯𑁄 𑀘 𑀯𑀸𑀫𑁄𑀭𑀼𑀁, 𑀤𑀓𑁆𑀔𑀺𑀡𑁄𑀭𑀼𑀜𑁆𑀘 𑀲𑀫𑀁 𑀞𑀧𑁂𑀢𑁆𑀯𑀸 𑀉𑀪𑀺𑀦𑁆𑀦𑀁 𑀧𑀸𑀤𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀦𑀓𑀭𑀡𑀁. 𑀢𑁂𑀦𑀸𑀳 ‘‘𑀲𑀫𑀦𑁆𑀢𑀢𑁄 𑀊𑀭𑀼𑀩𑀤𑁆𑀥𑀸𑀲𑀦’’𑀦𑁆𑀢𑀺. 𑀊𑀭𑀽𑀦𑀁 𑀩𑀦𑁆𑀥𑀦𑀯𑀲𑁂𑀦 𑀦𑀺𑀲𑀚𑁆𑀚𑀸𑀯 𑀇𑀥 𑀧𑀮𑁆𑀮𑀗𑁆𑀓𑁄, 𑀦 𑀆𑀳𑀭𑀺𑀫𑁂𑀳𑀺 𑀯𑀸𑀴𑁂𑀳𑀺 𑀓𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀪𑀼𑀚𑀺𑀢𑁆𑀯𑀸𑀢𑀺 𑀘 𑀬𑀣𑀸 𑀧𑀮𑁆𑀮𑀗𑁆𑀓𑀯𑀲𑁂𑀦 𑀦𑀺𑀲𑀚𑁆𑀚𑀸 𑀳𑁄𑀢𑀺, 𑀢𑀣𑀸 𑀉𑀪𑁄 𑀧𑀸𑀤𑁂 𑀆𑀪𑀼𑀕𑁆𑀕𑁂 𑀲𑀫𑀺𑀜𑁆𑀚𑀺𑀢𑁂 𑀓𑀢𑁆𑀯𑀸, 𑀢𑀁 𑀧𑀦 𑀉𑀪𑀺𑀦𑁆𑀦𑀁 𑀧𑀸𑀤𑀸𑀦𑀁 𑀢𑀣𑀸𑀩𑀦𑁆𑀥𑀢𑀸𑀓𑀭𑀡𑀫𑁂𑀯𑀸𑀢𑀺 𑀆𑀳 ‘‘𑀩𑀦𑁆𑀥𑀺𑀢𑁆𑀯𑀸’’𑀢𑀺. 𑀉𑀚𑀼𑀁 𑀓𑀸𑀬𑀦𑁆𑀢𑀺 𑀏𑀢𑁆𑀣 𑀓𑀸𑀬-𑀲𑀤𑁆𑀤𑁄 𑀉𑀧𑀭𑀺𑀫𑀓𑀸𑀬𑀯𑀺𑀲𑀬𑁄 𑀳𑁂𑀝𑁆𑀞𑀺𑀫𑀓𑀸𑀬𑀲𑁆𑀲 𑀅𑀦𑀼𑀚𑀼𑀓𑀁 𑀞𑀧𑀦𑀲𑁆𑀲 𑀦𑀺𑀲𑀚𑁆𑀚𑀸𑀯𑀘𑀦𑁂𑀦𑁂𑀯 𑀯𑀺𑀜𑁆𑀜𑀸𑀧𑀺𑀢𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀉𑀧𑀭𑀺𑀫𑀁 𑀲𑀭𑀻𑀭𑀁 𑀉𑀚𑀼𑀁 𑀞𑀧𑁂𑀢𑁆𑀯𑀸’’𑀢𑀺. 𑀢𑀁 𑀧𑀦 𑀉𑀧𑀭𑀺𑀫𑀓𑀸𑀬𑀲𑁆𑀲 ¶ 𑀉𑀚𑀼𑀓𑀁 𑀞𑀧𑀦𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺 ‘‘𑀅𑀝𑁆𑀞𑀸𑀭𑀲𑀸’’𑀢𑀺𑀆𑀤𑀺𑀦𑀸, 𑀅𑀝𑁆𑀞𑀸𑀭𑀲𑀦𑁆𑀦𑀁 𑀧𑀺𑀝𑁆𑀞𑀺𑀓𑀡𑁆𑀝𑀓𑀝𑁆𑀞𑀺𑀓𑀸𑀦𑀁 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀧𑀝𑀺𑀧𑀸𑀤𑀦𑀫𑁂𑀯 𑀢𑀣𑀸 𑀞𑀧𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀤𑀸𑀦𑀺 𑀢𑀣𑀸 𑀞𑀧𑀦𑀲𑁆𑀲 𑀧𑀬𑁄𑀚𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀯𑀦𑁆𑀢𑀺 𑀢𑀣𑀸 𑀞𑀧𑀦𑁂 𑀲𑀢𑀺, 𑀇𑀫𑀺𑀦𑀸 𑀯𑀸 𑀢𑀣𑀸𑀞𑀧𑀦𑀳𑁂𑀢𑀼𑀦𑀸. 𑀦 𑀧𑀡𑀫𑀦𑁆𑀢𑀻𑀢𑀺 𑀦 𑀑𑀦𑀫𑀦𑁆𑀢𑀺. ‘‘𑀅𑀣𑀲𑁆𑀲𑀸’’𑀢𑀺𑀆𑀤𑀺 𑀧𑀦 𑀧𑀭𑀫𑁆𑀧𑀭𑀧𑀬𑁄𑀚𑀦𑀤𑀲𑁆𑀲𑀦𑀁. 𑀅𑀣𑀸𑀢𑀺 𑀏𑀯𑀁 𑀅𑀦𑁄𑀦𑀫𑀦𑁂. 𑀯𑁂𑀤𑀦𑀸𑀢𑀺 𑀧𑀺𑀝𑁆𑀞𑀺𑀕𑀺𑀮𑀸𑀦𑀸𑀤𑀺𑀯𑁂𑀤𑀦𑀸. 𑀦 𑀧𑀭𑀺𑀧𑀢𑀢𑀻𑀢𑀺 𑀦 𑀯𑀺𑀕𑀘𑁆𑀙𑀢𑀺 𑀯𑀻𑀣𑀺𑀁 𑀦 𑀯𑀺𑀮𑀗𑁆𑀖𑁂𑀢𑀺. 𑀢𑀢𑁄 𑀏𑀯 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀧𑁆𑀧𑀢𑁆𑀢𑀺𑀬𑀸 𑀓𑀫𑁆𑀫𑀝𑁆𑀞𑀸𑀦𑀁 𑀯𑀼𑀤𑁆𑀥𑀺𑀁 𑀨𑀸𑀢𑀺𑀁 𑀯𑁂𑀧𑀼𑀮𑁆𑀮𑀁 𑀉𑀧𑀕𑀘𑁆𑀙𑀢𑀺. 𑀧𑀭𑀺𑀲𑀤𑁆𑀤𑁄 𑀘𑁂𑀢𑁆𑀣 𑀅𑀪𑀺𑀲𑀤𑁆𑀤𑀧𑀭𑀺𑀬𑀸𑀬𑁄 𑀅𑀪𑀺𑀫𑀼𑀔𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 ¶ ‘‘𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀫𑀼𑀔’’𑀦𑁆𑀢𑀺, 𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑀢𑁄 𑀦𑀺𑀯𑀸𑀭𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁𑀬𑁂𑀯 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀲𑀤𑁆𑀤𑀲𑁆𑀲 𑀲𑀫𑀻𑀧𑀢𑁆𑀣𑀢𑀁 𑀤𑀲𑁆𑀲𑁂𑀢𑀺 ‘‘𑀫𑀼𑀔𑀲𑀫𑀻𑀧𑁂 𑀯𑀸 𑀓𑀢𑁆𑀯𑀸’’𑀢𑀺 𑀇𑀫𑀺𑀦𑀸, 𑀫𑀼𑀔𑀲𑁆𑀲 𑀲𑀫𑀻𑀧𑁂 𑀯𑀺𑀬 𑀘𑀺𑀢𑁆𑀢𑁂 𑀦𑀺𑀩𑀤𑁆𑀥𑀁 𑀉𑀧𑀝𑁆𑀞𑀸𑀧𑀦𑀯𑀲𑁂𑀦 𑀓𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀺𑀲𑀤𑁆𑀤𑀲𑁆𑀲 𑀲𑀫𑀻𑀧𑀢𑁆𑀣𑀢𑀁 𑀯𑀺𑀪𑀗𑁆𑀕𑀧𑀸𑀴𑀺𑀬𑀸 (𑀯𑀺𑀪. 𑁫𑁩𑁭) 𑀲𑀸𑀥𑁂𑀢𑀼𑀁 ‘‘𑀢𑁂𑀦𑁂𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀸𑀲𑀺𑀓𑀕𑁆𑀕𑁂𑀢𑀺 𑀦𑀸𑀲𑀧𑀼𑀝𑀕𑁆𑀕𑁂. 𑀫𑀼𑀔𑀦𑀺𑀫𑀺𑀢𑁆𑀢𑀁 𑀦𑀸𑀫 𑀉𑀢𑁆𑀢𑀭𑁄𑀝𑁆𑀞𑀲𑁆𑀲 𑀯𑁂𑀫𑀚𑁆𑀛𑀧𑁆𑀧𑀤𑁂𑀲𑁄, 𑀬𑀢𑁆𑀣 𑀦𑀸𑀲𑀺𑀓𑀯𑀸𑀢𑁄 𑀧𑀝𑀺𑀳𑀜𑁆𑀜𑀢𑀺.

𑀏𑀢𑁆𑀣 𑀘 𑀬𑀣𑀸 ‘‘𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀪𑀚𑀢𑀻’’𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁦𑁮) 𑀪𑀸𑀯𑀦𑀸𑀦𑀼𑀭𑀽𑀧𑀁 𑀲𑁂𑀦𑀸𑀲𑀦𑀁 𑀤𑀲𑁆𑀲𑀺𑀢𑀁, 𑀏𑀯𑀁 ‘‘𑀦𑀺𑀲𑀻𑀤𑀢𑀻’’𑀢𑀺 𑀇𑀫𑀺𑀦𑀸 𑀅𑀮𑀻𑀦𑀸𑀦𑀼𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑁄 𑀲𑀦𑁆𑀢𑁄 𑀇𑀭𑀺𑀬𑀸𑀧𑀣𑁄 𑀤𑀲𑁆𑀲𑀺𑀢𑁄, ‘‘𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀦𑀺𑀲𑀚𑁆𑀚𑀸𑀬 𑀤𑀴𑁆𑀳𑀪𑀸𑀯𑁄, ‘‘𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀆𑀭𑀫𑁆𑀫𑀡𑀧𑀭𑀺𑀕𑁆𑀕𑀳𑀡𑀽𑀧𑀸𑀬𑁄𑀢𑀺. 𑀧𑀭𑀺-𑀲𑀤𑁆𑀤𑁄 𑀧𑀭𑀺𑀕𑁆𑀕𑀳𑀝𑁆𑀞𑁄 ‘‘𑀧𑀭𑀺𑀡𑀸𑀬𑀺𑀓𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁬) 𑀯𑀺𑀬. 𑀫𑀼𑀔-𑀲𑀤𑁆𑀤𑁄 𑀦𑀺𑀬𑁆𑀬𑀸𑀦𑀝𑁆𑀞𑁄 ‘‘𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀫𑀼𑀔’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀧𑀝𑀺𑀧𑀓𑁆𑀔𑀢𑁄 𑀦𑀺𑀓𑁆𑀔𑀫𑀦𑀫𑁂𑀯 𑀳𑀺 𑀦𑀺𑀬𑁆𑀬𑀸𑀦𑀁. 𑀅𑀲𑀫𑁆𑀫𑁄𑀲𑀦𑀪𑀸𑀯𑁄 𑀉𑀧𑀝𑁆𑀞𑀸𑀦𑀝𑁆𑀞𑁄. 𑀢𑀢𑁆𑀭𑀸𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀦𑀬𑁂. 𑀧𑀭𑀺𑀕𑁆𑀕𑀳𑀺𑀢𑀦𑀺𑀬𑁆𑀬𑀸𑀦𑀦𑁆𑀢𑀺 𑀲𑀩𑁆𑀩𑀣𑀸 𑀕𑀳𑀺𑀢𑀸𑀲𑀫𑁆𑀫𑁄𑀲𑀢𑀸𑀬 𑀧𑀭𑀺𑀕𑁆𑀕𑀳𑀺𑀢𑀁, 𑀧𑀭𑀺𑀘𑁆𑀘𑀢𑁆𑀢𑀲𑀫𑁆𑀫𑁄𑀲𑀧𑀝𑀺𑀧𑀓𑁆𑀔𑀢𑀸𑀬 𑀘 𑀦𑀺𑀬𑁆𑀬𑀸𑀦𑀁 𑀲𑀢𑀺𑀁 𑀓𑀢𑁆𑀯𑀸, 𑀧𑀭𑀫𑀁 𑀲𑀢𑀺𑀦𑁂𑀧𑀓𑁆𑀓𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀁 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑀲𑁆𑀲, 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀘 𑀫𑀢𑀺. 𑀅𑀣 𑀯𑀸 ‘‘𑀓𑀸𑀬𑀸𑀤𑀻𑀲𑀼 𑀲𑀼𑀝𑁆𑀞𑀼𑀧𑀯𑀢𑁆𑀢𑀺𑀬𑀸 𑀧𑀭𑀺𑀕𑁆𑀕𑀳𑀺𑀢𑀁, 𑀢𑀢𑁄 𑀏𑀯 𑀘 𑀦𑀺𑀬𑁆𑀬𑀸𑀦𑀪𑀸𑀯𑀬𑀼𑀢𑁆𑀢𑀁, 𑀓𑀸𑀬𑀸𑀤𑀺𑀧𑀭𑀺𑀕𑁆𑀕𑀳𑀡𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀢𑀸𑀬 𑀯𑀸 𑀧𑀭𑀺𑀕𑁆𑀕𑀳𑀺𑀢𑀁, 𑀢𑀢𑁄𑀬𑁂𑀯 𑀘 𑀦𑀺𑀬𑁆𑀬𑀸𑀦𑀪𑀽𑀢𑀁 ¶ 𑀉𑀧𑀝𑁆𑀞𑀸𑀦𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄’’𑀢𑀺 𑀅𑀬𑀁 𑀆𑀘𑀭𑀺𑀬𑀸𑀦𑀦𑁆𑀤𑀢𑁆𑀣𑁂𑀭𑀲𑁆𑀲 (𑀯𑀺𑀪. 𑀫𑀽𑀮𑀝𑀻. 𑁫𑁩𑁭) 𑀫𑀢𑀺.

𑁨𑁧𑁭. 𑀅𑀪𑀺𑀚𑁆𑀛𑀸𑀬𑀢𑀺 𑀕𑀺𑀚𑁆𑀛𑀢𑀺 𑀅𑀪𑀺𑀓𑀗𑁆𑀔𑀢𑀺 𑀏𑀢𑀸𑀬𑀸𑀢𑀺 𑀅𑀪𑀺𑀚𑁆𑀛𑀸, 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁. 𑀮𑀼𑀘𑁆𑀘𑀦𑀝𑁆𑀞𑁂𑀦𑀸𑀢𑀺 𑀪𑀺𑀚𑁆𑀚𑀦𑀝𑁆𑀞𑁂𑀦, 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀦𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄𑀢𑀺 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦, (𑀤𑀻. 𑀦𑀺. 𑀝𑀻. 𑁧.𑁨𑁧𑁭) 𑀅𑀗𑁆𑀕𑀼𑀢𑁆𑀢𑀭𑀝𑀻𑀓𑀸𑀓𑀸𑀭𑁂𑀦 𑀘 𑀆𑀘𑀭𑀺𑀬𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁. 𑀲𑀼𑀢𑁆𑀢𑁂𑀲𑀼 𑀘 𑀤𑀺𑀲𑁆𑀲𑀢𑀺 ‘‘𑀮𑀼𑀘𑁆𑀘𑀢𑀻𑀢𑀺 𑀔𑁄 𑀪𑀺𑀓𑁆𑀔𑀼 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘 𑀮𑀼𑀘𑁆𑀘𑀢𑀺? 𑀘𑀓𑁆𑀔𑀼 𑀔𑁄 𑀪𑀺𑀓𑁆𑀔𑀼 𑀮𑀼𑀘𑁆𑀘𑀢𑀺, 𑀭𑀽𑀧𑀸 𑀮𑀼𑀘𑁆𑀘𑀦𑁆𑀢𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀮𑀼𑀘𑁆𑀘𑀢𑀻’’𑀢𑀺𑀆𑀤𑀺. (𑀲𑀁. 𑀦𑀺. 𑁪.𑁮𑁨) 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑀁, (𑀥. 𑀲. 𑀅𑀝𑁆𑀞. 𑁭-𑁧𑁩) 𑀧𑀦 𑀇𑀥 𑀘 𑀅𑀥𑀼𑀦𑀸 𑀧𑁄𑀢𑁆𑀣𑀓𑁂 ‘‘𑀮𑀼𑀘𑁆𑀘𑀦𑀧𑀮𑀼𑀘𑁆𑀘𑀦𑀝𑁆𑀞𑁂𑀦𑀸’’𑀢𑀺 𑀮𑀺𑀔𑀺𑀢𑀁. 𑀢𑀢𑁆𑀣 𑀮𑀼𑀘𑁆𑀘𑀦𑀫𑁂𑀯 𑀧𑀮𑀼𑀘𑁆𑀘𑀦𑀧𑀭𑀺𑀬𑀸𑀬𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀮𑀼𑀘𑀲𑀤𑁆𑀤𑁄 𑀳𑀺 𑀅𑀧𑁂𑀓𑁆𑀔𑀦𑀸𑀤𑀺𑀅𑀢𑁆𑀣𑁄𑀧𑀺 𑀪𑀯𑀢𑀺 ‘‘𑀑𑀮𑁄𑀓𑁂𑀢𑀻’’𑀢𑀺𑀆𑀤𑀻𑀲𑀼, 𑀪𑀺𑀚𑁆𑀚𑀦𑀧𑀪𑀺𑀚𑁆𑀚𑀦𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. 𑀯𑀁𑀲𑀢𑁆𑀣𑀧𑀓𑀸𑀲𑀺𑀦𑀺𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀔𑀡𑀪𑀗𑁆𑀕𑀯𑀲𑁂𑀦 𑀮𑀼𑀘𑁆𑀘𑀦𑀲𑀪𑀸𑀯𑀢𑁄, 𑀘𑀼𑀢𑀺𑀪𑀗𑁆𑀕𑀯𑀲𑁂𑀦 𑀘 𑀧𑀮𑀼𑀘𑁆𑀘𑀦𑀲𑀪𑀸𑀯𑀢𑁄 𑀮𑁄𑀓𑁄 𑀦𑀸𑀫𑀸’’𑀢𑀺 (𑀯𑀁𑀲𑀢𑁆𑀣𑀧𑀓𑀸𑀲𑀺𑀦𑀺𑀬𑀁 𑀦𑀸𑀫 𑀫𑀳𑀸𑀯𑀁𑀲𑀝𑀻𑀓𑀸𑀬𑀁 𑀧𑀞𑀫𑀧𑀭𑀺𑀘𑁆𑀙𑁂𑀤𑁂 𑀧𑀜𑁆𑀘𑀫𑀕𑀸𑀣𑀸 𑀯𑀡𑁆𑀡𑀦𑀸𑀬𑀁) 𑀓𑁂𑀘𑀺 𑀧𑀦 ‘‘𑀪𑀺𑀚𑁆𑀚𑀦𑀉𑀧𑁆𑀧𑀚𑁆𑀚𑀦𑀝𑁆𑀞𑁂𑀦𑀸’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀆𑀳𑀘𑁆𑀘𑀪𑀸𑀲𑀺𑀢𑀯𑀘𑀦𑀢𑁆𑀣𑁂𑀦 𑀯𑀺𑀭𑀼𑀚𑁆𑀛𑀦𑀢𑁄, 𑀮𑀼𑀘𑀲𑀤𑁆𑀤𑀲𑁆𑀲 𑀘 ¶ 𑀅𑀦𑀼𑀧𑁆𑀧𑀸𑀤𑀯𑀸𑀘𑀓𑀢𑁆𑀢𑀸 𑀅𑀬𑀼𑀢𑁆𑀢𑀫𑁂𑀯𑁂𑀢𑀁. 𑀅𑀧𑀺𑀘 𑀆𑀘𑀭𑀺𑀬𑁂𑀳𑀺𑀧𑀺 ‘‘𑀮𑀼𑀘𑁆𑀘𑀦𑀧𑀮𑀼𑀘𑁆𑀘𑀦𑀝𑁆𑀞𑁂𑀦𑀸’’𑀢𑀺 𑀧𑀸𑀞𑀫𑁂𑀯 𑀉𑀮𑁆𑀮𑀺𑀗𑁆𑀕𑁂𑀢𑁆𑀯𑀸 𑀢𑀣𑀸 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀲𑀺𑀬𑀸, 𑀧𑀘𑁆𑀙𑀸 𑀧𑀦 𑀧𑀭𑀫𑁆𑀧𑀭𑀸𑀪𑀢𑀯𑀲𑁂𑀦 𑀧𑀫𑀸𑀤𑀮𑁂𑀔𑀢𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀦 𑀤𑀺𑀝𑁆𑀞𑁄𑀢𑀺 𑀤𑀝𑁆𑀞𑀩𑁆𑀩𑀁, 𑀦 𑀮𑀼𑀘𑁆𑀘𑀢𑀺 𑀦 𑀧𑀮𑀼𑀘𑁆𑀘𑀢𑀻𑀢𑀺 𑀬𑁄 𑀕𑀳𑀺𑀢𑁄𑀧𑀺 𑀢𑀣𑀸 𑀦 𑀳𑁄𑀢𑀺, 𑀲𑁆𑀯𑁂𑀯 𑀮𑁄𑀓𑁄, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀯𑀸 𑀮𑀼𑀘𑁆𑀘𑀢𑀺 𑀪𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀻𑀢𑀺 𑀕𑀳𑁂𑀢𑀩𑁆𑀩𑁄𑀯 𑀮𑁄𑀓𑁄𑀢𑀺 𑀢𑀁𑀕𑀳𑀡𑀭𑀳𑀺𑀢𑀸𑀦𑀁 𑀮𑁄𑀓𑀼𑀢𑁆𑀢𑀭𑀸𑀦𑀁 𑀦𑀢𑁆𑀣𑀺 𑀮𑁄𑀓𑀢𑀸, 𑀤𑀼𑀓𑁆𑀔𑀲𑀘𑁆𑀘𑀁 𑀯𑀸 𑀮𑁄𑀓𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀮𑁄𑀓𑁄’’𑀢𑀺. 𑀏𑀯𑀁 𑀢𑀢𑁆𑀣 𑀢𑀢𑁆𑀣 𑀯𑀘𑀦𑀢𑁄𑀧𑀺 𑀬𑀣𑀸𑀯𑀼𑀢𑁆𑀢𑁄 𑀓𑁂𑀲𑀜𑁆𑀘𑀺 𑀅𑀢𑁆𑀣𑁄 𑀦 𑀬𑀼𑀢𑁆𑀢𑁄𑀢𑀺.

𑀢𑀲𑁆𑀫𑀸𑀢𑀺 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀫𑁂𑀯 𑀮𑁄𑀓𑀪𑀸𑀯𑀢𑁄. 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦𑀸𑀢𑀺 𑀏𑀢𑁆𑀣 𑀯𑀺𑀓𑁆𑀔𑀫𑁆𑀪𑀦𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑀯𑀲𑁂𑀦𑁂𑀯 𑀅𑀦𑀼𑀧𑁆𑀧𑀸𑀤𑀦𑀁 𑀅𑀧𑁆𑀧𑀯𑀢𑁆𑀢𑀦𑀁, 𑀦 𑀧𑀦 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀯𑀲𑁂𑀦 𑀧𑀝𑀺𑀧𑀓𑁆𑀔𑀸𑀦𑀁 𑀲𑀼𑀝𑁆𑀞𑀼𑀧𑀳𑀻𑀦𑀁. ‘‘𑀧𑀳𑀻𑀦𑀢𑁆𑀢𑀸’’𑀢𑀺 𑀳𑀺 𑀢𑀣𑀸𑀧𑀳𑀻𑀦𑀲𑀤𑀺𑀲𑀢𑀁 𑀏𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀲𑁆𑀫𑀸𑀢𑀺 𑀘𑁂? 𑀛𑀸𑀦𑀲𑁆𑀲 𑀅𑀦𑀥𑀺𑀕𑀢𑀢𑁆𑀢𑀸. 𑀏𑀯𑀁 𑀧𑀦 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀬 𑀢𑀣𑀸 𑀧𑀳𑀸𑀦𑀢𑁄𑀬𑁂𑀯𑁂𑀢𑀁 𑀘𑀺𑀢𑁆𑀢𑀁 𑀯𑀺𑀕𑀢𑀸𑀪𑀺𑀚𑁆𑀛𑀁 𑀦𑀸𑀫, 𑀦 ¶ 𑀢𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀫𑀺𑀯 𑀲𑀪𑀸𑀯𑀢𑁄 𑀅𑀪𑀺𑀚𑁆𑀛𑀸𑀯𑀺𑀭𑀳𑀺𑀢𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀤𑀺𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀢𑀦𑁆𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀢𑀁 𑀘𑀺𑀢𑁆𑀢𑀁 𑀯𑀸. 𑀅𑀥𑀼𑀦𑀸 𑀫𑀼𑀜𑁆𑀘𑀦𑀲𑁆𑀲, 𑀅𑀦𑀸𑀕𑀢𑁂 𑀘 𑀧𑀼𑀦 𑀅𑀦𑀸𑀤𑀸𑀦𑀲𑁆𑀲 𑀓𑀭𑀡𑀁 𑀧𑀭𑀺𑀲𑁄𑀥𑀦𑀁 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸 𑀘 𑀇𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀬 𑀧𑀭𑀺𑀲𑁄𑀥𑀺𑀢𑀢𑁆𑀢𑀸 𑀯𑀺𑀕𑀢𑀸𑀪𑀺𑀚𑁆𑀛𑀢𑀸, 𑀏𑀯𑀁 𑀅𑀩𑁆𑀬𑀸𑀧𑀦𑁆𑀦𑀢𑀸, 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑀢𑀸, 𑀅𑀦𑀼𑀤𑁆𑀥𑀢𑀢𑀸, 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸𑀢𑀺 𑀦𑀺𑀤𑀲𑁆𑀲𑁂𑀦𑁆𑀢𑁄 ‘‘𑀩𑁆𑀬𑀸𑀧𑀸𑀤𑀧𑀤𑁄𑀲𑀁 𑀧𑀳𑀸𑀬𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺 𑀆𑀳. 𑀧𑀽𑀢𑀺𑀓𑀼𑀫𑁆𑀫𑀸𑀲𑀸𑀤𑀬𑁄𑀢𑀺 𑀆𑀪𑀺𑀤𑁄𑀲𑀺𑀓𑀬𑀯𑀓𑀼𑀫𑁆𑀫𑀸𑀲𑀸𑀤𑀬𑁄. 𑀧𑀼𑀭𑀺𑀫𑀧𑀓𑀢𑀺𑀦𑁆𑀢𑀺 𑀧𑀭𑀺𑀲𑀼𑀤𑁆𑀥𑀧𑀡𑁆𑀟𑀭𑀲𑀪𑀸𑀯𑀁, 𑀇𑀫𑀺𑀦𑀸 𑀯𑀺𑀓𑀸𑀭𑀫𑀸𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀯𑀺𑀓𑀸𑀭𑀸𑀧𑀢𑁆𑀢𑀺𑀬𑀸𑀢𑀺 𑀧𑀼𑀭𑀺𑀫𑀧𑀓𑀢𑀺𑀯𑀺𑀚𑀳𑀦𑀲𑀗𑁆𑀔𑀸𑀢𑁂𑀦 𑀯𑀺𑀓𑀸𑀭𑀫𑀸𑀧𑀚𑁆𑀚𑀦𑁂𑀦. ‘‘𑀉𑀪𑀬’’𑀦𑁆𑀢𑀺𑀆𑀤𑀺𑀦𑀸 𑀢𑀼𑀮𑁆𑀬𑀢𑁆𑀣𑀲𑀫𑀸𑀲𑀪𑀸𑀯𑀫𑀸𑀳. ‘‘𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀮𑀢𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁧𑁬𑁨; 𑀯𑀺𑀪. 𑁫𑁪𑁬) 𑀣𑀺𑀦𑀲𑁆𑀲, ‘‘𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀸𑀬𑀲𑁆𑀲 𑀅𑀓𑀮𑁆𑀮𑀢𑀸’’𑀢𑀺𑀆𑀤𑀺𑀦𑀸 𑀘 𑀫𑀺𑀤𑁆𑀥𑀲𑁆𑀲 𑀅𑀪𑀺𑀥𑀫𑁆𑀫𑁂 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 ‘‘𑀣𑀺𑀦𑀁 𑀘𑀺𑀢𑁆𑀢𑀕𑁂𑀮𑀜𑁆𑀜𑀁, 𑀫𑀺𑀤𑁆𑀥𑀁 𑀘𑁂𑀢𑀲𑀺𑀓𑀕𑁂𑀮𑀜𑁆𑀜’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀢𑀺𑀧𑀺 𑀳𑀺 𑀣𑀺𑀦𑀫𑀺𑀤𑁆𑀥𑀲𑁆𑀲 𑀅𑀜𑁆𑀜𑀫𑀜𑁆𑀜𑀁 𑀅𑀯𑀺𑀧𑁆𑀧𑀬𑁄𑀕𑁂 𑀘𑀺𑀢𑁆𑀢𑀓𑀸𑀬𑀮𑀳𑀼𑀢𑀸𑀤𑀻𑀦𑀁 𑀯𑀺𑀬 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀬𑀣𑀸𑀓𑁆𑀓𑀫𑀁 𑀢𑀁𑀢𑀁𑀯𑀺𑀲𑁂𑀲𑀲𑁆𑀲 𑀬𑀸 𑀢𑁂𑀲𑀁 𑀅𑀓𑀮𑁆𑀮𑀢𑀸𑀤𑀻𑀦𑀁 𑀯𑀺𑀲𑁂𑀲𑀧𑀘𑁆𑀘𑀬𑀢𑀸, 𑀅𑀬𑀫𑁂𑀢𑁂𑀲𑀁 𑀲𑀪𑀸𑀯𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀤𑀺𑀝𑁆𑀞𑀸𑀮𑁄𑀓𑁄 𑀦𑀸𑀫 𑀧𑀲𑁆𑀲𑀺𑀢𑁄 𑀭𑀢𑁆𑀢𑀺𑀁 𑀘𑀦𑁆𑀤𑀸𑀮𑁄𑀓𑀤𑀻𑀧𑀸𑀮𑁄𑀓𑀉𑀓𑁆𑀓𑀸𑀮𑁄𑀓𑀸𑀤𑀺, 𑀤𑀺𑀯𑀸 𑀘 𑀲𑀽𑀭𑀺𑀬𑀸𑀮𑁄𑀓𑀸𑀤𑀺. 𑀭𑀢𑁆𑀢𑀺𑀫𑁆𑀧𑀺 𑀤𑀺𑀯𑀸𑀧𑀺 𑀢𑀲𑁆𑀲 𑀲𑀜𑁆𑀚𑀸𑀦𑀦𑀲𑀫𑀢𑁆𑀣𑀸 𑀲𑀜𑁆𑀜𑀸 𑀆𑀮𑁄𑀓𑀲𑀜𑁆𑀜𑀸, 𑀢𑀲𑁆𑀲𑀸 𑀘 𑀯𑀺𑀕𑀢𑀦𑀻𑀯𑀭𑀡𑀸𑀬 𑀧𑀭𑀺𑀲𑀼𑀤𑁆𑀥𑀸𑀬 𑀅𑀢𑁆𑀣𑀺𑀢𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀅𑀢𑀺𑀲𑀬𑀢𑁆𑀣𑀯𑀺𑀲𑀺𑀝𑁆𑀞𑀲𑁆𑀲 𑀳𑀺 𑀅𑀢𑁆𑀣𑀺𑀅𑀢𑁆𑀣𑀲𑁆𑀲 𑀅𑀯𑀩𑁄𑀥𑀓𑁄 𑀅𑀬𑀫𑀻𑀓𑀸𑀭𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀭𑀢𑁆𑀢𑀺𑀫𑁆𑀧𑀻’’𑀢𑀺𑀆𑀤𑀺𑀫𑀸𑀳, 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑀪𑀸𑀯𑀲𑁆𑀲 𑀓𑀸𑀭𑀡𑀢𑁆𑀢𑀸 𑀘𑁂𑀢𑀁 𑀯𑀼𑀢𑁆𑀢𑀁. 𑀲𑀼𑀢𑁆𑀢𑁂𑀲𑀼 𑀧𑀸𑀓𑀝𑁄𑀯𑀸𑀬𑀫𑀢𑁆𑀣𑁄.

𑀲𑀭𑀢𑀻𑀢𑀺 ¶ 𑀲𑀢𑁄, 𑀲𑀫𑁆𑀧𑀚𑀸𑀦𑀸𑀢𑀻𑀢𑀺 𑀲𑀫𑁆𑀧𑀚𑀸𑀦𑁄𑀢𑀺 𑀏𑀯𑀁 𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀲𑀢𑀺𑀬𑀸 𑀘 𑀜𑀸𑀡𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀇𑀫𑀺𑀦𑀸. 𑀲𑀦𑁆𑀢𑁂𑀲𑀼𑀧𑀺 𑀅𑀜𑁆𑀜𑁂𑀲𑀼 𑀯𑀻𑀭𑀺𑀬𑀲𑀫𑀸𑀥𑀺𑀆𑀤𑀻𑀲𑀼 𑀓𑀲𑁆𑀫𑀸 𑀇𑀤𑀫𑁂𑀯 𑀉𑀪𑀬𑀁 𑀯𑀼𑀢𑁆𑀢𑀁, 𑀯𑀺𑀕𑀢𑀸𑀪𑀺𑀚𑁆𑀛𑀸𑀤𑀻𑀲𑀼 𑀯𑀸 𑀇𑀤𑀁 𑀉𑀪𑀬𑀁 𑀅𑀯𑀢𑁆𑀯𑀸 𑀓𑀲𑁆𑀫𑀸 𑀇𑀥𑁂𑀯 𑀯𑀼𑀢𑁆𑀢𑀦𑁆𑀢𑀺 𑀅𑀦𑀼𑀬𑁄𑀕𑀫𑀧𑀦𑁂𑀢𑀼𑀁 ‘‘𑀇𑀤𑀁 𑀉𑀪𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀦𑀺𑀤𑁆𑀤𑀺𑀝𑁆𑀞𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑀗𑁆𑀔𑀸𑀢𑀁 𑀇𑀤𑀁 𑀉𑀪𑀬𑀦𑁆𑀢𑀺 𑀅𑀢𑁆𑀣𑁄. 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄𑀢𑀺 𑀢-𑀲𑀤𑁆𑀤𑀲𑁆𑀲 𑀅𑀢𑀻𑀢𑀢𑁆𑀣𑀢𑀁 𑀆𑀳, 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀬 𑀧𑀚𑀳𑀦𑀫𑁂𑀯 𑀘 𑀅𑀢𑀺𑀓𑁆𑀓𑀫𑀦𑀁. ‘‘𑀓𑀣𑀁 𑀇𑀤𑀁 ¶ 𑀓𑀣𑀁 𑀇𑀤’’𑀦𑁆𑀢𑀺 𑀧𑀯𑀢𑁆𑀢𑀢𑀻𑀢𑀺 𑀓𑀣𑀁𑀓𑀣𑀸, 𑀯𑀺𑀘𑀺𑀓𑀺𑀘𑁆𑀙𑀸, 𑀲𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀓𑀣𑀁𑀓𑀣𑀻, 𑀦 𑀓𑀣𑀁𑀓𑀣𑀻 𑀅𑀓𑀣𑀁𑀓𑀣𑀻, 𑀦𑀺𑀩𑁆𑀩𑀺𑀘𑀺𑀓𑀺𑀘𑁆𑀙𑁄𑀢𑀺 𑀯𑀘𑀦𑀢𑁆𑀣𑁄, 𑀅𑀢𑁆𑀣𑀫𑀢𑁆𑀢𑀁 𑀧𑀦 𑀤𑀲𑁆𑀲𑁂𑀢𑀼𑀁 ‘‘𑀓𑀣𑀁 𑀇𑀤𑀁 𑀓𑀣𑀁 𑀇𑀤’𑀦𑁆𑀢𑀺 𑀏𑀯𑀁 𑀦𑀧𑁆𑀧𑀯𑀢𑁆𑀢𑀢𑀻𑀢𑀺 𑀅𑀓𑀣𑀁𑀓𑀣𑀻’’𑀢𑀺 𑀯𑀼𑀢𑁆𑀢𑀁. ‘‘𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺 𑀇𑀤𑀁 ‘‘𑀅𑀓𑀣𑀁𑀓𑀣𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀚𑁆𑀛𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀦 𑀯𑀺𑀘𑀺𑀓𑀺𑀘𑁆𑀙𑀢𑀺, 𑀦 𑀓𑀗𑁆𑀔𑀢𑀻𑀢𑀺 𑀅𑀢𑁆𑀣𑁄’’𑀢𑀺. 𑀯𑀘𑀦𑀢𑁆𑀣𑀮𑀓𑁆𑀔𑀡𑀸𑀤𑀺𑀪𑁂𑀤𑀢𑁄𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀧𑀘𑁆𑀘𑀬𑀧𑀳𑀸𑀦𑀧𑀳𑀸𑀬𑀓𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀧𑀺 𑀳𑀺 𑀧𑀪𑁂𑀤𑀢𑁄 𑀯𑀢𑁆𑀢𑀩𑁆𑀩𑀸𑀢𑀺.

𑁨𑁧𑁮. 𑀯𑀟𑁆𑀠𑀺𑀬𑀸 𑀕𑀳𑀺𑀢𑀁 𑀥𑀦𑀁 𑀇𑀡𑀁 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 ‘‘𑀯𑀟𑁆𑀠𑀺𑀬𑀸 𑀥𑀦𑀁 𑀕𑀳𑁂𑀢𑁆𑀯𑀸’’𑀢𑀺. 𑀯𑀺𑀕𑀢𑁄 𑀅𑀦𑁆𑀢𑁄 𑀩𑁆𑀬𑀦𑁆𑀢𑁄, 𑀲𑁄 𑀬𑀲𑁆𑀲𑀸𑀢𑀺 𑀩𑁆𑀬𑀦𑁆𑀢𑀻. 𑀢𑁂𑀦𑀸𑀳 ‘‘𑀯𑀺𑀕𑀢𑀦𑁆𑀢’’𑀦𑁆𑀢𑀺, 𑀯𑀺𑀭𑀳𑀺𑀢𑀤𑀸𑀢𑀩𑁆𑀩𑀇𑀡𑀧𑀭𑀺𑀬𑀦𑁆𑀢𑀁 𑀓𑀭𑁂𑀬𑁆𑀬𑀸𑀢𑀺 𑀘𑁂𑀢𑀲𑁆𑀲 𑀅𑀢𑁆𑀣𑁄. 𑀢𑁂𑀲𑀦𑁆𑀢𑀺 𑀯𑀟𑁆𑀠𑀺𑀬𑀸 𑀕𑀳𑀺𑀢𑀸𑀦𑀁 𑀇𑀡𑀥𑀦𑀸𑀦𑀁. 𑀧𑀭𑀺𑀬𑀦𑁆𑀢𑁄 𑀦𑀸𑀫 𑀢𑀤𑀼𑀢𑁆𑀢𑀭𑀺 𑀤𑀸𑀢𑀩𑁆𑀩𑀇𑀡𑀲𑁂𑀲𑁄. 𑀦𑀢𑁆𑀣𑀺 𑀇𑀡𑀫𑀲𑁆𑀲𑀸𑀢𑀺 𑀅𑀡𑀡𑁄. 𑀢𑀲𑁆𑀲 𑀪𑀸𑀯𑁄 𑀆𑀡𑀡𑁆𑀬𑀁. 𑀢𑀫𑁂𑀯 𑀦𑀺𑀤𑀸𑀦𑀁 𑀆𑀡𑀡𑁆𑀬𑀦𑀺𑀤𑀸𑀦𑀁, 𑀆𑀡𑀡𑁆𑀬𑀳𑁂𑀢𑀼 𑀆𑀡𑀡𑁆𑀬𑀓𑀸𑀭𑀡𑀸𑀢𑀺 𑀅𑀢𑁆𑀣𑁄. 𑀆𑀡𑀡𑁆𑀬𑀫𑁂𑀯 𑀳𑀺 𑀦𑀺𑀤𑀸𑀦𑀁 𑀓𑀸𑀭𑀡𑀫𑀲𑁆𑀲𑀸𑀢𑀺 𑀯𑀸 𑀆𑀡𑀡𑁆𑀬𑀦𑀺𑀤𑀸𑀦𑀁, ‘‘𑀧𑀸𑀫𑁄𑀚𑁆𑀚𑀁 𑀲𑁄𑀫𑀦𑀲𑁆𑀲’’𑀦𑁆𑀢𑀺 𑀇𑀫𑁂𑀳𑀺 𑀲𑀫𑁆𑀩𑀦𑁆𑀥𑁄. ‘‘𑀇𑀡𑀧𑀮𑀺𑀩𑁄𑀥𑀢𑁄 𑀫𑀼𑀢𑁆𑀢𑁄𑀫𑁆𑀳𑀻’’𑀢𑀺 𑀩𑀮𑀯𑀧𑀸𑀫𑁄𑀚𑁆𑀚𑀁 𑀮𑀪𑀢𑀺. ‘‘𑀚𑀻𑀯𑀺𑀓𑀸𑀦𑀺𑀫𑀺𑀢𑁆𑀢𑀫𑁆𑀧𑀺 𑀫𑁂 𑀅𑀯𑀲𑀺𑀝𑁆𑀞𑀁 𑀅𑀢𑁆𑀣𑀻’’𑀢𑀺 𑀲𑁄𑀫𑀦𑀲𑁆𑀲𑀁 𑀅𑀥𑀺𑀕𑀘𑁆𑀙𑀢𑀺.

𑁨𑁧𑁯. 𑀯𑀺𑀲𑀪𑀸𑀕𑀯𑁂𑀤𑀦𑀸 𑀦𑀸𑀫 𑀤𑀼𑀓𑁆𑀔𑀯𑁂𑀤𑀦𑀸. 𑀲𑀸 𑀳𑀺 𑀓𑀼𑀲𑀮𑀯𑀺𑀧𑀸𑀓𑀲𑀦𑁆𑀢𑀸𑀦𑀲𑁆𑀲 𑀯𑀺𑀭𑁄𑀥𑀺𑀪𑀸𑀯𑀢𑁄 𑀲𑀼𑀔𑀯𑁂𑀤𑀦𑀸𑀬 𑀯𑀺𑀲𑀪𑀸𑀕𑀸, 𑀢𑀲𑁆𑀲𑀸 𑀉𑀧𑁆𑀧𑀢𑁆𑀢𑀺𑀬𑀸 𑀓𑀭𑀡𑀪𑀽𑀢𑀸𑀬. 𑀓𑀓𑀘𑁂𑀦𑁂𑀯𑀸𑀢𑀺 𑀓𑀓𑀘𑁂𑀦 𑀇𑀯. 𑀘𑀢𑀼𑀇𑀭𑀺𑀬𑀸𑀧𑀣𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀇𑀭𑀺𑀬𑀸𑀧𑀣𑀁. 𑀩𑁆𑀬𑀸𑀥𑀺𑀢𑁄 𑀳𑀺 𑀬𑀣𑀸 𑀞𑀸𑀦𑀕𑀫𑀦𑁂𑀲𑀼 𑀅𑀲𑀫𑀢𑁆𑀣𑁄, 𑀏𑀯𑀁 𑀦𑀺𑀲𑀚𑁆𑀚𑀸𑀤𑀻𑀲𑀼𑀧𑀺. 𑀆𑀩𑀸𑀥𑁂𑀢𑀻𑀢𑀺 𑀧𑀻𑀴𑁂𑀢𑀺. 𑀯𑀸𑀢𑀸𑀤𑀻𑀦𑀁 𑀯𑀺𑀓𑀸𑀭𑀪𑀽𑀢𑀸 𑀯𑀺𑀲𑀫𑀸𑀯𑀢𑁆𑀣𑀸𑀬𑁂𑀯 ‘‘𑀆𑀩𑀸𑀥𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀢𑀁𑀲𑀫𑀼𑀝𑁆𑀞𑀸𑀦𑁂𑀦 𑀤𑀼𑀓𑁆𑀔𑁂𑀦 𑀤𑀼𑀓𑁆𑀔𑀺𑀢𑁄’’𑀢𑀺, 𑀆𑀩𑀸𑀥𑀲𑀫𑀼𑀝𑁆𑀞𑀸𑀦𑁂𑀦 𑀤𑀼𑀓𑁆𑀔𑀯𑁂𑀤𑀦𑀸𑀲𑀗𑁆𑀔𑀸𑀢𑁂𑀦 𑀤𑀼𑀓𑁆𑀔𑁂𑀦 𑀤𑀼𑀓𑁆𑀔𑀺𑀢𑁄 𑀤𑀼𑀓𑁆𑀔𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀯𑁂𑀤𑀦𑀸𑀬 𑀧𑀦 𑀆𑀩𑀸𑀥𑀪𑀸𑀯𑁂𑀦 𑀆𑀤𑀺𑀫𑁆𑀳𑀺 𑀩𑀸𑀥𑀢𑀻𑀢𑀺 𑀆𑀩𑀸𑀥𑁄𑀢𑀺 𑀓𑀢𑁆𑀯𑀸 𑀆𑀩𑀸𑀥𑀲𑀗𑁆𑀔𑀸𑀢𑁂𑀦 𑀫𑀽𑀮𑀩𑁆𑀬𑀸𑀥𑀺𑀦𑀸 𑀆𑀩𑀸𑀥𑀺𑀓𑁄, 𑀅𑀧𑀭𑀸𑀧𑀭𑀁 𑀲𑀜𑁆𑀚𑀸𑀢𑀤𑀼𑀓𑁆𑀔𑀲𑀗𑁆𑀔𑀸𑀢𑁂𑀦 𑀅𑀦𑀼𑀩𑀦𑁆𑀥𑀩𑁆𑀬𑀸𑀥𑀺𑀦𑀸 𑀤𑀼𑀓𑁆𑀔𑀺𑀢𑁄𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀲𑀢𑀺 𑀤𑀼𑀓𑁆𑀔𑀯𑁂𑀤𑀦𑀸𑀯𑀲𑁂𑀦 𑀯𑀼𑀢𑁆𑀢𑀲𑁆𑀲 𑀤𑀼𑀓𑁆𑀔𑀺𑀢𑀧𑀤𑀲𑁆𑀲 𑀆𑀩𑀸𑀥𑀺𑀓𑀧𑀤𑁂𑀦 𑀯𑀺𑀲𑁂𑀲𑀺𑀢𑀩𑁆𑀩𑀢𑀸 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 ¶ ¶ 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 (𑀤𑀻. 𑀦𑀺. 𑀝𑀻. 𑁧.𑁨𑁧𑁯) 𑀯𑀼𑀢𑁆𑀢𑀦𑀬𑁄. 𑀅𑀥𑀺𑀓𑀁 𑀫𑀢𑁆𑀢𑀁 𑀧𑀫𑀸𑀡𑀁 𑀅𑀥𑀺𑀫𑀢𑁆𑀢𑀁, 𑀩𑀸𑀴𑁆𑀳𑀁, 𑀅𑀥𑀺𑀫𑀢𑁆𑀢𑀁 𑀕𑀺𑀮𑀸𑀦𑁄 𑀥𑀸𑀢𑀼𑀲𑀗𑁆𑀔𑀬𑁂𑀦 𑀧𑀭𑀺𑀓𑁆𑀔𑀻𑀡𑀲𑀭𑀻𑀭𑁄𑀢𑀺 𑀅𑀥𑀺𑀫𑀢𑁆𑀢𑀕𑀺𑀮𑀸𑀦𑁄. 𑀅𑀥𑀺𑀫𑀢𑁆𑀢𑀩𑁆𑀬𑀸𑀥𑀺𑀧𑀭𑁂𑀢𑀢𑀸𑀬𑀸𑀢𑀺 𑀅𑀥𑀺𑀫𑀢𑁆𑀢𑀩𑁆𑀬𑀸𑀥𑀺𑀧𑀻𑀴𑀺𑀢𑀢𑀸𑀬. 𑀦 𑀭𑀼𑀘𑁆𑀘𑁂𑀬𑁆𑀬𑀸𑀢𑀺 𑀦 𑀭𑀼𑀘𑁆𑀘𑁂𑀣, 𑀓𑀫𑁆𑀫𑀢𑁆𑀣𑀧𑀤𑀜𑁆𑀘𑁂𑀢𑀁 ‘‘𑀪𑀢𑁆𑀢𑀜𑁆𑀘𑀲𑁆𑀲𑀸’’𑀢𑀺 𑀏𑀢𑁆𑀣 ‘‘𑀅𑀲𑁆𑀲𑀸’’𑀢𑀺 𑀓𑀢𑁆𑀢𑀼𑀤𑀲𑁆𑀲𑀦𑀢𑁄. 𑀫𑀢𑁆𑀢𑀸𑀲𑀤𑁆𑀤𑁄 𑀅𑀦𑀢𑁆𑀣𑀓𑁄𑀢𑀺 𑀯𑀼𑀢𑁆𑀢𑀁 ‘‘𑀩𑀮𑀫𑀢𑁆𑀢𑀸𑀢𑀺 𑀩𑀮𑀫𑁂𑀯𑀸’’𑀢𑀺, 𑀅𑀧𑁆𑀧𑀫𑀢𑁆𑀢𑀓𑀁 𑀯𑀸 𑀩𑀮𑀁 𑀩𑀮𑀫𑀢𑁆𑀢𑀸. 𑀢𑀤𑀼𑀪𑀬𑀦𑁆𑀢𑀺 𑀧𑀸𑀫𑁄𑀚𑁆𑀚𑀁, 𑀲𑁄𑀫𑀦𑀲𑁆𑀲𑀜𑁆𑀘. 𑀮𑀪𑁂𑀣 𑀧𑀸𑀫𑁄𑀚𑁆𑀚𑀁 ‘‘𑀭𑁄𑀕𑀢𑁄 𑀫𑀼𑀢𑁆𑀢𑁄𑀫𑁆𑀳𑀻’’𑀢𑀺. 𑀅𑀥𑀺𑀕𑀘𑁆𑀙𑁂𑀬𑁆𑀬 𑀲𑁄𑀫𑀦𑀲𑁆𑀲𑀁 ‘‘𑀅𑀢𑁆𑀣𑀺 𑀫𑁂 𑀓𑀸𑀬𑀩𑀮’’𑀦𑁆𑀢𑀺 𑀧𑀸𑀴𑀺𑀬𑀸 𑀅𑀢𑁆𑀣𑁄.

𑁨𑁨𑁦. 𑀓𑀸𑀓𑀡𑀺𑀓𑀫𑀢𑁆𑀢𑀁 𑀦𑀸𑀫 ‘‘𑀏𑀓𑀕𑀼𑀜𑁆𑀚𑀫𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. ‘‘𑀤𑀺𑀬𑀟𑁆𑀠𑀯𑀻𑀳𑀺𑀫𑀢𑁆𑀢’’𑀦𑁆𑀢𑀺 𑀯𑀺𑀦𑀬𑀝𑀻𑀓𑀸𑀬𑀁 𑀯𑀼𑀢𑁆𑀢𑀁. 𑀅𑀧𑀺𑀘 𑀓𑀡-𑀲𑀤𑁆𑀤𑁄 𑀓𑀼𑀡𑁆𑀟𑀓𑁂 𑁋

‘‘𑀅𑀓𑀡𑀁 𑀅𑀣𑀼𑀲𑀁 𑀲𑀼𑀤𑁆𑀥𑀁, 𑀲𑀼𑀕𑀦𑁆𑀥𑀁 𑀢𑀡𑁆𑀟𑀼𑀮𑀧𑁆𑀨𑀮𑀁;

𑀢𑀼𑀡𑁆𑀟𑀺𑀓𑀻𑀭𑁂 𑀧𑀘𑀺𑀢𑁆𑀯𑀸𑀦, 𑀢𑀢𑁄 𑀪𑀼𑀜𑁆𑀚𑀦𑁆𑀢𑀺 𑀪𑁄𑀚𑀦’’𑀦𑁆𑀢𑀺. (𑀤𑀻. 𑀦𑀺. 𑁩.𑁨𑁮𑁧) 𑀆𑀤𑀻𑀲𑀼 𑀯𑀺𑀬;

‘‘𑀓𑀡𑁄 𑀢𑀼 𑀓𑀼𑀡𑁆𑀟𑀓𑁄 𑀪𑀯𑁂’’𑀢𑀺 (𑀅𑀪𑀺𑀥𑀸𑀦𑁂 𑀪𑀓𑀡𑁆𑀟𑁂 𑀘𑀢𑀼𑀩𑁆𑀩𑀡𑁆𑀡𑀯𑀕𑁆𑀕𑁂 𑁪𑁫𑁪 𑀕𑀸𑀣𑀸) 𑀳𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀓𑁄 𑀧𑀦 𑀓𑀡𑁄 𑀓𑀸𑀓𑀡𑁄𑀢𑀺 𑀯𑀼𑀘𑁆𑀘𑀢𑀺 𑀬𑀣𑀸 ‘‘𑀓𑀸𑀮𑀯𑀡’’𑀦𑁆𑀢𑀺, 𑀢𑀲𑁆𑀫𑀸 𑀓𑀸𑀓𑀡𑁄𑀯 𑀧𑀫𑀸𑀡𑀫𑀲𑁆𑀲𑀸𑀢𑀺 𑀓𑀸𑀓𑀡𑀺𑀓𑀁, 𑀓𑀸𑀓𑀡𑀺𑀓𑀫𑁂𑀯 𑀓𑀸𑀓𑀡𑀺𑀓𑀫𑀢𑁆𑀢𑀁, 𑀔𑀼𑀤𑁆𑀤𑀓𑀓𑀼𑀡𑁆𑀟𑀓𑀧𑁆𑀧𑀫𑀸𑀡𑀫𑁂𑀯𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀜𑁆𑀳𑀺 𑀲𑀢𑀺 ‘‘𑀭𑀸𑀚𑀤𑀸𑀬𑁄 𑀦𑀸𑀫 𑀓𑀸𑀓𑀡𑀺𑀓𑀫𑀢𑁆𑀢𑀁 𑀦 𑀯𑀝𑁆𑀝𑀢𑀺, 𑀅𑀟𑁆𑀠𑀫𑀸𑀲𑀕𑁆𑀖𑀦𑀺𑀓𑀁 𑀫𑀁𑀲𑀁 𑀤𑁂𑀢𑀻’’𑀢𑀺 (𑀚𑀸. 𑀅𑀝𑁆𑀞. 𑁬.𑀉𑀫𑀗𑁆𑀕𑀚𑀸𑀢𑀓𑀯𑀡𑁆𑀡𑀦𑀸𑀬) 𑀯𑀼𑀢𑁆𑀢𑁂𑀦 𑀉𑀫𑀗𑁆𑀕𑀚𑀸𑀢𑀓𑀯𑀘𑀦𑁂𑀦 𑀘 𑀅𑀯𑀺𑀭𑀼𑀤𑁆𑀥𑀁 𑀳𑁄𑀢𑀺. 𑀯𑀬𑁄𑀢𑀺 𑀔𑀬𑁄 𑀪𑀗𑁆𑀕𑁄, 𑀢𑀲𑁆𑀲 ‘‘𑀩𑀦𑁆𑀥𑀦𑀸 𑀫𑀼𑀢𑁆𑀢𑁄𑀫𑁆𑀳𑀻’’𑀢𑀺 𑀆𑀯𑀚𑁆𑀚𑀬𑀢𑁄 𑀢𑀤𑀼𑀪𑀬𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀮𑀪𑁂𑀣 𑀧𑀸𑀫𑁄𑀚𑁆𑀚𑀁, 𑀅𑀥𑀺𑀕𑀘𑁆𑀙𑁂𑀬𑁆𑀬 𑀲𑁄𑀫𑀦𑀲𑁆𑀲’’𑀦𑁆𑀢𑀺. 𑀯𑀘𑀦𑀸𑀯𑀲𑁂𑀲𑀁 𑀲𑀦𑁆𑀥𑀸𑀬 ‘‘𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀘 𑀧𑀞𑀫𑀤𑀼𑀢𑀺𑀬𑀧𑀤𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀲𑀩𑁆𑀩𑀧𑀤𑁂𑀲𑀽𑀢𑀺 𑀢𑀢𑀺𑀬𑀸𑀤𑀻𑀲𑀼 𑀢𑀻𑀲𑀼 𑀓𑁄𑀝𑁆𑀞𑀸𑀲𑁂𑀲𑀼. 𑀏𑀓𑁂𑀓𑁄 𑀳𑀺 𑀉𑀧𑀫𑀸𑀧𑀓𑁆𑀔𑁄 ‘‘𑀧𑀤’’𑀦𑁆𑀢𑀺 𑀯𑀼𑀢𑁆𑀢𑁄.

𑁨𑁨𑁧-𑁨𑁨𑁨. 𑀅𑀥𑀻𑀦𑁄𑀢𑀺 𑀆𑀬𑀢𑁆𑀢𑁄, 𑀦 𑀲𑁂𑀭𑀺𑀪𑀸𑀯𑀬𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀦 𑀮𑀪𑀢𑀻’’𑀢𑀺. 𑀏𑀯𑀫𑀺𑀢𑀭𑀲𑁆𑀫𑀺𑀫𑁆𑀧𑀺. 𑀬𑁂𑀦 𑀕𑀦𑁆𑀢𑀼𑀓𑀸𑀫𑁄, 𑀢𑁂𑀦 𑀓𑀸𑀫𑀁 𑀕𑀫𑁄 𑀦 𑀳𑁄𑀢𑀻𑀢𑀺 𑀲𑀧𑀸𑀞𑀲𑁂𑀲𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀸𑀫𑀦𑁆𑀢𑀺 𑀘𑁂𑀢𑀁 𑀪𑀸𑀯𑀦𑀧𑀼𑀁𑀲𑀓𑀯𑀘𑀦𑀁, 𑀓𑀸𑀫𑁂𑀦 𑀯𑀸 𑀇𑀘𑁆𑀙𑀸𑀬 𑀕𑀫𑁄 𑀓𑀸𑀫𑀁𑀕𑀫𑁄 𑀦𑀺𑀕𑁆𑀕𑀳𑀻𑀢𑀸𑀕𑀫𑁂𑀦. 𑀤𑀸𑀲𑀩𑁆𑀬𑀸𑀢𑀺 ¶ 𑀏𑀢𑁆𑀣 𑀩𑁆𑀬-𑀲𑀤𑁆𑀤𑀲𑁆𑀲 𑀪𑀸𑀯𑀢𑁆𑀣𑀢𑀁 𑀤𑀲𑁆𑀲𑁂𑀢𑀺 ‘‘𑀤𑀸𑀲𑀪𑀸𑀯𑀸’’𑀢𑀺 𑀇𑀫𑀺𑀦𑀸. 𑀅𑀧𑀭𑀸𑀥𑀻𑀦𑀢𑀸𑀬 𑀅𑀢𑁆𑀢𑀦𑁄 𑀪𑀼𑀚𑁄 𑀯𑀺𑀬 𑀲𑀓𑀺𑀘𑁆𑀘𑁂 𑀏𑀲𑀺𑀢𑀩𑁆𑀩𑁄 𑀧𑁂𑀲𑀺𑀢𑀩𑁆𑀩𑁄𑀢𑀺 ¶ 𑀪𑀼𑀚𑀺𑀲𑁆𑀲𑁄, 𑀲𑀬𑀁𑀯𑀲𑀻𑀢𑀺 𑀦𑀺𑀩𑁆𑀩𑀘𑀦𑀁. ‘‘𑀪𑀼𑀚𑁄 𑀦𑀸𑀫 𑀅𑀢𑁆𑀢𑀦𑁄 𑀬𑀣𑀸𑀲𑀼𑀔𑀁 𑀯𑀺𑀦𑀺𑀬𑁄𑀕𑁄, 𑀲𑁄 𑀇𑀲𑁆𑀲𑁄 𑀇𑀘𑁆𑀙𑀺𑀢𑀩𑁆𑀩𑁄 𑀏𑀢𑁆𑀣𑀸𑀢𑀺 𑀪𑀼𑀚𑀺𑀲𑁆𑀲𑁄, 𑀅𑀲𑁆𑀲𑀸𑀫𑀺𑀓𑁄’’𑀢𑀺 𑀫𑀽𑀮𑀧𑀡𑁆𑀡𑀸𑀲𑀓𑀝𑀻𑀓𑀸𑀬𑀁 𑀯𑀼𑀢𑁆𑀢𑀁. 𑀅𑀢𑁆𑀣𑀫𑀢𑁆𑀢𑀁 𑀧𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑁆𑀢𑀦𑁄 𑀲𑀦𑁆𑀢𑀓𑁄’’𑀢𑀺 𑀆𑀳, 𑀅𑀢𑁆𑀢𑀸𑀯 𑀅𑀢𑁆𑀢𑀦𑁄 𑀲𑀦𑁆𑀢𑀓𑁄, 𑀦 𑀧𑀭𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀼𑀤𑀓𑀢𑀸𑀬 𑀓𑀁 𑀧𑀸𑀦𑀻𑀬𑀁 𑀢𑀸𑀭𑁂𑀦𑁆𑀢𑀺 𑀏𑀢𑁆𑀣𑀸𑀢𑀺 𑀓𑀦𑁆𑀢𑀸𑀭𑁄, 𑀅𑀤𑁆𑀥𑀸𑀦𑀲𑀤𑁆𑀤𑁄 𑀘 𑀤𑀻𑀖𑀧𑀭𑀺𑀬𑀸𑀬𑁄𑀢𑀺 𑀯𑀼𑀢𑁆𑀢𑀁 ‘‘𑀦𑀺𑀭𑀼𑀤𑀓𑀁 𑀤𑀻𑀖𑀫𑀕𑁆𑀕’’𑀦𑁆𑀢𑀺.

𑁨𑁨𑁩. 𑀲𑁂𑀲𑀸𑀦𑀻𑀢𑀺 𑀩𑁆𑀬𑀸𑀧𑀸𑀤𑀸𑀤𑀻𑀦𑀺. 𑀢𑀢𑁆𑀭𑀸𑀢𑀺 𑀤𑀲𑁆𑀲𑀦𑁂. 𑀅𑀬𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸 𑀲𑀤𑀺𑀲𑀢𑀸, 𑀬𑁂𑀦 𑀇𑀡𑀸𑀤𑀻𑀦𑀁 𑀉𑀧𑀫𑀸𑀪𑀸𑀯𑁄, 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀜𑁆𑀘 𑀉𑀧𑀫𑁂𑀬𑁆𑀬𑀪𑀸𑀯𑁄 𑀳𑁄𑀢𑀺, 𑀲𑁄 𑀦𑁂𑀲𑀁 𑀉𑀧𑀫𑁄𑀧𑀫𑁂𑀬𑁆𑀬𑀲𑀫𑁆𑀩𑀦𑁆𑀥𑁄 𑀲𑀤𑀺𑀲𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀳𑀻𑀢𑀺 𑀧𑀭𑁂𑀳𑀺 𑀇𑀡𑀲𑀸𑀫𑀺𑀓𑁂𑀳𑀺. 𑀓𑀺𑀜𑁆𑀘𑀺 𑀧𑀝𑀺𑀩𑀸𑀳𑀺𑀢𑀼𑀦𑁆𑀢𑀺 𑀨𑀭𑀼𑀲𑀯𑀘𑀦𑀸𑀤𑀺𑀓𑀁 𑀓𑀺𑀜𑁆𑀘𑀺𑀧𑀺 𑀧𑀝𑀺𑀲𑁂𑀥𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀇𑀡𑀁 𑀤𑀸𑀢𑀼𑀫𑀲𑀓𑁆𑀓𑀼𑀡𑀢𑁆𑀢𑀸. 𑀓𑀲𑁆𑀫𑀸𑀢𑀺 𑀯𑀼𑀢𑁆𑀢𑀁 ‘‘𑀢𑀺𑀢𑀺𑀓𑁆𑀔𑀸𑀓𑀸𑀭𑀡’’𑀦𑁆𑀢𑀺𑀆𑀤𑀺, 𑀇𑀡𑀲𑁆𑀲 𑀢𑀺𑀢𑀺𑀓𑁆𑀔𑀸𑀓𑀸𑀭𑀡𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀬𑁄 𑀬𑀫𑁆𑀳𑀺 𑀓𑀸𑀫𑀘𑁆𑀙𑀦𑁆𑀤𑁂𑀦 𑀭𑀚𑁆𑀚𑀢𑀻𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀬𑀫𑁆𑀳𑀺 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀯𑀢𑁆𑀣𑀼𑀪𑀽𑀢𑁂 𑀧𑀼𑀕𑁆𑀕𑀮𑁂 𑀓𑀸𑀫𑀘𑁆𑀙𑀦𑁆𑀤𑁂𑀦 𑀭𑀚𑁆𑀚𑀢𑀺. 𑀢𑀡𑁆𑀳𑀸𑀲𑀳𑀕𑀢𑁂𑀦 𑀢𑀁 𑀯𑀢𑁆𑀣𑀼𑀁 𑀕𑀡𑁆𑀳𑀸𑀢𑀻𑀢𑀺 𑀢𑀡𑁆𑀳𑀸𑀪𑀽𑀢𑁂𑀦 𑀓𑀸𑀫𑀘𑁆𑀙𑀦𑁆𑀤𑁂𑀦 𑀢𑀁 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀯𑀢𑁆𑀣𑀼𑀪𑀽𑀢𑀁 𑀧𑀼𑀕𑁆𑀕𑀮𑀁 ‘‘𑀫𑀫𑁂𑀢’’𑀦𑁆𑀢𑀺 𑀕𑀡𑁆𑀳𑀸𑀢𑀺. 𑀲𑀳𑀕𑀢𑀲𑀤𑁆𑀤𑁄 𑀳𑁂𑀢𑁆𑀣 𑀢𑀩𑁆𑀪𑀸𑀯𑀫𑀢𑁆𑀢𑁄 ‘‘𑀬𑀸𑀬𑀁 𑀢𑀡𑁆𑀳𑀸 𑀧𑁄𑀦𑁄𑀪𑀯𑀺𑀓𑀸 𑀦𑀦𑁆𑀤𑀻𑀭𑀸𑀕𑀲𑀳𑀕𑀢𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁪𑁦𑁦; 𑀫. 𑀦𑀺. 𑁧.𑁧𑁩𑁩, 𑁪𑁮𑁦; 𑁩.𑁩𑁭𑁩; 𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁫; 𑀧𑀝𑀺. 𑀫. 𑁨.𑁩𑁦) 𑀯𑀺𑀬. 𑀢𑁂𑀦𑀸𑀢𑀺 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀯𑀢𑁆𑀣𑀼𑀪𑀽𑀢𑁂𑀦 𑀧𑀼𑀕𑁆𑀕𑀮𑁂𑀦. 𑀓𑀲𑁆𑀫𑀸𑀢𑀺 𑀆𑀳 ‘‘𑀢𑀺𑀢𑀺𑀓𑁆𑀔𑀸𑀓𑀸𑀭𑀡’’𑀦𑁆𑀢𑀺𑀆𑀤𑀺, 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀢𑀺𑀢𑀺𑀓𑁆𑀔𑀸𑀓𑀸𑀭𑀡𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑀺𑀢𑀺𑀓𑁆𑀔𑀸𑀲𑀤𑀺𑀲𑁄 𑀘𑁂𑀢𑁆𑀣 𑀭𑀸𑀕𑀧𑀥𑀸𑀦𑁄 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 ‘‘𑀢𑀺𑀢𑀺𑀓𑁆𑀔𑀸’’𑀢𑀺 𑀯𑀼𑀢𑁆𑀢𑁄, 𑀦 𑀢𑀼 ‘‘𑀔𑀦𑁆𑀢𑀻 𑀧𑀭𑀫𑀁 𑀢𑀧𑁄 𑀢𑀺𑀢𑀺𑀓𑁆𑀔𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁯𑁧; 𑀥. 𑀧. 𑁧𑁮𑁪) 𑀯𑀺𑀬 𑀢𑀧𑀪𑀽𑀢𑁄 𑀅𑀤𑁄𑀲𑀧𑀥𑀸𑀦𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀖𑀭𑀲𑀸𑀫𑀺𑀓𑁂𑀳𑀻𑀢𑀺 𑀖𑀭𑀲𑁆𑀲 𑀲𑀸𑀫𑀺𑀓𑀪𑀽𑀢𑁂𑀳𑀺 𑀲𑀲𑁆𑀲𑀼𑀲𑀲𑀼𑀭𑀲𑀸𑀫𑀺𑀓𑁂𑀳𑀺. 𑀇𑀢𑁆𑀣𑀻𑀦𑀁 𑀓𑀸𑀫𑀘𑁆𑀙𑀦𑁆𑀤𑁄 𑀢𑀺𑀢𑀺𑀓𑁆𑀔𑀸𑀓𑀸𑀭𑀡𑀁 𑀳𑁄𑀢𑀺 𑀯𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄.

‘‘𑀬𑀣𑀸 𑀧𑀦𑀸’’𑀢𑀺𑀆𑀤𑀺𑀦𑀸 𑀲𑁂𑀲𑀸𑀦𑀁 𑀭𑁄𑀕𑀸𑀤𑀺𑀲𑀤𑀺𑀲𑀢𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀧𑀺𑀢𑁆𑀢𑀤𑁄𑀲𑀓𑁄𑀧𑀦𑀯𑀲𑁂𑀦 𑀧𑀺𑀢𑁆𑀢𑀭𑁄𑀕𑀸𑀢𑀼𑀭𑁄. 𑀢𑀲𑁆𑀲 𑀧𑀺𑀢𑁆𑀢𑀓𑁄𑀧𑀦𑀢𑁄 𑀲𑀩𑁆𑀩𑀫𑁆𑀧𑀺 ¶ 𑀫𑀥𑀼𑀲𑀓𑁆𑀓𑀭𑀸𑀤𑀺𑀓𑀁 𑀅𑀫𑀥𑀼𑀭𑀪𑀸𑀯𑁂𑀦 𑀲𑀫𑁆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑀺𑀢𑁆𑀢𑀓𑀁 𑀢𑀺𑀢𑁆𑀢𑀓𑀦𑁆𑀢𑀺 𑀉𑀕𑁆𑀕𑀺𑀭𑀢𑀺𑀬𑁂𑀯𑀸’’𑀢𑀺. 𑀢𑀼𑀫𑁆𑀳𑁂 𑀉𑀧𑀤𑁆𑀤𑀯𑁂𑀣𑀸𑀢𑀺 𑀝𑀻𑀓𑀸𑀬𑀁 (𑀤𑀻. 𑀦𑀺. 𑀝𑀻. 𑁧.𑁨𑁨𑁩) 𑀉𑀤𑁆𑀥𑀝𑀧𑀸𑀞𑁄, ‘‘𑀉𑀧𑀤𑁆𑀤𑀯𑀁 𑀓𑀭𑁄𑀣𑀸’’𑀢𑀺 𑀦𑀸𑀫𑀥𑀸𑀢𑀼𑀯𑀲𑁂𑀦 𑀅𑀢𑁆𑀣𑁄, 𑀇𑀤𑀸𑀦𑀺 𑀧𑀦 ‘‘𑀢𑀼𑀫𑁆𑀳𑁂𑀳𑀺 𑀉𑀧𑀤𑁆𑀤𑀼𑀢𑀸’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀯𑀺𑀩𑁆𑀪𑀫𑀢𑀻𑀢𑀺 𑀇𑀢𑁄 𑀘𑀺𑀢𑁄 𑀘 𑀆𑀳𑀺𑀡𑁆𑀟𑀢𑀺, 𑀳𑀻𑀦𑀸𑀬 𑀯𑀸 𑀆𑀯𑀢𑁆𑀢𑀢𑀺. 𑀫𑀥𑀼𑀲𑀓𑁆𑀓𑀭𑀸𑀤𑀻𑀦𑀁 𑀭𑀲𑀁 𑀦 𑀯𑀺𑀦𑁆𑀤𑀢𑀺 𑀦𑀸𑀦𑀼𑀪𑀯𑀢𑀺 𑀦 𑀚𑀸𑀦𑀸𑀢𑀺 𑀦 𑀮𑀪𑀢𑀺 𑀘 𑀯𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀸𑀲𑀦𑀭𑀲𑀦𑁆𑀢𑀺 𑀲𑀸𑀲𑀦𑀲𑁆𑀲 𑀭𑀲𑀁, 𑀲𑀸𑀲𑀦𑀫𑁂𑀯 𑀯𑀸 𑀭𑀲𑀁.

𑀦𑀓𑁆𑀔𑀢𑁆𑀢𑀙𑀡𑀁 ¶ 𑀦𑀓𑁆𑀔𑀢𑁆𑀢𑀁. 𑀢𑁂𑀦𑀸𑀳 ‘‘𑀅𑀳𑁄 𑀦𑀘𑁆𑀘𑀁, 𑀅𑀳𑁄 𑀕𑀻𑀢’’𑀦𑁆𑀢𑀺. 𑀫𑀼𑀢𑁆𑀢𑁄𑀢𑀺 𑀩𑀦𑁆𑀥𑀦𑀢𑁄 𑀧𑀫𑀼𑀢𑁆𑀢𑁄. 𑀥𑀫𑁆𑀫𑀲𑁆𑀲𑀯𑀦𑀲𑁆𑀲𑀸𑀢𑀺 𑀲𑁄𑀢𑀩𑁆𑀩𑀥𑀫𑁆𑀫𑀲𑁆𑀲.

𑀲𑀻𑀖𑀁 𑀧𑀯𑀢𑁆𑀢𑁂𑀢𑀩𑁆𑀩𑀓𑀺𑀘𑁆𑀘𑀁 𑀅𑀘𑁆𑀘𑀸𑀬𑀺𑀓𑀁. 𑀲𑀻𑀖𑀢𑁆𑀣𑁄 𑀳𑀺 𑀅𑀢𑀺𑀲𑀤𑁆𑀤𑁄 ‘‘𑀧𑀸𑀡𑀸𑀢𑀺𑀧𑀸𑀢𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁯𑁩; 𑀯𑀺𑀪. 𑁯𑁬𑁮) 𑀯𑀺𑀬. 𑀯𑀺𑀦𑀬𑁂 𑀅𑀧𑀓𑀢𑀜𑁆𑀜𑀼𑀦𑀸𑀢𑀺 𑀯𑀺𑀦𑀬𑀓𑁆𑀓𑀫𑁂 𑀅𑀓𑀼𑀲𑀮𑁂𑀦. 𑀧𑀓𑀢𑀁 𑀦𑀺𑀝𑁆𑀞𑀸𑀦𑀁 𑀯𑀺𑀦𑀺𑀘𑁆𑀙𑀬𑀁 𑀚𑀸𑀦𑀸𑀢𑀻𑀢𑀺 𑀧𑀓𑀢𑀜𑁆𑀜𑀽, 𑀦 𑀧𑀓𑀢𑀜𑁆𑀜𑀽 𑀢𑀣𑀸. 𑀲𑁄 𑀳𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀬𑀸𑀣𑀸𑀯𑀢𑁄 𑀦 𑀚𑀸𑀦𑀸𑀢𑀺. 𑀢𑁂𑀦𑀸𑀳 ‘‘𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯𑀸’’𑀢𑀺𑀆𑀤𑀺. 𑀓𑀧𑁆𑀧𑀺𑀬𑀫𑀁𑀲𑁂𑀧𑀻𑀢𑀺 𑀲𑀽𑀓𑀭𑀫𑀁𑀲𑀸𑀤𑀺𑀓𑁂𑀧𑀺. 𑀅𑀓𑀧𑁆𑀧𑀺𑀬𑀫𑀁𑀲𑀲𑀜𑁆𑀜𑀸𑀬𑀸𑀢𑀺 𑀅𑀘𑁆𑀙𑀫𑀁𑀲𑀸𑀤𑀺𑀲𑀜𑁆𑀜𑀸𑀬.

𑀤𑀡𑁆𑀟𑀓𑀲𑀤𑁆𑀤𑁂𑀦𑀸𑀧𑀻𑀢𑀺 𑀲𑀸𑀔𑀸𑀤𑀡𑁆𑀟𑀓𑀲𑀤𑁆𑀤𑁂𑀦𑀧𑀺. 𑀉𑀲𑁆𑀲𑀗𑁆𑀓𑀺𑀢𑀧𑀭𑀺𑀲𑀗𑁆𑀓𑀺𑀢𑁄𑀢𑀺 𑀅𑀯𑀲𑀗𑁆𑀓𑀺𑀢𑁄 𑀘𑁂𑀯 𑀲𑀫𑀦𑁆𑀢𑀢𑁄 𑀲𑀗𑁆𑀓𑀺𑀢𑁄 𑀘, 𑀅𑀢𑀺𑀯𑀺𑀬 𑀲𑀗𑁆𑀓𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀤𑀸𑀓𑀸𑀭𑀤𑀲𑁆𑀲𑀦𑀁 ‘‘𑀕𑀘𑁆𑀙𑀢𑀺𑀧𑀻’’𑀢𑀺𑀆𑀤𑀺. 𑀲𑁄 𑀳𑀺 𑀣𑁄𑀓𑀁 𑀕𑀘𑁆𑀙𑀢𑀺𑀧𑀺. 𑀕𑀘𑁆𑀙𑀦𑁆𑀢𑁄 𑀧𑀦 𑀢𑀸𑀬 𑀉𑀲𑁆𑀲𑀗𑁆𑀓𑀺𑀢𑀧𑀭𑀺𑀲𑀗𑁆𑀓𑀺𑀢𑀢𑀸𑀬 𑀢𑀢𑁆𑀣 𑀢𑀢𑁆𑀣 𑀢𑀺𑀝𑁆𑀞𑀢𑀺𑀧𑀺. 𑀈𑀤𑀺𑀲𑁂 𑀓𑀦𑁆𑀢𑀸𑀭𑁂 𑀕𑀢𑁂 ‘‘𑀓𑁄 𑀚𑀸𑀦𑀸𑀢𑀺, 𑀓𑀺𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀺𑀯𑀢𑁆𑀢𑀢𑀺𑀧𑀺, 𑀢𑀲𑁆𑀫𑀸 𑀘 𑀕𑀢𑀝𑁆𑀞𑀸𑀦𑀢𑁄 𑀅𑀕𑀢𑀝𑁆𑀞𑀸𑀦𑀫𑁂𑀯 𑀩𑀳𑀼𑀢𑀭𑀁 𑀳𑁄𑀢𑀺, 𑀢𑀢𑁄 𑀏𑀯 𑀘 𑀲𑁄 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀔𑁂𑀫𑀦𑁆𑀢𑀪𑀽𑀫𑀺𑀁 𑀧𑀸𑀧𑀼𑀡𑀸𑀢𑀺 𑀯𑀸, 𑀦 𑀯𑀸 𑀧𑀸𑀧𑀼𑀡𑀸𑀢𑀺. 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦𑀸𑀢𑀺 𑀧𑀭𑀺𑀬𑀸𑀬𑀯𑀘𑀦𑀁, 𑀓𑀸𑀬𑀺𑀓𑀤𑀼𑀓𑁆𑀔𑁂𑀦 𑀔𑁂𑀤𑀦𑀁 𑀯𑀸 𑀓𑀺𑀘𑁆𑀙𑀁, 𑀘𑁂𑀢𑀲𑀺𑀓𑀤𑀼𑀓𑁆𑀔𑁂𑀦 𑀧𑀻𑀴𑀦𑀁 𑀓𑀲𑀺𑀭𑀁. 𑀔𑁂𑀫𑀦𑁆𑀢𑀪𑀽𑀫𑀺𑀦𑁆𑀢𑀺 𑀔𑁂𑀫𑀪𑀽𑀢𑀁 𑀪𑀽𑀫𑀺𑀁 𑀅𑀦𑁆𑀢𑀲𑀤𑁆𑀤𑀲𑁆𑀲 𑀢𑀩𑁆𑀪𑀸𑀯𑀢𑁆𑀢𑀸, 𑀪𑀬𑀲𑁆𑀲 𑀔𑀻𑀬𑀦𑀁 𑀯𑀸 𑀔𑁂𑀫𑁄, 𑀲𑁄𑀯 𑀅𑀦𑁆𑀢𑁄 𑀧𑀭𑀺𑀘𑁆𑀙𑁂𑀤𑁄 𑀬𑀲𑁆𑀲𑀸 𑀢𑀣𑀸, 𑀲𑀸 𑀏𑀯 𑀪𑀽𑀫𑀻𑀢𑀺 𑀔𑁂𑀫𑀦𑁆𑀢𑀪𑀽𑀫𑀺, 𑀢𑀁 𑀦𑀺𑀩𑁆𑀪𑀬𑀧𑁆𑀧𑀤𑁂𑀲𑀦𑁆𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀲𑀼 𑀞𑀸𑀦𑁂𑀲𑀽𑀢𑀺 ‘‘𑀢𑀢𑁆𑀣 𑀓𑀢𑀫𑀸 𑀯𑀺𑀘𑀺𑀓𑀺𑀘𑁆𑀙𑀸? 𑀲𑀢𑁆𑀣𑀭𑀺 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀺. 𑀥𑀫𑁆𑀫𑁂. 𑀲𑀗𑁆𑀖𑁂. 𑀲𑀺𑀓𑁆𑀔𑀸𑀬. 𑀧𑀼𑀩𑁆𑀩𑀦𑁆𑀢𑁂. 𑀅𑀧𑀭𑀦𑁆𑀢𑁂. 𑀧𑀼𑀩𑁆𑀩𑀦𑁆𑀢𑀸𑀧𑀭𑀦𑁆𑀢𑁂. 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀓𑀗𑁆𑀔𑀢𑀺 𑀯𑀺𑀘𑀺𑀓𑀺𑀘𑁆𑀙𑀢𑀻’’𑀢𑀺 (𑀯𑀺𑀪. 𑁯𑁧𑁫) 𑀯𑀺𑀪𑀗𑁆𑀕𑁂 ¶ 𑀯𑀼𑀢𑁆𑀢𑁂𑀲𑀼 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼. 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸𑀢𑀺 𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸, 𑀲𑀤𑁆𑀤𑀳𑀺𑀢𑁆𑀯𑀸 𑀯𑀸. 𑀲𑀤𑁆𑀥𑀸𑀬 𑀕𑀡𑁆𑀳𑀺𑀢𑀼𑀦𑁆𑀢𑀺 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀁 ‘‘𑀇𑀤𑀫𑁂𑀯’’𑀦𑁆𑀢𑀺 𑀲𑀤𑁆𑀤𑀳𑀦𑀯𑀲𑁂𑀦 𑀕𑀡𑁆𑀳𑀺𑀢𑀼𑀁, 𑀲𑀤𑁆𑀤𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀻𑀢𑀺 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦 𑀅𑀲𑀓𑁆𑀓𑀼𑀡𑀦𑀢𑁄 𑀅𑀦𑁆𑀢𑀭𑀸𑀬𑀁 𑀓𑀭𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀅𑀢𑁆𑀣𑀺 𑀦𑀼 𑀔𑁄, 𑀦𑀢𑁆𑀣𑀺 𑀦𑀼 𑀔𑁄’’𑀢𑀺 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑀲𑁆𑀲 𑀆𑀤𑀺𑀫𑁆𑀳𑀺 𑀏𑀯 𑀲𑀧𑁆𑀧𑀦𑀁 𑀲𑀁𑀲𑀬𑁄 𑀆𑀲𑀧𑁆𑀧𑀦𑀁. 𑀢𑀢𑁄 𑀧𑀭𑀁 𑀲𑀫𑀦𑁆𑀢𑀢𑁄, 𑀉𑀧𑀭𑀽𑀧𑀭𑀺 𑀯𑀸 𑀲𑀧𑁆𑀧𑀦𑀁 𑀧𑀭𑀺𑀲𑀧𑁆𑀧𑀦𑀁. 𑀉𑀪𑀬𑁂𑀦𑀧𑀺 𑀢𑀢𑁆𑀣𑁂𑀯 𑀲𑀁𑀲𑀬𑀯𑀲𑁂𑀦 𑀧𑀭𑀺𑀩𑁆𑀪𑀫𑀦𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀅𑀧𑀭𑀺𑀬𑁄𑀕𑀸𑀳𑀦’’𑀦𑁆𑀢𑀺, ‘‘𑀏𑀯𑀫𑀺𑀤’’𑀦𑁆𑀢𑀺 𑀲𑀫𑀦𑁆𑀢𑀢𑁄 𑀅𑀦𑁄𑀕𑀸𑀳𑀦𑀦𑁆𑀢𑀺 𑀅𑀢𑁆𑀣𑁄. 𑀙𑀫𑁆𑀪𑀺𑀢𑀢𑁆𑀢𑀦𑁆𑀢𑀺 𑀅𑀭𑀜𑁆𑀜𑀲𑀜𑁆𑀜𑀸𑀬 𑀉𑀧𑁆𑀧𑀦𑁆𑀦𑀁 𑀙𑀫𑁆𑀪𑀺𑀢𑀪𑀸𑀯𑀁 𑀳𑀤𑀬𑀫𑀁𑀲𑀘𑀮𑀦𑀁, 𑀉𑀢𑁆𑀭𑀸𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀫𑁂𑀬𑁆𑀬𑀧𑀓𑁆𑀔𑁂𑀧𑀺 𑀬𑀣𑀸𑀭𑀳𑀫𑁂𑀲𑀫𑀢𑁆𑀣𑁄.

𑁨𑁨𑁪. 𑀢𑀢𑁆𑀭𑀸𑀬𑀁 𑀲𑀤𑀺𑀲𑀢𑀸𑀢𑀺 𑀏𑀢𑁆𑀣 𑀧𑀦 𑀅𑀧𑁆𑀧𑀳𑀻𑀦𑀧𑀓𑁆𑀔𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸 ¶ . 𑀬𑀤𑀕𑁆𑀕𑁂𑀦 𑀳𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄 𑀇𑀡𑀸𑀤𑀺𑀲𑀤𑀺𑀲𑀸, 𑀢𑀤𑀕𑁆𑀕𑁂𑀦 𑀘 𑀢𑁂𑀲𑀁 𑀧𑀳𑀸𑀦𑀁 𑀆𑀡𑀡𑁆𑀬𑀸𑀤𑀺𑀲𑀤𑀺𑀲𑀢𑀸𑀢𑀺. 𑀇𑀤𑀁 𑀧𑀦 𑀅𑀦𑀼𑀢𑁆𑀢𑀸𑀦𑀧𑀤𑀢𑁆𑀣𑀫𑀢𑁆𑀢𑀁 𑁋 𑀲𑀫𑀺𑀤𑁆𑀥𑀢𑀦𑁆𑀢𑀺 𑀅𑀟𑁆𑀠𑀢𑀁. 𑀧𑀼𑀩𑁆𑀩𑁂 𑀧𑀡𑁆𑀡𑀫𑀸𑀭𑁄𑀧𑀺𑀢𑀸𑀬 𑀯𑀟𑁆𑀠𑀺𑀬𑀸 𑀲𑀳 𑀯𑀢𑁆𑀢𑀢𑀻𑀢𑀺 𑀲𑀯𑀟𑁆𑀠𑀺𑀓𑀁. 𑀧𑀡𑁆𑀡𑀦𑁆𑀢𑀺 𑀇𑀡𑀤𑀸𑀦𑀕𑁆𑀕𑀳𑀡𑁂 𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀮𑀺𑀔𑀺𑀢𑀧𑀡𑁆𑀡𑀁. 𑀧𑀼𑀦 𑀧𑀡𑁆𑀡𑀦𑁆𑀢𑀺 𑀇𑀡𑀬𑀸𑀘𑀦𑀯𑀲𑁂𑀦 𑀲𑀸𑀲𑀦𑀮𑀺𑀔𑀺𑀢𑀧𑀡𑁆𑀡𑀁. 𑀦𑀺𑀮𑁆𑀮𑁂𑀧𑀢𑀸𑀬𑀸𑀢𑀺 𑀥𑀦𑀲𑀫𑁆𑀩𑀦𑁆𑀥𑀸𑀪𑀸𑀯𑁂𑀦 𑀅𑀯𑀺𑀮𑀺𑀫𑁆𑀧𑀦𑀢𑀸𑀬. 𑀢𑀣𑀸 𑀅𑀮𑀕𑁆𑀕𑀢𑀸𑀬. 𑀧𑀭𑀺𑀬𑀸𑀬𑀯𑀘𑀦𑀜𑁆𑀳𑁂𑀢𑀁 𑀤𑁆𑀯𑀬𑀁. 𑀅𑀣 𑀯𑀸 𑀦𑀺𑀮𑁆𑀮𑁂𑀧𑀢𑀸𑀬𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀅𑀯𑀺𑀮𑀺𑀫𑁆𑀧𑀦𑀪𑀸𑀯𑁂𑀦 𑀯𑀺𑀲𑁂𑀲𑀦𑀪𑀽𑀢𑁂𑀦 𑀅𑀮𑀕𑁆𑀕𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀙 𑀥𑀫𑁆𑀫𑁂𑀢𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑁄, 𑀅𑀲𑀼𑀪𑀪𑀸𑀯𑀦𑀸𑀦𑀼𑀬𑁄𑀕𑁄, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺 𑀇𑀫𑁂 𑀙 𑀥𑀫𑁆𑀫𑁂. 𑀪𑀸𑀯𑁂𑀢𑁆𑀯𑀸𑀢𑀺 𑀩𑁆𑀭𑀽𑀳𑁂𑀢𑁆𑀯𑀸, 𑀅𑀢𑁆𑀢𑀦𑀺 𑀯𑀸 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀅𑀦𑀼𑀧𑁆𑀧𑀦𑁆𑀦𑀅𑀦𑀼𑀧𑁆𑀧𑀸𑀤𑀦𑀉𑀧𑁆𑀧𑀦𑁆𑀦𑀧𑁆𑀧𑀳𑀸𑀦𑀸𑀤𑀺𑀯𑀺𑀪𑀸𑀯𑀦𑀯𑀲𑁂𑀦 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑁂 𑀲𑀯𑀺𑀲𑁂𑀲𑀁 𑀧𑀸𑀴𑀺𑀬𑀸 𑀆𑀕𑀢𑀢𑁆𑀢𑀸 ‘‘𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂 𑀯𑀡𑁆𑀡𑀬𑀺𑀲𑁆𑀲𑀸𑀫𑀸’’𑀢𑀺 𑀯𑀼𑀢𑁆𑀢𑀁. ‘‘𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂’’𑀢𑀺 𑀘 𑀇𑀫𑀲𑁆𑀫𑀺𑀁 𑀤𑀻𑀖𑀸𑀕𑀫𑁂 (𑀤𑀻. 𑀦𑀺. 𑁨.𑁩𑁭𑁨 𑀆𑀤𑀬𑁄) 𑀲𑀗𑁆𑀕𑀻𑀢𑀫𑀸𑀳, 𑀦 𑀫𑀚𑁆𑀛𑀺𑀫𑀸𑀕𑀫𑁂 𑀦𑀺𑀓𑀸𑀬𑀦𑁆𑀢𑀭𑀢𑁆𑀢𑀸. 𑀦𑀺𑀓𑀸𑀬𑀦𑁆𑀢𑀭𑀸𑀕𑀢𑁄𑀧𑀺 𑀳𑀺 𑀅𑀢𑁆𑀣𑁄 𑀆𑀘𑀭𑀺𑀬𑁂𑀳𑀺 𑀅𑀜𑁆𑀜𑀢𑁆𑀣 𑀬𑁂𑀪𑀼𑀬𑁆𑀬𑁂𑀦 𑀯𑀼𑀢𑁆𑀢𑁄𑀢𑀺 𑀯𑀤𑀦𑁆𑀢𑀺. 𑀏𑀲 𑀦𑀬𑁄 𑀩𑁆𑀬𑀸𑀧𑀸𑀤𑀸𑀤𑀺𑀧𑁆𑀧𑀳𑀸𑀦𑀪𑀸𑀕𑁂𑀧𑀺. 𑀧𑀭𑀯𑀢𑁆𑀣𑀼𑀫𑁆𑀳𑀻𑀢𑀺 𑀆𑀭𑀫𑁆𑀫𑀡𑀪𑀽𑀢𑁂 𑀧𑀭𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁. 𑀫𑀫𑀸𑀬𑀦𑀸𑀪𑀸𑀯𑁂𑀦 𑀦𑁂𑀯 𑀲𑀗𑁆𑀕𑁄. 𑀧𑀭𑀺𑀕𑁆𑀕𑀳𑀸𑀪𑀸𑀯𑁂𑀦 𑀦 𑀩𑀤𑁆𑀥𑁄. 𑀤𑀺𑀩𑁆𑀩𑀸𑀦𑀺𑀧𑀺 𑀭𑀽𑀧𑀸𑀦𑀺 𑀧𑀲𑁆𑀲𑀢𑁄 𑀓𑀺𑀮𑁂𑀲𑁄 𑀦 𑀲𑀫𑀼𑀤𑀸𑀘𑀭𑀢𑀺, 𑀧𑀕𑁂𑀯 𑀫𑀸𑀦𑀼𑀲𑀺𑀬𑀸𑀦𑀻𑀢𑀺 𑀲𑀫𑁆𑀪𑀸𑀯𑀦𑁂 𑀅𑀧𑀺-𑀲𑀤𑁆𑀤𑁄.

𑀅𑀦𑀢𑁆𑀣𑀓𑀭𑁄𑀢𑀺 ¶ 𑀅𑀢𑁆𑀢𑀦𑁄, 𑀧𑀭𑀲𑁆𑀲 𑀘 𑀅𑀳𑀺𑀢𑀓𑀭𑁄. 𑀙 𑀥𑀫𑁆𑀫𑁂𑀢𑀺 𑀫𑁂𑀢𑁆𑀢𑀸𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑁄, 𑀫𑁂𑀢𑁆𑀢𑀸𑀪𑀸𑀯𑀦𑀸𑀦𑀼𑀬𑁄𑀕𑁄, 𑀓𑀫𑁆𑀫𑀲𑁆𑀲𑀓𑀢𑀸, 𑀧𑀝𑀺𑀲𑀗𑁆𑀔𑀸𑀦𑀩𑀳𑀼𑀮𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺 𑀇𑀫𑁂 𑀙 𑀥𑀫𑁆𑀫𑁂. 𑀢𑀢𑁆𑀣𑁂𑀯𑀸𑀢𑀺 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂𑀬𑁂𑀯. 𑀘𑀸𑀭𑀺𑀢𑁆𑀢𑀲𑀻𑀮𑀫𑁂𑀯 𑀉𑀤𑁆𑀤𑀺𑀲𑁆𑀲 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀁 ‘‘𑀆𑀘𑀸𑀭𑀧𑀡𑁆𑀡𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀆𑀤𑀺-𑀲𑀤𑁆𑀤𑁂𑀦 𑀯𑀸𑀭𑀺𑀢𑁆𑀢𑀧𑀡𑁆𑀡𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀧𑀯𑁂𑀲𑀺𑀢𑁄𑀢𑀺 𑀧𑀯𑁂𑀲𑀸𑀧𑀺𑀢𑁄. 𑀩𑀦𑁆𑀥𑀦𑀸𑀕𑀸𑀭𑀁 𑀧𑀯𑁂𑀲𑀸𑀧𑀺𑀢𑀢𑁆𑀢𑀸 𑀅𑀮𑀤𑁆𑀥𑀦𑀓𑁆𑀔𑀢𑁆𑀢𑀸𑀦𑀼𑀪𑀯𑀦𑁄 𑀧𑀼𑀭𑀺𑀲𑁄 𑀳𑀺 ‘‘𑀦𑀓𑁆𑀔𑀢𑁆𑀢𑀤𑀺𑀯𑀲𑁂 𑀩𑀦𑁆𑀥𑀦𑀸𑀕𑀸𑀭𑀁 𑀧𑀯𑁂𑀲𑀺𑀢𑁄 𑀧𑀼𑀭𑀺𑀲𑁄’’𑀢𑀺 𑀯𑀼𑀢𑁆𑀢𑁄, 𑀦𑀓𑁆𑀔𑀢𑁆𑀢𑀤𑀺𑀯𑀲𑁂 𑀏𑀯 𑀯𑀸 𑀢𑀤𑀦𑀦𑀼𑀪𑀯𑀦𑀢𑁆𑀣𑀁 𑀢𑀣𑀸 𑀓𑀢𑁄 𑀧𑀼𑀭𑀺𑀲𑁄 𑀏𑀯𑀁 𑀯𑀼𑀢𑁆𑀢𑁄𑀢𑀺𑀧𑀺 𑀯𑀝𑁆𑀝𑀢𑀺. 𑀅𑀧𑀭𑀲𑁆𑀫𑀺𑀦𑁆𑀢𑀺 𑀢𑀢𑁄 𑀧𑀘𑁆𑀙𑀺𑀫𑁂, 𑀅𑀜𑁆𑀜𑀲𑁆𑀫𑀺𑀁 𑀯𑀸 𑀦𑀓𑁆𑀔𑀢𑁆𑀢𑀤𑀺𑀯𑀲𑁂. 𑀑𑀓𑀸𑀲𑀦𑁆𑀢𑀺 𑀓𑀫𑁆𑀫𑀓𑀸𑀭𑀡𑀸𑀓𑀸𑀭𑀡𑀁, 𑀓𑀫𑁆𑀫𑀓𑀸𑀭𑀡𑀓𑁆𑀔𑀡𑀁 𑀯𑀸. 𑀫𑀳𑀸𑀦𑀢𑁆𑀣𑀓𑀭𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀢𑁆𑀣𑀳𑀸𑀧𑀦𑀫𑀼𑀔𑁂𑀦 𑀫𑀳𑀢𑁄 𑀅𑀦𑀢𑁆𑀣𑀲𑁆𑀲 𑀓𑀸𑀭𑀓𑀁. 𑀙 𑀥𑀫𑁆𑀫𑁂𑀢𑀺 𑀅𑀢𑀺𑀪𑁄𑀚𑀦𑁂 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄, 𑀇𑀭𑀺𑀬𑀸𑀧𑀣𑀲𑀫𑁆𑀧𑀭𑀺𑀯𑀢𑁆𑀢𑀦𑀢𑀸, 𑀆𑀮𑁄𑀓𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑁄, 𑀅𑀩𑁆𑀪𑁄𑀓𑀸𑀲𑀯𑀸𑀲𑁄, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺 𑀇𑀫𑁂 𑀙 𑀥𑀫𑁆𑀫𑁂, 𑀥𑀫𑁆𑀫𑀦𑀓𑁆𑀔𑀢𑁆𑀢𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁄𑀢𑀩𑁆𑀩𑀥𑀫𑁆𑀫𑀲𑀗𑁆𑀔𑀸𑀢𑀲𑁆𑀲 𑀫𑀳𑀲𑁆𑀲. 𑀲𑀸𑀥𑀽𑀦𑀁 𑀭𑀢𑀺𑀚𑀦𑀦𑀢𑁄 𑀳𑀺 𑀥𑀫𑁆𑀫𑁄𑀧𑀺 𑀙𑀡𑀲𑀤𑀺𑀲𑀝𑁆𑀞𑁂𑀦 ‘‘𑀦𑀓𑁆𑀔𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑁄.

𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑁂 ¶ 𑀫𑀳𑀸𑀦𑀢𑁆𑀣𑀓𑀭𑀦𑁆𑀢𑀺 𑀧𑀭𑀸𑀬𑀢𑁆𑀢𑀢𑀸𑀧𑀸𑀤𑀦𑁂𑀦 𑀯𑀼𑀢𑁆𑀢𑀦𑀬𑁂𑀦 𑀫𑀳𑀢𑁄 𑀅𑀦𑀢𑁆𑀣𑀲𑁆𑀲 𑀓𑀸𑀭𑀓𑀁. 𑀙 𑀥𑀫𑁆𑀫𑁂𑀢𑀺 𑀩𑀳𑀼𑀲𑁆𑀲𑀼𑀢𑀢𑀸, 𑀧𑀭𑀺𑀧𑀼𑀘𑁆𑀙𑀓𑀢𑀸, 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀸, 𑀯𑀼𑀟𑁆𑀠𑀲𑁂𑀯𑀺𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺 𑀇𑀫𑁂 𑀙 𑀥𑀫𑁆𑀫𑁂. 𑀩𑀮𑀲𑁆𑀲, 𑀩𑀮𑁂𑀦 𑀯𑀸 𑀅𑀢𑁆𑀢𑀦𑀸 𑀇𑀘𑁆𑀙𑀺𑀢𑀲𑁆𑀲 𑀓𑀭𑀡𑀁 𑀩𑀮𑀓𑁆𑀓𑀸𑀭𑁄, 𑀢𑁂𑀦. 𑀦𑁂𑀓𑁆𑀔𑀫𑁆𑀫𑀧𑀝𑀺𑀧𑀤𑀦𑁆𑀢𑀺 𑀦𑀻𑀯𑀭𑀡𑀢𑁄 𑀦𑀺𑀓𑁆𑀔𑀫𑀦𑀧𑀝𑀺𑀧𑀤𑀁 𑀉𑀧𑀘𑀸𑀭𑀪𑀸𑀯𑀦𑀫𑁂𑀯, 𑀦 𑀧𑀞𑀫𑀁 𑀛𑀸𑀦𑀁. 𑀅𑀬𑀜𑁆𑀳𑀺 𑀉𑀧𑀘𑀸𑀭𑀪𑀸𑀯𑀦𑀸𑀥𑀺𑀓𑀸𑀭𑁄.

𑀩𑀮𑀯𑀸𑀢𑀺 𑀧𑀘𑁆𑀘𑀢𑁆𑀣𑀺𑀓𑀯𑀺𑀥𑀫𑀦𑀲𑀫𑀢𑁆𑀣𑁂𑀦 𑀩𑀮𑁂𑀦 𑀩𑀮𑀯𑀸 𑀯𑀦𑁆𑀢𑀼-𑀲𑀤𑁆𑀤𑀲𑁆𑀲 𑀅𑀪𑀺𑀲𑀬𑀢𑁆𑀣𑀯𑀺𑀲𑀺𑀝𑁆𑀞𑀲𑁆𑀲 𑀅𑀢𑁆𑀣𑀺𑀬𑀢𑁆𑀣𑀲𑁆𑀲 𑀩𑁄𑀥𑀦𑀢𑁄. 𑀳𑀢𑁆𑀣𑀲𑀸𑀭𑀦𑁆𑀢𑀺 𑀳𑀢𑁆𑀣𑀕𑀢𑀥𑀦𑀲𑀸𑀭𑀁. 𑀲𑀚𑁆𑀚𑀸𑀯𑀼𑀥𑁄𑀢𑀺 𑀲𑀚𑁆𑀚𑀺𑀢𑀥𑀦𑁆𑀯𑀸𑀤𑀺𑀆𑀯𑀼𑀥𑁄, 𑀲𑀦𑁆𑀦𑀤𑁆𑀥𑀧𑀜𑁆𑀘𑀸𑀯𑀼𑀥𑁄𑀢𑀺 𑀅𑀢𑁆𑀣𑁄. 𑀲𑀽𑀭𑀯𑀻𑀭𑀲𑁂𑀯𑀓𑀚𑀦𑀯𑀲𑁂𑀦 𑀲𑀧𑀭𑀺𑀯𑀸𑀭𑁄. 𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀧𑀼𑀭𑀺𑀲𑀁. 𑀩𑀮𑀯𑀦𑁆𑀢𑀢𑀸𑀬, 𑀲𑀚𑁆𑀚𑀸𑀯𑀼𑀥𑀢𑀸𑀬, 𑀲𑀧𑀭𑀺𑀯𑀸𑀭𑀢𑀸𑀬 𑀘 𑀘𑁄𑀭𑀸 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 𑀧𑀮𑀸𑀬𑁂𑀬𑁆𑀬𑀼𑀁. 𑀅𑀦𑀢𑁆𑀣𑀓𑀸𑀭𑀺𑀓𑀸𑀢𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀩𑀦𑁆𑀥𑀓𑀭𑀡𑀢𑁄 𑀯𑀼𑀢𑁆𑀢𑀦𑀬𑁂𑀦 𑀅𑀳𑀺𑀢𑀓𑀸𑀭𑀺𑀓𑀸. 𑀙 𑀥𑀫𑁆𑀫𑁂𑀢𑀺 𑀩𑀳𑀼𑀲𑁆𑀲𑀼𑀢𑀢𑀸, 𑀧𑀭𑀺𑀧𑀼𑀘𑁆𑀙𑀓𑀢𑀸 ¶ , 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀸, 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺 𑀇𑀫𑁂 𑀙 𑀥𑀫𑁆𑀫𑁂. 𑀬𑀣𑀸 𑀩𑀸𑀳𑀼𑀲𑀘𑁆𑀘𑀸𑀤𑀻𑀦𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀯𑀺𑀘𑀺𑀓𑀺𑀘𑁆𑀙𑀸𑀬𑀧𑀻𑀢𑀺 𑀇𑀥𑀸𑀧𑀺 𑀩𑀳𑀼𑀲𑁆𑀲𑀼𑀢𑀢𑀸𑀤𑀬𑁄 𑀢𑀬𑁄𑀧𑀺 𑀥𑀫𑁆𑀫𑀸 𑀕𑀳𑀺𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀧𑀦 𑀲𑀧𑁆𑀧𑀸𑀬𑀓𑀣𑀸 𑀘 𑀧𑀜𑁆𑀘𑀦𑁆𑀦𑀫𑁆𑀧𑀺 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀢𑀸𑀲𑀼 𑀢𑀲𑁆𑀲 𑀢𑀲𑁆𑀲 𑀦𑀻𑀯𑀭𑀡𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀲𑁂𑀯𑀦𑀢𑀸 𑀤𑀝𑁆𑀞𑀩𑁆𑀩𑀸. 𑀢𑀺𑀡𑀁 𑀯𑀺𑀬𑀸𑀢𑀺 𑀢𑀺𑀡𑀁 𑀪𑀬𑀯𑀲𑁂𑀦 𑀦 𑀕𑀡𑁂𑀢𑀺 𑀯𑀺𑀬. 𑀤𑀼𑀘𑁆𑀘𑀭𑀺𑀢𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀭𑀺𑀢𑁆𑀯𑀸𑀢𑀺 𑀤𑀼𑀘𑁆𑀘𑀭𑀺𑀢𑀘𑀭𑀡𑀽𑀧𑀸𑀬𑀪𑀽𑀢𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀦𑀺𑀢𑁆𑀣𑀭𑀡𑀯𑀲𑁂𑀦 𑀤𑀼𑀘𑁆𑀘𑀭𑀺𑀢𑀲𑀗𑁆𑀔𑀸𑀢𑀁 𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀭𑀺𑀢𑁆𑀯𑀸. 𑀯𑀺𑀘𑀺𑀓𑀺𑀘𑁆𑀙𑀸 𑀳𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀧𑀚𑁆𑀚𑀦𑀦𑀺𑀫𑀺𑀢𑁆𑀢𑀢𑀸𑀫𑀼𑀔𑁂𑀦 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀫𑁂𑀯 𑀧𑀭𑀺𑀩𑁆𑀭𑀽𑀳𑁂𑀢𑀻𑀢𑀺 𑀢𑀲𑁆𑀲𑀸 𑀅𑀧𑁆𑀧𑀳𑀸𑀦𑀁 𑀤𑀼𑀘𑁆𑀘𑀭𑀺𑀢𑀘𑀭𑀡𑀽𑀧𑀸𑀬𑁄, 𑀧𑀳𑀸𑀦𑀜𑁆𑀘 𑀤𑀼𑀘𑁆𑀘𑀭𑀺𑀢𑀯𑀺𑀥𑀽𑀦𑀦𑀽𑀧𑀸𑀬𑁄𑀢𑀺.

𑁨𑁨𑁫. ‘‘𑀢𑀼𑀝𑁆𑀞𑀸𑀓𑀸𑀭𑁄’’𑀢𑀺 𑀇𑀫𑀺𑀦𑀸 𑀧𑀸𑀫𑁄𑀚𑁆𑀚𑀁 𑀦𑀸𑀫 𑀢𑀭𑀼𑀡𑀧𑀻𑀢𑀺𑀁 𑀤𑀲𑁆𑀲𑁂𑀢𑀺. 𑀲𑀸 𑀳𑀺 𑀢𑀭𑀼𑀡𑀢𑀸𑀬 𑀓𑀣𑀜𑁆𑀘𑀺𑀧𑀺 𑀢𑀼𑀝𑁆𑀞𑀸𑀯𑀢𑁆𑀣𑀸 𑀢𑀼𑀝𑁆𑀞𑀸𑀓𑀸𑀭𑀫𑀢𑁆𑀢𑀁. ‘‘𑀢𑀼𑀝𑁆𑀞𑀲𑁆𑀲𑀸’’𑀢𑀺 𑀇𑀤𑀁 ‘‘𑀧𑀫𑀼𑀤𑀺𑀢𑀲𑁆𑀲𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀯𑀘𑀦𑀁, 𑀢𑀲𑁆𑀲𑀢𑁆𑀣𑁄 ‘‘𑀑𑀓𑁆𑀓𑀦𑁆𑀢𑀺𑀓𑀪𑀸𑀯𑀧𑁆𑀧𑀢𑁆𑀢𑀸𑀬 𑀧𑀻𑀢𑀺𑀬𑀸 𑀯𑀲𑁂𑀦 𑀢𑀼𑀝𑁆𑀞𑀲𑁆𑀲𑀸’’𑀢𑀺 𑀝𑀻𑀓𑀸𑀬𑀁 𑀯𑀼𑀢𑁆𑀢𑁄, 𑀏𑀯𑀁 𑀲𑀢𑀺 𑀧𑀸𑀫𑁄𑀚𑁆𑀚𑀧𑀤𑁂𑀦 𑀑𑀓𑁆𑀓𑀦𑁆𑀢𑀺𑀓𑀸 𑀧𑀻𑀢𑀺𑀬𑁂𑀯 𑀕𑀳𑀺𑀢𑀸 𑀲𑀺𑀬𑀸. ‘‘𑀲𑀓𑀮𑀲𑀭𑀻𑀭𑀁 𑀔𑁄𑀪𑀬𑀫𑀸𑀦𑀸 𑀧𑀻𑀢𑀺 𑀚𑀸𑀬𑀢𑀻’’𑀢𑀺 𑀏𑀢𑀲𑁆𑀲𑀸 𑀘𑀢𑁆𑀣𑁄 ‘‘𑀅𑀢𑁆𑀢𑀦𑁄 𑀲𑀯𑀺𑀧𑁆𑀨𑀸𑀭𑀺𑀓𑀢𑀸𑀬, 𑀅𑀢𑁆𑀢𑀲𑀫𑀼𑀝𑁆𑀞𑀸𑀦𑀧𑀡𑀻𑀢𑀭𑀽𑀧𑀼𑀧𑁆𑀧𑀢𑁆𑀢𑀺𑀬𑀸 𑀘 𑀲𑀓𑀮𑀲𑀭𑀻𑀭𑀁 𑀔𑁄𑀪𑀬𑀫𑀸𑀦𑀸 𑀨𑀭𑀡𑀮𑀓𑁆𑀔𑀡𑀸 𑀧𑀻𑀢𑀺 𑀚𑀸𑀬𑀢𑀻’’𑀢𑀺 𑀯𑀼𑀢𑁆𑀢𑁄, 𑀏𑀯𑀜𑁆𑀘 𑀲𑀢𑀺 𑀧𑀻𑀢𑀺𑀧𑀤𑁂𑀦 𑀨𑀭𑀡𑀸 𑀧𑀻𑀢𑀺𑀬𑁂𑀯 𑀕𑀳𑀺𑀢𑀸 𑀲𑀺𑀬𑀸, 𑀓𑀸𑀭𑀡𑀁 𑀧𑀦𑁂𑀢𑁆𑀣 𑀕𑀯𑁂𑀲𑀺𑀢𑀩𑁆𑀩𑀁. 𑀇𑀥, 𑀧𑀦 𑀅𑀜𑁆𑀜𑀢𑁆𑀣 𑀘 𑀢𑀭𑀼𑀡𑀩𑀮𑀯𑀢𑀸𑀫𑀢𑁆𑀢𑀲𑀸𑀫𑀜𑁆𑀜𑁂𑀦 𑀧𑀤𑀤𑁆𑀯𑀬𑀲𑁆𑀲 𑀅𑀢𑁆𑀣𑀤𑀻𑀧𑀦𑀢𑁄 𑀬𑀸 𑀓𑀸𑀘𑀺 𑀢𑀭𑀼𑀡𑀸 𑀧𑀻𑀢𑀺 𑀧𑀸𑀫𑁄𑀚𑁆𑀚𑀁, 𑀩𑀮𑀯𑀢𑀻 𑀧𑀻𑀢𑀺, 𑀧𑀜𑁆𑀘𑀯𑀺𑀥𑀸𑀬 𑀯𑀸 𑀧𑀻𑀢𑀺𑀬𑀸 𑀬𑀣𑀸𑀓𑁆𑀓𑀫𑀁 𑀢𑀭𑀼𑀡𑀩𑀮𑀯𑀢𑀸𑀲𑀫𑁆𑀪𑀯𑀢𑁄 𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀧𑀸𑀫𑁄𑀚𑁆𑀚𑀁 ¶ , 𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀧𑀻𑀢𑀻𑀢𑀺𑀧𑀺 𑀯𑀤𑀦𑁆𑀢𑀺, 𑀅𑀬𑀫𑁂𑀢𑁆𑀣 𑀢𑀤𑀦𑀼𑀘𑁆𑀙𑀯𑀺𑀓𑁄 𑀅𑀢𑁆𑀣𑁄. 𑀢𑀼𑀝𑁆𑀞𑀲𑁆𑀲𑀸𑀢𑀺 𑀧𑀸𑀫𑁄𑀚𑁆𑀚𑀲𑀗𑁆𑀔𑀸𑀢𑀸𑀬 𑀢𑀭𑀼𑀡𑀧𑀻𑀢𑀺𑀬𑀸 𑀯𑀲𑁂𑀦 𑀢𑀼𑀝𑁆𑀞𑀲𑁆𑀲. 𑀢-𑀲𑀤𑁆𑀤𑁄 𑀳𑀺 𑀅𑀢𑀻𑀢𑀢𑁆𑀣𑁄, 𑀇𑀢𑀭𑀣𑀸 𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑀸𑀪𑀸𑀯𑀸𑀧𑀢𑁆𑀢𑀺𑀢𑁄, 𑀳𑁂𑀢𑀼𑀨𑀮𑀲𑀫𑁆𑀩𑀦𑁆𑀥𑀪𑀸𑀯𑀲𑁆𑀲 𑀘 𑀯𑀼𑀢𑁆𑀢𑀢𑁆𑀢𑀸. ‘‘𑀲𑀓𑀮𑀲𑀭𑀻𑀭𑀁 𑀔𑁄𑀪𑀬𑀫𑀸𑀦𑀸’’𑀢𑀺 𑀇𑀫𑀺𑀦𑀸 𑀧𑀻𑀢𑀺 𑀦𑀸𑀫 𑀏𑀢𑁆𑀣 𑀩𑀮𑀯𑀧𑀻𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀸 𑀳𑀺 𑀅𑀢𑁆𑀢𑀦𑁄 𑀲𑀯𑀺𑀧𑁆𑀨𑀸𑀭𑀺𑀓𑀢𑀸𑀬, 𑀅𑀢𑁆𑀢𑀲𑀫𑀼𑀝𑁆𑀞𑀸𑀦𑀧𑀡𑀻𑀢𑀭𑀽𑀧𑀼𑀧𑁆𑀧𑀢𑁆𑀢𑀺𑀬𑀸 𑀘 𑀲𑀓𑀮𑀲𑀭𑀻𑀭𑀁 𑀲𑀗𑁆𑀔𑁄𑀪𑀬𑀫𑀸𑀦𑀸 𑀚𑀸𑀬𑀢𑀺. 𑀲𑀓𑀮𑀲𑀭𑀻𑀭𑁂 𑀧𑀻𑀢𑀺𑀯𑁂𑀕𑀲𑁆𑀲 𑀧𑀻𑀢𑀺𑀯𑀺𑀧𑁆𑀨𑀸𑀭𑀲𑁆𑀲 𑀉𑀧𑁆𑀧𑀸𑀤𑀦𑀜𑁆𑀘𑁂𑀢𑁆𑀣 𑀲𑀗𑁆𑀔𑁄𑀪𑀦𑀁.

𑀧𑀻𑀢𑀺𑀲𑀳𑀺𑀢𑀁 ¶ 𑀧𑀻𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦. 𑀓𑀺𑀁 𑀧𑀦 𑀢𑀁? 𑀫𑀦𑁄, 𑀧𑀻𑀢𑀺 𑀫𑀦𑁄 𑀏𑀢𑀲𑁆𑀲𑀸𑀢𑀺 𑀲𑀫𑀸𑀲𑁄. 𑀧𑀻𑀢𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀁 𑀫𑀦𑁄 𑀬𑀲𑁆𑀲𑀸𑀢𑀺𑀧𑀺 𑀯𑀝𑁆𑀝𑀢𑀺, 𑀢𑀲𑁆𑀲. 𑀅𑀢𑁆𑀣𑀫𑀢𑁆𑀢𑀁 𑀧𑀦 𑀤𑀲𑁆𑀲𑁂𑀢𑀼𑀁 ‘‘𑀧𑀻𑀢𑀺𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀓𑀸𑀬𑁄𑀢𑀺 𑀇𑀥 𑀲𑀩𑁆𑀩𑁄𑀧𑀺 𑀅𑀭𑀽𑀧𑀓𑀮𑀸𑀧𑁄 𑀅𑀥𑀺𑀧𑁆𑀧𑁂𑀢𑁄, 𑀦 𑀧𑀦 𑀓𑀸𑀬𑀮𑀳𑀼𑀢𑀸𑀤𑀻𑀲𑀼 𑀯𑀺𑀬 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀫𑁂𑀯, 𑀦 𑀘 𑀓𑀸𑀬𑀸𑀬𑀢𑀦𑀸𑀤𑀻𑀲𑀼 𑀯𑀺𑀬 𑀭𑀽𑀧𑀓𑀸𑀬𑀫𑁆𑀧𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀦𑀸𑀫𑀓𑀸𑀬𑁄’’𑀢𑀺 𑀇𑀫𑀺𑀦𑀸. 𑀧𑀲𑁆𑀲𑀤𑁆𑀥𑀺𑀤𑁆𑀯𑀬𑀯𑀲𑁂𑀦𑁂𑀯 𑀳𑁂𑀢𑁆𑀣 𑀧𑀲𑁆𑀲𑀫𑁆𑀪𑀦𑀫𑀥𑀺𑀧𑁆𑀧𑁂𑀢𑀁, 𑀧𑀲𑁆𑀲𑀫𑁆𑀪𑀦𑀁 𑀧𑀦 𑀯𑀺𑀕𑀢𑀓𑀺𑀮𑁂𑀲𑀤𑀭𑀣𑀢𑀸𑀢𑀺 𑀆𑀳 ‘‘𑀯𑀺𑀕𑀢𑀤𑀭𑀣𑁄 𑀳𑁄𑀢𑀻’’𑀢𑀺, 𑀧𑀳𑀻𑀦𑀉𑀤𑁆𑀥𑀘𑁆𑀘𑀸𑀤𑀺𑀓𑀺𑀮𑁂𑀲𑀤𑀭𑀣𑁄𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀬 𑀯𑀲𑁂𑀦 𑀘𑁂𑀢𑀲𑀺𑀓𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑁄𑀬𑁂𑀯 𑀢𑀁𑀲𑀫𑀼𑀝𑁆𑀞𑀸𑀦𑀧𑀡𑀻𑀢𑀭𑀽𑀧𑀨𑀼𑀝𑀲𑀭𑀻𑀭𑀢𑀸𑀬 𑀓𑀸𑀬𑀺𑀓𑀫𑁆𑀧𑀺 𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀓𑀸𑀬𑀺𑀓𑀫𑁆𑀧𑀺 𑀘𑁂𑀢𑀲𑀺𑀓𑀫𑁆𑀧𑀺 𑀲𑀼𑀔𑀁 𑀯𑁂𑀤𑀬𑀢𑀻’’𑀢𑀺. 𑀇𑀫𑀺𑀦𑀸 𑀦𑁂𑀓𑁆𑀔𑀫𑁆𑀫𑀲𑀼𑀔𑁂𑀦𑀸𑀢𑀺 ‘‘𑀲𑀼𑀔𑀁 𑀯𑁂𑀤𑁂𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀦 𑀲𑀁𑀓𑀺𑀮𑁂𑀲𑀦𑀻𑀯𑀭𑀡𑀧𑀓𑁆𑀔𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸, 𑀧𑀞𑀫𑀚𑁆𑀛𑀸𑀦𑀧𑀓𑁆𑀔𑀺𑀓𑀢𑁆𑀢𑀸 𑀘 𑀬𑀣𑀸𑀭𑀳𑀁 𑀦𑁂𑀓𑁆𑀔𑀫𑁆𑀫𑀲𑀗𑁆𑀔𑀸𑀢𑁂𑀦 𑀉𑀧𑀘𑀸𑀭𑀲𑀼𑀔𑁂𑀦 𑀅𑀧𑁆𑀧𑀦𑀸𑀲𑀼𑀔𑁂𑀦 𑀘. 𑀲𑀫𑀸𑀥𑀸𑀦𑀫𑁆𑀧𑁂𑀢𑁆𑀣 𑀢𑀤𑀼𑀪𑀬𑁂𑀦𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀉𑀧𑀘𑀸𑀭𑀯𑀲𑁂𑀦𑀸𑀧𑀺 𑀅𑀧𑁆𑀧𑀦𑀸𑀯𑀲𑁂𑀦𑀸𑀧𑀻’’𑀢𑀺.

𑀏𑀢𑁆𑀣 𑀧𑀦𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀓𑀸𑀫𑀘𑁆𑀙𑀦𑁆𑀤𑀧𑁆𑀧𑀳𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀲𑁆𑀲𑀤𑁆𑀥𑀓𑀸𑀬𑀲𑁆𑀲 𑀲𑀼𑀔𑀧𑀝𑀺𑀲𑀁𑀯𑁂𑀤𑀦𑀸, 𑀢𑀸𑀯 𑀬𑀣𑀸 𑀧𑀼𑀩𑁆𑀩𑁂, 𑀢𑀣𑀸 𑀇𑀥𑀸𑀧𑀺 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀬𑁂𑀯 𑀯𑀼𑀢𑁆𑀢𑀸, 𑀦 𑀅𑀧𑁆𑀧𑀦𑀸. 𑀢𑀣𑀸 𑀳𑀺 𑀓𑀸𑀫𑀘𑁆𑀙𑀦𑁆𑀤𑀧𑁆𑀧𑀳𑀸𑀦𑁂 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀁 ‘‘𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦𑀸𑀢𑀺 𑀏𑀢𑁆𑀣 𑀯𑀺𑀓𑁆𑀔𑀫𑁆𑀪𑀦𑀁 𑀅𑀦𑀼𑀧𑁆𑀧𑀸𑀤𑀦𑀁 𑀅𑀧𑁆𑀧𑀯𑀢𑁆𑀢𑀦𑀁, 𑀦 𑀧𑀝𑀺𑀧𑀓𑁆𑀔𑀸𑀦𑀁 𑀲𑀼𑀧𑁆𑀧𑀳𑀻𑀦𑀢𑀸, 𑀧𑀳𑀻𑀦𑀢𑁆𑀢𑀸𑀢𑀺 𑀘 𑀧𑀳𑀻𑀦𑀲𑀤𑀺𑀲𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀛𑀸𑀦𑀲𑁆𑀲 𑀅𑀦𑀥𑀺𑀕𑀢𑀢𑁆𑀢𑀸’’𑀢𑀺 (𑀤𑀻. 𑀦𑀺. 𑀝𑀻. 𑁧.𑁨𑁬𑁧). 𑀧𑀲𑁆𑀲𑀤𑁆𑀥𑀓𑀸𑀬𑀲𑁆𑀲 𑀲𑀼𑀔𑀧𑀝𑀺𑀲𑀁𑀯𑁂𑀤𑀦𑀸𑀬 𑀘 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀬 𑀯𑀲𑁂𑀦 𑀘𑁂𑀢𑀲𑀺𑀓𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑁄𑀬𑁂𑀯 𑀢𑀁𑀲𑀫𑀼𑀝𑁆𑀞𑀸𑀦𑀧𑀡𑀻𑀢𑀭𑀽𑀧𑀨𑀼𑀝𑀲𑀭𑀻𑀭𑀢𑀸𑀬 𑀓𑀸𑀬𑀺𑀓𑀫𑁆𑀧𑀺 𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺. 𑀅𑀧𑀺𑀘 𑀓𑀸 𑀦𑀸𑀫 𑀓𑀣𑀸 𑀅𑀜𑁆𑀜𑁂𑀳𑀺 𑀯𑀢𑁆𑀢𑀩𑁆𑀩𑀸 𑀅𑀝𑁆𑀞𑀓𑀣𑀸𑀬𑀫𑁂𑀯 ‘‘𑀙 𑀥𑀫𑁆𑀫𑁂 𑀪𑀸𑀯𑁂𑀢𑁆𑀯𑀸’’𑀢𑀺 𑀢𑀢𑁆𑀣 𑀢𑀢𑁆𑀣 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀬 𑀯𑀼𑀢𑁆𑀢𑀢𑁆𑀢𑀸. 𑀲𑀼𑀔𑀺𑀦𑁄 𑀘𑀺𑀢𑁆𑀢𑀲𑀫𑀸𑀥𑀸𑀦𑁂 𑀧𑀦 𑀲𑀼𑀔𑀲𑁆𑀲 𑀉𑀧𑀘𑀸𑀭𑀪𑀸𑀯𑀦𑀸𑀬 𑀯𑀺𑀬 𑀅𑀧𑁆𑀧𑀦𑀸𑀬𑀧𑀺 𑀓𑀸𑀭𑀡𑀢𑁆𑀢𑀸, ‘‘𑀲𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺𑀆𑀤𑀺𑀦𑀸 𑀘 𑀯𑀓𑁆𑀔𑀫𑀸𑀦𑀸𑀬 𑀅𑀧𑁆𑀧𑀦𑀸𑀬 𑀳𑁂𑀢𑀼𑀨𑀮𑀯𑀲𑁂𑀦 𑀲𑀫𑁆𑀩𑀚𑁆𑀛𑀦𑀢𑁄 𑀧𑀼𑀩𑁆𑀩𑀪𑀸𑀕𑀲𑀫𑀸𑀥𑀺 ¶ , 𑀅𑀧𑁆𑀧𑀦𑀸𑀲𑀫𑀸𑀥𑀺 𑀘 𑀯𑀼𑀢𑁆𑀢𑁄, 𑀧𑀼𑀩𑁆𑀩𑀪𑀸𑀕𑀲𑀼𑀔𑀫𑀺𑀯 𑀯𑀸 𑀅𑀧𑁆𑀧𑀦𑀸𑀲𑀼𑀔𑀫𑁆𑀧𑀺 𑀅𑀧𑁆𑀧𑀦𑀸𑀲𑀫𑀸𑀥𑀺𑀲𑁆𑀲 𑀓𑀸𑀭𑀡𑀫𑁂𑀯𑀸𑀢𑀺 𑀢𑀫𑁆𑀧𑀺 𑀅𑀧𑁆𑀧𑀦𑀸𑀲𑀼𑀔𑀁 𑀅𑀧𑁆𑀧𑀦𑀸𑀲𑀫𑀸𑀥𑀺𑀦𑁄 ¶ 𑀓𑀸𑀭𑀡𑀪𑀸𑀯𑁂𑀦 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀕𑀳𑀺𑀢𑀦𑁆𑀢𑀺 𑀇𑀫𑀫𑀢𑁆𑀣𑀫𑀲𑀮𑁆𑀮𑀓𑁆𑀔𑁂𑀦𑁆𑀢𑀸 𑀦𑁂𑀓𑁆𑀔𑀫𑁆𑀫𑀧𑀤𑀢𑁆𑀣𑀁 𑀬𑀣𑀸𑀢𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀸𑀴𑀺𑀬𑀁, 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀲𑀁𑀓𑀺𑀡𑁆𑀡𑀸𑀓𑀼𑀮𑀁 𑀓𑁂𑀘𑀺 𑀓𑀭𑁄𑀦𑁆𑀢𑀻𑀢𑀺.

𑀧𑀞𑀫𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑁨𑁨𑁬. 𑀬𑀤𑁂𑀯𑀁 ‘‘𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻’’𑀢𑀺 𑀏𑀢𑁂𑀦𑁂𑀯 𑀉𑀧𑀘𑀸𑀭𑀯𑀲𑁂𑀦𑀧𑀺 𑀅𑀧𑁆𑀧𑀦𑀸𑀯𑀲𑁂𑀦𑀧𑀺 𑀘𑀺𑀢𑁆𑀢𑀲𑁆𑀲 𑀲𑀫𑀸𑀥𑀸𑀦𑀁 𑀓𑀣𑀺𑀢𑀁 𑀲𑀺𑀬𑀸, 𑀏𑀯𑀁 𑀲𑀦𑁆𑀢𑁂 ‘‘𑀲𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺𑀆𑀤𑀺𑀓𑀸 𑀤𑁂𑀲𑀦𑀸 𑀓𑀺𑀫𑀢𑁆𑀣𑀺𑀬𑀸𑀢𑀺 𑀘𑁄𑀤𑀦𑀸𑀬 ‘‘𑀲𑁄 𑀯𑀺𑀯𑀺𑀘𑁆𑀘𑁂𑀯…𑀧𑁂… 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀲𑀫𑀸𑀳𑀺𑀢𑁂’’𑀢𑀺 𑀧𑀤𑀤𑁆𑀯𑀬𑀁 ‘‘𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢’’𑀦𑁆𑀢𑀺 𑀇𑀫𑁂𑀳𑀺 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀲𑀫𑀸𑀳𑀺𑀢𑀢𑁆𑀢𑀸 𑀢𑀣𑀸 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀧𑀭𑀺𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀉𑀧𑀘𑀸𑀭𑀲𑀫𑀸𑀥𑀺𑀢𑁄, 𑀧𑀞𑀫𑀚𑁆𑀛𑀸𑀦𑀸𑀤𑀺𑀲𑀫𑀸𑀥𑀺𑀢𑁄 𑀘 𑀉𑀧𑀭𑀺 𑀧𑀢𑁆𑀢𑀩𑁆𑀩𑀲𑁆𑀲 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁. 𑀉𑀧𑀘𑀸𑀭𑀲𑀫𑀸𑀥𑀺𑀲𑀫𑀥𑀺𑀕𑀫𑁂𑀦𑁂𑀯 𑀳𑀺 𑀧𑀞𑀫𑀚𑁆𑀛𑀸𑀦𑀸𑀤𑀺𑀯𑀺𑀲𑁂𑀲𑁄 𑀲𑀫𑀥𑀺𑀕𑀦𑁆𑀢𑀼𑀁 𑀲𑀓𑁆𑀓𑀸, 𑀦 𑀧𑀦 𑀢𑁂𑀦 𑀯𑀺𑀦𑀸, 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀲𑀫𑀥𑀺𑀕𑀫𑁂𑀧𑀺 𑀧𑀸𑀫𑁄𑀚𑁆𑀚𑀼𑀧𑁆𑀧𑀸𑀤𑀸𑀤𑀺𑀓𑀸𑀭𑀡𑀧𑀭𑀫𑁆𑀧𑀭𑀸 𑀇𑀘𑁆𑀙𑀺𑀢𑀩𑁆𑀩𑀸, 𑀤𑀼𑀢𑀺𑀬𑀫𑀕𑁆𑀕𑀸𑀤𑀺𑀲𑀫𑀥𑀺𑀕𑀫𑁂 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀧𑁆𑀧𑀦𑀸𑀲𑀫𑀸𑀥𑀺𑀦𑀸𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀺𑀅𑀧𑁆𑀧𑀦𑀸𑀲𑀫𑀸𑀥𑀺𑀦𑀸. 𑀢𑀲𑁆𑀲 𑀲𑀫𑀸𑀥𑀺𑀦𑁄𑀢𑀺 𑀬𑁄 𑀅𑀧𑁆𑀧𑀦𑀸𑀮𑀓𑁆𑀔𑀡𑁄 𑀲𑀫𑀸𑀥𑀺 ‘‘𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻’’𑀢𑀺 𑀲𑀩𑁆𑀩𑀲𑀸𑀥𑀸𑀭𑀡𑀯𑀲𑁂𑀦 𑀯𑀼𑀢𑁆𑀢𑁄, 𑀢𑀲𑁆𑀲 𑀲𑀫𑀸𑀥𑀺𑀦𑁄. 𑀧𑀪𑁂𑀤𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀯𑀺𑀪𑀸𑀕𑀲𑁆𑀲 𑀘𑁂𑀯 𑀧𑀞𑀫𑀸𑀪𑀺𑀜𑁆𑀜𑀸𑀤𑀺𑀯𑀺𑀪𑀸𑀕𑀲𑁆𑀲 𑀘 𑀧𑀪𑁂𑀤𑀤𑀲𑁆𑀲𑀦𑀢𑁆𑀣𑀁. 𑀓𑀭𑀚𑀓𑀸𑀬𑀦𑁆𑀢𑀺 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀲𑀫𑀼𑀤𑀸𑀬𑀪𑀽𑀢𑀁 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀓𑀸𑀬𑀁. 𑀲𑁄 𑀳𑀺 𑀕𑀩𑁆𑀪𑀸𑀲𑀬𑁂 𑀓𑀭𑀻𑀬𑀢𑀻𑀢𑀺 𑀓𑀢𑁆𑀯𑀸 𑀓𑀭𑀲𑀗𑁆𑀔𑀸𑀢𑀢𑁄 𑀧𑀼𑀧𑁆𑀨𑀲𑀫𑁆𑀪𑀯𑀢𑁄 𑀚𑀸𑀢𑀢𑁆𑀢𑀸 𑀓𑀭𑀚𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀭𑁄𑀢𑀺 𑀳𑀺 𑀫𑀸𑀢𑀼 𑀲𑁄𑀡𑀺𑀢𑀲𑀗𑁆𑀔𑀸𑀢𑀧𑀼𑀧𑁆𑀨𑀲𑁆𑀲, 𑀧𑀺𑀢𑀼 𑀲𑀼𑀓𑁆𑀓𑀲𑀗𑁆𑀔𑀸𑀢𑀲𑀫𑁆𑀪𑀯𑀲𑁆𑀲 𑀘 𑀦𑀸𑀫𑀁, 𑀢𑀢𑁄 𑀚𑀸𑀢𑁄 𑀧𑀦 𑀅𑀡𑁆𑀟𑀚𑀚𑀮𑀸𑀩𑀼𑀚𑀯𑀲𑁂𑀦 𑀕𑀩𑁆𑀪𑀲𑁂𑀬𑁆𑀬𑀓𑀓𑀸𑀬𑁄𑀯. 𑀓𑀸𑀫𑀁 𑀑𑀧𑀧𑀸𑀢𑀺𑀓𑀸𑀤𑀻𑀦𑀫𑁆𑀧𑀺 𑀳𑁂𑀢𑀼𑀲𑀫𑁆𑀧𑀦𑁆𑀦𑀸𑀦𑀁 𑀬𑀣𑀸𑀯𑀼𑀢𑁆𑀢𑀲𑀫𑀸𑀥𑀺𑀲𑀫𑀥𑀺𑀕𑀫𑁄 𑀲𑀫𑁆𑀪𑀯𑀢𑀺, 𑀢𑀣𑀸𑀧𑀺 𑀬𑁂𑀪𑀼𑀬𑁆𑀬𑀢𑁆𑀢𑀸, 𑀧𑀸𑀓𑀝𑀢𑁆𑀢𑀸 𑀘 𑀲𑁆𑀯𑁂𑀯 𑀓𑀸𑀬𑁄 𑀯𑀼𑀢𑁆𑀢𑁄𑀢𑀺. 𑀓𑀭𑁄𑀢𑀺 𑀧𑀼𑀢𑁆𑀢𑁂 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀓𑀭𑁄, 𑀲𑀼𑀓𑁆𑀓𑀲𑁄𑀡𑀺𑀢𑀁, 𑀓𑀭𑁂𑀦 𑀚𑀸𑀢𑁄 𑀓𑀭𑀚𑁄𑀢𑀺𑀧𑀺 𑀯𑀤𑀦𑁆𑀢𑀺.

𑀦𑀦𑀼 𑀘 𑀦𑀸𑀫𑀓𑀸𑀬𑁄𑀧𑀺 𑀯𑀺𑀯𑁂𑀓𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀢𑀣𑀸 𑀮𑀤𑁆𑀥𑀽𑀧𑀓𑀸𑀭𑁄𑀯 𑀲𑀺𑀬𑀸, 𑀅𑀣 𑀓𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁄 𑀭𑀽𑀧𑀓𑀸𑀬𑁄𑀯 𑀇𑀥 𑀕𑀳𑀺𑀢𑁄𑀢𑀺? 𑀲𑀤𑁆𑀤𑀦𑁆𑀢𑀭𑀸𑀪𑀺𑀲𑀫𑁆𑀩𑀦𑁆𑀥𑁂𑀦 𑀅𑀥𑀺𑀕𑀢𑀢𑁆𑀢𑀸. ‘‘𑀅𑀪𑀺𑀲𑀦𑁆𑀤𑁂𑀢𑀻’’𑀢𑀺𑀆𑀤𑀺𑀲𑀤𑁆𑀤𑀦𑁆𑀢𑀭𑀸𑀪𑀺𑀲𑀫𑁆𑀩𑀦𑁆𑀥𑀢𑁄 𑀳𑀺 𑀭𑀽𑀧𑀓𑀸𑀬𑁄 ¶ 𑀏𑀯 𑀇𑀥 𑀪𑀕𑀯𑀢𑀸 𑀯𑀼𑀢𑁆𑀢𑁄𑀢𑀺 𑀅𑀥𑀺𑀕𑀫𑀻𑀬𑀢𑀺 𑀢𑀲𑁆𑀲𑁂𑀯 𑀅𑀪𑀺𑀲𑀦𑁆𑀤𑀦𑀸𑀤𑀺𑀓𑀺𑀭𑀺𑀬𑀸𑀬𑁄𑀕𑁆𑀬𑀢𑁆𑀢𑀸𑀢𑀺. 𑀅𑀪𑀺𑀲𑀦𑁆𑀤𑁂𑀢𑀻𑀢𑀺 𑀅𑀪𑀺𑀲𑀦𑁆𑀤𑀦𑀁 𑀓𑀭𑁄𑀢𑀺, 𑀲𑁄 ¶ 𑀇𑀫𑀫𑁂𑀯 𑀓𑀸𑀬𑀁 𑀯𑀺𑀯𑁂𑀓𑀚𑁂𑀦 𑀧𑀻𑀢𑀺𑀲𑀼𑀔𑁂𑀦𑀸𑀢𑀺 𑀳𑀺 𑀪𑁂𑀤𑀯𑀲𑁂𑀦, 𑀲𑀫𑀼𑀤𑀸𑀬𑀸𑀯𑀬𑀯𑀯𑀲𑁂𑀦 𑀘 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑀸 𑀳𑁂𑀢𑀼𑀓𑀺𑀭𑀺𑀬𑀸 𑀏𑀢𑁆𑀣 𑀮𑀩𑁆𑀪𑀢𑀺, 𑀅𑀪𑀺𑀲𑀦𑁆𑀤𑀦𑀁 𑀧𑀦𑁂𑀢𑀁 𑀛𑀸𑀦𑀫𑀬𑁂𑀦 𑀧𑀻𑀢𑀺𑀲𑀼𑀔𑁂𑀦 𑀓𑀭𑀚𑀓𑀸𑀬𑀲𑁆𑀲 𑀢𑀺𑀦𑁆𑀢𑀪𑀸𑀯𑀸𑀧𑀸𑀤𑀦𑀁, 𑀲𑀩𑁆𑀩𑀢𑁆𑀣𑀓𑀫𑁂𑀯 𑀘 𑀮𑀽𑀔𑀪𑀸𑀯𑀲𑁆𑀲𑀸𑀧𑀦𑀬𑀦𑀦𑁆𑀢𑀺 𑀆𑀳 ‘‘𑀢𑁂𑀫𑁂𑀢𑀺 𑀲𑁆𑀦𑁂𑀳𑁂𑀢𑀻’’𑀢𑀺, 𑀅𑀯𑀲𑁆𑀲𑀼𑀢𑀪𑀸𑀯𑀁, 𑀅𑀮𑁆𑀮𑀪𑀸𑀯𑀜𑁆𑀘 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀢𑁄 𑀧𑀦 𑀅𑀪𑀺𑀲𑀦𑁆𑀤𑀦𑀁 𑀦𑀸𑀫 𑀬𑀣𑀸𑀯𑀼𑀢𑁆𑀢𑀧𑀻𑀢𑀺𑀲𑀼𑀔𑀲𑀫𑀼𑀝𑁆𑀞𑀸𑀦𑁂𑀳𑀺 𑀧𑀡𑀻𑀢𑀭𑀽𑀧𑁂𑀳𑀺 𑀓𑀸𑀬𑀲𑁆𑀲 𑀧𑀭𑀺𑀧𑁆𑀨𑀭𑀡𑀁 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀲𑀩𑁆𑀩𑀢𑁆𑀣 𑀧𑀯𑀢𑁆𑀢𑀧𑀻𑀢𑀺 𑀲𑀼𑀔𑀁 𑀓𑀭𑁄𑀢𑀻’’𑀢𑀺. 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀨𑀭𑀡𑀯𑀲𑁂𑀦𑁂𑀯 𑀳𑀺 𑀲𑀩𑁆𑀩𑀢𑁆𑀣 𑀧𑀯𑀢𑁆𑀢𑀧𑀻𑀢𑀺𑀲𑀼𑀔𑀢𑀸. 𑀧𑀭𑀺𑀲𑀦𑁆𑀤𑁂𑀢𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀪𑀲𑁆𑀢𑀁 𑀦𑀸𑀫 𑀘𑀫𑁆𑀫𑀧𑀲𑀺𑀩𑁆𑀩𑀓𑀁. 𑀧𑀭𑀺𑀧𑁆𑀨𑀭𑀢𑀻𑀢𑀺 𑀲𑀼𑀤𑁆𑀥𑀓𑀺𑀭𑀺𑀬𑀸𑀧𑀤𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀫𑀦𑁆𑀢𑀢𑁄 𑀨𑀼𑀲𑀢𑀻’’𑀢𑀺, 𑀲𑁄 𑀇𑀫𑀫𑁂𑀯 𑀓𑀸𑀬𑀁 𑀯𑀺𑀯𑁂𑀓𑀚𑁂𑀦 𑀧𑀻𑀢𑀺𑀲𑀼𑀔𑁂𑀦 𑀲𑀫𑀦𑁆𑀢𑀢𑁄 𑀨𑀼𑀝𑁆𑀞𑁄 𑀪𑀯𑀢𑀻𑀢𑀺 𑀅𑀢𑁆𑀣𑁄. 𑀨𑀼𑀲𑀦𑀓𑀺𑀭𑀺𑀬𑀸𑀬𑁂𑀯𑁂𑀢𑁆𑀣 𑀉𑀧𑀧𑀦𑁆𑀦𑀸, 𑀦 𑀩𑁆𑀬𑀸𑀧𑀦𑀓𑀺𑀭𑀺𑀬𑀸 𑀪𑀺𑀓𑁆𑀔𑀼𑀲𑁆𑀲𑁂𑀯 𑀲𑀼𑀤𑁆𑀥𑀓𑀢𑁆𑀢𑀼𑀪𑀸𑀯𑀢𑁄. 𑀲𑀩𑁆𑀩𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀩𑁆𑀩𑀯𑀸 𑀬𑀣𑀸 ‘‘𑀕𑀼𑀡𑀯𑀸’’𑀢𑀺, 𑀢𑀲𑁆𑀲 𑀲𑀩𑁆𑀩𑀯𑀢𑁄, ‘‘𑀅𑀯𑀬𑀯𑀸𑀯𑀬𑀯𑀻𑀲𑀫𑁆𑀩𑀦𑁆𑀥𑁂 𑀅𑀯𑀬𑀯𑀺𑀦𑀺 𑀲𑀸𑀫𑀺𑀯𑀘𑀦’’𑀦𑁆𑀢𑀺 𑀲𑀤𑁆𑀤𑀮𑀓𑁆𑀔𑀡𑁂𑀦 𑀧𑀦𑁂𑀢𑀲𑁆𑀲 ‘‘𑀓𑀺𑀜𑁆𑀘𑀻’’𑀢𑀺 𑀅𑀯𑀬𑀯𑁂𑀦 𑀲𑀫𑁆𑀩𑀚𑁆𑀛𑀦𑀢𑁄 𑀅𑀯𑀬𑀯𑀻𑀯𑀺𑀲𑀬𑁄𑀬𑁂𑀯𑁂𑀲 𑀲𑀩𑁆𑀩𑀲𑀤𑁆𑀤𑁄𑀢𑀺 𑀫𑀦𑁆𑀢𑁆𑀯𑀸 𑀙𑀯𑀺𑀫𑀁𑀲𑀸𑀤𑀺𑀓𑁄𑀝𑁆𑀞𑀸𑀲𑀲𑀗𑁆𑀔𑀸𑀢𑁂𑀦 𑀅𑀯𑀬𑀯𑁂𑀦 𑀅𑀯𑀬𑀯𑀻𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀩𑁆𑀩𑀓𑁄𑀝𑁆𑀞𑀸𑀲𑀯𑀢𑁄 𑀓𑀸𑀬𑀲𑁆𑀲𑀸’’𑀢𑀺. ‘‘𑀓𑀺𑀜𑁆𑀘𑀻’’𑀢𑀺 𑀏𑀢𑀲𑁆𑀲 ‘‘𑀉𑀧𑀸…𑀧𑁂… 𑀞𑀸𑀦’’𑀦𑁆𑀢𑀺 𑀅𑀢𑁆𑀣𑀯𑀘𑀦𑀁. 𑀉𑀧𑀸𑀤𑀺𑀦𑁆𑀦𑀓𑀲𑀦𑁆𑀢𑀢𑀺𑀧𑀯𑀢𑁆𑀢𑀺𑀝𑁆𑀞𑀸𑀦𑁂𑀢𑀺 𑀓𑀫𑁆𑀫𑀚𑀭𑀽𑀧𑀲𑀦𑁆𑀢𑀢𑀺𑀬𑀸 𑀧𑀯𑀢𑁆𑀢𑀺𑀝𑁆𑀞𑀸𑀦𑁂 𑀅𑀨𑀼𑀝𑀁 𑀦𑀸𑀫 𑀦 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀙𑀯𑀺𑀫𑀁𑀲𑀮𑁄𑀳𑀺𑀢𑀸𑀦𑀼𑀕𑀢𑀦𑁆𑀢𑀺 𑀙𑀯𑀺𑀫𑀁𑀲𑀮𑁄𑀳𑀺𑀢𑀸𑀤𑀺𑀓𑀫𑁆𑀫𑀚𑀭𑀽𑀧𑀫𑀦𑀼𑀕𑀢𑀁. 𑀬𑀢𑁆𑀣 𑀬𑀢𑁆𑀣 𑀓𑀫𑁆𑀫𑀚𑀭𑀽𑀧𑀁, 𑀢𑀢𑁆𑀣 𑀢𑀢𑁆𑀣 𑀘𑀺𑀢𑁆𑀢𑀚𑀭𑀽𑀧𑀲𑁆𑀲𑀸𑀧𑀺 𑀩𑁆𑀬𑀸𑀧𑀦𑀢𑁄 𑀢𑁂𑀦 𑀢𑀲𑁆𑀲 𑀓𑀸𑀬𑀲𑁆𑀲 𑀨𑀼𑀝𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀅𑀨𑀼𑀝𑀁 𑀦𑀸𑀫 𑀦 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁.

𑁨𑁨𑁭. 𑀙𑁂𑀓𑁄𑀢𑀺 𑀓𑀼𑀲𑀮𑁄, 𑀢𑀁 𑀧𑀦 𑀓𑁄𑀲𑀮𑁆𑀮𑀁 ‘‘𑀓𑀁𑀲𑀣𑀸𑀮𑁂 𑀦𑁆𑀳𑀸𑀦𑀺𑀬𑀘𑀼𑀡𑁆𑀡𑀸𑀦𑀺 𑀆𑀓𑀺𑀭𑀺𑀢𑁆𑀯𑀸’’𑀢𑀺𑀆𑀤𑀺𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑀢𑁄, 𑀧𑀓𑀭𑀡𑀢𑁄 𑀘 𑀦𑁆𑀳𑀸𑀦𑀺𑀬𑀘𑀼𑀡𑁆𑀡𑀸𑀦𑀁 𑀓𑀭𑀡𑁂, 𑀧𑀬𑁄𑀚𑀦𑁂, 𑀧𑀺𑀡𑁆𑀟𑀦𑁂 𑀘 𑀲𑀫𑀢𑁆𑀣𑀢𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀧𑀝𑀺𑀩𑀮𑁄’’𑀢𑀺𑀆𑀤𑀺𑀦𑀸. 𑀓𑀁𑀲𑀲𑀤𑁆𑀤𑁄 𑀧𑀦 ‘‘𑀫𑀳𑀢𑀺𑀬𑀸 𑀓𑀁𑀲𑀧𑀸𑀢𑀺𑀬𑀸’’𑀢𑀺𑀆𑀤𑀻𑀲𑀼 ¶ (𑀫. 𑀦𑀺. 𑁧.𑁬𑁧) 𑀲𑀼𑀯𑀡𑁆𑀡𑁂 𑀆𑀕𑀢𑁄, ‘‘𑀓𑀁𑀲𑁄 𑀉𑀧𑀳𑀢𑁄 𑀬𑀣𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁧𑁩𑁪) 𑀓𑀺𑀢𑁆𑀢𑀺𑀫𑀮𑁄𑀳𑁂, ‘‘𑀉𑀧𑀓𑀁𑀲𑁄 𑀦𑀸𑀫 𑀭𑀸𑀚𑀸 𑀫𑀳𑀸𑀓𑀁𑀲𑀲𑁆𑀲 𑀅𑀢𑁆𑀭𑀚𑁄’’𑀢𑀺𑀆𑀤𑀻𑀲𑀼 [𑀚𑀸. 𑀅𑀝𑁆𑀞. 𑁪.𑁧𑁦.𑁧𑁬𑁪 (𑀅𑀢𑁆𑀣𑀢𑁄 𑀲𑀫𑀸𑀦𑀁)] 𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑁂. 𑀇𑀥 𑀧𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀮𑁄𑀳𑁂𑀢𑀺 𑀆𑀳 ‘‘𑀬𑁂𑀦 𑀓𑁂𑀦𑀘𑀺 𑀮𑁄𑀳𑁂𑀦 𑀓𑀢𑀪𑀸𑀚𑀦𑁂’’𑀢𑀺. 𑀦𑀦𑀼 𑀉𑀧𑀫𑀸𑀓𑀭𑀡𑀫𑀢𑁆𑀢𑀫𑁂𑀯𑀺𑀤𑀁, 𑀅𑀣 𑀓𑀲𑁆𑀫𑀸 𑀓𑀁𑀲𑀣𑀸𑀮𑀓𑀲𑁆𑀲 𑀲𑀯𑀺𑀲𑁂𑀲𑀲𑁆𑀲 𑀕𑀳𑀡𑀁 𑀓𑀢𑀦𑁆𑀢𑀺 𑀅𑀦𑀼𑀬𑁄𑀕𑀁 𑀧𑀭𑀺𑀳𑀭𑀢𑀺 ‘‘𑀫𑀢𑁆𑀢𑀺𑀓𑀸𑀪𑀸𑀚𑀦’’𑀦𑁆𑀢𑀺𑀆𑀤𑀺𑀦𑀸. ‘‘𑀲𑀦𑁆𑀤𑁂𑀦𑁆𑀢𑀲𑁆𑀲𑀸’’𑀢𑀺 𑀧𑀭𑀺𑀫𑀤𑁆𑀤𑁂𑀢𑁆𑀯𑀸 𑀧𑀺𑀡𑁆𑀟𑀁 𑀓𑀭𑁄𑀦𑁆𑀢𑀲𑁆𑀲𑁂𑀯 𑀪𑀺𑀚𑁆𑀚𑀢𑀺, 𑀦 𑀧𑀦 𑀲𑀦𑁆𑀤𑀦𑀓𑁆𑀔𑀫𑀁 𑀳𑁄𑀢𑀺, 𑀅𑀦𑀸𑀤𑀭𑀮𑀓𑁆𑀔𑀡𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀓𑀺𑀭𑀺𑀬𑀦𑁆𑀢𑀭𑀲𑁆𑀲 𑀧𑀯𑀢𑁆𑀢𑀦𑀓𑁆𑀔𑀡𑁂𑀬𑁂𑀯 𑀓𑀺𑀭𑀺𑀬𑀦𑁆𑀢𑀭𑀲𑁆𑀲 𑀧𑀯𑀢𑁆𑀢𑀦𑀜𑁆𑀳𑀺 𑀅𑀦𑀸𑀤𑀭𑀮𑀓𑁆𑀔𑀡𑀁. ‘‘𑀧𑀭𑀺𑀧𑁆𑀨𑁄𑀲𑀓𑀁 𑀧𑀭𑀺𑀧𑁆𑀨𑁄𑀲𑀓’’𑀦𑁆𑀢𑀺 𑀇𑀤𑀁 𑀪𑀸𑀯𑀦𑀧𑀼𑀁𑀲𑀓𑀦𑁆𑀢𑀺 ¶ 𑀤𑀲𑁆𑀲𑁂𑀢𑀺 ‘‘𑀲𑀺𑀜𑁆𑀘𑀺𑀢𑁆𑀯𑀸 𑀲𑀺𑀜𑁆𑀘𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸. 𑀨𑀼𑀲𑀲𑀤𑁆𑀤𑁄 𑀘𑁂𑀢𑁆𑀣 𑀧𑀭𑀺𑀲𑀺𑀜𑁆𑀘𑀦𑁂 𑀬𑀣𑀸 𑀢𑀁 𑀯𑀸𑀢𑀯𑀼𑀝𑁆𑀞𑀺𑀲𑀫𑀬𑁂 ‘‘𑀤𑁂𑀯𑁄 𑀘 𑀣𑁄𑀓𑀁 𑀣𑁄𑀓𑀁 𑀨𑀼𑀲𑀸𑀬𑀢𑀻’’𑀢𑀺, (𑀧𑀸𑀘𑀺. 𑁩𑁬𑁨) 𑀢𑀲𑁆𑀫𑀸 𑀢𑀢𑁄 𑀢𑀢𑁄 𑀦𑁆𑀳𑀸𑀦𑀺𑀬𑀘𑀼𑀡𑁆𑀡𑀢𑁄 𑀉𑀧𑀭𑀺 𑀉𑀤𑀓𑁂𑀦 𑀩𑁆𑀬𑀸𑀧𑀦𑀓𑀭𑀡𑀯𑀲𑁂𑀦 𑀧𑀭𑀺𑀲𑀺𑀜𑁆𑀘𑀺𑀢𑁆𑀯𑀸 𑀧𑀭𑀺𑀲𑀺𑀜𑁆𑀘𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀦𑀼𑀧𑀲𑀕𑁆𑀕𑁄𑀧𑀺 𑀳𑀺 𑀲𑀤𑁆𑀤𑁄 𑀲𑀉𑀧𑀲𑀕𑁆𑀕𑁄 𑀯𑀺𑀬 𑀧𑀓𑀭𑀡𑀸𑀥𑀺𑀕𑀢𑀲𑁆𑀲 𑀅𑀢𑁆𑀣𑀲𑁆𑀲 𑀤𑀻𑀧𑀓𑁄, ‘‘𑀲𑀺𑀜𑁆𑀘𑀺𑀢𑁆𑀯𑀸 𑀲𑀺𑀜𑁆𑀘𑀺𑀢𑁆𑀯𑀸’’𑀢𑀺 𑀧𑀦 𑀯𑀘𑀦𑀁 ‘‘𑀧𑀭𑀺𑀧𑁆𑀨𑁄𑀲𑀓𑀁 𑀧𑀭𑀺𑀧𑁆𑀨𑁄𑀲𑀓’’𑀦𑁆𑀢𑀺 𑀏𑀢𑀲𑁆𑀲 ‘‘𑀲𑀦𑁆𑀤𑁂𑀬𑁆𑀬𑀸’’𑀢𑀺 𑀏𑀢𑁆𑀣 𑀯𑀺𑀲𑁂𑀲𑀦𑀪𑀸𑀯𑀯𑀺𑀜𑁆𑀜𑀸𑀧𑀦𑀢𑁆𑀣𑀁. 𑀏𑀯𑀫𑀻𑀤𑀺𑀲𑁂𑀲𑀼. ‘‘𑀲𑀦𑁆𑀤𑁂𑀬𑁆𑀬𑀸’’𑀢𑀺 𑀏𑀢𑁆𑀣 𑀲𑀦𑁆𑀤-𑀲𑀤𑁆𑀤𑁄 𑀧𑀺𑀡𑁆𑀟𑀓𑀭𑀡𑁂𑀢𑀺 𑀯𑀼𑀢𑁆𑀢𑀁 ‘‘𑀧𑀺𑀡𑁆𑀟𑀁 𑀓𑀭𑁂𑀬𑁆𑀬𑀸’’𑀢𑀺. 𑀅𑀦𑀼𑀕𑀢𑀸𑀢𑀺 𑀅𑀦𑀼𑀧𑀯𑀺𑀲𑀦𑀯𑀲𑁂𑀦 𑀕𑀢𑀸 𑀉𑀧𑀕𑀢𑀸. 𑀧𑀭𑀺𑀕𑁆𑀕𑀳𑀺𑀢𑀸𑀢𑀺 𑀧𑀭𑀺𑀢𑁄 𑀕𑀳𑀺𑀢𑀸 𑀲𑀫𑀦𑁆𑀢𑀢𑁄 𑀨𑀼𑀝𑁆𑀞𑀸.

𑀅𑀦𑁆𑀢𑀭𑁄 𑀘 𑀩𑀸𑀳𑀺𑀭𑁄 𑀘 𑀧𑀤𑁂𑀲𑁄, 𑀢𑁂𑀳𑀺 𑀲𑀳 𑀧𑀯𑀢𑁆𑀢𑀢𑀻𑀢𑀺 𑀲𑀦𑁆𑀢𑀭𑀩𑀸𑀳𑀺𑀭𑀸, 𑀦𑁆𑀳𑀸𑀦𑀺𑀬𑀧𑀺𑀡𑁆𑀟𑀺, ‘‘𑀲𑀫𑀦𑁆𑀢𑀭𑀩𑀸𑀳𑀺𑀭𑀸’’𑀢𑀺𑀧𑀺 𑀧𑀸𑀞𑁄, 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀯𑀲𑁂𑀦 𑀆𑀕𑀫𑁄. 𑀬𑀣𑀸𑀯𑀼𑀢𑁆𑀢𑁂𑀦 𑀧𑀭𑀺𑀕𑁆𑀕𑀳𑀺𑀢𑀢𑀸𑀓𑀸𑀭𑀡𑁂𑀦𑁂𑀯 𑀲𑀦𑁆𑀢𑀭𑀩𑀸𑀳𑀺𑀭𑁄 𑀦𑁆𑀳𑀸𑀦𑀺𑀬𑀧𑀺𑀡𑁆𑀟𑀺 𑀨𑀼𑀝𑀸 𑀉𑀤𑀓𑀲𑁆𑀦𑁂𑀳𑁂𑀦𑀸𑀢𑀺 𑀆𑀳 ‘‘𑀲𑀩𑁆𑀩𑀢𑁆𑀣𑀓𑀫𑁂𑀯 𑀉𑀤𑀓𑀲𑀺𑀦𑁂𑀳𑁂𑀦 𑀨𑀼𑀝𑀸’’𑀢𑀺. 𑀲𑀩𑁆𑀩𑀢𑁆𑀣 𑀧𑀯𑀢𑁆𑀢𑀦𑀁 𑀲𑀩𑁆𑀩𑀢𑁆𑀣𑀓𑀁, 𑀪𑀸𑀯𑀦𑀧𑀼𑀁𑀲𑀓𑀜𑁆𑀘𑁂𑀢𑀁, 𑀲𑀩𑁆𑀩𑀧𑀤𑁂𑀲𑁂 𑀳𑀼𑀢𑁆𑀯𑀸 𑀏𑀯 𑀨𑀼𑀝𑀸𑀢𑀺 𑀅𑀢𑁆𑀣𑁄. ‘‘𑀲𑀦𑁆𑀢𑀭𑀩𑀸𑀳𑀺𑀭𑀸 𑀨𑀼𑀝𑀸’’𑀢𑀺 𑀘 𑀇𑀫𑀺𑀦𑀸 𑀦𑁆𑀳𑀸𑀦𑀺𑀬𑀧𑀺𑀡𑁆𑀟𑀺𑀬𑀸 𑀲𑀩𑁆𑀩𑀲𑁄 𑀉𑀤𑀓𑁂𑀦 𑀢𑁂𑀫𑀺𑀢𑀪𑀸𑀯𑀫𑀸𑀳, ‘‘𑀦 𑀘 𑀧𑀕𑁆𑀖𑀭𑀡𑀻’’𑀢𑀺 𑀧𑀦 𑀇𑀫𑀺𑀦𑀸 𑀢𑀺𑀦𑁆𑀢𑀸𑀬𑀧𑀺 𑀢𑀸𑀬 𑀖𑀦𑀣𑀤𑁆𑀥𑀪𑀸𑀯𑀁. 𑀢𑁂𑀦𑀸𑀳 ‘‘𑀦 𑀘 𑀩𑀺𑀦𑁆𑀤𑀼𑀁 𑀩𑀺𑀦𑁆𑀤𑀼’’𑀦𑁆𑀢𑀺𑀆𑀤𑀺. 𑀉𑀤𑀓𑀲𑁆𑀲 𑀨𑀼𑀲𑀺𑀢𑀁 𑀨𑀼𑀲𑀺𑀢𑀁, ¶ 𑀦 𑀘 𑀧𑀕𑁆𑀖𑀭𑀡𑀻 𑀲𑀽𑀤𑀦𑀻𑀢𑀺 𑀅𑀢𑁆𑀣𑁄, ‘‘𑀩𑀺𑀦𑁆𑀤𑀼𑀁 𑀉𑀤𑀓𑀁’’ 𑀢𑀺𑀧𑀺 𑀓𑀢𑁆𑀣𑀘𑀺 𑀧𑀸𑀞𑁄, 𑀉𑀤𑀓𑀲𑀗𑁆𑀔𑀸𑀢𑀁 𑀩𑀺𑀦𑁆𑀤𑀼𑀦𑁆𑀢𑀺 𑀢𑀲𑁆𑀲𑀢𑁆𑀣𑁄. 𑀩𑀺𑀦𑁆𑀤𑀼𑀲𑀤𑁆𑀤𑁄 𑀳𑀺 ‘‘𑀩𑁆𑀬𑀸𑀮𑀫𑁆𑀩𑀫𑁆𑀩𑀼𑀥𑀭𑀩𑀺𑀦𑁆𑀤𑀽’’𑀢𑀺𑀆𑀤𑀻𑀲𑀼 𑀯𑀺𑀬 𑀥𑀸𑀭𑀸𑀯𑀬𑀯𑁂. 𑀏𑀯𑀁 𑀧𑀦 𑀅𑀧𑀕𑁆𑀖𑀭𑀡𑀢𑁄 𑀳𑀢𑁆𑀣𑁂𑀦𑀧𑀺 𑀤𑁆𑀯𑀻𑀳𑀺𑀧𑀺 𑀢𑀻𑀳𑀺𑀧𑀺 𑀅𑀗𑁆𑀕𑀼𑀮𑁂𑀳𑀺 𑀕𑀳𑁂𑀢𑀼𑀁, 𑀑𑀯𑀝𑁆𑀝𑀺𑀓𑀸𑀬 𑀯𑀸 𑀓𑀸𑀢𑀼𑀁 𑀲𑀓𑁆𑀓𑀸. 𑀬𑀤𑀺 𑀳𑀺 𑀲𑀸 𑀧𑀕𑁆𑀖𑀭𑀡𑀻 𑀅𑀲𑁆𑀲, 𑀏𑀯𑀁 𑀲𑀢𑀺 𑀲𑁆𑀦𑁂𑀳𑀯𑀺𑀕𑀫𑀦𑁂𑀦 𑀲𑀼𑀓𑁆𑀔𑀢𑁆𑀢𑀸 𑀣𑀤𑁆𑀥𑀸 𑀳𑀼𑀢𑁆𑀯𑀸 𑀢𑀣𑀸 𑀕𑀳𑁂𑀢𑀼𑀁, 𑀓𑀸𑀢𑀼𑀁 𑀯𑀸 𑀦 𑀲𑀓𑁆𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀑𑀯𑀝𑁆𑀝𑀺𑀓𑀸𑀬𑀸𑀢𑀺 𑀧𑀭𑀺𑀯𑀝𑁆𑀝𑀼𑀮𑀯𑀲𑁂𑀦, 𑀕𑀼𑀴𑀺𑀓𑀸𑀯𑀲𑁂𑀦 𑀲𑀸 𑀧𑀺𑀡𑁆𑀟𑀺 𑀓𑀸𑀢𑀼𑀁 𑀲𑀓𑁆𑀓𑀸𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑁨𑁨𑁯. 𑀢𑀸𑀳𑀺 𑀢𑀸𑀳𑀺 𑀉𑀤𑀓𑀲𑀺𑀭𑀸𑀳𑀺 𑀉𑀩𑁆𑀪𑀺𑀚𑁆𑀚𑀢𑀺 𑀉𑀤𑁆𑀥𑀁 𑀦𑀺𑀓𑁆𑀔𑀫𑀢𑀻𑀢𑀺 𑀉𑀩𑁆𑀪𑀺𑀤𑀁, 𑀢𑀸𑀤𑀺𑀲𑀁 𑀉𑀤𑀓𑀁 𑀬𑀲𑁆𑀲𑀸𑀢𑀺 𑀉𑀩𑁆𑀪𑀺𑀤𑁄𑀤𑀓𑁄, 𑀤-𑀓𑀸𑀭𑀲𑁆𑀲 𑀧𑀦 𑀢-𑀓𑀸𑀭𑁂 𑀓𑀢𑁂 𑀉𑀩𑁆𑀪𑀺𑀢𑁄𑀤𑀓𑁄, 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀩𑁆𑀪𑀺𑀦𑁆𑀦𑀉𑀤𑀓𑁄’’𑀢𑀺 𑀯𑀼𑀢𑁆𑀢𑀁, 𑀦𑀤𑀻𑀢𑀻𑀭𑁂 𑀔𑀢𑀓𑀽𑀧𑀓𑁄 𑀯𑀺𑀬 𑀉𑀩𑁆𑀪𑀺𑀚𑁆𑀚𑀦𑀓𑀉𑀤𑀓𑁄𑀢𑀺 𑀅𑀢𑁆𑀣𑁄. 𑀉𑀩𑁆𑀪𑀺𑀚𑁆𑀚𑀦𑀓𑀫𑁆𑀧𑀺 𑀉𑀤𑀓𑀁 𑀓𑀢𑁆𑀣𑀘𑀺 𑀳𑁂𑀝𑁆𑀞𑀸 𑀉𑀩𑁆𑀪𑀺𑀚𑁆𑀚𑀺𑀢𑁆𑀯𑀸 𑀥𑀸𑀭𑀸𑀯𑀲𑁂𑀦 𑀉𑀝𑁆𑀞𑀳𑀺𑀢𑁆𑀯𑀸 𑀩𑀳𑀺 𑀕𑀘𑁆𑀙𑀢𑀺, 𑀦 𑀢𑀁 𑀓𑁄𑀘𑀺 𑀅𑀦𑁆𑀢𑁄𑀬𑁂𑀯 𑀧𑀢𑀺𑀝𑁆𑀞𑀺𑀢𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺 𑀥𑀸𑀭𑀸𑀯𑀲𑁂𑀦 𑀉𑀝𑁆𑀞𑀳𑀦𑀢𑁄, 𑀇𑀥 𑀧𑀦 𑀯𑀸𑀮𑀺𑀓𑀸𑀢𑀝𑁂 𑀯𑀺𑀬 𑀉𑀤𑀓𑀭𑀳𑀤𑀲𑁆𑀲 𑀅𑀦𑁆𑀢𑁄𑀬𑁂𑀯 𑀉𑀩𑁆𑀪𑀺𑀚𑁆𑀚𑀺𑀢𑁆𑀯𑀸 𑀢𑀢𑁆𑀣𑁂𑀯 𑀢𑀺𑀝𑁆𑀞𑀢𑀺, 𑀦 𑀥𑀸𑀭𑀸𑀯𑀲𑁂𑀦 𑀉𑀝𑁆𑀞𑀳𑀺𑀢𑁆𑀯𑀸 𑀩𑀳𑀺 𑀕𑀘𑁆𑀙𑀢𑀻𑀢𑀺 ¶ 𑀯𑀺𑀜𑁆𑀜𑀸𑀬𑀢𑀺 𑀅𑀔𑁄𑀪𑀓𑀲𑁆𑀲 𑀲𑀦𑁆𑀦𑀺𑀲𑀺𑀦𑁆𑀦𑀲𑁆𑀲𑁂𑀯 𑀉𑀤𑀓𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀦 𑀳𑁂𑀝𑁆𑀞𑀸’’𑀢𑀺𑀆𑀤𑀺. 𑀳𑁂𑀝𑁆𑀞𑀸𑀢𑀺 𑀉𑀤𑀓𑀭𑀳𑀤𑀲𑁆𑀲 𑀳𑁂𑀝𑁆𑀞𑀸 𑀫𑀳𑀸𑀉𑀤𑀓𑀲𑀺𑀭𑀸, 𑀮𑁄𑀳𑀺𑀢𑀸𑀦𑀼𑀕𑀢𑀸 𑀮𑁄𑀳𑀺𑀢𑀲𑀺𑀭𑀸 𑀯𑀺𑀬 𑀉𑀤𑀓𑀸𑀦𑀼𑀕𑀢𑁄 𑀧𑀣𑀯𑀺𑀧𑀤𑁂𑀲𑁄 ‘‘𑀉𑀤𑀓𑀲𑀺𑀭𑀸’’𑀢𑀺 𑀯𑀼𑀘𑁆𑀘𑀢𑀺. 𑀉𑀕𑁆𑀕𑀘𑁆𑀙𑀦𑀓𑀉𑀤𑀓𑁄𑀢𑀺 𑀥𑀸𑀭𑀸𑀯𑀲𑁂𑀦 𑀉𑀝𑁆𑀞𑀳𑀦𑀓𑀉𑀤𑀓𑁄. 𑀅𑀦𑁆𑀢𑁄𑀬𑁂𑀯𑀸𑀢𑀺 𑀉𑀤𑀓𑀭𑀳𑀤𑀲𑁆𑀲 𑀅𑀦𑁆𑀢𑁄 𑀲𑀫𑀢𑀮𑀧𑀤𑁂𑀲𑁂 𑀏𑀯. 𑀉𑀩𑁆𑀪𑀺𑀚𑁆𑀚𑀦𑀓𑀉𑀤𑀓𑁄𑀢𑀺 𑀉𑀩𑁆𑀪𑀺𑀚𑁆𑀚𑀺𑀢𑁆𑀯𑀸 𑀢𑀢𑁆𑀣𑁂𑀯 𑀢𑀺𑀝𑁆𑀞𑀦𑀓𑀉𑀤𑀓𑁄. 𑀆𑀕𑀫𑀦𑀫𑀕𑁆𑀕𑁄𑀢𑀺 𑀩𑀸𑀳𑀺𑀭𑀢𑁄 𑀉𑀤𑀓𑀭𑀳𑀤𑀸𑀪𑀺𑀫𑀼𑀔𑀁 𑀆𑀕𑀫𑀦𑀫𑀕𑁆𑀕𑁄. 𑀓𑀸𑀮𑁂𑀦 𑀓𑀸𑀮𑀦𑁆𑀢𑀺 𑀭𑀼𑀴𑁆𑀳𑀻𑀧𑀤𑀁 ‘‘𑀏𑀓𑁄 𑀏𑀓𑀸𑀬𑀸’’𑀢𑀺𑀆𑀤𑀺 (𑀧𑀸𑀭𑀸. 𑁪𑁪𑁩, 𑁪𑁪𑁪, 𑁪𑁫𑁨) 𑀯𑀺𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀓𑀸𑀮𑁂 𑀓𑀸𑀮𑁂’’𑀢𑀺. 𑀅𑀦𑁆𑀯𑀤𑁆𑀥𑀫𑀸𑀲𑀦𑁆𑀢𑀺 𑀏𑀢𑁆𑀣 𑀅𑀦𑀼𑀲𑀤𑁆𑀤𑁄 𑀩𑁆𑀬𑀸𑀧𑀦𑁂. 𑀯𑀲𑁆𑀲𑀸𑀦𑀲𑁆𑀲 𑀅𑀤𑁆𑀥𑀫𑀸𑀲𑀁 𑀅𑀤𑁆𑀥𑀫𑀸𑀲𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁 𑀅𑀦𑀼𑀤𑀲𑀸𑀳𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀯𑀼𑀝𑁆𑀞𑀺𑀦𑁆𑀢𑀺 𑀯𑀲𑁆𑀲𑀦𑀁. 𑀅𑀦𑀼𑀧𑁆𑀧𑀯𑀘𑁆𑀙𑁂𑀬𑁆𑀬𑀸𑀢𑀺 𑀦 𑀉𑀧𑀯𑀘𑁆𑀙𑁂𑀬𑁆𑀬. 𑀯𑀲𑁆𑀲𑀲𑀤𑁆𑀤𑀢𑁄 𑀘𑀲𑁆𑀲 𑀲𑀺𑀤𑁆𑀥𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀦 𑀯𑀲𑁆𑀲𑁂𑀬𑁆𑀬𑀸’’𑀢𑀺 𑀇𑀫𑀺𑀦𑀸.

‘‘𑀲𑀻𑀢𑀸 ¶ 𑀯𑀸𑀭𑀺𑀥𑀸𑀭𑀸’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀧𑀤𑀲𑁆𑀲 ‘‘𑀲𑀻𑀢𑀁 𑀥𑀸𑀭’’𑀦𑁆𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀦 𑀅𑀢𑁆𑀣𑀯𑀘𑀦𑀁 𑀥𑀸𑀭𑀲𑀤𑁆𑀤𑀲𑁆𑀲 𑀤𑁆𑀯𑀺𑀮𑀺𑀗𑁆𑀕𑀺𑀓𑀪𑀸𑀯𑀯𑀺𑀜𑁆𑀜𑀸𑀧𑀦𑀢𑁆𑀣𑀁. 𑀲𑀻𑀢𑀦𑁆𑀢𑀺 𑀔𑁄𑀪𑀦𑀸𑀪𑀸𑀯𑁂𑀦 𑀲𑀻𑀢𑀮𑀁, 𑀧𑀼𑀭𑀸𑀡𑀧𑀡𑁆𑀡𑀢𑀺𑀡𑀓𑀝𑁆𑀞𑀸𑀤𑀺𑀲𑀁𑀓𑀺𑀡𑁆𑀡𑀸𑀪𑀸𑀯𑁂𑀦 𑀯𑀸 𑀲𑁂𑀢𑀁 𑀧𑀭𑀺𑀲𑀼𑀤𑁆𑀥𑀁. 𑀲𑁂𑀢𑀁 𑀲𑀻𑀢𑀦𑁆𑀢𑀺 𑀳𑀺 𑀧𑀭𑀺𑀬𑀸𑀬𑁄. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀉𑀩𑁆𑀪𑀺𑀤𑁄𑀤𑀓𑁄𑀬𑁂𑀯 𑀭𑀳𑀤𑁄 𑀕𑀳𑀺𑀢𑁄, 𑀦 𑀇𑀢𑀭𑁂𑀢𑀺 𑀅𑀦𑀼𑀬𑁄𑀕𑀫𑀧𑀦𑁂𑀢𑀺 ‘‘𑀳𑁂𑀝𑁆𑀞𑀸 𑀉𑀕𑁆𑀕𑀘𑁆𑀙𑀦𑀉𑀤𑀓𑀜𑁆𑀳𑀻’’𑀢𑀺𑀆𑀤𑀺𑀦𑀸. 𑀉𑀕𑁆𑀕𑀦𑁆𑀢𑁆𑀯𑀸 𑀉𑀕𑁆𑀕𑀦𑁆𑀢𑁆𑀯𑀸 𑀪𑀺𑀚𑁆𑀚𑀦𑁆𑀢𑀦𑁆𑀢𑀺 𑀉𑀝𑁆𑀞𑀳𑀺𑀢𑁆𑀯𑀸 𑀉𑀝𑁆𑀞𑀳𑀺𑀢𑁆𑀯𑀸 𑀥𑀸𑀭𑀸𑀓𑀺𑀭𑀡𑀯𑀲𑁂𑀦 𑀉𑀩𑁆𑀪𑀺𑀚𑁆𑀚𑀦𑁆𑀢𑀁, 𑀯𑀺𑀦𑀲𑁆𑀲𑀦𑁆𑀢𑀁 𑀯𑀸. 𑀔𑁄𑀪𑁂𑀢𑀻𑀢𑀺 𑀆𑀮𑁄𑀴𑁂𑀢𑀺. 𑀯𑀼𑀝𑁆𑀞𑀻𑀢𑀺 𑀯𑀲𑁆𑀲𑀦𑀁. 𑀥𑀸𑀭𑀸𑀦𑀺𑀧𑀸𑀢𑀧𑀼𑀩𑁆𑀩𑀼𑀴𑀓𑁂𑀳𑀻𑀢𑀺 𑀉𑀤𑀓𑀥𑀸𑀭𑀸𑀦𑀺𑀧𑀸𑀢𑁂𑀳𑀺 𑀘 𑀢𑀢𑁄𑀬𑁂𑀯 𑀉𑀝𑁆𑀞𑀺𑀢𑀉𑀤𑀓𑀧𑀼𑀩𑁆𑀩𑀼𑀴𑀓𑀲𑀗𑁆𑀔𑀸𑀢𑁂𑀳𑀺 𑀨𑁂𑀡𑀧𑀝𑀮𑁂𑀳𑀺 𑀘. 𑀏𑀯𑀁 𑀬𑀣𑀸𑀓𑁆𑀓𑀫𑀁 𑀢𑀺𑀡𑁆𑀡𑀫𑁆𑀧𑀺 𑀭𑀳𑀤𑀸𑀦𑀫𑀕𑀳𑁂𑀢𑀩𑁆𑀩𑀢𑀁 𑀯𑀢𑁆𑀯𑀸 𑀉𑀩𑁆𑀪𑀺𑀤𑁄𑀤𑀓𑀲𑁆𑀲𑁂𑀯 𑀕𑀳𑁂𑀢𑀩𑁆𑀩𑀢𑀁 𑀯𑀤𑀢𑀺 ‘‘𑀲𑀦𑁆𑀦𑀺𑀲𑀺𑀦𑁆𑀦𑀫𑁂𑀯𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀲𑀦𑁆𑀦𑀺𑀲𑀺𑀦𑁆𑀦𑀫𑁂𑀯𑀸𑀢𑀺 𑀲𑀫𑁆𑀫𑀸, 𑀲𑀫𑀁 𑀯𑀸 𑀦𑀺𑀲𑀺𑀦𑁆𑀦𑀫𑁂𑀯, 𑀅𑀧𑀭𑀺𑀓𑁆𑀔𑁄𑀪𑀢𑀸𑀬 𑀦𑀺𑀘𑁆𑀘𑀮𑀫𑁂𑀯, 𑀲𑀼𑀧𑁆𑀧𑀲𑀦𑁆𑀦𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑁆𑀥𑀺𑀦𑀺𑀫𑁆𑀫𑀺𑀢𑀫𑀺𑀯𑀸𑀢𑀺 𑀇𑀤𑁆𑀥𑀺𑀫𑀢𑀸 𑀇𑀤𑁆𑀥𑀺𑀬𑀸 𑀢𑀣𑀸 𑀦𑀺𑀫𑁆𑀫𑀺𑀢𑀁 𑀇𑀯. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀉𑀧𑀫𑁄𑀧𑀫𑁂𑀬𑁆𑀬𑀯𑀘𑀦𑁂. 𑀲𑁂𑀲𑀦𑁆𑀢𑀺 ‘‘𑀅𑀪𑀺𑀲𑀦𑁆𑀤𑁂𑀢𑀻’’𑀢𑀺𑀆𑀤𑀺𑀓𑀁.

𑀢𑀢𑀺𑀬𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑁨𑁩𑁧. ‘‘𑀉𑀧𑁆𑀧𑀮𑀺𑀦𑀻’’𑀢𑀺𑀆𑀤𑀺 𑀕𑀘𑁆𑀙𑀲𑁆𑀲𑀧𑀺 𑀯𑀦𑀲𑁆𑀲𑀧𑀺 𑀅𑀥𑀺𑀯𑀘𑀦𑀁. 𑀇𑀥 𑀧𑀦 ‘‘𑀬𑀸𑀯 𑀅𑀕𑁆𑀕𑀸, 𑀬𑀸𑀯 𑀘 𑀫𑀽𑀮𑀸’’𑀢𑀺 𑀯𑀘𑀦𑀬𑁄𑀕𑁂𑀦 ‘‘𑀅𑀧𑁆𑀧𑁂𑀓𑀘𑁆𑀘𑀸𑀦𑀻’’𑀢𑀺𑀆𑀤𑀺𑀦𑀸 𑀉𑀧𑁆𑀧𑀮𑀕𑀘𑁆𑀙𑀸𑀤𑀻𑀦𑀫𑁂𑀯 𑀕𑀳𑁂𑀢𑀩𑁆𑀩𑀢𑀸𑀬 𑀯𑀦𑀫𑁂𑀯𑀸𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 ‘‘𑀉𑀧𑁆𑀧𑀮𑀸𑀦𑀻𑀢𑀺 𑀉𑀧𑁆𑀧𑀮𑀕𑀘𑁆𑀙𑀸𑀦𑀺. 𑀏𑀢𑁆𑀣𑀸𑀢𑀺 𑀉𑀧𑁆𑀧𑀮𑀯𑀦𑁂’’𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀯𑀬𑀯𑁂𑀦 𑀳𑀺 𑀲𑀫𑀼𑀤𑀸𑀬𑀲𑁆𑀲 𑀦𑀺𑀩𑁆𑀩𑀘𑀦𑀁 𑀓𑀢𑀁. 𑀏𑀓𑀜𑁆𑀳𑀺 𑀉𑀧𑁆𑀧𑀮𑀕𑀘𑁆𑀙𑀸𑀤𑀺 ¶ 𑀉𑀧𑁆𑀧𑀮𑀸𑀤𑀺𑀬𑁂𑀯, 𑀘𑀢𑀼𑀧𑀜𑁆𑀘𑀫𑀢𑁆𑀢𑀫𑁆𑀧𑀺 𑀧𑀦 𑀉𑀧𑁆𑀧𑀮𑀸𑀤𑀺𑀯𑀦𑀦𑁆𑀢𑀺 𑀯𑁄𑀳𑀭𑀻𑀬𑀢𑀺, 𑀲𑀸𑀭𑀢𑁆𑀣𑀤𑀻𑀧𑀦𑀺𑀬𑀁 𑀧𑀦 𑀚𑀮𑀸𑀲𑀬𑁄𑀧𑀺 𑀉𑀧𑁆𑀧𑀮𑀺𑀦𑀺𑀆𑀤𑀺𑀪𑀸𑀯𑁂𑀦 𑀯𑀼𑀢𑁆𑀢𑁄. 𑀏𑀢𑁆𑀣 𑀘𑀸𑀢𑀺 𑀏𑀢𑀲𑁆𑀫𑀺𑀁 𑀧𑀤𑀢𑁆𑀢𑀬𑁂, 𑀏𑀢𑁂𑀲𑀼 𑀯𑀸 𑀢𑀻𑀲𑀼 𑀉𑀧𑁆𑀧𑀮𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀲𑀗𑁆𑀔𑀸𑀢𑁂𑀲𑀼 𑀅𑀢𑁆𑀣𑁂𑀲𑀼. ‘‘𑀲𑁂𑀢𑀭𑀢𑁆𑀢𑀦𑀻𑀮𑁂𑀲𑀽’’𑀢𑀺 𑀉𑀧𑁆𑀧𑀮𑀫𑁂𑀯 𑀯𑀼𑀢𑁆𑀢𑀁, 𑀲𑁂𑀢𑀼𑀧𑁆𑀧𑀮𑀭𑀢𑁆𑀢𑀼𑀧𑁆𑀧𑀮𑀦𑀻𑀮𑀼𑀧𑁆𑀧𑀮𑁂𑀲𑀽𑀢𑀺 𑀅𑀢𑁆𑀣𑁄. 𑀬𑀁 𑀓𑀺𑀜𑁆𑀘𑀺 𑀉𑀧𑁆𑀧𑀮𑀁 𑀉𑀧𑁆𑀧𑀮𑀫𑁂𑀯 𑀉𑀧𑁆𑀧𑀮𑀲𑀤𑁆𑀤𑀲𑁆𑀲 𑀲𑀸𑀫𑀜𑁆𑀜𑀦𑀸𑀫𑀯𑀲𑁂𑀦 𑀢𑁂𑀲𑀼 𑀲𑀩𑁆𑀩𑁂𑀲𑀼𑀧𑀺 𑀧𑀯𑀢𑁆𑀢𑀦𑀢𑁄. 𑀲𑀢𑀧𑀢𑁆𑀢𑀦𑁆𑀢𑀺 𑀏𑀢𑁆𑀣 𑀲𑀢𑀲𑀤𑁆𑀤𑁄 𑀩𑀳𑀼𑀧𑀭𑀺𑀬𑀸𑀬𑁄 ‘‘𑀲𑀢𑀕𑁆𑀖𑀻 𑀲𑀢𑀭𑀁𑀲𑀺 𑀲𑀽𑀭𑀺𑀬𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀅𑀦𑁂𑀓𑀲𑀗𑁆𑀔𑁆𑀬𑀸𑀪𑀸𑀯𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀦𑁂𑀓𑀧𑀢𑁆𑀢𑀲𑁆𑀲𑀸𑀧𑀺 𑀧𑀤𑀼𑀫𑀪𑀸𑀯𑁂 𑀲𑀗𑁆𑀕𑀳𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀧𑀢𑁆𑀢𑀦𑁆𑀢𑀺 𑀘 𑀧𑀼𑀧𑁆𑀨𑀤𑀮𑀫𑀥𑀺𑀧𑁆𑀧𑁂𑀢𑀁. 𑀯𑀡𑁆𑀡𑀦𑀺𑀬𑀫𑁂𑀦 𑀲𑁂𑀢𑀁 𑀧𑀤𑀼𑀫𑀁, 𑀭𑀢𑁆𑀢𑀁 ¶ 𑀧𑀼𑀡𑁆𑀟𑀭𑀻𑀓𑀦𑁆𑀢𑀺 𑀲𑀸𑀲𑀦𑀯𑁄𑀳𑀸𑀭𑁄, 𑀮𑁄𑀓𑁂 𑀧𑀦 ‘‘𑀭𑀢𑁆𑀢𑀁 𑀧𑀤𑀼𑀫𑀁, 𑀲𑁂𑀢𑀁 𑀧𑀼𑀡𑁆𑀟𑀭𑀻𑀓’’𑀦𑁆𑀢𑀺 𑀯𑀤𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀧𑀼𑀡𑁆𑀟𑀭𑀻𑀓𑀁 𑀲𑀺𑀢𑀁 𑀭𑀢𑁆𑀢𑀁, 𑀓𑁄𑀓𑀦𑀤𑀁 𑀓𑁄𑀓𑀸𑀲𑀓𑁄’’𑀢𑀺. 𑀭𑀢𑁆𑀢𑀯𑀡𑁆𑀡𑀢𑀸𑀬 𑀳𑀺 𑀓𑁄𑀓𑀦𑀸𑀫𑀓𑀸𑀦𑀁 𑀲𑀼𑀦𑀔𑀸𑀦𑀁 𑀦𑀸𑀤𑀬𑀢𑁄 𑀲𑀤𑁆𑀤𑀸𑀧𑀬𑀢𑁄, 𑀢𑁂𑀳𑀺 𑀘 𑀅𑀲𑀺𑀢𑀩𑁆𑀩𑀢𑁄 ‘‘𑀓𑁄𑀓𑀦𑀤𑀁, 𑀓𑁄𑀓𑀸𑀲𑀓𑁄’’𑀢𑀺 𑀘 𑀧𑀤𑀼𑀫𑀁 𑀯𑀼𑀘𑁆𑀘𑀢𑀺. 𑀬𑀣𑀸𑀳 ‘‘𑀧𑀤𑁆𑀫𑀁 𑀬𑀣𑀸 𑀓𑁄𑀓𑀦𑀤𑀁 𑀲𑀼𑀕𑀦𑁆𑀥’’𑀦𑁆𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄 𑀉𑀤𑀓𑀁 𑀧𑀸𑀢𑀺, 𑀉𑀤𑀓𑁂 𑀯𑀸 𑀧𑁆𑀮𑀯𑀢𑀻𑀢𑀺 𑀉𑀧𑁆𑀧𑀮𑀁. 𑀧𑀗𑁆𑀓𑁂 𑀤𑀯𑀢𑀺 𑀕𑀘𑁆𑀙𑀢𑀺, 𑀧𑀓𑀸𑀭𑁂𑀦 𑀯𑀸 𑀤𑀯𑀢𑀺 𑀯𑀺𑀭𑀼𑀳𑀢𑀻𑀢𑀺 𑀧𑀤𑀼𑀫𑀁. 𑀧𑀡𑁆𑀟𑀭𑀁 𑀯𑀡𑁆𑀡𑀫𑀲𑁆𑀲, 𑀫𑀳𑀦𑁆𑀢𑀢𑀸𑀬 𑀯𑀸 𑀫𑀼𑀟𑀺𑀢𑀩𑁆𑀩𑀁𑀔𑀡𑁆𑀟𑁂𑀢𑀩𑁆𑀩𑀦𑁆𑀢𑀺 𑀧𑀼𑀡𑁆𑀟𑀭𑀻𑀓𑀁 𑀫-𑀓𑀸𑀭𑀲𑁆𑀲 𑀧-𑀓𑀸𑀭𑀸𑀤𑀺𑀯𑀲𑁂𑀦. 𑀫𑀼𑀟𑀺𑀲𑀤𑁆𑀤𑀜𑁆𑀳𑀺 𑀫𑀼𑀟𑀭𑀺𑀲𑀤𑁆𑀤𑀁 𑀯𑀸 𑀔𑀡𑁆𑀟𑀦𑀢𑁆𑀣𑀫𑀺𑀘𑁆𑀙𑀦𑁆𑀢𑀺 𑀲𑀤𑁆𑀤𑀯𑀺𑀤𑀽, 𑀲𑀤𑁆𑀤𑀲𑀢𑁆𑀣𑀢𑁄 𑀘𑁂𑀢𑁆𑀣 𑀧𑀤𑀲𑀺𑀤𑁆𑀥𑀺. 𑀬𑀸𑀯 𑀅𑀕𑁆𑀕𑀸, 𑀬𑀸𑀯 𑀘 𑀫𑀽𑀮𑀸 𑀉𑀤𑀓𑁂𑀦 𑀅𑀪𑀺𑀲𑀦𑁆𑀤𑀦𑀸𑀤𑀺𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀧𑀸𑀴𑀺𑀬𑀁 ‘‘𑀉𑀤𑀓𑀸𑀦𑀼𑀕𑁆𑀕𑀢𑀸𑀦𑀻’’𑀢𑀺 𑀯𑀘𑀦𑀁, 𑀢𑀲𑁆𑀫𑀸 𑀉𑀤𑀓𑀢𑁄 𑀦 𑀉𑀕𑁆𑀕𑀢𑀸𑀦𑀺𑀘𑁆𑀘𑁂𑀯 𑀅𑀢𑁆𑀣𑁄, 𑀦 𑀢𑀼 𑀉𑀤𑀓𑁂 𑀅𑀦𑀼𑀭𑀽𑀧𑀕𑀢𑀸𑀦𑀻𑀢𑀺 𑀆𑀳 ‘‘𑀉𑀤𑀓𑀸…𑀧𑁂… 𑀕𑀢𑀸𑀦𑀻’’𑀢𑀺. 𑀇𑀥 𑀧𑀦 𑀉𑀧𑁆𑀧𑀮𑀸𑀤𑀻𑀦𑀺 𑀯𑀺𑀬 𑀓𑀭𑀚𑀓𑀸𑀬𑁄, 𑀉𑀤𑀓𑀁 𑀯𑀺𑀬 𑀢𑀢𑀺𑀬𑀚𑁆𑀛𑀸𑀦𑀲𑀼𑀔𑀁 𑀤𑀝𑁆𑀞𑀩𑁆𑀩𑀁.

𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑀣𑀸𑀯𑀡𑁆𑀡𑀦𑀸

𑁨𑁩𑁩. 𑀬𑀲𑁆𑀫𑀸 𑀧𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀫𑁂𑀯 ‘‘𑀘𑁂𑀢𑀲𑀸’’𑀢𑀺 𑀯𑀼𑀢𑁆𑀢𑀁, 𑀢𑀜𑁆𑀘 𑀭𑀸𑀕𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀫𑀮𑀸𑀧𑀕𑀫𑀢𑁄 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁 𑀦𑀺𑀫𑁆𑀫𑀮𑀁, 𑀢𑀲𑁆𑀫𑀸 𑀉𑀧𑀓𑁆𑀓𑀺𑀮𑁂𑀲𑀯𑀺𑀕𑀫𑀦𑀫𑁂𑀯 𑀧𑀭𑀺𑀲𑀼𑀤𑁆𑀥𑀪𑀸𑀯𑁄𑀢𑀺 𑀆𑀳 ‘‘𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀝𑁆𑀞𑁂𑀦 𑀧𑀭𑀺𑀲𑀼𑀤𑁆𑀥’’𑀦𑁆𑀢𑀺. 𑀬𑀲𑁆𑀫𑀸 𑀘 𑀧𑀭𑀺𑀲𑀼𑀤𑁆𑀥𑀲𑁆𑀲𑁂𑀯 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀧𑀯𑀢𑁆𑀢𑀺𑀯𑀺𑀲𑁂𑀲𑁄 𑀧𑀭𑀺𑀬𑁄𑀤𑀸𑀢𑀢𑀸 𑀲𑀼𑀤𑁆𑀥𑀦𑁆𑀢𑀲𑀼𑀯𑀡𑁆𑀡𑀲𑁆𑀲 𑀦𑀺𑀖𑀁𑀲𑀦𑁂𑀦 𑀧𑀪𑀲𑁆𑀲𑀭𑀢𑀸 𑀯𑀺𑀬, 𑀢𑀲𑁆𑀫𑀸 𑀧𑀪𑀲𑁆𑀲𑀭𑀢𑀸𑀬𑁂𑀯 𑀧𑀭𑀺𑀬𑁄𑀤𑀸𑀢𑀢𑀸𑀢𑀺 𑀆𑀳 ‘‘𑀧𑀪𑀲𑁆𑀲𑀭𑀝𑁆𑀞𑁂𑀦 𑀧𑀭𑀺𑀬𑁄𑀤𑀸𑀢’’𑀦𑁆𑀢𑀺. 𑀯𑀺𑀚𑁆𑀚𑀼 𑀯𑀺𑀬 𑀧𑀪𑀸𑀬 𑀇𑀢𑁄 𑀘𑀺𑀢𑁄 𑀘 𑀦𑀺𑀘𑁆𑀙𑀭𑀡𑀁 𑀧𑀪𑀲𑁆𑀲𑀭𑀁 𑀬𑀣𑀸 ‘‘𑀆𑀪𑀲𑁆𑀲𑀭𑀸’’𑀢𑀺. 𑀑𑀤𑀸𑀢𑁂𑀦 𑀯𑀢𑁆𑀣𑁂𑀦𑀸𑀢𑀺 𑀏𑀢𑁆𑀣 ‘‘𑀑𑀤𑀸𑀢𑁂𑀦𑀸’’𑀢𑀺 𑀕𑀼𑀡𑀯𑀘𑀦𑀁 𑀲𑀦𑁆𑀥𑀸𑀬 ‘‘𑀑𑀤𑀸𑀢𑁂𑀦…𑀧𑁂… 𑀇𑀤’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀢𑀼𑀨𑀭𑀡𑀢𑁆𑀣𑀦𑁆𑀢𑀺 𑀉𑀡𑁆𑀳𑀲𑁆𑀲 𑀉𑀢𑀼𑀦𑁄 𑀨𑀭𑀡𑀤𑀲𑁆𑀲𑀦𑀢𑁆𑀣𑀁. 𑀓𑀲𑁆𑀫𑀸𑀢𑀺 𑀆𑀳 ‘‘𑀓𑀺𑀮𑀺𑀝𑁆𑀞𑀯𑀢𑁆𑀣𑁂𑀦𑀸’’𑀢𑀺𑀆𑀤𑀺. 𑀉𑀢𑀼𑀨𑀭𑀡𑀁 𑀦 𑀳𑁄𑀢𑀻𑀢𑀺 𑀑𑀤𑀸𑀢𑀯𑀢𑁆𑀣𑁂𑀦 𑀯𑀺𑀬 𑀲𑀯𑀺𑀲𑁂𑀲𑀁 𑀉𑀢𑀼𑀨𑀭𑀡𑀁 𑀦 𑀳𑁄𑀢𑀺, 𑀅𑀧𑁆𑀧𑀓𑀫𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 ¶ . 𑀢𑁂𑀦𑀸𑀳 ‘‘𑀢𑀗𑁆𑀔𑀡…𑀧𑁂… 𑀩𑀮𑀯𑀁 𑀳𑁄𑀢𑀻’’𑀢𑀺. ‘‘𑀢𑀗𑁆𑀔𑀡𑀥𑁄𑀢𑀧𑀭𑀺𑀲𑀼𑀤𑁆𑀥𑁂𑀦𑀸’’𑀢𑀺 𑀘 𑀏𑀢𑁂𑀦 𑀑𑀤𑀸𑀢𑀲𑀤𑁆𑀤𑁄 𑀏𑀢𑁆𑀣 𑀧𑀭𑀺𑀲𑀼𑀤𑁆𑀥𑀯𑀘𑀦𑁄 𑀏𑀯 ‘‘𑀕𑀺𑀳𑀻 𑀑𑀤𑀸𑀢𑀯𑀢𑁆𑀣𑀯𑀲𑀦𑁄’’𑀢𑀺𑀆𑀤𑀻𑀲𑀼 𑀯𑀺𑀬 ¶ , 𑀦 𑀲𑁂𑀢𑀯𑀘𑀦𑁄 𑀬𑁂𑀦 𑀓𑁂𑀦𑀘𑀺 𑀢𑀗𑁆𑀔𑀡𑀥𑁄𑀢𑀧𑀭𑀺𑀲𑀼𑀤𑁆𑀥𑁂𑀦𑁂𑀯 𑀉𑀢𑀼𑀨𑀭𑀡𑀲𑀫𑁆𑀪𑀯𑀢𑁄𑀢𑀺 𑀤𑀲𑁆𑀲𑁂𑀢𑀺.

𑀦𑀦𑀼 𑀘 𑀧𑀸𑀴𑀺𑀬𑀁 ‘‘𑀦𑀸𑀲𑁆𑀲 𑀓𑀺𑀜𑁆𑀘𑀺 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀑𑀤𑀸𑀢𑁂𑀦 𑀯𑀢𑁆𑀣𑁂𑀦 𑀅𑀨𑀼𑀝𑀁 𑀅𑀲𑁆𑀲𑀸’’𑀢𑀺 𑀓𑀸𑀬𑀲𑁆𑀲 𑀑𑀤𑀸𑀢𑀯𑀢𑁆𑀣𑀨𑀭𑀡𑀁 𑀯𑀼𑀢𑁆𑀢𑀁, 𑀦 𑀧𑀦 𑀯𑀢𑁆𑀣𑀲𑁆𑀲 𑀉𑀢𑀼𑀨𑀭𑀡𑀁, 𑀅𑀣 𑀓𑀲𑁆𑀫𑀸 𑀉𑀢𑀼𑀨𑀭𑀡𑀁 𑀇𑀥 𑀯𑀼𑀢𑁆𑀢𑀦𑁆𑀢𑀺 𑀅𑀦𑀼𑀬𑁄𑀕𑁂𑀦𑀸𑀳 ‘‘𑀇𑀫𑀺𑀲𑁆𑀲𑀸𑀬 𑀳𑀻’’𑀢𑀺𑀆𑀤𑀺. 𑀬𑀲𑁆𑀫𑀸 𑀯𑀢𑁆𑀣𑀁 𑀯𑀺𑀬 𑀓𑀭𑀚𑀓𑀸𑀬𑁄, 𑀉𑀢𑀼𑀨𑀭𑀡𑀁 𑀯𑀺𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀼𑀔𑀁, 𑀢𑀲𑁆𑀫𑀸 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀏𑀢𑁂𑀦 𑀘 𑀑𑀤𑀸𑀢𑁂𑀦 𑀯𑀢𑁆𑀣𑁂𑀦 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲 𑀨𑀭𑀡𑀸𑀲𑀫𑁆𑀪𑀯𑀢𑁄, 𑀉𑀧𑀫𑁂𑀬𑁆𑀬𑁂𑀦 𑀘 𑀅𑀬𑀼𑀢𑁆𑀢𑀢𑁆𑀢𑀸 𑀓𑀸𑀬𑀕𑁆𑀕𑀳𑀡𑁂𑀦 𑀢𑀦𑁆𑀦𑀺𑀲𑁆𑀲𑀺𑀢𑀯𑀢𑁆𑀣𑀁 𑀕𑀳𑁂𑀢𑀩𑁆𑀩𑀁, 𑀯𑀢𑁆𑀣𑀕𑁆𑀕𑀳𑀡𑁂𑀦 𑀘 𑀢𑀧𑁆𑀧𑀘𑁆𑀘𑀬𑀁 𑀉𑀢𑀼𑀨𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀦𑁂𑀬𑁆𑀬𑀢𑁆𑀣𑀢𑁄 𑀳𑀺 𑀅𑀬𑀁 𑀉𑀧𑀫𑀸 𑀯𑀼𑀢𑁆𑀢𑀸. 𑀯𑀺𑀘𑀺𑀢𑁆𑀭𑀤𑁂𑀲𑀦𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄𑀢𑀺. 𑀬𑁄𑀕𑀺𑀦𑁄 𑀳𑀺 𑀓𑀭𑀚𑀓𑀸𑀬𑁄 𑀯𑀢𑁆𑀣𑀁 𑀯𑀺𑀬 𑀤𑀝𑁆𑀞𑀩𑁆𑀩𑁄 𑀉𑀢𑀼𑀨𑀭𑀡𑀲𑀤𑀺𑀲𑁂𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀼𑀔𑁂𑀦 𑀨𑀭𑀺𑀢𑀩𑁆𑀩𑀢𑁆𑀢𑀸, 𑀉𑀢𑀼𑀨𑀭𑀡𑀁 𑀯𑀺𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀼𑀔𑀁 𑀯𑀢𑁆𑀣𑀲𑁆𑀲 𑀯𑀺𑀬 𑀢𑁂𑀦 𑀓𑀭𑀚𑀓𑀸𑀬𑀲𑁆𑀲 𑀨𑀭𑀡𑀢𑁄, 𑀧𑀼𑀭𑀺𑀲𑀲𑁆𑀲 𑀲𑀭𑀻𑀭𑀁 𑀯𑀺𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀉𑀢𑀼𑀨𑀭𑀡𑀝𑁆𑀞𑀸𑀦𑀺𑀬𑀲𑁆𑀲 𑀲𑀼𑀔𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀇𑀤𑀜𑁆𑀳𑀺 𑀬𑀣𑀸𑀯𑀼𑀢𑁆𑀢𑀯𑀘𑀦𑀲𑁆𑀲 𑀕𑀼𑀡𑀤𑀲𑁆𑀲𑀦𑀁. 𑀏𑀢𑁆𑀣 𑀘 𑀧𑀸𑀴𑀺𑀬𑀁 ‘‘𑀧𑀭𑀺𑀲𑀼𑀤𑁆𑀥𑁂𑀦 𑀘𑁂𑀢𑀲𑀸’’𑀢𑀺 𑀘𑁂𑀢𑁄𑀕𑀳𑀡𑁂𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀼𑀔𑀁 𑀪𑀕𑀯𑀢𑀸 𑀯𑀼𑀢𑁆𑀢𑀦𑁆𑀢𑀺 𑀜𑀸𑀧𑁂𑀢𑀼𑀁 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀼𑀔𑀁, 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀼𑀔𑁂𑀦𑀸’’𑀢𑀺 𑀘 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀦𑀼 𑀘 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀼𑀔𑀁 𑀦𑀸𑀫 𑀲𑀸𑀢𑀮𑀓𑁆𑀔𑀡𑀁 𑀦𑀢𑁆𑀣𑀻𑀢𑀺? 𑀲𑀘𑁆𑀘𑀁, 𑀲𑀦𑁆𑀢𑀲𑀪𑀸𑀯𑀢𑁆𑀢𑀸 𑀧𑀦𑁂𑀢𑁆𑀣 𑀉𑀧𑁂𑀓𑁆𑀔𑀸𑀬𑁂𑀯 ‘‘𑀲𑀼𑀔’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀦 𑀯𑀼𑀢𑁆𑀢𑀁 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 ‘‘𑀉𑀧𑁂𑀓𑁆𑀔𑀸 𑀧𑀦 𑀲𑀦𑁆𑀢𑀢𑁆𑀢𑀸, 𑀲𑀼𑀔𑀫𑀺𑀘𑁆𑀘𑁂𑀯 𑀪𑀸𑀲𑀺𑀢𑀸’’𑀢𑀺 (𑀯𑀺𑀪. 𑀅𑀝𑁆𑀞. 𑁨𑁩𑁨; 𑀯𑀺𑀲𑀼𑀤𑁆𑀥𑀺. 𑁨.𑁬𑁪𑁪; 𑀫𑀳𑀸𑀦𑀺. 𑀅𑀝𑁆𑀞. 𑁨𑁭; 𑀧𑀝𑀺. 𑀫. 𑀅𑀝𑁆𑀞. 𑁧.𑁧𑁦𑁫).

𑀏𑀢𑁆𑀢𑀸𑀯𑀢𑀸𑀢𑀺 𑀧𑀞𑀫𑀚𑁆𑀛𑀸𑀦𑀸𑀥𑀺𑀕𑀫𑀧𑀭𑀺𑀤𑀻𑀧𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀥𑀺𑀕𑀫𑀧𑀭𑀺𑀤𑀻𑀧𑀦𑀸, 𑀢𑀸𑀯𑀢𑀸 𑀯𑀘𑀦𑀓𑁆𑀓𑀫𑁂𑀦. 𑀮𑀪𑀦𑀁 𑀮𑀸𑀪𑁄, 𑀲𑁄 𑀏𑀢𑀲𑁆𑀲𑀸𑀢𑀺 𑀮𑀸𑀪𑀻, 𑀭𑀽𑀧𑀚𑁆𑀛𑀸𑀦𑀸𑀦𑀁 𑀮𑀸𑀪𑀻 𑀭𑀽𑀧𑀚𑁆𑀛𑀸𑀦𑀮𑀸𑀪𑀻 𑀬𑀣𑀸 ‘‘𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺, (𑀲𑀁. 𑀦𑀺. 𑁨.𑁭𑁦; 𑀉𑀤𑀸. 𑁩𑁮) 𑀮𑀪𑀦𑀲𑀻𑀮𑁄 𑀯𑀸 𑀮𑀸𑀪𑀻. 𑀓𑀺𑀁 𑀮𑀪𑀦𑀲𑀻𑀮𑁄? 𑀭𑀽𑀧𑀚𑁆𑀛𑀸𑀦𑀸𑀦𑀻𑀢𑀺𑀧𑀺 𑀬𑀼𑀚𑁆𑀚𑀢𑀺. 𑀏𑀯𑀫𑀺𑀢𑀭𑀲𑁆𑀫𑀺𑀫𑁆𑀧𑀺. 𑀦 𑀅𑀭𑀽𑀧𑀚𑁆𑀛𑀸𑀦𑀮𑀸𑀪𑀻𑀢𑀺 𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀓𑀲𑁆𑀫𑀸𑀢𑀺 𑀯𑀼𑀢𑁆𑀢𑀁 ‘‘𑀦 𑀳𑀻’’𑀢𑀺𑀆𑀤𑀺, 𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀸𑀧𑀢𑁆𑀢𑀻𑀦𑀁 𑀉𑀧𑀭𑀺 𑀅𑀪𑀺𑀜𑁆𑀜𑀸𑀥𑀺𑀕𑀫𑁂 𑀅𑀯𑀺𑀦𑀸𑀪𑀸𑀯𑀢𑁄𑀢𑀺 ¶ 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀼𑀤𑁆𑀤𑀲𑀳𑀸𑀓𑀸𑀭𑁂𑀳𑀻𑀢𑀺 ‘‘𑀓𑀲𑀺𑀡𑀸𑀦𑀼𑀮𑁄𑀫𑀢𑁄, 𑀓𑀲𑀺𑀡𑀧𑀝𑀺𑀮𑁄𑀫𑀢𑁄 𑀓𑀲𑀺𑀡𑀸𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄, 𑀛𑀸𑀦𑀸𑀦𑀼𑀮𑁄𑀫𑀢𑁄, 𑀛𑀸𑀦𑀧𑀝𑀺𑀮𑁄𑀫𑀢𑁄, 𑀛𑀸𑀦𑀸𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄, 𑀛𑀸𑀦𑀼𑀓𑁆𑀓𑀦𑁆𑀢𑀺𑀓𑀢𑁄, 𑀓𑀲𑀺𑀡𑀼𑀓𑁆𑀓𑀦𑁆𑀢𑀺𑀓𑀢𑁄, 𑀛𑀸𑀦𑀓𑀲𑀺𑀡𑀼𑀓𑁆𑀓𑀦𑁆𑀢𑀺𑀓𑀢𑁄, 𑀅𑀗𑁆𑀕𑀲𑀗𑁆𑀓𑀦𑁆𑀢𑀺𑀢𑁄, 𑀆𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺𑀢𑁄 ¶ , 𑀅𑀗𑁆𑀕𑀸𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺𑀢𑁄 𑀅𑀗𑁆𑀕𑀯𑀯𑀢𑁆𑀣𑀸𑀦𑀢𑁄, 𑀆𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀢𑁄’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁩𑁬𑁫) 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑁂𑀳𑀺 𑀇𑀫𑁂𑀳𑀺 𑀘𑀼𑀤𑁆𑀤𑀲𑀳𑀸𑀓𑀸𑀭𑁂𑀳𑀺. 𑀲𑀢𑀺𑀧𑀺 𑀛𑀸𑀦𑁂𑀲𑀼 𑀆𑀯𑀚𑁆𑀚𑀦𑀸𑀤𑀺𑀧𑀜𑁆𑀘𑀯𑀺𑀥𑀯𑀲𑀻𑀪𑀸𑀯𑁂 𑀅𑀬𑀫𑁂𑀯 𑀘𑀼𑀤𑁆𑀤𑀲𑀯𑀺𑀥𑁄 𑀯𑀲𑀻𑀪𑀸𑀯𑁄 𑀅𑀪𑀺𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑀦𑁂 𑀏𑀓𑀦𑁆𑀢𑁂𑀦 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀘𑀼𑀤𑁆𑀤𑀲𑀳𑀸𑀓𑀸𑀭𑁂𑀳𑀺 𑀘𑀺𑀡𑁆𑀡𑀯𑀲𑀻𑀪𑀸𑀯’’𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀫𑀺𑀦𑀸 𑀘 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀲𑀼 𑀘𑀺𑀡𑁆𑀡𑀯𑀲𑀻𑀪𑀸𑀯𑀁 𑀯𑀺𑀦𑀸 𑀭𑀽𑀧𑀲𑀫𑀸𑀧𑀢𑁆𑀢𑀻𑀲𑀼 𑀏𑀯 𑀘𑀺𑀡𑁆𑀡𑀯𑀲𑀻𑀪𑀸𑀯𑁂𑀦 𑀲𑀫𑀸𑀧𑀢𑁆𑀢𑀺 𑀦 𑀇𑀚𑁆𑀛𑀢𑀻𑀢𑀺 𑀢𑀸𑀲𑀁 𑀅𑀪𑀺𑀜𑁆𑀜𑀸𑀥𑀺𑀕𑀫𑁂 𑀅𑀯𑀺𑀦𑀸𑀪𑀸𑀯𑀁 𑀤𑀲𑁆𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀦𑀦𑀼 𑀬𑀣𑀸𑀧𑀸𑀞𑀫𑁂𑀯 𑀯𑀺𑀦𑀺𑀘𑁆𑀙𑀬𑁄 𑀯𑀢𑁆𑀢𑀩𑁆𑀩𑁄𑀢𑀺 𑀘𑁄𑀤𑀦𑀁 𑀲𑁄𑀥𑁂𑀢𑀺 ‘‘𑀧𑀸𑀴𑀺𑀬𑀁 𑀧𑀦𑀸’’𑀢𑀺𑀆𑀤𑀺𑀦𑀸, 𑀲𑀸𑀯𑀲𑁂𑀲𑀧𑀸𑀞𑀪𑀸𑀯𑀢𑁄 𑀦𑀻𑀳𑀭𑀺𑀢𑁆𑀯𑀸 𑀏𑀲 𑀯𑀺𑀦𑀺𑀘𑁆𑀙𑀬𑁄 𑀯𑀢𑁆𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀚𑁆𑀚𑁂𑀯𑀁 𑀅𑀭𑀽𑀧𑀚𑁆𑀛𑀸𑀦𑀸𑀦𑀺𑀧𑀺 𑀧𑀸𑀴𑀺𑀬𑀁 𑀕𑀳𑁂𑀢𑀩𑁆𑀩𑀸𑀦𑀺, 𑀅𑀣 𑀓𑀲𑁆𑀫𑀸 𑀢𑀸𑀦𑀺 𑀅𑀕𑁆𑀕𑀳𑁂𑀢𑁆𑀯𑀸 𑀲𑀸𑀯𑀲𑁂𑀲𑀧𑀸𑀞𑁄 𑀪𑀕𑀯𑀢𑀸 𑀓𑀢𑁄𑀢𑀺? 𑀲𑀩𑁆𑀩𑀸𑀪𑀺𑀜𑁆𑀜𑀸𑀦𑀁 𑀯𑀺𑀲𑁂𑀲𑀢𑁄 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀸𑀤𑀓𑀢𑁆𑀢𑀸. 𑀲𑀢𑀺𑀧𑀺 𑀳𑀺 𑀢𑀸𑀲𑀁 𑀢𑀣𑀸 𑀅𑀯𑀺𑀦𑀸𑀪𑀸𑀯𑁂 𑀯𑀺𑀲𑁂𑀲𑀢𑁄 𑀧𑀦𑁂𑀢𑀸 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀸𑀤𑀓𑀸, 𑀢𑀲𑁆𑀫𑀸 𑀢𑀸𑀲𑀁 𑀢𑀧𑁆𑀧𑀸𑀤𑀓𑀪𑀸𑀯𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀢𑀢𑁆𑀣𑁂𑀯 𑀞𑀢𑁆𑀯𑀸 𑀤𑁂𑀲𑀦𑀸 𑀓𑀢𑀸, 𑀦 𑀧𑀦 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁 𑀇𑀥 𑀅𑀦𑀦𑀼𑀧𑀬𑁄𑀕𑀢𑁄. 𑀢𑁂𑀦𑀸𑀳 ‘‘𑀅𑀭𑀽𑀧𑀚𑁆𑀛𑀸𑀦𑀸𑀦𑀺 𑀆𑀳𑀭𑀺𑀢𑁆𑀯𑀸 𑀓𑀣𑁂𑀢𑀩𑁆𑀩𑀸𑀦𑀻’’𑀢𑀺.

𑀯𑀺𑀧𑀲𑁆𑀲𑀦𑀸𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁨𑁩𑁪. ‘‘𑀧𑀼𑀦 𑀘𑀧𑀭𑀁 𑀫𑀳𑀸𑀭𑀸𑀚 (𑀧𑀸𑀴𑀺𑀬𑀁 𑀦𑀢𑁆𑀣𑀺) 𑀪𑀺𑀓𑁆𑀔𑀽’’𑀢𑀺 𑀯𑀢𑁆𑀯𑀸𑀧𑀺 𑀓𑀺𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄’’𑀢𑀺 𑀧𑀤𑀁 𑀧𑀼𑀦 𑀯𑀼𑀢𑁆𑀢𑀦𑁆𑀢𑀺 𑀘𑁄𑀤𑀦𑀸𑀬𑀸𑀳 ‘‘𑀲𑁄…𑀧𑁂… 𑀤𑀲𑁆𑀲𑁂𑀢𑀻’’𑀢𑀺, 𑀬𑀣𑀸𑀭𑀼𑀢𑀯𑀲𑁂𑀦, 𑀦𑁂𑀬𑁆𑀬𑀢𑁆𑀣𑀯𑀲𑁂𑀦 𑀘 𑀯𑀼𑀢𑁆𑀢𑀸𑀲𑀼 𑀅𑀝𑁆𑀞𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀘𑀺𑀡𑁆𑀡𑀯𑀲𑀺𑀢𑀸𑀯𑀺𑀲𑀺𑀝𑁆𑀞𑀁 𑀪𑀺𑀓𑁆𑀔𑀼𑀁 𑀤𑀲𑁆𑀲𑁂𑀢𑀼𑀁 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀲𑀦𑁆𑀢𑀺 ‘‘𑀲𑁄’’𑀢𑀺 𑀧𑀤𑀢𑁆𑀣𑀢𑁄 𑀲𑁂𑀲𑀁 ‘‘𑀏𑀯𑀁 𑀲𑀫𑀸𑀳𑀺𑀢𑁂’’𑀢𑀺𑀆𑀤𑀻𑀲𑀼 𑀯𑀢𑁆𑀢𑀩𑁆𑀩𑀁 𑀲𑀸𑀥𑀺𑀧𑁆𑀧𑀸𑀬𑀫𑀢𑁆𑀣𑀚𑀸𑀢𑀁. 𑀜𑁂𑀬𑁆𑀬𑀁 𑀚𑀸𑀦𑀸𑀢𑀻𑀢𑀺 𑀜𑀸𑀡𑀁, 𑀢𑀤𑁂𑀯 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀧𑀲𑁆𑀲𑀢𑀻𑀢𑀺 𑀤𑀲𑁆𑀲𑀦𑀁, 𑀜𑀸𑀡𑀫𑁂𑀯 𑀤𑀲𑁆𑀲𑀦𑀁 𑀦 𑀘𑀓𑁆𑀔𑀸𑀤𑀺𑀓𑀦𑁆𑀢𑀺 𑀜𑀸𑀡𑀤𑀲𑁆𑀲𑀦𑀁, 𑀧𑀜𑁆𑀘𑀯𑀺𑀥𑀫𑁆𑀧𑀺 𑀜𑀸𑀡𑀁, 𑀢𑀬𑀺𑀤𑀁 𑀧𑀦 𑀜𑀸𑀡𑀤𑀲𑁆𑀲𑀦𑀧𑀤𑀁 ¶ 𑀲𑀸𑀲𑀦𑁂 𑀬𑁂𑀲𑀼 𑀜𑀸𑀡𑀯𑀺𑀲𑁂𑀲𑁂𑀲𑀼 𑀦𑀺𑀭𑀼𑀴𑁆𑀳𑀁, 𑀢𑀁 𑀲𑀩𑁆𑀩𑀁 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀫𑀕𑁆𑀕𑀜𑀸𑀡𑀫𑁆𑀧𑀺 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺𑀫𑀸𑀳. 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀢𑁆𑀣𑀦𑁆𑀢𑀺 𑀜𑀸𑀡𑀤𑀲𑁆𑀲𑀦𑀲𑁆𑀲 𑀯𑀺𑀲𑀼𑀤𑁆𑀥𑀺𑀧𑀬𑁄𑀚𑀦𑀸𑀬. 𑀨𑀸𑀲𑀼𑀯𑀺𑀳𑀸𑀭𑁄𑀢𑀺 𑀅𑀭𑀺𑀬𑀯𑀺𑀳𑀸𑀭𑀪𑀽𑀢𑁄 𑀲𑀼𑀔𑀯𑀺𑀳𑀸𑀭𑁄. 𑀪𑀕𑀯𑀢𑁄𑀧𑀻𑀢𑀺 𑀦 𑀓𑁂𑀯𑀮𑀁 𑀤𑁂𑀯𑀢𑀸𑀭𑁄𑀘𑀦𑀫𑁂𑀯, 𑀅𑀣 𑀔𑁄 𑀢𑀤𑀸 𑀪𑀕𑀯𑀢𑁄𑀧𑀺 𑀜𑀸𑀡𑀤𑀲𑁆𑀲𑀦𑀁 𑀉𑀤𑀧𑀸𑀤𑀻𑀢𑀺 𑀅𑀢𑁆𑀣𑁄. 𑀲𑀢𑁆𑀢𑀸𑀳𑀁 𑀓𑀸𑀮𑀗𑁆𑀓𑀢𑀲𑁆𑀲 𑀅𑀲𑁆𑀲𑀸𑀢𑀺 𑀲𑀢𑁆𑀢𑀸𑀳𑀓𑀸𑀮𑀗𑁆𑀓𑀢𑁄. ‘‘𑀓𑀸𑀮𑀸𑀫𑁄’’𑀢𑀺 𑀕𑁄𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 [𑀯𑀺𑀫𑀼𑀢𑁆𑀢𑀺 (𑀅𑀝𑁆𑀞𑀓𑀣𑀸𑀬𑀁)] 𑀦𑀸𑀫 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺. 𑀬𑀲𑁆𑀫𑀸 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀜𑁂𑀬𑁆𑀬𑀲𑀗𑁆𑀔𑀸𑀢𑁂 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀸𑀤𑀺𑀢𑁄 ¶ 𑀚𑀸𑀦𑀸𑀢𑀺, 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀢𑁄 𑀘 𑀧𑀝𑁆𑀞𑀸𑀬 𑀧𑀘𑁆𑀘𑀓𑁆𑀔𑀢𑁄 𑀢𑁂 𑀧𑀲𑁆𑀲𑀢𑀺, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀝𑁆𑀞𑁂𑀦 𑀜𑀸𑀡𑀤𑀲𑁆𑀲𑀦𑀁 𑀦𑀸𑀫 𑀚𑀸𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 ‘‘𑀇𑀥 𑀧𑀦𑀸’’𑀢𑀺𑀆𑀤𑀺𑀦𑀸.

𑀅𑀪𑀺𑀦𑀻𑀳𑀭𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀪𑀺𑀫𑀼𑀔𑀁 𑀘𑀺𑀢𑁆𑀢𑀁 𑀢𑀤𑀜𑁆𑀜𑀓𑀭𑀡𑀻𑀬𑀢𑁄 𑀦𑀻𑀳𑀭𑀺𑀢𑁆𑀯𑀸 𑀳𑀭𑀢𑀻𑀢𑀺 𑀅𑀬𑀁 𑀲𑀤𑁆𑀤𑀢𑁄 𑀅𑀢𑁆𑀣𑁄, 𑀅𑀥𑀺𑀧𑁆𑀧𑀸𑀬𑀢𑁄 𑀧𑀦 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀤𑀪𑀺𑀫𑀼𑀔𑀪𑀸𑀯𑁄𑀬𑁂𑀯 𑀳𑀺𑀲𑁆𑀲 𑀢𑀦𑁆𑀦𑀺𑀦𑁆𑀦𑀢𑀸𑀤𑀺𑀓𑀭𑀡𑀁, 𑀢𑀁 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁂 𑀢𑀲𑁆𑀫𑀺𑀁 𑀘𑀺𑀢𑁆𑀢𑁂 𑀯𑀺𑀧𑀲𑁆𑀲𑀦𑀸𑀓𑁆𑀓𑀫𑁂𑀦 𑀚𑀸𑀢𑁂 𑀯𑀺𑀧𑀲𑁆𑀲𑀦𑀸𑀪𑀺𑀫𑀼𑀔𑀁 𑀘𑀺𑀢𑁆𑀢𑀧𑁂𑀲𑀦𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀦𑁆𑀦𑀺𑀦𑁆𑀦𑀦𑁆𑀢𑀺 𑀢𑀲𑁆𑀲𑀁 𑀯𑀺𑀧𑀲𑁆𑀲𑀦𑀸𑀬𑀁 𑀦𑀺𑀦𑁆𑀦𑀁. 𑀇𑀢𑀭𑀤𑁆𑀯𑀬𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀢𑀲𑁆𑀲𑀁 𑀧𑁄𑀡𑀁 𑀯𑀗𑁆𑀓𑀁 𑀧𑀩𑁆𑀪𑀸𑀭𑀁 𑀦𑀻𑀘𑀦𑁆𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀚𑀸𑀮𑁂 𑀯𑀼𑀢𑁆𑀢𑁄𑀬𑁂𑀯. 𑀑𑀤𑀦𑀓𑀼𑀫𑁆𑀫𑀸𑀲𑁂𑀳𑀺 𑀉𑀧𑀘𑀻𑀬𑀢𑀺 𑀯𑀟𑁆𑀠𑀸𑀧𑀻𑀬𑀢𑀺, 𑀉𑀧𑀘𑀬𑀢𑀺 𑀯𑀸 𑀯𑀟𑁆𑀠𑀢𑀻𑀢𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀑𑀤𑀦𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑀺𑀘𑁆𑀘𑀼𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑁄𑀢𑀺 𑀏𑀢𑁆𑀣 ‘‘𑀅𑀦𑀺𑀘𑁆𑀘𑀥𑀫𑁆𑀫𑁄’’𑀢𑀺𑀆𑀤𑀺𑀦𑀸 𑀥𑀫𑁆𑀫𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀢𑀢𑁆𑀣 𑀅𑀦𑀺𑀘𑁆𑀘𑀥𑀫𑁆𑀫𑁄𑀢𑀺 𑀧𑀪𑀗𑁆𑀕𑀼𑀢𑀸𑀬 𑀅𑀤𑁆𑀥𑀼𑀯𑀲𑀪𑀸𑀯𑁄. 𑀤𑀼𑀕𑁆𑀕𑀦𑁆𑀥𑀯𑀺𑀖𑀸𑀢𑀢𑁆𑀣𑀸𑀬𑀸𑀢𑀺 𑀲𑀭𑀻𑀭𑁂 𑀤𑀼𑀕𑁆𑀕𑀦𑁆𑀥𑀲𑁆𑀲 𑀯𑀺𑀕𑀫𑀸𑀬. 𑀉𑀘𑁆𑀙𑀸𑀤𑀦𑀥𑀫𑁆𑀫𑁄𑀢𑀺 𑀉𑀘𑁆𑀙𑀸𑀤𑁂𑀢𑀩𑁆𑀩𑀢𑀸𑀲𑀪𑀸𑀯𑁄, 𑀇𑀫𑀲𑁆𑀲 𑀧𑀽𑀢𑀺𑀓𑀸𑀬𑀲𑁆𑀲 𑀤𑀼𑀕𑁆𑀕𑀦𑁆𑀥𑀪𑀸𑀯𑀢𑁄 𑀕𑀦𑁆𑀥𑁄𑀤𑀓𑀸𑀤𑀻𑀳𑀺 𑀉𑀩𑁆𑀩𑀝𑁆𑀝𑀦𑀯𑀺𑀮𑀺𑀫𑁆𑀧𑀦𑀚𑀸𑀢𑀺𑀓𑁄𑀢𑀺 𑀅𑀢𑁆𑀣𑁄. 𑀉𑀘𑁆𑀙𑀸𑀤𑀦𑁂𑀦 𑀳𑀺 𑀧𑀽𑀢𑀺𑀓𑀸𑀬𑁂 𑀲𑁂𑀤𑀯𑀸𑀢𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀻𑀳𑀺 𑀕𑀭𑀼𑀪𑀸𑀯𑀤𑀼𑀕𑁆𑀕𑀦𑁆𑀥𑀸𑀦𑀫𑀧𑀕𑀫𑁄 𑀳𑁄𑀢𑀺. 𑀫𑀳𑀸𑀲𑀫𑁆𑀩𑀸𑀳𑀦𑀁 𑀫𑀮𑁆𑀮𑀸𑀤𑀻𑀦𑀁 𑀩𑀸𑀳𑀼𑀯𑀟𑁆𑀠𑀦𑀸𑀤𑀺𑀅𑀢𑁆𑀣𑀁𑀯 𑀳𑁄𑀢𑀺, 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀩𑀸𑀥𑀯𑀺𑀦𑁄𑀤𑀦𑀢𑁆𑀣𑀁 𑀧𑀦 𑀔𑀼𑀤𑁆𑀤𑀓𑀲𑀫𑁆𑀩𑀸𑀳𑀦𑀫𑁂𑀯 𑀬𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀔𑀼𑀤𑁆𑀤𑀓𑀲𑀫𑁆𑀩𑀸𑀳𑀦𑁂𑀦𑀸’’𑀢𑀺, 𑀫𑀦𑁆𑀤𑀲𑀫𑁆𑀩𑀸𑀳𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀫𑀤𑁆𑀤𑀦𑀥𑀫𑁆𑀫𑁄𑀢𑀺 𑀧𑀭𑀺𑀫𑀤𑁆𑀤𑀺𑀢𑀩𑁆𑀩𑀢𑀸𑀲𑀪𑀸𑀯𑁄.

𑀏𑀯𑀁 ¶ 𑀅𑀦𑀺𑀬𑀫𑀺𑀢𑀓𑀸𑀮𑀯𑀲𑁂𑀦 𑀅𑀢𑁆𑀣𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀦𑀺𑀬𑀫𑀺𑀢𑀓𑀸𑀮𑀯𑀲𑁂𑀦 𑀅𑀢𑁆𑀣𑀁 𑀯𑀤𑀢𑀺 ‘‘𑀤𑀳𑀭𑀓𑀸𑀮𑁂’’𑀢𑀺𑀆𑀤𑀺𑀦𑀸. 𑀯𑀸-𑀲𑀤𑁆𑀤𑁄 𑀘𑁂𑀢𑁆𑀣 𑀅𑀢𑁆𑀣𑀤𑀲𑁆𑀲𑀦𑀯𑀲𑁂𑀦𑁂𑀯 𑀅𑀢𑁆𑀣𑀦𑁆𑀢𑀭𑀯𑀺𑀓𑀧𑁆𑀧𑀦𑀲𑁆𑀲 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸 𑀦 𑀧𑀬𑀼𑀢𑁆𑀢𑁄, 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄 𑀯𑀸. 𑀤𑀳𑀭𑀓𑀸𑀮𑁂𑀢𑀺 𑀅𑀘𑀺𑀭𑀯𑀺𑀚𑀸𑀢𑀓𑀸𑀮𑁂. 𑀲𑀬𑀸𑀧𑁂𑀢𑁆𑀯𑀸 𑀅𑀜𑁆𑀙𑀦𑀧𑀻𑀴𑀦𑀸𑀤𑀺𑀯𑀲𑁂𑀦 𑀧𑀭𑀺𑀫𑀤𑁆𑀤𑀦𑀥𑀫𑁆𑀫𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀺𑀢𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀢𑁂𑀦 𑀬𑀣𑀸𑀧𑀫𑀸𑀡𑀁, 𑀫𑀦𑁆𑀤𑀁 𑀯𑀸 𑀅𑀜𑁆𑀙𑀦𑀧𑀻𑀴𑀦𑀸𑀤𑀻𑀦𑀺 𑀤𑀲𑁆𑀲𑁂𑀢𑀺. 𑀅𑀜𑁆𑀙𑀦𑀜𑁆𑀘𑁂𑀢𑁆𑀣 𑀆𑀓𑀟𑁆𑀠𑀦𑀁. 𑀧𑀻𑀴𑀦𑀁 𑀲𑀫𑁆𑀩𑀸𑀳𑀦𑀁. 𑀆𑀤𑀺𑀲𑀤𑁆𑀤𑁂𑀦 𑀲𑀫𑀺𑀜𑁆𑀚𑀦𑀉𑀕𑁆𑀕𑀫𑀦𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀯𑀁 𑀧𑀭𑀺𑀳𑀭𑀺𑀢𑁄𑀧𑀻𑀢𑀺 𑀉𑀘𑁆𑀙𑀸𑀤𑀦𑀸𑀤𑀺𑀦𑀸 𑀲𑀼𑀔𑁂𑀥𑀺𑀢𑁄𑀧𑀺. 𑀪𑀺𑀚𑁆𑀚𑀢𑀺 𑀘𑁂𑀯𑀸𑀢𑀺 𑀅𑀦𑀺𑀘𑁆𑀘𑀢𑀸𑀤𑀺𑀯𑀲𑁂𑀦 𑀦𑀲𑁆𑀲𑀢𑀺 𑀘. 𑀯𑀺𑀓𑀺𑀭𑀢𑀺 𑀘𑀸𑀢𑀺 𑀏𑀯𑀁 𑀪𑀺𑀦𑁆𑀤𑀦𑁆𑀢𑁄 𑀘 𑀓𑀺𑀜𑁆𑀘𑀺 𑀧𑀬𑁄𑀚𑀦𑀁 𑀅𑀲𑀸𑀥𑁂𑀦𑁆𑀢𑁄 𑀯𑀺𑀧𑁆𑀧𑀓𑀺𑀡𑁆𑀡𑁄𑀯 𑀳𑁄𑀢𑀺. 𑀏𑀯𑀁 𑀦𑀯𑀳𑀺 𑀧𑀤𑁂𑀳𑀺 𑀬𑀣𑀸𑀭𑀳𑀁 𑀓𑀸𑀬𑁂 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀺𑀢𑀸 𑀤𑀲𑁆𑀲𑀺𑀢𑀸𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀙𑀳𑀺 𑀧𑀤𑁂𑀳𑀻𑀢𑀺 ‘‘𑀭𑀽𑀧𑀻, 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄, 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑁄, 𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑁄, 𑀉𑀘𑁆𑀙𑀸𑀤𑀦𑀥𑀫𑁆𑀫𑁄, 𑀧𑀭𑀺𑀫𑀤𑁆𑀤𑀦𑀥𑀫𑁆𑀫𑁄’’𑀢𑀺 𑀇𑀫𑁂𑀳𑀺 𑀙𑀳𑀺 𑀧𑀤𑁂𑀳𑀺. 𑀬𑀼𑀢𑁆𑀢𑀁 𑀢𑀸𑀯 𑀳𑁄𑀢𑀼 𑀫𑀚𑁆𑀛𑁂 𑀢𑀻𑀳𑀺𑀧𑀺 𑀧𑀤𑁂𑀳𑀺 𑀓𑀸𑀬𑀲𑁆𑀲 𑀲𑀫𑀼𑀤𑀬𑀓𑀣𑀦𑀁 𑀢𑁂𑀲𑀁 𑀢𑀤𑀢𑁆𑀣𑀤𑀻𑀧𑀦𑀢𑁄, ‘‘𑀭𑀽𑀧𑀻, 𑀉𑀘𑁆𑀙𑀸𑀤𑀦𑀥𑀫𑁆𑀫𑁄, 𑀧𑀭𑀺𑀫𑀤𑁆𑀤𑀦𑀥𑀫𑁆𑀫𑁄’’𑀢𑀺 𑀧𑀦 𑀢𑀻𑀳𑀺 ¶ 𑀢𑁆𑀧𑀤𑁂𑀳𑀺 𑀓𑀣𑀁 𑀢𑀲𑁆𑀲 𑀢𑀣𑀸𑀓𑀣𑀦𑀁 𑀬𑀼𑀢𑁆𑀢𑀁 𑀲𑀺𑀬𑀸 𑀢𑁂𑀲𑀁 𑀢𑀤𑀢𑁆𑀣𑀲𑁆𑀲 𑀅𑀤𑀻𑀧𑀦𑀢𑁄𑀢𑀺? 𑀬𑀼𑀢𑁆𑀢𑀫𑁂𑀯 𑀢𑁂𑀲𑀫𑁆𑀧𑀺 𑀢𑀤𑀢𑁆𑀣𑀲𑁆𑀲 𑀤𑀻𑀧𑀺𑀢𑀢𑁆𑀢𑀸. ‘‘𑀭𑀽𑀧𑀻’’𑀢𑀺 𑀳𑀺 𑀇𑀤𑀁 𑀅𑀢𑁆𑀢𑀦𑁄 𑀧𑀘𑁆𑀘𑀬𑀪𑀽𑀢𑁂𑀦 𑀉𑀢𑀼𑀆𑀳𑀸𑀭𑀮𑀓𑁆𑀔𑀡𑁂𑀦 𑀭𑀽𑀧𑁂𑀦 𑀭𑀽𑀧𑀯𑀸𑀢𑀺 𑀅𑀢𑁆𑀣𑀲𑁆𑀲 𑀤𑀻𑀧𑀓𑀁. 𑀧𑀘𑁆𑀘𑀬𑀲𑀗𑁆𑀕𑀫𑀯𑀺𑀲𑀺𑀝𑁆𑀞𑁂 𑀳𑀺 𑀢𑀤𑀲𑁆𑀲𑀢𑁆𑀣𑀺𑀅𑀢𑁆𑀣𑁂 𑀅𑀬𑀫𑀻𑀓𑀸𑀭𑁄. ‘‘𑀉𑀘𑁆𑀙𑀸𑀤𑀦𑀥𑀫𑁆𑀫𑁄, 𑀧𑀭𑀺𑀫𑀤𑁆𑀤𑀦𑀥𑀫𑁆𑀫𑁄’’𑀢𑀺 𑀘 𑀇𑀤𑀁 𑀧𑀤𑀤𑁆𑀯𑀬𑀁 𑀢𑀣𑀸𑀯𑀺𑀥𑀭𑀽𑀧𑀼𑀧𑁆𑀧𑀸𑀤𑀦𑁂𑀦 𑀲𑀡𑁆𑀞𑀸𑀦𑀲𑀫𑁆𑀧𑀸𑀤𑀦𑀢𑁆𑀣𑀲𑁆𑀲 𑀤𑀻𑀧𑀓𑀦𑁆𑀢𑀺. 𑀤𑁆𑀯𑀻𑀳𑀻𑀢𑀺 ‘‘𑀪𑁂𑀤𑀦𑀥𑀫𑁆𑀫𑁄, 𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑁄’’𑀢𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺. 𑀦𑀺𑀲𑁆𑀲𑀺𑀢𑀜𑁆𑀘 𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑁂 𑀳𑀤𑀬𑀯𑀢𑁆𑀣𑀼𑀫𑁆𑀳𑀺 𑀦𑀺𑀲𑁆𑀲𑀺𑀢𑀢𑁆𑀢𑀸 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑁆𑀲. 𑀢𑀤𑀸 𑀧𑀯𑀢𑁆𑀢𑀜𑁆𑀳𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀫𑁂𑀯 ‘‘𑀇𑀤𑀜𑁆𑀘 𑀫𑁂 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀝𑀺𑀩𑀤𑁆𑀥𑀜𑁆𑀘 𑀓𑀸𑀬𑁂𑀦 𑀯𑀺𑀦𑀸 𑀅𑀧𑁆𑀧𑀯𑀢𑁆𑀢𑀦𑀢𑁄, 𑀓𑀸𑀬𑀲𑀜𑁆𑀜𑀺𑀢𑀸𑀦𑀜𑁆𑀘 𑀭𑀽𑀧𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀢𑁄.

𑁨𑁩𑁫. 𑀲𑀼𑀝𑁆𑀞𑀼 𑀑𑀪𑀸𑀲𑀢𑀻𑀢𑀺 𑀲𑀼𑀪𑁄, 𑀧𑀪𑀸𑀲𑀫𑁆𑀧𑀦𑁆𑀦𑁄 𑀫𑀡𑀺, 𑀢𑀸𑀬 𑀏𑀯 𑀧𑀪𑀸𑀲𑀫𑁆𑀧𑀢𑁆𑀢𑀺𑀬𑀸 𑀫𑀡𑀺𑀦𑁄 𑀪𑀤𑁆𑀭𑀢𑀸𑀢𑀺 𑀅𑀢𑁆𑀣𑀫𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀪𑁄𑀢𑀺 𑀲𑀼𑀦𑁆𑀤𑀭𑁄’’𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀲𑀼𑀤𑁆𑀥𑀸𑀓𑀭𑀲𑀫𑀼𑀝𑁆𑀞𑀸𑀦𑀫𑁂𑀯 𑀫𑀡𑀺𑀦𑁄 𑀲𑀼𑀯𑀺𑀲𑀼𑀤𑁆𑀥𑀚𑀸𑀢𑀺𑀢𑀸𑀢𑀺 𑀆𑀳 ‘‘𑀚𑀸𑀢𑀺𑀫𑀸𑀢𑀺 𑀧𑀭𑀺𑀲𑀼𑀤𑁆𑀥𑀸𑀓𑀭𑀲𑀫𑀼𑀝𑁆𑀞𑀺𑀢𑁄’’𑀢𑀺. 𑀲𑀼𑀯𑀺𑀲𑀼𑀤𑁆𑀥𑀭𑀢𑀦𑀸𑀓𑀭𑀢𑁄 𑀲𑀫𑀼𑀝𑁆𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀆𑀓𑀭𑀧𑀭𑀺𑀯𑀺𑀲𑀼𑀤𑁆𑀥𑀺𑀫𑀽𑀮𑀓𑁄 𑀏𑀯 𑀳𑀺 ¶ 𑀫𑀡𑀺𑀦𑁄 𑀓𑀼𑀭𑀼𑀯𑀺𑀦𑁆𑀤𑀚𑀸𑀢𑀺𑀆𑀤𑀺𑀚𑀸𑀢𑀺𑀯𑀺𑀲𑁂𑀲𑁄𑀢𑀺. 𑀇𑀥𑀸𑀥𑀺𑀧𑁆𑀧𑁂𑀢𑀲𑁆𑀲 𑀧𑀦 𑀯𑁂𑀴𑀼𑀭𑀺𑀬𑀫𑀡𑀺𑀦𑁄 𑀯𑀺𑀴𑀽𑀭 (𑀯𑀺. 𑀯. 𑀅𑀝𑁆𑀞. 𑁩𑁪 𑀆𑀤𑀬𑁄 𑀯𑀸𑀓𑁆𑀬𑀓𑁆𑀔𑁆𑀔𑁆𑀦𑁆𑀥𑁂𑀲𑀼 𑀧𑀲𑁆𑀲𑀺𑀢𑀩𑁆𑀩𑀁) 𑀧𑀩𑁆𑀩𑀢𑀲𑁆𑀲, 𑀯𑀺𑀴𑀽𑀭 𑀕𑀸𑀫𑀲𑁆𑀲 𑀘 𑀅𑀯𑀺𑀤𑀽𑀭𑁂 𑀧𑀭𑀺𑀲𑀼𑀤𑁆𑀥𑀸𑀓𑀭𑁄. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀲𑁄 𑀢𑀢𑁄 𑀲𑀫𑀼𑀝𑁆𑀞𑀺𑀢𑁄. 𑀢𑀣𑀸 𑀳𑁂𑀲 𑀯𑀺𑀴𑀽𑀭𑀦𑀸𑀫𑀓𑀲𑁆𑀲 𑀧𑀩𑁆𑀩𑀢𑀲𑁆𑀲, 𑀕𑀸𑀫𑀲𑁆𑀲 𑀘 𑀅𑀯𑀺𑀤𑀽𑀭𑁂 𑀲𑀫𑀼𑀝𑁆𑀞𑀺𑀢𑀢𑁆𑀢𑀸 𑀯𑁂𑀴𑀼𑀭𑀺𑀬𑁄𑀢𑀺 𑀧𑀜𑁆𑀜𑀸𑀬𑀺𑀢𑁆𑀣, 𑀤𑁂𑀯𑀮𑁄𑀓𑁂 𑀧𑀯𑀢𑁆𑀢𑀲𑁆𑀲𑀧𑀺 𑀘 𑀢𑀁𑀲𑀤𑀺𑀲𑀯𑀡𑁆𑀡𑀦𑀺𑀪𑀢𑀸𑀬 𑀢𑀤𑁂𑀯 𑀦𑀸𑀫𑀁 𑀚𑀸𑀢𑀁 𑀬𑀣𑀸 𑀢𑀁 𑀫𑀦𑀼𑀲𑁆𑀲𑀮𑁄𑀓𑁂 𑀮𑀤𑁆𑀥𑀦𑀸𑀫𑀯𑀲𑁂𑀦 𑀤𑁂𑀯𑀮𑁄𑀓𑁂 𑀤𑁂𑀯𑀢𑀸𑀦𑀁, 𑀲𑁄 𑀧𑀦 𑀫𑀬𑀽𑀭𑀕𑀻𑀯𑀸𑀯𑀡𑁆𑀡𑁄 𑀯𑀸 𑀳𑁄𑀢𑀺 𑀯𑀸𑀬𑀲𑀧𑀢𑁆𑀢𑀯𑀡𑁆𑀡𑁄 𑀯𑀸 𑀲𑀺𑀦𑀺𑀤𑁆𑀥𑀯𑁂𑀡𑀼𑀧𑀢𑁆𑀢𑀯𑀡𑁆𑀡𑁄 𑀯𑀸𑀢𑀺 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀁 (𑀯𑀺. 𑀯. 𑀅𑀝𑁆𑀞. 𑁩𑁪) 𑀯𑀼𑀢𑁆𑀢𑀁. 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀲𑀼 (𑀯𑀺. 𑀯𑀺. 𑀝𑀻. 𑁧.𑁨𑁮𑁧) 𑀧𑀦 ‘‘𑀅𑀮𑁆𑀮𑀯𑁂𑀴𑀼𑀯𑀡𑁆𑀡𑁄’’𑀢𑀺 𑀯𑀤𑀦𑁆𑀢𑀺. 𑀢𑀣𑀸 𑀳𑀺𑀲𑁆𑀲 ‘‘𑀯𑀁𑀲𑀯𑀡𑁆𑀡𑁄’’𑀢𑀺𑀧𑀺 𑀦𑀸𑀫𑀁 𑀚𑀸𑀢𑀁. ‘‘𑀫𑀜𑁆𑀚𑀸𑀭𑀓𑁆𑀔𑀺𑀫𑀡𑁆𑀟𑀮𑀯𑀡𑁆𑀡𑁄’’𑀢𑀺 𑀘 𑀯𑀼𑀢𑁆𑀢𑁄, 𑀢𑀢𑁄𑀬𑁂𑀯 𑀲𑁄 𑀇𑀥 𑀧𑀤𑁂𑀲𑁂 𑀫𑀜𑁆𑀚𑀸𑀭𑀫𑀡𑀻𑀢𑀺 𑀧𑀸𑀓𑀝𑁄 𑀳𑁄𑀢𑀺. 𑀘𑀓𑁆𑀓𑀯𑀢𑁆𑀢𑀺𑀧𑀭𑀺𑀪𑁄𑀕𑀸𑀭𑀳𑀧𑀡𑀻𑀢𑀢𑀭𑀫𑀡𑀺𑀪𑀸𑀯𑀢𑁄 𑀧𑀦 𑀢𑀲𑁆𑀲𑁂𑀯 𑀧𑀸𑀴𑀺𑀬𑀁 𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀬𑀣𑀸𑀳 ‘‘𑀧𑀼𑀦 𑀘𑀧𑀭𑀁 𑀆𑀦𑀦𑁆𑀤 𑀭𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀲𑁆𑀲 𑀫𑀡𑀺𑀭𑀢𑀦𑀁 𑀧𑀸𑀢𑀼𑀭𑀳𑁄𑀲𑀺, 𑀲𑁄 𑀅𑀳𑁄𑀲𑀺 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀼𑀪𑁄 𑀚𑀸𑀢𑀺𑀫𑀸 𑀅𑀝𑁆𑀞𑀁𑀲𑁄’’𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁨𑁪𑁮). 𑀧𑀸𑀲𑀸𑀡𑀲𑀓𑁆𑀔𑀭𑀸𑀤𑀺𑀤𑁄𑀲𑀦𑀻𑀳𑀭𑀡𑀯𑀲𑁂𑀦𑁂𑀯 𑀧𑀭𑀺𑀓𑀫𑁆𑀫𑀦𑀺𑀧𑁆𑀨𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀅𑀧𑀦𑀻𑀢𑀧𑀸𑀲𑀸𑀡𑀲𑀓𑁆𑀔𑀭𑁄’’𑀢𑀺 𑀇𑀫𑀺𑀦𑀸.

𑀙𑀯𑀺𑀬𑀸 𑀏𑀯 𑀲𑀡𑁆𑀳𑀪𑀸𑀯𑁂𑀦 𑀅𑀘𑁆𑀙𑀢𑀸, 𑀦 𑀲𑀗𑁆𑀖𑀸𑀢𑀲𑁆𑀲𑀸𑀢𑀺 𑀆𑀳 ‘‘𑀅𑀘𑁆𑀙𑁄𑀢𑀺 𑀢𑀦𑀼𑀘𑁆𑀙𑀯𑀻’’𑀢𑀺. 𑀢𑀢𑁄 𑀘𑁂𑀯 𑀯𑀺𑀲𑁂𑀲𑁂𑀦 𑀧𑀲𑀦𑁆𑀦𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀝𑁆𑀞𑀼 𑀧𑀲𑀦𑁆𑀦𑁄’’𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀪𑁄𑀕𑀫𑀡𑀺𑀭𑀢𑀦𑀸𑀓𑀸𑀭𑀲𑀫𑁆𑀧𑀢𑁆𑀢𑀺 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀢𑀸 ¶ . 𑀢𑁂𑀦𑀸𑀳 ‘‘𑀥𑁄𑀯𑀦𑀯𑁂𑀥𑀦𑀸𑀤𑀻𑀳𑀻’’𑀢𑀺𑀆𑀤𑀺. 𑀧𑀸𑀲𑀸𑀡𑀸𑀤𑀻𑀲𑀼 𑀥𑁄𑀢𑀢𑀸 𑀥𑁄𑀯𑀦𑀁, 𑀓𑀸𑀴𑀓𑀸𑀤𑀺𑀅𑀧𑀳𑀭𑀡𑀢𑁆𑀣𑀸𑀬 𑀘𑁂𑀯 𑀲𑀼𑀢𑁆𑀢𑁂𑀦 𑀆𑀯𑀼𑀦𑀢𑁆𑀣𑀸𑀬 𑀘 𑀯𑀺𑀚𑁆𑀛𑀺𑀢𑀩𑁆𑀩𑀢𑀸 𑀯𑁂𑀥𑀦𑀁. 𑀆𑀤𑀺𑀲𑀤𑁆𑀤𑁂𑀦 𑀢𑀸𑀧𑀲𑀡𑁆𑀳𑀓𑀭𑀡𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀆𑀯𑀼𑀦𑀺𑀢𑀲𑀼𑀢𑁆𑀢𑀲𑁆𑀲 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀁. 𑀓𑀲𑁆𑀫𑀸𑀢𑀺 𑀯𑀼𑀢𑁆𑀢𑀁 ‘‘𑀢𑀸𑀤𑀺𑀲’’𑀦𑁆𑀢𑀺𑀆𑀤𑀺, 𑀢𑀸𑀤𑀺𑀲𑀲𑁆𑀲𑁂𑀯 𑀆𑀯𑀼𑀢𑀲𑁆𑀲 𑀧𑀸𑀓𑀝𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀫𑀡𑀺 𑀯𑀺𑀬 𑀓𑀭𑀚𑀓𑀸𑀬𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀢𑁄. 𑀆𑀯𑀼𑀢𑀲𑀼𑀢𑁆𑀢𑀁 𑀯𑀺𑀬 𑀯𑀺𑀜𑁆𑀜𑀸𑀡𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑀢𑁆𑀢𑀸. 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀯𑀺𑀬 𑀯𑀺𑀧𑀲𑁆𑀲𑀦𑀸𑀮𑀸𑀪𑀻 𑀪𑀺𑀓𑁆𑀔𑀼 ¶ 𑀲𑀫𑁆𑀫𑀤𑁂𑀯 𑀢𑀲𑁆𑀲 𑀤𑀲𑁆𑀲𑀦𑀢𑁄, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀫𑀡𑀺𑀦𑁄 𑀆𑀯𑀺𑀪𑀽𑀢𑀓𑀸𑀮𑁄 𑀯𑀺𑀬 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀸𑀬𑀲𑁆𑀲 𑀆𑀯𑀺𑀪𑀽𑀢𑀓𑀸𑀮𑁄 𑀢𑀦𑁆𑀦𑀺𑀲𑁆𑀲𑀬𑀲𑁆𑀲 𑀧𑀸𑀓𑀝𑀪𑀸𑀯𑀢𑁄. 𑀲𑀼𑀢𑁆𑀢𑀲𑁆𑀲𑀸𑀯𑀺𑀪𑀽𑀢𑀓𑀸𑀮𑁄 𑀯𑀺𑀬 𑀢𑁂𑀲𑀁 𑀥𑀫𑁆𑀫𑀸𑀦𑀫𑀸𑀯𑀺𑀪𑀽𑀢𑀓𑀸𑀮𑁄 𑀢𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀧𑀸𑀓𑀝𑀪𑀸𑀯𑀢𑁄𑀢𑀺 𑀅𑀬𑀫𑁂𑀢𑁆𑀣 𑀉𑀧𑀫𑀸𑀲𑀫𑁆𑀧𑀸𑀤𑀦𑁂 𑀓𑀸𑀭𑀡𑀯𑀺𑀪𑀸𑀯𑀦𑀸, ‘‘𑀆𑀯𑀼𑀢𑀲𑀼𑀢𑁆𑀢𑀁 𑀯𑀺𑀬 𑀯𑀺𑀧𑀲𑁆𑀲𑀦𑀸𑀜𑀸𑀡’’𑀦𑁆𑀢𑀺 𑀓𑀢𑁆𑀣𑀘𑀺 𑀧𑀸𑀞𑁄, ‘‘𑀇𑀤𑀜𑁆𑀘 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀯𑀘𑀦𑀢𑁄 𑀧𑀦 ‘‘𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀧𑀸𑀞𑁄𑀯 𑀲𑀼𑀦𑁆𑀤𑀭𑀢𑀭𑁄, ‘‘𑀯𑀺𑀧𑀲𑁆𑀲𑀦𑀸𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀯𑀸 𑀪𑀯𑀺𑀢𑀩𑁆𑀩𑀁. 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀅𑀪𑀺𑀦𑀻𑀳𑀭𑀺𑀢𑁆𑀯𑀸𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀪𑀺𑀫𑀼𑀔𑀁 𑀘𑀺𑀢𑁆𑀢𑀁 𑀦𑀻𑀳𑀭𑀺𑀢𑁆𑀯𑀸.

𑀢𑀢𑁆𑀭𑀸𑀢𑀺 𑀯𑁂𑀴𑀼𑀭𑀺𑀬𑀫𑀡𑀺𑀫𑁆𑀳𑀺. 𑀢𑀤𑀸𑀭𑀫𑁆𑀫𑀡𑀸𑀦𑀦𑁆𑀢𑀺 𑀓𑀸𑀬𑀲𑀜𑁆𑀜𑀺𑀢𑀭𑀽𑀧𑀥𑀫𑁆𑀫𑀸𑀭𑀫𑁆𑀫𑀡𑀸𑀦𑀁. ‘‘𑀨𑀲𑁆𑀲𑀧𑀜𑁆𑀘𑀫𑀓𑀸𑀦’’𑀦𑁆𑀢𑀺𑀆𑀤𑀺𑀧𑀤𑀢𑁆𑀢𑀬𑀲𑁆𑀲𑁂𑀢𑀁 𑀯𑀺𑀲𑁂𑀲𑀦𑀁 𑀅𑀢𑁆𑀣𑀯𑀲𑀸 𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀯𑀘𑀦𑀯𑀺𑀧𑀭𑀺𑀡𑀸𑀫𑁄𑀢𑀺 𑀓𑀢𑁆𑀯𑀸 𑀧𑀘𑁆𑀙𑀺𑀫𑀧𑀤𑀲𑁆𑀲𑀸𑀧𑀺 𑀯𑀺𑀲𑁂𑀲𑀦𑀪𑀸𑀯𑀢𑁄. 𑀨𑀲𑁆𑀲𑀧𑀜𑁆𑀘𑀫𑀓𑀕𑁆𑀕𑀳𑀡𑁂𑀦, 𑀲𑀩𑁆𑀩𑀘𑀺𑀢𑁆𑀢𑀘𑁂𑀢𑀲𑀺𑀓𑀕𑁆𑀕𑀳𑀡𑁂𑀦 𑀘 𑀕𑀳𑀺𑀢𑀥𑀫𑁆𑀫𑀸 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀸 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀳𑀺 𑀢𑁂𑀲𑀁 𑀯𑀺𑀧𑀲𑁆𑀲𑀦𑀸𑀯𑀺𑀜𑁆𑀜𑀸𑀡𑀕𑀢𑀺𑀓𑀢𑁆𑀢𑀸 𑀆𑀯𑀼𑀢𑀲𑀼𑀢𑁆𑀢𑀁 𑀯𑀺𑀬 ‘‘𑀯𑀺𑀧𑀲𑁆𑀲𑀦𑀸𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀯𑀘𑀦𑀁 𑀅𑀯𑀺𑀭𑁄𑀥𑀺𑀢𑀁 𑀳𑁄𑀢𑀺. 𑀓𑀲𑁆𑀫𑀸 𑀧𑀦 𑀯𑀺𑀧𑀲𑁆𑀲𑀦𑀸𑀯𑀺𑀜𑁆𑀜𑀸𑀡𑀲𑁆𑀲𑁂𑀯 𑀕𑀳𑀡𑀦𑁆𑀢𑀺? ‘‘𑀇𑀤𑀜𑁆𑀘 𑀫𑁂 𑀯𑀺𑀜𑁆𑀜𑀸𑀡𑀁 𑀏𑀢𑁆𑀣 𑀲𑀺𑀢𑀁 𑀏𑀢𑁆𑀣 𑀧𑀝𑀺𑀩𑀤𑁆𑀥’’𑀦𑁆𑀢𑀺 𑀇𑀫𑀺𑀦𑀸 𑀢𑀲𑁆𑀲𑁂𑀯 𑀯𑀘𑀦𑀢𑁄. ‘‘𑀅𑀬𑀁 𑀔𑁄 𑀫𑁂 𑀓𑀸𑀬𑁄’’𑀢𑀺𑀆𑀤𑀺𑀦𑀸 𑀳𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀯𑀺𑀧𑀲𑁆𑀲𑀺𑀢𑁆𑀯𑀸 ‘‘𑀢𑀤𑁂𑀯 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀯𑀺𑀜𑁆𑀜𑀸𑀡𑀁 𑀏𑀢𑁆𑀣 𑀲𑀺𑀢𑀁 𑀏𑀢𑁆𑀣 𑀧𑀝𑀺𑀩𑀤𑁆𑀥’’𑀦𑁆𑀢𑀺 𑀦𑀺𑀲𑁆𑀲𑀬𑀯𑀺𑀲𑀬𑀸𑀤𑀺𑀯𑀲𑁂𑀦 𑀫𑀦𑀲𑀺 𑀓𑀭𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀲𑁂𑀯 𑀇𑀥 𑀕𑀳𑀡𑀁 𑀲𑀫𑁆𑀪𑀯𑀢𑀺, 𑀦𑀸𑀜𑁆𑀜𑀲𑁆𑀲𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀯𑀺𑀧𑀲𑁆𑀲𑀦𑀸𑀯𑀺𑀜𑁆𑀜𑀸𑀡𑀲𑁆𑀲𑁂𑀯 𑀯𑀸 𑀆𑀯𑀺𑀪𑀽𑀢𑀓𑀸𑀮𑁄’’𑀢𑀺. 𑀥𑀫𑁆𑀫𑀲𑀗𑁆𑀕𑀳𑀸𑀤𑀻𑀲𑀼 (𑀥. 𑀲. 𑁨 𑀆𑀤𑀬𑁄) 𑀤𑁂𑀲𑀺𑀢𑀦𑀬𑁂𑀦 𑀧𑀸𑀓𑀝𑀪𑀸𑀯𑀢𑁄 𑀘𑁂𑀢𑁆𑀣 𑀨𑀲𑁆𑀲𑀧𑀜𑁆𑀘𑀫𑀓𑀸𑀦𑀁 𑀕𑀳𑀡𑀁, 𑀦𑀺𑀭𑀯𑀲𑁂𑀲𑀧𑀭𑀺𑀕𑁆𑀕𑀳𑀡𑀢𑁄 𑀲𑀩𑁆𑀩𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁, 𑀬𑀣𑀸𑀭𑀼𑀢𑀁 𑀤𑁂𑀲𑀺𑀢𑀯𑀲𑁂𑀦 𑀧𑀥𑀸𑀦𑀪𑀸𑀯𑀢𑁄 𑀯𑀺𑀧𑀲𑁆𑀲𑀦𑀸𑀯𑀺𑀜𑁆𑀜𑀸𑀡𑀲𑁆𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀺𑀁 𑀧𑀦𑁂𑀢𑁂 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲 𑀆𑀯𑀺𑀪𑀯𑀦𑁆𑀢𑀺, 𑀉𑀤𑀸𑀳𑀼 𑀧𑀼𑀕𑁆𑀕𑀮𑀲𑁆𑀲𑀸𑀢𑀺? 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲𑁂𑀯, 𑀢𑀲𑁆𑀲 𑀧𑀦 𑀆𑀯𑀺𑀪𑀽𑀢𑀢𑁆𑀢𑀸 𑀧𑀼𑀕𑁆𑀕𑀮𑀲𑁆𑀲𑀸𑀧𑀺 𑀆𑀯𑀺𑀪𑀽𑀢𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀪𑀺𑀓𑁆𑀔𑀼𑀦𑁄 𑀆𑀯𑀺𑀪𑀽𑀢𑀓𑀸𑀮𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺.

𑀬𑀲𑁆𑀫𑀸 ¶ 𑀧𑀦𑀺𑀤𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀫𑀕𑁆𑀕𑀜𑀸𑀡𑀸𑀦𑀦𑁆𑀢𑀭𑀁 𑀳𑁄𑀢𑀺, 𑀢𑀲𑁆𑀫𑀸 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀦𑀁 𑀧𑀭𑀢𑁄, 𑀙𑀝𑁆𑀞𑀪𑀺𑀜𑁆𑀜𑀸𑀬 𑀘 𑀧𑀼𑀭𑀢𑁄 𑀯𑀢𑁆𑀢𑀩𑁆𑀩𑀁, 𑀅𑀣 𑀓𑀲𑁆𑀫𑀸 𑀲𑀩𑁆𑀩𑀸𑀪𑀺𑀜𑁆𑀜𑀸𑀦𑀁 𑀧𑀼𑀭𑀢𑁄𑀯 𑀯𑀼𑀢𑁆𑀢𑀦𑁆𑀢𑀺 𑀘𑁄𑀤𑀦𑀸𑀮𑁂𑀲𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀳𑀭𑀦𑁆𑀢𑁄 ¶ ‘‘𑀇𑀤𑀜𑁆𑀘 𑀯𑀺𑀧𑀲𑁆𑀲𑀦𑀸𑀜𑀸𑀡’’𑀦𑁆𑀢𑀺𑀆𑀤𑀺𑀫𑀸𑀳. ‘‘𑀇𑀤𑀜𑁆𑀘 𑀫𑀕𑁆𑀕𑀜𑀸𑀡𑀸𑀦𑀦𑁆𑀢𑀭’’𑀦𑁆𑀢𑀺 𑀳𑀺 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑀁 𑀘𑁄𑀤𑀦𑀸𑀮𑁂𑀲𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 ‘‘𑀫𑀕𑁆𑀕𑀜𑀸𑀡𑀸𑀦𑀦𑁆𑀢𑀭’’𑀦𑁆𑀢𑀺 𑀲𑀺𑀔𑀸𑀧𑁆𑀧𑀢𑁆𑀢𑀯𑀺𑀧𑀲𑁆𑀲𑀦𑀸𑀪𑀽𑀢𑀁 𑀕𑁄𑀢𑁆𑀭𑀪𑀼𑀜𑀸𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀤𑁂𑀯 𑀳𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲, 𑀲𑀩𑁆𑀩𑁂𑀲𑀁 𑀯𑀸 𑀫𑀕𑁆𑀕𑀨𑀮𑀸𑀦𑀫𑀦𑀦𑁆𑀢𑀭𑀁 𑀳𑁄𑀢𑀺, 𑀧𑀥𑀸𑀦𑀢𑁄 𑀧𑀦 𑀢𑀩𑁆𑀩𑀘𑀦𑁂𑀦𑁂𑀯 𑀲𑀩𑁆𑀩𑀲𑁆𑀲𑀧𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁 𑀅𑀯𑀺𑀲𑁂𑀲𑀢𑁄 𑀢𑀲𑁆𑀲 𑀇𑀥 𑀯𑀼𑀢𑁆𑀢𑀢𑁆𑀢𑀸. 𑀫𑀕𑁆𑀕𑀲𑀤𑁆𑀤𑁂𑀦 𑀘 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲𑁂𑀯 𑀕𑀳𑀡𑀁 𑀢𑀲𑁆𑀲𑁂𑀯𑀸𑀪𑀺𑀜𑁆𑀜𑀸𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸, 𑀅𑀪𑀺𑀜𑁆𑀜𑀸𑀲𑀫𑁆𑀩𑀦𑁆𑀥𑁂𑀦 𑀘 𑀘𑁄𑀤𑀦𑀸𑀲𑀫𑁆𑀪𑀯𑀢𑁄. 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀦𑀁 𑀧𑀼𑀭𑀢𑁄 𑀯𑀼𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀢𑀸𑀲𑀁 𑀦𑀸𑀦𑀦𑁆𑀢𑀭𑀢𑀸𑀬 𑀅𑀦𑀼𑀧𑀓𑀸𑀭𑀁, 𑀆𑀲𑀯𑀓𑁆𑀔𑀬𑀜𑀸𑀡𑀲𑀗𑁆𑀔𑀸𑀢𑀸𑀬 𑀧𑀦 𑀮𑁄𑀓𑀼𑀢𑁆𑀢𑀭𑀸𑀪𑀺𑀜𑁆𑀜𑀸𑀬 𑀧𑀼𑀭𑀢𑁄 𑀯𑀼𑀢𑁆𑀢𑀁 𑀢𑀲𑁆𑀲𑀸 𑀅𑀦𑀦𑁆𑀢𑀭𑀢𑀸𑀬 𑀉𑀧𑀓𑀸𑀭𑀁, 𑀢𑀲𑁆𑀫𑀸 𑀇𑀤𑀁 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀦𑀁 𑀧𑀭𑀢𑁄, 𑀙𑀝𑁆𑀞𑀸𑀪𑀺𑀜𑁆𑀜𑀸𑀬 𑀘 𑀧𑀼𑀭𑀢𑁄 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸 𑀧𑀦 𑀉𑀧𑀓𑀸𑀭𑀝𑁆𑀞𑀸𑀦𑁂 𑀢𑀣𑀸 𑀅𑀯𑀢𑁆𑀯𑀸 𑀅𑀦𑀼𑀧𑀓𑀸𑀭𑀝𑁆𑀞𑀸𑀦𑁂𑀯 𑀪𑀕𑀯𑀢𑀸 𑀯𑀼𑀢𑁆𑀢𑀦𑁆𑀢𑀺 𑀳𑀺 𑀘𑁄𑀤𑀦𑀸 𑀲𑀫𑁆𑀪𑀯𑀢𑀺. ‘‘𑀏𑀯𑀁 𑀲𑀦𑁆𑀢𑁂𑀧𑀻’’𑀢𑀺𑀆𑀤𑀺 𑀧𑀭𑀺𑀳𑀸𑀭𑀤𑀲𑁆𑀲𑀦𑀁. 𑀢𑀢𑁆𑀣 𑀏𑀯𑀁 𑀲𑀦𑁆𑀢𑁂𑀧𑀻𑀢𑀺 𑀬𑀤𑀺𑀧𑀺 𑀜𑀸𑀡𑀸𑀦𑀼𑀧𑀼𑀩𑁆𑀩𑀺𑀬𑀸 𑀫𑀕𑁆𑀕𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀢𑀸𑀬 𑀉𑀧𑀓𑀸𑀭𑀁 𑀳𑁄𑀢𑀺, 𑀏𑀯𑀁 𑀲𑀢𑀺𑀧𑀻𑀢𑀺 𑀅𑀢𑁆𑀣𑁄.

𑀅𑀪𑀺𑀜𑁆𑀜𑀸𑀯𑀸𑀭𑁂𑀢𑀺 𑀙𑀴𑀪𑀺𑀜𑁆𑀜𑀸𑀯𑀲𑁂𑀦 𑀯𑀼𑀢𑁆𑀢𑁂 𑀤𑁂𑀲𑀦𑀸𑀯𑀸𑀭𑁂. 𑀏𑀢𑀲𑁆𑀲 𑀅𑀦𑁆𑀢𑀭𑀸 𑀯𑀸𑀭𑁄 𑀦𑀢𑁆𑀣𑀻𑀢𑀺 𑀧𑀜𑁆𑀘𑀲𑀼 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀲𑀼 𑀓𑀣𑀺𑀢𑀸𑀲𑀼 𑀆𑀓𑀗𑁆𑀔𑁂𑀬𑁆𑀬𑀲𑀼𑀢𑁆𑀢𑀸𑀤𑀻𑀲𑀼 (𑀫. 𑀦𑀺. 𑁧.𑁬𑁫) 𑀯𑀺𑀬 𑀙𑀝𑁆𑀞𑀸𑀪𑀺𑀜𑁆𑀜𑀸𑀧𑀺 𑀅𑀯𑀲𑁆𑀲𑀁 𑀓𑀣𑁂𑀢𑀩𑁆𑀩𑀸 𑀅𑀪𑀺𑀜𑁆𑀜𑀸𑀮𑀓𑁆𑀔𑀡𑀪𑀸𑀯𑁂𑀦 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑁄, 𑀦 𑀘 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀦𑀁, 𑀙𑀝𑁆𑀞𑀸𑀪𑀺𑀜𑁆𑀜𑀸𑀬 𑀘 𑀅𑀦𑁆𑀢𑀭𑀸 𑀧𑀯𑁂𑀲𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀁 𑀅𑀦𑀪𑀺𑀜𑁆𑀜𑀸𑀮𑀓𑁆𑀔𑀡𑀪𑀸𑀯𑁂𑀦 𑀢𑀤𑀧𑀭𑀺𑀬𑀸𑀧𑀦𑁆𑀦𑀢𑁄. 𑀇𑀢𑀺 𑀏𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀢𑀸𑀲𑀫𑀪𑀺𑀜𑁆𑀜𑀸𑀦𑀁 𑀅𑀦𑁆𑀢𑀭𑀸 𑀯𑀸𑀭𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀢𑁆𑀣 𑀅𑀯𑀲𑀭𑀸𑀪𑀸𑀯𑀢𑁄 𑀇𑀥𑁂𑀯 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀦𑀦𑁆𑀢𑀭𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀓𑀣𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀬𑀲𑁆𑀫𑀸 𑀘𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀣𑀦𑁆𑀢𑀭𑀫𑀸𑀳. 𑀢𑀢𑁆𑀣 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄, 𑀢𑁂𑀦 𑀦 𑀓𑁂𑀯𑀮𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀇𑀥 𑀤𑀲𑁆𑀲𑀦𑁂 𑀢𑀤𑁂𑀯 𑀓𑀸𑀭𑀡𑀁, 𑀅𑀣 𑀔𑁄 𑀇𑀤𑀫𑁆𑀧𑀻𑀢𑀺 𑀇𑀫𑀫𑀢𑁆𑀣𑀁 𑀲𑀫𑀼𑀘𑁆𑀘𑀺𑀦𑀸𑀢𑀻𑀢𑀺 𑀆𑀘𑀭𑀺𑀬𑁂𑀦 (𑀤𑀻. 𑀦𑀺. 𑀝𑀻. 𑁧.𑁨𑁩𑁫) 𑀯𑀼𑀢𑁆𑀢𑀁. 𑀲𑀤𑁆𑀤𑀯𑀺𑀤𑀽 𑀧𑀦 𑀈𑀤𑀺𑀲𑁂 𑀞𑀸𑀦𑁂 𑀘-𑀲𑀤𑁆𑀤𑁄 𑀯𑀸-𑀲𑀤𑁆𑀤𑀢𑁆𑀣𑁄, 𑀲𑁄 𑀘 𑀯𑀺𑀓𑀧𑁆𑀧𑀢𑁆𑀣𑁄𑀢𑀺 𑀯𑀤𑀦𑁆𑀢𑀺, 𑀢𑀫𑁆𑀧𑀺 𑀬𑀼𑀢𑁆𑀢𑀫𑁂𑀯 𑀅𑀢𑁆𑀣𑀦𑁆𑀢𑀭𑀤𑀲𑁆𑀲𑀦𑁂 𑀧𑀬𑀼𑀢𑁆𑀢𑀢𑁆𑀢𑀸. 𑀅𑀢𑁆𑀢𑀦𑀸 𑀧𑀬𑀼𑀚𑁆𑀚𑀺𑀢𑀩𑁆𑀩𑀲𑁆𑀲 𑀳𑀺 𑀯𑀺𑀚𑁆𑀚𑀫𑀸𑀦𑀢𑁆𑀣𑀲𑁆𑀲𑁂𑀯 𑀚𑁄𑀢𑀓𑀸 𑀉𑀧𑀲𑀕𑁆𑀕𑀦𑀺𑀧𑀸𑀢𑀸 𑀬𑀣𑀸 𑀫𑀕𑁆𑀕𑀦𑀺𑀤𑀲𑁆𑀲𑀦𑁂 𑀲𑀸𑀔𑀸𑀪𑀗𑁆𑀕𑀸, 𑀬𑀣𑀸 𑀘 𑀅𑀤𑀺𑀲𑁆𑀲𑀫𑀸𑀦𑀸 𑀚𑁄𑀢𑀦𑁂 𑀧𑀤𑀻𑀧𑀸𑀢𑀺 𑀏𑀯𑀫𑀻𑀤𑀺𑀲𑁂𑀲𑀼. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀅𑀢𑁆𑀣𑀦𑁆𑀢𑀭𑀤𑀲𑁆𑀲𑀦𑀫𑁆𑀳𑀺 ¶ , 𑀘 𑀲𑀤𑁆𑀤𑁄 𑀬𑀤𑀺 𑀤𑀺𑀲𑁆𑀲𑀢𑀺;

𑀲𑀫𑀼𑀘𑁆𑀘𑀬𑁂 𑀯𑀺𑀓𑀧𑁆𑀧𑁂 𑀲𑁄, 𑀕𑀳𑁂𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸’’𑀢𑀺.

𑀅𑀓𑀢𑀲𑀫𑁆𑀫𑀲𑀦𑀲𑁆𑀲𑀸𑀢𑀺 ¶ 𑀳𑁂𑀢𑀼𑀕𑀩𑁆𑀪𑀧𑀤𑀁. 𑀢𑀣𑀸 𑀓𑀢𑀲𑀫𑁆𑀫𑀲𑀦𑀲𑁆𑀲𑀸𑀢𑀺 𑀘. ‘‘𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀪𑁂𑀭𑀯𑀫𑁆𑀧𑀺 𑀭𑀽𑀧𑀁 𑀧𑀲𑁆𑀲𑀢𑁄𑀢𑀺 𑀏𑀢𑁆𑀣 𑀇𑀤𑁆𑀥𑀺𑀯𑀺𑀥𑀜𑀸𑀡𑁂𑀦 𑀪𑁂𑀭𑀯𑀁 𑀭𑀽𑀧𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀫𑀁𑀲𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑁄𑀢𑀺𑀧𑀺 𑀯𑀢𑁆𑀢𑀩𑁆𑀩𑀁. 𑀏𑀯𑀫𑁆𑀧𑀺 𑀳𑀺 𑀅𑀪𑀺𑀜𑁆𑀜𑀸𑀮𑀸𑀪𑀺𑀦𑁄 𑀅𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀲𑁆𑀲 𑀪𑀬𑀁 𑀲𑀦𑁆𑀢𑀸𑀲𑁄 𑀉𑀧𑁆𑀧𑀚𑁆𑀚𑀢𑀺 𑀉𑀘𑁆𑀘𑀯𑀸𑀮𑀺𑀓𑀯𑀸𑀲𑀺𑀫𑀳𑀸𑀦𑀸𑀕𑀢𑁆𑀣𑁂𑀭𑀲𑁆𑀲 𑀯𑀺𑀬𑀸’’𑀢𑀺 𑀆𑀘𑀭𑀺𑀬𑁂𑀦 (𑀤𑀻. 𑀦𑀺. 𑀝𑀻. 𑁧.𑁨𑁩𑁫) 𑀯𑀼𑀢𑁆𑀢𑀁. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀪𑁂𑀭𑀯𑀁 𑀲𑀤𑁆𑀤𑀁 𑀲𑀼𑀡𑀢𑁄𑀢𑀺 𑀏𑀢𑁆𑀣𑀸𑀧𑀺 𑀇𑀤𑁆𑀥𑀺𑀯𑀺𑀥𑀜𑀸𑀡𑁂𑀦 𑀪𑁂𑀭𑀯𑀁 𑀲𑀤𑁆𑀤𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀫𑀁𑀲𑀲𑁄𑀢𑁂𑀦 𑀲𑀼𑀡𑀢𑁄𑀧𑀻𑀢𑀺 𑀯𑀢𑁆𑀢𑀩𑁆𑀩𑀫𑁂𑀯. 𑀏𑀯𑀫𑁆𑀧𑀺 𑀳𑀺 𑀅𑀪𑀺𑀜𑁆𑀜𑀸𑀮𑀸𑀪𑀺𑀦𑁄 𑀅𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀲𑁆𑀲 𑀪𑀬𑀁 𑀲𑀦𑁆𑀢𑀸𑀲𑁄 𑀉𑀧𑁆𑀧𑀚𑁆𑀚𑀢𑀺 𑀉𑀘𑁆𑀘𑀯𑀸𑀮𑀺𑀓𑀯𑀸𑀲𑀺𑀫𑀳𑀸𑀦𑀸𑀕𑀢𑁆𑀣𑁂𑀭𑀲𑁆𑀲 𑀯𑀺𑀬. 𑀣𑁂𑀭𑁄 𑀳𑀺 𑀓𑁄𑀜𑁆𑀘𑀦𑀸𑀤𑀲𑀳𑀺𑀢𑀁 𑀲𑀩𑁆𑀩𑀲𑁂𑀢𑀁 𑀳𑀢𑁆𑀣𑀺𑀦𑀸𑀕𑀁 𑀫𑀸𑀧𑁂𑀢𑁆𑀯𑀸 𑀤𑀺𑀲𑁆𑀯𑀸, 𑀲𑀼𑀢𑁆𑀯𑀸 𑀘 𑀲𑀜𑁆𑀚𑀸𑀢𑀪𑀬𑀲𑀦𑁆𑀢𑀸𑀲𑁄𑀢𑀺 𑀅𑀝𑁆𑀞𑀓𑀣𑀸𑀲𑀼 (𑀯𑀺𑀪. 𑀅𑀝𑁆𑀞. 𑁨.𑁮𑁮𑁨; 𑀫. 𑀦𑀺. 𑀅𑀝𑁆𑀞. 𑁧.𑁮𑁧; 𑀯𑀺𑀲𑀼𑀤𑁆𑀥𑀺. 𑁨.𑁭𑁩𑁩) 𑀯𑀼𑀢𑁆𑀢𑁄. 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀓𑀢𑀲𑀫𑁆𑀫𑀲𑀦𑀲𑁆𑀲 𑀤𑀺𑀩𑁆𑀩𑀸𑀬…𑀧𑁂… 𑀪𑀬𑀁 𑀲𑀦𑁆𑀢𑀸𑀲𑁄 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀪𑀬𑀯𑀺𑀦𑁄𑀤𑀦𑀳𑁂𑀢𑀼 𑀦𑀸𑀫 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀓𑀢𑀲𑀫𑁆𑀫𑀲𑀦𑀢𑀸, 𑀢𑀲𑁆𑀲, 𑀢𑁂𑀦 𑀯𑀸 𑀲𑀫𑁆𑀧𑀸𑀤𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀇𑀥𑁂𑀯𑀸𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀦𑀦𑁆𑀢𑀭𑀫𑁂𑀯. ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀧𑀸𑀞𑀁 𑀬𑀼𑀢𑁆𑀢𑀢𑀭𑀦𑀬𑀁 𑀤𑀲𑁆𑀲𑁂𑀢𑀺. 𑀯𑀺𑀧𑀲𑁆𑀲𑀦𑀸𑀬 𑀧𑀯𑀢𑁆𑀢𑀁 𑀧𑀸𑀫𑁄𑀚𑁆𑀚𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀧𑀭𑀫𑁆𑀧𑀭𑀸𑀕𑀢𑀲𑀼𑀔𑀁 𑀯𑀺𑀧𑀲𑁆𑀲𑀦𑀸𑀲𑀼𑀔𑀁. 𑀧𑀸𑀝𑀺𑀬𑁂𑀓𑁆𑀓𑀦𑁆𑀢𑀺 𑀛𑀸𑀦𑀸𑀪𑀺𑀜𑁆𑀜𑀸𑀤𑀻𑀳𑀺 𑀅𑀲𑀫𑁆𑀫𑀺𑀲𑁆𑀲𑀁 𑀯𑀺𑀲𑀼𑀁 𑀪𑀽𑀢𑀁 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁. 𑀢𑁂𑀦𑀸𑀳 𑀪𑀕𑀯𑀸 𑀥𑀫𑁆𑀫𑀧𑀤𑁂 𑁋

‘‘𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢’’𑀦𑁆𑀢𑀺𑀆𑀤𑀺. (𑀥. 𑀧. 𑁩𑁭𑁪);

𑀇𑀥𑀸𑀧𑀺 𑀯𑀼𑀢𑁆𑀢𑀁 ‘‘𑀇𑀤𑀫𑁆𑀧𑀺 𑀔𑁄 𑀫𑀳𑀸𑀭𑀸𑀚 𑀲𑀦𑁆𑀤𑀺𑀝𑁆𑀞𑀺𑀓𑀁 𑀲𑀸𑀫𑀜𑁆𑀜𑀨𑀮𑀁…𑀧𑁂… 𑀧𑀡𑀻𑀢𑀢𑀭𑀜𑁆𑀘𑀸’’𑀢𑀺, 𑀢𑀲𑁆𑀫𑀸 𑀧𑀸𑀴𑀺𑀬𑀸 𑀲𑀁𑀲𑀦𑁆𑀤𑀦𑀢𑁄 𑀇𑀫𑀫𑁂𑀯 𑀦𑀬𑀁 𑀬𑀼𑀢𑁆𑀢𑀢𑀭𑀦𑁆𑀢𑀺 𑀯𑀤𑀦𑁆𑀢𑀺. 𑀆𑀤𑀺𑀢𑁄𑀯𑀸𑀢𑀺 𑀅𑀪𑀺𑀜𑁆𑀜𑀸𑀦𑀫𑀸𑀤𑀺𑀫𑁆𑀳𑀺𑀬𑁂𑀯.

𑀫𑀦𑁄𑀫𑀬𑀺𑀤𑁆𑀥𑀺𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁨𑁩𑁬-𑁭. 𑀫𑀦𑁄𑀫𑀬𑀦𑁆𑀢𑀺 𑀏𑀢𑁆𑀣 𑀧𑀦 𑀫𑀬𑀲𑀤𑁆𑀤𑁄 𑀅𑀧𑀭𑀧𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀧𑀤𑀧𑀽𑀭𑀡𑀦𑀺𑀩𑁆𑀩𑀢𑁆𑀢𑀺𑀆𑀤𑀻𑀲𑀼 𑀅𑀦𑁂𑀓𑁂𑀲𑁆𑀯𑀢𑁆𑀣𑁂𑀲𑀼 𑀆𑀕𑀢𑁄. 𑀇𑀥 𑀧𑀦 𑀦𑀺𑀩𑁆𑀩𑀢𑁆𑀢𑀺𑀅𑀢𑁆𑀣𑁂𑀢𑀺 𑀤𑀲𑁆𑀲𑁂𑀢𑀼𑀁 ¶ ‘‘𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀅𑀪𑀺𑀜𑁆𑀜𑀸𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀺𑀢’’𑀦𑁆𑀢𑀺 𑀅𑀢𑁆𑀣𑁄𑀢𑀺 𑀆𑀘𑀭𑀺𑀬𑁂𑀦𑀸𑀢𑀺 (𑀤𑀻. 𑀦𑀺. 𑀝𑀻. 𑁧.𑁨𑁩𑁬, 𑁨𑁩𑁭) 𑀯𑀼𑀢𑁆𑀢𑀁. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁩𑁯𑁭) 𑀧𑀦 ‘‘𑀅𑀥𑀺𑀝𑁆𑀞𑀸𑀦𑀫𑀦𑁂𑀦 𑀦𑀺𑀫𑁆𑀫𑀺𑀢𑀢𑁆𑀢𑀸 𑀫𑀦𑁄𑀫𑀬’’𑀦𑁆𑀢𑀺 𑀆𑀕𑀢𑀁, 𑀅𑀪𑀺𑀜𑁆𑀜𑀸𑀫𑀦𑁂𑀦, 𑀅𑀥𑀺𑀝𑁆𑀞𑀸𑀦𑀫𑀦𑁂𑀦 𑀘𑀸𑀢𑀺 𑀉𑀪𑀬𑀣𑀸𑀧𑀺 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀉𑀪𑀬𑀫𑁆𑀧𑁂𑀢𑀁 𑀬𑀼𑀢𑁆𑀢𑀫𑁂𑀯 ¶ . 𑀅𑀗𑁆𑀕𑀁 𑀦𑀸𑀫 𑀳𑀢𑁆𑀣𑀧𑀸𑀤𑀸𑀤𑀺𑀢𑀁𑀢𑀁𑀲𑀫𑀼𑀤𑀸𑀬𑀁, 𑀧𑀘𑁆𑀘𑀗𑁆𑀕𑀁 𑀦𑀸𑀫 𑀓𑀧𑁆𑀧𑀭𑀚𑀡𑁆𑀡𑀼𑀆𑀤𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀫𑀼𑀤𑀸𑀬𑁂 𑀅𑀯𑀬𑀯𑀁. ‘‘𑀅𑀳𑀻𑀦𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀏𑀢𑁆𑀣 𑀧𑀭𑀺𑀧𑀼𑀡𑁆𑀡𑀢𑀸𑀬𑁂𑀯 𑀅𑀳𑀻𑀦𑀢𑀸, 𑀦 𑀢𑀼 𑀅𑀧𑁆𑀧𑀡𑀻𑀢𑀢𑀸, 𑀧𑀭𑀺𑀧𑀼𑀡𑁆𑀡𑀪𑀸𑀯𑁄 𑀘 𑀘𑀓𑁆𑀔𑀼𑀲𑁄𑀢𑀸𑀤𑀻𑀦𑀁 𑀲𑀡𑁆𑀞𑀸𑀦𑀯𑀲𑁂𑀦𑁂𑀯. 𑀦𑀺𑀫𑁆𑀫𑀺𑀢𑀭𑀽𑀧𑁂 𑀳𑀺 𑀧𑀲𑀸𑀤𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀡𑁆𑀞𑀸𑀦𑀯𑀲𑁂𑀦 𑀅𑀯𑀺𑀓𑀮𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀫𑀺𑀦𑀸𑀯 𑀢𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀫𑁆𑀧𑀺 𑀅𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀡𑁆𑀞𑀸𑀦𑀯𑀲𑁂𑀦𑀸𑀢𑀺 𑀘 𑀓𑀫𑀮𑀤𑀮𑀸𑀤𑀺𑀲𑀤𑀺𑀲𑀲𑀡𑁆𑀞𑀸𑀦𑀫𑀢𑁆𑀢𑀯𑀲𑁂𑀦, 𑀦 𑀭𑀽𑀧𑀸𑀪𑀺𑀖𑀸𑀢𑀸𑀭𑀳𑀪𑀽𑀢𑀧𑁆𑀧𑀲𑀸𑀤𑀸𑀤𑀺𑀇𑀦𑁆𑀤𑁆𑀭𑀺𑀬𑀯𑀲𑁂𑀦. ‘‘𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀺𑀁 𑀅𑀳𑀻𑀦𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀦𑁆𑀢𑁄 ‘‘𑀇𑀤𑁆𑀥𑀺𑀫𑀢𑀸’’𑀢𑀺𑀆𑀤𑀺𑀫𑀸𑀳. 𑀅𑀯𑀺𑀤𑁆𑀥𑀓𑀡𑁆𑀡𑁄𑀢𑀺 𑀓𑀼𑀮𑀘𑀸𑀭𑀺𑀢𑁆𑀢𑀯𑀲𑁂𑀦 𑀓𑀡𑁆𑀡𑀸𑀮𑀗𑁆𑀓𑀸𑀭𑀧𑀺𑀴𑀦𑁆𑀥𑀦𑀢𑁆𑀣𑀁 𑀅𑀯𑀺𑀚𑁆𑀛𑀺𑀢𑀓𑀡𑁆𑀡𑁄, 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁. 𑀢𑁂𑀦𑀸𑀳 ‘‘𑀲𑀩𑁆𑀩𑀸𑀓𑀸𑀭𑁂𑀳𑀻’’𑀢𑀺, 𑀯𑀡𑁆𑀡𑀲𑀡𑁆𑀞𑀸𑀦𑀸𑀯𑀬𑀯𑀯𑀺𑀲𑁂𑀲𑀸𑀤𑀺𑀲𑀩𑁆𑀩𑀸𑀓𑀸𑀭𑁂𑀳𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀢𑀺 𑀇𑀤𑁆𑀥𑀺𑀫𑀢𑀸.

𑀅𑀬𑀫𑁂𑀯𑀢𑁆𑀣𑁄 𑀧𑀸𑀴𑀺𑀬𑀫𑁆𑀧𑀺 𑀯𑀺𑀪𑀸𑀯𑀺𑀢𑁄𑀢𑀺 𑀆𑀳 ‘‘𑀫𑀼𑀜𑁆𑀚𑀫𑁆𑀳𑀸 𑀈𑀲𑀺𑀓𑀦𑁆𑀢𑀺𑀆𑀤𑀺𑀉𑀧𑀫𑀸𑀢𑁆𑀢𑀬𑀫𑁆𑀧𑀺 𑀳𑀺…𑀧𑁂… 𑀯𑀼𑀢𑁆𑀢’’𑀦𑁆𑀢𑀺. 𑀓𑀢𑁆𑀣𑀘𑀺 𑀧𑀦 ‘‘𑀫𑀼𑀜𑁆𑀚𑀫𑁆𑀳𑀸 𑀈𑀲𑀺𑀓𑀦𑁆𑀢𑀺𑀆𑀤𑀺 𑀉𑀧𑀫𑀸𑀫𑀢𑁆𑀢𑀁. 𑀬𑀫𑁆𑀧𑀺 𑀳𑀺 𑀲𑀤𑀺𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀫𑁂𑀯 𑀯𑀼𑀢𑁆𑀢’’𑀦𑁆𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀢𑀢𑁆𑀣 ‘‘𑀉𑀧𑀫𑀸𑀫𑀢𑁆𑀢’’𑀦𑁆𑀢𑀺 𑀇𑀫𑀺𑀦𑀸 𑀅𑀢𑁆𑀣𑀦𑁆𑀢𑀭𑀤𑀲𑁆𑀲𑀦𑀁 𑀦𑀺𑀯𑀢𑁆𑀢𑁂𑀢𑀺, ‘‘𑀬𑀫𑁆𑀧𑀺 𑀳𑀻’’𑀢𑀺𑀆𑀤𑀺𑀦𑀸 𑀧𑀦 𑀢𑀲𑁆𑀲 𑀉𑀧𑀫𑀸𑀪𑀸𑀯𑀁 𑀲𑀫𑀢𑁆𑀣𑁂𑀢𑀺. 𑀦𑀺𑀬𑀢𑀸𑀦𑀧𑁂𑀓𑁆𑀔𑁂𑀦 𑀘 𑀬𑀁-𑀲𑀤𑁆𑀤𑁂𑀦 ‘‘𑀫𑀼𑀜𑁆𑀚𑀫𑁆𑀳𑀸 𑀈𑀲𑀺𑀓’’𑀦𑁆𑀢𑀺𑀆𑀤𑀺𑀯𑀘𑀦𑀫𑁂𑀯 𑀧𑀘𑁆𑀘𑀸𑀫𑀲𑀢𑀺. 𑀲𑀤𑀺𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀫𑁂𑀯𑀸𑀢𑀺 𑀲𑀡𑁆𑀞𑀸𑀦𑀢𑁄𑀧𑀺 𑀯𑀡𑁆𑀡𑀢𑁄𑀧𑀺 𑀅𑀯𑀬𑀯𑀯𑀺𑀲𑁂𑀲𑀢𑁄𑀧𑀺 𑀲𑀤𑀺𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀁𑀬𑁂𑀯. 𑀓𑀣𑀁 𑀲𑀤𑀺𑀲𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 ‘‘𑀫𑀼𑀜𑁆𑀚𑀲𑀤𑀺𑀲𑀸 𑀏𑀯 𑀳𑀻’’𑀢𑀺𑀆𑀤𑀺. 𑀫𑀼𑀜𑁆𑀚𑀁 𑀦𑀸𑀫 𑀢𑀺𑀡𑀯𑀺𑀲𑁂𑀲𑁄, 𑀬𑁂𑀦 𑀓𑁄𑀘𑁆𑀙𑀸𑀤𑀻𑀦𑀺 𑀓𑀭𑁄𑀦𑁆𑀢𑀺. ‘‘𑀧𑀯𑀸𑀳𑁂𑀬𑁆𑀬𑀸’’𑀢𑀺 𑀯𑀘𑀦𑀢𑁄 𑀅𑀦𑁆𑀢𑁄 𑀞𑀺𑀢𑀸 𑀏𑀯 𑀈𑀲𑀺𑀓𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀅𑀦𑁆𑀢𑁄 𑀈𑀲𑀺𑀓𑀸 𑀳𑁄𑀢𑀻’’𑀢𑀺 𑀇𑀫𑀺𑀦𑀸. 𑀈𑀲𑀺𑀓𑀸𑀢𑀺 𑀘 𑀓𑀴𑀻𑀭𑁄. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀝𑀻𑀓𑀸𑀬𑀁 𑀧𑀦 ‘‘𑀓𑀡𑁆𑀟’’𑀦𑁆𑀢𑀺 (𑀯𑀺𑀲𑀼𑀤𑁆𑀥𑀺. 𑀝𑀻. 𑁨.𑁩𑁯𑁯) 𑀯𑀼𑀢𑁆𑀢𑀁. 𑀯𑀝𑁆𑀝𑀸𑀬 𑀓𑁄𑀲𑀺𑀬𑀸𑀢𑀺 𑀧𑀭𑀺𑀯𑀝𑁆𑀝𑀼𑀮𑀸𑀬 𑀅𑀲𑀺𑀓𑁄𑀲𑀺𑀬𑀸. 𑀧𑀢𑁆𑀣𑀝𑀸𑀬𑀸𑀢𑀺 𑀧𑀝𑁆𑀝𑀺𑀓𑀸𑀬. 𑀓𑀭𑀟𑀺𑀢𑀩𑁆𑀩𑁄 𑀪𑀸𑀚𑁂𑀢𑀩𑁆𑀩𑁄𑀢𑀺 𑀓𑀭𑀡𑁆𑀟𑁄, 𑀧𑁂𑀴𑀸. 𑀓𑀭𑀟𑀺𑀢𑀩𑁆𑀩𑁄 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑁄𑀢𑀺 𑀓𑀭𑀡𑁆𑀟𑁄, 𑀦𑀺𑀫𑁆𑀫𑁄𑀓𑀁. 𑀇𑀥𑀸𑀧𑀺 ¶ 𑀦𑀺𑀫𑁆𑀫𑁄𑀓𑀫𑁂𑀯𑀸𑀢𑀺 𑀆𑀳 ‘‘𑀓𑀭𑀡𑁆𑀟𑀸𑀢𑀺 𑀇𑀤𑀫𑁆𑀧𑀻’’𑀢𑀺𑀆𑀤𑀺. 𑀯𑀺𑀮𑀻𑀯𑀓𑀭𑀡𑁆𑀟𑁄 𑀦𑀸𑀫 𑀧𑁂𑀴𑀸. 𑀓𑀲𑁆𑀫𑀸 𑀅𑀳𑀺𑀓𑀜𑁆𑀘𑀼𑀓𑀲𑁆𑀲𑁂𑀯 𑀦𑀸𑀫𑀁, 𑀦 𑀯𑀺𑀮𑀻𑀯𑀓𑀭𑀡𑁆𑀟𑀓𑀲𑁆𑀲𑀸𑀢𑀺 𑀘𑁄𑀤𑀦𑀁 𑀲𑁄𑀥𑁂𑀢𑀺 ‘‘𑀅𑀳𑀺𑀓𑀜𑁆𑀘𑀼𑀓𑁄 𑀳𑀻’’𑀢𑀺𑀆𑀤𑀺𑀦𑀸, 𑀲𑁆𑀯𑁂𑀯 𑀅𑀳𑀺𑀦𑀸 𑀲𑀤𑀺𑀲𑁄, 𑀢𑀲𑁆𑀫𑀸 𑀢𑀲𑁆𑀲𑁂𑀯 𑀦𑀸𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀝𑀻𑀓𑀸𑀬𑀁 𑀧𑀦 ‘‘𑀓𑀭𑀡𑁆𑀟𑀸𑀬𑀸𑀢𑀺 𑀧𑁂𑀴𑀸𑀬, 𑀦𑀺𑀫𑁆𑀫𑁄𑀓𑀢𑁄𑀢𑀺 𑀘 𑀯𑀤𑀦𑁆𑀢𑀻’’𑀢𑀺 (𑀯𑀺𑀲𑀼𑀤𑁆𑀥𑀺. 𑀝𑀻. 𑁨.𑁩𑁯𑁯) 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑁂𑀴𑀸𑀕𑀳𑀡𑀁 𑀅𑀳𑀺𑀦𑀸 𑀅𑀲𑀤𑀺𑀲𑀢𑀸𑀬 𑀯𑀺𑀘𑀸𑀭𑁂𑀢𑀩𑁆𑀩𑀁.

𑀬𑀚𑁆𑀚𑁂𑀯𑀁 ‘‘𑀲𑁂𑀬𑁆𑀬𑀣𑀸𑀧𑀺 𑀧𑀦 𑀫𑀳𑀸𑀭𑀸𑀚 𑀧𑀼𑀭𑀺𑀲𑁄 𑀅𑀳𑀺𑀁 𑀓𑀭𑀡𑁆𑀟𑀸 𑀉𑀤𑁆𑀥𑀭𑁂𑀬𑁆𑀬𑀸’’𑀢𑀺 𑀧𑀼𑀭𑀺𑀲𑀲𑁆𑀲 𑀓𑀭𑀡𑁆𑀟𑀢𑁄 𑀅𑀳𑀺𑀉𑀤𑁆𑀥𑀭𑀡𑀽𑀧𑀫𑀸𑀬 𑀅𑀬𑀫𑀢𑁆𑀣𑁄 𑀯𑀺𑀭𑀼𑀚𑁆𑀛𑁂𑀬𑁆𑀬. 𑀦 𑀳𑀺 𑀲𑁄 𑀳𑀢𑁆𑀣𑁂𑀦 𑀢𑀢𑁄 𑀉𑀤𑁆𑀥𑀭𑀺𑀢𑀼𑀁 𑀲𑀓𑁆𑀓𑀸𑀢𑀺 ¶ 𑀅𑀦𑀼𑀬𑁄𑀕𑁂𑀦𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. ‘‘𑀉𑀤𑁆𑀥𑀭𑁂𑀬𑁆𑀬𑀸’’𑀢𑀺 𑀳𑀺 𑀅𑀦𑀺𑀬𑀫𑀯𑀘𑀦𑁂𑀧𑀺 𑀳𑀢𑁆𑀣𑁂𑀦 𑀉𑀤𑁆𑀥𑀭𑀡𑀲𑁆𑀲𑁂𑀯 𑀧𑀸𑀓𑀝𑀢𑁆𑀢𑀸 𑀢𑀁𑀤𑀲𑁆𑀲𑀦𑀫𑀺𑀯 𑀚𑀸𑀢𑀁. 𑀢𑁂𑀦𑀸𑀳 ‘‘𑀳𑀢𑁆𑀣𑁂𑀦 𑀉𑀤𑁆𑀥𑀭𑀫𑀸𑀦𑁄 𑀯𑀺𑀬 𑀤𑀲𑁆𑀲𑀺𑀢𑁄’’𑀢𑀺. ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺 𑀘𑀺𑀢𑁆𑀢𑁂𑀦 𑀉𑀤𑁆𑀥𑀭𑀡𑀲𑁆𑀲 𑀳𑁂𑀢𑀼𑀤𑀲𑁆𑀲𑀦𑀁. 𑀅𑀳𑀺𑀦𑁄 𑀦𑀸𑀫 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀲𑀚𑀸𑀢𑀺𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺 𑀉𑀧𑀧𑀢𑁆𑀢𑀺𑀬𑀁, 𑀘𑀼𑀢𑀺𑀬𑀁, 𑀯𑀺𑀲𑁆𑀲𑀝𑁆𑀞𑀦𑀺𑀤𑁆𑀤𑁄𑀓𑁆𑀓𑀫𑀦𑁂, 𑀲𑀫𑀸𑀦𑀚𑀸𑀢𑀺𑀬𑀸 𑀫𑁂𑀣𑀼𑀦𑀧𑀝𑀺𑀲𑁂𑀯𑀦𑁂, 𑀚𑀺𑀡𑁆𑀡𑀢𑀘𑀸𑀧𑀦𑀬𑀦𑁂𑀢𑀺 𑀯𑀼𑀢𑁆𑀢𑀁 ‘‘𑀲𑀚𑀸𑀢𑀺𑀬𑀁 𑀞𑀺𑀢𑁄’’𑀢𑀺. 𑀉𑀭𑀕𑀚𑀸𑀢𑀺𑀬𑀫𑁂𑀯 𑀞𑀺𑀢𑁄 𑀧𑀚𑀳𑀢𑀺, 𑀦 𑀦𑀸𑀕𑀺𑀤𑁆𑀥𑀺𑀬𑀸 𑀅𑀜𑁆𑀜𑀚𑀸𑀢𑀺𑀭𑀽𑀧𑁄𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀳𑀺 𑀫𑀳𑀺𑀤𑁆𑀥𑀺𑀓𑁂 𑀦𑀸𑀕𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀭𑀻𑀭𑀁 𑀔𑀸𑀤𑀬𑀫𑀸𑀦𑀁 𑀯𑀺𑀬𑀸𑀢𑀺 𑀅𑀢𑁆𑀢𑀦𑁄𑀬𑁂𑀯 𑀢𑀘𑀁 𑀅𑀢𑁆𑀢𑀦𑁄 𑀲𑀭𑀻𑀭𑀁 𑀔𑀸𑀤𑀬𑀫𑀸𑀦𑀁 𑀯𑀺𑀬. 𑀧𑀼𑀭𑀸𑀡𑀢𑀘𑀁 𑀚𑀺𑀕𑀼𑀘𑁆𑀙𑀦𑁆𑀢𑁄𑀢𑀺 𑀚𑀺𑀡𑁆𑀡𑀢𑀸𑀬 𑀓𑀢𑁆𑀣𑀘𑀺 𑀫𑀼𑀢𑁆𑀢𑀁 𑀓𑀢𑁆𑀣𑀘𑀺 𑀑𑀮𑀫𑁆𑀩𑀺𑀢𑀁 𑀚𑀺𑀡𑁆𑀡𑀢𑀘𑀁 𑀚𑀺𑀕𑀼𑀘𑁆𑀙𑀦𑁆𑀢𑁄. 𑀘𑀢𑀽𑀳𑀻𑀢𑀺 ‘‘𑀲𑀚𑀸𑀢𑀺𑀬𑀁 𑀞𑀺𑀢𑁄, 𑀦𑀺𑀲𑁆𑀲𑀸𑀬, 𑀣𑀸𑀫𑁂𑀦, 𑀚𑀺𑀕𑀼𑀘𑁆𑀙𑀦𑁆𑀢𑁄’’𑀢𑀺 𑀬𑀣𑀸𑀯𑀼𑀢𑁆𑀢𑁂𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺. 𑀢𑀢𑁄𑀢𑀺 𑀓𑀜𑁆𑀘𑀼𑀓𑀢𑁄. 𑀅𑀜𑁆𑀜𑁂𑀦𑀸𑀢𑀺 𑀅𑀢𑁆𑀢𑀢𑁄 𑀅𑀜𑁆𑀜𑁂𑀦. 𑀘𑀺𑀢𑁆𑀢𑁂𑀦𑀸𑀢𑀺 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑁂𑀦𑁂𑀯, 𑀦 𑀳𑀢𑁆𑀣𑁂𑀦. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀼𑀭𑀺𑀲𑁄 𑀅𑀳𑀺𑀁 𑀧𑀲𑁆𑀲𑀺𑀢𑁆𑀯𑀸 ‘‘𑀅𑀳𑁄 𑀯𑀢𑀸𑀳𑀁 𑀇𑀫𑀁 𑀅𑀳𑀺𑀁 𑀓𑀜𑁆𑀘𑀼𑀓𑀢𑁄 𑀉𑀤𑁆𑀥𑀭𑁂𑀬𑁆𑀬’’𑀦𑁆𑀢𑀺 𑀅𑀳𑀺𑀁 𑀓𑀭𑀡𑁆𑀟𑀸 𑀘𑀺𑀢𑁆𑀢𑁂𑀦 𑀉𑀤𑁆𑀥𑀭𑁂𑀬𑁆𑀬, 𑀢𑀲𑁆𑀲 𑀏𑀯𑀫𑀲𑁆𑀲 ‘‘𑀅𑀬𑀁 𑀅𑀳𑀺, 𑀅𑀬𑀁 𑀓𑀭𑀡𑁆𑀟𑁄, 𑀅𑀜𑁆𑀜𑁄 𑀅𑀳𑀺, 𑀅𑀜𑁆𑀜𑁄 𑀓𑀭𑀡𑁆𑀟𑁄, 𑀓𑀭𑀡𑁆𑀟𑀸 𑀢𑁆𑀯𑁂𑀯 𑀅𑀳𑀺 𑀉𑀩𑁆𑀪𑀢𑁄’’𑀢𑀺, 𑀏𑀯𑀫𑁂𑀯…𑀧𑁂… 𑀲𑁄 𑀇𑀫𑀫𑁆𑀳𑀸 𑀓𑀸𑀬𑀸 𑀅𑀜𑁆𑀜𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀺𑀦𑀸𑀢𑀺…𑀧𑁂… 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑀇𑀤𑁆𑀥𑀺𑀯𑀺𑀥𑀜𑀸𑀡𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁩𑁯. 𑀪𑀸𑀚𑀦𑀸𑀤𑀺𑀯𑀺𑀓𑀢𑀺𑀓𑀺𑀭𑀺𑀬𑀸𑀦𑀺𑀲𑁆𑀲𑀬𑀪𑀽𑀢𑀸 ¶ 𑀲𑀼𑀧𑀭𑀺𑀓𑀫𑁆𑀫𑀓𑀢𑀫𑀢𑁆𑀢𑀺𑀓𑀸𑀤𑀬𑁄 𑀯𑀺𑀬 𑀯𑀺𑀓𑀼𑀩𑁆𑀩𑀦𑀓𑀺𑀭𑀺𑀬𑀸𑀦𑀺𑀲𑁆𑀲𑀬𑀪𑀸𑀯𑀢𑁄 𑀇𑀤𑁆𑀥𑀺𑀯𑀺𑀥𑀜𑀸𑀡𑀁 𑀤𑀝𑁆𑀞𑀩𑁆𑀩𑀁.

𑁨𑁪𑁧. 𑀧𑀼𑀩𑁆𑀩𑁂 𑀦𑀻𑀯𑀭𑀡𑀧𑁆𑀧𑀳𑀸𑀦𑀯𑀸𑀭𑁂 𑀯𑀺𑀬 𑀓𑀦𑁆𑀢𑀸𑀭𑀕𑁆𑀕𑀳𑀡𑀁 𑀅𑀓𑀢𑁆𑀯𑀸 𑀓𑁂𑀯𑀮𑀁 𑀅𑀤𑁆𑀥𑀸𑀦𑀫𑀕𑁆𑀕𑀕𑁆𑀕𑀳𑀡𑀁 𑀔𑁂𑀫𑀫𑀕𑁆𑀕𑀤𑀲𑁆𑀲𑀦𑀢𑁆𑀣𑀁. 𑀓𑀲𑁆𑀫𑀸 𑀧𑀦 𑀔𑁂𑀫𑀫𑀕𑁆𑀕𑀲𑁆𑀲𑁂𑀯 𑀤𑀲𑁆𑀲𑀦𑀁, 𑀦 𑀓𑀦𑁆𑀢𑀸𑀭𑀫𑀕𑁆𑀕𑀲𑁆𑀲, 𑀦𑀦𑀼 𑀉𑀧𑀫𑀸𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀦𑁆𑀢𑀺 𑀘𑁄𑀤𑀦𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀬𑀲𑁆𑀫𑀸’’𑀢𑀺𑀆𑀤𑀺𑀫𑀸𑀳. ‘‘𑀅𑀧𑁆𑀧𑀝𑀺𑀪𑀬𑀜𑁆𑀳𑀻’’𑀢𑀺𑀆𑀤𑀺 𑀧𑀦 𑀔𑁂𑀫𑀫𑀕𑁆𑀕𑀲𑁆𑀲𑁂𑀯 𑀕𑀳𑀡𑀓𑀸𑀭𑀡𑀤𑀲𑁆𑀲𑀦𑀁. 𑀯𑀸𑀢𑀸𑀢𑀧𑀸𑀤𑀺𑀦𑀺𑀯𑀸𑀭𑀡𑀢𑁆𑀣𑀁 𑀲𑀻𑀲𑁂 𑀲𑀸𑀝𑀓𑀁 𑀓𑀢𑁆𑀯𑀸. 𑀢𑀣𑀸 𑀢𑀣𑀸 𑀧𑀦 𑀧𑀭𑀺𑀧𑀼𑀡𑁆𑀡𑀯𑀘𑀦𑀁 𑀉𑀧𑀫𑀸𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑀫𑁂𑀬𑁆𑀬𑀲𑀫𑁆𑀧𑀸𑀤𑀦𑀢𑁆𑀣𑀁, 𑀅𑀥𑀺𑀧𑁆𑀧𑁂𑀢𑀲𑁆𑀲 𑀘 𑀉𑀧𑀫𑁂𑀬𑁆𑀬𑀢𑁆𑀣𑀲𑁆𑀲 𑀲𑀼𑀯𑀺𑀜𑁆𑀜𑀸𑀧𑀦𑀢𑁆𑀣𑀁, 𑀳𑁂𑀢𑀼𑀤𑀸𑀳𑀭𑀡𑀪𑁂𑀤𑁆𑀬𑀪𑁂𑀤𑀓𑀸𑀤𑀺𑀲𑀫𑁆𑀧𑀦𑁆𑀦𑀯𑀘𑀦𑁂𑀦 𑀘 𑀯𑀺𑀜𑁆𑀜𑀽𑀚𑀸𑀢𑀺𑀓𑀸𑀦𑀁 𑀘𑀺𑀢𑁆𑀢𑀸𑀭𑀸𑀥𑀦𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀲𑀩𑁆𑀩𑀢𑁆𑀣. 𑀲𑀼𑀔𑀁 𑀯𑀯𑀢𑁆𑀣𑀧𑁂𑀢𑀻𑀢𑀺 𑀅𑀓𑀺𑀘𑁆𑀙𑀁 𑀅𑀓𑀲𑀺𑀭𑁂𑀦 𑀲𑀮𑁆𑀮𑀓𑁆𑀔𑁂𑀢𑀺, 𑀧𑀭𑀺𑀘𑁆𑀙𑀺𑀦𑁆𑀤𑀢𑀺 𑀘.

𑁨𑁪𑁩. 𑀫𑀦𑁆𑀤𑁄 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑀤𑀸𑀭𑀓𑁄𑀧𑀺 ‘‘𑀤𑀳𑀭𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀬𑀼𑀯𑀸’’𑀢𑀺 ¶ 𑀯𑀼𑀢𑁆𑀢𑀦𑁆𑀢𑀺 𑀫𑀦𑁆𑀢𑁆𑀯𑀸 𑀬𑀼𑀯𑀲𑀤𑁆𑀤𑁂𑀦 𑀯𑀺𑀲𑁂𑀲𑀺𑀢𑀩𑁆𑀩𑀫𑁂𑀯 𑀤𑀳𑀭𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀭𑀼𑀡𑁄’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀬𑀼𑀯𑀸𑀧𑀺 𑀓𑁄𑀘𑀺 𑀅𑀦𑀺𑀘𑁆𑀙𑀦𑀓𑁄, 𑀅𑀦𑀺𑀘𑁆𑀙𑀦𑀢𑁄 𑀘 𑀅𑀫𑀡𑁆𑀟𑀦𑀚𑀸𑀢𑀺𑀓𑁄𑀢𑀺 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀫𑀡𑁆𑀟𑀦𑀚𑀸𑀢𑀺𑀓𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀫𑀦𑁆𑀢𑁆𑀯𑀸 𑀫𑀡𑁆𑀟𑀦𑀚𑀸𑀢𑀺𑀓𑀸𑀤𑀺𑀲𑀤𑁆𑀤𑁂𑀦 𑀯𑀺𑀲𑁂𑀲𑀺𑀢𑀩𑁆𑀩𑀫𑁂𑀯 𑀬𑀼𑀯𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁄𑀩𑁆𑀩𑀦𑁆𑀦𑁂𑀦 𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀯𑀼𑀢𑁆𑀢𑀁. 𑀧𑀸𑀴𑀺𑀬𑀜𑁆𑀳𑀺 𑀬𑀣𑀸𑀓𑁆𑀓𑀫𑀁 𑀧𑀤𑀢𑁆𑀢𑀬𑀲𑁆𑀲 𑀯𑀺𑀲𑁂𑀲𑀺𑀢𑀩𑁆𑀩𑀯𑀺𑀲𑁂𑀲𑀓𑀪𑀸𑀯𑁂𑀦 𑀯𑀘𑀦𑀢𑁄 𑀢𑀣𑀸 𑀲𑀁𑀯𑀡𑁆𑀡𑀦𑀸 𑀓𑀢𑀸, 𑀇𑀢𑀭𑀣𑀸 𑀏𑀓𑀓𑁂𑀦𑀸𑀧𑀺 𑀧𑀤𑁂𑀦 𑀅𑀥𑀺𑀧𑁆𑀧𑁂𑀢𑀢𑁆𑀣𑀸𑀥𑀺𑀕𑀫𑀺𑀓𑀸 𑀲𑀧𑀭𑀺𑀯𑀸𑀭𑀸 𑀲𑀁𑀯𑀡𑁆𑀡𑀦𑀸𑀯 𑀓𑀸𑀢𑀩𑁆𑀩𑀸 𑀲𑀺𑀬𑀸𑀢𑀺. ‘‘𑀫𑀡𑁆𑀟𑀦𑀧𑀓𑀢𑀺𑀓𑁄’’𑀢𑀺 𑀯𑀼𑀢𑁆𑀢𑀫𑁂𑀯 𑀯𑀺𑀯𑀭𑀺𑀢𑀼𑀁 ‘‘𑀤𑀺𑀯𑀲𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀓𑀡𑀺𑀓𑀲𑀤𑁆𑀤𑁄 𑀤𑁄𑀲𑀧𑀭𑀺𑀬𑀸𑀬𑁄, 𑀤𑁄𑀲𑁄 𑀘 𑀦𑀸𑀫 𑀓𑀸𑀴𑀢𑀺𑀮𑀓𑀸𑀤𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀓𑀸𑀴𑀢𑀺𑀮𑀓𑀸’’𑀢𑀺𑀆𑀤𑀺𑀦𑀸. 𑀓𑀸𑀴𑀢𑀺𑀮𑀧𑁆𑀧𑀫𑀸𑀡𑀸 𑀩𑀺𑀦𑁆𑀤𑀯𑁄 𑀓𑀸𑀴𑀢𑀺𑀮𑀓𑀸𑀦𑀺, 𑀓𑀸𑀴𑀸 𑀯𑀸 𑀓𑀫𑁆𑀫𑀸𑀲𑀸, 𑀬𑁂 ‘‘𑀲𑀸𑀲𑀧𑀩𑀻𑀚𑀺𑀓𑀸’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀺𑀮𑀧𑁆𑀧𑀫𑀸𑀡𑀸 𑀩𑀺𑀦𑁆𑀤𑀯𑁄 𑀢𑀺𑀮𑀓𑀸𑀦𑀺. 𑀯𑀗𑁆𑀕𑀁 𑀦𑀸𑀫 𑀯𑀺𑀬𑀗𑁆𑀕𑀁 𑀯𑀺𑀧𑀭𑀺𑀡𑀸𑀫𑀺𑀢𑀫𑀗𑁆𑀕𑀁. 𑀬𑁄𑀩𑁆𑀩𑀦𑁆𑀦𑀧𑀻𑀴𑀓𑀸𑀤𑀬𑁄 𑀫𑀼𑀔𑀤𑀽𑀲𑀺𑀧𑀻𑀴𑀓𑀸, 𑀬𑁂 ‘‘𑀔𑀭𑀧𑀻𑀴𑀓𑀸’’ 𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺. 𑀫𑀼𑀔𑀦𑀺𑀫𑀺𑀢𑁆𑀢𑀦𑁆𑀢𑀺 𑀫𑀼𑀔𑀘𑁆𑀙𑀸𑀬𑀁. 𑀫𑀼𑀔𑁂 𑀕𑀢𑁄 𑀤𑁄𑀲𑁄 𑀫𑀼𑀔𑀤𑁄𑀲𑁄 ¶ . 𑀮𑀓𑁆𑀔𑀡𑀯𑀘𑀦𑀫𑀢𑁆𑀢𑀫𑁂𑀢𑀁 𑀫𑀼𑀔𑁂 𑀅𑀤𑁄𑀲𑀲𑁆𑀲𑀧𑀺 𑀧𑀸𑀓𑀝𑀪𑀸𑀯𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀬𑀣𑀸 𑀯𑀸 𑀫𑀼𑀔𑁂 𑀤𑁄𑀲𑁄, 𑀏𑀯𑀁 𑀫𑀼𑀔𑁂 𑀅𑀤𑁄𑀲𑁄𑀧𑀺 𑀫𑀼𑀔𑀤𑁄𑀲𑁄𑀢𑀺 𑀲𑀭𑀮𑁄𑀧𑁂𑀦 𑀯𑀼𑀢𑁆𑀢𑁄 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑀢𑁄𑀧𑀺 𑀅𑀦𑁂𑀓𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀢𑀩𑁆𑀩𑀢𑁆𑀢𑀸, 𑀧𑀺𑀲𑀤𑁆𑀤𑀮𑁄𑀧𑁂𑀦 𑀯𑀸 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀯𑀼𑀢𑁆𑀢𑁄𑀧𑀺 𑀳𑀺 𑀅𑀢𑁆𑀣𑁄 𑀲𑀫𑁆𑀧𑀺𑀡𑁆𑀟𑀦𑀯𑀲𑁂𑀦 𑀯𑀼𑀢𑁆𑀢𑁄 𑀯𑀺𑀬 𑀯𑀺𑀜𑁆𑀜𑀸𑀬𑀢𑀺, 𑀫𑀼𑀔𑀤𑁄𑀲𑁄 𑀘 𑀫𑀼𑀔𑀅𑀤𑁄𑀲𑁄 𑀘 𑀫𑀼𑀔𑀤𑁄𑀲𑁄𑀢𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑀦𑀬𑁂𑀦𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀏𑀯𑀜𑁆𑀳𑀺 𑀅𑀢𑁆𑀣𑀲𑁆𑀲 𑀧𑀭𑀺𑀧𑀼𑀡𑁆𑀡𑀢𑀸𑀬 ‘‘𑀧𑀭𑁂𑀲𑀁 𑀲𑁄𑀴𑀲𑀯𑀺𑀥𑀁 𑀘𑀺𑀢𑁆𑀢𑀁 𑀧𑀸𑀓𑀝𑀁 𑀳𑁄𑀢𑀻’’𑀢𑀺 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀯𑀢𑁆𑀢𑀩𑁆𑀩𑀲𑁆𑀲𑀸𑀯𑀲𑀺𑀝𑁆𑀞𑀲𑁆𑀲, 𑀕𑀸𑀳𑁄 𑀦𑀺𑀤𑀲𑁆𑀲𑀦𑀸𑀤𑀺𑀦𑀸;

𑀅𑀧𑀺𑀲𑀤𑁆𑀤𑀸𑀤𑀺𑀮𑁄𑀧𑁂𑀦, 𑀏𑀓𑀲𑁂𑀲𑀦𑀬𑁂𑀦 𑀯𑀸.

𑀅𑀲𑀫𑀸𑀦𑁂 𑀲𑀤𑁆𑀤𑁂 𑀢𑀺𑀥𑀸, 𑀘𑀢𑀼𑀥𑀸 𑀘 𑀲𑀫𑀸𑀦𑀓𑁂;

𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑀢𑁄𑀧𑀺, 𑀯𑁂𑀤𑀺𑀢𑀩𑁆𑀩𑁄 𑀯𑀺𑀪𑀸𑀯𑀺𑀦𑀸’’𑀢𑀺.

‘‘𑀲𑀭𑀸𑀕𑀁 𑀯𑀸 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁 𑀲𑁄𑀴𑀲𑀯𑀺𑀥𑀁 𑀘𑀺𑀢𑁆𑀢𑀁.

𑁨𑁪𑁫. 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀽𑀧𑀫𑀸𑀬𑀦𑁆𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀲𑁆𑀲, 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂 𑀯𑀸 𑀤𑀲𑁆𑀲𑀺𑀢𑀸𑀬 𑀉𑀧𑀫𑀸𑀬. 𑀓𑀲𑁆𑀫𑀸 𑀧𑀦 𑀧𑀸𑀴𑀺𑀬𑀁 𑀕𑀸𑀫𑀢𑁆𑀢𑀬𑀫𑁂𑀯 𑀉𑀧𑀫𑀸𑀦𑁂 𑀕𑀳𑀺𑀢𑀦𑁆𑀢𑀺 𑀘𑁄𑀤𑀦𑀁 𑀲𑁄𑀥𑁂𑀢𑀼𑀁 ‘‘𑀢𑀁 𑀤𑀺𑀯𑀲’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀤𑀺𑀯𑀲𑀁 𑀓𑀢𑀓𑀺𑀭𑀺𑀬𑀸 𑀦𑀸𑀫 𑀧𑀸𑀓𑀢𑀺𑀓𑀲𑀢𑁆𑀢𑀲𑁆𑀲𑀸𑀧𑀺 𑀬𑁂𑀪𑀼𑀬𑁆𑀬𑁂𑀦 𑀧𑀸𑀓𑀝𑀸 𑀳𑁄𑀢𑀺. 𑀢𑀲𑁆𑀫𑀸 𑀢𑀁 𑀤𑀺𑀯𑀲𑀁 𑀕𑀦𑁆𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀁 𑀕𑀸𑀫𑀢𑁆𑀢𑀬𑀫𑁂𑀯 𑀪𑀕𑀯𑀢𑀸 𑀕𑀳𑀺𑀢𑀁, 𑀦 𑀢𑀤𑀼𑀢𑁆𑀢𑀭𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 ¶ . 𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 𑀢𑀁𑀤𑀺𑀯𑀲𑀕𑁆𑀕𑀳𑀡𑀁 𑀦𑀢𑁆𑀣𑀺, 𑀕𑀸𑀫𑀢𑁆𑀢𑀬𑀕𑁆𑀕𑀳𑀡𑁂𑀦 𑀧𑀦 𑀢𑀤𑀳𑁂𑀯 𑀓𑀢𑀓𑀺𑀭𑀺𑀬𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀫𑀦𑁆𑀢𑁆𑀯𑀸 𑀅𑀝𑁆𑀞𑀓𑀣𑀸𑀬𑀁 𑀢𑀁𑀤𑀺𑀯𑀲𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀁𑀤𑀺𑀯𑀲𑀕𑀢𑀕𑀸𑀫𑀢𑁆𑀢𑀬𑀕𑁆𑀕𑀳𑀡𑁂𑀦𑁂𑀯 𑀘 𑀫𑀳𑀸𑀪𑀺𑀦𑀻𑀳𑀸𑀭𑁂𑀳𑀺 𑀅𑀜𑁆𑀜𑁂𑀲𑀫𑁆𑀧𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀮𑀸𑀪𑀻𑀦𑀁 𑀢𑀻𑀲𑀼𑀧𑀺 𑀪𑀯𑁂𑀲𑀼 𑀓𑀢𑀓𑀺𑀭𑀺𑀬𑀸 𑀬𑁂𑀪𑀼𑀬𑁆𑀬𑁂𑀦 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀤𑀻𑀧𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑀤𑀢𑁆𑀣𑀫𑁆𑀧𑀺 𑀳𑀺 𑀕𑀸𑀫𑀢𑁆𑀢𑀬𑀕𑁆𑀕𑀳𑀡𑀦𑁆𑀢𑀺. 𑀢𑀻𑀲𑀼 𑀪𑀯𑁂𑀲𑀼 𑀓𑀢𑀓𑀺𑀭𑀺𑀬𑀸𑀬𑀸𑀢𑀺 𑀅𑀪𑀺𑀲𑀫𑁆𑀧𑀭𑀸𑀬𑁂𑀲𑀼 𑀧𑀼𑀩𑁆𑀩𑁂 𑀤𑀺𑀝𑁆𑀞𑀥𑀫𑁆𑀫𑁂 𑀧𑀦 𑀇𑀤𑀸𑀦𑀺, 𑀧𑀼𑀩𑁆𑀩𑁂 𑀘 𑀓𑀢𑀓𑀺𑀘𑁆𑀘𑀲𑁆𑀲.

𑁨𑁪𑁭. 𑀧𑀸𑀴𑀺𑀬𑀁 𑀭𑀣𑀺𑀓𑀸𑀬 𑀯𑀻𑀣𑀺𑀁 𑀲𑀜𑁆𑀘𑀭𑀦𑁆𑀢𑁂𑀢𑀺 𑀅𑀜𑁆𑀜𑀸𑀬 𑀭𑀣𑀺𑀓𑀸𑀬 𑀅𑀜𑁆𑀜𑀁 𑀭𑀣𑀺𑀁 𑀲𑀜𑁆𑀘𑀭𑀦𑁆𑀢𑁂𑀢𑀺 𑀅𑀢𑁆𑀣𑁄, 𑀢𑁂𑀦 𑀅𑀧𑀭𑀸𑀧𑀭𑀁 𑀲𑀜𑁆𑀘𑀭𑀡𑀁 𑀤𑀲𑁆𑀲𑀺𑀢𑀦𑁆𑀢𑀺 𑀆𑀳 ‘‘𑀅𑀧𑀭𑀸𑀧𑀭𑀁 𑀲𑀜𑁆𑀘𑀭𑀦𑁆𑀢𑁂’’𑀢𑀺, 𑀢𑀁𑀢𑀁𑀓𑀺𑀘𑁆𑀘𑀯𑀲𑁂𑀦 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀭𑀦𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀅𑀬𑀫𑁂𑀯𑀢𑁆𑀣𑁄 𑀭𑀣𑀺𑀯𑀻𑀣𑀺𑀲𑀤𑁆𑀤𑀸𑀦𑀫𑁂𑀓𑀢𑁆𑀣𑀢𑁆𑀢𑀸. 𑀲𑀺𑀗𑁆𑀖𑀸𑀝𑀓𑀫𑁆𑀳𑀻𑀢𑀺 𑀯𑀻𑀣𑀺𑀘𑀢𑀼𑀓𑁆𑀓𑁂. 𑀧𑀸𑀲𑀸𑀤𑁄 𑀯𑀺𑀬 𑀪𑀺𑀓𑁆𑀔𑀼𑀲𑁆𑀲 𑀓𑀭𑀚𑀓𑀸𑀬𑁄 𑀤𑀝𑁆𑀞𑀩𑁆𑀩𑁄 ¶ 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑀲𑁆𑀲 𑀤𑀝𑁆𑀞𑀩𑁆𑀩𑀤𑀲𑁆𑀲𑀦𑀲𑀺𑀤𑁆𑀥𑀺𑀢𑁄. 𑀫𑀁𑀲𑀘𑀓𑁆𑀔𑀼𑀫𑀢𑁄 𑀳𑀺 𑀤𑀺𑀩𑁆𑀩𑀘𑀓𑁆𑀔𑀼𑀲𑀫𑀥𑀺𑀕𑀫𑁄. 𑀬𑀣𑀸𑀳 ‘‘𑀫𑀁𑀲𑀘𑀓𑁆𑀔𑀼𑀲𑁆𑀲 𑀉𑀧𑁆𑀧𑀸𑀤𑁄, 𑀫𑀕𑁆𑀕𑁄 𑀤𑀺𑀩𑁆𑀩𑀲𑁆𑀲 𑀘𑀓𑁆𑀔𑀼𑀦𑁄’’𑀢𑀺 (𑀇𑀢𑀺𑀯𑀼. 𑁬𑁧). 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀯𑀺𑀬 𑀅𑀬𑀫𑁂𑀯 𑀤𑀺𑀩𑁆𑀩𑀘𑀓𑁆𑀔𑀼𑀁 𑀧𑀢𑁆𑀯𑀸 𑀞𑀺𑀢𑁄 𑀪𑀺𑀓𑁆𑀔𑀼 𑀤𑀝𑁆𑀞𑀩𑁆𑀩𑀲𑁆𑀲 𑀤𑀲𑁆𑀲𑀦𑀢𑁄. 𑀕𑁂𑀳𑀁 𑀧𑀯𑀺𑀲𑀦𑁆𑀢𑁄, 𑀢𑀢𑁄 𑀦𑀺𑀓𑁆𑀔𑀫𑀦𑁆𑀢𑁄 𑀯𑀺𑀬 𑀘 𑀫𑀸𑀢𑀼𑀓𑀼𑀘𑁆𑀙𑀺𑀁 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀯𑀺𑀲𑀦𑁆𑀢𑁄, 𑀢𑀢𑁄 𑀘 𑀯𑀺𑀚𑀸𑀢𑀺𑀯𑀲𑁂𑀦 𑀦𑀺𑀓𑁆𑀔𑀫𑀦𑁆𑀢𑁄 𑀫𑀸𑀢𑀼𑀓𑀼𑀘𑁆𑀙𑀺𑀬𑀸 𑀕𑁂𑀳𑀲𑀤𑀺𑀲𑀢𑁆𑀢𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀫𑀸𑀢𑀭𑀁 𑀓𑀼𑀝𑀺𑀓𑀁 𑀩𑁆𑀭𑀽𑀲𑀺, 𑀪𑀭𑀺𑀬𑀁 𑀩𑁆𑀭𑀽𑀲𑀺 𑀓𑀼𑀮𑀸𑀯𑀓’’𑀦𑁆𑀢𑀺 (𑀲𑀁. 𑀦𑀺. 𑁧.𑁧𑁯). 𑀅𑀬𑀁 𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑁄 𑀦𑀬𑁄 𑁋 𑀕𑁂𑀳𑀁 𑀧𑀯𑀺𑀲𑀦𑁆𑀢𑁄 𑀯𑀺𑀬 𑀅𑀢𑁆𑀢𑀪𑀸𑀯𑀁 𑀉𑀧𑀧𑀚𑁆𑀚𑀦𑀯𑀲𑁂𑀦 𑀑𑀓𑁆𑀓𑀫𑀦𑁆𑀢𑁄, 𑀕𑁂𑀳𑀸 𑀦𑀺𑀓𑁆𑀔𑀫𑀦𑁆𑀢𑁄 𑀯𑀺𑀬 𑀘 𑀅𑀢𑁆𑀢𑀪𑀸𑀯𑀢𑁄 𑀘𑀯𑀦𑀯𑀲𑁂𑀦 𑀅𑀧𑀓𑁆𑀓𑀫𑀦𑁆𑀢𑁄 𑀅𑀢𑁆𑀢𑀪𑀸𑀯𑀲𑁆𑀲 𑀕𑁂𑀳𑀲𑀤𑀺𑀲𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑀺 ‘‘𑀕𑀳𑀓𑀸𑀭𑀓 𑀤𑀺𑀝𑁆𑀞𑁄𑀲𑀺, 𑀧𑀼𑀦 𑀕𑁂𑀳𑀁 𑀦 𑀓𑀸𑀳𑀲𑀻’’𑀢𑀺 (𑀥. 𑀧. 𑁧𑁫𑁪).

𑀅𑀧𑀭𑀸𑀧𑀭𑀁 𑀲𑀜𑁆𑀘𑀭𑀡𑀓𑀲𑀢𑁆𑀢𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀲𑀁𑀲𑀸𑀭𑁂 𑀧𑀭𑀺𑀩𑁆𑀪𑀫𑀦𑀓𑀲𑀢𑁆𑀢𑀸. 𑀅𑀩𑁆𑀪𑁄𑀓𑀸𑀲𑀝𑁆𑀞𑀸𑀦𑁂𑀢𑀺 𑀅𑀚𑁆𑀛𑁄𑀓𑀸𑀲𑀤𑁂𑀲𑀪𑀽𑀢𑁂. 𑀫𑀚𑁆𑀛𑁂𑀢𑀺 𑀦𑀕𑀭𑀲𑁆𑀲 𑀫𑀚𑁆𑀛𑀪𑀽𑀢𑁂 𑀲𑀺𑀗𑁆𑀖𑀸𑀝𑀓𑁂. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑁂𑀓𑀤𑁂𑀲𑁂. 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀓𑀲𑀢𑁆𑀢𑀸. 𑀇𑀫𑀺𑀦𑀸 𑀳𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑁂 𑀚𑀸𑀢𑀲𑀁𑀯𑀤𑁆𑀥𑁂 𑀲𑀢𑁆𑀢𑁂 𑀯𑀤𑀢𑀺, ‘‘𑀅𑀧𑀭𑀸𑀧𑀭𑀁 𑀲𑀜𑁆𑀘𑀭𑀡𑀓𑀲𑀢𑁆𑀢𑀸’’𑀢𑀺 𑀧𑀦 𑀏𑀢𑁂𑀦 𑀢𑀣𑀸 𑀅𑀦𑀺𑀬𑀫𑀺𑀢𑀓𑀸𑀮𑀺𑀓𑁂 𑀲𑀸𑀥𑀸𑀭𑀡𑀲𑀢𑁆𑀢𑁂. 𑀏𑀯𑀜𑁆𑀳𑀺 𑀢𑁂𑀲𑀁 𑀬𑀣𑀸𑀓𑁆𑀓𑀫𑀁 𑀲𑀜𑁆𑀘𑀭𑀡𑀓𑀲𑀦𑁆𑀦𑀺𑀲𑀺𑀦𑁆𑀦𑀓𑀚𑀦𑁄𑀧𑀫𑀢𑀸 𑀉𑀧𑀧𑀦𑁆𑀦𑀸 𑀳𑁄𑀢𑀻𑀢𑀺. 𑀢𑀻𑀲𑀼 𑀪𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀁 𑀆𑀯𑀺𑀪𑀽𑀢𑀓𑀸𑀮𑁄𑀢𑀺 𑀏𑀢𑁆𑀣 𑀧𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀲𑀢𑁆𑀢𑀸𑀦𑀁 𑀅𑀦𑀺𑀬𑀫𑀢𑁄 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀦𑀦𑀼 𑀘𑀸𑀬𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀣𑀸, 𑀅𑀣 𑀓𑀲𑁆𑀫𑀸 ‘‘𑀢𑀻𑀲𑀼 𑀪𑀯𑁂𑀲𑀽’’𑀢𑀺 𑀘𑀢𑀼𑀯𑁄𑀓𑀸𑀭𑀪𑀯𑀲𑁆𑀲𑀸𑀧𑀺 𑀲𑀗𑁆𑀕𑀳𑁄 𑀓𑀢𑁄. 𑀦 𑀳𑀺 𑀲𑁄 𑀅𑀭𑀽𑀧𑀥𑀫𑁆𑀫𑀸𑀭𑀫𑁆𑀫𑀡𑁄𑀢𑀺 𑀅𑀦𑀼𑀬𑁄𑀕𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀇𑀤𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ¶ ‘‘𑀇𑀤𑀦𑁆𑀢𑀺 𑀢𑀻𑀲𑀼 𑀪𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀦𑁆𑀢𑀺 𑀇𑀤𑀁 𑀯𑀘𑀦’’𑀦𑁆𑀢𑀺 (𑀤𑀻. 𑀦𑀺. 𑀝𑀻. 𑁧.𑁨𑁪𑁭) 𑀅𑀬𑀫𑁂𑀢𑁆𑀣 𑀆𑀘𑀭𑀺𑀬𑀲𑁆𑀲 𑀫𑀢𑀺, 𑀏𑀯𑀁 𑀲𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀅𑀝𑁆𑀞𑀓𑀣𑀸𑀬𑀫𑁂𑀯 𑀬𑀣𑀸𑀯𑀼𑀢𑁆𑀢𑁄 𑀅𑀦𑀼𑀬𑁄𑀕𑁄 𑀧𑀭𑀺𑀳𑀭𑀺𑀢𑁄𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀫𑁆𑀳𑀸𑀓𑀁 𑀔𑀦𑁆𑀢𑀺 𑁋 𑀦𑀦𑀼 𑀘𑀸𑀬𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀣𑀸, 𑀅𑀣 𑀓𑀲𑁆𑀫𑀸 ‘‘𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂’’𑀢𑀺𑀆𑀤𑀺𑀦𑀸 𑀅𑀯𑀺𑀲𑁂𑀲𑀢𑁄 𑀘𑀢𑀼𑀯𑁄𑀓𑀸𑀭𑀪𑀯𑀽𑀧𑀕𑀲𑁆𑀲𑀸𑀧𑀺 𑀲𑀗𑁆𑀕𑀳𑁄 𑀓𑀢𑁄. 𑀦 𑀳𑀺 ¶ 𑀲𑁄 𑀅𑀭𑀽𑀧𑀥𑀫𑁆𑀫𑀸𑀭𑀫𑁆𑀫𑀡𑁄𑀢𑀺 𑀅𑀦𑀼𑀬𑁄𑀕𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀇𑀤𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀤𑀦𑁆𑀢𑀺 ‘‘𑀲𑀢𑁆𑀢𑁂 𑀧𑀲𑁆𑀲𑀢𑀺 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂’’𑀢𑀺𑀆𑀤𑀺𑀯𑀘𑀦𑀁. 𑀏𑀯𑀜𑁆𑀳𑀺 𑀲𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀧𑀸𑀴𑀺𑀬𑀫𑁂𑀯 𑀬𑀣𑀸𑀯𑀼𑀢𑁆𑀢𑁄 𑀅𑀦𑀼𑀬𑁄𑀕𑁄 𑀧𑀭𑀺𑀳𑀭𑀺𑀢𑁄𑀢𑀺. 𑀬𑀤𑀕𑁆𑀕𑁂𑀦 𑀲𑁄 𑀧𑀸𑀴𑀺𑀬𑀁 𑀧𑀭𑀺𑀳𑀭𑀺𑀢𑁄, 𑀢𑀤𑀕𑁆𑀕𑁂𑀦 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀢𑀲𑁆𑀲𑀸 𑀅𑀢𑁆𑀣𑀯𑀡𑁆𑀡𑀦𑀸𑀪𑀸𑀯𑀢𑁄. 𑀤𑁂𑀲𑀦𑀸𑀲𑀼𑀔𑀢𑁆𑀣𑀫𑁂𑀯𑀸𑀢𑀺 𑀓𑁂𑀯𑀮𑀁 𑀤𑁂𑀲𑀦𑀸𑀲𑀼𑀔𑀢𑁆𑀣𑀁 𑀏𑀯 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁, 𑀦 𑀧𑀦 𑀘𑀢𑀼𑀯𑁄𑀓𑀸𑀭𑀪𑀯𑀽𑀧𑀕𑀸𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀆𑀯𑀺𑀪𑀸𑀯𑀲𑀩𑁆𑀪𑀸𑀯𑀢𑁄. ‘‘𑀞𑀧𑁂𑀢𑁆𑀯𑀸 𑀅𑀭𑀽𑀧𑀪𑀯’’𑀦𑁆𑀢𑀺 𑀯𑀸 ‘‘𑀤𑁆𑀯𑀻𑀲𑀼 𑀪𑀯𑁂𑀲𑀽’’𑀢𑀺 𑀯𑀸 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀓𑀸𑀫𑀸𑀯𑀘𑀭𑀪𑀯𑀢𑁄, 𑀭𑀽𑀧𑀸𑀯𑀘𑀭𑀪𑀯𑀢𑁄 𑀘 𑀘𑀯𑀫𑀸𑀦𑁂𑀢𑀺 𑀯𑀸 𑀓𑀸𑀫𑀸𑀯𑀘𑀭𑀪𑀯𑁂, 𑀭𑀽𑀧𑀸𑀯𑀘𑀭𑀪𑀯𑁂 𑀘 𑀉𑀧𑀧𑀚𑁆𑀚𑀫𑀸𑀦𑁂𑀢𑀺 𑀯𑀸 𑀯𑀼𑀘𑁆𑀘𑀫𑀸𑀦𑀸 𑀳𑀺 𑀤𑁂𑀲𑀦𑀸 𑀬𑀣𑀸𑀭𑀳𑀁 𑀪𑁂𑀤𑁆𑀬𑀪𑁂𑀤𑀓𑀸𑀤𑀺𑀯𑀺𑀪𑀸𑀯𑀦𑁂𑀦 𑀲𑀼𑀔𑀸𑀲𑀼𑀔𑀸𑀯𑀩𑁄𑀥𑀸 𑀘 𑀦 𑀳𑁄𑀢𑀺, 𑀅𑀯𑀺𑀲𑁂𑀲𑁂𑀦 𑀧𑀦 𑀏𑀯𑀫𑁂𑀯 𑀯𑀼𑀘𑁆𑀘𑀫𑀸𑀦𑀸 𑀲𑀼𑀔𑀸𑀲𑀼𑀔𑀸𑀯𑀩𑁄𑀥𑀸 𑀘. 𑀤𑁂𑀲𑁂𑀢𑀼𑀁, 𑀅𑀯𑀩𑁄𑀥𑁂𑀢𑀼𑀜𑁆𑀘 𑀲𑀼𑀓𑀭𑀢𑀸𑀧𑀬𑁄𑀚𑀦𑀜𑁆𑀳𑀺 ‘‘𑀤𑁂𑀲𑀦𑀸𑀲𑀼𑀔𑀢𑁆𑀣’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸𑀢𑀺 𑀆𑀳 ‘‘𑀆𑀭𑀼𑀧𑁆𑀧𑁂…𑀧𑁂… 𑀦𑀢𑁆𑀣𑀻’’𑀢𑀺, 𑀤𑀺𑀩𑁆𑀩𑀘𑀓𑁆𑀔𑀼𑀕𑁄𑀘𑀭𑀪𑀽𑀢𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀫𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀆𑀲𑀯𑀓𑁆𑀔𑀬𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁨𑁪𑁮. 𑀇𑀥 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁, 𑀦 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀲𑀼 𑀯𑀺𑀬 𑀅𑀪𑀺𑀜𑁆𑀜𑀸𑀧𑀸𑀤𑀓𑀁. 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀦𑁆𑀢𑀺 𑀘 𑀯𑀺𑀧𑀲𑁆𑀲𑀦𑀸𑀬 𑀧𑀤𑀝𑁆𑀞𑀸𑀦𑀪𑀽𑀢𑀁, 𑀯𑀺𑀧𑀲𑁆𑀲𑀦𑀸 𑀘 𑀦𑀸𑀫𑁂𑀲𑀸 𑀢𑀺𑀯𑀺𑀥𑀸 𑀯𑀺𑀧𑀲𑁆𑀲𑀓𑀧𑀼𑀕𑁆𑀕𑀮𑀪𑁂𑀤𑁂𑀦 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀯𑀺𑀧𑀲𑁆𑀲𑀦𑀸, 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀸𑀦𑀁 𑀯𑀺𑀧𑀲𑁆𑀲𑀦𑀸, 𑀲𑀸𑀯𑀓𑀸𑀦𑀁 𑀯𑀺𑀧𑀲𑁆𑀲𑀦𑀸 𑀘𑀸𑀢𑀺. 𑀢𑀢𑁆𑀣 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁, 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀘 𑀯𑀺𑀧𑀲𑁆𑀲𑀦𑀸 𑀘𑀺𑀦𑁆𑀢𑀸𑀫𑀬𑀜𑀸𑀡𑀲𑀫𑁆𑀩𑀦𑁆𑀥𑀺𑀓𑀸 𑀲𑀬𑀫𑁆𑀪𑀼𑀜𑀸𑀡𑀪𑀽𑀢𑀸, 𑀲𑀸𑀯𑀓𑀸𑀦𑀁 𑀧𑀦 𑀲𑀼𑀢𑀫𑀬𑀜𑀸𑀡𑀲𑀫𑁆𑀩𑀦𑁆𑀥𑀺𑀓𑀸 𑀧𑀭𑁄𑀧𑀤𑁂𑀲𑀲𑀫𑁆𑀪𑀽𑀢𑀸. 𑀲𑀸 ‘‘𑀞𑀧𑁂𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀅𑀯𑀲𑁂𑀲𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑀸𑀦𑀁 𑀅𑀜𑁆𑀜𑀢𑀭𑀢𑁄 𑀯𑀼𑀝𑁆𑀞𑀸𑀬𑀸’’𑀢𑀺𑀆𑀤𑀺𑀦𑀸 𑀅𑀦𑁂𑀓𑀥𑀸, 𑀅𑀭𑀽𑀧𑀫𑀼𑀔𑀯𑀲𑁂𑀦 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑁂 𑀯𑀼𑀢𑁆𑀢𑀸𑀦𑀁 𑀢𑁂𑀲𑀁 𑀢𑁂𑀲𑀁 𑀥𑀸𑀢𑀼𑀧𑀭𑀺𑀕𑁆𑀕𑀳𑀫𑀼𑀔𑀸𑀦𑀜𑁆𑀘 𑀅𑀜𑁆𑀜𑀢𑀭𑀫𑀼𑀔𑀯𑀲𑁂𑀦 𑀅𑀦𑁂𑀓𑀥𑀸 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁬𑁬𑁪) 𑀦𑀸𑀦𑀸𑀦𑀬𑀢𑁄 𑀯𑀺𑀪𑀸𑀯𑀺𑀢𑀸, 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀦 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀼𑀔𑁂𑀦 𑀧𑀪𑁂𑀤𑀕𑀫𑀦𑀢𑁄 𑀦𑀸𑀦𑀸𑀦𑀬𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀦𑁆𑀦𑀺𑀲𑁆𑀲𑀬𑀲𑁆𑀲 𑀅𑀭𑀺𑀬𑀫𑀕𑁆𑀕𑀜𑀸𑀡𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀽𑀢𑀁 𑀧𑀼𑀩𑁆𑀩𑀪𑀸𑀕𑀜𑀸𑀡𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀦𑁆𑀢𑀁 ¶ 𑀧𑀭𑀺𑀧𑀸𑀓𑀁 𑀕𑀘𑁆𑀙𑀦𑁆𑀢𑀁 𑀧𑀭𑀫𑀕𑀫𑁆𑀪𑀻𑀭𑀁 𑀲𑀡𑁆𑀳𑀲𑀼𑀔𑀼𑀫𑀢𑀭𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀳𑁄𑀢𑀺 ¶ , 𑀬𑀁 𑀅𑀝𑁆𑀞𑀓𑀣𑀸𑀲𑀼 ‘‘𑀫𑀳𑀸𑀯𑀚𑀺𑀭𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀬𑀲𑁆𑀲 𑀘 𑀧𑀯𑀢𑁆𑀢𑀺𑀯𑀺𑀪𑀸𑀕𑁂𑀦 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀧𑁆𑀧𑀪𑁂𑀤𑀲𑁆𑀲 𑀧𑀸𑀤𑀓𑀪𑀸𑀯𑁂𑀦 𑀲𑀫𑀸𑀧𑀚𑁆𑀚𑀺𑀬𑀫𑀸𑀦𑀸 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑁆𑀬𑀸 𑀤𑁂𑀯𑀲𑀺𑀓𑀁 𑀲𑀢𑁆𑀣𑀼 𑀯𑀴𑀜𑁆𑀚𑀦𑀲𑀫𑀸𑀧𑀢𑁆𑀢𑀺𑀬𑁄 𑀯𑀼𑀘𑁆𑀘𑀦𑁆𑀢𑀺. 𑀲𑁆𑀯𑀸𑀬𑀁 𑀩𑀼𑀤𑁆𑀥𑀸𑀦𑀁 𑀯𑀺𑀧𑀲𑁆𑀲𑀦𑀸𑀘𑀸𑀭𑁄 𑀧𑀭𑀫𑀢𑁆𑀣𑀫𑀜𑁆𑀚𑀼𑀲𑀸𑀬𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀯𑀡𑁆𑀡𑀦𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑀝𑀻. 𑁧.𑁧𑁪𑁪) 𑀉𑀤𑁆𑀤𑁂𑀲𑀢𑁄 𑀆𑀘𑀭𑀺𑀬𑁂𑀦 𑀤𑀲𑁆𑀲𑀺𑀢𑁄, 𑀢𑀢𑁄 𑀲𑁄 𑀅𑀢𑁆𑀣𑀺𑀓𑁂𑀳𑀺 𑀕𑀳𑁂𑀢𑀩𑁆𑀩𑁄. 𑀇𑀥 𑀧𑀦 𑀲𑀸𑀯𑀓𑀸𑀦𑀁 𑀯𑀺𑀧𑀲𑁆𑀲𑀦𑀸𑀯 𑀅𑀥𑀺𑀧𑁆𑀧𑁂𑀢𑀸.

‘‘𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬𑀸’’𑀢𑀺 𑀇𑀤𑀁 𑀓𑀺𑀭𑀺𑀬𑀸𑀧𑀬𑁄𑀚𑀦𑀪𑀽𑀢𑁂 𑀢𑀤𑀢𑁆𑀣𑁂 𑀲𑀫𑁆𑀧𑀤𑀸𑀦𑀯𑀘𑀦𑀁, 𑀢𑀲𑁆𑀫𑀸 𑀅𑀲𑀢𑀺𑀧𑀺 𑀧𑀬𑁄𑀚𑀦𑀯𑀸𑀘𑀓𑁂 𑀧𑀬𑁄𑀚𑀦𑀯𑀲𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀔𑀬𑀜𑀸𑀡𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀸𑀬𑀸’’𑀢𑀺. 𑀏𑀯𑀫𑀻𑀤𑀺𑀲𑁂𑀲𑀼. 𑀦𑀺𑀩𑁆𑀩𑀸𑀦𑀁, 𑀅𑀭𑀳𑀢𑁆𑀢𑀫𑀕𑁆𑀕𑁄 𑀘 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀇𑀥 𑀔𑀬𑁄 𑀦𑀸𑀫, 𑀢𑀢𑁆𑀣 𑀜𑀸𑀡𑀁 𑀔𑀬𑀜𑀸𑀡𑀁, 𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀧𑀬𑁄𑀚𑀦𑀁, 𑀢𑀤𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀔𑁂𑀧𑁂𑀢𑀺 𑀧𑀸𑀧𑀥𑀫𑁆𑀫𑁂 𑀲𑀫𑀼𑀘𑁆𑀙𑀺𑀦𑁆𑀤𑀢𑀻𑀢𑀺 𑀔𑀬𑁄, 𑀫𑀕𑁆𑀕𑁄. 𑀲𑁄 𑀧𑀦 𑀧𑀸𑀧𑀓𑁆𑀔𑀬𑁄 𑀆𑀲𑀯𑀓𑁆𑀔𑀬𑁂𑀦 𑀯𑀺𑀦𑀸 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀔𑀬𑁂 𑀜𑀸𑀡’’𑀦𑁆𑀢𑀺 (𑀥. 𑀲. 𑀲𑀼𑀢𑁆𑀢𑀦𑁆𑀢𑀤𑀼𑀓𑀫𑀸𑀢𑀺𑀓𑀸 𑁧𑁪𑁮) 𑀏𑀢𑁆𑀣 𑀔𑀬𑀕𑁆𑀕𑀳𑀡𑁂𑀦 𑀆𑀲𑀯𑀓𑁆𑀔𑀬𑁄𑀯 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀆𑀲𑀯𑀸𑀦𑀁 𑀔𑀬𑁄’’𑀢𑀺 𑀇𑀫𑀺𑀦𑀸. 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀦𑁆𑀢𑀺 𑀆𑀲𑀯𑀸𑀦𑀫𑀦𑀼𑀧𑁆𑀧𑀸𑀤𑀪𑀽𑀢𑁂 𑀅𑀭𑀺𑀬𑀨𑀮𑁂 𑀜𑀸𑀡𑀁. 𑀔𑀻𑀬𑀺𑀁𑀲𑀼 𑀆𑀲𑀯𑀸 𑀏𑀢𑁆𑀣𑀸𑀢𑀺 𑀔𑀬𑁄, 𑀨𑀮𑀁. 𑀲𑀫𑀺𑀢𑀧𑀸𑀧𑀢𑀸𑀬 𑀲𑀫𑀡𑁄, 𑀲𑀫𑀺𑀢𑀧𑀸𑀧𑀢𑀸 𑀘 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀅𑀭𑀳𑀢𑁆𑀢𑀨𑀮𑁂𑀦𑁂𑀯𑀸𑀢𑀺 𑀆𑀳 ‘‘𑀆𑀲𑀯𑀸𑀦𑀁 𑀔𑀬𑀸 𑀲𑀫𑀡𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀨𑀮’’𑀦𑁆𑀢𑀺. 𑀔𑀬𑀸𑀢𑀺 𑀘 𑀔𑀻𑀡𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀔𑀻𑀬𑀦𑁆𑀢𑀺 𑀆𑀲𑀯𑀸 𑀏𑀢𑁆𑀣𑀸𑀢𑀺 𑀔𑀬𑁄, 𑀦𑀺𑀩𑁆𑀩𑀸𑀦𑀁. ‘‘𑀆𑀲𑀯𑀓𑁆𑀔𑀬𑀸’’𑀢𑀺 𑀧𑀦 𑀲𑀫𑀸𑀲𑀯𑀲𑁂𑀦 𑀤𑁆𑀯𑀺𑀪𑀸𑀯𑀁 𑀓𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 ‘‘𑀆𑀲𑀯𑀸𑀦𑀁 𑀔𑀬𑁄’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂 𑀆𑀲𑀯𑀓𑁆𑀔𑀬𑀧𑀤𑀕𑁆𑀕𑀳𑀡𑀁.

‘‘𑀧𑀭𑀯𑀚𑁆𑀚𑀸𑀦𑀼𑀧𑀲𑁆𑀲𑀺𑀲𑁆𑀲𑀸’’𑀢𑀺𑀆𑀤𑀺𑀕𑀸𑀣𑀸 𑀥𑀫𑁆𑀫𑀧𑀤𑁂 (𑀥. 𑀧. 𑁨𑁫𑁩). 𑀢𑀢𑁆𑀣 𑀉𑀚𑁆𑀛𑀸𑀦𑀲𑀜𑁆𑀜𑀺𑀦𑁄𑀢𑀺 𑀕𑀭𑀳𑀲𑀜𑁆𑀜𑀺𑀦𑁄. 𑀅𑀭𑀸𑀢𑀺 𑀤𑀽𑀭𑀸. ‘‘𑀅𑀭𑀸 𑀲𑀺𑀗𑁆𑀖𑀸𑀫𑀺 𑀯𑀸𑀭𑀺𑀚’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁩𑁪; 𑀚𑀸. 𑁧.𑁬.𑁧𑁧𑁬) 𑀯𑀺𑀬 𑀳𑀺 𑀤𑀽𑀭𑀢𑁆𑀣𑁄𑀬𑀁 𑀦𑀺𑀧𑀸𑀢𑁄. ‘‘𑀆𑀭𑀸’’𑀢𑀺𑀧𑀺 𑀧𑀸𑀞𑁄. 𑀅𑀭𑀸𑀲𑀤𑁆𑀤𑁄 𑀯𑀺𑀬 𑀆𑀭𑀸𑀲𑀤𑁆𑀤𑁄𑀧𑀺 𑀤𑀽𑀭𑀢𑁆𑀣𑁂 𑀏𑀓𑁄 𑀦𑀺𑀧𑀸𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀤𑁂𑀯 𑀳𑀺 𑀧𑀤𑀁 𑀲𑀤𑁆𑀤𑀲𑀢𑁆𑀣𑁂 𑀉𑀤𑀸𑀳𑀝𑀁. 𑀓𑀸𑀫𑀜𑁆𑀘 𑀥𑀫𑁆𑀫𑀧𑀤𑀝𑁆𑀞𑀓𑀣𑀸𑀬𑀁 ‘‘𑀅𑀭𑀳𑀢𑁆𑀢𑀫𑀕𑁆𑀕𑀲𑀗𑁆𑀔𑀸𑀢𑀸 𑀆𑀭𑀸 𑀤𑀽𑀭𑀁 𑀕𑀢𑁄𑀯 𑀳𑁄𑀢𑀻’’𑀢𑀺 (𑀥. 𑀧. 𑀅𑀝𑁆𑀞. 𑁨.𑁨𑁫𑁩) 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀆𑀲𑀯𑀯𑀟𑁆𑀠𑀺𑀬𑀸 𑀲𑀗𑁆𑀔𑀸𑀭𑁂 𑀯𑀟𑁆𑀠𑁂𑀦𑁆𑀢𑁄 ¶ 𑀯𑀺𑀲𑀗𑁆𑀔𑀸𑀭𑀢𑁄 𑀲𑀼𑀯𑀺𑀤𑀽𑀭𑀤𑀽𑀭𑁄, 𑀢𑀲𑁆𑀫𑀸 ‘‘𑀆𑀭𑀸 𑀲𑁄 𑀆𑀲𑀯𑀓𑁆𑀔𑀬𑀸’’𑀢𑀺 𑀏𑀢𑁆𑀣 𑀆𑀲𑀯𑀓𑁆𑀔𑀬𑀧𑀤𑀁 𑀯𑀺𑀲𑀗𑁆𑀔𑀸𑀭𑀸𑀥𑀺𑀯𑀘𑀦𑀫𑁆𑀧𑀺 𑀲𑀫𑁆𑀪𑀯𑀢𑀻𑀢𑀺 𑀆𑀳 ‘‘𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀔𑀬𑀦𑀁 𑀔𑀬𑁄, 𑀆𑀲𑀯𑀸𑀦𑀁 𑀔𑀡𑀦𑀺𑀭𑁄𑀥𑁄. 𑀲𑁂𑀲𑀁 𑀢𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀁. 𑀪𑀗𑁆𑀕𑁄 𑀆𑀲𑀯𑀸𑀦𑀁 𑀔𑀬𑁄𑀢𑀺 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸. 𑀇𑀥 𑀧𑀦 𑀦𑀺𑀩𑁆𑀩𑀸𑀦𑀫𑁆𑀧𑀺 𑀫𑀕𑁆𑀕𑁄𑀧𑀺 𑀅𑀯𑀺𑀦𑀸𑀪𑀸𑀯𑀢𑁄. 𑀦 𑀳𑀺 𑀦𑀺𑀩𑁆𑀩𑀸𑀦𑀫𑀦𑀸𑀭𑀩𑁆𑀪 𑀫𑀕𑁆𑀕𑁂𑀦𑁂𑀯 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀻𑀢𑀺.

𑀢𑀦𑁆𑀦𑀺𑀦𑁆𑀦𑀦𑁆𑀢𑀺 ¶ 𑀢𑀲𑁆𑀫𑀺𑀁 𑀆𑀲𑀯𑀸𑀦𑀁 𑀔𑀬𑀜𑀸𑀡𑁂 𑀦𑀺𑀦𑁆𑀦𑀁. 𑀲𑁂𑀲𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀸𑀴𑀺𑀬𑀁 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀤𑀼𑀓𑁆𑀔𑀲𑁆𑀲 𑀅𑀭𑀺𑀬𑀲𑀘𑁆𑀘𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸, 𑀅𑀦𑀯𑀲𑁂𑀲𑁂𑀢𑁆𑀯𑀸 𑀘 𑀢𑀤𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀘𑁆𑀘𑀓𑁆𑀔𑀢𑁄 𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀢𑀓’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀏𑀢𑁆𑀢𑀓𑀁 𑀤𑀼𑀓𑁆𑀔𑀦𑁆𑀢𑀺 𑀢𑀲𑁆𑀲 𑀧𑀭𑀺𑀘𑁆𑀙𑀺𑀚𑁆𑀚 𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑀁. 𑀦 𑀇𑀢𑁄 𑀪𑀺𑀬𑁆𑀬𑁄𑀢𑀺 𑀅𑀦𑀯𑀲𑁂𑀲𑁂𑀢𑁆𑀯𑀸 𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑀁. 𑀢𑁂𑀦𑀸𑀳 ‘‘𑀲𑀩𑁆𑀩𑀫𑁆𑀧𑀺 𑀤𑀼𑀓𑁆𑀔𑀲𑀘𑁆𑀘’’𑀦𑁆𑀢𑀺𑀆𑀤𑀺. 𑀲𑀭𑀲𑀮𑀓𑁆𑀔𑀡𑀧𑀝𑀺𑀯𑁂𑀥𑀯𑀲𑁂𑀦 𑀧𑀚𑀸𑀦𑀦𑀫𑁂𑀯 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀲𑀭𑀲𑀮𑀓𑁆𑀔𑀡𑀧𑀝𑀺𑀯𑁂𑀥𑁂𑀦𑀸’’𑀢𑀺 𑀇𑀫𑀺𑀦𑀸. 𑀭𑀲𑁄𑀢𑀺 𑀲𑀪𑀸𑀯𑁄 𑀭𑀲𑀺𑀢𑀩𑁆𑀩𑁄 𑀚𑀸𑀦𑀺𑀢𑀩𑁆𑀩𑁄𑀢𑀺 𑀓𑀢𑁆𑀯𑀸, 𑀅𑀢𑁆𑀢𑀦𑁄 𑀭𑀲𑁄 𑀲𑀭𑀲𑁄, 𑀲𑁄 𑀏𑀯 𑀮𑀓𑁆𑀔𑀡𑀁, 𑀢𑀲𑁆𑀲 𑀅𑀲𑀫𑁆𑀫𑁄𑀳𑀢𑁄 𑀧𑀝𑀺𑀯𑀺𑀚𑁆𑀛𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀲𑀫𑁆𑀫𑁄𑀳𑀢𑁄 𑀧𑀝𑀺𑀯𑀺𑀚𑁆𑀛𑀦𑀜𑁆𑀘 𑀦𑀸𑀫 𑀬𑀣𑀸 𑀢𑀲𑁆𑀫𑀺𑀁 𑀜𑀸𑀡𑁂 𑀧𑀯𑀢𑁆𑀢𑁂 𑀧𑀘𑁆𑀙𑀸 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀲𑀭𑀽𑀧𑀸𑀤𑀺𑀧𑀭𑀺𑀘𑁆𑀙𑁂𑀤𑁂 𑀲𑀫𑁆𑀫𑁄𑀳𑁄 𑀦 𑀳𑁄𑀢𑀺, 𑀢𑀣𑀸 𑀢𑀲𑁆𑀲 𑀧𑀯𑀢𑁆𑀢𑀺𑀬𑁂𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺. ‘‘𑀦𑀺𑀩𑁆𑀩𑀢𑁆𑀢𑀺𑀓’’𑀦𑁆𑀢𑀺 𑀇𑀫𑀺𑀦𑀸 ‘‘𑀤𑀼𑀓𑁆𑀔𑀁 𑀲𑀫𑀼𑀤𑁂𑀢𑀺 𑀏𑀢𑀲𑁆𑀫𑀸𑀢𑀺 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀢𑀺. 𑀢𑀤𑀼𑀪𑀬𑀦𑁆𑀢𑀺 𑀤𑀼𑀓𑁆𑀔𑀁, 𑀤𑀼𑀓𑁆𑀔𑀲𑀫𑀼𑀤𑀬𑁄 𑀘. 𑀬𑀁 𑀞𑀸𑀦𑀁 𑀧𑀢𑁆𑀯𑀸𑀢𑀺 𑀬𑀁 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀝𑁆𑀞𑁂𑀦 𑀓𑀸𑀭𑀡𑀪𑀽𑀢𑀁 𑀆𑀕𑀫𑁆𑀫. 𑀞𑀸𑀦𑀦𑁆𑀢𑀺 𑀳𑀺 𑀓𑀸𑀭𑀡𑀁 𑀯𑀼𑀘𑁆𑀘𑀢𑀺 𑀢𑀺𑀝𑁆𑀞𑀢𑀺 𑀏𑀢𑁆𑀣 𑀨𑀮𑀁 𑀢𑀤𑀸𑀬𑀢𑁆𑀢𑀢𑀸𑀬𑀸𑀢𑀺 𑀓𑀢𑁆𑀯𑀸. 𑀢𑀤𑀼𑀪𑀬𑀁 𑀧𑀢𑁆𑀯𑀸𑀢𑀺 𑀘 𑀢𑀤𑀼𑀪𑀬𑀯𑀢𑁄 𑀧𑀼𑀕𑁆𑀕𑀮𑀲𑁆𑀲 𑀢𑀤𑀼𑀪𑀬𑀲𑁆𑀲 𑀧𑀢𑁆𑀢𑀺 𑀯𑀺𑀬 𑀯𑀼𑀢𑁆𑀢𑀸. 𑀧𑀼𑀕𑁆𑀕𑀮𑀲𑁆𑀲𑁂𑀯 𑀳𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺, 𑀦 𑀢𑀤𑀼𑀪𑀬𑀲𑁆𑀲. 𑀅𑀧𑀺𑀘 𑀧𑀢𑁆𑀯𑀸𑀢𑀺 𑀧𑀸𑀧𑀼𑀡𑀦𑀳𑁂𑀢𑀼, 𑀧𑀼𑀕𑁆𑀕𑀮𑀲𑁆𑀲 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀲𑀫𑀸𑀧𑀚𑁆𑀚𑀦𑀢𑁄𑀢𑀺 𑀅𑀢𑁆𑀣𑁄. 𑀅𑀲𑀫𑀸𑀦𑀓𑀢𑁆𑀢𑀼𑀓𑁂 𑀯𑀺𑀬 𑀳𑀺 𑀲𑀫𑀸𑀦𑀓𑀢𑁆𑀢𑀼𑀓𑁂𑀧𑀺 𑀢𑁆𑀯𑀸𑀧𑀘𑁆𑀘𑀬𑀲𑁆𑀲 𑀳𑁂𑀢𑁆𑀯𑀢𑁆𑀣𑁂 𑀧𑀯𑀢𑁆𑀢𑀺 𑀲𑀤𑁆𑀤𑀲𑀢𑁆𑀣𑁂𑀲𑀼 𑀧𑀸𑀓𑀝𑀸. 𑀅𑀧𑁆𑀧𑀯𑀢𑁆𑀢𑀻𑀢𑀺 𑀅𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 ‘‘𑀦 𑀧𑀯𑀢𑁆𑀢𑀢𑀺 𑀢𑀤𑀼𑀪𑀬𑀫𑁂𑀢𑁂𑀦𑀸’’𑀢𑀺 𑀓𑀢𑁆𑀯𑀸, 𑀅𑀧𑁆𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀯𑀸 ‘‘𑀦 𑀧𑀯𑀢𑁆𑀢𑀢𑀺 𑀢𑀤𑀼𑀪𑀬𑀫𑁂𑀢𑁆𑀣𑀸’’𑀢𑀺 𑀓𑀢𑁆𑀯𑀸, 𑀅𑀦𑁂𑀦 𑀘 ‘‘𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑀢𑀺 𑀏𑀢𑁆𑀣, 𑀏𑀢𑁂𑀦𑀸𑀢𑀺 𑀯𑀸 𑀤𑀼𑀓𑁆𑀔𑀦𑀺𑀭𑁄𑀥𑁄’’𑀢𑀺 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀢𑀺, 𑀤𑀼𑀓𑁆𑀔𑀲𑀫𑀼𑀤𑀬𑀲𑁆𑀲 𑀧𑀦 𑀕𑀳𑀡𑀁 𑀢𑀁𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀦𑀺𑀭𑀼𑀚𑁆𑀛𑀦𑀢𑁄 𑀢𑀲𑁆𑀲𑀸𑀧𑀺 𑀦𑀺𑀭𑀼𑀚𑁆𑀛𑀦𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀺𑀩𑁆𑀩𑀸𑀦𑀧𑀤𑁂𑀬𑁂𑀯 ¶ 𑀢-𑀲𑀤𑁆𑀤𑁄 𑀦𑀺𑀯𑀢𑁆𑀢𑀢𑀻𑀢𑀺 𑀅𑀬𑀁-𑀲𑀤𑁆𑀤𑁄 𑀧𑀼𑀦 𑀯𑀼𑀢𑁆𑀢𑁄. 𑀲𑀩𑁆𑀩𑀦𑀸𑀫𑀺𑀓𑀜𑁆𑀳𑀺 𑀧𑀤𑀁 𑀯𑀼𑀢𑁆𑀢𑀲𑁆𑀲 𑀯𑀸 𑀮𑀺𑀗𑁆𑀕𑀲𑁆𑀲 𑀕𑀸𑀳𑀓𑀁, 𑀯𑀼𑀘𑁆𑀘𑀫𑀸𑀦𑀲𑁆𑀲 𑀯𑀸. 𑀢𑀲𑁆𑀲𑀸𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑀲𑁆𑀲. 𑀲𑀫𑁆𑀧𑀸𑀧𑀓𑀦𑁆𑀢𑀺 𑀲𑀘𑁆𑀙𑀺𑀓𑀭𑀡𑀯𑀲𑁂𑀦 𑀲𑀫𑁆𑀫𑀤𑁂𑀯 𑀧𑀸𑀧𑀓𑀁, 𑀏𑀢𑁂𑀦 𑀘 ‘‘𑀤𑀼𑀓𑁆𑀔𑀦𑀺𑀭𑁄𑀥𑀁 𑀕𑀫𑀬𑀢𑀺, 𑀕𑀘𑁆𑀙𑀢𑀺 𑀯𑀸 𑀏𑀢𑀸𑀬𑀸𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻, 𑀲𑀸𑀬𑁂𑀯 𑀧𑀝𑀺𑀧𑀤𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸’’𑀢𑀺 𑀦𑀺𑀩𑁆𑀩𑀘𑀦𑀁 𑀤𑀲𑁆𑀲𑁂𑀢𑀺.

𑀓𑀺𑀮𑁂𑀲𑀯𑀲𑁂𑀦𑀸𑀢𑀺 𑀆𑀲𑀯𑀲𑀗𑁆𑀔𑀸𑀢𑀓𑀺𑀮𑁂𑀲𑀯𑀲𑁂𑀦. 𑀢𑀤𑁂𑀯 𑀆𑀲𑀯𑀧𑀭𑀺𑀬𑀸𑀬𑁂𑀦 𑀤𑀲𑁆𑀲𑁂𑀦𑁆𑀢𑁄 𑀧𑀼𑀦 𑀆𑀳, 𑀢𑀲𑁆𑀫𑀸 𑀦 𑀏𑀢𑁆𑀣 𑀧𑀼𑀦𑀭𑀼𑀢𑁆𑀢𑀺𑀤𑁄𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀬𑀸𑀬𑀤𑁂𑀲𑀦𑀸𑀪𑀸𑀯𑁄 𑀦𑀸𑀫 𑀳𑀺 𑀆𑀯𑁂𑀡𑀺𑀓𑁄 𑀩𑀼𑀤𑁆𑀥𑀥𑀫𑁆𑀫𑁄𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀦𑀦𑀼 𑀘 𑀆𑀲𑀯𑀸𑀦𑀁 𑀤𑀼𑀓𑁆𑀔𑀲𑀘𑁆𑀘𑀧𑀭𑀺𑀬𑀸𑀬𑁄𑀯 𑀅𑀢𑁆𑀣𑀺, 𑀦 𑀲𑁂𑀲𑀲𑀘𑁆𑀘𑀧𑀭𑀺𑀬𑀸𑀬𑁄, 𑀅𑀣 𑀓𑀲𑁆𑀫𑀸 𑀲𑀭𑀽𑀧𑀢𑁄 𑀤𑀲𑁆𑀲𑀺𑀢𑀲𑀘𑁆𑀘𑀸𑀦𑀺𑀬𑁂𑀯 𑀓𑀺𑀮𑁂𑀲𑀯𑀲𑁂𑀦 𑀧𑀭𑀺𑀬𑀸𑀬𑀢𑁄 𑀧𑀼𑀦 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳𑀸𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀲𑀘𑁆𑀘𑀁, 𑀢𑀁𑀲𑀫𑁆𑀩𑀦𑁆𑀥𑀢𑁆𑀢𑀸 𑀧𑀦 𑀲𑁂𑀲𑀲𑀘𑁆𑀘𑀸𑀦𑀁 𑀢𑀁𑀲𑀫𑀼𑀤𑀬𑀸𑀤𑀺𑀧𑀭𑀺𑀬𑀸𑀬𑁄𑀧𑀺 𑀮𑀩𑁆𑀪𑀢𑀻𑀢𑀺 ¶ 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑀼𑀓𑁆𑀔𑀲𑀘𑁆𑀘𑀧𑀭𑀺𑀬𑀸𑀬𑀪𑀽𑀢𑀆𑀲𑀯𑀲𑀫𑁆𑀩𑀦𑁆𑀥𑀸𑀦𑀺 𑀳𑀺 𑀆𑀲𑀯𑀲𑀫𑀼𑀤𑀬𑀸𑀤𑀻𑀦𑀻𑀢𑀺, 𑀲𑀘𑁆𑀘𑀸𑀦𑀺 𑀤𑀲𑁆𑀲𑁂𑀦𑁆𑀢𑁄𑀢𑀺𑀧𑀺 𑀬𑁄𑀚𑁂𑀢𑀩𑁆𑀩𑀁. ‘‘𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬𑀸’’𑀢𑀺 𑀆𑀭𑀤𑁆𑀥𑀢𑁆𑀢𑀸 𑀘𑁂𑀢𑁆𑀣 𑀆𑀲𑀯𑀸𑀦𑀫𑁂𑀯 𑀕𑀳𑀡𑀁, 𑀦 𑀲𑁂𑀲𑀓𑀺𑀮𑁂𑀲𑀸𑀦𑀁 𑀢𑀣𑀸 𑀅𑀦𑀸𑀭𑀤𑁆𑀥𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 ‘‘𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁪𑁮; 𑀫. 𑀦𑀺. 𑁧.𑁪𑁩𑁩; 𑁩.𑁧𑁯) 𑀆𑀲𑀯𑀯𑀺𑀫𑀼𑀢𑁆𑀢𑀲𑀻𑀲𑁂𑀦𑁂𑀯 𑀲𑀩𑁆𑀩𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀺 𑀯𑀼𑀢𑁆𑀢𑀸. ‘‘𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀫𑀺𑀲𑁆𑀲𑀓𑀫𑀕𑁆𑀕𑁄𑀯 𑀇𑀥 𑀓𑀣𑀺𑀢𑁄 𑀮𑁄𑀓𑀺𑀬𑀯𑀺𑀧𑀲𑁆𑀲𑀦𑀸𑀬 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑁆𑀲 𑀫𑀺𑀲𑁆𑀲𑀓𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀳 𑀯𑀺𑀧𑀲𑁆𑀲𑀦𑀸𑀬 𑀓𑁄𑀝𑀺𑀧𑁆𑀧𑀢𑁆𑀢𑀁 𑀫𑀕𑁆𑀕𑀁 𑀓𑀣𑁂𑀲𑀻’’𑀢𑀺. ‘‘𑀚𑀸𑀦𑀢𑁄 𑀧𑀲𑁆𑀲𑀢𑁄’’𑀢𑀺 𑀇𑀫𑀺𑀦𑀸 𑀢𑀬𑁄𑀧𑀺 𑀧𑀭𑀺𑀜𑁆𑀜𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸𑀪𑀺𑀲𑀫𑀬𑀸 𑀯𑀼𑀢𑁆𑀢𑀸 𑀘𑀢𑀼𑀲𑀘𑁆𑀘𑀧𑀚𑀸𑀦𑀦𑀸𑀬 𑀏𑀯 𑀘𑀢𑀼𑀓𑀺𑀘𑁆𑀘𑀲𑀺𑀤𑁆𑀥𑀺𑀢𑁄, 𑀧𑀳𑀸𑀦𑀸𑀪𑀺𑀲𑀫𑀬𑁄 𑀧𑀦 𑀧𑀸𑀭𑀺𑀲𑁂𑀲𑀢𑁄 ‘‘𑀯𑀺𑀫𑀼𑀘𑁆𑀘𑀢𑀻’’𑀢𑀺 𑀇𑀫𑀺𑀦𑀸 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀫𑀕𑁆𑀕𑀓𑁆𑀔𑀡𑀁 𑀤𑀲𑁆𑀲𑁂𑀢𑀻’’𑀢𑀺. 𑀘𑀢𑁆𑀢𑀸𑀭𑀺 𑀳𑀺 𑀓𑀺𑀘𑁆𑀘𑀸𑀦𑀺 𑀘𑀢𑀼𑀲𑀘𑁆𑀘𑀧𑀚𑀸𑀦𑀦𑀸𑀬 𑀏𑀯 𑀲𑀺𑀤𑁆𑀥𑀸𑀦𑀺. 𑀬𑀣𑀸𑀳 ‘‘𑀢𑀁 𑀔𑁄 𑀧𑀦𑀺𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀧𑀭𑀺𑀜𑁆𑀜𑀸𑀢𑀦𑁆𑀢𑀺 𑀫𑁂 𑀪𑀺𑀓𑁆𑀔𑀯𑁂 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁫; 𑀧𑀝𑀺. 𑀫. 𑁨.𑁨𑁯). 𑀅𑀬𑀁 𑀅𑀝𑁆𑀞𑀓𑀣𑀸𑀫𑀼𑀢𑁆𑀢𑀓𑁄 𑀦𑀬𑁄 𑁋 𑀚𑀸𑀦𑀢𑁄 𑀧𑀲𑁆𑀲𑀢𑁄𑀢𑀺 𑀘 𑀳𑁂𑀢𑀼𑀦𑀺𑀤𑁆𑀤𑁂𑀲𑁄, ‘‘𑀚𑀸𑀦𑀦𑀳𑁂𑀢𑀼 𑀧𑀲𑁆𑀲𑀦𑀳𑁂𑀢𑀼 𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀻’’𑀢𑀺𑀆𑀤𑀺𑀦𑀸 𑀬𑁄𑀚𑀦𑀸. 𑀓𑀸𑀫𑀜𑁆𑀘𑁂𑀢𑁆𑀣 𑀚𑀸𑀦𑀦𑀧𑀲𑁆𑀲