📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀫𑀚𑁆𑀛𑀺𑀫𑀦𑀺𑀓𑀸𑀬𑁂

𑀫𑀽𑀮𑀧𑀡𑁆𑀡𑀸𑀲-𑀅𑀝𑁆𑀞𑀓𑀣𑀸

(𑀤𑀼𑀢𑀺𑀬𑁄 𑀪𑀸𑀕𑁄)

𑁩. 𑀑𑀧𑀫𑁆𑀫𑀯𑀕𑁆𑀕𑁄

𑁧. 𑀓𑀓𑀘𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁨. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀓𑀓𑀘𑀽𑀧𑀫𑀲𑀼𑀢𑁆𑀢𑀁. 𑀢𑀢𑁆𑀣 𑀫𑁄𑀴𑀺𑀬𑀨𑀕𑁆𑀕𑀼𑀦𑁄𑀢𑀺 𑀫𑁄𑀴𑀻𑀢𑀺 𑀘𑀽𑀴𑀸 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋

‘‘𑀙𑁂𑀢𑁆𑀯𑀸𑀦 𑀫𑁄𑀴𑀺𑀁 𑀯𑀭𑀕𑀦𑁆𑀥𑀯𑀸𑀲𑀺𑀢𑀁,

𑀯𑁂𑀳𑀸𑀬𑀲𑀁 𑀉𑀓𑁆𑀔𑀺𑀧𑀺 𑀲𑀓𑁆𑀬𑀧𑀼𑀗𑁆𑀕𑀯𑁄;

𑀭𑀢𑀦𑀘𑀗𑁆𑀓𑁄𑀝𑀯𑀭𑁂𑀦 𑀯𑀸𑀲𑀯𑁄,

𑀲𑀳𑀲𑁆𑀲𑀦𑁂𑀢𑁆𑀢𑁄 𑀲𑀺𑀭𑀲𑀸 𑀧𑀝𑀺𑀕𑁆𑀕𑀳𑀻’’𑀢𑀺.

𑀲𑀸 𑀢𑀲𑁆𑀲 𑀕𑀺𑀳𑀺𑀓𑀸𑀮𑁂 𑀫𑀳𑀢𑀻 𑀅𑀳𑁄𑀲𑀺, 𑀢𑁂𑀦𑀲𑁆𑀲 𑀫𑁄𑀴𑀺𑀬𑀨𑀕𑁆𑀕𑀼𑀦𑁄𑀢𑀺 𑀲𑀗𑁆𑀔𑀸 𑀉𑀤𑀧𑀸𑀤𑀺. 𑀧𑀩𑁆𑀩𑀚𑀺𑀢𑀫𑁆𑀧𑀺 𑀦𑀁 𑀢𑁂𑀦𑁂𑀯 𑀦𑀸𑀫𑁂𑀦 𑀲𑀜𑁆𑀚𑀸𑀦𑀦𑁆𑀢𑀺. 𑀅𑀢𑀺𑀯𑁂𑀮𑀦𑁆𑀢𑀺 𑀯𑁂𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀢𑀢𑁆𑀣 𑀓𑀸𑀮𑀯𑁂𑀮𑀸, 𑀲𑀻𑀫𑀯𑁂𑀮𑀸, 𑀲𑀻𑀮𑀯𑁂𑀮𑀸𑀢𑀺 𑀢𑀺𑀯𑀺𑀥𑀸 𑀯𑁂𑀮𑀸. ‘‘𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻’’𑀢𑀺 (𑀥𑀫𑁆𑀫𑀧𑀤𑁂 𑀯𑀕𑁆𑀕𑀸𑀦𑀫𑀼𑀤𑁆𑀤𑀸𑀦𑀁, 𑀕𑀸𑀣𑀸𑀦𑀫𑀼𑀤𑁆𑀤𑀸𑀦𑀁; 𑀫𑀳𑀸𑀯. 𑁧-𑁩) 𑀅𑀬𑀁 𑀓𑀸𑀮𑀯𑁂𑀮𑀸 𑀦𑀸𑀫. ‘‘𑀞𑀺𑀢𑀥𑀫𑁆𑀫𑁄 𑀯𑁂𑀮𑀁 𑀦𑀸𑀢𑀺𑀯𑀢𑁆𑀢𑀢𑀻’’𑀢𑀺 (𑀘𑀽𑀴𑀯. 𑁩𑁮𑁪; 𑀉𑀤𑀸. 𑁪𑁫; 𑀅. 𑀦𑀺. 𑁮.𑁧𑁯) 𑀅𑀬𑀁 𑀲𑀻𑀫𑀯𑁂𑀮𑀸 𑀦𑀸𑀫. ‘‘𑀯𑁂𑀮𑀸𑀅𑀦𑀢𑀺𑀓𑁆𑀓𑀫𑁄 𑀲𑁂𑀢𑀼𑀖𑀸𑀢𑁄’’𑀢𑀺 (𑀥. 𑀲. 𑁨𑁯𑁯-𑁩𑁦𑁧) 𑀘, ‘‘𑀯𑁂𑀮𑀸 𑀘𑁂𑀲𑀸 𑀅𑀯𑀻𑀢𑀺𑀓𑁆𑀓𑀫𑀦𑀝𑁆𑀞𑁂𑀦𑀸’’𑀢𑀺 𑀘, 𑀅𑀬𑀁 𑀲𑀻𑀮𑀯𑁂𑀮𑀸 𑀦𑀸𑀫. 𑀢𑀁 𑀢𑀺𑀯𑀺𑀥𑀫𑁆𑀧𑀺 𑀲𑁄 𑀅𑀢𑀺𑀓𑁆𑀓𑀫𑀺𑀬𑁂𑀯. 𑀪𑀺𑀓𑁆𑀔𑀼𑀦𑀺𑀬𑁄 𑀳𑀺 𑀑𑀯𑀤𑀺𑀢𑀼𑀁 𑀓𑀸𑀮𑁄 𑀦𑀸𑀫 𑀅𑀢𑁆𑀣𑀺, 𑀲𑁄 𑀅𑀢𑁆𑀣𑀗𑁆𑀕𑀢𑁂𑀧𑀺 𑀲𑀽𑀭𑀺𑀬𑁂 𑀑𑀯𑀤𑀦𑁆𑀢𑁄 𑀢𑀁 𑀓𑀸𑀮𑀯𑁂𑀮𑀫𑁆𑀧𑀺 𑀅𑀢𑀺𑀓𑁆𑀓𑀫𑀺. 𑀪𑀺𑀓𑁆𑀔𑀼𑀦𑀻𑀦𑀁 𑀑𑀯𑀸𑀤𑁂 𑀧𑀫𑀸𑀡𑀁 𑀦𑀸𑀫 𑀅𑀢𑁆𑀣𑀺 𑀲𑀻𑀫𑀸 𑀫𑀭𑀺𑀬𑀸𑀤𑀸. 𑀲𑁄 𑀉𑀢𑁆𑀢𑀭𑀺𑀙𑀧𑁆𑀧𑀜𑁆𑀘𑀯𑀸𑀘𑀸𑀳𑀺 𑀑𑀯𑀤𑀦𑁆𑀢𑁄 𑀢𑀁 𑀲𑀻𑀫𑀯𑁂𑀮𑀫𑁆𑀧𑀺 𑀅𑀢𑀺𑀓𑁆𑀓𑀫𑀺. 𑀓𑀣𑁂𑀦𑁆𑀢𑁄 𑀧𑀦 𑀤𑀯𑀲𑀳𑀕𑀢𑀁 𑀓𑀢𑁆𑀯𑀸 𑀤𑀼𑀝𑁆𑀞𑀼𑀮𑁆𑀮𑀸𑀧𑀢𑁆𑀢𑀺𑀧𑀳𑁄𑀦𑀓𑀁 𑀓𑀣𑁂𑀢𑀺, 𑀏𑀯𑀁 𑀲𑀻𑀮𑀯𑁂𑀮𑀫𑁆𑀧𑀺 𑀅𑀢𑀺𑀓𑁆𑀓𑀫𑀺.

𑀲𑀁𑀲𑀝𑁆𑀞𑁄𑀢𑀺 𑀫𑀺𑀲𑁆𑀲𑀻𑀪𑀽𑀢𑁄 𑀲𑀫𑀸𑀦𑀲𑀼𑀔𑀤𑀼𑀓𑁆𑀔𑁄 𑀳𑀼𑀢𑁆𑀯𑀸. 𑀲𑀫𑁆𑀫𑀼𑀔𑀸𑀢𑀺 𑀧𑀼𑀭𑀢𑁄. 𑀅𑀯𑀡𑁆𑀡𑀁 𑀪𑀸𑀲𑀢𑀻𑀢𑀺 𑀢𑀸 𑀧𑀦 𑀧𑀘𑀦𑀓𑁄𑀝𑁆𑀝𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀺𑀬𑁄 𑀤𑀺𑀲𑁆𑀯𑀸 𑀦𑀢𑁆𑀣𑀺 𑀇𑀫𑀸𑀲𑀁 𑀅𑀦𑀸𑀧𑀢𑁆𑀢𑀺 𑀦𑀸𑀫, 𑀇𑀫𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀦𑀸𑀘𑀸𑀭𑀸 𑀤𑀼𑀩𑁆𑀩𑀘𑀸 𑀧𑀕𑀩𑁆𑀪𑀸𑀢𑀺 𑀅𑀕𑀼𑀡𑀁 𑀓𑀣𑁂𑀢𑀺. 𑀅𑀥𑀺𑀓𑀭𑀡𑀫𑁆𑀧𑀺 𑀓𑀭𑁄𑀢𑀻𑀢𑀺 𑀇𑀫𑁂𑀲𑀁 𑀪𑀺𑀓𑁆𑀔𑀽𑀦𑀁 𑀇𑀫𑀸 𑀪𑀺𑀓𑁆𑀔𑀼𑀦𑀺𑀬𑁄 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀓𑁆𑀔𑀻𑀦𑀺 𑀤𑀬𑁆𑀳𑀦𑁆𑀢𑀺, 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀧𑀼𑀧𑁆𑀨𑀧𑀽𑀚𑀸 𑀯𑀸 𑀆𑀲𑀦𑀥𑁄𑀯𑀦𑀧𑀭𑀺𑀪𑀡𑁆𑀟𑀓𑀭𑀡𑀸𑀤𑀻𑀦𑀺 𑀯𑀸 𑀇𑀫𑀸𑀲𑀁 𑀯𑀲𑁂𑀦 𑀯𑀢𑁆𑀢𑀦𑁆𑀢𑀺. 𑀓𑀼𑀮𑀥𑀻𑀢𑀭𑁄 𑀏𑀢𑀸 𑀮𑀚𑁆𑀚𑀺𑀦𑀺𑀬𑁄, 𑀢𑀼𑀫𑁆𑀳𑁂 𑀇𑀫𑀸 𑀇𑀤𑀜𑁆𑀘𑀺𑀤𑀜𑁆𑀘 𑀯𑀤𑀣, 𑀅𑀬𑀁 𑀦𑀸𑀫 𑀢𑀼𑀫𑁆𑀳𑀸𑀓𑀁 𑀆𑀧𑀢𑁆𑀢𑀺 𑀳𑁄𑀢𑀺, 𑀯𑀺𑀦𑀬𑀥𑀭𑀸𑀦𑀁 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀁 𑀫𑁂 𑀤𑁂𑀣𑀸𑀢𑀺 𑀅𑀥𑀺𑀓𑀭𑀡𑀁 𑀆𑀓𑀟𑁆𑀠𑀢𑀺.

𑀫𑁄𑀴𑀺𑀬𑀨𑀕𑁆𑀕𑀼𑀦𑀲𑁆𑀲 𑀅𑀯𑀡𑁆𑀡𑀁 𑀪𑀸𑀲𑀢𑀻𑀢𑀺 𑀦𑀢𑁆𑀣𑀺 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀸𑀧𑀢𑁆𑀢𑀺 𑀦𑀸𑀫. 𑀦𑀺𑀘𑁆𑀘𑀓𑀸𑀮𑀁 𑀇𑀫𑀲𑁆𑀲 𑀧𑀭𑀺𑀯𑁂𑀡𑀤𑁆𑀯𑀸𑀭𑀁 𑀅𑀲𑀼𑀜𑁆𑀜𑀁 𑀪𑀺𑀓𑁆𑀔𑀼𑀦𑀻𑀳𑀻𑀢𑀺 𑀅𑀕𑀼𑀡𑀁 𑀓𑀣𑁂𑀢𑀺. 𑀅𑀥𑀺𑀓𑀭𑀡𑀫𑁆𑀧𑀺 𑀓𑀭𑁄𑀦𑁆𑀢𑀻𑀢𑀺 𑀇𑀫𑁂𑀲𑀁 𑀪𑀺𑀓𑁆𑀔𑀽𑀦𑀁 𑀫𑁄𑀴𑀺𑀬𑀨𑀕𑁆𑀕𑀼𑀦𑀢𑁆𑀣𑁂𑀭𑀲𑁆𑀲 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀓𑁆𑀔𑀻𑀦𑀺 𑀤𑀬𑁆𑀳𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀅𑀜𑁆𑀜𑁂𑀲𑀁 𑀯𑀲𑀦𑀝𑁆𑀞𑀸𑀦𑀁 𑀑𑀮𑁄𑀓𑁂𑀢𑀼𑀫𑁆𑀧𑀺 𑀦 𑀲𑀓𑁆𑀓𑀸. 𑀯𑀺𑀳𑀸𑀭𑀁 𑀆𑀕𑀢𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀸𑀤𑀁 𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀯𑀸 𑀉𑀤𑁆𑀤𑁂𑀲𑀧𑀤𑀁 𑀯𑀸 𑀣𑁂𑀭𑀫𑁂𑀯 𑀦𑀺𑀲𑁆𑀲𑀸𑀬 𑀮𑀪𑀦𑁆𑀢𑀺, 𑀓𑀼𑀮𑀧𑀼𑀢𑁆𑀢𑀓𑁄 𑀮𑀚𑁆𑀚𑀻 𑀓𑀼𑀓𑁆𑀓𑀼𑀘𑁆𑀘𑀓𑁄, 𑀏𑀯𑀭𑀽𑀧𑀁 𑀦𑀸𑀫 𑀢𑀼𑀫𑁆𑀳𑁂 𑀇𑀤𑀜𑁆𑀘𑀺𑀤𑀜𑁆𑀘 𑀯𑀤𑀣, 𑀏𑀣 𑀯𑀺𑀦𑀬𑀥𑀭𑀸𑀦𑀁 𑀲𑀦𑁆𑀢𑀺𑀓𑁂 𑀯𑀺𑀦𑀺𑀘𑁆𑀙𑀬𑀁 𑀤𑁂𑀣𑀸𑀢𑀺 𑀅𑀥𑀺𑀓𑀭𑀡𑀁 𑀆𑀓𑀟𑁆𑀠𑀦𑁆𑀢𑀺.

𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀸𑀢𑀺 𑀦𑁂𑀯 𑀧𑀺𑀬𑀓𑀫𑁆𑀬𑀢𑀸𑀬 𑀦 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦, 𑀅𑀢𑁆𑀣𑀓𑀸𑀫𑀢𑀸𑀬 𑀅𑀯𑁄𑀘. 𑀏𑀓𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀇𑀫𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀏𑀯𑀁 𑀲𑀁𑀲𑀝𑁆𑀞𑀲𑁆𑀲 𑀯𑀺𑀳𑀭𑀢𑁄 𑀅𑀬𑀲𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀲𑁄 𑀲𑀸𑀲𑀦𑀲𑁆𑀲𑀸𑀧𑀺 𑀅𑀯𑀡𑁆𑀡𑁄𑀬𑁂𑀯. 𑀅𑀜𑁆𑀜𑁂𑀦 𑀧𑀦 𑀓𑀣𑀺𑀢𑁄 𑀅𑀬𑀁 𑀦 𑀑𑀭𑀫𑀺𑀲𑁆𑀲𑀢𑀺, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀑𑀯𑀤𑀺𑀢𑁄 𑀑𑀭𑀫𑀺𑀲𑁆𑀲𑀢𑀻’’𑀢𑀺 𑀢𑀲𑁆𑀲 𑀅𑀢𑁆𑀣𑀓𑀸𑀫𑀢𑀸𑀬 𑀪𑀕𑀯𑀦𑁆𑀢𑀁 𑀏𑀢𑀁, ‘‘𑀆𑀬𑀲𑁆𑀫𑀸, 𑀪𑀦𑁆𑀢𑁂’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘.

𑁨𑁨𑁩. 𑀆𑀫𑀦𑁆𑀢𑁂𑀳𑀻𑀢𑀺 𑀚𑀸𑀦𑀸𑀧𑁂𑀳𑀺. 𑀆𑀫𑀦𑁆𑀢𑁂𑀢𑀻𑀢𑀺 𑀧𑀓𑁆𑀓𑁄𑀲𑀢𑀺.

𑁨𑁨𑁪. 𑀲𑀤𑁆𑀥𑀸𑀢𑀺 𑀲𑀤𑁆𑀥𑀸𑀬. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀢𑁆𑀯𑀁 𑀓𑀼𑀮𑀧𑀼𑀢𑁆𑀢𑁄 𑀘𑁂𑀯 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁄 𑀘, 𑀬𑀲𑁆𑀫𑀸 𑀯𑀸 𑀢𑁂 𑀏𑀢𑀸𑀳𑀺 𑀲𑀤𑁆𑀥𑀺𑀁 𑀲𑀁𑀲𑀝𑁆𑀞𑀲𑁆𑀲 𑀯𑀺𑀳𑀭𑀢𑁄 𑀬𑁂 𑀢𑀸 𑀅𑀓𑁆𑀓𑁄𑀲𑀺𑀲𑁆𑀲𑀦𑁆𑀢𑀺 𑀯𑀸, 𑀧𑀳𑀭𑀺𑀲𑁆𑀲𑀦𑁆𑀢𑀺 𑀯𑀸, 𑀢𑁂𑀲𑀼 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀲𑀁𑀲𑀕𑁆𑀕𑁂 𑀧𑀳𑀻𑀦𑁂 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀫𑀸. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀅𑀯𑀡𑁆𑀡𑀪𑀸𑀲𑀦𑁂. 𑀕𑁂𑀳𑀲𑀺𑀢𑀸𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀦𑀺𑀲𑁆𑀲𑀺𑀢𑀸. 𑀙𑀦𑁆𑀤𑀸𑀢𑀺 𑀢𑀡𑁆𑀳𑀸𑀙𑀦𑁆𑀤𑀸𑀧𑀺 𑀧𑀝𑀺𑀖𑀙𑀦𑁆𑀤𑀸𑀧𑀺. 𑀯𑀺𑀧𑀭𑀺𑀡𑀢𑀦𑁆𑀢𑀺 𑀭𑀢𑁆𑀢𑀫𑁆𑀧𑀺 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀢𑀁. 𑀤𑀼𑀝𑁆𑀞𑀫𑁆𑀧𑀺, 𑀫𑀽𑀴𑁆𑀳𑀫𑁆𑀧𑀺 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀢𑀁. 𑀇𑀥 𑀧𑀦 𑀢𑀡𑁆𑀳𑀸𑀙𑀦𑁆𑀤𑀯𑀲𑁂𑀦 𑀭𑀢𑁆𑀢𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀝𑀺𑀖𑀙𑀦𑁆𑀤𑀯𑀲𑁂𑀦 𑀤𑀼𑀝𑁆𑀞𑀫𑁆𑀧𑀺 𑀯𑀝𑁆𑀝𑀢𑀺. 𑀳𑀺𑀢𑀸𑀦𑀼𑀓𑀫𑁆𑀧𑀻𑀢𑀺 𑀳𑀺𑀢𑁂𑀦 𑀅𑀦𑀼𑀓𑀫𑁆𑀧𑀫𑀸𑀦𑁄 𑀳𑀺𑀢𑁂𑀦 𑀨𑀭𑀫𑀸𑀦𑁄. 𑀦 𑀤𑁄𑀲𑀦𑁆𑀢𑀭𑁄𑀢𑀺 𑀦 𑀤𑁄𑀲𑀘𑀺𑀢𑁆𑀢𑁄 𑀪𑀯𑀺𑀲𑁆𑀲𑀸𑀫𑀺.

𑁨𑁨𑁫. 𑀅𑀣 𑀔𑁄 𑀪𑀕𑀯𑀸𑀢𑀺 𑀓𑀲𑁆𑀫𑀸 𑀆𑀭𑀪𑀺? 𑀨𑀕𑁆𑀕𑀼𑀦𑀲𑁆𑀲 𑀓𑀺𑀭 𑀏𑀢𑁆𑀢𑀓𑀁 𑀑𑀯𑀸𑀤𑀁 𑀲𑀼𑀢𑁆𑀯𑀸𑀧𑀺, ‘‘𑀪𑀺𑀓𑁆𑀔𑀼𑀦𑀺𑀲𑀁𑀲𑀕𑁆𑀕𑀢𑁄 𑀑𑀭𑀫𑀺𑀲𑁆𑀲𑀸𑀫𑀺 𑀯𑀺𑀭𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀦𑁆𑀦𑀁, 𑀪𑀕𑀯𑀢𑀸 𑀧𑀦 𑀲𑀤𑁆𑀥𑀺𑀁 𑀧𑀝𑀸𑀡𑀻 𑀯𑀺𑀬 𑀧𑀝𑀺𑀯𑀺𑀭𑀼𑀤𑁆𑀥𑁄 𑀅𑀝𑁆𑀞𑀸𑀲𑀺, 𑀅𑀣𑀲𑁆𑀲 𑀪𑀕𑀯𑀢𑁄 𑀬𑀣𑀸 𑀦𑀸𑀫 𑀚𑀺𑀖𑀘𑁆𑀙𑀺𑀢𑀲𑁆𑀲 𑀪𑁄𑀚𑀦𑁂, 𑀧𑀺𑀧𑀸𑀲𑀺𑀢𑀲𑁆𑀲 𑀧𑀸𑀦𑀻𑀬𑁂, 𑀲𑀻𑀢𑁂𑀦 𑀨𑀼𑀝𑁆𑀞𑀲𑁆𑀲 𑀉𑀡𑁆𑀳𑁂 𑀤𑀼𑀓𑁆𑀔𑀺𑀢𑀲𑁆𑀲 𑀲𑀼𑀔𑁂 𑀧𑀢𑁆𑀣𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀫𑁂𑀯 𑀇𑀫𑀁 𑀤𑀼𑀩𑁆𑀩𑀘𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑀧𑀞𑀫𑀩𑁄𑀥𑀺𑀬𑀁 𑀲𑀼𑀩𑁆𑀩𑀘𑀸 𑀪𑀺𑀓𑁆𑀔𑀽 𑀆𑀧𑀸𑀣𑀁 𑀆𑀕𑀫𑀺𑀁𑀲𑀼. 𑀅𑀣 𑀢𑁂𑀲𑀁 𑀯𑀡𑁆𑀡𑀁 𑀓𑀣𑁂𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺.

𑀢𑀢𑁆𑀣 𑀆𑀭𑀸𑀥𑀬𑀺𑀁𑀲𑀽𑀢𑀺 𑀕𑀡𑁆𑀳𑀺𑀁𑀲𑀼 𑀧𑀽𑀭𑀬𑀺𑀁𑀲𑀼. 𑀏𑀓𑀁 𑀲𑀫𑀬𑀦𑁆𑀢𑀺 𑀏𑀓𑀲𑁆𑀫𑀺𑀁 𑀲𑀫𑀬𑁂. 𑀏𑀓𑀸𑀲𑀦𑀪𑁄𑀚𑀦𑀦𑁆𑀢𑀺 𑀏𑀓𑀁 𑀧𑀼𑀭𑁂𑀪𑀢𑁆𑀢𑀪𑁄𑀚𑀦𑀁. 𑀲𑀽𑀭𑀺𑀬𑀼𑀕𑁆𑀕𑀫𑀦𑀢𑁄 𑀳𑀺 𑀬𑀸𑀯 𑀫𑀚𑁆𑀛𑀦𑁆𑀳𑀺𑀓𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀪𑀼𑀢𑁆𑀢𑀪𑁄𑀚𑀦𑀫𑁆𑀧𑀺 𑀇𑀥 𑀏𑀓𑀸𑀲𑀦𑀪𑁄𑀚𑀦𑀦𑁆𑀢𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀅𑀧𑁆𑀧𑀸𑀩𑀸𑀥𑀢𑀦𑁆𑀢𑀺 𑀦𑀺𑀭𑀸𑀩𑀸𑀥𑀢𑀁. 𑀅𑀧𑁆𑀧𑀸𑀢𑀗𑁆𑀓𑀢𑀦𑁆𑀢𑀺 𑀦𑀺𑀤𑁆𑀤𑀼𑀓𑁆𑀔𑀢𑀁. 𑀮𑀳𑀼𑀝𑁆𑀞𑀸𑀦𑀦𑁆𑀢𑀺 𑀲𑀭𑀻𑀭𑀲𑁆𑀲 𑀲𑀮𑁆𑀮𑀳𑀼𑀓𑀁 𑀉𑀝𑁆𑀞𑀸𑀦𑀁. 𑀩𑀮𑀦𑁆𑀢𑀺 𑀓𑀸𑀬𑀩𑀮𑀁. 𑀨𑀸𑀲𑀼𑀯𑀺𑀳𑀸𑀭𑀦𑁆𑀢𑀺 𑀓𑀸𑀬𑀲𑁆𑀲 𑀲𑀼𑀔𑀯𑀺𑀳𑀸𑀭𑀁. 𑀇𑀫𑀺𑀦𑀸 𑀓𑀺𑀁 𑀓𑀣𑀺𑀢𑀁? 𑀤𑀺𑀯𑀸 𑀯𑀺𑀓𑀸𑀮𑀪𑁄𑀚𑀦𑀁 𑀧𑀚𑀳𑀸𑀧𑀺𑀢𑀓𑀸𑀮𑁄 𑀓𑀣𑀺𑀢𑁄. 𑀪𑀤𑁆𑀤𑀸𑀮𑀺𑀲𑀼𑀢𑁆𑀢𑁂 𑀧𑀦 𑀭𑀢𑁆𑀢𑀺𑀁 𑀯𑀺𑀓𑀸𑀮𑀪𑁄𑀚𑀦𑀁 𑀧𑀚𑀳𑀸𑀧𑀺𑀢𑀓𑀸𑀮𑁄 𑀓𑀣𑀺𑀢𑁄. 𑀇𑀫𑀸𑀦𑀺 𑀳𑀺 𑀤𑁆𑀯𑁂 𑀪𑁄𑀚𑀦𑀸𑀦𑀺 𑀪𑀕𑀯𑀸 𑀦 𑀏𑀓𑀧𑁆𑀧𑀳𑀸𑀭𑁂𑀦 𑀧𑀚𑀳𑀸𑀧𑁂𑀲𑀺. 𑀓𑀲𑁆𑀫𑀸? 𑀇𑀫𑀸𑀦𑁂𑀯 𑀳𑀺 𑀤𑁆𑀯𑁂 𑀪𑁄𑀚𑀦𑀸𑀦𑀺 𑀯𑀝𑁆𑀝𑁂 𑀲𑀢𑁆𑀢𑀸𑀦𑀁 𑀆𑀘𑀺𑀡𑁆𑀡𑀸𑀦𑀺. 𑀲𑀦𑁆𑀢𑀺 𑀓𑀼𑀮𑀧𑀼𑀢𑁆𑀢𑀸 𑀲𑀼𑀔𑀼𑀫𑀸𑀮𑀸, 𑀢𑁂 𑀏𑀓𑀢𑁄 𑀤𑁆𑀯𑁂𑀧𑀺 𑀪𑁄𑀚𑀦𑀸𑀦𑀺 𑀧𑀚𑀳𑀦𑁆𑀢𑀸 𑀓𑀺𑀮𑀫𑀦𑁆𑀢𑀺. 𑀢𑀲𑁆𑀫𑀸 𑀏𑀓𑀢𑁄 𑀅𑀧𑀚𑀳𑀸𑀧𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀤𑀺𑀯𑀸 𑀯𑀺𑀓𑀸𑀮𑀪𑁄𑀚𑀦𑀁, 𑀏𑀓𑀲𑁆𑀫𑀺𑀁 𑀭𑀢𑁆𑀢𑀺𑀁 𑀯𑀺𑀓𑀸𑀮𑀪𑁄𑀚𑀦𑀦𑁆𑀢𑀺 𑀯𑀺𑀲𑀼𑀁 𑀧𑀚𑀳𑀸𑀧𑁂𑀲𑀺. 𑀢𑁂𑀲𑀼 𑀇𑀥 𑀤𑀺𑀯𑀸 𑀯𑀺𑀓𑀸𑀮𑀪𑁄𑀚𑀦𑀁 𑀧𑀚𑀳𑀸𑀧𑀺𑀢𑀓𑀸𑀮𑁄 𑀓𑀣𑀺𑀢𑁄. 𑀢𑀢𑁆𑀣 𑀬𑀲𑁆𑀫𑀸 𑀩𑀼𑀤𑁆𑀥𑀸 𑀦 𑀪𑀬𑀁 𑀤𑀲𑁆𑀲𑁂𑀢𑁆𑀯𑀸 𑀢𑀚𑁆𑀚𑁂𑀢𑁆𑀯𑀸 𑀧𑀚𑀳𑀸𑀧𑁂𑀦𑁆𑀢𑀺, 𑀆𑀦𑀺𑀲𑀁𑀲𑀁 𑀧𑀦 𑀤𑀲𑁆𑀲𑁂𑀢𑁆𑀯𑀸 𑀧𑀚𑀳𑀸𑀧𑁂𑀦𑁆𑀢𑀺, 𑀏𑀯𑀜𑁆𑀳𑀺 𑀲𑀢𑁆𑀢𑀸 𑀲𑀼𑀔𑁂𑀦 𑀧𑀚𑀳𑀦𑁆𑀢𑀺. 𑀢𑀲𑁆𑀫𑀸 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀦𑁆𑀢𑁄 𑀇𑀫𑁂 𑀧𑀜𑁆𑀘 𑀕𑀼𑀡𑁂 𑀤𑀲𑁆𑀲𑁂𑀲𑀺. 𑀅𑀦𑀼𑀲𑀸𑀲𑀦𑀻 𑀓𑀭𑀡𑀻𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀲𑀸𑀲𑀦𑁂 𑀓𑀢𑁆𑀢𑀩𑁆𑀩𑀁 𑀦𑀸𑀳𑁄𑀲𑀺. ‘‘𑀇𑀤𑀁 𑀓𑀭𑁄𑀣, 𑀇𑀤𑀁 𑀫𑀸 𑀓𑀭𑁄𑀣𑀸’’𑀢𑀺 𑀲𑀢𑀼𑀧𑁆𑀧𑀸𑀤𑀓𑀭𑀡𑀻𑀬𑀫𑀢𑁆𑀢𑀫𑁂𑀯 𑀅𑀳𑁄𑀲𑀺. 𑀢𑀸𑀯𑀢𑁆𑀢𑀓𑁂𑀦𑁂𑀯 𑀢𑁂 𑀓𑀢𑁆𑀢𑀩𑁆𑀩𑀁 𑀅𑀓𑀁𑀲𑀼, 𑀧𑀳𑀸𑀢𑀩𑁆𑀩𑀁 𑀧𑀚𑀳𑀺𑀁𑀲𑀼, 𑀧𑀞𑀫𑀩𑁄𑀥𑀺𑀬𑀁, 𑀪𑀺𑀓𑁆𑀔𑀯𑁂, 𑀲𑀼𑀩𑁆𑀩𑀘𑀸 𑀪𑀺𑀓𑁆𑀔𑀽 𑀅𑀳𑁂𑀲𑀼𑀁 𑀅𑀲𑁆𑀲𑀯𑀸 𑀑𑀯𑀸𑀤𑀧𑀝𑀺𑀓𑀭𑀸𑀢𑀺.

𑀇𑀤𑀸𑀦𑀺 𑀦𑁂𑀲𑀁 𑀲𑀼𑀩𑁆𑀩𑀘𑀪𑀸𑀯𑀤𑀻𑀧𑀺𑀓𑀁 𑀉𑀧𑀫𑀁 𑀆𑀳𑀭𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀪𑀽𑀫𑀺𑀬𑀦𑁆𑀢𑀺 𑀲𑀫𑀪𑀽𑀫𑀺𑀬𑀁. ‘‘𑀲𑀼𑀪𑀽𑀫𑁆𑀬𑀁 𑀲𑀼𑀔𑁂𑀢𑁆𑀢𑁂 𑀯𑀺𑀳𑀢𑀔𑀸𑀡𑀼𑀓𑁂 𑀩𑀻𑀚𑀸𑀦𑀺 𑀧𑀢𑀺𑀝𑁆𑀞𑀧𑁂𑀬𑁆𑀬𑀸’’𑀢𑀺 (𑀤𑀻. 𑀦𑀺. 𑁨.𑁪𑁩𑁮) 𑀏𑀢𑁆𑀣 𑀧𑀦 𑀫𑀡𑁆𑀟𑀪𑀽𑀫𑀺 𑀲𑀼𑀪𑀽𑀫𑀻𑀢𑀺 𑀆𑀕𑀢𑀸. 𑀘𑀢𑀼𑀫𑀳𑀸𑀧𑀣𑁂𑀢𑀺 𑀤𑁆𑀯𑀺𑀦𑁆𑀦𑀁 𑀫𑀳𑀸𑀫𑀕𑁆𑀕𑀸𑀦𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀢𑀝𑁆𑀞𑀸𑀦𑁂. 𑀆𑀚𑀜𑁆𑀜𑀭𑀣𑁄𑀢𑀺 𑀯𑀺𑀦𑀻𑀢𑀅𑀲𑁆𑀲𑀭𑀣𑁄. 𑀑𑀥𑀲𑁆𑀢𑀧𑀢𑁄𑀤𑁄𑀢𑀺 𑀬𑀣𑀸 𑀭𑀣𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀞𑀺𑀢𑁂𑀦 𑀲𑀓𑁆𑀓𑀸 𑀳𑁄𑀢𑀺 𑀕𑀡𑁆𑀳𑀺𑀢𑀼𑀁, 𑀏𑀯𑀁 𑀆𑀮𑀫𑁆𑀩𑀦𑀁 𑀦𑀺𑀲𑁆𑀲𑀸𑀬 𑀢𑀺𑀭𑀺𑀬𑀢𑁄 𑀞𑀧𑀺𑀢𑀧𑀢𑁄𑀤𑁄. 𑀬𑁄𑀕𑁆𑀕𑀸𑀘𑀭𑀺𑀬𑁄𑀢𑀺 𑀅𑀲𑁆𑀲𑀸𑀘𑀭𑀺𑀬𑁄. 𑀲𑁆𑀯𑁂𑀯 𑀅𑀲𑁆𑀲𑀤𑀫𑁆𑀫𑁂 𑀲𑀸𑀭𑁂𑀢𑀻𑀢𑀺 𑀅𑀲𑁆𑀲𑀤𑀫𑁆𑀫𑀲𑀸𑀭𑀣𑀺. 𑀬𑁂𑀦𑀺𑀘𑁆𑀙𑀓𑀦𑁆𑀢𑀺 𑀬𑁂𑀦 𑀬𑁂𑀦 𑀫𑀕𑁆𑀕𑁂𑀦 𑀇𑀘𑁆𑀙𑀢𑀺. 𑀬𑀤𑀺𑀘𑁆𑀙𑀓𑀦𑁆𑀢𑀺 𑀬𑀁 𑀬𑀁 𑀕𑀢𑀺𑀁 𑀇𑀘𑁆𑀙𑀢𑀺. 𑀲𑀸𑀭𑁂𑀬𑁆𑀬𑀸𑀢𑀺 𑀉𑀚𑀼𑀓𑀁 𑀧𑀼𑀭𑀢𑁄 𑀧𑁂𑀲𑁂𑀬𑁆𑀬. 𑀧𑀘𑁆𑀘𑀸𑀲𑀸𑀭𑁂𑀬𑁆𑀬𑀸𑀢𑀺 𑀧𑀝𑀺𑀦𑀺𑀯𑀢𑁆𑀢𑁂𑀬𑁆𑀬.

𑀏𑀯𑀫𑁂𑀯 𑀔𑁄𑀢𑀺 𑀬𑀣𑀸 𑀳𑀺 𑀲𑁄 𑀬𑁄𑀕𑁆𑀕𑀸𑀘𑀭𑀺𑀬𑁄 𑀬𑁂𑀦 𑀬𑁂𑀦 𑀫𑀕𑁆𑀕𑁂𑀦 𑀕𑀫𑀦𑀁 𑀇𑀘𑁆𑀙𑀢𑀺, 𑀢𑀁 𑀢𑀁 𑀅𑀲𑁆𑀲𑀸 𑀆𑀭𑀼𑀴𑁆𑀳𑀸𑀯 𑀳𑁄𑀦𑁆𑀢𑀺. 𑀬𑀸𑀬 𑀬𑀸𑀬 𑀘 𑀕𑀢𑀺𑀬𑀸 𑀇𑀘𑁆𑀙𑀢𑀺, 𑀲𑀸 𑀲𑀸 𑀕𑀢𑀺 𑀕𑀳𑀺𑀢𑀸𑀯 𑀳𑁄𑀢𑀺. 𑀭𑀣𑀁 𑀧𑁂𑀲𑁂𑀢𑁆𑀯𑀸 𑀅𑀲𑁆𑀲𑀸 𑀦𑁂𑀯 𑀯𑀸𑀭𑁂𑀢𑀩𑁆𑀩𑀸 𑀦 𑀯𑀺𑀚𑁆𑀛𑀺𑀢𑀩𑁆𑀩𑀸 𑀳𑁄𑀦𑁆𑀢𑀺. 𑀓𑁂𑀯𑀮𑀁 𑀢𑁂𑀲𑀁 𑀲𑀫𑁂 𑀪𑀽𑀫𑀺𑀪𑀸𑀕𑁂 𑀔𑀼𑀭𑁂𑀲𑀼 𑀦𑀺𑀫𑀺𑀢𑁆𑀢𑀁 𑀞𑀧𑁂𑀢𑁆𑀯𑀸 𑀕𑀫𑀦𑀫𑁂𑀯 𑀧𑀲𑁆𑀲𑀺𑀢𑀩𑁆𑀩𑀁 𑀳𑁄𑀢𑀺. 𑀏𑀯𑀁 𑀫𑀬𑁆𑀳𑀫𑁆𑀧𑀺 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀧𑀼𑀦𑀧𑁆𑀧𑀼𑀦𑀁 𑀯𑀢𑁆𑀢𑀩𑁆𑀩𑀁 𑀦𑀸𑀳𑁄𑀲𑀺. 𑀇𑀤𑀁 𑀓𑀭𑁄𑀣 𑀇𑀤𑀁 𑀫𑀸 𑀓𑀭𑁄𑀣𑀸𑀢𑀺 𑀲𑀢𑀼𑀧𑁆𑀧𑀸𑀤𑀦𑀫𑀢𑁆𑀢𑀫𑁂𑀯 𑀓𑀢𑁆𑀢𑀩𑁆𑀩𑀁 𑀳𑁄𑀢𑀺. 𑀢𑁂𑀳𑀺𑀧𑀺 𑀢𑀸𑀯𑀤𑁂𑀯 𑀓𑀢𑁆𑀢𑀩𑁆𑀩𑀁 𑀓𑀢𑀫𑁂𑀯 𑀳𑁄𑀢𑀺, 𑀅𑀓𑀢𑁆𑀢𑀩𑁆𑀩𑀁 𑀚𑀳𑀺𑀢𑀫𑁂𑀯. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀼𑀩𑁆𑀩𑀘𑀸 𑀬𑀼𑀢𑁆𑀢𑀬𑀸𑀦𑀧𑀝𑀺𑀪𑀸𑀕𑀸 𑀳𑀼𑀢𑁆𑀯𑀸 𑀲𑀢𑀼𑀧𑁆𑀧𑀸𑀤𑀦𑀫𑀢𑁆𑀢𑁂𑀦𑁂𑀯 𑀧𑀚𑀳𑀺𑀁𑀲𑀼, 𑀢𑀲𑁆𑀫𑀸 𑀢𑀼𑀫𑁆𑀳𑁂𑀧𑀺 𑀧𑀚𑀳𑀣𑀸𑀢𑀺 𑀅𑀢𑁆𑀣𑁄. 𑀏𑀮𑀡𑁆𑀟𑁂𑀳𑀻𑀢𑀺 𑀏𑀮𑀡𑁆𑀟𑀸 𑀓𑀺𑀭 𑀲𑀸𑀮𑀤𑀽𑀲𑀦𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀯𑀺𑀲𑁄𑀥𑁂𑀬𑁆𑀬𑀸𑀢𑀺 𑀏𑀮𑀡𑁆𑀟𑁂 𑀘𑁂𑀯 𑀅𑀜𑁆𑀜𑀸 𑀘 𑀯𑀮𑁆𑀮𑀺𑀬𑁄 𑀙𑀺𑀦𑁆𑀤𑀺𑀢𑁆𑀯𑀸 𑀩𑀳𑀺 𑀦𑀻𑀳𑀭𑀡𑁂𑀦 𑀲𑁄𑀥𑁂𑀬𑁆𑀬. 𑀲𑀼𑀚𑀸𑀢𑀸𑀢𑀺 𑀲𑀼𑀲𑀡𑁆𑀞𑀺𑀢𑀸. 𑀲𑀫𑁆𑀫𑀸 𑀧𑀭𑀺𑀳𑀭𑁂𑀬𑁆𑀬𑀸𑀢𑀺 𑀫𑀭𑀺𑀬𑀸𑀤𑀁 𑀩𑀦𑁆𑀥𑀺𑀢𑁆𑀯𑀸 𑀉𑀤𑀓𑀸𑀲𑀺𑀜𑁆𑀘𑀦𑁂𑀦𑀧𑀺 𑀓𑀸𑀮𑁂𑀦𑀓𑀸𑀮𑀁 𑀫𑀽𑀮𑀫𑀽𑀮𑁂 𑀔𑀡𑀦𑁂𑀦𑀧𑀺 𑀯𑀮𑁆𑀮𑀺𑀕𑀼𑀫𑁆𑀩𑀸𑀤𑀺𑀘𑁆𑀙𑁂𑀤𑀦𑁂𑀦𑀧𑀺 𑀓𑀺𑀧𑀺𑀮𑁆𑀮𑀧𑀽𑀝𑀓𑀳𑀭𑀡𑁂𑀦𑀧𑀺 𑀫𑀓𑁆𑀓𑀝𑀓𑀚𑀸𑀮𑀲𑀼𑀓𑁆𑀔𑀤𑀡𑁆𑀟𑀓𑀳𑀭𑀡𑁂𑀦𑀧𑀺 𑀲𑀫𑁆𑀫𑀸 𑀯𑀟𑁆𑀠𑁂𑀢𑁆𑀯𑀸 𑀧𑁄𑀲𑁂𑀬𑁆𑀬. 𑀯𑀼𑀤𑁆𑀥𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯.

𑁨𑁨𑁬. 𑀇𑀤𑀸𑀦𑀺 𑀅𑀓𑁆𑀔𑀦𑁆𑀢𑀺𑀬𑀸 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄 𑀪𑀽𑀢𑀧𑀼𑀩𑁆𑀩𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑁂𑀤𑁂𑀳𑀺𑀓𑀸𑀢𑀺 𑀯𑀺𑀤𑁂𑀳𑀭𑀝𑁆𑀞𑀯𑀸𑀲𑀺𑀓𑀲𑁆𑀲 𑀥𑀻𑀢𑀸. 𑀅𑀣 𑀯𑀸 𑀯𑁂𑀤𑁄𑀢𑀺 𑀧𑀜𑁆𑀜𑀸 𑀯𑀼𑀘𑁆𑀘𑀢𑀺, 𑀯𑁂𑀤𑁂𑀦 𑀈𑀳𑀢𑀺 𑀇𑀭𑀺𑀬𑀢𑀻𑀢𑀺 𑀯𑁂𑀤𑁂𑀳𑀺𑀓𑀸, 𑀧𑀡𑁆𑀟𑀺𑀢𑀸𑀢𑀺 𑀅𑀢𑁆𑀣𑁄. 𑀕𑀳𑀧𑀢𑀸𑀦𑀻𑀢𑀺 𑀖𑀭𑀲𑀸𑀫𑀺𑀦𑀻. 𑀓𑀺𑀢𑁆𑀢𑀺𑀲𑀤𑁆𑀤𑁄𑀢𑀺 𑀓𑀺𑀢𑁆𑀢𑀺𑀖𑁄𑀲𑁄. 𑀲𑁄𑀭𑀢𑀸𑀢𑀺 𑀲𑁄𑀭𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀦𑀺𑀯𑀸𑀢𑀸𑀢𑀺 𑀦𑀺𑀯𑀸𑀢𑀯𑀼𑀢𑁆𑀢𑀺. 𑀉𑀧𑀲𑀦𑁆𑀢𑀸𑀢𑀺 𑀦𑀺𑀩𑁆𑀩𑀼𑀢𑀸. 𑀤𑀓𑁆𑀔𑀸𑀢𑀺 𑀪𑀢𑁆𑀢𑀧𑀘𑀦𑀲𑀬𑀦𑀢𑁆𑀣𑀭𑀡𑀤𑀻𑀧𑀼𑀚𑁆𑀚𑀮𑀦𑀸𑀤𑀺𑀓𑀫𑁆𑀫𑁂𑀲𑀼 𑀙𑁂𑀓𑀸. 𑀅𑀦𑀮𑀲𑀸𑀢𑀺 𑀉𑀝𑁆𑀞𑀸𑀳𑀺𑀓𑀸, 𑀲𑀼𑀲𑀁𑀯𑀺𑀳𑀺𑀢𑀓𑀫𑁆𑀫𑀦𑁆𑀢𑀸𑀢𑀺 𑀲𑀼𑀝𑁆𑀞𑀼 𑀲𑀁𑀯𑀺𑀳𑀺𑀢𑀓𑀫𑁆𑀫𑀦𑁆𑀢𑀸. 𑀏𑀓𑀸 𑀅𑀦𑀮𑀲𑀸 𑀳𑁄𑀢𑀺, 𑀬𑀁 𑀬𑀁 𑀧𑀦 𑀪𑀸𑀚𑀦𑀁 𑀕𑀡𑁆𑀳𑀸𑀢𑀺, 𑀢𑀁 𑀢𑀁 𑀪𑀺𑀦𑁆𑀤𑀢𑀺 𑀯𑀸 𑀙𑀺𑀤𑁆𑀤𑀁 𑀯𑀸 𑀓𑀭𑁄𑀢𑀺, 𑀅𑀬𑀁 𑀦 𑀢𑀸𑀤𑀺𑀲𑀸𑀢𑀺 𑀤𑀲𑁆𑀲𑁂𑀢𑀺.

𑀤𑀺𑀯𑀸 𑀉𑀝𑁆𑀞𑀸𑀲𑀻𑀢𑀺 𑀧𑀸𑀢𑁄𑀯 𑀓𑀢𑁆𑀢𑀩𑁆𑀩𑀸𑀦𑀺 𑀥𑁂𑀦𑀼𑀤𑀼𑀳𑀦𑀸𑀤𑀺𑀓𑀫𑁆𑀫𑀸𑀦𑀺 𑀅𑀓𑀢𑁆𑀯𑀸 𑀉𑀲𑁆𑀲𑀽𑀭𑁂 𑀉𑀝𑁆𑀞𑀺𑀢𑀸. 𑀳𑁂 𑀚𑁂 𑀓𑀸𑀴𑀻𑀢𑀺 𑀅𑀭𑁂 𑀓𑀸𑀴𑀺. 𑀓𑀺𑀁 𑀚𑁂 𑀤𑀺𑀯𑀸 𑀉𑀝𑁆𑀞𑀸𑀲𑀻𑀢𑀺 𑀓𑀺𑀁 𑀢𑁂 𑀓𑀺𑀜𑁆𑀘𑀺 𑀅𑀨𑀸𑀲𑀼𑀓𑀁 𑀅𑀢𑁆𑀣𑀺, 𑀓𑀺𑀁 𑀤𑀺𑀯𑀸 𑀉𑀝𑁆𑀞𑀸𑀲𑀻𑀢𑀺? 𑀦𑁄 𑀯𑀢 𑀭𑁂 𑀓𑀺𑀜𑁆𑀘𑀻𑀢𑀺 𑀅𑀭𑁂 𑀬𑀤𑀺 𑀢𑁂 𑀦 𑀓𑀺𑀜𑁆𑀘𑀺 𑀅𑀨𑀸𑀲𑀼𑀓𑀁 𑀅𑀢𑁆𑀣𑀺, 𑀦𑁂𑀯 𑀲𑀻𑀲𑀁 𑀭𑀼𑀚𑁆𑀛𑀢𑀺, 𑀦 𑀧𑀺𑀝𑁆𑀞𑀺, 𑀅𑀣 𑀓𑀲𑁆𑀫𑀸 𑀧𑀸𑀧𑀺 𑀤𑀸𑀲𑀺 𑀤𑀺𑀯𑀸 𑀉𑀝𑁆𑀞𑀸𑀲𑀻𑀢𑀺 𑀓𑀼𑀧𑀺𑀢𑀸 𑀅𑀦𑀢𑁆𑀢𑀫𑀦𑀸 𑀪𑀸𑀓𑀼𑀝𑀺𑀫𑀓𑀸𑀲𑀺. 𑀤𑀺𑀯𑀸𑀢𑀭𑀁 𑀉𑀝𑁆𑀞𑀸𑀲𑀻𑀢𑀺 𑀧𑀼𑀦𑀤𑀺𑀯𑀲𑁂 𑀉𑀲𑁆𑀲𑀽𑀭𑀢𑀭𑀁 𑀉𑀝𑁆𑀞𑀸𑀲𑀺. 𑀅𑀦𑀢𑁆𑀢𑀫𑀦𑀯𑀸𑀘𑀦𑁆𑀢𑀺 𑀅𑀭𑁂 𑀧𑀸𑀧𑀺 𑀤𑀸𑀲𑀺 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀦 𑀚𑀸𑀦𑀸𑀲𑀺; 𑀓𑀺𑀁 𑀅𑀕𑁆𑀕𑀺𑀁 𑀲𑀻𑀢𑁄𑀢𑀺 𑀫𑀜𑁆𑀜𑀲𑀺, 𑀇𑀤𑀸𑀦𑀺 𑀢𑀁 𑀲𑀺𑀓𑁆𑀔𑀸𑀧𑁂𑀲𑁆𑀲𑀸𑀫𑀻𑀢𑀺𑀆𑀤𑀻𑀦𑀺 𑀯𑀤𑀫𑀸𑀦𑀸 𑀓𑀼𑀧𑀺𑀢𑀯𑀘𑀦𑀁 𑀦𑀺𑀘𑁆𑀙𑀸𑀭𑁂𑀲𑀺.

𑀧𑀝𑀺𑀯𑀺𑀲𑀓𑀸𑀦𑀦𑁆𑀢𑀺 𑀲𑀸𑀫𑀦𑁆𑀢𑀕𑁂𑀳𑀯𑀸𑀲𑀻𑀦𑀁. 𑀉𑀚𑁆𑀛𑀸𑀧𑁂𑀲𑀻𑀢𑀺 𑀅𑀯𑀚𑀸𑀦𑀸𑀧𑁂𑀲𑀺. 𑀘𑀡𑁆𑀟𑀻𑀢𑀺 𑀅𑀲𑁄𑀭𑀢𑀸 𑀓𑀺𑀩𑁆𑀩𑀺𑀲𑀸. 𑀇𑀢𑀺 𑀬𑀢𑁆𑀢𑀓𑀸 𑀕𑀼𑀡𑀸, 𑀢𑀢𑁄 𑀤𑀺𑀕𑀼𑀡𑀸 𑀤𑁄𑀲𑀸 𑀉𑀧𑁆𑀧𑀚𑁆𑀚𑀺𑀁𑀲𑀼. 𑀕𑀼𑀡𑀸 𑀦𑀸𑀫 𑀲𑀡𑀺𑀓𑀁 𑀲𑀡𑀺𑀓𑀁 𑀆𑀕𑀘𑁆𑀙𑀦𑁆𑀢𑀺; 𑀤𑁄𑀲𑀸 𑀏𑀓𑀤𑀺𑀯𑀲𑁂𑀦𑁂𑀯 𑀧𑀢𑁆𑀣𑀝𑀸 𑀳𑁄𑀦𑁆𑀢𑀺. 𑀲𑁄𑀭𑀢𑀲𑁄𑀭𑀢𑁄𑀢𑀺 𑀅𑀢𑀺𑀯𑀺𑀬 𑀲𑁄𑀭𑀢𑁄, 𑀲𑁄𑀢𑀸𑀧𑀦𑁆𑀦𑁄 𑀦𑀼 𑀔𑁄, 𑀲𑀓𑀤𑀸𑀕𑀸𑀫𑀻 𑀅𑀦𑀸𑀕𑀸𑀫𑀻 𑀅𑀭𑀳𑀸 𑀦𑀼 𑀔𑁄𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺. 𑀨𑀼𑀲𑀦𑁆𑀢𑀻𑀢𑀺 𑀨𑀼𑀲𑀦𑁆𑀢𑀸 𑀖𑀝𑁆𑀝𑁂𑀦𑁆𑀢𑀸 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺.

𑀅𑀣 𑀪𑀺𑀓𑁆𑀔𑀼 𑀲𑁄𑀭𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀣 𑀅𑀥𑀺𑀯𑀸𑀲𑀦𑀓𑁆𑀔𑀦𑁆𑀢𑀺𑀬𑀁 𑀞𑀺𑀢𑁄 𑀪𑀺𑀓𑁆𑀔𑀼 𑀲𑁄𑀭𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑁄 𑀘𑀻𑀯𑀭…𑀧𑁂… 𑀧𑀭𑀺𑀓𑁆𑀔𑀸𑀭𑀳𑁂𑀢𑀽𑀢𑀺 𑀬𑁄 𑀏𑀢𑀸𑀦𑀺 𑀘𑀻𑀯𑀭𑀸𑀤𑀻𑀦𑀺 𑀧𑀡𑀻𑀢𑀧𑀡𑀻𑀢𑀸𑀦𑀺 𑀮𑀪𑀦𑁆𑀢𑁄 𑀧𑀸𑀤𑀧𑀭𑀺𑀓𑀫𑁆𑀫𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀸𑀤𑀻𑀦𑀺 𑀏𑀓𑀯𑀘𑀦𑁂𑀦𑁂𑀯 𑀓𑀭𑁄𑀢𑀺. 𑀅𑀮𑀪𑀫𑀸𑀦𑁄𑀢𑀺 𑀬𑀣𑀸 𑀧𑀼𑀩𑁆𑀩𑁂 𑀮𑀪𑀢𑀺, 𑀏𑀯𑀁 𑀅𑀮𑀪𑀦𑁆𑀢𑁄. 𑀥𑀫𑁆𑀫𑀜𑁆𑀜𑁂𑀯 𑀲𑀓𑁆𑀓𑀭𑁄𑀦𑁆𑀢𑁄𑀢𑀺 𑀥𑀫𑁆𑀫𑀁𑀬𑁂𑀯 𑀲𑀓𑁆𑀓𑀸𑀭𑀁 𑀲𑀼𑀓𑀢𑀓𑀸𑀭𑀁 𑀓𑀭𑁄𑀦𑁆𑀢𑁄. 𑀕𑀭𑀼𑀁 𑀓𑀭𑁄𑀦𑁆𑀢𑁄𑀢𑀺 𑀕𑀭𑀼𑀪𑀸𑀭𑀺𑀬𑀁 𑀓𑀭𑁄𑀦𑁆𑀢𑁄. 𑀫𑀸𑀦𑁂𑀦𑁆𑀢𑁄𑀢𑀺 𑀫𑀦𑁂𑀦 𑀧𑀺𑀬𑀁 𑀓𑀭𑁄𑀦𑁆𑀢𑁄. 𑀧𑀽𑀚𑁂𑀦𑁆𑀢𑁄𑀢𑀺 𑀧𑀘𑁆𑀘𑀬𑀧𑀽𑀚𑀸𑀬 𑀧𑀽𑀚𑁂𑀦𑁆𑀢𑁄. 𑀅𑀧𑀘𑀸𑀬𑀫𑀸𑀦𑁄𑀢𑀺 𑀥𑀫𑁆𑀫𑀁𑀬𑁂𑀯 𑀅𑀧𑀘𑀸𑀬𑀫𑀸𑀦𑁄 𑀅𑀧𑀘𑀺𑀢𑀺𑀁 𑀦𑀻𑀘𑀯𑀼𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄.

𑁨𑁨𑁭. 𑀏𑀯𑀁 𑀅𑀓𑁆𑀔𑀦𑁆𑀢𑀺𑀬𑀸 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑁂 𑀅𑀥𑀺𑀯𑀸𑀲𑁂𑀦𑁆𑀢𑀺, 𑀢𑁂 𑀏𑀯𑀁 𑀅𑀥𑀺𑀯𑀸𑀲𑁂𑀦𑁆𑀢𑀻𑀢𑀺 𑀧𑀜𑁆𑀘 𑀯𑀘𑀦𑀧𑀣𑁂 𑀤𑀲𑁆𑀲𑁂𑀦𑁆𑀢𑁄 𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀸𑀮𑁂𑀦𑀸𑀢𑀺 𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑁂𑀦. 𑀪𑀽𑀢𑁂𑀦𑀸𑀢𑀺 𑀲𑀢𑀸 𑀯𑀺𑀚𑁆𑀚𑀫𑀸𑀦𑁂𑀦. 𑀲𑀡𑁆𑀳𑁂𑀦𑀸𑀢𑀺 𑀲𑀫𑁆𑀫𑀝𑁆𑀞𑁂𑀦. 𑀅𑀢𑁆𑀣𑀲𑀜𑁆𑀳𑀺𑀢𑁂𑀦𑀸𑀢𑀺 𑀅𑀢𑁆𑀣𑀦𑀺𑀲𑁆𑀲𑀺𑀢𑁂𑀦 𑀓𑀸𑀭𑀡𑀦𑀺𑀲𑁆𑀲𑀺𑀢𑁂𑀦. 𑀅𑀓𑀸𑀮𑁂𑀦𑀸𑀢𑀺𑀆𑀤𑀻𑀦𑀺 𑀢𑁂𑀲𑀁𑀬𑁂𑀯 𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀫𑁂𑀢𑁆𑀢𑀘𑀺𑀢𑁆𑀢𑀸𑀢𑀺 𑀉𑀧𑁆𑀧𑀦𑁆𑀦𑀫𑁂𑀢𑁆𑀢𑀘𑀺𑀢𑁆𑀢𑀸 𑀳𑀼𑀢𑁆𑀯𑀸. 𑀤𑁄𑀲𑀦𑁆𑀢𑀭𑀸𑀢𑀺 𑀤𑀼𑀝𑁆𑀞𑀘𑀺𑀢𑁆𑀢𑀸, 𑀅𑀩𑁆𑀪𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑀤𑁄𑀲𑀸 𑀳𑀼𑀢𑁆𑀯𑀸. 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀯𑀘𑀦𑀧𑀣𑁂𑀲𑀼. 𑀨𑀭𑀺𑀢𑁆𑀯𑀸𑀢𑀺 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸. 𑀢𑀤𑀸𑀭𑀫𑁆𑀫𑀡𑀜𑁆𑀘𑀸𑀢𑀺 𑀓𑀣𑀁 𑀢𑀤𑀸𑀭𑀫𑁆𑀫𑀡𑀁 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀓𑀭𑁄𑀢𑀺? 𑀧𑀜𑁆𑀘 𑀯𑀘𑀦𑀧𑀣𑁂 𑀕𑀳𑁂𑀢𑁆𑀯𑀸 𑀆𑀕𑀢𑀁 𑀧𑀼𑀕𑁆𑀕𑀮𑀁 𑀫𑁂𑀢𑁆𑀢𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀼𑀦 𑀢𑀲𑁆𑀲𑁂𑀯 𑀫𑁂𑀢𑁆𑀢𑀘𑀺𑀢𑁆𑀢𑀲𑁆𑀲 𑀅𑀯𑀲𑁂𑀲𑀲𑀢𑁆𑀢𑁂 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑁄 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀢𑀤𑀸𑀭𑀫𑁆𑀫𑀡𑀁 𑀓𑀭𑁄𑀢𑀺 𑀦𑀸𑀫. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄. 𑀢𑀤𑀸𑀭𑀫𑁆𑀫𑀡𑀜𑁆𑀘𑀸𑀢𑀺 𑀢𑀲𑁆𑀲𑁂𑀯 𑀫𑁂𑀢𑁆𑀢𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸. 𑀲𑀩𑁆𑀩𑀸𑀯𑀦𑁆𑀢𑀦𑁆𑀢𑀺 𑀲𑀩𑁆𑀩𑀲𑀢𑁆𑀢𑀯𑀦𑁆𑀢𑀁. 𑀮𑁄𑀓𑀦𑁆𑀢𑀺 𑀲𑀢𑁆𑀢𑀮𑁄𑀓𑀁. 𑀯𑀺𑀧𑀼𑀮𑁂𑀦𑀸𑀢𑀺 𑀅𑀦𑁂𑀓𑀲𑀢𑁆𑀢𑀸𑀭𑀫𑁆𑀫𑀡𑁂𑀦. 𑀫𑀳𑀕𑁆𑀕𑀢𑁂𑀦𑀸𑀢𑀺 𑀫𑀳𑀕𑁆𑀕𑀢𑀪𑀽𑀫𑀺𑀓𑁂𑀦. 𑀅𑀧𑁆𑀧𑀫𑀸𑀡𑁂𑀦𑀸𑀢𑀺 𑀲𑀼𑀪𑀸𑀯𑀺𑀢𑁂𑀦. 𑀅𑀯𑁂𑀭𑁂𑀦𑀸𑀢𑀺 𑀦𑀺𑀤𑁆𑀤𑁄𑀲𑁂𑀦. 𑀅𑀩𑁆𑀬𑀸𑀩𑀚𑁆𑀛𑁂𑀦𑀸𑀢𑀺 𑀦𑀺𑀤𑁆𑀤𑀼𑀓𑁆𑀔𑁂𑀦. 𑀨𑀭𑀺𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀸𑀫𑀸𑀢𑀺 𑀏𑀯𑀭𑀽𑀧𑁂𑀦 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀢𑀜𑁆𑀘 𑀧𑀼𑀕𑁆𑀕𑀮𑀁 𑀲𑀩𑁆𑀩𑀜𑁆𑀘 𑀮𑁄𑀓𑀁 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀸𑀫.

𑁨𑁨𑁮. 𑀇𑀤𑀸𑀦𑀺 𑀢𑀤𑀢𑁆𑀣𑀤𑀻𑀧𑀺𑀓𑀁 𑀉𑀧𑀫𑀁 𑀆𑀳𑀭𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀧𑀣𑀯𑀺𑀦𑁆𑀢𑀺 𑀦𑀺𑀧𑁆𑀧𑀣𑀯𑀺𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀭 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂. 𑀯𑀺𑀓𑀺𑀭𑁂𑀬𑁆𑀬𑀸𑀢𑀺 𑀧𑀘𑁆𑀙𑀺𑀬𑀸 𑀧𑀁𑀲𑀼𑀁 𑀉𑀤𑁆𑀥𑀭𑀺𑀢𑁆𑀯𑀸 𑀩𑀻𑀚𑀸𑀦𑀺 𑀯𑀺𑀬 𑀯𑀺𑀓𑀺𑀭𑁂𑀬𑁆𑀬. 𑀑𑀝𑁆𑀞𑀼𑀪𑁂𑀬𑁆𑀬𑀸𑀢𑀺 𑀔𑁂𑀴𑀁 𑀧𑀸𑀢𑁂𑀬𑁆𑀬. 𑀅𑀧𑀣𑀯𑀺𑀁 𑀓𑀭𑁂𑀬𑁆𑀬𑀸𑀢𑀺 𑀏𑀯𑀁 𑀓𑀸𑀬𑁂𑀦 𑀘 𑀯𑀸𑀘𑀸𑀬 𑀘 𑀧𑀬𑁄𑀕𑀁 𑀓𑀢𑁆𑀯𑀸𑀧𑀺 𑀲𑀓𑁆𑀓𑀼𑀡𑁂𑀬𑁆𑀬 𑀅𑀧𑀣𑀯𑀺𑀁 𑀓𑀸𑀢𑀼𑀦𑁆𑀢𑀺? 𑀕𑀫𑁆𑀪𑀻𑀭𑀸𑀢𑀺 𑀩𑀳𑀮𑀢𑁆𑀢𑁂𑀦 𑀤𑁆𑀯𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀸𑀦𑀺 𑀘𑀢𑁆𑀢𑀸𑀭𑀺 𑀘 𑀦𑀳𑀼𑀢𑀸𑀦𑀺 𑀕𑀫𑁆𑀪𑀻𑀭𑀸. 𑀅𑀧𑁆𑀧𑀫𑁂𑀬𑁆𑀬𑀸𑀢𑀺 𑀢𑀺𑀭𑀺𑀬𑀁 𑀧𑀦 𑀅𑀧𑀭𑀺𑀘𑁆𑀙𑀺𑀦𑁆𑀦𑀸. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀧𑀣𑀯𑀻 𑀯𑀺𑀬 𑀳𑀺 𑀫𑁂𑀢𑁆𑀢𑀘𑀺𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀓𑀼𑀤𑀸𑀮𑀧𑀺𑀝𑀓𑀁 𑀕𑀳𑁂𑀢𑁆𑀯𑀸 𑀆𑀕𑀢𑀧𑀼𑀭𑀺𑀲𑁄 𑀯𑀺𑀬 𑀧𑀜𑁆𑀘 𑀯𑀘𑀦𑀧𑀣𑁂 𑀕𑀳𑁂𑀢𑁆𑀯𑀸 𑀆𑀕𑀢𑀧𑀼𑀕𑁆𑀕𑀮𑁄. 𑀬𑀣𑀸 𑀲𑁄 𑀓𑀼𑀤𑀸𑀮𑀧𑀺𑀝𑀓𑁂𑀦 𑀫𑀳𑀸𑀧𑀣𑀯𑀺𑀁 𑀅𑀧𑀣𑀯𑀺𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀯𑁄 𑀧𑀜𑁆𑀘 𑀯𑀘𑀦𑀧𑀣𑁂 𑀕𑀳𑁂𑀢𑁆𑀯𑀸 𑀆𑀕𑀢𑀧𑀼𑀕𑁆𑀕𑀮𑁄 𑀫𑁂𑀢𑁆𑀢𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀻𑀢𑀺.

𑁨𑁨𑁯. 𑀤𑀼𑀢𑀺𑀬𑀉𑀧𑀫𑀸𑀬𑀁 𑀳𑀮𑀺𑀤𑁆𑀤𑀺𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀧𑀻𑀢𑀓𑀯𑀡𑁆𑀡𑀁. 𑀦𑀻𑀮𑀦𑁆𑀢𑀺 𑀓𑀁𑀲𑀦𑀻𑀮𑀁 𑀯𑀸 𑀧𑀮𑀸𑀲𑀦𑀻𑀮𑀁 𑀯𑀸. 𑀅𑀭𑀽𑀧𑀻𑀢𑀺 𑀅𑀭𑀽𑀧𑁄. 𑀦𑀦𑀼 𑀘, 𑀤𑁆𑀯𑀺𑀦𑁆𑀦𑀁 𑀓𑀝𑁆𑀞𑀸𑀦𑀁 𑀯𑀸 𑀤𑁆𑀯𑀺𑀦𑁆𑀦𑀁 𑀭𑀼𑀓𑁆𑀔𑀸𑀦𑀁 𑀯𑀸 𑀤𑁆𑀯𑀺𑀦𑁆𑀦𑀁 𑀲𑁂𑀬𑁆𑀬𑀸𑀦𑀁 𑀯𑀸 𑀤𑁆𑀯𑀺𑀦𑁆𑀦𑀁 𑀲𑁂𑀮𑀸𑀦𑀁 𑀯𑀸 𑀅𑀦𑁆𑀢𑀭𑀁 𑀧𑀭𑀺𑀘𑁆𑀙𑀺𑀦𑁆𑀦𑀸𑀓𑀸𑀲𑀭𑀽𑀧𑀦𑁆𑀢𑀺 𑀆𑀕𑀢𑀁, 𑀓𑀲𑁆𑀫𑀸 𑀇𑀥 𑀅𑀭𑀽𑀧𑀻𑀢𑀺 𑀯𑀼𑀢𑁆𑀢𑁄𑀢𑀺? 𑀲𑀦𑀺𑀤𑀲𑁆𑀲𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀢𑁄. 𑀢𑁂𑀦𑁂𑀯𑀸𑀳 ‘‘𑀅𑀦𑀺𑀤𑀲𑁆𑀲𑀦𑁄’’𑀢𑀺. 𑀢𑀲𑁆𑀫𑀺𑀜𑁆𑀳𑀺 𑀭𑀽𑀧𑀁 𑀮𑀺𑀔𑀺𑀢𑀼𑀁, 𑀭𑀽𑀧𑀧𑀸𑀢𑀼𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 ‘‘𑀅𑀭𑀽𑀧𑀻’’𑀢𑀺 𑀯𑀼𑀢𑁆𑀢𑁄. 𑀅𑀦𑀺𑀤𑀲𑁆𑀲𑀦𑁄𑀢𑀺 𑀤𑀲𑁆𑀲𑀦𑀲𑁆𑀲 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀅𑀦𑀸𑀧𑀸𑀣𑁄. 𑀉𑀧𑀫𑀸𑀲𑀁𑀲𑀦𑁆𑀤𑀦𑁂 𑀧𑀦𑁂𑀢𑁆𑀣 𑀆𑀓𑀸𑀲𑁄 𑀯𑀺𑀬 𑀫𑁂𑀢𑁆𑀢𑀘𑀺𑀢𑁆𑀢𑀁. 𑀢𑀼𑀮𑀺𑀓𑀧𑀜𑁆𑀘𑀫𑀸 𑀘𑀢𑁆𑀢𑀸𑀭𑁄 𑀭𑀗𑁆𑀕𑀚𑀸𑀢𑀸 𑀯𑀺𑀬 𑀧𑀜𑁆𑀘 𑀯𑀘𑀦𑀧𑀣𑀸, 𑀢𑀼𑀮𑀺𑀓𑀧𑀜𑁆𑀘𑀫𑁂 𑀭𑀗𑁆𑀕𑁂 𑀕𑀳𑁂𑀢𑁆𑀯𑀸 𑀆𑀕𑀢𑀧𑀼𑀭𑀺𑀲𑁄 𑀯𑀺𑀬 𑀧𑀜𑁆𑀘 𑀯𑀘𑀦𑀧𑀣𑁂 𑀕𑀳𑁂𑀢𑁆𑀯𑀸 𑀆𑀕𑀢𑀧𑀼𑀕𑁆𑀕𑀮𑁄. 𑀬𑀣𑀸 𑀲𑁄 𑀢𑀼𑀮𑀺𑀓𑀧𑀜𑁆𑀘𑀫𑁂𑀳𑀺 𑀭𑀗𑁆𑀕𑁂𑀳𑀺 𑀆𑀓𑀸𑀲𑁂 𑀭𑀽𑀧𑀧𑀸𑀢𑀼𑀪𑀸𑀯𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀯𑁄 𑀧𑀜𑁆𑀘 𑀯𑀘𑀦𑀧𑀣𑁂 𑀕𑀳𑁂𑀢𑁆𑀯𑀸 𑀆𑀕𑀢𑀧𑀼𑀕𑁆𑀕𑀮𑁄 𑀫𑁂𑀢𑁆𑀢𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀓𑀢𑁆𑀯𑀸 𑀤𑁄𑀲𑀼𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀻𑀢𑀺.

𑁨𑁩𑁦. 𑀢𑀢𑀺𑀬𑀉𑀧𑀫𑀸𑀬𑀁 𑀆𑀤𑀺𑀢𑁆𑀢𑀦𑁆𑀢𑀺 𑀧𑀚𑁆𑀚𑀮𑀺𑀢𑀁. 𑀕𑀫𑁆𑀪𑀻𑀭𑀸 𑀅𑀧𑁆𑀧𑀫𑁂𑀬𑁆𑀬𑀸𑀢𑀺 𑀇𑀫𑀺𑀲𑁆𑀲𑀸 𑀕𑀗𑁆𑀕𑀸𑀬 𑀕𑀫𑁆𑀪𑀻𑀭𑀝𑁆𑀞𑀸𑀦𑀁 𑀕𑀸𑀯𑀼𑀢𑀫𑁆𑀧𑀺 𑀅𑀢𑁆𑀣𑀺, 𑀅𑀟𑁆𑀠𑀬𑁄𑀚𑀦𑀫𑁆𑀧𑀺, 𑀬𑁄𑀚𑀦𑀫𑁆𑀧𑀺. 𑀧𑀼𑀣𑀼𑀮𑀁 𑀧𑀦𑀲𑁆𑀲𑀸 𑀏𑀯𑀭𑀽𑀧𑀁𑀬𑁂𑀯, 𑀤𑀻𑀖𑀢𑁄 𑀧𑀦 𑀧𑀜𑁆𑀘𑀬𑁄𑀚𑀦𑀲𑀢𑀸𑀦𑀺. 𑀲𑀸 𑀓𑀣𑀁 𑀕𑀫𑁆𑀪𑀻𑀭𑀸 𑀅𑀧𑁆𑀧𑀫𑁂𑀬𑁆𑀬𑀸𑀢𑀺? 𑀏𑀢𑁂𑀦 𑀧𑀬𑁄𑀕𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀉𑀤𑁆𑀥𑀦𑁂 𑀉𑀤𑀓𑀁 𑀯𑀺𑀬 𑀢𑀸𑀧𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁄. 𑀞𑀺𑀢𑁄𑀤𑀓𑀁 𑀧𑀦 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀅𑀗𑁆𑀕𑀼𑀮𑀫𑀢𑁆𑀢𑀁 𑀯𑀸 𑀅𑀟𑁆𑀠𑀗𑁆𑀕𑀼𑀮𑀫𑀢𑁆𑀢𑀁 𑀯𑀸 𑀏𑀯𑀁 𑀢𑀸𑀧𑁂𑀢𑀼𑀁 𑀲𑀓𑁆𑀓𑀸 𑀪𑀯𑁂𑀬𑁆𑀬, 𑀅𑀬𑀁 𑀧𑀦 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁. 𑀉𑀧𑀫𑀸𑀲𑀁𑀲𑀦𑁆𑀤𑀦𑁂 𑀧𑀦𑁂𑀢𑁆𑀣 𑀕𑀗𑁆𑀕𑀸 𑀯𑀺𑀬 𑀫𑁂𑀢𑁆𑀢𑀘𑀺𑀢𑁆𑀢𑀁, 𑀢𑀺𑀡𑀼𑀓𑁆𑀓𑀁 𑀆𑀤𑀸𑀬 𑀆𑀕𑀢𑀧𑀼𑀭𑀺𑀲𑁄 𑀯𑀺𑀬 𑀧𑀜𑁆𑀘 𑀯𑀘𑀦𑀧𑀣𑁂 𑀕𑀳𑁂𑀢𑁆𑀯𑀸 𑀆𑀕𑀢𑀧𑀼𑀕𑁆𑀕𑀮𑁄. 𑀬𑀣𑀸 𑀲𑁄 𑀆𑀤𑀺𑀢𑁆𑀢𑀸𑀬 𑀢𑀺𑀡𑀼𑀓𑁆𑀓𑀸𑀬 𑀕𑀗𑁆𑀕𑀁 𑀢𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀯𑁄 𑀧𑀜𑁆𑀘 𑀯𑀘𑀦𑀧𑀣𑁂 𑀕𑀳𑁂𑀢𑁆𑀯𑀸 𑀆𑀕𑀢𑀧𑀼𑀕𑁆𑀕𑀮𑁄 𑀫𑁂𑀢𑁆𑀢𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀻𑀢𑀺.

𑁨𑁩𑁧. 𑀘𑀢𑀼𑀢𑁆𑀣𑀉𑀧𑀫𑀸𑀬𑀁 𑀩𑀺𑀴𑀸𑀭𑀪𑀲𑁆𑀢𑀸𑀢𑀺 𑀩𑀺𑀴𑀸𑀭𑀘𑀫𑁆𑀫𑀧𑀲𑀺𑀩𑁆𑀩𑀓𑀸. 𑀲𑀼𑀫𑀤𑁆𑀤𑀺𑀢𑀸𑀢𑀺 𑀲𑀼𑀝𑁆𑀞𑀼 𑀫𑀤𑁆𑀤𑀺𑀢𑀸. 𑀲𑀼𑀧𑀭𑀺𑀫𑀤𑁆𑀤𑀺𑀢𑀸𑀢𑀺 𑀅𑀦𑁆𑀢𑁄 𑀘 𑀩𑀳𑀺 𑀘 𑀲𑀫𑀦𑁆𑀢𑀢𑁄 𑀲𑀼𑀧𑀭𑀺𑀫𑀤𑁆𑀤𑀺𑀢𑀸. 𑀢𑀽𑀮𑀺𑀦𑀻𑀢𑀺 𑀲𑀺𑀫𑁆𑀩𑀮𑀺𑀢𑀽𑀮𑀮𑀢𑀸𑀢𑀽𑀮𑀲𑀫𑀸𑀦𑀸. 𑀙𑀺𑀦𑁆𑀦𑀲𑀲𑁆𑀲𑀭𑀸𑀢𑀺 𑀙𑀺𑀦𑁆𑀦𑀲𑀲𑁆𑀲𑀭𑀲𑀤𑁆𑀤𑀸. 𑀙𑀺𑀦𑁆𑀦𑀪𑀩𑁆𑀪𑀭𑀸𑀢𑀺 𑀙𑀺𑀦𑁆𑀦𑀪𑀩𑁆𑀪𑀭𑀲𑀤𑁆𑀤𑀸. 𑀉𑀧𑀫𑀸𑀲𑀁𑀲𑀦𑁆𑀤𑀦𑁂 𑀧𑀦𑁂𑀢𑁆𑀣 𑀩𑀺𑀴𑀸𑀭𑀪𑀲𑁆𑀢𑀸 𑀯𑀺𑀬 𑀫𑁂𑀢𑁆𑀢𑀘𑀺𑀢𑁆𑀢𑀁, 𑀓𑀝𑁆𑀞𑀓𑀞𑀮𑀁 𑀆𑀤𑀸𑀬 𑀆𑀕𑀢𑀧𑀼𑀭𑀺𑀲𑁄 𑀯𑀺𑀬 𑀧𑀜𑁆𑀘 𑀯𑀘𑀦𑀧𑀣𑁂 𑀕𑀳𑁂𑀢𑁆𑀯𑀸 𑀆𑀕𑀢𑀧𑀼𑀕𑁆𑀕𑀮𑁄. 𑀬𑀣𑀸 𑀲𑁄 𑀓𑀝𑁆𑀞𑁂𑀦 𑀯𑀸 𑀓𑀞𑀮𑁂𑀦 𑀯𑀸 𑀩𑀺𑀴𑀸𑀭𑀪𑀲𑁆𑀢𑀁 𑀲𑀭𑀲𑀭𑀁 𑀪𑀭𑀪𑀭𑀁 𑀲𑀤𑁆𑀤𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀯𑁄 𑀧𑀜𑁆𑀘 𑀯𑀘𑀦𑀧𑀣𑁂 𑀕𑀳𑁂𑀢𑁆𑀯𑀸 𑀆𑀕𑀢𑀧𑀼𑀕𑁆𑀕𑀮𑁄 𑀫𑁂𑀢𑁆𑀢𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀓𑀢𑁆𑀯𑀸 𑀤𑁄𑀲𑀸𑀦𑀼𑀕𑀢𑀪𑀸𑀯𑀁 𑀓𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀻𑀢𑀺.

𑁨𑁩𑁨. 𑀑𑀘𑀭𑀓𑀸𑀢𑀺 𑀅𑀯𑀘𑀭𑀓𑀸 𑀳𑁂𑀝𑁆𑀞𑀸𑀘𑀭𑀓𑀸, 𑀦𑀻𑀘𑀓𑀫𑁆𑀫𑀓𑀸𑀭𑀓𑀸𑀢𑀺 𑀅𑀢𑁆𑀣𑁄. 𑀬𑁄 𑀫𑀦𑁄 𑀧𑀤𑀽𑀲𑁂𑀬𑁆𑀬𑀸𑀢𑀺 𑀬𑁄 𑀪𑀺𑀓𑁆𑀔𑀼 𑀯𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀫𑀦𑁄 𑀧𑀤𑀽𑀲𑁂𑀬𑁆𑀬, 𑀢𑀁 𑀓𑀓𑀘𑁂𑀦 𑀑𑀓𑀦𑁆𑀢𑀦𑀁 𑀦𑀸𑀥𑀺𑀯𑀸𑀲𑁂𑀬𑁆𑀬. 𑀦 𑀫𑁂 𑀲𑁄 𑀢𑁂𑀦 𑀲𑀸𑀲𑀦𑀓𑀭𑁄𑀢𑀺 𑀲𑁄 𑀢𑁂𑀦 𑀅𑀦𑀥𑀺𑀯𑀸𑀲𑀦𑁂𑀦 𑀫𑀬𑁆𑀳𑀁 𑀑𑀯𑀸𑀤𑀓𑀭𑁄 𑀦 𑀳𑁄𑀢𑀺. 𑀆𑀧𑀢𑁆𑀢𑀺 𑀧𑀦𑁂𑀢𑁆𑀣 𑀦𑀢𑁆𑀣𑀺.

𑁨𑁩𑁩. 𑀅𑀡𑀼𑀁 𑀯𑀸 𑀣𑀽𑀮𑀁 𑀯𑀸𑀢𑀺 𑀅𑀧𑁆𑀧𑀲𑀸𑀯𑀚𑁆𑀚𑀁 𑀯𑀸 𑀫𑀳𑀸𑀲𑀸𑀯𑀚𑁆𑀚𑀁 𑀯𑀸. 𑀬𑀁 𑀢𑀼𑀫𑁆𑀳𑁂 𑀦𑀸𑀥𑀺𑀯𑀸𑀲𑁂𑀬𑁆𑀬𑀸𑀣𑀸𑀢𑀺 𑀬𑁄 𑀢𑀼𑀫𑁆𑀳𑁂𑀳𑀺 𑀅𑀥𑀺𑀯𑀸𑀲𑁂𑀢𑀩𑁆𑀩𑁄 𑀦 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀦𑁄 𑀳𑁂𑀢𑀁, 𑀪𑀦𑁆𑀢𑁂𑀢𑀺, 𑀪𑀦𑁆𑀢𑁂, 𑀅𑀦𑀥𑀺𑀯𑀸𑀲𑁂𑀢𑀩𑁆𑀩𑀁 𑀦𑀸𑀫 𑀯𑀘𑀦𑀧𑀣𑀁 𑀦 𑀧𑀲𑁆𑀲𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸𑀢𑀺 𑀇𑀢𑀺 𑀪𑀕𑀯𑀸 𑀅𑀭𑀳𑀢𑁆𑀢𑁂𑀦 𑀓𑀽𑀝𑀁 𑀕𑀡𑁆𑀳𑀦𑁆𑀢𑁄 𑀬𑀣𑀸𑀦𑀼𑀲𑀦𑁆𑀥𑀺𑀦𑀸 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀓𑀓𑀘𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀮𑀕𑀤𑁆𑀤𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁪. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀅𑀮𑀕𑀤𑁆𑀤𑀽𑀧𑀫𑀲𑀼𑀢𑁆𑀢𑀁. 𑀢𑀢𑁆𑀣 𑀕𑀤𑁆𑀥𑁂 𑀩𑀸𑀥𑀬𑀺𑀁𑀲𑀽𑀢𑀺 𑀕𑀤𑁆𑀥𑀩𑀸𑀥𑀺𑀦𑁄, 𑀕𑀤𑁆𑀥𑀩𑀸𑀥𑀺𑀦𑁄 𑀧𑀼𑀩𑁆𑀩𑀧𑀼𑀭𑀺𑀲𑀸 𑀅𑀲𑁆𑀲𑀸𑀢𑀺 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑁄, 𑀢𑀲𑁆𑀲 𑀕𑀤𑁆𑀥𑀩𑀸𑀥𑀺𑀧𑀼𑀩𑁆𑀩𑀲𑁆𑀲, 𑀕𑀺𑀚𑁆𑀛𑀖𑀸𑀢𑀓𑀓𑀼𑀮𑀧𑁆𑀧𑀲𑀼𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑀕𑁆𑀕𑀫𑁄𑀓𑁆𑀔𑀸𑀦𑀁 𑀅𑀦𑁆𑀢𑀭𑀸𑀬𑀁 𑀓𑀭𑁄𑀦𑁆𑀢𑀻𑀢𑀺 𑀅𑀦𑁆𑀢𑀭𑀸𑀬𑀺𑀓𑀸. 𑀢𑁂 𑀓𑀫𑁆𑀫𑀓𑀺𑀮𑁂𑀲𑀯𑀺𑀧𑀸𑀓𑀉𑀧𑀯𑀸𑀤𑀆𑀡𑀸𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀧𑀜𑁆𑀘𑀯𑀺𑀥𑀸. 𑀢𑀢𑁆𑀣 𑀧𑀜𑁆𑀘𑀸𑀦𑀦𑁆𑀢𑀭𑀺𑀬𑀥𑀫𑁆𑀫𑀸 𑀓𑀫𑁆𑀫𑀦𑁆𑀢𑀭𑀸𑀬𑀺𑀓𑀸 𑀦𑀸𑀫. 𑀢𑀣𑀸 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑀓𑀫𑁆𑀫𑀁, 𑀢𑀁 𑀧𑀦 𑀫𑁄𑀓𑁆𑀔𑀲𑁆𑀲𑁂𑀯 𑀅𑀦𑁆𑀢𑀭𑀸𑀬𑀁 𑀓𑀭𑁄𑀢𑀺, 𑀦 𑀲𑀕𑁆𑀕𑀲𑁆𑀲. 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀥𑀫𑁆𑀫𑀸 𑀓𑀺𑀮𑁂𑀲𑀦𑁆𑀢𑀭𑀸𑀬𑀺𑀓𑀸 𑀦𑀸𑀫. 𑀧𑀡𑁆𑀟𑀓𑀢𑀺𑀭𑀘𑁆𑀙𑀸𑀦𑀕𑀢𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸𑀦𑀁 𑀧𑀝𑀺𑀲𑀦𑁆𑀥𑀺𑀥𑀫𑁆𑀫𑀸 𑀯𑀺𑀧𑀸𑀓𑀦𑁆𑀢𑀭𑀸𑀬𑀺𑀓𑀸 𑀦𑀸𑀫. 𑀅𑀭𑀺𑀬𑀽𑀧𑀯𑀸𑀤𑀥𑀫𑁆𑀫𑀸 𑀉𑀧𑀯𑀸𑀤𑀦𑁆𑀢𑀭𑀸𑀬𑀺𑀓𑀸 𑀦𑀸𑀫, 𑀢𑁂 𑀧𑀦 𑀬𑀸𑀯 𑀅𑀭𑀺𑀬𑁂 𑀦 𑀔𑀫𑀸𑀧𑁂𑀦𑁆𑀢𑀺, 𑀢𑀸𑀯𑀤𑁂𑀯, 𑀦 𑀢𑀢𑁄 𑀧𑀭𑀁. 𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀦𑁆𑀢𑀸 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀡𑀸𑀯𑀻𑀢𑀺𑀓𑁆𑀓𑀫𑀦𑁆𑀢𑀭𑀸𑀬𑀺𑀓𑀸 𑀦𑀸𑀫. 𑀢𑁂𑀧𑀺 𑀬𑀸𑀯 𑀪𑀺𑀓𑁆𑀔𑀼𑀪𑀸𑀯𑀁 𑀯𑀸 𑀧𑀝𑀺𑀚𑀸𑀦𑀸𑀢𑀺, 𑀦 𑀯𑀼𑀝𑁆𑀞𑀸𑀢𑀺 𑀯𑀸, 𑀦 𑀤𑁂𑀲𑁂𑀢𑀺 𑀯𑀸, 𑀢𑀸𑀯𑀤𑁂𑀯, 𑀦 𑀢𑀢𑁄 𑀧𑀭𑀁.

𑀢𑀢𑁆𑀭𑀸𑀬𑀁 𑀪𑀺𑀓𑁆𑀔𑀼 𑀩𑀳𑀼𑀲𑁆𑀲𑀼𑀢𑁄 𑀥𑀫𑁆𑀫𑀓𑀣𑀺𑀓𑁄 𑀲𑁂𑀲𑀦𑁆𑀢𑀭𑀸𑀬𑀺𑀓𑁂 𑀚𑀸𑀦𑀸𑀢𑀺, 𑀯𑀺𑀦𑀬𑁂 𑀧𑀦 𑀅𑀓𑁄𑀯𑀺𑀤𑀢𑁆𑀢𑀸 𑀧𑀡𑁆𑀡𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀦𑁆𑀢𑀭𑀸𑀬𑀺𑀓𑁂 𑀦 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀭𑀳𑁄𑀕𑀢𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 𑀇𑀫𑁂 𑀆𑀕𑀸𑀭𑀺𑀓𑀸 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀲𑁄𑀢𑀸𑀧𑀦𑁆𑀦𑀸𑀧𑀺 𑀲𑀓𑀤𑀸𑀕𑀸𑀫𑀺𑀦𑁄𑀧𑀺 𑀅𑀦𑀸𑀕𑀸𑀫𑀺𑀦𑁄𑀧𑀺 𑀳𑁄𑀦𑁆𑀢𑀺. 𑀪𑀺𑀓𑁆𑀔𑀽𑀧𑀺 𑀫𑀦𑀸𑀧𑀺𑀓𑀸𑀦𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺 𑀭𑀽𑀧𑀸𑀦𑀺 𑀧𑀲𑁆𑀲𑀦𑁆𑀢𑀺…𑀧𑁂… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑁂 𑀨𑁄𑀝𑁆𑀞𑀩𑁆𑀩𑁂 𑀨𑀼𑀲𑀦𑁆𑀢𑀺, 𑀫𑀼𑀤𑀼𑀓𑀸𑀦𑀺 𑀅𑀢𑁆𑀣𑀭𑀡𑀧𑀸𑀯𑀼𑀭𑀡𑀸𑀤𑀻𑀦𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀏𑀢𑀁 𑀲𑀩𑁆𑀩𑀁 𑀯𑀝𑁆𑀝𑀢𑀺. 𑀓𑀲𑁆𑀫𑀸 𑀇𑀢𑁆𑀣𑀻𑀦𑀁𑀬𑁂𑀯 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸 𑀦 𑀯𑀝𑁆𑀝𑀦𑁆𑀢𑀺? 𑀏𑀢𑁂𑀧𑀺 𑀯𑀝𑁆𑀝𑀦𑁆𑀢𑀻𑀢𑀺. 𑀏𑀯𑀁 𑀭𑀲𑁂𑀦 𑀭𑀲𑀁 𑀲𑀁𑀲𑀦𑁆𑀤𑁂𑀢𑁆𑀯𑀸 𑀲𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑀜𑁆𑀘 𑀦𑀺𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑀜𑁆𑀘 𑀏𑀓𑀁 𑀓𑀢𑁆𑀯𑀸 𑀣𑀽𑀮𑀯𑀸𑀓𑁂𑀳𑀺 𑀲𑀤𑁆𑀥𑀺𑀁 𑀅𑀢𑀺𑀲𑀼𑀔𑀼𑀫𑀲𑀼𑀢𑁆𑀢𑀁 𑀉𑀧𑀦𑁂𑀦𑁆𑀢𑁄 𑀯𑀺𑀬, 𑀲𑀸𑀲𑀧𑁂𑀦 𑀲𑀤𑁆𑀥𑀺𑀁 𑀲𑀺𑀦𑁂𑀭𑀼𑀁 𑀉𑀧𑀲𑀁𑀳𑀭𑀦𑁆𑀢𑁄 𑀯𑀺𑀬, 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸, ‘‘𑀓𑀺𑀁 𑀪𑀕𑀯𑀢𑀸 𑀫𑀳𑀸𑀲𑀫𑀼𑀤𑁆𑀤𑀁 𑀩𑀦𑁆𑀥𑀦𑁆𑀢𑁂𑀦 𑀯𑀺𑀬 𑀫𑀳𑀢𑀸 𑀉𑀲𑁆𑀲𑀸𑀳𑁂𑀦 𑀧𑀞𑀫𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀢𑁆𑀢𑀁, 𑀦𑀢𑁆𑀣𑀺 𑀏𑀢𑁆𑀣 𑀤𑁄𑀲𑁄’’𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀧𑀝𑀺𑀯𑀺𑀭𑀼𑀚𑁆𑀛𑀦𑁆𑀢𑁄 𑀯𑁂𑀲𑀸𑀭𑀚𑁆𑀚𑀜𑀸𑀡𑀁 𑀧𑀝𑀺𑀩𑀸𑀳𑀦𑁆𑀢𑁄 𑀅𑀭𑀺𑀬𑀫𑀕𑁆𑀕𑁂 𑀔𑀸𑀡𑀼𑀓𑀡𑁆𑀝𑀓𑀸𑀤𑀻𑀦𑀺 𑀧𑀓𑁆𑀔𑀺𑀧𑀦𑁆𑀢𑁄 𑀫𑁂𑀣𑀼𑀦𑀥𑀫𑁆𑀫𑁂 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀚𑀺𑀦𑀲𑁆𑀲 𑀆𑀡𑀸𑀘𑀓𑁆𑀓𑁂 𑀧𑀳𑀸𑀭𑀁 𑀅𑀤𑀸𑀲𑀺. 𑀢𑁂𑀦𑀸𑀳 𑁋 ‘‘𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀻’’𑀢𑀺𑀆𑀤𑀺.

𑀏𑀯𑀁 𑀩𑁆𑀬𑀸 𑀔𑁄𑀢𑀺 𑀏𑀯𑀁 𑀯𑀺𑀬 𑀔𑁄. 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀻𑀢𑀺𑀆𑀤𑀻𑀲𑀼 𑀓𑀺𑀁 𑀮𑀤𑁆𑀥𑀺𑀓𑁄 𑀢𑁆𑀯𑀁, 𑀮𑀤𑁆𑀥𑀺𑀁 𑀯𑀤𑁂𑀳𑀻𑀢𑀺 𑀧𑀼𑀘𑁆𑀙𑀫𑀸𑀦𑀸 𑀲𑀫𑀦𑀼𑀬𑀼𑀜𑁆𑀚𑀦𑁆𑀢𑀺 𑀦𑀸𑀫. 𑀤𑀺𑀝𑁆𑀞𑀺𑀁 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑀸 𑀲𑀫𑀦𑀼𑀕𑁆𑀕𑀸𑀳𑀦𑁆𑀢𑀺 𑀦𑀸𑀫. 𑀓𑁂𑀦 𑀓𑀸𑀭𑀡𑁂𑀦 𑀏𑀯𑀁 𑀯𑀤𑀲𑀻𑀢𑀺 𑀓𑀸𑀭𑀡𑀁 𑀧𑀼𑀘𑁆𑀙𑀦𑁆𑀢𑀸 𑀲𑀫𑀦𑀼𑀪𑀸𑀲𑀦𑁆𑀢𑀺 𑀦𑀸𑀫. 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁪𑁨-𑁪𑁮) 𑀅𑀝𑁆𑀞𑀺𑀓𑀗𑁆𑀓𑀮𑀽𑀧𑀫𑀸 𑀅𑀧𑁆𑀧𑀲𑁆𑀲𑀸𑀤𑀝𑁆𑀞𑁂𑀦. 𑀫𑀁𑀲𑀧𑁂𑀲𑀽𑀧𑀫𑀸 𑀩𑀳𑀼𑀲𑀸𑀥𑀸𑀭𑀡𑀝𑁆𑀞𑁂𑀦. 𑀢𑀺𑀡𑀼𑀓𑁆𑀓𑀽𑀧𑀫𑀸 𑀅𑀦𑀼𑀤𑀳𑀦𑀝𑁆𑀞𑁂𑀦. 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸 𑀫𑀳𑀸𑀪𑀺𑀢𑀸𑀧𑀦𑀝𑁆𑀞𑁂𑀦. 𑀲𑀼𑀧𑀺𑀦𑀓𑀽𑀧𑀫𑀸 𑀇𑀢𑁆𑀢𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀝𑁆𑀞𑁂𑀦. 𑀬𑀸𑀘𑀺𑀢𑀓𑀽𑀧𑀫𑀸 𑀢𑀸𑀯𑀓𑀸𑀮𑀺𑀓𑀝𑁆𑀞𑁂𑀦. 𑀭𑀼𑀓𑁆𑀔𑀨𑀮𑀽𑀧𑀫𑀸 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑀧𑀮𑀺𑀪𑀜𑁆𑀚𑀦𑀝𑁆𑀞𑁂𑀦. 𑀅𑀲𑀺𑀲𑀽𑀦𑀽𑀧𑀫𑀸 𑀅𑀥𑀺𑀓𑀼𑀝𑁆𑀝𑀦𑀝𑁆𑀞𑁂𑀦. 𑀲𑀢𑁆𑀢𑀺𑀲𑀽𑀮𑀽𑀧𑀫𑀸 𑀯𑀺𑀦𑀺𑀯𑀺𑀚𑁆𑀛𑀦𑀝𑁆𑀞𑁂𑀦. 𑀲𑀧𑁆𑀧𑀲𑀺𑀭𑀽𑀧𑀫𑀸 𑀲𑀸𑀲𑀗𑁆𑀓𑀲𑀧𑁆𑀧𑀝𑀺𑀪𑀬𑀝𑁆𑀞𑁂𑀦. 𑀣𑀸𑀫𑀲𑀸𑀢𑀺 𑀤𑀺𑀝𑁆𑀞𑀺𑀣𑀸𑀫𑁂𑀦. 𑀧𑀭𑀸𑀫𑀸𑀲𑀸𑀢𑀺 𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑁂𑀦. 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀢𑀻𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀯𑁄𑀳𑀭𑀢𑀺 𑀤𑀻𑀧𑁂𑀢𑀺 𑀯𑀸.

𑁨𑁩𑁫. 𑀬𑀢𑁄 𑀔𑁄 𑀢𑁂 𑀪𑀺𑀓𑁆𑀔𑀽𑀢𑀺 𑀬𑀤𑀸 𑀢𑁂 𑀪𑀺𑀓𑁆𑀔𑀽. 𑀏𑀯𑀁 𑀩𑁆𑀬𑀸 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀸𑀢𑀺 𑀇𑀤𑀁 𑀏𑀲 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂𑀦 𑀦𑀢𑁆𑀣𑀻𑀢𑀺 𑀯𑀢𑁆𑀢𑀼𑀓𑀸𑀫𑁄𑀧𑀺 𑀪𑀕𑀯𑀢𑁄 𑀆𑀦𑀼𑀪𑀸𑀯𑁂𑀦 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀩𑀼𑀤𑁆𑀥𑀸𑀦𑀁 𑀓𑀺𑀭 𑀲𑀫𑁆𑀫𑀼𑀔𑀸 𑀤𑁆𑀯𑁂 𑀓𑀣𑀸 𑀓𑀣𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺.

𑁨𑁩𑁬. 𑀓𑀲𑁆𑀲 𑀔𑁄 𑀦𑀸𑀫 𑀢𑁆𑀯𑀁 𑀫𑁄𑀖𑀧𑀼𑀭𑀺𑀲𑀸𑀢𑀺 𑀢𑁆𑀯𑀁 𑀫𑁄𑀖𑀧𑀼𑀭𑀺𑀲 𑀓𑀲𑁆𑀲 𑀔𑀢𑁆𑀢𑀺𑀬𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀯𑁂𑀲𑁆𑀲𑀲𑁆𑀲 𑀯𑀸 𑀲𑀼𑀤𑁆𑀤𑀲𑁆𑀲 𑀯𑀸 𑀕𑀳𑀝𑁆𑀞𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸 𑀤𑁂𑀯𑀲𑁆𑀲 𑀯𑀸 𑀫𑀦𑀼𑀲𑁆𑀲𑀲𑁆𑀲 𑀯𑀸 𑀫𑀬𑀸 𑀏𑀯𑀁 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀲𑀺. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺 𑀅𑀬𑀁 𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀺. 𑀅𑀭𑀺𑀝𑁆𑀞𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀪𑀕𑀯𑀸 𑀫𑀁 𑀫𑁄𑀖𑀧𑀼𑀭𑀺𑀲𑁄𑀢𑀺 𑀯𑀤𑀢𑀺, 𑀦 𑀔𑁄 𑀧𑀦 𑀫𑁄𑀖𑀧𑀼𑀭𑀺𑀲𑀸𑀢𑀺 𑀯𑀼𑀢𑁆𑀢𑀫𑀢𑁆𑀢𑀓𑁂𑀦 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀦 𑀳𑁄𑀢𑀺. 𑀉𑀧𑀲𑁂𑀦𑀫𑁆𑀧𑀺 𑀳𑀺 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑀁, ‘𑀅𑀢𑀺𑀮𑀳𑀼𑀁 𑀔𑁄 𑀢𑁆𑀯𑀁, 𑀫𑁄𑀖𑀧𑀼𑀭𑀺𑀲, 𑀩𑀸𑀳𑀼𑀮𑁆𑀮𑀸𑀬 𑀆𑀯𑀢𑁆𑀢𑁄’𑀢𑀺 (𑀫𑀳𑀸𑀯. 𑁭𑁫) 𑀪𑀕𑀯𑀸 𑀫𑁄𑀖𑀧𑀼𑀭𑀺𑀲𑀯𑀸𑀤𑁂𑀦 𑀑𑀯𑀤𑀺. 𑀣𑁂𑀭𑁄 𑀅𑀧𑀭𑀪𑀸𑀕𑁂 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀙 𑀅𑀪𑀺𑀜𑁆𑀜𑀸 𑀲𑀘𑁆𑀙𑀸𑀓𑀸𑀲𑀺. 𑀅𑀳𑀫𑁆𑀧𑀺 𑀢𑀣𑀸𑀭𑀽𑀧𑀁 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀺𑀢𑁆𑀯𑀸 𑀫𑀕𑁆𑀕𑀨𑀮𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀩𑀦𑁆𑀥𑀦𑀸 𑀧𑀯𑀼𑀢𑁆𑀢𑀲𑁆𑀲 𑀧𑀡𑁆𑀟𑀼𑀧𑀮𑀸𑀲𑀲𑁆𑀲 𑀯𑀺𑀬 𑀅𑀯𑀺𑀭𑀼𑀴𑁆𑀳𑀺𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺.

𑀉𑀲𑁆𑀫𑀻𑀓𑀢𑁄𑀧𑀻𑀢𑀺, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂 𑀓𑀺𑀦𑁆𑀢𑀺 𑀫𑀜𑁆𑀜𑀣, 𑀅𑀬𑀁 𑀅𑀭𑀺𑀝𑁆𑀞𑁄 𑀏𑀯𑀁𑀮𑀤𑁆𑀥𑀺𑀓𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀧𑀝𑀺𑀯𑀺𑀭𑀼𑀚𑁆𑀛𑀺𑀢𑁆𑀯𑀸 𑀯𑁂𑀲𑀸𑀭𑀚𑁆𑀚𑀜𑀸𑀡𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀆𑀡𑀸𑀘𑀓𑁆𑀓𑁂 𑀧𑀳𑀸𑀭𑀁 𑀤𑀤𑀫𑀸𑀦𑁄 𑀅𑀧𑀺 𑀦𑀼 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀉𑀲𑁆𑀫𑀻𑀓𑀢𑁄𑀧𑀺? 𑀬𑀣𑀸 𑀦𑀺𑀩𑁆𑀩𑀼𑀢𑁂𑀧𑀺 𑀫𑀳𑀦𑁆𑀢𑁂 𑀅𑀕𑁆𑀕𑀺𑀓𑁆𑀔𑀦𑁆𑀥𑁂 𑀔𑀚𑁆𑀚𑀼𑀧𑀦𑀓𑀫𑀢𑁆𑀢𑀸𑀧𑀺 𑀅𑀕𑁆𑀕𑀺𑀧𑀧𑀝𑀺𑀓𑀸 𑀳𑁄𑀢𑀺𑀬𑁂𑀯, 𑀬𑀁 𑀦𑀺𑀲𑁆𑀲𑀸𑀬 𑀧𑀼𑀦 𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀪𑀯𑁂𑀬𑁆𑀬. 𑀓𑀺𑀁 𑀦𑀼 𑀔𑁄 𑀏𑀯𑀁 𑀇𑀫𑀲𑁆𑀲 𑀅𑀧𑁆𑀧𑀫𑀢𑁆𑀢𑀺𑀓𑀸𑀧𑀺 𑀜𑀸𑀡𑀼𑀲𑁆𑀫𑀸 𑀅𑀢𑁆𑀣𑀺, 𑀬𑀁 𑀦𑀺𑀲𑁆𑀲𑀸𑀬 𑀯𑀸𑀬𑀫𑀦𑁆𑀢𑁄 𑀫𑀕𑁆𑀕𑀨𑀮𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀸𑀢𑀺? 𑀦𑁄 𑀳𑁂𑀢𑀁, 𑀪𑀦𑁆𑀢𑁂𑀢𑀺, 𑀪𑀦𑁆𑀢𑁂, 𑀏𑀯𑀁𑀮𑀤𑁆𑀥𑀺𑀓𑀲𑁆𑀲 𑀓𑀼𑀢𑁄 𑀏𑀯𑀭𑀽𑀧𑀸 𑀜𑀸𑀡𑀼𑀲𑁆𑀫𑀸𑀢𑀺? 𑀫𑀕𑁆𑀕𑀨𑀮𑀸𑀦𑀁 𑀧𑀘𑁆𑀘𑀬𑀲𑀫𑀢𑁆𑀣𑀸𑀬 𑀜𑀸𑀡𑀼𑀲𑁆𑀫𑀸𑀬 𑀉𑀲𑁆𑀫𑀻𑀓𑀢𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀸 𑀯𑀤𑀦𑁆𑀢𑀺. 𑀫𑀗𑁆𑀓𑀼𑀪𑀽𑀢𑁄𑀢𑀺 𑀦𑀺𑀢𑁆𑀢𑁂𑀚𑀪𑀽𑀢𑁄. 𑀧𑀢𑁆𑀢𑀓𑁆𑀔𑀦𑁆𑀥𑁄𑀢𑀺 𑀧𑀢𑀺𑀢𑀓𑁆𑀔𑀦𑁆𑀥𑁄. 𑀅𑀧𑁆𑀧𑀝𑀺𑀪𑀸𑀦𑁄𑀢𑀺 𑀓𑀺𑀜𑁆𑀘𑀺 𑀧𑀝𑀺𑀪𑀸𑀦𑀁 𑀅𑀧𑀲𑁆𑀲𑀦𑁆𑀢𑁄 𑀪𑀺𑀦𑁆𑀦𑀧𑀝𑀺𑀪𑀸𑀦𑁄 𑀏𑀯𑀭𑀽𑀧𑀫𑁆𑀧𑀺 𑀦𑀸𑀫 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑀁 𑀮𑀪𑀺𑀢𑁆𑀯𑀸 𑀅𑀯𑀺𑀭𑀼𑀴𑁆𑀳𑀺𑀥𑀫𑁆𑀫𑁄 𑀓𑀺𑀭𑀫𑁆𑀳𑀺 𑀲𑀫𑀼𑀕𑁆𑀖𑀸𑀢𑀺𑀢𑀧𑀘𑁆𑀘𑀬𑁄 𑀚𑀸𑀢𑁄𑀢𑀺 𑀅𑀢𑁆𑀢𑀦𑁄 𑀅𑀪𑀩𑁆𑀩𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦 𑀪𑀽𑀫𑀺𑀁 𑀔𑀡𑀫𑀸𑀦𑁄 𑀦𑀺𑀲𑀻𑀤𑀺.

𑀧𑀜𑁆𑀜𑀸𑀬𑀺𑀲𑁆𑀲𑀲𑀺 𑀔𑁄𑀢𑀺 𑀅𑀬𑀫𑁆𑀧𑀺 𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀺. 𑀅𑀭𑀺𑀝𑁆𑀞𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀪𑀕𑀯𑀸 𑀫𑀬𑁆𑀳𑀁 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀧𑀘𑁆𑀙𑀺𑀦𑁆𑀦𑁄𑀢𑀺 𑀯𑀤𑀢𑀺, 𑀦 𑀔𑁄 𑀧𑀦 𑀩𑀼𑀤𑁆𑀥𑀸 𑀲𑀉𑀧𑀦𑀺𑀲𑁆𑀲𑀬𑀸𑀦𑀁𑀬𑁂𑀯 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀅𑀦𑀼𑀧𑀦𑀺𑀲𑁆𑀲𑀬𑀸𑀦𑀫𑁆𑀧𑀺 𑀤𑁂𑀲𑁂𑀦𑁆𑀢𑀺, 𑀅𑀳𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸 𑀲𑀼𑀕𑀢𑁄𑀯𑀸𑀤𑀁 𑀮𑀪𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀽𑀧𑀕𑀁 𑀓𑀼𑀲𑀮𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀑𑀯𑀸𑀤𑀁 𑀧𑀝𑀺𑀧𑀲𑁆𑀲𑀫𑁆𑀪𑁂𑀦𑁆𑀢𑁄 ‘‘𑀧𑀜𑁆𑀜𑀸𑀬𑀺𑀲𑁆𑀲𑀲𑀻’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄, 𑀢𑁆𑀯𑀁𑀬𑁂𑀯, 𑀫𑁄𑀖𑀧𑀼𑀭𑀺𑀲, 𑀇𑀫𑀺𑀦𑀸 𑀧𑀸𑀧𑀓𑁂𑀦 𑀤𑀺𑀝𑁆𑀞𑀺𑀕𑀢𑁂𑀦 𑀦𑀺𑀭𑀬𑀸𑀤𑀻𑀲𑀼 𑀧𑀜𑁆𑀜𑀸𑀬𑀺𑀲𑁆𑀲𑀲𑀺, 𑀫𑀫 𑀲𑀦𑁆𑀢𑀺𑀓𑀸 𑀢𑀼𑀬𑁆𑀳𑀁 𑀲𑀼𑀕𑀢𑁄𑀯𑀸𑀤𑁄 𑀦𑀸𑀫 𑀦𑀢𑁆𑀣𑀺, 𑀦 𑀫𑁂 𑀢𑀬𑀸 𑀅𑀢𑁆𑀣𑁄, 𑀇𑀥𑀸𑀳𑀁 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺.

𑁨𑁩𑁭. 𑀅𑀣 𑀔𑁄 𑀪𑀕𑀯𑀸𑀢𑀺 𑀅𑀬𑀫𑁆𑀧𑀺 𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀺. 𑀇𑀫𑀲𑁆𑀫𑀺𑀜𑁆𑀳𑀺 𑀞𑀸𑀦𑁂 𑀪𑀕𑀯𑀸 𑀧𑀭𑀺𑀲𑀁 𑀲𑁄𑀥𑁂𑀢𑀺, 𑀅𑀭𑀺𑀝𑁆𑀞𑀁 𑀕𑀡𑀢𑁄 𑀦𑀺𑀲𑁆𑀲𑀸𑀭𑁂𑀢𑀺. 𑀲𑀘𑁂 𑀳𑀺 𑀧𑀭𑀺𑀲𑀕𑀢𑀸𑀦𑀁 𑀓𑀲𑁆𑀲𑀘𑀺 𑀏𑀯𑀁 𑀪𑀯𑁂𑀬𑁆𑀬 𑁋 ‘‘𑀅𑀬𑀁 𑀅𑀭𑀺𑀝𑁆𑀞𑁄 𑀪𑀕𑀯𑀢𑀸 𑀅𑀓𑀣𑀺𑀢𑀁 𑀓𑀣𑁂𑀢𑀼𑀁 𑀓𑀺𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀓𑀘𑁆𑀘𑀺 𑀦𑀼 𑀔𑁄 𑀧𑀭𑀺𑀲𑀫𑀚𑁆𑀛𑁂 𑀪𑀕𑀯𑀢𑀸 𑀓𑀣𑀸𑀬 𑀲𑀫𑀸𑀭𑀤𑁆𑀥𑀸𑀬 𑀲𑀳𑀲𑀸 𑀓𑀣𑀺𑀢’’𑀦𑁆𑀢𑀺. 𑀏𑀯𑀁 𑀓𑀣𑀺𑀢𑀁 𑀧𑀦 𑀦 𑀅𑀭𑀺𑀝𑁆𑀞𑁄𑀯 𑀲𑀼𑀡𑀸𑀢𑀺, 𑀅𑀜𑁆𑀜𑁂𑀦𑀧𑀺 𑀲𑀼𑀢𑀁 𑀪𑀯𑀺𑀲𑁆𑀲𑀢𑀺. 𑀅𑀣𑀸𑀧𑀺𑀲𑁆𑀲 𑀲𑀺𑀬𑀸 ‘‘𑀬𑀣𑀸 𑀲𑀢𑁆𑀣𑀸 𑀅𑀭𑀺𑀝𑁆𑀞𑀁 𑀦𑀺𑀕𑁆𑀕𑀡𑁆𑀳𑀸𑀢𑀺, 𑀫𑀫𑁆𑀧𑀺 𑀏𑀯𑀁 𑀦𑀺𑀕𑁆𑀕𑀡𑁆𑀳𑁂𑀬𑁆𑀬𑀸𑀢𑀺 𑀲𑀼𑀢𑁆𑀯𑀸𑀧𑀺 𑀢𑀼𑀡𑁆𑀳𑀻𑀪𑀸𑀯𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺. ‘‘𑀢𑀁 𑀲𑀩𑁆𑀩𑀁 𑀦 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀫𑀬𑀸𑀧𑀺 𑀦 𑀓𑀣𑀺𑀢𑀁, 𑀅𑀜𑁆𑀜𑁂𑀦 𑀲𑀼𑀢𑀫𑁆𑀧𑀺 𑀦𑀢𑁆𑀣𑀻𑀢𑀺 ‘‘𑀢𑀼𑀫𑁆𑀳𑁂𑀧𑀺𑀫𑁂, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸 𑀧𑀭𑀺𑀲𑀸𑀬 𑀮𑀤𑁆𑀥𑀺𑀁 𑀲𑁄𑀥𑁂𑀢𑀺. 𑀧𑀭𑀺𑀲𑀸𑀬 𑀧𑀦 𑀮𑀤𑁆𑀥𑀺𑀲𑁄𑀥𑀦𑁂𑀦𑁂𑀯 𑀅𑀭𑀺𑀝𑁆𑀞𑁄 𑀕𑀡𑀢𑁄 𑀦𑀺𑀲𑁆𑀲𑀸𑀭𑀺𑀢𑁄 𑀦𑀸𑀫 𑀳𑁄𑀢𑀺.

𑀇𑀤𑀸𑀦𑀺 𑀅𑀭𑀺𑀝𑁆𑀞𑀲𑁆𑀲 𑀮𑀤𑁆𑀥𑀺𑀁 𑀧𑀓𑀸𑀲𑁂𑀦𑁆𑀢𑁄 𑀲𑁄 𑀯𑀢, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀜𑁆𑀜𑀢𑁆𑀭𑁂𑀯 𑀓𑀸𑀫𑁂𑀳𑀻𑀢𑀺𑀆𑀤𑀻𑀲𑀼 𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 ‘‘𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’’𑀢𑀺 𑀏𑀯𑀁𑀮𑀤𑁆𑀥𑀺𑀓𑁄, 𑀲𑁄 𑀯𑀢 𑀓𑀺𑀮𑁂𑀲𑀓𑀸𑀫𑁂𑀳𑀺 𑀘𑁂𑀯 𑀓𑀺𑀮𑁂𑀲𑀓𑀸𑀫𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀲𑀜𑁆𑀜𑀸𑀯𑀺𑀢𑀓𑁆𑀓𑁂𑀳𑀺 𑀘 𑀅𑀜𑁆𑀜𑀢𑁆𑀭, 𑀏𑀢𑁂 𑀥𑀫𑁆𑀫𑁂 𑀧𑀳𑀸𑀬, 𑀯𑀺𑀦𑀸 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺, 𑀯𑀢𑁆𑀣𑀼𑀓𑀸𑀫𑁂 𑀧𑀝𑀺𑀲𑁂𑀯𑀺𑀲𑁆𑀲𑀢𑀺, 𑀫𑁂𑀣𑀼𑀦𑀲𑀫𑀸𑀘𑀸𑀭𑀁 𑀲𑀫𑀸𑀘𑀭𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀇𑀤𑀁 𑀓𑀸𑀭𑀡𑀁 𑀦𑀸𑀫 𑀦𑀢𑁆𑀣𑀺, 𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄𑀢𑀺.

𑁨𑁩𑁮. 𑀏𑀯𑀁 𑀪𑀕𑀯𑀸 𑀅𑀬𑀁 𑀅𑀭𑀺𑀝𑁆𑀞𑁄 𑀬𑀣𑀸 𑀦𑀸𑀫 𑀭𑀚𑀓𑁄 𑀲𑀼𑀕𑀦𑁆𑀥𑀸𑀦𑀺𑀧𑀺 𑀤𑀼𑀕𑁆𑀕𑀦𑁆𑀥𑀸𑀦𑀺𑀧𑀺 𑀚𑀺𑀡𑁆𑀡𑀸𑀦𑀺𑀧𑀺 𑀦𑀯𑀸𑀦𑀺𑀧𑀺 𑀲𑀼𑀤𑁆𑀥𑀸𑀦𑀺𑀧𑀺 𑀅𑀲𑀼𑀤𑁆𑀥𑀸𑀦𑀺𑀧𑀺 𑀯𑀢𑁆𑀣𑀸𑀦𑀺 𑀏𑀓𑀢𑁄 𑀪𑀡𑁆𑀟𑀺𑀓𑀁 𑀓𑀭𑁄𑀢𑀺, 𑀏𑀯𑀫𑁂𑀯 𑀪𑀺𑀓𑁆𑀔𑀽𑀦𑀁 𑀦𑀺𑀘𑁆𑀙𑀦𑁆𑀤𑀭𑀸𑀕𑀧𑀡𑀻𑀢𑀘𑀻𑀯𑀭𑀸𑀤𑀺𑀧𑀭𑀺𑀪𑁄𑀕𑀜𑁆𑀘 𑀅𑀦𑀺𑀩𑀤𑁆𑀥𑀲𑀻𑀮𑀸𑀦𑀁 𑀕𑀳𑀝𑁆𑀞𑀸𑀦𑀁 𑀅𑀦𑁆𑀢𑀭𑀸𑀬𑀓𑀭𑀁 𑀲𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑀜𑁆𑀘 𑀦𑀺𑀩𑀤𑁆𑀥𑀲𑀻𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀯𑀭𑀡𑀓𑀭𑀁 𑀲𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑀜𑁆𑀘 𑀲𑀩𑁆𑀩𑀁 𑀏𑀓𑀲𑀤𑀺𑀲𑀁 𑀓𑀭𑁄𑀢𑀻𑀢𑀺 𑀅𑀭𑀺𑀝𑁆𑀞𑀲𑁆𑀲 𑀮𑀤𑁆𑀥𑀺𑀁 𑀧𑀓𑀸𑀲𑁂𑀢𑁆𑀯𑀸 𑀇𑀤𑀸𑀦𑀺 𑀤𑀼𑀕𑁆𑀕𑀳𑀺𑀢𑀸𑀬 𑀧𑀭𑀺𑀬𑀢𑁆𑀢𑀺𑀬𑀸 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀭𑀺𑀬𑀸𑀧𑀼𑀡𑀦𑁆𑀢𑀻𑀢𑀺 𑀉𑀕𑁆𑀕𑀡𑁆𑀳𑀦𑁆𑀢𑀺. 𑀲𑀼𑀢𑁆𑀢𑀦𑁆𑀢𑀺𑀆𑀤𑀻𑀲𑀼 𑀉𑀪𑀢𑁄𑀯𑀺𑀪𑀗𑁆𑀕𑀦𑀺𑀤𑁆𑀤𑁂𑀲𑀔𑀦𑁆𑀥𑀓𑀧𑀭𑀺𑀯𑀸𑀭𑀸, 𑀲𑀼𑀢𑁆𑀢𑀦𑀺𑀧𑀸𑀢𑁂 𑀫𑀗𑁆𑀕𑀮𑀲𑀼𑀢𑁆𑀢𑀭𑀢𑀦𑀲𑀼𑀢𑁆𑀢𑀦𑀸𑀮𑀓𑀲𑀼𑀆𑀢𑀼𑀯𑀝𑁆𑀝𑀓𑀲𑀼𑀢𑁆𑀢𑀸𑀦𑀺, 𑀅𑀜𑁆𑀜𑀫𑁆𑀧𑀺 𑀘 𑀲𑀼𑀢𑁆𑀢𑀦𑀸𑀫𑀓𑀁 𑀢𑀣𑀸𑀕𑀢𑀯𑀘𑀦𑀁 𑀲𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑀫𑁆𑀧𑀺 𑀲𑀕𑀸𑀣𑀓𑀁 𑀲𑀼𑀢𑁆𑀢𑀁 𑀕𑁂𑀬𑁆𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀯𑀺𑀲𑁂𑀲𑁂𑀦 𑀲𑀁𑀬𑀼𑀢𑁆𑀢𑀓𑁂 𑀲𑀓𑀮𑁄𑀧𑀺 𑀲𑀕𑀸𑀣𑀸𑀯𑀕𑁆𑀕𑁄. 𑀲𑀓𑀮𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁, 𑀦𑀺𑀕𑁆𑀕𑀸𑀣𑀓𑀁 𑀲𑀼𑀢𑁆𑀢𑀁, 𑀬𑀜𑁆𑀘 𑀅𑀜𑁆𑀜𑀫𑁆𑀧𑀺 𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀅𑀲𑀗𑁆𑀕𑀳𑀺𑀢𑀁 𑀩𑀼𑀤𑁆𑀥𑀯𑀘𑀦𑀁, 𑀢𑀁 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀥𑀫𑁆𑀫𑀧𑀤𑀁, 𑀣𑁂𑀭𑀕𑀸𑀣𑀸, 𑀣𑁂𑀭𑀺𑀕𑀸𑀣𑀸, 𑀲𑀼𑀢𑁆𑀢𑀦𑀺𑀧𑀸𑀢𑁂 𑀦𑁄𑀲𑀼𑀢𑁆𑀢𑀦𑀸𑀫𑀺𑀓𑀸 𑀲𑀼𑀤𑁆𑀥𑀺𑀓𑀕𑀸𑀣𑀸 𑀘 𑀕𑀸𑀣𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁄𑀫𑀦𑀲𑁆𑀲𑀜𑀸𑀡𑀫𑀬𑀺𑀓𑀕𑀸𑀣𑀸𑀧𑀝𑀺𑀲𑀁𑀬𑀼𑀢𑁆𑀢𑀸 𑀤𑁆𑀯𑁂𑀅𑀲𑀻𑀢𑀺𑀲𑀼𑀢𑁆𑀢𑀦𑁆𑀢𑀸 𑀉𑀤𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 (𑀇𑀢𑀺𑀯𑀼. 𑁧,𑁨) 𑀤𑀲𑀼𑀢𑁆𑀢𑀭𑀲𑀢𑀲𑀼𑀢𑁆𑀢𑀦𑁆𑀢𑀸 𑀇𑀢𑀺𑀯𑀼𑀢𑁆𑀢𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀡𑁆𑀡𑀓𑀚𑀸𑀢𑀓𑀸𑀤𑀻𑀦𑀺 𑀧𑀡𑁆𑀡𑀸𑀲𑀸𑀥𑀺𑀓𑀸𑀦𑀺 𑀧𑀜𑁆𑀘𑀚𑀸𑀢𑀓𑀲𑀢𑀸𑀦𑀺 𑀚𑀸𑀢𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀸 𑀥𑀫𑁆𑀫𑀸 𑀆𑀦𑀦𑁆𑀤𑁂’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 (𑀅. 𑀦𑀺. 𑁪.𑁧𑁨𑁯) 𑀲𑀩𑁆𑀩𑁂𑀧𑀺 𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀥𑀫𑁆𑀫𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸 𑀲𑀼𑀢𑁆𑀢𑀦𑁆𑀢𑀸 𑀅𑀩𑁆𑀪𑀼𑀢𑀥𑀫𑁆𑀫𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀘𑀽𑀴𑀯𑁂𑀤𑀮𑁆𑀮𑀫𑀳𑀸𑀯𑁂𑀤𑀮𑁆𑀮𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀓𑁆𑀓𑀧𑀜𑁆𑀳𑀲𑀗𑁆𑀔𑀸𑀭𑀪𑀸𑀚𑀦𑀺𑀬𑀫𑀳𑀸𑀧𑀼𑀡𑁆𑀡𑀫𑀲𑀼𑀢𑁆𑀢𑀸𑀤𑀬𑁄 𑀲𑀩𑁆𑀩𑁂𑀧𑀺 𑀯𑁂𑀤𑀜𑁆𑀘 𑀢𑀼𑀝𑁆𑀞𑀺𑀜𑁆𑀘 𑀮𑀤𑁆𑀥𑀸 𑀮𑀤𑁆𑀥𑀸 𑀧𑀼𑀘𑁆𑀙𑀺𑀢𑀲𑀼𑀢𑁆𑀢𑀦𑁆𑀢𑀸 𑀯𑁂𑀤𑀮𑁆𑀮𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀢𑁆𑀣𑀁 𑀦 𑀉𑀧𑀧𑀭𑀺𑀓𑁆𑀔𑀦𑁆𑀢𑀻𑀢𑀺 𑀅𑀢𑁆𑀣𑀢𑁆𑀣𑀁 𑀓𑀸𑀭𑀡𑀢𑁆𑀣𑀁 𑀦 𑀧𑀲𑁆𑀲𑀦𑁆𑀢𑀺 𑀦 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺. 𑀅𑀦𑀼𑀧𑀧𑀭𑀺𑀓𑁆𑀔𑀢𑀦𑁆𑀢𑀺 𑀅𑀦𑀼𑀧𑀧𑀭𑀺𑀓𑁆𑀔𑀦𑁆𑀢𑀸𑀦𑀁. 𑀦 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀻𑀢𑀺 𑀦 𑀉𑀧𑀝𑁆𑀞𑀳𑀦𑁆𑀢𑀺 𑀦 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀻𑀮𑀁 𑀲𑀫𑀸𑀥𑀺 𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑁄 𑀨𑀮𑀁 𑀯𑀝𑁆𑀝𑀁 𑀯𑀺𑀯𑀝𑁆𑀝𑀁 𑀓𑀣𑀺𑀢𑀦𑁆𑀢𑀺 𑀏𑀯𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂 𑀉𑀧𑀸𑀭𑀫𑁆𑀪𑀸𑀦𑀺𑀲𑀁𑀲𑀸 𑀘𑁂𑀯𑀸𑀢𑀺 𑀢𑁂 𑀧𑀭𑁂𑀲𑀁 𑀯𑀸𑀤𑁂 𑀤𑁄𑀲𑀸𑀭𑁄𑀧𑀦𑀸𑀦𑀺𑀲𑀁𑀲𑀸 𑀳𑀼𑀢𑁆𑀯𑀸 𑀧𑀭𑀺𑀬𑀸𑀧𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀺𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀦𑀺𑀲𑀁𑀲𑀸 𑀘𑀸𑀢𑀺 𑀏𑀯𑀁 𑀯𑀸𑀤𑀧𑀫𑁄𑀓𑁆𑀔𑀸𑀦𑀺𑀲𑀁𑀲𑀸, 𑀧𑀭𑁂𑀳𑀺 𑀲𑀓𑀯𑀸𑀤𑁂 𑀤𑁄𑀲𑁂 𑀆𑀭𑁄𑀧𑀺𑀢𑁂 𑀢𑀁 𑀤𑁄𑀲𑀁 𑀏𑀯𑀁 𑀫𑁄𑀘𑁂𑀲𑁆𑀲𑀸𑀫𑀸𑀢𑀺 𑀇𑀫𑀺𑀦𑀸𑀯 𑀓𑀸𑀭𑀡𑁂𑀦 𑀧𑀭𑀺𑀬𑀸𑀧𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀜𑁆𑀘𑀲𑁆𑀲 𑀅𑀢𑁆𑀣𑀁 𑀦𑀸𑀦𑀼𑀪𑁄𑀦𑁆𑀢𑀻𑀢𑀺 𑀬𑀲𑁆𑀲 𑀘 𑀫𑀕𑁆𑀕𑀲𑁆𑀲 𑀯𑀸 𑀨𑀮𑀲𑁆𑀲 𑀯𑀸 𑀅𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺, 𑀢𑀜𑁆𑀘𑀲𑁆𑀲 𑀥𑀫𑁆𑀫𑀲𑁆𑀲 𑀅𑀢𑁆𑀣𑀁 𑀏𑀢𑁂 𑀤𑀼𑀕𑁆𑀕𑀳𑀺𑀢𑀕𑁆𑀕𑀸𑀳𑀺𑀦𑁄 𑀦𑀸𑀦𑀼𑀪𑁄𑀦𑁆𑀢𑀺. 𑀅𑀧𑀺𑀘 𑀧𑀭𑀲𑁆𑀲 𑀯𑀸𑀤𑁂 𑀉𑀧𑀸𑀭𑀫𑁆𑀪𑀁 𑀆𑀭𑁄𑀧𑁂𑀢𑀼𑀁 𑀅𑀢𑁆𑀢𑀦𑁄 𑀯𑀸𑀤𑀁 𑀫𑁄𑀘𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀧𑀺 𑀢𑀜𑁆𑀘 𑀅𑀢𑁆𑀣𑀁 𑀦𑀸𑀦𑀼𑀪𑁄𑀦𑁆𑀢𑀺𑀬𑁂𑀯.

𑁨𑁩𑁯. 𑀅𑀮𑀕𑀤𑁆𑀤𑀢𑁆𑀣𑀺𑀓𑁄𑀢𑀺 𑀆𑀲𑀺𑀯𑀺𑀲𑀅𑀢𑁆𑀣𑀺𑀓𑁄. 𑀕𑀤𑁄𑀢𑀺 𑀳𑀺 𑀯𑀺𑀲𑀲𑁆𑀲 𑀦𑀸𑀫𑀁, 𑀢𑀁 𑀢𑀲𑁆𑀲 𑀅𑀮𑀁 𑀧𑀭𑀺𑀧𑀼𑀡𑁆𑀡𑀁 𑀅𑀢𑁆𑀣𑀻𑀢𑀺 𑀅𑀮𑀕𑀤𑁆𑀤𑁄. 𑀪𑁄𑀕𑁂𑀢𑀺 𑀲𑀭𑀻𑀭𑁂. 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁂 𑀓𑀼𑀮𑀧𑀼𑀢𑁆𑀢𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀻𑀢𑀺 𑀦𑀺𑀢𑁆𑀣𑀭𑀡𑀧𑀭𑀺𑀬𑀢𑁆𑀢𑀺𑀯𑀲𑁂𑀦 𑀉𑀕𑁆𑀕𑀡𑁆𑀳𑀦𑁆𑀢𑀺. 𑀢𑀺𑀲𑁆𑀲𑁄 𑀳𑀺 𑀧𑀭𑀺𑀬𑀢𑁆𑀢𑀺𑀬𑁄 𑀅𑀮𑀕𑀤𑁆𑀤𑀧𑀭𑀺𑀬𑀢𑁆𑀢𑀺 𑀦𑀺𑀢𑁆𑀣𑀭𑀡𑀧𑀭𑀺𑀬𑀢𑁆𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀻𑀢𑀺.

𑀢𑀢𑁆𑀣 𑀬𑁄 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀏𑀯𑀁 𑀘𑀻𑀯𑀭𑀸𑀤𑀻𑀦𑀺 𑀯𑀸 𑀮𑀪𑀺𑀲𑁆𑀲𑀸𑀫𑀺, 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀯𑀸 𑀫𑀁 𑀚𑀸𑀦𑀺𑀲𑁆𑀲𑀦𑁆𑀢𑀻𑀢𑀺 𑀮𑀸𑀪𑀲𑀓𑁆𑀓𑀸𑀭𑀳𑁂𑀢𑀼 𑀧𑀭𑀺𑀬𑀸𑀧𑀼𑀡𑀸𑀢𑀺, 𑀢𑀲𑁆𑀲 𑀲𑀸 𑀧𑀭𑀺𑀬𑀢𑁆𑀢𑀺 𑀅𑀮𑀕𑀤𑁆𑀤𑀧𑀭𑀺𑀬𑀢𑁆𑀢𑀺 𑀦𑀸𑀫. 𑀏𑀯𑀁 𑀧𑀭𑀺𑀬𑀸𑀧𑀼𑀡𑀢𑁄 𑀳𑀺 𑀩𑀼𑀤𑁆𑀥𑀯𑀘𑀦𑀁 𑀅𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀦𑀺𑀤𑁆𑀤𑁄𑀓𑁆𑀓𑀫𑀦𑀁 𑀯𑀭𑀢𑀭𑀁.

𑀬𑁄 𑀧𑀦 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑀻𑀮𑀲𑁆𑀲 𑀆𑀕𑀢𑀝𑁆𑀞𑀸𑀦𑁂 𑀲𑀻𑀮𑀁 𑀧𑀽𑀭𑁂𑀢𑁆𑀯𑀸 𑀲𑀫𑀸𑀥𑀺𑀲𑁆𑀲 𑀆𑀕𑀢𑀝𑁆𑀞𑀸𑀦𑁂 𑀲𑀫𑀸𑀥𑀺𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀆𑀕𑀢𑀝𑁆𑀞𑀸𑀦𑁂 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀫𑀕𑁆𑀕𑀨𑀮𑀸𑀦𑀁 𑀆𑀕𑀢𑀝𑁆𑀞𑀸𑀦𑁂 𑀫𑀕𑁆𑀕𑀁 𑀪𑀸𑀯𑁂𑀲𑁆𑀲𑀸𑀫𑀺 𑀨𑀮𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀸𑀫𑀻𑀢𑀺 𑀉𑀕𑁆𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀲𑀸 𑀧𑀭𑀺𑀬𑀢𑁆𑀢𑀺 𑀦𑀺𑀢𑁆𑀣𑀭𑀡𑀧𑀭𑀺𑀬𑀢𑁆𑀢𑀺 𑀦𑀸𑀫 𑀳𑁄𑀢𑀺.

𑀔𑀻𑀡𑀸𑀲𑀯𑀲𑁆𑀲 𑀧𑀦 𑀧𑀭𑀺𑀬𑀢𑁆𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺 𑀦𑀸𑀫. 𑀢𑀲𑁆𑀲 𑀳𑀺 𑀅𑀧𑀭𑀺𑀜𑁆𑀜𑀸𑀢𑀁 𑀅𑀧𑁆𑀧𑀳𑀻𑀦𑀁 𑀅𑀪𑀸𑀯𑀺𑀢𑀁 𑀅𑀲𑀘𑁆𑀙𑀺𑀓𑀢𑀁 𑀯𑀸 𑀦𑀢𑁆𑀣𑀺. 𑀲𑁄 𑀳𑀺 𑀧𑀭𑀺𑀜𑁆𑀜𑀸𑀢𑀓𑁆𑀔𑀦𑁆𑀥𑁄 𑀧𑀳𑀻𑀦𑀓𑀺𑀮𑁂𑀲𑁄 𑀪𑀸𑀯𑀺𑀢𑀫𑀕𑁆𑀕𑁄 𑀲𑀘𑁆𑀙𑀺𑀓𑀢𑀨𑀮𑁄, 𑀢𑀲𑁆𑀫𑀸 𑀩𑀼𑀤𑁆𑀥𑀯𑀘𑀦𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑁄 𑀢𑀦𑁆𑀢𑀺𑀥𑀸𑀭𑀓𑁄 𑀧𑀯𑁂𑀡𑀺𑀧𑀸𑀮𑀓𑁄 𑀯𑀁𑀲𑀸𑀦𑀼𑀭𑀓𑁆𑀔𑀓𑁄𑀯 𑀳𑀼𑀢𑁆𑀯𑀸 𑀉𑀕𑁆𑀕𑀡𑁆𑀳𑀸𑀢𑀺. 𑀇𑀢𑀺𑀲𑁆𑀲 𑀲𑀸 𑀧𑀭𑀺𑀬𑀢𑁆𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺 𑀦𑀸𑀫 𑀳𑁄𑀢𑀺.

𑀬𑁄 𑀧𑀦 𑀧𑀼𑀣𑀼𑀚𑁆𑀚𑀦𑁄 𑀙𑀸𑀢𑀪𑀬𑀸𑀤𑀻𑀲𑀼 𑀕𑀦𑁆𑀣𑀥𑀭𑁂𑀲𑀼 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀲𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀲𑀼 𑀲𑀬𑀁 𑀪𑀺𑀓𑁆𑀔𑀸𑀘𑀸𑀭𑁂𑀦 𑀅𑀓𑀺𑀮𑀫𑀫𑀸𑀦𑁄 𑀅𑀢𑀺𑀫𑀥𑀼𑀭𑀁 𑀩𑀼𑀤𑁆𑀥𑀯𑀘𑀦𑀁 𑀫𑀸 𑀦𑀲𑁆𑀲𑀢𑀼, 𑀢𑀦𑁆𑀢𑀺𑀁 𑀥𑀸𑀭𑁂𑀲𑁆𑀲𑀸𑀫𑀺, 𑀯𑀁𑀲𑀁 𑀞𑀧𑁂𑀲𑁆𑀲𑀸𑀫𑀺, 𑀧𑀯𑁂𑀡𑀺𑀁 𑀧𑀸𑀮𑁂𑀲𑁆𑀲𑀸𑀫𑀻𑀢𑀺 𑀧𑀭𑀺𑀬𑀸𑀧𑀼𑀡𑀸𑀢𑀺, 𑀢𑀲𑁆𑀲 𑀧𑀭𑀺𑀬𑀢𑁆𑀢𑀺 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺 𑀳𑁄𑀢𑀺, 𑀦 𑀳𑁄𑀢𑀻𑀢𑀺? 𑀦 𑀳𑁄𑀢𑀺. 𑀓𑀲𑁆𑀫𑀸? 𑀦 𑀅𑀢𑁆𑀢𑀦𑁄 𑀞𑀸𑀦𑁂 𑀞𑀢𑁆𑀯𑀸 𑀧𑀭𑀺𑀬𑀸𑀧𑀼𑀢𑀢𑁆𑀢𑀸. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀳𑀺 𑀧𑀭𑀺𑀬𑀢𑁆𑀢𑀺 𑀦𑀸𑀫 𑀅𑀮𑀕𑀤𑁆𑀤𑀸 𑀯𑀸 𑀳𑁄𑀢𑀺 𑀦𑀺𑀢𑁆𑀣𑀭𑀡𑀸 𑀯𑀸, 𑀲𑀢𑁆𑀢𑀦𑁆𑀦𑀁 𑀲𑁂𑀓𑁆𑀔𑀸𑀦𑀁 𑀦𑀺𑀢𑁆𑀣𑀭𑀡𑀸𑀯, 𑀔𑀻𑀡𑀸𑀲𑀯𑀲𑁆𑀲 𑀪𑀡𑁆𑀟𑀸𑀕𑀸𑀭𑀺𑀓𑀧𑀭𑀺𑀬𑀢𑁆𑀢𑀺𑀬𑁂𑀯. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀦𑀺𑀢𑁆𑀣𑀭𑀡𑀧𑀭𑀺𑀬𑀢𑁆𑀢𑀺 𑀅𑀥𑀺𑀧𑁆𑀧𑁂𑀢𑀸.

𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀻𑀢𑀺 𑀲𑀻𑀮𑀸𑀤𑀻𑀦𑀁 𑀆𑀕𑀢𑀝𑁆𑀞𑀸𑀦𑁂𑀲𑀼 𑀇𑀥 𑀲𑀻𑀮𑀁 𑀓𑀣𑀺𑀢𑀁, 𑀇𑀥 𑀲𑀫𑀸𑀥𑀺, 𑀇𑀥 𑀯𑀺𑀧𑀲𑁆𑀲𑀦𑀸, 𑀇𑀥 𑀫𑀕𑁆𑀕𑁄, 𑀇𑀥 𑀨𑀮𑀁, 𑀇𑀥 𑀯𑀝𑁆𑀝𑀁, 𑀇𑀥 𑀯𑀺𑀯𑀝𑁆𑀝𑀦𑁆𑀢𑀺 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺. 𑀢𑀜𑁆𑀘𑀲𑁆𑀲 𑀅𑀢𑁆𑀣𑀁 𑀅𑀦𑀼𑀪𑁄𑀦𑁆𑀢𑀻𑀢𑀺 𑀬𑁂𑀲𑀁 𑀫𑀕𑁆𑀕𑀨𑀮𑀸𑀦𑀁 𑀅𑀢𑁆𑀣𑀸𑀬 𑀧𑀭𑀺𑀬𑀸𑀧𑀼𑀡𑀦𑁆𑀢𑀺. 𑀲𑀼𑀕𑁆𑀕𑀳𑀺𑀢𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 𑀨𑀮𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀸 𑀢𑀜𑁆𑀘𑀲𑁆𑀲 𑀥𑀫𑁆𑀫𑀲𑁆𑀲 𑀅𑀢𑁆𑀣𑀁 𑀅𑀦𑀼𑀪𑀯𑀦𑁆𑀢𑀺. 𑀧𑀭𑀯𑀸𑀤𑁂 𑀉𑀧𑀸𑀭𑀫𑁆𑀪𑀁 𑀆𑀭𑁄𑀧𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀸𑀧𑀺 𑀲𑀓𑀯𑀸𑀤𑁂 𑀆𑀭𑁄𑀧𑀺𑀢𑀁 𑀤𑁄𑀲𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀫𑁄𑀘𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀸𑀧𑀺 𑀅𑀦𑀼𑀪𑁄𑀦𑁆𑀢𑀺𑀬𑁂𑀯. 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀲𑀻𑀮𑀸𑀤𑀻𑀦𑀁 𑀆𑀕𑀢𑀝𑁆𑀞𑀸𑀦𑁂 𑀲𑀻𑀮𑀸𑀤𑀻𑀦𑀺 𑀧𑀽𑀭𑁂𑀦𑁆𑀢𑀸𑀦𑀫𑁆𑀧𑀺, 𑀧𑀭𑁂𑀲𑀁 𑀯𑀸𑀤𑁂 𑀲𑀳𑀥𑀫𑁆𑀫𑁂𑀦 𑀉𑀧𑀸𑀭𑀫𑁆𑀪𑀁 𑀆𑀭𑁄𑀧𑁂𑀦𑁆𑀢𑀸𑀦𑀫𑁆𑀧𑀺, 𑀲𑀓𑀯𑀸𑀤𑀢𑁄 𑀤𑁄𑀲𑀁 𑀳𑀭𑀦𑁆𑀢𑀸𑀦𑀫𑁆𑀧𑀺, 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀲𑀫𑀚𑁆𑀛𑁂 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀬 𑀧𑀲𑀦𑁆𑀦𑁂𑀳𑀺 𑀉𑀧𑀦𑀻𑀢𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀸𑀦𑀫𑁆𑀧𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

𑀏𑀯𑀁 𑀲𑀼𑀕𑁆𑀕𑀳𑀺𑀢𑁂 𑀩𑀼𑀤𑁆𑀥𑀯𑀘𑀦𑁂 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀢𑁆𑀣𑁂𑀯 𑀦𑀺𑀬𑁄𑀚𑁂𑀦𑁆𑀢𑁄 𑀢𑀲𑁆𑀫𑀸 𑀢𑀺𑀳, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀤𑀼𑀕𑁆𑀕𑀳𑀺𑀢𑀧𑀭𑀺𑀬𑀢𑁆𑀢𑀺 𑀤𑀼𑀕𑁆𑀕𑀳𑀺𑀢𑀅𑀮𑀕𑀤𑁆𑀤𑁄 𑀯𑀺𑀬 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀢𑀺, 𑀲𑀼𑀕𑁆𑀕𑀳𑀺𑀢𑀧𑀭𑀺𑀬𑀢𑁆𑀢𑀺 𑀲𑀼𑀕𑁆𑀕𑀳𑀺𑀢𑀅𑀮𑀕𑀤𑁆𑀤𑁄 𑀯𑀺𑀬 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀦𑀁 𑀥𑀸𑀭𑁂𑀬𑁆𑀬𑀸𑀣𑀸𑀢𑀺 𑀢𑀣𑁂𑀯 𑀦𑀁 𑀥𑀸𑀭𑁂𑀬𑁆𑀬𑀸𑀣, 𑀢𑁂𑀦𑁂𑀯 𑀅𑀢𑁆𑀣𑁂𑀦 𑀕𑀡𑁆𑀳𑁂𑀬𑁆𑀬𑀸𑀣. 𑀬𑁂 𑀯𑀸 𑀧𑀦𑀸𑀲𑁆𑀲𑀼 𑀯𑀺𑀬𑀢𑁆𑀢𑀸 𑀪𑀺𑀓𑁆𑀔𑀽𑀢𑀺 𑀬𑁂 𑀯𑀸 𑀧𑀦 𑀅𑀜𑁆𑀜𑁂 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀫𑀳𑀸𑀓𑀲𑁆𑀲𑀧𑀫𑀳𑀸𑀓𑀘𑁆𑀘𑀸𑀦𑀸𑀤𑀺𑀓𑀸 𑀩𑁆𑀬𑀢𑁆𑀢𑀸 𑀧𑀡𑁆𑀟𑀺𑀢𑀸 𑀪𑀺𑀓𑁆𑀔𑀽 𑀅𑀲𑁆𑀲𑀼, 𑀢𑁂 𑀧𑀼𑀘𑁆𑀙𑀺𑀢𑀩𑁆𑀩𑀸. 𑀅𑀭𑀺𑀝𑁆𑀞𑁂𑀦 𑀯𑀺𑀬 𑀧𑀦 𑀫𑀫 𑀲𑀸𑀲𑀦𑁂 𑀦 𑀓𑀮𑀮𑀁 𑀯𑀸 𑀓𑀘𑀯𑀭𑀁 𑀯𑀸 𑀧𑀓𑁆𑀔𑀺𑀧𑀺𑀢𑀩𑁆𑀩𑀁.

𑁨𑁪𑁦. 𑀓𑀼𑀮𑁆𑀮𑀽𑀧𑀫𑀦𑁆𑀢𑀺 𑀓𑀼𑀮𑁆𑀮𑀲𑀤𑀺𑀲𑀁. 𑀦𑀺𑀢𑁆𑀣𑀭𑀡𑀢𑁆𑀣𑀸𑀬𑀸𑀢𑀺 𑀘𑀢𑀼𑀭𑁄𑀖𑀦𑀺𑀢𑁆𑀣𑀭𑀡𑀢𑁆𑀣𑀸𑀬. 𑀉𑀤𑀓𑀡𑁆𑀡𑀯𑀦𑁆𑀢𑀺 𑀬𑀜𑁆𑀳𑀺 𑀉𑀤𑀓𑀁 𑀕𑀫𑁆𑀪𑀻𑀭𑀁 𑀦 𑀧𑀼𑀣𑀼𑀮𑀁. 𑀧𑀼𑀣𑀼𑀮𑀁 𑀯𑀸 𑀧𑀦 𑀦 𑀕𑀫𑁆𑀪𑀻𑀭𑀁, 𑀦 𑀢𑀁 𑀅𑀡𑁆𑀡𑀯𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀁 𑀧𑀦 𑀕𑀫𑁆𑀪𑀻𑀭𑀜𑁆𑀘𑁂𑀯 𑀧𑀼𑀣𑀼𑀮𑀜𑁆𑀘, 𑀢𑀁 𑀅𑀡𑁆𑀡𑀯𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀫𑀳𑀦𑁆𑀢𑀁 𑀉𑀤𑀓𑀡𑁆𑀡𑀯𑀦𑁆𑀢𑀺 𑀫𑀳𑀦𑁆𑀢𑀁 𑀧𑀼𑀣𑀼𑀮𑀁 𑀕𑀫𑁆𑀪𑀻𑀭𑀁 𑀉𑀤𑀓𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀲𑀸𑀲𑀗𑁆𑀓𑀁 𑀦𑀸𑀫 𑀬𑀢𑁆𑀣 𑀘𑁄𑀭𑀸𑀦𑀁 𑀦𑀺𑀯𑀼𑀢𑁆𑀣𑁄𑀓𑀸𑀲𑁄 𑀤𑀺𑀲𑁆𑀲𑀢𑀺. 𑀞𑀺𑀢𑁄𑀓𑀸𑀲𑁄, 𑀦𑀺𑀲𑀺𑀦𑁆𑀦𑁄𑀓𑀸𑀲𑁄, 𑀦𑀺𑀧𑀦𑁆𑀦𑁄𑀓𑀸𑀲𑁄 𑀤𑀺𑀲𑁆𑀲𑀢𑀺. 𑀲𑀧𑁆𑀧𑀝𑀺𑀪𑀬𑀁 𑀦𑀸𑀫 𑀬𑀢𑁆𑀣 𑀘𑁄𑀭𑁂𑀳𑀺 𑀫𑀦𑀼𑀲𑁆𑀲𑀸 𑀳𑀢𑀸 𑀤𑀺𑀲𑁆𑀲𑀦𑁆𑀢𑀺, 𑀯𑀺𑀮𑀼𑀢𑁆𑀢𑀸 𑀤𑀺𑀲𑁆𑀲𑀦𑁆𑀢𑀺, 𑀆𑀓𑁄𑀝𑀺𑀢𑀸 𑀤𑀺𑀲𑁆𑀲𑀦𑁆𑀢𑀺. 𑀉𑀢𑁆𑀢𑀭𑀲𑁂𑀢𑀽𑀢𑀺 𑀉𑀤𑀓𑀡𑁆𑀡𑀯𑀲𑁆𑀲 𑀉𑀧𑀭𑀺 𑀩𑀤𑁆𑀥𑁄 𑀲𑁂𑀢𑀼. 𑀓𑀼𑀮𑁆𑀮𑀁 𑀩𑀦𑁆𑀥𑀺𑀢𑁆𑀯𑀸𑀢𑀺 𑀓𑀼𑀮𑁆𑀮𑁄 𑀦𑀸𑀫 𑀢𑀭𑀡𑀢𑁆𑀣𑀸𑀬 𑀓𑀮𑀸𑀧𑀁 𑀓𑀢𑁆𑀯𑀸 𑀩𑀤𑁆𑀥𑁄. 𑀧𑀢𑁆𑀣𑀭𑀺𑀢𑁆𑀯𑀸 𑀩𑀤𑁆𑀥𑀸 𑀧𑀦 𑀧𑀤𑀭𑀘𑀸𑀝𑀺𑀆𑀤𑀬𑁄 𑀉𑀴𑀼𑀫𑁆𑀧𑁄𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀉𑀘𑁆𑀘𑀸𑀭𑁂𑀢𑁆𑀯𑀸𑀢𑀺 𑀞𑀧𑁂𑀢𑁆𑀯𑀸. 𑀓𑀺𑀘𑁆𑀘𑀓𑀸𑀭𑀻𑀢𑀺 𑀧𑀢𑁆𑀢𑀓𑀸𑀭𑀻 𑀬𑀼𑀢𑁆𑀢𑀓𑀸𑀭𑀻, 𑀧𑀢𑀺𑀭𑀽𑀧𑀓𑀸𑀭𑀻𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀸𑀧𑀺 𑀯𑁄 𑀧𑀳𑀸𑀢𑀩𑁆𑀩𑀸𑀢𑀺 𑀏𑀢𑁆𑀣 𑀥𑀫𑁆𑀫𑀸𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸. 𑀪𑀕𑀯𑀸 𑀳𑀺 𑀲𑀫𑀣𑁂𑀧𑀺 𑀙𑀦𑁆𑀤𑀭𑀸𑀕𑀁 𑀧𑀚𑀳𑀸𑀧𑁂𑀲𑀺, 𑀯𑀺𑀧𑀲𑁆𑀲𑀦𑀸𑀬𑀧𑀺. 𑀲𑀫𑀣𑁂 𑀙𑀦𑁆𑀤𑀭𑀸𑀕𑀁 𑀓𑀢𑁆𑀣 𑀧𑀚𑀳𑀸𑀧𑁂𑀲𑀺? ‘‘𑀇𑀢𑀺 𑀔𑁄, 𑀉𑀤𑀸𑀬𑀺, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑁆𑀲𑀧𑀺 𑀧𑀳𑀸𑀦𑀁 𑀯𑀤𑀸𑀫𑀺, 𑀧𑀲𑁆𑀲𑀲𑀺 𑀦𑁄 𑀢𑁆𑀯𑀁, 𑀉𑀤𑀸𑀬𑀺, 𑀢𑀁 𑀲𑀁𑀬𑁄𑀚𑀦𑀁 𑀅𑀡𑀼𑀁 𑀯𑀸 𑀣𑀽𑀮𑀁 𑀯𑀸, 𑀬𑀲𑁆𑀲𑀸𑀳𑀁 𑀦𑁄 𑀧𑀳𑀸𑀦𑀁 𑀯𑀤𑀸𑀫𑀻’’𑀢𑀺 (𑀫. 𑀦𑀺. 𑁨.𑁧𑁫𑁬) 𑀏𑀢𑁆𑀣 𑀲𑀫𑀣𑁂 𑀙𑀦𑁆𑀤𑀭𑀸𑀕𑀁 𑀧𑀚𑀳𑀸𑀧𑁂𑀲𑀺. ‘‘𑀇𑀫𑀁 𑀘𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀁 𑀏𑀯𑀁 𑀧𑀭𑀺𑀲𑀼𑀤𑁆𑀥𑀁 𑀏𑀯𑀁 𑀧𑀭𑀺𑀬𑁄𑀤𑀸𑀢𑀁 𑀦 𑀅𑀮𑁆𑀮𑀻𑀬𑁂𑀣 𑀦 𑀓𑁂𑀮𑀸𑀬𑁂𑀣 𑀦 𑀥𑀦𑀸𑀬𑁂𑀣𑀸’’𑀢𑀺 (𑀫. 𑀦𑀺. 𑁧.𑁪𑁦𑁧) 𑀏𑀢𑁆𑀣 𑀯𑀺𑀧𑀲𑁆𑀲𑀦𑀸𑀬 𑀙𑀦𑁆𑀤𑀭𑀸𑀕𑀁 𑀧𑀚𑀳𑀸𑀧𑁂𑀲𑀺. 𑀇𑀥 𑀧𑀦 𑀉𑀪𑀬𑀢𑁆𑀣 𑀧𑀚𑀳𑀸𑀧𑁂𑀦𑁆𑀢𑁄 ‘‘𑀥𑀫𑁆𑀫𑀸𑀧𑀺 𑀯𑁄 𑀧𑀳𑀸𑀢𑀩𑁆𑀩𑀸, 𑀧𑀕𑁂𑀯 𑀅𑀥𑀫𑁆𑀫𑀸’’𑀢𑀺 𑀆𑀳.

𑀢𑀢𑁆𑀭𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀪𑀺𑀓𑁆𑀔𑀯𑁂, 𑀅𑀳𑀁 𑀏𑀯𑀭𑀽𑀧𑁂𑀲𑀼 𑀲𑀦𑁆𑀢𑀧𑁆𑀧𑀡𑀻𑀢𑁂𑀲𑀼 𑀥𑀫𑁆𑀫𑁂𑀲𑀼 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁 𑀯𑀤𑀸𑀫𑀺, 𑀓𑀺𑀁 𑀧𑀦 𑀇𑀫𑀲𑁆𑀫𑀺𑀁 𑀅𑀲𑀤𑁆𑀥𑀫𑁆𑀫𑁂 𑀕𑀸𑀫𑀥𑀫𑁆𑀫𑁂 𑀯𑀲𑀮𑀥𑀫𑁆𑀫𑁂 𑀤𑀼𑀝𑁆𑀞𑀼𑀮𑁆𑀮𑁂 𑀑𑀤𑀓𑀦𑁆𑀢𑀺𑀓𑁂, 𑀬𑀢𑁆𑀣 𑀅𑀬𑀁 𑀅𑀭𑀺𑀝𑁆𑀞𑁄 𑀫𑁄𑀖𑀧𑀼𑀭𑀺𑀲𑁄 𑀦𑀺𑀤𑁆𑀤𑁄𑀲𑀲𑀜𑁆𑀜𑀻 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀙𑀦𑁆𑀤𑀭𑀸𑀕𑀁 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸𑀢𑀺 𑀯𑀤𑀢𑀺. 𑀅𑀭𑀺𑀝𑁆𑀞𑁂𑀦 𑀯𑀺𑀬 𑀦 𑀢𑀼𑀫𑁆𑀳𑁂𑀳𑀺 𑀫𑀬𑁆𑀳𑀁 𑀲𑀸𑀲𑀦𑁂 𑀓𑀮𑀮𑀁 𑀯𑀸 𑀓𑀘𑀯𑀭𑀁 𑀯𑀸 𑀧𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀏𑀯𑀁 𑀪𑀕𑀯𑀸 𑀇𑀫𑀺𑀦𑀸𑀧𑀺 𑀑𑀯𑀸𑀤𑁂𑀦 𑀅𑀭𑀺𑀝𑁆𑀞𑀁𑀬𑁂𑀯 𑀦𑀺𑀕𑁆𑀕𑀡𑁆𑀳𑀸𑀢𑀺.

𑁨𑁪𑁧. 𑀇𑀤𑀸𑀦𑀺 𑀬𑁄 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀢𑀺𑀯𑀺𑀥𑀕𑁆𑀕𑀸𑀳𑀯𑀲𑁂𑀦 𑀅𑀳𑀁 𑀫𑀫𑀦𑁆𑀢𑀺 𑀕𑀡𑁆𑀳𑀸𑀢𑀺, 𑀲𑁄 𑀫𑀬𑁆𑀳𑀁 𑀲𑀸𑀲𑀦𑁂 𑀅𑀬𑀁 𑀅𑀭𑀺𑀝𑁆𑀞𑁄 𑀯𑀺𑀬 𑀓𑀮𑀮𑀁 𑀓𑀘𑀯𑀭𑀁 𑀧𑀓𑁆𑀔𑀺𑀧𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀙𑀬𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀦𑀻𑀢𑀺 𑀤𑀺𑀝𑁆𑀞𑀺𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁, 𑀤𑀺𑀝𑁆𑀞𑀺𑀬𑀸 𑀆𑀭𑀫𑁆𑀫𑀡𑀫𑁆𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁, 𑀤𑀺𑀝𑁆𑀞𑀺𑀬𑀸 𑀧𑀘𑁆𑀘𑀬𑁄𑀧𑀺. 𑀭𑀽𑀧𑀁 𑀏𑀢𑀁 𑀫𑀫𑀸𑀢𑀺𑀆𑀤𑀻𑀲𑀼 𑀏𑀢𑀁 𑀫𑀫𑀸𑀢𑀺 𑀢𑀡𑁆𑀳𑀸𑀕𑁆𑀕𑀸𑀳𑁄. 𑀏𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑀕𑁆𑀕𑀸𑀳𑁄. 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑀤𑀺𑀝𑁆𑀞𑀺𑀕𑁆𑀕𑀸𑀳𑁄. 𑀏𑀯𑀁 𑀭𑀽𑀧𑀸𑀭𑀫𑁆𑀫𑀡𑀸 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀬𑁄 𑀓𑀣𑀺𑀢𑀸 𑀳𑁄𑀦𑁆𑀢𑀺. 𑀭𑀽𑀧𑀁 𑀧𑀦 𑀅𑀢𑁆𑀢𑀸𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀤𑀺𑀝𑁆𑀞𑀁 𑀭𑀽𑀧𑀸𑀬𑀢𑀦𑀁, 𑀲𑀼𑀢𑀁 𑀲𑀤𑁆𑀤𑀸𑀬𑀢𑀦𑀁, 𑀫𑀼𑀢𑀁 𑀕𑀦𑁆𑀥𑀸𑀬𑀢𑀦𑀁 𑀭𑀲𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁, 𑀢𑀜𑁆𑀳𑀺 𑀧𑀢𑁆𑀯𑀸 𑀕𑀳𑁂𑀢𑀩𑁆𑀩𑀢𑁄 𑀫𑀼𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀯𑀲𑁂𑀲𑀸𑀦𑀺 𑀲𑀢𑁆𑀢𑀸𑀬𑀢𑀦𑀸𑀦𑀺 𑀯𑀺𑀜𑁆𑀜𑀸𑀢𑀁 𑀦𑀸𑀫. 𑀧𑀢𑁆𑀢𑀦𑁆𑀢𑀺 𑀧𑀭𑀺𑀬𑁂𑀲𑀺𑀢𑁆𑀯𑀸 𑀯𑀸 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀯𑀸 𑀧𑀢𑁆𑀢𑀁. 𑀧𑀭𑀺𑀬𑁂𑀲𑀺𑀢𑀦𑁆𑀢𑀺 𑀧𑀢𑁆𑀢𑀁 𑀯𑀸 𑀅𑀧𑁆𑀧𑀢𑁆𑀢𑀁 𑀯𑀸 𑀧𑀭𑀺𑀬𑁂𑀲𑀺𑀢𑀁. 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸𑀢𑀺 𑀘𑀺𑀢𑁆𑀢𑁂𑀦 𑀅𑀦𑀼𑀲𑀜𑁆𑀘𑀭𑀺𑀢𑀁. 𑀮𑁄𑀓𑀲𑁆𑀫𑀺𑀜𑁆𑀳𑀺 𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀫𑁆𑀧𑀺 𑀅𑀢𑁆𑀣𑀺, 𑀧𑀭𑀺𑀬𑁂𑀲𑀺𑀢𑁆𑀯𑀸 𑀦𑁄𑀧𑀢𑁆𑀢𑀫𑁆𑀧𑀺. 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀫𑁆𑀧𑀺 𑀅𑀢𑁆𑀣𑀺, 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀦𑁄𑀧𑀢𑁆𑀢𑀫𑁆𑀧𑀺. 𑀢𑀢𑁆𑀣 𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀁 𑀧𑀢𑁆𑀢𑀁 𑀦𑀸𑀫. 𑀧𑀭𑀺𑀬𑁂𑀲𑀺𑀢𑁆𑀯𑀸 𑀦𑁄𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀦𑀸𑀫. 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀜𑁆𑀘, 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀦𑁄𑀧𑀢𑁆𑀢𑀜𑁆𑀘 𑀫𑀦𑀲𑀸𑀦𑀼𑀯𑀺𑀘𑀭𑀺𑀢𑀁 𑀦𑀸𑀫.

𑀅𑀣 𑀯𑀸 𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀫𑁆𑀧𑀺 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀫𑁆𑀧𑀺 𑀧𑀢𑁆𑀢𑀝𑁆𑀞𑁂𑀦 𑀧𑀢𑁆𑀢𑀁 𑀦𑀸𑀫. 𑀧𑀭𑀺𑀬𑁂𑀲𑀺𑀢𑁆𑀯𑀸 𑀦𑁄𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀦𑀸𑀫. 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀦𑁄𑀧𑀢𑁆𑀢𑀁 𑀫𑀦𑀲𑀸𑀦𑀼𑀯𑀺𑀘𑀭𑀺𑀢𑀁 𑀦𑀸𑀫. 𑀲𑀩𑁆𑀩𑀁 𑀯𑀸 𑀏𑀢𑀁 𑀫𑀦𑀲𑀸 𑀅𑀦𑀼𑀯𑀺𑀘𑀭𑀺𑀢𑀢𑁆𑀢𑀸 𑀫𑀦𑀲𑀸𑀦𑀼𑀯𑀺𑀘𑀭𑀺𑀢𑀁 𑀦𑀸𑀫. 𑀇𑀫𑀺𑀦𑀸 𑀯𑀺𑀜𑁆𑀜𑀸𑀡𑀸𑀭𑀫𑁆𑀫𑀡𑀸 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀬𑁄 𑀓𑀣𑀺𑀢𑀸, 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀳𑁂𑀝𑁆𑀞𑀸 𑀤𑀺𑀝𑁆𑀞𑀸𑀤𑀺𑀆𑀭𑀫𑁆𑀫𑀡𑀯𑀲𑁂𑀦 𑀯𑀺𑀜𑁆𑀜𑀸𑀡𑀁 𑀤𑀲𑁆𑀲𑀺𑀢𑀁. 𑀬𑀫𑁆𑀧𑀺 𑀢𑀁 𑀤𑀺𑀝𑁆𑀞𑀺𑀝𑁆𑀞𑀸𑀦𑀦𑁆𑀢𑀺 𑀬𑀫𑁆𑀧𑀺 𑀏𑀢𑀁 𑀲𑁄 𑀮𑁄𑀓𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀁 𑀤𑀺𑀝𑁆𑀞𑀺𑀝𑁆𑀞𑀸𑀦𑀁.

𑀲𑁄 𑀮𑁄𑀓𑁄 𑀲𑁄 𑀅𑀢𑁆𑀢𑀸𑀢𑀺 𑀬𑀸 𑀏𑀲𑀸 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀮𑁄𑀓𑁄 𑀘 𑀅𑀢𑁆𑀢𑀸 𑀘𑀸𑀢𑀺 𑀕𑀡𑁆𑀳𑀸𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁄 𑀧𑁂𑀘𑁆𑀘 𑀪𑀯𑀺𑀲𑁆𑀲𑀸𑀫𑀻𑀢𑀺 𑀲𑁄 𑀅𑀳𑀁 𑀧𑀭𑀮𑁄𑀓𑀁 𑀕𑀦𑁆𑀢𑁆𑀯𑀸 𑀦𑀺𑀘𑁆𑀘𑁄 𑀪𑀯𑀺𑀲𑁆𑀲𑀸𑀫𑀺, 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄 𑀪𑀯𑀺𑀲𑁆𑀲𑀸𑀫𑀺, 𑀲𑀺𑀦𑁂𑀭𑀼𑀫𑀳𑀸𑀧𑀣𑀯𑀻𑀫𑀳𑀸𑀲𑀫𑀼𑀤𑁆𑀤𑀸𑀤𑀻𑀳𑀺 𑀲𑀲𑁆𑀲𑀢𑀻𑀳𑀺 𑀲𑀫𑀁 𑀢𑀣𑁂𑀯 𑀞𑀲𑁆𑀲𑀸𑀫𑀺. 𑀢𑀫𑁆𑀧𑀺 𑀏𑀢𑀁 𑀫𑀫𑀸𑀢𑀺 𑀢𑀫𑁆𑀧𑀺 𑀤𑀲𑁆𑀲𑀦𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑀲𑀫𑀦𑀼𑀧𑀲𑁆𑀲𑀢𑀺. 𑀇𑀫𑀺𑀦𑀸 𑀤𑀺𑀝𑁆𑀞𑀸𑀭𑀫𑁆𑀫𑀡𑀸 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀬𑁄 𑀓𑀣𑀺𑀢𑀸. 𑀯𑀺𑀧𑀲𑁆𑀲𑀦𑀸𑀬 𑀧𑀝𑀺𑀯𑀺𑀧𑀲𑁆𑀲𑀦𑀸𑀓𑀸𑀮𑁂 𑀯𑀺𑀬 𑀧𑀘𑁆𑀙𑀺𑀫𑀤𑀺𑀝𑁆𑀞𑀺𑀬𑀸 𑀧𑀼𑀭𑀺𑀫𑀤𑀺𑀝𑁆𑀞𑀺𑀕𑁆𑀕𑀳𑀡𑀓𑀸𑀮𑁂 𑀏𑀯𑀁 𑀳𑁄𑀢𑀺.

𑀲𑀼𑀓𑁆𑀓𑀧𑀓𑁆𑀔𑁂 𑀭𑀽𑀧𑀁 𑀦𑁂𑀢𑀁 𑀫𑀫𑀸𑀢𑀺 𑀭𑀽𑀧𑁂 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀕𑁆𑀕𑀸𑀳𑀸 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀇𑀫𑀲𑁆𑀲 𑀧𑀦 𑀧𑀤𑀲𑁆𑀲 𑀢𑀡𑁆𑀳𑀸𑀲𑀫𑀦𑀼𑀧𑀲𑁆𑀲𑀦𑀸 𑀫𑀸𑀦𑀲𑀫𑀦𑀼𑀧𑀲𑁆𑀲𑀦𑀸 𑀤𑀺𑀝𑁆𑀞𑀺𑀲𑀫𑀦𑀼𑀧𑀲𑁆𑀲𑀦𑀸 𑀜𑀸𑀡𑀲𑀫𑀦𑀼𑀧𑀲𑁆𑀲𑀦𑀸𑀢𑀺 𑀘𑀢𑀲𑁆𑀲𑁄 𑀲𑀫𑀦𑀼𑀧𑀲𑁆𑀲𑀦𑀸𑀢𑀺 𑀅𑀢𑁆𑀣𑁄. 𑀢𑀸 𑀓𑀡𑁆𑀳𑀧𑀓𑁆𑀔𑁂 𑀢𑀺𑀲𑁆𑀲𑀦𑁆𑀦𑀁 𑀲𑀫𑀦𑀼𑀧𑀲𑁆𑀲𑀦𑀸𑀦𑀁, 𑀲𑀼𑀓𑁆𑀓𑀧𑀓𑁆𑀔𑁂 𑀜𑀸𑀡𑀲𑀫𑀦𑀼𑀧𑀲𑁆𑀲𑀦𑀸𑀬 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀅𑀲𑀢𑀺 𑀦 𑀧𑀭𑀺𑀢𑀲𑁆𑀲𑀢𑀻𑀢𑀺 𑀅𑀯𑀺𑀚𑁆𑀚𑀫𑀸𑀦𑁂 𑀪𑀬𑀧𑀭𑀺𑀢𑀲𑁆𑀲𑀦𑀸𑀬 𑀢𑀡𑁆𑀳𑀸𑀧𑀭𑀺𑀢𑀲𑁆𑀲𑀦𑀸𑀬 𑀯𑀸 𑀦 𑀧𑀭𑀺𑀢𑀲𑁆𑀲𑀢𑀺. 𑀇𑀫𑀺𑀦𑀸 𑀪𑀕𑀯𑀸 𑀅𑀚𑁆𑀛𑀢𑁆𑀢𑀓𑁆𑀔𑀦𑁆𑀥𑀯𑀺𑀦𑀸𑀲𑁂 𑀅𑀧𑀭𑀺𑀢𑀲𑁆𑀲𑀫𑀸𑀦𑀁 𑀔𑀻𑀡𑀸𑀲𑀯𑀁 𑀤𑀲𑁆𑀲𑁂𑀦𑁆𑀢𑁄 𑀤𑁂𑀲𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀲𑀺.

𑁨𑁪𑁨. 𑀏𑀯𑀁 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀽𑀢𑀺 𑀏𑀯𑀁 𑀪𑀕𑀯𑀢𑀸 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀅𑀦𑀼𑀲𑀦𑁆𑀥𑀺𑀓𑀼𑀲𑀮𑁄 𑀪𑀺𑀓𑁆𑀔𑀼 𑁋 ‘‘𑀪𑀕𑀯𑀢𑀸 𑀅𑀚𑁆𑀛𑀢𑁆𑀢𑀓𑁆𑀔𑀦𑁆𑀥𑀯𑀺𑀦𑀸𑀲𑁂 𑀅𑀧𑀭𑀺𑀢𑀲𑁆𑀲𑀦𑁆𑀢𑀁 𑀔𑀻𑀡𑀸𑀲𑀯𑀁 𑀤𑀲𑁆𑀲𑁂𑀢𑁆𑀯𑀸 𑀤𑁂𑀲𑀦𑀸 𑀦𑀺𑀝𑁆𑀞𑀸𑀧𑀺𑀢𑀸, 𑀅𑀚𑁆𑀛𑀢𑁆𑀢𑀁 𑀅𑀧𑀭𑀺𑀢𑀲𑁆𑀲𑀦𑁆𑀢𑁂 𑀔𑁄 𑀧𑀦 𑀲𑀢𑀺 𑀅𑀚𑁆𑀛𑀢𑁆𑀢𑀁 𑀧𑀭𑀺𑀢𑀲𑁆𑀲𑀓𑁂𑀦 𑀩𑀳𑀺𑀤𑁆𑀥𑀸 𑀧𑀭𑀺𑀓𑁆𑀔𑀸𑀭𑀯𑀺𑀦𑀸𑀲𑁂 𑀧𑀭𑀺𑀢𑀲𑁆𑀲𑀓𑁂𑀦 𑀅𑀧𑀭𑀺𑀢𑀲𑁆𑀲𑀓𑁂𑀦 𑀘𑀸𑀧𑀺 𑀪𑀯𑀺𑀢𑀩𑁆𑀩𑀁. 𑀇𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀅𑀬𑀁 𑀧𑀜𑁆𑀳𑁄 𑀧𑀼𑀘𑁆𑀙𑀺𑀢𑀩𑁆𑀩𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀁𑀲𑀁 𑀘𑀻𑀯𑀭𑀁 𑀓𑀢𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘. 𑀩𑀳𑀺𑀤𑁆𑀥𑀸 𑀅𑀲𑀢𑀻𑀢𑀺 𑀩𑀳𑀺𑀤𑁆𑀥𑀸 𑀧𑀭𑀺𑀓𑁆𑀔𑀸𑀭𑀯𑀺𑀦𑀸𑀲𑁂. 𑀅𑀳𑀼 𑀯𑀢 𑀫𑁂𑀢𑀺 𑀅𑀳𑁄𑀲𑀺 𑀯𑀢 𑀫𑁂 𑀪𑀤𑁆𑀤𑀓𑀁 𑀬𑀸𑀦𑀁 𑀯𑀸𑀳𑀦𑀁 𑀳𑀺𑀭𑀜𑁆𑀜𑀁 𑀲𑀼𑀯𑀡𑁆𑀡𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀯𑀢 𑀫𑁂 𑀦𑀢𑁆𑀣𑀻𑀢𑀺 𑀢𑀁 𑀯𑀢 𑀇𑀤𑀸𑀦𑀺 𑀫𑀬𑁆𑀳𑀁 𑀦𑀢𑁆𑀣𑀺, 𑀭𑀸𑀚𑀽𑀳𑀺 𑀯𑀸 𑀘𑁄𑀭𑁂𑀳𑀺 𑀯𑀸 𑀳𑀝𑀁, 𑀅𑀕𑁆𑀕𑀺𑀦𑀸 𑀯𑀸 𑀤𑀟𑁆𑀠𑀁, 𑀉𑀤𑀓𑁂𑀦 𑀯𑀸 𑀯𑀼𑀴𑁆𑀳𑀁, 𑀧𑀭𑀺𑀪𑁄𑀕𑁂𑀦 𑀯𑀸 𑀚𑀺𑀡𑁆𑀡𑀁. 𑀲𑀺𑀬𑀸 𑀯𑀢 𑀫𑁂𑀢𑀺 𑀪𑀯𑁂𑀬𑁆𑀬 𑀯𑀢 𑀫𑀬𑁆𑀳𑀁 𑀬𑀸𑀦𑀁 𑀯𑀸𑀳𑀦𑀁 𑀳𑀺𑀭𑀜𑁆𑀜𑀁 𑀲𑀼𑀯𑀡𑁆𑀡𑀁 𑀲𑀸𑀮𑀺 𑀯𑀻𑀳𑀺 𑀬𑀯𑁄 𑀕𑁄𑀥𑀼𑀫𑁄. 𑀢𑀁 𑀯𑀢𑀸𑀳𑀁 𑀦 𑀮𑀪𑀸𑀫𑀻𑀢𑀺 𑀢𑀫𑀳𑀁 𑀅𑀮𑀪𑀫𑀸𑀦𑁄 𑀢𑀤𑀦𑀼𑀘𑁆𑀙𑀯𑀺𑀓𑀁 𑀓𑀫𑁆𑀫𑀁 𑀅𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑀢𑁆𑀢𑀸 𑀇𑀤𑀸𑀦𑀺 𑀦 𑀮𑀪𑀸𑀫𑀻𑀢𑀺 𑀲𑁄𑀘𑀢𑀺, 𑀅𑀬𑀁 𑀅𑀕𑀸𑀭𑀺𑀬𑀲𑁄𑀘𑀦𑀸, 𑀅𑀦𑀕𑀸𑀭𑀺𑀬𑀲𑁆𑀲 𑀧𑀢𑁆𑀢𑀘𑀻𑀯𑀭𑀸𑀤𑀻𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀅𑀧𑀭𑀺𑀢𑀲𑁆𑀲𑀦𑀸𑀯𑀸𑀭𑁂 𑀦 𑀏𑀯𑀁 𑀳𑁄𑀢𑀻𑀢𑀺 𑀬𑁂𑀳𑀺 𑀓𑀺𑀮𑁂𑀲𑁂𑀳𑀺 𑀏𑀯𑀁 𑀪𑀯𑁂𑀬𑁆𑀬, 𑀢𑁂𑀲𑀁 𑀧𑀳𑀻𑀦𑀢𑁆𑀢𑀸 𑀦 𑀏𑀯𑀁 𑀳𑁄𑀢𑀺. 𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀥𑀺𑀝𑁆𑀞𑀸𑀦𑀧𑀭𑀺𑀬𑀼𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸𑀦𑀦𑁆𑀢𑀺 𑀤𑀺𑀝𑁆𑀞𑀻𑀦𑀜𑁆𑀘 𑀤𑀺𑀝𑁆𑀞𑀺𑀝𑁆𑀞𑀸𑀦𑀸𑀦𑀜𑁆𑀘 𑀤𑀺𑀝𑁆𑀞𑀸𑀥𑀺𑀝𑁆𑀞𑀸𑀦𑀸𑀦𑀜𑁆𑀘 𑀤𑀺𑀝𑁆𑀞𑀺𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀜𑁆𑀘 𑀅𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸𑀦𑀜𑁆𑀘. 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑀸𑀬𑀸𑀢𑀺 𑀦𑀺𑀩𑁆𑀩𑀸𑀦𑀢𑁆𑀣𑀸𑀬. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀆𑀕𑀫𑁆𑀫 𑀲𑀩𑁆𑀩𑀲𑀗𑁆𑀔𑀸𑀭𑀸𑀇𑀜𑁆𑀚𑀺𑀢𑀸𑀦𑀺, 𑀲𑀩𑁆𑀩𑀲𑀗𑁆𑀔𑀸𑀭𑀘𑀮𑀦𑀸𑀦𑀺 𑀲𑀩𑁆𑀩𑀲𑀗𑁆𑀔𑀸𑀭𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀺 𑀲𑀫𑁆𑀫𑀦𑁆𑀢𑀺 𑀯𑀽𑀧𑀲𑀫𑁆𑀫𑀦𑁆𑀢𑀺, 𑀢𑀲𑁆𑀫𑀸 𑀢𑀁, ‘‘𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀤𑁂𑀯 𑀘 𑀆𑀕𑀫𑁆𑀫 𑀔𑀦𑁆𑀥𑀽𑀧𑀥𑀺 𑀓𑀺𑀮𑁂𑀲𑀽𑀧𑀥𑀺 𑀅𑀪𑀺𑀲𑀗𑁆𑀔𑀸𑀭𑀽𑀧𑀥𑀺, 𑀧𑀜𑁆𑀘𑀓𑀸𑀫𑀕𑀼𑀡𑀽𑀧𑀥𑀻𑀢𑀺 𑀇𑀫𑁂 𑀉𑀧𑀥𑀬𑁄 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀬𑀦𑁆𑀢𑀺, 𑀢𑀡𑁆𑀳𑀸 𑀔𑀻𑀬𑀢𑀺 𑀯𑀺𑀭𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀢𑀁, ‘‘𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄’’𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀩𑁆𑀩𑀸𑀦𑀸𑀬𑀸𑀢𑀺 𑀅𑀬𑀁 𑀧𑀦𑀲𑁆𑀲 𑀲𑀭𑀽𑀧𑀦𑀺𑀤𑁆𑀤𑁂𑀲𑁄, 𑀇𑀢𑀺 𑀲𑀩𑁆𑀩𑁂𑀳𑁂𑀯 𑀇𑀫𑁂𑀳𑀺 𑀧𑀤𑁂𑀳𑀺 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀢𑁆𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲𑀸𑀢𑀺 𑀅𑀬𑀫𑀢𑁆𑀣𑁄 𑀤𑀻𑀧𑀺𑀢𑁄. 𑀢𑀲𑁆𑀲𑁂𑀯𑀁 𑀳𑁄𑀢𑀻𑀢𑀺 𑀢𑀲𑁆𑀲 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀉𑀘𑁆𑀙𑀺𑀚𑁆𑀚𑀺𑀲𑁆𑀲𑀸𑀫𑀺 𑀦𑀸𑀫𑀲𑁆𑀲𑀼, 𑀯𑀺𑀦𑀲𑁆𑀲𑀺𑀲𑁆𑀲𑀸𑀫𑀺 𑀦𑀸𑀫𑀲𑁆𑀲𑀼, 𑀦𑀸𑀲𑁆𑀲𑀼 𑀦𑀸𑀫 𑀪𑀯𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀳𑁄𑀢𑀺. 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀳𑀺 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀲𑀼𑀜𑁆𑀜𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀁 𑀓𑀢𑁆𑀯𑀸 𑀤𑁂𑀲𑀺𑀬𑀫𑀸𑀦𑀁 𑀥𑀫𑁆𑀫𑀁 𑀲𑀼𑀡𑀦𑁆𑀢𑀲𑁆𑀲 𑀢𑀸𑀲𑁄 𑀉𑀧𑁆𑀧𑀚𑁆𑀚𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀢𑀸𑀲𑁄 𑀳𑁂𑀲𑁄, 𑀪𑀺𑀓𑁆𑀔𑀯𑁂, 𑀅𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀦𑁄 𑀘𑀲𑁆𑀲𑀁, 𑀦𑁄 𑀘 𑀫𑁂 𑀲𑀺𑀬𑀸’’𑀢𑀺 (𑀲𑀁. 𑀦𑀺. 𑁩.𑁫𑁫).

𑁨𑁪𑁩. 𑀏𑀢𑁆𑀢𑀸𑀯𑀢𑀸 𑀩𑀳𑀺𑀤𑁆𑀥𑀸𑀧𑀭𑀺𑀓𑁆𑀔𑀸𑀭𑀯𑀺𑀦𑀸𑀲𑁂 𑀢𑀲𑁆𑀲𑀦𑀓𑀲𑁆𑀲 𑀘 𑀦𑁄𑀢𑀲𑁆𑀲𑀦𑀓𑀲𑁆𑀲 𑀘 𑀅𑀚𑁆𑀛𑀢𑁆𑀢𑀓𑁆𑀔𑀦𑁆𑀥𑀯𑀺𑀦𑀸𑀲𑁂 𑀢𑀲𑁆𑀲𑀦𑀓𑀲𑁆𑀲 𑀘 𑀦𑁄𑀢𑀲𑁆𑀲𑀦𑀓𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀯𑀲𑁂𑀦 𑀘𑀢𑀼𑀓𑁆𑀓𑁄𑀝𑀺𑀓𑀸 𑀲𑀼𑀜𑁆𑀜𑀢𑀸 𑀓𑀣𑀺𑀢𑀸. 𑀇𑀤𑀸𑀦𑀺 𑀩𑀳𑀺𑀤𑁆𑀥𑀸 𑀧𑀭𑀺𑀓𑁆𑀔𑀸𑀭𑀁 𑀧𑀭𑀺𑀕𑁆𑀕𑀳𑀁 𑀦𑀸𑀫 𑀓𑀢𑁆𑀯𑀸, 𑀯𑀻𑀲𑀢𑀺𑀯𑀢𑁆𑀣𑀼𑀓𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁 𑀦𑀸𑀫 𑀓𑀢𑁆𑀯𑀸, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑀫𑀼𑀔𑀸 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀁 𑀦𑀸𑀫 𑀓𑀢𑁆𑀯𑀸 𑀢𑀺𑀓𑁄𑀝𑀺𑀓𑀁 𑀲𑀼𑀜𑁆𑀜𑀢𑀁 𑀤𑀲𑁆𑀲𑁂𑀢𑀼𑀁 𑀢𑀁, 𑀪𑀺𑀓𑁆𑀔𑀯𑁂, 𑀧𑀭𑀺𑀕𑁆𑀕𑀳𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀭𑀺𑀕𑁆𑀕𑀳𑀦𑁆𑀢𑀺 𑀩𑀳𑀺𑀤𑁆𑀥𑀸 𑀧𑀭𑀺𑀓𑁆𑀔𑀸𑀭𑀁. 𑀧𑀭𑀺𑀕𑁆𑀕𑀡𑁆𑀳𑁂𑀬𑁆𑀬𑀸𑀣𑀸𑀢𑀺 𑀬𑀣𑀸 𑀯𑀺𑀜𑁆𑀜𑀽 𑀫𑀦𑀼𑀲𑁆𑀲𑁄 𑀧𑀭𑀺𑀕𑁆𑀕𑀡𑁆𑀳𑁂𑀬𑁆𑀬. 𑀅𑀳𑀫𑁆𑀧𑀺 𑀔𑁄 𑀢𑀁, 𑀪𑀺𑀓𑁆𑀔𑀯𑁂𑀢𑀺, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂𑀧𑀺 𑀦 𑀧𑀲𑁆𑀲𑀣, 𑀅𑀳𑀫𑁆𑀧𑀺 𑀦 𑀧𑀲𑁆𑀲𑀸𑀫𑀺, 𑀇𑀢𑀺 𑀏𑀯𑀭𑀽𑀧𑁄 𑀧𑀭𑀺𑀕𑁆𑀕𑀳𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁪𑁪. 𑀏𑀯𑀁 𑀢𑀺𑀓𑁄𑀝𑀺𑀓𑀁 𑀲𑀼𑀜𑁆𑀜𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀚𑁆𑀛𑀢𑁆𑀢𑀓𑁆𑀔𑀦𑁆𑀥𑁂 𑀅𑀢𑁆𑀢𑀸𑀢𑀺 𑀩𑀳𑀺𑀤𑁆𑀥𑀸 𑀧𑀭𑀺𑀓𑁆𑀔𑀸𑀭𑁂 𑀅𑀢𑁆𑀢𑀦𑀺𑀬𑀦𑁆𑀢𑀺 𑀓𑀢𑁆𑀯𑀸 𑀤𑁆𑀯𑀺𑀓𑁄𑀝𑀺𑀓𑀁 𑀤𑀲𑁆𑀲𑁂𑀦𑁆𑀢𑁄 𑀅𑀢𑁆𑀢𑀦𑀺 𑀯𑀸, 𑀪𑀺𑀓𑁆𑀔𑀯𑁂, 𑀲𑀢𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀦𑀺 𑀯𑀸 𑀲𑀢𑀺 𑀇𑀤𑀁 𑀫𑁂 𑀧𑀭𑀺𑀓𑁆𑀔𑀸𑀭𑀚𑀸𑀢𑀁 𑀅𑀢𑁆𑀢𑀦𑀺𑀬𑀦𑁆𑀢𑀺 𑀅𑀲𑁆𑀲, 𑀅𑀢𑁆𑀢𑀦𑀺𑀬𑁂𑀯 𑀯𑀸 𑀧𑀭𑀺𑀓𑁆𑀔𑀸𑀭𑁂 𑀲𑀢𑀺 𑀅𑀬𑀁 𑀫𑁂 𑀅𑀢𑁆𑀢𑀸 𑀇𑀫𑀲𑁆𑀲 𑀧𑀭𑀺𑀓𑁆𑀔𑀸𑀭𑀲𑁆𑀲 𑀲𑀸𑀫𑀻𑀢𑀺, 𑀏𑀯𑀁 𑀅𑀳𑀦𑁆𑀢𑀺. 𑀲𑀢𑀺 𑀫𑀫𑀸𑀢𑀺, 𑀫𑀫𑀸𑀢𑀺 𑀲𑀢𑀺 𑀅𑀳𑀦𑁆𑀢𑀺 𑀬𑀼𑀢𑁆𑀢𑀁 𑀪𑀯𑁂𑀬𑁆𑀬. 𑀲𑀘𑁆𑀘𑀢𑁄𑀢𑀺 𑀪𑀽𑀢𑀢𑁄, 𑀣𑁂𑀢𑀢𑁄𑀢𑀺 𑀢𑀣𑀢𑁄 𑀣𑀺𑀭𑀢𑁄 𑀯𑀸.

𑀇𑀤𑀸𑀦𑀺 𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀏𑀯𑀁 𑀢𑀺𑀧𑀭𑀺𑀯𑀝𑁆𑀝𑀯𑀲𑁂𑀦 𑀅𑀕𑁆𑀕𑀡𑁆𑀳𑀦𑁆𑀢𑁄 𑀅𑀬𑀁 𑀅𑀭𑀺𑀝𑁆𑀞𑁄 𑀯𑀺𑀬 𑀫𑀬𑁆𑀳𑀁 𑀲𑀸𑀲𑀦𑁂 𑀓𑀮𑀮𑀁 𑀓𑀘𑀯𑀭𑀁 𑀧𑀓𑁆𑀔𑀺𑀧𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂𑀢𑀺, 𑀪𑀦𑁆𑀢𑁂, 𑀬𑀲𑁆𑀫𑀸 𑀳𑀼𑀢𑁆𑀯𑀸 𑀦 𑀳𑁄𑀢𑀺, 𑀢𑀲𑁆𑀫𑀸 𑀅𑀦𑀺𑀘𑁆𑀘𑀁. 𑀉𑀧𑁆𑀧𑀸𑀤𑀯𑀬𑀯𑀢𑁆𑀢𑀺𑀢𑁄 𑀯𑀺𑀧𑀭𑀺𑀡𑀸𑀫𑀢𑀸𑀯𑀓𑀸𑀮𑀺𑀓𑀦𑀺𑀘𑁆𑀘𑀧𑀝𑀺𑀓𑁆𑀔𑁂𑀧𑀝𑁆𑀞𑁂𑀦 𑀯𑀸𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀅𑀦𑀺𑀘𑁆𑀘𑀁. 𑀤𑀼𑀓𑁆𑀔𑀁, 𑀪𑀦𑁆𑀢𑁂𑀢𑀺, 𑀪𑀦𑁆𑀢𑁂, 𑀧𑀝𑀺𑀧𑀻𑀴𑀦𑀸𑀓𑀸𑀭𑁂𑀦 𑀤𑀼𑀓𑁆𑀔𑀁, 𑀲𑀦𑁆𑀢𑀸𑀧𑀤𑀼𑀓𑁆𑀔𑀫𑀤𑀼𑀓𑁆𑀔𑀯𑀢𑁆𑀣𑀼𑀓𑀲𑀼𑀔𑀧𑀝𑀺𑀓𑁆𑀔𑁂𑀧𑀝𑁆𑀞𑁂𑀦 𑀯𑀸𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀤𑀼𑀓𑁆𑀔𑀁. 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀦𑁆𑀢𑀺 𑀪𑀯𑀲𑀗𑁆𑀓𑀦𑁆𑀢𑀺𑀉𑀧𑀕𑀫𑀦𑀲𑀪𑀸𑀯𑀁 𑀧𑀓𑀢𑀺𑀪𑀸𑀯𑀯𑀺𑀚𑀳𑀦𑀲𑀪𑀸𑀯𑀁. 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑀬𑀼𑀢𑁆𑀢𑀁 𑀦𑀼 𑀔𑁄 𑀢𑀁 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀕𑁆𑀕𑀸𑀳𑀸𑀦𑀁 𑀯𑀲𑁂𑀦 𑀅𑀳𑀁 𑀫𑀫𑀸𑀢𑀺 𑀏𑀯𑀁 𑀕𑀳𑁂𑀢𑀼𑀁. 𑀦𑁄 𑀳𑁂𑀢𑀁, 𑀪𑀦𑁆𑀢𑁂𑀢𑀺 𑀇𑀫𑀺𑀦𑀸 𑀢𑁂 𑀪𑀺𑀓𑁆𑀔𑀽 𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑁂𑀦 𑀭𑀽𑀧𑀁, 𑀪𑀦𑁆𑀢𑁂, 𑀅𑀦𑀢𑁆𑀢𑀸𑀢𑀺 𑀧𑀝𑀺𑀚𑀸𑀦𑀦𑁆𑀢𑀺. 𑀲𑀼𑀜𑁆𑀜𑀅𑀲𑁆𑀲𑀸𑀫𑀺𑀓𑀅𑀦𑀺𑀲𑁆𑀲𑀭𑀅𑀢𑁆𑀢𑀧𑀝𑀺𑀓𑁆𑀔𑁂𑀧𑀝𑁆𑀞𑁂𑀦 𑀯𑀸𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀅𑀦𑀢𑁆𑀢𑀸.

𑀪𑀕𑀯𑀸 𑀳𑀺 𑀓𑀢𑁆𑀣𑀘𑀺 𑀅𑀦𑀺𑀘𑁆𑀘𑀯𑀲𑁂𑀦 𑀅𑀦𑀢𑁆𑀢𑀢𑁆𑀢𑀁 𑀤𑀲𑁆𑀲𑁂𑀢𑀺, 𑀓𑀢𑁆𑀣𑀘𑀺 𑀤𑀼𑀓𑁆𑀔𑀯𑀲𑁂𑀦, 𑀓𑀢𑁆𑀣𑀘𑀺 𑀉𑀪𑀬𑀯𑀲𑁂𑀦. ‘‘𑀘𑀓𑁆𑀔𑀼 𑀅𑀢𑁆𑀢𑀸𑀢𑀺 𑀬𑁄 𑀯𑀤𑁂𑀬𑁆𑀬, 𑀢𑀁 𑀦 𑀉𑀧𑀧𑀚𑁆𑀚𑀢𑀺, 𑀘𑀓𑁆𑀔𑀼𑀲𑁆𑀲 𑀉𑀧𑁆𑀧𑀸𑀤𑁄𑀧𑀺 𑀯𑀬𑁄𑀧𑀺 𑀧𑀜𑁆𑀜𑀸𑀬𑀢𑀺. 𑀬𑀲𑁆𑀲 𑀔𑁄 𑀧𑀦 𑀉𑀧𑁆𑀧𑀸𑀤𑁄𑀧𑀺 𑀯𑀬𑁄𑀧𑀺 𑀧𑀜𑁆𑀜𑀸𑀬𑀢𑀺, 𑀅𑀢𑁆𑀢𑀸 𑀫𑁂 𑀉𑀧𑁆𑀧𑀚𑁆𑀚𑀢𑀺 𑀘 𑀯𑁂𑀢𑀺 𑀘𑀸𑀢𑀺 𑀇𑀘𑁆𑀘𑀲𑁆𑀲 𑀏𑀯𑀫𑀸𑀕𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀦 𑀉𑀧𑀧𑀚𑁆𑀚𑀢𑀺 𑀘𑀓𑁆𑀔𑀼 𑀅𑀢𑁆𑀢𑀸𑀢𑀺 𑀬𑁄 𑀯𑀤𑁂𑀬𑁆𑀬, 𑀇𑀢𑀺 𑀘𑀓𑁆𑀔𑀼 𑀅𑀦𑀢𑁆𑀢𑀸’’𑀢𑀺 (𑀫. 𑀦𑀺. 𑁩.𑁪𑁨𑁨) 𑀇𑀫𑀲𑁆𑀫𑀺𑀜𑁆𑀳𑀺 𑀙𑀙𑀓𑁆𑀓𑀲𑀼𑀢𑁆𑀢𑁂 𑀅𑀦𑀺𑀘𑁆𑀘𑀯𑀲𑁂𑀦 𑀅𑀦𑀢𑁆𑀢𑀢𑀁 𑀤𑀲𑁆𑀲𑁂𑀢𑀺. ‘‘𑀭𑀽𑀧𑀜𑁆𑀘 𑀳𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸 𑀅𑀪𑀯𑀺𑀲𑁆𑀲, 𑀦𑀬𑀺𑀤𑀁 𑀭𑀽𑀧𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑁂𑀬𑁆𑀬, 𑀮𑀩𑁆𑀪𑁂𑀣 𑀘 𑀭𑀽𑀧𑁂 ‘𑀏𑀯𑀁 𑀫𑁂 𑀭𑀽𑀧𑀁 𑀳𑁄𑀢𑀼, 𑀏𑀯𑀁 𑀫𑁂 𑀭𑀽𑀧𑀁 𑀫𑀸 𑀅𑀳𑁄𑀲𑀻’𑀢𑀺. 𑀬𑀲𑁆𑀫𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀅𑀦𑀢𑁆𑀢𑀸, 𑀢𑀲𑁆𑀫𑀸 𑀭𑀽𑀧𑀁 𑀆𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀺, 𑀦 𑀘 𑀮𑀩𑁆𑀪𑀢𑀺 𑀭𑀽𑀧𑁂 ‘𑀏𑀯𑀁 𑀫𑁂 𑀭𑀽𑀧𑀁 𑀳𑁄𑀢𑀼, 𑀏𑀯𑀁 𑀫𑁂 𑀭𑀽𑀧𑀁 𑀫𑀸 𑀅𑀳𑁄𑀲𑀻’’’𑀢𑀺 (𑀫𑀳𑀸𑀯. 𑁨𑁦; 𑀲𑀁. 𑀦𑀺. 𑁩.𑁫𑁯) 𑀇𑀫𑀲𑁆𑀫𑀺𑀁 𑀅𑀦𑀢𑁆𑀢𑀮𑀓𑁆𑀔𑀡𑀲𑀼𑀢𑁆𑀢𑁂 𑀤𑀼𑀓𑁆𑀔𑀯𑀲𑁂𑀦 𑀅𑀦𑀢𑁆𑀢𑀢𑀁 𑀤𑀲𑁆𑀲𑁂𑀢𑀺. ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁, 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀁, 𑀬𑀁 𑀤𑀼𑀓𑁆𑀔𑀁 𑀢𑀤𑀦𑀢𑁆𑀢𑀸, 𑀬𑀤𑀦𑀢𑁆𑀢𑀸 𑀢𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩’’𑀦𑁆𑀢𑀺 (𑀲𑀁. 𑀦𑀺. 𑁩.𑁭𑁬) 𑀇𑀫𑀲𑁆𑀫𑀺𑀁 𑀅𑀭𑀳𑀢𑁆𑀢𑀲𑀼𑀢𑁆𑀢𑁂 𑀉𑀪𑀬𑀯𑀲𑁂𑀦 𑀅𑀦𑀢𑁆𑀢𑀢𑀁 𑀤𑀲𑁆𑀲𑁂𑀢𑀺. 𑀓𑀲𑁆𑀫𑀸? 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀜𑁆𑀘 𑀧𑀸𑀓𑀝𑀁. 𑀅𑀦𑀢𑁆𑀢𑀸𑀢𑀺 𑀦 𑀧𑀸𑀓𑀝𑀁.

𑀧𑀭𑀺𑀪𑁄𑀕𑀪𑀸𑀚𑀦𑀸𑀤𑀻𑀲𑀼 𑀳𑀺 𑀪𑀺𑀦𑁆𑀦𑁂𑀲𑀼 𑀅𑀳𑁄 𑀅𑀦𑀺𑀘𑁆𑀘𑀦𑁆𑀢𑀺 𑀯𑀤𑀦𑁆𑀢𑀺, 𑀅𑀳𑁄 𑀅𑀦𑀢𑁆𑀢𑀸𑀢𑀺 𑀯𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺. 𑀲𑀭𑀻𑀭𑁂 𑀕𑀡𑁆𑀟𑀧𑀺𑀴𑀓𑀸𑀤𑀻𑀲𑀼 𑀯𑀸 𑀉𑀝𑁆𑀞𑀺𑀢𑀸𑀲𑀼 𑀓𑀡𑁆𑀝𑀓𑁂𑀦 𑀯𑀸 𑀯𑀺𑀤𑁆𑀥𑀸 𑀅𑀳𑁄 𑀤𑀼𑀓𑁆𑀔𑀦𑁆𑀢𑀺 𑀯𑀤𑀦𑁆𑀢𑀺, 𑀅𑀳𑁄 𑀅𑀦𑀢𑁆𑀢𑀸𑀢𑀺 𑀧𑀦 𑀯𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺. 𑀓𑀲𑁆𑀫𑀸? 𑀇𑀤𑀜𑁆𑀳𑀺 𑀅𑀦𑀢𑁆𑀢𑀮𑀓𑁆𑀔𑀡𑀁 𑀦𑀸𑀫 𑀅𑀯𑀺𑀪𑀽𑀢𑀁 𑀤𑀼𑀤𑁆𑀤𑀲𑀁 𑀤𑀼𑀧𑁆𑀧𑀜𑁆𑀜𑀸𑀧𑀦𑀁. 𑀢𑁂𑀦 𑀢𑀁 𑀪𑀕𑀯𑀸 𑀅𑀦𑀺𑀘𑁆𑀘𑀯𑀲𑁂𑀦 𑀯𑀸 𑀤𑀼𑀓𑁆𑀔𑀯𑀲𑁂𑀦 𑀯𑀸 𑀉𑀪𑀬𑀯𑀲𑁂𑀦 𑀯𑀸 𑀤𑀲𑁆𑀲𑁂𑀢𑀺. 𑀢𑀬𑀺𑀤𑀁 𑀇𑀫𑀲𑁆𑀫𑀺𑀫𑁆𑀧𑀺 𑀢𑁂𑀧𑀭𑀺𑀯𑀝𑁆𑀝𑁂 𑀅𑀦𑀺𑀘𑁆𑀘𑀤𑀼𑀓𑁆𑀔𑀯𑀲𑁂𑀦𑁂𑀯 𑀤𑀲𑁆𑀲𑀺𑀢𑀁. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀲𑁆𑀫𑀸 𑀢𑀺𑀳, 𑀪𑀺𑀓𑁆𑀔𑀯𑁂𑀢𑀺, 𑀪𑀺𑀓𑁆𑀔𑀯𑁂, 𑀬𑀲𑁆𑀫𑀸 𑀏𑀢𑀭𑀳𑀺 𑀅𑀜𑁆𑀜𑀤𑀸𑀧𑀺 𑀭𑀽𑀧𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀬𑀁𑀓𑀺𑀜𑁆𑀘𑀺 𑀭𑀽𑀧𑀦𑁆𑀢𑀺𑀆𑀤𑀻𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑁂𑀯.

𑁨𑁪𑁫. 𑀦𑀺𑀩𑁆𑀩𑀺𑀦𑁆𑀤𑀢𑀻𑀢𑀺 𑀉𑀓𑁆𑀓𑀡𑁆𑀞𑀢𑀺. 𑀏𑀢𑁆𑀣 𑀘 𑀦𑀺𑀩𑁆𑀩𑀺𑀤𑀸𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀯𑀺𑀧𑀲𑁆𑀲𑀦𑀸 𑀅𑀥𑀺𑀧𑁆𑀧𑁂𑀢𑀸. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀯𑀺𑀧𑀲𑁆𑀲𑀦𑀸𑀬 𑀳𑀺 𑀩𑀳𑀽𑀦𑀺 𑀦𑀸𑀫𑀸𑀦𑀺. 𑀏𑀲𑀸 𑀳𑀺 𑀓𑀢𑁆𑀣𑀘𑀺 𑀲𑀜𑁆𑀜𑀕𑁆𑀕𑀦𑁆𑀢𑀺 𑀯𑀼𑀢𑁆𑀢𑀸. 𑀓𑀢𑁆𑀣𑀘𑀺 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀦𑁆𑀢𑀺. 𑀓𑀢𑁆𑀣𑀘𑀺 𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀦𑁆𑀢𑀺. 𑀓𑀢𑁆𑀣𑀘𑀺 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻𑀢𑀺. 𑀓𑀢𑁆𑀣𑀘𑀺 𑀢𑀫𑁆𑀫𑀬𑀢𑀸𑀧𑀭𑀺𑀬𑀸𑀤𑀸𑀦𑀦𑁆𑀢𑀺. 𑀓𑀢𑁆𑀣𑀘𑀺 𑀢𑀻𑀳𑀺 𑀦𑀸𑀫𑁂𑀳𑀺. 𑀓𑀢𑁆𑀣𑀘𑀺 𑀤𑁆𑀯𑀻𑀳𑀻𑀢𑀺.

𑀢𑀢𑁆𑀣 𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑁂 𑀢𑀸𑀯 ‘‘𑀲𑀜𑁆𑀜𑀸 𑀔𑁄, 𑀧𑁄𑀝𑁆𑀞𑀧𑀸𑀤, 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀘𑁆𑀙𑀸 𑀜𑀸𑀡’’𑀦𑁆𑀢𑀺 (𑀤𑀻. 𑀦𑀺. 𑁧.𑁪𑁧𑁬) 𑀏𑀯𑀁 𑀲𑀜𑁆𑀜𑀕𑁆𑀕𑀦𑁆𑀢𑀺 𑀯𑀼𑀢𑁆𑀢𑀸. 𑀲𑀼𑀲𑀺𑀫𑀲𑀼𑀢𑁆𑀢𑁂 ‘‘𑀧𑀼𑀩𑁆𑀩𑁂 𑀔𑁄, 𑀲𑀼𑀲𑀺𑀫, 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁, 𑀧𑀘𑁆𑀙𑀸 𑀦𑀺𑀩𑁆𑀩𑀸𑀦𑁂 𑀜𑀸𑀡’’𑀦𑁆𑀢𑀺 (𑀲𑀁. 𑀦𑀺. 𑁨.𑁭𑁦) 𑀏𑀯𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑀸. 𑀤𑀲𑀼𑀢𑁆𑀢𑀭𑀲𑀼𑀢𑁆𑀢𑁂 ‘‘𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕’’𑀦𑁆𑀢𑀺 (𑀤𑀻. 𑀦𑀺. 𑁩.𑁩𑁫𑁯) 𑀏𑀯𑀁 𑀧𑀸𑀭𑀺𑀲𑀼𑀤𑁆𑀥𑀺𑀧𑀤𑀸𑀦𑀺𑀬𑀗𑁆𑀕𑀦𑁆𑀢𑀺 𑀯𑀼𑀢𑁆𑀢𑀸. 𑀭𑀣𑀯𑀺𑀦𑀻𑀢𑁂 ‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀢𑁆𑀣𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁧.𑁨𑁫𑁭) 𑀏𑀯𑀁 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻𑀢𑀺 𑀯𑀼𑀢𑁆𑀢𑀸. 𑀲𑀴𑀸𑀬𑀢𑀦𑀯𑀺𑀪𑀗𑁆𑀕𑁂 ‘‘𑀅𑀢𑀫𑁆𑀫𑀬𑀢𑀁, 𑀪𑀺𑀓𑁆𑀔𑀯𑁂, 𑀦𑀺𑀲𑁆𑀲𑀸𑀬 𑀅𑀢𑀫𑁆𑀫𑀬𑀢𑀁 𑀆𑀕𑀫𑁆𑀫 𑀬𑀸𑀬𑀁 𑀉𑀧𑁂𑀓𑁆𑀔𑀸 𑀦𑀸𑀦𑀢𑁆𑀢𑀸 𑀦𑀸𑀦𑀢𑁆𑀢𑀲𑀺𑀢𑀸, 𑀢𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀬𑀸𑀬𑀁 𑀉𑀧𑁂𑀓𑁆𑀔𑀸 𑀏𑀓𑀢𑁆𑀢𑀸 𑀏𑀓𑀢𑁆𑀢𑀲𑀺𑀢𑀸, 𑀢𑀁 𑀦𑀺𑀲𑁆𑀲𑀸𑀬 𑀢𑀁 𑀆𑀕𑀫𑁆𑀫 𑀏𑀯𑀫𑁂𑀢𑀺𑀲𑁆𑀲𑀸 𑀧𑀳𑀸𑀦𑀁 𑀳𑁄𑀢𑀺, 𑀏𑀯𑀫𑁂𑀢𑀺𑀲𑁆𑀲𑀸 𑀲𑀫𑀢𑀺𑀓𑁆𑀓𑀫𑁄 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁧𑁦) 𑀏𑀯𑀁 𑀢𑀫𑁆𑀫𑀬𑀢𑀸𑀧𑀭𑀺𑀬𑀸𑀤𑀸𑀦𑀦𑁆𑀢𑀺 𑀯𑀼𑀢𑁆𑀢𑀸. 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 ‘‘𑀬𑀸 𑀘 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸, 𑀬𑀸 𑀘 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸, 𑀬𑀸 𑀘 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸, 𑀇𑀫𑁂 𑀥𑀫𑁆𑀫𑀸 𑀏𑀓𑀢𑁆𑀣𑀸 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺 (𑀧𑀝𑀺. 𑀫. 𑁧.𑁫𑁪) 𑀏𑀯𑀁 𑀢𑀻𑀳𑀺 𑀦𑀸𑀫𑁂𑀳𑀺 𑀯𑀼𑀢𑁆𑀢𑀸. 𑀧𑀝𑁆𑀞𑀸𑀦𑁂 ‘‘𑀅𑀦𑀼𑀮𑁄𑀫𑀁 𑀕𑁄𑀢𑁆𑀭𑀪𑀼𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀅𑀦𑀼𑀮𑁄𑀫𑀁 𑀯𑁄𑀤𑀸𑀦𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁧𑁭) 𑀏𑀯𑀁 𑀤𑁆𑀯𑀻𑀳𑀺 𑀦𑀸𑀫𑁂𑀳𑀺 𑀯𑀼𑀢𑁆𑀢𑀸. 𑀇𑀫𑀲𑁆𑀫𑀺𑀁 𑀧𑀦 𑀅𑀮𑀕𑀤𑁆𑀤𑀲𑀼𑀢𑁆𑀢𑁂 𑀦𑀺𑀩𑁆𑀩𑀺𑀦𑁆𑀤𑀢𑀻𑀢𑀺 𑀦𑀺𑀩𑁆𑀩𑀺𑀤𑀸𑀦𑀸𑀫𑁂𑀦 𑀆𑀕𑀢𑀸.

𑀦𑀺𑀩𑁆𑀩𑀺𑀤𑀸 𑀯𑀺𑀭𑀚𑁆𑀚𑀢𑀻𑀢𑀺 𑀏𑀢𑁆𑀣 𑀯𑀺𑀭𑀸𑀕𑁄𑀢𑀺 𑀫𑀕𑁆𑀕𑁄 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀻𑀢𑀺 𑀏𑀢𑁆𑀣 𑀯𑀺𑀭𑀸𑀕𑁂𑀦 𑀫𑀕𑁆𑀕𑁂𑀦 𑀯𑀺𑀫𑀼𑀘𑁆𑀘𑀢𑀻𑀢𑀺 𑀨𑀮𑀁 𑀓𑀣𑀺𑀢𑀁. 𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀻𑀢𑀺 𑀇𑀥 𑀧𑀘𑁆𑀘𑀯𑁂𑀓𑁆𑀔𑀡𑀸 𑀓𑀣𑀺𑀢𑀸.

𑀏𑀯𑀁 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀁 𑀫𑀳𑀸𑀔𑀻𑀡𑀸𑀲𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲 𑀬𑀣𑀸𑀪𑀽𑀢𑁂𑀳𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀦𑀸𑀫𑀁 𑀕𑀡𑁆𑀳𑀦𑁆𑀢𑁄 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀅𑀯𑀺𑀚𑁆𑀚𑀸𑀢𑀺 𑀯𑀝𑁆𑀝𑀫𑀽𑀮𑀺𑀓𑀸 𑀅𑀯𑀺𑀚𑁆𑀚𑀸. 𑀅𑀬𑀜𑁆𑀳𑀺 𑀤𑀼𑀭𑀼𑀓𑁆𑀔𑀺𑀧𑀦𑀝𑁆𑀞𑁂𑀦 𑀧𑀮𑀺𑀖𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀲 𑀢𑀲𑁆𑀲 𑀉𑀓𑁆𑀔𑀺𑀢𑁆𑀢𑀢𑁆𑀢𑀸 𑀉𑀓𑁆𑀔𑀺𑀢𑁆𑀢𑀧𑀮𑀺𑀖𑁄𑀢𑀺 𑀯𑀼𑀢𑁆𑀢𑁄. 𑀢𑀸𑀮𑀸𑀯𑀢𑁆𑀣𑀼𑀓𑀢𑀸𑀢𑀺 𑀲𑀻𑀲𑀘𑁆𑀙𑀺𑀦𑁆𑀦𑀢𑀸𑀮𑁄 𑀯𑀺𑀬 𑀓𑀢𑀸, 𑀲𑀫𑀽𑀮𑀁 𑀯𑀸 𑀢𑀸𑀮𑀁 𑀉𑀤𑁆𑀥𑀭𑀺𑀢𑁆𑀯𑀸 𑀢𑀸𑀮𑀲𑁆𑀲 𑀯𑀢𑁆𑀣𑀼 𑀯𑀺𑀬 𑀓𑀢𑀸, 𑀬𑀣𑀸 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀼𑀦 𑀲𑁄 𑀢𑀸𑀮𑁄 𑀦 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀧𑀼𑀦 𑀅𑀧𑀜𑁆𑀜𑀢𑁆𑀢𑀺𑀪𑀸𑀯𑀁 𑀦𑀻𑀢𑀸𑀢𑀺 𑀅𑀢𑁆𑀣𑁄. 𑀧𑁄𑀦𑁄𑀩𑁆𑀪𑀯𑀺𑀓𑁄𑀢𑀺 𑀧𑀼𑀦𑀩𑁆𑀪𑀯𑀤𑀸𑀬𑀓𑁄. 𑀚𑀸𑀢𑀺𑀲𑀁𑀲𑀸𑀭𑁄𑀢𑀺𑀆𑀤𑀻𑀲𑀼 𑀚𑀸𑀬𑀦𑀯𑀲𑁂𑀦 𑀘𑁂𑀯 𑀲𑀁𑀲𑀭𑀡𑀯𑀲𑁂𑀦 𑀘 𑀏𑀯𑀁 𑀮𑀤𑁆𑀥𑀦𑀸𑀫𑀸𑀦𑀁 𑀧𑀼𑀦𑀩𑁆𑀪𑀯𑀔𑀦𑁆𑀥𑀸𑀦𑀁 𑀧𑀘𑁆𑀘𑀬𑁄 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑁄. 𑀲𑁄 𑀳𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀢𑁆𑀢𑀺𑀓𑀭𑀡𑀯𑀲𑁂𑀦 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀧𑀭𑀺𑀓𑁆𑀔𑀸𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀦𑁂𑀲 𑀢𑀲𑁆𑀲𑀸 𑀲𑀁𑀓𑀺𑀡𑁆𑀡𑀢𑁆𑀢𑀸 𑀯𑀺𑀓𑀺𑀡𑁆𑀡𑀢𑁆𑀢𑀸 𑀲𑀁𑀓𑀺𑀡𑁆𑀡𑀧𑀭𑀺𑀓𑁆𑀔𑁄𑀢𑀺 𑀯𑀼𑀢𑁆𑀢𑁄. 𑀢𑀡𑁆𑀳𑀸𑀢𑀺 𑀯𑀝𑁆𑀝𑀫𑀽𑀮𑀺𑀓𑀸 𑀢𑀡𑁆𑀳𑀸. 𑀅𑀬𑀜𑁆𑀳𑀺 𑀕𑀫𑁆𑀪𑀻𑀭𑀸𑀦𑀼𑀕𑀢𑀝𑁆𑀞𑁂𑀦 𑀏𑀲𑀺𑀓𑀸𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀲 𑀢𑀲𑁆𑀲𑀸 𑀅𑀩𑁆𑀩𑀽𑀴𑁆𑀳𑀢𑁆𑀢𑀸 𑀮𑀼𑀜𑁆𑀘𑀺𑀢𑁆𑀯𑀸 𑀙𑀟𑁆𑀟𑀺𑀢𑀢𑁆𑀢𑀸 𑀅𑀩𑁆𑀩𑀽𑀴𑁆𑀳𑁂𑀲𑀺𑀓𑁄𑀢𑀺 𑀯𑀼𑀢𑁆𑀢𑁄. 𑀑𑀭𑀫𑁆𑀪𑀸𑀕𑀺𑀬𑀸𑀦𑀻𑀢𑀺 𑀑𑀭𑀁 𑀪𑀚𑀦𑀓𑀸𑀦𑀺 𑀓𑀸𑀫𑀪𑀯𑁂 𑀉𑀧𑀧𑀢𑁆𑀢𑀺𑀧𑀘𑁆𑀘𑀬𑀸𑀦𑀺. 𑀏𑀢𑀸𑀦𑀺 𑀳𑀺 𑀓𑀯𑀸𑀝𑀁 𑀯𑀺𑀬 𑀦𑀕𑀭𑀤𑁆𑀯𑀸𑀭𑀁 𑀘𑀺𑀢𑁆𑀢𑀁 𑀧𑀺𑀤𑀳𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀅𑀕𑁆𑀕𑀴𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀦𑁂𑀲 𑀢𑁂𑀲𑀁 𑀦𑀺𑀭𑀸𑀓𑀢𑀢𑁆𑀢𑀸 𑀪𑀺𑀦𑁆𑀦𑀢𑁆𑀢𑀸 𑀦𑀺𑀭𑀕𑁆𑀕𑀴𑁄𑀢𑀺 𑀯𑀼𑀢𑁆𑀢𑁄. 𑀅𑀭𑀺𑀬𑁄𑀢𑀺 𑀦𑀺𑀓𑁆𑀓𑀺𑀮𑁂𑀲𑁄 𑀧𑀭𑀺𑀲𑀼𑀤𑁆𑀥𑁄. 𑀧𑀦𑁆𑀦𑀤𑁆𑀥𑀚𑁄𑀢𑀺 𑀧𑀢𑀺𑀢𑀫𑀸𑀦𑀤𑁆𑀥𑀚𑁄. 𑀧𑀦𑁆𑀦𑀪𑀸𑀭𑁄𑀢𑀺 𑀔𑀦𑁆𑀥𑀪𑀸𑀭𑀓𑀺𑀮𑁂𑀲𑀪𑀸𑀭𑀅𑀪𑀺𑀲𑀗𑁆𑀔𑀸𑀭𑀪𑀸𑀭𑀧𑀜𑁆𑀘𑀓𑀸𑀫𑀕𑀼𑀡𑀪𑀸𑀭𑀸 𑀧𑀦𑁆𑀦𑀸 𑀑𑀭𑁄𑀳𑀺𑀢𑀸 𑀅𑀲𑁆𑀲𑀸𑀢𑀺 𑀧𑀦𑁆𑀦𑀪𑀸𑀭𑁄. 𑀅𑀧𑀺𑀘 𑀇𑀥 𑀫𑀸𑀦𑀪𑀸𑀭𑀲𑁆𑀲𑁂𑀯 𑀑𑀭𑁄𑀧𑀺𑀢𑀢𑁆𑀢𑀸 𑀧𑀦𑁆𑀦𑀪𑀸𑀭𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀯𑀺𑀲𑀁𑀬𑀼𑀢𑁆𑀢𑁄𑀢𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀘 𑀯𑀺𑀲𑀁𑀬𑀼𑀢𑁆𑀢𑁄. 𑀇𑀥 𑀧𑀦 𑀫𑀸𑀦𑀲𑀁𑀬𑁄𑀕𑁂𑀦𑁂𑀯 𑀯𑀺𑀲𑀁𑀬𑀼𑀢𑁆𑀢𑀢𑁆𑀢𑀸 𑀯𑀺𑀲𑀁𑀬𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀅𑀲𑁆𑀫𑀺𑀫𑀸𑀦𑁄𑀢𑀺 𑀭𑀽𑀧𑁂 𑀅𑀲𑁆𑀫𑀻𑀢𑀺 𑀫𑀸𑀦𑁄, 𑀯𑁂𑀤𑀦𑀸𑀬… 𑀲𑀜𑁆𑀜𑀸𑀬… 𑀲𑀗𑁆𑀔𑀸𑀭𑁂𑀲𑀼… 𑀯𑀺𑀜𑁆𑀜𑀸𑀡𑁂 𑀅𑀲𑁆𑀫𑀻𑀢𑀺 𑀫𑀸𑀦𑁄.

𑀏𑀢𑁆𑀢𑀸𑀯𑀢𑀸 𑀪𑀕𑀯𑀢𑀸 𑀫𑀕𑁆𑀕𑁂𑀦 𑀓𑀺𑀮𑁂𑀲𑁂 𑀔𑁂𑀧𑁂𑀢𑁆𑀯𑀸 𑀦𑀺𑀭𑁄𑀥𑀲𑀬𑀦𑀯𑀭𑀕𑀢𑀲𑁆𑀲 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀯𑀺𑀳𑀭𑀢𑁄 𑀔𑀻𑀡𑀸𑀲𑀯𑀲𑁆𑀲 𑀓𑀸𑀮𑁄 𑀤𑀲𑁆𑀲𑀺𑀢𑁄. 𑀬𑀣𑀸 𑀳𑀺 𑀤𑁆𑀯𑁂 𑀦𑀕𑀭𑀸𑀦𑀺 𑀏𑀓𑀁 𑀘𑁄𑀭𑀦𑀕𑀭𑀁, 𑀏𑀓𑀁 𑀔𑁂𑀫𑀦𑀕𑀭𑀁. 𑀅𑀣 𑀏𑀓𑀲𑁆𑀲 𑀫𑀳𑀸𑀬𑁄𑀥𑀲𑁆𑀲 𑀏𑀯𑀁 𑀪𑀯𑁂𑀬𑁆𑀬 𑁋 ‘‘𑀬𑀸𑀯𑀺𑀫𑀁 𑀘𑁄𑀭𑀦𑀕𑀭𑀁 𑀢𑀺𑀝𑁆𑀞𑀢𑀺, 𑀢𑀸𑀯 𑀔𑁂𑀫𑀦𑀕𑀭𑀁 𑀪𑀬𑀢𑁄 𑀦 𑀫𑀼𑀘𑁆𑀘𑀢𑀺, 𑀘𑁄𑀭𑀦𑀕𑀭𑀁 𑀅𑀦𑀕𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀦𑁆𑀦𑀸𑀳𑀁 𑀓𑀢𑁆𑀯𑀸 𑀔𑀕𑁆𑀕𑀁 𑀕𑀳𑁂𑀢𑁆𑀯𑀸 𑀘𑁄𑀭𑀦𑀕𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀉𑀲𑁆𑀲𑀸𑀧𑀺𑀢𑁂 𑀏𑀲𑀺𑀓𑀢𑁆𑀣𑀫𑁆𑀪𑁂 𑀔𑀕𑁆𑀕𑁂𑀦 𑀙𑀺𑀦𑁆𑀤𑀺𑀢𑁆𑀯𑀸 𑀲𑀤𑁆𑀯𑀸𑀭𑀩𑀸𑀳𑀓𑀁 𑀓𑀯𑀸𑀝𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀮𑀺𑀖𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀸𑀓𑀸𑀭𑀁 𑀪𑀺𑀦𑁆𑀤𑀦𑁆𑀢𑁄 𑀧𑀭𑀺𑀓𑁆𑀔𑀁 𑀲𑀁𑀓𑀺𑀭𑀺𑀢𑁆𑀯𑀸 𑀦𑀕𑀭𑀲𑁄𑀪𑀦𑀢𑁆𑀣𑀸𑀬 𑀉𑀲𑁆𑀲𑀺𑀢𑁂 𑀥𑀚𑁂 𑀧𑀸𑀢𑁂𑀢𑁆𑀯𑀸 𑀦𑀕𑀭𑀁 𑀅𑀕𑁆𑀕𑀺𑀦𑀸 𑀛𑀸𑀧𑁂𑀢𑁆𑀯𑀸 𑀔𑁂𑀫𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀬𑁆𑀳 𑀜𑀸𑀢𑀺𑀕𑀡𑀧𑀭𑀺𑀯𑀼𑀢𑁄 𑀲𑀼𑀭𑀲𑀪𑁄𑀚𑀦𑀁 𑀪𑀼𑀜𑁆𑀚𑁂𑀬𑁆𑀬, 𑀏𑀯𑀁 𑀘𑁄𑀭𑀦𑀕𑀭𑀁 𑀯𑀺𑀬 𑀲𑀓𑁆𑀓𑀸𑀬𑁄, 𑀔𑁂𑀫𑀦𑀕𑀭𑀁 𑀯𑀺𑀬 𑀦𑀺𑀩𑁆𑀩𑀸𑀦𑀁, 𑀫𑀳𑀸𑀬𑁄𑀥𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄. 𑀢𑀲𑁆𑀲𑁂𑀯𑀁 𑀳𑁄𑀢𑀺, ‘‘𑀬𑀸𑀯 𑀲𑀓𑁆𑀓𑀸𑀬𑀯𑀝𑁆𑀝𑀁 𑀯𑀢𑁆𑀢𑀢𑀺, 𑀢𑀸𑀯 𑀤𑁆𑀯𑀢𑁆𑀢𑀺𑀁𑀲𑀓𑀫𑁆𑀫𑀓𑀸𑀭𑀡𑀅𑀝𑁆𑀞𑀦𑀯𑀼𑀢𑀺𑀭𑁄𑀕𑀧𑀜𑁆𑀘𑀯𑀻𑀲𑀢𑀺𑀫𑀳𑀸𑀪𑀬𑁂𑀳𑀺 𑀧𑀭𑀺𑀫𑀼𑀘𑁆𑀘𑀦𑀁 𑀦𑀢𑁆𑀣𑀻’’𑀢𑀺. 𑀲𑁄 𑀫𑀳𑀸𑀬𑁄𑀥𑁄 𑀯𑀺𑀬 𑀲𑀦𑁆𑀦𑀸𑀳𑀁 𑀲𑀻𑀮𑀲𑀦𑁆𑀦𑀸𑀳𑀁 𑀓𑀢𑁆𑀯𑀸, 𑀧𑀜𑁆𑀜𑀸𑀔𑀕𑁆𑀕𑀁 𑀕𑀳𑁂𑀢𑁆𑀯𑀸 𑀔𑀕𑁆𑀕𑁂𑀦 𑀏𑀲𑀺𑀓𑀢𑁆𑀣𑀫𑁆𑀪𑁂 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀢𑀡𑁆𑀳𑁂𑀲𑀺𑀓𑀁 𑀮𑀼𑀜𑁆𑀘𑀺𑀢𑁆𑀯𑀸, 𑀲𑁄 𑀬𑁄𑀥𑁄 𑀲𑀤𑁆𑀯𑀸𑀭𑀩𑀸𑀳𑀓𑀁 𑀦𑀕𑀭𑀓𑀯𑀸𑀝𑀁 𑀯𑀺𑀬 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀕𑁆𑀕𑀴𑀁 𑀉𑀕𑁆𑀖𑀸𑀝𑁂𑀢𑁆𑀯𑀸, 𑀲𑁄 𑀬𑁄𑀥𑁄 𑀧𑀮𑀺𑀖𑀁 𑀯𑀺𑀬, 𑀅𑀯𑀺𑀚𑁆𑀚𑀸𑀧𑀮𑀺𑀖𑀁 𑀉𑀓𑁆𑀔𑀺𑀧𑀺𑀢𑁆𑀯𑀸, 𑀲𑁄 𑀬𑁄𑀥𑁄 𑀧𑀸𑀓𑀸𑀭𑀁 𑀪𑀺𑀦𑁆𑀤𑀦𑁆𑀢𑁄 𑀧𑀭𑀺𑀓𑁆𑀔𑀁 𑀯𑀺𑀬 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀁 𑀪𑀺𑀦𑁆𑀤𑀦𑁆𑀢𑁄 𑀚𑀸𑀢𑀺𑀲𑀁𑀲𑀸𑀭𑀧𑀭𑀺𑀓𑁆𑀔𑀁 𑀲𑀁𑀓𑀺𑀭𑀺𑀢𑁆𑀯𑀸, 𑀲𑁄 𑀬𑁄𑀥𑁄 𑀦𑀕𑀭𑀲𑁄𑀪𑀦𑀢𑁆𑀣𑀸𑀬 𑀉𑀲𑁆𑀲𑀸𑀧𑀺𑀢𑁂 𑀥𑀚𑁂 𑀯𑀺𑀬 𑀫𑀸𑀦𑀤𑁆𑀥𑀚𑁂 𑀧𑀸𑀢𑁂𑀢𑁆𑀯𑀸 𑀲𑀓𑁆𑀓𑀸𑀬𑀦𑀕𑀭𑀁 𑀛𑀸𑀧𑁂𑀢𑁆𑀯𑀸, 𑀲𑁄 𑀬𑁄𑀥𑁄 𑀔𑁂𑀫𑀦𑀕𑀭𑁂 𑀉𑀧𑀭𑀺𑀧𑀸𑀲𑀸𑀤𑁂 𑀲𑀼𑀭𑀲𑀪𑁄𑀚𑀦𑀁 𑀯𑀺𑀬 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑀁 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀅𑀫𑀢𑀦𑀺𑀭𑁄𑀥𑀸𑀭𑀫𑁆𑀫𑀡𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀅𑀦𑀼𑀪𑀯𑀫𑀸𑀦𑁄 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀢𑀺.

𑁨𑁪𑁬. 𑀇𑀤𑀸𑀦𑀺 𑀏𑀯𑀁 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀧𑀭𑁂𑀳𑀺 𑀅𑀦𑀥𑀺𑀕𑀫𑀦𑀻𑀬𑀯𑀺𑀜𑁆𑀜𑀸𑀡𑀢𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀁 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀁 𑀔𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑁆𑀯𑁂𑀲𑀦𑁆𑀢𑀺 𑀅𑀦𑁆𑀯𑁂𑀲𑀦𑁆𑀢𑀸 𑀕𑀯𑁂𑀲𑀦𑁆𑀢𑀸. 𑀇𑀤𑀁 𑀦𑀺𑀲𑁆𑀲𑀺𑀢𑀦𑁆𑀢𑀺 𑀇𑀤𑀁 𑀦𑀸𑀫 𑀦𑀺𑀲𑁆𑀲𑀺𑀢𑀁. 𑀢𑀣𑀸𑀕𑀢𑀲𑁆𑀲𑀸𑀢𑀺 𑀏𑀢𑁆𑀣 𑀲𑀢𑁆𑀢𑁄𑀧𑀺 𑀢𑀣𑀸𑀕𑀢𑁄𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀉𑀢𑁆𑀢𑀫𑀧𑀼𑀕𑁆𑀕𑀮𑁄 𑀔𑀻𑀡𑀸𑀲𑀯𑁄𑀧𑀺. 𑀅𑀦𑀦𑀼𑀯𑀺𑀚𑁆𑀚𑁄𑀢𑀺 𑀅𑀲𑀁𑀯𑀺𑀚𑁆𑀚𑀫𑀸𑀦𑁄 𑀯𑀸 𑀅𑀯𑀺𑀦𑁆𑀤𑁂𑀬𑁆𑀬𑁄 𑀯𑀸. 𑀢𑀣𑀸𑀕𑀢𑁄𑀢𑀺 𑀳𑀺 𑀲𑀢𑁆𑀢𑁂 𑀕𑀳𑀺𑀢𑁂 𑀅𑀲𑀁𑀯𑀺𑀚𑁆𑀚𑀫𑀸𑀦𑁄𑀢𑀺 𑀅𑀢𑁆𑀣𑁄 𑀯𑀝𑁆𑀝𑀢𑀺, 𑀔𑀻𑀡𑀸𑀲𑀯𑁂 𑀕𑀳𑀺𑀢𑁂 𑀅𑀯𑀺𑀦𑁆𑀤𑁂𑀬𑁆𑀬𑁄𑀢𑀺 𑀅𑀢𑁆𑀣𑁄 𑀯𑀝𑁆𑀝𑀢𑀺.

𑀢𑀢𑁆𑀣 𑀧𑀼𑀭𑀺𑀫𑀦𑀬𑁂 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀪𑀺𑀓𑁆𑀔𑀯𑁂, 𑀅𑀳𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀥𑀭𑀫𑀸𑀦𑀓𑀁𑀬𑁂𑀯 𑀔𑀻𑀡𑀸𑀲𑀯𑀁 𑀢𑀣𑀸𑀕𑀢𑁄 𑀲𑀢𑁆𑀢𑁄 𑀧𑀼𑀕𑁆𑀕𑀮𑁄𑀢𑀺 𑀦 𑀧𑀜𑁆𑀜𑀧𑁂𑀫𑀺. 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀁 𑀧𑀦 𑀧𑀭𑀺𑀦𑀺𑀩𑁆𑀩𑀼𑀢𑀁 𑀔𑀻𑀡𑀸𑀲𑀯𑀁 𑀲𑀢𑁆𑀢𑁄𑀢𑀺 𑀯𑀸 𑀧𑀼𑀕𑁆𑀕𑀮𑁄𑀢𑀺 𑀯𑀸 𑀓𑀺𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀺? 𑀅𑀦𑀦𑀼𑀯𑀺𑀚𑁆𑀚𑁄 𑀢𑀣𑀸𑀕𑀢𑁄. 𑀦 𑀳𑀺 𑀧𑀭𑀫𑀢𑁆𑀣𑀢𑁄 𑀲𑀢𑁆𑀢𑁄 𑀦𑀸𑀫 𑀓𑁄𑀘𑀺 𑀅𑀢𑁆𑀣𑀺, 𑀢𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀇𑀤𑀁 𑀦𑀺𑀲𑁆𑀲𑀺𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀅𑀦𑁆𑀯𑁂𑀲𑀦𑁆𑀢𑀸𑀧𑀺 𑀓𑀺𑀁 𑀅𑀥𑀺𑀕𑀘𑁆𑀙𑀺𑀲𑁆𑀲𑀦𑁆𑀢𑀺? 𑀓𑀣𑀁 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑀦𑀬𑁂 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀪𑀺𑀓𑁆𑀔𑀯𑁂, 𑀅𑀳𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀥𑀭𑀫𑀸𑀦𑀓𑀁𑀬𑁂𑀯 𑀔𑀻𑀡𑀸𑀲𑀯𑀁 𑀯𑀺𑀜𑁆𑀜𑀸𑀡𑀯𑀲𑁂𑀦 𑀇𑀦𑁆𑀤𑀸𑀤𑀻𑀳𑀺 𑀅𑀯𑀺𑀦𑁆𑀤𑀺𑀬𑀁 𑀯𑀤𑀸𑀫𑀺. 𑀦 𑀳𑀺 𑀲𑀇𑀦𑁆𑀤𑀸 𑀤𑁂𑀯𑀸 𑀲𑀩𑁆𑀭𑀳𑁆𑀫𑀓𑀸 𑀲𑀧𑀚𑀸𑀧𑀢𑀺𑀓𑀸 𑀅𑀦𑁆𑀯𑁂𑀲𑀦𑁆𑀢𑀸𑀧𑀺 𑀔𑀻𑀡𑀸𑀲𑀯𑀲𑁆𑀲 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀯𑀸 𑀫𑀕𑁆𑀕𑀘𑀺𑀢𑁆𑀢𑀁 𑀯𑀸 𑀨𑀮𑀘𑀺𑀢𑁆𑀢𑀁 𑀯𑀸, 𑀇𑀤𑀁 𑀦𑀸𑀫 𑀆𑀭𑀫𑁆𑀫𑀡𑀁 𑀦𑀺𑀲𑁆𑀲𑀸𑀬 𑀯𑀢𑁆𑀢𑀢𑀻𑀢𑀺 𑀚𑀸𑀦𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀢𑁂 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀓𑀺𑀁 𑀚𑀸𑀦𑀺𑀲𑁆𑀲𑀦𑁆𑀢𑀻𑀢𑀺?

𑀅𑀲𑀢𑀸𑀢𑀺 𑀅𑀲𑀦𑁆𑀢𑁂𑀦. 𑀢𑀼𑀘𑁆𑀙𑀸𑀢𑀺 𑀢𑀼𑀘𑁆𑀙𑀓𑁂𑀦. 𑀫𑀼𑀲𑀸𑀢𑀺 𑀫𑀼𑀲𑀸𑀯𑀸𑀤𑁂𑀦. 𑀅𑀪𑀽𑀢𑁂𑀦𑀸𑀢𑀺 𑀬𑀁 𑀦𑀢𑁆𑀣𑀺, 𑀢𑁂𑀦. 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀻𑀢𑀺 𑀅𑀪𑀺𑀆𑀘𑀺𑀓𑁆𑀔𑀦𑁆𑀢𑀺, 𑀅𑀪𑀺𑀪𑀯𑀺𑀢𑁆𑀯𑀸 𑀯𑀤𑀦𑁆𑀢𑀺. 𑀯𑁂𑀦𑀬𑀺𑀓𑁄𑀢𑀺 𑀯𑀺𑀦𑀬𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀯𑀺𑀦𑀬𑁄, 𑀲𑁄 𑀏𑀯 𑀯𑁂𑀦𑀬𑀺𑀓𑁄, 𑀲𑀢𑁆𑀢𑀯𑀺𑀦𑀸𑀲𑀓𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸 𑀘𑀸𑀳𑀁 𑀦, 𑀪𑀺𑀓𑁆𑀔𑀯𑁂𑀢𑀺, 𑀪𑀺𑀓𑁆𑀔𑀯𑁂, 𑀬𑁂𑀦 𑀯𑀸𑀓𑀸𑀭𑁂𑀦 𑀅𑀳𑀁 𑀦 𑀲𑀢𑁆𑀢𑀯𑀺𑀦𑀸𑀲𑀓𑁄. 𑀬𑀣𑀸 𑀘𑀸𑀳𑀁 𑀦 𑀯𑀤𑀸𑀫𑀻𑀢𑀺 𑀬𑁂𑀦 𑀯𑀸 𑀓𑀸𑀭𑀡𑁂𑀦 𑀅𑀳𑀁 𑀲𑀢𑁆𑀢𑀯𑀺𑀦𑀸𑀲𑀁 𑀦 𑀧𑀜𑁆𑀜𑀧𑁂𑀫𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸𑀳𑀁 𑀦 𑀲𑀢𑁆𑀢𑀯𑀺𑀦𑀸𑀲𑀓𑁄, 𑀬𑀣𑀸 𑀘 𑀦 𑀲𑀢𑁆𑀢𑀯𑀺𑀦𑀸𑀲𑀁 𑀧𑀜𑁆𑀜𑀧𑁂𑀫𑀺, 𑀢𑀣𑀸 𑀫𑀁 𑀢𑁂 𑀪𑁄𑀦𑁆𑀢𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 ‘‘𑀯𑁂𑀦𑀬𑀺𑀓𑁄 𑀲𑀫𑀡𑁄 𑀕𑁄𑀢𑀫𑁄’’𑀢𑀺 𑀯𑀤𑀦𑁆𑀢𑀸 𑀲𑀢𑁆𑀢𑀯𑀺𑀦𑀸𑀲𑀓𑁄 𑀲𑀫𑀡𑁄 𑀕𑁄𑀢𑀫𑁄𑀢𑀺 𑀘, ‘‘𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀢𑀻’’𑀢𑀺 𑀯𑀤𑀦𑁆𑀢𑀸 𑀲𑀢𑁆𑀢𑀯𑀺𑀦𑀸𑀲𑀁 𑀧𑀜𑁆𑀜𑀧𑁂𑀢𑀻𑀢𑀺 𑀘 𑀅𑀲𑀢𑀸 𑀢𑀼𑀘𑁆𑀙𑀸 𑀫𑀼𑀲𑀸 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀻𑀢𑀺.

𑀧𑀼𑀩𑁆𑀩𑁂 𑀘𑀸𑀢𑀺 𑀧𑀼𑀩𑁆𑀩𑁂 𑀫𑀳𑀸𑀩𑁄𑀥𑀺𑀫𑀡𑁆𑀟𑀫𑁆𑀳𑀺𑀬𑁂𑀯 𑀘. 𑀏𑀢𑀭𑀳𑀺 𑀘𑀸𑀢𑀺 𑀏𑀢𑀭𑀳𑀺 𑀥𑀫𑁆𑀫𑀤𑁂𑀲𑀦𑀸𑀬𑀜𑁆𑀘. 𑀤𑀼𑀓𑁆𑀔𑀜𑁆𑀘𑁂𑀯 𑀧𑀜𑁆𑀜𑀧𑁂𑀫𑀺, 𑀤𑀼𑀓𑁆𑀔𑀲𑁆𑀲 𑀘 𑀦𑀺𑀭𑁄𑀥𑀦𑁆𑀢𑀺 𑀥𑀫𑁆𑀫𑀘𑀓𑁆𑀓𑀁 𑀅𑀧𑁆𑀧𑀯𑀢𑁆𑀢𑁂𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑁂 𑀯𑀺𑀳𑀭𑀦𑁆𑀢𑁄𑀧𑀺 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄𑀧𑀺 𑀘𑀢𑀼𑀲𑀘𑁆𑀘𑀫𑁂𑀯 𑀧𑀜𑁆𑀜𑀧𑁂𑀫𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀳𑀺 𑀤𑀼𑀓𑁆𑀔𑀕𑁆𑀕𑀳𑀡𑁂𑀦 𑀢𑀲𑁆𑀲 𑀫𑀽𑀮𑀪𑀽𑀢𑁄 𑀲𑀫𑀼𑀤𑀬𑁄, 𑀦𑀺𑀭𑁄𑀥𑀕𑁆𑀕𑀳𑀡𑁂𑀦 𑀢𑀁𑀲𑀫𑁆𑀧𑀸𑀧𑀓𑁄 𑀫𑀕𑁆𑀕𑁄 𑀕𑀳𑀺𑀢𑁄𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀭 𑀘𑁂𑀢𑀺 𑀢𑀲𑁆𑀫𑀺𑀁 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑁂. 𑀧𑀭𑁂𑀢𑀺 𑀲𑀘𑁆𑀘𑀸𑀦𑀺 𑀆𑀚𑀸𑀦𑀺𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀅𑀲𑀫𑀢𑁆𑀣𑀧𑀼𑀕𑁆𑀕𑀮𑀸. 𑀅𑀓𑁆𑀓𑁄𑀲𑀦𑁆𑀢𑀻𑀢𑀺 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀦𑁆𑀢𑀺. 𑀧𑀭𑀺𑀪𑀸𑀲𑀦𑁆𑀢𑀻𑀢𑀺 𑀯𑀸𑀘𑀸𑀬 𑀧𑀭𑀺𑀪𑀸𑀲𑀦𑁆𑀢𑀺. 𑀭𑁄𑀲𑁂𑀦𑁆𑀢𑀺 𑀯𑀺𑀳𑁂𑀲𑁂𑀦𑁆𑀢𑀻𑀢𑀺 𑀭𑁄𑀲𑁂𑀲𑁆𑀲𑀸𑀫 𑀯𑀺𑀳𑁂𑀲𑁂𑀲𑁆𑀲𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀖𑀝𑁆𑀝𑁂𑀦𑁆𑀢𑀺 𑀤𑀼𑀓𑁆𑀔𑀸𑀧𑁂𑀦𑁆𑀢𑀺. 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀅𑀓𑁆𑀓𑁄𑀲𑀸𑀤𑀻𑀲𑀼, 𑀢𑁂𑀲𑀼 𑀯𑀸 𑀧𑀭𑀧𑀼𑀕𑁆𑀕𑀮𑁂𑀲𑀼. 𑀆𑀖𑀸𑀢𑁄𑀢𑀺 𑀓𑁄𑀧𑁄. 𑀅𑀧𑁆𑀧𑀘𑁆𑀘𑀬𑁄𑀢𑀺 𑀤𑁄𑀫𑀦𑀲𑁆𑀲𑀁. 𑀅𑀦𑀪𑀺𑀭𑀤𑁆𑀥𑀻𑀢𑀺 𑀅𑀢𑀼𑀝𑁆𑀞𑀺.

𑀢𑀢𑁆𑀭 𑀘𑁂𑀢𑀺 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑁂𑀬𑁂𑀯. 𑀧𑀭𑁂𑀢𑀺 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑀁 𑀆𑀚𑀸𑀦𑀺𑀢𑀼𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑀧𑀼𑀕𑁆𑀕𑀮𑀸. 𑀆𑀦𑀦𑁆𑀤𑁄𑀢𑀺 𑀆𑀦𑀦𑁆𑀤𑀧𑀻𑀢𑀺. 𑀉𑀧𑁆𑀧𑀺𑀮𑀸𑀯𑀺𑀢𑀢𑁆𑀢𑀦𑁆𑀢𑀺 𑀉𑀧𑁆𑀧𑀺𑀮𑀸𑀧𑀦𑀧𑀻𑀢𑀺. 𑀢𑀢𑁆𑀭 𑀘𑁂𑀢𑀺 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑀫𑁆𑀳𑀺𑀬𑁂𑀯. 𑀢𑀢𑁆𑀭𑀸𑀢𑀺 𑀲𑀓𑁆𑀓𑀸𑀭𑀸𑀤𑀻𑀲𑀼. 𑀬𑀁 𑀔𑁄 𑀇𑀤𑀁 𑀧𑀼𑀩𑁆𑀩𑁂 𑀧𑀭𑀺𑀜𑁆𑀜𑀸𑀢𑀦𑁆𑀢𑀺 𑀇𑀤𑀁 𑀔𑀦𑁆𑀥𑀧𑀜𑁆𑀘𑀓𑀁 𑀧𑀼𑀩𑁆𑀩𑁂 𑀩𑁄𑀥𑀺𑀫𑀡𑁆𑀟𑁂 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀜𑁆𑀜𑀸𑀢𑀁. 𑀢𑀢𑁆𑀣𑀫𑁂𑀢𑀺 𑀢𑀲𑁆𑀫𑀺𑀁 𑀔𑀦𑁆𑀥𑀧𑀜𑁆𑀘𑀓𑁂 𑀇𑀫𑁂. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀢𑀢𑁆𑀭𑀸𑀧𑀺 𑀢𑀣𑀸𑀕𑀢𑀲𑁆𑀲 𑀇𑀫𑁂 𑀲𑀓𑁆𑀓𑀸𑀭𑀸 𑀫𑀬𑀺 𑀓𑀭𑀻𑀬𑀦𑁆𑀢𑀻𑀢𑀺 𑀯𑀸 𑀅𑀳𑀁 𑀏𑀢𑁂 𑀅𑀦𑀼𑀪𑀯𑀸𑀫𑀻𑀢𑀺 𑀯𑀸 𑀦 𑀳𑁄𑀢𑀺. 𑀧𑀼𑀩𑁆𑀩𑁂 𑀧𑀭𑀺𑀜𑁆𑀜𑀸𑀢𑀓𑁆𑀔𑀦𑁆𑀥𑀧𑀜𑁆𑀘𑀓𑀁𑀬𑁂𑀯 𑀏𑀢𑁂 𑀲𑀓𑁆𑀓𑀸𑀭𑁂 𑀅𑀦𑀼𑀪𑁄𑀢𑀻𑀢𑀺 𑀏𑀢𑁆𑀢𑀓𑀫𑁂𑀯 𑀳𑁄𑀢𑀻𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀅𑀲𑀫𑀢𑁆𑀣𑀸 𑀢𑀣𑀸𑀕𑀢𑀫𑁆𑀧𑀺 𑀅𑀓𑁆𑀓𑁄𑀲𑀦𑁆𑀢𑀺, 𑀢𑀲𑁆𑀫𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁨𑁪𑁭. 𑀢𑀲𑁆𑀫𑀸 𑀢𑀺𑀳, 𑀪𑀺𑀓𑁆𑀔𑀯𑁂, 𑀬𑀁 𑀦 𑀢𑀼𑀫𑁆𑀳𑀸𑀓𑀦𑁆𑀢𑀺 𑀬𑀲𑁆𑀫𑀸 𑀅𑀢𑁆𑀢𑀦𑀺𑀬𑁂𑀧𑀺 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀬𑀁 𑀦 𑀢𑀼𑀫𑁆𑀳𑀸𑀓𑀁, 𑀢𑀁 𑀧𑀚𑀳𑀣𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁂𑀬𑁆𑀬𑀸𑀢𑀺 𑀬𑀣𑀸 𑀬𑀣𑀸 𑀇𑀘𑁆𑀙𑁂𑀬𑁆𑀬 𑀢𑀣𑀸 𑀢𑀣𑀸 𑀓𑀭𑁂𑀬𑁆𑀬. 𑀦 𑀳𑀺 𑀦𑁄 𑀏𑀢𑀁, 𑀪𑀦𑁆𑀢𑁂, 𑀅𑀢𑁆𑀢𑀸 𑀯𑀸𑀢𑀺, 𑀪𑀦𑁆𑀢𑁂, 𑀏𑀢𑀁 𑀢𑀺𑀡𑀓𑀝𑁆𑀞𑀲𑀸𑀔𑀸𑀧𑀮𑀸𑀲𑀁 𑀅𑀫𑁆𑀳𑀸𑀓𑀁 𑀦𑁂𑀯 𑀅𑀢𑁆𑀢𑀸 𑀦 𑀅𑀫𑁆𑀳𑀸𑀓𑀁 𑀭𑀽𑀧𑀁 𑀦 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀢𑁆𑀢𑀦𑀺𑀬𑀁 𑀯𑀸𑀢𑀺 𑀅𑀫𑁆𑀳𑀸𑀓𑀁 𑀘𑀻𑀯𑀭𑀸𑀤𑀺𑀧𑀭𑀺𑀓𑁆𑀔𑀸𑀭𑁄𑀧𑀺 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀁 𑀦 𑀢𑀼𑀫𑁆𑀳𑀸𑀓𑀁 𑀢𑀁 𑀧𑀚𑀳𑀣𑀸𑀢𑀺 𑀪𑀕𑀯𑀸, 𑀔𑀦𑁆𑀥𑀧𑀜𑁆𑀘𑀓𑀁𑀬𑁂𑀯 𑀦 𑀢𑀼𑀫𑁆𑀳𑀸𑀓𑀦𑁆𑀢𑀺 𑀤𑀲𑁆𑀲𑁂𑀢𑁆𑀯𑀸 𑀧𑀚𑀳𑀸𑀧𑁂𑀢𑀺, 𑀢𑀜𑁆𑀘 𑀔𑁄 𑀦 𑀉𑀧𑁆𑀧𑀸𑀝𑁂𑀢𑁆𑀯𑀸, 𑀮𑀼𑀜𑁆𑀘𑀺𑀢𑁆𑀯𑀸 𑀯𑀸. 𑀙𑀦𑁆𑀤𑀭𑀸𑀕𑀯𑀺𑀦𑀬𑁂𑀦 𑀧𑀦𑁂𑀢𑀁 𑀧𑀚𑀳𑀸𑀧𑁂𑀢𑀺.

𑁨𑁪𑁮. 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁄𑀢𑀺 𑀏𑀢𑁆𑀣 𑀢𑀺𑀧𑀭𑀺𑀯𑀝𑁆𑀝𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀇𑀫𑀁 𑀞𑀸𑀦𑀁 𑀆𑀳𑀭𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀧𑀝𑀺𑀮𑁄𑀫𑁂𑀦 𑀧𑁂𑀫𑀫𑀢𑁆𑀢𑀓𑁂𑀦 𑀲𑀕𑁆𑀕𑀧𑀭𑀸𑀬𑀡𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀇𑀫𑀁 𑀞𑀸𑀦𑀁 𑀆𑀳𑀭𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀲𑁆𑀯𑀸𑀓𑁆𑀔𑀸𑀢𑁄𑀢𑀺 𑀲𑀼𑀓𑀣𑀺𑀢𑁄. 𑀲𑀼𑀓𑀣𑀺𑀢𑀢𑁆𑀢𑀸 𑀏𑀯 𑀉𑀢𑁆𑀢𑀸𑀦𑁄 𑀯𑀺𑀯𑀝𑁄 𑀧𑀓𑀸𑀲𑀺𑀢𑁄. 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑁄𑀢𑀺 𑀧𑀺𑀮𑁄𑀢𑀺𑀓𑀸 𑀯𑀼𑀘𑁆𑀘𑀢𑀺 𑀙𑀺𑀦𑁆𑀦𑀁 𑀪𑀺𑀦𑁆𑀦𑀁 𑀢𑀢𑁆𑀣 𑀢𑀢𑁆𑀣 𑀲𑀺𑀩𑁆𑀩𑀺𑀢𑀁 𑀕𑀡𑁆𑀞𑀺𑀓𑀢𑀁 𑀚𑀺𑀡𑁆𑀡𑀁 𑀯𑀢𑁆𑀣𑀁, 𑀢𑀁 𑀬𑀲𑁆𑀲 𑀦𑀢𑁆𑀣𑀺, 𑀅𑀝𑁆𑀞𑀳𑀢𑁆𑀣𑀁 𑀯𑀸 𑀦𑀯𑀳𑀢𑁆𑀣𑀁 𑀯𑀸 𑀅𑀳𑀢𑀲𑀸𑀝𑀓𑀁 𑀦𑀺𑀯𑀢𑁆𑀣𑁄, 𑀲𑁄 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑁄 𑀦𑀸𑀫. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀢𑀸𑀤𑀺𑀲𑁄, 𑀦 𑀳𑁂𑀢𑁆𑀣 𑀓𑁄𑀳𑀜𑁆𑀜𑀸𑀤𑀺𑀯𑀲𑁂𑀦 𑀙𑀺𑀦𑁆𑀦𑀪𑀺𑀦𑁆𑀦𑀲𑀺𑀩𑁆𑀩𑀺𑀢𑀕𑀡𑁆𑀞𑀺𑀓𑀢𑀪𑀸𑀯𑁄 𑀅𑀢𑁆𑀣𑀺. 𑀅𑀧𑀺𑀘 𑀓𑀘𑀯𑀭𑁄 𑀧𑀺𑀮𑁄𑀢𑀺𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀲𑀸𑀲𑀦𑁂 𑀲𑀫𑀡𑀓𑀘𑀯𑀭𑀁 𑀦𑀸𑀫 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀮𑀪𑀢𑀺. 𑀢𑁂𑀦𑁂𑀯𑀸𑀳 𑁋

‘‘𑀓𑀸𑀭𑀡𑁆𑀟𑀯𑀁 𑀦𑀺𑀤𑁆𑀥𑀫𑀣, 𑀓𑀲𑀫𑁆𑀩𑀼𑀜𑁆𑀘𑀸𑀧𑀓𑀲𑁆𑀲𑀣;

𑀢𑀢𑁄 𑀧𑀮𑀸𑀧𑁂 𑀯𑀸𑀳𑁂𑀣, 𑀅𑀲𑁆𑀲𑀫𑀡𑁂 𑀲𑀫𑀡𑀫𑀸𑀦𑀺𑀦𑁂.

𑀦𑀺𑀤𑁆𑀥𑀫𑀺𑀢𑁆𑀯𑀸𑀦 𑀧𑀸𑀧𑀺𑀘𑁆𑀙𑁂, 𑀧𑀸𑀧𑀆𑀘𑀸𑀭𑀕𑁄𑀘𑀭𑁂;

𑀲𑀼𑀤𑁆𑀥𑀸 𑀲𑀼𑀤𑁆𑀥𑁂𑀳𑀺 𑀲𑀁𑀯𑀸𑀲𑀁, 𑀓𑀧𑁆𑀧𑀬𑀯𑁆𑀳𑁄 𑀧𑀢𑀺𑀲𑁆𑀲𑀢𑀸;

𑀢𑀢𑁄 𑀲𑀫𑀕𑁆𑀕𑀸 𑀦𑀺𑀧𑀓𑀸, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀣𑀸’’𑀢𑀺. (𑀲𑀼. 𑀦𑀺. 𑁨𑁮𑁩-𑁨𑁮𑁫);

𑀇𑀢𑀺 𑀲𑀫𑀡𑀓𑀘𑀯𑀭𑀲𑁆𑀲 𑀙𑀺𑀦𑁆𑀦𑀢𑁆𑀢𑀸𑀧𑀺 𑀅𑀬𑀁 𑀥𑀫𑁆𑀫𑁄 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑁄 𑀦𑀸𑀫 𑀳𑁄𑀢𑀺. 𑀯𑀝𑁆𑀝𑀁 𑀢𑁂𑀲𑀁 𑀦𑀢𑁆𑀣𑀺 𑀧𑀜𑁆𑀜𑀸𑀧𑀦𑀸𑀬𑀸𑀢𑀺 𑀢𑁂𑀲𑀁 𑀯𑀝𑁆𑀝𑀁 𑀅𑀧𑀜𑁆𑀜𑀢𑁆𑀢𑀺𑀪𑀸𑀯𑀁 𑀕𑀢𑀁 𑀦𑀺𑀧𑁆𑀧𑀜𑁆𑀜𑀢𑁆𑀢𑀺𑀓𑀁 𑀚𑀸𑀢𑀁. 𑀏𑀯𑀭𑀽𑀧𑁄 𑀫𑀳𑀸𑀔𑀻𑀡𑀸𑀲𑀯𑁄 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀲𑀸𑀲𑀦𑁂𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸 𑀘 𑀔𑀻𑀡𑀸𑀲𑀯𑁄, 𑀏𑀯𑀁 𑀅𑀦𑀸𑀕𑀸𑀫𑀺𑀆𑀤𑀬𑁄𑀧𑀺.

𑀢𑀢𑁆𑀣 𑀥𑀫𑁆𑀫𑀸𑀦𑀼𑀲𑀸𑀭𑀺𑀦𑁄 𑀲𑀤𑁆𑀥𑀸𑀦𑀼𑀲𑀸𑀭𑀺𑀦𑁄𑀢𑀺 𑀇𑀫𑁂 𑀤𑁆𑀯𑁂 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀸 𑀳𑁄𑀦𑁆𑀢𑀺. 𑀬𑀣𑀸𑀳 𑁋 ‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀥𑀫𑁆𑀫𑀸𑀦𑀼𑀲𑀸𑀭𑀻? 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺, 𑀧𑀜𑁆𑀜𑀸𑀯𑀸𑀳𑀺𑀁 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀁 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀥𑀫𑁆𑀫𑀸𑀦𑀼𑀲𑀸𑀭𑀻. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀥𑀫𑁆𑀫𑀸𑀦𑀼𑀲𑀸𑀭𑀻, 𑀨𑀮𑁂 𑀞𑀺𑀢𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄. 𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀦𑀼𑀲𑀸𑀭𑀻? 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺, 𑀲𑀤𑁆𑀥𑀸𑀯𑀸𑀳𑀺𑀁 𑀲𑀤𑁆𑀥𑀸𑀧𑀼𑀩𑁆𑀩𑀗𑁆𑀕𑀫𑀁 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀦𑀼𑀲𑀸𑀭𑀻. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀦𑀼𑀲𑀸𑀭𑀻, 𑀨𑀮𑁂 𑀞𑀺𑀢𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄’’𑀢𑀺 (𑀧𑀼. 𑀧. 𑁩𑁦). 𑀬𑁂𑀲𑀁 𑀫𑀬𑀺 𑀲𑀤𑁆𑀥𑀸𑀫𑀢𑁆𑀢𑀁 𑀧𑁂𑀫𑀫𑀢𑁆𑀢𑀦𑁆𑀢𑀺 𑀇𑀫𑀺𑀦𑀸 𑀬𑁂𑀲𑀁 𑀅𑀜𑁆𑀜𑁄 𑀅𑀭𑀺𑀬𑀥𑀫𑁆𑀫𑁄 𑀦𑀢𑁆𑀣𑀺, 𑀢𑀣𑀸𑀕𑀢𑁂 𑀧𑀦 𑀲𑀤𑁆𑀥𑀸𑀫𑀢𑁆𑀢𑀁 𑀧𑁂𑀫𑀫𑀢𑁆𑀢𑀫𑁂𑀯 𑀳𑁄𑀢𑀺. 𑀢𑁂 𑀯𑀺𑀧𑀲𑁆𑀲𑀓𑀧𑀼𑀕𑁆𑀕𑀮𑀸 𑀅𑀥𑀺𑀧𑁆𑀧𑁂𑀢𑀸. 𑀯𑀺𑀧𑀲𑁆𑀲𑀓𑀪𑀺𑀓𑁆𑀔𑀽𑀦𑀜𑁆𑀳𑀺 𑀏𑀯𑀁 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀦𑀁 𑀤𑀲𑀩𑀮𑁂 𑀏𑀓𑀸 𑀲𑀤𑁆𑀥𑀸 𑀏𑀓𑀁 𑀧𑁂𑀫𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀸𑀬 𑀲𑀤𑁆𑀥𑀸𑀬 𑀢𑁂𑀦 𑀧𑁂𑀫𑁂𑀦 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀲𑀕𑁆𑀕𑁂 𑀞𑀧𑀺𑀢𑀸 𑀯𑀺𑀬 𑀳𑁄𑀦𑁆𑀢𑀺, 𑀦𑀺𑀬𑀢𑀕𑀢𑀺𑀓𑀸 𑀓𑀺𑀭 𑀏𑀢𑁂. 𑀧𑁄𑀭𑀸𑀡𑀓𑀢𑁆𑀣𑁂𑀭𑀸 𑀧𑀦 𑀏𑀯𑀭𑀽𑀧𑀁 𑀪𑀺𑀓𑁆𑀔𑀼𑀁 𑀘𑀽𑀴𑀲𑁄𑀢𑀸𑀧𑀦𑁆𑀦𑁄𑀢𑀺 𑀯𑀤𑀦𑁆𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀅𑀮𑀕𑀤𑁆𑀤𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀯𑀫𑁆𑀫𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁯. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀯𑀫𑁆𑀫𑀺𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀫𑁂𑀢𑀁. 𑀓𑀼𑀫𑀸𑀭𑀓𑀲𑁆𑀲𑀧𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀓𑀼𑀫𑀸𑀭𑀓𑀸𑀮𑁂 𑀧𑀩𑁆𑀩𑀚𑀺𑀢𑀢𑁆𑀢𑀸 𑀧𑀦 𑀪𑀕𑀯𑀢𑀸, ‘‘𑀓𑀲𑁆𑀲𑀧𑀁 𑀧𑀓𑁆𑀓𑁄𑀲𑀣, 𑀇𑀤𑀁 𑀨𑀮𑀁 𑀯𑀸 𑀔𑀸𑀤𑀦𑀻𑀬𑀁 𑀯𑀸 𑀓𑀲𑁆𑀲𑀧𑀲𑁆𑀲 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑁂, 𑀓𑀢𑀭𑀲𑁆𑀲 𑀓𑀲𑁆𑀲𑀧𑀲𑁆𑀲𑀸𑀢𑀺 𑀓𑀼𑀫𑀸𑀭𑀓𑀲𑁆𑀲𑀧𑀲𑁆𑀲𑀸𑀢𑀺 𑀏𑀯𑀁 𑀕𑀳𑀺𑀢𑀦𑀸𑀫𑀢𑁆𑀢𑀸 𑀢𑀢𑁄 𑀧𑀝𑁆𑀞𑀸𑀬 𑀯𑀼𑀟𑁆𑀠𑀓𑀸𑀮𑁂𑀧𑀺 ‘‘𑀓𑀼𑀫𑀸𑀭𑀓𑀲𑁆𑀲𑀧𑁄’’ 𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀅𑀧𑀺𑀘 𑀭𑀜𑁆𑀜𑀸 𑀧𑁄𑀲𑀸𑀯𑀦𑀺𑀓𑀧𑀼𑀢𑁆𑀢𑀢𑁆𑀢𑀸𑀧𑀺 𑀢𑀁 ‘‘𑀓𑀼𑀫𑀸𑀭𑀓𑀲𑁆𑀲𑀧𑁄’’𑀢𑀺 𑀲𑀜𑁆𑀚𑀸𑀦𑀺𑀁𑀲𑀼. 𑀅𑀬𑀁 𑀧𑀦𑀲𑁆𑀲 𑀧𑀼𑀩𑁆𑀩𑀬𑁄𑀕𑀢𑁄 𑀧𑀝𑁆𑀞𑀸𑀬 𑀆𑀯𑀺𑀪𑀸𑀯𑀓𑀣𑀸 𑁋

𑀣𑁂𑀭𑁄 𑀓𑀺𑀭 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀅𑀳𑁄𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀪𑀕𑀯𑀦𑁆𑀢𑀁 𑀘𑀺𑀢𑁆𑀭𑀓𑀣𑀺𑀁 𑀏𑀓𑀁 𑀅𑀢𑁆𑀢𑀦𑁄 𑀲𑀸𑀯𑀓𑀁 𑀞𑀸𑀦𑀦𑁆𑀢𑀭𑁂 𑀞𑀧𑁂𑀦𑁆𑀢𑀁 𑀤𑀺𑀲𑁆𑀯𑀸 𑀪𑀕𑀯𑀢𑁄 𑀲𑀢𑁆𑀢𑀸𑀳𑀁 𑀤𑀸𑀦𑀁 𑀤𑀢𑁆𑀯𑀸, ‘‘𑀅𑀳𑀫𑁆𑀧𑀺 𑀪𑀕𑀯𑀸 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀅𑀬𑀁 𑀣𑁂𑀭𑁄 𑀯𑀺𑀬 𑀘𑀺𑀢𑁆𑀭𑀓𑀣𑀻 𑀲𑀸𑀯𑀓𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑁄 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺.

𑀢𑀤𑀸 𑀓𑀺𑀭 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀑𑀲𑀓𑁆𑀓𑀦𑁆𑀢𑁂 𑀧𑀜𑁆𑀘 𑀪𑀺𑀓𑁆𑀔𑀽 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀧𑀩𑁆𑀩𑀢𑀁 𑀅𑀪𑀺𑀭𑀼𑀬𑁆𑀳 𑀲𑀫𑀡𑀥𑀫𑁆𑀫𑀁 𑀅𑀓𑀁𑀲𑀼. 𑀲𑀗𑁆𑀖𑀢𑁆𑀣𑁂𑀭𑁄 𑀢𑀢𑀺𑀬𑀤𑀺𑀯𑀲𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀅𑀦𑀼𑀣𑁂𑀭𑁄 𑀘𑀢𑀼𑀢𑁆𑀣𑀤𑀺𑀯𑀲𑁂 𑀅𑀦𑀸𑀕𑀸𑀫𑀻 𑀅𑀳𑁄𑀲𑀺. 𑀇𑀢𑀭𑁂 𑀢𑀬𑁄 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂𑀲𑀁 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀦𑁆𑀢𑀸𑀦𑀁 𑀏𑀓𑁄 𑀢𑀓𑁆𑀓𑀲𑀺𑀮𑀸𑀬𑀁 𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀼𑀓𑁆𑀓𑀼𑀲𑀸𑀢𑀺 𑀦𑀸𑀫 𑀭𑀸𑀚𑀸 𑀳𑀼𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁆𑀯𑀸 𑀭𑀸𑀚𑀕𑀳𑀁 𑀕𑀘𑁆𑀙𑀦𑁆𑀢𑁄 𑀓𑀼𑀫𑁆𑀪𑀓𑀸𑀭𑀲𑀸𑀮𑀸𑀬𑀁 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀧𑀢𑁆𑀢𑁄. 𑀏𑀓𑁄 𑀏𑀓𑀲𑁆𑀫𑀺𑀁 𑀲𑀫𑀼𑀤𑁆𑀤𑀧𑀝𑁆𑀝𑀦𑁂 𑀓𑀼𑀮𑀖𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀦𑀸𑀯𑀁 𑀆𑀭𑀼𑀬𑁆𑀳 𑀪𑀺𑀦𑁆𑀦𑀦𑀸𑀯𑁄 𑀤𑀸𑀭𑀼𑀘𑀻𑀭𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀮𑀸𑀪𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀢𑁄, ‘‘𑀅𑀳𑀁 𑀅𑀭𑀳𑀸’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸, ‘‘𑀦 𑀢𑁆𑀯𑀁 𑀅𑀭𑀳𑀸, 𑀕𑀘𑁆𑀙 𑀲𑀢𑁆𑀣𑀸𑀭𑀁 𑀧𑀜𑁆𑀳𑀁 𑀧𑀼𑀘𑁆𑀙𑀸’’𑀢𑀺 𑀅𑀢𑁆𑀣𑀓𑀸𑀫𑀸𑀬 𑀤𑁂𑀯𑀢𑀸𑀬 𑀘𑁄𑀤𑀺𑀢𑁄 𑀢𑀣𑀸 𑀓𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑀁 𑀧𑀢𑁆𑀢𑁄.

𑀏𑀓𑁄 𑀭𑀸𑀚𑀕𑀳𑁂 𑀏𑀓𑀺𑀲𑁆𑀲𑀸 𑀓𑀼𑀮𑀤𑀸𑀭𑀺𑀓𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀉𑀧𑁆𑀧𑀦𑁆𑀦𑁄. 𑀲𑀸 𑀘 𑀧𑀞𑀫𑀁 𑀫𑀸𑀢𑀸𑀧𑀺𑀢𑀭𑁄 𑀬𑀸𑀘𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀅𑀮𑀪𑀫𑀸𑀦𑀸 𑀓𑀼𑀮𑀖𑀭𑀁 𑀕𑀢𑀸 𑀕𑀩𑁆𑀪𑀲𑀡𑁆𑀞𑀺𑀢𑀫𑁆𑀧𑀺 𑀅𑀚𑀸𑀦𑀦𑁆𑀢𑀻 𑀲𑀸𑀫𑀺𑀓𑀁 𑀆𑀭𑀸𑀥𑁂𑀢𑁆𑀯𑀸 𑀢𑁂𑀦 𑀅𑀦𑀼𑀜𑁆𑀜𑀸𑀢𑀸 𑀪𑀺𑀓𑁆𑀔𑀼𑀦𑀻𑀲𑀼 𑀧𑀩𑁆𑀩𑀚𑀺𑀢𑀸. 𑀢𑀲𑁆𑀲𑀸 𑀕𑀩𑁆𑀪𑀺𑀦𑀺𑀦𑀺𑀫𑀺𑀢𑁆𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑁄 𑀤𑁂𑀯𑀤𑀢𑁆𑀢𑀁 𑀧𑀼𑀘𑁆𑀙𑀺𑀁𑀲𑀼, 𑀲𑁄 ‘‘𑀅𑀲𑁆𑀲𑀫𑀡𑀻’’𑀢𑀺 𑀆𑀳. 𑀤𑀲𑀩𑀮𑀁 𑀧𑀼𑀘𑁆𑀙𑀺𑀁𑀲𑀼, 𑀲𑀢𑁆𑀣𑀸 𑀉𑀧𑀸𑀮𑀺𑀢𑁆𑀣𑁂𑀭𑀁 𑀧𑀝𑀺𑀘𑁆𑀙𑀸𑀧𑁂𑀲𑀺. 𑀣𑁂𑀭𑁄 𑀲𑀸𑀯𑀢𑁆𑀣𑀺𑀦𑀕𑀭𑀯𑀸𑀲𑀻𑀦𑀺 𑀓𑀼𑀮𑀸𑀦𑀺 𑀯𑀺𑀲𑀸𑀔𑀜𑁆𑀘 𑀉𑀧𑀸𑀲𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑁄𑀥𑁂𑀦𑁆𑀢𑁄, 𑁋 ‘‘𑀧𑀼𑀭𑁂 𑀮𑀤𑁆𑀥𑁄 𑀕𑀩𑁆𑀪𑁄, 𑀧𑀩𑁆𑀩𑀚𑁆𑀚𑀸 𑀅𑀭𑁄𑀕𑀸’’𑀢𑀺 𑀆𑀳. 𑀲𑀢𑁆𑀣𑀸 ‘‘𑀲𑀼𑀯𑀺𑀦𑀺𑀘𑁆𑀙𑀺𑀢𑀁 𑀅𑀥𑀺𑀓𑀭𑀡’’𑀦𑁆𑀢𑀺 𑀣𑁂𑀭𑀲𑁆𑀲 𑀲𑀸𑀥𑀼𑀓𑀸𑀭𑀁 𑀅𑀤𑀸𑀲𑀺. 𑀲𑀸 𑀪𑀺𑀓𑁆𑀔𑀼𑀦𑀻 𑀲𑀼𑀯𑀡𑁆𑀡𑀩𑀺𑀫𑁆𑀩𑀲𑀤𑀺𑀲𑀁 𑀧𑀼𑀢𑁆𑀢𑀁 𑀯𑀺𑀚𑀸𑀬𑀺, 𑀢𑀁 𑀕𑀳𑁂𑀢𑁆𑀯𑀸 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀧𑁄𑀲𑀸𑀧𑁂𑀲𑀺. ‘‘𑀓𑀲𑁆𑀲𑀧𑁄’’𑀢𑀺 𑀘𑀲𑁆𑀲 𑀦𑀸𑀫𑀁 𑀓𑀢𑁆𑀯𑀸 𑀅𑀧𑀭𑀪𑀸𑀕𑁂 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀇𑀢𑀺 𑀭𑀜𑁆𑀜𑁄 𑀧𑁄𑀲𑀸𑀯𑀦𑀺𑀓𑀧𑀼𑀢𑁆𑀢𑀢𑁆𑀢𑀸𑀧𑀺 𑀢𑀁 ‘‘𑀓𑀼𑀫𑀸𑀭𑀓𑀲𑁆𑀲𑀧𑁄’’𑀢𑀺 𑀲𑀜𑁆𑀚𑀸𑀦𑀺𑀁𑀲𑀽𑀢𑀺.

𑀅𑀦𑁆𑀥𑀯𑀦𑁂𑀢𑀺 𑀏𑀯𑀁𑀦𑀸𑀫𑀓𑁂 𑀯𑀦𑁂. 𑀢𑀁 𑀓𑀺𑀭 𑀯𑀦𑀁 𑀤𑁆𑀯𑀺𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀓𑀸𑀮𑁂 𑀅𑀯𑀺𑀚𑀳𑀺𑀢𑀦𑀸𑀫𑀁 𑀅𑀦𑁆𑀥𑀯𑀦𑀁𑀢𑁆𑀯𑁂𑀯 𑀧𑀜𑁆𑀜𑀸𑀬𑀢𑀺. 𑀢𑀢𑁆𑀭𑀸𑀬𑀁 𑀧𑀜𑁆𑀜𑀢𑁆𑀢𑀺𑀯𑀺𑀪𑀸𑀯𑀦𑀸 𑁋 𑀅𑀧𑁆𑀧𑀸𑀬𑀼𑀓𑀩𑀼𑀤𑁆𑀥𑀸𑀦𑀜𑁆𑀳𑀺 𑀲𑀭𑀻𑀭𑀥𑀸𑀢𑀼 𑀦 𑀏𑀓𑀕𑁆𑀖𑀦𑀸 𑀳𑁄𑀢𑀺. 𑀅𑀥𑀺𑀝𑁆𑀞𑀸𑀦𑀸𑀦𑀼𑀪𑀸𑀯𑁂𑀦 𑀯𑀺𑀧𑁆𑀧𑀓𑀺𑀭𑀺𑀬𑀢𑀺. 𑀢𑁂𑀦𑁂𑀯 𑀅𑀫𑁆𑀳𑀸𑀓𑀫𑁆𑀧𑀺 𑀪𑀕𑀯𑀸, 𑁋 ‘‘𑀅𑀳𑀁 𑀦 𑀘𑀺𑀭𑀝𑁆𑀞𑀺𑀢𑀺𑀓𑁄, 𑀅𑀧𑁆𑀧𑀓𑁂𑀳𑀺 𑀲𑀢𑁆𑀢𑁂𑀳𑀺 𑀅𑀳𑀁 𑀤𑀺𑀝𑁆𑀞𑁄, 𑀬𑁂𑀳𑀺 𑀦 𑀤𑀺𑀝𑁆𑀞𑁄, 𑀢𑁂𑀯 𑀩𑀳𑀼𑀢𑀭𑀸, 𑀢𑁂 𑀫𑁂 𑀥𑀸𑀢𑀼𑀬𑁄 𑀆𑀤𑀸𑀬 𑀢𑀢𑁆𑀣 𑀢𑀢𑁆𑀣 𑀧𑀽𑀚𑁂𑀦𑁆𑀢𑀸 𑀲𑀕𑁆𑀕𑀧𑀭𑀸𑀬𑀡𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂, ‘‘𑀅𑀢𑁆𑀢𑀦𑁄 𑀲𑀭𑀻𑀭𑀁 𑀯𑀺𑀧𑁆𑀧𑀓𑀺𑀭𑀺𑀬𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀤𑀻𑀖𑀸𑀬𑀼𑀓𑀩𑀼𑀤𑁆𑀥𑀸𑀦𑀁 𑀧𑀦 𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑁄 𑀯𑀺𑀬 𑀏𑀓𑀕𑁆𑀖𑀦𑀁 𑀥𑀸𑀢𑀼𑀲𑀭𑀻𑀭𑀁 𑀢𑀺𑀝𑁆𑀞𑀢𑀺.

𑀓𑀲𑁆𑀲𑀧𑀲𑁆𑀲𑀸𑀧𑀺 𑀪𑀕𑀯𑀢𑁄 𑀢𑀣𑁂𑀯 𑀅𑀝𑁆𑀞𑀸𑀲𑀺. 𑀢𑀢𑁄 𑀫𑀳𑀸𑀚𑀦𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸, ‘‘𑀥𑀸𑀢𑀼𑀬𑁄 𑀏𑀓𑀕𑁆𑀖𑀦𑀸 𑀦 𑀲𑀓𑁆𑀓𑀸 𑀯𑀺𑀬𑁄𑀚𑁂𑀢𑀼𑀁, 𑀓𑀺𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀫𑁆𑀫𑀦𑁆𑀢𑀬𑀺𑀢𑁆𑀯𑀸 𑀏𑀓𑀕𑁆𑀖𑀦𑀫𑁂𑀯 𑀘𑁂𑀢𑀺𑀬𑀁 𑀓𑀭𑀺𑀲𑁆𑀲𑀸𑀫, 𑀓𑀺𑀢𑁆𑀢𑀓𑀁 𑀧𑀦 𑀳𑁄𑀢𑀼 𑀢𑀦𑁆𑀢𑀺 𑀆𑀳𑀁𑀲𑀼. 𑀏𑀓𑁂 𑀲𑀢𑁆𑀢𑀬𑁄𑀚𑀦𑀺𑀬𑀦𑁆𑀢𑀺 𑀆𑀳𑀁𑀲𑀼. 𑀏𑀢𑀁 𑀅𑀢𑀺𑀫𑀳𑀦𑁆𑀢𑀁, 𑀅𑀦𑀸𑀕𑀢𑁂 𑀚𑀕𑁆𑀕𑀺𑀢𑀼𑀁 𑀦 𑀲𑀓𑁆𑀓𑀸, 𑀙𑀬𑁄𑀚𑀦𑀁 𑀳𑁄𑀢𑀼, 𑀧𑀜𑁆𑀘𑀬𑁄𑀚𑀦𑀁… 𑀘𑀢𑀼𑀬𑁄𑀚𑀦𑀁… 𑀢𑀺𑀬𑁄𑀚𑀦𑀁… 𑀤𑁆𑀯𑀺𑀬𑁄𑀚𑀦𑀁… 𑀏𑀓𑀬𑁄𑀚𑀦𑀁 𑀳𑁄𑀢𑀽𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀇𑀝𑁆𑀞𑀓𑀸 𑀓𑀻𑀤𑀺𑀲𑀸 𑀳𑁄𑀦𑁆𑀢𑀽𑀢𑀺 𑀩𑀸𑀳𑀺𑀭𑀦𑁆𑀢𑁂 𑀇𑀝𑁆𑀞𑀓𑀸 𑀭𑀢𑁆𑀢𑀲𑀼𑀯𑀡𑁆𑀡𑀫𑀬𑀸 𑀏𑀓𑀕𑁆𑀖𑀦𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸 𑀳𑁄𑀦𑁆𑀢𑀼, 𑀅𑀩𑁆𑀪𑀦𑁆𑀢𑀭𑀺𑀫𑀦𑁆𑀢𑁂 𑀧𑀜𑁆𑀜𑀸𑀲𑀲𑀳𑀲𑁆𑀲𑀕𑁆𑀖𑀦𑀺𑀓𑀸. 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸𑀳𑀺 𑀫𑀢𑁆𑀢𑀺𑀓𑀸𑀓𑀺𑀘𑁆𑀘𑀁 𑀓𑀬𑀺𑀭𑀢𑀼, 𑀢𑁂𑀮𑁂𑀦 𑀉𑀤𑀓𑀓𑀺𑀘𑁆𑀘𑀦𑁆𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀘𑀢𑁆𑀢𑀸𑀭𑀺 𑀫𑀼𑀔𑀸𑀦𑀺 𑀘𑀢𑀼𑀥𑀸 𑀯𑀺𑀪𑀚𑀺𑀁𑀲𑀼. 𑀭𑀸𑀚𑀸 𑀏𑀓𑀁 𑀫𑀼𑀔𑀁 𑀕𑀡𑁆𑀳𑀺, 𑀭𑀸𑀚𑀧𑀼𑀢𑁆𑀢𑁄 𑀧𑀣𑀯𑀺𑀦𑁆𑀤𑀭𑀓𑀼𑀫𑀸𑀭𑁄 𑀏𑀓𑀁, 𑀅𑀫𑀘𑁆𑀘𑀸𑀦𑀁 𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸 𑀲𑁂𑀦𑀸𑀧𑀢𑀺 𑀏𑀓𑀁, 𑀚𑀦𑀧𑀤𑀸𑀦𑀁 𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸 𑀲𑁂𑀝𑁆𑀞𑀺 𑀏𑀓𑀁.

𑀢𑀢𑁆𑀣 𑀥𑀦𑀲𑀫𑁆𑀧𑀦𑁆𑀦𑀢𑀸𑀬 𑀭𑀸𑀚𑀸𑀧𑀺 𑀲𑀼𑀯𑀡𑁆𑀡𑀁 𑀦𑀻𑀳𑀭𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀕𑀳𑀺𑀢𑀫𑀼𑀔𑁂 𑀓𑀫𑁆𑀫𑀁 𑀆𑀭𑀪𑀺, 𑀉𑀧𑀭𑀸𑀚𑀸𑀧𑀺, 𑀲𑁂𑀦𑀸𑀧𑀢𑀺𑀧𑀺. 𑀲𑁂𑀝𑁆𑀞𑀺𑀦𑀸 𑀕𑀳𑀺𑀢𑀫𑀼𑀔𑁂 𑀧𑀦 𑀓𑀫𑁆𑀫𑀁 𑀑𑀮𑀻𑀬𑀢𑀺. 𑀢𑀢𑁄 𑀬𑀲𑁄𑀭𑀢𑁄 𑀦𑀸𑀫 𑀏𑀓𑁄 𑀉𑀧𑀸𑀲𑀓𑁄 𑀢𑁂𑀧𑀺𑀝𑀓𑁄 𑀪𑀸𑀡𑀓𑁄 𑀅𑀦𑀸𑀕𑀸𑀫𑀻 𑀅𑀭𑀺𑀬𑀲𑀸𑀯𑀓𑁄, 𑀲𑁄 𑀓𑀫𑁆𑀫𑀁 𑀑𑀮𑀻𑀬𑀢𑀻𑀢𑀺 𑀜𑀢𑁆𑀯𑀸 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀬𑁄𑀚𑀸𑀧𑁂𑀢𑁆𑀯𑀸 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 ‘‘𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀢𑀲𑁆𑀲 𑀬𑁄𑀚𑀦𑀺𑀓𑀁 𑀭𑀢𑀦𑀘𑁂𑀢𑀺𑀬𑀁 𑀓𑀬𑀺𑀭𑀢𑀺, 𑀬𑁄 𑀬𑀁 𑀤𑀸𑀢𑀼𑀁 𑀉𑀲𑁆𑀲𑀳𑀢𑀺 𑀲𑀼𑀯𑀡𑁆𑀡𑀁 𑀯𑀸 𑀳𑀺𑀭𑀜𑁆𑀜𑀁 𑀯𑀸 𑀲𑀢𑁆𑀢𑀭𑀢𑀦𑀁 𑀯𑀸 𑀳𑀭𑀺𑀢𑀸𑀮𑀁 𑀯𑀸 𑀫𑀦𑁄𑀲𑀺𑀮𑀁 𑀯𑀸, 𑀲𑁄 𑀢𑀁 𑀤𑁂𑀢𑀽’’𑀢𑀺 𑀲𑀫𑀸𑀤𑀧𑁂𑀲𑀺. 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀣𑀸𑀫𑁂𑀦 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀻𑀦𑀺 𑀅𑀤𑀁𑀲𑀼. 𑀅𑀲𑀓𑁆𑀓𑁄𑀦𑁆𑀢𑀸 𑀢𑁂𑀮𑀢𑀡𑁆𑀟𑀼𑀮𑀸𑀤𑀻𑀦𑀺 𑀤𑁂𑀦𑁆𑀢𑀺𑀬𑁂𑀯. 𑀉𑀧𑀸𑀲𑀓𑁄 𑀢𑁂𑀮𑀢𑀡𑁆𑀟𑀼𑀮𑀸𑀤𑀻𑀦𑀺 𑀓𑀫𑁆𑀫𑀓𑀸𑀭𑀸𑀦𑀁 𑀪𑀢𑁆𑀢𑀯𑁂𑀢𑀦𑀢𑁆𑀣𑀁 𑀧𑀳𑀺𑀡𑀸𑀢𑀺, 𑀅𑀯𑀲𑁂𑀲𑁂𑀳𑀺 𑀲𑀼𑀯𑀡𑁆𑀡𑀁 𑀘𑁂𑀢𑀸𑀧𑁂𑀢𑁆𑀯𑀸 𑀧𑀳𑀺𑀡𑀸𑀢𑀺, 𑀏𑀯𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀅𑀘𑀭𑀺.

𑀘𑁂𑀢𑀺𑀬𑁂 𑀓𑀫𑁆𑀫𑀁 𑀦𑀺𑀝𑁆𑀞𑀺𑀢𑀦𑁆𑀢𑀺 𑀘𑁂𑀢𑀺𑀬𑀝𑁆𑀞𑀸𑀦𑀢𑁄 𑀧𑀡𑁆𑀡𑀁 𑀧𑀳𑀺𑀡𑀺𑀁𑀲𑀼 𑁋 ‘‘𑀦𑀺𑀝𑁆𑀞𑀺𑀢𑀁 𑀓𑀫𑁆𑀫𑀁 𑀆𑀘𑀭𑀺𑀬𑁄 𑀆𑀕𑀦𑁆𑀢𑁆𑀯𑀸 𑀘𑁂𑀢𑀺𑀬𑀁 𑀯𑀦𑁆𑀤𑀢𑀽’’𑀢𑀺. 𑀲𑁄𑀧𑀺 𑀧𑀡𑁆𑀡𑀁 𑀧𑀳𑀺𑀡𑀺 𑁋 ‘‘𑀫𑀬𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁄 𑀲𑀫𑀸𑀤𑀧𑀺𑀢𑁄, 𑀬𑀁 𑀅𑀢𑁆𑀣𑀺, 𑀢𑀁 𑀕𑀳𑁂𑀢𑁆𑀯𑀸 𑀓𑀫𑁆𑀫𑀁 𑀦𑀺𑀝𑁆𑀞𑀸𑀧𑁂𑀦𑁆𑀢𑀽’’𑀢𑀺. 𑀤𑁆𑀯𑁂𑀧𑀺 𑀧𑀡𑁆𑀡𑀸𑀦𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀫𑀸𑀕𑀫𑀺𑀁𑀲𑀼. 𑀆𑀘𑀭𑀺𑀬𑀲𑁆𑀲 𑀧𑀡𑁆𑀡𑀢𑁄 𑀧𑀦 𑀘𑁂𑀢𑀺𑀬𑀝𑁆𑀞𑀸𑀦𑀢𑁄 𑀧𑀡𑁆𑀡𑀁 𑀧𑀞𑀫𑀢𑀭𑀁 𑀆𑀘𑀭𑀺𑀬𑀲𑁆𑀲 𑀳𑀢𑁆𑀣𑀁 𑀅𑀕𑀫𑀸𑀲𑀺. 𑀲𑁄 𑀧𑀡𑁆𑀡𑀁 𑀯𑀸𑀘𑁂𑀢𑁆𑀯𑀸 𑀘𑁂𑀢𑀺𑀬𑀁 𑀯𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀏𑀓𑀓𑁄𑀯 𑀦𑀺𑀓𑁆𑀔𑀫𑀺. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀝𑀯𑀺𑀬𑀁 𑀧𑀜𑁆𑀘 𑀘𑁄𑀭𑀲𑀢𑀸𑀦𑀺 𑀉𑀝𑁆𑀞𑀳𑀺𑀁𑀲𑀼. 𑀢𑀢𑁆𑀭𑁂𑀓𑀘𑁆𑀘𑁂 𑀢𑀁 𑀤𑀺𑀲𑁆𑀯𑀸 𑀇𑀫𑀺𑀦𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀢𑁄 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀲𑀫𑁆𑀧𑀺𑀡𑁆𑀟𑀺𑀢𑀁, 𑀦𑀺𑀥𑀺𑀓𑀼𑀫𑁆𑀪𑀻 𑀦𑁄 𑀧𑀯𑀝𑁆𑀝𑀫𑀸𑀦𑀸 𑀆𑀕𑀢𑀸𑀢𑀺 𑀅𑀯𑀲𑁂𑀲𑀸𑀦𑀁 𑀆𑀭𑁄𑀘𑁂𑀢𑁆𑀯𑀸 𑀢𑀁 𑀅𑀕𑁆𑀕𑀳𑁂𑀲𑀼𑀁. 𑀓𑀲𑁆𑀫𑀸 𑀢𑀸𑀢𑀸, 𑀫𑀁 𑀕𑀡𑁆𑀳𑀣𑀸𑀢𑀺? 𑀢𑀬𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀢𑁄 𑀲𑀩𑁆𑀩𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀲𑀫𑁆𑀧𑀺𑀡𑁆𑀟𑀺𑀢𑀁, 𑀅𑀫𑁆𑀳𑀸𑀓𑀫𑁆𑀧𑀺 𑀣𑁄𑀓𑀁 𑀣𑁄𑀓𑀁 𑀤𑁂𑀳𑀻𑀢𑀺. 𑀓𑀺𑀁 𑀢𑀼𑀫𑁆𑀳𑁂 𑀦 𑀚𑀸𑀦𑀸𑀣, 𑀓𑀲𑁆𑀲𑀧𑁄 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀢𑀲𑁆𑀲 𑀬𑁄𑀚𑀦𑀺𑀓𑀁 𑀭𑀢𑀦𑀘𑁂𑀢𑀺𑀬𑀁 𑀓𑀬𑀺𑀭𑀢𑀺, 𑀢𑀤𑀢𑁆𑀣𑀸𑀬 𑀫𑀬𑀸 𑀲𑀫𑀸𑀤𑀧𑀺𑀢𑀁, 𑀦𑁄 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬. 𑀢𑀁 𑀢𑀁 𑀮𑀤𑁆𑀥𑀮𑀤𑁆𑀥𑀝𑁆𑀞𑀸𑀦𑀢𑁄 𑀢𑀢𑁆𑀣𑁂𑀯 𑀧𑁂𑀲𑀺𑀢𑀁, 𑀫𑀬𑁆𑀳𑀁 𑀧𑀦 𑀦𑀺𑀯𑀢𑁆𑀣𑀲𑀸𑀝𑀓𑀫𑀢𑁆𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀯𑀺𑀢𑁆𑀢𑀁 𑀓𑀸𑀓𑀡𑀺𑀓𑀫𑁆𑀧𑀺 𑀦𑀢𑁆𑀣𑀻𑀢𑀺.

𑀏𑀓𑁂, ‘‘𑀏𑀯𑀫𑁂𑀢𑀁 𑀯𑀺𑀲𑁆𑀲𑀚𑁂𑀣 𑀆𑀘𑀭𑀺𑀬’’𑀦𑁆𑀢𑀺 𑀆𑀳𑀁𑀲𑀼. 𑀏𑀓𑁂, ‘‘𑀅𑀬𑀁 𑀭𑀸𑀚𑀧𑀽𑀚𑀺𑀢𑁄 𑀅𑀫𑀘𑁆𑀘𑀧𑀽𑀚𑀺𑀢𑁄, 𑀅𑀫𑁆𑀳𑁂𑀲𑀼 𑀓𑀜𑁆𑀘𑀺𑀤𑁂𑀯 𑀦𑀕𑀭𑀯𑀻𑀣𑀺𑀬𑀁 𑀤𑀺𑀲𑁆𑀯𑀸 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀦𑀁 𑀆𑀭𑁄𑀘𑁂𑀢𑁆𑀯𑀸 𑀅𑀦𑀬𑀯𑁆𑀬𑀲𑀦𑀁 𑀧𑀸𑀧𑀼𑀡𑀸𑀧𑁂𑀬𑁆𑀬𑀸’’𑀢𑀺 𑀆𑀳𑀁𑀲𑀼. 𑀉𑀧𑀸𑀲𑀓𑁄, ‘‘𑀢𑀸𑀢𑀸, 𑀦𑀸𑀳𑀁 𑀏𑀯𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀢𑀜𑁆𑀘 𑀔𑁄 𑀢𑁂𑀲𑀼 𑀓𑀸𑀭𑀼𑀜𑁆𑀜𑁂𑀦, 𑀦 𑀅𑀢𑁆𑀢𑀦𑁄 𑀚𑀻𑀯𑀺𑀢𑀦𑀺𑀓𑀦𑁆𑀢𑀺𑀬𑀸. 𑀅𑀣 𑀢𑁂𑀲𑀼 𑀕𑀳𑁂𑀢𑀩𑁆𑀩𑁄 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄𑀢𑀺 𑀯𑀺𑀯𑀤𑀦𑁆𑀢𑁂𑀲𑀼 𑀕𑀳𑁂𑀢𑀩𑁆𑀩𑁄𑀢𑀺 𑀮𑀤𑁆𑀥𑀺𑀓𑀸 𑀏𑀯 𑀩𑀳𑀼𑀢𑀭𑀸 𑀳𑀼𑀢𑁆𑀯𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑀬𑀺𑀁𑀲𑀼.

𑀢𑁂𑀲𑀁 𑀩𑀮𑀯𑀕𑀼𑀡𑁂 𑀅𑀭𑀺𑀬𑀲𑀸𑀯𑀓𑁂 𑀅𑀧𑀭𑀸𑀥𑁂𑀦 𑀦𑀺𑀩𑁆𑀩𑀼𑀢𑀤𑀻𑀧𑀲𑀺𑀔𑀸 𑀯𑀺𑀬 𑀅𑀓𑁆𑀔𑀻𑀦𑀺 𑀅𑀦𑁆𑀢𑀭𑀥𑀸𑀬𑀺𑀁𑀲𑀼. 𑀢𑁂, ‘‘𑀓𑀳𑀁 𑀪𑁄 𑀘𑀓𑁆𑀔𑀼, 𑀓𑀳𑀁 𑀪𑁄 𑀘𑀓𑁆𑀔𑀽’’𑀢𑀺 𑀯𑀺𑀧𑁆𑀧𑀮𑀧𑀦𑁆𑀢𑀸 𑀏𑀓𑀘𑁆𑀘𑁂 𑀜𑀸𑀢𑀓𑁂𑀳𑀺 𑀕𑁂𑀳𑀁 𑀦𑀻𑀢𑀸. 𑀏𑀓𑀘𑁆𑀘𑁂 𑀦𑁄𑀜𑀸𑀢𑀓𑀸 𑀅𑀦𑀸𑀣𑀸𑀢𑀺 𑀢𑀢𑁆𑀣𑁂𑀯 𑀅𑀝𑀯𑀺𑀬𑀁 𑀭𑀼𑀓𑁆𑀔𑀫𑀽𑀮𑁂 𑀧𑀡𑁆𑀡𑀲𑀸𑀮𑀸𑀬𑀁 𑀯𑀲𑀺𑀁𑀲𑀼. 𑀅𑀝𑀯𑀺𑀁 𑀆𑀕𑀢𑀫𑀦𑀼𑀲𑁆𑀲𑀸 𑀓𑀸𑀭𑀼𑀜𑁆𑀜𑁂𑀦 𑀢𑁂𑀲𑀁 𑀢𑀡𑁆𑀟𑀼𑀮𑀁 𑀯𑀸 𑀧𑀼𑀝𑀪𑀢𑁆𑀢𑀁 𑀯𑀸 𑀧𑀭𑀺𑀩𑁆𑀩𑀬𑀁 𑀯𑀸 𑀤𑁂𑀦𑁆𑀢𑀺. 𑀤𑀸𑀭𑀼𑀧𑀡𑁆𑀡𑀸𑀤𑀻𑀦𑀁 𑀅𑀢𑁆𑀣𑀸𑀬 𑀕𑀦𑁆𑀢𑁆𑀯𑀸 𑀆𑀕𑀢𑀸 𑀫𑀦𑀼𑀲𑁆𑀲𑀸 𑀓𑀼𑀳𑀺𑀁 𑀕𑀢𑀢𑁆𑀣𑀸𑀢𑀺 𑀯𑀼𑀢𑁆𑀢𑁂 𑀅𑀦𑁆𑀥𑀯𑀦𑀁 𑀕𑀢𑀫𑁆𑀳𑀸𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀩𑀼𑀤𑁆𑀥𑀸𑀦𑀁 𑀓𑀸𑀮𑁂 𑀢𑀁 𑀯𑀦𑀁 𑀅𑀦𑁆𑀥𑀯𑀦𑀁𑀢𑁆𑀯𑁂𑀯 𑀧𑀜𑁆𑀜𑀸𑀬𑀢𑀺. 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀧𑀦𑁂𑀢𑀁 𑀙𑀟𑁆𑀟𑀺𑀢𑀚𑀦𑀧𑀤𑁂 𑀅𑀝𑀯𑀺 𑀅𑀳𑁄𑀲𑀺. 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀲𑀸𑀯𑀢𑁆𑀣𑀺𑀬𑀸 𑀅𑀯𑀺𑀤𑀽𑀭𑁂 𑀚𑁂𑀢𑀯𑀦𑀲𑁆𑀲 𑀧𑀺𑀝𑁆𑀞𑀺𑀪𑀸𑀕𑁂 𑀧𑀯𑀺𑀯𑁂𑀓𑀓𑀸𑀫𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀧𑀥𑀸𑀦𑀖𑀭𑀁 𑀅𑀳𑁄𑀲𑀺, 𑀢𑀢𑁆𑀣 𑀆𑀬𑀲𑁆𑀫𑀸 𑀓𑀼𑀫𑀸𑀭𑀓𑀲𑁆𑀲𑀧𑁄 𑀢𑁂𑀦 𑀲𑀫𑀬𑁂𑀦 𑀲𑁂𑀔𑀧𑀝𑀺𑀧𑀤𑀁 𑀧𑀽𑀭𑀬𑀫𑀸𑀦𑁄 𑀯𑀺𑀳𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑁆𑀥𑀯𑀦𑁂 𑀯𑀺𑀳𑀭𑀢𑀻’’𑀢𑀺.

𑀅𑀜𑁆𑀜𑀢𑀭𑀸 𑀤𑁂𑀯𑀢𑀸𑀢𑀺 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀅𑀧𑀸𑀓𑀝𑀸 𑀏𑀓𑀸 𑀤𑁂𑀯𑀢𑀸𑀢𑀺 𑀅𑀢𑁆𑀣𑁄. ‘‘𑀅𑀪𑀺𑀚𑀸𑀦𑀸𑀢𑀺 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀅𑀳𑀼𑀜𑀸𑀢𑀜𑁆𑀜𑀢𑀭𑀲𑁆𑀲 𑀫𑀳𑁂𑀲𑀓𑁆𑀔𑀲𑁆𑀲 𑀲𑀁𑀔𑀺𑀢𑁆𑀢𑁂𑀦 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺𑀁 𑀪𑀸𑀲𑀺𑀢𑀸’’𑀢𑀺 (𑀫. 𑀦𑀺. 𑁧.𑁩𑁬𑁫) 𑀏𑀢𑁆𑀣 𑀧𑀦 𑀅𑀪𑀺𑀜𑁆𑀜𑀸𑀢𑁄 𑀲𑀓𑁆𑀓𑁄𑀧𑀺 𑀤𑁂𑀯𑀭𑀸𑀚𑀸 𑀅𑀜𑁆𑀜𑀢𑀭𑁄𑀢𑀺 𑀯𑀼𑀢𑁆𑀢𑁄. 𑀤𑁂𑀯𑀢𑀸𑀢𑀺 𑀘 𑀇𑀤𑀁 𑀤𑁂𑀯𑀸𑀦𑀫𑁆𑀧𑀺 𑀤𑁂𑀯𑀥𑀻𑀢𑀸𑀦𑀫𑁆𑀧𑀺 𑀲𑀸𑀥𑀸𑀭𑀡𑀯𑀘𑀦𑀁. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀤𑁂𑀯𑁄 𑀅𑀥𑀺𑀧𑁆𑀧𑁂𑀢𑁄. 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁄 𑀔𑀬𑀲𑀼𑀦𑁆𑀤𑀭𑀸𑀪𑀺𑀭𑀽𑀧𑀅𑀩𑁆𑀪𑀦𑀼𑀫𑁄𑀤𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀢𑁆𑀣 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀸, 𑀪𑀦𑁆𑀢𑁂, 𑀭𑀢𑁆𑀢𑀺, 𑀦𑀺𑀓𑁆𑀔𑀦𑁆𑀢𑁄 𑀧𑀞𑀫𑁄 𑀬𑀸𑀫𑁄, 𑀘𑀺𑀭𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁮.𑁨𑁦) 𑀔𑀬𑁂 𑀤𑀺𑀲𑁆𑀲𑀢𑀺. ‘‘𑀅𑀬𑀁 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘𑀸’’𑀢𑀺 (𑀅. 𑀦𑀺. 𑁪.𑁧𑁦𑁦) 𑀏𑀯𑀫𑀸𑀤𑀻𑀲𑀼 𑀲𑀼𑀦𑁆𑀤𑀭𑁂.

‘‘𑀓𑁄 𑀫𑁂 𑀯𑀦𑁆𑀤𑀢𑀺 𑀧𑀸𑀤𑀸𑀦𑀺, 𑀇𑀤𑁆𑀥𑀺𑀬𑀸 𑀬𑀲𑀲𑀸 𑀚𑀮𑀁;

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸’’𑀢𑀺. (𑀯𑀺. 𑀯. 𑁮𑁫𑁭) 𑁋

𑀏𑀯𑀫𑀸𑀤𑀻𑀲𑀼 𑀅𑀪𑀺𑀭𑀽𑀧𑁂. ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀧𑀸𑀭𑀸. 𑁧𑁫) 𑀅𑀩𑁆𑀪𑀦𑀼𑀫𑁄𑀤𑀦𑁂. 𑀇𑀥 𑀧𑀦 𑀔𑀬𑁂. 𑀢𑁂𑀦 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸𑀢𑀺 𑀧𑀭𑀺𑀓𑁆𑀔𑀻𑀡𑀸𑀬 𑀭𑀢𑁆𑀢𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣𑀸𑀬𑀁 𑀤𑁂𑀯𑀧𑀼𑀢𑁆𑀢𑁄 𑀫𑀚𑁆𑀛𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀆𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸𑀢𑀺 𑀇𑀥 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁄 𑀅𑀪𑀺𑀭𑀽𑀧𑁂. 𑀯𑀡𑁆𑀡𑀲𑀤𑁆𑀤𑁄 𑀧𑀦 𑀙𑀯𑀺-𑀣𑀼𑀢𑀺-𑀓𑀼𑀮𑀯𑀕𑁆𑀕𑀓𑀸𑀭𑀡-𑀲𑀡𑁆𑀞𑀸𑀦𑀧𑀫𑀸𑀡𑀭𑀽𑀧𑀸𑀬𑀢𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀢𑁆𑀣, ‘‘𑀲𑀼𑀯𑀡𑁆𑀡𑀯𑀡𑁆𑀡𑁄𑀲𑀺 𑀪𑀕𑀯𑀸’’𑀢𑀺 𑀏𑀯𑀫𑀸𑀤𑀻𑀲𑀼 𑀙𑀯𑀺𑀬𑀸. ‘‘𑀓𑀤𑀸 𑀲𑀜𑁆𑀜𑀽𑀴𑁆𑀳𑀸 𑀧𑀦 𑀢𑁂 𑀕𑀳𑀧𑀢𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀡𑁆𑀡𑀸’’𑀢𑀺 (𑀫. 𑀦𑀺. 𑁨.𑁭𑁭) 𑀏𑀯𑀫𑀸𑀤𑀻𑀲𑀼 𑀣𑀼𑀢𑀺𑀬𑀁. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑁄 𑀕𑁄𑀢𑀫, 𑀯𑀡𑁆𑀡𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁩.𑁧𑁧𑁫) 𑀓𑀼𑀮𑀯𑀕𑁆𑀕𑁂. ‘‘𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀕𑀦𑁆𑀥𑀣𑁂𑀦𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁩𑁪) 𑀓𑀸𑀭𑀡𑁂. ‘‘𑀫𑀳𑀦𑁆𑀢𑀁 𑀳𑀢𑁆𑀣𑀺𑀭𑀸𑀚𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁩𑁮) 𑀲𑀡𑁆𑀞𑀸𑀦𑁂. ‘‘𑀢𑀬𑁄 𑀧𑀢𑁆𑀢𑀲𑁆𑀲 𑀯𑀡𑁆𑀡𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀧𑀸𑀭𑀸. 𑁬𑁦𑁨) 𑀧𑀫𑀸𑀡𑁂. ‘‘𑀯𑀡𑁆𑀡𑁄 𑀕𑀦𑁆𑀥𑁄 𑀭𑀲𑁄 𑀑𑀚𑀸’’𑀢𑀺 𑀏𑀯𑀫𑀸𑀤𑀻𑀲𑀼 𑀭𑀽𑀧𑀸𑀬𑀢𑀦𑁂. 𑀲𑁄 𑀇𑀥 𑀙𑀯𑀺𑀬𑀁 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸𑀢𑀺 𑀅𑀪𑀺𑀭𑀽𑀧𑀙𑀯𑀺𑀇𑀝𑁆𑀞𑀯𑀡𑁆𑀡𑀸, 𑀫𑀦𑀸𑀧𑀯𑀡𑁆𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑁂𑀯𑀢𑀸 𑀳𑀺 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀘𑁆𑀙𑀫𑀸𑀦𑀸 𑀧𑀓𑀢𑀺𑀯𑀡𑁆𑀡𑀁 𑀧𑀓𑀢𑀺𑀇𑀤𑁆𑀥𑀺𑀁 𑀧𑀚𑀳𑀺𑀢𑁆𑀯𑀸 𑀑𑀴𑀸𑀭𑀺𑀓𑀁 𑀅𑀢𑁆𑀢𑀪𑀸𑀯𑀁 𑀓𑀢𑁆𑀯𑀸 𑀅𑀢𑀺𑀭𑁂𑀓𑀯𑀡𑁆𑀡𑀁 𑀅𑀢𑀺𑀭𑁂𑀓𑀇𑀤𑁆𑀥𑀺𑀁 𑀫𑀸𑀧𑁂𑀢𑁆𑀯𑀸 𑀦𑀝𑀲𑀫𑀚𑁆𑀚𑀸𑀤𑀻𑀦𑀺 𑀕𑀘𑁆𑀙𑀦𑁆𑀢𑀸 𑀫𑀦𑀼𑀲𑁆𑀲𑀸 𑀯𑀺𑀬 𑀅𑀪𑀺𑀲𑀗𑁆𑀔𑀢𑁂𑀦 𑀓𑀸𑀬𑁂𑀦 𑀆𑀕𑀘𑁆𑀙𑀦𑁆𑀢𑀺. 𑀅𑀬𑀫𑁆𑀧𑀺 𑀤𑁂𑀯𑀧𑀼𑀢𑁆𑀢𑁄 𑀢𑀣𑁂𑀯 𑀆𑀕𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸’’𑀢𑀺.

𑀓𑁂𑀯𑀮𑀓𑀧𑁆𑀧𑀦𑁆𑀢𑀺 𑀏𑀢𑁆𑀣 𑀓𑁂𑀯𑀮𑀲𑀤𑁆𑀤𑁄 𑀅𑀦𑀯𑀲𑁂𑀲-𑀬𑁂𑀪𑀽𑀬𑁆𑀬-𑀅𑀩𑁆𑀬𑀸𑀫𑀺𑀲𑁆𑀲𑀸𑀦𑀢𑀺𑀭𑁂𑀓𑀤𑀴𑁆𑀳𑀢𑁆𑀣-𑀯𑀺𑀲𑀁𑀬𑁄𑀕𑀸𑀤𑀺𑀅𑀦𑁂𑀓𑀢𑁆𑀣𑁄. 𑀢𑀣𑀸 𑀳𑀺𑀲𑁆𑀲, ‘‘𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 (𑀧𑀸𑀭𑀸. 𑁧) 𑀏𑀯𑀫𑀸𑀤𑀻𑀲𑀼 𑀅𑀦𑀯𑀲𑁂𑀲𑀢𑁆𑀢𑀫𑀢𑁆𑀣𑁄. ‘‘𑀓𑁂𑀯𑀮𑀓𑀧𑁆𑀧𑀸 𑀘 𑀅𑀗𑁆𑀕𑀫𑀕𑀥𑀸 𑀧𑀳𑀽𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀆𑀤𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 𑀬𑁂𑀪𑀼𑀬𑁆𑀬𑀢𑀸. ‘‘𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺 (𑀯𑀺𑀪. 𑁨𑁨𑁫) 𑀏𑀯𑀫𑀸𑀤𑀻𑀲𑀼 𑀅𑀩𑁆𑀬𑀸𑀫𑀺𑀲𑁆𑀲𑀢𑀸. ‘‘𑀓𑁂𑀯𑀮𑀁 𑀲𑀤𑁆𑀥𑀸𑀫𑀢𑁆𑀢𑀓𑀁 𑀦𑀽𑀦 𑀅𑀬𑀫𑀸𑀬𑀲𑁆𑀫𑀸’’𑀢𑀺 (𑀫𑀳𑀸𑀯. 𑁨𑁪𑁪) 𑀏𑀯𑀫𑀸𑀤𑀻𑀲𑀼 𑀅𑀦𑀢𑀺𑀭𑁂𑀓𑀢𑀸. ‘‘𑀆𑀬𑀲𑁆𑀫𑀢𑁄 𑀅𑀦𑀼𑀭𑀼𑀤𑁆𑀥𑀲𑁆𑀲 𑀩𑀸𑀳𑀺𑀬𑁄 𑀦𑀸𑀫 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀓𑁂𑀯𑀮𑀓𑀧𑁆𑀧𑀁 𑀲𑀗𑁆𑀖𑀪𑁂𑀤𑀸𑀬 𑀞𑀺𑀢𑁄’’𑀢𑀺 (𑀅. 𑀦𑀺. 𑁪.𑁨𑁪𑁩) 𑀏𑀯𑀫𑀸𑀤𑀻𑀲𑀼 𑀤𑀴𑁆𑀳𑀢𑁆𑀣𑀢𑀸. ‘‘𑀓𑁂𑀯𑀮𑀻 𑀯𑀼𑀲𑀺𑀢𑀯𑀸 𑀉𑀢𑁆𑀢𑀫𑀧𑀼𑀭𑀺𑀲𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀲𑀁. 𑀦𑀺. 𑁩.𑁫𑁭) 𑀏𑀯𑀫𑀸𑀤𑀻𑀲𑀼 𑀯𑀺𑀲𑀁𑀬𑁄𑀕𑁄. 𑀇𑀥 𑀧𑀦𑀲𑁆𑀲 𑀅𑀦𑀯𑀲𑁂𑀲𑀢𑁆𑀢𑀫𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑁂𑀢𑁄.

𑀓𑀧𑁆𑀧𑀲𑀤𑁆𑀤𑁄 𑀧𑀦𑀸𑀬𑀁 𑀅𑀪𑀺𑀲𑀤𑁆𑀤𑀳𑀦-𑀯𑁄𑀳𑀸𑀭-𑀓𑀸𑀮-𑀧𑀜𑁆𑀜𑀢𑁆𑀢𑀺- 𑀙𑁂𑀤𑀦-𑀯𑀺𑀓𑀧𑁆𑀧-𑀮𑁂𑀲-𑀲𑀫𑀦𑁆𑀢𑀪𑀸𑀯𑀸𑀤𑀺-𑀅𑀦𑁂𑀓𑀢𑁆𑀣𑁄. 𑀢𑀣𑀸 𑀳𑀺𑀲𑁆𑀲, ‘‘𑀑𑀓𑀧𑁆𑀧𑀦𑀺𑀬𑀫𑁂𑀢𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲, 𑀬𑀣𑀸 𑀢𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺 (𑀫. 𑀦𑀺. 𑁧.𑁩𑁮𑁭) 𑀏𑀯𑀫𑀸𑀤𑀻𑀲𑀼 𑀅𑀪𑀺𑀲𑀤𑁆𑀤𑀳𑀦𑀫𑀢𑁆𑀣𑁄. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀺 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 (𑀘𑀽𑀴𑀯. 𑁨𑁫𑁦) 𑀏𑀯𑀫𑀸𑀤𑀻𑀲𑀼 𑀯𑁄𑀳𑀸𑀭𑁄. ‘‘𑀬𑁂𑀦 𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁩𑁮𑁭) 𑀓𑀸𑀮𑁄. ‘‘𑀇𑀘𑁆𑀘𑀸𑀬𑀲𑁆𑀫𑀸 𑀓𑀧𑁆𑀧𑁄’’𑀢𑀺 (𑀲𑀁. 𑀦𑀺. 𑁩.𑁧𑁨𑁪) 𑀏𑀯𑀫𑀸𑀤𑀻𑀲𑀼 𑀧𑀜𑁆𑀜𑀢𑁆𑀢𑀺. ‘‘𑀅𑀮𑀗𑁆𑀓𑀢𑀸 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽’’𑀢𑀺 (𑀲𑀁. 𑀦𑀺. 𑁪.𑁩𑁬𑁫) 𑀏𑀯𑀫𑀸𑀤𑀻𑀲𑀼 𑀙𑁂𑀤𑀦𑀁. ‘‘𑀓𑀧𑁆𑀧𑀢𑀺 𑀤𑁆𑀯𑀗𑁆𑀕𑀼𑀮𑀓𑀧𑁆𑀧𑁄’’𑀢𑀺 (𑀘𑀽𑀴𑀯. 𑁪𑁪𑁬) 𑀏𑀯𑀫𑀸𑀤𑀻𑀲𑀼 𑀯𑀺𑀓𑀧𑁆𑀧𑁄. ‘‘𑀅𑀢𑁆𑀣𑀺 𑀓𑀧𑁆𑀧𑁄 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺 (𑀅. 𑀦𑀺. 𑁮.𑁮𑁦) 𑀏𑀯𑀫𑀸𑀤𑀻𑀲𑀼 𑀮𑁂𑀲𑁄. ‘‘𑀓𑁂𑀯𑀮𑀓𑀧𑁆𑀧𑀁 𑀯𑁂𑀴𑀼𑀯𑀦𑀁 𑀑𑀪𑀸𑀲𑁂𑀢𑁆𑀯𑀸’’𑀢𑀺 (𑀲𑀁. 𑀦𑀺. 𑁧.𑁯𑁪) 𑀏𑀯𑀫𑀸𑀤𑀻𑀲𑀼 𑀲𑀫𑀦𑁆𑀢𑀪𑀸𑀯𑁄. 𑀇𑀥 𑀧𑀦𑀲𑁆𑀲 𑀲𑀫𑀦𑁆𑀢𑀪𑀸𑀯𑁄 𑀅𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀫𑀸 𑀓𑁂𑀯𑀮𑀓𑀧𑁆𑀧𑀁 𑀅𑀦𑁆𑀥𑀯𑀦𑀦𑁆𑀢𑀺 𑀏𑀢𑁆𑀣 𑀅𑀦𑀯𑀲𑁂𑀲𑀁 𑀲𑀫𑀦𑁆𑀢𑀢𑁄 𑀅𑀦𑁆𑀥𑀯𑀦𑀦𑁆𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀑𑀪𑀸𑀲𑁂𑀢𑁆𑀯𑀸𑀢𑀺 𑀯𑀢𑁆𑀣𑀸𑀮𑀗𑁆𑀓𑀸𑀭𑀲𑀭𑀻𑀭𑀲𑀫𑀼𑀝𑁆𑀞𑀺𑀢𑀸𑀬 𑀆𑀪𑀸𑀬 𑀨𑀭𑀺𑀢𑁆𑀯𑀸, 𑀘𑀦𑁆𑀤𑀺𑀫𑀸 𑀯𑀺𑀬 𑀘 𑀲𑀽𑀭𑀺𑀬𑁄 𑀯𑀺𑀬 𑀘 𑀏𑀓𑁄𑀪𑀸𑀲𑀁 𑀏𑀓𑀧𑀚𑁆𑀚𑁄𑀢𑀁 𑀓𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀻𑀢𑀺 𑀏𑀓𑀲𑁆𑀫𑀺𑀁 𑀅𑀦𑁆𑀢𑁂, 𑀏𑀓𑀲𑁆𑀫𑀺𑀁 𑀑𑀓𑀸𑀲𑁂 𑀅𑀝𑁆𑀞𑀸𑀲𑀺. 𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 ‘‘𑀪𑀺𑀓𑁆𑀔𑀼 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀯𑀘𑀦𑀫𑀯𑁄𑀘. 𑀓𑀲𑁆𑀫𑀸 𑀧𑀦𑀸𑀬𑀁 𑀅𑀯𑀦𑁆𑀤𑀺𑀢𑁆𑀯𑀸 𑀲𑀫𑀡𑀯𑁄𑀳𑀸𑀭𑁂𑀦𑁂𑀯 𑀓𑀣𑁂𑀢𑀻𑀢𑀺? 𑀲𑀫𑀡𑀲𑀜𑁆𑀜𑀸𑀲𑀫𑀼𑀤𑀸𑀘𑀸𑀭𑁂𑀦𑁂𑀯. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀬𑀁 𑀅𑀦𑁆𑀢𑀭𑀸 𑀓𑀸𑀫𑀸𑀯𑀘𑀭𑁂 𑀯𑀲𑀺. 𑀅𑀳𑀁 𑀧𑀦 𑀅𑀲𑁆𑀫𑀺 𑀢𑀢𑁄 𑀓𑀸𑀮𑀢𑁄 𑀧𑀝𑁆𑀞𑀸𑀬 𑀩𑁆𑀭𑀳𑁆𑀫𑀘𑀸𑀭𑀻’’𑀢𑀺 𑀲𑀫𑀡𑀲𑀜𑁆𑀜𑀸𑀯𑀲𑁆𑀲 𑀲𑀫𑀼𑀤𑀸𑀘𑀭𑀢𑀺, 𑀢𑀲𑁆𑀫𑀸 𑀅𑀯𑀦𑁆𑀤𑀺𑀢𑁆𑀯𑀸 𑀲𑀫𑀡𑀯𑁄𑀳𑀸𑀭𑁂𑀦𑁂𑀯 𑀓𑀣𑁂𑀢𑀺. 𑀧𑀼𑀩𑁆𑀩𑀲𑀳𑀸𑀬𑁄 𑀓𑀺𑀭𑁂𑀲𑁄 𑀤𑁂𑀯𑀧𑀼𑀢𑁆𑀢𑁄 𑀣𑁂𑀭𑀲𑁆𑀲. 𑀓𑀼𑀢𑁄 𑀧𑀝𑁆𑀞𑀸𑀬𑀸𑀢𑀺? 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬. 𑀬𑁄 𑀳𑀺 𑀧𑀼𑀩𑁆𑀩𑀬𑁄𑀕𑁂 𑀆𑀕𑀢𑁂𑀲𑀼 𑀧𑀜𑁆𑀘𑀲𑀼 𑀲𑀳𑀸𑀬𑁂𑀲𑀼 𑀅𑀦𑀼𑀣𑁂𑀭𑁄 𑀘𑀢𑀼𑀢𑁆𑀣𑀤𑀺𑀯𑀲𑁂 𑀅𑀦𑀸𑀕𑀸𑀫𑀻 𑀅𑀳𑁄𑀲𑀻𑀢𑀺 𑀯𑀼𑀢𑁆𑀢𑁄, 𑀅𑀬𑀁 𑀲𑁄. 𑀢𑀤𑀸 𑀓𑀺𑀭 𑀢𑁂𑀲𑀼 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀅𑀭𑀳𑀢𑁆𑀢𑁂𑀦𑁂𑀯 𑀲𑀤𑁆𑀥𑀺𑀁 𑀅𑀪𑀺𑀜𑁆𑀜𑀸 𑀆𑀕𑀫𑀺𑀁𑀲𑀼. 𑀲𑁄, ‘‘𑀫𑀬𑁆𑀳𑀁 𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀢𑁆𑀢’’𑀦𑁆𑀢𑀺 𑀯𑁂𑀳𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀅𑀦𑁄𑀢𑀢𑁆𑀢𑀤𑀳𑁂 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀉𑀢𑁆𑀢𑀭𑀓𑀼𑀭𑀼𑀢𑁄 𑀧𑀺𑀡𑁆𑀟𑀧𑀸𑀢𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸, ‘‘𑀇𑀫𑀁, 𑀆𑀯𑀼𑀲𑁄, 𑀧𑀺𑀡𑁆𑀟𑀧𑀸𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀣𑀸’’𑀢𑀺 𑀆𑀳. 𑀇𑀢𑀭𑁂 𑀆𑀳𑀁𑀲𑀼 𑁋 ‘‘𑀦, 𑀆𑀯𑀼𑀲𑁄, 𑀅𑀫𑁆𑀳𑀸𑀓𑀁 𑀏𑀯𑀁 𑀓𑀢𑀺𑀓𑀸 𑀅𑀢𑁆𑀣𑀺 𑁋 ‘𑀬𑁄 𑀧𑀞𑀫𑀁 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀆𑀳𑀭𑀢𑀺, 𑀢𑁂𑀦𑀸𑀪𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀲𑁂𑀳𑀺 𑀲𑀫𑀡𑀥𑀫𑁆𑀫𑁄 𑀓𑀸𑀢𑀩𑁆𑀩𑁄’𑀢𑀺. 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄 𑀉𑀧𑀦𑀺𑀲𑁆𑀲𑀬𑁂𑀦 𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀸𑀧𑀬𑀺𑀢𑁆𑀣. 𑀫𑀬𑀫𑁆𑀧𑀺 𑀲𑀘𑁂 𑀦𑁄 𑀉𑀧𑀦𑀺𑀲𑁆𑀲𑀬𑁄 𑀪𑀯𑀺𑀲𑁆𑀲𑀢𑀺, 𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀸𑀧𑁂𑀲𑁆𑀲𑀸𑀫. 𑀧𑀧𑀜𑁆𑀘𑁄 𑀏𑀲 𑀅𑀫𑁆𑀳𑀸𑀓𑀁, 𑀕𑀘𑁆𑀙𑀣 𑀢𑀼𑀫𑁆𑀳𑁂’’𑀢𑀺. 𑀲𑁄 𑀬𑀣𑀸𑀨𑀸𑀲𑀼𑀓𑀁 𑀕𑀦𑁆𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀧𑀼𑀦𑀤𑀺𑀯𑀲𑁂 𑀅𑀦𑀼𑀣𑁂𑀭𑁄 𑀅𑀦𑀸𑀕𑀸𑀫𑀺𑀨𑀮𑀁 𑀲𑀘𑁆𑀙𑀓𑀸𑀲𑀺, 𑀢𑀲𑁆𑀲 𑀅𑀪𑀺𑀜𑁆𑀜𑀸𑀬𑁄 𑀆𑀕𑀫𑀺𑀁𑀲𑀼. 𑀲𑁄𑀧𑀺 𑀢𑀣𑁂𑀯 𑀧𑀺𑀡𑁆𑀟𑀧𑀸𑀢𑀁 𑀆𑀳𑀭𑀺𑀢𑁆𑀯𑀸 𑀢𑁂𑀳𑀺 𑀧𑀝𑀺𑀓𑁆𑀔𑀺𑀢𑁆𑀢𑁄 𑀬𑀣𑀸𑀨𑀸𑀲𑀼𑀓𑀁 𑀕𑀦𑁆𑀢𑁆𑀯𑀸 𑀆𑀬𑀼𑀧𑀭𑀺𑀬𑁄𑀲𑀸𑀦𑁂 𑀲𑀼𑀤𑁆𑀥𑀸𑀯𑀸𑀲𑁂 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀲𑀼𑀤𑁆𑀥𑀸𑀯𑀸𑀲𑁂 𑀞𑀢𑁆𑀯𑀸 𑀢𑁂 𑀲𑀳𑀸𑀬𑁂 𑀑𑀮𑁄𑀓𑁂𑀦𑁆𑀢𑁄, 𑀏𑀓𑁄 𑀢𑀤𑀸𑀯 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀏𑀓𑁄 𑀅𑀥𑀼𑀦𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀅𑀭𑀺𑀬𑀪𑀽𑀫𑀺𑀁 𑀧𑀢𑁆𑀢𑁄, 𑀏𑀓𑁄 𑀮𑀸𑀪𑀲𑀓𑁆𑀓𑀸𑀭𑀁 𑀦𑀺𑀲𑁆𑀲𑀸𑀬, ‘‘𑀅𑀳𑀁 𑀅𑀭𑀳𑀸’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀼𑀧𑁆𑀧𑀸𑀭𑀓𑀧𑀝𑁆𑀝𑀦𑁂 𑀯𑀲𑀢𑀻𑀢𑀺 𑀤𑀺𑀲𑁆𑀯𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀦 𑀢𑁆𑀯𑀁 𑀅𑀭𑀳𑀸, 𑀦 𑀅𑀭𑀳𑀢𑁆𑀢𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄, 𑀕𑀘𑁆𑀙 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀸𑀳𑀻’’𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀲𑁄𑀧𑀺 𑀅𑀦𑁆𑀢𑀭𑀖𑀭𑁂 𑀪𑀕𑀯𑀦𑁆𑀢𑀁 𑀑𑀯𑀸𑀤𑀁 𑀬𑀸𑀘𑀺𑀢𑁆𑀯𑀸, ‘‘𑀢𑀲𑁆𑀫𑀸 𑀢𑀺𑀳 𑀢𑁂 𑀩𑀸𑀳𑀺𑀬 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀳𑁄𑀢𑀽’’𑀢𑀺 (𑀉𑀤𑀸. 𑁧𑁦) 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀑𑀯𑀤𑀺𑀢𑁄 𑀅𑀭𑀺𑀬𑀪𑀽𑀫𑀺𑀁 𑀲𑀫𑁆𑀧𑀸𑀧𑀼𑀡𑀺.

𑀢𑀢𑁄 𑀅𑀜𑁆𑀜𑁄 𑀏𑀓𑁄 𑀅𑀢𑁆𑀣𑀺, 𑀲𑁄 𑀓𑀼𑀳𑀺𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 𑀅𑀦𑁆𑀥𑀯𑀦𑁂 𑀲𑁂𑀓𑁆𑀔𑀧𑀝𑀺𑀧𑀤𑀁 𑀧𑀽𑀭𑀬𑀫𑀸𑀦𑁄 𑀯𑀺𑀳𑀭𑀢𑀻𑀢𑀺 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀳𑀸𑀬𑀓𑀲𑁆𑀲 𑀲𑀦𑁆𑀢𑀺𑀓𑁂 𑀕𑀫𑀺𑀲𑁆𑀲𑀸𑀫𑀻𑀢𑀺, 𑀕𑀘𑁆𑀙𑀦𑁆𑀢𑁂𑀦 𑀧𑀦 𑀢𑀼𑀘𑁆𑀙𑀳𑀢𑁆𑀣𑁂𑀦 𑀅𑀕𑀦𑁆𑀢𑁆𑀯𑀸 𑀓𑀺𑀜𑁆𑀘𑀺 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀲𑀳𑀸𑀬𑁄 𑀔𑁄 𑀧𑀦 𑀫𑁂 𑀦𑀺𑀭𑀸𑀫𑀺𑀲𑁄 𑀧𑀩𑁆𑀩𑀢𑀫𑀢𑁆𑀣𑀓𑁂 𑀯𑀲𑀦𑁆𑀢𑁄 𑀫𑀬𑀸 𑀆𑀓𑀸𑀲𑁂 𑀞𑀢𑁆𑀯𑀸 𑀤𑀺𑀦𑁆𑀦𑀁 𑀧𑀺𑀡𑁆𑀟𑀧𑀸𑀢𑀫𑁆𑀧𑀺 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀅𑀓𑀸𑀲𑀺, 𑀇𑀤𑀸𑀦𑀺 𑀆𑀫𑀺𑀲𑀧𑀡𑁆𑀡𑀸𑀓𑀸𑀭𑀁 𑀓𑀺𑀁 𑀕𑀡𑁆𑀳𑀺𑀲𑁆𑀲𑀢𑀺? 𑀥𑀫𑁆𑀫𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀩𑁆𑀭𑀳𑁆𑀫𑀮𑁄𑀓𑁂 𑀞𑀺𑀢𑁄𑀯 𑀭𑀢𑀦𑀸𑀯𑀴𑀺𑀁 𑀕𑀦𑁆𑀣𑁂𑀦𑁆𑀢𑁄 𑀯𑀺𑀬 𑀧𑀦𑁆𑀦𑀭𑀲 𑀧𑀜𑁆𑀳𑁂 𑀯𑀺𑀪𑀚𑀺𑀢𑁆𑀯𑀸 𑀢𑀁 𑀥𑀫𑁆𑀫𑀧𑀡𑁆𑀡𑀸𑀓𑀸𑀭𑀁 𑀆𑀤𑀸𑀬 𑀆𑀕𑀦𑁆𑀢𑁆𑀯𑀸 𑀲𑀳𑀸𑀬𑀲𑁆𑀲 𑀅𑀯𑀺𑀤𑀽𑀭𑁂 𑀞𑀢𑁆𑀯𑀸 𑀅𑀢𑁆𑀢𑀦𑁄 𑀲𑀫𑀡𑀲𑀜𑁆𑀜𑀸𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀢𑀁 𑀅𑀦𑀪𑀺𑀯𑀸𑀤𑁂𑀢𑁆𑀯𑀸𑀯, ‘‘𑀪𑀺𑀓𑁆𑀔𑀼 𑀪𑀺𑀓𑁆𑀔𑀽’’𑀢𑀺 𑀆𑀮𑀧𑀺𑀢𑁆𑀯𑀸 𑀅𑀬𑀁 𑀯𑀫𑁆𑀫𑀺𑀓𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀼𑀭𑀺𑀢𑀸𑀮𑀧𑀦𑀯𑀲𑁂𑀦 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀢𑀺 𑀆𑀫𑁂𑀟𑀺𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀯𑀸 𑀏𑀓𑀦𑁂𑀯 𑀢𑀺𑀮𑀓𑁂𑀦 𑀦𑀮𑀸𑀝𑀁 𑀦 𑀲𑁄𑀪𑀢𑀺, 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀜𑁆𑀜𑁂𑀲𑀼𑀧𑀺 𑀤𑀺𑀦𑁆𑀦𑁂𑀲𑀼 𑀨𑀼𑀮𑁆𑀮𑀺𑀢𑀫𑀡𑁆𑀟𑀺𑀢𑀁 𑀯𑀺𑀬 𑀲𑁄𑀪𑀢𑀺, 𑀏𑀯𑀁 𑀏𑀓𑁂𑀦𑁂𑀯 𑀧𑀤𑁂𑀦 𑀯𑀘𑀦𑀁 𑀦 𑀲𑁄𑀪𑀢𑀺, 𑀧𑀭𑀺𑀯𑀸𑀭𑀺𑀓𑀧𑀤𑁂𑀦 𑀲𑀤𑁆𑀥𑀺𑀁 𑀨𑀼𑀮𑁆𑀮𑀺𑀢𑀫𑀡𑁆𑀟𑀺𑀢𑀁 𑀯𑀺𑀬 𑀲𑁄𑀪𑀢𑀻𑀢𑀺 𑀢𑀁 𑀧𑀭𑀺𑀯𑀸𑀭𑀺𑀓𑀧𑀤𑀯𑀲𑁂𑀦 𑀯𑀘𑀦𑀁 𑀨𑀼𑀮𑁆𑀮𑀺𑀢𑀫𑀡𑁆𑀟𑀺𑀢𑀁 𑀯𑀺𑀬 𑀓𑀭𑁄𑀦𑁆𑀢𑁄𑀧𑀺 𑀏𑀯𑀫𑀸𑀳.

𑀅𑀬𑀁 𑀯𑀫𑁆𑀫𑀺𑀓𑁄𑀢𑀺 𑀧𑀼𑀭𑀢𑁄 𑀞𑀺𑀢𑁄 𑀯𑀫𑁆𑀫𑀺𑀓𑁄 𑀦𑀸𑀫 𑀦𑀢𑁆𑀣𑀺, 𑀤𑁂𑀲𑀦𑀸𑀯𑀲𑁂𑀦 𑀧𑀦 𑀧𑀼𑀭𑀢𑁄 𑀞𑀺𑀢𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀬 𑀅𑀬𑀦𑁆𑀢𑀺 𑀆𑀳. 𑀮𑀗𑁆𑀕𑀺𑀦𑁆𑀢𑀺 𑀲𑀢𑁆𑀣𑀁 𑀆𑀤𑀸𑀬 𑀔𑀡𑀦𑁆𑀢𑁄 𑀧𑀮𑀺𑀖𑀁 𑀅𑀤𑁆𑀤𑀲. 𑀉𑀓𑁆𑀔𑀺𑀧 𑀮𑀗𑁆𑀕𑀺𑀁 𑀅𑀪𑀺𑀓𑁆𑀔𑀡 𑀲𑀼𑀫𑁂𑀥𑀸𑀢𑀺 𑀢𑀸𑀢, 𑀧𑀡𑁆𑀟𑀺𑀢, 𑀮𑀗𑁆𑀕𑀻 𑀦𑀸𑀫 𑀭𑀢𑁆𑀢𑀺𑀁 𑀥𑀽𑀫𑀸𑀬𑀢𑀺 𑀤𑀺𑀯𑀸 𑀧𑀚𑁆𑀚𑀮𑀢𑀺. 𑀉𑀓𑁆𑀔𑀺𑀧𑁂𑀢 𑀧𑀭𑀁 𑀧𑀭𑀢𑁄 𑀔𑀡𑀸𑀢𑀺. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀉𑀤𑁆𑀥𑀼𑀫𑀸𑀬𑀺𑀓𑀦𑁆𑀢𑀺 𑀫𑀡𑁆𑀟𑀽𑀓𑀁. 𑀘𑀗𑁆𑀓𑀯𑀸𑀭𑀦𑁆𑀢𑀺 𑀔𑀸𑀭𑀧𑀭𑀺𑀲𑁆𑀲𑀸𑀯𑀦𑀁. 𑀓𑀼𑀫𑁆𑀫𑀦𑁆𑀢𑀺 𑀓𑀘𑁆𑀙𑀧𑀁. 𑀅𑀲𑀺𑀲𑀽𑀦𑀦𑁆𑀢𑀺 𑀫𑀁𑀲𑀘𑁆𑀙𑁂𑀤𑀓𑀁 𑀅𑀲𑀺𑀜𑁆𑀘𑁂𑀯 𑀅𑀥𑀺𑀓𑀼𑀝𑁆𑀝𑀦𑀜𑁆𑀘. 𑀫𑀁𑀲𑀧𑁂𑀲𑀺𑀦𑁆𑀢𑀺 𑀦𑀺𑀲𑀤𑀧𑁄𑀢𑀧𑁆𑀧𑀫𑀸𑀡𑀁 𑀅𑀮𑁆𑀮𑀫𑀁𑀲𑀧𑀺𑀡𑁆𑀟𑀁. 𑀦𑀸𑀕𑀦𑁆𑀢𑀺 𑀲𑀼𑀫𑀦𑀧𑀼𑀧𑁆𑀨𑀓𑀮𑀸𑀧𑀲𑀤𑀺𑀲𑀁 𑀫𑀳𑀸𑀨𑀡𑀁 𑀢𑀺𑀯𑀺𑀥𑀲𑁄𑀯𑀢𑁆𑀣𑀺𑀓𑀧𑀭𑀺𑀓𑁆𑀔𑀺𑀢𑁆𑀢𑀁 𑀅𑀳𑀺𑀦𑀸𑀕𑀁 𑀅𑀤𑁆𑀤𑀲. 𑀫𑀸 𑀦𑀸𑀕𑀁 𑀖𑀝𑁆𑀝𑁂𑀲𑀻𑀢𑀺 𑀤𑀡𑁆𑀟𑀓𑀓𑁄𑀝𑀺𑀬𑀸 𑀯𑀸 𑀯𑀮𑁆𑀮𑀺𑀓𑁄𑀝𑀺𑀬𑀸 𑀯𑀸 𑀧𑀁𑀲𑀼𑀘𑀼𑀡𑁆𑀡𑀁 𑀯𑀸 𑀧𑀦 𑀔𑀺𑀧𑀫𑀸𑀦𑁄 𑀫𑀸 𑀦𑀸𑀕𑀁 𑀖𑀝𑁆𑀝𑀬𑀺. 𑀦𑀫𑁄 𑀓𑀭𑁄𑀳𑀺 𑀦𑀸𑀕𑀲𑁆𑀲𑀸𑀢𑀺 𑀉𑀧𑀭𑀺𑀯𑀸𑀢𑀢𑁄 𑀅𑀧𑀕𑀫𑁆𑀫 𑀲𑀼𑀤𑁆𑀥𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀦𑀸𑀕𑀲𑁆𑀲 𑀦𑀫𑀓𑁆𑀓𑀸𑀭𑀁 𑀓𑀭𑁄𑀳𑀺. 𑀦𑀸𑀕𑁂𑀦 𑀅𑀥𑀺𑀲𑀬𑀺𑀢𑀁 𑀥𑀦𑀁 𑀦𑀸𑀫 𑀬𑀸𑀯 𑀲𑀢𑁆𑀢𑀫𑀸 𑀓𑀼𑀮𑀧𑀭𑀺𑀯𑀝𑁆𑀝𑀸 𑀔𑀸𑀤𑀢𑁄 𑀦 𑀔𑀻𑀬𑀢𑀺, 𑀦𑀸𑀕𑁄 𑀢𑁂 𑀅𑀥𑀺𑀲𑀬𑀺𑀢𑀁 𑀥𑀦𑀁 𑀤𑀲𑁆𑀲𑀢𑀺, 𑀢𑀲𑁆𑀫𑀸 𑀦𑀫𑁄 𑀓𑀭𑁄𑀳𑀺 𑀦𑀸𑀕𑀲𑁆𑀲𑀸𑀢𑀺. 𑀇𑀢𑁄 𑀯𑀸 𑀧𑀦 𑀲𑀼𑀢𑁆𑀯𑀸𑀢𑀺 𑀬𑀣𑀸 𑀤𑀼𑀓𑁆𑀔𑀓𑁆𑀔𑀦𑁆𑀥𑁂 𑀇𑀢𑁄𑀢𑀺 𑀲𑀸𑀲𑀦𑁂 𑀦𑀺𑀲𑁆𑀲𑀓𑀁, 𑀦 𑀢𑀣𑀸 𑀇𑀥. 𑀇𑀥 𑀧𑀦 𑀤𑁂𑀯𑀧𑀼𑀢𑁆𑀢𑁂 𑀦𑀺𑀲𑁆𑀲𑀓𑁆𑀓𑀁, 𑀢𑀲𑁆𑀫𑀸 𑀇𑀢𑁄 𑀯𑀸 𑀧𑀦𑀸𑀢𑀺 𑀫𑀫 𑀯𑀸 𑀧𑀦 𑀲𑀦𑁆𑀢𑀺𑀓𑀸 𑀲𑀼𑀢𑁆𑀯𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑁨𑁫𑁧. 𑀘𑀸𑀢𑀼𑀫𑁆𑀫𑀳𑀸𑀪𑀽𑀢𑀺𑀓𑀲𑁆𑀲𑀸𑀢𑀺 𑀘𑀢𑀼𑀫𑀳𑀸𑀪𑀽𑀢𑀫𑀬𑀲𑁆𑀲. 𑀓𑀸𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀲𑀭𑀻𑀭𑀲𑁆𑀲 𑀦𑀸𑀫𑀁. 𑀬𑀣𑁂𑀯 𑀳𑀺 𑀩𑀸𑀳𑀺𑀭𑀓𑁄 𑀯𑀫𑁆𑀫𑀺𑀓𑁄, 𑀯𑀫𑀢𑀻𑀢𑀺 𑀯𑀦𑁆𑀢𑀓𑁄𑀢𑀺 𑀯𑀦𑁆𑀢𑀼𑀲𑁆𑀲𑀬𑁄𑀢𑀺 𑀯𑀦𑁆𑀢𑀲𑀺𑀦𑁂𑀳𑀲𑀫𑁆𑀩𑀦𑁆𑀥𑁄𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀯𑀫𑁆𑀫𑀺𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀳𑀺 𑀅𑀳𑀺𑀫𑀗𑁆𑀕𑀼𑀲𑀉𑀦𑁆𑀤𑀽𑀭𑀖𑀭𑀕𑁄𑀴𑀺𑀓𑀸𑀤𑀬𑁄 𑀦𑀸𑀦𑀧𑁆𑀧𑀓𑀸𑀭𑁂 𑀧𑀸𑀡𑀓𑁂 𑀯𑀫𑀢𑀻𑀢𑀺 𑀯𑀫𑁆𑀫𑀺𑀓𑁄. 𑀉𑀧𑀘𑀺𑀓𑀸𑀳𑀺 𑀯𑀦𑁆𑀢𑀓𑁄𑀢𑀺 𑀯𑀫𑁆𑀫𑀺𑀓𑁄. 𑀉𑀧𑀘𑀺𑀓𑀸𑀳𑀺 𑀯𑀫𑀺𑀢𑁆𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀉𑀓𑁆𑀔𑀺𑀢𑁆𑀢𑀧𑀁𑀲𑀼𑀘𑀼𑀡𑁆𑀡𑁂𑀦 𑀓𑀝𑀺𑀧𑁆𑀧𑀫𑀸𑀡𑁂𑀦𑀧𑀺 𑀧𑁄𑀭𑀺𑀲𑀧𑁆𑀧𑀫𑀸𑀡𑁂𑀦𑀧𑀺 𑀉𑀲𑁆𑀲𑀺𑀢𑁄𑀢𑀺 𑀯𑀫𑁆𑀫𑀺𑀓𑁄. 𑀉𑀧𑀘𑀺𑀓𑀸𑀳𑀺 𑀯𑀦𑁆𑀢𑀔𑁂𑀴𑀲𑀺𑀦𑁂𑀳𑁂𑀦 𑀆𑀩𑀤𑁆𑀥𑀢𑀸𑀬 𑀲𑀢𑁆𑀢𑀲𑀢𑁆𑀢𑀸𑀳𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂𑀧𑀺 𑀦 𑀯𑀺𑀧𑁆𑀧𑀓𑀺𑀭𑀺𑀬𑀢𑀺, 𑀦𑀺𑀤𑀸𑀖𑁂𑀧𑀺 𑀢𑀢𑁄 𑀧𑀁𑀲𑀼𑀫𑀼𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀢𑀲𑁆𑀫𑀺𑀁 𑀫𑀼𑀝𑁆𑀞𑀺𑀦𑀸 𑀧𑀻𑀴𑀺𑀬𑀫𑀸𑀦𑁂 𑀲𑀺𑀦𑁂𑀳𑁄 𑀦𑀺𑀓𑁆𑀔𑀫𑀢𑀺, 𑀏𑀯𑀁 𑀯𑀦𑁆𑀢𑀲𑀺𑀦𑁂𑀳𑁂𑀦 𑀲𑀫𑁆𑀩𑀤𑁆𑀥𑁄𑀢𑀺 𑀯𑀫𑁆𑀫𑀺𑀓𑁄. 𑀏𑀯𑀫𑀬𑀁 𑀓𑀸𑀬𑁄𑀧𑀺, ‘‘𑀅𑀓𑁆𑀔𑀺𑀫𑁆𑀳𑀸 𑀅𑀓𑁆𑀔𑀺𑀕𑀽𑀣𑀓𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀸𑀦𑀧𑁆𑀧𑀓𑀸𑀭𑀓𑀁 𑀅𑀲𑀼𑀘𑀺𑀓𑀮𑀺𑀫𑀮𑀁 𑀯𑀫𑀢𑀻𑀢𑀺 𑀯𑀫𑁆𑀫𑀺𑀓𑁄. 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀔𑀻𑀡𑀸𑀲𑀯𑀸 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑁂𑀦 𑀅𑀢𑁆𑀢𑀪𑀸𑀯𑀁 𑀙𑀟𑁆𑀟𑁂𑀢𑁆𑀯𑀸 𑀕𑀢𑀸𑀢𑀺 𑀅𑀭𑀺𑀬𑁂𑀳𑀺 𑀯𑀦𑁆𑀢𑀓𑁄𑀢𑀺𑀧𑀺 𑀯𑀫𑁆𑀫𑀺𑀓𑁄. 𑀬𑁂𑀳𑀺 𑀘𑀸𑀬𑀁 𑀢𑀻𑀳𑀺 𑀅𑀝𑁆𑀞𑀺𑀲𑀢𑁂𑀳𑀺 𑀉𑀲𑁆𑀲𑀺𑀢𑁄 𑀦𑁆𑀳𑀸𑀭𑀼𑀲𑀫𑁆𑀩𑀤𑁆𑀥𑁄 𑀫𑀁𑀲𑀸𑀯𑀮𑁂𑀧𑀦𑁄 𑀅𑀮𑁆𑀮𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑁄 𑀙𑀯𑀺𑀭𑀜𑁆𑀚𑀺𑀢𑁄 𑀲𑀢𑁆𑀢𑁂 𑀯𑀜𑁆𑀘𑁂𑀢𑀺, 𑀢𑀁 𑀲𑀩𑁆𑀩𑀁 𑀅𑀭𑀺𑀬𑁂𑀳𑀺 𑀯𑀦𑁆𑀢𑀫𑁂𑀯𑀸𑀢𑀺 𑀯𑀦𑁆𑀢𑀼𑀲𑁆𑀲𑀬𑁄𑀢𑀺𑀧𑀺 𑀯𑀫𑁆𑀫𑀺𑀓𑁄. ‘‘𑀢𑀡𑁆𑀳𑀸 𑀚𑀦𑁂𑀢𑀺 𑀧𑀼𑀭𑀺𑀲𑀁, 𑀘𑀺𑀢𑁆𑀢𑀫𑀲𑁆𑀲 𑀯𑀺𑀥𑀸𑀯𑀢𑀻’’𑀢𑀺 (𑀲𑀁. 𑀦𑀺. 𑁧.𑁫𑁫) 𑀏𑀯𑀁 𑀢𑀡𑁆𑀳𑀸𑀬 𑀚𑀦𑀺𑀢𑀢𑁆𑀢𑀸 𑀅𑀭𑀺𑀬𑁂𑀳𑀺 𑀯𑀦𑁆𑀢𑁂𑀦𑁂𑀯 𑀢𑀡𑁆𑀳𑀸𑀲𑀺𑀦𑁂𑀳𑁂𑀦 𑀲𑀫𑁆𑀩𑀤𑁆𑀥𑁄 𑀅𑀬𑀦𑁆𑀢𑀺 𑀯𑀦𑁆𑀢𑀲𑀺𑀦𑁂𑀳𑁂𑀦 𑀲𑀫𑁆𑀩𑀤𑁆𑀥𑁄𑀢𑀺𑀧𑀺 𑀯𑀫𑁆𑀫𑀺𑀓𑁄. 𑀬𑀣𑀸 𑀘 𑀯𑀫𑁆𑀫𑀺𑀓𑀲𑁆𑀲 𑀅𑀦𑁆𑀢𑁄 𑀦𑀸𑀦𑀧𑁆𑀧𑀓𑀸𑀭𑀸 𑀧𑀸𑀡𑀓𑀸 𑀢𑀢𑁆𑀣𑁂𑀯 𑀚𑀸𑀬𑀦𑁆𑀢𑀺, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀓𑀭𑁄𑀦𑁆𑀢𑀺, 𑀕𑀺𑀮𑀸𑀦𑀸 𑀲𑀬𑀦𑁆𑀢𑀺, 𑀫𑀢𑀸 𑀧𑀢𑀦𑁆𑀢𑀺. 𑀇𑀢𑀺 𑀲𑁄 𑀢𑁂𑀲𑀁 𑀲𑀽𑀢𑀺𑀖𑀭𑀁 𑀯𑀘𑁆𑀘𑀓𑀼𑀝𑀺 𑀕𑀺𑀮𑀸𑀦𑀲𑀸𑀮𑀸 𑀲𑀼𑀲𑀸𑀦𑀜𑁆𑀘 𑀳𑁄𑀢𑀺. 𑀏𑀯𑀁 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀤𑀻𑀦𑀫𑁆𑀧𑀺 𑀓𑀸𑀬𑁄 𑀅𑀬𑀁 𑀕𑁄𑀧𑀺𑀢𑀭𑀓𑁆𑀔𑀺𑀢𑁄 𑀫𑀡𑁆𑀟𑀺𑀢𑀧𑁆𑀧𑀲𑀸𑀥𑀺𑀢𑁄 𑀫𑀳𑀸𑀦𑀼𑀪𑀸𑀯𑀸𑀦𑀁 𑀓𑀸𑀬𑁄𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 𑀙𑀯𑀺𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀘𑀫𑁆𑀫𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀫𑀁𑀲𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀦𑁆𑀳𑀸𑀭𑀼𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀅𑀝𑁆𑀞𑀺𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀅𑀝𑁆𑀞𑀺𑀫𑀺𑀜𑁆𑀚𑀦𑀺𑀲𑁆𑀲𑀺𑀢𑀸 𑀧𑀸𑀡𑀸𑀢𑀺 𑀏𑀯𑀁 𑀓𑀼𑀮𑀕𑀡𑀦𑀸𑀬 𑀅𑀲𑀻𑀢𑀺𑀫𑀢𑁆𑀢𑀸𑀦𑀺 𑀓𑀺𑀫𑀺𑀓𑀼𑀮𑀲𑀳𑀲𑁆𑀲𑀸𑀦𑀺 𑀅𑀦𑁆𑀢𑁄𑀓𑀸𑀬𑀲𑁆𑀫𑀺𑀁𑀬𑁂𑀯 𑀚𑀸𑀬𑀦𑁆𑀢𑀺, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀓𑀭𑁄𑀦𑁆𑀢𑀺, 𑀕𑁂𑀮𑀜𑁆𑀜𑁂𑀦 𑀆𑀢𑀼𑀭𑀺𑀢𑀸𑀦𑀺 𑀲𑀬𑀦𑁆𑀢𑀺, 𑀫𑀢𑀸𑀦𑀺 𑀧𑀢𑀦𑁆𑀢𑀺, 𑀇𑀢𑀺 𑀅𑀬𑀫𑁆𑀧𑀺 𑀢𑁂𑀲𑀁 𑀧𑀸𑀡𑀸𑀦𑀁 𑀲𑀽𑀢𑀺𑀖𑀭𑀁 𑀯𑀘𑁆𑀘𑀓𑀼𑀝𑀺 𑀕𑀺𑀮𑀸𑀦𑀲𑀸𑀮𑀸 𑀲𑀼𑀲𑀸𑀦𑀜𑁆𑀘 𑀳𑁄𑀢𑀻𑀢𑀺 ‘‘𑀯𑀫𑁆𑀫𑀺𑀓𑁄’’ 𑀢𑁆𑀯𑁂𑀯 𑀲𑀗𑁆𑀔𑀁 𑀕𑀢𑁄. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀯𑀫𑁆𑀫𑀺𑀓𑁄𑀢𑀺 𑀔𑁄, 𑀪𑀺𑀓𑁆𑀔𑀼, 𑀇𑀫𑀲𑁆𑀲 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀲 𑀓𑀸𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺.

𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑀲𑁆𑀲𑀸𑀢𑀺 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀦𑀺𑀩𑁆𑀩𑀢𑁆𑀢𑁂𑀦 𑀫𑀸𑀢𑀸𑀧𑁂𑀢𑁆𑀢𑀺𑀓𑁂𑀦 𑀲𑀼𑀓𑁆𑀓𑀲𑁄𑀡𑀺𑀢𑁂𑀦 𑀲𑀫𑁆𑀪𑀽𑀢𑀲𑁆𑀲. 𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑀲𑁆𑀲𑀸𑀢𑀺 𑀑𑀤𑀦𑁂𑀦 𑀘𑁂𑀯 𑀓𑀼𑀫𑁆𑀫𑀸𑀲𑁂𑀦 𑀘 𑀉𑀧𑀘𑀺𑀢𑀲𑁆𑀲 𑀯𑀟𑁆𑀠𑀺𑀢𑀲𑁆𑀲. 𑀅𑀦𑀺𑀘𑁆𑀘𑀼𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑀲𑁆𑀲𑀸𑀢𑀺 𑀏𑀢𑁆𑀣 𑀅𑀬𑀁 𑀓𑀸𑀬𑁄 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀥𑀫𑁆𑀫𑁄. 𑀤𑀼𑀕𑁆𑀕𑀦𑁆𑀥𑀯𑀺𑀖𑀸𑀢𑀢𑁆𑀣𑀸𑀬 𑀢𑀦𑀼𑀯𑀺𑀮𑁂𑀧𑀦𑁂𑀦 𑀉𑀘𑁆𑀙𑀸𑀤𑀦𑀥𑀫𑁆𑀫𑁄. 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀩𑀸𑀥𑀯𑀺𑀦𑁄𑀤𑀦𑀢𑁆𑀣𑀸𑀬 𑀔𑀼𑀤𑁆𑀤𑀓𑀲𑀫𑁆𑀩𑀸𑀳𑀦𑁂𑀦 𑀧𑀭𑀺𑀫𑀤𑁆𑀤𑀦𑀥𑀫𑁆𑀫𑁄. 𑀤𑀳𑀭𑀓𑀸𑀮𑁂 𑀯𑀸 𑀊𑀭𑀽𑀲𑀼 𑀲𑀬𑀸𑀧𑁂𑀢𑁆𑀯𑀸 𑀕𑀩𑁆𑀪𑀯𑀸𑀲𑁂𑀦 𑀤𑀼𑀲𑁆𑀲𑀡𑁆𑀞𑀺𑀢𑀸𑀦𑀁 𑀢𑁂𑀲𑀁 𑀢𑁂𑀲𑀁 𑀅𑀗𑁆𑀕𑀸𑀦𑀁 𑀲𑀡𑁆𑀞𑀸𑀦𑀲𑀫𑁆𑀧𑀸𑀤𑀦𑀢𑁆𑀣𑀁 𑀅𑀜𑁆𑀙𑀦𑀧𑀻𑀴𑀦𑀸𑀤𑀺𑀯𑀲𑁂𑀦 𑀧𑀭𑀺𑀫𑀤𑁆𑀤𑀦𑀥𑀫𑁆𑀫𑁄. 𑀏𑀯𑀁 𑀧𑀭𑀺𑀳𑀭𑀢𑁄𑀧𑀺 𑀘 𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑁄 𑀪𑀺𑀚𑁆𑀚𑀢𑀺 𑀘𑁂𑀯 𑀯𑀺𑀓𑀺𑀭𑀢𑀺 𑀘, 𑀏𑀯𑀁 𑀲𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑀉𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀧𑀤𑁂𑀳𑀺 𑀲𑀫𑀼𑀤𑀬𑁄 𑀓𑀣𑀺𑀢𑁄, 𑀅𑀦𑀺𑀘𑁆𑀘𑀪𑁂𑀤𑀯𑀺𑀤𑁆𑀥𑀁𑀲𑀦𑀧𑀤𑁂𑀳𑀺 𑀅𑀢𑁆𑀣𑀗𑁆𑀕𑀫𑁄. 𑀏𑀯𑀁 𑀲𑀢𑁆𑀢𑀳𑀺𑀧𑀺 𑀧𑀤𑁂𑀳𑀺 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀲 𑀓𑀸𑀬𑀲𑁆𑀲 𑀉𑀘𑁆𑀘𑀸𑀯𑀘𑀪𑀸𑀯𑁄 𑀯𑀟𑁆𑀠𑀺𑀧𑀭𑀺𑀳𑀸𑀦𑀺 𑀲𑀫𑀼𑀤𑀬𑀢𑁆𑀣𑀗𑁆𑀕𑀫𑁄 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀤𑀺𑀯𑀸 𑀓𑀫𑁆𑀫𑀦𑁆𑀢𑁂𑀢𑀺 𑀤𑀺𑀯𑀸 𑀓𑀢𑁆𑀢𑀩𑁆𑀩𑀓𑀫𑁆𑀫𑀦𑁆𑀢𑁂. 𑀥𑀽𑀫𑀸𑀬𑀦𑀸𑀢𑀺 𑀏𑀢𑁆𑀣 𑀅𑀬𑀁 𑀥𑀽𑀫𑀲𑀤𑁆𑀤𑁄 𑀓𑁄𑀥𑁂 𑀢𑀡𑁆𑀳𑀸𑀬 𑀯𑀺𑀢𑀓𑁆𑀓𑁂 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀥𑀫𑁆𑀫𑀤𑁂𑀲𑀦𑀸𑀬 𑀧𑀓𑀢𑀺𑀥𑀽𑀫𑁂𑀢𑀺 𑀇𑀫𑁂𑀲𑀼 𑀅𑀢𑁆𑀣𑁂𑀲𑀼 𑀯𑀢𑁆𑀢𑀢𑀺. ‘‘𑀓𑁄𑀥𑁄 𑀥𑀽𑀫𑁄 𑀪𑀲𑁆𑀫𑀦𑀺𑀫𑁄𑀲𑀯𑀚𑁆𑀚’’𑀦𑁆𑀢𑀺 (𑀲𑀁. 𑀦𑀺. 𑁧.𑁧𑁬𑁫) 𑀏𑀢𑁆𑀣 𑀳𑀺 𑀓𑁄𑀥𑁂 𑀯𑀢𑁆𑀢𑀢𑀺. ‘‘𑀇𑀘𑁆𑀙𑀸𑀥𑀽𑀫𑀸𑀬𑀺𑀢𑀸 𑀲𑀢𑁆𑀢𑀸’’𑀢𑀺 𑀏𑀢𑁆𑀣 𑀢𑀡𑁆𑀳𑀸𑀬. ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀅𑀯𑀺𑀤𑀽𑀭𑁂 𑀥𑀽𑀫𑀸𑀬𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻’’𑀢𑀺 𑀏𑀢𑁆𑀣 𑀯𑀺𑀢𑀓𑁆𑀓𑁂.

‘‘𑀧𑀗𑁆𑀓𑁄 𑀘 𑀓𑀸𑀫𑀸 𑀧𑀮𑀺𑀧𑁄 𑀘 𑀓𑀸𑀫𑀸,

𑀪𑀬𑀜𑁆𑀘 𑀫𑁂𑀢𑀁 𑀢𑀺𑀫𑀽𑀮𑀁 𑀧𑀯𑀼𑀢𑁆𑀢𑀁;

𑀭𑀚𑁄 𑀘 𑀥𑀽𑀫𑁄 𑀘 𑀫𑀬𑀸 𑀧𑀓𑀸𑀲𑀺𑀢𑀸;

𑀳𑀺𑀢𑁆𑀯𑀸 𑀢𑀼𑀯𑀁 𑀧𑀩𑁆𑀩𑀚 𑀩𑁆𑀭𑀳𑁆𑀫𑀤𑀢𑁆𑀢𑀸’’𑀢𑀺. (𑀚𑀸. 𑁧.𑁬.𑁧𑁪) 𑁋

𑀏𑀢𑁆𑀣 𑀧𑀜𑁆𑀘𑀓𑀸𑀫𑀕𑀼𑀡𑁂𑀲𑀼. ‘‘𑀥𑀽𑀫𑀁 𑀓𑀢𑁆𑀢𑀸 𑀳𑁄𑀢𑀻’’𑀢𑀺 (𑀫. 𑀦𑀺. 𑁧.𑁩𑁪𑁯) 𑀏𑀢𑁆𑀣 𑀥𑀫𑁆𑀫𑀤𑁂𑀲𑀦𑀸𑀬. ‘‘𑀥𑀚𑁄 𑀭𑀣𑀲𑁆𑀲 𑀧𑀜𑁆𑀜𑀸𑀡𑀁, 𑀥𑀽𑀫𑁄 𑀧𑀜𑁆𑀜𑀸𑀡𑀫𑀕𑁆𑀕𑀺𑀦𑁄’’𑀢𑀺 (𑀲𑀁. 𑀦𑀺. 𑁧.𑁭𑁨) 𑀏𑀢𑁆𑀣 𑀧𑀓𑀢𑀺𑀥𑀽𑀫𑁂. 𑀇𑀥 𑀧𑀦𑀸𑀬𑀁 𑀯𑀺𑀢𑀓𑁆𑀓𑁂 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦𑀸𑀳 ‘‘𑀅𑀬𑀁 𑀭𑀢𑁆𑀢𑀺𑀁 𑀥𑀽𑀫𑀸𑀬𑀦𑀸’’𑀢𑀺.

𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀢𑀣𑀸𑀕𑀢𑁄 𑀳𑀺 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀩𑀸𑀳𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄 𑀦𑀸𑀫. 𑀬𑀣𑀸𑀳 𑁋 ‘‘𑀲𑀢𑁆𑀢𑀦𑁆𑀦𑀁 𑀔𑁄, 𑀪𑀺𑀓𑁆𑀔𑀼, 𑀥𑀫𑁆𑀫𑀸𑀦𑀁 𑀩𑀸𑀳𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄. 𑀓𑀢𑀫𑁂𑀲𑀁 𑀲𑀢𑁆𑀢𑀦𑁆𑀦𑀁? 𑀭𑀸𑀕𑁄 𑀩𑀸𑀳𑀺𑀢𑁄 𑀳𑁄𑀢𑀺, 𑀤𑁄𑀲𑁄… 𑀫𑁄𑀳𑁄… 𑀫𑀸𑀦𑁄… 𑀲𑀓𑁆𑀓𑀸𑀬𑀤𑀺𑀝𑁆𑀞𑀺… 𑀯𑀺𑀘𑀺𑀓𑀺𑀘𑁆𑀙𑀸… 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀩𑀸𑀳𑀺𑀢𑁄 𑀳𑁄𑀢𑀺. 𑀇𑀫𑁂𑀲𑀁 𑀪𑀺𑀓𑁆𑀔𑀼 𑀲𑀢𑁆𑀢𑀦𑁆𑀦𑀁 𑀥𑀫𑁆𑀫𑀸𑀦𑀁 𑀩𑀸𑀳𑀺𑀢𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄’’𑀢𑀺 (𑀘𑀽𑀴𑀦𑀺. 𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁨𑁮). 𑀲𑀼𑀫𑁂𑀥𑁄𑀢𑀺 𑀲𑀼𑀦𑁆𑀤𑀭𑀧𑀜𑁆𑀜𑁄. 𑀲𑁂𑀓𑁆𑀔𑀲𑁆𑀲𑀸𑀢𑀺 𑀏𑀢𑁆𑀣 𑀲𑀺𑀓𑁆𑀔𑀢𑀻𑀢𑀺 𑀲𑁂𑀓𑁆𑀔𑁄. 𑀬𑀣𑀸𑀳 𑁋 ‘‘𑀲𑀺𑀓𑁆𑀔𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀼, 𑀢𑀲𑁆𑀫𑀸 𑀲𑁂𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘 𑀲𑀺𑀓𑁆𑀔𑀢𑀺? 𑀅𑀥𑀺𑀲𑀻𑀮𑀫𑁆𑀧𑀺 𑀲𑀺𑀓𑁆𑀔𑀢𑀺, 𑀅𑀥𑀺𑀘𑀺𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑀢𑀺, 𑀅𑀥𑀺𑀧𑀜𑁆𑀜𑀫𑁆𑀧𑀺 𑀲𑀺𑀓𑁆𑀔𑀢𑀻’’𑀢𑀺 (𑀅. 𑀦𑀺. 𑁩.𑁮𑁬).

𑀧𑀜𑁆𑀜𑀸𑀬 𑀅𑀥𑀺𑀯𑀘𑀦𑀦𑁆𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀬 𑀧𑀜𑁆𑀜𑀸𑀬 𑀏𑀢𑀁 𑀅𑀥𑀺𑀯𑀘𑀦𑀁, 𑀦 𑀆𑀯𑀼𑀥𑀲𑀢𑁆𑀣𑀲𑁆𑀲. 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲𑀸𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑀲𑁆𑀲. 𑀢𑀁 𑀧𑀜𑁆𑀜𑀸𑀕𑀢𑀺𑀓𑀫𑁂𑀯 𑀳𑁄𑀢𑀺. 𑀮𑁄𑀓𑀺𑀬𑀸𑀬 𑀧𑀜𑁆𑀜𑀸𑀬 𑀮𑁄𑀓𑀺𑀬𑀁, 𑀮𑁄𑀓𑀼𑀢𑁆𑀢𑀭𑀸𑀬 𑀧𑀜𑁆𑀜𑀸𑀬 𑀮𑁄𑀓𑀼𑀢𑁆𑀢𑀭𑀁. 𑀏𑀢𑁆𑀣 𑀧𑀦𑀸𑀬𑀁 𑀅𑀢𑁆𑀣𑀤𑀻𑀧𑀦𑀸 𑁋

𑀏𑀓𑁄 𑀓𑀺𑀭 𑀚𑀸𑀦𑀧𑀤𑁄 𑀩𑁆𑀭𑀸𑀳𑁆𑀫𑀡𑁄 𑀧𑀸𑀢𑁄𑀯 𑀫𑀸𑀡𑀯𑀓𑁂𑀳𑀺 𑀲𑀤𑁆𑀥𑀺𑀁 𑀕𑀸𑀫𑀢𑁄 𑀦𑀺𑀓𑁆𑀔𑀫𑁆𑀫 𑀤𑀺𑀯𑀲𑀁 𑀅𑀭𑀜𑁆𑀜𑁂 𑀫𑀦𑁆𑀢𑁂 𑀯𑀸𑀘𑁂𑀢𑁆𑀯𑀸 𑀲𑀸𑀬𑀁 𑀕𑀸𑀫𑀁 𑀆𑀕𑀘𑁆𑀙𑀢𑀺. 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘 𑀏𑀓𑁄 𑀯𑀫𑁆𑀫𑀺𑀓𑁄 𑀅𑀢𑁆𑀣𑀺. 𑀲𑁄 𑀭𑀢𑁆𑀢𑀺𑀁 𑀥𑀽𑀫𑀸𑀬𑀢𑀺, 𑀤𑀺𑀯𑀸 𑀧𑀚𑁆𑀚𑀮𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀅𑀦𑁆𑀢𑁂𑀯𑀸𑀲𑀺𑀁 𑀲𑀼𑀫𑁂𑀥𑀁 𑀫𑀸𑀡𑀯𑀁 𑀆𑀳 𑁋 ‘‘𑀢𑀸𑀢, 𑀅𑀬𑀁 𑀯𑀫𑁆𑀫𑀺𑀓𑁄 𑀭𑀢𑁆𑀢𑀺𑀁 𑀥𑀽𑀫𑀸𑀬𑀢𑀺, 𑀤𑀺𑀯𑀸 𑀧𑀚𑁆𑀚𑀮𑀢𑀺, 𑀯𑀺𑀓𑀸𑀭𑀫𑀲𑁆𑀲 𑀧𑀲𑁆𑀲𑀺𑀲𑁆𑀲𑀸𑀫, 𑀪𑀺𑀦𑁆𑀤𑀺𑀢𑁆𑀯𑀸 𑀦𑀁 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀔𑀺𑀧𑀸𑀳𑀻’’𑀢𑀺. 𑀲𑁄 𑀲𑀸𑀥𑀽𑀢𑀺 𑀓𑀼𑀤𑀸𑀮𑀁 𑀕𑀳𑁂𑀢𑁆𑀯𑀸 𑀲𑀫𑁂𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬 𑀢𑀣𑀸 𑀅𑀓𑀸𑀲𑀺. 𑀢𑀢𑁆𑀭 𑀆𑀘𑀭𑀺𑀬𑀩𑁆𑀭𑀸𑀳𑁆𑀫𑀡𑁄 𑀯𑀺𑀬 𑀪𑀕𑀯𑀸. 𑀲𑀼𑀫𑁂𑀥𑀫𑀸𑀡𑀯𑀓𑁄 𑀯𑀺𑀬 𑀲𑁂𑀓𑁆𑀔𑁄 𑀪𑀺𑀓𑁆𑀔𑀼. 𑀯𑀫𑁆𑀫𑀺𑀓𑁄 𑀯𑀺𑀬 𑀓𑀸𑀬𑁄. ‘‘𑀢𑀸𑀢, 𑀅𑀬𑀁 𑀯𑀫𑁆𑀫𑀺𑀓𑁄 𑀭𑀢𑁆𑀢𑀺𑀁 𑀥𑀽𑀫𑀸𑀬𑀢𑀺, 𑀤𑀺𑀯𑀸 𑀧𑀚𑁆𑀚𑀮𑀢𑀺, 𑀯𑀺𑀓𑀸𑀭𑀫𑀲𑁆𑀲 𑀧𑀲𑁆𑀲𑀺𑀲𑁆𑀲𑀸𑀫, 𑀪𑀺𑀦𑁆𑀤𑀺𑀢𑁆𑀯𑀸 𑀦𑀁 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀔𑀺𑀧𑀸𑀳𑀻’’𑀢𑀺 𑀩𑁆𑀭𑀸𑀳𑁆𑀫𑀡𑁂𑀦 𑀯𑀼𑀢𑁆𑀢𑀓𑀸𑀮𑁄 𑀯𑀺𑀬, ‘‘𑀪𑀺𑀓𑁆𑀔𑀼 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀁 𑀓𑀸𑀬𑀁 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀧𑀭𑀺𑀕𑁆𑀕𑀡𑁆𑀳𑀸𑀳𑀻’’𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀓𑀸𑀮𑁄. 𑀢𑀲𑁆𑀲 𑀲𑀸𑀥𑀽𑀢𑀺 𑀓𑀼𑀤𑀸𑀮𑀁 𑀕𑀳𑁂𑀢𑁆𑀯𑀸 𑀢𑀣𑀸𑀓𑀭𑀡𑀁 𑀯𑀺𑀬 𑀲𑁂𑀓𑁆𑀔𑀲𑁆𑀲 𑀪𑀺𑀓𑁆𑀔𑀼𑀦𑁄, ‘‘𑀬𑁄 𑀯𑀻𑀲𑀢𑀺𑀬𑀸 𑀓𑁄𑀝𑁆𑀞𑀸𑀲𑁂𑀲𑀼 𑀣𑀤𑁆𑀥𑀪𑀸𑀯𑁄, 𑀅𑀬𑀁 𑀧𑀣𑀯𑀻𑀥𑀸𑀢𑀼. 𑀬𑁄 𑀤𑁆𑀯𑀸𑀤𑀲𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀆𑀩𑀦𑁆𑀥𑀦𑀪𑀸𑀯𑁄, 𑀅𑀬𑀁 𑀆𑀧𑁄𑀥𑀸𑀢𑀼. 𑀬𑁄 𑀘𑀢𑀽𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀧𑀭𑀺𑀧𑀸𑀘𑀦𑀪𑀸𑀯𑁄, 𑀅𑀬𑀁 𑀢𑁂𑀚𑁄𑀥𑀸𑀢𑀼. 𑀬𑁄 𑀙𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀯𑀺𑀢𑁆𑀣𑀫𑁆𑀪𑀦𑀪𑀸𑀯𑁄, 𑀅𑀬𑀁 𑀯𑀸𑀬𑁄𑀥𑀸𑀢𑀽’’𑀢𑀺 𑀏𑀯𑀁 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀯𑀲𑁂𑀦 𑀓𑀸𑀬𑀧𑀭𑀺𑀕𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄.

𑀮𑀗𑁆𑀕𑀻𑀢𑀺 𑀔𑁄, 𑀪𑀺𑀓𑁆𑀔𑀽𑀢𑀺 𑀓𑀲𑁆𑀫𑀸 𑀪𑀕𑀯𑀸 𑀅𑀯𑀺𑀚𑁆𑀚𑀁 𑀮𑀗𑁆𑀕𑀻𑀢𑀺 𑀓𑀢𑁆𑀯𑀸 𑀤𑀲𑁆𑀲𑁂𑀲𑀻𑀢𑀺? 𑀬𑀣𑀸 𑀳𑀺 𑀦𑀕𑀭𑀲𑁆𑀲 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀧𑀮𑀺𑀖𑁂 𑀬𑁄𑀚𑀺𑀢𑁂 𑀫𑀳𑀸𑀚𑀦𑀲𑁆𑀲 𑀕𑀫𑀦𑀁 𑀧𑀘𑁆𑀙𑀺𑀚𑁆𑀚𑀢𑀺, 𑀬𑁂 𑀦𑀕𑀭𑀲𑁆𑀲 𑀅𑀦𑁆𑀢𑁄, 𑀢𑁂 𑀅𑀦𑁆𑀢𑁄𑀬𑁂𑀯 𑀳𑁄𑀦𑁆𑀢𑀺. 𑀬𑁂 𑀩𑀳𑀺, 𑀢𑁂 𑀩𑀳𑀺𑀬𑁂𑀯. 𑀏𑀯𑀫𑁂𑀯 𑀬𑀲𑁆𑀲 𑀜𑀸𑀡𑀫𑀼𑀔𑁂 𑀅𑀯𑀺𑀚𑁆𑀚𑀸𑀮𑀗𑁆𑀕𑀻 𑀧𑀢𑀢𑀺, 𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑀫𑁆𑀧𑀸𑀧𑀓𑀁 𑀜𑀸𑀡𑀕𑀫𑀦𑀁 𑀧𑀘𑁆𑀙𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀅𑀯𑀺𑀚𑁆𑀚𑀁 𑀮𑀗𑁆𑀕𑀻𑀢𑀺 𑀓𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀧𑀚𑀳 𑀅𑀯𑀺𑀚𑁆𑀚𑀦𑁆𑀢𑀺 𑀏𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦 𑀅𑀯𑀺𑀚𑁆𑀚𑀸𑀧𑀳𑀸𑀦𑀁 𑀓𑀣𑀺𑀢𑀁.

𑀉𑀤𑁆𑀥𑀼𑀫𑀸𑀬𑀺𑀓𑀸𑀢𑀺 𑀔𑁄, 𑀪𑀺𑀓𑁆𑀔𑀽𑀢𑀺 𑀏𑀢𑁆𑀣 𑀉𑀤𑁆𑀥𑀼𑀫𑀸𑀬𑀺𑀓𑀫𑀡𑁆𑀟𑀽𑀓𑁄 𑀦𑀸𑀫 𑀦𑁄 𑀫𑀳𑀦𑁆𑀢𑁄, 𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑁄 𑀳𑁄𑀢𑀺, 𑀧𑀼𑀭𑀸𑀡𑀧𑀡𑁆𑀡𑀦𑁆𑀢𑀭𑁂 𑀯𑀸 𑀕𑀘𑁆𑀙𑀦𑁆𑀢𑀭𑁂 𑀯𑀸 𑀯𑀮𑁆𑀮𑀺𑀅𑀦𑁆𑀢𑀭𑁂 𑀯𑀸 𑀯𑀲𑀢𑀺. 𑀲𑁄 𑀤𑀡𑁆𑀟𑀓𑁄𑀝𑀺𑀬𑀸 𑀯𑀸 𑀯𑀮𑁆𑀮𑀺𑀓𑁄𑀝𑀺𑀬𑀸 𑀯𑀸 𑀧𑀁𑀲𑀼𑀘𑀼𑀡𑁆𑀡𑀓𑁂𑀦 𑀯𑀸 𑀖𑀝𑁆𑀝𑀺𑀢𑁄 𑀆𑀬𑀫𑀺𑀢𑁆𑀯𑀸 𑀫𑀳𑀦𑁆𑀢𑁄 𑀧𑀭𑀺𑀫𑀡𑁆𑀟𑀮𑁄 𑀩𑁂𑀮𑀼𑀯𑀧𑀓𑁆𑀓𑀧𑁆𑀧𑀫𑀸𑀡𑁄 𑀳𑀼𑀢𑁆𑀯𑀸 𑀘𑀢𑁆𑀢𑀸𑀭𑁄 𑀧𑀸𑀤𑁂 𑀆𑀓𑀸𑀲𑀕𑀢𑁂 𑀓𑀢𑁆𑀯𑀸 𑀧𑀘𑁆𑀙𑀺𑀦𑁆𑀦𑀕𑀫𑀦𑁄 𑀳𑀼𑀢𑁆𑀯𑀸 𑀅𑀫𑀺𑀢𑁆𑀢𑀯𑀲𑀁 𑀬𑀸𑀢𑀺, 𑀓𑀸𑀓𑀓𑀼𑀮𑀮𑀸𑀤𑀺𑀪𑀢𑁆𑀢𑀫𑁂𑀯 𑀳𑁄𑀢𑀺. 𑀏𑀯𑀫𑁂𑀯 𑀅𑀬𑀁 𑀓𑁄𑀥𑁄 𑀧𑀞𑀫𑀁 𑀉𑀧𑁆𑀧𑀚𑁆𑀚𑀦𑁆𑀢𑁄 𑀘𑀺𑀢𑁆𑀢𑀸𑀯𑀺𑀮𑀫𑀢𑁆𑀢𑀓𑁄𑀯 𑀳𑁄𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀅𑀦𑀺𑀕𑁆𑀕𑀳𑀺𑀢𑁄 𑀯𑀟𑁆𑀠𑀺𑀢𑁆𑀯𑀸 𑀫𑀼𑀔𑀯𑀺𑀓𑀼𑀮𑀦𑀁 𑀧𑀸𑀧𑁂𑀢𑀺. 𑀢𑀤𑀸 𑀅𑀦𑀺𑀕𑁆𑀕𑀳𑀺𑀢𑁄 𑀳𑀦𑀼𑀲𑀜𑁆𑀘𑁄𑀧𑀦𑀁 𑀧𑀸𑀧𑁂𑀢𑀺. 𑀢𑀤𑀸 𑀅𑀦𑀺𑀕𑁆𑀕𑀳𑀺𑀢𑁄 𑀨𑀭𑀼𑀲𑀯𑀸𑀘𑀸𑀦𑀺𑀘𑁆𑀙𑀸𑀭𑀡𑀁 𑀧𑀸𑀧𑁂𑀢𑀺. 𑀢𑀤𑀸 𑀅𑀦𑀺𑀕𑁆𑀕𑀳𑀺𑀢𑁄 𑀤𑀺𑀲𑀸𑀯𑀺𑀮𑁄𑀓𑀦𑀁 𑀧𑀸𑀧𑁂𑀢𑀺. 𑀢𑀤𑀸 𑀅𑀦𑀺𑀕𑁆𑀕𑀳𑀺𑀢𑁄 𑀆𑀓𑀟𑁆𑀠𑀦𑀧𑀭𑀺𑀓𑀟𑁆𑀠𑀦𑀁 𑀧𑀸𑀧𑁂𑀢𑀺. 𑀢𑀤𑀸 𑀅𑀦𑀺𑀕𑁆𑀕𑀳𑀺𑀢𑁄 𑀧𑀸𑀡𑀺𑀦𑀸 𑀮𑁂𑀟𑁆𑀟𑀼𑀤𑀡𑁆𑀟𑀲𑀢𑁆𑀣𑀧𑀭𑀸𑀫𑀲𑀦𑀁 𑀧𑀸𑀧𑁂𑀢𑀺. 𑀢𑀤𑀸 𑀅𑀦𑀺𑀕𑁆𑀕𑀳𑀺𑀢𑁄 𑀤𑀡𑁆𑀟𑀲𑀢𑁆𑀣𑀸𑀪𑀺𑀦𑀺𑀧𑀸𑀢𑀁 𑀧𑀸𑀧𑁂𑀢𑀺. 𑀢𑀤𑀸 𑀅𑀦𑀺𑀕𑁆𑀕𑀳𑀺𑀢𑁄 𑀧𑀭𑀖𑀸𑀢𑀦𑀫𑁆𑀧𑀺 𑀅𑀢𑁆𑀢𑀖𑀸𑀢𑀦𑀫𑁆𑀧𑀺 𑀧𑀸𑀧𑁂𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑁋 ‘‘𑀬𑀢𑁄 𑀅𑀬𑀁 𑀓𑁄𑀥𑁄 𑀧𑀭𑀁 𑀖𑀸𑀢𑁂𑀢𑁆𑀯𑀸 𑀅𑀢𑁆𑀢𑀸𑀦𑀁 𑀖𑀸𑀢𑁂𑀢𑀺, 𑀏𑀢𑁆𑀢𑀸𑀯𑀢𑀸𑀬𑀁 𑀓𑁄𑀥𑁄 𑀧𑀭𑀫𑀼𑀲𑁆𑀲𑀤𑀕𑀢𑁄 𑀳𑁄𑀢𑀺 𑀧𑀭𑀫𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑁄’’𑀢𑀺. 𑀢𑀢𑁆𑀣 𑀬𑀣𑀸 𑀉𑀤𑁆𑀥𑀼𑀫𑀸𑀬𑀺𑀓𑀸𑀬 𑀘𑀢𑀽𑀲𑀼 𑀧𑀸𑀤𑁂𑀲𑀼 𑀆𑀓𑀸𑀲𑀕𑀢𑁂𑀲𑀼 𑀕𑀫𑀦𑀁 𑀧𑀘𑁆𑀙𑀺𑀚𑁆𑀚𑀢𑀺, 𑀉𑀤𑁆𑀥𑀼𑀫𑀸𑀬𑀺𑀓𑀸 𑀅𑀫𑀺𑀢𑁆𑀢𑀯𑀲𑀁 𑀕𑀦𑁆𑀢𑁆𑀯𑀸 𑀓𑀸𑀓𑀸𑀤𑀺𑀪𑀢𑁆𑀢𑀁 𑀳𑁄𑀢𑀺, 𑀏𑀯𑀫𑁂𑀯 𑀓𑁄𑀥𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀫𑀺𑀢𑁆𑀢𑀯𑀲𑀁 𑀬𑀸𑀢𑀺, 𑀲𑀩𑁆𑀩𑁂𑀲𑀁 𑀫𑀸𑀭𑀸𑀦𑀁 𑀬𑀣𑀸𑀓𑀸𑀫𑀓𑀭𑀡𑀻𑀬𑁄 𑀳𑁄𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀉𑀤𑁆𑀥𑀼𑀫𑀸𑀬𑀺𑀓𑀸𑀢𑀺 𑀔𑁄, 𑀪𑀺𑀓𑁆𑀔𑀼, 𑀓𑁄𑀥𑀽𑀧𑀸𑀬𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀢𑀢𑁆𑀣 𑀩𑀮𑀯𑀧𑁆𑀧𑀢𑁆𑀢𑁄 𑀓𑁄𑀥𑁄𑀯 𑀓𑁄𑀥𑀽𑀧𑀸𑀬𑀸𑀲𑁄. 𑀧𑀚𑀳 𑀓𑁄𑀥𑀽𑀧𑀸𑀬𑀸𑀲𑀦𑁆𑀢𑀺 𑀏𑀢𑁆𑀣 𑀧𑀝𑀺𑀲𑀗𑁆𑀔𑀸𑀦𑀧𑁆𑀧𑀳𑀸𑀦𑀁 𑀓𑀣𑀺𑀢𑀁.

𑀤𑁆𑀯𑀺𑀥𑀸𑀧𑀣𑁄𑀢𑀺 𑀏𑀢𑁆𑀣, 𑀬𑀣𑀸 𑀧𑀼𑀭𑀺𑀲𑁄 𑀲𑀥𑀦𑁄 𑀲𑀪𑁄𑀕𑁄 𑀓𑀦𑁆𑀢𑀸𑀭𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄 𑀤𑁆𑀯𑁂𑀥𑀸𑀧𑀣𑀁 𑀧𑀢𑁆𑀯𑀸, ‘‘𑀇𑀫𑀺𑀦𑀸 𑀦𑀼 𑀔𑁄 𑀕𑀦𑁆𑀢𑀩𑁆𑀩𑀁, 𑀇𑀫𑀺𑀦𑀸 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀦𑀺𑀘𑁆𑀙𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀢𑁆𑀣𑁂𑀯 𑀢𑀺𑀝𑁆𑀞𑀢𑀺, 𑀅𑀣 𑀦𑀁 𑀘𑁄𑀭𑀸 𑀉𑀝𑁆𑀞𑀳𑀺𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀦𑁆𑀢𑀺, 𑀏𑀯𑀫𑁂𑀯 𑀔𑁄 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼 𑀩𑀼𑀤𑁆𑀥𑀸𑀤𑀻𑀲𑀼 𑀓𑀗𑁆𑀔𑀸𑀬 𑀉𑀧𑁆𑀧𑀦𑁆𑀦𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀣 𑀦𑀁 𑀓𑀺𑀮𑁂𑀲𑀫𑀸𑀭𑀸𑀤𑀬𑁄 𑀲𑀩𑁆𑀩𑁂 𑀫𑀸𑀭𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀦𑁆𑀢𑀺, 𑀇𑀢𑀺 𑀯𑀺𑀘𑀺𑀓𑀺𑀘𑁆𑀙𑀸 𑀤𑁆𑀯𑁂𑀥𑀸𑀧𑀣𑀲𑀫𑀸 𑀳𑁄𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀤𑁆𑀯𑀺𑀥𑀸𑀧𑀣𑁄𑀢𑀺 𑀔𑁄, 𑀪𑀺𑀓𑁆𑀔𑀼, 𑀯𑀺𑀘𑀺𑀓𑀺𑀘𑁆𑀙𑀸𑀬𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀧𑀚𑀳 𑀯𑀺𑀘𑀺𑀓𑀺𑀘𑁆𑀙𑀦𑁆𑀢𑀺 𑀏𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀲𑁂𑀦 𑀯𑀺𑀘𑀺𑀓𑀺𑀘𑁆𑀙𑀸𑀧𑀳𑀸𑀦𑀁 𑀓𑀣𑀺𑀢𑀁.

𑀘𑀗𑁆𑀕𑀯𑀸𑀭𑀦𑁆𑀢𑀺 𑀏𑀢𑁆𑀣, 𑀬𑀣𑀸 𑀭𑀚𑀓𑁂𑀳𑀺 𑀔𑀸𑀭𑀧𑀭𑀺𑀲𑁆𑀲𑀸𑀯𑀦𑀫𑁆𑀳𑀺 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑁂 𑀏𑀓𑁄 𑀉𑀤𑀓𑀖𑀝𑁄 𑀤𑁆𑀯𑁂𑀧𑀺 𑀤𑀲𑀧𑀺 𑀯𑀻𑀲𑀢𑀺𑀧𑀺 𑀖𑀝𑀲𑀢𑀫𑁆𑀧𑀺 𑀧𑀕𑁆𑀖𑀭𑀢𑀺𑀬𑁂𑀯, 𑀧𑀲𑀝𑀫𑀢𑁆𑀢𑀫𑁆𑀧𑀺 𑀉𑀤𑀓𑀁 𑀦 𑀢𑀺𑀝𑁆𑀞𑀢𑀺, 𑀏𑀯𑀫𑁂𑀯 𑀦𑀻𑀯𑀭𑀡𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀓𑀼𑀲𑀮𑀥𑀫𑁆𑀫𑁄 𑀦 𑀢𑀺𑀝𑁆𑀞𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀘𑀗𑁆𑀕𑀯𑀸𑀭𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀼, 𑀧𑀜𑁆𑀘𑀦𑁆𑀦𑁂𑀢𑀁 𑀦𑀻𑀯𑀭𑀡𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀧𑀚𑀳 𑀧𑀜𑁆𑀘𑀦𑀻𑀯𑀭𑀡𑁂𑀢𑀺 𑀏𑀢𑁆𑀣 𑀯𑀺𑀓𑁆𑀔𑀫𑁆𑀪𑀦𑀢𑀤𑀗𑁆𑀕𑀯𑀲𑁂𑀦 𑀦𑀻𑀯𑀭𑀡𑀧𑁆𑀧𑀳𑀸𑀦𑀁 𑀓𑀣𑀺𑀢𑀁.

𑀓𑀼𑀫𑁆𑀫𑁄𑀢𑀺 𑀏𑀢𑁆𑀣, 𑀬𑀣𑀸 𑀓𑀘𑁆𑀙𑀧𑀲𑁆𑀲 𑀘𑀢𑁆𑀢𑀸𑀭𑁄 𑀧𑀸𑀤𑀸 𑀲𑀻𑀲𑀦𑁆𑀢𑀺 𑀧𑀜𑁆𑀘𑁂𑀯 𑀅𑀗𑁆𑀕𑀸𑀦𑀺 𑀳𑁄𑀦𑁆𑀢𑀺, 𑀏𑀯𑀫𑁂𑀯 𑀲𑀩𑁆𑀩𑁂𑀧𑀺 𑀲𑀗𑁆𑀔𑀢𑀸 𑀥𑀫𑁆𑀫𑀸 𑀕𑀬𑁆𑀳𑀫𑀸𑀦𑀸 𑀧𑀜𑁆𑀘𑁂𑀯 𑀔𑀦𑁆𑀥𑀸 𑀪𑀯𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀓𑀼𑀫𑁆𑀫𑁄𑀢𑀺 𑀔𑁄, 𑀪𑀺𑀓𑁆𑀔𑀼, 𑀧𑀜𑁆𑀘𑀦𑁆𑀦𑁂𑀢𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀧𑀚𑀳 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀢𑀺 𑀏𑀢𑁆𑀣 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁 𑀓𑀣𑀺𑀢𑀁.

𑀅𑀲𑀺𑀲𑀽𑀦𑀸𑀢𑀺 𑀏𑀢𑁆𑀣, 𑀬𑀣𑀸 𑀲𑀽𑀦𑀸𑀬 𑀉𑀧𑀭𑀺 𑀫𑀁𑀲𑀁 𑀞𑀧𑁂𑀢𑁆𑀯𑀸 𑀅𑀲𑀺𑀦𑀸 𑀓𑁄𑀝𑁆𑀝𑁂𑀦𑁆𑀢𑀺, 𑀏𑀯𑀫𑀺𑀫𑁂 𑀲𑀢𑁆𑀢𑀸 𑀯𑀢𑁆𑀣𑀼𑀓𑀸𑀫𑀢𑁆𑀣𑀸𑀬 𑀓𑀺𑀮𑁂𑀲𑀓𑀸𑀫𑁂𑀳𑀺 𑀖𑀸𑀢𑀬𑀫𑀸𑀦𑀸 𑀯𑀢𑁆𑀣𑀼𑀓𑀸𑀫𑀸𑀦𑀁 𑀉𑀧𑀭𑀺 𑀓𑀢𑁆𑀯𑀸 𑀓𑀺𑀮𑁂𑀲𑀓𑀸𑀫𑁂𑀳𑀺 𑀓𑀦𑁆𑀢𑀺𑀢𑀸 𑀓𑁄𑀝𑁆𑀝𑀺𑀢𑀸 𑀘 𑀳𑁄𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀅𑀲𑀺𑀲𑀽𑀦𑀸𑀢𑀺 𑀔𑁄, 𑀪𑀺𑀓𑁆𑀔𑀼, 𑀧𑀜𑁆𑀘𑀦𑁆𑀦𑁂𑀢𑀁 𑀓𑀸𑀫𑀕𑀼𑀡𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀧𑀚𑀳 𑀧𑀜𑁆𑀘 𑀓𑀸𑀫𑀕𑀼𑀡𑁂𑀢𑀺 𑀏𑀢𑁆𑀣 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁 𑀓𑀣𑀺𑀢𑀁.

𑀫𑀁𑀲𑀧𑁂𑀲𑀻𑀢𑀺 𑀔𑁄, 𑀪𑀺𑀓𑁆𑀔𑀽𑀢𑀺 𑀏𑀢𑁆𑀣 𑀅𑀬𑀁 𑀫𑀁𑀲𑀧𑁂𑀲𑀺 𑀦𑀸𑀫 𑀩𑀳𑀼𑀚𑀦𑀧𑀢𑁆𑀣𑀺𑀢𑀸 𑀔𑀢𑁆𑀢𑀺𑀬𑀸𑀤𑀬𑁄 𑀫𑀦𑀼𑀲𑁆𑀲𑀸𑀧𑀺 𑀦𑀁 𑀧𑀢𑁆𑀣𑁂𑀦𑁆𑀢𑀺 𑀓𑀸𑀓𑀸𑀤𑀬𑁄 𑀢𑀺𑀭𑀘𑁆𑀙𑀸𑀦𑀸𑀧𑀺. 𑀇𑀫𑁂 𑀳𑀺 𑀲𑀢𑁆𑀢𑀸 𑀅𑀯𑀺𑀚𑁆𑀚𑀸𑀬 𑀲𑀫𑁆𑀫𑀢𑁆𑀢𑀸 𑀦𑀦𑁆𑀤𑀺𑀭𑀸𑀕𑀁 𑀉𑀧𑀕𑀫𑁆𑀫 𑀯𑀝𑁆𑀝𑀁 𑀯𑀟𑁆𑀠𑁂𑀦𑁆𑀢𑀺. 𑀬𑀣𑀸 𑀯𑀸 𑀫𑀁𑀲𑀧𑁂𑀲𑀺 𑀞𑀧𑀺𑀢𑀞𑀧𑀺𑀢𑀝𑁆𑀞𑀸𑀦𑁂 𑀮𑀕𑁆𑀕𑀢𑀺, 𑀏𑀯𑀫𑀺𑀫𑁂 𑀲𑀢𑁆𑀢𑀸 𑀦𑀦𑁆𑀤𑀺𑀭𑀸𑀕𑀩𑀤𑁆𑀥𑀸 𑀯𑀝𑁆𑀝𑁂 𑀮𑀕𑁆𑀕𑀦𑁆𑀢𑀺, 𑀤𑀼𑀓𑁆𑀔𑀁 𑀧𑀢𑁆𑀯𑀸𑀧𑀺 𑀦 𑀉𑀓𑁆𑀓𑀡𑁆𑀞𑀦𑁆𑀢𑀺, 𑀇𑀢𑀺 𑀦𑀦𑁆𑀤𑀺𑀭𑀸𑀕𑁄 𑀫𑀁𑀲𑀧𑁂𑀲𑀺𑀲𑀤𑀺𑀲𑁄 𑀳𑁄𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀫𑀁𑀲𑀧𑁂𑀲𑀻𑀢𑀺 𑀔𑁄, 𑀪𑀺𑀓𑁆𑀔𑀼, 𑀦𑀦𑁆𑀤𑀺𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀧𑀚𑀳 𑀦𑀦𑁆𑀤𑀻𑀭𑀸𑀕𑀦𑁆𑀢𑀺 𑀏𑀢𑁆𑀣 𑀘𑀢𑀼𑀢𑁆𑀣𑀫𑀕𑁆𑀕𑁂𑀦 𑀦𑀦𑁆𑀤𑀻𑀭𑀸𑀕𑀧𑁆𑀧𑀳𑀸𑀦𑀁 𑀓𑀣𑀺𑀢𑀁.

𑀦𑀸𑀕𑁄𑀢𑀺 𑀔𑁄, 𑀪𑀺𑀓𑁆𑀔𑀼, 𑀔𑀻𑀡𑀸𑀲𑀯𑀲𑁆𑀲𑁂𑀢𑀁 𑀪𑀺𑀓𑁆𑀔𑀼𑀦𑁄 𑀅𑀥𑀺𑀯𑀘𑀦𑀦𑁆𑀢𑀺 𑀏𑀢𑁆𑀣 𑀬𑁂𑀦𑀢𑁆𑀣𑁂𑀦 𑀔𑀻𑀡𑀸𑀲𑀯𑁄 𑀦𑀸𑀕𑁄𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀅𑀦𑀗𑁆𑀕𑀡𑀲𑀼𑀢𑁆𑀢𑁂 (𑀫. 𑀦𑀺. 𑀅𑀝𑁆𑀞. 𑁧.𑁬𑁩) 𑀧𑀓𑀸𑀲𑀺𑀢𑁄 𑀏𑀯. 𑀦𑀫𑁄 𑀓𑀭𑁄𑀳𑀺 𑀦𑀸𑀕𑀲𑁆𑀲𑀸𑀢𑀺 𑀔𑀻𑀡𑀸𑀲𑀯𑀲𑁆𑀲 𑀩𑀼𑀤𑁆𑀥𑀦𑀸𑀕𑀲𑁆𑀲, ‘‘𑀩𑀼𑀤𑁆𑀥𑁄 𑀲𑁄 𑀪𑀕𑀯𑀸 𑀩𑁄𑀥𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀤𑀦𑁆𑀢𑁄 𑀲𑁄 𑀪𑀕𑀯𑀸 𑀤𑀫𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀲𑀦𑁆𑀢𑁄 𑀲𑁄 𑀪𑀕𑀯𑀸 𑀲𑀫𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀢𑀺𑀡𑁆𑀡𑁄 𑀲𑁄 𑀪𑀕𑀯𑀸 𑀢𑀭𑀡𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀧𑀭𑀺𑀦𑀺𑀩𑁆𑀩𑀼𑀢𑁄 𑀲𑁄 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺 (𑀫. 𑀦𑀺. 𑁧.𑁩𑁬𑁧) 𑀏𑀯𑀁 𑀦𑀫𑀓𑁆𑀓𑀸𑀭𑀁 𑀓𑀭𑁄𑀳𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀇𑀢𑀺 𑀇𑀤𑀁 𑀲𑀼𑀢𑁆𑀢𑀁 𑀣𑁂𑀭𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀣𑁂𑀭𑁄𑀧𑀺 𑀇𑀤𑀫𑁂𑀯 𑀲𑀼𑀢𑁆𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀅𑀬𑀫𑁂𑀢𑀲𑁆𑀲 𑀅𑀢𑁆𑀣𑁄𑀢𑀺 𑀅𑀬𑀁 𑀏𑀢𑀲𑁆𑀲 𑀧𑀜𑁆𑀳𑀲𑁆𑀲 𑀅𑀢𑁆𑀣𑁄. 𑀇𑀢𑀺 𑀪𑀕𑀯𑀸 𑀭𑀢𑀦𑀭𑀸𑀲𑀺𑀫𑁆𑀳𑀺 𑀫𑀡𑀺𑀓𑀽𑀝𑀁 𑀕𑀡𑁆𑀳𑀦𑁆𑀢𑁄 𑀯𑀺𑀬 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀯𑀫𑁆𑀫𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀭𑀣𑀯𑀺𑀦𑀻𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁨. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀭𑀣𑀯𑀺𑀦𑀻𑀢𑀲𑀼𑀢𑁆𑀢𑀁. 𑀢𑀢𑁆𑀣 𑀭𑀸𑀚𑀕𑀳𑁂𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂, 𑀢𑀜𑁆𑀳𑀺 𑀫𑀦𑁆𑀥𑀸𑀢𑀼𑀫𑀳𑀸𑀕𑁄𑀯𑀺𑀦𑁆𑀤𑀸𑀤𑀻𑀳𑀺 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀭𑀸𑀚𑀕𑀳𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀜𑁆𑀜𑁂𑀧𑁂𑀢𑁆𑀣 𑀧𑀓𑀸𑀭𑁂 𑀯𑀡𑁆𑀡𑀬𑀦𑁆𑀢𑀺. 𑀓𑀺𑀁 𑀢𑁂𑀳𑀺? 𑀦𑀸𑀫𑀫𑁂𑀢𑀁 𑀢𑀲𑁆𑀲 𑀦𑀕𑀭𑀲𑁆𑀲. 𑀢𑀁 𑀧𑀦𑁂𑀢𑀁 𑀩𑀼𑀤𑁆𑀥𑀓𑀸𑀮𑁂 𑀘 𑀘𑀓𑁆𑀓𑀯𑀢𑁆𑀢𑀺𑀓𑀸𑀮𑁂 𑀘 𑀦𑀕𑀭𑀁 𑀳𑁄𑀢𑀺, 𑀲𑁂𑀲𑀓𑀸𑀮𑁂 𑀲𑀼𑀜𑁆𑀜𑀁 𑀳𑁄𑀢𑀺 𑀬𑀓𑁆𑀔𑀧𑀭𑀺𑀕𑁆𑀕𑀳𑀺𑀢𑀁, 𑀢𑁂𑀲𑀁 𑀯𑀲𑀦𑁆𑀢𑀯𑀦𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀯𑁂𑀴𑀼𑀯𑀦𑁂 𑀓𑀮𑀦𑁆𑀤𑀓𑀦𑀺𑀯𑀸𑀧𑁂𑀢𑀺 𑀯𑁂𑀴𑀼𑀯𑀦𑀦𑁆𑀢𑀺 𑀢𑀲𑁆𑀲 𑀉𑀬𑁆𑀬𑀸𑀦𑀲𑁆𑀲 𑀦𑀸𑀫𑀁, 𑀢𑀁 𑀓𑀺𑀭 𑀯𑁂𑀴𑀽𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀁 𑀅𑀳𑁄𑀲𑀺 𑀅𑀝𑁆𑀞𑀸𑀭𑀲𑀳𑀢𑁆𑀣𑁂𑀦 𑀘 𑀧𑀸𑀓𑀸𑀭𑁂𑀦, 𑀕𑁄𑀧𑀼𑀭𑀝𑁆𑀝𑀸𑀮𑀓𑀬𑀼𑀢𑁆𑀢𑀁 𑀦𑀻𑀮𑁄𑀪𑀸𑀲𑀁 𑀫𑀦𑁄𑀭𑀫𑀁, 𑀢𑁂𑀦 𑀯𑁂𑀴𑀼𑀯𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀮𑀦𑁆𑀤𑀓𑀸𑀦𑀜𑁆𑀘𑁂𑀢𑁆𑀣 𑀦𑀺𑀯𑀸𑀧𑀁 𑀅𑀤𑀁𑀲𑀼, 𑀢𑁂𑀦 𑀓𑀮𑀦𑁆𑀤𑀓𑀦𑀺𑀯𑀸𑀧𑁄𑀢𑀺 𑀯𑀼𑀘𑁆𑀘𑀢𑀺.

𑀧𑀼𑀩𑁆𑀩𑁂 𑀓𑀺𑀭 𑀅𑀜𑁆𑀜𑀢𑀭𑁄 𑀭𑀸𑀚𑀸 𑀢𑀢𑁆𑀣 𑀉𑀬𑁆𑀬𑀸𑀦𑀓𑀻𑀴𑀦𑀢𑁆𑀣𑀁 𑀆𑀕𑀢𑁄 𑀲𑀼𑀭𑀸𑀫𑀤𑁂𑀦 𑀫𑀢𑁆𑀢𑁄 𑀤𑀺𑀯𑀸𑀲𑁂𑀬𑁆𑀬𑀁 𑀉𑀧𑀕𑀢𑁄 𑀲𑀼𑀧𑀺. 𑀧𑀭𑀺𑀚𑀦𑁄𑀧𑀺𑀲𑁆𑀲, ‘‘𑀲𑀼𑀢𑁆𑀢𑁄 𑀭𑀸𑀚𑀸’’𑀢𑀺 𑀧𑀼𑀧𑁆𑀨𑀨𑀮𑀸𑀤𑀻𑀳𑀺 𑀧𑀮𑁄𑀪𑀺𑀬𑀫𑀸𑀦𑁄 𑀇𑀢𑁄 𑀘𑀺𑀢𑁄 𑀘 𑀧𑀓𑁆𑀓𑀸𑀫𑀺, 𑀅𑀣 𑀲𑀼𑀭𑀸𑀕𑀦𑁆𑀥𑁂𑀦 𑀅𑀜𑁆𑀜𑀢𑀭𑀲𑁆𑀫𑀸 𑀲𑀼𑀲𑀺𑀭𑀭𑀼𑀓𑁆𑀔𑀸 𑀓𑀡𑁆𑀳𑀲𑀧𑁆𑀧𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀜𑁆𑀜𑀸𑀪𑀺𑀫𑀼𑀔𑁄 𑀆𑀕𑀘𑁆𑀙𑀢𑀺. 𑀢𑀁 𑀤𑀺𑀲𑁆𑀯𑀸 𑀭𑀼𑀓𑁆𑀔𑀤𑁂𑀯𑀢𑀸, ‘‘𑀭𑀜𑁆𑀜𑁄 𑀚𑀻𑀯𑀺𑀢𑀁 𑀤𑀫𑁆𑀫𑀻’’𑀢𑀺 𑀓𑀸𑀴𑀓𑀯𑁂𑀲𑁂𑀦 𑀆𑀕𑀦𑁆𑀢𑁆𑀯𑀸 𑀓𑀡𑁆𑀡𑀫𑀽𑀮𑁂 𑀲𑀤𑁆𑀤𑀫𑀓𑀸𑀲𑀺. 𑀭𑀸𑀚𑀸 𑀧𑀝𑀺𑀩𑀼𑀚𑁆𑀛𑀺, 𑀓𑀡𑁆𑀳𑀲𑀧𑁆𑀧𑁄 𑀦𑀺𑀯𑀢𑁆𑀢𑁄. 𑀲𑁄 𑀢𑀁 𑀤𑀺𑀲𑁆𑀯𑀸, ‘‘𑀇𑀫𑀸𑀬 𑀫𑀫 𑀚𑀻𑀯𑀺𑀢𑀁 𑀤𑀺𑀦𑁆𑀦’’𑀦𑁆𑀢𑀺 𑀓𑀸𑀴𑀓𑀸𑀦𑀁 𑀢𑀢𑁆𑀣 𑀦𑀺𑀯𑀸𑀧𑀁 𑀧𑀝𑁆𑀞𑀧𑁂𑀲𑀺, 𑀅𑀪𑀬𑀖𑁄𑀲𑀦𑀜𑁆𑀘 𑀖𑁄𑀲𑀸𑀧𑁂𑀲𑀺. 𑀢𑀲𑁆𑀫𑀸 𑀢𑀁 𑀢𑀢𑁄 𑀧𑀪𑀼𑀢𑀺 𑀓𑀮𑀦𑁆𑀤𑀓𑀦𑀺𑀯𑀸𑀧𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀢𑀁. 𑀓𑀮𑀦𑁆𑀤𑀓𑀸𑀢𑀺 𑀓𑀸𑀴𑀓𑀸𑀦𑀁 𑀦𑀸𑀫𑀁.

𑀚𑀸𑀢𑀺𑀪𑀽𑀫𑀺𑀓𑀸𑀢𑀺 𑀚𑀸𑀢𑀺𑀪𑀽𑀫𑀺𑀯𑀸𑀲𑀺𑀦𑁄. 𑀢𑀢𑁆𑀣 𑀚𑀸𑀢𑀺𑀪𑀽𑀫𑀻𑀢𑀺 𑀚𑀸𑀢𑀝𑁆𑀞𑀸𑀦𑀁. 𑀢𑀁 𑀔𑁄 𑀧𑀦𑁂𑀢𑀁 𑀦𑁂𑀯 𑀓𑁄𑀲𑀮𑀫𑀳𑀸𑀭𑀸𑀚𑀸𑀤𑀻𑀦𑀁 𑀦 𑀘𑀗𑁆𑀓𑀻𑀩𑁆𑀭𑀸𑀳𑀫𑀡𑀸𑀤𑀻𑀦𑀁 𑀦 𑀲𑀓𑁆𑀓𑀲𑀼𑀬𑀸𑀫𑀲𑀦𑁆𑀢𑀼𑀲𑀺𑀢𑀸𑀤𑀻𑀦𑀁 𑀦 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸𑀤𑀻𑀦𑀁 𑀦 𑀅𑀜𑁆𑀜𑁂𑀲𑀁 𑀲𑀢𑁆𑀢𑀸𑀦𑀁 𑀚𑀸𑀢𑀝𑁆𑀞𑀸𑀦𑀁 ‘‘𑀚𑀸𑀢𑀺𑀪𑀽𑀫𑀻’’𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀲 𑀧𑀦 𑀚𑀸𑀢𑀤𑀺𑀯𑀲𑁂 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀏𑀓𑀤𑁆𑀥𑀚𑀫𑀸𑀮𑀸𑀯𑀺𑀧𑁆𑀧𑀓𑀺𑀡𑁆𑀡𑀓𑀼𑀲𑀼𑀫𑀯𑀸𑀲𑀘𑀼𑀡𑁆𑀡𑀕𑀦𑁆𑀥𑀲𑀼𑀕𑀦𑁆𑀥𑀸 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀫𑀺𑀯 𑀦𑀦𑁆𑀤𑀦𑀯𑀦𑀁 𑀯𑀺𑀭𑁄𑀘𑀫𑀸𑀦𑀸 𑀧𑀤𑀼𑀫𑀺𑀦𑀺𑀧𑀡𑁆𑀡𑁂 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀅𑀓𑀫𑁆𑀧𑀺𑀢𑁆𑀣, 𑀚𑀘𑁆𑀘𑀦𑁆𑀥𑀸𑀤𑀻𑀦𑀜𑁆𑀘 𑀭𑀽𑀧𑀤𑀲𑁆𑀲𑀦𑀸𑀤𑀻𑀦𑀺 𑀅𑀦𑁂𑀓𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀧𑀯𑀢𑁆𑀢𑀺𑀁𑀲𑀼, 𑀢𑀲𑁆𑀲 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀲𑁆𑀲 𑀚𑀸𑀢𑀝𑁆𑀞𑀸𑀦𑀲𑀸𑀓𑀺𑀬𑀚𑀦𑀧𑀤𑁄 𑀓𑀧𑀺𑀮𑀯𑀢𑁆𑀣𑀸𑀳𑀸𑀭𑁄, 𑀲𑀸 ‘‘𑀚𑀸𑀢𑀺𑀪𑀽𑀫𑀻’’𑀢𑀺 𑀯𑀼𑀘𑁆𑀘𑀢𑀺.

𑀥𑀫𑁆𑀫𑀕𑀭𑀼𑀪𑀸𑀯𑀯𑀡𑁆𑀡𑀦𑀸

𑀯𑀲𑁆𑀲𑀁𑀯𑀼𑀝𑁆𑀞𑀸𑀢𑀺 𑀢𑁂𑀫𑀸𑀲𑀁 𑀯𑀲𑁆𑀲𑀁𑀯𑀼𑀝𑁆𑀞𑀸 𑀧𑀯𑀸𑀭𑀺𑀢𑀧𑀯𑀸𑀭𑀡𑀸 𑀳𑀼𑀢𑁆𑀯𑀸. 𑀪𑀕𑀯𑀸 𑀏𑀢𑀤𑀯𑁄𑀘𑀸𑀢𑀺 ‘‘𑀓𑀘𑁆𑀘𑀺, 𑀪𑀺𑀓𑁆𑀔𑀯𑁂, 𑀔𑀫𑀦𑀻𑀬’’𑀦𑁆𑀢𑀺𑀆𑀤𑀻𑀳𑀺 𑀯𑀘𑀦𑁂𑀳𑀺 𑀆𑀕𑀦𑁆𑀢𑀼𑀓𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀏𑀢𑀁, ‘‘𑀓𑁄 𑀦𑀼 𑀔𑁄, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀯𑀘𑀦𑀫𑀯𑁄𑀘. 𑀢𑁂 𑀓𑀺𑀭 𑀪𑀺𑀓𑁆𑀔𑀼, 𑁋 ‘‘𑀓𑀘𑁆𑀘𑀺, 𑀪𑀺𑀓𑁆𑀔𑀯𑁂, 𑀔𑀫𑀦𑀻𑀬𑀁 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺𑀢𑁆𑀣 𑀅𑀧𑁆𑀧𑀓𑀺𑀮𑀫𑀣𑁂𑀦 𑀅𑀤𑁆𑀥𑀸𑀦𑀁 𑀆𑀕𑀢𑀸, 𑀦 𑀘 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀺𑀢𑁆𑀣, 𑀓𑀼𑀢𑁄 𑀘 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀆𑀕𑀘𑁆𑀙𑀣𑀸’’𑀢𑀺 𑀧𑀝𑀺𑀲𑀦𑁆𑀣𑀸𑀭𑀯𑀲𑁂𑀦 𑀧𑀼𑀘𑁆𑀙𑀺𑀢𑀸 𑁋 ‘‘𑀪𑀕𑀯𑀸 𑀲𑀸𑀓𑀺𑀬𑀚𑀦𑀧𑀤𑁂 𑀓𑀧𑀺𑀮𑀯𑀢𑁆𑀣𑀸𑀳𑀸𑀭𑀢𑁄 𑀚𑀸𑀢𑀺𑀪𑀽𑀫𑀺𑀢𑁄 𑀆𑀕𑀘𑁆𑀙𑀸𑀫𑀸’’𑀢𑀺 𑀆𑀳𑀁𑀲𑀼. 𑀅𑀣 𑀪𑀕𑀯𑀸 𑀦𑁂𑀯 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲, 𑀦 𑀲𑀓𑁆𑀓𑁄𑀤𑀦𑀲𑁆𑀲, 𑀦 𑀲𑀼𑀓𑁆𑀓𑁄𑀤𑀦𑀲𑁆𑀲, 𑀦 𑀥𑁄𑀢𑁄𑀤𑀦𑀲𑁆𑀲, 𑀦 𑀅𑀫𑀺𑀢𑁄𑀤𑀦𑀲𑁆𑀲, 𑀦 𑀅𑀫𑀺𑀢𑁆𑀢𑀸𑀬 𑀤𑁂𑀯𑀺𑀬𑀸, 𑀦 𑀫𑀳𑀸𑀧𑀚𑀸𑀧𑀢𑀺𑀬𑀸, 𑀦 𑀲𑀓𑀮𑀲𑁆𑀲 𑀲𑀸𑀓𑀺𑀬𑀫𑀡𑁆𑀟𑀮𑀲𑁆𑀲 𑀆𑀭𑁄𑀕𑁆𑀬𑀁 𑀧𑀼𑀘𑁆𑀙𑀺. 𑀅𑀣 𑀔𑁄 𑀅𑀢𑁆𑀢𑀦𑀸 𑀘 𑀤𑀲𑀓𑀣𑀸𑀯𑀢𑁆𑀣𑀼𑀮𑀸𑀪𑀺𑀁 𑀧𑀭𑀜𑁆𑀘 𑀢𑀢𑁆𑀣 𑀲𑀫𑀸𑀤𑀧𑁂𑀢𑀸𑀭𑀁 𑀧𑀝𑀺𑀧𑀢𑁆𑀢𑀺𑀲𑀫𑁆𑀧𑀦𑁆𑀦𑀁 𑀪𑀺𑀓𑁆𑀔𑀼𑀁 𑀧𑀼𑀘𑁆𑀙𑀦𑁆𑀢𑁄 𑀇𑀤𑀁 𑁋 ‘‘𑀓𑁄 𑀦𑀼 𑀔𑁄, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘.

𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀲𑀼𑀤𑁆𑀥𑁄𑀤𑀦𑀸𑀤𑀻𑀦𑀁 𑀆𑀭𑁄𑀕𑁆𑀬𑀁 𑀅𑀧𑀼𑀘𑁆𑀙𑀺𑀢𑁆𑀯𑀸 𑀏𑀯𑀭𑀽𑀧𑀁 𑀪𑀺𑀓𑁆𑀔𑀼𑀫𑁂𑀯 𑀧𑀼𑀘𑁆𑀙𑀢𑀺? 𑀧𑀺𑀬𑀢𑀸𑀬. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀧𑀝𑀺𑀧𑀦𑁆𑀦𑀓𑀸 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀸𑀲𑀓𑀸 𑀉𑀧𑀸𑀲𑀺𑀓𑀸𑀬𑁄 𑀘 𑀧𑀺𑀬𑀸 𑀳𑁄𑀦𑁆𑀢𑀺 𑀫𑀦𑀸𑀧𑀸. 𑀓𑀺𑀁 𑀓𑀸𑀭𑀡𑀸? 𑀥𑀫𑁆𑀫𑀕𑀭𑀼𑀢𑀸𑀬. 𑀥𑀫𑁆𑀫𑀕𑀭𑀼𑀦𑁄 𑀳𑀺 𑀢𑀣𑀸𑀕𑀢𑀸, 𑀲𑁄 𑀘 𑀦𑁂𑀲𑀁 𑀥𑀫𑁆𑀫𑀕𑀭𑀼𑀪𑀸𑀯𑁄, ‘‘𑀤𑀼𑀓𑁆𑀔𑀁 𑀔𑁄 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺, 𑀅𑀧𑁆𑀧𑀢𑀺𑀲𑁆𑀲𑁄’’𑀢𑀺 (𑀅. 𑀦𑀺. 𑁪.𑁨𑁧) 𑀇𑀫𑀺𑀦𑀸 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀉𑀧𑁆𑀧𑀦𑁆𑀦𑀚𑁆𑀛𑀸𑀲𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀥𑀫𑁆𑀫𑀕𑀭𑀼𑀢𑀸𑀬𑁂𑀯 𑀳𑀺 𑀪𑀕𑀯𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀅𑀪𑀺𑀦𑀺𑀓𑁆𑀔𑀫𑀦𑀤𑀺𑀯𑀲𑁂 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀭𑁄𑀦𑁆𑀢𑁄 𑀢𑀺𑀕𑀸𑀯𑀼𑀢𑀁 𑀫𑀕𑁆𑀕𑀁 𑀅𑀕𑀫𑀸𑀲𑀺. 𑀅𑀢𑀺𑀭𑁂𑀓𑀢𑀺𑀬𑁄𑀚𑀦𑀲𑀢𑀁 𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀕𑀗𑁆𑀕𑀸𑀢𑀻𑀭𑁂 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀫𑀳𑀸𑀓𑀧𑁆𑀧𑀺𑀦𑀁 𑀲𑀧𑀭𑀺𑀲𑀁 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀧𑁂𑀲𑀺. 𑀏𑀓𑀲𑁆𑀫𑀺𑀁 𑀧𑀘𑁆𑀙𑀸𑀪𑀢𑁆𑀢𑁂 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀁 𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀓𑀼𑀫𑁆𑀪𑀓𑀸𑀭𑀲𑁆𑀲 𑀦𑀺𑀯𑁂𑀲𑀦𑁂 𑀢𑀺𑀬𑀸𑀫𑀭𑀢𑁆𑀢𑀺𑀁 𑀥𑀫𑁆𑀫𑀓𑀣𑀁 𑀓𑀢𑁆𑀯𑀸 𑀧𑀼𑀓𑁆𑀓𑀼𑀲𑀸𑀢𑀺𑀓𑀼𑀮𑀧𑀼𑀢𑁆𑀢𑀁 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀧𑁂𑀲𑀺. 𑀯𑀻𑀲𑀬𑁄𑀚𑀦𑀲𑀢𑀁 𑀕𑀦𑁆𑀢𑁆𑀯𑀸 𑀯𑀦𑀯𑀸𑀲𑀺𑀲𑀸𑀫𑀡𑁂𑀭𑀲𑁆𑀲 𑀅𑀦𑀼𑀕𑁆𑀕𑀳𑀁 𑀅𑀓𑀸𑀲𑀺. 𑀲𑀝𑁆𑀞𑀺𑀬𑁄𑀚𑀦𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀔𑀤𑀺𑀭𑀯𑀦𑀺𑀬𑀢𑁆𑀣𑁂𑀭𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀧𑀸𑀘𑀻𑀦𑀯𑀁𑀲𑀤𑀸𑀬𑁂 𑀦𑀺𑀲𑀺𑀦𑁆𑀦𑁄 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀢𑀻𑀢𑀺 𑀜𑀢𑁆𑀯𑀸 𑀢𑀢𑁆𑀣 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀧𑀼𑀭𑀢𑁄 𑀑𑀭𑀼𑀬𑁆𑀳 𑀲𑀸𑀥𑀼𑀓𑀸𑀭𑀫𑀤𑀸𑀲𑀺. 𑀓𑁄𑀝𑀺𑀓𑀡𑁆𑀡𑀲𑁄𑀡𑀢𑁆𑀣𑁂𑀭𑀲𑁆𑀲 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑀸𑀧𑁂𑀢𑁆𑀯𑀸 𑀧𑀘𑁆𑀘𑀽𑀲𑀓𑀸𑀮𑁂 𑀥𑀫𑁆𑀫𑀤𑁂𑀲𑀦𑀁 𑀅𑀚𑁆𑀛𑁂𑀲𑀺𑀢𑁆𑀯𑀸 𑀲𑀭𑀪𑀜𑁆𑀜𑀧𑀭𑀺𑀬𑁄𑀲𑀸𑀦𑁂 𑀲𑀸𑀥𑀼𑀓𑀸𑀭𑀫𑀤𑀸𑀲𑀺. 𑀢𑀺𑀕𑀸𑀯𑀼𑀢𑀁 𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀢𑀺𑀡𑁆𑀡𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀯𑀲𑀦𑀝𑁆𑀞𑀸𑀦𑁂 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑁂 𑀲𑀸𑀫𑀕𑁆𑀕𑀺𑀭𑀲𑀸𑀦𑀺𑀲𑀁𑀲𑀁 𑀓𑀣𑁂𑀲𑀺. 𑀓𑀲𑁆𑀲𑀧𑁄𑀧𑀺 𑀪𑀕𑀯𑀸 𑁋 ‘‘𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁄 𑀅𑀭𑀺𑀬𑀲𑀸𑀯𑀓𑁄 𑀅𑀬’’𑀦𑁆𑀢𑀺 𑀯𑀺𑀲𑁆𑀲𑀸𑀲𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀖𑀝𑀺𑀓𑀸𑀭𑀲𑁆𑀲 𑀓𑀼𑀫𑁆𑀪𑀓𑀸𑀭𑀲𑁆𑀲 𑀦𑀺𑀯𑁂𑀲𑀦𑀁 𑀕𑀦𑁆𑀢𑁆𑀯𑀸 𑀲𑀳𑀢𑁆𑀣𑀸 𑀆𑀫𑀺𑀲𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺.

𑀅𑀫𑁆𑀳𑀸𑀓𑀁𑀬𑁂𑀯 𑀪𑀕𑀯𑀸 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀚𑁂𑀢𑀯𑀦𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀘𑀸𑀭𑀺𑀓𑀁 𑀦𑀺𑀓𑁆𑀔𑀫𑀺. 𑀓𑁄𑀲𑀮𑀫𑀳𑀸𑀭𑀸𑀚𑀅𑀦𑀸𑀣𑀧𑀺𑀡𑁆𑀟𑀺𑀓𑀸𑀤𑀬𑁄 𑀦𑀺𑀯𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀖𑀭𑀁 𑀆𑀕𑀦𑁆𑀢𑁆𑀯𑀸 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄 𑀦𑀺𑀲𑀻𑀤𑀺. 𑀅𑀣 𑀦𑀁 𑀧𑀼𑀡𑁆𑀡𑀸 𑀦𑀸𑀫 𑀤𑀸𑀲𑀻 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄𑀲𑀺 𑀲𑀸𑀫𑀻𑀢𑀺 𑀆𑀳. ‘‘𑀆𑀫 𑀚𑁂, 𑀲𑀢𑁆𑀣𑀸𑀭𑀁 𑀦𑀺𑀯𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺𑀁, 𑀅𑀣 𑀫𑁂 𑀇𑀫𑀁 𑀢𑁂𑀫𑀸𑀲𑀁 𑀥𑀫𑁆𑀫𑀁 𑀯𑀸 𑀲𑁄𑀢𑀼𑀁, 𑀬𑀣𑀸𑀥𑀺𑀧𑁆𑀧𑀸𑀬𑀁 𑀯𑀸 𑀤𑀸𑀦𑀁 𑀤𑀸𑀢𑀼𑀁 𑀦 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑀸 𑀉𑀧𑁆𑀧𑀦𑁆𑀦𑀸𑀢𑀺. 𑀅𑀳𑀫𑁆𑀧𑀺 𑀲𑀸𑀫𑀺 𑀲𑀢𑁆𑀣𑀸𑀭𑀁 𑀦𑀺𑀯𑀢𑁆𑀢𑁂𑀲𑁆𑀲𑀸𑀫𑀻𑀢𑀺. 𑀲𑀘𑁂 𑀦𑀺𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀲𑀺, 𑀪𑀼𑀚𑀺𑀲𑁆𑀲𑀸𑀬𑁂𑀯 𑀢𑁆𑀯𑀦𑁆𑀢𑀺. 𑀲𑀸 𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 ‘‘𑀦𑀺𑀯𑀢𑁆𑀢𑀣 𑀪𑀕𑀯𑀸’’𑀢𑀺 𑀆𑀳. 𑀧𑀼𑀡𑁆𑀡𑁂 𑀢𑁆𑀯𑀁 𑀧𑀭𑀧𑀝𑀺𑀩𑀤𑁆𑀥𑀚𑀻𑀯𑀺𑀓𑀸 𑀓𑀺𑀁 𑀫𑁂 𑀓𑀭𑀺𑀲𑁆𑀲𑀲𑀻𑀢𑀺. 𑀪𑀕𑀯𑀸 𑀫𑀬𑁆𑀳𑀁 𑀤𑁂𑀬𑁆𑀬𑀥𑀫𑁆𑀫𑁄 𑀦𑀢𑁆𑀣𑀻𑀢𑀺 𑀢𑀼𑀫𑁆𑀳𑁂𑀧𑀺 𑀚𑀸𑀦𑀸𑀣, 𑀢𑀼𑀫𑁆𑀳𑀸𑀓𑀁 𑀦𑀺𑀯𑀢𑁆𑀢𑀦𑀧𑀘𑁆𑀘𑀬𑀸 𑀧𑀦𑀸𑀳𑀁 𑀢𑀻𑀲𑀼 𑀲𑀭𑀡𑁂𑀲𑀼 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀳𑀺𑀲𑁆𑀲𑀸𑀫𑀻𑀢𑀺. 𑀪𑀕𑀯𑀸 𑀲𑀸𑀥𑀼 𑀲𑀸𑀥𑀼 𑀧𑀼𑀡𑁆𑀡𑁂𑀢𑀺 𑀲𑀸𑀥𑀼𑀓𑀸𑀭𑀁 𑀓𑀢𑁆𑀯𑀸 𑀦𑀺𑀯𑀢𑁆𑀢𑁂𑀢𑁆𑀯𑀸 𑀚𑁂𑀢𑀯𑀦𑀫𑁂𑀯 𑀧𑀯𑀺𑀝𑁆𑀞𑁄. 𑀅𑀬𑀁 𑀓𑀣𑀸 𑀧𑀸𑀓𑀝𑀸 𑀅𑀳𑁄𑀲𑀺. 𑀲𑁂𑀝𑁆𑀞𑀺 𑀲𑀼𑀢𑁆𑀯𑀸 𑀧𑀼𑀡𑁆𑀡𑀸𑀬 𑀓𑀺𑀭 𑀪𑀕𑀯𑀸 𑀦𑀺𑀯𑀢𑁆𑀢𑀺𑀢𑁄𑀢𑀺 𑀢𑀁 𑀪𑀼𑀚𑀺𑀲𑁆𑀲𑀁 𑀓𑀢𑁆𑀯𑀸 𑀥𑀻𑀢𑀼𑀝𑁆𑀞𑀸𑀦𑁂 𑀞𑀧𑁂𑀲𑀺. 𑀲𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀧𑀩𑁆𑀩𑀚𑀺, 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺. 𑀅𑀣𑀲𑁆𑀲𑀸 𑀲𑀢𑁆𑀣𑀸 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀪𑀸𑀯𑀁 𑀜𑀢𑁆𑀯𑀸 𑀇𑀫𑀁 𑀑𑀪𑀸𑀲𑀕𑀸𑀣𑀁 𑀯𑀺𑀲𑁆𑀲𑀚𑁆𑀚𑁂𑀲𑀺 𑁋

‘‘𑀧𑀼𑀡𑁆𑀡𑁂 𑀧𑀽𑀭𑁂𑀲𑀺 𑀲𑀤𑁆𑀥𑀫𑁆𑀫𑀁, 𑀘𑀦𑁆𑀤𑁄 𑀧𑀦𑁆𑀦𑀭𑀲𑁄 𑀬𑀣𑀸;

𑀧𑀭𑀺𑀧𑀼𑀡𑁆𑀡𑀸𑀬 𑀧𑀜𑁆𑀜𑀸𑀬, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀲𑀻’’𑀢𑀺. (𑀣𑁂𑀭𑀻𑀕𑀸. 𑁩);

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀪𑀺𑀜𑁆𑀜𑀸𑀢𑀸 𑀲𑀸𑀯𑀺𑀓𑀸 𑀅𑀳𑁄𑀲𑀻𑀢𑀺. 𑀏𑀯𑀁 𑀥𑀫𑁆𑀫𑀕𑀭𑀼𑀦𑁄 𑀢𑀣𑀸𑀕𑀢𑀸.

𑀦𑀦𑁆𑀤𑀓𑀢𑁆𑀣𑁂𑀭𑁂 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂𑀧𑀺 𑀪𑀕𑀯𑀸 𑀅𑀦𑀳𑀸𑀢𑁄𑀯 𑀕𑀦𑁆𑀢𑁆𑀯𑀸 𑀢𑀺𑀬𑀸𑀫𑀭𑀢𑁆𑀢𑀺𑀁 𑀞𑀺𑀢𑀓𑁄𑀯 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀸𑀥𑀼𑀓𑀸𑀭𑀫𑀤𑀸𑀲𑀺. 𑀣𑁂𑀭𑁄 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸, ‘‘𑀓𑀸𑀬 𑀯𑁂𑀮𑀸𑀬, 𑀪𑀦𑁆𑀢𑁂, 𑀆𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. 𑀢𑀬𑀸 𑀲𑀼𑀢𑁆𑀢𑀦𑁆𑀢𑁂 𑀆𑀭𑀤𑁆𑀥𑀫𑀢𑁆𑀢𑁂𑀢𑀺. 𑀤𑀼𑀓𑁆𑀓𑀭𑀁 𑀓𑀭𑀺𑀢𑁆𑀣, 𑀪𑀦𑁆𑀢𑁂, 𑀩𑀼𑀤𑁆𑀥𑀲𑀼𑀔𑀼𑀫𑀸𑀮𑀸 𑀢𑀼𑀫𑁆𑀳𑁂𑀢𑀺. 𑀲𑀘𑁂 𑀢𑁆𑀯𑀁, 𑀦𑀦𑁆𑀤, 𑀓𑀧𑁆𑀧𑀁 𑀤𑁂𑀲𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀲𑀺, 𑀓𑀧𑁆𑀧𑀫𑀢𑁆𑀢𑀫𑁆𑀧𑀸𑀳𑀁 𑀞𑀺𑀢𑀓𑁄𑀯 𑀲𑀼𑀡𑁂𑀬𑁆𑀬𑀦𑁆𑀢𑀺 𑀪𑀕𑀯𑀸 𑀅𑀯𑁄𑀘. 𑀏𑀯𑀁 𑀥𑀫𑁆𑀫𑀕𑀭𑀼𑀦𑁄 𑀢𑀣𑀸𑀕𑀢𑀸. 𑀢𑁂𑀲𑀁 𑀥𑀫𑁆𑀫𑀕𑀭𑀼𑀢𑀸𑀬 𑀧𑀝𑀺𑀧𑀦𑁆𑀦𑀓𑀸 𑀧𑀺𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀧𑀝𑀺𑀧𑀦𑁆𑀦𑀓𑁂 𑀧𑀼𑀘𑁆𑀙𑀺. 𑀧𑀝𑀺𑀧𑀦𑁆𑀦𑀓𑁄 𑀘 𑀦𑀸𑀫 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀦𑁄 𑀧𑀭𑀳𑀺𑀢𑀸𑀬, 𑀧𑀭𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀦𑁄 𑀅𑀢𑁆𑀢𑀳𑀺𑀢𑀸𑀬, 𑀦𑁄 𑀅𑀢𑁆𑀢𑀳𑀺𑀢𑀸𑀬 𑀘 𑀧𑀝𑀺𑀧𑀦𑁆𑀦𑁄 𑀦𑁄 𑀧𑀭𑀳𑀺𑀢𑀸𑀬 𑀘, 𑀅𑀢𑁆𑀢𑀳𑀺𑀢𑀸𑀬 𑀘 𑀧𑀝𑀺𑀧𑀦𑁆𑀦𑁄 𑀧𑀭𑀳𑀺𑀢𑀸𑀬 𑀘𑀸𑀢𑀺 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺.

𑀢𑀢𑁆𑀣 𑀬𑁄 𑀲𑀬𑀁 𑀤𑀲𑀦𑁆𑀦𑀁 𑀓𑀣𑀸𑀯𑀢𑁆𑀣𑀽𑀦𑀁 𑀮𑀸𑀪𑀻 𑀳𑁄𑀢𑀺, 𑀧𑀭𑀁 𑀢𑀢𑁆𑀣 𑀦 𑀑𑀯𑀤𑀢𑀺 𑀦 𑀅𑀦𑀼𑀲𑀸𑀲𑀢𑀺 𑀆𑀬𑀲𑁆𑀫𑀸 𑀩𑀸𑀓𑀼𑀮𑁄 𑀯𑀺𑀬. 𑀅𑀬𑀁 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀦𑀸𑀫 𑀦𑁄 𑀧𑀭𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄, 𑀏𑀯𑀭𑀽𑀧𑀁 𑀪𑀺𑀓𑁆𑀔𑀼𑀁 𑀪𑀕𑀯𑀸 𑀦 𑀧𑀼𑀘𑁆𑀙𑀢𑀺. 𑀓𑀲𑁆𑀫𑀸? 𑀦 𑀫𑀬𑁆𑀳𑀁 𑀲𑀸𑀲𑀦𑀲𑁆𑀲 𑀯𑀟𑁆𑀠𑀺𑀧𑀓𑁆𑀔𑁂 𑀞𑀺𑀢𑁄𑀢𑀺.

𑀬𑁄 𑀧𑀦 𑀤𑀲𑀦𑁆𑀦𑀁 𑀓𑀣𑀸𑀯𑀢𑁆𑀣𑀽𑀦𑀁 𑀅𑀮𑀸𑀪𑀻, 𑀧𑀭𑀁 𑀢𑁂𑀳𑀺 𑀑𑀯𑀤𑀢𑀺 𑀢𑁂𑀦 𑀓𑀢𑀯𑀢𑁆𑀢𑀲𑀸𑀤𑀺𑀬𑀦𑀢𑁆𑀣𑀁 𑀉𑀧𑀦𑀦𑁆𑀤𑁄 𑀲𑀓𑁆𑀬𑀧𑀼𑀢𑁆𑀢𑁄 𑀯𑀺𑀬, 𑀅𑀬𑀁 𑀧𑀭𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀦𑀸𑀫 𑀦𑁄 𑀅𑀢𑁆𑀢𑀳𑀺𑀢𑀸𑀬, 𑀏𑀯𑀭𑀽𑀧𑀫𑁆𑀧𑀺 𑀦 𑀧𑀼𑀘𑁆𑀙𑀢𑀺. 𑀓𑀲𑁆𑀫𑀸? 𑀅𑀲𑁆𑀲 𑀢𑀡𑁆𑀳𑀸 𑀫𑀳𑀸𑀧𑀘𑁆𑀙𑀺 𑀯𑀺𑀬 𑀅𑀧𑁆𑀧𑀳𑀻𑀦𑀸𑀢𑀺.

𑀬𑁄 𑀅𑀢𑁆𑀢𑀦𑀸𑀧𑀺 𑀤𑀲𑀦𑁆𑀦𑀁 𑀓𑀣𑀸𑀯𑀢𑁆𑀣𑀽𑀦𑀁 𑀅𑀮𑀸𑀪𑀻, 𑀧𑀭𑀫𑁆𑀧𑀺 𑀢𑁂𑀳𑀺 𑀦 𑀑𑀯𑀤𑀢𑀺, 𑀮𑀸𑀴𑀼𑀤𑀸𑀬𑀻 𑀯𑀺𑀬, 𑀅𑀬𑀁 𑀦𑁂𑀯 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑁄 𑀦 𑀧𑀭𑀳𑀺𑀢𑀸𑀬, 𑀏𑀯𑀭𑀽𑀧𑀫𑁆𑀧𑀺 𑀦 𑀧𑀼𑀘𑁆𑀙𑀢𑀺. 𑀓𑀲𑁆𑀫𑀸? 𑀅𑀲𑁆𑀲 𑀅𑀦𑁆𑀢𑁄 𑀓𑀺𑀮𑁂𑀲𑀸 𑀨𑀭𑀲𑀼𑀙𑁂𑀚𑁆𑀚𑀸 𑀯𑀺𑀬 𑀫𑀳𑀦𑁆𑀢𑀸𑀢𑀺.

𑀬𑁄 𑀧𑀦 𑀲𑀬𑀁 𑀤𑀲𑀦𑁆𑀦𑀁 𑀓𑀣𑀸𑀯𑀢𑁆𑀣𑀽𑀦𑀁 𑀮𑀸𑀪𑀻, 𑀧𑀭𑀫𑁆𑀧𑀺 𑀢𑁂𑀳𑀺 𑀑𑀯𑀤𑀢𑀺, 𑀅𑀬𑀁 𑀅𑀢𑁆𑀢𑀳𑀺𑀢𑀸𑀬 𑀘𑁂𑀯 𑀧𑀭𑀳𑀺𑀢𑀸𑀬 𑀘 𑀧𑀝𑀺𑀧𑀦𑁆𑀦𑁄 𑀦𑀸𑀫 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀫𑀳𑀸𑀓𑀲𑁆𑀲𑀧𑀸𑀤𑀬𑁄 𑀅𑀲𑀻𑀢𑀺𑀫𑀳𑀸𑀣𑁂𑀭𑀸 𑀯𑀺𑀬, 𑀏𑀯𑀭𑀽𑀧𑀁 𑀪𑀺𑀓𑁆𑀔𑀼𑀁 𑀧𑀼𑀘𑁆𑀙𑀢𑀺. 𑀓𑀲𑁆𑀫𑀸? 𑀫𑀬𑁆𑀳𑀁 𑀲𑀸𑀲𑀦𑀲𑁆𑀲 𑀯𑀼𑀟𑁆𑀠𑀺𑀧𑀓𑁆𑀔𑁂 𑀞𑀺𑀢𑁄𑀢𑀺. 𑀇𑀥𑀸𑀧𑀺 𑀏𑀯𑀭𑀽𑀧𑀫𑁂𑀯 𑀧𑀼𑀘𑁆𑀙𑀦𑁆𑀢𑁄 𑁋 ‘‘𑀓𑁄 𑀦𑀼 𑀔𑁄, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳.

𑀏𑀯𑀁 𑀪𑀕𑀯𑀢𑀸 𑀧𑀼𑀝𑁆𑀞𑀸𑀦𑀁 𑀧𑀦 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀪𑀕𑀯𑀸 𑀅𑀢𑁆𑀢𑀦𑁄 𑀚𑀸𑀢𑀺𑀪𑀽𑀫𑀺𑀬𑀁 𑀉𑀪𑀬𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀁 𑀤𑀲𑀓𑀣𑀸𑀯𑀢𑁆𑀣𑀼𑀮𑀸𑀪𑀺𑀁 𑀪𑀺𑀓𑁆𑀔𑀼𑀁 𑀧𑀼𑀘𑁆𑀙𑀢𑀺, 𑀓𑁄 𑀦𑀼 𑀔𑁄 𑀢𑀢𑁆𑀣 𑀏𑀯𑀭𑀽𑀧𑁄𑀢𑀺 𑀦 𑀅𑀜𑁆𑀜𑀫𑀜𑁆𑀜𑀁 𑀘𑀺𑀦𑁆𑀢𑀦𑀸 𑀯𑀸 𑀲𑀫𑀦𑁆𑀢𑀦𑀸 𑀯𑀸 𑀅𑀳𑁄𑀲𑀺. 𑀓𑀲𑁆𑀫𑀸? 𑀆𑀬𑀲𑁆𑀫𑀸 𑀳𑀺 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄 𑀢𑀲𑁆𑀫𑀺𑀁 𑀚𑀦𑀧𑀤𑁂 𑀆𑀓𑀸𑀲𑀫𑀚𑁆𑀛𑁂 𑀞𑀺𑀢𑁄 𑀘𑀦𑁆𑀤𑁄 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀘 𑀧𑀸𑀓𑀝𑁄 𑀧𑀜𑁆𑀜𑀸𑀢𑁄. 𑀢𑀲𑁆𑀫𑀸 𑀢𑁂 𑀪𑀺𑀓𑁆𑀔𑀽 𑀫𑁂𑀖𑀲𑀤𑁆𑀤𑀁 𑀲𑀼𑀢𑁆𑀯𑀸 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀺𑀢𑀫𑁄𑀭𑀖𑀝𑀸 𑀯𑀺𑀬 𑀖𑀦𑀲𑀚𑁆𑀛𑀸𑀬𑀁 𑀓𑀸𑀢𑀼𑀁, 𑀆𑀭𑀤𑁆𑀥𑀪𑀺𑀓𑁆𑀔𑀽 𑀯𑀺𑀬 𑀘 𑀅𑀢𑁆𑀢𑀦𑁄 𑀆𑀘𑀭𑀺𑀬𑀁 𑀧𑀼𑀡𑁆𑀡𑀢𑁆𑀣𑁂𑀭𑀁 𑀪𑀕𑀯𑀢𑁄 𑀆𑀭𑁄𑀘𑁂𑀦𑁆𑀢𑀸 𑀣𑁂𑀭𑀲𑁆𑀲 𑀘 𑀕𑀼𑀡𑀁 𑀪𑀸𑀲𑀺𑀢𑀼𑀁 𑀅𑀧𑁆𑀧𑀳𑁄𑀦𑁆𑀢𑁂𑀳𑀺 𑀫𑀼𑀔𑁂𑀳𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀧𑀼𑀡𑁆𑀡𑁄 𑀦𑀸𑀫, 𑀪𑀦𑁆𑀢𑁂, 𑀆𑀬𑀲𑁆𑀫𑀸𑀢𑀺𑀆𑀤𑀺𑀫𑀸𑀳𑀁𑀲𑀼. 𑀢𑀢𑁆𑀣 𑀧𑀼𑀡𑁆𑀡𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁. 𑀫𑀦𑁆𑀢𑀸𑀡𑀺𑀬𑀸 𑀧𑀦 𑀲𑁄 𑀧𑀼𑀢𑁆𑀢𑁄, 𑀢𑀲𑁆𑀫𑀸 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀫𑁆𑀪𑀸𑀯𑀺𑀢𑁄𑀢𑀺 𑀕𑀼𑀡𑀲𑀫𑁆𑀪𑀸𑀯𑀦𑀸𑀬 𑀲𑀫𑁆𑀪𑀸𑀯𑀺𑀢𑁄.

𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀯𑀡𑁆𑀡𑀦𑀸

𑀅𑀧𑁆𑀧𑀺𑀘𑁆𑀙𑁄𑀢𑀺 𑀇𑀘𑁆𑀙𑀸𑀯𑀺𑀭𑀳𑀺𑀢𑁄 𑀦𑀺𑀇𑀘𑁆𑀙𑁄 𑀦𑀺𑀢𑁆𑀢𑀡𑁆𑀳𑁄. 𑀏𑀢𑁆𑀣 𑀳𑀺 𑀩𑁆𑀬𑀜𑁆𑀚𑀦𑀁 𑀲𑀸𑀯𑀲𑁂𑀲𑀁 𑀯𑀺𑀬, 𑀅𑀢𑁆𑀣𑁄 𑀧𑀦 𑀦𑀺𑀭𑀯𑀲𑁂𑀲𑁄. 𑀦 𑀳𑀺 𑀢𑀲𑁆𑀲 𑀅𑀦𑁆𑀢𑁄 𑀅𑀡𑀼𑀫𑀢𑁆𑀢𑀸𑀧𑀺 𑀧𑀸𑀧𑀺𑀓𑀸 𑀇𑀘𑁆𑀙𑀸 𑀦𑀸𑀫 𑀅𑀢𑁆𑀣𑀺. 𑀔𑀻𑀡𑀸𑀲𑀯𑁄 𑀳𑁂𑀲 𑀲𑀩𑁆𑀩𑀲𑁄 𑀧𑀳𑀻𑀦𑀢𑀡𑁆𑀳𑁄. 𑀅𑀧𑀺𑀘𑁂𑀢𑁆𑀣 𑀅𑀢𑁆𑀭𑀺𑀘𑁆𑀙𑀢𑀸 𑀧𑀸𑀧𑀺𑀘𑁆𑀙𑀢𑀸 𑀫𑀳𑀺𑀘𑁆𑀙𑀢𑀸 𑀅𑀧𑁆𑀧𑀺𑀘𑁆𑀙𑀢𑀸𑀢𑀺 𑀅𑀬𑀁 𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀲𑀓𑀮𑀸𑀪𑁂 𑀅𑀢𑀺𑀢𑁆𑀢𑀲𑁆𑀲 𑀧𑀭𑀮𑀸𑀪𑁂 𑀧𑀢𑁆𑀣𑀦𑀸 𑀅𑀢𑁆𑀭𑀺𑀘𑁆𑀙𑀢𑀸 𑀦𑀸𑀫. 𑀢𑀸𑀬 𑀲𑀫𑀦𑁆𑀦𑀸𑀕𑀢𑀲𑁆𑀲 𑀏𑀓𑀪𑀸𑀚𑁂𑀦 𑀧𑀓𑁆𑀓𑀧𑀽𑀯𑁄𑀧𑀺 𑀅𑀢𑁆𑀢𑀦𑁄 𑀧𑀢𑁆𑀢𑁂 𑀧𑀢𑀺𑀢𑁄 𑀦 𑀲𑀼𑀧𑀓𑁆𑀓𑁄 𑀯𑀺𑀬 𑀔𑀼𑀤𑁆𑀤𑀓𑁄 𑀯𑀺𑀬 𑀘 𑀔𑀸𑀬𑀢𑀺. 𑀲𑁆𑀯𑁂𑀯 𑀧𑀭𑀲𑁆𑀲 𑀧𑀢𑁆𑀢𑁂 𑀧𑀓𑁆𑀔𑀺𑀢𑁆𑀢𑁄 𑀲𑀼𑀧𑀓𑁆𑀓𑁄 𑀯𑀺𑀬 𑀫𑀳𑀦𑁆𑀢𑁄 𑀯𑀺𑀬 𑀘 𑀔𑀸𑀬𑀢𑀺. 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀢𑀸 𑀧𑀦 𑀧𑀝𑀺𑀕𑁆𑀕𑀳𑀡𑁂 𑀘 𑀅𑀫𑀢𑁆𑀢𑀜𑁆𑀜𑀼𑀢𑀸 𑀧𑀸𑀧𑀺𑀘𑁆𑀙𑀢𑀸 𑀦𑀸𑀫, 𑀲𑀸, ‘‘𑀇𑀥𑁂𑀓𑀘𑁆𑀘𑁄 𑀅𑀲𑁆𑀲𑀤𑁆𑀥𑁄 𑀲𑀫𑀸𑀦𑁄 𑀲𑀤𑁆𑀥𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 𑀆𑀕𑀢𑀸𑀬𑁂𑀯, 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀓𑁄𑀳𑀜𑁆𑀜𑁂 𑀧𑀢𑀺𑀝𑁆𑀞𑀸𑀢𑀺. 𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀸 𑀧𑀦 𑀧𑀝𑀺𑀕𑁆𑀕𑀳𑀡𑁂 𑀘 𑀅𑀫𑀢𑁆𑀢𑀜𑁆𑀜𑀼𑀢𑀸 𑀫𑀳𑀺𑀘𑁆𑀙𑀢𑀸 𑀦𑀸𑀫. 𑀲𑀸𑀧𑀺, ‘‘𑀇𑀥𑁂𑀓𑀘𑁆𑀘𑁄 𑀲𑀤𑁆𑀥𑁄 𑀲𑀫𑀸𑀦𑁄 𑀲𑀤𑁆𑀥𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽𑀢𑀺 𑀇𑀘𑁆𑀙𑀢𑀺, 𑀲𑀻𑀮𑀯𑀸 𑀲𑀫𑀸𑀦𑁄 𑀲𑀻𑀮𑀯𑀸𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 (𑀯𑀺𑀪. 𑁮𑁫𑁧) 𑀇𑀫𑀺𑀦𑀸 𑀦𑀬𑁂𑀦 𑀆𑀕𑀢𑀸𑀬𑁂𑀯, 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀤𑀼𑀲𑁆𑀲𑀦𑁆𑀢𑀧𑁆𑀧𑀬𑁄 𑀳𑁄𑀢𑀺, 𑀯𑀺𑀚𑀸𑀢𑀫𑀸𑀢𑀸𑀧𑀺𑀲𑁆𑀲 𑀘𑀺𑀢𑁆𑀢𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀲𑀫𑀼𑀤𑁆𑀤𑁄 𑀘, 𑀫𑀳𑀺𑀘𑁆𑀙𑁄 𑀘𑀸𑀧𑀺 𑀧𑀼𑀕𑁆𑀕𑀮𑁄;

𑀲𑀓𑀝𑁂𑀦 𑀧𑀘𑁆𑀘𑀬𑀁 𑀤𑁂𑀢𑀼, 𑀢𑀬𑁄𑀧𑁂𑀢𑁂 𑀅𑀢𑀧𑁆𑀧𑀬𑀸’’𑀢𑀺.

𑀲𑀦𑁆𑀢𑀕𑀼𑀡𑀦𑀺𑀕𑀽𑀳𑀦𑀢𑀸 𑀧𑀦 𑀧𑀝𑀺𑀕𑁆𑀕𑀳𑀡𑁂 𑀘 𑀫𑀢𑁆𑀢𑀜𑁆𑀜𑀼𑀢𑀸 𑀅𑀧𑁆𑀧𑀺𑀘𑁆𑀙𑀢𑀸 𑀦𑀸𑀫, 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀕𑀼𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑀼𑀓𑀸𑀫𑀢𑀸𑀬, ‘‘𑀲𑀤𑁆𑀥𑁄 𑀲𑀫𑀸𑀦𑁄 𑀲𑀤𑁆𑀥𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽𑀢𑀺 𑀦 𑀇𑀘𑁆𑀙𑀢𑀺. 𑀲𑀻𑀮𑀯𑀸, 𑀧𑀯𑀺𑀯𑀺𑀢𑁆𑀢𑁄, 𑀩𑀳𑀼𑀲𑁆𑀲𑀼𑀢𑁄, 𑀆𑀭𑀤𑁆𑀥𑀯𑀻𑀭𑀺𑀬𑁄, 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑁄, 𑀧𑀜𑁆𑀜𑀯𑀸, 𑀔𑀻𑀡𑀸𑀲𑀯𑁄 𑀲𑀫𑀸𑀦𑁄 𑀔𑀻𑀡𑀸𑀲𑀯𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 𑀦 𑀇𑀘𑁆𑀙𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀫𑀚𑁆𑀛𑀦𑁆𑀢𑀺𑀓𑀢𑁆𑀣𑁂𑀭𑁄.

𑀣𑁂𑀭𑁄 𑀓𑀺𑀭 𑀫𑀳𑀸𑀔𑀻𑀡𑀸𑀲𑀯𑁄 𑀅𑀳𑁄𑀲𑀺, 𑀧𑀢𑁆𑀢𑀘𑀻𑀯𑀭𑀁 𑀧𑀦𑀲𑁆𑀲 𑀧𑀸𑀤𑀫𑀢𑁆𑀢𑀫𑁂𑀯 𑀅𑀕𑁆𑀖𑀢𑀺, 𑀲𑁄 𑀅𑀲𑁄𑀓𑀲𑁆𑀲 𑀥𑀫𑁆𑀫𑀭𑀜𑁆𑀜𑁄 𑀯𑀺𑀳𑀸𑀭𑀫𑀳𑀤𑀺𑀯𑀲𑁂 𑀲𑀗𑁆𑀖𑀢𑁆𑀣𑁂𑀭𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀅𑀢𑀺𑀮𑀽𑀔𑀪𑀸𑀯𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸, ‘‘𑀪𑀦𑁆𑀢𑁂, 𑀣𑁄𑀓𑀁 𑀩𑀳𑀺 𑀳𑁄𑀣𑀸’’𑀢𑀺 𑀆𑀳𑀁𑀲𑀼. 𑀣𑁂𑀭𑁄, ‘‘𑀫𑀸𑀤𑀺𑀲𑁂 𑀔𑀻𑀡𑀸𑀲𑀯𑁂 𑀭𑀜𑁆𑀜𑁄 𑀲𑀗𑁆𑀕𑀳𑀁 𑀅𑀓𑀭𑁄𑀦𑁆𑀢𑁂 𑀅𑀜𑁆𑀜𑁄 𑀓𑁄 𑀓𑀭𑀺𑀲𑁆𑀲𑀢𑀻’’𑀢𑀺 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀲𑀗𑁆𑀖𑀢𑁆𑀣𑁂𑀭𑀲𑁆𑀲 𑀉𑀓𑁆𑀔𑀺𑀢𑁆𑀢𑀧𑀺𑀡𑁆𑀟𑀁 𑀕𑀡𑁆𑀳𑀦𑁆𑀢𑁄𑀬𑁂𑀯 𑀉𑀫𑁆𑀫𑀼𑀚𑁆𑀚𑀺. 𑀏𑀯𑀁 𑀔𑀻𑀡𑀸𑀲𑀯𑁄 𑀲𑀫𑀸𑀦𑁄, ‘‘𑀔𑀻𑀡𑀸𑀲𑀯𑁄𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 𑀦 𑀇𑀘𑁆𑀙𑀢𑀺. 𑀏𑀯𑀁 𑀅𑀧𑁆𑀧𑀺𑀘𑁆𑀙𑁄 𑀧𑀦 𑀪𑀺𑀓𑁆𑀔𑀼 𑀅𑀦𑀼𑀧𑁆𑀧𑀦𑁆𑀦𑀁 𑀮𑀸𑀪𑀁 𑀉𑀧𑁆𑀧𑀸𑀤𑁂𑀢𑀺, 𑀉𑀧𑁆𑀧𑀦𑁆𑀦𑀁 𑀮𑀸𑀪𑀁 𑀣𑀸𑀯𑀭𑀁 𑀓𑀭𑁄𑀢𑀺, 𑀤𑀸𑀬𑀓𑀸𑀦𑀁 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀺, 𑀬𑀣𑀸 𑀬𑀣𑀸 𑀳𑀺 𑀲𑁄 𑀅𑀢𑁆𑀢𑀦𑁄 𑀅𑀧𑁆𑀧𑀺𑀘𑁆𑀙𑀢𑀸𑀬 𑀅𑀧𑁆𑀧𑀁 𑀕𑀡𑁆𑀳𑀸𑀢𑀺, 𑀢𑀣𑀸 𑀢𑀣𑀸 𑀢𑀲𑁆𑀲 𑀯𑀢𑁆𑀢𑁂 𑀧𑀲𑀦𑁆𑀦𑀸 𑀫𑀦𑀼𑀲𑁆𑀲𑀸 𑀩𑀳𑀽 𑀤𑁂𑀦𑁆𑀢𑀺.

𑀅𑀧𑀭𑁄𑀧𑀺 𑀘𑀢𑀼𑀩𑁆𑀩𑀺𑀥𑁄 𑀅𑀧𑁆𑀧𑀺𑀘𑁆𑀙𑁄 𑁋 𑀧𑀘𑁆𑀘𑀬𑀅𑀧𑁆𑀧𑀺𑀘𑁆𑀙𑁄 𑀥𑀼𑀢𑀗𑁆𑀕𑀅𑀧𑁆𑀧𑀺𑀘𑁆𑀙𑁄 𑀧𑀭𑀺𑀬𑀢𑁆𑀢𑀺𑀅𑀧𑁆𑀧𑀺𑀘𑁆𑀙𑁄 𑀅𑀥𑀺𑀕𑀫𑀅𑀧𑁆𑀧𑀺𑀘𑁆𑀙𑁄𑀢𑀺. 𑀢𑀢𑁆𑀣 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀅𑀧𑁆𑀧𑀺𑀘𑁆𑀙𑁄 𑀧𑀘𑁆𑀘𑀬𑀅𑀧𑁆𑀧𑀺𑀘𑁆𑀙𑁄 𑀦𑀸𑀫, 𑀲𑁄 𑀤𑀸𑀬𑀓𑀲𑁆𑀲 𑀯𑀲𑀁 𑀚𑀸𑀦𑀸𑀢𑀺, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀯𑀲𑀁 𑀚𑀸𑀦𑀸𑀢𑀺, 𑀅𑀢𑁆𑀢𑀦𑁄 𑀣𑀸𑀫𑀁 𑀚𑀸𑀦𑀸𑀢𑀺. 𑀬𑀤𑀺 𑀳𑀺 𑀤𑁂𑀬𑁆𑀬𑀥𑀫𑁆𑀫𑁄 𑀩𑀳𑀼 𑀳𑁄𑀢𑀺, 𑀤𑀸𑀬𑀓𑁄 𑀅𑀧𑁆𑀧𑀁 𑀤𑀸𑀢𑀼𑀓𑀸𑀫𑁄, 𑀤𑀸𑀬𑀓𑀲𑁆𑀲 𑀯𑀲𑁂𑀦 𑀅𑀧𑁆𑀧𑀁 𑀕𑀡𑁆𑀳𑀸𑀢𑀺. 𑀤𑁂𑀬𑁆𑀬𑀥𑀫𑁆𑀫𑁄 𑀅𑀧𑁆𑀧𑁄, 𑀤𑀸𑀬𑀓𑁄 𑀩𑀳𑀼𑀁 𑀤𑀸𑀢𑀼𑀓𑀸𑀫𑁄, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀯𑀲𑁂𑀦 𑀅𑀧𑁆𑀧𑀁 𑀕𑀡𑁆𑀳𑀸𑀢𑀺. 𑀤𑁂𑀬𑁆𑀬𑀥𑀫𑁆𑀫𑁄𑀧𑀺 𑀩𑀳𑀼, 𑀤𑀸𑀬𑀓𑁄𑀧𑀺 𑀩𑀳𑀼𑀁 𑀤𑀸𑀢𑀼𑀓𑀸𑀫𑁄, 𑀅𑀢𑁆𑀢𑀦𑁄 𑀣𑀸𑀫𑀁 𑀜𑀢𑁆𑀯𑀸 𑀧𑀫𑀸𑀡𑁂𑀦𑁂𑀯 𑀕𑀡𑁆𑀳𑀸𑀢𑀺.

𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀲𑁆𑀲 𑀅𑀢𑁆𑀢𑀦𑀺 𑀅𑀢𑁆𑀣𑀺𑀪𑀸𑀯𑀁 𑀦𑀚𑀸𑀦𑀸𑀧𑁂𑀢𑀼𑀓𑀸𑀫𑁄 𑀥𑀼𑀢𑀗𑁆𑀕𑀅𑀧𑁆𑀧𑀺𑀘𑁆𑀙𑁄 𑀦𑀸𑀫. 𑀢𑀲𑁆𑀲 𑀯𑀺𑀪𑀸𑀯𑀦𑀢𑁆𑀣𑀁 𑀇𑀫𑀸𑀦𑀺 𑀯𑀢𑁆𑀣𑀽𑀦𑀺 𑁋 𑀲𑁄𑀲𑀸𑀦𑀺𑀓𑀫𑀳𑀸𑀲𑀼𑀫𑀦𑀢𑁆𑀣𑁂𑀭𑁄 𑀓𑀺𑀭 𑀲𑀝𑁆𑀞𑀺 𑀯𑀲𑁆𑀲𑀸𑀦𑀺 𑀲𑀼𑀲𑀸𑀦𑁂 𑀯𑀲𑀺, 𑀅𑀜𑁆𑀜𑁄 𑀏𑀓𑀪𑀺𑀓𑁆𑀔𑀼𑀧𑀺 𑀦 𑀅𑀜𑁆𑀜𑀸𑀲𑀺, 𑀢𑁂𑀦𑁂𑀯𑀸𑀳 𑁋

‘‘𑀲𑀼𑀲𑀸𑀦𑁂 𑀲𑀝𑁆𑀞𑀺 𑀯𑀲𑁆𑀲𑀸𑀦𑀺, 𑀅𑀩𑁆𑀩𑁄𑀓𑀺𑀡𑁆𑀡𑀁 𑀯𑀲𑀸𑀫𑀳𑀁;

𑀤𑀼𑀢𑀺𑀬𑁄 𑀫𑀁 𑀦 𑀚𑀸𑀦𑁂𑀬𑁆𑀬, 𑀅𑀳𑁄 𑀲𑁄𑀲𑀸𑀦𑀺𑀓𑀼𑀢𑁆𑀢𑀫𑁄’’𑀢𑀺.

𑀘𑁂𑀢𑀺𑀬𑀧𑀩𑁆𑀩𑀢𑁂 𑀤𑁆𑀯𑁂𑀪𑀸𑀢𑀺𑀬𑀢𑁆𑀣𑁂𑀭𑀸 𑀯𑀲𑀺𑀁𑀲𑀼. 𑀢𑁂𑀲𑀼 𑀓𑀦𑀺𑀝𑁆𑀞𑁄 𑀉𑀧𑀝𑁆𑀞𑀸𑀓𑁂𑀦 𑀧𑁂𑀲𑀺𑀢𑀸 𑀉𑀘𑁆𑀙𑀼𑀔𑀡𑁆𑀟𑀺𑀓𑀸 𑀕𑀳𑁂𑀢𑁆𑀯𑀸 𑀚𑁂𑀝𑁆𑀞𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀧𑀭𑀺𑀪𑁄𑀕𑀁, 𑀪𑀦𑁆𑀢𑁂, 𑀓𑀭𑁄𑀣𑀸𑀢𑀺. 𑀣𑁂𑀭𑀲𑁆𑀲 𑀘 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑀦𑀓𑀸𑀮𑁄 𑀅𑀳𑁄𑀲𑀺. 𑀲𑁄 𑀅𑀮𑀁, 𑀆𑀯𑀼𑀲𑁄𑀢𑀺 𑀆𑀳. 𑀓𑀘𑁆𑀘𑀺, 𑀪𑀦𑁆𑀢𑁂, 𑀏𑀓𑀸𑀲𑀦𑀺𑀓𑀢𑁆𑀣𑀸𑀢𑀺. 𑀆𑀳𑀭𑀸𑀯𑀼𑀲𑁄, 𑀉𑀘𑁆𑀙𑀼𑀔𑀡𑁆𑀟𑀺𑀓𑀸𑀢𑀺 𑀧𑀜𑁆𑀜𑀸𑀲 𑀯𑀲𑁆𑀲𑀸𑀦𑀺 𑀏𑀓𑀸𑀲𑀦𑀺𑀓𑁄 𑀲𑀫𑀸𑀦𑁄𑀧𑀺 𑀥𑀼𑀢𑀗𑁆𑀕𑀁 𑀦𑀺𑀕𑀽𑀳𑀫𑀸𑀦𑁄 𑀧𑀭𑀺𑀪𑁄𑀕𑀁 𑀓𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀧𑀼𑀦 𑀥𑀼𑀢𑀗𑁆𑀕𑀁 𑀅𑀥𑀺𑀝𑁆𑀞𑀸𑀬 𑀕𑀢𑁄.

𑀬𑁄 𑀧𑀦 𑀲𑀸𑀓𑁂𑀢𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀺𑀬 𑀩𑀳𑀼𑀲𑁆𑀲𑀼𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑀼𑀁 𑀦 𑀇𑀘𑁆𑀙𑀢𑀺, 𑀅𑀬𑀁 𑀧𑀭𑀺𑀬𑀢𑁆𑀢𑀺𑀅𑀧𑁆𑀧𑀺𑀘𑁆𑀙𑁄 𑀦𑀸𑀫. 𑀣𑁂𑀭𑁄 𑀓𑀺𑀭 𑀔𑀡𑁄 𑀦𑀢𑁆𑀣𑀻𑀢𑀺 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀲𑀼 𑀑𑀓𑀸𑀲𑀁 𑀅𑀓𑀭𑁄𑀦𑁆𑀢𑁄 𑀫𑀭𑀡𑀓𑁆𑀔𑀬𑀁, 𑀪𑀦𑁆𑀢𑁂, 𑀮𑀪𑀺𑀲𑁆𑀲𑀣𑀸𑀢𑀺 𑀘𑁄𑀤𑀺𑀢𑁄 𑀕𑀡𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀓𑀡𑀺𑀓𑀸𑀭𑀯𑀸𑀮𑀺𑀓𑀲𑀫𑀼𑀤𑁆𑀤𑀯𑀺𑀳𑀸𑀭𑀁 𑀕𑀢𑁄. 𑀢𑀢𑁆𑀣 𑀅𑀦𑁆𑀢𑁄𑀯𑀲𑁆𑀲𑀁 𑀣𑁂𑀭𑀦𑀯𑀫𑀚𑁆𑀛𑀺𑀫𑀸𑀦𑀁 𑀉𑀧𑀓𑀸𑀭𑁄 𑀳𑀼𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀸𑀬 𑀉𑀧𑁄𑀲𑀣𑀤𑀺𑀯𑀲𑁂 𑀥𑀫𑁆𑀫𑀓𑀣𑀸𑀬 𑀚𑀦𑀢𑀁 𑀔𑁄𑀪𑁂𑀢𑁆𑀯𑀸 𑀕𑀢𑁄.

𑀬𑁄 𑀧𑀦 𑀲𑁄𑀢𑀸𑀧𑀦𑁆𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑁄 𑀳𑀼𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑀸𑀤𑀺𑀪𑀸𑀯𑀁 𑀚𑀸𑀦𑀸𑀧𑁂𑀢𑀼𑀁 𑀦 𑀇𑀘𑁆𑀙𑀢𑀺, 𑀅𑀬𑀁 𑀅𑀥𑀺𑀕𑀫𑀅𑀧𑁆𑀧𑀺𑀘𑁆𑀙𑁄 𑀦𑀸𑀫, 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑀯𑀺𑀬 𑀖𑀝𑀺𑀓𑀸𑀭𑀓𑀼𑀫𑁆𑀪𑀓𑀸𑀭𑁄 𑀯𑀺𑀬 𑀘.

𑀆𑀬𑀲𑁆𑀫𑀸 𑀧𑀦 𑀧𑀼𑀡𑁆𑀡𑁄 𑀅𑀢𑁆𑀭𑀺𑀘𑁆𑀙𑀢𑀁 𑀧𑀸𑀧𑀺𑀘𑁆𑀙𑀢𑀁 𑀫𑀳𑀺𑀘𑁆𑀙𑀢𑀜𑁆𑀘 𑀧𑀳𑀸𑀬 𑀲𑀩𑁆𑀩𑀲𑁄 𑀇𑀘𑁆𑀙𑀸𑀧𑀝𑀺𑀧𑀓𑁆𑀔𑀪𑀽𑀢𑀸𑀬 𑀅𑀮𑁄𑀪𑀲𑀗𑁆𑀔𑀸𑀢𑀸𑀬 𑀧𑀭𑀺𑀲𑀼𑀤𑁆𑀥𑀸𑀬 𑀅𑀧𑁆𑀧𑀺𑀘𑁆𑀙𑀢𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀅𑀧𑁆𑀧𑀺𑀘𑁆𑀙𑁄 𑀦𑀸𑀫 𑀅𑀳𑁄𑀲𑀺. 𑀪𑀺𑀓𑁆𑀔𑀽𑀦𑀫𑁆𑀧𑀺, ‘‘𑀆𑀯𑀼𑀲𑁄, 𑀅𑀢𑁆𑀭𑀺𑀘𑁆𑀙𑀢𑀸 𑀧𑀸𑀧𑀺𑀘𑁆𑀙𑀢𑀸 𑀫𑀳𑀺𑀘𑁆𑀙𑀢𑀸𑀢𑀺 𑀇𑀫𑁂 𑀥𑀫𑁆𑀫𑀸 𑀧𑀳𑀸𑀢𑀩𑁆𑀩𑀸’’𑀢𑀺 𑀢𑁂𑀲𑀼 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀏𑀯𑀭𑀽𑀧𑀁 𑀅𑀧𑁆𑀧𑀺𑀘𑁆𑀙𑀢𑀁 𑀲𑀫𑀸𑀤𑀸𑀬 𑀯𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀅𑀧𑁆𑀧𑀺𑀘𑁆𑀙𑀓𑀣𑀁 𑀓𑀣𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀦𑀸 𑀘 𑀅𑀧𑁆𑀧𑀺𑀘𑁆𑀙𑁄 𑀅𑀧𑁆𑀧𑀺𑀘𑁆𑀙𑀓𑀣𑀜𑁆𑀘 𑀪𑀺𑀓𑁆𑀔𑀽𑀦𑀁 𑀓𑀢𑁆𑀢𑀸’’𑀢𑀺.

𑀤𑁆𑀯𑀸𑀤𑀲𑀯𑀺𑀥𑀲𑀦𑁆𑀢𑁄𑀲𑀯𑀡𑁆𑀡𑀦𑀸

𑀇𑀤𑀸𑀦𑀺 𑀅𑀢𑁆𑀢𑀦𑀸 𑀘 𑀲𑀦𑁆𑀢𑀼𑀝𑁆𑀞𑁄𑀢𑀺𑀆𑀤𑀻𑀲𑀼 𑀯𑀺𑀲𑁂𑀲𑀢𑁆𑀣𑀫𑁂𑀯 𑀤𑀻𑀧𑀬𑀺𑀲𑁆𑀲𑀸𑀫. 𑀬𑁄𑀚𑀦𑀸 𑀧𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀲𑀦𑁆𑀢𑀼𑀝𑁆𑀞𑁄𑀢𑀺 𑀇𑀢𑀭𑀻𑀢𑀭𑀧𑀘𑁆𑀘𑀬𑀲𑀦𑁆𑀢𑁄𑀲𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑁄 𑀧𑀦𑁂𑀲 𑀲𑀦𑁆𑀢𑁄𑀲𑁄 𑀤𑁆𑀯𑀸𑀤𑀲𑀯𑀺𑀥𑁄 𑀳𑁄𑀢𑀺. 𑀲𑁂𑀬𑁆𑀬𑀣𑀺𑀤𑀁, 𑀘𑀻𑀯𑀭𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄 𑀬𑀣𑀸𑀩𑀮𑀲𑀦𑁆𑀢𑁄𑀲𑁄 𑀬𑀣𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄𑀢𑀺 𑀢𑀺𑀯𑀺𑀥𑁄, 𑀏𑀯𑀁 𑀧𑀺𑀡𑁆𑀟𑀧𑀸𑀢𑀸𑀤𑀻𑀲𑀼. 𑀢𑀲𑁆𑀲𑀸𑀬𑀁 𑀧𑀪𑁂𑀤𑀲𑀁𑀯𑀡𑁆𑀡𑀦𑀸.

𑀇𑀥 𑀪𑀺𑀓𑁆𑀔𑀼 𑀘𑀻𑀯𑀭𑀁 𑀮𑀪𑀢𑀺 𑀲𑀼𑀦𑁆𑀤𑀭𑀁 𑀯𑀸 𑀅𑀲𑀼𑀦𑁆𑀤𑀭𑀁 𑀯𑀸. 𑀲𑁄 𑀢𑁂𑀦𑁂𑀯 𑀬𑀸𑀧𑁂𑀢𑀺 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺, 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀅𑀣 𑀬𑁄 𑀧𑀓𑀢𑀺𑀤𑀼𑀩𑁆𑀩𑀮𑁄 𑀯𑀸 𑀳𑁄𑀢𑀺 𑀆𑀩𑀸𑀥𑀚𑀭𑀸𑀪𑀺𑀪𑀽𑀢𑁄 𑀯𑀸, 𑀕𑀭𑀼𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑁄 𑀓𑀺𑀮𑀫𑀢𑀺, 𑀲𑁄 𑀲𑀪𑀸𑀕𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀮𑀳𑀼𑀓𑁂𑀦 𑀬𑀸𑀧𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀧𑀡𑀻𑀢𑀧𑀘𑁆𑀘𑀬𑀮𑀸𑀪𑀻 𑀳𑁄𑀢𑀺, 𑀲𑁄 𑀧𑀝𑁆𑀝𑀘𑀻𑀯𑀭𑀸𑀤𑀻𑀦𑀁 𑀅𑀜𑁆𑀜𑀢𑀭𑀁 𑀫𑀳𑀕𑁆𑀖𑀘𑀻𑀯𑀭𑀁 𑀩𑀳𑀽𑀦𑀺 𑀯𑀸 𑀧𑀦 𑀘𑀻𑀯𑀭𑀸𑀦𑀺 𑀮𑀪𑀺𑀢𑁆𑀯𑀸 𑀇𑀤𑀁 𑀣𑁂𑀭𑀸𑀦𑀁 𑀘𑀺𑀭𑀧𑀩𑁆𑀩𑀚𑀺𑀢𑀸𑀦𑀁 𑀇𑀤𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀅𑀦𑀼𑀭𑀽𑀧𑀁, 𑀇𑀤𑀁 𑀕𑀺𑀮𑀸𑀦𑀸𑀦𑀁 𑀇𑀤𑀁 𑀅𑀧𑁆𑀧𑀮𑀸𑀪𑀸𑀦𑀁 𑀳𑁄𑀢𑀽𑀢𑀺 𑀤𑀢𑁆𑀯𑀸 𑀢𑁂𑀲𑀁 𑀧𑀼𑀭𑀸𑀡𑀘𑀻𑀯𑀭𑀁 𑀯𑀸 𑀲𑀗𑁆𑀓𑀸𑀭𑀓𑀽𑀝𑀸𑀤𑀺𑀢𑁄 𑀯𑀸 𑀦𑀦𑁆𑀢𑀓𑀸𑀦𑀺 𑀉𑀘𑁆𑀘𑀺𑀦𑀺𑀢𑁆𑀯𑀸 𑀢𑁂𑀳𑀺 𑀲𑀗𑁆𑀖𑀸𑀝𑀺𑀁 𑀓𑀢𑁆𑀯𑀸 𑀥𑀸𑀭𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀥 𑀧𑀦 𑀪𑀺𑀓𑁆𑀔𑀼 𑀧𑀺𑀡𑁆𑀟𑀧𑀸𑀢𑀁 𑀮𑀪𑀢𑀺 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸, 𑀲𑁄 𑀢𑁂𑀦𑁂𑀯 𑀬𑀸𑀧𑁂𑀢𑀺, 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺, 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀬𑁄 𑀧𑀦 𑀅𑀢𑁆𑀢𑀦𑁄 𑀧𑀓𑀢𑀺𑀯𑀺𑀭𑀼𑀤𑁆𑀥𑀁 𑀯𑀸 𑀩𑁆𑀬𑀸𑀥𑀺𑀯𑀺𑀭𑀼𑀤𑁆𑀥𑀁 𑀯𑀸 𑀧𑀺𑀡𑁆𑀟𑀧𑀸𑀢𑀁 𑀮𑀪𑀢𑀺, 𑀬𑁂𑀦𑀲𑁆𑀲 𑀧𑀭𑀺𑀪𑀼𑀢𑁆𑀢𑁂𑀦 𑀅𑀨𑀸𑀲𑀼 𑀳𑁄𑀢𑀺, 𑀲𑁄 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀁 𑀤𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑁄 𑀲𑀧𑁆𑀧𑀸𑀬𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀩𑀳𑀼𑀁 𑀧𑀡𑀻𑀢𑀁 𑀧𑀺𑀡𑁆𑀟𑀧𑀸𑀢𑀁 𑀮𑀪𑀢𑀺, 𑀲𑁄 𑀢𑀁 𑀘𑀻𑀯𑀭𑀁 𑀯𑀺𑀬 𑀘𑀺𑀭𑀧𑀩𑁆𑀩𑀚𑀺𑀢𑀩𑀳𑀼𑀲𑁆𑀲𑀼𑀢𑀅𑀧𑁆𑀧𑀮𑀸𑀪𑀺𑀕𑀺𑀮𑀸𑀦𑀸𑀦𑀁 𑀤𑀢𑁆𑀯𑀸 𑀢𑁂𑀲𑀁 𑀯𑀸 𑀲𑁂𑀲𑀓𑀁 𑀧𑀺𑀡𑁆𑀟𑀸𑀬 𑀯𑀸 𑀘𑀭𑀺𑀢𑁆𑀯𑀸 𑀫𑀺𑀲𑁆𑀲𑀓𑀸𑀳𑀸𑀭𑀁 𑀪𑀼𑀜𑁆𑀚𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀥 𑀧𑀦 𑀪𑀺𑀓𑁆𑀔𑀼 𑀲𑁂𑀦𑀸𑀲𑀦𑀁 𑀮𑀪𑀢𑀺 𑀫𑀦𑀸𑀧𑀁 𑀯𑀸 𑀅𑀫𑀦𑀸𑀧𑀁 𑀯𑀸, 𑀲𑁄 𑀢𑁂𑀦 𑀦𑁂𑀯 𑀲𑁄𑀫𑀦𑀲𑁆𑀲𑀁 𑀦 𑀧𑀝𑀺𑀖𑀁 𑀉𑀧𑁆𑀧𑀸𑀤𑁂𑀢𑀺, 𑀅𑀦𑁆𑀢𑀫𑀲𑁄 𑀢𑀺𑀡𑀲𑀦𑁆𑀣𑀸𑀭𑀓𑁂𑀦𑀸𑀧𑀺 𑀬𑀣𑀸𑀮𑀤𑁆𑀥𑁂𑀦𑁂𑀯 𑀢𑀼𑀲𑁆𑀲𑀢𑀺, 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀬𑁄 𑀧𑀦 𑀅𑀢𑁆𑀢𑀦𑁄 𑀧𑀓𑀢𑀺𑀯𑀺𑀭𑀼𑀤𑁆𑀥𑀁 𑀯𑀸 𑀩𑁆𑀬𑀸𑀥𑀺𑀯𑀺𑀭𑀼𑀤𑁆𑀥𑀁 𑀯𑀸 𑀲𑁂𑀦𑀸𑀲𑀦𑀁 𑀮𑀪𑀢𑀺, 𑀬𑀢𑁆𑀣𑀲𑁆𑀲 𑀯𑀲𑀢𑁄 𑀅𑀨𑀸𑀲𑀼 𑀳𑁄𑀢𑀺, 𑀲𑁄 𑀢𑀁 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀓𑁂 𑀲𑀧𑁆𑀧𑀸𑀬𑀲𑁂𑀦𑀸𑀲𑀦𑁂 𑀯𑀲𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀫𑀳𑀸𑀧𑀼𑀜𑁆𑀜𑁄 𑀮𑁂𑀡𑀫𑀡𑁆𑀟𑀧𑀓𑀽𑀝𑀸𑀕𑀸𑀭𑀸𑀤𑀻𑀦𑀺 𑀩𑀳𑀽𑀦𑀺 𑀧𑀡𑀻𑀢𑀲𑁂𑀦𑀸𑀲𑀦𑀸𑀦𑀺 𑀮𑀪𑀢𑀺, 𑀲𑁄 𑀢𑀸𑀦𑀺 𑀘𑀻𑀯𑀭𑀸𑀤𑀻𑀦𑀺 𑀯𑀺𑀬 𑀘𑀺𑀭𑀧𑀩𑁆𑀩𑀚𑀺𑀢𑀩𑀳𑀼𑀲𑁆𑀲𑀼𑀢𑀅𑀧𑁆𑀧𑀮𑀸𑀪𑀺𑀕𑀺𑀮𑀸𑀦𑀸𑀦𑀁 𑀤𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄. 𑀬𑁄𑀧𑀺, ‘‘𑀉𑀢𑁆𑀢𑀫𑀲𑁂𑀦𑀸𑀲𑀦𑀁 𑀦𑀸𑀫 𑀧𑀫𑀸𑀤𑀝𑁆𑀞𑀸𑀦𑀁, 𑀢𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲 𑀣𑀺𑀦𑀫𑀺𑀤𑁆𑀥𑀁 𑀑𑀓𑁆𑀓𑀫𑀢𑀺, 𑀦𑀺𑀤𑁆𑀤𑀸𑀪𑀺𑀪𑀽𑀢𑀲𑁆𑀲 𑀧𑀼𑀦 𑀧𑀝𑀺𑀩𑀼𑀚𑁆𑀛𑀢𑁄 𑀧𑀸𑀧𑀯𑀺𑀢𑀓𑁆𑀓𑀸 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑁆𑀯𑀸 𑀢𑀸𑀤𑀺𑀲𑀁 𑀲𑁂𑀦𑀸𑀲𑀦𑀁 𑀧𑀢𑁆𑀢𑀫𑁆𑀧𑀺 𑀦 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀲𑁄 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀩𑁆𑀪𑁄𑀓𑀸𑀲𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼 𑀯𑀲𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑁆𑀧𑀺𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀥 𑀧𑀦 𑀪𑀺𑀓𑁆𑀔𑀼 𑀪𑁂𑀲𑀚𑁆𑀚𑀁 𑀮𑀪𑀢𑀺 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸, 𑀲𑁄 𑀬𑀁 𑀮𑀪𑀢𑀺, 𑀢𑁂𑀦𑁂𑀯 𑀲𑀦𑁆𑀢𑀼𑀲𑁆𑀲𑀢𑀺, 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺, 𑀅𑀬𑀫𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀬𑁄 𑀧𑀦 𑀢𑁂𑀮𑁂𑀦 𑀅𑀢𑁆𑀣𑀺𑀓𑁄 𑀨𑀸𑀡𑀺𑀢𑀁 𑀮𑀪𑀢𑀺, 𑀲𑁄 𑀢𑀁 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑁄 𑀢𑁂𑀮𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀤𑁂𑀯 𑀯𑀸 𑀧𑀭𑀺𑀬𑁂𑀲𑀺𑀢𑁆𑀯𑀸 𑀢𑁂𑀳𑀺 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀫𑀳𑀸𑀧𑀼𑀜𑁆𑀜𑁄 𑀩𑀳𑀼𑀁 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀺𑀧𑀡𑀻𑀢𑀪𑁂𑀲𑀚𑁆𑀚𑀁 𑀮𑀪𑀢𑀺, 𑀲𑁄 𑀢𑀁 𑀘𑀻𑀯𑀭𑀁 𑀯𑀺𑀬 𑀘𑀺𑀭𑀧𑀩𑁆𑀩𑀚𑀺𑀢𑀩𑀳𑀼𑀲𑁆𑀲𑀼𑀢𑀅𑀧𑁆𑀧𑀮𑀸𑀪𑀺𑀕𑀺𑀮𑀸𑀦𑀸𑀦𑀁 𑀤𑀢𑁆𑀯𑀸 𑀢𑁂𑀲𑀁 𑀆𑀪𑀢𑀓𑁂𑀦 𑀬𑁂𑀦 𑀓𑁂𑀦𑀘𑀺 𑀬𑀸𑀧𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀬𑁄 𑀧𑀦 𑀏𑀓𑀲𑁆𑀫𑀺𑀁 𑀪𑀸𑀚𑀦𑁂 𑀫𑀼𑀢𑁆𑀢𑀳𑀭𑀻𑀢𑀓𑀁 𑀞𑀧𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀘𑀢𑀼𑀫𑀥𑀼𑀭𑀁, ‘‘𑀕𑀡𑁆𑀳, 𑀪𑀦𑁆𑀢𑁂, 𑀬𑀤𑀺𑀘𑁆𑀙𑀲𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀲𑀘𑀲𑁆𑀲 𑀢𑁂𑀲𑀼 𑀅𑀜𑁆𑀜𑀢𑀭𑁂𑀦𑀧𑀺 𑀭𑁄𑀕𑁄 𑀯𑀽𑀧𑀲𑀫𑁆𑀫𑀢𑀺, 𑀅𑀣 𑀫𑀼𑀢𑁆𑀢𑀳𑀭𑀻𑀢𑀓𑀁 𑀦𑀸𑀫 𑀩𑀼𑀤𑁆𑀥𑀸𑀤𑀻𑀳𑀺 𑀯𑀡𑁆𑀡𑀺𑀢𑀦𑁆𑀢𑀺 𑀘𑀢𑀼𑀫𑀥𑀼𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀼𑀢𑁆𑀢𑀳𑀭𑀻𑀢𑀓𑁂𑀦𑁂𑀯 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑁄 𑀧𑀭𑀫𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺, 𑀅𑀬𑀫𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀫𑁂𑀲𑀁 𑀧𑀦 𑀧𑀘𑁆𑀘𑁂𑀓𑀁 𑀧𑀘𑁆𑀘𑀬𑁂𑀲𑀼 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀲𑀦𑁆𑀢𑁄𑀲𑀸𑀦𑀁 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄𑀯 𑀅𑀕𑁆𑀕𑁄. 𑀆𑀬𑀲𑁆𑀫𑀸 𑀧𑀼𑀡𑁆𑀡𑁄 𑀏𑀓𑁂𑀓𑀲𑁆𑀫𑀺𑀁 𑀧𑀘𑁆𑀘𑀬𑁂 𑀇𑀫𑁂𑀳𑀺 𑀢𑀻𑀳𑀺 𑀲𑀦𑁆𑀢𑁄𑀲𑁂𑀳𑀺 𑀲𑀦𑁆𑀢𑀼𑀝𑁆𑀞𑁄 𑀅𑀳𑁄𑀲𑀺. 𑀲𑀦𑁆𑀢𑀼𑀝𑁆𑀞𑀺𑀓𑀣𑀜𑁆𑀘𑀸𑀢𑀺 𑀪𑀺𑀓𑁆𑀔𑀽𑀦𑀫𑁆𑀧𑀺 𑀘 𑀇𑀫𑀁 𑀲𑀦𑁆𑀢𑀼𑀝𑁆𑀞𑀺𑀓𑀣𑀁 𑀓𑀢𑁆𑀢𑀸𑀯 𑀅𑀳𑁄𑀲𑀺.

𑀢𑀺𑀯𑀺𑀥𑀧𑀯𑀺𑀯𑁂𑀓𑀯𑀡𑁆𑀡𑀦𑀸

𑀧𑀯𑀺𑀯𑀺𑀢𑁆𑀢𑁄𑀢𑀺 𑀓𑀸𑀬𑀧𑀯𑀺𑀯𑁂𑀓𑁄 𑀘𑀺𑀢𑁆𑀢𑀧𑀯𑀺𑀯𑁂𑀓𑁄 𑀉𑀧𑀥𑀺𑀧𑀯𑀺𑀯𑁂𑀓𑁄𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀧𑀯𑀺𑀯𑁂𑀓𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀢𑀢𑁆𑀣 𑀏𑀓𑁄 𑀕𑀘𑁆𑀙𑀢𑀺, 𑀏𑀓𑁄 𑀢𑀺𑀝𑁆𑀞𑀢𑀺, 𑀏𑀓𑁄 𑀦𑀺𑀲𑀻𑀤𑀢𑀺, 𑀏𑀓𑁄 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀏𑀓𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀏𑀓𑁄 𑀧𑀝𑀺𑀓𑁆𑀓𑀫𑀢𑀺, 𑀏𑀓𑁄 𑀘𑀗𑁆𑀓𑀫𑀫𑀥𑀺𑀝𑁆𑀞𑀸𑀢𑀺, 𑀏𑀓𑁄 𑀘𑀭𑀢𑀺, 𑀏𑀓𑁄 𑀯𑀺𑀳𑀭𑀢𑀻𑀢𑀺 𑀅𑀬𑀁 𑀓𑀸𑀬𑀧𑀯𑀺𑀯𑁂𑀓𑁄 𑀦𑀸𑀫. 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀦 𑀘𑀺𑀢𑁆𑀢𑀧𑀯𑀺𑀯𑁂𑀓𑁄 𑀦𑀸𑀫. 𑀦𑀺𑀩𑁆𑀩𑀸𑀦𑀁 𑀉𑀧𑀥𑀺𑀧𑀯𑀺𑀯𑁂𑀓𑁄 𑀦𑀸𑀫. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑁋 ‘‘𑀓𑀸𑀬𑀧𑀯𑀺𑀯𑁂𑀓𑁄 𑀘 𑀯𑀺𑀯𑁂𑀓𑀝𑁆𑀞𑀓𑀸𑀬𑀸𑀦𑀁 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀸𑀦𑀁. 𑀘𑀺𑀢𑁆𑀢𑀧𑀯𑀺𑀯𑁂𑀓𑁄 𑀘 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀁 𑀧𑀭𑀫𑀯𑁄𑀤𑀸𑀦𑀧𑁆𑀧𑀢𑁆𑀢𑀸𑀦𑀁. 𑀉𑀧𑀥𑀺𑀯𑀺𑀯𑁂𑀓𑁄 𑀘 𑀦𑀺𑀭𑀼𑀧𑀥𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀺𑀲𑀗𑁆𑀔𑀸𑀭𑀕𑀢𑀸𑀦’’𑀦𑁆𑀢𑀺 (𑀫𑀳𑀸𑀦𑀺. 𑁫𑁭). 𑀧𑀯𑀺𑀯𑁂𑀓𑀓𑀣𑀦𑁆𑀢𑀺 𑀪𑀺𑀓𑁆𑀔𑀽𑀦𑀫𑁆𑀧𑀺 𑀘 𑀇𑀫𑀁 𑀧𑀯𑀺𑀯𑁂𑀓𑀓𑀣𑀁 𑀓𑀢𑁆𑀢𑀸.

𑀧𑀜𑁆𑀘𑀯𑀺𑀥𑀲𑀁𑀲𑀕𑁆𑀕𑀯𑀡𑁆𑀡𑀦𑀸

𑀅𑀲𑀁𑀲𑀝𑁆𑀞𑁄𑀢𑀺 𑀧𑀜𑁆𑀘𑀯𑀺𑀥𑁂𑀦 𑀲𑀁𑀲𑀕𑁆𑀕𑁂𑀦 𑀯𑀺𑀭𑀳𑀺𑀢𑁄. 𑀲𑀯𑀦𑀲𑀁𑀲𑀕𑁆𑀕𑁄 𑀤𑀲𑁆𑀲𑀦𑀲𑀁𑀲𑀕𑁆𑀕𑁄 𑀲𑀫𑀼𑀮𑁆𑀮𑀧𑀦𑀲𑀁𑀲𑀕𑁆𑀕𑁄 𑀲𑀫𑁆𑀪𑁄𑀕𑀲𑀁𑀲𑀕𑁆𑀕𑁄 𑀓𑀸𑀬𑀲𑀁𑀲𑀕𑁆𑀕𑁄𑀢𑀺 𑀧𑀜𑁆𑀘𑀯𑀺𑀥𑁄 𑀲𑀁𑀲𑀕𑁆𑀕𑁄. 𑀢𑁂𑀲𑀼 𑀇𑀥 𑀪𑀺𑀓𑁆𑀔𑀼 𑀲𑀼𑀡𑀸𑀢𑀺, ‘‘𑀅𑀲𑀼𑀓𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀇𑀢𑁆𑀣𑀻 𑀯𑀸 𑀓𑀼𑀫𑀸𑀭𑀺𑀓𑀸 𑀯𑀸 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸’’𑀢𑀺. 𑀲𑁄 𑀢𑀁 𑀲𑀼𑀢𑁆𑀯𑀸 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺 𑀦 𑀲𑀓𑁆𑀓𑁄𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁, 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸 𑀳𑀻𑀦𑀸𑀬𑀸𑀯𑀢𑁆𑀢𑀢𑀻𑀢𑀺 𑀏𑀯𑀁 𑀧𑀭𑁂𑀳𑀺 𑀯𑀸 𑀓𑀣𑀻𑀬𑀫𑀸𑀦𑀁 𑀭𑀽𑀧𑀸𑀤𑀺𑀲𑀫𑁆𑀧𑀢𑁆𑀢𑀺𑀁 𑀅𑀢𑁆𑀢𑀦𑀸 𑀯𑀸 𑀳𑀲𑀺𑀢𑀮𑀧𑀺𑀢𑀕𑀻𑀢𑀲𑀤𑁆𑀤𑀁 𑀲𑀼𑀡𑀦𑁆𑀢𑀲𑁆𑀲 𑀲𑁄𑀢𑀯𑀺𑀜𑁆𑀜𑀸𑀡𑀯𑀻𑀣𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀭𑀸𑀕𑁄 𑀲𑀯𑀦𑀲𑀁𑀲𑀕𑁆𑀕𑁄 𑀦𑀸𑀫. 𑀲𑁄 𑀅𑀦𑀺𑀢𑁆𑀣𑀺𑀕𑀦𑁆𑀥𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀲𑁆𑀲 𑀘 𑀧𑀜𑁆𑀘𑀕𑁆𑀕𑀴𑀮𑁂𑀡𑀯𑀸𑀲𑀻𑀢𑀺𑀲𑁆𑀲𑀤𑀳𑀭𑀲𑁆𑀲 𑀘 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄 𑁋

𑀤𑀳𑀭𑁄 𑀓𑀺𑀭 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀕𑀺𑀭𑀺𑀕𑀸𑀫𑀯𑀸𑀲𑀺𑀓𑀫𑁆𑀫𑀸𑀭𑀥𑀻𑀢𑀸𑀬 𑀧𑀜𑁆𑀘𑀳𑀺 𑀓𑀼𑀫𑀸𑀭𑀻𑀳𑀺 𑀲𑀤𑁆𑀥𑀺𑀁 𑀧𑀤𑀼𑀫𑀲𑀭𑀁 𑀕𑀦𑁆𑀢𑁆𑀯𑀸 𑀦𑁆𑀳𑀢𑁆𑀯𑀸 𑀧𑀤𑀼𑀫𑀸𑀦𑀺 𑀘 𑀧𑀺𑀮𑀦𑁆𑀥𑀺𑀢𑁆𑀯𑀸 𑀫𑀥𑀼𑀭𑀲𑁆𑀲𑀭𑁂𑀦 𑀕𑀸𑀬𑀦𑁆𑀢𑀺𑀬𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀓𑀸𑀫𑀭𑀸𑀕𑁂𑀦 𑀯𑀺𑀤𑁆𑀥𑁄 𑀯𑀺𑀲𑁂𑀲𑀸 𑀧𑀭𑀺𑀳𑀸𑀬𑀺𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑀺. 𑀇𑀥 𑀪𑀺𑀓𑁆𑀔𑀼 𑀦 𑀳𑁂𑀯 𑀔𑁄 𑀲𑀼𑀡𑀸𑀢𑀺, 𑀅𑀧𑀺𑀘 𑀔𑁄 𑀲𑀸𑀫𑀁 𑀧𑀲𑁆𑀲𑀢𑀺 𑀇𑀢𑁆𑀣𑀺𑀁 𑀯𑀸 𑀓𑀼𑀫𑀸𑀭𑀺𑀁 𑀯𑀸 𑀅𑀪𑀺𑀭𑀽𑀧𑀁 𑀤𑀲𑁆𑀲𑀦𑀻𑀬𑀁 𑀧𑀸𑀲𑀸𑀤𑀺𑀓𑀁 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀁. 𑀲𑁄 𑀢𑀁 𑀤𑀺𑀲𑁆𑀯𑀸 𑀲𑀁𑀲𑀻𑀤𑀢𑀺 𑀯𑀺𑀲𑀻𑀤𑀢𑀺 𑀦 𑀲𑀓𑁆𑀓𑁄𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁, 𑀲𑀺𑀓𑁆𑀔𑀸𑀤𑀼𑀩𑁆𑀩𑀮𑁆𑀬𑀁 𑀅𑀦𑀸𑀯𑀺𑀓𑀢𑁆𑀯𑀸 𑀳𑀻𑀦𑀸𑀬𑀸𑀯𑀢𑁆𑀢𑀢𑀻𑀢𑀺 𑀏𑀯𑀁 𑀯𑀺𑀲𑀪𑀸𑀕𑀭𑀽𑀧𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀭𑀸𑀕𑁄 𑀤𑀲𑁆𑀲𑀦𑀲𑀁𑀲𑀕𑁆𑀕𑁄 𑀦𑀸𑀫. 𑀲𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋

𑀏𑀓𑁄 𑀓𑀺𑀭 𑀤𑀳𑀭𑁄 𑀓𑀸𑀮𑀤𑀻𑀖𑀯𑀸𑀧𑀺𑀤𑁆𑀯𑀸𑀭𑀯𑀺𑀳𑀸𑀭𑀁 𑀉𑀤𑁆𑀤𑁂𑀲𑀢𑁆𑀣𑀸𑀬 𑀕𑀢𑁄. 𑀆𑀘𑀭𑀺𑀬𑁄 𑀢𑀲𑁆𑀲 𑀅𑀦𑁆𑀢𑀭𑀸𑀬𑀁 𑀤𑀺𑀲𑁆𑀯𑀸 𑀑𑀓𑀸𑀲𑀁 𑀦 𑀓𑀭𑁄𑀢𑀺. 𑀲𑁄 𑀧𑀼𑀦𑀧𑁆𑀧𑀼𑀦𑁆𑀦𑀁 𑀅𑀦𑀼𑀩𑀦𑁆𑀥𑀢𑀺. 𑀆𑀘𑀭𑀺𑀬𑁄 𑀲𑀘𑁂 𑀅𑀦𑁆𑀢𑁄𑀕𑀸𑀫𑁂 𑀦 𑀘𑀭𑀺𑀲𑁆𑀲𑀲𑀺. 𑀤𑀲𑁆𑀲𑀸𑀫𑀺 𑀢𑁂 𑀉𑀤𑁆𑀤𑁂𑀲𑀦𑁆𑀢𑀺 𑀆𑀳. 𑀲𑁄 𑀲𑀸𑀥𑀽𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀉𑀤𑁆𑀤𑁂𑀲𑁂 𑀦𑀺𑀝𑁆𑀞𑀺𑀢𑁂 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀆𑀘𑀭𑀺𑀬𑁄 𑀫𑁂 𑀇𑀫𑀲𑁆𑀫𑀺𑀁 𑀕𑀸𑀫𑁂 𑀘𑀭𑀺𑀢𑀼𑀁 𑀦 𑀤𑁂𑀢𑀺, 𑀓𑀺𑀁 𑀦𑀼 𑀔𑁄 𑀓𑀸𑀭𑀡𑀦𑁆𑀢𑀺 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀕𑀸𑀫𑀁 𑀧𑀸𑀯𑀺𑀲𑀺, 𑀏𑀓𑀸 𑀓𑀼𑀮𑀥𑀻𑀢𑀸 𑀧𑀻𑀢𑀓𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀕𑁂𑀳𑁂 𑀞𑀺𑀢𑀸 𑀤𑀳𑀭𑀁 𑀤𑀺𑀲𑁆𑀯𑀸 𑀲𑀜𑁆𑀚𑀸𑀢𑀭𑀸𑀕𑀸 𑀉𑀴𑀼𑀗𑁆𑀓𑁂𑀦 𑀬𑀸𑀕𑀼𑀁 𑀆𑀳𑀭𑀺𑀢𑁆𑀯𑀸 𑀢𑀲𑁆𑀲 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀫𑀜𑁆𑀘𑀓𑁂 𑀦𑀺𑀧𑀚𑁆𑀚𑀺. 𑀅𑀣 𑀦𑀁 𑀫𑀸𑀢𑀸𑀧𑀺𑀢𑀭𑁄 𑀓𑀺𑀁 𑀅𑀫𑁆𑀫𑀸𑀢𑀺 𑀧𑀼𑀘𑁆𑀙𑀺𑀁𑀲𑀼, 𑀤𑁆𑀯𑀸𑀭𑁂𑀦 𑀕𑀢𑀁 𑀤𑀳𑀭𑀁 𑀮𑀪𑀫𑀸𑀦𑀸 𑀚𑀻𑀯𑀺𑀲𑁆𑀲𑀸𑀫𑀺, 𑀅𑀮𑀪𑀫𑀸𑀦𑀸 𑀫𑀭𑀺𑀲𑁆𑀲𑀸𑀫𑀻𑀢𑀺. 𑀫𑀸𑀢𑀸𑀧𑀺𑀢𑀭𑁄 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀕𑀸𑀫𑀤𑁆𑀯𑀸𑀭𑁂 𑀤𑀳𑀭𑀁 𑀧𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸, ‘‘𑀦𑀺𑀯𑀢𑁆𑀢𑀣, 𑀪𑀦𑁆𑀢𑁂, 𑀪𑀺𑀓𑁆𑀔𑀁 𑀕𑀡𑁆𑀳𑀸𑀳𑀻’’𑀢𑀺 𑀆𑀳𑀁𑀲𑀼. 𑀤𑀳𑀭𑁄 𑀅𑀮𑀁 𑀕𑀘𑁆𑀙𑀸𑀫𑀻𑀢𑀺. 𑀢𑁂, ‘‘𑀇𑀤𑀁 𑀦𑀸𑀫, 𑀪𑀦𑁆𑀢𑁂, 𑀓𑀸𑀭𑀡’’𑀦𑁆𑀢𑀺 𑀬𑀸𑀘𑀺𑀢𑁆𑀯𑀸 𑁋 ‘‘𑀅𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀕𑁂𑀳𑁂 𑀏𑀢𑁆𑀢𑀓𑀁 𑀦𑀸𑀫 𑀥𑀦𑀁 𑀅𑀢𑁆𑀣𑀺, 𑀏𑀓𑀸𑀬𑁂𑀯 𑀦𑁄 𑀥𑀻𑀢𑀸, 𑀢𑁆𑀯𑀁 𑀦𑁄 𑀚𑁂𑀝𑁆𑀞𑀧𑀼𑀢𑁆𑀢𑀝𑁆𑀞𑀸𑀦𑁂 𑀞𑀲𑁆𑀲𑀲𑀺, 𑀲𑀼𑀔𑁂𑀦 𑀲𑀓𑁆𑀓𑀸 𑀚𑀻𑀯𑀺𑀢𑀼’’𑀦𑁆𑀢𑀺 𑀆𑀳𑀁𑀲𑀼. 𑀤𑀳𑀭𑁄, ‘‘𑀦 𑀫𑀬𑁆𑀳𑀁 𑀇𑀫𑀺𑀦𑀸 𑀧𑀮𑀺𑀩𑁄𑀥𑁂𑀦 𑀅𑀢𑁆𑀣𑁄’’𑀢𑀺 𑀅𑀦𑀸𑀤𑀺𑀬𑀺𑀢𑁆𑀯𑀸𑀯 𑀧𑀓𑁆𑀓𑀦𑁆𑀢𑁄.

𑀫𑀸𑀢𑀸𑀧𑀺𑀢𑀭𑁄 𑀕𑀦𑁆𑀢𑁆𑀯𑀸, ‘‘𑀅𑀫𑁆𑀫, 𑀦𑀸𑀲𑀓𑁆𑀔𑀺𑀫𑁆𑀳𑀸 𑀤𑀳𑀭𑀁 𑀦𑀺𑀯𑀢𑁆𑀢𑁂𑀢𑀼𑀁, 𑀬𑀁 𑀅𑀜𑁆𑀜𑀁 𑀲𑀸𑀫𑀺𑀓𑀁 𑀇𑀘𑁆𑀙𑀲𑀺, 𑀢𑀁 𑀮𑀪𑀺𑀲𑁆𑀲𑀲𑀺, 𑀉𑀝𑁆𑀞𑁂𑀳𑀺 𑀔𑀸𑀤 𑀘 𑀧𑀺𑀯 𑀘𑀸’’𑀢𑀺 𑀆𑀳𑀁𑀲𑀼. 𑀲𑀸 𑀅𑀦𑀺𑀘𑁆𑀙𑀦𑁆𑀢𑀻 𑀲𑀢𑁆𑀢𑀸𑀳𑀁 𑀦𑀺𑀭𑀸𑀳𑀸𑀭𑀸 𑀳𑀼𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀫𑀸𑀢𑀸𑀧𑀺𑀢𑀭𑁄 𑀢𑀲𑁆𑀲𑀸 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀢𑀁 𑀧𑀻𑀢𑀓𑀯𑀢𑁆𑀣𑀁 𑀥𑀼𑀭𑀯𑀺𑀳𑀸𑀭𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀤𑀁𑀲𑀼, 𑀪𑀺𑀓𑁆𑀔𑀽 𑀯𑀢𑁆𑀣𑀁 𑀔𑀡𑁆𑀟𑀸𑀔𑀡𑁆𑀟𑀁 𑀓𑀢𑁆𑀯𑀸 𑀪𑀸𑀚𑀬𑀺𑀁𑀲𑀼. 𑀏𑀓𑁄 𑀫𑀳𑀮𑁆𑀮𑀓𑁄 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀁 𑀕𑀳𑁂𑀢𑁆𑀯𑀸 𑀓𑀮𑁆𑀬𑀸𑀡𑀻𑀯𑀺𑀳𑀸𑀭𑀁 𑀆𑀕𑀢𑁄. 𑀲𑁄𑀧𑀺 𑀤𑀳𑀭𑁄 𑀘𑁂𑀢𑀺𑀬𑀁 𑀯𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀢𑀢𑁆𑀣𑁂𑀯 𑀕𑀦𑁆𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀻𑀤𑀺. 𑀫𑀳𑀮𑁆𑀮𑀓𑁄 𑀢𑀁 𑀯𑀢𑁆𑀣𑀔𑀡𑁆𑀟𑀁 𑀕𑀳𑁂𑀢𑁆𑀯𑀸, ‘‘𑀇𑀫𑀺𑀦𑀸 𑀫𑁂 𑀧𑀭𑀺𑀲𑁆𑀲𑀸𑀯𑀦𑀁 𑀯𑀺𑀘𑀸𑀭𑁂𑀣𑀸’’𑀢𑀺 𑀤𑀳𑀭𑀁 𑀅𑀯𑁄𑀘. 𑀤𑀳𑀭𑁄 𑀫𑀳𑀸𑀣𑁂𑀭 ‘‘𑀓𑀼𑀳𑀺𑀁 𑀮𑀤𑁆𑀥’’𑀦𑁆𑀢𑀺 𑀆𑀳. 𑀲𑁄 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀓𑀣𑁂𑀲𑀺. 𑀲𑁄 𑀢𑀁 𑀲𑀼𑀢𑁆𑀯𑀸𑀯, ‘‘𑀏𑀯𑀭𑀽𑀧𑀸𑀬 𑀦𑀸𑀫 𑀲𑀤𑁆𑀥𑀺𑀁 𑀲𑀁𑀯𑀸𑀲𑀁 𑀦𑀸𑀮𑀢𑁆𑀣’’𑀦𑁆𑀢𑀺 𑀭𑀸𑀕𑀕𑁆𑀕𑀺𑀦𑀸 𑀤𑀟𑁆𑀠𑁄 𑀢𑀢𑁆𑀣𑁂𑀯 𑀓𑀸𑀮𑀫𑀓𑀸𑀲𑀺.

𑀅𑀜𑁆𑀜𑀫𑀜𑁆𑀜𑀁 𑀆𑀮𑀸𑀧𑀲𑀮𑁆𑀮𑀸𑀧𑀯𑀲𑁂𑀦 𑀉𑀧𑁆𑀧𑀦𑁆𑀦𑀭𑀸𑀕𑁄 𑀧𑀦 𑀲𑀫𑀼𑀮𑁆𑀮𑀧𑀦𑀲𑀁𑀲𑀕𑁆𑀕𑁄 𑀦𑀸𑀫. 𑀪𑀺𑀓𑁆𑀔𑀼𑀦𑁄 𑀪𑀺𑀓𑁆𑀔𑀼𑀦𑀺𑀬𑀸 𑀲𑀦𑁆𑀢𑀓𑀁, 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀓𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑁄𑀕𑀓𑀭𑀡𑀯𑀲𑁂𑀦 𑀉𑀧𑁆𑀧𑀦𑁆𑀦𑀭𑀸𑀕𑁄 𑀲𑀫𑁆𑀪𑁄𑀕𑀲𑀁𑀲𑀕𑁆𑀕𑁄 𑀦𑀸𑀫. 𑀲𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀫𑀭𑀺𑀘𑀯𑀝𑁆𑀝𑀺𑀯𑀺𑀳𑀸𑀭𑀫𑀳𑁂 𑀓𑀺𑀭 𑀪𑀺𑀓𑁆𑀔𑀽𑀦𑀁 𑀲𑀢𑀲𑀳𑀲𑁆𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀦𑀯𑀼𑀢𑀺𑀲𑀳𑀲𑁆𑀲𑀸𑀦𑀺 𑀏𑀯 𑀅𑀳𑁂𑀲𑀼𑀁. 𑀏𑀓𑁄 𑀲𑀸𑀫𑀡𑁂𑀭𑁄 𑀉𑀡𑁆𑀳𑀬𑀸𑀕𑀼𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀲𑀓𑀺𑀁 𑀘𑀻𑀯𑀭𑀓𑀡𑁆𑀡𑁂 𑀞𑀧𑁂𑀲𑀺, 𑀲𑀓𑀺𑀁 𑀪𑀽𑀫𑀺𑀬𑀁. 𑀏𑀓𑀸 𑀲𑀸𑀫𑀡𑁂𑀭𑀻 𑀤𑀺𑀲𑁆𑀯𑀸 𑀏𑀢𑁆𑀣 𑀧𑀢𑁆𑀢𑀁 𑀞𑀧𑁂𑀢𑁆𑀯𑀸 𑀬𑀸𑀳𑀻𑀢𑀺 𑀣𑀸𑀮𑀓𑀁 𑀅𑀤𑀸𑀲𑀺. 𑀢𑁂 𑀅𑀧𑀭𑀪𑀸𑀕𑁂 𑀏𑀓𑀲𑁆𑀫𑀺𑀁 𑀪𑀬𑁂 𑀉𑀧𑁆𑀧𑀦𑁆𑀦𑁂 𑀧𑀭𑀲𑀫𑀼𑀤𑁆𑀤𑀁 𑀅𑀕𑀫𑀁𑀲𑀼. 𑀢𑁂𑀲𑀼 𑀪𑀺𑀓𑁆𑀔𑀼𑀦𑀻 𑀧𑀼𑀭𑁂𑀢𑀭𑀁 𑀅𑀕𑀫𑀸𑀲𑀺. 𑀲𑀸, ‘‘𑀏𑀓𑁄 𑀓𑀺𑀭 𑀲𑀻𑀳𑀴𑀪𑀺𑀓𑁆𑀔𑀼 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑀸, 𑁋 ‘‘𑀪𑀦𑁆𑀢𑁂, 𑀫𑀭𑀺𑀘𑀯𑀝𑁆𑀝𑀺𑀯𑀺𑀳𑀸𑀭𑀫𑀳𑀓𑀸𑀮𑁂 𑀢𑀼𑀫𑁆𑀳𑁂 𑀓𑀢𑀺𑀯𑀲𑁆𑀲𑀸’’𑀢𑀺 𑀧𑀼𑀘𑁆𑀙𑀺. 𑀢𑀤𑀸𑀳𑀁 𑀲𑀢𑁆𑀢𑀯𑀲𑁆𑀲𑀺𑀓𑀲𑀸𑀫𑀡𑁂𑀭𑁄. 𑀢𑁆𑀯𑀁 𑀧𑀦 𑀓𑀢𑀺𑀯𑀲𑁆𑀲𑀸𑀢𑀺? 𑀅𑀳𑀁 𑀲𑀢𑁆𑀢𑀯𑀲𑁆𑀲𑀺𑀓𑀲𑀸𑀫𑀡𑁂𑀭𑀻𑀬𑁂𑀯 𑀏𑀓𑀲𑁆𑀲 𑀲𑀸𑀫𑀡𑁂𑀭𑀲𑁆𑀲 𑀉𑀡𑁆𑀳𑀬𑀸𑀕𑀼𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀧𑀢𑁆𑀢𑀞𑀧𑀦𑀢𑁆𑀣𑀁 𑀣𑀸𑀮𑀓𑀫𑀤𑀸𑀲𑀺𑀦𑁆𑀢𑀺. 𑀣𑁂𑀭𑁄, ‘‘𑀅𑀳𑀁 𑀲𑁄’’𑀢𑀺 𑀯𑀢𑁆𑀯𑀸 𑀣𑀸𑀮𑀓𑀁 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀢𑁂 𑀏𑀢𑁆𑀢𑀓𑁂𑀦𑁂𑀯 𑀲𑀁𑀲𑀕𑁆𑀕𑁂𑀦 𑀩𑁆𑀭𑀳𑁆𑀫𑀘𑀭𑀺𑀬𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀤𑁆𑀯𑁂𑀧𑀺 𑀲𑀝𑁆𑀞𑀺𑀯𑀲𑁆𑀲𑀓𑀸𑀮𑁂 𑀯𑀺𑀩𑁆𑀪𑀫𑀺𑀁𑀲𑀼.

𑀳𑀢𑁆𑀣𑀕𑀸𑀳𑀸𑀤𑀺𑀯𑀲𑁂𑀦 𑀧𑀦 𑀉𑀧𑁆𑀧𑀦𑁆𑀦𑀭𑀸𑀕𑁄 𑀓𑀸𑀬𑀲𑀁𑀲𑀕𑁆𑀕𑁄 𑀦𑀸𑀫. 𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀫𑀳𑀸𑀘𑁂𑀢𑀺𑀬𑀗𑁆𑀕𑀡𑁂 𑀓𑀺𑀭 𑀤𑀳𑀭𑀪𑀺𑀓𑁆𑀔𑀽 𑀲𑀚𑁆𑀛𑀸𑀬𑀁 𑀕𑀡𑁆𑀳𑀦𑁆𑀢𑀺. 𑀢𑁂𑀲𑀁 𑀧𑀺𑀝𑁆𑀞𑀺𑀧𑀲𑁆𑀲𑁂 𑀤𑀳𑀭𑀪𑀺𑀓𑁆𑀔𑀼𑀦𑀺𑀬𑁄 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺. 𑀢𑀢𑁆𑀭𑁂𑀓𑁄 𑀤𑀳𑀭𑁄 𑀳𑀢𑁆𑀣𑀁 𑀧𑀲𑀸𑀭𑁂𑀦𑁆𑀢𑁄 𑀏𑀓𑀺𑀲𑁆𑀲𑀸 𑀤𑀳𑀭𑀪𑀺𑀓𑁆𑀔𑀼𑀦𑀺𑀬𑀸 𑀓𑀸𑀬𑀁 𑀙𑀼𑀧𑀺. 𑀲𑀸 𑀢𑀁 𑀳𑀢𑁆𑀣𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀉𑀭𑀲𑁆𑀫𑀺𑀁 𑀞𑀧𑁂𑀲𑀺, 𑀏𑀢𑁆𑀢𑀓𑁂𑀦 𑀲𑀁𑀲𑀕𑁆𑀕𑁂𑀦 𑀤𑁆𑀯𑁂𑀧𑀺 𑀯𑀺𑀩𑁆𑀪𑀫𑀺𑀢𑁆𑀯𑀸 𑀕𑀺𑀳𑀺𑀪𑀸𑀯𑀁 𑀧𑀢𑁆𑀢𑀸.

𑀕𑀸𑀳𑀕𑀸𑀳𑀓𑀸𑀤𑀺𑀯𑀡𑁆𑀡𑀦𑀸

𑀇𑀫𑁂𑀲𑀼 𑀧𑀦 𑀧𑀜𑁆𑀘𑀲𑀼 𑀲𑀁𑀲𑀕𑁆𑀕𑁂𑀲𑀼 𑀪𑀺𑀓𑁆𑀔𑀼𑀦𑁄 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀯𑀦𑀤𑀲𑁆𑀲𑀦𑀲𑀫𑀼𑀮𑁆𑀮𑀧𑀦𑀲𑀫𑁆𑀪𑁄𑀕𑀓𑀸𑀬𑀧𑀭𑀸𑀫𑀸𑀲𑀸 𑀦𑀺𑀘𑁆𑀘𑀫𑁆𑀧𑀺 𑀳𑁄𑀦𑁆𑀢𑀺𑀬𑁂𑀯, 𑀪𑀺𑀓𑁆𑀔𑀼𑀦𑀻𑀳𑀺 𑀲𑀤𑁆𑀥𑀺𑀁 𑀞𑀧𑁂𑀢𑁆𑀯𑀸 𑀓𑀸𑀬𑀲𑀁𑀲𑀕𑁆𑀕𑀁 𑀲𑁂𑀲𑀸 𑀓𑀸𑀮𑁂𑀦 𑀓𑀸𑀮𑀁 𑀳𑁄𑀦𑁆𑀢𑀺; 𑀢𑀣𑀸 𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀳𑀺 𑀲𑀤𑁆𑀥𑀺𑀁 𑀲𑀩𑁆𑀩𑁂𑀧𑀺 𑀓𑀸𑀮𑁂𑀦 𑀓𑀸𑀮𑀁 𑀳𑁄𑀦𑁆𑀢𑀺. 𑀢𑁂𑀲𑀼 𑀳𑀺 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀢𑁄 𑀘𑀺𑀢𑁆𑀢𑀁 𑀭𑀓𑁆𑀔𑀺𑀢𑀩𑁆𑀩𑀁. 𑀏𑀓𑁄 𑀳𑀺 𑀪𑀺𑀓𑁆𑀔𑀼 𑀕𑀸𑀳𑀕𑀸𑀳𑀓𑁄 𑀳𑁄𑀢𑀺, 𑀏𑀓𑁄 𑀕𑀸𑀳𑀫𑀼𑀢𑁆𑀢𑀓𑁄, 𑀏𑀓𑁄 𑀫𑀼𑀢𑁆𑀢𑀕𑀸𑀳𑀓𑁄, 𑀏𑀓𑁄 𑀫𑀼𑀢𑁆𑀢𑀫𑀼𑀢𑁆𑀢𑀓𑁄.

𑀢𑀢𑁆𑀣 𑀬𑀁 𑀪𑀺𑀓𑁆𑀔𑀼𑀁 𑀫𑀦𑀼𑀲𑁆𑀲𑀸𑀧𑀺 𑀆𑀫𑀺𑀲𑁂𑀦 𑀉𑀧𑀮𑀸𑀧𑁂𑀢𑁆𑀯𑀸 𑀕𑀳𑀡𑀯𑀲𑁂𑀦 𑀉𑀧𑀲𑀗𑁆𑀓𑀫𑀦𑁆𑀢𑀺, 𑀪𑀺𑀓𑁆𑀔𑀼𑀧𑀺 𑀧𑀼𑀧𑁆𑀨𑀨𑀮𑀸𑀤𑀻𑀳𑀺 𑀉𑀧𑀮𑀸𑀧𑁂𑀢𑁆𑀯𑀸 𑀕𑀳𑀡𑀯𑀲𑁂𑀦 𑀉𑀧𑀲𑀗𑁆𑀓𑀫𑀢𑀺, 𑀅𑀬𑀁 𑀕𑀸𑀳𑀕𑀸𑀳𑀓𑁄 𑀦𑀸𑀫. 𑀬𑀁 𑀧𑀦 𑀫𑀦𑀼𑀲𑁆𑀲𑀸 𑀯𑀼𑀢𑁆𑀢𑀦𑀬𑁂𑀦 𑀉𑀧𑀲𑀗𑁆𑀓𑀫𑀦𑁆𑀢𑀺, 𑀪𑀺𑀓𑁆𑀔𑀼 𑀤𑀓𑁆𑀔𑀺𑀡𑁂𑀬𑁆𑀬𑀯𑀲𑁂𑀦 𑀉𑀧𑀲𑀗𑁆𑀓𑀫𑀢𑀺, 𑀅𑀬𑀁 𑀕𑀸𑀳𑀫𑀼𑀢𑁆𑀢𑀓𑁄 𑀦𑀸𑀫. 𑀬𑀲𑁆𑀲 𑀫𑀦𑀼𑀲𑁆𑀲𑀸 𑀤𑀓𑁆𑀔𑀺𑀡𑁂𑀬𑁆𑀬𑀯𑀲𑁂𑀦 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀤𑁂𑀦𑁆𑀢𑀺, 𑀪𑀺𑀓𑁆𑀔𑀼 𑀧𑀼𑀧𑁆𑀨𑀨𑀮𑀸𑀤𑀻𑀳𑀺 𑀉𑀧𑀮𑀸𑀧𑁂𑀢𑁆𑀯𑀸 𑀕𑀳𑀡𑀯𑀲𑁂𑀦 𑀉𑀧𑀲𑀗𑁆𑀓𑀫𑀢𑀺, 𑀅𑀬𑀁 𑀫𑀼𑀢𑁆𑀢𑀕𑀸𑀳𑀓𑁄 𑀦𑀸𑀫. 𑀬𑀲𑁆𑀲 𑀫𑀦𑀼𑀲𑁆𑀲𑀸𑀧𑀺 𑀤𑀓𑁆𑀔𑀺𑀡𑁂𑀬𑁆𑀬𑀯𑀲𑁂𑀦 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀤𑁂𑀦𑁆𑀢𑀺, 𑀪𑀺𑀓𑁆𑀔𑀼𑀧𑀺 𑀘𑀽𑀴𑀧𑀺𑀡𑁆𑀟𑀧𑀸𑀢𑀺𑀬𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀺𑀬 𑀤𑀓𑁆𑀔𑀺𑀡𑁂𑀬𑁆𑀬𑀯𑀲𑁂𑀦 𑀧𑀭𑀺𑀪𑀼𑀜𑁆𑀚𑀢𑀺, 𑀅𑀬𑀁 𑀫𑀼𑀢𑁆𑀢𑀫𑀼𑀢𑁆𑀢𑀓𑁄 𑀦𑀸𑀫.

𑀣𑁂𑀭𑀁 𑀓𑀺𑀭 𑀏𑀓𑀸 𑀉𑀧𑀸𑀲𑀺𑀓𑀸 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀉𑀧𑀝𑁆𑀞𑀳𑀺. 𑀏𑀓𑀤𑀺𑀯𑀲𑀁 𑀢𑀲𑁆𑀫𑀺𑀁 𑀕𑀸𑀫𑁂 𑀅𑀕𑁆𑀕𑀺 𑀉𑀝𑁆𑀞𑀳𑀺𑀢𑁆𑀯𑀸 𑀕𑁂𑀳𑀸𑀦𑀺 𑀛𑀸𑀧𑁂𑀲𑀺. 𑀅𑀜𑁆𑀜𑁂𑀲𑀁 𑀓𑀼𑀮𑀽𑀧𑀓𑀪𑀺𑀓𑁆𑀔𑀽 𑀆𑀕𑀦𑁆𑀢𑁆𑀯𑀸 𑁋 ‘‘𑀓𑀺𑀁 𑀉𑀧𑀸𑀲𑀺𑀓𑁂, 𑀅𑀧𑀺 𑀓𑀺𑀜𑁆𑀘𑀺 𑀪𑀡𑁆𑀟𑀓𑀁 𑀅𑀭𑁄𑀕𑀁 𑀓𑀸𑀢𑀼𑀁 𑀅𑀲𑀓𑁆𑀔𑀺𑀢𑁆𑀣𑀸’’𑀢𑀺 𑀧𑀝𑀺𑀲𑀦𑁆𑀣𑀸𑀭𑀁 𑀅𑀓𑀁𑀲𑀼. 𑀫𑀦𑀼𑀲𑁆𑀲𑀸, ‘‘𑀅𑀫𑁆𑀳𑀸𑀓𑀁 𑀫𑀸𑀢𑀼 𑀓𑀼𑀮𑀽𑀧𑀓𑀢𑁆𑀣𑁂𑀭𑁄 𑀪𑀼𑀜𑁆𑀚𑀦𑀯𑁂𑀮𑀸𑀬𑀫𑁂𑀯 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀆𑀳𑀁𑀲𑀼. 𑀣𑁂𑀭𑁄𑀧𑀺 𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀯 𑀆𑀕𑀢𑁄. 𑀉𑀧𑀸𑀲𑀺𑀓𑀸 𑀓𑁄𑀝𑁆𑀞𑀘𑁆𑀙𑀸𑀬𑀸𑀬 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀅𑀤𑀸𑀲𑀺. 𑀣𑁂𑀭𑁂 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀧𑀓𑁆𑀓𑀦𑁆𑀢𑁂 𑀫𑀦𑀼𑀲𑁆𑀲𑀸 𑀆𑀳𑀁𑀲𑀼 𑁋 ‘‘𑀅𑀫𑁆𑀳𑀸𑀓𑀁 𑀫𑀸𑀢𑀼 𑀓𑀼𑀮𑀽𑀧𑀓𑀢𑁆𑀣𑁂𑀭𑁄 𑀪𑀼𑀜𑁆𑀚𑀦𑀯𑁂𑀮𑀸𑀬𑀫𑁂𑀯 𑀆𑀕𑀢𑁄’’𑀢𑀺. 𑀉𑀧𑀸𑀲𑀺𑀓𑀸, ‘‘𑀢𑀼𑀫𑁆𑀳𑀸𑀓𑀁 𑀓𑀼𑀮𑀽𑀧𑀓𑀸 𑀢𑀼𑀫𑁆𑀳𑀸𑀓𑀁𑀬𑁂𑀯 𑀅𑀦𑀼𑀘𑁆𑀙𑀯𑀺𑀓𑀸, 𑀫𑀬𑁆𑀳𑀁 𑀣𑁂𑀭𑁄 𑀫𑀬𑁆𑀳𑁂𑀯 𑀅𑀦𑀼𑀘𑁆𑀙𑀯𑀺𑀓𑁄’’𑀢𑀺 𑀆𑀳. 𑀆𑀬𑀲𑁆𑀫𑀸 𑀧𑀦 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀲𑀁𑀲𑀕𑁆𑀕𑁂𑀳𑀺 𑀘𑀢𑀽𑀳𑀺𑀧𑀺 𑀧𑀭𑀺𑀲𑀸𑀳𑀺 𑀲𑀤𑁆𑀥𑀺𑀁 𑀅𑀲𑀁𑀲𑀝𑁆𑀞𑁄 𑀕𑀸𑀳𑀫𑀼𑀢𑁆𑀢𑀓𑁄 𑀘𑁂𑀯 𑀫𑀼𑀢𑁆𑀢𑀫𑀼𑀢𑁆𑀢𑀓𑁄 𑀘 𑀅𑀳𑁄𑀲𑀺. 𑀬𑀣𑀸 𑀘 𑀲𑀬𑀁 𑀅𑀲𑀁𑀲𑀝𑁆𑀞𑁄, 𑀏𑀯𑀁 𑀪𑀺𑀓𑁆𑀔𑀽𑀦𑀫𑁆𑀧𑀺 𑀢𑀁 𑀅𑀲𑀁𑀲𑀕𑁆𑀕𑀓𑀣𑀁 𑀓𑀢𑁆𑀢𑀸 𑀅𑀳𑁄𑀲𑀺.

𑀆𑀭𑀤𑁆𑀥𑀯𑀻𑀭𑀺𑀬𑁄𑀢𑀺 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑁄, 𑀧𑀭𑀺𑀧𑀼𑀡𑁆𑀡𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑁄𑀢𑀺 𑀅𑀢𑁆𑀣𑁄. 𑀬𑁄 𑀳𑀺 𑀪𑀺𑀓𑁆𑀔𑀼 𑀕𑀫𑀦𑁂 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀁 𑀞𑀸𑀦𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀤𑁂𑀢𑀺, 𑀞𑀸𑀦𑁂 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀁 𑀦𑀺𑀲𑀚𑁆𑀚𑀁, 𑀦𑀺𑀲𑀚𑁆𑀚𑀸𑀬 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀁 𑀲𑀬𑀦𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀤𑁂𑀢𑀺, 𑀫𑀦𑁆𑀢𑁂𑀦 𑀓𑀡𑁆𑀳𑀲𑀧𑁆𑀧𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀯𑀺𑀬, 𑀅𑀫𑀺𑀢𑁆𑀢𑀁 𑀕𑀻𑀯𑀸𑀬 𑀅𑀓𑁆𑀓𑀫𑀦𑁆𑀢𑁄 𑀯𑀺𑀬 𑀘 𑀯𑀺𑀘𑀭𑀢𑀺, 𑀅𑀬𑀁 𑀆𑀭𑀤𑁆𑀥𑀯𑀻𑀭𑀺𑀬𑁄 𑀦𑀸𑀫. 𑀣𑁂𑀭𑁄 𑀘 𑀢𑀸𑀤𑀺𑀲𑁄 𑀅𑀳𑁄𑀲𑀺. 𑀪𑀺𑀓𑁆𑀔𑀽𑀦𑀫𑁆𑀧𑀺 𑀢𑀣𑁂𑀯 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀁 𑀓𑀢𑁆𑀢𑀸 𑀅𑀳𑁄𑀲𑀺.

𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺𑀆𑀤𑀻𑀲𑀼 𑀲𑀻𑀮𑀦𑁆𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀲𑀫𑀸𑀥𑀻𑀢𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄. 𑀧𑀜𑁆𑀜𑀸𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀜𑀸𑀡𑀁. 𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀺𑀬𑀨𑀮𑀁. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀏𑀓𑀽𑀦𑀯𑀻𑀲𑀢𑀺𑀯𑀺𑀥𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. 𑀣𑁂𑀭𑁄 𑀲𑀬𑀫𑁆𑀧𑀺 𑀲𑀻𑀮𑀸𑀤𑀻𑀳𑀺 𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺 𑀪𑀺𑀓𑁆𑀔𑀽𑀦𑀫𑁆𑀧𑀺 𑀲𑀻𑀮𑀸𑀤𑀺𑀓𑀣𑀁 𑀓𑀢𑁆𑀢𑀸. 𑀲𑁆𑀯𑀸𑀬𑀁 𑀤𑀲𑀳𑀺 𑀓𑀣𑀸𑀯𑀢𑁆𑀣𑀽𑀳𑀺 𑀑𑀯𑀤𑀢𑀻𑀢𑀺 𑀑𑀯𑀸𑀤𑀓𑁄. 𑀬𑀣𑀸 𑀧𑀦 𑀏𑀓𑁄 𑀑𑀯𑀤𑀢𑀺𑀬𑁂𑀯, 𑀲𑀼𑀔𑀼𑀫𑀁 𑀅𑀢𑁆𑀣𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀚𑀸𑀦𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀦 𑀏𑀯𑀁 𑀣𑁂𑀭𑁄. 𑀣𑁂𑀭𑁄 𑀧𑀦 𑀢𑀸𑀦𑀺 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀯𑀺𑀜𑁆𑀜𑀸𑀧𑀓𑁄. 𑀏𑀓𑁄 𑀯𑀺𑀜𑁆𑀜𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀣𑁂𑀭𑁄 𑀓𑀸𑀭𑀡𑀫𑁆𑀧𑀺 𑀲𑀦𑁆𑀤𑀲𑁆𑀲𑁂𑀢𑀻𑀢𑀺 𑀲𑀦𑁆𑀤𑀲𑁆𑀲𑀓𑁄. 𑀏𑀓𑁄 𑀯𑀺𑀚𑁆𑀚𑀫𑀸𑀦𑀁 𑀓𑀸𑀭𑀡𑀁 𑀤𑀲𑁆𑀲𑁂𑀢𑀺, 𑀕𑀸𑀳𑁂𑀢𑀼𑀁 𑀧𑀦 𑀦 𑀲𑀓𑁆𑀓𑁄𑀢𑀺. 𑀣𑁂𑀭𑁄 𑀕𑀸𑀳𑁂𑀢𑀼𑀫𑁆𑀧𑀺 𑀲𑀓𑁆𑀓𑁄𑀢𑀻𑀢𑀺 𑀲𑀫𑀸𑀤𑀧𑀓𑁄. 𑀏𑀯𑀁 𑀲𑀫𑀸𑀤𑀧𑁂𑀢𑁆𑀯𑀸 𑀧𑀦 𑀢𑁂𑀲𑀼 𑀓𑀣𑀸𑀯𑀢𑁆𑀣𑀽𑀲𑀼 𑀉𑀲𑁆𑀲𑀸𑀳𑀚𑀦𑀦𑀯𑀲𑁂𑀦 𑀪𑀺𑀓𑁆𑀔𑀽 𑀲𑀫𑀼𑀢𑁆𑀢𑁂𑀚𑁂𑀢𑀻𑀢𑀺 𑀲𑀫𑀼𑀢𑁆𑀢𑁂𑀚𑀓𑁄. 𑀉𑀲𑁆𑀲𑀸𑀳𑀚𑀸𑀢𑁂 𑀯𑀡𑁆𑀡𑀁 𑀯𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑀻𑀢𑀺 𑀲𑀫𑁆𑀧𑀳𑀁𑀲𑀓𑁄.

𑀧𑀜𑁆𑀘𑀮𑀸𑀪𑀯𑀡𑁆𑀡𑀦𑀸

𑁨𑁫𑁩. 𑀲𑀼𑀮𑀤𑁆𑀥𑀮𑀸𑀪𑀸𑀢𑀺 𑀅𑀜𑁆𑀜𑁂𑀲𑀫𑁆𑀧𑀺 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑀧𑀩𑁆𑀩𑀚𑁆𑀚𑀸𑀤𑀺𑀕𑀼𑀡𑀮𑀸𑀪𑀸 𑀦𑀸𑀫 𑀳𑁄𑀦𑁆𑀢𑀺. 𑀆𑀬𑀲𑁆𑀫𑀢𑁄 𑀧𑀦 𑀧𑀼𑀡𑁆𑀡𑀲𑁆𑀲 𑀲𑀼𑀮𑀤𑁆𑀥𑀮𑀸𑀪𑀸 𑀏𑀢𑁂, 𑀬𑀲𑁆𑀲 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀏𑀯𑀁 𑀯𑀡𑁆𑀡𑁄 𑀅𑀩𑁆𑀪𑀼𑀕𑁆𑀕𑀢𑁄𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀅𑀧𑀡𑁆𑀟𑀺𑀢𑁂𑀳𑀺 𑀯𑀡𑁆𑀡𑀓𑀣𑀦𑀁 𑀦𑀸𑀫 𑀦 𑀢𑀣𑀸 𑀮𑀸𑀪𑁄, 𑀧𑀡𑁆𑀟𑀺𑀢𑁂𑀳𑀺 𑀯𑀡𑁆𑀡𑀓𑀣𑀦𑀁 𑀧𑀦 𑀮𑀸𑀪𑁄. 𑀕𑀺𑀳𑀻 𑀳𑀺 𑀯𑀸 𑀯𑀡𑁆𑀡𑀓𑀣𑀦𑀁 𑀦 𑀢𑀣𑀸 𑀮𑀸𑀪𑁄, 𑀕𑀺𑀳𑀻 𑀳𑀺 ‘‘𑀯𑀡𑁆𑀡𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺, ‘‘𑀅𑀫𑁆𑀳𑀸𑀓𑀁 𑀅𑀬𑁆𑀬𑁄 𑀲𑀡𑁆𑀳𑁄 𑀲𑀔𑀺𑀮𑁄 𑀲𑀼𑀔𑀲𑀫𑁆𑀪𑀸𑀲𑁄, 𑀯𑀺𑀳𑀸𑀭𑀁 𑀆𑀕𑀢𑀸𑀦𑀁 𑀬𑀸𑀕𑀼𑀪𑀢𑁆𑀢𑀨𑀸𑀡𑀺𑀢𑀸𑀤𑀻𑀳𑀺 𑀲𑀗𑁆𑀕𑀳𑀁 𑀓𑀭𑁄𑀢𑀻’’𑀢𑀺 𑀓𑀣𑁂𑀦𑁆𑀢𑁄 𑀅𑀯𑀡𑁆𑀡𑀫𑁂𑀯 𑀓𑀣𑁂𑀢𑀺. ‘‘𑀅𑀯𑀡𑁆𑀡𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 ‘‘𑀅𑀬𑀁 𑀣𑁂𑀭𑁄 𑀫𑀦𑁆𑀤𑀫𑀦𑁆𑀤𑁄 𑀯𑀺𑀬 𑀅𑀩𑀮𑀩𑀮𑁄 𑀯𑀺𑀬 𑀪𑀸𑀓𑀼𑀝𑀺𑀓𑀪𑀸𑀓𑀼𑀝𑀺𑀓𑁄 𑀯𑀺𑀬 𑀦𑀢𑁆𑀣𑀺 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀯𑀺𑀲𑁆𑀲𑀸𑀲𑁄’’𑀢𑀺 𑀓𑀣𑁂𑀦𑁆𑀢𑁄 𑀯𑀡𑁆𑀡𑀫𑁂𑀯 𑀓𑀣𑁂𑀢𑀺. 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺𑀧𑀺 𑀲𑀢𑁆𑀣𑀼 𑀧𑀭𑀫𑁆𑀫𑀼𑀔𑀸 𑀯𑀡𑁆𑀡𑀓𑀣𑀦𑀁 𑀦 𑀢𑀣𑀸 𑀮𑀸𑀪𑁄, 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀧𑀦 𑀅𑀢𑀺𑀮𑀸𑀪𑁄𑀢𑀺 𑀇𑀫𑀫𑁆𑀧𑀺 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 ‘‘𑀲𑀼𑀮𑀤𑁆𑀥𑀮𑀸𑀪𑀸’’𑀢𑀺 𑀆𑀳. 𑀅𑀦𑀼𑀫𑀲𑁆𑀲 𑀅𑀦𑀼𑀫𑀲𑁆𑀲𑀸𑀢𑀺 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀅𑀦𑀼𑀧𑀯𑀺𑀲𑀺𑀢𑁆𑀯𑀸. 𑀢𑀜𑁆𑀘 𑀲𑀢𑁆𑀣𑀸 𑀅𑀩𑁆𑀪𑀦𑀼𑀫𑁄𑀤𑀢𑀻𑀢𑀺 𑀢𑀜𑁆𑀘𑀲𑁆𑀲 𑀯𑀡𑁆𑀡𑀁 𑀏𑀯𑀫𑁂𑀢𑀁 𑀅𑀧𑁆𑀧𑀺𑀘𑁆𑀙𑁄 𑀘 𑀲𑁄 𑀪𑀺𑀓𑁆𑀔𑀼 𑀲𑀦𑁆𑀢𑀼𑀝𑁆𑀞𑁄 𑀘 𑀲𑁄 𑀪𑀺𑀓𑁆𑀔𑀽𑀢𑀺 𑀅𑀦𑀼𑀫𑁄𑀤𑀢𑀺. 𑀇𑀢𑀺 𑀯𑀺𑀜𑁆𑀜𑀽𑀳𑀺 𑀯𑀡𑁆𑀡𑀪𑀸𑀲𑀦𑀁 𑀏𑀓𑁄 𑀮𑀸𑀪𑁄, 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀏𑀓𑁄, 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀏𑀓𑁄, 𑀅𑀦𑀼𑀫𑀲𑁆𑀲 𑀅𑀦𑀼𑀫𑀲𑁆𑀲 𑀏𑀓𑁄, 𑀲𑀢𑁆𑀣𑀸𑀭𑀸 𑀅𑀩𑁆𑀪𑀦𑀼𑀫𑁄𑀤𑀦𑀁 𑀏𑀓𑁄𑀢𑀺 𑀇𑀫𑁂 𑀧𑀜𑁆𑀘 𑀮𑀸𑀪𑁂 𑀲𑀦𑁆𑀥𑀸𑀬 ‘‘𑀲𑀼𑀮𑀤𑁆𑀥𑀮𑀸𑀪𑀸’’𑀢𑀺 𑀆𑀳. 𑀓𑀤𑀸𑀘𑀻𑀢𑀺 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀓𑀸𑀮𑁂. 𑀓𑀭𑀳𑀘𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀧𑁆𑀧𑁂𑀯 𑀦𑀸𑀫 𑀲𑀺𑀬𑀸 𑀓𑁄𑀘𑀺𑀤𑁂𑀯 𑀓𑀣𑀸𑀲𑀮𑁆𑀮𑀸𑀧𑁄𑀢𑀺 𑀅𑀧𑀺 𑀦𑀸𑀫 𑀓𑁄𑀘𑀺 𑀓𑀣𑀸𑀲𑀫𑀼𑀤𑀸𑀘𑀸𑀭𑁄𑀧𑀺 𑀪𑀯𑁂𑀬𑁆𑀬. 𑀣𑁂𑀭𑁂𑀦 𑀓𑀺𑀭 𑀆𑀬𑀲𑁆𑀫𑀸 𑀧𑀼𑀡𑁆𑀡𑁄 𑀦𑁂𑀯 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀦𑀲𑁆𑀲 𑀥𑀫𑁆𑀫𑀓𑀣𑀸 𑀲𑀼𑀢𑀧𑀼𑀩𑁆𑀩𑀸. 𑀇𑀢𑀺 𑀲𑁄 𑀢𑀲𑁆𑀲 𑀤𑀲𑁆𑀲𑀦𑀫𑁆𑀧𑀺 𑀥𑀫𑁆𑀫𑀓𑀣𑀫𑁆𑀧𑀺 𑀧𑀢𑁆𑀣𑀬𑀫𑀸𑀦𑁄 𑀏𑀯𑀫𑀸𑀳.

𑀘𑀸𑀭𑀺𑀓𑀸𑀤𑀺𑀯𑀡𑁆𑀡𑀦𑀸

𑁨𑁫𑁪. 𑀬𑀣𑀸𑀪𑀺𑀭𑀦𑁆𑀢𑀦𑁆𑀢𑀺 𑀬𑀣𑀸𑀅𑀚𑁆𑀛𑀸𑀲𑀬𑀁 𑀯𑀺𑀳𑀭𑀺𑀢𑁆𑀯𑀸. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀲𑀦𑁆𑀢𑀸𑀦𑀁 𑀙𑀸𑀬𑀽𑀤𑀓𑀸𑀤𑀺𑀯𑀺𑀧𑀢𑁆𑀢𑀺𑀁 𑀯𑀸 𑀅𑀧𑁆𑀨𑀸𑀲𑀼𑀓𑀲𑁂𑀦𑀸𑀲𑀦𑀁 𑀯𑀸, 𑀫𑀦𑀼𑀲𑁆𑀲𑀸𑀦𑀁 𑀅𑀲𑁆𑀲𑀤𑁆𑀥𑀸𑀤𑀺𑀪𑀸𑀯𑀁 𑀯𑀸 𑀆𑀕𑀫𑁆𑀫 𑀅𑀦𑀪𑀺𑀭𑀢𑀺 𑀦𑀸𑀫 𑀦𑀢𑁆𑀣𑀺. 𑀢𑁂𑀲𑀁 𑀲𑀫𑁆𑀧𑀢𑁆𑀢𑀺𑀬𑀸 ‘‘𑀇𑀥 𑀨𑀸𑀲𑀼 𑀯𑀺𑀳𑀭𑀸𑀫𑀸’’𑀢𑀺 𑀅𑀪𑀺𑀭𑀫𑀺𑀢𑁆𑀯𑀸 𑀘𑀺𑀭𑀯𑀺𑀳𑀸𑀭𑁄𑀧𑀺 𑀦𑀢𑁆𑀣𑀺. 𑀬𑀢𑁆𑀣 𑀧𑀦 𑀢𑀣𑀸𑀕𑀢𑁂 𑀯𑀺𑀳𑀭𑀦𑁆𑀢𑁂 𑀲𑀢𑁆𑀢𑀸 𑀲𑀭𑀡𑁂𑀲𑀼 𑀯𑀸 𑀧𑀢𑀺𑀝𑁆𑀞𑀳𑀦𑁆𑀢𑀺, 𑀲𑀻𑀮𑀸𑀦𑀺 𑀯𑀸 𑀲𑀫𑀸𑀤𑀺𑀬𑀦𑁆𑀢𑀺, 𑀧𑀩𑁆𑀩𑀚𑀦𑁆𑀢𑀺 𑀯𑀸, 𑀢𑀢𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀻𑀦𑀁 𑀯𑀸 𑀧𑀦 𑀢𑁂𑀲𑀁 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀢𑀢𑁆𑀣 𑀩𑀼𑀤𑁆𑀥𑀸 𑀲𑀢𑁆𑀢𑁂 𑀢𑀸𑀲𑀼 𑀲𑀫𑁆𑀧𑀢𑁆𑀢𑀻𑀲𑀼 𑀧𑀢𑀺𑀝𑁆𑀞𑀸𑀧𑀦𑀅𑀚𑁆𑀛𑀸𑀲𑀬𑁂𑀦 𑀯𑀲𑀦𑁆𑀢𑀺; 𑀢𑀸𑀲𑀁 𑀅𑀪𑀸𑀯𑁂 𑀧𑀓𑁆𑀓𑀫𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀬𑀣𑀸𑀅𑀚𑁆𑀛𑀸𑀲𑀬𑀁 𑀯𑀺𑀳𑀭𑀺𑀢𑁆𑀯𑀸’’𑀢𑀺. 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄𑀢𑀺 𑀅𑀤𑁆𑀥𑀸𑀦𑀕𑀫𑀦𑀁 𑀕𑀘𑁆𑀙𑀦𑁆𑀢𑁄. 𑀘𑀸𑀭𑀺𑀓𑀸 𑀘 𑀦𑀸𑀫𑁂𑀲𑀸 𑀪𑀕𑀯𑀢𑁄 𑀤𑀼𑀯𑀺𑀥𑀸 𑀳𑁄𑀢𑀺 𑀢𑀼𑀭𑀺𑀢𑀘𑀸𑀭𑀺𑀓𑀸 𑀘, 𑀅𑀢𑀼𑀭𑀺𑀢𑀘𑀸𑀭𑀺𑀓𑀸 𑀘.

𑀢𑀢𑁆𑀣 𑀤𑀽𑀭𑁂𑀧𑀺 𑀩𑁄𑀥𑀦𑁂𑀬𑁆𑀬𑀧𑀼𑀕𑁆𑀕𑀮𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀩𑁄𑀥𑀦𑀢𑁆𑀣𑀸𑀬 𑀲𑀳𑀲𑀸 𑀕𑀫𑀦𑀁 𑀢𑀼𑀭𑀺𑀢𑀘𑀸𑀭𑀺𑀓𑀸 𑀦𑀸𑀫. 𑀲𑀸 𑀫𑀳𑀸𑀓𑀲𑁆𑀲𑀧𑀧𑀘𑁆𑀘𑀼𑀕𑁆𑀕𑀫𑀦𑀸𑀤𑀻𑀲𑀼 𑀤𑀝𑁆𑀞𑀩𑁆𑀩𑀸. 𑀪𑀕𑀯𑀸 𑀳𑀺 𑀫𑀳𑀸𑀓𑀲𑁆𑀲𑀧𑀁 𑀧𑀘𑁆𑀘𑀼𑀕𑁆𑀕𑀘𑁆𑀙𑀦𑁆𑀢𑁄 𑀫𑀼𑀳𑀼𑀢𑁆𑀢𑁂𑀦 𑀢𑀺𑀕𑀸𑀯𑀼𑀢𑀁 𑀫𑀕𑁆𑀕𑀁 𑀅𑀕𑀫𑀸𑀲𑀺, 𑀆𑀴𑀯𑀓𑀲𑁆𑀲𑀢𑁆𑀣𑀸𑀬 𑀢𑀺𑀁𑀲𑀬𑁄𑀚𑀦𑀁, 𑀢𑀣𑀸 𑀅𑀗𑁆𑀕𑀼𑀮𑀺𑀫𑀸𑀮𑀲𑁆𑀲. 𑀧𑀼𑀓𑁆𑀓𑀼𑀲𑀸𑀢𑀺𑀲𑁆𑀲 𑀧𑀦 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀁, 𑀫𑀳𑀸𑀓𑀧𑁆𑀧𑀺𑀦𑀲𑁆𑀲 𑀯𑀻𑀲𑀬𑁄𑀚𑀦𑀲𑀢𑀁, 𑀔𑀤𑀺𑀭𑀯𑀦𑀺𑀬𑀲𑁆𑀲𑀢𑁆𑀣𑀸𑀬 𑀲𑀢𑁆𑀢 𑀬𑁄𑀚𑀦𑀲𑀢𑀸𑀦𑀺 𑀅𑀕𑀫𑀸𑀲𑀺; 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀯𑀦𑀯𑀸𑀲𑀻𑀢𑀺𑀲𑁆𑀲𑀲𑀸𑀫𑀡𑁂𑀭𑀲𑁆𑀲 𑀢𑀺𑀕𑀸𑀯𑀼𑀢𑀸𑀥𑀺𑀓𑀁 𑀯𑀻𑀲𑀬𑁄𑀚𑀦𑀲𑀢𑀁.

𑀏𑀓𑀤𑀺𑀯𑀲𑀁 𑀓𑀺𑀭 𑀣𑁂𑀭𑁄, ‘‘𑀢𑀺𑀲𑁆𑀲𑀲𑀸𑀫𑀡𑁂𑀭𑀲𑁆𑀲 𑀲𑀦𑁆𑀢𑀺𑀓𑀁, 𑀪𑀦𑁆𑀢𑁂, 𑀕𑀘𑁆𑀙𑀸𑀫𑀻’’𑀢𑀺 𑀆𑀳. 𑀪𑀕𑀯𑀸, ‘‘𑀅𑀳𑀫𑁆𑀧𑀺 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀦𑀦𑁆𑀤, 𑀯𑀻𑀲𑀢𑀺𑀲𑀳𑀲𑁆𑀲𑀸𑀦𑀁 𑀙𑀴𑀪𑀺𑀜𑁆𑀜𑀸𑀦𑀁 𑀆𑀭𑁄𑀘𑁂𑀳𑀺 𑁋 ‘𑀪𑀕𑀯𑀸 𑀯𑀦𑀯𑀸𑀲𑀻𑀢𑀺𑀲𑁆𑀲𑀲𑀸𑀫𑀡𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀢𑀻’’’𑀢𑀺. 𑀢𑀢𑁄 𑀤𑀼𑀢𑀺𑀬𑀤𑀺𑀯𑀲𑁂 𑀯𑀻𑀲𑀢𑀺𑀲𑀳𑀲𑁆𑀲𑀔𑀻𑀡𑀸𑀲𑀯𑀧𑀭𑀺𑀯𑀼𑀢𑁄 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀯𑀻𑀲𑀬𑁄𑀚𑀦𑀲𑀢𑀫𑀢𑁆𑀣𑀓𑁂 𑀢𑀲𑁆𑀲 𑀕𑁄𑀘𑀭𑀕𑀸𑀫𑀤𑁆𑀯𑀸𑀭𑁂 𑀑𑀢𑀭𑀺𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺. 𑀓𑀫𑁆𑀫𑀦𑁆𑀢𑀁 𑀕𑀘𑁆𑀙𑀫𑀸𑀦𑀸 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸, ‘‘𑀲𑀢𑁆𑀣𑀸, 𑀪𑁄, 𑀆𑀕𑀢𑁄, 𑀫𑀸 𑀓𑀫𑁆𑀫𑀦𑁆𑀢𑀁 𑀅𑀕𑀫𑀺𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀢𑁆𑀯𑀸 𑀬𑀸𑀕𑀼𑀁 𑀤𑀢𑁆𑀯𑀸 𑀧𑀸𑀦𑀯𑀢𑁆𑀢𑀁 𑀓𑀭𑁄𑀦𑁆𑀢𑀸, ‘‘𑀓𑀼𑀳𑀺𑀁, 𑀪𑀦𑁆𑀢𑁂, 𑀪𑀕𑀯𑀸 𑀕𑀘𑁆𑀙𑀢𑀻’’𑀢𑀺 𑀤𑀳𑀭𑀪𑀺𑀓𑁆𑀔𑀽 𑀧𑀼𑀘𑁆𑀙𑀺𑀁𑀲𑀼. 𑀉𑀧𑀸𑀲𑀓𑀸, 𑀦 𑀪𑀕𑀯𑀸 𑀅𑀜𑁆𑀜𑀢𑁆𑀣 𑀕𑀘𑁆𑀙𑀢𑀺, 𑀇𑀥𑁂𑀯 𑀢𑀺𑀲𑁆𑀲𑀲𑀸𑀫𑀡𑁂𑀭𑀲𑁆𑀲 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀢𑁄𑀢𑀺. 𑀢𑁂 ‘‘𑀅𑀫𑁆𑀳𑀸𑀓𑀁 𑀓𑀺𑀭 𑀓𑀼𑀮𑀽𑀧𑀓𑀢𑁆𑀣𑁂𑀭𑀲𑁆𑀲 𑀤𑀲𑁆𑀲𑀦𑀢𑁆𑀣𑀸𑀬 𑀲𑀢𑁆𑀣𑀸 𑀆𑀕𑀢𑁄, 𑀦𑁄 𑀯𑀢 𑀦𑁄 𑀣𑁂𑀭𑁄 𑀑𑀭𑀫𑀢𑁆𑀢𑀓𑁄’’𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑀸 𑀅𑀳𑁂𑀲𑀼𑀁.

𑀅𑀣 𑀪𑀕𑀯𑀢𑁄 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑀸𑀫𑀡𑁂𑀭𑁄 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 ‘‘𑀉𑀧𑀸𑀲𑀓𑀸 𑀫𑀳𑀸 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀢𑁂, ‘‘𑀲𑀢𑁆𑀣𑀸, 𑀪𑀦𑁆𑀢𑁂, 𑀆𑀕𑀢𑁄’’𑀢𑀺 𑀆𑀭𑁄𑀘𑁂𑀲𑀼𑀁, 𑀲𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑁂𑀦 𑀆𑀧𑀼𑀘𑁆𑀙𑀺. 𑀲𑀢𑁆𑀣𑀸 𑀢𑀲𑁆𑀲 𑀧𑀢𑁆𑀢𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸, ‘‘𑀅𑀮𑀁, 𑀢𑀺𑀲𑁆𑀲, 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢𑀓𑀺𑀘𑁆𑀘’’𑀦𑁆𑀢𑀺 𑀆𑀳. 𑀢𑀢𑁄 𑀉𑀧𑀚𑁆𑀛𑀸𑀬𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀫𑀓𑀸𑀲𑀺. 𑀅𑀣𑀲𑁆𑀲 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂 𑀲𑀢𑁆𑀣𑀸 𑀫𑀗𑁆𑀕𑀮𑀁 𑀯𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀸𑀫𑀤𑁆𑀯𑀸𑀭𑁂 𑀞𑀢𑁆𑀯𑀸, ‘‘𑀓𑀢𑀭𑁄 𑀢𑁂, 𑀢𑀺𑀲𑁆𑀲, 𑀯𑀲𑀦𑀝𑁆𑀞𑀸𑀦𑀁 𑀕𑀫𑀦𑀫𑀕𑁆𑀕𑁄’’𑀢𑀺 𑀆𑀳. ‘‘𑀅𑀬𑀁 𑀪𑀕𑀯𑀸’’𑀢𑀺. 𑀫𑀕𑁆𑀕𑀁 𑀤𑁂𑀲𑀬𑀫𑀸𑀦𑁄 𑀧𑀼𑀭𑀢𑁄 𑀬𑀸𑀳𑀺 𑀢𑀺𑀲𑁆𑀲𑀸𑀢𑀺. 𑀪𑀕𑀯𑀸 𑀓𑀺𑀭 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀫𑀕𑁆𑀕𑀤𑁂𑀲𑀓𑁄 𑀲𑀫𑀸𑀦𑁄𑀧𑀺 ‘‘𑀲𑀓𑀮𑀢𑀺𑀕𑀸𑀯𑀼𑀢𑁂 𑀫𑀕𑁆𑀕𑁂 𑀲𑀸𑀫𑀡𑁂𑀭𑀁 𑀤𑀝𑁆𑀞𑀼𑀁 𑀮𑀘𑁆𑀙𑀸𑀫𑀻’’𑀢𑀺 𑀢𑀁 𑀫𑀕𑁆𑀕𑀤𑁂𑀲𑀓𑀫𑀓𑀸𑀲𑀺.

𑀲𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀯𑀢𑁆𑀢𑀫𑀓𑀸𑀲𑀺. 𑀅𑀣 𑀦𑀁 𑀪𑀕𑀯𑀸, ‘‘𑀓𑀢𑀭𑁄 𑀢𑁂, 𑀢𑀺𑀲𑁆𑀲, 𑀘𑀗𑁆𑀓𑀫𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀸𑀫𑀡𑁂𑀭𑀲𑁆𑀲 𑀦𑀺𑀲𑀻𑀤𑀦𑀧𑀸𑀲𑀸𑀡𑁂 𑀦𑀺𑀲𑀻𑀤𑀺𑀢𑁆𑀯𑀸, ‘‘𑀢𑀺𑀲𑁆𑀲, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀼𑀔𑀁 𑀯𑀲𑀲𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 𑀆𑀳 𑁋 ‘‘𑀆𑀫, 𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀫𑁂 𑀞𑀸𑀦𑁂 𑀯𑀲𑀦𑁆𑀢𑀲𑁆𑀲 𑀲𑀻𑀳𑀩𑁆𑀬𑀕𑁆𑀖𑀳𑀢𑁆𑀣𑀺𑀫𑀺𑀕𑀫𑁄𑀭𑀸𑀤𑀻𑀦𑀁 𑀲𑀤𑁆𑀤𑀁 𑀲𑀼𑀡𑀢𑁄 𑀅𑀭𑀜𑁆𑀜𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀬 𑀲𑀼𑀔𑀁 𑀯𑀲𑀸𑀫𑀻’’𑀢𑀺. 𑀅𑀣 𑀦𑀁 𑀪𑀕𑀯𑀸, ‘‘𑀢𑀺𑀲𑁆𑀲, 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀳𑀺, 𑀩𑀼𑀤𑁆𑀥𑀤𑀸𑀬𑀚𑁆𑀚𑀁 𑀢𑁂 𑀤𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑁂 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀅𑀕𑀫𑀸𑀲𑀻𑀢𑀺. 𑀅𑀬𑀁 𑀢𑀼𑀭𑀺𑀢𑀘𑀸𑀭𑀺𑀓𑀸 𑀦𑀸𑀫.

𑀬𑀁 𑀧𑀦 𑀕𑀸𑀫𑀦𑀺𑀕𑀫𑀧𑀝𑀺𑀧𑀸𑀝𑀺𑀬𑀸 𑀤𑁂𑀯𑀲𑀺𑀓𑀁 𑀬𑁄𑀚𑀦𑀟𑁆𑀠𑀬𑁄𑀚𑀦𑀯𑀲𑁂𑀦 𑀧𑀺𑀡𑁆𑀟𑀧𑀸𑀢𑀘𑀭𑀺𑀬𑀸𑀤𑀻𑀳𑀺 𑀮𑁄𑀓𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀕𑀫𑀦𑀁, 𑀅𑀬𑀁 𑀅𑀢𑀼𑀭𑀺𑀢𑀘𑀸𑀭𑀺𑀓𑀸 𑀦𑀸𑀫. 𑀇𑀫𑀁 𑀧𑀦 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀪𑀕𑀯𑀸 𑀫𑀳𑀸𑀫𑀡𑁆𑀟𑀮𑀁 𑀫𑀚𑁆𑀛𑀺𑀫𑀫𑀡𑁆𑀟𑀮𑀁 𑀅𑀦𑁆𑀢𑀺𑀫𑀫𑀡𑁆𑀟𑀮𑀦𑁆𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀫𑀡𑁆𑀟𑀮𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀘𑀭𑀢𑀺. 𑀢𑀢𑁆𑀣 𑀫𑀳𑀸𑀫𑀡𑁆𑀟𑀮𑀁 𑀦𑀯𑀬𑁄𑀚𑀦𑀲𑀢𑀺𑀓𑀁, 𑀫𑀚𑁆𑀛𑀺𑀫𑀫𑀡𑁆𑀟𑀮𑀁 𑀙𑀬𑁄𑀚𑀦𑀲𑀢𑀺𑀓𑀁, 𑀅𑀦𑁆𑀢𑀺𑀫𑀫𑀡𑁆𑀟𑀮𑀁 𑀢𑀺𑀬𑁄𑀚𑀦𑀲𑀢𑀺𑀓𑀁. 𑀬𑀤𑀸 𑀫𑀳𑀸𑀫𑀡𑁆𑀟𑀮𑁂 𑀘𑀸𑀭𑀺𑀓𑀁 𑀘𑀭𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀫𑀳𑀸𑀧𑀯𑀸𑀭𑀡𑀸𑀬 𑀧𑀯𑀸𑀭𑁂𑀢𑁆𑀯𑀸 𑀧𑀸𑀝𑀺𑀧𑀤𑀤𑀺𑀯𑀲𑁂 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀦𑀺𑀓𑁆𑀔𑀫𑀢𑀺. 𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁 𑀏𑀓𑀓𑁄𑀮𑀸𑀳𑀮𑀁 𑀅𑀳𑁄𑀲𑀺, 𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀆𑀕𑀢𑀸 𑀦𑀺𑀫𑀦𑁆𑀢𑁂𑀢𑀼𑀁 𑀮𑀪𑀦𑁆𑀢𑀺; 𑀇𑀢𑀭𑁂𑀲𑀼 𑀤𑁆𑀯𑀻𑀲𑀼 𑀫𑀡𑁆𑀟𑀮𑁂𑀲𑀼 𑀲𑀓𑁆𑀓𑀸𑀭𑁄 𑀫𑀳𑀸𑀫𑀡𑁆𑀟𑀮𑁂 𑀑𑀲𑀭𑀢𑀺. 𑀢𑀢𑁆𑀭 𑀪𑀕𑀯𑀸 𑀢𑁂𑀲𑀼 𑀢𑁂𑀲𑀼 𑀕𑀸𑀫𑀦𑀺𑀕𑀫𑁂𑀲𑀼 𑀏𑀓𑀸𑀳𑀁 𑀤𑁆𑀯𑀻𑀳𑀁 𑀯𑀲𑀦𑁆𑀢𑁄 𑀫𑀳𑀸𑀚𑀦𑀁 𑀆𑀫𑀺𑀲𑀧𑀝𑀺𑀕𑁆𑀕𑀳𑁂𑀦 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀥𑀫𑁆𑀫𑀤𑀸𑀦𑁂𑀦 𑀘𑀲𑁆𑀲 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀺𑀢𑀁 𑀓𑀼𑀲𑀮𑀁 𑀯𑀟𑁆𑀠𑁂𑀦𑁆𑀢𑁄 𑀦𑀯𑀳𑀺 𑀫𑀸𑀲𑁂𑀳𑀺 𑀘𑀸𑀭𑀺𑀓𑀁 𑀧𑀭𑀺𑀬𑁄𑀲𑀸𑀧𑁂𑀢𑀺.

𑀲𑀘𑁂 𑀧𑀦 𑀅𑀦𑁆𑀢𑁄𑀯𑀲𑁆𑀲𑁂 𑀪𑀺𑀓𑁆𑀔𑀽𑀦𑀁 𑀲𑀫𑀣𑀯𑀺𑀧𑀲𑁆𑀲𑀦𑀸 𑀢𑀭𑀼𑀡𑀸 𑀳𑁄𑀢𑀺, 𑀫𑀳𑀸𑀧𑀯𑀸𑀭𑀡𑀸𑀬 𑀅𑀧𑀯𑀸𑀭𑁂𑀢𑁆𑀯𑀸 𑀧𑀯𑀸𑀭𑀡𑀸𑀲𑀗𑁆𑀕𑀳𑀁 𑀤𑀢𑁆𑀯𑀸 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬 𑀧𑀯𑀸𑀭𑁂𑀢𑁆𑀯𑀸 𑀫𑀺𑀕𑀲𑀺𑀭𑀲𑁆𑀲 𑀧𑀞𑀫𑀤𑀺𑀯𑀲𑁂 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀚𑁆𑀛𑀺𑀫𑀫𑀡𑁆𑀟𑀮𑀁 𑀑𑀲𑀭𑀢𑀺. 𑀅𑀜𑁆𑀜𑁂𑀦𑀧𑀺 𑀓𑀸𑀭𑀡𑁂𑀦 𑀫𑀚𑁆𑀛𑀺𑀫𑀫𑀡𑁆𑀟𑀮𑁂 𑀘𑀸𑀭𑀺𑀓𑀁 𑀘𑀭𑀺𑀢𑀼𑀓𑀸𑀫𑁄 𑀘𑀢𑀼𑀫𑀸𑀲𑀁 𑀯𑀲𑀺𑀢𑁆𑀯𑀸𑀯 𑀦𑀺𑀓𑁆𑀔𑀫𑀢𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀇𑀢𑀭𑁂𑀲𑀼 𑀤𑁆𑀯𑀻𑀲𑀼 𑀫𑀡𑁆𑀟𑀮𑁂𑀲𑀼 𑀲𑀓𑁆𑀓𑀸𑀭𑁄 𑀫𑀚𑁆𑀛𑀺𑀫𑀫𑀡𑁆𑀟𑀮𑁂 𑀑𑀲𑀭𑀢𑀺. 𑀪𑀕𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀮𑁄𑀓𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀅𑀝𑁆𑀞𑀳𑀺 𑀫𑀸𑀲𑁂𑀳𑀺 𑀘𑀸𑀭𑀺𑀓𑀁 𑀧𑀭𑀺𑀬𑁄𑀲𑀸𑀧𑁂𑀢𑀺.

𑀲𑀘𑁂 𑀧𑀦 𑀘𑀢𑀼𑀫𑀸𑀲𑀁 𑀯𑀼𑀝𑁆𑀞𑀯𑀲𑁆𑀲𑀲𑁆𑀲𑀸𑀧𑀺 𑀪𑀕𑀯𑀢𑁄 𑀯𑁂𑀦𑁂𑀬𑁆𑀬𑀲𑀢𑁆𑀢𑀸 𑀅𑀧𑀭𑀺𑀧𑀓𑁆𑀓𑀺𑀦𑁆𑀤𑁆𑀭𑀺𑀬𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀁 𑀆𑀕𑀫𑀬𑀫𑀸𑀦𑁄 𑀅𑀧𑀭𑀫𑁆𑀧𑀺 𑀏𑀓𑀁 𑀫𑀸𑀲𑀁 𑀯𑀸 𑀤𑁆𑀯𑀺𑀢𑀺𑀘𑀢𑀼𑀫𑀸𑀲𑀁 𑀯𑀸 𑀢𑀢𑁆𑀣𑁂𑀯 𑀯𑀲𑀺𑀢𑁆𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀦𑀺𑀓𑁆𑀔𑀫𑀢𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀇𑀢𑀭𑁂𑀲𑀼 𑀤𑁆𑀯𑀻𑀲𑀼 𑀫𑀡𑁆𑀟𑀮𑁂𑀲𑀼 𑀲𑀓𑁆𑀓𑀸𑀭𑁄 𑀅𑀦𑁆𑀢𑁄𑀫𑀡𑁆𑀟𑀮𑁂 𑀑𑀲𑀭𑀢𑀺. 𑀪𑀕𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀮𑁄𑀓𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀲𑀢𑁆𑀢𑀳𑀺 𑀯𑀸 𑀙𑀳𑀺 𑀯𑀸 𑀧𑀜𑁆𑀘𑀳𑀺 𑀯𑀸 𑀘𑀢𑀽𑀳𑀺 𑀯𑀸 𑀫𑀸𑀲𑁂𑀳𑀺 𑀘𑀸𑀭𑀺𑀓𑀁 𑀧𑀭𑀺𑀬𑁄𑀲𑀸𑀧𑁂𑀢𑀺. 𑀇𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀫𑀡𑁆𑀟𑀮𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀦 𑀘𑀻𑀯𑀭𑀸𑀤𑀺𑀳𑁂𑀢𑀼 𑀘𑀭𑀢𑀺. 𑀅𑀣 𑀔𑁄 𑀬𑁂 𑀤𑀼𑀕𑁆𑀕𑀢𑀸 𑀩𑀸𑀮𑀸 𑀚𑀺𑀡𑁆𑀡𑀸 𑀩𑁆𑀬𑀸𑀥𑀺𑀢𑀸, 𑀢𑁂 𑀓𑀤𑀸 𑀢𑀣𑀸𑀕𑀢𑀁 𑀆𑀕𑀦𑁆𑀢𑁆𑀯𑀸 𑀧𑀲𑁆𑀲𑀺𑀲𑁆𑀲𑀦𑁆𑀢𑀺? 𑀫𑀬𑀺 𑀧𑀦 𑀘𑀸𑀭𑀺𑀓𑀁 𑀘𑀭𑀦𑁆𑀢𑁂 𑀫𑀳𑀸𑀚𑀦𑁄 𑀢𑀣𑀸𑀕𑀢𑀤𑀲𑁆𑀲𑀦𑀁 𑀮𑀪𑀺𑀲𑁆𑀲𑀢𑀺, 𑀢𑀢𑁆𑀣 𑀓𑁂𑀘𑀺 𑀘𑀺𑀢𑁆𑀢𑀸𑀦𑀺 𑀧𑀲𑀸𑀤𑁂𑀲𑁆𑀲𑀦𑁆𑀢𑀺, 𑀓𑁂𑀘𑀺 𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀲𑁆𑀲𑀦𑁆𑀢𑀺, 𑀓𑁂𑀘𑀺 𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀤𑀲𑁆𑀲𑀦𑁆𑀢𑀺, 𑀓𑁂𑀘𑀺 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀧𑀳𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀁 𑀢𑁂𑀲𑀁 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸𑀢𑀺 𑀏𑀯𑀁 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀘𑀸𑀭𑀺𑀓𑀁 𑀘𑀭𑀢𑀺.

𑀅𑀧𑀺𑀘 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺 𑁋 𑀚𑀗𑁆𑀖𑀸𑀯𑀺𑀳𑀸𑀭𑀯𑀲𑁂𑀦 𑀲𑀭𑀻𑀭𑀨𑀸𑀲𑀼𑀓𑀢𑁆𑀣𑀸𑀬, 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀓𑀸𑀮𑀁 𑀅𑀪𑀺𑀓𑀗𑁆𑀔𑀦𑀢𑁆𑀣𑀸𑀬, 𑀪𑀺𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑀦𑀢𑁆𑀣𑀸𑀬, 𑀢𑀢𑁆𑀣 𑀢𑀢𑁆𑀣 𑀧𑀭𑀺𑀧𑀸𑀓𑀕𑀢𑀺𑀦𑁆𑀤𑁆𑀭𑀺𑀬𑁂 𑀩𑁄𑀥𑀦𑁂𑀬𑁆𑀬𑀲𑀢𑁆𑀢𑁂 𑀩𑁄𑀥𑀦𑀢𑁆𑀣𑀸𑀬𑀸𑀢𑀺. 𑀅𑀧𑀭𑁂𑀳𑀺𑀧𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺 𑁋 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀘𑁆𑀙𑀺𑀲𑁆𑀲𑀦𑁆𑀢𑀻𑀢𑀺 𑀯𑀸, 𑀥𑀫𑁆𑀫𑀁 𑀲𑀭𑀡𑀁 𑀕𑀘𑁆𑀙𑀺𑀲𑁆𑀲𑀦𑁆𑀢𑀻𑀢𑀺 𑀯𑀸, 𑀲𑀗𑁆𑀖𑀁 𑀲𑀭𑀡𑀁 𑀕𑀘𑁆𑀙𑀺𑀲𑁆𑀲𑀦𑁆𑀢𑀻𑀢𑀺 𑀯𑀸, 𑀫𑀳𑀢𑀸 𑀥𑀫𑁆𑀫𑀯𑀲𑁆𑀲𑁂𑀦 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀲𑀦𑁆𑀢𑀧𑁆𑀧𑁂𑀲𑁆𑀲𑀸𑀫𑀻𑀢𑀺 𑀯𑀸𑀢𑀺. 𑀅𑀧𑀭𑁂𑀳𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺 𑁋 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀫𑀺𑀲𑁆𑀲𑀦𑁆𑀢𑀻𑀢𑀺 𑀯𑀸, 𑀅𑀤𑀺𑀦𑁆𑀦𑀸𑀤𑀸𑀦𑀸… 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸… 𑀫𑀼𑀲𑀸𑀯𑀸𑀤𑀸… 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀯𑀺𑀭𑀫𑀺𑀲𑁆𑀲𑀦𑁆𑀢𑀻𑀢𑀺 𑀯𑀸𑀢𑀺. 𑀅𑀧𑀭𑁂𑀳𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺 𑁋 𑀧𑀞𑀫𑀚𑁆𑀛𑀸𑀦𑀁 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀻𑀢𑀺 𑀯𑀸, 𑀤𑀼𑀢𑀺𑀬𑀁…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀧𑀝𑀺𑀮𑀪𑀺𑀲𑁆𑀲𑀦𑁆𑀢𑀻𑀢𑀺 𑀯𑀸𑀢𑀺. 𑀅𑀧𑀭𑁂𑀳𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺 𑁋 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀅𑀥𑀺𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑀯𑀸, 𑀲𑁄𑀢𑀸𑀧𑀢𑁆𑀢𑀺𑀨𑀮𑀁…𑀧𑁂… 𑀅𑀭𑀳𑀢𑁆𑀢𑀨𑀮𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀯𑀸𑀢𑀺. 𑀅𑀬𑀁 𑀅𑀢𑀼𑀭𑀺𑀢𑀘𑀸𑀭𑀺𑀓𑀸, 𑀲𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀲𑀸 𑀧𑀦𑁂𑀲𑀸 𑀤𑀼𑀯𑀺𑀥𑀸 𑀳𑁄𑀢𑀺 𑀦𑀺𑀩𑀤𑁆𑀥𑀘𑀸𑀭𑀺𑀓𑀸, 𑀅𑀦𑀺𑀩𑀤𑁆𑀥𑀘𑀸𑀭𑀺𑀓𑀸 𑀘. 𑀢𑀢𑁆𑀣 𑀬𑀁 𑀏𑀓𑀲𑁆𑀲𑁂𑀯 𑀩𑁄𑀥𑀦𑁂𑀬𑁆𑀬𑀲𑀢𑁆𑀢𑀲𑁆𑀲 𑀅𑀢𑁆𑀣𑀸𑀬 𑀕𑀘𑁆𑀙𑀢𑀺, 𑀅𑀬𑀁 𑀦𑀺𑀩𑀤𑁆𑀥𑀘𑀸𑀭𑀺𑀓𑀸 𑀦𑀸𑀫. 𑀬𑀁 𑀧𑀦 𑀕𑀸𑀫𑀦𑀺𑀕𑀫𑀦𑀕𑀭𑀧𑀝𑀺𑀧𑀸𑀝𑀺𑀯𑀲𑁂𑀦 𑀘𑀭𑀢𑀺, 𑀅𑀬𑀁 𑀅𑀦𑀺𑀩𑀤𑁆𑀥𑀘𑀸𑀭𑀺𑀓𑀸 𑀦𑀸𑀫. 𑀏𑀲𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸.

𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸𑀢𑀺 𑀲𑁂𑀦𑀸𑀲𑀦𑀁 𑀧𑀝𑀺𑀲𑀸𑀫𑁂𑀢𑁆𑀯𑀸. 𑀢𑀁 𑀧𑀦 𑀧𑀝𑀺𑀲𑀸𑀫𑁂𑀦𑁆𑀢𑁄 𑀣𑁂𑀭𑁄 𑀦 𑀘𑀽𑀴𑀧𑀢𑁆𑀢𑀫𑀳𑀸𑀧𑀢𑁆𑀢-𑀘𑀽𑀴𑀣𑀸𑀮𑀓𑀫𑀳𑀸𑀣𑀸𑀮𑀓-𑀧𑀝𑁆𑀝𑀼𑀡𑁆𑀡𑀘𑀻𑀯𑀭-𑀤𑀼𑀓𑀽𑀮𑀘𑀻𑀯𑀭𑀸𑀤𑀻𑀦𑀁 𑀪𑀡𑁆𑀟𑀺𑀓𑀁 𑀓𑀢𑁆𑀯𑀸 𑀲𑀧𑁆𑀧𑀺𑀢𑁂𑀮𑀸𑀤𑀻𑀦𑀁 𑀯𑀸 𑀧𑀦 𑀖𑀝𑁂 𑀧𑀽𑀭𑀸𑀧𑁂𑀢𑁆𑀯𑀸 𑀕𑀩𑁆𑀪𑁂 𑀦𑀺𑀤𑀳𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀓𑀼𑀜𑁆𑀘𑀺𑀓𑀫𑀼𑀤𑁆𑀤𑀺𑀓𑀸𑀤𑀻𑀦𑀺 𑀬𑁄𑀚𑀸𑀧𑁂𑀲𑀺. ‘‘𑀲𑀘𑁂 𑀦 𑀳𑁄𑀢𑀺 𑀪𑀺𑀓𑁆𑀔𑀼 𑀯𑀸 𑀲𑀸𑀫𑀡𑁂𑀭𑁄 𑀯𑀸 𑀆𑀭𑀸𑀫𑀺𑀓𑁄 𑀯𑀸 𑀉𑀧𑀸𑀲𑀓𑁄 𑀯𑀸, 𑀘𑀢𑀽𑀲𑀼 𑀧𑀸𑀲𑀸𑀡𑁂𑀲𑀼 𑀫𑀜𑁆𑀘𑁂 𑀫𑀜𑁆𑀘𑀁 𑀆𑀭𑁄𑀧𑁂𑀢𑁆𑀯𑀸 𑀧𑀻𑀞𑁂 𑀧𑀻𑀞𑀁 𑀆𑀭𑁄𑀧𑁂𑀢𑁆𑀯𑀸 𑀘𑀻𑀯𑀭𑀯𑀁𑀲𑁂 𑀯𑀸 𑀘𑀻𑀯𑀭𑀭𑀚𑁆𑀚𑀼𑀬𑀸 𑀯𑀸 𑀉𑀧𑀭𑀺 𑀧𑀼𑀜𑁆𑀚𑀁 𑀓𑀢𑁆𑀯𑀸 𑀤𑁆𑀯𑀸𑀭𑀯𑀸𑀢𑀧𑀸𑀦𑀁 𑀣𑀓𑁂𑀢𑁆𑀯𑀸 𑀧𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑁩𑁬𑁧) 𑀯𑀘𑀦𑀢𑁄 𑀧𑀦 𑀦𑁂𑀯𑀸𑀲𑀺𑀓𑀁 𑀪𑀺𑀓𑁆𑀔𑀼𑀁 𑀆𑀧𑀼𑀘𑁆𑀙𑀦𑀫𑀢𑁆𑀢𑀓𑁂𑀦𑁂𑀯 𑀧𑀝𑀺𑀲𑀸𑀫𑁂𑀲𑀺.

𑀬𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀻𑀢𑀺 𑀲𑀢𑁆𑀣𑀼 𑀤𑀲𑁆𑀲𑀦𑀓𑀸𑀫𑁄 𑀳𑀼𑀢𑁆𑀯𑀸 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦 𑀲𑀸𑀯𑀢𑁆𑀣𑀺 𑀢𑁂𑀦 𑀧𑀓𑁆𑀓𑀸𑀫𑀺. 𑀧𑀓𑁆𑀓𑀫𑀦𑁆𑀢𑁄 𑀘 𑀦 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀆𑀭𑁄𑀘𑀸𑀧𑁂𑀢𑁆𑀯𑀸 𑀲𑀧𑁆𑀧𑀺𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀧𑀓𑁆𑀓𑀦𑁆𑀢𑁄. 𑀬𑀽𑀣𑀁 𑀧𑀳𑀸𑀬 𑀦𑀺𑀓𑁆𑀔𑀦𑁆𑀢𑁄 𑀧𑀦 𑀫𑀢𑁆𑀢𑀳𑀢𑁆𑀣𑀻 𑀯𑀺𑀬, 𑀅𑀲𑀳𑀸𑀬𑀓𑀺𑀘𑁆𑀘𑁄 𑀲𑀻𑀳𑁄 𑀯𑀺𑀬, 𑀧𑀢𑁆𑀢𑀘𑀻𑀯𑀭𑀫𑀢𑁆𑀢𑀁 𑀆𑀤𑀸𑀬 𑀏𑀓𑀓𑁄𑀯 𑀧𑀓𑁆𑀓𑀸𑀫𑀺. 𑀓𑀲𑁆𑀫𑀸 𑀧𑀦𑁂𑀲 𑀧𑀜𑁆𑀘𑀲𑀢𑁂𑀳𑀺 𑀅𑀢𑁆𑀢𑀦𑁄 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀲𑀤𑁆𑀥𑀺𑀁 𑀭𑀸𑀚𑀕𑀳𑀁 𑀅𑀕𑀦𑁆𑀢𑁆𑀯𑀸 𑀇𑀤𑀸𑀦𑀺 𑀦𑀺𑀓𑁆𑀔𑀦𑁆𑀢𑁄𑀢𑀺? 𑀭𑀸𑀚𑀕𑀳𑀁 𑀓𑀧𑀺𑀮𑀯𑀢𑁆𑀣𑀼𑀢𑁄 𑀤𑀽𑀭𑀁 𑀲𑀝𑁆𑀞𑀺𑀬𑁄𑀚𑀦𑀸𑀦𑀺, 𑀲𑀸𑀯𑀢𑁆𑀣𑀺 𑀧𑀦 𑀧𑀜𑁆𑀘𑀤𑀲. 𑀲𑀢𑁆𑀣𑀸 𑀭𑀸𑀚𑀕𑀳𑀢𑁄 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀁 𑀆𑀕𑀦𑁆𑀢𑁆𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺, 𑀇𑀤𑀸𑀦𑀺 𑀆𑀲𑀦𑁆𑀦𑁄 𑀚𑀸𑀢𑁄𑀢𑀺 𑀲𑀼𑀢𑁆𑀯𑀸 𑀦𑀺𑀓𑁆𑀔𑀫𑀻𑀢𑀺 𑀅𑀓𑀸𑀭𑀡𑀫𑁂𑀢𑀁. 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑁄 𑀳𑀺 𑀏𑀲 𑀬𑁄𑀚𑀦𑀲𑀳𑀲𑁆𑀲𑀫𑁆𑀧𑀺 𑀕𑀘𑁆𑀙𑁂𑀬𑁆𑀬, 𑀢𑀤𑀸 𑀧𑀦 𑀓𑀸𑀬𑀯𑀺𑀯𑁂𑀓𑁄 𑀦 𑀲𑀓𑁆𑀓𑀸 𑀮𑀤𑁆𑀥𑀼𑀦𑁆𑀢𑀺. 𑀩𑀳𑀽𑀳𑀺 𑀲𑀤𑁆𑀥𑀺𑀁 𑀕𑀫𑀦𑀓𑀸𑀮𑁂 𑀳𑀺 𑀏𑀓𑀲𑁆𑀫𑀺𑀁 𑀕𑀘𑁆𑀙𑀸𑀫𑀸𑀢𑀺 𑀯𑀤𑀦𑁆𑀢𑁂 𑀏𑀓𑁄 𑀇𑀥𑁂𑀯 𑀯𑀲𑀸𑀫𑀸𑀢𑀺 𑀯𑀤𑀢𑀺. 𑀏𑀓𑀲𑁆𑀫𑀺𑀁 𑀯𑀲𑀸𑀫𑀸𑀢𑀺 𑀯𑀤𑀦𑁆𑀢𑁂 𑀏𑀓𑁄 𑀕𑀘𑁆𑀙𑀸𑀫𑀸𑀢𑀺 𑀯𑀤𑀢𑀺. 𑀢𑀲𑁆𑀫𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀯𑀸 𑀨𑀸𑀲𑀼𑀓𑀲𑁂𑀦𑀸𑀲𑀦𑁂 𑀓𑀸𑀬𑀯𑀺𑀯𑁂𑀓𑀁 𑀮𑀤𑁆𑀥𑀼𑀁 𑀯𑀸 𑀦 𑀲𑀓𑁆𑀓𑀸 𑀳𑁄𑀢𑀺, 𑀏𑀓𑀓𑀲𑁆𑀲 𑀧𑀦 𑀢𑀁 𑀲𑀩𑁆𑀩𑀁 𑀲𑀼𑀮𑀪𑀁 𑀳𑁄𑀢𑀻𑀢𑀺 𑀢𑀤𑀸 𑀅𑀕𑀦𑁆𑀢𑁆𑀯𑀸 𑀇𑀤𑀸𑀦𑀺 𑀧𑀓𑁆𑀓𑀸𑀫𑀺.

𑀘𑀸𑀭𑀺𑀓𑀁 𑀘𑀭𑀫𑀸𑀦𑁄𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀬𑀁 𑀘𑀸𑀭𑀺𑀓𑀸 𑀦𑀸𑀫 𑀫𑀳𑀸𑀚𑀦𑀲𑀗𑁆𑀕𑀳𑀢𑁆𑀣𑀁 𑀩𑀼𑀤𑁆𑀥𑀸𑀦𑀁𑀬𑁂𑀯 𑀮𑀩𑁆𑀪𑀢𑀺, 𑀩𑀼𑀤𑁆𑀥𑁂 𑀉𑀧𑀸𑀤𑀸𑀬 𑀧𑀦 𑀭𑀼𑀴𑁆𑀳𑀻𑀲𑀤𑁆𑀤𑁂𑀦 𑀲𑀸𑀯𑀓𑀸𑀦𑀫𑁆𑀧𑀺 𑀯𑀼𑀘𑁆𑀘𑀢𑀺 𑀓𑀺𑀮𑀜𑁆𑀚𑀸𑀤𑀻𑀳𑀺 𑀓𑀢𑀁 𑀩𑀻𑀚𑀦𑀫𑁆𑀧𑀺 𑀢𑀸𑀮𑀯𑀡𑁆𑀝𑀁 𑀯𑀺𑀬. 𑀬𑁂𑀦 𑀪𑀕𑀯𑀸𑀢𑀺 𑀲𑀸𑀯𑀢𑁆𑀣𑀺𑀬𑀸 𑀅𑀯𑀺𑀤𑀽𑀭𑁂 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀚𑁂𑀢𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀯𑀸 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀫𑀓𑁆𑀔𑁂𑀢𑁆𑀯𑀸 𑀧𑀸𑀦𑀻𑀬𑀁 𑀯𑀸 𑀧𑀸𑀦𑀓𑀁 𑀯𑀸 𑀧𑀺𑀯𑀺𑀢𑁆𑀯𑀸 𑀣𑁄𑀓𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺 𑀘𑀺𑀢𑁆𑀢𑀫𑁆𑀧𑀺 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀉𑀚𑀼𑀓𑀁 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑀫𑁂𑀯 𑀅𑀕𑀫𑀸𑀲𑀺. 𑀣𑁂𑀭𑀲𑁆𑀲 𑀳𑀺 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀓𑀸𑀫𑀲𑁆𑀲 𑀅𑀜𑁆𑀜𑁂𑀦 𑀪𑀺𑀓𑁆𑀔𑀼𑀦𑀸 𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀢𑀲𑁆𑀫𑀸 𑀭𑀸𑀳𑀼𑀮𑀁 𑀯𑀸 𑀆𑀦𑀦𑁆𑀤𑀁 𑀯𑀸 𑀕𑀳𑁂𑀢𑁆𑀯𑀸 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺 𑀏𑀯𑀫𑁆𑀧𑀺 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀸𑀤𑁂𑀲𑀺.

𑀣𑁂𑀭𑁄 𑀳𑀺 𑀲𑀬𑀫𑁂𑀯 𑀩𑀼𑀤𑁆𑀥𑀲𑀸𑀲𑀦𑁂 𑀯𑀮𑁆𑀮𑀪𑁄 𑀭𑀜𑁆𑀜𑁄 𑀲𑀗𑁆𑀕𑀸𑀫𑀯𑀺𑀚𑀬𑀫𑀳𑀸𑀬𑁄𑀥𑁄 𑀯𑀺𑀬. 𑀬𑀣𑀸 𑀳𑀺 𑀢𑀸𑀤𑀺𑀲𑀲𑁆𑀲 𑀬𑁄𑀥𑀲𑁆𑀲 𑀭𑀸𑀚𑀸𑀦𑀁 𑀤𑀝𑁆𑀞𑀼𑀓𑀸𑀫𑀲𑁆𑀲 𑀅𑀜𑁆𑀜𑀁 𑀲𑁂𑀯𑀺𑀢𑁆𑀯𑀸 𑀤𑀲𑁆𑀲𑀦𑀓𑀫𑁆𑀫𑀁 𑀦𑀸𑀫 𑀦𑀢𑁆𑀣𑀺; 𑀯𑀮𑁆𑀮𑀪𑀢𑀸𑀬 𑀲𑀬𑀫𑁂𑀯 𑀧𑀲𑁆𑀲𑀢𑀺. 𑀏𑀯𑀁 𑀣𑁂𑀭𑁄𑀧𑀺 𑀩𑀼𑀤𑁆𑀥𑀲𑀸𑀲𑀦𑁂 𑀯𑀮𑁆𑀮𑀪𑁄, 𑀢𑀲𑁆𑀲 𑀅𑀜𑁆𑀜𑀁 𑀲𑁂𑀯𑀺𑀢𑁆𑀯𑀸 𑀲𑀢𑁆𑀣𑀼𑀤𑀲𑁆𑀲𑀦𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀧𑀸𑀤𑀧𑀼𑀜𑁆𑀙𑀦𑀫𑁆𑀳𑀺 𑀧𑀼𑀜𑁆𑀙𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀪𑀕𑀯𑀸𑀧𑀺 ‘‘𑀧𑀘𑁆𑀘𑀽𑀲𑀓𑀸𑀮𑁂𑀬𑁂𑀯 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀅𑀤𑁆𑀤𑀲. 𑀢𑀲𑁆𑀫𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀲𑀽𑀘𑀺𑀖𑀝𑀺𑀓𑀁 𑀅𑀤𑀢𑁆𑀯𑀸𑀯 𑀤𑀭𑀣𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑁆𑀯𑀸 𑀉𑀝𑁆𑀞𑀸𑀬 𑀦𑀺𑀲𑀻𑀤𑀺. 𑀣𑁂𑀭𑁄 𑀓𑀯𑀸𑀝𑀁 𑀧𑀡𑀸𑀫𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀥𑀫𑁆𑀫𑀺𑀬𑀸 𑀓𑀣𑀸𑀬𑀸𑀢𑀺 𑀪𑀕𑀯𑀸 𑀥𑀫𑁆𑀫𑀺𑀁 𑀓𑀣𑀁 𑀓𑀣𑁂𑀦𑁆𑀢𑁄 𑀘𑀽𑀴𑀕𑁄𑀲𑀺𑀗𑁆𑀕𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁩𑁨𑁫 𑀆𑀤𑀬𑁄) 𑀢𑀺𑀡𑁆𑀡𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀲𑀸𑀫𑀕𑁆𑀕𑀺𑀭𑀲𑀸𑀦𑀺𑀲𑀁𑀲𑀁 𑀓𑀣𑁂𑀲𑀺; 𑀲𑁂𑀓𑁆𑀔𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁨𑁨 𑀆𑀤𑀬𑁄) 𑀆𑀯𑀲𑀣𑀸𑀦𑀺𑀲𑀁𑀲𑀁, 𑀖𑀝𑀺𑀓𑀸𑀭𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁨𑁮𑁨 𑀆𑀤𑀬𑁄) 𑀲𑀢𑀺𑀧𑀝𑀺𑀮𑀸𑀪𑀺𑀓𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀓𑀣𑀁; 𑀭𑀝𑁆𑀞𑀧𑀸𑀮𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁩𑁦𑁪) 𑀘𑀢𑁆𑀢𑀸𑀭𑁄 𑀥𑀫𑁆𑀫𑀼𑀤𑁆𑀤𑁂𑀲𑁂, 𑀲𑁂𑀮𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁩𑁯𑁬 𑀆𑀤𑀬𑁄) 𑀧𑀸𑀦𑀓𑀸𑀦𑀺𑀲𑀁𑀲𑀓𑀣𑀁, 𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁨𑁩𑁬 𑀆𑀤𑀬𑁄) 𑀪𑀕𑀼𑀢𑁆𑀣𑁂𑀭𑀲𑁆𑀲 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑁄 𑀏𑀓𑀻𑀪𑀸𑀯𑁂 𑀆𑀦𑀺𑀲𑀁𑀲𑀁 𑀓𑀣𑁂𑀲𑀺. 𑀇𑀫𑀲𑁆𑀫𑀺𑀁 𑀧𑀦 𑀭𑀣𑀯𑀺𑀦𑀻𑀢𑁂 𑀆𑀬𑀲𑁆𑀫𑀢𑁄 𑀧𑀼𑀡𑁆𑀡𑀲𑁆𑀲 𑀓𑀣𑁂𑀦𑁆𑀢𑁄 𑀤𑀲𑀓𑀣𑀸𑀯𑀢𑁆𑀣𑀼𑀦𑀺𑀲𑁆𑀲𑀬𑀁 𑀅𑀦𑀦𑁆𑀢𑀦𑀬𑀁 𑀦𑀸𑀫 𑀤𑀲𑁆𑀲𑁂𑀲𑀺 𑀧𑀼𑀡𑁆𑀡, 𑀅𑀬𑀫𑁆𑀧𑀺 𑀅𑀧𑁆𑀧𑀺𑀘𑁆𑀙𑀓𑀣𑀸𑀬𑁂𑀯 𑀲𑀦𑁆𑀢𑁄𑀲𑀓𑀣𑀸𑀬𑁂𑀯𑀸𑀢𑀺. 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑀲𑁆𑀲 𑀲𑀸𑀯𑀓𑀲𑁆𑀲 𑀯𑁂𑀮𑀦𑁆𑀢𑁂 𑀞𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑁂 𑀳𑀢𑁆𑀣𑀧𑁆𑀧𑀲𑀸𑀭𑀡𑀁 𑀯𑀺𑀬 𑀅𑀳𑁄𑀲𑀺.

𑀬𑁂𑀦 𑀅𑀦𑁆𑀥𑀯𑀦𑀦𑁆𑀢𑀺 𑀢𑀤𑀸 𑀓𑀺𑀭 𑀧𑀘𑁆𑀙𑀸𑀪𑀢𑁆𑀢𑁂 𑀚𑁂𑀢𑀯𑀦𑀁 𑀆𑀓𑀺𑀡𑁆𑀡𑀁 𑀳𑁄𑀢𑀺, 𑀩𑀳𑀽 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀚𑁂𑀢𑀯𑀦𑀁 𑀑𑀲𑀭𑀦𑁆𑀢𑀺; 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀔𑀦𑁆𑀥𑀸𑀯𑀸𑀭𑀝𑁆𑀞𑀸𑀦𑀁 𑀯𑀺𑀬 𑀳𑁄𑀢𑀺, 𑀦 𑀲𑀓𑁆𑀓𑀸 𑀧𑀯𑀺𑀯𑁂𑀓𑀁 𑀮𑀪𑀺𑀢𑀼𑀁. 𑀅𑀦𑁆𑀥𑀯𑀦𑀁 𑀧𑀦 𑀧𑀥𑀸𑀦𑀖𑀭𑀲𑀤𑀺𑀲𑀁 𑀧𑀯𑀺𑀯𑀺𑀢𑁆𑀢𑀁, 𑀢𑀲𑁆𑀫𑀸 𑀬𑁂𑀦𑀦𑁆𑀥𑀯𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀓𑀲𑁆𑀫𑀸 𑀧𑀦 𑀫𑀳𑀸𑀣𑁂𑀭𑁂 𑀦 𑀅𑀤𑁆𑀤𑀲? 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀲𑀸𑀬𑀦𑁆𑀳𑀲𑀫𑀬𑁂 𑀆𑀕𑀦𑁆𑀢𑁆𑀯𑀸 𑀫𑀳𑀸𑀣𑁂𑀭𑁂 𑀤𑀺𑀲𑁆𑀯𑀸 𑀧𑀼𑀦 𑀤𑀲𑀩𑀮𑀁 𑀧𑀲𑁆𑀲𑀺𑀲𑁆𑀲𑀸𑀫𑀺, 𑀏𑀯𑀁 𑀫𑀳𑀸𑀣𑁂𑀭𑀸𑀦𑀁 𑀏𑀓𑀁 𑀉𑀧𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀲𑀢𑁆𑀣𑀼 𑀤𑁆𑀯𑁂 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀢𑁄 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀫𑀫 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀫𑀺𑀲𑁆𑀲𑀸𑀫𑀻’’𑀢𑀺.

𑀲𑀢𑁆𑀢𑀯𑀺𑀲𑀼𑀤𑁆𑀥𑀺𑀧𑀜𑁆𑀳𑀯𑀡𑁆𑀡𑀦𑀸

𑁨𑁫𑁬. 𑀅𑀪𑀺𑀡𑁆𑀳𑀁 𑀓𑀺𑀢𑁆𑀢𑀬𑀫𑀸𑀦𑁄 𑀅𑀳𑁄𑀲𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀯𑀡𑁆𑀡𑀁 𑀓𑀺𑀢𑁆𑀢𑀬𑀫𑀸𑀦𑁄 𑀯𑀺𑀳𑀸𑀲𑀺. 𑀣𑁂𑀭𑁄 𑀓𑀺𑀭 𑀢𑀢𑁄 𑀧𑀝𑁆𑀞𑀸𑀬 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀗𑁆𑀖𑀫𑀚𑁆𑀛𑁂 ‘‘𑀧𑀼𑀡𑁆𑀡𑁄 𑀓𑀺𑀭 𑀦𑀸𑀫 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄 𑀘𑀢𑀽𑀳𑀺 𑀧𑀭𑀺𑀲𑀸𑀳𑀺 𑀲𑀤𑁆𑀥𑀺𑀁 𑀅𑀲𑀁𑀲𑀝𑁆𑀞𑁄, 𑀲𑁄 𑀤𑀲𑀩𑀮𑀲𑁆𑀲 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀫𑀺𑀲𑁆𑀲𑀢𑀺; 𑀓𑀘𑁆𑀘𑀺 𑀦𑀼 𑀔𑁄 𑀫𑀁 𑀅𑀤𑀺𑀲𑁆𑀯𑀸𑀯 𑀕𑀫𑀺𑀲𑁆𑀲𑀢𑀻’’𑀢𑀺 𑀣𑁂𑀭𑀦𑀯𑀫𑀚𑁆𑀛𑀺𑀫𑀸𑀦𑀁 𑀲𑀢𑀺𑀓𑀭𑀡𑀢𑁆𑀣𑀁 𑀆𑀬𑀲𑁆𑀫𑀢𑁄 𑀧𑀼𑀡𑁆𑀡𑀲𑁆𑀲 𑀕𑀼𑀡𑀁 𑀪𑀸𑀲𑀢𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀫𑀳𑀮𑁆𑀮𑀓𑀪𑀺𑀓𑁆𑀔𑀽 𑀦𑀸𑀫 𑀦 𑀲𑀩𑁆𑀩𑀓𑀸𑀮𑀁 𑀅𑀦𑁆𑀢𑁄𑀯𑀺𑀳𑀸𑀭𑁂 𑀳𑁄𑀦𑁆𑀢𑀺; 𑀕𑀼𑀡𑀓𑀣𑀸𑀬 𑀧𑀦𑀲𑁆𑀲 𑀓𑀣𑀺𑀢𑀸𑀬 𑀬𑁄 𑀘 𑀦𑀁 𑀪𑀺𑀓𑁆𑀔𑀼𑀁 𑀧𑀲𑁆𑀲𑀺𑀲𑁆𑀲𑀢𑀺; 𑀲𑁄 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀲𑁆𑀲𑀢𑀻’’𑀢𑀺. 𑀅𑀣𑀸𑀬𑀁 𑀣𑁂𑀭𑀲𑁆𑀲𑁂𑀯 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀢𑀁 𑀆𑀬𑀲𑁆𑀫𑀦𑁆𑀢𑀁 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀁 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀦𑁆𑀢𑀁 𑀅𑀤𑁆𑀤𑀲. 𑀓𑀣𑀁 𑀧𑀦 𑀦𑀁 𑀏𑀲 𑀅𑀜𑁆𑀜𑀸𑀲𑀻𑀢𑀺? 𑀧𑀼𑀡𑁆𑀡, 𑀧𑀼𑀡𑁆𑀡𑀸𑀢𑀺 𑀯𑀢𑁆𑀯𑀸 𑀓𑀣𑁂𑀦𑁆𑀢𑀲𑁆𑀲 𑀪𑀕𑀯𑀢𑁄 𑀥𑀫𑁆𑀫𑀓𑀣𑀸𑀬 𑀅𑀜𑁆𑀜𑀸𑀲𑀺 𑁋 ‘‘𑀅𑀬𑀁 𑀲𑁄 𑀣𑁂𑀭𑁄, 𑀬𑀲𑁆𑀲 𑀫𑁂 𑀉𑀧𑀚𑁆𑀛𑀸𑀬𑁄 𑀅𑀪𑀺𑀡𑁆𑀳𑀁 𑀓𑀺𑀢𑁆𑀢𑀬𑀫𑀸𑀦𑁄 𑀳𑁄𑀢𑀻’’𑀢𑀺. 𑀇𑀢𑀺 𑀲𑁄 𑀆𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀆𑀭𑁄𑀘𑁂𑀲𑀺. 𑀦𑀺𑀲𑀻𑀤𑀦𑀁 𑀆𑀤𑀸𑀬𑀸𑀢𑀺 𑀦𑀺𑀲𑀻𑀤𑀦𑀁 𑀦𑀸𑀫 𑀲𑀤𑀲𑀁 𑀯𑀼𑀘𑁆𑀘𑀢𑀺 𑀅𑀯𑀸𑀬𑀺𑀫𑀁. 𑀣𑁂𑀭𑁄 𑀧𑀦 𑀘𑀫𑁆𑀫𑀔𑀡𑁆𑀟𑀁 𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄𑀢𑀺 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄. 𑀲𑀻𑀲𑀸𑀦𑀼𑀮𑁄𑀓𑀻𑀢𑀺 𑀬𑁄 𑀉𑀦𑁆𑀦𑀢𑀝𑁆𑀞𑀸𑀦𑁂 𑀧𑀺𑀝𑁆𑀞𑀺𑀁 𑀧𑀲𑁆𑀲𑀦𑁆𑀢𑁄 𑀦𑀺𑀦𑁆𑀦𑀝𑁆𑀞𑀸𑀦𑁂 𑀲𑀻𑀲𑀁 𑀧𑀲𑁆𑀲𑀦𑁆𑀢𑁄 𑀕𑀘𑁆𑀙𑀢𑀺, 𑀅𑀬𑀫𑁆𑀧𑀺 𑀲𑀻𑀲𑀸𑀦𑀼𑀮𑁄𑀓𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀸𑀤𑀺𑀲𑁄 𑀳𑀼𑀢𑁆𑀯𑀸 𑀅𑀦𑀼𑀩𑀦𑁆𑀥𑀺. 𑀣𑁂𑀭𑁄 𑀳𑀺 𑀓𑀺𑀜𑁆𑀘𑀸𑀧𑀺 𑀲𑀁𑀬𑀢𑀧𑀤𑀲𑀤𑁆𑀤𑀢𑀸𑀬 𑀅𑀘𑁆𑀘𑀸𑀲𑀦𑁆𑀦𑁄 𑀳𑀼𑀢𑁆𑀯𑀸 𑀕𑀘𑁆𑀙𑀦𑁆𑀢𑁄𑀧𑀺 𑀧𑀤𑀲𑀤𑁆𑀤𑁂𑀦 𑀦 𑀩𑀸𑀥𑀢𑀺, ‘‘𑀦𑀸𑀬𑀁 𑀲𑀫𑁆𑀫𑁄𑀤𑀦𑀓𑀸𑀮𑁄’’𑀢𑀺 𑀜𑀢𑁆𑀯𑀸 𑀧𑀦 𑀦 𑀅𑀘𑁆𑀘𑀸𑀲𑀦𑁆𑀦𑁄, 𑀅𑀦𑁆𑀥𑀯𑀦𑀁 𑀦𑀸𑀫 𑀫𑀳𑀦𑁆𑀢𑀁, 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀦𑀺𑀮𑀻𑀦𑀁 𑀅𑀧𑀲𑁆𑀲𑀦𑁆𑀢𑁂𑀦, 𑀆𑀯𑀼𑀲𑁄 𑀧𑀼𑀡𑁆𑀡, 𑀧𑀼𑀡𑁆𑀡𑀸𑀢𑀺 𑀅𑀨𑀸𑀲𑀼𑀓𑀲𑀤𑁆𑀤𑁄 𑀓𑀸𑀢𑀩𑁆𑀩𑁄 𑀳𑁄𑀢𑀻𑀢𑀺 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀚𑀸𑀦𑀦𑀢𑁆𑀣𑀁 𑀦𑀸𑀢𑀺𑀤𑀽𑀭𑁂 𑀳𑀼𑀢𑁆𑀯𑀸 𑀲𑀻𑀲𑀸𑀦𑀼𑀮𑁄𑀓𑀻 𑀅𑀕𑀫𑀸𑀲𑀺. 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀻𑀢𑀺 𑀤𑀺𑀯𑀸𑀯𑀺𑀳𑀸𑀭𑀢𑁆𑀣𑀸𑀬 𑀦𑀺𑀲𑀻𑀤𑀺.

𑀢𑀢𑁆𑀣 𑀆𑀬𑀲𑁆𑀫𑀸𑀧𑀺 𑀧𑀼𑀡𑁆𑀡𑁄 𑀉𑀤𑀺𑀘𑁆𑀘𑀩𑁆𑀭𑀸𑀳𑁆𑀫𑀡𑀚𑀘𑁆𑀘𑁄, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺. 𑀧𑀼𑀡𑁆𑀡𑀢𑁆𑀣𑁂𑀭𑁄𑀧𑀺 𑀲𑀼𑀯𑀡𑁆𑀡𑀯𑀡𑁆𑀡𑁄, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺. 𑀧𑀼𑀡𑁆𑀡𑀢𑁆𑀣𑁂𑀭𑁄𑀧𑀺 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀦𑁆𑀦𑁄, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺. 𑀧𑀼𑀡𑁆𑀡𑀢𑁆𑀣𑁂𑀭𑁄𑀧𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑁄, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀁 𑀏𑀓𑀫𑀲𑀗𑁆𑀔𑁆𑀬𑁂𑀬𑁆𑀬𑀁. 𑀧𑀼𑀡𑁆𑀡𑀢𑁆𑀣𑁂𑀭𑁄𑀧𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄 𑀫𑀳𑀸𑀔𑀻𑀡𑀸𑀲𑀯𑁄, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺. 𑀇𑀢𑀺 𑀏𑀓𑀁 𑀓𑀦𑀓𑀕𑀼𑀳𑀁 𑀧𑀯𑀺𑀝𑁆𑀞𑀸 𑀤𑁆𑀯𑁂 𑀲𑀻𑀳𑀸 𑀯𑀺𑀬, 𑀏𑀓𑀁 𑀯𑀺𑀚𑀫𑁆𑀪𑀦𑀪𑀽𑀫𑀺𑀁 𑀑𑀢𑀺𑀡𑁆𑀡𑀸 𑀤𑁆𑀯𑁂 𑀩𑁆𑀬𑀕𑁆𑀖𑀸 𑀯𑀺𑀬, 𑀏𑀓𑀁 𑀲𑀼𑀧𑀼𑀧𑁆𑀨𑀺𑀢𑀲𑀸𑀮𑀯𑀦𑀁 𑀧𑀯𑀺𑀝𑁆𑀞𑀸 𑀤𑁆𑀯𑁂 𑀙𑀤𑁆𑀤𑀦𑁆𑀢𑀦𑀸𑀕𑀭𑀸𑀚𑀸𑀦𑁄 𑀯𑀺𑀬, 𑀏𑀓𑀁 𑀲𑀺𑀫𑁆𑀩𑀮𑀺𑀯𑀦𑀁 𑀧𑀯𑀺𑀝𑁆𑀞𑀸 𑀤𑁆𑀯𑁂 𑀲𑀼𑀧𑀡𑁆𑀡𑀭𑀸𑀚𑀸𑀦𑁄 𑀯𑀺𑀬, 𑀏𑀓𑀁 𑀦𑀭𑀯𑀸𑀳𑀦𑀬𑀸𑀦𑀁 𑀅𑀪𑀺𑀭𑀼𑀴𑁆𑀳𑀸 𑀤𑁆𑀯𑁂 𑀯𑁂𑀲𑁆𑀲𑀯𑀡𑀸 𑀯𑀺𑀬, 𑀏𑀓𑀁 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀁 𑀅𑀪𑀺𑀦𑀺𑀲𑀺𑀦𑁆𑀦𑀸 𑀤𑁆𑀯𑁂 𑀲𑀓𑁆𑀓𑀸 𑀯𑀺𑀬, 𑀏𑀓𑀯𑀺𑀫𑀸𑀦𑀩𑁆𑀪𑀦𑁆𑀢𑀭𑀕𑀢𑀸 𑀤𑁆𑀯𑁂 𑀳𑀸𑀭𑀺𑀢𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀯𑀺𑀬 𑀘 𑀢𑁂 𑀤𑁆𑀯𑁂𑀧𑀺 𑀩𑁆𑀭𑀸𑀳𑁆𑀫𑀡𑀚𑀘𑁆𑀘𑀸 𑀤𑁆𑀯𑁂𑀧𑀺 𑀲𑀼𑀯𑀡𑁆𑀡𑀯𑀡𑁆𑀡𑀸 𑀤𑁆𑀯𑁂𑀧𑀺 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀤𑁆𑀯𑁂𑀧𑀺 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑀸 𑀤𑁆𑀯𑁂𑀧𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑀸 𑀫𑀳𑀸𑀔𑀻𑀡𑀸𑀲𑀯𑀸 𑀏𑀓𑀁 𑀯𑀦𑀲𑀡𑁆𑀟𑀁 𑀅𑀦𑀼𑀧𑀯𑀺𑀝𑁆𑀞𑀸 𑀢𑀁 𑀯𑀦𑀝𑁆𑀞𑀸𑀦𑀁 𑀲𑁄𑀪𑀬𑀺𑀁𑀲𑀼.

𑀪𑀕𑀯𑀢𑀺 𑀦𑁄, 𑀆𑀯𑀼𑀲𑁄, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻𑀢𑀺, 𑀆𑀯𑀼𑀲𑁄, 𑀓𑀺𑀁 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀆𑀬𑀲𑁆𑀫𑀢𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻𑀢𑀺? 𑀇𑀤𑀁 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑀲𑁆𑀲 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀚𑀸𑀦𑀦𑁆𑀢𑁄𑀧𑀺 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀧𑀼𑀘𑁆𑀙𑀺. 𑀧𑀼𑀭𑀺𑀫𑀓𑀣𑀸𑀬 𑀳𑀺 𑀅𑀧𑁆𑀧𑀢𑀺𑀝𑁆𑀞𑀺𑀢𑀸𑀬 𑀧𑀘𑁆𑀙𑀺𑀫𑀓𑀣𑀸 𑀦 𑀚𑀸𑀬𑀢𑀺, 𑀢𑀲𑁆𑀫𑀸 𑀏𑀯𑀁 𑀧𑀼𑀘𑁆𑀙𑀺. 𑀣𑁂𑀭𑁄 𑀅𑀦𑀼𑀚𑀸𑀦𑀦𑁆𑀢𑁄 ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀆𑀳. 𑀅𑀣𑀲𑁆𑀲 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀁 𑀲𑁄𑀢𑀼𑀓𑀸𑀫𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 ‘‘𑀓𑀺𑀁 𑀦𑀼 𑀔𑁄 𑀆𑀯𑀼𑀲𑁄 𑀲𑀻𑀮𑀯𑀺𑀲𑀼𑀤𑁆𑀥𑀢𑁆𑀣𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀯𑀺𑀲𑀼𑀤𑁆𑀥𑀺𑀬𑁄 𑀧𑀼𑀘𑁆𑀙𑀺. 𑀢𑀸𑀲𑀁 𑀯𑀺𑀢𑁆𑀣𑀸𑀭𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀸. 𑀆𑀬𑀲𑁆𑀫𑀸 𑀧𑀦 𑀧𑀼𑀡𑁆𑀡𑁄 𑀬𑀲𑁆𑀫𑀸 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀤𑀻𑀲𑀼 𑀞𑀺𑀢𑀲𑁆𑀲𑀸𑀧𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀫𑀢𑁆𑀣𑀓𑀁 𑀦 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀸, ‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’𑀢𑀺 𑀲𑀩𑁆𑀩𑀁 𑀧𑀝𑀺𑀓𑁆𑀔𑀺𑀧𑀺.

𑀓𑀺𑀫𑀢𑁆𑀣𑀁 𑀘𑀭𑀳𑀸𑀯𑀼𑀲𑁄𑀢𑀺 𑀬𑀤𑀺 𑀲𑀻𑀮𑀯𑀺𑀲𑀼𑀤𑁆𑀥𑀺𑀆𑀤𑀻𑀦𑀁 𑀅𑀢𑁆𑀣𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦 𑀯𑀼𑀲𑁆𑀲𑀢𑀺, 𑀅𑀣 𑀓𑀺𑀫𑀢𑁆𑀣𑀁 𑀯𑀼𑀲𑁆𑀲𑀢𑀻𑀢𑀺 𑀧𑀼𑀘𑁆𑀙𑀺. 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀁 𑀔𑁄, 𑀆𑀯𑀼𑀲𑁄𑀢𑀺 𑀏𑀢𑁆𑀣 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀦𑀸𑀫 𑀅𑀧𑁆𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀁. 𑀤𑁆𑀯𑁂𑀥𑀸 𑀉𑀧𑀸𑀤𑀸𑀦𑀸𑀦𑀺 𑀕𑀳𑀡𑀽𑀧𑀸𑀤𑀸𑀦𑀜𑁆𑀘 𑀧𑀘𑁆𑀘𑀬𑀽𑀧𑀸𑀤𑀸𑀦𑀜𑁆𑀘. 𑀕𑀳𑀡𑀽𑀧𑀸𑀤𑀸𑀦𑀁 𑀦𑀸𑀫 𑀓𑀸𑀫𑀼𑀧𑀸𑀤𑀸𑀦𑀸𑀤𑀺𑀓𑀁 𑀘𑀢𑀼𑀩𑁆𑀩𑀺𑀥𑀁, 𑀧𑀘𑁆𑀘𑀬𑀽𑀧𑀸𑀤𑀸𑀦𑀁 𑀦𑀸𑀫 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀏𑀯𑀁 𑀯𑀼𑀢𑁆𑀢𑀧𑀘𑁆𑀘𑀬𑀸. 𑀢𑀢𑁆𑀣 𑀕𑀳𑀡𑀽𑀧𑀸𑀤𑀸𑀦𑀯𑀸𑀤𑀺𑀦𑁄 𑀆𑀘𑀭𑀺𑀬𑀸 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀘𑀢𑀽𑀲𑀼 𑀉𑀧𑀸𑀤𑀸𑀦𑁂𑀲𑀼 𑀅𑀜𑁆𑀜𑀢𑀭𑁂𑀦𑀸𑀧𑀺 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀁 𑀅𑀭𑀳𑀢𑁆𑀢𑀨𑀮𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀓𑀣𑁂𑀦𑁆𑀢𑀺. 𑀢𑀜𑁆𑀳𑀺 𑀦 𑀘 𑀉𑀧𑀸𑀤𑀸𑀦𑀲𑀫𑁆𑀧𑀬𑀼𑀢𑁆𑀢𑀁 𑀳𑀼𑀢𑁆𑀯𑀸 𑀓𑀜𑁆𑀘𑀺 𑀥𑀫𑁆𑀫𑀁 𑀉𑀧𑀸𑀤𑀺𑀬𑀢𑀺, 𑀓𑀺𑀮𑁂𑀲𑀸𑀦𑀜𑁆𑀘 𑀧𑀭𑀺𑀦𑀺𑀩𑁆𑀩𑀼𑀢𑀦𑁆𑀢𑁂 𑀚𑀸𑀢𑀢𑁆𑀢𑀸 𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀘𑁆𑀘𑀬𑀽𑀧𑀸𑀤𑀸𑀦𑀯𑀸𑀤𑀺𑀦𑁄 𑀧𑀦 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀧𑁆𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀁. 𑀧𑀘𑁆𑀘𑀬𑀯𑀲𑁂𑀦 𑀅𑀦𑀼𑀧𑁆𑀧𑀦𑁆𑀦𑀁 𑀅𑀲𑀗𑁆𑀔𑀢𑀁 𑀅𑀫𑀢𑀥𑀸𑀢𑀼𑀫𑁂𑀯 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀓𑀣𑁂𑀦𑁆𑀢𑀺. 𑀅𑀬𑀁 𑀅𑀦𑁆𑀢𑁄, 𑀅𑀬𑀁 𑀓𑁄𑀝𑀺, 𑀅𑀬𑀁 𑀦𑀺𑀝𑁆𑀞𑀸. 𑀅𑀧𑁆𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑀲𑁆𑀲 𑀳𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀫𑀢𑁆𑀣𑀓𑀁 𑀧𑀢𑁆𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀣𑁂𑀭𑁄 ‘‘𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣’’𑀦𑁆𑀢𑀺 𑀆𑀳. 𑀅𑀣 𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 ‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀲𑀻𑀮𑀯𑀺𑀲𑀼𑀤𑁆𑀥𑀺 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀧𑀼𑀦 𑀧𑀼𑀘𑁆𑀙𑀁 𑀆𑀭𑀪𑀺.

𑁨𑁫𑁮. 𑀣𑁂𑀭𑁄𑀧𑀺 𑀲𑀩𑁆𑀩𑀧𑀭𑀺𑀯𑀢𑁆𑀢𑁂𑀲𑀼 𑀢𑀣𑁂𑀯 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑁂 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄 𑀲𑀻𑀮𑀯𑀺𑀲𑀼𑀤𑁆𑀥𑀺𑀁 𑀘𑁂, 𑀆𑀯𑀼𑀲𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀜𑁆𑀜𑀧𑁂𑀬𑁆𑀬𑀸𑀢𑀺 𑀬𑀤𑀺 𑀧𑀜𑁆𑀜𑀧𑁂𑀬𑁆𑀬. 𑀲𑀉𑀧𑀸𑀤𑀸𑀦𑀁𑀬𑁂𑀯 𑀲𑀫𑀸𑀦𑀁 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀬𑁆𑀬𑀸𑀢𑀺 𑀲𑀗𑁆𑀕𑀳𑀡𑀥𑀫𑁆𑀫𑀫𑁂𑀯 𑀦𑀺𑀕𑁆𑀕𑀳𑀡𑀥𑀫𑁆𑀫𑀁 𑀲𑀧𑁆𑀧𑀘𑁆𑀘𑀬𑀥𑀫𑁆𑀫𑀫𑁂𑀯 𑀅𑀧𑁆𑀧𑀘𑁆𑀘𑀬𑀥𑀫𑁆𑀫𑀁 𑀲𑀗𑁆𑀔𑀢𑀥𑀫𑁆𑀫𑀫𑁂𑀯 𑀅𑀲𑀗𑁆𑀔𑀢𑀥𑀫𑁆𑀫𑀦𑁆𑀢𑀺 𑀧𑀜𑁆𑀜𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀬𑀁 𑀧𑀦 𑀲𑀧𑁆𑀧𑀘𑁆𑀘𑀬𑀥𑀫𑁆𑀫𑀫𑁂𑀯 𑀅𑀧𑁆𑀧𑀘𑁆𑀘𑀬𑀥𑀫𑁆𑀫𑀁 𑀲𑀗𑁆𑀔𑀢𑀥𑀫𑁆𑀫𑀫𑁂𑀯 𑀅𑀲𑀗𑁆𑀔𑀢𑀥𑀫𑁆𑀫𑀦𑁆𑀢𑀺 𑀧𑀜𑁆𑀜𑀧𑁂𑀬𑁆𑀬𑀸𑀢𑀺 𑀅𑀬𑀫𑁂𑀯 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀧𑀼𑀣𑀼𑀚𑁆𑀚𑀦𑁄 𑀳𑀺, 𑀆𑀯𑀼𑀲𑁄𑀢𑀺 𑀏𑀢𑁆𑀣 𑀯𑀝𑁆𑀝𑀸𑀦𑀼𑀕𑀢𑁄 𑀮𑁄𑀓𑀺𑀬𑀩𑀸𑀮𑀧𑀼𑀣𑀼𑀚𑁆𑀚𑀦𑁄 𑀤𑀝𑁆𑀞𑀩𑁆𑀩𑁄. 𑀲𑁄 𑀳𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀫𑀢𑁆𑀢𑀲𑁆𑀲𑀸𑀧𑀺 𑀅𑀪𑀸𑀯𑀢𑁄 𑀲𑀩𑁆𑀩𑀲𑁄 𑀅𑀜𑁆𑀜𑀢𑁆𑀭 𑀇𑀫𑁂𑀳𑀺 𑀥𑀫𑁆𑀫𑁂𑀳𑀺. 𑀢𑁂𑀦 𑀳𑀻𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀏𑀓𑀘𑁆𑀘𑁂 𑀧𑀡𑁆𑀟𑀺𑀢𑀸 𑀉𑀧𑀫𑀸𑀬 𑀅𑀢𑁆𑀣𑀁 𑀚𑀸𑀦𑀦𑁆𑀢𑀺, 𑀢𑁂𑀦 𑀓𑀸𑀭𑀡𑁂𑀦 𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀲𑀢𑁆𑀢𑀭𑀣𑀯𑀺𑀦𑀻𑀢𑀯𑀡𑁆𑀡𑀦𑀸

𑁨𑁫𑁯. 𑀲𑀢𑁆𑀢 𑀭𑀣𑀯𑀺𑀦𑀻𑀢𑀸𑀦𑀻𑀢𑀺 𑀯𑀺𑀦𑀻𑀢𑀅𑀲𑁆𑀲𑀸𑀚𑀸𑀦𑀺𑀬𑀬𑀼𑀢𑁆𑀢𑁂 𑀲𑀢𑁆𑀢 𑀭𑀣𑁂. 𑀬𑀸𑀯𑀤𑁂𑀯, 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀢𑁆𑀣𑀸𑀢𑀺, 𑀆𑀯𑀼𑀲𑁄, 𑀅𑀬𑀁 𑀲𑀻𑀮𑀯𑀺𑀲𑀼𑀤𑁆𑀥𑀺 𑀦𑀸𑀫, 𑀬𑀸𑀯𑀤𑁂𑀯, 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀢𑁆𑀣𑀸. 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀢𑁆𑀣𑀸𑀢𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀫𑁂𑀢𑀁. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄, 𑀬𑀸𑀯𑀤𑁂𑀯, 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀲𑀗𑁆𑀔𑀸𑀢𑀸 𑀅𑀢𑁆𑀣𑀸, 𑀢𑀸𑀯 𑀅𑀬𑀁 𑀲𑀻𑀮𑀯𑀺𑀲𑀼𑀤𑁆𑀥𑀺 𑀦𑀸𑀫 𑀇𑀘𑁆𑀙𑀺𑀢𑀩𑁆𑀩𑀸. 𑀬𑀸 𑀧𑀦 𑀅𑀬𑀁 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺, 𑀏𑀲𑀸 𑀲𑀻𑀮𑀯𑀺𑀲𑀼𑀤𑁆𑀥𑀺𑀬𑀸 𑀅𑀢𑁆𑀣𑁄, 𑀅𑀬𑀁 𑀓𑁄𑀝𑀺, 𑀇𑀤𑀁 𑀧𑀭𑀺𑀬𑁄𑀲𑀸𑀦𑀁, 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀬𑀁 𑀞𑀺𑀢𑀲𑁆𑀲 𑀳𑀺 𑀲𑀻𑀮𑀯𑀺𑀲𑀼𑀤𑁆𑀥𑀺𑀓𑀺𑀘𑁆𑀘𑀁 𑀓𑀢𑀁 𑀦𑀸𑀫 𑀳𑁄𑀢𑀻𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀧𑀤𑁂𑀲𑀼.

𑀇𑀤𑀁 𑀧𑀦𑁂𑀢𑁆𑀣 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀯𑀺𑀬 𑀳𑀺 𑀚𑀭𑀸𑀫𑀭𑀡𑀪𑀻𑀭𑀼𑀓𑁄 𑀬𑁄𑀕𑀸𑀯𑀘𑀭𑁄 𑀤𑀝𑁆𑀞𑀩𑁆𑀩𑁄. 𑀲𑀸𑀯𑀢𑁆𑀣𑀺𑀦𑀕𑀭𑀁 𑀯𑀺𑀬 𑀲𑀓𑁆𑀓𑀸𑀬𑀦𑀕𑀭𑀁, 𑀲𑀸𑀓𑁂𑀢𑀦𑀕𑀭𑀁 𑀯𑀺𑀬 𑀦𑀺𑀩𑁆𑀩𑀸𑀦𑀦𑀕𑀭𑀁, 𑀭𑀜𑁆𑀜𑁄 𑀲𑀸𑀓𑁂𑀢𑁂 𑀯𑀟𑁆𑀠𑀺𑀆𑀯𑀳𑀲𑁆𑀲 𑀲𑀻𑀖𑀁 𑀕𑀦𑁆𑀢𑁆𑀯𑀸 𑀧𑀸𑀧𑀼𑀡𑀺𑀢𑀩𑁆𑀩𑀲𑁆𑀲 𑀅𑀘𑁆𑀘𑀸𑀬𑀺𑀓𑀲𑁆𑀲 𑀓𑀺𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑀓𑀸𑀮𑁄 𑀯𑀺𑀬 𑀬𑁄𑀕𑀺𑀦𑁄 𑀅𑀦𑀪𑀺𑀲𑀫𑁂𑀢𑀸𑀦𑀁 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀅𑀪𑀺𑀲𑀫𑀬𑀓𑀺𑀘𑁆𑀘𑀲𑁆𑀲 𑀉𑀧𑁆𑀧𑀸𑀤𑀓𑀸𑀮𑁄. 𑀲𑀢𑁆𑀢 𑀭𑀣𑀯𑀺𑀦𑀻𑀢𑀸𑀦𑀺 𑀯𑀺𑀬 𑀲𑀢𑁆𑀢 𑀯𑀺𑀲𑀼𑀤𑁆𑀥𑀺𑀬𑁄, 𑀧𑀞𑀫𑀁 𑀭𑀣𑀯𑀺𑀦𑀻𑀢𑀁 𑀆𑀭𑀼𑀴𑁆𑀳𑀓𑀸𑀮𑁄 𑀯𑀺𑀬 𑀲𑀻𑀮𑀯𑀺𑀲𑀼𑀤𑁆𑀥𑀺𑀬𑀁 𑀞𑀺𑀢𑀓𑀸𑀮𑁄, 𑀧𑀞𑀫𑀭𑀣𑀯𑀺𑀦𑀻𑀢𑀸𑀤𑀻𑀳𑀺 𑀤𑀼𑀢𑀺𑀬𑀸𑀤𑀻𑀦𑀺 𑀆𑀭𑀼𑀴𑁆𑀳𑀓𑀸𑀮𑁄 𑀯𑀺𑀬 𑀲𑀻𑀮𑀯𑀺𑀲𑀼𑀤𑁆𑀥𑀺𑀆𑀤𑀻𑀳𑀺 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀆𑀤𑀻𑀲𑀼 𑀞𑀺𑀢𑀓𑀸𑀮𑁄. 𑀲𑀢𑁆𑀢𑀫𑁂𑀦 𑀭𑀣𑀯𑀺𑀦𑀻𑀢𑁂𑀦 𑀲𑀸𑀓𑁂𑀢𑁂 𑀅𑀦𑁆𑀢𑁂𑀧𑀼𑀭𑀤𑁆𑀯𑀸𑀭𑁂 𑀑𑀭𑀼𑀬𑁆𑀳 𑀉𑀧𑀭𑀺𑀧𑀸𑀲𑀸𑀤𑁂 𑀜𑀸𑀢𑀺𑀫𑀺𑀢𑁆𑀢𑀕𑀡𑀧𑀭𑀺𑀯𑀼𑀢𑀲𑁆𑀲 𑀲𑀼𑀭𑀲𑀪𑁄𑀚𑀦𑀧𑀭𑀺𑀪𑁄𑀕𑀓𑀸𑀮𑁄 𑀯𑀺𑀬 𑀬𑁄𑀕𑀺𑀦𑁄 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀬𑀸 𑀲𑀩𑁆𑀩𑀓𑀺𑀮𑁂𑀲𑁂 𑀔𑁂𑀧𑁂𑀢𑁆𑀯𑀸 𑀥𑀫𑁆𑀫𑀯𑀭𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀧𑀭𑁄𑀧𑀡𑁆𑀡𑀸𑀲𑀓𑀼𑀲𑀮𑀥𑀫𑁆𑀫𑀧𑀭𑀺𑀯𑀸𑀭𑀲𑁆𑀲 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀭𑁄𑀥𑀲𑀬𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀮𑁄𑀓𑀼𑀢𑁆𑀢𑀭𑀲𑀼𑀔𑀸𑀦𑀼𑀪𑀯𑀦𑀓𑀸𑀮𑁄 𑀤𑀝𑁆𑀞𑀩𑁆𑀩𑁄.

𑀇𑀢𑀺 𑀆𑀬𑀲𑁆𑀫𑀦𑁆𑀢𑀁 𑀧𑀼𑀡𑁆𑀡𑀁 𑀤𑀲𑀓𑀣𑀸𑀯𑀢𑁆𑀣𑀼𑀮𑀸𑀪𑀺𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀲𑀢𑁆𑀢 𑀯𑀺𑀲𑀼𑀤𑁆𑀥𑀺𑀬𑁄 𑀧𑀼𑀘𑁆𑀙𑀺. 𑀆𑀬𑀲𑁆𑀫𑀸 𑀧𑀼𑀡𑁆𑀡𑁄 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀏𑀯𑀁 𑀧𑀼𑀘𑁆𑀙𑀦𑁆𑀢𑁄 𑀧𑀦 𑀥𑀫𑁆𑀫𑀲𑁂𑀦𑀸𑀧𑀢𑀺 𑀓𑀺𑀁 𑀚𑀸𑀦𑀺𑀢𑁆𑀯𑀸 𑀧𑀼𑀘𑁆𑀙𑀺, 𑀉𑀤𑀸𑀳𑀼 𑀅𑀚𑀸𑀦𑀺𑀢𑁆𑀯𑀸? 𑀢𑀺𑀢𑁆𑀣𑀓𑀼𑀲𑀮𑁄 𑀯𑀸 𑀧𑀦 𑀳𑀼𑀢𑁆𑀯𑀸 𑀯𑀺𑀲𑀬𑀲𑁆𑀫𑀺𑀁 𑀧𑀼𑀘𑁆𑀙𑀺, 𑀉𑀤𑀸𑀳𑀼 𑀅𑀢𑀺𑀢𑁆𑀣𑀓𑀼𑀲𑀮𑁄 𑀳𑀼𑀢𑁆𑀯𑀸 𑀅𑀯𑀺𑀲𑀬𑀲𑁆𑀫𑀺𑀁? 𑀧𑀼𑀡𑁆𑀡𑀢𑁆𑀣𑁂𑀭𑁄𑀧𑀺 𑀘 𑀓𑀺𑀁 𑀚𑀸𑀦𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀉𑀤𑀸𑀳𑀼 𑀅𑀚𑀸𑀦𑀺𑀢𑁆𑀯𑀸? 𑀢𑀺𑀢𑁆𑀣𑀓𑀼𑀲𑀮𑁄 𑀯𑀸 𑀧𑀦 𑀳𑀼𑀢𑁆𑀯𑀸 𑀯𑀺𑀲𑀬𑀲𑁆𑀫𑀺𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀉𑀤𑀸𑀳𑀼 𑀅𑀢𑀺𑀢𑁆𑀣𑀓𑀼𑀲𑀮𑁄 𑀳𑀼𑀢𑁆𑀯𑀸 𑀅𑀯𑀺𑀲𑀬𑁂𑀢𑀺? 𑀚𑀸𑀦𑀺𑀢𑁆𑀯𑀸 𑀢𑀺𑀢𑁆𑀣𑀓𑀼𑀲𑀮𑁄 𑀳𑀼𑀢𑁆𑀯𑀸 𑀯𑀺𑀲𑀬𑁂 𑀧𑀼𑀘𑁆𑀙𑀻𑀢𑀺 𑀳𑀺 𑀯𑀤𑀫𑀸𑀦𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀁𑀬𑁂𑀯 𑀯𑀤𑁂𑀬𑁆𑀬. 𑀚𑀸𑀦𑀺𑀢𑁆𑀯𑀸 𑀢𑀺𑀢𑁆𑀣𑀓𑀼𑀲𑀮𑁄 𑀳𑀼𑀢𑁆𑀯𑀸 𑀯𑀺𑀲𑀬𑁂 𑀯𑀺𑀲𑁆𑀲𑀚𑁆𑀚𑁂𑀲𑀻𑀢𑀺 𑀯𑀤𑀫𑀸𑀦𑁄 𑀧𑀼𑀡𑁆𑀡𑀢𑁆𑀣𑁂𑀭𑀁𑀬𑁂𑀯 𑀯𑀤𑁂𑀬𑁆𑀬. 𑀬𑀜𑁆𑀳𑀺 𑀯𑀺𑀲𑀼𑀤𑁆𑀥𑀻𑀲𑀼 𑀲𑀁𑀔𑀺𑀢𑁆𑀢𑀁, 𑀢𑀁 𑀓𑀣𑀸𑀯𑀢𑁆𑀣𑀽𑀲𑀼 𑀯𑀺𑀢𑁆𑀣𑀺𑀡𑁆𑀡𑀁. 𑀬𑀁 𑀓𑀣𑀸𑀯𑀢𑁆𑀣𑀽𑀲𑀼 𑀲𑀁𑀔𑀺𑀢𑁆𑀢𑀁, 𑀢𑀁 𑀯𑀺𑀲𑀼𑀤𑁆𑀥𑀻𑀲𑀼 𑀯𑀺𑀢𑁆𑀣𑀺𑀡𑁆𑀡𑀁. 𑀢𑀤𑀫𑀺𑀦𑀸 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀲𑀼𑀤𑁆𑀥𑀻𑀲𑀼 𑀳𑀺 𑀏𑀓𑀸 𑀲𑀻𑀮𑀯𑀺𑀲𑀼𑀤𑁆𑀥𑀺 𑀘𑀢𑁆𑀢𑀸𑀭𑀺 𑀓𑀣𑀸𑀯𑀢𑁆𑀣𑀽𑀦𑀺 𑀳𑀼𑀢𑁆𑀯𑀸 𑀆𑀕𑀢𑀸 𑀅𑀧𑁆𑀧𑀺𑀘𑁆𑀙𑀓𑀣𑀸 𑀲𑀦𑁆𑀢𑀼𑀝𑁆𑀞𑀺𑀓𑀣𑀸 𑀅𑀲𑀁𑀲𑀕𑁆𑀕𑀓𑀣𑀸, 𑀲𑀻𑀮𑀓𑀣𑀸𑀢𑀺. 𑀏𑀓𑀸 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀢𑀻𑀡𑀺 𑀓𑀣𑀸𑀯𑀢𑁆𑀣𑀽𑀦𑀺 𑀳𑀼𑀢𑁆𑀯𑀸 𑀆𑀕𑀢𑀸 𑁋 𑀧𑀯𑀺𑀯𑁂𑀓𑀓𑀣𑀸, 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀸, 𑀲𑀫𑀸𑀥𑀺𑀓𑀣𑀸𑀢𑀺, 𑀏𑀯𑀁 𑀢𑀸𑀯 𑀬𑀁 𑀯𑀺𑀲𑀼𑀤𑁆𑀥𑀻𑀲𑀼 𑀲𑀁𑀔𑀺𑀢𑁆𑀢𑀁, 𑀢𑀁 𑀓𑀣𑀸𑀯𑀢𑁆𑀣𑀽𑀲𑀼 𑀯𑀺𑀢𑁆𑀣𑀺𑀡𑁆𑀡𑀁. 𑀓𑀣𑀸𑀯𑀢𑁆𑀣𑀽𑀲𑀼 𑀧𑀦 𑀏𑀓𑀸 𑀧𑀜𑁆𑀜𑀸𑀓𑀣𑀸 𑀧𑀜𑁆𑀘 𑀯𑀺𑀲𑀼𑀤𑁆𑀥𑀺𑀬𑁄 𑀳𑀼𑀢𑁆𑀯𑀸 𑀆𑀕𑀢𑀸 𑁋 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺, 𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀺, 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺, 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺, 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻𑀢𑀺, 𑀏𑀯𑀁 𑀬𑀁 𑀓𑀣𑀸𑀯𑀢𑁆𑀣𑀽𑀲𑀼 𑀲𑀁𑀔𑀺𑀢𑁆𑀢𑀁, 𑀢𑀁 𑀯𑀺𑀲𑀼𑀤𑁆𑀥𑀻𑀲𑀼 𑀯𑀺𑀢𑁆𑀣𑀺𑀡𑁆𑀡𑀁. 𑀢𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀲𑀢𑁆𑀢 𑀯𑀺𑀲𑀼𑀤𑁆𑀥𑀺𑀬𑁄 𑀧𑀼𑀘𑁆𑀙𑀦𑁆𑀢𑁄 𑀦 𑀅𑀜𑁆𑀜𑀁 𑀧𑀼𑀘𑁆𑀙𑀺, 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺𑀬𑁂𑀯 𑀧𑀼𑀘𑁆𑀙𑀺. 𑀧𑀼𑀡𑁆𑀡𑀢𑁆𑀣𑁂𑀭𑁄𑀧𑀺 𑀲𑀢𑁆𑀢 𑀯𑀺𑀲𑀼𑀤𑁆𑀥𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀦 𑀅𑀜𑁆𑀜𑀁 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺𑀬𑁂𑀯 𑀯𑀺𑀲𑁆𑀲𑀚𑁆𑀚𑁂𑀲𑀻𑀢𑀺. 𑀇𑀢𑀺 𑀉𑀪𑁄𑀧𑁂𑀢𑁂 𑀚𑀸𑀦𑀺𑀢𑁆𑀯𑀸 𑀢𑀺𑀢𑁆𑀣𑀓𑀼𑀲𑀮𑀸 𑀳𑀼𑀢𑁆𑀯𑀸 𑀯𑀺𑀲𑀬𑁂𑀯 𑀧𑀜𑁆𑀳𑀁 𑀧𑀼𑀘𑁆𑀙𑀺𑀁𑀲𑀼 𑀘𑁂𑀯 𑀯𑀺𑀲𑁆𑀲𑀚𑁆𑀚𑁂𑀲𑀼𑀁 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁨𑁬𑁦. 𑀓𑁄 𑀦𑀸𑀫𑁄 𑀆𑀬𑀲𑁆𑀫𑀸𑀢𑀺 𑀦 𑀣𑁂𑀭𑁄 𑀢𑀲𑁆𑀲 𑀦𑀸𑀫𑀁 𑀦 𑀚𑀸𑀦𑀸𑀢𑀺. 𑀚𑀸𑀦𑀦𑁆𑀢𑁄𑀬𑁂𑀯 𑀧𑀦 𑀲𑀫𑁆𑀫𑁄𑀤𑀺𑀢𑀼𑀁 𑀮𑀪𑀺𑀲𑁆𑀲𑀸𑀫𑀻𑀢𑀺 𑀧𑀼𑀘𑁆𑀙𑀺. 𑀓𑀣𑀜𑁆𑀘 𑀧𑀦𑀸𑀬𑀲𑁆𑀫𑀦𑁆𑀢𑀦𑁆𑀢𑀺 𑀇𑀤𑀁 𑀧𑀦 𑀣𑁂𑀭𑁄 𑀲𑀫𑁆𑀫𑁄𑀤𑀫𑀸𑀦𑁄 𑀆𑀳. 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄𑀢𑀺 𑀫𑀦𑁆𑀢𑀸𑀡𑀺𑀬𑀸 𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀼𑀢𑁆𑀢𑁄. 𑀬𑀣𑀸 𑀢𑀦𑁆𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀬𑀣𑀸 𑀲𑀼𑀢𑀯𑀢𑀸 𑀲𑀸𑀯𑀓𑁂𑀦 𑀩𑁆𑀬𑀸𑀓𑀸𑀢𑀩𑁆𑀩𑀸, 𑀏𑀯𑀫𑁂𑀯 𑀩𑁆𑀬𑀸𑀓𑀢𑀸𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄. 𑀅𑀦𑀼𑀫𑀲𑁆𑀲 𑀅𑀦𑀼𑀫𑀲𑁆𑀲𑀸𑀢𑀺 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺 𑀑𑀕𑀸𑀳𑁂𑀢𑁆𑀯𑀸 𑀅𑀦𑀼𑀧𑀯𑀺𑀲𑀺𑀢𑁆𑀯𑀸. 𑀘𑁂𑀮𑀡𑁆𑀟𑀼𑀧𑀓𑁂𑀦𑀸𑀢𑀺 𑀏𑀢𑁆𑀣 𑀘𑁂𑀮𑀁 𑀯𑀼𑀘𑁆𑀘𑀢𑀺 𑀯𑀢𑁆𑀣𑀁, 𑀅𑀡𑁆𑀟𑀼𑀧𑀓𑀁 𑀘𑀼𑀫𑁆𑀩𑀝𑀓𑀁. 𑀯𑀢𑁆𑀣𑀘𑀼𑀫𑁆𑀩𑀝𑀓𑀁 𑀲𑀻𑀲𑁂 𑀓𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀢𑀢𑁆𑀣 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀧𑀭𑀺𑀳𑀭𑀦𑁆𑀢𑀸𑀧𑀺 𑀲𑀩𑁆𑀭𑀳𑁆𑀫𑀘𑀸𑀭𑀻 𑀤𑀲𑁆𑀲𑀦𑀸𑀬 𑀮𑀪𑁂𑀬𑁆𑀬𑀼𑀁, 𑀏𑀯𑀁 𑀮𑀤𑁆𑀥𑀤𑀲𑁆𑀲𑀦𑀫𑁆𑀧𑀺 𑀢𑁂𑀲𑀁 𑀮𑀸𑀪𑀸𑀬𑁂𑀯𑀸𑀢𑀺 𑀅𑀝𑁆𑀞𑀸𑀦𑀧𑀭𑀺𑀓𑀧𑁆𑀧𑁂𑀦 𑀅𑀪𑀺𑀡𑁆𑀳𑀤𑀲𑁆𑀲𑀦𑀲𑁆𑀲 𑀉𑀧𑀸𑀬𑀁 𑀤𑀲𑁆𑀲𑁂𑀲𑀺. 𑀏𑀯𑀁 𑀅𑀧𑀭𑀺𑀳𑀭𑀦𑁆𑀢𑁂𑀦 𑀳𑀺 𑀧𑀜𑁆𑀳𑀁 𑀯𑀸 𑀧𑀼𑀘𑁆𑀙𑀺𑀢𑀼𑀓𑀸𑀫𑁂𑀦 𑀥𑀫𑁆𑀫𑀁 𑀯𑀸 𑀲𑁄𑀢𑀼𑀓𑀸𑀫𑁂𑀦 ‘‘𑀣𑁂𑀭𑁄 𑀓𑀢𑁆𑀣 𑀞𑀺𑀢𑁄 𑀓𑀢𑁆𑀣 𑀦𑀺𑀲𑀺𑀦𑁆𑀦𑁄’’𑀢𑀺 𑀧𑀭𑀺𑀬𑁂𑀲𑀦𑁆𑀢𑁂𑀦 𑀘𑀭𑀺𑀢𑀩𑁆𑀩𑀁 𑀳𑁄𑀢𑀺. 𑀏𑀯𑀁 𑀧𑀭𑀺𑀳𑀭𑀦𑁆𑀢𑀸 𑀧𑀦 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂𑀬𑁂𑀯 𑀲𑀻𑀲𑀢𑁄 𑀑𑀭𑁄𑀧𑁂𑀢𑁆𑀯𑀸 𑀫𑀳𑀸𑀭𑀳𑁂 𑀆𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀧𑀜𑁆𑀳𑀁 𑀯𑀸 𑀧𑀼𑀘𑁆𑀙𑀺𑀢𑀼𑀁 𑀥𑀫𑁆𑀫𑀁 𑀯𑀸 𑀲𑁄𑀢𑀼𑀁. 𑀇𑀢𑀺 𑀅𑀝𑁆𑀞𑀸𑀦𑀧𑀭𑀺𑀓𑀧𑁆𑀧𑁂𑀦 𑀅𑀪𑀺𑀡𑁆𑀳𑀤𑀲𑁆𑀲𑀦𑀲𑁆𑀲 𑀉𑀧𑀸𑀬𑀁 𑀤𑀲𑁆𑀲𑁂𑀲𑀺.

𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀘 𑀧𑀦 𑀫𑀦𑁆𑀢𑀺 𑀲𑀸𑀭𑀺𑀬𑀸 𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀼𑀢𑁆𑀢𑁄𑀢𑀺 𑀘 𑀧𑀦 𑀏𑀯𑀁 𑀫𑀁 𑀲𑀩𑁆𑀭𑀳𑁆𑀫𑀘𑀸𑀭𑀻 𑀚𑀸𑀦𑀦𑁆𑀢𑀺. 𑀲𑀢𑁆𑀣𑀼𑀓𑀧𑁆𑀧𑁂𑀦𑀸𑀢𑀺 𑀲𑀢𑁆𑀣𑀼𑀲𑀤𑀺𑀲𑁂𑀦. 𑀇𑀢𑀺 𑀏𑀓𑀧𑀤𑁂𑀦𑁂𑀯 𑀆𑀬𑀲𑁆𑀫𑀸 𑀧𑀼𑀡𑁆𑀡𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀘𑀦𑁆𑀤𑀫𑀡𑁆𑀟𑀮𑀁 𑀆𑀳𑀘𑁆𑀘 𑀞𑀧𑁂𑀦𑁆𑀢𑁄 𑀯𑀺𑀬 𑀉𑀓𑁆𑀔𑀺𑀧𑀺. 𑀣𑁂𑀭𑀲𑁆𑀲 𑀳𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀏𑀓𑀦𑁆𑀢𑀥𑀫𑁆𑀫𑀓𑀣𑀺𑀓𑀪𑀸𑀯𑁄 𑀧𑀸𑀓𑀝𑁄 𑀅𑀳𑁄𑀲𑀺. 𑀅𑀫𑀘𑁆𑀘𑀜𑁆𑀳𑀺 𑀧𑀼𑀭𑁄𑀳𑀺𑀢𑀁 𑀫𑀳𑀦𑁆𑀢𑁄𑀢𑀺 𑀯𑀤𑀫𑀸𑀦𑁄 𑀭𑀸𑀚𑀲𑀤𑀺𑀲𑁄𑀢𑀺 𑀯𑀤𑁂𑀬𑁆𑀬, 𑀕𑁄𑀡𑀁 𑀳𑀢𑁆𑀣𑀺𑀧𑁆𑀧𑀫𑀸𑀡𑁄𑀢𑀺, 𑀯𑀸𑀧𑀺𑀁 𑀲𑀫𑀼𑀤𑁆𑀤𑀧𑁆𑀧𑀫𑀸𑀡𑁄𑀢𑀺, 𑀆𑀮𑁄𑀓𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀮𑁄𑀓𑀧𑁆𑀧𑀫𑀸𑀡𑁄𑀢𑀺, 𑀇𑀢𑁄 𑀧𑀭𑀁 𑀏𑀢𑁂𑀲𑀁 𑀫𑀳𑀦𑁆𑀢𑀪𑀸𑀯𑀓𑀣𑀸 𑀦𑀸𑀫 𑀦𑀢𑁆𑀣𑀺. 𑀲𑀸𑀯𑀓𑀫𑁆𑀧𑀺 𑀫𑀳𑀸𑀢𑀺 𑀯𑀤𑀦𑁆𑀢𑁄 𑀲𑀢𑁆𑀣𑀼𑀧𑀝𑀺𑀪𑀸𑀕𑁄𑀢𑀺 𑀯𑀤𑁂𑀬𑁆𑀬, 𑀇𑀢𑁄 𑀧𑀭𑀁 𑀢𑀲𑁆𑀲 𑀫𑀳𑀦𑁆𑀢𑀪𑀸𑀯𑀓𑀣𑀸 𑀦𑀸𑀫 𑀦𑀢𑁆𑀣𑀺. 𑀇𑀘𑁆𑀘𑀸𑀬𑀲𑁆𑀫𑀸 𑀧𑀼𑀡𑁆𑀡𑁄 𑀏𑀓𑀧𑀤𑁂𑀦𑁂𑀯 𑀣𑁂𑀭𑀁 𑀘𑀦𑁆𑀤𑀫𑀡𑁆𑀟𑀮𑀁 𑀆𑀳𑀘𑁆𑀘 𑀞𑀧𑁂𑀦𑁆𑀢𑁄 𑀯𑀺𑀬 𑀉𑀓𑁆𑀔𑀺𑀧𑀺.

𑀏𑀢𑁆𑀢𑀓𑀫𑁆𑀧𑀺 𑀦𑁄 𑀦𑀧𑁆𑀧𑀝𑀺𑀪𑀸𑀲𑁂𑀬𑁆𑀬𑀸𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑀲𑁆𑀲 𑀅𑀧𑁆𑀧𑀝𑀺𑀪𑀸𑀦𑀁 𑀦𑀸𑀫 𑀦𑀢𑁆𑀣𑀺. 𑀬𑀸 𑀧𑀦𑀸𑀬𑀁 𑀉𑀧𑀫𑀸 𑀆𑀳𑀝𑀸, 𑀢𑀁 𑀦 𑀆𑀳𑀭𑁂𑀬𑁆𑀬𑀸𑀫, 𑀅𑀢𑁆𑀣𑀫𑁂𑀯 𑀓𑀣𑁂𑀬𑁆𑀬𑀸𑀫. 𑀉𑀧𑀫𑀸 𑀳𑀺 𑀅𑀚𑀸𑀦𑀦𑁆𑀢𑀸𑀦𑀁 𑀆𑀳𑀭𑀻𑀬𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀇𑀤𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀫𑀸 𑀦𑀸𑀫 𑀩𑀼𑀤𑁆𑀥𑀸𑀦𑀫𑁆𑀧𑀺 𑀲𑀦𑁆𑀢𑀺𑀓𑁂 𑀆𑀳𑀭𑀻𑀬𑀢𑀺, 𑀣𑁂𑀭𑀁 𑀧𑀦𑁂𑀲 𑀅𑀧𑀘𑀸𑀬𑀫𑀸𑀦𑁄 𑀏𑀯𑀫𑀸𑀳𑀸𑀢𑀺.

𑀅𑀦𑀼𑀫𑀲𑁆𑀲 𑀅𑀦𑀼𑀫𑀲𑁆𑀲 𑀧𑀼𑀘𑁆𑀙𑀺𑀢𑀸𑀢𑀺 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺 𑀑𑀕𑀸𑀳𑁂𑀢𑁆𑀯𑀸 𑀑𑀕𑀸𑀳𑁂𑀢𑁆𑀯𑀸 𑀧𑀼𑀘𑁆𑀙𑀺𑀢𑀸. 𑀓𑀺𑀁 𑀧𑀦 𑀧𑀜𑁆𑀳𑀲𑁆𑀲 𑀧𑀼𑀘𑁆𑀙𑀦𑀁 𑀪𑀸𑀭𑀺𑀬𑀁, 𑀉𑀤𑀸𑀳𑀼 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺? 𑀉𑀕𑁆𑀕𑀳𑁂𑀢𑁆𑀯𑀸 𑀧𑀼𑀘𑁆𑀙𑀦𑀁 𑀦𑁄 𑀪𑀸𑀭𑀺𑀬𑀁, 𑀯𑀺𑀲𑁆𑀲𑀚𑁆𑀚𑀦𑀁 𑀧𑀦 𑀪𑀸𑀭𑀺𑀬𑀁. 𑀲𑀳𑁂𑀢𑀼𑀓𑀁 𑀯𑀸 𑀲𑀓𑀸𑀭𑀡𑀁 𑀓𑀢𑁆𑀯𑀸 𑀧𑀼𑀘𑁆𑀙𑀦𑀫𑁆𑀧𑀺 𑀯𑀺𑀲𑁆𑀲𑀚𑁆𑀚𑀦𑀫𑁆𑀧𑀺 𑀪𑀸𑀭𑀺𑀬𑀫𑁂𑀯. 𑀲𑀫𑀦𑀼𑀫𑁄𑀤𑀺𑀁𑀲𑀽𑀢𑀺 𑀲𑀫𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀅𑀦𑀼𑀫𑁄𑀤𑀺𑀁𑀲𑀼. 𑀇𑀢𑀺 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀤𑁂𑀲𑀦𑀸 𑀦𑀺𑀝𑁆𑀞𑀺𑀢𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀭𑀣𑀯𑀺𑀦𑀻𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀦𑀺𑀯𑀸𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁧. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀦𑀺𑀯𑀸𑀧𑀲𑀼𑀢𑁆𑀢𑀁. 𑀢𑀢𑁆𑀣 𑀦𑁂𑀯𑀸𑀧𑀺𑀓𑁄𑀢𑀺 𑀬𑁄 𑀫𑀺𑀕𑀸𑀦𑀁 𑀕𑀳𑀡𑀢𑁆𑀣𑀸𑀬 𑀅𑀭𑀜𑁆𑀜𑁂 𑀢𑀺𑀡𑀩𑀻𑀚𑀸𑀦𑀺 𑀯𑀧𑀢𑀺 ‘‘𑀇𑀤𑀁 𑀢𑀺𑀡𑀁 𑀔𑀸𑀤𑀺𑀢𑀼𑀁 𑀆𑀕𑀢𑁂 𑀫𑀺𑀕𑁂 𑀲𑀼𑀔𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀦𑀺𑀯𑀸𑀧𑀦𑁆𑀢𑀺 𑀯𑀧𑁆𑀧𑀁. 𑀦𑀺𑀯𑀼𑀢𑁆𑀢𑀦𑁆𑀢𑀺 𑀯𑀧𑀺𑀢𑀁. 𑀫𑀺𑀕𑀚𑀸𑀢𑀸𑀢𑀺 𑀫𑀺𑀕𑀖𑀝𑀸. 𑀅𑀦𑀼𑀧𑀔𑀚𑁆𑀚𑀸𑀢𑀺 𑀅𑀦𑀼𑀧𑀯𑀺𑀲𑀺𑀢𑁆𑀯𑀸. 𑀫𑀼𑀘𑁆𑀙𑀺𑀢𑀸𑀢𑀺 𑀢𑀡𑁆𑀳𑀸𑀫𑀼𑀘𑁆𑀙𑀦𑀸𑀬 𑀫𑀼𑀘𑁆𑀙𑀺𑀢𑀸, 𑀢𑀡𑁆𑀳𑀸𑀬 𑀳𑀤𑀬𑀁 𑀧𑀯𑀺𑀲𑀺𑀢𑁆𑀯𑀸 𑀫𑀼𑀘𑁆𑀙𑀦𑀸𑀓𑀸𑀭𑀁 𑀧𑀸𑀧𑀺𑀢𑀸𑀢𑀺 𑀅𑀢𑁆𑀣𑁄. 𑀫𑀤𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀫𑀸𑀦𑀫𑀤𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀧𑀫𑀸𑀤𑀦𑁆𑀢𑀺 𑀯𑀺𑀲𑁆𑀲𑀝𑁆𑀞𑀲𑀢𑀺𑀪𑀸𑀯𑀁. 𑀬𑀣𑀸𑀓𑀸𑀫𑀓𑀭𑀡𑀻𑀬𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀬𑀣𑀸 𑀇𑀘𑁆𑀙𑀺𑀲𑁆𑀲𑀸𑀫, 𑀢𑀣𑀸 𑀓𑀸𑀢𑀩𑁆𑀩𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀦𑀺𑀯𑀸𑀧𑁂𑀢𑀺 𑀇𑀫𑀲𑁆𑀫𑀺𑀁 𑀦𑀺𑀯𑀸𑀧𑀝𑁆𑀞𑀸𑀦𑁂. 𑀏𑀓𑀁 𑀓𑀺𑀭 𑀦𑀺𑀯𑀸𑀧𑀢𑀺𑀡𑀁 𑀦𑀸𑀫 𑀅𑀢𑁆𑀣𑀺 𑀦𑀺𑀤𑀸𑀖𑀪𑀤𑁆𑀤𑀓𑀁, 𑀢𑀁 𑀬𑀣𑀸 𑀬𑀣𑀸 𑀦𑀺𑀤𑀸𑀖𑁄 𑀳𑁄𑀢𑀺, 𑀢𑀣𑀸 𑀢𑀣𑀸 𑀦𑀻𑀯𑀸𑀭𑀯𑀦𑀁 𑀯𑀺𑀬 𑀫𑁂𑀖𑀫𑀸𑀮𑀸 𑀯𑀺𑀬 𑀘 𑀏𑀓𑀕𑁆𑀖𑀦𑀁 𑀳𑁄𑀢𑀺, 𑀢𑀁 𑀮𑀼𑀤𑁆𑀤𑀓𑀸 𑀏𑀓𑀲𑁆𑀫𑀺𑀁 𑀉𑀤𑀓𑀨𑀸𑀲𑀼𑀓𑀝𑁆𑀞𑀸𑀦𑁂 𑀓𑀲𑀺𑀢𑁆𑀯𑀸 𑀯𑀧𑀺𑀢𑁆𑀯𑀸 𑀯𑀢𑀺𑀁 𑀓𑀢𑁆𑀯𑀸 𑀤𑁆𑀯𑀸𑀭𑀁 𑀬𑁄𑀚𑁂𑀢𑁆𑀯𑀸 𑀭𑀓𑁆𑀔𑀦𑁆𑀢𑀺. 𑀅𑀣 𑀬𑀤𑀸 𑀫𑀳𑀸𑀦𑀺𑀤𑀸𑀖𑁂 𑀲𑀩𑁆𑀩𑀢𑀺𑀡𑀸𑀦𑀺 𑀲𑀼𑀓𑁆𑀔𑀸𑀦𑀺 𑀳𑁄𑀦𑁆𑀢𑀺, 𑀚𑀺𑀯𑁆𑀳𑀸𑀢𑁂𑀫𑀦𑀫𑀢𑁆𑀢𑀫𑁆𑀧𑀺 𑀉𑀤𑀓𑀁 𑀤𑀼𑀮𑁆𑀮𑀪𑀁 𑀳𑁄𑀢𑀺, 𑀢𑀤𑀸 𑀫𑀺𑀕𑀚𑀸𑀢𑀸 𑀲𑀼𑀓𑁆𑀔𑀢𑀺𑀡𑀸𑀦𑀺 𑀘𑁂𑀯 𑀧𑀼𑀭𑀸𑀡𑀧𑀡𑁆𑀡𑀸𑀦𑀺 𑀘 𑀔𑀸𑀤𑀦𑁆𑀢𑀸 𑀓𑀫𑁆𑀧𑀫𑀸𑀦𑀸 𑀯𑀺𑀬 𑀯𑀺𑀘𑀭𑀦𑁆𑀢𑀸 𑀦𑀺𑀯𑀸𑀧𑀢𑀺𑀡𑀲𑁆𑀲 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀯𑀥𑀩𑀦𑁆𑀥𑀦𑀸𑀤𑀻𑀦𑀺 𑀅𑀕𑀡𑀬𑀺𑀢𑁆𑀯𑀸 𑀯𑀢𑀺𑀁 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀸 𑀧𑀯𑀺𑀲𑀦𑁆𑀢𑀺. 𑀢𑁂𑀲𑀜𑁆𑀳𑀺 𑀦𑀺𑀯𑀸𑀧𑀢𑀺𑀡𑀁 𑀅𑀢𑀺𑀯𑀺𑀬 𑀧𑀺𑀬𑀁 𑀳𑁄𑀢𑀺 𑀫𑀦𑀸𑀧𑀁. 𑀦𑁂𑀯𑀸𑀧𑀺𑀓𑁄 𑀢𑁂 𑀤𑀺𑀲𑁆𑀯𑀸 𑀤𑁆𑀯𑁂 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀧𑀫𑀢𑁆𑀢𑁄 𑀯𑀺𑀬 𑀳𑁄𑀢𑀺, 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀅𑀦𑁆𑀢𑁄𑀦𑀺𑀯𑀸𑀧𑀝𑁆𑀞𑀸𑀦𑁂 𑀢𑀳𑀺𑀁 𑀢𑀳𑀺𑀁 𑀉𑀤𑀓𑀆𑀯𑀸𑀝𑀓𑀸𑀧𑀺 𑀳𑁄𑀦𑁆𑀢𑀺, 𑀫𑀺𑀕𑀸 𑀯𑀺𑀯𑀝𑀤𑁆𑀯𑀸𑀭𑁂𑀦 𑀧𑀯𑀺𑀲𑀺𑀢𑁆𑀯𑀸 𑀔𑀸𑀤𑀺𑀢𑀫𑀢𑁆𑀢𑀓𑀁 𑀧𑀺𑀯𑀺𑀢𑀫𑀢𑁆𑀢𑀓𑀫𑁂𑀯 𑀓𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀺, 𑀧𑀼𑀦𑀤𑀺𑀯𑀲𑁂 𑀓𑀺𑀜𑁆𑀘𑀺 𑀦 𑀓𑀭𑁄𑀦𑁆𑀢𑀻𑀢𑀺 𑀓𑀡𑁆𑀡𑁂 𑀘𑀸𑀮𑀬𑀫𑀸𑀦𑀸 𑀔𑀸𑀤𑀺𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀅𑀢𑀭𑀫𑀸𑀦𑀸 𑀕𑀘𑁆𑀙𑀦𑁆𑀢𑀺, 𑀧𑀼𑀦𑀤𑀺𑀯𑀲𑁂 𑀓𑁄𑀘𑀺 𑀓𑀺𑀜𑁆𑀘𑀺 𑀓𑀢𑁆𑀢𑀸 𑀦𑀢𑁆𑀣𑀻𑀢𑀺 𑀬𑀸𑀯𑀤𑀢𑁆𑀣𑀁 𑀔𑀸𑀤𑀺𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀫𑀡𑁆𑀟𑀮𑀕𑀼𑀫𑁆𑀩𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀚𑁆𑀚𑀦𑁆𑀢𑀺. 𑀮𑀼𑀤𑁆𑀤𑀓𑀸 𑀢𑁂𑀲𑀁 𑀧𑀫𑀢𑁆𑀢𑀪𑀸𑀯𑀁 𑀚𑀸𑀦𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬 𑀓𑁄𑀝𑁆𑀝𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀏𑀯𑀁 𑀢𑁂 𑀢𑀲𑁆𑀫𑀺𑀁 𑀦𑀺𑀯𑀸𑀧𑁂 𑀦𑁂𑀯𑀸𑀧𑀺𑀓𑀲𑁆𑀲 𑀬𑀣𑀸𑀓𑀸𑀫𑀓𑀭𑀡𑀻𑀬𑀸 𑀪𑀯𑀦𑁆𑀢𑀺.

𑁨𑁬𑁨. 𑀢𑀢𑁆𑀭, 𑀪𑀺𑀓𑁆𑀔𑀯𑁂𑀢𑀺, 𑀪𑀺𑀓𑁆𑀔𑀯𑁂, 𑀢𑁂𑀲𑀼 𑀫𑀺𑀕𑀚𑀸𑀢𑁂𑀲𑀼. 𑀧𑀞𑀫𑀸 𑀫𑀺𑀕𑀚𑀸𑀢𑀸𑀢𑀺, 𑀫𑀺𑀕𑀚𑀸𑀢𑀸 𑀧𑀞𑀫𑀤𑀼𑀢𑀺𑀬𑀸 𑀦𑀸𑀫 𑀦𑀢𑁆𑀣𑀺. 𑀪𑀕𑀯𑀸 𑀧𑀦 𑀆𑀕𑀢𑀧𑀝𑀺𑀧𑀸𑀝𑀺𑀯𑀲𑁂𑀦 𑀓𑀧𑁆𑀧𑁂𑀢𑁆𑀯𑀸 𑀧𑀞𑀫𑀸, 𑀤𑀼𑀢𑀺𑀬𑀸, 𑀢𑀢𑀺𑀬𑀸, 𑀘𑀢𑀼𑀢𑁆𑀣𑀸𑀢𑀺 𑀦𑀸𑀫𑀁 𑀆𑀭𑁄𑀧𑁂𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀇𑀤𑁆𑀥𑀸𑀦𑀼𑀪𑀸𑀯𑀸𑀢𑀺 𑀬𑀣𑀸𑀓𑀸𑀫𑀁 𑀓𑀢𑁆𑀢𑀩𑁆𑀩𑀪𑀸𑀯𑀢𑁄; 𑀯𑀲𑀻𑀪𑀸𑀯𑁄𑀬𑁂𑀯 𑀳𑀺 𑀏𑀢𑁆𑀣 𑀇𑀤𑁆𑀥𑀻𑀢𑀺 𑀘 𑀆𑀦𑀼𑀪𑀸𑀯𑁄𑀢𑀺 𑀘 𑀅𑀥𑀺𑀧𑁆𑀧𑁂𑀢𑁄.

𑁨𑁬𑁩. 𑀪𑀬𑀪𑁄𑀕𑀸𑀢𑀺 𑀪𑀬𑁂𑀦 𑀪𑁄𑀕𑀢𑁄. 𑀩𑀮𑀯𑀻𑀭𑀺𑀬𑀦𑁆𑀢𑀺 𑀅𑀧𑀭𑀸𑀧𑀭𑀁 𑀲𑀜𑁆𑀘𑀭𑀡𑀯𑀸𑀬𑁄𑀥𑀸𑀢𑀼, 𑀲𑀸 𑀧𑀭𑀺𑀳𑀸𑀬𑀻𑀢𑀺 𑀅𑀢𑁆𑀣𑁄.

𑁨𑁬𑁪. 𑀉𑀧𑀦𑀺𑀲𑁆𑀲𑀸𑀬 𑀆𑀲𑀬𑀁 𑀓𑀧𑁆𑀧𑁂𑀬𑁆𑀬𑀸𑀫𑀸𑀢𑀺 𑀅𑀦𑁆𑀢𑁄 𑀦𑀺𑀧𑀚𑁆𑀚𑀺𑀢𑁆𑀯𑀸 𑀔𑀸𑀤𑀦𑁆𑀢𑀸𑀦𑀫𑁆𑀧𑀺 𑀪𑀬𑀫𑁂𑀯, 𑀩𑀸𑀳𑀺𑀭𑀢𑁄 𑀆𑀕𑀦𑁆𑀢𑁆𑀯𑀸 𑀔𑀸𑀤𑀦𑁆𑀢𑀸𑀦𑀫𑁆𑀧𑀺 𑀪𑀬𑀫𑁂𑀯, 𑀫𑀬𑀁 𑀧𑀦 𑀅𑀫𑀼𑀁 𑀦𑀺𑀯𑀸𑀧𑀝𑁆𑀞𑀸𑀦𑀁 𑀦𑀺𑀲𑁆𑀲𑀸𑀬 𑀏𑀓𑀫𑀦𑁆𑀢𑁂 𑀆𑀲𑀬𑀁 𑀓𑀧𑁆𑀧𑁂𑀬𑁆𑀬𑀸𑀫𑀸𑀢𑀺 𑀘𑀺𑀦𑁆𑀢𑀬𑀺𑀁𑀲𑀼. 𑀉𑀧𑀦𑀺𑀲𑁆𑀲𑀸𑀬 𑀆𑀲𑀬𑀁 𑀓𑀧𑁆𑀧𑀬𑀺𑀁𑀲𑀽𑀢𑀺 𑀮𑀼𑀤𑁆𑀤𑀓𑀸 𑀦𑀸𑀫 𑀦 𑀲𑀩𑁆𑀩𑀓𑀸𑀮𑀁 𑀅𑀧𑁆𑀧𑀫𑀢𑁆𑀢𑀸 𑀳𑁄𑀦𑁆𑀢𑀺. 𑀫𑀬𑀁 𑀢𑀢𑁆𑀣 𑀢𑀢𑁆𑀣 𑀫𑀡𑁆𑀟𑀮𑀕𑀼𑀫𑁆𑀩𑁂𑀲𑀼 𑀘𑁂𑀯 𑀯𑀢𑀺𑀧𑀸𑀤𑁂𑀲𑀼 𑀘 𑀦𑀺𑀧𑀚𑁆𑀚𑀺𑀢𑁆𑀯𑀸 𑀏𑀢𑁂𑀲𑀼 𑀫𑀼𑀔𑀥𑁄𑀯𑀦𑀢𑁆𑀣𑀁 𑀯𑀸 𑀆𑀳𑀸𑀭𑀓𑀺𑀘𑁆𑀘𑀓𑀭𑀡𑀢𑁆𑀣𑀁 𑀯𑀸 𑀧𑀓𑁆𑀓𑀦𑁆𑀢𑁂𑀲𑀼 𑀦𑀺𑀯𑀸𑀧𑀯𑀢𑁆𑀣𑀼𑀁 𑀧𑀯𑀺𑀲𑀺𑀢𑁆𑀯𑀸 𑀔𑀸𑀤𑀺𑀢𑀫𑀢𑁆𑀢𑀁 𑀓𑀢𑁆𑀯𑀸 𑀅𑀫𑁆𑀳𑀸𑀓𑀁 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀺𑀲𑁆𑀲𑀸𑀫𑀸𑀢𑀺 𑀦𑀺𑀯𑀸𑀧𑀯𑀢𑁆𑀣𑀼𑀁 𑀉𑀧𑀦𑀺𑀲𑁆𑀲𑀸𑀬 𑀕𑀳𑀦𑁂𑀲𑀼 𑀕𑀼𑀫𑁆𑀩𑀯𑀢𑀺𑀧𑀸𑀤𑀸𑀤𑀻𑀲𑀼 𑀆𑀲𑀬𑀁 𑀓𑀧𑁆𑀧𑀬𑀺𑀁𑀲𑀼. 𑀪𑀼𑀜𑁆𑀚𑀺𑀁𑀲𑀽𑀢𑀺 𑀯𑀼𑀢𑁆𑀢𑀦𑀬𑁂𑀦 𑀮𑀼𑀤𑁆𑀤𑀓𑀸𑀦𑀁 𑀧𑀫𑀸𑀤𑀓𑀸𑀮𑀁 𑀜𑀢𑁆𑀯𑀸 𑀲𑀻𑀖𑀁 𑀲𑀻𑀖𑀁 𑀧𑀯𑀺𑀲𑀺𑀢𑁆𑀯𑀸 𑀪𑀼𑀜𑁆𑀚𑀺𑀁𑀲𑀼. 𑀓𑁂𑀢𑀩𑀺𑀦𑁄𑀢𑀺 𑀲𑀺𑀓𑁆𑀔𑀺𑀢𑀓𑁂𑀭𑀸𑀝𑀺𑀓𑀸. 𑀇𑀤𑁆𑀥𑀺𑀫𑀦𑁆𑀢𑀸𑀢𑀺 𑀇𑀤𑁆𑀥𑀺𑀫𑀦𑁆𑀢𑁄 𑀯𑀺𑀬. 𑀧𑀭𑀚𑀦𑀸𑀢𑀺 𑀬𑀓𑁆𑀔𑀸. 𑀇𑀫𑁂 𑀦 𑀫𑀺𑀕𑀚𑀸𑀢𑀸𑀢𑀺. 𑀆𑀕𑀢𑀺𑀁 𑀯𑀸 𑀕𑀢𑀺𑀁 𑀯𑀸𑀢𑀺 𑀇𑀫𑀺𑀦𑀸 𑀦𑀸𑀫 𑀞𑀸𑀦𑁂𑀦 𑀆𑀕𑀘𑁆𑀙𑀦𑁆𑀢𑀺, 𑀅𑀫𑀼𑀢𑁆𑀭 𑀕𑀘𑁆𑀙𑀦𑁆𑀢𑀻𑀢𑀺 𑀇𑀤𑀁 𑀦𑁂𑀲𑀁 𑀦 𑀚𑀸𑀦𑀸𑀫. 𑀤𑀡𑁆𑀟𑀯𑀸𑀓𑀭𑀸𑀳𑀻𑀢𑀺 𑀤𑀡𑁆𑀟𑀯𑀸𑀓𑀭𑀚𑀸𑀮𑁂𑀳𑀺. 𑀲𑀫𑀦𑁆𑀢𑀸 𑀲𑀧𑁆𑀧𑀤𑁂𑀲𑀁 𑀅𑀦𑀼𑀧𑀭𑀺𑀯𑀸𑀭𑁂𑀲𑀼𑀦𑁆𑀢𑀺 𑀅𑀢𑀺𑀫𑀸𑀬𑀸𑀯𑀺𑀦𑁄 𑀏𑀢𑁂, 𑀦 𑀤𑀽𑀭𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀲𑀦𑁆𑀢𑀺𑀓𑁂𑀬𑁂𑀯 𑀦𑀺𑀧𑀦𑁆𑀦𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀦𑀺𑀯𑀸𑀧𑀓𑁆𑀔𑁂𑀢𑁆𑀢𑀲𑁆𑀲 𑀲𑀫𑀦𑁆𑀢𑀸 𑀲𑀧𑁆𑀧𑀤𑁂𑀲𑀁 𑀫𑀳𑀦𑁆𑀢𑀁 𑀑𑀓𑀸𑀲𑀁 𑀅𑀦𑀼𑀧𑀭𑀺𑀯𑀸𑀭𑁂𑀲𑀼𑀁. 𑀅𑀤𑁆𑀤𑀲𑀁𑀲𑀽𑀢𑀺 𑀏𑀯𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀸𑀓𑀭𑀚𑀸𑀮𑀁 𑀲𑀫𑀦𑁆𑀢𑀢𑁄 𑀘𑀸𑀮𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀸 𑀅𑀤𑁆𑀤𑀲𑀁𑀲𑀼. 𑀬𑀢𑁆𑀣 𑀢𑁂𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀢𑁂 𑀕𑀸𑀳𑀁 𑀅𑀕𑀫𑀁𑀲𑀼, 𑀢𑀁 𑀞𑀸𑀦𑀁 𑀅𑀤𑁆𑀤𑀲𑀁𑀲𑀽𑀢𑀺 𑀅𑀢𑁆𑀣𑁄.

𑁨𑁬𑁫. 𑀬𑀁𑀦𑀽𑀦 𑀫𑀬𑀁 𑀬𑀢𑁆𑀣 𑀅𑀕𑀢𑀻𑀢𑀺 𑀢𑁂 𑀓𑀺𑀭 𑀏𑀯𑀁 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀅𑀦𑁆𑀢𑁄 𑀦𑀺𑀧𑀚𑁆𑀚𑀺𑀢𑁆𑀯𑀸 𑀅𑀦𑁆𑀢𑁄 𑀔𑀸𑀤𑀦𑁆𑀢𑀸𑀦𑀫𑁆𑀧𑀺 𑀪𑀬𑀫𑁂𑀯, 𑀩𑀸𑀳𑀺𑀭𑀢𑁄 𑀆𑀕𑀦𑁆𑀢𑁆𑀯𑀸 𑀔𑀸𑀤𑀦𑁆𑀢𑀸𑀦𑀫𑁆𑀧𑀺 𑀲𑀦𑁆𑀢𑀺𑀓𑁂 𑀯𑀲𑀺𑀢𑁆𑀯𑀸 𑀔𑀸𑀤𑀦𑁆𑀢𑀸𑀦𑀫𑁆𑀧𑀺 𑀪𑀬𑀫𑁂𑀯, 𑀢𑁂𑀧𑀺 𑀳𑀺 𑀯𑀸𑀓𑀭𑀚𑀸𑀮𑁂𑀦 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀳𑀺𑀢𑀸𑀬𑁂𑀯𑀸’’𑀢𑀺, 𑀢𑁂𑀦 𑀢𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀬𑀁𑀦𑀽𑀦 𑀫𑀬𑀁 𑀬𑀢𑁆𑀣 𑀦𑁂𑀯𑀸𑀧𑀺𑀓𑀲𑁆𑀲 𑀘 𑀦𑁂𑀯𑀸𑀧𑀺𑀓𑀧𑀭𑀺𑀲𑀸𑀬 𑀘 𑀅𑀕𑀢𑀺 𑀅𑀯𑀺𑀲𑀬𑁄, 𑀢𑀢𑁆𑀣 𑀢𑀢𑁆𑀣 𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬𑀸𑀫𑀸’’𑀢𑀺. 𑀅𑀜𑁆𑀜𑁂 𑀖𑀝𑁆𑀝𑁂𑀲𑁆𑀲𑀦𑁆𑀢𑀻𑀢𑀺 𑀢𑀢𑁄 𑀢𑀢𑁄 𑀤𑀽𑀭𑀢𑀭𑀯𑀸𑀲𑀺𑀦𑁄 𑀅𑀜𑁆𑀜𑁂 𑀖𑀝𑁆𑀝𑁂𑀲𑁆𑀲𑀦𑁆𑀢𑀺. 𑀢𑁂 𑀖𑀝𑁆𑀝𑀺𑀢𑀸 𑀅𑀜𑁆𑀜𑁂𑀢𑀺 𑀢𑁂𑀧𑀺 𑀖𑀝𑁆𑀝𑀺𑀢𑀸 𑀅𑀜𑁆𑀜𑁂 𑀢𑀢𑁄 𑀤𑀽𑀭𑀢𑀭𑀯𑀸𑀲𑀺𑀦𑁄 𑀖𑀝𑁆𑀝𑁂𑀲𑁆𑀲𑀦𑁆𑀢𑀺. 𑀏𑀯𑀁 𑀇𑀫𑀁 𑀦𑀺𑀯𑀸𑀧𑀁 𑀦𑀺𑀯𑀼𑀢𑁆𑀢𑀁 𑀲𑀩𑁆𑀩𑀲𑁄 𑀫𑀺𑀕𑀚𑀸𑀢𑀸 𑀧𑀭𑀺𑀫𑀼𑀘𑁆𑀘𑀺𑀲𑁆𑀲𑀦𑁆𑀢𑀻𑀢𑀺 𑀏𑀯𑀁 𑀇𑀫𑀁 𑀅𑀫𑁆𑀳𑁂𑀳𑀺 𑀦𑀺𑀯𑀼𑀢𑁆𑀢𑀁 𑀦𑀺𑀯𑀸𑀧𑀁 𑀲𑀩𑁆𑀩𑁂 𑀫𑀺𑀕𑀖𑀝𑀸 𑀫𑀺𑀕𑀲𑀗𑁆𑀖𑀸 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀦𑁆𑀢𑀺 𑀧𑀭𑀺𑀘𑁆𑀘𑀚𑀺𑀲𑁆𑀲𑀦𑁆𑀢𑀺. 𑀅𑀚𑁆𑀛𑀼𑀧𑁂𑀓𑁆𑀔𑁂𑀬𑁆𑀬𑀸𑀫𑀸𑀢𑀺 𑀢𑁂𑀲𑀁 𑀕𑀳𑀡𑁂 𑀅𑀩𑁆𑀬𑀸𑀯𑀝𑀸 𑀪𑀯𑁂𑀬𑁆𑀬𑀸𑀫𑀸𑀢𑀺; 𑀬𑀣𑀸 𑀢𑀣𑀸 𑀆𑀕𑀘𑁆𑀙𑀦𑁆𑀢𑁂𑀲𑀼 𑀳𑀺 𑀢𑀭𑀼𑀡𑀧𑁄𑀢𑀓𑁄 𑀯𑀸 𑀫𑀳𑀮𑁆𑀮𑀓𑁄 𑀯𑀸 𑀤𑀼𑀩𑁆𑀩𑀮𑁄 𑀯𑀸 𑀬𑀽𑀣𑀧𑀭𑀺𑀳𑀻𑀦𑁄 𑀯𑀸 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀮𑀤𑁆𑀥𑀼𑀁, 𑀅𑀦𑀸𑀕𑀘𑁆𑀙𑀦𑁆𑀢𑁂𑀲𑀼 𑀓𑀺𑀜𑁆𑀘𑀺 𑀦𑀢𑁆𑀣𑀺. 𑀅𑀚𑁆𑀛𑀼𑀧𑁂𑀓𑁆𑀔𑀺𑀁𑀲𑀼 𑀔𑁄, 𑀪𑀺𑀓𑁆𑀔𑀯𑁂𑀢𑀺 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀅𑀩𑁆𑀬𑀸𑀯𑀝𑀸𑀯 𑀅𑀳𑁂𑀲𑀼𑀁.

𑁨𑁬𑁭. 𑀅𑀫𑀼𑀁 𑀦𑀺𑀯𑀸𑀧𑀁 𑀦𑀺𑀯𑀼𑀢𑁆𑀢𑀁 𑀫𑀸𑀭𑀲𑁆𑀲 𑀅𑀫𑀽𑀦𑀺 𑀘 𑀮𑁄𑀓𑀸𑀫𑀺𑀲𑀸𑀦𑀻𑀢𑀺 𑀏𑀢𑁆𑀣 𑀦𑀺𑀯𑀸𑀧𑁄𑀢𑀺 𑀯𑀸 𑀮𑁄𑀓𑀸𑀫𑀺𑀲𑀸𑀦𑀻𑀢𑀺 𑀯𑀸 𑀯𑀝𑁆𑀝𑀸𑀫𑀺𑀲𑀪𑀽𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀓𑀸𑀫𑀕𑀼𑀡𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀫𑀸𑀭𑁄 𑀦 𑀘 𑀩𑀻𑀚𑀸𑀦𑀺 𑀯𑀺𑀬 𑀓𑀸𑀫𑀕𑀼𑀡𑁂 𑀯𑀧𑁂𑀦𑁆𑀢𑁄 𑀆𑀳𑀺𑀡𑁆𑀟𑀢𑀺, 𑀓𑀸𑀫𑀕𑀼𑀡𑀕𑀺𑀤𑁆𑀥𑀸𑀦𑀁 𑀧𑀦 𑀉𑀧𑀭𑀺 𑀯𑀲𑀁 𑀯𑀢𑁆𑀢𑁂𑀢𑀺, 𑀢𑀲𑁆𑀫𑀸 𑀓𑀸𑀫𑀕𑀼𑀡𑀸 𑀫𑀸𑀭𑀲𑁆𑀲 𑀦𑀺𑀯𑀸𑀧𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀫𑀼𑀁 𑀦𑀺𑀯𑀸𑀧𑀁 𑀦𑀺𑀯𑀼𑀢𑁆𑀢𑀁 𑀫𑀸𑀭𑀲𑁆𑀲𑀸’’𑀢𑀺. 𑀦 𑀧𑀭𑀺𑀫𑀼𑀘𑁆𑀘𑀺𑀁𑀲𑀼 𑀫𑀸𑀭𑀲𑁆𑀲 𑀇𑀤𑁆𑀥𑀸𑀦𑀼𑀪𑀸𑀯𑀸𑀢𑀺 𑀫𑀸𑀭𑀲𑁆𑀲 𑀯𑀲𑀁 𑀕𑀢𑀸 𑀅𑀳𑁂𑀲𑀼𑀁, 𑀬𑀣𑀸𑀓𑀸𑀫𑀓𑀭𑀡𑀻𑀬𑀸. 𑀅𑀬𑀁 𑀲𑀧𑀼𑀢𑁆𑀢𑀪𑀭𑀺𑀬𑀧𑀩𑁆𑀩𑀚𑁆𑀚𑀸𑀬 𑀆𑀕𑀢𑀉𑀧𑀫𑀸.

𑁨𑁬𑁮. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀧𑀭𑀺𑀳𑀸𑀬𑀻𑀢𑀺 𑀏𑀢𑁆𑀣 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀦𑀸𑀫 𑀅𑀭𑀜𑁆𑀜𑁂 𑀯𑀲𑀺𑀲𑁆𑀲𑀸𑀫𑀸𑀢𑀺 𑀉𑀧𑁆𑀧𑀦𑁆𑀦𑀅𑀚𑁆𑀛𑀸𑀲𑀬𑁄; 𑀲𑁄 𑀧𑀭𑀺𑀳𑀸𑀬𑀻𑀢𑀺 𑀅𑀢𑁆𑀣𑁄. 𑀢𑀣𑀽𑀧𑀫𑁂 𑀅𑀳𑀁 𑀇𑀫𑁂 𑀤𑀼𑀢𑀺𑀬𑁂𑀢𑀺 𑀅𑀬𑀁 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀺𑀓𑀧𑀩𑁆𑀩𑀚𑁆𑀚𑀸𑀬 𑀉𑀧𑀫𑀸. 𑀩𑁆𑀭𑀸𑀳𑁆𑀫𑀡𑀸 𑀳𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀸𑀦𑀺 𑀓𑁄𑀫𑀸𑀭𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑁆𑀯𑀸 𑀯𑀝𑁆𑀝𑀼𑀧𑀘𑁆𑀙𑁂𑀤𑀪𑀬𑁂𑀦 𑀧𑀯𑁂𑀡𑀺𑀁 𑀖𑀝𑀬𑀺𑀲𑁆𑀲𑀸𑀫𑀸𑀢𑀺 𑀥𑀦𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀪𑀭𑀺𑀬𑀁 𑀕𑀳𑁂𑀢𑁆𑀯𑀸 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑀸 𑀏𑀓𑀲𑁆𑀫𑀺𑀁 𑀧𑀼𑀢𑁆𑀢𑁂 𑀚𑀸𑀢𑁂 ‘‘𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑁄 𑀚𑀸𑀢𑁄 𑀯𑀝𑁆𑀝𑀁 𑀦 𑀉𑀘𑁆𑀙𑀺𑀦𑁆𑀦𑀁 𑀧𑀯𑁂𑀡𑀺 𑀖𑀝𑀺𑀢𑀸’’𑀢𑀺 𑀧𑀼𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀦𑁆𑀢𑀺 𑀯𑀸 𑀢𑀫𑁂𑀯 𑀯𑀸 𑀲’𑀓𑀮𑀢𑁆𑀢𑀯𑀸𑀲𑀁 𑀯𑀲𑀦𑁆𑀢𑀺.

𑁨𑁬𑁯. 𑀏𑀯𑀜𑁆𑀳𑀺 𑀢𑁂, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑀸𑀧𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦 𑀧𑀭𑀺𑀫𑀼𑀘𑁆𑀘𑀺𑀁𑀲𑀽𑀢𑀺 𑀧𑀼𑀭𑀺𑀫𑀸 𑀯𑀺𑀬 𑀢𑁂𑀧𑀺 𑀫𑀸𑀭𑀲𑁆𑀲 𑀇𑀤𑁆𑀥𑀸𑀦𑀼𑀪𑀸𑀯𑀸 𑀦 𑀫𑀼𑀘𑁆𑀘𑀺𑀁𑀲𑀼; 𑀬𑀣𑀸𑀓𑀸𑀫𑀓𑀭𑀡𑀻𑀬𑀸𑀯 𑀅𑀳𑁂𑀲𑀼𑀁. 𑀓𑀺𑀁 𑀧𑀦 𑀢𑁂 𑀅𑀓𑀁𑀲𑀽𑀢𑀺? 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀺𑀬𑁄 𑀑𑀲𑀭𑀺𑀢𑁆𑀯𑀸 𑀢𑁂𑀲𑀼 𑀢𑁂𑀲𑀼 𑀆𑀭𑀸𑀫𑀉𑀬𑁆𑀬𑀸𑀦𑀝𑁆𑀞𑀸𑀦𑁂𑀲𑀼 𑀅𑀲𑁆𑀲𑀫𑀁 𑀫𑀸𑀧𑁂𑀢𑁆𑀯𑀸 𑀦𑀺𑀯𑀲𑀦𑁆𑀢𑀸 𑀓𑀼𑀮𑀤𑀸𑀭𑀓𑁂 𑀳𑀢𑁆𑀣𑀺𑀅𑀲𑁆𑀲𑀭𑀣𑀲𑀺𑀧𑁆𑀧𑀸𑀤𑀻𑀦𑀺 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀲𑀺𑀧𑁆𑀧𑀸𑀦𑀺 𑀲𑀺𑀓𑁆𑀔𑀸𑀧𑁂𑀲𑀼𑀁. 𑀇𑀢𑀺 𑀢𑁂 𑀯𑀸𑀓𑀭𑀚𑀸𑀮𑁂𑀦 𑀢𑀢𑀺𑀬𑀸 𑀫𑀺𑀕𑀚𑀸𑀢𑀸 𑀯𑀺𑀬 𑀫𑀸𑀭𑀲𑁆𑀲 𑀧𑀸𑀧𑀺𑀫𑀢𑁄 𑀤𑀺𑀝𑁆𑀞𑀺𑀚𑀸𑀮𑁂𑀦 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀬𑀣𑀸𑀓𑀸𑀫𑀓𑀭𑀡𑀻𑀬𑀸 𑀅𑀳𑁂𑀲𑀼𑀁.

𑁨𑁭𑁦. 𑀢𑀣𑀽𑀧𑀫𑁂 𑀅𑀳𑀁 𑀇𑀫𑁂 𑀘𑀢𑀼𑀢𑁆𑀣𑁂𑀢𑀺 𑀅𑀬𑀁 𑀇𑀫𑀲𑁆𑀲 𑀲𑀸𑀲𑀦𑀲𑁆𑀲 𑀉𑀧𑀫𑀸 𑀆𑀳𑀝𑀸.

𑁨𑁭𑁧. 𑀅𑀦𑁆𑀥𑀫𑀓𑀸𑀲𑀺 𑀫𑀸𑀭𑀦𑁆𑀢𑀺 𑀦 𑀫𑀸𑀭𑀲𑁆𑀲 𑀅𑀓𑁆𑀔𑀻𑀦𑀺 𑀪𑀺𑀦𑁆𑀤𑀺. 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑁄 𑀇𑀫𑀁 𑀦𑀸𑀫 𑀆𑀭𑀫𑁆𑀫𑀡𑀁 𑀦𑀺𑀲𑁆𑀲𑀸𑀬 𑀘𑀺𑀢𑁆𑀢𑀁 𑀯𑀢𑁆𑀢𑀢𑀻𑀢𑀺 𑀫𑀸𑀭𑁄 𑀧𑀲𑁆𑀲𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀦𑁆𑀥𑀫𑀓𑀸𑀲𑀺 𑀫𑀸𑀭’’𑀦𑁆𑀢𑀺. 𑀅𑀧𑀤𑀁 𑀯𑀥𑀺𑀢𑁆𑀯𑀸 𑀫𑀸𑀭𑀘𑀓𑁆𑀔𑀼𑀦𑁆𑀢𑀺 𑀢𑁂𑀦𑁂𑀯 𑀧𑀭𑀺𑀬𑀸𑀬𑁂𑀦 𑀬𑀣𑀸 𑀫𑀸𑀭𑀲𑁆𑀲 𑀘𑀓𑁆𑀔𑀼 𑀅𑀧𑀤𑀁 𑀳𑁄𑀢𑀺 𑀦𑀺𑀧𑁆𑀧𑀤𑀁, 𑀅𑀧𑁆𑀧𑀢𑀺𑀝𑁆𑀞𑀁, 𑀦𑀺𑀭𑀸𑀭𑀫𑁆𑀫𑀡𑀁, 𑀏𑀯𑀁 𑀯𑀥𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀤𑀲𑁆𑀲𑀦𑀁 𑀕𑀢𑁄 𑀧𑀸𑀧𑀺𑀫𑀢𑁄𑀢𑀺 𑀢𑁂𑀦𑁂𑀯 𑀧𑀭𑀺𑀬𑀸𑀬𑁂𑀦 𑀫𑀸𑀭𑀲𑁆𑀲 𑀧𑀸𑀧𑀺𑀫𑀢𑁄 𑀅𑀤𑀲𑁆𑀲𑀦𑀁 𑀕𑀢𑁄. 𑀦 𑀳𑀺 𑀲𑁄 𑀅𑀢𑁆𑀢𑀦𑁄 𑀫𑀁𑀲𑀘𑀓𑁆𑀔𑀼𑀦𑀸 𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀜𑀸𑀡𑀲𑀭𑀻𑀭𑀁 𑀤𑀝𑁆𑀞𑀼𑀁 𑀲𑀓𑁆𑀓𑁄𑀢𑀺. 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻𑀢𑀺 𑀫𑀕𑁆𑀕𑀧𑀜𑁆𑀜𑀸𑀬 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀤𑀺𑀲𑁆𑀯𑀸 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀢𑀺𑀡𑁆𑀡𑁄 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀮𑁄𑀓𑁂 𑀲𑀢𑁆𑀢𑀯𑀺𑀲𑀢𑁆𑀢𑀪𑀸𑀯𑁂𑀦 𑀯𑀺𑀲𑀢𑁆𑀢𑀺𑀓𑀸𑀢𑀺 𑀏𑀯𑀁 𑀲𑀗𑁆𑀔𑀁 𑀕𑀢𑀁. 𑀅𑀣 𑀯𑀸 ‘‘𑀯𑀺𑀲𑀢𑁆𑀢𑀺𑀓𑀸𑀢𑀺 𑀓𑁂𑀦𑀝𑁆𑀞𑁂𑀦 𑀯𑀺𑀲𑀢𑁆𑀢𑀺𑀓𑀸? 𑀯𑀺𑀲𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸 𑀯𑀺𑀲𑀝𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀧𑀼𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀸𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀫𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀓𑁆𑀓𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀁 𑀳𑀭𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀁𑀯𑀸𑀤𑀺𑀓𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀫𑀽𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀨𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀧𑀭𑀺𑀪𑁄𑀕𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀸𑀮𑀸 𑀯𑀸 𑀧𑀦 𑀲𑀸 𑀢𑀡𑁆𑀳𑀸 𑀭𑀽𑀧𑁂 𑀲𑀤𑁆𑀤𑁂 𑀕𑀦𑁆𑀥𑁂 𑀭𑀲𑁂 𑀨𑁄𑀝𑁆𑀞𑀩𑁆𑀩𑁂’’𑀢𑀺 (𑀫𑀳𑀸𑀦𑀺. 𑁩; 𑀘𑀽𑀴𑀦𑀺. 𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁨𑁨, 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁪) 𑀯𑀺𑀲𑀢𑁆𑀢𑀺𑀓𑀸. 𑀏𑀯𑀁 𑀯𑀺𑀲𑀢𑁆𑀢𑀺𑀓𑀸𑀢𑀺 𑀲𑀗𑁆𑀔𑀁 𑀕𑀢𑀁 𑀢𑀡𑁆𑀳𑀁 𑀢𑀺𑀡𑁆𑀡𑁄 𑀦𑀺𑀢𑁆𑀢𑀺𑀡𑁆𑀡𑁄 𑀉𑀢𑁆𑀢𑀺𑀡𑁆𑀡𑁄. 𑀢𑁂𑀦 𑀯𑀼𑀘𑁆𑀘𑀢𑀺 𑁋 ‘‘𑀢𑀺𑀡𑁆𑀡𑁄 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀦𑀺𑀯𑀸𑀧𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀧𑀸𑀲𑀭𑀸𑀲𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭𑁨. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀧𑀸𑀲𑀭𑀸𑀲𑀺𑀲𑀼𑀢𑁆𑀢𑀁. 𑀢𑀢𑁆𑀣 𑀲𑀸𑀥𑀼 𑀫𑀬𑀁, 𑀆𑀯𑀼𑀲𑁄𑀢𑀺 𑀆𑀬𑀸𑀘𑀦𑁆𑀢𑀸 𑀪𑀡𑀦𑁆𑀢𑀺. 𑀏𑀢𑁂 𑀓𑀺𑀭 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀚𑀦𑀧𑀤𑀯𑀸𑀲𑀺𑀦𑁄 ‘‘𑀤𑀲𑀩𑀮𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀲𑀸𑀯𑀢𑁆𑀣𑀺𑀁 𑀅𑀦𑀼𑀧𑁆𑀧𑀢𑁆𑀢𑀸. 𑀲𑀢𑁆𑀣𑀼𑀤𑀲𑁆𑀲𑀦𑀁 𑀧𑀦 𑀏𑀢𑁂𑀳𑀺 𑀮𑀤𑁆𑀥𑀁, 𑀥𑀫𑁆𑀫𑀺𑀁 𑀓𑀣𑀁 𑀦 𑀢𑀸𑀯 𑀲𑀼𑀡𑀦𑁆𑀢𑀺. 𑀢𑁂 𑀲𑀢𑁆𑀣𑀼𑀕𑀸𑀭𑀯𑁂𑀦 ‘‘𑀅𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀥𑀫𑁆𑀫𑀓𑀣𑀁 𑀓𑀣𑁂𑀣𑀸’’𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀩𑀼𑀤𑁆𑀥𑀸 𑀳𑀺 𑀕𑀭𑀽 𑀳𑁄𑀦𑁆𑀢𑀺, 𑀏𑀓𑀘𑀸𑀭𑀺𑀓𑁄 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀯𑀺𑀬, 𑀧𑀪𑀺𑀦𑁆𑀦𑀓𑀼𑀜𑁆𑀚𑀭𑁄 𑀯𑀺𑀬, 𑀨𑀡𑀓𑀢𑀆𑀲𑀻𑀯𑀺𑀲𑁄 𑀯𑀺𑀬, 𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀯𑀺𑀬 𑀘 𑀤𑀼𑀭𑀸𑀲𑀤𑀸 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀆𑀲𑀻𑀯𑀺𑀲𑁄 𑀬𑀣𑀸 𑀖𑁄𑀭𑁄, 𑀫𑀺𑀕𑀭𑀸𑀚𑀸𑀯 𑀓𑁂𑀲𑀭𑀻;

𑀦𑀸𑀕𑁄𑀯 𑀓𑀼𑀜𑁆𑀚𑀭𑁄 𑀤𑀦𑁆𑀢𑀻, 𑀏𑀯𑀁 𑀩𑀼𑀤𑁆𑀥𑀸 𑀤𑀼𑀭𑀸𑀲𑀤𑀸’’𑀢𑀺.

𑀏𑀯𑀁 𑀤𑀼𑀭𑀸𑀲𑀤𑀁 𑀲𑀢𑁆𑀣𑀸𑀭𑀁 𑀢𑁂 𑀪𑀺𑀓𑁆𑀔𑀽 𑀲𑀬𑀁 𑀬𑀸𑀘𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀬𑀸𑀘𑀫𑀸𑀦𑀸 ‘‘𑀲𑀸𑀥𑀼 𑀫𑀬𑀁, 𑀆𑀯𑀼𑀲𑁄’’𑀢𑀺 𑀆𑀳𑀁𑀲𑀼.

𑀅𑀧𑁆𑀧𑁂𑀯 𑀦𑀸𑀫𑀸𑀢𑀺 𑀅𑀧𑀺 𑀦𑀸𑀫 𑀮𑀪𑁂𑀬𑁆𑀬𑀸𑀣. 𑀓𑀲𑁆𑀫𑀸 𑀧𑀦 𑀣𑁂𑀭𑁄 𑀢𑁂 𑀪𑀺𑀓𑁆𑀔𑀽 ‘‘𑀭𑀫𑁆𑀫𑀓𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀲𑁆𑀲𑀫𑀁 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀣𑀸’’𑀢𑀺 𑀆𑀳? 𑀧𑀸𑀓𑀝𑀓𑀺𑀭𑀺𑀬𑀢𑀸𑀬. 𑀤𑀲𑀩𑀮𑀲𑁆𑀲 𑀳𑀺 𑀓𑀺𑀭𑀺𑀬𑀸 𑀣𑁂𑀭𑀲𑁆𑀲 𑀧𑀸𑀓𑀝𑀸 𑀳𑁄𑀢𑀺; 𑀚𑀸𑀦𑀸𑀢𑀺 𑀣𑁂𑀭𑁄, ‘‘𑀅𑀚𑁆𑀚 𑀲𑀢𑁆𑀣𑀸 𑀚𑁂𑀢𑀯𑀦𑁂 𑀯𑀲𑀺𑀢𑁆𑀯𑀸 𑀧𑀼𑀩𑁆𑀩𑀸𑀭𑀸𑀫𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀭𑀺𑀲𑁆𑀲𑀢𑀺; 𑀅𑀚𑁆𑀚 𑀧𑀼𑀩𑁆𑀩𑀸𑀭𑀸𑀫𑁂 𑀯𑀲𑀺𑀢𑁆𑀯𑀸 𑀚𑁂𑀢𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀭𑀺𑀲𑁆𑀲𑀢𑀺; 𑀅𑀚𑁆𑀚 𑀏𑀓𑀓𑁄𑀯 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀲𑁆𑀲𑀢𑀺; 𑀅𑀚𑁆𑀚 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀚𑀦𑀧𑀤𑀘𑀸𑀭𑀺𑀓𑀁 𑀦𑀺𑀓𑁆𑀔𑀫𑀺𑀲𑁆𑀲𑀢𑀻’’𑀢𑀺. 𑀓𑀺𑀁 𑀧𑀦𑀲𑁆𑀲 𑀏𑀯𑀁 𑀚𑀸𑀦𑀦𑀢𑁆𑀣𑀁 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀅𑀢𑁆𑀣𑀻𑀢𑀺? 𑀦𑀢𑁆𑀣𑀺. 𑀅𑀦𑀼𑀫𑀸𑀦𑀩𑀼𑀤𑁆𑀥𑀺𑀬𑀸 𑀧𑀦 𑀓𑀢𑀓𑀺𑀭𑀺𑀬𑀸𑀬 𑀦𑀬𑀕𑁆𑀕𑀸𑀳𑁂𑀦 𑀚𑀸𑀦𑀸𑀢𑀺. 𑀬𑀜𑁆𑀳𑀺 𑀤𑀺𑀯𑀲𑀁 𑀪𑀕𑀯𑀸 𑀚𑁂𑀢𑀯𑀦𑁂 𑀯𑀲𑀺𑀢𑁆𑀯𑀸 𑀧𑀼𑀩𑁆𑀩𑀸𑀭𑀸𑀫𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀤𑀸 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀪𑀡𑁆𑀟𑀸𑀦𑀁 𑀧𑀝𑀺𑀲𑀸𑀫𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀺, 𑀣𑁂𑀭𑁄 𑀲𑀫𑁆𑀫𑀚𑁆𑀚𑀦𑀺𑀲𑀗𑁆𑀓𑀸𑀭𑀙𑀟𑁆𑀟𑀦𑀓𑀸𑀤𑀻𑀦𑀺 𑀧𑀝𑀺𑀲𑀸𑀫𑁂𑀢𑀺. 𑀧𑀼𑀩𑁆𑀩𑀸𑀭𑀸𑀫𑁂 𑀯𑀲𑀺𑀢𑁆𑀯𑀸 𑀚𑁂𑀢𑀯𑀦𑀁 𑀤𑀺𑀯𑀸𑀯𑀺𑀳𑀸𑀭𑀸𑀬 𑀆𑀕𑀫𑀦𑀓𑀸𑀮𑁂𑀧𑀺 𑀏𑀲𑁂𑀯 𑀦𑀬𑁄.

𑀬𑀤𑀸 𑀧𑀦 𑀏𑀓𑀓𑁄 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀤𑀸 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀻𑀤𑀢𑀺. 𑀣𑁂𑀭𑁄 ‘‘𑀅𑀚𑁆𑀚 𑀪𑀕𑀯𑀸 𑀩𑁄𑀥𑀦𑁂𑀬𑁆𑀬𑀩𑀦𑁆𑀥𑀯𑀁 𑀤𑀺𑀲𑁆𑀯𑀸 𑀦𑀺𑀲𑀺𑀦𑁆𑀦𑁄’’𑀢𑀺 𑀢𑀸𑀬 𑀲𑀜𑁆𑀜𑀸𑀬 𑀜𑀢𑁆𑀯𑀸 ‘‘𑀅𑀚𑁆𑀚, 𑀆𑀯𑀼𑀲𑁄, 𑀪𑀕𑀯𑀸 𑀏𑀓𑀓𑁄 𑀧𑀯𑀺𑀲𑀺𑀢𑀼𑀓𑀸𑀫𑁄, 𑀢𑀼𑀫𑁆𑀳𑁂 𑀪𑀺𑀓𑁆𑀔𑀸𑀘𑀸𑀭𑀲𑀚𑁆𑀚𑀸 𑀳𑁄𑀣𑀸’’𑀢𑀺 𑀪𑀺𑀓𑁆𑀔𑀽𑀦𑀁 𑀲𑀜𑁆𑀜𑀁 𑀤𑁂𑀢𑀺. 𑀬𑀤𑀸 𑀧𑀦 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀤𑀸 𑀕𑀦𑁆𑀥𑀓𑀼𑀝𑀺𑀤𑁆𑀯𑀸𑀭𑀁 𑀉𑀧𑀟𑁆𑀠𑀧𑀺𑀤𑀳𑀺𑀢𑀁 𑀓𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀣𑁂𑀭𑁄 𑀢𑀸𑀬 𑀲𑀜𑁆𑀜𑀸𑀬 𑀜𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀕𑁆𑀕𑀳𑀡𑀢𑁆𑀣𑀸𑀬 𑀪𑀺𑀓𑁆𑀔𑀽𑀦𑀁 𑀲𑀜𑁆𑀜𑀁 𑀤𑁂𑀢𑀺. 𑀬𑀤𑀸 𑀚𑀦𑀧𑀤𑀘𑀸𑀭𑀺𑀓𑀁 𑀦𑀺𑀓𑁆𑀔𑀫𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀤𑀸 𑀏𑀓𑀁 𑀤𑁆𑀯𑁂 𑀆𑀮𑁄𑀧𑁂 𑀅𑀢𑀺𑀭𑁂𑀓𑀁 𑀪𑀼𑀜𑁆𑀚𑀢𑀺, 𑀲𑀩𑁆𑀩𑀓𑀸𑀮𑀁 𑀘𑀗𑁆𑀓𑀫𑀦𑀜𑁆𑀘𑀸𑀭𑀼𑀬𑁆𑀳 𑀅𑀧𑀭𑀸𑀧𑀭𑀁 𑀘𑀗𑁆𑀓𑀫𑀢𑀺, 𑀣𑁂𑀭𑁄 𑀢𑀸𑀬 𑀲𑀜𑁆𑀜𑀸𑀬 𑀜𑀢𑁆𑀯𑀸 ‘‘𑀪𑀕𑀯𑀸, 𑀆𑀯𑀼𑀲𑁄, 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀺𑀢𑀼𑀓𑀸𑀫𑁄, 𑀢𑀼𑀫𑁆𑀳𑀸𑀓𑀁 𑀓𑀢𑁆𑀢𑀩𑁆𑀩𑀁 𑀓𑀭𑁄𑀣𑀸’’𑀢𑀺 𑀪𑀺𑀓𑁆𑀔𑀽𑀦𑀁 𑀲𑀜𑁆𑀜𑀁 𑀤𑁂𑀢𑀺.

𑀪𑀕𑀯𑀸 𑀧𑀞𑀫𑀩𑁄𑀥𑀺𑀬𑀁 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀅𑀦𑀺𑀩𑀤𑁆𑀥𑀯𑀸𑀲𑁄 𑀅𑀳𑁄𑀲𑀺, 𑀧𑀘𑁆𑀙𑀸 𑀧𑀜𑁆𑀘𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀅𑀩𑁆𑀩𑁄𑀓𑀺𑀡𑁆𑀡𑀁 𑀲𑀸𑀯𑀢𑁆𑀣𑀺𑀁𑀬𑁂𑀯 𑀉𑀧𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁄 𑀏𑀓𑀤𑀺𑀯𑀲𑁂 𑀤𑁆𑀯𑁂 𑀞𑀸𑀦𑀸𑀦𑀺 𑀧𑀭𑀺𑀪𑀼𑀜𑁆𑀚𑀢𑀺. 𑀚𑁂𑀢𑀯𑀦𑁂 𑀭𑀢𑁆𑀢𑀺𑀁 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀼𑀩𑁆𑀩𑀸𑀭𑀸𑀫𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀭𑁄𑀢𑀺. 𑀧𑀼𑀩𑁆𑀩𑀸𑀭𑀸𑀫𑁂 𑀭𑀢𑁆𑀢𑀺𑀁 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀚𑁂𑀢𑀯𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀭𑁄𑀢𑀺. 𑀓𑀲𑁆𑀫𑀸? 𑀤𑁆𑀯𑀺𑀦𑁆𑀦𑀁 𑀓𑀼𑀮𑀸𑀦𑀁 𑀅𑀦𑀼𑀓𑀫𑁆𑀧𑀸𑀬. 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀞𑀺𑀢𑁂𑀦 𑀳𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀯𑀺𑀬 𑀅𑀜𑁆𑀜𑁂𑀦 𑀓𑁂𑀦𑀘𑀺, 𑀫𑀸𑀢𑀼𑀕𑀸𑀫𑀢𑁆𑀢𑀪𑀸𑀯𑁂 𑀞𑀺𑀢𑀸𑀬 𑀘 𑀯𑀺𑀲𑀸𑀔𑀸𑀬 𑀯𑀺𑀬 𑀅𑀜𑁆𑀜𑀸𑀬 𑀇𑀢𑁆𑀣𑀺𑀬𑀸 𑀢𑀣𑀸𑀕𑀢𑀁 𑀉𑀤𑁆𑀤𑀺𑀲𑁆𑀲 𑀥𑀦𑀧𑀭𑀺𑀘𑁆𑀘𑀸𑀕𑁄 𑀓𑀢𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀪𑀕𑀯𑀸 𑀢𑁂𑀲𑀁 𑀅𑀦𑀼𑀓𑀫𑁆𑀧𑀸𑀬 𑀏𑀓𑀤𑀺𑀯𑀲𑁂 𑀇𑀫𑀸𑀦𑀺 𑀤𑁆𑀯𑁂 𑀞𑀸𑀦𑀸𑀦𑀺 𑀧𑀭𑀺𑀪𑀼𑀜𑁆𑀚𑀢𑀺. 𑀢𑀲𑁆𑀫𑀺𑀁 𑀧𑀦 𑀤𑀺𑀯𑀲𑁂 𑀚𑁂𑀢𑀯𑀦𑁂 𑀯𑀲𑀺, 𑀢𑀲𑁆𑀫𑀸 𑀣𑁂𑀭𑁄 𑁋 ‘‘𑀅𑀚𑁆𑀚 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀲𑀸𑀬𑀦𑁆𑀳𑀓𑀸𑀮𑁂 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀦𑀢𑁆𑀣𑀸𑀬 𑀧𑀼𑀩𑁆𑀩𑀓𑁄𑀝𑁆𑀞𑀓𑀁 𑀕𑀫𑀺𑀲𑁆𑀲𑀢𑀺; 𑀅𑀣𑀸𑀳𑀁 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑁆𑀯𑀸 𑀞𑀺𑀢𑀁 𑀪𑀕𑀯𑀦𑁆𑀢𑀁 𑀬𑀸𑀘𑀺𑀢𑁆𑀯𑀸 𑀭𑀫𑁆𑀫𑀓𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀲𑁆𑀲𑀫𑀁 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀺. 𑀏𑀯𑀫𑀺𑀫𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀮𑀪𑀺𑀲𑁆𑀲𑀦𑁆𑀢𑀺 𑀥𑀫𑁆𑀫𑀓𑀣𑀁 𑀲𑀯𑀦𑀸𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀏𑀯𑀫𑀸𑀳.

𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁄𑀢𑀺 𑀯𑀺𑀲𑀸𑀔𑀸𑀬 𑀧𑀸𑀲𑀸𑀤𑁄. 𑀲𑀸 𑀳𑀺 𑀫𑀺𑀕𑀸𑀭𑁂𑀦 𑀲𑁂𑀝𑁆𑀞𑀺𑀦𑀸 𑀫𑀸𑀢𑀼𑀝𑁆𑀞𑀸𑀦𑁂 𑀞𑀧𑀺𑀢𑀢𑁆𑀢𑀸 𑀫𑀺𑀕𑀸𑀭𑀫𑀸𑀢𑀸𑀢𑀺 𑀯𑀼𑀘𑁆𑀘𑀢𑀺. 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀢𑀲𑁆𑀫𑀺𑀁 𑀓𑀺𑀭 𑀧𑀸𑀲𑀸𑀤𑁂 𑀤𑁆𑀯𑀺𑀦𑁆𑀦𑀁 𑀫𑀳𑀸𑀲𑀸𑀯𑀓𑀸𑀦𑀁 𑀲𑀺𑀭𑀺𑀕𑀩𑁆𑀪𑀸𑀦𑀁 𑀫𑀚𑁆𑀛𑁂 𑀪𑀕𑀯𑀢𑁄 𑀲𑀺𑀭𑀺𑀕𑀩𑁆𑀪𑁄 𑀅𑀳𑁄𑀲𑀺. 𑀣𑁂𑀭𑁄 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀅𑀦𑁆𑀢𑁄𑀕𑀩𑁆𑀪𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀫𑀸𑀮𑀸𑀓𑀘𑀯𑀭𑀁 𑀦𑀻𑀳𑀭𑀺𑀢𑁆𑀯𑀸 𑀫𑀜𑁆𑀘𑀧𑀻𑀞𑀁 𑀧𑀜𑁆𑀜𑀧𑁂𑀢𑁆𑀯𑀸 𑀲𑀢𑁆𑀣𑀼 𑀲𑀜𑁆𑀜𑀁 𑀅𑀤𑀸𑀲𑀺. 𑀲𑀢𑁆𑀣𑀸 𑀲𑀺𑀭𑀺𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀲𑀻𑀳𑀲𑁂𑀬𑁆𑀬𑀁 𑀉𑀧𑀕𑀫𑁆𑀫 𑀤𑀭𑀣𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑁆𑀯𑀸 𑀉𑀝𑁆𑀞𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀢𑀢𑁄 𑀯𑀼𑀝𑁆𑀞𑀸𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄’’𑀢𑀺.

𑀧𑀭𑀺𑀲𑀺𑀜𑁆𑀘𑀺𑀢𑀼𑀦𑁆𑀢𑀺 𑀬𑁄 𑀳𑀺 𑀘𑀼𑀡𑁆𑀡𑀫𑀢𑁆𑀢𑀺𑀓𑀸𑀤𑀻𑀳𑀺 𑀕𑀢𑁆𑀢𑀸𑀦𑀺 𑀉𑀩𑁆𑀩𑀝𑁆𑀝𑁂𑀦𑁆𑀢𑁄 𑀫𑀮𑁆𑀮𑀓𑀫𑀼𑀝𑁆𑀞𑀸𑀤𑀻𑀳𑀺 𑀯𑀸 𑀖𑀁𑀲𑀦𑁆𑀢𑁄 𑀦𑁆𑀳𑀸𑀬𑀢𑀺, 𑀲𑁄 𑀦𑁆𑀳𑀸𑀬𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀬𑁄 𑀢𑀣𑀸 𑀅𑀓𑀢𑁆𑀯𑀸 𑀧𑀓𑀢𑀺𑀬𑀸𑀯 𑀦𑁆𑀳𑀸𑀬𑀢𑀺, 𑀲𑁄 𑀧𑀭𑀺𑀲𑀺𑀜𑁆𑀘𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀪𑀕𑀯𑀢𑁄𑀧𑀺 𑀲𑀭𑀻𑀭𑁂 𑀢𑀣𑀸 𑀳𑀭𑀺𑀢𑀩𑁆𑀩𑀁 𑀭𑀚𑁄𑀚𑀮𑁆𑀮𑀁 𑀦𑀸𑀫 𑀦 𑀉𑀧𑀮𑀺𑀫𑁆𑀧𑀢𑀺, 𑀉𑀢𑀼𑀕𑁆𑀕𑀳𑀡𑀢𑁆𑀣𑀁 𑀧𑀦 𑀪𑀕𑀯𑀸 𑀓𑁂𑀯𑀮𑀁 𑀉𑀤𑀓𑀁 𑀑𑀢𑀭𑀢𑀺. 𑀢𑁂𑀦𑀸𑀳 𑁋 ‘‘𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑀼’’𑀦𑁆𑀢𑀺. 𑀧𑀼𑀩𑁆𑀩𑀓𑁄𑀝𑁆𑀞𑀓𑁄𑀢𑀺 𑀧𑀸𑀘𑀻𑀦𑀓𑁄𑀝𑁆𑀞𑀓𑁄.

𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀯𑀺𑀳𑀸𑀭𑁄 𑀓𑀤𑀸𑀘𑀺 𑀫𑀳𑀸 𑀳𑁄𑀢𑀺 𑀓𑀤𑀸𑀘𑀺 𑀔𑀼𑀤𑁆𑀤𑀓𑁄. 𑀢𑀣𑀸 𑀳𑀺 𑀲𑁄 𑀯𑀺𑀧𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀓𑀸𑀮𑁂 𑀬𑁄𑀚𑀦𑀺𑀓𑁄 𑀅𑀳𑁄𑀲𑀺, 𑀲𑀺𑀔𑀺𑀲𑁆𑀲 𑀢𑀺𑀕𑀸𑀯𑀼𑀢𑁄, 𑀯𑁂𑀲𑁆𑀲𑀪𑀼𑀲𑁆𑀲 𑀅𑀟𑁆𑀠𑀬𑁄𑀚𑀦𑀺𑀓𑁄, 𑀓𑀓𑀼𑀲𑀦𑁆𑀥𑀲𑁆𑀲 𑀕𑀸𑀯𑀼𑀢𑀧𑁆𑀧𑀫𑀸𑀡𑁄, 𑀓𑁄𑀡𑀸𑀕𑀫𑀦𑀲𑁆𑀲 𑀅𑀟𑁆𑀠𑀕𑀸𑀯𑀼𑀢𑀧𑁆𑀧𑀫𑀸𑀡𑁄, 𑀓𑀲𑁆𑀲𑀧𑀲𑁆𑀲 𑀯𑀻𑀲𑀢𑀺𑀉𑀲𑀪𑀧𑁆𑀧𑀫𑀸𑀡𑁄, 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀅𑀝𑁆𑀞𑀓𑀭𑀻𑀲𑀧𑁆𑀧𑀫𑀸𑀡𑁄 𑀚𑀸𑀢𑁄. 𑀢𑀫𑁆𑀧𑀺 𑀦𑀕𑀭𑀁 𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀓𑀤𑀸𑀘𑀺 𑀧𑀸𑀘𑀻𑀦𑀢𑁄 𑀳𑁄𑀢𑀺, 𑀓𑀤𑀸𑀘𑀺 𑀤𑀓𑁆𑀔𑀺𑀡𑀢𑁄, 𑀓𑀤𑀸𑀘𑀺 𑀧𑀘𑁆𑀙𑀺𑀫𑀢𑁄, 𑀓𑀤𑀸𑀘𑀺 𑀉𑀢𑁆𑀢𑀭𑀢𑁄. 𑀚𑁂𑀢𑀯𑀦𑁂 𑀕𑀦𑁆𑀥𑀓𑀼𑀝𑀺𑀬𑀁 𑀧𑀦 𑀘𑀢𑀼𑀦𑁆𑀦𑀁 𑀫𑀜𑁆𑀘𑀧𑀸𑀤𑀸𑀦𑀁 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀁 𑀅𑀘𑀮𑀫𑁂𑀯.

𑀘𑀢𑁆𑀢𑀸𑀭𑀺 𑀳𑀺 𑀅𑀘𑀮𑀘𑁂𑀢𑀺𑀬𑀝𑁆𑀞𑀸𑀦𑀸𑀦𑀺 𑀦𑀸𑀫 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀝𑁆𑀞𑀸𑀦𑀁 𑀇𑀲𑀺𑀧𑀢𑀦𑁂 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀝𑁆𑀞𑀸𑀦𑀁 𑀲𑀗𑁆𑀓𑀲𑁆𑀲𑀦𑀕𑀭𑀤𑁆𑀯𑀸𑀭𑁂 𑀤𑁂𑀯𑁄𑀭𑁄𑀳𑀡𑀓𑀸𑀮𑁂 𑀲𑁄𑀧𑀸𑀦𑀲𑁆𑀲 𑀧𑀢𑀺𑀝𑁆𑀞𑀝𑁆𑀞𑀸𑀦𑀁 𑀫𑀜𑁆𑀘𑀧𑀸𑀤𑀝𑁆𑀞𑀸𑀦𑀦𑁆𑀢𑀺. 𑀅𑀬𑀁 𑀧𑀦 𑀧𑀼𑀩𑁆𑀩𑀓𑁄𑀝𑁆𑀞𑀓𑁄 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀯𑀻𑀲𑀢𑀺𑀉𑀲𑀪𑀯𑀺𑀳𑀸𑀭𑀓𑀸𑀮𑁂 𑀧𑀸𑀘𑀻𑀦𑀤𑁆𑀯𑀸𑀭𑁂 𑀓𑁄𑀝𑁆𑀞𑀓𑁄 𑀅𑀳𑁄𑀲𑀺. 𑀲𑁄 𑀇𑀤𑀸𑀦𑀺𑀧𑀺 𑀧𑀼𑀩𑁆𑀩𑀓𑁄𑀝𑁆𑀞𑀓𑁄𑀢𑁆𑀯𑁂𑀯 𑀧𑀜𑁆𑀜𑀸𑀬𑀢𑀺. 𑀓𑀲𑁆𑀲𑀧𑀤𑀲𑀩𑀮𑀲𑁆𑀲 𑀓𑀸𑀮𑁂 𑀅𑀘𑀺𑀭𑀯𑀢𑀻 𑀦𑀕𑀭𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀦𑁆𑀤𑀫𑀸𑀦𑀸 𑀧𑀼𑀩𑁆𑀩𑀓𑁄𑀝𑁆𑀞𑀓𑀁 𑀧𑀢𑁆𑀯𑀸 𑀉𑀤𑀓𑁂𑀦 𑀪𑀺𑀦𑁆𑀤𑀺𑀢𑁆𑀯𑀸 𑀫𑀳𑀦𑁆𑀢𑀁 𑀉𑀤𑀓𑀭𑀳𑀤𑀁 𑀫𑀸𑀧𑁂𑀲𑀺 𑀲𑀫𑀢𑀺𑀢𑁆𑀣𑀁 𑀅𑀦𑀼𑀧𑀼𑀩𑁆𑀩𑀕𑀫𑁆𑀪𑀻𑀭𑀁. 𑀢𑀢𑁆𑀣 𑀏𑀓𑀁 𑀭𑀜𑁆𑀜𑁄 𑀦𑁆𑀳𑀸𑀦𑀢𑀺𑀢𑁆𑀣𑀁, 𑀏𑀓𑀁 𑀦𑀸𑀕𑀭𑀸𑀦𑀁, 𑀏𑀓𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀏𑀓𑀁 𑀩𑀼𑀤𑁆𑀥𑀸𑀦𑀦𑁆𑀢𑀺 𑀏𑀯𑀁 𑀧𑀸𑀝𑀺𑀬𑁂𑀓𑁆𑀓𑀸𑀦𑀺 𑀦𑁆𑀳𑀸𑀦𑀢𑀺𑀢𑁆𑀣𑀸𑀦𑀺 𑀳𑁄𑀦𑁆𑀢𑀺 𑀭𑀫𑀡𑀻𑀬𑀸𑀦𑀺 𑀯𑀺𑀧𑁆𑀧𑀓𑀺𑀡𑁆𑀡𑀭𑀚𑀢𑀧𑀝𑁆𑀝𑀲𑀤𑀺𑀲𑀯𑀸𑀮𑀺𑀓𑀸𑀦𑀺. 𑀇𑀢𑀺 𑀪𑀕𑀯𑀸 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀲𑀤𑁆𑀥𑀺𑀁 𑀬𑁂𑀦 𑀅𑀬𑀁 𑀏𑀯𑀭𑀽𑀧𑁄 𑀧𑀼𑀩𑁆𑀩𑀓𑁄𑀝𑁆𑀞𑀓𑁄 𑀢𑁂𑀦𑀼𑀧𑀲𑀗𑁆𑀓𑀫𑀺 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑀼𑀁. 𑀅𑀣𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀉𑀤𑀓𑀲𑀸𑀝𑀺𑀓𑀁 𑀉𑀧𑀦𑁂𑀲𑀺. 𑀪𑀕𑀯𑀸 𑀭𑀢𑁆𑀢𑀤𑀼𑀧𑀝𑁆𑀝𑀁 𑀅𑀧𑀦𑁂𑀢𑁆𑀯𑀸 𑀉𑀤𑀓𑀲𑀸𑀝𑀺𑀓𑀁 𑀦𑀺𑀯𑀸𑀲𑁂𑀲𑀺. 𑀣𑁂𑀭𑁄 𑀤𑀼𑀧𑀝𑁆𑀝𑁂𑀦 𑀲𑀤𑁆𑀥𑀺𑀁 𑀫𑀳𑀸𑀘𑀻𑀯𑀭𑀁 𑀅𑀢𑁆𑀢𑀦𑁄 𑀳𑀢𑁆𑀣𑀕𑀢𑀫𑀓𑀸𑀲𑀺. 𑀪𑀕𑀯𑀸 𑀉𑀤𑀓𑀁 𑀑𑀢𑀭𑀺. 𑀲𑀳𑁄𑀢𑀭𑀡𑁂𑀦𑁂𑀯𑀲𑁆𑀲 𑀉𑀤𑀓𑁂 𑀫𑀘𑁆𑀙𑀓𑀘𑁆𑀙𑀧𑀸 𑀲𑀩𑁆𑀩𑁂 𑀲𑀼𑀯𑀡𑁆𑀡𑀯𑀡𑁆𑀡𑀸 𑀅𑀳𑁂𑀲𑀼𑀁. 𑀬𑀦𑁆𑀢𑀦𑀸𑀮𑀺𑀓𑀸𑀳𑀺 𑀲𑀼𑀯𑀡𑁆𑀡𑀭𑀲𑀥𑀸𑀭𑀸𑀦𑀺𑀲𑀺𑀜𑁆𑀘𑀫𑀸𑀦𑀓𑀸𑀮𑁄 𑀯𑀺𑀬 𑀲𑀼𑀯𑀡𑁆𑀡𑀧𑀝𑀧𑀲𑀸𑀭𑀡𑀓𑀸𑀮𑁄 𑀯𑀺𑀬 𑀘 𑀅𑀳𑁄𑀲𑀺. 𑀅𑀣 𑀪𑀕𑀯𑀢𑁄 𑀦𑁆𑀳𑀸𑀦𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀦𑁆𑀳𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀺𑀡𑁆𑀡𑀲𑁆𑀲 𑀣𑁂𑀭𑁄 𑀭𑀢𑁆𑀢𑀤𑀼𑀧𑀝𑁆𑀝𑀁 𑀉𑀧𑀦𑁂𑀲𑀺. 𑀪𑀕𑀯𑀸 𑀢𑀁 𑀦𑀺𑀯𑀸𑀲𑁂𑀢𑁆𑀯𑀸 𑀯𑀺𑀚𑁆𑀚𑀼𑀮𑀢𑀸𑀲𑀤𑀺𑀲𑀁 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀫𑀳𑀸𑀘𑀻𑀯𑀭𑀁 𑀅𑀦𑁆𑀢𑀦𑁆𑀢𑁂𑀦 𑀲𑀁𑀳𑀭𑀺𑀢𑁆𑀯𑀸 𑀧𑀤𑀼𑀫𑀕𑀩𑁆𑀪𑀲𑀤𑀺𑀲𑀁 𑀓𑀢𑁆𑀯𑀸 𑀉𑀧𑀦𑀻𑀢𑀁 𑀤𑁆𑀯𑀻𑀲𑀼 𑀓𑀡𑁆𑀡𑁂𑀲𑀼 𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀼𑀩𑁆𑀩𑀓𑁄𑀝𑁆𑀞𑀓𑁂 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀏𑀓𑀘𑀻𑀯𑀭𑁄 𑀅𑀝𑁆𑀞𑀸𑀲𑀻’’𑀢𑀺.

𑀏𑀯𑀁 𑀞𑀺𑀢𑀲𑁆𑀲 𑀧𑀦 𑀪𑀕𑀯𑀢𑁄 𑀲𑀭𑀻𑀭𑀁 𑀯𑀺𑀓𑀲𑀺𑀢𑀓𑀫𑀮𑀼𑀧𑁆𑀧𑀮𑀲𑀭𑀁 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑀁 𑀢𑀸𑀭𑀸𑀫𑀭𑀻𑀘𑀺𑀯𑀺𑀓𑀲𑀺𑀢𑀁 𑀘 𑀕𑀕𑀦𑀢𑀮𑀁 𑀲𑀺𑀭𑀺𑀬𑀸 𑀅𑀯𑀳𑀲𑀫𑀸𑀦𑀁 𑀯𑀺𑀬 𑀯𑀺𑀭𑁄𑀘𑀺𑀢𑁆𑀣. 𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑁂𑀧𑀯𑀺𑀮𑀸𑀲𑀺𑀦𑀻 𑀘𑀲𑁆𑀲 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀫𑀸𑀮𑀸 𑀕𑀦𑁆𑀣𑁂𑀢𑁆𑀯𑀸 𑀞𑀧𑀺𑀢𑀸 𑀤𑁆𑀯𑀢𑁆𑀢𑀺𑀁𑀲𑀘𑀦𑁆𑀤𑀫𑀸𑀮𑀸 𑀯𑀺𑀬, 𑀤𑁆𑀯𑀢𑁆𑀢𑀺𑀁𑀲𑀲𑀽𑀭𑀺𑀬𑀫𑀸𑀮𑀸 𑀯𑀺𑀬, 𑀧𑀝𑀺𑀧𑀸𑀝𑀺𑀬𑀸 𑀞𑀧𑀺𑀢𑀸 𑀤𑁆𑀯𑀢𑁆𑀢𑀺𑀁𑀲𑀘𑀓𑁆𑀓𑀯𑀢𑁆𑀢𑀺 𑀤𑁆𑀯𑀢𑁆𑀢𑀺𑀁𑀲𑀤𑁂𑀯𑀭𑀸𑀚𑀸 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀯𑀺𑀬 𑀘 𑀅𑀢𑀺𑀯𑀺𑀬 𑀯𑀺𑀭𑁄𑀘𑀺𑀢𑁆𑀣, 𑀯𑀡𑁆𑀡𑀪𑀽𑀫𑀺𑀦𑀸𑀫𑁂𑀲𑀸. 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀩𑀼𑀤𑁆𑀥𑀸𑀦𑀁 𑀲𑀭𑀻𑀭𑀯𑀡𑁆𑀡𑀁 𑀯𑀸 𑀕𑀼𑀡𑀯𑀡𑁆𑀡𑀁 𑀯𑀸 𑀘𑀼𑀡𑁆𑀡𑀺𑀬𑀧𑀤𑁂𑀳𑀺 𑀯𑀸 𑀕𑀸𑀣𑀸𑀳𑀺 𑀯𑀸 𑀅𑀢𑁆𑀣𑀜𑁆𑀘 𑀉𑀧𑀫𑀸𑀬𑁄 𑀘 𑀓𑀸𑀭𑀡𑀸𑀦𑀺 𑀘 𑀆𑀳𑀭𑀺𑀢𑁆𑀯𑀸 𑀧𑀝𑀺𑀩𑀮𑁂𑀦 𑀥𑀫𑁆𑀫𑀓𑀣𑀺𑀓𑁂𑀦 𑀧𑀽𑀭𑁂𑀢𑁆𑀯𑀸 𑀓𑀣𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀥𑀫𑁆𑀫𑀓𑀣𑀺𑀓𑀲𑁆𑀲 𑀣𑀸𑀫𑁄 𑀯𑁂𑀤𑀺𑀢𑀩𑁆𑀩𑁄.

𑁨𑁭𑁩. 𑀕𑀢𑁆𑀢𑀸𑀦𑀺 𑀧𑀼𑀩𑁆𑀩𑀸𑀧𑀬𑀫𑀸𑀦𑁄𑀢𑀺 𑀧𑀓𑀢𑀺𑀪𑀸𑀯𑀁 𑀕𑀫𑀬𑀫𑀸𑀦𑁄 𑀦𑀺𑀭𑀼𑀤𑀓𑀸𑀦𑀺 𑀓𑀼𑀭𑀼𑀫𑀸𑀦𑁄, 𑀲𑀼𑀓𑁆𑀔𑀸𑀧𑀬𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀲𑁄𑀤𑀓𑁂𑀦 𑀕𑀢𑁆𑀢𑁂𑀦 𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑀲𑁆𑀲 𑀳𑀺 𑀘𑀻𑀯𑀭𑁂 𑀓𑀡𑁆𑀡𑀺𑀓𑀸 𑀉𑀝𑁆𑀞𑀳𑀦𑁆𑀢𑀺, 𑀧𑀭𑀺𑀓𑁆𑀔𑀸𑀭𑀪𑀡𑁆𑀟𑀁 𑀤𑀼𑀲𑁆𑀲𑀢𑀺. 𑀩𑀼𑀤𑁆𑀥𑀸𑀦𑀁 𑀧𑀦 𑀲𑀭𑀻𑀭𑁂 𑀭𑀚𑁄𑀚𑀮𑁆𑀮𑀁 𑀦 𑀉𑀧𑀮𑀺𑀫𑁆𑀧𑀢𑀺; 𑀧𑀤𑀼𑀫𑀧𑀢𑁆𑀢𑁂 𑀧𑀓𑁆𑀔𑀺𑀢𑁆𑀢𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀉𑀤𑀓𑀁 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀺𑀓𑁆𑀔𑀸𑀕𑀸𑀭𑀯𑀢𑀸𑀬 𑀪𑀕𑀯𑀸, ‘‘𑀧𑀩𑁆𑀩𑀚𑀺𑀢𑀯𑀢𑁆𑀢𑀁 𑀦𑀸𑀫𑁂𑀢’’𑀦𑁆𑀢𑀺 𑀫𑀳𑀸𑀘𑀻𑀯𑀭𑀁 𑀉𑀪𑁄𑀲𑀼 𑀓𑀡𑁆𑀡𑁂𑀲𑀼 𑀕𑀳𑁂𑀢𑁆𑀯𑀸 𑀧𑀼𑀭𑀢𑁄 𑀓𑀸𑀬𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀔𑀡𑁂 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀪𑀕𑀯𑀸 𑀫𑀳𑀸𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑀁 𑀆𑀭𑀩𑁆𑀪 𑀕𑀫𑀦𑀸𑀪𑀺𑀳𑀸𑀭𑀢𑁄 𑀧𑀝𑁆𑀞𑀸𑀬 𑀤𑀼𑀦𑁆𑀦𑀺𑀯𑀢𑁆𑀢𑀺𑀬𑁄 𑀪𑀯𑀺𑀲𑁆𑀲𑀢𑀺; 𑀩𑀼𑀤𑁆𑀥𑀸𑀦𑀜𑁆𑀳𑀺 𑀅𑀥𑀺𑀧𑁆𑀧𑀸𑀬𑀓𑁄𑀧𑀦𑀁 𑀦𑀸𑀫 𑀏𑀓𑀘𑀸𑀭𑀺𑀓𑀲𑀻𑀳𑀲𑁆𑀲 𑀕𑀳𑀡𑀢𑁆𑀣𑀁 𑀳𑀢𑁆𑀣𑀧𑁆𑀧𑀲𑀸𑀭𑀡𑀁 𑀯𑀺𑀬; 𑀧𑀪𑀺𑀦𑁆𑀦𑀯𑀭𑀯𑀸𑀭𑀡𑀲𑁆𑀲 𑀲𑁄𑀡𑁆𑀟𑀸𑀬 𑀧𑀭𑀸𑀫𑀲𑀦𑀁 𑀯𑀺𑀬; 𑀉𑀕𑁆𑀕𑀢𑁂𑀚𑀲𑁆𑀲 𑀆𑀲𑀻𑀯𑀺𑀲𑀲𑁆𑀲 𑀕𑀻𑀯𑀸𑀬 𑀕𑀳𑀡𑀁 𑀯𑀺𑀬 𑀘 𑀪𑀸𑀭𑀺𑀬𑀁 𑀳𑁄𑀢𑀺. 𑀇𑀥𑁂𑀯 𑀭𑀫𑁆𑀫𑀓𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀲𑁆𑀲𑀫𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀢𑀢𑁆𑀣 𑀕𑀫𑀦𑀢𑁆𑀣𑀸𑀬 𑀪𑀕𑀯𑀦𑁆𑀢𑀁 𑀬𑀸𑀘𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄…𑀧𑁂… 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’’𑀢𑀺.

𑀢𑀢𑁆𑀣 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸𑀢𑀺 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀥𑀫𑁆𑀫𑀺𑀁 𑀓𑀣𑀁 𑀲𑁄𑀲𑁆𑀲𑀸𑀫𑀸𑀢𑀺 𑀢𑀁 𑀅𑀲𑁆𑀲𑀫𑀁 𑀕𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀅𑀦𑀼𑀓𑀫𑁆𑀧𑀁 𑀧𑀝𑀺𑀘𑁆𑀘, 𑀢𑁂𑀲𑀼 𑀓𑀸𑀭𑀼𑀜𑁆𑀜𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀺𑀬𑀸 𑀓𑀣𑀸𑀬𑀸𑀢𑀺 𑀤𑀲𑀲𑀼 𑀧𑀸𑀭𑀫𑀺𑀢𑀸𑀲𑀼 𑀅𑀜𑁆𑀜𑀢𑀭𑀸𑀬 𑀧𑀸𑀭𑀫𑀺𑀬𑀸 𑀘𑁂𑀯 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀲𑁆𑀲 𑀘 𑀯𑀡𑁆𑀡𑀁 𑀓𑀣𑀬𑀫𑀸𑀦𑀸 𑀲𑀦𑁆𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀆𑀕𑀫𑀬𑀫𑀸𑀦𑁄𑀢𑀺 𑀑𑀮𑁄𑀓𑀬𑀫𑀸𑀦𑁄. 𑀅𑀳𑀁 𑀩𑀼𑀤𑁆𑀥𑁄𑀢𑀺 𑀲𑀳𑀲𑀸 𑀅𑀧𑁆𑀧𑀯𑀺𑀲𑀺𑀢𑁆𑀯𑀸 𑀬𑀸𑀯 𑀲𑀸 𑀓𑀣𑀸 𑀦𑀺𑀝𑁆𑀞𑀸𑀢𑀺, 𑀢𑀸𑀯 𑀅𑀝𑁆𑀞𑀸𑀲𑀻𑀢𑀺 𑀅𑀢𑁆𑀣𑁄. 𑀅𑀕𑁆𑀕𑀴𑀁 𑀆𑀓𑁄𑀝𑁂𑀲𑀻𑀢𑀺 𑀅𑀕𑁆𑀕𑀦𑀔𑁂𑀦 𑀓𑀯𑀸𑀝𑁂 𑀲𑀜𑁆𑀜𑀁 𑀅𑀤𑀸𑀲𑀺. 𑀯𑀺𑀯𑀭𑀺𑀁𑀲𑀽𑀢𑀺 𑀲𑁄𑀢𑀁 𑀑𑀤𑀳𑀺𑀢𑁆𑀯𑀸𑀯 𑀦𑀺𑀲𑀺𑀦𑁆𑀦𑀢𑁆𑀢𑀸 𑀢𑀗𑁆𑀔𑀡𑀁𑀬𑁂𑀯 𑀆𑀕𑀦𑁆𑀢𑁆𑀯𑀸 𑀯𑀺𑀯𑀭𑀺𑀁𑀲𑀼.

𑀧𑀜𑁆𑀜𑀢𑁆𑀢𑁂 𑀆𑀲𑀦𑁂𑀢𑀺 𑀩𑀼𑀤𑁆𑀥𑀓𑀸𑀮𑁂 𑀓𑀺𑀭 𑀬𑀢𑁆𑀣 𑀬𑀢𑁆𑀣 𑀏𑀓𑁄𑀧𑀺 𑀪𑀺𑀓𑁆𑀔𑀼 𑀯𑀺𑀳𑀭𑀢𑀺, 𑀲𑀩𑁆𑀩𑀢𑁆𑀣 𑀩𑀼𑀤𑁆𑀥𑀸𑀲𑀦𑀁 𑀧𑀜𑁆𑀜𑀢𑁆𑀢𑀫𑁂𑀯 𑀳𑁄𑀢𑀺. 𑀓𑀲𑁆𑀫𑀸? 𑀪𑀕𑀯𑀸 𑀓𑀺𑀭 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀨𑀸𑀲𑀼𑀓𑀝𑁆𑀞𑀸𑀦𑁂 𑀯𑀺𑀳𑀭𑀦𑁆𑀢𑁂 𑀫𑀦𑀲𑀺 𑀓𑀭𑁄𑀢𑀺 ‘‘𑀅𑀲𑀼𑀓𑁄 𑀫𑀬𑁆𑀳𑀁 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀕𑀢𑁄, 𑀲𑀓𑁆𑀔𑀺𑀲𑁆𑀲𑀢𑀺 𑀦𑀼 𑀔𑁄 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦𑁄 𑀯𑀸’’𑀢𑀺. 𑀅𑀣 𑀦𑀁 𑀧𑀲𑁆𑀲𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀓𑀼𑀲𑀮𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑀬𑀫𑀸𑀦𑀁, 𑀢𑀢𑁄 ‘‘𑀓𑀣𑀜𑁆𑀳𑀺 𑀦𑀸𑀫 𑀫𑀸𑀤𑀺𑀲𑀲𑁆𑀲 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀺𑀳𑀭𑀦𑁆𑀢𑀁 𑀇𑀫𑀁 𑀓𑀼𑀮𑀧𑀼𑀢𑁆𑀢𑀁 𑀅𑀓𑀼𑀲𑀮𑀯𑀺𑀢𑀓𑁆𑀓𑀸 𑀅𑀪𑀺𑀪𑀯𑀺𑀢𑁆𑀯𑀸 𑀅𑀦𑀫𑀢𑀕𑁆𑀕𑁂 𑀯𑀝𑁆𑀝𑀤𑀼𑀓𑁆𑀔𑁂 𑀲𑀁𑀲𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺 𑀢𑀲𑁆𑀲 𑀅𑀦𑀼𑀕𑁆𑀕𑀳𑀢𑁆𑀣𑀁 𑀢𑀢𑁆𑀣𑁂𑀯 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀓𑀼𑀮𑀧𑀼𑀢𑁆𑀢𑀁 𑀑𑀯𑀤𑀺𑀢𑁆𑀯𑀸 𑀆𑀓𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀧𑀼𑀦 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀕𑀘𑁆𑀙𑀢𑀺. 𑀅𑀣𑁂𑀯𑀁 𑀑𑀯𑀤𑀺𑀬𑀫𑀸𑀦𑀸 𑀢𑁂 𑀪𑀺𑀓𑁆𑀔𑀽 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀲𑀢𑁆𑀣𑀸 𑀅𑀫𑁆𑀳𑀸𑀓𑀁 𑀫𑀦𑀁 𑀚𑀸𑀦𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀅𑀫𑁆𑀳𑀸𑀓𑀁 𑀲𑀫𑀻𑀧𑁂 𑀞𑀺𑀢𑀁𑀬𑁂𑀯 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀺; 𑀢𑀲𑁆𑀫𑀺𑀁 𑀔𑀡𑁂, ‘𑀪𑀦𑁆𑀢𑁂, 𑀇𑀥 𑀦𑀺𑀲𑀻𑀤𑀣, 𑀇𑀥 𑀦𑀺𑀲𑀻𑀤𑀣𑀸’𑀢𑀺 𑀆𑀲𑀦𑀧𑀭𑀺𑀬𑁂𑀲𑀦𑀁 𑀦𑀸𑀫 𑀪𑀸𑀭𑁄’’𑀢𑀺. 𑀢𑁂 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸𑀯 𑀯𑀺𑀳𑀭𑀦𑁆𑀢𑀺. 𑀬𑀲𑁆𑀲 𑀧𑀻𑀞𑀁 𑀅𑀢𑁆𑀣𑀺, 𑀲𑁄 𑀢𑀁 𑀧𑀜𑁆𑀜𑀧𑁂𑀢𑀺. 𑀬𑀲𑁆𑀲 𑀦𑀢𑁆𑀣𑀺, 𑀲𑁄 𑀫𑀜𑁆𑀘𑀁 𑀯𑀸 𑀨𑀮𑀓𑀁 𑀯𑀸 𑀓𑀝𑁆𑀞𑀁 𑀯𑀸 𑀧𑀸𑀲𑀸𑀡𑀁 𑀯𑀸 𑀯𑀸𑀮𑀺𑀓𑀧𑀼𑀜𑁆𑀚𑀁 𑀯𑀸 𑀧𑀜𑁆𑀜𑀧𑁂𑀢𑀺. 𑀢𑀁 𑀅𑀮𑀪𑀫𑀸𑀦𑀸 𑀧𑀼𑀭𑀸𑀡𑀧𑀡𑁆𑀡𑀸𑀦𑀺𑀧𑀺 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀢𑀢𑁆𑀣 𑀧𑀁𑀲𑀼𑀓𑀽𑀮𑀁 𑀧𑀢𑁆𑀣𑀭𑀺𑀢𑁆𑀯𑀸 𑀞𑀧𑁂𑀦𑁆𑀢𑀺. 𑀇𑀥 𑀧𑀦 𑀧𑀓𑀢𑀺𑀧𑀜𑁆𑀜𑀢𑁆𑀢𑀫𑁂𑀯 𑀆𑀲𑀦𑀁 𑀅𑀳𑁄𑀲𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀻’’𑀢𑀺.

𑀓𑀸𑀬 𑀦𑀼𑀢𑁆𑀣𑀸𑀢𑀺 𑀓𑀢𑀫𑀸𑀬 𑀦𑀼 𑀓𑀣𑀸𑀬 𑀲𑀦𑁆𑀦𑀺𑀲𑀺𑀦𑁆𑀦𑀸 𑀪𑀯𑀣𑀸𑀢𑀺 𑀅𑀢𑁆𑀣𑁄. ‘‘𑀓𑀸𑀬 𑀦𑁂𑀢𑁆𑀣𑀸’’𑀢𑀺𑀧𑀺 𑀧𑀸𑀴𑀺, 𑀢𑀲𑁆𑀲𑀸 𑀓𑀢𑀫𑀸𑀬 𑀦𑀼 𑀏𑀢𑁆𑀣𑀸𑀢𑀺 𑀅𑀢𑁆𑀣𑁄. ‘‘𑀓𑀸𑀬 𑀦𑁄𑀢𑁆𑀣𑀸’’𑀢𑀺𑀧𑀺 𑀧𑀸𑀴𑀺, 𑀢𑀲𑁆𑀲𑀸𑀧𑀺 𑀧𑀼𑀭𑀺𑀫𑁄𑀬𑁂𑀯 𑀅𑀢𑁆𑀣𑁄. 𑀅𑀦𑁆𑀢𑀭𑀸 𑀓𑀣𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀦𑀁 𑀅𑀦𑁆𑀢𑀭𑀸 𑀅𑀜𑁆𑀜𑀸 𑀏𑀓𑀸 𑀓𑀣𑀸. 𑀯𑀺𑀧𑁆𑀧𑀓𑀢𑀸𑀢𑀺 𑀫𑀫 𑀆𑀕𑀫𑀦𑀧𑀘𑁆𑀘𑀬𑀸 𑀅𑀧𑀭𑀺𑀦𑀺𑀝𑁆𑀞𑀺𑀢𑀸 𑀲𑀺𑀔𑀁 𑀅𑀧𑁆𑀧𑀢𑁆𑀢𑀸. 𑀅𑀣 𑀪𑀕𑀯𑀸 𑀅𑀦𑀼𑀧𑁆𑀧𑀢𑁆𑀢𑁄𑀢𑀺 𑀅𑀣 𑀏𑀢𑀲𑁆𑀫𑀺𑀁 𑀓𑀸𑀮𑁂 𑀪𑀕𑀯𑀸 𑀆𑀕𑀢𑁄. 𑀥𑀫𑁆𑀫𑀻 𑀯𑀸 𑀓𑀣𑀸𑀢𑀺 𑀤𑀲𑀓𑀣𑀸𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀸 𑀯𑀸 𑀥𑀫𑁆𑀫𑀻 𑀓𑀣𑀸. 𑀅𑀭𑀺𑀬𑁄 𑀯𑀸 𑀢𑀼𑀡𑁆𑀳𑀻𑀪𑀸𑀯𑁄𑀢𑀺 𑀏𑀢𑁆𑀣 𑀧𑀦 𑀤𑀼𑀢𑀺𑀬𑀚𑁆𑀛𑀸𑀦𑀫𑁆𑀧𑀺 𑀅𑀭𑀺𑀬𑁄 𑀢𑀼𑀡𑁆𑀳𑀻𑀪𑀸𑀯𑁄 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀫𑁆𑀧𑀺. 𑀢𑀲𑁆𑀫𑀸 𑀢𑀁 𑀛𑀸𑀦𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄𑀧𑀺, 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄𑀧𑀺 𑀪𑀺𑀓𑁆𑀔𑀼 𑀅𑀭𑀺𑀬𑁂𑀦 𑀢𑀼𑀡𑁆𑀳𑀻𑀪𑀸𑀯𑁂𑀦 𑀦𑀺𑀲𑀺𑀦𑁆𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁨𑁭𑁪. 𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀧𑀭𑀺𑀬𑁂𑀲𑀦𑀸𑀢𑀺 𑀓𑁄 𑀅𑀦𑀼𑀲𑀦𑁆𑀥𑀺? 𑀢𑁂 𑀪𑀺𑀓𑁆𑀔𑀽 𑀲𑀫𑁆𑀫𑀼𑀔𑀸 𑀥𑀫𑁆𑀫𑀺𑀁 𑀓𑀣𑀁 𑀲𑁄𑀲𑁆𑀲𑀸𑀫𑀸𑀢𑀺 𑀣𑁂𑀭𑀲𑁆𑀲 𑀪𑀸𑀭𑀁 𑀅𑀓𑀁𑀲𑀼, 𑀣𑁂𑀭𑁄 𑀢𑁂𑀲𑀁 𑀅𑀲𑁆𑀲𑀫𑀕𑀫𑀦𑀫𑀓𑀸𑀲𑀺. 𑀢𑁂 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀅𑀢𑀺𑀭𑀘𑁆𑀙𑀸𑀦𑀓𑀣𑀺𑀓𑀸 𑀳𑀼𑀢𑁆𑀯𑀸 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀦𑀺𑀲𑀻𑀤𑀺𑀁𑀲𑀼. 𑀅𑀣 𑀪𑀕𑀯𑀸 ‘‘𑀅𑀬𑀁 𑀢𑀼𑀫𑁆𑀳𑀸𑀓𑀁 𑀧𑀭𑀺𑀬𑁂𑀲𑀦𑀸 𑀅𑀭𑀺𑀬𑀧𑀭𑀺𑀬𑁂𑀲𑀦𑀸 𑀦𑀸𑀫𑀸’’𑀢𑀺 𑀤𑀲𑁆𑀲𑁂𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀅𑀦𑀭𑀺𑀬𑀧𑀭𑀺𑀬𑁂𑀲𑀦𑀸𑀢𑀺 𑀏𑀢𑁆𑀣 𑀬𑀣𑀸 𑀫𑀕𑁆𑀕𑀓𑀼𑀲𑀮𑁄 𑀧𑀼𑀭𑀺𑀲𑁄 𑀧𑀞𑀫𑀁 𑀯𑀚𑁆𑀚𑁂𑀢𑀩𑁆𑀩𑀁 𑀅𑀧𑀸𑀬𑀫𑀕𑁆𑀕𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀸𑀫𑀁 𑀫𑀼𑀜𑁆𑀘𑀺𑀢𑁆𑀯𑀸 𑀤𑀓𑁆𑀔𑀺𑀡𑀁 𑀕𑀡𑁆𑀳𑀸’’𑀢𑀺 𑀯𑀤𑀢𑀺. 𑀏𑀯𑀁 𑀪𑀕𑀯𑀸 𑀤𑁂𑀲𑀦𑀸𑀓𑀼𑀲𑀮𑀢𑀸𑀬 𑀧𑀞𑀫𑀁 𑀯𑀚𑁆𑀚𑁂𑀢𑀩𑁆𑀩𑀁 𑀅𑀦𑀭𑀺𑀬𑀧𑀭𑀺𑀬𑁂𑀲𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀧𑀘𑁆𑀙𑀸 𑀇𑀢𑀭𑀁 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀻𑀢𑀺 𑀉𑀤𑁆𑀤𑁂𑀲𑀸𑀦𑀼𑀓𑁆𑀓𑀫𑀁 𑀪𑀺𑀦𑁆𑀤𑀺𑀢𑁆𑀯𑀸 𑀏𑀯𑀫𑀸𑀳. 𑀚𑀸𑀢𑀺𑀥𑀫𑁆𑀫𑁄𑀢𑀺 𑀚𑀸𑀬𑀦𑀲𑀪𑀸𑀯𑁄. 𑀚𑀭𑀸𑀥𑀫𑁆𑀫𑁄𑀢𑀺 𑀚𑀻𑀭𑀡𑀲𑀪𑀸𑀯𑁄. 𑀩𑁆𑀬𑀸𑀥𑀺𑀥𑀫𑁆𑀫𑁄𑀢𑀺 𑀩𑁆𑀬𑀸𑀥𑀺𑀲𑀪𑀸𑀯𑁄. 𑀫𑀭𑀡𑀥𑀫𑁆𑀫𑁄𑀢𑀺 𑀫𑀭𑀡𑀲𑀪𑀸𑀯𑁄. 𑀲𑁄𑀓𑀥𑀫𑁆𑀫𑁄𑀢𑀺 𑀲𑁄𑀘𑀦𑀓𑀲𑀪𑀸𑀯𑁄. 𑀲𑀁𑀓𑀺𑀮𑁂𑀲𑀥𑀫𑁆𑀫𑁄𑀢𑀺 𑀲𑀁𑀓𑀺𑀮𑀺𑀲𑁆𑀲𑀦𑀲𑀪𑀸𑀯𑁄.

𑀧𑀼𑀢𑁆𑀢𑀪𑀭𑀺𑀬𑀦𑁆𑀢𑀺 𑀧𑀼𑀢𑁆𑀢𑀸 𑀘 𑀪𑀭𑀺𑀬𑀸 𑀘. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀚𑀸𑀢𑀭𑀽𑀧𑀭𑀚𑀢𑀦𑁆𑀢𑀺 𑀏𑀢𑁆𑀣 𑀧𑀦 𑀚𑀸𑀢𑀭𑀽𑀧𑀦𑁆𑀢𑀺 𑀲𑀼𑀯𑀡𑁆𑀡𑀁. 𑀭𑀚𑀢𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀯𑁄𑀳𑀸𑀭𑀽𑀧𑀕𑀁 𑀮𑁄𑀳𑀫𑀸𑀲𑀓𑀸𑀤𑀺. 𑀚𑀸𑀢𑀺𑀥𑀫𑁆𑀫𑀸 𑀳𑁂𑀢𑁂, 𑀪𑀺𑀓𑁆𑀔𑀯𑁂, 𑀉𑀧𑀥𑀬𑁄𑀢𑀺 𑀏𑀢𑁂 𑀧𑀜𑁆𑀘𑀓𑀸𑀫𑀕𑀼𑀡𑀽𑀧𑀥𑀬𑁄 𑀦𑀸𑀫 𑀳𑁄𑀦𑁆𑀢𑀺, 𑀢𑁂 𑀲𑀩𑁆𑀩𑁂𑀧𑀺 𑀚𑀸𑀢𑀺𑀥𑀫𑁆𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀩𑁆𑀬𑀸𑀥𑀺𑀥𑀫𑁆𑀫𑀯𑀸𑀭𑀸𑀤𑀻𑀲𑀼 𑀚𑀸𑀢𑀭𑀽𑀧𑀭𑀚𑀢𑀁 𑀦 𑀕𑀳𑀺𑀢𑀁, 𑀦 𑀳𑁂𑀢𑀲𑁆𑀲 𑀲𑀻𑀲𑀭𑁄𑀕𑀸𑀤𑀬𑁄 𑀩𑁆𑀬𑀸𑀥𑀬𑁄 𑀦𑀸𑀫 𑀳𑁄𑀦𑁆𑀢𑀺, 𑀦 𑀲𑀢𑁆𑀢𑀸𑀦𑀁 𑀯𑀺𑀬 𑀘𑀼𑀢𑀺𑀲𑀗𑁆𑀔𑀸𑀢𑀁 𑀫𑀭𑀡𑀁, 𑀦 𑀲𑁄𑀓𑁄 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀸𑀤𑀻𑀳𑀺 𑀧𑀦 𑀲𑀁𑀓𑀺𑀮𑁂𑀲𑁂𑀳𑀺 𑀲𑀁𑀓𑀺𑀮𑀺𑀲𑁆𑀲𑀢𑀻𑀢𑀺 𑀲𑀁𑀓𑀺𑀮𑁂𑀲𑀥𑀫𑁆𑀫𑀯𑀸𑀭𑁂 𑀕𑀳𑀺𑀢𑀁. 𑀢𑀣𑀸 𑀉𑀢𑀼𑀲𑀫𑀼𑀝𑁆𑀞𑀸𑀦𑀢𑁆𑀢𑀸 𑀚𑀸𑀢𑀺𑀥𑀫𑁆𑀫𑀯𑀸𑀭𑁂. 𑀫𑀮𑀁 𑀕𑀳𑁂𑀢𑁆𑀯𑀸 𑀚𑀻𑀭𑀡𑀢𑁄 𑀚𑀭𑀸𑀥𑀫𑁆𑀫𑀯𑀸𑀭𑁂 𑀘.

𑁨𑁭𑁫. 𑀅𑀬𑀁 , 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀸 𑀧𑀭𑀺𑀬𑁂𑀲𑀦𑀸𑀢𑀺, 𑀪𑀺𑀓𑁆𑀔𑀯𑁂, 𑀅𑀬𑀁 𑀦𑀺𑀤𑁆𑀤𑁄𑀲𑀢𑀸𑀬𑀧𑀺 𑀅𑀭𑀺𑀬𑁂𑀳𑀺 𑀧𑀭𑀺𑀬𑁂𑀲𑀺𑀢𑀩𑁆𑀩𑀢𑀸𑀬𑀧𑀺 𑀅𑀭𑀺𑀬𑀧𑀭𑀺𑀬𑁂𑀲𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁨𑁭𑁬. 𑀅𑀳𑀫𑁆𑀧𑀺 𑀲𑀼𑀤𑀁, 𑀪𑀺𑀓𑁆𑀔𑀯𑁂𑀢𑀺 𑀓𑀲𑁆𑀫𑀸 𑀆𑀭𑀪𑀺? 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀤𑀲𑁆𑀲𑁂𑀢𑀼𑀁. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀪𑀺𑀓𑁆𑀔𑀯𑁂, 𑀅𑀳𑀫𑁆𑀧𑀺 𑀧𑀼𑀩𑁆𑀩𑁂 𑀅𑀦𑀭𑀺𑀬𑀧𑀭𑀺𑀬𑁂𑀲𑀦𑀁 𑀧𑀭𑀺𑀬𑁂𑀲𑀺𑀁. 𑀲𑁆𑀯𑀸𑀳𑀁 𑀢𑀁 𑀧𑀳𑀸𑀬 𑀅𑀭𑀺𑀬𑀧𑀭𑀺𑀬𑁂𑀲𑀦𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄. 𑀧𑀜𑁆𑀘𑀯𑀕𑁆𑀕𑀺𑀬𑀸𑀧𑀺 𑀅𑀦𑀭𑀺𑀬𑀧𑀭𑀺𑀬𑁂𑀲𑀦𑀁 𑀧𑀭𑀺𑀬𑁂𑀲𑀺𑀁𑀲𑀼. 𑀢𑁂 𑀢𑀁 𑀧𑀳𑀸𑀬 𑀅𑀭𑀺𑀬𑀧𑀭𑀺𑀬𑁂𑀲𑀦𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀔𑀻𑀡𑀸𑀲𑀯𑀪𑀽𑀫𑀺𑀁 𑀧𑀢𑁆𑀢𑀸. 𑀢𑀼𑀫𑁆𑀳𑁂𑀧𑀺 𑀫𑀫 𑀘𑁂𑀯 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀜𑁆𑀘 𑀫𑀕𑁆𑀕𑀁 𑀆𑀭𑀼𑀴𑁆𑀳𑀸. 𑀅𑀭𑀺𑀬𑀧𑀭𑀺𑀬𑁂𑀲𑀦𑀸 𑀢𑀼𑀫𑁆𑀳𑀸𑀓𑀁 𑀧𑀭𑀺𑀬𑁂𑀲𑀦𑀸’’𑀢𑀺 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀤𑀲𑁆𑀲𑁂𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺.

𑁨𑁭𑁭. 𑀢𑀢𑁆𑀣 𑀤𑀳𑀭𑁄𑀯 𑀲𑀫𑀸𑀦𑁄𑀢𑀺 𑀢𑀭𑀼𑀡𑁄𑀯 𑀲𑀫𑀸𑀦𑁄. 𑀲𑀼𑀲𑀼𑀓𑀸𑀴𑀓𑁂𑀲𑁄𑀢𑀺 𑀲𑀼𑀝𑁆𑀞𑀼 𑀓𑀸𑀴𑀓𑁂𑀲𑁄, 𑀅𑀜𑁆𑀚𑀦𑀯𑀡𑁆𑀡𑀓𑁂𑀲𑁄𑀯 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀪𑀤𑁆𑀭𑁂𑀦𑀸𑀢𑀺 𑀪𑀤𑁆𑀤𑀓𑁂𑀦. 𑀧𑀞𑀫𑁂𑀦 𑀯𑀬𑀲𑀸𑀢𑀺 𑀢𑀺𑀡𑁆𑀡𑀁 𑀯𑀬𑀸𑀦𑀁 𑀧𑀞𑀫𑀯𑀬𑁂𑀦. 𑀅𑀓𑀸𑀫𑀓𑀸𑀦𑀦𑁆𑀢𑀺 𑀅𑀦𑀺𑀘𑁆𑀙𑀫𑀸𑀦𑀸𑀦𑀁, 𑀅𑀦𑀸𑀤𑀭𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀅𑀲𑁆𑀲𑀽𑀦𑀺 𑀫𑀼𑀔𑁂 𑀏𑀢𑁂𑀲𑀦𑁆𑀢𑀺 𑀅𑀲𑁆𑀲𑀼𑀫𑀼𑀔𑀸; 𑀢𑁂𑀲𑀁 𑀅𑀲𑁆𑀲𑀼𑀫𑀼𑀔𑀸𑀦𑀁, 𑀅𑀲𑁆𑀲𑀼𑀓𑀺𑀮𑀺𑀦𑁆𑀦𑀫𑀼𑀔𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀭𑀼𑀤𑀦𑁆𑀢𑀸𑀦𑀦𑁆𑀢𑀺 𑀓𑀦𑁆𑀤𑀺𑀢𑁆𑀯𑀸 𑀭𑁄𑀤𑀫𑀸𑀦𑀸𑀦𑀁. 𑀓𑀺𑀁 𑀓𑀼𑀲𑀮𑀕𑀯𑁂𑀲𑀻𑀢𑀺 𑀓𑀺𑀁 𑀓𑀼𑀲𑀮𑀦𑁆𑀢𑀺 𑀕𑀯𑁂𑀲𑀫𑀸𑀦𑁄. 𑀅𑀦𑀼𑀢𑁆𑀢𑀭𑀁 𑀲𑀦𑁆𑀢𑀺𑀯𑀭𑀧𑀤𑀦𑁆𑀢𑀺 𑀉𑀢𑁆𑀢𑀫𑀁 𑀲𑀦𑁆𑀢𑀺𑀲𑀗𑁆𑀔𑀸𑀢𑀁 𑀯𑀭𑀧𑀤𑀁, 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁂𑀲𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀬𑁂𑀦 𑀆𑀴𑀸𑀭𑁄 𑀓𑀸𑀮𑀸𑀫𑁄𑀢𑀺 𑀏𑀢𑁆𑀣 𑀆𑀴𑀸𑀭𑁄𑀢𑀺 𑀢𑀲𑁆𑀲 𑀦𑀸𑀫𑀁, 𑀤𑀻𑀖𑀧𑀺𑀗𑁆𑀕𑀮𑁄 𑀓𑀺𑀭𑁂𑀲𑁄. 𑀢𑁂𑀦𑀲𑁆𑀲 𑀆𑀴𑀸𑀭𑁄𑀢𑀺 𑀦𑀸𑀫𑀁 𑀅𑀳𑁄𑀲𑀺. 𑀓𑀸𑀮𑀸𑀫𑁄𑀢𑀺 𑀕𑁄𑀢𑁆𑀢𑀁. 𑀯𑀺𑀳𑀭𑀢𑀸𑀬𑀲𑁆𑀫𑀸𑀢𑀺 𑀯𑀺𑀳𑀭𑀢𑀼 𑀆𑀬𑀲𑁆𑀫𑀸. 𑀬𑀢𑁆𑀣 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄𑀢𑀺 𑀬𑀲𑁆𑀫𑀺𑀁 𑀥𑀫𑁆𑀫𑁂 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄. 𑀲𑀓𑀁 𑀆𑀘𑀭𑀺𑀬𑀓𑀦𑁆𑀢𑀺 𑀅𑀢𑁆𑀢𑀦𑁄 𑀆𑀘𑀭𑀺𑀬𑀲𑀫𑀬𑀁. 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸𑀢𑀺 𑀧𑀝𑀺𑀮𑀪𑀺𑀢𑁆𑀯𑀸 𑀯𑀺𑀳𑀭𑁂𑀬𑁆𑀬. 𑀏𑀢𑁆𑀢𑀸𑀯𑀢𑀸 𑀢𑁂𑀦 𑀑𑀓𑀸𑀲𑁄 𑀓𑀢𑁄 𑀳𑁄𑀢𑀺. 𑀢𑀁 𑀥𑀫𑁆𑀫𑀦𑁆𑀢𑀺 𑀢𑀁 𑀢𑁂𑀲𑀁 𑀲𑀫𑀬𑀁 𑀢𑀦𑁆𑀢𑀺𑀁. 𑀧𑀭𑀺𑀬𑀸𑀧𑀼𑀡𑀺𑀦𑁆𑀢𑀺 𑀲𑀼𑀢𑁆𑀯𑀸𑀯 𑀉𑀕𑁆𑀕𑀡𑁆𑀳𑀺𑀁.

𑀑𑀝𑁆𑀞𑀧𑀳𑀢𑀫𑀢𑁆𑀢𑁂𑀦𑀸𑀢𑀺 𑀢𑁂𑀦 𑀯𑀼𑀢𑁆𑀢𑀲𑁆𑀲 𑀧𑀝𑀺𑀕𑁆𑀕𑀳𑀡𑀢𑁆𑀣𑀁 𑀑𑀝𑁆𑀞𑀧𑀳𑀭𑀡𑀫𑀢𑁆𑀢𑁂𑀦; 𑀅𑀧𑀭𑀸𑀧𑀭𑀁 𑀓𑀢𑁆𑀯𑀸 𑀑𑀝𑁆𑀞𑀲𑀜𑁆𑀘𑀭𑀡𑀫𑀢𑁆𑀢𑀓𑁂𑀦𑀸𑀢𑀺 𑀅𑀢𑁆𑀣𑁄. 𑀮𑀧𑀺𑀢𑀮𑀸𑀧𑀦𑀫𑀢𑁆𑀢𑁂𑀦𑀸𑀢𑀺 𑀢𑁂𑀦 𑀮𑀧𑀺𑀢𑀲𑁆𑀲 𑀧𑀝𑀺𑀮𑀸𑀧𑀦𑀫𑀢𑁆𑀢𑀓𑁂𑀦. 𑀜𑀸𑀡𑀯𑀸𑀤𑀦𑁆𑀢𑀺 𑀚𑀸𑀦𑀸𑀫𑀻𑀢𑀺 𑀯𑀸𑀤𑀁. 𑀣𑁂𑀭𑀯𑀸𑀤𑀦𑁆𑀢𑀺 𑀣𑀺𑀭𑀪𑀸𑀯𑀯𑀸𑀤𑀁, 𑀣𑁂𑀭𑁄 𑀅𑀳𑀫𑁂𑀢𑁆𑀣𑀸𑀢𑀺 𑀏𑀢𑀁 𑀯𑀘𑀦𑀁. 𑀅𑀳𑀜𑁆𑀘𑁂𑀯 𑀅𑀜𑁆𑀜𑁂 𑀘𑀸𑀢𑀺 𑀦 𑀓𑁂𑀯𑀮𑀁 𑀅𑀳𑀁, 𑀅𑀜𑁆𑀜𑁂𑀧𑀺 𑀩𑀳𑀽 𑀏𑀯𑀁 𑀯𑀤𑀦𑁆𑀢𑀺. 𑀓𑁂𑀯𑀮𑀁 𑀲𑀤𑁆𑀥𑀸𑀫𑀢𑁆𑀢𑀓𑁂𑀦𑀸𑀢𑀺 𑀧𑀜𑁆𑀜𑀸𑀬 𑀅𑀲𑀘𑁆𑀙𑀺𑀓𑀢𑁆𑀯𑀸 𑀲𑀼𑀤𑁆𑀥𑁂𑀦 𑀲𑀤𑁆𑀥𑀸𑀫𑀢𑁆𑀢𑀓𑁂𑀦𑁂𑀯. 𑀩𑁄𑀥𑀺𑀲𑀢𑁆𑀢𑁄 𑀓𑀺𑀭 𑀯𑀸𑀘𑀸𑀬 𑀥𑀫𑁆𑀫𑀁 𑀉𑀕𑁆𑀕𑀡𑁆𑀳𑀦𑁆𑀢𑁄𑀬𑁂𑀯, ‘‘𑀦 𑀓𑀸𑀮𑀸𑀫𑀲𑁆𑀲 𑀯𑀸𑀘𑀸𑀬 𑀧𑀭𑀺𑀬𑀢𑁆𑀢𑀺𑀫𑀢𑁆𑀢𑀫𑁂𑀯 𑀅𑀲𑁆𑀫𑀺𑀁 𑀥𑀫𑁆𑀫𑁂, 𑀅𑀤𑁆𑀥𑀸 𑀏𑀲 𑀲𑀢𑁆𑀢𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀮𑀸𑀪𑀻’’𑀢𑀺 𑀅𑀜𑁆𑀜𑀸𑀲𑀺, 𑀢𑁂𑀦𑀲𑁆𑀲 𑀏𑀢𑀤𑀳𑁄𑀲𑀺.

𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀧𑀯𑁂𑀤𑁂𑀲𑀻𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀧𑀭𑀺𑀬𑁄𑀲𑀸𑀦𑀸 𑀲𑀢𑁆𑀢 𑀲𑀫𑀸𑀧𑀢𑁆𑀢𑀺𑀬𑁄 𑀫𑀁 𑀚𑀸𑀦𑀸𑀧𑁂𑀲𑀺. 𑀲𑀤𑁆𑀥𑀸𑀢𑀺 𑀇𑀫𑀸𑀲𑀁 𑀲𑀢𑁆𑀢𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀸𑀬 𑀲𑀤𑁆𑀥𑀸. 𑀯𑀻𑀭𑀺𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀤𑀳𑁂𑀬𑁆𑀬𑀦𑁆𑀢𑀺 𑀧𑀬𑁄𑀕𑀁 𑀓𑀭𑁂𑀬𑁆𑀬𑀁. 𑀦𑀘𑀺𑀭𑀲𑁆𑀲𑁂𑀯 𑀢𑀁 𑀥𑀫𑁆𑀫𑀁 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺𑀦𑁆𑀢𑀺 𑀩𑁄𑀥𑀺𑀲𑀢𑁆𑀢𑁄 𑀓𑀺𑀭 𑀯𑀻𑀭𑀺𑀬𑀁 𑀧𑀕𑁆𑀕𑀳𑁂𑀢𑁆𑀯𑀸 𑀓𑀢𑀺𑀧𑀸𑀳𑀜𑁆𑀜𑁂𑀯 𑀲𑀢𑁆𑀢 𑀲𑀼𑀯𑀡𑁆𑀡𑀦𑀺𑀲𑁆𑀲𑁂𑀡𑀺𑀬𑁄 𑀧𑀲𑀸𑀭𑁂𑀦𑁆𑀢𑁄 𑀯𑀺𑀬 𑀲𑀢𑁆𑀢 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀲𑀺; 𑀢𑀲𑁆𑀫𑀸 𑀏𑀯𑀫𑀸𑀳.

𑀮𑀸𑀪𑀸 𑀦𑁄, 𑀆𑀯𑀼𑀲𑁄𑀢𑀺 𑀅𑀦𑀼𑀲𑀽𑀬𑀓𑁄 𑀓𑀺𑀭𑁂𑀲 𑀓𑀸𑀮𑀸𑀫𑁄. 𑀢𑀲𑁆𑀫𑀸 ‘‘𑀅𑀬𑀁 𑀅𑀥𑀼𑀦𑀸𑀕𑀢𑁄, 𑀓𑀺𑀦𑁆𑀢𑀺 𑀓𑀢𑁆𑀯𑀸 𑀇𑀫𑀁 𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑀻’’𑀢𑀺 𑀉𑀲𑀽𑀬𑀁 𑀅𑀓𑀢𑁆𑀯𑀸 𑀧𑀲𑀦𑁆𑀦𑁄 𑀧𑀲𑀸𑀤𑀁 𑀧𑀯𑁂𑀤𑁂𑀦𑁆𑀢𑁄 𑀏𑀯𑀫𑀸𑀳. 𑀉𑀪𑁄𑀯 𑀲𑀦𑁆𑀢𑀸 𑀇𑀫𑀁 𑀕𑀡𑀁 𑀧𑀭𑀺𑀳𑀭𑀸𑀫𑀸𑀢𑀺 ‘‘𑀫𑀳𑀸 𑀅𑀬𑀁 𑀕𑀡𑁄, 𑀤𑁆𑀯𑁂𑀧𑀺 𑀚𑀦𑀸 𑀧𑀭𑀺𑀳𑀭𑀸𑀫𑀸’’𑀢𑀺 𑀯𑀢𑁆𑀯𑀸 𑀕𑀡𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺, ‘‘𑀅𑀳𑀫𑁆𑀧𑀺 𑀲𑀢𑁆𑀢𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀮𑀸𑀪𑀻, 𑀫𑀳𑀸𑀧𑀼𑀭𑀺𑀲𑁄𑀧𑀺 𑀲𑀢𑁆𑀢𑀦𑁆𑀦𑀫𑁂𑀯, 𑀏𑀢𑁆𑀢𑀓𑀸 𑀚𑀦𑀸 𑀫𑀳𑀸𑀧𑀼𑀭𑀺𑀲𑀲𑁆𑀲 𑀲𑀦𑁆𑀢𑀺𑀓𑁂 𑀧𑀭𑀺𑀓𑀫𑁆𑀫𑀁 𑀉𑀕𑁆𑀕𑀡𑁆𑀳𑀣, 𑀏𑀢𑁆𑀢𑀓𑀸 𑀫𑀬𑁆𑀳’’𑀦𑁆𑀢𑀺 𑀫𑀚𑁆𑀛𑁂 𑀪𑀺𑀦𑁆𑀤𑀺𑀢𑁆𑀯𑀸 𑀅𑀤𑀸𑀲𑀺. 𑀉𑀴𑀸𑀭𑀸𑀬𑀸𑀢𑀺 𑀉𑀢𑁆𑀢𑀫𑀸𑀬. 𑀧𑀽𑀚𑀸𑀬𑀸𑀢𑀺 𑀓𑀸𑀮𑀸𑀫𑀲𑁆𑀲 𑀓𑀺𑀭 𑀉𑀧𑀝𑁆𑀞𑀸𑀓𑀸 𑀇𑀢𑁆𑀣𑀺𑀬𑁄𑀧𑀺 𑀧𑀼𑀭𑀺𑀲𑀸𑀧𑀺 𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀺. 𑀓𑀸𑀮𑀸𑀫𑁄 𑁋 ‘‘𑀕𑀘𑁆𑀙𑀣, 𑀫𑀳𑀸𑀧𑀼𑀭𑀺𑀲𑀁 𑀧𑀽𑀚𑁂𑀣𑀸’’𑀢𑀺 𑀯𑀤𑀢𑀺. 𑀢𑁂 𑀢𑀁 𑀧𑀽𑀚𑁂𑀢𑁆𑀯𑀸 𑀬𑀁 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺, 𑀢𑁂𑀦 𑀓𑀸𑀮𑀸𑀫𑀁 𑀧𑀽𑀚𑁂𑀦𑁆𑀢𑀺. 𑀫𑀳𑀕𑁆𑀖𑀸𑀦𑀺 𑀫𑀜𑁆𑀘𑀧𑀻𑀞𑀸𑀦𑀺 𑀆𑀳𑀭𑀦𑁆𑀢𑀺; 𑀢𑀸𑀦𑀺𑀧𑀺 𑀫𑀳𑀸𑀧𑀼𑀭𑀺𑀲𑀲𑁆𑀲 𑀤𑀸𑀧𑁂𑀢𑁆𑀯𑀸 𑀬𑀤𑀺 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺, 𑀅𑀢𑁆𑀢𑀦𑀸 𑀕𑀡𑁆𑀳𑀸𑀢𑀺. 𑀕𑀢𑀕𑀢𑀝𑁆𑀞𑀸𑀦𑁂 𑀯𑀭𑀲𑁂𑀦𑀸𑀲𑀦𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀚𑀕𑁆𑀕𑀸𑀧𑁂𑀢𑁆𑀯𑀸 𑀲𑁂𑀲𑀓𑀁 𑀅𑀢𑁆𑀢𑀦𑀸 𑀕𑀡𑁆𑀳𑀸𑀢𑀺. 𑀏𑀯𑀁 𑀉𑀴𑀸𑀭𑀸𑀬 𑀧𑀽𑀚𑀸𑀬 𑀧𑀽𑀚𑁂𑀲𑀺. 𑀦𑀸𑀬𑀁 𑀥𑀫𑁆𑀫𑁄 𑀦𑀺𑀩𑁆𑀩𑀺𑀤𑀸𑀬𑀸𑀢𑀺𑀆𑀤𑀻𑀲𑀼 𑀅𑀬𑀁 𑀲𑀢𑁆𑀢𑀲𑀫𑀸𑀧𑀢𑁆𑀢𑀺𑀥𑀫𑁆𑀫𑁄 𑀦𑁂𑀯 𑀯𑀝𑁆𑀝𑁂 𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀣𑀸𑀬, 𑀦 𑀯𑀺𑀭𑀚𑁆𑀚𑀦𑀢𑁆𑀣𑀸𑀬, 𑀦 𑀭𑀸𑀕𑀸𑀤𑀺𑀦𑀺𑀭𑁄𑀥𑀢𑁆𑀣𑀸𑀬, 𑀦 𑀉𑀧𑀲𑀫𑀢𑁆𑀣𑀸𑀬, 𑀦 𑀅𑀪𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑀁 𑀅𑀪𑀺𑀚𑀸𑀦𑀦𑀢𑁆𑀣𑀸𑀬, 𑀦 𑀘𑀢𑀼𑀫𑀕𑁆𑀕𑀲𑀫𑁆𑀩𑁄𑀥𑀸𑀬, 𑀦 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.

𑀬𑀸𑀯𑀤𑁂𑀯 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀽𑀧𑀧𑀢𑁆𑀢𑀺𑀬𑀸𑀢𑀺 𑀬𑀸𑀯 𑀲𑀝𑁆𑀞𑀺𑀓𑀧𑁆𑀧𑀲𑀳𑀲𑁆𑀲𑀸𑀬𑀼𑀧𑀭𑀺𑀫𑀸𑀡𑁂 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀪𑀯𑁂 𑀉𑀧𑀧𑀢𑁆𑀢𑀺, 𑀢𑀸𑀯𑀤𑁂𑀯 𑀲𑀁𑀯𑀢𑁆𑀢𑀢𑀺, 𑀦 𑀢𑀢𑁄 𑀉𑀤𑁆𑀥𑀁. 𑀏𑀯𑀫𑀬𑀁 𑀧𑀼𑀦𑀭𑀸𑀯𑀢𑁆𑀢𑀦𑀥𑀫𑁆𑀫𑁄𑀬𑁂𑀯; 𑀬𑀜𑁆𑀘 𑀞𑀸𑀦𑀁 𑀧𑀸𑀧𑁂𑀢𑀺, 𑀢𑀁 𑀚𑀸𑀢𑀺𑀚𑀭𑀸𑀫𑀭𑀡𑁂𑀳𑀺 𑀅𑀧𑀭𑀺𑀫𑀼𑀢𑁆𑀢𑀫𑁂𑀯 𑀫𑀘𑁆𑀘𑀼𑀧𑀸𑀲𑀧𑀭𑀺𑀓𑁆𑀔𑀺𑀢𑁆𑀢𑀫𑁂𑀯𑀸𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀘 𑀧𑀦 𑀫𑀳𑀸𑀲𑀢𑁆𑀢𑁄 𑀬𑀣𑀸 𑀦𑀸𑀫 𑀙𑀸𑀢𑀚𑁆𑀛𑀢𑁆𑀢𑀧𑀼𑀭𑀺𑀲𑁄 𑀫𑀦𑀼𑀜𑁆𑀜𑀪𑁄𑀚𑀦𑀁 𑀮𑀪𑀺𑀢𑁆𑀯𑀸 𑀲𑀫𑁆𑀧𑀺𑀬𑀸𑀬𑀫𑀸𑀦𑁄𑀧𑀺 𑀪𑀼𑀜𑁆𑀚𑀺𑀢𑁆𑀯𑀸 𑀧𑀺𑀢𑁆𑀢𑀯𑀲𑁂𑀦 𑀯𑀸 𑀲𑁂𑀫𑁆𑀳𑀯𑀲𑁂𑀦 𑀯𑀸 𑀫𑀓𑁆𑀔𑀺𑀓𑀸𑀯𑀲𑁂𑀦 𑀯𑀸 𑀙𑀟𑁆𑀟𑁂𑀢𑁆𑀯𑀸 𑀧𑀼𑀦 𑀏𑀓𑀁 𑀧𑀺𑀡𑁆𑀟𑀫𑁆𑀧𑀺 𑀪𑀼𑀜𑁆𑀚𑀺𑀲𑁆𑀲𑀸𑀫𑀻𑀢𑀺 𑀫𑀦𑀁 𑀦 𑀉𑀧𑁆𑀧𑀸𑀤𑁂𑀢𑀺; 𑀏𑀯𑀫𑁂𑀯 𑀇𑀫𑀸 𑀲𑀢𑁆𑀢 𑀲𑀫𑀸𑀧𑀢𑁆𑀢𑀺𑀬𑁄 𑀫𑀳𑀦𑁆𑀢𑁂𑀦 𑀉𑀲𑁆𑀲𑀸𑀳𑁂𑀦 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸𑀧𑀺, 𑀢𑀸𑀲𑀼 𑀇𑀫𑀁 𑀧𑀼𑀦𑀭𑀸𑀯𑀢𑁆𑀢𑀺𑀓𑀸𑀤𑀺𑀪𑁂𑀤𑀁 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸, 𑀧𑀼𑀦 𑀇𑀫𑀁 𑀥𑀫𑁆𑀫𑀁 𑀆𑀯𑀚𑁆𑀚𑀺𑀲𑁆𑀲𑀸𑀫𑀺 𑀯𑀸 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀺 𑀯𑀸 𑀅𑀥𑀺𑀝𑁆𑀞𑀳𑀺𑀲𑁆𑀲𑀸𑀫𑀺 𑀯𑀸 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀺 𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀲𑁆𑀲𑀸𑀫𑀺 𑀯𑀸𑀢𑀺 𑀘𑀺𑀢𑁆𑀢𑀫𑁂𑀯 𑀦 𑀉𑀧𑁆𑀧𑀸𑀤𑁂𑀲𑀺. 𑀅𑀦𑀮𑀗𑁆𑀓𑀭𑀺𑀢𑁆𑀯𑀸𑀢𑀺 𑀅𑀮𑀁 𑀇𑀫𑀺𑀦𑀸, 𑀅𑀮𑀁 𑀇𑀫𑀺𑀦𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀅𑀮𑀗𑁆𑀓𑀭𑀺𑀢𑁆𑀯𑀸. 𑀦𑀺𑀩𑁆𑀩𑀺𑀚𑁆𑀚𑀸𑀢𑀺 𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸. 𑀅𑀧𑀓𑁆𑀓𑀫𑀺𑀦𑁆𑀢𑀺 𑀅𑀕𑀫𑀸𑀲𑀺𑀁.

𑁨𑁭𑁮. 𑀦 𑀔𑁄 𑀭𑀸𑀫𑁄 𑀇𑀫𑀁 𑀥𑀫𑁆𑀫𑀦𑁆𑀢𑀺 𑀇𑀥𑀸𑀧𑀺 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀥𑀫𑁆𑀫𑀁 𑀉𑀕𑁆𑀕𑀡𑁆𑀳𑀦𑁆𑀢𑁄𑀬𑁂𑀯 𑀅𑀜𑁆𑀜𑀸𑀲𑀺 𑁋 ‘‘𑀦𑀸𑀬𑀁 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀥𑀫𑁆𑀫𑁄 𑀉𑀤𑀓𑀲𑁆𑀲 𑀯𑀸𑀘𑀸𑀬 𑀉𑀕𑁆𑀕𑀳𑀺𑀢𑀫𑀢𑁆𑀢𑁄𑀯, 𑀅𑀤𑁆𑀥𑀸 𑀧𑀦𑁂𑀲 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻’’𑀢𑀺. 𑀢𑁂𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀦 𑀔𑁄 𑀭𑀸𑀫𑁄…𑀧𑁂… 𑀚𑀸𑀦𑀁 𑀧𑀲𑁆𑀲𑀁 𑀯𑀺𑀳𑀸𑀲𑀻’’𑀢𑀺. 𑀲𑁂𑀲𑀫𑁂𑀢𑁆𑀣 𑀧𑀼𑀭𑀺𑀫𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁨𑁭𑁯. 𑀬𑁂𑀦 𑀉𑀭𑀼𑀯𑁂𑀮𑀸 𑀲𑁂𑀦𑀸𑀦𑀺𑀕𑀫𑁄𑀢𑀺 𑀏𑀢𑁆𑀣 𑀉𑀭𑀼𑀯𑁂𑀮𑀸𑀢𑀺 𑀫𑀳𑀸𑀯𑁂𑀮𑀸, 𑀫𑀳𑀸𑀯𑀸𑀮𑀺𑀓𑀭𑀸𑀲𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀉𑀭𑀽𑀢𑀺 𑀯𑀸𑀮𑀺𑀓𑀸 𑀯𑀼𑀘𑁆𑀘𑀢𑀺; 𑀯𑁂𑀮𑀸𑀢𑀺 𑀫𑀭𑀺𑀬𑀸𑀤𑀸, 𑀯𑁂𑀮𑀸𑀢𑀺𑀓𑁆𑀓𑀫𑀦𑀳𑁂𑀢𑀼 𑀆𑀳𑀝𑀸 𑀉𑀭𑀼 𑀉𑀭𑀼𑀯𑁂𑀮𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀢𑀻𑀢𑁂 𑀓𑀺𑀭 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀤𑀲𑀲𑀳𑀲𑁆𑀲𑀸 𑀓𑀼𑀮𑀧𑀼𑀢𑁆𑀢𑀸 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀯𑀺𑀳𑀭𑀦𑁆𑀢𑀸 𑀏𑀓𑀤𑀺𑀯𑀲𑀁 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀓𑀢𑀺𑀓𑀯𑀢𑁆𑀢𑀁 𑀅𑀓𑀁𑀲𑀼 𑁋 ‘‘𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀸𑀦𑀺 𑀦𑀸𑀫 𑀧𑀭𑁂𑀲𑀫𑁆𑀧𑀺 𑀧𑀸𑀓𑀝𑀸𑀦𑀺 𑀳𑁄𑀦𑁆𑀢𑀺, 𑀫𑀦𑁄𑀓𑀫𑁆𑀫𑀁 𑀧𑀦 𑀅𑀧𑀸𑀓𑀝𑀁. 𑀢𑀲𑁆𑀫𑀸 𑀬𑁄 𑀓𑀸𑀫𑀯𑀺𑀢𑀓𑁆𑀓𑀁 𑀯𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁 𑀯𑀸 𑀯𑀺𑀢𑀓𑁆𑀓𑁂𑀢𑀺, 𑀢𑀲𑁆𑀲 𑀅𑀜𑁆𑀜𑁄 𑀘𑁄𑀤𑀓𑁄 𑀦𑀸𑀫 𑀦𑀢𑁆𑀣𑀺; 𑀲𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀘𑁄𑀤𑁂𑀢𑁆𑀯𑀸 𑀧𑀢𑁆𑀢𑀧𑀼𑀝𑁂𑀦 𑀯𑀸𑀮𑀺𑀓𑀁 𑀆𑀳𑀭𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀆𑀓𑀺𑀭𑀢𑀼, 𑀇𑀤𑀫𑀲𑁆𑀲 𑀤𑀡𑁆𑀟𑀓𑀫𑁆𑀫’’𑀦𑁆𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀬𑁄 𑀢𑀸𑀤𑀺𑀲𑀁 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀢𑀺, 𑀲𑁄 𑀢𑀢𑁆𑀣 𑀧𑀢𑁆𑀢𑀧𑀼𑀝𑁂𑀦 𑀯𑀸𑀮𑀺𑀓𑀁 𑀆𑀓𑀺𑀭𑀢𑀺, 𑀏𑀯𑀁 𑀢𑀢𑁆𑀣 𑀅𑀦𑀼𑀓𑁆𑀓𑀫𑁂𑀦 𑀫𑀳𑀸𑀯𑀸𑀮𑀺𑀓𑀭𑀸𑀲𑀺 𑀚𑀸𑀢𑁄. 𑀢𑀢𑁄 𑀢𑀁 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀘𑁂𑀢𑀺𑀬𑀝𑁆𑀞𑀸𑀦𑀫𑀓𑀸𑀲𑀺; 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀉𑀭𑀼𑀯𑁂𑀮𑀸𑀢𑀺 𑀫𑀳𑀸𑀯𑁂𑀮𑀸, 𑀫𑀳𑀸𑀯𑀸𑀮𑀺𑀓𑀭𑀸𑀲𑀻𑀢𑀺 𑀅𑀢𑁆𑀣𑁄’’𑀢𑀺. 𑀢𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀅𑀣 𑀯𑀸 𑀉𑀭𑀽𑀢𑀺 𑀯𑀸𑀮𑀺𑀓𑀸 𑀯𑀼𑀘𑁆𑀘𑀢𑀺, 𑀯𑁂𑀮𑀸𑀢𑀺 𑀫𑀭𑀺𑀬𑀸𑀤𑀸. 𑀯𑁂𑀮𑀸𑀢𑀺𑀓𑁆𑀓𑀫𑀦𑀳𑁂𑀢𑀼 𑀆𑀳𑀝𑀸 𑀉𑀭𑀼 𑀉𑀭𑀼𑀯𑁂𑀮𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺.

𑀲𑁂𑀦𑀸𑀦𑀺𑀕𑀫𑁄𑀢𑀺 𑀲𑁂𑀦𑀸𑀬 𑀦𑀺𑀕𑀫𑁄. 𑀧𑀞𑀫𑀓𑀧𑁆𑀧𑀺𑀓𑀸𑀦𑀁 𑀓𑀺𑀭 𑀢𑀲𑁆𑀫𑀺𑀁 𑀞𑀸𑀦𑁂 𑀲𑁂𑀦𑀸𑀦𑀺𑀯𑁂𑀲𑁄 𑀅𑀳𑁄𑀲𑀺; 𑀢𑀲𑁆𑀫𑀸 𑀲𑁄 𑀧𑀤𑁂𑀲𑁄 𑀲𑁂𑀦𑀸𑀦𑀺𑀕𑀫𑁄𑀢𑀺 𑀯𑀼𑀘𑁆𑀘𑀢𑀺. ‘‘𑀲𑁂𑀦𑀸𑀦𑀺-𑀕𑀸𑀫𑁄’’𑀢𑀺𑀧𑀺 𑀧𑀸𑀞𑁄. 𑀲𑁂𑀦𑀸𑀦𑀻 𑀦𑀸𑀫 𑀲𑀼𑀚𑀸𑀢𑀸𑀬 𑀧𑀺𑀢𑀸, 𑀢𑀲𑁆𑀲 𑀕𑀸𑀫𑁄𑀢𑀺 𑀅𑀢𑁆𑀣𑁄. 𑀢𑀤𑀯𑀲𑀭𑀺𑀦𑁆𑀢𑀺 𑀢𑀢𑁆𑀣 𑀑𑀲𑀭𑀺𑀁. 𑀭𑀫𑀡𑀻𑀬𑀁 𑀪𑀽𑀫𑀺𑀪𑀸𑀕𑀦𑁆𑀢𑀺 𑀲𑀼𑀧𑀼𑀧𑁆𑀨𑀺𑀢𑀦𑀸𑀦𑀧𑁆𑀧𑀓𑀸𑀭𑀚𑀮𑀚𑀣𑀮𑀚𑀧𑀼𑀧𑁆𑀨𑀯𑀺𑀘𑀺𑀢𑁆𑀢𑀁 𑀫𑀦𑁄𑀭𑀫𑁆𑀫𑀁 𑀪𑀽𑀫𑀺𑀪𑀸𑀕𑀁. 𑀧𑀸𑀲𑀸𑀤𑀺𑀓𑀜𑁆𑀘 𑀯𑀦𑀲𑀡𑁆𑀟𑀦𑁆𑀢𑀺 𑀫𑁄𑀭𑀧𑀺𑀜𑁆𑀙𑀓𑀮𑀸𑀧𑀲𑀤𑀺𑀲𑀁 𑀧𑀲𑀸𑀤𑀚𑀦𑀦𑀯𑀦𑀲𑀡𑁆𑀟𑀜𑁆𑀘 𑀅𑀤𑁆𑀤𑀲𑀁. 𑀦𑀤𑀺𑀜𑁆𑀘 𑀲𑀦𑁆𑀤𑀦𑁆𑀢𑀺𑀦𑁆𑀢𑀺 𑀲𑀦𑁆𑀤𑀫𑀸𑀦𑀜𑁆𑀘 𑀫𑀡𑀺𑀓𑁆𑀔𑀦𑁆𑀥𑀲𑀤𑀺𑀲𑀁 𑀯𑀺𑀫𑀮𑀦𑀻𑀮𑀲𑀻𑀢𑀮𑀲𑀮𑀺𑀮𑀁 𑀦𑁂𑀭𑀜𑁆𑀚𑀭𑀁 𑀦𑀤𑀺𑀁 𑀅𑀤𑁆𑀤𑀲𑀁. 𑀲𑁂𑀢𑀓𑀦𑁆𑀢𑀺 𑀧𑀭𑀺𑀲𑀼𑀤𑁆𑀥𑀁 𑀦𑀺𑀓𑁆𑀓𑀤𑁆𑀤𑀫𑀁. 𑀲𑀼𑀧𑀢𑀺𑀢𑁆𑀣𑀦𑁆𑀢𑀺 𑀅𑀦𑀼𑀧𑀼𑀩𑁆𑀩𑀕𑀫𑁆𑀪𑀻𑀭𑁂𑀳𑀺 𑀲𑀼𑀦𑁆𑀤𑀭𑁂𑀳𑀺 𑀢𑀺𑀢𑁆𑀣𑁂𑀳𑀺 𑀉𑀧𑁂𑀢𑀁. 𑀭𑀫𑀡𑀻𑀬𑀦𑁆𑀢𑀺 𑀭𑀚𑀢𑀧𑀝𑁆𑀝𑀲𑀤𑀺𑀲𑀁 𑀯𑀺𑀧𑁆𑀧𑀓𑀺𑀡𑁆𑀡𑀯𑀸𑀮𑀺𑀓𑀁 𑀧𑀳𑀽𑀢𑀫𑀘𑁆𑀙𑀓𑀘𑁆𑀙𑀧𑀁 𑀅𑀪𑀺𑀭𑀸𑀫𑀤𑀲𑁆𑀲𑀦𑀁. 𑀲𑀫𑀦𑁆𑀢𑀸 𑀘 𑀕𑁄𑀘𑀭𑀕𑀸𑀫𑀦𑁆𑀢𑀺 𑀢𑀲𑁆𑀲 𑀧𑀤𑁂𑀲𑀲𑁆𑀲 𑀲𑀫𑀦𑁆𑀢𑀸 𑀅𑀯𑀺𑀤𑀽𑀭𑁂 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀁 𑀲𑀫𑁆𑀧𑀢𑁆𑀢𑀧𑀩𑁆𑀩𑀚𑀺𑀢𑀸𑀦𑀁 𑀲𑀼𑀮𑀪𑀧𑀺𑀡𑁆𑀟𑀁 𑀕𑁄𑀘𑀭𑀕𑀸𑀫𑀜𑁆𑀘 𑀅𑀤𑁆𑀤𑀲𑀁. 𑀅𑀮𑀁 𑀯𑀢𑀸𑀢𑀺 𑀲𑀫𑀢𑁆𑀣𑀁 𑀯𑀢. 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺𑀦𑁆𑀢𑀺 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀦𑀺𑀲𑀚𑁆𑀚𑀁 𑀲𑀦𑁆𑀥𑀸𑀬𑀸𑀳. 𑀉𑀧𑀭𑀺𑀲𑀼𑀢𑁆𑀢𑀲𑁆𑀫𑀺𑀜𑁆𑀳𑀺 𑀢𑀢𑁆𑀣𑁂𑀯𑀸𑀢𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀝𑁆𑀞𑀸𑀦𑀁 𑀅𑀥𑀺𑀧𑁆𑀧𑁂𑀢𑀁, 𑀇𑀥 𑀧𑀦 𑀩𑁄𑀥𑀺𑀧𑀮𑁆𑀮𑀗𑁆𑀓𑁄. 𑀢𑁂𑀦𑀸𑀳 𑁋 ‘‘𑀢𑀢𑁆𑀣𑁂𑀯 𑀦𑀺𑀲𑀻𑀤𑀺’’𑀦𑁆𑀢𑀺. 𑀅𑀮𑀫𑀺𑀤𑀁 𑀧𑀥𑀸𑀦𑀸𑀬𑀸𑀢𑀺 𑀇𑀤𑀁 𑀞𑀸𑀦𑀁 𑀧𑀥𑀸𑀦𑀢𑁆𑀣𑀸𑀬 𑀲𑀫𑀢𑁆𑀣𑀦𑁆𑀢𑀺 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀦𑀺𑀲𑀻𑀤𑀺𑀦𑁆𑀢𑀺 𑀅𑀢𑁆𑀣𑁄.

𑁨𑁮𑁦. 𑀅𑀚𑁆𑀛𑀕𑀫𑀦𑁆𑀢𑀺 𑀅𑀥𑀺𑀕𑀘𑁆𑀙𑀺𑀁 𑀧𑀝𑀺𑀮𑀪𑀺𑀁. 𑀜𑀸𑀡𑀜𑁆𑀘 𑀧𑀦 𑀫𑁂 𑀤𑀲𑁆𑀲𑀦𑀦𑁆𑀢𑀺 𑀲𑀩𑁆𑀩𑀥𑀫𑁆𑀫𑀤𑀲𑁆𑀲𑀦𑀲𑀫𑀢𑁆𑀣𑀜𑁆𑀘 𑀫𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀉𑀤𑀧𑀸𑀤𑀺. 𑀅𑀓𑀼𑀧𑁆𑀧𑀸 𑀫𑁂 𑀯𑀺𑀫𑀼𑀢𑁆𑀢𑀻𑀢𑀺 𑀫𑀬𑁆𑀳𑀁 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺 𑀅𑀓𑀼𑀧𑁆𑀧𑀢𑀸𑀬 𑀘 𑀅𑀓𑀼𑀧𑁆𑀧𑀸𑀭𑀫𑁆𑀫𑀡𑀢𑀸𑀬 𑀘 𑀅𑀓𑀼𑀧𑁆𑀧𑀸, 𑀲𑀸 𑀳𑀺 𑀭𑀸𑀕𑀸𑀤𑀻𑀳𑀺 𑀦 𑀓𑀼𑀧𑁆𑀧𑀢𑀻𑀢𑀺 𑀅𑀓𑀼𑀧𑁆𑀧𑀢𑀸𑀬𑀧𑀺 𑀅𑀓𑀼𑀧𑁆𑀧𑀸, 𑀅𑀓𑀼𑀧𑁆𑀧𑀁 𑀦𑀺𑀩𑁆𑀩𑀸𑀦𑀫𑀲𑁆𑀲𑀸𑀭𑀫𑁆𑀫𑀡𑀦𑁆𑀢𑀺𑀧𑀺 𑀅𑀓𑀼𑀧𑁆𑀧𑀸. 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀻𑀢𑀺 𑀅𑀬𑀁 𑀲𑀩𑁆𑀩𑀧𑀘𑁆𑀙𑀺𑀫𑀸 𑀚𑀸𑀢𑀺. 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄𑀢𑀺 𑀇𑀤𑀸𑀦𑀺 𑀫𑁂 𑀧𑀼𑀦 𑀧𑀝𑀺𑀲𑀦𑁆𑀥𑀺 𑀦𑀸𑀫 𑀦𑀢𑁆𑀣𑀻𑀢𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀫𑁆𑀧𑀺 𑀫𑁂 𑀉𑀧𑁆𑀧𑀦𑁆𑀦𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁨𑁮𑁧. 𑀅𑀥𑀺𑀕𑀢𑁄𑀢𑀺 𑀧𑀝𑀺𑀯𑀺𑀤𑁆𑀥𑁄. 𑀥𑀫𑁆𑀫𑁄𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁄. 𑀕𑀫𑁆𑀪𑀻𑀭𑁄𑀢𑀺 𑀉𑀢𑁆𑀢𑀸𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀯𑀘𑀦𑀫𑁂𑀢𑀁. 𑀤𑀼𑀤𑁆𑀤𑀲𑁄𑀢𑀺 𑀕𑀫𑁆𑀪𑀻𑀭𑀢𑁆𑀢𑀸𑀯 𑀤𑀼𑀤𑁆𑀤𑀲𑁄 𑀤𑀼𑀓𑁆𑀔𑁂𑀦 𑀤𑀝𑁆𑀞𑀩𑁆𑀩𑁄, 𑀦 𑀲𑀓𑁆𑀓𑀸 𑀲𑀼𑀔𑁂𑀦 𑀤𑀝𑁆𑀞𑀼𑀁. 𑀤𑀼𑀤𑁆𑀤𑀲𑀢𑁆𑀢𑀸𑀯 𑀤𑀼𑀭𑀦𑀼𑀩𑁄𑀥𑁄, 𑀤𑀼𑀓𑁆𑀔𑁂𑀦 𑀅𑀯𑀩𑀼𑀚𑁆𑀛𑀺𑀢𑀩𑁆𑀩𑁄, 𑀦 𑀲𑀓𑁆𑀓𑀸 𑀲𑀼𑀔𑁂𑀦 𑀅𑀯𑀩𑀼𑀚𑁆𑀛𑀺𑀢𑀼𑀁. 𑀲𑀦𑁆𑀢𑁄𑀢𑀺 𑀦𑀺𑀩𑁆𑀩𑀼𑀢𑁄. 𑀧𑀡𑀻𑀢𑁄𑀢𑀺 𑀅𑀢𑀧𑁆𑀧𑀓𑁄. 𑀇𑀤𑀁 𑀤𑁆𑀯𑀬𑀁 𑀮𑁄𑀓𑀼𑀢𑁆𑀢𑀭𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀢𑀓𑁆𑀓𑀸𑀯𑀘𑀭𑁄𑀢𑀺 𑀢𑀓𑁆𑀓𑁂𑀦 𑀅𑀯𑀘𑀭𑀺𑀢𑀩𑁆𑀩𑁄 𑀑𑀕𑀸𑀳𑀺𑀢𑀩𑁆𑀩𑁄 𑀦 𑀳𑁄𑀢𑀺, 𑀜𑀸𑀡𑁂𑀦𑁂𑀯 𑀅𑀯𑀘𑀭𑀺𑀢𑀩𑁆𑀩𑁄. 𑀦𑀺𑀧𑀼𑀡𑁄𑀢𑀺 𑀲𑀡𑁆𑀳𑁄. 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑁄𑀢𑀺 𑀲𑀫𑁆𑀫𑀸𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀯𑁂𑀤𑀺𑀢𑀩𑁆𑀩𑁄. 𑀆𑀮𑀬𑀭𑀸𑀫𑀸𑀢𑀺 𑀲𑀢𑁆𑀢𑀸 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀅𑀮𑁆𑀮𑀻𑀬𑀦𑁆𑀢𑀺. 𑀢𑀲𑁆𑀫𑀸 𑀢𑁂 𑀆𑀮𑀬𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀆𑀮𑀬𑀦𑁆𑀢𑀺, 𑀢𑀲𑁆𑀫𑀸 𑀆𑀮𑀬𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀳𑀺 𑀆𑀮𑀬𑁂𑀳𑀺 𑀭𑀫𑀦𑁆𑀢𑀻𑀢𑀺 𑀆𑀮𑀬𑀭𑀸𑀫𑀸. 𑀆𑀮𑀬𑁂𑀲𑀼 𑀭𑀢𑀸𑀢𑀺 𑀆𑀮𑀬𑀭𑀢𑀸. 𑀆𑀮𑀬𑁂𑀲𑀼 𑀲𑀼𑀝𑁆𑀞𑀼 𑀫𑀼𑀤𑀺𑀢𑀸𑀢𑀺 𑀆𑀮𑀬𑀲𑀫𑁆𑀫𑀼𑀤𑀺𑀢𑀸. 𑀬𑀣𑁂𑀯 𑀳𑀺 𑀲𑀼𑀲𑀚𑁆𑀚𑀺𑀢𑀁 𑀧𑀼𑀧𑁆𑀨𑀨𑀮𑀪𑀭𑀺𑀢𑀭𑀼𑀓𑁆𑀔𑀸𑀤𑀺𑀲𑀫𑁆𑀧𑀦𑁆𑀦𑀁 𑀉𑀬𑁆𑀬𑀸𑀦𑀁 𑀧𑀯𑀺𑀝𑁆𑀞𑁄 𑀭𑀸𑀚𑀸 𑀢𑀸𑀬 𑀢𑀸𑀬 𑀲𑀫𑁆𑀧𑀢𑁆𑀢𑀺𑀬𑀸 𑀭𑀫𑀢𑀺, 𑀲𑀫𑁆𑀫𑀼𑀤𑀺𑀢𑁄 𑀆𑀫𑁄𑀤𑀺𑀢𑀧𑀫𑁄𑀤𑀺𑀢𑁄 𑀳𑁄𑀢𑀺, 𑀦 𑀉𑀓𑁆𑀓𑀡𑁆𑀞𑀢𑀺, 𑀲𑀸𑀬𑀫𑁆𑀧𑀺 𑀦𑀺𑀓𑁆𑀔𑀫𑀺𑀢𑀼𑀁 𑀦 𑀇𑀘𑁆𑀙𑀢𑀺; 𑀏𑀯𑀫𑀺𑀫𑁂𑀳𑀺𑀧𑀺 𑀓𑀸𑀫𑀸𑀮𑀬𑀢𑀡𑁆𑀳𑀸𑀮𑀬𑁂𑀳𑀺 𑀲𑀢𑁆𑀢𑀸 𑀭𑀫𑀦𑁆𑀢𑀺, 𑀲𑀁𑀲𑀸𑀭𑀯𑀝𑁆𑀝𑁂 𑀲𑀫𑁆𑀫𑀼𑀤𑀺𑀢𑀸 𑀅𑀦𑀼𑀓𑁆𑀓𑀡𑁆𑀞𑀺𑀢𑀸 𑀯𑀲𑀦𑁆𑀢𑀺. 𑀢𑁂𑀦 𑀦𑁂𑀲𑀁 𑀪𑀕𑀯𑀸 𑀤𑀼𑀯𑀺𑀥𑀫𑁆𑀧𑀺 𑀆𑀮𑀬𑀁 𑀉𑀬𑁆𑀬𑀸𑀦𑀪𑀽𑀫𑀺𑀁 𑀯𑀺𑀬 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀮𑀬𑀭𑀸𑀫𑀸’’𑀢𑀺𑀆𑀤𑀺𑀫𑀸𑀳.

𑀬𑀤𑀺𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀢𑀲𑁆𑀲 𑀞𑀸𑀦𑀁 𑀲𑀦𑁆𑀥𑀸𑀬 ‘‘𑀬𑀁 𑀇𑀤’’𑀦𑁆𑀢𑀺, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀲𑀦𑁆𑀥𑀸𑀬 ‘‘𑀬𑁄 𑀅𑀬’’𑀦𑁆𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀇𑀫𑁂𑀲𑀁 𑀧𑀘𑁆𑀘𑀬𑀸 𑀇𑀤𑀧𑁆𑀧𑀘𑁆𑀘𑀬𑀸; 𑀇𑀤𑀧𑁆𑀧𑀘𑁆𑀘𑀬𑀸 𑀏𑀯 𑀇𑀤𑀧𑁆𑀧𑀘𑁆𑀘𑀬𑀢𑀸; 𑀇𑀤𑀧𑁆𑀧𑀘𑁆𑀘𑀬𑀢𑀸 𑀘 𑀲𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀘𑀸𑀢𑀺 𑀇𑀤𑀧𑁆𑀧𑀘𑁆𑀘𑀬𑀢𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀲𑀗𑁆𑀔𑀸𑀭𑀸𑀤𑀺𑀧𑀘𑁆𑀘𑀬𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄𑀢𑀺𑀆𑀤𑀺 𑀲𑀩𑁆𑀩𑀁 𑀦𑀺𑀩𑁆𑀩𑀸𑀦𑀫𑁂𑀯. 𑀬𑀲𑁆𑀫𑀸 𑀳𑀺 𑀢𑀁 𑀆𑀕𑀫𑁆𑀫 𑀲𑀩𑁆𑀩𑀲𑀗𑁆𑀔𑀸𑀭𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀺 𑀲𑀫𑁆𑀫𑀦𑁆𑀢𑀺 𑀯𑀽𑀧𑀲𑀫𑁆𑀫𑀦𑁆𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀘 𑀢𑀁 𑀆𑀕𑀫𑁆𑀫 𑀲𑀩𑁆𑀩𑁂 𑀉𑀧𑀥𑀬𑁄 𑀧𑀝𑀺𑀦𑀺𑀲𑁆𑀲𑀝𑁆𑀞𑀸 𑀳𑁄𑀦𑁆𑀢𑀺, 𑀲𑀩𑁆𑀩𑀸 𑀢𑀡𑁆𑀳𑀸 𑀔𑀻𑀬𑀦𑁆𑀢𑀺, 𑀲𑀩𑁆𑀩𑁂 𑀓𑀺𑀮𑁂𑀲𑀭𑀸𑀕𑀸 𑀯𑀺𑀭𑀚𑁆𑀚𑀦𑁆𑀢𑀺, 𑀲𑀩𑁆𑀩𑀁 𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑀢𑀺; 𑀢𑀲𑁆𑀫𑀸 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀢𑀡𑁆𑀳𑀸𑀓𑁆𑀔𑀬𑁄 𑀯𑀺𑀭𑀸𑀕𑁄 𑀦𑀺𑀭𑁄𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀧𑀦𑁂𑀲𑀸 𑀢𑀡𑁆𑀳𑀸 𑀪𑀯𑁂𑀦 𑀪𑀯𑀁, 𑀨𑀮𑁂𑀦 𑀯𑀸 𑀲𑀤𑁆𑀥𑀺𑀁 𑀓𑀫𑁆𑀫𑀁 𑀯𑀺𑀦𑀢𑀺 𑀲𑀁𑀲𑀺𑀩𑁆𑀩𑀢𑀻𑀢𑀺 𑀓𑀢𑁆𑀯𑀸 𑀯𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀢𑁄 𑀦𑀺𑀓𑁆𑀔𑀦𑁆𑀢𑀁 𑀯𑀸𑀦𑀢𑁄𑀢𑀺 𑀦𑀺𑀩𑁆𑀩𑀸𑀦𑀁. 𑀲𑁄 𑀫𑀫𑀲𑁆𑀲 𑀓𑀺𑀮𑀫𑀣𑁄𑀢𑀺 𑀬𑀸 𑀅𑀚𑀸𑀦𑀦𑁆𑀢𑀸𑀦𑀁 𑀤𑁂𑀲𑀦𑀸 𑀦𑀸𑀫, 𑀲𑁄 𑀫𑀫 𑀓𑀺𑀮𑀫𑀣𑁄 𑀅𑀲𑁆𑀲, 𑀲𑀸 𑀫𑀫 𑀯𑀺𑀳𑁂𑀲𑀸 𑀅𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀓𑀸𑀬𑀓𑀺𑀮𑀫𑀣𑁄 𑀘𑁂𑀯 𑀓𑀸𑀬𑀯𑀺𑀳𑁂𑀲𑀸 𑀘 𑀅𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀺𑀢𑁆𑀢𑁂 𑀧𑀦 𑀉𑀪𑀬𑀫𑁆𑀧𑁂𑀢𑀁 𑀩𑀼𑀤𑁆𑀥𑀸𑀦𑀁 𑀦𑀢𑁆𑀣𑀺. 𑀅𑀧𑀺𑀲𑁆𑀲𑀽𑀢𑀺 𑀅𑀦𑀼𑀩𑁆𑀭𑀽𑀳𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀲𑁄 ‘‘𑀦 𑀓𑁂𑀯𑀮𑀁 𑀏𑀢𑀤𑀳𑁄𑀲𑀺, 𑀇𑀫𑀸𑀧𑀺 𑀕𑀸𑀣𑀸 𑀧𑀝𑀺𑀪𑀁𑀲𑀽’’𑀢𑀺 𑀤𑀻𑀧𑁂𑀢𑀺. 𑀫𑀦𑁆𑀢𑀺 𑀫𑀫. 𑀅𑀦𑀘𑁆𑀙𑀭𑀺𑀬𑀸𑀢𑀺 𑀅𑀦𑀼𑀅𑀘𑁆𑀙𑀭𑀺𑀬𑀸. 𑀧𑀝𑀺𑀪𑀁𑀲𑀽𑀢𑀺 𑀧𑀝𑀺𑀪𑀸𑀦𑀲𑀗𑁆𑀔𑀸𑀢𑀲𑁆𑀲 𑀜𑀸𑀡𑀲𑁆𑀲 𑀕𑁄𑀘𑀭𑀸 𑀅𑀳𑁂𑀲𑀼𑀁; 𑀧𑀭𑀺𑀯𑀺𑀢𑀓𑁆𑀓𑀬𑀺𑀢𑀩𑁆𑀩𑀢𑀁 𑀧𑀸𑀧𑀼𑀡𑀺𑀁𑀲𑀼.

𑀓𑀺𑀘𑁆𑀙𑁂𑀦𑀸𑀢𑀺 𑀤𑀼𑀓𑁆𑀔𑁂𑀦, 𑀦 𑀤𑀼𑀓𑁆𑀔𑀸𑀬 𑀧𑀝𑀺𑀧𑀤𑀸𑀬. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀲𑀼𑀔𑀧𑁆𑀧𑀝𑀺𑀧𑀤𑀸𑀯 𑀳𑁄𑀦𑁆𑀢𑀺. 𑀧𑀸𑀭𑀫𑀻𑀧𑀽𑀭𑀡𑀓𑀸𑀮𑁂 𑀧𑀦 𑀲𑀭𑀸𑀕𑀲𑀤𑁄𑀲𑀲𑀫𑁄𑀳𑀲𑁆𑀲𑁂𑀯 𑀲𑀢𑁄 𑀆𑀕𑀢𑀸𑀕𑀢𑀸𑀦𑀁 𑀬𑀸𑀘𑀓𑀸𑀦𑀁, 𑀅𑀮𑀗𑁆𑀓𑀢𑀧𑁆𑀧𑀝𑀺𑀬𑀢𑁆𑀢𑀁 𑀲𑀻𑀲𑀁 𑀓𑀦𑁆𑀢𑀺𑀢𑁆𑀯𑀸, 𑀕𑀮𑀮𑁄𑀳𑀺𑀢𑀁 𑀦𑀻𑀳𑀭𑀺𑀢𑁆𑀯𑀸, 𑀲𑀼𑀅𑀜𑁆𑀚𑀺𑀢𑀸𑀦𑀺 𑀅𑀓𑁆𑀔𑀻𑀦𑀺 𑀉𑀧𑁆𑀧𑀸𑀝𑁂𑀢𑁆𑀯𑀸, 𑀓𑀼𑀮𑀯𑀁𑀲𑀧𑁆𑀧𑀤𑀻𑀧𑀁 𑀧𑀼𑀢𑁆𑀢𑀁 𑀫𑀦𑀸𑀧𑀘𑀸𑀭𑀺𑀦𑀺𑀁 𑀪𑀭𑀺𑀬𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀤𑁂𑀦𑁆𑀢𑀲𑁆𑀲, 𑀅𑀜𑁆𑀜𑀸𑀦𑀺 𑀘 𑀔𑀦𑁆𑀢𑀺𑀯𑀸𑀤𑀺𑀲𑀤𑀺𑀲𑁂𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀙𑁂𑀚𑁆𑀚𑀪𑁂𑀚𑁆𑀚𑀸𑀤𑀻𑀦𑀺 𑀧𑀸𑀧𑀼𑀡𑀦𑁆𑀢𑀲𑁆𑀲 𑀆𑀕𑀫𑀦𑀺𑀬𑀧𑀝𑀺𑀧𑀤𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀳𑀮𑀦𑁆𑀢𑀺 𑀏𑀢𑁆𑀣 𑀳-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑁄, 𑀅𑀮𑀦𑁆𑀢𑀺 𑀅𑀢𑁆𑀣𑁄. 𑀧𑀓𑀸𑀲𑀺𑀢𑀼𑀦𑁆𑀢𑀺 𑀤𑁂𑀲𑀺𑀢𑀼𑀁, 𑀏𑀯𑀁 𑀓𑀺𑀘𑁆𑀙𑁂𑀦 𑀅𑀥𑀺𑀕𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀮𑀁 𑀤𑁂𑀲𑀺𑀢𑀼𑀁, 𑀧𑀭𑀺𑀬𑀢𑁆𑀢𑀁 𑀤𑁂𑀲𑀺𑀢𑀼𑀁, 𑀓𑁄 𑀅𑀢𑁆𑀣𑁄 𑀤𑁂𑀲𑀺𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀸𑀕𑀤𑁄𑀲𑀧𑀭𑁂𑀢𑁂𑀳𑀻𑀢𑀺 𑀭𑀸𑀕𑀤𑁄𑀲𑀧𑀭𑀺𑀨𑀼𑀝𑁆𑀞𑁂𑀳𑀺 𑀭𑀸𑀕𑀤𑁄𑀲𑀸𑀦𑀼𑀕𑀢𑁂𑀳𑀺 𑀯𑀸.

𑀧𑀝𑀺𑀲𑁄𑀢𑀕𑀸𑀫𑀺𑀦𑁆𑀢𑀺 𑀦𑀺𑀘𑁆𑀘𑀸𑀤𑀻𑀦𑀁 𑀧𑀝𑀺𑀲𑁄𑀢𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸 𑀅𑀲𑀼𑀪𑀦𑁆𑀢𑀺 𑀏𑀯𑀁 𑀕𑀢𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀁. 𑀭𑀸𑀕𑀭𑀢𑁆𑀢𑀸𑀢𑀺 𑀓𑀸𑀫𑀭𑀸𑀕𑁂𑀦 𑀪𑀯𑀭𑀸𑀕𑁂𑀦 𑀤𑀺𑀝𑁆𑀞𑀺𑀭𑀸𑀕𑁂𑀦 𑀘 𑀭𑀢𑁆𑀢𑀸. 𑀦 𑀤𑀓𑁆𑀔𑀦𑁆𑀢𑀻𑀢𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸 𑀅𑀲𑀼𑀪𑀦𑁆𑀢𑀺 𑀇𑀫𑀺𑀦𑀸 𑀲𑀪𑀸𑀯𑁂𑀦 𑀦 𑀧𑀲𑁆𑀲𑀺𑀲𑁆𑀲𑀦𑁆𑀢𑀺, 𑀢𑁂 𑀅𑀧𑀲𑁆𑀲𑀦𑁆𑀢𑁂 𑀓𑁄 𑀲𑀓𑁆𑀔𑀺𑀲𑁆𑀲𑀢𑀺 𑀏𑀯𑀁 𑀕𑀸𑀳𑀸𑀧𑁂𑀢𑀼𑀁. 𑀢𑀫𑁄𑀔𑀦𑁆𑀥𑁂𑀦 𑀆𑀯𑀼𑀝𑀸𑀢𑀺 𑀅𑀯𑀺𑀚𑁆𑀚𑀸𑀭𑀸𑀲𑀺𑀦𑀸 𑀅𑀚𑁆𑀛𑁄𑀢𑁆𑀣𑀢𑀸.

𑁨𑁮𑁨. 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬𑀸𑀢𑀺 𑀦𑀺𑀭𑀼𑀲𑁆𑀲𑀼𑀓𑁆𑀓𑀪𑀸𑀯𑁂𑀦, 𑀅𑀤𑁂𑀲𑁂𑀢𑀼𑀓𑀸𑀫𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀧𑀦𑀲𑁆𑀲 𑀏𑀯𑀁 𑀘𑀺𑀢𑁆𑀢𑀁 𑀦𑀫𑀺, 𑀦𑀦𑀼 𑀏𑀲 𑀫𑀼𑀢𑁆𑀢𑁄 𑀫𑁄𑀘𑁂𑀲𑁆𑀲𑀸𑀫𑀺, 𑀢𑀺𑀡𑁆𑀡𑁄 𑀢𑀸𑀭𑁂𑀲𑁆𑀲𑀸𑀫𑀺.

‘‘𑀓𑀺𑀁 𑀫𑁂 𑀅𑀜𑁆𑀜𑀸𑀢𑀯𑁂𑀲𑁂𑀦, 𑀥𑀫𑁆𑀫𑀁 𑀲𑀘𑁆𑀙𑀺𑀓𑀢𑁂𑀦𑀺𑀥;

𑀲𑀩𑁆𑀩𑀜𑁆𑀜𑀼𑀢𑀁 𑀧𑀸𑀧𑀼𑀡𑀺𑀢𑁆𑀯𑀸, 𑀢𑀸𑀭𑀬𑀺𑀲𑁆𑀲𑀁 𑀲𑀤𑁂𑀯𑀓’’𑀦𑁆𑀢𑀺. (𑀩𑀼. 𑀯𑀁. 𑁨.𑁫𑁬) 𑁋

𑀧𑀢𑁆𑀣𑀦𑀁 𑀓𑀢𑁆𑀯𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄𑀢𑀺. 𑀲𑀘𑁆𑀘𑀫𑁂𑀢𑀁, 𑀢𑀤𑁂𑀯𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀼𑀪𑀸𑀯𑁂𑀦 𑀧𑀦𑀲𑁆𑀲 𑀏𑀯𑀁 𑀘𑀺𑀢𑁆𑀢𑀁 𑀦𑀫𑀺. 𑀢𑀲𑁆𑀲 𑀳𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀢𑀸𑀦𑀁 𑀓𑀺𑀮𑁂𑀲𑀕𑀳𑀦𑀢𑀁, 𑀥𑀫𑁆𑀫𑀲𑁆𑀲 𑀘 𑀕𑀫𑁆𑀪𑀻𑀭𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀲𑀢𑁆𑀢𑀸𑀦𑀁 𑀓𑀺𑀮𑁂𑀲𑀕𑀳𑀦𑀢𑀸 𑀘 𑀥𑀫𑁆𑀫𑀕𑀫𑁆𑀪𑀻𑀭𑀢𑀸 𑀘 𑀲𑀩𑁆𑀩𑀸𑀓𑀸𑀭𑁂𑀦 𑀧𑀸𑀓𑀝𑀸 𑀚𑀸𑀢𑀸. 𑀅𑀣𑀲𑁆𑀲 ‘‘𑀇𑀫𑁂 𑀲𑀢𑁆𑀢𑀸 𑀓𑀜𑁆𑀚𑀺𑀓𑀧𑀼𑀡𑁆𑀡𑀸 𑀮𑀸𑀩𑀼 𑀯𑀺𑀬, 𑀢𑀓𑁆𑀓𑀪𑀭𑀺𑀢𑀸 𑀘𑀸𑀝𑀺 𑀯𑀺𑀬, 𑀯𑀲𑀸𑀢𑁂𑀮𑀧𑀻𑀢𑀧𑀺𑀮𑁄𑀢𑀺𑀓𑀸 𑀯𑀺𑀬, 𑀅𑀜𑁆𑀚𑀦𑀫𑀓𑁆𑀔𑀺𑀢𑀳𑀢𑁆𑀣𑁄 𑀯𑀺𑀬 𑀘 𑀓𑀺𑀮𑁂𑀲𑀪𑀭𑀺𑀢𑀸 𑀅𑀢𑀺𑀲𑀁𑀓𑀺𑀮𑀺𑀝𑁆𑀞𑀸 𑀭𑀸𑀕𑀭𑀢𑁆𑀢𑀸 𑀤𑁄𑀲𑀤𑀼𑀝𑁆𑀞𑀸 𑀫𑁄𑀳𑀫𑀽𑀴𑁆𑀳𑀸, 𑀢𑁂 𑀓𑀺𑀁 𑀦𑀸𑀫 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀦𑁆𑀢𑀻’’𑀢𑀺 𑀘𑀺𑀦𑁆𑀢𑀬𑀢𑁄 𑀓𑀺𑀮𑁂𑀲𑀕𑀳𑀦𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀼𑀪𑀸𑀯𑁂𑀦𑀸𑀧𑀺 𑀏𑀯𑀁 𑀘𑀺𑀢𑁆𑀢𑀁 𑀦𑀫𑀺.

‘‘𑀅𑀬𑀜𑁆𑀘 𑀥𑀫𑁆𑀫𑁄 𑀧𑀣𑀯𑀻𑀲𑀦𑁆𑀥𑀸𑀭𑀓𑀉𑀤𑀓𑀓𑁆𑀔𑀦𑁆𑀥𑁄 𑀯𑀺𑀬 𑀕𑀫𑁆𑀪𑀻𑀭𑁄, 𑀧𑀩𑁆𑀩𑀢𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀞𑀧𑀺𑀢𑁄 𑀲𑀸𑀲𑀧𑁄 𑀯𑀺𑀬 𑀤𑀼𑀤𑁆𑀤𑀲𑁄, 𑀲𑀢𑀥𑀸 𑀪𑀺𑀦𑁆𑀦𑀲𑁆𑀲 𑀯𑀸𑀮𑀲𑁆𑀲 𑀓𑁄𑀝𑀺𑀬𑀸 𑀓𑁄𑀝𑀺𑀧𑀝𑀺𑀧𑀸𑀤𑀦𑀁 𑀯𑀺𑀬 𑀤𑀼𑀭𑀦𑀼𑀩𑁄𑀥𑁄. 𑀦𑀦𑀼 𑀫𑀬𑀸 𑀳𑀺 𑀇𑀫𑀁 𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀯𑀸𑀬𑀫𑀦𑁆𑀢𑁂𑀦 𑀅𑀤𑀺𑀦𑁆𑀦𑀁 𑀤𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀅𑀭𑀓𑁆𑀔𑀺𑀢𑀁 𑀲𑀻𑀮𑀁 𑀦𑀸𑀫 𑀦𑀢𑁆𑀣𑀺, 𑀅𑀧𑀭𑀺𑀧𑀽𑀭𑀺𑀢𑀸 𑀓𑀸𑀘𑀺 𑀧𑀸𑀭𑀫𑀻 𑀦𑀸𑀫 𑀦𑀢𑁆𑀣𑀺? 𑀢𑀲𑁆𑀲 𑀫𑁂 𑀦𑀺𑀭𑀼𑀲𑁆𑀲𑀸𑀳𑀁 𑀯𑀺𑀬 𑀫𑀸𑀭𑀩𑀮𑀁 𑀯𑀺𑀥𑀫𑀦𑁆𑀢𑀲𑁆𑀲𑀸𑀧𑀺 𑀧𑀣𑀯𑀻 𑀦 𑀓𑀫𑁆𑀧𑀺𑀢𑁆𑀣, 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲𑀸𑀧𑀺 𑀦 𑀓𑀫𑁆𑀧𑀺𑀢𑁆𑀣, 𑀫𑀚𑁆𑀛𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀲𑁄𑀥𑁂𑀦𑁆𑀢𑀲𑁆𑀲𑀸𑀧𑀺 𑀦 𑀓𑀫𑁆𑀧𑀺𑀢𑁆𑀣, 𑀧𑀘𑁆𑀙𑀺𑀫𑀬𑀸𑀫𑁂 𑀧𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀲𑁆𑀲𑁂𑀯 𑀫𑁂 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀓𑀫𑁆𑀧𑀺𑀢𑁆𑀣. 𑀇𑀢𑀺 𑀫𑀸𑀤𑀺𑀲𑁂𑀦𑀸𑀧𑀺 𑀢𑀺𑀓𑁆𑀔𑀜𑀸𑀡𑁂𑀦 𑀓𑀺𑀘𑁆𑀙𑁂𑀦𑁂𑀯𑀸𑀬𑀁 𑀥𑀫𑁆𑀫𑁄 𑀧𑀝𑀺𑀯𑀺𑀤𑁆𑀥𑁄, 𑀢𑀁 𑀮𑁄𑀓𑀺𑀬𑀫𑀳𑀸𑀚𑀦𑀸 𑀓𑀣𑀁 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀦𑁆𑀢𑀻’’𑀢𑀺 𑀥𑀫𑁆𑀫𑀕𑀫𑁆𑀪𑀻𑀭𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀼𑀪𑀸𑀯𑁂𑀦𑀸𑀧𑀺 𑀏𑀯𑀁 𑀘𑀺𑀢𑁆𑀢𑀁 𑀦𑀫𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀺𑀘 𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑁂 𑀤𑁂𑀲𑁂𑀢𑀼𑀓𑀸𑀫𑀢𑀸𑀬𑀧𑀺𑀲𑁆𑀲 𑀏𑀯𑀁 𑀘𑀺𑀢𑁆𑀢𑀁 𑀦𑀫𑀺. 𑀚𑀸𑀦𑀸𑀢𑀺 𑀳𑀺 𑀪𑀕𑀯𑀸 𑁋 ‘‘𑀫𑀫 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑁂 𑀦𑀫𑀫𑀸𑀦𑁂 𑀫𑀁 𑀫𑀳𑀸𑀩𑁆𑀭𑀳𑁆𑀫𑀸 𑀥𑀫𑁆𑀫𑀤𑁂𑀲𑀦𑀁 𑀬𑀸𑀘𑀺𑀲𑁆𑀲𑀢𑀺, 𑀇𑀫𑁂 𑀘 𑀲𑀢𑁆𑀢𑀸 𑀩𑁆𑀭𑀳𑁆𑀫𑀕𑀭𑀼𑀓𑀸, 𑀢𑁂 ‘𑀲𑀢𑁆𑀣𑀸 𑀓𑀺𑀭 𑀥𑀫𑁆𑀫𑀁 𑀦 𑀤𑁂𑀲𑁂𑀢𑀼𑀓𑀸𑀫𑁄 𑀅𑀳𑁄𑀲𑀺, 𑀅𑀣 𑀦𑀁 𑀫𑀳𑀸𑀩𑁆𑀭𑀳𑁆𑀫𑀸 𑀬𑀸𑀘𑀺𑀢𑁆𑀯𑀸 𑀤𑁂𑀲𑀸𑀧𑁂𑀲𑀺, 𑀲𑀦𑁆𑀢𑁄 𑀯𑀢, 𑀪𑁄, 𑀥𑀫𑁆𑀫𑁄 𑀧𑀡𑀻𑀢𑁄 𑀯𑀢, 𑀪𑁄, 𑀥𑀫𑁆𑀫𑁄’𑀢𑀺 𑀫𑀜𑁆𑀜𑀫𑀸𑀦𑀸 𑀲𑀼𑀲𑁆𑀲𑀽𑀲𑀺𑀲𑁆𑀲𑀦𑁆𑀢𑀻’’𑀢𑀺. 𑀇𑀤𑀫𑁆𑀧𑀺𑀲𑁆𑀲 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀬 𑀘𑀺𑀢𑁆𑀢𑀁 𑀦𑀫𑀺, 𑀦𑁄 𑀥𑀫𑁆𑀫𑀤𑁂𑀲𑀦𑀸𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀳𑀫𑁆𑀧𑀢𑀺𑀲𑁆𑀲𑀸𑀢𑀺 𑀲𑁄 𑀓𑀺𑀭 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀲𑀳𑀓𑁄 𑀦𑀸𑀫 𑀣𑁂𑀭𑁄 𑀧𑀞𑀫𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀓𑀧𑁆𑀧𑀸𑀬𑀼𑀓𑀩𑁆𑀭𑀳𑁆𑀫𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄. 𑀢𑀢𑁆𑀭 𑀦𑀁 𑀲𑀳𑀫𑁆𑀧𑀢𑀺𑀩𑁆𑀭𑀳𑁆𑀫𑀸𑀢𑀺 𑀧𑀝𑀺𑀲𑀜𑁆𑀚𑀸𑀦𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀩𑁆𑀭𑀳𑁆𑀫𑀼𑀦𑁄 𑀲𑀳𑀫𑁆𑀧𑀢𑀺𑀲𑁆𑀲𑀸’’𑀢𑀺. 𑀦𑀲𑁆𑀲𑀢𑀺 𑀯𑀢, 𑀪𑁄𑀢𑀺 𑀲𑁄 𑀓𑀺𑀭 𑀇𑀫𑀁 𑀲𑀤𑁆𑀤𑀁 𑀢𑀣𑀸 𑀦𑀺𑀘𑁆𑀙𑀸𑀭𑁂𑀲𑀺, 𑀬𑀣𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀩𑁆𑀭𑀳𑁆𑀫𑀸𑀦𑁄 𑀲𑀼𑀢𑁆𑀯𑀸 𑀲𑀩𑁆𑀩𑁂 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑀲𑁆𑀫𑀺𑀁 𑀦𑀸𑀫 𑀮𑁄𑀓𑁂. 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀻𑀢𑀺 𑀢𑁂𑀳𑀺 𑀤𑀲𑀳𑀺 𑀩𑁆𑀭𑀳𑁆𑀫𑀲𑀳𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀧𑀸𑀢𑀼𑀭𑀳𑁄𑀲𑀺. 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸𑀢𑀺 𑀧𑀜𑁆𑀜𑀸𑀫𑀬𑁂 𑀅𑀓𑁆𑀔𑀺𑀫𑁆𑀳𑀺 𑀅𑀧𑁆𑀧𑀁 𑀧𑀭𑀺𑀢𑁆𑀢𑀁 𑀭𑀸𑀕𑀤𑁄𑀲𑀫𑁄𑀳𑀭𑀚𑀁 𑀏𑀢𑁂𑀲𑀁, 𑀏𑀯𑀁𑀲𑀪𑀸𑀯𑀸𑀢𑀺 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸. 𑀅𑀲𑁆𑀲𑀯𑀦𑀢𑀸𑀢𑀺 𑀅𑀲𑁆𑀲𑀯𑀦𑀢𑀸𑀬. 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀲𑀼 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀲𑁂𑀦 𑀓𑀢𑀸𑀥𑀺𑀓𑀸𑀭𑀸 𑀧𑀭𑀺𑀧𑀸𑀓𑀕𑀢𑀧𑀤𑀼𑀫𑀸𑀦𑀺 𑀯𑀺𑀬 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑁆𑀨𑀲𑁆𑀲𑀁, 𑀥𑀫𑁆𑀫𑀤𑁂𑀲𑀦𑀁𑀬𑁂𑀯 𑀆𑀓𑀗𑁆𑀔𑀫𑀸𑀦𑀸 𑀘𑀢𑀼𑀧𑁆𑀧𑀤𑀺𑀓𑀕𑀸𑀣𑀸𑀯𑀲𑀸𑀦𑁂 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀦𑀸𑀭𑀳𑀸 𑀦 𑀏𑀓𑁄, 𑀦 𑀤𑁆𑀯𑁂, 𑀅𑀦𑁂𑀓𑀲𑀢𑀲𑀳𑀲𑁆𑀲𑀸 𑀥𑀫𑁆𑀫𑀲𑁆𑀲 𑀅𑀜𑁆𑀜𑀸𑀢𑀸𑀭𑁄 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀧𑀸𑀢𑀼𑀭𑀳𑁄𑀲𑀻𑀢𑀺 𑀧𑀸𑀢𑀼𑀪𑀯𑀺. 𑀲𑀫𑀮𑁂𑀳𑀺 𑀘𑀺𑀦𑁆𑀢𑀺𑀢𑁄𑀢𑀺 𑀲𑀫𑀮𑁂𑀳𑀺 𑀙𑀳𑀺 𑀲𑀢𑁆𑀣𑀸𑀭𑁂𑀳𑀺 𑀘𑀺𑀦𑁆𑀢𑀺𑀢𑁄. 𑀢𑁂 𑀳𑀺 𑀧𑀼𑀭𑁂𑀢𑀭𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀓𑀡𑁆𑀝𑀓𑁂 𑀧𑀢𑁆𑀣𑀭𑀫𑀸𑀦𑀸 𑀯𑀺𑀬, 𑀯𑀺𑀲𑀁 𑀲𑀺𑀜𑁆𑀘𑀫𑀸𑀦𑀸 𑀯𑀺𑀬 𑀘 𑀲𑀫𑀮𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀥𑀫𑁆𑀫𑀁 𑀤𑁂𑀲𑀬𑀺𑀁𑀲𑀼. 𑀅𑀧𑀸𑀧𑀼𑀭𑁂𑀢𑀦𑁆𑀢𑀺 𑀯𑀺𑀯𑀭 𑀏𑀢𑀁. 𑀅𑀫𑀢𑀲𑁆𑀲 𑀤𑁆𑀯𑀸𑀭𑀦𑁆𑀢𑀺 𑀅𑀫𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀤𑁆𑀯𑀸𑀭𑀪𑀽𑀢𑀁 𑀅𑀭𑀺𑀬𑀫𑀕𑁆𑀕𑀁. 𑀲𑀼𑀡𑀦𑁆𑀢𑀼 𑀥𑀫𑁆𑀫𑀁 𑀯𑀺𑀫𑀮𑁂𑀦𑀸𑀦𑀼𑀩𑀼𑀤𑁆𑀥𑀦𑁆𑀢𑀺 𑀇𑀫𑁂 𑀲𑀢𑁆𑀢𑀸 𑀭𑀸𑀕𑀸𑀤𑀺𑀫𑀮𑀸𑀦𑀁 𑀅𑀪𑀸𑀯𑀢𑁄 𑀯𑀺𑀫𑀮𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀅𑀦𑀼𑀩𑀼𑀤𑁆𑀥𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀲𑀼𑀡𑀦𑁆𑀢𑀼 𑀢𑀸𑀯 𑀪𑀕𑀯𑀸𑀢𑀺 𑀬𑀸𑀘𑀢𑀺.

𑀲𑁂𑀮𑁂 𑀬𑀣𑀸 𑀧𑀩𑁆𑀩𑀢𑀫𑀼𑀤𑁆𑀥𑀦𑀺𑀝𑁆𑀞𑀺𑀢𑁄𑀢𑀺 𑀲𑁂𑀮𑀫𑀬𑁂 𑀏𑀓𑀕𑁆𑀖𑀦𑁂 𑀧𑀩𑁆𑀩𑀢𑀫𑀼𑀤𑁆𑀥𑀦𑀺 𑀬𑀣𑀸 𑀞𑀺𑀢𑁄𑀯. 𑀦 𑀳𑀺 𑀢𑀲𑁆𑀲 𑀞𑀺𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀕𑀻𑀯𑀼𑀓𑁆𑀔𑀺𑀧𑀦𑀧𑀲𑀸𑀭𑀡𑀸𑀤𑀺𑀓𑀺𑀘𑁆𑀘𑀁 𑀅𑀢𑁆𑀣𑀺. 𑀢𑀣𑀽𑀧𑀫𑀦𑁆𑀢𑀺 𑀢𑀧𑁆𑀧𑀝𑀺𑀪𑀸𑀕𑀁 𑀲𑁂𑀮𑀧𑀩𑁆𑀩𑀢𑀽𑀧𑀫𑀁. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀣𑀸 𑀲𑁂𑀮𑀧𑀩𑁆𑀩𑀢𑀫𑀼𑀤𑁆𑀥𑀦𑀺 𑀞𑀺𑀢𑁄𑀯 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀲𑀫𑀦𑁆𑀢𑀢𑁄 𑀚𑀦𑀢𑀁 𑀧𑀲𑁆𑀲𑁂𑀬𑁆𑀬, 𑀢𑀣𑀸 𑀢𑁆𑀯𑀫𑁆𑀧𑀺, 𑀲𑀼𑀫𑁂𑀥, 𑀲𑀼𑀦𑁆𑀤𑀭𑀧𑀜𑁆𑀜-𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀫𑀦𑁆𑀢𑀘𑀓𑁆𑀔𑀼 𑀪𑀕𑀯𑀸 𑀥𑀫𑁆𑀫𑀫𑀬𑀁 𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀲𑀬𑀁 𑀅𑀧𑁂𑀢𑀲𑁄𑀓𑁄 𑀲𑁄𑀓𑀸𑀯𑀢𑀺𑀡𑁆𑀡𑀁 𑀚𑀸𑀢𑀺𑀚𑀭𑀸𑀪𑀺𑀪𑀽𑀢𑀁 𑀚𑀦𑀢𑀁 𑀅𑀯𑁂𑀓𑁆𑀔𑀲𑁆𑀲𑀼 𑀉𑀧𑀥𑀸𑀭𑀬 𑀉𑀧𑀧𑀭𑀺𑀓𑁆𑀔. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸 𑀳𑀺 𑀧𑀩𑁆𑀩𑀢𑀧𑀸𑀤𑁂 𑀲𑀫𑀦𑁆𑀢𑀸 𑀫𑀳𑀦𑁆𑀢𑀁 𑀔𑁂𑀢𑁆𑀢𑀁 𑀓𑀢𑁆𑀯𑀸 𑀢𑀢𑁆𑀣 𑀓𑁂𑀤𑀸𑀭𑀧𑀸𑀴𑀻𑀲𑀼 𑀓𑀼𑀝𑀺𑀓𑀸𑀬𑁄 𑀓𑀢𑁆𑀯𑀸 𑀭𑀢𑁆𑀢𑀺𑀁 𑀅𑀕𑁆𑀕𑀺𑀁 𑀚𑀸𑀮𑁂𑀬𑁆𑀬𑀼𑀁. 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀜𑁆𑀘 𑀅𑀦𑁆𑀥𑀓𑀸𑀭𑀁 𑀅𑀲𑁆𑀲, 𑀅𑀣 𑀢𑀲𑁆𑀲 𑀧𑀩𑁆𑀩𑀢𑀲𑁆𑀲 𑀫𑀢𑁆𑀣𑀓𑁂 𑀞𑀢𑁆𑀯𑀸 𑀘𑀓𑁆𑀔𑀼𑀫𑀢𑁄 𑀧𑀼𑀭𑀺𑀲𑀲𑁆𑀲 𑀪𑀽𑀫𑀺𑀁 𑀑𑀮𑁄𑀓𑀬𑀢𑁄 𑀦𑁂𑀯 𑀔𑁂𑀢𑁆𑀢𑀁, 𑀦 𑀓𑁂𑀤𑀸𑀭𑀧𑀸𑀴𑀺𑀬𑁄, 𑀦 𑀓𑀼𑀝𑀺𑀬𑁄, 𑀦 𑀢𑀢𑁆𑀣 𑀲𑀬𑀺𑀢𑀫𑀦𑀼𑀲𑁆𑀲𑀸 𑀧𑀜𑁆𑀜𑀸𑀬𑁂𑀬𑁆𑀬𑀼𑀁. 𑀓𑀼𑀝𑀺𑀓𑀸𑀲𑀼 𑀧𑀦 𑀅𑀕𑁆𑀕𑀺𑀚𑀸𑀮𑀸𑀫𑀢𑁆𑀢𑀓𑀫𑁂𑀯 𑀧𑀜𑁆𑀜𑀸𑀬𑁂𑀬𑁆𑀬. 𑀏𑀯𑀁 𑀥𑀫𑁆𑀫𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀲𑀢𑁆𑀢𑀦𑀺𑀓𑀸𑀬𑀁 𑀑𑀮𑁄𑀓𑀬𑀢𑁄 𑀢𑀣𑀸𑀕𑀢𑀲𑁆𑀲, 𑀬𑁂 𑀢𑁂 𑀅𑀓𑀢𑀓𑀮𑁆𑀬𑀸𑀡𑀸 𑀲𑀢𑁆𑀢𑀸, 𑀢𑁂 𑀏𑀓𑀯𑀺𑀳𑀸𑀭𑁂 𑀤𑀓𑁆𑀔𑀺𑀡𑀚𑀸𑀡𑀼𑀧𑀲𑁆𑀲𑁂 𑀦𑀺𑀲𑀺𑀦𑁆𑀦𑀸𑀧𑀺 𑀩𑀼𑀤𑁆𑀥𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀦𑀸𑀕𑀘𑁆𑀙𑀦𑁆𑀢𑀺, 𑀭𑀢𑁆𑀢𑀺𑀁 𑀔𑀺𑀢𑁆𑀢𑀸 𑀲𑀭𑀸 𑀯𑀺𑀬 𑀳𑁄𑀦𑁆𑀢𑀺. 𑀬𑁂 𑀧𑀦 𑀓𑀢𑀓𑀮𑁆𑀬𑀸𑀡𑀸 𑀯𑁂𑀦𑁂𑀬𑁆𑀬𑀧𑀼𑀕𑁆𑀕𑀮𑀸, 𑀢𑁂 𑀏𑀯𑀲𑁆𑀲 𑀤𑀽𑀭𑁂𑀧𑀺 𑀞𑀺𑀢𑀸 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀲𑁄 𑀅𑀕𑁆𑀕𑀺 𑀯𑀺𑀬 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑁄 𑀯𑀺𑀬 𑀘. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀤𑀽𑀭𑁂 𑀲𑀦𑁆𑀢𑁄 𑀧𑀓𑀸𑀲𑁂𑀦𑁆𑀢𑀺, 𑀳𑀺𑀫𑀯𑀦𑁆𑀢𑁄𑀯 𑀧𑀩𑁆𑀩𑀢𑁄;

𑀅𑀲𑀦𑁆𑀢𑁂𑀢𑁆𑀣 𑀦 𑀤𑀺𑀲𑁆𑀲𑀦𑁆𑀢𑀺, 𑀭𑀢𑁆𑀢𑀺𑀁 𑀔𑀺𑀢𑁆𑀢𑀸 𑀬𑀣𑀸 𑀲𑀭𑀸’’𑀢𑀺. (𑀥. 𑀧. 𑁩𑁦𑁪);

𑀉𑀝𑁆𑀞𑁂𑀳𑀻𑀢𑀺 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀘𑀸𑀭𑀺𑀓𑀘𑀭𑀡𑀁 𑀬𑀸𑀘𑀦𑁆𑀢𑁄 𑀪𑀡𑀢𑀺. 𑀯𑀻𑀭𑀸𑀢𑀺𑀆𑀤𑀻𑀲𑀼 𑀪𑀕𑀯𑀸 𑀯𑀻𑀭𑀺𑀬𑀯𑀦𑁆𑀢𑀢𑀸𑀬 𑀯𑀻𑀭𑁄. 𑀤𑁂𑀯𑀧𑀼𑀢𑁆𑀢𑀫𑀘𑁆𑀘𑀼𑀓𑀺𑀮𑁂𑀲𑀫𑀸𑀭𑀸𑀦𑀁 𑀯𑀺𑀚𑀺𑀢𑀢𑁆𑀢𑀸 𑀯𑀺𑀚𑀺𑀢𑀲𑀗𑁆𑀕𑀸𑀫𑁄. 𑀚𑀸𑀢𑀺𑀓𑀦𑁆𑀢𑀸𑀭𑀸𑀤𑀺𑀦𑀺𑀢𑁆𑀣𑀭𑀡𑀢𑁆𑀣𑀸𑀬 𑀯𑁂𑀦𑁂𑀬𑁆𑀬𑀲𑀢𑁆𑀣𑀯𑀸𑀳𑀦𑀲𑀫𑀢𑁆𑀣𑀢𑀸𑀬 𑀲𑀢𑁆𑀣𑀯𑀸𑀳𑁄. 𑀓𑀸𑀫𑀘𑁆𑀙𑀦𑁆𑀤𑀇𑀡𑀲𑁆𑀲 𑀅𑀪𑀸𑀯𑀢𑁄 𑀅𑀡𑀡𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁨𑁮𑁩. 𑀅𑀚𑁆𑀛𑁂𑀲𑀦𑀦𑁆𑀢𑀺 𑀬𑀸𑀘𑀦𑀁. 𑀩𑀼𑀤𑁆𑀥𑀘𑀓𑁆𑀔𑀼𑀦𑀸𑀢𑀺 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑁂𑀦 𑀘 𑀆𑀲𑀬𑀸𑀦𑀼𑀲𑀬𑀜𑀸𑀡𑁂𑀦 𑀘. 𑀇𑀫𑁂𑀲𑀜𑁆𑀳𑀺 𑀤𑁆𑀯𑀺𑀦𑁆𑀦𑀁 𑀜𑀸𑀡𑀸𑀦𑀁 𑀩𑀼𑀤𑁆𑀥𑀘𑀓𑁆𑀔𑀽𑀢𑀺 𑀦𑀸𑀫𑀁, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀲𑀫𑀦𑁆𑀢𑀘𑀓𑁆𑀔𑀽𑀢𑀺, 𑀢𑀺𑀡𑁆𑀡𑀁 𑀫𑀕𑁆𑀕𑀜𑀸𑀡𑀸𑀦𑀁 𑀥𑀫𑁆𑀫𑀘𑀓𑁆𑀔𑀽𑀢𑀺. 𑀅𑀧𑁆𑀧𑀭𑀚𑀓𑁆𑀔𑁂𑀢𑀺𑀆𑀤𑀻𑀲𑀼 𑀬𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀜𑁆𑀜𑀸𑀘𑀓𑁆𑀔𑀼𑀫𑁆𑀳𑀺 𑀭𑀸𑀕𑀸𑀤𑀺𑀭𑀚𑀁 𑀅𑀧𑁆𑀧𑀁, 𑀢𑁂 𑀅𑀧𑁆𑀧𑀭𑀚𑀓𑁆𑀔𑀸. 𑀬𑁂𑀲𑀁 𑀢𑀁 𑀫𑀳𑀦𑁆𑀢𑀁, 𑀢𑁂 𑀫𑀳𑀸𑀭𑀚𑀓𑁆𑀔𑀸. 𑀬𑁂𑀲𑀁 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀢𑀺𑀓𑁆𑀔𑀸𑀦𑀺, 𑀢𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀸. 𑀬𑁂𑀲𑀁 𑀢𑀸𑀦𑀺 𑀫𑀼𑀤𑀽𑀦𑀺, 𑀢𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑀸. 𑀬𑁂𑀲𑀁 𑀢𑁂𑀬𑁂𑀯 𑀲𑀤𑁆𑀥𑀸𑀤𑀬𑁄 𑀆𑀓𑀸𑀭𑀸 𑀲𑀼𑀦𑁆𑀤𑀭𑀸, 𑀢𑁂 𑀲𑁆𑀯𑀸𑀓𑀸𑀭𑀸. 𑀬𑁂 𑀓𑀣𑀺𑀢𑀓𑀸𑀭𑀡𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑀺, 𑀲𑀼𑀔𑁂𑀦 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀯𑀺𑀜𑁆𑀜𑀸𑀧𑁂𑀢𑀼𑀁, 𑀢𑁂 𑀲𑀼𑀯𑀺𑀜𑁆𑀜𑀸𑀧𑀬𑀸. 𑀬𑁂 𑀧𑀭𑀮𑁄𑀓𑀜𑁆𑀘𑁂𑀯 𑀯𑀚𑁆𑀚𑀜𑁆𑀘 𑀪𑀬𑀢𑁄 𑀧𑀲𑁆𑀲𑀦𑁆𑀢𑀺, 𑀢𑁂 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀺𑀦𑁄 𑀦𑀸𑀫.

𑀅𑀬𑀁 𑀧𑀦𑁂𑀢𑁆𑀣 𑀧𑀸𑀴𑀺 𑁋 ‘‘𑀲𑀤𑁆𑀥𑁄 𑀧𑀼𑀕𑁆𑀕𑀮𑁄 𑀅𑀧𑁆𑀧𑀭𑀚𑀓𑁆𑀔𑁄, 𑀅𑀲𑁆𑀲𑀤𑁆𑀥𑁄 𑀧𑀼𑀕𑁆𑀕𑀮𑁄 𑀫𑀳𑀸𑀭𑀚𑀓𑁆𑀔𑁄. 𑀆𑀭𑀤𑁆𑀥𑀯𑀻𑀭𑀺𑀬𑁄…, 𑀓𑀼𑀲𑀺𑀢𑁄…, 𑀉𑀧𑀝𑁆𑀞𑀺𑀢𑀲𑁆𑀲𑀢𑀺…, 𑀫𑀼𑀝𑁆𑀞𑀲𑁆𑀲𑀢𑀺…, 𑀲𑀫𑀸𑀳𑀺𑀢𑁄…, 𑀅𑀲𑀫𑀸𑀳𑀺𑀢𑁄…, 𑀧𑀜𑁆𑀜𑀯𑀸…, 𑀤𑀼𑀧𑁆𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀫𑀳𑀸𑀭𑀚𑀓𑁆𑀔𑁄. 𑀢𑀣𑀸 𑀲𑀤𑁆𑀥𑁄 𑀧𑀼𑀕𑁆𑀕𑀮𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄…𑀧𑁂… 𑀧𑀜𑁆𑀜𑀯𑀸 𑀧𑀼𑀕𑁆𑀕𑀮𑁄 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀻, 𑀤𑀼𑀧𑁆𑀧𑀜𑁆𑀜𑁄 𑀧𑀼𑀕𑁆𑀕𑀮𑁄 𑀦 𑀧𑀭𑀮𑁄𑀓𑀯𑀚𑁆𑀚𑀪𑀬𑀤𑀲𑁆𑀲𑀸𑀯𑀻. 𑀮𑁄𑀓𑁄𑀢𑀺 𑀔𑀦𑁆𑀥𑀮𑁄𑀓𑁄, 𑀆𑀬𑀢𑀦𑀮𑁄𑀓𑁄, 𑀥𑀸𑀢𑀼𑀮𑁄𑀓𑁄, 𑀲𑀫𑁆𑀧𑀢𑁆𑀢𑀺𑀪𑀯𑀮𑁄𑀓𑁄, 𑀲𑀫𑁆𑀧𑀢𑁆𑀢𑀺𑀲𑀫𑁆𑀪𑀯𑀮𑁄𑀓𑁄, 𑀯𑀺𑀧𑀢𑁆𑀢𑀺𑀪𑀯𑀮𑁄𑀓𑁄, 𑀯𑀺𑀧𑀢𑁆𑀢𑀺𑀲𑀫𑁆𑀪𑀯𑀮𑁄𑀓𑁄, 𑀏𑀓𑁄 𑀮𑁄𑀓𑁄 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸. 𑀤𑁆𑀯𑁂 𑀮𑁄𑀓𑀸 𑁋 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘. 𑀢𑀬𑁄 𑀮𑁄𑀓𑀸 𑁋 𑀢𑀺𑀲𑁆𑀲𑁄 𑀯𑁂𑀤𑀦𑀸. 𑀘𑀢𑁆𑀢𑀸𑀭𑁄 𑀮𑁄𑀓𑀸 𑁋 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸. 𑀧𑀜𑁆𑀘 𑀮𑁄𑀓𑀸 𑁋 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀙 𑀮𑁄𑀓𑀸 𑁋 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺. 𑀲𑀢𑁆𑀢 𑀮𑁄𑀓𑀸 𑁋 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄. 𑀅𑀝𑁆𑀞 𑀮𑁄𑀓𑀸 𑁋 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸. 𑀦𑀯 𑀮𑁄𑀓𑀸 𑁋 𑀦𑀯 𑀲𑀢𑁆𑀢𑀸𑀯𑀸𑀲𑀸. 𑀤𑀲 𑀮𑁄𑀓𑀸 𑁋 𑀤𑀲𑀸𑀬𑀢𑀦𑀸𑀦𑀺. 𑀤𑁆𑀯𑀸𑀤𑀲 𑀮𑁄𑀓𑀸 𑁋 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺. 𑀅𑀝𑁆𑀞𑀸𑀭𑀲 𑀮𑁄𑀓𑀸 𑁋 𑀅𑀝𑁆𑀞𑀸𑀭𑀲𑁆𑀲 𑀥𑀸𑀢𑀼𑀬𑁄. 𑀯𑀚𑁆𑀚𑀦𑁆𑀢𑀺 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀯𑀚𑁆𑀚𑀸, 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑀸 𑀯𑀚𑁆𑀚𑀸, 𑀲𑀩𑁆𑀩𑁂 𑀅𑀪𑀺𑀲𑀗𑁆𑀔𑀸𑀭𑀸 𑀯𑀚𑁆𑀚𑀸, 𑀲𑀩𑁆𑀩𑁂 𑀪𑀯𑀕𑀸𑀫𑀺𑀓𑀫𑁆𑀫𑀸 𑀯𑀚𑁆𑀚𑀸. 𑀇𑀢𑀺 𑀇𑀫𑀲𑁆𑀫𑀺𑀜𑁆𑀘 𑀮𑁄𑀓𑁂 𑀇𑀫𑀲𑁆𑀫𑀺𑀜𑁆𑀘 𑀯𑀚𑁆𑀚𑁂 𑀢𑀺𑀩𑁆𑀩𑀸 𑀪𑀬𑀲𑀜𑁆𑀜𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑁂 𑀯𑀥𑀓𑁂. 𑀇𑀫𑁂𑀳𑀺 𑀧𑀜𑁆𑀜𑀸𑀲𑀸𑀬 𑀆𑀓𑀸𑀭𑁂𑀳𑀺 𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀚𑀸𑀦𑀸𑀢𑀺 𑀧𑀲𑁆𑀲𑀢𑀺 𑀅𑀜𑁆𑀜𑀸𑀲𑀺 𑀧𑀝𑀺𑀯𑀺𑀚𑁆𑀛𑀺. 𑀇𑀤𑀁 𑀢𑀣𑀸𑀕𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑁂 𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑁧.𑁧𑁧𑁨).

𑀉𑀧𑁆𑀧𑀮𑀺𑀦𑀺𑀬𑀦𑁆𑀢𑀺 𑀉𑀧𑁆𑀧𑀮𑀯𑀦𑁂. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑁆𑀢𑁄𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀻𑀢𑀺 𑀬𑀸𑀦𑀺 𑀅𑀦𑁆𑀢𑁄 𑀦𑀺𑀫𑀼𑀕𑁆𑀕𑀸𑀦𑁂𑀯 𑀧𑁄𑀲𑀺𑀬𑀦𑁆𑀢𑀺. 𑀉𑀤𑀓𑀁 𑀅𑀘𑁆𑀘𑀼𑀕𑁆𑀕𑀫𑁆𑀫 𑀞𑀺𑀢𑀸𑀦𑀻𑀢𑀺 𑀉𑀤𑀓𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀸𑀦𑀺. 𑀢𑀢𑁆𑀣 𑀬𑀸𑀦𑀺 𑀅𑀘𑁆𑀘𑀼𑀕𑁆𑀕𑀫𑁆𑀫 𑀞𑀺𑀢𑀸𑀦𑀺, 𑀢𑀸𑀦𑀺 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑁆𑀨𑀲𑁆𑀲𑀁 𑀆𑀕𑀫𑀬𑀫𑀸𑀦𑀸𑀦𑀺 𑀞𑀺𑀢𑀸𑀦𑀺 𑀅𑀚𑁆𑀚 𑀧𑀼𑀧𑁆𑀨𑀦𑀓𑀸𑀦𑀺. 𑀬𑀸𑀦𑀺 𑀲𑀫𑁄𑀤𑀓𑀁 𑀞𑀺𑀢𑀸𑀦𑀺, 𑀢𑀸𑀦𑀺 𑀲𑁆𑀯𑁂 𑀧𑀼𑀧𑁆𑀨𑀦𑀓𑀸𑀦𑀺. 𑀬𑀸𑀦𑀺 𑀉𑀤𑀓𑀸𑀦𑀼𑀕𑁆𑀕𑀢𑀸𑀦𑀺 𑀅𑀦𑁆𑀢𑁄𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀺, 𑀢𑀸𑀦𑀺 𑀢𑀢𑀺𑀬𑀤𑀺𑀯𑀲𑁂 𑀧𑀼𑀧𑁆𑀨𑀦𑀓𑀸𑀦𑀺. 𑀉𑀤𑀓𑀸 𑀧𑀦 𑀅𑀦𑀼𑀕𑁆𑀕𑀢𑀸𑀦𑀺 𑀅𑀜𑁆𑀜𑀸𑀦𑀺𑀧𑀺 𑀲𑀭𑁄𑀕𑀉𑀧𑁆𑀧𑀮𑀸𑀤𑀻𑀦𑀺 𑀦𑀸𑀫 𑀅𑀢𑁆𑀣𑀺, 𑀬𑀸𑀦𑀺 𑀦𑁂𑀯 𑀧𑀼𑀧𑁆𑀨𑀺𑀲𑁆𑀲𑀦𑁆𑀢𑀺, 𑀫𑀘𑁆𑀙𑀓𑀘𑁆𑀙𑀧𑀪𑀓𑁆𑀔𑀸𑀦𑁂𑀯 𑀪𑀯𑀺𑀲𑁆𑀲𑀦𑁆𑀢𑀺. 𑀢𑀸𑀦𑀺 𑀧𑀸𑀴𑀺𑀁 𑀦𑀸𑀭𑀼𑀴𑁆𑀳𑀸𑀦𑀺. 𑀆𑀳𑀭𑀺𑀢𑁆𑀯𑀸 𑀧𑀦 𑀤𑀻𑀧𑁂𑀢𑀩𑁆𑀩𑀸𑀦𑀻𑀢𑀺 𑀤𑀻𑀧𑀺𑀢𑀸𑀦𑀺.

𑀬𑀣𑁂𑀯 𑀳𑀺 𑀢𑀸𑀦𑀺 𑀘𑀢𑀼𑀩𑁆𑀩𑀺𑀥𑀸𑀦𑀺 𑀧𑀼𑀧𑁆𑀨𑀸𑀦𑀺, 𑀏𑀯𑀫𑁂𑀯 𑀉𑀕𑁆𑀖𑀝𑀺𑀢𑀜𑁆𑀜𑀽 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀦𑁂𑀬𑁆𑀬𑁄 𑀧𑀤𑀧𑀭𑀫𑁄𑀢𑀺 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸. 𑀢𑀢𑁆𑀣 ‘‘𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀳 𑀉𑀤𑀸𑀳𑀝𑀯𑁂𑀮𑀸𑀬 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀉𑀕𑁆𑀖𑀝𑀺𑀢𑀜𑁆𑀜𑀽. 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁂 𑀯𑀺𑀪𑀚𑀺𑀬𑀫𑀸𑀦𑁂 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀽. 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀤𑁆𑀤𑁂𑀲𑀢𑁄 𑀧𑀭𑀺𑀧𑀼𑀘𑁆𑀙𑀢𑁄 𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀦𑁂𑀬𑁆𑀬𑁄. 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀩𑀳𑀼𑀫𑁆𑀧𑀺 𑀲𑀼𑀡𑀢𑁄 𑀩𑀳𑀼𑀫𑁆𑀧𑀺 𑀪𑀡𑀢𑁄 𑀩𑀳𑀼𑀫𑁆𑀧𑀺 𑀥𑀸𑀭𑀬𑀢𑁄 𑀩𑀳𑀼𑀫𑁆𑀧𑀺 𑀯𑀸𑀘𑀬𑀢𑁄 𑀦 𑀢𑀸𑀬 𑀚𑀸𑀢𑀺𑀬𑀸 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀧𑀤𑀧𑀭𑀫𑁄’’ (𑀧𑀼. 𑀧. 𑁧𑁫𑁧). 𑀢𑀢𑁆𑀣 𑀪𑀕𑀯𑀸 𑀉𑀧𑁆𑀧𑀮𑀯𑀦𑀸𑀤𑀺𑀲𑀤𑀺𑀲𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑁂𑀦𑁆𑀢𑁄 ‘‘𑀅𑀚𑁆𑀚 𑀧𑀼𑀧𑁆𑀨𑀦𑀓𑀸𑀦𑀺 𑀯𑀺𑀬 𑀉𑀕𑁆𑀖𑀝𑀺𑀢𑀜𑁆𑀜𑀽, 𑀲𑁆𑀯𑁂 𑀧𑀼𑀧𑁆𑀨𑀦𑀓𑀸𑀦𑀺 𑀯𑀺𑀬 𑀯𑀺𑀧𑀜𑁆𑀘𑀺𑀢𑀜𑁆𑀜𑀽, 𑀢𑀢𑀺𑀬𑀤𑀺𑀯𑀲𑁂 𑀧𑀼𑀧𑁆𑀨𑀦𑀓𑀸𑀦𑀺 𑀯𑀺𑀬 𑀦𑁂𑀬𑁆𑀬𑁄, 𑀫𑀘𑁆𑀙𑀓𑀘𑁆𑀙𑀧𑀪𑀓𑁆𑀔𑀸𑀦𑀺 𑀧𑀼𑀧𑁆𑀨𑀸𑀦𑀺 𑀯𑀺𑀬 𑀧𑀤𑀧𑀭𑀫𑁄’’𑀢𑀺 𑀅𑀤𑁆𑀤𑀲. 𑀧𑀲𑁆𑀲𑀦𑁆𑀢𑁄 𑀘 ‘‘𑀏𑀢𑁆𑀢𑀓𑀸 𑀅𑀧𑁆𑀧𑀭𑀚𑀓𑁆𑀔𑀸, 𑀏𑀢𑁆𑀢𑀓𑀸 𑀫𑀳𑀸𑀭𑀚𑀓𑁆𑀔𑀸, 𑀢𑀢𑁆𑀭𑀸𑀧𑀺 𑀏𑀢𑁆𑀢𑀓𑀸 𑀉𑀕𑁆𑀖𑀝𑀺𑀢𑀜𑁆𑀜𑀽’’𑀢𑀺 𑀏𑀯𑀁 𑀲𑀩𑁆𑀩𑀸𑀓𑀸𑀭𑀢𑁄𑀯 𑀅𑀤𑁆𑀤𑀲.

𑀢𑀢𑁆𑀣 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸 𑀅𑀢𑁆𑀣𑀁 𑀲𑀸𑀥𑁂𑀢𑀺. 𑀧𑀤𑀧𑀭𑀫𑀸𑀦𑀁 𑀅𑀦𑀸𑀕𑀢𑁂 𑀯𑀸𑀲𑀦𑀢𑁆𑀣𑀸𑀬 𑀳𑁄𑀢𑀺. 𑀅𑀣 𑀪𑀕𑀯𑀸 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀢𑁆𑀣𑀸𑀯𑀳𑀁 𑀥𑀫𑁆𑀫𑀤𑁂𑀲𑀦𑀁 𑀯𑀺𑀤𑀺𑀢𑁆𑀯𑀸 𑀤𑁂𑀲𑁂𑀢𑀼𑀓𑀫𑁆𑀬𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀼𑀦 𑀲𑀩𑁆𑀩𑁂𑀧𑀺 𑀢𑀻𑀲𑀼 𑀪𑀯𑁂𑀲𑀼 𑀲𑀢𑁆𑀢𑁂 𑀪𑀩𑁆𑀩𑀸𑀪𑀩𑁆𑀩𑀯𑀲𑁂𑀦 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀅𑀓𑀸𑀲𑀺. 𑀬𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀓𑀢𑀫𑁂 𑀢𑁂 𑀲𑀢𑁆𑀢𑀸 𑀅𑀪𑀩𑁆𑀩𑀸, 𑀬𑁂 𑀢𑁂 𑀲𑀢𑁆𑀢𑀸 𑀓𑀫𑁆𑀫𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀸 𑀓𑀺𑀮𑁂𑀲𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀸 𑀯𑀺𑀧𑀸𑀓𑀸𑀯𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀲𑁆𑀲𑀤𑁆𑀥𑀸 𑀅𑀘𑁆𑀙𑀦𑁆𑀤𑀺𑀓𑀸 𑀤𑀼𑀧𑁆𑀧𑀜𑁆𑀜𑀸 𑀅𑀪𑀩𑁆𑀩𑀸 𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀁, 𑀇𑀫𑁂 𑀢𑁂 𑀲𑀢𑁆𑀢𑀸 𑀅𑀪𑀩𑁆𑀩𑀸. 𑀓𑀢𑀫𑁂 𑀢𑁂 𑀲𑀢𑁆𑀢𑀸 𑀪𑀩𑁆𑀩𑀸? 𑀬𑁂 𑀢𑁂 𑀲𑀢𑁆𑀢𑀸 𑀦 𑀓𑀫𑁆𑀫𑀸𑀯𑀭𑀡𑁂𑀦…𑀧𑁂… 𑀇𑀫𑁂 𑀢𑁂 𑀲𑀢𑁆𑀢𑀸 𑀪𑀩𑁆𑀩𑀸’’𑀢𑀺 (𑀯𑀺𑀪. 𑁮𑁨𑁭; 𑀧𑀝𑀺. 𑀫. 𑁧.𑁧𑁧𑁫). 𑀢𑀢𑁆𑀣 𑀲𑀩𑁆𑀩𑁂𑀧𑀺 𑀅𑀪𑀩𑁆𑀩𑀧𑀼𑀕𑁆𑀕𑀮𑁂 𑀧𑀳𑀸𑀬 𑀪𑀩𑁆𑀩𑀧𑀼𑀕𑁆𑀕𑀮𑁂𑀬𑁂𑀯 𑀜𑀸𑀡𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 ‘‘𑀏𑀢𑁆𑀢𑀓𑀸 𑀭𑀸𑀕𑀘𑀭𑀺𑀢𑀸, 𑀏𑀢𑁆𑀢𑀓𑀸 𑀤𑁄𑀲𑀫𑁄𑀳𑀘𑀭𑀺𑀢𑀸 𑀯𑀺𑀢𑀓𑁆𑀓𑀲𑀤𑁆𑀥𑀸𑀩𑀼𑀤𑁆𑀥𑀺𑀘𑀭𑀺𑀢𑀸’’𑀢𑀺 𑀙 𑀓𑁄𑀝𑁆𑀞𑀸𑀲𑁂 𑀅𑀓𑀸𑀲𑀺; 𑀏𑀯𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀲𑀺.

𑀧𑀘𑁆𑀘𑀪𑀸𑀲𑀺𑀦𑁆𑀢𑀺 𑀧𑀢𑀺𑀅𑀪𑀸𑀲𑀺𑀁. 𑀅𑀧𑀸𑀭𑀼𑀢𑀸𑀢𑀺 𑀯𑀺𑀯𑀝𑀸. 𑀅𑀫𑀢𑀲𑁆𑀲 𑀤𑁆𑀯𑀸𑀭𑀸𑀢𑀺 𑀅𑀭𑀺𑀬𑀫𑀕𑁆𑀕𑁄. 𑀲𑁄 𑀳𑀺 𑀅𑀫𑀢𑀲𑀗𑁆𑀔𑀸𑀢𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀤𑁆𑀯𑀸𑀭𑀁, 𑀲𑁄 𑀫𑀬𑀸 𑀯𑀺𑀯𑀭𑀺𑀢𑁆𑀯𑀸 𑀞𑀧𑀺𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀫𑀼𑀜𑁆𑀘𑀦𑁆𑀢𑀼 𑀲𑀤𑁆𑀥𑀦𑁆𑀢𑀺 𑀲𑀩𑁆𑀩𑁂 𑀅𑀢𑁆𑀢𑀦𑁄 𑀲𑀤𑁆𑀥𑀁 𑀧𑀫𑀼𑀜𑁆𑀘𑀦𑁆𑀢𑀼, 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀼. 𑀧𑀘𑁆𑀙𑀺𑀫𑀧𑀤𑀤𑁆𑀯𑀬𑁂 𑀅𑀬𑀫𑀢𑁆𑀣𑁄, 𑀅𑀳𑀜𑁆𑀳𑀺 𑀅𑀢𑁆𑀢𑀦𑁄 𑀧𑀕𑀼𑀡𑀁 𑀲𑀼𑀧𑁆𑀧𑀯𑀢𑁆𑀢𑀺𑀢𑀫𑁆𑀧𑀺 𑀇𑀫𑀁 𑀧𑀡𑀻𑀢𑀁 𑀉𑀢𑁆𑀢𑀫𑀁 𑀥𑀫𑁆𑀫𑀁 𑀓𑀸𑀬𑀯𑀸𑀘𑀸𑀓𑀺𑀮𑀫𑀣𑀲𑀜𑁆𑀜𑀻 𑀳𑀼𑀢𑁆𑀯𑀸 𑀦 𑀪𑀸𑀲𑀺𑀁. 𑀇𑀤𑀸𑀦𑀺 𑀧𑀦 𑀲𑀩𑁆𑀩𑁄 𑀚𑀦𑁄 𑀲𑀤𑁆𑀥𑀸𑀪𑀸𑀚𑀦𑀁 𑀉𑀧𑀦𑁂𑀢𑀼, 𑀧𑀽𑀭𑁂𑀲𑁆𑀲𑀸𑀫𑀺 𑀦𑁂𑀲𑀁 𑀲𑀗𑁆𑀓𑀧𑁆𑀧𑀦𑁆𑀢𑀺.

𑁨𑁮𑁪. 𑀢𑀲𑁆𑀲 𑀫𑀬𑁆𑀳𑀁, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀻𑀢𑀺 𑀏𑀢𑀁 𑀅𑀳𑁄𑀲𑀺 𑁋 𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀦𑁆𑀢𑀺 𑀅𑀬𑀁 𑀥𑀫𑁆𑀫𑀤𑁂𑀲𑀦𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀻𑀢𑀺 𑀅𑀢𑁆𑀣𑁄. 𑀓𑀤𑀸 𑀧𑀦𑁂𑀲 𑀉𑀤𑀧𑀸𑀤𑀻𑀢𑀺? 𑀩𑀼𑀤𑁆𑀥𑀪𑀽𑀢𑀲𑁆𑀲 𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀩𑁄𑀥𑀺𑀲𑀢𑁆𑀢𑁄 𑀓𑀺𑀭 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀤𑀺𑀯𑀲𑁂 𑀯𑀺𑀯𑀝𑀁 𑀇𑀢𑁆𑀣𑀸𑀕𑀸𑀭𑀁 𑀤𑀺𑀲𑁆𑀯𑀸 𑀲𑀁𑀯𑀺𑀕𑁆𑀕𑀳𑀤𑀬𑁄, ‘‘𑀓𑀡𑁆𑀟𑀓𑀁 𑀆𑀳𑀭𑀸’’𑀢𑀺 𑀙𑀦𑁆𑀦𑀁 𑀆𑀫𑀦𑁆𑀢𑁂𑀢𑁆𑀯𑀸 𑀙𑀦𑁆𑀦𑀲𑀳𑀸𑀬𑁄 𑀅𑀲𑁆𑀲𑀭𑀸𑀚𑀧𑀺𑀝𑁆𑀞𑀺𑀕𑀢𑁄 𑀦𑀕𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀡𑁆𑀟𑀓𑀦𑀺𑀯𑀢𑁆𑀢𑀦𑀘𑁂𑀢𑀺𑀬𑀝𑁆𑀞𑀸𑀦𑀁 𑀦𑀸𑀫 𑀤𑀲𑁆𑀲𑁂𑀢𑁆𑀯𑀸 𑀢𑀻𑀡𑀺 𑀭𑀚𑁆𑀚𑀸𑀦𑀺 𑀅𑀢𑀺𑀓𑁆𑀓𑀫𑁆𑀫 𑀅𑀦𑁄𑀫𑀸𑀦𑀤𑀻𑀢𑀻𑀭𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀡𑁆𑀟𑀯𑀧𑀩𑁆𑀩𑀢𑁂 𑀦𑀺𑀲𑀺𑀦𑁆𑀦𑁄 𑀫𑀕𑀥𑀺𑀲𑁆𑀲𑀭𑁂𑀦 𑀭𑀜𑁆𑀜𑀸 𑀦𑀸𑀫𑀕𑁄𑀢𑁆𑀢𑀁 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀇𑀫𑀁 𑀭𑀚𑁆𑀚𑀁 𑀲𑀫𑁆𑀧𑀝𑀺𑀘𑁆𑀙𑀸𑀳𑀻’’𑀢𑀺 𑀯𑀼𑀢𑁆𑀢𑁄, ‘‘𑀅𑀮𑀁 𑀫𑀳𑀸𑀭𑀸𑀚, 𑀦 𑀫𑀬𑁆𑀳𑀁 𑀭𑀚𑁆𑀚𑁂𑀦 𑀅𑀢𑁆𑀣𑁄, 𑀅𑀳𑀁 𑀭𑀚𑁆𑀚𑀁 𑀧𑀳𑀸𑀬 𑀮𑁄𑀓𑀳𑀺𑀢𑀢𑁆𑀣𑀸𑀬 𑀧𑀥𑀸𑀦𑀁 𑀅𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀮𑁄𑀓𑁂 𑀯𑀺𑀯𑀝𑀘𑁆𑀙𑀤𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀦𑀺𑀓𑁆𑀔𑀦𑁆𑀢𑁄’’𑀢𑀺 𑀯𑀢𑁆𑀯𑀸, ‘‘𑀢𑁂𑀦 𑀳𑀺 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀧𑀞𑀫𑀁 𑀫𑀬𑁆𑀳𑀁 𑀯𑀺𑀚𑀺𑀢𑀁 𑀑𑀲𑀭𑁂𑀬𑁆𑀬𑀸𑀲𑀻’’𑀢𑀺 𑀧𑀝𑀺𑀜𑁆𑀜𑀁 𑀕𑀳𑀺𑀢𑁄 𑀓𑀸𑀮𑀸𑀫𑀜𑁆𑀘 𑀉𑀤𑀓𑀜𑁆𑀘 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂𑀲𑀁 𑀥𑀫𑁆𑀫𑀤𑁂𑀲𑀦𑀸𑀬 𑀲𑀸𑀭𑀁 𑀅𑀯𑀺𑀦𑁆𑀤𑀦𑁆𑀢𑁄 𑀢𑀢𑁄 𑀧𑀓𑁆𑀓𑀫𑀺𑀢𑁆𑀯𑀸 𑀉𑀭𑀼𑀯𑁂𑀴𑀸𑀬 𑀙𑀩𑁆𑀩𑀲𑁆𑀲𑀸𑀦𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀓𑀭𑁄𑀦𑁆𑀢𑁄𑀧𑀺 𑀅𑀫𑀢𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀑𑀴𑀸𑀭𑀺𑀓𑀸𑀳𑀸𑀭𑀧𑀝𑀺𑀲𑁂𑀯𑀦𑁂𑀦 𑀓𑀸𑀬𑀁 𑀲𑀦𑁆𑀢𑀧𑁆𑀧𑁂𑀲𑀺.

𑀢𑀤𑀸 𑀘 𑀉𑀭𑀼𑀯𑁂𑀮𑀕𑀸𑀫𑁂 𑀲𑀼𑀚𑀸𑀢𑀸 𑀦𑀸𑀫 𑀓𑀼𑀝𑀼𑀫𑁆𑀩𑀺𑀬𑀥𑀻𑀢𑀸 𑀏𑀓𑀲𑁆𑀫𑀺𑀁 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁂 𑀧𑀢𑁆𑀣𑀦𑀫𑀓𑀸𑀲𑀺 𑁋 ‘‘𑀲𑀘𑀸𑀳𑀁 𑀲𑀫𑀸𑀦𑀚𑀸𑀢𑀺𑀓𑀁 𑀓𑀼𑀮𑀖𑀭𑀁 𑀕𑀦𑁆𑀢𑁆𑀯𑀸 𑀧𑀞𑀫𑀕𑀩𑁆𑀪𑁂 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀸𑀫𑀺, 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀲𑀸 𑀲𑀸 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀺. 𑀲𑀸 𑀯𑀺𑀲𑀸𑀔𑀧𑀼𑀡𑁆𑀡𑀫𑀤𑀺𑀯𑀲𑁂 𑀧𑀸𑀢𑁄𑀯 𑀩𑀮𑀺𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑁂 𑀏𑀯 𑀧𑀸𑀬𑀲𑀁 𑀧𑀝𑀺𑀬𑀸𑀤𑁂𑀲𑀺. 𑀢𑀲𑁆𑀫𑀺𑀁 𑀧𑀸𑀬𑀲𑁂 𑀧𑀘𑁆𑀘𑀫𑀸𑀦𑁂 𑀫𑀳𑀦𑁆𑀢𑀫𑀳𑀦𑁆𑀢𑀸 𑀧𑀼𑀧𑁆𑀨𑀼𑀴𑀸 𑀉𑀝𑁆𑀞𑀳𑀺𑀢𑁆𑀯𑀸 𑀤𑀓𑁆𑀔𑀺𑀡𑀸𑀯𑀝𑁆𑀝𑀸 𑀳𑀼𑀢𑁆𑀯𑀸 𑀲𑀜𑁆𑀘𑀭𑀦𑁆𑀢𑀺. 𑀏𑀓𑀨𑀼𑀲𑀺𑀢𑀫𑁆𑀧𑀺 𑀩𑀳𑀺 𑀦 𑀕𑀘𑁆𑀙𑀢𑀺. 𑀫𑀳𑀸𑀩𑁆𑀭𑀳𑁆𑀫𑀸 𑀙𑀢𑁆𑀢𑀁 𑀥𑀸𑀭𑁂𑀲𑀺. 𑀘𑀢𑁆𑀢𑀸𑀭𑁄 𑀮𑁄𑀓𑀧𑀸𑀮𑀸 𑀔𑀕𑁆𑀕𑀳𑀢𑁆𑀣𑀸 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁𑀲𑀼. 𑀲𑀓𑁆𑀓𑁄 𑀅𑀮𑀸𑀢𑀸𑀦𑀺 𑀲𑀫𑀸𑀦𑁂𑀦𑁆𑀢𑁄 𑀅𑀕𑁆𑀕𑀺𑀁 𑀚𑀸𑀮𑁂𑀲𑀺. 𑀤𑁂𑀯𑀢𑀸 𑀘𑀢𑀽𑀲𑀼 𑀤𑀻𑀧𑁂𑀲𑀼 𑀑𑀚𑀁 𑀲𑀁𑀳𑀭𑀺𑀢𑁆𑀯𑀸 𑀢𑀢𑁆𑀣 𑀧𑀓𑁆𑀔𑀺𑀧𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀪𑀺𑀓𑁆𑀔𑀸𑀘𑀸𑀭𑀓𑀸𑀮𑀁 𑀆𑀕𑀫𑀬𑀫𑀸𑀦𑁄 𑀧𑀸𑀢𑁄𑀯 𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀭𑀼𑀓𑁆𑀔𑀫𑀽𑀮𑁂 𑀲𑁄𑀥𑀦𑀢𑁆𑀣𑀸𑀬 𑀕𑀢𑀸 𑀥𑀸𑀢𑀻 𑀆𑀕𑀦𑁆𑀢𑁆𑀯𑀸 𑀲𑀼𑀚𑀸𑀢𑀸𑀬 𑀆𑀭𑁄𑀘𑁂𑀲𑀺 𑁋 ‘‘𑀤𑁂𑀯𑀢𑀸 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑀸’’𑀢𑀺. 𑀲𑀼𑀚𑀸𑀢𑀸, 𑀲𑀩𑁆𑀩𑀁 𑀧𑀲𑀸𑀥𑀦𑀁 𑀧𑀲𑀸𑀥𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑁂 𑀲𑀼𑀯𑀡𑁆𑀡𑀣𑀸𑀮𑁂 𑀧𑀸𑀬𑀲𑀁 𑀯𑀟𑁆𑀠𑁂𑀢𑁆𑀯𑀸 𑀅𑀧𑀭𑀸𑀬 𑀲𑀼𑀯𑀡𑁆𑀡𑀧𑀸𑀢𑀺𑀬𑀸 𑀧𑀺𑀤𑀳𑀺𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀢𑀸 𑀫𑀳𑀸𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀲𑀳𑁂𑀯 𑀧𑀸𑀢𑀺𑀬𑀸 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ‘‘𑀬𑀣𑀸 𑀫𑀬𑁆𑀳𑀁 𑀫𑀦𑁄𑀭𑀣𑁄 𑀦𑀺𑀧𑁆𑀨𑀦𑁆𑀦𑁄, 𑀏𑀯𑀁 𑀢𑀼𑀫𑁆𑀳𑀸𑀓𑀫𑁆𑀧𑀺 𑀦𑀺𑀧𑁆𑀨𑀚𑁆𑀚𑀢𑀽’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀩𑁄𑀥𑀺𑀲𑀢𑁆𑀢𑁄 𑀦𑁂𑀭𑀜𑁆𑀚𑀭𑀸𑀬 𑀢𑀻𑀭𑀁 𑀕𑀦𑁆𑀢𑁆𑀯𑀸 𑀲𑀼𑀯𑀡𑁆𑀡𑀣𑀸𑀮𑀁 𑀢𑀻𑀭𑁂 𑀞𑀧𑁂𑀢𑁆𑀯𑀸 𑀦𑁆𑀳𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀏𑀓𑀽𑀦𑀧𑀡𑁆𑀡𑀸𑀲𑀧𑀺𑀡𑁆𑀟𑁂 𑀓𑀭𑁄𑀦𑁆𑀢𑁄 𑀧𑀸𑀬𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 ‘‘𑀲𑀘𑀸𑀳𑀁 𑀅𑀚𑁆𑀚 𑀩𑀼𑀤𑁆𑀥𑁄 𑀪𑀯𑀸𑀫𑀺, 𑀣𑀸𑀮𑀁 𑀧𑀝𑀺𑀲𑁄𑀢𑀁 𑀕𑀘𑁆𑀙𑀢𑀽’’𑀢𑀺 𑀔𑀺𑀧𑀺. 𑀣𑀸𑀮𑀁 𑀧𑀝𑀺𑀲𑁄𑀢𑀁 𑀕𑀦𑁆𑀢𑁆𑀯𑀸 𑀣𑁄𑀓𑀁 𑀞𑀢𑁆𑀯𑀸 𑀓𑀸𑀮𑀦𑀸𑀕𑀭𑀸𑀚𑀲𑁆𑀲 𑀪𑀯𑀦𑀁 𑀧𑀯𑀺𑀲𑀺𑀢𑁆𑀯𑀸 𑀢𑀺𑀡𑁆𑀡𑀁 𑀩𑀼𑀤𑁆𑀥𑀸𑀦𑀁 𑀣𑀸𑀮𑀸𑀦𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀝𑁆𑀞𑀸𑀲𑀺.

𑀫𑀳𑀸𑀲𑀢𑁆𑀢𑁄 𑀯𑀦𑀲𑀡𑁆𑀟𑁂 𑀤𑀺𑀯𑀸𑀯𑀺𑀳𑀸𑀭𑀁 𑀓𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀲𑁄𑀢𑁆𑀢𑀺𑀬𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁂 𑀅𑀝𑁆𑀞𑀸𑀲𑀺. 𑀲𑁄 𑀧𑀤𑁂𑀲𑁄 𑀧𑀤𑀼𑀫𑀺𑀦𑀺𑀧𑀢𑁆𑀢𑁂 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀅𑀓𑀫𑁆𑀧𑀺𑀢𑁆𑀣. 𑀫𑀳𑀸𑀲𑀢𑁆𑀢𑁄, ‘‘𑀅𑀬𑀁 𑀫𑀫 𑀕𑀼𑀡𑀁 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺 𑀧𑀘𑁆𑀙𑀺𑀫𑀤𑀺𑀲𑀸𑀪𑀸𑀕𑀁 𑀅𑀕𑀫𑀸𑀲𑀺, 𑀲𑁄𑀧𑀺 𑀢𑀣𑁂𑀯 𑀅𑀓𑀫𑁆𑀧𑀺𑀢𑁆𑀣. 𑀉𑀢𑁆𑀢𑀭𑀤𑀺𑀲𑀸𑀪𑀸𑀕𑀁 𑀅𑀕𑀫𑀸𑀲𑀺, 𑀲𑁄𑀧𑀺 𑀢𑀣𑁂𑀯 𑀅𑀓𑀫𑁆𑀧𑀺𑀢𑁆𑀣. 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀪𑀸𑀕𑀁 𑀅𑀕𑀫𑀸𑀲𑀺, 𑀢𑀢𑁆𑀣 𑀧𑀮𑁆𑀮𑀗𑁆𑀓𑀧𑁆𑀧𑀫𑀸𑀡𑀁 𑀞𑀸𑀦𑀁 𑀲𑀼𑀦𑀺𑀔𑀸𑀢𑀇𑀦𑁆𑀤𑀔𑀺𑀮𑁄 𑀯𑀺𑀬 𑀦𑀺𑀘𑁆𑀘𑀮𑀫𑀳𑁄𑀲𑀺. 𑀫𑀳𑀸𑀲𑀢𑁆𑀢𑁄 ‘‘𑀇𑀤𑀁 𑀞𑀸𑀦𑀁 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀓𑀺𑀮𑁂𑀲𑀪𑀜𑁆𑀚𑀦𑀯𑀺𑀤𑁆𑀥𑀁𑀲𑀦𑀝𑁆𑀞𑀸𑀦’’𑀦𑁆𑀢𑀺 𑀢𑀸𑀦𑀺 𑀢𑀺𑀡𑀸𑀦𑀺 𑀅𑀕𑁆𑀕𑁂 𑀕𑀳𑁂𑀢𑁆𑀯𑀸 𑀘𑀸𑀮𑁂𑀲𑀺. 𑀢𑀸𑀦𑀺 𑀘𑀺𑀢𑁆𑀢𑀓𑀸𑀭𑁂𑀦 𑀢𑀽𑀮𑀺𑀓𑀕𑁆𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀦𑀺 𑀯𑀺𑀬 𑀅𑀳𑁂𑀲𑀼𑀁. 𑀩𑁄𑀥𑀺𑀲𑀢𑁆𑀢𑁄, ‘‘𑀩𑁄𑀥𑀺𑀁 𑀅𑀧𑁆𑀧𑀢𑁆𑀯𑀸 𑀇𑀫𑀁 𑀧𑀮𑁆𑀮𑀗𑁆𑀓𑀁 𑀦 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀘𑀢𑀼𑀭𑀗𑁆𑀕𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀺.

𑀢𑀗𑁆𑀔𑀡𑀜𑁆𑀜𑁂𑀯 𑀫𑀸𑀭𑁄 𑀩𑀸𑀳𑀼𑀲𑀳𑀲𑁆𑀲𑀁 𑀫𑀸𑀧𑁂𑀢𑁆𑀯𑀸 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑀁 𑀕𑀺𑀭𑀺𑀫𑁂𑀔𑀮𑀁 𑀦𑀸𑀫 𑀳𑀢𑁆𑀣𑀺𑀁 𑀆𑀭𑀼𑀬𑁆𑀳 𑀦𑀯𑀬𑁄𑀚𑀦𑀁 𑀫𑀸𑀭𑀩𑀮𑀁 𑀕𑀳𑁂𑀢𑁆𑀯𑀸 𑀅𑀤𑁆𑀥𑀓𑁆𑀔𑀺𑀓𑁂𑀦 𑀑𑀮𑁄𑀓𑀬𑀫𑀸𑀦𑁄 𑀧𑀩𑁆𑀩𑀢𑁄 𑀯𑀺𑀬 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁄 𑀉𑀧𑀲𑀗𑁆𑀓𑀫𑀺. 𑀫𑀳𑀸𑀲𑀢𑁆𑀢𑁄, ‘‘𑀫𑀬𑁆𑀳𑀁 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑀲𑁆𑀲 𑀅𑀜𑁆𑀜𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀲𑀓𑁆𑀔𑀺 𑀦𑀢𑁆𑀣𑀺, 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑁂 𑀧𑀦 𑀫𑀬𑁆𑀳𑀁 𑀲𑀢𑁆𑀢𑀲𑀼 𑀯𑀸𑀭𑁂𑀲𑀼 𑀫𑀳𑀸𑀧𑀣𑀯𑀻 𑀲𑀓𑁆𑀔𑀺 𑀅𑀳𑁄𑀲𑀺; 𑀇𑀤𑀸𑀦𑀺𑀧𑀺 𑀫𑁂 𑀅𑀬𑀫𑁂𑀯 𑀅𑀘𑁂𑀢𑀦𑀸 𑀓𑀝𑁆𑀞𑀓𑀮𑀺𑀗𑁆𑀕𑀭𑀽𑀧𑀫𑀸 𑀫𑀳𑀸𑀧𑀣𑀯𑀻 𑀲𑀓𑁆𑀔𑀻’’𑀢𑀺 𑀳𑀢𑁆𑀣𑀁 𑀧𑀲𑀸𑀭𑁂𑀢𑀺. 𑀫𑀳𑀸𑀧𑀣𑀯𑀻 𑀢𑀸𑀯𑀤𑁂𑀯 𑀅𑀬𑀤𑀡𑁆𑀟𑁂𑀦 𑀧𑀳𑀢𑀁 𑀓𑀁𑀲𑀣𑀸𑀮𑀁 𑀯𑀺𑀬 𑀭𑀯𑀲𑀢𑀁 𑀭𑀯𑀲𑀳𑀲𑁆𑀲𑀁 𑀫𑀼𑀜𑁆𑀘𑀫𑀸𑀦𑀸 𑀯𑀺𑀭𑀯𑀺𑀢𑁆𑀯𑀸 𑀧𑀭𑀺𑀯𑀢𑁆𑀢𑀫𑀸𑀦𑀸 𑀫𑀸𑀭𑀩𑀮𑀁 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀫𑀼𑀜𑁆𑀘𑀦𑀫𑀓𑀸𑀲𑀺. 𑀫𑀳𑀸𑀲𑀢𑁆𑀢𑁄 𑀲𑀽𑀭𑀺𑀬𑁂 𑀥𑀭𑀫𑀸𑀦𑁂𑀬𑁂𑀯 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑁆𑀯𑀸 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁, 𑀫𑀚𑁆𑀛𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑁂𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸 𑀯𑀝𑁆𑀝𑀯𑀺𑀯𑀝𑁆𑀝𑀁 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀼𑀡𑁄𑀤𑀬𑁂 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸, ‘‘𑀫𑀬𑀸 𑀅𑀦𑁂𑀓𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑀁 𑀅𑀤𑁆𑀥𑀸𑀦𑀁 𑀇𑀫𑀲𑁆𑀲 𑀧𑀮𑁆𑀮𑀗𑁆𑀓𑀲𑁆𑀲 𑀅𑀢𑁆𑀣𑀸𑀬 𑀯𑀸𑀬𑀸𑀫𑁄 𑀓𑀢𑁄’’𑀢𑀺 𑀲𑀢𑁆𑀢𑀸𑀳𑀁 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀅𑀣𑁂𑀓𑀘𑁆𑀘𑀸𑀦𑀁 𑀤𑁂𑀯𑀢𑀸𑀦𑀁, ‘‘𑀓𑀺𑀁 𑀦𑀼 𑀔𑁄 𑀅𑀜𑁆𑀜𑁂𑀧𑀺 𑀩𑀼𑀤𑁆𑀥𑀢𑁆𑀢𑀓𑀭𑀸 𑀥𑀫𑁆𑀫𑀸 𑀅𑀢𑁆𑀣𑀻’’𑀢𑀺 𑀓𑀗𑁆𑀔𑀸 𑀉𑀤𑀧𑀸𑀤𑀺.

𑀅𑀣 𑀪𑀕𑀯𑀸 𑀅𑀝𑁆𑀞𑀫𑁂 𑀤𑀺𑀯𑀲𑁂 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀤𑁂𑀯𑀢𑀸𑀦𑀁 𑀓𑀗𑁆𑀔𑀁 𑀜𑀢𑁆𑀯𑀸 𑀓𑀗𑁆𑀔𑀸𑀯𑀺𑀥𑀫𑀦𑀢𑁆𑀣𑀁 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑁆𑀯𑀸 𑀢𑀸𑀲𑀁 𑀓𑀗𑁆𑀔𑀁 𑀯𑀺𑀥𑀫𑀺𑀢𑁆𑀯𑀸 𑀧𑀮𑁆𑀮𑀗𑁆𑀓𑀢𑁄 𑀈𑀲𑀓𑀁 𑀧𑀸𑀘𑀻𑀦𑀦𑀺𑀲𑁆𑀲𑀺𑀢𑁂 𑀉𑀢𑁆𑀢𑀭𑀤𑀺𑀲𑀸𑀪𑀸𑀕𑁂 𑀞𑀢𑁆𑀯𑀸 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀧𑀽𑀭𑀺𑀢𑀸𑀦𑀁 𑀧𑀸𑀭𑀫𑀻𑀦𑀁 𑀨𑀮𑀸𑀥𑀺𑀕𑀫𑀝𑁆𑀞𑀸𑀦𑀁 𑀧𑀮𑁆𑀮𑀗𑁆𑀓𑀜𑁆𑀘𑁂𑀯 𑀩𑁄𑀥𑀺𑀭𑀼𑀓𑁆𑀔𑀜𑁆𑀘 𑀅𑀦𑀺𑀫𑀺𑀲𑁂𑀳𑀺 𑀅𑀓𑁆𑀔𑀻𑀳𑀺 𑀑𑀮𑁄𑀓𑀬𑀫𑀸𑀦𑁄 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀺, 𑀢𑀁 𑀞𑀸𑀦𑀁 𑀅𑀦𑀺𑀫𑀺𑀲𑀘𑁂𑀢𑀺𑀬𑀁 𑀦𑀸𑀫 𑀚𑀸𑀢𑀁.

𑀅𑀣 𑀧𑀮𑁆𑀮𑀗𑁆𑀓𑀲𑁆𑀲 𑀘 𑀞𑀺𑀢𑀝𑁆𑀞𑀸𑀦𑀲𑁆𑀲 𑀘 𑀅𑀦𑁆𑀢𑀭𑀸 𑀧𑀼𑀭𑀢𑁆𑀣𑀺𑀫𑀧𑀘𑁆𑀙𑀺𑀫𑀢𑁄 𑀆𑀬𑀢𑁂 𑀭𑀢𑀦𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁄 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀺, 𑀢𑀁 𑀞𑀸𑀦𑀁 𑀭𑀢𑀦𑀘𑀗𑁆𑀓𑀫𑀘𑁂𑀢𑀺𑀬𑀁 𑀦𑀸𑀫 𑀚𑀸𑀢𑀁. 𑀢𑀢𑁄 𑀧𑀘𑁆𑀙𑀺𑀫𑀤𑀺𑀲𑀸𑀪𑀸𑀕𑁂 𑀤𑁂𑀯𑀢𑀸 𑀭𑀢𑀦𑀖𑀭𑀁 𑀫𑀸𑀧𑀬𑀺𑀁𑀲𑀼, 𑀢𑀢𑁆𑀣 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀯𑀺𑀲𑁂𑀲𑀢𑁄 𑀘𑁂𑀢𑁆𑀣 𑀅𑀦𑀦𑁆𑀢𑀦𑀬𑀲𑀫𑀦𑁆𑀢𑀧𑀝𑁆𑀞𑀸𑀦𑀁 𑀯𑀺𑀘𑀺𑀦𑀦𑁆𑀢𑁄 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀲𑀺, 𑀢𑀁 𑀞𑀸𑀦𑀁 𑀭𑀢𑀦𑀖𑀭𑀘𑁂𑀢𑀺𑀬𑀁 𑀦𑀸𑀫 𑀚𑀸𑀢𑀁. 𑀏𑀯𑀁 𑀩𑁄𑀥𑀺𑀲𑀫𑀻𑀧𑁂𑀬𑁂𑀯 𑀘𑀢𑁆𑀢𑀸𑀭𑀺 𑀲𑀢𑁆𑀢𑀸𑀳𑀸𑀦𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀜𑁆𑀘𑀫𑁂 𑀲𑀢𑁆𑀢𑀸𑀳𑁂 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑀸 𑀬𑁂𑀦 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁄 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀢𑀢𑁆𑀭𑀸𑀧𑀺 𑀥𑀫𑁆𑀫𑀁 𑀯𑀺𑀘𑀺𑀦𑀦𑁆𑀢𑁄𑀬𑁂𑀯 𑀯𑀺𑀫𑀼𑀢𑁆𑀢𑀺𑀲𑀼𑀔𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑁄 𑀦𑀺𑀲𑀻𑀤𑀺, 𑀥𑀫𑁆𑀫𑀁 𑀯𑀺𑀘𑀺𑀦𑀦𑁆𑀢𑁄 𑀘𑁂𑀢𑁆𑀣 𑀏𑀯𑀁 𑀅𑀪𑀺𑀥𑀫𑁆𑀫𑁂 𑀦𑀬𑀫𑀕𑁆𑀕𑀁 𑀲𑀫𑁆𑀫𑀲𑀺 𑁋 𑀧𑀞𑀫𑀁 𑀥𑀫𑁆𑀫𑀲𑀗𑁆𑀕𑀡𑀻𑀧𑀓𑀭𑀡𑀁 𑀦𑀸𑀫, 𑀢𑀢𑁄 𑀯𑀺𑀪𑀗𑁆𑀕𑀧𑀓𑀭𑀡𑀁, 𑀥𑀸𑀢𑀼𑀓𑀣𑀸𑀧𑀓𑀭𑀡𑀁, 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀧𑀓𑀭𑀡𑀁, 𑀓𑀣𑀸𑀯𑀢𑁆𑀣𑀼 𑀦𑀸𑀫 𑀧𑀓𑀭𑀡𑀁, 𑀬𑀫𑀓𑀁 𑀦𑀸𑀫 𑀧𑀓𑀭𑀡𑀁, 𑀢𑀢𑁄 𑀫𑀳𑀸𑀧𑀓𑀭𑀡𑀁 𑀧𑀝𑁆𑀞𑀸𑀦𑀁 𑀦𑀸𑀫𑀸𑀢𑀺.

𑀢𑀢𑁆𑀣𑀲𑁆𑀲 𑀲𑀡𑁆𑀳𑀲𑀼𑀔𑀼𑀫𑀧𑀝𑁆𑀞𑀸𑀦𑀫𑁆𑀳𑀺 𑀘𑀺𑀢𑁆𑀢𑁂 𑀑𑀢𑀺𑀡𑁆𑀡𑁂 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺; 𑀧𑀻𑀢𑀺𑀬𑀸 𑀉𑀧𑁆𑀧𑀦𑁆𑀦𑀸𑀬 𑀮𑁄𑀳𑀺𑀢𑀁 𑀧𑀲𑀻𑀤𑀺, 𑀮𑁄𑀳𑀺𑀢𑁂 𑀧𑀲𑀦𑁆𑀦𑁂 𑀙𑀯𑀺 𑀧𑀲𑀻𑀤𑀺. 𑀙𑀯𑀺𑀬𑀸 𑀧𑀲𑀦𑁆𑀦𑀸𑀬 𑀧𑀼𑀭𑀢𑁆𑀣𑀺𑀫𑀓𑀸𑀬𑀢𑁄 𑀓𑀽𑀝𑀸𑀕𑀸𑀭𑀸𑀤𑀺𑀧𑁆𑀧𑀫𑀸𑀡𑀸 𑀭𑀲𑁆𑀫𑀺𑀬𑁄 𑀉𑀝𑁆𑀞𑀳𑀺𑀢𑁆𑀯𑀸 𑀆𑀓𑀸𑀲𑁂 𑀧𑀓𑁆𑀔𑀦𑁆𑀤𑀙𑀤𑁆𑀤𑀦𑁆𑀢𑀦𑀸𑀕𑀓𑀼𑀮𑀁 𑀯𑀺𑀬 𑀧𑀸𑀘𑀻𑀦𑀤𑀺𑀲𑀸𑀬 𑀅𑀦𑀦𑁆𑀢𑀸𑀦𑀺 𑀘𑀓𑁆𑀓𑀯𑀸𑀴𑀸𑀦𑀺 𑀧𑀓𑁆𑀔𑀦𑁆𑀤𑀸, 𑀧𑀘𑁆𑀙𑀺𑀫𑀓𑀸𑀬𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀧𑀘𑁆𑀙𑀺𑀫𑀤𑀺𑀲𑀸𑀬, 𑀤𑀓𑁆𑀔𑀺𑀡𑀁𑀲𑀓𑀽𑀝𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀤𑀓𑁆𑀔𑀺𑀡𑀤𑀺𑀲𑀸𑀬, 𑀯𑀸𑀫𑀁𑀲𑀓𑀽𑀝𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀉𑀢𑁆𑀢𑀭𑀤𑀺𑀲𑀸𑀬 𑀅𑀦𑀦𑁆𑀢𑀸𑀦𑀺 𑀘𑀓𑁆𑀓𑀯𑀸𑀴𑀸𑀦𑀺 𑀧𑀓𑁆𑀔𑀦𑁆𑀤𑀸, 𑀧𑀸𑀤𑀢𑀮𑁂𑀳𑀺 𑀧𑀯𑀸𑀴𑀗𑁆𑀓𑀼𑀭𑀯𑀡𑁆𑀡𑀸 𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀳𑀸𑀧𑀣𑀯𑀺𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀉𑀤𑀓𑀁 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀯𑀸𑀢𑀓𑁆𑀔𑀦𑁆𑀥𑀁 𑀧𑀤𑀸𑀮𑁂𑀢𑁆𑀯𑀸 𑀅𑀚𑀝𑀸𑀓𑀸𑀲𑀁 𑀧𑀓𑁆𑀔𑀦𑁆𑀤𑀸, 𑀲𑀻𑀲𑀢𑁄 𑀲𑀫𑁆𑀧𑀭𑀺𑀯𑀢𑁆𑀢𑀺𑀬𑀫𑀸𑀦𑀁 𑀫𑀡𑀺𑀤𑀸𑀫𑀁 𑀯𑀺𑀬 𑀦𑀻𑀮𑀯𑀡𑁆𑀡𑀸 𑀭𑀲𑁆𑀫𑀺𑀯𑀝𑁆𑀝𑀺 𑀉𑀝𑁆𑀞𑀳𑀺𑀢𑁆𑀯𑀸 𑀙 𑀤𑁂𑀯𑀮𑁄𑀓𑁂 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀦𑀯 𑀩𑁆𑀭𑀳𑁆𑀫𑀮𑁄𑀓𑁂 𑀯𑁂𑀳𑀧𑁆𑀨𑀮𑁂 𑀧𑀜𑁆𑀘 𑀲𑀼𑀤𑁆𑀥𑀸𑀯𑀸𑀲𑁂 𑀘 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑁂 𑀅𑀢𑀺𑀓𑁆𑀓𑀫𑁆𑀫 𑀅𑀚𑀝𑀸𑀓𑀸𑀲𑀁 𑀧𑀓𑁆𑀔𑀦𑁆𑀤𑀸. 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀅𑀧𑀭𑀺𑀫𑀸𑀡𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀅𑀧𑀭𑀺𑀫𑀸𑀡𑀸 𑀲𑀢𑁆𑀢𑀸 𑀲𑀩𑁆𑀩𑁂 𑀲𑀼𑀯𑀡𑁆𑀡𑀯𑀡𑁆𑀡𑀸𑀯 𑀅𑀳𑁂𑀲𑀼𑀁. 𑀢𑀁 𑀤𑀺𑀯𑀲𑀜𑁆𑀘 𑀧𑀦 𑀪𑀕𑀯𑀢𑁄 𑀲𑀭𑀻𑀭𑀸 𑀦𑀺𑀓𑁆𑀔𑀦𑁆𑀢𑀸 𑀬𑀸𑀯𑀚𑁆𑀚𑀤𑀺𑀯𑀲𑀸𑀧𑀺 𑀢𑀸 𑀭𑀲𑁆𑀫𑀺𑀬𑁄 𑀅𑀦𑀦𑁆𑀢𑀸 𑀮𑁄𑀓𑀥𑀸𑀢𑀼𑀬𑁄 𑀕𑀘𑁆𑀙𑀦𑁆𑀢𑀺𑀬𑁂𑀯.

𑀏𑀯𑀁 𑀪𑀕𑀯𑀸 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂 𑀲𑀢𑁆𑀢𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀢𑀢𑁄 𑀅𑀧𑀭𑀁 𑀲𑀢𑁆𑀢𑀸𑀳𑀁 𑀫𑀼𑀘𑀮𑀺𑀦𑁆𑀤𑁂 𑀦𑀺𑀲𑀻𑀤𑀺, 𑀦𑀺𑀲𑀺𑀦𑁆𑀦𑀫𑀢𑁆𑀢𑀲𑁆𑀲𑁂𑀯 𑀘𑀲𑁆𑀲 𑀲𑀓𑀮𑀁 𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀧𑀽𑀭𑁂𑀦𑁆𑀢𑁄 𑀫𑀳𑀸𑀅𑀓𑀸𑀮𑀫𑁂𑀖𑁄 𑀉𑀤𑀧𑀸𑀤𑀺. 𑀏𑀯𑀭𑀽𑀧𑁄 𑀓𑀺𑀭 𑀫𑀳𑀸𑀫𑁂𑀖𑁄 𑀤𑁆𑀯𑀻𑀲𑀼𑀬𑁂𑀯 𑀓𑀸𑀮𑁂𑀲𑀼 𑀯𑀲𑁆𑀲𑀢𑀺 𑀘𑀓𑁆𑀓𑀯𑀢𑁆𑀢𑀺𑀫𑁆𑀳𑀺 𑀯𑀸 𑀉𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀯𑀸. 𑀇𑀥 𑀩𑀼𑀤𑁆𑀥𑀓𑀸𑀮𑁂 𑀉𑀤𑀧𑀸𑀤𑀺. 𑀢𑀲𑁆𑀫𑀺𑀁 𑀧𑀦 𑀉𑀧𑁆𑀧𑀦𑁆𑀦𑁂 𑀫𑀼𑀘𑀮𑀺𑀦𑁆𑀤𑁄 𑀦𑀸𑀕𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀫𑁂𑀖𑁄 𑀲𑀢𑁆𑀣𑀭𑀺 𑀫𑀬𑁆𑀳𑀁 𑀪𑀯𑀦𑀁 𑀧𑀯𑀺𑀝𑁆𑀞𑀫𑀢𑁆𑀢𑁂𑀯 𑀉𑀧𑁆𑀧𑀦𑁆𑀦𑁄, 𑀯𑀸𑀲𑀸𑀕𑀸𑀭𑀫𑀲𑁆𑀲 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺. 𑀲𑁄 𑀲𑀢𑁆𑀢𑀭𑀢𑀦𑀫𑀬𑀁 𑀧𑀸𑀲𑀸𑀤𑀁 𑀦𑀺𑀫𑁆𑀫𑀺𑀦𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑁄𑀧𑀺 𑀏𑀯𑀁 𑀓𑀢𑁂 𑀫𑀬𑁆𑀳𑀁 𑀫𑀳𑀧𑁆𑀨𑀮𑀁 𑀦 𑀪𑀯𑀺𑀲𑁆𑀲𑀢𑀺, 𑀤𑀲𑀩𑀮𑀲𑁆𑀲 𑀓𑀸𑀬𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀫𑀳𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀓𑀢𑁆𑀯𑀸 𑀲𑀢𑁆𑀣𑀸𑀭𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀪𑁄𑀕𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀭𑀺 𑀨𑀡𑀁 𑀥𑀸𑀭𑁂𑀲𑀺. 𑀧𑀭𑀺𑀓𑁆𑀔𑁂𑀧𑀲𑁆𑀲 𑀅𑀦𑁆𑀢𑁄 𑀑𑀓𑀸𑀲𑁄 𑀳𑁂𑀝𑁆𑀞𑀸 𑀮𑁄𑀳𑀧𑀸𑀲𑀸𑀤𑀧𑁆𑀧𑀫𑀸𑀡𑁄 𑀅𑀳𑁄𑀲𑀺. 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑁂𑀦 𑀇𑀭𑀺𑀬𑀸𑀧𑀣𑁂𑀦 𑀲𑀢𑁆𑀣𑀸 𑀯𑀺𑀳𑀭𑀺𑀲𑁆𑀲𑀢𑀻𑀢𑀺 𑀦𑀸𑀕𑀭𑀸𑀚𑀲𑁆𑀲 𑀅𑀚𑁆𑀛𑀸𑀲𑀬𑁄 𑀅𑀳𑁄𑀲𑀺. 𑀢𑀲𑁆𑀫𑀸 𑀏𑀯𑀁 𑀫𑀳𑀦𑁆𑀢𑀁 𑀑𑀓𑀸𑀲𑀁 𑀧𑀭𑀺𑀓𑁆𑀔𑀺𑀧𑀺. 𑀫𑀚𑁆𑀛𑁂 𑀭𑀢𑀦𑀧𑀮𑁆𑀮𑀗𑁆𑀓𑁄 𑀧𑀜𑁆𑀜𑀢𑁆𑀢𑁄 𑀳𑁄𑀢𑀺, 𑀉𑀧𑀭𑀺 𑀲𑀼𑀯𑀡𑁆𑀡𑀢𑀸𑀭𑀓𑀯𑀺𑀘𑀺𑀢𑁆𑀢𑀁 𑀲𑀫𑁄𑀲𑀭𑀺𑀢𑀕𑀦𑁆𑀥𑀤𑀸𑀫𑀓𑀼𑀲𑀼𑀫𑀤𑀸𑀫𑀘𑁂𑀮𑀯𑀺𑀢𑀸𑀦𑀁 𑀅𑀳𑁄𑀲𑀺. 𑀘𑀢𑀽𑀲𑀼 𑀓𑁄𑀡𑁂𑀲𑀼 𑀕𑀦𑁆𑀥𑀢𑁂𑀮𑁂𑀦 𑀤𑀻𑀧𑀸 𑀚𑀮𑀺𑀢𑀸, 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀯𑀺𑀯𑀭𑀺𑀢𑁆𑀯𑀸 𑀘𑀦𑁆𑀤𑀦𑀓𑀭𑀡𑁆𑀟𑀓𑀸 𑀞𑀧𑀺𑀢𑀸. 𑀏𑀯𑀁 𑀪𑀕𑀯𑀸 𑀢𑀁 𑀲𑀢𑁆𑀢𑀸𑀳𑀁 𑀢𑀢𑁆𑀣 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀢𑀢𑁄 𑀅𑀧𑀭𑀁 𑀲𑀢𑁆𑀢𑀸𑀳𑀁 𑀭𑀸𑀚𑀸𑀬𑀢𑀦𑁂 𑀦𑀺𑀲𑀻𑀤𑀺.

𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂 𑀲𑀓𑁆𑀓𑁂𑀦 𑀤𑁂𑀯𑀸𑀦𑀫𑀺𑀦𑁆𑀤𑁂𑀦 𑀆𑀪𑀢𑀁 𑀤𑀦𑁆𑀢𑀓𑀝𑁆𑀞𑀜𑁆𑀘 𑀑𑀲𑀥𑀳𑀭𑀻𑀢𑀓𑀜𑁆𑀘 𑀔𑀸𑀤𑀺𑀢𑁆𑀯𑀸 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀘𑀢𑀽𑀳𑀺 𑀮𑁄𑀓𑀧𑀸𑀮𑁂𑀳𑀺 𑀉𑀧𑀦𑀻𑀢𑁂 𑀧𑀘𑁆𑀘𑀕𑁆𑀖𑁂 𑀲𑁂𑀮𑀫𑀬𑁂 𑀧𑀢𑁆𑀢𑁂 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀸𑀦𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀧𑀼𑀦 𑀧𑀘𑁆𑀘𑀸𑀕𑀦𑁆𑀢𑁆𑀯𑀸 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑁂 𑀦𑀺𑀲𑀺𑀦𑁆𑀦𑀲𑁆𑀲 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑁄 𑀅𑀬𑀁 𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺.

𑀢𑀢𑁆𑀣 𑀧𑀡𑁆𑀟𑀺𑀢𑁄𑀢𑀺 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀯𑀺𑀬𑀢𑁆𑀢𑁄𑀢𑀺 𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀫𑁂𑀥𑀸𑀯𑀻𑀢𑀺 𑀞𑀸𑀦𑀼𑀧𑁆𑀧𑀢𑁆𑀢𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑁄𑀢𑀺 𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸 𑀦𑀺𑀓𑁆𑀓𑀺𑀮𑁂𑀲𑀚𑀸𑀢𑀺𑀓𑁄 𑀯𑀺𑀲𑀼𑀤𑁆𑀥𑀲𑀢𑁆𑀢𑁄. 𑀆𑀚𑀸𑀦𑀺𑀲𑁆𑀲𑀢𑀻𑀢𑀺 𑀲𑀮𑁆𑀮𑀓𑁆𑀔𑁂𑀲𑁆𑀲𑀢𑀺 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀢𑀺. 𑀜𑀸𑀡𑀜𑁆𑀘 𑀧𑀦 𑀫𑁂𑀢𑀺 𑀫𑀬𑁆𑀳𑀫𑁆𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀺. 𑀪𑀕𑀯𑀸 𑀓𑀺𑀭 𑀤𑁂𑀯𑀢𑀸𑀬 𑀓𑀣𑀺𑀢𑁂𑀦𑁂𑀯 𑀦𑀺𑀝𑁆𑀞𑀁 𑀅𑀕𑀦𑁆𑀢𑁆𑀯𑀸 𑀲𑀬𑀫𑁆𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀑𑀮𑁄𑀓𑁂𑀦𑁆𑀢𑁄 𑀇𑀢𑁄 𑀲𑀢𑁆𑀢𑀫𑀤𑀺𑀯𑀲𑀫𑀢𑁆𑀣𑀓𑁂 𑀓𑀸𑀮𑀁 𑀓𑀢𑁆𑀯𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀦𑀺𑀩𑁆𑀩𑀢𑁆𑀢𑁄𑀢𑀺 𑀅𑀤𑁆𑀤𑀲. 𑀢𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀜𑀸𑀡𑀜𑁆𑀘 𑀧𑀦 𑀫𑁂 𑀤𑀲𑁆𑀲𑀦𑀁 𑀉𑀤𑀧𑀸𑀤𑀻’’𑀢𑀺. 𑀫𑀳𑀸𑀚𑀸𑀦𑀺𑀬𑁄𑀢𑀺 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑁂 𑀧𑀢𑁆𑀢𑀩𑁆𑀩𑀫𑀕𑁆𑀕𑀨𑀮𑀢𑁄 𑀧𑀭𑀺𑀳𑀻𑀦𑀢𑁆𑀢𑀸 𑀫𑀳𑀢𑀻 𑀚𑀸𑀦𑀺 𑀅𑀲𑁆𑀲𑀸𑀢𑀺 𑀫𑀳𑀸𑀚𑀸𑀦𑀺𑀬𑁄. 𑀅𑀓𑁆𑀔𑀡𑁂 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀕𑀦𑁆𑀢𑁆𑀯𑀸 𑀤𑁂𑀲𑀺𑀬𑀫𑀸𑀦𑀁 𑀥𑀫𑁆𑀫𑀫𑁆𑀧𑀺𑀲𑁆𑀲 𑀲𑁄𑀢𑀼𑀁 𑀲𑁄𑀢𑀧𑁆𑀧𑀲𑀸𑀤𑁄 𑀦𑀢𑁆𑀣𑀺, 𑀇𑀥 𑀥𑀫𑁆𑀫𑀤𑁂𑀲𑀦𑀝𑁆𑀞𑀸𑀦𑀁 𑀆𑀕𑀫𑀦𑀧𑀸𑀤𑀸𑀧𑀺 𑀦𑀢𑁆𑀣𑀺, 𑀏𑀯𑀁 𑀫𑀳𑀸𑀚𑀸𑀦𑀺𑀬𑁄 𑀚𑀸𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀪𑀺𑀤𑁄𑀲𑀓𑀸𑀮𑀗𑁆𑀓𑀢𑁄𑀢𑀺 𑀅𑀟𑁆𑀠𑀭𑀢𑁆𑀢𑁂 𑀓𑀸𑀮𑀗𑁆𑀓𑀢𑁄. 𑀜𑀸𑀡𑀜𑁆𑀘 𑀧𑀦 𑀫𑁂𑀢𑀺 𑀫𑀬𑁆𑀳𑀫𑁆𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀉𑀤𑀧𑀸𑀤𑀺. 𑀇𑀥𑀸𑀧𑀺 𑀓𑀺𑀭 𑀪𑀕𑀯𑀸 𑀤𑁂𑀯𑀢𑀸𑀬 𑀯𑀘𑀦𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑀁 𑀅𑀓𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀑𑀮𑁄𑀓𑁂𑀦𑁆𑀢𑁄 ‘‘𑀳𑀺𑀬𑁆𑀬𑁄 𑀅𑀟𑁆𑀠𑀭𑀢𑁆𑀢𑁂 𑀓𑀸𑀮𑀗𑁆𑀓𑀢𑁆𑀯𑀸 𑀉𑀤𑀓𑁄 𑀭𑀸𑀫𑀧𑀼𑀢𑁆𑀢𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀅𑀤𑁆𑀤𑀲. 𑀢𑀲𑁆𑀫𑀸 𑀏𑀯𑀫𑀸𑀳. 𑀲𑁂𑀲𑀁 𑀧𑀼𑀭𑀺𑀫𑀦𑀬𑀲𑀤𑀺𑀲𑀫𑁂𑀯. 𑀩𑀳𑀼𑀓𑀸𑀭𑀸𑀢𑀺 𑀩𑀳𑀽𑀧𑀓𑀸𑀭𑀸. 𑀧𑀥𑀸𑀦𑀧𑀳𑀺𑀢𑀢𑁆𑀢𑀁 𑀉𑀧𑀝𑁆𑀞𑀳𑀺𑀁𑀲𑀽𑀢𑀺 𑀧𑀥𑀸𑀦𑀢𑁆𑀣𑀸𑀬 𑀧𑁂𑀲𑀺𑀢𑀢𑁆𑀢𑀪𑀸𑀯𑀁 𑀯𑀲𑀦𑀝𑁆𑀞𑀸𑀦𑁂 𑀧𑀭𑀺𑀯𑁂𑀡𑀲𑀫𑁆𑀫𑀚𑁆𑀚𑀦𑁂𑀦 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀅𑀦𑀼𑀩𑀦𑁆𑀥𑀦𑁂𑀦 𑀫𑀼𑀔𑁄𑀤𑀓𑀤𑀦𑁆𑀢𑀓𑀝𑁆𑀞𑀤𑀸𑀦𑀸𑀤𑀺𑀦𑀸 𑀘 𑀉𑀧𑀝𑁆𑀞𑀳𑀺𑀁𑀲𑀼. 𑀓𑁂 𑀧𑀦 𑀢𑁂 𑀧𑀜𑁆𑀘𑀯𑀕𑁆𑀕𑀺𑀬𑀸 𑀦𑀸𑀫? 𑀬𑁂𑀢𑁂 𑁋

𑀭𑀸𑀫𑁄 𑀥𑀚𑁄 𑀮𑀓𑁆𑀔𑀡𑁄 𑀚𑁄𑀢𑀺𑀫𑀦𑁆𑀢𑀺,

𑀬𑀜𑁆𑀜𑁄 𑀲𑀼𑀪𑁄𑀚𑁄 𑀲𑀼𑀬𑀸𑀫𑁄 𑀲𑀼𑀤𑀢𑁆𑀢𑁄;

𑀏𑀢𑁂 𑀢𑀤𑀸 𑀅𑀝𑁆𑀞 𑀅𑀳𑁂𑀲𑀼𑀁 𑀩𑁆𑀭𑀸𑀳𑁆𑀫𑀡𑀸,

𑀙𑀴𑀗𑁆𑀕𑀯𑀸 𑀫𑀦𑁆𑀢𑀁 𑀯𑀺𑀬𑀸𑀓𑀭𑀺𑀁𑀲𑀽𑀢𑀺.

𑀩𑁄𑀥𑀺𑀲𑀢𑁆𑀢𑀲𑁆𑀲 𑀚𑀸𑀢𑀓𑀸𑀮𑁂 𑀲𑀼𑀧𑀺𑀦𑀧𑀝𑀺𑀕𑁆𑀕𑀸𑀳𑀓𑀸 𑀘𑁂𑀯 𑀮𑀓𑁆𑀔𑀡𑀧𑀝𑀺𑀕𑁆𑀕𑀸𑀳𑀓𑀸 𑀘 𑀅𑀝𑁆𑀞 𑀩𑁆𑀭𑀸𑀳𑁆𑀫𑀡𑀸. 𑀢𑁂𑀲𑀼 𑀢𑀬𑁄 𑀤𑁆𑀯𑁂𑀥𑀸 𑀩𑁆𑀬𑀸𑀓𑀭𑀺𑀁𑀲𑀼 𑁋 ‘‘𑀇𑀫𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀫𑀸𑀦𑁄 𑀭𑀸𑀚𑀸 𑀳𑁄𑀢𑀺 𑀘𑀓𑁆𑀓𑀯𑀢𑁆𑀢𑀻, 𑀧𑀩𑁆𑀩𑀚𑀫𑀸𑀦𑁄 𑀩𑀼𑀤𑁆𑀥𑁄’’𑀢𑀺. 𑀧𑀜𑁆𑀘 𑀩𑁆𑀭𑀸𑀳𑁆𑀫𑀡𑀸 𑀏𑀓𑀁𑀲𑀩𑁆𑀬𑀸𑀓𑀭𑀡𑀸 𑀅𑀳𑁂𑀲𑀼𑀁 𑁋 ‘‘𑀇𑀫𑁂𑀳𑀺 𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀕𑀸𑀭𑁂 𑀦 𑀢𑀺𑀝𑁆𑀞𑀢𑀺, 𑀩𑀼𑀤𑁆𑀥𑁄𑀯 𑀳𑁄𑀢𑀻’’𑀢𑀺. 𑀢𑁂𑀲𑀼 𑀧𑀼𑀭𑀺𑀫𑀸 𑀢𑀬𑁄 𑀬𑀣𑀸𑀫𑀦𑁆𑀢𑀧𑀤𑀁 𑀕𑀢𑀸, 𑀇𑀫𑁂 𑀧𑀦 𑀧𑀜𑁆𑀘 𑀫𑀦𑁆𑀢𑀧𑀤𑀁 𑀅𑀢𑀺𑀓𑁆𑀓𑀦𑁆𑀢𑀸. 𑀢𑁂 𑀅𑀢𑁆𑀢𑀦𑀸 𑀮𑀤𑁆𑀥𑀁 𑀧𑀼𑀡𑁆𑀡𑀧𑀢𑁆𑀢𑀁 𑀜𑀸𑀢𑀓𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 ‘‘𑀅𑀬𑀁 𑀫𑀳𑀸𑀧𑀼𑀭𑀺𑀲𑁄 𑀅𑀕𑀸𑀭𑀁 𑀦 𑀅𑀚𑁆𑀛𑀸𑀯𑀲𑀺𑀲𑁆𑀲𑀢𑀺, 𑀏𑀓𑀦𑁆𑀢𑁂𑀦 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀺𑀩𑁆𑀩𑀺𑀢𑀓𑁆𑀓𑀸 𑀩𑁄𑀥𑀺𑀲𑀢𑁆𑀢𑀁 𑀉𑀤𑁆𑀤𑀺𑀲𑁆𑀲 𑀲𑀫𑀡𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑀸. 𑀢𑁂𑀲𑀁 𑀧𑀼𑀢𑁆𑀢𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀁 𑀅𑀝𑁆𑀞𑀓𑀣𑀸𑀬 𑀧𑀝𑀺𑀓𑁆𑀔𑀺𑀢𑁆𑀢𑀁.

𑀏𑀢𑁂 𑀓𑀺𑀭 𑀤𑀳𑀭𑀓𑀸𑀮𑁂𑀬𑁂𑀯 𑀩𑀳𑀽 𑀫𑀦𑁆𑀢𑁂 𑀚𑀸𑀦𑀺𑀁𑀲𑀼, 𑀢𑀲𑁆𑀫𑀸 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀆𑀘𑀭𑀺𑀬𑀝𑁆𑀞𑀸𑀦𑁂 𑀞𑀧𑀬𑀺𑀁𑀲𑀼. 𑀢𑁂 𑀧𑀘𑁆𑀙𑀸 𑀅𑀫𑁆𑀳𑁂𑀳𑀺 𑀧𑀼𑀢𑁆𑀢𑀤𑀸𑀭𑀚𑀝𑀁 𑀙𑀟𑁆𑀟𑁂𑀢𑁆𑀯𑀸 𑀦 𑀲𑀓𑁆𑀓𑀸 𑀪𑀯𑀺𑀲𑁆𑀲𑀢𑀺 𑀧𑀩𑁆𑀩𑀚𑀺𑀢𑀼𑀦𑁆𑀢𑀺 𑀤𑀳𑀭𑀓𑀸𑀮𑁂𑀬𑁂𑀯 𑀧𑀩𑁆𑀩𑀚𑀺𑀢𑁆𑀯𑀸 𑀭𑀫𑀡𑀻𑀬𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀯𑀺𑀘𑀭𑀺𑀁𑀲𑀼. 𑀓𑀸𑀮𑁂𑀦 𑀓𑀸𑀮𑀁 𑀧𑀦 ‘‘𑀓𑀺𑀁, 𑀪𑁄, 𑀫𑀳𑀸𑀧𑀼𑀭𑀺𑀲𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀦𑁆𑀢𑁄’’𑀢𑀺 𑀧𑀼𑀘𑁆𑀙𑀦𑁆𑀢𑀺. 𑀫𑀦𑀼𑀲𑁆𑀲𑀸, ‘‘𑀓𑀼𑀳𑀺𑀁 𑀢𑀼𑀫𑁆𑀳𑁂 𑀫𑀳𑀸𑀧𑀼𑀭𑀺𑀲𑀁 𑀧𑀲𑁆𑀲𑀺𑀲𑁆𑀲𑀣, 𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀢𑀺𑀯𑀺𑀥𑀦𑀸𑀝𑀓𑀫𑀚𑁆𑀛𑁂 𑀤𑁂𑀯𑁄 𑀯𑀺𑀬 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑁄𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑁂 𑀲𑀼𑀢𑁆𑀯𑀸, ‘‘𑀦 𑀢𑀸𑀯 𑀫𑀳𑀸𑀧𑀼𑀭𑀺𑀲𑀲𑁆𑀲 𑀜𑀸𑀡𑀁 𑀧𑀭𑀺𑀧𑀸𑀓𑀁 𑀕𑀘𑁆𑀙𑀢𑀻’’𑀢𑀺 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸 𑀯𑀺𑀳𑀭𑀺𑀁𑀲𑀼𑀬𑁂𑀯. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀪𑀕𑀯𑀸, ‘‘𑀩𑀳𑀼𑀓𑀸𑀭𑀸 𑀔𑁄 𑀇𑀫𑁂 𑀧𑀜𑁆𑀘𑀯𑀕𑁆𑀕𑀺𑀬𑀸’’𑀢𑀺 𑀆𑀳? 𑀓𑀺𑀁 𑀉𑀧𑀓𑀸𑀭𑀓𑀸𑀦𑀁𑀬𑁂𑀯 𑀏𑀲 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀅𑀦𑀼𑀧𑀓𑀸𑀭𑀓𑀸𑀦𑀁 𑀦 𑀤𑁂𑀲𑁂𑀢𑀻𑀢𑀺? 𑀦𑁄 𑀦 𑀤𑁂𑀲𑁂𑀢𑀺. 𑀧𑀭𑀺𑀘𑀬𑀯𑀲𑁂𑀦 𑀳𑁂𑀲 𑀆𑀴𑀸𑀭𑀜𑁆𑀘𑁂𑀯 𑀓𑀸𑀮𑀸𑀫𑀁 𑀉𑀤𑀓𑀜𑁆𑀘 𑀭𑀸𑀫𑀧𑀼𑀢𑁆𑀢𑀁 𑀑𑀮𑁄𑀓𑁂𑀲𑀺. 𑀏𑀢𑀲𑁆𑀫𑀺𑀁 𑀧𑀦 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑁂 𑀞𑀧𑁂𑀢𑁆𑀯𑀸 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀁 𑀧𑀞𑀫𑀁 𑀥𑀫𑁆𑀫𑀁 𑀲𑀘𑁆𑀙𑀺𑀓𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀓𑀲𑁆𑀫𑀸? 𑀢𑀣𑀸𑀯𑀺𑀥𑀉𑀧𑀦𑀺𑀲𑁆𑀲𑀬𑀢𑁆𑀢𑀸.

𑀧𑀼𑀩𑁆𑀩𑁂 𑀓𑀺𑀭 𑀧𑀼𑀜𑁆𑀜𑀓𑀭𑀡𑀓𑀸𑀮𑁂 𑀤𑁆𑀯𑁂 𑀪𑀸𑀢𑀭𑁄 𑀅𑀳𑁂𑀲𑀼𑀁. 𑀢𑁂 𑀏𑀓𑀢𑁄𑀯 𑀲𑀲𑁆𑀲𑀁 𑀅𑀓𑀁𑀲𑀼. 𑀢𑀢𑁆𑀣 𑀚𑁂𑀝𑁆𑀞𑀓𑀲𑁆𑀲 ‘‘𑀏𑀓𑀲𑁆𑀫𑀺𑀁 𑀲𑀲𑁆𑀲𑁂 𑀦𑀯𑀯𑀸𑀭𑁂 𑀅𑀕𑁆𑀕𑀲𑀲𑁆𑀲𑀤𑀸𑀦𑀁 𑀫𑀬𑀸 𑀤𑀸𑀢𑀩𑁆𑀩’’𑀦𑁆𑀢𑀺 𑀅𑀳𑁄𑀲𑀺. 𑀲𑁄 𑀯𑀧𑁆𑀧𑀓𑀸𑀮𑁂 𑀩𑀻𑀚𑀕𑁆𑀕𑀁 𑀦𑀸𑀫 𑀤𑀢𑁆𑀯𑀸 𑀕𑀩𑁆𑀪𑀓𑀸𑀮𑁂 𑀓𑀦𑀺𑀝𑁆𑀞𑁂𑀦 𑀲𑀤𑁆𑀥𑀺𑀁 𑀫𑀦𑁆𑀢𑁂𑀲𑀺 𑁋 ‘‘𑀕𑀩𑁆𑀪𑀓𑀸𑀮𑁂 𑀕𑀩𑁆𑀪𑀁 𑀨𑀸𑀮𑁂𑀢𑁆𑀯𑀸 𑀤𑀲𑁆𑀲𑀸𑀫𑀸’’𑀢𑀺. 𑀓𑀦𑀺𑀝𑁆𑀞𑁄 ‘‘𑀢𑀭𑀼𑀡𑀲𑀲𑁆𑀲𑀁 𑀦𑀸𑀲𑁂𑀢𑀼𑀓𑀸𑀫𑁄𑀲𑀻’’𑀢𑀺 𑀆𑀳. 𑀚𑁂𑀝𑁆𑀞𑁄 𑀓𑀦𑀺𑀝𑁆𑀞𑀲𑁆𑀲 𑀅𑀦𑀦𑀼𑀯𑀢𑁆𑀢𑀦𑀪𑀸𑀯𑀁 𑀜𑀢𑁆𑀯𑀸 𑀔𑁂𑀢𑁆𑀢𑀁 𑀯𑀺𑀪𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀢𑁄 𑀕𑀩𑁆𑀪𑀁 𑀨𑀸𑀮𑁂𑀢𑁆𑀯𑀸 𑀔𑀻𑀭𑀁 𑀦𑀻𑀳𑀭𑀺𑀢𑁆𑀯𑀸 𑀲𑀧𑁆𑀧𑀺𑀨𑀸𑀡𑀺𑀢𑁂𑀳𑀺 𑀬𑁄𑀚𑁂𑀢𑁆𑀯𑀸 𑀅𑀤𑀸𑀲𑀺, 𑀧𑀼𑀣𑀼𑀓𑀓𑀸𑀮𑁂 𑀧𑀼𑀣𑀼𑀓𑀁 𑀓𑀸𑀭𑁂𑀢𑁆𑀯𑀸 𑀅𑀤𑀸𑀲𑀺, 𑀮𑀸𑀬𑀦𑁂 𑀮𑀸𑀬𑀦𑀕𑁆𑀕𑀁 𑀯𑁂𑀡𑀺𑀓𑀭𑀡𑁂 𑀯𑁂𑀡𑀕𑁆𑀕𑀁 𑀓𑀮𑀸𑀧𑀸𑀤𑀻𑀲𑀼 𑀓𑀮𑀸𑀧𑀕𑁆𑀕𑀁 𑀔𑀴𑀕𑁆𑀕𑀁 𑀪𑀡𑁆𑀟𑀕𑁆𑀕𑀁 𑀓𑁄𑀝𑁆𑀞𑀕𑁆𑀕𑀦𑁆𑀢𑀺 𑀏𑀯𑀁 𑀏𑀓𑀲𑀲𑁆𑀲𑁂 𑀦𑀯𑀯𑀸𑀭𑁂 𑀅𑀕𑁆𑀕𑀤𑀸𑀦𑀁 𑀅𑀤𑀸𑀲𑀺. 𑀓𑀦𑀺𑀝𑁆𑀞𑁄 𑀧𑀦𑀲𑁆𑀲 𑀉𑀤𑁆𑀥𑀭𑀺𑀢𑁆𑀯𑀸 𑀅𑀤𑀸𑀲𑀺, 𑀢𑁂𑀲𑀼 𑀚𑁂𑀝𑁆𑀞𑁄 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑁄 𑀚𑀸𑀢𑁄, 𑀓𑀦𑀺𑀝𑁆𑀞𑁄 𑀲𑀼𑀪𑀤𑁆𑀤𑀧𑀭𑀺𑀩𑁆𑀩𑀸𑀚𑀓𑁄. 𑀇𑀢𑀺 𑀏𑀓𑀲𑁆𑀫𑀺𑀁 𑀲𑀲𑁆𑀲𑁂 𑀦𑀯𑀦𑁆𑀦𑀁 𑀅𑀕𑁆𑀕𑀤𑀸𑀦𑀸𑀦𑀁 𑀤𑀺𑀦𑁆𑀦𑀢𑁆𑀢𑀸 𑀞𑀧𑁂𑀢𑁆𑀯𑀸 𑀣𑁂𑀭𑀁 𑀅𑀜𑁆𑀜𑁄 𑀧𑀞𑀫𑀁 𑀥𑀫𑁆𑀫𑀁 𑀲𑀘𑁆𑀙𑀺𑀓𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. ‘‘𑀩𑀳𑀼𑀓𑀸𑀭𑀸 𑀔𑁄 𑀇𑀫𑁂 𑀧𑀜𑁆𑀘𑀯𑀕𑁆𑀕𑀺𑀬𑀸’’𑀢𑀺 𑀇𑀤𑀁 𑀧𑀦 𑀉𑀧𑀓𑀸𑀭𑀸𑀦𑀼𑀲𑁆𑀲𑀭𑀡𑀫𑀢𑁆𑀢𑀓𑁂𑀦𑁂𑀯 𑀯𑀼𑀢𑁆𑀢𑀁.

𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂𑀢𑀺 𑀢𑀲𑁆𑀫𑀺𑀁 𑀓𑀺𑀭 𑀧𑀤𑁂𑀲𑁂 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀸 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑁂 𑀲𑀢𑁆𑀢𑀸𑀳𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀬 𑀦𑀸𑀕𑀮𑀢𑀸𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑁆𑀯𑀸 𑀅𑀦𑁄𑀢𑀢𑁆𑀢𑀤𑀳𑁂 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀆𑀓𑀸𑀲𑁂𑀦 𑀆𑀕𑀦𑁆𑀢𑁆𑀯𑀸 𑀦𑀺𑀧𑀢𑀦𑁆𑀢𑀺. 𑀢𑀢𑁆𑀣 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀸 𑀕𑀫𑀦𑀓𑀸𑀮𑁂𑀧𑀺 𑀢𑀢𑁄𑀬𑁂𑀯 𑀉𑀧𑁆𑀧𑀢𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀇𑀢𑀺 𑀇𑀲𑀬𑁄 𑀏𑀢𑁆𑀣 𑀦𑀺𑀧𑀢𑀦𑁆𑀢𑀺 𑀉𑀧𑁆𑀧𑀢𑀦𑁆𑀢𑀺 𑀘𑀸𑀢𑀺 𑀢𑀁 𑀞𑀸𑀦𑀁 𑀇𑀲𑀺𑀧𑀢𑀦𑀦𑁆𑀢𑀺 𑀲𑀗𑁆𑀔𑀁 𑀕𑀢𑀁. 𑀫𑀺𑀕𑀸𑀦𑀁 𑀧𑀦 𑀅𑀪𑀬𑀢𑁆𑀣𑀸𑀬 𑀤𑀺𑀦𑁆𑀦𑀢𑁆𑀢𑀸 𑀫𑀺𑀕𑀤𑀸𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂’’𑀢𑀺.

𑁨𑁮𑁫. 𑀅𑀦𑁆𑀢𑀭𑀸 𑀘 𑀕𑀬𑀁 𑀅𑀦𑁆𑀢𑀭𑀸 𑀘 𑀩𑁄𑀥𑀺𑀦𑁆𑀢𑀺 𑀕𑀬𑀸𑀬 𑀘 𑀩𑁄𑀥𑀺𑀲𑁆𑀲 𑀘 𑀯𑀺𑀯𑀭𑁂 𑀢𑀺𑀕𑀸𑀯𑀼𑀢𑀦𑁆𑀢𑀭𑁂 𑀞𑀸𑀦𑁂. 𑀩𑁄𑀥𑀺𑀫𑀡𑁆𑀟𑀢𑁄 𑀳𑀺 𑀕𑀬𑀸 𑀢𑀻𑀡𑀺 𑀕𑀸𑀯𑀼𑀢𑀸𑀦𑀺. 𑀩𑀸𑀭𑀸𑀡𑀲𑀻 𑀅𑀝𑁆𑀞𑀸𑀭𑀲 𑀬𑁄𑀚𑀦𑀸𑀦𑀺. 𑀉𑀧𑀓𑁄 𑀩𑁄𑀥𑀺𑀫𑀡𑁆𑀟𑀲𑁆𑀲 𑀘 𑀕𑀬𑀸𑀬 𑀘 𑀅𑀦𑁆𑀢𑀭𑁂 𑀪𑀕𑀯𑀦𑁆𑀢𑀁 𑀅𑀤𑁆𑀤𑀲. 𑀅𑀦𑁆𑀢𑀭𑀸𑀲𑀤𑁆𑀤𑁂𑀦 𑀧𑀦 𑀬𑀼𑀢𑁆𑀢𑀢𑁆𑀢𑀸 𑀉𑀧𑀬𑁄𑀕𑀯𑀘𑀦𑀁 𑀓𑀢𑀁. 𑀈𑀤𑀺𑀲𑁂𑀲𑀼 𑀘 𑀞𑀸𑀦𑁂𑀲𑀼 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 ‘‘𑀅𑀦𑁆𑀢𑀭𑀸 𑀕𑀸𑀫𑀜𑁆𑀘 𑀦𑀤𑀺𑀜𑁆𑀘 𑀬𑀸𑀢𑀻’’𑀢𑀺 𑀏𑀯𑀁 𑀏𑀓𑀫𑁂𑀯 𑀅𑀦𑁆𑀢𑀭𑀸𑀲𑀤𑁆𑀤𑀁 𑀧𑀬𑀼𑀚𑁆𑀚𑀦𑁆𑀢𑀺. 𑀲𑁄 𑀤𑀼𑀢𑀺𑀬𑀧𑀤𑁂𑀦𑀧𑀺 𑀬𑁄𑀚𑁂𑀢𑀩𑁆𑀩𑁄 𑀳𑁄𑀢𑀺. 𑀅𑀬𑁄𑀚𑀺𑀬𑀫𑀸𑀦𑁂 𑀉𑀧𑀬𑁄𑀕𑀯𑀘𑀦𑀁 𑀦 𑀧𑀸𑀧𑀼𑀡𑀸𑀢𑀺. 𑀇𑀥 𑀧𑀦 𑀬𑁄𑀚𑁂𑀢𑁆𑀯𑀸 𑀏𑀯 𑀯𑀼𑀢𑁆𑀢𑁄𑀢𑀺. 𑀅𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑀦𑁆𑀢𑀺 𑀅𑀤𑁆𑀥𑀸𑀦𑀲𑀗𑁆𑀔𑀸𑀢𑀁 𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀁, 𑀤𑀻𑀖𑀫𑀕𑁆𑀕𑀧𑀝𑀺𑀧𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀤𑁆𑀥𑀸𑀦𑀫𑀕𑁆𑀕𑀕𑀫𑀦𑀲𑀫𑀬𑀲𑁆𑀲 𑀳𑀺 𑀯𑀺𑀪𑀗𑁆𑀕𑁂 ‘‘𑀅𑀤𑁆𑀥𑀬𑁄𑀚𑀦𑀁 𑀕𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀧𑀸𑀘𑀺. 𑁨𑁧𑁮) 𑀅𑀤𑁆𑀥𑀬𑁄𑀚𑀦𑀫𑁆𑀧𑀺 𑀅𑀤𑁆𑀥𑀸𑀦𑀫𑀕𑁆𑀕𑁄 𑀳𑁄𑀢𑀺. 𑀩𑁄𑀥𑀺𑀫𑀡𑁆𑀟𑀢𑁄 𑀧𑀦 𑀕𑀬𑀸 𑀢𑀺𑀕𑀸𑀯𑀼𑀢𑀁.

𑀲𑀩𑁆𑀩𑀸𑀪𑀺𑀪𑀽𑀢𑀺 𑀲𑀩𑁆𑀩𑀁 𑀢𑁂𑀪𑀽𑀫𑀓𑀥𑀫𑁆𑀫𑀁 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑁄. 𑀲𑀩𑁆𑀩𑀯𑀺𑀤𑀽𑀢𑀺 𑀲𑀩𑁆𑀩𑀁 𑀘𑀢𑀼𑀪𑀽𑀫𑀓𑀥𑀫𑁆𑀫𑀁 𑀅𑀯𑁂𑀤𑀺𑀁 𑀅𑀜𑁆𑀜𑀸𑀲𑀺𑀁. 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑀼𑀧𑀮𑀺𑀢𑁆𑀢𑁄𑀢𑀺 𑀲𑀩𑁆𑀩𑁂𑀲𑀼 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼 𑀓𑀺𑀮𑁂𑀲𑀮𑁂𑀧𑀦𑁂𑀦 𑀅𑀦𑀼𑀧𑀮𑀺𑀢𑁆𑀢𑁄. 𑀲𑀩𑁆𑀩𑀁 𑀚𑀳𑁄𑀢𑀺 𑀲𑀩𑁆𑀩𑀁 𑀢𑁂𑀪𑀽𑀫𑀓𑀥𑀫𑁆𑀫𑀁 𑀚𑀳𑀺𑀢𑁆𑀯𑀸 𑀞𑀺𑀢𑁄. 𑀢𑀡𑁆𑀳𑀸𑀓𑁆𑀔𑀬𑁂 𑀯𑀺𑀫𑀼𑀢𑁆𑀢𑁄𑀢𑀺 𑀢𑀡𑁆𑀳𑀸𑀓𑁆𑀔𑀬𑁂 𑀦𑀺𑀩𑁆𑀩𑀸𑀦𑁂 𑀆𑀭𑀫𑁆𑀫𑀡𑀢𑁄 𑀯𑀺𑀫𑀼𑀢𑁆𑀢𑁄. 𑀲𑀬𑀁 𑀅𑀪𑀺𑀜𑁆𑀜𑀸𑀬𑀸𑀢𑀺 𑀲𑀩𑁆𑀩𑀁 𑀘𑀢𑀼𑀪𑀽𑀫𑀓𑀥𑀫𑁆𑀫𑀁 𑀅𑀢𑁆𑀢𑀦𑀸𑀯 𑀚𑀸𑀦𑀺𑀢𑁆𑀯𑀸. 𑀓𑀫𑀼𑀤𑁆𑀤𑀺𑀲𑁂𑀬𑁆𑀬𑀦𑁆𑀢𑀺 𑀓𑀁 𑀅𑀜𑁆𑀜𑀁 ‘‘𑀅𑀬𑀁 𑀫𑁂 𑀆𑀘𑀭𑀺𑀬𑁄’’𑀢𑀺 𑀉𑀤𑁆𑀤𑀺𑀲𑁂𑀬𑁆𑀬𑀁.

𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀻𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀫𑀬𑁆𑀳𑀁 𑀆𑀘𑀭𑀺𑀬𑁄 𑀦𑀸𑀫 𑀦𑀢𑁆𑀣𑀺. 𑀦𑀢𑁆𑀣𑀺 𑀫𑁂 𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀫𑀬𑁆𑀳𑀁 𑀧𑀝𑀺𑀪𑀸𑀕𑀧𑀼𑀕𑁆𑀕𑀮𑁄 𑀦𑀸𑀫 𑀦𑀢𑁆𑀣𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀲𑀳𑁂𑀢𑀼𑀦𑀸 𑀦𑀬𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑀬𑀁 𑀩𑀼𑀤𑁆𑀥𑁄. 𑀲𑀻𑀢𑀺𑀪𑀽𑀢𑁄𑀢𑀺 𑀲𑀩𑁆𑀩𑀓𑀺𑀮𑁂𑀲𑀕𑁆𑀕𑀺𑀦𑀺𑀩𑁆𑀩𑀸𑀧𑀦𑁂𑀦 𑀲𑀻𑀢𑀺𑀪𑀽𑀢𑁄. 𑀓𑀺𑀮𑁂𑀲𑀸𑀦𑀁𑀬𑁂𑀯 𑀦𑀺𑀩𑁆𑀩𑀼𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑁄. 𑀓𑀸𑀲𑀺𑀦𑀁 𑀧𑀼𑀭𑀦𑁆𑀢𑀺 𑀓𑀸𑀲𑀺𑀭𑀝𑁆𑀞𑁂 𑀦𑀕𑀭𑀁. 𑀆𑀳𑀜𑁆𑀙𑀁 𑀅𑀫𑀢𑀤𑀼𑀦𑁆𑀤𑀼𑀪𑀺𑀦𑁆𑀢𑀺 𑀥𑀫𑁆𑀫𑀘𑀓𑁆𑀓𑀧𑀝𑀺𑀮𑀸𑀪𑀸𑀬 𑀅𑀫𑀢𑀪𑁂𑀭𑀺𑀁 𑀧𑀳𑀭𑀺𑀲𑁆𑀲𑀸𑀫𑀻𑀢𑀺 𑀕𑀘𑁆𑀙𑀸𑀫𑀺. 𑀅𑀭𑀳𑀲𑀺 𑀅𑀦𑀦𑁆𑀢𑀚𑀺𑀦𑁄𑀢𑀺 𑀅𑀦𑀦𑁆𑀢𑀚𑀺𑀦𑁄𑀢𑀺 𑀪𑀯𑀺𑀢𑀼𑀁 𑀬𑀼𑀢𑁆𑀢𑁄. 𑀳𑀼𑀧𑁂𑀬𑁆𑀬 𑀧𑀸𑀯𑀼𑀲𑁄𑀢𑀺, 𑀆𑀯𑀼𑀲𑁄, 𑀏𑀯𑀫𑁆𑀧𑀺 𑀦𑀸𑀫 𑀪𑀯𑁂𑀬𑁆𑀬. 𑀧𑀓𑁆𑀓𑀸𑀫𑀻𑀢𑀺 𑀯𑀗𑁆𑀓𑀳𑀸𑀭𑀚𑀦𑀧𑀤𑀁 𑀦𑀸𑀫 𑀅𑀕𑀫𑀸𑀲𑀺.

𑀢𑀢𑁆𑀣𑁂𑀓𑀁 𑀫𑀺𑀕𑀮𑀼𑀤𑁆𑀤𑀓𑀕𑀸𑀫𑀓𑀁 𑀦𑀺𑀲𑁆𑀲𑀸𑀬 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀚𑁂𑀝𑁆𑀞𑀓𑀮𑀼𑀤𑁆𑀤𑀓𑁄 𑀢𑀁 𑀉𑀧𑀝𑁆𑀞𑀸𑀲𑀺. 𑀢𑀲𑁆𑀫𑀺𑀜𑁆𑀘 𑀚𑀦𑀧𑀤𑁂 𑀘𑀡𑁆𑀟𑀸 𑀫𑀓𑁆𑀔𑀺𑀓𑀸 𑀳𑁄𑀦𑁆𑀢𑀺. 𑀅𑀣 𑀦𑀁 𑀏𑀓𑀸𑀬 𑀘𑀸𑀝𑀺𑀬𑀸 𑀯𑀲𑀸𑀧𑁂𑀲𑀼𑀁, 𑀫𑀺𑀕𑀮𑀼𑀤𑁆𑀤𑀓𑁄 𑀤𑀽𑀭𑁂 𑀫𑀺𑀕𑀯𑀁 𑀕𑀘𑁆𑀙𑀦𑁆𑀢𑁄 ‘‘𑀅𑀫𑁆𑀳𑀸𑀓𑀁 𑀅𑀭𑀳𑀦𑁆𑀢𑁂 𑀫𑀸 𑀧𑀫𑀚𑁆𑀚𑀻’’𑀢𑀺 𑀙𑀸𑀯𑀁 𑀦𑀸𑀫 𑀥𑀻𑀢𑀭𑀁 𑀆𑀡𑀸𑀧𑁂𑀢𑁆𑀯𑀸 𑀅𑀕𑀫𑀸𑀲𑀺 𑀲𑀤𑁆𑀥𑀺𑀁 𑀧𑀼𑀢𑁆𑀢𑀪𑀸𑀢𑀼𑀓𑁂𑀳𑀺. 𑀲𑀸 𑀘𑀲𑁆𑀲 𑀥𑀻𑀢𑀸 𑀤𑀲𑁆𑀲𑀦𑀻𑀬𑀸 𑀳𑁄𑀢𑀺 𑀓𑁄𑀝𑁆𑀞𑀸𑀲𑀲𑀫𑁆𑀧𑀦𑁆𑀦𑀸. 𑀤𑀼𑀢𑀺𑀬𑀤𑀺𑀯𑀲𑁂 𑀉𑀧𑀓𑁄 𑀖𑀭𑀁 𑀆𑀕𑀢𑁄 𑀢𑀁 𑀤𑀸𑀭𑀺𑀓𑀁 𑀲𑀩𑁆𑀩𑀁 𑀉𑀧𑀘𑀸𑀭𑀁 𑀓𑀢𑁆𑀯𑀸 𑀧𑀭𑀺𑀯𑀺𑀲𑀺𑀢𑀼𑀁 𑀉𑀧𑀕𑀢𑀁 𑀤𑀺𑀲𑁆𑀯𑀸 𑀭𑀸𑀕𑁂𑀦 𑀅𑀪𑀺𑀪𑀽𑀢𑁄 𑀪𑀼𑀜𑁆𑀚𑀺𑀢𑀼𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑁄 𑀪𑀸𑀚𑀦𑁂𑀦 𑀪𑀢𑁆𑀢𑀁 𑀆𑀤𑀸𑀬 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀪𑀢𑁆𑀢𑀁 𑀏𑀓𑀫𑀦𑁆𑀢𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀘𑁂 𑀙𑀸𑀯𑀁 𑀮𑀪𑀸𑀫𑀺, 𑀚𑀻𑀯𑀸𑀫𑀺, 𑀦𑁄 𑀘𑁂, 𑀫𑀭𑀸𑀫𑀻𑀢𑀺 𑀦𑀺𑀭𑀸𑀳𑀸𑀭𑁄 𑀲𑀬𑀺. 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀸𑀕𑀯𑀺𑀓𑁄 𑀆𑀕𑀦𑁆𑀢𑁆𑀯𑀸 𑀥𑀻𑀢𑀭𑀁 𑀉𑀧𑀓𑀲𑁆𑀲 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀺. 𑀲𑀸 ‘‘𑀏𑀓𑀤𑀺𑀯𑀲𑀫𑁂𑀯 𑀆𑀕𑀦𑁆𑀢𑁆𑀯𑀸 𑀧𑀼𑀦 𑀦𑀸𑀕𑀢𑀧𑀼𑀩𑁆𑀩𑁄’’𑀢𑀺 𑀆𑀳. 𑀫𑀸𑀕𑀯𑀺𑀓𑁄 𑀆𑀕𑀢𑀯𑁂𑀲𑁂𑀦𑁂𑀯 𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀢𑀁𑀔𑀡𑀁𑀬𑁂𑀯 𑀕𑀦𑁆𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂, 𑀅𑀧𑁆𑀨𑀸𑀲𑀼𑀓’’𑀦𑁆𑀢𑀺 𑀧𑀸𑀤𑁂 𑀧𑀭𑀸𑀫𑀲𑀦𑁆𑀢𑁄 𑀧𑀼𑀘𑁆𑀙𑀺. 𑀉𑀧𑀓𑁄 𑀦𑀺𑀢𑁆𑀣𑀼𑀦𑀦𑁆𑀢𑁄 𑀧𑀭𑀺𑀯𑀢𑁆𑀢𑀢𑀺𑀬𑁂𑀯. 𑀲𑁄 ‘‘𑀯𑀤𑀣 𑀪𑀦𑁆𑀢𑁂, 𑀬𑀁 𑀫𑀬𑀸 𑀲𑀓𑁆𑀓𑀸 𑀓𑀸𑀢𑀼𑀁, 𑀢𑀁 𑀲𑀩𑁆𑀩𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀉𑀧𑀓𑁄, ‘‘𑀲𑀘𑁂 𑀙𑀸𑀯𑀁 𑀮𑀪𑀸𑀫𑀺, 𑀚𑀻𑀯𑀸𑀫𑀺, 𑀦𑁄 𑀘𑁂, 𑀇𑀥𑁂𑀯 𑀫𑀭𑀡𑀁 𑀲𑁂𑀬𑁆𑀬𑁄’’𑀢𑀺 𑀆𑀳. 𑀚𑀸𑀦𑀸𑀲𑀺 𑀧𑀦, 𑀪𑀦𑁆𑀢𑁂, 𑀓𑀺𑀜𑁆𑀘𑀺 𑀲𑀺𑀧𑁆𑀧𑀦𑁆𑀢𑀺. 𑀦 𑀚𑀸𑀦𑀸𑀫𑀻𑀢𑀺. 𑀦, 𑀪𑀦𑁆𑀢𑁂, 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀅𑀚𑀸𑀦𑀦𑁆𑀢𑁂𑀦 𑀲𑀓𑁆𑀓𑀸 𑀖𑀭𑀸𑀯𑀸𑀲𑀁 𑀅𑀥𑀺𑀝𑁆𑀞𑀸𑀢𑀼𑀦𑁆𑀢𑀺.

𑀲𑁄 𑀆𑀳 𑁋 ‘‘𑀦𑀸𑀳𑀁 𑀓𑀺𑀜𑁆𑀘𑀺 𑀲𑀺𑀧𑁆𑀧𑀁 𑀚𑀸𑀦𑀸𑀫𑀺, 𑀅𑀧𑀺𑀘 𑀢𑀼𑀫𑁆𑀳𑀸𑀓𑀁 𑀫𑀁𑀲𑀳𑀸𑀭𑀓𑁄 𑀪𑀯𑀺𑀲𑁆𑀲𑀸𑀫𑀺, 𑀫𑀁𑀲𑀜𑁆𑀘 𑀯𑀺𑀓𑁆𑀓𑀻𑀡𑀺𑀲𑁆𑀲𑀸𑀫𑀻’’𑀢𑀺. 𑀫𑀸𑀕𑀯𑀺𑀓𑁄, ‘‘𑀅𑀫𑁆𑀳𑀸𑀓𑀫𑁆𑀧𑀺 𑀏𑀢𑀤𑁂𑀯 𑀭𑀼𑀘𑁆𑀘𑀢𑀻’’𑀢𑀺 𑀉𑀢𑁆𑀢𑀭𑀲𑀸𑀝𑀓𑀁 𑀤𑀢𑁆𑀯𑀸 𑀖𑀭𑀁 𑀆𑀦𑁂𑀢𑁆𑀯𑀸 𑀥𑀻𑀢𑀭𑀁 𑀅𑀤𑀸𑀲𑀺. 𑀢𑁂𑀲𑀁 𑀲𑀁𑀯𑀸𑀲𑀫𑀦𑁆𑀯𑀸𑀬 𑀧𑀼𑀢𑁆𑀢𑁄 𑀯𑀺𑀚𑀸𑀬𑀺. 𑀲𑀼𑀪𑀤𑁆𑀤𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀙𑀸𑀯𑀸 𑀢𑀲𑁆𑀲 𑀭𑁄𑀤𑀦𑀓𑀸𑀮𑁂 ‘‘𑀫𑀁𑀲𑀳𑀸𑀭𑀓𑀲𑁆𑀲 𑀧𑀼𑀢𑁆𑀢, 𑀫𑀺𑀕𑀮𑀼𑀤𑁆𑀤𑀓𑀲𑁆𑀲 𑀧𑀼𑀢𑁆𑀢 𑀫𑀸 𑀭𑁄𑀤𑀻’’𑀢𑀺𑀆𑀤𑀻𑀦𑀺 𑀯𑀤𑀫𑀸𑀦𑀸 𑀧𑀼𑀢𑁆𑀢𑀢𑁄𑀲𑀦𑀕𑀻𑀢𑁂𑀦 𑀉𑀧𑀓𑀁 𑀉𑀧𑁆𑀧𑀡𑁆𑀟𑁂𑀲𑀺. 𑀪𑀤𑁆𑀤𑁂 𑀢𑁆𑀯𑀁 𑀫𑀁 𑀅𑀦𑀸𑀣𑁄𑀢𑀺 𑀫𑀜𑁆𑀜𑀲𑀺. 𑀅𑀢𑁆𑀣𑀺 𑀫𑁂 𑀅𑀦𑀦𑁆𑀢𑀚𑀺𑀦𑁄 𑀦𑀸𑀫 𑀲𑀳𑀸𑀬𑁄. 𑀢𑀲𑁆𑀲𑀸𑀳𑀁 𑀲𑀦𑁆𑀢𑀺𑀓𑁂 𑀕𑀫𑀺𑀲𑁆𑀲𑀸𑀫𑀻𑀢𑀺 𑀆𑀳. 𑀙𑀸𑀯𑀸 𑀏𑀯𑀫𑀬𑀁 𑀅𑀝𑁆𑀝𑀻𑀬𑀢𑀻𑀢𑀺 𑀜𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀓𑀣𑁂𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀅𑀦𑀸𑀭𑁄𑀘𑁂𑀢𑁆𑀯𑀸𑀯 𑀫𑀚𑁆𑀛𑀺𑀫𑀤𑁂𑀲𑀸𑀪𑀺𑀫𑀼𑀔𑁄 𑀧𑀓𑁆𑀓𑀸𑀫𑀺.

𑀪𑀕𑀯𑀸 𑀘 𑀢𑁂𑀦 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀫𑀳𑀸𑀯𑀺𑀳𑀸𑀭𑁂. 𑀅𑀣 𑀔𑁄 𑀪𑀕𑀯𑀸 𑀧𑀝𑀺𑀓𑀘𑁆𑀘𑁂𑀯 𑀪𑀺𑀓𑁆𑀔𑀽 𑀆𑀡𑀸𑀧𑁂𑀲𑀺 𑁋 ‘‘𑀬𑁄, 𑀪𑀺𑀓𑁆𑀔𑀯𑁂, ‘𑀅𑀦𑀦𑁆𑀢𑀚𑀺𑀦𑁄’𑀢𑀺 𑀧𑀼𑀘𑁆𑀙𑀫𑀸𑀦𑁄 𑀆𑀕𑀘𑁆𑀙𑀢𑀺, 𑀢𑀲𑁆𑀲 𑀫𑀁 𑀤𑀲𑁆𑀲𑁂𑀬𑁆𑀬𑀸𑀣𑀸’’𑀢𑀺. 𑀉𑀧𑀓𑁄𑀧𑀺 𑀔𑁄 ‘‘𑀓𑀼𑀳𑀺𑀁 𑀅𑀦𑀦𑁆𑀢𑀚𑀺𑀦𑁄 𑀯𑀲𑀢𑀻’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀆𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑀫𑀚𑁆𑀛𑁂 𑀞𑀢𑁆𑀯𑀸 𑀓𑀼𑀳𑀺𑀁 𑀅𑀦𑀦𑁆𑀢𑀚𑀺𑀦𑁄𑀢𑀺 𑀧𑀼𑀘𑁆𑀙𑀺. 𑀢𑀁 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀦𑀬𑀺𑀁𑀲𑀼. 𑀲𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑁋 ‘‘𑀲𑀜𑁆𑀚𑀸𑀦𑀸𑀣 𑀫𑀁 𑀪𑀕𑀯𑀸’’𑀢𑀺 𑀆𑀳. 𑀆𑀫, 𑀉𑀧𑀓, 𑀲𑀜𑁆𑀚𑀸𑀦𑀸𑀫𑀺, 𑀓𑀼𑀳𑀺𑀁 𑀧𑀦 𑀢𑁆𑀯𑀁 𑀯𑀲𑀺𑀢𑁆𑀣𑀸𑀢𑀺. 𑀯𑀗𑁆𑀓𑀳𑀸𑀭𑀚𑀦𑀧𑀤𑁂, 𑀪𑀦𑁆𑀢𑁂𑀢𑀺. 𑀉𑀧𑀓, 𑀫𑀳𑀮𑁆𑀮𑀓𑁄𑀲𑀺 𑀚𑀸𑀢𑁄 𑀧𑀩𑁆𑀩𑀚𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻𑀢𑀺. 𑀧𑀩𑁆𑀩𑀚𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂𑀢𑀺. 𑀪𑀕𑀯𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀅𑀤𑀸𑀲𑀺. 𑀲𑁄 𑀓𑀫𑁆𑀫𑀝𑁆𑀞𑀸𑀦𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀓𑀸𑀮𑀁 𑀓𑀢𑁆𑀯𑀸 𑀅𑀯𑀺𑀳𑁂𑀲𑀼 𑀦𑀺𑀩𑁆𑀩𑀢𑁆𑀢𑁄. 𑀦𑀺𑀩𑁆𑀩𑀢𑁆𑀢𑀓𑁆𑀔𑀡𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺. 𑀅𑀯𑀺𑀳𑁂𑀲𑀼 𑀦𑀺𑀩𑁆𑀩𑀢𑁆𑀢𑀫𑀢𑁆𑀢𑀸 𑀳𑀺 𑀲𑀢𑁆𑀢 𑀚𑀦𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼, 𑀢𑁂𑀲𑀁 𑀲𑁄 𑀅𑀜𑁆𑀜𑀢𑀭𑁄.

𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀯𑀺𑀳𑀁 𑀉𑀧𑀧𑀦𑁆𑀦𑀸𑀲𑁂, 𑀯𑀺𑀫𑀼𑀢𑁆𑀢𑀸 𑀲𑀢𑁆𑀢 𑀪𑀺𑀓𑁆𑀔𑀯𑁄;

𑀭𑀸𑀕𑀤𑁄𑀲𑀧𑀭𑀺𑀓𑁆𑀔𑀻𑀡𑀸, 𑀢𑀺𑀡𑁆𑀡𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁.

𑀉𑀧𑀓𑁄 𑀧𑀮𑀕𑀡𑁆𑀟𑁄 𑀘, 𑀧𑀼𑀓𑁆𑀓𑀼𑀲𑀸𑀢𑀺 𑀘 𑀢𑁂 𑀢𑀬𑁄;

𑀪𑀤𑁆𑀤𑀺𑀬𑁄 𑀔𑀡𑁆𑀟𑀤𑁂𑀯𑁄 𑀘, 𑀩𑀳𑀼𑀭𑀕𑁆𑀕𑀺 𑀘 𑀲𑀗𑁆𑀕𑀺𑀬𑁄;

𑀢𑁂 𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀤𑀺𑀩𑁆𑀩𑀬𑁄𑀕𑀁 𑀉𑀧𑀚𑁆𑀛𑀕𑀼’’𑀦𑁆𑀢𑀺. (𑀲𑀁. 𑀦𑀺. 𑁧.𑁧𑁦𑁫);

𑁨𑁮𑁬. 𑀲𑀡𑁆𑀞𑀧𑁂𑀲𑀼𑀦𑁆𑀢𑀺 𑀓𑀢𑀺𑀓𑀁 𑀅𑀓𑀁𑀲𑀼. 𑀩𑀸𑀳𑀼𑀮𑁆𑀮𑀺𑀓𑁄𑀢𑀺 𑀘𑀻𑀯𑀭𑀩𑀸𑀳𑀼𑀮𑁆𑀮𑀸𑀤𑀻𑀦𑀁 𑀅𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑁄. 𑀧𑀥𑀸𑀦𑀯𑀺𑀩𑁆𑀪𑀦𑁆𑀢𑁄𑀢𑀺 𑀧𑀥𑀸𑀦𑀢𑁄 𑀯𑀺𑀩𑁆𑀪𑀦𑁆𑀢𑁄 𑀪𑀝𑁆𑀞𑁄 𑀧𑀭𑀺𑀳𑀻𑀦𑁄. 𑀆𑀯𑀢𑁆𑀢𑁄 𑀩𑀸𑀳𑀼𑀮𑁆𑀮𑀸𑀬𑀸𑀢𑀺 𑀘𑀻𑀯𑀭𑀸𑀤𑀻𑀦𑀁 𑀩𑀳𑀼𑀮𑀪𑀸𑀯𑀢𑁆𑀣𑀸𑀬 𑀆𑀯𑀢𑁆𑀢𑁄. 𑀅𑀧𑀺𑀘 𑀔𑁄 𑀆𑀲𑀦𑀁 𑀞𑀧𑁂𑀢𑀩𑁆𑀩𑀦𑁆𑀢𑀺 𑀅𑀧𑀺𑀘 𑀔𑁄 𑀧𑀦𑀲𑁆𑀲 𑀉𑀘𑁆𑀘𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀆𑀲𑀦𑀫𑀢𑁆𑀢𑀁 𑀞𑀧𑁂𑀢𑀩𑁆𑀩𑀦𑁆𑀢𑀺 𑀯𑀤𑀺𑀁𑀲𑀼. 𑀦𑀸𑀲𑀓𑁆𑀔𑀺𑀁𑀲𑀽𑀢𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀩𑀼𑀤𑁆𑀥𑀢𑁂𑀚𑀲𑀸 𑀅𑀪𑀺𑀪𑀽𑀢𑀸 𑀅𑀢𑁆𑀢𑀦𑁄 𑀓𑀢𑀺𑀓𑀸𑀬 𑀞𑀸𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀦𑀸𑀫𑁂𑀦 𑀘 𑀆𑀯𑀼𑀲𑁄𑀯𑀸𑀤𑁂𑀦 𑀘 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀕𑁄𑀢𑀫𑀸𑀢𑀺, 𑀆𑀯𑀼𑀲𑁄𑀢𑀺 𑀘 𑀯𑀤𑀦𑁆𑀢𑀺. 𑀆𑀯𑀼𑀲𑁄 𑀕𑁄𑀢𑀫, 𑀫𑀬𑀁 𑀉𑀭𑀼𑀯𑁂𑀮𑀸𑀬𑀁 𑀧𑀥𑀸𑀦𑀓𑀸𑀮𑁂 𑀢𑀼𑀬𑁆𑀳𑀁 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀺𑀫𑁆𑀳𑀸, 𑀫𑀼𑀔𑁄𑀤𑀓𑀁 𑀤𑀦𑁆𑀢𑀓𑀝𑁆𑀞𑀁 𑀅𑀤𑀫𑁆𑀳𑀸, 𑀯𑀼𑀢𑁆𑀣𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀺𑀫𑁆𑀳𑀸, 𑀧𑀘𑁆𑀙𑀸 𑀓𑁄 𑀢𑁂 𑀯𑀢𑁆𑀢𑀧𑁆𑀧𑀝𑀺𑀧𑀢𑁆𑀢𑀺𑀫𑀓𑀸𑀲𑀺, 𑀓𑀘𑁆𑀘𑀺 𑀅𑀫𑁆𑀳𑁂𑀲𑀼 𑀧𑀓𑁆𑀓𑀦𑁆𑀢𑁂𑀲𑀼 𑀦 𑀘𑀺𑀦𑁆𑀢𑀬𑀺𑀢𑁆𑀣𑀸𑀢𑀺 𑀏𑀯𑀭𑀽𑀧𑀺𑀁 𑀓𑀣𑀁 𑀓𑀣𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀭𑀺𑀬𑀸𑀬𑀸𑀢𑀺 𑀤𑀼𑀓𑁆𑀓𑀭𑀇𑀭𑀺𑀬𑀸𑀬. 𑀧𑀝𑀺𑀧𑀤𑀸𑀬𑀸𑀢𑀺 𑀤𑀼𑀓𑁆𑀓𑀭𑀧𑀝𑀺𑀧𑀢𑁆𑀢𑀺𑀬𑀸. 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬𑀸𑀢𑀺 𑀧𑀲𑀢𑀧𑀲𑀢-𑀫𑀼𑀕𑁆𑀕𑀬𑀽𑀲𑀸𑀤𑀺𑀆𑀳𑀭𑀓𑀭𑀡𑀸𑀤𑀺𑀦𑀸 𑀤𑀼𑀓𑁆𑀓𑀭𑀓𑀭𑀡𑁂𑀦. 𑀅𑀪𑀺𑀚𑀸𑀦𑀸𑀣 𑀫𑁂 𑀦𑁄𑀢𑀺 𑀅𑀪𑀺𑀚𑀸𑀦𑀸𑀣 𑀦𑀼 𑀫𑀫. 𑀏𑀯𑀭𑀽𑀧𑀁 𑀧𑀪𑀸𑀯𑀺𑀢𑀫𑁂𑀢𑀦𑁆𑀢𑀺 𑀏𑀢𑀁 𑀏𑀯𑀭𑀽𑀧𑀁 𑀯𑀸𑀓𑁆𑀬𑀪𑁂𑀤𑀦𑁆𑀢𑀺 𑀅𑀢𑁆𑀣𑁄. 𑀅𑀧𑀺 𑀦𑀼 𑀅𑀳𑀁 𑀉𑀭𑀼𑀯𑁂𑀮𑀸𑀬 𑀧𑀥𑀸𑀦𑁂 𑀢𑀼𑀫𑁆𑀳𑀸𑀓𑀁 𑀲𑀗𑁆𑀕𑀡𑁆𑀳𑀦𑀢𑁆𑀣𑀁 𑀅𑀦𑀼𑀓𑁆𑀓𑀡𑁆𑀞𑀦𑀢𑁆𑀣𑀁 𑀭𑀢𑁆𑀢𑀺𑀁 𑀯𑀸 𑀤𑀺𑀯𑀸 𑀯𑀸 𑀆𑀕𑀦𑁆𑀢𑁆𑀯𑀸, 𑁋 ‘‘𑀆𑀯𑀼𑀲𑁄, 𑀫𑀸 𑀯𑀺𑀢𑀓𑁆𑀓𑀬𑀺𑀢𑁆𑀣, 𑀫𑀬𑁆𑀳𑀁 𑀑𑀪𑀸𑀲𑁄 𑀯𑀸 𑀦𑀺𑀫𑀺𑀢𑁆𑀢𑀁 𑀯𑀸 𑀧𑀜𑁆𑀜𑀸𑀬𑀢𑀻’’𑀢𑀺 𑀏𑀯𑀭𑀽𑀧𑀁 𑀓𑀜𑁆𑀘𑀺 𑀯𑀘𑀦𑀪𑁂𑀤𑀁 𑀅𑀓𑀸𑀲𑀺𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂 𑀏𑀓𑀧𑀤𑁂𑀦𑁂𑀯 𑀲𑀢𑀺𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀕𑀸𑀭𑀯𑀸, ‘‘𑀳𑀦𑁆𑀤 𑀅𑀤𑁆𑀥𑀸 𑀏𑀲 𑀩𑀼𑀤𑁆𑀥𑁄 𑀚𑀸𑀢𑁄’’𑀢𑀺 𑀲𑀤𑁆𑀤𑀳𑀺𑀢𑁆𑀯𑀸 𑀦𑁄 𑀳𑁂𑀢𑀁, 𑀪𑀦𑁆𑀢𑁂𑀢𑀺 𑀆𑀳𑀁𑀲𑀼. 𑀅𑀲𑀓𑁆𑀔𑀺𑀁 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀲𑀜𑁆𑀜𑀸𑀧𑁂𑀢𑀼𑀦𑁆𑀢𑀺 𑀅𑀳𑀁, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀯𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀩𑀼𑀤𑁆𑀥𑁄 𑀅𑀳𑀦𑁆𑀢𑀺 𑀚𑀸𑀦𑀸𑀧𑁂𑀢𑀼𑀁 𑀅𑀲𑀓𑁆𑀔𑀺𑀁. 𑀢𑀤𑀸 𑀧𑀦 𑀪𑀕𑀯𑀸 𑀉𑀧𑁄𑀲𑀣𑀤𑀺𑀯𑀲𑁂𑀬𑁂𑀯 𑀆𑀕𑀘𑁆𑀙𑀺. 𑀅𑀢𑁆𑀢𑀦𑁄 𑀩𑀼𑀤𑁆𑀥𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀁 𑀓𑀸𑀬𑀲𑀓𑁆𑀔𑀺𑀁 𑀓𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀁 𑀓𑀣𑁂𑀲𑀺. 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀣𑁂𑀭𑁄 𑀅𑀝𑁆𑀞𑀸𑀭𑀲𑀳𑀺 𑀩𑁆𑀭𑀳𑁆𑀫𑀓𑁄𑀝𑀻𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀲𑀽𑀭𑀺𑀬𑁂 𑀥𑀭𑀫𑀸𑀦𑁂𑀬𑁂𑀯 𑀤𑁂𑀲𑀦𑀸 𑀦𑀺𑀝𑁆𑀞𑀸𑀲𑀺. 𑀪𑀕𑀯𑀸 𑀢𑀢𑁆𑀣𑁂𑀯 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺.

𑀤𑁆𑀯𑁂𑀧𑀺 𑀲𑀼𑀤𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀑𑀯𑀤𑀸𑀫𑀻𑀢𑀺𑀆𑀤𑀺 𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀧𑀺𑀡𑁆𑀟𑀧𑀸𑀢𑀢𑁆𑀣𑀸𑀬𑀧𑀺 𑀕𑀸𑀫𑀁 𑀅𑀧𑁆𑀧𑀯𑀺𑀲𑀦𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑁂𑀲𑀜𑁆𑀳𑀺 𑀪𑀺𑀓𑁆𑀔𑀽𑀦𑀁 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀉𑀧𑁆𑀧𑀦𑁆𑀦𑀫𑀮𑀯𑀺𑀲𑁄𑀥𑀦𑀢𑁆𑀣𑀁 𑀪𑀕𑀯𑀸 𑀅𑀦𑁆𑀢𑁄𑀯𑀺𑀳𑀸𑀭𑁂𑀬𑁂𑀯 𑀅𑀳𑁄𑀲𑀺. 𑀉𑀧𑁆𑀧𑀦𑁆𑀦𑁂 𑀉𑀧𑁆𑀧𑀦𑁆𑀦𑁂 𑀓𑀫𑁆𑀫𑀝𑁆𑀞𑀸𑀦𑀫𑀮𑁂 𑀢𑁂𑀧𑀺 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀺. 𑀪𑀕𑀯𑀸𑀧𑀺 𑀢𑁂𑀲𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀫𑀮𑀁 𑀯𑀺𑀦𑁄𑀤𑁂𑀢𑀺. 𑀅𑀣 𑀦𑁂𑀲𑀁 𑀪𑀕𑀯𑀢𑀸 𑀏𑀯𑀁 𑀦𑀻𑀳𑀝𑀪𑀢𑁆𑀢𑁂𑀦 𑀑𑀯𑀤𑀺𑀬𑀫𑀸𑀦𑀸𑀦𑀁 𑀯𑀧𑁆𑀧𑀢𑁆𑀣𑁂𑀭𑁄 𑀧𑀸𑀝𑀺𑀧𑀤𑀤𑀺𑀯𑀲𑁂 𑀲𑁄𑀢𑀸𑀧𑀦𑁆𑀦𑁄 𑀅𑀳𑁄𑀲𑀺. 𑀪𑀤𑁆𑀤𑀺𑀬𑀢𑁆𑀣𑁂𑀭𑁄 𑀤𑀼𑀢𑀺𑀬𑀸𑀬𑀁, 𑀫𑀳𑀸𑀦𑀸𑀫𑀢𑁆𑀣𑁂𑀭𑁄 𑀢𑀢𑀺𑀬𑀸𑀬𑀁, 𑀅𑀲𑁆𑀲𑀚𑀺𑀢𑁆𑀣𑁂𑀭𑁄 𑀘𑀢𑀼𑀢𑁆𑀣𑀺𑀬𑀁. 𑀧𑀓𑁆𑀔𑀲𑁆𑀲 𑀧𑀦 𑀧𑀜𑁆𑀘𑀫𑀺𑀬𑀁 𑀲𑀩𑁆𑀩𑁂𑀯 𑀢𑁂 𑀏𑀓𑀢𑁄 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀅𑀦𑀢𑁆𑀢𑀮𑀓𑁆𑀔𑀡𑀲𑀼𑀢𑁆𑀢𑀁 𑀓𑀣𑁂𑀲𑀺, 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀲𑀩𑁆𑀩𑁂𑀧𑀺 𑀅𑀭𑀳𑀢𑁆𑀢𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀢𑁂𑀦𑀸𑀳 𑁋 ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀯𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀫𑀬𑀸 𑀏𑀯𑀁 𑀑𑀯𑀤𑀺𑀬𑀫𑀸𑀦𑀸…𑀧𑁂… 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀦𑀺𑀩𑁆𑀩𑀸𑀦𑀁 𑀅𑀚𑁆𑀛𑀕𑀫𑀁𑀲𑀼…𑀧𑁂… 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’𑀢𑀺. 𑀏𑀢𑁆𑀢𑀓𑀁 𑀓𑀣𑀸𑀫𑀕𑁆𑀕𑀁 𑀪𑀕𑀯𑀸 𑀬𑀁 𑀧𑀼𑀩𑁆𑀩𑁂 𑀅𑀯𑀘 𑁋 ‘‘𑀢𑀼𑀫𑁆𑀳𑁂𑀧𑀺 𑀫𑀫𑀜𑁆𑀘𑁂𑀯 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀜𑁆𑀘 𑀫𑀕𑁆𑀕𑀁 𑀆𑀭𑀼𑀴𑁆𑀳𑀸, 𑀅𑀭𑀺𑀬𑀧𑀭𑀺𑀬𑁂𑀲𑀦𑀸 𑀢𑀼𑀫𑁆𑀳𑀸𑀓𑀁 𑀧𑀭𑀺𑀬𑁂𑀲𑀦𑀸’’𑀢𑀺 𑀇𑀫𑀁 𑀏𑀓𑀫𑁂𑀯 𑀅𑀦𑀼𑀲𑀦𑁆𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳𑀭𑀺.

𑁨𑁮𑁭. 𑀇𑀤𑀸𑀦𑀺 𑀬𑀲𑁆𑀫𑀸 𑀦 𑀅𑀕𑀸𑀭𑀺𑀬𑀸𑀦𑀁𑀬𑁂𑀯 𑀧𑀜𑁆𑀘𑀓𑀸𑀫𑀕𑀼𑀡𑀧𑀭𑀺𑀬𑁂𑀲𑀦𑀸 𑀳𑁄𑀢𑀺, 𑀅𑀦𑀕𑀸𑀭𑀺𑀬𑀸𑀦𑀫𑁆𑀧𑀺 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀸𑀦𑀁 𑀧𑀜𑁆𑀘𑀓𑀸𑀫𑀕𑀼𑀡𑀯𑀲𑁂𑀦 𑀅𑀦𑀭𑀺𑀬𑀧𑀭𑀺𑀬𑁂𑀲𑀦𑀸 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀢𑀼𑀁 𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀓𑀸𑀫𑀕𑀼𑀡𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀯𑀭𑀢𑁆𑀢𑁂𑀲𑀼 𑀧𑀢𑁆𑀢𑀘𑀻𑀯𑀭𑀸𑀤𑀻𑀲𑀼 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸𑀢𑀺𑀆𑀤𑀬𑁄 𑀘𑀢𑁆𑀢𑀸𑀭𑁄 𑀓𑀸𑀫𑀕𑀼𑀡𑀸 𑀮𑀩𑁆𑀪𑀦𑁆𑀢𑀺. 𑀭𑀲𑁄 𑀧𑀦𑁂𑀢𑁆𑀣 𑀧𑀭𑀺𑀪𑁄𑀕𑀭𑀲𑁄 𑀳𑁄𑀢𑀺. 𑀫𑀦𑀼𑀜𑁆𑀜𑁂 𑀧𑀺𑀡𑁆𑀟𑀧𑀸𑀢𑁂 𑀪𑁂𑀲𑀚𑁆𑀚𑁂 𑀘 𑀧𑀜𑁆𑀘𑀧𑀺 𑀮𑀩𑁆𑀪𑀦𑁆𑀢𑀺. 𑀲𑁂𑀦𑀸𑀲𑀦𑀫𑁆𑀳𑀺 𑀘𑀻𑀯𑀭𑁂 𑀯𑀺𑀬 𑀘𑀢𑁆𑀢𑀸𑀭𑁄. 𑀭𑀲𑁄 𑀧𑀦 𑀏𑀢𑁆𑀣𑀸𑀧𑀺 𑀧𑀭𑀺𑀪𑁄𑀕𑀭𑀲𑁄𑀯. 𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂𑀢𑀺 𑀓𑀲𑁆𑀫𑀸 𑀆𑀭𑀪𑀺? 𑀏𑀯𑀁 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑁂 𑀏𑀯𑀁 𑀯𑀤𑁂𑀬𑁆𑀬𑀼𑀁, ‘‘𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀦𑀭𑀺𑀬𑀧𑀭𑀺𑀬𑁂𑀲𑀦𑀸 𑀦𑀸𑀫 𑀓𑀼𑀢𑁄, 𑀅𑀭𑀺𑀬𑀧𑀭𑀺𑀬𑁂𑀲𑀦𑀸𑀯 𑀧𑀩𑁆𑀩𑀚𑀺𑀢𑀸𑀦’’𑀦𑁆𑀢𑀺, 𑀢𑁂𑀲𑀁 𑀧𑀝𑀺𑀲𑁂𑀥𑀦𑀢𑁆𑀣𑀸𑀬 ‘‘𑀧𑀩𑁆𑀩𑀚𑀺𑀢𑀸𑀦𑀫𑁆𑀧𑀺 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀡𑀧𑀭𑀺𑀪𑁄𑀕𑁄 𑀅𑀦𑀭𑀺𑀬𑀧𑀭𑀺𑀬𑁂𑀲𑀦𑀸 𑀏𑀯𑀸’’𑀢𑀺 𑀤𑀲𑁆𑀲𑁂𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀕𑀥𑀺𑀢𑀸𑀢𑀺 𑀢𑀡𑁆𑀳𑀸𑀕𑁂𑀥𑁂𑀦 𑀕𑀥𑀺𑀢𑀸. 𑀫𑀼𑀘𑁆𑀙𑀺𑀢𑀸𑀢𑀺 𑀢𑀡𑁆𑀳𑀸𑀫𑀼𑀘𑁆𑀙𑀸𑀬 𑀫𑀼𑀘𑁆𑀙𑀺𑀢𑀸. 𑀅𑀚𑁆𑀛𑁄𑀧𑀦𑁆𑀦𑀸𑀢𑀺 𑀢𑀡𑁆𑀳𑀸𑀬 𑀅𑀚𑁆𑀛𑁄𑀕𑀸𑀴𑁆𑀳𑀸. 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄𑀢𑀺 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑀸. 𑀅𑀦𑀺𑀲𑁆𑀲𑀭𑀡𑀧𑀜𑁆𑀜𑀸𑀢𑀺 𑀦𑀺𑀲𑁆𑀲𑀭𑀡𑀁 𑀯𑀼𑀘𑁆𑀘𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. 𑀢𑁂 𑀢𑁂𑀦 𑀯𑀺𑀭𑀳𑀺𑀢𑀸.

𑀇𑀤𑀸𑀦𑀺 𑀢𑀲𑁆𑀲𑀢𑁆𑀣𑀲𑁆𑀲 𑀲𑀸𑀥𑀓𑀁 𑀉𑀧𑀫𑀁 𑀤𑀲𑁆𑀲𑁂𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑁂𑀯𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀆𑀭𑀜𑁆𑀜𑀓𑀫𑀕𑁄 𑀯𑀺𑀬 𑀳𑀺 𑀲𑀫𑀡𑀩𑁆𑀭𑀸𑀳𑁆𑀫𑀡𑀸, 𑀮𑀼𑀤𑁆𑀤𑀓𑁂𑀦 𑀅𑀭𑀜𑁆𑀜𑁂 𑀞𑀧𑀺𑀢𑀧𑀸𑀲𑁄 𑀯𑀺𑀬 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸, 𑀢𑀲𑁆𑀲 𑀮𑀼𑀤𑁆𑀤𑀲𑁆𑀲 𑀧𑀸𑀲𑀭𑀸𑀲𑀺𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀲𑀬𑀦𑀓𑀸𑀮𑁄 𑀯𑀺𑀬 𑀢𑁂𑀲𑀁 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑁄𑀕𑀓𑀸𑀮𑁄. 𑀮𑀼𑀤𑁆𑀤𑀓𑁂 𑀆𑀕𑀘𑁆𑀙𑀦𑁆𑀢𑁂 𑀫𑀕𑀲𑁆𑀲 𑀬𑁂𑀦 𑀓𑀸𑀫𑀁 𑀅𑀕𑀫𑀦𑀓𑀸𑀮𑁄 𑀯𑀺𑀬 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀸𑀭𑀲𑁆𑀲 𑀬𑀣𑀸𑀓𑀸𑀫𑀓𑀭𑀡𑀻𑀬𑀓𑀸𑀮𑁄, 𑀫𑀸𑀭𑀯𑀲𑀁 𑀉𑀧𑀕𑀢𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀫𑀕𑀲𑁆𑀲 𑀧𑀦 𑀅𑀩𑀤𑁆𑀥𑀲𑁆𑀲 𑀧𑀸𑀲𑀭𑀸𑀲𑀺𑀁 𑀅𑀥𑀺𑀲𑀬𑀺𑀢𑀓𑀸𑀮𑁄 𑀯𑀺𑀬 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀧𑀘𑁆𑀘𑀯𑁂𑀓𑁆𑀔𑀡𑀧𑀭𑀺𑀪𑁄𑀕𑁄, 𑀮𑀼𑀤𑁆𑀤𑀓𑁂 𑀆𑀕𑀘𑁆𑀙𑀦𑁆𑀢𑁂 𑀫𑀕𑀲𑁆𑀲 𑀬𑁂𑀦 𑀓𑀸𑀫𑀁 𑀕𑀫𑀦𑀁 𑀯𑀺𑀬 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀸𑀭𑀯𑀲𑀁 𑀅𑀦𑀼𑀧𑀕𑀫𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀲𑁆𑀲𑀢𑁆𑀣𑁄𑀢𑀺 𑀦𑀺𑀩𑁆𑀪𑀬𑁄 𑀦𑀺𑀭𑀸𑀲𑀗𑁆𑀓𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀧𑀸𑀲𑀭𑀸𑀲𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀭𑀺𑀬𑀧𑀭𑀺𑀬𑁂𑀲𑀦𑀸𑀢𑀺𑀧𑀺 𑀏𑀢𑀲𑁆𑀲𑁂𑀯 𑀦𑀸𑀫𑀁.

𑁭. 𑀘𑀽𑀴𑀳𑀢𑁆𑀣𑀺𑀧𑀤𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮𑁮. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀘𑀽𑀴𑀳𑀢𑁆𑀣𑀺𑀧𑀤𑁄𑀧𑀫𑀲𑀼𑀢𑁆𑀢𑀁. 𑀢𑀢𑁆𑀣 𑀲𑀩𑁆𑀩𑀲𑁂𑀢𑁂𑀦 𑀯𑀴𑀯𑀸𑀪𑀺𑀭𑀣𑁂𑀦𑀸𑀢𑀺, ‘‘𑀲𑁂𑀢𑀸 𑀲𑀼𑀤𑀁 𑀅𑀲𑁆𑀲𑀸 𑀬𑀼𑀢𑁆𑀢𑀸 𑀳𑁄𑀦𑁆𑀢𑀺 𑀲𑁂𑀢𑀸𑀮𑀗𑁆𑀓𑀸𑀭𑀸. 𑀲𑁂𑀢𑁄 𑀭𑀣𑁄 𑀲𑁂𑀢𑀸𑀮𑀗𑁆𑀓𑀸𑀭𑁄 𑀲𑁂𑀢𑀧𑀭𑀺𑀯𑀸𑀭𑁄, 𑀲𑁂𑀢𑀸 𑀭𑀲𑁆𑀫𑀺𑀬𑁄, 𑀲𑁂𑀢𑀸 𑀧𑀢𑁄𑀤𑀮𑀝𑁆𑀞𑀺, 𑀲𑁂𑀢𑀁 𑀙𑀢𑁆𑀢𑀁, 𑀲𑁂𑀢𑀁 𑀉𑀡𑁆𑀳𑀻𑀲𑀁, 𑀲𑁂𑀢𑀸𑀦𑀺 𑀯𑀢𑁆𑀣𑀸𑀦𑀺, 𑀲𑁂𑀢𑀸 𑀉𑀧𑀸𑀳𑀦𑀸, 𑀲𑁂𑀢𑀸𑀬 𑀲𑀼𑀤𑀁 𑀯𑀸𑀮𑀩𑀻𑀚𑀦𑀺𑀬𑀸 𑀩𑀻𑀚𑀺𑀬𑀢𑀻’’𑀢𑀺 (𑀲𑀁. 𑀦𑀺. 𑁫.𑁪) 𑀏𑀯𑀁 𑀯𑀼𑀢𑁆𑀢𑁂𑀦 𑀲𑀓𑀮𑀲𑁂𑀢𑁂𑀦 𑀘𑀢𑀽𑀳𑀺 𑀯𑀴𑀯𑀸𑀳𑀺 𑀬𑀼𑀢𑁆𑀢𑀭𑀣𑁂𑀦.

𑀭𑀣𑁄 𑀘 𑀦𑀸𑀫𑁂𑀲𑁄 𑀤𑀼𑀯𑀺𑀥𑁄 𑀳𑁄𑀢𑀺 𑁋 𑀬𑁄𑀥𑀭𑀣𑁄, 𑀅𑀮𑀗𑁆𑀓𑀸𑀭𑀭𑀣𑁄𑀢𑀺. 𑀢𑀢𑁆𑀣 𑀬𑁄𑀥𑀭𑀣𑁄 𑀘𑀢𑀼𑀭𑀲𑁆𑀲𑀲𑀡𑁆𑀞𑀸𑀦𑁄 𑀳𑁄𑀢𑀺 𑀦𑀸𑀢𑀺𑀫𑀳𑀸, 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀯𑀸 𑀚𑀦𑀸𑀦𑀁 𑀕𑀳𑀡𑀲𑀫𑀢𑁆𑀣𑁄. 𑀅𑀮𑀗𑁆𑀓𑀸𑀭𑀭𑀣𑁄 𑀫𑀳𑀸 𑀳𑁄𑀢𑀺, 𑀤𑀻𑀖𑀢𑁄 𑀤𑀻𑀖𑁄, 𑀧𑀼𑀣𑀼𑀮𑀢𑁄 𑀧𑀼𑀣𑀼𑀮𑁄. 𑀢𑀢𑁆𑀣 𑀙𑀢𑁆𑀢𑀕𑁆𑀕𑀸𑀳𑀓𑁄 𑀯𑀸𑀮𑀩𑀻𑀚𑀦𑀺𑀕𑁆𑀕𑀸𑀳𑀓𑁄 𑀢𑀸𑀮𑀯𑀡𑁆𑀝𑀕𑁆𑀕𑀸𑀳𑀓𑁄𑀢𑀺 𑀏𑀯𑀁 𑀅𑀝𑁆𑀞 𑀯𑀸 𑀤𑀲 𑀯𑀸 𑀲𑀼𑀔𑁂𑀦 𑀞𑀸𑀢𑀼𑀁 𑀯𑀸 𑀦𑀺𑀲𑀻𑀤𑀺𑀢𑀼𑀁 𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀯𑀸 𑀲𑀓𑁆𑀓𑁄𑀦𑁆𑀢𑀺, 𑀅𑀬𑀫𑁆𑀧𑀺 𑀅𑀮𑀗𑁆𑀓𑀸𑀭𑀭𑀣𑁄𑀬𑁂𑀯. 𑀲𑁄 𑀲𑀩𑁆𑀩𑁄 𑀲𑀘𑀓𑁆𑀓𑀧𑀜𑁆𑀚𑀭𑀓𑀼𑀩𑁆𑀩𑀭𑁄 𑀭𑀚𑀢𑀧𑀭𑀺𑀓𑁆𑀔𑀺𑀢𑁆𑀢𑁄 𑀅𑀳𑁄𑀲𑀺. 𑀯𑀴𑀯𑀸 𑀧𑀓𑀢𑀺𑀬𑀸 𑀲𑁂𑀢𑀯𑀡𑁆𑀡𑀸𑀯. 𑀧𑀲𑀸𑀥𑀦𑀫𑁆𑀧𑀺 𑀢𑀸𑀤𑀺𑀲𑀁 𑀭𑀚𑀢𑀫𑀬𑀁 𑀅𑀳𑁄𑀲𑀺. 𑀭𑀲𑁆𑀫𑀺𑀬𑁄𑀧𑀺 𑀭𑀚𑀢𑀧𑀦𑀸𑀴𑀺 𑀲𑀼𑀧𑀭𑀺𑀓𑁆𑀔𑀺𑀢𑁆𑀢𑀸. 𑀧𑀢𑁄𑀤𑀮𑀝𑁆𑀞𑀺𑀧𑀺 𑀭𑀚𑀢𑀧𑀭𑀺𑀓𑁆𑀔𑀺𑀢𑁆𑀢𑀸. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀲𑁂𑀢𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀲𑁂𑀢𑀁𑀬𑁂𑀯 𑀉𑀢𑁆𑀢𑀭𑀸𑀲𑀗𑁆𑀕𑀫𑀓𑀸𑀲𑀺, 𑀲𑁂𑀢𑀯𑀺𑀮𑁂𑀧𑀦𑀁 𑀯𑀺𑀮𑀺𑀫𑁆𑀧𑀺, 𑀲𑁂𑀢𑀫𑀸𑀮𑀁 𑀧𑀺𑀮𑀦𑁆𑀥𑀺, 𑀤𑀲𑀲𑀼 𑀅𑀗𑁆𑀕𑀼𑀮𑀻𑀲𑀼 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀸, 𑀓𑀡𑁆𑀡𑁂𑀲𑀼 𑀓𑀼𑀡𑁆𑀟𑀮𑀸𑀦𑀻𑀢𑀺 𑀏𑀯𑀫𑀸𑀤𑀺𑀅𑀮𑀗𑁆𑀓𑀸𑀭𑁄𑀧𑀺𑀲𑁆𑀲 𑀭𑀚𑀢𑀫𑀬𑁄𑀯 𑀅𑀳𑁄𑀲𑀺. 𑀧𑀭𑀺𑀯𑀸𑀭𑀩𑁆𑀭𑀸𑀳𑁆𑀫𑀡𑀸𑀧𑀺𑀲𑁆𑀲 𑀤𑀲𑀲𑀳𑀲𑁆𑀲𑀫𑀢𑁆𑀢𑀸 𑀢𑀣𑁂𑀯 𑀲𑁂𑀢𑀯𑀢𑁆𑀣𑀯𑀺𑀮𑁂𑀧𑀦𑀫𑀸𑀮𑀸𑀮𑀗𑁆𑀓𑀸𑀭𑀸 𑀅𑀳𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀲𑁂𑀢𑁂𑀦 𑀯𑀴𑀯𑀸𑀪𑀺𑀭𑀣𑁂𑀦𑀸’’𑀢𑀺.

𑀲𑀸𑀯𑀢𑁆𑀣𑀺𑀬𑀸 𑀦𑀺𑀬𑁆𑀬𑀸𑀢𑀻𑀢𑀺 𑀲𑁄 𑀓𑀺𑀭 𑀙𑀦𑁆𑀦𑀁 𑀙𑀦𑁆𑀦𑀁 𑀫𑀸𑀲𑀸𑀦𑀁 𑀏𑀓𑀯𑀸𑀭𑀁 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀢𑀺. 𑀇𑀢𑁄 𑀏𑀢𑁆𑀢𑀓𑁂𑀳𑀺 𑀤𑀺𑀯𑀲𑁂𑀳𑀺 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑀺𑀲𑁆𑀲𑀢𑀻𑀢𑀺 𑀧𑀼𑀭𑁂𑀢𑀭𑀫𑁂𑀯 𑀖𑁄𑀲𑀦𑀸 𑀓𑀭𑀻𑀬𑀢𑀺; 𑀢𑀁 𑀲𑀼𑀢𑁆𑀯𑀸 𑀬𑁂 𑀦𑀕𑀭𑀢𑁄 𑀦 𑀧𑀓𑁆𑀓𑀦𑁆𑀢𑀸, 𑀢𑁂 𑀦 𑀧𑀓𑁆𑀓𑀫𑀦𑁆𑀢𑀺. 𑀬𑁂 𑀧𑀓𑁆𑀓𑀦𑁆𑀢𑀸, 𑀢𑁂𑀧𑀺, ‘‘𑀧𑀼𑀜𑁆𑀜𑀯𑀢𑁄 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀆𑀕𑀘𑁆𑀙𑀦𑁆𑀢𑀺. 𑀬𑀁 𑀤𑀺𑀯𑀲𑀁 𑀩𑁆𑀭𑀸𑀳𑁆𑀫𑀡𑁄 𑀦𑀕𑀭𑀁 𑀅𑀦𑀼𑀯𑀺𑀘𑀭𑀢𑀺, 𑀢𑀤𑀸 𑀧𑀸𑀢𑁄𑀯 𑀦𑀕𑀭𑀯𑀻𑀣𑀺𑀬𑁄 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀯𑀸𑀮𑀺𑀓𑀁 𑀑𑀓𑀺𑀭𑀺𑀢𑁆𑀯𑀸 𑀮𑀸𑀚𑀧𑀜𑁆𑀘𑀫𑁂𑀳𑀺 𑀧𑀼𑀧𑁆𑀨𑁂𑀳𑀺 𑀅𑀪𑀺𑀧𑁆𑀧𑀓𑀺𑀭𑀺𑀢𑁆𑀯𑀸 𑀧𑀼𑀡𑁆𑀡𑀖𑀝𑁂 𑀞𑀧𑁂𑀢𑁆𑀯𑀸 𑀓𑀤𑀮𑀺𑀬𑁄 𑀘 𑀥𑀚𑁂 𑀘 𑀉𑀲𑁆𑀲𑀸𑀧𑁂𑀢𑁆𑀯𑀸 𑀲𑀓𑀮𑀦𑀕𑀭𑀁 𑀥𑀽𑀧𑀺𑀢𑀯𑀸𑀲𑀺𑀢𑀁 𑀓𑀭𑁄𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀧𑀸𑀢𑁄𑀯 𑀲𑀻𑀲𑀁 𑀦𑁆𑀳𑀸𑀬𑀺𑀢𑁆𑀯𑀸 𑀧𑀼𑀭𑁂𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑁂𑀢𑀯𑀢𑁆𑀣𑀸𑀤𑀻𑀳𑀺 𑀅𑀢𑁆𑀢𑀸𑀦𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀭𑀣𑀁 𑀅𑀪𑀺𑀭𑀼𑀳𑀢𑀺. 𑀅𑀣 𑀦𑀁 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀲𑀩𑁆𑀩𑀲𑁂𑀢𑀯𑀢𑁆𑀣𑀯𑀺𑀮𑁂𑀧𑀦𑀫𑀸𑀮𑀸𑀮𑀗𑁆𑀓𑀸𑀭𑀸 𑀲𑁂𑀢𑀘𑁆𑀙𑀢𑁆𑀢𑀸𑀦𑀺 𑀕𑀳𑁂𑀢𑁆𑀯𑀸 𑀧𑀭𑀺𑀯𑀸𑀭𑁂𑀦𑁆𑀢𑀺; 𑀢𑀢𑁄 𑀫𑀳𑀸𑀚𑀦𑀲𑁆𑀲 𑀲𑀦𑁆𑀦𑀺𑀧𑀸𑀢𑀦𑀢𑁆𑀣𑀁 𑀧𑀞𑀫𑀁𑀬𑁂𑀯 𑀢𑀭𑀼𑀡𑀤𑀸𑀭𑀓𑀸𑀦𑀁 𑀨𑀮𑀸𑀨𑀮𑀸𑀦𑀺 𑀯𑀺𑀓𑀺𑀭𑀺𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀫𑀸𑀲𑀓𑀭𑀽𑀧𑀸𑀦𑀺; 𑀢𑀤𑀦𑀦𑁆𑀢𑀭𑀁 𑀓𑀳𑀸𑀧𑀡𑁂 𑀯𑀺𑀓𑀺𑀭𑀦𑁆𑀢𑀺; 𑀫𑀳𑀸𑀚𑀦𑀸 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀉𑀓𑁆𑀓𑀼𑀝𑁆𑀞𑀺𑀬𑁄 𑀘𑁂𑀯 𑀘𑁂𑀮𑀼𑀓𑁆𑀔𑁂𑀧𑀸 𑀘 𑀧𑀯𑀢𑁆𑀢𑀦𑁆𑀢𑀺. 𑀅𑀣 𑀩𑁆𑀭𑀸𑀳𑁆𑀫𑀡𑁄 𑀫𑀗𑁆𑀕𑀮𑀺𑀓𑀲𑁄𑀯𑀢𑁆𑀣𑀺𑀓𑀸𑀤𑀻𑀲𑀼 𑀫𑀗𑁆𑀕𑀮𑀸𑀦𑀺 𑀘𑁂𑀯 𑀲𑀼𑀯𑀢𑁆𑀣𑀺𑀬𑁄 𑀘 𑀓𑀭𑁄𑀦𑁆𑀢𑁂𑀲𑀼 𑀫𑀳𑀸𑀲𑀫𑁆𑀧𑀢𑁆𑀢𑀺𑀬𑀸 𑀦𑀕𑀭𑀁 𑀅𑀦𑀼𑀯𑀺𑀘𑀭𑀢𑀺. 𑀧𑀼𑀜𑁆𑀜𑀯𑀦𑁆𑀢𑀸 𑀫𑀦𑀼𑀲𑁆𑀲𑀸 𑀏𑀓𑀪𑀽𑀫𑀓𑀸𑀤𑀺𑀧𑀸𑀲𑀸𑀤𑁂 𑀆𑀭𑀼𑀬𑁆𑀳 𑀲𑀼𑀓𑀧𑀢𑁆𑀢𑀲𑀤𑀺𑀲𑀸𑀦𑀺 𑀯𑀸𑀢𑀧𑀸𑀦𑀓𑀯𑀸𑀝𑀸𑀦𑀺 𑀯𑀺𑀯𑀭𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀅𑀢𑁆𑀢𑀦𑁄 𑀬𑀲𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀬𑀸 𑀦𑀕𑀭𑀁 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁄 𑀯𑀺𑀬 𑀤𑀓𑁆𑀔𑀺𑀡𑀤𑁆𑀯𑀸𑀭𑀸𑀪𑀺𑀫𑀼𑀔𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀸𑀯𑀢𑁆𑀣𑀺𑀬𑀸 𑀦𑀺𑀬𑁆𑀬𑀸𑀢𑀻’’𑀢𑀺.

𑀤𑀺𑀯𑀸 𑀤𑀺𑀯𑀲𑁆𑀲𑀸𑀢𑀺 𑀤𑀺𑀯𑀲𑀲𑁆𑀲 𑀤𑀺𑀯𑀸, 𑀫𑀚𑁆𑀛𑀦𑁆𑀳𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀧𑀺𑀮𑁄𑀢𑀺𑀓𑀁 𑀧𑀭𑀺𑀩𑁆𑀩𑀸𑀚𑀓𑀦𑁆𑀢𑀺 𑀧𑀺𑀮𑁄𑀢𑀺𑀓𑀸𑀢𑀺 𑀏𑀯𑀁 𑀇𑀢𑁆𑀣𑀺𑀮𑀺𑀗𑁆𑀕𑀯𑁄𑀳𑀸𑀭𑀯𑀲𑁂𑀦 𑀮𑀤𑁆𑀥𑀦𑀸𑀫𑀁 𑀧𑀭𑀺𑀩𑁆𑀩𑀸𑀚𑀓𑀁. 𑀲𑁄 𑀓𑀺𑀭 𑀧𑀭𑀺𑀩𑁆𑀩𑀸𑀚𑀓𑁄 𑀤𑀳𑀭𑁄 𑀧𑀞𑀫𑀯𑀬𑁂 𑀞𑀺𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀩𑀼𑀤𑁆𑀥𑀼𑀧𑀝𑁆𑀞𑀸𑀓𑁄, 𑀧𑀸𑀢𑁄𑀯 𑀢𑀣𑀸𑀕𑀢𑀲𑁆𑀲 𑀘𑁂𑀯 𑀫𑀳𑀸𑀣𑁂𑀭𑀸𑀦𑀜𑁆𑀘 𑀉𑀧𑀝𑁆𑀞𑀸𑀦𑀁 𑀓𑀢𑁆𑀯𑀸 𑀢𑀺𑀤𑀡𑁆𑀟𑀓𑀼𑀡𑁆𑀟𑀺𑀓𑀸𑀤𑀺𑀧𑀭𑀺𑀓𑁆𑀔𑀸𑀭𑀁 𑀆𑀤𑀸𑀬 𑀚𑁂𑀢𑀯𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀦𑀕𑀭𑀸𑀪𑀺𑀫𑀼𑀔𑁄 𑀧𑀸𑀬𑀸𑀲𑀺. 𑀢𑀁 𑀏𑀲 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀅𑀤𑁆𑀤𑀲. 𑀏𑀢𑀤𑀯𑁄𑀘𑀸𑀢𑀺 𑀅𑀦𑀼𑀓𑁆𑀓𑀫𑁂𑀦 𑀲𑀦𑁆𑀢𑀺𑀓𑀁 𑀆𑀕𑀢𑀁 𑀲𑀜𑁆𑀚𑀸𑀦𑀺𑀢𑁆𑀯𑀸 𑀏𑀢𑀁, ‘‘𑀳𑀦𑁆𑀤 𑀓𑀼𑀢𑁄 𑀦𑀼 𑀪𑀯𑀁 𑀯𑀘𑁆𑀙𑀸𑀬𑀦𑁄 𑀆𑀕𑀘𑁆𑀙𑀢𑀻’’𑀢𑀺 𑀕𑁄𑀢𑁆𑀢𑀁 𑀓𑀺𑀢𑁆𑀢𑁂𑀦𑁆𑀢𑁄 𑀯𑀘𑀦𑀁 𑀅𑀯𑁄𑀘. 𑀧𑀡𑁆𑀟𑀺𑀢𑁄 𑀫𑀜𑁆𑀜𑁂𑀢𑀺 𑀪𑀯𑀁 𑀯𑀘𑁆𑀙𑀸𑀬𑀦𑁄 𑀲𑀫𑀡𑀁 𑀕𑁄𑀢𑀫𑀁 𑀧𑀡𑁆𑀟𑀺𑀢𑁄𑀢𑀺 𑀫𑀜𑁆𑀜𑀢𑀺, 𑀉𑀤𑀸𑀳𑀼 𑀦𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀓𑁄 𑀘𑀸𑀳𑀁, 𑀪𑁄𑀢𑀺, 𑀪𑁄, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀁 𑀚𑀸𑀦𑀦𑁂 𑀅𑀳𑀁 𑀓𑁄 𑀦𑀸𑀫? 𑀓𑁄 𑀘 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀁 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀓𑀼𑀢𑁄 𑀘𑀸𑀳𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀁 𑀚𑀸𑀦𑀺𑀲𑁆𑀲𑀸𑀫𑀺, 𑀓𑁂𑀦 𑀓𑀸𑀭𑀡𑁂𑀦 𑀚𑀸𑀦𑀺𑀲𑁆𑀲𑀸𑀫𑀻𑀢𑀺? 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀅𑀢𑁆𑀢𑀦𑁄 𑀅𑀚𑀸𑀦𑀦𑀪𑀸𑀯𑀁 𑀤𑀻𑀧𑁂𑀢𑀺. 𑀲𑁄𑀧𑀺 𑀦𑀽𑀦𑀲𑁆𑀲 𑀢𑀸𑀤𑀺𑀲𑁄𑀯𑀸𑀢𑀺 𑀬𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀁 𑀚𑀸𑀦𑁂𑀬𑁆𑀬, 𑀲𑁄𑀧𑀺 𑀦𑀽𑀦 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀢𑀸𑀤𑀺𑀲𑁄 𑀩𑀼𑀤𑁆𑀥𑁄𑀬𑁂𑀯 𑀪𑀯𑁂𑀬𑁆𑀬. 𑀲𑀺𑀦𑁂𑀭𑀼𑀁 𑀯𑀸 𑀳𑀺𑀫𑀯𑀦𑁆𑀢𑀁 𑀯𑀸 𑀧𑀣𑀯𑀺𑀁 𑀯𑀸 𑀆𑀓𑀸𑀲𑀁 𑀯𑀸 𑀧𑀫𑁂𑀢𑀼𑀓𑀸𑀫𑁂𑀦 𑀢𑀧𑁆𑀧𑀫𑀸𑀡𑁄𑀯 𑀤𑀡𑁆𑀟𑁄 𑀯𑀸 𑀭𑀚𑁆𑀚𑀼 𑀯𑀸 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺. 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀜𑁆𑀜𑀁 𑀚𑀸𑀦𑀦𑁆𑀢𑁂𑀦𑀧𑀺 𑀢𑀲𑁆𑀲 𑀜𑀸𑀡𑀲𑀤𑀺𑀲𑀫𑁂𑀯 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻𑀢𑀺 𑀤𑀻𑀧𑁂𑀢𑀺. 𑀆𑀤𑀭𑀯𑀲𑁂𑀦 𑀧𑀦𑁂𑀢𑁆𑀣 𑀆𑀫𑁂𑀟𑀺𑀢𑀁 𑀓𑀢𑀁. 𑀉𑀴𑀸𑀭𑀸𑀬𑀸𑀢𑀺 𑀉𑀢𑁆𑀢𑀭𑀸𑀬 𑀲𑁂𑀝𑁆𑀞𑀸𑀬. 𑀓𑁄 𑀘𑀸𑀳𑀁, 𑀪𑁄𑀢𑀺, 𑀪𑁄, 𑀅𑀳𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀲𑀁𑀲𑀦𑁂 𑀓𑁄 𑀦𑀸𑀫? 𑀓𑁄 𑀘 𑀲𑀫𑀡𑀁 𑀕𑁄𑀢𑀫𑀁 𑀧𑀲𑀁𑀲𑀺𑀲𑁆𑀲𑀸𑀫𑀻𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀧𑀲𑀁𑀲𑀺𑀲𑁆𑀲𑀸𑀫𑀺? 𑀧𑀲𑀢𑁆𑀣𑀧𑀲𑀢𑁆𑀣𑁄𑀢𑀺 𑀲𑀩𑁆𑀩𑀕𑀼𑀡𑀸𑀦𑀁 𑀉𑀢𑁆𑀢𑀭𑀺𑀢𑀭𑁂𑀳𑀺 𑀲𑀩𑁆𑀩𑀮𑁄𑀓𑀧𑀲𑀢𑁆𑀣𑁂𑀳𑀺 𑀅𑀢𑁆𑀢𑀦𑁄 𑀕𑀼𑀡𑁂𑀳𑁂𑀯 𑀧𑀲𑀢𑁆𑀣𑁄, 𑀦 𑀢𑀲𑁆𑀲 𑀅𑀜𑁆𑀜𑁂𑀳𑀺 𑀧𑀲𑀁𑀲𑀦𑀓𑀺𑀘𑁆𑀘𑀁 𑀅𑀢𑁆𑀣𑀺. 𑀬𑀣𑀸 𑀳𑀺 𑀘𑀫𑁆𑀧𑀓𑀧𑀼𑀧𑁆𑀨𑀁 𑀯𑀸 𑀦𑀻𑀮𑀼𑀧𑁆𑀧𑀮𑀁 𑀯𑀸 𑀧𑀤𑀼𑀫𑀁 𑀯𑀸 𑀮𑁄𑀳𑀺𑀢𑀘𑀦𑁆𑀤𑀦𑀁 𑀯𑀸 𑀅𑀢𑁆𑀢𑀦𑁄 𑀯𑀡𑁆𑀡𑀕𑀦𑁆𑀥𑀲𑀺𑀭𑀺𑀬𑀸𑀯 𑀧𑀸𑀲𑀸𑀤𑀺𑀓𑀜𑁆𑀘𑁂𑀯 𑀲𑀼𑀕𑀦𑁆𑀥𑀜𑁆𑀘, 𑀦 𑀢𑀲𑁆𑀲 𑀆𑀕𑀦𑁆𑀢𑀼𑀓𑁂𑀳𑀺 𑀯𑀡𑁆𑀡𑀕𑀦𑁆𑀥𑁂𑀳𑀺 𑀣𑁄𑀫𑀦𑀓𑀺𑀘𑁆𑀘𑀁 𑀅𑀢𑁆𑀣𑀺. 𑀬𑀣𑀸 𑀘 𑀫𑀡𑀺𑀭𑀢𑀦𑀁 𑀯𑀸 𑀘𑀦𑁆𑀤𑀫𑀡𑁆𑀟𑀮𑀁 𑀯𑀸 𑀅𑀢𑁆𑀢𑀦𑁄 𑀆𑀮𑁄𑀓𑁂𑀦𑁂𑀯 𑀑𑀪𑀸𑀲𑀢𑀺, 𑀦 𑀢𑀲𑁆𑀲 𑀅𑀜𑁆𑀜𑁂𑀦 𑀑𑀪𑀸𑀲𑀦𑀓𑀺𑀘𑁆𑀘𑀁 𑀅𑀢𑁆𑀣𑀺. 𑀏𑀯𑀁 𑀲𑀫𑀡𑁄 𑀕𑁄𑀢𑀫𑁄 𑀲𑀩𑁆𑀩𑀮𑁄𑀓𑀧𑀲𑀢𑁆𑀣𑁂𑀳𑀺 𑀅𑀢𑁆𑀢𑀦𑁄 𑀕𑀼𑀡𑁂𑀳𑁂𑀯 𑀧𑀲𑀢𑁆𑀣𑁄 𑀣𑁄𑀫𑀺𑀢𑁄 𑀲𑀩𑁆𑀩𑀮𑁄𑀓𑀲𑁆𑀲 𑀲𑁂𑀝𑁆𑀞𑀢𑀁 𑀧𑀸𑀧𑀺𑀢𑁄, 𑀦 𑀢𑀲𑁆𑀲 𑀅𑀜𑁆𑀜𑁂𑀦 𑀧𑀲𑀁𑀲𑀦𑀓𑀺𑀘𑁆𑀘𑀁 𑀅𑀢𑁆𑀣𑀺. 𑀧𑀲𑀢𑁆𑀣𑁂𑀳𑀺 𑀯𑀸 𑀧𑀲𑀢𑁆𑀣𑁄𑀢𑀺𑀧𑀺 𑀧𑀲𑀢𑁆𑀣𑀧𑀲𑀢𑁆𑀣𑁄.

𑀓𑁂 𑀧𑀲𑀢𑁆𑀣𑀸 𑀦𑀸𑀫? 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑀓𑀸𑀲𑀺𑀓𑁄𑀲𑀮𑀯𑀸𑀲𑀺𑀓𑁂𑀳𑀺 𑀧𑀲𑀢𑁆𑀣𑁄, 𑀩𑀺𑀫𑁆𑀩𑀺𑀲𑀸𑀭𑁄 𑀅𑀗𑁆𑀕𑀫𑀕𑀥𑀯𑀸𑀲𑀻𑀳𑀺. 𑀯𑁂𑀲𑀸𑀮𑀺𑀓𑀸 𑀮𑀺𑀘𑁆𑀙𑀯𑀻 𑀯𑀚𑁆𑀚𑀺𑀭𑀝𑁆𑀞𑀯𑀸𑀲𑀻𑀳𑀺 𑀧𑀲𑀢𑁆𑀣𑀸. 𑀧𑀸𑀯𑁂𑀬𑁆𑀬𑀓𑀸 𑀫𑀮𑁆𑀮𑀸, 𑀓𑁄𑀲𑀺𑀦𑀸𑀭𑀓𑀸 𑀫𑀮𑁆𑀮𑀸, 𑀅𑀜𑁆𑀜𑁂𑀧𑀺 𑀢𑁂 𑀢𑁂 𑀔𑀢𑁆𑀢𑀺𑀬𑀸 𑀢𑁂𑀳𑀺 𑀢𑁂𑀳𑀺 𑀚𑀸𑀦𑀧𑀤𑁂𑀳𑀺 𑀧𑀲𑀢𑁆𑀣𑀸. 𑀘𑀗𑁆𑀓𑀻𑀆𑀤𑀬𑁄 𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀸𑀳𑁆𑀫𑀡𑀕𑀡𑁂𑀳𑀺, 𑀅𑀦𑀸𑀣𑀧𑀺𑀡𑁆𑀟𑀺𑀓𑀸𑀤𑀬𑁄 𑀉𑀧𑀸𑀲𑀓𑀸 𑀅𑀦𑁂𑀓𑀲𑀢𑁂𑀳𑀺 𑀉𑀧𑀸𑀲𑀓𑀕𑀡𑁂𑀳𑀺, 𑀯𑀺𑀲𑀸𑀔𑀸𑀤𑀬𑁄 𑀉𑀧𑀸𑀲𑀺𑀓𑀸 𑀅𑀦𑁂𑀓𑀲𑀢𑀸𑀳𑀺 𑀉𑀧𑀸𑀲𑀺𑀓𑀸𑀳𑀺, 𑀲𑀓𑀼𑀮𑀼𑀤𑀸𑀬𑀺𑀆𑀤𑀬𑁄 𑀧𑀭𑀺𑀩𑁆𑀩𑀸𑀚𑀓𑀸 𑀅𑀦𑁂𑀓𑁂𑀳𑀺 𑀧𑀭𑀺𑀩𑁆𑀩𑀸𑀚𑀓𑀲𑀢𑁂𑀳𑀺, 𑀉𑀧𑁆𑀧𑀮𑀯𑀡𑁆𑀡𑀸𑀣𑁂𑀭𑀺𑀆𑀤𑀺𑀓𑀸 𑀫𑀳𑀸𑀲𑀸𑀯𑀺𑀓𑀸 𑀅𑀦𑁂𑀓𑁂𑀳𑀺 𑀪𑀺𑀓𑁆𑀔𑀼𑀦𑀺𑀲𑀢𑁂𑀳𑀺, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀸𑀤𑀬𑁄 𑀫𑀳𑀸𑀲𑀸𑀯𑀓𑀸 𑀅𑀦𑁂𑀓𑀲𑀢𑁂𑀳𑀺 𑀪𑀺𑀓𑁆𑀔𑀽𑀳𑀺, 𑀲𑀓𑁆𑀓𑀸𑀤𑀬𑁄 𑀤𑁂𑀯𑀸 𑀅𑀦𑁂𑀓𑀲𑀳𑀲𑁆𑀲𑁂𑀳𑀺 𑀤𑁂𑀯𑁂𑀳𑀺, 𑀫𑀳𑀸𑀩𑁆𑀭𑀳𑁆𑀫𑀸𑀤𑀬𑁄 𑀩𑁆𑀭𑀳𑁆𑀫𑀸𑀦𑁄 𑀅𑀦𑁂𑀓𑀲𑀳𑀲𑁆𑀲𑁂𑀳𑀺 𑀩𑁆𑀭𑀳𑁆𑀫𑁂𑀳𑀺 𑀧𑀲𑀢𑁆𑀣𑀸. 𑀢𑁂 𑀲𑀩𑁆𑀩𑁂𑀧𑀺 𑀤𑀲𑀩𑀮𑀁 𑀣𑁄𑀫𑁂𑀦𑁆𑀢𑀺 𑀯𑀡𑁆𑀡𑁂𑀦𑁆𑀢𑀺, 𑀧𑀲𑀁𑀲𑀦𑁆𑀢𑀻𑀢𑀺 𑀪𑀕𑀯𑀸 ‘‘𑀧𑀲𑀢𑁆𑀣𑀧𑀲𑀢𑁆𑀣𑁄’’𑀢𑀺 𑀯𑀼𑀘𑁆𑀘𑀢𑀺.

𑀅𑀢𑁆𑀣𑀯𑀲𑀦𑁆𑀢𑀺 𑀅𑀢𑁆𑀣𑀸𑀦𑀺𑀲𑀁𑀲𑀁. 𑀅𑀣𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑁄 𑀅𑀢𑁆𑀢𑀦𑁄 𑀧𑀲𑀸𑀤𑀓𑀸𑀭𑀡𑀁 𑀆𑀘𑀺𑀓𑁆𑀔𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀺, 𑀪𑁄, 𑀓𑀼𑀲𑀮𑁄 𑀦𑀸𑀕𑀯𑀦𑀺𑀓𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀸𑀕𑀯𑀦𑀺𑀓𑁄𑀢𑀺 𑀦𑀸𑀕𑀯𑀦𑀯𑀸𑀲𑀺𑀓𑁄 𑀅𑀦𑀼𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀧𑀼𑀭𑀺𑀲𑁄. 𑀧𑀭𑀢𑁄 𑀧𑀦 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑁄 𑀧𑀼𑀭𑀺𑀲𑁄 𑀦𑀸𑀕𑀯𑀦𑀺𑀓𑁄𑀢𑀺 𑀆𑀕𑀢𑁄. 𑀘𑀢𑁆𑀢𑀸𑀭𑀺 𑀧𑀤𑀸𑀦𑀻𑀢𑀺 𑀘𑀢𑁆𑀢𑀸𑀭𑀺 𑀜𑀸𑀡𑀧𑀤𑀸𑀦𑀺 𑀜𑀸𑀡𑀯𑀮𑀜𑁆𑀚𑀸𑀦𑀺, 𑀜𑀸𑀡𑁂𑀦 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑀸𑀦𑀻𑀢𑀺 𑀅𑀢𑁆𑀣𑁄.

𑁨𑁮𑁯. 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑁂𑀢𑀺𑀆𑀤𑀻𑀲𑀼 𑀧𑀡𑁆𑀟𑀺𑀢𑁂𑀢𑀺 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁂. 𑀦𑀺𑀧𑀼𑀡𑁂𑀢𑀺 𑀲𑀡𑁆𑀳𑁂 𑀲𑀼𑀔𑀼𑀫𑀩𑀼𑀤𑁆𑀥𑀺𑀦𑁄, 𑀲𑀼𑀔𑀼𑀫𑀅𑀢𑁆𑀣𑀦𑁆𑀢𑀭𑀧𑀝𑀺𑀯𑀺𑀚𑁆𑀛𑀦𑀲𑀫𑀢𑁆𑀣𑁂. 𑀓𑀢𑀧𑀭𑀧𑁆𑀧𑀯𑀸𑀤𑁂𑀢𑀺 𑀯𑀺𑀜𑁆𑀜𑀸𑀢𑀧𑀭𑀧𑁆𑀧𑀯𑀸𑀤𑁂 𑀘𑁂𑀯 𑀧𑀭𑁂𑀳𑀺 𑀲𑀤𑁆𑀥𑀺𑀁 𑀓𑀢𑀯𑀸𑀤𑀧𑀭𑀺𑀘𑀬𑁂 𑀘. 𑀯𑀸𑀮𑀯𑁂𑀥𑀺𑀭𑀽𑀧𑁂𑀢𑀺 𑀯𑀸𑀮𑀯𑁂𑀥𑀺𑀥𑀦𑀼𑀕𑁆𑀕𑀳𑀲𑀤𑀺𑀲𑁂. 𑀢𑁂 𑀪𑀺𑀦𑁆𑀤𑀦𑁆𑀢𑀸 𑀫𑀜𑁆𑀜𑁂 𑀘𑀭𑀦𑁆𑀢𑀻𑀢𑀺 𑀯𑀸𑀮𑀯𑁂𑀥𑀺 𑀯𑀺𑀬 𑀯𑀸𑀮𑀁 𑀲𑀼𑀔𑀼𑀫𑀸𑀦𑀺𑀧𑀺 𑀧𑀭𑁂𑀲𑀁 𑀤𑀺𑀝𑁆𑀞𑀺𑀕𑀢𑀸𑀦𑀺 𑀅𑀢𑁆𑀢𑀦𑁄 𑀧𑀜𑁆𑀜𑀸𑀕𑀢𑁂𑀦 𑀪𑀺𑀦𑁆𑀤𑀦𑁆𑀢𑀸 𑀯𑀺𑀬 𑀘𑀭𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀳𑀁 𑀅𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀤𑀼𑀧𑀤𑀫𑁆𑀧𑀺 𑀢𑀺𑀧𑀤𑀫𑁆𑀧𑀺 𑀘𑀢𑀼𑀧𑁆𑀧𑀤𑀫𑁆𑀧𑀺 𑀧𑀜𑁆𑀳𑀁 𑀓𑀭𑁄𑀦𑁆𑀢𑀺. 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫𑀸𑀢𑀺 𑀤𑁄𑀲𑀁 𑀆𑀭𑁄𑀧𑁂𑀲𑁆𑀲𑀸𑀫. 𑀦 𑀘𑁂𑀯 𑀲𑀫𑀡𑀁 𑀕𑁄𑀢𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀻𑀢𑀺; 𑀓𑀲𑁆𑀫𑀸 𑀦 𑀧𑀼𑀘𑁆𑀙𑀦𑁆𑀢𑀺? 𑀪𑀕𑀯𑀸 𑀓𑀺𑀭 𑀧𑀭𑀺𑀲𑀫𑀚𑁆𑀛𑁂 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀧𑀭𑀺𑀲𑀸𑀬 𑀅𑀚𑁆𑀛𑀸𑀲𑀬𑀁 𑀑𑀮𑁄𑀓𑁂𑀢𑀺, 𑀢𑀢𑁄 𑀧𑀲𑁆𑀲𑀢𑀺 𑁋 ‘‘𑀇𑀫𑁂 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸 𑀕𑀼𑀴𑁆𑀳𑀁 𑀭𑀳𑀲𑁆𑀲𑀁 𑀧𑀜𑁆𑀳𑀁 𑀑𑀯𑀝𑁆𑀝𑀺𑀓𑀲𑀸𑀭𑀁 𑀓𑀢𑁆𑀯𑀸 𑀆𑀕𑀢𑀸’’𑀢𑀺. 𑀲𑁄 𑀢𑁂𑀳𑀺 𑀅𑀧𑀼𑀝𑁆𑀞𑁄𑀬𑁂𑀯 𑀏𑀯𑀭𑀽𑀧𑁂 𑀧𑀜𑁆𑀳𑁂 𑀧𑀼𑀘𑁆𑀙𑀸𑀬 𑀏𑀢𑁆𑀢𑀓𑀸 𑀤𑁄𑀲𑀸, 𑀯𑀺𑀲𑁆𑀲𑀚𑁆𑀚𑀦𑁂 𑀏𑀢𑁆𑀢𑀓𑀸, 𑀅𑀢𑁆𑀣𑁂 𑀧𑀤𑁂 𑀅𑀓𑁆𑀔𑀭𑁂 𑀏𑀢𑁆𑀢𑀓𑀸𑀢𑀺 𑀇𑀫𑁂 𑀧𑀜𑁆𑀳𑁂 𑀧𑀼𑀘𑁆𑀙𑀦𑁆𑀢𑁄 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬, 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀏𑀯𑀁 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀸𑀢𑀺, 𑀇𑀢𑀺 𑀑𑀯𑀝𑁆𑀝𑀺𑀓𑀲𑀸𑀭𑀁 𑀓𑀢𑁆𑀯𑀸 𑀆𑀦𑀻𑀢𑁂 𑀧𑀜𑁆𑀳𑁂 𑀥𑀫𑁆𑀫𑀓𑀣𑀸𑀬 𑀅𑀦𑁆𑀢𑀭𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀤𑁆𑀥𑀁𑀲𑁂𑀢𑀺. 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸 ‘‘𑀲𑁂𑀬𑁆𑀬𑁄 𑀯𑀢 𑀦𑁄, 𑀬𑁂 𑀫𑀬𑀁 𑀇𑀫𑁂 𑀧𑀜𑁆𑀳𑁂 𑀦 𑀧𑀼𑀘𑁆𑀙𑀺𑀫𑁆𑀳𑀸, 𑀲𑀘𑁂 𑀳𑀺 𑀫𑀬𑀁 𑀧𑀼𑀘𑁆𑀙𑁂𑀬𑁆𑀬𑀸𑀫, 𑀅𑀧𑁆𑀧𑀢𑀺𑀝𑁆𑀞𑁂𑀯 𑀦𑁄 𑀓𑀢𑁆𑀯𑀸 𑀲𑀫𑀡𑁄 𑀕𑁄𑀢𑀫𑁄 𑀔𑀺𑀧𑁂𑀬𑁆𑀬𑀸’’𑀢𑀺 𑀅𑀢𑁆𑀢𑀫𑀦𑀸 𑀪𑀯𑀦𑁆𑀢𑀺.

𑀅𑀧𑀺𑀘 𑀩𑀼𑀤𑁆𑀥𑀸 𑀦𑀸𑀫 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀸 𑀧𑀭𑀺𑀲𑀁 𑀫𑁂𑀢𑁆𑀢𑀸𑀬 𑀨𑀭𑀦𑁆𑀢𑀺, 𑀫𑁂𑀢𑁆𑀢𑀸𑀨𑀭𑀡𑁂𑀦 𑀤𑀲𑀩𑀮𑁂 𑀫𑀳𑀸𑀚𑀦𑀲𑁆𑀲 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀩𑀼𑀤𑁆𑀥𑀸 𑀘 𑀦𑀸𑀫 𑀭𑀽𑀧𑀕𑁆𑀕𑀧𑁆𑀧𑀢𑁆𑀢𑀸 𑀳𑁄𑀦𑁆𑀢𑀺 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀸 𑀫𑀥𑀼𑀭𑀲𑁆𑀲𑀭𑀸 𑀫𑀼𑀤𑀼𑀚𑀺𑀯𑁆𑀳𑀸 𑀲𑀼𑀨𑀼𑀲𑀺𑀢𑀤𑀦𑁆𑀢𑀸𑀯𑀭𑀡𑀸 𑀅𑀫𑀢𑁂𑀦 𑀳𑀤𑀬𑀁 𑀲𑀺𑀜𑁆𑀘𑀦𑁆𑀢𑀸 𑀯𑀺𑀬 𑀥𑀫𑁆𑀫𑀁 𑀓𑀣𑁂𑀦𑁆𑀢𑀺. 𑀢𑀢𑁆𑀭 𑀦𑁂𑀲𑀁 𑀫𑁂𑀢𑁆𑀢𑀸𑀨𑀭𑀡𑁂𑀦 𑀧𑀲𑀦𑁆𑀦𑀘𑀺𑀢𑁆𑀢𑀸𑀦𑀁 𑀏𑀯𑀁 𑀳𑁄𑀢𑀺 𑁋 ‘‘𑀏𑀯𑀭𑀽𑀧𑀁 𑀅𑀤𑁆𑀯𑁂𑀚𑁆𑀛𑀓𑀣𑀁 𑀅𑀫𑁄𑀖𑀓𑀣𑀁 𑀦𑀺𑀬𑁆𑀬𑀸𑀦𑀺𑀓𑀓𑀣𑀁 𑀓𑀣𑁂𑀦𑁆𑀢𑁂𑀦 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫 𑀧𑀘𑁆𑀘𑀦𑀻𑀓𑀕𑁆𑀕𑀸𑀳𑀁 𑀕𑀡𑁆𑀳𑀺𑀢𑀼’’𑀦𑁆𑀢𑀺 𑀅𑀢𑁆𑀢𑀦𑁄 𑀧𑀲𑀦𑁆𑀦𑀪𑀸𑀯𑁂𑀦𑁂𑀯 𑀦 𑀧𑀼𑀘𑁆𑀙𑀦𑁆𑀢𑀺.

𑀅𑀜𑁆𑀜𑀤𑀢𑁆𑀣𑀽𑀢𑀺 𑀏𑀓𑀁𑀲𑁂𑀦. 𑀲𑀸𑀯𑀓𑀸 𑀲𑀫𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀭𑀡𑀕𑀫𑀦𑀯𑀲𑁂𑀦 𑀲𑀸𑀯𑀓𑀸 𑀳𑁄𑀦𑁆𑀢𑀺. 𑀢𑀤𑀦𑀼𑀢𑁆𑀢𑀭𑀦𑁆𑀢𑀺 𑀢𑀁 𑀅𑀦𑀼𑀢𑁆𑀢𑀭𑀁. 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀧𑀭𑀺𑀬𑁄𑀲𑀸𑀦𑀪𑀽𑀢𑀁 𑀅𑀭𑀳𑀢𑁆𑀢𑀨𑀮𑀁, 𑀢𑀤𑀢𑁆𑀣𑀸𑀬 𑀳𑀺 𑀢𑁂 𑀧𑀩𑁆𑀩𑀚𑀦𑁆𑀢𑀺. 𑀫𑀦𑀁 𑀯𑀢, 𑀪𑁄, 𑀅𑀦𑀲𑁆𑀲𑀸𑀫𑀸𑀢𑀺, 𑀪𑁄, 𑀲𑀘𑁂 𑀫𑀬𑀁 𑀦 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫, 𑀇𑀫𑀺𑀦𑀸 𑀣𑁄𑀓𑁂𑀦 𑀅𑀦𑀼𑀧𑀲𑀗𑁆𑀓𑀫𑀦𑀫𑀢𑁆𑀢𑁂𑀦 𑀅𑀧𑀬𑀺𑀭𑀼𑀧𑀸𑀲𑀦𑀫𑀢𑁆𑀢𑁂𑀦𑁂𑀯 𑀦𑀝𑁆𑀞𑀸 𑀪𑀯𑁂𑀬𑁆𑀬𑀸𑀫. 𑀉𑀧𑀲𑀗𑁆𑀓𑀫𑀦𑀫𑀢𑁆𑀢𑀓𑁂𑀦 𑀧𑀦𑀫𑁆𑀳𑀸 𑀦 𑀦𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑀧𑀤𑀁 𑀧𑀼𑀭𑀺𑀫𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀲𑁆𑀲𑀫𑀡𑀸𑀯 𑀲𑀫𑀸𑀦𑀸𑀢𑀺𑀆𑀤𑀻𑀲𑀼 𑀧𑀸𑀧𑀸𑀦𑀁 𑀅𑀲𑀫𑀺𑀢𑀢𑁆𑀢𑀸 𑀅𑀲𑁆𑀲𑀫𑀡𑀸𑀯. 𑀅𑀩𑀸𑀳𑀺𑀢𑀢𑁆𑀢𑀸 𑀘 𑀧𑀦 𑀅𑀩𑁆𑀭𑀸𑀳𑁆𑀫𑀡𑀸𑀯. 𑀓𑀺𑀮𑁂𑀲𑀸𑀭𑀻𑀦𑀁 𑀅𑀳𑀢𑀢𑁆𑀢𑀸 𑀅𑀦𑀭𑀳𑀦𑁆𑀢𑁄𑀬𑁂𑀯 𑀲𑀫𑀸𑀦𑀸𑀢𑀺 𑀅𑀢𑁆𑀣𑁄.

𑁨𑁯𑁦. 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀉𑀤𑀸𑀳𑀸𑀭𑀁 𑀉𑀤𑀸𑀳𑀭𑀺. 𑀬𑀣𑀸 𑀳𑀺 𑀬𑀁 𑀢𑁂𑀮𑀁 𑀫𑀸𑀦𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀯𑀺𑀲𑁆𑀲𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀁 𑀅𑀯𑀲𑁂𑀓𑁄𑀢𑀺 𑀯𑀼𑀘𑁆𑀘𑀢𑀺, 𑀬𑀜𑁆𑀘 𑀚𑀮𑀁 𑀢𑀴𑀸𑀓𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀁 𑀑𑀖𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀫𑁂𑀯 𑀬𑀁 𑀧𑀻𑀢𑀺𑀫𑀬𑀁 𑀯𑀘𑀦𑀁 𑀳𑀤𑀬𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀥𑀺𑀓𑀁 𑀳𑀼𑀢𑁆𑀯𑀸 𑀅𑀦𑁆𑀢𑁄 𑀅𑀲𑀡𑁆𑀞𑀳𑀺𑀢𑁆𑀯𑀸 𑀩𑀳𑀺 𑀦𑀺𑀓𑁆𑀔𑀫𑀢𑀺, 𑀢𑀁 𑀉𑀤𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀭𑀽𑀧𑀁 𑀧𑀻𑀢𑀺𑀫𑀬𑀁 𑀯𑀘𑀦𑀁 𑀦𑀺𑀘𑁆𑀙𑀸𑀭𑁂𑀲𑀻𑀢𑀺 𑀅𑀢𑁆𑀣𑁄. 𑀳𑀢𑁆𑀣𑀺𑀧𑀤𑁄𑀧𑀫𑁄𑀢𑀺 𑀳𑀢𑁆𑀣𑀺𑀧𑀤𑀁 𑀉𑀧𑀫𑀸 𑀅𑀲𑁆𑀲 𑀥𑀫𑁆𑀫𑀲𑁆𑀲𑀸𑀢𑀺 𑀳𑀢𑁆𑀣𑀺𑀧𑀤𑁄𑀧𑀫𑁄. 𑀲𑁄 𑀦 𑀏𑀢𑁆𑀢𑀸𑀯𑀢𑀸 𑀯𑀺𑀢𑁆𑀣𑀸𑀭𑁂𑀦 𑀧𑀭𑀺𑀧𑀽𑀭𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀦𑀸𑀕𑀯𑀦𑀺𑀓𑁄𑀢𑀺 𑀉𑀕𑁆𑀕𑀳𑀺𑀢𑀳𑀢𑁆𑀣𑀺𑀲𑀺𑀧𑁆𑀧𑁄 𑀳𑀢𑁆𑀣𑀺𑀯𑀦𑀘𑀸𑀭𑀺𑀓𑁄. 𑀅𑀣 𑀓𑀲𑁆𑀫𑀸 𑀇𑀥 𑀓𑀼𑀲𑀮𑁄𑀢𑀺 𑀦 𑀯𑀼𑀢𑁆𑀢𑁄𑀢𑀺? 𑀧𑀭𑀢𑁄 ‘‘𑀬𑁄 𑀳𑁄𑀢𑀺 𑀓𑀼𑀲𑀮𑁄’’𑀢𑀺 𑀯𑀺𑀪𑀸𑀕𑀤𑀲𑁆𑀲𑀦𑀢𑁄. 𑀬𑁄 𑀳𑀺 𑀓𑁄𑀘𑀺 𑀧𑀯𑀺𑀲𑀢𑀺, 𑀬𑁄 𑀧𑀦 𑀓𑀼𑀲𑀮𑁄 𑀳𑁄𑀢𑀺, 𑀲𑁄 𑀦𑁂𑀯 𑀢𑀸𑀯 𑀦𑀺𑀝𑁆𑀞𑀁 𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀇𑀥 𑀓𑀼𑀲𑀮𑁄𑀢𑀺 𑀅𑀯𑀢𑁆𑀯𑀸 𑀧𑀭𑀢𑁄 𑀯𑀼𑀢𑁆𑀢𑁄.

𑁨𑁯𑁧. 𑀯𑀸𑀫𑀦𑀺𑀓𑀸𑀢𑀺 𑀭𑀲𑁆𑀲𑀸 𑀆𑀬𑀸𑀫𑀢𑁄𑀧𑀺 𑀦 𑀤𑀻𑀖𑀸 𑀫𑀳𑀸𑀓𑀼𑀘𑁆𑀙𑀺𑀳𑀢𑁆𑀣𑀺𑀦𑀺𑀬𑁄. 𑀉𑀘𑁆𑀘𑀸 𑀘 𑀦𑀺𑀲𑁂𑀯𑀺𑀢𑀦𑁆𑀢𑀺 𑀲𑀢𑁆𑀢𑀝𑁆𑀞𑀭𑀢𑀦𑀼𑀩𑁆𑀩𑁂𑀥𑁂 𑀯𑀝𑀭𑀼𑀓𑁆𑀔𑀸𑀤𑀻𑀦𑀁 𑀔𑀦𑁆𑀥𑀧𑁆𑀧𑀤𑁂𑀲𑁂 𑀖𑀁𑀲𑀺𑀢𑀝𑁆𑀞𑀸𑀦𑀁. 𑀉𑀘𑁆𑀘𑀸 𑀓𑀸𑀴𑀸𑀭𑀺𑀓𑀸𑀢𑀺 𑀉𑀘𑁆𑀘𑀸 𑀘 𑀬𑀝𑁆𑀞𑀺𑀲𑀤𑀺𑀲𑀧𑀸𑀤𑀸 𑀳𑀼𑀢𑁆𑀯𑀸, 𑀓𑀸𑀴𑀸𑀭𑀺𑀓𑀸 𑀘 𑀤𑀦𑁆𑀢𑀸𑀦𑀁 𑀓𑀴𑀸𑀭𑀢𑀸𑀬. 𑀢𑀸𑀲𑀁 𑀓𑀺𑀭 𑀏𑀓𑁄 𑀤𑀦𑁆𑀢𑁄 𑀉𑀦𑁆𑀦𑀢𑁄 𑀳𑁄𑀢𑀺, 𑀏𑀓𑁄 𑀑𑀦𑀢𑁄. 𑀉𑀪𑁄𑀧𑀺 𑀘 𑀯𑀺𑀭𑀴𑀸 𑀳𑁄𑀦𑁆𑀢𑀺, 𑀦 𑀆𑀲𑀦𑁆𑀦𑀸. 𑀉𑀘𑁆𑀘𑀸 𑀘 𑀤𑀦𑁆𑀢𑁂𑀳𑀺 𑀆𑀭𑀜𑁆𑀚𑀺𑀢𑀸𑀦𑀻𑀢𑀺 𑀲𑀢𑁆𑀢𑀝𑁆𑀞𑀭𑀢𑀦𑀼𑀩𑁆𑀩𑁂𑀥𑁂 𑀯𑀝𑀭𑀼𑀓𑁆𑀔𑀸𑀤𑀻𑀦𑀁 𑀔𑀦𑁆𑀥𑀧𑁆𑀧𑀤𑁂𑀲𑁂 𑀨𑀭𑀲𑀼𑀦𑀸 𑀧𑀳𑀢𑀝𑁆𑀞𑀸𑀦𑀁 𑀯𑀺𑀬 𑀤𑀸𑀝𑁆𑀞𑀸𑀳𑀺 𑀙𑀺𑀦𑁆𑀦𑀝𑁆𑀞𑀸𑀦𑀁. 𑀉𑀘𑁆𑀘𑀸 𑀓𑀡𑁂𑀭𑀼𑀓𑀸 𑀦𑀸𑀫𑀸𑀢𑀺 𑀉𑀘𑁆𑀘𑀸 𑀘 𑀬𑀝𑁆𑀞𑀺𑀲𑀤𑀺𑀲𑀤𑀻𑀖𑀧𑀸𑀤𑀸 𑀳𑀼𑀢𑁆𑀯𑀸, 𑀓𑀡𑁂𑀭𑀼𑀓𑀸 𑀘 𑀤𑀦𑁆𑀢𑀸𑀦𑀁 𑀓𑀡𑁂𑀭𑀼𑀢𑀸𑀬, 𑀢𑀸 𑀓𑀺𑀭 𑀫𑀓𑀼𑀴𑀤𑀸𑀞𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀓𑀡𑁂𑀭𑀼𑀓𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑁄 𑀦𑀺𑀝𑁆𑀞𑀁 𑀕𑀘𑁆𑀙𑀢𑀻𑀢𑀺 𑀲𑁄 𑀦𑀸𑀕𑀯𑀦𑀺𑀓𑁄 𑀬𑀲𑁆𑀲 𑀯𑀢𑀸𑀳𑀁 𑀦𑀸𑀕𑀲𑁆𑀲 𑀅𑀦𑀼𑀧𑀤𑀁 𑀆𑀕𑀢𑁄, 𑀅𑀬𑀫𑁂𑀯 𑀲𑁄, 𑀦 𑀅𑀜𑁆𑀜𑁄. 𑀬𑀜𑁆𑀳𑀺 𑀅𑀳𑀁 𑀧𑀞𑀫𑀁 𑀧𑀤𑀁 𑀤𑀺𑀲𑁆𑀯𑀸 𑀯𑀸𑀫𑀦𑀺𑀓𑀸𑀦𑀁 𑀧𑀤𑀁 𑀇𑀤𑀁 𑀪𑀯𑀺𑀲𑁆𑀲𑀢𑀻𑀢𑀺 𑀦𑀺𑀝𑁆𑀞𑀁 𑀦 𑀕𑀢𑁄, 𑀬𑀫𑁆𑀧𑀺 𑀢𑀢𑁄 𑀑𑀭𑀪𑀸𑀕𑁂 𑀤𑀺𑀲𑁆𑀯𑀸 𑀓𑀸𑀴𑀸𑀭𑀺𑀓𑀸𑀦𑀁 𑀪𑀯𑀺𑀲𑁆𑀲𑀢𑀺, 𑀓𑀡𑁂𑀭𑀼𑀓𑀸𑀦𑀁 𑀪𑀯𑀺𑀲𑁆𑀲𑀢𑀻𑀢𑀺 𑀦𑀺𑀝𑁆𑀞𑀁 𑀦 𑀕𑀢𑁄, 𑀲𑀩𑁆𑀩𑀁 𑀢𑀁 𑀇𑀫𑀲𑁆𑀲𑁂𑀯 𑀫𑀳𑀸𑀳𑀢𑁆𑀣𑀺𑀦𑁄 𑀧𑀤𑀦𑁆𑀢𑀺 𑀫𑀳𑀸𑀳𑀢𑁆𑀣𑀺𑀁 𑀤𑀺𑀲𑁆𑀯𑀸𑀯 𑀦𑀺𑀝𑁆𑀞𑀁 𑀕𑀘𑁆𑀙𑀢𑀺.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀦𑀸𑀕𑀯𑀦𑀁 𑀯𑀺𑀬 𑀳𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀦𑀻𑀯𑀭𑀡𑀧𑁆𑀧𑀳𑀸𑀦𑀸 𑀥𑀫𑁆𑀫𑀤𑁂𑀲𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀼𑀲𑀮𑁄 𑀦𑀸𑀕𑀯𑀦𑀺𑀓𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄; 𑀫𑀳𑀸𑀦𑀸𑀕𑁄 𑀯𑀺𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄; 𑀫𑀳𑀦𑁆𑀢𑀁 𑀳𑀢𑁆𑀣𑀺𑀧𑀤𑀁 𑀯𑀺𑀬 𑀛𑀸𑀦𑀸𑀪𑀺𑀜𑁆𑀜𑀸. 𑀦𑀸𑀕𑀯𑀦𑀺𑀓𑀲𑁆𑀲 𑀢𑀢𑁆𑀣 𑀢𑀢𑁆𑀣 𑀳𑀢𑁆𑀣𑀺𑀧𑀤𑀁 𑀤𑀺𑀲𑁆𑀯𑀸𑀧𑀺 𑀯𑀸𑀫𑀦𑀺𑀓𑀸𑀦𑀁 𑀧𑀤𑀁 𑀪𑀯𑀺𑀲𑁆𑀲𑀢𑀺, 𑀓𑀸𑀴𑀸𑀭𑀺𑀓𑀸𑀦𑀁 𑀓𑀡𑁂𑀭𑀼𑀓𑀸𑀦𑀁 𑀧𑀤𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀦𑀺𑀝𑁆𑀞𑀗𑁆𑀕𑀢𑀪𑀸𑀯𑁄 𑀯𑀺𑀬 𑀬𑁄𑀕𑀺𑀦𑁄, 𑀇𑀫𑀸 𑀛𑀸𑀦𑀸𑀪𑀺𑀜𑁆𑀜𑀸 𑀦𑀸𑀫 𑀩𑀸𑀳𑀺𑀭𑀓𑀧𑀭𑀺𑀩𑁆𑀩𑀸𑀚𑀓𑀸𑀦𑀫𑁆𑀧𑀺 𑀲𑀦𑁆𑀢𑀻𑀢𑀺 𑀅𑀦𑀺𑀝𑁆𑀞𑀗𑁆𑀕𑀢𑀪𑀸𑀯𑁄. 𑀦𑀸𑀕𑀯𑀦𑀺𑀓𑀲𑁆𑀲, 𑀢𑀢𑁆𑀣 𑀢𑀢𑁆𑀣 𑀫𑀬𑀸 𑀤𑀺𑀝𑁆𑀞𑀁 𑀧𑀤𑀁 𑀇𑀫𑀲𑁆𑀲𑁂𑀯 𑀫𑀳𑀸𑀳𑀢𑁆𑀣𑀺𑀦𑁄, 𑀦 𑀅𑀜𑁆𑀜𑀲𑁆𑀲𑀸𑀢𑀺 𑀫𑀳𑀸𑀳𑀢𑁆𑀣𑀺𑀁 𑀤𑀺𑀲𑁆𑀯𑀸 𑀦𑀺𑀝𑁆𑀞𑀗𑁆𑀕𑀫𑀦𑀁 𑀯𑀺𑀬 𑀅𑀭𑀺𑀬𑀲𑀸𑀯𑀓𑀲𑁆𑀲 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸𑀯 𑀦𑀺𑀝𑁆𑀞𑀗𑁆𑀕𑀫𑀦𑀁. 𑀇𑀤𑀜𑁆𑀘 𑀧𑀦 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀫𑀢𑁆𑀣𑀓𑁂 𑀞𑀢𑁆𑀯𑀸𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀇𑀫𑀲𑁆𑀫𑀺𑀫𑁆𑀧𑀺 𑀞𑀸𑀦𑁂 𑀯𑀝𑁆𑀝𑀢𑀺𑀬𑁂𑀯. 𑀅𑀦𑀼𑀓𑁆𑀓𑀫𑀸𑀕𑀢𑀁 𑀧𑀦 𑀧𑀸𑀴𑀺𑀧𑀤𑀁 𑀕𑀳𑁂𑀢𑁆𑀯𑀸 𑀇𑀥𑁂𑀯 𑀓𑀢𑀁. 𑀢𑀢𑁆𑀣 𑀇𑀥𑀸𑀢𑀺 𑀤𑁂𑀲𑀸𑀧𑀤𑁂𑀲𑁂 𑀦𑀺𑀧𑀸𑀢𑁄. 𑀲𑁆𑀯𑀸𑀬𑀁 𑀓𑀢𑁆𑀣𑀘𑀺 𑀮𑁄𑀓𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋 ‘‘𑀇𑀥 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀤𑀻. 𑀦𑀺. 𑁧.𑁨𑁭𑁯). 𑀓𑀢𑁆𑀣𑀘𑀺 𑀲𑀸𑀲𑀦𑀁. 𑀬𑀣𑀸𑀳 𑁋 ‘‘𑀇𑀥𑁂𑀯, 𑀪𑀺𑀓𑁆𑀔𑀯𑁂, 𑀲𑀫𑀡𑁄, 𑀇𑀥 𑀤𑀼𑀢𑀺𑀬𑁄 𑀲𑀫𑀡𑁄’’𑀢𑀺 (𑀅. 𑀦𑀺. 𑁪.𑁨𑁪𑁧). 𑀓𑀢𑁆𑀣𑀘𑀺 𑀑𑀓𑀸𑀲𑀁. 𑀬𑀣𑀸𑀳 𑁋

‘‘𑀇𑀥𑁂𑀯 𑀢𑀺𑀝𑁆𑀞𑀫𑀸𑀦𑀲𑁆𑀲, 𑀤𑁂𑀯𑀪𑀽𑀢𑀲𑁆𑀲 𑀫𑁂 𑀲𑀢𑁄;

𑀧𑀼𑀦𑀭𑀸𑀬𑀼 𑀘 𑀫𑁂 𑀮𑀤𑁆𑀥𑁄, 𑀏𑀯𑀁 𑀚𑀸𑀦𑀸𑀳𑀺 𑀫𑀸𑀭𑀺𑀲𑀸’’𑀢𑀺. (𑀤𑀻. 𑀦𑀺. 𑁨.𑁩𑁬𑁯; 𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁯𑁦);

𑀓𑀢𑁆𑀣𑀘𑀺 𑀧𑀤𑀧𑀽𑀭𑀡𑀫𑀢𑁆𑀢𑀫𑁂𑀯. 𑀬𑀣𑀸𑀳 𑁋 ‘‘𑀇𑀥𑀸𑀳𑀁, 𑀪𑀺𑀓𑁆𑀔𑀯𑁂, 𑀪𑀼𑀢𑁆𑀢𑀸𑀯𑀻 𑀅𑀲𑁆𑀲𑀁 𑀧𑀯𑀸𑀭𑀺𑀢𑁄’’𑀢𑀺 (𑀫. 𑀦𑀺. 𑁧.𑁩𑁦). 𑀇𑀥 𑀧𑀦 𑀮𑁄𑀓𑀁 𑀉𑀧𑀸𑀤𑀸𑀬 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀩𑁆𑀭𑀸𑀳𑁆𑀫𑀡 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀢𑀣𑀸𑀕𑀢𑁄 𑀉𑀧𑁆𑀧𑀚𑁆𑀚𑀢𑀺 𑀅𑀭𑀳𑀁…𑀧𑁂… 𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺.

𑀢𑀢𑁆𑀣 𑀢𑀣𑀸𑀕𑀢𑀲𑀤𑁆𑀤𑁄 𑀫𑀽𑀮𑀧𑀭𑀺𑀬𑀸𑀬𑁂, 𑀅𑀭𑀳𑀦𑁆𑀢𑀺𑀆𑀤𑀬𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀸. 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀢𑁆𑀣 𑀧𑀦 𑀮𑁄𑀓𑁄𑀢𑀺 𑀑𑀓𑀸𑀲𑀮𑁄𑀓𑁄 𑀲𑀢𑁆𑀢𑀮𑁄𑀓𑁄 𑀲𑀗𑁆𑀔𑀸𑀭𑀮𑁄𑀓𑁄𑀢𑀺 𑀢𑀺𑀯𑀺𑀥𑁄. 𑀇𑀥 𑀧𑀦 𑀲𑀢𑁆𑀢𑀮𑁄𑀓𑁄 𑀅𑀥𑀺𑀧𑁆𑀧𑁂𑀢𑁄. 𑀲𑀢𑁆𑀢𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀘 𑀢𑀣𑀸𑀕𑀢𑁄 𑀦 𑀤𑁂𑀯𑀮𑁄𑀓𑁂, 𑀦 𑀩𑁆𑀭𑀳𑁆𑀫𑀮𑁄𑀓𑁂, 𑀫𑀦𑀼𑀲𑁆𑀲𑀮𑁄𑀓𑁂𑀬𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀫𑀦𑀼𑀲𑁆𑀲𑀮𑁄𑀓𑁂𑀧𑀺 𑀦 𑀅𑀜𑁆𑀜𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂, 𑀇𑀫𑀲𑁆𑀫𑀺𑀁𑀬𑁂𑀯 𑀘𑀓𑁆𑀓𑀯𑀸𑀴𑁂. 𑀢𑀢𑁆𑀭𑀸𑀧𑀺 𑀦 𑀲𑀩𑁆𑀩𑀝𑁆𑀞𑀸𑀦𑁂𑀲𑀼, ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀕𑀚𑀗𑁆𑀕𑀮𑀁 𑀦𑀸𑀫 𑀦𑀺𑀕𑀫𑁄. 𑀢𑀲𑁆𑀲𑀸𑀧𑀭𑁂𑀦 𑀫𑀳𑀸𑀲𑀸𑀮𑁄, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀧𑀼𑀭𑀢𑁆𑀣𑀺𑀫𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀲𑀮𑁆𑀮𑀯𑀢𑀻 𑀦𑀸𑀫 𑀦𑀤𑀻, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀲𑁂𑀢𑀓𑀡𑁆𑀡𑀺𑀓𑀁 𑀦𑀸𑀫 𑀦𑀺𑀕𑀫𑁄, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬 𑀣𑀽𑀡𑀁 𑀦𑀸𑀫 𑀩𑁆𑀭𑀸𑀳𑁆𑀫𑀡𑀕𑀸𑀫𑁄, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂. 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀉𑀲𑀺𑀭𑀤𑁆𑀥𑀚𑁄 𑀦𑀸𑀫 𑀧𑀩𑁆𑀩𑀢𑁄, 𑀢𑀢𑁄 𑀧𑀭𑀸 𑀧𑀘𑁆𑀘𑀦𑁆𑀢𑀺𑀫𑀸 𑀚𑀦𑀧𑀤𑀸, 𑀑𑀭𑀢𑁄 𑀫𑀚𑁆𑀛𑁂’’𑀢𑀺 (𑀫𑀳𑀸𑀯. 𑁨𑁫𑁯) 𑀏𑀯𑀁 𑀧𑀭𑀺𑀘𑁆𑀙𑀺𑀦𑁆𑀦𑁂 𑀆𑀬𑀸𑀫𑀢𑁄 𑀢𑀺𑀬𑁄𑀚𑀦𑀲𑀢𑁂 𑀯𑀺𑀢𑁆𑀣𑀸𑀭𑀢𑁄 𑀅𑀟𑁆𑀠𑀢𑁂𑀬𑁆𑀬𑀬𑁄𑀚𑀦𑀲𑀢𑁂 𑀧𑀭𑀺𑀓𑁆𑀔𑁂𑀧𑀢𑁄 𑀦𑀯𑀬𑁄𑀚𑀦𑀲𑀢𑁂 𑀫𑀚𑁆𑀛𑀺𑀫𑀧𑀤𑁂𑀲𑁂 𑀉𑀧𑁆𑀧𑀚𑁆𑀚𑀢𑀺. 𑀦 𑀓𑁂𑀯𑀮𑀜𑁆𑀘 𑀢𑀣𑀸𑀕𑀢𑁄𑀯, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀅𑀕𑁆𑀕𑀲𑀸𑀯𑀓𑀸 𑀅𑀲𑀻𑀢𑀺 𑀫𑀳𑀸𑀣𑁂𑀭𑀸 𑀩𑀼𑀤𑁆𑀥𑀫𑀸𑀢𑀸 𑀩𑀼𑀤𑁆𑀥𑀧𑀺𑀢𑀸 𑀘𑀓𑁆𑀓𑀯𑀢𑁆𑀢𑀻 𑀭𑀸𑀚𑀸 𑀅𑀜𑁆𑀜𑁂 𑀘 𑀲𑀸𑀭𑀧𑁆𑀧𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸 𑀏𑀢𑁆𑀣𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀢𑁆𑀣 𑀢𑀣𑀸𑀕𑀢𑁄 𑀲𑀼𑀚𑀸𑀢𑀸𑀬 𑀤𑀺𑀦𑁆𑀦𑀫𑀥𑀼𑀧𑀸𑀬𑀲𑀪𑁄𑀚𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑁄, 𑀢𑀸𑀯 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫. 𑀅𑀭𑀳𑀢𑁆𑀢𑀨𑀮𑁂 𑀉𑀧𑁆𑀧𑀦𑁆𑀦𑁄 𑀦𑀸𑀫. 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀢𑁄 𑀯𑀸 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑁄. 𑀢𑀼𑀲𑀺𑀢𑀪𑀯𑀦𑀢𑁄 𑀯𑀸 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑁄. 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑀢𑁄 𑀯𑀸 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑁄, 𑀢𑀸𑀯 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫. 𑀅𑀭𑀳𑀢𑁆𑀢𑀨𑀮𑁂 𑀉𑀧𑁆𑀧𑀦𑁆𑀦𑁄 𑀦𑀸𑀫. 𑀇𑀥 𑀲𑀩𑁆𑀩𑀧𑀞𑀫𑀁 𑀉𑀧𑁆𑀧𑀦𑁆𑀦𑀪𑀸𑀯𑀁 𑀲𑀦𑁆𑀥𑀸𑀬 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁, 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀳𑁄𑀢𑀻𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄.

𑀲𑁄 𑀇𑀫𑀁 𑀮𑁄𑀓𑀦𑁆𑀢𑀺 𑀲𑁄 𑀪𑀕𑀯𑀸 𑀇𑀫𑀁 𑀮𑁄𑀓𑀁, 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀦𑀺𑀤𑀲𑁆𑀲𑁂𑀢𑀺. 𑀲𑀤𑁂𑀯𑀓𑀦𑁆𑀢𑀺 𑀲𑀳 𑀤𑁂𑀯𑁂𑀳𑀺 𑀲𑀤𑁂𑀯𑀓𑀁. 𑀏𑀯𑀁 𑀲𑀳 𑀫𑀸𑀭𑁂𑀦 𑀲𑀫𑀸𑀭𑀓𑀁. 𑀲𑀳 𑀩𑁆𑀭𑀳𑁆𑀫𑀼𑀦𑀸 𑀲𑀩𑁆𑀭𑀳𑁆𑀫𑀓𑀁. 𑀲𑀳 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀳𑀺 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁. 𑀧𑀚𑀸𑀢𑀢𑁆𑀢𑀸 𑀧𑀚𑀸, 𑀢𑀁 𑀧𑀚𑀁. 𑀲𑀳 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀤𑁂𑀯𑀫𑀦𑀼𑀲𑁆𑀲𑀁. 𑀢𑀢𑁆𑀣 𑀲𑀤𑁂𑀯𑀓𑀯𑀘𑀦𑁂𑀦 𑀧𑀜𑁆𑀘𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀫𑀸𑀭𑀓𑀯𑀘𑀦𑁂𑀦 𑀙𑀝𑁆𑀞𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁. 𑀲𑀩𑁆𑀭𑀳𑁆𑀫𑀓𑀯𑀘𑀦𑁂𑀦 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀩𑁆𑀭𑀳𑁆𑀫𑀕𑁆𑀕𑀳𑀡𑀁. 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀯𑀘𑀦𑁂𑀦 𑀲𑀸𑀲𑀦𑀲𑁆𑀲 𑀧𑀘𑁆𑀘𑀢𑁆𑀣𑀺𑀧𑀘𑁆𑀘𑀸𑀫𑀺𑀢𑁆𑀢𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀁 𑀲𑀫𑀺𑀢𑀧𑀸𑀧𑀩𑀸𑀳𑀺𑀢𑀧𑀸𑀧𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀜𑁆𑀘. 𑀧𑀚𑀸𑀯𑀘𑀦𑁂𑀦 𑀲𑀢𑁆𑀢𑀮𑁄𑀓𑀕𑁆𑀕𑀳𑀡𑀁. 𑀲𑀤𑁂𑀯𑀫𑀦𑀼𑀲𑁆𑀲𑀯𑀘𑀦𑁂𑀦 𑀲𑀫𑁆𑀫𑀼𑀢𑀺𑀤𑁂𑀯𑀅𑀯𑀲𑁂𑀲𑀫𑀦𑀼𑀲𑁆𑀲𑀕𑁆𑀕𑀳𑀡𑀁. 𑀏𑀯𑀫𑁂𑀢𑁆𑀣 𑀢𑀻𑀳𑀺 𑀧𑀤𑁂𑀳𑀺 𑀑𑀓𑀸𑀲𑀮𑁄𑀓𑁂𑀦 𑀲𑀤𑁆𑀥𑀺𑀁 𑀲𑀢𑁆𑀢𑀮𑁄𑀓𑁄, 𑀤𑁆𑀯𑀻𑀳𑀺 𑀧𑀚𑀸𑀯𑀲𑁂𑀦 𑀲𑀢𑁆𑀢𑀮𑁄𑀓𑁄𑀯 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀭𑁄 𑀦𑀬𑁄 𑁋 𑀲𑀤𑁂𑀯𑀓𑀕𑁆𑀕𑀳𑀡𑁂𑀦 𑀅𑀭𑀽𑀧𑀸𑀯𑀘𑀭𑀤𑁂𑀯𑀮𑁄𑀓𑁄 𑀕𑀳𑀺𑀢𑁄. 𑀲𑀫𑀸𑀭𑀓𑀕𑁆𑀕𑀳𑀡𑁂𑀦 𑀙𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁄. 𑀲𑀩𑁆𑀭𑀳𑁆𑀫𑀓𑀕𑁆𑀕𑀳𑀡𑁂𑀦 𑀭𑀽𑀧𑀻 𑀩𑁆𑀭𑀳𑁆𑀫𑀮𑁄𑀓𑁄. 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀤𑀺𑀕𑁆𑀕𑀳𑀡𑁂𑀦 𑀘𑀢𑀼𑀧𑀭𑀺𑀲𑀯𑀲𑁂𑀦 𑀲𑀫𑁆𑀫𑀼𑀢𑀺𑀤𑁂𑀯𑁂𑀳𑀺 𑀯𑀸 𑀲𑀳 𑀫𑀦𑀼𑀲𑁆𑀲𑀮𑁄𑀓𑁄 𑀅𑀯𑀲𑁂𑀲𑀲𑀩𑁆𑀩𑀲𑀢𑁆𑀢𑀮𑁄𑀓𑁄 𑀯𑀸.

𑀅𑀧𑀺𑀘𑁂𑀢𑁆𑀣 𑀲𑀤𑁂𑀯𑀓𑀯𑀘𑀦𑁂𑀦 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀢𑁄 𑀲𑀩𑁆𑀩𑀲𑁆𑀲 𑀮𑁄𑀓𑀲𑁆𑀲 𑀲𑀘𑁆𑀙𑀺𑀓𑀢𑀪𑀸𑀯𑀫𑀸𑀳. 𑀢𑀢𑁄 𑀬𑁂𑀲𑀁 𑀅𑀳𑁄𑀲𑀺 𑁋 ‘‘𑀫𑀸𑀭𑁄 𑀫𑀳𑀸𑀦𑀼𑀪𑀸𑀯𑁄 𑀙𑀓𑀸𑀫𑀸𑀯𑀘𑀭𑀺𑀲𑁆𑀲𑀭𑁄 𑀯𑀲𑀯𑀢𑁆𑀢𑀻. 𑀓𑀺𑀁 𑀲𑁄𑀧𑀺 𑀏𑀢𑁂𑀦 𑀲𑀘𑁆𑀙𑀺𑀓𑀢𑁄’’𑀢𑀺? 𑀢𑁂𑀲𑀁 𑀯𑀺𑀫𑀢𑀺𑀁 𑀯𑀺𑀥𑀫𑀦𑁆𑀢𑁄 𑀲𑀫𑀸𑀭𑀓𑀦𑁆𑀢𑀺 𑀆𑀳. 𑀬𑁂𑀲𑀁 𑀧𑀦 𑀅𑀳𑁄𑀲𑀺 𑁋 ‘‘𑀩𑁆𑀭𑀳𑁆𑀫𑀸 𑀫𑀳𑀸𑀦𑀼𑀪𑀸𑀯𑁄, 𑀏𑀓𑀗𑁆𑀕𑀼𑀮𑀺𑀬𑀸 𑀏𑀓𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂 𑀆𑀮𑁄𑀓𑀁 𑀨𑀭𑀢𑀺, 𑀤𑁆𑀯𑀻𑀳𑀺…𑀧𑁂… 𑀤𑀲𑀳𑀺 𑀅𑀗𑁆𑀕𑀼𑀮𑀻𑀳𑀺 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀆𑀮𑁄𑀓𑀁 𑀨𑀭𑀢𑀺, 𑀅𑀦𑀼𑀢𑁆𑀢𑀭𑀜𑁆𑀘 𑀛𑀸𑀦𑀲𑀫𑀸𑀧𑀢𑁆𑀢𑀺𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀓𑀺𑀁 𑀲𑁄𑀧𑀺 𑀲𑀘𑁆𑀙𑀺𑀓𑀢𑁄’’𑀢𑀺? 𑀢𑁂𑀲𑀁 𑀯𑀺𑀫𑀢𑀺𑀁 𑀯𑀺𑀥𑀫𑀦𑁆𑀢𑁄 𑀲𑀩𑁆𑀭𑀳𑁆𑀫𑀓𑀦𑁆𑀢𑀺 𑀆𑀳. 𑀢𑀢𑁄 𑀬𑁂 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀧𑀼𑀣𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀸𑀲𑀦𑀲𑁆𑀲 𑀧𑀘𑁆𑀘𑀢𑁆𑀣𑀺𑀓𑀸, 𑀓𑀺𑀁 𑀢𑁂𑀧𑀺 𑀲𑀘𑁆𑀙𑀺𑀓𑀢𑀸’’𑀢𑀺? 𑀢𑁂𑀲𑀁 𑀯𑀺𑀫𑀢𑀺𑀁 𑀯𑀺𑀥𑀫𑀦𑁆𑀢𑁄 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀦𑁆𑀢𑀺 𑀆𑀳. 𑀏𑀯𑀁 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑀸𑀦𑀁 𑀲𑀘𑁆𑀙𑀺𑀓𑀢𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸 𑀅𑀣 𑀲𑀫𑁆𑀫𑀼𑀢𑀺𑀤𑁂𑀯𑁂 𑀅𑀯𑀲𑁂𑀲𑀫𑀦𑀼𑀲𑁆𑀲𑁂 𑀘 𑀉𑀧𑀸𑀤𑀸𑀬 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑁂𑀲𑀲𑀢𑁆𑀢𑀮𑁄𑀓𑀲𑁆𑀲 𑀲𑀘𑁆𑀙𑀺𑀓𑀢𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀲𑀤𑁂𑀯𑀫𑀦𑀼𑀲𑁆𑀲𑀦𑁆𑀢𑀺 𑀆𑀳. 𑀅𑀬𑀫𑁂𑀢𑁆𑀣 𑀪𑀸𑀯𑀸𑀦𑀼𑀓𑁆𑀓𑀫𑁄. 𑀧𑁄𑀭𑀸𑀡𑀸 𑀧𑀦𑀸𑀳𑀼 𑁋 𑀲𑀤𑁂𑀯𑀓𑀦𑁆𑀢𑀺 𑀤𑁂𑀯𑀢𑀸𑀳𑀺 𑀲𑀤𑁆𑀥𑀺𑀁 𑀅𑀯𑀲𑁂𑀲𑀮𑁄𑀓𑀁. 𑀲𑀫𑀸𑀭𑀓𑀦𑁆𑀢𑀺 𑀫𑀸𑀭𑁂𑀦 𑀲𑀤𑁆𑀥𑀺𑀁 𑀅𑀯𑀲𑁂𑀲𑀮𑁄𑀓𑀁. 𑀲𑀩𑁆𑀭𑀳𑁆𑀫𑀓𑀦𑁆𑀢𑀺 𑀩𑁆𑀭𑀳𑁆𑀫𑁂𑀳𑀺 𑀲𑀤𑁆𑀥𑀺𑀁 𑀅𑀯𑀲𑁂𑀲𑀮𑁄𑀓𑀁. 𑀏𑀯𑀁 𑀲𑀩𑁆𑀩𑁂𑀧𑀺 𑀢𑀺𑀪𑀯𑀽𑀧𑀕𑁂 𑀲𑀢𑁆𑀢𑁂 𑀢𑀻𑀳𑀸𑀓𑀸𑀭𑁂𑀳𑀺 𑀢𑀻𑀲𑀼 𑀧𑀤𑁂𑀲𑀼 𑀧𑀓𑁆𑀔𑀺𑀧𑁂𑀢𑁆𑀯𑀸 𑀧𑀼𑀦 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀧𑀭𑀺𑀬𑀸𑀤𑀺𑀬𑀦𑁆𑀢𑁄 ‘‘𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀁 𑀧𑀚𑀁 𑀲𑀤𑁂𑀯𑀫𑀦𑀼𑀲𑁆𑀲’’𑀦𑁆𑀢𑀺 𑀆𑀳. 𑀏𑀯𑀁 𑀧𑀜𑁆𑀘𑀳𑀺 𑀧𑀤𑁂𑀳𑀺 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦 𑀢𑁂𑀥𑀸𑀢𑀼𑀓𑀫𑁂𑀯 𑀧𑀭𑀺𑀬𑀸𑀤𑀺𑀦𑁆𑀦𑀦𑁆𑀢𑀺.

𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀻𑀢𑀺 𑀲𑀬𑀦𑁆𑀢𑀺 𑀲𑀸𑀫𑀁 𑀅𑀧𑀭𑀦𑁂𑀬𑁆𑀬𑁄 𑀳𑀼𑀢𑁆𑀯𑀸. 𑀅𑀪𑀺𑀜𑁆𑀜𑀸𑀢𑀺 𑀅𑀪𑀺𑀜𑁆𑀜𑀸𑀬, 𑀅𑀥𑀺𑀓𑁂𑀦 𑀜𑀸𑀡𑁂𑀦 𑀜𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸. 𑀏𑀢𑁂𑀦 𑀅𑀦𑀼𑀫𑀸𑀦𑀸𑀤𑀺𑀧𑀝𑀺𑀓𑁆𑀔𑁂𑀧𑁄 𑀓𑀢𑁄 𑀳𑁄𑀢𑀺. 𑀧𑀯𑁂𑀤𑁂𑀢𑀻𑀢𑀺 𑀩𑁄𑀥𑁂𑀢𑀺 𑀯𑀺𑀜𑁆𑀜𑀸𑀧𑁂𑀢𑀺 𑀧𑀓𑀸𑀲𑁂𑀢𑀺. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁…𑀧𑁂… 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀦𑁆𑀢𑀺 𑀲𑁄 𑀪𑀕𑀯𑀸 𑀲𑀢𑁆𑀢𑁂𑀲𑀼 𑀓𑀸𑀭𑀼𑀜𑁆𑀜𑀢𑀁 𑀧𑀝𑀺𑀘𑁆𑀘 𑀳𑀺𑀢𑁆𑀯𑀸𑀧𑀺 𑀅𑀦𑀼𑀢𑁆𑀢𑀭𑀁 𑀯𑀺𑀯𑁂𑀓𑀲𑀼𑀔𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀢𑀜𑁆𑀘 𑀔𑁄 𑀅𑀧𑁆𑀧𑀁 𑀯𑀸 𑀩𑀳𑀼𑀁 𑀯𑀸 𑀤𑁂𑀲𑁂𑀦𑁆𑀢𑁄 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀧𑁆𑀧𑀓𑀸𑀭𑀫𑁂𑀯 𑀤𑁂𑀲𑁂𑀢𑀺. 𑀆𑀤𑀺𑀫𑁆𑀳𑀺𑀧𑀺 𑀓𑀮𑁆𑀬𑀸𑀡𑀁 𑀪𑀤𑁆𑀤𑀓𑀁 𑀅𑀦𑀯𑀚𑁆𑀚𑀫𑁂𑀯 𑀓𑀢𑁆𑀯𑀸 𑀤𑁂𑀲𑁂𑀢𑀺. 𑀫𑀚𑁆𑀛𑁂𑀧𑀺… 𑀧𑀭𑀺𑀬𑁄𑀲𑀸𑀦𑁂𑀧𑀺 𑀓𑀮𑁆𑀬𑀸𑀡𑀁 𑀪𑀤𑁆𑀤𑀓𑀁 𑀅𑀦𑀯𑀚𑁆𑀚𑀫𑁂𑀯 𑀓𑀢𑁆𑀯𑀸 𑀤𑁂𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁆𑀣 𑀅𑀢𑁆𑀣𑀺 𑀤𑁂𑀲𑀦𑀸𑀬 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁, 𑀅𑀢𑁆𑀣𑀺 𑀲𑀸𑀲𑀦𑀲𑁆𑀲. 𑀤𑁂𑀲𑀦𑀸𑀬 𑀢𑀸𑀯 𑀘𑀢𑀼𑀧𑁆𑀧𑀤𑀺𑀓𑀸𑀬𑀧𑀺 𑀕𑀸𑀣𑀸𑀬 𑀧𑀞𑀫𑀧𑀸𑀤𑁄 𑀆𑀤𑀺 𑀦𑀸𑀫, 𑀢𑀢𑁄 𑀤𑁆𑀯𑁂 𑀫𑀚𑁆𑀛𑀁 𑀦𑀸𑀫, 𑀅𑀦𑁆𑀢𑁂 𑀏𑀓𑁄 𑀧𑀭𑀺𑀬𑁄𑀲𑀸𑀦𑀁 𑀦𑀸𑀫. 𑀏𑀓𑀸𑀦𑀼𑀲𑀦𑁆𑀥𑀺𑀓𑀲𑁆𑀲 𑀲𑀼𑀢𑁆𑀢𑀲𑁆𑀲 𑀦𑀺𑀤𑀸𑀦𑀫𑀸𑀤𑀺, 𑀇𑀤𑀫𑀯𑁄𑀘𑀸𑀢𑀺 𑀧𑀭𑀺𑀬𑁄𑀲𑀸𑀦𑀁, 𑀉𑀪𑀺𑀦𑁆𑀦𑀁 𑀅𑀦𑁆𑀢𑀭𑀸 𑀫𑀚𑁆𑀛𑀁. 𑀅𑀦𑁂𑀓𑀸𑀦𑀼𑀲𑀦𑁆𑀥𑀺𑀓𑀲𑁆𑀲 𑀲𑀼𑀢𑁆𑀢𑀲𑁆𑀲 𑀧𑀞𑀫𑀸𑀦𑀼𑀲𑀦𑁆𑀥𑀺 𑀆𑀤𑀺, 𑀅𑀦𑁆𑀢𑁂 𑀅𑀦𑀼𑀲𑀦𑁆𑀥𑀺 𑀧𑀭𑀺𑀬𑁄𑀲𑀸𑀦𑀁, 𑀫𑀚𑁆𑀛𑁂 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀩𑀳𑀽 𑀯𑀸 𑀫𑀚𑁆𑀛𑀫𑁂𑀯. 𑀲𑀸𑀲𑀦𑀲𑁆𑀲 𑀧𑀦 𑀲𑀻𑀮𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸 𑀆𑀤𑀺 𑀦𑀸𑀫. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀓𑁄 𑀘𑀸𑀤𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁, 𑀲𑀻𑀮𑀜𑁆𑀘 𑀲𑀼𑀯𑀺𑀲𑀼𑀤𑁆𑀥𑀁, 𑀤𑀺𑀝𑁆𑀞𑀺 𑀘 𑀉𑀚𑀼𑀓𑀸’’𑀢𑀺 (𑀲𑀁. 𑀦𑀺. 𑁫.𑁩𑁬𑁯). ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀢𑀣𑀸𑀕𑀢𑁂𑀦 𑀅𑀪𑀺𑀲𑀫𑁆𑀩𑀼𑀤𑁆𑀥𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁄 𑀧𑀦 𑀅𑀭𑀺𑀬𑀫𑀕𑁆𑀕𑁄 𑀫𑀚𑁆𑀛𑀁 𑀦𑀸𑀫, 𑀨𑀮𑀜𑁆𑀘𑁂𑀯 𑀦𑀺𑀩𑁆𑀩𑀸𑀦𑀜𑁆𑀘 𑀧𑀭𑀺𑀬𑁄𑀲𑀸𑀦𑀁 𑀦𑀸𑀫. ‘‘𑀏𑀢𑀤𑀢𑁆𑀣𑀫𑀺𑀤𑀁, 𑀩𑁆𑀭𑀸𑀳𑁆𑀫𑀡, 𑀩𑁆𑀭𑀳𑁆𑀫𑀘𑀭𑀺𑀬𑀫𑁂𑀢𑀁 𑀲𑀸𑀭𑀁, 𑀏𑀢𑀁 𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺 (𑀫. 𑀦𑀺. 𑁧.𑁩𑁨𑁪) 𑀳𑀺 𑀏𑀢𑁆𑀣 𑀨𑀮𑀁 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀦𑀺𑀩𑁆𑀩𑀸𑀦𑁄𑀕𑀥𑀜𑁆𑀳𑀺, 𑀆𑀯𑀼𑀲𑁄 𑀯𑀺𑀲𑀸𑀔, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺 𑀦𑀺𑀩𑁆𑀩𑀸𑀦𑀧𑀭𑀸𑀬𑀡𑀁 𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺 (𑀫. 𑀦𑀺. 𑁧.𑁪𑁬𑁬) 𑀏𑀢𑁆𑀣 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀥 𑀤𑁂𑀲𑀦𑀸𑀬 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀪𑀕𑀯𑀸 𑀳𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀆𑀤𑀺𑀫𑁆𑀳𑀺 𑀲𑀻𑀮𑀁 𑀤𑀲𑁆𑀲𑁂𑀢𑁆𑀯𑀸 𑀫𑀚𑁆𑀛𑁂 𑀫𑀕𑁆𑀕𑀁 𑀧𑀭𑀺𑀬𑁄𑀲𑀸𑀦𑁂 𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡’’𑀦𑁆𑀢𑀺. 𑀢𑀲𑁆𑀫𑀸 𑀅𑀜𑁆𑀜𑁄𑀧𑀺 𑀥𑀫𑁆𑀫𑀓𑀣𑀺𑀓𑁄 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑁋

‘‘𑀆𑀤𑀺𑀫𑁆𑀳𑀺 𑀲𑀻𑀮𑀁 𑀤𑀲𑁆𑀲𑁂𑀬𑁆𑀬, 𑀫𑀚𑁆𑀛𑁂 𑀫𑀕𑁆𑀕𑀁 𑀯𑀺𑀪𑀸𑀯𑀬𑁂;

𑀧𑀭𑀺𑀬𑁄𑀲𑀸𑀦𑀫𑁆𑀳𑀺 𑀦𑀺𑀩𑁆𑀩𑀸𑀦𑀁, 𑀏𑀲𑀸 𑀓𑀣𑀺𑀓𑀲𑀡𑁆𑀞𑀺𑀢𑀻’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁯𑁦);

𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀬𑀲𑁆𑀲 𑀳𑀺 𑀬𑀸𑀕𑀼𑀪𑀢𑁆𑀢𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀯𑀡𑁆𑀡𑀦𑀸 𑀦𑀺𑀲𑁆𑀲𑀺𑀢𑀸 𑀤𑁂𑀲𑀦𑀸 𑀳𑁄𑀢𑀺, 𑀦 𑀲𑁄 𑀲𑀸𑀢𑁆𑀣𑀁 𑀤𑁂𑀲𑁂𑀢𑀺. 𑀪𑀕𑀯𑀸 𑀧𑀦 𑀢𑀣𑀸𑀭𑀽𑀧𑀁 𑀤𑁂𑀲𑀦𑀁 𑀧𑀳𑀸𑀬 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀦𑀺𑀲𑁆𑀲𑀺𑀢𑀁 𑀤𑁂𑀲𑀦𑀁 𑀤𑁂𑀲𑁂𑀢𑀺. 𑀢𑀲𑁆𑀫𑀸 ‘‘𑀲𑀸𑀢𑁆𑀣𑀁 𑀤𑁂𑀲𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀲 𑀧𑀦 𑀤𑁂𑀲𑀦𑀸 𑀏𑀓𑀩𑁆𑀬𑀜𑁆𑀚𑀦𑀸𑀤𑀺𑀬𑀼𑀢𑁆𑀢𑀸 𑀯𑀸 𑀲𑀩𑁆𑀩𑀦𑀺𑀭𑁄𑀝𑁆𑀞𑀩𑁆𑀬𑀜𑁆𑀚𑀦𑀸 𑀯𑀸 𑀲𑀩𑁆𑀩𑀯𑀺𑀲𑁆𑀲𑀝𑁆𑀞𑀲𑀩𑁆𑀩𑀦𑀺𑀕𑁆𑀕𑀳𑀻𑀢𑀩𑁆𑀬𑀜𑁆𑀚𑀦𑀸 𑀯𑀸, 𑀢𑀲𑁆𑀲 𑀤𑀫𑀺𑀴𑀓𑀺𑀭𑀸𑀲𑀯𑀭𑀸𑀤𑀺𑀫𑀺𑀮𑀓𑁆𑀔𑀽𑀦𑀁 𑀪𑀸𑀲𑀸 𑀯𑀺𑀬 𑀩𑁆𑀬𑀜𑁆𑀚𑀦𑀧𑀸𑀭𑀺𑀧𑀽𑀭𑀺𑀬𑀸 𑀅𑀪𑀸𑀯𑀢𑁄 𑀅𑀩𑁆𑀬𑀜𑁆𑀚𑀦𑀸 𑀦𑀸𑀫 𑀤𑁂𑀲𑀦𑀸 𑀳𑁄𑀢𑀺. 𑀪𑀕𑀯𑀸 𑀧𑀦 𑁋

‘‘𑀲𑀺𑀣𑀺𑀮𑀁 𑀥𑀦𑀺𑀢𑀜𑁆𑀘 𑀤𑀻𑀖𑀭𑀲𑁆𑀲𑀁, 𑀕𑀭𑀼𑀓𑀁 𑀮𑀳𑀼𑀓𑀜𑁆𑀘 𑀦𑀺𑀕𑁆𑀕𑀳𑀻𑀢𑀁;

𑀲𑀫𑁆𑀩𑀦𑁆𑀥𑀁 𑀯𑀯𑀢𑁆𑀣𑀺𑀢𑀁 𑀯𑀺𑀫𑀼𑀢𑁆𑀢𑀁, 𑀤𑀲𑀥𑀸 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑀸 𑀧𑀪𑁂𑀤𑁄’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁯𑁦) 𑁋

𑀏𑀯𑀁 𑀯𑀼𑀢𑁆𑀢𑀁 𑀤𑀲𑀯𑀺𑀥𑀁 𑀩𑁆𑀬𑀜𑁆𑀚𑀦𑀁 𑀅𑀫𑀓𑁆𑀔𑁂𑀢𑁆𑀯𑀸 𑀧𑀭𑀺𑀧𑀼𑀡𑁆𑀡𑀩𑁆𑀬𑀜𑁆𑀚𑀦𑀫𑁂𑀯 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀢𑀲𑁆𑀫𑀸 ‘‘𑀲𑀩𑁆𑀬𑀜𑁆𑀚𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀏𑀢𑁆𑀣 𑀓𑁂𑀯𑀮𑀦𑁆𑀢𑀺 𑀲𑀓𑀮𑀸𑀥𑀺𑀯𑀘𑀦𑀁. 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀦𑀽𑀦𑀸𑀥𑀺𑀓𑀯𑀘𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀲𑀓𑀮𑀧𑀭𑀺𑀧𑀼𑀡𑁆𑀡𑀫𑁂𑀯 𑀤𑁂𑀲𑁂𑀢𑀺, 𑀏𑀓𑀤𑁂𑀲𑀦𑀸𑀧𑀺 𑀅𑀧𑀭𑀺𑀧𑀼𑀡𑁆𑀡𑀸 𑀦𑀢𑁆𑀣𑀻’’𑀢𑀺. 𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁. 𑀬𑁄 𑀳𑀺 𑀇𑀤𑀁 𑀥𑀫𑁆𑀫𑀤𑁂𑀲𑀦𑀁 𑀦𑀺𑀲𑁆𑀲𑀸𑀬 𑀮𑀸𑀪𑀁 𑀯𑀸 𑀲𑀓𑁆𑀓𑀸𑀭𑀁 𑀯𑀸 𑀮𑀪𑀺𑀲𑁆𑀲𑀸𑀫𑀻𑀢𑀺 𑀤𑁂𑀲𑁂𑀢𑀺, 𑀢𑀲𑁆𑀲 𑀅𑀧𑀭𑀺𑀲𑀼𑀤𑁆𑀥𑀸 𑀤𑁂𑀲𑀦𑀸 𑀳𑁄𑀢𑀺. 𑀪𑀕𑀯𑀸 𑀧𑀦 𑀮𑁄𑀓𑀸𑀫𑀺𑀲𑀦𑀺𑀭𑀧𑁂𑀓𑁆𑀔𑁄 𑀳𑀺𑀢𑀨𑀭𑀡𑁂𑀦 𑀫𑁂𑀢𑁆𑀢𑀸𑀪𑀸𑀯𑀦𑀸𑀬 𑀫𑀼𑀤𑀼𑀳𑀤𑀬𑁄 𑀉𑀮𑁆𑀮𑀼𑀫𑁆𑀧𑀦𑀲𑀪𑀸𑀯𑀲𑀡𑁆𑀞𑀺𑀢𑁂𑀦 𑀘𑀺𑀢𑁆𑀢𑁂𑀦 𑀤𑁂𑀲𑁂𑀢𑀺. 𑀢𑀲𑁆𑀫𑀸 ‘‘𑀧𑀭𑀺𑀲𑀼𑀤𑁆𑀥𑀁 𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀻𑀢𑀺 𑀏𑀢𑁆𑀣 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀲𑀓𑀮𑀲𑀸𑀲𑀦𑀁. 𑀢𑀲𑁆𑀫𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀻𑀢𑀺 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁…𑀧𑁂… 𑀧𑀭𑀺𑀲𑀼𑀤𑁆𑀥𑀁, 𑀏𑀯𑀁 𑀤𑁂𑀲𑁂𑀦𑁆𑀢𑁄 𑀘 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀁 𑀲𑀓𑀮𑀲𑀸𑀲𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑁂𑀝𑁆𑀞𑀝𑁆𑀞𑁂𑀦 𑀩𑁆𑀭𑀳𑁆𑀫𑀪𑀽𑀢𑀁 𑀘𑀭𑀺𑀬𑀁. 𑀩𑁆𑀭𑀳𑁆𑀫𑀪𑀽𑀢𑀸𑀦𑀁 𑀯𑀸 𑀩𑀼𑀤𑁆𑀥𑀸𑀤𑀻𑀦𑀁 𑀘𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀁 𑀥𑀫𑁆𑀫𑀦𑁆𑀢𑀺 𑀢𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑀫𑁆𑀧𑀤𑀁 𑀥𑀫𑁆𑀫𑀁. 𑀲𑀼𑀡𑀸𑀢𑀺 𑀕𑀳𑀧𑀢𑀺 𑀯𑀸𑀢𑀺 𑀓𑀲𑁆𑀫𑀸 𑀧𑀞𑀫𑀁 𑀕𑀳𑀧𑀢𑀺𑀁 𑀦𑀺𑀤𑁆𑀤𑀺𑀲𑀢𑀻𑀢𑀺? 𑀦𑀺𑀳𑀢𑀫𑀸𑀦𑀢𑁆𑀢𑀸 𑀉𑀲𑁆𑀲𑀦𑁆𑀦𑀢𑁆𑀢𑀸 𑀘. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀔𑀢𑁆𑀢𑀺𑀬𑀓𑀼𑀮𑀢𑁄 𑀧𑀩𑁆𑀩𑀚𑀺𑀢𑀸 𑀚𑀸𑀢𑀺𑀁 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀓𑀭𑁄𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑀓𑀼𑀮𑀸 𑀧𑀩𑁆𑀩𑀚𑀺𑀢𑀸 𑀫𑀦𑁆𑀢𑁂 𑀦𑀺𑀲𑁆𑀲𑀸𑀬 𑀫𑀸𑀦𑀁 𑀓𑀭𑁄𑀦𑁆𑀢𑀺. 𑀳𑀻𑀦𑀚𑀘𑁆𑀘𑀓𑀼𑀮𑀸 𑀧𑀩𑁆𑀩𑀚𑀺𑀢𑀸 𑀅𑀢𑁆𑀢𑀦𑁄 𑀯𑀺𑀚𑀸𑀢𑀺𑀢𑀸𑀬 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀕𑀳𑀧𑀢𑀺𑀤𑀸𑀭𑀓𑀸 𑀧𑀦 𑀓𑀘𑁆𑀙𑁂𑀳𑀺 𑀲𑁂𑀤𑀁 𑀫𑀼𑀜𑁆𑀘𑀦𑁆𑀢𑁂𑀳𑀺 𑀧𑀺𑀝𑁆𑀞𑀺𑀬𑀸 𑀮𑁄𑀡𑀁 𑀧𑀼𑀧𑁆𑀨𑀫𑀸𑀦𑀸𑀬 𑀪𑀽𑀫𑀺𑀁 𑀓𑀲𑀺𑀢𑁆𑀯𑀸 𑀦𑀺𑀳𑀢𑀫𑀸𑀦𑀤𑀧𑁆𑀧𑀸 𑀳𑁄𑀦𑁆𑀢𑀺. 𑀢𑁂 𑀧𑀩𑁆𑀩𑀚𑀺𑀢𑁆𑀯𑀸 𑀫𑀸𑀦𑀁 𑀯𑀸 𑀤𑀧𑁆𑀧𑀁 𑀯𑀸 𑀅𑀓𑀢𑁆𑀯𑀸 𑀬𑀣𑀸𑀩𑀮𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀲𑀓𑁆𑀓𑁄𑀦𑁆𑀢𑀺 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀢𑀼𑀁. 𑀇𑀢𑀭𑁂𑀳𑀺 𑀘 𑀓𑀼𑀮𑁂𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀸 𑀦𑀸𑀫 𑀦 𑀩𑀳𑀼𑀓𑀸, 𑀕𑀳𑀧𑀢𑀺𑀓𑀸𑀯 𑀩𑀳𑀼𑀓𑀸, 𑀇𑀢𑀺 𑀦𑀺𑀳𑀢𑀫𑀸𑀦𑀢𑁆𑀢𑀸 𑀉𑀲𑁆𑀲𑀦𑁆𑀦𑀢𑁆𑀢𑀸 𑀘 𑀧𑀞𑀫𑀁 𑀕𑀳𑀧𑀢𑀺𑀁 𑀦𑀺𑀤𑁆𑀤𑀺𑀲𑀢𑀻𑀢𑀺.

𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀸𑀢𑀺 𑀇𑀢𑀭𑁂𑀲𑀁 𑀯𑀸 𑀓𑀼𑀮𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁. 𑀧𑀘𑁆𑀘𑀸𑀚𑀸𑀢𑁄𑀢𑀺 𑀧𑀢𑀺𑀚𑀸𑀢𑁄. 𑀢𑀣𑀸𑀕𑀢𑁂 𑀲𑀤𑁆𑀥𑀁 𑀧𑀝𑀺𑀮𑀪𑀢𑀻𑀢𑀺 𑀧𑀭𑀺𑀲𑀼𑀤𑁆𑀥𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀥𑀫𑁆𑀫𑀲𑁆𑀲𑀸𑀫𑀺𑀫𑁆𑀳𑀺 𑀢𑀣𑀸𑀕𑀢𑁂 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀪𑀕𑀯𑀸’’𑀢𑀺 𑀲𑀤𑁆𑀥𑀁 𑀧𑀝𑀺𑀮𑀪𑀢𑀺. 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀻𑀢𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄𑀢𑀺 𑀲𑀘𑁂𑀧𑀺 𑀲𑀝𑁆𑀞𑀺𑀳𑀢𑁆𑀣𑁂 𑀖𑀭𑁂 𑀬𑁄𑀚𑀦𑀲𑀢𑀦𑁆𑀢𑀭𑁂𑀧𑀺 𑀯𑀸 𑀤𑁆𑀯𑁂 𑀚𑀸𑀬𑀫𑁆𑀧𑀢𑀺𑀓𑀸 𑀯𑀲𑀦𑁆𑀢𑀺, 𑀢𑀣𑀸𑀧𑀺 𑀦𑁂𑀲𑀁 𑀲𑀓𑀺𑀜𑁆𑀘𑀦𑀲𑀧𑀮𑀺𑀩𑁄𑀥𑀝𑁆𑀞𑁂𑀦 𑀖𑀭𑀸𑀯𑀸𑀲𑁄 𑀲𑀫𑁆𑀩𑀸𑀥𑁄𑀬𑁂𑀯. 𑀭𑀚𑁄𑀧𑀣𑁄𑀢𑀺 𑀭𑀸𑀕𑀭𑀚𑀸𑀤𑀻𑀦𑀁 𑀉𑀝𑁆𑀞𑀸𑀦𑀝𑁆𑀞𑀸𑀦𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀆𑀕𑀫𑀦𑀧𑀣𑁄𑀢𑀺𑀧𑀺 𑀯𑀝𑁆𑀝𑀢𑀺. 𑀅𑀮𑀕𑁆𑀕𑀦𑀝𑁆𑀞𑁂𑀦 𑀅𑀩𑁆𑀪𑁄𑀓𑀸𑀲𑁄 𑀯𑀺𑀬𑀸𑀢𑀺 𑀅𑀩𑁆𑀪𑁄𑀓𑀸𑀲𑁄. 𑀧𑀩𑁆𑀩𑀚𑀺𑀢𑁄 𑀳𑀺 𑀓𑀽𑀝𑀸𑀕𑀸𑀭𑀭𑀢𑀦𑀧𑀸𑀲𑀸𑀤𑀤𑁂𑀯𑀯𑀺𑀫𑀸𑀦𑀸𑀤𑀻𑀲𑀼 𑀧𑀺𑀳𑀺𑀢𑀤𑁆𑀯𑀸𑀭𑀯𑀸𑀢𑀧𑀸𑀦𑁂𑀲𑀼 𑀧𑀝𑀺𑀘𑁆𑀙𑀦𑁆𑀦𑁂𑀲𑀼 𑀯𑀲𑀦𑁆𑀢𑁄𑀧𑀺 𑀦𑁂𑀯 𑀮𑀕𑁆𑀕𑀢𑀺 𑀦 𑀲𑀚𑁆𑀚𑀢𑀺 𑀦 𑀩𑀚𑁆𑀛𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸’’𑀢𑀺. 𑀅𑀧𑀺𑀘 𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄 𑀓𑀼𑀲𑀮𑀓𑀺𑀭𑀺𑀬𑀸𑀬 𑀑𑀓𑀸𑀲𑀸𑀪𑀸𑀯𑀢𑁄. 𑀭𑀚𑁄𑀧𑀣𑁄 𑀅𑀲𑀁𑀯𑀼𑀢𑀲𑀗𑁆𑀓𑀸𑀭𑀝𑁆𑀞𑀸𑀦𑀁 𑀯𑀺𑀬 𑀭𑀚𑀸𑀦𑀁 𑀓𑀺𑀮𑁂𑀲𑀭𑀚𑀸𑀦𑀁 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀢𑁄. 𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸 𑀓𑀼𑀲𑀮𑀓𑀺𑀭𑀺𑀬𑀸𑀬 𑀬𑀣𑀸𑀲𑀼𑀔𑀁 𑀑𑀓𑀸𑀲𑀲𑀩𑁆𑀪𑀸𑀯𑀢𑁄.

𑀦𑀬𑀺𑀤𑀁 𑀲𑀼𑀓𑀭𑀁…𑀧𑁂… 𑀧𑀩𑁆𑀩𑀚𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀅𑀬𑀁 𑀲𑀗𑁆𑀔𑁂𑀧𑀓𑀣𑀸 𑁋 𑀬𑀤𑁂𑀢𑀁 𑀲𑀺𑀓𑁆𑀔𑀢𑁆𑀢𑀬𑀩𑁆𑀭𑀳𑁆𑀫𑀘𑀭𑀺𑀬𑀁 𑀏𑀓𑀫𑁆𑀧𑀺 𑀤𑀺𑀯𑀲𑀁 𑀅𑀔𑀡𑁆𑀟𑀁 𑀓𑀢𑁆𑀯𑀸 𑀘𑀭𑀺𑀫𑀓𑀘𑀺𑀢𑁆𑀢𑀁 𑀧𑀸𑀧𑁂𑀢𑀩𑁆𑀩𑀢𑀸𑀬 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁. 𑀏𑀓𑀤𑀺𑀯𑀲𑀫𑁆𑀧𑀺 𑀘 𑀓𑀺𑀮𑁂𑀲𑀫𑀮𑁂𑀦 𑀅𑀫𑀮𑀺𑀦𑀁 𑀓𑀢𑁆𑀯𑀸 𑀘𑀭𑀺𑀫𑀓𑀘𑀺𑀢𑁆𑀢𑀁 𑀧𑀸𑀧𑁂𑀢𑀩𑁆𑀩𑀢𑀸𑀬 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁, 𑀲𑀗𑁆𑀔𑀮𑀺𑀔𑀺𑀢𑀁 𑀮𑀺𑀔𑀺𑀢𑀲𑀗𑁆𑀔𑀲𑀤𑀺𑀲𑀁 𑀥𑁄𑀢𑀲𑀗𑁆𑀔𑀲𑀧𑁆𑀧𑀝𑀺𑀪𑀸𑀕𑀁 𑀘𑀭𑀺𑀢𑀩𑁆𑀩𑀁, 𑀇𑀤𑀁 𑀦 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑁂𑀦 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁…𑀧𑁂… 𑀘𑀭𑀺𑀢𑀼𑀁. 𑀬𑀁𑀦𑀽𑀦𑀸𑀳𑀁 𑀓𑁂𑀲𑁂 𑀘 𑀫𑀲𑁆𑀲𑀼𑀜𑁆𑀘 𑀑𑀳𑀸𑀭𑁂𑀢𑁆𑀯𑀸 𑀓𑀸𑀲𑀸𑀬𑀭𑀲𑀧𑀻𑀢𑀢𑀸𑀬 𑀓𑀸𑀲𑀸𑀬𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀧𑀭𑀺𑀤𑀳𑀺𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁂𑀬𑁆𑀬𑀦𑁆𑀢𑀺. 𑀏𑀢𑁆𑀣 𑀘 𑀬𑀲𑁆𑀫𑀸 𑀅𑀕𑀸𑀭𑀲𑁆𑀲 𑀳𑀺𑀢𑀁 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀁 𑀅𑀕𑀸𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀜𑁆𑀘 𑀧𑀩𑁆𑀩𑀚𑁆𑀚𑀸𑀬 𑀦𑀢𑁆𑀣𑀺. 𑀢𑀲𑁆𑀫𑀸 𑀧𑀩𑁆𑀩𑀚𑁆𑀚𑀸 𑀅𑀦𑀕𑀸𑀭𑀺𑀬𑀸𑀢𑀺 𑀜𑀸𑀢𑀩𑁆𑀩𑀸, 𑀢𑀁 𑀅𑀦𑀕𑀸𑀭𑀺𑀬𑀁. 𑀧𑀩𑁆𑀩𑀚𑁂𑀬𑁆𑀬𑀦𑁆𑀢𑀺 𑀧𑀝𑀺𑀧𑀚𑁆𑀚𑁂𑀬𑁆𑀬𑀁. 𑀅𑀧𑁆𑀧𑀁 𑀯𑀸𑀢𑀺 𑀲𑀳𑀲𑁆𑀲𑀢𑁄 𑀳𑁂𑀝𑁆𑀞𑀸 𑀪𑁄𑀕𑀓𑁆𑀔𑀦𑁆𑀥𑁄 𑀅𑀧𑁆𑀧𑁄 𑀦𑀸𑀫 𑀳𑁄𑀢𑀺, 𑀲𑀳𑀲𑁆𑀲𑀢𑁄 𑀧𑀝𑁆𑀞𑀸𑀬 𑀫𑀳𑀸. 𑀆𑀩𑀦𑁆𑀥𑀦𑀝𑁆𑀞𑁂𑀦 𑀜𑀸𑀢𑀺 𑀏𑀯 𑀧𑀭𑀺𑀯𑀝𑁆𑀝𑁄 𑀜𑀸𑀢𑀺𑀧𑀭𑀺𑀯𑀝𑁆𑀝𑁄. 𑀲𑁄 𑀯𑀻𑀲𑀢𑀺𑀬𑀸 𑀳𑁂𑀝𑁆𑀞𑀸 𑀅𑀧𑁆𑀧𑁄 𑀳𑁄𑀢𑀺, 𑀯𑀻𑀲𑀢𑀺𑀬𑀸 𑀧𑀝𑁆𑀞𑀸𑀬 𑀫𑀳𑀸.

𑁨𑁯𑁨. 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄𑀢𑀺 𑀬𑀸 𑀪𑀺𑀓𑁆𑀔𑀽𑀦𑀁 𑀅𑀥𑀺𑀲𑀻𑀮𑀲𑀗𑁆𑀔𑀸𑀢𑀸 𑀲𑀺𑀓𑁆𑀔𑀸, 𑀢𑀜𑁆𑀘, 𑀬𑀢𑁆𑀣 𑀘𑁂𑀢𑁂 𑀲𑀳 𑀚𑀻𑀯𑀦𑁆𑀢𑀺 𑀏𑀓𑀚𑀻𑀯𑀺𑀓𑀸 𑀲𑀪𑀸𑀕𑀯𑀼𑀢𑁆𑀢𑀺𑀦𑁄 𑀳𑁄𑀦𑁆𑀢𑀺, 𑀢𑀁 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀲𑀗𑁆𑀔𑀸𑀢𑀁 𑀲𑀸𑀚𑀻𑀯𑀜𑁆𑀘 𑀢𑀢𑁆𑀣 𑀲𑀺𑀓𑁆𑀔𑀦𑀪𑀸𑀯𑁂𑀦 𑀲𑀫𑀸𑀧𑀦𑁆𑀦𑁄𑀢𑀺 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀲𑀸𑀚𑀻𑀯𑀲𑀫𑀸𑀧𑀦𑁆𑀦𑁄. 𑀲𑀫𑀸𑀧𑀦𑁆𑀦𑁄𑀢𑀺 𑀲𑀺𑀓𑁆𑀔𑀁 𑀧𑀭𑀺𑀧𑀽𑀭𑁂𑀦𑁆𑀢𑁄, 𑀲𑀸𑀚𑀻𑀯𑀜𑁆𑀘 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀳𑀼𑀢𑁆𑀯𑀸 𑀢𑀤𑀼𑀪𑀬𑀁 𑀉𑀧𑀕𑀢𑁄𑀢𑀺 𑀅𑀢𑁆𑀣𑁄. 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬𑀸𑀢𑀺𑀆𑀤𑀻𑀲𑀼 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀣𑀸 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀸 𑀏𑀯. 𑀧𑀳𑀸𑀬𑀸𑀢𑀺 𑀇𑀫𑀁 𑀧𑀸𑀡𑀸𑀢𑀺𑀧𑀸𑀢𑀘𑁂𑀢𑀦𑀸𑀲𑀗𑁆𑀔𑀸𑀢𑀁 𑀤𑀼𑀲𑁆𑀲𑀻𑀮𑁆𑀬𑀁 𑀧𑀚𑀳𑀺𑀢𑁆𑀯𑀸. 𑀧𑀝𑀺𑀯𑀺𑀭𑀢𑁄 𑀳𑁄𑀢𑀻𑀢𑀺 𑀧𑀳𑀻𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀢𑁄 𑀤𑀼𑀲𑁆𑀲𑀻𑀮𑁆𑀬𑀢𑁄 𑀑𑀭𑀢𑁄 𑀯𑀺𑀭𑀢𑁄𑀯 𑀳𑁄𑀢𑀺. 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄𑀢𑀺 𑀧𑀭𑀽𑀧𑀖𑀸𑀢𑀢𑁆𑀣𑀸𑀬 𑀤𑀡𑁆𑀟𑀁 𑀯𑀸 𑀲𑀢𑁆𑀣𑀁 𑀯𑀸 𑀆𑀤𑀸𑀬 𑀅𑀯𑀢𑁆𑀢𑀦𑀢𑁄 𑀦𑀺𑀓𑁆𑀔𑀺𑀢𑁆𑀢𑀤𑀡𑁆𑀟𑁄 𑀘𑁂𑀯 𑀦𑀺𑀓𑁆𑀔𑀺𑀢𑁆𑀢𑀲𑀢𑁆𑀣𑁄 𑀘𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀞𑀧𑁂𑀢𑁆𑀯𑀸 𑀤𑀡𑁆𑀟𑀁 𑀲𑀩𑁆𑀩𑀫𑁆𑀧𑀺 𑀅𑀯𑀲𑁂𑀲𑀁 𑀉𑀧𑀓𑀭𑀡𑀁 𑀲𑀢𑁆𑀢𑀸𑀦𑀁 𑀯𑀺𑀳𑀺𑀁𑀲𑀦𑀪𑀸𑀯𑀢𑁄 𑀲𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀧𑀦 𑀪𑀺𑀓𑁆𑀔𑀽 𑀓𑀢𑁆𑀢𑀭𑀤𑀡𑁆𑀟𑀁 𑀯𑀸 𑀤𑀦𑁆𑀢𑀓𑀝𑁆𑀞𑀯𑀸𑀲𑀺𑀁 𑀯𑀸 𑀧𑀺𑀧𑁆𑀨𑀮𑀓𑀁 𑀯𑀸 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀺, 𑀦 𑀢𑀁 𑀧𑀭𑀽𑀧𑀖𑀸𑀢𑀢𑁆𑀣𑀸𑀬. 𑀢𑀲𑁆𑀫𑀸 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀮𑀚𑁆𑀚𑀻𑀢𑀺 𑀧𑀸𑀧𑀚𑀺𑀕𑀼𑀘𑁆𑀙𑀦𑀮𑀓𑁆𑀔𑀡𑀸𑀬 𑀮𑀚𑁆𑀚𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀤𑀬𑀸𑀧𑀦𑁆𑀦𑁄𑀢𑀺 𑀤𑀬𑀁 𑀫𑁂𑀢𑁆𑀢𑀘𑀺𑀢𑁆𑀢𑀢𑀁 𑀆𑀧𑀦𑁆𑀦𑁄. 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻𑀢𑀺 𑀲𑀩𑁆𑀩𑁂 𑀧𑀸𑀡𑀪𑀽𑀢𑁂 𑀳𑀺𑀢𑁂𑀦 𑀅𑀦𑀼𑀓𑀫𑁆𑀧𑀓𑁄. 𑀢𑀸𑀬 𑀤𑀬𑀸𑀧𑀦𑁆𑀦𑀢𑀸𑀬 𑀲𑀩𑁆𑀩𑁂𑀲𑀁 𑀧𑀸𑀡𑀪𑀽𑀢𑀸𑀦𑀁 𑀳𑀺𑀢𑀘𑀺𑀢𑁆𑀢𑀓𑁄𑀢𑀺 𑀅𑀢𑁆𑀣𑁄. 𑀯𑀺𑀳𑀭𑀢𑀻𑀢𑀺 𑀇𑀭𑀺𑀬𑀢𑀺 𑀧𑀸𑀮𑁂𑀢𑀺.

𑀤𑀺𑀦𑁆𑀦𑀫𑁂𑀯 𑀆𑀤𑀺𑀬𑀢𑀻𑀢𑀺 𑀤𑀺𑀦𑁆𑀦𑀸𑀤𑀸𑀬𑀻. 𑀘𑀺𑀢𑁆𑀢𑁂𑀦𑀧𑀺 𑀤𑀺𑀦𑁆𑀦𑀫𑁂𑀯 𑀧𑀝𑀺𑀓𑀗𑁆𑀔𑀢𑀻𑀢𑀺 𑀤𑀺𑀦𑁆𑀦𑀧𑀸𑀝𑀺𑀓𑀗𑁆𑀔𑀻. 𑀣𑁂𑀦𑁂𑀢𑀻𑀢𑀺 𑀣𑁂𑀦𑁄. 𑀦 𑀣𑁂𑀦𑁂𑀦 𑀅𑀣𑁂𑀦𑁂𑀦. 𑀅𑀣𑁂𑀦𑀢𑁆𑀢𑀸𑀬𑁂𑀯 𑀲𑀼𑀘𑀺𑀪𑀽𑀢𑁂𑀦. 𑀅𑀢𑁆𑀢𑀦𑀸𑀢𑀺 𑀅𑀢𑁆𑀢𑀪𑀸𑀯𑁂𑀦, 𑀅𑀣𑁂𑀦𑀁 𑀲𑀼𑀘𑀺𑀪𑀽𑀢𑀁 𑀅𑀢𑁆𑀢𑀪𑀸𑀯𑀁 𑀓𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀅𑀲𑁂𑀝𑁆𑀞𑀘𑀭𑀺𑀬𑀁. 𑀩𑁆𑀭𑀳𑁆𑀫𑀁 𑀲𑁂𑀝𑁆𑀞𑀁 𑀆𑀘𑀸𑀭𑀁 𑀘𑀭𑀢𑀻𑀢𑀺 𑀩𑁆𑀭𑀳𑁆𑀫𑀘𑀸𑀭𑀻. 𑀆𑀭𑀸𑀘𑀸𑀭𑀻𑀢𑀺 𑀅𑀩𑁆𑀭𑀳𑁆𑀫𑀘𑀭𑀺𑀬𑀢𑁄 𑀤𑀽𑀭𑀘𑀸𑀭𑀻. 𑀫𑁂𑀣𑀼𑀦𑀸𑀢𑀺 𑀭𑀸𑀕𑀧𑀭𑀺𑀬𑀼𑀝𑁆𑀞𑀸𑀦𑀯𑀲𑁂𑀦 𑀲𑀤𑀺𑀲𑀢𑁆𑀢𑀸 𑀫𑁂𑀣𑀼𑀦𑀓𑀸𑀢𑀺 𑀮𑀤𑁆𑀥𑀯𑁄𑀳𑀸𑀭𑁂𑀳𑀺 𑀧𑀝𑀺𑀲𑁂𑀯𑀺𑀢𑀩𑁆𑀩𑀢𑁄 𑀫𑁂𑀣𑀼𑀦𑀸𑀢𑀺 𑀲𑀗𑁆𑀔𑀁 𑀕𑀢𑀸 𑀅𑀲𑀤𑁆𑀥𑀫𑁆𑀫𑀸. 𑀕𑀸𑀫𑀥𑀫𑁆𑀫𑀸𑀢𑀺 𑀕𑀸𑀫𑀯𑀸𑀲𑀻𑀦𑀁 𑀥𑀫𑁆𑀫𑀸.

𑀲𑀘𑁆𑀘𑀁 𑀯𑀤𑀢𑀻𑀢𑀺 𑀲𑀘𑁆𑀘𑀯𑀸𑀤𑀻. 𑀲𑀘𑁆𑀘𑁂𑀦 𑀲𑀘𑁆𑀘𑀁 𑀲𑀦𑁆𑀤𑀳𑀢𑀺 𑀖𑀝𑁂𑀢𑀻𑀢𑀺 𑀲𑀘𑁆𑀘𑀲𑀦𑁆𑀥𑁄, 𑀦 𑀅𑀦𑁆𑀢𑀭𑀦𑁆𑀢𑀭𑀸 𑀫𑀼𑀲𑀸 𑀯𑀤𑀢𑀻𑀢𑀺 𑀅𑀢𑁆𑀣𑁄. 𑀬𑁄 𑀳𑀺 𑀧𑀼𑀭𑀺𑀲𑁄 𑀓𑀤𑀸𑀘𑀺 𑀫𑀼𑀲𑀸 𑀯𑀤𑀢𑀺, 𑀓𑀤𑀸𑀘𑀺 𑀲𑀘𑁆𑀘𑀁, 𑀢𑀲𑁆𑀲 𑀫𑀼𑀲𑀸𑀯𑀸𑀤𑁂𑀦 𑀅𑀦𑁆𑀢𑀭𑀺𑀢𑀢𑁆𑀢𑀸 𑀲𑀘𑁆𑀘𑀁 𑀲𑀘𑁆𑀘𑁂𑀦 𑀦 𑀖𑀝𑀻𑀬𑀢𑀺. 𑀢𑀲𑁆𑀫𑀸 𑀦 𑀲𑁄 𑀲𑀘𑁆𑀘𑀲𑀦𑁆𑀥𑁄, 𑀅𑀬𑀁 𑀧𑀦 𑀦 𑀢𑀸𑀤𑀺𑀲𑁄, 𑀚𑀻𑀯𑀺𑀢𑀳𑁂𑀢𑀼𑀧𑀺 𑀫𑀼𑀲𑀸𑀯𑀸𑀤𑀁 𑀅𑀯𑀢𑁆𑀯𑀸 𑀲𑀘𑁆𑀘𑁂𑀦 𑀲𑀘𑁆𑀘𑀁 𑀲𑀦𑁆𑀤𑀳𑀢𑀺𑀬𑁂𑀯𑀸𑀢𑀺 𑀲𑀘𑁆𑀘𑀲𑀦𑁆𑀥𑁄. 𑀣𑁂𑀢𑁄𑀢𑀺 𑀣𑀺𑀭𑁄, 𑀣𑀺𑀭𑀓𑀣𑁄𑀢𑀺 𑀅𑀢𑁆𑀣𑁄. 𑀏𑀓𑁄 𑀳𑀺 𑀧𑀼𑀕𑁆𑀕𑀮𑁄 𑀳𑀮𑀺𑀤𑁆𑀤𑀺𑀭𑀸𑀕𑁄 𑀯𑀺𑀬, 𑀣𑀼𑀲𑀭𑀸𑀲𑀺𑀫𑁆𑀳𑀺 𑀦𑀺𑀔𑀸𑀢𑀔𑀸𑀡𑀼 𑀯𑀺𑀬, 𑀅𑀲𑁆𑀲𑀧𑀺𑀝𑁆𑀞𑁂 𑀞𑀧𑀺𑀢𑀓𑀼𑀫𑁆𑀪𑀡𑁆𑀟𑀫𑀺𑀯 𑀘 𑀦 𑀣𑀺𑀭𑀓𑀣𑁄 𑀳𑁄𑀢𑀺. 𑀏𑀓𑁄 𑀧𑀸𑀲𑀸𑀡𑀮𑁂𑀔𑀸 𑀯𑀺𑀬 𑀇𑀦𑁆𑀤𑀔𑀺𑀮𑁄 𑀯𑀺𑀬 𑀘 𑀣𑀺𑀭𑀓𑀣𑁄 𑀳𑁄𑀢𑀺; 𑀅𑀲𑀺𑀦𑀸 𑀲𑀻𑀲𑁂 𑀙𑀺𑀚𑁆𑀚𑀦𑁆𑀢𑁂𑀧𑀺 𑀤𑁆𑀯𑁂 𑀓𑀣𑀸 𑀦 𑀓𑀣𑁂𑀢𑀺; 𑀅𑀬𑀁 𑀯𑀼𑀘𑁆𑀘𑀢𑀺 𑀣𑁂𑀢𑁄. 𑀧𑀘𑁆𑀘𑀬𑀺𑀓𑁄𑀢𑀺 𑀧𑀢𑁆𑀢𑀺𑀬𑀸𑀬𑀺𑀢𑀩𑁆𑀩𑀓𑁄, 𑀲𑀤𑁆𑀥𑀸𑀬𑀺𑀓𑁄𑀢𑀺 𑀅𑀢𑁆𑀣𑁄. 𑀏𑀓𑀘𑁆𑀘𑁄 𑀳𑀺 𑀧𑀼𑀕𑁆𑀕𑀮𑁄 𑀦 𑀧𑀘𑁆𑀘𑀬𑀺𑀓𑁄 𑀳𑁄𑀢𑀺, ‘‘𑀇𑀤𑀁 𑀓𑁂𑀦 𑀯𑀼𑀢𑁆𑀢𑀁, 𑀅𑀲𑀼𑀓𑁂𑀦𑀸’’𑀢𑀺 𑀯𑀼𑀢𑁆𑀢𑁂 ‘‘𑀫𑀸 𑀢𑀲𑁆𑀲 𑀯𑀘𑀦𑀁 𑀲𑀤𑁆𑀤𑀳𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺. 𑀏𑀓𑁄 𑀧𑀘𑁆𑀘𑀬𑀺𑀓𑁄 𑀳𑁄𑀢𑀺, ‘‘𑀇𑀤𑀁 𑀓𑁂𑀦 𑀯𑀼𑀢𑁆𑀢𑀁, 𑀅𑀲𑀼𑀓𑁂𑀦𑀸’’𑀢𑀺 𑀯𑀼𑀢𑁆𑀢𑁂, ‘‘𑀬𑀤𑀺 𑀢𑁂𑀦 𑀯𑀼𑀢𑁆𑀢𑀁, 𑀇𑀤𑀫𑁂𑀯 𑀧𑀫𑀸𑀡𑀁, 𑀇𑀤𑀸𑀦𑀺 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁 𑀦𑀢𑁆𑀣𑀺, 𑀏𑀯𑀫𑁂𑀯 𑀇𑀤’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀘𑁆𑀘𑀬𑀺𑀓𑁄. 𑀅𑀯𑀺𑀲𑀁𑀯𑀸𑀤𑀓𑁄 𑀮𑁄𑀓𑀲𑁆𑀲𑀸𑀢𑀺 𑀢𑀸𑀬 𑀲𑀘𑁆𑀘𑀯𑀸𑀤𑀺𑀢𑀸𑀬 𑀮𑁄𑀓𑀁 𑀦 𑀯𑀺𑀲𑀁𑀯𑀸𑀤𑁂𑀢𑀻𑀢𑀺 𑀅𑀢𑁆𑀣𑁄.

𑀇𑀫𑁂𑀲𑀁 𑀪𑁂𑀤𑀸𑀬𑀸𑀢𑀺 𑀬𑁂𑀲𑀁 𑀇𑀢𑁄 𑀲𑀼𑀢𑁆𑀯𑀸𑀢𑀺 𑀯𑀼𑀢𑁆𑀢𑀸𑀦𑀁 𑀲𑀦𑁆𑀢𑀺𑀓𑁂 𑀲𑀼𑀢𑀁, 𑀢𑁂𑀲𑀁 𑀪𑁂𑀤𑀸𑀬. 𑀪𑀺𑀦𑁆𑀦𑀸𑀦𑀁 𑀯𑀸 𑀲𑀦𑁆𑀥𑀸𑀢𑀸𑀢𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀫𑀺𑀢𑁆𑀢𑀸𑀦𑀁 𑀯𑀸 𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀸𑀤𑀻𑀦𑀁 𑀯𑀸 𑀓𑁂𑀦𑀘𑀺𑀤𑁂𑀯 𑀓𑀸𑀭𑀡𑁂𑀦 𑀪𑀺𑀦𑁆𑀦𑀸𑀦𑀁 𑀏𑀓𑀫𑁂𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀈𑀤𑀺𑀲𑁂 𑀓𑀼𑀮𑁂 𑀚𑀸𑀢𑀸𑀦𑀁 𑀏𑀯𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀇𑀤𑀁 𑀦 𑀬𑀼𑀢𑁆𑀢’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀲𑀦𑁆𑀥𑀸𑀦𑀁 𑀓𑀢𑁆𑀢𑀸. 𑀅𑀦𑀼𑀧𑁆𑀧𑀤𑀸𑀢𑀸𑀢𑀺 𑀲𑀦𑁆𑀥𑀸𑀦𑀸𑀦𑀼𑀧𑁆𑀧𑀤𑀸𑀢𑀸, 𑀤𑁆𑀯𑁂 𑀚𑀦𑁂 𑀲𑀫𑀕𑁆𑀕𑁂 𑀤𑀺𑀲𑁆𑀯𑀸, ‘‘𑀢𑀼𑀫𑁆𑀳𑀸𑀓𑀁 𑀏𑀯𑀭𑀽𑀧𑁂 𑀓𑀼𑀮𑁂 𑀚𑀸𑀢𑀸𑀦𑀁 𑀏𑀯𑀭𑀽𑀧𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀫𑁂𑀢’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀤𑀴𑁆𑀳𑀻𑀓𑀫𑁆𑀫𑀁 𑀓𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀫𑀕𑁆𑀕𑁄 𑀆𑀭𑀸𑀫𑁄 𑀅𑀲𑁆𑀲𑀸𑀢𑀺 𑀲𑀫𑀕𑁆𑀕𑀸𑀭𑀸𑀫𑁄. 𑀬𑀢𑁆𑀣 𑀲𑀫𑀕𑁆𑀕𑀸 𑀦𑀢𑁆𑀣𑀺, 𑀢𑀢𑁆𑀣 𑀯𑀲𑀺𑀢𑀼𑀫𑁆𑀧𑀺 𑀦 𑀇𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. ‘‘𑀲𑀫𑀕𑁆𑀕𑀭𑀸𑀫𑁄’’𑀢𑀺𑀧𑀺 𑀧𑀸𑀴𑀺, 𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄. 𑀲𑀫𑀕𑁆𑀕𑀭𑀢𑁄𑀢𑀺 𑀲𑀫𑀕𑁆𑀕𑁂𑀲𑀼 𑀭𑀢𑁄, 𑀢𑁂 𑀧𑀳𑀸𑀬 𑀅𑀜𑁆𑀜𑀢𑁆𑀭 𑀕𑀦𑁆𑀢𑀼𑀫𑁆𑀧𑀺 𑀦 𑀇𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀲𑀫𑀕𑁆𑀕𑁂 𑀤𑀺𑀲𑁆𑀯𑀸𑀧𑀺 𑀲𑀼𑀢𑁆𑀯𑀸𑀧𑀺 𑀦𑀦𑁆𑀤𑀢𑀻𑀢𑀺 𑀲𑀫𑀕𑁆𑀕𑀦𑀦𑁆𑀤𑀻. 𑀲𑀫𑀕𑁆𑀕𑀓𑀭𑀡𑀺𑀁 𑀯𑀸𑀘𑀁 𑀪𑀸𑀲𑀺𑀢𑀸𑀢𑀺 𑀬𑀸 𑀯𑀸𑀘𑀸 𑀲𑀢𑁆𑀢𑁂 𑀲𑀫𑀕𑁆𑀕𑁂𑀬𑁂𑀯 𑀓𑀭𑁄𑀢𑀺, 𑀢𑀁 𑀲𑀸𑀫𑀕𑁆𑀕𑀺𑀕𑀼𑀡𑀧𑀭𑀺𑀤𑀻𑀧𑀓𑀫𑁂𑀯 𑀯𑀸𑀘𑀁 𑀪𑀸𑀲𑀢𑀺, 𑀦 𑀇𑀢𑀭𑀦𑁆𑀢𑀺.

𑀦𑁂𑀮𑀸𑀢𑀺 𑀏𑀮𑀁 𑀯𑀼𑀘𑁆𑀘𑀢𑀺 𑀤𑁄𑀲𑁄, 𑀦𑀸𑀲𑁆𑀲𑀸 𑀏𑀮𑀦𑁆𑀢𑀺 𑀦𑁂𑀮𑀸, 𑀦𑀺𑀤𑁆𑀤𑁄𑀲𑀸𑀢𑀺 𑀅𑀢𑁆𑀣𑁄. ‘‘𑀦𑁂𑀮𑀗𑁆𑀕𑁄 𑀲𑁂𑀢𑀧𑀘𑁆𑀙𑀸𑀤𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑁂𑀮𑀁 𑀯𑀺𑀬. 𑀓𑀡𑁆𑀡𑀲𑀼𑀔𑀸𑀢𑀺 𑀩𑁆𑀬𑀜𑁆𑀚𑀦𑀫𑀥𑀼𑀭𑀢𑀸𑀬 𑀓𑀡𑁆𑀡𑀸𑀦𑀁 𑀲𑀼𑀔𑀸, 𑀲𑀽𑀘𑀺𑀯𑀺𑀚𑁆𑀛𑀦𑀁 𑀯𑀺𑀬 𑀓𑀡𑁆𑀡𑀲𑀽𑀮𑀁 𑀦 𑀚𑀦𑁂𑀢𑀺. 𑀅𑀢𑁆𑀣𑀫𑀥𑀼𑀭𑀢𑀸𑀬 𑀲𑀓𑀮𑀲𑀭𑀻𑀭𑁂 𑀓𑁄𑀧𑀁 𑀅𑀚𑀦𑁂𑀢𑁆𑀯𑀸 𑀧𑁂𑀫𑀁 𑀚𑀦𑁂𑀢𑀻𑀢𑀺 𑀧𑁂𑀫𑀦𑀻𑀬𑀸. 𑀳𑀤𑀬𑀁 𑀕𑀘𑁆𑀙𑀢𑀺, 𑀅𑀧𑀝𑀺𑀳𑀜𑁆𑀜𑀫𑀸𑀦𑀸 𑀲𑀼𑀔𑁂𑀦 𑀘𑀺𑀢𑁆𑀢𑀁 𑀧𑀯𑀺𑀲𑀢𑀻𑀢𑀺 𑀳𑀤𑀬𑀗𑁆𑀕𑀫𑀸. 𑀕𑀼𑀡𑀧𑀭𑀺𑀧𑀼𑀡𑁆𑀡𑀢𑀸𑀬 𑀧𑀼𑀭𑁂 𑀪𑀯𑀸𑀢𑀺 𑀧𑁄𑀭𑀻, 𑀧𑀼𑀭𑁂 𑀲𑀁𑀯𑀤𑁆𑀥𑀦𑀸𑀭𑀻 𑀯𑀺𑀬 𑀲𑀼𑀓𑀼𑀫𑀸𑀭𑀸𑀢𑀺𑀧𑀺 𑀧𑁄𑀭𑀻, 𑀧𑀼𑀭𑀲𑁆𑀲 𑀏𑀲𑀸𑀢𑀺𑀧𑀺 𑀧𑁄𑀭𑀻, 𑀦𑀕𑀭𑀯𑀸𑀲𑀻𑀦𑀁 𑀓𑀣𑀸𑀢𑀺 𑀅𑀢𑁆𑀣𑁄. 𑀦𑀕𑀭𑀯𑀸𑀲𑀺𑀦𑁄 𑀳𑀺 𑀬𑀼𑀢𑁆𑀢𑀓𑀣𑀸 𑀳𑁄𑀦𑁆𑀢𑀺, 𑀧𑀺𑀢𑀺𑀫𑀢𑁆𑀢𑀁 𑀧𑀺𑀢𑀸𑀢𑀺, 𑀫𑀸𑀢𑀺𑀫𑀢𑁆𑀢𑀁 𑀫𑀸𑀢𑀸𑀢𑀺, 𑀪𑀸𑀢𑀺𑀫𑀢𑁆𑀢𑀁 𑀪𑀸𑀢𑀸𑀢𑀺 𑀯𑀤𑀦𑁆𑀢𑀺. 𑀏𑀯𑀭𑀽𑀧𑀻 𑀓𑀣𑀸 𑀩𑀳𑀼𑀦𑁄 𑀚𑀦𑀲𑁆𑀲 𑀓𑀦𑁆𑀢𑀸 𑀳𑁄𑀢𑀻𑀢𑀺 𑀩𑀳𑀼𑀚𑀦𑀓𑀦𑁆𑀢𑀸. 𑀓𑀦𑁆𑀢𑀪𑀸𑀯𑁂𑀦𑁂𑀯 𑀩𑀳𑀼𑀦𑁄 𑀚𑀦𑀲𑁆𑀲 𑀫𑀦𑀸𑀧𑀸 𑀘𑀺𑀢𑁆𑀢𑀯𑀼𑀤𑁆𑀥𑀺𑀓𑀭𑀸𑀢𑀺 𑀩𑀳𑀼𑀚𑀦𑀫𑀦𑀸𑀧𑀸.

𑀓𑀸𑀮𑁂𑀦 𑀯𑀤𑀢𑀻𑀢𑀺 𑀓𑀸𑀮𑀯𑀸𑀤𑀻, 𑀯𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀸𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀯𑀤𑀢𑀻𑀢𑀺 𑀅𑀢𑁆𑀣𑁄. 𑀪𑀽𑀢𑀁 𑀢𑀘𑁆𑀙𑀁 𑀲𑀪𑀸𑀯𑀫𑁂𑀯 𑀯𑀤𑀢𑀻𑀢𑀺 𑀪𑀽𑀢𑀯𑀸𑀤𑀻. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀫𑁂𑀯 𑀓𑀢𑁆𑀯𑀸 𑀯𑀤𑀢𑀻𑀢𑀺 𑀅𑀢𑁆𑀣𑀯𑀸𑀤𑀻. 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀯𑀤𑀢𑀻𑀢𑀺 𑀥𑀫𑁆𑀫𑀯𑀸𑀤𑀻. 𑀲𑀁𑀯𑀭𑀯𑀺𑀦𑀬𑀧𑀳𑀸𑀦𑀯𑀺𑀦𑀬𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀯𑀤𑀢𑀻𑀢𑀺 𑀯𑀺𑀦𑀬𑀯𑀸𑀤𑀻. 𑀦𑀺𑀥𑀸𑀦𑀁 𑀯𑀼𑀘𑁆𑀘𑀢𑀺 𑀞𑀧𑀦𑁄𑀓𑀸𑀲𑁄, 𑀦𑀺𑀥𑀸𑀦𑀫𑀲𑁆𑀲𑀸 𑀅𑀢𑁆𑀣𑀻𑀢𑀺 𑀦𑀺𑀥𑀸𑀦𑀯𑀢𑀻, 𑀳𑀤𑀬𑁂 𑀦𑀺𑀥𑀸𑀢𑀩𑁆𑀩 𑀬𑀼𑀢𑁆𑀢𑀯𑀸𑀘𑀁 𑀪𑀸𑀲𑀺𑀢𑀸𑀢𑀺 𑀅𑀢𑁆𑀣𑁄. 𑀓𑀸𑀮𑁂𑀦𑀸𑀢𑀺 𑀏𑀯𑀭𑀽𑀧𑀺𑀁 𑀪𑀸𑀲𑀫𑀸𑀦𑁄𑀧𑀺 𑀘 ‘‘𑀅𑀳𑀁 𑀦𑀺𑀥𑀸𑀦𑀯𑀢𑀺𑀁 𑀯𑀸𑀘𑀁 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺 𑀦 𑀅𑀓𑀸𑀮𑁂𑀦 𑀪𑀸𑀲𑀢𑀺, 𑀬𑀼𑀢𑁆𑀢𑀓𑀸𑀮𑀁 𑀧𑀦 𑀅𑀯𑁂𑀓𑁆𑀔𑀺𑀢𑁆𑀯𑀸 𑀪𑀸𑀲𑀢𑀻𑀢𑀺 𑀅𑀢𑁆𑀣𑁄. 𑀲𑀸𑀧𑀤𑁂𑀲𑀦𑁆𑀢𑀺 𑀲𑀉𑀧𑀫𑀁, 𑀲𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀺𑀬𑀦𑁆𑀢𑀯𑀢𑀺𑀦𑁆𑀢𑀺 𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀬𑀣𑀸𑀲𑁆𑀲𑀸 𑀧𑀭𑀺𑀘𑁆𑀙𑁂𑀤𑁄 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀪𑀸𑀲𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀅𑀦𑁂𑀓𑁂𑀳𑀺𑀧𑀺 𑀦𑀬𑁂𑀳𑀺 𑀯𑀺𑀪𑀚𑀦𑁆𑀢𑁂𑀦 𑀧𑀭𑀺𑀬𑀸𑀤𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀢𑁆𑀣𑀲𑀫𑁆𑀧𑀦𑁆𑀦𑀁, 𑀬𑀁 𑀯𑀸 𑀲𑁄 𑀅𑀢𑁆𑀣𑀯𑀸𑀤𑀻 𑀅𑀢𑁆𑀣𑀁 𑀯𑀤𑀢𑀺, 𑀢𑁂𑀦 𑀅𑀢𑁆𑀣𑁂𑀦 𑀲𑀁𑀳𑀺𑀢𑀢𑁆𑀢𑀸 𑀅𑀢𑁆𑀣𑀲𑀁𑀳𑀺𑀢𑀁 𑀯𑀸𑀘𑀁 𑀪𑀸𑀲𑀢𑀺, 𑀦 𑀅𑀜𑁆𑀜𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀜𑁆𑀜𑀁 𑀪𑀸𑀲𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁯𑁩. 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸𑀢𑀺 𑀫𑀽𑀮𑀩𑀻𑀚𑀁 𑀔𑀦𑁆𑀥𑀩𑀻𑀚𑀁 𑀨𑀴𑀼𑀩𑀻𑀚𑀁 𑀅𑀕𑁆𑀕𑀩𑀻𑀚𑀁 𑀩𑀻𑀚𑀩𑀻𑀚𑀦𑁆𑀢𑀺 𑀧𑀜𑁆𑀘𑀯𑀺𑀥𑀲𑁆𑀲 𑀩𑀻𑀚𑀕𑀸𑀫𑀲𑁆𑀲 𑀘𑁂𑀯 𑀬𑀲𑁆𑀲 𑀓𑀲𑁆𑀲𑀘𑀺 𑀦𑀻𑀮𑀢𑀺𑀡𑀭𑀼𑀓𑁆𑀔𑀸𑀤𑀺𑀓𑀲𑁆𑀲 𑀪𑀽𑀢𑀕𑀸𑀫𑀲𑁆𑀲 𑀘 𑀲𑀫𑀸𑀭𑀫𑁆𑀪𑀸, 𑀙𑁂𑀤𑀦𑀪𑁂𑀤𑀦𑀧𑀘𑀦𑀸𑀤𑀺𑀪𑀸𑀯𑁂𑀦 𑀯𑀺𑀓𑁄𑀧𑀦𑀸 𑀧𑀝𑀺𑀯𑀺𑀭𑀢𑁄𑀢𑀺 𑀅𑀢𑁆𑀣𑁄. 𑀏𑀓𑀪𑀢𑁆𑀢𑀺𑀓𑁄𑀢𑀺 𑀧𑀸𑀢𑀭𑀸𑀲𑀪𑀢𑁆𑀢𑀁 𑀲𑀸𑀬𑀫𑀸𑀲𑀪𑀢𑁆𑀢𑀦𑁆𑀢𑀺 𑀤𑁆𑀯𑁂 𑀪𑀢𑁆𑀢𑀸𑀦𑀺. 𑀢𑁂𑀲𑀼 𑀧𑀸𑀢𑀭𑀸𑀲𑀪𑀢𑁆𑀢𑀁 𑀅𑀦𑁆𑀢𑁄𑀫𑀚𑁆𑀛𑀦𑁆𑀳𑀺𑀓𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁, 𑀇𑀢𑀭𑀁 𑀫𑀚𑁆𑀛𑀦𑁆𑀳𑀺𑀓𑀢𑁄 𑀉𑀤𑁆𑀥𑀁 𑀅𑀦𑁆𑀢𑁄𑀅𑀭𑀼𑀡𑁂𑀦. 𑀢𑀲𑁆𑀫𑀸 𑀅𑀦𑁆𑀢𑁄𑀫𑀚𑁆𑀛𑀦𑁆𑀳𑀺𑀓𑁂 𑀤𑀲𑀓𑁆𑀔𑀢𑁆𑀢𑀼𑀁 𑀪𑀼𑀜𑁆𑀚𑀫𑀸𑀦𑁄𑀧𑀺 𑀏𑀓𑀪𑀢𑁆𑀢𑀺𑀓𑁄𑀯 𑀳𑁄𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀏𑀓𑀪𑀢𑁆𑀢𑀺𑀓𑁄’’𑀢𑀺. 𑀭𑀢𑁆𑀢𑀺𑀬𑀸 𑀪𑁄𑀚𑀦𑀁 𑀭𑀢𑁆𑀢𑀺, 𑀢𑀢𑁄 𑀉𑀧𑀭𑀢𑁄𑀢𑀺 𑀭𑀢𑁆𑀢𑀽𑀧𑀭𑀢𑁄. 𑀅𑀢𑀺𑀓𑁆𑀓𑀦𑁆𑀢𑁂 𑀫𑀚𑁆𑀛𑀦𑁆𑀳𑀺𑀓𑁂 𑀬𑀸𑀯 𑀲𑀽𑀭𑀺𑀬𑀢𑁆𑀣𑀁𑀕𑀫𑀦𑀸 𑀪𑁄𑀚𑀦𑀁 𑀯𑀺𑀓𑀸𑀮𑀪𑁄𑀚𑀦𑀁 𑀦𑀸𑀫. 𑀢𑀢𑁄 𑀯𑀺𑀭𑀢𑀢𑁆𑀢𑀸 𑀯𑀺𑀭𑀢𑁄 𑀯𑀺𑀓𑀸𑀮𑀪𑁄𑀚𑀦𑀸. 𑀲𑀸𑀲𑀦𑀲𑁆𑀲 𑀅𑀦𑀦𑀼𑀮𑁄𑀫𑀢𑁆𑀢𑀸 𑀯𑀺𑀲𑀽𑀓𑀁 𑀧𑀝𑀸𑀡𑀻𑀪𑀽𑀢𑀁 𑀤𑀲𑁆𑀲𑀦𑀦𑁆𑀢𑀺 𑀯𑀺𑀲𑀽𑀓𑀤𑀲𑁆𑀲𑀦𑀁. 𑀅𑀢𑁆𑀢𑀦𑀸 𑀦𑀘𑁆𑀘𑀦𑀦𑀘𑁆𑀘𑀸𑀧𑀦𑀸𑀤𑀺𑀯𑀲𑁂𑀦 𑀦𑀘𑁆𑀘𑀸 𑀘 𑀕𑀻𑀢𑀸 𑀘 𑀯𑀸𑀤𑀺𑀢𑀸 𑀘, 𑀅𑀦𑁆𑀢𑀫𑀲𑁄 𑀫𑀬𑀽𑀭𑀦𑀘𑁆𑀘𑀦𑀸𑀤𑀺𑀯𑀲𑁂𑀦𑀸𑀧𑀺 𑀧𑀯𑀢𑁆𑀢𑀸𑀦𑀁 𑀦𑀘𑁆𑀘𑀸𑀤𑀻𑀦𑀁 𑀯𑀺𑀲𑀽𑀓𑀪𑀽𑀢𑀸 𑀤𑀲𑁆𑀲𑀦𑀸 𑀘𑀸𑀢𑀺 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀸. 𑀦𑀘𑁆𑀘𑀸𑀤𑀻𑀦𑀺 𑀳𑀺 𑀅𑀢𑁆𑀢𑀦𑀸 𑀧𑀬𑁄𑀚𑁂𑀢𑀼𑀁 𑀯𑀸 𑀧𑀭𑁂𑀳𑀺 𑀧𑀬𑁄𑀚𑀸𑀧𑁂𑀢𑀼𑀁 𑀯𑀸 𑀧𑀬𑀼𑀢𑁆𑀢𑀸𑀦𑀺 𑀧𑀲𑁆𑀲𑀺𑀢𑀼𑀁 𑀯𑀸 𑀦𑁂𑀯 𑀪𑀺𑀓𑁆𑀔𑀽𑀦𑀁 𑀦 𑀪𑀺𑀓𑁆𑀔𑀼𑀦𑀻𑀦𑀁 𑀯𑀝𑁆𑀝𑀦𑁆𑀢𑀺. 𑀫𑀸𑀮𑀸𑀤𑀻𑀲𑀼 𑀫𑀸𑀮𑀸𑀢𑀺 𑀬𑀁𑀓𑀺𑀜𑁆𑀘𑀺 𑀧𑀼𑀧𑁆𑀨𑀁. 𑀕𑀦𑁆𑀥𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀕𑀦𑁆𑀥𑀚𑀸𑀢𑀁. 𑀯𑀺𑀮𑁂𑀧𑀦𑀦𑁆𑀢𑀺 𑀙𑀯𑀺𑀭𑀸𑀕𑀓𑀭𑀡𑀁. 𑀢𑀢𑁆𑀣 𑀧𑀺𑀴𑀦𑁆𑀥𑀦𑁆𑀢𑁄 𑀥𑀸𑀭𑁂𑀢𑀺 𑀦𑀸𑀫. 𑀊𑀦𑀝𑁆𑀞𑀸𑀦𑀁 𑀧𑀽𑀭𑁂𑀦𑁆𑀢𑁄 𑀫𑀡𑁆𑀟𑁂𑀢𑀺 𑀦𑀸𑀫. 𑀕𑀦𑁆𑀥𑀯𑀲𑁂𑀦 𑀙𑀯𑀺𑀭𑀸𑀕𑀯𑀲𑁂𑀦 𑀘 𑀲𑀸𑀤𑀺𑀬𑀦𑁆𑀢𑁄 𑀯𑀺𑀪𑀽𑀲𑁂𑀢𑀺 𑀦𑀸𑀫. 𑀞𑀸𑀦𑀁 𑀯𑀼𑀘𑁆𑀘𑀢𑀺 𑀓𑀸𑀭𑀡𑀁. 𑀢𑀲𑁆𑀫𑀸 𑀬𑀸𑀬 𑀤𑀼𑀲𑁆𑀲𑀻𑀮𑁆𑀬𑀘𑁂𑀢𑀦𑀸𑀬 𑀢𑀸𑀦𑀺 𑀫𑀸𑀮𑀸𑀥𑀸𑀭𑀡𑀸𑀤𑀻𑀦𑀺 𑀫𑀳𑀸𑀚𑀦𑁄 𑀓𑀭𑁄𑀢𑀺, 𑀢𑀢𑁄 𑀧𑀝𑀺𑀯𑀺𑀭𑀢𑁄𑀢𑀺 𑀅𑀢𑁆𑀣𑁄.

𑀉𑀘𑁆𑀘𑀸𑀲𑀬𑀦𑀁 𑀯𑀼𑀘𑁆𑀘𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁. 𑀫𑀳𑀸𑀲𑀬𑀦𑀁 𑀅𑀓𑀧𑁆𑀧𑀺𑀬𑀢𑁆𑀣𑀭𑀡𑀁. 𑀢𑀢𑁄 𑀧𑀝𑀺𑀯𑀺𑀭𑀢𑁄𑀢𑀺 𑀅𑀢𑁆𑀣𑁄. 𑀚𑀸𑀢𑀭𑀽𑀧𑀦𑁆𑀢𑀺 𑀲𑀼𑀯𑀡𑁆𑀡𑀁. 𑀭𑀚𑀢𑀦𑁆𑀢𑀺 𑀓𑀳𑀸𑀧𑀡𑁄 𑀮𑁄𑀳𑀫𑀸𑀲𑀓𑁄 𑀚𑀢𑀼𑀫𑀸𑀲𑀓𑁄 𑀤𑀸𑀭𑀼𑀫𑀸𑀲𑀓𑁄𑀢𑀺 𑀬𑁂 𑀯𑁄𑀳𑀸𑀭𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀲 𑀉𑀪𑀬𑀲𑁆𑀲𑀧𑀺 𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑁄, 𑀦𑁂𑀯 𑀦𑀁 𑀉𑀕𑁆𑀕𑀡𑁆𑀳𑀸𑀢𑀺, 𑀦 𑀉𑀕𑁆𑀕𑀡𑁆𑀳𑀸𑀧𑁂𑀢𑀺, 𑀦 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀲𑀸𑀤𑀺𑀬𑀢𑀻𑀢𑀺 𑀅𑀢𑁆𑀣𑁄. 𑀆𑀫𑀓𑀥𑀜𑁆𑀜𑀧𑀝𑀺𑀕𑁆𑀕𑀳𑀡𑀸𑀢𑀺 𑀲𑀸𑀮𑀺𑀯𑀻𑀳𑀺𑀬𑀯𑀕𑁄𑀥𑀽𑀫𑀓𑀗𑁆𑀕𑀼𑀯𑀭𑀓𑀓𑀼𑀤𑁆𑀭𑀽𑀲𑀓𑀲𑀗𑁆𑀔𑀸𑀢𑀲𑁆𑀲 𑀲𑀢𑁆𑀢𑀯𑀺𑀥𑀲𑁆𑀲𑀸𑀧𑀺 𑀆𑀫𑀓𑀥𑀜𑁆𑀜𑀲𑁆𑀲 𑀧𑀝𑀺𑀕𑁆𑀕𑀳𑀡𑀸. 𑀦 𑀓𑁂𑀯𑀮𑀜𑁆𑀘 𑀏𑀢𑁂𑀲𑀁 𑀧𑀝𑀺𑀕𑁆𑀕𑀳𑀡𑀫𑁂𑀯, 𑀆𑀫𑀲𑀦𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀦 𑀯𑀝𑁆𑀝𑀢𑀺𑀬𑁂𑀯. 𑀆𑀫𑀓𑀫𑀁𑀲𑀧𑀝𑀺𑀕𑁆𑀕𑀳𑀡𑀸𑀢𑀺 𑀏𑀢𑁆𑀣 𑀅𑀜𑁆𑀜𑀢𑁆𑀭 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀸 𑀆𑀫𑀓𑀫𑀁𑀲𑀫𑀘𑁆𑀙𑀸𑀦𑀁 𑀧𑀝𑀺𑀕𑁆𑀕𑀳𑀡𑀫𑁂𑀯 𑀪𑀺𑀓𑁆𑀔𑀽𑀦𑀁 𑀦 𑀯𑀝𑁆𑀝𑀢𑀺, 𑀦𑁄 𑀆𑀫𑀲𑀦𑀁.

𑀇𑀢𑁆𑀣𑀺𑀓𑀼𑀫𑀸𑀭𑀺𑀓𑀧𑀝𑀺𑀕𑁆𑀕𑀳𑀡𑀸𑀢𑀺 𑀏𑀢𑁆𑀣 𑀇𑀢𑁆𑀣𑀻𑀢𑀺 𑀧𑀼𑀭𑀺𑀲𑀦𑁆𑀢𑀭𑀕𑀢𑀸, 𑀇𑀢𑀭𑀸 𑀓𑀼𑀫𑀸𑀭𑀺𑀓𑀸 𑀦𑀸𑀫. 𑀢𑀸𑀲𑀁 𑀧𑀝𑀺𑀕𑁆𑀕𑀳𑀡𑀫𑁆𑀧𑀺 𑀆𑀫𑀲𑀦𑀫𑁆𑀧𑀺 𑀅𑀓𑀧𑁆𑀧𑀺𑀬𑀫𑁂𑀯. 𑀤𑀸𑀲𑀺𑀤𑀸𑀲𑀧𑀝𑀺𑀕𑁆𑀕𑀳𑀡𑀸𑀢𑀺 𑀏𑀢𑁆𑀣 𑀤𑀸𑀲𑀺𑀤𑀸𑀲𑀯𑀲𑁂𑀦𑁂𑀯 𑀢𑁂𑀲𑀁 𑀧𑀝𑀺𑀕𑁆𑀕𑀳𑀡𑀁 𑀦 𑀯𑀝𑁆𑀝𑀢𑀺, ‘‘𑀓𑀧𑁆𑀧𑀺𑀬𑀓𑀸𑀭𑀓𑀁 𑀤𑀫𑁆𑀫𑀺, 𑀆𑀭𑀸𑀫𑀺𑀓𑀁 𑀤𑀫𑁆𑀫𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑁂 𑀧𑀦 𑀯𑀝𑁆𑀝𑀢𑀺. 𑀅𑀚𑁂𑀴𑀓𑀸𑀤𑀻𑀲𑀼 𑀔𑁂𑀢𑁆𑀢𑀯𑀢𑁆𑀣𑀼𑀧𑀭𑀺𑀬𑁄𑀲𑀸𑀦𑁂𑀲𑀼 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀦𑀬𑁄 𑀯𑀺𑀦𑀬𑀯𑀲𑁂𑀦 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄. 𑀢𑀢𑁆𑀣 𑀔𑁂𑀢𑁆𑀢𑀁 𑀦𑀸𑀫 𑀬𑀲𑁆𑀫𑀺𑀁 𑀧𑀼𑀩𑁆𑀩𑀡𑁆𑀡𑀁 𑀭𑀼𑀳𑀢𑀺. 𑀯𑀢𑁆𑀣𑀼 𑀦𑀸𑀫 𑀬𑀲𑁆𑀫𑀺𑀁 𑀅𑀧𑀭𑀡𑁆𑀡𑀁 𑀭𑀼𑀳𑀢𑀺. 𑀬𑀢𑁆𑀣 𑀯𑀸 𑀉𑀪𑀬𑀫𑁆𑀧𑀺 𑀭𑀼𑀳𑀢𑀺, 𑀢𑀁 𑀔𑁂𑀢𑁆𑀢𑀁. 𑀢𑀤𑀢𑁆𑀣𑀸𑀬 𑀅𑀓𑀢𑀪𑀽𑀫𑀺𑀪𑀸𑀕𑁄 𑀯𑀢𑁆𑀣𑀼. 𑀔𑁂𑀢𑁆𑀢𑀯𑀢𑁆𑀣𑀼𑀲𑀻𑀲𑁂𑀦 𑀘𑁂𑀢𑁆𑀣 𑀯𑀸𑀧𑀺𑀢𑀴𑀸𑀓𑀸𑀤𑀻𑀦𑀺𑀧𑀺 𑀲𑀗𑁆𑀕𑀳𑀺𑀢𑀸𑀦𑁂𑀯. 𑀤𑀽𑀢𑁂𑀬𑁆𑀬𑀁 𑀯𑀼𑀘𑁆𑀘𑀢𑀺 𑀤𑀽𑀢𑀓𑀫𑁆𑀫𑀁, 𑀕𑀺𑀳𑀻𑀦𑀁 𑀧𑀡𑁆𑀡𑀁 𑀯𑀸 𑀲𑀸𑀲𑀦𑀁 𑀯𑀸 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀕𑀫𑀦𑀁. 𑀧𑀳𑀺𑀡𑀕𑀫𑀦𑀁 𑀯𑀼𑀘𑁆𑀘𑀢𑀺 𑀖𑀭𑀸 𑀖𑀭𑀁 𑀧𑁂𑀲𑀺𑀢𑀲𑁆𑀲 𑀔𑀼𑀤𑁆𑀤𑀓𑀕𑀫𑀦𑀁. 𑀅𑀦𑀼𑀬𑁄𑀕𑁄 𑀦𑀸𑀫 𑀢𑀤𑀼𑀪𑀬𑀓𑀭𑀡𑀁, 𑀢𑀲𑁆𑀫𑀸 𑀤𑀽𑀢𑁂𑀬𑁆𑀬𑀧𑀳𑀺𑀡𑀕𑀫𑀦𑀸𑀦𑀁 𑀅𑀦𑀼𑀬𑁄𑀕𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀬𑀯𑀺𑀓𑁆𑀓𑀬𑀸𑀢𑀺 𑀓𑀬𑀸 𑀘 𑀯𑀺𑀓𑁆𑀓𑀬𑀸 𑀘. 𑀢𑀼𑀮𑀸𑀓𑀽𑀝𑀸𑀤𑀻𑀲𑀼 𑀓𑀽𑀝𑀦𑁆𑀢𑀺 𑀯𑀜𑁆𑀘𑀦𑀁. 𑀢𑀢𑁆𑀣 𑀢𑀼𑀮𑀸𑀓𑀽𑀝𑀁 𑀢𑀸𑀯 𑀭𑀽𑀧𑀓𑀽𑀝𑀁 𑀅𑀗𑁆𑀕𑀓𑀽𑀝𑀁 𑀕𑀳𑀡𑀓𑀽𑀝𑀁 𑀧𑀝𑀺𑀘𑁆𑀙𑀦𑁆𑀦𑀓𑀽𑀝𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀭𑀽𑀧𑀓𑀽𑀝𑀁 𑀦𑀸𑀫 𑀤𑁆𑀯𑁂 𑀢𑀼𑀮𑀸 𑀲𑀭𑀽𑀧𑀸 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀫𑀳𑀢𑀺𑀬𑀸 𑀕𑀡𑁆𑀳𑀸𑀢𑀺, 𑀤𑀤𑀦𑁆𑀢𑁄 𑀔𑀼𑀤𑁆𑀤𑀺𑀓𑀸𑀬 𑀤𑁂𑀢𑀺. 𑀅𑀗𑁆𑀕𑀓𑀽𑀝𑀁 𑀦𑀸𑀫 𑀕𑀡𑁆𑀳𑀦𑁆𑀢𑁄 𑀧𑀘𑁆𑀙𑀸𑀪𑀸𑀕𑁂 𑀳𑀢𑁆𑀣𑁂𑀦 𑀢𑀼𑀮𑀁 𑀅𑀓𑁆𑀓𑀫𑀢𑀺, 𑀤𑀤𑀦𑁆𑀢𑁄 𑀧𑀼𑀩𑁆𑀩𑀪𑀸𑀕𑁂. 𑀕𑀳𑀡𑀓𑀽𑀝𑀁 𑀦𑀸𑀫 𑀕𑀡𑁆𑀳𑀦𑁆𑀢𑁄 𑀫𑀽𑀮𑁂 𑀭𑀚𑁆𑀚𑀼𑀁 𑀕𑀡𑁆𑀳𑀸𑀢𑀺, 𑀤𑀤𑀦𑁆𑀢𑁄 𑀅𑀕𑁆𑀕𑁂. 𑀧𑀝𑀺𑀘𑁆𑀙𑀦𑁆𑀦𑀓𑀽𑀝𑀁 𑀦𑀸𑀫 𑀢𑀼𑀮𑀁 𑀲𑀼𑀲𑀺𑀭𑀁 𑀓𑀢𑁆𑀯𑀸 𑀅𑀦𑁆𑀢𑁄 𑀅𑀬𑀘𑀼𑀡𑁆𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀢𑀁 𑀧𑀘𑁆𑀙𑀸𑀪𑀸𑀕𑁂 𑀓𑀭𑁄𑀢𑀺, 𑀤𑀤𑀦𑁆𑀢𑁄 𑀅𑀕𑁆𑀕𑀪𑀸𑀕𑁂. 𑀓𑀁𑀲𑁄 𑀯𑀼𑀘𑁆𑀘𑀢𑀺 𑀲𑀼𑀯𑀡𑁆𑀡𑀧𑀸𑀢𑀺, 𑀢𑀸𑀬 𑀯𑀜𑁆𑀘𑀦𑀁 𑀓𑀁𑀲𑀓𑀽𑀝𑀁. 𑀓𑀣𑀁? 𑀏𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀓𑀢𑁆𑀯𑀸 𑀅𑀜𑁆𑀜𑀸 𑀤𑁆𑀯𑁂 𑀢𑀺𑀲𑁆𑀲𑁄 𑀮𑁄𑀳𑀧𑀸𑀢𑀺𑀬𑁄 𑀲𑀼𑀯𑀡𑁆𑀡𑀯𑀡𑁆𑀡𑀸 𑀓𑀭𑁄𑀢𑀺, 𑀢𑀢𑁄 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀓𑀺𑀜𑁆𑀘𑀺𑀤𑁂𑀯 𑀅𑀤𑁆𑀥𑀓𑀼𑀮𑀁 𑀧𑀯𑀺𑀲𑀺𑀢𑁆𑀯𑀸, ‘‘𑀲𑀼𑀯𑀡𑁆𑀡𑀪𑀸𑀚𑀦𑀸𑀦𑀺 𑀓𑀺𑀡𑀣𑀸’’𑀢𑀺 𑀯𑀢𑁆𑀯𑀸 𑀅𑀕𑁆𑀖𑁂 𑀧𑀼𑀘𑁆𑀙𑀺𑀢𑁂 𑀲𑀫𑀕𑁆𑀖𑀢𑀭𑀁 𑀤𑀸𑀢𑀼𑀓𑀸𑀫𑀸 𑀳𑁄𑀦𑁆𑀢𑀺. 𑀢𑀢𑁄 𑀢𑁂𑀳𑀺 ‘‘𑀓𑀣𑀁 𑀇𑀫𑁂𑀲𑀁 𑀲𑀼𑀯𑀡𑁆𑀡𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑁂 𑁋 ‘‘𑀯𑀻𑀫𑀁𑀲𑀺𑀢𑁆𑀯𑀸 𑀕𑀡𑁆𑀳𑀣𑀸’’𑀢𑀺 𑀲𑀼𑀯𑀡𑁆𑀡𑀧𑀸𑀢𑀺𑀁 𑀧𑀸𑀲𑀸𑀡𑁂 𑀖𑀁𑀲𑀺𑀢𑁆𑀯𑀸 𑀲𑀩𑁆𑀩𑀸 𑀧𑀸𑀢𑀺𑀬𑁄 𑀤𑀢𑁆𑀯𑀸 𑀕𑀘𑁆𑀙𑀢𑀺.

𑀫𑀸𑀦𑀓𑀽𑀝𑀁 𑀦𑀸𑀫 𑀳𑀤𑀬𑀪𑁂𑀤𑀲𑀺𑀔𑀸𑀪𑁂𑀤𑀭𑀚𑁆𑀚𑀼𑀪𑁂𑀤𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀳𑀤𑀬𑀪𑁂𑀤𑁄 𑀲𑀧𑁆𑀧𑀺𑀢𑁂𑀮𑀸𑀤𑀺𑀫𑀺𑀦𑀦𑀓𑀸𑀮𑁂 𑀮𑀩𑁆𑀪𑀢𑀺. 𑀢𑀸𑀦𑀺 𑀳𑀺 𑀕𑀡𑁆𑀳𑀦𑁆𑀢𑁄 𑀳𑁂𑀝𑁆𑀞𑀸 𑀙𑀺𑀤𑁆𑀤𑁂𑀦 𑀫𑀸𑀦𑁂𑀦, ‘‘𑀲𑀡𑀺𑀓𑀁 𑀆𑀲𑀺𑀜𑁆𑀘𑀸’’𑀢𑀺 𑀯𑀢𑁆𑀯𑀸 𑀅𑀦𑁆𑀢𑁄𑀪𑀸𑀚𑀦𑁂 𑀩𑀳𑀼𑀁 𑀧𑀕𑁆𑀖𑀭𑀸𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺; 𑀤𑀤𑀦𑁆𑀢𑁄 𑀙𑀺𑀤𑁆𑀤𑀁 𑀧𑀺𑀥𑀸𑀬 𑀲𑀻𑀖𑀁 𑀧𑀽𑀭𑁂𑀢𑁆𑀯𑀸 𑀤𑁂𑀢𑀺. 𑀲𑀺𑀔𑀸𑀪𑁂𑀤𑁄 𑀢𑀺𑀮𑀢𑀡𑁆𑀟𑀼𑀮𑀸𑀤𑀺𑀫𑀺𑀦𑀦𑀓𑀸𑀮𑁂 𑀮𑀩𑁆𑀪𑀢𑀺. 𑀢𑀸𑀦𑀺 𑀳𑀺 𑀕𑀡𑁆𑀳𑀦𑁆𑀢𑁄 𑀲𑀡𑀺𑀓𑀁 𑀲𑀺𑀔𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀤𑀤𑀦𑁆𑀢𑁄 𑀯𑁂𑀕𑁂𑀦 𑀧𑀽𑀭𑁂𑀢𑁆𑀯𑀸 𑀲𑀺𑀔𑀁 𑀙𑀺𑀦𑁆𑀤𑀦𑁆𑀢𑁄 𑀤𑁂𑀢𑀺. 𑀭𑀚𑁆𑀚𑀼𑀪𑁂𑀤𑁄 𑀔𑁂𑀢𑁆𑀢𑀯𑀢𑁆𑀣𑀼𑀫𑀺𑀦𑀦𑀓𑀸𑀮𑁂 𑀮𑀩𑁆𑀪𑀢𑀺. 𑀮𑀜𑁆𑀚𑀁 𑀅𑀮𑀪𑀦𑁆𑀢𑀸 𑀳𑀺 𑀔𑁂𑀢𑁆𑀢𑀁 𑀅𑀫𑀳𑀦𑁆𑀢𑀫𑁆𑀧𑀺 𑀫𑀳𑀦𑁆𑀢𑀁 𑀓𑀢𑁆𑀯𑀸 𑀫𑀺𑀦𑀦𑁆𑀢𑀺.

𑀉𑀓𑁆𑀓𑁄𑀝𑀦𑀸𑀤𑀻𑀲𑀼 𑀉𑀓𑁆𑀓𑁄𑀝𑀦𑀦𑁆𑀢𑀺 𑀲𑀸𑀫𑀺𑀓𑁂 𑀅𑀲𑁆𑀲𑀸𑀫𑀺𑀓𑁂 𑀓𑀸𑀢𑀼𑀁 𑀮𑀜𑁆𑀚𑀕𑁆𑀕𑀳𑀡𑀁. 𑀯𑀜𑁆𑀘𑀦𑀦𑁆𑀢𑀺 𑀢𑁂𑀳𑀺 𑀢𑁂𑀳𑀺 𑀉𑀧𑀸𑀬𑁂𑀳𑀺 𑀧𑀭𑁂𑀲𑀁 𑀯𑀜𑁆𑀘𑀦𑀁. 𑀢𑀢𑁆𑀭𑀺𑀤𑀫𑁂𑀓𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀮𑀼𑀤𑁆𑀤𑀓𑁄 𑀫𑀺𑀕𑀜𑁆𑀘 𑀫𑀺𑀕𑀧𑁄𑀢𑀓𑀜𑁆𑀘 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀢𑀺. 𑀢𑀫𑁂𑀓𑁄 𑀥𑀼𑀢𑁆𑀢𑁄, ‘‘𑀓𑀺𑀁, 𑀪𑁄, 𑀫𑀺𑀕𑁄 𑀅𑀕𑁆𑀖𑀢𑀺, 𑀓𑀺𑀁 𑀫𑀺𑀕𑀧𑁄𑀢𑀓𑁄’’𑀢𑀺 𑀆𑀳. ‘‘𑀫𑀺𑀕𑁄 𑀤𑁆𑀯𑁂 𑀓𑀳𑀸𑀧𑀡𑁂 𑀫𑀺𑀕𑀧𑁄𑀢𑀓𑁄 𑀏𑀓’’𑀦𑁆𑀢𑀺 𑀘 𑀯𑀼𑀢𑁆𑀢𑁂 𑀓𑀳𑀸𑀧𑀡𑀁 𑀤𑀢𑁆𑀯𑀸 𑀫𑀺𑀕𑀧𑁄𑀢𑀓𑀁 𑀕𑀳𑁂𑀢𑁆𑀯𑀸 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑁄, ‘‘𑀦 𑀫𑁂, 𑀪𑁄, 𑀫𑀺𑀕𑀧𑁄𑀢𑀓𑁂𑀦 𑀅𑀢𑁆𑀣𑁄, 𑀫𑀺𑀕𑀁 𑀫𑁂 𑀤𑁂𑀳𑀻’’𑀢𑀺 𑀆𑀳. 𑀢𑁂𑀦 𑀳𑀺 ‘‘𑀤𑁆𑀯𑁂 𑀓𑀳𑀸𑀧𑀡𑁂 𑀤𑁂𑀳𑀻’’𑀢𑀺. 𑀲𑁄 𑀆𑀳 𑁋 ‘‘𑀦𑀦𑀼 𑀢𑁂, 𑀪𑁄, 𑀫𑀬𑀸 𑀧𑀞𑀫𑀁 𑀏𑀓𑁄 𑀓𑀳𑀸𑀧𑀡𑁄 𑀤𑀺𑀦𑁆𑀦𑁄’’𑀢𑀺. 𑀆𑀫 𑀤𑀺𑀦𑁆𑀦𑁄𑀢𑀺. ‘‘𑀇𑀫𑀫𑁆𑀧𑀺 𑀫𑀺𑀕𑀧𑁄𑀢𑀓𑀁 𑀕𑀡𑁆𑀳, 𑀏𑀯𑀁 𑀲𑁄 𑀘 𑀓𑀳𑀸𑀧𑀡𑁄 𑀅𑀬𑀜𑁆𑀘 𑀓𑀳𑀸𑀧𑀡𑀕𑁆𑀖𑀦𑀓𑁄 𑀫𑀺𑀕𑀧𑁄𑀢𑀓𑁄𑀢𑀺 𑀤𑁆𑀯𑁂 𑀓𑀳𑀸𑀧𑀡𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺. 𑀲𑁄 𑀓𑀸𑀭𑀡𑀁 𑀯𑀤𑀢𑀻𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀫𑀺𑀕𑀧𑁄𑀢𑀓𑀁 𑀕𑀳𑁂𑀢𑁆𑀯𑀸 𑀫𑀺𑀕𑀁 𑀅𑀤𑀸𑀲𑀻𑀢𑀺.

𑀦𑀺𑀓𑀢𑀻𑀢𑀺 𑀬𑁄𑀕𑀯𑀲𑁂𑀦 𑀯𑀸 𑀫𑀸𑀬𑀸𑀯𑀲𑁂𑀦 𑀯𑀸 𑀅𑀧𑀸𑀫𑀗𑁆𑀕𑀁 𑀧𑀸𑀫𑀗𑁆𑀕𑀦𑁆𑀢𑀺, 𑀅𑀫𑀡𑀺𑀁 𑀫𑀡𑀺𑀦𑁆𑀢𑀺, 𑀅𑀲𑀼𑀯𑀡𑁆𑀡𑀁 𑀲𑀼𑀯𑀡𑁆𑀡𑀦𑁆𑀢𑀺 𑀓𑀢𑁆𑀯𑀸 𑀧𑀝𑀺𑀭𑀽𑀧𑀓𑁂𑀦 𑀯𑀜𑁆𑀘𑀦𑀁. 𑀲𑀸𑀘𑀺𑀬𑁄𑀕𑁄𑀢𑀺 𑀓𑀼𑀝𑀺𑀮𑀬𑁄𑀕𑁄, 𑀏𑀢𑁂𑀲𑀁𑀬𑁂𑀯 𑀉𑀓𑁆𑀓𑁄𑀝𑀦𑀸𑀤𑀻𑀦𑀫𑁂𑀢𑀁 𑀦𑀸𑀫𑀁, 𑀢𑀲𑁆𑀫𑀸 𑀉𑀓𑁆𑀓𑁄𑀝𑀦𑀲𑀸𑀘𑀺𑀬𑁄𑀕𑁄 𑀯𑀜𑁆𑀘𑀦𑀲𑀸𑀘𑀺𑀬𑁄𑀕𑁄 𑀦𑀺𑀓𑀢𑀺𑀲𑀸𑀘𑀺𑀬𑁄𑀕𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀓𑁂𑀘𑀺 𑀅𑀜𑁆𑀜𑀁 𑀤𑀲𑁆𑀲𑁂𑀢𑁆𑀯𑀸 𑀅𑀜𑁆𑀜𑀲𑁆𑀲 𑀧𑀭𑀺𑀯𑀢𑁆𑀢𑀦𑀁 𑀲𑀸𑀘𑀺𑀬𑁄𑀕𑁄𑀢𑀺 𑀯𑀤𑀦𑁆𑀢𑀺. 𑀢𑀁 𑀧𑀦 𑀯𑀜𑁆𑀘𑀦𑁂𑀦𑁂𑀯 𑀲𑀗𑁆𑀕𑀳𑀺𑀢𑀁. 𑀙𑁂𑀤𑀦𑀸𑀤𑀻𑀲𑀼 𑀙𑁂𑀤𑀦𑀦𑁆𑀢𑀺 𑀳𑀢𑁆𑀣𑀘𑁆𑀙𑁂𑀤𑀦𑀸𑀤𑀺. 𑀯𑀥𑁄𑀢𑀺 𑀫𑀸𑀭𑀡𑀁. 𑀩𑀦𑁆𑀥𑁄𑀢𑀺 𑀭𑀚𑁆𑀚𑀼𑀩𑀦𑁆𑀥𑀦𑀸𑀤𑀻𑀳𑀺 𑀩𑀦𑁆𑀥𑀦𑀁. 𑀯𑀺𑀧𑀭𑀸𑀫𑁄𑀲𑁄𑀢𑀺 𑀳𑀺𑀫𑀯𑀺𑀧𑀭𑀸𑀫𑁄𑀲𑁄 𑀕𑀼𑀫𑁆𑀩𑀯𑀺𑀧𑀭𑀸𑀫𑁄𑀲𑁄𑀢𑀺 𑀤𑀼𑀯𑀺𑀥𑁄. 𑀬𑀁 𑀳𑀺𑀫𑀧𑀸𑀢𑀲𑀫𑀬𑁂 𑀳𑀺𑀫𑁂𑀦 𑀧𑀝𑀺𑀘𑁆𑀙𑀦𑁆𑀦𑀸 𑀳𑀼𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀦𑁆𑀦𑀁 𑀚𑀦𑀁 𑀫𑀼𑀲𑀦𑁆𑀢𑀺, 𑀅𑀬𑀁 𑀳𑀺𑀫𑀯𑀺𑀧𑀭𑀸𑀫𑁄𑀲𑁄. 𑀬𑀁 𑀕𑀼𑀫𑁆𑀩𑀸𑀤𑀻𑀳𑀺 𑀧𑀝𑀺𑀘𑁆𑀙𑀦𑁆𑀦𑀸 𑀫𑀼𑀲𑀦𑁆𑀢𑀺, 𑀅𑀬𑀁 𑀕𑀼𑀫𑁆𑀩𑀯𑀺𑀧𑀭𑀸𑀫𑁄𑀲𑁄. 𑀆𑀮𑁄𑀧𑁄 𑀯𑀼𑀘𑁆𑀘𑀢𑀺 𑀕𑀸𑀫𑀦𑀺𑀕𑀫𑀸𑀤𑀻𑀦𑀁 𑀯𑀺𑀮𑁄𑀧𑀓𑀭𑀡𑀁. 𑀲𑀳𑀲𑀸𑀓𑀸𑀭𑁄𑀢𑀺 𑀲𑀸𑀳𑀲𑀺𑀓𑀓𑀺𑀭𑀺𑀬𑀸, 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀉𑀭𑁂 𑀲𑀢𑁆𑀣𑀁 𑀞𑀧𑁂𑀢𑁆𑀯𑀸 𑀇𑀘𑁆𑀙𑀺𑀢𑀪𑀡𑁆𑀟𑀕𑁆𑀕𑀳𑀡𑀁. 𑀏𑀯𑀫𑁂𑀢𑀲𑁆𑀫𑀸 𑀙𑁂𑀤𑀦…𑀧𑁂… 𑀲𑀳𑀲𑀸𑀓𑀸𑀭𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺.

𑁨𑁯𑁪. 𑀲𑁄 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀻𑀢𑀺 𑀲𑁆𑀯𑀸𑀬𑀁 𑀪𑀺𑀓𑁆𑀔𑀼 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀦 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀤𑁆𑀯𑀸𑀤𑀲𑀯𑀺𑀥𑁂𑀦 𑀇𑀢𑀭𑀻𑀢𑀭𑀧𑀘𑁆𑀘𑀬𑀲𑀦𑁆𑀢𑁄𑀲𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀇𑀫𑀺𑀦𑀸 𑀧𑀦 𑀤𑁆𑀯𑀸𑀤𑀲𑀯𑀺𑀥𑁂𑀦 𑀇𑀢𑀭𑀻𑀢𑀭𑀧𑀘𑁆𑀘𑀬𑀲𑀦𑁆𑀢𑁄𑀲𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀝𑁆𑀞 𑀧𑀭𑀺𑀓𑁆𑀔𑀸𑀭𑀸 𑀯𑀝𑁆𑀝𑀦𑁆𑀢𑀺 𑀢𑀻𑀡𑀺 𑀘𑀻𑀯𑀭𑀸𑀦𑀺 𑀧𑀢𑁆𑀢𑁄 𑀤𑀦𑁆𑀢𑀓𑀝𑁆𑀞𑀘𑁆𑀙𑁂𑀤𑀦𑀯𑀸𑀲𑀺 𑀏𑀓𑀸 𑀲𑀽𑀘𑀺 𑀓𑀸𑀬𑀩𑀦𑁆𑀥𑀦𑀁 𑀧𑀭𑀺𑀲𑁆𑀲𑀸𑀯𑀦𑀦𑁆𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀢𑀺𑀘𑀻𑀯𑀭𑀜𑁆𑀘 𑀧𑀢𑁆𑀢𑁄 𑀘, 𑀯𑀸𑀲𑀺 𑀲𑀽𑀘𑀺 𑀘 𑀩𑀦𑁆𑀥𑀦𑀁;

𑀧𑀭𑀺𑀲𑁆𑀲𑀸𑀯𑀦𑁂𑀦 𑀅𑀝𑁆𑀞𑁂𑀢𑁂, 𑀬𑀼𑀢𑁆𑀢𑀬𑁄𑀕𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺.

𑀢𑁂 𑀲𑀩𑁆𑀩𑁂𑀧𑀺 𑀓𑀸𑀬𑀧𑀭𑀺𑀳𑀸𑀭𑀺𑀓𑀸𑀧𑀺 𑀳𑁄𑀦𑁆𑀢𑀺 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑀸𑀧𑀺. 𑀓𑀣𑀁? 𑀢𑀺𑀘𑀻𑀯𑀭𑀁 𑀢𑀸𑀯 𑀦𑀺𑀯𑀸𑀲𑁂𑀢𑁆𑀯𑀸 𑀧𑀸𑀭𑀼𑀧𑀺𑀢𑁆𑀯𑀸 𑀘 𑀯𑀺𑀘𑀭𑀡𑀓𑀸𑀮𑁂 𑀓𑀸𑀬𑀁 𑀧𑀭𑀺𑀳𑀭𑀢𑀺 𑀧𑁄𑀲𑁂𑀢𑀻𑀢𑀺 𑀓𑀸𑀬𑀧𑀭𑀺𑀳𑀸𑀭𑀺𑀓𑀁 𑀳𑁄𑀢𑀺, 𑀘𑀻𑀯𑀭𑀓𑀡𑁆𑀡𑁂𑀦 𑀉𑀤𑀓𑀁 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀧𑀺𑀯𑀦𑀓𑀸𑀮𑁂 𑀔𑀸𑀤𑀺𑀢𑀩𑁆𑀩𑀨𑀮𑀸𑀨𑀮𑀕𑁆𑀕𑀳𑀡𑀓𑀸𑀮𑁂 𑀘 𑀓𑀼𑀘𑁆𑀙𑀺𑀁 𑀧𑀭𑀺𑀳𑀭𑀢𑀺 𑀧𑁄𑀲𑁂𑀢𑀻𑀢𑀺 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑀁 𑀳𑁄𑀢𑀺. 𑀧𑀢𑁆𑀢𑁄𑀧𑀺 𑀢𑁂𑀦 𑀉𑀤𑀓𑀁 𑀉𑀤𑁆𑀥𑀭𑀺𑀢𑁆𑀯𑀸 𑀦𑀳𑀸𑀦𑀓𑀸𑀮𑁂 𑀓𑀼𑀝𑀺𑀧𑀭𑀺𑀪𑀡𑁆𑀟𑀓𑀭𑀡𑀓𑀸𑀮𑁂 𑀘 𑀓𑀸𑀬𑀧𑀭𑀺𑀳𑀸𑀭𑀺𑀓𑁄 𑀳𑁄𑀢𑀺, 𑀆𑀳𑀸𑀭𑀁 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀦𑀓𑀸𑀮𑁂 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑁄 𑀳𑁄𑀢𑀺. 𑀯𑀸𑀲𑀺𑀧𑀺 𑀢𑀸𑀬 𑀤𑀦𑁆𑀢𑀓𑀝𑁆𑀞𑀘𑁆𑀙𑁂𑀤𑀦𑀓𑀸𑀮𑁂 𑀫𑀜𑁆𑀘𑀧𑀻𑀞𑀸𑀦𑀁 𑀅𑀗𑁆𑀕𑀧𑀸𑀤𑀘𑀻𑀯𑀭𑀓𑀼𑀝𑀺𑀤𑀡𑁆𑀟𑀓𑀲𑀚𑁆𑀚𑀦𑀓𑀸𑀮𑁂 𑀘 𑀓𑀸𑀬𑀧𑀭𑀺𑀳𑀸𑀭𑀺𑀓𑀸 𑀳𑁄𑀢𑀺, 𑀉𑀘𑁆𑀙𑀼𑀘𑁆𑀙𑁂𑀤𑀦𑀦𑀸𑀴𑀺𑀓𑁂𑀭𑀸𑀤𑀺𑀢𑀘𑁆𑀙𑀦𑀓𑀸𑀮𑁂 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑀸. 𑀲𑀽𑀘𑀺𑀧𑀺 𑀘𑀻𑀯𑀭𑀲𑀺𑀩𑁆𑀩𑀦𑀓𑀸𑀮𑁂 𑀓𑀸𑀬𑀧𑀭𑀺𑀳𑀸𑀭𑀺𑀓𑀸 𑀳𑁄𑀢𑀺, 𑀧𑀽𑀯𑀁 𑀯𑀸 𑀨𑀮𑀁 𑀯𑀸 𑀯𑀺𑀚𑁆𑀛𑀺𑀢𑁆𑀯𑀸 𑀔𑀸𑀤𑀦𑀓𑀸𑀮𑁂 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑀸. 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀯𑀺𑀘𑀭𑀡𑀓𑀸𑀮𑁂 𑀓𑀸𑀬𑀧𑀭𑀺𑀳𑀸𑀭𑀺𑀓𑀁, 𑀉𑀘𑁆𑀙𑀼𑀆𑀤𑀻𑀦𑀺 𑀩𑀦𑁆𑀥𑀺𑀢𑁆𑀯𑀸 𑀕𑀳𑀡𑀓𑀸𑀮𑁂 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑀁. 𑀧𑀭𑀺𑀲𑁆𑀲𑀸𑀯𑀦𑀁 𑀢𑁂𑀦 𑀉𑀤𑀓𑀁 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀦𑀳𑀸𑀦𑀓𑀸𑀮𑁂, 𑀲𑁂𑀦𑀸𑀲𑀦𑀧𑀭𑀺𑀪𑀡𑁆𑀟𑀓𑀭𑀡𑀓𑀸𑀮𑁂 𑀘 𑀓𑀸𑀬𑀧𑀭𑀺𑀳𑀸𑀭𑀺𑀓𑀁, 𑀧𑀸𑀦𑀻𑀬𑀧𑀭𑀺𑀲𑁆𑀲𑀸𑀯𑀦𑀓𑀸𑀮𑁂 𑀢𑁂𑀦𑁂𑀯 𑀢𑀺𑀮𑀢𑀡𑁆𑀟𑀼𑀮𑀧𑀼𑀣𑀼𑀓𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀔𑀸𑀤𑀦𑀓𑀸𑀮𑁂 𑀘 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑀁. 𑀅𑀬𑀁 𑀢𑀸𑀯 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀺𑀓𑀲𑁆𑀲 𑀧𑀭𑀺𑀓𑁆𑀔𑀸𑀭𑀫𑀢𑁆𑀢𑀸.

𑀦𑀯𑀧𑀭𑀺𑀓𑁆𑀔𑀸𑀭𑀺𑀓𑀲𑁆𑀲 𑀧𑀦 𑀲𑁂𑀬𑁆𑀬𑀁 𑀧𑀯𑀺𑀲𑀦𑁆𑀢𑀲𑁆𑀲 𑀢𑀢𑁆𑀭𑀝𑁆𑀞𑀓𑀧𑀘𑁆𑀘𑀢𑁆𑀣𑀭𑀡𑀁 𑀯𑀸 𑀓𑀼𑀜𑁆𑀘𑀺𑀓𑀸 𑀯𑀸 𑀯𑀝𑁆𑀝𑀢𑀺. 𑀤𑀲𑀧𑀭𑀺𑀓𑁆𑀔𑀸𑀭𑀺𑀓𑀲𑁆𑀲 𑀦𑀺𑀲𑀻𑀤𑀦𑀁 𑀯𑀸 𑀘𑀫𑁆𑀫𑀔𑀡𑁆𑀟𑀁 𑀯𑀸 𑀯𑀝𑁆𑀝𑀢𑀺. 𑀏𑀓𑀸𑀤𑀲𑀧𑀭𑀺𑀓𑁆𑀔𑀸𑀭𑀺𑀓𑀲𑁆𑀲 𑀓𑀢𑁆𑀢𑀭𑀬𑀝𑁆𑀞𑀺 𑀯𑀸 𑀢𑁂𑀮𑀦𑀸𑀴𑀺𑀓𑀸 𑀯𑀸 𑀯𑀝𑁆𑀝𑀢𑀺. 𑀤𑁆𑀯𑀸𑀤𑀲𑀧𑀭𑀺𑀓𑁆𑀔𑀸𑀭𑀺𑀓𑀲𑁆𑀲 𑀙𑀢𑁆𑀢𑀁 𑀯𑀸 𑀉𑀧𑀸𑀳𑀦𑀸 𑀯𑀸 𑀯𑀝𑁆𑀝𑀢𑀺. 𑀏𑀢𑁂𑀲𑀼 𑀘 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀺𑀓𑁄𑀯 𑀲𑀦𑁆𑀢𑀼𑀝𑁆𑀞𑁄, 𑀇𑀢𑀭𑁂 𑀅𑀲𑀦𑁆𑀢𑀼𑀝𑁆𑀞𑀸, 𑀫𑀳𑀺𑀘𑁆𑀙𑀸 𑀫𑀳𑀸𑀪𑀸𑀭𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀏𑀢𑁂𑀧𑀺 𑀳𑀺 𑀅𑀧𑁆𑀧𑀺𑀘𑁆𑀙𑀸𑀯 𑀲𑀦𑁆𑀢𑀼𑀝𑁆𑀞𑀸𑀯 𑀲𑀼𑀪𑀭𑀸𑀯 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺𑀦𑁄𑀯. 𑀪𑀕𑀯𑀸 𑀧𑀦 𑀦𑀬𑀺𑀫𑀁 𑀲𑀼𑀢𑁆𑀢𑀁 𑀢𑁂𑀲𑀁 𑀯𑀲𑁂𑀦 𑀓𑀣𑁂𑀲𑀺, 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀺𑀓𑀲𑁆𑀲 𑀯𑀲𑁂𑀦 𑀓𑀣𑁂𑀲𑀺. 𑀲𑁄 𑀳𑀺 𑀔𑀼𑀤𑁆𑀤𑀓𑀯𑀸𑀲𑀺𑀜𑁆𑀘 𑀲𑀽𑀘𑀺𑀜𑁆𑀘 𑀧𑀭𑀺𑀲𑁆𑀲𑀸𑀯𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀢𑁆𑀢𑀲𑁆𑀲 𑀅𑀦𑁆𑀢𑁄 𑀞𑀧𑁂𑀢𑁆𑀯𑀸 𑀧𑀢𑁆𑀢𑀁 𑀅𑀁𑀲𑀓𑀽𑀝𑁂 𑀮𑀕𑁆𑀕𑁂𑀢𑁆𑀯𑀸 𑀢𑀺𑀘𑀻𑀯𑀭𑀁 𑀓𑀸𑀬𑀧𑀝𑀺𑀩𑀤𑁆𑀥𑀁 𑀓𑀢𑁆𑀯𑀸 𑀬𑁂𑀦𑀺𑀘𑁆𑀙𑀓𑀁 𑀲𑀼𑀔𑀁 𑀧𑀓𑁆𑀓𑀫𑀢𑀺. 𑀧𑀝𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁 𑀦𑀸𑀫𑀲𑁆𑀲 𑀦 𑀳𑁄𑀢𑀺, 𑀇𑀢𑀺 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺𑀢𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸, 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺 𑀓𑀸𑀬𑀧𑀭𑀺𑀳𑀸𑀭𑀺𑀓𑁂𑀦 𑀘𑀻𑀯𑀭𑁂𑀦𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀓𑀸𑀬𑀧𑀭𑀺𑀳𑀸𑀭𑀺𑀓𑁂𑀦𑀸𑀢𑀺 𑀓𑀸𑀬𑀧𑀭𑀺𑀳𑀭𑀡𑀫𑀢𑁆𑀢𑀓𑁂𑀦. 𑀓𑀼𑀘𑁆𑀙𑀺𑀧𑀭𑀺𑀳𑀸𑀭𑀺𑀓𑁂𑀦𑀸𑀢𑀺 𑀓𑀼𑀘𑁆𑀙𑀺𑀧𑀭𑀺𑀳𑀭𑀡𑀫𑀢𑁆𑀢𑀓𑁂𑀦. 𑀲𑀫𑀸𑀤𑀸𑀬𑁂𑀯 𑀧𑀓𑁆𑀓𑀫𑀢𑀻𑀢𑀺 𑀢𑀁 𑀅𑀝𑁆𑀞𑀧𑀭𑀺𑀓𑁆𑀔𑀸𑀭𑀫𑀢𑁆𑀢𑀓𑀁 𑀲𑀩𑁆𑀩𑀁 𑀕𑀳𑁂𑀢𑁆𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑀁 𑀓𑀢𑁆𑀯𑀸𑀯 𑀕𑀘𑁆𑀙𑀢𑀺, ‘‘𑀫𑀫 𑀯𑀺𑀳𑀸𑀭𑁄 𑀧𑀭𑀺𑀯𑁂𑀡𑀁 𑀉𑀧𑀝𑁆𑀞𑀸𑀓𑁄’’𑀢𑀺𑀲𑁆𑀲 𑀲𑀗𑁆𑀕𑁄 𑀯𑀸 𑀩𑀤𑁆𑀥𑁄 𑀯𑀸 𑀦 𑀳𑁄𑀢𑀺, 𑀲𑁄 𑀚𑀺𑀬𑀸 𑀫𑀼𑀢𑁆𑀢𑁄 𑀲𑀭𑁄 𑀯𑀺𑀬, 𑀬𑀽𑀣𑀸 𑀅𑀧𑀓𑁆𑀓𑀦𑁆𑀢𑁄 𑀫𑀢𑁆𑀢𑀳𑀢𑁆𑀣𑀻 𑀯𑀺𑀬 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀲𑁂𑀦𑀸𑀲𑀦𑀁 𑀯𑀦𑀲𑀡𑁆𑀟𑀁 𑀭𑀼𑀓𑁆𑀔𑀫𑀽𑀮𑀁 𑀯𑀦𑀧𑀩𑁆𑀪𑀸𑀭𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀏𑀓𑁄𑀯 𑀢𑀺𑀝𑁆𑀞𑀢𑀺, 𑀏𑀓𑁄𑀯 𑀦𑀺𑀲𑀻𑀤𑀢𑀺, 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀏𑀓𑁄𑀯 𑀅𑀤𑀼𑀢𑀺𑀬𑁄.

‘‘𑀘𑀸𑀢𑀼𑀤𑁆𑀤𑀺𑀲𑁄 𑀅𑀧𑁆𑀧𑀝𑀺𑀖𑁄 𑀘 𑀳𑁄𑀢𑀺,

𑀲𑀦𑁆𑀢𑀼𑀲𑁆𑀲𑀫𑀸𑀦𑁄 𑀇𑀢𑀭𑀻𑀢𑀭𑁂𑀦;

𑀧𑀭𑀺𑀲𑁆𑀲𑀬𑀸𑀦𑀁 𑀲𑀳𑀺𑀢𑀸 𑀅𑀙𑀫𑁆𑀪𑀻,

𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺. (𑀲𑀼. 𑀦𑀺. 𑁪𑁨);

𑀏𑀯𑀁 𑀯𑀡𑁆𑀡𑀺𑀢𑀁 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑀢𑀁 𑀆𑀧𑀚𑁆𑀚𑀢𑀺.

𑀇𑀤𑀸𑀦𑀺 𑀢𑀫𑀢𑁆𑀣𑀁 𑀉𑀧𑀫𑀸𑀬 𑀲𑀸𑀥𑁂𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀓𑁆𑀔𑀻 𑀲𑀓𑀼𑀡𑁄𑀢𑀺 𑀧𑀓𑁆𑀔𑀬𑀼𑀢𑁆𑀢𑁄 𑀲𑀓𑀼𑀡𑁄. 𑀟𑁂𑀢𑀻𑀢𑀺 𑀉𑀧𑁆𑀧𑀢𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀲𑀓𑀼𑀡𑀸 𑀦𑀸𑀫 ‘‘𑀅𑀲𑀼𑀓𑀲𑁆𑀫𑀺𑀁 𑀧𑀤𑁂𑀲𑁂 𑀭𑀼𑀓𑁆𑀔𑁄 𑀧𑀭𑀺𑀧𑀓𑁆𑀓𑀨𑀮𑁄’’𑀢𑀺 𑀜𑀢𑁆𑀯𑀸 𑀦𑀸𑀦𑀸𑀤𑀺𑀲𑀸𑀳𑀺 𑀆𑀕𑀦𑁆𑀢𑁆𑀯𑀸 𑀦𑀔𑀧𑀓𑁆𑀔𑀢𑀼𑀡𑁆𑀟𑀸𑀤𑀻𑀳𑀺 𑀢𑀲𑁆𑀲 𑀨𑀮𑀸𑀦𑀺 𑀯𑀺𑀚𑁆𑀛𑀦𑁆𑀢𑀸 𑀯𑀺𑀥𑀼𑀦𑀦𑁆𑀢𑀸 𑀔𑀸𑀤𑀦𑁆𑀢𑀺. ‘‘𑀇𑀤𑀁 𑀅𑀚𑁆𑀚𑀢𑀦𑀸𑀬 𑀇𑀤𑀁 𑀲𑁆𑀯𑀸𑀢𑀦𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑁂𑀲𑀁 𑀦 𑀳𑁄𑀢𑀺. 𑀨𑀮𑁂 𑀧𑀦 𑀔𑀻𑀡𑁂 𑀦𑁂𑀯 𑀭𑀼𑀓𑁆𑀔𑀲𑁆𑀲 𑀆𑀭𑀓𑁆𑀔𑀁 𑀞𑀧𑁂𑀦𑁆𑀢𑀺, 𑀦 𑀢𑀢𑁆𑀣 𑀧𑀢𑁆𑀢𑀁 𑀯𑀸 𑀦𑀔𑀁 𑀯𑀸 𑀢𑀼𑀡𑁆𑀟𑀁 𑀯𑀸 𑀞𑀧𑁂𑀦𑁆𑀢𑀺, 𑀅𑀣 𑀔𑁄 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀅𑀦𑀧𑁂𑀓𑁆𑀔𑁄 𑀳𑀼𑀢𑁆𑀯𑀸 𑀬𑁄 𑀬𑀁 𑀤𑀺𑀲𑀸𑀪𑀸𑀕𑀁 𑀇𑀘𑁆𑀙𑀢𑀺, 𑀲𑁄 𑀢𑁂𑀦 𑀲𑀧𑀢𑁆𑀢𑀪𑀸𑀭𑁄𑀯 𑁋 𑀉𑀧𑁆𑀧𑀢𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀏𑀯𑀫𑁂𑀯 𑀅𑀬𑀁 𑀪𑀺𑀓𑁆𑀔𑀼 𑀦𑀺𑀲𑁆𑀲𑀗𑁆𑀕𑁄 𑀦𑀺𑀭𑀧𑁂𑀓𑁆𑀔𑁄𑀬𑁂𑀯 𑀧𑀓𑁆𑀓𑀫𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀫𑀸𑀤𑀸𑀬𑁂𑀯 𑀧𑀓𑁆𑀓𑀫𑀢𑀻’’𑀢𑀺. 𑀅𑀭𑀺𑀬𑁂𑀦𑀸𑀢𑀺 𑀦𑀺𑀤𑁆𑀤𑁄𑀲𑁂𑀦. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀲𑀓𑁂 𑀅𑀢𑁆𑀢𑀪𑀸𑀯𑁂. 𑀅𑀦𑀯𑀚𑁆𑀚𑀲𑀼𑀔𑀦𑁆𑀢𑀺 𑀦𑀺𑀤𑁆𑀤𑁄𑀲𑀲𑀼𑀔𑀁.

𑁨𑁯𑁫. 𑀲𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀲𑁄 𑀇𑀫𑀺𑀦𑀸 𑀅𑀭𑀺𑀬𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀁 𑀧𑀲𑁆𑀲𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀁. 𑀅𑀩𑁆𑀬𑀸𑀲𑁂𑀓𑀲𑀼𑀔𑀦𑁆𑀢𑀺 𑀓𑀺𑀮𑁂𑀲𑁂𑀳𑀺 𑀅𑀦𑀯𑀲𑀺𑀢𑁆𑀢𑀲𑀼𑀔𑀁, 𑀅𑀯𑀺𑀓𑀺𑀡𑁆𑀡𑀲𑀼𑀔𑀦𑁆𑀢𑀺𑀧𑀺 𑀯𑀼𑀢𑁆𑀢𑀁. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀼𑀔𑀜𑁆𑀳𑀺 𑀤𑀺𑀝𑁆𑀞𑀸𑀤𑀻𑀲𑀼 𑀤𑀺𑀝𑁆𑀞𑀫𑀢𑁆𑀢𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀢𑀸𑀬 𑀅𑀯𑀺𑀓𑀺𑀡𑁆𑀡𑀁 𑀳𑁄𑀢𑀺. 𑀲𑁄 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂𑀢𑀺 𑀲𑁄 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀁𑀯𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀇𑀫𑁂𑀲𑀼 𑀅𑀪𑀺𑀓𑁆𑀓𑀦𑁆𑀢𑀧𑀝𑀺𑀓𑁆𑀓𑀦𑁆𑀢𑀸𑀤𑀻𑀲𑀼 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀲𑀢𑀺𑀲𑀫𑁆𑀧𑀚𑀜𑁆𑀜𑀯𑀲𑁂𑀦 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀢𑀺𑀧𑀝𑁆𑀞𑀸𑀦𑁂 𑀯𑀼𑀢𑁆𑀢𑀫𑁂𑀯.

𑁨𑁯𑁬. 𑀲𑁄 𑀇𑀫𑀺𑀦𑀸 𑀘𑀸𑀢𑀺𑀆𑀤𑀺𑀦𑀸 𑀓𑀺𑀁 𑀤𑀲𑁆𑀲𑁂𑀢𑀺? 𑀅𑀭𑀜𑁆𑀜𑀯𑀸𑀲𑀲𑁆𑀲 𑀧𑀘𑁆𑀘𑀬𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀬𑀲𑁆𑀲 𑀳𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀦𑀢𑁆𑀣𑀺, 𑀢𑀲𑁆𑀲 𑀅𑀭𑀜𑁆𑀜𑀯𑀸𑀲𑁄 𑀦 𑀇𑀚𑁆𑀛𑀢𑀺, 𑀢𑀺𑀭𑀘𑁆𑀙𑀸𑀦𑀕𑀢𑁂𑀳𑀺 𑀯𑀸 𑀯𑀦𑀘𑀭𑀓𑁂𑀳𑀺 𑀯𑀸 𑀲𑀤𑁆𑀥𑀺𑀁 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺, 𑀅𑀭𑀜𑁆𑀜𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸, ‘‘𑀓𑀺𑀁 𑀏𑀯𑀭𑀽𑀧𑀲𑁆𑀲 𑀧𑀸𑀧𑀪𑀺𑀓𑁆𑀔𑀼𑀦𑁄 𑀅𑀭𑀜𑁆𑀜𑀯𑀸𑀲𑁂𑀦𑀸’’𑀢𑀺 𑀪𑁂𑀭𑀯𑀲𑀤𑁆𑀤𑀁 𑀲𑀸𑀯𑁂𑀦𑁆𑀢𑀺, 𑀳𑀢𑁆𑀣𑁂𑀳𑀺 𑀲𑀻𑀲𑀁 𑀧𑀳𑀭𑀺𑀢𑁆𑀯𑀸 𑀧𑀮𑀸𑀬𑀦𑀸𑀓𑀸𑀭𑀁 𑀓𑀭𑁄𑀦𑁆𑀢𑀺. ‘‘𑀅𑀲𑀼𑀓𑁄 𑀪𑀺𑀓𑁆𑀔𑀼 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀇𑀤𑀜𑁆𑀘𑀺𑀤𑀜𑁆𑀘 𑀧𑀸𑀧𑀓𑀫𑁆𑀫𑀁 𑀅𑀓𑀸𑀲𑀻’’𑀢𑀺 𑀅𑀬𑀲𑁄 𑀧𑀢𑁆𑀣𑀭𑀢𑀺. 𑀬𑀲𑁆𑀲 𑀧𑀦𑁂𑀢𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀅𑀢𑁆𑀣𑀺, 𑀢𑀲𑁆𑀲 𑀅𑀭𑀜𑁆𑀜𑀯𑀸𑀲𑁄 𑀇𑀚𑁆𑀛𑀢𑀺, 𑀲𑁄 𑀳𑀺 𑀅𑀢𑁆𑀢𑀦𑁄 𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀓𑀺𑀜𑁆𑀘𑀺 𑀓𑀸𑀴𑀓𑀁 𑀯𑀸 𑀢𑀺𑀮𑀓𑀁 𑀯𑀸 𑀅𑀧𑀲𑁆𑀲𑀦𑁆𑀢𑁄 𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀔𑀬𑀢𑁄 𑀯𑀬𑀢𑁄 𑀲𑀫𑁆𑀫𑀲𑀦𑁆𑀢𑁄 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀢𑀺, 𑀅𑀭𑀜𑁆𑀜𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀅𑀢𑁆𑀢𑀫𑀦𑀸 𑀯𑀡𑁆𑀡𑀁 𑀪𑀸𑀲𑀦𑁆𑀢𑀺, 𑀇𑀢𑀺𑀲𑁆𑀲 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑀢𑁂𑀮𑀩𑀺𑀦𑁆𑀤𑀼 𑀯𑀺𑀬 𑀬𑀲𑁄 𑀯𑀺𑀢𑁆𑀣𑀸𑀭𑀺𑀓𑁄 𑀳𑁄𑀢𑀺.

𑀢𑀢𑁆𑀣 𑀯𑀺𑀯𑀺𑀢𑁆𑀢𑀦𑁆𑀢𑀺 𑀲𑀼𑀜𑁆𑀜𑀁 𑀅𑀧𑁆𑀧𑀲𑀤𑁆𑀤𑀁, 𑀅𑀧𑁆𑀧𑀦𑀺𑀕𑁆𑀖𑁄𑀲𑀦𑁆𑀢𑀺 𑀅𑀢𑁆𑀣𑁄. 𑀏𑀢𑀤𑁂𑀯 𑀳𑀺 𑀲𑀦𑁆𑀥𑀸𑀬 𑀯𑀺𑀪𑀗𑁆𑀕𑁂, ‘‘𑀯𑀺𑀯𑀺𑀢𑁆𑀢𑀦𑁆𑀢𑀺 𑀲𑀦𑁆𑀢𑀺𑀓𑁂 𑀘𑁂𑀧𑀺 𑀲𑁂𑀦𑀸𑀲𑀦𑀁 𑀳𑁄𑀢𑀺, 𑀢𑀜𑁆𑀘 𑀅𑀦𑀸𑀓𑀺𑀡𑁆𑀡𑀁 𑀕𑀳𑀝𑁆𑀞𑁂𑀳𑀺 𑀧𑀩𑁆𑀩𑀚𑀺𑀢𑁂𑀳𑀺, 𑀢𑁂𑀦 𑀢𑀁 𑀯𑀺𑀯𑀺𑀢𑁆𑀢’’𑀦𑁆𑀢𑀺 (𑀯𑀺𑀪. 𑁫𑁨𑁬) 𑀯𑀼𑀢𑁆𑀢𑀁. 𑀲𑁂𑀢𑀺 𑀘𑁂𑀯 𑀆𑀲𑀢𑀺 𑀘 𑀏𑀢𑁆𑀣𑀸𑀢𑀺 𑀲𑁂𑀦𑀸𑀲𑀦𑀁, 𑀫𑀜𑁆𑀘𑀧𑀻𑀞𑀸𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀦𑀸𑀳 𑁋 ‘‘𑀲𑁂𑀦𑀸𑀲𑀦𑀦𑁆𑀢𑀺 𑀫𑀜𑁆𑀘𑁄𑀧𑀺 𑀲𑁂𑀦𑀸𑀲𑀦𑀁, 𑀧𑀻𑀞𑀫𑁆𑀧𑀺 𑀪𑀺𑀲𑀺𑀧𑀺 𑀩𑀺𑀫𑁆𑀩𑁄𑀳𑀦𑀫𑁆𑀧𑀺, 𑀯𑀺𑀳𑀸𑀭𑁄𑀧𑀺 𑀅𑀟𑁆𑀠𑀬𑁄𑀕𑁄𑀧𑀺, 𑀧𑀸𑀲𑀸𑀤𑁄𑀧𑀺, 𑀳𑀫𑁆𑀫𑀺𑀬𑀫𑁆𑀧𑀺, 𑀕𑀼𑀳𑀸𑀧𑀺, 𑀅𑀝𑁆𑀝𑁄𑀧𑀺, 𑀫𑀸𑀴𑁄𑀧𑀺, 𑀮𑁂𑀡𑀫𑁆𑀧𑀺, 𑀯𑁂𑀴𑀼𑀕𑀼𑀫𑁆𑀩𑁄𑀧𑀺, 𑀭𑀼𑀓𑁆𑀔𑀫𑀽𑀮𑀫𑁆𑀧𑀺, 𑀫𑀡𑁆𑀟𑀧𑁄𑀧𑀺 𑀲𑁂𑀦𑀸𑀲𑀦𑀁, 𑀬𑀢𑁆𑀣 𑀯𑀸 𑀧𑀦 𑀪𑀺𑀓𑁆𑀔𑀽 𑀧𑀝𑀺𑀓𑁆𑀓𑀫𑀦𑁆𑀢𑀺, 𑀲𑀩𑁆𑀩𑀫𑁂𑀢𑀁 𑀲𑁂𑀦𑀸𑀲𑀦’’𑀦𑁆𑀢𑀺. 𑀅𑀧𑀺𑀘 ‘‘𑀯𑀺𑀳𑀸𑀭𑁄 𑀅𑀟𑁆𑀠𑀬𑁄𑀕𑁄 𑀧𑀸𑀲𑀸𑀤𑁄 𑀳𑀫𑁆𑀫𑀺𑀬𑀁 𑀕𑀼𑀳𑀸’’𑀢𑀺 𑀇𑀤𑀁 𑀯𑀺𑀳𑀸𑀭𑀲𑁂𑀦𑀸𑀲𑀦𑀁 𑀦𑀸𑀫. ‘‘𑀫𑀜𑁆𑀘𑁄 𑀧𑀻𑀞𑀁, 𑀪𑀺𑀲𑀺 𑀩𑀺𑀫𑁆𑀩𑁄𑀳𑀦’’𑀦𑁆𑀢𑀺 𑀇𑀤𑀁 𑀫𑀜𑁆𑀘𑀧𑀻𑀞𑀲𑁂𑀦𑀸𑀲𑀦𑀁 𑀦𑀸𑀫. ‘‘𑀘𑀺𑀫𑀺𑀮𑀺𑀓𑀸, 𑀘𑀫𑁆𑀫𑀔𑀡𑁆𑀟𑁄, 𑀢𑀺𑀡𑀲𑀦𑁆𑀣𑀸𑀭𑁄, 𑀧𑀡𑁆𑀡𑀲𑀦𑁆𑀣𑀸𑀭𑁄’’𑀢𑀺 𑀇𑀤𑀁 𑀲𑀦𑁆𑀣𑀢𑀲𑁂𑀦𑀸𑀲𑀦𑀁 𑀦𑀸𑀫. ‘‘𑀬𑀢𑁆𑀣 𑀯𑀸 𑀧𑀦 𑀪𑀺𑀓𑁆𑀔𑀽 𑀧𑀝𑀺𑀓𑁆𑀓𑀫𑀦𑁆𑀢𑀻’’𑀢𑀺 𑀇𑀤𑀁 𑀑𑀓𑀸𑀲𑀲𑁂𑀦𑀸𑀲𑀦𑀁 𑀦𑀸𑀫𑀸𑀢𑀺 𑀏𑀯𑀁 𑀘𑀢𑀼𑀩𑁆𑀩𑀺𑀥𑀁 𑀲𑁂𑀦𑀸𑀲𑀦𑀁 𑀳𑁄𑀢𑀺, 𑀢𑀁 𑀲𑀩𑁆𑀩𑀫𑁆𑀧𑀺 𑀲𑁂𑀦𑀸𑀲𑀦𑀕𑁆𑀕𑀳𑀡𑁂𑀦 𑀕𑀳𑀺𑀢𑀫𑁂𑀯. 𑀇𑀫𑀲𑁆𑀲 𑀧𑀦 𑀲𑀓𑀼𑀡𑀲𑀤𑀺𑀲𑀲𑁆𑀲 𑀘𑀸𑀢𑀼𑀤𑁆𑀤𑀺𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀘𑁆𑀙𑀯𑀺𑀓𑀁 𑀤𑀲𑁆𑀲𑁂𑀦𑁆𑀢𑁄 𑀅𑀭𑀜𑁆𑀜𑀁 𑀭𑀼𑀓𑁆𑀔𑀫𑀽𑀮𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀅𑀭𑀜𑁆𑀜𑀦𑁆𑀢𑀺 ‘‘𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸, 𑀲𑀩𑁆𑀩𑀫𑁂𑀢𑀁 𑀅𑀭𑀜𑁆𑀜’’𑀦𑁆𑀢𑀺 𑀇𑀤𑀁 𑀪𑀺𑀓𑁆𑀔𑀼𑀦𑀻𑀦𑀁 𑀯𑀲𑁂𑀦 𑀆𑀕𑀢𑀁 𑀅𑀭𑀜𑁆𑀜𑀁. ‘‘𑀆𑀭𑀜𑁆𑀜𑀓𑀁 𑀦𑀸𑀫 𑀲𑁂𑀦𑀸𑀲𑀦𑀁 𑀧𑀜𑁆𑀘𑀥𑀦𑀼𑀲𑀢𑀺𑀓𑀁 𑀧𑀘𑁆𑀙𑀺𑀫’’𑀦𑁆𑀢𑀺 (𑀧𑀸𑀭𑀸. 𑁬𑁫𑁪) 𑀇𑀤𑀁 𑀧𑀦 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀼𑀭𑀽𑀧𑀁, 𑀢𑀲𑁆𑀲 𑀮𑀓𑁆𑀔𑀡𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀥𑀼𑀢𑀗𑁆𑀕𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀁. 𑀭𑀼𑀓𑁆𑀔𑀫𑀽𑀮𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀲𑀦𑁆𑀤𑀘𑁆𑀙𑀸𑀬𑀁 𑀯𑀺𑀯𑀺𑀢𑁆𑀢𑀁 𑀭𑀓𑁆𑀔𑀫𑀽𑀮𑀁. 𑀧𑀩𑁆𑀩𑀢𑀦𑁆𑀢𑀺 𑀲𑁂𑀮𑀁. 𑀢𑀢𑁆𑀣 𑀳𑀺 𑀉𑀤𑀓𑀲𑁄𑀡𑁆𑀟𑀻𑀲𑀼 𑀉𑀤𑀓𑀓𑀺𑀘𑁆𑀘𑀁 𑀓𑀢𑁆𑀯𑀸 𑀲𑀻𑀢𑀸𑀬 𑀭𑀼𑀓𑁆𑀔𑀘𑁆𑀙𑀸𑀬𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀦𑀸𑀦𑀸𑀤𑀺𑀲𑀸𑀲𑀼 𑀔𑀸𑀬𑀫𑀸𑀦𑀸𑀲𑀼 𑀲𑀻𑀢𑁂𑀦 𑀯𑀸𑀢𑁂𑀦 𑀯𑀻𑀚𑀺𑀬𑀫𑀸𑀦𑀲𑁆𑀲 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺. 𑀓𑀦𑁆𑀤𑀭𑀦𑁆𑀢𑀺 𑀓𑀁 𑀯𑀼𑀘𑁆𑀘𑀢𑀺 𑀉𑀤𑀓𑀁, 𑀢𑁂𑀦 𑀤𑀸𑀭𑀺𑀢𑀁, 𑀉𑀤𑀓𑁂𑀦 𑀪𑀺𑀦𑁆𑀦𑀁 𑀧𑀩𑁆𑀩𑀢𑀧𑁆𑀧𑀤𑁂𑀲𑀁, 𑀬𑀁 𑀦𑀤𑀻𑀢𑀼𑀫𑁆𑀩𑀦𑁆𑀢𑀺𑀧𑀺 𑀦𑀤𑀻𑀓𑀼𑀜𑁆𑀚𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀳𑀺 𑀭𑀚𑀢𑀧𑀝𑁆𑀝𑀲𑀤𑀺𑀲𑀸 𑀯𑀸𑀮𑀺𑀓𑀸 𑀳𑁄𑀦𑁆𑀢𑀺, 𑀫𑀢𑁆𑀣𑀓𑁂 𑀫𑀡𑀺𑀯𑀺𑀢𑀸𑀦𑀁 𑀯𑀺𑀬 𑀯𑀦𑀕𑀳𑀦𑀁, 𑀫𑀡𑀺𑀓𑁆𑀔𑀦𑁆𑀥𑀲𑀤𑀺𑀲𑀁 𑀉𑀤𑀓𑀁 𑀲𑀦𑁆𑀤𑀢𑀺. 𑀏𑀯𑀭𑀽𑀧𑀁 𑀓𑀦𑁆𑀤𑀭𑀁 𑀑𑀭𑀼𑀬𑁆𑀳 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀕𑀢𑁆𑀢𑀸𑀦𑀺 𑀲𑀻𑀢𑀸𑀦𑀺 𑀓𑀢𑁆𑀯𑀸 𑀯𑀸𑀮𑀺𑀓𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀧𑀁𑀲𑀼𑀓𑀽𑀮𑀘𑀻𑀯𑀭𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑁄 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺. 𑀕𑀺𑀭𑀺𑀕𑀼𑀳𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀧𑀩𑁆𑀩𑀢𑀸𑀦𑀁 𑀅𑀦𑁆𑀢𑀭𑀸, 𑀏𑀓𑀲𑁆𑀫𑀺𑀁𑀬𑁂𑀯 𑀯𑀸 𑀉𑀫𑀗𑁆𑀕𑀲𑀤𑀺𑀲𑀁 𑀫𑀳𑀸𑀯𑀺𑀯𑀭𑀁. 𑀲𑀼𑀲𑀸𑀦𑀮𑀓𑁆𑀔𑀡𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀁. 𑀯𑀦𑀧𑀢𑁆𑀣𑀦𑁆𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀉𑀧𑀘𑀸𑀭𑀝𑁆𑀞𑀸𑀦𑀁, 𑀬𑀢𑁆𑀣 𑀦 𑀓𑀲𑀦𑁆𑀢𑀺 𑀦 𑀯𑀧𑀦𑁆𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀯𑀦𑀧𑀢𑁆𑀣𑀦𑁆𑀢𑀺 𑀤𑀽𑀭𑀸𑀦𑀫𑁂𑀢𑀁 𑀲𑁂𑀦𑀸𑀲𑀦𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺𑀆𑀤𑀺 (𑀯𑀺𑀪. 𑁫𑁩𑁧). 𑀅𑀩𑁆𑀪𑁄𑀓𑀸𑀲𑀦𑁆𑀢𑀺 𑀅𑀘𑁆𑀙𑀦𑁆𑀦𑀁, 𑀆𑀓𑀗𑁆𑀔𑀫𑀸𑀦𑁄 𑀧𑀦𑁂𑀢𑁆𑀣 𑀘𑀻𑀯𑀭𑀓𑀼𑀝𑀺𑀁 𑀓𑀢𑁆𑀯𑀸 𑀯𑀲𑀢𑀺. 𑀧𑀮𑀸𑀮𑀧𑀼𑀜𑁆𑀚𑀦𑁆𑀢𑀺 𑀧𑀮𑀸𑀮𑀭𑀸𑀲𑀺𑀁. 𑀫𑀳𑀸𑀧𑀮𑀸𑀮𑀧𑀼𑀜𑁆𑀚𑀢𑁄 𑀳𑀺 𑀧𑀮𑀸𑀮𑀁 𑀦𑀺𑀓𑁆𑀓𑀟𑁆𑀠𑀺𑀢𑁆𑀯𑀸 𑀧𑀩𑁆𑀪𑀸𑀭𑀮𑁂𑀡𑀲𑀤𑀺𑀲𑁂 𑀆𑀮𑀬𑁂 𑀓𑀭𑁄𑀦𑁆𑀢𑀺, 𑀕𑀘𑁆𑀙𑀕𑀼𑀫𑁆𑀩𑀸𑀤𑀻𑀦𑀫𑁆𑀧𑀺 𑀉𑀧𑀭𑀺 𑀧𑀮𑀸𑀮𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀳𑁂𑀝𑁆𑀞𑀸 𑀦𑀺𑀲𑀺𑀦𑁆𑀦𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀧𑀘𑁆𑀙𑀸𑀪𑀢𑁆𑀢𑀦𑁆𑀢𑀺 𑀪𑀢𑁆𑀢𑀲𑁆𑀲 𑀧𑀘𑁆𑀙𑀢𑁄. 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄𑀢𑀺 𑀧𑀺𑀡𑁆𑀟𑀧𑀸𑀢𑀧𑀭𑀺𑀬𑁂𑀲𑀦𑀢𑁄 𑀧𑀝𑀺𑀓𑁆𑀓𑀦𑁆𑀢𑁄. 𑀧𑀮𑁆𑀮𑀗𑁆𑀓𑀦𑁆𑀢𑀺 𑀲𑀫𑀦𑁆𑀢𑀢𑁄 𑀊𑀭𑀼𑀩𑀤𑁆𑀥𑀸𑀲𑀦𑀁. 𑀆𑀪𑀼𑀚𑀺𑀢𑁆𑀯𑀸𑀢𑀺 𑀩𑀦𑁆𑀥𑀺𑀢𑁆𑀯𑀸. 𑀉𑀚𑀼𑀁 𑀓𑀸𑀬𑀁 𑀧𑀡𑀺𑀥𑀸𑀬𑀸𑀢𑀺 𑀉𑀧𑀭𑀺𑀫𑀁 𑀲𑀭𑀻𑀭𑀁 𑀉𑀚𑀼𑀓𑀁 𑀞𑀧𑁂𑀢𑁆𑀯𑀸 𑀅𑀝𑁆𑀞𑀸𑀭𑀲 𑀧𑀺𑀝𑁆𑀞𑀺𑀓𑀡𑁆𑀝𑀓𑁂 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀧𑀝𑀺𑀧𑀸𑀤𑁂𑀢𑁆𑀯𑀸. 𑀏𑀯𑀜𑁆𑀳𑀺 𑀦𑀺𑀲𑀺𑀦𑁆𑀦𑀲𑁆𑀲 𑀘𑀫𑁆𑀫𑀫𑀁𑀲𑀦𑀳𑀸𑀭𑀽𑀦𑀺 𑀦 𑀧𑀡𑀫𑀦𑁆𑀢𑀺. 𑀅𑀣𑀲𑁆𑀲 𑀬𑀸 𑀢𑁂𑀲𑀁 𑀧𑀡𑀫𑀦𑀧𑀘𑁆𑀘𑀬𑀸 𑀔𑀡𑁂 𑀔𑀡𑁂 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀢𑀸𑀲𑀼 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀸𑀲𑀼 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀧𑀭𑀺𑀧𑀢𑀢𑀺, 𑀯𑀼𑀤𑁆𑀥𑀺𑀁 𑀨𑀸𑀢𑀺𑀁 𑀉𑀧𑀕𑀘𑁆𑀙𑀢𑀺. 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀫𑀼𑀔𑀁 𑀲𑀢𑀺𑀁 𑀞𑀧𑀬𑀺𑀢𑁆𑀯𑀸, 𑀫𑀼𑀔𑀲𑀫𑀻𑀧𑁂 𑀯𑀸 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀁 𑁋 ‘‘𑀅𑀬𑀁 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺 𑀲𑀽𑀧𑀝𑁆𑀞𑀺𑀢𑀸 𑀦𑀸𑀲𑀺𑀓𑀕𑁆𑀕𑁂 𑀯𑀸 𑀫𑀼𑀔𑀦𑀺𑀫𑀺𑀢𑁆𑀢𑁂 𑀯𑀸, 𑀢𑁂𑀦 𑀯𑀼𑀘𑁆𑀘𑀢𑀺 𑀧𑀭𑀺𑀫𑀼𑀔𑀁 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺 (𑀯𑀺𑀪. 𑁫𑁩𑁭). 𑀅𑀣 𑀯𑀸 ‘‘𑀧𑀭𑀻𑀢𑀺 𑀧𑀭𑀺𑀕𑁆𑀕𑀳𑀝𑁆𑀞𑁄, 𑀫𑀼𑀔𑀦𑁆𑀢𑀺 𑀦𑀺𑀬𑁆𑀬𑀸𑀦𑀢𑁆𑀣𑁄, 𑀲𑀢𑀻𑀢𑀺 𑀉𑀧𑀝𑁆𑀞𑀸𑀦𑀢𑁆𑀣𑁄, 𑀢𑁂𑀦 𑀯𑀼𑀘𑁆𑀘𑀢𑀺 𑀧𑀭𑀺𑀫𑀼𑀔𑀁 𑀲𑀢𑀺’’𑀦𑁆𑀢𑀺 (𑀧𑀝𑀺. 𑀫. 𑁧.𑁧𑁬𑁪) 𑀏𑀯𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑁄 ‘‘𑀧𑀭𑀺𑀕𑁆𑀕𑀳𑀺𑀢𑀦𑀺𑀬𑁆𑀬𑀸𑀦𑀲𑀢𑀺𑀁 𑀓𑀢𑁆𑀯𑀸’’𑀢𑀺.

𑀅𑀪𑀺𑀚𑁆𑀛𑀁 𑀮𑁄𑀓𑁂𑀢𑀺 𑀏𑀢𑁆𑀣 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀮𑁄𑀓𑁄, 𑀢𑀲𑁆𑀫𑀸 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀭𑀸𑀕𑀁 𑀧𑀳𑀸𑀬 𑀓𑀸𑀫𑀘𑁆𑀙𑀦𑁆𑀤𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀯𑀺𑀕𑀢𑀸𑀪𑀺𑀚𑁆𑀛𑁂𑀦𑀸𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀳𑀻𑀦𑀢𑁆𑀢𑀸 𑀯𑀺𑀕𑀢𑀸𑀪𑀺𑀚𑁆𑀛𑁂𑀦, 𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀤𑀺𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀪𑀺𑀚𑁆𑀛𑀸𑀬 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀻𑀢𑀺 𑀅𑀪𑀺𑀚𑁆𑀛𑀸𑀢𑁄 𑀘𑀺𑀢𑁆𑀢𑀁 𑀧𑀭𑀺𑀫𑁄𑀘𑁂𑀢𑀺. 𑀬𑀣𑀸 𑀦𑀁 𑀲𑀸 𑀫𑀼𑀜𑁆𑀘𑀢𑀺 𑀘𑁂𑀯, 𑀫𑀼𑀜𑁆𑀘𑀺𑀢𑁆𑀯𑀸 𑀘 𑀦 𑀧𑀼𑀦 𑀕𑀡𑁆𑀳𑀸𑀢𑀺, 𑀏𑀯𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀩𑁆𑀬𑀸𑀧𑀸𑀤𑀧𑀤𑁄𑀲𑀁 𑀧𑀳𑀸𑀬𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀩𑁆𑀬𑀸𑀧𑀚𑁆𑀚𑀢𑀺 𑀇𑀫𑀺𑀦𑀸 𑀘𑀺𑀢𑁆𑀢𑀁 𑀧𑀽𑀢𑀺𑀓𑀫𑁆𑀫𑀸𑀲𑀸𑀤𑀬𑁄 𑀯𑀺𑀬 𑀧𑀼𑀭𑀺𑀫𑀧𑀓𑀢𑀺𑀁 𑀧𑀚𑀳𑀢𑀻𑀢𑀺 𑀩𑁆𑀬𑀸𑀧𑀸𑀤𑁄. 𑀯𑀺𑀓𑀸𑀭𑀸𑀧𑀢𑁆𑀢𑀺𑀬𑀸 𑀧𑀤𑀼𑀲𑁆𑀲𑀢𑀺, 𑀧𑀭𑀁 𑀯𑀸 𑀧𑀤𑀽𑀲𑁂𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀧𑀤𑁄𑀲𑁄. 𑀉𑀪𑀬𑀫𑁂𑀢𑀁 𑀓𑁄𑀥𑀲𑁆𑀲𑁂𑀯𑀸𑀥𑀺𑀯𑀘𑀦𑀁. 𑀣𑀺𑀦𑀁 𑀘𑀺𑀢𑁆𑀢𑀕𑁂𑀮𑀜𑁆𑀜𑀁. 𑀫𑀺𑀤𑁆𑀥𑀁 𑀘𑁂𑀢𑀲𑀺𑀓𑀕𑁂𑀮𑀜𑁆𑀜𑀁. 𑀣𑀺𑀦𑀜𑁆𑀘 𑀫𑀺𑀤𑁆𑀥𑀜𑁆𑀘 𑀣𑀺𑀦𑀫𑀺𑀤𑁆𑀥𑀁. 𑀆𑀮𑁄𑀓𑀲𑀜𑁆𑀜𑀻𑀢𑀺 𑀭𑀢𑁆𑀢𑀺𑀫𑁆𑀧𑀺 𑀤𑀺𑀯𑀸 𑀤𑀺𑀝𑁆𑀞𑀆𑀮𑁄𑀓𑀲𑀜𑁆𑀚𑀸𑀦𑀦𑀲𑀫𑀢𑁆𑀣𑀢𑀸𑀬 𑀯𑀺𑀕𑀢𑀦𑀻𑀯𑀭𑀡𑀸𑀬 𑀧𑀭𑀺𑀲𑀼𑀤𑁆𑀥𑀸𑀬 𑀲𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺 𑀲𑀢𑀺𑀬𑀸 𑀘 𑀜𑀸𑀡𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄. 𑀇𑀤𑀁 𑀉𑀪𑀬𑀁 𑀆𑀮𑁄𑀓𑀲𑀜𑁆𑀜𑀸𑀬 𑀉𑀧𑀓𑀸𑀭𑀢𑁆𑀢𑀸 𑀯𑀼𑀢𑁆𑀢𑀁. 𑀉𑀤𑁆𑀥𑀘𑁆𑀘𑀜𑁆𑀘 𑀓𑀼𑀓𑁆𑀓𑀼𑀘𑁆𑀘𑀜𑁆𑀘 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁. 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄𑀢𑀺 𑀯𑀺𑀘𑀺𑀓𑀺𑀘𑁆𑀙𑀁 𑀢𑀭𑀺𑀢𑁆𑀯𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄. ‘‘𑀓𑀣𑀫𑀺𑀤𑀁 𑀓𑀣𑀫𑀺𑀤’’𑀦𑁆𑀢𑀺 𑀏𑀯𑀁 𑀦𑀧𑁆𑀧𑀯𑀢𑁆𑀢𑀢𑀻𑀢𑀺 𑀅𑀓𑀣𑀁𑀓𑀣𑀻. 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀅𑀦𑀯𑀚𑁆𑀚𑁂𑀲𑀼 𑀥𑀫𑁆𑀫𑁂𑀲𑀼. ‘‘𑀇𑀫𑁂 𑀦𑀼 𑀔𑁄 𑀓𑀼𑀲𑀮𑀸, 𑀓𑀣𑀫𑀺𑀫𑁂 𑀓𑀼𑀲𑀮𑀸’’𑀢𑀺 𑀏𑀯𑀁 𑀦 𑀯𑀺𑀘𑀺𑀓𑀺𑀘𑁆𑀙𑀢𑀺 𑀦 𑀓𑀗𑁆𑀔𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀇𑀫𑁂𑀲𑀼 𑀧𑀦 𑀦𑀻𑀯𑀭𑀡𑁂𑀲𑀼 𑀯𑀘𑀦𑀢𑁆𑀣𑀮𑀓𑁆𑀔𑀡𑀸𑀤𑀺𑀪𑁂𑀤𑀢𑁄 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀁.

𑁨𑁯𑁭. 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂𑀢𑀺 𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀼𑀧𑁆𑀧𑀦𑁆𑀦𑀸𑀬 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀬 𑀧𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀤𑁂𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀅𑀧𑀺 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀜𑁆𑀘 𑀯𑀸 𑀅𑀪𑀺𑀜𑁆𑀜𑀸 𑀉𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀢𑁂𑀦𑁆𑀢𑀺; 𑀢𑀲𑁆𑀫𑀸 ‘‘𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀣𑀸𑀕𑀢𑀧𑀤𑀁 𑀇𑀢𑀺𑀧𑀻𑀢𑀺 𑀇𑀤𑀫𑁆𑀧𑀺 𑀢𑀣𑀸𑀕𑀢𑀲𑁆𑀲 𑀜𑀸𑀡𑀧𑀤𑀁 𑀜𑀸𑀡𑀯𑀴𑀜𑁆𑀚𑀁 𑀜𑀸𑀡𑁂𑀦 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸𑀕𑀢𑀦𑀺𑀲𑁂𑀯𑀺𑀢𑀦𑁆𑀢𑀺 𑀢𑀣𑀸𑀕𑀢𑀲𑁆𑀲 𑀜𑀸𑀡𑀨𑀸𑀲𑀼𑀓𑀸𑀬 𑀦𑀺𑀖𑀁𑀲𑀺𑀢𑀝𑁆𑀞𑀸𑀦𑀁. 𑀢𑀣𑀸𑀕𑀢𑀸𑀭𑀜𑁆𑀚𑀺𑀢𑀦𑁆𑀢𑀺 𑀢𑀣𑀸𑀕𑀢𑀲𑁆𑀲 𑀜𑀸𑀡𑀤𑀸𑀞𑀸𑀬 𑀆𑀭𑀜𑁆𑀚𑀺𑀢𑀝𑁆𑀞𑀸𑀦𑀁.

𑁨𑁯𑁯. 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻𑀢𑀺 𑀬𑀣𑀸𑀲𑀪𑀸𑀯𑀁 𑀧𑀚𑀸𑀦𑀸𑀢𑀺. 𑀦𑀢𑁆𑀯𑁂𑀯 𑀢𑀸𑀯 𑀅𑀭𑀺𑀬𑀲𑀸𑀯𑀓𑁄 𑀦𑀺𑀝𑁆𑀞𑀁 𑀕𑀢𑁄 𑀳𑁄𑀢𑀻𑀢𑀺 𑀇𑀫𑀸 𑀛𑀸𑀦𑀸𑀪𑀺𑀜𑁆𑀜𑀸 𑀩𑀸𑀳𑀺𑀭𑀓𑁂𑀳𑀺𑀧𑀺 𑀲𑀸𑀥𑀸𑀭𑀡𑀸𑀢𑀺 𑀦 𑀢𑀸𑀯 𑀦𑀺𑀝𑁆𑀞𑀁 𑀕𑀢𑁄 𑀳𑁄𑀢𑀺. 𑀫𑀕𑁆𑀕𑀓𑁆𑀔𑀡𑁂𑀧𑀺 𑀅𑀧𑀭𑀺𑀬𑁄𑀲𑀺𑀢𑀓𑀺𑀘𑁆𑀘𑀢𑀸𑀬 𑀦 𑀢𑀸𑀯 𑀦𑀺𑀝𑁆𑀞𑀁 𑀕𑀢𑁄 𑀳𑁄𑀢𑀺. 𑀅𑀧𑀺𑀘 𑀔𑁄 𑀦𑀺𑀝𑁆𑀞𑀁 𑀕𑀘𑁆𑀙𑀢𑀻𑀢𑀺 𑀅𑀧𑀺𑀘 𑀔𑁄 𑀧𑀦 𑀫𑀕𑁆𑀕𑀓𑁆𑀔𑀡𑁂 𑀫𑀳𑀸𑀳𑀢𑁆𑀣𑀺𑀁 𑀧𑀲𑁆𑀲𑀦𑁆𑀢𑁄 𑀦𑀸𑀕𑀯𑀦𑀺𑀓𑁄 𑀯𑀺𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸𑀢𑀺 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀢𑀻𑀲𑀼 𑀭𑀢𑀦𑁂𑀲𑀼 𑀦𑀺𑀝𑁆𑀞𑀁 𑀕𑀘𑁆𑀙𑀢𑀺. 𑀦𑀺𑀝𑁆𑀞𑀁 𑀕𑀢𑁄 𑀳𑁄𑀢𑀻𑀢𑀺 𑀏𑀯𑀁 𑀫𑀕𑁆𑀕𑀓𑁆𑀔𑀡𑁂 𑀦𑀺𑀝𑁆𑀞𑀁 𑀕𑀘𑁆𑀙𑀦𑁆𑀢𑁄 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀧𑀭𑀺𑀬𑁄𑀲𑀺𑀢𑀲𑀩𑁆𑀩𑀓𑀺𑀘𑁆𑀘𑀢𑀸𑀬 𑀲𑀩𑁆𑀩𑀸𑀓𑀸𑀭𑁂𑀦 𑀢𑀻𑀲𑀼 𑀭𑀢𑀦𑁂𑀲𑀼 𑀦𑀺𑀝𑁆𑀞𑀁 𑀕𑀢𑁄 𑀳𑁄𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀘𑀽𑀴𑀳𑀢𑁆𑀣𑀺𑀧𑀤𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀫𑀳𑀸𑀳𑀢𑁆𑀣𑀺𑀧𑀤𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦𑁦. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀳𑀢𑁆𑀣𑀺𑀧𑀤𑁄𑀧𑀫𑀲𑀼𑀢𑁆𑀢𑀁. 𑀢𑀢𑁆𑀣 𑀚𑀗𑁆𑀕𑀮𑀸𑀦𑀦𑁆𑀢𑀺 𑀧𑀣𑀯𑀻𑀢𑀮𑀘𑀸𑀭𑀻𑀦𑀁. 𑀧𑀸𑀡𑀸𑀦𑀦𑁆𑀢𑀺 𑀲𑀧𑀸𑀤𑀓𑀧𑀸𑀡𑀸𑀦𑀁. 𑀧𑀤𑀚𑀸𑀢𑀸𑀦𑀻𑀢𑀺 𑀧𑀤𑀸𑀦𑀺. 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀑𑀥𑀸𑀦𑀁 𑀧𑀓𑁆𑀔𑁂𑀧𑀁 𑀕𑀘𑁆𑀙𑀦𑁆𑀢𑀺. 𑀅𑀕𑁆𑀕𑀫𑀓𑁆𑀔𑀸𑀬𑀢𑀻𑀢𑀺 𑀲𑁂𑀝𑁆𑀞𑀁 𑀅𑀓𑁆𑀔𑀸𑀬𑀢𑀺. 𑀬𑀤𑀺𑀤𑀁 𑀫𑀳𑀦𑁆𑀢𑀢𑁆𑀢𑁂𑀦𑀸𑀢𑀺 𑀫𑀳𑀦𑁆𑀢𑀪𑀸𑀯𑁂𑀦 𑀅𑀕𑁆𑀕𑀁 𑀅𑀓𑁆𑀔𑀸𑀬𑀢𑀺, 𑀦 𑀕𑀼𑀡𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀬𑁂 𑀓𑁂𑀘𑀺 𑀮𑁄𑀓𑀺𑀬𑀸 𑀯𑀸 𑀮𑁄𑀓𑀼𑀢𑁆𑀢𑀭𑀸 𑀯𑀸 𑀓𑀼𑀲𑀮𑀸 𑀥𑀫𑁆𑀫𑀸. 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀏𑀢𑁆𑀣 𑀘𑀢𑀼𑀩𑁆𑀩𑀺𑀥𑁄 𑀲𑀗𑁆𑀕𑀳𑁄 𑁋 𑀲𑀚𑀸𑀢𑀺𑀲𑀗𑁆𑀕𑀳𑁄, 𑀲𑀜𑁆𑀚𑀸𑀢𑀺𑀲𑀗𑁆𑀕𑀳𑁄, 𑀓𑀺𑀭𑀺𑀬𑀲𑀗𑁆𑀕𑀳𑁄, 𑀕𑀡𑀦𑀲𑀗𑁆𑀕𑀳𑁄𑀢𑀺. 𑀢𑀢𑁆𑀣 ‘‘𑀲𑀩𑁆𑀩𑁂 𑀔𑀢𑁆𑀢𑀺𑀬𑀸 𑀆𑀕𑀘𑁆𑀙𑀦𑁆𑀢𑀼 𑀲𑀩𑁆𑀩𑁂 𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀏𑀯𑀁 𑀲𑀫𑀸𑀦𑀚𑀸𑀢𑀺𑀯𑀲𑁂𑀦 𑀲𑀗𑁆𑀕𑀳𑁄 𑀲𑀚𑀸𑀢𑀺𑀲𑀗𑁆𑀕𑀳𑁄 𑀦𑀸𑀫. ‘‘𑀲𑀩𑁆𑀩𑁂 𑀓𑁄𑀲𑀮𑀓𑀸 𑀲𑀩𑁆𑀩𑁂 𑀫𑀸𑀕𑀥𑀓𑀸’’𑀢𑀺 𑀏𑀯𑀁 𑀲𑀜𑁆𑀚𑀸𑀢𑀺𑀤𑁂𑀲𑀯𑀲𑁂𑀦 𑀲𑀗𑁆𑀕𑀳𑁄 𑀲𑀜𑁆𑀚𑀸𑀢𑀺𑀲𑀗𑁆𑀕𑀳𑁄 𑀦𑀸𑀫. ‘‘𑀲𑀩𑁆𑀩𑁂 𑀭𑀣𑀺𑀓𑀸 𑀲𑀩𑁆𑀩𑁂 𑀥𑀦𑀼𑀕𑁆𑀕𑀳𑀸’’𑀢𑀺 𑀏𑀯𑀁 𑀓𑀺𑀭𑀺𑀬𑀯𑀲𑁂𑀦 𑀲𑀗𑁆𑀕𑀳𑁄 𑀓𑀺𑀭𑀺𑀬𑀲𑀗𑁆𑀕𑀳𑁄 𑀦𑀸𑀫. ‘‘𑀘𑀓𑁆𑀔𑀸𑀬𑀢𑀦𑀁 𑀓𑀢𑀫𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀻𑀢𑀺? 𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀺. 𑀳𑀜𑁆𑀘𑀺 𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢’’𑀦𑁆𑀢𑀺 (𑀓𑀣𑀸. 𑁪𑁭𑁧), 𑀅𑀬𑀁 𑀕𑀡𑀦𑀲𑀗𑁆𑀕𑀳𑁄 𑀦𑀸𑀫. 𑀇𑀫𑀲𑁆𑀫𑀺𑀫𑁆𑀧𑀺 𑀞𑀸𑀦𑁂 𑀅𑀬𑀫𑁂𑀯 𑀅𑀥𑀺𑀧𑁆𑀧𑁂𑀢𑁄.

𑀦𑀦𑀼 𑀘 ‘‘𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀓𑀢𑀺 𑀓𑀼𑀲𑀮𑀸 𑀓𑀢𑀺 𑀅𑀓𑀼𑀲𑀮𑀸 𑀓𑀢𑀺 𑀅𑀩𑁆𑀬𑀸𑀓𑀢𑀸𑀢𑀺 𑀧𑀜𑁆𑀳𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀲𑀫𑀼𑀤𑀬𑀲𑀘𑁆𑀘𑀁 𑀅𑀓𑀼𑀲𑀮𑀁, 𑀫𑀕𑁆𑀕𑀲𑀘𑁆𑀘𑀁 𑀓𑀼𑀲𑀮𑀁, 𑀦𑀺𑀭𑁄𑀥𑀲𑀘𑁆𑀘𑀁 𑀅𑀩𑁆𑀬𑀸𑀓𑀢𑀁, 𑀤𑀼𑀓𑁆𑀔𑀲𑀘𑁆𑀘𑀁 𑀲𑀺𑀬𑀸 𑀓𑀼𑀲𑀮𑀁, 𑀲𑀺𑀬𑀸 𑀅𑀓𑀼𑀲𑀮𑀁, 𑀲𑀺𑀬𑀸 𑀅𑀩𑁆𑀬𑀸𑀓𑀢’’𑀦𑁆𑀢𑀺 (𑀯𑀺𑀪. 𑁨𑁧𑁬-𑁨𑁧𑁭) 𑀆𑀕𑀢𑀢𑁆𑀢𑀸 𑀘𑀢𑀼𑀪𑀽𑀫𑀓𑀫𑁆𑀧𑀺 𑀓𑀼𑀲𑀮𑀁 𑀤𑀺𑀬𑀟𑁆𑀠𑀫𑁂𑀯 𑀲𑀘𑁆𑀘𑀁 𑀪𑀚𑀢𑀺. 𑀅𑀣 𑀓𑀲𑁆𑀫𑀸 𑀫𑀳𑀸𑀣𑁂𑀭𑁄 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀕𑀡𑀦𑀁 𑀕𑀘𑁆𑀙𑀢𑀻𑀢𑀺 𑀆𑀳𑀸𑀢𑀺? 𑀲𑀘𑁆𑀘𑀸𑀦𑀁 𑀅𑀦𑁆𑀢𑁄𑀕𑀥𑀢𑁆𑀢𑀸. 𑀬𑀣𑀸 𑀳𑀺 ‘‘𑀲𑀸𑀥𑀺𑀓𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀤𑀺𑀬𑀟𑁆𑀠𑀲𑀺𑀓𑁆𑀔𑀸𑀧𑀤𑀲𑀢𑀁 𑀅𑀦𑁆𑀯𑀤𑁆𑀥𑀫𑀸𑀲𑀁 𑀉𑀤𑁆𑀤𑁂𑀲𑀁 𑀆𑀕𑀘𑁆𑀙𑀢𑀺, 𑀬𑀢𑁆𑀣 𑀅𑀢𑁆𑀢𑀓𑀸𑀫𑀸 𑀓𑀼𑀮𑀧𑀼𑀢𑁆𑀢𑀸 𑀲𑀺𑀓𑁆𑀔𑀦𑁆𑀢𑀺. 𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸’’𑀢𑀺 (𑀅. 𑀦𑀺. 𑁩.𑁮𑁮) 𑀏𑀢𑁆𑀣 𑀲𑀸𑀥𑀺𑀓𑀫𑀺𑀤𑀁 𑀤𑀺𑀬𑀟𑁆𑀠𑀲𑀺𑀓𑁆𑀔𑀸𑀧𑀤𑀲𑀢𑀁 𑀏𑀓𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀯 𑀳𑁄𑀢𑀺, 𑀢𑀁 𑀲𑀺𑀓𑁆𑀔𑀦𑁆𑀢𑁄𑀧𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑀢𑀻𑀢𑀺 𑀤𑀲𑁆𑀲𑀺𑀢𑁄, 𑀲𑀺𑀓𑁆𑀔𑀸𑀦𑀁 𑀅𑀦𑁆𑀢𑁄𑀕𑀥𑀢𑁆𑀢𑀸. 𑀬𑀣𑀸 𑀘 𑀏𑀓𑀲𑁆𑀲 𑀳𑀢𑁆𑀣𑀺𑀧𑀤𑀲𑁆𑀲 𑀘𑀢𑀽𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀏𑀓𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀑𑀢𑀺𑀡𑁆𑀡𑀸𑀦𑀺𑀧𑀺 𑀤𑁆𑀯𑀻𑀲𑀼 𑀢𑀻𑀲𑀼 𑀘𑀢𑀽𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀑𑀢𑀺𑀡𑁆𑀡𑀸𑀦𑀺𑀧𑀺 𑀲𑀺𑀗𑁆𑀕𑀸𑀮𑀲𑀲𑀫𑀺𑀕𑀸𑀤𑀻𑀦𑀁 𑀧𑀸𑀤𑀸𑀦𑀺 𑀳𑀢𑁆𑀣𑀺𑀧𑀤𑁂 𑀲𑀫𑁄𑀥𑀸𑀦𑀁 𑀕𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀳𑀢𑁆𑀣𑀺𑀧𑀤𑀢𑁄 𑀅𑀫𑀼𑀘𑁆𑀘𑀺𑀢𑁆𑀯𑀸 𑀢𑀲𑁆𑀲𑁂𑀯 𑀅𑀦𑁆𑀢𑁄𑀕𑀥𑀢𑁆𑀢𑀸. 𑀏𑀯𑀫𑁂𑀯 𑀏𑀓𑀲𑁆𑀫𑀺𑀫𑁆𑀧𑀺 𑀤𑁆𑀯𑀻𑀲𑀼𑀧𑀺 𑀢𑀻𑀲𑀼𑀧𑀺 𑀘𑀢𑀽𑀲𑀼𑀧𑀺 𑀲𑀘𑁆𑀘𑁂𑀲𑀼 𑀕𑀡𑀦𑀁 𑀕𑀢𑀸 𑀥𑀫𑁆𑀫𑀸 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀕𑀡𑀦𑀁 𑀕𑀢𑀸𑀯 𑀳𑁄𑀦𑁆𑀢𑀺; 𑀲𑀘𑁆𑀘𑀸𑀦𑀁 𑀅𑀦𑁆𑀢𑁄𑀕𑀥𑀢𑁆𑀢𑀸𑀢𑀺 𑀤𑀺𑀬𑀟𑁆𑀠𑀲𑀘𑁆𑀘𑀕𑀡𑀦𑀁 𑀕𑀢𑁂𑀧𑀺 𑀓𑀼𑀲𑀮𑀥𑀫𑁆𑀫𑁂 ‘‘𑀲𑀩𑁆𑀩𑁂 𑀢𑁂 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀆𑀳. ‘‘𑀤𑀼𑀓𑁆𑀔𑁂 𑀅𑀭𑀺𑀬𑀲𑀘𑁆𑀘𑁂’’𑀢𑀺𑀆𑀤𑀻𑀲𑀼 𑀉𑀤𑁆𑀤𑁂𑀲𑀧𑀤𑁂𑀲𑀼 𑀘𑁂𑀯 𑀚𑀸𑀢𑀺𑀧𑀺 𑀤𑀼𑀓𑁆𑀔𑀸𑀢𑀺𑀆𑀤𑀻𑀲𑀼 𑀦𑀺𑀤𑁆𑀤𑁂𑀲𑀧𑀤𑁂𑀲𑀼 𑀘 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀫𑁂𑀯. 𑀓𑁂𑀯𑀮𑀁 𑀧𑀦𑁂𑀢𑁆𑀣 𑀤𑁂𑀲𑀦𑀸𑀦𑀼𑀓𑁆𑀓𑀫𑁄𑀯 𑀯𑁂𑀤𑀺𑀢𑀩𑁆𑀩𑁄.

𑁩𑁦𑁧. 𑀬𑀣𑀸 𑀳𑀺 𑀙𑁂𑀓𑁄 𑀯𑀺𑀮𑀻𑀯𑀓𑀸𑀭𑁄 𑀲𑀼𑀚𑀸𑀢𑀁 𑀯𑁂𑀴𑀼𑀁 𑀮𑀪𑀺𑀢𑁆𑀯𑀸 𑀘𑀢𑀼𑀥𑀸 𑀙𑁂𑀢𑁆𑀯𑀸 𑀢𑀢𑁄 𑀢𑀬𑁄 𑀓𑁄𑀝𑁆𑀞𑀸𑀲𑁂 𑀞𑀧𑁂𑀢𑁆𑀯𑀸 𑀏𑀓𑀁 𑀕𑀡𑁆𑀳𑀺𑀢𑁆𑀯𑀸 𑀧𑀜𑁆𑀘𑀥𑀸 𑀪𑀺𑀦𑁆𑀤𑁂𑀬𑁆𑀬, 𑀢𑀢𑁄𑀧𑀺 𑀘𑀢𑁆𑀢𑀸𑀭𑁄 𑀞𑀧𑁂𑀢𑁆𑀯𑀸 𑀏𑀓𑀁 𑀕𑀡𑁆𑀳𑀺𑀢𑁆𑀯𑀸 𑀨𑀸𑀮𑁂𑀦𑁆𑀢𑁄 𑀧𑀜𑁆𑀘 𑀧𑁂𑀲𑀺𑀬𑁄 𑀓𑀭𑁂𑀬𑁆𑀬, 𑀢𑀢𑁄 𑀘𑀢𑀲𑁆𑀲𑁄 𑀞𑀧𑁂𑀢𑁆𑀯𑀸 𑀏𑀓𑀁 𑀕𑀡𑁆𑀳𑀺𑀢𑁆𑀯𑀸 𑀓𑀼𑀘𑁆𑀙𑀺𑀪𑀸𑀕𑀁 𑀧𑀺𑀝𑁆𑀞𑀺𑀪𑀸𑀕𑀦𑁆𑀢𑀺 𑀤𑁆𑀯𑀺𑀥𑀸 𑀨𑀸𑀮𑁂𑀢𑁆𑀯𑀸 𑀧𑀺𑀝𑁆𑀞𑀺𑀪𑀸𑀕𑀁 𑀞𑀧𑁂𑀢𑁆𑀯𑀸 𑀓𑀼𑀘𑁆𑀙𑀺𑀪𑀸𑀕𑀁 𑀆𑀤𑀸𑀬 𑀢𑀢𑁄 𑀲𑀫𑀼𑀕𑁆𑀕𑀩𑀻𑀚𑀦𑀺𑀢𑀸𑀮𑀯𑀡𑁆𑀝𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀁 𑀯𑁂𑀴𑀼𑀯𑀺𑀓𑀢𑀺𑀁 𑀓𑀭𑁂𑀬𑁆𑀬, 𑀲𑁄 𑀧𑀺𑀝𑁆𑀞𑀺𑀪𑀸𑀕𑀜𑁆𑀘 𑀇𑀢𑀭𑀸 𑀘 𑀘𑀢𑀲𑁆𑀲𑁄 𑀧𑁂𑀲𑀺𑀬𑁄 𑀇𑀢𑀭𑁂 𑀘 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂 𑀇𑀢𑀭𑁂 𑀘 𑀢𑀬𑁄 𑀓𑁄𑀝𑁆𑀞𑀸𑀲𑁂 𑀓𑀫𑁆𑀫𑀸𑀬 𑀦 𑀉𑀧𑀦𑁂𑀲𑁆𑀲𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀏𑀓𑀧𑁆𑀧𑀳𑀸𑀭𑁂𑀦 𑀧𑀦 𑀉𑀧𑀦𑁂𑀢𑀼𑀁 𑀦 𑀲𑀓𑁆𑀓𑀸, 𑀅𑀦𑀼𑀧𑀼𑀩𑁆𑀩𑁂𑀦 𑀉𑀧𑀦𑁂𑀲𑁆𑀲𑀢𑀺. 𑀏𑀯𑀫𑁂𑀯 𑀅𑀬𑀁 𑀫𑀳𑀸𑀣𑁂𑀭𑁄𑀧𑀺 𑀯𑀺𑀮𑀻𑀯𑀓𑀸𑀭𑁄 𑀲𑀼𑀚𑀸𑀢𑀁 𑀯𑁂𑀴𑀼𑀁 𑀮𑀪𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂 𑀯𑀺𑀬, 𑀇𑀫𑀁 𑀫𑀳𑀦𑁆𑀢𑀁 𑀲𑀼𑀢𑁆𑀢𑀦𑁆𑀢𑀁 𑀆𑀭𑀪𑀺𑀢𑁆𑀯𑀸 𑀘𑀢𑀼𑀅𑀭𑀺𑀬𑀲𑀘𑁆𑀘𑀯𑀲𑁂𑀦 𑀫𑀸𑀢𑀺𑀓𑀁 𑀞𑀧𑁂𑀲𑀺. 𑀯𑀺𑀮𑀻𑀯𑀓𑀸𑀭𑀲𑁆𑀲 𑀢𑀬𑁄 𑀓𑁄𑀝𑁆𑀞𑀸𑀲𑁂 𑀞𑀧𑁂𑀢𑁆𑀯𑀸 𑀏𑀓𑀁 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀧𑀜𑁆𑀘𑀥𑀸 𑀓𑀭𑀡𑀁 𑀯𑀺𑀬 𑀣𑁂𑀭𑀲𑁆𑀲 𑀢𑀻𑀡𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀞𑀧𑁂𑀢𑁆𑀯𑀸 𑀏𑀓𑀁 𑀤𑀼𑀓𑁆𑀔𑀲𑀘𑁆𑀘𑀁 𑀕𑀳𑁂𑀢𑁆𑀯𑀸 𑀪𑀸𑀚𑁂𑀦𑁆𑀢𑀲𑁆𑀲 𑀔𑀦𑁆𑀥𑀯𑀲𑁂𑀦 𑀧𑀜𑁆𑀘𑀥𑀸 𑀓𑀭𑀡𑀁. 𑀢𑀢𑁄 𑀬𑀣𑀸 𑀲𑁄 𑀯𑀺𑀮𑀻𑀯𑀓𑀸𑀭𑁄 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂 𑀞𑀧𑁂𑀢𑁆𑀯𑀸 𑀏𑀓𑀁 𑀪𑀸𑀕𑀁 𑀕𑀳𑁂𑀢𑁆𑀯𑀸 𑀧𑀜𑁆𑀘𑀥𑀸 𑀨𑀸𑀮𑁂𑀲𑀺, 𑀏𑀯𑀁 𑀣𑁂𑀭𑁄 𑀘𑀢𑁆𑀢𑀸𑀭𑁄 𑀅𑀭𑀽𑀧𑀓𑁆𑀔𑀦𑁆𑀥𑁂 𑀞𑀧𑁂𑀢𑁆𑀯𑀸 𑀭𑀽𑀧𑀓𑁆𑀔𑀦𑁆𑀥𑀁 𑀯𑀺𑀪𑀚𑀦𑁆𑀢𑁄 𑀘𑀢𑁆𑀢𑀸𑀭𑀺 𑀘 𑀫𑀳𑀸𑀪𑀽𑀢𑀸𑀦𑀺 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀭𑀽𑀧𑀦𑁆𑀢𑀺 𑀧𑀜𑁆𑀘𑀥𑀸 𑀅𑀓𑀸𑀲𑀺. 𑀢𑀢𑁄 𑀬𑀣𑀸 𑀲𑁄 𑀯𑀺𑀮𑀻𑀯𑀓𑀸𑀭𑁄 𑀘𑀢𑀲𑁆𑀲𑁄 𑀧𑁂𑀲𑀺𑀬𑁄 𑀞𑀧𑁂𑀢𑁆𑀯𑀸 𑀏𑀓𑀁 𑀕𑀳𑁂𑀢𑁆𑀯𑀸 𑀓𑀼𑀘𑁆𑀙𑀺𑀪𑀸𑀕𑀁 𑀧𑀺𑀝𑁆𑀞𑀺𑀪𑀸𑀕𑀦𑁆𑀢𑀺 𑀤𑁆𑀯𑀺𑀥𑀸 𑀨𑀸𑀮𑁂𑀲𑀺, 𑀏𑀯𑀁 𑀣𑁂𑀭𑁄 𑀉𑀧𑀸𑀤𑀸𑀬 𑀭𑀽𑀧𑀜𑁆𑀘 𑀢𑀺𑀲𑁆𑀲𑁄 𑀘 𑀥𑀸𑀢𑀼𑀬𑁄 𑀞𑀧𑁂𑀢𑁆𑀯𑀸 𑀏𑀓𑀁 𑀧𑀣𑀯𑀻𑀥𑀸𑀢𑀼𑀁 𑀯𑀺𑀪𑀚𑀦𑁆𑀢𑁄 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀲𑁂𑀦 𑀤𑁆𑀯𑀺𑀥𑀸 𑀤𑀲𑁆𑀲𑁂𑀲𑀺. 𑀬𑀣𑀸 𑀲𑁄 𑀯𑀺𑀮𑀻𑀯𑀓𑀸𑀭𑁄 𑀧𑀺𑀝𑁆𑀞𑀺𑀪𑀸𑀕𑀁 𑀞𑀧𑁂𑀢𑁆𑀯𑀸 𑀓𑀼𑀘𑁆𑀙𑀺𑀪𑀸𑀕𑀁 𑀆𑀤𑀸𑀬 𑀦𑀸𑀦𑀧𑁆𑀧𑀓𑀸𑀭𑀁 𑀯𑀺𑀮𑀻𑀯𑀯𑀺𑀓𑀢𑀺𑀁 𑀅𑀓𑀸𑀲𑀺, 𑀏𑀯𑀁 𑀣𑁂𑀭𑁄 𑀩𑀸𑀳𑀺𑀭𑀁 𑀧𑀣𑀯𑀻𑀥𑀸𑀢𑀼𑀁 𑀞𑀧𑁂𑀢𑁆𑀯𑀸 𑀅𑀚𑁆𑀛𑀢𑁆𑀢𑀺𑀓𑀁 𑀧𑀣𑀯𑀻𑀥𑀸𑀢𑀼𑀁 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀓𑀢𑀫𑀸 𑀘𑀸𑀯𑀼𑀲𑁄, 𑀅𑀚𑁆𑀛𑀢𑁆𑀢𑀺𑀓𑀸 𑀧𑀣𑀯𑀻𑀥𑀸𑀢𑀽𑀢𑀺𑀆𑀤𑀺𑀫𑀸𑀳.

𑀬𑀣𑀸 𑀧𑀦 𑀯𑀺𑀮𑀻𑀯𑀓𑀸𑀭𑁄 𑀧𑀺𑀝𑁆𑀞𑀺𑀪𑀸𑀕𑀜𑁆𑀘 𑀇𑀢𑀭𑀸 𑀘 𑀘𑀢𑁆𑀢𑀲𑁆𑀲𑁄 𑀧𑁂𑀲𑀺𑀬𑁄 𑀇𑀢𑀭𑁂 𑀘 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑁂 𑀇𑀢𑀭𑁂 𑀘 𑀢𑀬𑁄 𑀓𑁄𑀝𑁆𑀞𑀸𑀲𑁂 𑀅𑀦𑀼𑀧𑀼𑀩𑁆𑀩𑁂𑀦 𑀓𑀫𑁆𑀫𑀸𑀬 𑀉𑀧𑀦𑁂𑀲𑁆𑀲𑀢𑀺, 𑀦 𑀳𑀺 𑀲𑀓𑁆𑀓𑀸 𑀏𑀓𑀧𑁆𑀧𑀳𑀸𑀭𑁂𑀦 𑀉𑀧𑀦𑁂𑀢𑀼𑀁, 𑀏𑀯𑀁 𑀣𑁂𑀭𑁄𑀧𑀺 𑀩𑀸𑀳𑀺𑀭𑀜𑁆𑀘 𑀧𑀣𑀯𑀻𑀥𑀸𑀢𑀼𑀁 𑀇𑀢𑀭𑀸 𑀘 𑀢𑀺𑀲𑁆𑀲𑁄 𑀥𑀸𑀢𑀼𑀬𑁄 𑀉𑀧𑀸𑀤𑀸𑀭𑀽𑀧𑀜𑁆𑀘 𑀇𑀢𑀭𑁂 𑀘 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑁂 𑀇𑀢𑀭𑀸𑀦𑀺 𑀘 𑀢𑀻𑀡𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀅𑀦𑀼𑀧𑀼𑀩𑁆𑀩𑁂𑀦 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀲𑁆𑀲𑀢𑀺, 𑀦 𑀳𑀺 𑀲𑀓𑁆𑀓𑀸 𑀏𑀓𑀧𑁆𑀧𑀳𑀸𑀭𑁂𑀦 𑀤𑀲𑁆𑀲𑁂𑀢𑀼𑀁. 𑀅𑀧𑀺𑀘 𑀭𑀸𑀚𑀧𑀼𑀢𑁆𑀢𑀽𑀧𑀫𑀸𑀬𑀧𑀺 𑀅𑀬𑀁 𑀓𑀫𑁄 𑀯𑀺𑀪𑀸𑀯𑁂𑀢𑀩𑁆𑀩𑁄 𑁋

𑀏𑀓𑁄 𑀓𑀺𑀭 𑀫𑀳𑀸𑀭𑀸𑀚𑀸, 𑀢𑀲𑁆𑀲 𑀧𑀭𑁄𑀲𑀳𑀲𑁆𑀲𑀁 𑀧𑀼𑀢𑁆𑀢𑀸. 𑀲𑁄 𑀢𑁂𑀲𑀁 𑀧𑀺𑀴𑀦𑁆𑀥𑀦𑀧𑀭𑀺𑀓𑁆𑀔𑀸𑀭𑀁 𑀘𑀢𑀽𑀲𑀼 𑀧𑁂𑀴𑀸𑀲𑀼 𑀞𑀧𑁂𑀢𑁆𑀯𑀸 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀅𑀧𑁆𑀧𑁂𑀲𑀺 𑁋 ‘‘𑀇𑀤𑀁 𑀢𑁂, 𑀢𑀸𑀢, 𑀪𑀸𑀢𑀺𑀓𑀸𑀦𑀁 𑀧𑀺𑀴𑀦𑁆𑀥𑀦𑀪𑀡𑁆𑀟𑀁 𑀢𑀣𑀸𑀭𑀽𑀧𑁂 𑀙𑀡𑁂 𑀲𑀫𑁆𑀧𑀢𑁆𑀢𑁂 𑀧𑀺𑀴𑀦𑁆𑀥𑀦𑀁 𑀦𑁄 𑀤𑁂𑀳𑀻𑀢𑀺 𑀬𑀸𑀘𑀦𑁆𑀢𑀸𑀦𑀁 𑀤𑀤𑁂𑀬𑁆𑀬𑀸𑀲𑀻’’𑀢𑀺. 𑀲𑁄 ‘‘𑀲𑀸𑀥𑀼 𑀤𑁂𑀯𑀸’’𑀢𑀺 𑀲𑀸𑀭𑀕𑀩𑁆𑀪𑁂 𑀧𑀝𑀺𑀲𑀸𑀫𑁂𑀲𑀺, 𑀢𑀣𑀸𑀭𑀽𑀧𑁂 𑀙𑀡𑀤𑀺𑀯𑀲𑁂 𑀭𑀸𑀚𑀧𑀼𑀢𑁆𑀢𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀧𑀺𑀴𑀦𑁆𑀥𑀦𑀁 𑀦𑁄, 𑀢𑀸𑀢, 𑀤𑁂𑀣, 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀢𑀸𑀢𑀸, 𑀚𑁂𑀝𑁆𑀞𑀪𑀸𑀢𑀺𑀓𑀲𑁆𑀲 𑀯𑁄 𑀳𑀢𑁆𑀣𑁂 𑀫𑀬𑀸 𑀧𑀺𑀴𑀦𑁆𑀥𑀦𑀁 𑀞𑀧𑀺𑀢𑀁, 𑀢𑀁 𑀆𑀳𑀭𑀸𑀧𑁂𑀢𑁆𑀯𑀸 𑀧𑀺𑀴𑀦𑁆𑀥𑀣𑀸𑀢𑀺. 𑀢𑁂 𑀲𑀸𑀥𑀽𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀢𑀼𑀫𑁆𑀳𑀸𑀓𑀁 𑀓𑀺𑀭 𑀦𑁄 𑀳𑀢𑁆𑀣𑁂 𑀧𑀺𑀴𑀦𑁆𑀥𑀦𑀪𑀡𑁆𑀟𑀁, 𑀢𑀁 𑀤𑁂𑀣𑀸’’𑀢𑀺 𑀆𑀳𑀁𑀲𑀼. 𑀲𑁄 𑀏𑀯𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀕𑀩𑁆𑀪𑀁 𑀯𑀺𑀯𑀭𑀺𑀢𑁆𑀯𑀸, 𑀘𑀢𑀲𑁆𑀲𑁄 𑀧𑁂𑀴𑀸𑀬𑁄 𑀦𑀻𑀳𑀭𑀺𑀢𑁆𑀯𑀸 𑀢𑀺𑀲𑁆𑀲𑁄 𑀞𑀧𑁂𑀢𑁆𑀯𑀸 𑀏𑀓𑀁 𑀯𑀺𑀯𑀭𑀺𑀢𑁆𑀯𑀸, 𑀢𑀢𑁄 𑀧𑀜𑁆𑀘 𑀲𑀫𑀼𑀕𑁆𑀕𑁂 𑀦𑀻𑀳𑀭𑀺𑀢𑁆𑀯𑀸 𑀘𑀢𑁆𑀢𑀸𑀭𑁄 𑀞𑀧𑁂𑀢𑁆𑀯𑀸 𑀏𑀓𑀁 𑀯𑀺𑀯𑀭𑀺𑀢𑁆𑀯𑀸, 𑀢𑀢𑁄 𑀧𑀜𑁆𑀘𑀲𑀼 𑀓𑀭𑀡𑁆𑀟𑁂𑀲𑀼 𑀦𑀻𑀳𑀭𑀺𑀢𑁂𑀲𑀼 𑀘𑀢𑁆𑀢𑀸𑀭𑁄 𑀞𑀧𑁂𑀢𑁆𑀯𑀸 𑀏𑀓𑀁 𑀯𑀺𑀯𑀭𑀺𑀢𑁆𑀯𑀸 𑀧𑀺𑀥𑀸𑀦𑀁 𑀧𑀲𑁆𑀲𑁂 𑀞𑀧𑁂𑀢𑁆𑀯𑀸 𑀢𑀢𑁄 𑀳𑀢𑁆𑀣𑀽𑀧𑀕𑀧𑀸𑀤𑀽𑀧𑀕𑀸𑀤𑀻𑀦𑀺 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀧𑀺𑀴𑀦𑁆𑀥𑀦𑀸𑀦𑀺 𑀦𑀻𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀓𑀺𑀜𑁆𑀘𑀸𑀧𑀺 𑀇𑀢𑀭𑁂𑀳𑀺 𑀘𑀢𑀽𑀳𑀺 𑀓𑀭𑀡𑁆𑀟𑁂𑀳𑀺 𑀇𑀢𑀭𑁂𑀳𑀺 𑀘𑀢𑀽𑀳𑀺 𑀲𑀫𑀼𑀕𑁆𑀕𑁂𑀳𑀺 𑀇𑀢𑀭𑀸𑀳𑀺 𑀢𑀻𑀳𑀺 𑀧𑁂𑀴𑀸𑀳𑀺 𑀦 𑀢𑀸𑀯 𑀪𑀸𑀚𑁂𑀢𑁆𑀯𑀸 𑀤𑁂𑀢𑀺, 𑀅𑀦𑀼𑀧𑀼𑀩𑁆𑀩𑁂𑀦 𑀧𑀦 𑀤𑀲𑁆𑀲𑀢𑀺, 𑀦 𑀳𑀺 𑀲𑀓𑁆𑀓𑀸 𑀏𑀓𑀧𑁆𑀧𑀳𑀸𑀭𑁂𑀦 𑀤𑀸𑀢𑀼𑀁.

𑀢𑀢𑁆𑀣 𑀫𑀳𑀸𑀭𑀸𑀚𑀸 𑀯𑀺𑀬 𑀪𑀕𑀯𑀸 𑀤𑀝𑁆𑀞𑀩𑁆𑀩𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀭𑀸𑀚𑀸𑀳𑀫𑀲𑁆𑀫𑀺 𑀲𑁂𑀮𑀸𑀢𑀺 𑀪𑀕𑀯𑀸, 𑀥𑀫𑁆𑀫𑀭𑀸𑀚𑀸 𑀅𑀦𑀼𑀢𑁆𑀢𑀭𑁄’’𑀢𑀺 (𑀲𑀼. 𑀦𑀺. 𑁫𑁫𑁯). 𑀚𑁂𑀝𑁆𑀞𑀧𑀼𑀢𑁆𑀢𑁄 𑀯𑀺𑀬 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄, 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀬𑀁 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬, ‘𑀪𑀕𑀯𑀢𑁄 𑀧𑀼𑀢𑁆𑀢𑁄 𑀑𑀭𑀲𑁄 𑀫𑀼𑀔𑀢𑁄 𑀚𑀸𑀢𑁄 𑀥𑀫𑁆𑀫𑀚𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄 𑀥𑀫𑁆𑀫𑀤𑀸𑀬𑀸𑀤𑁄, 𑀦𑁄 𑀆𑀫𑀺𑀲𑀤𑀸𑀬𑀸𑀤𑁄’𑀢𑀺 𑀲𑀸𑀭𑀺𑀧𑀼𑀢𑁆𑀢𑀫𑁂𑀯 𑀢𑀁 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬, 𑀪𑀕𑀯𑀢𑁄 𑀧𑀼𑀢𑁆𑀢𑁄…𑀧𑁂… 𑀦𑁄 𑀆𑀫𑀺𑀲𑀤𑀸𑀬𑀸𑀤𑁄’’𑀢𑀺 (𑀫. 𑀦𑀺. 𑁩.𑁯𑁭). 𑀧𑀭𑁄𑀲𑀳𑀲𑁆𑀲𑀭𑀸𑀚𑀧𑀼𑀢𑁆𑀢𑀸 𑀯𑀺𑀬 𑀪𑀺𑀓𑁆𑀔𑀼𑀲𑀗𑁆𑀖𑁄 𑀤𑀝𑁆𑀞𑀩𑁆𑀩𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀧𑀭𑁄𑀲𑀳𑀲𑁆𑀲𑀁 𑀪𑀺𑀓𑁆𑀔𑀽𑀦𑀁, 𑀲𑀼𑀕𑀢𑀁 𑀧𑀬𑀺𑀭𑀼𑀧𑀸𑀲𑀢𑀺;

𑀤𑁂𑀲𑁂𑀦𑁆𑀢𑀁 𑀯𑀺𑀭𑀚𑀁 𑀥𑀫𑁆𑀫𑀁, 𑀦𑀺𑀩𑁆𑀩𑀸𑀦𑀁 𑀅𑀓𑀼𑀢𑁄𑀪𑀬’’𑀦𑁆𑀢𑀺. (𑀲𑀁. 𑀦𑀺. 𑁧.𑁨𑁧𑁬);

𑀭𑀜𑁆𑀜𑁄 𑀢𑁂𑀲𑀁 𑀧𑀼𑀢𑁆𑀢𑀸𑀦𑀁 𑀧𑀺𑀴𑀦𑁆𑀥𑀦𑀁 𑀘𑀢𑀽𑀲𑀼 𑀧𑁂𑀴𑀸𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀳𑀢𑁆𑀣𑁂 𑀞𑀧𑀺𑀢𑀓𑀸𑀮𑁄 𑀯𑀺𑀬 𑀪𑀕𑀯𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀳𑀢𑁆𑀣𑁂 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑀸𑀬 𑀞𑀧𑀺𑀢𑀓𑀸𑀮𑁄, 𑀢𑁂𑀦𑁂𑀯𑀸𑀳 𑁋 ‘‘𑀲𑀸𑀭𑀺𑀧𑀼𑀢𑁆𑀢𑁄, 𑀪𑀺𑀓𑁆𑀔𑀯𑁂, 𑀧𑀳𑁄𑀢𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀆𑀘𑀺𑀓𑁆𑀔𑀺𑀢𑀼𑀁 𑀤𑁂𑀲𑁂𑀢𑀼𑀁 𑀧𑀜𑁆𑀜𑀸𑀧𑁂𑀢𑀼𑀁 𑀧𑀝𑁆𑀞𑀧𑁂𑀢𑀼𑀁 𑀯𑀺𑀯𑀭𑀺𑀢𑀼𑀁 𑀯𑀺𑀪𑀚𑀺𑀢𑀼𑀁 𑀉𑀢𑁆𑀢𑀸𑀦𑀻𑀓𑀸𑀢𑀼’’𑀦𑁆𑀢𑀺 (𑀫. 𑀦𑀺. 𑁩.𑁩𑁭𑁧). 𑀢𑀣𑀸𑀭𑀽𑀧𑁂 𑀔𑀡𑁂 𑀢𑁂𑀲𑀁 𑀭𑀸𑀚𑀧𑀼𑀢𑁆𑀢𑀸𑀦𑀁 𑀢𑀁 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀺𑀴𑀦𑁆𑀥𑀦𑀁 𑀬𑀸𑀘𑀦𑀓𑀸𑀮𑁄 𑀯𑀺𑀬 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀯𑀲𑁆𑀲𑀽𑀧𑀦𑀸𑀬𑀺𑀓𑀲𑀫𑀬𑁂 𑀆𑀕𑀦𑁆𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀬 𑀬𑀸𑀘𑀺𑀢𑀓𑀸𑀮𑁄. 𑀉𑀧𑀓𑀝𑁆𑀞𑀸𑀬 𑀓𑀺𑀭 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀇𑀤𑀁 𑀲𑀼𑀢𑁆𑀢𑀁 𑀤𑁂𑀲𑀺𑀢𑀁. 𑀭𑀜𑁆𑀜𑁄, ‘‘𑀢𑀸𑀢𑀸, 𑀚𑁂𑀝𑁆𑀞𑀪𑀸𑀢𑀺𑀓𑀲𑁆𑀲 𑀯𑁄 𑀳𑀢𑁆𑀣𑁂 𑀫𑀬𑀸 𑀧𑀺𑀴𑀦𑁆𑀥𑀦𑀁 𑀞𑀧𑀺𑀢𑀁 𑀢𑀁 𑀆𑀳𑀭𑀸𑀧𑁂𑀢𑁆𑀯𑀸 𑀧𑀺𑀴𑀦𑁆𑀥𑀣𑀸’’𑀢𑀺 𑀯𑀼𑀢𑁆𑀢𑀓𑀸𑀮𑁄 𑀯𑀺𑀬 𑀲𑀫𑁆𑀩𑀼𑀤𑁆𑀥𑁂𑀦𑀸𑀧𑀺, ‘‘𑀲𑁂𑀯𑁂𑀣, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂, 𑀪𑀚𑀣, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂. 𑀧𑀡𑁆𑀟𑀺𑀢𑀸 𑀪𑀺𑀓𑁆𑀔𑀽 𑀅𑀦𑀼𑀕𑁆𑀕𑀸𑀳𑀓𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀦’’𑀦𑁆𑀢𑀺 𑀏𑀯𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀲𑀦𑁆𑀢𑀺𑀓𑁂 𑀪𑀺𑀓𑁆𑀔𑀽𑀦𑀁 𑀧𑁂𑀲𑀺𑀢𑀓𑀸𑀮𑁄.

𑀭𑀸𑀚𑀧𑀼𑀢𑁆𑀢𑁂𑀳𑀺 𑀭𑀜𑁆𑀜𑁄 𑀓𑀣𑀁 𑀲𑀼𑀢𑁆𑀯𑀸 𑀚𑁂𑀝𑁆𑀞𑀪𑀸𑀢𑀺𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀺𑀴𑀦𑁆𑀥𑀦𑀁 𑀬𑀸𑀘𑀺𑀢𑀓𑀸𑀮𑁄 𑀯𑀺𑀬 𑀪𑀺𑀓𑁆𑀔𑀽𑀳𑀺 𑀲𑀢𑁆𑀣𑀼𑀓𑀣𑀁 𑀲𑀼𑀢𑁆𑀯𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀉𑀧𑀲𑀗𑁆𑀓𑀫𑁆𑀫 𑀥𑀫𑁆𑀫𑀤𑁂𑀲𑀦𑀁 𑀆𑀬𑀸𑀘𑀺𑀢𑀓𑀸𑀮𑁄. 𑀚𑁂𑀝𑁆𑀞𑀪𑀸𑀢𑀺𑀓𑀲𑁆𑀲 𑀕𑀩𑁆𑀪𑀁 𑀯𑀺𑀯𑀭𑀺𑀢𑁆𑀯𑀸 𑀘𑀢𑀲𑁆𑀲𑁄 𑀧𑁂𑀴𑀸𑀬𑁄 𑀦𑀻𑀳𑀭𑀺𑀢𑁆𑀯𑀸 𑀞𑀧𑀦𑀁 𑀯𑀺𑀬 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀇𑀫𑀁 𑀲𑀼𑀢𑁆𑀢𑀦𑁆𑀢𑀁 𑀆𑀭𑀪𑀺𑀢𑁆𑀯𑀸 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀯𑀲𑁂𑀦 𑀫𑀸𑀢𑀺𑀓𑀸𑀬 𑀞𑀧𑀦𑀁. 𑀢𑀺𑀲𑁆𑀲𑁄 𑀧𑁂𑀴𑀸𑀬𑁄 𑀞𑀧𑁂𑀢𑁆𑀯𑀸 𑀏𑀓𑀁 𑀯𑀺𑀯𑀭𑀺𑀢𑁆𑀯𑀸 𑀢𑀢𑁄 𑀧𑀜𑁆𑀘𑀲𑀫𑀼𑀕𑁆𑀕𑀦𑀻𑀳𑀭𑀡𑀁 𑀯𑀺𑀬 𑀢𑀻𑀡𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀞𑀧𑁂𑀢𑁆𑀯𑀸 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀯𑀺𑀪𑀚𑀦𑁆𑀢𑀲𑁆𑀲 𑀧𑀜𑁆𑀘𑀓𑁆𑀔𑀦𑁆𑀥𑀤𑀲𑁆𑀲𑀦𑀁. 𑀘𑀢𑁆𑀢𑀸𑀭𑁄 𑀲𑀫𑀼𑀕𑁆𑀕𑁂 𑀞𑀧𑁂𑀢𑁆𑀯𑀸 𑀏𑀓𑀁 𑀯𑀺𑀯𑀭𑀺𑀢𑁆𑀯𑀸 𑀢𑀢𑁄 𑀧𑀜𑁆𑀘𑀓𑀭𑀡𑁆𑀟𑀦𑀻𑀳𑀭𑀡𑀁 𑀯𑀺𑀬 𑀘𑀢𑁆𑀢𑀸𑀭𑁄 𑀅𑀭𑀽𑀧𑀓𑁆𑀔𑀦𑁆𑀥𑁂 𑀞𑀧𑁂𑀢𑁆𑀯𑀸 𑀏𑀓𑀁 𑀭𑀽𑀧𑀓𑁆𑀔𑀦𑁆𑀥𑀁 𑀯𑀺𑀪𑀚𑀦𑁆𑀢𑀲𑁆𑀲 𑀘𑀢𑀼𑀫𑀳𑀸𑀪𑀽𑀢𑀉𑀧𑀸𑀤𑀸𑀭𑀽𑀧𑀯𑀲𑁂𑀦 𑀧𑀜𑁆𑀘𑀓𑁄𑀝𑁆𑀞𑀸𑀲𑀤𑀲𑁆𑀲𑀦𑀁.

𑁩𑁦𑁨. 𑀘𑀢𑁆𑀢𑀸𑀭𑁄 𑀓𑀭𑀡𑁆𑀟𑁂 𑀞𑀧𑁂𑀢𑁆𑀯𑀸 𑀏𑀓𑀁 𑀯𑀺𑀯𑀭𑀺𑀢𑁆𑀯𑀸 𑀧𑀺𑀥𑀸𑀦𑀁 𑀧𑀲𑁆𑀲𑁂 𑀞𑀧𑁂𑀢𑁆𑀯𑀸 𑀳𑀢𑁆𑀣𑀽𑀧𑀕𑀧𑀸𑀤𑀽𑀧𑀕𑀸𑀤𑀺𑀧𑀺𑀴𑀦𑁆𑀥𑀦𑀤𑀸𑀦𑀁 𑀯𑀺𑀬 𑀢𑀻𑀡𑀺 𑀫𑀳𑀸𑀪𑀽𑀢𑀸𑀦𑀺 𑀉𑀧𑀸𑀤𑀸𑀭𑀽𑀧𑀜𑁆𑀘 𑀞𑀧𑁂𑀢𑁆𑀯𑀸 𑀏𑀓𑀁 𑀧𑀣𑀯𑀻𑀥𑀸𑀢𑀼𑀁 𑀯𑀺𑀪𑀚𑀦𑁆𑀢𑀲𑁆𑀲 𑀩𑀸𑀳𑀺𑀭𑀁 𑀢𑀸𑀯 𑀧𑀺𑀥𑀸𑀦𑀁 𑀯𑀺𑀬 𑀞𑀧𑁂𑀢𑁆𑀯𑀸 𑀅𑀚𑁆𑀛𑀢𑁆𑀢𑀺𑀓𑀸𑀬 𑀧𑀣𑀯𑀻𑀥𑀸𑀢𑀼𑀬𑀸 𑀦𑀸𑀦𑀸𑀲𑀪𑀸𑀯𑀢𑁄 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀓𑀢𑀫𑀸 𑀘𑀸𑀯𑀼𑀲𑁄 𑀅𑀚𑁆𑀛𑀢𑁆𑀢𑀺𑀓𑀸 𑀧𑀣𑀯𑀻𑀥𑀸𑀢𑀽’’𑀢𑀺𑀆𑀤𑀺𑀯𑀘𑀦𑀁.

𑀢𑀲𑁆𑀲 𑀧𑀦 𑀭𑀸𑀚𑀧𑀼𑀢𑁆𑀢𑀲𑁆𑀲 𑀢𑁂𑀳𑀺 𑀘𑀢𑀽𑀳𑀺 𑀓𑀭𑀡𑁆𑀟𑁂𑀳𑀺 𑀘𑀢𑀽𑀳𑀺 𑀲𑀫𑀼𑀕𑁆𑀕𑁂𑀳𑀺 𑀢𑀻𑀳𑀺 𑀘 𑀧𑁂𑀴𑀸𑀳𑀺 𑀧𑀘𑁆𑀙𑀸 𑀅𑀦𑀼𑀧𑀼𑀩𑁆𑀩𑁂𑀦 𑀦𑀻𑀳𑀭𑀺𑀢𑁆𑀯𑀸 𑀧𑀺𑀴𑀦𑁆𑀥𑀦𑀤𑀸𑀦𑀁 𑀯𑀺𑀬 𑀣𑁂𑀭𑀲𑁆𑀲𑀸𑀧𑀺 𑀇𑀢𑀭𑁂𑀲𑀜𑁆𑀘 𑀢𑀺𑀡𑁆𑀡𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀭𑀽𑀧𑀸𑀦𑀜𑁆𑀘 𑀘𑀢𑀼𑀦𑁆𑀦𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀜𑁆𑀘 𑀢𑀺𑀡𑁆𑀡𑀁 𑀅𑀭𑀺𑀬𑀲𑀘𑁆𑀘𑀸𑀦𑀜𑁆𑀘 𑀧𑀘𑁆𑀙𑀸 𑀅𑀦𑀼𑀧𑀼𑀩𑁆𑀩𑁂𑀦 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀧𑀦𑁂𑀢𑀁 ‘‘𑀓𑀢𑀫𑀸 𑀘𑀸𑀯𑀼𑀲𑁄, 𑀅𑀚𑁆𑀛𑀢𑁆𑀢𑀺𑀓𑀸 𑀧𑀣𑀯𑀻𑀥𑀸𑀢𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀚𑁆𑀛𑀢𑁆𑀢𑀁 𑀧𑀘𑁆𑀘𑀢𑁆𑀢𑀦𑁆𑀢𑀺 𑀉𑀪𑀬𑀫𑁆𑀧𑁂𑀢𑀁 𑀦𑀺𑀬𑀓𑀸𑀥𑀺𑀯𑀘𑀦𑀫𑁂𑀯. 𑀓𑀓𑁆𑀔𑀴𑀦𑁆𑀢𑀺 𑀣𑀤𑁆𑀥𑀁. 𑀔𑀭𑀺𑀕𑀢𑀦𑁆𑀢𑀺 𑀨𑀭𑀼𑀲𑀁. 𑀉𑀧𑀸𑀤𑀺𑀦𑁆𑀦𑀦𑁆𑀢𑀺 𑀦 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀫𑁂𑀯, 𑀅𑀯𑀺𑀲𑁂𑀲𑁂𑀦 𑀧𑀦 𑀲𑀭𑀻𑀭𑀝𑁆𑀞𑀓𑀲𑁆𑀲𑁂𑀢𑀁 𑀕𑀳𑀡𑀁. 𑀲𑀭𑀻𑀭𑀝𑁆𑀞𑀓𑀜𑁆𑀳𑀺 𑀉𑀧𑀸𑀤𑀺𑀦𑁆𑀦𑀁 𑀯𑀸 𑀳𑁄𑀢𑀼, 𑀅𑀦𑀼𑀧𑀸𑀤𑀺𑀦𑁆𑀦𑀁 𑀯𑀸, 𑀆𑀤𑀺𑀦𑁆𑀦𑀕𑀳𑀺𑀢𑀧𑀭𑀸𑀫𑀝𑁆𑀞𑀯𑀲𑁂𑀦 𑀲𑀩𑁆𑀩𑀁 𑀉𑀧𑀸𑀤𑀺𑀦𑁆𑀦𑀫𑁂𑀯 𑀦𑀸𑀫. 𑀲𑁂𑀬𑁆𑀬𑀣𑀺𑀤𑀁 𑁋 𑀓𑁂𑀲𑀸 𑀮𑁄𑀫𑀸…𑀧𑁂… 𑀉𑀤𑀭𑀺𑀬𑀁 𑀓𑀭𑀻𑀲𑀦𑁆𑀢𑀺 𑀇𑀤𑀁 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀅𑀚𑁆𑀛𑀢𑁆𑀢𑀺𑀓𑀧𑀣𑀯𑀻𑀥𑀸𑀢𑀼𑀯𑀲𑁂𑀦 𑀢𑀸𑀯 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀪𑀢𑁆𑀢𑀁. 𑀏𑀢𑁆𑀣 𑀧𑀦 𑀫𑀦𑀲𑀺𑀓𑀸𑀭𑀁 𑀆𑀭𑀪𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀳𑁂𑀢𑀼𑀓𑀸𑀫𑁂𑀦 𑀬𑀁 𑀓𑀸𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀫𑀢𑁆𑀣𑀮𑀼𑀗𑁆𑀕𑀁 𑀧𑀦 𑀦 𑀇𑀥 𑀧𑀸𑀴𑀺𑀆𑀭𑀼𑀴𑁆𑀳𑀁. 𑀢𑀫𑁆𑀧𑀺 𑀆𑀳𑀭𑀺𑀢𑁆𑀯𑀸, 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀲𑁂𑀦 𑀯𑀯𑀢𑁆𑀣𑀧𑁂𑀢𑁆𑀯𑀸, ‘‘𑀅𑀬𑀫𑁆𑀧𑀺 𑀅𑀘𑁂𑀢𑀦𑀸 𑀅𑀩𑁆𑀬𑀸𑀓𑀢𑀸 𑀲𑀼𑀜𑁆𑀜𑀸 𑀣𑀤𑁆𑀥𑀸 𑀧𑀣𑀯𑀻𑀥𑀸𑀢𑀼 𑀏𑀯𑀸’’𑀢𑀺 𑀫𑀦𑀲𑀺 𑀓𑀸𑀢𑀩𑁆𑀩𑀁. 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀻𑀢𑀺 𑀇𑀤𑀁 𑀇𑀢𑀭𑁂𑀲𑀼 𑀢𑀻𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀅𑀦𑀼𑀕𑀢𑀸𑀬 𑀧𑀣𑀯𑀻𑀥𑀸𑀢𑀼𑀬𑀸 𑀕𑀳𑀡𑀢𑁆𑀣𑀁 𑀯𑀼𑀢𑁆𑀢𑀁. 𑀬𑀸 𑀘𑁂𑀯 𑀔𑁄 𑀧𑀦 𑀅𑀚𑁆𑀛𑀢𑁆𑀢𑀺𑀓𑀸 𑀧𑀣𑀯𑀻𑀥𑀸𑀢𑀽𑀢𑀺 𑀬𑀸 𑀘 𑀅𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀅𑀚𑁆𑀛𑀢𑁆𑀢𑀺𑀓𑀸 𑀧𑀣𑀯𑀻𑀥𑀸𑀢𑀼. 𑀬𑀸 𑀘 𑀩𑀸𑀳𑀺𑀭𑀸𑀢𑀺 𑀬𑀸 𑀘 𑀯𑀺𑀪𑀗𑁆𑀕𑁂, ‘‘𑀅𑀬𑁄 𑀮𑁄𑀳𑀁 𑀢𑀺𑀧𑀼 𑀲𑀻𑀲’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀪. 𑁧𑁭𑁩) 𑀦𑀬𑁂𑀦 𑀆𑀕𑀢𑀸 𑀩𑀸𑀳𑀺𑀭𑀸 𑀧𑀣𑀯𑀻𑀥𑀸𑀢𑀼.

𑀏𑀢𑁆𑀢𑀸𑀯𑀢𑀸 𑀣𑁂𑀭𑁂𑀦 𑀅𑀚𑁆𑀛𑀢𑁆𑀢𑀺𑀓𑀸 𑀧𑀣𑀯𑀻𑀥𑀸𑀢𑀼 𑀦𑀸𑀦𑀸𑀲𑀪𑀸𑀯𑀢𑁄 𑀯𑀻𑀲𑀢𑀺𑀬𑀸 𑀆𑀓𑀸𑀭𑁂𑀳𑀺 𑀯𑀺𑀢𑁆𑀣𑀸𑀭𑁂𑀦 𑀤𑀲𑁆𑀲𑀺𑀢𑀸, 𑀩𑀸𑀳𑀺𑀭𑀸 𑀲𑀗𑁆𑀔𑁂𑀧𑁂𑀦. 𑀓𑀲𑁆𑀫𑀸? 𑀬𑀲𑁆𑀫𑀺𑀜𑁆𑀳𑀺 𑀞𑀸𑀦𑁂 𑀲𑀢𑁆𑀢𑀸𑀦𑀁 𑀆𑀮𑀬𑁄 𑀦𑀺𑀓𑀦𑁆𑀢𑀺 𑀧𑀢𑁆𑀣𑀦𑀸 𑀧𑀭𑀺𑀬𑀼𑀝𑁆𑀞𑀸𑀦𑀁 𑀕𑀳𑀡𑀁 𑀧𑀭𑀸𑀫𑀸𑀲𑁄 𑀩𑀮𑀯𑀸 𑀳𑁄𑀢𑀺, 𑀢𑀢𑁆𑀣 𑀢𑁂𑀲𑀁 𑀆𑀮𑀬𑀸𑀤𑀻𑀦𑀁 𑀉𑀤𑁆𑀥𑀭𑀡𑀢𑁆𑀣𑀁 𑀩𑀼𑀤𑁆𑀥𑀸 𑀯𑀸 𑀩𑀼𑀤𑁆𑀥𑀲𑀸𑀯𑀓𑀸 𑀯𑀸 𑀯𑀺𑀢𑁆𑀣𑀸𑀭𑀓𑀣𑀁 𑀓𑀣𑁂𑀦𑁆𑀢𑀺. 𑀬𑀢𑁆𑀣 𑀧𑀦 𑀦 𑀩𑀮𑀯𑀸, 𑀢𑀢𑁆𑀣 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀸𑀪𑀸𑀯𑀢𑁄 𑀲𑀗𑁆𑀔𑁂𑀧𑁂𑀦 𑀓𑀣𑁂𑀦𑁆𑀢𑀺. 𑀬𑀣𑀸 𑀳𑀺 𑀓𑀲𑁆𑀲𑀓𑁄 𑀔𑁂𑀢𑁆𑀢𑀁 𑀓𑀲𑀫𑀸𑀦𑁄 𑀬𑀢𑁆𑀣 𑀫𑀽𑀮𑀲𑀦𑁆𑀢𑀸𑀦𑀓𑀸𑀦𑀁 𑀩𑀮𑀯𑀢𑀸𑀬 𑀦𑀗𑁆𑀕𑀮𑀁 𑀮𑀕𑁆𑀕𑀢𑀺, 𑀢𑀢𑁆𑀣 𑀕𑁄𑀡𑁂 𑀞𑀧𑁂𑀢𑁆𑀯𑀸 𑀧𑀁𑀲𑀼𑀁 𑀯𑀺𑀬𑀽𑀳𑀺𑀢𑁆𑀯𑀸 𑀫𑀽𑀮𑀲𑀦𑁆𑀢𑀸𑀦𑀓𑀸𑀦𑀺 𑀙𑁂𑀢𑁆𑀯𑀸 𑀙𑁂𑀢𑁆𑀯𑀸 𑀉𑀤𑁆𑀥𑀭𑀦𑁆𑀢𑁄 𑀩𑀳𑀼𑀁 𑀯𑀸𑀬𑀸𑀫𑀁 𑀓𑀭𑁄𑀢𑀺. 𑀬𑀢𑁆𑀣 𑀢𑀸𑀦𑀺 𑀦𑀢𑁆𑀣𑀺, 𑀢𑀢𑁆𑀣 𑀩𑀮𑀯𑀁 𑀧𑀬𑁄𑀕𑀁 𑀓𑀢𑁆𑀯𑀸 𑀕𑁄𑀡𑁂 𑀧𑀺𑀝𑁆𑀞𑀺𑀬𑀁 𑀧𑀳𑀭𑀫𑀸𑀦𑁄 𑀓𑀲𑀢𑀺𑀬𑁂𑀯, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁.

𑀧𑀣𑀯𑀻𑀥𑀸𑀢𑀼𑀭𑁂𑀯𑁂𑀲𑀸𑀢𑀺 𑀤𑀼𑀯𑀺𑀥𑀸𑀧𑁂𑀲𑀸 𑀣𑀤𑁆𑀥𑀝𑁆𑀞𑁂𑀦 𑀓𑀓𑁆𑀔𑀴𑀝𑁆𑀞𑁂𑀦 𑀨𑀭𑀼𑀲𑀝𑁆𑀞𑁂𑀦 𑀏𑀓𑀮𑀓𑁆𑀔𑀡𑀸 𑀧𑀣𑀯𑀻𑀥𑀸𑀢𑀼𑀬𑁂𑀯, 𑀆𑀯𑀼𑀲𑁄𑀢𑀺 𑀅𑀚𑁆𑀛𑀢𑁆𑀢𑀺𑀓𑀁 𑀩𑀸𑀳𑀺𑀭𑀸𑀬 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀬𑀲𑁆𑀫𑀸 𑀩𑀸𑀳𑀺𑀭𑀸𑀬 𑀧𑀣𑀯𑀻𑀥𑀸𑀢𑀼𑀬𑀸 𑀅𑀘𑁂𑀢𑀦𑀸𑀪𑀸𑀯𑁄 𑀧𑀸𑀓𑀝𑁄, 𑀦 𑀅𑀚𑁆𑀛𑀢𑁆𑀢𑀺𑀓𑀸𑀬, 𑀢𑀲𑁆𑀫𑀸 𑀲𑀸 𑀩𑀸𑀳𑀺𑀭𑀸𑀬 𑀲𑀤𑁆𑀥𑀺𑀁 𑀏𑀓𑀲𑀤𑀺𑀲𑀸 𑀅𑀘𑁂𑀢𑀦𑀸𑀬𑁂𑀯𑀸𑀢𑀺 𑀕𑀡𑁆𑀳𑀦𑁆𑀢𑀲𑁆𑀲 𑀲𑀼𑀔𑀧𑀭𑀺𑀕𑁆𑀕𑀳𑁄 𑀳𑁄𑀢𑀺. 𑀬𑀣𑀸 𑀓𑀺𑀁? 𑀬𑀣𑀸 𑀤𑀦𑁆𑀢𑁂𑀦 𑀕𑁄𑀡𑁂𑀦 𑀲𑀤𑁆𑀥𑀺𑀁 𑀬𑁄𑀚𑀺𑀢𑁄 𑀅𑀤𑀦𑁆𑀢𑁄 𑀓𑀢𑀺𑀧𑀸𑀳𑀫𑁂𑀯 𑀯𑀺𑀲𑀽𑀓𑀸𑀬𑀢𑀺 𑀯𑀺𑀧𑁆𑀨𑀦𑁆𑀤𑀢𑀺, 𑀅𑀣 𑀦 𑀘𑀺𑀭𑀲𑁆𑀲𑁂𑀯 𑀤𑀫𑀣𑀁 𑀉𑀧𑁂𑀢𑀺. 𑀏𑀯𑀁 𑀅𑀚𑁆𑀛𑀢𑁆𑀢𑀺𑀓𑀸𑀧𑀺 𑀩𑀸𑀳𑀺𑀭𑀸𑀬 𑀲𑀤𑁆𑀥𑀺𑀁 𑀏𑀓𑀲𑀤𑀺𑀲𑀸𑀢𑀺 𑀕𑀡𑁆𑀳𑀦𑁆𑀢𑀲𑁆𑀲 𑀓𑀢𑀺𑀧𑀸𑀳𑀫𑁂𑀯 𑀅𑀘𑁂𑀢𑀦𑀸𑀪𑀸𑀯𑁄 𑀦 𑀉𑀧𑀝𑁆𑀞𑀸𑀢𑀺, 𑀅𑀣 𑀦 𑀘𑀺𑀭𑁂𑀦𑁂𑀯𑀲𑁆𑀲𑀸 𑀅𑀘𑁂𑀢𑀦𑀸𑀪𑀸𑀯𑁄 𑀧𑀸𑀓𑀝𑁄 𑀳𑁄𑀢𑀺. 𑀢𑀁 𑀦𑁂𑀢𑀁 𑀫𑀫𑀸𑀢𑀺 𑀢𑀁 𑀉𑀪𑀬𑀫𑁆𑀧𑀺 𑀦 𑀏𑀢𑀁 𑀫𑀫, 𑀦 𑀏𑀲𑁄𑀳𑀫𑀲𑁆𑀫𑀺, 𑀦 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑀏𑀯𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁. 𑀬𑀣𑀸𑀪𑀽𑀢𑀦𑁆𑀢𑀺 𑀬𑀣𑀸𑀲𑀪𑀸𑀯𑀁, 𑀢𑀜𑁆𑀳𑀺 𑀅𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑀁, 𑀢𑀲𑁆𑀫𑀸 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸𑀢𑀺 𑀏𑀯𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀳𑁄𑀢𑀺 𑀔𑁄 𑀲𑁄, 𑀆𑀯𑀼𑀲𑁄𑀢𑀺 𑀓𑀲𑁆𑀫𑀸 𑀆𑀭𑀪𑀺? 𑀩𑀸𑀳𑀺𑀭𑀆𑀧𑁄𑀥𑀸𑀢𑀼𑀯𑀲𑁂𑀦 𑀩𑀸𑀳𑀺𑀭𑀸𑀬 𑀧𑀣𑀯𑀻𑀥𑀸𑀢𑀼𑀬𑀸 𑀯𑀺𑀦𑀸𑀲𑀁 𑀤𑀲𑁆𑀲𑁂𑀢𑁆𑀯𑀸 𑀢𑀢𑁄 𑀯𑀺𑀲𑁂𑀲𑀢𑀭𑁂𑀦 𑀉𑀧𑀸𑀤𑀺𑀦𑁆𑀦𑀸𑀬 𑀲𑀭𑀻𑀭𑀝𑁆𑀞𑀓𑀧𑀣𑀯𑀻𑀥𑀸𑀢𑀼𑀬𑀸 𑀯𑀺𑀦𑀸𑀲𑀤𑀲𑁆𑀲𑀦𑀢𑁆𑀣𑀁. 𑀧𑀓𑀼𑀧𑁆𑀧𑀢𑀻𑀢𑀺 𑀆𑀧𑁄𑀲𑀁𑀯𑀝𑁆𑀝𑀯𑀲𑁂𑀦 𑀯𑀟𑁆𑀠𑀫𑀸𑀦𑀸 𑀓𑀼𑀧𑁆𑀧𑀢𑀺. 𑀅𑀦𑁆𑀢𑀭𑀳𑀺𑀢𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀩𑀸𑀳𑀺𑀭𑀸 𑀧𑀣𑀯𑀻𑀥𑀸𑀢𑀼 𑀳𑁄𑀢𑀻𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀔𑀸𑀭𑁄𑀤𑀓𑁂𑀦 𑀯𑀺𑀮𑀻𑀬𑀫𑀸𑀦𑀸 𑀉𑀤𑀓𑀸𑀦𑀼𑀕𑀢𑀸 𑀳𑀼𑀢𑁆𑀯𑀸 𑀲𑀩𑁆𑀩𑀸 𑀧𑀩𑁆𑀩𑀢𑀸𑀤𑀺𑀯𑀲𑁂𑀦 𑀲𑀡𑁆𑀞𑀺𑀢𑀸 𑀧𑀣𑀯𑀻𑀥𑀸𑀢𑀼 𑀅𑀦𑁆𑀢𑀭𑀳𑀺𑀢𑀸 𑀳𑁄𑀢𑀺. 𑀯𑀺𑀮𑀻𑀬𑀺𑀢𑁆𑀯𑀸 𑀉𑀤𑀓𑀫𑁂𑀯 𑀳𑁄𑀢𑀺. 𑀢𑀸𑀯 𑀫𑀳𑀮𑁆𑀮𑀺𑀓𑀸𑀬𑀸𑀢𑀺 𑀢𑀸𑀯 𑀫𑀳𑀦𑁆𑀢𑀸𑀬.

𑀤𑀼𑀯𑁂 𑀲𑀢𑀲𑀳𑀲𑁆𑀲𑀸𑀦𑀺, 𑀘𑀢𑁆𑀢𑀸𑀭𑀺 𑀦𑀳𑀼𑀢𑀸𑀦𑀺 𑀘;

𑀏𑀢𑁆𑀢𑀓𑀁 𑀩𑀳𑀮𑀢𑁆𑀢𑁂𑀦, 𑀲𑀗𑁆𑀔𑀸𑀢𑀸𑀬𑀁 𑀯𑀲𑀼𑀦𑁆𑀥𑀭𑀸𑀢𑀺. 𑁋

𑀏𑀯𑀁 𑀩𑀳𑀮𑀢𑁆𑀢𑁂𑀦𑁂𑀯 𑀫𑀳𑀦𑁆𑀢𑀸𑀬, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀧𑁆𑀧𑀫𑀸𑀡𑀸𑀬. 𑀅𑀦𑀺𑀘𑁆𑀘𑀢𑀸𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀢𑀸. 𑀔𑀬𑀥𑀫𑁆𑀫𑀢𑀸𑀢𑀺 𑀔𑀬𑀁 𑀕𑀫𑀦𑀲𑀪𑀸𑀯𑀢𑀸. 𑀯𑀬𑀥𑀫𑁆𑀫𑀢𑀸𑀢𑀺 𑀯𑀬𑀁 𑀕𑀫𑀦𑀲𑀪𑀸𑀯𑀢𑀸. 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑀸𑀢𑀺 𑀧𑀓𑀢𑀺𑀯𑀺𑀚𑀳𑀦𑀲𑀪𑀸𑀯𑀢𑀸, 𑀇𑀢𑀺 𑀲𑀩𑁆𑀩𑁂𑀳𑀺𑀧𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀫𑁂𑀯 𑀯𑀼𑀢𑁆𑀢𑀁. 𑀬𑀁 𑀧𑀦 𑀅𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔𑀁. 𑀬𑀁 𑀤𑀼𑀓𑁆𑀔𑀁, 𑀢𑀁 𑀅𑀦𑀢𑁆𑀢𑀸𑀢𑀺 𑀢𑀻𑀡𑀺𑀧𑀺 𑀮𑀓𑁆𑀔𑀡𑀸𑀦𑀺 𑀆𑀕𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀫𑀢𑁆𑀢𑀝𑁆𑀞𑀓𑀲𑁆𑀲𑀸𑀢𑀺 𑀧𑀭𑀺𑀢𑁆𑀢𑀝𑁆𑀞𑀺𑀢𑀺𑀓𑀲𑁆𑀲, 𑀢𑀢𑁆𑀣 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀧𑀭𑀺𑀢𑁆𑀢𑀝𑁆𑀞𑀺𑀢𑀺𑀢𑀸 𑀯𑁂𑀤𑀺𑀢𑀩𑁆𑀩𑀸 𑀞𑀺𑀢𑀺𑀧𑀭𑀺𑀢𑁆𑀢𑀢𑀸𑀬 𑀘 𑀲𑀭𑀲𑀧𑀭𑀺𑀢𑁆𑀢𑀢𑀸𑀬 𑀘. 𑀅𑀬𑀜𑁆𑀳𑀺 𑀅𑀢𑀻𑀢𑁂 𑀘𑀺𑀢𑁆𑀢𑀓𑁆𑀔𑀡𑁂 𑀚𑀻𑀯𑀺𑀢𑁆𑀣, 𑀦 𑀚𑀻𑀯𑀢𑀺, 𑀦 𑀚𑀻𑀯𑀺𑀲𑁆𑀲𑀢𑀺. 𑀅𑀦𑀸𑀕𑀢𑁂 𑀘𑀺𑀢𑁆𑀢𑀓𑁆𑀔𑀡𑁂 𑀚𑀻𑀯𑀺𑀲𑁆𑀲𑀢𑀺, 𑀦 𑀚𑀻𑀯𑀢𑀺, 𑀦 𑀚𑀻𑀯𑀺𑀢𑁆𑀣. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀘𑀺𑀢𑁆𑀢𑀓𑁆𑀔𑀡𑁂 𑀚𑀻𑀯𑀢𑀺, 𑀦 𑀚𑀻𑀯𑀺𑀢𑁆𑀣, 𑀦 𑀚𑀻𑀯𑀺𑀲𑁆𑀲𑀢𑀻𑀢𑀺 𑀯𑀼𑀘𑁆𑀘𑀢𑀺.

‘‘𑀚𑀻𑀯𑀺𑀢𑀁 𑀅𑀢𑁆𑀢𑀪𑀸𑀯𑁄 𑀘, 𑀲𑀼𑀔𑀤𑀼𑀓𑁆𑀔𑀸 𑀘 𑀓𑁂𑀯𑀮𑀸;

𑀏𑀓𑀘𑀺𑀢𑁆𑀢𑀲𑀫𑀸𑀬𑀼𑀢𑁆𑀢𑀸, 𑀮𑀳𑀼 𑀲𑁄 𑀯𑀢𑁆𑀢𑀢𑁂 𑀔𑀡𑁄’’𑀢𑀺. 𑁋

𑀇𑀤𑀁 𑀏𑀢𑀲𑁆𑀲𑁂𑀯 𑀧𑀭𑀺𑀢𑁆𑀢𑀝𑁆𑀞𑀺𑀢𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀯𑀁 𑀞𑀺𑀢𑀺𑀧𑀭𑀺𑀢𑁆𑀢𑀢𑀸𑀬 𑀧𑀭𑀺𑀢𑁆𑀢𑀝𑁆𑀞𑀺𑀢𑀺𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀽𑀧𑀦𑀺𑀩𑀤𑁆𑀥𑀸𑀤𑀺𑀪𑀸𑀯𑁂𑀦 𑀧𑀦𑀲𑁆𑀲 𑀲𑀭𑀲𑀧𑀭𑀺𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀢𑁆𑀢𑀸𑀦𑀜𑁆𑀳𑀺 𑀅𑀲𑁆𑀲𑀸𑀲𑀽𑀧𑀦𑀺𑀩𑀤𑁆𑀥𑀁 𑀚𑀻𑀯𑀺𑀢𑀁, 𑀧𑀲𑁆𑀲𑀸𑀲𑀽𑀧𑀦𑀺𑀩𑀤𑁆𑀥𑀁 𑀚𑀻𑀯𑀺𑀢𑀁, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀽𑀧𑀦𑀺𑀩𑀤𑁆𑀥𑀁 𑀚𑀻𑀯𑀺𑀢𑀁, 𑀫𑀳𑀸𑀪𑀽𑀢𑀽𑀧𑀦𑀺𑀩𑀤𑁆𑀥𑀁 𑀚𑀻𑀯𑀺𑀢𑀁, 𑀓𑀩𑀴𑀻𑀓𑀸𑀭𑀸𑀳𑀸𑀭𑀽𑀧𑀦𑀺𑀩𑀤𑁆𑀥𑀁 𑀚𑀻𑀯𑀺𑀢𑀁, 𑀯𑀺𑀜𑁆𑀜𑀸𑀡𑀽𑀧𑀦𑀺𑀩𑀤𑁆𑀥𑀁 𑀚𑀻𑀯𑀺𑀢𑀦𑁆𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀁.

𑀢𑀡𑁆𑀳𑀼𑀧𑀸𑀤𑀺𑀦𑁆𑀦𑀲𑁆𑀲𑀸𑀢𑀺 𑀢𑀡𑁆𑀳𑀸𑀬 𑀆𑀤𑀺𑀦𑁆𑀦𑀕𑀳𑀺𑀢𑀧𑀭𑀸𑀫𑀝𑁆𑀞𑀲𑁆𑀲 𑀅𑀳𑀦𑁆𑀢𑀺 𑀯𑀸 𑀫𑀫𑀦𑁆𑀢𑀺 𑀯𑀸 𑀅𑀲𑁆𑀫𑀻𑀢𑀺 𑀯𑀸. 𑀅𑀣 𑀔𑁆𑀯𑀸𑀲𑁆𑀲 𑀦𑁄𑀢𑁂𑀯𑁂𑀢𑁆𑀣 𑀳𑁄𑀢𑀻𑀢𑀺 𑀅𑀣 𑀔𑁄 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀆𑀭𑁄𑀧𑁂𑀢𑁆𑀯𑀸 𑀧𑀲𑁆𑀲𑀦𑁆𑀢𑀲𑁆𑀲 𑀏𑀢𑁆𑀣 𑀅𑀚𑁆𑀛𑀢𑁆𑀢𑀺𑀓𑀸𑀬 𑀧𑀣𑀯𑀻𑀥𑀸𑀢𑀼𑀬𑀸 𑀅𑀳𑀦𑁆𑀢𑀺 𑀯𑀸𑀢𑀺𑀆𑀤𑀺 𑀢𑀺𑀯𑀺𑀥𑁄 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀕𑁆𑀕𑀸𑀳𑁄 𑀦𑁄𑀢𑁂𑀯 𑀳𑁄𑀢𑀺, 𑀦 𑀳𑁄𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀘 𑀆𑀧𑁄𑀥𑀸𑀢𑀼𑀯𑀲𑁂𑀦, 𑀏𑀯𑀁 𑀢𑁂𑀚𑁄𑀥𑀸𑀢𑀼𑀯𑀸𑀬𑁄𑀥𑀸𑀢𑀼𑀯𑀲𑁂𑀦𑀧𑀺 𑀩𑀸𑀳𑀺𑀭𑀸𑀬 𑀧𑀣𑀯𑀻𑀥𑀸𑀢𑀼𑀬𑀸 𑀅𑀦𑁆𑀢𑀭𑀥𑀸𑀦𑀁 𑀳𑁄𑀢𑀺. 𑀇𑀥 𑀧𑀦 𑀏𑀓𑀁𑀬𑁂𑀯 𑀆𑀕𑀢𑀁. 𑀇𑀢𑀭𑀸𑀦𑀺𑀧𑀺 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀢𑀜𑁆𑀘𑁂, 𑀆𑀯𑀼𑀲𑁄𑀢𑀺 𑀇𑀥 𑀢𑀲𑁆𑀲 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑁄𑀢𑀤𑁆𑀯𑀸𑀭𑁂 𑀧𑀭𑀺𑀕𑁆𑀕𑀳𑀁 𑀧𑀝𑁆𑀞𑀧𑁂𑀦𑁆𑀢𑁄 𑀩𑀮𑀁 𑀤𑀲𑁆𑀲𑁂𑀢𑀺. 𑀅𑀓𑁆𑀓𑁄𑀲𑀦𑁆𑀢𑀻𑀢𑀺 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀦𑁆𑀢𑀺. 𑀧𑀭𑀺𑀪𑀸𑀲𑀦𑁆𑀢𑀻𑀢𑀺 𑀢𑀬𑀸 𑀇𑀤𑀜𑁆𑀘𑀺𑀤𑀜𑁆𑀘 𑀓𑀢𑀁, 𑀏𑀯𑀜𑁆𑀘 𑀏𑀯𑀜𑁆𑀘 𑀢𑀁 𑀓𑀭𑀺𑀲𑁆𑀲𑀸𑀫𑀸𑀢𑀺 𑀯𑀸𑀘𑀸𑀬 𑀧𑀭𑀺𑀪𑀸𑀲𑀦𑁆𑀢𑀺. 𑀭𑁄𑀲𑁂𑀦𑁆𑀢𑀻𑀢𑀺 𑀖𑀝𑁆𑀝𑁂𑀦𑁆𑀢𑀺. 𑀯𑀺𑀳𑁂𑀲𑁂𑀦𑁆𑀢𑀻𑀢𑀺 𑀤𑀼𑀓𑁆𑀔𑀸𑀧𑁂𑀦𑁆𑀢𑀺, 𑀲𑀩𑁆𑀩𑀁 𑀯𑀸𑀘𑀸𑀬 𑀖𑀝𑁆𑀝𑀦𑀫𑁂𑀯 𑀯𑀼𑀢𑁆𑀢𑀁. 𑀲𑁄 𑀏𑀯𑀦𑁆𑀢𑀺 𑀲𑁄 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀺𑀓𑁄 𑀏𑀯𑀁 𑀲𑀫𑁆𑀧𑀚𑀸𑀦𑀸𑀢𑀺. 𑀉𑀧𑁆𑀧𑀦𑁆𑀦𑀸 𑀔𑁄 𑀫𑁂 𑀅𑀬𑀦𑁆𑀢𑀺 𑀲𑀫𑁆𑀧𑀢𑀺𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀘 𑀲𑀫𑀼𑀤𑀸𑀘𑀸𑀭𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀘 𑀉𑀧𑁆𑀧𑀦𑁆𑀦𑀸. 𑀲𑁄𑀢𑀲𑀫𑁆𑀨𑀲𑁆𑀲𑀚𑀸𑀢𑀺 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀲𑁄𑀢𑀲𑀫𑁆𑀨𑀲𑁆𑀲𑀢𑁄 𑀚𑀸𑀢𑀸 𑀲𑁄𑀢𑀤𑁆𑀯𑀸𑀭𑀚𑀯𑀦𑀯𑁂𑀤𑀦𑀸, 𑀨𑀲𑁆𑀲𑁄 𑀅𑀦𑀺𑀘𑁆𑀘𑁄𑀢𑀺 𑀲𑁄𑀢𑀲𑀫𑁆𑀨𑀲𑁆𑀲𑁄 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑁄𑀢𑀺 𑀧𑀲𑁆𑀲𑀢𑀺. 𑀯𑁂𑀤𑀦𑀸𑀤𑀬𑁄𑀧𑀺 𑀲𑁄𑀢𑀲𑀫𑁆𑀨𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀸𑀯 𑀯𑁂𑀤𑀺𑀢𑀩𑁆𑀩𑀸. 𑀥𑀸𑀢𑀸𑀭𑀫𑁆𑀫𑀡𑀫𑁂𑀯𑀸𑀢𑀺 𑀥𑀸𑀢𑀼𑀲𑀗𑁆𑀔𑀸𑀢𑀫𑁂𑀯 𑀆𑀭𑀫𑁆𑀫𑀡𑀁. 𑀧𑀓𑁆𑀔𑀦𑁆𑀤𑀢𑀻𑀢𑀺 𑀑𑀢𑀭𑀢𑀺. 𑀧𑀲𑀻𑀤𑀢𑀻𑀢𑀺 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀧𑀲𑀻𑀤𑀢𑀺, 𑀪𑀼𑀫𑁆𑀫𑀯𑀘𑀦𑀫𑁂𑀯 𑀯𑀸 𑀏𑀢𑀁. 𑀩𑁆𑀬𑀜𑁆𑀚𑀦𑀲𑀦𑁆𑀥𑀺𑀯𑀲𑁂𑀦 ‘‘𑀥𑀸𑀢𑀸𑀭𑀫𑁆𑀫𑀡𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁, 𑀥𑀸𑀢𑀸𑀭𑀫𑁆𑀫𑀡𑁂𑀬𑁂𑀯𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀅𑀥𑀺𑀫𑀼𑀘𑁆𑀘𑀢𑀻𑀢𑀺 𑀥𑀸𑀢𑀼𑀯𑀲𑁂𑀦 𑀏𑀯𑀦𑁆𑀢𑀺 𑀅𑀥𑀺𑀫𑁄𑀓𑁆𑀔𑀁 𑀮𑀪𑀢𑀺, 𑀦 𑀭𑀚𑁆𑀚𑀢𑀺, 𑀦 𑀤𑀼𑀲𑁆𑀲𑀢𑀺. 𑀅𑀬𑀜𑁆𑀳𑀺 𑀲𑁄𑀢𑀤𑁆𑀯𑀸𑀭𑀫𑁆𑀳𑀺 𑀆𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀫𑀽𑀮𑀧𑀭𑀺𑀜𑁆𑀜𑀸𑀆𑀕𑀦𑁆𑀢𑀼𑀓𑀢𑀸𑀯𑀓𑀸𑀮𑀺𑀓𑀯𑀲𑁂𑀦 𑀧𑀭𑀺𑀕𑁆𑀕𑀳𑀁 𑀓𑀭𑁄𑀢𑀺, 𑀢𑀲𑁆𑀲 𑀯𑀺𑀢𑁆𑀣𑀸𑀭𑀓𑀣𑀸 𑀲𑀢𑀺𑀧𑀝𑁆𑀞𑀸𑀦𑁂 𑀲𑀢𑀺𑀲𑀫𑁆𑀧𑀚𑀜𑁆𑀜𑀧𑀩𑁆𑀩𑁂 𑀯𑀼𑀢𑁆𑀢𑀸. 𑀲𑀸 𑀧𑀦 𑀢𑀢𑁆𑀣 𑀘𑀓𑁆𑀔𑀼𑀤𑁆𑀯𑀸𑀭𑀯𑀲𑁂𑀦 𑀯𑀼𑀢𑁆𑀢𑀸, 𑀇𑀥 𑀲𑁄𑀢𑀤𑁆𑀯𑀸𑀭𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀓𑀢𑀧𑀭𑀺𑀕𑁆𑀕𑀳𑀲𑁆𑀲 𑀳𑀺 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲 𑀩𑀮𑀯𑀯𑀺𑀧𑀲𑁆𑀲𑀓𑀲𑁆𑀲 𑀲𑀘𑁂𑀧𑀺 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀲𑀼 𑀆𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀅𑀬𑁄𑀦𑀺𑀲𑁄 𑀆𑀯𑀚𑁆𑀚𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀯𑁄𑀝𑁆𑀞𑀩𑁆𑀩𑀦𑀁 𑀧𑀢𑁆𑀯𑀸 𑀏𑀓𑀁 𑀤𑁆𑀯𑁂 𑀯𑀸𑀭𑁂 𑀆𑀲𑁂𑀯𑀦𑀁 𑀮𑀪𑀺𑀢𑁆𑀯𑀸 𑀘𑀺𑀢𑁆𑀢𑀁 𑀪𑀯𑀗𑁆𑀕𑀫𑁂𑀯 𑀑𑀢𑀭𑀢𑀺, 𑀦 𑀭𑀸𑀕𑀸𑀤𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀅𑀬𑀁 𑀓𑁄𑀝𑀺𑀧𑁆𑀧𑀢𑁆𑀢𑁄 𑀢𑀺𑀓𑁆𑀔𑀯𑀺𑀧𑀲𑁆𑀲𑀓𑁄. 𑀅𑀧𑀭𑀲𑁆𑀲 𑀭𑀸𑀕𑀸𑀤𑀺𑀯𑀲𑁂𑀦 𑀏𑀓𑀁 𑀯𑀸𑀭𑀁 𑀚𑀯𑀦𑀁 𑀚𑀯𑀢𑀺, 𑀚𑀯𑀦𑀧𑀭𑀺𑀬𑁄𑀲𑀸𑀦𑁂 𑀧𑀦 𑀭𑀸𑀕𑀸𑀤𑀺𑀯𑀲𑁂𑀦 𑀏𑀯𑀁 𑀫𑁂 𑀚𑀯𑀦𑀁 𑀚𑀯𑀺𑀢𑀦𑁆𑀢𑀺 𑀆𑀯𑀚𑁆𑀚𑀢𑁄 𑀆𑀭𑀫𑁆𑀫𑀡𑀁 𑀧𑀭𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺, 𑀧𑀼𑀦 𑀯𑀸𑀭𑀁 𑀢𑀣𑀸 𑀦 𑀚𑀯𑀢𑀺. 𑀅𑀧𑀭𑀲𑁆𑀲 𑀏𑀓𑀯𑀸𑀭𑀁 𑀏𑀯𑀁 𑀆𑀯𑀚𑁆𑀚𑀢𑁄 𑀧𑀼𑀦 𑀤𑀼𑀢𑀺𑀬𑀯𑀸𑀭𑀁 𑀭𑀸𑀕𑀸𑀤𑀺𑀯𑀲𑁂𑀦 𑀚𑀯𑀦𑀁 𑀚𑀯𑀢𑀺𑀬𑁂𑀯, 𑀤𑀼𑀢𑀺𑀬𑀯𑀸𑀭𑀸𑀯𑀲𑀸𑀦𑁂 𑀧𑀦 𑀏𑀯𑀁 𑀫𑁂 𑀚𑀯𑀦𑀁 𑀚𑀯𑀺𑀢𑀦𑁆𑀢𑀺 𑀆𑀯𑀚𑁆𑀚𑀢𑁄 𑀆𑀭𑀫𑁆𑀫𑀡𑀁 𑀧𑀭𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺, 𑀢𑀢𑀺𑀬𑀯𑀸𑀭𑁂 𑀢𑀣𑀸 𑀦 𑀉𑀧𑁆𑀧𑀚𑁆𑀚𑀢𑀺. 𑀏𑀢𑁆𑀣 𑀧𑀦 𑀧𑀞𑀫𑁄 𑀅𑀢𑀺𑀢𑀺𑀓𑁆𑀔𑁄, 𑀢𑀢𑀺𑀬𑁄 𑀅𑀢𑀺𑀫𑀦𑁆𑀤𑁄, 𑀤𑀼𑀢𑀺𑀬𑀲𑁆𑀲 𑀧𑀦 𑀯𑀲𑁂𑀦 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂, 𑀮𑀝𑀼𑀓𑀺𑀓𑁄𑀧𑀫𑁂, 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑁂 𑀘 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀁 𑀲𑁄𑀢𑀤𑁆𑀯𑀸𑀭𑁂 𑀧𑀭𑀺𑀕𑁆𑀕𑀳𑀺𑀢𑀯𑀲𑁂𑀦 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲 𑀩𑀮𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀓𑀸𑀬𑀤𑁆𑀯𑀸𑀭𑁂 𑀤𑀻𑀧𑁂𑀦𑁆𑀢𑁄 𑀢𑀜𑁆𑀘𑁂, 𑀆𑀯𑀼𑀲𑁄𑀢𑀺𑀆𑀤𑀺𑀫𑀸𑀳. 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀜𑁆𑀳𑀺 𑀧𑀢𑁆𑀯𑀸 𑀤𑁆𑀯𑀻𑀲𑀼 𑀯𑀸𑀭𑁂𑀲𑀼 𑀓𑀺𑀮𑀫𑀢𑀺 𑀲𑁄𑀢𑀤𑁆𑀯𑀸𑀭𑁂 𑀘 𑀓𑀸𑀬𑀤𑁆𑀯𑀸𑀭𑁂 𑀘. 𑀢𑀲𑁆𑀫𑀸 𑀬𑀣𑀸 𑀦𑀸𑀫 𑀔𑁂𑀢𑁆𑀢𑀲𑁆𑀲𑀸𑀫𑀻 𑀧𑀼𑀭𑀺𑀲𑁄 𑀓𑀼𑀤𑀸𑀮𑀁 𑀕𑀳𑁂𑀢𑁆𑀯𑀸 𑀔𑁂𑀢𑁆𑀢𑀁 𑀅𑀦𑀼𑀲𑀜𑁆𑀘𑀭𑀦𑁆𑀢𑁄 𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀫𑀢𑁆𑀢𑀺𑀓𑀧𑀺𑀡𑁆𑀟𑀁 𑀅𑀤𑀢𑁆𑀯𑀸 𑀤𑀼𑀩𑁆𑀩𑀮𑀝𑁆𑀞𑀸𑀦𑁂𑀲𑀼𑀬𑁂𑀯 𑀓𑀼𑀤𑀸𑀮𑁂𑀦 𑀪𑀽𑀫𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀢𑀺𑀡𑀫𑀢𑁆𑀢𑀺𑀓𑀧𑀺𑀡𑁆𑀟𑀁 𑀤𑁂𑀢𑀺. 𑀏𑀯𑀫𑁂𑀯 𑀫𑀳𑀸𑀣𑁂𑀭𑁄 𑀅𑀦𑀸𑀕𑀢𑁂 𑀲𑀺𑀓𑁆𑀔𑀸𑀓𑀸𑀫𑀸 𑀧𑀥𑀸𑀦𑀓𑀫𑁆𑀫𑀺𑀓𑀸 𑀓𑀼𑀮𑀧𑀼𑀢𑁆𑀢𑀸 𑀇𑀫𑁂𑀲𑀼 𑀤𑁆𑀯𑀸𑀭𑁂𑀲𑀼 𑀲𑀁𑀯𑀭𑀁 𑀧𑀝𑁆𑀞𑀧𑁂𑀢𑁆𑀯𑀸 𑀔𑀺𑀧𑁆𑀧𑀫𑁂𑀯 𑀚𑀸𑀢𑀺𑀚𑀭𑀸𑀫𑀭𑀡𑀲𑁆𑀲 𑀅𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀇𑀫𑁂𑀲𑀼𑀬𑁂𑀯 𑀤𑁆𑀯𑀻𑀲𑀼 𑀤𑁆𑀯𑀸𑀭𑁂𑀲𑀼 𑀕𑀸𑀴𑁆𑀳𑀁 𑀓𑀢𑁆𑀯𑀸 𑀲𑀁𑀯𑀭𑀁 𑀤𑁂𑀲𑁂𑀦𑁆𑀢𑁄 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺.

𑀢𑀢𑁆𑀣 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀉𑀧𑀓𑁆𑀓𑀫𑀦𑁆𑀢𑀺. 𑀧𑀸𑀡𑀺𑀲𑀫𑁆𑀨𑀲𑁆𑀲𑁂𑀦𑀸𑀢𑀺 𑀧𑀸𑀡𑀺𑀧𑁆𑀧𑀳𑀸𑀭𑁂𑀦, 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀣𑀸𑀪𑀽𑀢𑁄𑀢𑀺 𑀢𑀣𑀸𑀲𑀪𑀸𑀯𑁄. 𑀬𑀣𑀸𑀪𑀽𑀢𑀲𑁆𑀫𑀺𑀦𑁆𑀢𑀺 𑀬𑀣𑀸𑀲𑀪𑀸𑀯𑁂. 𑀓𑀫𑀦𑁆𑀢𑀻𑀢𑀺 𑀧𑀯𑀢𑁆𑀢𑀦𑁆𑀢𑀺. 𑀏𑀯𑀁 𑀩𑀼𑀤𑁆𑀥𑀁 𑀅𑀦𑀼𑀲𑁆𑀲𑀭𑀢𑁄𑀢𑀺𑀆𑀤𑀻𑀲𑀼 𑀇𑀢𑀺𑀧𑀺 𑀲𑁄 𑀪𑀕𑀯𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑀼𑀲𑁆𑀲𑀭𑀦𑁆𑀢𑁄𑀧𑀺 𑀩𑀼𑀤𑁆𑀥𑀁 𑀅𑀦𑀼𑀲𑁆𑀲𑀭𑀢𑀺, 𑀯𑀼𑀢𑁆𑀢𑀁 𑀔𑁄 𑀧𑀦𑁂𑀢𑀁 𑀪𑀕𑀯𑀢𑀸𑀢𑀺 𑀅𑀦𑀼𑀲𑁆𑀲𑀭𑀦𑁆𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺𑀬𑁂𑀯. 𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑀼𑀲𑁆𑀲𑀭𑀦𑁆𑀢𑁄𑀧𑀺 𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀢𑀺, 𑀓𑀓𑀘𑀽𑀧𑀫𑁄𑀯𑀸𑀤𑀁 𑀅𑀦𑀼𑀲𑁆𑀲𑀭𑀦𑁆𑀢𑁄𑀧𑀺 𑀅𑀦𑀼𑀲𑁆𑀲𑀭𑀢𑀺𑀬𑁂𑀯. 𑀲𑀼𑀧𑁆𑀧𑀝𑀺𑀧𑀦𑁆𑀦𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑀼𑀲𑁆𑀲𑀭𑀦𑁆𑀢𑁄𑀧𑀺 𑀲𑀗𑁆𑀖𑀁 𑀅𑀦𑀼𑀲𑁆𑀲𑀭𑀢𑀺, 𑀓𑀓𑀘𑁄𑀓𑀦𑁆𑀢𑀦𑀁 𑀅𑀥𑀺𑀯𑀸𑀲𑀬𑀫𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀕𑀼𑀡𑀁 𑀅𑀦𑀼𑀲𑁆𑀲𑀭𑀫𑀸𑀦𑁄𑀧𑀺 𑀅𑀦𑀼𑀲𑁆𑀲𑀭𑀢𑀺𑀬𑁂𑀯.

𑀉𑀧𑁂𑀓𑁆𑀔𑀸 𑀓𑀼𑀲𑀮𑀦𑀺𑀲𑁆𑀲𑀺𑀢𑀸 𑀦 𑀲𑀡𑁆𑀞𑀸𑀢𑀻𑀢𑀺 𑀇𑀥 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸 𑀅𑀥𑀺𑀧𑁆𑀧𑁂𑀢𑀸. 𑀉𑀧𑁂𑀓𑁆𑀔𑀸 𑀓𑀼𑀲𑀮𑀦𑀺𑀲𑁆𑀲𑀺𑀢𑀸 𑀲𑀡𑁆𑀞𑀸𑀢𑀻𑀢𑀺 𑀇𑀥 𑀙𑀴𑀗𑁆𑀕𑀼𑀧𑁂𑀓𑁆𑀔𑀸, 𑀲𑀸 𑀧𑀦𑁂𑀲𑀸 𑀓𑀺𑀜𑁆𑀘𑀸𑀧𑀺 𑀔𑀻𑀡𑀸𑀲𑀯𑀲𑁆𑀲 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀅𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀅𑀬𑀁 𑀧𑀦 𑀪𑀺𑀓𑁆𑀔𑀼 𑀯𑀻𑀭𑀺𑀬𑀩𑀮𑁂𑀦 𑀪𑀸𑀯𑀦𑀸𑀲𑀺𑀤𑁆𑀥𑀺𑀬𑀸 𑀅𑀢𑁆𑀢𑀦𑁄 𑀯𑀺𑀧𑀲𑁆𑀲𑀦𑀁 𑀔𑀻𑀡𑀸𑀲𑀯𑀲𑁆𑀲 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀞𑀸𑀦𑁂 𑀞𑀧𑁂𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀯 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀦𑀸𑀫 𑀚𑀸𑀢𑀸.

𑁩𑁦𑁩. 𑀆𑀧𑁄𑀥𑀸𑀢𑀼𑀦𑀺𑀤𑁆𑀤𑁂𑀲𑁂 𑀆𑀧𑁄𑀕𑀢𑀦𑁆𑀢𑀺 𑀲𑀩𑁆𑀩𑀆𑀧𑁂𑀲𑀼 𑀕𑀢𑀁 𑀅𑀮𑁆𑀮𑀬𑀽𑀲𑀪𑀸𑀯𑀮𑀓𑁆𑀔𑀡𑀁. 𑀧𑀺𑀢𑁆𑀢𑀁 𑀲𑁂𑀫𑁆𑀳𑀦𑁆𑀢𑀺𑀆𑀤𑀻𑀲𑀼 𑀧𑀦 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀲𑀤𑁆𑀥𑀺𑀁 𑀪𑀸𑀯𑀦𑀸𑀦𑀬𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀁. 𑀧𑀓𑀼𑀧𑁆𑀧𑀢𑀻𑀢𑀺 𑀑𑀖𑀯𑀲𑁂𑀦 𑀯𑀟𑁆𑀠𑀢𑀺, 𑀲𑀫𑀼𑀤𑁆𑀤𑀢𑁄 𑀯𑀸 𑀉𑀤𑀓𑀁 𑀉𑀢𑁆𑀢𑀭𑀢𑀺, 𑀅𑀬𑀫𑀲𑁆𑀲 𑀧𑀸𑀓𑀢𑀺𑀓𑁄 𑀧𑀓𑁄𑀧𑁄, 𑀆𑀧𑁄𑀲𑀁𑀯𑀝𑁆𑀝𑀓𑀸𑀮𑁂 𑀧𑀦 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀁 𑀉𑀤𑀓𑀧𑀽𑀭𑀫𑁂𑀯 𑀳𑁄𑀢𑀺. 𑀑𑀕𑀘𑁆𑀙𑀦𑁆𑀢𑀻𑀢𑀺 𑀳𑁂𑀝𑁆𑀞𑀸 𑀕𑀘𑁆𑀙𑀦𑁆𑀢𑀺, 𑀉𑀤𑁆𑀥𑀦𑁂 𑀆𑀭𑁄𑀧𑀺𑀢𑀉𑀤𑀓𑀁 𑀯𑀺𑀬 𑀔𑀬𑀁 𑀯𑀺𑀦𑀸𑀲𑀁 𑀧𑀸𑀧𑀼𑀡𑀦𑁆𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁩𑁦𑁪. 𑀢𑁂𑀚𑁄𑀥𑀸𑀢𑀼𑀦𑀺𑀤𑁆𑀤𑁂𑀲𑁂 𑀢𑁂𑀚𑁄𑀕𑀢𑀦𑁆𑀢𑀺 𑀲𑀩𑁆𑀩𑀢𑁂𑀚𑁂𑀲𑀼 𑀕𑀢𑀁 𑀉𑀡𑁆𑀳𑀢𑁆𑀢𑀮𑀓𑁆𑀔𑀡𑀁. 𑀢𑁂𑀚𑁄 𑀏𑀯 𑀯𑀸 𑀢𑁂𑀚𑁄𑀪𑀸𑀯𑀁 𑀕𑀢𑀦𑁆𑀢𑀺 𑀢𑁂𑀚𑁄𑀕𑀢𑀁. 𑀧𑀼𑀭𑀺𑀫𑁂 𑀆𑀧𑁄𑀕𑀢𑁂𑀧𑀺 𑀧𑀘𑁆𑀙𑀺𑀫𑁂 𑀯𑀸𑀬𑁄𑀕𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑁂𑀦 𑀘𑀸𑀢𑀺 𑀬𑁂𑀦 𑀢𑁂𑀚𑁄𑀕𑀢𑁂𑀦. 𑀢𑀲𑁆𑀫𑀺𑀁 𑀓𑀼𑀧𑁆𑀧𑀺𑀢𑁂 𑀅𑀬𑀁 𑀓𑀸𑀬𑁄 𑀲𑀦𑁆𑀢𑀧𑁆𑀧𑀢𑀺, 𑀏𑀓𑀸𑀳𑀺𑀓𑀚𑀭𑀸𑀤𑀺𑀪𑀸𑀯𑁂𑀦 𑀉𑀲𑀼𑀫𑀚𑀸𑀢𑁄 𑀳𑁄𑀢𑀺. 𑀬𑁂𑀦 𑀘 𑀚𑀻𑀭𑀻𑀬𑀢𑀻𑀢𑀺 𑀬𑁂𑀦 𑀅𑀬𑀁 𑀓𑀸𑀬𑁄 𑀚𑀻𑀭𑀢𑀺, 𑀇𑀦𑁆𑀤𑁆𑀭𑀺𑀬𑀯𑁂𑀓𑀮𑁆𑀮𑀢𑁆𑀢𑀁 𑀩𑀮𑀧𑀭𑀺𑀓𑁆𑀔𑀬𑀁 𑀯𑀮𑀺𑀧𑀮𑀺𑀢𑀸𑀤𑀺𑀪𑀸𑀯𑀜𑁆𑀘 𑀧𑀸𑀧𑀼𑀡𑀸𑀢𑀺. 𑀬𑁂𑀦 𑀘 𑀧𑀭𑀺𑀟𑀬𑁆𑀳𑀢𑀻𑀢𑀺 𑀬𑁂𑀦 𑀓𑀼𑀧𑁆𑀧𑀺𑀢𑁂𑀦 𑀅𑀬𑀁 𑀓𑀸𑀬𑁄 𑀤𑀬𑁆𑀳𑀢𑀺, 𑀲𑁄 𑀘 𑀧𑀼𑀕𑁆𑀕𑀮𑁄 𑀤𑀬𑁆𑀳𑀸𑀫𑀺 𑀤𑀬𑁆𑀳𑀸𑀫𑀻𑀢𑀺 𑀓𑀦𑁆𑀤𑀦𑁆𑀢𑁄 𑀲𑀢𑀥𑁄𑀢𑀲𑀧𑁆𑀧𑀺𑀕𑁄𑀲𑀻𑀢𑀘𑀦𑁆𑀤𑀦𑀸𑀤𑀺𑀮𑁂𑀧𑀜𑁆𑀘 𑀢𑀸𑀮𑀯𑀡𑁆𑀝𑀯𑀸𑀢𑀜𑁆𑀘 𑀧𑀘𑁆𑀘𑀸𑀲𑀻𑀲𑀢𑀺. 𑀬𑁂𑀦 𑀘 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀁 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀻𑀢𑀺 𑀬𑁂𑀦 𑀢𑀁 𑀅𑀲𑀺𑀢𑀁 𑀯𑀸 𑀑𑀤𑀦𑀸𑀤𑀺, 𑀧𑀻𑀢𑀁 𑀯𑀸 𑀧𑀸𑀦𑀓𑀸𑀤𑀺, 𑀔𑀸𑀬𑀺𑀢𑀁 𑀯𑀸 𑀧𑀺𑀝𑁆𑀞𑀔𑀚𑁆𑀚𑀓𑀸𑀤𑀺, 𑀲𑀸𑀬𑀺𑀢𑀁 𑀯𑀸 𑀅𑀫𑁆𑀩𑀧𑀓𑁆𑀓𑀫𑀥𑀼𑀨𑀸𑀡𑀺𑀢𑀸𑀤𑀺 𑀲𑀫𑁆𑀫𑀸 𑀧𑀭𑀺𑀧𑀸𑀓𑀁 𑀕𑀘𑁆𑀙𑀢𑀺, 𑀭𑀲𑀸𑀤𑀺𑀪𑀸𑀯𑁂𑀦 𑀯𑀺𑀯𑁂𑀓𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀲𑀤𑁆𑀥𑀺𑀁 𑀪𑀸𑀯𑀦𑀸𑀦𑀬𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀁.

𑀳𑀭𑀺𑀢𑀦𑁆𑀢𑀦𑁆𑀢𑀺 𑀳𑀭𑀺𑀢𑀫𑁂𑀯. 𑀅𑀮𑁆𑀮𑀢𑀺𑀡𑀸𑀤𑀺𑀁 𑀆𑀕𑀫𑁆𑀫 𑀦𑀺𑀩𑁆𑀩𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀧𑀦𑁆𑀣𑀦𑁆𑀢𑀦𑁆𑀢𑀺 𑀫𑀳𑀸𑀫𑀕𑁆𑀕𑀫𑁂𑀯. 𑀲𑁂𑀮𑀦𑁆𑀢𑀦𑁆𑀢𑀺 𑀧𑀩𑁆𑀩𑀢𑀁. 𑀉𑀤𑀓𑀦𑁆𑀢𑀦𑁆𑀢𑀺 𑀉𑀤𑀓𑀁. 𑀭𑀫𑀡𑀻𑀬𑀁 𑀯𑀸 𑀪𑀽𑀫𑀺𑀪𑀸𑀕𑀦𑁆𑀢𑀺 𑀢𑀺𑀡𑀕𑀼𑀫𑁆𑀩𑀸𑀤𑀺𑀭𑀳𑀺𑀢𑀁, 𑀯𑀺𑀯𑀺𑀢𑁆𑀢𑀁 𑀅𑀩𑁆𑀪𑁄𑀓𑀸𑀲𑀁 𑀪𑀽𑀫𑀺𑀪𑀸𑀕𑀁. 𑀅𑀦𑀸𑀳𑀸𑀭𑀸𑀢𑀺 𑀦𑀺𑀭𑀸𑀳𑀸𑀭𑀸 𑀦𑀺𑀭𑀼𑀧𑀸𑀤𑀸𑀦𑀸, 𑀅𑀬𑀫𑁆𑀧𑀺 𑀧𑀓𑀢𑀺𑀬𑀸𑀯 𑀢𑁂𑀚𑁄𑀯𑀺𑀓𑀸𑀭𑁄 𑀯𑀼𑀢𑁆𑀢𑁄, 𑀢𑁂𑀚𑁄𑀲𑀁𑀯𑀝𑁆𑀝𑀓𑀸𑀮𑁂 𑀧𑀦 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀁 𑀛𑀸𑀧𑁂𑀢𑁆𑀯𑀸 𑀙𑀸𑀭𑀺𑀓𑀸𑀫𑀢𑁆𑀢𑀫𑁆𑀧𑀺 𑀦 𑀢𑀺𑀝𑁆𑀞𑀢𑀺. 𑀦𑁆𑀳𑀸𑀭𑀼𑀤𑀤𑁆𑀤𑀼𑀮𑁂𑀦𑀸𑀢𑀺 𑀘𑀫𑁆𑀫𑀦𑀺𑀮𑁆𑀮𑁂𑀔𑀦𑁂𑀦. 𑀅𑀕𑁆𑀕𑀺𑀁 𑀕𑀯𑁂𑀲𑀦𑁆𑀢𑀻𑀢𑀺 𑀏𑀯𑀭𑀽𑀧𑀁 𑀲𑀼𑀔𑀼𑀫𑀁 𑀉𑀧𑀸𑀤𑀸𑀦𑀁 𑀕𑀳𑁂𑀢𑁆𑀯𑀸 𑀅𑀕𑁆𑀕𑀺𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀬𑀁 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀉𑀲𑀼𑀫𑀁 𑀮𑀪𑀺𑀢𑁆𑀯𑀸 𑀧𑀚𑁆𑀚𑀮𑀢𑀺, 𑀲𑁂𑀲𑀫𑀺𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁩𑁦𑁫. 𑀯𑀸𑀬𑁄𑀥𑀸𑀢𑀼𑀦𑀺𑀤𑁆𑀤𑁂𑀲𑁂 𑀉𑀤𑁆𑀥𑀗𑁆𑀕𑀫𑀸 𑀯𑀸𑀢𑀸𑀢𑀺 𑀉𑀕𑁆𑀕𑀸𑀭𑀳𑀺𑀓𑁆𑀓𑀸𑀭𑀸𑀤𑀺𑀧𑀯𑀢𑁆𑀢𑀓𑀸 𑀉𑀤𑁆𑀥𑀁 𑀆𑀭𑁄𑀳𑀦𑀯𑀸𑀢𑀸. 𑀅𑀥𑁄𑀕𑀫𑀸 𑀯𑀸𑀢𑀸𑀢𑀺 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸𑀤𑀺𑀦𑀻𑀳𑀭𑀡𑀓𑀸 𑀅𑀥𑁄 𑀑𑀭𑁄𑀳𑀦𑀯𑀸𑀢𑀸. 𑀓𑀼𑀘𑁆𑀙𑀺𑀲𑀬𑀸 𑀯𑀸𑀢𑀸𑀢𑀺 𑀅𑀦𑁆𑀢𑀸𑀦𑀁 𑀩𑀳𑀺𑀯𑀸𑀢𑀸. 𑀓𑁄𑀝𑁆𑀞𑀸𑀲𑀬𑀸 𑀯𑀸𑀢𑀸𑀢𑀺 𑀅𑀦𑁆𑀢𑀸𑀦𑀁 𑀅𑀦𑁆𑀢𑁄𑀯𑀸𑀢𑀸. 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀺𑀦𑁄𑀢𑀺 𑀥𑀫𑀦𑀻𑀚𑀸𑀮𑀸𑀦𑀼𑀲𑀸𑀭𑁂𑀦 𑀲𑀓𑀮𑀲𑀭𑀻𑀭𑁂 𑀅𑀗𑁆𑀕𑀫𑀗𑁆𑀕𑀸𑀦𑀺 𑀅𑀦𑀼𑀲𑀝𑀸 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀸𑀤𑀺𑀦𑀺𑀩𑁆𑀩𑀢𑁆𑀢𑀓𑀯𑀸𑀢𑀸. 𑀅𑀲𑁆𑀲𑀸𑀲𑁄𑀢𑀺 𑀅𑀦𑁆𑀢𑁄𑀧𑀯𑀺𑀲𑀦𑀦𑀸𑀲𑀺𑀓𑀯𑀸𑀢𑁄. 𑀧𑀲𑁆𑀲𑀸𑀲𑁄𑀢𑀺 𑀩𑀳𑀺𑀦𑀺𑀓𑁆𑀔𑀫𑀦𑀦𑀸𑀲𑀺𑀓𑀯𑀸𑀢𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀲𑀤𑁆𑀥𑀺𑀁 𑀪𑀸𑀯𑀦𑀸𑀦𑀬𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀁.

𑀕𑀸𑀫𑀫𑁆𑀧𑀺 𑀯𑀳𑀢𑀻𑀢𑀺 𑀲𑀓𑀮𑀕𑀸𑀫𑀫𑁆𑀧𑀺 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀓𑀼𑀭𑀼𑀫𑀸𑀦𑀸 𑀆𑀤𑀸𑀬 𑀕𑀘𑁆𑀙𑀢𑀺, 𑀦𑀺𑀕𑀫𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀥 𑀯𑀸𑀬𑁄𑀲𑀁𑀯𑀝𑁆𑀝𑀓𑀸𑀮𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀯𑀺𑀤𑁆𑀥𑀁𑀲𑀦𑀯𑀲𑁂𑀦 𑀯𑀸𑀬𑁄𑀥𑀸𑀢𑀼𑀯𑀺𑀓𑀸𑀭𑁄 𑀤𑀲𑁆𑀲𑀺𑀢𑁄. 𑀯𑀺𑀥𑀽𑀧𑀦𑁂𑀦𑀸𑀢𑀺 𑀅𑀕𑁆𑀕𑀺𑀩𑀻𑀚𑀦𑀓𑁂𑀦. 𑀑𑀲𑁆𑀲𑀯𑀦𑁂𑀢𑀺 𑀙𑀤𑀦𑀕𑁆𑀕𑁂, 𑀢𑁂𑀦 𑀳𑀺 𑀉𑀤𑀓𑀁 𑀲𑀯𑀢𑀺, 𑀢𑀲𑁆𑀫𑀸 𑀢𑀁 ‘‘𑀑𑀲𑁆𑀲𑀯𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀲𑀫𑀺𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑁩𑁦𑁬. 𑀲𑁂𑀬𑁆𑀬𑀣𑀸𑀧𑀺, 𑀆𑀯𑀼𑀲𑁄𑀢𑀺 𑀇𑀥 𑀓𑀺𑀁 𑀤𑀲𑁆𑀲𑁂𑀢𑀺? 𑀳𑁂𑀝𑁆𑀞𑀸 𑀓𑀣𑀺𑀢𑀸𑀦𑀁 𑀫𑀳𑀸𑀪𑀽𑀢𑀸𑀦𑀁 𑀦𑀺𑀲𑁆𑀲𑀢𑁆𑀢𑀪𑀸𑀯𑀁. 𑀓𑀝𑁆𑀞𑀦𑁆𑀢𑀺 𑀤𑀩𑁆𑀩𑀲𑀫𑁆𑀪𑀸𑀭𑀁. 𑀯𑀮𑁆𑀮𑀺𑀦𑁆𑀢𑀺 𑀆𑀩𑀦𑁆𑀥𑀦𑀯𑀮𑁆𑀮𑀺𑀁. 𑀢𑀺𑀡𑀦𑁆𑀢𑀺 𑀙𑀤𑀦𑀢𑀺𑀡𑀁. 𑀫𑀢𑁆𑀢𑀺𑀓𑀦𑁆𑀢𑀺 𑀅𑀦𑀼𑀮𑁂𑀧𑀫𑀢𑁆𑀢𑀺𑀓𑀁. 𑀆𑀓𑀸𑀲𑁄 𑀧𑀭𑀺𑀯𑀸𑀭𑀺𑀢𑁄𑀢𑀺 𑀏𑀢𑀸𑀦𑀺 𑀓𑀝𑁆𑀞𑀸𑀤𑀻𑀦𑀺 𑀅𑀦𑁆𑀢𑁄 𑀘 𑀩𑀳𑀺 𑀘 𑀧𑀭𑀺𑀯𑀸𑀭𑁂𑀢𑁆𑀯𑀸 𑀆𑀓𑀸𑀲𑁄 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀅𑀕𑀸𑀭𑀁𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻𑀢𑀺 𑀅𑀕𑀸𑀭𑀦𑁆𑀢𑀺 𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀁 𑀳𑁄𑀢𑀺. 𑀓𑀝𑁆𑀞𑀸𑀤𑀻𑀲𑀼 𑀧𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀭𑀸𑀲𑀺𑀓𑀢𑁂𑀲𑀼 𑀓𑀝𑁆𑀞𑀭𑀸𑀲𑀺𑀯𑀮𑁆𑀮𑀺𑀭𑀸𑀲𑀻𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀏𑀯𑀫𑁂𑀯 𑀔𑁄𑀢𑀺 𑀏𑀯𑀫𑁂𑀯 𑀅𑀝𑁆𑀞𑀺𑀆𑀤𑀻𑀦𑀺 𑀅𑀦𑁆𑀢𑁄 𑀘 𑀩𑀳𑀺 𑀘 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑁄 𑀆𑀓𑀸𑀲𑁄, 𑀢𑀸𑀦𑁂𑀯 𑀅𑀝𑁆𑀞𑀺𑀆𑀤𑀻𑀦𑀺 𑀧𑀝𑀺𑀘𑁆𑀘 𑀭𑀽𑀧𑀁𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀲𑀭𑀻𑀭𑀦𑁆𑀢𑀺 𑀯𑁄𑀳𑀸𑀭𑀁 𑀕𑀘𑁆𑀙𑀢𑀺. 𑀬𑀣𑀸 𑀓𑀝𑁆𑀞𑀸𑀤𑀻𑀦𑀺 𑀧𑀝𑀺𑀘𑁆𑀘 𑀕𑁂𑀳𑀦𑁆𑀢𑀺 𑀲𑀗𑁆𑀔𑀁 𑀕𑀢𑀁 𑀅𑀕𑀸𑀭𑀁 𑀔𑀢𑁆𑀢𑀺𑀬𑀕𑁂𑀳𑀁 𑀩𑁆𑀭𑀸𑀳𑁆𑀫𑀡𑀕𑁂𑀳𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀔𑀢𑁆𑀢𑀺𑀬𑀲𑀭𑀻𑀭𑀁 𑀩𑁆𑀭𑀸𑀳𑁆𑀫𑀡𑀲𑀭𑀻𑀭𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀦 𑀳𑁂𑀢𑁆𑀣 𑀓𑁄𑀘𑀺 𑀲𑀢𑁆𑀢𑁄 𑀯𑀸 𑀚𑀻𑀯𑁄 𑀯𑀸 𑀯𑀺𑀚𑁆𑀚𑀢𑀺.

𑀅𑀚𑁆𑀛𑀢𑁆𑀢𑀺𑀓𑀜𑁆𑀘𑁂𑀯, 𑀆𑀯𑀼𑀲𑁄, 𑀘𑀓𑁆𑀔𑀽𑀢𑀺 𑀇𑀤𑀁 𑀓𑀲𑁆𑀫𑀸 𑀆𑀭𑀤𑁆𑀥𑀁? 𑀳𑁂𑀝𑁆𑀞𑀸 𑀉𑀧𑀸𑀤𑀸𑀭𑀽𑀧𑀁 𑀘𑀢𑁆𑀢𑀸𑀭𑁄 𑀘 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀢𑀻𑀡𑀺 𑀘 𑀅𑀭𑀺𑀬𑀲𑀘𑁆𑀘𑀸𑀦𑀺 𑀦 𑀓𑀣𑀺𑀢𑀸𑀦𑀺, 𑀇𑀤𑀸𑀦𑀺 𑀢𑀸𑀦𑀺 𑀓𑀣𑁂𑀢𑀼𑀁 𑀅𑀬𑀁 𑀤𑁂𑀲𑀦𑀸 𑀆𑀭𑀤𑁆𑀥𑀸𑀢𑀺. 𑀢𑀢𑁆𑀣 𑀘𑀓𑁆𑀔𑀼𑀁 𑀅𑀧𑀭𑀺𑀪𑀺𑀦𑁆𑀦𑀦𑁆𑀢𑀺 𑀘𑀓𑁆𑀔𑀼𑀧𑀲𑀸𑀤𑁂 𑀦𑀺𑀭𑀼𑀤𑁆𑀥𑁂𑀧𑀺 𑀉𑀧𑀳𑀢𑁂𑀧𑀺 𑀧𑀺𑀢𑁆𑀢𑀲𑁂𑀫𑁆𑀳𑀮𑁄𑀳𑀺𑀢𑁂𑀳𑀺 𑀧𑀮𑀺𑀩𑀼𑀤𑁆𑀥𑁂𑀧𑀺 𑀘𑀓𑁆𑀔𑀼 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀧𑀭𑀺𑀪𑀺𑀦𑁆𑀦𑀫𑁂𑀯 𑀳𑁄𑀢𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀧𑀦 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑀁 𑀅𑀧𑀭𑀺𑀪𑀺𑀦𑁆𑀦𑀁 𑀦𑀸𑀫. 𑀩𑀸𑀳𑀺𑀭𑀸 𑀘 𑀭𑀽𑀧𑀸𑀢𑀺 𑀩𑀸𑀳𑀺𑀭𑀸 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀸. 𑀢𑀚𑁆𑀚𑁄 𑀲𑀫𑀦𑁆𑀦𑀸𑀳𑀸𑀭𑁄𑀢𑀺 𑀢𑀁 𑀘𑀓𑁆𑀔𑀼𑀜𑁆𑀘 𑀭𑀽𑀧𑁂 𑀘 𑀧𑀝𑀺𑀘𑁆𑀘 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀫𑀦𑀲𑀺𑀓𑀸𑀭𑁄, 𑀪𑀯𑀗𑁆𑀕𑀸𑀯𑀝𑁆𑀝𑀦𑀲𑀫𑀢𑁆𑀣𑀁 𑀘𑀓𑁆𑀔𑀼𑀤𑁆𑀯𑀸𑀭𑁂 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀘𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀭𑀽𑀧𑀸𑀦𑀁 𑀅𑀦𑀸𑀧𑀸𑀣𑀕𑀢𑀢𑁆𑀢𑀸𑀧𑀺 𑀅𑀜𑁆𑀜𑀸𑀯𑀺𑀳𑀺𑀢𑀲𑁆𑀲𑀧𑀺 𑀦 𑀳𑁄𑀢𑀺, 𑀢𑀚𑁆𑀚𑀲𑁆𑀲𑀸𑀢𑀺 𑀢𑀤𑀦𑀼𑀭𑀽𑀧𑀲𑁆𑀲. 𑀯𑀺𑀜𑁆𑀜𑀸𑀡𑀪𑀸𑀕𑀲𑁆𑀲𑀸𑀢𑀺 𑀯𑀺𑀜𑁆𑀜𑀸𑀡𑀓𑁄𑀝𑁆𑀞𑀸𑀲𑀲𑁆𑀲.

𑀬𑀁 𑀢𑀣𑀸𑀪𑀽𑀢𑀲𑁆𑀲𑀸𑀢𑀺𑀆𑀤𑀻𑀲𑀼 𑀤𑁆𑀯𑀸𑀭𑀯𑀲𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀢𑀣𑀸𑀪𑀽𑀢𑀲𑁆𑀲𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀲𑀳𑀪𑀽𑀢𑀲𑁆𑀲, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀦𑁄𑀢𑀺 𑀅𑀢𑁆𑀣𑁄. 𑀭𑀽𑀧𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀦 𑀭𑀽𑀧𑀚𑀦𑀓𑀢𑁆𑀢𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀓𑁆𑀔𑀡𑁂 𑀢𑀺𑀲𑀫𑀼𑀝𑁆𑀞𑀸𑀦𑀭𑀽𑀧𑀁, 𑀢𑀤𑀦𑀦𑁆𑀢𑀭𑀘𑀺𑀢𑁆𑀢𑀓𑁆𑀔𑀡𑁂 𑀘𑀢𑀼𑀲𑀫𑀼𑀝𑁆𑀞𑀸𑀦𑀫𑁆𑀧𑀺 𑀮𑀩𑁆𑀪𑀢𑀺. 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀕𑀡𑀦𑀁 𑀕𑀘𑁆𑀙𑀢𑀺. 𑀯𑁂𑀤𑀦𑀸𑀤𑀬𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀯. 𑀯𑀺𑀜𑁆𑀜𑀸𑀡𑀫𑁆𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀫𑁂𑀯. 𑀏𑀢𑁆𑀣 𑀘 𑀲𑀗𑁆𑀔𑀸𑀭𑀸𑀢𑀺 𑀘𑁂𑀢𑀦𑀸𑀯 𑀯𑀼𑀢𑁆𑀢𑀸. 𑀲𑀗𑁆𑀕𑀳𑁄𑀢𑀺 𑀏𑀓𑀢𑁄 𑀲𑀗𑁆𑀕𑀳𑁄. 𑀲𑀦𑁆𑀦𑀺𑀧𑀸𑀢𑁄𑀢𑀺 𑀲𑀫𑀸𑀕𑀫𑁄. 𑀲𑀫𑀯𑀸𑀬𑁄𑀢𑀺 𑀭𑀸𑀲𑀺. 𑀬𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀧𑀲𑁆𑀲𑀢𑀻𑀢𑀺 𑀬𑁄 𑀧𑀘𑁆𑀘𑀬𑁂 𑀧𑀲𑁆𑀲𑀢𑀺. 𑀲𑁄 𑀥𑀫𑁆𑀫𑀁 𑀧𑀲𑁆𑀲𑀢𑀻𑀢𑀺 𑀲𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀥𑀫𑁆𑀫𑁂 𑀧𑀲𑁆𑀲𑀢𑀺, 𑀙𑀦𑁆𑀤𑁄𑀢𑀺𑀆𑀤𑀺 𑀲𑀩𑁆𑀩𑀁 𑀢𑀡𑁆𑀳𑀸𑀯𑁂𑀯𑀘𑀦𑀫𑁂𑀯, 𑀢𑀡𑁆𑀳𑀸 𑀳𑀺 𑀙𑀦𑁆𑀤𑀓𑀭𑀡𑀯𑀲𑁂𑀦 𑀙𑀦𑁆𑀤𑁄. 𑀆𑀮𑀬𑀓𑀭𑀡𑀯𑀲𑁂𑀦 𑀆𑀮𑀬𑁄. 𑀅𑀦𑀼𑀦𑀬𑀓𑀭𑀡𑀯𑀲𑁂𑀦 𑀅𑀦𑀼𑀦𑀬𑁄. 𑀅𑀚𑁆𑀛𑁄𑀕𑀸𑀳𑀺𑀢𑁆𑀯𑀸 𑀕𑀺𑀮𑀺𑀢𑁆𑀯𑀸 𑀕𑀳𑀦𑀯𑀲𑁂𑀦 𑀅𑀚𑁆𑀛𑁄𑀲𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀦𑁆𑀢𑀺 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀇𑀢𑀺 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀧𑀸𑀴𑀺𑀬𑀁 𑀆𑀕𑀢𑀸𑀦𑁂𑀯 𑀫𑀕𑁆𑀕𑀲𑀘𑁆𑀘𑀁 𑀆𑀳𑀭𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁, 𑀬𑀸 𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀤𑀺𑀝𑁆𑀞𑀺 𑀲𑀗𑁆𑀓𑀧𑁆𑀧𑁄 𑀯𑀸𑀘𑀸 𑀓𑀫𑁆𑀫𑀦𑁆𑀢𑁄 𑀆𑀚𑀻𑀯𑁄 𑀯𑀸𑀬𑀸𑀫𑁄 𑀲𑀢𑀺 𑀲𑀫𑀸𑀥𑀺 𑀪𑀸𑀯𑀦𑀸𑀧𑀝𑀺𑀯𑁂𑀥𑁄, 𑀅𑀬𑀁 𑀫𑀕𑁆𑀕𑁄𑀢𑀺. 𑀩𑀳𑀼𑀓𑀢𑀁 𑀳𑁄𑀢𑀻𑀢𑀺 𑀏𑀢𑁆𑀢𑀸𑀯𑀢𑀸𑀧𑀺 𑀩𑀳𑀼𑀁 𑀪𑀕𑀯𑀢𑁄 𑀲𑀸𑀲𑀦𑀁 𑀓𑀢𑀁 𑀳𑁄𑀢𑀺, 𑀅𑀚𑁆𑀛𑀢𑁆𑀢𑀺𑀓𑀜𑁆𑀘𑁂𑀯, 𑀆𑀯𑀼𑀲𑁄, 𑀲𑁄𑀢𑀦𑁆𑀢𑀺𑀆𑀤𑀺𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀫𑀦𑁄𑀤𑁆𑀯𑀸𑀭𑁂 𑀧𑀦 𑀅𑀚𑁆𑀛𑀢𑁆𑀢𑀺𑀓𑁄 𑀫𑀦𑁄 𑀦𑀸𑀫 𑀪𑀯𑀗𑁆𑀕𑀘𑀺𑀢𑁆𑀢𑀁. 𑀢𑀁 𑀦𑀺𑀭𑀼𑀤𑁆𑀥𑀫𑁆𑀧𑀺 𑀆𑀯𑀚𑁆𑀚𑀦𑀘𑀺𑀢𑁆𑀢𑀲𑁆𑀲 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀅𑀲𑀫𑀢𑁆𑀣𑀁 𑀫𑀦𑁆𑀤𑀣𑀸𑀫𑀕𑀢𑀫𑁂𑀯 𑀧𑀯𑀢𑁆𑀢𑀫𑀸𑀦𑀫𑁆𑀧𑀺 𑀧𑀭𑀺𑀪𑀺𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀆𑀯𑀚𑁆𑀚𑀦𑀲𑁆𑀲 𑀧𑀦 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑀁 𑀅𑀧𑀭𑀺𑀪𑀺𑀦𑁆𑀦𑀁 𑀦𑀸𑀫. 𑀩𑀸𑀳𑀺𑀭𑀸 𑀘 𑀥𑀫𑁆𑀫𑀸𑀢𑀺 𑀥𑀫𑁆𑀫𑀸𑀭𑀫𑁆𑀫𑀡𑀁. 𑀦𑁂𑀯 𑀢𑀸𑀯 𑀢𑀚𑁆𑀚𑀲𑁆𑀲𑀸𑀢𑀺 𑀇𑀤𑀁 𑀪𑀯𑀗𑁆𑀕𑀲𑀫𑀬𑁂𑀦𑁂𑀯 𑀓𑀣𑀺𑀢𑀁. 𑀤𑀼𑀢𑀺𑀬𑀯𑀸𑀭𑁄 𑀧𑀕𑀼𑀡𑀚𑁆𑀛𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀯𑀸, 𑀧𑀕𑀼𑀡𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁂𑀦 𑀯𑀸, 𑀧𑀕𑀼𑀡𑀩𑀼𑀤𑁆𑀥𑀯𑀘𑀦𑀲𑀚𑁆𑀛𑀸𑀬𑀓𑀭𑀡𑀸𑀤𑀺𑀦𑀸 𑀯𑀸, 𑀅𑀜𑁆𑀜𑀯𑀺𑀳𑀺𑀢𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄. 𑀇𑀫𑀲𑁆𑀫𑀺𑀁 𑀯𑀸𑀭𑁂 𑀭𑀽𑀧𑀦𑁆𑀢𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀫𑁆𑀧𑀺 𑀮𑀩𑁆𑀪𑀢𑀺. 𑀫𑀦𑁄𑀯𑀺𑀜𑁆𑀜𑀸𑀡𑀜𑁆𑀳𑀺 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀯𑁂𑀤𑀦𑀸𑀤𑀬𑁄 𑀫𑀦𑁄𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸, 𑀯𑀺𑀜𑁆𑀜𑀸𑀡𑀁 𑀫𑀦𑁄𑀯𑀺𑀜𑁆𑀜𑀸𑀡𑀫𑁂𑀯. 𑀲𑀗𑁆𑀔𑀸𑀭𑀸 𑀧𑀦𑁂𑀢𑁆𑀣 𑀨𑀲𑁆𑀲𑀘𑁂𑀢𑀦𑀸𑀯𑀲𑁂𑀦𑁂𑀯 𑀕𑀳𑀺𑀢𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀺 𑀫𑀳𑀸𑀣𑁂𑀭𑁄 𑀳𑁂𑀝𑁆𑀞𑀸 𑀏𑀓𑀤𑁂𑀲𑀫𑁂𑀯 𑀲𑀫𑁆𑀫𑀲𑀦𑁆𑀢𑁄 𑀆𑀕𑀦𑁆𑀢𑁆𑀯𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀞𑀢𑁆𑀯𑀸 𑀳𑁂𑀝𑁆𑀞𑀸 𑀧𑀭𑀺𑀳𑀻𑀦𑀤𑁂𑀲𑀦𑀁 𑀲𑀩𑁆𑀩𑀁 𑀢𑀁𑀢𑀁𑀤𑁆𑀯𑀸𑀭𑀯𑀲𑁂𑀦 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀲𑀼𑀢𑁆𑀢𑀦𑁆𑀢𑀁 𑀦𑀺𑀝𑁆𑀞𑀧𑁂𑀲𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀳𑀸𑀳𑀢𑁆𑀣𑀺𑀧𑀤𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀫𑀳𑀸𑀲𑀸𑀭𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦𑁭. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀲𑀸𑀭𑁄𑀧𑀫𑀲𑀼𑀢𑁆𑀢𑀁. 𑀢𑀢𑁆𑀣 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀢𑀺 𑀲𑀗𑁆𑀖𑀁 𑀪𑀺𑀦𑁆𑀤𑀺𑀢𑁆𑀯𑀸 𑀭𑀼𑀳𑀺𑀭𑀼𑀧𑁆𑀧𑀸𑀤𑀓𑀫𑁆𑀫𑀁 𑀓𑀢𑁆𑀯𑀸 𑀦𑀘𑀺𑀭𑀧𑀓𑁆𑀓𑀦𑁆𑀢𑁂 𑀲𑀮𑀺𑀗𑁆𑀕𑁂𑀦𑁂𑀯 𑀧𑀸𑀝𑀺𑀬𑁂𑀓𑁆𑀓𑁂 𑀚𑀸𑀢𑁂.

𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀓𑀼𑀮𑀧𑀼𑀢𑁆𑀢𑁄𑀢𑀺 𑀓𑀺𑀜𑁆𑀘𑀸𑀧𑀺 𑀅𑀲𑀼𑀓𑀓𑀼𑀮𑀧𑀼𑀢𑁆𑀢𑁄𑀢𑀺 𑀦 𑀦𑀺𑀬𑀸𑀫𑀺𑀢𑁄, 𑀤𑁂𑀯𑀤𑀢𑁆𑀢𑀁𑀬𑁂𑀯 𑀧𑀦 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁄 𑀳𑀺 𑀅𑀲𑀫𑁆𑀪𑀺𑀦𑁆𑀦𑀸𑀬 𑀫𑀳𑀸𑀲𑀫𑁆𑀫𑀢𑀧𑀯𑁂𑀡𑀺𑀬𑀸 𑀑𑀓𑁆𑀓𑀸𑀓𑀯𑀁𑀲𑁂 𑀚𑀸𑀢𑀢𑁆𑀢𑀸 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑁄. 𑀑𑀢𑀺𑀡𑁆𑀡𑁄𑀢𑀺 𑀬𑀲𑁆𑀲 𑀚𑀸𑀢𑀺 𑀅𑀦𑁆𑀢𑁄 𑀅𑀦𑀼𑀧𑀯𑀺𑀝𑁆𑀞𑀸, 𑀲𑁄 𑀚𑀸𑀢𑀺𑀬𑀸 𑀑𑀢𑀺𑀡𑁆𑀡𑁄 𑀦𑀸𑀫. 𑀚𑀭𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀮𑀸𑀪𑀲𑀓𑁆𑀓𑀸𑀭𑀸𑀤𑀻𑀲𑀼𑀧𑀺 𑀮𑀸𑀪𑁄𑀢𑀺 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸. 𑀲𑀓𑁆𑀓𑀸𑀭𑁄𑀢𑀺 𑀢𑁂𑀲𑀁𑀬𑁂𑀯 𑀲𑀼𑀓𑀢𑀪𑀸𑀯𑁄. 𑀲𑀺𑀮𑁄𑀓𑁄𑀢𑀺 𑀯𑀡𑁆𑀡𑀪𑀡𑀦𑀁. 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀉𑀧𑁆𑀧𑀸𑀤𑁂𑀢𑀺. 𑀅𑀧𑀜𑁆𑀜𑀸𑀢𑀸𑀢𑀺 𑀤𑁆𑀯𑀺𑀦𑁆𑀦𑀁 𑀚𑀦𑀸𑀦𑀁 𑀞𑀺𑀢𑀝𑁆𑀞𑀸𑀦𑁂 𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀖𑀸𑀲𑀘𑁆𑀙𑀸𑀤𑀦𑀫𑀢𑁆𑀢𑀫𑁆𑀧𑀺 𑀦 𑀮𑀪𑀦𑁆𑀢𑀺. 𑀅𑀧𑁆𑀧𑁂𑀲𑀓𑁆𑀔𑀸𑀢𑀺 𑀅𑀧𑁆𑀧𑀧𑀭𑀺𑀯𑀸𑀭𑀸, 𑀧𑀼𑀭𑀢𑁄 𑀯𑀸 𑀧𑀘𑁆𑀙𑀢𑁄 𑀯𑀸 𑀕𑀘𑁆𑀙𑀦𑁆𑀢𑀁 𑀦 𑀮𑀪𑀦𑁆𑀢𑀺.

𑀲𑀸𑀭𑁂𑀦 𑀲𑀸𑀭𑀓𑀭𑀡𑀻𑀬𑀦𑁆𑀢𑀺 𑀭𑀼𑀓𑁆𑀔𑀲𑀸𑀭𑁂𑀦 𑀓𑀢𑁆𑀢𑀩𑁆𑀩𑀁 𑀅𑀓𑁆𑀔𑀘𑀓𑁆𑀓𑀬𑀼𑀕𑀦𑀗𑁆𑀕𑀮𑀸𑀤𑀺𑀓𑀁 𑀬𑀁𑀓𑀺𑀜𑁆𑀘𑀺. 𑀲𑀸𑀔𑀸𑀧𑀮𑀸𑀲𑀁 𑀅𑀕𑁆𑀕𑀳𑁂𑀲𑀺 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲𑀸𑀢𑀺 𑀫𑀕𑁆𑀕𑀨𑀮𑀲𑀸𑀭𑀲𑁆𑀲 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀲𑀸𑀔𑀸𑀧𑀮𑀸𑀲𑀁 𑀦𑀸𑀫, 𑀢𑀁 𑀅𑀕𑁆𑀕𑀳𑁂𑀲𑀺. 𑀢𑁂𑀦 𑀘 𑀯𑁄𑀲𑀸𑀦𑀁 𑀆𑀧𑀸𑀤𑀻𑀢𑀺 𑀢𑁂𑀦𑁂𑀯 𑀘 𑀅𑀮𑀫𑁂𑀢𑁆𑀢𑀸𑀯𑀢𑀸 𑀲𑀸𑀭𑁄 𑀫𑁂 𑀧𑀢𑁆𑀢𑁄𑀢𑀺 𑀯𑁄𑀲𑀸𑀦𑀁 𑀆𑀧𑀦𑁆𑀦𑁄.

𑁩𑁧𑁦. 𑀜𑀸𑀡𑀤𑀲𑁆𑀲𑀦𑀁 𑀆𑀭𑀸𑀥𑁂𑀢𑀻𑀢𑀺 𑀤𑁂𑀯𑀤𑀢𑁆𑀢𑁄 𑀧𑀜𑁆𑀘𑀸𑀪𑀺𑀜𑁆𑀜𑁄, 𑀤𑀺𑀩𑁆𑀩𑀘𑀓𑁆𑀔𑀼 𑀘 𑀧𑀜𑁆𑀘𑀦𑁆𑀦𑀁 𑀅𑀪𑀺𑀜𑁆𑀜𑀸𑀦𑀁 𑀫𑀢𑁆𑀣𑀓𑁂 𑀞𑀺𑀢𑀁, 𑀢𑀁 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 ‘‘𑀜𑀸𑀡𑀤𑀲𑁆𑀲𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀚𑀸𑀦𑀁 𑀅𑀧𑀲𑁆𑀲𑀁 𑀯𑀺𑀳𑀭𑀦𑁆𑀢𑀻𑀢𑀺 𑀓𑀺𑀜𑁆𑀘𑀺 𑀲𑀼𑀔𑀼𑀫𑀁 𑀭𑀽𑀧𑀁 𑀅𑀚𑀸𑀦𑀦𑁆𑀢𑀸 𑀅𑀦𑁆𑀢𑀫𑀲𑁄 𑀧𑀁𑀲𑀼𑀧𑀺𑀲𑀸𑀘𑀓𑀫𑁆𑀧𑀺 𑀅𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀦𑁆𑀢𑀺.

𑁩𑁧𑁧. 𑀅𑀲𑀫𑀬𑀯𑀺𑀫𑁄𑀓𑁆𑀔𑀁 𑀆𑀭𑀸𑀥𑁂𑀢𑀻𑀢𑀺, ‘‘𑀓𑀢𑀫𑁄 𑀅𑀲𑀫𑀬𑀯𑀺𑀫𑁄𑀓𑁆𑀔𑁄? 𑀘𑀢𑁆𑀢𑀸𑀭𑁄 𑀘 𑀅𑀭𑀺𑀬𑀫𑀕𑁆𑀕𑀸 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀦𑀺𑀩𑁆𑀩𑀸𑀦𑀜𑁆𑀘, 𑀅𑀬𑀁 𑀅𑀲𑀫𑀬𑀯𑀺𑀫𑁄𑀓𑁆𑀔𑁄’’𑀢𑀺 (𑀧𑀝𑀺. 𑀫. 𑁧.𑁨𑁧𑁩) 𑀏𑀯𑀁 𑀯𑀼𑀢𑁆𑀢𑁂 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀆𑀭𑀸𑀥𑁂𑀢𑀺 𑀲𑀫𑁆𑀧𑀸𑀤𑁂𑀢𑀺 𑀧𑀝𑀺𑀮𑀪𑀢𑀺. 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀬𑁄 𑀳𑀺 𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂𑀬𑁂𑀯 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀯𑀺𑀫𑀼𑀘𑁆𑀘𑀦𑁆𑀢𑀺, 𑀢𑀲𑁆𑀫𑀸, ‘‘𑀓𑀢𑀫𑁄 𑀲𑀫𑀬𑀯𑀺𑀫𑁄𑀓𑁆𑀔𑁄? 𑀘𑀢𑁆𑀢𑀸𑀭𑀺 𑀘 𑀛𑀸𑀦𑀸𑀦𑀺 𑀘𑀢𑀲𑁆𑀲𑁄 𑀘 𑀅𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀬𑁄, 𑀅𑀬𑀁 𑀲𑀫𑀬𑀯𑀺𑀫𑁄𑀓𑁆𑀔𑁄’’𑀢𑀺 𑀏𑀯𑀁 𑀲𑀫𑀬𑀯𑀺𑀫𑁄𑀓𑁆𑀔𑁄𑀢𑀺 𑀯𑀼𑀢𑁆𑀢𑀸. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀧𑀦 𑀓𑀸𑀮𑁂𑀦 𑀓𑀸𑀮𑀁 𑀯𑀺𑀫𑀼𑀘𑁆𑀘𑀦𑁆𑀢𑀺, 𑀲𑀓𑀺𑀁 𑀯𑀺𑀫𑀼𑀢𑁆𑀢𑀸𑀦𑀺 𑀳𑀺 𑀫𑀕𑁆𑀕𑀨𑀮𑀸𑀦𑀺 𑀯𑀺𑀫𑀼𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀦𑀺𑀩𑁆𑀩𑀸𑀦𑀁 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀅𑀘𑁆𑀘𑀦𑁆𑀢𑀁 𑀯𑀺𑀫𑀼𑀢𑁆𑀢𑀫𑁂𑀯𑀸𑀢𑀺 𑀇𑀫𑁂 𑀦𑀯 𑀥𑀫𑁆𑀫𑀸 𑀅𑀲𑀫𑀬𑀯𑀺𑀫𑁄𑀓𑁆𑀔𑁄𑀢𑀺 𑀯𑀼𑀢𑁆𑀢𑀸.

𑀅𑀓𑀼𑀧𑁆𑀧𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺. 𑀅𑀬𑀫𑀢𑁆𑀣𑁄 𑀏𑀢𑀲𑁆𑀲𑀸𑀢𑀺 𑀏𑀢𑀤𑀢𑁆𑀣𑀁, 𑀅𑀭𑀳𑀢𑁆𑀢𑀨𑀮𑀢𑁆𑀣𑀫𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁. 𑀅𑀬𑀁 𑀏𑀢𑀲𑁆𑀲 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑀁 𑀲𑀸𑀭𑀦𑁆𑀢𑀺 𑀏𑀢𑀁 𑀅𑀭𑀳𑀢𑁆𑀢𑀨𑀮𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀲𑀸𑀭𑀁. 𑀏𑀢𑀁 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀏𑀢𑀁 𑀅𑀭𑀳𑀢𑁆𑀢𑀨𑀮𑀁 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀧𑀭𑀺𑀬𑁄𑀲𑀸𑀦𑀁, 𑀏𑀲𑀸 𑀓𑁄𑀝𑀺, 𑀦 𑀇𑀢𑁄 𑀧𑀭𑀁 𑀧𑀢𑁆𑀢𑀩𑁆𑀩𑀁 𑀅𑀢𑁆𑀣𑀻𑀢𑀺 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀳𑀸𑀲𑀸𑀭𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀘𑀽𑀴𑀲𑀸𑀭𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧𑁨. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀘𑀽𑀴𑀲𑀸𑀭𑁄𑀧𑀫𑀲𑀼𑀢𑁆𑀢𑀁. 𑀢𑀢𑁆𑀣 𑀧𑀺𑀗𑁆𑀕𑀮𑀓𑁄𑀘𑁆𑀙𑁄𑀢𑀺 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀧𑀺𑀗𑁆𑀕𑀮𑀥𑀸𑀢𑀼𑀓𑁄. 𑀓𑁄𑀘𑁆𑀙𑁄𑀢𑀺 𑀧𑀦𑀲𑁆𑀲 𑀦𑀸𑀫𑀁, 𑀢𑀲𑁆𑀫𑀸 ‘‘𑀧𑀺𑀗𑁆𑀕𑀮𑀓𑁄𑀘𑁆𑀙𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀗𑁆𑀖𑀺𑀦𑁄𑀢𑀺𑀆𑀤𑀻𑀲𑀼 𑀧𑀩𑁆𑀩𑀚𑀺𑀢𑀲𑀫𑀽𑀳𑀲𑀗𑁆𑀔𑀸𑀢𑁄 𑀲𑀗𑁆𑀖𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀲𑀗𑁆𑀖𑀺𑀦𑁄. 𑀲𑁆𑀯𑁂𑀯 𑀕𑀡𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀕𑀡𑀺𑀦𑁄. 𑀆𑀘𑀸𑀭𑀲𑀺𑀓𑁆𑀔𑀸𑀧𑀦𑀯𑀲𑁂𑀦 𑀢𑀲𑁆𑀲 𑀕𑀡𑀲𑁆𑀲 𑀆𑀘𑀭𑀺𑀬𑀸𑀢𑀺 𑀕𑀡𑀸𑀘𑀭𑀺𑀬𑀸. 𑀜𑀸𑀢𑀸𑀢𑀺 𑀧𑀜𑁆𑀜𑀸𑀢𑀸 𑀧𑀸𑀓𑀝𑀸. ‘‘𑀅𑀧𑁆𑀧𑀺𑀘𑁆𑀙𑀸 𑀲𑀦𑁆𑀢𑀼𑀝𑁆𑀞𑀸, 𑀅𑀧𑁆𑀧𑀺𑀘𑁆𑀙𑀢𑀸𑀬 𑀯𑀢𑁆𑀣𑀫𑁆𑀧𑀺 𑀦 𑀦𑀺𑀯𑀸𑀲𑁂𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀫𑀼𑀕𑁆𑀕𑀢𑁄 𑀬𑀲𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀬𑀲𑀲𑁆𑀲𑀺𑀦𑁄. 𑀢𑀺𑀢𑁆𑀣𑀓𑀭𑀸𑀢𑀺 𑀮𑀤𑁆𑀥𑀺𑀓𑀭𑀸. 𑀲𑀸𑀥𑀼𑀲𑀫𑁆𑀫𑀢𑀸𑀢𑀺 𑀇𑀫𑁂 𑀲𑀸𑀥𑀼 𑀲𑀼𑀦𑁆𑀤𑀭𑀸 𑀲𑀧𑁆𑀧𑀼𑀭𑀺𑀲𑀸𑀢𑀺 𑀏𑀯𑀁 𑀲𑀫𑁆𑀫𑀢𑀸. 𑀩𑀳𑀼𑀚𑀦𑀲𑁆𑀲𑀸𑀢𑀺 𑀅𑀲𑁆𑀲𑀼𑀢𑀯𑀢𑁄 𑀅𑀦𑁆𑀥𑀩𑀸𑀮𑀧𑀼𑀣𑀼𑀚𑁆𑀚𑀦𑀲𑁆𑀲. 𑀇𑀤𑀸𑀦𑀺 𑀢𑁂 𑀤𑀲𑁆𑀲𑁂𑀦𑁆𑀢𑁄 𑀲𑁂𑀬𑁆𑀬𑀣𑀺𑀤𑀁 𑀧𑀽𑀭𑀡𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀽𑀭𑀡𑁄𑀢𑀺 𑀢𑀲𑁆𑀲 𑀲𑀢𑁆𑀣𑀼𑀧𑀝𑀺𑀜𑁆𑀜𑀲𑁆𑀲 𑀦𑀸𑀫𑀁. 𑀓𑀲𑁆𑀲𑀧𑁄𑀢𑀺 𑀕𑁄𑀢𑁆𑀢𑀁. 𑀲𑁄 𑀓𑀺𑀭 𑀅𑀜𑁆𑀜𑀢𑀭𑀲𑁆𑀲 𑀓𑀼𑀮𑀲𑁆𑀲 𑀏𑀓𑀽𑀦𑀤𑀸𑀲𑀲𑀢𑀁 𑀧𑀽𑀭𑀬𑀫𑀸𑀦𑁄 𑀚𑀸𑀢𑁄, 𑀢𑁂𑀦𑀲𑁆𑀲 ‘‘𑀧𑀽𑀭𑀡𑁄’’𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀫𑀗𑁆𑀕𑀮𑀤𑀸𑀲𑀢𑁆𑀢𑀸 𑀘𑀲𑁆𑀲 ‘‘𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀢𑁆𑀢𑀸 𑀦𑀢𑁆𑀣𑀺, 𑀅𑀓𑀢𑀁 𑀯𑀸 𑀦 𑀓𑀢𑀦𑁆𑀢𑀺. ‘‘𑀲𑁄 𑀓𑀺𑀫𑀳𑀫𑁂𑀢𑁆𑀣 𑀯𑀲𑀸𑀫𑀻’’𑀢𑀺 𑀧𑀮𑀸𑀬𑀺. 𑀅𑀣𑀲𑁆𑀲 𑀘𑁄𑀭𑀸 𑀯𑀢𑁆𑀣𑀸𑀦𑀺 𑀅𑀘𑁆𑀙𑀺𑀦𑁆𑀤𑀺𑀁𑀲𑀼. 𑀲𑁄 𑀧𑀡𑁆𑀡𑁂𑀦 𑀯𑀸 𑀢𑀺𑀡𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀼𑀫𑁆𑀧𑀺 𑀅𑀚𑀸𑀦𑀦𑁆𑀢𑁄 𑀚𑀸𑀢𑀭𑀽𑀧𑁂𑀦𑁂𑀯 𑀏𑀓𑀁 𑀕𑀸𑀫𑀁 𑀧𑀸𑀯𑀺𑀲𑀺. 𑀫𑀦𑀼𑀲𑁆𑀲𑀸 𑀢𑀁 𑀤𑀺𑀲𑁆𑀯𑀸, ‘‘𑀅𑀬𑀁 𑀲𑀫𑀡𑁄 𑀅𑀭𑀳𑀸 𑀅𑀧𑁆𑀧𑀺𑀘𑁆𑀙𑁄, 𑀦𑀢𑁆𑀣𑀺 𑀇𑀫𑀺𑀦𑀸 𑀲𑀤𑀺𑀲𑁄’’𑀢𑀺 𑀧𑀽𑀯𑀪𑀢𑁆𑀢𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀦𑁆𑀢𑀺. 𑀲𑁄 ‘‘𑀫𑀬𑁆𑀳𑀁 𑀲𑀸𑀝𑀓𑀁 𑀅𑀦𑀺𑀯𑀢𑁆𑀣𑀪𑀸𑀯𑁂𑀦 𑀇𑀤𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀲𑀸𑀝𑀓𑀁 𑀮𑀪𑀺𑀢𑁆𑀯𑀸𑀧𑀺 𑀦 𑀦𑀺𑀯𑀸𑀲𑁂𑀲𑀺, 𑀢𑀤𑁂𑀯 𑀧𑀩𑁆𑀩𑀚𑁆𑀚𑀁 𑀅𑀕𑁆𑀕𑀳𑁂𑀲𑀺. 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀅𑀜𑁆𑀜𑁂𑀧𑀺 𑀧𑀜𑁆𑀘𑀲𑀢𑀸 𑀫𑀦𑀼𑀲𑁆𑀲𑀸 𑀧𑀩𑁆𑀩𑀚𑀺𑀁𑀲𑀼, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀽𑀭𑀡𑁄 𑀓𑀲𑁆𑀲𑀧𑁄’’𑀢𑀺.

𑀫𑀓𑁆𑀔𑀮𑀻𑀢𑀺 𑀢𑀲𑁆𑀲 𑀦𑀸𑀫𑀁. 𑀕𑁄𑀲𑀸𑀮𑀸𑀬 𑀚𑀸𑀢𑀢𑁆𑀢𑀸 𑀕𑁄𑀲𑀸𑀮𑁄𑀢𑀺 𑀤𑀼𑀢𑀺𑀬𑀁 𑀦𑀸𑀫𑀁. 𑀢𑀁 𑀓𑀺𑀭 𑀲𑀓𑀤𑁆𑀤𑀫𑀸𑀬 𑀪𑀽𑀫𑀺𑀬𑀸 𑀢𑁂𑀮𑀖𑀝𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀁, ‘‘𑀢𑀸𑀢, 𑀫𑀸 𑀔𑀮𑀻’’𑀢𑀺 𑀲𑀸𑀫𑀺𑀓𑁄 𑀆𑀳. 𑀲𑁄 𑀧𑀫𑀸𑀤𑁂𑀦 𑀔𑀮𑀺𑀢𑁆𑀯𑀸 𑀧𑀢𑀺𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀪𑀬𑁂𑀦 𑀧𑀮𑀸𑀬𑀺𑀢𑀼𑀁 𑀆𑀭𑀤𑁆𑀥𑁄. 𑀲𑀸𑀫𑀺𑀓𑁄 𑀉𑀧𑀥𑀸𑀯𑀺𑀢𑁆𑀯𑀸 𑀲𑀸𑀝𑀓𑀓𑀡𑁆𑀡𑁂 𑀅𑀕𑁆𑀕𑀳𑁂𑀲𑀺. 𑀲𑁄𑀧𑀺 𑀲𑀸𑀝𑀓𑀁 𑀙𑀟𑁆𑀟𑁂𑀢𑁆𑀯𑀸 𑀅𑀘𑁂𑀮𑀓𑁄 𑀳𑀼𑀢𑁆𑀯𑀸 𑀧𑀮𑀸𑀬𑀺, 𑀲𑁂𑀲𑀁 𑀧𑀽𑀭𑀡𑀲𑀤𑀺𑀲𑀫𑁂𑀯.

𑀅𑀚𑀺𑀢𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀓𑁂𑀲𑀓𑀫𑁆𑀩𑀮𑀁 𑀥𑀸𑀭𑁂𑀢𑀻𑀢𑀺 𑀓𑁂𑀲𑀓𑀫𑁆𑀩𑀮𑁄. 𑀇𑀢𑀺 𑀦𑀸𑀫𑀤𑁆𑀯𑀬𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 ‘‘𑀅𑀚𑀺𑀢𑁄 𑀓𑁂𑀲𑀓𑀫𑁆𑀩𑀮𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀓𑁂𑀲𑀓𑀫𑁆𑀩𑀮𑁄 𑀦𑀸𑀫 𑀫𑀦𑀼𑀲𑁆𑀲𑀓𑁂𑀲𑁂𑀳𑀺 𑀓𑀢𑀓𑀫𑁆𑀩𑀮𑁄, 𑀢𑀢𑁄 𑀧𑀝𑀺𑀓𑀺𑀝𑁆𑀞𑀢𑀭𑀁 𑀯𑀢𑁆𑀣𑀁 𑀦𑀸𑀫 𑀦𑀢𑁆𑀣𑀺. 𑀬𑀣𑀸𑀳 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀬𑀸𑀦𑀺 𑀓𑀸𑀦𑀺𑀘𑀺 𑀢𑀦𑁆𑀢𑀸𑀯𑀼𑀢𑀸𑀦𑀁 𑀯𑀢𑁆𑀣𑀸𑀦𑀁, 𑀓𑁂𑀲𑀓𑀫𑁆𑀩𑀮𑁄 𑀢𑁂𑀲𑀁 𑀧𑀝𑀺𑀓𑀺𑀝𑁆𑀞𑁄 𑀅𑀓𑁆𑀔𑀸𑀬𑀢𑀺, 𑀓𑁂𑀲𑀓𑀫𑁆𑀩𑀮𑁄, 𑀪𑀺𑀓𑁆𑀔𑀯𑁂, 𑀲𑀻𑀢𑁂 𑀲𑀻𑀢𑁄 𑀉𑀡𑁆𑀳𑁂 𑀉𑀡𑁆𑀳𑁄 𑀤𑀼𑀩𑁆𑀩𑀡𑁆𑀡𑁄 𑀤𑀼𑀕𑁆𑀕𑀦𑁆𑀥𑁄 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑁄’’𑀢𑀺 (𑀅. 𑀦𑀺. 𑁩.𑁧𑁩𑁮).

𑀧𑀓𑀼𑀥𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀓𑀘𑁆𑀘𑀸𑀬𑀦𑁄𑀢𑀺 𑀕𑁄𑀢𑁆𑀢𑀁. 𑀇𑀢𑀺 𑀦𑀸𑀫𑀕𑁄𑀢𑁆𑀢𑀁 𑀲𑀁𑀲𑀦𑁆𑀤𑀺𑀢𑁆𑀯𑀸, ‘‘𑀧𑀓𑀼𑀥𑁄 𑀓𑀘𑁆𑀘𑀸𑀬𑀦𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀻𑀢𑀼𑀤𑀓𑀧𑀝𑀺𑀓𑁆𑀔𑀺𑀢𑁆𑀢𑀓𑁄 𑀏𑀲, 𑀯𑀘𑁆𑀘𑀁 𑀓𑀢𑁆𑀯𑀸𑀧𑀺 𑀉𑀤𑀓𑀓𑀺𑀘𑁆𑀘𑀁 𑀦 𑀓𑀭𑁄𑀢𑀺, 𑀉𑀡𑁆𑀳𑁄𑀤𑀓𑀁 𑀯𑀸 𑀓𑀜𑁆𑀚𑀺𑀬𑀁 𑀯𑀸 𑀮𑀪𑀺𑀢𑁆𑀯𑀸 𑀓𑀭𑁄𑀢𑀺, 𑀦𑀤𑀺𑀁 𑀯𑀸 𑀫𑀕𑁆𑀕𑁄𑀤𑀓𑀁 𑀯𑀸 𑀅𑀢𑀺𑀓𑁆𑀓𑀫𑁆𑀫, ‘‘𑀲𑀻𑀮𑀁 𑀫𑁂 𑀪𑀺𑀦𑁆𑀦’’𑀦𑁆𑀢𑀺 𑀯𑀸𑀮𑀺𑀓𑀣𑀽𑀧𑀁 𑀓𑀢𑁆𑀯𑀸 𑀲𑀻𑀮𑀁 𑀅𑀥𑀺𑀝𑁆𑀞𑀸𑀬 𑀕𑀘𑁆𑀙𑀢𑀺, 𑀏𑀯𑀭𑀽𑀧𑁄 𑀦𑀺𑀲𑁆𑀲𑀺𑀭𑀺𑀓𑀮𑀤𑁆𑀥𑀺𑀓𑁄 𑀏𑀲.

𑀲𑀜𑁆𑀚𑀬𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀩𑁂𑀮𑀝𑁆𑀞𑀲𑁆𑀲 𑀧𑀼𑀢𑁆𑀢𑁄𑀢𑀺 𑀩𑁂𑀮𑀝𑁆𑀞𑀧𑀼𑀢𑁆𑀢𑁄. 𑀅𑀫𑁆𑀳𑀸𑀓𑀁 𑀕𑀡𑁆𑀞𑀦𑀓𑀺𑀮𑁂𑀲𑁄 𑀧𑀮𑀺𑀩𑀼𑀚𑁆𑀛𑀦𑀓𑀺𑀮𑁂𑀲𑁄 𑀦𑀢𑁆𑀣𑀺, 𑀓𑀺𑀮𑁂𑀲𑀕𑀡𑁆𑀞𑀭𑀳𑀺𑀢𑀸 𑀫𑀬𑀦𑁆𑀢𑀺 𑀏𑀯𑀁 𑀯𑀸𑀤𑀺𑀢𑀸𑀬 𑀮𑀤𑁆𑀥𑀦𑀸𑀫𑀯𑀲𑁂𑀦 𑀦𑀺𑀕𑀡𑁆𑀞𑁄. 𑀦𑀸𑀝𑀲𑁆𑀲 𑀧𑀼𑀢𑁆𑀢𑁄𑀢𑀺 𑀦𑀸𑀝𑀧𑀼𑀢𑁆𑀢𑁄. 𑀅𑀩𑁆𑀪𑀜𑁆𑀜𑀁𑀲𑀽𑀢𑀺 𑀬𑀣𑀸 𑀢𑁂𑀲𑀁 𑀧𑀝𑀺𑀜𑁆𑀜𑀸, 𑀢𑀣𑁂𑀯 𑀚𑀸𑀦𑀺𑀁𑀲𑀼. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀘𑁂 𑀦𑁂𑀲𑀁 𑀲𑀸 𑀧𑀝𑀺𑀜𑁆𑀜𑀸 𑀦𑀺𑀬𑁆𑀬𑀸𑀦𑀺𑀓𑀸 𑀲𑀩𑁆𑀩𑁂 𑀅𑀩𑁆𑀪𑀜𑁆𑀜𑀁𑀲𑀼. 𑀦𑁄 𑀘𑁂, 𑀦 𑀅𑀩𑁆𑀪𑀜𑁆𑀜𑀁𑀲𑀼. 𑀢𑀲𑁆𑀫𑀸 𑀓𑀺𑀁 𑀢𑁂𑀲𑀁 𑀧𑀝𑀺𑀜𑁆𑀜𑀸 𑀦𑀺𑀬𑁆𑀬𑀸𑀦𑀺𑀓𑀸 𑀦 𑀦𑀺𑀬𑁆𑀬𑀸𑀦𑀺𑀓𑀸𑀢𑀺, 𑀅𑀬𑀫𑁂𑀢𑀲𑁆𑀲 𑀧𑀜𑁆𑀳𑀲𑁆𑀲 𑀅𑀢𑁆𑀣𑁄. 𑀅𑀣 𑀪𑀕𑀯𑀸 𑀦𑁂𑀲𑀁 𑀅𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀓𑀣𑀦𑁂𑀦 𑀅𑀢𑁆𑀣𑀸𑀪𑀸𑀯𑀢𑁄 𑀅𑀮𑀦𑁆𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀫𑀸𑀬 𑀅𑀢𑁆𑀣𑀁 𑀧𑀯𑁂𑀤𑁂𑀦𑁆𑀢𑁄 𑀥𑀫𑁆𑀫𑀫𑁂𑀯 𑀤𑁂𑀲𑁂𑀢𑀼𑀁, 𑀥𑀫𑁆𑀫𑀁, 𑀢𑁂 𑀩𑁆𑀭𑀸𑀳𑁆𑀫𑀡, 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀆𑀳.

𑁩𑁨𑁦. 𑀢𑀢𑁆𑀣 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸𑀢𑀺 𑀲𑀘𑁆𑀙𑀺𑀓𑀭𑀡𑀢𑁆𑀣𑀁. 𑀦 𑀙𑀦𑁆𑀤𑀁 𑀚𑀦𑁂𑀢𑀻𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑀁 𑀦 𑀚𑀦𑀬𑀢𑀺. 𑀦 𑀯𑀸𑀬𑀫𑀢𑀻𑀢𑀺 𑀯𑀸𑀬𑀸𑀫𑀁 𑀧𑀭𑀓𑁆𑀓𑀫𑀁 𑀦 𑀓𑀭𑁄𑀢𑀺. 𑀑𑀮𑀻𑀦𑀯𑀼𑀢𑁆𑀢𑀺𑀓𑁄 𑀘 𑀳𑁄𑀢𑀻𑀢𑀺 𑀮𑀻𑀦𑀚𑁆𑀛𑀸𑀲𑀬𑁄 𑀳𑁄𑀢𑀺. 𑀲𑀸𑀣𑀮𑀺𑀓𑁄𑀢𑀺 𑀲𑀺𑀣𑀺𑀮𑀕𑁆𑀕𑀸𑀳𑀻, 𑀲𑀸𑀲𑀦𑀁 𑀲𑀺𑀣𑀺𑀮𑀁 𑀓𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀤𑀴𑁆𑀳𑀁 𑀦 𑀕𑀡𑁆𑀳𑀸𑀢𑀺.

𑁩𑁨𑁩. 𑀇𑀥, 𑀩𑁆𑀭𑀸𑀳𑁆𑀫𑀡 𑀪𑀺𑀓𑁆𑀔𑀼, 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺 𑀓𑀣𑀁 𑀇𑀫𑁂 𑀧𑀞𑀫𑀚𑁆𑀛𑀸𑀦𑀸𑀤𑀺𑀥𑀫𑁆𑀫𑀸 𑀜𑀸𑀡𑀤𑀲𑁆𑀲𑀦𑁂𑀦 𑀉𑀢𑁆𑀢𑀭𑀺𑀢𑀭𑀸 𑀚𑀸𑀢𑀸𑀢𑀺? 𑀦𑀺𑀭𑁄𑀥𑀧𑀸𑀤𑀓𑀢𑁆𑀢𑀸. 𑀳𑁂𑀝𑁆𑀞𑀸 𑀧𑀞𑀫𑀚𑁆𑀛𑀸𑀦𑀸𑀤𑀺𑀥𑀫𑁆𑀫𑀸 𑀳𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸, 𑀇𑀥 𑀦𑀺𑀭𑁄𑀥𑀧𑀸𑀤𑀓𑀸, 𑀢𑀲𑁆𑀫𑀸 𑀉𑀢𑁆𑀢𑀭𑀺𑀢𑀭𑀸 𑀚𑀸𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀢𑀺 𑀪𑀕𑀯𑀸 𑀇𑀤𑀫𑁆𑀧𑀺 𑀲𑀼𑀢𑁆𑀢𑀁 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀦𑀺𑀝𑁆𑀞𑀧𑁂𑀲𑀺. 𑀤𑁂𑀲𑀦𑀸𑀯𑀲𑀸𑀦𑁂 𑀩𑁆𑀭𑀸𑀳𑁆𑀫𑀡𑁄 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀺𑀢𑁄𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀘𑀽𑀴𑀲𑀸𑀭𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀫𑀳𑀸𑀬𑀫𑀓𑀯𑀕𑁆𑀕𑁄

𑁧. 𑀘𑀽𑀴𑀕𑁄𑀲𑀺𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨𑁫. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀘𑀽𑀴𑀕𑁄𑀲𑀺𑀗𑁆𑀕𑀲𑀼𑀢𑁆𑀢𑀁. 𑀢𑀢𑁆𑀣 𑀦𑀸𑀢𑀺𑀓𑁂 𑀯𑀺𑀳𑀭𑀢𑀻𑀢𑀺 𑀦𑀸𑀢𑀺𑀓𑀸 𑀦𑀸𑀫 𑀏𑀓𑀁 𑀢𑀴𑀸𑀓𑀁 𑀦𑀺𑀲𑁆𑀲𑀸𑀬 𑀤𑁆𑀯𑀺𑀦𑁆𑀦𑀁 𑀘𑀽𑀴𑀧𑀺𑀢𑀺𑀫𑀳𑀸𑀧𑀺𑀢𑀺𑀧𑀼𑀢𑁆𑀢𑀸𑀦𑀁 𑀤𑁆𑀯𑁂 𑀕𑀸𑀫𑀸, 𑀢𑁂𑀲𑀼 𑀏𑀓𑀲𑁆𑀫𑀺𑀁 𑀕𑀸𑀫𑁂. 𑀕𑀺𑀜𑁆𑀚𑀓𑀸𑀯𑀲𑀣𑁂𑀢𑀺 𑀇𑀝𑁆𑀞𑀓𑀸𑀫𑀬𑁂 𑀆𑀯𑀲𑀣𑁂. 𑀏𑀓𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀪𑀕𑀯𑀸 𑀫𑀳𑀸𑀚𑀦𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑁄 𑀯𑀚𑁆𑀚𑀺𑀭𑀝𑁆𑀞𑁂 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀦𑀸𑀢𑀺𑀓𑀁 𑀅𑀦𑀼𑀧𑁆𑀧𑀢𑁆𑀢𑁄. 𑀦𑀸𑀢𑀺𑀓𑀯𑀸𑀲𑀺𑀦𑁄 𑀫𑀦𑀼𑀲𑁆𑀲𑀸 𑀪𑀕𑀯𑀢𑁄 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀳𑀤𑀬𑀸, ‘‘𑀲𑀢𑁆𑀣𑀼 𑀯𑀲𑀦𑀝𑁆𑀞𑀸𑀦𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀫𑀦𑁆𑀢𑁂𑀢𑁆𑀯𑀸 𑀇𑀝𑁆𑀞𑀓𑀸𑀳𑁂𑀯 𑀪𑀺𑀢𑁆𑀢𑀺𑀲𑁄𑀧𑀸𑀦𑀢𑁆𑀣𑀫𑁆𑀪𑁂 𑀯𑀸𑀴𑀭𑀽𑀧𑀸𑀤𑀻𑀦𑀺 𑀤𑀲𑁆𑀲𑁂𑀦𑁆𑀢𑁄 𑀧𑀸𑀲𑀸𑀤𑀁 𑀓𑀢𑁆𑀯𑀸 𑀲𑀼𑀥𑀸𑀬 𑀮𑀺𑀫𑁆𑀧𑀺𑀢𑁆𑀯𑀸 𑀫𑀸𑀮𑀸𑀓𑀫𑁆𑀫𑀮𑀢𑀸𑀓𑀫𑁆𑀫𑀸𑀤𑀻𑀦𑀺 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀪𑀼𑀫𑁆𑀫𑀢𑁆𑀣𑀭𑀡𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀧𑀜𑁆𑀜𑀧𑁂𑀢𑁆𑀯𑀸 𑀲𑀢𑁆𑀣𑀼 𑀦𑀺𑀬𑁆𑀬𑀸𑀢𑁂𑀲𑀼𑀁. 𑀅𑀧𑀭𑀸𑀧𑀭𑀁 𑀧𑀦𑁂𑀢𑁆𑀣 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀫𑀡𑁆𑀟𑀧𑀘𑀗𑁆𑀓𑀫𑀸𑀤𑀻𑀦𑀺 𑀓𑀸𑀭𑀬𑀺𑀁𑀲𑀼. 𑀇𑀢𑀺 𑀲𑁄 𑀯𑀺𑀳𑀸𑀭𑁄 𑀫𑀳𑀸 𑀅𑀳𑁄𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀕𑀺𑀜𑁆𑀚𑀓𑀸𑀯𑀲𑀣𑁂’’𑀢𑀺.

𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀤𑀸𑀬𑁂𑀢𑀺 𑀢𑀢𑁆𑀣 𑀏𑀓𑀲𑁆𑀲 𑀚𑁂𑀝𑁆𑀞𑀓𑀭𑀼𑀓𑁆𑀔𑀲𑁆𑀲 𑀔𑀦𑁆𑀥𑀢𑁄 𑀕𑁄𑀲𑀺𑀗𑁆𑀕𑀲𑀡𑁆𑀞𑀸𑀦𑀁 𑀳𑀼𑀢𑁆𑀯𑀸 𑀯𑀺𑀝𑀧𑀁 𑀉𑀝𑁆𑀞𑀳𑀺, 𑀢𑀁 𑀭𑀼𑀓𑁆𑀔𑀁 𑀉𑀧𑀸𑀤𑀸𑀬 𑀲𑀩𑁆𑀩𑀫𑁆𑀧𑀺 𑀢𑀁 𑀯𑀦𑀁 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀦𑁆𑀢𑀺 𑀲𑀗𑁆𑀔𑀁 𑀕𑀢𑀁. 𑀤𑀸𑀬𑁄𑀢𑀺 𑀅𑀯𑀺𑀲𑁂𑀲𑁂𑀦 𑀅𑀭𑀜𑁆𑀜𑀲𑁆𑀲𑁂𑀢𑀁 𑀦𑀸𑀫𑀁. 𑀢𑀲𑁆𑀫𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀤𑀸𑀬𑁂𑀢𑀺 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀅𑀭𑀜𑁆𑀜𑁂𑀢𑀺 𑀅𑀢𑁆𑀣𑁄. 𑀯𑀺𑀳𑀭𑀦𑁆𑀢𑀻𑀢𑀺 𑀲𑀸𑀫𑀕𑁆𑀕𑀺𑀭𑀲𑀁 𑀅𑀦𑀼𑀪𑀯𑀫𑀸𑀦𑀸 𑀯𑀺𑀳𑀭𑀦𑁆𑀢𑀺. 𑀇𑀫𑁂𑀲𑀜𑁆𑀳𑀺 𑀓𑀼𑀮𑀧𑀼𑀢𑁆𑀢𑀸𑀦𑀁 𑀉𑀧𑀭𑀺𑀧𑀡𑁆𑀡𑀸𑀲𑀓𑁂 𑀧𑀼𑀣𑀼𑀚𑁆𑀚𑀦𑀓𑀸𑀮𑁄 𑀓𑀣𑀺𑀢𑁄, 𑀇𑀥 𑀔𑀻𑀡𑀸𑀲𑀯𑀓𑀸𑀮𑁄. 𑀢𑀤𑀸 𑀳𑀺 𑀢𑁂 𑀮𑀤𑁆𑀥𑀲𑁆𑀲𑀸𑀤𑀸 𑀮𑀤𑁆𑀥𑀧𑀢𑀺𑀝𑁆𑀞𑀸 𑀅𑀥𑀺𑀕𑀢𑀧𑀝𑀺𑀲𑀫𑁆𑀪𑀺𑀤𑀸 𑀔𑀻𑀡𑀸𑀲𑀯𑀸 𑀳𑀼𑀢𑁆𑀯𑀸 𑀲𑀸𑀫𑀕𑁆𑀕𑀺𑀭𑀲𑀁 𑀅𑀦𑀼𑀪𑀯𑀫𑀸𑀦𑀸 𑀢𑀢𑁆𑀣 𑀯𑀺𑀳𑀭𑀺𑀁𑀲𑀼. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀬𑁂𑀦 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀤𑀸𑀬𑁄 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁂𑀲𑀼 𑀯𑀸 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑁂𑀲𑀼 𑀯𑀸, 𑀅𑀦𑁆𑀢𑀫𑀲𑁄 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀆𑀦𑀦𑁆𑀤𑀢𑁆𑀣𑁂𑀭𑀫𑁆𑀧𑀺 𑀓𑀜𑁆𑀘𑀺 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀲𑀬𑀫𑁂𑀯 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀅𑀦𑀻𑀓𑀸 𑀦𑀺𑀲𑁆𑀲𑀝𑁄 𑀳𑀢𑁆𑀣𑀻 𑀯𑀺𑀬, 𑀬𑀽𑀣𑀸 𑀦𑀺𑀲𑁆𑀲𑀝𑁄 𑀓𑀸𑀴𑀲𑀻𑀳𑁄 𑀯𑀺𑀬, 𑀯𑀸𑀢𑀘𑁆𑀙𑀺𑀦𑁆𑀦𑁄 𑀯𑀮𑀸𑀳𑀓𑁄 𑀯𑀺𑀬 𑀏𑀓𑀓𑁄𑀯 𑀉𑀧𑀲𑀗𑁆𑀓𑀫𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀪𑀕𑀯𑀸 𑀲𑀬𑀁 𑀅𑀕𑀫𑀸𑀲𑀻𑀢𑀺? 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑀲𑀸𑀫𑀕𑁆𑀕𑀺𑀭𑀲𑀁 𑀅𑀦𑀼𑀪𑀯𑀦𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀢𑁂𑀲𑀁 𑀧𑀕𑁆𑀕𑀡𑁆𑀳𑀦𑀢𑁄, 𑀧𑀘𑁆𑀙𑀺𑀫𑀚𑀦𑀢𑀁 𑀅𑀦𑀼𑀓𑀫𑁆𑀧𑀦𑀢𑁄 𑀥𑀫𑁆𑀫𑀕𑀭𑀼𑀪𑀸𑀯𑀢𑁄 𑀘. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀳𑀁 𑀇𑀫𑁂 𑀓𑀼𑀮𑀧𑀼𑀢𑁆𑀢𑁂 𑀧𑀕𑁆𑀕𑀡𑁆𑀳𑀺𑀢𑁆𑀯𑀸 𑀉𑀓𑁆𑀓𑀁𑀲𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀦𑁂𑀲𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺. 𑀏𑀯𑀁 𑀢𑀸𑀯 𑀧𑀕𑁆𑀕𑀡𑁆𑀳𑀦𑀢𑁄 𑀅𑀕𑀫𑀸𑀲𑀺. 𑀅𑀧𑀭𑀫𑁆𑀧𑀺𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀦𑀸𑀕𑀢𑁂 𑀓𑀼𑀮𑀧𑀼𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑀫𑀕𑁆𑀕𑀯𑀸𑀲𑀁 𑀯𑀲𑀦𑁆𑀢𑀸𑀦𑀁 𑀲𑀦𑁆𑀢𑀺𑀓𑀁 𑀲𑀬𑀁 𑀕𑀦𑁆𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀢𑀬𑁄 𑀓𑀼𑀮𑀧𑀼𑀢𑁆𑀢𑁂 𑀧𑀕𑁆𑀕𑀡𑁆𑀳𑀺, 𑀓𑁄 𑀦𑀸𑀫 𑀲𑀫𑀕𑁆𑀕𑀯𑀸𑀲𑀁 𑀦 𑀯𑀲𑁂𑀬𑁆𑀬𑀸𑀢𑀺 𑀲𑀫𑀕𑁆𑀕𑀯𑀸𑀲𑀁 𑀯𑀲𑀺𑀢𑀩𑁆𑀩𑀁 𑀫𑀜𑁆𑀜𑀫𑀸𑀦𑀸 𑀔𑀺𑀧𑁆𑀧𑀫𑁂𑀯 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀏𑀯𑀁 𑀧𑀘𑁆𑀙𑀺𑀫𑀚𑀦𑀢𑀁 𑀅𑀦𑀼𑀓𑀫𑁆𑀧𑀦𑀢𑁄𑀧𑀺 𑀅𑀕𑀫𑀸𑀲𑀺. 𑀩𑀼𑀤𑁆𑀥𑀸 𑀘 𑀦𑀸𑀫 𑀥𑀫𑁆𑀫𑀕𑀭𑀼𑀦𑁄 𑀳𑁄𑀦𑁆𑀢𑀺, 𑀲𑁄 𑀘 𑀦𑁂𑀲𑀁 𑀥𑀫𑁆𑀫𑀕𑀭𑀼𑀪𑀸𑀯𑁄 𑀭𑀣𑀯𑀺𑀦𑀻𑀢𑁂 𑀆𑀯𑀺𑀓𑀢𑁄𑀯. 𑀇𑀢𑀺 𑀇𑀫𑀲𑁆𑀫𑀸 𑀥𑀫𑁆𑀫𑀕𑀭𑀼𑀪𑀸𑀯𑀢𑁄𑀧𑀺 𑀥𑀫𑁆𑀫𑀁 𑀧𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀅𑀕𑀫𑀸𑀲𑀺.

𑀤𑀸𑀬𑀧𑀸𑀮𑁄𑀢𑀺 𑀅𑀭𑀜𑁆𑀜𑀧𑀸𑀮𑁄. 𑀲𑁄 𑀢𑀁 𑀅𑀭𑀜𑁆𑀜𑀁 𑀬𑀣𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀧𑁆𑀧𑀤𑁂𑀲𑁂𑀦 𑀫𑀦𑀼𑀲𑁆𑀲𑀸 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀧𑀼𑀧𑁆𑀨𑀁 𑀯𑀸 𑀨𑀮𑀁 𑀯𑀸 𑀦𑀺𑀬𑁆𑀬𑀸𑀲𑀁 𑀯𑀸 𑀤𑀩𑁆𑀩𑀲𑀫𑁆𑀪𑀸𑀭𑀁 𑀯𑀸 𑀦 𑀳𑀭𑀦𑁆𑀢𑀺, 𑀏𑀯𑀁 𑀯𑀢𑀺𑀬𑀸 𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀢𑀲𑁆𑀲 𑀅𑀭𑀜𑁆𑀜𑀲𑁆𑀲 𑀬𑁄𑀚𑀺𑀢𑁂 𑀤𑁆𑀯𑀸𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑀁 𑀅𑀭𑀜𑁆𑀜𑀁 𑀭𑀓𑁆𑀔𑀢𑀺, 𑀧𑀸𑀮𑁂𑀢𑀺. 𑀢𑀲𑁆𑀫𑀸 ‘‘𑀤𑀸𑀬𑀧𑀸𑀮𑁄’’𑀢𑀺 𑀯𑀼𑀢𑁆𑀢𑁄. 𑀅𑀢𑁆𑀢𑀓𑀸𑀫𑀭𑀽𑀧𑀸𑀢𑀺 𑀅𑀢𑁆𑀢𑀦𑁄 𑀳𑀺𑀢𑀁 𑀓𑀸𑀫𑀬𑀫𑀸𑀦𑀲𑀪𑀸𑀯𑀸 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑀺. 𑀬𑁄 𑀳𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸𑀧𑀺 𑀯𑁂𑀚𑁆𑀚𑀓𑀫𑁆𑀫𑀤𑀽𑀢𑀓𑀫𑁆𑀫𑀧𑀳𑀺𑀡𑀕𑀫𑀦𑀸𑀤𑀻𑀦𑀁 𑀯𑀲𑁂𑀦 𑀏𑀓𑀯𑀻𑀲𑀢𑀺𑀅𑀦𑁂𑀲𑀦𑀸𑀳𑀺 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺, 𑀅𑀬𑀁 𑀦 𑀅𑀢𑁆𑀢𑀓𑀸𑀫𑀭𑀽𑀧𑁄 𑀦𑀸𑀫. 𑀬𑁄 𑀧𑀦 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀏𑀓𑀯𑀻𑀲𑀢𑀺𑀅𑀦𑁂𑀲𑀦𑀁 𑀧𑀳𑀸𑀬 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑀧𑁆𑀧𑀸𑀬𑀥𑀼𑀢𑀗𑁆𑀕𑀁 𑀅𑀥𑀺𑀝𑁆𑀞𑀸𑀬 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀘𑀺𑀢𑁆𑀢𑀭𑀼𑀘𑀺𑀬𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀕𑀸𑀫𑀦𑁆𑀢𑀁 𑀧𑀳𑀸𑀬 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀼𑀭𑀼𑀫𑀸𑀦𑁄 𑀯𑀺𑀳𑀭𑀢𑀺, 𑀅𑀬𑀁 𑀅𑀢𑁆𑀢𑀓𑀸𑀫𑁄 𑀦𑀸𑀫. 𑀢𑁂𑀧𑀺 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑀏𑀯𑀭𑀽𑀧𑀸 𑀅𑀳𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀢𑁆𑀢𑀓𑀸𑀫𑀭𑀽𑀧𑀸 𑀯𑀺𑀳𑀭𑀦𑁆𑀢𑀻’’𑀢𑀺.

𑀫𑀸 𑀢𑁂𑀲𑀁 𑀅𑀨𑀸𑀲𑀼𑀫𑀓𑀸𑀲𑀻𑀢𑀺 𑀢𑁂𑀲𑀁 𑀫𑀸 𑀅𑀨𑀸𑀲𑀼𑀓𑀁 𑀅𑀓𑀸𑀲𑀻𑀢𑀺 𑀪𑀕𑀯𑀦𑁆𑀢𑀁 𑀯𑀸𑀭𑁂𑀲𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀇𑀫𑁂 𑀓𑀼𑀮𑀧𑀼𑀢𑁆𑀢𑀸 𑀲𑀫𑀕𑁆𑀕𑀸 𑀯𑀺𑀳𑀭𑀦𑁆𑀢𑀺, 𑀏𑀓𑀘𑁆𑀘𑀲𑁆𑀲 𑀘 𑀕𑀢𑀝𑁆𑀞𑀸𑀦𑁂 𑀪𑀡𑁆𑀟𑀦𑀓𑀮𑀳𑀯𑀺𑀯𑀸𑀤𑀸 𑀯𑀢𑁆𑀢𑀦𑁆𑀢𑀺, 𑀢𑀺𑀔𑀺𑀡𑀲𑀺𑀗𑁆𑀕𑁄 𑀘𑀡𑁆𑀟𑀕𑁄𑀡𑁄 𑀯𑀺𑀬 𑀑𑀯𑀺𑀚𑁆𑀛𑀦𑁆𑀢𑁄 𑀯𑀺𑀘𑀭𑀢𑀺, 𑀅𑀣𑁂𑀓𑀫𑀕𑁆𑀕𑁂𑀦 𑀤𑁆𑀯𑀺𑀦𑁆𑀦𑀁 𑀕𑀫𑀦𑀁 𑀦 𑀳𑁄𑀢𑀺, 𑀓𑀤𑀸𑀘𑀺 𑀅𑀬𑀫𑁆𑀧𑀺 𑀏𑀯𑀁 𑀓𑀭𑁄𑀦𑁆𑀢𑁄 𑀇𑀫𑁂𑀲𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀲𑀫𑀕𑁆𑀕𑀯𑀸𑀲𑀁 𑀪𑀺𑀦𑁆𑀤𑁂𑀬𑁆𑀬. 𑀧𑀸𑀲𑀸𑀤𑀺𑀓𑁄 𑀘 𑀧𑀦𑁂𑀲 𑀲𑀼𑀯𑀡𑁆𑀡𑀯𑀡𑁆𑀡𑁄 𑀲𑀼𑀭𑀲𑀕𑀺𑀤𑁆𑀥𑁄 𑀫𑀜𑁆𑀜𑁂, 𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀡𑀻𑀢𑀤𑀸𑀬𑀓𑀸𑀦𑀁 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀸𑀦𑀜𑁆𑀘 𑀯𑀡𑁆𑀡𑀓𑀣𑀦𑀸𑀤𑀻𑀳𑀺 𑀇𑀫𑁂𑀲𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀁 𑀪𑀺𑀦𑁆𑀤𑁂𑀬𑁆𑀬. 𑀯𑀲𑀦𑀝𑁆𑀞𑀸𑀦𑀸𑀦𑀺 𑀘𑀸𑀧𑀺 𑀏𑀢𑁂𑀲𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀦𑀺𑀩𑀤𑁆𑀥𑀸𑀦𑀺 𑀧𑀭𑀺𑀘𑁆𑀙𑀺𑀦𑁆𑀦𑀸𑀦𑀺 𑀢𑀺𑀲𑁆𑀲𑁄 𑀘 𑀧𑀡𑁆𑀡𑀲𑀸𑀮𑀸 𑀢𑀬𑁄 𑀘𑀗𑁆𑀓𑀫𑀸 𑀢𑀻𑀡𑀺 𑀤𑀺𑀯𑀸𑀝𑁆𑀞𑀸𑀦𑀸𑀦𑀺 𑀢𑀻𑀡𑀺 𑀫𑀜𑁆𑀘𑀧𑀻𑀞𑀸𑀦𑀺. 𑀅𑀬𑀁 𑀧𑀦 𑀲𑀫𑀡𑁄 𑀫𑀳𑀸𑀓𑀸𑀬𑁄 𑀯𑀼𑀟𑁆𑀠𑀢𑀭𑁄 𑀫𑀜𑁆𑀜𑁂 𑀪𑀯𑀺𑀲𑁆𑀲𑀢𑀺. 𑀲𑁄 𑀅𑀓𑀸𑀮𑁂 𑀇𑀫𑁂 𑀓𑀼𑀮𑀧𑀼𑀢𑁆𑀢𑁂 𑀲𑁂𑀦𑀸𑀲𑀦𑀸 𑀯𑀼𑀝𑁆𑀞𑀸𑀧𑁂𑀲𑁆𑀲𑀢𑀺. 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀏𑀢𑁂𑀲𑀁 𑀅𑀨𑀸𑀲𑀼 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀁 𑀅𑀦𑀺𑀘𑁆𑀙𑀦𑁆𑀢𑁄, ‘‘𑀫𑀸 𑀢𑁂𑀲𑀁 𑀅𑀨𑀸𑀲𑀼𑀓𑀫𑀓𑀸𑀲𑀻’’𑀢𑀺 𑀪𑀕𑀯𑀦𑁆𑀢𑀁 𑀯𑀸𑀭𑁂𑀲𑀺.

𑀓𑀺𑀁 𑀧𑀦𑁂𑀲 𑀚𑀸𑀦𑀦𑁆𑀢𑁄 𑀯𑀸𑀭𑁂𑀲𑀺, 𑀅𑀚𑀸𑀦𑀦𑁆𑀢𑁄𑀢𑀺? 𑀅𑀚𑀸𑀦𑀦𑁆𑀢𑁄. 𑀓𑀺𑀜𑁆𑀘𑀸𑀧𑀺 𑀳𑀺 𑀢𑀣𑀸𑀕𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀓𑀫𑁆𑀧𑀦𑀸𑀤𑀻𑀦𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀧𑀯𑀢𑁆𑀢𑀺𑀁𑀲𑀼, 𑀅𑀭𑀜𑁆𑀜𑀯𑀸𑀲𑀺𑀦𑁄 𑀧𑀦 𑀤𑀼𑀩𑁆𑀩𑀮𑀫𑀦𑀼𑀲𑁆𑀲𑀸 𑀲𑀓𑀫𑁆𑀫𑀧𑁆𑀧𑀲𑀼𑀢𑀸 𑀢𑀸𑀦𑀺 𑀲𑀮𑁆𑀮𑀓𑁆𑀔𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀘 𑀦𑀸𑀫 𑀬𑀤𑀸 𑀅𑀦𑁂𑀓𑀪𑀺𑀓𑁆𑀔𑀼𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀩𑁆𑀬𑀸𑀫𑀧𑁆𑀧𑀪𑀸𑀬 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑁂𑀳𑀺 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀲𑀺𑀭𑀺𑀬𑀸 𑀘 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀘𑀭𑀢𑀺, 𑀢𑀤𑀸 𑀓𑁄 𑀏𑀲𑁄𑀢𑀺 𑀅𑀧𑀼𑀘𑁆𑀙𑀺𑀢𑁆𑀯𑀸𑀯 𑀚𑀸𑀦𑀺𑀢𑀩𑁆𑀩𑁄 𑀳𑁄𑀢𑀺. 𑀢𑀤𑀸 𑀧𑀦 𑀪𑀕𑀯𑀸 𑀲𑀩𑁆𑀩𑀫𑁆𑀧𑀺 𑀢𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀘𑀻𑀯𑀭𑀕𑀩𑁆𑀪𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀮𑀸𑀳𑀓𑀕𑀩𑁆𑀪𑁂𑀦 𑀧𑀝𑀺𑀘𑁆𑀙𑀦𑁆𑀦𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀲𑀬𑀫𑁂𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀅𑀕𑀫𑀸𑀲𑀺. 𑀇𑀢𑀺 𑀦𑀁 𑀅𑀚𑀸𑀦𑀦𑁆𑀢𑁄𑀯 𑀤𑀸𑀬𑀧𑀸𑀮𑁄 𑀦𑀺𑀯𑀸𑀭𑁂𑀲𑀺.

𑀏𑀢𑀤𑀯𑁄𑀘𑀸𑀢𑀺 𑀣𑁂𑀭𑁄 𑀓𑀺𑀭 𑀫𑀸 𑀲𑀫𑀡𑀸𑀢𑀺 𑀤𑀸𑀬𑀧𑀸𑀮𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸𑀯 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀁 𑀢𑀬𑁄 𑀚𑀦𑀸 𑀇𑀥 𑀯𑀺𑀳𑀭𑀸𑀫, 𑀅𑀜𑁆𑀜𑁂 𑀧𑀩𑁆𑀩𑀚𑀺𑀢𑀸 𑀦𑀸𑀫 𑀦𑀢𑁆𑀣𑀺, 𑀅𑀬𑀜𑁆𑀘 𑀤𑀸𑀬𑀧𑀸𑀮𑁄 𑀧𑀩𑁆𑀩𑀚𑀺𑀢𑁂𑀦 𑀯𑀺𑀬 𑀲𑀤𑁆𑀥𑀺𑀁 𑀓𑀣𑁂𑀢𑀺, 𑀓𑁄 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑀺𑀯𑀸𑀝𑁆𑀞𑀸𑀦𑀢𑁄 𑀯𑀼𑀝𑁆𑀞𑀸𑀬 𑀤𑁆𑀯𑀸𑀭𑁂 𑀞𑀢𑁆𑀯𑀸 𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀪𑀕𑀯𑀦𑁆𑀢𑀁 𑀅𑀤𑁆𑀤𑀲. 𑀪𑀕𑀯𑀸𑀧𑀺 𑀣𑁂𑀭𑀲𑁆𑀲 𑀲𑀳 𑀤𑀲𑁆𑀲𑀦𑁂𑀦𑁂𑀯 𑀲𑀭𑀻𑀭𑁄𑀪𑀸𑀲𑀁 𑀫𑀼𑀜𑁆𑀘𑀺, 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀯𑀺𑀭𑀸𑀚𑀺𑀢𑀸 𑀩𑁆𑀬𑀸𑀫𑀧𑁆𑀧𑀪𑀸 𑀧𑀲𑀸𑀭𑀺𑀢𑀲𑀼𑀯𑀡𑁆𑀡𑀧𑀝𑁄 𑀯𑀺𑀬 𑀯𑀺𑀭𑁄𑀘𑀺𑀢𑁆𑀣. 𑀣𑁂𑀭𑁄, ‘‘𑀅𑀬𑀁 𑀤𑀸𑀬𑀧𑀸𑀮𑁄 𑀨𑀡𑀓𑀢𑀁 𑀆𑀲𑀺𑀯𑀺𑀲𑀁 𑀕𑀻𑀯𑀸𑀬 𑀕𑀳𑁂𑀢𑀼𑀁 𑀳𑀢𑁆𑀣𑀁 𑀧𑀲𑀸𑀭𑁂𑀦𑁆𑀢𑁄 𑀯𑀺𑀬 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑀓𑀣𑁂𑀦𑁆𑀢𑁄𑀯 𑀦 𑀚𑀸𑀦𑀸𑀢𑀺, 𑀅𑀜𑁆𑀜𑀢𑀭𑀪𑀺𑀓𑁆𑀔𑀼𑀦𑀸 𑀯𑀺𑀬 𑀲𑀤𑁆𑀥𑀺𑀁 𑀓𑀣𑁂𑀢𑀻’’𑀢𑀺 𑀦𑀺𑀯𑀸𑀭𑁂𑀦𑁆𑀢𑁄 𑀏𑀢𑀁, ‘‘𑀫𑀸, 𑀆𑀯𑀼𑀲𑁄 𑀤𑀸𑀬𑀧𑀸𑀮𑀸’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘.

𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀓𑀲𑁆𑀫𑀸 𑀪𑀕𑀯𑀢𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀅𑀓𑀢𑁆𑀯𑀸 𑀉𑀧𑀲𑀗𑁆𑀓𑀫𑀺? 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀫𑀬𑀁 𑀢𑀬𑁄 𑀚𑀦𑀸 𑀲𑀫𑀕𑁆𑀕𑀯𑀸𑀲𑀁 𑀯𑀲𑀸𑀫, 𑀲𑀘𑀸𑀳𑀁 𑀏𑀓𑀓𑁄𑀯 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀭𑀺𑀲𑁆𑀲𑀸𑀫𑀺, 𑀲𑀫𑀕𑁆𑀕𑀯𑀸𑀲𑁄 𑀦𑀸𑀫 𑀦 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀺𑀬𑀫𑀺𑀢𑁆𑀢𑁂 𑀕𑀳𑁂𑀢𑁆𑀯𑀸𑀯 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀭𑀺𑀲𑁆𑀲𑀸𑀫𑀺. 𑀬𑀣𑀸 𑀘 𑀪𑀕𑀯𑀸 𑀫𑀬𑁆𑀳𑀁 𑀧𑀺𑀬𑁄, 𑀏𑀯𑀁 𑀲𑀳𑀸𑀬𑀸𑀦𑀫𑁆𑀧𑀺 𑀫𑁂 𑀧𑀺𑀬𑁄𑀢𑀺, 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀸𑀢𑀼𑀓𑀸𑀫𑁄 𑀲𑀬𑀁 𑀅𑀓𑀢𑁆𑀯𑀸𑀯 𑀉𑀧𑀲𑀗𑁆𑀓𑀫𑀺. 𑀓𑁂𑀘𑀺 𑀧𑀦 𑀢𑁂𑀲𑀁 𑀣𑁂𑀭𑀸𑀦𑀁 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀘𑀗𑁆𑀓𑀫𑀦𑀓𑁄𑀝𑀺𑀬𑀸 𑀪𑀕𑀯𑀢𑁄 𑀆𑀕𑀫𑀦𑀫𑀕𑁆𑀕𑁄 𑀳𑁄𑀢𑀺, 𑀢𑀲𑁆𑀫𑀸 𑀣𑁂𑀭𑁄 𑀢𑁂𑀲𑀁 𑀲𑀜𑁆𑀜𑀁 𑀤𑀤𑀫𑀸𑀦𑁄𑀯 𑀕𑀢𑁄𑀢𑀺. 𑀅𑀪𑀺𑀓𑁆𑀓𑀫𑀣𑀸𑀢𑀺 𑀇𑀢𑁄 𑀆𑀕𑀘𑁆𑀙𑀣. 𑀧𑀸𑀤𑁂 𑀧𑀓𑁆𑀔𑀸𑀮𑁂𑀲𑀻𑀢𑀺 𑀯𑀺𑀓𑀲𑀺𑀢𑀧𑀤𑀼𑀫𑀲𑀦𑁆𑀦𑀺𑀪𑁂𑀳𑀺 𑀚𑀸𑀮𑀳𑀢𑁆𑀣𑁂𑀳𑀺 𑀫𑀡𑀺𑀯𑀡𑁆𑀡𑀁 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀲𑀼𑀯𑀡𑁆𑀡𑀯𑀡𑁆𑀡𑁂𑀲𑀼 𑀧𑀺𑀝𑁆𑀞𑀺𑀧𑀸𑀤𑁂𑀲𑀼 𑀉𑀤𑀓𑀫𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀧𑀸𑀤𑁂𑀦 𑀧𑀸𑀤𑀁 𑀖𑀁𑀲𑀦𑁆𑀢𑁄 𑀧𑀓𑁆𑀔𑀸𑀮𑁂𑀲𑀺. 𑀩𑀼𑀤𑁆𑀥𑀸𑀦𑀁 𑀓𑀸𑀬𑁂 𑀭𑀚𑁄𑀚𑀮𑁆𑀮𑀁 𑀦𑀸𑀫 𑀦 𑀉𑀧𑀮𑀺𑀫𑁆𑀧𑀢𑀺, 𑀓𑀲𑁆𑀫𑀸 𑀧𑀓𑁆𑀔𑀸𑀮𑁂𑀲𑀻𑀢𑀺? 𑀲𑀭𑀻𑀭𑀲𑁆𑀲 𑀉𑀢𑀼𑀕𑁆𑀕𑀳𑀡𑀢𑁆𑀣𑀁, 𑀢𑁂𑀲𑀜𑁆𑀘 𑀘𑀺𑀢𑁆𑀢𑀲𑀫𑁆𑀧𑀳𑀁𑀲𑀦𑀢𑁆𑀣𑀁. 𑀅𑀫𑁆𑀳𑁂𑀳𑀺 𑀅𑀪𑀺𑀳𑀝𑁂𑀦 𑀉𑀤𑀓𑁂𑀦 𑀪𑀕𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀲𑀺, 𑀧𑀭𑀺𑀪𑁄𑀕𑀁 𑀅𑀓𑀸𑀲𑀻𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀩𑀮𑀯𑀲𑁄𑀫𑀦𑀲𑁆𑀲𑀯𑀲𑁂𑀦 𑀘𑀺𑀢𑁆𑀢𑀁 𑀧𑀻𑀡𑀺𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀧𑀓𑁆𑀔𑀸𑀮𑁂𑀲𑀺. 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀪𑀕𑀯𑀸 𑀏𑀢𑀤𑀯𑁄𑀘𑀸𑀢𑀺 𑀲𑁄 𑀓𑀺𑀭 𑀢𑁂𑀲𑀁 𑀯𑀼𑀟𑁆𑀠𑀢𑀭𑁄.

𑁩𑁨𑁬. 𑀢𑀲𑁆𑀲 𑀲𑀗𑁆𑀕𑀳𑁂 𑀓𑀢𑁂 𑀲𑁂𑀲𑀸𑀦𑀁 𑀓𑀢𑁄𑀯 𑀳𑁄𑀢𑀻𑀢𑀺 𑀣𑁂𑀭𑀜𑁆𑀜𑁂𑀯 𑀏𑀢𑀁 𑀓𑀘𑁆𑀘𑀺 𑀯𑁄 𑀅𑀦𑀼𑀭𑀼𑀤𑁆𑀥𑀸𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀢𑀢𑁆𑀣 𑀓𑀘𑁆𑀘𑀻𑀢𑀺 𑀧𑀼𑀘𑁆𑀙𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀯𑁄𑀢𑀺 𑀲𑀸𑀫𑀺𑀯𑀘𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑀘𑁆𑀘𑀺 𑀅𑀦𑀼𑀭𑀼𑀤𑁆𑀥𑀸 𑀢𑀼𑀫𑁆𑀳𑀸𑀓𑀁 𑀔𑀫𑀦𑀻𑀬𑀁, 𑀇𑀭𑀺𑀬𑀸𑀧𑀣𑁄 𑀯𑁄 𑀔𑀫𑀢𑀺? 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀯𑁄 𑀚𑀻𑀯𑀺𑀢𑀁 𑀬𑀸𑀧𑁂𑀢𑀺 𑀖𑀝𑀺𑀬𑀢𑀺? 𑀓𑀘𑁆𑀘𑀺 𑀧𑀺𑀡𑁆𑀟𑀓𑁂𑀦 𑀦 𑀓𑀺𑀮𑀫𑀣, 𑀓𑀘𑁆𑀘𑀺 𑀢𑀼𑀫𑁆𑀳𑀸𑀓𑀁 𑀲𑀼𑀮𑀪𑀧𑀺𑀡𑁆𑀟𑀁, 𑀲𑀫𑁆𑀧𑀢𑁆𑀢𑁂 𑀯𑁄 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀉𑀴𑀼𑀗𑁆𑀓𑀬𑀸𑀕𑀼𑀁 𑀯𑀸 𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀯𑀸 𑀤𑀸𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀻𑀢𑀺 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑀁 𑀧𑀼𑀘𑁆𑀙𑀢𑀺. 𑀓𑀲𑁆𑀫𑀸? 𑀧𑀘𑁆𑀘𑀬𑁂𑀦 𑀅𑀓𑀺𑀮𑀫𑀦𑁆𑀢𑁂𑀦 𑀳𑀺 𑀲𑀓𑁆𑀓𑀸 𑀲𑀫𑀡𑀥𑀫𑁆𑀫𑁄 𑀓𑀸𑀢𑀼𑀁, 𑀯𑀢𑁆𑀢𑀫𑁂𑀯 𑀯𑀸 𑀏𑀢𑀁 𑀧𑀩𑁆𑀩𑀚𑀺𑀢𑀸𑀦𑀁. 𑀅𑀣 𑀢𑁂𑀦 𑀧𑀝𑀺𑀯𑀘𑀦𑁂 𑀤𑀺𑀦𑁆𑀦𑁂, ‘‘𑀅𑀦𑀼𑀭𑀼𑀤𑁆𑀥𑀸, 𑀢𑀼𑀫𑁆𑀳𑁂 𑀭𑀸𑀚𑀧𑀩𑁆𑀩𑀚𑀺𑀢𑀸 𑀫𑀳𑀸𑀧𑀼𑀜𑁆𑀜𑀸, 𑀫𑀦𑀼𑀲𑁆𑀲𑀸 𑀢𑀼𑀫𑁆𑀳𑀸𑀓𑀁 𑀅𑀭𑀜𑁆𑀜𑁂 𑀯𑀲𑀦𑁆𑀢𑀸𑀦𑀁 𑀅𑀤𑀢𑁆𑀯𑀸 𑀓𑀲𑁆𑀲 𑀅𑀜𑁆𑀜𑀲𑁆𑀲 𑀤𑀸𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀢𑀼𑀫𑁆𑀳𑁂 𑀧𑀦 𑀏𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀓𑀺𑀁 𑀦𑀼 𑀔𑁄 𑀫𑀺𑀕𑀧𑁄𑀢𑀓𑀸 𑀯𑀺𑀬 𑀅𑀜𑁆𑀜𑀫𑀜𑁆𑀜𑀁 𑀲𑀗𑁆𑀖𑀝𑁆𑀝𑁂𑀦𑁆𑀢𑀸 𑀯𑀺𑀳𑀭𑀣, 𑀉𑀤𑀸𑀳𑀼 𑀲𑀸𑀫𑀕𑁆𑀕𑀺𑀪𑀸𑀯𑁄 𑀯𑁄 𑀅𑀢𑁆𑀣𑀻’’𑀢𑀺 𑀲𑀸𑀫𑀕𑁆𑀕𑀺𑀭𑀲𑀁 𑀧𑀼𑀘𑁆𑀙𑀦𑁆𑀢𑁄, 𑀓𑀘𑁆𑀘𑀺 𑀧𑀦 𑀯𑁄, 𑀅𑀦𑀼𑀭𑀼𑀤𑁆𑀥𑀸, 𑀲𑀫𑀕𑁆𑀕𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀔𑀻𑀭𑁄𑀤𑀓𑀻𑀪𑀽𑀢𑀸𑀢𑀺 𑀬𑀣𑀸 𑀔𑀻𑀭𑀜𑁆𑀘 𑀉𑀤𑀓𑀜𑁆𑀘 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀦𑁆𑀤𑀢𑀺, 𑀯𑀺𑀲𑀼𑀁 𑀦 𑀳𑁄𑀢𑀺, 𑀏𑀓𑀢𑁆𑀢𑀁 𑀯𑀺𑀬 𑀉𑀧𑁂𑀢𑀺, 𑀓𑀘𑁆𑀘𑀺 𑀏𑀯𑀁 𑀲𑀸𑀫𑀕𑁆𑀕𑀺𑀯𑀲𑁂𑀦 𑀏𑀓𑀢𑁆𑀢𑀽𑀧𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀯𑀺𑀳𑀭𑀣𑀸𑀢𑀺 𑀧𑀼𑀘𑁆𑀙𑀢𑀺. 𑀧𑀺𑀬𑀘𑀓𑁆𑀔𑀽𑀳𑀻𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀑𑀮𑁄𑀓𑀦𑀘𑀓𑁆𑀔𑀽𑀦𑀺 𑀧𑀺𑀬𑀘𑀓𑁆𑀔𑀽𑀦𑀺 𑀦𑀸𑀫. 𑀓𑀘𑁆𑀘𑀺 𑀢𑀣𑀸𑀭𑀽𑀧𑁂𑀳𑀺 𑀘𑀓𑁆𑀔𑀽𑀳𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑁆𑀧𑀲𑁆𑀲𑀦𑁆𑀢𑀸 𑀯𑀺𑀳𑀭𑀣𑀸𑀢𑀺 𑀧𑀼𑀘𑁆𑀙𑀢𑀺. 𑀢𑀕𑁆𑀖𑀸𑀢𑀺 𑀏𑀓𑀁𑀲𑀢𑁆𑀣𑁂 𑀦𑀺𑀧𑀸𑀢𑁄. 𑀏𑀓𑀁𑀲𑁂𑀦 𑀫𑀬𑀁, 𑀪𑀦𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸 𑀓𑀣𑀁 𑀧𑀦𑀸𑀢𑀺 𑀏𑀢𑁆𑀣 𑀬𑀣𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀓𑀣𑀦𑁆𑀢𑀺 𑀓𑀸𑀭𑀡𑀧𑀼𑀘𑁆𑀙𑀸. 𑀓𑀣𑀁 𑀧𑀦 𑀢𑀼𑀫𑁆𑀳𑁂 𑀏𑀯𑀁 𑀯𑀺𑀳𑀭𑀣, 𑀓𑁂𑀦 𑀓𑀸𑀭𑀡𑁂𑀦 𑀯𑀺𑀳𑀭𑀣, 𑀢𑀁 𑀫𑁂 𑀓𑀸𑀭𑀡𑀁 𑀩𑁆𑀭𑀽𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀦𑁆𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑀯𑀲𑁂𑀦 𑀧𑀯𑀢𑁆𑀢𑀁 𑀓𑀸𑀬𑀓𑀫𑁆𑀫𑀁. 𑀆𑀯𑀺 𑀘𑁂𑀯 𑀭𑀳𑁄 𑀘𑀸𑀢𑀺 𑀲𑀫𑁆𑀫𑀼𑀔𑀸 𑀘𑁂𑀯 𑀧𑀭𑀫𑁆𑀫𑀼𑀔𑀸 𑀘. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 𑀲𑀫𑁆𑀫𑀼𑀔𑀸 𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀺 𑀲𑀳𑀯𑀸𑀲𑁂 𑀮𑀩𑁆𑀪𑀦𑁆𑀢𑀺, 𑀇𑀢𑀭𑀸𑀦𑀺 𑀯𑀺𑀧𑁆𑀧𑀯𑀸𑀲𑁂. 𑀫𑀦𑁄𑀓𑀫𑁆𑀫𑀁 𑀲𑀩𑁆𑀩𑀢𑁆𑀣 𑀮𑀩𑁆𑀪𑀢𑀺. 𑀬𑀜𑁆𑀳𑀺 𑀲𑀳𑀯𑀲𑀦𑁆𑀢𑁂𑀲𑀼 𑀏𑀓𑁂𑀦 𑀫𑀜𑁆𑀘𑀧𑀻𑀞𑀁 𑀯𑀸 𑀤𑀸𑀭𑀼𑀪𑀡𑁆𑀟𑀁 𑀯𑀸 𑀫𑀢𑁆𑀢𑀺𑀓𑀸𑀪𑀡𑁆𑀟𑀁 𑀯𑀸 𑀩𑀳𑀺 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀢𑀁 𑀤𑀺𑀲𑁆𑀯𑀸 𑀓𑁂𑀦𑀺𑀤𑀁 𑀯𑀴𑀜𑁆𑀚𑀺𑀢𑀦𑁆𑀢𑀺 𑀅𑀯𑀜𑁆𑀜𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑀸 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀁 𑀯𑀺𑀬 𑀕𑀳𑁂𑀢𑁆𑀯𑀸 𑀧𑀝𑀺𑀲𑀸𑀫𑁂𑀦𑁆𑀢𑀲𑁆𑀲 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀬𑀼𑀢𑁆𑀢𑀁 𑀯𑀸 𑀧𑀦 𑀞𑀸𑀦𑀁 𑀧𑀝𑀺𑀚𑀕𑁆𑀕𑀦𑁆𑀢𑀲𑁆𑀲 𑀲𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺. 𑀏𑀓𑀲𑁆𑀫𑀺𑀁 𑀧𑀓𑁆𑀓𑀦𑁆𑀢𑁂 𑀢𑁂𑀦 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀁 𑀲𑁂𑀦𑀸𑀲𑀦𑀧𑀭𑀺𑀓𑁆𑀔𑀸𑀭𑀁 𑀢𑀣𑁂𑀯 𑀦𑀺𑀓𑁆𑀔𑀺𑀧𑀦𑁆𑀢𑀲𑁆𑀲 𑀧𑀝𑀺𑀚𑀕𑁆𑀕𑀺𑀢𑀩𑁆𑀩𑀬𑀼𑀢𑁆𑀢𑀝𑁆𑀞𑀸𑀦𑀁 𑀯𑀸 𑀧𑀦 𑀧𑀝𑀺𑀚𑀕𑁆𑀕𑀦𑁆𑀢𑀲𑁆𑀲 𑀧𑀭𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺. 𑀲𑀳𑀯𑀲𑀦𑁆𑀢𑀲𑁆𑀲 𑀧𑀦 𑀢𑁂𑀳𑀺 𑀲𑀤𑁆𑀥𑀺𑀁 𑀫𑀥𑀼𑀭𑀁 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀧𑀝𑀺𑀲𑀦𑁆𑀣𑀸𑀭𑀓𑀣𑀁 𑀲𑀸𑀭𑀡𑀻𑀬𑀓𑀣𑀁 𑀥𑀫𑁆𑀫𑀻𑀓𑀣𑀁 𑀲𑀭𑀪𑀜𑁆𑀜𑀁 𑀲𑀸𑀓𑀘𑁆𑀙𑀁 𑀧𑀜𑁆𑀳𑀧𑀼𑀘𑁆𑀙𑀦𑀁 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀏𑀯𑀫𑀸𑀤𑀺𑀓𑀭𑀡𑁂 𑀲𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺. 𑀣𑁂𑀭𑁂𑀲𑀼 𑀧𑀦 𑀧𑀓𑁆𑀓𑀦𑁆𑀢𑁂𑀲𑀼 𑀫𑀬𑁆𑀳𑀁 𑀧𑀺𑀬𑀲𑀳𑀸𑀬𑁄 𑀦𑀦𑁆𑀤𑀺𑀬𑀢𑁆𑀣𑁂𑀭𑁄 𑀓𑀺𑀫𑀺𑀮𑀢𑁆𑀣𑁂𑀭𑁄 𑀏𑀯𑀁 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀏𑀯𑀁 𑀆𑀘𑀸𑀭𑀲𑀫𑁆𑀧𑀦𑁆𑀦𑁄𑀢𑀺𑀆𑀤𑀺𑀕𑀼𑀡𑀓𑀣𑀦𑀁 𑀧𑀭𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫 𑀳𑁄𑀢𑀺. 𑀫𑀬𑁆𑀳𑀁 𑀧𑀺𑀬𑀫𑀺𑀢𑁆𑀢𑁄 𑀦𑀦𑁆𑀤𑀺𑀬𑀢𑁆𑀣𑁂𑀭𑁄 𑀓𑀺𑀫𑀺𑀮𑀢𑁆𑀣𑁂𑀭𑁄 𑀅𑀯𑁂𑀭𑁄 𑀳𑁄𑀢𑀼, 𑀅𑀩𑁆𑀬𑀸𑀧𑀚𑁆𑀚𑁄 𑀲𑀼𑀔𑀻 𑀳𑁄𑀢𑀽𑀢𑀺 𑀏𑀯𑀁 𑀲𑀫𑀦𑁆𑀦𑀸𑀳𑀭𑀢𑁄 𑀧𑀦 𑀲𑀫𑁆𑀫𑀼𑀔𑀸𑀧𑀺 𑀧𑀭𑀫𑁆𑀫𑀼𑀔𑀸𑀧𑀺 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀳𑁄𑀢𑀺𑀬𑁂𑀯.

𑀦𑀸𑀦𑀸 𑀳𑀺 𑀔𑁄 𑀦𑁄, 𑀪𑀦𑁆𑀢𑁂, 𑀓𑀸𑀬𑀸𑀢𑀺 𑀓𑀸𑀬𑀜𑁆𑀳𑀺 𑀧𑀺𑀝𑁆𑀞𑀁 𑀯𑀺𑀬 𑀫𑀢𑁆𑀢𑀺𑀓𑀸 𑀯𑀺𑀬 𑀘 𑀑𑀫𑀤𑁆𑀤𑀺𑀢𑁆𑀯𑀸 𑀏𑀓𑀢𑁄 𑀓𑀸𑀢𑀼𑀁 𑀦 𑀲𑀓𑁆𑀓𑀸. 𑀏𑀓𑀜𑁆𑀘 𑀧𑀦 𑀫𑀜𑁆𑀜𑁂 𑀘𑀺𑀢𑁆𑀢𑀦𑁆𑀢𑀺 𑀘𑀺𑀢𑁆𑀢𑀁 𑀧𑀦 𑀦𑁄 𑀳𑀺𑀢𑀝𑁆𑀞𑁂𑀦 𑀦𑀺𑀭𑀦𑁆𑀢𑀭𑀝𑁆𑀞𑁂𑀦 𑀅𑀯𑀺𑀕𑁆𑀕𑀳𑀝𑁆𑀞𑁂𑀦 𑀲𑀫𑀕𑁆𑀕𑀝𑁆𑀞𑁂𑀦 𑀏𑀓𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀓𑀣𑀁 𑀧𑀦𑁂𑀢𑀁 𑀲𑀓𑀁 𑀘𑀺𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀢𑀭𑁂𑀲𑀁 𑀘𑀺𑀢𑁆𑀢𑀯𑀲𑁂𑀦 𑀯𑀢𑁆𑀢𑀺𑀁𑀲𑀽𑀢𑀺? 𑀏𑀓𑀲𑁆𑀲 𑀧𑀢𑁆𑀢𑁂 𑀫𑀮𑀁 𑀉𑀝𑁆𑀞𑀳𑀢𑀺, 𑀏𑀓𑀲𑁆𑀲 𑀘𑀻𑀯𑀭𑀁 𑀓𑀺𑀮𑀺𑀝𑁆𑀞𑀁 𑀳𑁄𑀢𑀺, 𑀏𑀓𑀲𑁆𑀲 𑀧𑀭𑀺𑀪𑀡𑁆𑀟𑀓𑀫𑁆𑀫𑀁 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀲 𑀧𑀢𑁆𑀢𑁂 𑀫𑀮𑀁 𑀉𑀝𑁆𑀞𑀺𑀢𑀁, 𑀢𑁂𑀦 𑀫𑀫𑀸𑀯𑀼𑀲𑁄, 𑀧𑀢𑁆𑀢𑁂 𑀫𑀮𑀁 𑀉𑀝𑁆𑀞𑀺𑀢𑀁 𑀧𑀘𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑁂 𑀇𑀢𑀭𑁂 𑀫𑀬𑁆𑀳𑀁 𑀘𑀻𑀯𑀭𑀁 𑀓𑀺𑀮𑀺𑀝𑁆𑀞𑀁 𑀥𑁄𑀯𑀺𑀢𑀩𑁆𑀩𑀁, 𑀫𑀬𑁆𑀳𑀁 𑀧𑀭𑀺𑀪𑀡𑁆𑀟𑀁 𑀓𑀸𑀢𑀩𑁆𑀩𑀦𑁆𑀢𑀺 𑀅𑀯𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀤𑀸𑀭𑀽𑀦𑀺 𑀆𑀳𑀭𑀺𑀢𑁆𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀓𑀝𑀸𑀳𑁂 𑀧𑀭𑀺𑀪𑀡𑁆𑀟𑀁 𑀓𑀢𑁆𑀯𑀸 𑀢𑀢𑁄 𑀧𑀭𑀁 𑀘𑀻𑀯𑀭𑀁 𑀯𑀸 𑀥𑁄𑀯𑀦𑁆𑀢𑀺, 𑀧𑀭𑀺𑀪𑀡𑁆𑀟𑀁 𑀯𑀸 𑀓𑀭𑁄𑀦𑁆𑀢𑀺. 𑀫𑀫𑀸𑀯𑀼𑀲𑁄, 𑀘𑀻𑀯𑀭𑀁 𑀓𑀺𑀮𑀺𑀝𑁆𑀞𑀁 𑀥𑁄𑀯𑀺𑀢𑀼𑀁 𑀯𑀝𑁆𑀝𑀢𑀺, 𑀫𑀫 𑀧𑀡𑁆𑀡𑀲𑀸𑀮𑀸 𑀉𑀓𑁆𑀮𑀸𑀧𑀸 𑀧𑀭𑀺𑀪𑀡𑁆𑀟𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀧𑀞𑀫𑀢𑀭𑀁 𑀆𑀭𑁄𑀘𑀺𑀢𑁂𑀧𑀺 𑀏𑀲𑁂𑀯 𑀦𑀬𑁄.

𑁩𑁨𑁭. 𑀲𑀸𑀥𑀼 𑀲𑀸𑀥𑀼, 𑀅𑀦𑀼𑀭𑀼𑀤𑁆𑀥𑀸𑀢𑀺 𑀪𑀕𑀯𑀸 𑀳𑁂𑀝𑁆𑀞𑀸 𑀦 𑀘 𑀫𑀬𑀁, 𑀪𑀦𑁆𑀢𑁂, 𑀧𑀺𑀡𑁆𑀟𑀓𑁂𑀦 𑀓𑀺𑀮𑀫𑀺𑀫𑁆𑀳𑀸𑀢𑀺 𑀯𑀼𑀢𑁆𑀢𑁂 𑀦 𑀲𑀸𑀥𑀼𑀓𑀸𑀭𑀫𑀤𑀸𑀲𑀺. 𑀓𑀲𑁆𑀫𑀸? 𑀅𑀬𑀜𑁆𑀳𑀺 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀦𑀸𑀫 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀅𑀧𑀸𑀬𑀮𑁄𑀓𑁂𑀧𑀺 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂𑀧𑀺 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑁄𑀯. 𑀅𑀬𑀁 𑀧𑀦 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀬𑁂𑀪𑀼𑀬𑁆𑀬𑁂𑀦 𑀯𑀺𑀯𑀸𑀤𑀧𑀓𑁆𑀔𑀦𑁆𑀤𑁄, 𑀅𑀧𑀸𑀬𑀮𑁄𑀓𑁂 𑀤𑁂𑀯𑀫𑀦𑀼𑀲𑁆𑀲𑀮𑁄𑀓𑁂𑀧𑀺 𑀇𑀫𑁂 𑀲𑀢𑁆𑀢𑀸 𑀧𑀝𑀺𑀯𑀺𑀭𑀼𑀤𑁆𑀥𑀸 𑀏𑀯, 𑀏𑀢𑁂𑀲𑀁 𑀲𑀸𑀫𑀕𑁆𑀕𑀺𑀓𑀸𑀮𑁄 𑀤𑀼𑀮𑁆𑀮𑀪𑁄, 𑀓𑀤𑀸𑀘𑀺𑀤𑁂𑀯 𑀳𑁄𑀢𑀻𑀢𑀺 𑀲𑀫𑀕𑁆𑀕𑀯𑀸𑀲𑀲𑁆𑀲 𑀤𑀼𑀮𑁆𑀮𑀪𑀢𑁆𑀢𑀸 𑀇𑀥 𑀪𑀕𑀯𑀸 𑀲𑀸𑀥𑀼𑀓𑀸𑀭𑀫𑀤𑀸𑀲𑀺. 𑀇𑀤𑀸𑀦𑀺 𑀢𑁂𑀲𑀁 𑀅𑀧𑁆𑀧𑀫𑀸𑀤𑀮𑀓𑁆𑀔𑀡𑀁 𑀧𑀼𑀘𑁆𑀙𑀦𑁆𑀢𑁄 𑀓𑀘𑁆𑀘𑀺 𑀧𑀦 𑀯𑁄, 𑀅𑀦𑀼𑀭𑀼𑀤𑁆𑀥𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁 𑀯𑀸, 𑀓𑀘𑁆𑀘𑀺 𑀢𑀼𑀫𑁆𑀳𑁂𑀢𑀺 𑀅𑀢𑁆𑀣𑁄. 𑀅𑀫𑁆𑀳𑀸𑀓𑀦𑁆𑀢𑀺 𑀅𑀫𑁆𑀳𑁂𑀲𑀼 𑀢𑀻𑀲𑀼 𑀚𑀦𑁂𑀲𑀼. 𑀧𑀺𑀡𑁆𑀟𑀸𑀬 𑀧𑀝𑀺𑀓𑁆𑀓𑀫𑀢𑀻𑀢𑀺 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀘𑀸𑀕𑀘𑁆𑀙𑀢𑀺. 𑀅𑀯𑀓𑁆𑀓𑀸𑀭𑀧𑀸𑀢𑀺𑀦𑁆𑀢𑀺 𑀅𑀢𑀺𑀭𑁂𑀓𑀧𑀺𑀡𑁆𑀟𑀧𑀸𑀢𑀁 𑀅𑀧𑀦𑁂𑀢𑁆𑀯𑀸 𑀞𑀧𑀦𑀢𑁆𑀣𑀸𑀬 𑀏𑀓𑀁 𑀲𑀫𑀼𑀕𑁆𑀕𑀧𑀸𑀢𑀺𑀁 𑀥𑁄𑀯𑀺𑀢𑁆𑀯𑀸 𑀞𑀧𑁂𑀢𑀺.

𑀬𑁄 𑀧𑀘𑁆𑀙𑀸𑀢𑀺 𑀢𑁂 𑀓𑀺𑀭 𑀣𑁂𑀭𑀸 𑀦 𑀏𑀓𑀢𑁄𑀯 𑀪𑀺𑀓𑁆𑀔𑀸𑀘𑀸𑀭𑀁 𑀧𑀯𑀺𑀲𑀦𑁆𑀢𑀺, 𑀨𑀮𑀲𑀫𑀸𑀧𑀢𑁆𑀢𑀺𑀭𑀢𑀸 𑀳𑁂𑀢𑁂. 𑀧𑀸𑀢𑁄𑀯 𑀲𑀭𑀻𑀭𑀧𑁆𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀯𑀢𑁆𑀢𑀧𑁆𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀢𑁆𑀯𑀸 𑀲𑁂𑀦𑀸𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺. 𑀢𑁂𑀲𑀼 𑀬𑁄 𑀧𑀞𑀫𑀢𑀭𑀁 𑀦𑀺𑀲𑀺𑀦𑁆𑀦𑁄 𑀅𑀢𑁆𑀢𑀦𑁄 𑀓𑀸𑀮𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀧𑀞𑀫𑀢𑀭𑀁 𑀉𑀝𑁆𑀞𑀸𑀢𑀺; 𑀲𑁄 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑁄 𑀪𑀢𑁆𑀢𑀓𑀺𑀘𑁆𑀘𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀚𑀸𑀦𑀸𑀢𑀺 𑁋 ‘‘𑀤𑁆𑀯𑁂 𑀪𑀺𑀓𑁆𑀔𑀽 𑀧𑀘𑁆𑀙𑀸, 𑀅𑀳𑀁 𑀧𑀞𑀫𑀢𑀭𑀁 𑀆𑀕𑀢𑁄’’𑀢𑀺. 𑀅𑀣 𑀧𑀢𑁆𑀢𑀁 𑀧𑀺𑀤𑀳𑀺𑀢𑁆𑀯𑀸 𑀆𑀲𑀦𑀧𑀜𑁆𑀜𑀸𑀧𑀦𑀸𑀤𑀻𑀦𑀺 𑀓𑀢𑁆𑀯𑀸 𑀬𑀤𑀺 𑀧𑀢𑁆𑀢𑁂 𑀧𑀝𑀺𑀯𑀺𑀲𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀢𑀺. 𑀬𑀤𑀺 𑀅𑀢𑀺𑀭𑁂𑀓𑀁 𑀳𑁄𑀢𑀺, 𑀅𑀯𑀓𑁆𑀓𑀸𑀭𑀧𑀸𑀢𑀺𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀸𑀢𑀺𑀁 𑀧𑀺𑀥𑀸𑀬 𑀪𑀼𑀜𑁆𑀚𑀢𑀺. 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀯𑁄𑀤𑀓𑀁 𑀓𑀢𑁆𑀯𑀸 𑀣𑀯𑀺𑀓𑀸𑀬 𑀑𑀲𑀸𑀧𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀢𑀺. 𑀤𑀼𑀢𑀺𑀬𑁄𑀧𑀺 𑀆𑀕𑀦𑁆𑀢𑁆𑀯𑀸𑀯 𑀚𑀸𑀦𑀸𑀢𑀺 𑁋 ‘‘𑀏𑀓𑁄 𑀧𑀞𑀫𑀁 𑀆𑀕𑀢𑁄, 𑀏𑀓𑁄 𑀧𑀘𑁆𑀙𑀢𑁄’’𑀢𑀺. 𑀲𑁄 𑀲𑀘𑁂 𑀧𑀢𑁆𑀢𑁂 𑀪𑀢𑁆𑀢𑀁 𑀧𑀫𑀸𑀡𑀫𑁂𑀯 𑀳𑁄𑀢𑀺, 𑀪𑀼𑀜𑁆𑀚𑀢𑀺. 𑀲𑀘𑁂 𑀫𑀦𑁆𑀤𑀁, 𑀅𑀯𑀓𑁆𑀓𑀸𑀭𑀧𑀸𑀢𑀺𑀢𑁄 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀢𑀺. 𑀲𑀘𑁂 𑀅𑀢𑀺𑀭𑁂𑀓𑀁 𑀳𑁄𑀢𑀺, 𑀅𑀯𑀓𑁆𑀓𑀸𑀭𑀧𑀸𑀢𑀺𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀫𑀸𑀡𑀫𑁂𑀯 𑀪𑀼𑀜𑁆𑀚𑀺𑀢𑁆𑀯𑀸 𑀧𑀼𑀭𑀺𑀫𑀢𑁆𑀣𑁂𑀭𑁄 𑀯𑀺𑀬 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀢𑀺. 𑀢𑀢𑀺𑀬𑁄𑀧𑀺 𑀆𑀕𑀦𑁆𑀢𑁆𑀯𑀸𑀯 𑀚𑀸𑀦𑀸𑀢𑀺 𑁋 ‘‘𑀤𑁆𑀯𑁂 𑀧𑀞𑀫𑀁 𑀆𑀕𑀢𑀸, 𑀅𑀳𑀁 𑀧𑀘𑁆𑀙𑀢𑁄’’𑀢𑀺. 𑀲𑁄𑀧𑀺 𑀤𑀼𑀢𑀺𑀬𑀢𑁆𑀣𑁂𑀭𑁄 𑀯𑀺𑀬 𑀪𑀼𑀜𑁆𑀚𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀯𑁄𑀤𑀓𑀁 𑀓𑀢𑁆𑀯𑀸 𑀣𑀯𑀺𑀓𑀸𑀬 𑀑𑀲𑀸𑀧𑁂𑀢𑁆𑀯𑀸 𑀆𑀲𑀦𑀸𑀦𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑀺; 𑀧𑀸𑀦𑀻𑀬𑀖𑀝𑁂 𑀯𑀸 𑀧𑀭𑀺𑀪𑁄𑀚𑀦𑀻𑀬𑀖𑀝𑁂 𑀯𑀸 𑀅𑀯𑀲𑁂𑀲𑀁 𑀉𑀤𑀓𑀁 𑀙𑀟𑁆𑀟𑁂𑀢𑁆𑀯𑀸 𑀖𑀝𑁂 𑀦𑀺𑀓𑀼𑀚𑁆𑀚𑀺𑀢𑁆𑀯𑀸 𑀅𑀯𑀓𑁆𑀓𑀸𑀭𑀧𑀸𑀢𑀺𑀬𑀁 𑀲𑀘𑁂 𑀅𑀯𑀲𑁂𑀲𑀪𑀢𑁆𑀢𑀁 𑀳𑁄𑀢𑀺, 𑀢𑀁 𑀯𑀼𑀢𑁆𑀢𑀦𑀬𑁂𑀦 𑀚𑀳𑀺𑀢𑁆𑀯𑀸 𑀧𑀸𑀢𑀺𑀁 𑀥𑁄𑀯𑀺𑀢𑁆𑀯𑀸 𑀧𑀝𑀺𑀲𑀸𑀫𑁂𑀢𑀺; 𑀪𑀢𑁆𑀢𑀕𑁆𑀕𑀁 𑀲𑀫𑁆𑀫𑀚𑁆𑀚𑀢𑀺. 𑀢𑀢𑁄 𑀓𑀘𑀯𑀭𑀁 𑀙𑀟𑁆𑀟𑁂𑀢𑁆𑀯𑀸 𑀲𑀫𑁆𑀫𑀚𑁆𑀚𑀦𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀘𑀺𑀓𑀸𑀳𑀺 𑀫𑀼𑀢𑁆𑀢𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀢𑀺. 𑀇𑀤𑀁 𑀣𑁂𑀭𑀸𑀦𑀁 𑀩𑀳𑀺𑀯𑀺𑀳𑀸𑀭𑁂 𑀅𑀭𑀜𑁆𑀜𑁂 𑀪𑀢𑁆𑀢𑀓𑀺𑀘𑁆𑀘𑀓𑀭𑀡𑀝𑁆𑀞𑀸𑀦𑁂 𑀪𑁄𑀚𑀦𑀲𑀸𑀮𑀸𑀬𑀁 𑀯𑀢𑁆𑀢𑀁. 𑀇𑀤𑀁 𑀲𑀦𑁆𑀥𑀸𑀬, ‘‘𑀬𑁄 𑀧𑀘𑁆𑀙𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀬𑁄 𑀧𑀲𑁆𑀲𑀢𑀻𑀢𑀺𑀆𑀤𑀺 𑀧𑀦 𑀦𑁂𑀲𑀁 𑀅𑀦𑁆𑀢𑁄𑀯𑀺𑀳𑀸𑀭𑁂 𑀯𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀯𑀘𑁆𑀘𑀖𑀝𑀦𑁆𑀢𑀺 𑀆𑀘𑀫𑀦𑀓𑀼𑀫𑁆𑀪𑀺𑀁. 𑀭𑀺𑀢𑁆𑀢𑀦𑁆𑀢𑀺 𑀭𑀺𑀢𑁆𑀢𑀓𑀁. 𑀢𑀼𑀘𑁆𑀙𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀯𑀺𑀲𑀬𑁆𑀳𑀦𑁆𑀢𑀺 𑀉𑀓𑁆𑀔𑀺𑀧𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁, 𑀅𑀢𑀺𑀪𑀸𑀭𑀺𑀬𑀁. 𑀳𑀢𑁆𑀣𑀯𑀺𑀓𑀸𑀭𑁂𑀦𑀸𑀢𑀺 𑀳𑀢𑁆𑀣𑀲𑀜𑁆𑀜𑀸𑀬. 𑀢𑁂 𑀓𑀺𑀭 𑀧𑀸𑀦𑀻𑀬𑀖𑀝𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺 𑀢𑀼𑀘𑁆𑀙𑀓𑀁 𑀕𑀳𑁂𑀢𑁆𑀯𑀸 𑀧𑁄𑀓𑁆𑀔𑀭𑀡𑀺𑀁 𑀕𑀦𑁆𑀢𑁆𑀯𑀸 𑀅𑀦𑁆𑀢𑁄 𑀘 𑀩𑀳𑀺 𑀘 𑀥𑁄𑀯𑀺𑀢𑁆𑀯𑀸 𑀉𑀤𑀓𑀁 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀢𑀻𑀭𑁂 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀳𑀢𑁆𑀣𑀯𑀺𑀓𑀸𑀭𑁂𑀦 𑀆𑀫𑀦𑁆𑀢𑁂𑀦𑁆𑀢𑀺, 𑀑𑀤𑀺𑀲𑁆𑀲 𑀯𑀸 𑀅𑀦𑁄𑀤𑀺𑀲𑁆𑀲 𑀯𑀸 𑀲𑀤𑁆𑀤𑀁 𑀦 𑀓𑀭𑁄𑀦𑁆𑀢𑀺. 𑀓𑀲𑁆𑀫𑀸 𑀑𑀤𑀺𑀲𑁆𑀲 𑀲𑀤𑁆𑀤𑀁 𑀦 𑀓𑀭𑁄𑀦𑁆𑀢𑀺? 𑀢𑀁 𑀪𑀺𑀓𑁆𑀔𑀼𑀁 𑀲𑀤𑁆𑀤𑁄 𑀩𑀸𑀥𑁂𑀬𑁆𑀬𑀸𑀢𑀺. 𑀓𑀲𑁆𑀫𑀸 𑀅𑀦𑁄𑀤𑀺𑀲𑁆𑀲 𑀲𑀤𑁆𑀤𑀁 𑀦 𑀓𑀭𑁄𑀦𑁆𑀢𑀺? 𑀅𑀦𑁄𑀤𑀺𑀲𑁆𑀲 𑀲𑀤𑁆𑀤𑁂 𑀤𑀺𑀦𑁆𑀦𑁂, ‘‘𑀅𑀳𑀁 𑀧𑀼𑀭𑁂, 𑀅𑀳𑀁 𑀧𑀼𑀭𑁂’’𑀢𑀺 𑀤𑁆𑀯𑁂𑀧𑀺 𑀦𑀺𑀓𑁆𑀔𑀫𑁂𑀬𑁆𑀬𑀼𑀁, 𑀢𑀢𑁄 𑀤𑁆𑀯𑀻𑀳𑀺 𑀓𑀢𑁆𑀢𑀩𑁆𑀩𑀓𑀫𑁆𑀫𑁂 𑀢𑀢𑀺𑀬𑀲𑁆𑀲 𑀓𑀫𑁆𑀫𑀘𑁆𑀙𑁂𑀤𑁄 𑀪𑀯𑁂𑀬𑁆𑀬. 𑀲𑀁𑀬𑀢𑀧𑀤𑀲𑀤𑁆𑀤𑁄 𑀧𑀦 𑀳𑀼𑀢𑁆𑀯𑀸 𑀅𑀧𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀺𑀯𑀸𑀝𑁆𑀞𑀸𑀦𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑁂𑀦 𑀤𑀺𑀝𑁆𑀞𑀪𑀸𑀯𑀁 𑀜𑀢𑁆𑀯𑀸 𑀳𑀢𑁆𑀣𑀲𑀜𑁆𑀜𑀁 𑀓𑀭𑁄𑀢𑀺, 𑀢𑀸𑀬 𑀲𑀜𑁆𑀜𑀸𑀬 𑀇𑀢𑀭𑁄 𑀆𑀕𑀘𑁆𑀙𑀢𑀺, 𑀢𑀢𑁄 𑀤𑁆𑀯𑁂 𑀚𑀦𑀸 𑀳𑀢𑁆𑀣𑁂𑀦 𑀳𑀢𑁆𑀣𑀁 𑀲𑀁𑀲𑀺𑀩𑁆𑀩𑀦𑁆𑀢𑀸 𑀤𑁆𑀯𑀻𑀲𑀼 𑀳𑀢𑁆𑀣𑁂𑀲𑀼 𑀞𑀧𑁂𑀢𑁆𑀯𑀸 𑀉𑀧𑀝𑁆𑀞𑀧𑁂𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀳𑀢𑁆𑀣𑀯𑀺𑀓𑀸𑀭𑁂𑀦 𑀤𑀼𑀢𑀺𑀬𑀁 𑀆𑀫𑀦𑁆𑀢𑁂𑀢𑁆𑀯𑀸 𑀳𑀢𑁆𑀣𑀯𑀺𑀮𑀗𑁆𑀖𑀓𑁂𑀦 𑀉𑀧𑀝𑁆𑀞𑀧𑁂𑀫𑀸’’𑀢𑀺.

𑀧𑀜𑁆𑀘𑀸𑀳𑀺𑀓𑀁 𑀔𑁄 𑀧𑀦𑀸𑀢𑀺 𑀘𑀸𑀢𑀼𑀤𑁆𑀤𑀲𑁂 𑀧𑀦𑁆𑀦𑀭𑀲𑁂 𑀅𑀝𑁆𑀞𑀫𑀺𑀬𑀦𑁆𑀢𑀺 𑀇𑀤𑀁 𑀢𑀸𑀯 𑀧𑀓𑀢𑀺𑀥𑀫𑁆𑀫𑀲𑁆𑀲𑀯𑀦𑀫𑁂𑀯, 𑀢𑀁 𑀅𑀔𑀡𑁆𑀟𑀁 𑀓𑀢𑁆𑀯𑀸 𑀧𑀜𑁆𑀘𑀫𑁂 𑀧𑀜𑁆𑀘𑀫𑁂 𑀤𑀺𑀯𑀲𑁂 𑀤𑁆𑀯𑁂 𑀣𑁂𑀭𑀸 𑀦𑀸𑀢𑀺𑀯𑀺𑀓𑀸𑀮𑁂 𑀦𑁆𑀳𑀸𑀬𑀺𑀢𑁆𑀯𑀸 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀢𑀬𑁄𑀧𑀺 𑀦𑀺𑀲𑀻𑀤𑀺𑀢𑁆𑀯𑀸 𑀢𑀺𑀡𑁆𑀡𑀁 𑀧𑀺𑀝𑀓𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀅𑀜𑁆𑀜𑀫𑀜𑁆𑀜𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, 𑀢𑁂𑀲𑀁 𑀏𑀯𑀁 𑀓𑀭𑁄𑀦𑁆𑀢𑀸𑀦𑀁𑀬𑁂𑀯 𑀅𑀭𑀼𑀡𑀁 𑀉𑀕𑁆𑀕𑀘𑁆𑀙𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀏𑀢𑁆𑀢𑀸𑀯𑀢𑀸 𑀣𑁂𑀭𑁂𑀦 𑀪𑀕𑀯𑀢𑀸 𑀅𑀧𑁆𑀧𑀫𑀸𑀤𑀮𑀓𑁆𑀔𑀡𑀁 𑀧𑀼𑀘𑁆𑀙𑀺𑀢𑁂𑀦 𑀧𑀫𑀸𑀤𑀝𑁆𑀞𑀸𑀦𑁂𑀲𑀼𑀬𑁂𑀯 𑀅𑀧𑁆𑀧𑀫𑀸𑀤𑀮𑀓𑁆𑀔𑀡𑀁 𑀯𑀺𑀲𑁆𑀲𑀚𑁆𑀚𑀺𑀢𑀁 𑀳𑁄𑀢𑀺. 𑀅𑀜𑁆𑀜𑁂𑀲𑀜𑁆𑀳𑀺 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀸𑀘𑀸𑀭𑀁 𑀧𑀯𑀺𑀲𑀦𑀓𑀸𑀮𑁄, 𑀦𑀺𑀓𑁆𑀔𑀫𑀦𑀓𑀸𑀮𑁄, 𑀦𑀺𑀯𑀸𑀲𑀦𑀧𑀭𑀺𑀯𑀢𑁆𑀢𑀦𑀁, 𑀘𑀻𑀯𑀭𑀧𑀸𑀭𑀼𑀧𑀦𑀁, 𑀅𑀦𑁆𑀢𑁄𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀡𑀁 𑀥𑀫𑁆𑀫𑀓𑀣𑀦𑀁, 𑀅𑀦𑀼𑀫𑁄𑀤𑀦𑀁, 𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀓𑀭𑀡𑀁, 𑀧𑀢𑁆𑀢𑀥𑁄𑀯𑀦𑀁, 𑀧𑀢𑁆𑀢𑀑𑀲𑀸𑀧𑀦𑀁, 𑀧𑀢𑁆𑀢𑀘𑀻𑀯𑀭𑀧𑀝𑀺𑀲𑀸𑀫𑀦𑀦𑁆𑀢𑀺 𑀧𑀧𑀜𑁆𑀘𑀓𑀭𑀡𑀝𑁆𑀞𑀸𑀦𑀸𑀦𑀺 𑀏𑀢𑀸𑀦𑀺. 𑀢𑀲𑁆𑀫𑀸 𑀣𑁂𑀭𑁄 𑀅𑀫𑁆𑀳𑀸𑀓𑀁 𑀏𑀢𑁆𑀢𑀓𑀁 𑀞𑀸𑀦𑀁 𑀫𑀼𑀜𑁆𑀘𑀺𑀢𑁆𑀯𑀸 𑀧𑀫𑀸𑀤𑀓𑀸𑀮𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀧𑀫𑀸𑀤𑀝𑁆𑀞𑀸𑀦𑁂𑀲𑀼𑀬𑁂𑀯 𑀅𑀧𑁆𑀧𑀫𑀸𑀤𑀮𑀓𑁆𑀔𑀡𑀁 𑀯𑀺𑀲𑁆𑀲𑀚𑁆𑀚𑁂𑀲𑀺.

𑁩𑁨𑁮. 𑀅𑀣𑀲𑁆𑀲 𑀪𑀕𑀯𑀸 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀁 𑀧𑀼𑀘𑁆𑀙𑀦𑁆𑀢𑁄 𑀧𑀼𑀦 𑀅𑀢𑁆𑀣𑀺 𑀧𑀦 𑀯𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸𑀢𑀺 𑀫𑀦𑀼𑀲𑁆𑀲𑀥𑀫𑁆𑀫𑀢𑁄 𑀉𑀢𑁆𑀢𑀭𑀺. 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄𑀢𑀺 𑀅𑀭𑀺𑀬𑀪𑀸𑀯𑀓𑀭𑀡𑀲𑀫𑀢𑁆𑀣𑁄 𑀜𑀸𑀡𑀯𑀺𑀲𑁂𑀲𑁄. 𑀓𑀺𑀜𑁆𑀳𑀺 𑀦𑁄 𑀲𑀺𑀬𑀸, 𑀪𑀦𑁆𑀢𑁂𑀢𑀺 𑀓𑀲𑁆𑀫𑀸, 𑀪𑀦𑁆𑀢𑁂, 𑀦𑀸𑀥𑀺𑀕𑀢𑁄 𑀪𑀯𑀺𑀲𑁆𑀲𑀢𑀺, 𑀅𑀥𑀺𑀕𑀢𑁄𑀬𑁂𑀯𑀸𑀢𑀺. 𑀬𑀸𑀯 𑀤𑁂𑀯𑀸𑀢𑀺 𑀬𑀸𑀯 𑀏𑀯.

𑁩𑁨𑁯. 𑀏𑀯𑀁 𑀧𑀞𑀫𑀚𑁆𑀛𑀸𑀦𑀸𑀥𑀺𑀕𑀫𑁂 𑀩𑁆𑀬𑀸𑀓𑀢𑁂 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀺 𑀧𑀼𑀘𑁆𑀙𑀦𑁆𑀢𑁄 𑀏𑀢𑀲𑁆𑀲 𑀧𑀦 𑀯𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀫𑀢𑀺𑀓𑁆𑀓𑀫𑀸𑀬𑀸𑀢𑀺 𑀲𑀫𑀢𑀺𑀓𑁆𑀓𑀫𑀢𑁆𑀣𑀸𑀬. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸𑀢𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀣𑀸𑀬. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀧𑀘𑁆𑀙𑀺𑀫𑀧𑀜𑁆𑀳𑁂 𑀧𑀦 𑀮𑁄𑀓𑀼𑀢𑁆𑀢𑀭𑀜𑀸𑀡𑀤𑀲𑁆𑀲𑀦𑀯𑀲𑁂𑀦 𑀅𑀥𑀺𑀕𑀢𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀧𑀼𑀘𑁆𑀙𑀦𑁆𑀢𑁄 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄𑀢𑀺 𑀆𑀳. 𑀣𑁂𑀭𑁄𑀧𑀺 𑀧𑀼𑀘𑁆𑀙𑀸𑀦𑀼𑀭𑀽𑀧𑁂𑀦𑁂𑀯 𑀩𑁆𑀬𑀸𑀓𑀸𑀲𑀺. 𑀢𑀢𑁆𑀣 𑀬𑀲𑁆𑀫𑀸 𑀯𑁂𑀤𑀬𑀺𑀢𑀲𑀼𑀔𑀢𑁄 𑀅𑀯𑁂𑀤𑀬𑀺𑀢𑀲𑀼𑀔𑀁 𑀲𑀦𑁆𑀢𑀢𑀭𑀁 𑀧𑀡𑀻𑀢𑀢𑀭𑀁 𑀳𑁄𑀢𑀺, 𑀢𑀲𑁆𑀫𑀸 𑀅𑀜𑁆𑀜𑀁 𑀨𑀸𑀲𑀼𑀯𑀺𑀳𑀸𑀭𑀁 𑀉𑀢𑁆𑀢𑀭𑀺𑀢𑀭𑀁 𑀯𑀸 𑀧𑀡𑀻𑀢𑀢𑀭𑀁 𑀯𑀸 𑀦 𑀲𑀫𑀦𑀼𑀧𑀲𑁆𑀲𑀸𑀫𑀸𑀢𑀺 𑀆𑀳.

𑁩𑁩𑁦. 𑀥𑀫𑁆𑀫𑀺𑀬𑀸 𑀓𑀣𑀸𑀬𑀸𑀢𑀺 𑀲𑀸𑀫𑀕𑁆𑀕𑀺𑀭𑀲𑀸𑀦𑀺𑀲𑀁𑀲𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀬 𑀥𑀫𑁆𑀫𑀺𑀬𑀸 𑀓𑀣𑀸𑀬. 𑀲𑀩𑁆𑀩𑁂𑀧𑀺 𑀢𑁂 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀧𑀭𑀺𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀸, 𑀢𑁂𑀦 𑀢𑁂𑀲𑀁 𑀧𑀝𑀺𑀯𑁂𑀥𑀢𑁆𑀣𑀸𑀬 𑀓𑀺𑀜𑁆𑀘𑀺 𑀓𑀣𑁂𑀢𑀩𑁆𑀩𑀁 𑀦𑀢𑁆𑀣𑀺. 𑀲𑀸𑀫𑀕𑁆𑀕𑀺𑀭𑀲𑁂𑀦 𑀧𑀦 𑀅𑀬𑀜𑁆𑀘 𑀅𑀬𑀜𑁆𑀘 𑀆𑀦𑀺𑀲𑀁𑀲𑁄𑀢𑀺 𑀲𑀸𑀫𑀕𑁆𑀕𑀺𑀭𑀲𑀸𑀦𑀺𑀲𑀁𑀲𑀫𑁂𑀯 𑀦𑁂𑀲𑀁 𑀪𑀕𑀯𑀸 𑀓𑀣𑁂𑀲𑀺. 𑀪𑀕𑀯𑀦𑁆𑀢𑀁 𑀅𑀦𑀼𑀲𑀁𑀬𑀸𑀬𑀺𑀢𑁆𑀯𑀸𑀢𑀺 𑀅𑀦𑀼𑀕𑀦𑁆𑀢𑁆𑀯𑀸. 𑀢𑁂 𑀓𑀺𑀭 𑀪𑀕𑀯𑀢𑁄 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀣𑁄𑀓𑀁 𑀅𑀕𑀫𑀁𑀲𑀼, 𑀅𑀣 𑀪𑀕𑀯𑀸 𑀯𑀺𑀳𑀸𑀭𑀲𑁆𑀲 𑀧𑀭𑀺𑀯𑁂𑀡𑀧𑀭𑀺𑀬𑀦𑁆𑀢𑀁 𑀕𑀢𑀓𑀸𑀮𑁂, ‘‘𑀆𑀳𑀭𑀣 𑀫𑁂 𑀧𑀢𑁆𑀢𑀘𑀻𑀯𑀭𑀁, 𑀢𑀼𑀫𑁆𑀳𑁂 𑀇𑀥𑁂𑀯 𑀢𑀺𑀝𑁆𑀞𑀣𑀸’’𑀢𑀺 𑀧𑀓𑁆𑀓𑀸𑀫𑀺. 𑀢𑀢𑁄 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸𑀢𑀺 𑀢𑀢𑁄 𑀞𑀺𑀢𑀝𑁆𑀞𑀸𑀦𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸. 𑀓𑀺𑀁 𑀦𑀼 𑀔𑁄 𑀫𑀬𑀁 𑀆𑀬𑀲𑁆𑀫𑀢𑁄𑀢𑀺 𑀪𑀕𑀯𑀦𑁆𑀢𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸𑀤𑀻𑀦𑀺 𑀅𑀥𑀺𑀕𑀦𑁆𑀢𑁆𑀯𑀸𑀧𑀺 𑀅𑀢𑁆𑀢𑀦𑁄 𑀕𑀼𑀡𑀓𑀣𑀸𑀬 𑀅𑀝𑁆𑀝𑀺𑀬𑀫𑀸𑀦𑀸 𑀅𑀥𑀺𑀕𑀫𑀧𑁆𑀧𑀺𑀘𑁆𑀙𑀢𑀸𑀬 𑀆𑀳𑀁𑀲𑀼. 𑀇𑀫𑀸𑀲𑀜𑁆𑀘 𑀇𑀫𑀸𑀲𑀜𑁆𑀘𑀸𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀦𑀁. 𑀘𑁂𑀢𑀲𑀸 𑀘𑁂𑀢𑁄 𑀧𑀭𑀺𑀘𑁆𑀘 𑀯𑀺𑀤𑀺𑀢𑁄𑀢𑀺 𑀅𑀚𑁆𑀚 𑀫𑁂 𑀆𑀬𑀲𑁆𑀫𑀦𑁆𑀢𑁄 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀲𑀼𑀁, 𑀅𑀚𑁆𑀚 𑀮𑁄𑀓𑀼𑀢𑁆𑀢𑀭𑀸𑀬𑀸𑀢𑀺 𑀏𑀯𑀁 𑀘𑀺𑀢𑁆𑀢𑁂𑀦 𑀘𑀺𑀢𑁆𑀢𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀺𑀤𑀺𑀢𑀁. 𑀤𑁂𑀯𑀢𑀸𑀧𑀺 𑀫𑁂𑀢𑀺, 𑀪𑀦𑁆𑀢𑁂 𑀅𑀦𑀼𑀭𑀼𑀤𑁆𑀥, 𑀅𑀚𑁆𑀚 𑀅𑀬𑁆𑀬𑁄 𑀦𑀦𑁆𑀤𑀺𑀬𑀢𑁆𑀣𑁂𑀭𑁄, 𑀅𑀚𑁆𑀚 𑀅𑀬𑁆𑀬𑁄 𑀓𑀺𑀫𑀺𑀮𑀢𑁆𑀣𑁂𑀭𑁄 𑀇𑀫𑀸𑀬 𑀘 𑀇𑀫𑀸𑀬 𑀘 𑀲𑀫𑀸𑀧𑀢𑁆𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀲𑀻𑀢𑀺 𑀏𑀯𑀫𑀸𑀭𑁄𑀘𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀧𑀜𑁆𑀳𑀸𑀪𑀺𑀧𑀼𑀝𑁆𑀞𑁂𑀦𑀸𑀢𑀺 𑀢𑀫𑁆𑀧𑀺 𑀫𑀬𑀸 𑀲𑀬𑀁 𑀯𑀺𑀤𑀺𑀢𑀦𑁆𑀢𑀺 𑀯𑀸 𑀤𑁂𑀯𑀢𑀸𑀳𑀺 𑀆𑀭𑁄𑀘𑀺𑀢𑀦𑁆𑀢𑀺 𑀯𑀸 𑀏𑀢𑁆𑀢𑀓𑁂𑀦𑁂𑀯 𑀫𑀼𑀔𑀁 𑀫𑁂 𑀲𑀚𑁆𑀚𑀦𑁆𑀢𑀺 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀅𑀧𑀼𑀝𑁆𑀞𑁂𑀦𑁂𑀯 𑀫𑁂 𑀦 𑀓𑀣𑀺𑀢𑀁. 𑀪𑀕𑀯𑀢𑀸 𑀧𑀦 𑀧𑀜𑁆𑀳𑀸𑀪𑀺𑀧𑀼𑀝𑁆𑀞𑁂𑀦 𑀧𑀜𑁆𑀳𑀁 𑀅𑀪𑀺𑀧𑀼𑀘𑁆𑀙𑀺𑀢𑁂𑀦 𑀲𑀢𑀸 𑀩𑁆𑀬𑀸𑀓𑀢𑀁, 𑀢𑀢𑁆𑀭 𑀫𑁂 𑀓𑀺𑀁 𑀦 𑀭𑁄𑀘𑀣𑀸𑀢𑀺 𑀆𑀳.

𑁩𑁩𑁧. 𑀤𑀻𑀖𑁄𑀢𑀺 ‘‘𑀫𑀡𑀺 𑀫𑀸𑀡𑀺𑀯𑀭𑁄 𑀤𑀻𑀖𑁄, 𑀅𑀣𑁄 𑀲𑁂𑀭𑀻𑀲𑀓𑁄 𑀲𑀳𑀸’’𑀢𑀺 (𑀤𑀻. 𑀦𑀺. 𑁩.𑁨𑁯𑁩) 𑀏𑀯𑀁 𑀆𑀕𑀢𑁄 𑀅𑀝𑁆𑀞𑀯𑀻𑀲𑀢𑀺𑀬𑀸 𑀬𑀓𑁆𑀔𑀲𑁂𑀦𑀸𑀧𑀢𑀻𑀦𑀁 𑀅𑀩𑁆𑀪𑀦𑁆𑀢𑀭𑁄 𑀏𑀓𑁄 𑀤𑁂𑀯𑀭𑀸𑀚𑀸. 𑀧𑀭𑀚𑀦𑁄𑀢𑀺 𑀢𑀲𑁆𑀲𑁂𑀯 𑀬𑀓𑁆𑀔𑀲𑁆𑀲 𑀦𑀸𑀫𑀁. 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀲𑁄 𑀓𑀺𑀭 𑀯𑁂𑀲𑁆𑀲𑀯𑀡𑁂𑀦 𑀧𑁂𑀲𑀺𑀢𑁄 𑀏𑀢𑀁 𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀪𑀕𑀯𑀦𑁆𑀢𑀁 𑀲𑀬𑀁 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀕𑀺𑀜𑁆𑀚𑀓𑀸𑀯𑀲𑀣𑀢𑁄 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀲𑁆𑀲 𑀅𑀦𑁆𑀢𑀭𑁂 𑀤𑀺𑀲𑁆𑀯𑀸 𑀪𑀕𑀯𑀸 𑀅𑀢𑁆𑀢𑀦𑀸 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑁂 𑀢𑀺𑀡𑁆𑀡𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀲𑀦𑁆𑀢𑀺𑀓𑀁 𑀕𑀘𑁆𑀙𑀢𑀺. 𑀅𑀚𑁆𑀚 𑀫𑀳𑀢𑀻 𑀥𑀫𑁆𑀫𑀤𑁂𑀲𑀦𑀸 𑀪𑀯𑀺𑀲𑁆𑀲𑀢𑀺. 𑀫𑀬𑀸𑀧𑀺 𑀢𑀲𑁆𑀲𑀸 𑀤𑁂𑀲𑀦𑀸𑀬 𑀪𑀸𑀕𑀺𑀦𑀸 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀲𑀢𑁆𑀣𑀼 𑀧𑀤𑀸𑀦𑀼𑀧𑀤𑀺𑀓𑁄 𑀕𑀦𑁆𑀢𑁆𑀯𑀸 𑀅𑀯𑀺𑀤𑀽𑀭𑁂 𑀞𑀢𑁆𑀯𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀢𑁆𑀣𑀭𑀺 𑀕𑀘𑁆𑀙𑀦𑁆𑀢𑁂𑀧𑀺 𑀦 𑀕𑀢𑁄, 𑁋 ‘‘𑀇𑀫𑁂 𑀣𑁂𑀭𑀸 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑀧𑀦 𑀢𑀢𑁆𑀣𑁂𑀯 𑀞𑀺𑀢𑁄. 𑀅𑀣 𑀢𑁂 𑀤𑁆𑀯𑁂 𑀣𑁂𑀭𑁂 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀁 𑀧𑀮𑀺𑀯𑁂𑀞𑁂𑀦𑁆𑀢𑁂 𑀤𑀺𑀲𑁆𑀯𑀸, 𑁋 ‘‘𑀇𑀫𑁂 𑀣𑁂𑀭𑀸 𑀪𑀕𑀯𑀦𑁆𑀢𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸𑀤𑀬𑁄 𑀲𑀩𑁆𑀩𑀕𑀼𑀡𑁂 𑀅𑀥𑀺𑀕𑀦𑁆𑀢𑁆𑀯𑀸𑀧𑀺 𑀪𑀕𑀯𑀢𑁄𑀯 𑀫𑀘𑁆𑀙𑀭𑀸𑀬𑀦𑁆𑀢𑀺, 𑀦 𑀲𑀳𑀦𑁆𑀢𑀺, 𑀅𑀢𑀺𑀯𑀺𑀬 𑀦𑀺𑀮𑀻𑀬𑀦𑁆𑀢𑀺 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀺, 𑀦 𑀤𑀸𑀦𑀺 𑀢𑁂𑀲𑀁 𑀧𑀝𑀺𑀘𑁆𑀙𑀸𑀤𑁂𑀢𑀼𑀁 𑀤𑀲𑁆𑀲𑀸𑀫𑀺, 𑀧𑀣𑀯𑀺𑀢𑁄 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀏𑀢𑁂𑀲𑀁 𑀕𑀼𑀡𑁂 𑀧𑀓𑀸𑀲𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀮𑀸𑀪𑀸 𑀯𑀢, 𑀪𑀦𑁆𑀢𑁂𑀢𑀺 𑀬𑁂, 𑀪𑀦𑁆𑀢𑁂, 𑀯𑀚𑁆𑀚𑀺𑀭𑀝𑁆𑀞𑀯𑀸𑀲𑀺𑀦𑁄 𑀪𑀕𑀯𑀦𑁆𑀢𑀜𑁆𑀘 𑀇𑀫𑁂 𑀘 𑀢𑀬𑁄 𑀓𑀼𑀮𑀧𑀼𑀢𑁆𑀢𑁂 𑀧𑀲𑁆𑀲𑀺𑀢𑀼𑀁 𑀮𑀪𑀦𑁆𑀢𑀺, 𑀯𑀦𑁆𑀤𑀺𑀢𑀼𑀁 𑀮𑀪𑀦𑁆𑀢𑀺, 𑀤𑁂𑀬𑁆𑀬𑀥𑀫𑁆𑀫𑀁 𑀤𑀸𑀢𑀼𑀁 𑀮𑀪𑀦𑁆𑀢𑀺, 𑀥𑀫𑁆𑀫𑀁 𑀲𑁄𑀢𑀼𑀁 𑀮𑀪𑀦𑁆𑀢𑀺, 𑀢𑁂𑀲𑀁 𑀮𑀸𑀪𑀸, 𑀪𑀦𑁆𑀢𑁂, 𑀯𑀚𑁆𑀚𑀻𑀦𑀦𑁆𑀢𑀺 𑀅𑀢𑁆𑀣𑁄. 𑀲𑀤𑁆𑀤𑀁 𑀲𑀼𑀢𑁆𑀯𑀸𑀢𑀺 𑀲𑁄 𑀓𑀺𑀭 𑀅𑀢𑁆𑀢𑀦𑁄 𑀬𑀓𑁆𑀔𑀸𑀦𑀼𑀪𑀸𑀯𑁂𑀦 𑀫𑀳𑀦𑁆𑀢𑀁 𑀲𑀤𑁆𑀤𑀁 𑀓𑀢𑁆𑀯𑀸 𑀲𑀓𑀮𑀁 𑀯𑀚𑁆𑀚𑀺𑀭𑀝𑁆𑀞𑀁 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁄 𑀢𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀢𑁂𑀦 𑀘𑀲𑁆𑀲 𑀢𑁂𑀲𑀼 𑀭𑀼𑀓𑁆𑀔𑀧𑀩𑁆𑀩𑀢𑀸𑀤𑀻𑀲𑀼 𑀅𑀥𑀺𑀯𑀢𑁆𑀣𑀸 𑀪𑀼𑀫𑁆𑀫𑀸 𑀤𑁂𑀯𑀢𑀸 𑀲𑀤𑁆𑀤𑀁 𑀅𑀲𑁆𑀲𑁄𑀲𑀼𑀁. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀲𑀤𑁆𑀤𑀁 𑀲𑀼𑀢𑁆𑀯𑀸’’𑀢𑀺. 𑀅𑀦𑀼𑀲𑁆𑀲𑀸𑀯𑁂𑀲𑀼𑀦𑁆𑀢𑀺 𑀫𑀳𑀦𑁆𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀸𑀯𑁂𑀲𑀼𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸𑀢𑀺 𑀬𑀸𑀯 𑀅𑀓𑀦𑀺𑀝𑁆𑀞𑀩𑁆𑀭𑀳𑁆𑀫𑀮𑁄𑀓𑀸. 𑀢𑀜𑁆𑀘𑁂𑀧𑀺 𑀓𑀼𑀮𑀦𑁆𑀢𑀺, ‘‘𑀅𑀫𑁆𑀳𑀸𑀓𑀁 𑀓𑀼𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀇𑀫𑁂 𑀓𑀼𑀮𑀧𑀼𑀢𑁆𑀢𑀸 𑀧𑀩𑁆𑀩𑀚𑀺𑀢𑀸 𑀏𑀯𑀁 𑀲𑀻𑀮𑀯𑀦𑁆𑀢𑁄 𑀕𑀼𑀡𑀯𑀦𑁆𑀢𑁄 𑀆𑀘𑀸𑀭𑀲𑀫𑁆𑀧𑀦𑁆𑀦𑀸 𑀓𑀮𑁆𑀬𑀸𑀡𑀥𑀫𑁆𑀫𑀸’’𑀢𑀺 𑀏𑀯𑀁 𑀢𑀜𑁆𑀘𑁂𑀧𑀺 𑀓𑀼𑀮𑀁 𑀏𑀢𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑁂 𑀧𑀲𑀦𑁆𑀦𑀘𑀺𑀢𑁆𑀢𑀁 𑀅𑀦𑀼𑀲𑁆𑀲𑀭𑁂𑀬𑁆𑀬𑀸𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀇𑀢𑀺 𑀪𑀕𑀯𑀸 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀘𑀽𑀴𑀕𑁄𑀲𑀺𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀫𑀳𑀸𑀕𑁄𑀲𑀺𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁩𑁨. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀕𑁄𑀲𑀺𑀗𑁆𑀕𑀲𑀼𑀢𑁆𑀢𑀁. 𑀢𑀢𑁆𑀣 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀤𑀸𑀬𑁂𑀢𑀺 𑀇𑀤𑀁 𑀯𑀲𑀦𑀝𑁆𑀞𑀸𑀦𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀜𑁆𑀜𑁂𑀲𑀼 𑀳𑀺 𑀲𑀼𑀢𑁆𑀢𑁂𑀲𑀼, ‘‘𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂’’𑀢𑀺 𑀏𑀯𑀁 𑀧𑀞𑀫𑀁 𑀕𑁄𑀘𑀭𑀕𑀸𑀫𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀯𑀲𑀦𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀫𑀳𑀸𑀕𑁄𑀲𑀺𑀗𑁆𑀕𑀲𑀼𑀢𑁆𑀢𑁂 𑀪𑀕𑀯𑀢𑁄 𑀕𑁄𑀘𑀭𑀕𑀸𑀫𑁄 𑀅𑀦𑀺𑀩𑀦𑁆𑀥𑁄, 𑀓𑁄𑀘𑀺𑀤𑁂𑀯 𑀕𑁄𑀘𑀭𑀕𑀸𑀫𑁄 𑀪𑀯𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀯𑀲𑀦𑀝𑁆𑀞𑀸𑀦𑀫𑁂𑀯 𑀧𑀭𑀺𑀤𑀻𑀧𑀺𑀢𑀁. 𑀅𑀭𑀜𑁆𑀜𑀦𑀺𑀤𑀸𑀦𑀓𑀁 𑀦𑀸𑀫𑁂𑀢𑀁 𑀲𑀼𑀢𑁆𑀢𑀦𑁆𑀢𑀺. 𑀲𑀫𑁆𑀩𑀳𑀼𑀮𑁂𑀳𑀻𑀢𑀺 𑀩𑀳𑀼𑀓𑁂𑀳𑀺. 𑀅𑀪𑀺𑀜𑁆𑀜𑀸𑀢𑁂𑀳𑀺 𑀅𑀪𑀺𑀜𑁆𑀜𑀸𑀢𑁂𑀳𑀻𑀢𑀺 𑀲𑀩𑁆𑀩𑀢𑁆𑀣 𑀯𑀺𑀲𑁆𑀲𑀼𑀢𑁂𑀳𑀺 𑀧𑀸𑀓𑀝𑁂𑀳𑀺. 𑀣𑁂𑀭𑁂𑀳𑀺 𑀲𑀸𑀯𑀓𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀤𑀻𑀳𑀺 𑀣𑀺𑀭𑀓𑀸𑀭𑀓𑁂𑀳𑁂𑀯 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀣𑁂𑀭𑁂𑀳𑀺, 𑀲𑀯𑀦𑀦𑁆𑀢𑁂 𑀚𑀸𑀢𑀢𑁆𑀢𑀸 𑀲𑀸𑀯𑀓𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄. 𑀇𑀤𑀸𑀦𑀺 𑀢𑁂 𑀣𑁂𑀭𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄, 𑀆𑀬𑀲𑁆𑀫𑀢𑀸 𑀘 𑀲𑀸𑀭𑀺𑀧𑀼𑀢𑁆𑀢𑁂𑀦𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀩𑀼𑀤𑁆𑀥𑀲𑀸𑀲𑀦𑁂 𑀅𑀪𑀺𑀜𑁆𑀜𑀸𑀢𑁄. 𑀘𑀓𑁆𑀔𑀼𑀫𑀦𑁆𑀢𑀸𑀦𑀁 𑀕𑀕𑀦𑀫𑀚𑁆𑀛𑁂 𑀞𑀺𑀢𑁄 𑀲𑀽𑀭𑀺𑀬𑁄 𑀯𑀺𑀬 𑀘𑀦𑁆𑀤𑁄 𑀯𑀺𑀬, 𑀲𑀫𑀼𑀤𑁆𑀤𑀢𑀻𑀭𑁂 𑀞𑀺𑀢𑀸𑀦𑀁 𑀲𑀸𑀕𑀭𑁄 𑀯𑀺𑀬 𑀘 𑀧𑀸𑀓𑀝𑁄 𑀧𑀜𑁆𑀜𑀸𑀢𑁄. 𑀦 𑀓𑁂𑀯𑀮𑀜𑁆𑀘𑀲𑁆𑀲 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀆𑀕𑀢𑀕𑀼𑀡𑀯𑀲𑁂𑀦𑁂𑀯 𑀫𑀳𑀦𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀇𑀢𑁄 𑀅𑀜𑁆𑀜𑁂𑀲𑀁 𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀁 𑀅𑀦𑀗𑁆𑀕𑀡𑀲𑀼𑀢𑁆𑀢𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑀁 𑀲𑀻𑀳𑀦𑀸𑀤𑀲𑀼𑀢𑁆𑀢𑀁 𑀭𑀣𑀯𑀺𑀦𑀻𑀢𑀁 𑀫𑀳𑀸𑀳𑀢𑁆𑀣𑀺𑀧𑀤𑁄𑀧𑀫𑀁 𑀫𑀳𑀸𑀯𑁂𑀤𑀮𑁆𑀮𑀁 𑀘𑀸𑀢𑀼𑀫𑀲𑀼𑀢𑁆𑀢𑀁 𑀤𑀻𑀖𑀦𑀔𑀁 𑀅𑀦𑀼𑀧𑀤𑀲𑀼𑀢𑁆𑀢𑀁 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀲𑀼𑀢𑁆𑀢𑀁 𑀲𑀘𑁆𑀘𑀯𑀺𑀪𑀗𑁆𑀕𑀲𑀼𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀸𑀭𑀺𑀲𑀼𑀤𑁆𑀥𑀺 𑀲𑀫𑁆𑀧𑀲𑀸𑀤𑀦𑀻𑀬𑀁 𑀲𑀗𑁆𑀕𑀻𑀢𑀺𑀲𑀼𑀢𑁆𑀢𑀁 𑀤𑀲𑀼𑀢𑁆𑀢𑀭𑀲𑀼𑀢𑁆𑀢𑀁 𑀧𑀯𑀸𑀭𑀡𑀸𑀲𑀼𑀢𑁆𑀢𑀁 (𑀲𑀁. 𑀦𑀺. 𑁧.𑁨𑁧𑁫 𑀆𑀤𑀬𑁄) 𑀲𑀼𑀲𑀺𑀫𑀲𑀼𑀢𑁆𑀢𑀁 𑀣𑁂𑀭𑀧𑀜𑁆𑀳𑀲𑀼𑀢𑁆𑀢𑀁 𑀫𑀳𑀸𑀦𑀺𑀤𑁆𑀤𑁂𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁄 𑀣𑁂𑀭𑀲𑀻𑀳𑀦𑀸𑀤𑀲𑀼𑀢𑁆𑀢𑀁 𑀅𑀪𑀺𑀦𑀺𑀓𑁆𑀔𑀫𑀦𑀁 𑀏𑀢𑀤𑀕𑁆𑀕𑀦𑁆𑀢𑀺 𑀇𑀫𑁂𑀲𑀫𑁆𑀧𑀺 𑀲𑀼𑀢𑁆𑀢𑀸𑀦𑀁 𑀯𑀲𑁂𑀦 𑀣𑁂𑀭𑀲𑁆𑀲 𑀫𑀳𑀦𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀢𑀤𑀕𑁆𑀕𑀲𑁆𑀫𑀺𑀜𑁆𑀳𑀺, ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀳𑀸𑀧𑀜𑁆𑀜𑀸𑀦𑀁 𑀬𑀤𑀺𑀤𑀁 𑀲𑀸𑀭𑀺𑀧𑀼𑀢𑁆𑀢𑁄’’𑀢𑀺 (𑀅. 𑀦𑀺. 𑁧.𑁧𑁮𑁮-𑁧𑁮𑁯) 𑀯𑀼𑀢𑁆𑀢𑀁.

𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄𑀧𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀘𑁂𑀯 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀆𑀕𑀢𑀕𑀼𑀡𑁂𑀳𑀺 𑀘 𑀣𑁂𑀭𑁄 𑀯𑀺𑀬 𑀅𑀪𑀺𑀜𑁆𑀜𑀸𑀢𑁄 𑀧𑀸𑀓𑀝𑁄 𑀫𑀳𑀸. 𑀅𑀧𑀺𑀘𑀲𑁆𑀲 𑀅𑀦𑀼𑀫𑀸𑀦𑀲𑀼𑀢𑁆𑀢𑀁, 𑀘𑀽𑀴𑀢𑀡𑁆𑀳𑀸𑀲𑀗𑁆𑀔𑀬𑀲𑀼𑀢𑁆𑀢𑀁 𑀫𑀸𑀭𑀢𑀚𑁆𑀚𑀦𑀺𑀬𑀲𑀼𑀢𑁆𑀢𑀁 𑀧𑀸𑀲𑀸𑀤𑀓𑀫𑁆𑀧𑀦𑀁 𑀲𑀓𑀮𑀁 𑀇𑀤𑁆𑀥𑀺𑀧𑀸𑀤𑀲𑀁𑀬𑀼𑀢𑁆𑀢𑀁 𑀦𑀦𑁆𑀤𑁄𑀧𑀦𑀦𑁆𑀤𑀤𑀫𑀦𑀁 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀓𑀸𑀮𑁂 𑀤𑁂𑀯𑀮𑁄𑀓𑀕𑀫𑀦𑀁 𑀯𑀺𑀫𑀸𑀦𑀯𑀢𑁆𑀣𑀼 𑀧𑁂𑀢𑀯𑀢𑁆𑀣𑀼 𑀣𑁂𑀭𑀲𑁆𑀲 𑀅𑀪𑀺𑀦𑀺𑀓𑁆𑀔𑀫𑀦𑀁 𑀏𑀢𑀤𑀕𑁆𑀕𑀦𑁆𑀢𑀺 𑀇𑀫𑁂𑀲𑀫𑁆𑀧𑀺 𑀯𑀲𑁂𑀦 𑀫𑀳𑀦𑁆𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑀤𑀕𑁆𑀕𑀲𑁆𑀫𑀺𑀜𑁆𑀳𑀺, ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀬𑀤𑀺𑀤𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄’’𑀢𑀺 (𑀅. 𑀦𑀺. 𑁧.𑁧𑁯𑁦) 𑀯𑀼𑀢𑁆𑀢𑀁.

𑀫𑀳𑀸𑀓𑀲𑁆𑀲𑀧𑁄𑀧𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀘𑁂𑀯 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀆𑀕𑀢𑀕𑀼𑀡𑁂𑀳𑀺 𑀘 𑀣𑁂𑀭𑁄 𑀯𑀺𑀬 𑀅𑀪𑀺𑀜𑁆𑀜𑀸𑀢𑁄 𑀧𑀸𑀓𑀝𑁄 𑀫𑀳𑀸. 𑀅𑀧𑀺𑀘𑀲𑁆𑀲 𑀘𑀻𑀯𑀭𑀧𑀭𑀺𑀯𑀢𑁆𑀢𑀦𑀲𑀼𑀢𑁆𑀢𑀁 𑀚𑀺𑀡𑁆𑀡𑀘𑀻𑀯𑀭𑀲𑀼𑀢𑁆𑀢𑀁 (𑀲𑀁. 𑀦𑀺. 𑁨.𑁧𑁫𑁪 𑀆𑀤𑀬𑁄) 𑀘𑀦𑁆𑀤𑁄𑀧𑀫𑀁 𑀲𑀓𑀮𑀁 𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑀁 𑀫𑀳𑀸𑀅𑀭𑀺𑀬𑀯𑀁𑀲𑀲𑀼𑀢𑁆𑀢𑀁 𑀣𑁂𑀭𑀲𑁆𑀲 𑀅𑀪𑀺𑀦𑀺𑀓𑁆𑀔𑀫𑀦𑀁 𑀏𑀢𑀤𑀕𑁆𑀕𑀦𑁆𑀢𑀺 𑀇𑀫𑁂𑀲𑀫𑁆𑀧𑀺 𑀯𑀲𑁂𑀦 𑀫𑀳𑀦𑁆𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑀤𑀕𑁆𑀕𑀲𑁆𑀫𑀺𑀜𑁆𑀳𑀺, ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀼𑀢𑀯𑀸𑀤𑀸𑀦𑀁 𑀬𑀤𑀺𑀤𑀁 𑀫𑀳𑀸𑀓𑀲𑁆𑀲𑀧𑁄’’𑀢𑀺 (𑀅. 𑀦𑀺. 𑁧.𑁧𑁯𑁧) 𑀯𑀼𑀢𑁆𑀢𑀁.

𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄𑀧𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀘𑁂𑀯 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀆𑀕𑀢𑀕𑀼𑀡𑁂𑀳𑀺 𑀘 𑀣𑁂𑀭𑁄 𑀯𑀺𑀬 𑀅𑀪𑀺𑀜𑁆𑀜𑀸𑀢𑁄 𑀧𑀸𑀓𑀝𑁄 𑀫𑀳𑀸. 𑀅𑀧𑀺𑀘𑀲𑁆𑀲 𑀘𑀽𑀴𑀕𑁄𑀲𑀺𑀗𑁆𑀕𑀲𑀼𑀢𑁆𑀢𑀁 𑀦𑀴𑀓𑀧𑀸𑀦𑀲𑀼𑀢𑁆𑀢𑀁 𑀅𑀦𑀼𑀢𑁆𑀢𑀭𑀺𑀬𑀲𑀼𑀢𑁆𑀢𑀁 𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑀁 𑀅𑀦𑀼𑀭𑀼𑀤𑁆𑀥𑀲𑀁𑀬𑀼𑀢𑁆𑀢𑀁 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑀲𑀼𑀢𑁆𑀢𑀁 𑀣𑁂𑀭𑀲𑁆𑀲 𑀅𑀪𑀺𑀦𑀺𑀓𑁆𑀔𑀫𑀦𑀁 𑀏𑀢𑀤𑀕𑁆𑀕𑀦𑁆𑀢𑀺 𑀇𑀫𑁂𑀲𑀫𑁆𑀧𑀺 𑀯𑀲𑁂𑀦 𑀫𑀳𑀦𑁆𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑀤𑀕𑁆𑀕𑀲𑁆𑀫𑀺𑀜𑁆𑀳𑀺, ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀬𑀤𑀺𑀤𑀁 𑀅𑀦𑀼𑀭𑀼𑀤𑁆𑀥𑁄’’𑀢𑀺 (𑀅. 𑀦𑀺. 𑁧.𑁧𑁯𑁨) 𑀯𑀼𑀢𑁆𑀢𑀁.

𑀆𑀬𑀲𑁆𑀫𑀢𑀸 𑀘 𑀭𑁂𑀯𑀢𑁂𑀦𑀸𑀢𑀺 𑀏𑀢𑁆𑀣 𑀧𑀦 𑀤𑁆𑀯𑁂 𑀭𑁂𑀯𑀢𑀸 𑀔𑀤𑀺𑀭𑀯𑀦𑀺𑀬𑀭𑁂𑀯𑀢𑁄 𑀘 𑀓𑀗𑁆𑀔𑀸𑀭𑁂𑀯𑀢𑁄 𑀘. 𑀢𑀢𑁆𑀣 𑀔𑀤𑀺𑀭𑀯𑀦𑀺𑀬𑀭𑁂𑀯𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀢𑁆𑀣𑁂𑀭𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀺𑀓𑁄, 𑀦 𑀲𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄. ‘‘𑀅𑀓𑀧𑁆𑀧𑀺𑀬𑁄 𑀕𑀼𑀴𑁄, 𑀅𑀓𑀧𑁆𑀧𑀺𑀬𑀸 𑀫𑀼𑀕𑁆𑀕𑀸’’𑀢𑀺 (𑀫𑀳𑀸𑀯. 𑁨𑁭𑁨) 𑀏𑀯𑀁 𑀓𑀗𑁆𑀔𑀸𑀩𑀳𑀼𑀮𑁄 𑀧𑀦 𑀣𑁂𑀭𑁄 𑀇𑀥 𑀭𑁂𑀯𑀢𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀲𑁄𑀧𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀘𑁂𑀯 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀆𑀕𑀢𑀕𑀼𑀡𑁂𑀳𑀺 𑀘 𑀣𑁂𑀭𑁄 𑀯𑀺𑀬 𑀅𑀪𑀺𑀜𑁆𑀜𑀸𑀢𑁄 𑀧𑀸𑀓𑀝𑁄 𑀫𑀳𑀸. 𑀅𑀧𑀺𑀘𑀲𑁆𑀲 𑀅𑀪𑀺𑀦𑀺𑀓𑁆𑀔𑀫𑀦𑁂𑀦𑀧𑀺 𑀏𑀢𑀤𑀕𑁆𑀕𑁂𑀦𑀧𑀺 𑀫𑀳𑀦𑁆𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑀤𑀕𑁆𑀕𑀲𑁆𑀫𑀺𑀜𑁆𑀳𑀺, ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀛𑀸𑀬𑀻𑀦𑀁 𑀬𑀤𑀺𑀤𑀁 𑀓𑀗𑁆𑀔𑀸𑀭𑁂𑀯𑀢𑁄’’𑀢𑀺 (𑀅. 𑀦𑀺. 𑁧.𑁨𑁦𑁪) 𑀯𑀼𑀢𑁆𑀢𑀁.

𑀆𑀦𑀦𑁆𑀤𑀢𑁆𑀣𑁂𑀭𑁄𑀧𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀘𑁂𑀯 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀆𑀕𑀢𑀕𑀼𑀡𑁂𑀳𑀺 𑀘 𑀣𑁂𑀭𑁄 𑀯𑀺𑀬 𑀅𑀪𑀺𑀜𑁆𑀜𑀸𑀢𑁄 𑀧𑀸𑀓𑀝𑁄 𑀫𑀳𑀸. 𑀅𑀧𑀺𑀘𑀲𑁆𑀲 𑀲𑁂𑀓𑁆𑀔𑀲𑀼𑀢𑁆𑀢𑀁 𑀩𑀸𑀳𑀺𑀢𑀺𑀓𑀲𑀼𑀢𑁆𑀢𑀁 𑀆𑀦𑁂𑀜𑁆𑀚𑀲𑀧𑁆𑀧𑀸𑀬𑀁 𑀕𑁄𑀧𑀓𑀫𑁄𑀕𑁆𑀕𑀮𑁆𑀮𑀸𑀦𑀁 𑀩𑀳𑀼𑀥𑀸𑀢𑀼𑀓𑀁 𑀘𑀽𑀴𑀲𑀼𑀜𑁆𑀜𑀢𑀁 𑀫𑀳𑀸𑀲𑀼𑀜𑁆𑀜𑀢𑀁 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀲𑀼𑀢𑁆𑀢𑀁 𑀪𑀤𑁆𑀤𑁂𑀓𑀭𑀢𑁆𑀢𑀁 𑀫𑀳𑀸𑀦𑀺𑀤𑀸𑀦𑀁 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀲𑀼𑀪𑀲𑀼𑀢𑁆𑀢𑀁 𑀘𑀽𑀴𑀦𑀺𑀬𑀮𑁄𑀓𑀥𑀸𑀢𑀼𑀲𑀼𑀢𑁆𑀢𑀁 𑀅𑀪𑀺𑀦𑀺𑀓𑁆𑀔𑀫𑀦𑀁 𑀏𑀢𑀤𑀕𑁆𑀕𑀦𑁆𑀢𑀺 𑀇𑀫𑁂𑀲𑀫𑁆𑀧𑀺 𑀯𑀲𑁂𑀦 𑀫𑀳𑀦𑁆𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑀤𑀕𑁆𑀕𑀲𑁆𑀫𑀺𑀜𑁆𑀳𑀺, ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄’’𑀢𑀺 (𑀅. 𑀦𑀺. 𑁧.𑁨𑁧𑁯-𑁨𑁨𑁩) 𑀯𑀼𑀢𑁆𑀢𑀁.

𑀅𑀜𑁆𑀜𑁂𑀳𑀺 𑀘 𑀅𑀪𑀺𑀜𑁆𑀜𑀸𑀢𑁂𑀳𑀺 𑀅𑀪𑀺𑀜𑁆𑀜𑀸𑀢𑁂𑀳𑀻𑀢𑀺 𑀦 𑀓𑁂𑀯𑀮𑀜𑁆𑀘 𑀏𑀢𑁂𑀳𑁂𑀯, 𑀅𑀜𑁆𑀜𑁂𑀳𑀺 𑀘 𑀫𑀳𑀸𑀕𑀼𑀡𑀢𑀸𑀬 𑀧𑀸𑀓𑀝𑁂𑀳𑀺 𑀅𑀪𑀺𑀜𑁆𑀜𑀸𑀢𑁂𑀳𑀺 𑀩𑀳𑀽𑀳𑀺 𑀣𑁂𑀭𑁂𑀳𑀺 𑀲𑀸𑀯𑀓𑁂𑀳𑀺 𑀲𑀤𑁆𑀥𑀺𑀁 𑀪𑀕𑀯𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀤𑀸𑀬𑁂 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀆𑀬𑀲𑁆𑀫𑀸 𑀳𑀺 𑀲𑀸𑀭𑀺𑀧𑀼𑀢𑁆𑀢𑁄 𑀲𑀬𑀁 𑀫𑀳𑀸𑀧𑀜𑁆𑀜𑁄 𑀅𑀜𑁆𑀜𑁂𑀧𑀺 𑀩𑀳𑀽 𑀫𑀳𑀸𑀧𑀜𑁆𑀜𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀢𑀤𑀸 𑀤𑀲𑀩𑀮𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀺𑀳𑀸𑀲𑀺. 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀲𑀬𑀁 𑀇𑀤𑁆𑀥𑀺𑀫𑀸, 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀲𑀬𑀁 𑀥𑀼𑀢𑀯𑀸𑀤𑁄, 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀲𑀬𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑁄, 𑀆𑀬𑀲𑁆𑀫𑀸 𑀭𑁂𑀯𑀢𑁄 𑀲𑀬𑀁 𑀛𑀸𑀦𑀸𑀪𑀺𑀭𑀢𑁄, 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀲𑀬𑀁 𑀩𑀳𑀼𑀲𑁆𑀲𑀼𑀢𑁄 𑀅𑀜𑁆𑀜𑁂𑀧𑀺 𑀩𑀳𑀽 𑀩𑀳𑀼𑀲𑁆𑀲𑀼𑀢𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀢𑀤𑀸 𑀤𑀲𑀩𑀮𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀺𑀳𑀸𑀲𑀺, 𑀏𑀯𑀁 𑀢𑀤𑀸 𑀏𑀢𑁂 𑀘 𑀅𑀜𑁆𑀜𑁂 𑀘 𑀅𑀪𑀺𑀜𑁆𑀜𑀸𑀢𑀸 𑀫𑀳𑀸𑀣𑁂𑀭𑀸 𑀢𑀺𑀁𑀲𑀲𑀳𑀲𑁆𑀲𑀫𑀢𑁆𑀢𑀸 𑀪𑀺𑀓𑁆𑀔𑀽 𑀤𑀲𑀩𑀮𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀺𑀳𑀭𑀺𑀁𑀲𑀽𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀯𑁂𑀓𑀢𑁄 𑀯𑀼𑀝𑁆𑀞𑀺𑀢𑁄. 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀣𑁂𑀭𑁄 𑀓𑀺𑀭 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀧𑀘𑁆𑀙𑀺𑀫𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑁂𑀦𑁆𑀢𑁄 𑀯𑀦𑀦𑁆𑀢𑁂 𑀓𑀻𑀴𑀦𑁆𑀢𑀲𑁆𑀲 𑀫𑀢𑁆𑀢𑀔𑀢𑁆𑀢𑀺𑀬𑀲𑁆𑀲 𑀓𑀡𑁆𑀡𑀢𑁄 𑀧𑀢𑀫𑀸𑀦𑀁 𑀓𑀼𑀡𑁆𑀟𑀮𑀁 𑀯𑀺𑀬, 𑀲𑀁𑀳𑀭𑀺𑀢𑁆𑀯𑀸 𑀲𑀫𑀼𑀕𑁆𑀕𑁂 𑀧𑀓𑁆𑀔𑀺𑀧𑀫𑀸𑀦𑀁 𑀭𑀢𑁆𑀢𑀓𑀫𑁆𑀩𑀮𑀁 𑀯𑀺𑀬, 𑀫𑀡𑀺𑀦𑀸𑀕𑀤𑀦𑁆𑀢𑀢𑁄 𑀧𑀢𑀫𑀸𑀦𑀁 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀯𑀺𑀬 𑀘 𑀅𑀢𑁆𑀣𑀁 𑀕𑀘𑁆𑀙𑀫𑀸𑀦𑀁 𑀧𑀭𑀺𑀧𑀼𑀡𑁆𑀡𑀧𑀡𑁆𑀡𑀸𑀲𑀬𑁄𑀚𑀦𑀁 𑀲𑀽𑀭𑀺𑀬𑀫𑀡𑁆𑀟𑀮𑀁 𑀅𑀤𑁆𑀤𑀲. 𑀢𑀤𑀦𑀦𑁆𑀢𑀭𑀁 𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑁂𑀦𑁆𑀢𑁄 𑀦𑁂𑀫𑀺𑀬𑀁 𑀕𑀳𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑀬𑀫𑀸𑀦𑀁 𑀭𑀚𑀢𑀘𑀓𑁆𑀓𑀁 𑀯𑀺𑀬, 𑀭𑀚𑀢𑀓𑀽𑀝𑀢𑁄 𑀦𑀺𑀓𑁆𑀔𑀫𑀦𑁆𑀢𑀁 𑀔𑀻𑀭𑀥𑀸𑀭𑀸𑀫𑀡𑁆𑀟𑀁 𑀯𑀺𑀬, 𑀲𑀧𑀓𑁆𑀔𑁂 𑀧𑀧𑁆𑀨𑁄𑀝𑁂𑀢𑁆𑀯𑀸 𑀕𑀕𑀦𑀢𑀮𑁂 𑀧𑀓𑁆𑀔𑀦𑁆𑀤𑀫𑀸𑀦𑀁 𑀲𑁂𑀢𑀳𑀁𑀲𑀁 𑀯𑀺𑀬 𑀘 𑀫𑁂𑀖𑀯𑀡𑁆𑀡𑀸𑀬 𑀲𑀫𑀼𑀤𑁆𑀤𑀓𑀼𑀘𑁆𑀙𑀺𑀢𑁄 𑀉𑀕𑁆𑀕𑀦𑁆𑀢𑁆𑀯𑀸 𑀧𑀸𑀘𑀻𑀦𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀫𑀢𑁆𑀣𑀓𑁂 𑀲𑀲𑀮𑀓𑁆𑀔𑀡𑀧𑁆𑀧𑀝𑀺𑀫𑀡𑁆𑀟𑀺𑀢𑀁 𑀏𑀓𑀽𑀦𑀧𑀡𑁆𑀡𑀸𑀲𑀬𑁄𑀚𑀦𑀁 𑀘𑀦𑁆𑀤𑀫𑀡𑁆𑀟𑀮𑀁 𑀅𑀤𑁆𑀤𑀲. 𑀢𑀢𑁄 𑀲𑀸𑀮𑀯𑀦𑀁 𑀑𑀮𑁄𑀓𑁂𑀲𑀺. 𑀢𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀲𑀸𑀮𑀭𑀼𑀓𑁆𑀔𑀸 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀕𑁆𑀕𑀸 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀸 𑀤𑀼𑀓𑀽𑀮𑀧𑀸𑀭𑀼𑀢𑀸 𑀯𑀺𑀬, 𑀫𑀼𑀢𑁆𑀢𑀸𑀓𑀮𑀸𑀧𑀯𑀺𑀦𑀤𑁆𑀥𑀸 𑀯𑀺𑀬 𑀘 𑀯𑀺𑀭𑁄𑀘𑀺𑀁𑀲𑀼. 𑀪𑀽𑀫𑀺𑀢𑀮𑀁 𑀧𑀼𑀧𑁆𑀨𑀲𑀦𑁆𑀣𑀭𑀧𑀽𑀚𑀸𑀬 𑀧𑀝𑀺𑀫𑀡𑁆𑀟𑀺𑀢𑀁 𑀯𑀺𑀬, 𑀢𑀢𑁆𑀣 𑀢𑀢𑁆𑀣 𑀦𑀺𑀧𑀢𑀦𑁆𑀢𑁂𑀦 𑀧𑀼𑀧𑁆𑀨𑀭𑁂𑀡𑀼𑀦𑀸 𑀮𑀸𑀔𑀸𑀭𑀲𑁂𑀦 𑀲𑀺𑀜𑁆𑀘𑀫𑀸𑀦𑀁 𑀯𑀺𑀬 𑀘 𑀅𑀳𑁄𑀲𑀺. 𑀪𑀫𑀭𑀫𑀥𑀼𑀓𑀭𑀕𑀡𑀸 𑀓𑀼𑀲𑀼𑀫𑀭𑁂𑀡𑀼𑀫𑀤𑀫𑀢𑁆𑀢𑀸 𑀉𑀧𑀕𑀸𑀬𑀫𑀸𑀦𑀸 𑀯𑀺𑀬 𑀯𑀦𑀦𑁆𑀢𑀭𑁂𑀲𑀼 𑀯𑀺𑀘𑀭𑀦𑁆𑀢𑀺. 𑀢𑀤𑀸 𑀘 𑀉𑀧𑁄𑀲𑀣𑀤𑀺𑀯𑀲𑁄𑀯 𑀳𑁄𑀢𑀺. 𑀅𑀣 𑀣𑁂𑀭𑁄, ‘‘𑀓𑀸𑀬 𑀦𑀼 𑀔𑁄 𑀅𑀚𑁆𑀚 𑀭𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺, 𑀅𑀭𑀺𑀬𑀲𑀸𑀯𑀓𑀸 𑀘 𑀦𑀸𑀫 𑀧𑀺𑀬𑀥𑀫𑁆𑀫𑀲𑁆𑀲𑀯𑀦𑀸 𑀳𑁄𑀦𑁆𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀚𑁆𑀚 𑀫𑀬𑁆𑀳𑀁 𑀚𑁂𑀝𑁆𑀞𑀪𑀸𑀢𑀺𑀓𑀲𑁆𑀲 𑀥𑀫𑁆𑀫𑀲𑁂𑀦𑀸𑀧𑀢𑀺𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀥𑀫𑁆𑀫𑀭𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀲𑁆𑀲𑀸𑀫𑀻’’𑀢𑀺. 𑀕𑀘𑁆𑀙𑀦𑁆𑀢𑁄 𑀧𑀦 𑀏𑀓𑀓𑁄𑀯 𑀅𑀕𑀦𑁆𑀢𑁆𑀯𑀸 ‘‘𑀫𑀬𑁆𑀳𑀁 𑀧𑀺𑀬𑀲𑀳𑀸𑀬𑀁 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀁 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀢𑁄 𑀯𑀼𑀝𑁆𑀞𑀸𑀬 𑀘𑀫𑁆𑀫𑀔𑀡𑁆𑀟𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀏𑀯𑀫𑀸𑀯𑀼𑀲𑁄𑀢𑀺 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄𑀢𑀺 𑀣𑁂𑀭𑁄𑀧𑀺 𑀬𑀲𑁆𑀫𑀸 𑀧𑀺𑀬𑀥𑀫𑁆𑀫𑀲𑁆𑀲𑀯𑀦𑁄𑀯 𑀅𑀭𑀺𑀬𑀲𑀸𑀯𑀓𑁄, 𑀢𑀲𑁆𑀫𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀕𑀘𑁆𑀙𑀸𑀯𑀼𑀲𑁄, 𑀢𑁆𑀯𑀁, 𑀫𑀬𑁆𑀳𑀁 𑀲𑀻𑀲𑀁 𑀯𑀸 𑀭𑀼𑀚𑁆𑀚𑀢𑀺 𑀧𑀺𑀝𑁆𑀞𑀺 𑀯𑀸𑀢𑀺 𑀓𑀺𑀜𑁆𑀘𑀺 𑀮𑁂𑀲𑀸𑀧𑀤𑁂𑀲𑀁 𑀅𑀓𑀢𑁆𑀯𑀸 𑀢𑀼𑀝𑁆𑀞𑀳𑀤𑀬𑁄𑀯, ‘‘𑀏𑀯𑀫𑀸𑀯𑀼𑀲𑁄’’𑀢𑀺𑀆𑀤𑀺𑀫𑀸𑀳. 𑀧𑀝𑀺𑀲𑁆𑀲𑀼𑀢𑁆𑀯𑀸 𑀘 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀢𑁄 𑀯𑀼𑀝𑁆𑀞𑀸𑀬 𑀘𑀫𑁆𑀫𑀔𑀡𑁆𑀟𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀅𑀦𑀼𑀩𑀦𑁆𑀥𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀤𑁆𑀯𑁂 𑀫𑀳𑀸𑀣𑁂𑀭𑀸 𑀧𑀝𑀺𑀧𑀸𑀝𑀺𑀬𑀸 𑀞𑀺𑀢𑀸𑀦𑀺 𑀤𑁆𑀯𑁂 𑀘𑀦𑁆𑀤𑀫𑀡𑁆𑀟𑀮𑀸𑀦𑀺 𑀯𑀺𑀬, 𑀤𑁆𑀯𑁂 𑀲𑀽𑀭𑀺𑀬𑀫𑀡𑁆𑀟𑀮𑀸𑀦𑀺 𑀯𑀺𑀬, 𑀤𑁆𑀯𑁂 𑀙𑀤𑁆𑀤𑀦𑁆𑀢𑀦𑀸𑀕𑀭𑀸𑀚𑀸𑀦𑁄 𑀯𑀺𑀬, 𑀤𑁆𑀯𑁂 𑀲𑀻𑀳𑀸 𑀯𑀺𑀬, 𑀤𑁆𑀯𑁂 𑀩𑁆𑀬𑀕𑁆𑀖𑀸 𑀯𑀺𑀬 𑀘 𑀯𑀺𑀭𑁄𑀘𑀺𑀁𑀲𑀼. 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄 𑀤𑁆𑀯𑁂 𑀫𑀳𑀸𑀣𑁂𑀭𑁂 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑁂 𑀤𑀺𑀲𑁆𑀯𑀸 𑀧𑀘𑁆𑀙𑀺𑀫𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑁂𑀦𑁆𑀢𑁄 𑀲𑀽𑀭𑀺𑀬𑀁 𑀯𑀦𑀦𑁆𑀢𑀁 𑀧𑀯𑀺𑀲𑀦𑁆𑀢𑀁 𑀯𑀺𑀬, 𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑁂𑀦𑁆𑀢𑁄 𑀘𑀦𑁆𑀤𑀁 𑀯𑀦𑀦𑁆𑀢𑀢𑁄 𑀉𑀕𑁆𑀕𑀘𑁆𑀙𑀦𑁆𑀢𑀁 𑀯𑀺𑀬, 𑀲𑀸𑀮𑀯𑀦𑀁 𑀑𑀮𑁄𑀓𑁂𑀦𑁆𑀢𑁄 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀫𑁂𑀯 𑀲𑀸𑀮𑀯𑀦𑀜𑁆𑀘 𑀤𑀺𑀲𑁆𑀯𑀸 𑀅𑀚𑁆𑀚 𑀉𑀧𑁄𑀲𑀣𑀤𑀺𑀯𑀲𑁄, 𑀇𑀫𑁂 𑀘 𑀫𑁂 𑀚𑁂𑀝𑁆𑀞𑀪𑀸𑀢𑀺𑀓𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑀺, 𑀫𑀳𑀦𑁆𑀢𑁂𑀦 𑀥𑀫𑁆𑀫𑀲𑁆𑀲𑀯𑀦𑁂𑀦 𑀪𑀯𑀺𑀢𑀩𑁆𑀩𑀁, 𑀅𑀳𑀫𑁆𑀧𑀺 𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀪𑀸𑀕𑀻 𑀪𑀯𑀺𑀲𑁆𑀲𑀸𑀫𑀻𑀢𑀺 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀢𑁄 𑀯𑀼𑀝𑁆𑀞𑀸𑀬 𑀘𑀫𑁆𑀫𑀔𑀡𑁆𑀟𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀫𑀳𑀸𑀣𑁂𑀭𑀸𑀦𑀁 𑀧𑀤𑀸𑀦𑀼𑀧𑀤𑀺𑀓𑁄 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀘 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀆𑀬𑀲𑁆𑀫𑀸 𑀘 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀸 𑀘 𑀅𑀦𑀼𑀭𑀼𑀤𑁆𑀥𑁄 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀽’’𑀢𑀺. 𑀉𑀧𑀲𑀗𑁆𑀓𑀫𑀺𑀁𑀲𑀽𑀢𑀺. 𑀧𑀝𑀺𑀧𑀸𑀝𑀺𑀬𑀸 𑀞𑀺𑀢𑀸 𑀢𑀬𑁄 𑀘𑀦𑁆𑀤𑀸 𑀯𑀺𑀬, 𑀲𑀽𑀭𑀺𑀬𑀸 𑀯𑀺𑀬, 𑀲𑀻𑀳𑀸 𑀯𑀺𑀬 𑀘 𑀯𑀺𑀭𑁄𑀘𑀫𑀸𑀦𑀸 𑀉𑀧𑀲𑀗𑁆𑀓𑀫𑀺𑀁𑀲𑀼.

𑁩𑁩𑁩. 𑀏𑀯𑀁 𑀉𑀧𑀲𑀗𑁆𑀓𑀫𑀦𑁆𑀢𑁂 𑀧𑀦 𑀢𑁂 𑀫𑀳𑀸𑀣𑁂𑀭𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀢𑁆𑀢𑀦𑁄 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄𑀬𑁂𑀯 𑀤𑀺𑀲𑁆𑀯𑀸, ‘‘𑀅𑀚𑁆𑀚 𑀫𑀳𑀦𑁆𑀢𑀁 𑀥𑀫𑁆𑀫𑀲𑁆𑀲𑀯𑀦𑀁 𑀪𑀯𑀺𑀲𑁆𑀲𑀢𑀺, 𑀫𑀬𑀸𑀧𑀺 𑀢𑀲𑁆𑀲 𑀪𑀸𑀕𑀺𑀦𑀸 𑀪𑀯𑀺𑀢𑀩𑁆𑀩𑀁, 𑀦 𑀔𑁄 𑀧𑀦 𑀏𑀓𑀓𑁄𑀯 𑀕𑀫𑀺𑀲𑁆𑀲𑀸𑀫𑀺, 𑀫𑀬𑁆𑀳𑀁 𑀧𑀺𑀬𑀲𑀳𑀸𑀬𑀫𑁆𑀧𑀺 𑀭𑁂𑀯𑀢𑀢𑁆𑀣𑁂𑀭𑀁 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀲𑀩𑁆𑀩𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲 𑀫𑀳𑀸𑀓𑀲𑁆𑀲𑀧𑀲𑁆𑀲 𑀅𑀦𑀼𑀭𑀼𑀤𑁆𑀥𑀲𑁆𑀲 𑀉𑀧𑀲𑀗𑁆𑀓𑀫𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀺 𑀢𑁂 𑀤𑁆𑀯𑁂 𑀚𑀦𑀸 𑀧𑀝𑀺𑀧𑀸𑀝𑀺𑀬𑀸 𑀞𑀺𑀢𑀸 𑀤𑁆𑀯𑁂 𑀘𑀦𑁆𑀤𑀸 𑀯𑀺𑀬, 𑀲𑀽𑀭𑀺𑀬𑀸 𑀯𑀺𑀬, 𑀲𑀻𑀳𑀸 𑀯𑀺𑀬 𑀘 𑀯𑀺𑀭𑁄𑀘𑀫𑀸𑀦𑀸 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄’’𑀢𑀺𑀆𑀤𑀺. 𑀤𑀺𑀲𑁆𑀯𑀸𑀦 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘𑀸𑀢𑀺 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀓𑀣𑀸𑀉𑀧𑀘𑀸𑀭𑀁 𑀲𑀫𑁆𑀧𑀢𑁆𑀢𑀫𑁂𑀢𑀁, ‘‘𑀏𑀢𑀼 𑀔𑁄 𑀆𑀬𑀲𑁆𑀫𑀸’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀭𑀫𑀡𑀻𑀬𑀁, 𑀆𑀯𑀼𑀲𑁄𑀢𑀺 𑀏𑀢𑁆𑀣 𑀤𑀼𑀯𑀺𑀥𑀁 𑀭𑀸𑀫𑀡𑁂𑀬𑁆𑀬𑀓𑀁 𑀯𑀦𑀭𑀸𑀫𑀡𑁂𑀬𑁆𑀬𑀓𑀁 𑀧𑀼𑀕𑁆𑀕𑀮𑀭𑀸𑀫𑀡𑁂𑀬𑁆𑀬𑀓𑀜𑁆𑀘. 𑀢𑀢𑁆𑀣 𑀯𑀦𑀁 𑀦𑀸𑀫 𑀦𑀸𑀕𑀲𑀮𑀴𑀲𑀸𑀮𑀘𑀫𑁆𑀧𑀓𑀸𑀤𑀻𑀳𑀺 𑀲𑀜𑁆𑀙𑀦𑁆𑀦𑀁 𑀳𑁄𑀢𑀺 𑀩𑀳𑀮𑀘𑁆𑀙𑀸𑀬𑀁 𑀧𑀼𑀧𑁆𑀨𑀨𑀮𑀽𑀧𑀕𑀁 𑀯𑀺𑀯𑀺𑀥𑀭𑀼𑀓𑁆𑀔𑀁 𑀉𑀤𑀓𑀲𑀫𑁆𑀧𑀦𑁆𑀦𑀁 𑀕𑀸𑀫𑀢𑁄 𑀦𑀺𑀲𑁆𑀲𑀝𑀁, 𑀇𑀤𑀁 𑀯𑀦𑀭𑀸𑀫𑀡𑁂𑀬𑁆𑀬𑀓𑀁 𑀦𑀸𑀫. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀭𑀫𑀡𑀻𑀬𑀸𑀦𑀺 𑀅𑀭𑀜𑁆𑀜𑀸𑀦𑀺, 𑀬𑀢𑁆𑀣 𑀦 𑀭𑀫𑀢𑀻 𑀚𑀦𑁄;

𑀯𑀻𑀢𑀭𑀸𑀕𑀸 𑀭𑀫𑀺𑀲𑁆𑀲𑀦𑁆𑀢𑀺, 𑀦 𑀢𑁂 𑀓𑀸𑀫𑀕𑀯𑁂𑀲𑀺𑀦𑁄’’𑀢𑀺. (𑀥. 𑀧. 𑁯𑁯);

𑀯𑀦𑀁 𑀧𑀦 𑀲𑀘𑁂𑀧𑀺 𑀉𑀚𑁆𑀚𑀗𑁆𑀕𑀮𑁂 𑀳𑁄𑀢𑀺 𑀦𑀺𑀭𑀼𑀤𑀓𑀁 𑀯𑀺𑀭𑀮𑀘𑁆𑀙𑀸𑀬𑀁 𑀓𑀡𑁆𑀝𑀓𑀲𑀫𑀸𑀓𑀺𑀡𑁆𑀡𑀁, 𑀩𑀼𑀤𑁆𑀥𑀸𑀤𑀬𑁄𑀧𑁂𑀢𑁆𑀣 𑀅𑀭𑀺𑀬𑀸 𑀯𑀺𑀳𑀭𑀦𑁆𑀢𑀺, 𑀇𑀤𑀁 𑀧𑀼𑀕𑁆𑀕𑀮𑀭𑀸𑀫𑀡𑁂𑀬𑁆𑀬𑀓𑀁 𑀦𑀸𑀫. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂, 𑀦𑀺𑀦𑁆𑀦𑁂 𑀯𑀸 𑀬𑀤𑀺 𑀯𑀸 𑀣𑀮𑁂;

𑀬𑀢𑁆𑀣 𑀅𑀭𑀳𑀦𑁆𑀢𑁄 𑀯𑀺𑀳𑀭𑀦𑁆𑀢𑀺, 𑀢𑀁 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓’’𑀦𑁆𑀢𑀺. (𑀥. 𑀧. 𑁯𑁮);

𑀇𑀥 𑀧𑀦 𑀢𑀁 𑀤𑀼𑀯𑀺𑀥𑀫𑁆𑀧𑀺 𑀮𑀩𑁆𑀪𑀢𑀺. 𑀢𑀤𑀸 𑀳𑀺 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀁 𑀳𑁄𑀢𑀺 𑀓𑀼𑀲𑀼𑀫𑀕𑀦𑁆𑀥𑀲𑀼𑀕𑀦𑁆𑀥𑀁, 𑀲𑀤𑁂𑀯𑀓𑁂 𑀘𑁂𑀢𑁆𑀣 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀢𑀺𑀁𑀲𑀲𑀳𑀲𑁆𑀲𑀫𑀢𑁆𑀢𑁂𑀳𑀺 𑀅𑀪𑀺𑀜𑁆𑀜𑀸𑀢𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀯𑀺𑀳𑀭𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀭𑀫𑀡𑀻𑀬𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀕𑁄𑀲𑀺𑀗𑁆𑀕𑀲𑀸𑀮𑀯𑀦’’𑀦𑁆𑀢𑀺.

𑀤𑁄𑀲𑀺𑀦𑀸𑀢𑀺 𑀤𑁄𑀲𑀸𑀧𑀕𑀢𑀸, 𑀅𑀩𑁆𑀪𑀁 𑀫𑀳𑀺𑀓𑀸 𑀥𑀽𑀫𑁄 𑀭𑀚𑁄 𑀭𑀸𑀳𑀽𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀯𑀺𑀭𑀳𑀺𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀸𑀢𑀺 𑀲𑀩𑁆𑀩𑀢𑁆𑀣 𑀧𑀸𑀮𑀺𑀨𑀼𑀮𑁆𑀮𑀸, 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀕𑁆𑀕𑀸 𑀅𑀧𑀼𑀧𑁆𑀨𑀺𑀢𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺. 𑀤𑀺𑀩𑁆𑀩𑀸 𑀫𑀜𑁆𑀜𑁂 𑀕𑀦𑁆𑀥𑀸 𑀲𑀫𑁆𑀧𑀯𑀦𑁆𑀢𑀻𑀢𑀺 𑀤𑀺𑀩𑁆𑀩𑀸 𑀫𑀦𑁆𑀤𑀸𑀭𑀧𑀼𑀧𑁆𑀨𑀓𑁄𑀯𑀺𑀴𑀸𑀭𑀧𑀸𑀭𑀺𑀘𑁆𑀙𑀢𑁆𑀢𑀓𑀘𑀦𑁆𑀤𑀦𑀘𑀼𑀡𑁆𑀡𑀕𑀦𑁆𑀥𑀸 𑀯𑀺𑀬 𑀲𑀫𑀦𑁆𑀢𑀸 𑀧𑀯𑀸𑀬𑀦𑁆𑀢𑀺, 𑀲𑀓𑁆𑀓𑀲𑀼𑀬𑀸𑀲𑀦𑁆𑀢𑀼𑀲𑀺𑀢𑀦𑀺𑀫𑁆𑀫𑀸𑀦𑀭𑀢𑀺𑀧𑀭𑀦𑀺𑀫𑁆𑀫𑀺𑀢𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀑𑀢𑀺𑀡𑁆𑀡𑀝𑁆𑀞𑀸𑀦𑀁 𑀯𑀺𑀬 𑀯𑀸𑀬𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀣𑀁𑀭𑀽𑀧𑁂𑀦, 𑀆𑀯𑀼𑀲𑁄 𑀆𑀦𑀦𑁆𑀤𑀸𑀢𑀺 𑀆𑀦𑀦𑁆𑀤𑀢𑁆𑀣𑁂𑀭𑁄 𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀣𑁂𑀭𑀸𑀦𑀁 𑀲𑀗𑁆𑀖𑀦𑀯𑀓𑁄𑀯. 𑀓𑀲𑁆𑀫𑀸 𑀣𑁂𑀭𑁄 𑀢𑀁𑀬𑁂𑀯 𑀧𑀞𑀫𑀁 𑀧𑀼𑀘𑁆𑀙𑀢𑀻𑀢𑀺? 𑀫𑀫𑀸𑀬𑀺𑀢𑀢𑁆𑀢𑀸. 𑀢𑁂 𑀳𑀺 𑀤𑁆𑀯𑁂 𑀣𑁂𑀭𑀸 𑀅𑀜𑁆𑀜𑀫𑀜𑁆𑀜𑀁 𑀫𑀫𑀸𑀬𑀺𑀁𑀲𑀼. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄, ‘‘𑀫𑀬𑀸 𑀓𑀢𑁆𑀢𑀩𑁆𑀩𑀁 𑀲𑀢𑁆𑀣𑀼 𑀉𑀧𑀝𑁆𑀞𑀸𑀦𑀁 𑀓𑀭𑁄𑀢𑀻’’𑀢𑀺 𑀆𑀦𑀦𑁆𑀤𑀢𑁆𑀣𑁂𑀭𑀁 𑀫𑀫𑀸𑀬𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀪𑀕𑀯𑀢𑁄 𑀲𑀸𑀯𑀓𑀸𑀦𑀁 𑀅𑀕𑁆𑀕𑁄𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀫𑀫𑀸𑀬𑀺, 𑀓𑀼𑀮𑀤𑀸𑀭𑀓𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀉𑀧𑀚𑁆𑀛𑀁 𑀕𑀡𑁆𑀳𑀸𑀧𑁂𑀲𑀺. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀢𑀣𑁂𑀯 𑀅𑀓𑀸𑀲𑀺. 𑀏𑀯𑀁 𑀏𑀓𑀫𑁂𑀓𑁂𑀦 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀤𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀉𑀧𑀚𑁆𑀛𑀁 𑀕𑀡𑁆𑀳𑀸𑀧𑀺𑀢𑀸𑀦𑀺 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀅𑀳𑁂𑀲𑀼𑀁. 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀧𑀡𑀻𑀢𑀸𑀦𑀺 𑀘𑀻𑀯𑀭𑀸𑀤𑀻𑀦𑀺𑀧𑀺 𑀮𑀪𑀺𑀢𑁆𑀯𑀸 𑀣𑁂𑀭𑀲𑁆𑀲𑁂𑀯 𑀤𑁂𑀢𑀺.

𑀏𑀓𑁄 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀩𑀼𑀤𑁆𑀥𑀭𑀢𑀦𑀲𑁆𑀲 𑀘 𑀲𑀗𑁆𑀖𑀭𑀢𑀦𑀲𑁆𑀲 𑀘 𑀧𑀽𑀚𑀸 𑀧𑀜𑁆𑀜𑀸𑀬𑀢𑀺, 𑀓𑀣𑀁 𑀦𑀼 𑀔𑁄 𑀥𑀫𑁆𑀫𑀭𑀢𑀦𑀁 𑀧𑀽𑀚𑀺𑀢𑀁 𑀦𑀸𑀫 𑀳𑁄𑀢𑀻’’𑀢𑀺? 𑀲𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀪𑀕𑀯𑀸 𑀆𑀳 𑁋 ‘‘𑀲𑀘𑁂𑀲𑀺, 𑀩𑁆𑀭𑀸𑀳𑁆𑀫𑀡, 𑀥𑀫𑁆𑀫𑀭𑀢𑀦𑀁 𑀧𑀽𑀚𑀺𑀢𑀼𑀓𑀸𑀫𑁄, 𑀏𑀓𑀁 𑀩𑀳𑀼𑀲𑁆𑀲𑀼𑀢𑀁 𑀧𑀽𑀚𑁂𑀳𑀻’’𑀢𑀺 𑀩𑀳𑀼𑀲𑁆𑀲𑀼𑀢𑀁, 𑀪𑀦𑁆𑀢𑁂, 𑀆𑀘𑀺𑀓𑁆𑀔𑀣𑀸𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀼𑀘𑁆𑀙𑀢𑀺. 𑀲𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑀳𑀼𑀲𑁆𑀲𑀼𑀢𑀁, 𑀪𑀦𑁆𑀢𑁂, 𑀆𑀘𑀺𑀓𑁆𑀔𑀣𑀸𑀢𑀺 𑀆𑀳. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀩𑁆𑀭𑀸𑀳𑁆𑀫𑀡𑀸𑀢𑀺. 𑀩𑁆𑀭𑀸𑀳𑁆𑀫𑀡𑁄 𑀣𑁂𑀭𑀁 𑀲𑀳𑀲𑁆𑀲𑀕𑁆𑀖𑀦𑀺𑀓𑁂𑀦 𑀘𑀻𑀯𑀭𑁂𑀦 𑀧𑀽𑀚𑁂𑀲𑀺. 𑀣𑁂𑀭𑁄 𑀢𑀁 𑀕𑀳𑁂𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀪𑀕𑀯𑀸 ‘‘𑀓𑀼𑀢𑁄, 𑀆𑀦𑀦𑁆𑀤, 𑀮𑀤𑁆𑀥’’𑀦𑁆𑀢𑀺 𑀆𑀳. 𑀏𑀓𑁂𑀦, 𑀪𑀦𑁆𑀢𑁂, 𑀩𑁆𑀭𑀸𑀳𑁆𑀫𑀡𑁂𑀦 𑀤𑀺𑀦𑁆𑀦𑀁, 𑀇𑀤𑀁 𑀧𑀦𑀸𑀳𑀁 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀤𑀸𑀢𑀼𑀓𑀸𑀫𑁄𑀢𑀺. 𑀤𑁂𑀳𑀺, 𑀆𑀦𑀦𑁆𑀤𑀸𑀢𑀺. 𑀘𑀸𑀭𑀺𑀓𑀁 𑀧𑀓𑁆𑀓𑀦𑁆𑀢𑁄, 𑀪𑀦𑁆𑀢𑁂𑀢𑀺. 𑀆𑀕𑀢𑀓𑀸𑀮𑁂 𑀤𑁂𑀳𑀻𑀢𑀺. 𑀲𑀺𑀓𑁆𑀔𑀸𑀧𑀤𑀁, 𑀪𑀦𑁆𑀢𑁂, 𑀧𑀜𑁆𑀜𑀢𑁆𑀢𑀦𑁆𑀢𑀺. 𑀓𑀤𑀸 𑀧𑀦 𑀲𑀸𑀭𑀺𑀧𑀼𑀢𑁆𑀢𑁄 𑀆𑀕𑀫𑀺𑀲𑁆𑀲𑀢𑀻𑀢𑀺? 𑀤𑀲𑀸𑀳𑀫𑀢𑁆𑀢𑁂𑀦, 𑀪𑀦𑁆𑀢𑁂𑀢𑀺. ‘‘𑀅𑀦𑀼𑀚𑀸𑀦𑀸𑀫𑀺, 𑀆𑀦𑀦𑁆𑀤, 𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀼’’𑀦𑁆𑀢𑀺 (𑀧𑀸𑀭𑀸. 𑁪𑁬𑁧; 𑀫𑀳𑀸𑀯. 𑁩𑁪𑁭) 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀺. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀢𑀣𑁂𑀯 𑀬𑀁𑀓𑀺𑀜𑁆𑀘𑀺 𑀫𑀦𑀸𑀧𑀁 𑀮𑀪𑀢𑀺, 𑀢𑀁 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀤𑁂𑀢𑀺. 𑀏𑀯𑀁 𑀢𑁂 𑀣𑁂𑀭𑀸 𑀅𑀜𑁆𑀜𑀫𑀜𑁆𑀜𑀁 𑀫𑀫𑀸𑀬𑀺𑀁𑀲𑀼, 𑀇𑀢𑀺 𑀫𑀫𑀸𑀬𑀺𑀢𑀢𑁆𑀢𑀸 𑀧𑀞𑀫𑀁 𑀧𑀼𑀘𑁆𑀙𑀺.

𑀅𑀧𑀺𑀘 𑀅𑀦𑀼𑀫𑀢𑀺𑀧𑀼𑀘𑁆𑀙𑀸 𑀦𑀸𑀫𑁂𑀲𑀸 𑀔𑀼𑀤𑁆𑀤𑀓𑀢𑁄 𑀧𑀝𑁆𑀞𑀸𑀬 𑀧𑀼𑀘𑁆𑀙𑀺𑀢𑀩𑁆𑀩𑀸 𑀳𑁄𑀢𑀺. 𑀢𑀲𑁆𑀫𑀸 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀧𑀞𑀫𑀁 𑀆𑀦𑀦𑁆𑀤𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀆𑀦𑀦𑁆𑀤𑁄 𑀅𑀢𑁆𑀢𑀦𑁄 𑀧𑀝𑀺𑀪𑀸𑀦𑀁 𑀩𑁆𑀬𑀸𑀓𑀭𑀺𑀲𑁆𑀲𑀢𑀺. 𑀢𑀢𑁄 𑀭𑁂𑀯𑀢𑀁, 𑀅𑀦𑀼𑀭𑀼𑀤𑁆𑀥𑀁, 𑀫𑀳𑀸𑀓𑀲𑁆𑀲𑀧𑀁, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀺. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀅𑀢𑁆𑀢𑀦𑁄 𑀧𑀝𑀺𑀪𑀸𑀦𑀁 𑀩𑁆𑀬𑀸𑀓𑀭𑀺𑀲𑁆𑀲𑀢𑀺. 𑀢𑀢𑁄 𑀧𑀜𑁆𑀘𑀧𑀺 𑀣𑁂𑀭𑀸 𑀫𑀁 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺, 𑀅𑀳𑀫𑁆𑀧𑀺 𑀅𑀢𑁆𑀢𑀦𑁄 𑀧𑀝𑀺𑀪𑀸𑀦𑀁 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀏𑀢𑁆𑀢𑀸𑀯𑀢𑀸𑀧𑀺 𑀅𑀬𑀁 𑀥𑀫𑁆𑀫𑀤𑁂𑀲𑀦𑀸 𑀲𑀺𑀔𑀸𑀧𑁆𑀧𑀢𑁆𑀢𑀸 𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀸 𑀦 𑀪𑀯𑀺𑀲𑁆𑀲𑀢𑀺, 𑀅𑀣 𑀫𑀬𑀁 𑀲𑀩𑁆𑀩𑁂𑀧𑀺 𑀤𑀲𑀩𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺𑀲𑁆𑀲𑀸𑀫, 𑀲𑀢𑁆𑀣𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀩𑁆𑀬𑀸𑀓𑀭𑀺𑀲𑁆𑀲𑀢𑀺. 𑀏𑀢𑁆𑀢𑀸𑀯𑀢𑀸 𑀅𑀬𑀁 𑀥𑀫𑁆𑀫𑀤𑁂𑀲𑀦𑀸 𑀲𑀺𑀔𑀸𑀧𑁆𑀧𑀢𑁆𑀢𑀸 𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀸 𑀪𑀯𑀺𑀲𑁆𑀲𑀢𑀺. 𑀬𑀣𑀸 𑀳𑀺 𑀚𑀦𑀧𑀤𑀫𑁆𑀳𑀺 𑀉𑀧𑁆𑀧𑀦𑁆𑀦𑁄 𑀅𑀝𑁆𑀝𑁄 𑀕𑀸𑀫𑀪𑁄𑀚𑀓𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀺𑀁 𑀦𑀺𑀘𑁆𑀙𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂 𑀚𑀦𑀧𑀤𑀪𑁄𑀚𑀓𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀺𑀁 𑀅𑀲𑀓𑁆𑀓𑁄𑀦𑁆𑀢𑁂 𑀫𑀳𑀸𑀯𑀺𑀦𑀺𑀘𑁆𑀙𑀬𑀅𑀫𑀘𑁆𑀘𑀁, 𑀢𑀲𑁆𑀫𑀺𑀁 𑀅𑀲𑀓𑁆𑀓𑁄𑀦𑁆𑀢𑁂 𑀲𑁂𑀦𑀸𑀧𑀢𑀺𑀁, 𑀢𑀲𑁆𑀫𑀺𑀁 𑀅𑀲𑀓𑁆𑀓𑁄𑀦𑁆𑀢𑁂 𑀉𑀧𑀭𑀸𑀚𑀁, 𑀢𑀲𑁆𑀫𑀺𑀁 𑀯𑀺𑀦𑀺𑀘𑁆𑀙𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂 𑀭𑀸𑀚𑀸𑀦𑀁 𑀧𑀸𑀧𑀼𑀡𑀸𑀢𑀺, 𑀭𑀜𑁆𑀜𑀸 𑀯𑀺𑀦𑀺𑀘𑁆𑀙𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀝𑁆𑀝𑁄 𑀅𑀧𑀭𑀸𑀧𑀭𑀁 𑀦 𑀲𑀜𑁆𑀘𑀭𑀢𑀺, 𑀭𑀸𑀚𑀯𑀘𑀦𑁂𑀦𑁂𑀯 𑀙𑀺𑀚𑁆𑀚𑀢𑀺. 𑀏𑀯𑀫𑁂𑀯𑀁 𑀅𑀳𑀜𑁆𑀳𑀺 𑀧𑀞𑀫𑀁 𑀆𑀦𑀦𑁆𑀤𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀺…𑀧𑁂… 𑀅𑀣 𑀫𑀬𑀁 𑀲𑀩𑁆𑀩𑁂𑀧𑀺 𑀤𑀲𑀩𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺𑀲𑁆𑀲𑀸𑀫, 𑀲𑀢𑁆𑀣𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀩𑁆𑀬𑀸𑀓𑀭𑀺𑀲𑁆𑀲𑀢𑀺. 𑀏𑀢𑁆𑀢𑀸𑀯𑀢𑀸 𑀅𑀬𑀁 𑀥𑀫𑁆𑀫𑀤𑁂𑀲𑀦𑀸 𑀲𑀺𑀔𑀸𑀧𑁆𑀧𑀢𑁆𑀢𑀸 𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀸 𑀪𑀯𑀺𑀲𑁆𑀲𑀢𑀺. 𑀏𑀯𑀁 𑀅𑀦𑀼𑀫𑀢𑀺𑀧𑀼𑀘𑁆𑀙𑀁 𑀧𑀼𑀘𑁆𑀙𑀦𑁆𑀢𑁄 𑀣𑁂𑀭𑁄 𑀧𑀞𑀫𑀁 𑀆𑀦𑀦𑁆𑀤𑀢𑁆𑀣𑁂𑀭𑀁 𑀧𑀼𑀘𑁆𑀙𑀺.

𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀻𑀢𑀺 𑀩𑀳𑀼 𑀅𑀲𑁆𑀲 𑀲𑀼𑀢𑀁 𑀳𑁄𑀢𑀺, 𑀦𑀯𑀗𑁆𑀕𑀁 𑀲𑀢𑁆𑀣𑀼𑀲𑀸𑀲𑀦𑀁 𑀧𑀸𑀴𑀺𑀅𑀦𑀼𑀲𑀦𑁆𑀥𑀺𑀧𑀼𑀩𑁆𑀩𑀸𑀧𑀭𑀯𑀲𑁂𑀦 𑀉𑀕𑁆𑀕𑀳𑀺𑀢𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀢𑀥𑀭𑁄𑀢𑀺 𑀲𑀼𑀢𑀲𑁆𑀲 𑀆𑀥𑀸𑀭𑀪𑀽𑀢𑁄. 𑀬𑀲𑁆𑀲 𑀳𑀺 𑀇𑀢𑁄 𑀕𑀳𑀺𑀢𑀁 𑀇𑀢𑁄 𑀧𑀮𑀸𑀬𑀢𑀺, 𑀙𑀺𑀤𑁆𑀤𑀖𑀝𑁂 𑀉𑀤𑀓𑀁 𑀯𑀺𑀬 𑀦 𑀢𑀺𑀝𑁆𑀞𑀢𑀺, 𑀧𑀭𑀺𑀲𑀫𑀚𑁆𑀛𑁂 𑀏𑀓𑀁 𑀲𑀼𑀢𑁆𑀢𑀁 𑀯𑀸 𑀚𑀸𑀢𑀓𑀁 𑀯𑀸 𑀓𑀣𑁂𑀢𑀼𑀁 𑀯𑀸 𑀯𑀸𑀘𑁂𑀢𑀼𑀁 𑀯𑀸 𑀦 𑀲𑀓𑁆𑀓𑁄𑀢𑀺, 𑀅𑀬𑀁 𑀦 𑀲𑀼𑀢𑀥𑀭𑁄 𑀦𑀸𑀫. 𑀬𑀲𑁆𑀲 𑀧𑀦 𑀉𑀕𑁆𑀕𑀳𑀺𑀢𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀳𑀺𑀢𑀓𑀸𑀮𑀲𑀤𑀺𑀲𑀫𑁂𑀯 𑀳𑁄𑀢𑀺, 𑀤𑀲𑀧𑀺 𑀯𑀻𑀲𑀢𑀺𑀧𑀺 𑀯𑀲𑁆𑀲𑀸𑀦𑀺 𑀲𑀚𑁆𑀛𑀸𑀬𑀁 𑀅𑀓𑀭𑁄𑀦𑁆𑀢𑀲𑁆𑀲 𑀦 𑀦𑀲𑁆𑀲𑀢𑀺, 𑀅𑀬𑀁 𑀲𑀼𑀢𑀥𑀭𑁄 𑀦𑀸𑀫. 𑀲𑀼𑀢𑀲𑀦𑁆𑀦𑀺𑀘𑀬𑁄𑀢𑀺 𑀲𑀼𑀢𑀲𑁆𑀲 𑀲𑀦𑁆𑀦𑀺𑀘𑀬𑀪𑀽𑀢𑁄. 𑀬𑀣𑀸 𑀳𑀺 𑀲𑀼𑀢𑀁 𑀳𑀤𑀬𑀫𑀜𑁆𑀚𑀽𑀲𑀸𑀬 𑀲𑀦𑁆𑀦𑀺𑀘𑀺𑀢𑀁 𑀲𑀺𑀮𑀸𑀬𑀁 𑀮𑁂𑀔𑀸 𑀯𑀺𑀬, 𑀲𑀼𑀯𑀡𑁆𑀡𑀖𑀝𑁂 𑀧𑀓𑁆𑀔𑀺𑀢𑁆𑀢𑀲𑀻𑀳𑀯𑀲𑀸 𑀯𑀺𑀬 𑀘 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺, 𑀅𑀬𑀁 𑀲𑀼𑀢𑀲𑀦𑁆𑀦𑀺𑀘𑀬𑁄 𑀦𑀸𑀫. 𑀥𑀸𑀢𑀸𑀢𑀺 𑀞𑀺𑀢𑀸 𑀧𑀕𑀼𑀡𑀸. 𑀏𑀓𑀘𑁆𑀘𑀲𑁆𑀲 𑀳𑀺 𑀉𑀕𑁆𑀕𑀳𑀺𑀢𑀁 𑀩𑀼𑀤𑁆𑀥𑀯𑀘𑀦𑀁 𑀥𑀸𑀢𑀁 𑀧𑀕𑀼𑀡𑀁 𑀦𑀺𑀘𑁆𑀘𑀮𑀺𑀢𑀁 𑀦 𑀳𑁄𑀢𑀺, 𑀅𑀲𑀼𑀓𑀲𑀼𑀢𑁆𑀢𑀁 𑀯𑀸 𑀚𑀸𑀢𑀓𑀁 𑀯𑀸 𑀓𑀣𑁂𑀳𑀻𑀢𑀺 𑀯𑀼𑀢𑁆𑀢𑁂 𑀲𑀚𑁆𑀛𑀸𑀬𑀺𑀢𑁆𑀯𑀸 𑀲𑀁𑀲𑀦𑁆𑀤𑀺𑀢𑁆𑀯𑀸 𑀲𑀫𑀦𑀼𑀕𑁆𑀕𑀸𑀳𑀺𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀯𑀤𑀢𑀺. 𑀏𑀓𑀘𑁆𑀘𑀲𑁆𑀲 𑀥𑀸𑀢𑀁 𑀧𑀕𑀼𑀡𑀁 𑀪𑀯𑀗𑁆𑀕𑀲𑁄𑀢𑀲𑀤𑀺𑀲𑀁 𑀳𑁄𑀢𑀺, 𑀅𑀲𑀼𑀓𑀲𑀼𑀢𑁆𑀢𑀁 𑀯𑀸 𑀚𑀸𑀢𑀓𑀁 𑀯𑀸 𑀓𑀣𑁂𑀳𑀻𑀢𑀺 𑀯𑀼𑀢𑁆𑀢𑁂 𑀉𑀤𑁆𑀥𑀭𑀺𑀢𑁆𑀯𑀸 𑀢𑀫𑁂𑀯 𑀓𑀣𑁂𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀥𑀸𑀢𑀸’’𑀢𑀺.

𑀯𑀘𑀲𑀸 𑀧𑀭𑀺𑀘𑀺𑀢𑀸𑀢𑀺 𑀲𑀼𑀢𑁆𑀢𑀤𑀲𑀓-𑀯𑀕𑁆𑀕𑀤𑀲𑀓-𑀧𑀡𑁆𑀡𑀸𑀲𑀤𑀲𑀓𑀸𑀦𑀁 𑀯𑀲𑁂𑀦 𑀯𑀸𑀘𑀸𑀬 𑀲𑀚𑁆𑀛𑀸𑀬𑀺𑀢𑀸. 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸𑀢𑀺 𑀘𑀺𑀢𑁆𑀢𑁂𑀦 𑀅𑀦𑀼𑀧𑁂𑀓𑁆𑀔𑀺𑀢𑀸, 𑀬𑀲𑁆𑀲 𑀯𑀸𑀘𑀸𑀬 𑀲𑀚𑁆𑀛𑀸𑀬𑀺𑀢𑀁 𑀩𑀼𑀤𑁆𑀥𑀯𑀘𑀦𑀁 𑀫𑀦𑀲𑀸 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀢𑀢𑁆𑀣 𑀢𑀢𑁆𑀣 𑀧𑀸𑀓𑀝𑀁 𑀳𑁄𑀢𑀺. 𑀫𑀳𑀸𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀞𑀺𑀢𑀲𑁆𑀲 𑀭𑀽𑀧𑀕𑀢𑀁 𑀯𑀺𑀬 𑀧𑀜𑁆𑀜𑀸𑀬𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀯𑀘𑀲𑀸 𑀧𑀭𑀺𑀘𑀺𑀢𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸’’𑀢𑀺. 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀢𑀺 𑀅𑀢𑁆𑀣𑀢𑁄 𑀘 𑀓𑀸𑀭𑀡𑀢𑁄 𑀘 𑀧𑀜𑁆𑀜𑀸𑀬 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸. 𑀧𑀭𑀺𑀫𑀡𑁆𑀟𑀮𑁂𑀳𑀺 𑀧𑀤𑀩𑁆𑀬𑀜𑁆𑀚𑀦𑁂𑀳𑀻𑀢𑀺 𑀏𑀢𑁆𑀣 𑀧𑀤𑀫𑁂𑀯 𑀅𑀢𑁆𑀣𑀲𑁆𑀲 𑀩𑁆𑀬𑀜𑁆𑀚𑀦𑀢𑁄 𑀧𑀤𑀩𑁆𑀬𑀜𑁆𑀚𑀦𑀁, 𑀢𑀁 𑀅𑀓𑁆𑀔𑀭𑀧𑀸𑀭𑀺𑀧𑀽𑀭𑀺𑀁 𑀓𑀢𑁆𑀯𑀸 𑀤𑀲𑀯𑀺𑀥𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀬𑁄 𑀅𑀧𑀭𑀺𑀳𑀸𑀧𑁂𑀢𑁆𑀯𑀸 𑀯𑀼𑀢𑁆𑀢𑀁 𑀧𑀭𑀺𑀫𑀡𑁆𑀟𑀮𑀁 𑀦𑀸𑀫 𑀳𑁄𑀢𑀺, 𑀏𑀯𑀭𑀽𑀧𑁂𑀳𑀺 𑀧𑀤𑀩𑁆𑀬𑀜𑁆𑀚𑀦𑁂𑀳𑀻𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀬𑁄 𑀪𑀺𑀓𑁆𑀔𑀼 𑀧𑀭𑀺𑀲𑀢𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀲𑀼𑀢𑁆𑀢𑀁 𑀯𑀸 𑀚𑀸𑀢𑀓𑀁 𑀯𑀸 𑀦𑀺𑀓𑁆𑀔𑀧𑀺𑀢𑁆𑀯𑀸 𑀅𑀜𑁆𑀜𑀁 𑀉𑀧𑀸𑀭𑀫𑁆𑀪𑀓𑀭𑀁 𑀲𑀼𑀢𑁆𑀢𑀁 𑀆𑀳𑀭𑀢𑀺, 𑀢𑀲𑁆𑀲 𑀉𑀧𑀫𑀁 𑀓𑀣𑁂𑀢𑀺, 𑀢𑀤𑀢𑁆𑀣𑀁 𑀑𑀳𑀸𑀭𑁂𑀢𑀺, 𑀏𑀯𑀫𑀺𑀤𑀁 𑀕𑀳𑁂𑀢𑁆𑀯𑀸 𑀏𑀢𑁆𑀣 𑀔𑀺𑀧𑀦𑁆𑀢𑁄 𑀏𑀓𑀧𑀲𑁆𑀲𑁂𑀦𑁂𑀯 𑀧𑀭𑀺𑀳𑀭𑀦𑁆𑀢𑁄 𑀓𑀸𑀮𑀁 𑀜𑀢𑁆𑀯𑀸 𑀯𑀼𑀝𑁆𑀞𑀳𑀢𑀺. 𑀦𑀺𑀓𑁆𑀔𑀺𑀢𑁆𑀢𑀲𑀼𑀢𑁆𑀢𑀁 𑀧𑀦 𑀦𑀺𑀓𑁆𑀔𑀢𑁆𑀢𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀢𑀲𑁆𑀲 𑀓𑀣𑀸 𑀅𑀧𑀭𑀺𑀫𑀡𑁆𑀟𑀮𑀸 𑀦𑀸𑀫 𑀳𑁄𑀢𑀺. 𑀬𑁄 𑀧𑀦 𑀲𑀼𑀢𑁆𑀢𑀁 𑀯𑀸 𑀚𑀸𑀢𑀓𑀁 𑀯𑀸 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀩𑀳𑀺 𑀏𑀓𑀧𑀤𑀫𑁆𑀧𑀺 𑀅𑀕𑀦𑁆𑀢𑁆𑀯𑀸 𑀧𑀸𑀴𑀺𑀬𑀸 𑀅𑀦𑀼𑀲𑀦𑁆𑀥𑀺𑀜𑁆𑀘 𑀧𑀼𑀩𑁆𑀩𑀸𑀧𑀭𑀜𑁆𑀘 𑀅𑀫𑀓𑁆𑀔𑁂𑀦𑁆𑀢𑁄 𑀆𑀘𑀭𑀺𑀬𑁂𑀳𑀺 𑀤𑀺𑀦𑁆𑀦𑀦𑀬𑁂 𑀞𑀢𑁆𑀯𑀸 𑀢𑀼𑀮𑀺𑀓𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑁄 𑀯𑀺𑀬, 𑀕𑀫𑁆𑀪𑀻𑀭𑀫𑀸𑀢𑀺𑀓𑀸𑀬 𑀉𑀤𑀓𑀁 𑀧𑁂𑀲𑁂𑀦𑁆𑀢𑁄 𑀯𑀺𑀬, 𑀧𑀤𑀁 𑀓𑁄𑀝𑁆𑀝𑁂𑀦𑁆𑀢𑁄 𑀲𑀺𑀦𑁆𑀥𑀯𑀸𑀚𑀸𑀦𑀻𑀬𑁄 𑀯𑀺𑀬 𑀕𑀘𑁆𑀙𑀢𑀺, 𑀢𑀲𑁆𑀲 𑀓𑀣𑀸 𑀧𑀭𑀺𑀫𑀡𑁆𑀟𑀮𑀸 𑀦𑀸𑀫 𑀳𑁄𑀢𑀺. 𑀏𑀯𑀭𑀽𑀧𑀺𑀁 𑀓𑀣𑀁 𑀲𑀦𑁆𑀥𑀸𑀬 𑁋 ‘‘𑀧𑀭𑀺𑀫𑀡𑁆𑀟𑀮𑁂𑀳𑀺 𑀧𑀤𑀩𑁆𑀬𑀜𑁆𑀚𑀦𑁂𑀳𑀻’’𑀢𑀺 𑀯𑀼𑀢𑁆𑀢𑀁.

𑀅𑀦𑀼𑀧𑁆𑀧𑀩𑀦𑁆𑀥𑁂𑀳𑀻𑀢𑀺 𑀏𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑀲𑀼𑀢𑁆𑀢𑀁 𑀯𑀸 𑀚𑀸𑀢𑀓𑀁 𑀯𑀸 𑀆𑀭𑀪𑀺𑀢𑁆𑀯𑀸 𑀆𑀭𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀼𑀭𑀺𑀢𑀢𑀼𑀭𑀺𑀢𑁄 𑀅𑀭𑀡𑀺𑀁 𑀫𑀦𑁆𑀣𑁂𑀦𑁆𑀢𑁄 𑀯𑀺𑀬, 𑀉𑀡𑁆𑀳𑀔𑀸𑀤𑀦𑀻𑀬𑀁 𑀔𑀸𑀤𑀦𑁆𑀢𑁄 𑀯𑀺𑀬, 𑀧𑀸𑀴𑀺𑀬𑀸 𑀅𑀦𑀼𑀲𑀦𑁆𑀥𑀺𑀧𑀼𑀩𑁆𑀩𑀸𑀧𑀭𑁂𑀲𑀼 𑀕𑀳𑀺𑀢𑀁 𑀕𑀳𑀺𑀢𑀫𑁂𑀯 𑀅𑀕𑁆𑀕𑀳𑀺𑀢𑀁 𑀅𑀕𑁆𑀕𑀳𑀺𑀢𑀫𑁂𑀯 𑀘 𑀓𑀢𑁆𑀯𑀸 𑀧𑀼𑀭𑀸𑀡𑀧𑀡𑁆𑀡𑀦𑁆𑀢𑀭𑁂𑀲𑀼 𑀘𑀭𑀫𑀸𑀦𑀁 𑀕𑁄𑀥𑀁 𑀉𑀝𑁆𑀞𑀧𑁂𑀦𑁆𑀢𑁄 𑀯𑀺𑀬 𑀢𑀢𑁆𑀣 𑀢𑀢𑁆𑀣 𑀧𑀳𑀭𑀦𑁆𑀢𑁄 𑀑𑀲𑀸𑀧𑁂𑀦𑁆𑀢𑁄 𑀑𑀳𑀸𑀬 𑀕𑀘𑁆𑀙𑀢𑀺. 𑀬𑁄𑀧𑀺 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑀓𑀸𑀮𑁂𑀦 𑀲𑀻𑀖𑀁 𑀓𑀸𑀮𑁂𑀦 𑀤𑀦𑁆𑀥𑀁 𑀓𑀸𑀮𑁂𑀦 𑀫𑀳𑀸𑀲𑀤𑁆𑀤𑀁 𑀓𑀸𑀮𑁂𑀦 𑀔𑀼𑀤𑁆𑀤𑀓𑀲𑀤𑁆𑀤𑀁 𑀓𑀭𑁄𑀢𑀺. 𑀬𑀣𑀸 𑀧𑁂𑀢𑀕𑁆𑀕𑀺 𑀓𑀸𑀮𑁂𑀦 𑀚𑀮𑀢𑀺, 𑀓𑀸𑀮𑁂𑀦 𑀦𑀺𑀩𑁆𑀩𑀸𑀬𑀢𑀺, 𑀏𑀯𑀫𑁂𑀯 𑀇𑀥 𑀧𑁂𑀢𑀕𑁆𑀕𑀺𑀥𑀫𑁆𑀫𑀓𑀣𑀺𑀓𑁄 𑀦𑀸𑀫 𑀳𑁄𑀢𑀺, 𑀧𑀭𑀺𑀲𑀸𑀬 𑀉𑀝𑁆𑀞𑀸𑀢𑀼𑀓𑀸𑀫𑀸𑀬 𑀧𑀼𑀦𑀧𑁆𑀧𑀼𑀦𑀁 𑀆𑀭𑀪𑀢𑀺. 𑀬𑁄𑀧𑀺 𑀓𑀣𑁂𑀦𑁆𑀢𑁄 𑀢𑀢𑁆𑀣 𑀢𑀢𑁆𑀣 𑀯𑀺𑀢𑁆𑀣𑀸𑀬𑀢𑀺, 𑀦𑀺𑀢𑁆𑀣𑀼𑀦𑀦𑁆𑀢𑁄 𑀓𑀦𑁆𑀤𑀦𑁆𑀢𑁄 𑀯𑀺𑀬 𑀓𑀣𑁂𑀢𑀺, 𑀇𑀫𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀓𑀣𑀸 𑀅𑀧𑁆𑀧𑀩𑀦𑁆𑀥𑀸 𑀦𑀸𑀫 𑀳𑁄𑀢𑀺. 𑀬𑁄 𑀧𑀦 𑀲𑀼𑀢𑁆𑀢𑀁 𑀆𑀭𑀪𑀺𑀢𑁆𑀯𑀸 𑀆𑀘𑀭𑀺𑀬𑁂𑀳𑀺 𑀤𑀺𑀦𑁆𑀦𑀦𑀬𑁂 𑀞𑀺𑀢𑁄 𑀅𑀘𑁆𑀙𑀺𑀦𑁆𑀦𑀥𑀸𑀭𑀁 𑀓𑀢𑁆𑀯𑀸 𑀦𑀤𑀻𑀲𑁄𑀢𑀁 𑀯𑀺𑀬 𑀧𑀯𑀢𑁆𑀢𑁂𑀢𑀺, 𑀆𑀓𑀸𑀲𑀕𑀗𑁆𑀕𑀢𑁄 𑀪𑀲𑁆𑀲𑀫𑀸𑀦𑀁 𑀉𑀤𑀓𑀁 𑀯𑀺𑀬 𑀦𑀺𑀭𑀦𑁆𑀢𑀭𑀁 𑀓𑀣𑀁 𑀧𑀯𑀢𑁆𑀢𑁂𑀢𑀺, 𑀢𑀲𑁆𑀲 𑀓𑀣𑀸 𑀅𑀦𑀼𑀧𑁆𑀧𑀩𑀦𑁆𑀥𑀸 𑀳𑁄𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀦𑀼𑀧𑁆𑀧𑀩𑀦𑁆𑀥𑁂𑀳𑀻’’𑀢𑀺. 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑀸𑀬𑀸𑀢𑀺 𑀲𑀢𑁆𑀢𑀦𑁆𑀦𑀁 𑀅𑀦𑀼𑀲𑀬𑀸𑀦𑀁 𑀲𑀫𑀼𑀕𑁆𑀖𑀸𑀢𑀢𑁆𑀣𑀸𑀬. 𑀏𑀯𑀭𑀽𑀧𑁂𑀦𑀸𑀢𑀺 𑀏𑀯𑀭𑀽𑀧𑁂𑀦 𑀩𑀳𑀼𑀲𑁆𑀲𑀼𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑀣𑀸𑀭𑀽𑀧𑁂𑀦𑁂𑀯 𑀪𑀺𑀓𑁆𑀔𑀼𑀲𑀢𑁂𑀦 𑀪𑀺𑀓𑁆𑀔𑀼𑀲𑀳𑀲𑁆𑀲𑁂𑀦 𑀯𑀸 𑀲𑀗𑁆𑀖𑀸𑀝𑀺𑀓𑀡𑁆𑀡𑁂𑀦 𑀯𑀸 𑀲𑀗𑁆𑀖𑀸𑀝𑀺𑀓𑀡𑁆𑀡𑀁, 𑀧𑀮𑁆𑀮𑀗𑁆𑀓𑁂𑀦 𑀯𑀸 𑀧𑀮𑁆𑀮𑀗𑁆𑀓𑀁 𑀆𑀳𑀘𑁆𑀘 𑀦𑀺𑀲𑀺𑀦𑁆𑀦𑁂𑀦 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁩𑁪. 𑀧𑀝𑀺𑀲𑀮𑁆𑀮𑀸𑀦𑀁 𑀅𑀲𑁆𑀲 𑀆𑀭𑀸𑀫𑁄𑀢𑀺 𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑁄. 𑀧𑀝𑀺𑀲𑀮𑁆𑀮𑀸𑀦𑁂 𑀭𑀢𑁄𑀢𑀺 𑀧𑀝𑀺𑀲𑀮𑁆𑀮𑀸𑀦𑀭𑀢𑁄.

𑁩𑁩𑁫. 𑀲𑀳𑀲𑁆𑀲𑀁 𑀮𑁄𑀓𑀸𑀦𑀦𑁆𑀢𑀺 𑀲𑀳𑀲𑁆𑀲𑀁 𑀮𑁄𑀓𑀥𑀸𑀢𑀽𑀦𑀁. 𑀏𑀢𑁆𑀢𑀓𑀜𑁆𑀳𑀺 𑀣𑁂𑀭𑀲𑁆𑀲 𑀥𑀼𑀯𑀲𑁂𑀯𑀦𑀁 𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀁, 𑀆𑀓𑀗𑁆𑀔𑀫𑀸𑀦𑁄 𑀧𑀦 𑀣𑁂𑀭𑁄 𑀅𑀦𑁂𑀓𑀸𑀦𑀺𑀧𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀸𑀦𑀺 𑀯𑁄𑀮𑁄𑀓𑁂𑀢𑀺𑀬𑁂𑀯. 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑁄𑀢𑀺 𑀲𑀢𑁆𑀢𑀪𑀽𑀫𑀓𑀲𑁆𑀲 𑀯𑀸 𑀦𑀯𑀪𑀽𑀫𑀓𑀲𑁆𑀲 𑀯𑀸 𑀧𑀸𑀲𑀸𑀤𑀯𑀭𑀲𑁆𑀲 𑀉𑀧𑀭𑀺 𑀕𑀢𑁄. 𑀲𑀳𑀲𑁆𑀲𑀁 𑀦𑁂𑀫𑀺𑀫𑀡𑁆𑀟𑀮𑀸𑀦𑀁 𑀯𑁄𑀮𑁄𑀓𑁂𑀬𑁆𑀬𑀸𑀢𑀺 𑀧𑀸𑀲𑀸𑀤𑀧𑀭𑀺𑀯𑁂𑀡𑁂 𑀦𑀸𑀪𑀺𑀬𑀸 𑀧𑀢𑀺𑀝𑁆𑀞𑀺𑀢𑀸𑀦𑀁 𑀦𑁂𑀫𑀺𑀯𑀝𑁆𑀝𑀺𑀬𑀸 𑀦𑁂𑀫𑀺𑀯𑀝𑁆𑀝𑀺𑀁 𑀆𑀳𑀘𑁆𑀘 𑀞𑀺𑀢𑀸𑀦𑀁 𑀦𑁂𑀫𑀺𑀫𑀡𑁆𑀟𑀮𑀸𑀦𑀁 𑀲𑀳𑀲𑁆𑀲𑀁 𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀑𑀮𑁄𑀓𑁂𑀬𑁆𑀬, 𑀢𑀲𑁆𑀲 𑀦𑀸𑀪𑀺𑀬𑁄𑀧𑀺 𑀧𑀸𑀓𑀝𑀸 𑀳𑁄𑀦𑁆𑀢𑀺, 𑀅𑀭𑀸𑀧𑀺 𑀅𑀭𑀦𑁆𑀢𑀭𑀸𑀦𑀺𑀧𑀺 𑀦𑁂𑀫𑀺𑀬𑁄𑀧𑀺. 𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄𑀢𑀺, 𑀆𑀯𑀼𑀲𑁄, 𑀏𑀯𑀁 𑀅𑀬𑀫𑁆𑀧𑀺 𑀤𑀺𑀩𑁆𑀩𑀘𑀓𑁆𑀔𑀼𑀓𑁄 𑀪𑀺𑀓𑁆𑀔𑀼 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀳𑀲𑁆𑀲𑀁 𑀮𑁄𑀓𑀸𑀦𑀁 𑀯𑁄𑀮𑁄𑀓𑁂𑀢𑀺. 𑀢𑀲𑁆𑀲 𑀧𑀸𑀲𑀸𑀤𑁂 𑀞𑀺𑀢𑀧𑀼𑀭𑀺𑀲𑀲𑁆𑀲 𑀘𑀓𑁆𑀓𑀦𑀸𑀪𑀺𑀬𑁄 𑀯𑀺𑀬 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂 𑀲𑀺𑀦𑁂𑀭𑀼𑀲𑀳𑀲𑁆𑀲𑀁 𑀧𑀸𑀓𑀝𑀁 𑀳𑁄𑀢𑀺. 𑀅𑀭𑀸 𑀯𑀺𑀬 𑀤𑀻𑀧𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀅𑀭𑀦𑁆𑀢𑀭𑀸𑀦𑀺 𑀯𑀺𑀬 𑀤𑀻𑀧𑀝𑁆𑀞𑀺𑀢𑀫𑀦𑀼𑀲𑁆𑀲𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀦𑁂𑀫𑀺𑀬𑁄 𑀯𑀺𑀬 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺.

𑁩𑁩𑁬. 𑀆𑀭𑀜𑁆𑀜𑀺𑀓𑁄𑀢𑀺 𑀲𑀫𑀸𑀤𑀺𑀡𑁆𑀡𑀅𑀭𑀜𑁆𑀜𑀥𑀼𑀢𑀗𑁆𑀕𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁩𑁩𑁭. 𑀦𑁄 𑀘 𑀲𑀁𑀲𑀸𑀤𑁂𑀦𑁆𑀢𑀻𑀢𑀺 𑀦 𑀑𑀲𑀸𑀤𑁂𑀦𑁆𑀢𑀺. 𑀲𑀳𑁂𑀢𑀼𑀓𑀜𑁆𑀳𑀺 𑀲𑀓𑀸𑀭𑀡𑀁 𑀓𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀯𑀺𑀲𑁆𑀲𑀚𑁆𑀚𑀺𑀢𑀼𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑁄 𑀲𑀁𑀲𑀸𑀤𑁂𑀢𑀺 𑀦𑀸𑀫. 𑀏𑀯𑀁 𑀦 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀯𑀢𑁆𑀢𑀺𑀦𑀻 𑀳𑁄𑀢𑀻𑀢𑀺 𑀦𑀤𑀻𑀲𑁄𑀢𑁄𑀤𑀓𑀁 𑀯𑀺𑀬 𑀧𑀯𑀢𑁆𑀢𑀢𑀺.

𑁩𑁩𑁮. 𑀬𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀬𑀸𑀬 𑀮𑁄𑀓𑀺𑀬𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸, 𑀬𑀸𑀬 𑀮𑁄𑀓𑀼𑀢𑁆𑀢𑀭𑀸𑀬 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑀸.

𑁩𑁩𑁯. 𑀲𑀸𑀥𑀼 𑀲𑀸𑀥𑀼 𑀲𑀸𑀭𑀺𑀧𑀼𑀢𑁆𑀢𑀸𑀢𑀺 𑀅𑀬𑀁 𑀲𑀸𑀥𑀼𑀓𑀸𑀭𑁄 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀤𑀺𑀦𑁆𑀦𑁄. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀧𑀦 𑀲𑀤𑁆𑀥𑀺𑀁 𑀪𑀕𑀯𑀸 𑀆𑀮𑀧𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀬𑀣𑀸 𑀢𑀁 𑀆𑀦𑀦𑁆𑀤𑁄𑀯𑀸𑀢𑀺 𑀬𑀣𑀸 𑀆𑀦𑀦𑁆𑀤𑁄𑀯 𑀲𑀫𑁆𑀫𑀸 𑀩𑁆𑀬𑀸𑀓𑀭𑀡𑀫𑀸𑀦𑁄 𑀩𑁆𑀬𑀸𑀓𑀭𑁂𑀬𑁆𑀬, 𑀏𑀯𑀁 𑀩𑁆𑀬𑀸𑀓𑀢𑀁 𑀆𑀦𑀦𑁆𑀤𑁂𑀦 𑀅𑀢𑁆𑀢𑀦𑁄 𑀅𑀦𑀼𑀘𑁆𑀙𑀯𑀺𑀓𑀫𑁂𑀯, 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀫𑁂𑀯 𑀩𑁆𑀬𑀸𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀳𑀺 𑀅𑀢𑁆𑀢𑀦𑀸𑀧𑀺 𑀩𑀳𑀼𑀲𑁆𑀲𑀼𑀢𑁄, 𑀅𑀚𑁆𑀛𑀸𑀲𑀬𑁄𑀧𑀺𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀳𑁄 𑀯𑀢 𑀲𑀸𑀲𑀦𑁂 𑀲𑀩𑁆𑀭𑀳𑁆𑀫𑀘𑀸𑀭𑀻 𑀩𑀳𑀼𑀲𑁆𑀲𑀼𑀢𑀸 𑀪𑀯𑁂𑀬𑁆𑀬𑀼’’𑀦𑁆𑀢𑀺. 𑀓𑀲𑁆𑀫𑀸? 𑀩𑀳𑀼𑀲𑁆𑀲𑀼𑀢𑀲𑁆𑀲 𑀳𑀺 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁, 𑀕𑀭𑀼𑀓𑀮𑀳𑀼𑀓𑀁 𑀲𑀢𑁂𑀓𑀺𑀘𑁆𑀙𑀸𑀢𑁂𑀓𑀺𑀘𑁆𑀙𑀁 𑀧𑀸𑀓𑀝𑀁 𑀳𑁄𑀢𑀺. 𑀩𑀳𑀼𑀲𑁆𑀲𑀼𑀢𑁄 𑀉𑀕𑁆𑀕𑀳𑀺𑀢𑀩𑀼𑀤𑁆𑀥𑀯𑀘𑀦𑀁 𑀆𑀯𑀚𑁆𑀚𑀺𑀢𑁆𑀯𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀻𑀮𑀁 𑀓𑀣𑀺𑀢𑀁, 𑀇𑀫𑀲𑁆𑀫𑀺𑀁 𑀲𑀫𑀸𑀥𑀺, 𑀇𑀫𑀲𑁆𑀫𑀺𑀁 𑀯𑀺𑀧𑀲𑁆𑀲𑀦𑀸, 𑀇𑀫𑀲𑁆𑀫𑀺𑀁 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀻𑀢𑀺 𑀲𑀻𑀮𑀲𑁆𑀲 𑀆𑀕𑀢𑀝𑁆𑀞𑀸𑀦𑁂 𑀲𑀻𑀮𑀁 𑀧𑀽𑀭𑁂𑀢𑁆𑀯𑀸, 𑀲𑀫𑀸𑀥𑀺𑀲𑁆𑀲 𑀆𑀕𑀢𑀝𑁆𑀞𑀸𑀦𑁂 𑀲𑀫𑀸𑀥𑀺𑀁 𑀧𑀽𑀭𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀬 𑀆𑀕𑀢𑀝𑁆𑀞𑀸𑀦𑁂 𑀯𑀺𑀧𑀲𑁆𑀲𑀦𑀸𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀢𑁆𑀯𑀸 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀺. 𑀢𑀲𑁆𑀫𑀸 𑀣𑁂𑀭𑀲𑁆𑀲 𑀏𑀯𑀁 𑀅𑀚𑁆𑀛𑀸𑀲𑀬𑁄 𑀳𑁄𑀢𑀺 𑁋 ‘‘𑀅𑀳𑁄 𑀯𑀢 𑀲𑀩𑁆𑀭𑀳𑁆𑀫𑀘𑀸𑀭𑀻 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀘𑀢𑁆𑀢𑀸𑀭𑁄 𑀯𑀸 𑀧𑀜𑁆𑀘 𑀯𑀸 𑀦𑀺𑀓𑀸𑀬𑁂 𑀉𑀕𑁆𑀕𑀳𑁂𑀢𑁆𑀯𑀸 𑀆𑀯𑀚𑁆𑀚𑀦𑁆𑀢𑀸 𑀲𑀻𑀮𑀸𑀤𑀻𑀦𑀁 𑀆𑀕𑀢𑀝𑁆𑀞𑀸𑀦𑁂𑀲𑀼 𑀲𑀻𑀮𑀸𑀤𑀻𑀦𑀺 𑀧𑀭𑀺𑀧𑀽𑀭𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀲𑀘𑁆𑀙𑀺𑀓𑀭𑁂𑀬𑁆𑀬𑀼’’𑀦𑁆𑀢𑀺. 𑀲𑁂𑀲𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁩𑁪𑁦. 𑀆𑀬𑀲𑁆𑀫𑀸 𑀳𑀺 𑀭𑁂𑀯𑀢𑁄 𑀛𑀸𑀦𑀚𑁆𑀛𑀸𑀲𑀬𑁄 𑀛𑀸𑀦𑀸𑀪𑀺𑀭𑀢𑁄, 𑀢𑀲𑁆𑀫𑀸𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀳𑁄 𑀯𑀢 𑀲𑀩𑁆𑀭𑀳𑁆𑀫𑀘𑀸𑀭𑀻 𑀏𑀓𑀺𑀓𑀸 𑀦𑀺𑀲𑀻𑀤𑀺𑀢𑁆𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀧𑀤𑀝𑁆𑀞𑀸𑀦𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀲𑀘𑁆𑀙𑀺𑀓𑀭𑁂𑀬𑁆𑀬𑀼’’𑀦𑁆𑀢𑀺. 𑀢𑀲𑁆𑀫𑀸 𑀏𑀯𑀁 𑀩𑁆𑀬𑀸𑀓𑀸𑀲𑀺.

𑁩𑁪𑁧. 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀤𑀺𑀩𑁆𑀩𑀘𑀓𑁆𑀔𑀼𑀓𑁄, 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀳𑁄 𑀯𑀢 𑀲𑀩𑁆𑀭𑀳𑁆𑀫𑀘𑀸𑀭𑀻 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀅𑀦𑁂𑀓𑁂𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀘𑀯𑀫𑀸𑀦𑁂 𑀘 𑀉𑀧𑀧𑀚𑁆𑀚𑀫𑀸𑀦𑁂 𑀘 𑀲𑀢𑁆𑀢𑁂 𑀤𑀺𑀲𑁆𑀯𑀸 𑀯𑀝𑁆𑀝𑀪𑀬𑁂𑀦 𑀘𑀺𑀢𑁆𑀢𑀁 𑀲𑀁𑀯𑁂𑀚𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀲𑀘𑁆𑀙𑀺𑀓𑀭𑁂𑀬𑁆𑀬𑀼’’𑀦𑁆𑀢𑀺. 𑀢𑀲𑁆𑀫𑀸 𑀏𑀯𑀁 𑀩𑁆𑀬𑀸𑀓𑀸𑀲𑀺.

𑁩𑁪𑁨. 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀥𑀼𑀢𑀯𑀸𑀤𑁄, 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀳𑁄 𑀯𑀢 𑀲𑀩𑁆𑀭𑀳𑁆𑀫𑀘𑀸𑀭𑀻 𑀥𑀼𑀢𑀯𑀸𑀤𑀸 𑀳𑀼𑀢𑁆𑀯𑀸 𑀥𑀼𑀢𑀗𑁆𑀕𑀸𑀦𑀼𑀪𑀸𑀯𑁂𑀦 𑀧𑀘𑁆𑀘𑀬𑀢𑀡𑁆𑀳𑀁 𑀫𑀺𑀮𑀸𑀧𑁂𑀢𑁆𑀯𑀸 𑀅𑀧𑀭𑁂𑀧𑀺 𑀦𑀸𑀦𑀧𑁆𑀧𑀓𑀸𑀭𑁂 𑀓𑀺𑀮𑁂𑀲𑁂 𑀥𑀼𑀦𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀲𑀘𑁆𑀙𑀺𑀓𑀭𑁂𑀬𑁆𑀬𑀼’’𑀦𑁆𑀢𑀺. 𑀢𑀲𑁆𑀫𑀸 𑀏𑀯𑀁 𑀩𑁆𑀬𑀸𑀓𑀸𑀲𑀺.

𑁩𑁪𑁩. 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀲𑀫𑀸𑀥𑀺𑀧𑀸𑀭𑀫𑀺𑀬𑀸 𑀫𑀢𑁆𑀣𑀓𑀁 𑀧𑀢𑁆𑀢𑁄, 𑀲𑀼𑀔𑀼𑀫𑀁 𑀧𑀦 𑀘𑀺𑀢𑁆𑀢𑀦𑁆𑀢𑀭𑀁 𑀔𑀦𑁆𑀥𑀦𑁆𑀢𑀭𑀁 𑀥𑀸𑀢𑁆𑀯𑀦𑁆𑀢𑀭𑀁 𑀆𑀬𑀢𑀦𑀦𑁆𑀢𑀭𑀁 𑀛𑀸𑀦𑁄𑀓𑁆𑀓𑀦𑁆𑀢𑀺𑀓𑀁 𑀆𑀭𑀫𑁆𑀫𑀡𑁄𑀓𑁆𑀓𑀦𑁆𑀢𑀺𑀓𑀁 𑀅𑀗𑁆𑀕𑀯𑀯𑀢𑁆𑀣𑀸𑀦𑀁 𑀆𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀁 𑀅𑀗𑁆𑀕𑀲𑀗𑁆𑀓𑀦𑁆𑀢𑀺 𑀆𑀭𑀫𑁆𑀫𑀡𑀲𑀗𑁆𑀓𑀦𑁆𑀢𑀺 𑀏𑀓𑀢𑁄𑀯𑀟𑁆𑀠𑀦𑀁 𑀉𑀪𑀢𑁄𑀯𑀟𑁆𑀠𑀦𑀦𑁆𑀢𑀺 𑀆𑀪𑀺𑀥𑀫𑁆𑀫𑀺𑀓𑀥𑀫𑁆𑀫𑀓𑀣𑀺𑀓𑀲𑁆𑀲𑁂𑀯 𑀧𑀸𑀓𑀝𑀁. 𑀅𑀦𑀸𑀪𑀺𑀥𑀫𑁆𑀫𑀺𑀓𑁄 𑀳𑀺 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑁋 ‘‘𑀅𑀬𑀁 𑀲𑀓𑀯𑀸𑀤𑁄 𑀅𑀬𑀁 𑀧𑀭𑀯𑀸𑀤𑁄’’𑀢𑀺 𑀦 𑀚𑀸𑀦𑀸𑀢𑀺. 𑀲𑀓𑀯𑀸𑀤𑀁 𑀤𑀻𑀧𑁂𑀲𑁆𑀲𑀸𑀫𑀻𑀢𑀺 𑀧𑀭𑀯𑀸𑀤𑀁 𑀤𑀻𑀧𑁂𑀢𑀺, 𑀧𑀭𑀯𑀸𑀤𑀁 𑀤𑀻𑀧𑁂𑀲𑁆𑀲𑀸𑀫𑀻𑀢𑀺 𑀲𑀓𑀯𑀸𑀤𑀁 𑀤𑀻𑀧𑁂𑀢𑀺, 𑀥𑀫𑁆𑀫𑀦𑁆𑀢𑀭𑀁 𑀯𑀺𑀲𑀁𑀯𑀸𑀤𑁂𑀢𑀺. 𑀆𑀪𑀺𑀥𑀫𑁆𑀫𑀺𑀓𑁄 𑀲𑀓𑀯𑀸𑀤𑀁 𑀲𑀓𑀯𑀸𑀤𑀦𑀺𑀬𑀸𑀫𑁂𑀦𑁂𑀯, 𑀧𑀭𑀯𑀸𑀤𑀁 𑀧𑀭𑀯𑀸𑀤𑀦𑀺𑀬𑀸𑀫𑁂𑀦𑁂𑀯 𑀤𑀻𑀧𑁂𑀢𑀺, 𑀥𑀫𑁆𑀫𑀦𑁆𑀢𑀭𑀁 𑀦 𑀯𑀺𑀲𑀁𑀯𑀸𑀤𑁂𑀢𑀺. 𑀢𑀲𑁆𑀫𑀸 𑀣𑁂𑀭𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀳𑁄 𑀯𑀢 𑀲𑀩𑁆𑀭𑀳𑁆𑀫𑀘𑀸𑀭𑀻 𑀆𑀪𑀺𑀥𑀫𑁆𑀫𑀺𑀓𑀸 𑀳𑀼𑀢𑁆𑀯𑀸 𑀲𑀼𑀔𑀼𑀫𑁂𑀲𑀼 𑀞𑀸𑀦𑁂𑀲𑀼 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀲𑀘𑁆𑀙𑀺𑀓𑀭𑁂𑀬𑁆𑀬𑀼’’𑀦𑁆𑀢𑀺. 𑀢𑀲𑁆𑀫𑀸 𑀏𑀯𑀁 𑀩𑁆𑀬𑀸𑀓𑀸𑀲𑀺.

𑁩𑁪𑁪. 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀧𑀜𑁆𑀜𑀸𑀧𑀸𑀭𑀫𑀺𑀬𑀸 𑀫𑀢𑁆𑀣𑀓𑀁 𑀧𑀢𑁆𑀢𑁄, 𑀧𑀜𑁆𑀜𑀯𑀸𑀬𑁂𑀯 𑀘 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀤𑀼𑀧𑁆𑀧𑀜𑁆𑀜𑁄. 𑀤𑀼𑀧𑁆𑀧𑀜𑁆𑀜𑁄 𑀳𑀺 𑀉𑀧𑁆𑀧𑀦𑁆𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀲𑁂 𑀯𑀢𑁆𑀢𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀯𑀺𑀧𑁆𑀨𑀦𑁆𑀤𑀺𑀢𑁆𑀯𑀸𑀧𑀺 𑀓𑀢𑀺𑀧𑀸𑀳𑁂𑀦𑁂𑀯 𑀕𑀺𑀳𑀺𑀪𑀸𑀯𑀁 𑀧𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑀸𑀢𑀺. 𑀢𑀲𑁆𑀫𑀸 𑀣𑁂𑀭𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀅𑀳𑁄 𑀯𑀢 𑀲𑀩𑁆𑀭𑀳𑁆𑀫𑀘𑀸𑀭𑀻 𑀅𑀘𑀺𑀢𑁆𑀢𑀯𑀲𑀺𑀓𑀸 𑀳𑀼𑀢𑁆𑀯𑀸 𑀘𑀺𑀢𑁆𑀢𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑁆𑀯𑀸 𑀲𑀩𑁆𑀩𑀸𑀦𑀲𑁆𑀲 𑀯𑀺𑀲𑁂𑀯𑀺𑀢𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀺 𑀪𑀜𑁆𑀚𑀺𑀢𑁆𑀯𑀸 𑀈𑀲𑀓𑀫𑁆𑀧𑀺 𑀩𑀳𑀺 𑀦𑀺𑀓𑁆𑀔𑀫𑀺𑀢𑀼𑀁 𑀅𑀤𑁂𑀦𑁆𑀢𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀲𑀘𑁆𑀙𑀺𑀓𑀭𑁂𑀬𑁆𑀬𑀼’’𑀦𑁆𑀢𑀺. 𑀢𑀲𑁆𑀫𑀸 𑀏𑀯𑀁 𑀩𑁆𑀬𑀸𑀓𑀸𑀲𑀺.

𑁩𑁪𑁫. 𑀲𑀩𑁆𑀩𑁂𑀲𑀁 𑀯𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑀼𑀪𑀸𑀲𑀺𑀢𑀁 𑀧𑀭𑀺𑀬𑀸𑀬𑁂𑀦𑀸𑀢𑀺 𑀲𑀸𑀭𑀺𑀧𑀼𑀢𑁆𑀢, 𑀬𑀲𑁆𑀫𑀸 𑀲𑀗𑁆𑀖𑀸𑀭𑀸𑀫𑀲𑁆𑀲 𑀦𑀸𑀫 𑀩𑀳𑀼𑀲𑁆𑀲𑀼𑀢𑀪𑀺𑀓𑁆𑀔𑀽𑀳𑀺𑀧𑀺 𑀲𑁄𑀪𑀦𑀓𑀸𑀭𑀡𑀁 𑀅𑀢𑁆𑀣𑀺, 𑀛𑀸𑀦𑀸𑀪𑀺𑀭𑀢𑁂𑀳𑀺𑀧𑀺, 𑀤𑀺𑀩𑁆𑀩𑀘𑀓𑁆𑀔𑀼𑀓𑁂𑀳𑀺𑀧𑀺, 𑀥𑀼𑀢𑀯𑀸𑀤𑁂𑀳𑀺𑀧𑀺, 𑀆𑀪𑀺𑀥𑀫𑁆𑀫𑀺𑀓𑁂𑀳𑀺𑀧𑀺, 𑀅𑀘𑀺𑀢𑁆𑀢𑀯𑀲𑀺𑀓𑁂𑀳𑀺𑀧𑀺 𑀲𑁄𑀪𑀦𑀓𑀸𑀭𑀡𑀁 𑀅𑀢𑁆𑀣𑀺. 𑀢𑀲𑁆𑀫𑀸 𑀲𑀩𑁆𑀩𑁂𑀲𑀁 𑀯𑁄 𑀲𑀼𑀪𑀸𑀲𑀺𑀢𑀁 𑀧𑀭𑀺𑀬𑀸𑀬𑁂𑀦, 𑀢𑁂𑀦 𑀢𑁂𑀦 𑀓𑀸𑀭𑀡𑁂𑀦 𑀲𑀼𑀪𑀸𑀲𑀺𑀢𑀫𑁂𑀯, 𑀦𑁄 𑀤𑀼𑀩𑁆𑀪𑀸𑀲𑀺𑀢𑀁. 𑀅𑀧𑀺𑀘 𑀫𑀫𑀧𑀺 𑀲𑀼𑀡𑀸𑀣𑀸𑀢𑀺 𑀅𑀧𑀺𑀘 𑀫𑀫𑀧𑀺 𑀯𑀘𑀦𑀁 𑀲𑀼𑀡𑀸𑀣. 𑀦 𑀢𑀸𑀯𑀸𑀳𑀁 𑀇𑀫𑀁 𑀧𑀮𑁆𑀮𑀗𑁆𑀓𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻𑀢𑀺 𑀦 𑀢𑀸𑀯 𑀅𑀳𑀁 𑀇𑀫𑀁 𑀘𑀢𑀼𑀭𑀗𑁆𑀕𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀸𑀬 𑀆𑀪𑀼𑀚𑀺𑀢𑀁 𑀧𑀮𑁆𑀮𑀗𑁆𑀓𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀺, 𑀦 𑀫𑁄𑀘𑁂𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀓𑀺𑀭 𑀪𑀕𑀯𑀸 𑀧𑀭𑀺𑀧𑀸𑀓𑀕𑀢𑁂 𑀜𑀸𑀡𑁂 𑀭𑀚𑁆𑀚𑀲𑀺𑀭𑀺𑀁 𑀧𑀳𑀸𑀬 𑀓𑀢𑀸𑀪𑀺𑀦𑀺𑀓𑁆𑀔𑀫𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀘𑀢𑀼𑀭𑀗𑁆𑀕𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀸𑀬 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀤𑀴𑁆𑀳𑀲𑀫𑀸𑀤𑀸𑀦𑁄 𑀳𑀼𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀢𑀺𑀡𑁆𑀡𑀁 𑀫𑀸𑀭𑀸𑀦𑀁 𑀫𑀢𑁆𑀣𑀓𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀘𑁆𑀘𑀽𑀲𑀲𑀫𑀬𑁂 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀉𑀦𑁆𑀦𑀸𑀤𑁂𑀦𑁆𑀢𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀺, 𑀢𑀁 𑀅𑀢𑁆𑀢𑀦𑁄 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀁 𑀲𑀦𑁆𑀥𑀸𑀬 𑀏𑀯𑀫𑀸𑀳. 𑀅𑀧𑀺𑀘 𑀧𑀘𑁆𑀙𑀺𑀫𑀁 𑀚𑀦𑀢𑀁 𑀅𑀦𑀼𑀓𑀫𑁆𑀧𑀫𑀸𑀦𑁄𑀧𑀺 𑀧𑀝𑀺𑀧𑀢𑁆𑀢𑀺𑀲𑀸𑀭𑀁 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀧𑀲𑁆𑀲𑀢𑀺 𑀳𑀺 𑀪𑀕𑀯𑀸 𑁋 ‘‘𑀅𑀦𑀸𑀕𑀢𑁂 𑀏𑀯𑀁 𑀅𑀚𑁆𑀛𑀸𑀲𑀬𑀸 𑀓𑀼𑀮𑀧𑀼𑀢𑁆𑀢𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀺, ‘𑀪𑀕𑀯𑀸 𑀫𑀳𑀸𑀕𑁄𑀲𑀺𑀗𑁆𑀕𑀲𑀼𑀢𑁆𑀢𑀁 𑀓𑀣𑁂𑀦𑁆𑀢𑁄 𑀇𑀥, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼 𑀧𑀘𑁆𑀙𑀸𑀪𑀢𑁆𑀢𑀁…𑀧𑁂… 𑀏𑀯𑀭𑀽𑀧𑁂𑀦 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸𑀢𑀺 𑀆𑀳, 𑀫𑀬𑀁 𑀪𑀕𑀯𑀢𑁄 𑀅𑀚𑁆𑀛𑀸𑀲𑀬𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’𑀢𑀺 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀸 𑀘𑀢𑀼𑀭𑀗𑁆𑀕𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀸𑀬 𑀤𑀴𑁆𑀳𑀲𑀫𑀸𑀤𑀸𑀦𑀸 𑀳𑀼𑀢𑁆𑀯𑀸 ‘𑀅𑀭𑀳𑀢𑁆𑀢𑀁 𑀅𑀧𑁆𑀧𑀢𑁆𑀯𑀸 𑀇𑀫𑀁 𑀧𑀮𑁆𑀮𑀗𑁆𑀓𑀁 𑀦 𑀪𑀺𑀦𑁆𑀤𑀺𑀲𑁆𑀲𑀸𑀫𑀸’𑀢𑀺 𑀲𑀫𑀡𑀥𑀫𑁆𑀫𑀁 𑀓𑀸𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀢𑁂 𑀏𑀯𑀁 𑀧𑀝𑀺𑀧𑀦𑁆𑀦𑀸 𑀓𑀢𑀺𑀧𑀸𑀳𑁂𑀦𑁂𑀯 𑀚𑀸𑀢𑀺𑀚𑀭𑀸𑀫𑀭𑀡𑀲𑁆𑀲 𑀅𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺, 𑀇𑀫𑀁 𑀧𑀘𑁆𑀙𑀺𑀫𑀁 𑀚𑀦𑀢𑀁 𑀅𑀦𑀼𑀓𑀫𑁆𑀧𑀫𑀸𑀦𑁄 𑀧𑀝𑀺𑀧𑀢𑁆𑀢𑀺𑀲𑀸𑀭𑀁 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀏𑀯𑀭𑀽𑀧𑁂𑀦 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀪𑀺𑀓𑁆𑀔𑀼𑀦𑀸 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸𑀢𑀺, 𑀲𑀸𑀭𑀺𑀧𑀼𑀢𑁆𑀢, 𑀏𑀯𑀭𑀽𑀧𑁂𑀦 𑀪𑀺𑀓𑁆𑀔𑀼𑀦𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑁂𑀯 𑀕𑁄𑀲𑀺𑀗𑁆𑀕𑀲𑀸𑀮𑀯𑀦𑀁 𑀲𑁄𑀪𑁂𑀬𑁆𑀬𑀸𑀢𑀺 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀳𑀸𑀕𑁄𑀲𑀺𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑀳𑀸𑀕𑁄𑀧𑀸𑀮𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁬. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀕𑁄𑀧𑀸𑀮𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀢𑀺𑀲𑁆𑀲𑁄 𑀓𑀣𑀸 𑀏𑀓𑀦𑀸𑀴𑀺𑀓𑀸, 𑀘𑀢𑀼𑀭𑀲𑁆𑀲𑀸, 𑀦𑀺𑀲𑀺𑀦𑁆𑀦𑀯𑀢𑁆𑀢𑀺𑀓𑀸𑀢𑀺. 𑀢𑀢𑁆𑀣 𑀧𑀸𑀴𑀺𑀁 𑀯𑀢𑁆𑀯𑀸 𑀏𑀓𑁂𑀓𑀧𑀤𑀲𑁆𑀲 𑀅𑀢𑁆𑀣𑀓𑀣𑀦𑀁 𑀏𑀓𑀦𑀸𑀴𑀺𑀓𑀸 𑀦𑀸𑀫. 𑀅𑀧𑀡𑁆𑀟𑀺𑀢𑀁 𑀕𑁄𑀧𑀸𑀮𑀓𑀁 𑀤𑀲𑁆𑀲𑁂𑀢𑁆𑀯𑀸, 𑀅𑀧𑀡𑁆𑀟𑀺𑀢𑀁 𑀪𑀺𑀓𑁆𑀔𑀼𑀁 𑀤𑀲𑁆𑀲𑁂𑀢𑁆𑀯𑀸, 𑀧𑀡𑁆𑀟𑀺𑀢𑀁 𑀕𑁄𑀧𑀸𑀮𑀓𑀁 𑀤𑀲𑁆𑀲𑁂𑀢𑁆𑀯𑀸, 𑀧𑀡𑁆𑀟𑀺𑀢𑀁 𑀪𑀺𑀓𑁆𑀔𑀼𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀘𑀢𑀼𑀓𑁆𑀓𑀁 𑀩𑀦𑁆𑀥𑀺𑀢𑁆𑀯𑀸 𑀓𑀣𑀦𑀁 𑀘𑀢𑀼𑀭𑀲𑁆𑀲𑀸 𑀦𑀸𑀫. 𑀅𑀧𑀡𑁆𑀟𑀺𑀢𑀁 𑀕𑁄𑀧𑀸𑀮𑀓𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑀕𑀫𑀦𑀁, 𑀅𑀧𑀡𑁆𑀟𑀺𑀢𑀁 𑀪𑀺𑀓𑁆𑀔𑀼𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑀕𑀫𑀦𑀁, 𑀧𑀡𑁆𑀟𑀺𑀢𑀁 𑀕𑁄𑀧𑀸𑀮𑀓𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑀕𑀫𑀦𑀁, 𑀧𑀡𑁆𑀟𑀺𑀢𑀁 𑀪𑀺𑀓𑁆𑀔𑀼𑀁 𑀤𑀲𑁆𑀲𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑀕𑀫𑀦𑀦𑁆𑀢𑀺 𑀅𑀬𑀁 𑀦𑀺𑀲𑀺𑀦𑁆𑀦𑀯𑀢𑁆𑀢𑀺𑀓𑀸 𑀦𑀸𑀫. 𑀅𑀬𑀁 𑀇𑀥 𑀲𑀩𑁆𑀩𑀸𑀘𑀭𑀺𑀬𑀸𑀦𑀁 𑀆𑀘𑀺𑀡𑁆𑀡𑀸.

𑀏𑀓𑀸𑀤𑀲𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀻𑀢𑀺 𑀏𑀓𑀸𑀤𑀲𑀳𑀺 𑀅𑀕𑀼𑀡𑀓𑁄𑀝𑁆𑀞𑀸𑀲𑁂𑀳𑀺. 𑀕𑁄𑀕𑀡𑀦𑁆𑀢𑀺 𑀕𑁄𑀫𑀡𑁆𑀟𑀮𑀁. 𑀧𑀭𑀺𑀳𑀭𑀺𑀢𑀼𑀦𑁆𑀢𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀘𑀭𑀺𑀢𑀼𑀁. 𑀨𑀸𑀢𑀺𑀁 𑀓𑀸𑀢𑀼𑀦𑁆𑀢𑀺 𑀯𑀟𑁆𑀠𑀺𑀁 𑀆𑀧𑀸𑀤𑁂𑀢𑀼𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂. 𑀦 𑀭𑀽𑀧𑀜𑁆𑀜𑀽 𑀳𑁄𑀢𑀻𑀢𑀺 𑀕𑀡𑀦𑀢𑁄 𑀯𑀸 𑀯𑀡𑁆𑀡𑀢𑁄 𑀯𑀸 𑀭𑀽𑀧𑀁 𑀦 𑀚𑀸𑀦𑀸𑀢𑀺. 𑀕𑀡𑀦𑀢𑁄 𑀦 𑀚𑀸𑀦𑀸𑀢𑀺 𑀦𑀸𑀫 𑀅𑀢𑁆𑀢𑀦𑁄 𑀕𑀼𑀦𑁆𑀦𑀁 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸𑀢𑀺 𑀲𑀗𑁆𑀔𑁆𑀬𑀁 𑀦 𑀚𑀸𑀦𑀸𑀢𑀺. 𑀲𑁄 𑀕𑀸𑀯𑀻𑀲𑀼 𑀳𑀝𑀸𑀲𑀼 𑀯𑀸 𑀧𑀮𑀸𑀢𑀸𑀲𑀼 𑀯𑀸 𑀕𑁄𑀕𑀡𑀁 𑀕𑀡𑁂𑀢𑁆𑀯𑀸, 𑀅𑀚𑁆𑀚 𑀏𑀢𑁆𑀢𑀺𑀓𑀸 𑀦 𑀤𑀺𑀲𑁆𑀲𑀦𑁆𑀢𑀻𑀢𑀺 𑀤𑁆𑀯𑁂 𑀢𑀻𑀡𑀺 𑀕𑀸𑀫𑀦𑁆𑀢𑀭𑀸𑀦𑀺 𑀯𑀸 𑀅𑀝𑀯𑀺𑀁 𑀯𑀸 𑀯𑀺𑀘𑀭𑀦𑁆𑀢𑁄 𑀦 𑀧𑀭𑀺𑀬𑁂𑀲𑀢𑀺, 𑀅𑀜𑁆𑀜𑁂𑀲𑀁 𑀕𑀸𑀯𑀻𑀲𑀼 𑀅𑀢𑁆𑀢𑀦𑁄 𑀕𑁄𑀕𑀡𑀁 𑀧𑀯𑀺𑀝𑁆𑀞𑀸𑀲𑀼𑀧𑀺 𑀕𑁄𑀕𑀡𑀁 𑀕𑀡𑁂𑀢𑁆𑀯𑀸, ‘‘𑀇𑀫𑀸 𑀏𑀢𑁆𑀢𑀺𑀓𑀸 𑀕𑀸𑀯𑁄 𑀦 𑀅𑀫𑁆𑀳𑀸𑀓’’𑀦𑁆𑀢𑀺 𑀬𑀝𑁆𑀞𑀺𑀬𑀸 𑀧𑁄𑀣𑁂𑀢𑁆𑀯𑀸 𑀦 𑀦𑀻𑀳𑀭𑀢𑀺, 𑀢𑀲𑁆𑀲 𑀦𑀝𑁆𑀞𑀸 𑀕𑀸𑀯𑀺𑀬𑁄 𑀦𑀝𑁆𑀞𑀸𑀯 𑀳𑁄𑀦𑁆𑀢𑀺. 𑀧𑀭𑀕𑀸𑀯𑀺𑀬𑁄 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀁 𑀕𑁄𑀲𑀸𑀫𑀺𑀓𑀸 𑀤𑀺𑀲𑁆𑀯𑀸, ‘‘𑀅𑀬𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀫𑁆𑀳𑀸𑀓𑀁 𑀥𑁂𑀦𑀼𑀁 𑀕𑀡𑁆𑀳𑀸𑀢𑀻’’𑀢𑀺 𑀢𑀚𑁆𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀕𑀸𑀯𑀺𑀬𑁄 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀢𑀲𑁆𑀲 𑀕𑁄𑀕𑀡𑁄𑀧𑀺 𑀧𑀭𑀺𑀳𑀸𑀬𑀢𑀺, 𑀧𑀜𑁆𑀘𑀕𑁄𑀭𑀲𑀧𑀭𑀺𑀪𑁄𑀕𑀢𑁄𑀧𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺. 𑀯𑀡𑁆𑀡𑀢𑁄 𑀦 𑀚𑀸𑀦𑀸𑀢𑀺 𑀦𑀸𑀫 𑁋 ‘‘𑀏𑀢𑁆𑀢𑀺𑀓𑀸 𑀕𑀸𑀯𑁄 𑀲𑁂𑀢𑀸, 𑀏𑀢𑁆𑀢𑀺𑀓𑀸 𑀭𑀢𑁆𑀢𑀸, 𑀏𑀢𑁆𑀢𑀺𑀓𑀸 𑀓𑀸𑀴𑀸, 𑀏𑀢𑁆𑀢𑀺𑀓𑀸 𑀓𑀩𑀭𑀸 𑀏𑀢𑁆𑀢𑀺𑀓𑀸 𑀦𑀻𑀮𑀸’’𑀢𑀺 𑀦 𑀚𑀸𑀦𑀸𑀢𑀺, 𑀲𑁄 𑀕𑀸𑀯𑀻𑀲𑀼 𑀳𑀝𑀸𑀲𑀼 𑀯𑀸…𑀧𑁂… 𑀧𑀜𑁆𑀘𑀕𑁄𑀭𑀲𑀧𑀭𑀺𑀪𑁄𑀕𑀢𑁄𑀧𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀮𑀓𑁆𑀔𑀡𑀓𑀼𑀲𑀮𑁄 𑀳𑁄𑀢𑀻𑀢𑀺 𑀕𑀸𑀯𑀻𑀦𑀁 𑀲𑀭𑀻𑀭𑁂 𑀓𑀢𑀁 𑀥𑀦𑀼𑀲𑀢𑁆𑀢𑀺𑀲𑀽𑀮𑀸𑀤𑀺𑀪𑁂𑀤𑀁 𑀮𑀓𑁆𑀔𑀡𑀁 𑀦 𑀚𑀸𑀦𑀸𑀢𑀺, 𑀲𑁄 𑀕𑀸𑀯𑀻𑀲𑀼 𑀳𑀝𑀸𑀲𑀼 𑀯𑀸 𑀧𑀮𑀸𑀢𑀸𑀲𑀼 𑀯𑀸 𑀅𑀚𑁆𑀚 𑀅𑀲𑀼𑀓𑀮𑀓𑁆𑀔𑀡𑀸 𑀘 𑀅𑀲𑀼𑀓𑀮𑀓𑁆𑀔𑀡𑀸 𑀘 𑀕𑀸𑀯𑁄 𑀦 𑀤𑀺𑀲𑁆𑀲𑀦𑁆𑀢𑀺…𑀧𑁂… 𑀧𑀜𑁆𑀘𑀕𑁄𑀭𑀲𑀧𑀭𑀺𑀪𑁄𑀕𑀢𑁄𑀧𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀆𑀲𑀸𑀝𑀺𑀓𑀁 𑀳𑀸𑀭𑁂𑀢𑀸𑀢𑀺 𑀕𑀼𑀦𑁆𑀦𑀁 𑀔𑀸𑀡𑀼𑀓𑀡𑁆𑀝𑀓𑀸𑀤𑀻𑀳𑀺 𑀧𑀳𑀝𑀝𑁆𑀞𑀸𑀦𑁂𑀲𑀼 𑀯𑀡𑁄 𑀳𑁄𑀢𑀺. 𑀢𑀢𑁆𑀣 𑀦𑀻𑀮𑀫𑀓𑁆𑀔𑀺𑀓𑀸 𑀅𑀡𑁆𑀟𑀓𑀸𑀦𑀺 𑀧𑀸𑀢𑁂𑀦𑁆𑀢𑀺, 𑀢𑁂𑀲𑀁 𑀆𑀲𑀸𑀝𑀺𑀓𑀸𑀢𑀺 𑀦𑀸𑀫. 𑀢𑀸𑀦𑀺 𑀤𑀡𑁆𑀟𑁂𑀦 𑀅𑀧𑀦𑁂𑀢𑁆𑀯𑀸 𑀪𑁂𑀲𑀚𑁆𑀚𑀁 𑀤𑀸𑀢𑀩𑁆𑀩𑀁 𑀳𑁄𑀢𑀺. 𑀩𑀸𑀮𑁄 𑀕𑁄𑀧𑀸𑀮𑀓𑁄 𑀢𑀣𑀸 𑀦 𑀓𑀭𑁄𑀢𑀺, 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀦 𑀆𑀲𑀸𑀝𑀺𑀓𑀁 𑀳𑀸𑀭𑁂𑀢𑀸 𑀳𑁄𑀢𑀻’’𑀢𑀺. 𑀢𑀲𑁆𑀲 𑀕𑀼𑀦𑁆𑀦𑀁 𑀯𑀡𑀸 𑀯𑀟𑁆𑀠𑀦𑁆𑀢𑀺, 𑀕𑀫𑁆𑀪𑀻𑀭𑀸 𑀳𑁄𑀦𑁆𑀢𑀺, 𑀧𑀸𑀡𑀓𑀸 𑀓𑀼𑀘𑁆𑀙𑀺𑀁 𑀧𑀯𑀺𑀲𑀦𑁆𑀢𑀺, 𑀕𑀸𑀯𑁄 𑀕𑁂𑀮𑀜𑁆𑀜𑀸𑀪𑀺𑀪𑀽𑀢𑀸 𑀦𑁂𑀯 𑀬𑀸𑀯𑀤𑀢𑁆𑀣𑀁 𑀢𑀺𑀡𑀸𑀦𑀺 𑀔𑀸𑀤𑀺𑀢𑀼𑀁, 𑀦 𑀧𑀸𑀦𑀻𑀬𑀁 𑀧𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀢𑀢𑁆𑀣 𑀕𑀼𑀦𑁆𑀦𑀁 𑀔𑀻𑀭𑀁 𑀙𑀺𑀚𑁆𑀚𑀢𑀺, 𑀕𑁄𑀡𑀸𑀦𑀁 𑀚𑀯𑁄 𑀳𑀸𑀬𑀢𑀺, 𑀉𑀪𑀬𑁂𑀲𑀁 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀳𑁄𑀢𑀺. 𑀏𑀯𑀫𑀲𑁆𑀲 𑀕𑁄𑀕𑀡𑁄𑀧𑀺 𑀧𑀭𑀺𑀳𑀸𑀬𑀢𑀺, 𑀧𑀜𑁆𑀘𑀕𑁄𑀭𑀲𑀢𑁄𑀧𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀯𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑀸 𑀳𑁄𑀢𑀻𑀢𑀺 𑀕𑀼𑀦𑁆𑀦𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀜𑁆𑀚𑀸𑀢𑁄 𑀯𑀡𑁄 𑀪𑁂𑀲𑀚𑁆𑀚𑀁 𑀤𑀢𑁆𑀯𑀸 𑀯𑀸𑀓𑁂𑀦 𑀯𑀸 𑀘𑀻𑀭𑀓𑁂𑀦 𑀯𑀸 𑀩𑀦𑁆𑀥𑀺𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑁄 𑀳𑁄𑀢𑀺. 𑀩𑀸𑀮𑁄 𑀕𑁄𑀧𑀸𑀮𑀓𑁄 𑀢𑀣𑀸 𑀦 𑀓𑀭𑁄𑀢𑀺, 𑀅𑀣𑀲𑁆𑀲 𑀕𑀼𑀦𑁆𑀦𑀁 𑀯𑀡𑁂𑀳𑀺 𑀬𑀽𑀲𑀸 𑀧𑀕𑁆𑀖𑀭𑀦𑁆𑀢𑀺, 𑀢𑀸 𑀅𑀜𑁆𑀜𑀫𑀜𑁆𑀜𑀁 𑀦𑀺𑀖𑀁𑀲𑁂𑀦𑁆𑀢𑀺, 𑀢𑁂𑀦 𑀅𑀜𑁆𑀜𑁂𑀲𑀫𑁆𑀧𑀺 𑀯𑀡𑀸 𑀚𑀸𑀬𑀦𑁆𑀢𑀺. 𑀏𑀯𑀁 𑀕𑀸𑀯𑁄 𑀕𑁂𑀮𑀜𑁆𑀜𑀸𑀪𑀺𑀪𑀽𑀢𑀸 𑀦𑁂𑀯 𑀬𑀸𑀯𑀤𑀢𑁆𑀣𑀁 𑀢𑀺𑀡𑀸𑀦𑀺 𑀔𑀸𑀤𑀺𑀢𑀼𑀁…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀥𑀽𑀫𑀁 𑀓𑀢𑁆𑀢𑀸 𑀳𑁄𑀢𑀻𑀢𑀺 𑀅𑀦𑁆𑀢𑁄𑀯𑀲𑁆𑀲𑁂 𑀟𑀁𑀲𑀫𑀓𑀲𑀸𑀤𑀻𑀦𑀁 𑀉𑀲𑁆𑀲𑀦𑁆𑀦𑀓𑀸𑀮𑁂 𑀕𑁄𑀕𑀡𑁂 𑀯𑀚𑀁 𑀧𑀯𑀺𑀝𑁆𑀞𑁂 𑀢𑀢𑁆𑀣 𑀢𑀢𑁆𑀣 𑀥𑀽𑀫𑁄 𑀓𑀸𑀢𑀩𑁆𑀩𑁄 𑀳𑁄𑀢𑀺, 𑀅𑀧𑀡𑁆𑀟𑀺𑀢𑁄 𑀕𑁄𑀧𑀸𑀮𑀓𑁄 𑀢𑀁 𑀦 𑀓𑀭𑁄𑀢𑀺. 𑀕𑁄𑀕𑀡𑁄 𑀲𑀩𑁆𑀩𑀭𑀢𑁆𑀢𑀺𑀁 𑀟𑀁𑀲𑀸𑀤𑀻𑀳𑀺 𑀉𑀧𑀤𑁆𑀤𑀼𑀢𑁄 𑀦𑀺𑀤𑁆𑀤𑀁 𑀅𑀮𑀪𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀅𑀭𑀜𑁆𑀜𑁂 𑀢𑀢𑁆𑀣 𑀢𑀢𑁆𑀣 𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀢𑀺, 𑀦𑁂𑀯 𑀬𑀸𑀯𑀤𑀢𑁆𑀣𑀁 𑀢𑀺𑀡𑀸𑀦𑀺 𑀔𑀸𑀤𑀺𑀢𑀼𑀁…𑀧𑁂… 𑀧𑀜𑁆𑀘𑀕𑁄𑀭𑀲𑀧𑀭𑀺𑀪𑁄𑀕𑀢𑁄𑀧𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀢𑀺𑀢𑁆𑀣𑀁 𑀚𑀸𑀦𑀸𑀢𑀻𑀢𑀺 𑀢𑀺𑀢𑁆𑀣𑀁 𑀲𑀫𑀦𑁆𑀢𑀺 𑀯𑀸 𑀯𑀺𑀲𑀫𑀦𑁆𑀢𑀺 𑀯𑀸 𑀲𑀕𑀸𑀳𑀦𑁆𑀢𑀺 𑀯𑀸 𑀦𑀺𑀕𑁆𑀕𑀸𑀳𑀦𑁆𑀢𑀺 𑀯𑀸 𑀦 𑀚𑀸𑀦𑀸𑀢𑀺, 𑀲𑁄 𑀅𑀢𑀺𑀢𑁆𑀣𑁂𑀦 𑀕𑀸𑀯𑀺𑀬𑁄 𑀑𑀢𑀸𑀭𑁂𑀢𑀺. 𑀢𑀸𑀲𑀁 𑀯𑀺𑀲𑀫𑀢𑀺𑀢𑁆𑀣𑁂 𑀧𑀸𑀲𑀸𑀡𑀸𑀤𑀻𑀦𑀺 𑀅𑀓𑁆𑀓𑀫𑀦𑁆𑀢𑀻𑀦𑀁 𑀧𑀸𑀤𑀸 𑀪𑀺𑀚𑁆𑀚𑀦𑁆𑀢𑀺, 𑀲𑀕𑀸𑀳𑀁 𑀕𑀫𑁆𑀪𑀻𑀭𑀁 𑀢𑀺𑀢𑁆𑀣𑀁 𑀑𑀢𑀺𑀡𑁆𑀡𑀸 𑀓𑀼𑀫𑁆𑀪𑀻𑀮𑀸𑀤𑀬𑁄 𑀕𑀸𑀳𑀸 𑀕𑀡𑁆𑀳𑀦𑁆𑀢𑀺. 𑀅𑀚𑁆𑀚 𑀏𑀢𑁆𑀢𑀺𑀓𑀸 𑀕𑀸𑀯𑁄 𑀦𑀝𑁆𑀞𑀸, 𑀅𑀚𑁆𑀚 𑀏𑀢𑁆𑀢𑀺𑀓𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺. 𑀏𑀯𑀫𑀲𑁆𑀲 𑀕𑁄𑀕𑀡𑁄𑀧𑀺 𑀧𑀭𑀺𑀳𑀸𑀬𑀢𑀺, 𑀧𑀜𑁆𑀘𑀕𑁄𑀭𑀲𑀢𑁄𑀧𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀧𑀻𑀢𑀁 𑀚𑀸𑀦𑀸𑀢𑀻𑀢𑀺 𑀧𑀻𑀢𑀫𑁆𑀧𑀺 𑀅𑀧𑀻𑀢𑀫𑁆𑀧𑀺 𑀦 𑀚𑀸𑀦𑀸𑀢𑀺. 𑀕𑁄𑀧𑀸𑀮𑀓𑁂𑀦 𑀳𑀺 ‘‘𑀇𑀫𑀸𑀬 𑀕𑀸𑀯𑀺𑀬𑀸 𑀧𑀻𑀢𑀁, 𑀇𑀫𑀸𑀬 𑀦 𑀧𑀻𑀢𑀁, 𑀇𑀫𑀸𑀬 𑀧𑀸𑀦𑀻𑀬𑀢𑀺𑀢𑁆𑀣𑁂 𑀑𑀓𑀸𑀲𑁄 𑀮𑀤𑁆𑀥𑁄, 𑀇𑀫𑀸𑀬 𑀦 𑀮𑀤𑁆𑀥𑁄’’𑀢𑀺 𑀏𑀯𑀁 𑀧𑀻𑀢𑀸𑀧𑀻𑀢𑀁 𑀚𑀸𑀦𑀺𑀢𑀩𑁆𑀩𑀁 𑀳𑁄𑀢𑀺. 𑀅𑀬𑀁 𑀧𑀦 𑀤𑀺𑀯𑀲𑀪𑀸𑀕𑀁 𑀅𑀭𑀜𑁆𑀜𑁂 𑀕𑁄𑀕𑀡𑀁 𑀭𑀓𑁆𑀔𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀸𑀬𑁂𑀲𑁆𑀲𑀸𑀫𑀻𑀢𑀺 𑀦𑀤𑀺𑀁 𑀯𑀸 𑀢𑀴𑀸𑀓𑀁 𑀯𑀸 𑀕𑀳𑁂𑀢𑁆𑀯𑀸 𑀕𑀘𑁆𑀙𑀢𑀺. 𑀢𑀢𑁆𑀣 𑀫𑀳𑀸𑀉𑀲𑀪𑀸 𑀘 𑀅𑀦𑀼𑀉𑀲𑀪𑀸 𑀘 𑀩𑀮𑀯𑀕𑀸𑀯𑀺𑀬𑁄 𑀘 𑀤𑀼𑀩𑁆𑀩𑀮𑀸𑀦𑀺 𑀘𑁂𑀯 𑀫𑀳𑀮𑁆𑀮𑀓𑀸𑀦𑀺 𑀘 𑀕𑁄𑀭𑀽𑀧𑀸𑀦𑀺 𑀲𑀺𑀗𑁆𑀕𑁂𑀳𑀺 𑀯𑀸 𑀨𑀸𑀲𑀼𑀓𑀸𑀳𑀺 𑀯𑀸 𑀧𑀳𑀭𑀺𑀢𑁆𑀯𑀸 𑀅𑀢𑁆𑀢𑀦𑁄 𑀑𑀓𑀸𑀲𑀁 𑀓𑀢𑁆𑀯𑀸 𑀊𑀭𑀼𑀧𑁆𑀧𑀫𑀸𑀡𑀁 𑀉𑀤𑀓𑀁 𑀧𑀯𑀺𑀲𑀺𑀢𑁆𑀯𑀸 𑀬𑀣𑀸𑀓𑀸𑀫𑀁 𑀧𑀺𑀯𑀦𑁆𑀢𑀺. 𑀅𑀯𑀲𑁂𑀲𑀸 𑀑𑀓𑀸𑀲𑀁 𑀅𑀮𑀪𑀫𑀸𑀦𑀸 𑀢𑀻𑀭𑁂 𑀞𑀢𑁆𑀯𑀸 𑀓𑀮𑀮𑀫𑀺𑀲𑁆𑀲𑀓𑀁 𑀉𑀤𑀓𑀁 𑀧𑀺𑀯𑀦𑁆𑀢𑀺, 𑀅𑀧𑀻𑀢𑀸 𑀏𑀯 𑀯𑀸 𑀳𑁄𑀦𑁆𑀢𑀺. 𑀅𑀣 𑀦𑁂 𑀕𑁄𑀧𑀸𑀮𑀓𑁄 𑀧𑀺𑀝𑁆𑀞𑀺𑀬𑀁 𑀧𑀳𑀭𑀺𑀢𑁆𑀯𑀸 𑀧𑀼𑀦 𑀅𑀭𑀜𑁆𑀜𑀁 𑀧𑀯𑁂𑀲𑁂𑀢𑀺, 𑀢𑀢𑁆𑀣 𑀅𑀧𑀻𑀢𑀕𑀸𑀯𑀺𑀬𑁄 𑀧𑀺𑀧𑀸𑀲𑀸𑀬 𑀲𑀼𑀓𑁆𑀔𑀫𑀸𑀦𑀸 𑀬𑀸𑀯𑀤𑀢𑁆𑀣𑀁 𑀢𑀺𑀡𑀸𑀦𑀺 𑀔𑀸𑀤𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀢𑁆𑀣 𑀕𑀼𑀦𑁆𑀦𑀁 𑀔𑀻𑀭𑀁 𑀙𑀺𑀚𑁆𑀚𑀢𑀺, 𑀕𑁄𑀡𑀸𑀦𑀁 𑀚𑀯𑁄 𑀳𑀸𑀬𑀢𑀺…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀯𑀻𑀣𑀺𑀁 𑀚𑀸𑀦𑀸𑀢𑀻𑀢𑀺 ‘‘𑀅𑀬𑀁 𑀫𑀕𑁆𑀕𑁄 𑀲𑀫𑁄 𑀔𑁂𑀫𑁄, 𑀅𑀬𑀁 𑀯𑀺𑀲𑀫𑁄 𑀲𑀸𑀲𑀗𑁆𑀓𑁄 𑀲𑀧𑁆𑀧𑀝𑀺𑀪𑀬𑁄’’𑀢𑀺 𑀦 𑀚𑀸𑀦𑀸𑀢𑀺. 𑀲𑁄 𑀲𑀫𑀁 𑀔𑁂𑀫𑀁 𑀫𑀕𑁆𑀕𑀁 𑀯𑀚𑁆𑀚𑁂𑀢𑁆𑀯𑀸 𑀕𑁄𑀕𑀡𑀁 𑀇𑀢𑀭𑀁 𑀫𑀕𑁆𑀕𑀁 𑀧𑀝𑀺𑀧𑀸𑀤𑁂𑀢𑀺, 𑀢𑀢𑁆𑀣 𑀕𑀸𑀯𑁄 𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀦𑀁 𑀕𑀦𑁆𑀥𑁂𑀦 𑀘𑁄𑀭𑀧𑀭𑀺𑀲𑁆𑀲𑀬𑁂𑀦 𑀯𑀸 𑀅𑀪𑀺𑀪𑀽𑀢𑀸 𑀪𑀦𑁆𑀢𑀫𑀺𑀕𑀲𑀧𑁆𑀧𑀝𑀺𑀪𑀸𑀕𑀸 𑀕𑀻𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀦𑁂𑀯 𑀬𑀸𑀯𑀤𑀢𑁆𑀣𑀁 𑀢𑀺𑀡𑀸𑀦𑀺 𑀔𑀸𑀤𑀦𑁆𑀢𑀺, 𑀦 𑀧𑀸𑀦𑀻𑀬𑀁 𑀧𑀺𑀯𑀦𑁆𑀢𑀺, 𑀢𑀢𑁆𑀣 𑀕𑀼𑀦𑁆𑀦𑀁 𑀔𑀻𑀭𑀁 𑀙𑀺𑀚𑁆𑀚𑀢𑀺…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀕𑁄𑀘𑀭𑀓𑀼𑀲𑀮𑁄 𑀳𑁄𑀢𑀻𑀢𑀺 𑀕𑁄𑀧𑀸𑀮𑀓𑁂𑀦 𑀳𑀺 𑀕𑁄𑀘𑀭𑀓𑀼𑀲𑀮𑁂𑀦 𑀪𑀯𑀺𑀢𑀩𑁆𑀩𑀁, 𑀧𑀜𑁆𑀘𑀸𑀳𑀺𑀓𑀯𑀸𑀭𑁄 𑀯𑀸 𑀲𑀢𑁆𑀢𑀸𑀳𑀺𑀓𑀯𑀸𑀭𑁄 𑀯𑀸 𑀚𑀸𑀦𑀺𑀢𑀩𑁆𑀩𑁄, 𑀏𑀓𑀤𑀺𑀲𑀸𑀬 𑀕𑁄𑀕𑀡𑀁 𑀘𑀸𑀭𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀢𑀢𑁆𑀣 𑀦 𑀘𑀸𑀭𑁂𑀢𑀩𑁆𑀩𑁄. 𑀫𑀳𑀢𑀸 𑀳𑀺 𑀕𑁄𑀕𑀡𑁂𑀦 𑀘𑀺𑀡𑁆𑀡𑀝𑁆𑀞𑀸𑀦𑀁 𑀪𑁂𑀭𑀺𑀢𑀮𑀁 𑀯𑀺𑀬 𑀲𑀼𑀤𑁆𑀥𑀁 𑀳𑁄𑀢𑀺 𑀦𑀺𑀢𑁆𑀢𑀺𑀡𑀁, 𑀉𑀤𑀓𑀫𑁆𑀧𑀺 𑀆𑀮𑀼𑀴𑀻𑀬𑀢𑀺. 𑀢𑀲𑁆𑀫𑀸 𑀧𑀜𑁆𑀘𑀫𑁂 𑀯𑀸 𑀲𑀢𑁆𑀢𑀫𑁂 𑀯𑀸 𑀤𑀺𑀯𑀲𑁂 𑀧𑀼𑀦 𑀢𑀢𑁆𑀣 𑀘𑀸𑀭𑁂𑀢𑀼𑀁 𑀯𑀝𑁆𑀝𑀢𑀺, 𑀏𑀢𑁆𑀢𑀓𑁂𑀦 𑀳𑀺 𑀢𑀺𑀡𑀫𑁆𑀧𑀺 𑀧𑀝𑀺𑀯𑀺𑀭𑀼𑀳𑀢𑀺, 𑀉𑀤𑀓𑀫𑁆𑀧𑀺 𑀧𑀲𑀻𑀤𑀢𑀺. 𑀅𑀬𑀁 𑀧𑀦 𑀇𑀫𑀁 𑀧𑀜𑁆𑀘𑀸𑀳𑀺𑀓𑀯𑀸𑀭𑀁 𑀯𑀸 𑀲𑀢𑁆𑀢𑀸𑀳𑀺𑀓𑀯𑀸𑀭𑀁 𑀯𑀸 𑀦 𑀚𑀸𑀦𑀸𑀢𑀺, 𑀤𑀺𑀯𑀲𑁂 𑀤𑀺𑀯𑀲𑁂 𑀭𑀓𑁆𑀔𑀺𑀢𑀝𑁆𑀞𑀸𑀦𑁂𑀬𑁂𑀯 𑀭𑀓𑁆𑀔𑀢𑀺. 𑀅𑀣𑀲𑁆𑀲 𑀕𑁄𑀕𑀡𑁄 𑀳𑀭𑀺𑀢𑀢𑀺𑀡𑀁 𑀦 𑀮𑀪𑀢𑀺, 𑀲𑀼𑀓𑁆𑀔𑀢𑀺𑀡𑀁 𑀔𑀸𑀤𑀦𑁆𑀢𑁄 𑀓𑀮𑀮𑀫𑀺𑀲𑁆𑀲𑀓𑀁 𑀉𑀤𑀓𑀁 𑀧𑀺𑀯𑀢𑀺, 𑀢𑀢𑁆𑀣 𑀕𑀼𑀦𑁆𑀦𑀁 𑀔𑀻𑀭𑀁 𑀙𑀺𑀚𑁆𑀚𑀢𑀺…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀅𑀦𑀯𑀲𑁂𑀲𑀤𑁄𑀳𑀻 𑀘 𑀳𑁄𑀢𑀻𑀢𑀺 𑀧𑀡𑁆𑀟𑀺𑀢𑀕𑁄𑀧𑀸𑀮𑀓𑁂𑀦 𑀬𑀸𑀯 𑀯𑀘𑁆𑀙𑀓𑀲𑁆𑀲 𑀫𑀁𑀲𑀮𑁄𑀳𑀺𑀢𑀁 𑀲𑀡𑁆𑀞𑀸𑀢𑀺, 𑀢𑀸𑀯 𑀏𑀓𑀁 𑀤𑁆𑀯𑁂 𑀣𑀦𑁂 𑀞𑀧𑁂𑀢𑁆𑀯𑀸 𑀲𑀸𑀯𑀲𑁂𑀲𑀤𑁄𑀳𑀺𑀦𑀸 𑀪𑀯𑀺𑀢𑀩𑁆𑀩𑀁. 𑀅𑀬𑀁 𑀯𑀘𑁆𑀙𑀓𑀲𑁆𑀲 𑀓𑀺𑀜𑁆𑀘𑀺 𑀅𑀦𑀯𑀲𑁂𑀲𑁂𑀢𑁆𑀯𑀸 𑀤𑀼𑀳𑀢𑀺, 𑀔𑀻𑀭𑀧𑀓𑁄 𑀯𑀘𑁆𑀙𑁄 𑀔𑀻𑀭𑀧𑀺𑀧𑀸𑀲𑀸𑀬 𑀲𑀼𑀓𑁆𑀔𑀢𑀺, 𑀲𑀡𑁆𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑀫𑁆𑀧𑀫𑀸𑀦𑁄 𑀫𑀸𑀢𑀼 𑀧𑀼𑀭𑀢𑁄 𑀧𑀢𑀺𑀢𑁆𑀯𑀸 𑀓𑀸𑀮𑀗𑁆𑀓𑀭𑁄𑀢𑀺. 𑀫𑀸𑀢𑀸 𑀧𑀼𑀢𑁆𑀢𑀓𑀁 𑀤𑀺𑀲𑁆𑀯𑀸, ‘‘𑀫𑀬𑁆𑀳𑀁 𑀧𑀼𑀢𑁆𑀢𑀓𑁄 𑀅𑀢𑁆𑀢𑀦𑁄 𑀫𑀸𑀢𑀼𑀔𑀻𑀭𑀁 𑀧𑀸𑀢𑀼𑀫𑁆𑀧𑀺 𑀦 𑀮𑀪𑀢𑀻’’𑀢𑀺 𑀧𑀼𑀢𑁆𑀢𑀲𑁄𑀓𑁂𑀦 𑀦 𑀬𑀸𑀯𑀤𑀢𑁆𑀣𑀁 𑀢𑀺𑀡𑀸𑀦𑀺 𑀔𑀸𑀤𑀺𑀢𑀼𑀁, 𑀦 𑀧𑀸𑀦𑀻𑀬𑀁 𑀧𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀣𑀦𑁂𑀲𑀼 𑀔𑀻𑀭𑀁 𑀙𑀺𑀚𑁆𑀚𑀢𑀺. 𑀏𑀯𑀫𑀲𑁆𑀲 𑀕𑁄𑀕𑀡𑁄𑀧𑀺 𑀧𑀭𑀺𑀳𑀸𑀬𑀢𑀺, 𑀧𑀜𑁆𑀘𑀕𑁄𑀭𑀲𑀢𑁄𑀧𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀕𑀼𑀦𑁆𑀦𑀁 𑀧𑀺𑀢𑀼𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑀻𑀢𑀺 𑀕𑁄𑀧𑀺𑀢𑀭𑁄. 𑀕𑀸𑀯𑁄 𑀧𑀭𑀺𑀡𑀬𑀦𑁆𑀢𑀺 𑀬𑀣𑀸𑀭𑀼𑀘𑀺𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀻𑀢𑀺 𑀕𑁄𑀧𑀭𑀺𑀡𑀸𑀬𑀓𑀸. 𑀦 𑀅𑀢𑀺𑀭𑁂𑀓𑀧𑀽𑀚𑀸𑀬𑀸𑀢𑀺 𑀧𑀡𑁆𑀟𑀺𑀢𑁄 𑀳𑀺 𑀕𑁄𑀧𑀸𑀮𑀓𑁄 𑀏𑀯𑀭𑀽𑀧𑁂 𑀉𑀲𑀪𑁂 𑀅𑀢𑀺𑀭𑁂𑀓𑀧𑀽𑀚𑀸𑀬 𑀧𑀽𑀚𑁂𑀢𑀺, 𑀧𑀡𑀻𑀢𑀁 𑀕𑁄𑀪𑀢𑁆𑀢𑀁 𑀤𑁂𑀢𑀺, 𑀕𑀦𑁆𑀥𑀧𑀜𑁆𑀘𑀗𑁆𑀕𑀼𑀮𑀺𑀓𑁂𑀳𑀺 𑀫𑀡𑁆𑀟𑁂𑀢𑀺, 𑀫𑀸𑀮𑀁 𑀧𑀺𑀮𑀦𑁆𑀥𑁂𑀢𑀺, 𑀲𑀺𑀗𑁆𑀕𑁂 𑀲𑀼𑀯𑀡𑁆𑀡𑀭𑀚𑀢𑀓𑁄𑀲𑀓𑁂 𑀘 𑀥𑀸𑀭𑁂𑀢𑀺, 𑀭𑀢𑁆𑀢𑀺𑀁 𑀤𑀻𑀧𑀁 𑀚𑀸𑀮𑁂𑀢𑁆𑀯𑀸 𑀘𑁂𑀮𑀯𑀺𑀢𑀸𑀦𑀲𑁆𑀲 𑀳𑁂𑀝𑁆𑀞𑀸 𑀲𑀬𑀸𑀧𑁂𑀢𑀺. 𑀅𑀬𑀁 𑀧𑀦 𑀢𑀢𑁄 𑀏𑀓𑀲𑀓𑁆𑀓𑀸𑀭𑀫𑁆𑀧𑀺 𑀦 𑀓𑀭𑁄𑀢𑀺, 𑀉𑀲𑀪𑀸 𑀅𑀢𑀺𑀭𑁂𑀓𑀧𑀽𑀚𑀁 𑀅𑀮𑀪𑀫𑀸𑀦𑀸 𑀕𑁄𑀕𑀡𑀁 𑀦 𑀭𑀓𑁆𑀔𑀦𑁆𑀢𑀺, 𑀧𑀭𑀺𑀲𑁆𑀲𑀬𑀁 𑀦 𑀯𑀸𑀭𑁂𑀦𑁆𑀢𑀺. 𑀏𑀯𑀫𑀲𑁆𑀲 𑀕𑁄𑀕𑀡𑁄 𑀧𑀭𑀺𑀳𑀸𑀬𑀢𑀺, 𑀧𑀜𑁆𑀘𑀕𑁄𑀭𑀲𑀢𑁄 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑁩𑁪𑁭. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀦 𑀭𑀽𑀧𑀜𑁆𑀜𑀽 𑀳𑁄𑀢𑀻𑀢𑀺, ‘‘𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀭𑀽𑀧𑀁 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀦 𑀚𑀸𑀦𑀸𑀢𑀺 𑀕𑀡𑀦𑀢𑁄 𑀯𑀸 𑀲𑀫𑀼𑀝𑁆𑀞𑀸𑀦𑀢𑁄 𑀯𑀸. 𑀕𑀡𑀦𑀢𑁄 𑀦 𑀚𑀸𑀦𑀸𑀢𑀺 𑀦𑀸𑀫, ‘‘𑀘𑀓𑁆𑀔𑀸𑀬𑀢𑀦𑀁, 𑀲𑁄𑀢-𑀖𑀸𑀦-𑀚𑀺𑀯𑁆𑀳𑀸-𑀓𑀸𑀬𑀸𑀬𑀢𑀦𑀁, 𑀭𑀽𑀧-𑀲𑀤𑁆𑀤-𑀕𑀦𑁆𑀥-𑀭𑀲-𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀓𑀸𑀬𑀯𑀺𑀜𑁆𑀜𑀢𑁆𑀢𑀺, 𑀯𑀘𑀻𑀯𑀺𑀜𑁆𑀜𑀢𑁆𑀢𑀺, 𑀆𑀓𑀸𑀲𑀥𑀸𑀢𑀼, 𑀆𑀧𑁄𑀥𑀸𑀢𑀼, 𑀭𑀽𑀧𑀲𑁆𑀲 𑀮𑀳𑀼𑀢𑀸, 𑀫𑀼𑀤𑀼𑀢𑀸, 𑀓𑀫𑁆𑀫𑀜𑁆𑀜𑀢𑀸, 𑀉𑀧𑀘𑀬𑁄, 𑀲𑀦𑁆𑀢𑀢𑀺, 𑀚𑀭𑀢𑀸, 𑀭𑀽𑀧𑀲𑁆𑀲 𑀅𑀦𑀺𑀘𑁆𑀘𑀢𑀸, 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄’’𑀢𑀺 𑀏𑀯𑀁 𑀧𑀸𑀴𑀺𑀬𑀁 𑀆𑀕𑀢𑀸 𑀧𑀜𑁆𑀘𑀯𑀻𑀲𑀢𑀺 𑀭𑀽𑀧𑀓𑁄𑀝𑁆𑀞𑀸𑀲𑀸𑀢𑀺 𑀦 𑀚𑀸𑀦𑀸𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀲𑁄 𑀕𑁄𑀧𑀸𑀮𑀓𑁄 𑀕𑀡𑀦𑀢𑁄 𑀕𑀼𑀦𑁆𑀦𑀁 𑀭𑀽𑀧𑀁 𑀦 𑀚𑀸𑀦𑀸𑀢𑀺, 𑀢𑀣𑀽𑀧𑀫𑁄 𑀅𑀬𑀁 𑀪𑀺𑀓𑁆𑀔𑀼. 𑀲𑁄 𑀕𑀡𑀦𑀢𑁄 𑀭𑀽𑀧𑀁 𑀅𑀚𑀸𑀦𑀦𑁆𑀢𑁄 𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀭𑀽𑀧𑀸𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀘𑁆𑀘𑀬𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑁄 𑀬𑀣𑀸 𑀢𑀲𑁆𑀲 𑀕𑁄𑀧𑀸𑀮𑀓𑀲𑁆𑀲 𑀕𑁄𑀕𑀡𑁄 𑀦 𑀯𑀟𑁆𑀠𑀢𑀺, 𑀏𑀯𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀲𑀻𑀮𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑁂𑀳𑀺 𑀦 𑀯𑀟𑁆𑀠𑀢𑀺, 𑀬𑀣𑀸 𑀘 𑀲𑁄 𑀕𑁄𑀧𑀸𑀮𑀓𑁄 𑀧𑀜𑁆𑀘𑀳𑀺 𑀕𑁄𑀭𑀲𑁂𑀳𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺, 𑀏𑀯𑀁 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦, 𑀅𑀲𑁂𑀓𑁆𑀔𑁂𑀦 𑀲𑀫𑀸𑀥𑀺, 𑀧𑀜𑁆𑀜𑀸, 𑀯𑀺𑀫𑀼𑀢𑁆𑀢𑀺, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦𑀸𑀢𑀺 𑀧𑀜𑁆𑀘𑀳𑀺 𑀥𑀫𑁆𑀫𑀓𑁆𑀔𑀦𑁆𑀥𑁂𑀳𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀲𑀫𑀼𑀝𑁆𑀞𑀸𑀦𑀢𑁄 𑀦 𑀚𑀸𑀦𑀸𑀢𑀺 𑀦𑀸𑀫, ‘‘𑀏𑀢𑁆𑀢𑀓𑀁 𑀭𑀽𑀧𑀁 𑀏𑀓𑀲𑀫𑀼𑀝𑁆𑀞𑀸𑀦𑀁, 𑀏𑀢𑁆𑀢𑀓𑀁 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀁, 𑀏𑀢𑁆𑀢𑀓𑀁 𑀢𑀺𑀲𑀫𑀼𑀝𑁆𑀞𑀸𑀦𑀁, 𑀏𑀢𑁆𑀢𑀓𑀁 𑀘𑀢𑀼𑀲𑀫𑀼𑀝𑁆𑀞𑀸𑀦𑀁, 𑀏𑀢𑁆𑀢𑀓𑀁 𑀦 𑀓𑀼𑀢𑁄𑀘𑀺𑀲𑀫𑀼𑀝𑁆𑀞𑀸𑀢𑀻’’𑀢𑀺 𑀦 𑀚𑀸𑀦𑀸𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀲𑁄 𑀕𑁄𑀧𑀸𑀮𑀓𑁄 𑀯𑀡𑁆𑀡𑀢𑁄 𑀕𑀼𑀦𑁆𑀦𑀁 𑀭𑀽𑀧𑀁 𑀦 𑀚𑀸𑀦𑀸𑀢𑀺, 𑀢𑀣𑀽𑀧𑀫𑁄 𑀅𑀬𑀁 𑀪𑀺𑀓𑁆𑀔𑀼. 𑀲𑁄 𑀲𑀫𑀼𑀝𑁆𑀞𑀸𑀦𑀢𑁄 𑀭𑀽𑀧𑀁 𑀅𑀚𑀸𑀦𑀦𑁆𑀢𑁄 𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑁆𑀯𑀸…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀮𑀓𑁆𑀔𑀡𑀓𑀼𑀲𑀮𑁄 𑀳𑁄𑀢𑀻𑀢𑀺 𑀓𑀫𑁆𑀫𑀮𑀓𑁆𑀔𑀡𑁄 𑀩𑀸𑀮𑁄, 𑀓𑀫𑁆𑀫𑀮𑀓𑁆𑀔𑀡𑁄 𑀧𑀡𑁆𑀟𑀺𑀢𑁄𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 𑀧𑀡𑁆𑀟𑀺𑀢𑀩𑀸𑀮𑀮𑀓𑁆𑀔𑀡𑀦𑁆𑀢𑀺 𑀦 𑀚𑀸𑀦𑀸𑀢𑀺. 𑀲𑁄 𑀏𑀯𑀁 𑀅𑀚𑀸𑀦𑀦𑁆𑀢𑁄 𑀩𑀸𑀮𑁂 𑀯𑀚𑁆𑀚𑁂𑀢𑁆𑀯𑀸 𑀧𑀡𑁆𑀟𑀺𑀢𑁂 𑀦 𑀲𑁂𑀯𑀢𑀺, 𑀩𑀸𑀮𑁂 𑀯𑀚𑁆𑀚𑁂𑀢𑁆𑀯𑀸 𑀧𑀡𑁆𑀟𑀺𑀢𑁂 𑀅𑀲𑁂𑀯𑀦𑁆𑀢𑁄 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀓𑀼𑀲𑀮𑀸𑀓𑀼𑀲𑀮𑀁 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁 𑀕𑀭𑀼𑀓𑀮𑀳𑀼𑀓𑀁 𑀲𑀢𑁂𑀓𑀺𑀘𑁆𑀙𑀅𑀢𑁂𑀓𑀺𑀘𑁆𑀙𑀁 𑀓𑀸𑀭𑀡𑀸𑀓𑀸𑀭𑀡𑀁 𑀦 𑀚𑀸𑀦𑀸𑀢𑀺; 𑀢𑀁 𑀅𑀚𑀸𑀦𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑁄 𑀬𑀣𑀸 𑀢𑀲𑁆𑀲 𑀕𑁄𑀧𑀸𑀮𑀓𑀲𑁆𑀲 𑀕𑁄𑀕𑀡𑁄 𑀦 𑀯𑀟𑁆𑀠𑀢𑀺, 𑀏𑀯𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀬𑀣𑀸𑀯𑀼𑀢𑁆𑀢𑁂𑀳𑀺 𑀲𑀻𑀮𑀸𑀤𑀻𑀳𑀺 𑀦 𑀯𑀟𑁆𑀠𑀢𑀺, 𑀕𑁄𑀧𑀸𑀮𑀓𑁄 𑀯𑀺𑀬 𑀘 𑀧𑀜𑁆𑀘𑀳𑀺 𑀕𑁄𑀭𑀲𑁂𑀳𑀺 𑀧𑀜𑁆𑀘𑀳𑀺 𑀥𑀫𑁆𑀫𑀓𑁆𑀔𑀦𑁆𑀥𑁂𑀳𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀆𑀲𑀸𑀝𑀺𑀓𑀁 𑀳𑀸𑀭𑁂𑀢𑀸 𑀳𑁄𑀢𑀻𑀢𑀺 𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑁂 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀓𑁂 𑀦 𑀯𑀺𑀦𑁄𑀤𑁂𑀢𑀺, 𑀲𑁄 𑀇𑀫𑀁 𑀅𑀓𑀼𑀲𑀮𑀯𑀺𑀢𑀓𑁆𑀓𑀁 𑀆𑀲𑀸𑀝𑀺𑀓𑀁 𑀅𑀳𑀸𑀭𑁂𑀢𑁆𑀯𑀸 𑀯𑀺𑀢𑀓𑁆𑀓𑀯𑀲𑀺𑀓𑁄 𑀳𑀼𑀢𑁆𑀯𑀸 𑀯𑀺𑀘𑀭𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀲𑁄 𑀬𑀣𑀸 𑀢𑀲𑁆𑀲 𑀕𑁄𑀧𑀸𑀮𑀓𑀲𑁆𑀲…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀯𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑀸 𑀳𑁄𑀢𑀻𑀢𑀺 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀩𑁆𑀩𑀸𑀭𑀫𑁆𑀫𑀡𑁂𑀲𑀼 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑁄 𑀬𑀣𑀸 𑀲𑁄 𑀕𑁄𑀧𑀸𑀮𑀓𑁄 𑀯𑀡𑀁 𑀦 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀏𑀯𑀁 𑀲𑀁𑀯𑀭𑀁 𑀦 𑀲𑀫𑁆𑀧𑀸𑀤𑁂𑀢𑀺. 𑀲𑁄 𑀯𑀺𑀯𑀝𑀤𑁆𑀯𑀸𑀭𑁄 𑀯𑀺𑀘𑀭𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀥𑀽𑀫𑀁 𑀓𑀢𑁆𑀢𑀸 𑀳𑁄𑀢𑀻𑀢𑀺 𑀲𑁄 𑀕𑁄𑀧𑀸𑀮𑀓𑁄 𑀥𑀽𑀫𑀁 𑀯𑀺𑀬 𑀥𑀫𑁆𑀫𑀤𑁂𑀲𑀦𑀸𑀥𑀽𑀫𑀁 𑀦 𑀓𑀭𑁄𑀢𑀺, 𑀥𑀫𑁆𑀫𑀓𑀣𑀁 𑀯𑀸 𑀲𑀭𑀪𑀜𑁆𑀜𑀁 𑀯𑀸 𑀉𑀧𑀦𑀺𑀲𑀺𑀦𑁆𑀦𑀓𑀣𑀁 𑀯𑀸 𑀅𑀦𑀼𑀫𑁄𑀤𑀦𑀁 𑀯𑀸 𑀦 𑀓𑀭𑁄𑀢𑀺. 𑀢𑀢𑁄 𑀦𑀁 𑀫𑀦𑀼𑀲𑁆𑀲𑀸 𑀩𑀳𑀼𑀲𑁆𑀲𑀼𑀢𑁄 𑀕𑀼𑀡𑀯𑀸𑀢𑀺 𑀦 𑀚𑀸𑀦𑀦𑁆𑀢𑀺, 𑀢𑁂 𑀕𑀼𑀡𑀸𑀕𑀼𑀡𑀁 𑀅𑀚𑀸𑀦𑀦𑁆𑀢𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀗𑁆𑀕𑀳𑀁 𑀦 𑀓𑀭𑁄𑀦𑁆𑀢𑀺. 𑀲𑁄 𑀧𑀘𑁆𑀘𑀬𑁂𑀳𑀺 𑀓𑀺𑀮𑀫𑀫𑀸𑀦𑁄 𑀩𑀼𑀤𑁆𑀥𑀯𑀘𑀦𑀁 𑀲𑀚𑁆𑀛𑀸𑀬𑀁 𑀓𑀸𑀢𑀼𑀁 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀢𑀼𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀢𑀺𑀢𑁆𑀣𑀁 𑀚𑀸𑀦𑀸𑀢𑀻𑀢𑀺 𑀢𑀺𑀢𑁆𑀣𑀪𑀽𑀢𑁂 𑀩𑀳𑀼𑀲𑁆𑀲𑀼𑀢𑀪𑀺𑀓𑁆𑀔𑀽 𑀦 𑀉𑀧𑀲𑀗𑁆𑀓𑀫𑀢𑀺, 𑀉𑀧𑀲𑀗𑁆𑀓𑀫𑀦𑁆𑀢𑁄, ‘‘𑀇𑀤𑀁, 𑀪𑀦𑁆𑀢𑁂, 𑀩𑁆𑀬𑀜𑁆𑀚𑀦𑀁 𑀓𑀣𑀁 𑀭𑁄𑀧𑁂𑀢𑀩𑁆𑀩𑀁, 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀓𑁄 𑀅𑀢𑁆𑀣𑁄, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀸𑀴𑀺 𑀓𑀺𑀁 𑀯𑀤𑁂𑀢𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀢𑁆𑀣𑁄 𑀓𑀺𑀁 𑀤𑀻𑀧𑁂𑀢𑀻’’𑀢𑀺 𑀏𑀯𑀁 𑀦 𑀧𑀭𑀺𑀧𑀼𑀘𑁆𑀙𑀢𑀺 𑀦 𑀧𑀭𑀺𑀧𑀜𑁆𑀳𑀢𑀺, 𑀦 𑀚𑀸𑀦𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀢𑁂 𑀏𑀯𑀁 𑀅𑀧𑀭𑀺𑀧𑀼𑀘𑁆𑀙𑀢𑁄 𑀅𑀯𑀺𑀯𑀝𑀜𑁆𑀘𑁂𑀯 𑀦 𑀯𑀺𑀯𑀭𑀦𑁆𑀢𑀺, 𑀪𑀸𑀚𑁂𑀢𑁆𑀯𑀸 𑀦 𑀤𑀲𑁆𑀲𑁂𑀦𑁆𑀢𑀺, 𑀅𑀦𑀼𑀢𑁆𑀢𑀸𑀦𑀻𑀓𑀢𑀜𑁆𑀘 𑀦 𑀉𑀢𑁆𑀢𑀸𑀦𑀻𑀓𑀭𑁄𑀦𑁆𑀢𑀺, 𑀅𑀧𑀸𑀓𑀝𑀁 𑀦 𑀧𑀸𑀓𑀝𑀁 𑀓𑀭𑁄𑀦𑁆𑀢𑀺. 𑀅𑀦𑁂𑀓𑀯𑀺𑀳𑀺𑀢𑁂𑀲𑀼 𑀘 𑀓𑀗𑁆𑀔𑀸𑀞𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀅𑀦𑁂𑀓𑀯𑀺𑀥𑀸𑀲𑀼 𑀓𑀗𑁆𑀔𑀸𑀲𑀼 𑀏𑀓𑀁 𑀓𑀗𑁆𑀔𑀫𑁆𑀧𑀺 𑀦 𑀧𑀝𑀺𑀯𑀺𑀦𑁄𑀤𑁂𑀦𑁆𑀢𑀺. 𑀓𑀗𑁆𑀔𑀸 𑀏𑀯 𑀳𑀺 𑀓𑀗𑁆𑀔𑀸𑀞𑀸𑀦𑀺𑀬𑀸 𑀥𑀫𑁆𑀫𑀸 𑀦𑀸𑀫. 𑀢𑀢𑁆𑀣 𑀏𑀓𑀁 𑀓𑀗𑁆𑀔𑀫𑁆𑀧𑀺 𑀦 𑀦𑀻𑀳𑀭𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑁄 𑀏𑀯𑀁 𑀩𑀳𑀼𑀲𑁆𑀲𑀼𑀢𑀢𑀺𑀢𑁆𑀣𑀁 𑀅𑀦𑀼𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀓𑀗𑁆𑀔𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀬𑀣𑀸 𑀘 𑀲𑁄 𑀕𑁄𑀧𑀸𑀮𑀓𑁄 𑀢𑀺𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀏𑀯𑀁 𑀅𑀬𑀫𑁆𑀧𑀺 𑀪𑀺𑀓𑁆𑀔𑀼 𑀥𑀫𑁆𑀫𑀢𑀺𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀅𑀚𑀸𑀦𑀦𑁆𑀢𑁄 𑀅𑀯𑀺𑀲𑀬𑁂 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀅𑀪𑀺𑀥𑀫𑁆𑀫𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀧𑀼𑀘𑁆𑀙𑀢𑀺, 𑀯𑀺𑀦𑀬𑀥𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀭𑀽𑀧𑀸𑀭𑀽𑀧𑀧𑀭𑀺𑀘𑁆𑀙𑁂𑀤𑀁 𑀧𑀼𑀘𑁆𑀙𑀢𑀺. 𑀢𑁂 𑀅𑀯𑀺𑀲𑀬𑁂 𑀧𑀼𑀝𑁆𑀞𑀸 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀲𑁄 𑀅𑀢𑁆𑀢𑀦𑀸 𑀲𑀓𑀗𑁆𑀔𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀧𑀻𑀢𑀁 𑀚𑀸𑀦𑀸𑀢𑀻𑀢𑀺 𑀬𑀣𑀸 𑀲𑁄 𑀕𑁄𑀧𑀸𑀮𑀓𑁄 𑀧𑀻𑀢𑀸𑀧𑀻𑀢𑀁 𑀦 𑀚𑀸𑀦𑀸𑀢𑀺, 𑀏𑀯𑀁 𑀥𑀫𑁆𑀫𑀽𑀧𑀲𑀜𑁆𑀳𑀺𑀢𑀁 𑀧𑀸𑀫𑁄𑀚𑁆𑀚𑀁 𑀦 𑀚𑀸𑀦𑀸𑀢𑀺 𑀦 𑀮𑀪𑀢𑀺, 𑀲𑀯𑀦𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀆𑀦𑀺𑀲𑀁𑀲𑀁 𑀦 𑀯𑀺𑀦𑁆𑀤𑀢𑀺, 𑀥𑀫𑁆𑀫𑀲𑁆𑀲𑀯𑀦𑀕𑁆𑀕𑀁 𑀕𑀦𑁆𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀦 𑀲𑀼𑀡𑀸𑀢𑀺, 𑀦𑀺𑀲𑀺𑀦𑁆𑀦𑁄 𑀦𑀺𑀤𑁆𑀤𑀸𑀬𑀢𑀺, 𑀓𑀣𑀁 𑀓𑀣𑁂𑀢𑀺, 𑀅𑀜𑁆𑀜𑀯𑀺𑀳𑀺𑀢𑀓𑁄 𑀳𑁄𑀢𑀺, 𑀲𑁄 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑀁 𑀅𑀲𑀼𑀡𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀯𑀻𑀣𑀺𑀁 𑀚𑀸𑀦𑀸𑀢𑀻𑀢𑀺 𑀲𑁄 𑀕𑁄𑀧𑀸𑀮𑀓𑁄 𑀫𑀕𑁆𑀕𑀸𑀫𑀕𑁆𑀕𑀁 𑀯𑀺𑀬, 𑁋 ‘‘𑀅𑀬𑀁 𑀮𑁄𑀓𑀺𑀬𑁄 𑀅𑀬𑀁 𑀮𑁄𑀓𑀼𑀢𑁆𑀢𑀭𑁄’’𑀢𑀺 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀬𑀣𑀸𑀪𑀽𑀢𑀁 𑀦 𑀧𑀚𑀸𑀦𑀸𑀢𑀺. 𑀅𑀚𑀸𑀦𑀦𑁆𑀢𑁄 𑀮𑁄𑀓𑀺𑀬𑀫𑀕𑁆𑀕𑁂 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀦 𑀕𑁄𑀘𑀭𑀓𑀼𑀲𑀮𑁄 𑀳𑁄𑀢𑀻𑀢𑀺 𑀲𑁄 𑀕𑁄𑀧𑀸𑀮𑀓𑁄 𑀧𑀜𑁆𑀘𑀸𑀳𑀺𑀓𑀯𑀸𑀭𑁂 𑀲𑀢𑁆𑀢𑀸𑀳𑀺𑀓𑀯𑀸𑀭𑁂 𑀯𑀺𑀬 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂, ‘‘𑀇𑀫𑁂 𑀮𑁄𑀓𑀺𑀬𑀸 𑀇𑀫𑁂 𑀮𑁄𑀓𑀼𑀢𑁆𑀢𑀭𑀸’’𑀢𑀺 𑀬𑀣𑀸𑀪𑀽𑀢𑀁 𑀦 𑀧𑀚𑀸𑀦𑀸𑀢𑀺. 𑀅𑀚𑀸𑀦𑀦𑁆𑀢𑁄 𑀲𑀼𑀔𑀼𑀫𑀝𑁆𑀞𑀸𑀦𑁂𑀲𑀼 𑀅𑀢𑁆𑀢𑀦𑁄 𑀜𑀸𑀡𑀁 𑀘𑀭𑀸𑀧𑁂𑀢𑁆𑀯𑀸 𑀮𑁄𑀓𑀺𑀬𑀲𑀢𑀺𑀧𑀝𑁆𑀞𑀸𑀦𑁂 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀅𑀦𑀯𑀲𑁂𑀲𑀤𑁄𑀳𑀻 𑀘 𑀳𑁄𑀢𑀻𑀢𑀺 𑀧𑀝𑀺𑀕𑁆𑀕𑀳𑀡𑁂 𑀫𑀢𑁆𑀢𑀁 𑀅𑀚𑀸𑀦𑀦𑁆𑀢𑁄 𑀅𑀦𑀯𑀲𑁂𑀲𑀁 𑀤𑀼𑀳𑀢𑀺. 𑀦𑀺𑀤𑁆𑀤𑁂𑀲𑀯𑀸𑀭𑁂 𑀧𑀦𑀲𑁆𑀲 𑀅𑀪𑀺𑀳𑀝𑁆𑀞𑀼𑀁 𑀧𑀯𑀸𑀭𑁂𑀦𑁆𑀢𑀻𑀢𑀺 𑀅𑀪𑀺𑀳𑀭𑀺𑀢𑁆𑀯𑀸 𑀧𑀯𑀸𑀭𑁂𑀦𑁆𑀢𑀺. 𑀏𑀢𑁆𑀣 𑀤𑁆𑀯𑁂 𑀅𑀪𑀺𑀳𑀸𑀭𑀸 𑀯𑀸𑀘𑀸𑀪𑀺𑀳𑀸𑀭𑁄 𑀘 𑀧𑀘𑁆𑀘𑀬𑀸𑀪𑀺𑀳𑀸𑀭𑁄 𑀘. 𑀯𑀸𑀘𑀸𑀪𑀺𑀳𑀸𑀭𑁄 𑀦𑀸𑀫 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀯𑀤𑁂𑀬𑁆𑀬𑀸𑀣, 𑀪𑀦𑁆𑀢𑁂, 𑀬𑁂𑀦𑀢𑁆𑀣𑁄’’𑀢𑀺 𑀧𑀯𑀸𑀭𑁂𑀦𑁆𑀢𑀺. 𑀧𑀘𑁆𑀘𑀬𑀸𑀪𑀺𑀳𑀸𑀭𑁄 𑀦𑀸𑀫 𑀯𑀢𑁆𑀣𑀸𑀤𑀻𑀦𑀺 𑀯𑀸 𑀢𑁂𑀮𑀨𑀸𑀡𑀺𑀢𑀸𑀤𑀻𑀦𑀺 𑀯𑀸 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀕𑀡𑁆𑀳𑀣, 𑀪𑀦𑁆𑀢𑁂, 𑀬𑀸𑀯𑀢𑀓𑁂𑀦 𑀅𑀢𑁆𑀣𑁄’’𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀭 𑀪𑀺𑀓𑁆𑀔𑀼 𑀫𑀢𑁆𑀢𑀁 𑀦 𑀚𑀸𑀦𑀸𑀢𑀻𑀢𑀺 𑀪𑀺𑀓𑁆𑀔𑀼 𑀢𑁂𑀲𑀼 𑀧𑀘𑁆𑀘𑀬𑁂𑀲𑀼 𑀧𑀫𑀸𑀡𑀁 𑀦 𑀚𑀸𑀦𑀸𑀢𑀺, 𑁋 ‘‘𑀤𑀸𑀬𑀓𑀲𑁆𑀲 𑀯𑀲𑁄 𑀯𑁂𑀤𑀺𑀢𑀩𑁆𑀩𑁄, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀯𑀲𑁄 𑀯𑁂𑀤𑀺𑀢𑀩𑁆𑀩𑁄, 𑀅𑀢𑁆𑀢𑀦𑁄 𑀣𑀸𑀫𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀭𑀣𑀯𑀺𑀦𑀻𑀢𑁂 𑀯𑀼𑀢𑁆𑀢𑀦𑀬𑁂𑀦 𑀧𑀫𑀸𑀡𑀬𑀼𑀢𑁆𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀬𑀁 𑀆𑀳𑀭𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀕𑀡𑁆𑀳𑀸𑀢𑀻𑀢𑀺 𑀅𑀢𑁆𑀣𑁄. 𑀫𑀦𑀼𑀲𑁆𑀲𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀦 𑀧𑀼𑀦 𑀅𑀪𑀺𑀳𑀭𑀺𑀢𑁆𑀯𑀸 𑀧𑀯𑀸𑀭𑁂𑀦𑁆𑀢𑀺. 𑀲𑁄 𑀧𑀘𑁆𑀘𑀬𑁂𑀳𑀺 𑀓𑀺𑀮𑀫𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀟𑁆𑀠𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺…𑀧𑁂… 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺.

𑀢𑁂 𑀦 𑀅𑀢𑀺𑀭𑁂𑀓𑀧𑀽𑀚𑀸𑀬 𑀧𑀽𑀚𑁂𑀢𑀸 𑀳𑁄𑀢𑀻𑀢𑀺 𑀲𑁄 𑀕𑁄𑀧𑀸𑀮𑀓𑁄 𑀫𑀳𑀸𑀉𑀲𑀪𑁂 𑀯𑀺𑀬 𑀢𑁂 𑀣𑁂𑀭𑁂 𑀪𑀺𑀓𑁆𑀔𑀽 𑀇𑀫𑀸𑀬 𑀆𑀯𑀺 𑀘𑁂𑀯 𑀭𑀳𑁄 𑀘 𑀫𑁂𑀢𑁆𑀢𑀸𑀬 𑀓𑀸𑀬𑀓𑀫𑁆𑀫𑀸𑀤𑀺𑀓𑀸𑀬 𑀅𑀢𑀺𑀭𑁂𑀓𑀧𑀽𑀚𑀸𑀬 𑀦 𑀧𑀽𑀚𑁂𑀢𑀺. 𑀢𑀢𑁄 𑀣𑁂𑀭𑀸, 𑁋 ‘‘𑀇𑀫𑁂 𑀅𑀫𑁆𑀳𑁂𑀲𑀼 𑀕𑀭𑀼𑀘𑀺𑀢𑁆𑀢𑀻𑀓𑀸𑀭𑀁 𑀦 𑀓𑀭𑁄𑀦𑁆𑀢𑀻’’𑀢𑀺 𑀦𑀯𑀓𑁂 𑀪𑀺𑀓𑁆𑀔𑀽 𑀤𑁆𑀯𑀻𑀳𑀺 𑀲𑀗𑁆𑀕𑀳𑁂𑀳𑀺 𑀦 𑀲𑀗𑁆𑀕𑀡𑁆𑀳𑀦𑁆𑀢𑀺, 𑀦 𑀆𑀫𑀺𑀲𑀲𑀗𑁆𑀕𑀳𑁂𑀦 𑀘𑀻𑀯𑀭𑁂𑀦 𑀯𑀸 𑀧𑀢𑁆𑀢𑁂𑀦 𑀯𑀸 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑁂𑀦 𑀯𑀸 𑀯𑀲𑀦𑀝𑁆𑀞𑀸𑀦𑁂𑀦 𑀯𑀸. 𑀓𑀺𑀮𑀫𑀦𑁆𑀢𑁂 𑀫𑀺𑀮𑀸𑀬𑀦𑁆𑀢𑁂𑀧𑀺 𑀦𑀧𑁆𑀧𑀝𑀺𑀚𑀕𑁆𑀕𑀦𑁆𑀢𑀺. 𑀧𑀸𑀴𑀺𑀁 𑀯𑀸 𑀅𑀝𑁆𑀞𑀓𑀣𑀁 𑀯𑀸 𑀥𑀫𑁆𑀫𑀓𑀣𑀸𑀩𑀦𑁆𑀥𑀁 𑀯𑀸 𑀕𑀼𑀬𑁆𑀳𑀕𑀦𑁆𑀣𑀁 𑀯𑀸 𑀦 𑀲𑀺𑀓𑁆𑀔𑀸𑀧𑁂𑀦𑁆𑀢𑀺. 𑀦𑀯𑀓𑀸 𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑀸 𑀲𑀩𑁆𑀩𑀲𑁄 𑀇𑀫𑁂 𑀤𑁆𑀯𑁂 𑀲𑀗𑁆𑀕𑀳𑁂 𑀅𑀮𑀪𑀫𑀸𑀦𑀸 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀬𑀣𑀸 𑀢𑀲𑁆𑀲 𑀕𑁄𑀧𑀸𑀮𑀓𑀲𑁆𑀲 𑀕𑁄𑀕𑀡𑁄 𑀦 𑀯𑀟𑁆𑀠𑀢𑀺, 𑀏𑀯𑀁 𑀲𑀻𑀮𑀸𑀤𑀻𑀦𑀺 𑀦 𑀯𑀟𑁆𑀠𑀦𑁆𑀢𑀺. 𑀬𑀣𑀸 𑀘 𑀲𑁄 𑀕𑁄𑀧𑀸𑀮𑀓𑁄 𑀧𑀜𑁆𑀘𑀳𑀺 𑀕𑁄𑀭𑀲𑁂𑀳𑀺 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀺, 𑀏𑀯𑀁 𑀧𑀜𑁆𑀘𑀳𑀺 𑀥𑀫𑁆𑀫𑀓𑁆𑀔𑀦𑁆𑀥𑁂𑀳𑀺 𑀧𑀭𑀺𑀩𑀸𑀳𑀺𑀭𑀸 𑀳𑁄𑀦𑁆𑀢𑀺. 𑀲𑀼𑀓𑁆𑀓𑀧𑀓𑁆𑀔𑁄 𑀓𑀡𑁆𑀳𑀧𑀓𑁆𑀔𑁂 𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀳𑀸𑀕𑁄𑀧𑀸𑀮𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀽𑀴𑀕𑁄𑀧𑀸𑀮𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁦. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀘𑀽𑀴𑀕𑁄𑀧𑀸𑀮𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀉𑀓𑁆𑀓𑀘𑁂𑀮𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀢𑀲𑁆𑀫𑀺𑀁 𑀓𑀺𑀭 𑀫𑀸𑀧𑀺𑀬𑀫𑀸𑀦𑁂 𑀭𑀢𑁆𑀢𑀺𑀁 𑀕𑀗𑁆𑀕𑀸𑀲𑁄𑀢𑀢𑁄 𑀫𑀘𑁆𑀙𑁄 𑀣𑀮𑀁 𑀧𑀢𑁆𑀢𑁄. 𑀫𑀦𑀼𑀲𑁆𑀲𑀸 𑀘𑁂𑀮𑀸𑀦𑀺 𑀢𑁂𑀮𑀧𑀸𑀢𑀺𑀬𑀁 𑀢𑁂𑀫𑁂𑀢𑁆𑀯𑀸 𑀉𑀓𑁆𑀓𑀸 𑀓𑀢𑁆𑀯𑀸 𑀫𑀘𑁆𑀙𑀁 𑀕𑀡𑁆𑀳𑀺𑀁𑀲𑀼. 𑀦𑀕𑀭𑁂 𑀦𑀺𑀝𑁆𑀞𑀺𑀢𑁂 𑀢𑀲𑁆𑀲 𑀦𑀸𑀫𑀁 𑀓𑀭𑁄𑀦𑁆𑀢𑁂 𑀅𑀫𑁆𑀳𑁂𑀳𑀺 𑀦𑀕𑀭𑀝𑁆𑀞𑀸𑀦𑀲𑁆𑀲 𑀕𑀳𑀺𑀢𑀤𑀺𑀯𑀲𑁂 𑀘𑁂𑀮𑀼𑀓𑁆𑀓𑀸𑀳𑀺 𑀫𑀘𑁆𑀙𑁄 𑀕𑀳𑀺𑀢𑁄𑀢𑀺 𑀉𑀓𑁆𑀓𑀘𑁂𑀮𑀸-𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀲𑀩𑁆𑀩𑀸 𑀕𑀗𑁆𑀕𑀸 𑀧𑀸𑀓𑀝𑀸 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀢𑀺, 𑀢𑀸𑀤𑀺𑀲𑁂 𑀯𑀸𑀮𑀺𑀓𑀼𑀲𑁆𑀲𑀤𑁂 𑀕𑀗𑁆𑀕𑀸𑀢𑀺𑀢𑁆𑀣𑁂 𑀲𑀸𑀬𑀦𑁆𑀳𑀲𑀫𑀬𑁂 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀫𑀳𑀸𑀕𑀗𑁆𑀕𑀁 𑀧𑀭𑀺𑀧𑀼𑀡𑁆𑀡𑀁 𑀲𑀦𑁆𑀤𑀫𑀸𑀦𑀁 𑀑𑀮𑁄𑀓𑁂𑀦𑁆𑀢𑁄, 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀇𑀫𑀁 𑀕𑀗𑁆𑀕𑀁 𑀦𑀺𑀲𑁆𑀲𑀸𑀬 𑀓𑁄𑀘𑀺 𑀧𑀼𑀩𑁆𑀩𑁂 𑀯𑀟𑁆𑀠𑀺𑀧𑀭𑀺𑀳𑀸𑀦𑀺𑀁 𑀧𑀢𑁆𑀢𑁄’’𑀢𑀺 𑀆𑀯𑀚𑁆𑀚𑀺𑀢𑁆𑀯𑀸, 𑀧𑀼𑀩𑁆𑀩𑁂 𑀏𑀓𑀁 𑀩𑀸𑀮𑀕𑁄𑀧𑀸𑀮𑀓𑀁 𑀦𑀺𑀲𑁆𑀲𑀸𑀬 𑀅𑀦𑁂𑀓𑀲𑀢𑀲𑀳𑀲𑁆𑀲𑀸 𑀕𑁄𑀕𑀡𑀸 𑀇𑀫𑀺𑀲𑁆𑀲𑀸 𑀕𑀗𑁆𑀕𑀸𑀬 𑀆𑀯𑀝𑁆𑀝𑁂 𑀧𑀢𑀺𑀢𑁆𑀯𑀸 𑀲𑀫𑀼𑀤𑁆𑀤𑀫𑁂𑀯 𑀧𑀯𑀺𑀝𑁆𑀞𑀸, 𑀅𑀧𑀭𑀁 𑀧𑀦 𑀧𑀡𑁆𑀟𑀺𑀢𑀕𑁄𑀧𑀸𑀮𑀓𑀁 𑀦𑀺𑀲𑁆𑀲𑀸𑀬 𑀅𑀦𑁂𑀓𑀲𑀢𑀲𑀳𑀲𑁆𑀲𑀕𑁄𑀕𑀡𑀲𑁆𑀲 𑀲𑁄𑀢𑁆𑀣𑀺 𑀚𑀸𑀢𑀸 𑀯𑀟𑁆𑀠𑀺 𑀚𑀸𑀢𑀸 𑀆𑀭𑁄𑀕𑁆𑀬𑀁 𑀚𑀸𑀢𑀦𑁆𑀢𑀺 𑀅𑀤𑁆𑀤𑀲. 𑀤𑀺𑀲𑁆𑀯𑀸 𑀇𑀫𑀁 𑀓𑀸𑀭𑀡𑀁 𑀦𑀺𑀲𑁆𑀲𑀸𑀬 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺.

𑀫𑀸𑀕𑀥𑀓𑁄𑀢𑀺 𑀫𑀕𑀥𑀭𑀝𑁆𑀞𑀯𑀸𑀲𑀻. 𑀤𑀼𑀧𑁆𑀧𑀜𑁆𑀜𑀚𑀸𑀢𑀺𑀓𑁄𑀢𑀺 𑀦𑀺𑀧𑁆𑀧𑀜𑁆𑀜𑀲𑀪𑀸𑀯𑁄 𑀤𑀦𑁆𑀥𑁄 𑀫𑀳𑀸𑀚𑀴𑁄. 𑀅𑀲𑀫𑀯𑁂𑀓𑁆𑀔𑀺𑀢𑁆𑀯𑀸𑀢𑀺 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀦𑀼𑀧𑀥𑀸𑀭𑁂𑀢𑁆𑀯𑀸. 𑀧𑀢𑀸𑀭𑁂𑀲𑀻𑀢𑀺 𑀢𑀸𑀭𑁂𑀢𑀼𑀁 𑀆𑀭𑀪𑀺. 𑀉𑀢𑁆𑀢𑀭𑀁 𑀢𑀻𑀭𑀁 𑀲𑀼𑀯𑀺𑀤𑁂𑀳𑀸𑀦𑀦𑁆𑀢𑀺 𑀕𑀗𑁆𑀕𑀸𑀬 𑀑𑀭𑀺𑀫𑁂 𑀢𑀻𑀭𑁂 𑀫𑀕𑀥𑀭𑀝𑁆𑀞𑀁, 𑀧𑀸𑀭𑀺𑀫𑁂 𑀢𑀻𑀭𑁂 𑀯𑀺𑀤𑁂𑀳𑀭𑀝𑁆𑀞𑀁, 𑀕𑀸𑀯𑁄 𑀫𑀕𑀥𑀭𑀝𑁆𑀞𑀢𑁄 𑀯𑀺𑀤𑁂𑀳𑀭𑀝𑁆𑀞𑀁 𑀦𑁂𑀢𑁆𑀯𑀸 𑀭𑀓𑁆𑀔𑀺𑀲𑁆𑀲𑀸𑀫𑀻𑀢𑀺 𑀉𑀢𑁆𑀢𑀭𑀁 𑀢𑀻𑀭𑀁 𑀧𑀢𑀸𑀭𑁂𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀉𑀢𑁆𑀢𑀭𑀁 𑀢𑀻𑀭𑀁 𑀲𑀼𑀯𑀺𑀤𑁂𑀳𑀸𑀦’’𑀦𑁆𑀢𑀺. 𑀆𑀫𑀡𑁆𑀟𑀮𑀺𑀓𑀁 𑀓𑀭𑀺𑀢𑁆𑀯𑀸𑀢𑀺 𑀫𑀡𑁆𑀟𑀮𑀺𑀓𑀁 𑀓𑀢𑁆𑀯𑀸. 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀺𑀁𑀲𑀽𑀢𑀺 𑀅𑀯𑀟𑁆𑀠𑀺𑀁 𑀯𑀺𑀦𑀸𑀲𑀁 𑀧𑀸𑀧𑀼𑀡𑀺𑀁𑀲𑀼, 𑀫𑀳𑀸𑀲𑀫𑀼𑀤𑁆𑀤𑀫𑁂𑀯 𑀧𑀯𑀺𑀲𑀺𑀁𑀲𑀼. 𑀢𑁂𑀦 𑀳𑀺 𑀕𑁄𑀧𑀸𑀮𑀓𑁂𑀦 𑀕𑀸𑀯𑁄 𑀑𑀢𑀸𑀭𑁂𑀦𑁆𑀢𑁂𑀦 𑀕𑀗𑁆𑀕𑀸𑀬 𑀑𑀭𑀺𑀫𑀢𑀻𑀭𑁂 𑀲𑀫𑀢𑀺𑀢𑁆𑀣𑀜𑁆𑀘 𑀯𑀺𑀲𑀫𑀢𑀺𑀢𑁆𑀣𑀜𑁆𑀘 𑀑𑀮𑁄𑀓𑁂𑀢𑀩𑁆𑀩𑀁 𑀅𑀲𑁆𑀲, 𑀫𑀚𑁆𑀛𑁂 𑀕𑀗𑁆𑀕𑀸𑀬 𑀕𑀼𑀦𑁆𑀦𑀁 𑀯𑀺𑀲𑁆𑀲𑀫𑀝𑁆𑀞𑀸𑀦𑀢𑁆𑀣𑀁 𑀤𑁆𑀯𑁂 𑀢𑀻𑀡𑀺 𑀯𑀸𑀮𑀺𑀓𑀢𑁆𑀣𑀮𑀸𑀦𑀺 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸𑀦𑀺 𑀅𑀲𑁆𑀲𑀼. 𑀢𑀣𑀸 𑀧𑀸𑀭𑀺𑀫𑀢𑀻𑀭𑁂 𑀢𑀻𑀡𑀺 𑀘𑀢𑁆𑀢𑀸𑀭𑀺 𑀢𑀺𑀢𑁆𑀣𑀸𑀦𑀺, 𑀇𑀫𑀲𑁆𑀫𑀸 𑀢𑀺𑀢𑁆𑀣𑀸 𑀪𑀝𑁆𑀞𑀸 𑀇𑀫𑀁 𑀢𑀺𑀢𑁆𑀣𑀁 𑀕𑀡𑁆𑀳𑀺𑀲𑁆𑀲𑀦𑁆𑀢𑀺, 𑀇𑀫𑀲𑁆𑀫𑀸 𑀪𑀝𑁆𑀞𑀸 𑀇𑀫𑀦𑁆𑀢𑀺. 𑀅𑀬𑀁 𑀧𑀦 𑀩𑀸𑀮𑀕𑁄𑀧𑀸𑀮𑀓𑁄 𑀑𑀭𑀺𑀫𑀢𑀻𑀭𑁂 𑀕𑀼𑀦𑁆𑀦𑀁 𑀑𑀢𑀭𑀡𑀢𑀺𑀢𑁆𑀣𑀁 𑀲𑀫𑀁 𑀯𑀸 𑀯𑀺𑀲𑀫𑀁 𑀯𑀸 𑀅𑀦𑁄𑀮𑁄𑀓𑁂𑀢𑁆𑀯𑀸𑀯 𑀫𑀚𑁆𑀛𑁂 𑀕𑀗𑁆𑀕𑀸𑀬 𑀕𑀼𑀦𑁆𑀦𑀁 𑀯𑀺𑀲𑁆𑀲𑀫𑀝𑁆𑀞𑀸𑀦𑀢𑁆𑀣𑀁 𑀤𑁆𑀯𑁂 𑀢𑀻𑀡𑀺 𑀯𑀸𑀮𑀺𑀓𑀢𑁆𑀣𑀮𑀸𑀦𑀺𑀧𑀺 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀯 𑀧𑀭𑀢𑀻𑀭𑁂 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀉𑀢𑁆𑀢𑀭𑀡𑀢𑀺𑀢𑁆𑀣𑀸𑀦𑀺 𑀅𑀲𑀫𑀯𑁂𑀓𑁆𑀔𑀺𑀢𑁆𑀯𑀸𑀯 𑀅𑀢𑀺𑀢𑁆𑀣𑁂𑀦𑁂𑀯 𑀕𑀸𑀯𑁄 𑀑𑀢𑀸𑀭𑁂𑀲𑀺. 𑀅𑀣𑀲𑁆𑀲 𑀫𑀳𑀸𑀉𑀲𑀪𑁄 𑀚𑀯𑀦𑀲𑀫𑁆𑀧𑀦𑁆𑀦𑀢𑀸𑀬 𑀘𑁂𑀯 𑀣𑀸𑀫𑀲𑀫𑁆𑀧𑀦𑁆𑀦𑀢𑀸𑀬 𑀘 𑀢𑀺𑀭𑀺𑀬𑀁 𑀕𑀗𑁆𑀕𑀸𑀬 𑀲𑁄𑀢𑀁 𑀙𑁂𑀢𑁆𑀯𑀸 𑀧𑀸𑀭𑀺𑀫𑀁 𑀢𑀻𑀭𑀁 𑀧𑀢𑁆𑀯𑀸 𑀙𑀺𑀦𑁆𑀦𑀢𑀝𑀜𑁆𑀘𑁂𑀯 𑀓𑀡𑁆𑀝𑀓𑀕𑀼𑀫𑁆𑀩𑀕𑀳𑀦𑀜𑁆𑀘 𑀤𑀺𑀲𑁆𑀯𑀸, ‘‘𑀤𑀼𑀩𑁆𑀩𑀺𑀦𑀺𑀯𑀺𑀝𑁆𑀞𑀫𑁂𑀢’’𑀦𑁆𑀢𑀺 𑀜𑀢𑁆𑀯𑀸 𑀥𑀼𑀭𑀕𑁆𑀕-𑀧𑀢𑀺𑀝𑁆𑀞𑀸𑀦𑁄𑀓𑀸𑀲𑀫𑁆𑀧𑀺 𑀅𑀮𑀪𑀺𑀢𑁆𑀯𑀸 𑀧𑀝𑀺𑀦𑀺𑀯𑀢𑁆𑀢𑀺. 𑀕𑀸𑀯𑁄 𑀫𑀳𑀸𑀉𑀲𑀪𑁄 𑀦𑀺𑀯𑀢𑁆𑀢𑁄 𑀫𑀬𑀫𑁆𑀧𑀺 𑀦𑀺𑀯𑀢𑁆𑀢𑀺𑀲𑁆𑀲𑀸𑀫𑀸𑀢𑀺 𑀦𑀺𑀯𑀢𑁆𑀢𑀸. 𑀫𑀳𑀢𑁄 𑀕𑁄𑀕𑀡𑀲𑁆𑀲 𑀦𑀺𑀯𑀢𑁆𑀢𑀝𑁆𑀞𑀸𑀦𑁂 𑀉𑀤𑀓𑀁 𑀙𑀺𑀚𑁆𑀚𑀺𑀢𑁆𑀯𑀸 𑀫𑀚𑁆𑀛𑁂 𑀕𑀗𑁆𑀕𑀸𑀬 𑀆𑀯𑀝𑁆𑀝𑀁 𑀉𑀝𑁆𑀞𑀧𑁂𑀲𑀺. 𑀕𑁄𑀕𑀡𑁄 𑀆𑀯𑀝𑁆𑀝𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑀼𑀤𑁆𑀤𑀫𑁂𑀯 𑀧𑀢𑁆𑀢𑁄. 𑀏𑀓𑁄𑀧𑀺 𑀕𑁄𑀡𑁄 𑀅𑀭𑁄𑀕𑁄 𑀦𑀸𑀫 𑀦𑀸𑀳𑁄𑀲𑀺. 𑀢𑁂𑀦𑀸𑀳 𑁋 ‘‘𑀢𑀢𑁆𑀣𑁂𑀯 𑀅𑀦𑀬𑀩𑁆𑀬𑀲𑀦𑀁 𑀆𑀧𑀚𑁆𑀚𑀺𑀁𑀲𑀽’’𑀢𑀺.

𑀅𑀓𑀼𑀲𑀮𑀸 𑀇𑀫𑀲𑁆𑀲 𑀮𑁄𑀓𑀲𑁆𑀲𑀸𑀢𑀺 𑀇𑀥 𑀮𑁄𑀓𑁂 𑀔𑀦𑁆𑀥𑀥𑀸𑀢𑀸𑀬𑀢𑀦𑁂𑀲𑀼 𑀅𑀓𑀼𑀲𑀮𑀸 𑀅𑀙𑁂𑀓𑀸, 𑀧𑀭𑀮𑁄𑀓𑁂𑀧𑀺 𑀏𑀲𑁂𑀯 𑀦𑀬𑁄. 𑀫𑀸𑀭𑀥𑁂𑀬𑁆𑀬𑀁 𑀯𑀼𑀘𑁆𑀘𑀢𑀺 𑀢𑁂𑀪𑀽𑀫𑀓𑀥𑀫𑁆𑀫𑀸. 𑀅𑀫𑀸𑀭𑀥𑁂𑀬𑁆𑀬𑀁 𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸. 𑀫𑀘𑁆𑀘𑀼𑀥𑁂𑀬𑁆𑀬𑀫𑁆𑀧𑀺 𑀢𑁂𑀪𑀽𑀫𑀓𑀥𑀫𑁆𑀫𑀸𑀯. 𑀅𑀫𑀘𑁆𑀘𑀼𑀥𑁂𑀬𑁆𑀬𑀁 𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸. 𑀢𑀢𑁆𑀣 𑀅𑀓𑀼𑀲𑀮𑀸 𑀅𑀙𑁂𑀓𑀸. 𑀯𑀘𑀦𑀢𑁆𑀣𑀢𑁄 𑀧𑀦 𑀫𑀸𑀭𑀲𑁆𑀲 𑀥𑁂𑀬𑁆𑀬𑀁 𑀫𑀸𑀭𑀥𑁂𑀬𑁆𑀬𑀁. 𑀥𑁂𑀬𑁆𑀬𑀦𑁆𑀢𑀺 𑀞𑀸𑀦𑀁 𑀯𑀢𑁆𑀣𑀼 𑀦𑀺𑀯𑀸𑀲𑁄 𑀕𑁄𑀘𑀭𑁄. 𑀫𑀘𑁆𑀘𑀼𑀥𑁂𑀬𑁆𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀏𑀯𑀭𑀽𑀧𑀸𑀦𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁, 𑀇𑀫𑀺𑀦𑀸 𑀙 𑀲𑀢𑁆𑀣𑀸𑀭𑁄 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁩𑁫𑁧. 𑀏𑀯𑀁 𑀓𑀡𑁆𑀳𑀧𑀓𑁆𑀔𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀲𑀼𑀓𑁆𑀓𑀧𑀓𑁆𑀔𑀁 𑀤𑀲𑁆𑀲𑁂𑀦𑁆𑀢𑁄 𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑀮𑀯𑀕𑀸𑀯𑁄𑀢𑀺 𑀤𑀦𑁆𑀢𑀕𑁄𑀡𑁂 𑀘𑁂𑀯 𑀥𑁂𑀦𑀼𑀬𑁄 𑀘. 𑀤𑀫𑁆𑀫𑀕𑀸𑀯𑁄𑀢𑀺 𑀤𑀫𑁂𑀢𑀩𑁆𑀩𑀕𑁄𑀡𑁂 𑀘𑁂𑀯 𑀅𑀯𑀺𑀚𑀸𑀢𑀕𑀸𑀯𑁄 𑀘. 𑀯𑀘𑁆𑀙𑀢𑀭𑁂𑀢𑀺 𑀯𑀘𑁆𑀙𑀪𑀸𑀯𑀁 𑀢𑀭𑀺𑀢𑁆𑀯𑀸 𑀞𑀺𑀢𑁂 𑀩𑀮𑀯𑀯𑀘𑁆𑀙𑁂. 𑀯𑀘𑁆𑀙𑀓𑁂𑀢𑀺 𑀥𑁂𑀦𑀼𑀧𑀓𑁂 𑀢𑀭𑀼𑀡𑀯𑀘𑁆𑀙𑀓𑁂. 𑀓𑀺𑀲𑀸𑀩𑀮𑀓𑁂𑀢𑀺 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑁂 𑀫𑀦𑁆𑀤𑀣𑀸𑀫𑁂. 𑀢𑀸𑀯𑀤𑁂𑀯 𑀚𑀸𑀢𑀓𑁄𑀢𑀺 𑀢𑀁𑀤𑀺𑀯𑀲𑁂 𑀚𑀸𑀢𑀓𑁄. 𑀫𑀸𑀢𑀼𑀕𑁄𑀭𑀯𑀓𑁂𑀦 𑀯𑀼𑀬𑁆𑀳𑀫𑀸𑀦𑁄𑀢𑀺 𑀫𑀸𑀢𑀸 𑀧𑀼𑀭𑀢𑁄 𑀧𑀼𑀭𑀢𑁄 𑀳𑀼𑀁𑀳𑀼𑀦𑁆𑀢𑀺 𑀕𑁄𑀭𑀯𑀁 𑀓𑀢𑁆𑀯𑀸 𑀲𑀜𑁆𑀜𑀁 𑀤𑀤𑀫𑀸𑀦𑀸 𑀉𑀭𑁂𑀦 𑀉𑀤𑀓𑀁 𑀙𑀺𑀦𑁆𑀤𑀫𑀸𑀦𑀸 𑀕𑀘𑁆𑀙𑀢𑀺, 𑀯𑀘𑁆𑀙𑀓𑁄 𑀢𑀸𑀬 𑀕𑁄𑀭𑀯𑀲𑀜𑁆𑀜𑀸𑀬 𑀥𑁂𑀦𑀼𑀬𑀸 𑀯𑀸 𑀉𑀭𑁂𑀦 𑀙𑀺𑀦𑁆𑀦𑁄𑀤𑀓𑁂𑀦 𑀕𑀘𑁆𑀙𑀫𑀸𑀦𑁄 ‘‘𑀫𑀸𑀢𑀼𑀕𑁄𑀭𑀯𑀓𑁂𑀦 𑀯𑀼𑀬𑁆𑀳𑀫𑀸𑀦𑁄’’𑀢𑀺 𑀯𑀼𑀘𑁆𑀘𑀢𑀺.

𑁩𑁫𑁨. 𑀫𑀸𑀭𑀲𑁆𑀲 𑀲𑁄𑀢𑀁 𑀙𑁂𑀢𑁆𑀯𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀫𑀸𑀭𑀲𑁆𑀲 𑀢𑀡𑁆𑀳𑀸𑀲𑁄𑀢𑀁 𑀙𑁂𑀢𑁆𑀯𑀸. 𑀧𑀸𑀭𑀁 𑀕𑀢𑀸𑀢𑀺 𑀫𑀳𑀸𑀉𑀲𑀪𑀸 𑀦𑀤𑀻𑀧𑀸𑀭𑀁 𑀯𑀺𑀬 𑀲𑀁𑀲𑀸𑀭𑀧𑀸𑀭𑀁 𑀦𑀺𑀩𑁆𑀩𑀸𑀦𑀁 𑀕𑀢𑀸. 𑀧𑀸𑀭𑀁 𑀅𑀕𑀫𑀁𑀲𑀽𑀢𑀺 𑀫𑀳𑀸𑀉𑀲𑀪𑀸𑀦𑀁 𑀧𑀸𑀭𑀗𑁆𑀕𑀢𑀓𑁆𑀔𑀡𑁂 𑀕𑀗𑁆𑀕𑀸𑀬 𑀲𑁄𑀢𑀲𑁆𑀲 𑀢𑀬𑁄 𑀓𑁄𑀝𑁆𑀞𑀸𑀲𑁂 𑀅𑀢𑀺𑀓𑁆𑀓𑀫𑁆𑀫 𑀞𑀺𑀢𑀸 𑀫𑀳𑀸𑀉𑀲𑀪𑁂 𑀧𑀸𑀭𑀁 𑀧𑀢𑁆𑀢𑁂 𑀤𑀺𑀲𑁆𑀯𑀸 𑀢𑁂𑀲𑀁 𑀕𑀢𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀧𑀸𑀭𑀁 𑀅𑀕𑀫𑀁𑀲𑀼. 𑀧𑀸𑀭𑀁 𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑀘𑀢𑀼𑀫𑀕𑁆𑀕𑀯𑀚𑁆𑀛𑀸𑀦𑀁 𑀓𑀺𑀮𑁂𑀲𑀸𑀦𑀁 𑀢𑀬𑁄 𑀓𑁄𑀝𑁆𑀞𑀸𑀲𑁂 𑀔𑁂𑀧𑁂𑀢𑁆𑀯𑀸 𑀞𑀺𑀢𑀸 𑀇𑀤𑀸𑀦𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀯𑀲𑁂𑀲𑀁 𑀢𑀡𑁆𑀳𑀸𑀲𑁄𑀢𑀁 𑀙𑁂𑀢𑁆𑀯𑀸 𑀩𑀮𑀯𑀕𑀸𑀯𑁄 𑀯𑀺𑀬 𑀦𑀤𑀻𑀧𑀸𑀭𑀁 𑀲𑀁𑀲𑀸𑀭𑀧𑀸𑀭𑀁 𑀦𑀺𑀩𑁆𑀩𑀸𑀦𑀁 𑀕𑀫𑀺𑀲𑁆𑀲𑀦𑁆𑀢𑀻𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀥𑀫𑁆𑀫𑀸𑀦𑀼𑀲𑀸𑀭𑀺𑀦𑁄, 𑀲𑀤𑁆𑀥𑀸𑀦𑀼𑀲𑀸𑀭𑀺𑀦𑁄𑀢𑀺 𑀇𑀫𑁂 𑀤𑁆𑀯𑁂 𑀧𑀞𑀫𑀫𑀕𑁆𑀕𑀲𑀫𑀗𑁆𑀕𑀺𑀦𑁄.

𑀚𑀸𑀦𑀢𑀸𑀢𑀺 𑀲𑀩𑁆𑀩𑀥𑀫𑁆𑀫𑁂 𑀚𑀸𑀦𑀦𑁆𑀢𑁂𑀦 𑀩𑀼𑀤𑁆𑀥𑁂𑀦. 𑀲𑀼𑀧𑁆𑀧𑀓𑀸𑀲𑀺𑀢𑁄𑀢𑀺 𑀲𑀼𑀓𑀣𑀺𑀢𑁄. 𑀯𑀺𑀯𑀝𑀦𑁆𑀢𑀺 𑀯𑀺𑀯𑀭𑀺𑀢𑀁. 𑀅𑀫𑀢𑀤𑁆𑀯𑀸𑀭𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑁄. 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸𑀢𑀺 𑀢𑀤𑀢𑁆𑀣𑀸𑀬 𑀯𑀺𑀯𑀝𑀁. 𑀯𑀺𑀦𑀴𑀻𑀓𑀢𑀦𑁆𑀢𑀺 𑀯𑀺𑀕𑀢𑀫𑀸𑀦𑀦𑀴𑀁 𑀓𑀢𑀁. 𑀔𑁂𑀫𑀁 𑀧𑀢𑁆𑀣𑁂𑀣𑀸𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀣𑁂𑀣, 𑀓𑀢𑁆𑀢𑀼𑀓𑀸𑀫𑀸 𑀦𑀺𑀩𑁆𑀩𑀢𑁆𑀢𑁂𑀢𑀼𑀓𑀸𑀫𑀸 𑀳𑁄𑀣𑀸𑀢𑀺 𑀅𑀢𑁆𑀣𑁄. ‘‘𑀧𑀢𑁆𑀢’𑀢𑁆𑀣𑀸’’𑀢𑀺𑀧𑀺 𑀧𑀸𑀞𑁄. 𑀏𑀯𑀭𑀽𑀧𑀁 𑀲𑀢𑁆𑀣𑀸𑀭𑀁 𑀮𑀪𑀺𑀢𑁆𑀯𑀸 𑀢𑀼𑀫𑁆𑀳𑁂 𑀧𑀢𑁆𑀢𑀸𑀬𑁂𑀯 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀪𑀕𑀯𑀸 𑀧𑀦 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀘𑀽𑀴𑀕𑁄𑀧𑀸𑀮𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀽𑀴𑀲𑀘𑁆𑀘𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁩. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀘𑀽𑀴𑀲𑀘𑁆𑀘𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀦𑁆𑀢𑀺 𑀫𑀳𑀸𑀯𑀦𑀁 𑀦𑀸𑀫 𑀲𑀬𑀁𑀚𑀸𑀢𑀁 𑀅𑀭𑁄𑀧𑀺𑀫𑀁 𑀲𑀧𑀭𑀺𑀘𑁆𑀙𑁂𑀤𑀁 𑀫𑀳𑀦𑁆𑀢𑀁 𑀯𑀦𑀁. 𑀓𑀧𑀺𑀮𑀯𑀢𑁆𑀣𑀼𑀲𑀸𑀫𑀦𑁆𑀢𑀸 𑀧𑀦 𑀫𑀳𑀸𑀯𑀦𑀁 𑀳𑀺𑀫𑀯𑀦𑁆𑀢𑁂𑀦 𑀲𑀳 𑀏𑀓𑀸𑀩𑀤𑁆𑀥𑀁 𑀅𑀧𑀭𑀺𑀘𑁆𑀙𑁂𑀤𑀁 𑀳𑀼𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀆𑀳𑀘𑁆𑀘 𑀞𑀺𑀢𑀁. 𑀇𑀤𑀁 𑀢𑀸𑀤𑀺𑀲𑀁 𑀦 𑀳𑁄𑀢𑀺. 𑀲𑀧𑀭𑀺𑀘𑁆𑀙𑁂𑀤𑀁 𑀫𑀳𑀦𑁆𑀢𑀁 𑀯𑀦𑀦𑁆𑀢𑀺 𑀫𑀳𑀸𑀯𑀦𑀁. 𑀓𑀽𑀝𑀸𑀕𑀸𑀭𑀲𑀸𑀮𑀸 𑀧𑀦 𑀫𑀳𑀸𑀯𑀦𑀁 𑀦𑀺𑀲𑁆𑀲𑀸𑀬 𑀓𑀢𑁂 𑀆𑀭𑀸𑀫𑁂 𑀓𑀽𑀝𑀸𑀕𑀸𑀭𑀁 𑀅𑀦𑁆𑀢𑁄𑀓𑀢𑁆𑀯𑀸 𑀳𑀁𑀲𑀯𑀝𑁆𑀝𑀓𑀘𑁆𑀙𑀦𑁆𑀦𑁂𑀦 𑀓𑀢𑀸 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀕𑀦𑁆𑀥𑀓𑀼𑀝𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄𑀢𑀺 𑀧𑀼𑀩𑁆𑀩𑁂 𑀓𑀺𑀭 𑀏𑀓𑁄 𑀦𑀺𑀕𑀡𑁆𑀞𑁄 𑀘 𑀦𑀺𑀕𑀡𑁆𑀞𑀻 𑀘 𑀧𑀜𑁆𑀘 𑀧𑀜𑁆𑀘 𑀯𑀸𑀤𑀲𑀢𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸, 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫𑀸𑀢𑀺 𑀚𑀫𑁆𑀩𑀼𑀤𑀻𑀧𑁂 𑀯𑀺𑀘𑀭𑀦𑁆𑀢𑀸 𑀯𑁂𑀲𑀸𑀮𑀺𑀬𑀁 𑀲𑀫𑀸𑀕𑀢𑀸. 𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑁄 𑀤𑀺𑀲𑁆𑀯𑀸, 𑁋 ‘‘𑀢𑁆𑀯𑀁 𑀓𑁄, 𑀢𑁆𑀯𑀁 𑀓𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀦𑀺𑀕𑀡𑁆𑀞𑁄 𑁋 ‘‘𑀅𑀳𑀁 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫𑀻𑀢𑀺 𑀚𑀫𑁆𑀩𑀼𑀤𑀻𑀧𑁂 𑀯𑀺𑀘𑀭𑀸𑀫𑀻’’𑀢𑀺 𑀆𑀳. 𑀦𑀺𑀕𑀡𑁆𑀞𑀻𑀧𑀺 𑀢𑀣𑀸 𑀆𑀳. 𑀮𑀺𑀘𑁆𑀙𑀯𑀺𑀦𑁄, ‘‘𑀇𑀥𑁂𑀯 𑀅𑀜𑁆𑀜𑀫𑀜𑁆𑀜𑀁 𑀯𑀸𑀤𑀁 𑀆𑀭𑁄𑀧𑁂𑀣𑀸’’𑀢𑀺 𑀆𑀳𑀁𑀲𑀼. 𑀦𑀺𑀕𑀡𑁆𑀞𑀻 𑀅𑀢𑁆𑀢𑀦𑀸 𑀉𑀕𑁆𑀕𑀳𑀺𑀢𑀸𑀦𑀺 𑀧𑀜𑁆𑀘𑀯𑀸𑀤𑀲𑀢𑀸𑀦𑀺 𑀧𑀼𑀘𑁆𑀙𑀺, 𑀦𑀺𑀕𑀡𑁆𑀞𑁄 𑀓𑀣𑁂𑀲𑀺. 𑀦𑀺𑀕𑀡𑁆𑀞𑁂𑀦 𑀧𑀼𑀘𑁆𑀙𑀺𑀢𑁂𑀧𑀺 𑀦𑀺𑀕𑀡𑁆𑀞𑀻 𑀓𑀣𑁂𑀲𑀺𑀬𑁂𑀯. 𑀏𑀓𑀲𑁆𑀲𑀧𑀺 𑀦 𑀚𑀬𑁄, 𑀦 𑀧𑀭𑀸𑀚𑀬𑁄, 𑀉𑀪𑁄 𑀲𑀫𑀲𑀫𑀸𑀯 𑀅𑀳𑁂𑀲𑀼𑀁. 𑀮𑀺𑀘𑁆𑀙𑀯𑀺𑀦𑁄, 𑁋 ‘‘𑀢𑀼𑀫𑁆𑀳𑁂 𑀉𑀪𑁄𑀧𑀺 𑀲𑀫𑀲𑀫𑀸 𑀆𑀳𑀺𑀡𑁆𑀟𑀺𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀣, 𑀇𑀥𑁂𑀯 𑀯𑀲𑀣𑀸’’𑀢𑀺 𑀕𑁂𑀳𑀁 𑀤𑀢𑁆𑀯𑀸 𑀩𑀮𑀺𑀁 𑀧𑀝𑁆𑀞𑀧𑁂𑀲𑀼𑀁. 𑀢𑁂𑀲𑀁 𑀲𑀁𑀯𑀸𑀲𑀫𑀦𑁆𑀯𑀸𑀬 𑀘𑀢𑀲𑁆𑀲𑁄 𑀥𑀻𑀢𑀭𑁄 𑀚𑀸𑀢𑀸, 𑁋 𑀏𑀓𑀸 𑀲𑀘𑁆𑀘𑀸 𑀦𑀸𑀫, 𑀏𑀓𑀸 𑀮𑁄𑀮𑀸 𑀦𑀸𑀫, 𑀏𑀓𑀸 𑀧𑀝𑀸𑀘𑀸𑀭𑀸 𑀦𑀸𑀫, 𑀏𑀓𑀸 𑀆𑀘𑀸𑀭𑀯𑀢𑀻 𑀦𑀸𑀫. 𑀢𑀸𑀧𑀺 𑀧𑀡𑁆𑀟𑀺𑀢𑀸𑀯 𑀅𑀳𑁂𑀲𑀼𑀁, 𑀫𑀸𑀢𑀸𑀧𑀺𑀢𑀽𑀳𑀺 𑀉𑀕𑁆𑀕𑀳𑀺𑀢𑀸𑀦𑀺 𑀧𑀜𑁆𑀘 𑀧𑀜𑁆𑀘 𑀯𑀸𑀤𑀲𑀢𑀸𑀦𑀺 𑀉𑀕𑁆𑀕𑀳𑁂𑀲𑀼𑀁. 𑀢𑀸 𑀯𑀬𑀧𑀢𑁆𑀢𑀸 𑀫𑀸𑀢𑀸𑀧𑀺𑀢𑀭𑁄 𑀅𑀯𑁄𑀘𑀼𑀁 𑁋 ‘‘𑀅𑀫𑁆𑀳𑀸𑀓𑀁 𑀅𑀫𑁆𑀫𑀸 𑀓𑀼𑀮𑁂 𑀤𑀸𑀭𑀺𑀓𑀸 𑀦𑀸𑀫 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀻𑀦𑀺 𑀤𑀢𑁆𑀯𑀸 𑀓𑀼𑀮𑀖𑀭𑀁 𑀧𑁂𑀲𑀺𑀢𑀧𑀼𑀩𑁆𑀩𑀸 𑀦𑀸𑀫 𑀦𑀢𑁆𑀣𑀺. 𑀬𑁄 𑀧𑀦 𑀅𑀕𑀸𑀭𑀺𑀓𑁄 𑀢𑀸𑀲𑀁 𑀯𑀸𑀤𑀁 𑀫𑀤𑁆𑀤𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀳𑁄𑀦𑁆𑀢𑀺. 𑀬𑁄 𑀧𑀩𑁆𑀩𑀚𑀺𑀢𑁄 𑀢𑀸𑀲𑀁 𑀫𑀤𑁆𑀤𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀦𑁆𑀢𑀺. 𑀢𑀼𑀫𑁆𑀳𑁂 𑀓𑀺𑀁 𑀓𑀭𑀺𑀲𑁆𑀲𑀣𑀸’’𑀢𑀺? 𑀫𑀬𑀫𑁆𑀧𑀺 𑀏𑀯𑀫𑁂𑀯 𑀓𑀭𑀺𑀲𑁆𑀲𑀸𑀫𑀸𑀢𑀺. 𑀘𑀢𑀲𑁆𑀲𑁄𑀧𑀺 𑀧𑀭𑀺𑀩𑁆𑀩𑀸𑀚𑀺𑀓𑀯𑁂𑀲𑀁 𑀕𑀳𑁂𑀢𑁆𑀯𑀸, ‘‘𑀅𑀬𑀁 𑀚𑀫𑁆𑀩𑀼𑀤𑀻𑀧𑁄 𑀦𑀸𑀫 𑀚𑀫𑁆𑀩𑀼𑀬𑀸 𑀧𑀜𑁆𑀜𑀸𑀬𑀢𑀻’’𑀢𑀺 𑀚𑀫𑁆𑀩𑀼𑀲𑀸𑀔𑀁 𑀕𑀳𑁂𑀢𑁆𑀯𑀸 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀁𑀲𑀼. 𑀬𑀁 𑀕𑀸𑀫𑀁 𑀧𑀸𑀧𑀼𑀡𑀦𑁆𑀢𑀺, 𑀢𑀲𑁆𑀲 𑀤𑁆𑀯𑀸𑀭𑁂 𑀧𑀁𑀲𑀼𑀧𑀼𑀜𑁆𑀚𑁂 𑀯𑀸 𑀯𑀸𑀮𑀺𑀓𑀧𑀼𑀜𑁆𑀚𑁂 𑀯𑀸 𑀚𑀫𑁆𑀩𑀼𑀥𑀚𑀁 𑀞𑀧𑁂𑀢𑁆𑀯𑀸, 𑁋 ‘‘𑀬𑁄 𑀯𑀸𑀤𑀁 𑀆𑀭𑁄𑀧𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀲𑁄 𑀇𑀫𑀁 𑀫𑀤𑁆𑀤𑀢𑀽’’𑀢𑀺 𑀯𑀢𑁆𑀯𑀸 𑀕𑀸𑀫𑀁 𑀧𑀯𑀺𑀲𑀦𑁆𑀢𑀺. 𑀏𑀯𑀁 𑀕𑀸𑀫𑁂𑀦 𑀕𑀸𑀫𑀁 𑀯𑀺𑀘𑀭𑀦𑁆𑀢𑀺𑀬𑁄 𑀲𑀸𑀯𑀢𑁆𑀣𑀺𑀁 𑀧𑀸𑀧𑀼𑀡𑀺𑀢𑁆𑀯𑀸 𑀢𑀣𑁂𑀯 𑀕𑀸𑀫𑀤𑁆𑀯𑀸𑀭𑁂 𑀚𑀫𑁆𑀩𑀼𑀥𑀚𑀁 𑀞𑀧𑁂𑀢𑁆𑀯𑀸 𑀲𑀫𑁆𑀧𑀢𑁆𑀢𑀫𑀦𑀼𑀲𑁆𑀲𑀸𑀦𑀁 𑀆𑀭𑁄𑀘𑁂𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑀁 𑀧𑀯𑀺𑀝𑁆𑀞𑀸.

𑀢𑁂𑀦 𑀲𑀫𑀬𑁂𑀦 𑀪𑀕𑀯𑀸 𑀲𑀸𑀯𑀢𑁆𑀣𑀺𑀁 𑀦𑀺𑀲𑁆𑀲𑀸𑀬 𑀚𑁂𑀢𑀯𑀦𑁂 𑀯𑀺𑀳𑀭𑀢𑀺. 𑀅𑀣𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀕𑀺𑀮𑀸𑀦𑁂 𑀧𑀼𑀘𑁆𑀙𑀦𑁆𑀢𑁄 𑀅𑀚𑀕𑁆𑀕𑀺𑀢𑀝𑁆𑀞𑀸𑀦𑀁 𑀚𑀕𑁆𑀕𑀦𑁆𑀢𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑀫𑀳𑀦𑁆𑀢𑀢𑀸𑀬 𑀅𑀜𑁆𑀜𑁂𑀳𑀺 𑀪𑀺𑀓𑁆𑀔𑀽𑀳𑀺 𑀤𑀺𑀯𑀸𑀢𑀭𑀁 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑁄 𑀕𑀸𑀫𑀤𑁆𑀯𑀸𑀭𑁂 𑀚𑀫𑁆𑀩𑀼𑀥𑀚𑀁 𑀤𑀺𑀲𑁆𑀯𑀸, 𑁋 ‘‘𑀓𑀺𑀫𑀺𑀤’’𑀦𑁆𑀢𑀺 𑀤𑀸𑀭𑀓𑁂 𑀧𑀼𑀘𑁆𑀙𑀺. 𑀢𑁂 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀢𑁂𑀦 𑀳𑀺 𑀫𑀤𑁆𑀤𑀣𑀸𑀢𑀺. 𑀦 𑀲𑀓𑁆𑀓𑁄𑀫, 𑀪𑀦𑁆𑀢𑁂, 𑀪𑀸𑀬𑀸𑀫𑀸𑀢𑀺. ‘‘𑀓𑀼𑀫𑀸𑀭𑀸 𑀫𑀸 𑀪𑀸𑀬𑀣, ‘𑀓𑁂𑀦 𑀅𑀫𑁆𑀳𑀸𑀓𑀁 𑀚𑀫𑁆𑀩𑀼𑀥𑀚𑁄 𑀫𑀤𑁆𑀤𑀸𑀧𑀺𑀢𑁄’𑀢𑀺 𑀯𑀼𑀢𑁆𑀢𑁂, 𑀩𑀼𑀤𑁆𑀥𑀲𑀸𑀯𑀓𑁂𑀦 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀫𑀤𑁆𑀤𑀸𑀧𑀺𑀢𑁄, 𑀯𑀸𑀤𑀁 𑀆𑀭𑁄𑀧𑁂𑀢𑀼𑀓𑀸𑀫𑀸 𑀚𑁂𑀢𑀯𑀦𑁂 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀣𑀸𑀢𑀺 𑀯𑀤𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀢𑁂 𑀣𑁂𑀭𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀚𑀫𑁆𑀩𑀼𑀥𑀚𑀁 𑀫𑀤𑁆𑀤𑀺𑀢𑁆𑀯𑀸 𑀙𑀟𑁆𑀟𑁂𑀲𑀼𑀁. 𑀣𑁂𑀭𑁄 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀢𑁄. 𑀧𑀭𑀺𑀩𑁆𑀩𑀸𑀚𑀺𑀓𑀸𑀧𑀺 𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸, ‘‘𑀅𑀫𑁆𑀳𑀸𑀓𑀁 𑀥𑀚𑁄 𑀓𑁂𑀦 𑀫𑀤𑁆𑀤𑀸𑀧𑀺𑀢𑁄’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀤𑀸𑀭𑀓𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀧𑀭𑀺𑀩𑁆𑀩𑀸𑀚𑀺𑀓𑀸 𑀧𑀼𑀦 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑁂𑀓𑀁 𑀯𑀻𑀣𑀺𑀁 𑀕𑀳𑁂𑀢𑁆𑀯𑀸, 𑁋 ‘‘𑀩𑀼𑀤𑁆𑀥𑀲𑀸𑀯𑀓𑁄 𑀓𑀺𑀭 𑀲𑀸𑀭𑀺𑀧𑀼𑀢𑁆𑀢𑁄 𑀦𑀸𑀫 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀯𑀸𑀤𑀁 𑀓𑀭𑀺𑀲𑁆𑀲𑀢𑀺, 𑀲𑁄𑀢𑀼𑀓𑀸𑀫𑀸 𑀦𑀺𑀓𑁆𑀔𑀫𑀣𑀸’’𑀢𑀺 𑀆𑀭𑁄𑀘𑁂𑀲𑀼𑀁. 𑀫𑀳𑀸𑀚𑀦𑁄 𑀦𑀺𑀓𑁆𑀔𑀫𑀺, 𑀢𑁂𑀦 𑀲𑀤𑁆𑀥𑀺𑀁 𑀧𑀭𑀺𑀩𑁆𑀩𑀸𑀚𑀺𑀓𑀸 𑀚𑁂𑀢𑀯𑀦𑀁 𑀅𑀕𑀫𑀺𑀁𑀲𑀼.

𑀣𑁂𑀭𑁄 𑁋 ‘‘𑀅𑀫𑁆𑀳𑀸𑀓𑀁 𑀯𑀲𑀦𑀝𑁆𑀞𑀸𑀦𑁂 𑀫𑀸𑀢𑀼𑀕𑀸𑀫𑀲𑁆𑀲 𑀆𑀕𑀫𑀦𑀁 𑀦𑀸𑀫 𑀅𑀨𑀸𑀲𑀼𑀓’’𑀦𑁆𑀢𑀺 𑀯𑀺𑀳𑀸𑀭𑀫𑀚𑁆𑀛𑁂 𑀦𑀺𑀲𑀻𑀤𑀺. 𑀧𑀭𑀺𑀩𑁆𑀩𑀸𑀚𑀺𑀓𑀸𑀬𑁄 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀢𑀼𑀫𑁆𑀳𑁂𑀳𑀺 𑀅𑀫𑁆𑀳𑀸𑀓𑀁 𑀥𑀚𑁄 𑀫𑀤𑁆𑀤𑀸𑀧𑀺𑀢𑁄’’𑀢𑀺? 𑀆𑀫, 𑀫𑀬𑀸 𑀫𑀤𑁆𑀤𑀸𑀧𑀺𑀢𑁄𑀢𑀺. 𑀫𑀬𑀁 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀯𑀸𑀤𑀁 𑀓𑀭𑀺𑀲𑁆𑀲𑀸𑀫𑀸𑀢𑀺. 𑀲𑀸𑀥𑀼 𑀓𑀭𑁄𑀣, 𑀓𑀲𑁆𑀲 𑀧𑀼𑀘𑁆𑀙𑀸 𑀓𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀁 𑀳𑁄𑀢𑀽𑀢𑀺? 𑀧𑀼𑀘𑁆𑀙𑀸 𑀦𑀸𑀫 𑀅𑀫𑁆𑀳𑀸𑀓𑀁 𑀧𑀢𑁆𑀢𑀸, 𑀢𑀼𑀫𑁆𑀳𑁂 𑀧𑀦 𑀫𑀸𑀢𑀼𑀕𑀸𑀫𑀸 𑀦𑀸𑀫 𑀧𑀞𑀫𑀁 𑀧𑀼𑀘𑁆𑀙𑀣𑀸𑀢𑀺 𑀆𑀳. 𑀢𑀸 𑀘𑀢𑀲𑁆𑀲𑁄𑀧𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀞𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑀺𑀢𑀁 𑀯𑀸𑀤𑀲𑀳𑀲𑁆𑀲𑀁 𑀧𑀼𑀘𑁆𑀙𑀺𑀁𑀲𑀼. 𑀣𑁂𑀭𑁄 𑀔𑀕𑁆𑀕𑁂𑀦 𑀓𑀼𑀫𑀼𑀤𑀦𑀸𑀴𑀁 𑀙𑀺𑀦𑁆𑀤𑀦𑁆𑀢𑁄 𑀯𑀺𑀬 𑀧𑀼𑀘𑁆𑀙𑀺𑀢𑀁 𑀧𑀼𑀘𑁆𑀙𑀺𑀢𑀁 𑀦𑀺𑀚𑁆𑀚𑀝𑀁 𑀦𑀺𑀕𑁆𑀕𑀡𑁆𑀞𑀺𑀁 𑀓𑀢𑁆𑀯𑀸 𑀓𑀣𑁂𑀲𑀺, 𑀓𑀣𑁂𑀢𑁆𑀯𑀸 𑀧𑀼𑀦 𑀧𑀼𑀘𑁆𑀙𑀣𑀸𑀢𑀺 𑀆𑀳. 𑀏𑀢𑁆𑀢𑀓𑀫𑁂𑀯, 𑀪𑀦𑁆𑀢𑁂, 𑀫𑀬𑀁 𑀚𑀸𑀦𑀸𑀫𑀸𑀢𑀺. 𑀣𑁂𑀭𑁄 𑀆𑀳 𑁋 ‘‘𑀢𑀼𑀫𑁆𑀳𑁂𑀳𑀺 𑀯𑀸𑀤𑀲𑀳𑀲𑁆𑀲𑀁 𑀧𑀼𑀘𑁆𑀙𑀺𑀢𑀁 𑀫𑀬𑀸 𑀓𑀣𑀺𑀢𑀁, 𑀅𑀳𑀁 𑀧𑀦 𑀏𑀓𑀁 𑀬𑁂𑀯 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀢𑀁 𑀢𑀼𑀫𑁆𑀳𑁂 𑀓𑀣𑁂𑀣𑀸’’𑀢𑀺. 𑀢𑀸 𑀣𑁂𑀭𑀲𑁆𑀲 𑀯𑀺𑀲𑀬𑀁 𑀤𑀺𑀲𑁆𑀯𑀸, ‘‘𑀧𑀼𑀘𑁆𑀙𑀣, 𑀪𑀦𑁆𑀢𑁂, 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. ‘‘𑀯𑀤, 𑀪𑀦𑁆𑀢𑁂, 𑀚𑀸𑀦𑀫𑀸𑀦𑀸 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀧𑀼𑀦 𑀆𑀳𑀁𑀲𑀼.

𑀣𑁂𑀭𑁄 𑀅𑀬𑀁 𑀧𑀦 𑀓𑀼𑀮𑀧𑀼𑀢𑁆𑀢𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀧𑀞𑀫𑀁 𑀲𑀺𑀓𑁆𑀔𑀸𑀧𑁂𑀢𑀩𑁆𑀩𑀧𑀜𑁆𑀳𑁄𑀢𑀺 𑀯𑀢𑁆𑀯𑀸, 𑁋 ‘‘𑀏𑀓𑀁 𑀦𑀸𑀫 𑀓𑀺’’𑀦𑁆𑀢𑀺 𑀧𑀼𑀘𑁆𑀙𑀺. 𑀢𑀸 𑀦𑁂𑀯 𑀅𑀦𑁆𑀢𑀁, 𑀦 𑀓𑁄𑀝𑀺𑀁 𑀅𑀤𑁆𑀤𑀲𑀁𑀲𑀼. 𑀣𑁂𑀭𑁄 𑀓𑀣𑁂𑀣𑀸𑀢𑀺 𑀆𑀳. 𑀦 𑀧𑀲𑁆𑀲𑀸𑀫, 𑀪𑀦𑁆𑀢𑁂𑀢𑀺. 𑀢𑀼𑀫𑁆𑀳𑁂𑀳𑀺 𑀯𑀸𑀤𑀲𑀳𑀲𑁆𑀲𑀁 𑀧𑀼𑀘𑁆𑀙𑀺𑀢𑀁 𑀫𑀬𑀸 𑀓𑀣𑀺𑀢𑀁, 𑀫𑀬𑁆𑀳𑀁 𑀢𑀼𑀫𑁆𑀳𑁂 𑀏𑀓𑀁 𑀧𑀜𑁆𑀳𑀫𑁆𑀧𑀺 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀣, 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀲 𑀚𑀬𑁄 𑀓𑀲𑁆𑀲 𑀧𑀭𑀸𑀚𑀬𑁄𑀢𑀺? 𑀢𑀼𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀚𑀬𑁄, 𑀅𑀫𑁆𑀳𑀸𑀓𑀁 𑀧𑀭𑀸𑀚𑀬𑁄𑀢𑀺. 𑀇𑀤𑀸𑀦𑀺 𑀓𑀺𑀁 𑀓𑀭𑀺𑀲𑁆𑀲𑀣𑀸𑀢𑀺? 𑀢𑀸 𑀫𑀸𑀢𑀸𑀧𑀺𑀢𑀽𑀳𑀺 𑀯𑀼𑀢𑁆𑀢𑀯𑀘𑀦𑀁 𑀆𑀭𑁄𑀘𑁂𑀢𑁆𑀯𑀸, ‘‘𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀢𑀼𑀫𑁆𑀳𑁂 𑀫𑀸𑀢𑀼𑀕𑀸𑀫𑀸 𑀦𑀸𑀫 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀅𑀫𑁆𑀳𑀸𑀓𑀁 𑀧𑀦 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀣𑀸𑀢𑀺. 𑀢𑀸 𑀲𑀸𑀥𑀽𑀢𑀺 𑀣𑁂𑀭𑀲𑁆𑀲 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀼. 𑀧𑀩𑁆𑀩𑀚𑀺𑀢𑀸 𑀘 𑀧𑀦 𑀅𑀧𑁆𑀧𑀫𑀢𑁆𑀢𑀸 𑀆𑀢𑀸𑀧𑀺𑀦𑀺𑀬𑁄 𑀳𑀼𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼.

𑀅𑀬𑀁 𑀲𑀘𑁆𑀘𑀓𑁄 𑀢𑀸𑀲𑀁 𑀘𑀢𑀼𑀦𑁆𑀦𑀫𑁆𑀧𑀺 𑀓𑀦𑀺𑀝𑁆𑀞𑀪𑀸𑀢𑀺𑀓𑁄. 𑀢𑀸𑀳𑀺 𑀘𑀢𑀽𑀳𑀺𑀧𑀺 𑀉𑀢𑁆𑀢𑀭𑀺𑀢𑀭𑀧𑀜𑁆𑀜𑁄, 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺 𑀲𑀦𑁆𑀢𑀺𑀓𑀸 𑀯𑀸𑀤𑀲𑀳𑀲𑁆𑀲𑀁, 𑀢𑀢𑁄 𑀩𑀳𑀼𑀢𑀭𑀜𑁆𑀘 𑀩𑀸𑀳𑀺𑀭𑀲𑀫𑀬𑀁 𑀉𑀕𑁆𑀕𑀳𑁂𑀢𑁆𑀯𑀸 𑀓𑀢𑁆𑀣𑀘𑀺 𑀅𑀕𑀦𑁆𑀢𑁆𑀯𑀸 𑀭𑀸𑀚𑀤𑀸𑀭𑀓𑁂 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑁄 𑀢𑀢𑁆𑀣𑁂𑀯 𑀯𑁂𑀲𑀸𑀮𑀺𑀬𑀁 𑀯𑀲𑀢𑀺, 𑀧𑀜𑁆𑀜𑀸𑀬 𑀅𑀢𑀺𑀧𑀽𑀭𑀺𑀢𑀢𑁆𑀢𑀸 𑀓𑀼𑀘𑁆𑀙𑀺 𑀫𑁂 𑀪𑀺𑀚𑁆𑀚𑁂𑀬𑁆𑀬𑀸𑀢𑀺 𑀪𑀻𑀢𑁄 𑀅𑀬𑀧𑀝𑁆𑀝𑁂𑀦 𑀓𑀼𑀘𑁆𑀙𑀺𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀘𑀭𑀢𑀺, 𑀇𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄’’𑀢𑀺.

𑀪𑀲𑁆𑀲𑀧𑁆𑀧𑀯𑀸𑀤𑀓𑁄𑀢𑀺 𑀪𑀲𑁆𑀲𑀁 𑀯𑀼𑀘𑁆𑀘𑀢𑀺 𑀓𑀣𑀸𑀫𑀕𑁆𑀕𑁄, 𑀢𑀁 𑀧𑀯𑀤𑀢𑀺 𑀓𑀣𑁂𑀢𑀻𑀢𑀺 𑀪𑀲𑁆𑀲𑀧𑁆𑀧𑀯𑀸𑀤𑀓𑁄. 𑀧𑀡𑁆𑀟𑀺𑀢𑀯𑀸𑀤𑁄𑀢𑀺 𑀅𑀳𑀁 𑀧𑀡𑁆𑀟𑀺𑀢𑁄𑀢𑀺 𑀏𑀯𑀁 𑀯𑀸𑀤𑁄. 𑀲𑀸𑀥𑀼𑀲𑀫𑁆𑀫𑀢𑁄 𑀩𑀳𑀼𑀚𑀦𑀲𑁆𑀲𑀸𑀢𑀺 𑀬𑀁 𑀬𑀁 𑀦𑀓𑁆𑀔𑀢𑁆𑀢𑀘𑀸𑀭𑁂𑀦 𑀆𑀤𑀺𑀲𑀢𑀺, 𑀢𑀁 𑀢𑀁 𑀬𑁂𑀪𑀼𑀬𑁆𑀬𑁂𑀦 𑀢𑀣𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀅𑀬𑀁 𑀲𑀸𑀥𑀼𑀮𑀤𑁆𑀥𑀺𑀓𑁄 𑀪𑀤𑁆𑀤𑀓𑁄𑀢𑀺 𑀏𑀯𑀁 𑀲𑀫𑁆𑀫𑀢𑁄 𑀫𑀳𑀸𑀚𑀦𑀲𑁆𑀲. 𑀯𑀸𑀤𑁂𑀦 𑀯𑀸𑀤𑀁 𑀲𑀫𑀸𑀭𑀤𑁆𑀥𑁄𑀢𑀺 𑀓𑀣𑀸𑀫𑀕𑁆𑀕𑁂𑀦 𑀤𑁄𑀲𑀁 𑀆𑀭𑁄𑀧𑀺𑀢𑁄. 𑀆𑀬𑀲𑁆𑀫𑀸 𑀅𑀲𑁆𑀲𑀚𑀻𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀆𑀘𑀭𑀺𑀬𑁄 𑀅𑀲𑁆𑀲𑀚𑀺𑀢𑁆𑀣𑁂𑀭𑁄. 𑀚𑀗𑁆𑀖𑀸𑀯𑀺𑀳𑀸𑀭𑀁 𑀅𑀦𑀼𑀘𑀗𑁆𑀓𑀫𑀫𑀸𑀦𑁄𑀢𑀺 𑀢𑀢𑁄 𑀢𑀢𑁄 𑀮𑀺𑀘𑁆𑀙𑀯𑀺𑀭𑀸𑀚𑀕𑁂𑀳𑀢𑁄 𑀢𑀁 𑀢𑀁 𑀕𑁂𑀳𑀁 𑀕𑀫𑀦𑀢𑁆𑀣𑀸𑀬 𑀅𑀦𑀼𑀘𑀗𑁆𑀓𑀫𑀫𑀸𑀦𑁄. 𑀬𑁂𑀦𑀸𑀬𑀲𑁆𑀫𑀸 𑀅𑀲𑁆𑀲𑀚𑀺 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀓𑀲𑁆𑀫𑀸 𑀉𑀧𑀲𑀗𑁆𑀓𑀫𑀺? 𑀲𑀫𑀬𑀚𑀸𑀦𑀦𑀢𑁆𑀣𑀁.

𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀳𑀁 ‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫𑀻’𑀢𑀺 𑀆𑀳𑀺𑀡𑁆𑀟𑀸𑀫𑀺, ‘𑀲𑀫𑀬𑀁 𑀧𑀦𑀲𑁆𑀲 𑀦 𑀚𑀸𑀦𑀸𑀫𑀻’𑀢𑀺 𑀦 𑀆𑀭𑁄𑀧𑁂𑀲𑀺𑀁. 𑀧𑀭𑀲𑁆𑀲 𑀳𑀺 𑀲𑀫𑀬𑀁 𑀜𑀢𑁆𑀯𑀸 𑀆𑀭𑁄𑀧𑀺𑀢𑁄 𑀯𑀸𑀤𑁄 𑀲𑁆𑀯𑀸𑀭𑁄𑀧𑀺𑀢𑁄 𑀦𑀸𑀫 𑀳𑁄𑀢𑀺. 𑀅𑀬𑀁 𑀧𑀦 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑁄 𑀧𑀜𑁆𑀜𑀸𑀬𑀢𑀺 𑀅𑀲𑁆𑀲𑀚𑀺𑀢𑁆𑀣𑁂𑀭𑁄; 𑀲𑁄 𑀅𑀢𑁆𑀢𑀦𑁄 𑀲𑀢𑁆𑀣𑀼 𑀲𑀫𑀬𑁂 𑀓𑁄𑀯𑀺𑀤𑁄, 𑀏𑀢𑀸𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀓𑀣𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀸 𑀉𑀧𑀲𑀗𑁆𑀓𑀫𑀺. 𑀯𑀺𑀦𑁂𑀢𑀻𑀢𑀺 𑀓𑀣𑀁 𑀯𑀺𑀦𑁂𑀢𑀺, 𑀓𑀣𑀁 𑀲𑀺𑀓𑁆𑀔𑀸𑀧𑁂𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀣𑁂𑀭𑁄 𑀧𑀦 𑀬𑀲𑁆𑀫𑀸 𑀤𑀼𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑁂 𑀉𑀧𑀸𑀭𑀫𑁆𑀪𑀲𑁆𑀲 𑀑𑀓𑀸𑀲𑁄 𑀳𑁄𑀢𑀺, 𑀫𑀕𑁆𑀕𑀨𑀮𑀸𑀦𑀺𑀧𑀺 𑀧𑀭𑀺𑀬𑀸𑀬𑁂𑀦 𑀤𑀼𑀓𑁆𑀔𑀦𑁆𑀢𑀺 𑀆𑀕𑀢𑀸𑀦𑀺, 𑀅𑀬𑀜𑁆𑀘 𑀤𑀼𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑁂 𑀣𑁂𑀭𑀁 𑀧𑀼𑀘𑁆𑀙𑁂𑀬𑁆𑀬 𑁋 ‘‘𑀪𑁄 𑀅𑀲𑁆𑀲𑀚𑀺, 𑀓𑀺𑀫𑀢𑁆𑀣𑀁 𑀢𑀼𑀫𑁆𑀳𑁂 𑀧𑀩𑁆𑀩𑀚𑀺𑀢𑀸’’𑀢𑀺. 𑀢𑀢𑁄 ‘‘𑀫𑀕𑁆𑀕𑀨𑀮𑀢𑁆𑀣𑀸𑀬𑀸’’𑀢𑀺 𑀯𑀼𑀢𑁆𑀢𑁂, 𑁋 ‘‘𑀦𑀬𑀺𑀤𑀁, 𑀪𑁄 𑀅𑀲𑁆𑀲𑀚𑀺, 𑀢𑀼𑀫𑁆𑀳𑀸𑀓𑀁 𑀲𑀸𑀲𑀦𑀁 𑀦𑀸𑀫, 𑀫𑀳𑀸𑀆𑀖𑀸𑀢𑀦𑀁 𑀦𑀸𑀫𑁂𑀢𑀁, 𑀦𑀺𑀭𑀬𑀼𑀲𑁆𑀲𑀤𑁄 𑀦𑀸𑀫𑁂𑀲, 𑀦𑀢𑁆𑀣𑀺 𑀢𑀼𑀫𑁆𑀳𑀸𑀓𑀁 𑀲𑀼𑀔𑀸𑀲𑀸, 𑀉𑀝𑁆𑀞𑀸𑀬𑀼𑀝𑁆𑀞𑀸𑀬 𑀤𑀼𑀓𑁆𑀔𑀫𑁂𑀯 𑀚𑀺𑀭𑀸𑀧𑁂𑀦𑁆𑀢𑀸 𑀆𑀳𑀺𑀡𑁆𑀟𑀣𑀸’’𑀢𑀺 𑀤𑁄𑀲𑀁 𑀆𑀭𑁄𑀧𑁂𑀬𑁆𑀬, 𑀢𑀲𑁆𑀫𑀸 𑀧𑀭𑀯𑀸𑀤𑀺𑀲𑁆𑀲 𑀧𑀭𑀺𑀬𑀸𑀬𑀓𑀣𑀁 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀣𑀸 𑀏𑀲 𑀅𑀧𑁆𑀧𑀢𑀺𑀝𑁆𑀞𑁄 𑀳𑁄𑀢𑀺, 𑀏𑀯𑀫𑀲𑁆𑀲 𑀦𑀺𑀧𑁆𑀧𑀭𑀺𑀬𑀸𑀬𑀓𑀣𑀁 𑀓𑀣𑁂𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘’’𑀦𑁆𑀢𑀺 𑀇𑀫𑀁 𑀅𑀦𑀺𑀘𑁆𑀘𑀸𑀦𑀢𑁆𑀢𑀯𑀲𑁂𑀦𑁂𑀯 𑀓𑀣𑀁 𑀓𑀣𑁂𑀢𑀺. 𑀤𑀼𑀲𑁆𑀲𑀼𑀢𑀦𑁆𑀢𑀺 𑀲𑁄𑀢𑀼𑀁 𑀅𑀬𑀼𑀢𑁆𑀢𑀁.

𑁩𑁫𑁪. 𑀲𑀦𑁆𑀣𑀸𑀕𑀸𑀭𑁂𑀢𑀺 𑀭𑀸𑀚𑀓𑀼𑀮𑀸𑀦𑀁 𑀅𑀢𑁆𑀣𑀸𑀦𑀼𑀲𑀸𑀲𑀦𑀲𑀦𑁆𑀣𑀸𑀕𑀸𑀭𑀲𑀸𑀮𑀸𑀬𑀁. 𑀬𑁂𑀦 𑀢𑁂 𑀮𑀺𑀘𑁆𑀙𑀯𑀻 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀳𑀁 𑀧𑀼𑀩𑁆𑀩𑁂 𑀲𑀫𑀬𑀁 𑀅𑀚𑀸𑀦𑀦𑀪𑀸𑀯𑁂𑀦 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀸𑀤𑀁 𑀦 𑀆𑀭𑁄𑀧𑁂𑀲𑀺𑀁, 𑀇𑀤𑀸𑀦𑀺 𑀧𑀦𑀲𑁆𑀲 𑀫𑀳𑀸𑀲𑀸𑀯𑀓𑁂𑀦 𑀓𑀣𑀺𑀢𑀁 𑀲𑀫𑀬𑀁 𑀚𑀸𑀦𑀸𑀫𑀺, 𑀇𑀫𑁂 𑀘 𑀫𑀫 𑀅𑀦𑁆𑀢𑁂𑀯𑀸𑀲𑀺𑀓𑀸 𑀧𑀜𑁆𑀘𑀲𑀢𑀸 𑀮𑀺𑀘𑁆𑀙𑀯𑀻 𑀲𑀦𑁆𑀦𑀺𑀧𑀢𑀺𑀢𑀸. 𑀏𑀢𑁂𑀳𑀺 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀫𑀸 𑀉𑀧𑀲𑀗𑁆𑀓𑀫𑀺. 𑀜𑀸𑀢𑀜𑁆𑀜𑀢𑀭𑁂𑀦𑀸𑀢𑀺 𑀜𑀸𑀢𑁂𑀲𑀼 𑀅𑀪𑀺𑀜𑁆𑀜𑀸𑀢𑁂𑀲𑀼 𑀧𑀜𑁆𑀘𑀯𑀕𑁆𑀕𑀺𑀬𑀢𑁆𑀣𑁂𑀭𑁂𑀲𑀼 𑀅𑀜𑁆𑀜𑀢𑀭𑁂𑀦. 𑀧𑀢𑀺𑀝𑁆𑀞𑀺𑀢𑀦𑁆𑀢𑀺 𑀬𑀣𑀸 𑀢𑁂𑀦 𑀧𑀢𑀺𑀝𑁆𑀞𑀺𑀢𑀁. 𑀲𑀘𑁂 𑀏𑀯𑀁 𑀧𑀢𑀺𑀝𑁆𑀞𑀺𑀲𑁆𑀲𑀢𑀺, 𑀅𑀣 𑀧𑀦 𑀅𑀜𑁆𑀜𑀤𑁂𑀯 𑀯𑀓𑁆𑀔𑀢𑀺, 𑀢𑀢𑁆𑀭 𑀫𑀬𑀸 𑀓𑀺𑀁 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀇𑀤𑀸𑀦𑁂𑀯 𑀧𑀺𑀝𑁆𑀞𑀺𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑀆𑀳. 𑀆𑀓𑀟𑁆𑀠𑁂𑀬𑁆𑀬𑀸𑀢𑀺 𑀅𑀢𑁆𑀢𑀦𑁄 𑀅𑀪𑀺𑀫𑀼𑀔𑀁 𑀓𑀟𑁆𑀠𑁂𑀬𑁆𑀬. 𑀧𑀭𑀺𑀓𑀟𑁆𑀠𑁂𑀬𑁆𑀬𑀸𑀢𑀺 𑀧𑀼𑀭𑀢𑁄 𑀧𑀝𑀺𑀧𑀡𑀸𑀫𑁂𑀬𑁆𑀬. 𑀲𑀫𑁆𑀧𑀭𑀺𑀓𑀟𑁆𑀠𑁂𑀬𑁆𑀬𑀸𑀢𑀺 𑀓𑀸𑀮𑁂𑀦 𑀆𑀓𑀟𑁆𑀠𑁂𑀬𑁆𑀬, 𑀓𑀸𑀮𑁂𑀦 𑀧𑀭𑀺𑀓𑀟𑁆𑀠𑁂𑀬𑁆𑀬. 𑀲𑁄𑀡𑁆𑀟𑀺𑀓𑀸𑀓𑀺𑀮𑀜𑁆𑀚𑀦𑁆𑀢𑀺 𑀲𑀼𑀭𑀸𑀖𑀭𑁂 𑀧𑀺𑀝𑁆𑀞𑀓𑀺𑀮𑀜𑁆𑀚𑀁. 𑀲𑁄𑀡𑁆𑀟𑀺𑀓𑀸𑀥𑀼𑀢𑁆𑀢𑁄𑀢𑀺 𑀲𑀼𑀭𑀸𑀥𑀼𑀢𑁆𑀢𑁄. 𑀯𑀸𑀮𑀁 𑀓𑀡𑁆𑀡𑁂 𑀕𑀳𑁂𑀢𑁆𑀯𑀸𑀢𑀺 𑀲𑀼𑀭𑀸𑀧𑀭𑀺𑀲𑁆𑀲𑀸𑀯𑀦𑀢𑁆𑀣𑀯𑀺𑀓𑀁 𑀥𑁄𑀯𑀺𑀢𑀼𑀓𑀸𑀫𑁄 𑀓𑀲𑀝𑀦𑀺𑀥𑀼𑀦𑀦𑀢𑁆𑀣𑀁 𑀉𑀪𑁄𑀲𑀼 𑀓𑀡𑁆𑀡𑁂𑀲𑀼 𑀕𑀳𑁂𑀢𑁆𑀯𑀸. 𑀑𑀥𑀼𑀦𑁂𑀬𑁆𑀬𑀸𑀢𑀺 𑀅𑀥𑁄𑀫𑀼𑀔𑀁 𑀓𑀢𑁆𑀯𑀸 𑀥𑀼𑀦𑁂𑀬𑁆𑀬. 𑀦𑀺𑀤𑁆𑀥𑀼𑀦𑁂𑀬𑁆𑀬𑀸𑀢𑀺 𑀉𑀤𑁆𑀥𑀁𑀫𑀼𑀔𑀁 𑀓𑀢𑁆𑀯𑀸 𑀥𑀼𑀦𑁂𑀬𑁆𑀬. 𑀦𑀺𑀧𑁆𑀨𑁄𑀝𑁂𑀬𑁆𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀧𑁆𑀨𑁄𑀝𑁂𑀬𑁆𑀬. 𑀲𑀸𑀡𑀥𑁄𑀯𑀺𑀓𑀁 𑀦𑀸𑀫𑀸𑀢𑀺 𑀏𑀢𑁆𑀣 𑀫𑀦𑀼𑀲𑁆𑀲𑀸 𑀲𑀸𑀡𑀲𑀸𑀝𑀓𑀓𑀭𑀡𑀢𑁆𑀣𑀁 𑀲𑀸𑀡𑀯𑀸𑀓𑁂 𑀕𑀳𑁂𑀢𑁆𑀯𑀸 𑀫𑀼𑀝𑁆𑀞𑀺𑀁 𑀫𑀼𑀝𑁆𑀞𑀺𑀁 𑀩𑀦𑁆𑀥𑀺𑀢𑁆𑀯𑀸 𑀉𑀤𑀓𑁂 𑀧𑀓𑁆𑀔𑀺𑀧𑀦𑁆𑀢𑀺. 𑀢𑁂 𑀢𑀢𑀺𑀬𑀤𑀺𑀯𑀲𑁂 𑀲𑀼𑀝𑁆𑀞𑀼 𑀓𑀺𑀮𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀅𑀣 𑀫𑀦𑀼𑀲𑁆𑀲𑀸 𑀅𑀫𑁆𑀩𑀺𑀮𑀬𑀸𑀕𑀼𑀲𑀼𑀭𑀸𑀤𑀻𑀦𑀺 𑀆𑀤𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀸𑀡𑀫𑀼𑀝𑁆𑀞𑀺𑀁 𑀕𑀳𑁂𑀢𑁆𑀯𑀸, 𑀤𑀓𑁆𑀔𑀺𑀡𑀢𑁄 𑀯𑀸𑀫𑀢𑁄 𑀲𑀫𑁆𑀫𑀼𑀔𑀸 𑀘𑀸𑀢𑀺 𑀢𑀻𑀲𑀼 𑀨𑀮𑀓𑁂𑀲𑀼 𑀲𑀓𑀺𑀁 𑀤𑀓𑁆𑀔𑀺𑀡𑀨𑀮𑀓𑁂, 𑀲𑀓𑀺𑀁 𑀯𑀸𑀫𑀨𑀮𑀓𑁂, 𑀲𑀓𑀺𑀁 𑀲𑀫𑁆𑀫𑀼𑀔𑀨𑀮𑀓𑁂 𑀧𑀳𑀭𑀦𑁆𑀢𑀸 𑀅𑀫𑁆𑀩𑀺𑀮𑀬𑀸𑀕𑀼𑀲𑀼𑀭𑀸𑀤𑀻𑀦𑀺 𑀪𑀼𑀜𑁆𑀚𑀦𑁆𑀢𑀸 𑀧𑀺𑀯𑀦𑁆𑀢𑀸 𑀔𑀸𑀤𑀦𑁆𑀢𑀸 𑀥𑁄𑀯𑀦𑁆𑀢𑀺. 𑀫𑀳𑀦𑁆𑀢𑀸 𑀓𑀻𑀴𑀸 𑀳𑁄𑀢𑀺. 𑀭𑀜𑁆𑀜𑁄 𑀦𑀸𑀕𑁄 𑀢𑀁 𑀓𑀻𑀴𑀁 𑀤𑀺𑀲𑁆𑀯𑀸 𑀕𑀫𑁆𑀪𑀻𑀭𑀁 𑀉𑀤𑀓𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀲𑁄𑀡𑁆𑀟𑀸𑀬 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀲𑀓𑀺𑀁 𑀓𑀼𑀫𑁆𑀪𑁂 𑀲𑀓𑀺𑀁 𑀧𑀺𑀝𑁆𑀞𑀺𑀬𑀁 𑀲𑀓𑀺𑀁 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀲𑀓𑀺𑀁 𑀅𑀦𑁆𑀢𑀭𑀲𑀢𑁆𑀣𑀺𑀬𑀁 𑀧𑀓𑁆𑀔𑀺𑀧𑀦𑁆𑀢𑁄 𑀓𑀻𑀴𑀺𑀢𑁆𑀣. 𑀢𑀤𑀼𑀧𑀸𑀤𑀸𑀬 𑀢𑀁 𑀓𑀻𑀴𑀺𑀢𑀚𑀸𑀢𑀁 𑀲𑀸𑀡𑀥𑁄𑀯𑀺𑀓𑀁 𑀦𑀸𑀫 𑀯𑀼𑀘𑁆𑀘𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀲𑀸𑀡𑀥𑁄𑀯𑀺𑀓𑀁 𑀦𑀸𑀫 𑀓𑀻𑀴𑀺𑀢𑀚𑀸𑀢𑀁 𑀓𑀻𑀴𑀢𑀻’’𑀢𑀺. 𑀓𑀺𑀁 𑀲𑁄 𑀪𑀯𑀫𑀸𑀦𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄, 𑀬𑁄 𑀪𑀕𑀯𑀢𑁄 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀢𑀻𑀢𑀺 𑀬𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀪𑀕𑀯𑀢𑁄 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀢𑀺, 𑀲𑁄 𑀓𑀺𑀁 𑀪𑀯𑀫𑀸𑀦𑁄 𑀓𑀺𑀁 𑀬𑀓𑁆𑀔𑁄 𑀪𑀯𑀫𑀸𑀦𑁄 𑀉𑀤𑀸𑀳𑀼 𑀇𑀦𑁆𑀤𑁄, 𑀉𑀤𑀸𑀳𑀼 𑀩𑁆𑀭𑀳𑁆𑀫𑀸 𑀪𑀯𑀫𑀸𑀦𑁄 𑀪𑀕𑀯𑀢𑁄 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀢𑀺? 𑀦 𑀳𑀺 𑀲𑀓𑁆𑀓𑀸 𑀧𑀓𑀢𑀺𑀫𑀦𑀼𑀲𑁆𑀲𑁂𑀦 𑀪𑀕𑀯𑀢𑁄 𑀯𑀸𑀤𑀁 𑀆𑀭𑁄𑀧𑁂𑀢𑀼𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑁩𑁫𑁫. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀲𑀘𑁆𑀘𑀓𑁄 𑀆𑀭𑀸𑀫𑀁 𑀧𑀸𑀯𑀺𑀲𑀺, 𑀢𑀲𑁆𑀫𑀺𑀁. 𑀓𑀺𑀲𑁆𑀫𑀺𑀁 𑀧𑀦 𑀲𑀫𑀬𑁂 𑀧𑀸𑀯𑀺𑀲𑀻𑀢𑀺? 𑀫𑀳𑀸𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂. 𑀓𑀲𑁆𑀫𑀸 𑀧𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀗𑁆𑀓𑀫𑀦𑁆𑀢𑀻𑀢𑀺? 𑀧𑀡𑀻𑀢𑀪𑁄𑀚𑀦𑀧𑀘𑁆𑀘𑀬𑀲𑁆𑀲 𑀣𑀺𑀦𑀫𑀺𑀤𑁆𑀥𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀁. 𑀤𑀺𑀯𑀸𑀧𑀥𑀸𑀦𑀺𑀓𑀸 𑀯𑀸 𑀢𑁂. 𑀢𑀸𑀤𑀺𑀲𑀸𑀦𑀜𑁆𑀳𑀺 𑀧𑀘𑁆𑀙𑀸𑀪𑀢𑁆𑀢𑀁 𑀘𑀗𑁆𑀓𑀫𑀺𑀢𑁆𑀯𑀸 𑀦𑁆𑀳𑀢𑁆𑀯𑀸 𑀲𑀭𑀻𑀭𑀁 𑀉𑀢𑀼𑀁 𑀕𑀡𑁆𑀳𑀸𑀧𑁂𑀢𑁆𑀯𑀸 𑀦𑀺𑀲𑀚𑁆𑀚 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺. 𑀬𑁂𑀦 𑀢𑁂 𑀪𑀺𑀓𑁆𑀔𑀽𑀢𑀺 𑀲𑁄 𑀓𑀺𑀭 𑀓𑀼𑀳𑀺𑀁 𑀲𑀫𑀡𑁄 𑀕𑁄𑀢𑀫𑁄𑀢𑀺 𑀧𑀭𑀺𑀯𑁂𑀡𑀢𑁄 𑀧𑀭𑀺𑀯𑁂𑀡𑀁 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀢𑁆𑀯𑀸 𑀧𑀯𑀺𑀲𑀺𑀲𑁆𑀲𑀸𑀫𑀻𑀢𑀺 𑀯𑀺𑀮𑁄𑀓𑁂𑀦𑁆𑀢𑁄 𑀅𑀭𑀜𑁆𑀜𑁂 𑀳𑀢𑁆𑀣𑀻 𑀯𑀺𑀬 𑀘𑀗𑁆𑀓𑀫𑁂 𑀘𑀗𑁆𑀓𑀫𑀫𑀸𑀦𑁂 𑀧𑀁𑀲𑀼𑀓𑀽𑀮𑀺𑀓𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑀁 𑀲𑀦𑁆𑀥𑀸𑀬, ‘‘𑀬𑁂𑀦 𑀢𑁂 𑀪𑀺𑀓𑁆𑀔𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀳𑀁 𑀦𑀼 𑀔𑁄, 𑀪𑁄𑀢𑀺 𑀓𑀢𑀭𑀲𑁆𑀫𑀺𑀁 𑀆𑀯𑀸𑀲𑁂 𑀯𑀸 𑀫𑀡𑁆𑀟𑀧𑁂 𑀯𑀸𑀢𑀺 𑀅𑀢𑁆𑀣𑁄. 𑀏𑀲, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀪𑀕𑀯𑀸𑀢𑀺 𑀢𑀤𑀸 𑀓𑀺𑀭 𑀪𑀕𑀯𑀸 𑀧𑀘𑁆𑀘𑀽𑀲𑀓𑀸𑀮𑁂 𑀫𑀳𑀸𑀓𑀭𑀼𑀡𑀸 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀚𑀸𑀮𑀁 𑀧𑀢𑁆𑀣𑀭𑀺𑀢𑁆𑀯𑀸 𑀩𑁄𑀥𑀦𑁂𑀬𑁆𑀬𑀲𑀢𑁆𑀢𑀁 𑀑𑀮𑁄𑀓𑁂𑀦𑁆𑀢𑁄 𑀅𑀤𑁆𑀤𑀲 𑁋 ‘‘𑀲𑁆𑀯𑁂 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄 𑀫𑀳𑀢𑀺𑀁 𑀮𑀺𑀘𑁆𑀙𑀯𑀺𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀫𑀫 𑀯𑀸𑀤𑀁 𑀆𑀭𑁄𑀧𑁂𑀢𑀼𑀓𑀸𑀫𑁄 𑀆𑀕𑀫𑀺𑀲𑁆𑀲𑀢𑀻’’𑀢𑀺. 𑀢𑀲𑁆𑀫𑀸 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀯𑁂𑀲𑀸𑀮𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀫𑀳𑀸𑀧𑀭𑀺𑀲𑀸𑀬 𑀦𑀺𑀲𑀻𑀤𑀺𑀢𑀼𑀁 𑀲𑀼𑀔𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀲𑁆𑀲𑀸𑀫𑀻𑀢𑀺 𑀕𑀦𑁆𑀥𑀓𑀼𑀝𑀺𑀁 𑀅𑀧𑀯𑀺𑀲𑀺𑀢𑁆𑀯𑀸 𑀫𑀳𑀸𑀯𑀦𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺. 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀆𑀕𑀢𑀸, 𑀲𑀘𑁆𑀘𑀓𑁂𑀦 𑀧𑀼𑀝𑁆𑀞𑀸 𑀤𑀽𑀭𑁂 𑀦𑀺𑀲𑀺𑀦𑁆𑀦𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑁂𑀦𑁆𑀢𑀸, ‘‘𑀏𑀲 𑀅𑀕𑁆𑀕𑀺𑀯𑁂𑀲𑁆𑀲𑀦 𑀪𑀕𑀯𑀸’’𑀢𑀺 𑀆𑀳𑀁𑀲𑀼.

𑀫𑀳𑀢𑀺𑀬𑀸 𑀮𑀺𑀘𑁆𑀙𑀯𑀺𑀧𑀭𑀺𑀲𑀸𑀬 𑀲𑀤𑁆𑀥𑀺𑀦𑁆𑀢𑀺 𑀳𑁂𑀝𑁆𑀞𑀸 𑀧𑀜𑁆𑀘𑀫𑀢𑁆𑀢𑁂𑀳𑀺 𑀮𑀺𑀘𑁆𑀙𑀯𑀺𑀲𑀢𑁂𑀳𑀺 𑀧𑀭𑀺𑀯𑀼𑀢𑁄𑀢𑀺 𑀯𑀼𑀢𑁆𑀢𑀁. 𑀢𑁂 𑀏𑀢𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀸𑀬𑁂𑀯, 𑀅𑀦𑁆𑀢𑁄𑀯𑁂𑀲𑀸𑀮𑀺𑀬𑀁 𑀧𑀦 𑀲𑀘𑁆𑀘𑀓𑁄 𑀧𑀜𑁆𑀘𑀫𑀢𑁆𑀢𑀸𑀦𑀺 𑀮𑀺𑀘𑁆𑀙𑀯𑀺𑀭𑀸𑀚𑀲𑀢𑀸𑀦𑀺 𑀕𑀳𑁂𑀢𑁆𑀯𑀸, ‘‘𑀯𑀸𑀤𑀢𑁆𑀣𑀺𑀓𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀦𑁆𑀢𑁄’’𑀢𑀺 𑀲𑀼𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀧𑀡𑁆𑀟𑀺𑀢𑀸𑀦𑀁 𑀓𑀣𑀸𑀲𑀮𑁆𑀮𑀸𑀧𑀁 𑀲𑁄𑀲𑁆𑀲𑀸𑀫𑀸𑀢𑀺 𑀬𑁂𑀪𑀼𑀬𑁆𑀬𑁂𑀦 𑀫𑀦𑀼𑀲𑁆𑀲𑀸 𑀦𑀺𑀓𑁆𑀔𑀦𑁆𑀢𑀸, 𑀏𑀯𑀁 𑀲𑀸 𑀧𑀭𑀺𑀲𑀸 𑀫𑀳𑀢𑀻 𑀅𑀧𑀭𑀺𑀘𑁆𑀙𑀺𑀦𑁆𑀦𑀕𑀡𑀦𑀸 𑀅𑀳𑁄𑀲𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀅𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸𑀢𑀺 𑀏𑀢𑁂 𑀉𑀪𑀢𑁄𑀧𑀓𑁆𑀔𑀺𑀓𑀸, 𑀢𑁂 𑀏𑀯𑀁 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀲𑀘𑁂 𑀦𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀘𑁄𑀤𑁂𑀲𑁆𑀲𑀦𑁆𑀢𑀺, ‘𑀓𑀲𑁆𑀫𑀸 𑀢𑀼𑀫𑁆𑀳𑁂 𑀲𑀫𑀡𑀁 𑀕𑁄𑀢𑀫𑀁 𑀯𑀦𑁆𑀤𑀺𑀢𑁆𑀣𑀸’𑀢𑀺, 𑀢𑁂𑀲𑀁, ‘𑀓𑀺𑀁 𑀅𑀜𑁆𑀚𑀮𑀺𑀫𑀢𑁆𑀢𑀓𑀭𑀡𑁂𑀦𑀧𑀺 𑀯𑀦𑁆𑀤𑀺𑀢𑀁 𑀳𑁄𑀢𑀻’𑀢𑀺 𑀯𑀓𑁆𑀔𑀸𑀫. 𑀲𑀘𑁂 𑀦𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀘𑁄𑀤𑁂𑀲𑁆𑀲𑀦𑁆𑀢𑀺, ‘𑀓𑀲𑁆𑀫𑀸 𑀪𑀕𑀯𑀦𑁆𑀢𑀁 𑀦 𑀯𑀦𑁆𑀤𑀺𑀢𑁆𑀣𑀸’𑀢𑀺, ‘𑀓𑀺𑀁 𑀲𑀻𑀲𑁂𑀦 𑀪𑀽𑀫𑀺𑀁 𑀧𑀳𑀭𑀦𑁆𑀢𑁂𑀦𑁂𑀯 𑀯𑀦𑁆𑀤𑀺𑀢𑀁 𑀳𑁄𑀢𑀺, 𑀦𑀦𑀼 𑀅𑀜𑁆𑀚𑀮𑀺𑀓𑀫𑁆𑀫𑀫𑁆𑀧𑀺 𑀯𑀦𑁆𑀤𑀦𑀸 𑀏𑀯𑀸’𑀢𑀺 𑀯𑀓𑁆𑀔𑀸𑀫𑀸’’𑀢𑀺. 𑀦𑀸𑀫 𑀕𑁄𑀢𑁆𑀢𑀦𑁆𑀢𑀺, 𑀪𑁄 𑀕𑁄𑀢𑀫, 𑀅𑀳𑀁 𑀅𑀲𑀼𑀓𑀲𑁆𑀲 𑀧𑀼𑀢𑁆𑀢𑁄 𑀤𑀢𑁆𑀢𑁄 𑀦𑀸𑀫 𑀫𑀺𑀢𑁆𑀢𑁄 𑀦𑀸𑀫 𑀇𑀥 𑀆𑀕𑀢𑁄𑀢𑀺 𑀯𑀤𑀦𑁆𑀢𑀸 𑀦𑀸𑀫𑀁 𑀲𑀸𑀯𑁂𑀦𑁆𑀢𑀺 𑀦𑀸𑀫. 𑀪𑁄 𑀕𑁄𑀢𑀫, 𑀅𑀳𑀁 𑀯𑀸𑀲𑀺𑀝𑁆𑀞𑁄 𑀦𑀸𑀫 𑀓𑀘𑁆𑀘𑀸𑀦𑁄 𑀦𑀸𑀫 𑀇𑀥 𑀆𑀕𑀢𑁄𑀢𑀺 𑀯𑀤𑀦𑁆𑀢𑀸 𑀕𑁄𑀢𑁆𑀢𑀁 𑀲𑀸𑀯𑁂𑀦𑁆𑀢𑀺 𑀦𑀸𑀫. 𑀏𑀢𑁂 𑀓𑀺𑀭 𑀤𑀮𑀺𑀤𑁆𑀤𑀸 𑀚𑀺𑀡𑁆𑀡𑀓𑀼𑀮𑀧𑀼𑀢𑁆𑀢𑀸 𑀧𑀭𑀺𑀲𑀫𑀚𑁆𑀛𑁂 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀧𑀸𑀓𑀝𑀸 𑀪𑀯𑀺𑀲𑁆𑀲𑀸𑀫𑀸𑀢𑀺 𑀏𑀯𑀁 𑀅𑀓𑀁𑀲𑀼. 𑀬𑁂 𑀧𑀦 𑀢𑀼𑀡𑁆𑀳𑀻𑀪𑀽𑀢𑀸 𑀦𑀺𑀲𑀻𑀤𑀺𑀁𑀲𑀼, 𑀢𑁂 𑀓𑁂𑀭𑀸𑀝𑀺𑀓𑀸 𑀘𑁂𑀯 𑀅𑀦𑁆𑀥𑀩𑀸𑀮𑀸 𑀘. 𑀢𑀢𑁆𑀣 𑀓𑁂𑀭𑀸𑀝𑀺𑀓𑀸, ‘‘𑀏𑀓𑀁 𑀤𑁆𑀯𑁂 𑀓𑀣𑀸𑀲𑀮𑁆𑀮𑀸𑀧𑁂 𑀓𑀭𑁄𑀦𑁆𑀢𑁄 𑀯𑀺𑀲𑁆𑀲𑀸𑀲𑀺𑀓𑁄 𑀳𑁄𑀢𑀺, 𑀅𑀣 𑀯𑀺𑀲𑁆𑀲𑀸𑀲𑁂 𑀲𑀢𑀺 𑀏𑀓𑀁 𑀤𑁆𑀯𑁂 𑀪𑀺𑀓𑁆𑀔𑀸 𑀅𑀤𑀸𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀢𑀢𑁄 𑀅𑀢𑁆𑀢𑀸𑀦𑀁 𑀫𑁄𑀘𑁂𑀦𑁆𑀢𑀸 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺. 𑀅𑀦𑁆𑀥𑀩𑀸𑀮𑀸 𑀅𑀜𑁆𑀜𑀸𑀡𑀢𑀸𑀬𑁂𑀯 𑀅𑀯𑀓𑁆𑀔𑀺𑀢𑁆𑀢𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑁄 𑀯𑀺𑀬 𑀬𑀢𑁆𑀣 𑀓𑀢𑁆𑀣𑀘𑀺 𑀢𑀼𑀡𑁆𑀳𑀻𑀪𑀽𑀢𑀸 𑀦𑀺𑀲𑀻𑀤𑀦𑁆𑀢𑀺.

𑁩𑁫𑁬. 𑀓𑀺𑀜𑁆𑀘𑀺𑀤𑁂𑀯 𑀤𑁂𑀲𑀦𑁆𑀢𑀺 𑀓𑀜𑁆𑀘𑀺 𑀑𑀓𑀸𑀲𑀁 𑀓𑀺𑀜𑁆𑀘𑀺 𑀓𑀸𑀭𑀡𑀁, 𑀅𑀣𑀲𑁆𑀲 𑀪𑀕𑀯𑀸 𑀧𑀜𑁆𑀳𑀧𑀼𑀘𑁆𑀙𑀦𑁂 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁄 𑀆𑀳 𑁋 𑀧𑀼𑀘𑁆𑀙, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀬𑀤𑀸𑀓𑀗𑁆𑀔𑀲𑀻𑀢𑀺. 𑀢𑀲𑁆𑀲𑀢𑁆𑀣𑁄 𑁋 ‘‘𑀧𑀼𑀘𑁆𑀙 𑀬𑀤𑀺 𑀆𑀓𑀗𑁆𑀔𑀲𑀺, 𑀦 𑀫𑁂 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂 𑀪𑀸𑀭𑁄 𑀅𑀢𑁆𑀣𑀺’’. 𑀅𑀣 𑀯𑀸 ‘‘𑀧𑀼𑀘𑁆𑀙 𑀬𑀁 𑀆𑀓𑀗𑁆𑀔𑀲𑀺, 𑀲𑀩𑁆𑀩𑀁 𑀢𑁂 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀻’’𑀢𑀺 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀺 𑀅𑀲𑀸𑀥𑀸𑀭𑀡𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀅𑀕𑁆𑀕𑀲𑀸𑀯𑀫𑀳𑀸𑀲𑀸𑀯𑀓𑁂𑀳𑀺. 𑀢𑁂 𑀳𑀺 𑀬𑀤𑀸𑀓𑀗𑁆𑀔𑀲𑀻𑀢𑀺 𑀦 𑀯𑀤𑀦𑁆𑀢𑀺, 𑀲𑀼𑀢𑁆𑀯𑀸 𑀯𑁂𑀤𑀺𑀲𑁆𑀲𑀸𑀫𑀸𑀢𑀺 𑀯𑀤𑀦𑁆𑀢𑀺. 𑀩𑀼𑀤𑁆𑀥𑀸 𑀧𑀦 ‘‘𑀧𑀼𑀘𑁆𑀙𑀸𑀯𑀼𑀲𑁄, 𑀬𑀤𑀸𑀓𑀗𑁆𑀔𑀲𑀻’’𑀢𑀺 (𑀲𑀁. 𑀦𑀺. 𑁧.𑁨𑁩𑁭) 𑀯𑀸, ‘‘𑀧𑀼𑀘𑁆𑀙, 𑀫𑀳𑀸𑀭𑀸𑀚, 𑀬𑀤𑀸𑀓𑀗𑁆𑀔𑀲𑀻’’𑀢𑀺 (𑀤𑀻. 𑀦𑀺. 𑁧.𑁧𑁬𑁨) 𑀯𑀸,

‘‘𑀧𑀼𑀘𑁆𑀙 𑀯𑀸𑀲𑀯 𑀫𑀁 𑀧𑀜𑁆𑀳𑀁, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺;

𑀢𑀲𑁆𑀲 𑀢𑀲𑁆𑀲𑁂𑀯 𑀧𑀜𑁆𑀳𑀲𑁆𑀲, 𑀅𑀳𑀁 𑀅𑀦𑁆𑀢𑀁 𑀓𑀭𑁄𑀫𑀺 𑀢𑁂’’ 𑀇𑀢𑀺. (𑀤𑀻. 𑀦𑀺. 𑁨.𑁩𑁫𑁬) 𑀯𑀸,

‘‘𑀢𑁂𑀦 𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀲𑀓𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀼𑀘𑁆𑀙 𑀬𑀤𑀸𑀓𑀗𑁆𑀔𑀲𑀻’’𑀢𑀺 (𑀫. 𑀦𑀺. 𑁩.𑁮𑁫) 𑀯𑀸,

‘‘𑀩𑀸𑀯𑀭𑀺𑀲𑁆𑀲 𑀘 𑀢𑀼𑀬𑁆𑀳𑀁 𑀯𑀸, 𑀲𑀩𑁆𑀩𑁂𑀲𑀁 𑀲𑀩𑁆𑀩𑀲𑀁𑀲𑀬𑀁;

𑀓𑀢𑀸𑀯𑀓𑀸𑀲𑀸 𑀧𑀼𑀘𑁆𑀙𑀯𑁆𑀳𑁄, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀣𑀸’’𑀢𑀺. (𑀲𑀼. 𑀦𑀺. 𑁧𑁦𑁩𑁬) 𑀯𑀸,

‘‘𑀧𑀼𑀘𑁆𑀙 𑀫𑀁 𑀲𑀪𑀺𑀬 𑀧𑀜𑁆𑀳𑀁, 𑀬𑀁 𑀓𑀺𑀜𑁆𑀘𑀺 𑀫𑀦𑀲𑀺𑀘𑁆𑀙𑀲𑀺;

𑀢𑀲𑁆𑀲 𑀢𑀲𑁆𑀲𑁂𑀯 𑀧𑀜𑁆𑀳𑀲𑁆𑀲, 𑀅𑀳𑀁 𑀅𑀦𑁆𑀢𑀁 𑀓𑀭𑁄𑀫𑀺 𑀢𑁂’’ 𑀇𑀢𑀺. (𑀲𑀼. 𑀦𑀺. 𑁫𑁧𑁭) 𑀯𑀸 𑁋

𑀢𑁂𑀲𑀁 𑀢𑁂𑀲𑀁 𑀬𑀓𑁆𑀔𑀦𑀭𑀺𑀦𑁆𑀤𑀤𑁂𑀯𑀲𑀫𑀡𑀩𑁆𑀭𑀸𑀳𑁆𑀫𑀡𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀦𑁆𑀢𑀺. 𑀅𑀦𑀘𑁆𑀙𑀭𑀺𑀬𑀜𑁆𑀘𑁂𑀢𑀁, 𑀬𑀁 𑀪𑀕𑀯𑀸 𑀩𑀼𑀤𑁆𑀥𑀪𑀽𑀫𑀺𑀁 𑀧𑀢𑁆𑀯𑀸 𑀏𑀢𑀁 𑀧𑀯𑀸𑀭𑀡𑀁 𑀧𑀯𑀸𑀭𑁂𑀬𑁆𑀬. 𑀬𑁄 𑀩𑁄𑀥𑀺𑀲𑀢𑁆𑀢𑀪𑀽𑀫𑀺𑀬𑀁 𑀧𑀤𑁂𑀲𑀜𑀸𑀡𑁂𑀧𑀺 𑀞𑀺𑀢𑁄

‘‘𑀓𑁄𑀡𑁆𑀟𑀜𑁆𑀜 𑀧𑀜𑁆𑀳𑀸𑀦𑀺 𑀯𑀺𑀬𑀸𑀓𑀭𑁄𑀳𑀺,

𑀬𑀸𑀘𑀦𑁆𑀢𑀺 𑀢𑀁 𑀇𑀲𑀬𑁄 𑀲𑀸𑀥𑀼𑀭𑀽𑀧𑀸;

𑀓𑁄𑀡𑁆𑀟𑀜𑁆𑀜 𑀏𑀲𑁄 𑀫𑀦𑀼𑀚𑁂𑀲𑀼 𑀥𑀫𑁆𑀫𑁄,

𑀬𑀁 𑀯𑀼𑀤𑁆𑀥𑀫𑀸𑀕𑀘𑁆𑀙𑀢𑀺 𑀏𑀲 𑀪𑀸𑀭𑁄’’𑀢𑀺. (𑀚𑀸. 𑁨.𑁧𑁭.𑁬𑁦) 𑁋

𑀏𑀯𑀁 𑀲𑀓𑁆𑀓𑀸𑀤𑀻𑀦𑀁 𑀅𑀢𑁆𑀣𑀸𑀬 𑀇𑀲𑀻𑀳𑀺 𑀬𑀸𑀘𑀺𑀢𑁄

‘‘𑀓𑀢𑀸𑀯𑀓𑀸𑀲𑀸 𑀧𑀼𑀘𑁆𑀙𑀦𑁆𑀢𑀼 𑀪𑁄𑀦𑁆𑀢𑁄,

𑀬𑀁 𑀓𑀺𑀜𑁆𑀘𑀺 𑀧𑀜𑁆𑀳𑀁 𑀫𑀦𑀲𑀸𑀪𑀺𑀧𑀢𑁆𑀣𑀺𑀢𑀁;

𑀅𑀳𑀜𑁆𑀳𑀺 𑀢𑀁 𑀢𑀁 𑀯𑁄 𑀯𑀺𑀬𑀸𑀓𑀭𑀺𑀲𑁆𑀲𑀁,

𑀜𑀢𑁆𑀯𑀸 𑀲𑀬𑀁 𑀮𑁄𑀓𑀫𑀺𑀫𑀁 𑀧𑀭𑀜𑁆𑀘𑀸’’𑀢𑀺. (𑀚𑀸. 𑁨.𑁧𑁭.𑁬𑁧);

𑀏𑀯𑀁 𑀲𑀭𑀪𑀗𑁆𑀕𑀓𑀸𑀮𑁂, 𑀲𑀫𑁆𑀪𑀯𑀚𑀸𑀢𑀓𑁂 𑀘 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀢𑀺𑀓𑁆𑀔𑀢𑁆𑀢𑀼𑀁 𑀯𑀺𑀘𑀭𑀺𑀢𑁆𑀯𑀸 𑀧𑀜𑁆𑀳𑀸𑀦𑀁 𑀅𑀦𑁆𑀢𑀓𑀭𑀁 𑀅𑀤𑀺𑀲𑁆𑀯𑀸 𑀲𑀼𑀘𑀺𑀭𑀢𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀑𑀓𑀸𑀲𑁂 𑀓𑀸𑀭𑀺𑀢𑁂, 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑁄 𑀭𑀣𑀺𑀓𑀸𑀬𑀁 𑀧𑀁𑀲𑀼𑀁 𑀓𑀻𑀴𑀦𑁆𑀢𑁄 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀬𑀁 𑀦𑀺𑀲𑀺𑀦𑁆𑀦𑁄𑀯 𑁋

‘‘𑀢𑀕𑁆𑀖 𑀢𑁂 𑀅𑀳𑀫𑀓𑁆𑀔𑀺𑀲𑁆𑀲𑀁, 𑀬𑀣𑀸𑀧𑀺 𑀓𑀼𑀲𑀮𑁄 𑀢𑀣𑀸;

𑀭𑀸𑀚𑀸 𑀘 𑀔𑁄 𑀢𑀁 𑀚𑀸𑀦𑀸𑀢𑀺, 𑀬𑀤𑀺 𑀓𑀸𑀳𑀢𑀺 𑀯𑀸 𑀦 𑀯𑀸’’𑀢𑀺. (𑀚𑀸. 𑁧.𑁧𑁬.𑁧𑁭𑁨) 𑁋

𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀺.

𑀏𑀯𑀁 𑀪𑀕𑀯𑀢𑀸 𑀲𑀩𑁆𑀩𑀜𑁆𑀜𑀼𑀧𑀯𑀸𑀭𑀡𑀸𑀬 𑀧𑀯𑀸𑀭𑀺𑀢𑀸𑀬 𑀅𑀢𑁆𑀢𑀫𑀦𑁄 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄, ‘‘𑀓𑀣𑀁 𑀧𑀦, 𑀪𑁄 𑀕𑁄𑀢𑀫𑀸’’𑀢𑀺𑀆𑀤𑀺𑀫𑀸𑀳.

𑀅𑀣𑀲𑁆𑀲 𑀪𑀕𑀯𑀸, ‘‘𑀧𑀲𑁆𑀲𑀣, 𑀪𑁄, 𑀅𑀜𑁆𑀜𑀁 𑀲𑀸𑀯𑀓𑁂𑀦 𑀓𑀣𑀺𑀢𑀁, 𑀅𑀜𑁆𑀜𑀁 𑀲𑀢𑁆𑀣𑀸 𑀓𑀣𑁂𑀢𑀺, 𑀦𑀦𑀼 𑀫𑀬𑀸 𑀧𑀝𑀺𑀓𑀘𑁆𑀘𑁂𑀯 𑀯𑀼𑀢𑁆𑀢𑀁, ‘𑀲𑀘𑁂 𑀢𑀣𑀸 𑀧𑀢𑀺𑀝𑁆𑀞𑀺𑀲𑁆𑀲𑀢𑀺, 𑀬𑀣𑀸𑀲𑁆𑀲 𑀲𑀸𑀯𑀓𑁂𑀦 𑀧𑀢𑀺𑀝𑁆𑀞𑀺𑀢𑀁, 𑀏𑀯𑀸𑀳𑀁 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫𑀻’𑀢𑀺. 𑀅𑀬𑀁 𑀧𑀦 𑀅𑀜𑁆𑀜𑀫𑁂𑀯 𑀓𑀣𑁂𑀢𑀺, 𑀢𑀢𑁆𑀣 𑀓𑀺𑀁 𑀫𑀬𑀸 𑀲𑀓𑁆𑀓𑀸 𑀓𑀸𑀢𑀼’’𑀦𑁆𑀢𑀺 𑀏𑀯𑀁 𑀦𑀺𑀕𑀡𑁆𑀞𑀲𑁆𑀲 𑀯𑀘𑀦𑁄𑀓𑀸𑀲𑁄 𑀫𑀸 𑀳𑁄𑀢𑀽𑀢𑀺 𑀳𑁂𑀝𑁆𑀞𑀸 𑀅𑀲𑁆𑀲𑀚𑀺𑀢𑁆𑀣𑁂𑀭𑁂𑀦 𑀓𑀣𑀺𑀢𑀦𑀺𑀬𑀸𑀫𑁂𑀦𑁂𑀯 𑀓𑀣𑁂𑀦𑁆𑀢𑁄, 𑀏𑀯𑀁 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦𑀸𑀢𑀺𑀆𑀤𑀺𑀫𑀸𑀳. 𑀉𑀧𑀫𑀸 𑀫𑀁, 𑀪𑁄 𑀕𑁄𑀢𑀫, 𑀧𑀝𑀺𑀪𑀸𑀢𑀻𑀢𑀺, 𑀪𑁄 𑀕𑁄𑀢𑀫, 𑀫𑀬𑁆𑀳𑀁 𑀏𑀓𑀸 𑀉𑀧𑀫𑀸 𑀉𑀧𑀝𑁆𑀞𑀸𑀢𑀺, 𑀆𑀳𑀭𑀸𑀫𑀺 𑀢𑀁 𑀉𑀧𑀫𑀦𑁆𑀢𑀺 𑀯𑀤𑀢𑀺. 𑀧𑀝𑀺𑀪𑀸𑀢𑀼 𑀢𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦𑀸𑀢𑀺 𑀉𑀧𑀝𑁆𑀞𑀸𑀢𑀼 𑀢𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀆𑀳𑀭 𑀢𑀁 𑀉𑀧𑀫𑀁 𑀯𑀺𑀲𑀢𑁆𑀣𑁄𑀢𑀺 𑀪𑀕𑀯𑀸 𑀅𑀯𑁄𑀘. 𑀩𑀮𑀓𑀭𑀡𑀻𑀬𑀸𑀢𑀺 𑀩𑀸𑀳𑀼𑀩𑀮𑁂𑀦 𑀓𑀢𑁆𑀢𑀩𑁆𑀩𑀸 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀓𑀸 𑀓𑀫𑁆𑀫𑀦𑁆𑀢𑀸. 𑀭𑀽𑀧𑀢𑁆𑀢𑀸𑀬𑀁 𑀧𑀼𑀭𑀺𑀲𑀧𑀼𑀕𑁆𑀕𑀮𑁄𑀢𑀺 𑀭𑀽𑀧𑀁 𑀅𑀢𑁆𑀢𑀸 𑀅𑀲𑁆𑀲𑀸𑀢𑀺 𑀭𑀽𑀧𑀢𑁆𑀢𑀸, 𑀭𑀽𑀧𑀁 𑀅𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸 𑀞𑀺𑀢𑀧𑀼𑀕𑁆𑀕𑀮𑀁 𑀤𑀻𑀧𑁂𑀢𑀺. 𑀭𑀽𑀧𑁂 𑀧𑀢𑀺𑀝𑁆𑀞𑀸𑀬𑀸𑀢𑀺 𑀢𑀲𑁆𑀫𑀺𑀁 𑀅𑀢𑁆𑀢𑀸𑀢𑀺 𑀕𑀳𑀺𑀢𑀭𑀽𑀧𑁂 𑀧𑀢𑀺𑀝𑁆𑀞𑀳𑀺𑀢𑁆𑀯𑀸. 𑀧𑀼𑀜𑁆𑀜𑀁 𑀯𑀸 𑀅𑀧𑀼𑀜𑁆𑀜𑀁 𑀯𑀸 𑀧𑀲𑀯𑀢𑀻𑀢𑀺 𑀓𑀼𑀲𑀮𑀁 𑀯𑀸 𑀅𑀓𑀼𑀲𑀮𑀁 𑀯𑀸 𑀧𑀝𑀺𑀮𑀪𑀢𑀺. 𑀯𑁂𑀤𑀦𑀢𑁆𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀺𑀦𑀸 𑀓𑀺𑀁 𑀤𑀻𑀧𑁂𑀢𑀺? 𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑀸 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀧𑀣𑀯𑀻 𑀯𑀺𑀬 𑀧𑀢𑀺𑀝𑁆𑀞𑀸, 𑀢𑁂 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀧𑀢𑀺𑀝𑁆𑀞𑀸𑀬 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁 𑀦𑀸𑀫 𑀆𑀬𑀽𑀳𑀦𑁆𑀢𑀺. 𑀢𑀼𑀫𑁆𑀳𑁂 𑀏𑀯𑀭𑀽𑀧𑀁 𑀯𑀺𑀚𑁆𑀚𑀫𑀸𑀦𑀫𑁂𑀯 𑀅𑀢𑁆𑀢𑀸𑀦𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀦𑀢𑁆𑀢𑀸𑀢𑀺 𑀤𑀻𑀧𑁂𑀣𑀸𑀢𑀺 𑀅𑀢𑀺𑀯𑀺𑀬 𑀲𑀓𑀸𑀭𑀡𑀁 𑀓𑀢𑁆𑀯𑀸 𑀉𑀧𑀫𑀁 𑀆𑀳𑀭𑀺. 𑀇𑀫𑀺𑀦𑀸 𑀘 𑀦𑀺𑀕𑀡𑁆𑀞𑁂𑀦 𑀆𑀳𑀝𑀑𑀧𑀫𑁆𑀫𑀁 𑀦𑀺𑀬𑀢𑀫𑁂𑀯, 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀢𑁄 𑀅𑀜𑁆𑀜𑁄 𑀢𑀲𑁆𑀲 𑀓𑀣𑀁 𑀙𑀺𑀦𑁆𑀤𑀺𑀢𑁆𑀯𑀸 𑀯𑀸𑀤𑁂 𑀤𑁄𑀲𑀁 𑀤𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀤𑀼𑀯𑀺𑀥𑀸 𑀳𑀺 𑀧𑀼𑀕𑁆𑀕𑀮𑀸 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑀸 𑀘 𑀲𑀸𑀯𑀓𑀯𑁂𑀦𑁂𑀬𑁆𑀬𑀸 𑀘. 𑀲𑀸𑀯𑀓𑀯𑁂𑀦𑁂𑀬𑁆𑀬𑁂 𑀲𑀸𑀯𑀓𑀸𑀧𑀺 𑀯𑀺𑀦𑁂𑀦𑁆𑀢𑀺 𑀩𑀼𑀤𑁆𑀥𑀸𑀧𑀺. 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑁂 𑀧𑀦 𑀲𑀸𑀯𑀓𑀸 𑀯𑀺𑀦𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀩𑀼𑀤𑁆𑀥𑀸𑀯 𑀯𑀺𑀦𑁂𑀦𑁆𑀢𑀺. 𑀅𑀬𑀫𑁆𑀧𑀺 𑀦𑀺𑀕𑀡𑁆𑀞𑁄 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑁄, 𑀢𑀲𑁆𑀫𑀸 𑀏𑀢𑀲𑁆𑀲 𑀯𑀸𑀤𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑁄 𑀤𑁄𑀲𑀁 𑀤𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀢𑁂𑀦𑀲𑁆𑀲 𑀪𑀕𑀯𑀸 𑀲𑀬𑀫𑁂𑀯 𑀯𑀸𑀤𑁂 𑀤𑁄𑀲𑀤𑀲𑁆𑀲𑀦𑀢𑁆𑀣𑀁 𑀦𑀦𑀼 𑀢𑁆𑀯𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦𑀸𑀢𑀺𑀆𑀤𑀺𑀫𑀸𑀳.

𑀅𑀣 𑀦𑀺𑀕𑀡𑁆𑀞𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀢𑀺𑀯𑀺𑀬 𑀲𑀫𑀡𑁄 𑀕𑁄𑀢𑀫𑁄 𑀫𑀫 𑀯𑀸𑀤𑀁 𑀧𑀢𑀺𑀝𑁆𑀞𑀧𑁂𑀢𑀺, 𑀲𑀘𑁂 𑀉𑀧𑀭𑀺 𑀓𑁄𑀘𑀺 𑀤𑁄𑀲𑁄 𑀪𑀯𑀺𑀲𑁆𑀲𑀢𑀺, 𑀫𑀫𑀁 𑀏𑀓𑀓𑀁𑀬𑁂𑀯 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀢𑀺. 𑀳𑀦𑁆𑀤𑀸𑀳𑀁 𑀇𑀫𑀁 𑀯𑀸𑀤𑀁 𑀫𑀳𑀸𑀚𑀦𑀲𑁆𑀲𑀸𑀧𑀺 𑀫𑀢𑁆𑀣𑀓𑁂 𑀧𑀓𑁆𑀔𑀺𑀧𑀸𑀫𑀻’’𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳 𑁋 𑀅𑀳𑀫𑁆𑀧𑀺, 𑀪𑁄 𑀕𑁄𑀢𑀫, 𑀏𑀯𑀁 𑀯𑀤𑀸𑀫𑀺 𑀭𑀽𑀧𑀁 𑀫𑁂 𑀅𑀢𑁆𑀢𑀸…𑀧𑁂… 𑀯𑀺𑀜𑁆𑀜𑀸𑀡𑀁 𑀫𑁂 𑀅𑀢𑁆𑀢𑀸𑀢𑀺, 𑀅𑀬𑀜𑁆𑀘 𑀫𑀳𑀢𑀻 𑀚𑀦𑀢𑀸𑀢𑀺. 𑀪𑀕𑀯𑀸 𑀧𑀦 𑀦𑀺𑀕𑀡𑁆𑀞𑀢𑁄 𑀲𑀢𑀕𑀼𑀡𑁂𑀦𑀧𑀺 𑀲𑀳𑀲𑁆𑀲𑀕𑀼𑀡𑁂𑀦𑀧𑀺 𑀲𑀢𑀲𑀳𑀲𑁆𑀲𑀕𑀼𑀡𑁂𑀦𑀧𑀺 𑀯𑀸𑀤𑀻𑀯𑀭𑀢𑀭𑁄, 𑀢𑀲𑁆𑀫𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀦𑀺𑀕𑀡𑁆𑀞𑁄 𑀅𑀢𑁆𑀢𑀸𑀦𑀁 𑀫𑁄𑀘𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀫𑀢𑁆𑀣𑀓𑁂 𑀯𑀸𑀤𑀁 𑀧𑀓𑁆𑀔𑀺𑀧𑀢𑀺, 𑀦𑀸𑀲𑁆𑀲 𑀅𑀢𑁆𑀢𑀸𑀦𑀁 𑀫𑁄𑀘𑁂𑀢𑀼𑀁 𑀤𑀲𑁆𑀲𑀸𑀫𑀺, 𑀫𑀳𑀸𑀚𑀦𑀢𑁄 𑀦𑀺𑀯𑀢𑁆𑀢𑁂𑀢𑁆𑀯𑀸 𑀏𑀓𑀓𑀁𑀬𑁂𑀯 𑀦𑀁 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀓𑀺𑀜𑁆𑀳𑀺 𑀢𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦𑀸𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀦𑀸𑀬𑀁 𑀚𑀦𑀢𑀸 𑀫𑀫 𑀯𑀸𑀤𑀁 𑀆𑀭𑁄𑀧𑁂𑀢𑀼𑀁 𑀆𑀕𑀢𑀸, 𑀢𑁆𑀯𑀁𑀬𑁂𑀯 𑀲𑀓𑀮𑀁 𑀯𑁂𑀲𑀸𑀮𑀺𑀁 𑀲𑀁𑀯𑀝𑁆𑀝𑀺𑀢𑁆𑀯𑀸 𑀫𑀫 𑀯𑀸𑀤𑀁 𑀆𑀭𑁄𑀧𑁂𑀢𑀼𑀁 𑀆𑀕𑀢𑁄, 𑀢𑀲𑁆𑀫𑀸 𑀢𑁆𑀯𑀁 𑀲𑀓𑀫𑁂𑀯 𑀯𑀸𑀤𑀁 𑀦𑀺𑀯𑁂𑀞𑁂𑀳𑀺, 𑀫𑀸 𑀫𑀳𑀸𑀚𑀦𑀲𑁆𑀲 𑀫𑀢𑁆𑀣𑀓𑁂 𑀧𑀓𑁆𑀔𑀺𑀧𑀲𑀻𑀢𑀺. 𑀲𑁄 𑀧𑀝𑀺𑀚𑀸𑀦𑀦𑁆𑀢𑁄 𑀅𑀳𑀜𑁆𑀳𑀺, 𑀪𑁄 𑀕𑁄𑀢𑀫𑀸𑀢𑀺𑀆𑀤𑀺𑀫𑀸𑀳.

𑁩𑁫𑁭. 𑀇𑀢𑀺 𑀪𑀕𑀯𑀸 𑀦𑀺𑀕𑀡𑁆𑀞𑀲𑁆𑀲 𑀯𑀸𑀤𑀁 𑀧𑀢𑀺𑀝𑁆𑀞𑀧𑁂𑀢𑁆𑀯𑀸, 𑀢𑁂𑀦 𑀳𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦𑀸𑀢𑀺 𑀧𑀼𑀘𑁆𑀙𑀁 𑀆𑀭𑀪𑀺. 𑀢𑀢𑁆𑀣 𑀢𑁂𑀦 𑀳𑀻𑀢𑀺 𑀓𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄. 𑀬𑀲𑁆𑀫𑀸 𑀢𑁆𑀯𑀁 𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀢𑁆𑀢𑀢𑁄 𑀧𑀝𑀺𑀚𑀸𑀦𑀸𑀲𑀺, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀲𑀓𑀲𑁆𑀫𑀺𑀁 𑀯𑀺𑀚𑀺𑀢𑁂𑀢𑀺 𑀅𑀢𑁆𑀢𑀦𑁄 𑀭𑀝𑁆𑀞𑁂. 𑀖𑀸𑀢𑁂𑀢𑀸𑀬𑀁 𑀯𑀸 𑀖𑀸𑀢𑁂𑀢𑀼𑀦𑁆𑀢𑀺 𑀖𑀸𑀢𑀸𑀭𑀳𑀁 𑀖𑀸𑀢𑁂𑀢𑀩𑁆𑀩𑀬𑀼𑀢𑁆𑀢𑀓𑀁 𑀖𑀸𑀢𑁂𑀢𑀼𑀁. 𑀚𑀸𑀧𑁂𑀢𑀸𑀬𑀁 𑀯𑀸 𑀚𑀸𑀧𑁂𑀢𑀼𑀦𑁆𑀢𑀺 𑀥𑀦𑀚𑀸𑀦𑀺𑀭𑀳𑀁 𑀚𑀸𑀧𑁂𑀢𑀩𑁆𑀩𑀬𑀼𑀢𑁆𑀢𑀁 𑀚𑀸𑀧𑁂𑀢𑀼𑀁 𑀚𑀺𑀡𑁆𑀡𑀥𑀦𑀁 𑀓𑀸𑀢𑀼𑀁. 𑀧𑀩𑁆𑀩𑀸𑀚𑁂𑀢𑀸𑀬𑀁 𑀯𑀸 𑀧𑀩𑁆𑀩𑀸𑀚𑁂𑀢𑀼𑀦𑁆𑀢𑀺 𑀲𑀓𑀭𑀝𑁆𑀞𑀢𑁄 𑀧𑀩𑁆𑀩𑀸𑀚𑀦𑀸𑀭𑀳𑀁 𑀧𑀩𑁆𑀩𑀸𑀚𑁂𑀢𑀼𑀁, 𑀦𑀻𑀳𑀭𑀺𑀢𑀼𑀁. 𑀯𑀢𑁆𑀢𑀺𑀢𑀼𑀜𑁆𑀘 𑀅𑀭𑀳𑀢𑀻𑀢𑀺 𑀯𑀢𑁆𑀢𑀢𑀺 𑀘𑁂𑀯 𑀯𑀢𑁆𑀢𑀺𑀢𑀼𑀜𑁆𑀘 𑀅𑀭𑀳𑀢𑀺. 𑀯𑀢𑁆𑀢𑀺𑀢𑀼𑀁 𑀬𑀼𑀢𑁆𑀢𑁄𑀢𑀺 𑀤𑀻𑀧𑁂𑀢𑀺. 𑀇𑀢𑀺 𑀦𑀺𑀕𑀡𑁆𑀞𑁄 𑀅𑀢𑁆𑀢𑀦𑁄 𑀯𑀸𑀤𑀪𑁂𑀤𑀦𑀢𑁆𑀣𑀁 𑀆𑀳𑀝𑀓𑀸𑀭𑀡𑀫𑁂𑀯 𑀅𑀢𑁆𑀢𑀦𑁄 𑀫𑀸𑀭𑀡𑀢𑁆𑀣𑀸𑀬 𑀆𑀯𑀼𑀥𑀁 𑀢𑀺𑀔𑀺𑀡𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀯𑀺𑀲𑁂𑀲𑁂𑀢𑁆𑀯𑀸 𑀤𑀻𑀧𑁂𑀢𑀺, 𑀬𑀣𑀸 𑀢𑀁 𑀩𑀸𑀮𑁄. 𑀏𑀯𑀁 𑀫𑁂 𑀭𑀽𑀧𑀁 𑀳𑁄𑀢𑀽𑀢𑀺 𑀫𑀫 𑀭𑀽𑀧𑀁 𑀏𑀯𑀁𑀯𑀺𑀥𑀁 𑀳𑁄𑀢𑀼, 𑀧𑀸𑀲𑀸𑀤𑀺𑀓𑀁 𑀅𑀪𑀺𑀭𑀽𑀧𑀁 𑀅𑀮𑀗𑁆𑀓𑀢𑀧𑁆𑀧𑀝𑀺𑀬𑀢𑁆𑀢𑀁 𑀲𑀼𑀯𑀡𑁆𑀡𑀢𑁄𑀭𑀡𑀁 𑀯𑀺𑀬 𑀲𑀼𑀲𑀚𑁆𑀚𑀺𑀢𑀘𑀺𑀢𑁆𑀢𑀧𑀝𑁄 𑀯𑀺𑀬 𑀘 𑀫𑀦𑀸𑀧𑀤𑀲𑁆𑀲𑀦𑀦𑁆𑀢𑀺. 𑀏𑀯𑀁 𑀫𑁂 𑀭𑀽𑀧𑀁 𑀫𑀸 𑀅𑀳𑁄𑀲𑀻𑀢𑀺 𑀫𑀫 𑀭𑀽𑀧𑀁 𑀏𑀯𑀁𑀯𑀺𑀥𑀁 𑀫𑀸 𑀳𑁄𑀢𑀼, 𑀤𑀼𑀩𑁆𑀩𑀡𑁆𑀡𑀁 𑀤𑀼𑀲𑁆𑀲𑀡𑁆𑀞𑀺𑀢𑀁 𑀯𑀮𑀺𑀢𑀧𑀮𑀺𑀢𑀁 𑀢𑀺𑀮𑀓𑀲𑀫𑀸𑀓𑀺𑀡𑁆𑀡𑀦𑁆𑀢𑀺.

𑀢𑀼𑀡𑁆𑀳𑀻 𑀅𑀳𑁄𑀲𑀻𑀢𑀺 𑀦𑀺𑀕𑀡𑁆𑀞𑁄 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀺𑀭𑀤𑁆𑀥𑀪𑀸𑀯𑀁 𑀜𑀢𑁆𑀯𑀸, ‘‘𑀲𑀫𑀡𑁄 𑀕𑁄𑀢𑀫𑁄 𑀫𑀫 𑀯𑀸𑀤𑀁 𑀪𑀺𑀦𑁆𑀤𑀦𑀢𑁆𑀣𑀸𑀬 𑀓𑀸𑀭𑀡𑀁 𑀆𑀳𑀭𑀺, 𑀅𑀳𑀁 𑀩𑀸𑀮𑀢𑀸𑀬 𑀢𑀫𑁂𑀯 𑀯𑀺𑀲𑁂𑀲𑁂𑀢𑁆𑀯𑀸 𑀤𑀻𑀧𑁂𑀲𑀺𑀁, 𑀇𑀤𑀸𑀦𑀺 𑀦𑀝𑁆𑀞𑁄𑀫𑁆𑀳𑀺, 𑀲𑀘𑁂 𑀯𑀢𑁆𑀢𑀢𑀻𑀢𑀺 𑀯𑀓𑁆𑀔𑀸𑀫𑀺, 𑀇𑀫𑁂 𑀭𑀸𑀚𑀸𑀦𑁄 𑀉𑀝𑁆𑀞𑀳𑀺𑀢𑁆𑀯𑀸, ‘𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑁆𑀯𑀁 𑀫𑀫 𑀭𑀽𑀧𑁂 𑀯𑀲𑁄 𑀯𑀢𑁆𑀢𑀢𑀻𑀢𑀺 𑀯𑀤𑀲𑀺, 𑀬𑀤𑀺 𑀢𑁂 𑀭𑀽𑀧𑁂 𑀯𑀲𑁄 𑀯𑀢𑁆𑀢𑀢𑀺, 𑀓𑀲𑁆𑀫𑀸 𑀢𑁆𑀯𑀁 𑀬𑀣𑀸 𑀇𑀫𑁂 𑀮𑀺𑀘𑁆𑀙𑀯𑀺𑀭𑀸𑀚𑀸𑀦𑁄 𑀢𑀸𑀯𑀢𑀺𑀁𑀲𑀤𑁂𑀯𑀲𑀤𑀺𑀲𑁂𑀳𑀺 𑀅𑀢𑁆𑀢𑀪𑀸𑀯𑁂𑀳𑀺 𑀯𑀺𑀭𑁄𑀘𑀦𑁆𑀢𑀺 𑀅𑀪𑀺𑀭𑀽𑀧𑀸 𑀧𑀸𑀲𑀸𑀤𑀺𑀓𑀸, 𑀏𑀯𑀁 𑀦 𑀯𑀺𑀭𑁄𑀘𑀲𑀻’𑀢𑀺. 𑀲𑀘𑁂 𑀦 𑀯𑀢𑁆𑀢𑀢𑀻𑀢𑀺 𑀯𑀓𑁆𑀔𑀸𑀫𑀺, 𑀲𑀫𑀡𑁄 𑀕𑁄𑀢𑀫𑁄 𑀉𑀝𑁆𑀞𑀳𑀺𑀢𑁆𑀯𑀸, ‘𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑁆𑀯𑀁 𑀧𑀼𑀩𑁆𑀩𑁂 𑀯𑀢𑁆𑀢𑀢𑀺 𑀫𑁂 𑀭𑀽𑀧𑀲𑁆𑀫𑀺𑀁 𑀯𑀲𑁄𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀧𑀝𑀺𑀓𑁆𑀔𑀺𑀧𑀲𑀻’𑀢𑀺 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀢𑀺. 𑀇𑀢𑀺 𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑁂𑀧𑀺 𑀏𑀓𑁄 𑀤𑁄𑀲𑁄, 𑀦 𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑁂𑀧𑀺 𑀏𑀓𑁄 𑀤𑁄𑀲𑁄’’𑀢𑀺 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀤𑀼𑀢𑀺𑀬𑀫𑁆𑀧𑀺 𑀪𑀕𑀯𑀸 𑀧𑀼𑀘𑁆𑀙𑀺, 𑀤𑀼𑀢𑀺𑀬𑀫𑁆𑀧𑀺 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀬𑀲𑁆𑀫𑀸 𑀧𑀦 𑀬𑀸𑀯𑀢𑀢𑀺𑀬𑀁 𑀪𑀕𑀯𑀢𑀸 𑀧𑀼𑀘𑁆𑀙𑀺𑀢𑁂 𑀅𑀩𑁆𑀬𑀸𑀓𑀭𑁄𑀦𑁆𑀢𑀲𑁆𑀲 𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀨𑀮𑀢𑀺, 𑀩𑀼𑀤𑁆𑀥𑀸 𑀘 𑀦𑀸𑀫 𑀲𑀢𑁆𑀢𑀸𑀦𑀁𑀬𑁂𑀯 𑀅𑀢𑁆𑀣𑀸𑀬 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀸𑀭𑀫𑀻𑀦𑀁 𑀧𑀽𑀭𑀺𑀢𑀢𑁆𑀢𑀸 𑀲𑀢𑁆𑀢𑁂𑀲𑀼 𑀩𑀮𑀯𑀅𑀦𑀼𑀤𑁆𑀤𑀬𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀬𑀸𑀯𑀢𑀢𑀺𑀬𑀁 𑀅𑀧𑀼𑀘𑁆𑀙𑀺𑀢𑁆𑀯𑀸 𑀅𑀣 𑀔𑁄 𑀪𑀕𑀯𑀸 𑀲𑀘𑁆𑀘𑀓𑀁 𑀦𑀺𑀕𑀡𑁆𑀞𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 𑀏𑀢𑀁 ‘‘𑀩𑁆𑀬𑀸𑀓𑀭𑁄𑀳𑀻 𑀤𑀸𑀦𑀻’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘.

𑀢𑀢𑁆𑀣 𑀲𑀳𑀥𑀫𑁆𑀫𑀺𑀓𑀦𑁆𑀢𑀺 𑀲𑀳𑁂𑀢𑀼𑀓𑀁 𑀲𑀓𑀸𑀭𑀡𑀁. 𑀯𑀚𑀺𑀭𑀁 𑀧𑀸𑀡𑀺𑀫𑁆𑀳𑀺 𑀅𑀲𑁆𑀲𑀸𑀢𑀺 𑀯𑀚𑀺𑀭𑀧𑀸𑀡𑀺. 𑀬𑀓𑁆𑀔𑁄𑀢𑀺 𑀦 𑀬𑁄 𑀯𑀸 𑀲𑁄 𑀯𑀸 𑀬𑀓𑁆𑀔𑁄, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀆𑀤𑀺𑀢𑁆𑀢𑀦𑁆𑀢𑀺 𑀅𑀕𑁆𑀕𑀺𑀯𑀡𑁆𑀡𑀁. 𑀲𑀫𑁆𑀧𑀚𑁆𑀚𑀮𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀧𑀚𑁆𑀚𑀮𑀺𑀢𑀁. 𑀲𑀚𑁄𑀢𑀺𑀪𑀽𑀢𑀦𑁆𑀢𑀺 𑀲𑀫𑀦𑁆𑀢𑀢𑁄 𑀚𑁄𑀢𑀺𑀪𑀽𑀢𑀁, 𑀏𑀓𑀕𑁆𑀕𑀺𑀚𑀸𑀮𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀞𑀺𑀢𑁄 𑀳𑁄𑀢𑀻𑀢𑀺 𑀫𑀳𑀦𑁆𑀢𑀁 𑀲𑀻𑀲𑀁, 𑀓𑀦𑁆𑀤𑀮𑀫𑀓𑀼𑀮𑀲𑀤𑀺𑀲𑀸 𑀤𑀸𑀞𑀸, 𑀪𑀬𑀸𑀦𑀓𑀸𑀦𑀺 𑀅𑀓𑁆𑀔𑀺𑀦𑀸𑀲𑀸𑀤𑀻𑀦𑀻𑀢𑀺 𑀏𑀯𑀁 𑀯𑀺𑀭𑀽𑀧𑀭𑀽𑀧𑀁 𑀫𑀸𑀧𑁂𑀢𑁆𑀯𑀸 𑀞𑀺𑀢𑁄. 𑀓𑀲𑁆𑀫𑀸 𑀧𑀦𑁂𑀲 𑀆𑀕𑀢𑁄𑀢𑀺? 𑀤𑀺𑀝𑁆𑀞𑀺𑀯𑀺𑀲𑁆𑀲𑀚𑁆𑀚𑀸𑀧𑀦𑀢𑁆𑀣𑀁. 𑀅𑀧𑀺𑀘, ‘‘𑀅𑀳𑀜𑁆𑀘𑁂𑀯 𑀔𑁄 𑀧𑀦 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀁, 𑀧𑀭𑁂 𑀘 𑀫𑁂 𑀦 𑀆𑀚𑀸𑀦𑁂𑀬𑁆𑀬𑀼’’𑀦𑁆𑀢𑀺 𑀏𑀯𑀁 𑀥𑀫𑁆𑀫𑀤𑁂𑀲𑀦𑀸𑀬 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀪𑀸𑀯𑀁 𑀆𑀧𑀦𑁆𑀦𑁂 𑀪𑀕𑀯𑀢𑀺 𑀲𑀓𑁆𑀓𑁄 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀲𑀤𑁆𑀥𑀺𑀁 𑀆𑀕𑀦𑁆𑀢𑁆𑀯𑀸, ‘‘𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀣, 𑀢𑀼𑀫𑁆𑀳𑀸𑀓𑀁 𑀆𑀡𑀸𑀬 𑀅𑀯𑀢𑁆𑀢𑀫𑀸𑀦𑁂 𑀫𑀬𑀁 𑀯𑀢𑁆𑀢𑀸𑀧𑁂𑀲𑁆𑀲𑀸𑀫, 𑀢𑀼𑀫𑁆𑀳𑀸𑀓𑀁 𑀥𑀫𑁆𑀫𑀘𑀓𑁆𑀓𑀁 𑀳𑁄𑀢𑀼, 𑀅𑀫𑁆𑀳𑀸𑀓𑀁 𑀆𑀡𑀸𑀘𑀓𑁆𑀓’’𑀦𑁆𑀢𑀺 𑀧𑀝𑀺𑀜𑁆𑀜𑀫𑀓𑀸𑀲𑀺. 𑀢𑀲𑁆𑀫𑀸 ‘‘𑀅𑀚𑁆𑀚 𑀲𑀘𑁆𑀘𑀓𑀁 𑀢𑀸𑀲𑁂𑀢𑁆𑀯𑀸 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀆𑀕𑀢𑁄.

𑀪𑀕𑀯𑀸 𑀘𑁂𑀯 𑀧𑀲𑁆𑀲𑀢𑀺, 𑀲𑀘𑁆𑀘𑀓𑁄 𑀘 𑀦𑀺𑀕𑀡𑁆𑀞𑀧𑀼𑀢𑁆𑀢𑁄𑀢𑀺 𑀬𑀤𑀺 𑀳𑀺 𑀢𑀁 𑀅𑀜𑁆𑀜𑁂𑀧𑀺 𑀧𑀲𑁆𑀲𑁂𑀬𑁆𑀬𑀼𑀁. 𑀢𑀁 𑀓𑀸𑀭𑀡𑀁 𑀅𑀕𑀭𑀼 𑀅𑀲𑁆𑀲, ‘‘𑀲𑀫𑀡𑁄 𑀕𑁄𑀢𑀫𑁄 𑀲𑀘𑁆𑀘𑀓𑀁 𑀅𑀢𑁆𑀢𑀦𑁄 𑀯𑀸𑀤𑁂 𑀅𑀦𑁄𑀢𑀭𑀦𑁆𑀢𑀁 𑀜𑀢𑁆𑀯𑀸 𑀬𑀓𑁆𑀔𑀁 𑀆𑀯𑀸𑀳𑁂𑀢𑁆𑀯𑀸 𑀤𑀲𑁆𑀲𑁂𑀲𑀺, 𑀢𑀢𑁄 𑀲𑀘𑁆𑀘𑀓𑁄 𑀪𑀬𑁂𑀦 𑀓𑀣𑁂𑀲𑀻’’𑀢𑀺 𑀯𑀤𑁂𑀬𑁆𑀬𑀼𑀁. 𑀢𑀲𑁆𑀫𑀸 𑀪𑀕𑀯𑀸 𑀘𑁂𑀯 𑀧𑀲𑁆𑀲𑀢𑀺 𑀲𑀘𑁆𑀘𑀓𑁄 𑀘. 𑀢𑀲𑁆𑀲 𑀢𑀁 𑀤𑀺𑀲𑁆𑀯𑀸𑀯 𑀲𑀓𑀮𑀲𑀭𑀻𑀭𑀢𑁄 𑀲𑁂𑀤𑀸 𑀫𑀼𑀘𑁆𑀘𑀺𑀁𑀲𑀼, 𑀅𑀦𑁆𑀢𑁄𑀓𑀼𑀘𑁆𑀙𑀺 𑀯𑀺𑀧𑀭𑀺𑀯𑀢𑁆𑀢𑀫𑀸𑀦𑀸 𑀫𑀳𑀸𑀭𑀯𑀁 𑀭𑀯𑀺. 𑀲𑁄 ‘‘𑀅𑀜𑁆𑀜𑁂𑀧𑀺 𑀦𑀼 𑀔𑁄 𑀧𑀲𑁆𑀲𑀦𑁆𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀓𑀲𑁆𑀲𑀘𑀺 𑀮𑁄𑀫𑀳𑀁𑀲𑀫𑀢𑁆𑀢𑀫𑁆𑀧𑀺 𑀦 𑀅𑀤𑁆𑀤𑀲. 𑀢𑀢𑁄 𑁋 ‘‘𑀇𑀤𑀁 𑀪𑀬𑀁 𑀫𑀫𑁂𑀯 𑀉𑀧𑁆𑀧𑀦𑁆𑀦𑀁. 𑀲𑀘𑀸𑀳𑀁 𑀬𑀓𑁆𑀔𑁄𑀢𑀺 𑀯𑀓𑁆𑀔𑀸𑀫𑀺, ‘𑀓𑀺𑀁 𑀢𑀼𑀬𑁆𑀳𑀫𑁂𑀯 𑀅𑀓𑁆𑀔𑀻𑀦𑀺 𑀅𑀢𑁆𑀣𑀺, 𑀢𑁆𑀯𑀫𑁂𑀯 𑀬𑀓𑁆𑀔𑀁 𑀧𑀲𑁆𑀲𑀲𑀺, 𑀧𑀞𑀫𑀁 𑀬𑀓𑁆𑀔𑀁 𑀅𑀤𑀺𑀲𑁆𑀯𑀸 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀯𑀸𑀤𑀲𑀗𑁆𑀖𑀸𑀝𑁂 𑀔𑀺𑀢𑁆𑀢𑁄𑀯 𑀬𑀓𑁆𑀔𑀁 𑀧𑀲𑁆𑀲𑀲𑀻’𑀢𑀺 𑀯𑀤𑁂𑀬𑁆𑀬𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀦 𑀤𑀸𑀦𑀺 𑀫𑁂 𑀇𑀥 𑀅𑀜𑁆𑀜𑀁 𑀧𑀝𑀺𑀲𑀭𑀡𑀁 𑀅𑀢𑁆𑀣𑀺, 𑀅𑀜𑁆𑀜𑀢𑁆𑀭 𑀲𑀫𑀡𑀸 𑀕𑁄𑀢𑀫𑀸’’𑀢𑀺 𑀫𑀜𑁆𑀜𑀫𑀸𑀦𑁄, 𑀅𑀣 𑀔𑁄 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑀧𑀼𑀢𑁆𑀢𑁄…𑀧𑁂… 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘. 𑀢𑀸𑀡𑀁 𑀕𑀯𑁂𑀲𑀻𑀢𑀺 𑀢𑀸𑀡𑀦𑁆𑀢𑀺 𑀕𑀯𑁂𑀲𑀫𑀸𑀦𑁄. 𑀮𑁂𑀡𑀁 𑀕𑀯𑁂𑀲𑀻𑀢𑀺 𑀮𑁂𑀡𑀦𑁆𑀢𑀺 𑀕𑀯𑁂𑀲𑀫𑀸𑀦𑁄. 𑀲𑀭𑀡𑀁 𑀕𑀯𑁂𑀲𑀻𑀢𑀺 𑀲𑀭𑀡𑀦𑁆𑀢𑀺 𑀕𑀯𑁂𑀲𑀫𑀸𑀦𑁄. 𑀏𑀢𑁆𑀣 𑀘 𑀢𑀸𑀬𑀢𑀺 𑀭𑀓𑁆𑀔𑀢𑀻𑀢𑀺 𑀢𑀸𑀡𑀁. 𑀦𑀺𑀮𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀮𑁂𑀡𑀁. 𑀲𑀭𑀢𑀻𑀢𑀺 𑀲𑀭𑀡𑀁, 𑀪𑀬𑀁 𑀳𑀺𑀁𑀲𑀢𑀺 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀅𑀢𑁆𑀣𑁄.

𑁩𑁫𑁮. 𑀫𑀦𑀲𑀺 𑀓𑀭𑀺𑀢𑁆𑀯𑀸𑀢𑀺 𑀫𑀦𑀫𑁆𑀳𑀺 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀉𑀧𑀥𑀸𑀭𑁂𑀢𑁆𑀯𑀸. 𑀏𑀯𑀁 𑀫𑁂 𑀯𑁂𑀤𑀦𑀸 𑀳𑁄𑀢𑀽𑀢𑀺 𑀓𑀼𑀲𑀮𑀸𑀯 𑀳𑁄𑀢𑀼, 𑀲𑀼𑀔𑀸𑀯 𑀳𑁄𑀢𑀼. 𑀏𑀯𑀁 𑀫𑁂 𑀲𑀜𑁆𑀜𑀸 𑀳𑁄𑀢𑀽𑀢𑀺 𑀓𑀼𑀲𑀮𑀸𑀯 𑀳𑁄𑀢𑀼, 𑀲𑀼𑀔𑀸𑀯 𑀳𑁄𑀢𑀼, 𑀲𑁄𑀫𑀦𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀸𑀯 𑀳𑁄𑀢𑀽𑀢𑀺. 𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀫𑀸 𑀅𑀳𑁄𑀲𑀻𑀢𑀺 𑀏𑀢𑁆𑀣 𑀧𑀦 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀮𑁆𑀮𑀁 𑀦𑀽𑀢𑀺 𑀬𑀼𑀢𑁆𑀢𑀁 𑀦𑀼. 𑀲𑀫𑀦𑀼𑀧𑀲𑁆𑀲𑀺𑀢𑀼𑀦𑁆𑀢𑀺 ‘‘𑀏𑀢𑀁 𑀫𑀫 𑀏𑀲𑁄𑀳𑀫𑀲𑁆𑀫𑀺 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀏𑀯𑀁 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀧𑀲𑁆𑀲𑀺𑀢𑀼𑀁. 𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫𑀸𑀢𑀺 𑀦 𑀬𑀼𑀢𑁆𑀢𑀫𑁂𑀢𑀁, 𑀪𑁄 𑀕𑁄𑀢𑀫. 𑀇𑀢𑀺 𑀪𑀕𑀯𑀸 𑀬𑀣𑀸 𑀦𑀸𑀫 𑀙𑁂𑀓𑁄 𑀅𑀳𑀺𑀢𑀼𑀡𑁆𑀟𑀺𑀓𑁄 𑀲𑀧𑁆𑀧𑀤𑀝𑁆𑀞𑀯𑀺𑀲𑀁 𑀢𑁂𑀦𑁂𑀯 𑀲𑀧𑁆𑀧𑁂𑀦 𑀧𑀼𑀦 𑀟𑀁𑀲𑀸𑀧𑁂𑀢𑁆𑀯𑀸 𑀉𑀩𑁆𑀩𑀸𑀳𑁂𑀬𑁆𑀬, 𑀏𑀯𑀁 𑀢𑀲𑁆𑀲𑀁𑀬𑁂𑀯 𑀧𑀭𑀺𑀲𑀢𑀺 𑀲𑀘𑁆𑀘𑀓𑀁 𑀦𑀺𑀕𑀡𑁆𑀞𑀧𑀼𑀢𑁆𑀢𑀁 𑀢𑁂𑀦𑁂𑀯 𑀫𑀼𑀔𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸𑀢𑀺 𑀯𑀤𑀸𑀧𑁂𑀲𑀺. 𑀤𑀼𑀓𑁆𑀔𑀁 𑀅𑀮𑁆𑀮𑀻𑀦𑁄𑀢𑀺 𑀇𑀫𑀁 𑀧𑀜𑁆𑀘𑀓𑁆𑀔𑀦𑁆𑀥𑀤𑀼𑀓𑁆𑀔𑀁 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀅𑀮𑁆𑀮𑀻𑀦𑁄. 𑀉𑀧𑀕𑀢𑁄 𑀅𑀚𑁆𑀛𑁄𑀲𑀺𑀢𑁄𑀢𑀺𑀧𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀓𑁆𑀔𑀁 𑀏𑀢𑀁 𑀫𑀫𑀸𑀢𑀺𑀆𑀤𑀻𑀲𑀼 𑀧𑀜𑁆𑀘𑀓𑁆𑀔𑀦𑁆𑀥𑀤𑀼𑀓𑁆𑀔𑀁 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀚𑀸𑀦𑁂𑀬𑁆𑀬𑀸𑀢𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀧𑀭𑀺𑀢𑁄 𑀚𑀸𑀦𑁂𑀬𑁆𑀬. 𑀧𑀭𑀺𑀓𑁆𑀔𑁂𑀧𑁂𑀢𑁆𑀯𑀸𑀢𑀺 𑀔𑀬𑀁 𑀯𑀬𑀁 𑀅𑀦𑀼𑀧𑁆𑀧𑀸𑀤𑀁 𑀉𑀧𑀦𑁂𑀢𑁆𑀯𑀸.

𑁩𑁫𑁯. 𑀦𑀯𑀦𑁆𑀢𑀺 𑀢𑀭𑀼𑀡𑀁. 𑀅𑀓𑀼𑀓𑁆𑀓𑀼𑀓𑀚𑀸𑀢𑀦𑁆𑀢𑀺 𑀧𑀼𑀧𑁆𑀨𑀕𑁆𑀕𑀳𑀡𑀓𑀸𑀮𑁂 𑀅𑀦𑁆𑀢𑁄 𑀅𑀗𑁆𑀕𑀼𑀝𑁆𑀞𑀧𑁆𑀧𑀫𑀸𑀡𑁄 𑀏𑀓𑁄 𑀖𑀦𑀤𑀡𑁆𑀟𑀓𑁄 𑀦𑀺𑀩𑁆𑀩𑀢𑁆𑀢𑀢𑀺, 𑀢𑁂𑀦 𑀯𑀺𑀭𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀭𑀺𑀢𑁆𑀢𑁄𑀢𑀺 𑀲𑀼𑀜𑁆𑀜𑁄 𑀅𑀦𑁆𑀢𑁄𑀲𑀸𑀭𑀯𑀺𑀭𑀳𑀺𑀢𑁄. 𑀭𑀺𑀢𑁆𑀢𑀢𑁆𑀢𑀸𑀯 𑀢𑀼𑀘𑁆𑀙𑁄. 𑀅𑀧𑀭𑀤𑁆𑀥𑁄𑀢𑀺 𑀧𑀭𑀸𑀚𑀺𑀢𑁄. 𑀪𑀸𑀲𑀺𑀢𑀸 𑀔𑁄 𑀧𑀦 𑀢𑁂𑀢𑀺 𑀇𑀤𑀁 𑀪𑀕𑀯𑀸 𑀢𑀲𑁆𑀲 𑀫𑀼𑀔𑀭𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸 𑀦𑀺𑀕𑁆𑀕𑀡𑁆𑀳𑀦𑁆𑀢𑁄 𑀆𑀳. 𑀲𑁄 𑀓𑀺𑀭 𑀧𑀼𑀩𑁆𑀩𑁂 𑀧𑀽𑀭𑀡𑀸𑀤𑀬𑁄 𑀙 𑀲𑀢𑁆𑀣𑀸𑀭𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀢𑁂 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀣 𑀦𑁂𑀲𑀁 𑀧𑀭𑀺𑀲𑀫𑀚𑁆𑀛𑁂 𑀫𑀳𑀦𑁆𑀢𑀁 𑀯𑀺𑀧𑁆𑀧𑀓𑀸𑀭𑀁 𑀆𑀭𑁄𑀧𑁂𑀢𑁆𑀯𑀸 𑀉𑀝𑁆𑀞𑀸𑀬 𑀚𑀬𑀁 𑀧𑀯𑁂𑀤𑁂𑀦𑁆𑀢𑁄 𑀕𑀘𑁆𑀙𑀢𑀺. 𑀲𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀫𑁆𑀧𑀺 𑀢𑀣𑁂𑀯 𑀯𑀺𑀳𑁂𑀞𑁂𑀲𑁆𑀲𑀸𑀫𑀻𑀢𑀺 𑀲𑀜𑁆𑀜𑀸𑀬 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑁋

‘‘𑀅𑀫𑁆𑀪𑁄 𑀓𑁄 𑀦𑀸𑀫 𑀬𑀁 𑀭𑀼𑀓𑁆𑀔𑁄, 𑀲𑀺𑀦𑁆𑀦𑀧𑀢𑁆𑀢𑁄 𑀲𑀓𑀡𑁆𑀝𑀓𑁄;

𑀬𑀢𑁆𑀣 𑀏𑀓𑀧𑁆𑀧𑀳𑀸𑀭𑁂𑀦, 𑀉𑀢𑁆𑀢𑀫𑀗𑁆𑀕𑀁 𑀯𑀺𑀪𑀺𑀚𑁆𑀚𑀺𑀢’’𑀦𑁆𑀢𑀺.

𑀅𑀬𑀁 𑀔𑀤𑀺𑀭𑀁 𑀆𑀳𑀘𑁆𑀘 𑀅𑀲𑀸𑀭𑀓𑀭𑀼𑀓𑁆𑀔𑀧𑀭𑀺𑀘𑀺𑀢𑁄 𑀫𑀼𑀤𑀼𑀢𑀼𑀡𑁆𑀟𑀲𑀓𑀼𑀡𑁄 𑀯𑀺𑀬 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀸𑀭𑀁 𑀆𑀳𑀘𑁆𑀘 𑀜𑀸𑀡𑀢𑀼𑀡𑁆𑀟𑀪𑁂𑀤𑀁 𑀧𑀢𑁆𑀢𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀣𑀤𑁆𑀥𑀪𑀸𑀯𑀁 𑀅𑀜𑁆𑀜𑀸𑀲𑀺. 𑀢𑀤𑀲𑁆𑀲 𑀧𑀭𑀺𑀲𑀫𑀚𑁆𑀛𑁂 𑀧𑀓𑀸𑀲𑁂𑀦𑁆𑀢𑁄 𑀪𑀸𑀲𑀺𑀢𑀸 𑀔𑁄 𑀧𑀦 𑀢𑁂𑀢𑀺𑀆𑀤𑀺𑀫𑀸𑀳. 𑀦𑀢𑁆𑀣𑀺 𑀏𑀢𑀭𑀳𑀻𑀢𑀺 𑀉𑀧𑀸𑀤𑀺𑀦𑁆𑀦𑀓𑀲𑀭𑀻𑀭𑁂 𑀲𑁂𑀤𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀏𑀢𑀭𑀳𑀺 𑀧𑀦 𑀦𑀢𑁆𑀣𑀻𑀢𑀺 𑀯𑀤𑀢𑀺. 𑀲𑀼𑀯𑀡𑁆𑀡𑀯𑀡𑁆𑀡𑀁 𑀓𑀸𑀬𑀁 𑀯𑀺𑀯𑀭𑀻𑀢𑀺 𑀦 𑀲𑀩𑁆𑀩𑀁 𑀓𑀸𑀬𑀁 𑀯𑀺𑀯𑀭𑀺. 𑀩𑀼𑀤𑁆𑀥𑀸 𑀦𑀸𑀫 𑀕𑀡𑁆𑀞𑀺𑀓𑀁 𑀧𑀝𑀺𑀫𑀼𑀜𑁆𑀘𑀺𑀢𑁆𑀯𑀸 𑀧𑀝𑀺𑀘𑁆𑀙𑀦𑁆𑀦𑀲𑀭𑀻𑀭𑀸 𑀧𑀭𑀺𑀲𑀢𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺. 𑀅𑀣 𑀪𑀕𑀯𑀸 𑀕𑀮𑀯𑀸𑀝𑀓𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀁 𑀑𑀢𑀸𑀭𑁂𑀲𑀺. 𑀑𑀢𑀸𑀭𑀺𑀢𑀫𑀢𑁆𑀢𑁂 𑀧𑀦 𑀢𑀲𑁆𑀫𑀺𑀁 𑀲𑀼𑀯𑀡𑁆𑀡𑀯𑀡𑁆𑀡𑀸 𑀭𑀲𑁆𑀫𑀺𑀬𑁄 𑀧𑀼𑀜𑁆𑀚𑀧𑀼𑀜𑁆𑀚𑀸 𑀳𑀼𑀢𑁆𑀯𑀸 𑀲𑀼𑀯𑀡𑁆𑀡𑀖𑀝𑀢𑁄 𑀭𑀢𑁆𑀢𑀲𑀼𑀯𑀡𑁆𑀡𑀭𑀲𑀥𑀸𑀭𑀸 𑀯𑀺𑀬, 𑀭𑀢𑁆𑀢𑀯𑀡𑁆𑀡𑀯𑀮𑀸𑀳𑀓𑀢𑁄 𑀯𑀺𑀚𑁆𑀚𑀼𑀮𑀢𑀸 𑀯𑀺𑀬 𑀘 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀼𑀯𑀡𑁆𑀡𑀫𑀼𑀭𑀚𑀲𑀤𑀺𑀲𑀁 𑀫𑀳𑀸𑀔𑀦𑁆𑀥𑀁 𑀉𑀢𑁆𑀢𑀫𑀲𑀺𑀭𑀁 𑀧𑀤𑀓𑁆𑀔𑀺𑀡𑀁 𑀓𑀼𑀭𑀼𑀫𑀸𑀦𑀸 𑀆𑀓𑀸𑀲𑁂 𑀧𑀓𑁆𑀔𑀦𑁆𑀤𑀺𑀁𑀲𑀼. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀏𑀯𑀫𑀓𑀸𑀲𑀻𑀢𑀺? 𑀫𑀳𑀸𑀚𑀦𑀲𑁆𑀲 𑀓𑀗𑁆𑀔𑀸𑀯𑀺𑀦𑁄𑀤𑀦𑀢𑁆𑀣𑀁. 𑀫𑀳𑀸𑀚𑀦𑁄 𑀳𑀺 𑀲𑀫𑀡𑁄 𑀕𑁄𑀢𑀫𑁄 𑀫𑀬𑁆𑀳𑀁 𑀲𑁂𑀤𑁄 𑀦𑀢𑁆𑀣𑀻𑀢𑀺 𑀯𑀤𑀢𑀺, 𑀲𑀘𑁆𑀘𑀓𑀲𑁆𑀲 𑀢𑀸𑀯 𑀦𑀺𑀕𑀡𑁆𑀞𑀧𑀼𑀢𑁆𑀢𑀲𑁆𑀲 𑀬𑀦𑁆𑀢𑀸𑀭𑀼𑀴𑁆𑀳𑀲𑁆𑀲 𑀯𑀺𑀬 𑀲𑁂𑀤𑀸 𑀧𑀕𑁆𑀖𑀭𑀦𑁆𑀢𑀺. 𑀲𑀫𑀡𑁄 𑀧𑀦 𑀕𑁄𑀢𑀫𑁄 𑀖𑀦𑀤𑀼𑀧𑀝𑁆𑀝𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄, 𑀅𑀦𑁆𑀢𑁄 𑀲𑁂𑀤𑀲𑁆𑀲 𑀅𑀢𑁆𑀣𑀺𑀢𑀸 𑀯𑀸 𑀦𑀢𑁆𑀣𑀺𑀢𑀸 𑀯𑀸 𑀓𑀣𑀁 𑀲𑀓𑁆𑀓𑀸 𑀜𑀸𑀢𑀼𑀦𑁆𑀢𑀺 𑀓𑀗𑁆𑀔𑀁 𑀓𑀭𑁂𑀬𑁆𑀬, 𑀢𑀲𑁆𑀲 𑀓𑀗𑁆𑀔𑀸𑀯𑀺𑀦𑁄𑀤𑀦𑀢𑁆𑀣𑀁 𑀏𑀯𑀫𑀓𑀸𑀲𑀺. 𑀫𑀗𑁆𑀓𑀼𑀪𑀽𑀢𑁄𑀢𑀺 𑀦𑀺𑀢𑁆𑀢𑁂𑀚𑀪𑀽𑀢𑁄. 𑀧𑀢𑁆𑀢𑀓𑁆𑀔𑀦𑁆𑀥𑁄𑀢𑀺 𑀧𑀢𑀺𑀢𑀓𑁆𑀔𑀦𑁆𑀥𑁄. 𑀅𑀧𑁆𑀧𑀝𑀺𑀪𑀸𑀦𑁄𑀢𑀺 𑀉𑀢𑁆𑀢𑀭𑀺 𑀅𑀧𑁆𑀧𑀲𑁆𑀲𑀦𑁆𑀢𑁄. 𑀦𑀺𑀲𑀻𑀤𑀻𑀢𑀺 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦 𑀪𑀽𑀫𑀺𑀁 𑀓𑀲𑀫𑀸𑀦𑁄 𑀦𑀺𑀲𑀻𑀤𑀺.

𑁩𑁬𑁦. 𑀤𑀼𑀫𑁆𑀫𑀼𑀔𑁄𑀢𑀺 𑀦 𑀯𑀺𑀭𑀽𑀧𑀫𑀼𑀔𑁄, 𑀅𑀪𑀺𑀭𑀽𑀧𑁄 𑀳𑀺 𑀲𑁄 𑀧𑀸𑀲𑀸𑀤𑀺𑀓𑁄. 𑀦𑀸𑀫𑀁 𑀧𑀦𑀲𑁆𑀲 𑀏𑀢𑀁. 𑀅𑀪𑀩𑁆𑀩𑁄 𑀢𑀁 𑀧𑁄𑀓𑁆𑀔𑀭𑀡𑀺𑀁 𑀧𑀼𑀦 𑀑𑀢𑀭𑀺𑀢𑀼𑀦𑁆𑀢𑀺 𑀲𑀩𑁆𑀩𑁂𑀲𑀁 𑀅𑀴𑀸𑀦𑀁 𑀪𑀕𑁆𑀕𑀢𑁆𑀢𑀸 𑀧𑀘𑁆𑀙𑀺𑀦𑁆𑀦𑀕𑀫𑀦𑁄 𑀑𑀢𑀭𑀺𑀢𑀼𑀁 𑀅𑀪𑀩𑁆𑀩𑁄, 𑀢𑀢𑁆𑀣𑁂𑀯 𑀓𑀸𑀓𑀓𑀼𑀮𑀮𑀸𑀤𑀻𑀦𑀁 𑀪𑀢𑁆𑀢𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀯𑀺𑀲𑀽𑀓𑀸𑀬𑀺𑀓𑀸𑀦𑀻𑀢𑀺 𑀤𑀺𑀝𑁆𑀞𑀺𑀯𑀺𑀲𑀽𑀓𑀸𑀦𑀺. 𑀯𑀺𑀲𑁂𑀯𑀺𑀢𑀸𑀦𑀻𑀢𑀺 𑀤𑀺𑀝𑁆𑀞𑀺𑀲𑀜𑁆𑀘𑀭𑀺𑀢𑀸𑀦𑀺. 𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀻𑀢𑀺 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢𑀸𑀦𑀺. 𑀬𑀤𑀺𑀤𑀁 𑀯𑀸𑀤𑀸𑀥𑀺𑀧𑁆𑀧𑀸𑀬𑁄𑀢𑀺 𑀏𑀢𑁆𑀣 𑀬𑀤𑀺𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁; 𑀯𑀸𑀤𑀸𑀥𑀺𑀧𑁆𑀧𑀸𑀬𑁄 𑀳𑀼𑀢𑁆𑀯𑀸 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫𑀻𑀢𑀺 𑀅𑀚𑁆𑀛𑀸𑀲𑀬𑁂𑀦 𑀉𑀧𑀲𑀗𑁆𑀓𑀫𑀺𑀢𑀼𑀁 𑀅𑀪𑀩𑁆𑀩𑁄; 𑀥𑀫𑁆𑀫𑀲𑁆𑀲𑀯𑀦𑀸𑀬 𑀧𑀦 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀤𑀼𑀫𑁆𑀫𑀼𑀔𑀁 𑀮𑀺𑀘𑁆𑀙𑀯𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀸𑀢𑀺 𑀓𑀲𑁆𑀫𑀸 𑀅𑀯𑁄𑀘? 𑀤𑀼𑀫𑁆𑀫𑀼𑀔𑀲𑁆𑀲 𑀓𑀺𑀭𑀲𑁆𑀲 𑀉𑀧𑀫𑀸𑀳𑀭𑀡𑀓𑀸𑀮𑁂 𑀲𑁂𑀲 𑀮𑀺𑀘𑁆𑀙𑀯𑀺𑀓𑀼𑀫𑀸𑀭𑀸𑀧𑀺 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀇𑀫𑀺𑀦𑀸 𑀦𑀺𑀕𑀡𑁆𑀞𑁂𑀦 𑀅𑀫𑁆𑀳𑀸𑀓𑀁 𑀲𑀺𑀧𑁆𑀧𑀼𑀕𑁆𑀕𑀳𑀡𑀝𑁆𑀞𑀸𑀦𑁂 𑀘𑀺𑀭𑀁 𑀅𑀯𑀫𑀸𑀦𑁄 𑀓𑀢𑁄, 𑀅𑀬𑀁 𑀤𑀸𑀦𑀺 𑀅𑀫𑀺𑀢𑁆𑀢𑀲𑁆𑀲 𑀧𑀺𑀝𑁆𑀞𑀺𑀁 𑀧𑀲𑁆𑀲𑀺𑀢𑀼𑀁 𑀓𑀸𑀮𑁄. 𑀫𑀬𑀫𑁆𑀧𑀺 𑀏𑀓𑁂𑀓𑀁 𑀉𑀧𑀫𑀁 𑀆𑀳𑀭𑀺𑀢𑁆𑀯𑀸 𑀧𑀸𑀡𑀺𑀧𑁆𑀧𑀳𑀸𑀭𑁂𑀦 𑀧𑀢𑀺𑀢𑀁 𑀫𑀼𑀕𑁆𑀕𑀭𑁂𑀦 𑀧𑁄𑀣𑁂𑀦𑁆𑀢𑁄 𑀯𑀺𑀬 𑀢𑀣𑀸 𑀦𑀁 𑀓𑀭𑀺𑀲𑁆𑀲𑀸𑀫, 𑀬𑀣𑀸 𑀦 𑀧𑀼𑀦 𑀧𑀭𑀺𑀲𑀫𑀚𑁆𑀛𑁂 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺, 𑀢𑁂 𑀑𑀧𑀫𑁆𑀫𑀸𑀦𑀺 𑀓𑀭𑀺𑀢𑁆𑀯𑀸 𑀤𑀼𑀫𑁆𑀫𑀼𑀔𑀲𑁆𑀲 𑀓𑀣𑀸𑀧𑀭𑀺𑀬𑁄𑀲𑀸𑀦𑀁 𑀆𑀕𑀫𑀬𑀫𑀸𑀦𑀸 𑀦𑀺𑀲𑀻𑀤𑀺𑀁𑀲𑀼. 𑀲𑀘𑁆𑀘𑀓𑁄 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸, 𑀇𑀫𑁂 𑀲𑀩𑁆𑀩𑁂𑀯 𑀕𑀻𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀑𑀝𑁆𑀞𑁂𑀳𑀺 𑀘𑀮𑀫𑀸𑀦𑁂𑀳𑀺 𑀞𑀺𑀢𑀸; 𑀲𑀘𑁂 𑀧𑀘𑁆𑀘𑁂𑀓𑀸 𑀉𑀧𑀫𑀸 𑀳𑀭𑀺𑀢𑀼𑀁 𑀮𑀪𑀺𑀲𑁆𑀲𑀦𑁆𑀢𑀺, 𑀧𑀼𑀦 𑀫𑀬𑀸 𑀧𑀭𑀺𑀲𑀫𑀚𑁆𑀛𑁂 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀓𑀸 𑀪𑀯𑀺𑀲𑁆𑀲𑀢𑀺, 𑀳𑀦𑁆𑀤𑀸𑀳𑀁 𑀤𑀼𑀫𑁆𑀫𑀼𑀔𑀁 𑀅𑀧𑀲𑀸𑀤𑁂𑀢𑁆𑀯𑀸 𑀬𑀣𑀸 𑀅𑀜𑁆𑀜𑀲𑁆𑀲 𑀑𑀓𑀸𑀲𑁄 𑀦 𑀳𑁄𑀢𑀺, 𑀏𑀯𑀁 𑀓𑀣𑀸𑀯𑀸𑀭𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀫𑀡𑀁 𑀕𑁄𑀢𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀢𑀲𑁆𑀫𑀸 𑀏𑀢𑀤𑀯𑁄𑀘. 𑀢𑀢𑁆𑀣 𑀆𑀕𑀫𑁂𑀳𑀻𑀢𑀺 𑀢𑀺𑀝𑁆𑀞, 𑀫𑀸 𑀧𑀼𑀦 𑀪𑀡𑀸𑀳𑀻𑀢𑀺 𑀅𑀢𑁆𑀣𑁄.

𑁩𑁬𑁧. 𑀢𑀺𑀝𑁆𑀞𑀢𑁂𑀲𑀸, 𑀪𑁄 𑀕𑁄𑀢𑀫𑀸𑀢𑀺, 𑀪𑁄 𑀕𑁄𑀢𑀫, 𑀏𑀲𑀸 𑀅𑀫𑁆𑀳𑀸𑀓𑀜𑁆𑀘𑁂𑀯 𑀅𑀜𑁆𑀜𑁂𑀲𑀜𑁆𑀘 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀸𑀘𑀸 𑀢𑀺𑀝𑁆𑀞𑀢𑀼. 𑀯𑀺𑀮𑀸𑀧𑀁 𑀯𑀺𑀮𑀧𑀺𑀢𑀁 𑀫𑀜𑁆𑀜𑁂𑀢𑀺 𑀏𑀢𑀜𑁆𑀳𑀺 𑀯𑀘𑀦𑀁 𑀯𑀺𑀮𑀧𑀺𑀢𑀁 𑀯𑀺𑀬 𑀳𑁄𑀢𑀺, 𑀯𑀺𑀧𑁆𑀧𑀮𑀧𑀺𑀢𑀫𑀢𑁆𑀢𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀢𑀺𑀝𑁆𑀞𑀢𑁂𑀲𑀸𑀢𑀺 𑀏𑀢𑁆𑀣 𑀓𑀣𑀸𑀢𑀺 𑀆𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀸. 𑀯𑀸𑀘𑀸𑀯𑀺𑀮𑀸𑀧𑀁 𑀯𑀺𑀮𑀧𑀺𑀢𑀁 𑀫𑀜𑁆𑀜𑁂𑀢𑀺 𑀏𑀢𑁆𑀣 𑀧𑀦𑀺𑀤𑀁 𑀯𑀸𑀘𑀸𑀦𑀺𑀘𑁆𑀙𑀸𑀭𑀡𑀁 𑀯𑀺𑀮𑀧𑀺𑀢𑀫𑀢𑁆𑀢𑀁 𑀫𑀜𑁆𑀜𑁂 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 𑀓𑀺𑀢𑁆𑀢𑀸𑀯𑀢𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑁂𑀲𑀸𑀭𑀚𑁆𑀚𑀧𑀢𑁆𑀢𑁄𑀢𑀺 𑀜𑀸𑀡𑀧𑀢𑁆𑀢𑁄. 𑀅𑀧𑀭𑀧𑁆𑀧𑀘𑁆𑀘𑀬𑁄𑀢𑀺 𑀅𑀧𑀭𑀧𑁆𑀧𑀢𑁆𑀢𑀺𑀬𑁄. 𑀅𑀣𑀲𑁆𑀲 𑀪𑀕𑀯𑀸 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀇𑀥, 𑀅𑀕𑁆𑀕𑀺𑀯𑁂𑀲𑁆𑀲𑀦𑀸𑀢𑀺𑀆𑀤𑀺𑀫𑀸𑀳, 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀧𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑁂𑀓𑁆𑀔𑀪𑀽𑀫𑀺 𑀤𑀲𑁆𑀲𑀺𑀢𑀸. 𑀢𑀲𑁆𑀫𑀸 𑀉𑀢𑁆𑀢𑀭𑀺 𑀅𑀲𑁂𑀓𑁆𑀔𑀪𑀽𑀫𑀺𑀁 𑀧𑀼𑀘𑁆𑀙𑀦𑁆𑀢𑁄 𑀤𑀼𑀢𑀺𑀬𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺, 𑀢𑀫𑁆𑀧𑀺𑀲𑁆𑀲 𑀪𑀕𑀯𑀸 𑀩𑁆𑀬𑀸𑀓𑀸𑀲𑀺. 𑀢𑀢𑁆𑀣 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑁂𑀦𑀸𑀢𑀺𑀆𑀤𑀻𑀲𑀼 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀦𑁆𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀧𑀜𑁆𑀜𑀸. 𑀧𑀝𑀺𑀧𑀤𑀸𑀦𑀼𑀢𑁆𑀢𑀭𑀺𑀬𑀦𑁆𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀧𑀝𑀺𑀧𑀤𑀸. 𑀯𑀺𑀫𑀼𑀢𑁆𑀢𑀸𑀦𑀼𑀢𑁆𑀢𑀭𑀺𑀬𑀦𑁆𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀯𑀺𑀫𑀼𑀢𑁆𑀢𑀺. 𑀲𑀼𑀤𑁆𑀥𑀮𑁄𑀓𑀼𑀢𑁆𑀢𑀭𑀫𑁂𑀯 𑀯𑀸 𑀕𑀳𑁂𑀢𑁆𑀯𑀸 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀦𑁆𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺. 𑀧𑀝𑀺𑀧𑀤𑀸𑀦𑀼𑀢𑁆𑀢𑀭𑀺𑀬𑀦𑁆𑀢𑀺 𑀲𑁂𑀲𑀸𑀦𑀺 𑀫𑀕𑁆𑀕𑀗𑁆𑀕𑀸𑀦𑀺. 𑀯𑀺𑀫𑀼𑀢𑁆𑀢𑀸𑀦𑀼𑀢𑁆𑀢𑀭𑀺𑀬𑀦𑁆𑀢𑀺 𑀅𑀕𑁆𑀕𑀨𑀮𑀯𑀺𑀫𑀼𑀢𑁆𑀢𑀺. 𑀔𑀻𑀡𑀸𑀲𑀯𑀲𑁆𑀲 𑀯𑀸 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀁 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀁 𑀦𑀸𑀫. 𑀫𑀕𑁆𑀕𑀗𑁆𑀕𑀸𑀦𑀺 𑀧𑀝𑀺𑀧𑀤𑀸𑀦𑀼𑀢𑁆𑀢𑀭𑀺𑀬𑀁. 𑀅𑀕𑁆𑀕𑀨𑀮𑀁 𑀯𑀺𑀫𑀼𑀢𑁆𑀢𑀸𑀦𑀼𑀢𑁆𑀢𑀭𑀺𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀩𑀼𑀤𑁆𑀥𑁄 𑀲𑁄 𑀪𑀕𑀯𑀸𑀢𑀺 𑀲𑁄 𑀪𑀕𑀯𑀸 𑀲𑀬𑀫𑁆𑀧𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀼𑀤𑁆𑀥𑁄. 𑀩𑁄𑀥𑀸𑀬𑀸𑀢𑀺 𑀧𑀭𑁂𑀲𑀫𑁆𑀧𑀺 𑀘𑀢𑀼𑀲𑀘𑁆𑀘𑀩𑁄𑀥𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀤𑀦𑁆𑀢𑁄𑀢𑀺𑀆𑀤𑀻𑀲𑀼 𑀤𑀦𑁆𑀢𑁄𑀢𑀺 𑀦𑀺𑀩𑁆𑀩𑀺𑀲𑁂𑀯𑀦𑁄. 𑀤𑀫𑀣𑀸𑀬𑀸𑀢𑀺 𑀦𑀺𑀩𑁆𑀩𑀺𑀲𑁂𑀯𑀦𑀢𑁆𑀣𑀸𑀬. 𑀲𑀦𑁆𑀢𑁄𑀢𑀺 𑀲𑀩𑁆𑀩𑀓𑀺𑀮𑁂𑀲𑀯𑀽𑀧𑀲𑀫𑁂𑀦 𑀲𑀦𑁆𑀢𑁄. 𑀲𑀫𑀣𑀸𑀬𑀸𑀢𑀺 𑀓𑀺𑀮𑁂𑀲𑀯𑀽𑀧𑀲𑀫𑀸𑀬. 𑀢𑀺𑀡𑁆𑀡𑁄𑀢𑀺 𑀘𑀢𑀼𑀭𑁄𑀖𑀢𑀺𑀡𑁆𑀡𑁄. 𑀢𑀭𑀡𑀸𑀬𑀸𑀢𑀺 𑀘𑀢𑀼𑀭𑁄𑀖𑀢𑀭𑀡𑀸𑀬. 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀧𑀭𑀺𑀦𑀺𑀩𑁆𑀩𑀸𑀦𑀸𑀬𑀸𑀢𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀸𑀬.

𑁩𑁬𑁨. 𑀥𑀁𑀲𑀻𑀢𑀺 𑀕𑀼𑀡𑀥𑀁𑀲𑀓𑀸. 𑀧𑀕𑀩𑁆𑀩𑀸𑀢𑀺 𑀯𑀸𑀘𑀸𑀧𑀸𑀕𑀩𑁆𑀩𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀆𑀲𑀸𑀤𑁂𑀢𑀩𑁆𑀩𑀦𑁆𑀢𑀺 𑀖𑀝𑁆𑀝𑁂𑀢𑀩𑁆𑀩𑀁. 𑀆𑀲𑀚𑁆𑀚𑀸𑀢𑀺 𑀖𑀝𑁆𑀝𑁂𑀢𑁆𑀯𑀸. 𑀦𑀢𑁆𑀯𑁂𑀯 𑀪𑀯𑀦𑁆𑀢𑀁 𑀕𑁄𑀢𑀫𑀦𑁆𑀢𑀺 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀆𑀲𑀚𑁆𑀚 𑀓𑀲𑁆𑀲𑀘𑀺 𑀅𑀢𑁆𑀢𑀦𑁄 𑀯𑀸𑀤𑀁 𑀅𑀦𑀼𑀧𑀳𑀢𑀁 𑀲𑀓𑀮𑀁 𑀆𑀤𑀸𑀬 𑀧𑀓𑁆𑀓𑀫𑀺𑀢𑀼𑀁 𑀣𑀸𑀫𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀦 𑀳𑀺 𑀪𑀕𑀯𑀸 𑀳𑀢𑁆𑀣𑀺𑀆𑀤𑀬𑁄 𑀯𑀺𑀬 𑀓𑀲𑁆𑀲𑀘𑀺 𑀚𑀻𑀯𑀺𑀢𑀦𑁆𑀢𑀭𑀸𑀬𑀁 𑀓𑀭𑁄𑀢𑀺. 𑀅𑀬𑀁 𑀧𑀦 𑀦𑀺𑀕𑀡𑁆𑀞𑁄 𑀇𑀫𑀸 𑀢𑀺𑀲𑁆𑀲𑁄 𑀉𑀧𑀫𑀸 𑀦 𑀪𑀕𑀯𑀢𑁄 𑀉𑀓𑁆𑀓𑀁𑀲𑀦𑀢𑁆𑀣𑀁 𑀆𑀳𑀭𑀺, 𑀅𑀢𑁆𑀢𑀼𑀓𑁆𑀓𑀁𑀲𑀦𑀢𑁆𑀣𑀫𑁂𑀯 𑀆𑀳𑀭𑀺. 𑀬𑀣𑀸 𑀳𑀺 𑀭𑀸𑀚𑀸 𑀓𑀜𑁆𑀘𑀺 𑀧𑀘𑁆𑀘𑀢𑁆𑀣𑀺𑀓𑀁 𑀖𑀸𑀢𑁂𑀢𑁆𑀯𑀸 𑀏𑀯𑀁 𑀦𑀸𑀫 𑀲𑀽𑀭𑁄 𑀏𑀯𑀁 𑀣𑀸𑀫𑀲𑀫𑁆𑀧𑀦𑁆𑀦𑁄 𑀧𑀼𑀭𑀺𑀲𑁄 𑀪𑀯𑀺𑀲𑁆𑀲𑀢𑀻𑀢𑀺 𑀧𑀘𑁆𑀘𑀢𑁆𑀣𑀺𑀓𑀁 𑀣𑁄𑀫𑁂𑀦𑁆𑀢𑁄𑀧𑀺 𑀅𑀢𑁆𑀢𑀸𑀦𑀫𑁂𑀯 𑀣𑁄𑀫𑁂𑀢𑀺. 𑀏𑀯𑀫𑁂𑀯 𑀲𑁄𑀧𑀺 𑀲𑀺𑀬𑀸 𑀳𑀺, 𑀪𑁄 𑀕𑁄𑀢𑀫, 𑀳𑀢𑁆𑀣𑀺𑀁 𑀧𑀪𑀺𑀦𑁆𑀦𑀦𑁆𑀢𑀺𑀆𑀤𑀻𑀳𑀺 𑀪𑀕𑀯𑀦𑁆𑀢𑀁 𑀉𑀓𑁆𑀓𑀁𑀲𑁂𑀦𑁆𑀢𑁄𑀧𑀺 𑀫𑀬𑀫𑁂𑀯 𑀲𑀽𑀭𑀸 𑀫𑀬𑀁 𑀧𑀡𑁆𑀟𑀺𑀢𑀸 𑀫𑀬𑀁 𑀩𑀳𑀼𑀲𑁆𑀲𑀼𑀢𑀸𑀬𑁂𑀯 𑀏𑀯𑀁 𑀧𑀪𑀺𑀦𑁆𑀦𑀳𑀢𑁆𑀣𑀺𑀁 𑀯𑀺𑀬, 𑀚𑀮𑀺𑀢𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀯𑀺𑀬, 𑀨𑀡𑀓𑀢𑀆𑀲𑀻𑀯𑀺𑀲𑀁 𑀯𑀺𑀬 𑀘 𑀯𑀸𑀤𑀢𑁆𑀣𑀺𑀓𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀉𑀧𑀲𑀗𑁆𑀓𑀫𑀺𑀫𑁆𑀳𑀸𑀢𑀺 𑀅𑀢𑁆𑀢𑀸𑀦𑀁𑀬𑁂𑀯 𑀉𑀓𑁆𑀓𑀁𑀲𑁂𑀢𑀺. 𑀏𑀯𑀁 𑀅𑀢𑁆𑀢𑀸𑀦𑀁 𑀉𑀓𑁆𑀓𑀁𑀲𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀦𑀺𑀫𑀦𑁆𑀢𑀬𑀫𑀸𑀦𑁄 𑀅𑀥𑀺𑀯𑀸𑀲𑁂𑀢𑀼 𑀫𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀥𑀺𑀯𑀸𑀲𑁂𑀢𑀽𑀢𑀺 𑀲𑀫𑁆𑀧𑀝𑀺𑀘𑁆𑀙𑀢𑀼. 𑀲𑁆𑀯𑀸𑀢𑀦𑀸𑀬𑀸𑀢𑀺 𑀬𑀁 𑀫𑁂 𑀢𑀼𑀫𑁆𑀳𑁂𑀲𑀼 𑀓𑀸𑀭𑀁 𑀓𑀭𑁄𑀢𑁄 𑀲𑁆𑀯𑁂 𑀪𑀯𑀺𑀲𑁆𑀲𑀢𑀺 𑀧𑀼𑀜𑁆𑀜𑀜𑁆𑀘 𑀧𑀻𑀢𑀺𑀧𑀸𑀫𑁄𑀚𑁆𑀚𑀜𑁆𑀘, 𑀢𑀤𑀢𑁆𑀣𑀸𑀬. 𑀅𑀥𑀺𑀯𑀸𑀲𑁂𑀲𑀺 𑀪𑀕𑀯𑀸 𑀢𑀼𑀡𑁆𑀳𑀻𑀪𑀸𑀯𑁂𑀦𑀸𑀢𑀺 𑀪𑀕𑀯𑀸 𑀓𑀸𑀬𑀗𑁆𑀕𑀁 𑀯𑀸 𑀯𑀸𑀘𑀗𑁆𑀕𑀁 𑀯𑀸 𑀅𑀘𑁄𑀧𑁂𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑁂𑀬𑁂𑀯 𑀔𑀦𑁆𑀢𑀺𑀁 𑀥𑀸𑀭𑁂𑀦𑁆𑀢𑁄 𑀢𑀼𑀡𑁆𑀳𑀻𑀪𑀸𑀯𑁂𑀦 𑀅𑀥𑀺𑀯𑀸𑀲𑁂𑀲𑀺. 𑀲𑀘𑁆𑀘𑀓𑀲𑁆𑀲 𑀅𑀦𑀼𑀕𑁆𑀕𑀳𑀓𑀭𑀡𑀢𑁆𑀣𑀁 𑀫𑀦𑀲𑀸𑀯 𑀲𑀫𑁆𑀧𑀝𑀺𑀘𑁆𑀙𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁬𑁩. 𑀬𑀫𑀲𑁆𑀲 𑀧𑀢𑀺𑀭𑀽𑀧𑀁 𑀫𑀜𑁆𑀜𑁂𑀬𑁆𑀬𑀸𑀣𑀸𑀢𑀺 𑀢𑁂 𑀓𑀺𑀭 𑀮𑀺𑀘𑁆𑀙𑀯𑀻 𑀢𑀲𑁆𑀲 𑀧𑀜𑁆𑀘𑀣𑀸𑀮𑀺𑀧𑀸𑀓𑀲𑀢𑀸𑀦𑀺 𑀦𑀺𑀘𑁆𑀘𑀪𑀢𑁆𑀢𑀁 𑀆𑀳𑀭𑀦𑁆𑀢𑀺. 𑀢𑀤𑁂𑀯 𑀲𑀦𑁆𑀥𑀸𑀬 𑀏𑀲 𑀲𑁆𑀯𑁂 𑀢𑀼𑀫𑁆𑀳𑁂 𑀬𑀁 𑀅𑀲𑁆𑀲 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀧𑀢𑀺𑀭𑀽𑀧𑀁 𑀓𑀧𑁆𑀧𑀺𑀬𑀦𑁆𑀢𑀺 𑀫𑀜𑁆𑀜𑁂𑀬𑁆𑀬𑀸𑀣, 𑀢𑀁 𑀆𑀳𑀭𑁂𑀬𑁆𑀬𑀸𑀣; 𑀲𑀫𑀡𑀲𑁆𑀲 𑀳𑀺 𑀕𑁄𑀢𑀫𑀲𑁆𑀲 𑀢𑀼𑀫𑁆𑀳𑁂 𑀧𑀭𑀺𑀘𑀸𑀭𑀓𑀸 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀁 𑀬𑀼𑀢𑁆𑀢𑀸𑀬𑀼𑀢𑁆𑀢𑀁 𑀚𑀸𑀦𑀸𑀣𑀸𑀢𑀺 𑀯𑀤𑀢𑀺. 𑀪𑀢𑁆𑀢𑀸𑀪𑀺𑀳𑀸𑀭𑀁 𑀅𑀪𑀺𑀳𑀭𑀺𑀁𑀲𑀽𑀢𑀺 𑀅𑀪𑀺𑀳𑀭𑀺𑀢𑀩𑁆𑀩𑀁 𑀪𑀢𑁆𑀢𑀁 𑀅𑀪𑀺𑀳𑀭𑀺𑀁𑀲𑀼. 𑀧𑀡𑀻𑀢𑁂𑀦𑀸𑀢𑀺 𑀉𑀢𑁆𑀢𑀫𑁂𑀦. 𑀲𑀳𑀢𑁆𑀣𑀸𑀢𑀺 𑀲𑀳𑀢𑁆𑀣𑁂𑀦. 𑀲𑀦𑁆𑀢𑀧𑁆𑀧𑁂𑀢𑁆𑀯𑀸𑀢𑀺 𑀲𑀼𑀝𑁆𑀞𑀼 𑀢𑀧𑁆𑀧𑁂𑀢𑁆𑀯𑀸, 𑀧𑀭𑀺𑀧𑀼𑀡𑁆𑀡𑀁 𑀲𑀼𑀳𑀺𑀢𑀁 𑀬𑀸𑀯𑀤𑀢𑁆𑀣𑀁 𑀓𑀢𑁆𑀯𑀸. 𑀲𑀫𑁆𑀧𑀯𑀸𑀭𑁂𑀢𑁆𑀯𑀸𑀢𑀺 𑀲𑀼𑀝𑁆𑀞𑀼 𑀧𑀯𑀸𑀭𑁂𑀢𑁆𑀯𑀸, 𑀅𑀮𑀁 𑀅𑀮𑀦𑁆𑀢𑀺 𑀳𑀢𑁆𑀣𑀲𑀜𑁆𑀜𑀸𑀬 𑀧𑀝𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸. 𑀪𑀼𑀢𑁆𑀢𑀸𑀯𑀺𑀦𑁆𑀢𑀺 𑀪𑀼𑀢𑁆𑀢𑀯𑀦𑁆𑀢𑀁. 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀦𑁆𑀢𑀺 𑀧𑀢𑁆𑀢𑀢𑁄 𑀑𑀦𑀻𑀢𑀧𑀸𑀡𑀺𑀁, 𑀅𑀧𑀦𑀻𑀢𑀳𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀑𑀦𑀺𑀢𑁆𑀢𑀧𑀢𑁆𑀢𑀧𑀸𑀡𑀺’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲𑀢𑁆𑀣𑁄, 𑀑𑀦𑀺𑀢𑁆𑀢𑀁 𑀦𑀸𑀦𑀸𑀪𑀽𑀢𑀁 𑀧𑀢𑁆𑀢𑀁 𑀧𑀸𑀡𑀺𑀢𑁄 𑀅𑀲𑁆𑀲𑀸𑀢𑀺 𑀑𑀦𑀺𑀢𑁆𑀢𑀧𑀢𑁆𑀢𑀧𑀸𑀡𑀻. 𑀢𑀁 𑀑𑀦𑀺𑀢𑁆𑀢𑀧𑀢𑁆𑀢𑀧𑀸𑀡𑀺𑀁, 𑀳𑀢𑁆𑀣𑁂 𑀘 𑀧𑀢𑁆𑀢𑀜𑁆𑀘 𑀥𑁄𑀯𑀺𑀢𑁆𑀯𑀸 𑀏𑀓𑀫𑀦𑁆𑀢𑁂 𑀧𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀻𑀢𑀺 𑀪𑀕𑀯𑀦𑁆𑀢𑀁 𑀏𑀯𑀁𑀪𑀽𑀢𑀁 𑀜𑀢𑁆𑀯𑀸 𑀏𑀓𑀲𑁆𑀫𑀺𑀁 𑀑𑀓𑀸𑀲𑁂 𑀦𑀺𑀲𑀻𑀤𑀻𑀢𑀺 𑀅𑀢𑁆𑀣𑁄. 𑀧𑀼𑀜𑁆𑀜𑀜𑁆𑀘𑀸𑀢𑀺 𑀬𑀁 𑀇𑀫𑀲𑁆𑀫𑀺𑀁 𑀤𑀸𑀦𑁂 𑀧𑀼𑀜𑁆𑀜𑀁, 𑀆𑀬𑀢𑀺𑀁 𑀯𑀺𑀧𑀸𑀓𑀓𑁆𑀔𑀦𑁆𑀥𑀸𑀢𑀺 𑀅𑀢𑁆𑀣𑁄. 𑀧𑀼𑀜𑁆𑀜𑀫𑀳𑀻𑀢𑀺 𑀯𑀺𑀧𑀸𑀓𑀓𑁆𑀔𑀦𑁆𑀥𑀸𑀦𑀁𑀬𑁂𑀯 𑀧𑀭𑀺𑀯𑀸𑀭𑁄. 𑀢𑀁 𑀤𑀸𑀬𑀓𑀸𑀦𑀁 𑀲𑀼𑀔𑀸𑀬 𑀳𑁄𑀢𑀽𑀢𑀺 𑀢𑀁 𑀇𑀫𑁂𑀲𑀁 𑀮𑀺𑀘𑁆𑀙𑀯𑀻𑀦𑀁 𑀲𑀼𑀔𑀢𑁆𑀣𑀸𑀬 𑀳𑁄𑀢𑀼. 𑀇𑀤𑀁 𑀓𑀺𑀭 𑀲𑁄 𑀅𑀳𑀁 𑀧𑀩𑁆𑀩𑀚𑀺𑀢𑁄 𑀦𑀸𑀫, 𑀧𑀩𑁆𑀩𑀚𑀺𑀢𑁂𑀦 𑀘 𑀦 𑀬𑀼𑀢𑁆𑀢𑀁 𑀅𑀢𑁆𑀢𑀦𑁄 𑀤𑀸𑀦𑀁 𑀦𑀺𑀬𑁆𑀬𑀸𑀢𑁂𑀢𑀼𑀦𑁆𑀢𑀺 𑀢𑁂𑀲𑀁 𑀦𑀺𑀬𑁆𑀬𑀸𑀢𑁂𑀦𑁆𑀢𑁄 𑀏𑀯𑀫𑀸𑀳. 𑀅𑀣 𑀪𑀕𑀯𑀸 𑀬𑀲𑁆𑀫𑀸 𑀮𑀺𑀘𑁆𑀙𑀯𑀻𑀳𑀺 𑀲𑀘𑁆𑀘𑀓𑀲𑁆𑀲 𑀤𑀺𑀦𑁆𑀦𑀁, 𑀦 𑀪𑀕𑀯𑀢𑁄. 𑀲𑀘𑁆𑀘𑀓𑁂𑀦 𑀧𑀦 𑀪𑀕𑀯𑀢𑁄 𑀤𑀺𑀦𑁆𑀦𑀁, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑁄 𑀬𑀁 𑀔𑁄, 𑀅𑀕𑁆𑀕𑀺𑀯𑁂𑀲𑁆𑀲𑀦𑀸𑀢𑀺𑀆𑀤𑀺𑀫𑀸𑀳. 𑀇𑀢𑀺 𑀪𑀕𑀯𑀸 𑀦𑀺𑀕𑀡𑁆𑀞𑀲𑁆𑀲 𑀫𑀢𑁂𑀦 𑀯𑀺𑀦𑀸𑀬𑁂𑀯 𑀅𑀢𑁆𑀢𑀦𑁄 𑀤𑀺𑀦𑁆𑀦𑀁 𑀤𑀓𑁆𑀔𑀺𑀡𑀁 𑀦𑀺𑀕𑀡𑁆𑀞𑀲𑁆𑀲 𑀦𑀺𑀬𑁆𑀬𑀸𑀢𑁂𑀲𑀺, 𑀲𑀸 𑀘𑀲𑁆𑀲 𑀅𑀦𑀸𑀕𑀢𑁂 𑀯𑀸𑀲𑀦𑀸 𑀪𑀯𑀺𑀲𑁆𑀲𑀢𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀘𑀽𑀴𑀲𑀘𑁆𑀘𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀫𑀳𑀸𑀲𑀘𑁆𑀘𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬𑁪. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀲𑀘𑁆𑀘𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀏𑀓𑀁 𑀲𑀫𑀬𑀦𑁆𑀢𑀺 𑀘 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸𑀢𑀺 𑀘 𑀧𑀼𑀩𑁆𑀩𑀡𑁆𑀳𑀲𑀫𑀬𑀦𑁆𑀢𑀺 𑀘 𑀢𑀻𑀳𑀺 𑀧𑀤𑁂𑀳𑀺 𑀏𑀓𑁄𑀯 𑀲𑀫𑀬𑁄 𑀯𑀼𑀢𑁆𑀢𑁄. 𑀪𑀺𑀓𑁆𑀔𑀽𑀦𑀜𑁆𑀳𑀺 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀓𑀢𑁆𑀯𑀸 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀓𑀢𑀭𑀁 𑀕𑀸𑀫𑀁 𑀧𑀯𑀺𑀲𑀺𑀲𑁆𑀲𑀸𑀫𑀸𑀢𑀺 𑀯𑀺𑀢𑀓𑁆𑀓𑀫𑀸𑀴𑀓𑁂 𑀞𑀺𑀢𑀓𑀸𑀮𑁄 𑀦𑀸𑀫 𑀳𑁄𑀢𑀺. 𑀪𑀕𑀯𑀸 𑀏𑀯𑀭𑀽𑀧𑁂 𑀲𑀫𑀬𑁂 𑀭𑀢𑁆𑀢𑀤𑀼𑀧𑀝𑁆𑀝𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀧𑀁𑀲𑀼𑀓𑀽𑀮𑀘𑀻𑀯𑀭𑀁 𑀏𑀓𑀁𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑁆𑀫 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀕𑀦𑁆𑀥𑀓𑀼𑀝𑀺𑀧𑀫𑀼𑀔𑁂 𑀅𑀝𑁆𑀞𑀸𑀲𑀺. 𑀢𑀁 𑀲𑀦𑁆𑀥𑀸𑀬, 𑁋 ‘‘𑀏𑀓𑀁 𑀲𑀫𑀬𑀦𑁆𑀢𑀺 𑀘 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸𑀢𑀺 𑀘 𑀧𑀼𑀩𑁆𑀩𑀡𑁆𑀳𑀲𑀫𑀬’’𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀧𑀯𑀺𑀲𑀺𑀢𑀼𑀓𑀸𑀫𑁄𑀢𑀺 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀓𑀢𑀲𑀦𑁆𑀦𑀺𑀝𑁆𑀞𑀸𑀦𑁄. 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀓𑀲𑁆𑀫𑀸 𑀉𑀧𑀲𑀗𑁆𑀓𑀫𑀻𑀢𑀺? 𑀯𑀸𑀤𑀸𑀭𑁄𑀧𑀦𑀚𑁆𑀛𑀸𑀲𑀬𑁂𑀦. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀧𑀼𑀩𑁆𑀩𑁂𑀧𑀸𑀳𑀁 𑀅𑀧𑀡𑁆𑀟𑀺𑀢𑀢𑀸𑀬 𑀲𑀓𑀮𑀁 𑀯𑁂𑀲𑀸𑀮𑀺𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀭𑀺𑀲𑀫𑀚𑁆𑀛𑁂 𑀫𑀗𑁆𑀓𑀼 𑀚𑀸𑀢𑁄. 𑀇𑀤𑀸𑀦𑀺 𑀢𑀣𑀸 𑀅𑀓𑀢𑁆𑀯𑀸 𑀏𑀓𑀓𑁄𑀯 𑀕𑀦𑁆𑀢𑁆𑀯𑀸 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫𑀺. 𑀬𑀤𑀺 𑀲𑀫𑀡𑀁 𑀕𑁄𑀢𑀫𑀁 𑀧𑀭𑀸𑀚𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀤𑀻𑀧𑁂𑀢𑁆𑀯𑀸 𑀚𑀬𑀁 𑀓𑀭𑀺𑀲𑁆𑀲𑀸𑀫𑀺. 𑀬𑀤𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀅𑀦𑁆𑀥𑀓𑀸𑀭𑁂 𑀦𑀘𑁆𑀘𑀁 𑀯𑀺𑀬 𑀦 𑀓𑁄𑀘𑀺 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀦𑀺𑀤𑁆𑀤𑀸𑀧𑀜𑁆𑀳𑀁 𑀦𑀸𑀫 𑀕𑀳𑁂𑀢𑁆𑀯𑀸 𑀇𑀫𑀺𑀦𑀸 𑀯𑀸𑀤𑀚𑁆𑀛𑀸𑀲𑀬𑁂𑀦 𑀉𑀧𑀲𑀗𑁆𑀓𑀫𑀺.

𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸𑀢𑀺 𑀲𑀘𑁆𑀘𑀓𑀲𑁆𑀲 𑀦𑀺𑀕𑀡𑁆𑀞𑀧𑀼𑀢𑁆𑀢𑀲𑁆𑀲 𑀅𑀦𑀼𑀓𑀫𑁆𑀧𑀁 𑀧𑀝𑀺𑀘𑁆𑀘. 𑀣𑁂𑀭𑀲𑁆𑀲 𑀓𑀺𑀭𑀲𑁆𑀲 𑀏𑀯𑀁 𑀅𑀳𑁄𑀲𑀺 𑁋 ‘‘𑀪𑀕𑀯𑀢𑀺 𑀫𑀼𑀳𑀼𑀢𑁆𑀢𑀁 𑀦𑀺𑀲𑀺𑀦𑁆𑀦𑁂 𑀩𑀼𑀤𑁆𑀥𑀤𑀲𑁆𑀲𑀦𑀁 𑀥𑀫𑁆𑀫𑀲𑁆𑀲𑀯𑀦𑀜𑁆𑀘 𑀮𑀪𑀺𑀲𑁆𑀲𑀢𑀺. 𑀢𑀤𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀲𑀁𑀯𑀢𑁆𑀢𑀺𑀲𑁆𑀲𑀢𑀻’’𑀢𑀺. 𑀢𑀲𑁆𑀫𑀸 𑀪𑀕𑀯𑀦𑁆𑀢𑀁 𑀬𑀸𑀘𑀺𑀢𑁆𑀯𑀸 𑀧𑀁𑀲𑀼𑀓𑀽𑀮𑀘𑀻𑀯𑀭𑀁 𑀘𑀢𑀼𑀕𑁆𑀕𑀼𑀡𑀁 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀲𑀻𑀤𑀢𑀼 𑀪𑀕𑀯𑀸𑀢𑀺 𑀆𑀳. ‘‘𑀓𑀸𑀭𑀡𑀁 𑀆𑀦𑀦𑁆𑀤𑁄 𑀯𑀤𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀸𑀢𑀺 𑀬𑀁 𑀧𑀦 𑀧𑀜𑁆𑀳𑀁 𑀑𑀯𑀝𑁆𑀝𑀺𑀓𑀲𑀸𑀭𑀁 𑀓𑀢𑁆𑀯𑀸 𑀆𑀤𑀸𑀬 𑀆𑀕𑀢𑁄 𑀢𑀁 𑀞𑀧𑁂𑀢𑁆𑀯𑀸 𑀧𑀲𑁆𑀲𑁂𑀦 𑀢𑀸𑀯 𑀧𑀭𑀺𑀳𑀭𑀦𑁆𑀢𑁄 𑀏𑀢𑀁 𑀲𑀦𑁆𑀢𑀺, 𑀪𑁄 𑀕𑁄𑀢𑀫𑀸𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘.

𑁩𑁬𑁫. 𑀨𑀼𑀲𑀦𑁆𑀢𑀺 𑀳𑀺 𑀢𑁂, 𑀪𑁄 𑀕𑁄𑀢𑀫𑀸𑀢𑀺 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀲𑀭𑀻𑀭𑁂 𑀉𑀧𑁆𑀧𑀦𑁆𑀦𑀁 𑀲𑀸𑀭𑀻𑀭𑀺𑀓𑀁 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀨𑀼𑀲𑀦𑁆𑀢𑀺 𑀮𑀪𑀦𑁆𑀢𑀺, 𑀅𑀦𑀼𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀊𑀭𑀼𑀓𑁆𑀔𑀫𑁆𑀪𑁄𑀢𑀺 𑀔𑀫𑁆𑀪𑀓𑀢𑀊𑀭𑀼𑀪𑀸𑀯𑁄, 𑀊𑀭𑀼𑀣𑀤𑁆𑀥𑀢𑀸𑀢𑀺 𑀅𑀢𑁆𑀣𑁄. 𑀯𑀺𑀫𑁆𑀳𑀬𑀢𑁆𑀣𑀯𑀲𑁂𑀦 𑀧𑀦𑁂𑀢𑁆𑀣 𑀪𑀯𑀺𑀲𑁆𑀲𑀢𑀻𑀢𑀺 𑀅𑀦𑀸𑀕𑀢𑀯𑀘𑀦𑀁 𑀓𑀢𑀁. 𑀓𑀸𑀬𑀦𑁆𑀯𑀬𑀁 𑀳𑁄𑀢𑀻𑀢𑀺 𑀓𑀸𑀬𑀸𑀦𑀼𑀕𑀢𑀁 𑀳𑁄𑀢𑀺 𑀓𑀸𑀬𑀲𑁆𑀲 𑀯𑀲𑀯𑀢𑁆𑀢𑀺. 𑀓𑀸𑀬𑀪𑀸𑀯𑀦𑀸𑀢𑀺 𑀧𑀦 𑀯𑀺𑀧𑀲𑁆𑀲𑀦𑀸 𑀯𑀼𑀘𑁆𑀘𑀢𑀺, 𑀢𑀸𑀬 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀁 𑀧𑀸𑀧𑀼𑀡𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀇𑀢𑀺 𑀦𑀺𑀕𑀡𑁆𑀞𑁄 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀬𑀁 𑀦𑀢𑁆𑀣𑀺, 𑀢𑀤𑁂𑀯𑀸𑀳. 𑀘𑀺𑀢𑁆𑀢𑀪𑀸𑀯𑀦𑀸𑀢𑀺𑀧𑀺 𑀲𑀫𑀣𑁄 𑀯𑀼𑀘𑁆𑀘𑀢𑀺, 𑀲𑀫𑀸𑀥𑀺𑀬𑀼𑀢𑁆𑀢𑀲𑁆𑀲 𑀘 𑀧𑀼𑀕𑁆𑀕𑀮𑀲𑁆𑀲 𑀊𑀭𑀼𑀓𑁆𑀔𑀫𑁆𑀪𑀸𑀤𑀬𑁄 𑀦𑀸𑀫 𑀦𑀢𑁆𑀣𑀺, 𑀇𑀢𑀺 𑀦𑀺𑀕𑀡𑁆𑀞𑁄 𑀇𑀤𑀁 𑀅𑀪𑀽𑀢𑀫𑁂𑀯 𑀆𑀳. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀼𑀢𑁆𑀢𑀁 𑁋 ‘‘𑀬𑀣𑁂𑀯 ‘𑀪𑀽𑀢𑀧𑀼𑀩𑁆𑀩𑀦𑁆𑀢𑀺 𑀯𑀢𑁆𑀯𑀸 𑀊𑀭𑀼𑀓𑁆𑀔𑀫𑁆𑀪𑁄𑀧𑀺 𑀦𑀸𑀫 𑀪𑀯𑀺𑀲𑁆𑀲𑀢𑀻’𑀢𑀺𑀆𑀤𑀻𑀦𑀺 𑀯𑀤𑀢𑁄 𑀅𑀦𑀸𑀕𑀢𑀭𑀽𑀧𑀁 𑀦 𑀲𑀫𑁂𑀢𑀺, 𑀢𑀣𑀸 𑀅𑀢𑁆𑀣𑁄𑀧𑀺 𑀦 𑀲𑀫𑁂𑀢𑀺, 𑀅𑀲𑀦𑁆𑀢𑀁 𑀅𑀪𑀽𑀢𑀁 𑀬𑀁 𑀦𑀢𑁆𑀣𑀺, 𑀢𑀁 𑀓𑀣𑁂𑀢𑀻’’𑀢𑀺.

𑀦𑁄 𑀓𑀸𑀬𑀪𑀸𑀯𑀦𑀦𑁆𑀢𑀺 𑀧𑀜𑁆𑀘𑀸𑀢𑀧𑀢𑀧𑁆𑀧𑀦𑀸𑀤𑀺𑀁 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀁 𑀲𑀦𑁆𑀥𑀸𑀬𑀸𑀳. 𑀅𑀬𑀜𑁆𑀳𑀺 𑀢𑁂𑀲𑀁 𑀓𑀸𑀬𑀪𑀸𑀯𑀦𑀸 𑀦𑀸𑀫. 𑀓𑀺𑀁 𑀧𑀦 𑀲𑁄 𑀤𑀺𑀲𑁆𑀯𑀸 𑀏𑀯𑀫𑀸𑀳? 𑀲𑁄 𑀓𑀺𑀭 𑀤𑀺𑀯𑀸𑀤𑀺𑀯𑀲𑁆𑀲 𑀯𑀺𑀳𑀸𑀭𑀁 𑀆𑀕𑀘𑁆𑀙𑀢𑀺, 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀪𑀺𑀓𑁆𑀔𑀽 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑁂𑀲𑀼 𑀧𑀝𑀺𑀲𑀮𑁆𑀮𑀸𑀦𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀲𑁄 𑀢𑁂 𑀧𑀝𑀺𑀲𑀮𑁆𑀮𑀻𑀦𑁂 𑀤𑀺𑀲𑁆𑀯𑀸 𑀘𑀺𑀢𑁆𑀢𑀪𑀸𑀯𑀦𑀸𑀫𑀢𑁆𑀢𑀁 𑀏𑀢𑁂 𑀅𑀦𑀼𑀬𑀼𑀜𑁆𑀚𑀦𑁆𑀢𑀺, 𑀓𑀸𑀬𑀪𑀸𑀯𑀦𑀸 𑀧𑀦𑁂𑀢𑁂𑀲𑀁 𑀦𑀢𑁆𑀣𑀻𑀢𑀺 𑀫𑀜𑁆𑀜𑀫𑀸𑀦𑁄 𑀏𑀯𑀫𑀸𑀳.

𑁩𑁬𑁬. 𑀅𑀣 𑀦𑀁 𑀪𑀕𑀯𑀸 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀓𑀺𑀦𑁆𑀢𑀺 𑀧𑀦 𑀢𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀓𑀸𑀬𑀪𑀸𑀯𑀦𑀸 𑀲𑀼𑀢𑀸𑀢𑀺 𑀆𑀳. 𑀲𑁄 𑀢𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀲𑁂𑀬𑁆𑀬𑀣𑀺𑀤𑀁, 𑀦𑀦𑁆𑀤𑁄 𑀯𑀘𑁆𑀙𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀦𑁆𑀤𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀯𑀘𑁆𑀙𑁄𑀢𑀺 𑀕𑁄𑀢𑁆𑀢𑀁. 𑀓𑀺𑀲𑁄𑀢𑀺 𑀦𑀸𑀫𑀁. 𑀲𑀁𑀓𑀺𑀘𑁆𑀘𑁄𑀢𑀺 𑀕𑁄𑀢𑁆𑀢𑀁. 𑀫𑀓𑁆𑀔𑀮𑀺𑀕𑁄𑀲𑀸𑀮𑁄 𑀳𑁂𑀝𑁆𑀞𑀸 𑀆𑀕𑀢𑁄𑀯. 𑀏𑀢𑁂𑀢𑀺 𑀏𑀢𑁂 𑀢𑀬𑁄 𑀚𑀦𑀸, 𑀢𑁂 𑀓𑀺𑀭 𑀓𑀺𑀮𑀺𑀝𑁆𑀞𑀢𑀧𑀸𑀦𑀁 𑀫𑀢𑁆𑀣𑀓𑀧𑀢𑁆𑀢𑀸 𑀅𑀳𑁂𑀲𑀼𑀁. 𑀉𑀴𑀸𑀭𑀸𑀦𑀺 𑀉𑀴𑀸𑀭𑀸𑀦𑀻𑀢𑀺 𑀧𑀡𑀻𑀢𑀸𑀦𑀺 𑀧𑀡𑀻𑀢𑀸𑀦𑀺. 𑀕𑀸𑀳𑁂𑀦𑁆𑀢𑀺 𑀦𑀸𑀫𑀸𑀢𑀺 𑀩𑀮𑀁 𑀕𑀡𑁆𑀳𑀸𑀧𑁂𑀦𑁆𑀢𑀺 𑀦𑀸𑀫. 𑀩𑁆𑀭𑀽𑀳𑁂𑀦𑁆𑀢𑀻𑀢𑀺 𑀯𑀟𑁆𑀠𑁂𑀦𑁆𑀢𑀺. 𑀫𑁂𑀤𑁂𑀦𑁆𑀢𑀻𑀢𑀺 𑀚𑀸𑀢𑀫𑁂𑀤𑀁 𑀓𑀭𑁄𑀦𑁆𑀢𑀺. 𑀧𑀼𑀭𑀺𑀫𑀁 𑀧𑀳𑀸𑀬𑀸𑀢𑀺 𑀧𑀼𑀭𑀺𑀫𑀁 𑀤𑀼𑀓𑁆𑀓𑀭𑀓𑀸𑀭𑀁 𑀧𑀳𑀸𑀬. 𑀧𑀘𑁆𑀙𑀸 𑀉𑀧𑀘𑀺𑀦𑀦𑁆𑀢𑀻𑀢𑀺 𑀧𑀘𑁆𑀙𑀸 𑀉𑀴𑀸𑀭𑀔𑀸𑀤𑀦𑀻𑀬𑀸𑀤𑀻𑀳𑀺 𑀲𑀦𑁆𑀢𑀧𑁆𑀧𑁂𑀦𑁆𑀢𑀺, 𑀯𑀟𑁆𑀠𑁂𑀦𑁆𑀢𑀺. 𑀆𑀘𑀬𑀸𑀧𑀘𑀬𑁄 𑀳𑁄𑀢𑀻𑀢𑀺 𑀯𑀟𑁆𑀠𑀺 𑀘 𑀅𑀯𑀟𑁆𑀠𑀺 𑀘 𑀳𑁄𑀢𑀺, 𑀇𑀢𑀺 𑀇𑀫𑀲𑁆𑀲 𑀓𑀸𑀬𑀲𑁆𑀲 𑀓𑀸𑀮𑁂𑀦 𑀯𑀟𑁆𑀠𑀺, 𑀓𑀸𑀮𑁂𑀦 𑀧𑀭𑀺𑀳𑀸𑀦𑀻𑀢𑀺 𑀯𑀟𑁆𑀠𑀺𑀧𑀭𑀺𑀳𑀸𑀦𑀺𑀫𑀢𑁆𑀢𑀫𑁂𑀯 𑀧𑀜𑁆𑀜𑀸𑀬𑀢𑀺, 𑀓𑀸𑀬𑀪𑀸𑀯𑀦𑀸 𑀧𑀦 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀤𑀻𑀧𑁂𑀢𑁆𑀯𑀸 𑀘𑀺𑀢𑁆𑀢𑀪𑀸𑀯𑀦𑀁 𑀧𑀼𑀘𑁆𑀙𑀦𑁆𑀢𑁄, ‘‘𑀓𑀺𑀦𑁆𑀢𑀺 𑀧𑀦 𑀢𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀘𑀺𑀢𑁆𑀢𑀪𑀸𑀯𑀦𑀸 𑀲𑀼𑀢𑀸’’𑀢𑀺 𑀆𑀳. 𑀦 𑀲𑀫𑁆𑀧𑀸𑀬𑀸𑀲𑀻𑀢𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀓𑀣𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀬𑀣𑀸 𑀢𑀁 𑀩𑀸𑀮𑀧𑀼𑀣𑀼𑀚𑁆𑀚𑀦𑁄.

𑁩𑁬𑁭. 𑀓𑀼𑀢𑁄 𑀧𑀦 𑀢𑁆𑀯𑀦𑁆𑀢𑀺 𑀬𑁄 𑀢𑁆𑀯𑀁 𑀏𑀯𑀁 𑀑𑀴𑀸𑀭𑀺𑀓𑀁 𑀤𑀼𑀩𑁆𑀩𑀮𑀁 𑀓𑀸𑀬𑀪𑀸𑀯𑀦𑀁 𑀦 𑀚𑀸𑀦𑀸𑀲𑀺? 𑀲𑁄 𑀢𑁆𑀯𑀁 𑀓𑀼𑀢𑁄 𑀲𑀡𑁆𑀳𑀁 𑀲𑀼𑀔𑀼𑀫𑀁 𑀘𑀺𑀢𑁆𑀢𑀪𑀸𑀯𑀦𑀁 𑀚𑀸𑀦𑀺𑀲𑁆𑀲𑀲𑀻𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀘𑁄𑀤𑀦𑀸𑀮𑀬𑀢𑁆𑀣𑁂𑀭𑁄, ‘‘𑀅𑀩𑀼𑀤𑁆𑀥𑀯𑀘𑀦𑀁 𑀦𑀸𑀫𑁂𑀢𑀁 𑀧𑀤’’𑀦𑁆𑀢𑀺 𑀩𑀻𑀚𑀦𑀺𑀁 𑀞𑀧𑁂𑀢𑁆𑀯𑀸 𑀧𑀓𑁆𑀓𑀫𑀺𑀢𑀼𑀁 𑀆𑀭𑀪𑀺. 𑀅𑀣 𑀦𑀁 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀆𑀳 𑁋 ‘‘𑀤𑀺𑀲𑁆𑀲𑀢𑀺, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀲 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀲 𑀓𑀸𑀬𑀲𑁆𑀲 𑀆𑀘𑀬𑁄𑀧𑀺 𑀅𑀧𑀘𑀬𑁄𑀧𑀺 𑀆𑀤𑀸𑀦𑀫𑁆𑀧𑀺 𑀦𑀺𑀓𑁆𑀔𑁂𑀧𑀦𑀫𑁆𑀧𑀻’’𑀢𑀺 (𑀲𑀁. 𑀦𑀺. 𑁨.𑁬𑁨). 𑀢𑀁 𑀲𑀼𑀢𑁆𑀯𑀸 𑀲𑀮𑁆𑀮𑀓𑁆𑀔𑁂𑀲𑀺 𑁋 ‘‘𑀑𑀴𑀸𑀭𑀺𑀓𑀁 𑀓𑀸𑀬𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀯𑀺𑀧𑀲𑁆𑀲𑀦𑀸 𑀑𑀴𑀸𑀭𑀺𑀓𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺.

𑁩𑁬𑁮. 𑀲𑀼𑀔𑀲𑀸𑀭𑀸𑀕𑀻𑀢𑀺 𑀲𑀼𑀔𑀲𑀸𑀭𑀸𑀕𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀦𑀺𑀭𑁄𑀥𑀸 𑀉𑀧𑁆𑀧𑀚𑁆𑀚𑀢𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸𑀢𑀺 𑀦 𑀅𑀦𑀦𑁆𑀢𑀭𑀸𑀯 𑀉𑀧𑁆𑀧𑀚𑁆𑀚𑀢𑀺, 𑀲𑀼𑀔𑀤𑀼𑀓𑁆𑀔𑀸𑀦𑀜𑁆𑀳𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑀢𑀸 𑀧𑀝𑁆𑀞𑀸𑀦𑁂 (𑀧𑀝𑁆𑀞𑀸. 𑁧.𑁨.𑁪𑁫-𑁪𑁬) 𑀧𑀝𑀺𑀲𑀺𑀤𑁆𑀥𑀸. 𑀬𑀲𑁆𑀫𑀸 𑀧𑀦 𑀲𑀼𑀔𑁂 𑀅𑀦𑀺𑀭𑀼𑀤𑁆𑀥𑁂 𑀤𑀼𑀓𑁆𑀔𑀁 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀇𑀥 𑀏𑀯𑀁 𑀯𑀼𑀢𑁆𑀢𑀁. 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻𑀢𑀺 𑀔𑁂𑀧𑁂𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀉𑀪𑀢𑁄𑀧𑀓𑁆𑀔𑀦𑁆𑀢𑀺 𑀲𑀼𑀔𑀁 𑀏𑀓𑀁 𑀧𑀓𑁆𑀔𑀁 𑀤𑀼𑀓𑁆𑀔𑀁 𑀏𑀓𑀁 𑀧𑀓𑁆𑀔𑀦𑁆𑀢𑀺 𑀏𑀯𑀁 𑀉𑀪𑀢𑁄𑀧𑀓𑁆𑀔𑀁 𑀳𑀼𑀢𑁆𑀯𑀸.

𑁩𑁬𑁯. 𑀉𑀧𑁆𑀧𑀦𑁆𑀦𑀸𑀧𑀺 𑀲𑀼𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺, 𑀪𑀸𑀯𑀺𑀢𑀢𑁆𑀢𑀸 𑀓𑀸𑀬𑀲𑁆𑀲. 𑀉𑀧𑁆𑀧𑀦𑁆𑀦𑀸𑀧𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺, 𑀪𑀸𑀯𑀺𑀢𑀢𑁆𑀢𑀸 𑀘𑀺𑀢𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀓𑀸𑀬𑀪𑀸𑀯𑀦𑀸 𑀯𑀺𑀧𑀲𑁆𑀲𑀦𑀸, 𑀘𑀺𑀢𑁆𑀢𑀪𑀸𑀯𑀦𑀸 𑀲𑀫𑀸𑀥𑀺. 𑀯𑀺𑀧𑀲𑁆𑀲𑀦𑀸 𑀘 𑀲𑀼𑀔𑀲𑁆𑀲 𑀧𑀘𑁆𑀘𑀦𑀻𑀓𑀸, 𑀤𑀼𑀓𑁆𑀔𑀲𑁆𑀲 𑀆𑀲𑀦𑁆𑀦𑀸. 𑀲𑀫𑀸𑀥𑀺 𑀤𑀼𑀓𑁆𑀔𑀲𑁆𑀲 𑀧𑀘𑁆𑀘𑀦𑀻𑀓𑁄, 𑀲𑀼𑀔𑀲𑁆𑀲 𑀆𑀲𑀦𑁆𑀦𑁄. 𑀓𑀣𑀁? 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀳𑀺 𑀅𑀤𑁆𑀥𑀸𑀦𑁂 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀢𑀢𑁆𑀣 𑀢𑀢𑁆𑀣 𑀅𑀕𑁆𑀕𑀺𑀉𑀝𑁆𑀞𑀸𑀦𑀁 𑀯𑀺𑀬 𑀳𑁄𑀢𑀺, 𑀓𑀘𑁆𑀙𑁂𑀳𑀺 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀫𑀢𑁆𑀣𑀓𑀢𑁄 𑀉𑀲𑀼𑀫𑀯𑀝𑁆𑀝𑀺𑀉𑀝𑁆𑀞𑀸𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀘𑀺𑀢𑁆𑀢𑀁 𑀳𑀜𑁆𑀜𑀢𑀺 𑀯𑀺𑀳𑀜𑁆𑀜𑀢𑀺 𑀯𑀺𑀧𑁆𑀨𑀦𑁆𑀤𑀢𑀺. 𑀏𑀯𑀁 𑀢𑀸𑀯 𑀯𑀺𑀧𑀲𑁆𑀲𑀦𑀸 𑀲𑀼𑀔𑀲𑁆𑀲 𑀧𑀘𑁆𑀘𑀦𑀻𑀓𑀸, 𑀤𑀼𑀓𑁆𑀔𑀲𑁆𑀲 𑀆𑀲𑀦𑁆𑀦𑀸. 𑀉𑀧𑁆𑀧𑀦𑁆𑀦𑁂 𑀧𑀦 𑀓𑀸𑀬𑀺𑀓𑁂 𑀯𑀸 𑀘𑁂𑀢𑀲𑀺𑀓𑁂 𑀯𑀸 𑀤𑀼𑀓𑁆𑀔𑁂 𑀢𑀁 𑀤𑀼𑀓𑁆𑀔𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑀲𑁆𑀲 𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂 𑀤𑀼𑀓𑁆𑀔𑀁 𑀤𑀽𑀭𑀸𑀧𑀕𑀢𑀁 𑀳𑁄𑀢𑀺, 𑀅𑀦𑀧𑁆𑀧𑀓𑀁 𑀲𑀼𑀔𑀁 𑀑𑀓𑁆𑀓𑀫𑀢𑀺. 𑀏𑀯𑀁 𑀲𑀫𑀸𑀥𑀺 𑀤𑀼𑀓𑁆𑀔𑀲𑁆𑀲 𑀧𑀘𑁆𑀘𑀦𑀻𑀓𑁄, 𑀲𑀼𑀔𑀲𑁆𑀲 𑀆𑀲𑀦𑁆𑀦𑁄. 𑀬𑀣𑀸 𑀯𑀺𑀧𑀲𑁆𑀲𑀦𑀸 𑀲𑀼𑀔𑀲𑁆𑀲 𑀧𑀘𑁆𑀘𑀦𑀻𑀓𑀸, 𑀤𑀼𑀓𑁆𑀔𑀲𑁆𑀲 𑀆𑀲𑀦𑁆𑀦𑀸, 𑀦 𑀢𑀣𑀸 𑀲𑀫𑀸𑀥𑀺. 𑀬𑀣𑀸 𑀲𑀫𑀸𑀥𑀺 𑀤𑀼𑀓𑁆𑀔𑀲𑁆𑀲 𑀧𑀘𑁆𑀘𑀦𑀻𑀓𑁄, 𑀲𑀼𑀔𑀲𑁆𑀲 𑀆𑀲𑀦𑁆𑀦𑁄, 𑀦 𑀘 𑀢𑀣𑀸 𑀯𑀺𑀧𑀲𑁆𑀲𑀦𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀉𑀧𑁆𑀧𑀦𑁆𑀦𑀸𑀧𑀺 𑀲𑀼𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺, 𑀪𑀸𑀯𑀺𑀢𑀢𑁆𑀢𑀸 𑀓𑀸𑀬𑀲𑁆𑀲. 𑀉𑀧𑁆𑀧𑀦𑁆𑀦𑀸𑀧𑀺 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺, 𑀪𑀸𑀯𑀺𑀢𑀢𑁆𑀢𑀸 𑀘𑀺𑀢𑁆𑀢𑀲𑁆𑀲𑀸’’𑀢𑀺.

𑁩𑁭𑁦. 𑀆𑀲𑀚𑁆𑀚 𑀉𑀧𑀦𑀻𑀬𑀸𑀢𑀺 𑀕𑀼𑀡𑁂 𑀖𑀝𑁆𑀝𑁂𑀢𑁆𑀯𑀸 𑀘𑁂𑀯 𑀉𑀧𑀦𑁂𑀢𑁆𑀯𑀸 𑀘. 𑀢𑀁 𑀯𑀢 𑀫𑁂𑀢𑀺 𑀢𑀁 𑀯𑀢 𑀫𑀫 𑀘𑀺𑀢𑁆𑀢𑀁.

𑁩𑁭𑁧. 𑀓𑀺𑀜𑁆𑀳𑀺 𑀦𑁄 𑀲𑀺𑀬𑀸, 𑀅𑀕𑁆𑀕𑀺𑀯𑁂𑀲𑁆𑀲𑀦𑀸𑀢𑀺, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀓𑀺𑀁 𑀦 𑀪𑀯𑀺𑀲𑁆𑀲𑀢𑀺, 𑀪𑀯𑀺𑀲𑁆𑀲𑀢𑁂𑀯, 𑀫𑀸 𑀏𑀯𑀁 𑀲𑀜𑁆𑀜𑀻 𑀳𑁄𑀳𑀺, 𑀉𑀧𑁆𑀧𑀚𑁆𑀚𑀺𑀬𑁂𑀯 𑀫𑁂 𑀲𑀼𑀔𑀸𑀧𑀺 𑀤𑀼𑀓𑁆𑀔𑀸𑀧𑀺 𑀯𑁂𑀤𑀦𑀸, 𑀉𑀧𑁆𑀧𑀦𑁆𑀦𑀸𑀬 𑀧𑀦𑀲𑁆𑀲𑀸 𑀅𑀳𑀁 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀞𑀸𑀢𑀼𑀁 𑀦 𑀤𑁂𑀫𑀺. 𑀇𑀤𑀸𑀦𑀺𑀲𑁆𑀲 𑀢𑀫𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 𑀉𑀧𑀭𑀺 𑀧𑀲𑀸𑀤𑀸𑀯𑀳𑀁 𑀥𑀫𑁆𑀫𑀤𑁂𑀲𑀦𑀁 𑀤𑁂𑀲𑁂𑀢𑀼𑀓𑀸𑀫𑁄 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀆𑀭𑀪𑀺. 𑀢𑀢𑁆𑀣 𑀇𑀥 𑀫𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸…𑀧𑁂… 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺𑀁, 𑀅𑀮𑀫𑀺𑀤𑀁 𑀧𑀥𑀸𑀦𑀸𑀬𑀸𑀢𑀺 𑀇𑀤𑀁 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀧𑀸𑀲𑀭𑀸𑀲𑀺𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄, 𑀢𑀢𑁆𑀣 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀦𑀺𑀲𑀚𑁆𑀚𑀸, 𑀇𑀥 𑀤𑀼𑀓𑁆𑀓𑀭𑀓𑀸𑀭𑀺𑀓𑀸.

𑁩𑁭𑁪. 𑀅𑀮𑁆𑀮𑀓𑀝𑁆𑀞𑀦𑁆𑀢𑀺 𑀅𑀮𑁆𑀮𑀁 𑀉𑀤𑀼𑀫𑁆𑀩𑀭𑀓𑀝𑁆𑀞𑀁. 𑀲𑀲𑁆𑀦𑁂𑀳𑀦𑁆𑀢𑀺 𑀲𑀔𑀻𑀭𑀁. 𑀓𑀸𑀫𑁂𑀳𑀻𑀢𑀺 𑀯𑀢𑁆𑀣𑀼𑀓𑀸𑀫𑁂𑀳𑀺. 𑀅𑀯𑀽𑀧𑀓𑀝𑁆𑀞𑀸𑀢𑀺 𑀅𑀦𑀧𑀕𑀢𑀸. 𑀓𑀸𑀫𑀘𑁆𑀙𑀦𑁆𑀤𑁄𑀢𑀺𑀆𑀤𑀻𑀲𑀼 𑀓𑀺𑀮𑁂𑀲𑀓𑀸𑀫𑁄𑀯 𑀙𑀦𑁆𑀤𑀓𑀭𑀡𑀯𑀲𑁂𑀦 𑀙𑀦𑁆𑀤𑁄. 𑀲𑀺𑀦𑁂𑀳𑀓𑀭𑀡𑀯𑀲𑁂𑀦 𑀲𑁆𑀦𑁂𑀳𑁄. 𑀫𑀼𑀘𑁆𑀙𑀸𑀓𑀭𑀡𑀯𑀲𑁂𑀦 𑀫𑀼𑀘𑁆𑀙𑀸. 𑀧𑀺𑀧𑀸𑀲𑀸𑀓𑀭𑀡𑀯𑀲𑁂𑀦 𑀧𑀺𑀧𑀸𑀲𑀸. 𑀅𑀦𑀼𑀤𑀳𑀦𑀯𑀲𑁂𑀦 𑀧𑀭𑀺𑀴𑀸𑀳𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀑𑀧𑀓𑁆𑀓𑀫𑀺𑀓𑀸𑀢𑀺 𑀉𑀧𑀓𑁆𑀓𑀫𑀦𑀺𑀩𑁆𑀩𑀢𑁆𑀢𑀸. 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬 𑀅𑀦𑀼𑀢𑁆𑀢𑀭𑀸𑀬 𑀲𑀫𑁆𑀩𑁄𑀥𑀸𑀬𑀸𑀢𑀺 𑀲𑀩𑁆𑀩𑀁 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀯𑁂𑀯𑀘𑀦𑀫𑁂𑀯.

𑀇𑀤𑀁 𑀧𑀦𑁂𑀢𑁆𑀣 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀅𑀮𑁆𑀮𑀁 𑀲𑀔𑀻𑀭𑀁 𑀉𑀤𑀼𑀫𑁆𑀩𑀭𑀓𑀝𑁆𑀞𑀁 𑀯𑀺𑀬 𑀳𑀺 𑀓𑀺𑀮𑁂𑀲𑀓𑀸𑀫𑁂𑀦 𑀯𑀢𑁆𑀣𑀼𑀓𑀸𑀫𑀢𑁄 𑀅𑀦𑀺𑀲𑁆𑀲𑀝𑀧𑀼𑀕𑁆𑀕𑀮𑀸. 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑀪𑀸𑀯𑁄 𑀯𑀺𑀬 𑀓𑀺𑀮𑁂𑀲𑀓𑀸𑀫𑁂𑀦 𑀢𑀺𑀦𑁆𑀢𑀢𑀸; 𑀫𑀦𑁆𑀣𑀦𑁂𑀦𑀸𑀧𑀺 𑀅𑀕𑁆𑀕𑀺𑀦𑁄 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑀦𑀁 𑀯𑀺𑀬 𑀓𑀺𑀮𑁂𑀲𑀓𑀸𑀫𑁂𑀦 𑀯𑀢𑁆𑀣𑀼𑀓𑀸𑀫𑀢𑁄 𑀅𑀦𑀺𑀲𑁆𑀲𑀝𑀸𑀦𑀁 𑀑𑀧𑀓𑁆𑀓𑀫𑀺𑀓𑀸𑀳𑀺 𑀯𑁂𑀤𑀦𑀸𑀳𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑁆𑀲 𑀅𑀦𑀥𑀺𑀕𑀫𑁄. 𑀅𑀫𑀦𑁆𑀣𑀦𑁂𑀦𑀸𑀧𑀺 𑀅𑀕𑁆𑀕𑀺𑀦𑁄 𑀅𑀦𑀪𑀺𑀦𑀺𑀩𑁆𑀩𑀢𑁆𑀢𑀦𑀁 𑀯𑀺𑀬 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀯𑀺𑀦𑀸𑀧𑀺 𑀑𑀧𑀓𑁆𑀓𑀫𑀺𑀓𑀸𑀳𑀺 𑀯𑁂𑀤𑀦𑀸𑀳𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑁆𑀲 𑀅𑀦𑀥𑀺𑀕𑀫𑁄. 𑀤𑀼𑀢𑀺𑀬𑀉𑀧𑀫𑀸𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀧𑀦 𑀯𑀺𑀲𑁂𑀲𑁄, 𑀧𑀼𑀭𑀺𑀫𑀸 𑀲𑀧𑀼𑀢𑁆𑀢𑀪𑀭𑀺𑀬𑀧𑀩𑁆𑀩𑀚𑁆𑀚𑀸𑀬 𑀉𑀧𑀫𑀸; 𑀧𑀘𑁆𑀙𑀺𑀫𑀸 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀺𑀓𑀧𑀩𑁆𑀩𑀚𑁆𑀚𑀸𑀬.

𑁩𑁭𑁬. 𑀢𑀢𑀺𑀬𑀉𑀧𑀫𑀸𑀬 𑀓𑁄𑀴𑀸𑀧𑀦𑁆𑀢𑀺 𑀙𑀺𑀦𑁆𑀦𑀲𑀺𑀦𑁂𑀳𑀁 𑀦𑀺𑀭𑀸𑀧𑀁. 𑀣𑀮𑁂 𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀧𑀩𑁆𑀩𑀢𑀣𑀮𑁂 𑀯𑀸 𑀪𑀽𑀫𑀺𑀣𑀮𑁂 𑀯𑀸 𑀦𑀺𑀓𑁆𑀔𑀺𑀢𑁆𑀢𑀁. 𑀏𑀢𑁆𑀣𑀸𑀧𑀺 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀲𑀼𑀓𑁆𑀔𑀓𑁄𑀴𑀸𑀧𑀓𑀝𑁆𑀞𑀁 𑀯𑀺𑀬 𑀳𑀺 𑀓𑀺𑀮𑁂𑀲𑀓𑀸𑀫𑁂𑀦 𑀯𑀢𑁆𑀣𑀼𑀓𑀸𑀫𑀢𑁄 𑀦𑀺𑀲𑁆𑀲𑀝𑀧𑀼𑀕𑁆𑀕𑀮𑀸, 𑀆𑀭𑀓𑀸 𑀉𑀤𑀓𑀸 𑀣𑀮𑁂 𑀦𑀺𑀓𑁆𑀔𑀺𑀢𑁆𑀢𑀪𑀸𑀯𑁄 𑀯𑀺𑀬 𑀓𑀺𑀮𑁂𑀲𑀓𑀸𑀫𑁂𑀦 𑀅𑀢𑀺𑀦𑁆𑀢𑀢𑀸. 𑀫𑀦𑁆𑀣𑀦𑁂𑀦𑀸𑀧𑀺 𑀅𑀕𑁆𑀕𑀺𑀦𑁄 𑀅𑀪𑀺𑀦𑀺𑀩𑁆𑀩𑀢𑁆𑀢𑀦𑀁 𑀯𑀺𑀬 𑀓𑀺𑀮𑁂𑀲𑀓𑀸𑀫𑁂𑀦 𑀯𑀢𑁆𑀣𑀼𑀓𑀸𑀫𑀢𑁄 𑀦𑀺𑀲𑁆𑀲𑀝𑀸𑀦𑀁 𑀅𑀩𑁆𑀪𑁄𑀓𑀸𑀲𑀺𑀓𑀦𑁂𑀲𑀚𑁆𑀚𑀺𑀓𑀸𑀤𑀺𑀯𑀲𑁂𑀦 𑀑𑀧𑀓𑁆𑀓𑀫𑀺𑀓𑀸𑀳𑀺𑀧𑀺 𑀯𑁂𑀤𑀦𑀸𑀳𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑁆𑀲 𑀅𑀥𑀺𑀕𑀫𑁄. 𑀅𑀜𑁆𑀜𑀲𑁆𑀲 𑀭𑀼𑀓𑁆𑀔𑀲𑁆𑀲 𑀲𑀼𑀓𑁆𑀔𑀲𑀸𑀔𑀸𑀬 𑀲𑀤𑁆𑀥𑀺𑀁 𑀖𑀁𑀲𑀦𑀫𑀢𑁆𑀢𑁂𑀦𑁂𑀯 𑀅𑀕𑁆𑀕𑀺𑀦𑁄 𑀅𑀪𑀺𑀦𑀺𑀩𑁆𑀩𑀢𑁆𑀢𑀦𑀁 𑀯𑀺𑀬 𑀯𑀺𑀦𑀸𑀧𑀺 𑀑𑀧𑀓𑁆𑀓𑀫𑀺𑀓𑀸𑀳𑀺 𑀯𑁂𑀤𑀦𑀸𑀳𑀺 𑀲𑀼𑀔𑀸𑀬𑁂𑀯 𑀧𑀝𑀺𑀧𑀤𑀸𑀬 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑁆𑀲 𑀅𑀥𑀺𑀕𑀫𑁄𑀢𑀺. 𑀅𑀬𑀁 𑀉𑀧𑀫𑀸 𑀪𑀕𑀯𑀢𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀆𑀳𑀝𑀸.

𑁩𑁭𑁭. 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀤𑀲𑁆𑀲𑁂𑀦𑁆𑀢𑁄, 𑀢𑀲𑁆𑀲 𑀫𑀬𑁆𑀳𑀦𑁆𑀢𑀺𑀆𑀤𑀺𑀫𑀸𑀳. 𑀓𑀺𑀁 𑀧𑀦 𑀪𑀕𑀯𑀸 𑀤𑀼𑀓𑁆𑀓𑀭𑀁 𑀅𑀓𑀢𑁆𑀯𑀸 𑀩𑀼𑀤𑁆𑀥𑁄 𑀪𑀯𑀺𑀢𑀼𑀁 𑀦 𑀲𑀫𑀢𑁆𑀣𑁄𑀢𑀺? 𑀓𑀢𑁆𑀯𑀸𑀧𑀺 𑀅𑀓𑀢𑁆𑀯𑀸𑀧𑀺 𑀲𑀫𑀢𑁆𑀣𑁄𑀯. 𑀅𑀣 𑀓𑀲𑁆𑀫𑀸 𑀅𑀓𑀸𑀲𑀻𑀢𑀺? 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀢𑁆𑀢𑀦𑁄 𑀧𑀭𑀓𑁆𑀓𑀫𑀁 𑀤𑀲𑁆𑀲𑁂𑀲𑁆𑀲𑀸𑀫𑀺. 𑀲𑁄 𑀘 𑀫𑀁 𑀯𑀻𑀭𑀺𑀬𑀦𑀺𑀫𑁆𑀫𑀣𑀦𑀕𑀼𑀡𑁄 𑀳𑀸𑀲𑁂𑀲𑁆𑀲𑀢𑀻𑀢𑀺. 𑀧𑀸𑀲𑀸𑀤𑁂 𑀦𑀺𑀲𑀺𑀦𑁆𑀦𑁄𑀬𑁂𑀯 𑀳𑀺 𑀧𑀯𑁂𑀡𑀺𑀆𑀕𑀢𑀁 𑀭𑀚𑁆𑀚𑀁 𑀮𑀪𑀺𑀢𑁆𑀯𑀸𑀧𑀺 𑀔𑀢𑁆𑀢𑀺𑀬𑁄 𑀦 𑀢𑀣𑀸𑀧𑀫𑀼𑀤𑀺𑀢𑁄 𑀳𑁄𑀢𑀺, 𑀬𑀣𑀸 𑀩𑀮𑀓𑀸𑀬𑀁 𑀕𑀳𑁂𑀢𑁆𑀯𑀸 𑀲𑀗𑁆𑀕𑀸𑀫𑁂 𑀤𑁆𑀯𑁂 𑀢𑀬𑁄 𑀲𑀫𑁆𑀧𑀳𑀸𑀭𑁂 𑀤𑀢𑁆𑀯𑀸 𑀅𑀫𑀺𑀢𑁆𑀢𑀫𑀣𑀦𑀁 𑀓𑀢𑁆𑀯𑀸 𑀧𑀢𑁆𑀢𑀭𑀚𑁆𑀚𑁄. 𑀏𑀯𑀁 𑀧𑀢𑁆𑀢𑀭𑀚𑁆𑀚𑀲𑁆𑀲 𑀳𑀺 𑀭𑀚𑁆𑀚𑀲𑀺𑀭𑀺𑀁 𑀅𑀦𑀼𑀪𑀯𑀦𑁆𑀢𑀲𑁆𑀲 𑀧𑀭𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀓𑁆𑀓𑀫𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸, ‘‘𑀅𑀲𑀼𑀓𑀝𑁆𑀞𑀸𑀦𑁂 𑀅𑀲𑀼𑀓𑀓𑀫𑁆𑀫𑀁 𑀓𑀢𑁆𑀯𑀸 𑀅𑀲𑀼𑀓𑀜𑁆𑀘 𑀅𑀲𑀼𑀓𑀜𑁆𑀘 𑀅𑀫𑀺𑀢𑁆𑀢𑀁 𑀏𑀯𑀁 𑀯𑀺𑀚𑁆𑀛𑀺𑀢𑁆𑀯𑀸 𑀏𑀯𑀁 𑀧𑀳𑀭𑀺𑀢𑁆𑀯𑀸 𑀇𑀫𑀁 𑀭𑀚𑁆𑀚𑀲𑀺𑀭𑀺𑀁 𑀧𑀢𑁆𑀢𑁄𑀲𑁆𑀫𑀻’’𑀢𑀺 𑀘𑀺𑀦𑁆𑀢𑀬𑀢𑁄 𑀩𑀮𑀯𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀫𑁂𑀯𑀁 𑀪𑀕𑀯𑀸𑀧𑀺 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀧𑀭𑀓𑁆𑀓𑀫𑀁 𑀤𑀲𑁆𑀲𑁂𑀲𑁆𑀲𑀸𑀫𑀺, 𑀲𑁄 𑀳𑀺 𑀫𑀁 𑀧𑀭𑀓𑁆𑀓𑀫𑁄 𑀅𑀢𑀺𑀯𑀺𑀬 𑀳𑀸𑀲𑁂𑀲𑁆𑀲𑀢𑀺, 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀲𑁆𑀲𑀢𑀻𑀢𑀺 𑀤𑀼𑀓𑁆𑀓𑀭𑀫𑀓𑀸𑀲𑀺.

𑀅𑀧𑀺𑀘 𑀧𑀘𑁆𑀙𑀺𑀫𑀁 𑀚𑀦𑀢𑀁 𑀅𑀦𑀼𑀓𑀫𑁆𑀧𑀫𑀸𑀦𑁄𑀧𑀺 𑀅𑀓𑀸𑀲𑀺𑀬𑁂𑀯, 𑀧𑀘𑁆𑀙𑀺𑀫𑀸 𑀳𑀺 𑀚𑀦𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸𑀧𑀺 𑀧𑀥𑀸𑀦𑀁 𑀧𑀤𑀳𑀺𑀢𑁆𑀯𑀸𑀯 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀢𑁆𑀢𑁄, 𑀓𑀺𑀫𑀗𑁆𑀕𑀁 𑀧𑀦 𑀫𑀬𑀦𑁆𑀢𑀺 𑀧𑀥𑀸𑀦𑀯𑀻𑀭𑀺𑀬𑀁 𑀓𑀢𑁆𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀢𑀺; 𑀏𑀯𑀁 𑀲𑀦𑁆𑀢𑁂 𑀔𑀺𑀧𑁆𑀧𑀫𑁂𑀯 𑀚𑀸𑀢𑀺𑀚𑀭𑀸𑀫𑀭𑀡𑀲𑁆𑀲 𑀅𑀦𑁆𑀢𑀁 𑀓𑀭𑀺𑀲𑁆𑀲𑀢𑀻𑀢𑀺 𑀧𑀘𑁆𑀙𑀺𑀫𑀁 𑀚𑀦𑀢𑀁 𑀅𑀦𑀼𑀓𑀫𑁆𑀧𑀫𑀸𑀦𑁄 𑀅𑀓𑀸𑀲𑀺𑀬𑁂𑀯.

𑀤𑀦𑁆𑀢𑁂𑀪𑀺𑀤𑀦𑁆𑀢𑀫𑀸𑀥𑀸𑀬𑀸𑀢𑀺 𑀳𑁂𑀝𑁆𑀞𑀸𑀤𑀦𑁆𑀢𑁂 𑀉𑀧𑀭𑀺𑀤𑀦𑁆𑀢𑀁 𑀞𑀧𑁂𑀢𑁆𑀯𑀸. 𑀘𑁂𑀢𑀲𑀸 𑀘𑀺𑀢𑁆𑀢𑀦𑁆𑀢𑀺 𑀓𑀼𑀲𑀮𑀘𑀺𑀢𑁆𑀢𑁂𑀦 𑀅𑀓𑀼𑀲𑀮𑀘𑀺𑀢𑁆𑀢𑀁. 𑀅𑀪𑀺𑀦𑀺𑀕𑁆𑀕𑀡𑁆𑀳𑁂𑀬𑁆𑀬𑀦𑁆𑀢𑀺 𑀦𑀺𑀕𑁆𑀕𑀡𑁆𑀳𑁂𑀬𑁆𑀬𑀁. 𑀅𑀪𑀺𑀦𑀺𑀧𑁆𑀧𑀻𑀴𑁂𑀬𑁆𑀬𑀦𑁆𑀢𑀺 𑀦𑀺𑀧𑁆𑀧𑀻𑀴𑁂𑀬𑁆𑀬𑀁. 𑀅𑀪𑀺𑀲𑀦𑁆𑀢𑀸𑀧𑁂𑀬𑁆𑀬𑀦𑁆𑀢𑀺 𑀢𑀸𑀧𑁂𑀢𑁆𑀯𑀸 𑀯𑀻𑀭𑀺𑀬𑀦𑀺𑀫𑁆𑀫𑀣𑀦𑀁 𑀓𑀭𑁂𑀬𑁆𑀬𑀁. 𑀲𑀸𑀭𑀤𑁆𑀥𑁄𑀢𑀺 𑀲𑀤𑀭𑀣𑁄. 𑀧𑀥𑀸𑀦𑀸𑀪𑀺𑀢𑀼𑀦𑁆𑀦𑀲𑁆𑀲𑀸𑀢𑀺 𑀧𑀥𑀸𑀦𑁂𑀦 𑀅𑀪𑀺𑀢𑀼𑀦𑁆𑀦𑀲𑁆𑀲, 𑀯𑀺𑀤𑁆𑀥𑀲𑁆𑀲 𑀲𑀢𑁄𑀢𑀺 𑀅𑀢𑁆𑀣𑁄.

𑁩𑁭𑁮. 𑀅𑀧𑁆𑀧𑀸𑀡𑀓𑀦𑁆𑀢𑀺 𑀦𑀺𑀭𑀲𑁆𑀲𑀸𑀲𑀓𑀁. 𑀓𑀫𑁆𑀫𑀸𑀭𑀕𑀕𑁆𑀕𑀭𑀺𑀬𑀸𑀢𑀺 𑀓𑀫𑁆𑀫𑀸𑀭𑀲𑁆𑀲 𑀕𑀕𑁆𑀕𑀭𑀦𑀸𑀴𑀺𑀬𑀸. 𑀲𑀻𑀲𑀯𑁂𑀤𑀦𑀸 𑀳𑁄𑀦𑁆𑀢𑀻𑀢𑀺 𑀓𑀼𑀢𑁄𑀘𑀺 𑀦𑀺𑀓𑁆𑀔𑀫𑀺𑀢𑀼𑀁 𑀅𑀮𑀪𑀫𑀸𑀦𑁂𑀳𑀺 𑀯𑀸𑀢𑁂𑀳𑀺 𑀲𑀫𑀼𑀝𑁆𑀞𑀸𑀧𑀺𑀢𑀸 𑀩𑀮𑀯𑀢𑀺𑀬𑁄 𑀲𑀻𑀲𑀯𑁂𑀤𑀦𑀸 𑀳𑁄𑀦𑁆𑀢𑀺. 𑀲𑀻𑀲𑀯𑁂𑀞𑀁 𑀤𑀤𑁂𑀬𑁆𑀬𑀸𑀢𑀺 𑀲𑀻𑀲𑀯𑁂𑀞𑀦𑀁 𑀤𑀤𑁂𑀬𑁆𑀬. 𑀤𑁂𑀯𑀢𑀸𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀧𑀡𑁆𑀡𑀲𑀸𑀮𑀧𑀭𑀺𑀯𑁂𑀡𑀲𑀸𑀫𑀦𑁆𑀢𑀸 𑀘 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸.

𑀢𑀤𑀸 𑀓𑀺𑀭 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀥𑀺𑀫𑀢𑁆𑀢𑁂 𑀓𑀸𑀬𑀤𑀸𑀳𑁂 𑀉𑀧𑁆𑀧𑀦𑁆𑀦𑁂 𑀫𑀼𑀘𑁆𑀙𑀸 𑀉𑀤𑀧𑀸𑀤𑀺. 𑀲𑁄 𑀘𑀗𑁆𑀓𑀫𑁂𑀯 𑀦𑀺𑀲𑀺𑀦𑁆𑀦𑁄 𑀳𑀼𑀢𑁆𑀯𑀸 𑀧𑀧𑀢𑀺. 𑀢𑀁 𑀤𑀺𑀲𑁆𑀯𑀸 𑀤𑁂𑀯𑀢𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀯𑀺𑀳𑀸𑀭𑁄𑀢𑁆𑀯𑁂𑀯 𑀲𑁄 𑀅𑀭𑀳𑀢𑁄’’𑀢𑀺, ‘‘𑀅𑀭𑀳𑀦𑁆𑀢𑁄 𑀦𑀸𑀫 𑀏𑀯𑀭𑀽𑀧𑀸 𑀳𑁄𑀦𑁆𑀢𑀺 𑀫𑀢𑀓𑀲𑀤𑀺𑀲𑀸’’𑀢𑀺 𑀮𑀤𑁆𑀥𑀺𑀬𑀸 𑀯𑀤𑀦𑁆𑀢𑀺. 𑀢𑀢𑁆𑀣 𑀬𑀸 𑀤𑁂𑀯𑀢𑀸 ‘‘𑀓𑀸𑀮𑀗𑁆𑀓𑀢𑁄’’𑀢𑀺 𑀆𑀳𑀁𑀲𑀼, 𑀢𑀸 𑀕𑀦𑁆𑀢𑁆𑀯𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀆𑀭𑁄𑀘𑁂𑀲𑀼𑀁 𑁋 ‘‘𑀢𑀼𑀫𑁆𑀳𑀸𑀓𑀁 𑀧𑀼𑀢𑁆𑀢𑁄 𑀓𑀸𑀮𑀗𑁆𑀓𑀢𑁄’’𑀢𑀺. 𑀫𑀫 𑀧𑀼𑀢𑁆𑀢𑁄 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀓𑀸𑀮𑀗𑁆𑀓𑀢𑁄, 𑀦𑁄 𑀅𑀳𑀼𑀢𑁆𑀯𑀸𑀢𑀺? 𑀩𑀼𑀤𑁆𑀥𑁄 𑀪𑀯𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀧𑀥𑀸𑀦𑀪𑀽𑀫𑀺𑀬𑀁𑀬𑁂𑀯 𑀧𑀢𑀺𑀢𑁆𑀯𑀸 𑀓𑀸𑀮𑀗𑁆𑀓𑀢𑁄𑀢𑀺. 𑀦𑀸𑀳𑀁 𑀲𑀤𑁆𑀤𑀳𑀸𑀫𑀺, 𑀫𑀫 𑀧𑀼𑀢𑁆𑀢𑀲𑁆𑀲 𑀩𑁄𑀥𑀺𑀁 𑀅𑀧𑀢𑁆𑀯𑀸 𑀓𑀸𑀮𑀗𑁆𑀓𑀺𑀭𑀺𑀬𑀸 𑀦𑀸𑀫 𑀦𑀢𑁆𑀣𑀻𑀢𑀺.

𑀅𑀧𑀭𑀪𑀸𑀕𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀓𑀧𑀺𑀮𑀯𑀢𑁆𑀣𑀼𑀁 𑀅𑀦𑀼𑀧𑁆𑀧𑀢𑁆𑀢𑀲𑁆𑀲 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀸𑀲𑀸𑀤𑀁 𑀆𑀭𑁄𑀧𑁂𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑀁 𑀤𑀢𑁆𑀯𑀸 𑀅𑀦𑁆𑀢𑀭𑀸𑀪𑀢𑁆𑀢𑀲𑀫𑀬𑁂 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺 𑁋 𑀢𑀼𑀫𑁆𑀳𑀸𑀓𑀁 𑀪𑀕𑀯𑀸 𑀧𑀥𑀸𑀦𑀓𑀭𑀡𑀓𑀸𑀮𑁂 𑀤𑁂𑀯𑀢𑀸 𑀆𑀕𑀦𑁆𑀢𑁆𑀯𑀸, ‘‘𑀧𑀼𑀢𑁆𑀢𑁄 𑀢𑁂, 𑀫𑀳𑀸𑀭𑀸𑀚, 𑀓𑀸𑀮𑀗𑁆𑀓𑀢𑁄’’𑀢𑀺 𑀆𑀳𑀁𑀲𑀽𑀢𑀺. 𑀓𑀺𑀁 𑀲𑀤𑁆𑀤𑀳𑀲𑀺 𑀫𑀳𑀸𑀭𑀸𑀚𑀸𑀢𑀺? 𑀦 𑀪𑀕𑀯𑀸 𑀲𑀤𑁆𑀤𑀳𑀺𑀦𑁆𑀢𑀺. 𑀇𑀤𑀸𑀦𑀺, 𑀫𑀳𑀸𑀭𑀸𑀚, 𑀲𑀼𑀧𑀺𑀦𑀧𑁆𑀧𑀝𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀅𑀘𑁆𑀙𑀭𑀺𑀬𑀸𑀦𑀺 𑀧𑀲𑁆𑀲𑀦𑁆𑀢𑁄 𑀓𑀺𑀁 𑀲𑀤𑁆𑀤𑀳𑀺𑀲𑁆𑀲𑀲𑀺? 𑀅𑀳𑀫𑁆𑀧𑀺 𑀩𑀼𑀤𑁆𑀥𑁄 𑀚𑀸𑀢𑁄, 𑀢𑁆𑀯𑀫𑁆𑀧𑀺 𑀩𑀼𑀤𑁆𑀥𑀧𑀺𑀢𑀸 𑀚𑀸𑀢𑁄, 𑀧𑀼𑀩𑁆𑀩𑁂 𑀧𑀦 𑀫𑀬𑁆𑀳𑀁 𑀅𑀧𑀭𑀺𑀧𑀓𑁆𑀓𑁂 𑀜𑀸𑀡𑁂 𑀩𑁄𑀥𑀺𑀘𑀭𑀺𑀬𑀁 𑀘𑀭𑀦𑁆𑀢𑀲𑁆𑀲 𑀥𑀫𑁆𑀫𑀧𑀸𑀮𑀓𑀼𑀫𑀸𑀭𑀓𑀸𑀮𑁂𑀧𑀺 𑀲𑀺𑀧𑁆𑀧𑀁 𑀉𑀕𑁆𑀕𑀳𑁂𑀢𑀼𑀁 𑀕𑀢𑀲𑁆𑀲, ‘‘𑀢𑀼𑀫𑁆𑀳𑀸𑀓𑀁 𑀧𑀼𑀢𑁆𑀢𑁄 𑀥𑀫𑁆𑀫𑀧𑀸𑀮𑀓𑀼𑀫𑀸𑀭𑁄 𑀓𑀸𑀮𑀗𑁆𑀓𑀢𑁄, 𑀇𑀤𑀫𑀲𑁆𑀲 𑀅𑀝𑁆𑀞𑀻’’𑀢𑀺 𑀏𑀴𑀓𑀝𑁆𑀞𑀺𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀲𑀼𑀁, 𑀢𑀤𑀸𑀧𑀺 𑀢𑀼𑀫𑁆𑀳𑁂, ‘‘𑀫𑀫 𑀧𑀼𑀢𑁆𑀢𑀲𑁆𑀲 𑀅𑀦𑁆𑀢𑀭𑀸𑀫𑀭𑀡𑀁 𑀦𑀸𑀫 𑀦𑀢𑁆𑀣𑀺, 𑀦𑀸𑀳𑀁 𑀲𑀤𑁆𑀤𑀳𑀸𑀫𑀻’’𑀢𑀺 𑀅𑀯𑁄𑀘𑀼𑀢𑁆𑀣, 𑀫𑀳𑀸𑀭𑀸𑀚𑀸𑀢𑀺 𑀇𑀫𑀺𑀲𑁆𑀲𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀪𑀕𑀯𑀸 𑀫𑀳𑀸𑀥𑀫𑁆𑀫𑀧𑀸𑀮𑀚𑀸𑀢𑀓𑀁 𑀓𑀣𑁂𑀲𑀺.

𑁩𑁭𑁯. 𑀫𑀸 𑀔𑁄 𑀢𑁆𑀯𑀁 𑀫𑀸𑀭𑀺𑀲𑀸𑀢𑀺 𑀲𑀫𑁆𑀧𑀺𑀬𑀸𑀬𑀫𑀸𑀦𑀸 𑀆𑀳𑀁𑀲𑀼. 𑀤𑁂𑀯𑀢𑀸𑀦𑀁 𑀓𑀺𑀭𑀸𑀬𑀁 𑀧𑀺𑀬𑀫𑀦𑀸𑀧𑀯𑁄𑀳𑀸𑀭𑁄, 𑀬𑀤𑀺𑀤𑀁 𑀫𑀸𑀭𑀺𑀲𑀸𑀢𑀺. 𑀅𑀚𑀚𑁆𑀚𑀺𑀢𑀦𑁆𑀢𑀺 𑀅𑀪𑁄𑀚𑀦𑀁. 𑀳𑀮𑀦𑁆𑀢𑀺 𑀯𑀤𑀸𑀫𑀻𑀢𑀺 𑀅𑀮𑀦𑁆𑀢𑀺 𑀯𑀤𑀸𑀫𑀺, 𑀅𑀮𑀁 𑀇𑀫𑀺𑀦𑀸 𑀏𑀯𑀁 𑀫𑀸 𑀓𑀭𑀺𑀢𑁆𑀣, 𑀬𑀸𑀧𑁂𑀲𑁆𑀲𑀸𑀫𑀳𑀦𑁆𑀢𑀺 𑀏𑀯𑀁 𑀧𑀝𑀺𑀲𑁂𑀥𑁂𑀫𑀻𑀢𑀺 𑀅𑀢𑁆𑀣𑁄.

𑁩𑁮𑁦-𑁧. 𑀫𑀗𑁆𑀕𑀼𑀭𑀘𑁆𑀙𑀯𑀻𑀢𑀺 𑀫𑀗𑁆𑀕𑀼𑀭𑀫𑀘𑁆𑀙𑀘𑁆𑀙𑀯𑀺. 𑀏𑀢𑀸𑀯 𑀧𑀭𑀫𑀦𑁆𑀢𑀺 𑀢𑀸𑀲𑀫𑁆𑀧𑀺 𑀯𑁂𑀤𑀦𑀸𑀦𑀫𑁂𑀢𑀁𑀬𑁂𑀯 𑀧𑀭𑀫𑀁, 𑀉𑀢𑁆𑀢𑀫𑀁 𑀧𑀫𑀸𑀡𑀁. 𑀧𑀺𑀢𑀼 𑀲𑀓𑁆𑀓𑀲𑁆𑀲 𑀓𑀫𑁆𑀫𑀦𑁆𑀢𑁂…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀸𑀢𑀺 𑀭𑀜𑁆𑀜𑁄 𑀓𑀺𑀭 𑀯𑀧𑁆𑀧𑀫𑀗𑁆𑀕𑀮𑀤𑀺𑀯𑀲𑁄 𑀦𑀸𑀫 𑀳𑁄𑀢𑀺, 𑀢𑀤𑀸 𑀅𑀦𑁂𑀓𑀧𑁆𑀧𑀓𑀸𑀭𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑁂𑀦𑁆𑀢𑀺. 𑀦𑀕𑀭𑀯𑀻𑀣𑀺𑀬𑁄 𑀲𑁄𑀥𑀸𑀧𑁂𑀢𑁆𑀯𑀸 𑀧𑀼𑀡𑁆𑀡𑀖𑀝𑁂 𑀞𑀧𑀸𑀧𑁂𑀢𑁆𑀯𑀸 𑀥𑀚𑀧𑀝𑀸𑀓𑀸𑀤𑀬𑁄 𑀉𑀲𑁆𑀲𑀸𑀧𑁂𑀢𑁆𑀯𑀸 𑀲𑀓𑀮𑀦𑀕𑀭𑀁 𑀤𑁂𑀯𑀯𑀺𑀫𑀸𑀦𑀁 𑀯𑀺𑀬 𑀅𑀮𑀗𑁆𑀓𑀭𑁄𑀦𑁆𑀢𑀺. 𑀲𑀩𑁆𑀩𑁂 𑀤𑀸𑀲𑀓𑀫𑁆𑀫𑀓𑀭𑀸𑀤𑀬𑁄 𑀅𑀳𑀢𑀯𑀢𑁆𑀣𑀦𑀺𑀯𑀢𑁆𑀣𑀸 𑀕𑀦𑁆𑀥𑀫𑀸𑀮𑀸𑀤𑀺𑀧𑀝𑀺𑀫𑀡𑁆𑀟𑀺𑀢𑀸 𑀭𑀸𑀚𑀓𑀼𑀮𑁂 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀭𑀜𑁆𑀜𑁄 𑀓𑀫𑁆𑀫𑀦𑁆𑀢𑁂 𑀦𑀗𑁆𑀕𑀮𑀲𑀢𑀲𑀳𑀲𑁆𑀲𑀁 𑀬𑁄𑀚𑀻𑀬𑀢𑀺. 𑀢𑀲𑁆𑀫𑀺𑀁 𑀧𑀦 𑀤𑀺𑀯𑀲𑁂 𑀏𑀓𑁂𑀦 𑀊𑀦𑀁 𑀅𑀝𑁆𑀞𑀲𑀢𑀁 𑀬𑁄𑀚𑁂𑀦𑁆𑀢𑀺. 𑀲𑀩𑁆𑀩𑀦𑀗𑁆𑀕𑀮𑀸𑀦𑀺 𑀲𑀤𑁆𑀥𑀺𑀁 𑀩𑀮𑀺𑀩𑀤𑁆𑀤𑀭𑀲𑁆𑀫𑀺𑀬𑁄𑀢𑁆𑀢𑁂𑀳𑀺 𑀚𑀸𑀡𑀼𑀲𑁆𑀲𑁄𑀡𑀺𑀲𑁆𑀲 𑀭𑀣𑁄 𑀯𑀺𑀬 𑀭𑀚𑀢𑀧𑀭𑀺𑀓𑁆𑀔𑀺𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀭𑀜𑁆𑀜𑁄 𑀆𑀮𑀫𑁆𑀩𑀦𑀦𑀗𑁆𑀕𑀮𑀁 𑀭𑀢𑁆𑀢𑀲𑀼𑀯𑀡𑁆𑀡𑀧𑀭𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺. 𑀩𑀮𑀺𑀩𑀤𑁆𑀤𑀸𑀦𑀁 𑀲𑀺𑀗𑁆𑀕𑀸𑀦𑀺𑀧𑀺 𑀭𑀲𑁆𑀫𑀺𑀧𑀢𑁄𑀤𑀸𑀧𑀺 𑀲𑀼𑀯𑀡𑁆𑀡𑀧𑀭𑀺𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺. 𑀭𑀸𑀚𑀸 𑀫𑀳𑀸𑀧𑀭𑀺𑀯𑀸𑀭𑁂𑀦 𑀦𑀺𑀓𑁆𑀔𑀫𑀦𑁆𑀢𑁄 𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀺.

𑀓𑀫𑁆𑀫𑀦𑁆𑀢𑀝𑁆𑀞𑀸𑀦𑁂 𑀏𑀓𑁄 𑀚𑀫𑁆𑀩𑀼𑀭𑀼𑀓𑁆𑀔𑁄 𑀩𑀳𑀮𑀧𑀢𑁆𑀢𑀧𑀮𑀸𑀲𑁄 𑀲𑀦𑁆𑀤𑀘𑁆𑀙𑀸𑀬𑁄 𑀅𑀳𑁄𑀲𑀺. 𑀢𑀲𑁆𑀲 𑀳𑁂𑀝𑁆𑀞𑀸 𑀓𑀼𑀫𑀸𑀭𑀲𑁆𑀲 𑀲𑀬𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀉𑀧𑀭𑀺 𑀲𑀼𑀯𑀡𑁆𑀡𑀢𑀸𑀭𑀓𑀔𑀘𑀺𑀢𑀁 𑀯𑀺𑀢𑀸𑀦𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀲𑀸𑀡𑀺𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀭𑀸𑀚𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀅𑀫𑀘𑁆𑀘𑀕𑀡𑀧𑀭𑀺𑀯𑀼𑀢𑁄 𑀦𑀗𑁆𑀕𑀮𑀓𑀭𑀡𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀭𑀸𑀚𑀸 𑀲𑀼𑀯𑀡𑁆𑀡𑀦𑀗𑁆𑀕𑀮𑀁 𑀕𑀡𑁆𑀳𑀸𑀢𑀺. 𑀅𑀫𑀘𑁆𑀘𑀸 𑀏𑀓𑁂𑀦𑀽𑀦𑀅𑀝𑁆𑀞𑀲𑀢𑀭𑀚𑀢𑀦𑀗𑁆𑀕𑀮𑀸𑀦𑀺 𑀕𑀳𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀓𑀲𑀦𑁆𑀢𑀺. 𑀭𑀸𑀚𑀸 𑀧𑀦 𑀑𑀭𑀢𑁄 𑀧𑀸𑀭𑀁 𑀕𑀘𑁆𑀙𑀢𑀺, 𑀧𑀸𑀭𑀢𑁄 𑀯𑀸 𑀑𑀭𑀁 𑀕𑀘𑁆𑀙𑀢𑀺. 𑀏𑀢𑀲𑁆𑀫𑀺𑀁 𑀞𑀸𑀦𑁂 𑀫𑀳𑀸𑀲𑀫𑁆𑀧𑀢𑁆𑀢𑀺 𑀳𑁄𑀢𑀺, 𑀩𑁄𑀥𑀺𑀲𑀢𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀥𑀸𑀢𑀺𑀬𑁄 𑀭𑀜𑁆𑀜𑁄 𑀲𑀫𑁆𑀧𑀢𑁆𑀢𑀺𑀁 𑀧𑀲𑁆𑀲𑀺𑀲𑁆𑀲𑀸𑀫𑀸𑀢𑀺 𑀅𑀦𑁆𑀢𑁄𑀲𑀸𑀡𑀺𑀢𑁄 𑀩𑀳𑀺 𑀦𑀺𑀓𑁆𑀔𑀦𑁆𑀢𑀸. 𑀩𑁄𑀥𑀺𑀲𑀢𑁆𑀢𑁄 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀓𑀜𑁆𑀘𑀺 𑀅𑀤𑀺𑀲𑁆𑀯𑀸 𑀯𑁂𑀕𑁂𑀦 𑀉𑀝𑁆𑀞𑀸𑀬 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀆𑀦𑀸𑀧𑀸𑀦𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀥𑀸𑀢𑀺𑀬𑁄 𑀔𑀚𑁆𑀚𑀪𑁄𑀚𑁆𑀚𑀦𑁆𑀢𑀭𑁂 𑀯𑀺𑀘𑀭𑀫𑀸𑀦𑀸 𑀣𑁄𑀓𑀁 𑀘𑀺𑀭𑀸𑀬𑀺𑀁𑀲𑀼, 𑀲𑁂𑀲𑀭𑀼𑀓𑁆𑀔𑀸𑀦𑀁 𑀙𑀸𑀬𑀸 𑀦𑀺𑀯𑀢𑁆𑀢𑀸, 𑀢𑀲𑁆𑀲 𑀧𑀦 𑀭𑀼𑀓𑁆𑀔𑀲𑁆𑀲 𑀧𑀭𑀺𑀫𑀡𑁆𑀟𑀮𑀸 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀥𑀸𑀢𑀺𑀬𑁄 𑀅𑀬𑁆𑀬𑀧𑀼𑀢𑁆𑀢𑁄 𑀏𑀓𑀓𑁄𑀢𑀺 𑀯𑁂𑀕𑁂𑀦 𑀲𑀸𑀡𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁄 𑀧𑀯𑀺𑀲𑀫𑀸𑀦𑀸 𑀩𑁄𑀥𑀺𑀲𑀢𑁆𑀢𑀁 𑀲𑀬𑀦𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀁 𑀢𑀜𑁆𑀘 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑀬𑀺𑀁𑀲𑀼 𑁋 ‘‘𑀓𑀼𑀫𑀸𑀭𑁄 𑀤𑁂𑀯, 𑀏𑀯𑀁 𑀦𑀺𑀲𑀺𑀦𑁆𑀦𑁄 𑀅𑀜𑁆𑀜𑁂𑀲𑀁 𑀭𑀼𑀓𑁆𑀔𑀸𑀦𑀁 𑀙𑀸𑀬𑀸 𑀦𑀺𑀯𑀢𑁆𑀢𑀸, 𑀚𑀫𑁆𑀩𑀼𑀭𑀼𑀓𑁆𑀔𑀲𑁆𑀲 𑀧𑀭𑀺𑀫𑀡𑁆𑀟𑀮𑀸 𑀞𑀺𑀢𑀸’’𑀢𑀺. 𑀭𑀸𑀚𑀸 𑀯𑁂𑀕𑁂𑀦𑀸𑀕𑀦𑁆𑀢𑁆𑀯𑀸 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸, ‘‘𑀇𑀤𑀁 𑀢𑁂, 𑀢𑀸𑀢, 𑀤𑀼𑀢𑀺𑀬𑀁 𑀯𑀦𑁆𑀤𑀦’’𑀦𑁆𑀢𑀺 𑀧𑀼𑀢𑁆𑀢𑀁 𑀯𑀦𑁆𑀤𑀺. 𑀇𑀤𑀫𑁂𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀧𑀺𑀢𑀼 𑀲𑀓𑁆𑀓𑀲𑁆𑀲 𑀓𑀫𑁆𑀫𑀦𑁆𑀢𑁂…𑀧𑁂… 𑀧𑀞𑀫𑀚𑁆𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀸’’𑀢𑀺. 𑀲𑀺𑀬𑀸 𑀦𑀼 𑀔𑁄 𑀏𑀲𑁄 𑀫𑀕𑁆𑀕𑁄 𑀩𑁄𑀥𑀸𑀬𑀸𑀢𑀺 𑀪𑀯𑁂𑀬𑁆𑀬 𑀦𑀼 𑀔𑁄 𑀏𑀢𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀧𑀞𑀫𑀚𑁆𑀛𑀸𑀦𑀁 𑀩𑀼𑀚𑁆𑀛𑀦𑀢𑁆𑀣𑀸𑀬 𑀫𑀕𑁆𑀕𑁄𑀢𑀺. 𑀲𑀢𑀸𑀦𑀼𑀲𑀸𑀭𑀺𑀯𑀺𑀜𑁆𑀜𑀸𑀡𑀦𑁆𑀢𑀺 𑀦𑀬𑀺𑀤𑀁 𑀩𑁄𑀥𑀸𑀬 𑀫𑀕𑁆𑀕𑁄 𑀪𑀯𑀺𑀲𑁆𑀲𑀢𑀺, 𑀆𑀦𑀸𑀧𑀸𑀦𑀲𑁆𑀲𑀢𑀺𑀧𑀞𑀫𑀚𑁆𑀛𑀸𑀦𑀁 𑀧𑀦 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀏𑀓𑀁 𑀤𑁆𑀯𑁂 𑀯𑀸𑀭𑁂 𑀉𑀧𑁆𑀧𑀦𑁆𑀦𑀲𑀢𑀺𑀬𑀸 𑀅𑀦𑀦𑁆𑀢𑀭𑀁 𑀉𑀧𑁆𑀧𑀦𑁆𑀦𑀯𑀺𑀜𑁆𑀜𑀸𑀡𑀁 𑀲𑀢𑀸𑀦𑀼𑀲𑀸𑀭𑀺𑀯𑀺𑀜𑁆𑀜𑀸𑀡𑀁 𑀦𑀸𑀫. 𑀬𑀁 𑀢𑀁 𑀲𑀼𑀔𑀦𑁆𑀢𑀺 𑀬𑀁 𑀢𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀧𑀞𑀫𑀚𑁆𑀛𑀸𑀦𑀲𑀼𑀔𑀁.

𑁩𑁮𑁨. 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀦𑁆𑀢𑀻𑀢𑀺 𑀧𑀡𑁆𑀡𑀲𑀸𑀮𑀧𑀭𑀺𑀯𑁂𑀡𑀲𑀫𑁆𑀫𑀚𑁆𑀚𑀦𑀸𑀤𑀺𑀯𑀢𑁆𑀢𑀓𑀭𑀡𑁂𑀦 𑀉𑀧𑀝𑁆𑀞𑀺𑀢𑀸 𑀳𑁄𑀦𑁆𑀢𑀺. 𑀩𑀸𑀳𑀼𑀮𑁆𑀮𑀺𑀓𑁄𑀢𑀺 𑀧𑀘𑁆𑀘𑀬𑀩𑀸𑀳𑀼𑀮𑁆𑀮𑀺𑀓𑁄. 𑀆𑀯𑀢𑁆𑀢𑁄 𑀩𑀸𑀳𑀼𑀮𑁆𑀮𑀸𑀬𑀸𑀢𑀺 𑀭𑀲𑀕𑀺𑀤𑁆𑀥𑁄 𑀳𑀼𑀢𑁆𑀯𑀸 𑀧𑀡𑀻𑀢𑀧𑀺𑀡𑁆𑀟𑀧𑀸𑀢𑀸𑀤𑀻𑀦𑀁 𑀅𑀢𑁆𑀣𑀸𑀬 𑀆𑀯𑀢𑁆𑀢𑁄. 𑀦𑀺𑀩𑁆𑀩𑀺𑀚𑁆𑀚 𑀧𑀓𑁆𑀓𑀫𑀺𑀁𑀲𑀽𑀢𑀺 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀥𑀫𑁆𑀫𑀦𑀺𑀬𑀸𑀫𑁂𑀦𑁂𑀯 𑀧𑀓𑁆𑀓𑀦𑁆𑀢𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀫𑁆𑀩𑁄𑀥𑀺𑀁 𑀧𑀢𑁆𑀢𑀓𑀸𑀮𑁂 𑀓𑀸𑀬𑀯𑀺𑀯𑁂𑀓𑀲𑁆𑀲 𑀑𑀓𑀸𑀲𑀤𑀸𑀦𑀢𑁆𑀣𑀁 𑀥𑀫𑁆𑀫𑀢𑀸𑀬 𑀕𑀢𑀸. 𑀕𑀘𑁆𑀙𑀦𑁆𑀢𑀸 𑀘 𑀅𑀜𑁆𑀜𑀝𑁆𑀞𑀸𑀦𑀁 𑀅𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀫𑁂𑀯 𑀅𑀕𑀫𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀢𑁂𑀲𑀼 𑀕𑀢𑁂𑀲𑀼 𑀅𑀤𑁆𑀥𑀫𑀸𑀲𑀁 𑀓𑀸𑀬𑀯𑀺𑀯𑁂𑀓𑀁 𑀮𑀪𑀺𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑁂 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀺.

𑁩𑁮𑁩. 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺𑀆𑀤𑀺 𑀪𑀬𑀪𑁂𑀭𑀯𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁩𑁮𑁭. 𑀅𑀪𑀺𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳𑀦𑁆𑀢𑀺 𑀅𑀬𑀁 𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀺. 𑀦𑀺𑀕𑀡𑁆𑀞𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀲𑀫𑀡𑀁 𑀕𑁄𑀢𑀫𑀁 𑀏𑀓𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀁. 𑀲𑀫𑀡𑁄 𑀕𑁄𑀢𑀫𑁄 ‘𑀅𑀧𑀭𑀸𑀧𑀺 𑀫𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀅𑀧𑀭𑀸𑀧𑀺 𑀫𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦𑀸’𑀢𑀺 𑀧𑀭𑀺𑀬𑁄𑀲𑀸𑀦𑀁 𑀅𑀤𑀲𑁆𑀲𑁂𑀦𑁆𑀢𑁄 𑀓𑀣𑁂𑀢𑀺𑀬𑁂𑀯. 𑀓𑀼𑀧𑀺𑀢𑁄 𑀦𑀼 𑀔𑁄’’𑀢𑀺? 𑀅𑀣 𑀪𑀕𑀯𑀸, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀣𑀸𑀕𑀢𑁂 𑀅𑀦𑁂𑀓𑀲𑀢𑀸𑀬 𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀓𑀼𑀧𑀺𑀢𑁄 𑀲𑀫𑀡𑁄 𑀕𑁄𑀢𑀫𑁄𑀢𑀺 𑀏𑀓𑁄𑀧𑀺 𑀯𑀢𑁆𑀢𑀸 𑀦𑀢𑁆𑀣𑀺, 𑀧𑀭𑁂𑀲𑀁 𑀩𑁄𑀥𑀦𑀢𑁆𑀣𑀸𑀬 𑀧𑀝𑀺𑀯𑀺𑀚𑁆𑀛𑀦𑀢𑁆𑀣𑀸𑀬 𑀏𑀯 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀇𑀫𑀁 𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀆𑀭𑀩𑁆𑀪𑀸𑀢𑀺 𑀲𑀦𑁆𑀥𑀸𑀬. 𑀬𑀸𑀯𑀤𑁂𑀯𑀸𑀢𑀺 𑀧𑀬𑁄𑀚𑀦𑀯𑀺𑀥𑀺 𑀧𑀭𑀺𑀘𑁆𑀙𑁂𑀤𑀦𑀺𑀬𑀫𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀧𑀭𑁂𑀲𑀁 𑀯𑀺𑀜𑁆𑀜𑀸𑀧𑀦𑀫𑁂𑀯 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀬 𑀧𑀬𑁄𑀚𑀦𑀁, 𑀢𑀲𑁆𑀫𑀸 𑀦 𑀏𑀓𑀲𑁆𑀲𑁂𑀯 𑀤𑁂𑀲𑁂𑀢𑀺, 𑀬𑀢𑁆𑀢𑀓𑀸 𑀯𑀺𑀜𑁆𑀜𑀸𑀢𑀸𑀭𑁄 𑀅𑀢𑁆𑀣𑀺, 𑀲𑀩𑁆𑀩𑁂𑀲𑀁 𑀤𑁂𑀲𑁂𑀢𑀻𑀢𑀺. 𑀢𑀲𑁆𑀫𑀺𑀁𑀬𑁂𑀯 𑀧𑀼𑀭𑀺𑀫𑀲𑁆𑀫𑀺𑀦𑁆𑀢𑀺 𑀇𑀫𑀺𑀦𑀸 𑀓𑀺𑀁 𑀤𑀲𑁆𑀲𑁂𑀢𑀻𑀢𑀺? 𑀲𑀘𑁆𑀘𑀓𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀫𑀡𑁄 𑀕𑁄𑀢𑀫𑁄 𑀅𑀪𑀺𑀭𑀽𑀧𑁄 𑀧𑀸𑀲𑀸𑀤𑀺𑀓𑁄 𑀲𑀼𑀨𑀼𑀲𑀺𑀢𑀁 𑀤𑀦𑁆𑀢𑀸𑀯𑀭𑀡𑀁, 𑀚𑀺𑀯𑁆𑀳𑀸 𑀫𑀼𑀤𑀼𑀓𑀸, 𑀫𑀥𑀼𑀭𑀁 𑀯𑀸𑀓𑁆𑀓𑀭𑀡𑀁, 𑀧𑀭𑀺𑀲𑀁 𑀭𑀜𑁆𑀚𑁂𑀦𑁆𑀢𑁄 𑀫𑀜𑁆𑀜𑁂 𑀯𑀺𑀘𑀭𑀢𑀺, 𑀅𑀦𑁆𑀢𑁄 𑀧𑀦𑀲𑁆𑀲 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀦𑀢𑁆𑀣𑀻’’𑀢𑀺. 𑀅𑀣 𑀪𑀕𑀯𑀸, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀦 𑀢𑀣𑀸𑀕𑀢𑁄 𑀧𑀭𑀺𑀲𑀁 𑀭𑀜𑁆𑀚𑁂𑀦𑁆𑀢𑁄 𑀯𑀺𑀘𑀭𑀢𑀺, 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀸𑀬𑀧𑀺 𑀧𑀭𑀺𑀲𑀸𑀬 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀅𑀲𑀮𑁆𑀮𑀻𑀦𑁄 𑀅𑀦𑀼𑀧𑀮𑀺𑀢𑁆𑀢𑁄 𑀏𑀢𑁆𑀢𑀓𑀁 𑀏𑀓𑀯𑀺𑀳𑀸𑀭𑀻, 𑀲𑀼𑀜𑁆𑀜𑀢𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀦𑀼𑀬𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 𑀏𑀯𑀫𑀸𑀳.

𑀅𑀚𑁆𑀛𑀢𑁆𑀢𑀫𑁂𑀯𑀸𑀢𑀺 𑀕𑁄𑀘𑀭𑀚𑁆𑀛𑀢𑁆𑀢𑀫𑁂𑀯. 𑀲𑀦𑁆𑀦𑀺𑀲𑀸𑀤𑁂𑀫𑀻𑀢𑀺 𑀲𑀦𑁆𑀦𑀺𑀲𑀻𑀤𑀸𑀧𑁂𑀫𑀺, 𑀢𑀣𑀸𑀕𑀢𑁄 𑀳𑀺 𑀬𑀲𑁆𑀫𑀺𑀁 𑀔𑀡𑁂 𑀧𑀭𑀺𑀲𑀸 𑀲𑀸𑀥𑀼𑀓𑀸𑀭𑀁 𑀤𑁂𑀢𑀺, 𑀢𑀲𑁆𑀫𑀺𑀁 𑀔𑀡𑁂 𑀧𑀼𑀩𑁆𑀩𑀸𑀪𑁄𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀲𑀸𑀥𑀼𑀓𑀸𑀭𑀲𑀤𑁆𑀤𑀲𑁆𑀲 𑀦𑀺𑀕𑁆𑀖𑁄𑀲𑁂 𑀅𑀯𑀺𑀘𑁆𑀙𑀺𑀦𑁆𑀦𑁂𑀬𑁂𑀯 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀞𑀺𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀩𑀼𑀤𑁆𑀥𑀸𑀦𑀜𑁆𑀳𑀺 𑀪𑀯𑀗𑁆𑀕𑀧𑀭𑀺𑀯𑀸𑀲𑁄 𑀮𑀳𑀼𑀓𑁄 𑀳𑁄𑀢𑀻𑀢𑀺 𑀅𑀲𑁆𑀲𑀸𑀲𑀯𑀸𑀭𑁂 𑀧𑀲𑁆𑀲𑀸𑀲𑀯𑀸𑀭𑁂 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀺. 𑀬𑁂𑀦 𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀦𑁆𑀢𑀺 𑀬𑁂𑀦 𑀲𑀼𑀜𑁆𑀜𑁂𑀦 𑀨𑀮𑀲𑀫𑀸𑀥𑀺𑀦𑀸 𑀦𑀺𑀘𑁆𑀘𑀓𑀸𑀮𑀁 𑀯𑀺𑀳𑀭𑀸𑀫𑀺, 𑀢𑀲𑁆𑀫𑀺𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁂 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀫𑀺 𑀲𑀫𑀸𑀤𑀳𑀸𑀫𑀻𑀢𑀺 𑀤𑀲𑁆𑀲𑁂𑀢𑀺.

𑀑𑀓𑀧𑁆𑀧𑀦𑀺𑀬𑀫𑁂𑀢𑀦𑁆𑀢𑀺 𑀲𑀤𑁆𑀤𑀳𑀦𑀺𑀬𑀫𑁂𑀢𑀁. 𑀏𑀯𑀁 𑀪𑀕𑀯𑀢𑁄 𑀏𑀓𑀕𑁆𑀕𑀘𑀺𑀢𑁆𑀢𑀢𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀑𑀯𑀝𑁆𑀝𑀺𑀓𑀲𑀸𑀭𑀁 𑀓𑀢𑁆𑀯𑀸 𑀆𑀦𑀻𑀢𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 𑀅𑀪𑀺𑀚𑀸𑀦𑀸𑀢𑀺 𑀔𑁄 𑀧𑀦 𑀪𑀯𑀁 𑀕𑁄𑀢𑀫𑁄 𑀤𑀺𑀯𑀸 𑀲𑀼𑀧𑀺𑀢𑀸𑀢𑀺 𑀆𑀳. 𑀬𑀣𑀸 𑀳𑀺 𑀲𑀼𑀦𑀔𑁄 𑀦𑀸𑀫 𑀅𑀲𑀫𑁆𑀪𑀺𑀦𑁆𑀦𑀔𑀻𑀭𑀧𑀓𑁆𑀓𑀧𑀸𑀬𑀲𑀁 𑀲𑀧𑁆𑀧𑀺𑀦𑀸 𑀬𑁄𑀚𑁂𑀢𑁆𑀯𑀸 𑀉𑀤𑀭𑀧𑀽𑀭𑀁 𑀪𑁄𑀚𑀺𑀢𑁄𑀧𑀺 𑀕𑀽𑀣𑀁 𑀤𑀺𑀲𑁆𑀯𑀸 𑀅𑀔𑀸𑀤𑀺𑀢𑁆𑀯𑀸 𑀕𑀦𑁆𑀢𑀼𑀁 𑀦 𑀲𑀓𑁆𑀓𑀸, 𑀅𑀔𑀸𑀤𑀫𑀸𑀦𑁄 𑀖𑀸𑀬𑀺𑀢𑁆𑀯𑀸𑀧𑀺 𑀕𑀘𑁆𑀙𑀢𑀺, 𑀅𑀖𑀸𑀬𑀺𑀢𑁆𑀯𑀸𑀯 𑀕𑀢𑀲𑁆𑀲 𑀓𑀺𑀭𑀲𑁆𑀲 𑀲𑀻𑀲𑀁 𑀭𑀼𑀚𑁆𑀚𑀢𑀺; 𑀏𑀯𑀫𑁂𑀯𑀁 𑀇𑀫𑀲𑁆𑀲𑀧𑀺 𑀲𑀢𑁆𑀣𑀸 𑀅𑀲𑀫𑁆𑀪𑀺𑀦𑁆𑀦𑀔𑀻𑀭𑀧𑀓𑁆𑀓𑀧𑀸𑀬𑀲𑀲𑀤𑀺𑀲𑀁 𑀅𑀪𑀺𑀦𑀺𑀓𑁆𑀔𑀫𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀆𑀲𑀯𑀓𑁆𑀔𑀬𑀸 𑀧𑀲𑀸𑀤𑀦𑀻𑀬𑀁 𑀥𑀫𑁆𑀫𑀤𑁂𑀲𑀦𑀁 𑀤𑁂𑀲𑁂𑀢𑀺. 𑀏𑀢𑀲𑁆𑀲 𑀧𑀦 𑀏𑀯𑀭𑀽𑀧𑀁 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑀢𑁆𑀣𑀭𑀺 𑀧𑀲𑀸𑀤𑀫𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀫𑀸 𑀑𑀯𑀝𑁆𑀝𑀺𑀓𑀲𑀸𑀭𑀁 𑀓𑀢𑁆𑀯𑀸 𑀆𑀦𑀻𑀢𑀧𑀜𑁆𑀳𑀁 𑀅𑀧𑀼𑀘𑁆𑀙𑀺𑀢𑁆𑀯𑀸 𑀕𑀦𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀏𑀯𑀫𑀸𑀳. 𑀢𑀢𑁆𑀣 𑀬𑀲𑁆𑀫𑀸 𑀣𑀺𑀦𑀫𑀺𑀤𑁆𑀥𑀁 𑀲𑀩𑁆𑀩𑀔𑀻𑀡𑀸𑀲𑀯𑀸𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑁂𑀯 𑀧𑀳𑀻𑀬𑀢𑀺, 𑀓𑀸𑀬𑀤𑀭𑀣𑁄 𑀧𑀦 𑀉𑀧𑀸𑀤𑀺𑀦𑁆𑀦𑀓𑁂𑀧𑀺 𑀳𑁄𑀢𑀺 𑀅𑀦𑀼𑀧𑀸𑀤𑀺𑀦𑁆𑀦𑀓𑁂𑀧𑀺. 𑀢𑀣𑀸 𑀳𑀺 𑀓𑀫𑀮𑀼𑀧𑁆𑀧𑀮𑀸𑀤𑀻𑀦𑀺 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀯𑀺𑀓𑀲𑀦𑁆𑀢𑀺, 𑀏𑀓𑀲𑁆𑀫𑀺𑀁 𑀫𑀓𑀼𑀮𑀸𑀦𑀺 𑀳𑁄𑀦𑁆𑀢𑀺, 𑀲𑀸𑀬𑀁 𑀓𑁂𑀲𑀜𑁆𑀘𑀺 𑀭𑀼𑀓𑁆𑀔𑀸𑀦𑀫𑁆𑀧𑀺 𑀧𑀢𑁆𑀢𑀸𑀦𑀺 𑀧𑀢𑀺𑀮𑀻𑀬𑀦𑁆𑀢𑀺, 𑀧𑀸𑀢𑁄 𑀯𑀺𑀧𑁆𑀨𑀸𑀭𑀺𑀓𑀸𑀦𑀺 𑀳𑁄𑀦𑁆𑀢𑀺. 𑀏𑀯𑀁 𑀉𑀧𑀸𑀤𑀺𑀦𑁆𑀦𑀓𑀲𑁆𑀲 𑀓𑀸𑀬𑀲𑁆𑀲 𑀤𑀭𑀣𑁄𑀬𑁂𑀯 𑀤𑀭𑀣𑀯𑀲𑁂𑀦 𑀪𑀯𑀗𑁆𑀕𑀲𑁄𑀢𑀜𑁆𑀘 𑀇𑀥 𑀦𑀺𑀤𑁆𑀤𑀸𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀢𑀁 𑀔𑀻𑀡𑀸𑀲𑀯𑀸𑀦𑀫𑁆𑀧𑀺 𑀳𑁄𑀢𑀺. 𑀢𑀁 𑀲𑀦𑁆𑀥𑀸𑀬, ‘‘𑀅𑀪𑀺𑀚𑀸𑀦𑀸𑀫𑀳’’𑀦𑁆𑀢𑀺𑀆𑀤𑀺𑀫𑀸𑀳. 𑀲𑀫𑁆𑀫𑁄𑀳𑀯𑀺𑀳𑀸𑀭𑀲𑁆𑀫𑀺𑀁 𑀯𑀤𑀦𑁆𑀢𑀻𑀢𑀺 𑀲𑀫𑁆𑀫𑁄𑀳𑀯𑀺𑀳𑀸𑀭𑁄𑀢𑀺 𑀯𑀤𑀦𑁆𑀢𑀺.

𑁩𑁮𑁯. 𑀆𑀲𑀚𑁆𑀚 𑀆𑀲𑀚𑁆𑀚𑀸𑀢𑀺 𑀖𑀝𑁆𑀝𑁂𑀢𑁆𑀯𑀸 𑀖𑀝𑁆𑀝𑁂𑀢𑁆𑀯𑀸. 𑀉𑀧𑀦𑀻𑀢𑁂𑀳𑀻𑀢𑀺 𑀉𑀧𑀦𑁂𑀢𑁆𑀯𑀸 𑀓𑀣𑀺𑀢𑁂𑀳𑀺. 𑀯𑀘𑀦𑀧𑁆𑀧𑀣𑁂𑀳𑀻𑀢𑀺 𑀯𑀘𑀦𑁂𑀳𑀺. 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸𑀢𑀺 𑀅𑀮𑀦𑁆𑀢𑀺 𑀘𑀺𑀢𑁆𑀢𑁂𑀦 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀯𑀸𑀘𑀸𑀬𑀧𑀺 𑀧𑀲𑀁𑀲𑀦𑁆𑀢𑁄 𑀅𑀦𑀼𑀫𑁄𑀤𑀺𑀢𑁆𑀯𑀸. 𑀪𑀕𑀯𑀢𑀸 𑀇𑀫𑀲𑁆𑀲 𑀦𑀺𑀕𑀡𑁆𑀞𑀲𑁆𑀲 𑀤𑁆𑀯𑁂 𑀲𑀼𑀢𑁆𑀢𑀸𑀦𑀺 𑀓𑀣𑀺𑀢𑀸𑀦𑀺. 𑀧𑀼𑀭𑀺𑀫𑀲𑀼𑀢𑁆𑀢𑀁 𑀏𑀓𑁄 𑀪𑀸𑀡𑀯𑀸𑀭𑁄, 𑀇𑀤𑀁 𑀤𑀺𑀬𑀟𑁆𑀠𑁄, 𑀇𑀢𑀺 𑀅𑀟𑁆𑀠𑀢𑀺𑀬𑁂 𑀪𑀸𑀡𑀯𑀸𑀭𑁂 𑀲𑀼𑀢𑁆𑀯𑀸𑀧𑀺 𑀅𑀬𑀁 𑀦𑀺𑀕𑀡𑁆𑀞𑁄 𑀦𑁂𑀯 𑀅𑀪𑀺𑀲𑀫𑀬𑀁 𑀧𑀢𑁆𑀢𑁄, 𑀦 𑀧𑀩𑁆𑀩𑀚𑀺𑀢𑁄, 𑀦 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀺𑀢𑁄. 𑀓𑀲𑁆𑀫𑀸 𑀏𑀢𑀲𑁆𑀲 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀻𑀢𑀺? 𑀅𑀦𑀸𑀕𑀢𑁂 𑀯𑀸𑀲𑀦𑀢𑁆𑀣𑀸𑀬. 𑀧𑀲𑁆𑀲𑀢𑀺 𑀳𑀺 𑀪𑀕𑀯𑀸, ‘‘𑀇𑀫𑀲𑁆𑀲 𑀇𑀤𑀸𑀦𑀺 𑀉𑀧𑀦𑀺𑀲𑁆𑀲𑀬𑁄 𑀦𑀢𑁆𑀣𑀺, 𑀫𑀬𑁆𑀳𑀁 𑀧𑀦 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀲𑀫𑀥𑀺𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀯𑀲𑁆𑀲𑀲𑀢𑀸𑀦𑀁 𑀅𑀘𑁆𑀘𑀬𑁂𑀦 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀲𑀸𑀲𑀦𑀁 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀺. 𑀢𑀢𑁆𑀭𑀸𑀬𑀁 𑀓𑀼𑀮𑀖𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀫𑁆𑀧𑀢𑁆𑀢𑁂 𑀓𑀸𑀮𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀓𑀸𑀴𑀩𑀼𑀤𑁆𑀥𑀭𑀓𑁆𑀔𑀺𑀢𑁄 𑀦𑀸𑀫 𑀫𑀳𑀸𑀔𑀻𑀡𑀸𑀲𑀯𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀇𑀤𑀁 𑀤𑀺𑀲𑁆𑀯𑀸 𑀅𑀦𑀸𑀕𑀢𑁂 𑀯𑀸𑀲𑀦𑀢𑁆𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺.

𑀲𑁄𑀧𑀺 𑀢𑀢𑁆𑀣𑁂𑀯 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀫𑁆𑀳𑀺 𑀲𑀸𑀲𑀦𑁂 𑀧𑀢𑀺𑀝𑁆𑀞𑀺𑀢𑁂 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀤𑀓𑁆𑀔𑀺𑀡𑀕𑀺𑀭𑀺𑀯𑀺𑀳𑀸𑀭𑀲𑁆𑀲 𑀪𑀺𑀓𑁆𑀔𑀸𑀘𑀸𑀭𑀕𑀸𑀫𑁂 𑀏𑀓𑀲𑁆𑀫𑀺𑀁 𑀅𑀫𑀘𑁆𑀘𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀧𑀩𑁆𑀩𑀚𑁆𑀚𑀸𑀲𑀫𑀢𑁆𑀣𑀬𑁄𑀩𑁆𑀩𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀕𑀡𑀁 𑀧𑀭𑀺𑀳𑀭𑀦𑁆𑀢𑁄 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀉𑀧𑀚𑁆𑀛𑀸𑀬𑀁 𑀧𑀲𑁆𑀲𑀺𑀢𑀼𑀁 𑀅𑀕𑀫𑀸𑀲𑀺. 𑀅𑀣𑀲𑁆𑀲 𑀉𑀧𑀚𑁆𑀛𑀸𑀬𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀘𑁄𑀤𑁂𑀲𑁆𑀲𑀸𑀫𑀻𑀢𑀺 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀕𑀢𑁂𑀦 𑀢𑁂𑀦 𑀲𑀤𑁆𑀥𑀺𑀁 𑀫𑀼𑀔𑀁 𑀤𑀢𑁆𑀯𑀸 𑀓𑀣𑀸𑀫𑀢𑁆𑀢𑀫𑁆𑀧𑀺 𑀦 𑀅𑀓𑀸𑀲𑀺. 𑀲𑁄 𑀧𑀘𑁆𑀘𑀽𑀲𑀲𑀫𑀬𑁂 𑀯𑀼𑀝𑁆𑀞𑀸𑀬 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, 𑁋 ‘‘𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀫𑀬𑀺 𑀕𑀦𑁆𑀣𑀓𑀫𑁆𑀫𑀁 𑀓𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀢𑁂 𑀫𑀼𑀔𑀁 𑀤𑀢𑁆𑀯𑀸 𑀓𑀣𑀸𑀫𑀢𑁆𑀢𑀫𑁆𑀧𑀺 𑀦 𑀓𑀭𑀺𑀢𑁆𑀣, 𑀓𑁄 𑀫𑀬𑁆𑀳𑀁 𑀤𑁄𑀲𑁄’’𑀢𑀺 𑀧𑀼𑀘𑁆𑀙𑀺. 𑀣𑁂𑀭𑁄 𑀆𑀳 𑁋 ‘‘𑀢𑁆𑀯𑀁, 𑀆𑀯𑀼𑀲𑁄, 𑀩𑀼𑀤𑁆𑀥𑀭𑀓𑁆𑀔𑀺𑀢 𑀏𑀢𑁆𑀢𑀓𑁂𑀦𑁂𑀯 ‘𑀧𑀩𑁆𑀩𑀚𑁆𑀚𑀸𑀓𑀺𑀘𑁆𑀘𑀁 𑀫𑁂 𑀫𑀢𑁆𑀣𑀓𑀁 𑀧𑀢𑁆𑀢’𑀦𑁆𑀢𑀺 𑀲𑀜𑁆𑀜𑀁 𑀓𑀭𑁄𑀲𑀻’’𑀢𑀺. 𑀓𑀺𑀁 𑀓𑀭𑁄𑀫𑀺, 𑀪𑀦𑁆𑀢𑁂𑀢𑀺? 𑀕𑀡𑀁 𑀯𑀺𑀦𑁄𑀤𑁂𑀢𑁆𑀯𑀸 𑀢𑁆𑀯𑀁 𑀧𑀧𑀜𑁆𑀘𑀁 𑀙𑀺𑀦𑁆𑀤𑀺𑀢𑁆𑀯𑀸 𑀘𑁂𑀢𑀺𑀬𑀧𑀩𑁆𑀩𑀢𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀳𑀻𑀢𑀺. 𑀲𑁄 𑀉𑀧𑀚𑁆𑀛𑀸𑀬𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀼𑀜𑁆𑀜𑀯𑀸 𑀭𑀸𑀚𑀧𑀽𑀚𑀺𑀢𑁄 𑀳𑀼𑀢𑁆𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀘𑁂𑀢𑀺𑀬𑀧𑀩𑁆𑀩𑀢𑀯𑀺𑀳𑀸𑀭𑁂 𑀯𑀲𑀺.

𑀢𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀢𑀺𑀲𑁆𑀲𑀫𑀳𑀸𑀭𑀸𑀚𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀘𑁂𑀢𑀺𑀬𑀧𑀩𑁆𑀩𑀢𑁂 𑀭𑀸𑀚𑀮𑁂𑀡𑁂 𑀯𑀲𑀢𑀺. 𑀲𑁄 𑀣𑁂𑀭𑀲𑁆𑀲 𑀉𑀧𑀝𑁆𑀞𑀸𑀓𑀪𑀺𑀓𑁆𑀔𑀼𑀦𑁄 𑀲𑀜𑁆𑀜𑀁 𑀅𑀤𑀸𑀲𑀺 𑁋 ‘‘𑀬𑀤𑀸 𑀫𑀬𑁆𑀳𑀁 𑀅𑀬𑁆𑀬𑁄 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀥𑀫𑁆𑀫𑀁 𑀯𑀸 𑀓𑀣𑁂𑀢𑀺, 𑀢𑀤𑀸 𑀫𑁂 𑀲𑀜𑁆𑀜𑀁 𑀤𑀤𑁂𑀬𑁆𑀬𑀸𑀣𑀸’’𑀢𑀺. 𑀣𑁂𑀭𑁄𑀧𑀺 𑀏𑀓𑀲𑁆𑀫𑀺𑀁 𑀥𑀫𑁆𑀫𑀲𑁆𑀲𑀯𑀦𑀤𑀺𑀯𑀲𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀓𑀡𑁆𑀝𑀓𑀘𑁂𑀢𑀺𑀬𑀗𑁆𑀕𑀡𑀁 𑀆𑀭𑀼𑀬𑁆𑀳 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀓𑀸𑀴𑀢𑀺𑀫𑁆𑀩𑀭𑀼𑀭𑀼𑀓𑁆𑀔𑀫𑀽𑀮𑁂 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀏𑀓𑁄 𑀧𑀺𑀡𑁆𑀟𑀧𑀸𑀢𑀺𑀓𑀢𑁆𑀣𑁂𑀭𑁄 𑀓𑀸𑀴𑀓𑀸𑀭𑀸𑀫𑀲𑀼𑀢𑁆𑀢𑀦𑁆𑀢𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀣𑁂𑀭𑁄 𑀦𑀦𑀼, 𑀆𑀯𑀼𑀲𑁄, 𑀅𑀚𑁆𑀚 𑀥𑀫𑁆𑀫𑀲𑁆𑀲𑀯𑀦𑀤𑀺𑀯𑀲𑁄𑀢𑀺 𑀆𑀳. 𑀆𑀫, 𑀪𑀦𑁆𑀢𑁂, 𑀥𑀫𑁆𑀫𑀲𑁆𑀲𑀯𑀦𑀤𑀺𑀯𑀲𑁄𑀢𑀺. 𑀢𑁂𑀦 𑀳𑀺 𑀧𑀻𑀞𑀓𑀁 𑀆𑀦𑁂𑀣, 𑀇𑀥𑁂𑀯 𑀦𑀺𑀲𑀺𑀦𑁆𑀦𑀸 𑀥𑀫𑁆𑀫𑀲𑁆𑀲𑀯𑀦𑀁 𑀓𑀭𑀺𑀲𑁆𑀲𑀸𑀫𑀸𑀢𑀺. 𑀅𑀣𑀲𑁆𑀲 𑀭𑀼𑀓𑁆𑀔𑀫𑀽𑀮𑁂 𑀆𑀲𑀦𑀁 𑀧𑀜𑁆𑀜𑀧𑁂𑀢𑁆𑀯𑀸 𑀅𑀤𑀁𑀲𑀼. 𑀣𑁂𑀭𑁄 𑀧𑀼𑀩𑁆𑀩𑀕𑀸𑀣𑀸 𑀯𑀢𑁆𑀯𑀸 𑀓𑀸𑀴𑀓𑀸𑀭𑀸𑀫𑀲𑀼𑀢𑁆𑀢𑀁 𑀆𑀭𑀪𑀺. 𑀲𑁄𑀧𑀺𑀲𑁆𑀲 𑀉𑀧𑀝𑁆𑀞𑀸𑀓𑀤𑀳𑀭𑁄 𑀭𑀜𑁆𑀜𑁄 𑀲𑀜𑁆𑀜𑀁 𑀤𑀸𑀧𑁂𑀲𑀺. 𑀭𑀸𑀚𑀸 𑀧𑀼𑀩𑁆𑀩𑀕𑀸𑀣𑀸𑀲𑀼 𑀅𑀦𑀺𑀝𑁆𑀞𑀺𑀢𑀸𑀲𑀼𑀬𑁂𑀯 𑀧𑀸𑀧𑀼𑀡𑀺. 𑀧𑀢𑁆𑀯𑀸 𑀘 𑀅𑀜𑁆𑀜𑀸𑀢𑀓𑀯𑁂𑀲𑁂𑀦𑁂𑀯 𑀧𑀭𑀺𑀲𑀦𑁆𑀢𑁂 𑀞𑀢𑁆𑀯𑀸 𑀢𑀺𑀬𑀸𑀫𑀭𑀢𑁆𑀢𑀺𑀁 𑀞𑀺𑀢𑀓𑁄𑀯 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀣𑁂𑀭𑀲𑁆𑀲, 𑀇𑀤𑀫𑀯𑁄𑀘 𑀪𑀕𑀯𑀸𑀢𑀺 𑀯𑀘𑀦𑀓𑀸𑀮𑁂 𑀲𑀸𑀥𑀼𑀓𑀸𑀭𑀁 𑀅𑀤𑀸𑀲𑀺. 𑀣𑁂𑀭𑁄 𑀜𑀢𑁆𑀯𑀸, 𑀓𑀤𑀸 𑀆𑀕𑀢𑁄𑀲𑀺, 𑀫𑀳𑀸𑀭𑀸𑀚𑀸𑀢𑀺 𑀧𑀼𑀘𑁆𑀙𑀺. 𑀧𑀼𑀩𑁆𑀩𑀕𑀸𑀣𑀸 𑀑𑀲𑀸𑀭𑀡𑀓𑀸𑀮𑁂𑀬𑁂𑀯, 𑀪𑀦𑁆𑀢𑁂𑀢𑀺. 𑀤𑀼𑀓𑁆𑀓𑀭𑀁 𑀢𑁂 𑀫𑀳𑀸𑀭𑀸𑀚, 𑀓𑀢𑀦𑁆𑀢𑀺. 𑀦𑀬𑀺𑀤𑀁, 𑀪𑀦𑁆𑀢𑁂, 𑀤𑀼𑀓𑁆𑀓𑀭𑀁, 𑀬𑀤𑀺 𑀧𑀦 𑀫𑁂 𑀅𑀬𑁆𑀬𑀲𑁆𑀲 𑀥𑀫𑁆𑀫𑀓𑀣𑀁 𑀆𑀭𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀏𑀓𑀧𑀤𑁂𑀧𑀺 𑀅𑀜𑁆𑀜𑀯𑀺𑀳𑀺𑀢𑀪𑀸𑀯𑁄 𑀅𑀳𑁄𑀲𑀺, 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀲𑁆𑀲 𑀧𑀢𑁄𑀤𑀬𑀝𑁆𑀞𑀺𑀦𑀺𑀢𑀼𑀤𑀦𑀫𑀢𑁆𑀢𑁂𑀧𑀺 𑀞𑀸𑀦𑁂 𑀲𑀸𑀫𑀺𑀪𑀸𑀯𑁄 𑀦𑀸𑀫 𑀫𑁂 𑀫𑀸 𑀳𑁄𑀢𑀽𑀢𑀺 𑀲𑀧𑀣𑀫𑀓𑀸𑀲𑀺.

𑀢𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀩𑀼𑀤𑁆𑀥𑀕𑀼𑀡𑀸 𑀧𑀭𑀺𑀤𑀻𑀧𑀺𑀢𑀸, 𑀢𑀲𑁆𑀫𑀸 𑀭𑀸𑀚𑀸 𑀧𑀼𑀘𑁆𑀙𑀺 𑁋 ‘‘𑀏𑀢𑁆𑀢𑀓𑀸𑀯, 𑀪𑀦𑁆𑀢𑁂, 𑀩𑀼𑀤𑁆𑀥𑀕𑀼𑀡𑀸, 𑀉𑀤𑀸𑀳𑀼 𑀅𑀜𑁆𑀜𑁂𑀧𑀺 𑀅𑀢𑁆𑀣𑀻’’𑀢𑀺. 𑀫𑀬𑀸 𑀓𑀣𑀺𑀢𑀢𑁄, 𑀫𑀳𑀸𑀭𑀸𑀚, 𑀅𑀓𑀣𑀺𑀢𑀫𑁂𑀯 𑀩𑀳𑀼 𑀅𑀧𑁆𑀧𑀫𑀸𑀡𑀦𑁆𑀢𑀺. 𑀉𑀧𑀫𑀁, 𑀪𑀦𑁆𑀢𑁂, 𑀓𑀭𑁄𑀣𑀸𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀓𑀭𑀻𑀲𑀲𑀳𑀲𑁆𑀲𑀫𑀢𑁆𑀢𑁂 𑀲𑀸𑀮𑀺𑀓𑁆𑀔𑁂𑀢𑁆𑀢𑁂 𑀏𑀓𑀲𑀸𑀮𑀺𑀲𑀻𑀲𑀢𑁄 𑀅𑀯𑀲𑁂𑀲𑀲𑀸𑀮𑀻𑀬𑁂𑀯 𑀩𑀳𑀽, 𑀏𑀯𑀁 𑀫𑀬𑀸 𑀓𑀣𑀺𑀢𑀕𑀼𑀡𑀸 𑀅𑀧𑁆𑀧𑀸, 𑀅𑀯𑀲𑁂𑀲𑀸 𑀩𑀳𑀽𑀢𑀺. 𑀅𑀧𑀭𑀫𑁆𑀧𑀺, 𑀪𑀦𑁆𑀢𑁂, 𑀉𑀧𑀫𑀁 𑀓𑀭𑁄𑀣𑀸𑀢𑀺. 𑀬𑀣𑀸, 𑀫𑀳𑀸𑀭𑀸𑀚, 𑀫𑀳𑀸𑀕𑀗𑁆𑀕𑀸𑀬 𑀑𑀖𑀧𑀼𑀡𑁆𑀡𑀸𑀬 𑀲𑀽𑀘𑀺𑀧𑀸𑀲𑀁 𑀲𑀫𑁆𑀫𑀼𑀔𑀁 𑀓𑀭𑁂𑀬𑁆𑀬, 𑀲𑀽𑀘𑀺𑀧𑀸𑀲𑁂𑀦 𑀕𑀢𑀉𑀤𑀓𑀁 𑀅𑀧𑁆𑀧𑀁, 𑀲𑁂𑀲𑀁 𑀩𑀳𑀼, 𑀏𑀯𑀫𑁂𑀯 𑀫𑀬𑀸 𑀓𑀣𑀺𑀢𑀕𑀼𑀡𑀸 𑀅𑀧𑁆𑀧𑀸, 𑀅𑀯𑀲𑁂𑀲𑀸 𑀩𑀳𑀽𑀢𑀺. 𑀅𑀧𑀭𑀫𑁆𑀧𑀺, 𑀪𑀦𑁆𑀢𑁂, 𑀉𑀧𑀫𑀁 𑀓𑀭𑁄𑀣𑀸𑀢𑀺. 𑀇𑀥, 𑀫𑀳𑀸𑀭𑀸𑀚, 𑀘𑀸𑀢𑀓𑀲𑀓𑀼𑀡𑀸 𑀦𑀸𑀫 𑀆𑀓𑀸𑀲𑁂 𑀓𑀻𑀴𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀔𑀼𑀤𑁆𑀤𑀓𑀸 𑀲𑀸 𑀲𑀓𑀼𑀡𑀚𑀸𑀢𑀺, 𑀓𑀺𑀁 𑀦𑀼 𑀔𑁄 𑀢𑀲𑁆𑀲 𑀲𑀓𑀼𑀡𑀲𑁆𑀲 𑀆𑀓𑀸𑀲𑁂 𑀧𑀓𑁆𑀔𑀧𑀲𑀸𑀭𑀡𑀝𑁆𑀞𑀸𑀦𑀁 𑀩𑀳𑀼, 𑀅𑀯𑀲𑁂𑀲𑁄 𑀆𑀓𑀸𑀲𑁄 𑀅𑀧𑁆𑀧𑁄𑀢𑀺? 𑀓𑀺𑀁, 𑀪𑀦𑁆𑀢𑁂, 𑀯𑀤𑀣, 𑀅𑀧𑁆𑀧𑁄 𑀢𑀲𑁆𑀲 𑀧𑀓𑁆𑀔𑀧𑀲𑀸𑀭𑀡𑁄𑀓𑀸𑀲𑁄, 𑀅𑀯𑀲𑁂𑀲𑁄𑀯 𑀩𑀳𑀽𑀢𑀺. 𑀏𑀯𑀫𑁂𑀯, 𑀫𑀳𑀸𑀭𑀸𑀚, 𑀅𑀧𑁆𑀧𑀓𑀸 𑀫𑀬𑀸 𑀩𑀼𑀤𑁆𑀥𑀕𑀼𑀡𑀸 𑀓𑀣𑀺𑀢𑀸, 𑀅𑀯𑀲𑁂𑀲𑀸 𑀩𑀳𑀽 𑀅𑀦𑀦𑁆𑀢𑀸 𑀅𑀧𑁆𑀧𑀫𑁂𑀬𑁆𑀬𑀸𑀢𑀺. 𑀲𑀼𑀓𑀣𑀺𑀢𑀁, 𑀪𑀦𑁆𑀢𑁂, 𑀅𑀦𑀦𑁆𑀢𑀸 𑀩𑀼𑀤𑁆𑀥𑀕𑀼𑀡𑀸 𑀅𑀦𑀦𑁆𑀢𑁂𑀦𑁂𑀯 𑀆𑀓𑀸𑀲𑁂𑀦 𑀉𑀧𑀫𑀺𑀢𑀸. 𑀧𑀲𑀦𑁆𑀦𑀸 𑀫𑀬𑀁 𑀅𑀬𑁆𑀬𑀲𑁆𑀲, 𑀅𑀦𑀼𑀘𑁆𑀙𑀯𑀺𑀓𑀁 𑀧𑀦 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀫. 𑀅𑀬𑀁 𑀫𑁂 𑀤𑀼𑀕𑁆𑀕𑀢𑀧𑀡𑁆𑀡𑀸𑀓𑀸𑀭𑁄 𑀇𑀫𑀲𑁆𑀫𑀺𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀇𑀫𑀁 𑀢𑀺𑀬𑁄𑀚𑀦𑀲𑀢𑀺𑀓𑀁 𑀭𑀚𑁆𑀚𑀁 𑀅𑀬𑁆𑀬𑀲𑁆𑀲 𑀤𑁂𑀫𑀸𑀢𑀺. 𑀢𑀼𑀫𑁆𑀳𑁂𑀳𑀺, 𑀫𑀳𑀸𑀭𑀸𑀚, 𑀅𑀢𑁆𑀢𑀦𑁄 𑀧𑀲𑀦𑁆𑀦𑀸𑀓𑀸𑀭𑁄 𑀓𑀢𑁄, 𑀫𑀬𑀁 𑀧𑀦 𑀅𑀫𑁆𑀳𑀸𑀓𑀁 𑀤𑀺𑀦𑁆𑀦𑀁 𑀭𑀚𑁆𑀚𑀁 𑀢𑀼𑀫𑁆𑀳𑀸𑀓𑀁𑀬𑁂𑀯 𑀤𑁂𑀫, 𑀥𑀫𑁆𑀫𑁂𑀦 𑀲𑀫𑁂𑀦 𑀭𑀚𑁆𑀚𑀁 𑀓𑀸𑀭𑁂𑀳𑀺 𑀫𑀳𑀸𑀭𑀸𑀚𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀳𑀸𑀲𑀘𑁆𑀘𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀘𑀽𑀴𑀢𑀡𑁆𑀳𑀸𑀲𑀗𑁆𑀔𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯𑁦. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀘𑀽𑀴𑀢𑀡𑁆𑀳𑀸𑀲𑀗𑁆𑀔𑀬𑀲𑀼𑀢𑁆𑀢𑀁. 𑀢𑀢𑁆𑀣 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂𑀢𑀺 𑀧𑀼𑀩𑁆𑀩𑀸𑀭𑀸𑀫𑀲𑀗𑁆𑀔𑀸𑀢𑁂 𑀯𑀺𑀳𑀸𑀭𑁂 𑀫𑀺𑀕𑀸𑀭𑀫𑀸𑀢𑀼𑀬𑀸 𑀧𑀸𑀲𑀸𑀤𑁂. 𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀻𑀓𑀣𑀸𑀅𑀢𑀻𑀢𑁂 𑀲𑀢𑀲𑀳𑀲𑁆𑀲𑀓𑀧𑁆𑀧𑀫𑀢𑁆𑀣𑀓𑁂 𑀏𑀓𑀸 𑀉𑀧𑀸𑀲𑀺𑀓𑀸 𑀧𑀤𑀼𑀫𑀼𑀢𑁆𑀢𑀭𑀁 𑀪𑀕𑀯𑀦𑁆𑀢𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀢𑀲𑀳𑀲𑁆𑀲𑀁 𑀤𑀸𑀦𑀁 𑀤𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸, ‘‘𑀅𑀦𑀸𑀕𑀢𑁂 𑀢𑀼𑀫𑁆𑀳𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀲𑁆𑀲 𑀅𑀕𑁆𑀕𑀼𑀧𑀝𑁆𑀞𑀸𑀬𑀺𑀓𑀸 𑀳𑁄𑀫𑀻’’𑀢𑀺 𑀧𑀢𑁆𑀣𑀦𑀫𑀓𑀸𑀲𑀺. 𑀲𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑁂𑀲𑀼 𑀘𑁂𑀯 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀁𑀲𑀭𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀪𑀤𑁆𑀤𑀺𑀬𑀦𑀕𑀭𑁂 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀥𑀦𑀜𑁆𑀚𑀬𑀲𑁆𑀲 𑀲𑁂𑀝𑁆𑀞𑀺𑀦𑁄 𑀕𑀳𑁂 𑀲𑀼𑀫𑀦𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀚𑀸𑀢𑀓𑀸𑀮𑁂 𑀘𑀲𑁆𑀲𑀸 𑀯𑀺𑀲𑀸𑀔𑀸𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑀸 𑀬𑀤𑀸 𑀪𑀕𑀯𑀸 𑀪𑀤𑁆𑀤𑀺𑀬𑀦𑀕𑀭𑀁 𑀅𑀕𑀫𑀸𑀲𑀺, 𑀢𑀤𑀸 𑀧𑀜𑁆𑀘𑀳𑀺 𑀤𑀸𑀭𑀺𑀓𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀪𑀕𑀯𑀢𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀧𑀞𑀫𑀤𑀲𑁆𑀲𑀦𑀫𑁆𑀳𑀺𑀬𑁂𑀯 𑀲𑁄𑀢𑀸𑀧𑀦𑁆𑀦𑀸 𑀅𑀳𑁄𑀲𑀺. 𑀅𑀧𑀭𑀪𑀸𑀕𑁂 𑀲𑀸𑀯𑀢𑁆𑀣𑀺𑀬𑀁 𑀫𑀺𑀕𑀸𑀭𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀧𑀼𑀡𑁆𑀡𑀯𑀟𑁆𑀠𑀦𑀓𑀼𑀫𑀸𑀭𑀲𑁆𑀲 𑀕𑁂𑀳𑀁 𑀕𑀢𑀸, 𑀢𑀢𑁆𑀣 𑀦𑀁 𑀫𑀺𑀕𑀸𑀭𑀲𑁂𑀝𑁆𑀞𑀺 𑀫𑀸𑀢𑀺𑀝𑁆𑀞𑀸𑀦𑁂 𑀞𑀧𑁂𑀲𑀺, 𑀢𑀲𑁆𑀫𑀸 𑀫𑀺𑀕𑀸𑀭𑀫𑀸𑀢𑀸𑀢𑀺 𑀯𑀼𑀘𑁆𑀘𑀢𑀺.

𑀧𑀢𑀺𑀓𑀼𑀮𑀁 𑀕𑀘𑁆𑀙𑀦𑁆𑀢𑀺𑀬𑀸 𑀘𑀲𑁆𑀲𑀸 𑀧𑀺𑀢𑀸 𑀫𑀳𑀸𑀮𑀢𑀸𑀧𑀺𑀴𑀦𑁆𑀥𑀦𑀁 𑀦𑀸𑀫 𑀓𑀸𑀭𑀸𑀧𑁂𑀲𑀺. 𑀢𑀲𑁆𑀫𑀺𑀁 𑀧𑀺𑀴𑀦𑁆𑀥𑀦𑁂 𑀘𑀢𑀲𑁆𑀲𑁄 𑀯𑀚𑀺𑀭𑀦𑀸𑀴𑀺𑀬𑁄 𑀉𑀧𑀬𑁄𑀕𑀁 𑀅𑀕𑀫𑀁𑀲𑀼, 𑀫𑀼𑀢𑁆𑀢𑀸𑀦𑀁 𑀏𑀓𑀸𑀤𑀲 𑀦𑀸𑀴𑀺𑀬𑁄, 𑀧𑀯𑀸𑀴𑀸𑀦𑀁 𑀤𑁆𑀯𑀸𑀯𑀻𑀲𑀢𑀺 𑀦𑀸𑀴𑀺𑀬𑁄, 𑀫𑀡𑀻𑀦𑀁 𑀢𑁂𑀢𑁆𑀢𑀺𑀁𑀲 𑀦𑀸𑀴𑀺𑀬𑁄, 𑀇𑀢𑀺 𑀏𑀢𑁂𑀳𑀺 𑀘 𑀅𑀜𑁆𑀜𑁂𑀳𑀺 𑀘 𑀲𑀢𑁆𑀢𑀯𑀡𑁆𑀡𑁂𑀳𑀺 𑀭𑀢𑀦𑁂𑀳𑀺 𑀦𑀺𑀝𑁆𑀞𑀸𑀦𑀁 𑀅𑀕𑀫𑀸𑀲𑀺. 𑀢𑀁 𑀲𑀻𑀲𑁂 𑀧𑀝𑀺𑀫𑀼𑀓𑁆𑀓𑀁 𑀬𑀸𑀯 𑀧𑀸𑀤𑀧𑀺𑀝𑁆𑀞𑀺𑀬𑀸 𑀪𑀲𑁆𑀲𑀢𑀺, 𑀧𑀜𑁆𑀘𑀦𑁆𑀦𑀁 𑀳𑀢𑁆𑀣𑀻𑀦𑀁 𑀩𑀮𑀁 𑀥𑀸𑀭𑀬𑀫𑀸𑀦𑀸𑀯 𑀦𑀁 𑀇𑀢𑁆𑀣𑀻 𑀥𑀸𑀭𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀲𑀸 𑀅𑀧𑀭𑀪𑀸𑀕𑁂 𑀤𑀲𑀩𑀮𑀲𑁆𑀲 𑀅𑀕𑁆𑀕𑀼𑀧𑀝𑁆𑀞𑀸𑀬𑀺𑀓𑀸 𑀳𑀼𑀢𑁆𑀯𑀸 𑀢𑀁 𑀧𑀲𑀸𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀯𑀳𑀺 𑀓𑁄𑀝𑀻𑀳𑀺 𑀪𑀕𑀯𑀢𑁄 𑀯𑀺𑀳𑀸𑀭𑀁 𑀓𑀸𑀭𑀬𑀫𑀸𑀦𑀸 𑀓𑀭𑀻𑀲𑀫𑀢𑁆𑀢𑁂 𑀪𑀽𑀫𑀺𑀪𑀸𑀕𑁂 𑀧𑀸𑀲𑀸𑀤𑀁 𑀓𑀸𑀭𑁂𑀲𑀺. 𑀢𑀲𑁆𑀲 𑀉𑀧𑀭𑀺𑀪𑀽𑀫𑀺𑀬𑀁 𑀧𑀜𑁆𑀘 𑀕𑀩𑁆𑀪𑀲𑀢𑀸𑀦𑀺 𑀳𑁄𑀦𑁆𑀢𑀺, 𑀳𑁂𑀝𑁆𑀞𑀸𑀪𑀽𑀫𑀺𑀬𑀁 𑀧𑀜𑁆𑀘𑀸𑀢𑀺 𑀕𑀩𑁆𑀪𑀲𑀳𑀲𑁆𑀲𑀧𑁆𑀧𑀝𑀺𑀫𑀡𑁆𑀟𑀺𑀢𑁄 𑀅𑀳𑁄𑀲𑀺. 𑀲𑀸 ‘‘𑀲𑀼𑀤𑁆𑀥𑀧𑀸𑀲𑀸𑀤𑁄𑀯 𑀦 𑀲𑁄𑀪𑀢𑀻’’𑀢𑀺 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀧𑀜𑁆𑀘 𑀤𑁆𑀯𑀺𑀓𑀽𑀝𑀕𑁂𑀳𑀲𑀢𑀸𑀦𑀺, 𑀧𑀜𑁆𑀘 𑀘𑀽𑀴𑀧𑀸𑀲𑀸𑀤𑀲𑀢𑀸𑀦𑀺, 𑀧𑀜𑁆𑀘 𑀤𑀻𑀖𑀲𑀸𑀮𑀲𑀢𑀸𑀦𑀺 𑀘 𑀓𑀸𑀭𑀸𑀧𑁂𑀲𑀺. 𑀯𑀺𑀳𑀸𑀭𑀫𑀳𑁄 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀦𑀺𑀝𑁆𑀞𑀸𑀦𑀁 𑀅𑀕𑀫𑀸𑀲𑀺.

𑀫𑀸𑀢𑀼𑀕𑀸𑀫𑀢𑁆𑀢𑀪𑀸𑀯𑁂 𑀞𑀺𑀢𑀸𑀬 𑀯𑀺𑀲𑀸𑀔𑀸𑀬 𑀯𑀺𑀬 𑀅𑀜𑁆𑀜𑀺𑀲𑁆𑀲𑀸 𑀩𑀼𑀤𑁆𑀥𑀲𑀸𑀲𑀦𑁂 𑀥𑀦𑀧𑀭𑀺𑀘𑁆𑀘𑀸𑀕𑁄 𑀦𑀸𑀫 𑀦𑀢𑁆𑀣𑀺, 𑀧𑀼𑀭𑀺𑀲𑀢𑁆𑀢𑀪𑀸𑀯𑁂 𑀞𑀺𑀢𑀲𑁆𑀲 𑀘 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀯𑀺𑀬 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑀸𑀲𑀦𑁂 𑀥𑀦𑀧𑀭𑀺𑀘𑁆𑀘𑀸𑀕𑁄 𑀦𑀸𑀫 𑀦𑀢𑁆𑀣𑀺. 𑀲𑁄 𑀳𑀺 𑀘𑀢𑀼𑀧𑀜𑁆𑀜𑀸𑀲𑀓𑁄𑀝𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀸𑀯𑀢𑁆𑀣𑀺𑀬𑀸 𑀤𑀓𑁆𑀔𑀺𑀡𑀪𑀸𑀕𑁂 𑀅𑀦𑀼𑀭𑀸𑀥𑀧𑀼𑀭𑀲𑁆𑀲 𑀫𑀳𑀸𑀯𑀺𑀳𑀸𑀭𑀲𑀤𑀺𑀲𑁂 𑀞𑀸𑀦𑁂 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑀁 𑀦𑀸𑀫 𑀓𑀸𑀭𑁂𑀲𑀺. 𑀯𑀺𑀲𑀸𑀔𑀸, 𑀲𑀸𑀯𑀢𑁆𑀣𑀺𑀬𑀸 𑀧𑀸𑀘𑀻𑀦𑀪𑀸𑀕𑁂 𑀉𑀢𑁆𑀢𑀫𑀤𑁂𑀯𑀻𑀯𑀺𑀳𑀸𑀭𑀲𑀤𑀺𑀲𑁂 𑀞𑀸𑀦𑁂 𑀧𑀼𑀩𑁆𑀩𑀸𑀭𑀸𑀫𑀁 𑀦𑀸𑀫 𑀓𑀸𑀭𑁂𑀲𑀺. 𑀪𑀕𑀯𑀸 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀓𑀼𑀮𑀸𑀦𑀁 𑀅𑀦𑀼𑀓𑀫𑁆𑀧𑀸𑀬 𑀲𑀸𑀯𑀢𑁆𑀣𑀺𑀁 𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁄 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀯𑀺𑀳𑀸𑀭𑁂𑀲𑀼 𑀦𑀺𑀩𑀤𑁆𑀥𑀯𑀸𑀲𑀁 𑀯𑀲𑀺. 𑀏𑀓𑀁 𑀅𑀦𑁆𑀢𑁄𑀯𑀲𑁆𑀲𑀁 𑀚𑁂𑀢𑀯𑀦𑁂 𑀯𑀲𑀢𑀺, 𑀏𑀓𑀁 𑀧𑀼𑀩𑁆𑀩𑀸𑀭𑀸𑀫𑁂, 𑀏𑀢𑀲𑁆𑀫𑀺𑀁 𑀧𑀦 𑀲𑀫𑀬𑁂 𑀪𑀕𑀯𑀸 𑀧𑀼𑀩𑁆𑀩𑀸𑀭𑀸𑀫𑁂 𑀯𑀺𑀳𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂’’𑀢𑀺.

𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂𑀢𑀺 𑀓𑀺𑀢𑁆𑀢𑀓𑁂𑀦 𑀦𑀼 𑀔𑁄, 𑀪𑀦𑁆𑀢𑁂. 𑀲𑀁𑀔𑀺𑀢𑁆𑀢𑁂𑀦 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀢𑀡𑁆𑀳𑀸𑀲𑀗𑁆𑀔𑀬𑁂 𑀦𑀺𑀩𑁆𑀩𑀸𑀦𑁂 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀢𑀸𑀬 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑁄 𑀦𑀸𑀫 𑀲𑀁𑀔𑀺𑀢𑁆𑀢𑁂𑀦 𑀓𑀺𑀢𑁆𑀢𑀸𑀯𑀢𑀸 𑀳𑁄𑀢𑀺? 𑀬𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑁄 𑀳𑁄𑀢𑀺, 𑀢𑀁 𑀫𑁂 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀁 𑀲𑀁𑀔𑀺𑀢𑁆𑀢𑁂𑀦 𑀤𑁂𑀲𑁂𑀣𑀸𑀢𑀺 𑀧𑀼𑀘𑁆𑀙𑀢𑀺. 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄𑀢𑀺 𑀔𑀬𑀯𑀬𑀲𑀗𑁆𑀔𑀸𑀢𑀁 𑀅𑀦𑁆𑀢𑀁 𑀅𑀢𑀻𑀢𑀸𑀢𑀺 𑀅𑀘𑁆𑀘𑀦𑁆𑀢𑀸. 𑀅𑀘𑁆𑀘𑀦𑁆𑀢𑀸 𑀦𑀺𑀝𑁆𑀞𑀸 𑀅𑀲𑁆𑀲𑀸𑀢𑀺 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑁄, 𑀏𑀓𑀦𑁆𑀢𑀦𑀺𑀝𑁆𑀞𑁄 𑀲𑀢𑀢𑀦𑀺𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀅𑀘𑁆𑀘𑀦𑁆𑀢𑀁 𑀬𑁄𑀕𑀓𑁆𑀔𑁂𑀫𑀻𑀢𑀺 𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀻, 𑀦𑀺𑀘𑁆𑀘𑀬𑁄𑀕𑀓𑁆𑀔𑁂𑀫𑀻𑀢𑀺 𑀅𑀢𑁆𑀣𑁄. 𑀅𑀘𑁆𑀘𑀦𑁆𑀢𑀁 𑀩𑁆𑀭𑀳𑁆𑀫𑀘𑀸𑀭𑀻𑀢𑀺 𑀅𑀘𑁆𑀘𑀦𑁆𑀢𑀩𑁆𑀭𑀳𑁆𑀫𑀘𑀸𑀭𑀻, 𑀦𑀺𑀘𑁆𑀘𑀩𑁆𑀭𑀳𑁆𑀫𑀘𑀸𑀭𑀻𑀢𑀺 𑀅𑀢𑁆𑀣𑁄. 𑀅𑀘𑁆𑀘𑀦𑁆𑀢𑀁 𑀧𑀭𑀺𑀬𑁄𑀲𑀸𑀦𑀫𑀲𑁆𑀲𑀸𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀘𑁆𑀘𑀦𑁆𑀢𑀧𑀭𑀺𑀬𑁄𑀲𑀸𑀦𑁄. 𑀲𑁂𑀝𑁆𑀞𑁄 𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀤𑁂𑀯𑀸𑀦𑀜𑁆𑀘 𑀫𑀦𑀼𑀲𑁆𑀲𑀸𑀦𑀜𑁆𑀘 𑀲𑁂𑀝𑁆𑀞𑁄 𑀉𑀢𑁆𑀢𑀫𑁄. 𑀏𑀯𑀭𑀽𑀧𑁄 𑀪𑀺𑀓𑁆𑀔𑀼 𑀓𑀺𑀢𑁆𑀢𑀸𑀯𑀢𑀸 𑀳𑁄𑀢𑀺, 𑀔𑀺𑀧𑁆𑀧𑀫𑁂𑀢𑀲𑁆𑀲 𑀲𑀗𑁆𑀔𑁂𑀧𑁂𑀦𑁂𑀯 𑀧𑀝𑀺𑀧𑀢𑁆𑀢𑀺𑀁 𑀓𑀣𑁂𑀣𑀸𑀢𑀺 𑀪𑀕𑀯𑀦𑁆𑀢𑀁 𑀬𑀸𑀘𑀢𑀺. 𑀓𑀲𑁆𑀫𑀸 𑀧𑀦𑁂𑀲 𑀏𑀯𑀁 𑀯𑁂𑀕𑀸𑀬𑀢𑀻𑀢𑀺? 𑀓𑀻𑀴𑀁 𑀅𑀦𑀼𑀪𑀯𑀺𑀢𑀼𑀓𑀸𑀫𑀢𑀸𑀬.

𑀅𑀬𑀁 𑀓𑀺𑀭 𑀉𑀬𑁆𑀬𑀸𑀦𑀓𑀻𑀴𑀁 𑀆𑀡𑀸𑀧𑁂𑀢𑁆𑀯𑀸 𑀘𑀢𑀽𑀳𑀺 𑀫𑀳𑀸𑀭𑀸𑀚𑀽𑀳𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀆𑀭𑀓𑁆𑀔𑀁 𑀕𑀸𑀳𑀸𑀧𑁂𑀢𑁆𑀯𑀸 𑀤𑁆𑀯𑀻𑀲𑀼 𑀤𑁂𑀯𑀮𑁄𑀓𑁂𑀲𑀼 𑀤𑁂𑀯𑀲𑀗𑁆𑀖𑁂𑀦 𑀧𑀭𑀺𑀯𑀼𑀢𑁄 𑀅𑀟𑁆𑀠𑀢𑀺𑀬𑀸𑀳𑀺 𑀦𑀸𑀝𑀓𑀓𑁄𑀝𑀻𑀳𑀺 𑀲𑀤𑁆𑀥𑀺𑀁 𑀏𑀭𑀸𑀯𑀡𑀁 𑀆𑀭𑀼𑀬𑁆𑀳 𑀉𑀬𑁆𑀬𑀸𑀦𑀤𑁆𑀯𑀸𑀭𑁂 𑀞𑀺𑀢𑁄 𑀇𑀫𑀁 𑀧𑀜𑁆𑀳𑀁 𑀲𑀮𑁆𑀮𑀓𑁆𑀔𑁂𑀲𑀺 𑁋 ‘‘𑀓𑀺𑀢𑁆𑀢𑀓𑁂𑀦 𑀦𑀼 𑀔𑁄 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀲𑀗𑁆𑀔𑁂𑀧𑀢𑁄 𑀆𑀕𑀫𑀦𑀺𑀬𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀳𑁄𑀢𑀻’’𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀧𑀜𑁆𑀳𑁄 𑀅𑀢𑀺𑀯𑀺𑀬 𑀲𑀲𑁆𑀲𑀺𑀭𑀺𑀓𑁄, 𑀲𑀘𑀸𑀳𑀁 𑀇𑀫𑀁 𑀧𑀜𑁆𑀳𑀁 𑀅𑀦𑀼𑀕𑁆𑀕𑀡𑁆𑀳𑀺𑀢𑁆𑀯𑀸𑀯 𑀉𑀬𑁆𑀬𑀸𑀦𑀁 𑀧𑀯𑀺𑀲𑀺𑀲𑁆𑀲𑀸𑀫𑀺, 𑀙𑀤𑁆𑀯𑀸𑀭𑀺𑀓𑁂𑀳𑀺 𑀆𑀭𑀫𑁆𑀫𑀡𑁂𑀳𑀺 𑀦𑀺𑀫𑁆𑀫𑀣𑀺𑀢𑁄 𑀦 𑀧𑀼𑀦 𑀇𑀫𑀁 𑀧𑀜𑁆𑀳𑀁 𑀲𑀮𑁆𑀮𑀓𑁆𑀔𑁂𑀲𑁆𑀲𑀸𑀫𑀺, 𑀢𑀺𑀝𑁆𑀞𑀢𑀼 𑀢𑀸𑀯 𑀉𑀬𑁆𑀬𑀸𑀦𑀓𑀻𑀴𑀸, 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀇𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀉𑀕𑁆𑀕𑀳𑀺𑀢𑀧𑀜𑁆𑀳𑁄 𑀉𑀬𑁆𑀬𑀸𑀦𑁂 𑀓𑀻𑀴𑀺𑀲𑁆𑀲𑀸𑀫𑀻’’𑀢𑀺 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀅𑀦𑁆𑀢𑀭𑀳𑀺𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀸𑀢𑀼𑀭𑀳𑁄𑀲𑀺. 𑀢𑁂𑀧𑀺 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀆𑀭𑀓𑁆𑀔𑀁 𑀕𑀳𑁂𑀢𑁆𑀯𑀸 𑀞𑀺𑀢𑀝𑁆𑀞𑀸𑀦𑁂𑀬𑁂𑀯 𑀞𑀺𑀢𑀸, 𑀧𑀭𑀺𑀘𑀸𑀭𑀺𑀓𑀤𑁂𑀯𑀲𑀗𑁆𑀖𑀸𑀧𑀺 𑀦𑀸𑀝𑀓𑀸𑀦𑀺𑀧𑀺 𑀏𑀭𑀸𑀯𑀡𑁄𑀧𑀺 𑀦𑀸𑀕𑀭𑀸𑀚𑀸 𑀢𑀢𑁆𑀣𑁂𑀯 𑀉𑀬𑁆𑀬𑀸𑀦𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺, 𑀏𑀯𑀫𑁂𑀲 𑀓𑀻𑀴𑀁 𑀅𑀦𑀼𑀪𑀯𑀺𑀢𑀼𑀓𑀸𑀫𑀢𑀸𑀬 𑀯𑁂𑀕𑀸𑀬𑀦𑁆𑀢𑁄 𑀏𑀯𑀫𑀸𑀳.

𑀲𑀩𑁆𑀩𑁂 𑀥𑀫𑁆𑀫𑀸 𑀦𑀸𑀮𑀁 𑀅𑀪𑀺𑀦𑀺𑀯𑁂𑀲𑀸𑀬𑀸𑀢𑀺 𑀏𑀢𑁆𑀣 𑀲𑀩𑁆𑀩𑁂 𑀥𑀫𑁆𑀫𑀸 𑀦𑀸𑀫 𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄. 𑀢𑁂 𑀲𑀩𑁆𑀩𑁂𑀧𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀅𑀪𑀺𑀦𑀺𑀯𑁂𑀲𑀸𑀬 𑀦𑀸𑀮𑀁 𑀦 𑀧𑀭𑀺𑀬𑀢𑁆𑀢𑀸 𑀦 𑀲𑀫𑀢𑁆𑀣𑀸 𑀦 𑀬𑀼𑀢𑁆𑀢𑀸, 𑀓𑀲𑁆𑀫𑀸? 𑀕𑀳𑀺𑀢𑀸𑀓𑀸𑀭𑁂𑀦 𑀅𑀢𑀺𑀝𑁆𑀞𑀦𑀢𑁄. 𑀢𑁂 𑀳𑀺 𑀦𑀺𑀘𑁆𑀘𑀸𑀢𑀺 𑀕𑀳𑀺𑀢𑀸𑀧𑀺 𑀅𑀦𑀺𑀘𑁆𑀘𑀸𑀯 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀲𑀼𑀔𑀸𑀢𑀺 𑀕𑀳𑀺𑀢𑀸𑀧𑀺 𑀤𑀼𑀓𑁆𑀔𑀸𑀯 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀅𑀢𑁆𑀢𑀸𑀢𑀺 𑀕𑀳𑀺𑀢𑀸𑀧𑀺 𑀅𑀦𑀢𑁆𑀢𑀸𑀯 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀦𑀸𑀮𑀁 𑀅𑀪𑀺𑀦𑀺𑀯𑁂𑀲𑀸𑀬. 𑀅𑀪𑀺𑀚𑀸𑀦𑀸𑀢𑀻𑀢𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀜𑀸𑀢𑀧𑀭𑀺𑀜𑁆𑀜𑀸𑀬 𑀅𑀪𑀺𑀚𑀸𑀦𑀸𑀢𑀺. 𑀧𑀭𑀺𑀚𑀸𑀦𑀸𑀢𑀻𑀢𑀺 𑀢𑀣𑁂𑀯 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀧𑀭𑀺𑀚𑀸𑀦𑀸𑀢𑀺. 𑀬𑀁𑀓𑀺𑀜𑁆𑀘𑀺 𑀯𑁂𑀤𑀦𑀦𑁆𑀢𑀺 𑀅𑀦𑁆𑀢𑀫𑀲𑁄 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀫𑁆𑀧𑀺 𑀬𑀁𑀓𑀺𑀜𑁆𑀘𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀯𑁂𑀤𑀦𑀁 𑀅𑀦𑀼𑀪𑀯𑀢𑀺. 𑀇𑀫𑀺𑀦𑀸 𑀪𑀕𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀯𑁂𑀤𑀦𑀸𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀭𑀽𑀧𑀧𑀭𑀺𑀕𑁆𑀕𑀳𑀁 𑀤𑀲𑁆𑀲𑁂𑀢𑀺. 𑀲𑀘𑁂 𑀧𑀦 𑀯𑁂𑀤𑀦𑀸𑀓𑀫𑁆𑀫𑀝𑁆𑀞𑀸𑀦𑀁 𑀳𑁂𑀝𑁆𑀞𑀸 𑀦 𑀓𑀣𑀺𑀢𑀁 𑀪𑀯𑁂𑀬𑁆𑀬, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀣𑁂𑀢𑀩𑁆𑀩𑀁 𑀲𑀺𑀬𑀸. 𑀳𑁂𑀝𑁆𑀞𑀸 𑀧𑀦 𑀓𑀣𑀺𑀢𑀁, 𑀢𑀲𑁆𑀫𑀸 𑀲𑀢𑀺𑀧𑀝𑁆𑀞𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻𑀢𑀺 𑀏𑀢𑁆𑀣 𑀅𑀦𑀺𑀘𑁆𑀘𑀁 𑀯𑁂𑀤𑀺𑀢𑀩𑁆𑀩𑀁, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀯𑁂𑀤𑀺𑀢𑀩𑁆𑀩𑀸, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀅𑀦𑀺𑀘𑁆𑀘𑀦𑁆𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀢𑁂 𑀳𑀺 𑀉𑀧𑁆𑀧𑀸𑀤𑀯𑀬𑀝𑁆𑀞𑁂𑀦 𑀅𑀦𑀺𑀘𑁆𑀘𑀸. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀸𑀦𑀁 𑀔𑀬𑀢𑁄 𑀯𑀬𑀢𑁄 𑀤𑀲𑁆𑀲𑀦𑀜𑀸𑀡𑀁. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻𑀢𑀺 𑀢𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄. 𑀢𑀲𑁆𑀫𑀸 ‘‘𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻’’𑀢𑀺 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀯𑀺𑀳𑀭𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻𑀢𑀺 𑀏𑀢𑁆𑀣 𑀤𑁆𑀯𑁂 𑀯𑀺𑀭𑀸𑀕𑀸 𑀔𑀬𑀯𑀺𑀭𑀸𑀕𑁄 𑀘 𑀅𑀘𑁆𑀘𑀦𑁆𑀢𑀯𑀺𑀭𑀸𑀕𑁄 𑀘. 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀔𑀬𑀯𑀬𑀢𑁄 𑀅𑀦𑀼𑀧𑀲𑁆𑀲𑀦𑀸𑀧𑀺, 𑀅𑀘𑁆𑀘𑀦𑁆𑀢𑀯𑀺𑀭𑀸𑀕𑀁 𑀦𑀺𑀩𑁆𑀩𑀸𑀦𑀁 𑀯𑀺𑀭𑀸𑀕𑀢𑁄 𑀤𑀲𑁆𑀲𑀦𑀫𑀕𑁆𑀕𑀜𑀸𑀡𑀫𑁆𑀧𑀺 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸. 𑀢𑀤𑀼𑀪𑀬𑀲𑀫𑀸𑀗𑁆𑀕𑀻𑀧𑀼𑀕𑁆𑀕𑀮𑁄 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻 𑀦𑀸𑀫, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻’’𑀢𑀺, 𑀯𑀺𑀭𑀸𑀕𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀺𑀫𑁆𑀳𑀺𑀧𑀺 𑀏𑀲𑁂𑀯 𑀦𑀬𑁄, 𑀦𑀺𑀭𑁄𑀥𑁄𑀧𑀺 𑀳𑀺 𑀔𑀬𑀦𑀺𑀭𑁄𑀥𑁄 𑀘 𑀅𑀘𑁆𑀘𑀦𑁆𑀢𑀦𑀺𑀭𑁄𑀥𑁄 𑀘𑀸𑀢𑀺 𑀤𑀼𑀯𑀺𑀥𑁄𑀬𑁂𑀯. 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻𑀢𑀺 𑀏𑀢𑁆𑀣 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀯𑀼𑀘𑁆𑀘𑀢𑀺 𑀯𑁄𑀲𑁆𑀲𑀕𑁆𑀕𑁄, 𑀲𑁄 𑀘 𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑁄 𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑁄𑀢𑀺 𑀤𑀼𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑁄𑀢𑀺 𑀯𑀺𑀧𑀲𑁆𑀲𑀦𑀸, 𑀲𑀸 𑀳𑀺 𑀢𑀤𑀗𑁆𑀕𑀯𑀲𑁂𑀦 𑀓𑀺𑀮𑁂𑀲𑁂 𑀘 𑀔𑀦𑁆𑀥𑁂 𑀘 𑀯𑁄𑀲𑁆𑀲𑀚𑁆𑀚𑀢𑀺. 𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑁄𑀢𑀺 𑀫𑀕𑁆𑀕𑁄, 𑀲𑁄 𑀳𑀺 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀆𑀭𑀫𑁆𑀫𑀡𑀢𑁄 𑀧𑀓𑁆𑀔𑀦𑁆𑀤𑀢𑀺. 𑀤𑁆𑀯𑀻𑀳𑀺𑀧𑀺 𑀯𑀸 𑀓𑀸𑀭𑀡𑁂𑀳𑀺 𑀯𑁄𑀲𑁆𑀲𑀕𑁆𑀕𑁄𑀬𑁂𑀯, 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀔𑀦𑁆𑀥𑀸𑀦𑀁 𑀓𑀺𑀮𑁂𑀲𑀸𑀦𑀜𑁆𑀘 𑀯𑁄𑀲𑁆𑀲𑀚𑁆𑀚𑀦𑀢𑁄, 𑀦𑀺𑀩𑁆𑀩𑀸𑀦𑀜𑁆𑀘 𑀧𑀓𑁆𑀔𑀦𑁆𑀤𑀦𑀢𑁄. 𑀢𑀲𑁆𑀫𑀸 𑀓𑀺𑀮𑁂𑀲𑁂 𑀘 𑀔𑀦𑁆𑀥𑁂 𑀘 𑀧𑀭𑀺𑀘𑁆𑀘𑀚𑀢𑀻𑀢𑀺 𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑁄, 𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑁄𑀢𑀺 𑀉𑀪𑀬𑀫𑁆𑀧𑁂𑀢𑀁 𑀫𑀕𑁆𑀕𑁂 𑀲𑀫𑁂𑀢𑀺. 𑀢𑀤𑀼𑀪𑀬𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀇𑀫𑀸𑀬 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀦𑀸𑀫 𑀳𑁄𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻’’𑀢𑀺. 𑀦 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀻𑀢𑀺 𑀓𑀺𑀜𑁆𑀘𑀺 𑀏𑀓𑀫𑁆𑀧𑀺 𑀲𑀗𑁆𑀔𑀸𑀭𑀕𑀢𑀁 𑀢𑀡𑁆𑀳𑀸𑀯𑀲𑁂𑀦 𑀦 𑀉𑀧𑀸𑀤𑀺𑀬𑀢𑀺 𑀦 𑀕𑀡𑁆𑀳𑀸𑀢𑀺 𑀦 𑀧𑀭𑀸𑀫𑀲𑀢𑀺. 𑀅𑀦𑀼𑀧𑀸𑀤𑀺𑀬𑀁 𑀦 𑀧𑀭𑀺𑀢𑀲𑁆𑀲𑀢𑀻𑀢𑀺 𑀅𑀕𑁆𑀕𑀡𑁆𑀳𑀦𑁆𑀢𑁄 𑀢𑀡𑁆𑀳𑀸𑀧𑀭𑀺𑀢𑀲𑁆𑀲𑀦𑀸𑀬 𑀦 𑀧𑀭𑀺𑀢𑀲𑁆𑀲𑀢𑀺. 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀲𑀬𑀫𑁂𑀯 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀔𑀻𑀡𑀸 𑀚𑀸𑀢𑀻𑀢𑀺𑀆𑀤𑀺𑀦𑀸 𑀧𑀦𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀸𑀯 𑀤𑀲𑁆𑀲𑀺𑀢𑀸. 𑀇𑀢𑀺 𑀪𑀕𑀯𑀸 𑀲𑀓𑁆𑀓𑀲𑁆𑀲 𑀤𑁂𑀯𑀸𑀦𑀫𑀺𑀦𑁆𑀤𑀲𑁆𑀲 𑀲𑀁𑀔𑀺𑀢𑁆𑀢𑁂𑀦 𑀔𑀻𑀡𑀸𑀲𑀯𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀁 𑀧𑀼𑀘𑁆𑀙𑀺𑀢𑁄 𑀲𑀮𑁆𑀮𑀳𑀼𑀓𑀁 𑀓𑀢𑁆𑀯𑀸 𑀲𑀁𑀔𑀺𑀢𑁆𑀢𑁂𑀦𑁂𑀯 𑀔𑀺𑀧𑁆𑀧𑀁 𑀓𑀣𑁂𑀲𑀺.

𑁩𑁯𑁧. 𑀅𑀯𑀺𑀤𑀽𑀭𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺 𑀅𑀦𑀦𑁆𑀢𑀭𑁂 𑀓𑀽𑀝𑀸𑀕𑀸𑀭𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀅𑀪𑀺𑀲𑀫𑁂𑀘𑁆𑀘𑀸𑀢𑀺 𑀜𑀸𑀡𑁂𑀦 𑀅𑀪𑀺𑀲𑀫𑀸𑀕𑀦𑁆𑀢𑁆𑀯𑀸, 𑀚𑀸𑀦𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑀺𑀁 𑀦𑀼 𑀔𑁄 𑀏𑀲 𑀚𑀸𑀦𑀺𑀢𑁆𑀯𑀸 𑀅𑀦𑀼𑀫𑁄𑀤𑀺, 𑀉𑀤𑀸𑀳𑀼 𑀅𑀚𑀸𑀦𑀺𑀢𑁆𑀯𑀸 𑀯𑀸𑀢𑀺. 𑀓𑀲𑁆𑀫𑀸 𑀧𑀦𑀲𑁆𑀲 𑀏𑀯𑀫𑀳𑁄𑀲𑀻𑀢𑀺? 𑀣𑁂𑀭𑁄 𑀓𑀺𑀭 𑀦 𑀪𑀕𑀯𑀢𑁄 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀲𑀤𑁆𑀤𑀁 𑀅𑀲𑁆𑀲𑁄𑀲𑀺, 𑀲𑀓𑁆𑀓𑀲𑁆𑀲 𑀧𑀦 𑀤𑁂𑀯𑀭𑀜𑁆𑀜𑁄, ‘‘𑀏𑀯𑀫𑁂𑀢𑀁 𑀪𑀕𑀯𑀸 𑀏𑀯𑀫𑁂𑀢𑀁 𑀲𑀼𑀕𑀢𑀸’’𑀢𑀺 𑀅𑀦𑀼𑀫𑁄𑀤𑀦𑀲𑀤𑁆𑀤𑀁 𑀅𑀲𑁆𑀲𑁄𑀲𑀺. 𑀲𑀓𑁆𑀓𑁄 𑀓𑀺𑀭 𑀤𑁂𑀯𑀭𑀸𑀚𑀸 𑀫𑀳𑀢𑀸 𑀲𑀤𑁆𑀤𑁂𑀦 𑀅𑀦𑀼𑀫𑁄𑀤𑀺. 𑀅𑀣 𑀓𑀲𑁆𑀫𑀸 𑀦 𑀪𑀕𑀯𑀢𑁄 𑀲𑀤𑁆𑀤𑀁 𑀅𑀲𑁆𑀲𑁄𑀲𑀻𑀢𑀺? 𑀬𑀣𑀸𑀧𑀭𑀺𑀲𑀯𑀺𑀜𑁆𑀜𑀸𑀧𑀓𑀢𑁆𑀢𑀸. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀥𑀫𑁆𑀫𑀁 𑀓𑀣𑁂𑀦𑁆𑀢𑀸𑀦𑀁 𑀏𑀓𑀸𑀩𑀤𑁆𑀥𑀸𑀬 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀸𑀬𑀧𑀺 𑀧𑀭𑀺𑀲𑀸𑀬 𑀲𑀤𑁆𑀤𑁄 𑀲𑀼𑀬𑁆𑀬𑀢𑀺, 𑀧𑀭𑀺𑀬𑀦𑁆𑀢𑀁 𑀧𑀦 𑀫𑀼𑀜𑁆𑀘𑀺𑀢𑁆𑀯𑀸 𑀅𑀗𑁆𑀕𑀼𑀮𑀺𑀫𑀢𑁆𑀢𑀫𑁆𑀧𑀺 𑀩𑀳𑀺𑀤𑁆𑀥𑀸 𑀦 𑀦𑀺𑀘𑁆𑀙𑀭𑀢𑀺. 𑀓𑀲𑁆𑀫𑀸? 𑀏𑀯𑀭𑀽𑀧𑀸 𑀫𑀥𑀼𑀭𑀓𑀣𑀸 𑀫𑀸 𑀦𑀺𑀭𑀢𑁆𑀣𑀓𑀸 𑀅𑀕𑀫𑀸𑀲𑀻𑀢𑀺. 𑀢𑀤𑀸 𑀪𑀕𑀯𑀸 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂 𑀲𑀢𑁆𑀢𑀭𑀢𑀦𑀫𑀬𑁂 𑀓𑀽𑀝𑀸𑀕𑀸𑀭𑁂 𑀲𑀺𑀭𑀺𑀕𑀩𑁆𑀪𑀫𑁆𑀳𑀺 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀢𑀲𑁆𑀲 𑀤𑀓𑁆𑀔𑀺𑀡𑀧𑀲𑁆𑀲𑁂 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀲𑀦𑀓𑀽𑀝𑀸𑀕𑀸𑀭𑀁, 𑀯𑀸𑀫𑀧𑀲𑁆𑀲𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀲𑁆𑀲, 𑀅𑀦𑁆𑀢𑀭𑁂 𑀙𑀺𑀤𑁆𑀤𑀯𑀺𑀯𑀭𑁄𑀓𑀸𑀲𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀣𑁂𑀭𑁄 𑀦 𑀪𑀕𑀯𑀢𑁄 𑀲𑀤𑁆𑀤𑀁 𑀅𑀲𑁆𑀲𑁄𑀲𑀺, 𑀲𑀓𑁆𑀓𑀲𑁆𑀲𑁂𑀯 𑀅𑀲𑁆𑀲𑁄𑀲𑀻𑀢𑀺.

𑀧𑀜𑁆𑀘𑀳𑀺 𑀢𑀽𑀭𑀺𑀬𑀲𑀢𑁂𑀳𑀻𑀢𑀺 𑀧𑀜𑁆𑀘𑀗𑁆𑀕𑀺𑀓𑀸𑀦𑀁 𑀢𑀽𑀭𑀺𑀬𑀸𑀦𑀁 𑀧𑀜𑁆𑀘𑀳𑀺 𑀲𑀢𑁂𑀳𑀺. 𑀧𑀜𑁆𑀘𑀗𑁆𑀕𑀺𑀓𑀁 𑀢𑀽𑀭𑀺𑀬𑀁 𑀦𑀸𑀫 𑀆𑀢𑀢𑀁 𑀯𑀺𑀢𑀢𑀁 𑀆𑀢𑀢𑀯𑀺𑀢𑀢𑀁 𑀲𑀼𑀲𑀺𑀭𑀁 𑀖𑀦𑀦𑁆𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁. 𑀢𑀢𑁆𑀣 𑀆𑀢𑀢𑀁 𑀦𑀸𑀫 𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑁂𑀲𑀼 𑀪𑁂𑀭𑀺𑀆𑀤𑀻𑀲𑀼 𑀏𑀓𑀢𑀮𑀢𑀽𑀭𑀺𑀬𑀁. 𑀯𑀺𑀢𑀢𑀁 𑀦𑀸𑀫 𑀉𑀪𑀬𑀢𑀮𑀁. 𑀆𑀢𑀢𑀯𑀺𑀢𑀢𑀁 𑀦𑀸𑀫 𑀢𑀦𑁆𑀢𑀺𑀩𑀤𑁆𑀥𑀧𑀡𑀯𑀸𑀤𑀺. 𑀲𑀼𑀲𑀺𑀭𑀁 𑀯𑀁𑀲𑀸𑀤𑀺. 𑀖𑀦𑀁 𑀲𑀫𑁆𑀫𑀸𑀤𑀺. 𑀲𑀫𑀧𑁆𑀧𑀺𑀢𑁄𑀢𑀺 𑀉𑀧𑀕𑀢𑁄. 𑀲𑀫𑀗𑁆𑀕𑀻𑀪𑀽𑀢𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀭𑀺𑀘𑀸𑀭𑁂𑀢𑀻𑀢𑀺 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀢𑀢𑁄 𑀢𑀢𑁄 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘𑀸𑀭𑁂𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀚𑁆𑀚𑀫𑀸𑀦𑁂𑀳𑀺 𑀧𑀜𑁆𑀘𑀳𑀺 𑀢𑀽𑀭𑀺𑀬𑀲𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀢𑀻. 𑀧𑀝𑀺𑀧𑀡𑀸𑀫𑁂𑀢𑁆𑀯𑀸𑀢𑀺 𑀅𑀧𑀦𑁂𑀢𑁆𑀯𑀸, 𑀦𑀺𑀲𑁆𑀲𑀤𑁆𑀤𑀸𑀦𑀺 𑀓𑀸𑀭𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑀣𑁂𑀯 𑀳𑀺 𑀇𑀤𑀸𑀦𑀺 𑀲𑀤𑁆𑀥𑀸 𑀭𑀸𑀚𑀸𑀦𑁄 𑀕𑀭𑀼𑀪𑀸𑀯𑀦𑀺𑀬𑀁 𑀪𑀺𑀓𑁆𑀔𑀼𑀁 𑀤𑀺𑀲𑁆𑀯𑀸 𑁋 ‘‘𑀅𑀲𑀼𑀓𑁄 𑀦𑀸𑀫 𑀅𑀬𑁆𑀬𑁄 𑀆𑀕𑀘𑁆𑀙𑀢𑀺, 𑀫𑀸, 𑀢𑀸𑀢𑀸, 𑀕𑀸𑀬𑀣, 𑀫𑀸 𑀯𑀸𑀤𑁂𑀣, 𑀫𑀸 𑀦𑀘𑁆𑀘𑀣𑀸’’𑀢𑀺 𑀦𑀸𑀝𑀓𑀸𑀦𑀺 𑀧𑀝𑀺𑀯𑀺𑀦𑁂𑀦𑁆𑀢𑀺, 𑀲𑀓𑁆𑀓𑁄𑀧𑀺 𑀣𑁂𑀭𑀁 𑀤𑀺𑀲𑁆𑀯𑀸 𑀏𑀯𑀫𑀓𑀸𑀲𑀺. 𑀘𑀺𑀭𑀲𑁆𑀲𑀁 𑀔𑁄, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀇𑀫𑀁 𑀧𑀭𑀺𑀬𑀸𑀬𑀫𑀓𑀸𑀲𑀻𑀢𑀺 𑀏𑀯𑀭𑀽𑀧𑀁 𑀮𑁄𑀓𑁂 𑀧𑀓𑀢𑀺𑀬𑀸 𑀧𑀺𑀬𑀲𑀫𑀼𑀤𑀸𑀳𑀸𑀭𑀯𑀘𑀦𑀁 𑀳𑁄𑀢𑀺, 𑀮𑁄𑀓𑀺𑀬𑀸 𑀳𑀺 𑀘𑀺𑀭𑀲𑁆𑀲𑀁 𑀆𑀕𑀢𑀫𑁆𑀧𑀺 𑀅𑀦𑀸𑀕𑀢𑀧𑀼𑀩𑁆𑀩𑀫𑁆𑀧𑀺 𑀫𑀦𑀸𑀧𑀚𑀸𑀢𑀺𑀬𑀁 𑀆𑀕𑀢𑀁 𑀤𑀺𑀲𑁆𑀯𑀸, 𑁋 ‘‘𑀓𑀼𑀢𑁄 𑀪𑀯𑀁 𑀆𑀕𑀢𑁄, 𑀘𑀺𑀭𑀲𑁆𑀲𑀁 𑀪𑀯𑀁 𑀆𑀕𑀢𑁄, 𑀓𑀣𑀁 𑀢𑁂 𑀇𑀥𑀸𑀕𑀫𑀦𑀫𑀕𑁆𑀕𑁄 𑀜𑀸𑀢𑁄 𑀫𑀕𑁆𑀕𑀫𑀽𑀴𑁆𑀳𑁄𑀲𑀻’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀺. 𑀅𑀬𑀁 𑀧𑀦 𑀆𑀕𑀢𑀧𑀼𑀩𑁆𑀩𑀢𑁆𑀢𑀸𑀬𑁂𑀯 𑀏𑀯𑀫𑀸𑀳. 𑀣𑁂𑀭𑁄 𑀳𑀺 𑀓𑀸𑀮𑁂𑀦 𑀓𑀸𑀮𑀁 𑀤𑁂𑀯𑀘𑀸𑀭𑀺𑀓𑀁 𑀕𑀘𑁆𑀙𑀢𑀺𑀬𑁂𑀯. 𑀢𑀢𑁆𑀣 𑀧𑀭𑀺𑀬𑀸𑀬𑀫𑀓𑀸𑀲𑀻𑀢𑀺 𑀯𑀸𑀭𑀫𑀓𑀸𑀲𑀺. 𑀬𑀤𑀺𑀤𑀁 𑀇𑀥𑀸𑀕𑀫𑀦𑀸𑀬𑀸𑀢𑀺 𑀬𑁄 𑀅𑀬𑀁 𑀇𑀥𑀸𑀕𑀫𑀦𑀸𑀬 𑀯𑀸𑀭𑁄, 𑀢𑀁, 𑀪𑀦𑁆𑀢𑁂, 𑀘𑀺𑀭𑀲𑁆𑀲𑀫𑀓𑀸𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀤𑀫𑀸𑀲𑀦𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀬𑁄𑀚𑀦𑀺𑀓𑀁 𑀫𑀡𑀺𑀧𑀮𑁆𑀮𑀗𑁆𑀓𑀁 𑀧𑀜𑁆𑀜𑀧𑀸𑀧𑁂𑀢𑁆𑀯𑀸 𑀏𑀯𑀫𑀸𑀳.

𑁩𑁯𑁨. 𑀩𑀳𑀼𑀓𑀺𑀘𑁆𑀘𑀸 𑀩𑀳𑀼𑀓𑀭𑀡𑀻𑀬𑀸𑀢𑀺 𑀏𑀢𑁆𑀣 𑀬𑁂𑀲𑀁 𑀩𑀳𑀽𑀦𑀺 𑀓𑀺𑀘𑁆𑀘𑀸𑀦𑀺, 𑀢𑁂 𑀩𑀳𑀼𑀓𑀺𑀘𑁆𑀘𑀸. 𑀩𑀳𑀼𑀓𑀭𑀡𑀻𑀬𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀧𑁆𑀧𑁂𑀯 𑀲𑀓𑁂𑀦 𑀓𑀭𑀡𑀻𑀬𑁂𑀦𑀸𑀢𑀺 𑀲𑀓𑀭𑀡𑀻𑀬𑀫𑁂𑀯 𑀅𑀧𑁆𑀧𑀁 𑀫𑀦𑁆𑀤𑀁, 𑀦 𑀩𑀳𑀼, 𑀤𑁂𑀯𑀸𑀦𑀁 𑀓𑀭𑀡𑀻𑀬𑀁 𑀧𑀦 𑀩𑀳𑀼, 𑀧𑀣𑀯𑀺𑀢𑁄 𑀧𑀝𑁆𑀞𑀸𑀬 𑀳𑀺 𑀓𑀧𑁆𑀧𑀭𑀼𑀓𑁆𑀔𑀫𑀸𑀢𑀼𑀕𑀸𑀫𑀸𑀤𑀻𑀦𑀁 𑀅𑀢𑁆𑀣𑀸𑀬 𑀅𑀝𑁆𑀝𑀸 𑀲𑀓𑁆𑀓𑀲𑁆𑀲 𑀲𑀦𑁆𑀢𑀺𑀓𑁂 𑀙𑀺𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀦𑀺𑀬𑀫𑁂𑀦𑁆𑀢𑁄 𑀆𑀳 𑁋 𑀅𑀧𑀺𑀘 𑀤𑁂𑀯𑀸𑀦𑀁𑀬𑁂𑀯 𑀢𑀸𑀯𑀢𑀺𑀁𑀲𑀸𑀦𑀁 𑀓𑀭𑀡𑀻𑀬𑁂𑀦𑀸𑀢𑀺. 𑀤𑁂𑀯𑀸𑀦𑀜𑁆𑀳𑀺 𑀥𑀻𑀢𑀸 𑀘 𑀧𑀼𑀢𑁆𑀢𑀸 𑀘 𑀅𑀗𑁆𑀓𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀇𑀢𑁆𑀣𑀺𑀬𑁄 𑀲𑀬𑀦𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀢𑀸𑀲𑀁 𑀫𑀡𑁆𑀟𑀦𑀧𑀲𑀸𑀥𑀦𑀓𑀸𑀭𑀺𑀓𑀸 𑀤𑁂𑀯𑀥𑀻𑀢𑀸 𑀲𑀬𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀸 𑀅𑀦𑁆𑀢𑁄𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀏𑀢𑁂𑀲𑀁 𑀅𑀢𑁆𑀣𑀸𑀬 𑀅𑀝𑁆𑀝𑀓𑀭𑀡𑀁 𑀦𑀢𑁆𑀣𑀺. 𑀬𑁂 𑀧𑀦 𑀲𑀻𑀫𑀦𑁆𑀢𑀭𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀢𑁂 ‘‘𑀫𑀫 𑀲𑀦𑁆𑀢𑀓𑀸 𑀢𑀯 𑀲𑀦𑁆𑀢𑀓𑀸’’𑀢𑀺 𑀦𑀺𑀘𑁆𑀙𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀅𑀝𑁆𑀝𑀁 𑀓𑀭𑁄𑀦𑁆𑀢𑀺, 𑀲𑀓𑁆𑀓𑀁 𑀤𑁂𑀯𑀭𑀸𑀚𑀸𑀦𑀁 𑀧𑀼𑀘𑁆𑀙𑀦𑁆𑀢𑀺, 𑀲𑁄 𑀬𑀲𑁆𑀲 𑀯𑀺𑀫𑀸𑀦𑀁 𑀆𑀲𑀦𑁆𑀦𑀢𑀭𑀁, 𑀢𑀲𑁆𑀲 𑀲𑀦𑁆𑀢𑀓𑁄𑀢𑀺 𑀯𑀤𑀢𑀺. 𑀲𑀘𑁂 𑀤𑁆𑀯𑁂𑀧𑀺 𑀲𑀫𑀝𑁆𑀞𑀸𑀦𑁂 𑀳𑁄𑀦𑁆𑀢𑀺, 𑀬𑀲𑁆𑀲 𑀯𑀺𑀫𑀸𑀦𑀁 𑀑𑀮𑁄𑀓𑁂𑀦𑁆𑀢𑁄 𑀞𑀺𑀢𑁄, 𑀢𑀲𑁆𑀲 𑀲𑀦𑁆𑀢𑀓𑁄𑀢𑀺 𑀯𑀤𑀢𑀺. 𑀲𑀘𑁂 𑀏𑀓𑀫𑁆𑀧𑀺 𑀦 𑀑𑀮𑁄𑀓𑁂𑀢𑀺, 𑀢𑀁 𑀉𑀪𑀺𑀦𑁆𑀦𑀁 𑀓𑀮𑀳𑀼𑀧𑀘𑁆𑀙𑁂𑀤𑀦𑀢𑁆𑀣𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀭𑁄𑀢𑀺. 𑀢𑀁 𑀲𑀦𑁆𑀥𑀸𑀬, ‘‘𑀤𑁂𑀯𑀸𑀦𑀁𑀬𑁂𑀯 𑀢𑀸𑀯𑀢𑀺𑀁𑀲𑀸𑀦𑀁 𑀓𑀭𑀡𑀻𑀬𑁂𑀦𑀸’’𑀢𑀺 𑀆𑀳. 𑀅𑀧𑀺𑀘𑀲𑁆𑀲 𑀏𑀯𑀭𑀽𑀧𑀁 𑀓𑀻𑀴𑀸𑀓𑀺𑀘𑁆𑀘𑀫𑁆𑀧𑀺 𑀓𑀭𑀡𑀻𑀬𑀫𑁂𑀯.

𑀬𑀁 𑀦𑁄 𑀔𑀺𑀧𑁆𑀧𑀫𑁂𑀯 𑀅𑀦𑁆𑀢𑀭𑀥𑀸𑀬𑀢𑀻𑀢𑀺 𑀬𑀁 𑀅𑀫𑁆𑀳𑀸𑀓𑀁 𑀲𑀻𑀖𑀫𑁂𑀯 𑀅𑀦𑁆𑀥𑀓𑀸𑀭𑁂 𑀭𑀽𑀧𑀕𑀢𑀁 𑀯𑀺𑀬 𑀦 𑀤𑀺𑀲𑁆𑀲𑀢𑀺. 𑀇𑀫𑀺𑀦𑀸 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀢𑀁 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀁 𑀦 𑀲𑀮𑁆𑀮𑀓𑁆𑀔𑁂𑀫𑀻’’𑀢𑀺 𑀤𑀻𑀧𑁂𑀢𑀺. 𑀣𑁂𑀭𑁄 𑁋 ‘‘𑀓𑀲𑁆𑀫𑀸 𑀦𑀼 𑀔𑁄 𑀅𑀬𑀁 𑀬𑀓𑁆𑀔𑁄 𑀅𑀲𑀮𑁆𑀮𑀓𑁆𑀔𑀡𑀪𑀸𑀯𑀁 𑀤𑀻𑀧𑁂𑀢𑀺, 𑀧𑀲𑁆𑀲𑁂𑀦 𑀧𑀭𑀺𑀳𑀭𑀢𑀻’’𑀢𑀺 𑀆𑀯𑀚𑁆𑀚𑀦𑁆𑀢𑁄 𑁋 ‘‘𑀤𑁂𑀯𑀸 𑀦𑀸𑀫 𑀫𑀳𑀸𑀫𑀽𑀴𑁆𑀳𑀸 𑀳𑁄𑀦𑁆𑀢𑀺. 𑀙𑀤𑁆𑀯𑀸𑀭𑀺𑀓𑁂𑀳𑀺 𑀆𑀭𑀫𑁆𑀫𑀡𑁂𑀳𑀺 𑀦𑀺𑀫𑁆𑀫𑀣𑀻𑀬𑀫𑀸𑀦𑀸 𑀅𑀢𑁆𑀢𑀦𑁄 𑀪𑀼𑀢𑁆𑀢𑀸𑀪𑀼𑀢𑁆𑀢𑀪𑀸𑀯𑀫𑁆𑀧𑀺 𑀧𑀻𑀢𑀸𑀧𑀻𑀢𑀪𑀸𑀯𑀫𑁆𑀧𑀺 𑀦 𑀚𑀸𑀦𑀦𑁆𑀢𑀺, 𑀇𑀥 𑀓𑀢𑀫𑁂𑀢𑁆𑀣 𑀧𑀫𑀼𑀲𑁆𑀲𑀦𑁆𑀢𑀻’’𑀢𑀺 𑀅𑀜𑁆𑀜𑀸𑀲𑀺. 𑀓𑁂𑀘𑀺 𑀧𑀦𑀸𑀳𑀼 𑁋 ‘‘𑀣𑁂𑀭𑁄 𑀏𑀢𑀲𑁆𑀲 𑀕𑀭𑀼 𑀪𑀸𑀯𑀦𑀺𑀬𑁄, 𑀢𑀲𑁆𑀫𑀸 ‘𑀇𑀤𑀸𑀦𑁂𑀯 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀺𑀓𑁂 𑀧𑀜𑁆𑀳𑀁 𑀉𑀕𑁆𑀕𑀳𑁂𑀢𑁆𑀯𑀸 𑀆𑀕𑀢𑁄, 𑀇𑀤𑀸𑀦𑁂𑀯 𑀦𑀸𑀝𑀓𑀸𑀦𑀁 𑀅𑀦𑁆𑀢𑀭𑀁 𑀧𑀯𑀺𑀝𑁆𑀞𑁄𑀢𑀺 𑀏𑀯𑀁 𑀫𑀁 𑀣𑁂𑀭𑁄 𑀢𑀚𑁆𑀚𑁂𑀬𑁆𑀬𑀸’𑀢𑀺 𑀪𑀬𑁂𑀦 𑀏𑀯𑀫𑀸𑀳𑀸’’𑀢𑀺. 𑀏𑀢𑀁 𑀧𑀦 𑀓𑁄𑀳𑀜𑁆𑀜𑀁 𑀦𑀸𑀫 𑀳𑁄𑀢𑀺, 𑀦 𑀅𑀭𑀺𑀬𑀲𑀸𑀯𑀓𑀲𑁆𑀲 𑀏𑀯𑀭𑀽𑀧𑀁 𑀓𑁄𑀳𑀜𑁆𑀜𑀁 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀫𑀽𑀴𑁆𑀳𑀪𑀸𑀯𑁂𑀦𑁂𑀯 𑀦 𑀲𑀮𑁆𑀮𑀓𑁆𑀔𑁂𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀉𑀧𑀭𑀺 𑀓𑀲𑁆𑀫𑀸 𑀲𑀮𑁆𑀮𑀓𑁆𑀔𑁂𑀲𑀻𑀢𑀺? 𑀣𑁂𑀭𑁄 𑀢𑀲𑁆𑀲 𑀲𑁄𑀫𑀦𑀲𑁆𑀲𑀲𑀁𑀯𑁂𑀕𑀁 𑀚𑀦𑀬𑀺𑀢𑁆𑀯𑀸 𑀢𑀫𑀁 𑀦𑀻𑀳𑀭𑀺, 𑀢𑀲𑁆𑀫𑀸 𑀲𑀮𑁆𑀮𑀓𑁆𑀔𑁂𑀲𑀻𑀢𑀺.

𑀇𑀤𑀸𑀦𑀺 𑀲𑀓𑁆𑀓𑁄 𑀧𑀼𑀩𑁆𑀩𑁂 𑀅𑀢𑁆𑀢𑀦𑁄 𑀏𑀯𑀁 𑀪𑀽𑀢𑀓𑀸𑀭𑀡𑀁 𑀣𑁂𑀭𑀲𑁆𑀲 𑀆𑀭𑁄𑀘𑁂𑀢𑀼𑀁 𑀪𑀽𑀢𑀧𑀼𑀩𑁆𑀩𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀫𑀼𑀧𑀩𑁆𑀬𑀽𑀴𑁆𑀳𑁄𑀢𑀺 𑀲𑀦𑁆𑀦𑀺𑀧𑀢𑀺𑀢𑁄 𑀭𑀸𑀲𑀺𑀪𑀽𑀢𑁄. 𑀅𑀲𑀼𑀭𑀸 𑀧𑀭𑀸𑀚𑀺𑀦𑀺𑀁𑀲𑀽𑀢𑀺 𑀅𑀲𑀼𑀭𑀸 𑀧𑀭𑀸𑀚𑀬𑀁 𑀧𑀸𑀧𑀼𑀡𑀺𑀁𑀲𑀼. 𑀓𑀤𑀸 𑀧𑀦𑁂𑀢𑁂 𑀧𑀭𑀸𑀚𑀺𑀢𑀸𑀢𑀺? 𑀲𑀓𑁆𑀓𑀲𑁆𑀲 𑀦𑀺𑀩𑁆𑀩𑀢𑁆𑀢𑀓𑀸𑀮𑁂. 𑀲𑀓𑁆𑀓𑁄 𑀓𑀺𑀭 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀫𑀕𑀥𑀭𑀝𑁆𑀞𑁂 𑀫𑀘𑀮𑀕𑀸𑀫𑁂 𑀫𑀖𑁄 𑀦𑀸𑀫 𑀫𑀸𑀡𑀯𑁄 𑀅𑀳𑁄𑀲𑀺, 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄, 𑀩𑁄𑀥𑀺𑀲𑀢𑁆𑀢𑀘𑀭𑀺𑀬𑀸 𑀯𑀺𑀬𑀲𑁆𑀲 𑀘𑀭𑀺𑀬𑀸 𑀅𑀳𑁄𑀲𑀺. 𑀲𑁄 𑀢𑁂𑀢𑁆𑀢𑀺𑀁𑀲 𑀧𑀼𑀭𑀺𑀲𑁂 𑀕𑀳𑁂𑀢𑁆𑀯𑀸 𑀓𑀮𑁆𑀬𑀸𑀡𑀫𑀓𑀸𑀲𑀺. 𑀏𑀓𑀤𑀺𑀯𑀲𑀁 𑀅𑀢𑁆𑀢𑀦𑁄𑀯 𑀧𑀜𑁆𑀜𑀸𑀬 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀸𑀫𑀫𑀚𑁆𑀛𑁂 𑀫𑀳𑀸𑀚𑀦𑀲𑁆𑀲 𑀲𑀦𑁆𑀦𑀺𑀧𑀢𑀺𑀢𑀝𑁆𑀞𑀸𑀦𑁂 𑀓𑀘𑀯𑀭𑀁 𑀉𑀪𑀬𑀢𑁄 𑀅𑀧𑀩𑁆𑀩𑀳𑀺𑀢𑁆𑀯𑀸 𑀢𑀁 𑀞𑀸𑀦𑀁 𑀅𑀢𑀺𑀭𑀫𑀡𑀻𑀬𑀫𑀓𑀸𑀲𑀺, 𑀧𑀼𑀦 𑀢𑀢𑁆𑀣𑁂𑀯 𑀫𑀡𑁆𑀟𑀧𑀁 𑀓𑀸𑀭𑁂𑀲𑀺, 𑀧𑀼𑀦 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀲𑀸𑀮𑀁 𑀓𑀸𑀭𑁂𑀲𑀺. 𑀕𑀸𑀫𑀢𑁄 𑀘 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀸𑀯𑀼𑀢𑀫𑁆𑀧𑀺 𑀅𑀟𑁆𑀠𑀬𑁄𑀚𑀦𑀫𑁆𑀧𑀺 𑀢𑀺𑀕𑀸𑀯𑀼𑀢𑀫𑁆𑀧𑀺 𑀬𑁄𑀚𑀦𑀫𑁆𑀧𑀺 𑀯𑀺𑀘𑀭𑀺𑀢𑁆𑀯𑀸 𑀢𑁂𑀳𑀺 𑀲𑀳𑀸𑀬𑁂𑀳𑀺 𑀲𑀤𑁆𑀥𑀺𑀁 𑀯𑀺𑀲𑀫𑀁 𑀲𑀫𑀁 𑀅𑀓𑀸𑀲𑀺. 𑀢𑁂 𑀲𑀩𑁆𑀩𑁂𑀧𑀺 𑀏𑀓𑀘𑁆𑀙𑀦𑁆𑀤𑀸 𑀢𑀢𑁆𑀣 𑀢𑀢𑁆𑀣 𑀲𑁂𑀢𑀼𑀬𑀼𑀢𑁆𑀢𑀝𑁆𑀞𑀸𑀦𑁂𑀲𑀼 𑀲𑁂𑀢𑀼𑀁, 𑀫𑀡𑁆𑀟𑀧𑀲𑀸𑀮𑀸𑀧𑁄𑀓𑁆𑀔𑀭𑀡𑀻𑀫𑀸𑀮𑀸𑀕𑀘𑁆𑀙𑀭𑁄𑀧𑀦𑀸𑀤𑀻𑀦𑀁 𑀬𑀼𑀢𑁆𑀢𑀝𑁆𑀞𑀸𑀦𑁂𑀲𑀼 𑀫𑀡𑁆𑀟𑀧𑀸𑀤𑀻𑀦𑀺 𑀓𑀭𑁄𑀦𑁆𑀢𑀸 𑀩𑀳𑀼𑀁 𑀧𑀼𑀜𑁆𑀜𑀫𑀓𑀁𑀲𑀼. 𑀫𑀖𑁄 𑀲𑀢𑁆𑀢 𑀯𑀢𑀧𑀤𑀸𑀦𑀺 𑀧𑀽𑀭𑁂𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀲𑀤𑁆𑀥𑀺𑀁 𑀲𑀳𑀸𑀬𑁂𑀳𑀺 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺.

𑀢𑀲𑁆𑀫𑀺𑀁 𑀓𑀸𑀮𑁂 𑀅𑀲𑀼𑀭𑀕𑀡𑀸 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑁂 𑀧𑀝𑀺𑀯𑀲𑀦𑁆𑀢𑀺. 𑀲𑀩𑁆𑀩𑁂 𑀢𑁂 𑀤𑁂𑀯𑀸𑀦𑀁 𑀲𑀫𑀸𑀦𑀸𑀬𑀼𑀓𑀸 𑀲𑀫𑀸𑀦𑀯𑀡𑁆𑀡𑀸 𑀘 𑀳𑁄𑀦𑁆𑀢𑀺, 𑀢𑁂 𑀲𑀓𑁆𑀓𑀁 𑀲𑀧𑀭𑀺𑀲𑀁 𑀤𑀺𑀲𑁆𑀯𑀸 𑀅𑀥𑀼𑀦𑀸 𑀦𑀺𑀩𑁆𑀩𑀢𑁆𑀢𑀸 𑀦𑀯𑀓𑀤𑁂𑀯𑀧𑀼𑀢𑁆𑀢𑀸 𑀆𑀕𑀢𑀸𑀢𑀺 𑀫𑀳𑀸𑀧𑀸𑀦𑀁 𑀲𑀚𑁆𑀚𑀬𑀺𑀁𑀲𑀼. 𑀲𑀓𑁆𑀓𑁄 𑀤𑁂𑀯𑀧𑀼𑀢𑁆𑀢𑀸𑀦𑀁 𑀲𑀜𑁆𑀜𑀁 𑀅𑀤𑀸𑀲𑀺 𑁋 ‘‘𑀅𑀫𑁆𑀳𑁂𑀳𑀺 𑀓𑀼𑀲𑀮𑀁 𑀓𑀭𑁄𑀦𑁆𑀢𑁂𑀳𑀺 𑀦 𑀧𑀭𑁂𑀳𑀺 𑀲𑀤𑁆𑀥𑀺𑀁 𑀲𑀸𑀥𑀸𑀭𑀡𑀁 𑀓𑀢𑀁, 𑀢𑀼𑀫𑁆𑀳𑁂 𑀕𑀡𑁆𑀟𑀧𑀸𑀦𑀁 𑀫𑀸 𑀧𑀺𑀯𑀺𑀢𑁆𑀣 𑀧𑀻𑀢𑀫𑀢𑁆𑀢𑀫𑁂𑀯 𑀓𑀭𑁄𑀣𑀸’’𑀢𑀺. 𑀢𑁂 𑀢𑀣𑀸 𑀅𑀓𑀁𑀲𑀼. 𑀩𑀸𑀮𑀅𑀲𑀼𑀭𑀸 𑀕𑀡𑁆𑀟𑀧𑀸𑀦𑀁 𑀧𑀺𑀯𑀺𑀢𑁆𑀯𑀸 𑀫𑀢𑁆𑀢𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺𑀁𑀲𑀼. 𑀲𑀓𑁆𑀓𑁄 𑀤𑁂𑀯𑀸𑀦𑀁 𑀲𑀜𑁆𑀜𑀁 𑀤𑀢𑁆𑀯𑀸 𑀢𑁂 𑀧𑀸𑀤𑁂𑀲𑀼 𑀕𑀸𑀳𑀸𑀧𑁂𑀢𑁆𑀯𑀸 𑀲𑀺𑀦𑁂𑀭𑀼𑀧𑀸𑀤𑁂 𑀔𑀺𑀧𑀸𑀧𑁂𑀲𑀺, 𑀲𑀺𑀦𑁂𑀭𑀼𑀲𑁆𑀲 𑀳𑁂𑀝𑁆𑀞𑀺𑀫𑀢𑀮𑁂 𑀅𑀲𑀼𑀭𑀪𑀯𑀦𑀁 𑀦𑀸𑀫 𑀅𑀢𑁆𑀣𑀺, 𑀢𑀸𑀯𑀢𑀺𑀁𑀲𑀤𑁂𑀯𑀮𑁄𑀓𑀧𑁆𑀧𑀫𑀸𑀡𑀫𑁂𑀯. 𑀢𑀢𑁆𑀣 𑀅𑀲𑀼𑀭𑀸 𑀯𑀲𑀦𑁆𑀢𑀺. 𑀢𑁂𑀲𑀫𑁆𑀧𑀺 𑀘𑀺𑀢𑁆𑀢𑀧𑀸𑀝𑀮𑀺 𑀦𑀸𑀫 𑀭𑀼𑀓𑁆𑀔𑁄 𑀅𑀢𑁆𑀣𑀺. 𑀢𑁂 𑀢𑀲𑁆𑀲 𑀧𑀼𑀧𑁆𑀨𑀦𑀓𑀸𑀮𑁂 𑀚𑀸𑀦𑀦𑁆𑀢𑀺 𑁋 ‘‘𑀦𑀸𑀬𑀁 𑀢𑀸𑀯𑀢𑀺𑀁𑀲𑀸, 𑀲𑀓𑁆𑀓𑁂𑀦 𑀯𑀜𑁆𑀘𑀺𑀢𑀸 𑀫𑀬’’𑀦𑁆𑀢𑀺. 𑀢𑁂 𑀕𑀡𑁆𑀳𑀣 𑀦𑀦𑁆𑀢𑀺 𑀯𑀢𑁆𑀯𑀸 𑀲𑀺𑀦𑁂𑀭𑀼𑀁 𑀧𑀭𑀺𑀳𑀭𑀫𑀸𑀦𑀸 𑀤𑁂𑀯𑁂 𑀯𑀼𑀝𑁆𑀞𑁂 𑀯𑀫𑁆𑀫𑀺𑀓𑀧𑀸𑀤𑀢𑁄 𑀯𑀫𑁆𑀫𑀺𑀓𑀫𑀓𑁆𑀔𑀺𑀓𑀸 𑀯𑀺𑀬 𑀅𑀪𑀺𑀭𑀼𑀳𑀺𑀁𑀲𑀼. 𑀢𑀢𑁆𑀣 𑀓𑀸𑀮𑁂𑀦 𑀤𑁂𑀯𑀸 𑀚𑀺𑀦𑀦𑁆𑀢𑀺, 𑀓𑀸𑀮𑁂𑀦 𑀅𑀲𑀼𑀭𑀸. 𑀬𑀤𑀸 𑀤𑁂𑀯𑀸𑀦𑀁 𑀚𑀬𑁄 𑀳𑁄𑀢𑀺, 𑀅𑀲𑀼𑀭𑁂 𑀬𑀸𑀯 𑀲𑀫𑀼𑀤𑁆𑀤𑀧𑀺𑀝𑁆𑀞𑀸 𑀅𑀦𑀼𑀩𑀦𑁆𑀥𑀦𑁆𑀢𑀺. 𑀬𑀤𑀸 𑀅𑀲𑀼𑀭𑀸𑀦𑀁 𑀚𑀬𑁄 𑀳𑁄𑀢𑀺, 𑀤𑁂𑀯𑁂 𑀬𑀸𑀯 𑀯𑁂𑀤𑀺𑀓𑀧𑀸𑀤𑀸 𑀅𑀦𑀼𑀩𑀦𑁆𑀥𑀦𑁆𑀢𑀺. 𑀢𑀲𑁆𑀫𑀺𑀁 𑀧𑀦 𑀲𑀗𑁆𑀕𑀸𑀫𑁂 𑀤𑁂𑀯𑀸𑀦𑀁 𑀚𑀬𑁄 𑀅𑀳𑁄𑀲𑀺, 𑀤𑁂𑀯𑀸 𑀅𑀲𑀼𑀭𑁂 𑀬𑀸𑀯 𑀲𑀫𑀼𑀤𑁆𑀤𑀧𑀺𑀝𑁆𑀞𑀸 𑀅𑀦𑀼𑀩𑀦𑁆𑀥𑀺𑀁𑀲𑀼. 𑀲𑀓𑁆𑀓𑁄 𑀅𑀲𑀼𑀭𑁂 𑀧𑀮𑀸𑀧𑁂𑀢𑁆𑀯𑀸 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀆𑀭𑀓𑁆𑀔𑀁 𑀞𑀧𑁂𑀲𑀺. 𑀏𑀯𑀁 𑀆𑀭𑀓𑁆𑀔𑀁 𑀤𑀢𑁆𑀯𑀸 𑀯𑁂𑀤𑀺𑀓𑀧𑀸𑀤𑁂 𑀯𑀚𑀺𑀭𑀳𑀢𑁆𑀣𑀸 𑀇𑀦𑁆𑀤𑀧𑀝𑀺𑀫𑀸𑀬𑁄 𑀞𑀧𑁂𑀲𑀺. 𑀅𑀲𑀼𑀭𑀸 𑀓𑀸𑀮𑁂𑀦 𑀓𑀸𑀮𑀁 𑀉𑀝𑁆𑀞𑀳𑀺𑀢𑁆𑀯𑀸 𑀢𑀸 𑀧𑀝𑀺𑀫𑀸𑀬𑁄 𑀤𑀺𑀲𑁆𑀯𑀸, ‘‘𑀲𑀓𑁆𑀓𑁄 𑀅𑀧𑁆𑀧𑀫𑀢𑁆𑀢𑁄 𑀢𑀺𑀝𑁆𑀞𑀢𑀻’’𑀢𑀺 𑀢𑀢𑁄𑀯 𑀦𑀺𑀯𑀢𑁆𑀢𑀦𑁆𑀢𑀺. 𑀢𑀢𑁄 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸𑀢𑀺 𑀯𑀺𑀚𑀺𑀢𑀝𑁆𑀞𑀸𑀦𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸. 𑀧𑀭𑀺𑀘𑀸𑀭𑀺𑀓𑀸𑀬𑁄𑀢𑀺 𑀫𑀸𑀮𑀸𑀕𑀦𑁆𑀥𑀸𑀤𑀺𑀓𑀫𑁆𑀫𑀓𑀸𑀭𑀺𑀓𑀸𑀬𑁄.

𑁩𑁯𑁩. 𑀯𑁂𑀲𑁆𑀲𑀯𑀡𑁄 𑀘 𑀫𑀳𑀸𑀭𑀸𑀚𑀸𑀢𑀺 𑀲𑁄 𑀓𑀺𑀭 𑀲𑀓𑁆𑀓𑀲𑁆𑀲 𑀯𑀮𑁆𑀮𑀪𑁄, 𑀩𑀮𑀯𑀯𑀺𑀲𑁆𑀲𑀸𑀲𑀺𑀓𑁄, 𑀢𑀲𑁆𑀫𑀸 𑀲𑀓𑁆𑀓𑁂𑀦 𑀲𑀤𑁆𑀥𑀺𑀁 𑀅𑀕𑀫𑀸𑀲𑀺. 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀧𑀼𑀭𑀢𑁄 𑀓𑀢𑁆𑀯𑀸. 𑀧𑀯𑀺𑀲𑀺𑀁𑀲𑀽𑀢𑀺 𑀧𑀯𑀺𑀲𑀺𑀢𑁆𑀯𑀸 𑀧𑀦 𑀉𑀧𑀟𑁆𑀠𑀧𑀺𑀳𑀺𑀢𑀸𑀦𑀺 𑀤𑁆𑀯𑀸𑀭𑀸𑀦𑀺 𑀓𑀢𑁆𑀯𑀸 𑀑𑀮𑁄𑀓𑀬𑀫𑀸𑀦𑀸 𑀅𑀝𑁆𑀞𑀁𑀲𑀼. 𑀇𑀤𑀫𑁆𑀧𑀺, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀧𑀲𑁆𑀲 𑀯𑁂𑀚𑀬𑀦𑁆𑀢𑀲𑁆𑀲 𑀧𑀸𑀲𑀸𑀤𑀲𑁆𑀲 𑀭𑀸𑀫𑀡𑁂𑀬𑁆𑀬𑀓𑀦𑁆𑀢𑀺, 𑀫𑀸𑀭𑀺𑀲 𑀫𑁄𑀕𑁆𑀕𑀮𑁆𑀮𑀸𑀦, 𑀇𑀤𑀫𑁆𑀧𑀺 𑀯𑁂𑀚𑀬𑀦𑁆𑀢𑀲𑁆𑀲 𑀧𑀸𑀲𑀸𑀤𑀲𑁆𑀲 𑀭𑀸𑀫𑀡𑁂𑀬𑁆𑀬𑀓𑀁 𑀧𑀲𑁆𑀲, 𑀲𑀼𑀯𑀡𑁆𑀡𑀢𑁆𑀣𑀫𑁆𑀪𑁂 𑀧𑀲𑁆𑀲, 𑀭𑀚𑀢𑀢𑁆𑀣𑀫𑁆𑀪𑁂 𑀫𑀡𑀺𑀢𑁆𑀣𑀫𑁆𑀪𑁂 𑀧𑀯𑀸𑀴𑀢𑁆𑀣𑀫𑁆𑀪𑁂 𑀮𑁄𑀳𑀺𑀢𑀗𑁆𑀕𑀢𑁆𑀣𑀫𑁆𑀪𑁂 𑀫𑀲𑀸𑀭𑀕𑀮𑁆𑀮𑀢𑁆𑀣𑀫𑁆𑀪𑁂 𑀫𑀼𑀢𑁆𑀢𑀢𑁆𑀣𑀫𑁆𑀪𑁂 𑀲𑀢𑁆𑀢𑀭𑀢𑀦𑀢𑁆𑀣𑀫𑁆𑀪𑁂, 𑀢𑁂𑀲𑀁𑀬𑁂𑀯 𑀲𑀼𑀯𑀡𑁆𑀡𑀸𑀤𑀺𑀫𑀬𑁂 𑀖𑀝𑀓𑁂 𑀯𑀸𑀴𑀭𑀽𑀧𑀓𑀸𑀦𑀺 𑀘 𑀧𑀲𑁆𑀲𑀸𑀢𑀺 𑀏𑀯𑀁 𑀣𑀫𑁆𑀪𑀧𑀦𑁆𑀢𑀺𑀬𑁄 𑀆𑀤𑀺𑀁 𑀓𑀢𑁆𑀯𑀸 𑀭𑀸𑀫𑀡𑁂𑀬𑁆𑀬𑀓𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀬𑀣𑀸 𑀢𑀁 𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀲𑁆𑀲𑀸𑀢𑀺 𑀬𑀣𑀸 𑀧𑀼𑀩𑁆𑀩𑁂 𑀓𑀢𑀧𑀼𑀜𑁆𑀜𑀲𑁆𑀲 𑀉𑀧𑀪𑁄𑀕𑀝𑁆𑀞𑀸𑀦𑁂𑀦 𑀲𑁄𑀪𑀺𑀢𑀩𑁆𑀩𑀁, 𑀏𑀯𑀫𑁂𑀯𑀁 𑀲𑁄𑀪𑀢𑀻𑀢𑀺 𑀅𑀢𑁆𑀣𑁄. 𑀅𑀢𑀺𑀩𑀸𑀴𑁆𑀳𑀁 𑀔𑁄 𑀅𑀬𑀁 𑀬𑀓𑁆𑀔𑁄 𑀧𑀫𑀢𑁆𑀢𑁄 𑀯𑀺𑀳𑀭𑀢𑀻𑀢𑀺 𑀅𑀢𑁆𑀢𑀦𑁄 𑀧𑀸𑀲𑀸𑀤𑁂 𑀦𑀸𑀝𑀓𑀧𑀭𑀺𑀯𑀸𑀭𑁂𑀦 𑀲𑀫𑁆𑀧𑀢𑁆𑀢𑀺𑀬𑀸 𑀯𑀲𑁂𑀦 𑀅𑀢𑀺𑀯𑀺𑀬 𑀫𑀢𑁆𑀢𑁄.

𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀸𑀲𑀻𑀢𑀺 𑀇𑀤𑁆𑀥𑀺𑀫𑀓𑀸𑀲𑀺. 𑀆𑀧𑁄𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀸𑀲𑀸𑀤𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑀁 𑀉𑀤𑀓𑀁 𑀳𑁄𑀢𑀽𑀢𑀺 𑀇𑀤𑁆𑀥𑀺𑀁 𑀅𑀥𑀺𑀝𑁆𑀞𑀸𑀬 𑀧𑀸𑀲𑀸𑀤𑀓𑀡𑁆𑀡𑀺𑀓𑁂 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦 𑀧𑀳𑀭𑀺. 𑀲𑁄 𑀧𑀸𑀲𑀸𑀤𑁄 𑀬𑀣𑀸 𑀦𑀸𑀫 𑀉𑀤𑀓𑀧𑀺𑀝𑁆𑀞𑁂 𑀞𑀧𑀺𑀢𑀧𑀢𑁆𑀢𑀁 𑀫𑀼𑀔𑀯𑀝𑁆𑀝𑀺𑀬𑀁 𑀅𑀗𑁆𑀕𑀼𑀮𑀺𑀬𑀸 𑀧𑀳𑀝𑀁 𑀅𑀧𑀭𑀸𑀧𑀭𑀁 𑀓𑀫𑁆𑀧𑀢𑀺 𑀘𑀮𑀢𑀺 𑀦 𑀲𑀦𑁆𑀢𑀺𑀝𑁆𑀞𑀢𑀺. 𑀏𑀯𑀫𑁂𑀯𑀁 𑀲𑀁𑀓𑀫𑁆𑀧𑀺 𑀲𑀫𑁆𑀧𑀓𑀫𑁆𑀧𑀺 𑀲𑀫𑁆𑀧𑀯𑁂𑀥𑀺, 𑀣𑀫𑁆𑀪𑀧𑀺𑀝𑁆𑀞𑀲𑀗𑁆𑀖𑀸𑀝𑀓𑀡𑁆𑀡𑀺𑀓𑀕𑁄𑀧𑀸𑀦𑀲𑀺𑀆𑀤𑀻𑀦𑀺 𑀓𑀭𑀓𑀭𑀸𑀢𑀺 𑀲𑀤𑁆𑀤𑀁 𑀫𑀼𑀜𑁆𑀘𑀦𑁆𑀢𑀸𑀦𑀺 𑀧𑀢𑀺𑀢𑀼𑀁 𑀯𑀺𑀬 𑀆𑀭𑀤𑁆𑀥𑀸𑀦𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀗𑁆𑀓𑀫𑁆𑀧𑁂𑀲𑀺 𑀲𑀫𑁆𑀧𑀓𑀫𑁆𑀧𑁂𑀲𑀺 𑀲𑀫𑁆𑀧𑀯𑁂𑀥𑁂𑀲𑀻’’𑀢𑀺. 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑀸𑀢𑀺 𑀅𑀳𑁄 𑀅𑀘𑁆𑀙𑀭𑀺𑀬𑀁, 𑀅𑀳𑁄 𑀅𑀩𑁆𑀪𑀼𑀢𑀦𑁆𑀢𑀺 𑀏𑀯𑀁 𑀲𑀜𑁆𑀚𑀸𑀢𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀸 𑀘𑁂𑀯 𑀲𑀜𑁆𑀚𑀸𑀢𑀢𑀼𑀝𑁆𑀞𑀺𑀦𑁄 𑀘 𑀅𑀳𑁂𑀲𑀼𑀁 𑀉𑀧𑁆𑀧𑀦𑁆𑀦𑀩𑀮𑀯𑀲𑁄𑀫𑀦𑀲𑁆𑀲𑀸. 𑀲𑀁𑀯𑀺𑀕𑁆𑀕𑀦𑁆𑀢𑀺 𑀉𑀩𑁆𑀩𑀺𑀕𑁆𑀕𑀁. 𑀮𑁄𑀫𑀳𑀝𑁆𑀞𑀚𑀸𑀢𑀦𑁆𑀢𑀺 𑀚𑀸𑀢𑀮𑁄𑀫𑀳𑀁𑀲𑀁, 𑀓𑀜𑁆𑀘𑀦𑀪𑀺𑀢𑁆𑀢𑀺𑀬𑀁 𑀞𑀧𑀺𑀢𑀫𑀡𑀺𑀦𑀸𑀕𑀤𑀦𑁆𑀢𑁂𑀳𑀺 𑀯𑀺𑀬 𑀉𑀤𑁆𑀥𑀕𑁆𑀕𑁂𑀳𑀺 𑀮𑁄𑀫𑁂𑀳𑀺 𑀆𑀓𑀺𑀡𑁆𑀡𑀲𑀭𑀻𑀭𑀦𑁆𑀢𑀺 𑀅𑀢𑁆𑀣𑁄. 𑀮𑁄𑀫𑀳𑀁𑀲𑁄 𑀘 𑀦𑀸𑀫𑁂𑀲 𑀲𑁄𑀫𑀦𑀲𑁆𑀲𑁂𑀦𑀧𑀺 𑀳𑁄𑀢𑀺 𑀤𑁄𑀫𑀦𑀲𑁆𑀲𑁂𑀦𑀧𑀺, 𑀇𑀥 𑀧𑀦 𑀲𑁄𑀫𑀦𑀲𑁆𑀲𑁂𑀦 𑀚𑀸𑀢𑁄. 𑀣𑁂𑀭𑁄 𑀳𑀺 𑀲𑀓𑁆𑀓𑀲𑁆𑀲 𑀲𑁄𑀫𑀦𑀲𑁆𑀲𑀯𑁂𑀕𑁂𑀦 𑀲𑀁𑀯𑁂𑀚𑁂𑀢𑀼𑀁 𑀢𑀁 𑀧𑀸𑀝𑀺𑀳𑀸𑀭𑀺𑀬𑀫𑀓𑀸𑀲𑀺. 𑀢𑀲𑁆𑀫𑀸 𑀲𑁄𑀫𑀦𑀲𑁆𑀲𑀯𑁂𑀕𑁂𑀦 𑀲𑀁𑀯𑀺𑀕𑁆𑀕𑀮𑁄𑀫𑀳𑀝𑁆𑀞𑀁 𑀯𑀺𑀤𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁩𑁯𑁪. 𑀇𑀥𑀸𑀳𑀁, 𑀫𑀸𑀭𑀺𑀲𑀸𑀢𑀺 𑀇𑀤𑀸𑀦𑀺𑀲𑁆𑀲 𑀬𑀲𑁆𑀫𑀸 𑀣𑁂𑀭𑁂𑀦 𑀲𑁄𑀫𑀦𑀲𑁆𑀲𑀲𑀁𑀯𑁂𑀕𑀁 𑀚𑀦𑀬𑀺𑀢𑁆𑀯𑀸 𑀢𑀫𑀁 𑀯𑀺𑀦𑁄𑀤𑀺𑀢𑀁, 𑀢𑀲𑁆𑀫𑀸 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀏𑀯𑀫𑀸𑀳. 𑀏𑀲𑁄 𑀦𑀼 𑀢𑁂, 𑀫𑀸𑀭𑀺𑀲, 𑀲𑁄 𑀪𑀕𑀯𑀸 𑀲𑀢𑁆𑀣𑀸𑀢𑀺, 𑀫𑀸𑀭𑀺𑀲, 𑀢𑁆𑀯𑀁 𑀓𑀼𑀳𑀺𑀁 𑀕𑀢𑁄𑀲𑀻𑀢𑀺 𑀯𑀼𑀢𑁆𑀢𑁂 𑀫𑀬𑁆𑀳𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀦𑁆𑀢𑀺 𑀯𑀤𑁂𑀲𑀺, 𑀇𑀫𑀲𑁆𑀫𑀺𑀁 𑀤𑁂𑀯𑀮𑁄𑀓𑁂 𑀏𑀓𑀧𑀸𑀤𑀓𑁂𑀦 𑀯𑀺𑀬 𑀢𑀺𑀝𑁆𑀞𑀲𑀺, 𑀬𑀁 𑀢𑁆𑀯𑀁 𑀏𑀯𑀁 𑀯𑀤𑁂𑀲𑀺, 𑀏𑀲𑁄 𑀦𑀼 𑀢𑁂, 𑀫𑀸𑀭𑀺𑀲, 𑀲𑁄 𑀪𑀕𑀯𑀸 𑀲𑀢𑁆𑀣𑀸𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀲𑀩𑁆𑀭𑀳𑁆𑀫𑀘𑀸𑀭𑀻 𑀫𑁂 𑀏𑀲𑁄𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀣𑁂𑀭𑁄 𑀅𑀦𑀕𑀸𑀭𑀺𑀬𑁄 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑁄 𑀅𑀕𑁆𑀕𑀲𑀸𑀯𑀓𑁄, 𑀲𑀓𑁆𑀓𑁄 𑀅𑀕𑀸𑀭𑀺𑀬𑁄, 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀯𑀲𑁂𑀦 𑀧𑀦𑁂𑀢𑁂 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀅𑀳𑁄 𑀦𑀽𑀦 𑀢𑁂 𑀲𑁄 𑀪𑀕𑀯𑀸 𑀲𑀢𑁆𑀣𑀸𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻 𑀢𑀸𑀯 𑀢𑁂 𑀏𑀯𑀁𑀫𑀳𑀺𑀤𑁆𑀥𑀺𑀓𑁄, 𑀲𑁄 𑀧𑀦 𑀢𑁂 𑀪𑀕𑀯𑀸 𑀲𑀢𑁆𑀣𑀸 𑀅𑀳𑁄 𑀦𑀽𑀦 𑀫𑀳𑀺𑀤𑁆𑀥𑀺𑀓𑁄𑀢𑀺 𑀲𑀢𑁆𑀣𑀼 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀤𑀲𑁆𑀲𑀦𑁂 𑀚𑀸𑀢𑀸𑀪𑀺𑀮𑀸𑀧𑀸 𑀳𑀼𑀢𑁆𑀯𑀸 𑀏𑀯𑀫𑀸𑀳𑀁𑀲𑀼.

𑁩𑁯𑁫. 𑀜𑀸𑀢𑀜𑁆𑀜𑀢𑀭𑀲𑁆𑀲𑀸𑀢𑀺 𑀧𑀜𑁆𑀜𑀸𑀢𑀜𑁆𑀜𑀢𑀭𑀲𑁆𑀲, 𑀲𑀓𑁆𑀓𑁄 𑀳𑀺 𑀧𑀜𑁆𑀜𑀸𑀢𑀸𑀦𑀁 𑀅𑀜𑁆𑀜𑀢𑀭𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯, 𑀤𑁂𑀲𑀦𑀁 𑀧𑀦 𑀪𑀕𑀯𑀸 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀦𑀺𑀝𑁆𑀞𑀸𑀧𑁂𑀲𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀘𑀽𑀴𑀢𑀡𑁆𑀳𑀸𑀲𑀗𑁆𑀔𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀫𑀳𑀸𑀢𑀡𑁆𑀳𑀸𑀲𑀗𑁆𑀔𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯𑁬. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀢𑀡𑁆𑀳𑀸𑀲𑀗𑁆𑀔𑀬𑀲𑀼𑀢𑁆𑀢𑀁. 𑀢𑀢𑁆𑀣 𑀤𑀺𑀝𑁆𑀞𑀺𑀕𑀢𑀦𑁆𑀢𑀺 𑀅𑀮𑀕𑀤𑁆𑀤𑀽𑀧𑀫𑀲𑀼𑀢𑁆𑀢𑁂 𑀮𑀤𑁆𑀥𑀺𑀫𑀢𑁆𑀢𑀁 𑀤𑀺𑀝𑁆𑀞𑀺𑀕𑀢𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀥 𑀲𑀲𑁆𑀲𑀢𑀤𑀺𑀝𑁆𑀞𑀺. 𑀲𑁄 𑀘 𑀪𑀺𑀓𑁆𑀔𑀼 𑀩𑀳𑀼𑀲𑁆𑀲𑀼𑀢𑁄, 𑀅𑀬𑀁 𑀅𑀧𑁆𑀧𑀲𑁆𑀲𑀼𑀢𑁄, 𑀚𑀸𑀢𑀓𑀪𑀸𑀡𑀓𑁄 𑀪𑀕𑀯𑀦𑁆𑀢𑀁 𑀚𑀸𑀢𑀓𑀁 𑀓𑀣𑁂𑀢𑁆𑀯𑀸, ‘‘𑀅𑀳𑀁, 𑀪𑀺𑀓𑁆𑀔𑀯𑁂, 𑀢𑁂𑀦 𑀲𑀫𑀬𑁂𑀦 𑀯𑁂𑀲𑁆𑀲𑀦𑁆𑀢𑀭𑁄 𑀅𑀳𑁄𑀲𑀺𑀁, 𑀫𑀳𑁄𑀲𑀥𑁄, 𑀯𑀺𑀥𑀼𑀭𑀧𑀡𑁆𑀟𑀺𑀢𑁄, 𑀲𑁂𑀦𑀓𑀧𑀡𑁆𑀟𑀺𑀢𑁄, 𑀫𑀳𑀸𑀚𑀦𑀓𑁄 𑀭𑀸𑀚𑀸 𑀅𑀳𑁄𑀲𑀺’’𑀦𑁆𑀢𑀺 𑀲𑀫𑁄𑀥𑀸𑀦𑁂𑀦𑁆𑀢𑀁 𑀲𑀼𑀡𑀸𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑁂 𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀯𑀺𑀜𑁆𑀜𑀸𑀡𑀁 𑀧𑀦 𑀇𑀥𑀮𑁄𑀓𑀢𑁄 𑀧𑀭𑀮𑁄𑀓𑀁, 𑀧𑀭𑀮𑁄𑀓𑀢𑁄 𑀇𑀫𑀁 𑀮𑁄𑀓𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀻’’𑀢𑀺 𑀲𑀲𑁆𑀲𑀢𑀤𑀲𑁆𑀲𑀦𑀁 𑀉𑀧𑁆𑀧𑀦𑁆𑀦𑀁. 𑀢𑁂𑀦𑀸𑀳 𑁋 ‘‘𑀢𑀤𑁂𑀯𑀺𑀤𑀁 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀯𑀢𑀺 𑀲𑀁𑀲𑀭𑀢𑀺 𑀅𑀦𑀜𑁆𑀜’’𑀦𑁆𑀢𑀺.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀧𑀦, ‘‘𑀯𑀺𑀜𑁆𑀜𑀸𑀡𑀁 𑀧𑀘𑁆𑀘𑀬𑀲𑀫𑁆𑀪𑀯𑀁, 𑀲𑀢𑀺 𑀧𑀘𑁆𑀘𑀬𑁂 𑀉𑀧𑁆𑀧𑀚𑁆𑀚𑀢𑀺, 𑀯𑀺𑀦𑀸 𑀧𑀘𑁆𑀘𑀬𑀁 𑀦𑀢𑁆𑀣𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀫𑁆𑀪𑀯𑁄’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀅𑀬𑀁 𑀪𑀺𑀓𑁆𑀔𑀼 𑀩𑀼𑀤𑁆𑀥𑁂𑀦 𑀅𑀓𑀣𑀺𑀢𑀁 𑀓𑀣𑁂𑀢𑀺, 𑀚𑀺𑀦𑀘𑀓𑁆𑀓𑁂 𑀧𑀳𑀸𑀭𑀁 𑀤𑁂𑀢𑀺, 𑀯𑁂𑀲𑀸𑀭𑀚𑁆𑀚𑀜𑀸𑀡𑀁 𑀧𑀝𑀺𑀩𑀸𑀳𑀢𑀺, 𑀲𑁄𑀢𑀼𑀓𑀸𑀫𑀁 𑀚𑀦𑀁 𑀯𑀺𑀲𑀁𑀯𑀸𑀤𑁂𑀢𑀺, 𑀅𑀭𑀺𑀬𑀧𑀣𑁂 𑀢𑀺𑀭𑀺𑀬𑀁 𑀦𑀺𑀧𑀢𑀺𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀧𑀝𑀺𑀧𑀦𑁆𑀦𑁄. 𑀬𑀣𑀸 𑀦𑀸𑀫 𑀭𑀜𑁆𑀜𑁄 𑀭𑀚𑁆𑀚𑁂 𑀫𑀳𑀸𑀘𑁄𑀭𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀫𑀳𑀸𑀚𑀦𑀲𑁆𑀲 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀚𑀺𑀦𑀲𑀸𑀲𑀦𑁂 𑀘𑁄𑀭𑁄 𑀳𑀼𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀉𑀧𑁆𑀧𑀦𑁆𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽𑀢𑀺 𑀚𑀦𑀧𑀤𑀯𑀸𑀲𑀺𑀦𑁄 𑀧𑀺𑀡𑁆𑀟𑀧𑀸𑀢𑀺𑀓𑀪𑀺𑀓𑁆𑀔𑀽. 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀽𑀢𑀺 𑀅𑀬𑀁 𑀧𑀭𑀺𑀲𑀁 𑀮𑀪𑀺𑀢𑁆𑀯𑀸 𑀲𑀸𑀲𑀦𑀫𑁆𑀧𑀺 𑀅𑀦𑁆𑀢𑀭𑀥𑀸𑀧𑁂𑀬𑁆𑀬, 𑀬𑀸𑀯 𑀧𑀓𑁆𑀔𑀁 𑀦 𑀮𑀪𑀢𑀺, 𑀢𑀸𑀯𑀤𑁂𑀯 𑀦𑀁 𑀤𑀺𑀝𑁆𑀞𑀺𑀕𑀢𑀸 𑀯𑀺𑀯𑁂𑀘𑁂𑀫𑀸𑀢𑀺 𑀲𑀼𑀢𑀲𑀼𑀢𑀝𑁆𑀞𑀸𑀦𑀢𑁄𑀬𑁂𑀯 𑀅𑀝𑁆𑀞𑀢𑁆𑀯𑀸 𑀅𑀦𑀺𑀲𑀻𑀤𑀺𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀁𑀲𑀼.

𑁩𑁯𑁮. 𑀓𑀢𑀫𑀁 𑀢𑀁 𑀲𑀸𑀢𑀺 𑀯𑀺𑀜𑁆𑀜𑀸𑀡𑀦𑁆𑀢𑀺 𑀲𑀸𑀢𑀺 𑀬𑀁 𑀢𑁆𑀯𑀁 𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀬 𑀯𑀤𑁂𑀲𑀺, 𑀓𑀢𑀫𑀁 𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺? 𑀬𑁆𑀯𑀸𑀬𑀁, 𑀪𑀦𑁆𑀢𑁂, 𑀯𑀤𑁄 𑀯𑁂𑀤𑁂𑀬𑁆𑀬𑁄 𑀢𑀢𑁆𑀭 𑀢𑀢𑁆𑀭 𑀓𑀮𑁆𑀬𑀸𑀡𑀧𑀸𑀧𑀓𑀸𑀦𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺, 𑀪𑀦𑁆𑀢𑁂, 𑀬𑁄 𑀅𑀬𑀁 𑀯𑀤𑀢𑀺 𑀯𑁂𑀤𑀬𑀢𑀺, 𑀬𑁄 𑀘𑀸𑀬𑀁 𑀢𑀳𑀺𑀁 𑀢𑀳𑀺𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑀁 𑀧𑀘𑁆𑀘𑀦𑀼𑀪𑁄𑀢𑀺. 𑀇𑀤𑀁, 𑀪𑀦𑁆𑀢𑁂, 𑀯𑀺𑀜𑁆𑀜𑀸𑀡𑀁, 𑀬𑀫𑀳𑀁 𑀲𑀦𑁆𑀥𑀸𑀬 𑀯𑀤𑁂𑀫𑀻𑀢𑀺. 𑀓𑀲𑁆𑀲 𑀦𑀼 𑀔𑁄 𑀦𑀸𑀫𑀸𑀢𑀺 𑀓𑀲𑁆𑀲 𑀔𑀢𑁆𑀢𑀺𑀬𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀯𑁂𑀲𑁆𑀲𑀲𑀼𑀤𑁆𑀤𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀯𑀸 𑀅𑀜𑁆𑀜𑀢𑀭𑀲𑁆𑀲.

𑁩𑁯𑁯. 𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺 𑀓𑀲𑁆𑀫𑀸 𑀆𑀫𑀦𑁆𑀢𑁂𑀲𑀺? 𑀲𑀸𑀢𑀺𑀲𑁆𑀲 𑀓𑀺𑀭 𑀏𑀯𑀁 𑀅𑀳𑁄𑀲𑀺 𑁋 ‘‘𑀲𑀢𑁆𑀣𑀸 𑀫𑀁 ‘𑀫𑁄𑀖𑀧𑀼𑀭𑀺𑀲𑁄’𑀢𑀺 𑀯𑀤𑀢𑀺, 𑀦 𑀘 𑀫𑁄𑀖𑀧𑀼𑀭𑀺𑀲𑁄𑀢𑀺 𑀯𑀼𑀢𑁆𑀢𑀫𑀢𑁆𑀢𑁂𑀦𑁂𑀯 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀦 𑀳𑁄𑀢𑀺. 𑀉𑀧𑀲𑁂𑀦𑀫𑁆𑀧𑀺 𑀳𑀺 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑀁, ‘𑀅𑀢𑀺𑀮𑀳𑀼𑀁 𑀔𑁄 𑀢𑁆𑀯𑀁 𑀫𑁄𑀖𑀧𑀼𑀭𑀺𑀲 𑀩𑀸𑀳𑀼𑀮𑁆𑀮𑀸𑀬 𑀆𑀯𑀢𑁆𑀢𑁄’𑀢𑀺 (𑀫𑀳𑀸𑀯. 𑁭𑁫) 𑀪𑀕𑀯𑀸 𑀫𑁄𑀖𑀧𑀼𑀭𑀺𑀲𑀯𑀸𑀤𑁂𑀦 𑀑𑀯𑀤𑀺. 𑀣𑁂𑀭𑁄 𑀅𑀧𑀭𑀪𑀸𑀕𑁂 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀙 𑀅𑀪𑀺𑀜𑁆𑀜𑀸 𑀲𑀘𑁆𑀙𑀸𑀓𑀸𑀲𑀺. 𑀅𑀳𑀫𑁆𑀧𑀺 𑀢𑀣𑀸𑀭𑀽𑀧𑀁 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀺𑀢𑁆𑀯𑀸 𑀫𑀕𑁆𑀕𑀨𑀮𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀙𑀺𑀦𑁆𑀦𑀧𑀘𑁆𑀘𑀬𑁄 𑀅𑀬𑀁 𑀲𑀸𑀲𑀦𑁂 𑀅𑀯𑀺𑀭𑀼𑀴𑁆𑀳𑀥𑀫𑁆𑀫𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺. 𑀉𑀲𑁆𑀫𑀻𑀓𑀢𑁄𑀢𑀺𑀆𑀤𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸𑀥𑀺𑀧𑁆𑀧𑀸𑀬𑀫𑁂𑀯. 𑀅𑀣 𑀔𑁄 𑀪𑀕𑀯𑀸𑀢𑀺 𑀅𑀬𑀫𑁆𑀧𑀺 𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀺. 𑀲𑀸𑀢𑀺𑀲𑁆𑀲 𑀓𑀺𑀭 𑀏𑀢𑀤𑀳𑁄𑀲𑀺 𑁋 ‘‘𑀪𑀕𑀯𑀸 𑀫𑀬𑁆𑀳𑀁 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀦𑀢𑁆𑀣𑀻𑀢𑀺 𑀯𑀤𑀢𑀺, 𑀓𑀺𑀁 𑀲𑀓𑁆𑀓𑀸 𑀉𑀧𑀦𑀺𑀲𑁆𑀲𑀬𑁂 𑀅𑀲𑀢𑀺 𑀓𑀸𑀢𑀼𑀁? 𑀦 𑀳𑀺 𑀢𑀣𑀸𑀕𑀢𑀸 𑀲𑀉𑀧𑀦𑀺𑀲𑁆𑀲𑀬𑀲𑁆𑀲𑁂𑀯 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀬𑀲𑁆𑀲 𑀓𑀲𑁆𑀲𑀘𑀺 𑀤𑁂𑀲𑁂𑀦𑁆𑀢𑀺𑀬𑁂𑀯. 𑀅𑀳𑀁 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑀸 𑀲𑀼𑀕𑀢𑁄𑀯𑀸𑀤𑀁 𑀮𑀪𑀺𑀢𑁆𑀯𑀸 𑀲𑀕𑁆𑀕𑀲𑀫𑁆𑀧𑀢𑁆𑀢𑀽𑀧𑀕𑀁 𑀓𑀼𑀲𑀮𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀅𑀣𑀲𑁆𑀲 𑀪𑀕𑀯𑀸, ‘‘𑀦𑀸𑀳𑀁, 𑀫𑁄𑀖𑀧𑀼𑀭𑀺𑀲, 𑀢𑀼𑀬𑁆𑀳𑀁 𑀑𑀯𑀸𑀤𑀁 𑀯𑀸 𑀅𑀦𑀼𑀲𑀸𑀲𑀦𑀺𑀁 𑀯𑀸 𑀤𑁂𑀫𑀻’’𑀢𑀺 𑀲𑀼𑀕𑀢𑁄𑀯𑀸𑀤𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀦𑁆𑀢𑁄 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀲𑁆𑀲𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀸𑀦𑀺 𑀧𑀭𑀺𑀲𑀸𑀬 𑀮𑀤𑁆𑀥𑀺𑀁 𑀲𑁄𑀥𑁂𑀦𑁆𑀢𑁄, ‘‘𑀇𑀥𑀸𑀳𑀁 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀩𑁆𑀩𑀫𑁆𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁪𑁦𑁦. 𑀇𑀤𑀸𑀦𑀺 𑀯𑀺𑀜𑁆𑀜𑀸𑀡𑀲𑁆𑀲 𑀲𑀧𑁆𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀬𑀁 𑀬𑀤𑁂𑀯, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀦𑀜𑁆𑀘 𑀧𑀝𑀺𑀘𑁆𑀘 𑀥𑀫𑁆𑀫𑁂 𑀘𑀸𑀢𑀺 𑀲𑀳𑀸𑀯𑀚𑁆𑀚𑀦𑁂𑀦 𑀪𑀯𑀗𑁆𑀕𑀫𑀦𑀜𑁆𑀘 𑀢𑁂𑀪𑀽𑀫𑀓𑀥𑀫𑁆𑀫𑁂 𑀘 𑀧𑀝𑀺𑀘𑁆𑀘. 𑀓𑀝𑁆𑀞𑀜𑁆𑀘 𑀧𑀝𑀺𑀘𑁆𑀘𑀸𑀢𑀺𑀆𑀤𑀺 𑀑𑀧𑀫𑁆𑀫𑀦𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑁂𑀦 𑀓𑀺𑀁 𑀤𑀻𑀧𑁂𑀢𑀺? 𑀤𑁆𑀯𑀸𑀭𑀲𑀗𑁆𑀓𑀦𑁆𑀢𑀺𑀬𑀸 𑀅𑀪𑀸𑀯𑀁. 𑀬𑀣𑀸 𑀳𑀺 𑀓𑀝𑁆𑀞𑀁 𑀧𑀝𑀺𑀘𑁆𑀘 𑀚𑀮𑀫𑀸𑀦𑁄 𑀅𑀕𑁆𑀕𑀺 𑀉𑀧𑀸𑀤𑀸𑀦𑀧𑀘𑁆𑀘𑀬𑁂 𑀲𑀢𑀺𑀬𑁂𑀯 𑀚𑀮𑀢𑀺, 𑀢𑀲𑁆𑀫𑀺𑀁 𑀅𑀲𑀢𑀺 𑀧𑀘𑁆𑀘𑀬𑀯𑁂𑀓𑀮𑁆𑀮𑁂𑀦 𑀢𑀢𑁆𑀣𑁂𑀯 𑀯𑀽𑀧𑀲𑀫𑁆𑀫𑀢𑀺, 𑀦 𑀲𑀓𑀮𑀺𑀓𑀸𑀤𑀻𑀦𑀺 𑀲𑀗𑁆𑀓𑀫𑀺𑀢𑁆𑀯𑀸 𑀲𑀓𑀮𑀺𑀓𑀕𑁆𑀕𑀻𑀢𑀺𑀆𑀤𑀺𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀏𑀯𑀫𑁂𑀯 𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀦𑁆𑀦𑀁 𑀯𑀺𑀜𑁆𑀜𑀸𑀡𑀁 𑀢𑀲𑁆𑀫𑀺𑀁 𑀤𑁆𑀯𑀸𑀭𑁂 𑀘𑀓𑁆𑀔𑀼𑀭𑀽𑀧𑀆𑀮𑁄𑀓𑀫𑀦𑀲𑀺𑀓𑀸𑀭𑀲𑀗𑁆𑀔𑀸𑀢𑁂 𑀧𑀘𑁆𑀘𑀬𑀫𑁆𑀳𑀺 𑀲𑀢𑀺𑀬𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀺𑀁 𑀅𑀲𑀢𑀺 𑀧𑀘𑁆𑀘𑀬𑀯𑁂𑀓𑀮𑁆𑀮𑁂𑀦 𑀢𑀢𑁆𑀣𑁂𑀯 𑀦𑀺𑀭𑀼𑀚𑁆𑀛𑀢𑀺, 𑀦 𑀲𑁄𑀢𑀸𑀤𑀻𑀦𑀺 𑀲𑀗𑁆𑀓𑀫𑀺𑀢𑁆𑀯𑀸 𑀲𑁄𑀢𑀯𑀺𑀜𑁆𑀜𑀸𑀡𑀦𑁆𑀢𑀺𑀆𑀤𑀺𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀯𑀸𑀭𑁂𑀲𑀼. 𑀇𑀢𑀺 𑀪𑀕𑀯𑀸 𑀦𑀸𑀳𑀁 𑀯𑀺𑀜𑁆𑀜𑀸𑀡𑀧𑁆𑀧𑀯𑀢𑁆𑀢𑁂 𑀤𑁆𑀯𑀸𑀭𑀲𑀗𑁆𑀓𑀦𑁆𑀢𑀺𑀫𑀢𑁆𑀢𑀫𑁆𑀧𑀺 𑀯𑀤𑀸𑀫𑀺, 𑀅𑀬𑀁 𑀧𑀦 𑀲𑀸𑀢𑀺 𑀫𑁄𑀖𑀧𑀼𑀭𑀺𑀲𑁄 𑀪𑀯𑀲𑀗𑁆𑀓𑀦𑁆𑀢𑀺𑀁 𑀯𑀤𑀢𑀻𑀢𑀺 𑀲𑀸𑀢𑀺𑀁 𑀦𑀺𑀕𑁆𑀕𑀳𑁂𑀲𑀺.

𑁪𑁦𑁧. 𑀏𑀯𑀁 𑀯𑀺𑀜𑁆𑀜𑀸𑀡𑀲𑁆𑀲 𑀲𑀧𑁆𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀦 𑀧𑀜𑁆𑀘𑀦𑁆𑀦𑀫𑁆𑀧𑀺 𑀔𑀦𑁆𑀥𑀸𑀦𑀁 𑀲𑀧𑁆𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄, 𑀪𑀽𑀢𑀫𑀺𑀤𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀽𑀢𑀫𑀺𑀤𑀦𑁆𑀢𑀺 𑀇𑀤𑀁 𑀔𑀦𑁆𑀥𑀧𑀜𑁆𑀘𑀓𑀁 𑀚𑀸𑀢𑀁 𑀪𑀽𑀢𑀁 𑀦𑀺𑀩𑁆𑀩𑀢𑁆𑀢𑀁, 𑀢𑀼𑀫𑁆𑀳𑁂𑀧𑀺 𑀢𑀁 𑀪𑀽𑀢𑀫𑀺𑀤𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀧𑀲𑁆𑀲𑀣𑀸𑀢𑀺. 𑀢𑀤𑀸𑀳𑀸𑀭𑀲𑀫𑁆𑀪𑀯𑀦𑁆𑀢𑀺 𑀢𑀁 𑀧𑀦𑁂𑀢𑀁 𑀔𑀦𑁆𑀥𑀧𑀜𑁆𑀘𑀓𑀁 𑀆𑀳𑀸𑀭𑀲𑀫𑁆𑀪𑀯𑀁 𑀧𑀘𑁆𑀘𑀬𑀲𑀫𑁆𑀪𑀯𑀁, 𑀲𑀢𑀺 𑀧𑀘𑁆𑀘𑀬𑁂 𑀉𑀧𑁆𑀧𑀚𑁆𑀚𑀢𑀺 𑀏𑀯𑀁 𑀧𑀲𑁆𑀲𑀣𑀸𑀢𑀺 𑀧𑀼𑀘𑁆𑀙𑀢𑀺. 𑀢𑀤𑀸𑀳𑀸𑀭𑀦𑀺𑀭𑁄𑀥𑀸𑀢𑀺 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀦𑀺𑀭𑁄𑀥𑀸. 𑀪𑀽𑀢𑀫𑀺𑀤𑀁 𑀦𑁄𑀲𑁆𑀲𑀽𑀢𑀺 𑀪𑀽𑀢𑀁 𑀦𑀼 𑀔𑁄 𑀇𑀤𑀁, 𑀦 𑀦𑀼 𑀔𑁄 𑀪𑀽𑀢𑀦𑁆𑀢𑀺. 𑀢𑀤𑀸𑀳𑀸𑀭𑀲𑀫𑁆𑀪𑀯𑀁 𑀦𑁄𑀲𑁆𑀲𑀽𑀢𑀺 𑀢𑀁 𑀪𑀽𑀢𑀁 𑀔𑀦𑁆𑀥𑀧𑀜𑁆𑀘𑀓𑀁 𑀧𑀘𑁆𑀘𑀬𑀲𑀫𑁆𑀪𑀯𑀁 𑀦𑀼 𑀔𑁄, 𑀦 𑀦𑀼 𑀔𑁄𑀢𑀺. 𑀢𑀤𑀸𑀳𑀸𑀭𑀦𑀺𑀭𑁄𑀥𑀸𑀢𑀺 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀦𑀺𑀭𑁄𑀥𑀸. 𑀦𑀺𑀭𑁄𑀥𑀥𑀫𑁆𑀫𑀁 𑀦𑁄𑀲𑁆𑀲𑀽𑀢𑀺 𑀢𑀁 𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫𑀁 𑀦𑀼 𑀔𑁄, 𑀦 𑀦𑀼 𑀔𑁄𑀢𑀺. 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄𑀢𑀺 𑀇𑀤𑀁 𑀔𑀦𑁆𑀥𑀧𑀜𑁆𑀘𑀓𑀁 𑀚𑀸𑀢𑀁 𑀪𑀽𑀢𑀁 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀢𑁄 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀲𑀫𑁆𑀫𑀸 𑀧𑀲𑁆𑀲𑀦𑁆𑀢𑀲𑁆𑀲. 𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀦𑁆𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀲𑀼𑀝𑁆𑀞𑀼 𑀤𑀺𑀝𑁆𑀞𑀁. 𑀏𑀯𑀁 𑀬𑁂 𑀬𑁂 𑀢𑀁 𑀧𑀼𑀘𑁆𑀙𑀁 𑀲𑀮𑁆𑀮𑀓𑁆𑀔𑁂𑀲𑀼𑀁, 𑀢𑁂𑀲𑀁 𑀢𑁂𑀲𑀁 𑀧𑀝𑀺𑀜𑁆𑀜𑀁 𑀕𑀡𑁆𑀳𑀦𑁆𑀢𑁄 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀲𑀧𑁆𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 𑀬𑀸𑀬 𑀧𑀜𑁆𑀜𑀸𑀬 𑀢𑁂𑀳𑀺 𑀢𑀁 𑀲𑀧𑁆𑀧𑀘𑁆𑀘𑀬𑀁 𑀲𑀦𑀺𑀭𑁄𑀥𑀁 𑀔𑀦𑁆𑀥𑀧𑀜𑁆𑀘𑀓𑀁 𑀲𑀼𑀤𑀺𑀝𑁆𑀞𑀁, 𑀢𑀢𑁆𑀣 𑀦𑀺𑀢𑁆𑀢𑀡𑁆𑀳𑀪𑀸𑀯𑀁 𑀧𑀼𑀘𑁆𑀙𑀦𑁆𑀢𑁄 𑀇𑀫𑀁 𑀘𑁂 𑀢𑀼𑀫𑁆𑀳𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀺𑀝𑁆𑀞𑀺𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺𑀁. 𑀲𑀪𑀸𑀯𑀤𑀲𑁆𑀲𑀦𑁂𑀦 𑀧𑀭𑀺𑀲𑀼𑀤𑁆𑀥𑀁. 𑀧𑀘𑁆𑀘𑀬𑀤𑀲𑁆𑀲𑀦𑁂𑀦 𑀧𑀭𑀺𑀬𑁄𑀤𑀸𑀢𑀁. 𑀅𑀮𑁆𑀮𑀻𑀬𑁂𑀣𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀅𑀮𑁆𑀮𑀻𑀬𑀺𑀢𑁆𑀯𑀸 𑀯𑀺𑀳𑀭𑁂𑀬𑁆𑀬𑀸𑀣. 𑀓𑁂𑀮𑀸𑀬𑁂𑀣𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀓𑀻𑀴𑀫𑀸𑀦𑀸 𑀯𑀺𑀳𑀭𑁂𑀬𑁆𑀬𑀸𑀣. 𑀥𑀦𑀸𑀬𑁂𑀣𑀸𑀢𑀺 𑀥𑀦𑀁 𑀯𑀺𑀬 𑀇𑀘𑁆𑀙𑀦𑁆𑀢𑀸 𑀕𑁂𑀥𑀁 𑀆𑀧𑀚𑁆𑀚𑁂𑀬𑁆𑀬𑀸𑀣. 𑀫𑀫𑀸𑀬𑁂𑀣𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀫𑀫𑀢𑁆𑀢𑀁 𑀉𑀧𑁆𑀧𑀸𑀤𑁂𑀬𑁆𑀬𑀸𑀣. 𑀦𑀺𑀢𑁆𑀣𑀭𑀡𑀢𑁆𑀣𑀸𑀬 𑀦𑁄 𑀕𑀳𑀡𑀢𑁆𑀣𑀸𑀬𑀸𑀢𑀺 𑀬𑁄 𑀲𑁄 𑀫𑀬𑀸 𑀘𑀢𑀼𑀭𑁄𑀖𑀦𑀺𑀢𑁆𑀣𑀭𑀡𑀢𑁆𑀣𑀸𑀬 𑀓𑀼𑀮𑁆𑀮𑀽𑀧𑀫𑁄 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀦𑁄 𑀦𑀺𑀓𑀦𑁆𑀢𑀺𑀯𑀲𑁂𑀦 𑀕𑀳𑀡𑀢𑁆𑀣𑀸𑀬. 𑀅𑀧𑀺 𑀦𑀼 𑀢𑀁 𑀢𑀼𑀫𑁆𑀳𑁂 𑀆𑀚𑀸𑀦𑁂𑀬𑁆𑀬𑀸𑀣𑀸𑀢𑀺. 𑀯𑀺𑀧𑀭𑀺𑀬𑀸𑀬𑁂𑀦 𑀲𑀼𑀓𑁆𑀓𑀧𑀓𑁆𑀔𑁄 𑀯𑁂𑀤𑀺𑀢𑀩𑁆𑀩𑁄.

𑁪𑁦𑁨. 𑀇𑀤𑀸𑀦𑀺 𑀢𑁂𑀲𑀁 𑀔𑀦𑁆𑀥𑀸𑀦𑀁 𑀧𑀘𑁆𑀘𑀬𑀁 𑀤𑀲𑁆𑀲𑁂𑀦𑁆𑀢𑁄, 𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑀸𑀢𑀺𑀆𑀤𑀺𑀫𑀸𑀳, 𑀢𑀫𑁆𑀧𑀺 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀬𑀣𑀸 𑀧𑀦 𑀏𑀓𑁄 𑀇𑀫𑀁 𑀚𑀸𑀦𑀸𑀲𑀻𑀢𑀺 𑀯𑀼𑀢𑁆𑀢𑁄, ‘‘𑀦 𑀓𑁂𑀯𑀮𑀁 𑀇𑀫𑀁, 𑀫𑀸𑀢𑀭𑀫𑁆𑀧𑀺𑀲𑁆𑀲 𑀚𑀸𑀦𑀸𑀫𑀺, 𑀫𑀸𑀢𑀼 𑀫𑀸𑀢𑀭𑀫𑁆𑀧𑀻’’𑀢𑀺 𑀏𑀯𑀁 𑀧𑀯𑁂𑀡𑀺𑀯𑀲𑁂𑀦 𑀚𑀸𑀦𑀦𑁆𑀢𑁄 𑀲𑀼𑀝𑁆𑀞𑀼 𑀚𑀸𑀦𑀸𑀢𑀺 𑀦𑀸𑀫. 𑀏𑀯𑀫𑁂𑀯𑀁 𑀪𑀕𑀯𑀸 𑀦 𑀓𑁂𑀯𑀮𑀁 𑀔𑀦𑁆𑀥𑀫𑀢𑁆𑀢𑀫𑁂𑀯 𑀚𑀸𑀦𑀸𑀢𑀺, 𑀔𑀦𑁆𑀥𑀸𑀦𑀁 𑀧𑀘𑁆𑀘𑀬𑀫𑁆𑀧𑀺 𑀢𑁂𑀲𑀫𑁆𑀧𑀺 𑀧𑀘𑁆𑀘𑀬𑀸𑀦𑀁 𑀧𑀘𑁆𑀘𑀬𑀦𑁆𑀢𑀺 𑀏𑀯𑀁 𑀲𑀩𑁆𑀩𑀧𑀘𑁆𑀘𑀬𑀧𑀭𑀫𑁆𑀧𑀭𑀁 𑀚𑀸𑀦𑀸𑀢𑀺. 𑀲𑁄 𑀢𑀁, 𑀩𑀼𑀤𑁆𑀥𑀩𑀮𑀁 𑀤𑀻𑀧𑁂𑀦𑁆𑀢𑁄 𑀇𑀤𑀸𑀦𑀺 𑀧𑀘𑁆𑀘𑀬𑀧𑀭𑀫𑁆𑀧𑀭𑀁 𑀤𑀲𑁆𑀲𑁂𑀢𑀼𑀁, 𑀇𑀫𑁂 𑀘, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸…𑀧𑁂… 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀧𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸 𑀪𑀯𑁂𑀬𑁆𑀬, 𑀲𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀸𑀯.

𑁪𑁦𑁪. 𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀻𑀢𑀺 𑀇𑀫𑀲𑁆𑀫𑀺𑀁 𑀅𑀯𑀺𑀚𑁆𑀚𑀸𑀤𑀺𑀓𑁂 𑀧𑀘𑁆𑀘𑀬𑁂 𑀲𑀢𑀺 𑀇𑀤𑀁 𑀲𑀗𑁆𑀔𑀸𑀭𑀸𑀤𑀺𑀓𑀁 𑀨𑀮𑀁 𑀳𑁄𑀢𑀺. 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀫𑀲𑁆𑀲 𑀅𑀯𑀺𑀚𑁆𑀚𑀸𑀤𑀺𑀓𑀲𑁆𑀲 𑀧𑀘𑁆𑀘𑀬𑀲𑁆𑀲 𑀉𑀧𑁆𑀧𑀸𑀤𑀸 𑀇𑀤𑀁 𑀲𑀗𑁆𑀔𑀸𑀭𑀸𑀤𑀺𑀓𑀁 𑀨𑀮𑀁 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀦𑁂𑀯𑀸𑀳 𑁋 ‘‘𑀬𑀤𑀺𑀤𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸…𑀧𑁂… 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺. 𑀏𑀯𑀁 𑀯𑀝𑁆𑀝𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀯𑀝𑁆𑀝𑀁 𑀤𑀲𑁆𑀲𑁂𑀦𑁆𑀢𑁄, 𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯𑀸𑀢𑀺 𑀅𑀯𑀺𑀚𑁆𑀚𑀸𑀬 𑀏𑀯 𑀢𑀼. 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸𑀢𑀺 𑀯𑀺𑀭𑀸𑀕𑀲𑀗𑁆𑀔𑀸𑀢𑁂𑀦 𑀫𑀕𑁆𑀕𑁂𑀦 𑀅𑀲𑁂𑀲𑀦𑀺𑀭𑁄𑀥𑀸 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀸. 𑀲𑀗𑁆𑀔𑀸𑀭𑀦𑀺𑀭𑁄𑀥𑁄𑀢𑀺 𑀲𑀗𑁆𑀔𑀸𑀭𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄 𑀳𑁄𑀢𑀺, 𑀏𑀯𑀁 𑀦𑀺𑀭𑀼𑀤𑁆𑀥𑀸𑀦𑀁 𑀧𑀦 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄 𑀳𑁄𑀢𑀺, 𑀯𑀺𑀜𑁆𑀜𑀸𑀡𑀸𑀤𑀻𑀦𑀜𑁆𑀘 𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀸𑀤𑀻𑀦𑀺 𑀦𑀺𑀭𑀼𑀤𑁆𑀥𑀸𑀦𑀺𑀬𑁂𑀯 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄𑀢𑀺𑀆𑀤𑀺𑀁 𑀯𑀢𑁆𑀯𑀸 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑁂𑀯𑀮𑀲𑁆𑀲𑀸𑀢𑀺 𑀲𑀓𑀮𑀲𑁆𑀲, 𑀲𑀼𑀤𑁆𑀥𑀲𑁆𑀲 𑀯𑀸, 𑀲𑀢𑁆𑀢𑀯𑀺𑀭𑀳𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲𑀸𑀢𑀺 𑀤𑀼𑀓𑁆𑀔𑀭𑀸𑀲𑀺𑀲𑁆𑀲. 𑀦𑀺𑀭𑁄𑀥𑁄 𑀳𑁄𑀢𑀻𑀢𑀺 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺.

𑁪𑁦𑁬. 𑀇𑀫𑀲𑁆𑀫𑀺𑀁 𑀅𑀲𑀢𑀻𑀢𑀺𑀆𑀤𑀺 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑁪𑁦𑁭. 𑀏𑀯𑀁 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀇𑀫𑀁 𑀤𑁆𑀯𑀸𑀤𑀲𑀗𑁆𑀕𑀧𑀘𑁆𑀘𑀬𑀯𑀝𑁆𑀝𑀁 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁂𑀦 𑀚𑀸𑀦𑀦𑁆𑀢𑀲𑁆𑀲 𑀬𑀸 𑀧𑀝𑀺𑀥𑀸𑀯𑀦𑀸 𑀧𑀳𑀻𑀬𑀢𑀺, 𑀢𑀲𑁆𑀲𑀸 𑀅𑀪𑀸𑀯𑀁 𑀧𑀼𑀘𑁆𑀙𑀦𑁆𑀢𑁄 𑀅𑀧𑀺 𑀦𑀼 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀯𑀁 𑀚𑀸𑀦𑀦𑁆𑀢𑀸𑀢𑀺 𑀏𑀯𑀁 𑀲𑀳𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁂𑀦 𑀚𑀸𑀦𑀦𑁆𑀢𑀸. 𑀏𑀯𑀁 𑀧𑀲𑁆𑀲𑀦𑁆𑀢𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀼𑀩𑁆𑀩𑀦𑁆𑀢𑀦𑁆𑀢𑀺 𑀧𑀼𑀭𑀺𑀫𑀓𑁄𑀝𑁆𑀞𑀸𑀲𑀁, 𑀅𑀢𑀻𑀢𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀦𑀻𑀢𑀺 𑀅𑀢𑁆𑀣𑁄. 𑀧𑀝𑀺𑀥𑀸𑀯𑁂𑀬𑁆𑀬𑀸𑀣𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀧𑀝𑀺𑀥𑀸𑀯𑁂𑀬𑁆𑀬𑀸𑀣. 𑀲𑁂𑀲𑀁 𑀲𑀩𑁆𑀩𑀸𑀲𑀯𑀲𑀼𑀢𑁆𑀢𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯.

𑀇𑀤𑀸𑀦𑀺 𑀦𑁂𑀲𑀁 𑀢𑀢𑁆𑀣 𑀦𑀺𑀘𑁆𑀘𑀮𑀪𑀸𑀯𑀁 𑀧𑀼𑀘𑁆𑀙𑀦𑁆𑀢𑁄, 𑀅𑀧𑀺 𑀦𑀼 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀏𑀯𑀁 𑀚𑀸𑀦𑀦𑁆𑀢𑀸 𑀏𑀯𑀁 𑀧𑀲𑁆𑀲𑀦𑁆𑀢𑀸 𑀏𑀯𑀁 𑀯𑀤𑁂𑀬𑁆𑀬𑀸𑀣, 𑀲𑀢𑁆𑀣𑀸 𑀦𑁄 𑀕𑀭𑀽𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀕𑀭𑀽𑀢𑀺 𑀪𑀸𑀭𑀺𑀓𑁄 𑀅𑀓𑀸𑀫𑀸 𑀅𑀦𑀼𑀯𑀢𑁆𑀢𑀺𑀢𑀩𑁆𑀩𑁄. 𑀲𑀫𑀡𑁄𑀢𑀺 𑀩𑀼𑀤𑁆𑀥𑀲𑀫𑀡𑁄. 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣𑀸𑀢𑀺 𑀅𑀬𑀁 𑀲𑀢𑁆𑀣𑀸 𑀅𑀫𑁆𑀳𑀸𑀓𑀁 𑀓𑀺𑀘𑁆𑀘𑀁 𑀲𑀸𑀥𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀅𑀧𑀺 𑀦𑀼 𑀏𑀯𑀁𑀲𑀜𑁆𑀜𑀺𑀦𑁄 𑀳𑀼𑀢𑁆𑀯𑀸 𑀅𑀜𑁆𑀜𑀁 𑀩𑀸𑀳𑀺𑀭𑀓𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣. 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀦𑁆𑀢𑀺 𑀏𑀯𑀁𑀲𑀜𑁆𑀜𑀺𑀦𑁄 𑀳𑀼𑀢𑁆𑀯𑀸 𑀧𑀼𑀣𑀽𑀦𑀁 𑀢𑀺𑀢𑁆𑀣𑀺𑀬𑀲𑀫𑀡𑀸𑀦𑀁 𑀘𑁂𑀯 𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀘. 𑀯𑀢𑀓𑁄𑀢𑀽𑀳𑀮𑀫𑀗𑁆𑀕𑀮𑀸𑀦𑀻𑀢𑀺 𑀯𑀢𑀲𑀫𑀸𑀤𑀸𑀦𑀸𑀦𑀺 𑀘 𑀤𑀺𑀝𑁆𑀞𑀺𑀓𑀼𑀢𑀽𑀳𑀮𑀸𑀦𑀺 𑀘 𑀤𑀺𑀝𑁆𑀞𑀲𑀼𑀢𑀫𑀼𑀢𑀫𑀗𑁆𑀕𑀮𑀸𑀦𑀺 𑀘. 𑀢𑀸𑀦𑀺 𑀲𑀸𑀭𑀢𑁄 𑀧𑀘𑁆𑀘𑀸𑀕𑀘𑁆𑀙𑁂𑀬𑁆𑀬𑀸𑀣𑀸𑀢𑀺 𑀏𑀢𑀸𑀦𑀺 𑀲𑀸𑀭𑀦𑁆𑀢𑀺 𑀏𑀯𑀁𑀲𑀜𑁆𑀜𑀺𑀦𑁄 𑀳𑀼𑀢𑁆𑀯𑀸 𑀧𑀝𑀺𑀆𑀕𑀘𑁆𑀙𑁂𑀬𑁆𑀬𑀸𑀣. 𑀏𑀯𑀁 𑀦𑀺𑀲𑁆𑀲𑀝𑁆𑀞𑀸𑀦𑀺 𑀘 𑀧𑀼𑀦 𑀕𑀡𑁆𑀳𑁂𑀬𑁆𑀬𑀸𑀣𑀸𑀢𑀺 𑀅𑀢𑁆𑀣𑁄. 𑀲𑀸𑀫𑀁 𑀜𑀸𑀢𑀦𑁆𑀢𑀺 𑀲𑀬𑀁 𑀜𑀸𑀡𑁂𑀦 𑀜𑀸𑀢𑀁. 𑀲𑀸𑀫𑀁 𑀤𑀺𑀝𑁆𑀞𑀦𑁆𑀢𑀺 𑀲𑀬𑀁 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀁. 𑀲𑀸𑀫𑀁 𑀯𑀺𑀤𑀺𑀢𑀦𑁆𑀢𑀺 𑀲𑀬𑀁 𑀯𑀺𑀪𑀸𑀯𑀺𑀢𑀁 𑀧𑀸𑀓𑀝𑀁 𑀓𑀢𑀁. 𑀉𑀧𑀦𑀻𑀢𑀸 𑀔𑁄 𑀫𑁂 𑀢𑀼𑀫𑁆𑀳𑁂𑀢𑀺 𑀫𑀬𑀸, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑁂 𑀇𑀫𑀺𑀦𑀸 𑀲𑀦𑁆𑀤𑀺𑀝𑁆𑀞𑀺𑀓𑀸𑀤𑀺𑀲𑀪𑀸𑀯𑁂𑀦 𑀥𑀫𑁆𑀫𑁂𑀦 𑀦𑀺𑀩𑁆𑀩𑀸𑀦𑀁 𑀉𑀧𑀦𑀻𑀢𑀸, 𑀧𑀸𑀧𑀺𑀢𑀸𑀢𑀺 𑀅𑀢𑁆𑀣𑁄. 𑀲𑀦𑁆𑀤𑀺𑀝𑁆𑀞𑀺𑀓𑁄𑀢𑀺𑀆𑀤𑀻𑀦𑀫𑀢𑁆𑀣𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑁄. 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀦𑁆𑀢𑀺 𑀏𑀢𑀁 𑀯𑀘𑀦𑀫𑀺𑀤𑀁 𑀢𑀼𑀫𑁆𑀳𑁂𑀳𑀺 𑀲𑀸𑀫𑀁 𑀜𑀸𑀢𑀸𑀤𑀺𑀪𑀸𑀯𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

𑁪𑁦𑁮. 𑀢𑀺𑀡𑁆𑀡𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂𑀢𑀺 𑀓𑀲𑁆𑀫𑀸 𑀆𑀭𑀪𑀺? 𑀦𑀦𑀼 𑀳𑁂𑀝𑁆𑀞𑀸 𑀯𑀝𑁆𑀝𑀯𑀺𑀯𑀝𑁆𑀝𑀯𑀲𑁂𑀦 𑀤𑁂𑀲𑀦𑀸 𑀫𑀢𑁆𑀣𑀓𑀁 𑀧𑀸𑀧𑀺𑀢𑀸𑀢𑀺? 𑀆𑀫 𑀧𑀸𑀧𑀺𑀢𑀸. 𑀅𑀬𑀁 𑀧𑀦 𑀧𑀸𑀝𑀺𑀏𑀓𑁆𑀓𑁄 𑀅𑀦𑀼𑀲𑀦𑁆𑀥𑀺, ‘‘𑀅𑀬𑀜𑁆𑀳𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁄 𑀧𑀝𑀺𑀲𑀦𑁆𑀥𑀺𑀲𑀫𑁆𑀫𑀽𑀴𑁆𑀳𑁄, 𑀢𑀲𑁆𑀲 𑀲𑀫𑁆𑀫𑁄𑀳𑀝𑁆𑀞𑀸𑀦𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀧𑀸𑀓𑀝𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀅𑀧𑀺𑀘 𑀯𑀝𑁆𑀝𑀫𑀽𑀮𑀁 𑀅𑀯𑀺𑀚𑁆𑀚𑀸, 𑀯𑀺𑀯𑀝𑁆𑀝𑀫𑀽𑀮𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁄, 𑀇𑀢𑀺 𑀯𑀝𑁆𑀝𑀫𑀽𑀮𑀁 𑀅𑀯𑀺𑀚𑁆𑀚𑀁 𑀯𑀺𑀯𑀝𑁆𑀝𑀫𑀽𑀮𑀜𑁆𑀘 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀤𑀲𑁆𑀲𑁂𑀢𑁆𑀯𑀸𑀧𑀺, ‘‘𑀧𑀼𑀦 𑀏𑀓𑀯𑀸𑀭𑀁 𑀯𑀝𑁆𑀝𑀯𑀺𑀯𑀝𑁆𑀝𑀯𑀲𑁂𑀦 𑀤𑁂𑀲𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀲𑀦𑁆𑀦𑀺𑀧𑀸𑀢𑀸𑀢𑀺 𑀲𑀫𑁄𑀥𑀸𑀦𑁂𑀦 𑀧𑀺𑀡𑁆𑀟𑀪𑀸𑀯𑁂𑀦. 𑀕𑀩𑁆𑀪𑀲𑁆𑀲𑀸𑀢𑀺 𑀕𑀩𑁆𑀪𑁂 𑀦𑀺𑀩𑁆𑀩𑀢𑁆𑀢𑀦𑀓𑀲𑀢𑁆𑀢𑀲𑁆𑀲. 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺. 𑀓𑀢𑁆𑀣𑀘𑀺 𑀳𑀺 𑀕𑀩𑁆𑀪𑁄𑀢𑀺 𑀫𑀸𑀢𑀼𑀓𑀼𑀘𑁆𑀙𑀺 𑀯𑀼𑀢𑁆𑀢𑁄. 𑀬𑀣𑀸𑀳 𑁋

‘‘𑀬𑀫𑁂𑀓𑀭𑀢𑁆𑀢𑀺𑀁 𑀧𑀞𑀫𑀁, 𑀕𑀩𑁆𑀪𑁂 𑀯𑀲𑀢𑀺 𑀫𑀸𑀡𑀯𑁄;

𑀅𑀩𑁆𑀪𑀼𑀝𑁆𑀞𑀺𑀢𑁄𑀯 𑀲𑁄 𑀬𑀸𑀢𑀺, 𑀲 𑀕𑀘𑁆𑀙𑀁 𑀦 𑀦𑀺𑀯𑀢𑁆𑀢𑀢𑀻’’𑀢𑀺. (𑀚𑀸. 𑁧.𑁧𑁫.𑁩𑁬𑁩);

𑀓𑀢𑁆𑀣𑀘𑀺 𑀕𑀩𑁆𑀪𑁂 𑀦𑀺𑀩𑁆𑀩𑀢𑁆𑀢𑀦𑀲𑀢𑁆𑀢𑁄. 𑀬𑀣𑀸𑀳 𑁋 ‘‘𑀬𑀣𑀸 𑀔𑁄, 𑀧𑀦𑀸𑀦𑀦𑁆𑀤, 𑀅𑀜𑁆𑀜𑀸 𑀇𑀢𑁆𑀣𑀺𑀓𑀸 𑀦𑀯 𑀯𑀸 𑀤𑀲 𑀯𑀸 𑀫𑀸𑀲𑁂 𑀕𑀩𑁆𑀪𑀁 𑀓𑀼𑀘𑁆𑀙𑀺𑀦𑀸 𑀧𑀭𑀺𑀳𑀭𑀺𑀢𑁆𑀯𑀸 𑀯𑀺𑀚𑀸𑀬𑀦𑁆𑀢𑀻’’𑀢𑀺 (𑀫. 𑀦𑀺. 𑁩.𑁨𑁦𑁫). 𑀇𑀥 𑀲𑀢𑁆𑀢𑁄 𑀅𑀥𑀺𑀧𑁆𑀧𑁂𑀢𑁄, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀕𑀩𑁆𑀪𑀲𑁆𑀲 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀻’’𑀢𑀺.

𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀢𑁆𑀢𑀮𑁄𑀓𑁂. 𑀫𑀸𑀢𑀸 𑀘 𑀉𑀢𑀼𑀦𑀻 𑀳𑁄𑀢𑀻𑀢𑀺 𑀇𑀤𑀁 𑀉𑀢𑀼𑀲𑀫𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀫𑀸𑀢𑀼𑀕𑀸𑀫𑀲𑁆𑀲 𑀓𑀺𑀭 𑀬𑀲𑁆𑀫𑀺𑀁 𑀑𑀓𑀸𑀲𑁂 𑀤𑀸𑀭𑀓𑁄 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀢𑁆𑀣 𑀫𑀳𑀢𑀻 𑀮𑁄𑀳𑀺𑀢𑀧𑀻𑀴𑀓𑀸 𑀲𑀡𑁆𑀞𑀳𑀺𑀢𑁆𑀯𑀸 𑀪𑀺𑀚𑁆𑀚𑀺𑀢𑁆𑀯𑀸 𑀧𑀕𑁆𑀖𑀭𑀢𑀺, 𑀯𑀢𑁆𑀣𑀼 𑀲𑀼𑀤𑁆𑀥𑀁 𑀳𑁄𑀢𑀺, 𑀲𑀼𑀤𑁆𑀥𑁂 𑀯𑀢𑁆𑀣𑀼𑀫𑁆𑀳𑀺 𑀫𑀸𑀢𑀸𑀧𑀺𑀢𑀽𑀲𑀼 𑀏𑀓𑀯𑀸𑀭𑀁 𑀲𑀦𑁆𑀦𑀺𑀧𑀢𑀺𑀢𑁂𑀲𑀼 𑀬𑀸𑀯 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀔𑁂𑀢𑁆𑀢𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀳𑀢𑁆𑀣𑀕𑁆𑀕𑀸𑀳𑀯𑁂𑀡𑀺𑀕𑁆𑀕𑀸𑀳𑀸𑀤𑀺𑀦𑀸 𑀅𑀗𑁆𑀕𑀧𑀭𑀸𑀫𑀲𑀦𑁂𑀦𑀧𑀺 𑀤𑀸𑀭𑀓𑁄 𑀦𑀺𑀩𑁆𑀩𑀢𑁆𑀢𑀢𑀺𑀬𑁂𑀯. 𑀕𑀦𑁆𑀥𑀩𑁆𑀩𑁄𑀢𑀺 𑀢𑀢𑁆𑀭𑀽𑀧𑀕𑀲𑀢𑁆𑀢𑁄. 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀳𑁄𑀢𑀻𑀢𑀺 𑀦 𑀫𑀸𑀢𑀸𑀧𑀺𑀢𑀽𑀦𑀁 𑀲𑀦𑁆𑀦𑀺𑀧𑀸𑀢𑀁 𑀑𑀮𑁄𑀓𑀬𑀫𑀸𑀦𑁄 𑀲𑀫𑀻𑀧𑁂 𑀞𑀺𑀢𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀦𑀸𑀫 𑀳𑁄𑀢𑀺. 𑀓𑀫𑁆𑀫𑀬𑀦𑁆𑀢𑀬𑀦𑁆𑀢𑀺𑀢𑁄 𑀧𑀦 𑀏𑀓𑁄 𑀲𑀢𑁆𑀢𑁄 𑀢𑀲𑁆𑀫𑀺𑀁 𑀑𑀓𑀸𑀲𑁂 𑀦𑀺𑀩𑁆𑀩𑀢𑁆𑀢𑀦𑀓𑁄 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀲𑀁𑀲𑀬𑁂𑀦𑀸𑀢𑀺 ‘‘𑀅𑀭𑁄𑀕𑁄 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀺 𑀅𑀳𑀁 𑀯𑀸, 𑀧𑀼𑀢𑁆𑀢𑁄 𑀯𑀸 𑀫𑁂’’𑀢𑀺 𑀏𑀯𑀁 𑀫𑀳𑀦𑁆𑀢𑁂𑀦 𑀚𑀻𑀯𑀺𑀢𑀲𑀁𑀲𑀬𑁂𑀦. 𑀮𑁄𑀳𑀺𑀢𑀜𑁆𑀳𑁂𑀢𑀁, 𑀪𑀺𑀓𑁆𑀔𑀯𑁂𑀢𑀺 𑀢𑀤𑀸 𑀓𑀺𑀭 𑀫𑀸𑀢𑀼𑀮𑁄𑀳𑀺𑀢𑀁 𑀢𑀁 𑀞𑀸𑀦𑀁 𑀲𑀫𑁆𑀧𑀢𑁆𑀢𑀁 𑀧𑀼𑀢𑁆𑀢𑀲𑀺𑀦𑁂𑀳𑁂𑀦 𑀧𑀡𑁆𑀟𑀭𑀁 𑀳𑁄𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀯𑀗𑁆𑀓𑀓𑀦𑁆𑀢𑀺 𑀕𑀸𑀫𑀤𑀸𑀭𑀓𑀸𑀦𑀁 𑀓𑀻𑀴𑀦𑀓𑀁 𑀔𑀼𑀤𑁆𑀤𑀓𑀦𑀗𑁆𑀕𑀮𑀁. 𑀖𑀝𑀺𑀓𑀸 𑀯𑀼𑀘𑁆𑀘𑀢𑀺 𑀤𑀻𑀖𑀤𑀡𑁆𑀟𑁂𑀦 𑀭𑀲𑁆𑀲𑀤𑀡𑁆𑀟𑀓𑀁 𑀧𑀳𑀭𑀡𑀓𑀻𑀴𑀸. 𑀫𑁄𑀓𑁆𑀔𑀘𑀺𑀓𑀦𑁆𑀢𑀺 𑀲𑀫𑁆𑀧𑀭𑀺𑀯𑀢𑁆𑀢𑀓𑀓𑀻𑀴𑀸, 𑀆𑀓𑀸𑀲𑁂 𑀯𑀸 𑀤𑀡𑁆𑀟𑀓𑀁 𑀕𑀳𑁂𑀢𑁆𑀯𑀸 𑀪𑀽𑀫𑀺𑀬𑀁 𑀯𑀸 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀳𑁂𑀝𑁆𑀞𑀼𑀧𑀭𑀺𑀬𑀪𑀸𑀯𑁂𑀦 𑀧𑀭𑀺𑀯𑀢𑁆𑀢𑀦𑀓𑀻𑀴𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀺𑀗𑁆𑀕𑀼𑀮𑀓𑀁 𑀯𑀼𑀘𑁆𑀘𑀢𑀺 𑀢𑀸𑀮𑀧𑀡𑁆𑀡𑀸𑀤𑀻𑀳𑀺 𑀓𑀢𑀁 𑀯𑀸𑀢𑀧𑁆𑀧𑀳𑀸𑀭𑁂𑀦 𑀧𑀭𑀺𑀩𑁆𑀪𑀫𑀦𑀘𑀓𑁆𑀓𑀁. 𑀧𑀢𑁆𑀢𑀸𑀴𑁆𑀳𑀓𑀁 𑀯𑀼𑀘𑁆𑀘𑀢𑀺 𑀧𑀡𑁆𑀡𑀦𑀸𑀴𑀺𑀓𑀸, 𑀢𑀸𑀬 𑀯𑀸𑀮𑀺𑀓𑀸𑀤𑀻𑀦𑀺 𑀫𑀺𑀦𑀦𑁆𑀢𑀸 𑀓𑀻𑀴𑀦𑁆𑀢𑀺. 𑀭𑀣𑀓𑀦𑁆𑀢𑀺 𑀔𑀼𑀤𑁆𑀤𑀓𑀭𑀣𑀁. 𑀥𑀦𑀼𑀓𑀫𑁆𑀧𑀺 𑀔𑀼𑀤𑁆𑀤𑀓𑀥𑀦𑀼𑀫𑁂𑀯.

𑁪𑁦𑁯. 𑀲𑀸𑀭𑀚𑁆𑀚𑀢𑀻𑀢𑀺 𑀭𑀸𑀕𑀁 𑀉𑀧𑁆𑀧𑀸𑀤𑁂𑀢𑀺. 𑀩𑁆𑀬𑀸𑀧𑀚𑁆𑀚𑀢𑀻𑀢𑀺 𑀩𑁆𑀬𑀸𑀧𑀸𑀤𑀁 𑀉𑀧𑁆𑀧𑀸𑀤𑁂𑀢𑀺. 𑀅𑀦𑀼𑀧𑀝𑁆𑀞𑀺𑀢𑀓𑀸𑀬𑀲𑀢𑀻𑀢𑀺 𑀓𑀸𑀬𑁂 𑀲𑀢𑀺 𑀓𑀸𑀬𑀲𑀢𑀺, 𑀢𑀁 𑀅𑀦𑀼𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀢𑁆𑀢𑀘𑁂𑀢𑀲𑁄𑀢𑀺 𑀅𑀓𑀼𑀲𑀮𑀘𑀺𑀢𑁆𑀢𑁄. 𑀬𑀢𑁆𑀣𑀲𑁆𑀲 𑀢𑁂 𑀧𑀸𑀧𑀓𑀸𑀢𑀺 𑀬𑀲𑁆𑀲𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀁 𑀏𑀢𑁂 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀁 𑀦 𑀚𑀸𑀦𑀸𑀢𑀺 𑀦𑀸𑀥𑀺𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀼𑀭𑁄𑀥𑀯𑀺𑀭𑁄𑀥𑀦𑁆𑀢𑀺 𑀭𑀸𑀕𑀜𑁆𑀘𑁂𑀯 𑀤𑁄𑀲𑀜𑁆𑀘. 𑀅𑀪𑀺𑀦𑀦𑁆𑀤𑀢𑀻𑀢𑀺 𑀢𑀡𑁆𑀳𑀸𑀯𑀲𑁂𑀦 𑀅𑀪𑀺𑀦𑀦𑁆𑀤𑀢𑀺, 𑀢𑀡𑁆𑀳𑀸𑀯𑀲𑁂𑀦𑁂𑀯 𑀅𑀳𑁄 𑀲𑀼𑀔𑀦𑁆𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀅𑀪𑀺𑀯𑀤𑀢𑀺. 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀻𑀢𑀺 𑀢𑀡𑁆𑀳𑀸𑀅𑀚𑁆𑀛𑁄𑀲𑀸𑀦𑀕𑀳𑀡𑁂𑀦 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀲𑀼𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸 𑀅𑀪𑀺𑀦𑀦𑁆𑀤𑀢𑀼, 𑀤𑀼𑀓𑁆𑀔𑀁 𑀓𑀣𑀁 𑀅𑀪𑀺𑀦𑀦𑁆𑀤𑀢𑀻𑀢𑀺? ‘‘𑀅𑀳𑀁 𑀤𑀼𑀓𑁆𑀔𑀺𑀢𑁄 𑀫𑀫 𑀤𑀼𑀓𑁆𑀔’’𑀦𑁆𑀢𑀺 𑀕𑀡𑁆𑀳𑀦𑁆𑀢𑁄 𑀅𑀪𑀺𑀦𑀦𑁆𑀤𑀢𑀺 𑀦𑀸𑀫. 𑀉𑀧𑁆𑀧𑀚𑁆𑀚𑀢𑀺 𑀦𑀦𑁆𑀤𑀻𑀢𑀺 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀤𑀼𑀧𑀸𑀤𑀸𑀦𑀦𑁆𑀢𑀺 𑀲𑀸𑀯 𑀢𑀡𑁆𑀳𑀸 𑀕𑀳𑀡𑀝𑁆𑀞𑁂𑀦 𑀉𑀧𑀸𑀤𑀸𑀦𑀁 𑀦𑀸𑀫. 𑀢𑀲𑁆𑀲 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄…𑀧𑁂… 𑀲𑀫𑀼𑀤𑀬𑁄 𑀳𑁄𑀢𑀻𑀢𑀺, 𑀇𑀤𑀜𑁆𑀳𑀺 𑀪𑀕𑀯𑀢𑀸 𑀧𑀼𑀦 𑀏𑀓𑀯𑀸𑀭𑀁 𑀤𑁆𑀯𑀺𑀲𑀦𑁆𑀥𑀺 𑀢𑀺𑀲𑀗𑁆𑀔𑁂𑀧𑀁 𑀧𑀘𑁆𑀘𑀬𑀸𑀓𑀸𑀭𑀯𑀝𑁆𑀝𑀁 𑀤𑀲𑁆𑀲𑀺𑀢𑀁.

𑁪𑁧𑁦-𑁪. 𑀇𑀤𑀸𑀦𑀺 𑀯𑀺𑀯𑀝𑁆𑀝𑀁 𑀤𑀲𑁆𑀲𑁂𑀢𑀼𑀁 𑀇𑀥, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀧𑁆𑀧𑀫𑀸𑀡𑀘𑁂𑀢𑀲𑁄𑀢𑀺 𑀅𑀧𑁆𑀧𑀫𑀸𑀡𑀁 𑀮𑁄𑀓𑀼𑀢𑁆𑀢𑀭𑀁 𑀘𑁂𑀢𑁄 𑀅𑀲𑁆𑀲𑀸𑀢𑀺 𑀅𑀧𑁆𑀧𑀫𑀸𑀡𑀘𑁂𑀢𑀲𑁄, 𑀫𑀕𑁆𑀕𑀘𑀺𑀢𑁆𑀢𑀲𑀫𑀗𑁆𑀕𑀻𑀢𑀺 𑀅𑀢𑁆𑀣𑁄. 𑀇𑀫𑀁 𑀔𑁄 𑀫𑁂 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀲𑀁𑀔𑀺𑀢𑁆𑀢𑁂𑀦 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺𑀁 𑀥𑀸𑀭𑁂𑀣𑀸𑀢𑀺, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀁𑀔𑀺𑀢𑁆𑀢𑁂𑀦 𑀤𑁂𑀲𑀺𑀢𑀁 𑀫𑀬𑁆𑀳𑀁, 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺𑀤𑁂𑀲𑀦𑀁 𑀢𑀼𑀫𑁆𑀳𑁂 𑀦𑀺𑀘𑁆𑀘𑀓𑀸𑀮𑀁 𑀥𑀸𑀭𑁂𑀬𑁆𑀬𑀸𑀣 𑀫𑀸 𑀧𑀫𑀚𑁆𑀚𑁂𑀬𑁆𑀬𑀸𑀣. 𑀤𑁂𑀲𑀦𑀸 𑀳𑀺 𑀏𑀢𑁆𑀣 𑀯𑀺𑀫𑀼𑀢𑁆𑀢𑀺𑀧𑀝𑀺𑀮𑀸𑀪𑀳𑁂𑀢𑀼𑀢𑁄 𑀯𑀺𑀫𑀼𑀢𑁆𑀢𑀻𑀢𑀺 𑀯𑀼𑀢𑁆𑀢𑀸. 𑀫𑀳𑀸𑀢𑀡𑁆𑀳𑀸𑀚𑀸𑀮𑀢𑀡𑁆𑀳𑀸𑀲𑀗𑁆𑀖𑀸𑀝𑀧𑀝𑀺𑀫𑀼𑀓𑁆𑀓𑀦𑁆𑀢𑀺 𑀢𑀡𑁆𑀳𑀸𑀯 𑀲𑀁𑀲𑀺𑀩𑁆𑀩𑀺𑀢𑀝𑁆𑀞𑁂𑀦 𑀫𑀳𑀸𑀢𑀡𑁆𑀳𑀸𑀚𑀸𑀮𑀁, 𑀲𑀗𑁆𑀖𑀝𑀺𑀢𑀝𑁆𑀞𑁂𑀦 𑀲𑀗𑁆𑀖𑀸𑀝𑀦𑁆𑀢𑀺 𑀯𑀼𑀘𑁆𑀘𑀢𑀺; 𑀇𑀢𑀺 𑀇𑀫𑀲𑁆𑀫𑀺𑀁 𑀫𑀳𑀸𑀢𑀡𑁆𑀳𑀸𑀚𑀸𑀮𑁂 𑀢𑀡𑁆𑀳𑀸𑀲𑀗𑁆𑀖𑀸𑀝𑁂 𑀘 𑀇𑀫𑀁 𑀲𑀸𑀢𑀺𑀁 𑀪𑀺𑀓𑁆𑀔𑀼𑀁 𑀓𑁂𑀯𑀝𑁆𑀝𑀧𑀼𑀢𑁆𑀢𑀁 𑀧𑀝𑀺𑀫𑀼𑀓𑁆𑀓𑀁 𑀥𑀸𑀭𑁂𑀣. 𑀅𑀦𑀼𑀧𑀯𑀺𑀝𑁆𑀞𑁄 𑀅𑀦𑁆𑀢𑁄𑀕𑀥𑁄𑀢𑀺 𑀦𑀁 𑀥𑀸𑀭𑁂𑀣𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀳𑀸𑀢𑀡𑁆𑀳𑀸𑀲𑀗𑁆𑀔𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀫𑀳𑀸𑀅𑀲𑁆𑀲𑀧𑀼𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧𑁫. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀅𑀲𑁆𑀲𑀧𑀼𑀭𑀲𑀼𑀢𑁆𑀢𑀁. 𑀢𑀢𑁆𑀣 𑀅𑀗𑁆𑀕𑁂𑀲𑀽𑀢𑀺 𑀅𑀗𑁆𑀕𑀸 𑀦𑀸𑀫 𑀚𑀸𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸, 𑀢𑁂𑀲𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀼𑀴𑁆𑀳𑀻𑀲𑀤𑁆𑀤𑁂𑀦 ‘‘𑀅𑀗𑁆𑀕𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀅𑀗𑁆𑀕𑁂𑀲𑀼 𑀚𑀦𑀧𑀤𑁂. 𑀅𑀲𑁆𑀲𑀧𑀼𑀭𑀁 𑀦𑀸𑀫 𑀅𑀗𑁆𑀕𑀸𑀦𑀁 𑀦𑀺𑀕𑀫𑁄𑀢𑀺 𑀅𑀲𑁆𑀲𑀧𑀼𑀭𑀦𑁆𑀢𑀺 𑀦𑀕𑀭𑀦𑀸𑀫𑁂𑀦 𑀮𑀤𑁆𑀥𑀯𑁄𑀳𑀸𑀭𑁄 𑀅𑀗𑁆𑀕𑀸𑀦𑀁 𑀚𑀦𑀧𑀤𑀲𑁆𑀲 𑀏𑀓𑁄 𑀦𑀺𑀕𑀫𑁄, 𑀢𑀁 𑀕𑁄𑀘𑀭𑀕𑀸𑀫𑀁 𑀓𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀪𑀕𑀯𑀸 𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 ‘‘𑀲𑀫𑀡𑀸 𑀲𑀫𑀡𑀸𑀢𑀺 𑀯𑁄, 𑀪𑀺𑀓𑁆𑀔𑀯𑁂, 𑀚𑀦𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺𑀆𑀤𑀺𑀯𑀘𑀦𑀫𑀯𑁄𑀘.

𑀓𑀲𑁆𑀫𑀸 𑀧𑀦 𑀏𑀯𑀁 𑀅𑀯𑁄𑀘𑀸𑀢𑀺. 𑀢𑀲𑁆𑀫𑀺𑀁 𑀓𑀺𑀭 𑀦𑀺𑀕𑀫𑁂 𑀫𑀦𑀼𑀲𑁆𑀲𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀩𑀼𑀤𑁆𑀥𑀫𑀸𑀫𑀓𑀸 𑀥𑀫𑁆𑀫𑀫𑀸𑀫𑀓𑀸 𑀲𑀗𑁆𑀖𑀫𑀸𑀫𑀓𑀸, 𑀢𑀤𑀳𑀼𑀧𑀩𑁆𑀩𑀚𑀺𑀢𑀲𑀸𑀫𑀡𑁂𑀭𑀫𑁆𑀧𑀺 𑀯𑀲𑁆𑀲𑀲𑀢𑀺𑀓𑀢𑁆𑀣𑁂𑀭𑀲𑀤𑀺𑀲𑀁 𑀓𑀢𑁆𑀯𑀸 𑀧𑀲𑀁𑀲𑀦𑁆𑀢𑀺; 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑀁 𑀤𑀺𑀲𑁆𑀯𑀸 𑀩𑀻𑀚𑀦𑀗𑁆𑀕𑀮𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀔𑁂𑀢𑁆𑀢𑀁 𑀕𑀘𑁆𑀙𑀦𑁆𑀢𑀸𑀧𑀺, 𑀨𑀭𑀲𑀼𑀆𑀤𑀻𑀦𑀺 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀲𑀦𑁆𑀢𑀸𑀧𑀺 𑀢𑀸𑀦𑀺 𑀉𑀧𑀓𑀭𑀡𑀸𑀦𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀲𑀻𑀤𑀦𑀝𑁆𑀞𑀸𑀦𑀁 𑀆𑀲𑀦𑀲𑀸𑀮𑀁 𑀯𑀸 𑀫𑀡𑁆𑀟𑀧𑀁 𑀯𑀸 𑀭𑀼𑀓𑁆𑀔𑀫𑀽𑀮𑀁 𑀯𑀸 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀢𑁆𑀯𑀸 𑀅𑀭𑀚𑀧𑀸𑀦𑀻𑀬𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀦𑀺 𑀤𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀢𑀢𑁄 𑀢𑀸𑀦𑀺 𑀉𑀧𑀓𑀭𑀡𑀸𑀦𑀺 𑀆𑀤𑀸𑀬 𑀔𑁂𑀢𑁆𑀢𑀁 𑀯𑀸 𑀅𑀭𑀜𑁆𑀜𑀁 𑀯𑀸 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀺, 𑀓𑀫𑁆𑀫𑀦𑁆𑀢𑀝𑁆𑀞𑀸𑀦𑁂𑀧𑀺 𑀦𑁂𑀲𑀁 𑀅𑀜𑁆𑀜𑀸 𑀓𑀣𑀸 𑀦𑀸𑀫 𑀦𑀢𑁆𑀣𑀺. 𑀘𑀢𑁆𑀢𑀸𑀭𑁄 𑀫𑀕𑁆𑀕𑀝𑁆𑀞𑀸 𑀘𑀢𑁆𑀢𑀸𑀭𑁄 𑀨𑀮𑀝𑁆𑀞𑀸𑀢𑀺 𑀅𑀝𑁆𑀞 𑀧𑀼𑀕𑁆𑀕𑀮𑀸 𑀅𑀭𑀺𑀬𑀲𑀗𑁆𑀖𑁄 𑀦𑀸𑀫; 𑀢𑁂 ‘‘𑀏𑀯𑀭𑀽𑀧𑁂𑀦 𑀲𑀻𑀮𑁂𑀦, 𑀏𑀯𑀭𑀽𑀧𑁂𑀦 𑀆𑀘𑀸𑀭𑁂𑀦, 𑀏𑀯𑀭𑀽𑀧𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀸 𑀮𑀚𑁆𑀚𑀺𑀦𑁄 𑀧𑁂𑀲𑀮𑀸 𑀉𑀴𑀸𑀭𑀕𑀼𑀡𑀸’’𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑁂𑀯 𑀯𑀡𑁆𑀡𑀁 𑀓𑀣𑁂𑀦𑁆𑀢𑀺. 𑀓𑀫𑁆𑀫𑀦𑁆𑀢𑀝𑁆𑀞𑀸𑀦𑀢𑁄 𑀆𑀕𑀦𑁆𑀢𑁆𑀯𑀸 𑀪𑀼𑀢𑁆𑀢𑀲𑀸𑀬𑀫𑀸𑀲𑀸 𑀖𑀭𑀤𑁆𑀯𑀸𑀭𑁂 𑀦𑀺𑀲𑀺𑀦𑁆𑀦𑀸𑀧𑀺, 𑀲𑀬𑀦𑀺𑀖𑀭𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑁂𑀯 𑀯𑀡𑁆𑀡𑀁 𑀓𑀣𑁂𑀦𑁆𑀢𑀺. 𑀪𑀕𑀯𑀸 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀦𑀺𑀧𑀘𑁆𑀘𑀓𑀸𑀭𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀺𑀡𑁆𑀟𑀧𑀸𑀢𑀸𑀧𑀘𑀸𑀬𑀦𑁂 𑀦𑀺𑀬𑁄𑀚𑁂𑀢𑁆𑀯𑀸 𑀏𑀢𑀤𑀯𑁄𑀘.

𑀬𑁂 𑀥𑀫𑁆𑀫𑀸 𑀲𑀫𑀡𑀓𑀭𑀡𑀸 𑀘 𑀩𑁆𑀭𑀸𑀳𑁆𑀫𑀡𑀓𑀭𑀡𑀸 𑀘𑀸𑀢𑀺 𑀬𑁂 𑀥𑀫𑁆𑀫𑀸 𑀲𑀫𑀸𑀤𑀸𑀬 𑀧𑀭𑀺𑀧𑀽𑀭𑀺𑀢𑀸 𑀲𑀫𑀺𑀢𑀧𑀸𑀧𑀲𑀫𑀡𑀜𑁆𑀘 𑀩𑀸𑀳𑀺𑀢𑀧𑀸𑀧𑀩𑁆𑀭𑀸𑀳𑁆𑀫𑀡𑀜𑁆𑀘 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀲𑁆𑀲 𑀲𑀫𑀡𑀺𑀬𑀸𑀦𑀺 𑀲𑀫𑀡𑀓𑀭𑀡𑀻𑀬𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀁, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀁, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀲𑀫𑀸𑀤𑀸𑀦’’𑀦𑁆𑀢𑀺 (𑀅. 𑀦𑀺. 𑁩.𑁮𑁨) 𑀏𑀢𑁆𑀣 𑀧𑀦 𑀲𑀫𑀡𑁂𑀦 𑀓𑀢𑁆𑀢𑀩𑁆𑀩𑀥𑀫𑁆𑀫𑀸 𑀯𑀼𑀢𑁆𑀢𑀸. 𑀢𑁂𑀧𑀺 𑀘 𑀲𑀫𑀡𑀓𑀭𑀡𑀸 𑀳𑁄𑀦𑁆𑀢𑀺𑀬𑁂𑀯. 𑀇𑀥 𑀧𑀦 𑀳𑀺𑀭𑁄𑀢𑁆𑀢𑀧𑁆𑀧𑀸𑀤𑀺𑀯𑀲𑁂𑀦 𑀤𑁂𑀲𑀦𑀸 𑀯𑀺𑀢𑁆𑀣𑀸𑀭𑀺𑀢𑀸. 𑀏𑀯𑀁 𑀦𑁄 𑀅𑀬𑀁 𑀅𑀫𑁆𑀳𑀸𑀓𑀦𑁆𑀢𑀺 𑀏𑀢𑁆𑀣 𑀦𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀏𑀯𑀁 𑀅𑀬𑀁 𑀅𑀫𑁆𑀳𑀸𑀓𑀦𑁆𑀢𑀺 𑀅𑀢𑁆𑀣𑁄. 𑀫𑀳𑀧𑁆𑀨𑀮𑀸 𑀫𑀳𑀸𑀦𑀺𑀲𑀁𑀲𑀸𑀢𑀺 𑀉𑀪𑀬𑀫𑁆𑀧𑀺 𑀅𑀢𑁆𑀣𑀢𑁄 𑀏𑀓𑀫𑁂𑀯. 𑀅𑀯𑀜𑁆𑀛𑀸𑀢𑀺 𑀅𑀫𑁄𑀖𑀸. 𑀲𑀨𑀮𑀸𑀢𑀺 𑀅𑀬𑀁 𑀢𑀲𑁆𑀲𑁂𑀯 𑀅𑀢𑁆𑀣𑁄. 𑀬𑀲𑁆𑀲𑀸 𑀳𑀺 𑀨𑀮𑀁 𑀦𑀢𑁆𑀣𑀺, 𑀲𑀸 𑀯𑀜𑁆𑀛𑀸 𑀦𑀸𑀫 𑀳𑁄𑀢𑀺. 𑀲𑀉𑀤𑁆𑀭𑀬𑀸𑀢𑀺 𑀲𑀯𑀟𑁆𑀠𑀺, 𑀇𑀤𑀁 𑀲𑀨𑀮𑀢𑀸𑀬 𑀯𑁂𑀯𑀘𑀦𑀁. 𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀏𑀯𑀁 𑀢𑀼𑀫𑁆𑀳𑁂𑀳𑀺 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀇𑀢𑀺 𑀪𑀕𑀯𑀸 𑀇𑀫𑀺𑀦𑀸 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦 𑀳𑀺𑀭𑁄𑀢𑁆𑀢𑀧𑁆𑀧𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀯𑀡𑁆𑀡𑀁 𑀓𑀣𑁂𑀲𑀺. 𑀓𑀲𑁆𑀫𑀸? 𑀯𑀘𑀦𑀧𑀣𑀧𑀘𑁆𑀙𑀺𑀦𑁆𑀤𑀦𑀢𑁆𑀣𑀁. 𑀲𑀘𑁂 𑀳𑀺 𑀓𑁄𑀘𑀺 𑀅𑀘𑀺𑀭𑀧𑀩𑁆𑀩𑀚𑀺𑀢𑁄 𑀩𑀸𑀮𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀪𑀕𑀯𑀸 𑀳𑀺𑀭𑁄𑀢𑁆𑀢𑀧𑁆𑀧𑀸𑀤𑀺𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀣𑀸𑀢𑀺 𑀯𑀤𑀢𑀺, 𑀓𑁄 𑀦𑀼 𑀔𑁄 𑀢𑁂𑀲𑀁 𑀲𑀫𑀸𑀤𑀸𑀬 𑀯𑀢𑁆𑀢𑀦𑁂 𑀆𑀦𑀺𑀲𑀁𑀲𑁄’’𑀢𑀺? 𑀢𑀲𑁆𑀲 𑀯𑀘𑀦𑀧𑀣𑀧𑀘𑁆𑀙𑀺𑀦𑁆𑀤𑀦𑀢𑁆𑀣𑀁. 𑀅𑀬𑀜𑁆𑀘 𑀆𑀦𑀺𑀲𑀁𑀲𑁄, 𑀇𑀫𑁂 𑀳𑀺 𑀥𑀫𑁆𑀫𑀸 𑀲𑀫𑀸𑀤𑀸𑀬 𑀧𑀭𑀺𑀧𑀽𑀭𑀺𑀢𑀸 𑀲𑀫𑀺𑀢𑀧𑀸𑀧𑀲𑀫𑀡𑀁 𑀦𑀸𑀫 𑀩𑀸𑀳𑀺𑀢𑀧𑀸𑀧𑀩𑁆𑀭𑀸𑀳𑁆𑀫𑀡𑀁 𑀦𑀸𑀫 𑀓𑀭𑁄𑀦𑁆𑀢𑀺, 𑀘𑀢𑀼𑀧𑀘𑁆𑀘𑀬𑀮𑀸𑀪𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀧𑀘𑁆𑀘𑀬𑀤𑀸𑀬𑀓𑀸𑀦𑀁 𑀫𑀳𑀧𑁆𑀨𑀮𑀢𑀁 𑀲𑀫𑁆𑀧𑀸𑀤𑁂𑀦𑁆𑀢𑀺, 𑀧𑀩𑁆𑀩𑀚𑁆𑀚𑀁 𑀅𑀯𑀜𑁆𑀛𑀁 𑀲𑀨𑀮𑀁 𑀲𑀉𑀤𑁆𑀭𑀬𑀁 𑀓𑀭𑁄𑀦𑁆𑀢𑀻𑀢𑀺 𑀯𑀡𑁆𑀡𑀁 𑀅𑀪𑀸𑀲𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀯𑀡𑁆𑀡𑀓𑀣𑀸 𑀲𑀢𑀺𑀧𑀝𑁆𑀞𑀸𑀦𑁂 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁭𑁩; 𑀫. 𑀦𑀺. 𑀅𑀝𑁆𑀞. 𑁨.𑁩𑁭𑁩) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑁪𑁧𑁬. 𑀳𑀺𑀭𑁄𑀢𑁆𑀢𑀧𑁆𑀧𑁂𑀦𑀸𑀢𑀺 ‘‘𑀬𑀁 𑀳𑀺𑀭𑀻𑀬𑀢𑀺 𑀳𑀺𑀭𑀻𑀬𑀺𑀢𑀩𑁆𑀩𑁂𑀦, 𑀑𑀢𑁆𑀢𑀧𑁆𑀧𑀢𑀺 𑀑𑀢𑁆𑀢𑀧𑁆𑀧𑀺𑀢𑀩𑁆𑀩𑁂𑀦𑀸’’𑀢𑀺 (𑀥. 𑀲. 𑁧𑁩𑁩𑁧) 𑀏𑀯𑀁 𑀯𑀺𑀢𑁆𑀣𑀸𑀭𑀺𑀢𑀸𑀬 𑀳𑀺𑀭𑀺𑀬𑀸 𑀘𑁂𑀯 𑀑𑀢𑁆𑀢𑀧𑁆𑀧𑁂𑀦 𑀘. 𑀅𑀧𑀺𑀘𑁂𑀢𑁆𑀣 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀳𑀺𑀭𑀻, 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑀁 𑀑𑀢𑁆𑀢𑀧𑁆𑀧𑀁. 𑀅𑀢𑁆𑀢𑀸𑀥𑀺𑀧𑀢𑁂𑀬𑁆𑀬𑀸 𑀳𑀺𑀭𑀻, 𑀮𑁄𑀓𑀸𑀥𑀺𑀧𑀢𑁂𑀬𑁆𑀬𑀁 𑀑𑀢𑁆𑀢𑀧𑁆𑀧𑀁. 𑀮𑀚𑁆𑀚𑀸𑀲𑀪𑀸𑀯𑀲𑀡𑁆𑀞𑀺𑀢𑀸 𑀳𑀺𑀭𑀻, 𑀪𑀬𑀲𑀪𑀸𑀯𑀲𑀡𑁆𑀞𑀺𑀢𑀁 𑀑𑀢𑁆𑀢𑀧𑁆𑀧𑀁, 𑀯𑀺𑀢𑁆𑀣𑀸𑀭𑀓𑀣𑀸 𑀧𑀦𑁂𑀢𑁆𑀣 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀸. 𑀅𑀧𑀺𑀘 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀮𑁄𑀓𑀁 𑀧𑀸𑀮𑀦𑀢𑁄 𑀮𑁄𑀓𑀧𑀸𑀮𑀥𑀫𑁆𑀫𑀸 𑀦𑀸𑀫𑀸𑀢𑀺 𑀓𑀣𑀺𑀢𑀸. 𑀬𑀣𑀸𑀳 𑁋 ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀲𑀼𑀓𑁆𑀓𑀸 𑀥𑀫𑁆𑀫𑀸 𑀮𑁄𑀓𑀁 𑀧𑀸𑀮𑁂𑀦𑁆𑀢𑀺. 𑀓𑀢𑀫𑁂 𑀤𑁆𑀯𑁂? 𑀳𑀺𑀭𑀻 𑀘 𑀑𑀢𑁆𑀢𑀧𑁆𑀧𑀜𑁆𑀘. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀲𑀼𑀓𑁆𑀓𑀸 𑀥𑀫𑁆𑀫𑀸 𑀮𑁄𑀓𑀁 𑀧𑀸𑀮𑁂𑀦𑁆𑀢𑀺. 𑀇𑀫𑁂 𑀘 𑀔𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀲𑀼𑀓𑁆𑀓𑀸 𑀥𑀫𑁆𑀫𑀸 𑀮𑁄𑀓𑀁 𑀦 𑀧𑀸𑀮𑁂𑀬𑁆𑀬𑀼𑀁, 𑀦𑀬𑀺𑀥 𑀧𑀜𑁆𑀜𑀸𑀬𑁂𑀣, ‘𑀫𑀸𑀢𑀸’𑀢𑀺 𑀯𑀸, ‘𑀫𑀸𑀢𑀼𑀘𑁆𑀙𑀸’𑀢𑀺 𑀯𑀸, ‘𑀫𑀸𑀢𑀼𑀮𑀸𑀦𑀻’𑀢𑀺 𑀯𑀸, ‘𑀆𑀘𑀭𑀺𑀬𑀪𑀭𑀺𑀬𑀸’𑀢𑀺 𑀯𑀸, ‘𑀕𑀭𑀽𑀦𑀁 𑀤𑀸𑀭𑀸’𑀢𑀺 𑀯𑀸, 𑀲𑀫𑁆𑀪𑁂𑀤𑀁 𑀮𑁄𑀓𑁄 𑀅𑀕𑀫𑀺𑀲𑁆𑀲, 𑀬𑀣𑀸 𑀅𑀚𑁂𑀴𑀓𑀸 𑀓𑀼𑀓𑁆𑀓𑀼𑀝𑀲𑀽𑀓𑀭𑀸 𑀲𑁄𑀡𑀲𑀺𑀗𑁆𑀕𑀸𑀮𑀸’’𑀢𑀺 (𑀅. 𑀦𑀺. 𑁨.𑁯). 𑀇𑀫𑁂𑀬𑁂𑀯 𑀚𑀸𑀢𑀓𑁂 ‘‘𑀤𑁂𑀯𑀥𑀫𑁆𑀫𑀸’’𑀢𑀺 𑀓𑀣𑀺𑀢𑀸. 𑀬𑀣𑀸𑀳 𑁋

‘‘𑀳𑀺𑀭𑀺𑀑𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑀸, 𑀲𑀼𑀓𑁆𑀓𑀥𑀫𑁆𑀫𑀲𑀫𑀸𑀳𑀺𑀢𑀸;

𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸 𑀮𑁄𑀓𑁂, 𑀤𑁂𑀯𑀥𑀫𑁆𑀫𑀸𑀢𑀺 𑀯𑀼𑀘𑁆𑀘𑀭𑁂’’𑀢𑀺. (𑀚𑀸. 𑁧.𑁧.𑁬);

𑀫𑀳𑀸𑀘𑀼𑀦𑁆𑀤𑀢𑁆𑀣𑁂𑀭𑀲𑁆𑀲 𑀧𑀦 𑀓𑀺𑀮𑁂𑀲𑀲𑀮𑁆𑀮𑁂𑀔𑀦𑀧𑀝𑀺𑀧𑀤𑀸𑀢𑀺 𑀓𑀢𑁆𑀯𑀸 𑀤𑀲𑁆𑀲𑀺𑀢𑀸. 𑀬𑀣𑀸𑀳 𑁋 ‘‘𑀧𑀭𑁂 𑀅𑀳𑀺𑀭𑀺𑀓𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀫𑀬𑀫𑁂𑀢𑁆𑀣 𑀳𑀺𑀭𑀺𑀫𑀦𑀸 𑀪𑀯𑀺𑀲𑁆𑀲𑀸𑀫𑀸𑀢𑀺 𑀲𑀮𑁆𑀮𑁂𑀔𑁄 𑀓𑀭𑀡𑀻𑀬𑁄. 𑀧𑀭𑁂 𑀅𑀦𑁄𑀢𑁆𑀢𑀸𑀧𑀻 𑀪𑀯𑀺𑀲𑁆𑀲𑀦𑁆𑀢𑀺, 𑀫𑀬𑀫𑁂𑀢𑁆𑀣 𑀑𑀢𑁆𑀢𑀸𑀧𑀻 𑀪𑀯𑀺𑀲𑁆𑀲𑀸𑀫𑀸𑀢𑀺 𑀲𑀮𑁆𑀮𑁂𑀔𑁄 𑀓𑀭𑀡𑀻𑀬𑁄’’𑀢𑀺 (𑀫. 𑀦𑀺. 𑁧.𑁮𑁩). 𑀇𑀫𑁂𑀯 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀑𑀯𑀸𑀤𑀽𑀧𑀲𑀫𑁆𑀧𑀤𑀸𑀢𑀺 𑀓𑀢𑁆𑀯𑀸 𑀤𑀲𑁆𑀲𑀺𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀢𑀲𑁆𑀫𑀸 𑀢𑀺𑀳 𑀢𑁂, 𑀓𑀲𑁆𑀲𑀧, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁, 𑀢𑀺𑀩𑁆𑀩𑀁 𑀫𑁂 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀺𑀲𑁆𑀲𑀢𑀺 𑀣𑁂𑀭𑁂𑀲𑀼 𑀦𑀯𑁂𑀲𑀼 𑀫𑀚𑁆𑀛𑀺𑀫𑁂𑀲𑀽𑀢𑀺. 𑀏𑀯𑀜𑁆𑀳𑀺 𑀢𑁂, 𑀓𑀲𑁆𑀲𑀧, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 (𑀲𑀁. 𑀦𑀺. 𑁨.𑁧𑁫𑁪). 𑀇𑀥 𑀧𑀦𑁂𑀢𑁂 𑀲𑀫𑀡𑀥𑀫𑁆𑀫𑀸 𑀦𑀸𑀫𑀸𑀢𑀺 𑀤𑀲𑁆𑀲𑀺𑀢𑀸.

𑀬𑀲𑁆𑀫𑀸 𑀧𑀦 𑀏𑀢𑁆𑀢𑀸𑀯𑀢𑀸 𑀲𑀸𑀫𑀜𑁆𑀜𑀢𑁆𑀣𑁄 𑀫𑀢𑁆𑀣𑀓𑀁 𑀧𑀢𑁆𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀅𑀧𑀭𑁂𑀧𑀺 𑀲𑀫𑀡𑀓𑀭𑀡𑀥𑀫𑁆𑀫𑁂 𑀤𑀲𑁆𑀲𑁂𑀢𑀼𑀁 𑀲𑀺𑀬𑀸 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑀸𑀓𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀸𑀫𑀜𑁆𑀜𑀢𑁆𑀣𑁄𑀢𑀺 𑀲𑀁𑀬𑀼𑀢𑁆𑀢𑀓𑁂 𑀢𑀸𑀯, ‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀸𑀫𑀜𑁆𑀜𑀁? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄. 𑀲𑁂𑀬𑁆𑀬𑀣𑀺𑀤𑀁, 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺, 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀸𑀫𑀜𑁆𑀜𑀁. 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀸𑀫𑀜𑁆𑀜𑀢𑁆𑀣𑁄? 𑀬𑁄, 𑀪𑀺𑀓𑁆𑀔𑀯𑁂, 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀸𑀫𑀜𑁆𑀜𑀢𑁆𑀣𑁄’’𑀢𑀺 (𑀲𑀁. 𑀦𑀺. 𑁫.𑁩𑁬) 𑀫𑀕𑁆𑀕𑁄 ‘‘𑀲𑀸𑀫𑀜𑁆𑀜’’𑀦𑁆𑀢𑀺, 𑀨𑀮𑀦𑀺𑀩𑁆𑀩𑀸𑀦𑀸𑀦𑀺 ‘‘𑀲𑀸𑀫𑀜𑁆𑀜𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀸𑀦𑀺. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀫𑀕𑁆𑀕𑀫𑁆𑀧𑀺 𑀨𑀮𑀫𑁆𑀧𑀺 𑀏𑀓𑀢𑁄 𑀓𑀢𑁆𑀯𑀸 𑀲𑀸𑀫𑀜𑁆𑀜𑀢𑁆𑀣𑁄 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀆𑀭𑁄𑀘𑀬𑀸𑀫𑀻𑀢𑀺 𑀓𑀣𑁂𑀫𑀺. 𑀧𑀝𑀺𑀯𑁂𑀤𑀬𑀸𑀫𑀻𑀢𑀺 𑀚𑀸𑀦𑀸𑀧𑁂𑀫𑀺.

𑁪𑁧𑁭. 𑀧𑀭𑀺𑀲𑀼𑀤𑁆𑀥𑁄 𑀦𑁄 𑀓𑀸𑀬𑀲𑀫𑀸𑀘𑀸𑀭𑁄𑀢𑀺 𑀏𑀢𑁆𑀣 𑀓𑀸𑀬𑀲𑀫𑀸𑀘𑀸𑀭𑁄 𑀧𑀭𑀺𑀲𑀼𑀤𑁆𑀥𑁄 𑀅𑀧𑀭𑀺𑀲𑀼𑀤𑁆𑀥𑁄𑀢𑀺 𑀤𑀼𑀯𑀺𑀥𑁄. 𑀬𑁄 𑀳𑀺 𑀪𑀺𑀓𑁆𑀔𑀼 𑀧𑀸𑀡𑀁 𑀳𑀦𑀢𑀺 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺, 𑀓𑀸𑀫𑁂𑀲𑀼 𑀫𑀺𑀘𑁆𑀙𑀸 𑀘𑀭𑀢𑀺, 𑀢𑀲𑁆𑀲 𑀓𑀸𑀬𑀲𑀫𑀸𑀘𑀸𑀭𑁄 𑀅𑀧𑀭𑀺𑀲𑀼𑀤𑁆𑀥𑁄 𑀦𑀸𑀫, 𑀅𑀬𑀁 𑀧𑀦 𑀓𑀫𑁆𑀫𑀧𑀣𑀯𑀲𑁂𑀦𑁂𑀯 𑀯𑀸𑀭𑀺𑀢𑁄. 𑀬𑁄 𑀧𑀦 𑀧𑀸𑀡𑀺𑀦𑀸 𑀯𑀸 𑀮𑁂𑀟𑁆𑀟𑀼𑀦𑀸 𑀯𑀸 𑀤𑀡𑁆𑀟𑁂𑀦 𑀯𑀸 𑀲𑀢𑁆𑀣𑁂𑀦 𑀯𑀸 𑀧𑀭𑀁 𑀧𑁄𑀣𑁂𑀢𑀺 𑀯𑀺𑀳𑁂𑀞𑁂𑀢𑀺, 𑀢𑀲𑁆𑀲 𑀓𑀸𑀬𑀲𑀫𑀸𑀘𑀸𑀭𑁄 𑀅𑀧𑀭𑀺𑀲𑀼𑀤𑁆𑀥𑁄 𑀦𑀸𑀫, 𑀅𑀬𑀫𑁆𑀧𑀺 𑀲𑀺𑀓𑁆𑀔𑀸𑀧𑀤𑀩𑀤𑁆𑀥𑁂𑀦𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀉𑀪𑀬𑀫𑁆𑀧𑁂𑀢𑀁 𑀅𑀓𑀣𑁂𑀢𑁆𑀯𑀸 𑀧𑀭𑀫𑀲𑀮𑁆𑀮𑁂𑀔𑁄 𑀦𑀸𑀫 𑀓𑀣𑀺𑀢𑁄. 𑀬𑁄 𑀳𑀺 𑀪𑀺𑀓𑁆𑀔𑀼 𑀧𑀸𑀦𑀻𑀬𑀖𑀝𑁂 𑀯𑀸 𑀧𑀸𑀦𑀻𑀬𑀁 𑀧𑀺𑀯𑀦𑁆𑀢𑀸𑀦𑀁, 𑀧𑀢𑁆𑀢𑁂 𑀯𑀸 𑀪𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑀸𑀦𑀁 𑀓𑀸𑀓𑀸𑀦𑀁 𑀦𑀺𑀯𑀸𑀭𑀡𑀯𑀲𑁂𑀦 𑀳𑀢𑁆𑀣𑀁 𑀯𑀸 𑀤𑀡𑁆𑀟𑀁 𑀯𑀸 𑀮𑁂𑀟𑁆𑀟𑀼𑀁 𑀯𑀸 𑀉𑀕𑁆𑀕𑀺𑀭𑀢𑀺, 𑀢𑀲𑁆𑀲 𑀓𑀸𑀬𑀲𑀫𑀸𑀘𑀸𑀭𑁄 𑀅𑀧𑀭𑀺𑀲𑀼𑀤𑁆𑀥𑁄. 𑀯𑀺𑀧𑀭𑀻𑀢𑁄 𑀧𑀭𑀺𑀲𑀼𑀤𑁆𑀥𑁄 𑀦𑀸𑀫. 𑀉𑀢𑁆𑀢𑀸𑀦𑁄𑀢𑀺 𑀉𑀕𑁆𑀕𑀢𑁄 𑀧𑀸𑀓𑀝𑁄. 𑀯𑀺𑀯𑀝𑁄𑀢𑀺 𑀅𑀦𑀸𑀯𑀝𑁄 𑀅𑀲𑀜𑁆𑀙𑀦𑁆𑀦𑁄. 𑀉𑀪𑀬𑁂𑀦𑀸𑀧𑀺 𑀧𑀭𑀺𑀲𑀼𑀤𑁆𑀥𑀢𑀁𑀬𑁂𑀯 𑀤𑀻𑀧𑁂𑀢𑀺. 𑀦 𑀘 𑀙𑀺𑀤𑁆𑀤𑀯𑀸𑀢𑀺 𑀲𑀤𑀸 𑀏𑀓𑀲𑀤𑀺𑀲𑁄 𑀅𑀦𑁆𑀢𑀭𑀦𑁆𑀢𑀭𑁂 𑀙𑀺𑀤𑁆𑀤𑀭𑀳𑀺𑀢𑁄. 𑀲𑀁𑀯𑀼𑀢𑁄𑀢𑀺 𑀓𑀺𑀮𑁂𑀲𑀸𑀦𑀁 𑀤𑁆𑀯𑀸𑀭 𑀧𑀺𑀤𑀳𑀦𑁂𑀦 𑀧𑀺𑀤𑀳𑀺𑀢𑁄, 𑀦 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀸𑀬.

𑁪𑁧𑁮. 𑀯𑀘𑀻𑀲𑀫𑀸𑀘𑀸𑀭𑁂𑀧𑀺 𑀬𑁄 𑀪𑀺𑀓𑁆𑀔𑀼 𑀫𑀼𑀲𑀸 𑀯𑀤𑀢𑀺, 𑀧𑀺𑀲𑀼𑀡𑀁 𑀓𑀣𑁂𑀢𑀺, 𑀨𑀭𑀼𑀲𑀁 𑀪𑀸𑀲𑀢𑀺, 𑀲𑀫𑁆𑀨𑀁 𑀧𑀮𑀧𑀢𑀺, 𑀢𑀲𑁆𑀲 𑀯𑀘𑀻𑀲𑀫𑀸𑀘𑀸𑀭𑁄 𑀅𑀧𑀭𑀺𑀲𑀼𑀤𑁆𑀥𑁄 𑀦𑀸𑀫. 𑀅𑀬𑀁 𑀧𑀦 𑀓𑀫𑁆𑀫𑀧𑀣𑀯𑀲𑁂𑀦 𑀯𑀸𑀭𑀺𑀢𑁄. 𑀬𑁄 𑀧𑀦 𑀕𑀳𑀧𑀢𑀺𑀓𑀸𑀢𑀺 𑀯𑀸 𑀤𑀸𑀲𑀸𑀢𑀺 𑀯𑀸 𑀧𑁂𑀲𑁆𑀲𑀸𑀢𑀺 𑀯𑀸 𑀆𑀤𑀻𑀳𑀺 𑀔𑀼𑀁𑀲𑁂𑀦𑁆𑀢𑁄 𑀯𑀤𑀢𑀺, 𑀢𑀲𑁆𑀲 𑀯𑀘𑀻𑀲𑀫𑀸𑀘𑀸𑀭𑁄 𑀅𑀧𑀭𑀺𑀲𑀼𑀤𑁆𑀥𑁄 𑀦𑀸𑀫. 𑀅𑀬𑀁 𑀧𑀦 𑀲𑀺𑀓𑁆𑀔𑀸𑀧𑀤𑀩𑀤𑁆𑀥𑁂𑀦𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀉𑀪𑀬𑀫𑁆𑀧𑁂𑀢𑀁 𑀅𑀓𑀣𑁂𑀢𑁆𑀯𑀸 𑀧𑀭𑀫𑀲𑀮𑁆𑀮𑁂𑀔𑁄 𑀦𑀸𑀫 𑀓𑀣𑀺𑀢𑁄. 𑀬𑁄 𑀳𑀺 𑀪𑀺𑀓𑁆𑀔𑀼 𑀤𑀳𑀭𑁂𑀦 𑀯𑀸 𑀲𑀸𑀫𑀡𑁂𑀭𑁂𑀦 𑀯𑀸, ‘‘𑀓𑀘𑁆𑀘𑀺, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑀁 𑀧𑀲𑁆𑀲𑀣𑀸’’𑀢𑀺 𑀯𑀼𑀢𑁆𑀢𑁂, 𑀲𑀫𑁆𑀩𑀳𑀼𑀮𑀸, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀪𑀺𑀓𑁆𑀔𑀼𑀦𑀺𑀬𑁄 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀯𑀺𑀘𑀤𑀺𑀁𑀲𑀼, 𑀉𑀧𑀚𑁆𑀛𑀸𑀬𑁄 𑀢𑁂 𑀯𑀺𑀓𑁆𑀓𑀸𑀬𑀺𑀓𑀲𑀸𑀓𑀪𑀡𑁆𑀟𑀺𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀳𑀲𑀸𑀥𑀺𑀧𑁆𑀧𑀸𑀬𑁄𑀧𑀺 𑀏𑀯𑀭𑀽𑀧𑀁 𑀓𑀣𑀁 𑀓𑀣𑁂𑀢𑀺, 𑀢𑀲𑁆𑀲 𑀯𑀘𑀻𑀲𑀫𑀸𑀘𑀸𑀭𑁄 𑀅𑀧𑀭𑀺𑀲𑀼𑀤𑁆𑀥𑁄. 𑀯𑀺𑀧𑀭𑀻𑀢𑁄 𑀧𑀭𑀺𑀲𑀼𑀤𑁆𑀥𑁄 𑀦𑀸𑀫.

𑁪𑁧𑁯. 𑀫𑀦𑁄𑀲𑀫𑀸𑀘𑀸𑀭𑁂 𑀬𑁄 𑀪𑀺𑀓𑁆𑀔𑀼 𑀅𑀪𑀺𑀚𑁆𑀛𑀸𑀮𑀼 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀳𑁄𑀢𑀺, 𑀢𑀲𑁆𑀲 𑀫𑀦𑁄𑀲𑀫𑀸𑀘𑀸𑀭𑁄 𑀅𑀧𑀭𑀺𑀲𑀼𑀤𑁆𑀥𑁄 𑀦𑀸𑀫. 𑀅𑀬𑀁 𑀧𑀦 𑀓𑀫𑁆𑀫𑀧𑀣𑀯𑀲𑁂𑀦𑁂𑀯 𑀯𑀸𑀭𑀺𑀢𑁄. 𑀬𑁄 𑀧𑀦 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀚𑀸𑀢𑀭𑀽𑀧𑀭𑀚𑀢𑀁 𑀲𑀸𑀤𑀺𑀬𑀢𑀺, 𑀢𑀲𑁆𑀲 𑀫𑀦𑁄𑀲𑀫𑀸𑀘𑀸𑀭𑁄 𑀅𑀧𑀭𑀺𑀲𑀼𑀤𑁆𑀥𑁄 𑀦𑀸𑀫. 𑀅𑀬𑀫𑁆𑀧𑀺 𑀲𑀺𑀓𑁆𑀔𑀸𑀧𑀤𑀩𑀤𑁆𑀥𑁂𑀦𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀉𑀪𑀬𑀫𑁆𑀧𑁂𑀢𑀁 𑀅𑀓𑀣𑁂𑀢𑁆𑀯𑀸 𑀧𑀭𑀫𑀲𑀮𑁆𑀮𑁂𑀔𑁄 𑀦𑀸𑀫 𑀓𑀣𑀺𑀢𑁄. 𑀬𑁄 𑀧𑀦 𑀪𑀺𑀓𑁆𑀔𑀼 𑀓𑀸𑀫𑀯𑀺𑀢𑀓𑁆𑀓𑀁 𑀯𑀸 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁 𑀯𑀸 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁 𑀯𑀸 𑀯𑀺𑀢𑀓𑁆𑀓𑁂𑀢𑀺, 𑀢𑀲𑁆𑀲 𑀫𑀦𑁄𑀲𑀫𑀸𑀘𑀸𑀭𑁄 𑀅𑀧𑀭𑀺𑀲𑀼𑀤𑁆𑀥𑁄. 𑀯𑀺𑀧𑀭𑀻𑀢𑁄 𑀧𑀭𑀺𑀲𑀼𑀤𑁆𑀥𑁄 𑀦𑀸𑀫.

𑁪𑁨𑁦. 𑀆𑀚𑀻𑀯𑀲𑁆𑀫𑀺𑀁 𑀬𑁄 𑀪𑀺𑀓𑁆𑀔𑀼 𑀆𑀚𑀻𑀯𑀳𑁂𑀢𑀼 𑀯𑁂𑀚𑁆𑀚𑀓𑀫𑁆𑀫𑀁 𑀧𑀳𑀺𑀡𑀕𑀫𑀦𑀁 𑀕𑀡𑁆𑀟𑀨𑀸𑀮𑀦𑀁 𑀓𑀭𑁄𑀢𑀺, 𑀅𑀭𑀼𑀫𑀓𑁆𑀔𑀦𑀁 𑀤𑁂𑀢𑀺, 𑀢𑁂𑀮𑀁 𑀧𑀘𑀢𑀻𑀢𑀺 𑀏𑀓𑀯𑀻𑀲𑀢𑀺𑀅𑀦𑁂𑀲𑀦𑀸𑀯𑀲𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺. 𑀬𑁄 𑀯𑀸 𑀧𑀦 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀢𑀲𑁆𑀲 𑀆𑀚𑀻𑀯𑁄 𑀅𑀧𑀭𑀺𑀲𑀼𑀤𑁆𑀥𑁄 𑀦𑀸𑀫. 𑀅𑀬𑀁 𑀧𑀦 𑀲𑀺𑀓𑁆𑀔𑀸𑀧𑀤𑀩𑀤𑁆𑀥𑁂𑀦𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀉𑀪𑀬𑀫𑁆𑀧𑁂𑀢𑀁 𑀅𑀓𑀣𑁂𑀢𑁆𑀯𑀸 𑀧𑀭𑀫𑀲𑀮𑁆𑀮𑁂𑀔𑁄 𑀦𑀸𑀫 𑀓𑀣𑀺𑀢𑁄. 𑀬𑁄 𑀳𑀺 𑀪𑀺𑀓𑁆𑀔𑀼 𑀲𑀧𑁆𑀧𑀺𑀦𑀯𑀦𑀻𑀢𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀮𑀪𑀺𑀢𑁆𑀯𑀸, ‘‘𑀲𑁆𑀯𑁂 𑀯𑀸 𑀧𑀼𑀦𑀤𑀺𑀯𑀲𑁂 𑀯𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀬𑁄 𑀯𑀸 𑀧𑀦 𑀦𑀺𑀫𑁆𑀩𑀗𑁆𑀓𑀼𑀭𑀸𑀤𑀻𑀦𑀺 𑀤𑀺𑀲𑁆𑀯𑀸 𑀲𑀸𑀫𑀡𑁂𑀭𑁂 𑀯𑀤𑀢𑀺 𑁋 ‘‘𑀅𑀁𑀗𑁆𑀓𑀼𑀭𑁂 𑀔𑀸𑀤𑀣𑀸’’𑀢𑀺, 𑀲𑀸𑀫𑀡𑁂𑀭𑀸 𑀣𑁂𑀭𑁄 𑀔𑀸𑀤𑀺𑀢𑀼𑀓𑀸𑀫𑁄𑀢𑀺 𑀓𑀧𑁆𑀧𑀺𑀬𑀁 𑀓𑀢𑁆𑀯𑀸 𑀤𑁂𑀦𑁆𑀢𑀺, 𑀤𑀳𑀭𑁂 𑀧𑀦 𑀲𑀸𑀫𑀡𑁂𑀭𑁂 𑀯𑀸 𑀧𑀸𑀦𑀻𑀬𑀁 𑀧𑀺𑀯𑀣, 𑀆𑀯𑀼𑀲𑁄𑀢𑀺 𑀯𑀤𑀢𑀺, 𑀢𑁂 𑀣𑁂𑀭𑁄 𑀧𑀸𑀦𑀻𑀬𑀁 𑀧𑀺𑀯𑀺𑀢𑀼𑀓𑀸𑀫𑁄𑀢𑀺 𑀧𑀸𑀦𑀻𑀬𑀲𑀗𑁆𑀔𑀁 𑀥𑁄𑀯𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀢𑀫𑁆𑀧𑀺 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀆𑀚𑀻𑀯𑁄 𑀅𑀧𑀭𑀺𑀲𑀼𑀤𑁆𑀥𑁄 𑀦𑀸𑀫 𑀳𑁄𑀢𑀺. 𑀯𑀺𑀧𑀭𑀻𑀢𑁄 𑀧𑀭𑀺𑀲𑀼𑀤𑁆𑀥𑁄 𑀦𑀸𑀫.

𑁪𑁨𑁨. 𑀫𑀢𑁆𑀢𑀜𑁆𑀜𑀽𑀢𑀺 𑀧𑀭𑀺𑀬𑁂𑀲𑀦𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑁂𑀲𑀼 𑀫𑀢𑁆𑀢𑀜𑁆𑀜𑀽, 𑀬𑀼𑀢𑁆𑀢𑀜𑁆𑀜𑀽, 𑀧𑀫𑀸𑀡𑀜𑁆𑀜𑀽.

𑁪𑁨𑁩. 𑀚𑀸𑀕𑀭𑀺𑀬𑀫𑀦𑀼𑀬𑀼𑀢𑁆𑀢𑀸𑀢𑀺 𑀭𑀢𑁆𑀢𑀺𑀦𑁆𑀤𑀺𑀯𑀁 𑀙 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀏𑀓𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀦𑀺𑀤𑁆𑀤𑀸𑀬 𑀑𑀓𑀸𑀲𑀁 𑀤𑀢𑁆𑀯𑀸 𑀧𑀜𑁆𑀘 𑀓𑁄𑀝𑁆𑀞𑀸𑀲𑁂 𑀚𑀸𑀕𑀭𑀺𑀬𑀫𑁆𑀳𑀺 𑀬𑀼𑀢𑁆𑀢𑀸 𑀧𑀬𑀼𑀢𑁆𑀢𑀸. 𑀲𑀻𑀳𑀲𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀓𑀸𑀫𑀪𑁄𑀕𑀺𑀲𑁂𑀬𑁆𑀬𑀸, 𑀧𑁂𑀢𑀲𑁂𑀬𑁆𑀬𑀸, 𑀲𑀻𑀳𑀲𑁂𑀬𑁆𑀬𑀸, 𑀢𑀣𑀸𑀕𑀢𑀲𑁂𑀬𑁆𑀬𑀸𑀢𑀺 𑀘𑀢𑀲𑁆𑀲𑁄 𑀲𑁂𑀬𑁆𑀬𑀸. 𑀢𑀢𑁆𑀣 ‘‘𑀬𑁂𑀪𑀼𑀬𑁆𑀬𑁂𑀦, 𑀪𑀺𑀓𑁆𑀔𑀯𑁂, 𑀓𑀸𑀫𑀪𑁄𑀕𑀻 𑀲𑀢𑁆𑀢𑀸 𑀯𑀸𑀫𑁂𑀦 𑀧𑀲𑁆𑀲𑁂𑀦 𑀲𑁂𑀦𑁆𑀢𑀻’’𑀢𑀺 (𑀅. 𑀦𑀺. 𑁪.𑁨𑁪𑁬) 𑀅𑀬𑀁 𑀓𑀸𑀫𑀪𑁄𑀕𑀺𑀲𑁂𑀬𑁆𑀬𑀸, 𑀢𑁂𑀲𑀼 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀤𑀓𑁆𑀔𑀺𑀡𑀧𑀲𑁆𑀲𑁂𑀦 𑀲𑀬𑀸𑀦𑁄 𑀦𑀸𑀫 𑀦𑀢𑁆𑀣𑀺.

‘‘𑀬𑁂𑀪𑀼𑀬𑁆𑀬𑁂𑀦, 𑀪𑀺𑀓𑁆𑀔𑀯𑁂, 𑀧𑁂𑀢𑀸 𑀉𑀢𑁆𑀢𑀸𑀦𑀸 𑀲𑁂𑀦𑁆𑀢𑀻’’𑀢𑀺 (𑀅. 𑀦𑀺. 𑁪.𑁨𑁪𑁬) 𑀅𑀬𑀁 𑀧𑁂𑀢𑀲𑁂𑀬𑁆𑀬𑀸, 𑀧𑁂𑀢𑀸 𑀳𑀺 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑀢𑁆𑀢𑀸 𑀅𑀝𑁆𑀞𑀺𑀲𑀗𑁆𑀖𑀸𑀢𑀚𑀝𑀺𑀢𑀸 𑀏𑀓𑁂𑀦 𑀧𑀲𑁆𑀲𑁂𑀦 𑀲𑀬𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀉𑀢𑁆𑀢𑀸𑀦𑀸𑀯 𑀲𑁂𑀦𑁆𑀢𑀺.

‘‘𑀬𑁂𑀪𑀼𑀬𑁆𑀬𑁂𑀦, 𑀪𑀺𑀓𑁆𑀔𑀯𑁂, 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀦𑀗𑁆𑀕𑀼𑀝𑁆𑀞𑀁 𑀅𑀦𑁆𑀢𑀭𑀲𑀢𑁆𑀣𑀺𑀫𑁆𑀳𑀺 𑀅𑀦𑀼𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑁂𑀢𑀻’’𑀢𑀺 (𑀅. 𑀦𑀺. 𑁪.𑁨𑁪𑁬) 𑀅𑀬𑀁 𑀲𑀻𑀳𑀲𑁂𑀬𑁆𑀬𑀸. 𑀢𑁂𑀚𑀼𑀲𑁆𑀲𑀤𑀢𑁆𑀢𑀸 𑀳𑀺 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀤𑁆𑀯𑁂 𑀧𑀼𑀭𑀺𑀫𑀧𑀸𑀤𑁂 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀧𑀘𑁆𑀙𑀺𑀫𑀧𑀸𑀤𑁂 𑀏𑀓𑀲𑁆𑀫𑀺𑀁 𑀞𑀧𑁂𑀢𑁆𑀯𑀸 𑀦𑀗𑁆𑀕𑀼𑀝𑁆𑀞𑀁 𑀅𑀦𑁆𑀢𑀭𑀲𑀢𑁆𑀣𑀺𑀫𑁆𑀳𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀭𑀺𑀫𑀧𑀸𑀤𑀧𑀘𑁆𑀙𑀺𑀫𑀧𑀸𑀤𑀦𑀗𑁆𑀕𑀼𑀝𑁆𑀞𑀸𑀦𑀁 𑀞𑀺𑀢𑁄𑀓𑀸𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀧𑀼𑀭𑀺𑀫𑀧𑀸𑀤𑀸𑀦𑀁 𑀫𑀢𑁆𑀣𑀓𑁂 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀲𑀬𑀢𑀺. 𑀤𑀺𑀯𑀲𑀫𑁆𑀧𑀺 𑀲𑀬𑀺𑀢𑁆𑀯𑀸 𑀧𑀩𑀼𑀚𑁆𑀛𑀫𑀸𑀦𑁄 𑀦 𑀉𑀢𑁆𑀭𑀸𑀲𑀦𑁆𑀢𑁄 𑀧𑀩𑀼𑀚𑁆𑀛𑀢𑀺. 𑀲𑀻𑀲𑀁 𑀧𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀭𑀺𑀫𑀧𑀸𑀤𑀸𑀦𑀁 𑀞𑀺𑀢𑁄𑀓𑀸𑀲𑀁 𑀲𑀮𑁆𑀮𑀓𑁆𑀔𑁂𑀢𑀺. 𑀲𑀘𑁂 𑀓𑀺𑀜𑁆𑀘𑀺 𑀞𑀸𑀦𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑀁 𑀳𑁄𑀢𑀺, ‘‘𑀦𑀬𑀺𑀤𑀁 𑀢𑀼𑀬𑁆𑀳𑀁 𑀚𑀸𑀢𑀺𑀬𑀸, 𑀦 𑀲𑀽𑀭𑀪𑀸𑀯𑀲𑁆𑀲 𑀘 𑀅𑀦𑀼𑀭𑀽𑀧’’𑀦𑁆𑀢𑀺 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 𑀢𑀢𑁆𑀣𑁂𑀯 𑀲𑀬𑀢𑀺, 𑀦 𑀕𑁄𑀘𑀭𑀸𑀬 𑀧𑀓𑁆𑀓𑀫𑀢𑀺. 𑀅𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁂 𑀧𑀦 ‘‘𑀢𑀼𑀬𑁆𑀳𑀁 𑀚𑀸𑀢𑀺𑀬𑀸 𑀲𑀽𑀭𑀪𑀸𑀯𑀲𑁆𑀲 𑀘 𑀅𑀦𑀼𑀭𑀽𑀧𑀫𑀺𑀤’’𑀦𑁆𑀢𑀺 𑀳𑀝𑁆𑀞𑀢𑀼𑀝𑁆𑀞𑁄 𑀉𑀝𑁆𑀞𑀸𑀬 𑀲𑀻𑀳𑀯𑀺𑀚𑀫𑁆𑀪𑀺𑀢𑀁 𑀯𑀺𑀚𑀫𑁆𑀪𑀺𑀢𑁆𑀯𑀸 𑀓𑁂𑀲𑀭𑀪𑀸𑀭𑀁 𑀯𑀺𑀥𑀼𑀦𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀕𑁄𑀘𑀭𑀸𑀬 𑀧𑀓𑁆𑀓𑀫𑀢𑀺. 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁂𑀬𑁆𑀬𑀸 𑀧𑀦 𑀢𑀣𑀸𑀕𑀢𑀲𑁂𑀬𑁆𑀬𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀸𑀲𑀼 𑀇𑀥 𑀲𑀻𑀳𑀲𑁂𑀬𑁆𑀬𑀸 𑀆𑀕𑀢𑀸. 𑀅𑀬𑀜𑁆𑀳𑀺 𑀢𑁂𑀚𑀼𑀲𑁆𑀲𑀤𑀇𑀭𑀺𑀬𑀸𑀧𑀣𑀢𑁆𑀢𑀸 𑀉𑀢𑁆𑀢𑀫𑀲𑁂𑀬𑁆𑀬𑀸 𑀦𑀸𑀫. 𑀧𑀸𑀤𑁂 𑀧𑀸𑀤𑀦𑁆𑀢𑀺 𑀤𑀓𑁆𑀔𑀺𑀡𑀧𑀸𑀤𑁂 𑀯𑀸𑀫𑀧𑀸𑀤𑀁. 𑀅𑀘𑁆𑀘𑀸𑀥𑀸𑀬𑀸𑀢𑀺 𑀅𑀢𑀺𑀆𑀥𑀸𑀬 𑀈𑀲𑀓𑀁 𑀅𑀢𑀺𑀓𑁆𑀓𑀫𑁆𑀫 𑀞𑀧𑁂𑀢𑁆𑀯𑀸, 𑀕𑁄𑀧𑁆𑀨𑀓𑁂𑀦 𑀳𑀺 𑀕𑁄𑀧𑁆𑀨𑀓𑁂, 𑀚𑀸𑀡𑀼𑀦𑀸 𑀯𑀸 𑀚𑀸𑀡𑀼𑀫𑁆𑀳𑀺 𑀲𑀗𑁆𑀖𑀝𑁆𑀝𑀺𑀬𑀫𑀸𑀦𑁂 𑀅𑀪𑀺𑀡𑁆𑀳𑀁 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀦 𑀳𑁄𑀢𑀺, 𑀲𑁂𑀬𑁆𑀬𑀸 𑀅𑀨𑀸𑀲𑀼𑀓𑀸 𑀳𑁄𑀢𑀺. 𑀬𑀣𑀸 𑀧𑀦 𑀦 𑀲𑀗𑁆𑀖𑀝𑁆𑀝𑁂𑀢𑀺, 𑀏𑀯𑀁 𑀅𑀢𑀺𑀓𑁆𑀓𑀫𑁆𑀫 𑀞𑀧𑀺𑀢𑁂 𑀯𑁂𑀤𑀦𑀸 𑀦𑀼𑀧𑁆𑀧𑀚𑁆𑀚𑀢𑀺, 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺, 𑀲𑁂𑀬𑁆𑀬𑀸 𑀨𑀸𑀲𑀼𑀓𑀸 𑀳𑁄𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳.

𑁪𑁨𑁫. 𑀅𑀪𑀺𑀚𑁆𑀛𑀁 𑀮𑁄𑀓𑁂𑀢𑀺𑀆𑀤𑀺 𑀘𑀽𑀴𑀳𑀢𑁆𑀣𑀺𑀧𑀤𑁂 𑀯𑀺𑀢𑁆𑀣𑀸𑀭𑀺𑀢𑀁.

𑁪𑁨𑁬. 𑀬𑀸 𑀧𑀦𑀸𑀬𑀁 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂𑀢𑀺 𑀉𑀧𑀫𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀇𑀡𑀁 𑀆𑀤𑀸𑀬𑀸𑀢𑀺 𑀯𑀟𑁆𑀠𑀺𑀬𑀸 𑀥𑀦𑀁 𑀕𑀳𑁂𑀢𑁆𑀯𑀸. 𑀩𑁆𑀬𑀦𑁆𑀢𑀻 𑀓𑀭𑁂𑀬𑁆𑀬𑀸𑀢𑀺 𑀯𑀺𑀕𑀢𑀦𑁆𑀢𑀸𑀦𑀺 𑀓𑀭𑁂𑀬𑁆𑀬. 𑀬𑀣𑀸 𑀢𑁂𑀲𑀁 𑀓𑀸𑀓𑀡𑀺𑀓𑀫𑀢𑁆𑀢𑁄𑀧𑀺 𑀧𑀭𑀺𑀬𑀦𑁆𑀢𑁄 𑀦𑀸𑀫 𑀦𑀸𑀯𑀲𑀺𑀲𑁆𑀲𑀢𑀺, 𑀏𑀯𑀁 𑀓𑀭𑁂𑀬𑁆𑀬, 𑀲𑀩𑁆𑀩𑀲𑁄 𑀧𑀝𑀺𑀦𑀺𑀬𑁆𑀬𑀸𑀢𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁄𑀦𑀺𑀤𑀸𑀦𑀦𑁆𑀢𑀺 𑀆𑀡𑀡𑁆𑀬𑀦𑀺𑀤𑀸𑀦𑀁. 𑀲𑁄 𑀳𑀺 𑀅𑀡𑀡𑁄𑀫𑁆𑀳𑀻𑀢𑀺 𑀆𑀯𑀚𑁆𑀚𑀦𑁆𑀢𑁄 𑀩𑀮𑀯𑀧𑀸𑀫𑁄𑀚𑁆𑀚𑀁 𑀮𑀪𑀢𑀺, 𑀩𑀮𑀯𑀲𑁄𑀫𑀦𑀲𑁆𑀲𑀫𑀥𑀺𑀕𑀘𑁆𑀙𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀮𑀪𑁂𑀣 𑀧𑀸𑀫𑁄𑀚𑁆𑀚𑀁, 𑀅𑀥𑀺𑀕𑀘𑁆𑀙𑁂𑀬𑁆𑀬 𑀲𑁄𑀫𑀦𑀲𑁆𑀲’’𑀦𑁆𑀢𑀺.

𑀯𑀺𑀲𑀪𑀸𑀕𑀯𑁂𑀤𑀦𑀼𑀧𑁆𑀧𑀢𑁆𑀢𑀺𑀬𑀸 𑀓𑀓𑀘𑁂𑀦𑁂𑀯 𑀘𑀢𑀼𑀇𑀭𑀺𑀬𑀸𑀧𑀣𑀁 𑀙𑀺𑀦𑁆𑀤𑀦𑁆𑀢𑁄 𑀆𑀩𑀸𑀥𑀢𑀻𑀢𑀺 𑀆𑀩𑀸𑀥𑁄, 𑀲𑁆𑀯𑀸𑀲𑁆𑀲 𑀅𑀢𑁆𑀣𑀻𑀢𑀺 𑀆𑀩𑀸𑀥𑀺𑀓𑁄. 𑀢𑀁𑀲𑀫𑀼𑀝𑁆𑀞𑀸𑀦𑁂𑀦 𑀤𑀼𑀓𑁆𑀔𑁂𑀦 𑀤𑀼𑀓𑁆𑀔𑀺𑀢𑁄. 𑀅𑀥𑀺𑀫𑀢𑁆𑀢𑀕𑀺𑀮𑀸𑀦𑁄𑀢𑀺 𑀩𑀸𑀴𑁆𑀳𑀕𑀺𑀮𑀸𑀦𑁄. 𑀦𑀘𑁆𑀙𑀸𑀤𑁂𑀬𑁆𑀬𑀸𑀢𑀺 𑀅𑀥𑀺𑀫𑀢𑁆𑀢𑀩𑁆𑀬𑀸𑀥𑀺𑀧𑀭𑁂𑀢𑀢𑀸𑀬 𑀦 𑀭𑀼𑀘𑁆𑀘𑁂𑀬𑁆𑀬. 𑀩𑀮𑀫𑀢𑁆𑀢𑀸𑀢𑀺 𑀩𑀮𑀫𑁂𑀯, 𑀩𑀮𑀜𑁆𑀘𑀲𑁆𑀲 𑀓𑀸𑀬𑁂 𑀦 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁄𑀦𑀺𑀤𑀸𑀦𑀦𑁆𑀢𑀺 𑀆𑀭𑁄𑀕𑁆𑀬𑀦𑀺𑀤𑀸𑀦𑀁, 𑀢𑀲𑁆𑀲 𑀳𑀺 𑀅𑀭𑁄𑀕𑁄𑀫𑁆𑀳𑀻𑀢𑀺 𑀆𑀯𑀚𑁆𑀚𑀬𑀢𑁄 𑀢𑀤𑀼𑀪𑀬𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀮𑀪𑁂𑀣 𑀧𑀸𑀫𑁄𑀚𑁆𑀚𑀁, 𑀅𑀥𑀺𑀕𑀘𑁆𑀙𑁂𑀬𑁆𑀬 𑀲𑁄𑀫𑀦𑀲𑁆𑀲’’𑀦𑁆𑀢𑀺. 𑀦 𑀘𑀲𑁆𑀲 𑀓𑀺𑀜𑁆𑀘𑀺 𑀪𑁄𑀕𑀸𑀦𑀁 𑀯𑀬𑁄𑀢𑀺 𑀓𑀸𑀓𑀡𑀺𑀓𑀫𑀢𑁆𑀢𑀫𑁆𑀧𑀺 𑀪𑁄𑀕𑀸𑀦𑀁 𑀯𑀬𑁄 𑀦 𑀪𑀯𑁂𑀬𑁆𑀬. 𑀢𑀢𑁄𑀦𑀺𑀤𑀸𑀦𑀦𑁆𑀢𑀺 𑀩𑀦𑁆𑀥𑀦𑀸𑀫𑁄𑀓𑁆𑀔𑀦𑀺𑀤𑀸𑀦𑀁, 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀩𑁆𑀩𑀧𑀤𑁂𑀲𑀼 𑀬𑁄𑀚𑁂𑀢𑀩𑁆𑀩𑀁. 𑀅𑀦𑀢𑁆𑀢𑀸𑀥𑀻𑀦𑁄𑀢𑀺 𑀦 𑀅𑀢𑁆𑀢𑀦𑀺 𑀅𑀥𑀻𑀦𑁄, 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀓𑀺𑀜𑁆𑀘𑀺 𑀓𑀸𑀢𑀼𑀁 𑀦 𑀮𑀪𑀢𑀺. 𑀧𑀭𑀸𑀥𑀻𑀦𑁄𑀢𑀺 𑀧𑀭𑁂𑀲𑀼 𑀅𑀥𑀻𑀦𑁄, 𑀧𑀭𑀲𑁆𑀲𑁂𑀯 𑀭𑀼𑀘𑀺𑀬𑀸 𑀧𑀯𑀢𑁆𑀢𑀢𑀺. 𑀦 𑀬𑁂𑀦 𑀓𑀸𑀫𑀁 𑀕𑀫𑁄𑀢𑀺 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦𑀲𑁆𑀲 𑀓𑀸𑀫𑁄 𑀳𑁄𑀢𑀺. 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺 𑀕𑀫𑀦𑀸𑀬, 𑀢𑁂𑀦 𑀕𑀦𑁆𑀢𑀼𑀁 𑀦 𑀮𑀪𑀢𑀺. 𑀤𑀸𑀲𑀩𑁆𑀬𑀸𑀢𑀺 𑀤𑀸𑀲𑀪𑀸𑀯𑀸. 𑀪𑀼𑀚𑀺𑀲𑁆𑀲𑁄𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑁄. 𑀢𑀢𑁄𑀦𑀺𑀤𑀸𑀦𑀦𑁆𑀢𑀺 𑀪𑀼𑀚𑀺𑀲𑁆𑀲𑀦𑀺𑀤𑀸𑀦𑀁. 𑀓𑀦𑁆𑀢𑀸𑀭𑀤𑁆𑀥𑀸𑀦𑀫𑀕𑁆𑀕𑀦𑁆𑀢𑀺 𑀓𑀦𑁆𑀢𑀸𑀭𑀁 𑀅𑀤𑁆𑀥𑀸𑀦𑀫𑀕𑁆𑀕𑀁, 𑀦𑀺𑀭𑀼𑀤𑀓𑀁 𑀤𑀻𑀖𑀫𑀕𑁆𑀕𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁄𑀦𑀺𑀤𑀸𑀦𑀦𑁆𑀢𑀺 𑀔𑁂𑀫𑀦𑁆𑀢𑀪𑀽𑀫𑀺𑀦𑀺𑀤𑀸𑀦𑀁.

𑀇𑀫𑁂 𑀧𑀜𑁆𑀘 𑀦𑀻𑀯𑀭𑀡𑁂 𑀅𑀧𑁆𑀧𑀳𑀻𑀦𑁂𑀢𑀺 𑀏𑀢𑁆𑀣 𑀪𑀕𑀯𑀸 𑀅𑀧𑁆𑀧𑀳𑀻𑀦𑀁 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀇𑀡𑀲𑀤𑀺𑀲𑀁, 𑀲𑁂𑀲𑀸𑀦𑀺 𑀭𑁄𑀕𑀸𑀤𑀺𑀲𑀤𑀺𑀲𑀸𑀦𑀺 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀢𑀢𑁆𑀭𑀸𑀬𑀁 𑀲𑀤𑀺𑀲𑀢𑀸 𑁋 𑀬𑁄 𑀳𑀺 𑀧𑀭𑁂𑀲𑀁 𑀇𑀡𑀁 𑀕𑀳𑁂𑀢𑁆𑀯𑀸 𑀯𑀺𑀦𑀸𑀲𑁂𑀢𑀺. 𑀲𑁄 𑀢𑁂𑀳𑀺 𑀇𑀡𑀁 𑀤𑁂𑀳𑀻𑀢𑀺 𑀯𑀼𑀘𑁆𑀘𑀫𑀸𑀦𑁄𑀧𑀺 𑀨𑀭𑀼𑀲𑀁 𑀯𑀼𑀘𑁆𑀘𑀫𑀸𑀦𑁄𑀧𑀺 𑀩𑀚𑁆𑀛𑀫𑀸𑀦𑁄𑀧𑀺 𑀧𑀳𑀭𑀺𑀬𑀫𑀸𑀦𑁄𑀧𑀺 𑀓𑀺𑀜𑁆𑀘𑀺 𑀧𑀝𑀺𑀩𑀸𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀲𑀩𑁆𑀩𑀁 𑀢𑀺𑀢𑀺𑀓𑁆𑀔𑀢𑀺, 𑀢𑀺𑀢𑀺𑀓𑁆𑀔𑀓𑀸𑀭𑀡𑀜𑁆𑀳𑀺𑀲𑁆𑀲 𑀢𑀁 𑀇𑀡𑀁 𑀳𑁄𑀢𑀺. 𑀏𑀯𑀫𑁂𑀯𑀁 𑀬𑁄 𑀬𑀫𑁆𑀳𑀺 𑀓𑀸𑀫𑀘𑁆𑀙𑀦𑁆𑀤𑁂𑀦 𑀭𑀚𑁆𑀚𑀢𑀺, 𑀢𑀡𑁆𑀳𑀸𑀕𑀡𑁂𑀦 𑀢𑀁 𑀯𑀢𑁆𑀣𑀼𑀁 𑀕𑀡𑁆𑀳𑀸𑀢𑀺, 𑀲𑁄 𑀢𑁂𑀦 𑀨𑀭𑀼𑀲𑀁 𑀯𑀼𑀘𑁆𑀘𑀫𑀸𑀦𑁄𑀧𑀺 𑀩𑀚𑁆𑀛𑀫𑀸𑀦𑁄𑀧𑀺 𑀧𑀳𑀭𑀺𑀬𑀫𑀸𑀦𑁄𑀧𑀺 𑀲𑀩𑁆𑀩𑀁 𑀢𑀺𑀢𑀺𑀓𑁆𑀔𑀢𑀺. 𑀢𑀺𑀢𑀺𑀓𑁆𑀔𑀓𑀸𑀭𑀡𑀜𑁆𑀳𑀺𑀲𑁆𑀲 𑀲𑁄 𑀓𑀸𑀫𑀘𑁆𑀙𑀦𑁆𑀤𑁄 𑀳𑁄𑀢𑀺 𑀖𑀭𑀲𑀸𑀫𑀺𑀓𑁂𑀳𑀺 𑀯𑀥𑀻𑀬𑀫𑀸𑀦𑀸𑀦𑀁 𑀇𑀢𑁆𑀣𑀻𑀦𑀁 𑀯𑀺𑀬𑀸𑀢𑀺. 𑀏𑀯𑀁 𑀇𑀡𑀁 𑀯𑀺𑀬 𑀓𑀸𑀫𑀘𑁆𑀙𑀦𑁆𑀤𑁄 𑀤𑀝𑁆𑀞𑀩𑁆𑀩𑁄.

𑀬𑀣𑀸 𑀧𑀦 𑀧𑀺𑀢𑁆𑀢𑀭𑁄𑀕𑀸𑀢𑀼𑀭𑁄 𑀫𑀥𑀼𑀲𑀓𑁆𑀓𑀭𑀸𑀤𑀻𑀲𑀼𑀧𑀺 𑀤𑀺𑀦𑁆𑀦𑁂𑀲𑀼 𑀧𑀺𑀢𑁆𑀢𑀭𑁄𑀕𑀸𑀢𑀼𑀭𑀢𑀸𑀬 𑀢𑁂𑀲𑀁 𑀭𑀲𑀁 𑀦 𑀯𑀺𑀦𑁆𑀤𑀢𑀺, 𑀢𑀺𑀢𑁆𑀢𑀓𑀁 𑀢𑀺𑀢𑁆𑀢𑀓𑀦𑁆𑀢𑀺 𑀉𑀕𑁆𑀕𑀺𑀭𑀢𑀺𑀬𑁂𑀯. 𑀏𑀯𑀫𑁂𑀯𑀁 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀳𑀺𑀢𑀓𑀸𑀫𑁂𑀳𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀑𑀯𑀤𑀻𑀬𑀫𑀸𑀦𑁄 𑀑𑀯𑀸𑀤𑀁 𑀦 𑀕𑀡𑁆𑀳𑀸𑀢𑀺, ‘‘𑀅𑀢𑀺 𑀯𑀺𑀬 𑀫𑁂 𑀢𑀼𑀫𑁆𑀳𑁂 𑀉𑀧𑀤𑁆𑀤𑀯𑁂𑀣𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀯𑀺𑀩𑁆𑀪𑀫𑀢𑀺. 𑀧𑀺𑀢𑁆𑀢𑀭𑁄𑀕𑀸𑀢𑀼𑀭𑀢𑀸𑀬 𑀲𑁄 𑀧𑀼𑀭𑀺𑀲𑁄 𑀫𑀥𑀼𑀲𑀓𑁆𑀓𑀭𑀸𑀤𑀺𑀭𑀲𑀁 𑀯𑀺𑀬, 𑀓𑁄𑀥𑀸𑀢𑀼𑀭𑀢𑀸𑀬 𑀛𑀸𑀦𑀲𑀼𑀔𑀸𑀤𑀺𑀪𑁂𑀤𑀁 𑀲𑀸𑀲𑀦𑀭𑀲𑀁 𑀦 𑀯𑀺𑀦𑁆𑀤𑀢𑀻𑀢𑀺. 𑀏𑀯𑀁 𑀭𑁄𑀕𑁄 𑀯𑀺𑀬 𑀩𑁆𑀬𑀸𑀧𑀸𑀤𑁄 𑀤𑀝𑁆𑀞𑀩𑁆𑀩𑁄.

𑀬𑀣𑀸 𑀧𑀦 𑀦𑀓𑁆𑀔𑀢𑁆𑀢𑀤𑀺𑀯𑀲𑁂 𑀩𑀦𑁆𑀥𑀦𑀸𑀕𑀸𑀭𑁂 𑀩𑀤𑁆𑀥𑁄 𑀧𑀼𑀭𑀺𑀲𑁄 𑀦𑀓𑁆𑀔𑀢𑁆𑀢𑀲𑁆𑀲 𑀦𑁂𑀯 𑀆𑀤𑀺𑀁, 𑀦 𑀫𑀚𑁆𑀛𑀁, 𑀦 𑀧𑀭𑀺𑀬𑁄𑀲𑀸𑀦𑀁 𑀧𑀲𑁆𑀲𑀢𑀺. 𑀲𑁄 𑀤𑀼𑀢𑀺𑀬𑀤𑀺𑀯𑀲𑁂 𑀫𑀼𑀢𑁆𑀢𑁄, ‘‘𑀅𑀳𑁄 𑀳𑀺𑀬𑁆𑀬𑁄 𑀦𑀓𑁆𑀔𑀢𑁆𑀢𑀁 𑀫𑀦𑀸𑀧𑀁, 𑀅𑀳𑁄 𑀦𑀘𑁆𑀘𑀁, 𑀅𑀳𑁄 𑀕𑀻𑀢’’𑀦𑁆𑀢𑀺𑀆𑀤𑀻𑀦𑀺 𑀲𑀼𑀢𑁆𑀯𑀸𑀧𑀺 𑀧𑀝𑀺𑀯𑀘𑀦𑀁 𑀦 𑀤𑁂𑀢𑀺. 𑀓𑀺𑀁 𑀓𑀸𑀭𑀡𑀸? 𑀦𑀓𑁆𑀔𑀢𑁆𑀢𑀲𑁆𑀲 𑀅𑀦𑀦𑀼𑀪𑀽𑀢𑀢𑁆𑀢𑀸. 𑀏𑀯𑀫𑁂𑀯𑀁 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀽𑀢𑁄 𑀪𑀺𑀓𑁆𑀔𑀼 𑀯𑀺𑀘𑀺𑀢𑁆𑀢𑀦𑀬𑁂𑀧𑀺 𑀥𑀫𑁆𑀫𑀲𑁆𑀲𑀯𑀦𑁂 𑀧𑀯𑀢𑁆𑀢𑀫𑀸𑀦𑁂 𑀦𑁂𑀯 𑀢𑀲𑁆𑀲 𑀆𑀤𑀺𑀁, 𑀦 𑀫𑀚𑁆𑀛𑀁, 𑀦 𑀧𑀭𑀺𑀬𑁄𑀲𑀸𑀦𑀁 𑀚𑀸𑀦𑀸𑀢𑀺. 𑀲𑁄 𑀉𑀝𑁆𑀞𑀺𑀢𑁂 𑀥𑀫𑁆𑀫𑀲𑁆𑀲𑀯𑀦𑁂, ‘‘𑀅𑀳𑁄 𑀥𑀫𑁆𑀫𑀲𑁆𑀲𑀯𑀦𑀁, 𑀅𑀳𑁄 𑀓𑀸𑀭𑀡𑀁, 𑀅𑀳𑁄 𑀉𑀧𑀫𑀸’’𑀢𑀺 𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀯𑀡𑁆𑀡𑀁 𑀪𑀡𑀫𑀸𑀦𑀸𑀦𑀁 𑀲𑀼𑀢𑁆𑀯𑀸𑀧𑀺 𑀧𑀝𑀺𑀯𑀘𑀦𑀁 𑀦 𑀤𑁂𑀢𑀺. 𑀓𑀺𑀁 𑀓𑀸𑀭𑀡𑀸? 𑀣𑀺𑀦𑀫𑀺𑀤𑁆𑀥𑀯𑀲𑁂𑀦 𑀥𑀫𑁆𑀫𑀓𑀣𑀸𑀬 𑀅𑀦𑀦𑀼𑀪𑀽𑀢𑀢𑁆𑀢𑀸𑀢𑀺. 𑀏𑀯𑀁 𑀩𑀦𑁆𑀥𑀦𑀸𑀕𑀸𑀭𑀁 𑀯𑀺𑀬 𑀣𑀺𑀦𑀫𑀺𑀤𑁆𑀥𑀁 𑀤𑀝𑁆𑀞𑀩𑁆𑀩𑀁.

𑀬𑀣𑀸 𑀧𑀦 𑀦𑀓𑁆𑀔𑀢𑁆𑀢𑀁 𑀓𑀻𑀴𑀦𑁆𑀢𑁄𑀧𑀺 𑀤𑀸𑀲𑁄, ‘‘𑀇𑀤𑀁 𑀦𑀸𑀫 𑀅𑀘𑁆𑀘𑀸𑀬𑀺𑀓𑀁 𑀓𑀭𑀡𑀻𑀬𑀁 𑀅𑀢𑁆𑀣𑀺, 𑀲𑀻𑀖𑀁, 𑀢𑀢𑁆𑀣 𑀕𑀘𑁆𑀙, 𑀦𑁄 𑀘𑁂 𑀕𑀘𑁆𑀙𑀲𑀺, 𑀳𑀢𑁆𑀣𑀧𑀸𑀤𑀁 𑀯𑀸 𑀢𑁂 𑀙𑀺𑀦𑁆𑀤𑀸𑀫𑀺 𑀓𑀡𑁆𑀡𑀦𑀸𑀲𑀁 𑀯𑀸’’𑀢𑀺 𑀯𑀼𑀢𑁆𑀢𑁄 𑀲𑀻𑀖𑀁 𑀕𑀘𑁆𑀙𑀢𑀺𑀬𑁂𑀯, 𑀦𑀓𑁆𑀔𑀢𑁆𑀢𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀅𑀦𑀼𑀪𑀯𑀺𑀢𑀼𑀁 𑀦 𑀮𑀪𑀢𑀺. 𑀓𑀲𑁆𑀫𑀸? 𑀧𑀭𑀸𑀥𑀻𑀦𑀢𑀸𑀬. 𑀏𑀯𑀫𑁂𑀯𑀁 𑀯𑀺𑀦𑀬𑁂 𑀅𑀧𑁆𑀧𑀓𑀢𑀜𑁆𑀜𑀼𑀦𑀸 𑀯𑀺𑀯𑁂𑀓𑀢𑁆𑀣𑀸𑀬 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁂𑀦𑀸𑀧𑀺 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀅𑀦𑁆𑀢𑀫𑀲𑁄 𑀓𑀧𑁆𑀧𑀺𑀬𑀫𑀁𑀲𑁂𑀧𑀺 𑀅𑀓𑀧𑁆𑀧𑀺𑀬𑀫𑀁𑀲𑀲𑀜𑁆𑀜𑀸𑀬 𑀉𑀧𑁆𑀧𑀦𑁆𑀦𑀸𑀬 𑀯𑀺𑀯𑁂𑀓𑀁 𑀧𑀳𑀸𑀬 𑀲𑀻𑀮𑀯𑀺𑀲𑁄𑀥𑀦𑀢𑁆𑀣𑀁 𑀯𑀺𑀦𑀬𑀥𑀭𑀲𑁆𑀲 𑀲𑀦𑁆𑀢𑀺𑀓𑁂 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺. 𑀯𑀺𑀯𑁂𑀓𑀲𑀼𑀔𑀁 𑀅𑀦𑀼𑀪𑀯𑀺𑀢𑀼𑀁 𑀦 𑀮𑀪𑀢𑀺. 𑀓𑀲𑁆𑀫𑀸? 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀸𑀪𑀺𑀪𑀽𑀢𑀢𑀸𑀬𑀸𑀢𑀺, 𑀏𑀯𑀁 𑀤𑀸𑀲𑀩𑁆𑀬𑀁 𑀯𑀺𑀬 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀤𑀝𑁆𑀝𑀩𑁆𑀩𑀁.

𑀬𑀣𑀸 𑀧𑀦 𑀓𑀦𑁆𑀢𑀸𑀭𑀤𑁆𑀥𑀸𑀦𑀫𑀕𑁆𑀕𑀧𑀝𑀺𑀧𑀦𑁆𑀦𑁄 𑀧𑀼𑀭𑀺𑀲𑁄 𑀘𑁄𑀭𑁂𑀳𑀺 𑀫𑀦𑀼𑀲𑁆𑀲𑀸𑀦𑀁 𑀯𑀺𑀮𑀼𑀢𑁆𑀢𑁄𑀓𑀸𑀲𑀁 𑀧𑀳𑀢𑁄𑀓𑀸𑀲𑀜𑁆𑀘 𑀤𑀺𑀲𑁆𑀯𑀸 𑀤𑀡𑁆𑀟𑀓𑀲𑀤𑁆𑀤𑁂𑀦𑀧𑀺 𑀲𑀓𑀼𑀡𑀲𑀤𑁆𑀤𑁂𑀦𑀧𑀺 𑀘𑁄𑀭𑀸 𑀆𑀕𑀢𑀸𑀢𑀺 𑀉𑀲𑁆𑀲𑀗𑁆𑀓𑀺𑀢𑀧𑀭𑀺𑀲𑀗𑁆𑀓𑀺𑀢𑁄 𑀳𑁄𑀢𑀺, 𑀕𑀘𑁆𑀙𑀢𑀺𑀧𑀺, 𑀢𑀺𑀝𑁆𑀞𑀢𑀺𑀧𑀺, 𑀦𑀺𑀯𑀢𑁆𑀢𑀢𑀺𑀧𑀺, 𑀕𑀢𑀝𑁆𑀞𑀸𑀦𑀢𑁄 𑀆𑀕𑀢𑀝𑁆𑀞𑀸𑀦𑀫𑁂𑀯 𑀩𑀳𑀼𑀢𑀭𑀁 𑀳𑁄𑀢𑀺. 𑀲𑁄 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀔𑁂𑀫𑀦𑁆𑀢𑀪𑀽𑀫𑀺𑀁 𑀧𑀸𑀧𑀼𑀡𑀸𑀢𑀺 𑀯𑀸, 𑀦 𑀯𑀸 𑀧𑀸𑀧𑀼𑀡𑀸𑀢𑀺. 𑀏𑀯𑀫𑁂𑀯𑀁 𑀬𑀲𑁆𑀲 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺. 𑀲𑁄 ‘‘𑀩𑀼𑀤𑁆𑀥𑁄 𑀦𑀼 𑀔𑁄, 𑀦 𑀦𑀼 𑀔𑁄 𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀘𑀺𑀓𑀺𑀘𑁆𑀙𑀦𑁆𑀢𑁄 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀲𑀤𑁆𑀥𑀸𑀬 𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀲𑀓𑁆𑀓𑁄𑀦𑁆𑀢𑁄 𑀫𑀕𑁆𑀕𑀁 𑀯𑀸 𑀨𑀮𑀁 𑀯𑀸 𑀦 𑀧𑀸𑀧𑀼𑀡𑀸𑀢𑀻𑀢𑀺 𑀬𑀣𑀸 𑀓𑀦𑁆𑀢𑀸𑀭𑀤𑁆𑀥𑀸𑀦𑀫𑀕𑁆𑀕𑁂 ‘‘𑀘𑁄𑀭𑀸 𑀅𑀢𑁆𑀣𑀺 𑀦𑀢𑁆𑀣𑀻’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀆𑀲𑀧𑁆𑀧𑀦𑀧𑀭𑀺𑀲𑀧𑁆𑀧𑀦𑀁 𑀅𑀧𑀭𑀺𑀬𑁄𑀕𑀸𑀳𑀦𑀁 𑀙𑀫𑁆𑀪𑀺𑀢𑀢𑁆𑀢 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑁂𑀦𑁆𑀢𑁄 𑀔𑁂𑀫𑀦𑁆𑀢𑀧𑀢𑁆𑀢𑀺𑀬𑀸 𑀅𑀦𑁆𑀢𑀭𑀸𑀬𑀁 𑀓𑀭𑁄𑀢𑀺, 𑀏𑀯𑀁 𑀯𑀺𑀘𑀺𑀓𑀺𑀘𑁆𑀙𑀸𑀧𑀺 ‘‘𑀩𑀼𑀤𑁆𑀥𑁄 𑀦𑀼 𑀔𑁄 𑀦 𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀼𑀦𑀧𑁆𑀧𑀼𑀦𑀁 𑀆𑀲𑀧𑁆𑀧𑀦𑀧𑀭𑀺𑀲𑀧𑁆𑀧𑀦𑀁 𑀅𑀧𑀭𑀺𑀬𑁄𑀕𑀸𑀳𑀦𑀁 𑀙𑀫𑁆𑀪𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀬𑀫𑀸𑀦𑀸 𑀅𑀭𑀺𑀬𑀪𑀽𑀫𑀺𑀧𑁆𑀧𑀢𑁆𑀢𑀺𑀬𑀸 𑀅𑀦𑁆𑀢𑀭𑀸𑀬𑀁 𑀓𑀭𑁄𑀢𑀻𑀢𑀺 𑀓𑀦𑁆𑀢𑀸𑀭𑀤𑁆𑀥𑀸𑀦𑀫𑀕𑁆𑀕𑁄 𑀯𑀺𑀬 𑀤𑀝𑁆𑀞𑀩𑁆𑀩𑀸.

𑀇𑀤𑀸𑀦𑀺 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀆𑀡𑀡𑁆𑀬𑀦𑁆𑀢𑀺 𑀏𑀢𑁆𑀣 𑀪𑀕𑀯𑀸 𑀧𑀳𑀻𑀦𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀆𑀡𑀡𑁆𑀬𑀲𑀤𑀺𑀲𑀁, 𑀲𑁂𑀲𑀸𑀦𑀺 𑀆𑀭𑁄𑀕𑁆𑀬𑀸𑀤𑀺𑀲𑀤𑀺𑀲𑀸𑀦𑀺 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀢𑀢𑁆𑀭𑀸𑀬𑀁 𑀲𑀤𑀺𑀲𑀢𑀸 𑁋 𑀬𑀣𑀸 𑀳𑀺 𑀧𑀼𑀭𑀺𑀲𑁄 𑀇𑀡𑀁 𑀆𑀤𑀸𑀬 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀢𑁆𑀯𑀸 𑀲𑀫𑀺𑀤𑁆𑀥𑀓𑀫𑁆𑀫𑀦𑁆𑀢𑁄, ‘‘𑀇𑀤𑀁 𑀇𑀡𑀁 𑀦𑀸𑀫 𑀧𑀮𑀺𑀩𑁄𑀥𑀫𑀽𑀮’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀯𑀟𑁆𑀠𑀺𑀓𑀁 𑀇𑀡𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀧𑀡𑁆𑀡𑀁 𑀨𑀸𑀮𑀸𑀧𑁂𑀬𑁆𑀬. 𑀅𑀣𑀲𑁆𑀲 𑀢𑀢𑁄 𑀧𑀝𑁆𑀞𑀸𑀬 𑀦𑁂𑀯 𑀓𑁄𑀘𑀺 𑀤𑀽𑀢𑀁 𑀧𑁂𑀲𑁂𑀢𑀺, 𑀦 𑀧𑀡𑁆𑀡𑀁, 𑀲𑁄 𑀇𑀡𑀲𑀸𑀫𑀺𑀓𑁂 𑀤𑀺𑀲𑁆𑀯𑀸𑀧𑀺 𑀲𑀘𑁂 𑀇𑀘𑁆𑀙𑀢𑀺, 𑀆𑀲𑀦𑀸 𑀉𑀝𑁆𑀞𑀳𑀢𑀺, 𑀦𑁄 𑀘𑁂, 𑀦 𑀉𑀝𑁆𑀞𑀳𑀢𑀺. 𑀓𑀲𑁆𑀫𑀸? 𑀢𑁂𑀳𑀺 𑀲𑀤𑁆𑀥𑀺𑀁 𑀦𑀺𑀮𑁆𑀮𑁂𑀧𑀢𑀸𑀬 𑀅𑀮𑀕𑁆𑀕𑀢𑀸𑀬. 𑀏𑀯𑀫𑁂𑀯 𑀪𑀺𑀓𑁆𑀔𑀼, ‘‘𑀅𑀬𑀁 𑀓𑀸𑀫𑀘𑁆𑀙𑀦𑁆𑀤𑁄 𑀦𑀸𑀫 𑀧𑀮𑀺𑀩𑁄𑀥𑀫𑀽𑀮’’𑀦𑁆𑀢𑀺 𑀲𑀢𑀺𑀧𑀝𑁆𑀞𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀙 𑀥𑀫𑁆𑀫𑁂 𑀪𑀸𑀯𑁂𑀢𑁆𑀯𑀸 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀧𑀚𑀳𑀢𑀺. 𑀢𑀲𑁆𑀲𑁂𑀯𑀁 𑀧𑀳𑀻𑀦𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀬𑀣𑀸 𑀇𑀡𑀫𑀼𑀢𑁆𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀇𑀡𑀲𑀸𑀫𑀺𑀓𑁂 𑀤𑀺𑀲𑁆𑀯𑀸 𑀦𑁂𑀯 𑀪𑀬𑀁 𑀦 𑀙𑀫𑁆𑀪𑀺𑀢𑀢𑁆𑀢𑀁 𑀳𑁄𑀢𑀺. 𑀏𑀯𑀫𑁂𑀯 𑀧𑀭𑀯𑀢𑁆𑀣𑀼𑀫𑁆𑀳𑀺 𑀦𑁂𑀯 𑀲𑀗𑁆𑀕𑁄 𑀦 𑀩𑀦𑁆𑀥𑁄 𑀳𑁄𑀢𑀺. 𑀤𑀺𑀩𑁆𑀩𑀸𑀦𑀺𑀧𑀺 𑀭𑀽𑀧𑀸𑀦𑀺 𑀧𑀲𑁆𑀲𑀢𑁄 𑀓𑀺𑀮𑁂𑀲𑁄 𑀦 𑀲𑀫𑀼𑀤𑀸𑀘𑀭𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀆𑀡𑀡𑁆𑀬𑀫𑀺𑀯 𑀓𑀸𑀫𑀘𑁆𑀙𑀦𑁆𑀤𑀧𑁆𑀧𑀳𑀸𑀦𑀫𑀸𑀳.

𑀬𑀣𑀸 𑀧𑀦 𑀲𑁄 𑀧𑀺𑀢𑁆𑀢𑀭𑁄𑀕𑀸𑀢𑀼𑀭𑁄 𑀧𑀼𑀭𑀺𑀲𑁄 𑀪𑁂𑀲𑀚𑁆𑀚𑀓𑀺𑀭𑀺𑀬𑀸𑀬 𑀢𑀁 𑀭𑁄𑀕𑀁 𑀯𑀽𑀧𑀲𑀫𑁂𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀫𑀥𑀼𑀲𑀓𑁆𑀓𑀭𑀸𑀤𑀻𑀦𑀁 𑀭𑀲𑀁 𑀯𑀺𑀦𑁆𑀤𑀢𑀺. 𑀏𑀯𑀫𑁂𑀯𑀁 𑀪𑀺𑀓𑁆𑀔𑀼, ‘‘𑀅𑀬𑀁 𑀩𑁆𑀬𑀸𑀧𑀸𑀤𑁄 𑀦𑀸𑀫 𑀅𑀦𑀢𑁆𑀣𑀓𑀸𑀭𑀓𑁄’’𑀢𑀺 𑀙 𑀥𑀫𑁆𑀫𑁂 𑀪𑀸𑀯𑁂𑀢𑁆𑀯𑀸 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁 𑀧𑀚𑀳𑀢𑀺. 𑀲𑁄 𑀏𑀯𑀁 𑀧𑀳𑀻𑀦𑀩𑁆𑀬𑀸𑀧𑀸𑀤𑁄 𑀬𑀣𑀸 𑀧𑀺𑀢𑁆𑀢𑀭𑁄𑀕𑀯𑀺𑀫𑀼𑀢𑁆𑀢𑁄 𑀧𑀼𑀭𑀺𑀲𑁄 𑀫𑀥𑀼𑀲𑀓𑁆𑀓𑀭𑀸𑀤𑀻𑀦𑀺 𑀫𑀥𑀼𑀭𑀸𑀦𑀺 𑀲𑀫𑁆𑀧𑀺𑀬𑀸𑀬𑀫𑀸𑀦𑁄 𑀧𑀝𑀺𑀲𑁂𑀯𑀢𑀺. 𑀏𑀯𑀫𑁂𑀯𑀁 𑀆𑀘𑀸𑀭𑀧𑀡𑁆𑀡𑀢𑁆𑀢𑀺𑀆𑀤𑀻𑀦𑀺 𑀲𑀺𑀓𑁆𑀔𑀸𑀧𑀺𑀬𑀫𑀸𑀦𑁄 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀫𑁆𑀧𑀺𑀬𑀸𑀬𑀫𑀸𑀦𑁄 𑀲𑀺𑀓𑁆𑀔𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀆𑀭𑁄𑀕𑁆𑀬𑀫𑀺𑀯 𑀩𑁆𑀬𑀸𑀧𑀸𑀤𑀧𑁆𑀧𑀳𑀸𑀦𑀫𑀸𑀳.

𑀬𑀣𑀸 𑀲𑁄 𑀦𑀓𑁆𑀔𑀢𑁆𑀢𑀤𑀺𑀯𑀲𑁂 𑀩𑀦𑁆𑀥𑀦𑀸𑀕𑀸𑀭𑀁 𑀧𑀯𑁂𑀲𑀺𑀢𑁄 𑀧𑀼𑀭𑀺𑀲𑁄 𑀅𑀧𑀭𑀲𑁆𑀫𑀺𑀁 𑀦𑀓𑁆𑀔𑀢𑁆𑀢𑀤𑀺𑀯𑀲𑁂, ‘‘𑀧𑀼𑀩𑁆𑀩𑁂𑀧𑀺 𑀅𑀳𑀁 𑀧𑀫𑀸𑀤𑀤𑁄𑀲𑁂𑀦 𑀩𑀤𑁆𑀥𑁄 𑀢𑀁 𑀦𑀓𑁆𑀔𑀢𑁆𑀢𑀁 𑀦𑀸𑀦𑀼𑀪𑀯𑀸𑀫𑀺, 𑀇𑀤𑀸𑀦𑀺 𑀅𑀧𑁆𑀧𑀫𑀢𑁆𑀢𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀬𑀣𑀸𑀲𑁆𑀲 𑀧𑀘𑁆𑀘𑀢𑁆𑀣𑀺𑀓𑀸 𑀑𑀓𑀸𑀲𑀁 𑀦 𑀮𑀪𑀦𑁆𑀢𑀺. 𑀏𑀯𑀁 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀦𑀓𑁆𑀔𑀢𑁆𑀢𑀁 𑀅𑀦𑀼𑀪𑀯𑀺𑀢𑁆𑀯𑀸 𑁋 ‘‘𑀅𑀳𑁄 𑀦𑀓𑁆𑀔𑀢𑁆𑀢𑀁 𑀅𑀳𑁄 𑀦𑀓𑁆𑀔𑀢𑁆𑀢’’𑀦𑁆𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺. 𑀏𑀯𑀫𑁂𑀯 𑀪𑀺𑀓𑁆𑀔𑀼, ‘‘𑀇𑀤𑀁 𑀣𑀺𑀦𑀫𑀺𑀤𑁆𑀥𑀁 𑀦𑀸𑀫 𑀫𑀳𑀸𑀅𑀦𑀢𑁆𑀣𑀓𑀭’’𑀦𑁆𑀢𑀺 𑀙 𑀥𑀫𑁆𑀫𑁂 𑀪𑀸𑀯𑁂𑀢𑁆𑀯𑀸 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀧𑀚𑀳𑀢𑀺. 𑀲𑁄 𑀏𑀯𑀁 𑀧𑀳𑀻𑀦𑀣𑀺𑀦𑀫𑀺𑀤𑁆𑀥𑁄 𑀬𑀣𑀸 𑀩𑀦𑁆𑀥𑀦𑀸 𑀫𑀼𑀢𑁆𑀢𑁄 𑀧𑀼𑀭𑀺𑀲𑁄 𑀲𑀢𑁆𑀢𑀸𑀳𑀫𑁆𑀧𑀺 𑀦𑀓𑁆𑀔𑀢𑁆𑀢𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀅𑀦𑀼𑀪𑀯𑀢𑀺. 𑀏𑀯𑀫𑁂𑀯𑀁 𑀪𑀺𑀓𑁆𑀔𑀼 𑀥𑀫𑁆𑀫𑀦𑀓𑁆𑀔𑀢𑁆𑀢𑀲𑁆𑀲 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀁 𑀅𑀦𑀼𑀪𑀯𑀦𑁆𑀢𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀩𑀦𑁆𑀥𑀦𑀸 𑀫𑁄𑀓𑁆𑀔𑀫𑀺𑀯 𑀣𑀺𑀦𑀫𑀺𑀤𑁆𑀥𑀧𑁆𑀧𑀳𑀸𑀦𑀫𑀸𑀳.

𑀬𑀣𑀸 𑀧𑀦 𑀤𑀸𑀲𑁄 𑀓𑀜𑁆𑀘𑀺𑀤𑁂𑀯 𑀫𑀺𑀢𑁆𑀢𑀁 𑀉𑀧𑀦𑀺𑀲𑁆𑀲𑀸𑀬 𑀲𑀸𑀫𑀺𑀓𑀸𑀦𑀁 𑀥𑀦𑀁 𑀤𑀢𑁆𑀯𑀸 𑀅𑀢𑁆𑀢𑀸𑀦𑀁 𑀪𑀼𑀚𑀺𑀲𑁆𑀲𑀁 𑀓𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀬𑀁 𑀇𑀘𑁆𑀙𑀢𑀺, 𑀢𑀁 𑀓𑀭𑁂𑀬𑁆𑀬. 𑀏𑀯𑀫𑁂𑀯 𑀪𑀺𑀓𑁆𑀔𑀼, ‘‘𑀇𑀤𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀦𑀸𑀫 𑀫𑀳𑀸𑀅𑀦𑀢𑁆𑀣𑀓𑀭’’𑀦𑁆𑀢𑀺 𑀙 𑀥𑀫𑁆𑀫𑁂 𑀪𑀸𑀯𑁂𑀢𑁆𑀯𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀚𑀳𑀢𑀺. 𑀲𑁄 𑀏𑀯𑀁 𑀧𑀳𑀻𑀦𑀼𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑁄 𑀬𑀣𑀸 𑀪𑀼𑀚𑀺𑀲𑁆𑀲𑁄 𑀧𑀼𑀭𑀺𑀲𑁄 𑀬𑀁 𑀇𑀘𑁆𑀙𑀢𑀺, 𑀢𑀁 𑀓𑀭𑁄𑀢𑀺. 𑀦 𑀢𑀁 𑀓𑁄𑀘𑀺 𑀩𑀮𑀓𑁆𑀓𑀸𑀭𑁂𑀦 𑀢𑀢𑁄 𑀦𑀺𑀯𑀢𑁆𑀢𑁂𑀢𑀺. 𑀏𑀯𑀫𑁂𑀯𑀁 𑀪𑀺𑀓𑁆𑀔𑀼 𑀬𑀣𑀸𑀲𑀼𑀔𑀁 𑀦𑁂𑀓𑁆𑀔𑀫𑁆𑀫𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀢𑀺, 𑀦 𑀦𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀩𑀮𑀓𑁆𑀓𑀸𑀭𑁂𑀦 𑀢𑀢𑁄 𑀦𑀺𑀯𑀢𑁆𑀢𑁂𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀪𑀼𑀚𑀺𑀲𑁆𑀲𑀁 𑀯𑀺𑀬 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑁆𑀧𑀳𑀸𑀦𑀫𑀸𑀳.

𑀬𑀣𑀸 𑀩𑀮𑀯𑀸 𑀧𑀼𑀭𑀺𑀲𑁄 𑀳𑀢𑁆𑀣𑀲𑀸𑀭𑀁 𑀕𑀳𑁂𑀢𑁆𑀯𑀸 𑀲𑀚𑁆𑀚𑀸𑀯𑀼𑀥𑁄 𑀲𑀧𑀭𑀺𑀯𑀸𑀭𑁄 𑀓𑀦𑁆𑀢𑀸𑀭𑀁 𑀧𑀝𑀺𑀧𑀚𑁆𑀚𑁂𑀬𑁆𑀬. 𑀢𑀁 𑀘𑁄𑀭𑀸 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 𑀧𑀮𑀸𑀬𑁂𑀬𑁆𑀬𑀼𑀁. 𑀲𑁄 𑀲𑁄𑀢𑁆𑀣𑀺𑀦𑀸 𑀢𑀁 𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀭𑀺𑀢𑁆𑀯𑀸 𑀔𑁂𑀫𑀦𑁆𑀢𑀁 𑀧𑀢𑁆𑀢𑁄 𑀳𑀝𑁆𑀞𑀢𑀼𑀝𑁆𑀞𑁄 𑀅𑀲𑁆𑀲. 𑀏𑀯𑀫𑁂𑀯𑀁 𑀪𑀺𑀓𑁆𑀔𑀼, ‘‘𑀅𑀬𑀁 𑀯𑀺𑀘𑀺𑀓𑀺𑀘𑁆𑀙𑀸 𑀦𑀸𑀫 𑀅𑀦𑀢𑁆𑀣𑀓𑀸𑀭𑀺𑀓𑀸’’𑀢𑀺 𑀙 𑀥𑀫𑁆𑀫𑁂 𑀪𑀸𑀯𑁂𑀢𑁆𑀯𑀸 𑀯𑀺𑀘𑀺𑀓𑀺𑀘𑁆𑀙𑀁 𑀧𑀚𑀳𑀢𑀺. 𑀲𑁄 𑀏𑀯𑀁 𑀧𑀳𑀻𑀦𑀯𑀺𑀘𑀺𑀓𑀺𑀘𑁆𑀙𑁄 𑀬𑀣𑀸 𑀩𑀮𑀯𑀸 𑀲𑀚𑁆𑀚𑀸𑀯𑀼𑀥𑁄 𑀲𑀧𑀭𑀺𑀯𑀸𑀭𑁄 𑀧𑀼𑀭𑀺𑀲𑁄 𑀦𑀺𑀩𑁆𑀪𑀬𑁄 𑀘𑁄𑀭𑁂 𑀢𑀺𑀡𑀁 𑀯𑀺𑀬 𑀅𑀕𑀡𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀔𑁂𑀫𑀦𑁆𑀢𑀪𑀽𑀫𑀺𑀁 𑀧𑀸𑀧𑀼𑀡𑀸𑀢𑀺. 𑀏𑀯𑀫𑁂𑀯𑀁 𑀤𑀼𑀘𑁆𑀘𑀭𑀺𑀢𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀭𑀺𑀢𑁆𑀯𑀸 𑀧𑀭𑀫𑀔𑁂𑀫𑀦𑁆𑀢𑀪𑀽𑀫𑀺𑀁 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀸𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀔𑁂𑀫𑀦𑁆𑀢𑀪𑀽𑀫𑀺𑀁 𑀯𑀺𑀬 𑀯𑀺𑀘𑀺𑀓𑀺𑀘𑁆𑀙𑀸𑀧𑀳𑀸𑀦𑀫𑀸𑀳.

𑁪𑁨𑁭. 𑀇𑀫𑀫𑁂𑀯 𑀓𑀸𑀬𑀦𑁆𑀢𑀺 𑀇𑀫𑀁 𑀓𑀭𑀚𑀓𑀸𑀬𑀁. 𑀅𑀪𑀺𑀲𑀦𑁆𑀤𑁂𑀢𑀻𑀢𑀺 𑀢𑁂𑀫𑁂𑀢𑀺 𑀲𑁆𑀦𑁂𑀳𑁂𑀢𑀺, 𑀲𑀩𑁆𑀩𑀢𑁆𑀣 𑀧𑀯𑀢𑁆𑀢𑀧𑀻𑀢𑀺𑀲𑀼𑀔𑀁 𑀓𑀭𑁄𑀢𑀺. 𑀧𑀭𑀺𑀲𑀦𑁆𑀤𑁂𑀢𑀻𑀢𑀺 𑀲𑀫𑀦𑁆𑀢𑀢𑁄 𑀲𑀦𑁆𑀤𑁂𑀢𑀺. 𑀧𑀭𑀺𑀧𑀽𑀭𑁂𑀢𑀻𑀢𑀺 𑀯𑀸𑀬𑀼𑀦𑀸 𑀪𑀲𑁆𑀢𑀁 𑀯𑀺𑀬 𑀧𑀽𑀭𑁂𑀢𑀺. 𑀧𑀭𑀺𑀧𑁆𑀨𑀭𑀢𑀻𑀢𑀺 𑀲𑀫𑀦𑁆𑀢𑀢𑁄 𑀨𑀼𑀲𑀢𑀺. 𑀲𑀩𑁆𑀩𑀸𑀯𑀢𑁄 𑀓𑀸𑀬𑀲𑁆𑀲𑀸𑀢𑀺 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀩𑁆𑀩𑀓𑁄𑀝𑁆𑀞𑀸𑀲𑀯𑀢𑁄 𑀓𑀸𑀬𑀲𑁆𑀲. 𑀓𑀺𑀜𑁆𑀘𑀺 𑀉𑀧𑀸𑀤𑀺𑀦𑁆𑀦𑀓𑀲𑀦𑁆𑀢𑀢𑀺𑀧𑀯𑀢𑁆𑀢𑀺𑀝𑁆𑀞𑀸𑀦𑁂 𑀙𑀯𑀺𑀫𑀁𑀲𑀮𑁄𑀳𑀺𑀢𑀸𑀦𑀼𑀕𑀢𑀁 𑀅𑀡𑀼𑀫𑀢𑁆𑀢𑀫𑁆𑀧𑀺 𑀞𑀸𑀦𑀁 𑀧𑀞𑀫𑀚𑁆𑀛𑀸𑀦𑀲𑀼𑀔𑁂𑀦 𑀅𑀨𑀼𑀝𑁆𑀞𑀁 𑀦𑀸𑀫 𑀦 𑀳𑁄𑀢𑀺. 𑀤𑀓𑁆𑀔𑁄𑀢𑀺 𑀙𑁂𑀓𑁄 𑀧𑀝𑀺𑀩𑀮𑁄 𑀦𑁆𑀳𑀸𑀦𑀻𑀬𑀘𑀼𑀡𑁆𑀡𑀸𑀦𑀺 𑀓𑀸𑀢𑀼𑀜𑁆𑀘𑁂𑀯 𑀬𑁄𑀚𑁂𑀢𑀼𑀜𑁆𑀘 𑀲𑀦𑁆𑀦𑁂𑀢𑀼𑀜𑁆𑀘. 𑀓𑀁𑀲𑀣𑀸𑀮𑁂𑀢𑀺 𑀬𑁂𑀦 𑀓𑁂𑀦𑀘𑀺 𑀮𑁄𑀳𑁂𑀦 𑀓𑀢𑀪𑀸𑀚𑀦𑁂. 𑀫𑀢𑁆𑀢𑀺𑀓𑀪𑀸𑀚𑀦𑀁 𑀧𑀦 𑀣𑀺𑀭𑀁 𑀦 𑀳𑁄𑀢𑀺, 𑀲𑀦𑁆𑀦𑁂𑀦𑁆𑀢𑀲𑁆𑀲 𑀪𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀁 𑀦 𑀤𑀲𑁆𑀲𑁂𑀢𑀺. 𑀧𑀭𑀺𑀧𑁆𑀨𑁄𑀲𑀓𑀁 𑀧𑀭𑀺𑀧𑁆𑀨𑁄𑀲𑀓𑀦𑁆𑀢𑀺 𑀲𑀺𑀜𑁆𑀘𑀺𑀢𑁆𑀯𑀸 𑀲𑀺𑀜𑁆𑀘𑀺𑀢𑁆𑀯𑀸. 𑀲𑀦𑁆𑀦𑁂𑀬𑁆𑀬𑀸𑀢𑀺 𑀯𑀸𑀫𑀳𑀢𑁆𑀣𑁂𑀦 𑀓𑀁𑀲𑀣𑀸𑀮𑀁 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀳𑀢𑁆𑀣𑁂𑀦 𑀧𑀫𑀸𑀡𑀬𑀼𑀢𑁆𑀢𑀁 𑀉𑀤𑀓𑀁 𑀲𑀺𑀜𑁆𑀘𑀺𑀢𑁆𑀯𑀸 𑀲𑀺𑀜𑁆𑀘𑀺𑀢𑁆𑀯𑀸 𑀧𑀭𑀺𑀫𑀤𑁆𑀤𑀦𑁆𑀢𑁄 𑀧𑀺𑀡𑁆𑀟𑀁 𑀓𑀭𑁂𑀬𑁆𑀬. 𑀲𑁆𑀦𑁂𑀳𑀸𑀦𑀼𑀕𑀢𑀸𑀢𑀺 𑀉𑀤𑀓𑀲𑀺𑀦𑁂𑀳𑁂𑀦 𑀅𑀦𑀼𑀕𑀢𑀸. 𑀲𑁆𑀦𑁂𑀳𑀧𑀭𑁂𑀢𑀸𑀢𑀺 𑀉𑀤𑀓𑀲𑀺𑀦𑁂𑀳𑁂𑀦 𑀧𑀭𑀺𑀕𑀢𑀸. 𑀲𑀦𑁆𑀢𑀭𑀩𑀸𑀳𑀺𑀭𑀸𑀢𑀺 𑀲𑀤𑁆𑀥𑀺𑀁 𑀅𑀦𑁆𑀢𑁄𑀧𑀤𑁂𑀲𑁂𑀦 𑀘𑁂𑀯 𑀩𑀳𑀺𑀧𑀤𑁂𑀲𑁂𑀦 𑀘, 𑀲𑀩𑁆𑀩𑀢𑁆𑀣𑀓𑀫𑁂𑀯 𑀉𑀤𑀓𑀲𑀺𑀦𑁂𑀳𑁂𑀦 𑀨𑀼𑀝𑀸𑀢𑀺 𑀅𑀢𑁆𑀣𑁄. 𑀦 𑀘 𑀧𑀕𑁆𑀖𑀭𑀺𑀡𑀻𑀢𑀺 𑀦 𑀩𑀺𑀦𑁆𑀤𑀼 𑀩𑀺𑀦𑁆𑀤𑀼 𑀉𑀤𑀓𑀁 𑀧𑀕𑁆𑀖𑀭𑀢𑀺, 𑀲𑀓𑁆𑀓𑀸 𑀳𑁄𑀢𑀺 𑀳𑀢𑁆𑀣𑁂𑀦𑀧𑀺 𑀤𑁆𑀯𑀻𑀳𑀺𑀧𑀺 𑀢𑀻𑀳𑀺𑀧𑀺 𑀅𑀗𑁆𑀕𑀼𑀮𑀻𑀳𑀺 𑀕𑀳𑁂𑀢𑀼𑀁 𑀑𑀯𑀝𑁆𑀝𑀺𑀓𑀫𑁆𑀧𑀺 𑀓𑀸𑀢𑀼𑀦𑁆𑀢𑀺 𑀅𑀢𑁆𑀣𑁄.

𑁪𑁨𑁮. 𑀤𑀼𑀢𑀺𑀬𑀚𑁆𑀛𑀸𑀦𑀲𑀼𑀔𑀉𑀧𑀫𑀸𑀬𑀁 𑀉𑀩𑁆𑀪𑀺𑀢𑁄𑀤𑀓𑁄𑀢𑀺 𑀉𑀩𑁆𑀪𑀺𑀦𑁆𑀦𑀉𑀤𑀓𑁄, 𑀦 𑀳𑁂𑀝𑁆𑀞𑀸 𑀉𑀩𑁆𑀪𑀺𑀚𑁆𑀚𑀺𑀢𑁆𑀯𑀸 𑀉𑀕𑁆𑀕𑀘𑁆𑀙𑀦𑀉𑀤𑀓𑁄, 𑀅𑀦𑁆𑀢𑁄𑀬𑁂𑀯 𑀧𑀦 𑀉𑀩𑁆𑀪𑀺𑀚𑁆𑀚𑀦𑀉𑀤𑀓𑁄𑀢𑀺 𑀅𑀢𑁆𑀣𑁄. 𑀆𑀬𑀫𑀼𑀔𑀦𑁆𑀢𑀺 𑀆𑀕𑀫𑀦𑀫𑀕𑁆𑀕𑁄. 𑀤𑁂𑀯𑁄𑀢𑀺 𑀫𑁂𑀖𑁄. 𑀓𑀸𑀮𑁂𑀦𑀓𑀸𑀮𑀦𑁆𑀢𑀺 𑀓𑀸𑀮𑁂 𑀓𑀸𑀮𑁂, 𑀅𑀦𑁆𑀯𑀤𑁆𑀥𑀫𑀸𑀲𑀁 𑀯𑀸 𑀅𑀦𑀼𑀤𑀲𑀸𑀳𑀁 𑀯𑀸𑀢𑀺 𑀅𑀢𑁆𑀣𑁄. 𑀥𑀸𑀭𑀦𑁆𑀢𑀺 𑀯𑀼𑀝𑁆𑀞𑀺𑀁. 𑀦𑀸𑀦𑀼𑀧𑁆𑀧𑀯𑁂𑀘𑁆𑀙𑁂𑀬𑁆𑀬𑀸𑀢𑀺 𑀦 𑀧𑀯𑁂𑀲𑁂𑀬𑁆𑀬, 𑀦 𑀯𑀲𑁆𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀲𑀻𑀢𑀸 𑀯𑀸𑀭𑀺𑀥𑀸𑀭𑀸 𑀉𑀩𑁆𑀪𑀺𑀚𑁆𑀚𑀺𑀢𑁆𑀯𑀸𑀢𑀺 𑀲𑀻𑀢𑀁 𑀯𑀸𑀭𑀺 𑀢𑀁 𑀉𑀤𑀓𑀭𑀳𑀤𑀁 𑀧𑀽𑀭𑀬𑀫𑀸𑀦𑀁 𑀉𑀩𑁆𑀪𑀺𑀚𑁆𑀚𑀺𑀢𑁆𑀯𑀸. 𑀳𑁂𑀝𑁆𑀞𑀸 𑀉𑀕𑁆𑀕𑀘𑁆𑀙𑀦𑀉𑀤𑀓𑀜𑁆𑀳𑀺 𑀉𑀕𑁆𑀕𑀦𑁆𑀢𑁆𑀯𑀸 𑀉𑀕𑁆𑀕𑀦𑁆𑀢𑁆𑀯𑀸 𑀪𑀺𑀚𑁆𑀚𑀦𑁆𑀢𑀁 𑀉𑀤𑀓𑀁 𑀔𑁄𑀪𑁂𑀢𑀺. 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀧𑀯𑀺𑀲𑀦𑀉𑀤𑀓𑀁 𑀧𑀼𑀭𑀸𑀡𑀧𑀡𑁆𑀡𑀢𑀺𑀡𑀓𑀝𑁆𑀞𑀤𑀡𑁆𑀟𑀓𑀸𑀤𑀻𑀳𑀺 𑀉𑀤𑀓𑀁 𑀔𑁄𑀪𑁂𑀢𑀺. 𑀯𑀼𑀝𑁆𑀞𑀺𑀉𑀤𑀓𑀁 𑀥𑀸𑀭𑀸𑀦𑀺𑀧𑀸𑀢𑀧𑀼𑀧𑁆𑀨𑀼𑀴𑀓𑁂𑀳𑀺 𑀉𑀤𑀓𑀁 𑀔𑁄𑀪𑁂𑀢𑀺. 𑀲𑀦𑁆𑀦𑀺𑀲𑀺𑀦𑁆𑀦𑀫𑁂𑀯 𑀧𑀦 𑀳𑀼𑀢𑁆𑀯𑀸 𑀇𑀤𑁆𑀥𑀺𑀦𑀺𑀫𑁆𑀫𑀺𑀢𑀫𑀺𑀯 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀤𑀓𑀁 𑀇𑀫𑀁 𑀧𑀤𑁂𑀲𑀁 𑀨𑀭𑀢𑀺, 𑀇𑀫𑀁 𑀧𑀤𑁂𑀲𑀁 𑀦 𑀨𑀭𑀢𑀻𑀢𑀺 𑀦𑀢𑁆𑀣𑀺. 𑀢𑁂𑀦 𑀅𑀨𑀼𑀝𑁄𑀓𑀸𑀲𑁄 𑀦𑀸𑀫 𑀦 𑀳𑁄𑀢𑀻𑀢𑀺. 𑀢𑀢𑁆𑀣 𑀭𑀳𑀤𑁄 𑀯𑀺𑀬 𑀓𑀭𑀚𑀓𑀸𑀬𑁄, 𑀉𑀤𑀓𑀁 𑀯𑀺𑀬 𑀤𑀼𑀢𑀺𑀬𑀚𑁆𑀛𑀸𑀦𑀲𑀼𑀔𑀁. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁪𑁨𑁯. 𑀢𑀢𑀺𑀬𑀚𑁆𑀛𑀸𑀦𑀲𑀼𑀔𑀉𑀧𑀫𑀸𑀬𑀁 𑀉𑀧𑁆𑀧𑀮𑀸𑀦𑀺 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀉𑀧𑁆𑀧𑀮𑀺𑀦𑀻. 𑀲𑁂𑀲𑀧𑀤𑀤𑁆𑀯𑀬𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀲𑁂𑀢𑀭𑀢𑁆𑀢𑀦𑀻𑀮𑁂𑀲𑀼 𑀬𑀁𑀓𑀺𑀜𑁆𑀘𑀺 𑀉𑀧𑁆𑀧𑀮𑀁 𑀉𑀧𑁆𑀧𑀮𑀫𑁂𑀯, 𑀊𑀦𑀓𑀲𑀢𑀧𑀢𑁆𑀢𑀁 𑀧𑀼𑀡𑁆𑀟𑀭𑀻𑀓𑀁, 𑀲𑀢𑀧𑀢𑁆𑀢𑀁 𑀧𑀤𑀼𑀫𑀁. 𑀧𑀢𑁆𑀢𑀦𑀺𑀬𑀫𑀁 𑀯𑀸 𑀯𑀺𑀦𑀸𑀧𑀺 𑀲𑁂𑀢𑀁 𑀧𑀤𑀼𑀫𑀁, 𑀭𑀢𑁆𑀢𑀁 𑀧𑀼𑀡𑁆𑀟𑀭𑀻𑀓𑀦𑁆𑀢𑀺 𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑁄. 𑀉𑀤𑀓𑀸𑀦𑀼𑀕𑁆𑀕𑀢𑀸𑀦𑀻𑀢𑀺 𑀉𑀤𑀓𑀢𑁄 𑀦 𑀉𑀕𑁆𑀕𑀢𑀸𑀦𑀺. 𑀅𑀦𑁆𑀢𑁄𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀻𑀢𑀺 𑀉𑀤𑀓𑀢𑀮𑀲𑁆𑀲 𑀅𑀦𑁆𑀢𑁄 𑀦𑀺𑀫𑀼𑀕𑁆𑀕𑀸𑀦𑀺𑀬𑁂𑀯 𑀳𑀼𑀢𑁆𑀯𑀸 𑀧𑁄𑀲𑀻𑀦𑀺, 𑀯𑀟𑁆𑀠𑀻𑀦𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁪𑁩𑁦. 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀼𑀔𑀉𑀧𑀫𑀸𑀬𑀁 𑀧𑀭𑀺𑀲𑀼𑀤𑁆𑀥𑁂𑀦 𑀘𑁂𑀢𑀲𑀸 𑀧𑀭𑀺𑀬𑁄𑀤𑀸𑀢𑁂𑀦𑀸𑀢𑀺 𑀏𑀢𑁆𑀣 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀝𑁆𑀞𑁂𑀦 𑀧𑀭𑀺𑀲𑀼𑀤𑁆𑀥𑀁. 𑀧𑀪𑀲𑁆𑀲𑀭𑀝𑁆𑀞𑁂𑀦 𑀧𑀭𑀺𑀬𑁄𑀤𑀸𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀑𑀤𑀸𑀢𑁂𑀦 𑀯𑀢𑁆𑀣𑁂𑀦𑀸𑀢𑀺 𑀇𑀤𑀁 𑀉𑀢𑀼𑀨𑀭𑀡𑀢𑁆𑀣𑀁 𑀯𑀼𑀢𑁆𑀢𑀁. 𑀓𑀺𑀮𑀺𑀝𑁆𑀞𑀯𑀢𑁆𑀣𑁂𑀦 𑀳𑀺 𑀉𑀢𑀼𑀨𑀭𑀡𑀁 𑀦 𑀳𑁄𑀢𑀺, 𑀢𑀗𑁆𑀔𑀡𑀥𑁄𑀢𑀧𑀭𑀺𑀲𑀼𑀤𑁆𑀥𑁂𑀦 𑀉𑀢𑀼𑀨𑀭𑀡𑀁 𑀩𑀮𑀯𑀁 𑀳𑁄𑀢𑀺. 𑀇𑀫𑀺𑀲𑁆𑀲𑀸 𑀳𑀺 𑀉𑀧𑀫𑀸𑀬 𑀯𑀢𑁆𑀣𑀁 𑀯𑀺𑀬 𑀓𑀭𑀚𑀓𑀸𑀬𑁄. 𑀉𑀢𑀼𑀨𑀭𑀡𑀁 𑀯𑀺𑀬 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀼𑀔𑀁. 𑀢𑀲𑁆𑀫𑀸 𑀬𑀣𑀸 𑀲𑀼𑀦𑁆𑀳𑀸𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀭𑀺𑀲𑀼𑀤𑁆𑀥𑀁 𑀯𑀢𑁆𑀣𑀁 𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀲𑀭𑀻𑀭𑀢𑁄 𑀉𑀢𑀼 𑀲𑀩𑁆𑀩𑀫𑁂𑀯 𑀯𑀢𑁆𑀣𑀁 𑀨𑀭𑀢𑀺, 𑀦 𑀓𑁄𑀘𑀺 𑀯𑀢𑁆𑀣𑀲𑁆𑀲 𑀅𑀨𑀼𑀝𑁄𑀓𑀸𑀲𑁄 𑀳𑁄𑀢𑀺. 𑀏𑀯𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀼𑀔𑁂𑀦 𑀪𑀺𑀓𑁆𑀔𑀼𑀦𑁄 𑀓𑀭𑀚𑀓𑀸𑀬𑀲𑁆𑀲 𑀦 𑀓𑁄𑀘𑀺 𑀑𑀓𑀸𑀲𑁄 𑀅𑀨𑀼𑀝𑁄 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀫𑁂𑀯 𑀯𑀸 𑀯𑀢𑁆𑀣𑀁 𑀯𑀺𑀬, 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀉𑀢𑀼𑀨𑀭𑀡𑀁 𑀯𑀺𑀬. 𑀬𑀣𑀸 𑀳𑀺 𑀓𑀢𑁆𑀣𑀘𑀺 𑀑𑀤𑀸𑀢𑀯𑀢𑁆𑀣𑁂 𑀓𑀸𑀬𑀁 𑀅𑀧𑁆𑀨𑀼𑀲𑀦𑁆𑀢𑁂𑀧𑀺 𑀢𑀁𑀲𑀫𑀼𑀝𑁆𑀞𑀸𑀦𑁂𑀦 𑀉𑀢𑀼𑀦𑀸 𑀲𑀩𑁆𑀩𑀢𑁆𑀣𑀓𑀫𑁂𑀯 𑀓𑀸𑀬𑁄 𑀨𑀼𑀝𑁆𑀞𑁄 𑀳𑁄𑀢𑀺. 𑀏𑀯𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀼𑀝𑁆𑀞𑀺𑀢𑁂𑀦 𑀲𑀼𑀔𑀼𑀫𑀭𑀽𑀧𑁂𑀦 𑀲𑀩𑁆𑀩𑀢𑁆𑀣𑀓𑀫𑁂𑀯 𑀪𑀺𑀓𑁆𑀔𑀼𑀦𑁄 𑀓𑀭𑀚𑀓𑀸𑀬𑁄 𑀨𑀼𑀝𑁄 𑀳𑁄𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑁪𑁩𑁧. 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀉𑀧𑀫𑀸𑀬𑀁 𑀢𑀁𑀤𑀺𑀯𑀲𑀁 𑀓𑀢𑀓𑀺𑀭𑀺𑀬𑀸 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀢𑀁𑀤𑀺𑀯𑀲𑀁 𑀕𑀢𑀕𑀸𑀫𑀢𑁆𑀢𑀬𑀫𑁂𑀯 𑀕𑀳𑀺𑀢𑀁. 𑀢𑀢𑁆𑀣 𑀕𑀸𑀫𑀢𑁆𑀢𑀬𑀁 𑀕𑀢𑀧𑀼𑀭𑀺𑀲𑁄 𑀯𑀺𑀬 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀮𑀸𑀪𑀻 𑀤𑀝𑁆𑀞𑀩𑁆𑀩𑁄. 𑀢𑀬𑁄 𑀕𑀸𑀫𑀸 𑀯𑀺𑀬 𑀢𑀬𑁄 𑀪𑀯𑀸 𑀤𑀝𑁆𑀞𑀩𑁆𑀩𑀸. 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀻𑀲𑀼 𑀕𑀸𑀫𑁂𑀲𑀼 𑀢𑀁𑀤𑀺𑀯𑀲𑀁 𑀓𑀢𑀓𑀺𑀭𑀺𑀬𑀸𑀬 𑀆𑀯𑀺𑀪𑀸𑀯𑁄 𑀯𑀺𑀬 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀻𑀲𑀼 𑀪𑀯𑁂𑀲𑀼 𑀓𑀢𑀓𑀺𑀭𑀺𑀬𑀸𑀬 𑀆𑀯𑀺𑀪𑀸𑀯𑁄 𑀤𑀝𑁆𑀞𑀩𑁆𑀩𑁄.

𑁪𑁩𑁨. 𑀤𑀺𑀩𑁆𑀩𑀘𑀓𑁆𑀔𑀼𑀉𑀧𑀫𑀸𑀬𑀁 𑀤𑁆𑀯𑁂 𑀅𑀕𑀸𑀭𑀸𑀢𑀺 𑀤𑁆𑀯𑁂 𑀖𑀭𑀸. 𑀲𑀤𑁆𑀯𑀸𑀭𑀸𑀢𑀺 𑀲𑀫𑁆𑀫𑀼𑀔𑀤𑁆𑀯𑀸𑀭𑀸. 𑀅𑀦𑀼𑀘𑀗𑁆𑀓𑀫𑀦𑁆𑀢𑁂𑀢𑀺 𑀅𑀧𑀭𑀸𑀧𑀭𑀁 𑀲𑀜𑁆𑀘𑀭𑀦𑁆𑀢𑁂. 𑀅𑀦𑀼𑀯𑀺𑀘𑀭𑀦𑁆𑀢𑁂𑀢𑀺 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀦𑁆𑀢𑁂, 𑀇𑀢𑁄 𑀧𑀦 𑀕𑁂𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀢𑀁 𑀕𑁂𑀳𑀁, 𑀏𑀢𑀲𑁆𑀫𑀸 𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀇𑀫𑀁 𑀕𑁂𑀳𑀁 𑀧𑀯𑀺𑀲𑀦𑀯𑀲𑁂𑀦𑀧𑀺 𑀤𑀝𑁆𑀞𑀩𑁆𑀩𑀸. 𑀢𑀢𑁆𑀣 𑀤𑁆𑀯𑁂 𑀅𑀕𑀸𑀭𑀸 𑀲𑀤𑁆𑀯𑀸𑀭𑀸 𑀯𑀺𑀬 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄, 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀯𑀺𑀬 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀮𑀸𑀪𑀻, 𑀘𑀓𑁆𑀔𑀼𑀫𑀢𑁄 𑀧𑀼𑀭𑀺𑀲𑀲𑁆𑀲 𑀤𑁆𑀯𑀺𑀦𑁆𑀦𑀁 𑀕𑁂𑀳𑀸𑀦𑀁 𑀅𑀦𑁆𑀢𑀭𑁂 𑀞𑀢𑁆𑀯𑀸 𑀧𑀲𑁆𑀲𑀢𑁄 𑀤𑁆𑀯𑁂 𑀅𑀕𑀸𑀭𑁂 𑀧𑀯𑀺𑀲𑀦𑀓𑀦𑀺𑀓𑁆𑀔𑀫𑀦𑀓𑀧𑀼𑀭𑀺𑀲𑀸𑀦𑀁 𑀧𑀸𑀓𑀝𑀓𑀸𑀮𑁄 𑀯𑀺𑀬 𑀤𑀺𑀩𑁆𑀩𑀘𑀓𑁆𑀔𑀼𑀮𑀸𑀪𑀺𑀦𑁄 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀲𑁆𑀲 𑀘𑀯𑀦𑀓𑀉𑀧𑀧𑀚𑁆𑀚𑀦𑀓𑀲𑀢𑁆𑀢𑀸𑀦𑀁 𑀧𑀸𑀓𑀝𑀓𑀸𑀮𑁄. 𑀓𑀺𑀁 𑀧𑀦 𑀢𑁂 𑀜𑀸𑀡𑀲𑁆𑀲 𑀧𑀸𑀓𑀝𑀸, 𑀧𑀼𑀕𑁆𑀕𑀮𑀲𑁆𑀲𑀸𑀢𑀺? 𑀜𑀸𑀡𑀲𑁆𑀲. 𑀢𑀲𑁆𑀲 𑀧𑀸𑀓𑀝𑀢𑁆𑀢𑀸 𑀧𑀦 𑀧𑀼𑀕𑁆𑀕𑀮𑀲𑁆𑀲 𑀧𑀸𑀓𑀝𑀸𑀬𑁂𑀯𑀸𑀢𑀺.

𑁪𑁩𑁩. 𑀆𑀲𑀯𑀓𑁆𑀔𑀬𑀜𑀸𑀡𑀉𑀧𑀫𑀸𑀬𑀁 𑀧𑀩𑁆𑀩𑀢𑀲𑀗𑁆𑀔𑁂𑀧𑁂𑀢𑀺 𑀧𑀩𑁆𑀩𑀢𑀫𑀢𑁆𑀣𑀓𑁂. 𑀅𑀦𑀸𑀯𑀺𑀮𑁄𑀢𑀺 𑀦𑀺𑀓𑁆𑀓𑀤𑁆𑀤𑀫𑁄. 𑀲𑀺𑀧𑁆𑀧𑀺𑀬𑁄 𑀘 𑀲𑀫𑁆𑀩𑀼𑀓𑀸 𑀘 𑀲𑀺𑀧𑁆𑀧𑀺𑀲𑀫𑁆𑀩𑀼𑀓𑀁. 𑀲𑀓𑁆𑀔𑀭𑀸 𑀘 𑀓𑀣𑀮𑀸 𑀘 𑀲𑀓𑁆𑀔𑀭𑀓𑀣𑀮𑀁. 𑀫𑀘𑁆𑀙𑀸𑀦𑀁 𑀕𑀼𑀫𑁆𑀩𑀸 𑀖𑀝𑀸𑀢𑀺 𑀫𑀘𑁆𑀙𑀕𑀼𑀫𑁆𑀩𑀁. 𑀢𑀺𑀝𑁆𑀞𑀦𑁆𑀢𑀫𑁆𑀧𑀺 𑀘𑀭𑀦𑁆𑀢𑀫𑁆𑀧𑀻𑀢𑀺 𑀏𑀢𑁆𑀣 𑀲𑀓𑁆𑀔𑀭𑀓𑀣𑀮𑀁 𑀢𑀺𑀝𑁆𑀞𑀢𑀺𑀬𑁂𑀯, 𑀇𑀢𑀭𑀸𑀦𑀺 𑀘𑀭𑀦𑁆𑀢𑀺𑀧𑀺 𑀢𑀺𑀝𑁆𑀞𑀦𑁆𑀢𑀺𑀧𑀺. 𑀬𑀣𑀸 𑀧𑀦 𑀅𑀦𑁆𑀢𑀭𑀦𑁆𑀢𑀭𑀸 𑀞𑀺𑀢𑀸𑀲𑀼𑀧𑀺 𑀦𑀺𑀲𑀺𑀦𑁆𑀦𑀸𑀲𑀼𑀧𑀺 𑀯𑀺𑀚𑁆𑀚𑀫𑀸𑀦𑀸𑀲𑀼𑀧𑀺, ‘‘𑀏𑀢𑀸 𑀕𑀸𑀯𑁄 𑀘𑀭𑀦𑁆𑀢𑀻’’𑀢𑀺 𑀘𑀭𑀦𑁆𑀢𑀺𑀬𑁄 𑀉𑀧𑀸𑀤𑀸𑀬 𑀇𑀢𑀭𑀸𑀧𑀺 𑀘𑀭𑀦𑁆𑀢𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀁 𑀢𑀺𑀝𑁆𑀞𑀦𑁆𑀢𑀫𑁂𑀯 𑀲𑀓𑁆𑀔𑀭𑀓𑀣𑀮𑀁 𑀉𑀧𑀸𑀤𑀸𑀬 𑀇𑀢𑀭𑀫𑁆𑀧𑀺 𑀤𑁆𑀯𑀬𑀁 𑀢𑀺𑀝𑁆𑀞𑀦𑁆𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀢𑀭𑀜𑁆𑀘 𑀤𑁆𑀯𑀬𑀁 𑀘𑀭𑀦𑁆𑀢𑀁 𑀉𑀧𑀸𑀤𑀸𑀬 𑀲𑀓𑁆𑀔𑀭𑀓𑀣𑀮𑀫𑁆𑀧𑀺 𑀘𑀭𑀦𑁆𑀢𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘𑀓𑁆𑀔𑀼𑀫𑀢𑁄 𑀧𑀼𑀭𑀺𑀲𑀲𑁆𑀲 𑀢𑀻𑀭𑁂 𑀞𑀢𑁆𑀯𑀸 𑀧𑀲𑁆𑀲𑀢𑁄 𑀲𑀺𑀧𑁆𑀧𑀺𑀲𑀫𑁆𑀩𑀼𑀓𑀸𑀤𑀻𑀦𑀁 𑀯𑀺𑀪𑀽𑀢𑀓𑀸𑀮𑁄 𑀯𑀺𑀬 𑀆𑀲𑀯𑀸𑀦𑀁 𑀔𑀬𑀸𑀬 𑀘𑀺𑀢𑁆𑀢𑀁 𑀦𑀻𑀳𑀭𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀯𑀺𑀪𑀽𑀢𑀓𑀸𑀮𑁄 𑀤𑀝𑁆𑀞𑀩𑁆𑀩𑁄.

𑁪𑁩𑁪. 𑀇𑀤𑀸𑀦𑀺 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀲𑀮𑀺𑀗𑁆𑀕𑀢𑁄 𑀲𑀕𑀼𑀡𑀢𑁄 𑀔𑀻𑀡𑀸𑀲𑀯𑀲𑁆𑀲 𑀦𑀸𑀫𑀁 𑀕𑀡𑁆𑀳𑀦𑁆𑀢𑁄, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑀡𑁄 𑀇𑀢𑀺𑀧𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀫𑀡𑁄 𑀳𑁄𑀢𑀻𑀢𑀺𑀆𑀤𑀻𑀲𑀼, 𑀪𑀺𑀓𑁆𑀔𑀯𑁂, 𑀏𑀯𑀁 𑀪𑀺𑀓𑁆𑀔𑀼 𑀲𑀫𑀺𑀢𑀧𑀸𑀧𑀢𑁆𑀢𑀸 𑀲𑀫𑀡𑁄 𑀳𑁄𑀢𑀺. 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 𑀩𑁆𑀭𑀸𑀳𑁆𑀫𑀡𑁄 𑀳𑁄𑀢𑀺. 𑀦𑁆𑀳𑀸𑀢𑀓𑀺𑀮𑁂𑀲𑀢𑁆𑀢𑀸 𑀦𑁆𑀳𑀸𑀢𑀓𑁄 𑀳𑁄𑀢𑀺, 𑀥𑁄𑀢𑀓𑀺𑀮𑁂𑀲𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀘𑀢𑀼𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑁂𑀳𑀺 𑀯𑁂𑀤𑁂𑀳𑀺 𑀅𑀓𑀼𑀲𑀮𑀥𑀫𑁆𑀫𑀸𑀦𑀁 𑀕𑀢𑀢𑁆𑀢𑀸 𑀯𑁂𑀤𑀕𑀽 𑀳𑁄𑀢𑀺, 𑀯𑀺𑀤𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 𑀯𑀺𑀤𑀺𑀢𑀸𑀲𑁆𑀲 𑀳𑁄𑀦𑁆𑀢𑀻𑀢𑀺𑀆𑀤𑀺𑀫𑀸𑀳. 𑀓𑀺𑀮𑁂𑀲𑀸𑀦𑀁 𑀲𑀼𑀢𑀢𑁆𑀢𑀸 𑀲𑁄𑀢𑁆𑀢𑀺𑀬𑁄 𑀳𑁄𑀢𑀺, 𑀦𑀺𑀲𑁆𑀲𑀼𑀢𑀢𑁆𑀢𑀸 𑀅𑀧𑀳𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀓𑀺𑀮𑁂𑀲𑀸𑀦𑀁 𑀆𑀭𑀓𑀢𑁆𑀢𑀸 𑀅𑀭𑀺𑀬𑁄 𑀳𑁄𑀢𑀺, 𑀳𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑁂𑀳𑀺 𑀆𑀭𑀓𑀢𑁆𑀢𑀸 𑀅𑀭𑀳𑀁 𑀳𑁄𑀢𑀺, 𑀤𑀽𑀭𑀻𑀪𑀽𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑀢𑁆𑀣 𑀧𑀸𑀓𑀝𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀳𑀸𑀅𑀲𑁆𑀲𑀧𑀼𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀘𑀽𑀴𑀅𑀲𑁆𑀲𑀧𑀼𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁩𑁫. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀘𑀽𑀴𑀅𑀲𑁆𑀲𑀧𑀼𑀭𑀲𑀼𑀢𑁆𑀢𑀁. 𑀢𑀲𑁆𑀲 𑀤𑁂𑀲𑀦𑀸𑀓𑀸𑀭𑀡𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀲𑀫𑀡𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀤𑀸𑀢𑀺 𑀲𑀫𑀡𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀸 𑀲𑀫𑀡𑀸𑀦𑀁 𑀅𑀦𑀼𑀮𑁄𑀫𑀧𑁆𑀧𑀝𑀺𑀧𑀤𑀸.

𑁪𑁩𑁬. 𑀲𑀫𑀡𑀫𑀮𑀸𑀦𑀦𑁆𑀢𑀺𑀆𑀤𑀻𑀲𑀼 𑀏𑀢𑁂 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀫𑀡𑁂 𑀫𑀮𑀺𑀦𑁂 𑀓𑀭𑁄𑀦𑁆𑀢𑀺 𑀫𑀮𑀕𑁆𑀕𑀳𑀺𑀢𑁂, 𑀢𑀲𑁆𑀫𑀸 ‘‘𑀲𑀫𑀡𑀫𑀮𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀢𑁂𑀳𑀺 𑀲𑀫𑀡𑀸 𑀤𑀼𑀲𑁆𑀲𑀦𑁆𑀢𑀺, 𑀧𑀤𑀼𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀲𑀫𑀡𑀤𑁄𑀲𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀢𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀫𑀡𑁂 𑀓𑀲𑀝𑁂 𑀦𑀺𑀭𑁄𑀚𑁂 𑀓𑀭𑁄𑀦𑁆𑀢𑀺 𑀫𑀺𑀮𑀸𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀲𑀫𑀡𑀓𑀲𑀝𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀆𑀧𑀸𑀬𑀺𑀓𑀸𑀦𑀁 𑀞𑀸𑀦𑀸𑀦𑀦𑁆𑀢𑀺 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑀸𑀧𑀓𑀸𑀦𑀁 𑀓𑀸𑀭𑀡𑀸𑀦𑀁. 𑀤𑀼𑀕𑁆𑀕𑀢𑀺𑀯𑁂𑀤𑀦𑀺𑀬𑀸𑀦𑀦𑁆𑀢𑀺 𑀤𑀼𑀕𑁆𑀕𑀢𑀺𑀬𑀁 𑀯𑀺𑀧𑀸𑀓𑀯𑁂𑀤𑀦𑀸𑀬 𑀧𑀘𑁆𑀘𑀬𑀸𑀦𑀁. 𑀫𑀢𑀚𑀁 𑀦𑀸𑀫𑀸𑀢𑀺 𑀫𑀦𑀼𑀲𑁆𑀲𑀸 𑀢𑀺𑀔𑀺𑀡𑀁 𑀅𑀬𑀁 𑀅𑀬𑁂𑀦 𑀲𑀼𑀖𑀁𑀲𑀺𑀢𑁆𑀯𑀸 𑀢𑀁 𑀅𑀬𑀘𑀼𑀡𑁆𑀡𑀁 𑀫𑀁𑀲𑁂𑀦 𑀲𑀤𑁆𑀥𑀺𑀁 𑀫𑀤𑁆𑀤𑀺𑀢𑁆𑀯𑀸 𑀓𑁄𑀜𑁆𑀘𑀲𑀓𑀼𑀡𑁂 𑀔𑀸𑀤𑀸𑀧𑁂𑀦𑁆𑀢𑀺. 𑀢𑁂 𑀉𑀘𑁆𑀘𑀸𑀭𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀫𑀭𑀦𑁆𑀢𑀺. 𑀦𑁄 𑀘𑁂 𑀫𑀭𑀦𑁆𑀢𑀺, 𑀧𑀳𑀭𑀺𑀢𑁆𑀯𑀸 𑀫𑀸𑀭𑁂𑀦𑁆𑀢𑀺. 𑀅𑀣 𑀢𑁂𑀲𑀁 𑀓𑀼𑀘𑁆𑀙𑀺𑀁 𑀨𑀸𑀮𑁂𑀢𑁆𑀯𑀸 𑀦𑀁 𑀉𑀤𑀓𑁂𑀦 𑀥𑁄𑀯𑀺𑀢𑁆𑀯𑀸 𑀘𑀼𑀡𑁆𑀡𑀁 𑀕𑀳𑁂𑀢𑁆𑀯𑀸 𑀫𑀁𑀲𑁂𑀦 𑀲𑀤𑁆𑀥𑀺𑀁 𑀫𑀤𑁆𑀤𑀺𑀢𑁆𑀯𑀸 𑀧𑀼𑀦 𑀔𑀸𑀤𑀸𑀧𑁂𑀦𑁆𑀢𑀻𑀢𑀺 𑀏𑀯𑀁 𑀲𑀢𑁆𑀢 𑀯𑀸𑀭𑁂 𑀔𑀸𑀤𑀸𑀧𑁂𑀢𑁆𑀯𑀸 𑀕𑀳𑀺𑀢𑁂𑀦 𑀅𑀬𑀘𑀼𑀡𑁆𑀡𑁂𑀦 𑀆𑀯𑀼𑀥𑀁 𑀓𑀭𑁄𑀦𑁆𑀢𑀺. 𑀲𑀼𑀲𑀺𑀓𑁆𑀔𑀺𑀢𑀸 𑀘 𑀦𑀁 𑀅𑀬𑀓𑀸𑀭𑀸 𑀩𑀳𑀼𑀳𑀢𑁆𑀣𑀓𑀫𑁆𑀫𑀫𑀽𑀮𑀁 𑀮𑀪𑀺𑀢𑁆𑀯𑀸 𑀓𑀭𑁄𑀦𑁆𑀢𑀺. 𑀢𑀁 𑀫𑀢𑀲𑀓𑀼𑀡𑀢𑁄 𑀚𑀸𑀢𑀢𑁆𑀢𑀸 ‘‘𑀫𑀢𑀚’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀅𑀢𑀺𑀢𑀺𑀔𑀺𑀡𑀁 𑀳𑁄𑀢𑀺. 𑀧𑀻𑀢𑀦𑀺𑀲𑀺𑀢𑀦𑁆𑀢𑀺 𑀉𑀤𑀓𑀧𑀻𑀢𑀜𑁆𑀘𑁂𑀯 𑀲𑀺𑀮𑀸𑀬 𑀘 𑀲𑀼𑀦𑀺𑀖𑀁𑀲𑀺𑀢𑀁. 𑀲𑀗𑁆𑀖𑀸𑀝𑀺𑀬𑀸𑀢𑀺 𑀓𑁄𑀲𑀺𑀬𑀸. 𑀲𑀫𑁆𑀧𑀸𑀭𑀼𑀢𑀦𑁆𑀢𑀺 𑀧𑀭𑀺𑀬𑁄𑀦𑀤𑁆𑀥𑀁. 𑀲𑀫𑁆𑀧𑀮𑀺𑀯𑁂𑀞𑀺𑀢𑀦𑁆𑀢𑀺 𑀲𑀫𑀦𑁆𑀢𑀢𑁄 𑀯𑁂𑀞𑀺𑀢𑀁.

𑁪𑁩𑁭. 𑀭𑀚𑁄𑀚𑀮𑁆𑀮𑀺𑀓𑀲𑁆𑀲𑀸𑀢𑀺 𑀭𑀚𑁄𑀚𑀮𑁆𑀮𑀥𑀸𑀭𑀺𑀦𑁄. 𑀉𑀤𑀓𑁄𑀭𑁄𑀳𑀓𑀲𑁆𑀲𑀸𑀢𑀺 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀉𑀤𑀓𑀁 𑀑𑀭𑁄𑀳𑀦𑁆𑀢𑀲𑁆𑀲. 𑀭𑀼𑀓𑁆𑀔𑀫𑀽𑀮𑀺𑀓𑀲𑁆𑀲𑀸𑀢𑀺 𑀭𑀼𑀓𑁆𑀔𑀫𑀽𑀮𑀯𑀸𑀲𑀺𑀦𑁄. 𑀅𑀩𑁆𑀪𑁄𑀓𑀸𑀲𑀺𑀓𑀲𑁆𑀲𑀸𑀢𑀺 𑀅𑀩𑁆𑀪𑁄𑀓𑀸𑀲𑀯𑀸𑀲𑀺𑀦𑁄. 𑀉𑀩𑁆𑀪𑀝𑁆𑀞𑀓𑀲𑁆𑀲𑀸𑀢𑀺 𑀉𑀤𑁆𑀥𑀁 𑀞𑀺𑀢𑀓𑀲𑁆𑀲. 𑀧𑀭𑀺𑀬𑀸𑀬𑀪𑀢𑁆𑀢𑀺𑀓𑀲𑁆𑀲𑀸𑀢𑀺 𑀫𑀸𑀲𑀯𑀸𑀭𑁂𑀦 𑀯𑀸 𑀅𑀟𑁆𑀠𑀫𑀸𑀲𑀯𑀸𑀭𑁂𑀦 𑀯𑀸 𑀪𑀼𑀜𑁆𑀚𑀦𑁆𑀢𑀲𑁆𑀲. 𑀲𑀩𑁆𑀩𑀫𑁂𑀢𑀁 𑀩𑀸𑀳𑀺𑀭𑀲𑀫𑀬𑁂𑀦𑁂𑀯 𑀓𑀣𑀺𑀢𑀁. 𑀇𑀫𑀲𑁆𑀫𑀺𑀜𑁆𑀳𑀺 𑀲𑀸𑀲𑀦𑁂 𑀘𑀻𑀯𑀭𑀥𑀭𑁄 𑀪𑀺𑀓𑁆𑀔𑀼 𑀲𑀗𑁆𑀖𑀸𑀝𑀺𑀓𑁄𑀢𑀺 𑀦 𑀯𑀼𑀘𑁆𑀘𑀢𑀺. 𑀭𑀚𑁄𑀚𑀮𑁆𑀮𑀥𑀸𑀭𑀡𑀸𑀤𑀺𑀯𑀢𑀸𑀦𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀦𑀢𑁆𑀣𑀺𑀬𑁂𑀯. 𑀩𑀼𑀤𑁆𑀥𑀯𑀘𑀦𑀲𑁆𑀲 𑀩𑀼𑀤𑁆𑀥𑀯𑀘𑀦𑀫𑁂𑀯 𑀦𑀸𑀫𑀁, 𑀦 𑀫𑀦𑁆𑀢𑀸𑀢𑀺. 𑀭𑀼𑀓𑁆𑀔𑀫𑀽𑀮𑀺𑀓𑁄, 𑀅𑀩𑁆𑀪𑁄𑀓𑀸𑀲𑀺𑀓𑁄𑀢𑀺 𑀏𑀢𑁆𑀢𑀓𑀁𑀬𑁂𑀯 𑀧𑀦 𑀮𑀩𑁆𑀪𑀢𑀺. 𑀢𑀫𑁆𑀧𑀺 𑀩𑀸𑀳𑀺𑀭𑀲𑀫𑀬𑁂𑀦𑁂𑀯 𑀓𑀣𑀺𑀢𑀁. 𑀚𑀸𑀢𑀫𑁂𑀯 𑀦𑀦𑁆𑀢𑀺 𑀢𑀁𑀤𑀺𑀯𑀲𑁂 𑀚𑀸𑀢𑀫𑀢𑁆𑀢𑀁𑀬𑁂𑀯 𑀦𑀁. 𑀲𑀗𑁆𑀖𑀸𑀝𑀺𑀓𑀁 𑀓𑀭𑁂𑀬𑁆𑀬𑀼𑀦𑁆𑀢𑀺 𑀲𑀗𑁆𑀖𑀸𑀝𑀺𑀓𑀁 𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀘 𑀧𑀸𑀭𑀼𑀧𑀺𑀢𑁆𑀯𑀸 𑀘 𑀲𑀗𑁆𑀖𑀸𑀝𑀺𑀓𑀁 𑀓𑀭𑁂𑀬𑁆𑀬𑀼𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑁪𑁩𑁮. 𑀯𑀺𑀲𑀼𑀤𑁆𑀥𑀫𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀅𑀢𑁆𑀢𑀸𑀦𑀁 𑀯𑀺𑀲𑀼𑀚𑁆𑀛𑀦𑁆𑀢𑀁 𑀧𑀲𑁆𑀲𑀢𑀺. 𑀯𑀺𑀲𑀼𑀤𑁆𑀥𑁄𑀢𑀺 𑀧𑀦 𑀦 𑀢𑀸𑀯 𑀯𑀢𑁆𑀢𑀩𑁆𑀩𑁄. 𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀻𑀢𑀺 𑀢𑀼𑀝𑁆𑀞𑀸𑀓𑀸𑀭𑁄 𑀚𑀸𑀬𑀢𑀺. 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀻𑀢𑀺 𑀢𑀼𑀝𑁆𑀞𑀲𑁆𑀲 𑀲𑀓𑀮𑀲𑀭𑀻𑀭𑀁 𑀔𑁄𑀪𑀬𑀫𑀸𑀦𑀸 𑀧𑀻𑀢𑀺 𑀚𑀸𑀬𑀢𑀺. 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄𑀢𑀺 𑀧𑀻𑀢𑀺𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀦𑀸𑀫𑀓𑀸𑀬𑁄. 𑀧𑀲𑁆𑀲𑀫𑁆𑀪𑀢𑀻𑀢𑀺 𑀯𑀺𑀕𑀢𑀤𑀭𑀣𑁄 𑀳𑁄𑀢𑀺. 𑀲𑀼𑀔𑀁 𑀯𑁂𑀤𑁂𑀢𑀻𑀢𑀺 𑀓𑀸𑀬𑀺𑀓𑀫𑁆𑀧𑀺 𑀘𑁂𑀢𑀲𑀺𑀓𑀫𑁆𑀧𑀺 𑀲𑀼𑀔𑀁 𑀯𑁂𑀤𑀺𑀬𑀢𑀺. 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻𑀢𑀺 𑀇𑀫𑀺𑀦𑀸 𑀦𑁂𑀓𑁆𑀔𑀫𑁆𑀫𑀲𑀼𑀔𑁂𑀦 𑀲𑀼𑀔𑀺𑀢𑀲𑁆𑀲 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀅𑀧𑁆𑀧𑀦𑀸𑀧𑀢𑁆𑀢𑀁 𑀯𑀺𑀬 𑀳𑁄𑀢𑀺. 𑀲𑁄 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸𑀢𑀺 𑀳𑁂𑀝𑁆𑀞𑀸 𑀓𑀺𑀮𑁂𑀲𑀯𑀲𑁂𑀦 𑀆𑀭𑀤𑁆𑀥𑀸 𑀤𑁂𑀲𑀦𑀸 𑀧𑀩𑁆𑀩𑀢𑁂 𑀯𑀼𑀝𑁆𑀞𑀯𑀼𑀝𑁆𑀞𑀺 𑀯𑀺𑀬 𑀦𑀤𑀺𑀁 𑀬𑀣𑀸𑀦𑀼𑀲𑀦𑁆𑀥𑀺𑀦𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀁 𑀑𑀢𑀺𑀡𑁆𑀡𑀸. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀫𑁂𑀯. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑁄𑀓𑁆𑀔𑀭𑀡𑀻𑀢𑀺 𑀫𑀳𑀸𑀲𑀻𑀳𑀦𑀸𑀤𑀲𑀼𑀢𑁆𑀢𑁂 𑀫𑀕𑁆𑀕𑁄 𑀧𑁄𑀓𑁆𑀔𑀭𑀡𑀺𑀬𑀸 𑀉𑀧𑀫𑀺𑀢𑁄, 𑀇𑀥 𑀲𑀸𑀲𑀦𑀁 𑀉𑀧𑀫𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀆𑀲𑀯𑀸𑀦𑀁 𑀔𑀬𑀸 𑀲𑀫𑀡𑁄 𑀳𑁄𑀢𑀻𑀢𑀺 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀲𑀫𑀺𑀢𑀢𑁆𑀢𑀸 𑀧𑀭𑀫𑀢𑁆𑀣𑀲𑀫𑀡𑁄 𑀳𑁄𑀢𑀻𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀘𑀽𑀴𑀅𑀲𑁆𑀲𑀧𑀼𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀢𑁆𑀣𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀽𑀴𑀬𑀫𑀓𑀯𑀕𑁆𑀕𑁄

𑁧. 𑀲𑀸𑀮𑁂𑀬𑁆𑀬𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁩𑁯. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀲𑀸𑀮𑁂𑀬𑁆𑀬𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀓𑁄𑀲𑀮𑁂𑀲𑀽𑀢𑀺 𑀓𑁄𑀲𑀮𑀸 𑀦𑀸𑀫 𑀚𑀸𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸. 𑀢𑁂𑀲𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀼𑀴𑁆𑀳𑀻𑀲𑀤𑁆𑀤𑁂𑀦 𑀓𑁄𑀲𑀮𑀸𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀓𑁄𑀲𑀮𑁂𑀲𑀼 𑀚𑀦𑀧𑀤𑁂. 𑀧𑁄𑀭𑀸𑀡𑀸 𑀧𑀦𑀸𑀳𑀼 𑁋 𑀬𑀲𑁆𑀫𑀸 𑀧𑀼𑀩𑁆𑀩𑁂 𑀫𑀳𑀸𑀧𑀦𑀸𑀤𑀁 𑀭𑀸𑀚𑀓𑀼𑀫𑀸𑀭𑀁 𑀦𑀸𑀦𑀸𑀦𑀸𑀝𑀓𑀸𑀦𑀺 𑀤𑀺𑀲𑁆𑀯𑀸 𑀲𑀺𑀢𑀫𑀢𑁆𑀢𑀫𑁆𑀧𑀺 𑀅𑀓𑀭𑁄𑀦𑁆𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀆𑀳 𑁋 ‘‘𑀬𑁄 𑀫𑀫 𑀧𑀼𑀢𑁆𑀢𑀁 𑀳𑀲𑀸𑀧𑁂𑀢𑀺, 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀦 𑀦𑀁 𑀅𑀮𑀗𑁆𑀓𑀭𑁄𑀫𑀻’’𑀢𑀺. 𑀢𑀢𑁄 𑀦𑀗𑁆𑀕𑀮𑀸𑀦𑀺𑀧𑀺 𑀙𑀟𑁆𑀟𑁂𑀢𑁆𑀯𑀸 𑀫𑀳𑀸𑀚𑀦𑀓𑀸𑀬𑁂 𑀲𑀦𑁆𑀦𑀺𑀧𑀢𑀺𑀢𑁂 𑀫𑀦𑀼𑀲𑁆𑀲𑀸 𑀲𑀸𑀢𑀺𑀭𑁂𑀓𑀸𑀦𑀺 𑀲𑀢𑁆𑀢𑀯𑀲𑁆𑀲𑀸𑀦𑀺 𑀦𑀸𑀦𑀸𑀓𑀻𑀴𑀺𑀓𑀸𑀬𑁄 𑀤𑀲𑁆𑀲𑁂𑀢𑁆𑀯𑀸 𑀦𑀁 𑀳𑀲𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀢𑀢𑁄 𑀲𑀓𑁆𑀓𑁄 𑀤𑁂𑀯𑀦𑀝𑀁 𑀧𑁂𑀲𑁂𑀲𑀺. 𑀲𑁄 𑀤𑀺𑀩𑁆𑀩𑀦𑀸𑀝𑀓𑀁 𑀤𑀲𑁆𑀲𑁂𑀢𑁆𑀯𑀸 𑀳𑀲𑀸𑀧𑁂𑀲𑀺. 𑀅𑀣 𑀢𑁂 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀲𑀦𑁄𑀓𑀸𑀲𑀸𑀪𑀺𑀫𑀼𑀔𑀸 𑀧𑀓𑁆𑀓𑀫𑀺𑀁𑀲𑀼. 𑀢𑁂 𑀧𑀝𑀺𑀧𑀣𑁂 𑀫𑀺𑀢𑁆𑀢𑀲𑀼𑀳𑀚𑁆𑀚𑀸𑀤𑀬𑁄 𑀤𑀺𑀲𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑀸, ‘‘𑀓𑀘𑁆𑀘𑀺, 𑀪𑁄, 𑀓𑀼𑀲𑀮𑀁, 𑀓𑀘𑁆𑀘𑀺, 𑀪𑁄, 𑀓𑀼𑀲𑀮’’𑀦𑁆𑀢𑀺 𑀆𑀳𑀁𑀲𑀼. 𑀢𑀲𑁆𑀫𑀸 𑀢𑀁 ‘‘𑀓𑀼𑀲𑀮𑀁 𑀓𑀼𑀲𑀮’’𑀦𑁆𑀢𑀺 𑀯𑀘𑀦𑀁 𑀉𑀧𑀸𑀤𑀸𑀬 𑀲𑁄 𑀧𑀤𑁂𑀲𑁄 𑀓𑁄𑀲𑀮𑀸𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀘𑀸𑀭𑀺𑀓𑀁 𑀘𑀭𑀫𑀸𑀦𑁄𑀢𑀺 𑀅𑀢𑀼𑀭𑀺𑀢𑀘𑀸𑀭𑀺𑀓𑀁 𑀘𑀭𑀫𑀸𑀦𑁄. 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀦𑁆𑀢𑀺 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀲𑀢𑀲𑀳𑀲𑁆𑀲𑀁 𑀯𑀸𑀢𑀺 𑀏𑀯𑀁 𑀅𑀧𑀭𑀺𑀘𑁆𑀙𑀺𑀦𑁆𑀦𑁂𑀦 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁. 𑀩𑁆𑀭𑀸𑀳𑁆𑀫𑀡𑀕𑀸𑀫𑁄𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀫𑁄𑀲𑀭𑀡𑀕𑀸𑀫𑁄𑀧𑀺 𑀩𑁆𑀭𑀸𑀳𑁆𑀫𑀡𑀕𑀸𑀫𑁄𑀢𑀺 𑀯𑀼𑀘𑁆𑀘𑀢𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀪𑁄𑀕𑀕𑀸𑀫𑁄𑀧𑀺. 𑀇𑀥 𑀲𑀫𑁄𑀲𑀭𑀡𑀕𑀸𑀫𑁄 𑀅𑀥𑀺𑀧𑁆𑀧𑁂𑀢𑁄. 𑀢𑀤𑀯𑀲𑀭𑀻𑀢𑀺 𑀢𑀁 𑀅𑀯𑀲𑀭𑀺, 𑀲𑀫𑁆𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀳𑀸𑀭𑁄 𑀧𑀦𑁂𑀢𑁆𑀣 𑀅𑀦𑀺𑀬𑀸𑀫𑀺𑀢𑁄; 𑀢𑀲𑁆𑀫𑀸 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀩𑀼𑀤𑁆𑀥𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑁄 𑀏𑀓𑁄 𑀯𑀦𑀲𑀡𑁆𑀟𑁄 𑀪𑀯𑀺𑀲𑁆𑀲𑀢𑀺, 𑀲𑀢𑁆𑀣𑀸 𑀢𑀁 𑀯𑀦𑀲𑀡𑁆𑀟𑀁 𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀲𑁆𑀲𑁄𑀲𑀼𑀦𑁆𑀢𑀺 𑀲𑀼𑀡𑀺𑀁𑀲𑀼 𑀉𑀧𑀮𑀪𑀺𑀁𑀲𑀼. 𑀲𑁄𑀢𑀤𑁆𑀯𑀸𑀭𑀲𑀫𑁆𑀧𑀢𑁆𑀢𑀯𑀘𑀦𑀦𑀺𑀕𑁆𑀖𑁄𑀲𑀸𑀦𑀼𑀲𑀸𑀭𑁂𑀦 𑀚𑀸𑀦𑀺𑀁𑀲𑀼. 𑀔𑁄𑀢𑀺 𑀅𑀯𑀥𑀸𑀭𑀡𑀢𑁆𑀣𑁂 𑀧𑀤𑀧𑀽𑀭𑀡𑀫𑀢𑁆𑀢𑁂 𑀯𑀸 𑀦𑀺𑀧𑀸𑀢𑁄. 𑀢𑀢𑁆𑀣 𑀅𑀯𑀥𑀸𑀭𑀡𑀢𑁆𑀣𑁂𑀦 𑀅𑀲𑁆𑀲𑁄𑀲𑀼𑀁𑀬𑁂𑀯, 𑀦 𑀦𑁂𑀲𑀁 𑀓𑁄𑀘𑀺 𑀲𑀯𑀦𑀦𑁆𑀢𑀭𑀸𑀬𑁄 𑀅𑀳𑁄𑀲𑀻𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀤𑀧𑀽𑀭𑀡𑁂𑀦 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀫𑀢𑁆𑀢𑀫𑁂𑀯.

𑀇𑀤𑀸𑀦𑀺 𑀬𑀫𑀢𑁆𑀣𑀁 𑀅𑀲𑁆𑀲𑁄𑀲𑀼𑀁, 𑀢𑀁 𑀧𑀓𑀸𑀲𑁂𑀢𑀼𑀁 𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀫𑀺𑀢𑀧𑀸𑀧𑀢𑁆𑀢𑀸 𑀲𑀫𑀡𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀔𑀮𑀽𑀢𑀺 𑀅𑀦𑀼𑀲𑁆𑀲𑀯𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀪𑁄𑀢𑀺 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀆𑀮𑀧𑀦𑀫𑀢𑁆𑀢𑀁. 𑀕𑁄𑀢𑀫𑁄𑀢𑀺 𑀪𑀕𑀯𑀢𑁄 𑀕𑁄𑀢𑁆𑀢𑀯𑀲𑁂𑀦 𑀧𑀭𑀺𑀤𑀻𑀧𑀦𑀁. 𑀢𑀲𑁆𑀫𑀸 𑀲𑀫𑀡𑁄 𑀔𑀮𑀼, 𑀪𑁄, 𑀕𑁄𑀢𑀫𑁄𑀢𑀺 𑀏𑀢𑁆𑀣 𑀲𑀫𑀡𑁄 𑀓𑀺𑀭, 𑀪𑁄, 𑀕𑁄𑀢𑀫𑀕𑁄𑀢𑁆𑀢𑁄𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀓𑁆𑀬𑀧𑀼𑀢𑁆𑀢𑁄𑀢𑀺 𑀇𑀤𑀁 𑀧𑀦 𑀪𑀕𑀯𑀢𑁄 𑀉𑀘𑁆𑀘𑀸𑀓𑀼𑀮𑀧𑀭𑀺𑀤𑀻𑀧𑀦𑀁. 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀪𑀸𑀯𑀤𑀻𑀧𑀦𑀁. 𑀓𑁂𑀦𑀘𑀺 𑀧𑀸𑀭𑀺𑀚𑀼𑀜𑁆𑀜𑁂𑀦 𑀅𑀦𑀪𑀺𑀪𑀽𑀢𑁄 𑀅𑀧𑀭𑀺𑀓𑁆𑀔𑀻𑀡𑀁𑀬𑁂𑀯 𑀢𑀁 𑀓𑀼𑀮𑀁 𑀧𑀳𑀸𑀬 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁄 𑀧𑀭𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀢𑀁 𑀔𑁄 𑀧𑀦𑀸𑀢𑀺 𑀇𑀢𑁆𑀣𑀫𑁆𑀪𑀽𑀢𑀸𑀔𑁆𑀬𑀸𑀦𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁, 𑀢𑀲𑁆𑀲 𑀔𑁄 𑀧𑀦 𑀪𑁄𑀢𑁄 𑀕𑁄𑀢𑀫𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀓𑀮𑁆𑀬𑀸𑀡𑁄𑀢𑀺 𑀓𑀮𑁆𑀬𑀸𑀡𑀕𑀼𑀡𑀲𑀫𑀦𑁆𑀦𑀸𑀕𑀢𑁄, 𑀲𑁂𑀝𑁆𑀞𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀢𑁆𑀢𑀺𑀲𑀤𑁆𑀤𑁄𑀢𑀺 𑀓𑀺𑀢𑁆𑀢𑀺𑀬𑁂𑀯, 𑀣𑀼𑀢𑀺𑀖𑁄𑀲𑁄 𑀯𑀸. 𑀅𑀩𑁆𑀪𑀼𑀕𑁆𑀕𑀢𑁄𑀢𑀺 𑀲𑀤𑁂𑀯𑀓𑀁 𑀮𑁄𑀓𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀉𑀕𑁆𑀕𑀢𑁄. 𑀓𑀺𑀦𑁆𑀢𑀺? ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸…𑀧𑁂… 𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺.

𑀢𑀢𑁆𑀭𑀸𑀬𑀁 𑀧𑀤𑀲𑀫𑁆𑀩𑀦𑁆𑀥𑁄 𑁋 𑀲𑁄 𑀪𑀕𑀯𑀸 𑀇𑀢𑀺𑀧𑀺 𑀅𑀭𑀳𑀁, 𑀇𑀢𑀺𑀧𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… 𑀇𑀢𑀺𑀧𑀺 𑀪𑀕𑀯𑀸𑀢𑀺. 𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀆𑀭𑀓𑀢𑁆𑀢𑀸, 𑀅𑀭𑀻𑀦𑀁 𑀅𑀭𑀸𑀦𑀜𑁆𑀘 𑀳𑀢𑀢𑁆𑀢𑀸, 𑀧𑀘𑁆𑀘𑀬𑀸𑀤𑀻𑀦𑀁 𑀅𑀭𑀳𑀢𑁆𑀢𑀸, 𑀧𑀸𑀧𑀓𑀭𑀡𑁂 𑀭𑀳𑀸𑀪𑀸𑀯𑀸𑀢𑀺 𑀇𑀫𑁂𑀳𑀺 𑀢𑀸𑀯 𑀓𑀸𑀭𑀡𑁂𑀳𑀺 𑀲𑁄 𑀪𑀕𑀯𑀸 𑀅𑀭𑀳𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀩𑁆𑀩𑀸𑀦𑁂𑀯 𑀏𑀢𑀸𑀦𑀺 𑀧𑀤𑀸𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀦𑀺𑀤𑁆𑀤𑁂𑀲𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑀻𑀢𑀺 𑀢𑀢𑁄 𑀢𑁂𑀲𑀁 𑀯𑀺𑀢𑁆𑀣𑀸𑀭𑁄 𑀕𑀳𑁂𑀢𑀩𑁆𑀩𑁄.

𑀲𑀸𑀥𑀼 𑀔𑁄 𑀧𑀦𑀸𑀢𑀺 𑀲𑀼𑀦𑁆𑀤𑀭𑀁 𑀔𑁄 𑀧𑀦; 𑀅𑀢𑁆𑀣𑀸𑀯𑀳𑀁 𑀲𑀼𑀔𑀸𑀯𑀳𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀦𑁆𑀢𑀺 𑀬𑀣𑀸𑀭𑀽𑀧𑁄 𑀲𑁄 𑀪𑀯𑀁 𑀕𑁄𑀢𑀫𑁄, 𑀏𑀯𑀭𑀽𑀧𑀸𑀦𑀁 𑀅𑀦𑁂𑀓𑁂𑀳𑀺𑀧𑀺 𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀳𑀺 𑀤𑀼𑀮𑁆𑀮𑀪𑀤𑀲𑁆𑀲𑀦𑀸𑀦𑀁 𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑀺𑀢𑁆𑀢𑁂𑀳𑀺 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀭𑀢𑀦𑀧𑀝𑀺𑀫𑀡𑁆𑀟𑀺𑀢𑁂𑀳𑀺 𑀤𑁆𑀯𑀢𑁆𑀢𑀺𑀁𑀲𑁆𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀯𑀭𑁂𑀳𑀺 𑀲𑀫𑀸𑀓𑀺𑀡𑁆𑀡𑀫𑀦𑁄𑀭𑀫𑀲𑀭𑀻𑀭𑀸𑀦𑀁 𑀅𑀢𑀧𑁆𑀧𑀓𑀤𑀲𑁆𑀲𑀦𑀸𑀦𑀁 𑀅𑀢𑀺𑀫𑀥𑀼𑀭𑀥𑀫𑁆𑀫𑀦𑀺𑀕𑁆𑀖𑁄𑀲𑀸𑀦𑀁, 𑀬𑀣𑀸𑀪𑀽𑀢𑀕𑀼𑀡𑀸𑀥𑀺𑀕𑀫𑁂𑀦 𑀮𑁄𑀓𑁂 𑀅𑀭𑀳𑀦𑁆𑀢𑁄𑀢𑀺 𑀮𑀤𑁆𑀥𑀲𑀤𑁆𑀤𑀸𑀦𑀁 𑀅𑀭𑀳𑀢𑀁. 𑀤𑀲𑁆𑀲𑀦𑀁 𑀳𑁄𑀢𑀻𑀢𑀺 𑀧𑀲𑀸𑀤𑀲𑁄𑀫𑁆𑀫𑀸𑀦𑀺 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀤𑀲𑁆𑀲𑀦𑀫𑀢𑁆𑀢𑀫𑁆𑀧𑀺 𑀲𑀸𑀥𑀼 𑀳𑁄𑀢𑀺. 𑀲𑀘𑁂 𑀧𑀦 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀏𑀓𑀁 𑀧𑀤𑀫𑁆𑀧𑀺 𑀲𑁄𑀢𑀼𑀁 𑀮𑀪𑀺𑀲𑁆𑀲𑀸𑀫, 𑀲𑀸𑀥𑀼𑀢𑀭𑀁𑀬𑁂𑀯 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀅𑀚𑁆𑀛𑀸𑀲𑀬𑀁 𑀓𑀢𑁆𑀯𑀸.

𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀽𑀢𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀧𑀳𑀸𑀬 𑀢𑀼𑀝𑁆𑀞𑀫𑀸𑀦𑀲𑀸 𑀆𑀕𑀫𑀁𑀲𑀼. 𑀏𑀢𑀤𑀯𑁄𑀘𑀼𑀦𑁆𑀢𑀺 𑀤𑀼𑀯𑀺𑀥𑀸 𑀳𑀺 𑀧𑀼𑀘𑁆𑀙𑀸 𑀅𑀕𑀸𑀭𑀺𑀓𑀧𑀼𑀘𑁆𑀙𑀸 𑀅𑀦𑀕𑀸𑀭𑀺𑀓𑀧𑀼𑀘𑁆𑀙𑀸 𑀘. 𑀢𑀢𑁆𑀣 ‘‘𑀓𑀺𑀁, 𑀪𑀦𑁆𑀢𑁂, 𑀓𑀼𑀲𑀮𑀁, 𑀓𑀺𑀁 𑀅𑀓𑀼𑀲𑀮’’𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀕𑀸𑀭𑀺𑀓𑀧𑀼𑀘𑁆𑀙𑀸 𑀆𑀕𑀢𑀸. ‘‘𑀇𑀫𑁂 𑀔𑁄, 𑀪𑀦𑁆𑀢𑁂, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸’’𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀦𑀕𑀸𑀭𑀺𑀓𑀧𑀼𑀘𑁆𑀙𑀸. 𑀇𑀫𑁂 𑀧𑀦 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀁 𑀅𑀕𑀸𑀭𑀺𑀓𑀧𑀼𑀘𑁆𑀙𑀁 𑀧𑀼𑀘𑁆𑀙𑀦𑁆𑀢𑀸 𑀏𑀢𑀁, ‘‘𑀓𑁄 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘𑀼𑀁. 𑀢𑁂𑀲𑀁 𑀪𑀕𑀯𑀸 𑀬𑀣𑀸 𑀦 𑀲𑀓𑁆𑀓𑁄𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑀼𑀁, 𑀏𑀯𑀁 𑀲𑀁𑀔𑀺𑀢𑁆𑀢𑁂𑀦𑁂𑀯 𑀢𑀸𑀯 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄, 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸𑀳𑁂𑀢𑀼 𑀔𑁄 𑀕𑀳𑀧𑀢𑀬𑁄𑀢𑀺𑀆𑀤𑀺𑀫𑀸𑀳. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀬𑀣𑀸 𑀦 𑀲𑀮𑁆𑀮𑀓𑁆𑀔𑁂𑀦𑁆𑀢𑀺, 𑀏𑀯𑀁 𑀯𑀺𑀲𑁆𑀲𑀚𑁆𑀚𑁂𑀲𑀻𑀢𑀺? 𑀧𑀡𑁆𑀟𑀺𑀢𑀫𑀸𑀦𑀺𑀓𑀸 𑀳𑀺 𑀢𑁂; 𑀆𑀤𑀺𑀢𑁄𑀯 𑀫𑀸𑀢𑀺𑀓𑀁 𑀅𑀝𑁆𑀞𑀧𑁂𑀢𑁆𑀯𑀸 𑀬𑀣𑀸 𑀲𑀮𑁆𑀮𑀓𑁆𑀔𑁂𑀦𑁆𑀢𑀺, 𑀏𑀯𑀁 𑀅𑀢𑁆𑀣𑁂 𑀯𑀺𑀢𑁆𑀣𑀸𑀭𑀺𑀢𑁂, 𑀤𑁂𑀲𑀦𑀁 𑀉𑀢𑁆𑀢𑀸𑀦𑀺𑀓𑀸𑀢𑀺 𑀫𑀜𑁆𑀜𑀦𑁆𑀢𑀸 𑀅𑀯𑀚𑀸𑀦𑀦𑁆𑀢𑀺, 𑀫𑀬𑀫𑁆𑀧𑀺 𑀓𑀣𑁂𑀦𑁆𑀢𑀸 𑀏𑀯𑀫𑁂𑀯 𑀓𑀣𑁂𑀬𑁆𑀬𑀸𑀫𑀸𑀢𑀺 𑀯𑀢𑁆𑀢𑀸𑀭𑁄 𑀪𑀯𑀦𑁆𑀢𑀺. 𑀢𑁂𑀦 𑀦𑁂𑀲𑀁 𑀪𑀕𑀯𑀸 𑀬𑀣𑀸 𑀦 𑀲𑀓𑁆𑀓𑁄𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑀼𑀁, 𑀏𑀯𑀁 𑀲𑀁𑀔𑀺𑀢𑁆𑀢𑁂𑀦𑁂𑀯 𑀢𑀸𑀯 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀢𑁄 𑀲𑀮𑁆𑀮𑀓𑁆𑀔𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀳𑀺 𑀯𑀺𑀢𑁆𑀣𑀸𑀭𑀤𑁂𑀲𑀦𑀁 𑀬𑀸𑀘𑀺𑀢𑁄 𑀯𑀺𑀢𑁆𑀣𑀸𑀭𑁂𑀦 𑀤𑁂𑀲𑁂𑀢𑀼𑀁, 𑀢𑁂𑀦 𑀳𑀺 𑀕𑀳𑀧𑀢𑀬𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑁂𑀦 𑀳𑀻𑀢𑀺 𑀓𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄. 𑀬𑀲𑁆𑀫𑀸 𑀫𑀁 𑀢𑀼𑀫𑁆𑀳𑁂 𑀬𑀸𑀘𑀣, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄.

𑁪𑁪𑁦. 𑀢𑀺𑀯𑀺𑀥𑀦𑁆𑀢𑀺 𑀢𑀻𑀳𑀺 𑀓𑁄𑀝𑁆𑀞𑀸𑀲𑁂𑀳𑀺. 𑀓𑀸𑀬𑁂𑀦𑀸𑀢𑀺 𑀓𑀸𑀬𑀤𑁆𑀯𑀸𑀭𑁂𑀦. 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸𑀢𑀺 𑀅𑀥𑀫𑁆𑀫𑀘𑀭𑀺𑀬𑀲𑀗𑁆𑀔𑀸𑀢𑀸 𑀯𑀺𑀲𑀫𑀘𑀭𑀺𑀬𑀸. 𑀅𑀬𑀁 𑀧𑀦𑁂𑀢𑁆𑀣 𑀧𑀤𑀢𑁆𑀣𑁄, 𑀅𑀥𑀫𑁆𑀫𑀲𑁆𑀲 𑀘𑀭𑀺𑀬𑀸 𑀅𑀥𑀫𑁆𑀫𑀘𑀭𑀺𑀬𑀸, 𑀅𑀥𑀫𑁆𑀫𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀲𑀫𑀸 𑀘𑀭𑀺𑀬𑀸, 𑀯𑀺𑀲𑀫𑀲𑁆𑀲 𑀯𑀸 𑀓𑀫𑁆𑀫𑀲𑁆𑀲 𑀘𑀭𑀺𑀬𑀸𑀢𑀺 𑀯𑀺𑀲𑀫𑀘𑀭𑀺𑀬𑀸. 𑀅𑀥𑀫𑁆𑀫𑀘𑀭𑀺𑀬𑀸 𑀘 𑀲𑀸 𑀯𑀺𑀲𑀫𑀘𑀭𑀺𑀬𑀸 𑀘𑀸𑀢𑀺 𑀅𑀥𑀫𑁆𑀫𑀘𑀭𑀺𑀬𑀸𑀯𑀺𑀲𑀫𑀘𑀭𑀺𑀬𑀸. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀩𑁆𑀩𑁂𑀲𑀼 𑀓𑀡𑁆𑀳𑀲𑀼𑀓𑁆𑀓𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀮𑀼𑀤𑁆𑀤𑁄𑀢𑀺 𑀓𑀓𑁆𑀔𑀴𑁄. 𑀤𑀸𑀭𑀼𑀡𑁄𑀢𑀺 𑀲𑀸𑀳𑀲𑀺𑀓𑁄. 𑀮𑁄𑀳𑀺𑀢𑀧𑀸𑀡𑀻𑀢𑀺 𑀧𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀲𑁆𑀲 𑀧𑀸𑀡𑀻 𑀮𑁄𑀳𑀺𑀢𑁂𑀦 𑀮𑀺𑀧𑁆𑀧𑀦𑁆𑀢𑀺. 𑀲𑀘𑁂𑀧𑀺 𑀦 𑀮𑀺𑀧𑁆𑀧𑀦𑁆𑀢𑀺, 𑀢𑀣𑀸𑀯𑀺𑀥𑁄 𑀮𑁄𑀳𑀺𑀢𑀧𑀸𑀡𑀻𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀳𑀢𑀧𑁆𑀧𑀳𑀢𑁂 𑀦𑀺𑀯𑀺𑀝𑁆𑀞𑁄𑀢𑀺 𑀳𑀢𑁂 𑀘 𑀧𑀭𑀲𑁆𑀲 𑀧𑀳𑀸𑀭𑀤𑀸𑀦𑁂, 𑀧𑀳𑀢𑁂 𑀘 𑀧𑀭𑀫𑀸𑀭𑀡𑁂 𑀦𑀺𑀯𑀺𑀝𑁆𑀞𑁄. 𑀅𑀤𑀬𑀸𑀧𑀦𑁆𑀦𑁄𑀢𑀺 𑀦𑀺𑀓𑁆𑀓𑀭𑀼𑀡𑀢𑀁 𑀆𑀧𑀦𑁆𑀦𑁄.

𑀬𑀁 𑀢𑀁 𑀧𑀭𑀲𑁆𑀲𑀸𑀢𑀺 𑀬𑀁 𑀢𑀁 𑀧𑀭𑀲𑁆𑀲 𑀲𑀦𑁆𑀢𑀓𑀁. 𑀧𑀭𑀯𑀺𑀢𑁆𑀢𑀽𑀧𑀓𑀭𑀡𑀦𑁆𑀢𑀺 𑀢𑀲𑁆𑀲𑁂𑀯 𑀧𑀭𑀲𑁆𑀲 𑀯𑀺𑀢𑁆𑀢𑀽𑀧𑀓𑀭𑀡𑀁 𑀢𑀼𑀝𑁆𑀞𑀺𑀚𑀦𑀦𑀁 𑀧𑀭𑀺𑀓𑁆𑀔𑀸𑀭𑀪𑀡𑁆𑀟𑀓𑀁. 𑀕𑀸𑀫𑀕𑀢𑀁 𑀯𑀸𑀢𑀺 𑀅𑀦𑁆𑀢𑁄𑀕𑀸𑀫𑁂 𑀯𑀸 𑀞𑀧𑀺𑀢𑀁. 𑀅𑀭𑀜𑁆𑀜𑀕𑀢𑀁 𑀯𑀸𑀢𑀺 𑀅𑀭𑀜𑁆𑀜𑁂 𑀭𑀼𑀓𑁆𑀔𑀕𑁆𑀕𑀧𑀩𑁆𑀩𑀢𑀫𑀢𑁆𑀣𑀓𑀸𑀤𑀻𑀲𑀼 𑀯𑀸 𑀞𑀧𑀺𑀢𑀁. 𑀅𑀤𑀺𑀦𑁆𑀦𑀦𑁆𑀢𑀺 𑀢𑁂𑀳𑀺 𑀧𑀭𑁂𑀳𑀺 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀅𑀤𑀺𑀦𑁆𑀦𑀁. 𑀣𑁂𑀬𑁆𑀬𑀲𑀗𑁆𑀔𑀸𑀢𑀦𑁆𑀢𑀺 𑀏𑀢𑁆𑀣 𑀣𑁂𑀦𑁄𑀢𑀺 𑀘𑁄𑀭𑁄. 𑀣𑁂𑀦𑀲𑁆𑀲 𑀪𑀸𑀯𑁄 𑀣𑁂𑀬𑁆𑀬𑀁, 𑀅𑀯𑀳𑀭𑀡𑀘𑀺𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀗𑁆𑀔𑀸 𑀲𑀗𑁆𑀔𑀸𑀢𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓𑀁, 𑀓𑁄𑀝𑁆𑀞𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, ‘‘𑀲𑀜𑁆𑀜𑀸𑀦𑀺𑀤𑀸𑀦𑀸 𑀳𑀺 𑀧𑀧𑀜𑁆𑀘𑀲𑀗𑁆𑀔𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀣𑁂𑀬𑁆𑀬𑀜𑁆𑀘 𑀢𑀁 𑀲𑀗𑁆𑀔𑀸𑀢𑀜𑁆𑀘𑀸𑀢𑀺 𑀣𑁂𑀬𑁆𑀬𑀲𑀗𑁆𑀔𑀸𑀢𑀁, 𑀣𑁂𑀬𑁆𑀬𑀘𑀺𑀢𑁆𑀢𑀲𑀗𑁆𑀔𑀸𑀢𑁄 𑀏𑀓𑁄 𑀘𑀺𑀢𑁆𑀢𑀓𑁄𑀝𑁆𑀞𑀸𑀲𑁄𑀢𑀺 𑀅𑀢𑁆𑀣𑁄. 𑀓𑀭𑀡𑀢𑁆𑀣𑁂 𑀘𑁂𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁, 𑀢𑀲𑁆𑀫𑀸 𑀣𑁂𑀬𑁆𑀬𑀲𑀗𑁆𑀔𑀸𑀢𑁂𑀦𑀸𑀢𑀺 𑀅𑀢𑁆𑀣𑀢𑁄 𑀤𑀝𑁆𑀞𑀩𑁆𑀩𑀁.

𑀫𑀸𑀢𑀼𑀭𑀓𑁆𑀔𑀺𑀢𑀸𑀢𑀺𑀆𑀤𑀻𑀲𑀼 𑀬𑀁 𑀧𑀺𑀢𑀭𑀺 𑀦𑀝𑁆𑀞𑁂 𑀯𑀸 𑀫𑀢𑁂 𑀯𑀸 𑀖𑀸𑀲𑀘𑁆𑀙𑀸𑀤𑀦𑀸𑀤𑀻𑀳𑀺 𑀧𑀝𑀺𑀚𑀕𑁆𑀕𑀫𑀸𑀦𑀸, 𑀯𑀬𑀧𑀢𑁆𑀢𑀁 𑀓𑀼𑀮𑀖𑀭𑁂 𑀤𑀲𑁆𑀲𑀸𑀫𑀻𑀢𑀺 𑀫𑀸𑀢𑀸 𑀭𑀓𑁆𑀔𑀢𑀺, 𑀅𑀬𑀁 𑀫𑀸𑀢𑀼𑀭𑀓𑁆𑀔𑀺𑀢𑀸 𑀦𑀸𑀫. 𑀏𑀢𑁂𑀦𑀼𑀧𑀸𑀬𑁂𑀦 𑀧𑀺𑀢𑀼𑀭𑀓𑁆𑀔𑀺𑀢𑀸𑀤𑀬𑁄𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀪𑀸𑀕𑀓𑀼𑀮𑀸𑀦𑀺 𑀧𑀦 𑀓𑀼𑀘𑁆𑀙𑀺𑀕𑀢𑁂𑀲𑀼𑀧𑀺 𑀕𑀩𑁆𑀪𑁂𑀲𑀼 𑀓𑀢𑀺𑀓𑀁 𑀓𑀭𑁄𑀦𑁆𑀢𑀺 𑁋 ‘‘𑀲𑀘𑁂 𑀫𑀬𑁆𑀳𑀁 𑀧𑀼𑀢𑁆𑀢𑁄 𑀳𑁄𑀢𑀺, 𑀢𑀼𑀬𑁆𑀳𑀁 𑀥𑀻𑀢𑀸, 𑀅𑀜𑁆𑀜𑀢𑁆𑀣 𑀕𑀦𑁆𑀢𑀼𑀁 𑀦 𑀮𑀪𑀺𑀲𑁆𑀲𑀢𑀺, 𑀫𑀬𑁆𑀳𑀁 𑀧𑀼𑀢𑁆𑀢𑀲𑁆𑀲𑁂𑀯 𑀳𑁄𑀢𑀽’’𑀢𑀺. 𑀏𑀯𑀁 𑀕𑀩𑁆𑀪𑁂𑀧𑀺 𑀧𑀭𑀺𑀕𑁆𑀕𑀳𑀺𑀢𑀸 𑀲𑀲𑁆𑀲𑀸𑀫𑀺𑀓𑀸 𑀦𑀸𑀫. ‘‘𑀬𑁄 𑀇𑀢𑁆𑀣𑀦𑁆𑀦𑀸𑀫𑀁 𑀇𑀢𑁆𑀣𑀺𑀁 𑀕𑀘𑁆𑀙𑀢𑀺, 𑀢𑀲𑁆𑀲 𑀏𑀢𑁆𑀢𑀓𑁄 𑀤𑀡𑁆𑀟𑁄’’𑀢𑀺 𑀏𑀯𑀁 𑀕𑀸𑀫𑀁 𑀯𑀸 𑀕𑁂𑀳𑀁 𑀯𑀸 𑀯𑀻𑀣𑀺𑀁 𑀯𑀸 𑀉𑀤𑁆𑀤𑀺𑀲𑁆𑀲 𑀞𑀧𑀺𑀢𑀤𑀡𑁆𑀟𑀸, 𑀧𑀦 𑀲𑀧𑀭𑀺𑀤𑀡𑁆𑀟𑀸 𑀦𑀸𑀫. 𑀅𑀦𑁆𑀢𑀫𑀲𑁄 𑀫𑀸𑀮𑀸𑀕𑀼𑀡𑀧𑀭𑀺𑀓𑁆𑀔𑀺𑀢𑁆𑀢𑀸𑀧𑀻𑀢𑀺 𑀬𑀸 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦, ‘‘𑀏𑀲𑀸 𑀫𑁂 𑀪𑀭𑀺𑀬𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀜𑁆𑀜𑀸𑀬 𑀢𑀲𑁆𑀲𑀸 𑀉𑀧𑀭𑀺 𑀓𑁂𑀦𑀘𑀺 𑀫𑀸𑀮𑀸𑀕𑀼𑀡𑀁 𑀔𑀺𑀧𑀦𑁆𑀢𑁂𑀦 𑀫𑀸𑀮𑀸𑀕𑀼𑀡𑀫𑀢𑁆𑀢𑁂𑀦𑀸𑀧𑀺 𑀧𑀭𑀺𑀓𑁆𑀔𑀺𑀢𑁆𑀢𑀸 𑀳𑁄𑀢𑀺. 𑀢𑀣𑀸𑀭𑀽𑀧𑀸𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀺𑀢𑀸 𑀳𑁄𑀢𑀻𑀢𑀺 𑀏𑀯𑀭𑀽𑀧𑀸𑀲𑀼 𑀇𑀢𑁆𑀣𑀻𑀲𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑁂 𑀯𑀼𑀢𑁆𑀢𑀫𑀺𑀘𑁆𑀙𑀸𑀘𑀸𑀭𑀮𑀓𑁆𑀔𑀡𑀯𑀲𑁂𑀦 𑀯𑀻𑀢𑀺𑀓𑁆𑀓𑀫𑀁 𑀓𑀢𑁆𑀢𑀸 𑀳𑁄𑀢𑀺.

𑀲𑀪𑀸𑀕𑀢𑁄𑀢𑀺 𑀲𑀪𑀸𑀬𑀁 𑀞𑀺𑀢𑁄. 𑀧𑀭𑀺𑀲𑀸𑀕𑀢𑁄𑀢𑀺 𑀧𑀭𑀺𑀲𑀸𑀬𑀁 𑀞𑀺𑀢𑁄. 𑀜𑀸𑀢𑀺𑀫𑀚𑁆𑀛𑀕𑀢𑁄𑀢𑀺 𑀤𑀸𑀬𑀸𑀤𑀸𑀦𑀁 𑀫𑀚𑁆𑀛𑁂 𑀞𑀺𑀢𑁄. 𑀧𑀽𑀕𑀫𑀚𑁆𑀛𑀕𑀢𑁄𑀢𑀺 𑀲𑁂𑀦𑀻𑀦𑀁 𑀫𑀚𑁆𑀛𑁂 𑀞𑀺𑀢𑁄. 𑀭𑀸𑀚𑀓𑀼𑀮𑀫𑀚𑁆𑀛𑀕𑀢𑁄𑀢𑀺 𑀭𑀸𑀚𑀓𑀼𑀮𑀲𑁆𑀲 𑀫𑀚𑁆𑀛𑁂 𑀫𑀳𑀸𑀯𑀺𑀦𑀺𑀘𑁆𑀙𑀬𑁂 𑀞𑀺𑀢𑁄. 𑀅𑀪𑀺𑀦𑀻𑀢𑁄𑀢𑀺 𑀧𑀼𑀘𑁆𑀙𑀦𑀢𑁆𑀣𑀸𑀬 𑀦𑀻𑀢𑁄. 𑀲𑀓𑁆𑀔𑀺𑀧𑀼𑀝𑁆𑀞𑁄𑀢𑀺 𑀲𑀓𑁆𑀔𑀺𑀁 𑀓𑀢𑁆𑀯𑀸 𑀧𑀼𑀘𑁆𑀙𑀺𑀢𑁄. 𑀏𑀳𑀫𑁆𑀪𑁄 𑀧𑀼𑀭𑀺𑀲𑀸𑀢𑀺 𑀆𑀮𑀧𑀦𑀫𑁂𑀢𑀁. 𑀅𑀢𑁆𑀢𑀳𑁂𑀢𑀼 𑀯𑀸 𑀧𑀭𑀳𑁂𑀢𑀼 𑀯𑀸𑀢𑀺 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸 𑀳𑀢𑁆𑀣𑀧𑀸𑀤𑀸𑀤𑀺𑀳𑁂𑀢𑀼 𑀯𑀸 𑀥𑀦𑀳𑁂𑀢𑀼 𑀯𑀸. 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀳𑁂𑀢𑀼 𑀯𑀸𑀢𑀺 𑀏𑀢𑁆𑀣 𑀆𑀫𑀺𑀲𑀦𑁆𑀢𑀺 𑀮𑀸𑀪𑁄 𑀅𑀥𑀺𑀧𑁆𑀧𑁂𑀢𑁄. 𑀓𑀺𑀜𑁆𑀘𑀺𑀓𑁆𑀔𑀦𑁆𑀢𑀺 𑀬𑀁 𑀯𑀸 𑀢𑀁 𑀯𑀸 𑀅𑀧𑁆𑀧𑀫𑀢𑁆𑀢𑀓𑀁. 𑀅𑀦𑁆𑀢𑀫𑀲𑁄 𑀢𑀺𑀢𑁆𑀢𑀺𑀭𑀯𑀝𑁆𑀝𑀓𑀲𑀧𑁆𑀧𑀺𑀧𑀺𑀡𑁆𑀟𑀦𑀯𑀦𑀻𑀢𑀧𑀺𑀡𑁆𑀟𑀸𑀤𑀺𑀫𑀢𑁆𑀢𑀓𑀲𑁆𑀲𑀧𑀺 𑀮𑀜𑁆𑀚𑀲𑁆𑀲 𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀢𑀸 𑀳𑁄𑀢𑀻𑀢𑀺 𑀚𑀸𑀦𑀦𑁆𑀢𑁄𑀬𑁂𑀯 𑀫𑀼𑀲𑀸𑀯𑀸𑀤𑀁 𑀓𑀢𑁆𑀢𑀸 𑀳𑁄𑀢𑀺.

𑀇𑀫𑁂𑀲𑀁 𑀪𑁂𑀤𑀸𑀬𑀸𑀢𑀺 𑀬𑁂𑀲𑀁 𑀇𑀢𑁄𑀢𑀺 𑀯𑀼𑀢𑁆𑀢𑀸𑀦𑀁 𑀲𑀦𑁆𑀢𑀺𑀓𑁂 𑀲𑀼𑀢𑀁 𑀳𑁄𑀢𑀺, 𑀢𑁂𑀲𑀁 𑀪𑁂𑀤𑀸𑀬. 𑀅𑀫𑀽𑀲𑀁 𑀪𑁂𑀤𑀸𑀬𑀸𑀢𑀺 𑀬𑁂𑀲𑀁 𑀅𑀫𑀼𑀢𑁆𑀭𑀸𑀢𑀺 𑀯𑀼𑀢𑁆𑀢𑀸𑀦𑀁 𑀲𑀦𑁆𑀢𑀺𑀓𑁂 𑀲𑀼𑀢𑀁 𑀳𑁄𑀢𑀺, 𑀢𑁂𑀲𑀁 𑀪𑁂𑀤𑀸𑀬. 𑀇𑀢𑀺 𑀲𑀫𑀕𑁆𑀕𑀸𑀦𑀁 𑀯𑀸 𑀪𑁂𑀤𑀓𑀸𑀢𑀺 𑀏𑀯𑀁 𑀲𑀫𑀕𑁆𑀕𑀸𑀦𑀁 𑀯𑀸 𑀤𑁆𑀯𑀺𑀦𑁆𑀦𑀁 𑀲𑀳𑀸𑀬𑀓𑀸𑀦𑀁 𑀪𑁂𑀤𑀁 𑀓𑀢𑁆𑀢𑀸. 𑀪𑀺𑀦𑁆𑀦𑀸𑀦𑀁 𑀯𑀸 𑀅𑀦𑀼𑀧𑁆𑀧𑀤𑀸𑀢𑀸𑀢𑀺 𑀲𑀼𑀝𑁆𑀞𑀼 𑀓𑀢𑀁 𑀢𑀬𑀸, 𑀢𑀁 𑀧𑀚𑀳𑀦𑁆𑀢𑁂𑀦 𑀓𑀢𑀺𑀧𑀸𑀳𑁂𑀦𑁂𑀯 𑀢𑁂 𑀫𑀳𑀦𑁆𑀢𑀁 𑀅𑀦𑀢𑁆𑀣𑀁 𑀓𑀭𑁂𑀬𑁆𑀬𑀸𑀢𑀺 𑀏𑀯𑀁 𑀪𑀺𑀦𑁆𑀦𑀸𑀦𑀁 𑀧𑀼𑀦 𑀅𑀲𑀁𑀲𑀦𑁆𑀤𑀦𑀸𑀬 𑀅𑀦𑀼𑀧𑁆𑀧𑀤𑀸𑀢𑀸 𑀉𑀧𑀢𑁆𑀣𑀫𑁆𑀪𑁂𑀢𑀸 𑀓𑀸𑀭𑀡𑀁 𑀤𑀲𑁆𑀲𑁂𑀢𑀸𑀢𑀺 𑀅𑀢𑁆𑀣𑁄. 𑀯𑀕𑁆𑀕𑁄 𑀆𑀭𑀸𑀫𑁄 𑀅𑀪𑀺𑀭𑀢𑀺𑀝𑁆𑀞𑀸𑀦𑀫𑀲𑁆𑀲𑀸𑀢𑀺 𑀯𑀕𑁆𑀕𑀸𑀭𑀸𑀫𑁄. 𑀯𑀕𑁆𑀕𑀭𑀢𑁄𑀢𑀺 𑀯𑀕𑁆𑀕𑁂𑀲𑀼 𑀭𑀢𑁄. 𑀯𑀕𑁆𑀕𑁂 𑀤𑀺𑀲𑁆𑀯𑀸 𑀯𑀸 𑀲𑀼𑀢𑁆𑀯𑀸 𑀯𑀸 𑀦𑀦𑁆𑀤𑀢𑀻𑀢𑀺 𑀯𑀕𑁆𑀕𑀦𑀦𑁆𑀤𑀻. 𑀯𑀕𑁆𑀕𑀓𑀭𑀡𑀺𑀁 𑀯𑀸𑀘𑀦𑁆𑀢𑀺 𑀬𑀸 𑀯𑀸𑀘𑀸 𑀲𑀫𑀕𑁆𑀕𑁂𑀧𑀺 𑀲𑀢𑁆𑀢𑁂 𑀯𑀕𑁆𑀕𑁂 𑀓𑀭𑁄𑀢𑀺 𑀪𑀺𑀦𑁆𑀤𑀢𑀺, 𑀢𑀁 𑀓𑀮𑀳𑀓𑀸𑀭𑀡𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺.

𑀅𑀡𑁆𑀟𑀓𑀸𑀢𑀺 𑀬𑀣𑀸 𑀲𑀤𑁄𑀲𑁂 𑀭𑀼𑀓𑁆𑀔𑁂 𑀅𑀡𑁆𑀟𑀓𑀸𑀦𑀺 𑀉𑀝𑁆𑀞𑀳𑀦𑁆𑀢𑀺, 𑀏𑀯𑀁 𑀲𑀤𑁄𑀲𑀢𑀸𑀬 𑀔𑀼𑀁𑀲𑀦𑀸𑀯𑀫𑁆𑀪𑀦𑀸𑀤𑀺𑀯𑀘𑀦𑁂𑀳𑀺 𑀅𑀡𑁆𑀟𑀓𑀸 𑀚𑀸𑀢𑀸. 𑀓𑀓𑁆𑀓𑀲𑀸𑀢𑀺 𑀧𑀽𑀢𑀺𑀓𑀸. 𑀬𑀣𑀸 𑀦𑀸𑀫 𑀧𑀽𑀢𑀺𑀓𑀭𑀼𑀓𑁆𑀔𑁄 𑀓𑀓𑁆𑀓𑀲𑁄 𑀳𑁄𑀢𑀺 𑀧𑀕𑁆𑀖𑀭𑀺𑀢𑀘𑀼𑀡𑁆𑀡𑁄, 𑀏𑀯𑀁 𑀓𑀓𑁆𑀓𑀲𑀸 𑀳𑁄𑀢𑀺, 𑀲𑁄𑀢𑀁 𑀖𑀁𑀲𑀫𑀸𑀦𑀸 𑀯𑀺𑀬 𑀧𑀯𑀺𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀓𑁆𑀓𑀲𑀸’’𑀢𑀺. 𑀧𑀭𑀓𑀝𑀼𑀓𑀸𑀢𑀺 𑀧𑀭𑁂𑀲𑀁 𑀓𑀝𑀼𑀓𑀸 𑀅𑀫𑀦𑀸𑀧𑀸 𑀤𑁄𑀲𑀚𑀦𑀦𑀻. 𑀧𑀭𑀸𑀪𑀺𑀲𑀚𑁆𑀚𑀦𑀻𑀢𑀺 𑀓𑀼𑀝𑀺𑀮𑀓𑀡𑁆𑀝𑀓𑀲𑀸𑀔𑀸 𑀯𑀺𑀬 𑀫𑀫𑁆𑀫𑁂𑀲𑀼 𑀯𑀺𑀚𑁆𑀛𑀺𑀢𑁆𑀯𑀸 𑀧𑀭𑁂𑀲𑀁 𑀅𑀪𑀺𑀲𑀚𑁆𑀚𑀦𑀻 𑀕𑀦𑁆𑀢𑀼𑀓𑀸𑀫𑀸𑀦𑀫𑁆𑀧𑀺 𑀕𑀦𑁆𑀢𑀼𑀁 𑀅𑀤𑀢𑁆𑀯𑀸 𑀮𑀕𑁆𑀕𑀦𑀓𑀸𑀭𑀻. 𑀓𑁄𑀥𑀲𑀸𑀫𑀦𑁆𑀢𑀸𑀢𑀺 𑀓𑁄𑀥𑀲𑁆𑀲 𑀆𑀲𑀦𑁆𑀦𑀸. 𑀅𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀢𑀺 𑀅𑀧𑁆𑀧𑀦𑀸𑀲𑀫𑀸𑀥𑀺𑀲𑁆𑀲 𑀯𑀸 𑀉𑀧𑀘𑀸𑀭𑀲𑀫𑀸𑀥𑀺𑀲𑁆𑀲 𑀯𑀸 𑀅𑀲𑀁𑀯𑀢𑁆𑀢𑀦𑀺𑀓𑀸. 𑀇𑀢𑀺 𑀲𑀩𑁆𑀩𑀸𑀦𑁂𑀯 𑀢𑀸𑀦𑀺 𑀲𑀤𑁄𑀲𑀯𑀸𑀘𑀸𑀬 𑀯𑁂𑀯𑀘𑀦𑀸𑀦𑀺.

𑀅𑀓𑀸𑀮𑀯𑀸𑀤𑀻𑀢𑀺 𑀅𑀓𑀸𑀮𑁂𑀦 𑀯𑀢𑁆𑀢𑀸. 𑀅𑀪𑀽𑀢𑀯𑀸𑀤𑀻𑀢𑀺 𑀬𑀁 𑀦𑀢𑁆𑀣𑀺, 𑀢𑀲𑁆𑀲 𑀯𑀢𑁆𑀢𑀸. 𑀅𑀦𑀢𑁆𑀣𑀯𑀸𑀤𑀻𑀢𑀺 𑀅𑀓𑀸𑀭𑀡𑀦𑀺𑀲𑁆𑀲𑀺𑀢𑀁 𑀯𑀢𑁆𑀢𑀸. 𑀅𑀥𑀫𑁆𑀫𑀯𑀸𑀤𑀻𑀢𑀺 𑀅𑀲𑀪𑀸𑀯𑀁 𑀯𑀢𑁆𑀢𑀸. 𑀅𑀯𑀺𑀦𑀬𑀯𑀸𑀤𑀻𑀢𑀺 𑀅𑀲𑀁𑀯𑀭𑀯𑀺𑀦𑀬𑀧𑀝𑀺𑀲𑀁𑀬𑀼𑀢𑁆𑀢𑀲𑁆𑀲 𑀯𑀢𑁆𑀢𑀸. 𑀅𑀦𑀺𑀥𑀸𑀦𑀯𑀢𑀺 𑀯𑀸𑀘𑀦𑁆𑀢𑀺 𑀳𑀤𑀬𑀫𑀜𑁆𑀚𑀽𑀲𑀸𑀬𑀁 𑀦𑀺𑀥𑁂𑀢𑀼𑀁 𑀅𑀬𑀼𑀢𑁆𑀢𑀁 𑀯𑀸𑀘𑀁 𑀪𑀸𑀲𑀺𑀢𑀸 𑀳𑁄𑀢𑀺. 𑀅𑀓𑀸𑀮𑁂𑀦𑀸𑀢𑀺 𑀯𑀢𑁆𑀢𑀩𑁆𑀩𑀓𑀸𑀮𑀲𑁆𑀲 𑀧𑀼𑀩𑁆𑀩𑁂 𑀯𑀸 𑀧𑀘𑁆𑀙𑀸 𑀯𑀸 𑀅𑀬𑀼𑀢𑁆𑀢𑀓𑀸𑀮𑁂 𑀯𑀢𑁆𑀢𑀸 𑀳𑁄𑀢𑀺. 𑀅𑀦𑀧𑀤𑁂𑀲𑀦𑁆𑀢𑀺 𑀲𑀼𑀢𑁆𑀢𑀸𑀧𑀤𑁂𑀲𑀯𑀺𑀭𑀳𑀺𑀢𑀁. 𑀅𑀧𑀭𑀺𑀬𑀦𑁆𑀢𑀯𑀢𑀺𑀦𑁆𑀢𑀺 𑀅𑀧𑀭𑀺𑀘𑁆𑀙𑁂𑀤𑀁, 𑀲𑀼𑀢𑁆𑀢𑀁 𑀯𑀸 𑀚𑀸𑀢𑀓𑀁 𑀯𑀸 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀉𑀧𑀮𑀩𑁆𑀪𑀁 𑀯𑀸 𑀉𑀧𑀫𑀁 𑀯𑀸 𑀯𑀢𑁆𑀣𑀼𑀁 𑀯𑀸 𑀆𑀳𑀭𑀺𑀢𑁆𑀯𑀸 𑀩𑀸𑀳𑀺𑀭𑀓𑀣𑀁𑀬𑁂𑀯 𑀓𑀣𑁂𑀢𑀺. 𑀦𑀺𑀓𑁆𑀔𑀺𑀢𑁆𑀢𑀁 𑀦𑀺𑀓𑁆𑀔𑀺𑀢𑁆𑀢𑀫𑁂𑀯 𑀳𑁄𑀢𑀺. ‘‘𑀲𑀼𑀢𑁆𑀢𑀁 𑀦𑀼 𑀔𑁄 𑀓𑀣𑁂𑀢𑀺 𑀚𑀸𑀢𑀓𑀁 𑀦𑀼 𑀔𑁄, 𑀦𑀲𑁆𑀲 𑀅𑀦𑁆𑀢𑀁 𑀯𑀸 𑀓𑁄𑀝𑀺𑀁 𑀯𑀸 𑀧𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺. 𑀬𑀣𑀸 𑀯𑀝𑀭𑀼𑀓𑁆𑀔𑀲𑀸𑀔𑀸𑀦𑀁 𑀕𑀢𑀕𑀢𑀝𑁆𑀞𑀸𑀦𑁂 𑀧𑀸𑀭𑁄𑀳𑀸 𑀑𑀢𑀭𑀦𑁆𑀢𑀺, 𑀑𑀢𑀺𑀡𑁆𑀡𑁄𑀢𑀺𑀡𑁆𑀡𑀝𑁆𑀞𑀸𑀦𑁂 𑀲𑀫𑁆𑀧𑀚𑁆𑀚𑀺𑀢𑁆𑀯𑀸 𑀧𑀼𑀦 𑀯𑀟𑁆𑀠𑀦𑁆𑀢𑀺𑀬𑁂𑀯. 𑀏𑀯𑀁 𑀅𑀟𑁆𑀠𑀬𑁄𑀚𑀦𑀫𑁆𑀧𑀺 𑀬𑁄𑀚𑀦𑀫𑁆𑀧𑀺 𑀕𑀘𑁆𑀙𑀦𑁆𑀢𑀺𑀬𑁂𑀯, 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀧𑀦 𑀫𑀽𑀮𑀭𑀼𑀓𑁆𑀔𑁄 𑀯𑀺𑀦𑀲𑁆𑀲𑀢𑀺, 𑀧𑀯𑁂𑀡𑀺𑀚𑀸𑀢𑀓𑀸𑀯 𑀢𑀺𑀝𑁆𑀞𑀦𑁆𑀢𑀺. 𑀏𑀯𑀫𑀬𑀫𑁆𑀧𑀺 𑀦𑀺𑀕𑁆𑀭𑁄𑀥𑀥𑀫𑁆𑀫𑀓𑀣𑀺𑀓𑁄 𑀦𑀸𑀫 𑀳𑁄𑀢𑀺; 𑀦𑀺𑀓𑁆𑀔𑀺𑀢𑁆𑀢𑀁 𑀦𑀺𑀓𑁆𑀔𑀺𑀢𑁆𑀢𑀫𑀢𑁆𑀢𑀫𑁂𑀯 𑀓𑀢𑁆𑀯𑀸 𑀧𑀲𑁆𑀲𑁂𑀦𑁂𑀯 𑀧𑀭𑀺𑀳𑀭𑀦𑁆𑀢𑁄 𑀕𑀘𑁆𑀙𑀢𑀺. 𑀬𑁄 𑀧𑀦 𑀩𑀳𑀼𑀫𑁆𑀧𑀺 𑀪𑀡𑀦𑁆𑀢𑁄 𑀏𑀢𑀤𑀢𑁆𑀣𑀫𑀺𑀤𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳𑀭𑀺𑀢𑁆𑀯𑀸 𑀚𑀸𑀦𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀦𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀦 𑀅𑀢𑁆𑀣𑀦𑀺𑀲𑁆𑀲𑀺𑀢𑀁.

𑀅𑀪𑀺𑀚𑁆𑀛𑀸𑀢𑀸 𑀳𑁄𑀢𑀻𑀢𑀺 𑀅𑀪𑀺𑀚𑁆𑀛𑀸𑀬 𑀑𑀮𑁄𑀓𑁂𑀢𑀸 𑀳𑁄𑀢𑀺. 𑀅𑀳𑁄 𑀯𑀢𑀸𑀢𑀺 𑀧𑀢𑁆𑀣𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀪𑀺𑀚𑁆𑀛𑀸𑀬 𑀑𑀮𑁄𑀓𑀺𑀢𑀫𑀢𑁆𑀢𑀓𑁂𑀦 𑀘𑁂𑀢𑁆𑀣 𑀓𑀫𑁆𑀫𑀧𑀣𑀪𑁂𑀤𑁄 𑀦 𑀳𑁄𑀢𑀺. 𑀬𑀤𑀸 𑀧𑀦, ‘‘𑀅𑀳𑁄 𑀯𑀢𑀺𑀤𑀁 𑀫𑀫 𑀲𑀦𑁆𑀢𑀓𑀁 𑀅𑀲𑁆𑀲, 𑀅𑀳𑀫𑁂𑀢𑁆𑀣 𑀯𑀲𑀁 𑀯𑀢𑁆𑀢𑁂𑀬𑁆𑀬’’𑀦𑁆𑀢𑀺 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑁂𑀢𑀺, 𑀢𑀤𑀸 𑀓𑀫𑁆𑀫𑀧𑀣𑀪𑁂𑀤𑁄 𑀳𑁄𑀢𑀺, 𑀅𑀬𑀫𑀺𑀥 𑀅𑀥𑀺𑀧𑁆𑀧𑁂𑀢𑁄.

𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄𑀢𑀺 𑀯𑀺𑀧𑀦𑁆𑀦𑀘𑀺𑀢𑁆𑀢𑁄 𑀧𑀽𑀢𑀺𑀪𑀽𑀢𑀘𑀺𑀢𑁆𑀢𑁄. 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄𑀢𑀺 𑀤𑁄𑀲𑁂𑀦 𑀤𑀼𑀝𑁆𑀞𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑁄. 𑀳𑀜𑁆𑀜𑀦𑁆𑀢𑀽𑀢𑀺 𑀖𑀸𑀢𑀺𑀬𑀦𑁆𑀢𑀽. 𑀯𑀚𑁆𑀛𑀦𑁆𑀢𑀽𑀢𑀺 𑀯𑀥𑀁 𑀧𑀸𑀧𑀼𑀡𑀦𑁆𑀢𑀼. 𑀫𑀸 𑀯𑀸 𑀅𑀳𑁂𑀲𑀼𑀦𑁆𑀢𑀺 𑀓𑀺𑀜𑁆𑀘𑀺𑀧𑀺 𑀫𑀸 𑀅𑀳𑁂𑀲𑀼𑀁. 𑀇𑀥𑀸𑀧𑀺 𑀓𑁄𑀧𑀫𑀢𑁆𑀢𑀓𑁂𑀦 𑀓𑀫𑁆𑀫𑀧𑀣𑀪𑁂𑀤𑁄 𑀦 𑀳𑁄𑀢𑀺. 𑀳𑀜𑁆𑀜𑀦𑁆𑀢𑀽𑀢𑀺𑀆𑀤𑀺𑀘𑀺𑀦𑁆𑀢𑀦𑁂𑀦𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁.

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄𑀢𑀺 𑀅𑀓𑀼𑀲𑀮𑀤𑀲𑁆𑀲𑀦𑁄. 𑀯𑀺𑀧𑀭𑀻𑀢𑀤𑀲𑁆𑀲𑀦𑁄𑀢𑀺 𑀯𑀺𑀧𑀮𑁆𑀮𑀢𑁆𑀣𑀤𑀲𑁆𑀲𑀦𑁄. 𑀦𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺 𑀤𑀺𑀦𑁆𑀦𑀲𑁆𑀲 𑀨𑀮𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀬𑀺𑀝𑁆𑀞𑀁 𑀯𑀼𑀘𑁆𑀘𑀢𑀺 𑀫𑀳𑀸𑀬𑀸𑀕𑁄. 𑀳𑀼𑀢𑀦𑁆𑀢𑀺 𑀧𑀳𑁂𑀡𑀓𑀲𑀓𑁆𑀓𑀸𑀭𑁄 𑀅𑀥𑀺𑀧𑁆𑀧𑁂𑀢𑁄, 𑀢𑀫𑁆𑀧𑀺 𑀉𑀪𑀬𑀁 𑀨𑀮𑀸𑀪𑀸𑀯𑀫𑁂𑀯 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀦𑁆𑀢𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁, 𑀓𑀼𑀲𑀮𑀸𑀓𑀼𑀲𑀮𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀨𑀮𑀁 𑀯𑀺𑀧𑀸𑀓𑁄𑀢𑀺 𑀬𑀁 𑀨𑀮𑀦𑁆𑀢𑀺 𑀯𑀸 𑀯𑀺𑀧𑀸𑀓𑁄𑀢𑀺 𑀯𑀸 𑀯𑀼𑀘𑁆𑀘𑀢𑀺, 𑀢𑀁 𑀦𑀢𑁆𑀣𑀻𑀢𑀺 𑀯𑀤𑀢𑀺. 𑀦𑀢𑁆𑀣𑀺 𑀅𑀬𑀁 𑀮𑁄𑀓𑁄𑀢𑀺 𑀧𑀭𑀮𑁄𑀓𑁂 𑀞𑀺𑀢𑀲𑁆𑀲 𑀅𑀬𑀁 𑀮𑁄𑀓𑁄 𑀦𑀢𑁆𑀣𑀺. 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄𑀢𑀺 𑀇𑀥 𑀮𑁄𑀓𑁂 𑀞𑀺𑀢𑀲𑁆𑀲𑀧𑀺 𑀧𑀭𑀮𑁄𑀓𑁄 𑀦𑀢𑁆𑀣𑀺, 𑀲𑀩𑁆𑀩𑁂 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀦𑀢𑁆𑀣𑀺 𑀫𑀸𑀢𑀸 𑀦𑀢𑁆𑀣𑀺 𑀧𑀺𑀢𑀸𑀢𑀺 𑀢𑁂𑀲𑀼 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀻𑀦𑀁 𑀨𑀮𑀸𑀪𑀸𑀯𑀯𑀲𑁂𑀦 𑀯𑀤𑀢𑀺. 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸𑀢𑀺 𑀘𑀯𑀺𑀢𑁆𑀯𑀸 𑀉𑀧𑀧𑀚𑁆𑀚𑀦𑀓𑀲𑀢𑁆𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀯𑀤𑀢𑀺. 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀻𑀢𑀺 𑀬𑁂 𑀇𑀫𑀜𑁆𑀘 𑀮𑁄𑀓𑀁 𑀧𑀭𑀜𑁆𑀘 𑀮𑁄𑀓𑀁 𑀅𑀪𑀺𑀯𑀺𑀲𑀺𑀝𑁆𑀞𑀸𑀬 𑀧𑀜𑁆𑀜𑀸𑀬 𑀲𑀬𑀁 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀧𑀯𑁂𑀤𑁂𑀦𑁆𑀢𑀺, 𑀢𑁂 𑀦𑀢𑁆𑀣𑀻𑀢𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁 𑀅𑀪𑀸𑀯𑀁 𑀤𑀻𑀧𑁂𑀢𑀺, 𑀏𑀢𑁆𑀢𑀸𑀯𑀢𑀸 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀓𑀣𑀺𑀢𑀸 𑀳𑁄𑀢𑀺.

𑁪𑁪𑁧. 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬𑀸𑀢𑀺𑀆𑀤𑀬𑁄 𑀲𑀢𑁆𑀢 𑀓𑀫𑁆𑀫𑀧𑀣𑀸 𑀘𑀽𑀴𑀳𑀢𑁆𑀣𑀺𑀧𑀤𑁂 𑀯𑀺𑀢𑁆𑀣𑀸𑀭𑀺𑀢𑀸. 𑀅𑀦𑀪𑀺𑀚𑁆𑀛𑀸𑀤𑀬𑁄 𑀉𑀢𑁆𑀢𑀸𑀦𑀢𑁆𑀣𑀸𑀬𑁂𑀯.

𑁪𑁪𑁨. 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑁂𑀬𑁆𑀬𑀦𑁆𑀢𑀺 𑀲𑀳𑀪𑀸𑀯𑀁 𑀉𑀧𑀕𑀘𑁆𑀙𑁂𑀬𑁆𑀬𑀁. 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀦𑁆𑀢𑀺 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀤𑁂𑀯𑀸𑀦𑀁. 𑀆𑀪𑀸𑀦𑀁 𑀤𑁂𑀯𑀸𑀦𑀦𑁆𑀢𑀺 𑀆𑀪𑀸 𑀦𑀸𑀫 𑀯𑀺𑀲𑀼𑀁 𑀦𑀢𑁆𑀣𑀺, 𑀧𑀭𑀺𑀢𑁆𑀢𑀸𑀪𑀅𑀧𑁆𑀧𑀫𑀸𑀡𑀸𑀪𑀆𑀪𑀲𑁆𑀲𑀭𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀭𑀺𑀢𑁆𑀢𑀸𑀪𑀸𑀦𑀦𑁆𑀢𑀺𑀆𑀤𑀺 𑀧𑀦 𑀏𑀓𑀢𑁄 𑀅𑀕𑁆𑀕𑀳𑁂𑀢𑁆𑀯𑀸 𑀢𑁂𑀲𑀁𑀬𑁂𑀯 𑀪𑁂𑀤𑀢𑁄 𑀕𑀳𑀡𑀁. 𑀧𑀭𑀺𑀢𑁆𑀢𑀲𑀼𑀪𑀸𑀦𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀪𑀕𑀯𑀸 𑀆𑀲𑀯𑀓𑁆𑀔𑀬𑀁 𑀤𑀲𑁆𑀲𑁂𑀢𑁆𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀺.

𑀇𑀥 𑀞𑀢𑁆𑀯𑀸 𑀧𑀦 𑀤𑁂𑀯𑀮𑁄𑀓𑀸 𑀲𑀫𑀸𑀦𑁂𑀢𑀩𑁆𑀩𑀸. 𑀢𑀺𑀲𑁆𑀲𑀦𑁆𑀦𑀁 𑀢𑀸𑀯 𑀛𑀸𑀦𑀪𑀽𑀫𑀻𑀦𑀁 𑀯𑀲𑁂𑀦 𑀦𑀯 𑀩𑁆𑀭𑀳𑁆𑀫𑀮𑁄𑀓𑀸, 𑀧𑀜𑁆𑀘 𑀲𑀼𑀤𑁆𑀥𑀸𑀯𑀸𑀲𑀸 𑀘𑀢𑀽𑀳𑀺 𑀆𑀭𑀽𑀧𑁂𑀳𑀺 𑀲𑀤𑁆𑀥𑀺𑀁 𑀦𑀯𑀸𑀢𑀺 𑀅𑀝𑁆𑀞𑀸𑀭𑀲, 𑀯𑁂𑀳𑀧𑁆𑀨𑀮𑁂𑀳𑀺 𑀲𑀤𑁆𑀥𑀺𑀁 𑀏𑀓𑀽𑀦𑀯𑀻𑀲𑀢𑀺, 𑀢𑁂 𑀅𑀲𑀜𑁆𑀜𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀻𑀲𑀢𑀺 𑀩𑁆𑀭𑀳𑁆𑀫𑀮𑁄𑀓𑀸 𑀳𑁄𑀦𑁆𑀢𑀺, 𑀏𑀯𑀁 𑀙𑀳𑀺 𑀓𑀸𑀫𑀸𑀯𑀘𑀭𑁂𑀳𑀺 𑀲𑀤𑁆𑀥𑀺𑀁 𑀙𑀩𑁆𑀩𑀻𑀲𑀢𑀺 𑀤𑁂𑀯𑀮𑁄𑀓𑀸 𑀦𑀸𑀫. 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺 𑀪𑀕𑀯𑀢𑀸 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑁂𑀳𑀺 𑀦𑀺𑀩𑁆𑀩𑀢𑁆𑀢𑀺 𑀤𑀲𑁆𑀲𑀺𑀢𑀸.

𑀢𑀢𑁆𑀣 𑀙𑀲𑀼 𑀢𑀸𑀯 𑀓𑀸𑀫𑀸𑀯𑀘𑀭𑁂𑀲𑀼 𑀢𑀺𑀡𑁆𑀡𑀁 𑀲𑀼𑀘𑀭𑀺𑀢𑀸𑀦𑀁 𑀯𑀺𑀧𑀸𑀓𑁂𑀦𑁂𑀯 𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺. 𑀉𑀧𑀭𑀺𑀤𑁂𑀯𑀮𑁄𑀓𑀸𑀦𑀁 𑀧𑀦 𑀇𑀫𑁂 𑀓𑀫𑁆𑀫𑀧𑀣𑀸 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀓𑀣𑀺𑀢𑀸. 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸 𑀳𑀺 𑀲𑀻𑀮𑀁, 𑀲𑀻𑀮𑀯𑀢𑁄 𑀘 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀇𑀚𑁆𑀛𑀢𑀻𑀢𑀺. 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀦𑀺𑀩𑁆𑀩𑀢𑁆𑀢𑀢𑀺; 𑀤𑀼𑀢𑀺𑀬𑀸𑀤𑀻𑀦𑀺 𑀪𑀸𑀯𑁂𑀢𑁆𑀯𑀸 𑀤𑀼𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀆𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀢𑀺; 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁄 𑀧𑀜𑁆𑀘𑀲𑀼 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀢𑀺; 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀅𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀘𑀢𑀽𑀲𑀼 𑀅𑀭𑀽𑀧𑁂𑀲𑀼 𑀦𑀺𑀩𑁆𑀩𑀢𑁆𑀢𑀢𑀺; 𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀅𑀲𑀜𑁆𑀜𑀪𑀯𑁄 𑀧𑀦 𑀩𑀸𑀳𑀺𑀭𑀓𑀸𑀦𑀁 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀘𑀺𑀡𑁆𑀡𑁄𑀢𑀺 𑀇𑀥 𑀦 𑀦𑀺𑀤𑁆𑀤𑀺𑀝𑁆𑀞𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀲𑀸𑀮𑁂𑀬𑁆𑀬𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀯𑁂𑀭𑀜𑁆𑀚𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪𑁪. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀯𑁂𑀭𑀜𑁆𑀚𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀯𑁂𑀭𑀜𑁆𑀚𑀓𑀸𑀢𑀺 𑀯𑁂𑀭𑀜𑁆𑀚𑀯𑀸𑀲𑀺𑀦𑁄. 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦𑀸𑀢𑀺 𑀓𑁂𑀦𑀘𑀺𑀤𑁂𑀯 𑀅𑀦𑀺𑀬𑀫𑀺𑀢𑀓𑀺𑀘𑁆𑀘𑁂𑀦. 𑀲𑁂𑀲𑀁 𑀲𑀩𑁆𑀩𑀁 𑀧𑀼𑀭𑀺𑀫𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀓𑁂𑀯𑀮𑀜𑁆𑀳𑀺 𑀇𑀥 𑀅𑀥𑀫𑁆𑀫𑀘𑀸𑀭𑀻 𑀯𑀺𑀲𑀫𑀘𑀸𑀭𑀻𑀢𑀺 𑀏𑀯𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸 𑀤𑁂𑀲𑀦𑀸 𑀓𑀢𑀸. 𑀧𑀼𑀭𑀺𑀫𑀲𑀼𑀢𑁆𑀢𑁂 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀯𑁂𑀭𑀜𑁆𑀚𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑀳𑀸𑀯𑁂𑀤𑀮𑁆𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪𑁯. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀯𑁂𑀤𑀮𑁆𑀮𑀲𑀼𑀢𑁆𑀢𑀁. 𑀢𑀢𑁆𑀣 𑀆𑀬𑀲𑁆𑀫𑀸𑀢𑀺 𑀲𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀯𑀘𑀦𑀫𑁂𑀢𑀁. 𑀫𑀳𑀸𑀓𑁄𑀝𑁆𑀞𑀺𑀓𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁. 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑁄. 𑀤𑀼𑀧𑁆𑀧𑀜𑁆𑀜𑁄 𑀤𑀼𑀧𑁆𑀧𑀜𑁆𑀜𑁄𑀢𑀺 𑀏𑀢𑁆𑀣 𑀧𑀜𑁆𑀜𑀸𑀬 𑀤𑀼𑀝𑁆𑀞𑀁 𑀦𑀸𑀫 𑀦𑀢𑁆𑀣𑀺, 𑀅𑀧𑁆𑀧𑀜𑁆𑀜𑁄 𑀦𑀺𑀧𑁆𑀧𑀜𑁆𑀜𑁄𑀢𑀺 𑀅𑀢𑁆𑀣𑁄. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄𑀢𑀺 𑀓𑀸𑀭𑀡𑀧𑀭𑀺𑀘𑁆𑀙𑁂𑀤𑀧𑀼𑀘𑁆𑀙𑀸, 𑀓𑀺𑀢𑁆𑀢𑀓𑁂𑀦 𑀦𑀼 𑀔𑁄 𑀏𑀯𑀁 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀘𑁆𑀙𑀸 𑀘 𑀦𑀸𑀫𑁂𑀲𑀸 𑀅𑀤𑀺𑀝𑁆𑀞𑀚𑁄𑀢𑀦𑀸𑀧𑀼𑀘𑁆𑀙𑀸, 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸𑀧𑀼𑀘𑁆𑀙𑀸, 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀧𑀼𑀘𑁆𑀙𑀸, 𑀅𑀦𑀼𑀫𑀢𑀺𑀧𑀼𑀘𑁆𑀙𑀸, 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀢𑀺 𑀧𑀜𑁆𑀘𑀯𑀺𑀥𑀸 𑀳𑁄𑀢𑀺. 𑀢𑀸𑀲𑀫𑀺𑀤𑀁 𑀦𑀸𑀦𑀸𑀓𑀭𑀡𑀁 𑁋

𑀓𑀢𑀫𑀸 𑀅𑀤𑀺𑀝𑁆𑀞𑀚𑁄𑀢𑀦𑀸𑀧𑀼𑀘𑁆𑀙𑀸? 𑀧𑀓𑀢𑀺𑀬𑀸 𑀮𑀓𑁆𑀔𑀡𑀁 𑀅𑀜𑁆𑀜𑀸𑀢𑀁 𑀳𑁄𑀢𑀺 𑀅𑀤𑀺𑀝𑁆𑀞𑀁 𑀅𑀢𑀼𑀮𑀺𑀢𑀁 𑀅𑀢𑀻𑀭𑀺𑀢𑀁 𑀅𑀯𑀺𑀪𑀽𑀢𑀁 𑀅𑀯𑀺𑀪𑀸𑀯𑀺𑀢𑀁, 𑀢𑀲𑁆𑀲 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬 𑀢𑀼𑀮𑀦𑀸𑀬 𑀢𑀻𑀭𑀡𑀸𑀬 𑀯𑀺𑀪𑀽𑀢𑀸𑀬 𑀯𑀺𑀪𑀸𑀯𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀅𑀬𑀁 𑀅𑀤𑀺𑀝𑁆𑀞𑀚𑁄𑀢𑀦𑀸𑀧𑀼𑀘𑁆𑀙𑀸.

𑀓𑀢𑀫𑀸 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸𑀧𑀼𑀘𑁆𑀙𑀸? 𑀧𑀓𑀢𑀺𑀬𑀸 𑀮𑀓𑁆𑀔𑀡𑀁 𑀜𑀸𑀢𑀁 𑀳𑁄𑀢𑀺 𑀤𑀺𑀝𑁆𑀞𑀁 𑀢𑀼𑀮𑀺𑀢𑀁 𑀢𑀻𑀭𑀺𑀢𑀁 𑀯𑀺𑀪𑀽𑀢𑀁 𑀯𑀺𑀪𑀸𑀯𑀺𑀢𑀁, 𑀅𑀜𑁆𑀜𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀅𑀬𑀁 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸𑀧𑀼𑀘𑁆𑀙𑀸.

𑀓𑀢𑀫𑀸 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀧𑀼𑀘𑁆𑀙𑀸? 𑀧𑀓𑀢𑀺𑀬𑀸 𑀲𑀁𑀲𑀬𑀧𑀓𑁆𑀔𑀦𑁆𑀤𑁄 𑀳𑁄𑀢𑀺 𑀯𑀺𑀫𑀢𑀺𑀧𑀓𑁆𑀔𑀦𑁆𑀤𑁄, 𑀤𑁆𑀯𑁂𑀴𑁆𑀳𑀓𑀚𑀸𑀢𑁄, ‘‘𑀏𑀯𑀁 𑀦𑀼 𑀔𑁄, 𑀦 𑀦𑀼 𑀔𑁄, 𑀓𑀺𑀁 𑀦𑀼 𑀔𑁄, 𑀓𑀣𑀁 𑀦𑀼 𑀔𑁄’’𑀢𑀺, 𑀲𑁄 𑀯𑀺𑀫𑀢𑀺𑀘𑁆𑀙𑁂𑀤𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀅𑀬𑀁 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀧𑀼𑀘𑁆𑀙𑀸 (𑀫𑀳𑀸𑀦𑀺. 𑁧𑁫𑁦; 𑀘𑀽𑀴𑀦𑀺. 𑀧𑀼𑀡𑁆𑀡𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁧𑁨).

‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸𑀢𑀺? 𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂’’𑀢𑀺 (𑀫𑀳𑀸𑀯. 𑁨𑁧) 𑀏𑀯𑀭𑀽𑀧𑀸 𑀅𑀦𑀼𑀫𑀢𑀺𑀁 𑀕𑀳𑁂𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀓𑀸𑀮𑁂 𑀧𑀼𑀘𑁆𑀙𑀸 𑀅𑀦𑀼𑀫𑀢𑀺𑀧𑀼𑀘𑁆𑀙𑀸 𑀦𑀸𑀫.

‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀲𑀢𑀺𑀧𑀝𑁆𑀞𑀸𑀦𑀸, 𑀓𑀢𑀫𑁂 𑀘𑀢𑁆𑀢𑀸𑀭𑁄’’𑀢𑀺 (𑀲𑀁. 𑀦𑀺. 𑁫.𑁩𑁯𑁦) 𑀏𑀯𑀭𑀽𑀧𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀬𑀫𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀲𑀬𑀫𑁂𑀯 𑀯𑀺𑀲𑁆𑀲𑀚𑁆𑀚𑁂𑀢𑀼𑀓𑀸𑀫𑀲𑁆𑀲 𑀧𑀼𑀘𑁆𑀙𑀸 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸 𑀦𑀸𑀫. 𑀢𑀸𑀲𑀼 𑀇𑀥 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸𑀧𑀼𑀘𑁆𑀙𑀸 𑀅𑀥𑀺𑀧𑁆𑀧𑁂𑀢𑀸.

𑀣𑁂𑀭𑁄 𑀳𑀺 𑀅𑀢𑁆𑀢𑀦𑁄 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀬𑀫𑁂𑀯 𑀧𑀜𑁆𑀳𑀁 𑀲𑀫𑀼𑀝𑁆𑀞𑀧𑁂𑀢𑁆𑀯𑀸 𑀲𑀬𑀁 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑁄 𑀇𑀤𑀁 𑀲𑀼𑀢𑁆𑀢𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀫𑀢𑁆𑀣𑀓𑀁 𑀧𑀸𑀧𑁂𑀲𑀺. 𑀏𑀓𑀘𑁆𑀘𑁄 𑀳𑀺 𑀧𑀜𑁆𑀳𑀁 𑀲𑀫𑀼𑀝𑁆𑀞𑀸𑀧𑁂𑀢𑀼𑀁𑀬𑁂𑀯 𑀲𑀓𑁆𑀓𑁄𑀢𑀺 𑀦 𑀦𑀺𑀘𑁆𑀙𑁂𑀢𑀼𑀁; 𑀏𑀓𑀘𑁆𑀘𑁄 𑀦𑀺𑀘𑁆𑀙𑁂𑀢𑀼𑀁 𑀲𑀓𑁆𑀓𑁄𑀢𑀺 𑀦 𑀲𑀫𑀼𑀝𑁆𑀞𑀸𑀧𑁂𑀢𑀼𑀁; 𑀏𑀓𑀘𑁆𑀘𑁄 𑀉𑀪𑀬𑀫𑁆𑀧𑀺 𑀦 𑀲𑀓𑁆𑀓𑁄𑀢𑀺; 𑀏𑀓𑀘𑁆𑀘𑁄 𑀉𑀪𑀬𑀫𑁆𑀧𑀺 𑀲𑀓𑁆𑀓𑁄𑀢𑀺. 𑀢𑁂𑀲𑀼 𑀣𑁂𑀭𑁄 𑀉𑀪𑀬𑀫𑁆𑀧𑀺 𑀲𑀓𑁆𑀓𑁄𑀢𑀺𑀬𑁂𑀯. 𑀓𑀲𑁆𑀫𑀸? 𑀫𑀳𑀸𑀧𑀜𑁆𑀜𑀢𑀸𑀬. 𑀫𑀳𑀸𑀧𑀜𑁆𑀜𑀁 𑀦𑀺𑀲𑁆𑀲𑀸𑀬 𑀳𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄, 𑀫𑀳𑀸𑀓𑀘𑁆𑀘𑀸𑀦𑀢𑁆𑀣𑁂𑀭𑁄, 𑀧𑀼𑀡𑁆𑀡𑀢𑁆𑀣𑁂𑀭𑁄, 𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑁄, 𑀆𑀦𑀦𑁆𑀤𑀢𑁆𑀣𑁂𑀭𑁄, 𑀅𑀬𑀫𑁂𑀯 𑀆𑀬𑀲𑁆𑀫𑀸𑀢𑀺 𑀲𑀫𑁆𑀩𑀳𑀼𑀮𑀸 𑀣𑁂𑀭𑀸 𑀯𑀺𑀲𑁂𑀲𑀝𑁆𑀞𑀸𑀦𑀁 𑀅𑀥𑀺𑀕𑀢𑀸. 𑀦 𑀳𑀺 𑀲𑀓𑁆𑀓𑀸 𑀬𑀸𑀬 𑀯𑀸 𑀢𑀸𑀬 𑀯𑀸 𑀅𑀧𑁆𑀧𑀫𑀢𑁆𑀢𑀺𑀓𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀲𑁆𑀲 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺𑀢𑀼𑀁, 𑀫𑀳𑀸𑀧𑀜𑁆𑀜𑁂𑀦 𑀧𑀦 𑀲𑀓𑁆𑀓𑀸𑀢𑀺 𑀫𑀳𑀸𑀧𑀜𑁆𑀜𑀢𑀸𑀬 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀢𑀁 𑀞𑀸𑀦𑀁 𑀅𑀥𑀺𑀕𑀢𑁄. 𑀧𑀜𑁆𑀜𑀸𑀬 𑀳𑀺 𑀣𑁂𑀭𑁂𑀦 𑀲𑀤𑀺𑀲𑁄 𑀦𑀢𑁆𑀣𑀺. 𑀢𑁂𑀦𑁂𑀯 𑀦𑀁 𑀪𑀕𑀯𑀸 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑁋 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀳𑀸𑀧𑀜𑁆𑀜𑀸𑀦𑀁 𑀬𑀤𑀺𑀤𑀁 𑀲𑀸𑀭𑀺𑀧𑀼𑀢𑁆𑀢𑁄’’𑀢𑀺 (𑀅. 𑀦𑀺. 𑁧.𑁧𑁮𑁯).

𑀢𑀣𑀸 𑀦 𑀲𑀓𑁆𑀓𑀸 𑀬𑀸𑀬 𑀯𑀸 𑀢𑀸𑀬 𑀯𑀸 𑀅𑀧𑁆𑀧𑀫𑀢𑁆𑀢𑀺𑀓𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀪𑀕𑀯𑀢𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀲𑀫𑀸𑀦𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑁂𑀢𑀼𑀁, 𑀫𑀳𑀸𑀧𑀜𑁆𑀜𑁂𑀦 𑀧𑀦 𑀲𑀓𑁆𑀓𑀸𑀢𑀺 𑀫𑀳𑀸𑀧𑀜𑁆𑀜𑀢𑀸𑀬 𑀫𑀳𑀸𑀓𑀘𑁆𑀘𑀸𑀦𑀢𑁆𑀣𑁂𑀭𑁄 𑀢𑀢𑁆𑀣 𑀧𑀝𑀺𑀩𑀮𑁄 𑀚𑀸𑀢𑁄, 𑀢𑁂𑀦𑁂𑀯 𑀦𑀁 𑀪𑀕𑀯𑀸 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑁋 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑀦𑁆𑀢𑀸𑀦𑀁 𑀬𑀤𑀺𑀤𑀁 𑀫𑀳𑀸𑀓𑀘𑁆𑀘𑀸𑀦𑁄’’𑀢𑀺 (𑀅. 𑀦𑀺. 𑁧.𑁧𑁯𑁭).

𑀢𑀣𑀸 𑀦 𑀲𑀓𑁆𑀓𑀸 𑀬𑀸𑀬 𑀯𑀸 𑀢𑀸𑀬 𑀯𑀸 𑀅𑀧𑁆𑀧𑀫𑀢𑁆𑀢𑀺𑀓𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑁂𑀦 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺 𑀆𑀳𑀭𑀺𑀢𑁆𑀯𑀸 𑀲𑀢𑁆𑀢 𑀯𑀺𑀲𑀼𑀤𑁆𑀥𑀺𑀬𑁄 𑀯𑀺𑀪𑀚𑀦𑁆𑀢𑁂𑀦 𑀥𑀫𑁆𑀫𑀓𑀣𑀁 𑀓𑀣𑁂𑀢𑀼𑀁, 𑀫𑀳𑀸𑀧𑀜𑁆𑀜𑁂𑀦 𑀧𑀦 𑀲𑀓𑁆𑀓𑀸𑀢𑀺 𑀫𑀳𑀸𑀧𑀜𑁆𑀜𑀢𑀸𑀬 𑀧𑀼𑀡𑁆𑀡𑀢𑁆𑀣𑁂𑀭𑁄 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀅𑀮𑀗𑁆𑀓𑀢𑀥𑀫𑁆𑀫𑀸𑀲𑀦𑁂 𑀘𑀺𑀢𑁆𑀢𑀩𑀻𑀚𑀦𑀺𑀁 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀮𑀻𑀴𑀸𑀬𑀦𑁆𑀢𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀥𑀫𑁆𑀫𑀁 𑀓𑀣𑁂𑀲𑀺. 𑀢𑁂𑀦𑁂𑀯 𑀦𑀁 𑀪𑀕𑀯𑀸 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑁋 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀓𑀣𑀺𑀓𑀸𑀦𑀁 𑀬𑀤𑀺𑀤𑀁 𑀧𑀼𑀡𑁆𑀡𑁄 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄’’𑀢𑀺 (𑀅. 𑀦𑀺. 𑁧.𑁧𑁯𑁬).

𑀢𑀣𑀸 𑀬𑀸𑀬 𑀯𑀸 𑀢𑀸𑀬 𑀯𑀸 𑀅𑀧𑁆𑀧𑀫𑀢𑁆𑀢𑀺𑀓𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑀇𑀢𑁄 𑀯𑀸 𑀏𑀢𑁆𑀢𑁄 𑀯𑀸 𑀅𑀦𑀼𑀓𑁆𑀓𑀫𑀺𑀢𑁆𑀯𑀸 𑀬𑀝𑁆𑀞𑀺𑀓𑁄𑀝𑀺𑀁 𑀕𑀳𑁂𑀢𑁆𑀯𑀸 𑀅𑀦𑁆𑀥𑁄 𑀯𑀺𑀬, 𑀏𑀓𑀧𑀤𑀺𑀓𑀁 𑀤𑀡𑁆𑀟𑀓𑀲𑁂𑀢𑀼𑀁 𑀆𑀭𑀼𑀴𑁆𑀳𑁄 𑀯𑀺𑀬 𑀘 𑀕𑀘𑁆𑀙𑀢𑀺. 𑀫𑀳𑀸𑀧𑀜𑁆𑀜𑁄 𑀧𑀦 𑀘𑀢𑀼𑀧𑁆𑀧𑀤𑀺𑀓𑀁 𑀕𑀸𑀣𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀫𑀸 𑀘 𑀓𑀸𑀭𑀡𑀸𑀦𑀺 𑀘 𑀆𑀳𑀭𑀺𑀢𑁆𑀯𑀸 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀕𑀳𑁂𑀢𑁆𑀯𑀸 𑀳𑁂𑀝𑁆𑀞𑀼𑀧𑀭𑀺𑀬𑀁 𑀓𑀭𑁄𑀦𑁆𑀢𑁄 𑀓𑀣𑁂𑀲𑀺. 𑀫𑀳𑀸𑀧𑀜𑁆𑀜𑀢𑀸𑀬 𑀧𑀦 𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑁄 𑀘𑀢𑀼𑀧𑁆𑀧𑀤𑀺𑀓𑀁 𑀕𑀸𑀣𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀧𑀫𑀸 𑀘 𑀓𑀸𑀭𑀡𑀸𑀦𑀺 𑀘 𑀆𑀳𑀭𑀺𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀬𑁄𑀚𑁂𑀦𑁆𑀢𑁄 𑀚𑀸𑀢𑀲𑁆𑀲𑀭𑁂 𑀧𑀜𑁆𑀘𑀯𑀡𑁆𑀡𑀸𑀦𑀺 𑀓𑀼𑀲𑀼𑀫𑀸𑀦𑀺 𑀨𑀼𑀮𑁆𑀮𑀸𑀧𑁂𑀦𑁆𑀢𑁄 𑀯𑀺𑀬 𑀲𑀺𑀦𑁂𑀭𑀼𑀫𑀢𑁆𑀣𑀓𑁂 𑀯𑀝𑁆𑀝𑀺𑀲𑀳𑀲𑁆𑀲𑀁 𑀢𑁂𑀮𑀧𑀤𑀻𑀧𑀁 𑀚𑀸𑀮𑁂𑀦𑁆𑀢𑁄 𑀯𑀺𑀬 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀳𑁂𑀝𑁆𑀞𑀼𑀧𑀭𑀺𑀬𑀁 𑀓𑀭𑁄𑀦𑁆𑀢𑁄 𑀓𑀣𑁂𑀲𑀺. 𑀢𑁂𑀦𑁂𑀯 𑀦𑀁 𑀪𑀕𑀯𑀸 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑁋 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀘𑀺𑀢𑁆𑀢𑀓𑀣𑀺𑀓𑀸𑀦𑀁 𑀬𑀤𑀺𑀤𑀁 𑀓𑀼𑀫𑀸𑀭𑀓𑀲𑁆𑀲𑀧𑁄’’𑀢𑀺 (𑀅. 𑀦𑀺. 𑁧.𑁨𑁧𑁭).

𑀢𑀣𑀸 𑀬𑀸𑀬 𑀯𑀸 𑀢𑀸𑀬 𑀯𑀸 𑀅𑀧𑁆𑀧𑀫𑀢𑁆𑀢𑀺𑀓𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀘𑀢𑀼𑀧𑁆𑀧𑀤𑀺𑀓𑀫𑁆𑀧𑀺 𑀕𑀸𑀣𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀫𑀳𑀸𑀧𑀜𑁆𑀜𑁄 𑀧𑀦 𑀏𑀓𑀧𑀤𑁂 𑀞𑀢𑁆𑀯𑀸 𑀧𑀤𑀲𑀢𑀫𑁆𑀧𑀺 𑀧𑀤𑀲𑀳𑀲𑁆𑀲𑀫𑁆𑀧𑀺 𑀕𑀡𑁆𑀳𑀸𑀢𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀧𑀦 𑀫𑀳𑀸𑀧𑀜𑁆𑀜𑀢𑀸𑀬 𑀏𑀓𑀧𑀤𑀼𑀤𑁆𑀥𑀸𑀭𑁂 𑀞𑀢𑁆𑀯𑀸 𑀲𑀓𑀺𑀁𑀬𑁂𑀯 𑀲𑀼𑀢𑁆𑀯𑀸 𑀧𑀼𑀦 𑀅𑀧𑀼𑀘𑁆𑀙𑀦𑁆𑀢𑁄 𑀲𑀝𑁆𑀞𑀺 𑀧𑀤𑀲𑀳𑀲𑁆𑀲𑀸𑀦𑀺 𑀧𑀦𑁆𑀦𑀭𑀲 𑀕𑀸𑀣𑀸𑀲𑀳𑀲𑁆𑀲𑀸𑀦𑀺 𑀯𑀮𑁆𑀮𑀺𑀬𑀸 𑀧𑀼𑀧𑁆𑀨𑀸𑀦𑀺 𑀆𑀓𑀟𑁆𑀠𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀯𑀺𑀬 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀕𑀡𑁆𑀳𑀸𑀢𑀺. 𑀕𑀳𑀺𑀢𑀕𑀳𑀺𑀢𑀁 𑀧𑀸𑀲𑀸𑀡𑁂 𑀔𑀢𑀮𑁂𑀔𑀸 𑀯𑀺𑀬, 𑀲𑀼𑀯𑀡𑁆𑀡𑀖𑀝𑁂 𑀧𑀓𑁆𑀔𑀺𑀢𑁆𑀢𑀲𑀻𑀳𑀯𑀲𑀸 𑀯𑀺𑀬 𑀘 𑀕𑀳𑀺𑀢𑀸𑀓𑀸𑀭𑁂𑀦𑁂𑀯 𑀢𑀺𑀝𑁆𑀞𑀢𑀺. 𑀢𑁂𑀦𑁂𑀯 𑀦𑀁 𑀪𑀕𑀯𑀸 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑁋 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀕𑀢𑀺𑀫𑀦𑁆𑀢𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄, 𑀲𑀢𑀺𑀫𑀦𑁆𑀢𑀸𑀦𑀁, 𑀥𑀺𑀢𑀺𑀫𑀦𑁆𑀢𑀸𑀦𑀁, 𑀩𑀳𑀼𑀲𑁆𑀲𑀼𑀢𑀸𑀦𑀁, 𑀉𑀧𑀝𑁆𑀞𑀸𑀓𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄’’𑀢𑀺 (𑀅. 𑀦𑀺. 𑁧.𑁨𑁧𑁯-𑁨𑁨𑁩).

𑀦 𑀳𑀺 𑀲𑀓𑁆𑀓𑀸 𑀬𑀸𑀬 𑀯𑀸 𑀢𑀸𑀬 𑀯𑀸 𑀅𑀧𑁆𑀧𑀫𑀢𑁆𑀢𑀺𑀓𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀧𑀪𑁂𑀤𑀲𑁆𑀲 𑀫𑀢𑁆𑀣𑀓𑀁 𑀧𑀸𑀧𑀼𑀡𑀺𑀢𑀼𑀁. 𑀫𑀳𑀸𑀧𑀜𑁆𑀜𑁂𑀦 𑀧𑀦 𑀲𑀓𑁆𑀓𑀸𑀢𑀺 𑀫𑀳𑀸𑀧𑀜𑁆𑀜𑀢𑀸𑀬 𑀫𑀳𑀸𑀓𑁄𑀝𑁆𑀞𑀺𑀢𑀢𑁆𑀣𑁂𑀭𑁄 𑀅𑀥𑀺𑀕𑀫𑀧𑀭𑀺𑀧𑀼𑀘𑁆𑀙𑀸𑀲𑀯𑀦𑀧𑀼𑀩𑁆𑀩𑀬𑁄𑀕𑀸𑀦𑀁 𑀯𑀲𑁂𑀦 𑀅𑀦𑀦𑁆𑀢𑀦𑀬𑀼𑀲𑁆𑀲𑀤𑀁 𑀧𑀝𑀺𑀲𑀫𑁆𑀪𑀺𑀤𑀸𑀧𑀪𑁂𑀤𑀁 𑀧𑀢𑁆𑀢𑁄. 𑀢𑁂𑀦𑁂𑀯 𑀦𑀁 𑀪𑀕𑀯𑀸 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑁋 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑀸𑀦𑀁 𑀬𑀤𑀺𑀤𑀁 𑀫𑀳𑀸𑀓𑁄𑀝𑁆𑀞𑀺𑀢𑁄’’𑀢𑀺 (𑀅. 𑀦𑀺. 𑁧.𑁨𑁧𑁮).

𑀇𑀢𑀺 𑀣𑁂𑀭𑁄 𑀫𑀳𑀸𑀧𑀜𑁆𑀜𑀢𑀸𑀬 𑀧𑀜𑁆𑀳𑀁 𑀲𑀫𑀼𑀝𑁆𑀞𑀸𑀧𑁂𑀢𑀼𑀫𑁆𑀧𑀺 𑀦𑀺𑀘𑁆𑀙𑁂𑀢𑀼𑀫𑁆𑀧𑀻𑀢𑀺 𑀉𑀪𑀬𑀫𑁆𑀧𑀺 𑀲𑀓𑁆𑀓𑁄𑀢𑀺. 𑀲𑁄 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀬𑀫𑁂𑀯 𑀲𑀩𑁆𑀩𑀧𑀜𑁆𑀳𑁂 𑀲𑀫𑀼𑀝𑁆𑀞𑀧𑁂𑀢𑁆𑀯𑀸 𑀲𑀬𑀁 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑁄 𑀇𑀤𑀁 𑀲𑀼𑀢𑁆𑀢𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸, ‘‘𑀲𑁄𑀪𑀦𑀸 𑀯𑀢 𑀅𑀬𑀁 𑀥𑀫𑁆𑀫𑀤𑁂𑀲𑀦𑀸, 𑀚𑁂𑀝𑁆𑀞𑀪𑀸𑀢𑀺𑀓𑁂𑀦 𑀦𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀲𑁆𑀲𑀸𑀫𑀺, 𑀢𑀢𑁄 𑀅𑀬𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀫𑁆𑀳𑀸𑀓𑀁 𑀏𑀓𑀫𑀢𑀺𑀬𑀸 𑀏𑀓𑀚𑁆𑀛𑀸𑀲𑀬𑁂𑀦 𑀘 𑀞𑀧𑀺𑀢𑀸 𑀅𑀢𑀺𑀕𑀭𑀼𑀓𑀸 𑀪𑀯𑀺𑀲𑁆𑀲𑀢𑀺 𑀧𑀸𑀲𑀸𑀡𑀘𑁆𑀙𑀢𑁆𑀢𑀲𑀤𑀺𑀲𑀸, 𑀘𑀢𑀼𑀭𑁄𑀖𑀦𑀺𑀢𑁆𑀣𑀭𑀡𑀢𑁆𑀣𑀺𑀓𑀸𑀦𑀁 𑀢𑀺𑀢𑁆𑀣𑁂 𑀞𑀧𑀺𑀢𑀦𑀸𑀯𑀸 𑀯𑀺𑀬, 𑀫𑀕𑁆𑀕𑀕𑀫𑀦𑀢𑁆𑀣𑀺𑀓𑀸𑀦𑀁 𑀲𑀳𑀲𑁆𑀲𑀬𑀼𑀢𑁆𑀢𑀆𑀚𑀜𑁆𑀜𑀭𑀣𑁄 𑀯𑀺𑀬 𑀩𑀳𑀼𑀧𑀓𑀸𑀭𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀢𑁆𑀣𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀸𑀲𑀼 𑀇𑀥 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸𑀧𑀼𑀘𑁆𑀙𑀸 𑀅𑀥𑀺𑀧𑁆𑀧𑁂𑀢𑀸’’𑀢𑀺.

𑀦𑀧𑁆𑀧𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀦𑀧𑁆𑀧𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀤𑀼𑀧𑁆𑀧𑀜𑁆𑀜𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀬𑀫𑀢𑁆𑀣𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀦𑀧𑁆𑀧𑀚𑀸𑀦𑀸𑀢𑀻𑀢𑀺 𑀇𑀤𑀁 𑀤𑀼𑀓𑁆𑀔𑀁, 𑀏𑀢𑁆𑀢𑀓𑀁 𑀤𑀼𑀓𑁆𑀔𑀁, 𑀇𑀢𑁄 𑀉𑀤𑁆𑀥𑀁 𑀦𑀢𑁆𑀣𑀻𑀢𑀺 𑀤𑀼𑀓𑁆𑀔𑀲𑀘𑁆𑀘𑀁 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀢𑁄 𑀦 𑀧𑀚𑀸𑀦𑀸𑀢𑀺. 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀇𑀢𑁄 𑀤𑀼𑀓𑁆𑀔𑀁 𑀲𑀫𑀼𑀤𑁂𑀢𑀻𑀢𑀺 𑀧𑀯𑀢𑁆𑀢𑀺𑀤𑀼𑀓𑁆𑀔𑀧𑀪𑀸𑀯𑀺𑀓𑀸 𑀢𑀡𑁆𑀳𑀸 𑀲𑀫𑀼𑀤𑀬𑀲𑀘𑁆𑀘𑀦𑁆𑀢𑀺 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀢𑁄 𑀦 𑀧𑀚𑀸𑀦𑀸𑀢𑀺. 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀇𑀤𑀁 𑀤𑀼𑀓𑁆𑀔𑀁 𑀅𑀬𑀁 𑀤𑀼𑀓𑁆𑀔𑀲𑀫𑀼𑀤𑀬𑁄 𑀘 𑀇𑀤𑀁 𑀦𑀸𑀫 𑀞𑀸𑀦𑀁 𑀧𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀻𑀢𑀺 𑀉𑀪𑀺𑀦𑁆𑀦𑀁 𑀅𑀧𑁆𑀧𑀯𑀢𑁆𑀢𑀺 𑀦𑀺𑀩𑁆𑀩𑀸𑀦𑀁 𑀦𑀺𑀭𑁄𑀥𑀲𑀘𑁆𑀘𑀦𑁆𑀢𑀺 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀢𑁄 𑀦 𑀧𑀚𑀸𑀦𑀸𑀢𑀺. 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀅𑀬𑀁 𑀧𑀝𑀺𑀧𑀤𑀸 𑀤𑀼𑀓𑁆𑀔𑀦𑀺𑀭𑁄𑀥𑀁 𑀕𑀘𑁆𑀙𑀢𑀻𑀢𑀺 𑀫𑀕𑁆𑀕𑀲𑀘𑁆𑀘𑀁 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀢𑁄 𑀦 𑀧𑀚𑀸𑀦𑀸𑀢𑀻𑀢𑀺. 𑀅𑀦𑀦𑁆𑀢𑀭𑀯𑀸𑀭𑁂𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀗𑁆𑀔𑁂𑀧𑀢𑁄 𑀧𑀦𑁂𑀢𑁆𑀣 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀺𑀓𑁄 𑀧𑀼𑀕𑁆𑀕𑀮𑁄 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀬𑀜𑁆𑀳𑀺 𑀆𑀘𑀭𑀺𑀬𑀲𑀦𑁆𑀢𑀺𑀓𑁂 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑀯𑀦𑀢𑁄 𑀉𑀕𑁆𑀕𑀡𑁆𑀳𑀸𑀢𑀺. 𑀞𑀧𑁂𑀢𑁆𑀯𑀸 𑀢𑀡𑁆𑀳𑀁 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸 𑀤𑀼𑀓𑁆𑀔𑀲𑀘𑁆𑀘𑀁, 𑀢𑀡𑁆𑀳𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀉𑀪𑀺𑀦𑁆𑀦𑀁 𑀅𑀧𑁆𑀧𑀯𑀢𑁆𑀢𑀺 𑀦𑀺𑀩𑁆𑀩𑀸𑀦𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀤𑀼𑀓𑁆𑀔𑀲𑀘𑁆𑀘𑀁 𑀧𑀭𑀺𑀚𑀸𑀦𑀦𑁆𑀢𑁄 𑀲𑀫𑀼𑀤𑀬𑀲𑀘𑁆𑀘𑀁 𑀧𑀚𑀳𑀦𑁆𑀢𑁄 𑀦𑀺𑀭𑁄𑀥𑀧𑀸𑀧𑀦𑁄 𑀫𑀕𑁆𑀕𑁄 𑀫𑀕𑁆𑀕𑀲𑀘𑁆𑀘𑀦𑁆𑀢𑀺 𑀏𑀯𑀁 𑀉𑀕𑁆𑀕𑀳𑁂𑀢𑁆𑀯𑀸 𑀅𑀪𑀺𑀦𑀺𑀯𑀺𑀲𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀯𑀝𑁆𑀝𑀁, 𑀧𑀘𑁆𑀙𑀺𑀫𑀸𑀦𑀺 𑀯𑀺𑀯𑀝𑁆𑀝𑀁, 𑀯𑀝𑁆𑀝𑁂 𑀅𑀪𑀺𑀦𑀺𑀯𑁂𑀲𑁄 𑀳𑁄𑀢𑀺, 𑀦𑁄 𑀯𑀺𑀯𑀝𑁆𑀝𑁂, 𑀢𑀲𑁆𑀫𑀸 𑀅𑀬𑀁 𑀅𑀪𑀺𑀦𑀺𑀯𑀺𑀲𑀫𑀸𑀦𑁄 𑀤𑀼𑀓𑁆𑀔𑀲𑀘𑁆𑀘𑁂 𑀅𑀪𑀺𑀦𑀺𑀯𑀺𑀲𑀢𑀺.

𑀤𑀼𑀓𑁆𑀔𑀲𑀘𑁆𑀘𑀁 𑀦𑀸𑀫 𑀭𑀽𑀧𑀸𑀤𑀬𑁄 𑀧𑀜𑁆𑀘𑀓𑁆𑀔𑀦𑁆𑀥𑀸𑀢𑀺 𑀯𑀯𑀢𑁆𑀣𑀧𑁂𑀢𑁆𑀯𑀸 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦 𑀑𑀢𑀭𑀺𑀢𑁆𑀯𑀸, ‘‘𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀭𑀽𑀧𑀁 𑀭𑀽𑀧’’𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀢𑀤𑀸𑀭𑀫𑁆𑀫𑀡𑀸 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀁 𑀦𑀸𑀫𑀦𑁆𑀢𑀺 𑀏𑀯𑀁 𑀬𑀫𑀓𑀢𑀸𑀮𑀓𑁆𑀔𑀦𑁆𑀥𑀁 𑀪𑀺𑀦𑁆𑀤𑀦𑁆𑀢𑁄 𑀯𑀺𑀬 ‘‘𑀤𑁆𑀯𑁂𑀯 𑀇𑀫𑁂 𑀥𑀫𑁆𑀫𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀯𑀯𑀢𑁆𑀣𑀧𑁂𑀢𑀺. 𑀢𑀁 𑀧𑀦𑁂𑀢𑀁 𑀦 𑀅𑀳𑁂𑀢𑀼𑀓𑀁 𑀲𑀳𑁂𑀢𑀼𑀓𑀁 𑀲𑀧𑁆𑀧𑀘𑁆𑀘𑀬𑀁, 𑀓𑁄 𑀘𑀲𑁆𑀲 𑀧𑀘𑁆𑀘𑀬𑁄 𑀅𑀯𑀺𑀚𑁆𑀚𑀸𑀤𑀬𑁄 𑀥𑀫𑁆𑀫𑀸𑀢𑀺 𑀏𑀯𑀁 𑀧𑀘𑁆𑀘𑀬𑁂 𑀘𑁂𑀯 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑁂 𑀘 𑀯𑀯𑀢𑁆𑀣𑀧𑁂𑀢𑁆𑀯𑀸 ‘‘𑀲𑀩𑁆𑀩𑁂𑀧𑀺 𑀥𑀫𑁆𑀫𑀸 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀸’’𑀢𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀺, 𑀢𑀢𑁄 𑀉𑀤𑀬𑀯𑀬𑀧𑁆𑀧𑀝𑀺𑀧𑀻𑀴𑀦𑀸𑀓𑀸𑀭𑁂𑀦 𑀤𑀼𑀓𑁆𑀔𑀸, 𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑁂𑀦 𑀅𑀦𑀢𑁆𑀢𑀸𑀢𑀺 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀸𑀝𑀺𑀬𑀸 𑀲𑀫𑁆𑀫𑀲𑀦𑁆𑀢𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀁 𑀧𑀸𑀧𑀼𑀡𑀸𑀢𑀺.

𑀫𑀕𑁆𑀕𑀓𑁆𑀔𑀡𑁂 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀢𑀺, 𑀏𑀓𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺. 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀢𑀺. 𑀲𑀫𑀼𑀤𑀬𑀁 𑀧𑀳𑀸𑀦𑀧𑀝𑀺𑀯𑁂𑀥𑁂𑀦, 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀝𑀺𑀯𑁂𑀥𑁂𑀦, 𑀫𑀕𑁆𑀕𑀁 𑀪𑀸𑀯𑀦𑀸𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀢𑀺. 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺, 𑀲𑀫𑀼𑀤𑀬𑀁 𑀧𑀳𑀸𑀦𑀸𑀪𑀺𑀲𑀫𑀬𑁂𑀦, 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑁂𑀦, 𑀫𑀕𑁆𑀕𑀁 𑀪𑀸𑀯𑀦𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺. 𑀲𑁄 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀓𑀺𑀘𑁆𑀘𑀢𑁄 𑀧𑀝𑀺𑀯𑀺𑀚𑁆𑀛𑀢𑀺, 𑀦𑀺𑀭𑁄𑀥𑀁 𑀆𑀭𑀫𑁆𑀫𑀡𑀢𑁄. 𑀢𑀲𑁆𑀫𑀺𑀜𑁆𑀘𑀲𑁆𑀲 𑀔𑀡𑁂 𑀅𑀳𑀁 𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀸𑀫𑀺, 𑀲𑀫𑀼𑀤𑀬𑀁 𑀧𑀚𑀳𑀸𑀫𑀺, 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁄𑀫𑀺, 𑀫𑀕𑁆𑀕𑀁 𑀪𑀸𑀯𑁂𑀫𑀻𑀢𑀺 𑀆𑀪𑁄𑀕𑀲𑀫𑀦𑁆𑀦𑀸𑀳𑀸𑀭𑀫𑀦𑀲𑀺𑀓𑀸𑀭𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀢𑁆𑀣𑀺. 𑀏𑀢𑀲𑁆𑀲 𑀧𑀦 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑁂𑀯 𑀫𑀕𑁆𑀕𑁄 𑀢𑀻𑀲𑀼 𑀲𑀘𑁆𑀘𑁂𑀲𑀼 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑁄𑀯 𑀦𑀺𑀭𑁄𑀥𑀁 𑀆𑀭𑀫𑁆𑀫𑀡𑀢𑁄 𑀧𑀝𑀺𑀯𑀺𑀚𑁆𑀛𑀢𑀻𑀢𑀺.

𑀢𑀲𑁆𑀫𑀸 𑀧𑀜𑁆𑀜𑀯𑀸𑀢𑀺 𑀯𑀼𑀘𑁆𑀘𑀢𑀻𑀢𑀺 𑀏𑀢𑁆𑀣 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀲𑁄𑀢𑀸𑀧𑀦𑁆𑀦𑁄, 𑀉𑀧𑀭𑀺𑀫𑀓𑁄𑀝𑀺𑀬𑀸 𑀔𑀻𑀡𑀸𑀲𑀯𑁄 𑀧𑀜𑁆𑀜𑀯𑀸𑀢𑀺 𑀦𑀺𑀤𑁆𑀤𑀺𑀝𑁆𑀞𑁄. 𑀬𑁄 𑀧𑀦 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀧𑀸𑀴𑀺𑀢𑁄 𑀘 𑀅𑀢𑁆𑀣𑀢𑁄 𑀘 𑀅𑀦𑀼𑀲𑀦𑁆𑀥𑀺𑀢𑁄 𑀘 𑀧𑀼𑀩𑁆𑀩𑀸𑀧𑀭𑀢𑁄 𑀘 𑀉𑀕𑁆𑀕𑀳𑁂𑀢𑁆𑀯𑀸 𑀳𑁂𑀝𑁆𑀞𑀼𑀧𑀭𑀺𑀬𑀁 𑀓𑀭𑁄𑀦𑁆𑀢𑁄 𑀯𑀺𑀘𑀭𑀢𑀺, 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀯𑀲𑁂𑀦 𑀧𑀭𑀺𑀕𑁆𑀕𑀳𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, 𑀅𑀬𑀁 𑀧𑀜𑁆𑀜𑀯𑀸 𑀦𑀸𑀫, 𑀤𑀼𑀧𑁆𑀧𑀜𑁆𑀜𑁄 𑀦𑀸𑀫𑀸𑀢𑀺? 𑀯𑀺𑀜𑁆𑀜𑀸𑀡𑀘𑀭𑀺𑀢𑁄 𑀦𑀸𑀫𑁂𑀲, 𑀧𑀜𑁆𑀜𑀯𑀸𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀅𑀣 𑀬𑁄 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀸𑀝𑀺𑀬𑀸 𑀲𑀫𑁆𑀫𑀲𑀦𑁆𑀢𑁄 𑀅𑀚𑁆𑀚 𑀅𑀚𑁆𑀚𑁂𑀯 𑀅𑀭𑀳𑀢𑁆𑀢𑀦𑁆𑀢𑀺 𑀘𑀭𑀢𑀺, 𑀅𑀬𑀁 𑀧𑀜𑁆𑀜𑀯𑀸 𑀦𑀸𑀫, 𑀤𑀼𑀧𑁆𑀧𑀜𑁆𑀜𑁄 𑀦𑀸𑀫𑀸𑀢𑀺? 𑀪𑀚𑀸𑀧𑀺𑀬𑀫𑀸𑀦𑁄 𑀧𑀜𑁆𑀜𑀯𑀸𑀧𑀓𑁆𑀔𑀁 𑀪𑀚𑀢𑀺. 𑀲𑀼𑀢𑁆𑀢𑁂 𑀧𑀦 𑀧𑀝𑀺𑀯𑁂𑀥𑁄𑀯 𑀓𑀣𑀺𑀢𑁄.

𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀇𑀥 𑀓𑀺𑀁 𑀧𑀼𑀘𑁆𑀙𑀢𑀺? 𑀬𑁂𑀦 𑀯𑀺𑀜𑁆𑀜𑀸𑀡𑁂𑀦 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀏𑀲 𑀧𑀜𑁆𑀜𑀯𑀸 𑀦𑀸𑀫 𑀚𑀸𑀢𑁄, 𑀢𑀲𑁆𑀲 𑀆𑀕𑀫𑀦𑀯𑀺𑀧𑀲𑁆𑀲𑀦𑀸 𑀯𑀺𑀜𑁆𑀜𑀸𑀡𑀁 𑀓𑀫𑁆𑀫𑀓𑀸𑀭𑀓𑀘𑀺𑀢𑁆𑀢𑀁 𑀧𑀼𑀘𑁆𑀙𑀸𑀫𑀻𑀢𑀺 𑀧𑀼𑀘𑁆𑀙𑀢𑀺. 𑀲𑀼𑀔𑀦𑁆𑀢𑀺𑀧𑀺 𑀯𑀺𑀚𑀸𑀦𑀸𑀢𑀻𑀢𑀺 𑀲𑀼𑀔𑀯𑁂𑀤𑀦𑀫𑁆𑀧𑀺 𑀯𑀺𑀚𑀸𑀦𑀸𑀢𑀺. 𑀉𑀧𑀭𑀺𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀺𑀦𑀸 𑀣𑁂𑀭𑁄 ‘‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻𑀢𑀺 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁧𑁩; 𑀤𑀻. 𑀦𑀺. 𑁨.𑁩𑁮𑁦) 𑀦𑀬𑁂𑀦 𑀆𑀕𑀢𑀯𑁂𑀤𑀦𑀸𑀯𑀲𑁂𑀦 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑀺. 𑀢𑀲𑁆𑀲𑀢𑁆𑀣𑁄 𑀲𑀢𑀺𑀧𑀝𑁆𑀞𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀲𑀁𑀲𑀝𑁆𑀞𑀸𑀢𑀺 𑀏𑀓𑀼𑀧𑁆𑀧𑀸𑀤𑀸𑀤𑀺𑀮𑀓𑁆𑀔𑀡𑁂𑀦 𑀲𑀁𑀬𑁄𑀕𑀝𑁆𑀞𑁂𑀦 𑀲𑀁𑀲𑀝𑁆𑀞𑀸, 𑀉𑀤𑀸𑀳𑀼 𑀯𑀺𑀲𑀁𑀲𑀝𑁆𑀞𑀸𑀢𑀺 𑀧𑀼𑀘𑁆𑀙𑀢𑀺. 𑀏𑀢𑁆𑀣 𑀘 𑀣𑁂𑀭𑁄 𑀫𑀕𑁆𑀕𑀧𑀜𑁆𑀜𑀜𑁆𑀘 𑀯𑀺𑀧𑀲𑁆𑀲𑀦𑀸𑀯𑀺𑀜𑁆𑀜𑀸𑀡𑀜𑁆𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀫𑀺𑀲𑁆𑀲𑁂𑀢𑁆𑀯𑀸 𑀪𑀽𑀫𑀦𑁆𑀢𑀭𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀫𑀬𑀁 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀧𑀼𑀘𑁆𑀙𑀢𑀻𑀢𑀺 𑀦 𑀯𑁂𑀤𑀺𑀢𑀩𑁆𑀩𑁄. 𑀫𑀕𑁆𑀕𑀧𑀜𑁆𑀜𑀸𑀬 𑀧𑀦 𑀫𑀕𑁆𑀕𑀯𑀺𑀜𑁆𑀜𑀸𑀡𑁂𑀦, 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀘 𑀯𑀺𑀧𑀲𑁆𑀲𑀦𑀸𑀯𑀺𑀜𑁆𑀜𑀸𑀡𑁂𑀦𑁂𑀯 𑀲𑀤𑁆𑀥𑀺𑀁 𑀲𑀁𑀲𑀝𑁆𑀞𑀪𑀸𑀯𑀁 𑀧𑀼𑀘𑁆𑀙𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀣𑁂𑀭𑁄𑀧𑀺𑀲𑁆𑀲 𑀢𑀫𑁂𑀯𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀇𑀫𑁂 𑀥𑀫𑁆𑀫𑀸 𑀲𑀁𑀲𑀝𑁆𑀞𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦 𑀘 𑀮𑀩𑁆𑀪𑀸 𑀇𑀫𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀇𑀫𑁂𑀲𑀁 𑀮𑁄𑀓𑀺𑀬𑀫𑀕𑁆𑀕𑀓𑁆𑀔𑀡𑁂𑀧𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂𑀧𑀺 𑀏𑀓𑀢𑁄 𑀉𑀧𑁆𑀧𑀦𑁆𑀦𑀸𑀦𑀁 𑀤𑁆𑀯𑀺𑀦𑁆𑀦𑀁 𑀥𑀫𑁆𑀫𑀸𑀦𑀁. 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀢𑁆𑀯𑀸 𑀯𑀺𑀦𑀺𑀯𑀝𑁆𑀝𑁂𑀢𑁆𑀯𑀸, 𑀆𑀭𑀫𑁆𑀫𑀡𑀢𑁄 𑀯𑀸 𑀯𑀢𑁆𑀣𑀼𑀢𑁄 𑀯𑀸 𑀉𑀧𑁆𑀧𑀸𑀤𑀢𑁄 𑀯𑀸 𑀦𑀺𑀭𑁄𑀥𑀢𑁄 𑀯𑀸 𑀦𑀸𑀦𑀸𑀓𑀭𑀡𑀁 𑀤𑀲𑁆𑀲𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀁 𑀢𑁂𑀲𑀁 𑀧𑀦 𑀥𑀫𑁆𑀫𑀸𑀦𑀁 𑀯𑀺𑀲𑀬𑁄 𑀦𑀸𑀫 𑀅𑀢𑁆𑀣𑀺. 𑀮𑁄𑀓𑀺𑀬𑀥𑀫𑁆𑀫𑀁 𑀧𑀢𑁆𑀯𑀸 𑀳𑀺 𑀘𑀺𑀢𑁆𑀢𑀁 𑀚𑁂𑀝𑁆𑀞𑀓𑀁 𑀳𑁄𑀢𑀺 𑀧𑀼𑀩𑁆𑀩𑀗𑁆𑀕𑀫𑀁, 𑀮𑁄𑀓𑀼𑀢𑁆𑀢𑀭𑀁 𑀧𑀢𑁆𑀯𑀸 𑀧𑀜𑁆𑀜𑀸.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀧𑀺 𑀳𑀺 𑀮𑁄𑀓𑀺𑀬𑀥𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑁄, ‘‘𑀪𑀺𑀓𑁆𑀔𑀼, 𑀢𑁆𑀯𑀁 𑀓𑀢𑀫𑀁 𑀧𑀜𑁆𑀜𑀁 𑀅𑀥𑀺𑀕𑀢𑁄, 𑀓𑀺𑀁 𑀧𑀞𑀫𑀫𑀕𑁆𑀕𑀧𑀜𑁆𑀜𑀁, 𑀉𑀤𑀸𑀳𑀼 𑀤𑀼𑀢𑀺𑀬 𑀢𑀢𑀺𑀬 𑀘𑀢𑀼𑀢𑁆𑀣 𑀫𑀕𑁆𑀕𑀧𑀜𑁆𑀜’’𑀦𑁆𑀢𑀺 𑀦 𑀏𑀯𑀁 𑀧𑀼𑀘𑁆𑀙𑀢𑀺. 𑀓𑀺𑀁 𑀨𑀲𑁆𑀲𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀓𑀺𑀁 𑀯𑁂𑀤𑀦𑁄, 𑀓𑀺𑀁 𑀲𑀜𑁆𑀜𑁄, 𑀓𑀺𑀁 𑀘𑁂𑀢𑀦𑁄𑀢𑀺 𑀦 𑀘 𑀧𑀼𑀘𑁆𑀙𑀢𑀺, 𑀘𑀺𑀢𑁆𑀢𑀯𑀲𑁂𑀦 𑀧𑀦, ‘‘𑀓𑀺𑀜𑁆𑀘𑀺𑀢𑁆𑀢𑁄 𑀢𑁆𑀯𑀁, 𑀪𑀺𑀓𑁆𑀔𑀽’’𑀢𑀺 (𑀧𑀸𑀭𑀸. 𑁧𑁩𑁫) 𑀧𑀼𑀘𑁆𑀙𑀢𑀺. 𑀓𑀼𑀲𑀮𑀸𑀓𑀼𑀲𑀮𑀁 𑀧𑀜𑁆𑀜𑀧𑁂𑀦𑁆𑀢𑁄𑀧𑀺 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸, 𑀫𑀦𑁄𑀲𑁂𑀝𑁆𑀞𑀸 𑀫𑀦𑁄𑀫𑀬𑀸’’𑀢𑀺 (𑀥. 𑀧. 𑁧, 𑁨) 𑀘, ‘‘𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺 (𑀥. 𑀲. 𑁧) 𑀘 𑀏𑀯𑀁 𑀘𑀺𑀢𑁆𑀢𑀯𑀲𑁂𑀦𑁂𑀯 𑀧𑀜𑁆𑀜𑀸𑀧𑁂𑀢𑀺. 𑀮𑁄𑀓𑀼𑀢𑁆𑀢𑀭𑀁 𑀧𑀼𑀘𑁆𑀙𑀦𑁆𑀢𑁄 𑀧𑀦 𑀓𑀺𑀁 𑀨𑀲𑁆𑀲𑁄 𑀢𑁆𑀯𑀁 𑀪𑀺𑀓𑁆𑀔𑀼, 𑀓𑀺𑀁 𑀯𑁂𑀤𑀦𑁄, 𑀓𑀺𑀁 𑀲𑀜𑁆𑀜𑁄, 𑀓𑀺𑀁 𑀘𑁂𑀢𑀦𑁄𑀢𑀺 𑀦 𑀧𑀼𑀘𑁆𑀙𑀢𑀺. 𑀓𑀢𑀫𑀸 𑀢𑁂, 𑀪𑀺𑀓𑁆𑀔𑀼, 𑀧𑀜𑁆𑀜𑀸 𑀅𑀥𑀺𑀕𑀢𑀸, 𑀓𑀺𑀁 𑀧𑀞𑀫𑀫𑀕𑁆𑀕𑀧𑀜𑁆𑀜𑀸, 𑀉𑀤𑀸𑀳𑀼 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀫𑀕𑁆𑀕𑀧𑀜𑁆𑀜𑀸𑀢𑀺 𑀏𑀯𑀁 𑀧𑀜𑁆𑀜𑀸𑀯𑀲𑁂𑀦𑁂𑀯 𑀧𑀼𑀘𑁆𑀙𑀢𑀺.

𑀇𑀦𑁆𑀤𑁆𑀭𑀺𑀬𑀲𑀁𑀬𑀼𑀢𑁆𑀢𑁂𑀧𑀺 ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀓𑀢𑁆𑀣 𑀘, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀤𑀝𑁆𑀞𑀩𑁆𑀩𑀁? 𑀘𑀢𑀽𑀲𑀼 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀲𑀼 𑀏𑀢𑁆𑀣 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀤𑀝𑁆𑀞𑀩𑁆𑀩𑀁. 𑀓𑀢𑁆𑀣 𑀘, 𑀪𑀺𑀓𑁆𑀔𑀯𑁂, 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀤𑀝𑁆𑀞𑀩𑁆𑀩𑀁? 𑀘𑀢𑀽𑀲𑀼 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀼 𑀏𑀢𑁆𑀣 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀤𑀝𑁆𑀞𑀩𑁆𑀩𑀁. 𑀓𑀢𑁆𑀣 𑀘, 𑀪𑀺𑀓𑁆𑀔𑀯𑁂, 𑀲𑀢𑀺𑀦𑁆𑀤𑁆𑀭𑀺𑀬𑀁 𑀤𑀝𑁆𑀞𑀩𑁆𑀩𑀁? 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀏𑀢𑁆𑀣 𑀲𑀢𑀺𑀦𑁆𑀤𑁆𑀭𑀺𑀬𑀁 𑀤𑀝𑁆𑀞𑀩𑁆𑀩𑀁. 𑀓𑀢𑁆𑀣 𑀘, 𑀪𑀺𑀓𑁆𑀔𑀯𑁂, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀤𑀝𑁆𑀞𑀩𑁆𑀩𑀁? 𑀘𑀢𑀽𑀲𑀼 𑀛𑀸𑀦𑁂𑀲𑀼 𑀏𑀢𑁆𑀣 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀤𑀝𑁆𑀞𑀩𑁆𑀩𑀁. 𑀓𑀢𑁆𑀣 𑀘, 𑀪𑀺𑀓𑁆𑀔𑀯𑁂, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀤𑀝𑁆𑀞𑀩𑁆𑀩𑀁? 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀏𑀢𑁆𑀣 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀤𑀝𑁆𑀞𑀩𑁆𑀩’’𑀦𑁆𑀢𑀺 (𑀲𑀁. 𑀦𑀺. 𑁫.𑁪𑁭𑁮). 𑀏𑀯𑀁 𑀲𑀯𑀺𑀲𑀬𑀲𑁆𑀫𑀺𑀁𑀬𑁂𑀯 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀥𑀫𑁆𑀫𑀸 𑀓𑀣𑀺𑀢𑀸.

𑀬𑀣𑀸 𑀳𑀺 𑀘𑀢𑁆𑀢𑀸𑀭𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑀸 𑀭𑀸𑀚𑀸𑀢𑀺 𑀭𑀸𑀚𑀧𑀜𑁆𑀘𑀫𑁂𑀲𑀼 𑀲𑀳𑀸𑀬𑁂𑀲𑀼 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀸𑀢𑀺 𑀯𑀻𑀣𑀺𑀁 𑀑𑀢𑀺𑀡𑁆𑀡𑁂𑀲𑀼 𑀏𑀓𑀲𑁆𑀲 𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀕𑁂𑀳𑀁 𑀕𑀢𑀓𑀸𑀮𑁂 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺, 𑀕𑁂𑀳𑀲𑀸𑀫𑀺𑀓𑁄𑀯, ‘‘𑀇𑀫𑁂𑀲𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀤𑁂𑀣, 𑀕𑀦𑁆𑀥𑀫𑀸𑀮𑀸𑀮𑀗𑁆𑀓𑀸𑀭𑀸𑀤𑀻𑀦𑀺 𑀤𑁂𑀣𑀸’’𑀢𑀺 𑀕𑁂𑀳𑁂 𑀯𑀺𑀘𑀸𑀭𑁂𑀢𑀺. 𑀤𑀼𑀢𑀺𑀬𑀲𑁆𑀲 𑀢𑀢𑀺𑀬𑀲𑁆𑀲 𑀘𑀢𑀼𑀢𑁆𑀣𑀲𑁆𑀲 𑀕𑁂𑀳𑀁 𑀕𑀢𑀓𑀸𑀮𑁂 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺, 𑀕𑁂𑀳𑀲𑀸𑀫𑀺𑀓𑁄𑀯, ‘‘𑀇𑀫𑁂𑀲𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀤𑁂𑀣, 𑀕𑀦𑁆𑀥𑀫𑀸𑀮𑀸𑀮𑀗𑁆𑀓𑀸𑀭𑀸𑀤𑀻𑀦𑀺 𑀤𑁂𑀣𑀸’’𑀢𑀺 𑀕𑁂𑀳𑁂 𑀯𑀺𑀘𑀸𑀭𑁂𑀢𑀺. 𑀅𑀣 𑀲𑀩𑁆𑀩𑀧𑀘𑁆𑀙𑀸 𑀭𑀜𑁆𑀜𑁄 𑀕𑁂𑀳𑀁 𑀕𑀢𑀓𑀸𑀮𑁂 𑀓𑀺𑀜𑁆𑀘𑀸𑀧𑀺 𑀭𑀸𑀚𑀸 𑀲𑀩𑁆𑀩𑀢𑁆𑀣 𑀇𑀲𑁆𑀲𑀭𑁄𑀯, 𑀇𑀫𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀅𑀢𑁆𑀢𑀦𑁄 𑀕𑁂𑀳𑁂𑀬𑁂𑀯, ‘‘𑀇𑀫𑁂𑀲𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀤𑁂𑀣, 𑀕𑀦𑁆𑀥𑀫𑀸𑀮𑀸𑀮𑀗𑁆𑀓𑀸𑀭𑀸𑀤𑀻𑀦𑀺 𑀤𑁂𑀣𑀸’’𑀢𑀺 𑀯𑀺𑀘𑀸𑀭𑁂𑀢𑀺. 𑀏𑀯𑀫𑁂𑀯𑀁 𑀔𑁄 𑀲𑀤𑁆𑀥𑀸𑀧𑀜𑁆𑀘𑀫𑀓𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀢𑁂𑀲𑀼 𑀲𑀳𑀸𑀬𑁂𑀲𑀼 𑀏𑀓𑀢𑁄 𑀯𑀻𑀣𑀺𑀁 𑀑𑀢𑀭𑀦𑁆𑀢𑁂𑀲𑀼 𑀯𑀺𑀬 𑀏𑀓𑀸𑀭𑀫𑁆𑀫𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼𑀧𑀺 𑀬𑀣𑀸 𑀧𑀞𑀫𑀲𑁆𑀲 𑀕𑁂𑀳𑁂 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺, 𑀕𑁂𑀳𑀲𑀸𑀫𑀺𑀓𑁄𑀯 𑀯𑀺𑀘𑀸𑀭𑁂𑀢𑀺, 𑀏𑀯𑀁 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺 𑀧𑀢𑁆𑀯𑀸 𑀅𑀥𑀺𑀫𑁄𑀓𑁆𑀔𑀮𑀓𑁆𑀔𑀡𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀫𑁂𑀯 𑀚𑁂𑀝𑁆𑀞𑀓𑀁 𑀳𑁄𑀢𑀺 𑀧𑀼𑀩𑁆𑀩𑀗𑁆𑀕𑀫𑀁, 𑀲𑁂𑀲𑀸𑀦𑀺 𑀢𑀤𑀦𑁆𑀯𑀬𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸 𑀤𑀼𑀢𑀺𑀬𑀲𑁆𑀲 𑀕𑁂𑀳𑁂 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺, 𑀕𑁂𑀳𑀲𑀸𑀫𑀺𑀓𑁄𑀯 𑀯𑀺𑀘𑀸𑀭𑁂𑀢𑀺, 𑀏𑀯𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀺 𑀧𑀢𑁆𑀯𑀸 𑀧𑀕𑁆𑀕𑀳𑀡𑀮𑀓𑁆𑀔𑀡𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀫𑁂𑀯 𑀚𑁂𑀝𑁆𑀞𑀓𑀁 𑀳𑁄𑀢𑀺 𑀧𑀼𑀩𑁆𑀩𑀗𑁆𑀕𑀫𑀁, 𑀲𑁂𑀲𑀸𑀦𑀺 𑀢𑀤𑀦𑁆𑀯𑀬𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸 𑀢𑀢𑀺𑀬𑀲𑁆𑀲 𑀕𑁂𑀳𑁂 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺, 𑀕𑁂𑀳𑀲𑀸𑀫𑀺𑀓𑁄𑀯 𑀯𑀺𑀘𑀸𑀭𑁂𑀢𑀺, 𑀏𑀯𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀺 𑀧𑀢𑁆𑀯𑀸 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑀁 𑀲𑀢𑀺𑀦𑁆𑀤𑁆𑀭𑀺𑀬𑀫𑁂𑀯 𑀚𑁂𑀝𑁆𑀞𑀓𑀁 𑀳𑁄𑀢𑀺 𑀧𑀼𑀩𑁆𑀩𑀗𑁆𑀕𑀫𑀁, 𑀲𑁂𑀲𑀸𑀦𑀺 𑀢𑀤𑀦𑁆𑀯𑀬𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸 𑀘𑀢𑀼𑀢𑁆𑀣𑀲𑁆𑀲 𑀕𑁂𑀳𑁂 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺, 𑀕𑁂𑀳𑀲𑀸𑀫𑀺𑀓𑁄𑀯 𑀯𑀺𑀘𑀸𑀭𑁂𑀢𑀺, 𑀏𑀯𑀁 𑀛𑀸𑀦𑀯𑀺𑀫𑁄𑀓𑁆𑀔𑁂 𑀧𑀢𑁆𑀯𑀸 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀫𑁂𑀯 𑀚𑁂𑀝𑁆𑀞𑀓𑀁 𑀳𑁄𑀢𑀺 𑀧𑀼𑀩𑁆𑀩𑀗𑁆𑀕𑀫𑀁, 𑀲𑁂𑀲𑀸𑀦𑀺 𑀢𑀤𑀦𑁆𑀯𑀬𑀸𑀦𑀺 𑀳𑁄𑀦𑁆𑀢𑀺. 𑀲𑀩𑁆𑀩𑀧𑀘𑁆𑀙𑀸 𑀭𑀜𑁆𑀜𑁄 𑀕𑁂𑀳𑀁 𑀕𑀢𑀓𑀸𑀮𑁂 𑀧𑀦 𑀬𑀣𑀸 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺, 𑀭𑀸𑀚𑀸𑀯 𑀕𑁂𑀳𑁂 𑀯𑀺𑀘𑀸𑀭𑁂𑀢𑀺, 𑀏𑀯𑀫𑁂𑀯 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀢𑁆𑀯𑀸 𑀧𑀚𑀸𑀦𑀦𑀮𑀓𑁆𑀔𑀡𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀫𑁂𑀯 𑀚𑁂𑀝𑁆𑀞𑀓𑀁 𑀳𑁄𑀢𑀺 𑀧𑀼𑀩𑁆𑀩𑀗𑁆𑀕𑀫𑀁, 𑀲𑁂𑀲𑀸𑀦𑀺 𑀢𑀤𑀦𑁆𑀯𑀬𑀸𑀦𑀺 𑀳𑁄𑀦𑁆𑀢𑀺.

𑀇𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑀸𑀦𑀁 𑀅𑀕𑁆𑀕𑁂 𑀞𑀧𑀺𑀢𑁄 𑀫𑀳𑀸𑀓𑁄𑀝𑁆𑀞𑀺𑀢𑀢𑁆𑀣𑁂𑀭𑁄 𑀮𑁄𑀓𑀺𑀬𑀥𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑁄 𑀘𑀺𑀢𑁆𑀢𑀁 𑀚𑁂𑀝𑁆𑀞𑀓𑀁 𑀘𑀺𑀢𑁆𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀧𑀼𑀘𑁆𑀙𑀺; 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀧𑀼𑀘𑁆𑀙𑀦𑁆𑀢𑁄 𑀧𑀜𑁆𑀜𑀁 𑀚𑁂𑀝𑁆𑀞𑀓𑀁 𑀧𑀜𑁆𑀜𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀧𑀼𑀘𑁆𑀙𑀺. 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀢𑀣𑁂𑀯 𑀯𑀺𑀲𑁆𑀲𑀚𑁆𑀚𑁂𑀲𑀻𑀢𑀺.

𑀬𑀁 𑀳𑀸𑀯𑀼𑀲𑁄, 𑀧𑀚𑀸𑀦𑀸𑀢𑀻𑀢𑀺 𑀬𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀫𑀺𑀤𑀁 𑀤𑀼𑀓𑁆𑀔𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀕𑁆𑀕𑀧𑀜𑁆𑀜𑀸 𑀧𑀚𑀸𑀦𑀸𑀢𑀺. 𑀢𑀁 𑀯𑀺𑀚𑀸𑀦𑀸𑀢𑀻𑀢𑀺 𑀫𑀕𑁆𑀕𑀯𑀺𑀜𑁆𑀜𑀸𑀡𑀫𑁆𑀧𑀺 𑀢𑀣𑁂𑀯 𑀢𑀁 𑀯𑀺𑀚𑀸𑀦𑀸𑀢𑀺. 𑀬𑀁 𑀯𑀺𑀚𑀸𑀦𑀸𑀢𑀻𑀢𑀺 𑀬𑀁 𑀲𑀗𑁆𑀔𑀸𑀭𑀕𑀢𑀁 𑀅𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀧𑀲𑁆𑀲𑀦𑀸𑀯𑀺𑀜𑁆𑀜𑀸𑀡𑀁 𑀯𑀺𑀚𑀸𑀦𑀸𑀢𑀺. 𑀢𑀁 𑀧𑀚𑀸𑀦𑀸𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀧𑀺 𑀢𑀣𑁂𑀯 𑀢𑀁 𑀧𑀚𑀸𑀦𑀸𑀢𑀺. 𑀢𑀲𑁆𑀫𑀸 𑀇𑀫𑁂 𑀥𑀫𑁆𑀫𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀇𑀫𑁂 𑀥𑀫𑁆𑀫𑀸. 𑀲𑀁𑀲𑀝𑁆𑀞𑀸𑀢𑀺 𑀏𑀓𑀼𑀧𑁆𑀧𑀸𑀤𑀏𑀓𑀦𑀺𑀭𑁄𑀥𑀏𑀓𑀯𑀢𑁆𑀣𑀼𑀓𑀏𑀓𑀸𑀭𑀫𑁆𑀫𑀡𑀢𑀸𑀬 𑀲𑀁𑀲𑀝𑁆𑀞𑀸.

𑀧𑀜𑁆𑀜𑀸 𑀪𑀸𑀯𑁂𑀢𑀩𑁆𑀩𑀸𑀢𑀺 𑀇𑀤𑀁 𑀫𑀕𑁆𑀕𑀧𑀜𑁆𑀜𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀧𑀦 𑀯𑀺𑀜𑁆𑀜𑀸𑀡𑀁 𑀢𑀸𑀬 𑀲𑀤𑁆𑀥𑀺𑀁 𑀪𑀸𑀯𑁂𑀢𑀩𑁆𑀩𑀫𑁂𑀯 𑀳𑁄𑀢𑀺. 𑀯𑀺𑀜𑁆𑀜𑀸𑀡𑀁 𑀧𑀭𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀇𑀤𑀁 𑀯𑀺𑀧𑀲𑁆𑀲𑀦𑀸𑀯𑀺𑀜𑁆𑀜𑀸𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀧𑀜𑁆𑀜𑀸 𑀢𑁂𑀦 𑀲𑀤𑁆𑀥𑀺𑀁 𑀧𑀭𑀺𑀚𑀸𑀦𑀺𑀢𑀩𑁆𑀩𑀸𑀯 𑀳𑁄𑀢𑀺.

𑁪𑁫𑁦. 𑀯𑁂𑀤𑀦𑀸 𑀯𑁂𑀤𑀦𑀸𑀢𑀺 𑀇𑀤𑀁 𑀓𑀲𑁆𑀫𑀸 𑀧𑀼𑀘𑁆𑀙𑀢𑀺? 𑀯𑁂𑀤𑀦𑀸𑀮𑀓𑁆𑀔𑀡𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀧𑀼𑀘𑁆𑀙𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀢𑁂𑀪𑀽𑀫𑀺𑀓𑀲𑀫𑁆𑀫𑀲𑀦𑀘𑀸𑀭𑀯𑁂𑀤𑀦𑀸𑀯 𑀅𑀥𑀺𑀧𑁆𑀧𑁂𑀢𑀸𑀢𑀺 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸. 𑀲𑀼𑀔𑀫𑁆𑀧𑀺 𑀯𑁂𑀤𑁂𑀢𑀻𑀢𑀺 𑀲𑀼𑀔𑀁 𑀆𑀭𑀫𑁆𑀫𑀡𑀁 𑀯𑁂𑀤𑁂𑀢𑀺 𑀅𑀦𑀼𑀪𑀯𑀢𑀺. 𑀧𑀭𑀢𑁄 𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. ‘‘𑀭𑀽𑀧𑀜𑁆𑀘 𑀳𑀺𑀤𑀁, 𑀫𑀳𑀸𑀮𑀺, 𑀏𑀓𑀦𑁆𑀢𑀤𑀼𑀓𑁆𑀔𑀁 𑀅𑀪𑀯𑀺𑀲𑁆𑀲, 𑀤𑀼𑀓𑁆𑀔𑀸𑀦𑀼𑀧𑀢𑀺𑀢𑀁 𑀤𑀼𑀓𑁆𑀔𑀸𑀯𑀓𑁆𑀓𑀦𑁆𑀢𑀁 𑀅𑀦𑀯𑀓𑁆𑀓𑀦𑁆𑀢𑀁 𑀲𑀼𑀔𑁂𑀦, 𑀦𑀬𑀺𑀤𑀁 𑀲𑀢𑁆𑀢𑀸 𑀭𑀽𑀧𑀲𑁆𑀫𑀺𑀁 𑀲𑀸𑀭𑀚𑁆𑀚𑁂𑀬𑁆𑀬𑀼𑀁. 𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀮𑀺, 𑀭𑀽𑀧𑀁 𑀲𑀼𑀔𑀁 𑀲𑀼𑀔𑀸𑀦𑀼𑀧𑀢𑀺𑀢𑀁 𑀲𑀼𑀔𑀸𑀯𑀓𑁆𑀓𑀦𑁆𑀢𑀁 𑀅𑀦𑀯𑀓𑁆𑀓𑀦𑁆𑀢𑀁 𑀤𑀼𑀓𑁆𑀔𑁂𑀦, 𑀢𑀲𑁆𑀫𑀸 𑀲𑀢𑁆𑀢𑀸 𑀭𑀽𑀧𑀲𑁆𑀫𑀺𑀁 𑀲𑀸𑀭𑀚𑁆𑀚𑀦𑁆𑀢𑀺, 𑀲𑀸𑀭𑀸𑀕𑀸 𑀲𑀁𑀬𑀼𑀚𑁆𑀚𑀦𑁆𑀢𑀺, 𑀲𑀁𑀬𑁄𑀕𑀸 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺. 𑀯𑁂𑀤𑀦𑀸 𑀘 𑀳𑀺𑀤𑀁… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀜𑁆𑀘 𑀳𑀺𑀤𑀁, 𑀫𑀳𑀸𑀮𑀺, 𑀏𑀓𑀦𑁆𑀢𑀤𑀼𑀓𑁆𑀔𑀁 𑀅𑀪𑀯𑀺𑀲𑁆𑀲…𑀧𑁂… 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁩.𑁭𑁦) 𑀇𑀫𑀺𑀦𑀸 𑀳𑀺 𑀫𑀳𑀸𑀮𑀺𑀲𑀼𑀢𑁆𑀢𑀧𑀭𑀺𑀬𑀸𑀬𑁂𑀦 𑀇𑀥 𑀆𑀭𑀫𑁆𑀫𑀡𑀁 𑀲𑀼𑀔𑀁 𑀤𑀼𑀓𑁆𑀔𑀁 𑀅𑀤𑀼𑀓𑁆𑀔𑀫𑀲𑀼𑀔𑀦𑁆𑀢𑀺 𑀓𑀣𑀺𑀢𑀁. 𑀅𑀧𑀺𑀘 𑀧𑀼𑀭𑀺𑀫𑀁 𑀲𑀼𑀔𑀁 𑀯𑁂𑀤𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀧𑀭𑀸 𑀲𑀼𑀔𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺; 𑀧𑀼𑀭𑀺𑀫𑀁 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀧𑀭𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀯𑁂𑀤𑁂𑀢𑀺; 𑀧𑀼𑀭𑀺𑀫𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑁂𑀤𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀧𑀭𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸 𑀯𑁂𑀤𑁂𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀯𑁂𑀤𑀦𑀸𑀬𑁂𑀯 𑀳𑀺 𑀯𑁂𑀤𑁂𑀢𑀺, 𑀦 𑀅𑀜𑁆𑀜𑁄 𑀓𑁄𑀘𑀺 𑀯𑁂𑀤𑀺𑀢𑀸 𑀦𑀸𑀫 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑀫𑁂𑀢𑀁.

𑀲𑀜𑁆𑀜𑀸 𑀲𑀜𑁆𑀜𑀸𑀢𑀺 𑀇𑀥 𑀓𑀺𑀁 𑀧𑀼𑀘𑁆𑀙𑀢𑀺? 𑀲𑀩𑁆𑀩𑀲𑀜𑁆𑀜𑀸𑀬 𑀮𑀓𑁆𑀔𑀡𑀁. 𑀓𑀺𑀁 𑀲𑀩𑁆𑀩𑀢𑁆𑀣𑀓𑀲𑀜𑁆𑀜𑀸𑀬𑀸𑀢𑀺? 𑀲𑀩𑁆𑀩𑀲𑀜𑁆𑀜𑀸𑀬 𑀮𑀓𑁆𑀔𑀡𑀦𑁆𑀢𑀺𑀧𑀺 𑀲𑀩𑁆𑀩𑀢𑁆𑀣𑀓𑀲𑀜𑁆𑀜𑀸𑀬 𑀮𑀓𑁆𑀔𑀡𑀦𑁆𑀢𑀺𑀧𑀺 𑀏𑀓𑀫𑁂𑀯𑁂𑀢𑀁, 𑀏𑀯𑀁 𑀲𑀦𑁆𑀢𑁂𑀧𑀺 𑀢𑁂𑀪𑀽𑀫𑀺𑀓𑀲𑀫𑁆𑀫𑀲𑀦𑀘𑀸𑀭𑀲𑀜𑁆𑀜𑀸𑀯 𑀅𑀥𑀺𑀧𑁆𑀧𑁂𑀢𑀸𑀢𑀺 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑀸. 𑀦𑀻𑀮𑀓𑀫𑁆𑀧𑀺 𑀲𑀜𑁆𑀚𑀸𑀦𑀸𑀢𑀻𑀢𑀺 𑀦𑀻𑀮𑀧𑀼𑀧𑁆𑀨𑁂 𑀯𑀸 𑀯𑀢𑁆𑀣𑁂 𑀯𑀸 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀉𑀧𑀘𑀸𑀭𑀁 𑀯𑀸 𑀅𑀧𑁆𑀧𑀦𑀁 𑀯𑀸 𑀧𑀸𑀧𑁂𑀦𑁆𑀢𑁄 𑀲𑀜𑁆𑀚𑀸𑀦𑀸𑀢𑀺. 𑀇𑀫𑀲𑁆𑀫𑀺𑀜𑁆𑀳𑀺 𑀅𑀢𑁆𑀣𑁂 𑀧𑀭𑀺𑀓𑀫𑁆𑀫𑀲𑀜𑁆𑀜𑀸𑀧𑀺 𑀉𑀧𑀘𑀸𑀭𑀲𑀜𑁆𑀜𑀸𑀧𑀺 𑀅𑀧𑁆𑀧𑀦𑀸𑀲𑀜𑁆𑀜𑀸𑀧𑀺 𑀯𑀝𑁆𑀝𑀢𑀺. 𑀦𑀻𑀮𑁂 𑀦𑀻𑀮𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑀓𑀲𑀜𑁆𑀜𑀸𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀧𑀻𑀢𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀬𑀸 𑀘𑀸𑀯𑀼𑀲𑁄, 𑀯𑁂𑀤𑀦𑀸𑀢𑀺 𑀏𑀢𑁆𑀣 𑀯𑁂𑀤𑀦𑀸, 𑀲𑀜𑁆𑀜𑀸, 𑀯𑀺𑀜𑁆𑀜𑀸𑀡𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀕𑀳𑁂𑀢𑁆𑀯𑀸 𑀧𑀜𑁆𑀜𑀸 𑀓𑀲𑁆𑀫𑀸 𑀦 𑀕𑀳𑀺𑀢𑀸𑀢𑀺? 𑀅𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀢𑁆𑀢𑀸. 𑀧𑀜𑁆𑀜𑀸𑀬 𑀳𑀺 𑀕𑀳𑀺𑀢𑀸𑀬 𑀧𑀜𑁆𑀜𑀸𑀬 𑀲𑀫𑁆𑀧𑀬𑀼𑀢𑁆𑀢𑀸𑀯 𑀯𑁂𑀤𑀦𑀸𑀤𑀬𑁄 𑀮𑀩𑁆𑀪𑀦𑁆𑀢𑀺, 𑀦𑁄 𑀯𑀺𑀧𑁆𑀧𑀬𑀼𑀢𑁆𑀢𑀸. 𑀢𑀁 𑀧𑀦 𑀅𑀕𑁆𑀕𑀳𑁂𑀢𑁆𑀯𑀸 𑀇𑀫𑁂𑀲𑀼 𑀕𑀳𑀺𑀢𑁂𑀲𑀼 𑀧𑀜𑁆𑀜𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀘 𑀯𑀺𑀧𑁆𑀧𑀬𑀼𑀢𑁆𑀢𑀸 𑀘 𑀅𑀦𑁆𑀢𑀫𑀲𑁄 𑀤𑁆𑀯𑁂 𑀧𑀜𑁆𑀘𑀯𑀺𑀜𑁆𑀜𑀸𑀡𑀥𑀫𑁆𑀫𑀸𑀧𑀺 𑀮𑀩𑁆𑀪𑀦𑁆𑀢𑀺. 𑀬𑀣𑀸 𑀳𑀺 𑀢𑀬𑁄 𑀧𑀼𑀭𑀺𑀲𑀸 𑀲𑀼𑀢𑁆𑀢𑀁 𑀲𑀼𑀢𑁆𑀢𑀦𑁆𑀢𑀺 𑀯𑀤𑁂𑀬𑁆𑀬𑀼𑀁, 𑀘𑀢𑀼𑀢𑁆𑀣𑁄 𑀭𑀢𑀦𑀸𑀯𑀼𑀢𑀲𑀼𑀢𑁆𑀢𑀦𑁆𑀢𑀺. 𑀢𑁂𑀲𑀼 𑀧𑀼𑀭𑀺𑀫𑀸 𑀢𑀬𑁄 𑀢𑀓𑁆𑀓𑀕𑀢𑀫𑁆𑀧𑀺 𑀧𑀝𑁆𑀝𑀺𑀯𑀝𑁆𑀝𑀓𑀸𑀤𑀺𑀕𑀢𑀫𑁆𑀧𑀺 𑀬𑀁𑀓𑀺𑀜𑁆𑀘𑀺 𑀩𑀳𑀼𑀁 𑀲𑀼𑀢𑁆𑀢𑀁 𑀮𑀪𑀦𑁆𑀢𑀺 𑀅𑀦𑁆𑀢𑀫𑀲𑁄 𑀫𑀓𑁆𑀓𑀝𑀓𑀲𑀼𑀢𑁆𑀢𑀫𑁆𑀧𑀺. 𑀭𑀢𑀦𑀸𑀯𑀼𑀢𑀲𑀼𑀢𑁆𑀢𑀁 𑀧𑀭𑀺𑀬𑁂𑀲𑀦𑁆𑀢𑁄 𑀫𑀦𑁆𑀤𑀁 𑀮𑀪𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀳𑁂𑀝𑁆𑀞𑀢𑁄 𑀯𑀸 𑀧𑀜𑁆𑀜𑀸 𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀫𑁆𑀧𑀬𑁄𑀕𑀁 𑀮𑀪𑀸𑀧𑀺𑀢𑀸 𑀯𑀺𑀲𑁆𑀲𑀝𑁆𑀞𑀢𑁆𑀢𑀸𑀯 𑀇𑀥 𑀦 𑀕𑀳𑀺𑀢𑀸𑀢𑀺 𑀯𑀤𑀦𑁆𑀢𑀺. 𑀬𑀁 𑀳𑀸𑀯𑀼𑀲𑁄, 𑀯𑁂𑀤𑁂𑀢𑀻𑀢𑀺 𑀬𑀁 𑀆𑀭𑀫𑁆𑀫𑀡𑀁 𑀯𑁂𑀤𑀦𑀸 𑀯𑁂𑀤𑁂𑀢𑀺, 𑀲𑀜𑁆𑀜𑀸𑀧𑀺 𑀢𑀤𑁂𑀯 𑀲𑀜𑁆𑀚𑀸𑀦𑀸𑀢𑀺. 𑀬𑀁 𑀲𑀜𑁆𑀚𑀸𑀦𑀸𑀢𑀻𑀢𑀺 𑀬𑀁 𑀆𑀭𑀫𑁆𑀫𑀡𑀁 𑀲𑀜𑁆𑀜𑀸 𑀲𑀜𑁆𑀚𑀸𑀦𑀸𑀢𑀺, 𑀯𑀺𑀜𑁆𑀜𑀸𑀡𑀫𑁆𑀧𑀺 𑀢𑀤𑁂𑀯 𑀯𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀲𑀜𑁆𑀚𑀸𑀦𑀸𑀢𑀺 𑀯𑀺𑀚𑀸𑀦𑀸𑀢𑀺 𑀧𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀉𑀧𑀲𑀕𑁆𑀕𑀫𑀢𑁆𑀢𑀫𑁂𑀯 𑀯𑀺𑀲𑁂𑀲𑁄. 𑀚𑀸𑀦𑀸𑀢𑀻𑀢𑀺 𑀧𑀤𑀁 𑀧𑀦 𑀅𑀯𑀺𑀲𑁂𑀲𑁄. 𑀢𑀲𑁆𑀲𑀸𑀧𑀺 𑀚𑀸𑀦𑀦𑀢𑁆𑀣𑁂 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀜𑁆𑀜𑀸 𑀳𑀺 𑀦𑀻𑀮𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀁 𑀲𑀜𑁆𑀚𑀸𑀦𑀦𑀫𑀢𑁆𑀢𑀫𑁂𑀯, 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀮𑀓𑁆𑀔𑀡𑀧𑀝𑀺𑀯𑁂𑀥𑀁 𑀧𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀯𑀺𑀜𑁆𑀜𑀸𑀡𑀁 𑀦𑀻𑀮𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀜𑁆𑀘𑁂𑀯 𑀲𑀜𑁆𑀚𑀸𑀦𑀸𑀢𑀺, 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀧𑀝𑀺𑀯𑁂𑀥𑀜𑁆𑀘 𑀧𑀸𑀧𑁂𑀢𑀺, 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀧𑀦 𑀫𑀕𑁆𑀕𑀧𑀸𑀢𑀼𑀪𑀸𑀯𑀁 𑀧𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀧𑀜𑁆𑀜𑀸 𑀦𑀻𑀮𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀫𑁆𑀧𑀺 𑀲𑀜𑁆𑀚𑀸𑀦𑀸𑀢𑀺, 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀮𑀓𑁆𑀔𑀡𑀧𑀝𑀺𑀯𑁂𑀥𑀫𑁆𑀧𑀺 𑀧𑀸𑀧𑁂𑀢𑀺, 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀫𑀕𑁆𑀕𑀧𑀸𑀢𑀼𑀪𑀸𑀯𑀁 𑀧𑀸𑀧𑁂𑀢𑀼𑀫𑁆𑀧𑀺 𑀲𑀓𑁆𑀓𑁄𑀢𑀺.

𑀬𑀣𑀸 𑀳𑀺 𑀳𑁂𑀭𑀜𑁆𑀜𑀺𑀓𑀨𑀮𑀓𑁂 𑀓𑀳𑀸𑀧𑀡𑀭𑀸𑀲𑀺𑀫𑁆𑀳𑀺 𑀓𑀢𑁂 𑀅𑀚𑀸𑀢𑀩𑀼𑀤𑁆𑀥𑀺 𑀤𑀸𑀭𑀓𑁄 𑀕𑀸𑀫𑀺𑀓𑀧𑀼𑀭𑀺𑀲𑁄 𑀫𑀳𑀸𑀳𑁂𑀭𑀜𑁆𑀜𑀺𑀓𑁄𑀢𑀺 𑀢𑀻𑀲𑀼 𑀚𑀦𑁂𑀲𑀼 𑀑𑀮𑁄𑀓𑁂𑀢𑁆𑀯𑀸 𑀞𑀺𑀢𑁂𑀲𑀼 𑀅𑀚𑀸𑀢𑀩𑀼𑀤𑁆𑀥𑀺 𑀤𑀸𑀭𑀓𑁄 𑀓𑀳𑀸𑀧𑀡𑀸𑀦𑀁 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀘𑀢𑀼𑀭𑀲𑁆𑀲𑀫𑀡𑁆𑀟𑀮𑀪𑀸𑀯𑀫𑁂𑀯 𑀚𑀸𑀦𑀸𑀢𑀺, 𑀇𑀤𑀁 𑀫𑀦𑀼𑀲𑁆𑀲𑀸𑀦𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀁 𑀭𑀢𑀦𑀲𑀫𑁆𑀫𑀢𑀦𑁆𑀢𑀺 𑀦 𑀚𑀸𑀦𑀸𑀢𑀺. 𑀕𑀸𑀫𑀺𑀓𑀧𑀼𑀭𑀺𑀲𑁄 𑀘𑀺𑀢𑁆𑀢𑀸𑀤𑀺𑀪𑀸𑀯𑀜𑁆𑀘𑁂𑀯 𑀚𑀸𑀦𑀸𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀭𑀢𑀦𑀲𑀫𑁆𑀫𑀢𑀪𑀸𑀯𑀜𑁆𑀘. ‘‘𑀅𑀬𑀁 𑀓𑀽𑀝𑁄 𑀅𑀬𑀁 𑀙𑁂𑀓𑁄 𑀅𑀬𑀁 𑀓𑀭𑀢𑁄 𑀅𑀬𑀁 𑀲𑀡𑁆𑀳𑁄’’𑀢𑀺 𑀧𑀦 𑀦 𑀚𑀸𑀦𑀸𑀢𑀺. 𑀫𑀳𑀸𑀳𑁂𑀭𑀜𑁆𑀜𑀺𑀓𑁄 𑀘𑀺𑀢𑁆𑀢𑀸𑀤𑀺𑀪𑀸𑀯𑀫𑁆𑀧𑀺 𑀭𑀢𑀦𑀲𑀫𑁆𑀫𑀢𑀪𑀸𑀯𑀫𑁆𑀧𑀺 𑀓𑀽𑀝𑀸𑀤𑀺𑀪𑀸𑀯𑀫𑁆𑀧𑀺 𑀚𑀸𑀦𑀸𑀢𑀺, 𑀚𑀸𑀦𑀦𑁆𑀢𑁄 𑀘 𑀧𑀦 𑀦𑀁 𑀭𑀽𑀧𑀁 𑀤𑀺𑀲𑁆𑀯𑀸𑀧𑀺 𑀚𑀸𑀦𑀸𑀢𑀺, 𑀆𑀓𑁄𑀝𑀺𑀢𑀲𑁆𑀲 𑀲𑀤𑁆𑀤𑀁 𑀲𑀼𑀢𑁆𑀯𑀸𑀧𑀺, 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸𑀧𑀺, 𑀭𑀲𑀁 𑀲𑀸𑀬𑀺𑀢𑁆𑀯𑀸𑀧𑀺, 𑀳𑀢𑁆𑀣𑁂𑀦 𑀕𑀭𑀼𑀓𑀮𑀳𑀼𑀓𑀪𑀸𑀯𑀁 𑀉𑀧𑀥𑀸𑀭𑁂𑀢𑁆𑀯𑀸𑀧𑀺 𑀅𑀲𑀼𑀓𑀕𑀸𑀫𑁂 𑀓𑀢𑁄𑀢𑀺𑀧𑀺 𑀚𑀸𑀦𑀸𑀢𑀺, 𑀅𑀲𑀼𑀓𑀦𑀺𑀕𑀫𑁂 𑀅𑀲𑀼𑀓𑀦𑀕𑀭𑁂 𑀅𑀲𑀼𑀓𑀧𑀩𑁆𑀩𑀢𑀘𑁆𑀙𑀸𑀬𑀸𑀬 𑀅𑀲𑀼𑀓𑀦𑀤𑀻𑀢𑀻𑀭𑁂 𑀓𑀢𑁄𑀢𑀺𑀧𑀺, 𑀅𑀲𑀼𑀓𑀸𑀘𑀭𑀺𑀬𑁂𑀦 𑀓𑀢𑁄𑀢𑀺𑀧𑀺 𑀚𑀸𑀦𑀸𑀢𑀺. 𑀏𑀯𑀫𑁂𑀯𑀁 𑀲𑀜𑁆𑀜𑀸 𑀅𑀚𑀸𑀢𑀩𑀼𑀤𑁆𑀥𑀺𑀤𑀸𑀭𑀓𑀲𑁆𑀲 𑀓𑀳𑀸𑀧𑀡𑀤𑀲𑁆𑀲𑀦𑀁 𑀯𑀺𑀬 𑀦𑀻𑀮𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀫𑀢𑁆𑀢𑀫𑁂𑀯 𑀲𑀜𑁆𑀚𑀸𑀦𑀸𑀢𑀺. 𑀯𑀺𑀜𑁆𑀜𑀸𑀡𑀁 𑀕𑀸𑀫𑀺𑀓𑀧𑀼𑀭𑀺𑀲𑀲𑁆𑀲 𑀓𑀳𑀸𑀧𑀡𑀤𑀲𑁆𑀲𑀦𑀁 𑀯𑀺𑀬 𑀦𑀻𑀮𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀫𑁆𑀧𑀺 𑀲𑀜𑁆𑀚𑀸𑀦𑀸𑀢𑀺, 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀮𑀓𑁆𑀔𑀡𑀧𑀝𑀺𑀯𑁂𑀥𑀫𑁆𑀧𑀺 𑀧𑀸𑀧𑁂𑀢𑀺. 𑀧𑀜𑁆𑀜𑀸 𑀫𑀳𑀸𑀳𑁂𑀭𑀜𑁆𑀜𑀺𑀓𑀲𑁆𑀲 𑀓𑀳𑀸𑀧𑀡𑀤𑀲𑁆𑀲𑀦𑀁 𑀯𑀺𑀬 𑀦𑀻𑀮𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀫𑁆𑀧𑀺 𑀲𑀜𑁆𑀚𑀸𑀦𑀸𑀢𑀺, 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀮𑀓𑁆𑀔𑀡𑀧𑀝𑀺𑀯𑁂𑀥𑀫𑁆𑀧𑀺 𑀧𑀸𑀧𑁂𑀢𑀺, 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀫𑀕𑁆𑀕𑀧𑀸𑀢𑀼𑀪𑀸𑀯𑀫𑁆𑀧𑀺 𑀧𑀸𑀧𑁂𑀢𑀺. 𑀲𑁄 𑀧𑀦 𑀦𑁂𑀲𑀁 𑀯𑀺𑀲𑁂𑀲𑁄 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑁄.

𑀢𑁂𑀦𑀸𑀳 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑁋 ‘‘𑀤𑀼𑀓𑁆𑀓𑀭𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀓𑀢𑀦𑁆𑀢𑀺. 𑀓𑀺𑀁, 𑀪𑀦𑁆𑀢𑁂, 𑀦𑀸𑀕𑀲𑁂𑀦 𑀪𑀕𑀯𑀢𑀸 𑀤𑀼𑀓𑁆𑀓𑀭𑀁 𑀓𑀢𑀦𑁆𑀢𑀺? 𑀤𑀼𑀓𑁆𑀓𑀭𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀓𑀢𑀁, 𑀇𑀫𑁂𑀲𑀁 𑀅𑀭𑀽𑀧𑀻𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀏𑀓𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀫𑀸𑀦𑀸𑀦𑀁 𑀯𑀯𑀢𑁆𑀣𑀸𑀦𑀁 𑀅𑀓𑁆𑀔𑀸𑀢𑀁, 𑀅𑀬𑀁 𑀨𑀲𑁆𑀲𑁄, 𑀅𑀬𑀁 𑀯𑁂𑀤𑀦𑀸, 𑀅𑀬𑀁 𑀲𑀜𑁆𑀜𑀸, 𑀅𑀬𑀁 𑀘𑁂𑀢𑀦𑀸, 𑀇𑀤𑀁 𑀘𑀺𑀢𑁆𑀢’’𑀦𑁆𑀢𑀺 (𑀫𑀺. 𑀧. 𑁨.𑁭.𑁧𑁬). 𑀬𑀣𑀸 𑀳𑀺 𑀢𑀺𑀮𑀢𑁂𑀮𑀁, 𑀲𑀸𑀲𑀧𑀢𑁂𑀮𑀁, 𑀫𑀥𑀼𑀓𑀢𑁂𑀮𑀁, 𑀏𑀭𑀡𑁆𑀟𑀓𑀢𑁂𑀮𑀁, 𑀯𑀲𑀸𑀢𑁂𑀮𑀦𑁆𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀢𑁂𑀮𑀸𑀦𑀺 𑀏𑀓𑀘𑀸𑀝𑀺𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀺𑀯𑀲𑀁 𑀬𑀫𑀓𑀫𑀦𑁆𑀣𑁂𑀳𑀺 𑀫𑀦𑁆𑀣𑁂𑀢𑁆𑀯𑀸 𑀢𑀢𑁄 𑀇𑀤𑀁 𑀢𑀺𑀮𑀢𑁂𑀮𑀁, 𑀇𑀤𑀁 𑀲𑀸𑀲𑀧𑀢𑁂𑀮𑀦𑁆𑀢𑀺 𑀏𑀓𑁂𑀓𑀲𑁆𑀲 𑀧𑀸𑀝𑀺𑀬𑁂𑀓𑁆𑀓𑀁 𑀉𑀤𑁆𑀥𑀭𑀡𑀁 𑀦𑀸𑀫 𑀤𑀼𑀓𑁆𑀓𑀭𑀁, 𑀇𑀤𑀁 𑀢𑀢𑁄 𑀤𑀼𑀓𑁆𑀓𑀭𑀢𑀭𑀁. 𑀪𑀕𑀯𑀸 𑀧𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀥𑀫𑁆𑀫𑀺𑀲𑁆𑀲𑀭𑁄 𑀥𑀫𑁆𑀫𑀭𑀸𑀚𑀸 𑀇𑀫𑁂𑀲𑀁 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀏𑀓𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀫𑀸𑀦𑀸𑀦𑀁 𑀯𑀯𑀢𑁆𑀣𑀸𑀦𑀁 𑀅𑀓𑁆𑀔𑀸𑀲𑀺. 𑀧𑀜𑁆𑀘𑀦𑁆𑀦𑀁 𑀫𑀳𑀸𑀦𑀤𑀻𑀦𑀁 𑀲𑀫𑀼𑀤𑁆𑀤𑀁 𑀧𑀯𑀺𑀝𑁆𑀞𑀝𑁆𑀞𑀸𑀦𑁂, ‘‘𑀇𑀤𑀁 𑀕𑀗𑁆𑀕𑀸𑀬 𑀉𑀤𑀓𑀁, 𑀇𑀤𑀁 𑀬𑀫𑀼𑀦𑀸𑀬𑀸’’𑀢𑀺 𑀏𑀯𑀁 𑀧𑀸𑀝𑀺𑀬𑁂𑀓𑁆𑀓𑀁 𑀉𑀤𑀓𑀉𑀤𑁆𑀥𑀭𑀡𑁂𑀦𑀸𑀧𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁪𑁫𑁧. 𑀦𑀺𑀲𑁆𑀲𑀝𑁆𑀞𑁂𑀦𑀸𑀢𑀺 𑀦𑀺𑀲𑁆𑀲𑀝𑁂𑀦 𑀧𑀭𑀺𑀘𑁆𑀘𑀢𑁆𑀢𑁂𑀦 𑀯𑀸. 𑀢𑀢𑁆𑀣 𑀦𑀺𑀲𑁆𑀲𑀝𑁂𑀦𑀸𑀢𑀺 𑀅𑀢𑁆𑀣𑁂 𑀲𑀢𑀺 𑀧𑀜𑁆𑀘𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀻𑀢𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. 𑀧𑀭𑀺𑀘𑁆𑀘𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁂 𑀲𑀢𑀺 𑀓𑀭𑀡𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀧𑀜𑁆𑀘𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀦𑀺𑀲𑁆𑀲𑀭𑀺𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑁂𑀦 𑀧𑀜𑁆𑀘𑀳𑀺 𑀯𑀸 𑀇𑀦𑁆𑀤𑁆𑀭𑀺𑀬𑁂𑀳𑀺 𑀢𑀲𑁆𑀲 𑀯𑀢𑁆𑀣𑀼𑀪𑀸𑀯𑀁 𑀅𑀦𑀼𑀧𑀕𑀫𑀦𑀢𑀸𑀬 𑀧𑀭𑀺𑀘𑁆𑀘𑀢𑁆𑀢𑁂𑀦𑀸𑀢𑀺. 𑀧𑀭𑀺𑀲𑀼𑀤𑁆𑀥𑁂𑀦𑀸𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑁂𑀦. 𑀫𑀦𑁄𑀯𑀺𑀜𑁆𑀜𑀸𑀡𑁂𑀦𑀸𑀢𑀺 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑁂𑀦. 𑀓𑀺𑀁 𑀦𑁂𑀬𑁆𑀬𑀦𑁆𑀢𑀺 𑀓𑀺𑀁 𑀚𑀸𑀦𑀺𑀢𑀩𑁆𑀩𑀁. ‘‘𑀬𑀁𑀓𑀺𑀜𑁆𑀘𑀺 𑀦𑁂𑀬𑁆𑀬𑀁 𑀦𑀸𑀫 𑀅𑀢𑁆𑀣𑀺 𑀥𑀫𑁆𑀫’’𑀦𑁆𑀢𑀺𑀆𑀤𑀻𑀲𑀼 (𑀫𑀳𑀸𑀦𑀺. 𑁬𑁯) 𑀳𑀺 𑀚𑀸𑀦𑀺𑀢𑀩𑁆𑀩𑀁 𑀦𑁂𑀬𑁆𑀬𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀦𑁂𑀬𑁆𑀬𑀦𑁆𑀢𑀺 𑀓𑀣𑀁 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑁂𑀦 𑀅𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺 𑀦𑁂𑀬𑁆𑀬𑀸𑀢𑀺? 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀞𑀺𑀢𑁂𑀦 𑀅𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺. 𑀏𑀢𑁆𑀣 𑀞𑀺𑀢𑀲𑁆𑀲 𑀳𑀺 𑀲𑀸 𑀇𑀚𑁆𑀛𑀢𑀺. 𑀢𑀲𑁆𑀫𑀸 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀦𑁂𑀬𑁆𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀣 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺? 𑀧𑀸𑀝𑀺𑀬𑁂𑀓𑁆𑀓𑀁 𑀅𑀪𑀺𑀦𑀺𑀯𑁂𑀲𑀸𑀪𑀸𑀯𑀢𑁄. 𑀢𑀢𑁆𑀣 𑀳𑀺 𑀓𑀮𑀸𑀧𑀢𑁄 𑀦𑀬𑀢𑁄 𑀲𑀫𑁆𑀫𑀲𑀦𑀁 𑀮𑀩𑁆𑀪𑀢𑀺, 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀤𑀺𑀲𑀲𑁆𑀲𑀸𑀧𑀺 𑀳𑀺 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀬𑁂𑀓𑁆𑀓𑀁 𑀅𑀪𑀺𑀦𑀺𑀯𑁂𑀲𑁄 𑀦 𑀚𑀸𑀬𑀢𑀺. 𑀢𑀲𑁆𑀫𑀸 𑀣𑁂𑀭𑁄𑀧𑀺, ‘‘𑀏𑀯𑀁 𑀓𑀺𑀭𑀫𑁂 𑀥𑀫𑁆𑀫𑀸 𑀅𑀳𑀼𑀢𑁆𑀯𑀸 𑀲𑀫𑁆𑀪𑁄𑀦𑁆𑀢𑀺, 𑀳𑀼𑀢𑁆𑀯𑀸 𑀧𑀝𑀺𑀯𑁂𑀦𑁆𑀢𑀻’’𑀢𑀺 (𑀫. 𑀦𑀺. 𑁩.𑁯𑁪) 𑀓𑀮𑀸𑀧𑀢𑁄 𑀦𑀬𑀢𑁄 𑀲𑀫𑁆𑀫𑀲𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀻𑀢𑀺. 𑀪𑀕𑀯𑀸 𑀧𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀳𑀢𑁆𑀣𑀕𑀢𑀢𑁆𑀢𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀫𑁆𑀧𑀺 𑀧𑀭𑁄𑀧𑀜𑁆𑀜𑀸𑀲 𑀥𑀫𑁆𑀫𑁂 𑀧𑀸𑀝𑀺𑀬𑁂𑀓𑁆𑀓𑀁 𑀅𑀁𑀕𑀼𑀤𑁆𑀥𑀸𑀭𑁂𑀦𑁂𑀯 𑀉𑀤𑁆𑀥𑀭𑀺𑀢𑁆𑀯𑀸, ‘‘𑀬𑀸𑀯𑀢𑀸 𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀬𑁄, 𑀢𑀸𑀯𑀢𑀸 𑀅𑀜𑁆𑀜𑀸𑀧𑀝𑀺𑀯𑁂𑀥𑁄’’𑀢𑀺 𑀆𑀳.

𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀧𑀚𑀸𑀦𑀸𑀢𑀻𑀢𑀺 𑀤𑀲𑁆𑀲𑀦𑀧𑀭𑀺𑀡𑀸𑀬𑀓𑀝𑁆𑀞𑁂𑀦 𑀘𑀓𑁆𑀔𑀼𑀪𑀽𑀢𑀸𑀬 𑀧𑀜𑁆𑀜𑀸𑀬 𑀧𑀚𑀸𑀦𑀸𑀢𑀺. 𑀢𑀢𑁆𑀣 𑀤𑁆𑀯𑁂 𑀧𑀜𑁆𑀜𑀸 𑀲𑀫𑀸𑀥𑀺𑀧𑀜𑁆𑀜𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀘. 𑀲𑀫𑀸𑀥𑀺𑀧𑀜𑁆𑀜𑀸𑀬 𑀓𑀺𑀘𑁆𑀘𑀢𑁄 𑀅𑀲𑀫𑁆𑀫𑁄𑀳𑀢𑁄 𑀘 𑀧𑀚𑀸𑀦𑀸𑀢𑀺. 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀮𑀓𑁆𑀔𑀡𑀧𑀝𑀺𑀯𑁂𑀥𑁂𑀦 𑀆𑀭𑀫𑁆𑀫𑀡𑀢𑁄 𑀚𑀸𑀦𑀦𑀁 𑀓𑀣𑀺𑀢𑀁. 𑀓𑀺𑀫𑀢𑁆𑀣𑀺𑀬𑀸𑀢𑀺 𑀓𑁄 𑀏𑀢𑀺𑀲𑁆𑀲𑀸 𑀅𑀢𑁆𑀣𑁄. 𑀅𑀪𑀺𑀜𑁆𑀜𑀢𑁆𑀣𑀸𑀢𑀺𑀆𑀤𑀻𑀲𑀼 𑀅𑀪𑀺𑀜𑁆𑀜𑁂𑀬𑁆𑀬𑁂 𑀥𑀫𑁆𑀫𑁂 𑀅𑀪𑀺𑀚𑀸𑀦𑀸𑀢𑀻𑀢𑀺 𑀅𑀪𑀺𑀜𑁆𑀜𑀢𑁆𑀣𑀸. 𑀧𑀭𑀺𑀜𑁆𑀜𑁂𑀬𑁆𑀬𑁂 𑀥𑀫𑁆𑀫𑁂 𑀧𑀭𑀺𑀚𑀸𑀦𑀸𑀢𑀻𑀢𑀺 𑀧𑀭𑀺𑀜𑁆𑀜𑀢𑁆𑀣𑀸. 𑀧𑀳𑀸𑀢𑀩𑁆𑀩𑁂 𑀥𑀫𑁆𑀫𑁂 𑀧𑀚𑀳𑀢𑀻𑀢𑀺 𑀧𑀳𑀸𑀦𑀢𑁆𑀣𑀸. 𑀲𑀸 𑀧𑀦𑁂𑀲𑀸 𑀮𑁄𑀓𑀺𑀬𑀸𑀧𑀺 𑀅𑀪𑀺𑀜𑁆𑀜𑀢𑁆𑀣𑀸 𑀘 𑀧𑀭𑀺𑀜𑁆𑀜𑀢𑁆𑀣𑀸 𑀘 𑀯𑀺𑀓𑁆𑀔𑀫𑁆𑀪𑀦𑀢𑁄 𑀧𑀳𑀸𑀦𑀢𑁆𑀣𑀸. 𑀮𑁄𑀓𑀼𑀢𑁆𑀢𑀭𑀸𑀧𑀺 𑀅𑀪𑀺𑀜𑁆𑀜𑀢𑁆𑀣𑀸 𑀘 𑀧𑀭𑀺𑀜𑁆𑀜𑀢𑁆𑀣𑀸 𑀘 𑀲𑀫𑀼𑀘𑁆𑀙𑁂𑀤𑀢𑁄 𑀧𑀳𑀸𑀦𑀢𑁆𑀣𑀸. 𑀢𑀢𑁆𑀣 𑀮𑁄𑀓𑀺𑀬𑀸 𑀓𑀺𑀘𑁆𑀘𑀢𑁄 𑀅𑀲𑀫𑁆𑀫𑁄𑀳𑀢𑁄 𑀘 𑀧𑀚𑀸𑀦𑀸𑀢𑀺, 𑀮𑁄𑀓𑀼𑀢𑁆𑀢𑀭𑀸 𑀅𑀲𑀫𑁆𑀫𑁄𑀳𑀢𑁄.

𑁪𑁫𑁨. 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀉𑀧𑁆𑀧𑀸𑀤𑀸𑀬𑀸𑀢𑀺 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀘 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀘. 𑀧𑀭𑀢𑁄 𑀘 𑀖𑁄𑀲𑁄𑀢𑀺 𑀲𑀧𑁆𑀧𑀸𑀬𑀥𑀫𑁆𑀫𑀲𑁆𑀲𑀯𑀦𑀁. 𑀬𑁄𑀦𑀺𑀲𑁄 𑀘 𑀫𑀦𑀲𑀺𑀓𑀸𑀭𑁄𑀢𑀺 𑀅𑀢𑁆𑀢𑀦𑁄 𑀉𑀧𑀸𑀬𑀫𑀦𑀲𑀺𑀓𑀸𑀭𑁄. 𑀢𑀢𑁆𑀣 𑀲𑀸𑀯𑀓𑁂𑀲𑀼 𑀅𑀧𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀤𑁆𑀯𑁂 𑀧𑀘𑁆𑀘𑀬𑀸 𑀮𑀤𑁆𑀥𑀼𑀁 𑀯𑀝𑁆𑀝𑀦𑁆𑀢𑀺𑀬𑁂𑀯. 𑀣𑁂𑀭𑁄 𑀳𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀁 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸𑀧𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀅𑀡𑀼𑀫𑀢𑁆𑀢𑀫𑁆𑀧𑀺 𑀓𑀺𑀮𑁂𑀲𑀁 𑀧𑀚𑀳𑀺𑀢𑀼𑀁 𑀦𑀸𑀲𑀓𑁆𑀔𑀺. ‘‘𑀬𑁂 𑀥𑀫𑁆𑀫𑀸 𑀳𑁂𑀢𑀼𑀧𑁆𑀧𑀪𑀯𑀸’’𑀢𑀺 (𑀫𑀳𑀸𑀯. 𑁬𑁦) 𑀅𑀲𑁆𑀲𑀚𑀺𑀢𑁆𑀣𑁂𑀭𑀢𑁄 𑀇𑀫𑀁 𑀕𑀸𑀣𑀁 𑀲𑀼𑀢𑁆𑀯𑀸𑀯𑀲𑁆𑀲 𑀧𑀝𑀺𑀯𑁂𑀥𑁄 𑀚𑀸𑀢𑁄. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀦 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀜𑁆𑀘 𑀧𑀭𑀢𑁄𑀖𑁄𑀲𑀓𑀫𑁆𑀫𑀁 𑀦𑀢𑁆𑀣𑀺, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀫𑀺𑀁𑀬𑁂𑀯 𑀞𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺.

𑀅𑀦𑀼𑀕𑁆𑀕𑀳𑀺𑀢𑀸𑀢𑀺 𑀮𑀤𑁆𑀥𑀽𑀧𑀓𑀸𑀭𑀸. 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺. 𑀨𑀮𑀓𑁆𑀔𑀡𑁂 𑀦𑀺𑀩𑁆𑀩𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀨𑀮𑀁 𑀅𑀲𑁆𑀲𑀸𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀸. 𑀢𑀤𑁂𑀯 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀲𑀗𑁆𑀔𑀸𑀢𑀁 𑀨𑀮𑀁 𑀆𑀦𑀺𑀲𑀁𑀲𑁄 𑀅𑀲𑁆𑀲𑀸𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀨𑀮𑀸𑀦𑀺𑀲𑀁𑀲𑀸. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀘𑀢𑀼𑀢𑁆𑀣𑀨𑀮𑀧𑀜𑁆𑀜𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀦𑀸𑀫, 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀻𑀮𑀸𑀦𑀼𑀕𑁆𑀕𑀳𑀺𑀢𑀸𑀢𑀺𑀆𑀤𑀻𑀲𑀼 𑀲𑀻𑀮𑀦𑁆𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀲𑀼𑀢𑀦𑁆𑀢𑀺 𑀲𑀧𑁆𑀧𑀸𑀬𑀥𑀫𑁆𑀫𑀲𑁆𑀲𑀯𑀦𑀁. 𑀲𑀸𑀓𑀘𑁆𑀙𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑁂 𑀔𑀮𑀦𑀧𑀓𑁆𑀔𑀮𑀦𑀘𑁆𑀙𑁂𑀤𑀦𑀓𑀣𑀸. 𑀲𑀫𑀣𑁄𑀢𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀺𑀓𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄. 𑀯𑀺𑀧𑀲𑁆𑀲𑀦𑀸𑀢𑀺 𑀲𑀢𑁆𑀢𑀯𑀺𑀥𑀸 𑀅𑀦𑀼𑀧𑀲𑁆𑀲𑀦𑀸. 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀜𑁆𑀳𑀺 𑀧𑀽𑀭𑁂𑀦𑁆𑀢𑀲𑁆𑀲, 𑀲𑀧𑁆𑀧𑀸𑀬𑀥𑀫𑁆𑀫𑀲𑁆𑀲𑀯𑀦𑀁 𑀲𑀼𑀡𑀦𑁆𑀢𑀲𑁆𑀲, 𑀓𑀫𑁆𑀫𑀝𑁆𑀞𑀸𑀦𑁂 𑀔𑀮𑀦𑀧𑀓𑁆𑀔𑀮𑀦𑀁 𑀙𑀺𑀦𑁆𑀤𑀦𑁆𑀢𑀲𑁆𑀲, 𑀯𑀺𑀧𑀲𑁆𑀲𑀦𑀸𑀧𑀸𑀤𑀺𑀓𑀸𑀲𑀼 𑀅𑀝𑁆𑀞𑀲𑀫𑀸𑀧𑀢𑁆𑀢𑀻𑀲𑀼 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲, 𑀲𑀢𑁆𑀢𑀯𑀺𑀥𑀁 𑀅𑀦𑀼𑀧𑀲𑁆𑀲𑀦𑀁 𑀪𑀸𑀯𑁂𑀦𑁆𑀢𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀨𑀮𑀁 𑀤𑁂𑀢𑀺.

𑀬𑀣𑀸 𑀳𑀺 𑀫𑀥𑀼𑀭𑀁 𑀅𑀫𑁆𑀩𑀧𑀓𑁆𑀓𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀅𑀫𑁆𑀩𑀧𑁄𑀢𑀓𑀲𑁆𑀲 𑀲𑀫𑀦𑁆𑀢𑀸 𑀉𑀤𑀓𑀓𑁄𑀝𑁆𑀞𑀓𑀁 𑀣𑀺𑀭𑀁 𑀓𑀢𑁆𑀯𑀸 𑀩𑀦𑁆𑀥𑀢𑀺. 𑀖𑀝𑀁 𑀕𑀳𑁂𑀢𑁆𑀯𑀸 𑀓𑀸𑀮𑁂𑀦 𑀓𑀸𑀮𑀁 𑀉𑀤𑀓𑀁 𑀆𑀲𑀺𑀜𑁆𑀘𑀢𑀺. 𑀉𑀤𑀓𑀲𑁆𑀲 𑀅𑀦𑀺𑀓𑁆𑀔𑀫𑀦𑀢𑁆𑀣𑀁 𑀫𑀭𑀺𑀬𑀸𑀤𑀁 𑀣𑀺𑀭𑀁 𑀓𑀭𑁄𑀢𑀺. 𑀬𑀸 𑀳𑁄𑀢𑀺 𑀲𑀫𑀻𑀧𑁂 𑀯𑀮𑁆𑀮𑀺 𑀯𑀸 𑀲𑀼𑀓𑁆𑀔𑀤𑀡𑁆𑀟𑀓𑁄 𑀯𑀸 𑀓𑀺𑀧𑀺𑀮𑁆𑀮𑀺𑀓𑀧𑀼𑀝𑁄 𑀯𑀸 𑀫𑀓𑁆𑀓𑀝𑀓𑀚𑀸𑀮𑀁 𑀯𑀸, 𑀢𑀁 𑀅𑀧𑀦𑁂𑀢𑀺. 𑀔𑀡𑀺𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀓𑀸𑀮𑁂𑀦 𑀓𑀸𑀮𑀁 𑀫𑀽𑀮𑀸𑀦𑀺 𑀧𑀭𑀺𑀔𑀡𑀢𑀺. 𑀏𑀯𑀫𑀲𑁆𑀲 𑀅𑀧𑁆𑀧𑀫𑀢𑁆𑀢𑀲𑁆𑀲 𑀇𑀫𑀸𑀦𑀺 𑀧𑀜𑁆𑀘 𑀓𑀸𑀭𑀡𑀸𑀦𑀺 𑀓𑀭𑁄𑀢𑁄 𑀲𑁄 𑀅𑀫𑁆𑀩𑁄 𑀯𑀟𑁆𑀠𑀺𑀢𑁆𑀯𑀸 𑀨𑀮𑀁 𑀤𑁂𑀢𑀺. 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀭𑀼𑀓𑁆𑀔𑀲𑁆𑀲 𑀲𑀫𑀦𑁆𑀢𑀢𑁄 𑀓𑁄𑀝𑁆𑀞𑀓𑀩𑀦𑁆𑀥𑀦𑀁 𑀯𑀺𑀬 𑀳𑀺 𑀲𑀻𑀮𑀁 𑀤𑀝𑁆𑀞𑀩𑁆𑀩𑀁, 𑀓𑀸𑀮𑁂𑀦 𑀓𑀸𑀮𑀁 𑀉𑀤𑀓𑀲𑀺𑀜𑁆𑀘𑀦𑀁 𑀯𑀺𑀬 𑀥𑀫𑁆𑀫𑀲𑁆𑀲𑀯𑀦𑀁, 𑀫𑀭𑀺𑀬𑀸𑀤𑀸𑀬 𑀣𑀺𑀭𑀪𑀸𑀯𑀓𑀭𑀡𑀁 𑀯𑀺𑀬 𑀲𑀫𑀣𑁄, 𑀲𑀫𑀻𑀧𑁂 𑀯𑀮𑁆𑀮𑀺𑀆𑀤𑀻𑀦𑀁 𑀳𑀭𑀡𑀁 𑀯𑀺𑀬 𑀓𑀫𑁆𑀫𑀝𑁆𑀞𑀸𑀦𑁂 𑀔𑀮𑀦𑀧𑀓𑁆𑀔𑀮𑀦𑀘𑁆𑀙𑁂𑀤𑀦𑀁, 𑀓𑀸𑀮𑁂𑀦 𑀓𑀸𑀮𑀁 𑀔𑀡𑀺𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀫𑀽𑀮𑀔𑀡𑀦𑀁 𑀯𑀺𑀬 𑀲𑀢𑁆𑀢𑀦𑁆𑀦𑀁 𑀅𑀦𑀼𑀧𑀲𑁆𑀲𑀦𑀸𑀦𑀁 𑀪𑀸𑀯𑀦𑀸. 𑀢𑁂𑀳𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀅𑀦𑀼𑀕𑁆𑀕𑀳𑀺𑀢𑀲𑁆𑀲 𑀅𑀫𑁆𑀩𑀭𑀼𑀓𑁆𑀔𑀲𑁆𑀲 𑀫𑀥𑀼𑀭𑀨𑀮𑀤𑀸𑀦𑀓𑀸𑀮𑁄 𑀯𑀺𑀬 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀅𑀦𑀼𑀕𑁆𑀕𑀳𑀺𑀢𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀅𑀭𑀳𑀢𑁆𑀢𑀨𑀮𑀤𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑁪𑁫𑁩. 𑀓𑀢𑀺 𑀧𑀦𑀸𑀯𑀼𑀲𑁄, 𑀪𑀯𑀸𑀢𑀺 𑀇𑀥 𑀓𑀺𑀁 𑀧𑀼𑀘𑁆𑀙𑀢𑀺? 𑀫𑀽𑀮𑀫𑁂𑀯 𑀕𑀢𑁄 𑀅𑀦𑀼𑀲𑀦𑁆𑀥𑀺, 𑀤𑀼𑀧𑁆𑀧𑀜𑁆𑀜𑁄 𑀬𑁂𑀳𑀺 𑀪𑀯𑁂𑀳𑀺 𑀦 𑀉𑀝𑁆𑀞𑀸𑀢𑀺, 𑀢𑁂 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀧𑀼𑀘𑁆𑀙𑀢𑀺. 𑀢𑀢𑁆𑀣 𑀓𑀸𑀫𑀪𑀯𑁄𑀢𑀺 𑀓𑀸𑀫𑀪𑀯𑀽𑀧𑀕𑀁 𑀓𑀫𑁆𑀫𑀁 𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀸𑀧𑀻𑀢𑀺 𑀉𑀪𑀬𑀫𑁂𑀓𑀢𑁄 𑀓𑀢𑁆𑀯𑀸 𑀓𑀸𑀫𑀪𑀯𑁄𑀢𑀺 𑀆𑀳. 𑀭𑀽𑀧𑀸𑀭𑀽𑀧𑀪𑀯𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀆𑀬𑀢𑀺𑀦𑁆𑀢𑀺 𑀅𑀦𑀸𑀕𑀢𑁂. 𑀧𑀼𑀦𑀩𑁆𑀪𑀯𑀲𑁆𑀲 𑀅𑀪𑀺𑀦𑀺𑀩𑁆𑀩𑀢𑁆𑀢𑀻𑀢𑀺 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺. 𑀇𑀥 𑀯𑀝𑁆𑀝𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀧𑀼𑀘𑁆𑀙𑀢𑀺. 𑀢𑀢𑁆𑀭𑀸𑀢𑀢𑁆𑀭𑀸𑀪𑀺𑀦𑀦𑁆𑀤𑀦𑀸𑀢𑀺 𑀭𑀽𑀧𑀸𑀪𑀺𑀦𑀦𑁆𑀤𑀦𑀸 𑀲𑀤𑁆𑀤𑀸𑀪𑀺𑀦𑀦𑁆𑀤𑀦𑀸𑀢𑀺 𑀏𑀯𑀁 𑀢𑀳𑀺𑀁 𑀢𑀳𑀺𑀁 𑀅𑀪𑀺𑀦𑀦𑁆𑀤𑀦𑀸, 𑀓𑀭𑀡𑀯𑀘𑀦𑁂 𑀘𑁂𑀢𑀁 𑀧𑀘𑁆𑀘𑀢𑁆𑀢𑀁. 𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀦𑀸𑀬 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀢𑀸𑀯𑀢𑀸 𑀳𑀺 𑀕𑀫𑀦𑀁 𑀳𑁄𑀢𑀺, 𑀆𑀕𑀫𑀦𑀁 𑀳𑁄𑀢𑀺, 𑀕𑀫𑀦𑀸𑀕𑀫𑀦𑀁 𑀳𑁄𑀢𑀺, 𑀯𑀝𑁆𑀝𑀁 𑀯𑀢𑁆𑀢𑀢𑀻𑀢𑀺 𑀯𑀝𑁆𑀝𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀇𑀤𑀸𑀦𑀺 𑀯𑀺𑀯𑀝𑁆𑀝𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀓𑀣𑀁 𑀧𑀦𑀸𑀯𑀼𑀲𑁄’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸𑀢𑀺 𑀅𑀯𑀺𑀚𑁆𑀚𑀸𑀬 𑀔𑀬𑀦𑀺𑀭𑁄𑀥𑁂𑀦. 𑀯𑀺𑀚𑁆𑀚𑀼𑀧𑁆𑀧𑀸𑀤𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀯𑀺𑀚𑁆𑀚𑀸𑀬 𑀉𑀧𑁆𑀧𑀸𑀤𑁂𑀦. 𑀓𑀺𑀁 𑀅𑀯𑀺𑀚𑁆𑀚𑀸 𑀧𑀼𑀩𑁆𑀩𑁂 𑀦𑀺𑀭𑀼𑀤𑁆𑀥𑀸, 𑀅𑀣 𑀯𑀺𑀚𑁆𑀚𑀸 𑀧𑀼𑀩𑁆𑀩𑁂 𑀉𑀧𑁆𑀧𑀦𑁆𑀦𑀸𑀢𑀺? 𑀉𑀪𑀬𑀫𑁂𑀢𑀁 𑀦 𑀯𑀢𑁆𑀢𑀩𑁆𑀩𑀁. 𑀧𑀤𑀻𑀧𑀼𑀚𑁆𑀚𑀮𑀦𑁂𑀦 𑀅𑀦𑁆𑀥𑀓𑀸𑀭𑀯𑀺𑀕𑀫𑁄 𑀯𑀺𑀬 𑀯𑀺𑀚𑁆𑀚𑀼𑀧𑁆𑀧𑀸𑀤𑁂𑀦 𑀅𑀯𑀺𑀚𑁆𑀚𑀸 𑀦𑀺𑀭𑀼𑀤𑁆𑀥𑀸𑀯 𑀳𑁄𑀢𑀺. 𑀢𑀡𑁆𑀳𑀸𑀦𑀺𑀭𑁄𑀥𑀸𑀢𑀺 𑀢𑀡𑁆𑀳𑀸𑀬 𑀔𑀬𑀦𑀺𑀭𑁄𑀥𑁂𑀦. 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀦 𑀳𑁄𑀢𑀻𑀢𑀺 𑀏𑀯𑀁 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀲𑁆𑀲 𑀅𑀪𑀺𑀦𑀺𑀩𑁆𑀩𑀢𑁆𑀢𑀺 𑀦 𑀳𑁄𑀢𑀺, 𑀕𑀫𑀦𑀁 𑀆𑀕𑀫𑀦𑀁 𑀕𑀫𑀦𑀸𑀕𑀫𑀦𑀁 𑀉𑀧𑀘𑁆𑀙𑀺𑀚𑁆𑀚𑀢𑀺, 𑀯𑀝𑁆𑀝𑀁 𑀦 𑀯𑀢𑁆𑀢𑀢𑀻𑀢𑀺 𑀯𑀺𑀯𑀝𑁆𑀝𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀲𑀺.

𑁪𑁫𑁪. 𑀓𑀢𑀫𑀁 𑀧𑀦𑀸𑀯𑀼𑀲𑁄𑀢𑀺 𑀇𑀥 𑀓𑀺𑀁 𑀧𑀼𑀘𑁆𑀙𑀢𑀺? 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀪𑀺𑀓𑁆𑀔𑀼 𑀓𑀸𑀮𑁂𑀦 𑀓𑀸𑀮𑀁 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀢𑀺. 𑀢𑀲𑁆𑀲 𑀦𑀺𑀭𑁄𑀥𑀧𑀸𑀤𑀓𑀁 𑀧𑀞𑀫𑀚𑁆𑀛𑀸𑀦𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀧𑀼𑀘𑁆𑀙𑀢𑀺. 𑀧𑀞𑀫𑀁 𑀛𑀸𑀦𑀦𑁆𑀢𑀺 𑀇𑀥 𑀓𑀺𑀁 𑀧𑀼𑀘𑁆𑀙𑀢𑀺? 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀦𑀓𑁂𑀦 𑀪𑀺𑀓𑁆𑀔𑀼𑀦𑀸 𑀅𑀗𑁆𑀕𑀯𑀯𑀢𑁆𑀣𑀸𑀦𑀁 𑀓𑁄𑀝𑁆𑀞𑀸𑀲𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀚𑀸𑀦𑀺𑀢𑀩𑁆𑀩𑁄, 𑀇𑀤𑀁 𑀛𑀸𑀦𑀁 𑀧𑀜𑁆𑀘𑀗𑁆𑀕𑀺𑀓𑀁 𑀘𑀢𑀼𑀭𑀗𑁆𑀕𑀺𑀓𑀁 𑀢𑀺𑀯𑀗𑁆𑀕𑀺𑀓𑀁 𑀤𑀼𑀯𑀗𑁆𑀕𑀺𑀓𑀦𑁆𑀢𑀺 𑀅𑀗𑁆𑀕𑀯𑀯𑀢𑁆𑀣𑀸𑀦𑀁 𑀓𑁄𑀝𑁆𑀞𑀸𑀲𑀧𑀭𑀺𑀘𑁆𑀙𑁂𑀤𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀧𑀼𑀘𑁆𑀙𑀢𑀺. 𑀯𑀺𑀢𑀓𑁆𑀓𑁄𑀢𑀺𑀆𑀤𑀻𑀲𑀼 𑀧𑀦 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄 𑀯𑀺𑀢𑀓𑁆𑀓𑁄, 𑀅𑀦𑀼𑀫𑀚𑁆𑀚𑀦𑀮𑀓𑁆𑀔𑀡𑁄 𑀯𑀺𑀘𑀸𑀭𑁄, 𑀨𑀭𑀡𑀮𑀓𑁆𑀔𑀡𑀸 𑀧𑀻𑀢𑀺, 𑀲𑀸𑀢𑀮𑀓𑁆𑀔𑀡𑀁 𑀲𑀼𑀔𑀁, 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀯𑀢𑁆𑀢𑀦𑁆𑀢𑀺. 𑀓𑀢𑀗𑁆𑀕𑀯𑀺𑀧𑁆𑀧𑀳𑀻𑀦𑀦𑁆𑀢𑀺 𑀇𑀥 𑀧𑀦 𑀓𑀺𑀁 𑀧𑀼𑀘𑁆𑀙𑀢𑀺? 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀦𑀓𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑀸𑀦𑀺 𑀅𑀗𑁆𑀕𑀸𑀦𑀺 𑀚𑀸𑀦𑀺𑀢𑀩𑁆𑀩𑀸𑀦𑀺, 𑀢𑀸𑀦𑀺 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀧𑀼𑀘𑁆𑀙𑀢𑀺, 𑀯𑀺𑀲𑁆𑀲𑀚𑁆𑀚𑀦𑀁 𑀧𑀦𑁂𑀢𑁆𑀣 𑀧𑀸𑀓𑀝𑀫𑁂𑀯. 𑀇𑀢𑀺 𑀳𑁂𑀝𑁆𑀞𑀸 𑀦𑀺𑀭𑁄𑀥𑀧𑀸𑀤𑀓𑀁 𑀧𑀞𑀫𑀚𑁆𑀛𑀸𑀦𑀁 𑀕𑀳𑀺𑀢𑀁, 𑀉𑀧𑀭𑀺 𑀢𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀁 𑀧𑀼𑀘𑁆𑀙𑀺𑀲𑁆𑀲𑀢𑀺. 𑀅𑀦𑁆𑀢𑀭𑀸 𑀧𑀦 𑀙 𑀲𑀫𑀸𑀧𑀢𑁆𑀢𑀺𑀬𑁄 𑀲𑀁𑀔𑀺𑀢𑁆𑀢𑀸, 𑀦𑀬𑀁 𑀯𑀸 𑀤𑀲𑁆𑀲𑁂𑀢𑁆𑀯𑀸 𑀯𑀺𑀲𑁆𑀲𑀝𑁆𑀞𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁪𑁫𑁫. 𑀇𑀤𑀸𑀦𑀺 𑀯𑀺𑀜𑁆𑀜𑀸𑀡𑀦𑀺𑀲𑁆𑀲𑀬𑁂 𑀧𑀜𑁆𑀘 𑀧𑀲𑀸𑀤𑁂 𑀧𑀼𑀘𑁆𑀙𑀦𑁆𑀢𑁄 𑀧𑀜𑁆𑀘𑀺𑀫𑀸𑀦𑀺, 𑀆𑀯𑀼𑀲𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀕𑁄𑀘𑀭𑀯𑀺𑀲𑀬𑀦𑁆𑀢𑀺 𑀕𑁄𑀘𑀭𑀪𑀽𑀢𑀁 𑀯𑀺𑀲𑀬𑀁. 𑀅𑀜𑁆𑀜𑀫𑀜𑁆𑀜𑀲𑁆𑀲𑀸𑀢𑀺 𑀘𑀓𑁆𑀔𑀼 𑀲𑁄𑀢𑀲𑁆𑀲 𑀲𑁄𑀢𑀁 𑀯𑀸 𑀘𑀓𑁆𑀔𑀼𑀲𑁆𑀲𑀸𑀢𑀺 𑀏𑀯𑀁 𑀏𑀓𑁂𑀓𑀲𑁆𑀲 𑀕𑁄𑀘𑀭𑀯𑀺𑀲𑀬𑀁 𑀦 𑀧𑀘𑁆𑀘𑀦𑀼𑀪𑁄𑀢𑀺. 𑀲𑀘𑁂 𑀳𑀺 𑀦𑀻𑀮𑀸𑀤𑀺𑀪𑁂𑀤𑀁 𑀭𑀽𑀧𑀸𑀭𑀫𑁆𑀫𑀡𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀲𑁄𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀦𑁂𑀬𑁆𑀬, ‘‘𑀇𑀗𑁆𑀖 𑀢𑀸𑀯 𑀦𑀁 𑀯𑀯𑀢𑁆𑀣𑀧𑁂𑀳𑀺 𑀯𑀺𑀪𑀸𑀯𑁂𑀳𑀺, 𑀓𑀺𑀁 𑀦𑀸𑀫𑁂𑀢𑀁 𑀆𑀭𑀫𑁆𑀫𑀡’’𑀦𑁆𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀜𑁆𑀳𑀺 𑀯𑀺𑀦𑀸𑀧𑀺 𑀫𑀼𑀔𑁂𑀦 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀭𑁂 𑀅𑀦𑁆𑀥𑀩𑀸𑀮, 𑀯𑀲𑁆𑀲𑀲𑀢𑀫𑁆𑀧𑀺 𑀯𑀲𑁆𑀲𑀲𑀳𑀲𑁆𑀲𑀫𑁆𑀧𑀺 𑀧𑀭𑀺𑀥𑀸𑀯𑀫𑀸𑀦𑁄 𑀅𑀜𑁆𑀜𑀢𑁆𑀭 𑀫𑀬𑀸 𑀓𑀼𑀳𑀺𑀁 𑀏𑀢𑀲𑁆𑀲 𑀚𑀸𑀦𑀦𑀓𑀁 𑀮𑀪𑀺𑀲𑁆𑀲𑀲𑀺, 𑀆𑀳𑀭 𑀦𑀁 𑀘𑀓𑁆𑀔𑀼𑀧𑀲𑀸𑀤𑁂 𑀉𑀧𑀦𑁂𑀳𑀺, 𑀅𑀳𑀫𑁂𑀢𑀁 𑀆𑀭𑀫𑁆𑀫𑀡𑀁 𑀚𑀸𑀦𑀺𑀲𑁆𑀲𑀸𑀫𑀺, 𑀬𑀤𑀺 𑀯𑀸 𑀦𑀻𑀮𑀁 𑀬𑀤𑀺 𑀯𑀸 𑀧𑀻𑀢𑀓𑀁, 𑀦 𑀳𑀺 𑀏𑀲𑁄 𑀅𑀜𑁆𑀜𑀲𑁆𑀲 𑀯𑀺𑀲𑀬𑁄, 𑀫𑀬𑁆𑀳𑁂𑀯𑁂𑀲𑁄 𑀯𑀺𑀲𑀬𑁄’’𑀢𑀺. 𑀲𑁂𑀲𑀤𑁆𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀫𑁂𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀕𑁄𑀘𑀭𑀁 𑀯𑀺𑀲𑀬𑀁 𑀦 𑀧𑀘𑁆𑀘𑀦𑀼𑀪𑁄𑀦𑁆𑀢𑀺 𑀦𑀸𑀫. 𑀓𑀺𑀁 𑀧𑀝𑀺𑀲𑀭𑀡𑀦𑁆𑀢𑀺 𑀏𑀢𑁂𑀲𑀁 𑀓𑀺𑀁 𑀧𑀝𑀺𑀲𑀭𑀡𑀁, 𑀓𑀺𑀁 𑀏𑀢𑀸𑀦𑀺 𑀧𑀝𑀺𑀲𑀭𑀦𑁆𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀫𑀦𑁄 𑀧𑀝𑀺𑀲𑀭𑀡𑀦𑁆𑀢𑀺 𑀚𑀯𑀦𑀫𑀦𑁄 𑀧𑀝𑀺𑀲𑀭𑀡𑀁. 𑀫𑀦𑁄 𑀘 𑀦𑁂𑀲𑀦𑁆𑀢𑀺 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀫𑀦𑁄 𑀯𑀸 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑀫𑀦𑁄 𑀯𑀸 𑀏𑀢𑁂𑀲𑀁 𑀕𑁄𑀘𑀭𑀯𑀺𑀲𑀬𑀁 𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀅𑀦𑀼𑀪𑁄𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀜𑁆𑀳𑀺 𑀭𑀽𑀧𑀤𑀲𑁆𑀲𑀦𑀫𑀢𑁆𑀢𑀫𑁂𑀯, 𑀏𑀢𑁆𑀣 𑀭𑀚𑁆𑀚𑀦𑀁 𑀯𑀸 𑀤𑀼𑀲𑁆𑀲𑀦𑀁 𑀯𑀸 𑀫𑀼𑀬𑁆𑀳𑀦𑀁 𑀯𑀸 𑀦𑀢𑁆𑀣𑀺. 𑀏𑀢𑀲𑁆𑀫𑀺𑀁 𑀧𑀦 𑀤𑁆𑀯𑀸𑀭𑁂 𑀚𑀯𑀦𑀁 𑀭𑀚𑁆𑀚𑀢𑀺 𑀯𑀸 𑀤𑀼𑀲𑁆𑀲𑀢𑀺 𑀯𑀸 𑀫𑀼𑀬𑁆𑀳𑀢𑀺 𑀯𑀸. 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀭𑀸𑀬𑀁 𑀉𑀧𑀫𑀸 𑁋 𑀧𑀜𑁆𑀘 𑀓𑀺𑀭 𑀤𑀼𑀩𑁆𑀩𑀮𑀪𑁄𑀚𑀓𑀸 𑀭𑀸𑀚𑀸𑀦𑀁 𑀲𑁂𑀯𑀺𑀢𑁆𑀯𑀸 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀏𑀓𑀲𑁆𑀫𑀺𑀁 𑀧𑀜𑁆𑀘𑀓𑀼𑀮𑀺𑀓𑁂 𑀕𑀸𑀫𑁂 𑀧𑀭𑀺𑀢𑁆𑀢𑀓𑀁 𑀆𑀬𑀁 𑀮𑀪𑀺𑀁𑀲𑀼. 𑀢𑁂𑀲𑀁 𑀢𑀢𑁆𑀣 𑀫𑀘𑁆𑀙𑀪𑀸𑀕𑁄 𑀫𑀁𑀲𑀪𑀸𑀕𑁄 𑀬𑀼𑀢𑁆𑀢𑀺𑀓𑀳𑀸𑀧𑀡𑁄 𑀯𑀸, 𑀩𑀦𑁆𑀥𑀓𑀳𑀸𑀧𑀡𑁄 𑀯𑀸, 𑀫𑀸𑀧𑀳𑀸𑀭𑀓𑀳𑀸𑀧𑀡𑁄 𑀯𑀸, 𑀅𑀝𑁆𑀞𑀓𑀳𑀸𑀧𑀡𑁄 𑀯𑀸, 𑀲𑁄𑀴𑀲𑀓𑀳𑀸𑀧𑀡𑁄 𑀯𑀸, 𑀩𑀸𑀢𑁆𑀢𑀺𑀁𑀲𑀓𑀳𑀸𑀧𑀡𑁄 𑀯𑀸, 𑀘𑀢𑀼𑀲𑀝𑁆𑀞𑀺𑀓𑀳𑀸𑀧𑀡𑁄 𑀯𑀸, 𑀤𑀡𑁆𑀟𑁄𑀢𑀺 𑀏𑀢𑁆𑀢𑀓𑀫𑀢𑁆𑀢𑀫𑁂𑀯 𑀧𑀸𑀧𑀼𑀡𑀸𑀢𑀺. 𑀲𑀢𑀯𑀢𑁆𑀣𑀼𑀓𑀁 𑀧𑀜𑁆𑀘𑀲𑀢𑀯𑀢𑁆𑀣𑀼𑀓𑀁 𑀲𑀳𑀲𑁆𑀲𑀯𑀢𑁆𑀣𑀼𑀓𑀁 𑀫𑀳𑀸𑀩𑀮𑀺𑀁 𑀭𑀸𑀚𑀸𑀯 𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀧𑀜𑁆𑀘𑀓𑀼𑀮𑀺𑀓𑀕𑀸𑀫𑁄 𑀯𑀺𑀬 𑀧𑀜𑁆𑀘 𑀧𑀲𑀸𑀤𑀸 𑀤𑀝𑁆𑀞𑀩𑁆𑀩𑀸; 𑀧𑀜𑁆𑀘 𑀤𑀼𑀩𑁆𑀩𑀮𑀪𑁄𑀚𑀓𑀸 𑀯𑀺𑀬 𑀧𑀜𑁆𑀘 𑀯𑀺𑀜𑁆𑀜𑀸𑀡𑀸𑀦𑀺; 𑀭𑀸𑀚𑀸 𑀯𑀺𑀬 𑀚𑀯𑀦𑀁; 𑀤𑀼𑀩𑁆𑀩𑀮𑀪𑁄𑀚𑀓𑀸𑀦𑀁 𑀧𑀭𑀺𑀢𑁆𑀢𑀓𑀁 𑀆𑀬𑀧𑀸𑀧𑀼𑀡𑀦𑀁 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀭𑀽𑀧𑀤𑀲𑁆𑀲𑀦𑀸𑀤𑀺𑀫𑀢𑁆𑀢𑀁. 𑀭𑀚𑁆𑀚𑀦𑀸𑀤𑀻𑀦𑀺 𑀧𑀦 𑀏𑀢𑁂𑀲𑀼 𑀦𑀢𑁆𑀣𑀺. 𑀭𑀜𑁆𑀜𑁄 𑀫𑀳𑀸𑀩𑀮𑀺𑀕𑁆𑀕𑀳𑀡𑀁 𑀯𑀺𑀬 𑀢𑁂𑀲𑀼 𑀤𑁆𑀯𑀸𑀭𑁂𑀲𑀼 𑀚𑀯𑀦𑀲𑁆𑀲 𑀭𑀚𑁆𑀚𑀦𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁪𑁫𑁬. 𑀧𑀜𑁆𑀘𑀺𑀫𑀸𑀦𑀺, 𑀆𑀯𑀼𑀲𑁄𑀢𑀺 𑀇𑀥 𑀓𑀺𑀁 𑀧𑀼𑀘𑁆𑀙𑀢𑀺? 𑀅𑀦𑁆𑀢𑁄𑀦𑀺𑀭𑁄𑀥𑀲𑁆𑀫𑀺𑀁 𑀧𑀜𑁆𑀘 𑀧𑀲𑀸𑀤𑁂. 𑀓𑀺𑀭𑀺𑀬𑀫𑀬𑀧𑀯𑀢𑁆𑀢𑀲𑁆𑀫𑀺𑀜𑁆𑀳𑀺 𑀯𑀢𑁆𑀢𑀫𑀸𑀦𑁂 𑀅𑀭𑀽𑀧𑀥𑀫𑁆𑀫𑀸 𑀧𑀲𑀸𑀤𑀸𑀦𑀁 𑀩𑀮𑀯𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀬𑁄 𑀧𑀦 𑀢𑀁 𑀧𑀯𑀢𑁆𑀢𑀁 𑀦𑀺𑀭𑁄𑀥𑁂𑀢𑁆𑀯𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑁄, 𑀢𑀲𑁆𑀲 𑀅𑀦𑁆𑀢𑁄𑀦𑀺𑀭𑁄𑀥𑁂 𑀧𑀜𑁆𑀘 𑀧𑀲𑀸𑀤𑀸 𑀓𑀺𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀦𑁆𑀢𑀻𑀢𑀺 𑀇𑀤𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀧𑀼𑀘𑁆𑀙𑀢𑀺. 𑀆𑀬𑀼𑀁 𑀧𑀝𑀺𑀘𑁆𑀘𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀦𑁆𑀢𑀺. 𑀉𑀲𑁆𑀫𑀁 𑀧𑀝𑀺𑀘𑁆𑀘𑀸𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀓𑀫𑁆𑀫𑀚𑀢𑁂𑀚𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀺. 𑀬𑀲𑁆𑀫𑀸 𑀧𑀦 𑀓𑀫𑁆𑀫𑀚𑀢𑁂𑀚𑁄𑀧𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂𑀦 𑀯𑀺𑀦𑀸 𑀦 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 ‘‘𑀉𑀲𑁆𑀫𑀸 𑀆𑀬𑀼𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀻’’𑀢𑀺 𑀆𑀳. 𑀛𑀸𑀬𑀢𑁄𑀢𑀺 𑀚𑀮𑀢𑁄. 𑀅𑀘𑁆𑀘𑀺𑀁 𑀧𑀝𑀺𑀘𑁆𑀘𑀸𑀢𑀺 𑀚𑀸𑀮𑀲𑀺𑀔𑀁 𑀧𑀝𑀺𑀘𑁆𑀘. 𑀆𑀪𑀸 𑀧𑀜𑁆𑀜𑀸𑀬𑀢𑀻𑀢𑀺 𑀆𑀮𑁄𑀓𑁄 𑀦𑀸𑀫 𑀧𑀜𑁆𑀜𑀸𑀬𑀢𑀺. 𑀆𑀪𑀁 𑀧𑀝𑀺𑀘𑁆𑀘 𑀅𑀘𑁆𑀘𑀻𑀢𑀺 𑀢𑀁 𑀆𑀮𑁄𑀓𑀁 𑀧𑀝𑀺𑀘𑁆𑀘 𑀚𑀸𑀮𑀲𑀺𑀔𑀸 𑀧𑀜𑁆𑀜𑀸𑀬𑀢𑀺.

𑀏𑀯𑀫𑁂𑀯 𑀔𑁄, 𑀆𑀯𑀼𑀲𑁄, 𑀆𑀬𑀼 𑀉𑀲𑁆𑀫𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀻𑀢𑀺 𑀏𑀢𑁆𑀣 𑀚𑀸𑀮𑀲𑀺𑀔𑀸 𑀯𑀺𑀬 𑀓𑀫𑁆𑀫𑀚𑀢𑁂𑀚𑁄. 𑀆𑀮𑁄𑀓𑁄 𑀯𑀺𑀬 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀚𑀸𑀮𑀲𑀺𑀔𑀸 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀆𑀮𑁄𑀓𑀁 𑀕𑀳𑁂𑀢𑁆𑀯𑀸𑀯 𑀉𑀧𑁆𑀧𑀚𑁆𑀚𑀢𑀺. 𑀲𑀸 𑀢𑁂𑀦 𑀅𑀢𑁆𑀢𑀦𑀸 𑀚𑀦𑀺𑀢𑀆𑀮𑁄𑀓𑁂𑀦𑁂𑀯 𑀲𑀬𑀫𑁆𑀧𑀺 𑀅𑀡𑀼 𑀣𑀽𑀮𑀸 𑀤𑀻𑀖𑀸 𑀭𑀲𑁆𑀲𑀸𑀢𑀺 𑀧𑀸𑀓𑀝𑀸 𑀳𑁄𑀢𑀺. 𑀢𑀢𑁆𑀣 𑀚𑀸𑀮𑀧𑀯𑀢𑁆𑀢𑀺𑀬𑀸 𑀚𑀦𑀺𑀢𑀆𑀮𑁄𑀓𑁂𑀦 𑀢𑀲𑁆𑀲𑀸𑀬𑁂𑀯 𑀚𑀸𑀮𑀧𑀯𑀢𑁆𑀢𑀺𑀬𑀸 𑀧𑀸𑀓𑀝𑀪𑀸𑀯𑁄 𑀯𑀺𑀬 𑀉𑀲𑁆𑀫𑀁 𑀧𑀝𑀺𑀘𑁆𑀘 𑀦𑀺𑀩𑁆𑀩𑀢𑁆𑀢𑁂𑀦 𑀓𑀫𑁆𑀫𑀚𑀫𑀳𑀸𑀪𑀽𑀢𑀲𑀫𑁆𑀪𑀯𑁂𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑁂𑀦 𑀉𑀲𑁆𑀫𑀸𑀬 𑀅𑀦𑀼𑀧𑀸𑀮𑀦𑀁. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀳𑀺 𑀤𑀲𑀧𑀺 𑀯𑀲𑁆𑀲𑀸𑀦𑀺…𑀧𑁂… 𑀯𑀲𑁆𑀲𑀲𑀢𑀫𑁆𑀧𑀺 𑀓𑀫𑁆𑀫𑀚𑀢𑁂𑀚𑀧𑀯𑀢𑁆𑀢𑀁 𑀧𑀸𑀮𑁂𑀢𑀺. 𑀇𑀢𑀺 𑀫𑀳𑀸𑀪𑀽𑀢𑀸𑀦𑀺 𑀉𑀧𑀸𑀤𑀸𑀭𑀽𑀧𑀸𑀦𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑀸𑀦𑀺 𑀳𑁄𑀦𑁆𑀢𑀻𑀢𑀺 𑀆𑀬𑀼 𑀉𑀲𑁆𑀫𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀺. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀫𑀳𑀸𑀪𑀽𑀢𑀸𑀦𑀺 𑀧𑀸𑀮𑁂𑀢𑀻𑀢𑀺 𑀉𑀲𑁆𑀫𑀸 𑀆𑀬𑀼𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁪𑁫𑁭. 𑀆𑀬𑀼𑀲𑀗𑁆𑀔𑀸𑀭𑀸𑀢𑀺 𑀆𑀬𑀼𑀫𑁂𑀯. 𑀯𑁂𑀤𑀦𑀺𑀬𑀸 𑀥𑀫𑁆𑀫𑀸𑀢𑀺 𑀯𑁂𑀤𑀦𑀸 𑀥𑀫𑁆𑀫𑀸𑀯. 𑀯𑀼𑀝𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀻𑀢𑀺 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀺. 𑀬𑁄 𑀳𑀺 𑀪𑀺𑀓𑁆𑀔𑀼 𑀅𑀭𑀽𑀧𑀧𑀯𑀢𑁆𑀢𑁂 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀲𑀜𑁆𑀜𑀜𑁆𑀘 𑀯𑁂𑀤𑀦𑀜𑁆𑀘 𑀦𑀺𑀭𑁄𑀥𑁂𑀢𑁆𑀯𑀸 𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁄, 𑀢𑀲𑁆𑀲 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸 𑀅𑀭𑀽𑀧𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀁 𑀧𑀦 𑀭𑀽𑀧𑀸𑀭𑀽𑀧𑀧𑀯𑀢𑁆𑀢𑀁 𑀧𑀯𑀢𑁆𑀢𑀢𑀺. 𑀬𑀣𑀸 𑀓𑀺𑀁? 𑀬𑀣𑀸 𑀏𑀓𑁄 𑀧𑀼𑀭𑀺𑀲𑁄 𑀚𑀸𑀮𑀸𑀧𑀯𑀢𑁆𑀢𑁂 𑀉𑀓𑁆𑀔𑀡𑁆𑀞𑀺𑀢𑁄 𑀉𑀤𑀓𑁂𑀦 𑀧𑀳𑀭𑀺𑀢𑁆𑀯𑀸 𑀚𑀸𑀮𑀁 𑀅𑀧𑁆𑀧𑀯𑀢𑁆𑀢𑀁 𑀓𑀢𑁆𑀯𑀸 𑀙𑀸𑀭𑀺𑀓𑀸𑀬 𑀅𑀗𑁆𑀕𑀸𑀭𑁂 𑀧𑀺𑀥𑀸𑀬 𑀢𑀼𑀡𑁆𑀳𑀻 𑀦𑀺𑀲𑀻𑀤𑀢𑀺. 𑀬𑀤𑀸 𑀧𑀦𑀲𑁆𑀲 𑀧𑀼𑀦 𑀚𑀸𑀮𑀸𑀬 𑀅𑀢𑁆𑀣𑁄 𑀳𑁄𑀢𑀺, 𑀙𑀸𑀭𑀺𑀓𑀁 𑀅𑀧𑀦𑁂𑀢𑁆𑀯𑀸 𑀅𑀗𑁆𑀕𑀸𑀭𑁂 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀉𑀧𑀸𑀤𑀸𑀦𑀁 𑀤𑀢𑁆𑀯𑀸 𑀫𑀼𑀔𑀯𑀸𑀢𑀁 𑀯𑀸 𑀢𑀸𑀮𑀯𑀡𑁆𑀝𑀯𑀸𑀢𑀁 𑀯𑀸 𑀤𑀤𑀸𑀢𑀺. 𑀅𑀣 𑀚𑀸𑀮𑀸𑀧𑀯𑀢𑁆𑀢𑀁 𑀧𑀼𑀦 𑀧𑀯𑀢𑁆𑀢𑀢𑀺. 𑀏𑀯𑀫𑁂𑀯 𑀚𑀸𑀮𑀸𑀧𑀯𑀢𑁆𑀢𑀁 𑀯𑀺𑀬 𑀅𑀭𑀽𑀧𑀥𑀫𑁆𑀫𑀸. 𑀧𑀼𑀭𑀺𑀲𑀲𑁆𑀲 𑀚𑀸𑀮𑀸𑀧𑀯𑀢𑁆𑀢𑁂 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀉𑀤𑀓𑀧𑁆𑀧𑀳𑀸𑀭𑁂𑀦 𑀚𑀸𑀮𑀁 𑀅𑀧𑁆𑀧𑀯𑀢𑁆𑀢𑀁 𑀓𑀢𑁆𑀯𑀸 𑀙𑀸𑀭𑀺𑀓𑀸𑀬 𑀅𑀗𑁆𑀕𑀸𑀭𑁂 𑀧𑀺𑀥𑀸𑀬 𑀢𑀼𑀡𑁆𑀳𑀻𑀪𑀽𑀢𑀲𑁆𑀲 𑀦𑀺𑀲𑀚𑁆𑀚𑀸 𑀯𑀺𑀬 𑀪𑀺𑀓𑁆𑀔𑀼𑀦𑁄 𑀅𑀭𑀽𑀧𑀧𑀯𑀢𑁆𑀢𑁂 𑀉𑀓𑁆𑀓𑀡𑁆𑀞𑀺𑀢𑁆𑀯𑀸 𑀲𑀜𑁆𑀜𑀜𑁆𑀘 𑀯𑁂𑀤𑀦𑀜𑁆𑀘 𑀦𑀺𑀭𑁄𑀥𑁂𑀢𑁆𑀯𑀸 𑀦𑀺𑀭𑁄𑀥𑀲𑀫𑀸𑀧𑀚𑁆𑀚𑀦𑀁. 𑀙𑀸𑀭𑀺𑀓𑀸𑀬 𑀧𑀺𑀳𑀺𑀢𑀅𑀗𑁆𑀕𑀸𑀭𑀸 𑀯𑀺𑀬 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀧𑀼𑀭𑀺𑀲𑀲𑁆𑀲 𑀧𑀼𑀦 𑀚𑀸𑀮𑀸𑀬 𑀅𑀢𑁆𑀣𑁂 𑀲𑀢𑀺 𑀙𑀸𑀭𑀺𑀓𑀸𑀧𑀦𑀬𑀦𑀸𑀤𑀻𑀦𑀺 𑀯𑀺𑀬 𑀪𑀺𑀓𑁆𑀔𑀼𑀦𑁄 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀸𑀧𑀕𑀫𑀦𑀁. 𑀅𑀕𑁆𑀕𑀺𑀚𑀸𑀮𑀸𑀬 𑀧𑀯𑀢𑁆𑀢𑀺 𑀯𑀺𑀬 𑀧𑀼𑀦 𑀅𑀭𑀽𑀧𑀥𑀫𑁆𑀫𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀭𑀽𑀧𑀸𑀭𑀽𑀧𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀆𑀬𑀼 𑀉𑀲𑁆𑀫𑀸 𑀘 𑀯𑀺𑀜𑁆𑀜𑀸𑀡𑀦𑁆𑀢𑀺 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀓𑀫𑁆𑀫𑀚𑀢𑁂𑀚𑁄𑀥𑀸𑀢𑀼, 𑀘𑀺𑀢𑁆𑀢𑀦𑁆𑀢𑀺 𑀇𑀫𑁂 𑀢𑀬𑁄 𑀥𑀫𑁆𑀫𑀸 𑀬𑀤𑀸 𑀇𑀫𑀁 𑀭𑀽𑀧𑀓𑀸𑀬𑀁 𑀚𑀳𑀦𑁆𑀢𑀺, 𑀅𑀣𑀸𑀬𑀁 𑀅𑀘𑁂𑀢𑀦𑀁 𑀓𑀝𑁆𑀞𑀁 𑀯𑀺𑀬 𑀧𑀣𑀯𑀺𑀬𑀁 𑀙𑀟𑁆𑀟𑀺𑀢𑁄 𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋

‘‘𑀆𑀬𑀼 𑀉𑀲𑁆𑀫𑀸 𑀘 𑀯𑀺𑀜𑁆𑀜𑀸𑀡𑀁, 𑀬𑀤𑀸 𑀓𑀸𑀬𑀁 𑀚𑀳𑀦𑁆𑀢𑀺𑀫𑀁;

𑀅𑀧𑀯𑀺𑀤𑁆𑀥𑁄 𑀢𑀤𑀸 𑀲𑁂𑀢𑀺, 𑀧𑀭𑀪𑀢𑁆𑀢𑀁 𑀅𑀘𑁂𑀢𑀦’’𑀦𑁆𑀢𑀺. (𑀲𑀁. 𑀦𑀺. 𑁩.𑁯𑁫);

𑀓𑀸𑀬𑀲𑀗𑁆𑀔𑀸𑀭𑀸𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸. 𑀯𑀘𑀻𑀲𑀗𑁆𑀔𑀸𑀭𑀸𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸. 𑀘𑀺𑀢𑁆𑀢𑀲𑀗𑁆𑀔𑀸𑀭𑀸𑀢𑀺 𑀲𑀜𑁆𑀜𑀸𑀯𑁂𑀤𑀦𑀸. 𑀆𑀬𑀽𑀢𑀺 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀧𑀭𑀺𑀪𑀺𑀦𑁆𑀦𑀸𑀦𑀻𑀢𑀺 𑀉𑀧𑀳𑀢𑀸𑀦𑀺, 𑀯𑀺𑀦𑀝𑁆𑀞𑀸𑀦𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀓𑁂𑀘𑀺 ‘‘𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀲𑁆𑀲 𑀘𑀺𑀢𑁆𑀢𑀲𑀗𑁆𑀔𑀸𑀭𑀸𑀯 𑀦𑀺𑀭𑀼𑀤𑁆𑀥𑀸’’𑀢𑀺 𑀯𑀘𑀦𑀢𑁄 𑀘𑀺𑀢𑁆𑀢𑀁 𑀅𑀦𑀺𑀭𑀼𑀤𑁆𑀥𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀘𑀺𑀢𑁆𑀢𑀓𑀸 𑀅𑀬𑀁 𑀲𑀫𑀸𑀧𑀢𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀢𑁂 𑀯𑀢𑁆𑀢𑀩𑁆𑀩𑀸 𑁋 ‘‘𑀯𑀘𑀻𑀲𑀗𑁆𑀔𑀸𑀭𑀸𑀧𑀺𑀲𑁆𑀲 𑀦𑀺𑀭𑀼𑀤𑁆𑀥𑀸’’𑀢𑀺 𑀯𑀘𑀦𑀢𑁄 𑀯𑀸𑀘𑀸 𑀅𑀦𑀺𑀭𑀼𑀤𑁆𑀥𑀸 𑀳𑁄𑀢𑀺, 𑀢𑀲𑁆𑀫𑀸 𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑁂𑀦 𑀥𑀫𑁆𑀫𑀫𑁆𑀧𑀺 𑀓𑀣𑁂𑀦𑁆𑀢𑁂𑀦 𑀲𑀚𑁆𑀛𑀸𑀬𑀫𑁆𑀧𑀺 𑀓𑀭𑁄𑀦𑁆𑀢𑁂𑀦 𑀦𑀺𑀲𑀻𑀤𑀺𑀢𑀩𑁆𑀩𑀁 𑀲𑀺𑀬𑀸. ‘‘𑀬𑁄 𑀘𑀸𑀬𑀁 𑀫𑀢𑁄 𑀓𑀸𑀮𑀗𑁆𑀓𑀢𑁄, 𑀢𑀲𑁆𑀲𑀸𑀧𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀦𑀺𑀭𑀼𑀤𑁆𑀥𑀸’’𑀢𑀺 𑀯𑀘𑀦𑀢𑁄 𑀘𑀺𑀢𑁆𑀢𑀁 𑀅𑀦𑀺𑀭𑀼𑀤𑁆𑀥𑀁 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀓𑀸𑀮𑀗𑁆𑀓𑀢𑁂 𑀫𑀸𑀢𑀸𑀧𑀺𑀢𑀭𑁄 𑀯𑀸 𑀅𑀭𑀳𑀦𑁆𑀢𑁂 𑀯𑀸 𑀛𑀸𑀧𑀬𑀦𑁆𑀢𑁂𑀦 𑀅𑀦𑀦𑁆𑀢𑀭𑀺𑀬𑀓𑀫𑁆𑀫𑀁 𑀓𑀢𑀁 𑀪𑀯𑁂𑀬𑁆𑀬. 𑀇𑀢𑀺 𑀩𑁆𑀬𑀜𑁆𑀚𑀦𑁂 𑀅𑀪𑀺𑀦𑀺𑀯𑁂𑀲𑀁 𑀅𑀓𑀢𑁆𑀯𑀸 𑀆𑀘𑀭𑀺𑀬𑀸𑀦𑀁 𑀦𑀬𑁂 𑀞𑀢𑁆𑀯𑀸 𑀅𑀢𑁆𑀣𑁄 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄. 𑀅𑀢𑁆𑀣𑁄 𑀳𑀺 𑀧𑀝𑀺𑀲𑀭𑀡𑀁, 𑀦 𑀩𑁆𑀬𑀜𑁆𑀚𑀦𑀁.

𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀧𑁆𑀧𑀲𑀦𑁆𑀦𑀸𑀦𑀻𑀢𑀺 𑀓𑀺𑀭𑀺𑀬𑀫𑀬𑀧𑀯𑀢𑁆𑀢𑀲𑁆𑀫𑀺𑀜𑁆𑀳𑀺 𑀯𑀢𑁆𑀢𑀫𑀸𑀦𑁂 𑀩𑀳𑀺𑀤𑁆𑀥𑀸 𑀆𑀭𑀫𑁆𑀫𑀡𑁂𑀲𑀼 𑀧𑀲𑀸𑀤𑁂 𑀖𑀝𑁆𑀝𑁂𑀦𑁆𑀢𑁂𑀲𑀼 𑀇𑀦𑁆𑀤𑁆𑀭𑀺𑀬𑀸𑀦𑀺 𑀓𑀺𑀮𑀫𑀦𑁆𑀢𑀸𑀦𑀺 𑀉𑀧𑀳𑀢𑀸𑀦𑀺 𑀫𑀓𑁆𑀔𑀺𑀢𑀸𑀦𑀺 𑀯𑀺𑀬 𑀳𑁄𑀦𑁆𑀢𑀺, 𑀯𑀸𑀢𑀸𑀤𑀻𑀳𑀺 𑀉𑀝𑁆𑀞𑀺𑀢𑁂𑀦 𑀭𑀚𑁂𑀦 𑀘𑀢𑀼𑀫𑀳𑀸𑀧𑀣𑁂 𑀞𑀧𑀺𑀢𑀆𑀤𑀸𑀲𑁄 𑀯𑀺𑀬. 𑀬𑀣𑀸 𑀧𑀦 𑀣𑀯𑀺𑀓𑀸𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀜𑁆𑀚𑀽𑀲𑀸𑀤𑀻𑀲𑀼 𑀞𑀧𑀺𑀢𑁄 𑀆𑀤𑀸𑀲𑁄 𑀅𑀦𑁆𑀢𑁄𑀬𑁂𑀯 𑀯𑀺𑀭𑁄𑀘𑀢𑀺, 𑀏𑀯𑀁 𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑁄𑀦𑀺𑀭𑁄𑀥𑁂 𑀧𑀜𑁆𑀘 𑀧𑀲𑀸𑀤𑀸 𑀅𑀢𑀺𑀯𑀺𑀭𑁄𑀘𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀧𑁆𑀧𑀲𑀦𑁆𑀦𑀸𑀦𑀻’’𑀢𑀺.

𑁪𑁫𑁮. 𑀓𑀢𑀺 𑀧𑀦𑀸𑀯𑀼𑀲𑁄, 𑀧𑀘𑁆𑀘𑀬𑀸𑀢𑀺 𑀇𑀥 𑀓𑀺𑀁 𑀧𑀼𑀘𑁆𑀙𑀢𑀺? 𑀦𑀺𑀭𑁄𑀥𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀧𑀼𑀘𑁆𑀙𑀢𑀺. 𑀯𑀺𑀲𑁆𑀲𑀚𑁆𑀚𑀦𑁂 𑀧𑀦𑀲𑁆𑀲 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸𑀢𑀺 𑀘𑀢𑁆𑀢𑀸𑀭𑁄 𑀅𑀧𑀕𑀫𑀦𑀧𑀘𑁆𑀘𑀬𑀸 𑀓𑀣𑀺𑀢𑀸. 𑀅𑀦𑀺𑀫𑀺𑀢𑁆𑀢𑀸𑀬𑀸𑀢𑀺 𑀇𑀥 𑀓𑀺𑀁 𑀧𑀼𑀘𑁆𑀙𑀢𑀺? 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀸𑀦𑀓𑀨𑀮𑀲𑀫𑀸𑀧𑀢𑁆𑀢𑀺𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀧𑀼𑀘𑁆𑀙𑀢𑀺. 𑀅𑀯𑀲𑁂𑀲𑀲𑀫𑀸𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀜𑁆𑀳𑀺 𑀪𑀯𑀗𑁆𑀕𑁂𑀦 𑀳𑁄𑀢𑀺, 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀦𑀁 𑀧𑀦 𑀯𑀺𑀧𑀲𑁆𑀲𑀦𑀸𑀦𑀺𑀲𑁆𑀲𑀦𑁆𑀤𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀢𑀫𑁂𑀯 𑀧𑀼𑀘𑁆𑀙𑀢𑀺. 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀦𑁆𑀢𑀺 𑀭𑀽𑀧𑀸𑀤𑀻𑀦𑀁 𑀲𑀩𑁆𑀩𑀸𑀭𑀫𑁆𑀫𑀡𑀸𑀦𑀁. 𑀅𑀦𑀺𑀫𑀺𑀢𑁆𑀢𑀸𑀬 𑀘 𑀥𑀸𑀢𑀼𑀬𑀸 𑀫𑀦𑀲𑀺𑀓𑀸𑀭𑁄𑀢𑀺 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀧𑀕𑀢𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀫𑀦𑀲𑀺𑀓𑀸𑀭𑁄. 𑀨𑀮𑀲𑀫𑀸𑀧𑀢𑁆𑀢𑀺𑀲𑀳𑀚𑀸𑀢𑀁 𑀫𑀦𑀲𑀺𑀓𑀸𑀭𑀁 𑀲𑀦𑁆𑀥𑀸𑀬𑀸𑀳. 𑀇𑀢𑀺 𑀳𑁂𑀝𑁆𑀞𑀸 𑀦𑀺𑀭𑁄𑀥𑀧𑀸𑀤𑀓𑀁 𑀧𑀞𑀫𑀚𑁆𑀛𑀸𑀦𑀁 𑀕𑀳𑀺𑀢𑀁, 𑀦𑀺𑀭𑁄𑀥𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀕𑀳𑀺𑀢𑀁, 𑀇𑀥 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀸𑀦𑀓𑀨𑀮𑀲𑀫𑀸𑀧𑀢𑁆𑀢𑀺 𑀕𑀳𑀺𑀢𑀸𑀢𑀺.

𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦𑀺𑀭𑁄𑀥𑀓𑀣𑀸 𑀓𑀣𑁂𑀢𑀩𑁆𑀩𑀸 𑀳𑁄𑀢𑀺. 𑀲𑀸, ‘‘𑀤𑁆𑀯𑀻𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀢𑀬𑁄 𑀘 𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀲𑁄𑀴𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀺 𑀦𑀯𑀳𑀺 𑀲𑀫𑀸𑀥𑀺𑀘𑀭𑀺𑀬𑀸𑀳𑀺 𑀯𑀲𑀻𑀪𑀸𑀯𑀢𑀸𑀧𑀜𑁆𑀜𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀜𑀸𑀡’’𑀦𑁆𑀢𑀺 𑀏𑀯𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑀧𑀝𑀺. 𑀫. 𑁧.𑁮𑁩) 𑀆𑀕𑀢𑀸. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀦𑀲𑁆𑀲𑀸 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀦𑀺𑀘𑁆𑀙𑀬𑀓𑀣𑀸 𑀓𑀣𑀺𑀢𑀸.

𑀇𑀤𑀸𑀦𑀺 𑀯𑀮𑀜𑁆𑀚𑀦𑀲𑀫𑀸𑀧𑀢𑁆𑀢𑀺𑀁 𑀧𑀼𑀘𑁆𑀙𑀦𑁆𑀢𑁄 𑀓𑀢𑀺 𑀧𑀦𑀸𑀯𑀼𑀲𑁄, 𑀧𑀘𑁆𑀘𑀬𑀸𑀢𑀺𑀆𑀤𑀺𑀫𑀸𑀳. 𑀦𑀺𑀭𑁄𑀥𑀢𑁄 𑀳𑀺 𑀯𑀼𑀝𑁆𑀞𑀸𑀦𑀓𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀞𑀺𑀢𑀺 𑀦𑀸𑀫 𑀦 𑀳𑁄𑀢𑀺, 𑀏𑀓𑀁 𑀤𑁆𑀯𑁂 𑀘𑀺𑀢𑁆𑀢𑀯𑀸𑀭𑀫𑁂𑀯 𑀧𑀯𑀢𑁆𑀢𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀢𑀺. 𑀅𑀬𑀜𑁆𑀳𑀺 𑀪𑀺𑀓𑁆𑀔𑀼 𑀲𑀢𑁆𑀢 𑀤𑀺𑀯𑀲𑁂 𑀅𑀭𑀽𑀧𑀧𑀯𑀢𑁆𑀢𑀁 𑀦𑀺𑀭𑁄𑀥𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀦𑀺𑀭𑁄𑀥𑀯𑀼𑀝𑁆𑀞𑀸𑀦𑀓𑀨𑀮𑀲𑀫𑀸𑀧𑀢𑁆𑀢𑀺𑀬𑀁 𑀦 𑀘𑀺𑀭𑀁 𑀢𑀺𑀝𑁆𑀞𑀢𑀺. 𑀯𑀮𑀜𑁆𑀚𑀦𑀲𑀫𑀸𑀧𑀢𑁆𑀢𑀺𑀬𑀁 𑀧𑀦 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑁄𑀯 𑀧𑀫𑀸𑀡𑀁. 𑀢𑀲𑁆𑀫𑀸 𑀲𑀸 𑀞𑀺𑀢𑀺 𑀦𑀸𑀫 𑀳𑁄𑀢𑀺. 𑀢𑁂𑀦𑀸𑀳 𑁋 ‘‘𑀅𑀦𑀺𑀫𑀺𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀞𑀺𑀢𑀺𑀬𑀸’’𑀢𑀺. 𑀢𑀲𑁆𑀲𑀸 𑀘𑀺𑀭𑀝𑁆𑀞𑀺𑀢𑀢𑁆𑀣𑀁 𑀓𑀢𑀺 𑀧𑀘𑁆𑀘𑀬𑀸𑀢𑀺 𑀅𑀢𑁆𑀣𑁄. 𑀯𑀺𑀲𑁆𑀲𑀚𑁆𑀚𑀦𑁂 𑀧𑀦𑀲𑁆𑀲𑀸 𑀧𑀼𑀩𑁆𑀩𑁂 𑀘 𑀅𑀪𑀺𑀲𑀗𑁆𑀔𑀸𑀭𑁄𑀢𑀺 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑁄 𑀯𑀼𑀢𑁆𑀢𑁄. 𑀯𑀼𑀝𑁆𑀞𑀸𑀦𑀸𑀬𑀸𑀢𑀺 𑀇𑀥 𑀪𑀯𑀗𑁆𑀕𑀯𑀼𑀝𑁆𑀞𑀸𑀦𑀁 𑀧𑀼𑀘𑁆𑀙𑀢𑀺. 𑀯𑀺𑀲𑁆𑀲𑀚𑁆𑀚𑀦𑁂𑀧𑀺𑀲𑁆𑀲𑀸 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀜𑁆𑀘 𑀫𑀦𑀲𑀺𑀓𑀸𑀭𑁄𑀢𑀺 𑀭𑀽𑀧𑀸𑀤𑀺𑀦𑀺𑀫𑀺𑀢𑁆𑀢𑀯𑀲𑁂𑀦 𑀪𑀯𑀗𑁆𑀕𑀲𑀳𑀚𑀸𑀢𑀫𑀦𑀲𑀺𑀓𑀸𑀭𑁄 𑀯𑀼𑀢𑁆𑀢𑁄.

𑁪𑁫𑁯. 𑀬𑀸 𑀘𑀸𑀬𑀁, 𑀆𑀯𑀼𑀲𑁄𑀢𑀺 𑀇𑀥 𑀓𑀺𑀁 𑀧𑀼𑀘𑁆𑀙𑀢𑀺? 𑀇𑀥 𑀅𑀜𑁆𑀜𑀁 𑀅𑀪𑀺𑀦𑀯𑀁 𑀦𑀸𑀫 𑀦𑀢𑁆𑀣𑀺. 𑀳𑁂𑀝𑁆𑀞𑀸 𑀓𑀣𑀺𑀢𑀥𑀫𑁆𑀫𑁂𑀬𑁂𑀯 𑀏𑀓𑀢𑁄 𑀲𑀫𑁄𑀥𑀸𑀦𑁂𑀢𑁆𑀯𑀸 𑀧𑀼𑀘𑁆𑀙𑀸𑀫𑀻𑀢𑀺 𑀧𑀼𑀘𑁆𑀙𑀢𑀺. 𑀓𑀢𑁆𑀣 𑀧𑀦 𑀢𑁂 𑀓𑀣𑀺𑀢𑀸? ‘‘𑀦𑀻𑀮𑀫𑁆𑀧𑀺 𑀲𑀜𑁆𑀚𑀸𑀦𑀸𑀢𑀺 𑀧𑀻𑀢𑀓𑀫𑁆𑀧𑀺, 𑀮𑁄𑀳𑀺𑀢𑀓𑀫𑁆𑀧𑀺, 𑀑𑀤𑀸𑀢𑀓𑀫𑁆𑀧𑀺 𑀲𑀜𑁆𑀚𑀸𑀦𑀸𑀢𑀻’’𑀢𑀺 (𑀫. 𑀦𑀺. 𑁧.𑁪𑁫𑁦) 𑀏𑀢𑀲𑁆𑀫𑀺𑀜𑁆𑀳𑀺 𑀞𑀸𑀦𑁂 𑀅𑀧𑁆𑀧𑀫𑀸𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀓𑀣𑀺𑀢𑀸. ‘‘𑀦𑀢𑁆𑀣𑀺 𑀓𑀺𑀜𑁆𑀘𑀻𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀦𑁆𑀢𑀺 𑀦𑁂𑀬𑁆𑀬’’𑀦𑁆𑀢𑀺 (𑀫. 𑀦𑀺. 𑁧.𑁪𑁫𑁧) 𑀏𑀢𑁆𑀣 𑀆𑀓𑀺𑀜𑁆𑀘𑀜𑁆𑀜𑀁. ‘‘𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀧𑀚𑀸𑀦𑀸𑀢𑀻’’𑀢𑀺 (𑀫. 𑀦𑀺. 𑁧.𑁪𑁫𑁧) 𑀏𑀢𑁆𑀣 𑀲𑀼𑀜𑁆𑀜𑀢𑀸. ‘‘𑀓𑀢𑀺 𑀧𑀦𑀸𑀯𑀼𑀲𑁄, 𑀧𑀘𑁆𑀘𑀬𑀸 𑀅𑀦𑀺𑀫𑀺𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀞𑀺𑀢𑀺𑀬𑀸 𑀯𑀼𑀝𑁆𑀞𑀸𑀦𑀸𑀬𑀸’’𑀢𑀺 𑀏𑀢𑁆𑀣 𑀅𑀦𑀺𑀫𑀺𑀢𑁆𑀢𑀸. 𑀏𑀯𑀁 𑀳𑁂𑀝𑁆𑀞𑀸 𑀓𑀣𑀺𑀢𑀸𑀯 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀏𑀓𑀢𑁄 𑀲𑀫𑁄𑀥𑀸𑀦𑁂𑀢𑁆𑀯𑀸 𑀧𑀼𑀘𑁆𑀙𑀢𑀺. 𑀢𑀁 𑀧𑀦 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀏𑀢𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀦𑀺𑀤𑁆𑀤𑀺𑀝𑁆𑀞𑀸𑀯𑀸𑀢𑀺 𑀯𑀢𑁆𑀯𑀸 𑀅𑀜𑁆𑀜𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀏𑀓𑀦𑀸𑀫𑀓𑀸 𑀅𑀢𑁆𑀣𑀺. 𑀏𑀓𑁄 𑀥𑀫𑁆𑀫𑁄 𑀘𑀢𑀼𑀦𑀸𑀫𑀓𑁄 𑀅𑀢𑁆𑀣𑀺, 𑀏𑀢𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀓𑀣𑀸𑀧𑁂𑀢𑀼𑀁 𑀇𑀥 𑀧𑀼𑀘𑁆𑀙𑀢𑀻𑀢𑀺 𑀅𑀝𑁆𑀞𑀓𑀣𑀸𑀬𑀁 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑀁. 𑀢𑀲𑁆𑀲𑀸 𑀯𑀺𑀲𑁆𑀲𑀚𑁆𑀚𑀦𑁂 𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, 𑀅𑀧𑁆𑀧𑀫𑀸𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀅𑀬𑀁 𑀨𑀭𑀡𑀅𑀧𑁆𑀧𑀫𑀸𑀡𑀢𑀸𑀬 𑀅𑀧𑁆𑀧𑀫𑀸𑀡𑀸 𑀦𑀸𑀫. 𑀅𑀬𑀜𑁆𑀳𑀺 𑀅𑀧𑁆𑀧𑀫𑀸𑀡𑁂 𑀯𑀸 𑀲𑀢𑁆𑀢𑁂 𑀨𑀭𑀢𑀺, 𑀏𑀓𑀲𑁆𑀫𑀺𑀫𑁆𑀧𑀺 𑀯𑀸 𑀲𑀢𑁆𑀢𑁂 𑀅𑀲𑁂𑀲𑁂𑀢𑁆𑀯𑀸 𑀨𑀭𑀢𑀺.

𑀅𑀬𑀁 𑀯𑀼𑀘𑁆𑀘𑀢𑀸𑀯𑀼𑀲𑁄, 𑀆𑀓𑀺𑀜𑁆𑀘𑀜𑁆𑀜𑀸𑀢𑀺 𑀆𑀭𑀫𑁆𑀫𑀡𑀓𑀺𑀜𑁆𑀘𑀦𑀲𑁆𑀲 𑀅𑀪𑀸𑀯𑀢𑁄 𑀆𑀓𑀺𑀜𑁆𑀘𑀜𑁆𑀜𑀸. 𑀅𑀢𑁆𑀢𑁂𑀦 𑀯𑀸𑀢𑀺 𑀅𑀢𑁆𑀢 𑀪𑀸𑀯𑀧𑁄𑀲𑀧𑀼𑀕𑁆𑀕𑀮𑀸𑀤𑀺𑀲𑀗𑁆𑀔𑀸𑀢𑁂𑀦 𑀅𑀢𑁆𑀢𑁂𑀦 𑀲𑀼𑀜𑁆𑀜𑀁. 𑀅𑀢𑁆𑀢𑀦𑀺𑀬𑁂𑀦 𑀯𑀸𑀢𑀺 𑀘𑀻𑀯𑀭𑀸𑀤𑀺𑀧𑀭𑀺𑀓𑁆𑀔𑀸𑀭𑀲𑀗𑁆𑀔𑀸𑀢𑁂𑀦 𑀅𑀢𑁆𑀢𑀦𑀺𑀬𑁂𑀦 𑀲𑀼𑀜𑁆𑀜𑀁. 𑀅𑀦𑀺𑀫𑀺𑀢𑁆𑀢𑀸𑀢𑀺 𑀭𑀸𑀕𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀅𑀪𑀸𑀯𑁂𑀦𑁂𑀯 𑀅𑀦𑀺𑀫𑀺𑀢𑁆𑀢𑀸, 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬𑀸𑀳. 𑀦𑀸𑀦𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘𑀸𑀢𑀺 𑀩𑁆𑀬𑀜𑁆𑀚𑀦𑀫𑁆𑀧𑀺 𑀦𑁂𑀲𑀁 𑀦𑀸𑀦𑀸 𑀅𑀢𑁆𑀣𑁄𑀧𑀺. 𑀢𑀢𑁆𑀣 𑀩𑁆𑀬𑀜𑁆𑀚𑀦𑀲𑁆𑀲 𑀦𑀸𑀦𑀢𑀸 𑀧𑀸𑀓𑀝𑀸𑀯. 𑀅𑀢𑁆𑀣𑁄 𑀧𑀦, 𑀅𑀧𑁆𑀧𑀫𑀸𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀪𑀽𑀫𑀦𑁆𑀢𑀭𑀢𑁄 𑀫𑀳𑀕𑁆𑀕𑀢𑀸 𑀏𑀯 𑀳𑁄𑀢𑀺 𑀭𑀽𑀧𑀸𑀯𑀘𑀭𑀸; 𑀆𑀭𑀫𑁆𑀫𑀡𑀢𑁄 𑀲𑀢𑁆𑀢 𑀧𑀜𑁆𑀜𑀢𑁆𑀢𑀺𑀆𑀭𑀫𑁆𑀫𑀡𑀸. 𑀆𑀓𑀺𑀜𑁆𑀘𑀜𑁆𑀜𑀸 𑀪𑀼𑀫𑁆𑀫𑀦𑁆𑀢𑀭𑀢𑁄 𑀫𑀳𑀕𑁆𑀕𑀢𑀸 𑀅𑀭𑀽𑀧𑀸𑀯𑀘𑀭𑀸; 𑀆𑀭𑀫𑁆𑀫𑀡𑀢𑁄 𑀦 𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸. 𑀲𑀼𑀜𑁆𑀜𑀢𑀸 𑀪𑀼𑀫𑁆𑀫𑀦𑁆𑀢𑀭𑀢𑁄 𑀓𑀸𑀫𑀸𑀯𑀘𑀭𑀸; 𑀆𑀭𑀫𑁆𑀫𑀡𑀢𑁄 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀸. 𑀯𑀺𑀧𑀲𑁆𑀲𑀦𑀸 𑀳𑀺 𑀏𑀢𑁆𑀣 𑀲𑀼𑀜𑁆𑀜𑀢𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀅𑀦𑀺𑀫𑀺𑀢𑁆𑀢𑀸 𑀪𑀼𑀫𑁆𑀫𑀦𑁆𑀢𑀭𑀢𑁄 𑀮𑁄𑀓𑀼𑀢𑁆𑀢𑀭𑀸; 𑀆𑀭𑀫𑁆𑀫𑀡𑀢𑁄 𑀦𑀺𑀩𑁆𑀩𑀦𑀸𑀭𑀫𑁆𑀫𑀡𑀸.

𑀭𑀸𑀕𑁄 𑀔𑁄, 𑀆𑀯𑀼𑀲𑁄, 𑀧𑀫𑀸𑀡𑀓𑀭𑀡𑁄𑀢𑀺𑀆𑀤𑀻𑀲𑀼 𑀬𑀣𑀸 𑀧𑀩𑁆𑀩𑀢𑀧𑀸𑀤𑁂 𑀧𑀽𑀢𑀺𑀧𑀡𑁆𑀡𑀭𑀲𑀉𑀤𑀓𑀁 𑀦𑀸𑀫 𑀳𑁄𑀢𑀺 𑀓𑀸𑀴𑀯𑀡𑁆𑀡𑀁; 𑀑𑀮𑁄𑀓𑁂𑀦𑁆𑀢𑀸𑀦𑀁 𑀩𑁆𑀬𑀸𑀫𑀲𑀢𑀕𑀫𑁆𑀪𑀻𑀭𑀁 𑀯𑀺𑀬 𑀔𑀸𑀬𑀢𑀺. 𑀬𑀝𑁆𑀞𑀺𑀁 𑀯𑀸 𑀭𑀚𑁆𑀚𑀼𑀁 𑀯𑀸 𑀕𑀳𑁂𑀢𑁆𑀯𑀸 𑀫𑀺𑀦𑀦𑁆𑀢𑀲𑁆𑀲 𑀧𑀺𑀝𑁆𑀞𑀺𑀧𑀸𑀤𑁄𑀢𑁆𑀣𑀭𑀡𑀫𑀢𑁆𑀢𑀫𑁆𑀧𑀺 𑀦 𑀳𑁄𑀢𑀺. 𑀏𑀯𑀫𑁂𑀯𑀁 𑀬𑀸𑀯 𑀭𑀸𑀕𑀸𑀤𑀬𑁄 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀢𑀸𑀯 𑀧𑀼𑀕𑁆𑀕𑀮𑀁 𑀲𑀜𑁆𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀦𑁆𑀢𑀺, 𑀲𑁄𑀢𑀸𑀧𑀦𑁆𑀦𑁄 𑀯𑀺𑀬, 𑀲𑀓𑀤𑀸𑀕𑀸𑀫𑀻 𑀯𑀺𑀬, 𑀅𑀦𑀸𑀕𑀸𑀫𑀻 𑀯𑀺𑀬 𑀘 𑀔𑀸𑀬𑀢𑀺. 𑀬𑀤𑀸 𑀧𑀦𑀲𑁆𑀲 𑀭𑀸𑀕𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀭𑀢𑁆𑀢𑁄 𑀤𑀼𑀝𑁆𑀞𑁄 𑀫𑀽𑀴𑁆𑀳𑁄𑀢𑀺 𑀧𑀜𑁆𑀜𑀸𑀬𑀢𑀺. 𑀇𑀢𑀺 𑀏𑀢𑁂 ‘‘𑀏𑀢𑁆𑀢𑀓𑁄 𑀅𑀬’’𑀦𑁆𑀢𑀺 𑀧𑀼𑀕𑁆𑀕𑀮𑀲𑁆𑀲 𑀧𑀫𑀸𑀡𑀁 𑀤𑀲𑁆𑀲𑁂𑀦𑁆𑀢𑁄 𑀯𑀺𑀬 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀫𑀸𑀡𑀓𑀭𑀡𑀸 𑀦𑀸𑀫 𑀯𑀼𑀢𑁆𑀢𑀸. 𑀬𑀸𑀯𑀢𑀸 𑀔𑁄, 𑀆𑀯𑀼𑀲𑁄, 𑀅𑀧𑁆𑀧𑀫𑀸𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑁄𑀢𑀺 𑀬𑀢𑁆𑀢𑀓𑀸 𑀅𑀧𑁆𑀧𑀫𑀸𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑁄. 𑀓𑀺𑀢𑁆𑀢𑀓𑀸 𑀧𑀦 𑀢𑀸? 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸, 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀘 𑀨𑀮𑀸𑀦𑀻𑀢𑀺 𑀤𑁆𑀯𑀸𑀤𑀲. 𑀢𑀢𑁆𑀣 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀨𑀭𑀡𑀅𑀧𑁆𑀧𑀫𑀸𑀡𑀢𑀸𑀬 𑀅𑀧𑁆𑀧𑀫𑀸𑀡𑀸. 𑀲𑁂𑀲𑀸 𑀧𑀫𑀸𑀡𑀓𑀭𑀡𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑁂𑀦 𑀅𑀧𑁆𑀧𑀫𑀸𑀡𑀸. 𑀦𑀺𑀩𑁆𑀩𑀸𑀦𑀫𑁆𑀧𑀺 𑀅𑀧𑁆𑀧𑀫𑀸𑀡𑀫𑁂𑀯, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀧𑀦 𑀦 𑀳𑁄𑀢𑀺, 𑀢𑀲𑁆𑀫𑀸 𑀦 𑀕𑀳𑀺𑀢𑀁. 𑀅𑀓𑀼𑀧𑁆𑀧𑀸𑀢𑀺 𑀅𑀭𑀳𑀢𑁆𑀢𑀨𑀮𑀘𑁂𑀢𑁄𑀯𑀺𑀫𑀼𑀢𑁆𑀢𑀺; 𑀲𑀸 𑀳𑀺 𑀢𑀸𑀲𑀁 𑀲𑀩𑁆𑀩𑀚𑁂𑀝𑁆𑀞𑀺𑀓𑀸, 𑀢𑀲𑁆𑀫𑀸 𑀅𑀕𑁆𑀕𑀫𑀓𑁆𑀔𑀸𑀬𑀢𑀻𑀢𑀺 𑀯𑀼𑀢𑁆𑀢𑀸. 𑀭𑀸𑀕𑁄 𑀔𑁄, 𑀆𑀯𑀼𑀲𑁄, 𑀓𑀺𑀜𑁆𑀘𑀦𑁄𑀢𑀺 𑀭𑀸𑀕𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀼𑀕𑁆𑀕𑀮𑀁 𑀓𑀺𑀜𑁆𑀘𑀢𑀺 𑀫𑀤𑁆𑀤𑀢𑀺 𑀧𑀮𑀺𑀩𑀼𑀦𑁆𑀥𑀢𑀺. 𑀢𑀲𑁆𑀫𑀸 𑀓𑀺𑀜𑁆𑀘𑀦𑁄𑀢𑀺 𑀯𑀼𑀢𑁆𑀢𑁄. 𑀫𑀦𑀼𑀲𑁆𑀲𑀸 𑀓𑀺𑀭 𑀕𑁄𑀡𑁂𑀳𑀺 𑀔𑀮𑀁 𑀫𑀤𑁆𑀤𑀸𑀧𑁂𑀦𑁆𑀢𑁄 𑀓𑀺𑀜𑁆𑀘𑁂𑀳𑀺 𑀓𑀧𑀺𑀮, 𑀓𑀺𑀜𑁆𑀘𑁂𑀳𑀺 𑀓𑀸𑀴𑀓𑀸𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀫𑀤𑁆𑀤𑀦𑀢𑁆𑀣𑁄 𑀓𑀺𑀜𑁆𑀘𑀦𑀢𑁆𑀣𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀤𑁄𑀲𑀫𑁄𑀳𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀆𑀓𑀺𑀜𑁆𑀘𑀜𑁆𑀜𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑁄 𑀦𑀸𑀫 𑀦𑀯 𑀥𑀫𑁆𑀫𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀜𑁆𑀘 𑀫𑀕𑁆𑀕𑀨𑀮𑀸𑀦𑀺 𑀘. 𑀢𑀢𑁆𑀣 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀓𑀺𑀜𑁆𑀘𑀦𑀁 𑀆𑀭𑀫𑁆𑀫𑀡𑀁 𑀅𑀲𑁆𑀲 𑀦𑀢𑁆𑀣𑀻𑀢𑀺 𑀆𑀓𑀺𑀜𑁆𑀘𑀜𑁆𑀜𑀁. 𑀫𑀕𑁆𑀕𑀨𑀮𑀸𑀦𑀺 𑀓𑀺𑀜𑁆𑀘𑀦𑀸𑀦𑀁 𑀫𑀤𑁆𑀤𑀦𑀸𑀦𑀁 𑀧𑀮𑀺𑀩𑀼𑀦𑁆𑀥𑀦𑀓𑀺𑀮𑁂𑀲𑀸𑀦𑀁 𑀦𑀢𑁆𑀣𑀺𑀢𑀸𑀬 𑀆𑀓𑀺𑀜𑁆𑀘𑀜𑁆𑀜𑀸𑀦𑀺. 𑀦𑀺𑀩𑁆𑀩𑀸𑀦𑀫𑁆𑀧𑀺 𑀆𑀓𑀺𑀜𑁆𑀘𑀜𑁆𑀜𑀁, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀧𑀦 𑀦 𑀳𑁄𑀢𑀺, 𑀢𑀲𑁆𑀫𑀸 𑀦 𑀕𑀳𑀺𑀢𑀁.

𑀭𑀸𑀕𑁄 𑀔𑁄, 𑀆𑀯𑀼𑀲𑁄, 𑀦𑀺𑀫𑀺𑀢𑁆𑀢𑀓𑀭𑀡𑁄𑀢𑀺𑀆𑀤𑀻𑀲𑀼 𑀬𑀣𑀸 𑀦𑀸𑀫 𑀤𑁆𑀯𑀺𑀦𑁆𑀦𑀁 𑀓𑀼𑀮𑀸𑀦𑀁 𑀲𑀤𑀺𑀲𑀸 𑀤𑁆𑀯𑁂 𑀯𑀘𑁆𑀙𑀓𑀸 𑀳𑁄𑀦𑁆𑀢𑀺. 𑀬𑀸𑀯 𑀢𑁂𑀲𑀁 𑀮𑀓𑁆𑀔𑀡𑀁 𑀦 𑀓𑀢𑀁 𑀳𑁄𑀢𑀺, 𑀢𑀸𑀯 ‘‘𑀅𑀬𑀁 𑀅𑀲𑀼𑀓𑀓𑀼𑀮𑀲𑁆𑀲 𑀯𑀘𑁆𑀙𑀓𑁄, 𑀅𑀬𑀁 𑀅𑀲𑀼𑀓𑀓𑀼𑀮𑀲𑁆𑀲𑀸’’𑀢𑀺 𑀦 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀚𑀸𑀦𑀺𑀢𑀼𑀁. 𑀬𑀤𑀸 𑀧𑀦 𑀢𑁂𑀲𑀁 𑀲𑀢𑁆𑀢𑀺𑀲𑀽𑀮𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀮𑀓𑁆𑀔𑀡𑀁 𑀓𑀢𑀁 𑀳𑁄𑀢𑀺, 𑀢𑀤𑀸 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀚𑀸𑀦𑀺𑀢𑀼𑀁. 𑀏𑀯𑀫𑁂𑀯 𑀬𑀸𑀯 𑀧𑀼𑀕𑁆𑀕𑀮𑀲𑁆𑀲 𑀭𑀸𑀕𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀸𑀯 𑀦 𑀲𑀓𑁆𑀓𑀸 𑀳𑁄𑀢𑀺 𑀚𑀸𑀦𑀺𑀢𑀼𑀁 𑀅𑀭𑀺𑀬𑁄 𑀯𑀸 𑀧𑀼𑀣𑀼𑀚𑁆𑀚𑀦𑁄 𑀯𑀸𑀢𑀺. 𑀭𑀸𑀕𑁄 𑀧𑀦𑀲𑁆𑀲 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀲𑀭𑀸𑀕𑁄 𑀦𑀸𑀫 𑀅𑀬𑀁 𑀧𑀼𑀕𑁆𑀕𑀮𑁄𑀢𑀺 𑀲𑀜𑁆𑀚𑀸𑀦𑀦𑀦𑀺𑀫𑀺𑀢𑁆𑀢𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 ‘‘𑀦𑀺𑀫𑀺𑀢𑁆𑀢𑀓𑀭𑀡𑁄’’𑀢𑀺 𑀯𑀼𑀢𑁆𑀢𑁄. 𑀤𑁄𑀲𑀫𑁄𑀳𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀅𑀦𑀺𑀫𑀺𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀦𑀸𑀫 𑀢𑁂𑀭𑀲 𑀥𑀫𑁆𑀫𑀸 𑁋 𑀯𑀺𑀧𑀲𑁆𑀲𑀦𑀸, 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸, 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀘 𑀨𑀮𑀸𑀦𑀻𑀢𑀺. 𑀢𑀢𑁆𑀣 𑀯𑀺𑀧𑀲𑁆𑀲𑀦𑀸 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀁 𑀲𑀼𑀔𑀦𑀺𑀫𑀺𑀢𑁆𑀢𑀁 𑀅𑀢𑁆𑀢𑀦𑀺𑀫𑀺𑀢𑁆𑀢𑀁 𑀉𑀕𑁆𑀖𑀸𑀝𑁂𑀢𑀻𑀢𑀺 𑀅𑀦𑀺𑀫𑀺𑀢𑁆𑀢𑀸 𑀦𑀸𑀫. 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸 𑀭𑀽𑀧𑀦𑀺𑀫𑀺𑀢𑁆𑀢𑀲𑁆𑀲 𑀅𑀪𑀸𑀯𑁂𑀦 𑀅𑀦𑀺𑀫𑀺𑀢𑁆𑀢𑀸 𑀦𑀸𑀫. 𑀫𑀕𑁆𑀕𑀨𑀮𑀸𑀦𑀺 𑀦𑀺𑀫𑀺𑀢𑁆𑀢𑀓𑀭𑀡𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑁂𑀦 𑀅𑀦𑀺𑀫𑀺𑀢𑁆𑀢𑀸𑀦𑀺. 𑀦𑀺𑀩𑁆𑀩𑀸𑀦𑀫𑁆𑀧𑀺 𑀅𑀦𑀺𑀫𑀺𑀢𑁆𑀢𑀫𑁂𑀯, 𑀢𑀁 𑀧𑀦 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀦 𑀳𑁄𑀢𑀺, 𑀢𑀲𑁆𑀫𑀸 𑀦 𑀕𑀳𑀺𑀢𑀁. 𑀅𑀣 𑀓𑀲𑁆𑀫𑀸 𑀲𑀼𑀜𑁆𑀜𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀦 𑀕𑀳𑀺𑀢𑀸𑀢𑀺? 𑀲𑀸, ‘‘𑀲𑀼𑀜𑁆𑀜𑀸 𑀭𑀸𑀕𑁂𑀦𑀸’’𑀢𑀺𑀆𑀤𑀺𑀯𑀘𑀦𑀢𑁄 𑀲𑀩𑁆𑀩𑀢𑁆𑀣 𑀅𑀦𑀼𑀧𑀯𑀺𑀝𑁆𑀞𑀸𑀯, 𑀢𑀲𑁆𑀫𑀸 𑀯𑀺𑀲𑀼𑀁 𑀦 𑀕𑀳𑀺𑀢𑀸. 𑀏𑀓𑀢𑁆𑀣𑀸𑀢𑀺 𑀆𑀭𑀫𑁆𑀫𑀡𑀯𑀲𑁂𑀦 𑀏𑀓𑀢𑁆𑀣𑀸. 𑀅𑀧𑁆𑀧𑀫𑀸𑀡𑀁 𑀆𑀓𑀺𑀜𑁆𑀘𑀜𑁆𑀜𑀁 𑀲𑀼𑀜𑁆𑀜𑀢𑀁 𑀅𑀦𑀺𑀫𑀺𑀢𑁆𑀢𑀦𑁆𑀢𑀺 𑀳𑀺 𑀲𑀩𑁆𑀩𑀸𑀦𑁂𑀢𑀸𑀦𑀺 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀦𑀸𑀫𑀸𑀦𑀺. 𑀇𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀏𑀓𑀢𑁆𑀣𑀸. 𑀅𑀜𑁆𑀜𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀅𑀧𑁆𑀧𑀫𑀸𑀡𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀲𑁆𑀫𑀺𑀁 𑀆𑀓𑀺𑀜𑁆𑀘𑀜𑁆𑀜𑀸 𑀅𑀜𑁆𑀜𑀲𑁆𑀫𑀺𑀁 𑀲𑀼𑀜𑁆𑀜𑀢𑀸 𑀅𑀜𑁆𑀜𑀲𑁆𑀫𑀺𑀁 𑀅𑀦𑀺𑀫𑀺𑀢𑁆𑀢𑀸𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀦𑀸𑀦𑀸𑀩𑁆𑀬𑀜𑁆𑀚𑀦𑀸. 𑀇𑀢𑀺 𑀣𑁂𑀭𑁄 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀳𑀸𑀯𑁂𑀤𑀮𑁆𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀽𑀴𑀯𑁂𑀤𑀮𑁆𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁬𑁦. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀘𑀽𑀴𑀯𑁂𑀤𑀮𑁆𑀮𑀲𑀼𑀢𑁆𑀢𑀁. 𑀢𑀢𑁆𑀣 𑀯𑀺𑀲𑀸𑀔𑁄 𑀉𑀧𑀸𑀲𑀓𑁄𑀢𑀺 𑀯𑀺𑀲𑀸𑀔𑁄𑀢𑀺 𑀏𑀯𑀁𑀦𑀸𑀫𑀓𑁄 𑀉𑀧𑀸𑀲𑀓𑁄. 𑀬𑁂𑀦 𑀥𑀫𑁆𑀫𑀤𑀺𑀦𑁆𑀦𑀸𑀢𑀺 𑀬𑁂𑀦 𑀥𑀫𑁆𑀫𑀤𑀺𑀦𑁆𑀦𑀸 𑀦𑀸𑀫 𑀪𑀺𑀓𑁆𑀔𑀼𑀦𑀻 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀓𑁄 𑀧𑀦𑀸𑀬𑀁 𑀯𑀺𑀲𑀸𑀔𑁄? 𑀓𑀸 𑀥𑀫𑁆𑀫𑀤𑀺𑀦𑁆𑀦𑀸? 𑀓𑀲𑁆𑀫𑀸 𑀉𑀧𑀲𑀗𑁆𑀓𑀫𑀻𑀢𑀺? 𑀯𑀺𑀲𑀸𑀔𑁄 𑀦𑀸𑀫 𑀥𑀫𑁆𑀫𑀤𑀺𑀦𑁆𑀦𑀸𑀬 𑀕𑀺𑀳𑀺𑀓𑀸𑀮𑁂 𑀖𑀭𑀲𑀸𑀫𑀺𑀓𑁄. 𑀲𑁄 𑀬𑀤𑀸 𑀪𑀕𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀧𑀯𑀢𑁆𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀬𑀲𑀸𑀤𑀬𑁄 𑀓𑀼𑀮𑀧𑀼𑀢𑁆𑀢𑁂 𑀯𑀺𑀦𑁂𑀢𑁆𑀯𑀸 𑀉𑀭𑀼𑀯𑁂𑀮𑀁 𑀧𑀢𑁆𑀯𑀸 𑀢𑀢𑁆𑀣 𑀚𑀝𑀺𑀮𑀲𑀳𑀲𑁆𑀲𑀁 𑀯𑀺𑀦𑁂𑀢𑁆𑀯𑀸 𑀧𑀼𑀭𑀸𑀡𑀚𑀝𑀺𑀮𑁂𑀳𑀺 𑀔𑀻𑀡𑀸𑀲𑀯𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀩𑀼𑀤𑁆𑀥𑀤𑀲𑁆𑀲𑀦𑀢𑁆𑀣𑀁 𑀤𑁆𑀯𑀸𑀤𑀲𑀦𑀳𑀼𑀢𑀸𑀬 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀆𑀕𑀢𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀫𑀳𑀸𑀭𑀸𑀚𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀤𑀸 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀆𑀕𑀢𑁂𑀲𑀼 𑀤𑁆𑀯𑀸𑀤𑀲𑀦𑀳𑀼𑀢𑁂𑀲𑀼 𑀏𑀓𑀁 𑀦𑀳𑀼𑀢𑀁 𑀉𑀧𑀸𑀲𑀓𑀢𑁆𑀢𑀁 𑀧𑀝𑀺𑀯𑁂𑀤𑁂𑀲𑀺, 𑀏𑀓𑀸𑀤𑀲 𑀦𑀳𑀼𑀢𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼 𑀲𑀤𑁆𑀥𑀺𑀁 𑀭𑀜𑁆𑀜𑀸 𑀩𑀺𑀫𑁆𑀩𑀺𑀲𑀸𑀭𑁂𑀦. 𑀅𑀬𑀁 𑀉𑀧𑀸𑀲𑀓𑁄 𑀢𑁂𑀲𑀁 𑀅𑀜𑁆𑀜𑀢𑀭𑁄, 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀞𑀫𑀤𑀲𑁆𑀲𑀦𑁂𑀯 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬, 𑀧𑀼𑀦 𑀏𑀓𑀤𑀺𑀯𑀲𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑀁 𑀧𑀢𑁆𑀯𑀸, 𑀢𑀢𑁄 𑀅𑀧𑀭𑀪𑀸𑀕𑁂𑀧𑀺 𑀏𑀓𑀤𑀺𑀯𑀲𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁄. 𑀲𑁄 𑀅𑀦𑀸𑀕𑀸𑀫𑀻 𑀳𑀼𑀢𑁆𑀯𑀸 𑀕𑁂𑀳𑀁 𑀆𑀕𑀘𑁆𑀙𑀦𑁆𑀢𑁄 𑀬𑀣𑀸 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀲𑀺𑀢𑀁 𑀓𑀼𑀭𑀼𑀫𑀸𑀦𑁄 𑀆𑀕𑀘𑁆𑀙𑀢𑀺, 𑀏𑀯𑀁 𑀅𑀦𑀸𑀕𑀦𑁆𑀢𑁆𑀯𑀸 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑁄 𑀲𑀦𑁆𑀢𑀫𑀸𑀦𑀲𑁄 𑀳𑀼𑀢𑁆𑀯𑀸 𑀅𑀕𑀫𑀸𑀲𑀺.

𑀥𑀫𑁆𑀫𑀤𑀺𑀦𑁆𑀦𑀸 𑀲𑀻𑀳𑀧𑀜𑁆𑀚𑀭𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀯𑀻𑀣𑀺𑀁 𑀑𑀮𑁄𑀓𑀬𑀫𑀸𑀦𑀸 𑀢𑀲𑁆𑀲 𑀆𑀕𑀫𑀦𑀸𑀓𑀸𑀭𑀁 𑀤𑀺𑀲𑁆𑀯𑀸, ‘‘𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀼𑀭𑀼𑀫𑀸𑀦𑀸 𑀲𑁄𑀧𑀸𑀦𑀲𑀻𑀲𑁂 𑀞𑀢𑁆𑀯𑀸 𑀑𑀮𑀫𑁆𑀩𑀦𑀢𑁆𑀣𑀁 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀉𑀧𑀸𑀲𑀓𑁄 𑀅𑀢𑁆𑀢𑀦𑁄 𑀳𑀢𑁆𑀣𑀁 𑀲𑀫𑀺𑀜𑁆𑀚𑁂𑀲𑀺. 𑀲𑀸 ‘‘𑀧𑀸𑀢𑀭𑀸𑀲𑀪𑁄𑀚𑀦𑀓𑀸𑀮𑁂 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀉𑀧𑀸𑀲𑀓𑁄 𑀧𑀼𑀩𑁆𑀩𑁂 𑀢𑀸𑀬 𑀲𑀤𑁆𑀥𑀺𑀁 𑀏𑀓𑀢𑁄 𑀪𑀼𑀜𑁆𑀚𑀢𑀺. 𑀢𑀁 𑀤𑀺𑀯𑀲𑀁 𑀧𑀦 𑀢𑀁 𑀅𑀦𑀧𑀮𑁄𑀓𑁂𑀢𑁆𑀯𑀸 𑀬𑁄𑀕𑀸𑀯𑀘𑀭𑀪𑀺𑀓𑁆𑀔𑀼 𑀯𑀺𑀬 𑀏𑀓𑀓𑁄𑀯 𑀪𑀼𑀜𑁆𑀚𑀺. 𑀲𑀸, ‘‘𑀲𑀸𑀬𑀦𑁆𑀳𑀓𑀸𑀮𑁂 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀉𑀧𑀸𑀲𑀓𑁄 𑀢𑀁𑀤𑀺𑀯𑀲𑀁 𑀲𑀺𑀭𑀺𑀕𑀩𑁆𑀪𑀁 𑀦 𑀧𑀸𑀯𑀺𑀲𑀺, 𑀅𑀜𑁆𑀜𑀁 𑀕𑀩𑁆𑀪𑀁 𑀧𑀝𑀺𑀚𑀕𑁆𑀕𑀸𑀧𑁂𑀢𑁆𑀯𑀸 𑀓𑀧𑁆𑀧𑀺𑀬𑀫𑀜𑁆𑀘𑀓𑀁 𑀧𑀜𑁆𑀜𑀧𑀸𑀧𑁂𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀉𑀧𑀸𑀲𑀺𑀓𑀸, ‘‘𑀓𑀺𑀁 𑀦𑀼 𑀔𑁆𑀯𑀲𑁆𑀲 𑀩𑀳𑀺𑀤𑁆𑀥𑀸 𑀧𑀢𑁆𑀣𑀦𑀸 𑀅𑀢𑁆𑀣𑀺, 𑀉𑀤𑀸𑀳𑀼 𑀓𑁂𑀦𑀘𑀺𑀤𑁂𑀯 𑀧𑀭𑀺𑀪𑁂𑀤𑀓𑁂𑀦 𑀪𑀺𑀦𑁆𑀦𑁄, 𑀉𑀤𑀸𑀳𑀼 𑀫𑀬𑁆𑀳𑁂𑀯 𑀓𑁄𑀘𑀺 𑀤𑁄𑀲𑁄 𑀅𑀢𑁆𑀣𑀻’’𑀢𑀺 𑀩𑀮𑀯𑀤𑁄𑀫𑀦𑀲𑁆𑀲𑀸 𑀳𑀼𑀢𑁆𑀯𑀸, ‘‘𑀏𑀓𑀁 𑀤𑁆𑀯𑁂 𑀤𑀺𑀯𑀲𑁂 𑀯𑀲𑀺𑀢𑀓𑀸𑀮𑁂 𑀲𑀓𑁆𑀓𑀸 𑀜𑀸𑀢𑀼’’𑀦𑁆𑀢𑀺 𑀢𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺.

𑀉𑀧𑀸𑀲𑀓𑁄, ‘‘𑀓𑀺𑀁 𑀥𑀫𑁆𑀫𑀤𑀺𑀦𑁆𑀦𑁂 𑀅𑀓𑀸𑀮𑁂 𑀆𑀕𑀢𑀸𑀲𑀻’’𑀢𑀺 𑀧𑀼𑀘𑁆𑀙𑀺. 𑀆𑀫 𑀅𑀬𑁆𑀬𑀧𑀼𑀢𑁆𑀢, 𑀆𑀕𑀢𑀸𑀫𑁆𑀳𑀺, 𑀦 𑀢𑁆𑀯𑀁 𑀬𑀣𑀸 𑀧𑀼𑀭𑀸𑀡𑁄, 𑀓𑀺𑀁 𑀦𑀼 𑀢𑁂 𑀩𑀳𑀺𑀤𑁆𑀥𑀸 𑀧𑀢𑁆𑀣𑀦𑀸 𑀅𑀢𑁆𑀣𑀻𑀢𑀺? 𑀦𑀢𑁆𑀣𑀺 𑀥𑀫𑁆𑀫𑀤𑀺𑀦𑁆𑀦𑁂𑀢𑀺. 𑀅𑀜𑁆𑀜𑁄 𑀓𑁄𑀘𑀺 𑀧𑀭𑀺𑀪𑁂𑀤𑀓𑁄 𑀅𑀢𑁆𑀣𑀻𑀢𑀺? 𑀅𑀬𑀫𑁆𑀧𑀺 𑀦𑀢𑁆𑀣𑀻𑀢𑀺. 𑀏𑀯𑀁 𑀲𑀦𑁆𑀢𑁂 𑀫𑀬𑁆𑀳𑁂𑀯 𑀓𑁄𑀘𑀺 𑀤𑁄𑀲𑁄 𑀪𑀯𑀺𑀲𑁆𑀲𑀢𑀻𑀢𑀺. 𑀢𑀼𑀬𑁆𑀳𑀫𑁆𑀧𑀺 𑀤𑁄𑀲𑁄 𑀦𑀢𑁆𑀣𑀻𑀢𑀺. 𑀅𑀣 𑀓𑀲𑁆𑀫𑀸 𑀫𑀬𑀸 𑀲𑀤𑁆𑀥𑀺𑀁 𑀬𑀣𑀸 𑀧𑀓𑀢𑀺𑀬𑀸 𑀆𑀮𑀸𑀧𑀲𑀮𑁆𑀮𑀸𑀧𑀫𑀢𑁆𑀢𑀫𑁆𑀧𑀺 𑀦 𑀓𑀭𑁄𑀣𑀸𑀢𑀺? 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀦𑀸𑀫 𑀕𑀭𑀼 𑀪𑀸𑀭𑀺𑀬𑁄 𑀦 𑀧𑀓𑀸𑀲𑁂𑀢𑀢𑀩𑁆𑀩𑁄, 𑀲𑀘𑁂 𑀔𑁄 𑀧𑀦𑀸𑀳𑀁 𑀦 𑀓𑀣𑁂𑀲𑁆𑀲𑀸𑀫𑀺, 𑀅𑀬𑀁 𑀳𑀤𑀬𑀁 𑀨𑀸𑀮𑁂𑀢𑁆𑀯𑀸 𑀏𑀢𑁆𑀣𑁂𑀯 𑀓𑀸𑀮𑀁 𑀓𑀭𑁂𑀬𑁆𑀬𑀸’’𑀢𑀺 𑀢𑀲𑁆𑀲𑀸𑀦𑀼𑀕𑁆𑀕𑀳𑀢𑁆𑀣𑀸𑀬 𑀓𑀣𑁂𑀲𑀺 𑁋 ‘‘𑀥𑀫𑁆𑀫𑀤𑀺𑀦𑁆𑀦𑁂 𑀅𑀳𑀁 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀸𑀫 𑀅𑀥𑀺𑀕𑀢𑁄, 𑀢𑀁 𑀅𑀥𑀺𑀕𑀢𑀲𑁆𑀲 𑀏𑀯𑀭𑀽𑀧𑀸 𑀮𑁄𑀓𑀺𑀬𑀓𑀺𑀭𑀺𑀬𑀸 𑀦 𑀯𑀝𑁆𑀝𑀢𑀺. 𑀬𑀤𑀺 𑀢𑁆𑀯𑀁 𑀇𑀘𑁆𑀙𑀲𑀺, 𑀢𑀯 𑀘𑀢𑁆𑀢𑀸𑀮𑀻𑀲 𑀓𑁄𑀝𑀺𑀬𑁄 𑀫𑀫 𑀘𑀢𑁆𑀢𑀸𑀮𑀻𑀲 𑀓𑁄𑀝𑀺𑀬𑁄𑀢𑀺 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀅𑀢𑁆𑀣𑀺, 𑀏𑀢𑁆𑀣 𑀇𑀲𑁆𑀲𑀭𑀸 𑀳𑀼𑀢𑁆𑀯𑀸 𑀫𑀫 𑀫𑀸𑀢𑀺𑀝𑁆𑀞𑀸𑀦𑁂 𑀯𑀸 𑀪𑀕𑀺𑀦𑀺𑀝𑁆𑀞𑀸𑀦𑁂 𑀯𑀸 𑀞𑀢𑁆𑀯𑀸 𑀯𑀲. 𑀢𑀬𑀸 𑀤𑀺𑀦𑁆𑀦𑁂𑀦 𑀪𑀢𑁆𑀢𑀧𑀺𑀡𑁆𑀟𑀫𑀢𑁆𑀢𑀓𑁂𑀦 𑀅𑀳𑀁 𑀬𑀸𑀧𑁂𑀲𑁆𑀲𑀸𑀫𑀺. 𑀅𑀣𑁂𑀯𑀁 𑀦 𑀓𑀭𑁄𑀲𑀺, 𑀇𑀫𑁂 𑀪𑁄𑀕𑁂 𑀕𑀳𑁂𑀢𑁆𑀯𑀸 𑀓𑀼𑀮𑀕𑁂𑀳𑀁 𑀕𑀘𑁆𑀙, 𑀅𑀣𑀸𑀧𑀺 𑀢𑁂 𑀩𑀳𑀺𑀤𑁆𑀥𑀸 𑀧𑀢𑁆𑀣𑀦𑀸 𑀦𑀢𑁆𑀣𑀺, 𑀅𑀳𑀁 𑀢𑀁 𑀪𑀕𑀺𑀦𑀺𑀝𑁆𑀞𑀸𑀦𑁂 𑀯𑀸 𑀥𑀺𑀢𑀼𑀝𑁆𑀞𑀸𑀦𑁂 𑀯𑀸 𑀞𑀧𑁂𑀢𑁆𑀯𑀸 𑀧𑁄𑀲𑁂𑀲𑁆𑀲𑀸𑀫𑀻’’𑀢𑀺.

𑀲𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀓𑀢𑀺𑀧𑀼𑀭𑀺𑀲𑁄 𑀏𑀯𑀁 𑀯𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺. 𑀅𑀤𑁆𑀥𑀸 𑀏𑀢𑁂𑀦 𑀮𑁄𑀓𑀼𑀢𑁆𑀢𑀭𑀯𑀭𑀥𑀫𑁆𑀫𑁄 𑀧𑀝𑀺𑀯𑀺𑀤𑁆𑀥𑁄. 𑀲𑁄 𑀧𑀦 𑀥𑀫𑁆𑀫𑁄 𑀓𑀺𑀁 𑀧𑀼𑀭𑀺𑀲𑁂𑀳𑁂𑀯 𑀧𑀝𑀺𑀩𑀼𑀚𑁆𑀛𑀺𑀢𑀩𑁆𑀩𑁄, 𑀉𑀤𑀸𑀳𑀼 𑀫𑀸𑀢𑀼𑀕𑀸𑀫𑁄𑀧𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀓𑁆𑀓𑁄𑀢𑀻’’𑀢𑀺 𑀯𑀺𑀲𑀸𑀔𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄 𑀏𑀲𑁄 𑀥𑀫𑁆𑀫𑁄 𑀧𑀼𑀭𑀺𑀲𑁂𑀳𑁂𑀯 𑀮𑀪𑀺𑀢𑀩𑁆𑀩𑁄, 𑀫𑀸𑀢𑀼𑀕𑀸𑀫𑁂𑀦𑀧𑀺 𑀲𑀓𑁆𑀓𑀸 𑀮𑀤𑁆𑀥𑀼’’𑀦𑁆𑀢𑀺? 𑀓𑀺𑀁 𑀯𑀤𑁂𑀲𑀺 𑀥𑀫𑁆𑀫𑀤𑀺𑀦𑁆𑀦𑁂, 𑀬𑁂 𑀧𑀝𑀺𑀧𑀦𑁆𑀦𑀓𑀸, 𑀢𑁂 𑀏𑀢𑀲𑁆𑀲 𑀤𑀸𑀬𑀸𑀤𑀸, 𑀬𑀲𑁆𑀲 𑀬𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀅𑀢𑁆𑀣𑀺, 𑀲𑁄 𑀲𑁄 𑀏𑀢𑀁 𑀧𑀝𑀺𑀮𑀪𑀢𑀻𑀢𑀺. 𑀏𑀯𑀁 𑀲𑀦𑁆𑀢𑁂 𑀫𑀬𑁆𑀳𑀁 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀣𑀸𑀢𑀺. 𑀲𑀸𑀥𑀼 𑀪𑀤𑁆𑀤𑁂, 𑀅𑀳𑀫𑁆𑀧𑀺 𑀢𑀁 𑀏𑀢𑀲𑁆𑀫𑀺𑀁𑀬𑁂𑀯 𑀫𑀕𑁆𑀕𑁂 𑀬𑁄𑀚𑁂𑀢𑀼𑀓𑀸𑀫𑁄, 𑀫𑀦𑀁 𑀧𑀦 𑀢𑁂 𑀅𑀚𑀸𑀦𑀫𑀸𑀦𑁄 𑀦 𑀓𑀣𑁂𑀫𑀻𑀢𑀺 𑀢𑀸𑀯𑀤𑁂𑀯 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺.

𑀭𑀸𑀚𑀸, ‘‘𑀓𑀺𑀁, 𑀕𑀳𑀧𑀢𑀺, 𑀅𑀓𑀸𑀮𑁂 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. 𑀥𑀫𑁆𑀫𑀤𑀺𑀦𑁆𑀦𑀸, ‘‘𑀫𑀳𑀸𑀭𑀸𑀚, 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀢𑀻𑀢𑀺. 𑀓𑀺𑀁 𑀧𑀦𑀲𑁆𑀲 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻𑀢𑀺? 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀦𑀢𑁆𑀣𑀺, 𑀲𑁄𑀯𑀡𑁆𑀡𑀲𑀺𑀯𑀺𑀓𑀁 𑀤𑁂𑀯, 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺 𑀦𑀕𑀭𑀜𑁆𑀘 𑀧𑀝𑀺𑀚𑀕𑁆𑀕𑀸𑀧𑁂𑀢𑀼𑀦𑁆𑀢𑀺. 𑀭𑀸𑀚𑀸 𑀲𑁄𑀯𑀡𑁆𑀡𑀲𑀺𑀯𑀺𑀓𑀁 𑀤𑀢𑁆𑀯𑀸 𑀦𑀕𑀭𑀁 𑀧𑀝𑀺𑀚𑀕𑁆𑀕𑀸𑀧𑁂𑀲𑀺. 𑀯𑀺𑀲𑀸𑀔𑁄 𑀥𑀫𑁆𑀫𑀤𑀺𑀦𑁆𑀦𑀁 𑀕𑀦𑁆𑀥𑁄𑀤𑀓𑁂𑀦 𑀦𑀳𑀸𑀧𑁂𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀳𑀺 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀲𑁄𑀯𑀡𑁆𑀡𑀲𑀺𑀯𑀺𑀓𑀸𑀬 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀜𑀸𑀢𑀺𑀕𑀡𑁂𑀦 𑀧𑀭𑀺𑀯𑀸𑀭𑀸𑀧𑁂𑀢𑁆𑀯𑀸 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑁄 𑀦𑀕𑀭𑀯𑀸𑀲𑀦𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸, ‘‘𑀥𑀫𑁆𑀫𑀤𑀺𑀦𑁆𑀦𑀁 𑀧𑀩𑁆𑀩𑀸𑀚𑁂𑀣𑀸𑀬𑁆𑀬𑁂’’𑀢𑀺 𑀆𑀳. 𑀪𑀺𑀓𑁆𑀔𑀼𑀦𑀺𑀬𑁄 ‘‘𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀤𑁄𑀲𑁂 𑀲𑀳𑀺𑀢𑀼𑀁 𑀯𑀝𑁆𑀝𑀢𑀺 𑀕𑀳𑀧𑀢𑀻’’𑀢𑀺 𑀆𑀳𑀁𑀲𑀼. 𑀦𑀢𑁆𑀣𑀬𑁆𑀬𑁂 𑀓𑁄𑀘𑀺 𑀤𑁄𑀲𑁄, 𑀲𑀤𑁆𑀥𑀸𑀬 𑀧𑀩𑁆𑀩𑀚𑀢𑀻𑀢𑀺. 𑀅𑀣𑁂𑀓𑀸 𑀩𑁆𑀬𑀢𑁆𑀢𑀸 𑀣𑁂𑀭𑀻 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀓𑁂𑀲𑁂 𑀑𑀳𑀸𑀭𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀯𑀺𑀲𑀸𑀔𑁄, ‘‘𑀅𑀪𑀺𑀭𑀫𑀬𑁆𑀬𑁂, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄’’𑀢𑀺 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀢𑀲𑁆𑀲𑀸 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀺. 𑀢𑁂𑀦𑁂𑀯 𑀧𑀮𑀺𑀩𑀼𑀤𑁆𑀥𑀸 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀑𑀓𑀸𑀲𑀁 𑀦 𑀮𑀪𑀢𑀺. 𑀅𑀣𑀸𑀘𑀭𑀺𑀬-𑀉𑀧𑀚𑁆𑀛𑀸𑀬𑀣𑁂𑀭𑀺𑀬𑁄 𑀕𑀳𑁂𑀢𑁆𑀯𑀸 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀘𑀺𑀢𑁆𑀢𑀭𑀼𑀘𑀺𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀸𑀧𑁂𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀆𑀭𑀤𑁆𑀥𑀸, 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑀢𑁆𑀢𑀸 𑀧𑀦 𑀦𑀸𑀢𑀺𑀘𑀺𑀭𑀁 𑀓𑀺𑀮𑀫𑀺𑀢𑁆𑀣.

𑀇𑀢𑁄 𑀧𑀝𑁆𑀞𑀸𑀬 𑀳𑀺 𑀲𑀢𑀲𑀳𑀲𑁆𑀲𑀓𑀧𑁆𑀧𑀫𑀢𑁆𑀣𑀓𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀲𑀢𑁆𑀣𑀸 𑀮𑁄𑀓𑁂 𑀉𑀤𑀧𑀸𑀤𑀺. 𑀢𑀤𑀸 𑀏𑀲𑀸 𑀏𑀓𑀲𑁆𑀫𑀺𑀁 𑀓𑀼𑀮𑁂 𑀤𑀸𑀲𑀻 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄 𑀓𑁂𑀲𑁂 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀲𑀼𑀚𑀸𑀢𑀢𑁆𑀣𑁂𑀭𑀲𑁆𑀲 𑀦𑀸𑀫 𑀅𑀕𑁆𑀕𑀲𑀸𑀯𑀓𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀧𑀢𑁆𑀣𑀦𑀫𑀓𑀸𑀲𑀺. 𑀲𑀸 𑀢𑀸𑀬 𑀧𑀢𑁆𑀣𑀦𑀸𑀪𑀺𑀦𑀻𑀳𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀦𑀸𑀢𑀺𑀘𑀺𑀭𑀁 𑀓𑀺𑀮𑀫𑀺𑀢𑁆𑀣, 𑀓𑀢𑀺𑀧𑀸𑀳𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀬𑁂𑀦𑀢𑁆𑀣𑁂𑀦 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀸, 𑀲𑁄 𑀫𑀢𑁆𑀣𑀓𑀁 𑀧𑀢𑁆𑀢𑁄, 𑀓𑀺𑀁 𑀫𑁂 𑀚𑀦𑀧𑀤𑀯𑀸𑀲𑁂𑀦, 𑀫𑀬𑁆𑀳𑀁 𑀜𑀸𑀢𑀓𑀸𑀧𑀺 𑀧𑀼𑀜𑁆𑀜𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀺, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄𑀧𑀺 𑀧𑀘𑁆𑀘𑀬𑁂𑀳𑀺 𑀦 𑀓𑀺𑀮𑀫𑀺𑀲𑁆𑀲𑀢𑀺, 𑀭𑀸𑀚𑀕𑀳𑀁 𑀕𑀘𑁆𑀙𑀸𑀫𑀻’’𑀢𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀕𑀳𑁂𑀢𑁆𑀯𑀸 𑀭𑀸𑀚𑀕𑀳𑀫𑁂𑀯 𑀅𑀕𑀫𑀸𑀲𑀺. 𑀯𑀺𑀲𑀸𑀔𑁄, ‘‘𑀥𑀫𑁆𑀫𑀤𑀺𑀦𑁆𑀦𑀸 𑀓𑀺𑀭 𑀆𑀕𑀢𑀸’’𑀢𑀺 𑀲𑀼𑀢𑁆𑀯𑀸, ‘‘𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀚𑀦𑀧𑀤𑀁 𑀕𑀢𑀸, 𑀕𑀦𑁆𑀢𑁆𑀯𑀸𑀧𑀺 𑀦𑀘𑀺𑀭𑀲𑁆𑀲𑁂𑀯 𑀧𑀘𑁆𑀘𑀸𑀕𑀢𑀸, 𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀺, 𑀕𑀦𑁆𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀤𑀼𑀢𑀺𑀬𑀕𑀫𑀦𑁂𑀦 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑀁 𑀅𑀕𑀫𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀯𑀺𑀲𑀸𑀔𑁄 𑀉𑀧𑀸𑀲𑀓𑁄 𑀬𑁂𑀦 𑀥𑀫𑁆𑀫𑀤𑀺𑀦𑁆𑀦𑀸 𑀪𑀺𑀓𑁆𑀔𑀼𑀦𑀻 𑀢𑁂𑀦𑀼𑀧𑀲𑀗𑁆𑀓𑀫𑀻’’𑀢𑀺.

𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 𑀲𑀓𑁆𑀓𑀸𑀬𑁄𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀓𑀲𑁆𑀫𑀸 𑀅𑀯𑁄𑀘𑀸𑀢𑀺? 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀪𑀺𑀭𑀫𑀲𑀺 𑀦𑀸𑀪𑀺𑀭𑀫𑀲𑀺, 𑀅𑀬𑁆𑀬𑁂’’𑀢𑀺 𑀏𑀯𑀁 𑀧𑀼𑀘𑁆𑀙𑀦𑀁 𑀦𑀸𑀫 𑀦 𑀧𑀡𑁆𑀟𑀺𑀢𑀓𑀺𑀘𑁆𑀘𑀁, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀉𑀧𑀦𑁂𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀧𑀜𑁆𑀳𑀩𑁆𑀬𑀸𑀓𑀭𑀡𑁂𑀦 𑀢𑀲𑁆𑀲𑀸 𑀅𑀪𑀺𑀭𑀢𑀺𑀁 𑀯𑀸 𑀅𑀦𑀪𑀺𑀭𑀢𑀺𑀁 𑀯𑀸 𑀚𑀸𑀦𑀺𑀲𑁆𑀲𑀸𑀫𑀻𑀢𑀺, 𑀢𑀲𑁆𑀫𑀸 𑀅𑀯𑁄𑀘. 𑀢𑀁 𑀲𑀼𑀢𑁆𑀯𑀸𑀯 𑀥𑀫𑁆𑀫𑀤𑀺𑀦𑁆𑀦𑀸 𑀅𑀳𑀁, 𑀆𑀯𑀼𑀲𑁄 𑀯𑀺𑀲𑀸𑀔, 𑀅𑀘𑀺𑀭𑀧𑀩𑁆𑀩𑀚𑀺𑀢𑀸 𑀲𑀓𑀸𑀬𑀁 𑀯𑀸 𑀧𑀭𑀓𑀸𑀬𑀁 𑀯𑀸 𑀓𑀼𑀢𑁄 𑀚𑀸𑀦𑀺𑀲𑁆𑀲𑀸𑀫𑀻𑀢𑀺 𑀯𑀸, 𑀅𑀜𑁆𑀜𑀢𑁆𑀣𑁂𑀭𑀺𑀬𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀸𑀢𑀺 𑀯𑀸 𑀅𑀯𑀢𑁆𑀯𑀸 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀲𑀫𑁆𑀧𑀝𑀺𑀘𑁆𑀙𑀫𑀸𑀦𑀸 𑀯𑀺𑀬, 𑀏𑀓𑀧𑀸𑀲𑀓𑀕𑀡𑁆𑀞𑀺𑀁 𑀫𑁄𑀘𑁂𑀦𑁆𑀢𑀻 𑀯𑀺𑀬 𑀕𑀳𑀦𑀝𑁆𑀞𑀸𑀦𑁂 𑀳𑀢𑁆𑀣𑀺𑀫𑀕𑁆𑀕𑀁 𑀦𑀻𑀳𑀭𑀫𑀸𑀦𑀸 𑀯𑀺𑀬 𑀔𑀕𑁆𑀕𑀫𑀼𑀔𑁂𑀦 𑀲𑀫𑀼𑀕𑁆𑀕𑀁 𑀯𑀺𑀯𑀭𑀫𑀸𑀦𑀸 𑀯𑀺𑀬 𑀘 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑁂 𑀞𑀢𑁆𑀯𑀸 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑀫𑀸𑀦𑀸, 𑀧𑀜𑁆𑀘 𑀔𑁄 𑀇𑀫𑁂, 𑀆𑀯𑀼𑀲𑁄 𑀯𑀺𑀲𑀸𑀔, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀜𑁆𑀘𑀸𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀢𑀺 𑀉𑀧𑀸𑀤𑀸𑀦𑀸𑀦𑀁 𑀧𑀘𑁆𑀘𑀬𑀪𑀽𑀢𑀸 𑀔𑀦𑁆𑀥𑀸𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦𑁂𑀢𑁆𑀣 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀓𑀣𑀸 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀸. 𑀲𑀸 𑀧𑀦𑁂𑀲𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀸 𑀏𑀯𑀸𑀢𑀺 𑀢𑀢𑁆𑀣 𑀯𑀺𑀢𑁆𑀢𑀸𑀭𑀺𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀲𑀓𑁆𑀓𑀸𑀬𑀲𑀫𑀼𑀤𑀬𑀸𑀤𑀻𑀲𑀼𑀧𑀺 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀫𑁂𑀯.

𑀇𑀤𑀁 𑀧𑀦 𑀘𑀢𑀼𑀲𑀘𑁆𑀘𑀩𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸 𑀯𑀺𑀲𑀸𑀔𑁄 𑀣𑁂𑀭𑀺𑀬𑀸 𑀅𑀪𑀺𑀭𑀢𑀪𑀸𑀯𑀁 𑀅𑀜𑁆𑀜𑀸𑀲𑀺. 𑀬𑁄 𑀳𑀺 𑀩𑀼𑀤𑁆𑀥𑀲𑀸𑀲𑀦𑁂 𑀉𑀓𑁆𑀓𑀡𑁆𑀞𑀺𑀢𑁄 𑀳𑁄𑀢𑀺 𑀅𑀦𑀪𑀺𑀭𑀢𑁄, 𑀲𑁄 𑀏𑀯𑀁 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀺𑀢𑀧𑀜𑁆𑀳𑀁 𑀲𑀡𑁆𑀟𑀸𑀲𑁂𑀦 𑀏𑀓𑁂𑀓𑀁 𑀧𑀮𑀺𑀢𑀁 𑀕𑀡𑁆𑀳𑀦𑁆𑀢𑁄 𑀯𑀺𑀬, 𑀲𑀺𑀦𑁂𑀭𑀼𑀧𑀸𑀤𑀢𑁄 𑀯𑀸𑀮𑀼𑀓𑀁 𑀉𑀤𑁆𑀥𑀭𑀦𑁆𑀢𑁄 𑀯𑀺𑀬 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀬𑀲𑁆𑀫𑀸 𑀧𑀦 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀮𑁄𑀓𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀯𑀺𑀬 𑀩𑀼𑀤𑁆𑀥𑀲𑀸𑀲𑀦𑁂 𑀧𑀸𑀓𑀝𑀸𑀦𑀺, 𑀧𑀭𑀺𑀲𑀫𑀚𑁆𑀛𑁂 𑀕𑀢𑁄 𑀳𑀺 𑀪𑀕𑀯𑀸𑀧𑀺 𑀫𑀳𑀸𑀣𑁂𑀭𑀸𑀧𑀺 𑀲𑀘𑁆𑀘𑀸𑀦𑁂𑀯 𑀧𑀓𑀸𑀲𑁂𑀦𑁆𑀢𑀺; 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀓𑀼𑀮𑀧𑀼𑀢𑁆𑀢𑁂 𑀘𑀢𑁆𑀢𑀸𑀭𑀺 𑀦𑀸𑀫 𑀓𑀺𑀁, 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀧𑀜𑁆𑀳𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑀺. 𑀅𑀬𑀜𑁆𑀘 𑀥𑀫𑁆𑀫𑀤𑀺𑀦𑁆𑀦𑀸 𑀉𑀧𑀸𑀬𑀓𑁄𑀲𑀮𑁆𑀮𑁂 𑀞𑀺𑀢𑀸 𑀧𑀡𑁆𑀟𑀺𑀢𑀸 𑀩𑁆𑀬𑀢𑁆𑀢𑀸 𑀦𑀬𑀁 𑀕𑀳𑁂𑀢𑁆𑀯𑀸 𑀲𑀼𑀢𑁂𑀦𑀧𑀺 𑀓𑀣𑁂𑀢𑀼𑀁 𑀲𑀫𑀢𑁆𑀣𑀸, 𑀢𑀲𑁆𑀫𑀸 ‘‘𑀦 𑀲𑀓𑁆𑀓𑀸 𑀏𑀢𑀺𑀲𑁆𑀲𑀸 𑀏𑀢𑁆𑀢𑀸𑀯𑀢𑀸 𑀲𑀘𑁆𑀘𑀸𑀦𑀁 𑀧𑀝𑀺𑀯𑀺𑀤𑁆𑀥𑀪𑀸𑀯𑁄 𑀜𑀸𑀢𑀼𑀁, 𑀲𑀘𑁆𑀘𑀯𑀺𑀦𑀺𑀩𑁆𑀪𑁄𑀕𑀧𑀜𑁆𑀳𑀩𑁆𑀬𑀸𑀓𑀭𑀡𑁂𑀦 𑀲𑀓𑁆𑀓𑀸 𑀜𑀸𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀳𑁂𑀝𑁆𑀞𑀸 𑀓𑀣𑀺𑀢𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀧𑀝𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀕𑀼𑀴𑁆𑀳𑀁 𑀓𑀢𑁆𑀯𑀸 𑀕𑀡𑁆𑀞𑀺𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀧𑀼𑀘𑁆𑀙𑀦𑁆𑀢𑁄 𑀢𑀜𑁆𑀜𑁂𑀯 𑀦𑀼 𑀔𑁄, 𑀅𑀬𑁆𑀬𑁂𑀢𑀺𑀆𑀤𑀺𑀫𑀸𑀳.

𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀦 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀢𑀜𑁆𑀜𑁂𑀯 𑀉𑀧𑀸𑀤𑀸𑀦𑀦𑁆𑀢𑀺 𑀉𑀧𑀸𑀤𑀸𑀦𑀲𑁆𑀲 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀓𑀤𑁂𑀲𑀪𑀸𑀯𑀢𑁄 𑀦 𑀢𑀁𑀬𑁂𑀯 𑀉𑀧𑀸𑀤𑀸𑀦𑀁 𑀢𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸, 𑀦𑀸𑀧𑀺 𑀅𑀜𑁆𑀜𑀢𑁆𑀭 𑀧𑀜𑁆𑀘𑀳𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀳𑀺 𑀉𑀧𑀸𑀤𑀸𑀦𑀁. 𑀬𑀤𑀺 𑀳𑀺 𑀢𑀜𑁆𑀜𑁂𑀯 𑀲𑀺𑀬𑀸, 𑀭𑀽𑀧𑀸𑀤𑀺𑀲𑀪𑀸𑀯𑀫𑁆𑀧𑀺 𑀉𑀧𑀸𑀤𑀸𑀦𑀁 𑀲𑀺𑀬𑀸. 𑀬𑀤𑀺 𑀅𑀜𑁆𑀜𑀢𑁆𑀭 𑀲𑀺𑀬𑀸, 𑀧𑀭𑀲𑀫𑀬𑁂 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁄 𑀅𑀦𑀼𑀲𑀬𑁄 𑀯𑀺𑀬 𑀧𑀡𑁆𑀡𑀢𑁆𑀢𑀺 𑀯𑀺𑀬 𑀦𑀺𑀩𑁆𑀩𑀸𑀦𑀁 𑀯𑀺𑀬 𑀘 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀁 𑀯𑀸 𑀲𑀺𑀬𑀸, 𑀙𑀝𑁆𑀞𑁄 𑀯𑀸 𑀔𑀦𑁆𑀥𑁄 𑀧𑀜𑁆𑀜𑀧𑁂𑀢𑀩𑁆𑀩𑁄 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀏𑀯𑀁 𑀩𑁆𑀬𑀸𑀓𑀸𑀲𑀺. 𑀢𑀲𑁆𑀲𑀸 𑀩𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸 ‘‘𑀅𑀥𑀺𑀕𑀢𑀧𑀢𑀺𑀝𑁆𑀞𑀸 𑀅𑀬’’𑀦𑁆𑀢𑀺 𑀯𑀺𑀲𑀸𑀔𑁄 𑀦𑀺𑀝𑁆𑀞𑀫𑀕𑀫𑀸𑀲𑀺. 𑀦 𑀳𑀺 𑀲𑀓𑁆𑀓𑀸 𑀅𑀔𑀻𑀡𑀸𑀲𑀯𑁂𑀦 𑀅𑀲𑀫𑁆𑀩𑀤𑁆𑀥𑁂𑀦 𑀅𑀯𑀺𑀢𑁆𑀣𑀸𑀬𑀦𑁆𑀢𑁂𑀦 𑀧𑀤𑀻𑀧𑀲𑀳𑀲𑁆𑀲𑀁 𑀚𑀸𑀮𑁂𑀦𑁆𑀢𑁂𑀦 𑀯𑀺𑀬 𑀏𑀯𑀭𑀽𑀧𑁄 𑀕𑀼𑀴𑁆𑀳𑁄 𑀧𑀝𑀺𑀘𑁆𑀙𑀦𑁆𑀦𑁄 𑀢𑀺𑀮𑀓𑁆𑀔𑀡𑀸𑀳𑀢𑁄 𑀕𑀫𑁆𑀪𑀻𑀭𑁄 𑀧𑀜𑁆𑀳𑁄 𑀯𑀺𑀲𑁆𑀲𑀚𑁆𑀚𑁂𑀢𑀼𑀁. 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀧𑀦, ‘‘𑀅𑀬𑀁 𑀥𑀫𑁆𑀫𑀤𑀺𑀦𑁆𑀦𑀸 𑀲𑀸𑀲𑀦𑁂 𑀮𑀤𑁆𑀥𑀧𑀢𑀺𑀝𑁆𑀞𑀸 𑀅𑀥𑀺𑀕𑀢𑀧𑀝𑀺𑀲𑀫𑁆𑀪𑀺𑀤𑀸 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑀸 𑀪𑀯𑀫𑀢𑁆𑀣𑀓𑁂 𑀞𑀺𑀢𑀸 𑀫𑀳𑀸𑀔𑀻𑀡𑀸𑀲𑀯𑀸, 𑀲𑀫𑀢𑁆𑀣𑀸 𑀫𑀬𑁆𑀳𑀁 𑀧𑀼𑀘𑁆𑀙𑀺𑀢𑀧𑀜𑁆𑀳𑀁 𑀓𑀣𑁂𑀢𑀼𑀁, 𑀇𑀤𑀸𑀦𑀺 𑀧𑀦 𑀦𑀁 𑀑𑀯𑀢𑁆𑀢𑀺𑀓𑀲𑀸𑀭𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀧𑀼𑀘𑁆𑀙𑀦𑁆𑀢𑁄, 𑀓𑀣𑀁 𑀧𑀦𑀸𑀬𑁆𑀬𑁂𑀢𑀺𑀆𑀤𑀺𑀫𑀸𑀳.

𑁪𑁬𑁧. 𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀅𑀲𑁆𑀲𑀼𑀢𑀯𑀸𑀢𑀺𑀆𑀤𑀺 𑀫𑀽𑀮𑀧𑀭𑀺𑀬𑀸𑀬𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻𑀢𑀺, ‘‘𑀇𑀥𑁂𑀓𑀘𑁆𑀘𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺. 𑀬𑀁 𑀭𑀽𑀧𑀁 𑀲𑁄 𑀅𑀳𑀁, 𑀬𑁄 𑀅𑀳𑀁 𑀢𑀁 𑀭𑀽𑀧𑀦𑁆𑀢𑀺 𑀭𑀽𑀧𑀜𑁆𑀘 𑀅𑀢𑁆𑀢𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀢𑁂𑀮𑀧𑁆𑀧𑀤𑀻𑀧𑀲𑁆𑀲 𑀛𑀸𑀬𑀢𑁄 𑀬𑀸 𑀅𑀘𑁆𑀘𑀺 𑀲𑁄 𑀯𑀡𑁆𑀡𑁄, 𑀬𑁄 𑀯𑀡𑁆𑀡𑁄 𑀲𑀸 𑀅𑀘𑁆𑀘𑀻𑀢𑀺 𑀅𑀘𑁆𑀘𑀺𑀜𑁆𑀘 𑀯𑀡𑁆𑀡𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀏𑀯𑀫𑁂𑀯 𑀇𑀥𑁂𑀓𑀘𑁆𑀘𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺…𑀧𑁂… 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 (𑀧𑀝𑀺. 𑀫. 𑁧.𑁧𑁩𑁧) 𑀏𑀯𑀁 𑀭𑀽𑀧𑀁 𑀅𑀢𑁆𑀢𑀸𑀢𑀺 𑀤𑀺𑀝𑁆𑀞𑀺𑀧𑀲𑁆𑀲𑀦𑀸𑀬 𑀧𑀲𑁆𑀲𑀢𑀺. 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀦𑁆𑀢𑀺 𑀅𑀭𑀽𑀧𑀁 𑀅𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸 𑀙𑀸𑀬𑀸𑀯𑀦𑁆𑀢𑀁 𑀭𑀼𑀓𑁆𑀔𑀁 𑀯𑀺𑀬 𑀢𑀁 𑀅𑀢𑁆𑀢𑀸𑀦𑀁 𑀭𑀽𑀧𑀯𑀦𑁆𑀢𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀦𑁆𑀢𑀺 𑀅𑀭𑀽𑀧𑀫𑁂𑀯 𑀅𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸 𑀧𑀼𑀧𑁆𑀨𑀲𑁆𑀫𑀺𑀁 𑀕𑀦𑁆𑀥𑀁 𑀯𑀺𑀬 𑀅𑀢𑁆𑀢𑀦𑀺 𑀭𑀽𑀧𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀦𑁆𑀢𑀺 𑀅𑀭𑀽𑀧𑀫𑁂𑀯 𑀅𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸 𑀓𑀭𑀡𑁆𑀟𑀸𑀬 𑀫𑀡𑀺𑀁 𑀯𑀺𑀬 𑀅𑀢𑁆𑀢𑀸𑀦𑀁 𑀭𑀽𑀧𑀲𑁆𑀫𑀺𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀯𑁂𑀤𑀦𑀁 𑀅𑀢𑁆𑀢𑀢𑁄𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣, 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀲𑀼𑀤𑁆𑀥𑀭𑀽𑀧𑀫𑁂𑀯 𑀅𑀢𑁆𑀢𑀸𑀢𑀺 𑀓𑀣𑀺𑀢𑀁. 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁. 𑀯𑁂𑀤𑀦𑀁 𑀅𑀢𑁆𑀢𑀢𑁄… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀇𑀫𑁂𑀲𑀼 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀅𑀭𑀽𑀧𑀁 𑀅𑀢𑁆𑀢𑀸𑀢𑀺 𑀓𑀣𑀺𑀢𑀁. 𑀯𑁂𑀤𑀦𑀸𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀯𑁂𑀤𑀦𑀁, 𑀯𑁂𑀤𑀦𑀸𑀬 𑀯𑀸 𑀅𑀢𑁆𑀢𑀸𑀦𑀦𑁆𑀢𑀺 𑀏𑀯𑀁 𑀘𑀢𑀽𑀲𑀼 𑀔𑀦𑁆𑀥𑁂𑀲𑀼 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀯𑀲𑁂𑀦 𑀤𑁆𑀯𑀸𑀤𑀲𑀲𑀼 𑀞𑀸𑀦𑁂𑀲𑀼 𑀭𑀽𑀧𑀸𑀭𑀽𑀧𑀫𑀺𑀲𑁆𑀲𑀓𑁄 𑀅𑀢𑁆𑀢𑀸 𑀓𑀣𑀺𑀢𑁄. 𑀢𑀢𑁆𑀣 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺… 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀓𑀣𑀺𑀢𑀸, 𑀅𑀯𑀲𑁂𑀲𑁂𑀲𑀼 𑀲𑀲𑁆𑀲𑀢𑀤𑀺𑀝𑁆𑀞𑀻𑀢𑀺. 𑀏𑀯𑀫𑁂𑀢𑁆𑀣 𑀧𑀦𑁆𑀦𑀭𑀲 𑀪𑀯𑀤𑀺𑀝𑁆𑀞𑀺𑀬𑁄, 𑀧𑀜𑁆𑀘 𑀯𑀺𑀪𑀯𑀤𑀺𑀝𑁆𑀞𑀺𑀬𑁄 𑀳𑁄𑀦𑁆𑀢𑀺. 𑀦 𑀭𑀽𑀧𑀁 𑀅𑀢𑁆𑀢𑀢𑁄𑀢𑀺 𑀏𑀢𑁆𑀣 𑀭𑀽𑀧𑀁 𑀅𑀢𑁆𑀢𑀸𑀢𑀺 𑀦 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀧𑀦 𑀲𑀫𑀦𑀼𑀧𑀲𑁆𑀲𑀢𑀺. 𑀦 𑀭𑀽𑀧𑀯𑀦𑁆𑀢𑀁 𑀅𑀢𑁆𑀢𑀸𑀦𑀁…𑀧𑁂… 𑀦 𑀯𑀺𑀜𑁆𑀜𑀸𑀡𑀲𑁆𑀫𑀺𑀁 𑀅𑀢𑁆𑀢𑀸𑀦𑀦𑁆𑀢𑀺 𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑁂 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀅𑀢𑁆𑀢𑀢𑁄 𑀦 𑀲𑀫𑀦𑀼𑀧𑀲𑁆𑀲𑀢𑀺, 𑀲𑀩𑁆𑀩𑀸𑀓𑀸𑀭𑁂𑀦 𑀧𑀦 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸𑀢𑀺 𑀲𑀫𑀦𑀼𑀧𑀲𑁆𑀲𑀢𑀺.

𑀏𑀢𑁆𑀢𑀸𑀯𑀢𑀸 𑀣𑁂𑀭𑀺𑀬𑀸, ‘‘𑀏𑀯𑀁 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀳𑁄𑀢𑀻’’𑀢𑀺 𑀏𑀯𑀁 𑀧𑀼𑀭𑀺𑀫𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺𑀬𑀸 𑀏𑀢𑁆𑀢𑀓𑁂𑀦 𑀕𑀫𑀦𑀁 𑀳𑁄𑀢𑀺, 𑀆𑀕𑀫𑀦𑀁 𑀳𑁄𑀢𑀺, 𑀕𑀫𑀦𑀸𑀕𑀫𑀦𑀁 𑀳𑁄𑀢𑀺, 𑀯𑀝𑁆𑀝𑀁 𑀯𑀢𑁆𑀢𑀢𑀻𑀢𑀺 𑀯𑀝𑁆𑀝𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑀺𑀢𑀁. 𑀏𑀯𑀁 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀦 𑀳𑁄𑀢𑀻𑀢𑀺 𑀧𑀘𑁆𑀙𑀺𑀫𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺𑀬𑀸 𑀏𑀢𑁆𑀢𑀓𑁂𑀦 𑀕𑀫𑀦𑀁 𑀦 𑀳𑁄𑀢𑀺, 𑀆𑀕𑀫𑀦𑀁 𑀦 𑀳𑁄𑀢𑀺, 𑀕𑀫𑀦𑀸𑀕𑀫𑀦𑀁 𑀦 𑀳𑁄𑀢𑀺, 𑀯𑀝𑁆𑀝𑀁 𑀦𑀸𑀫 𑀦 𑀯𑀢𑁆𑀢𑀢𑀻𑀢𑀺 𑀯𑀺𑀯𑀝𑁆𑀝𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑀺𑀢𑀁.

𑁪𑁬𑁨. 𑀓𑀢𑀫𑁄 𑀧𑀦𑀸𑀬𑁆𑀬𑁂, 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀢𑀺 𑀅𑀬𑀁 𑀧𑀜𑁆𑀳𑁄 𑀣𑁂𑀭𑀺𑀬𑀸 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑁄 𑀪𑀯𑁂𑀬𑁆𑀬 𑁋 ‘‘𑀉𑀧𑀸𑀲𑀓, 𑀢𑀬𑀸 𑀳𑁂𑀝𑁆𑀞𑀸 𑀫𑀕𑁆𑀕𑁄 𑀧𑀼𑀘𑁆𑀙𑀺𑀢𑁄, 𑀇𑀥 𑀓𑀲𑁆𑀫𑀸 𑀫𑀕𑁆𑀕𑀫𑁂𑀯 𑀧𑀼𑀘𑁆𑀙𑀲𑀻’’𑀢𑀺. 𑀲𑀸 𑀧𑀦 𑀅𑀢𑁆𑀢𑀦𑁄 𑀩𑁆𑀬𑀢𑁆𑀢𑀢𑀸𑀬 𑀧𑀡𑁆𑀟𑀺𑀘𑁆𑀘𑁂𑀦 𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀲𑀮𑁆𑀮𑀓𑁆𑀔𑁂𑀲𑀺 𑁋 ‘‘𑀇𑀫𑀺𑀦𑀸 𑀉𑀧𑀸𑀲𑀓𑁂𑀦 𑀳𑁂𑀝𑁆𑀞𑀸 𑀧𑀝𑀺𑀧𑀢𑁆𑀢𑀺𑀯𑀲𑁂𑀦 𑀫𑀕𑁆𑀕𑁄 𑀧𑀼𑀘𑁆𑀙𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀇𑀥 𑀧𑀦 𑀢𑀁 𑀲𑀗𑁆𑀔𑀢𑀸𑀲𑀗𑁆𑀔𑀢𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀗𑁆𑀕𑀳𑀺𑀢𑀸𑀲𑀗𑁆𑀕𑀳𑀺𑀢𑀯𑀲𑁂𑀦 𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀲𑁆𑀫𑀸 𑀅𑀧𑁆𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸𑀯 𑀬𑀁 𑀬𑀁 𑀧𑀼𑀘𑁆𑀙𑀺, 𑀢𑀁 𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀢𑀢𑁆𑀣 𑀲𑀗𑁆𑀔𑀢𑁄𑀢𑀺 𑀘𑁂𑀢𑀺𑀢𑁄 𑀓𑀧𑁆𑀧𑀺𑀢𑁄 𑀧𑀓𑀧𑁆𑀧𑀺𑀢𑁄 𑀆𑀬𑀽𑀳𑀺𑀢𑁄 𑀓𑀢𑁄 𑀦𑀺𑀩𑁆𑀩𑀢𑁆𑀢𑀺𑀢𑁄 𑀲𑀫𑀸𑀧𑀚𑁆𑀚𑀦𑁆𑀢𑁂𑀦 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑁄. 𑀢𑀻𑀳𑀺 𑀘 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀔𑀦𑁆𑀥𑁂𑀳𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑀗𑁆𑀕𑀳𑀺𑀢𑁄𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀫𑀕𑁆𑀕𑁄 𑀲𑀧𑁆𑀧𑀤𑁂𑀲𑁄, 𑀢𑀬𑁄 𑀔𑀦𑁆𑀥𑀸 𑀦𑀺𑀧𑁆𑀧𑀤𑁂𑀲𑀸, 𑀢𑀲𑁆𑀫𑀸 𑀅𑀬𑀁 𑀲𑀧𑁆𑀧𑀤𑁂𑀲𑀢𑁆𑀢𑀸 𑀦𑀕𑀭𑀁 𑀯𑀺𑀬 𑀭𑀚𑁆𑀚𑁂𑀦 𑀦𑀺𑀧𑁆𑀧𑀤𑁂𑀲𑁂𑀳𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢𑁄. 𑀢𑀢𑁆𑀣 𑀲𑀫𑁆𑀫𑀸𑀯𑀸𑀘𑀸𑀤𑀬𑁄 𑀢𑀬𑁄 𑀲𑀻𑀮𑀫𑁂𑀯, 𑀢𑀲𑁆𑀫𑀸 𑀢𑁂 𑀲𑀚𑀸𑀢𑀺𑀢𑁄 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀸𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀧𑀸𑀴𑀺𑀬𑀁 𑀲𑀻𑀮𑀓𑁆𑀔𑀦𑁆𑀥𑁂𑀢𑀺 𑀪𑀼𑀫𑁆𑀫𑁂𑀦 𑀯𑀺𑀬 𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀅𑀢𑁆𑀣𑁄 𑀧𑀦 𑀓𑀭𑀡𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀲𑀫𑁆𑀫𑀸𑀯𑀸𑀬𑀸𑀫𑀸𑀤𑀻𑀲𑀼 𑀧𑀦 𑀢𑀻𑀲𑀼 𑀲𑀫𑀸𑀥𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀆𑀭𑀫𑁆𑀫𑀡𑁂 𑀏𑀓𑀕𑁆𑀕𑀪𑀸𑀯𑁂𑀦 𑀅𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀯𑀻𑀭𑀺𑀬𑁂 𑀧𑀦 𑀧𑀕𑁆𑀕𑀳𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑁂 𑀲𑀢𑀺𑀬𑀸 𑀘 𑀅𑀧𑀺𑀮𑀸𑀧𑀦𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀺𑀬𑀸 𑀮𑀤𑁆𑀥𑀽𑀧𑀓𑀸𑀭𑁄 𑀳𑀼𑀢𑁆𑀯𑀸 𑀲𑀓𑁆𑀓𑁄𑀢𑀺.

𑀢𑀢𑁆𑀭𑀸𑀬𑀁 𑀉𑀧𑀫𑀸 𑁋 𑀬𑀣𑀸 𑀳𑀺 ‘‘𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀸’’𑀢𑀺 𑀉𑀬𑁆𑀬𑀸𑀦𑀁 𑀧𑀯𑀺𑀝𑁆𑀞𑁂𑀲𑀼 𑀢𑀻𑀲𑀼 𑀲𑀳𑀸𑀬𑁂𑀲𑀼 𑀏𑀓𑁄 𑀲𑀼𑀧𑀼𑀧𑁆𑀨𑀺𑀢𑀁 𑀘𑀫𑁆𑀧𑀓𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑁆𑀯𑀸𑀧𑀺 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬. 𑀅𑀣𑀲𑁆𑀲 𑀤𑀼𑀢𑀺𑀬𑁄 𑀑𑀦𑀫𑀺𑀢𑁆𑀯𑀸 𑀧𑀺𑀝𑁆𑀞𑀺𑀁 𑀤𑀤𑁂𑀬𑁆𑀬, 𑀲𑁄 𑀢𑀲𑁆𑀲 𑀧𑀺𑀝𑁆𑀞𑀺𑀬𑀁 𑀞𑀢𑁆𑀯𑀸𑀧𑀺 𑀓𑀫𑁆𑀧𑀫𑀸𑀦𑁄 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬. 𑀅𑀣𑀲𑁆𑀲 𑀇𑀢𑀭𑁄 𑀅𑀁𑀲𑀓𑀽𑀝𑀁 𑀉𑀧𑀦𑀸𑀫𑁂𑀬𑁆𑀬, 𑀲𑁄 𑀏𑀓𑀲𑁆𑀲 𑀧𑀺𑀝𑁆𑀞𑀺𑀬𑀁 𑀞𑀢𑁆𑀯𑀸 𑀏𑀓𑀲𑁆𑀲 𑀅𑀁𑀲𑀓𑀽𑀝𑀁 𑀑𑀮𑀼𑀩𑁆𑀪 𑀬𑀣𑀸𑀭𑀼𑀘𑀺 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀺𑀢𑁆𑀯𑀸 𑀧𑀺𑀴𑀦𑁆𑀥𑀺𑀢𑁆𑀯𑀸 𑀦𑀓𑁆𑀔𑀢𑁆𑀢𑀁 𑀓𑀻𑀴𑁂𑀬𑁆𑀬. 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀏𑀓𑀢𑁄 𑀉𑀬𑁆𑀬𑀸𑀦𑀁 𑀧𑀯𑀺𑀝𑁆𑀞𑀸 𑀢𑀬𑁄 𑀲𑀳𑀸𑀬𑀓𑀸 𑀯𑀺𑀬 𑀳𑀺 𑀏𑀓𑀢𑁄 𑀚𑀸𑀢𑀸 𑀲𑀫𑁆𑀫𑀸𑀯𑀸𑀬𑀸𑀫𑀸𑀤𑀬𑁄 𑀢𑀬𑁄 𑀥𑀫𑁆𑀫𑀸. 𑀲𑀼𑀧𑀼𑀧𑁆𑀨𑀺𑀢𑀘𑀫𑁆𑀧𑀓𑁄 𑀯𑀺𑀬 𑀆𑀭𑀫𑁆𑀫𑀡𑀁. 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑁆𑀯𑀸𑀧𑀺 𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀯𑀺𑀬 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀆𑀭𑀫𑁆𑀫𑀡𑁂 𑀏𑀓𑀕𑁆𑀕𑀪𑀸𑀯𑁂𑀦 𑀅𑀧𑁆𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀫𑀸𑀥𑀺. 𑀧𑀺𑀝𑁆𑀞𑀺𑀁 𑀤𑀢𑁆𑀯𑀸 𑀑𑀦𑀢𑀲𑀳𑀸𑀬𑁄 𑀯𑀺𑀬 𑀯𑀸𑀬𑀸𑀫𑁄. 𑀅𑀁𑀲𑀓𑀽𑀝𑀁 𑀤𑀢𑁆𑀯𑀸 𑀞𑀺𑀢𑀲𑀳𑀸𑀬𑁄 𑀯𑀺𑀬 𑀲𑀢𑀺. 𑀬𑀣𑀸 𑀢𑁂𑀲𑀼 𑀏𑀓𑀲𑁆𑀲 𑀧𑀺𑀝𑁆𑀞𑀺𑀬𑀁 𑀞𑀢𑁆𑀯𑀸 𑀏𑀓𑀲𑁆𑀲 𑀅𑀁𑀲𑀓𑀽𑀝𑀁 𑀑𑀮𑀼𑀩𑁆𑀪 𑀇𑀢𑀭𑁄 𑀬𑀣𑀸𑀭𑀼𑀘𑀺 𑀧𑀼𑀧𑁆𑀨𑀁 𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀏𑀯𑀫𑁂𑀯𑀁 𑀯𑀻𑀭𑀺𑀬𑁂 𑀧𑀕𑁆𑀕𑀳𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑁂, 𑀲𑀢𑀺𑀬𑀸 𑀘 𑀅𑀧𑀺𑀮𑀸𑀧𑀦𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀺𑀬𑀸 𑀮𑀤𑁆𑀥𑀼𑀧𑀓𑀸𑀭𑁄 𑀲𑀫𑀸𑀥𑀺 𑀲𑀓𑁆𑀓𑁄𑀢𑀺 𑀆𑀭𑀫𑁆𑀫𑀡𑁂 𑀏𑀓𑀕𑁆𑀕𑀪𑀸𑀯𑁂𑀦 𑀅𑀧𑁆𑀧𑁂𑀢𑀼𑀁. 𑀢𑀲𑁆𑀫𑀸 𑀲𑀫𑀸𑀥𑀺𑀬𑁂𑀯𑁂𑀢𑁆𑀣 𑀲𑀚𑀸𑀢𑀺𑀢𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑁄. 𑀯𑀸𑀬𑀸𑀫𑀲𑀢𑀺𑀬𑁄 𑀧𑀦 𑀓𑀺𑀭𑀺𑀬𑀢𑁄 𑀲𑀗𑁆𑀕𑀳𑀺𑀢𑀸 𑀳𑁄𑀦𑁆𑀢𑀺.

𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁂𑀲𑀼𑀧𑀺 𑀧𑀜𑁆𑀜𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀆𑀭𑀫𑁆𑀫𑀡𑀁 𑀦𑀺𑀘𑁆𑀙𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀯𑀺𑀢𑀓𑁆𑀓𑁂 𑀧𑀦 𑀆𑀓𑁄𑀝𑁂𑀢𑁆𑀯𑀸 𑀆𑀓𑁄𑀝𑁂𑀢𑁆𑀯𑀸 𑀤𑁂𑀦𑁆𑀢𑁂 𑀲𑀓𑁆𑀓𑁄𑀢𑀺. 𑀓𑀣𑀁? 𑀬𑀣𑀸 𑀳𑀺 𑀳𑁂𑀭𑀜𑁆𑀜𑀺𑀓𑁄 𑀓𑀳𑀸𑀧𑀡𑀁 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀲𑀩𑁆𑀩𑀪𑀸𑀕𑁂𑀲𑀼 𑀑𑀮𑁄𑀓𑁂𑀢𑀼𑀓𑀸𑀫𑁄 𑀲𑀫𑀸𑀦𑁄𑀧𑀺 𑀦 𑀘𑀓𑁆𑀔𑀼𑀤𑀮𑁂𑀦𑁂𑀯 𑀧𑀭𑀺𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀅𑀗𑁆𑀕𑀼𑀮𑀺𑀧𑀩𑁆𑀩𑁂𑀳𑀺 𑀧𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀏𑀯𑀫𑁂𑀯 𑀦 𑀧𑀜𑁆𑀜𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀁 𑀦𑀺𑀘𑁆𑀙𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁂𑀦 𑀧𑀦 𑀆𑀳𑀦𑀦𑀧𑀭𑀺𑀬𑀸𑀳𑀦𑀦𑀭𑀲𑁂𑀦 𑀯𑀺𑀢𑀓𑁆𑀓𑁂𑀦 𑀆𑀓𑁄𑀝𑁂𑀦𑁆𑀢𑁂𑀦 𑀯𑀺𑀬 𑀧𑀭𑀺𑀯𑀢𑁆𑀢𑁂𑀦𑁆𑀢𑁂𑀦 𑀯𑀺𑀬 𑀘 𑀆𑀤𑀸𑀬𑀸 𑀤𑀺𑀦𑁆𑀦𑀫𑁂𑀯 𑀯𑀺𑀦𑀺𑀘𑁆𑀙𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀇𑀥𑀸𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑁂𑀯 𑀲𑀚𑀸𑀢𑀺𑀢𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀸. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀦 𑀓𑀺𑀭𑀺𑀬𑀢𑁄 𑀲𑀗𑁆𑀕𑀳𑀺𑀢𑁄 𑀳𑁄𑀢𑀺. 𑀇𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀫𑀕𑁆𑀕𑁄 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀻𑀳𑀺 𑀘 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀔𑀦𑁆𑀥𑁂𑀳𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀲𑀗𑁆𑀕𑀳𑀺𑀢𑁄’’𑀢𑀺.

𑀇𑀤𑀸𑀦𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀁 𑀫𑀕𑁆𑀕𑀲𑀫𑀸𑀥𑀺𑀁 𑀲𑀦𑀺𑀫𑀺𑀢𑁆𑀢𑀁 𑀲𑀧𑀭𑀺𑀓𑁆𑀔𑀸𑀭𑀁 𑀧𑀼𑀘𑁆𑀙𑀦𑁆𑀢𑁄, 𑀓𑀢𑀫𑁄 𑀧𑀦𑀸𑀬𑁆𑀬𑁂𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀫𑀕𑁆𑀕𑀓𑁆𑀔𑀡𑁂 𑀘𑀢𑀼𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀲𑀢𑀺, 𑀲𑀸 𑀲𑀫𑀸𑀥𑀺𑀲𑁆𑀲 𑀧𑀘𑁆𑀘𑀬𑀢𑁆𑀣𑁂𑀦 𑀦𑀺𑀫𑀺𑀢𑁆𑀢𑀁. 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀘𑀢𑀼𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦𑁂𑀯 𑀉𑀧𑁆𑀧𑀦𑁆𑀦𑀁 𑀯𑀻𑀭𑀺𑀬𑀁, 𑀢𑀁 𑀧𑀭𑀺𑀯𑀸𑀭𑀝𑁆𑀞𑁂𑀦 𑀧𑀭𑀺𑀓𑁆𑀔𑀸𑀭𑁄 𑀳𑁄𑀢𑀺. 𑀢𑁂𑀲𑀁𑀬𑁂𑀯 𑀥𑀫𑁆𑀫𑀸𑀦𑀦𑁆𑀢𑀺 𑀢𑁂𑀲𑀁 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁. 𑀆𑀲𑁂𑀯𑀦𑀸𑀢𑀺𑀆𑀤𑀻𑀲𑀼 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸𑀬𑁂𑀯 𑀆𑀲𑁂𑀯𑀦𑀸𑀤𑀬𑁄 𑀯𑀼𑀢𑁆𑀢𑀸𑀢𑀺.

𑀯𑀺𑀢𑀡𑁆𑀟𑀯𑀸𑀤𑀻 𑀧𑀦, ‘‘𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑁄 𑀦𑀸𑀫 𑀫𑀕𑁆𑀕𑁄 𑀦𑀢𑁆𑀣𑀺, ‘𑀏𑀯𑀁 𑀪𑀸𑀯𑁂𑀬𑁆𑀬 𑀲𑀢𑁆𑀢 𑀯𑀲𑁆𑀲𑀸𑀦𑀻’𑀢𑀺 𑀳𑀺 𑀯𑀘𑀦𑀢𑁄 𑀲𑀢𑁆𑀢𑀧𑀺 𑀯𑀲𑁆𑀲𑀸𑀦𑀺 𑀫𑀕𑁆𑀕𑀪𑀸𑀯𑀦𑀸 𑀳𑁄𑀢𑀺, 𑀓𑀺𑀮𑁂𑀲𑀸 𑀧𑀦 𑀮𑀳𑀼 𑀙𑀺𑀚𑁆𑀚𑀦𑁆𑀢𑀸 𑀲𑀢𑁆𑀢𑀳𑀺 𑀜𑀸𑀡𑁂𑀳𑀺 𑀙𑀺𑀚𑁆𑀚𑀦𑁆𑀢𑀻’’𑀢𑀺 𑀯𑀤𑀢𑀺. 𑀲𑁄 ‘‘𑀲𑀼𑀢𑁆𑀢𑀁 𑀆𑀳𑀭𑀸’’𑀢𑀺 𑀯𑀢𑁆𑀢𑀩𑁆𑀩𑁄. 𑀅𑀤𑁆𑀥𑀸 𑀅𑀜𑁆𑀜𑀁 𑀅𑀧𑀲𑁆𑀲𑀦𑁆𑀢𑁄, ‘‘𑀬𑀸 𑀢𑁂𑀲𑀁𑀬𑁂𑀯 𑀥𑀫𑁆𑀫𑀸𑀦𑀁 𑀆𑀲𑁂𑀯𑀦𑀸 𑀪𑀸𑀯𑀦𑀸 𑀩𑀳𑀼𑀮𑀻𑀓𑀫𑁆𑀫’’𑀦𑁆𑀢𑀺 𑀇𑀤𑀫𑁂𑀯 𑀲𑀼𑀢𑁆𑀢𑀁 𑀆𑀳𑀭𑀺𑀢𑁆𑀯𑀸, ‘‘𑀅𑀜𑁆𑀜𑁂𑀦 𑀘𑀺𑀢𑁆𑀢𑁂𑀦 𑀆𑀲𑁂𑀯𑀢𑀺, 𑀅𑀜𑁆𑀜𑁂𑀦 𑀪𑀸𑀯𑁂𑀢𑀺, 𑀅𑀜𑁆𑀜𑁂𑀦 𑀩𑀳𑀼𑀮𑀻𑀓𑀭𑁄𑀢𑀻’’𑀢𑀺 𑀯𑀓𑁆𑀔𑀢𑀺. 𑀢𑀢𑁄 𑀯𑀢𑁆𑀢𑀩𑁆𑀩𑁄 𑁋 ‘‘𑀓𑀺𑀁 𑀧𑀦𑀺𑀤𑀁, 𑀲𑀼𑀢𑁆𑀢𑀁 𑀦𑁂𑀬𑁆𑀬𑀢𑁆𑀣𑀁 𑀦𑀻𑀢𑀢𑁆𑀣’’𑀦𑁆𑀢𑀺. 𑀢𑀢𑁄 𑀯𑀓𑁆𑀔𑀢𑀺 𑁋 ‘‘𑀦𑀻𑀢𑀢𑁆𑀣𑀁 𑀬𑀣𑀸 𑀲𑀼𑀢𑁆𑀢𑀁 𑀢𑀣𑁂𑀯 𑀅𑀢𑁆𑀣𑁄’’𑀢𑀺. 𑀢𑀲𑁆𑀲 𑀇𑀤𑀁 𑀉𑀢𑁆𑀢𑀭𑀁 𑁋 𑀏𑀯𑀁 𑀲𑀦𑁆𑀢𑁂 𑀏𑀓𑀁 𑀘𑀺𑀢𑁆𑀢𑀁 𑀆𑀲𑁂𑀯𑀫𑀸𑀦𑀁 𑀉𑀧𑁆𑀧𑀦𑁆𑀦𑀁, 𑀅𑀧𑀭𑀫𑁆𑀧𑀺 𑀆𑀲𑁂𑀯𑀫𑀸𑀦𑀁, 𑀅𑀧𑀭𑀫𑁆𑀧𑀺 𑀆𑀲𑁂𑀯𑀫𑀸𑀦𑀦𑁆𑀢𑀺 𑀏𑀯𑀁 𑀤𑀺𑀯𑀲𑀫𑁆𑀧𑀺 𑀆𑀲𑁂𑀯𑀦𑀸𑀯 𑀪𑀯𑀺𑀲𑁆𑀲𑀢𑀺, 𑀓𑀼𑀢𑁄 𑀪𑀸𑀯𑀦𑀸, 𑀓𑀼𑀢𑁄 𑀩𑀳𑀼𑀮𑀻𑀓𑀫𑁆𑀫𑀁? 𑀏𑀓𑀁 𑀯𑀸 𑀪𑀸𑀯𑀬𑀫𑀸𑀦𑀁 𑀉𑀧𑁆𑀧𑀦𑁆𑀦𑀁 𑀅𑀧𑀭𑀫𑁆𑀧𑀺 𑀪𑀸𑀯𑀬𑀫𑀸𑀦𑀁 𑀅𑀧𑀭𑀫𑁆𑀧𑀺 𑀪𑀸𑀯𑀬𑀫𑀸𑀦𑀦𑁆𑀢𑀺 𑀏𑀯𑀁 𑀤𑀺𑀯𑀲𑀫𑁆𑀧𑀺 𑀪𑀸𑀯𑀦𑀸𑀯 𑀪𑀯𑀺𑀲𑁆𑀲𑀢𑀺, 𑀓𑀼𑀢𑁄 𑀆𑀲𑁂𑀯𑀦𑀸 𑀓𑀼𑀢𑁄 𑀩𑀳𑀼𑀮𑀻𑀓𑀫𑁆𑀫𑀁? 𑀏𑀓𑀁 𑀯𑀸 𑀩𑀳𑀼𑀮𑀻𑀓𑀭𑁄𑀦𑁆𑀢𑀁 𑀉𑀧𑁆𑀧𑀦𑁆𑀦𑀁, 𑀅𑀧𑀭𑀫𑁆𑀧𑀺 𑀩𑀳𑀼𑀮𑀻𑀓𑀭𑁄𑀦𑁆𑀢𑀁, 𑀅𑀧𑀭𑀫𑁆𑀧𑀺 𑀩𑀳𑀼𑀮𑀻𑀓𑀭𑁄𑀦𑁆𑀢𑀦𑁆𑀢𑀺 𑀏𑀯𑀁 𑀤𑀺𑀯𑀲𑀫𑁆𑀧𑀺 𑀩𑀳𑀼𑀮𑀻𑀓𑀫𑁆𑀫𑀫𑁂𑀯 𑀪𑀯𑀺𑀲𑁆𑀲𑀢𑀺 𑀓𑀼𑀢𑁄 𑀆𑀲𑁂𑀯𑀦𑀸, 𑀓𑀼𑀢𑁄 𑀪𑀸𑀯𑀦𑀸𑀢𑀺.

𑀅𑀣 𑀯𑀸 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀏𑀓𑁂𑀦 𑀘𑀺𑀢𑁆𑀢𑁂𑀦 𑀆𑀲𑁂𑀯𑀢𑀺, 𑀤𑁆𑀯𑀻𑀳𑀺 𑀪𑀸𑀯𑁂𑀢𑀺, 𑀢𑀻𑀳𑀺 𑀩𑀳𑀼𑀮𑀻𑀓𑀭𑁄𑀢𑀺. 𑀤𑁆𑀯𑀻𑀳𑀺 𑀯𑀸 𑀆𑀲𑁂𑀯𑀢𑀺, 𑀢𑀻𑀳𑀺 𑀪𑀸𑀯𑁂𑀢𑀺, 𑀏𑀓𑁂𑀦 𑀩𑀳𑀼𑀮𑀻𑀓𑀭𑁄𑀢𑀺. 𑀢𑀻𑀳𑀺 𑀯𑀸 𑀆𑀲𑁂𑀯𑀢𑀺, 𑀏𑀓𑁂𑀦 𑀪𑀸𑀯𑁂𑀢𑀺, 𑀤𑁆𑀯𑀻𑀳𑀺 𑀩𑀳𑀼𑀮𑀻𑀓𑀭𑁄𑀢𑀻’’𑀢𑀺. 𑀲𑁄 𑀯𑀢𑁆𑀢𑀩𑁆𑀩𑁄 𑁋 ‘‘𑀫𑀸 𑀲𑀼𑀢𑁆𑀢𑀁 𑀫𑁂 𑀮𑀤𑁆𑀥𑀦𑁆𑀢𑀺 𑀬𑀁 𑀯𑀸 𑀢𑀁 𑀯𑀸 𑀅𑀯𑀘. 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁂𑀦 𑀦𑀸𑀫 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀯𑀲𑀺𑀢𑁆𑀯𑀸 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀢𑁆𑀣𑀭𑀲𑀁 𑀯𑀺𑀤𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺. 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸𑀯 𑀅𑀬𑀁 𑀆𑀲𑁂𑀯𑀦𑀸, 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸 𑀪𑀸𑀯𑀦𑀸, 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀁 𑀩𑀳𑀼𑀮𑀻𑀓𑀫𑁆𑀫𑀁. 𑀔𑀬𑀕𑀸𑀫𑀺𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀩𑀳𑀼𑀮𑀘𑀺𑀢𑁆𑀢𑀓𑁆𑀔𑀡𑀺𑀓𑁄 𑀦𑀸𑀫 𑀦𑀢𑁆𑀣𑀺, ‘𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑁄𑀬𑁂𑀯𑀸’𑀢𑀺 𑀲𑀜𑁆𑀜𑀸𑀧𑁂𑀢𑀩𑁆𑀩𑁄. 𑀲𑀘𑁂 𑀲𑀜𑁆𑀚𑀸𑀦𑀸𑀢𑀺, 𑀲𑀜𑁆𑀚𑀸𑀦𑀸𑀢𑀼, 𑀦𑁄 𑀘𑁂 𑀲𑀜𑁆𑀚𑀸𑀦𑀸𑀢𑀺, 𑀕𑀘𑁆𑀙 𑀧𑀸𑀢𑁄𑀯 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀬𑀸𑀕𑀼𑀁 𑀧𑀺𑀯𑀸𑀳𑀻’’𑀢𑀺 𑀉𑀬𑁆𑀬𑁄𑀚𑁂𑀢𑀩𑁆𑀩𑁄.

𑁪𑁬𑁩. 𑀓𑀢𑀺 𑀧𑀦𑀸𑀬𑁆𑀬𑁂 𑀲𑀗𑁆𑀔𑀸𑀭𑀸𑀢𑀺 𑀇𑀥 𑀓𑀺𑀁 𑀧𑀼𑀘𑁆𑀙𑀢𑀺? 𑀬𑁂 𑀲𑀗𑁆𑀔𑀸𑀭𑁂 𑀦𑀺𑀭𑁄𑀥𑁂𑀢𑁆𑀯𑀸 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀢𑀺, 𑀢𑁂 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀧𑀼𑀘𑁆𑀙𑀢𑀺. 𑀢𑁂𑀦𑁂𑀯𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸 𑀣𑁂𑀭𑀻, 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀲𑀼 𑀅𑀦𑁂𑀓𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺, 𑀓𑀸𑀬𑀲𑀗𑁆𑀔𑀸𑀭𑀸𑀤𑀬𑁄𑀯 𑀆𑀘𑀺𑀓𑁆𑀔𑀦𑁆𑀢𑀻, 𑀢𑀬𑁄𑀫𑁂, 𑀆𑀯𑀼𑀲𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀸𑀬𑀧𑀝𑀺𑀩𑀤𑁆𑀥𑀢𑁆𑀢𑀸 𑀓𑀸𑀬𑁂𑀦 𑀲𑀗𑁆𑀔𑀭𑀻𑀬𑀢𑀺 𑀓𑀭𑀻𑀬𑀢𑀺 𑀦𑀺𑀩𑁆𑀩𑀢𑁆𑀢𑀻𑀬𑀢𑀻𑀢𑀺 𑀓𑀸𑀬𑀲𑀗𑁆𑀔𑀸𑀭𑁄. 𑀯𑀸𑀘𑀁 𑀲𑀗𑁆𑀔𑀭𑁄𑀢𑀺 𑀓𑀭𑁄𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀯𑀘𑀻𑀲𑀗𑁆𑀔𑀸𑀭𑁄. 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀢𑁆𑀢𑀸 𑀘𑀺𑀢𑁆𑀢𑁂𑀦 𑀲𑀗𑁆𑀔𑀭𑀻𑀬𑀢𑀺 𑀓𑀭𑀻𑀬𑀢𑀺 𑀦𑀺𑀩𑁆𑀩𑀢𑁆𑀢𑀻𑀬𑀢𑀻𑀢𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑁄. 𑀓𑀢𑀫𑁄 𑀧𑀦𑀸𑀬𑁆𑀬𑁂𑀢𑀺 𑀇𑀥 𑀓𑀺𑀁 𑀧𑀼𑀘𑁆𑀙𑀢𑀺? 𑀇𑀫𑁂 𑀲𑀗𑁆𑀔𑀸𑀭𑀸 𑀅𑀜𑁆𑀜𑀫𑀜𑁆𑀜𑀫𑀺𑀲𑁆𑀲𑀸 𑀆𑀮𑀼𑀴𑀺𑀢𑀸 𑀅𑀯𑀺𑀪𑀽𑀢𑀸 𑀤𑀼𑀤𑁆𑀤𑀻𑀧𑀦𑀸. 𑀢𑀣𑀸 𑀳𑀺, 𑀓𑀸𑀬𑀤𑁆𑀯𑀸𑀭𑁂 𑀆𑀤𑀸𑀦𑀕𑀳𑀡𑀫𑀼𑀜𑁆𑀘𑀦𑀘𑁄𑀧𑀦𑀸𑀦𑀺 𑀧𑀸𑀧𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑀸 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑁂𑀢𑀦𑀸𑀢𑀺 𑀏𑀯𑀁 𑀓𑀼𑀲𑀮𑀸𑀓𑀼𑀲𑀮𑀸 𑀯𑀻𑀲𑀢𑀺 𑀘𑁂𑀢𑀦𑀸𑀧𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀧𑀺 𑀓𑀸𑀬𑀲𑀗𑁆𑀔𑀸𑀭𑀸𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀯𑀘𑀻𑀤𑁆𑀯𑀸𑀭𑁂 𑀳𑀦𑀼𑀲𑀁𑀘𑁄𑀧𑀦𑀁 𑀯𑀘𑀻𑀪𑁂𑀤𑀁 𑀧𑀸𑀧𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀯 𑀯𑀻𑀲𑀢𑀺 𑀘𑁂𑀢𑀦𑀸𑀧𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀧𑀺 𑀯𑀘𑀻𑀲𑀗𑁆𑀔𑀸𑀭𑁄𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀘𑁄𑀧𑀦𑀁 𑀅𑀧𑀢𑁆𑀢𑀸 𑀭𑀳𑁄 𑀦𑀺𑀲𑀺𑀦𑁆𑀦𑀲𑁆𑀲 𑀘𑀺𑀦𑁆𑀢𑀬𑀢𑁄 𑀉𑀧𑁆𑀧𑀦𑁆𑀦𑀸 𑀓𑀼𑀲𑀮𑀸𑀓𑀼𑀲𑀮𑀸 𑀏𑀓𑀽𑀦𑀢𑀺𑀁𑀲 𑀘𑁂𑀢𑀦𑀸𑀧𑀺 𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸𑀧𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑁄𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀁 𑀇𑀫𑁂 𑀲𑀗𑁆𑀔𑀸𑀭𑀸 𑀅𑀜𑁆𑀜𑀫𑀜𑁆𑀜𑀫𑀺𑀲𑁆𑀲𑀸 𑀆𑀮𑀼𑀴𑀺𑀢𑀸 𑀅𑀯𑀺𑀪𑀽𑀢𑀸 𑀤𑀼𑀤𑁆𑀤𑀻𑀧𑀦𑀸. 𑀢𑁂 𑀧𑀸𑀓𑀝𑁂 𑀯𑀺𑀪𑀽𑀢𑁂 𑀓𑀢𑁆𑀯𑀸 𑀓𑀣𑀸𑀧𑁂𑀲𑁆𑀲𑀸𑀫𑀻𑀢𑀺 𑀧𑀼𑀘𑁆𑀙𑀢𑀺.

𑀓𑀲𑁆𑀫𑀸 𑀧𑀦𑀸𑀬𑁆𑀬𑁂𑀢𑀺 𑀇𑀥 𑀓𑀸𑀬𑀲𑀗𑁆𑀔𑀸𑀭𑀸𑀤𑀺𑀦𑀸𑀫𑀲𑁆𑀲 𑀧𑀤𑀢𑁆𑀣𑀁 𑀧𑀼𑀘𑁆𑀙𑀢𑀺. 𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸𑀢𑀺 𑀓𑀸𑀬𑀦𑀺𑀲𑁆𑀲𑀺𑀢𑀸, 𑀓𑀸𑀬𑁂 𑀲𑀢𑀺 𑀳𑁄𑀦𑁆𑀢𑀺, 𑀅𑀲𑀢𑀺 𑀦 𑀳𑁄𑀦𑁆𑀢𑀺. 𑀘𑀺𑀢𑁆𑀢𑀧𑁆𑀧𑀝𑀺𑀩𑀤𑁆𑀥𑀸𑀢𑀺 𑀘𑀺𑀢𑁆𑀢𑀦𑀺𑀲𑁆𑀲𑀺𑀢𑀸, 𑀘𑀺𑀢𑁆𑀢𑁂 𑀲𑀢𑀺 𑀳𑁄𑀦𑁆𑀢𑀺, 𑀅𑀲𑀢𑀺 𑀦 𑀳𑁄𑀦𑁆𑀢𑀺.

𑁪𑁬𑁪. 𑀇𑀤𑀸𑀦𑀺 𑀓𑀺𑀁 𑀦𑀼 𑀔𑁄 𑀏𑀲𑀸 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀯𑀮𑀜𑁆𑀚𑁂𑀢𑀺, 𑀦 𑀯𑀮𑀜𑁆𑀚𑁂𑀢𑀺. 𑀘𑀺𑀡𑁆𑀡𑀯𑀲𑀻 𑀯𑀸 𑀢𑀢𑁆𑀣 𑀦𑁄 𑀘𑀺𑀡𑁆𑀡𑀯𑀲𑀻𑀢𑀺 𑀚𑀸𑀦𑀦𑀢𑁆𑀣𑀁 𑀧𑀼𑀘𑁆𑀙𑀦𑁆𑀢𑁄, 𑀓𑀣𑀁 𑀧𑀦𑀸𑀬𑁆𑀬𑁂, 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀳𑁄𑀢𑀻𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀲𑀫𑀸𑀧𑀚𑁆𑀚𑀺𑀲𑁆𑀲𑀦𑁆𑀢𑀺 𑀯𑀸 𑀲𑀫𑀸𑀧𑀚𑁆𑀚𑀸𑀫𑀻𑀢𑀺 𑀯𑀸 𑀧𑀤𑀤𑁆𑀯𑀬𑁂𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀓𑀸𑀮𑁄 𑀓𑀣𑀺𑀢𑁄. 𑀲𑀫𑀸𑀧𑀦𑁆𑀦𑁄𑀢𑀺 𑀧𑀤𑁂𑀦 𑀅𑀦𑁆𑀢𑁄𑀦𑀺𑀭𑁄𑀥𑁄. 𑀢𑀣𑀸 𑀧𑀼𑀭𑀺𑀫𑁂𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀘𑀺𑀢𑁆𑀢𑀓𑀓𑀸𑀮𑁄 𑀓𑀣𑀺𑀢𑁄, 𑀧𑀘𑁆𑀙𑀺𑀫𑁂𑀦 𑀅𑀘𑀺𑀢𑁆𑀢𑀓𑀓𑀸𑀮𑁄. 𑀧𑀼𑀩𑁆𑀩𑁂𑀯 𑀢𑀣𑀸 𑀘𑀺𑀢𑁆𑀢𑀁 𑀪𑀸𑀯𑀺𑀢𑀁 𑀳𑁄𑀢𑀻𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀓𑀸𑀮𑁂𑀬𑁂𑀯, 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀘𑀺𑀢𑁆𑀢𑀓𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀘𑀺𑀢𑁆𑀢𑀁 𑀪𑀸𑀯𑀺𑀢𑀁 𑀳𑁄𑀢𑀺. 𑀬𑀁 𑀢𑀁 𑀢𑀣𑀢𑁆𑀢𑀸𑀬 𑀉𑀧𑀦𑁂𑀢𑀻𑀢𑀺 𑀬𑀁 𑀏𑀯𑀁 𑀪𑀸𑀯𑀺𑀢𑀁 𑀘𑀺𑀢𑁆𑀢𑀁, 𑀢𑀁 𑀧𑀼𑀕𑁆𑀕𑀮𑀁 𑀢𑀣𑀢𑁆𑀢𑀸𑀬 𑀅𑀘𑀺𑀢𑁆𑀢𑀓𑀪𑀸𑀯𑀸𑀬 𑀉𑀧𑀦𑁂𑀢𑀺.

𑀧𑀞𑀫𑀁 𑀦𑀺𑀭𑀼𑀚𑁆𑀛𑀢𑀺 𑀯𑀘𑀻𑀲𑀗𑁆𑀔𑀸𑀭𑁄𑀢𑀺 𑀲𑁂𑀲𑀲𑀗𑁆𑀔𑀸𑀭𑁂𑀳𑀺 𑀧𑀞𑀫𑀁 𑀤𑀼𑀢𑀺𑀬𑀚𑁆𑀛𑀸𑀦𑁂𑀬𑁂𑀯 𑀦𑀺𑀭𑀼𑀚𑁆𑀛𑀢𑀺. 𑀢𑀢𑁄 𑀓𑀸𑀬𑀲𑀗𑁆𑀔𑀸𑀭𑁄𑀢𑀺 𑀢𑀢𑁄 𑀧𑀭𑀁 𑀓𑀸𑀬𑀲𑀗𑁆𑀔𑀸𑀭𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀦𑀺𑀭𑀼𑀚𑁆𑀛𑀢𑀺. 𑀢𑀢𑁄 𑀘𑀺𑀢𑁆𑀢𑀲𑀗𑁆𑀔𑀸𑀭𑁄𑀢𑀺 𑀢𑀢𑁄 𑀧𑀭𑀁 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀅𑀦𑁆𑀢𑁄𑀦𑀺𑀭𑁄𑀥𑁂 𑀦𑀺𑀭𑀼𑀚𑁆𑀛𑀢𑀺. 𑀯𑀼𑀝𑁆𑀞𑀳𑀺𑀲𑁆𑀲𑀦𑁆𑀢𑀺 𑀯𑀸 𑀯𑀼𑀝𑁆𑀞𑀳𑀸𑀫𑀻𑀢𑀺 𑀯𑀸 𑀧𑀤𑀤𑁆𑀯𑀬𑁂𑀦 𑀅𑀦𑁆𑀢𑁄𑀦𑀺𑀭𑁄𑀥𑀓𑀸𑀮𑁄 𑀓𑀣𑀺𑀢𑁄. 𑀯𑀼𑀝𑁆𑀞𑀺𑀢𑁄𑀢𑀺 𑀧𑀤𑁂𑀦 𑀨𑀮𑀲𑀫𑀸𑀧𑀢𑁆𑀢𑀺𑀓𑀸𑀮𑁄. 𑀢𑀣𑀸 𑀧𑀼𑀭𑀺𑀫𑁂𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀅𑀘𑀺𑀢𑁆𑀢𑀓𑀓𑀸𑀮𑁄 𑀓𑀣𑀺𑀢𑁄, 𑀧𑀘𑁆𑀙𑀺𑀫𑁂𑀦 𑀲𑀘𑀺𑀢𑁆𑀢𑀓𑀓𑀸𑀮𑁄. 𑀧𑀼𑀩𑁆𑀩𑁂𑀯 𑀢𑀣𑀸 𑀘𑀺𑀢𑁆𑀢𑀁 𑀪𑀸𑀯𑀺𑀢𑀁 𑀳𑁄𑀢𑀻𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀓𑀸𑀮𑁂𑀬𑁂𑀯 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀘𑀺𑀢𑁆𑀢𑀓𑁄 𑀳𑀼𑀢𑁆𑀯𑀸 𑀢𑀢𑁄 𑀧𑀭𑀁 𑀲𑀘𑀺𑀢𑁆𑀢𑀓𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀘𑀺𑀢𑁆𑀢𑀁 𑀪𑀸𑀯𑀺𑀢𑀁 𑀳𑁄𑀢𑀺. 𑀬𑀁 𑀢𑀁 𑀢𑀣𑀢𑁆𑀢𑀸𑀬 𑀉𑀧𑀦𑁂𑀢𑀻𑀢𑀺 𑀬𑀁 𑀏𑀯𑀁 𑀪𑀸𑀯𑀺𑀢𑀁 𑀘𑀺𑀢𑁆𑀢𑀁, 𑀢𑀁 𑀧𑀼𑀕𑁆𑀕𑀮𑀁 𑀢𑀣𑀢𑁆𑀢𑀸𑀬 𑀲𑀘𑀺𑀢𑁆𑀢𑀓𑀪𑀸𑀯𑀸𑀬 𑀉𑀧𑀦𑁂𑀢𑀺. 𑀇𑀢𑀺 𑀳𑁂𑀝𑁆𑀞𑀸 𑀦𑀺𑀭𑁄𑀥𑀲𑀫𑀸𑀧𑀚𑁆𑀚𑀦𑀓𑀸𑀮𑁄 𑀕𑀳𑀺𑀢𑁄, 𑀇𑀥 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀸𑀦𑀓𑀸𑀮𑁄.

𑀇𑀤𑀸𑀦𑀺 𑀦𑀺𑀭𑁄𑀥𑀓𑀣𑀁 𑀓𑀣𑁂𑀢𑀼𑀁 𑀯𑀸𑀭𑁄𑀢𑀺 𑀦𑀺𑀭𑁄𑀥𑀓𑀣𑀸 𑀓𑀣𑁂𑀢𑀩𑁆𑀩𑀸 𑀲𑀺𑀬𑀸, 𑀲𑀸 𑀧𑀦𑁂𑀲𑀸, ‘‘𑀤𑁆𑀯𑀻𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀢𑀬𑁄 𑀘 𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀲𑁄𑀴𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀺 𑀦𑀯𑀳𑀺 𑀲𑀫𑀸𑀥𑀺𑀘𑀭𑀺𑀬𑀸𑀳𑀺 𑀯𑀲𑀻𑀪𑀸𑀯𑀢𑀸𑀧𑀜𑁆𑀜𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀸 𑀜𑀸𑀡’’𑀦𑁆𑀢𑀺 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀓𑀣𑀺𑀢𑀸. 𑀢𑀲𑁆𑀫𑀸 𑀢𑀢𑁆𑀣 𑀓𑀣𑀺𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀸. 𑀓𑁄 𑀧𑀦𑀸𑀬𑀁 𑀦𑀺𑀭𑁄𑀥𑁄 𑀦𑀸𑀫? 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀧𑀝𑀺𑀲𑀗𑁆𑀔𑀸 𑀅𑀧𑁆𑀧𑀯𑀢𑁆𑀢𑀺. 𑀅𑀣 𑀓𑀺𑀫𑀢𑁆𑀣𑀫𑁂𑀢𑀁 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺. 𑀲𑀗𑁆𑀔𑀸𑀭𑀸𑀦𑀁 𑀧𑀯𑀢𑁆𑀢𑁂 𑀉𑀓𑁆𑀓𑀡𑁆𑀞𑀺𑀢𑀸 𑀲𑀢𑁆𑀢𑀸𑀳𑀁 𑀅𑀘𑀺𑀢𑁆𑀢𑀓𑀸 𑀳𑀼𑀢𑁆𑀯𑀸 𑀲𑀼𑀔𑀁 𑀯𑀺𑀳𑀭𑀺𑀲𑁆𑀲𑀸𑀫, 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀦𑀸𑀫𑁂𑀢𑀁, 𑀬𑀤𑀺𑀤𑀁 𑀦𑀺𑀭𑁄𑀥𑁄𑀢𑀺 𑀏𑀢𑀤𑀢𑁆𑀣𑀁 𑀲𑀫𑀸𑀧𑀚𑁆𑀚𑀦𑁆𑀢𑀺.

𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑁄𑀢𑀺 𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀳𑀺 𑀨𑀮𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀁 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀲𑀜𑁆𑀜𑀜𑁆𑀘 𑀯𑁂𑀤𑀦𑀜𑁆𑀘 𑀲𑀦𑁆𑀥𑀸𑀬, ‘‘𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑁄’’𑀢𑀺 𑀆𑀳. 𑀢𑀢𑁄 𑀓𑀸𑀬𑀲𑀗𑁆𑀔𑀸𑀭𑁄𑀢𑀺 𑀢𑀢𑁄 𑀧𑀭𑀁 𑀪𑀯𑀗𑁆𑀕𑀲𑀫𑀬𑁂 𑀓𑀸𑀬𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀺. 𑀓𑀺𑀁 𑀧𑀦 𑀨𑀮𑀲𑀫𑀸𑀧𑀢𑁆𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺? 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀇𑀫𑀲𑁆𑀲 𑀧𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀸 𑀨𑀮𑀲𑀫𑀸𑀧𑀢𑁆𑀢𑀺, 𑀲𑀸 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀓𑀺𑀁 𑀯𑀸 𑀏𑀢𑁂𑀦 𑀨𑀮𑀲𑀫𑀸𑀧𑀢𑁆𑀢𑀺 𑀧𑀞𑀫𑀚𑁆𑀛𑀸𑀦𑀺𑀓𑀸 𑀯𑀸 𑀳𑁄𑀢𑀼, 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀸 𑀯𑀸, 𑀲𑀦𑁆𑀢𑀸𑀬 𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀅𑀩𑁆𑀩𑁄𑀳𑀸𑀭𑀺𑀓𑀸 𑀳𑁄𑀦𑁆𑀢𑀺. 𑀢𑁂𑀲𑀁 𑀅𑀩𑁆𑀩𑁄𑀳𑀸𑀭𑀺𑀓𑀪𑀸𑀯𑁄 𑀲𑀜𑁆𑀚𑀻𑀯𑀢𑁆𑀣𑁂𑀭𑀯𑀢𑁆𑀣𑀼𑀦𑀸 𑀯𑁂𑀤𑀺𑀢𑀩𑁆𑀩𑁄. 𑀲𑀜𑁆𑀚𑀻𑀯𑀢𑁆𑀣𑁂𑀭𑀲𑁆𑀲 𑀳𑀺 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀓𑀺𑀁𑀲𑀼𑀓𑀧𑀼𑀧𑁆𑀨𑀲𑀤𑀺𑀲𑁂 𑀯𑀻𑀢𑀘𑁆𑀘𑀺𑀢𑀗𑁆𑀕𑀸𑀭𑁂 𑀫𑀤𑁆𑀤𑀫𑀸𑀦𑀲𑁆𑀲 𑀕𑀘𑁆𑀙𑀢𑁄 𑀘𑀻𑀯𑀭𑁂 𑀅𑀁𑀲𑀼𑀫𑀢𑁆𑀢𑀫𑁆𑀧𑀺 𑀦 𑀛𑀸𑀬𑀺, 𑀉𑀲𑀼𑀫𑀸𑀓𑀸𑀭𑀫𑀢𑁆𑀢𑀫𑁆𑀧𑀺 𑀦𑀸𑀳𑁄𑀲𑀺, 𑀲𑀫𑀸𑀧𑀢𑁆𑀢𑀺𑀨𑀮𑀁 𑀦𑀸𑀫𑁂𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀏𑀯𑀫𑁂𑀯𑀁 𑀲𑀦𑁆𑀢𑀸𑀬 𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀅𑀩𑁆𑀩𑁄𑀳𑀸𑀭𑀺𑀓𑀸 𑀳𑁄𑀦𑁆𑀢𑀻𑀢𑀺 𑀪𑀯𑀗𑁆𑀕𑀲𑀫𑀬𑁂𑀦𑁂𑀯𑁂𑀢𑀁 𑀓𑀣𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁄 𑀯𑀘𑀻𑀲𑀗𑁆𑀔𑀸𑀭𑁄𑀢𑀺 𑀢𑀢𑁄 𑀧𑀭𑀁 𑀓𑀺𑀭𑀺𑀬𑀫𑀬𑀧𑀯𑀢𑁆𑀢𑀯𑀴𑀜𑁆𑀚𑀦𑀓𑀸𑀮𑁂 𑀯𑀘𑀻𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀺. 𑀓𑀺𑀁 𑀪𑀯𑀗𑁆𑀕𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑁂 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺? 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀁𑀲𑀫𑀼𑀝𑁆𑀞𑀸𑀦𑀸 𑀧𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀯𑀸𑀘𑀁 𑀅𑀪𑀺𑀲𑀗𑁆𑀔𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀓𑀺𑀭𑀺𑀬𑀫𑀬𑀧𑀯𑀢𑁆𑀢𑀯𑀴𑀜𑁆𑀚𑀦𑀓𑀸𑀮𑁂𑀦𑁂𑀯𑀢𑀁 𑀓𑀣𑀺𑀢𑀁. 𑀲𑀼𑀜𑁆𑀜𑀢𑁄 𑀨𑀲𑁆𑀲𑁄𑀢𑀺𑀆𑀤𑀬𑁄 𑀲𑀕𑀼𑀡𑁂𑀦𑀸𑀧𑀺 𑀆𑀭𑀫𑁆𑀫𑀡𑁂𑀦𑀸𑀧𑀺 𑀓𑀣𑁂𑀢𑀩𑁆𑀩𑀸. 𑀲𑀕𑀼𑀡𑁂𑀦 𑀢𑀸𑀯 𑀲𑀼𑀜𑁆𑀜𑀢𑀸 𑀦𑀸𑀫 𑀨𑀮𑀲𑀫𑀸𑀧𑀢𑁆𑀢𑀺, 𑀢𑀸𑀬 𑀲𑀳𑀚𑀸𑀢𑀁 𑀨𑀲𑁆𑀲𑀁 𑀲𑀦𑁆𑀥𑀸𑀬 𑀲𑀼𑀜𑁆𑀜𑀢𑁄 𑀨𑀲𑁆𑀲𑁄𑀢𑀺 𑀯𑀼𑀢𑁆𑀢𑀁. 𑀅𑀦𑀺𑀫𑀺𑀢𑁆𑀢𑀸𑀧𑀡𑀺𑀳𑀺𑀢𑁂𑀲𑀼𑀧𑀺𑀏𑀲𑁂𑀯 𑀦𑀬𑁄. 𑀆𑀭𑀫𑁆𑀫𑀡𑁂𑀦 𑀧𑀦 𑀦𑀺𑀩𑁆𑀩𑀸𑀦𑀁 𑀭𑀸𑀕𑀸𑀤𑀻𑀳𑀺 𑀲𑀼𑀜𑁆𑀜𑀢𑁆𑀢𑀸 𑀲𑀼𑀜𑁆𑀜𑀁 𑀦𑀸𑀫, 𑀭𑀸𑀕𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀅𑀪𑀸𑀯𑀸 𑀅𑀦𑀺𑀫𑀺𑀢𑁆𑀢𑀁, 𑀭𑀸𑀕𑀤𑁄𑀲𑀫𑁄𑀳𑀧𑁆𑀧𑀡𑀺𑀥𑀻𑀦𑀁 𑀅𑀪𑀸𑀯𑀸 𑀅𑀧𑁆𑀧𑀡𑀺𑀳𑀺𑀢𑀁. 𑀲𑀼𑀜𑁆𑀜𑀢𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀨𑀮𑀲𑀫𑀸𑀧𑀢𑁆𑀢𑀺𑀬𑀁 𑀨𑀲𑁆𑀲𑁄 𑀲𑀼𑀜𑁆𑀜𑀢𑁄 𑀦𑀸𑀫. 𑀅𑀦𑀺𑀫𑀺𑀢𑁆𑀢𑀸𑀧𑀡𑀺𑀳𑀺𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀅𑀧𑀭𑀸 𑀆𑀕𑀫𑀦𑀺𑀬𑀓𑀣𑀸 𑀦𑀸𑀫 𑀳𑁄𑀢𑀺, 𑀲𑀼𑀜𑁆𑀜𑀢𑀸, 𑀅𑀦𑀺𑀫𑀺𑀢𑁆𑀢𑀸, 𑀅𑀧𑁆𑀧𑀡𑀺𑀳𑀺𑀢𑀸𑀢𑀺 𑀳𑀺 𑀯𑀺𑀧𑀲𑁆𑀲𑀦𑀸𑀧𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀢𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀦𑀺𑀘𑁆𑀘𑀢𑁄 𑀤𑀺𑀲𑁆𑀯𑀸 𑀅𑀦𑀺𑀘𑁆𑀘𑀢𑁄 𑀯𑀼𑀝𑁆𑀞𑀸𑀢𑀺, 𑀢𑀲𑁆𑀲 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸 𑀅𑀦𑀺𑀫𑀺𑀢𑁆𑀢𑀸 𑀦𑀸𑀫 𑀳𑁄𑀢𑀺. 𑀬𑁄 𑀤𑀼𑀓𑁆𑀔𑀢𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀤𑀼𑀓𑁆𑀔𑀢𑁄 𑀤𑀺𑀲𑁆𑀯𑀸 𑀤𑀼𑀓𑁆𑀔𑀢𑁄 𑀯𑀼𑀝𑁆𑀞𑀸𑀢𑀺, 𑀢𑀲𑁆𑀲 𑀅𑀧𑁆𑀧𑀡𑀺𑀳𑀺𑀢𑀸 𑀦𑀸𑀫. 𑀬𑁄 𑀅𑀦𑀢𑁆𑀢𑀢𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀦𑀢𑁆𑀢𑀢𑁄 𑀤𑀺𑀲𑁆𑀯𑀸 𑀅𑀦𑀢𑁆𑀢𑀢𑁄 𑀯𑀼𑀝𑁆𑀞𑀸𑀢𑀺, 𑀢𑀲𑁆𑀲 𑀲𑀼𑀜𑁆𑀜𑀢𑀸 𑀦𑀸𑀫. 𑀢𑀢𑁆𑀣 𑀅𑀦𑀺𑀫𑀺𑀢𑁆𑀢𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁄 𑀅𑀦𑀺𑀫𑀺𑀢𑁆𑀢𑁄 𑀦𑀸𑀫, 𑀅𑀦𑀺𑀫𑀺𑀢𑁆𑀢𑀫𑀕𑁆𑀕𑀲𑁆𑀲 𑀨𑀮𑀁 𑀅𑀦𑀺𑀫𑀺𑀢𑁆𑀢𑀁 𑀦𑀸𑀫. 𑀅𑀦𑀺𑀫𑀺𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀲𑀳𑀚𑀸𑀢𑁂 𑀨𑀲𑁆𑀲𑁂 𑀨𑀼𑀲𑀦𑁆𑀢𑁂 𑀅𑀦𑀺𑀫𑀺𑀢𑁆𑀢𑁄 𑀨𑀲𑁆𑀲𑁄 𑀨𑀼𑀲𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀅𑀧𑁆𑀧𑀡𑀺𑀳𑀺𑀢𑀲𑀼𑀜𑁆𑀜𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀆𑀕𑀫𑀦𑀺𑀬𑁂𑀦 𑀓𑀣𑀺𑀢𑁂 𑀧𑀦 𑀲𑀼𑀜𑁆𑀜𑀢𑁄 𑀯𑀸 𑀨𑀲𑁆𑀲𑁄 𑀅𑀦𑀺𑀫𑀺𑀢𑁆𑀢𑁄 𑀯𑀸 𑀨𑀲𑁆𑀲𑁄 𑀅𑀧𑁆𑀧𑀡𑀺𑀳𑀺𑀢𑁄 𑀯𑀸 𑀨𑀲𑁆𑀲𑁄𑀢𑀺 𑀯𑀺𑀓𑀧𑁆𑀧𑁄 𑀆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀫𑀸 𑀲𑀕𑀼𑀡𑁂𑀦 𑀘𑁂𑀯 𑀆𑀭𑀫𑁆𑀫𑀡𑁂𑀦 𑀘 𑀓𑀣𑁂𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀢𑀬𑁄 𑀨𑀲𑁆𑀲𑀸 𑀨𑀼𑀲𑀦𑁆𑀢𑀻𑀢𑀺 𑀲𑀫𑁂𑀢𑀺.

𑀯𑀺𑀯𑁂𑀓𑀦𑀺𑀦𑁆𑀦𑀦𑁆𑀢𑀺𑀆𑀤𑀻𑀲𑀼 𑀦𑀺𑀩𑁆𑀩𑀸𑀦𑀁 𑀯𑀺𑀯𑁂𑀓𑁄 𑀦𑀸𑀫, 𑀢𑀲𑁆𑀫𑀺𑀁 𑀯𑀺𑀯𑁂𑀓𑁂 𑀦𑀺𑀦𑁆𑀦𑀁 𑀑𑀦𑀢𑀦𑁆𑀢𑀺 𑀯𑀺𑀯𑁂𑀓𑀦𑀺𑀦𑁆𑀦𑀁. 𑀅𑀜𑁆𑀜𑀢𑁄 𑀆𑀕𑀦𑁆𑀢𑁆𑀯𑀸 𑀬𑁂𑀦 𑀯𑀺𑀯𑁂𑀓𑁄, 𑀢𑁂𑀦 𑀯𑀗𑁆𑀓𑀁 𑀯𑀺𑀬 𑀳𑀼𑀢𑁆𑀯𑀸 𑀞𑀺𑀢𑀦𑁆𑀢𑀺 𑀯𑀺𑀯𑁂𑀓𑀧𑁄𑀡𑀁. 𑀬𑁂𑀦 𑀯𑀺𑀯𑁂𑀓𑁄, 𑀢𑁂𑀦 𑀧𑀢𑀫𑀸𑀦𑀁 𑀯𑀺𑀬 𑀞𑀺𑀢𑀦𑁆𑀢𑀺 𑀯𑀺𑀯𑁂𑀓𑀧𑀩𑁆𑀪𑀸𑀭𑀁.

𑁪𑁬𑁫. 𑀇𑀤𑀸𑀦𑀺 𑀬𑀸 𑀯𑁂𑀤𑀦𑀸 𑀦𑀺𑀭𑁄𑀥𑁂𑀢𑁆𑀯𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀢𑀸 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀧𑀼𑀘𑁆𑀙𑀦𑁆𑀢𑁄 𑀓𑀢𑀺 𑀧𑀦𑀸𑀬𑁆𑀬𑁂, 𑀯𑁂𑀤𑀦𑀸𑀢𑀺 𑀆𑀳. 𑀓𑀸𑀬𑀺𑀓𑀁 𑀯𑀸𑀢𑀺𑀆𑀤𑀻𑀲𑀼 𑀧𑀜𑁆𑀘𑀤𑁆𑀯𑀸𑀭𑀺𑀓𑀁 𑀲𑀼𑀔𑀁 𑀓𑀸𑀬𑀺𑀓𑀁 𑀦𑀸𑀫, 𑀫𑀦𑁄𑀤𑁆𑀯𑀸𑀭𑀺𑀓𑀁 𑀘𑁂𑀢𑀲𑀺𑀓𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀲𑀼𑀔𑀦𑁆𑀢𑀺 𑀲𑀪𑀸𑀯𑀦𑀺𑀤𑁆𑀤𑁂𑀲𑁄. 𑀲𑀸𑀢𑀦𑁆𑀢𑀺 𑀢𑀲𑁆𑀲𑁂𑀯 𑀫𑀥𑀼𑀭𑀪𑀸𑀯𑀤𑀻𑀧𑀓𑀁 𑀯𑁂𑀯𑀘𑀦𑀁. 𑀯𑁂𑀤𑀬𑀺𑀢𑀦𑁆𑀢𑀺 𑀯𑁂𑀤𑀬𑀺𑀢𑀪𑀸𑀯𑀤𑀻𑀧𑀓𑀁, 𑀲𑀩𑁆𑀩𑀯𑁂𑀤𑀦𑀸𑀦𑀁 𑀲𑀸𑀥𑀸𑀭𑀡𑀯𑀘𑀦𑀁. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀞𑀺𑀢𑀺𑀲𑀼𑀔𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀸𑀢𑀺𑀆𑀤𑀻𑀲𑀼 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀅𑀢𑁆𑀣𑀺𑀪𑀸𑀯𑁄 𑀲𑀼𑀔𑀁, 𑀦𑀢𑁆𑀣𑀺𑀪𑀸𑀯𑁄 𑀤𑀼𑀓𑁆𑀔𑀁. 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀅𑀢𑁆𑀣𑀺𑀪𑀸𑀯𑁄 𑀤𑀼𑀓𑁆𑀔𑀁, 𑀦𑀢𑁆𑀣𑀺𑀪𑀸𑀯𑁄 𑀲𑀼𑀔𑀁. 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀚𑀸𑀦𑀦𑀪𑀸𑀯𑁄 𑀲𑀼𑀔𑀁, 𑀅𑀚𑀸𑀦𑀦𑀪𑀸𑀯𑁄 𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀣𑁄.

𑀓𑀺𑀁 𑀅𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺 𑀓𑀢𑀫𑁄 𑀅𑀦𑀼𑀲𑀬𑁄 𑀅𑀦𑀼𑀲𑁂𑀢𑀺. 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀲𑀬𑀺𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀅𑀦𑀼𑀲𑀬𑀧𑀼𑀘𑁆𑀙𑀁 𑀧𑀼𑀘𑁆𑀙𑀢𑀺. 𑀦 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀲𑀩𑁆𑀩𑀸𑀬 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺 𑀦 𑀲𑀩𑁆𑀩𑀸𑀬 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀺. 𑀦 𑀲𑀩𑁆𑀩𑀸𑀬 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑁄 𑀅𑀧𑁆𑀧𑀳𑀻𑀦𑁄, 𑀦 𑀲𑀩𑁆𑀩𑀁 𑀲𑀼𑀔𑀁 𑀯𑁂𑀤𑀦𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀓𑀺𑀁 𑀧𑀳𑀸𑀢𑀩𑁆𑀩𑀦𑁆𑀢𑀺 𑀅𑀬𑀁 𑀧𑀳𑀸𑀦𑀧𑀼𑀘𑁆𑀙𑀸 𑀦𑀸𑀫.

𑀭𑀸𑀕𑀁 𑀢𑁂𑀦 𑀧𑀚𑀳𑀢𑀻𑀢𑀺 𑀏𑀢𑁆𑀣 𑀏𑀓𑁂𑀦𑁂𑀯 𑀩𑁆𑀬𑀸𑀓𑀭𑀡𑁂𑀦 𑀤𑁆𑀯𑁂 𑀧𑀼𑀘𑁆𑀙𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀇𑀥 𑀪𑀺𑀓𑁆𑀔𑀼 𑀭𑀸𑀕𑀸𑀦𑀼𑀲𑀬𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀢𑀺, 𑀛𑀸𑀦𑀯𑀺𑀓𑁆𑀔𑀫𑁆𑀪𑀺𑀢𑀁 𑀭𑀸𑀕𑀸𑀦𑀼𑀲𑀬𑀁 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑀫𑁂𑀯 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀢𑁂𑀢𑀺. 𑀲𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀳𑀻𑀦𑁄𑀧𑀺 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸𑀯 𑀧𑀞𑀫𑀚𑁆𑀛𑀸𑀦𑁂 𑀦𑀸𑀦𑀼𑀲𑁂𑀢𑀺 𑀦𑀸𑀫. 𑀢𑁂𑀦𑀸𑀳 𑁋 ‘‘𑀦 𑀢𑀢𑁆𑀣 𑀭𑀸𑀕𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺. 𑀢𑀤𑀸𑀬𑀢𑀦𑀦𑁆𑀢𑀺 𑀢𑀁 𑀆𑀬𑀢𑀦𑀁, 𑀧𑀭𑀫𑀲𑁆𑀲𑀸𑀲𑀪𑀸𑀯𑁂𑀦 𑀧𑀢𑀺𑀝𑁆𑀞𑀸𑀦𑀪𑀽𑀢𑀁 𑀅𑀭𑀳𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀇𑀢𑀺 𑀅𑀦𑀼𑀢𑁆𑀢𑀭𑁂𑀲𑀽𑀢𑀺 𑀏𑀯𑀁 𑀅𑀦𑀼𑀢𑁆𑀢𑀭𑀸 𑀯𑀺𑀫𑁄𑀓𑁆𑀔𑀸𑀢𑀺 𑀮𑀤𑁆𑀥𑀦𑀸𑀫𑁂 𑀅𑀭𑀳𑀢𑁆𑀢𑁂. 𑀧𑀺𑀳𑀁 𑀉𑀧𑀝𑁆𑀞𑀸𑀧𑀬𑀢𑁄𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀦𑁆𑀢𑀲𑁆𑀲. 𑀉𑀧𑁆𑀧𑀚𑁆𑀚𑀢𑀺 𑀧𑀺𑀳𑀸𑀧𑀘𑁆𑀘𑀬𑀸 𑀤𑁄𑀫𑀦𑀲𑁆𑀲𑀦𑁆𑀢𑀺 𑀧𑀢𑁆𑀣𑀦𑀸𑀬 𑀧𑀝𑁆𑀞𑀧𑀦𑀫𑀽𑀮𑀓𑀁 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀁 𑀧𑀦𑁂𑀢𑀁 𑀦 𑀧𑀢𑁆𑀣𑀦𑀸𑀬 𑀧𑀝𑁆𑀞𑀧𑀦𑀫𑀽𑀮𑀓𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀢𑁆𑀣𑁂𑀢𑁆𑀯𑀸 𑀅𑀮𑀪𑀦𑁆𑀢𑀲𑁆𑀲 𑀧𑀦 𑀅𑀮𑀸𑀪𑀫𑀽𑀮𑀓𑀁 𑀉𑀧𑁆𑀧𑀚𑁆𑀚𑀫𑀸𑀦𑀁, ‘‘𑀉𑀧𑁆𑀧𑀚𑁆𑀚𑀢𑀺 𑀧𑀺𑀳𑀸𑀧𑀘𑁆𑀘𑀬𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀤𑁄𑀫𑀦𑀲𑁆𑀲𑀁 𑀦𑀸𑀫 𑀏𑀓𑀦𑁆𑀢𑁂𑀦 𑀅𑀓𑀼𑀲𑀮𑀁, 𑀇𑀤𑀁 𑀧𑀦 𑀲𑁂𑀯𑀺𑀢𑀩𑁆𑀩𑀁 𑀤𑁄𑀫𑀦𑀲𑁆𑀲𑀁 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺. 𑀬𑁄𑀕𑀺𑀦𑁄 𑀳𑀺 𑀢𑁂𑀫𑀸𑀲𑀺𑀓𑀁 𑀙𑀫𑀸𑀲𑀺𑀓𑀁 𑀯𑀸 𑀦𑀯𑀫𑀸𑀲𑀺𑀓𑀁 𑀯𑀸 𑀧𑀝𑀺𑀧𑀤𑀁 𑀕𑀡𑁆𑀳𑀦𑁆𑀢𑀺. 𑀢𑁂𑀲𑀼 𑀬𑁄 𑀢𑀁 𑀢𑀁 𑀧𑀝𑀺𑀧𑀤𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀓𑀸𑀮𑀧𑀭𑀺𑀘𑁆𑀙𑁂𑀤𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻𑀢𑀺 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀦 𑀲𑀓𑁆𑀓𑁄𑀢𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑁂𑀦 𑀧𑀸𑀧𑀼𑀡𑀺𑀢𑀼𑀁, 𑀢𑀲𑁆𑀲 𑀩𑀮𑀯𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀆𑀴𑀺𑀦𑁆𑀤𑀺𑀓𑀯𑀸𑀲𑀺𑀫𑀳𑀸𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑀲𑁆𑀲 𑀯𑀺𑀬 𑀅𑀲𑁆𑀲𑀼𑀥𑀸𑀭𑀸 𑀧𑀯𑀢𑁆𑀢𑀦𑁆𑀢𑀺. 𑀣𑁂𑀭𑁄 𑀓𑀺𑀭 𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀕𑀢𑀧𑀘𑁆𑀘𑀸𑀕𑀢𑀯𑀢𑁆𑀢𑀁 𑀧𑀽𑀭𑁂𑀲𑀺. 𑀢𑀲𑁆𑀲, ‘‘𑀇𑀫𑀲𑁆𑀫𑀺𑀁 𑀯𑀸𑀭𑁂 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀇𑀫𑀲𑁆𑀫𑀺𑀁 𑀯𑀸𑀭𑁂 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀫𑀸𑀦𑀲𑀁 𑀩𑀦𑁆𑀥𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲𑁂𑀯 𑀏𑀓𑀽𑀦𑀯𑀻𑀲𑀢𑀺𑀯𑀲𑁆𑀲𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺. 𑀧𑀯𑀸𑀭𑀡𑀸𑀤𑀺𑀯𑀲𑁂 𑀆𑀕𑀢𑁂 𑀣𑁂𑀭𑀲𑁆𑀲 𑀅𑀲𑁆𑀲𑀼𑀧𑀸𑀢𑁂𑀦 𑀫𑀼𑀢𑁆𑀢𑀤𑀺𑀯𑀲𑁄 𑀦𑀸𑀫 𑀦𑀸𑀳𑁄𑀲𑀺. 𑀯𑀻𑀲𑀢𑀺𑀫𑁂 𑀧𑀦 𑀯𑀲𑁆𑀲𑁂 𑀅𑀭𑀳𑀢𑁆𑀢𑀁 𑀧𑀸𑀡𑀼𑀡𑀺.

𑀧𑀝𑀺𑀖𑀁 𑀢𑁂𑀦 𑀧𑀚𑀳𑀢𑀻𑀢𑀺 𑀏𑀢𑁆𑀣 𑀤𑁄𑀫𑀦𑀲𑁆𑀲𑁂𑀦𑁂𑀯 𑀧𑀝𑀺𑀖𑀁 𑀧𑀚𑀳𑀢𑀺. 𑀦 𑀳𑀺 𑀧𑀝𑀺𑀖𑁂𑀦𑁂𑀯 𑀧𑀝𑀺𑀖𑀧𑁆𑀧𑀳𑀸𑀦𑀁, 𑀤𑁄𑀫𑀦𑀲𑁆𑀲𑁂𑀦 𑀯𑀸 𑀤𑁄𑀫𑀦𑀲𑁆𑀲𑀧𑁆𑀧𑀳𑀸𑀦𑀁 𑀦𑀸𑀫 𑀅𑀢𑁆𑀣𑀺. 𑀅𑀬𑀁 𑀧𑀦 𑀪𑀺𑀓𑁆𑀔𑀼 𑀢𑁂𑀫𑀸𑀲𑀺𑀓𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀧𑀝𑀺𑀧𑀤𑀁 𑀕𑀳𑁂𑀢𑁆𑀯𑀸 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘‘𑀧𑀲𑁆𑀲 𑀪𑀺𑀓𑁆𑀔𑀼, 𑀓𑀺𑀁 𑀢𑀼𑀬𑁆𑀳𑀁 𑀲𑀻𑀮𑁂𑀦 𑀳𑀻𑀦𑀝𑁆𑀞𑀸𑀦𑀁 𑀅𑀢𑁆𑀣𑀺, 𑀉𑀤𑀸𑀳𑀼 𑀯𑀻𑀭𑀺𑀬𑁂𑀦, 𑀉𑀤𑀸𑀳𑀼 𑀧𑀜𑁆𑀜𑀸𑀬, 𑀦𑀦𑀼 𑀢𑁂 𑀲𑀻𑀮𑀁 𑀲𑀼𑀧𑀭𑀺𑀲𑀼𑀤𑁆𑀥𑀁 𑀯𑀻𑀭𑀺𑀬𑀁 𑀲𑀼𑀧𑀕𑁆𑀕𑀳𑀺𑀢𑀁 𑀧𑀜𑁆𑀜𑀸 𑀲𑀽𑀭𑀸 𑀳𑀼𑀢𑁆𑀯𑀸 𑀯𑀳𑀢𑀻’’𑀢𑀺. 𑀲𑁄 𑀏𑀯𑀁 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑁆𑀯𑀸, ‘‘𑀦 𑀤𑀸𑀦𑀺 𑀧𑀼𑀦 𑀇𑀫𑀲𑁆𑀲 𑀤𑁄𑀫𑀦𑀲𑁆𑀲𑀲𑁆𑀲 𑀉𑀧𑁆𑀧𑀚𑁆𑀚𑀺𑀢𑀼𑀁 𑀤𑀲𑁆𑀲𑀸𑀫𑀻’’𑀢𑀺 𑀯𑀻𑀭𑀺𑀬𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀅𑀦𑁆𑀢𑁄𑀢𑁂𑀫𑀸𑀲𑁂 𑀯𑀸 𑀅𑀦𑁆𑀢𑁄𑀙𑀫𑀸𑀲𑁂 𑀯𑀸 𑀅𑀦𑁆𑀢𑁄𑀦𑀯𑀫𑀸𑀲𑁂 𑀯𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀢𑀁 𑀲𑀫𑀼𑀕𑁆𑀖𑀸𑀢𑁂𑀢𑀺. 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀧𑀝𑀺𑀖𑁂𑀦𑁂𑀯 𑀧𑀝𑀺𑀖𑀁, 𑀤𑁄𑀫𑀦𑀲𑁆𑀲𑁂𑀦𑁂𑀯 𑀤𑁄𑀫𑀦𑀲𑁆𑀲𑀁 𑀧𑀚𑀳𑀢𑀺 𑀦𑀸𑀫.

𑀦 𑀢𑀢𑁆𑀣 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺 𑀢𑀢𑁆𑀣 𑀏𑀯𑀭𑀽𑀧𑁂 𑀤𑁄𑀫𑀦𑀲𑁆𑀲𑁂 𑀧𑀝𑀺𑀖𑀸𑀦𑀼𑀲𑀬𑁄 𑀦𑀸𑀦𑀼𑀲𑁂𑀢𑀺. 𑀦 𑀢𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀢𑀺, 𑀧𑀳𑀻𑀦𑁄𑀯 𑀢𑀢𑁆𑀣 𑀧𑀝𑀺𑀖𑀸𑀦𑀼𑀲𑀬𑁄𑀢𑀺 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀁 𑀢𑁂𑀦 𑀧𑀚𑀳𑀢𑀻𑀢𑀺 𑀇𑀥 𑀪𑀺𑀓𑁆𑀔𑀼 𑀅𑀯𑀺𑀚𑁆𑀚𑀸𑀦𑀼𑀲𑀬𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀢𑀺, 𑀛𑀸𑀦𑀯𑀺𑀓𑁆𑀔𑀫𑁆𑀪𑀺𑀢𑀁 𑀅𑀯𑀺𑀚𑁆𑀚𑀸𑀦𑀼𑀲𑀬𑀁 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑀫𑁂𑀯 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀢𑁂𑀢𑀺. 𑀲𑁄 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀳𑀻𑀦𑁄𑀧𑀺 𑀢𑀣𑀸 𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀦𑀸𑀦𑀼𑀲𑁂𑀢𑀺 𑀦𑀸𑀫. 𑀢𑁂𑀦𑀸𑀳 𑁋 ‘‘𑀦 𑀢𑀢𑁆𑀣 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻’’𑀢𑀺.

𑁪𑁬𑁬. 𑀇𑀤𑀸𑀦𑀺 𑀧𑀝𑀺𑀪𑀸𑀕𑀧𑀼𑀘𑁆𑀙𑀁 𑀧𑀼𑀘𑁆𑀙𑀦𑁆𑀢𑁄 𑀲𑀼𑀔𑀸𑀬 𑀧𑀦𑀸𑀬𑁆𑀬𑁂𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀬𑀲𑁆𑀫𑀸 𑀲𑀼𑀔𑀲𑁆𑀲 𑀤𑀼𑀓𑁆𑀔𑀁, 𑀤𑀼𑀓𑁆𑀔𑀲𑁆𑀲 𑀘 𑀲𑀼𑀔𑀁 𑀧𑀘𑁆𑀘𑀦𑀻𑀓𑀁, 𑀢𑀲𑁆𑀫𑀸 𑀤𑁆𑀯𑀻𑀲𑀼 𑀯𑁂𑀤𑀦𑀸𑀲𑀼 𑀯𑀺𑀲𑀪𑀸𑀕𑀧𑀝𑀺𑀪𑀸𑀕𑁄 𑀓𑀣𑀺𑀢𑁄. 𑀉𑀧𑁂𑀓𑁆𑀔𑀸 𑀧𑀦 𑀅𑀦𑁆𑀥𑀓𑀸𑀭𑀸 𑀅𑀯𑀺𑀪𑀽𑀢𑀸 𑀤𑀼𑀤𑁆𑀤𑀻𑀧𑀦𑀸, 𑀅𑀯𑀺𑀚𑁆𑀚𑀸𑀧𑀺 𑀢𑀸𑀤𑀺𑀲𑀸𑀯𑀸𑀢𑀺 𑀢𑁂𑀦𑁂𑀢𑁆𑀣 𑀲𑀪𑀸𑀕𑀧𑀝𑀺𑀪𑀸𑀕𑁄 𑀓𑀣𑀺𑀢𑁄. 𑀬𑀢𑁆𑀢𑀓𑁂𑀲𑀼 𑀧𑀦 𑀞𑀸𑀦𑁂𑀲𑀼 𑀅𑀯𑀺𑀚𑁆𑀚𑀸 𑀢𑀫𑀁 𑀓𑀭𑁄𑀢𑀺, 𑀢𑀢𑁆𑀢𑀓𑁂𑀲𑀼 𑀯𑀺𑀚𑁆𑀚𑀸 𑀢𑀫𑀁 𑀯𑀺𑀦𑁄𑀤𑁂𑀢𑀻𑀢𑀺 𑀯𑀺𑀲𑀪𑀸𑀕𑀧𑀝𑀺𑀪𑀸𑀕𑁄 𑀓𑀣𑀺𑀢𑁄. 𑀅𑀯𑀺𑀚𑁆𑀚𑀸𑀬 𑀔𑁄, 𑀆𑀯𑀼𑀲𑁄𑀢𑀺 𑀏𑀢𑁆𑀣 𑀉𑀪𑁄𑀧𑁂𑀢𑁂 𑀥𑀫𑁆𑀫𑀸 𑀅𑀦𑀸𑀲𑀯𑀸 𑀮𑁄𑀓𑀼𑀢𑁆𑀢𑀭𑀸𑀢𑀺 𑀲𑀪𑀸𑀕𑀧𑀝𑀺𑀪𑀸𑀕𑁄𑀯 𑀓𑀣𑀺𑀢𑁄. 𑀯𑀺𑀫𑀼𑀢𑁆𑀢𑀺𑀬𑀸 𑀔𑁄, 𑀆𑀯𑀼𑀲𑁄𑀢𑀺 𑀏𑀢𑁆𑀣 𑀅𑀦𑀸𑀲𑀯𑀝𑁆𑀞𑁂𑀦 𑀮𑁄𑀓𑀼𑀢𑁆𑀢𑀭𑀝𑁆𑀞𑁂𑀦 𑀅𑀩𑁆𑀬𑀸𑀓𑀢𑀝𑁆𑀞𑁂𑀦 𑀘 𑀲𑀪𑀸𑀕𑀧𑀝𑀺𑀪𑀸𑀕𑁄𑀯 𑀓𑀣𑀺𑀢𑁄. 𑀅𑀘𑁆𑀘𑀬𑀸𑀲𑀻𑀢𑀺 𑀏𑀢𑁆𑀣 𑀧𑀜𑁆𑀳𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀕𑀢𑁄𑀲𑀻𑀢𑀺 𑀅𑀢𑁆𑀣𑁄. 𑀦𑀸𑀲𑀓𑁆𑀔𑀺 𑀧𑀜𑁆𑀳𑀸𑀦𑀁 𑀧𑀭𑀺𑀬𑀦𑁆𑀢𑀁 𑀕𑀳𑁂𑀢𑀼𑀦𑁆𑀢𑀺 𑀧𑀜𑁆𑀳𑀸𑀦𑀁 𑀧𑀭𑀺𑀘𑁆𑀙𑁂𑀤𑀧𑀫𑀸𑀡𑀁 𑀕𑀳𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀅𑀧𑁆𑀧𑀝𑀺𑀪𑀸𑀕𑀥𑀫𑁆𑀫𑀲𑁆𑀲 𑀧𑀝𑀺𑀪𑀸𑀕𑀁 𑀧𑀼𑀘𑁆𑀙𑀺. 𑀦𑀺𑀩𑁆𑀩𑀸𑀦𑀁 𑀦𑀸𑀫𑁂𑀢𑀁 𑀅𑀧𑁆𑀧𑀝𑀺𑀪𑀸𑀕𑀁, 𑀦 𑀲𑀓𑁆𑀓𑀸 𑀦𑀻𑀮𑀁 𑀯𑀸 𑀧𑀻𑀢𑀓𑀁 𑀯𑀸𑀢𑀺 𑀓𑁂𑀦𑀘𑀺 𑀥𑀫𑁆𑀫𑁂𑀦 𑀲𑀤𑁆𑀥𑀺𑀁 𑀧𑀝𑀺𑀪𑀸𑀕𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁. 𑀢𑀜𑁆𑀘 𑀢𑁆𑀯𑀁 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀧𑀼𑀘𑁆𑀙𑀲𑀻𑀢𑀺 𑀅𑀢𑁆𑀣𑁄.

𑀏𑀢𑁆𑀢𑀸𑀯𑀢𑀸 𑀘𑀸𑀬𑀁 𑀉𑀧𑀸𑀲𑀓𑁄 𑀬𑀣𑀸 𑀦𑀸𑀫 𑀲𑀢𑁆𑀢𑀫𑁂 𑀖𑀭𑁂 𑀲𑀮𑀸𑀓𑀪𑀢𑁆𑀢𑀁 𑀮𑀪𑀺𑀢𑁆𑀯𑀸 𑀕𑀢𑁄 𑀪𑀺𑀓𑁆𑀔𑀼 𑀲𑀢𑁆𑀢 𑀖𑀭𑀸𑀦𑀺 𑀅𑀢𑀺𑀓𑁆𑀓𑀫𑁆𑀫 𑀅𑀝𑁆𑀞𑀫𑀲𑁆𑀲 𑀤𑁆𑀯𑀸𑀭𑁂 𑀞𑀺𑀢𑁄 𑀲𑀩𑁆𑀩𑀸𑀦𑀺𑀧𑀺 𑀲𑀢𑁆𑀢 𑀕𑁂𑀳𑀸𑀦𑀺 𑀯𑀺𑀭𑀤𑁆𑀥𑁄𑀯 𑀦 𑀅𑀜𑁆𑀜𑀸𑀲𑀺, 𑀏𑀯𑀫𑁂𑀯𑀁 𑀅𑀧𑁆𑀧𑀝𑀺𑀪𑀸𑀕𑀥𑀫𑁆𑀫𑀲𑁆𑀲 𑀧𑀝𑀺𑀪𑀸𑀕𑀁 𑀧𑀼𑀘𑁆𑀙𑀦𑁆𑀢𑁄 𑀲𑀩𑁆𑀩𑀸𑀲𑀼𑀧𑀺 𑀲𑀢𑁆𑀢𑀲𑀼 𑀲𑀧𑁆𑀧𑀝𑀺𑀪𑀸𑀕𑀧𑀼𑀘𑁆𑀙𑀸𑀲𑀼 𑀯𑀺𑀭𑀤𑁆𑀥𑁄𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀦𑀺𑀩𑁆𑀩𑀸𑀦𑁄𑀕𑀥𑀦𑁆𑀢𑀺 𑀦𑀺𑀩𑁆𑀩𑀸𑀦𑀩𑁆𑀪𑀦𑁆𑀢𑀭𑀁 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀁. 𑀦𑀺𑀩𑁆𑀩𑀸𑀦𑀧𑀭𑀸𑀬𑀦𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀧𑀭𑀁 𑀅𑀬𑀦𑀫𑀲𑁆𑀲 𑀧𑀭𑀸 𑀕𑀢𑀺, 𑀦 𑀢𑀢𑁄 𑀧𑀭𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀁 𑀅𑀯𑀲𑀸𑀦𑀁 𑀅𑀲𑁆𑀲𑀸𑀢𑀺 𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦𑀁.

𑁪𑁬𑁭. 𑀧𑀡𑁆𑀟𑀺𑀢𑀸𑀢𑀺 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀥𑀸𑀢𑀼𑀓𑀼𑀲𑀮𑀸 𑀆𑀬𑀢𑀦𑀓𑀼𑀲𑀮𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑀸 𑀞𑀸𑀦𑀸𑀝𑁆𑀞𑀸𑀦𑀓𑀼𑀲𑀮𑀸𑀢𑀺 𑀅𑀢𑁆𑀣𑁄. 𑀫𑀳𑀸𑀧𑀜𑁆𑀜𑀸𑀢𑀺 𑀫𑀳𑀦𑁆𑀢𑁂 𑀅𑀢𑁆𑀣𑁂 𑀫𑀳𑀦𑁆𑀢𑁂 𑀥𑀫𑁆𑀫𑁂 𑀫𑀳𑀦𑁆𑀢𑀸 𑀦𑀺𑀭𑀼𑀢𑁆𑀢𑀺𑀬𑁄 𑀫𑀳𑀦𑁆𑀢𑀸𑀦𑀺 𑀧𑀝𑀺𑀪𑀸𑀦𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑀲𑀫𑀢𑁆𑀣𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸. 𑀬𑀣𑀸 𑀢𑀁 𑀥𑀫𑁆𑀫𑀤𑀺𑀦𑁆𑀦𑀸𑀬𑀸𑀢𑀺 𑀬𑀣𑀸 𑀥𑀫𑁆𑀫𑀤𑀺𑀦𑁆𑀦𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀩𑁆𑀬𑀸𑀓𑀢𑀁, 𑀅𑀳𑀫𑁆𑀧𑀺 𑀢𑀁 𑀏𑀯𑀫𑁂𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑀧𑀦 𑀅𑀬𑀁 𑀲𑀼𑀢𑁆𑀢𑀦𑁆𑀢𑁄 𑀚𑀺𑀦𑀪𑀸𑀲𑀺𑀢𑁄 𑀦𑀸𑀫 𑀚𑀸𑀢𑁄, 𑀦 𑀲𑀸𑀯𑀓𑀪𑀸𑀲𑀺𑀢𑁄. 𑀬𑀣𑀸 𑀳𑀺 𑀭𑀸𑀚𑀬𑀼𑀢𑁆𑀢𑁂𑀳𑀺 𑀮𑀺𑀔𑀺𑀢𑀁 𑀧𑀡𑁆𑀡𑀁 𑀬𑀸𑀯 𑀭𑀸𑀚𑀫𑀼𑀤𑁆𑀤𑀺𑀓𑀸𑀬 𑀦 𑀮𑀜𑁆𑀙𑀺𑀢𑀁 𑀳𑁄𑀢𑀺, 𑀦 𑀢𑀸𑀯 𑀭𑀸𑀚𑀧𑀡𑁆𑀡𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺; 𑀮𑀜𑁆𑀙𑀺𑀢𑀫𑀢𑁆𑀢𑀁 𑀧𑀦 𑀭𑀸𑀚𑀧𑀡𑁆𑀡𑀁 𑀦𑀸𑀫 𑀳𑁄𑀢𑀺, 𑀢𑀣𑀸, ‘‘𑀅𑀳𑀫𑁆𑀧𑀺 𑀢𑀁 𑀏𑀯𑀫𑁂𑀯 𑀩𑁆𑀬𑀸𑀓𑀭𑁂𑀬𑁆𑀬’’𑀦𑁆𑀢𑀺 𑀇𑀫𑀸𑀬 𑀚𑀺𑀦𑀯𑀘𑀦𑀫𑀼𑀤𑁆𑀤𑀺𑀓𑀸𑀬 𑀮𑀜𑁆𑀙𑀺𑀢𑀢𑁆𑀢𑀸 𑀅𑀬𑀁 𑀲𑀼𑀢𑁆𑀢𑀦𑁆𑀢𑁄 𑀆𑀳𑀘𑁆𑀘𑀯𑀘𑀦𑁂𑀦 𑀚𑀺𑀦𑀪𑀸𑀲𑀺𑀢𑁄 𑀦𑀸𑀫 𑀚𑀸𑀢𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀘𑀽𑀴𑀯𑁂𑀤𑀮𑁆𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀽𑀴𑀥𑀫𑁆𑀫𑀲𑀫𑀸𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁬𑁮. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀘𑀽𑀴𑀥𑀫𑁆𑀫𑀲𑀫𑀸𑀤𑀸𑀦𑀲𑀼𑀢𑁆𑀢𑀁. 𑀢𑀢𑁆𑀣 𑀥𑀫𑁆𑀫𑀲𑀫𑀸𑀤𑀸𑀦𑀸𑀦𑀻𑀢𑀺 𑀥𑀫𑁆𑀫𑁄𑀢𑀺 𑀕𑀳𑀺𑀢𑀕𑀳𑀡𑀸𑀦𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀼𑀔𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀲𑀼𑀔𑀁, 𑀆𑀬𑀽𑀳𑀦𑀓𑁆𑀔𑀡𑁂 𑀲𑀼𑀔𑀁 𑀲𑀼𑀓𑀭𑀁 𑀲𑀼𑀔𑁂𑀦 𑀲𑀓𑁆𑀓𑀸 𑀧𑀽𑀭𑁂𑀢𑀼𑀁. 𑀆𑀬𑀢𑀺𑀁 𑀤𑀼𑀓𑁆𑀔𑀯𑀺𑀧𑀸𑀓𑀦𑁆𑀢𑀺 𑀅𑀦𑀸𑀕𑀢𑁂 𑀯𑀺𑀧𑀸𑀓𑀓𑀸𑀮𑁂 𑀤𑀼𑀓𑁆𑀔𑀯𑀺𑀧𑀸𑀓𑀁. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁪𑁬𑁯. 𑀦𑀢𑁆𑀣𑀺 𑀓𑀸𑀫𑁂𑀲𑀼 𑀤𑁄𑀲𑁄𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼𑀧𑀺 𑀓𑀺𑀮𑁂𑀲𑀓𑀸𑀫𑁂𑀲𑀼𑀧𑀺 𑀤𑁄𑀲𑁄 𑀦𑀢𑁆𑀣𑀺. 𑀧𑀸𑀢𑀩𑁆𑀬𑀢𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀢𑁂 𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀺𑀮𑁂𑀲𑀓𑀸𑀫𑁂𑀦 𑀧𑀸𑀢𑀩𑁆𑀬𑀢𑀁 𑀧𑀺𑀯𑀺𑀢𑀩𑁆𑀩𑀢𑀁, 𑀬𑀣𑀸𑀭𑀼𑀘𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀫𑁄𑀴𑀺𑀩𑀤𑁆𑀥𑀸𑀳𑀻𑀢𑀺 𑀫𑁄𑀴𑀺𑀁 𑀓𑀢𑁆𑀯𑀸 𑀩𑀤𑁆𑀥𑀓𑁂𑀲𑀸𑀳𑀺. 𑀧𑀭𑀺𑀩𑁆𑀩𑀸𑀚𑀺𑀓𑀸𑀳𑀻𑀢𑀺 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀺𑀓𑀸𑀳𑀺. 𑀏𑀯𑀫𑀸𑀳𑀁𑀲𑀽𑀢𑀺 𑀏𑀯𑀁 𑀯𑀤𑀦𑁆𑀢𑀺. 𑀧𑀭𑀺𑀜𑁆𑀜𑀁 𑀧𑀜𑁆𑀜𑀧𑁂𑀦𑁆𑀢𑀻𑀢𑀺 𑀧𑀳𑀸𑀦𑀁 𑀲𑀫𑀢𑀺𑀓𑁆𑀓𑀫𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀫𑀸𑀮𑀼𑀯𑀸𑀲𑀺𑀧𑀸𑀝𑀺𑀓𑀸𑀢𑀺 𑀤𑀻𑀖𑀲𑀡𑁆𑀞𑀸𑀦𑀁 𑀫𑀸𑀮𑀼𑀯𑀸𑀧𑀓𑁆𑀓𑀁. 𑀨𑀮𑁂𑀬𑁆𑀬𑀸𑀢𑀺 𑀆𑀢𑀧𑁂𑀦 𑀲𑀼𑀲𑁆𑀲𑀺𑀢𑁆𑀯𑀸 𑀪𑀺𑀚𑁆𑀚𑁂𑀬𑁆𑀬. 𑀲𑀸𑀮𑀫𑀽𑀮𑁂𑀢𑀺 𑀲𑀸𑀮𑀭𑀼𑀓𑁆𑀔𑀲𑁆𑀲 𑀲𑀫𑀻𑀧𑁂. 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀓𑀲𑁆𑀫𑀸 𑀆𑀧𑀚𑁆𑀚𑀢𑀺? 𑀪𑀯𑀦𑀯𑀺𑀦𑀸𑀲𑀪𑀬𑀸. 𑀭𑀼𑀓𑁆𑀔𑀫𑀽𑀮𑁂 𑀧𑀢𑀺𑀢𑀫𑀸𑀮𑀼𑀯𑀸𑀩𑀻𑀚𑀢𑁄 𑀳𑀺 𑀮𑀢𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀢𑀺. 𑀲𑀸 𑀫𑀳𑀸𑀧𑀢𑁆𑀢𑀸 𑀘𑁂𑀯 𑀳𑁄𑀢𑀺 𑀩𑀳𑀼𑀧𑀢𑁆𑀢𑀸 𑀘, 𑀓𑁄𑀯𑀺𑀴𑀸𑀭𑀧𑀢𑁆𑀢𑀲𑀤𑀺𑀲𑁂𑀳𑀺 𑀧𑀢𑁆𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀅𑀣 𑀢𑀁 𑀭𑀼𑀓𑁆𑀔𑀁 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀯𑀺𑀦𑀦𑁆𑀥𑀫𑀸𑀦𑀸 𑀲𑀩𑁆𑀩𑀯𑀺𑀝𑀧𑀸𑀦𑀺 𑀲𑀜𑁆𑀙𑀸𑀤𑁂𑀢𑁆𑀯𑀸 𑀫𑀳𑀦𑁆𑀢𑀁 𑀪𑀸𑀭𑀁 𑀚𑀦𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀲𑀸 𑀯𑀸𑀢𑁂 𑀯𑀸 𑀯𑀸𑀬𑀦𑁆𑀢𑁂 𑀤𑁂𑀯𑁂 𑀯𑀸 𑀯𑀲𑁆𑀲𑀦𑁆𑀢𑁂 𑀑𑀖𑀦𑀁 𑀚𑀦𑁂𑀢𑁆𑀯𑀸 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀲𑀩𑁆𑀩𑀲𑀸𑀔𑀸𑀧𑀲𑀸𑀔𑀁 𑀪𑀜𑁆𑀚𑀢𑀺, 𑀪𑀽𑀫𑀺𑀬𑀁 𑀦𑀺𑀧𑀸𑀢𑁂𑀢𑀺. 𑀢𑀢𑁄 𑀢𑀲𑁆𑀫𑀺𑀁 𑀭𑀼𑀓𑁆𑀔𑁂 𑀧𑀢𑀺𑀝𑁆𑀞𑀺𑀢𑀯𑀺𑀫𑀸𑀦𑀁 𑀪𑀺𑀚𑁆𑀚𑀢𑀺 𑀦𑀲𑁆𑀲𑀢𑀺. 𑀇𑀢𑀺 𑀲𑀸 𑀪𑀯𑀦𑀯𑀺𑀦𑀸𑀲𑀪𑀬𑀸 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀢𑀺.

𑀆𑀭𑀸𑀫𑀤𑁂𑀯𑀢𑀸𑀢𑀺 𑀢𑀢𑁆𑀣 𑀢𑀢𑁆𑀣 𑀧𑀼𑀧𑁆𑀨𑀸𑀭𑀸𑀫𑀨𑀮𑀸𑀭𑀸𑀫𑁂𑀲𑀼 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸. 𑀯𑀦𑀤𑁂𑀯𑀢𑀸𑀢𑀺 𑀅𑀦𑁆𑀥𑀯𑀦𑀲𑀼𑀪𑀕𑀯𑀦𑀸𑀤𑀻𑀲𑀼 𑀯𑀦𑁂𑀲𑀼 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸. 𑀭𑀼𑀓𑁆𑀔𑀤𑁂𑀯𑀢𑀸𑀢𑀺 𑀅𑀪𑀺𑀮𑀓𑁆𑀔𑀺𑀢𑁂𑀲𑀼 𑀦𑀴𑁂𑀭𑀼𑀧𑀼𑀘𑀺𑀫𑀦𑁆𑀤𑀸𑀤𑀻𑀲𑀼 𑀭𑀼𑀓𑁆𑀔𑁂𑀲𑀼 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸. 𑀑𑀲𑀥𑀺𑀢𑀺𑀡𑀯𑀦𑀧𑁆𑀧𑀢𑀻𑀲𑀽𑀢𑀺 𑀳𑀭𑀻𑀢𑀓𑀻𑀆𑀫𑀮𑀓𑀻𑀆𑀤𑀻𑀲𑀼 𑀑𑀲𑀥𑀻𑀲𑀼 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀻𑀲𑀼 𑀢𑀺𑀡𑁂𑀲𑀼 𑀯𑀦𑀚𑁂𑀝𑁆𑀞𑀓𑁂𑀲𑀼 𑀘 𑀯𑀦𑀧𑁆𑀧𑀢𑀺𑀭𑀼𑀓𑁆𑀔𑁂𑀲𑀼 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸. 𑀯𑀦𑀓𑀫𑁆𑀫𑀺𑀓𑀸𑀢𑀺 𑀯𑀦𑁂 𑀓𑀲𑀦𑀮𑀸𑀬𑀦𑀤𑀸𑀭𑀼𑀆𑀳𑀭𑀡𑀕𑁄𑀭𑀓𑁆𑀔𑀸𑀤𑀻𑀲𑀼 𑀓𑁂𑀦𑀘𑀺𑀤𑁂𑀯 𑀓𑀫𑁆𑀫𑁂𑀦 𑀯𑀸 𑀯𑀺𑀘𑀭𑀓𑀫𑀦𑀼𑀲𑁆𑀲𑀸. 𑀉𑀤𑁆𑀥𑀭𑁂𑀬𑁆𑀬𑀼𑀦𑁆𑀢𑀺 𑀔𑀸𑀤𑁂𑀬𑁆𑀬𑀼𑀁. 𑀯𑀺𑀮𑀫𑁆𑀩𑀺𑀦𑀻𑀢𑀺 𑀯𑀸𑀢𑁂𑀦 𑀧𑀳𑀢𑀧𑀳𑀢𑀝𑁆𑀞𑀸𑀦𑁂𑀲𑀼 𑀓𑁂𑀴𑀺𑀁 𑀓𑀭𑁄𑀦𑁆𑀢𑀻 𑀯𑀺𑀬 𑀯𑀺𑀮𑀫𑁆𑀩𑀦𑁆𑀢𑀻. 𑀲𑀼𑀔𑁄 𑀇𑀫𑀺𑀲𑁆𑀲𑀸𑀢𑀺 𑀏𑀯𑀭𑀽𑀧𑀸𑀬 𑀫𑀸𑀮𑀼𑀯𑀸𑀮𑀢𑀸𑀬 𑀲𑀫𑁆𑀨𑀲𑁆𑀲𑁄𑀧𑀺 𑀲𑀼𑀔𑁄, 𑀤𑀲𑁆𑀲𑀦𑀫𑁆𑀧𑀺 𑀲𑀼𑀔𑀁. 𑀅𑀬𑀁 𑀫𑁂 𑀤𑀸𑀭𑀓𑀸𑀦𑀁 𑀆𑀧𑀸𑀦𑀫𑀡𑁆𑀟𑀮𑀁 𑀪𑀯𑀺𑀲𑁆𑀲𑀢𑀺, 𑀓𑀻𑀴𑀸𑀪𑀽𑀫𑀺 𑀪𑀯𑀺𑀲𑁆𑀲𑀢𑀺, 𑀤𑀼𑀢𑀺𑀬𑀁 𑀫𑁂 𑀯𑀺𑀫𑀸𑀦𑀁 𑀧𑀝𑀺𑀮𑀤𑁆𑀥𑀦𑁆𑀢𑀺 𑀮𑀢𑀸𑀬 𑀤𑀲𑁆𑀲𑀦𑁂𑀧𑀺 𑀲𑀫𑁆𑀨𑀲𑁆𑀲𑁂𑀧𑀺 𑀲𑁄𑀫𑀦𑀲𑁆𑀲𑀚𑀸𑀢𑀸 𑀏𑀯𑀫𑀸𑀳.

𑀯𑀺𑀝𑀪𑀺𑀁 𑀓𑀭𑁂𑀬𑁆𑀬𑀸𑀢𑀺 𑀲𑀸𑀔𑀸𑀦𑀁 𑀉𑀧𑀭𑀺 𑀙𑀢𑁆𑀢𑀸𑀓𑀸𑀭𑁂𑀦 𑀢𑀺𑀝𑁆𑀞𑁂𑀬𑁆𑀬. 𑀑𑀖𑀦𑀁 𑀚𑀦𑁂𑀬𑁆𑀬𑀸𑀢𑀺 𑀳𑁂𑀝𑁆𑀞𑀸 𑀖𑀦𑀁 𑀚𑀦𑁂𑀬𑁆𑀬. 𑀉𑀧𑀭𑀺 𑀆𑀭𑀼𑀬𑁆𑀳 𑀲𑀓𑀮𑀁 𑀭𑀼𑀓𑁆𑀔𑀁 𑀧𑀮𑀺𑀯𑁂𑀞𑁂𑀢𑁆𑀯𑀸 𑀧𑀼𑀦 𑀳𑁂𑀝𑁆𑀞𑀸 𑀪𑀲𑁆𑀲𑀫𑀸𑀦𑀸 𑀪𑀽𑀫𑀺𑀁 𑀕𑀡𑁆𑀳𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀧𑀤𑀸𑀮𑁂𑀬𑁆𑀬𑀸𑀢𑀺 𑀏𑀯𑀁 𑀑𑀖𑀦𑀁 𑀓𑀢𑁆𑀯𑀸 𑀧𑀼𑀦 𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀽𑀮𑀸 𑀑𑀢𑀺𑀡𑁆𑀡𑀲𑀸𑀔𑀸𑀳𑀺 𑀅𑀪𑀺𑀭𑀼𑀳𑀫𑀸𑀦𑀸 𑀲𑀩𑁆𑀩𑀲𑀸𑀔𑀸 𑀧𑀮𑀺𑀯𑁂𑀞𑁂𑀦𑁆𑀢𑀻 𑀫𑀢𑁆𑀣𑀓𑀁 𑀧𑀢𑁆𑀯𑀸 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀧𑀼𑀦 𑀑𑀭𑁄𑀳𑀺𑀢𑁆𑀯𑀸 𑀘 𑀅𑀪𑀺𑀭𑀼𑀳𑀺𑀢𑁆𑀯𑀸 𑀘 𑀲𑀓𑀮𑀭𑀼𑀓𑁆𑀔𑀁 𑀲𑀁𑀲𑀺𑀩𑁆𑀩𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀻 𑀲𑀩𑁆𑀩𑀲𑀸𑀔𑀸 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀲𑀬𑀁 𑀉𑀧𑀭𑀺 𑀞𑀢𑁆𑀯𑀸 𑀯𑀸𑀢𑁂 𑀯𑀸 𑀯𑀸𑀬𑀦𑁆𑀢𑁂 𑀤𑁂𑀯𑁂 𑀯𑀸 𑀯𑀲𑁆𑀲𑀦𑁆𑀢𑁂 𑀧𑀤𑀸𑀮𑁂𑀬𑁆𑀬. 𑀪𑀺𑀦𑁆𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀔𑀸𑀡𑀼𑀫𑀢𑁆𑀢𑀫𑁂𑀯 𑀢𑀺𑀝𑁆𑀞𑁂𑀬𑁆𑀬, 𑀢𑀢𑁆𑀣 𑀬𑀁 𑀲𑀸𑀔𑀝𑁆𑀞𑀓𑀯𑀺𑀫𑀸𑀦𑀁 𑀳𑁄𑀢𑀺, 𑀢𑀁 𑀲𑀸𑀔𑀸𑀲𑀼 𑀪𑀺𑀚𑁆𑀚𑀫𑀸𑀦𑀸𑀲𑀼 𑀢𑀢𑁆𑀣 𑀢𑀢𑁆𑀣𑁂𑀯 𑀪𑀺𑀚𑁆𑀚𑀺𑀢𑁆𑀯𑀸 𑀲𑀩𑁆𑀩𑀲𑀸𑀔𑀸𑀲𑀼 𑀪𑀺𑀦𑁆𑀦𑀸𑀲𑀼 𑀲𑀩𑁆𑀩𑀁 𑀪𑀺𑀚𑁆𑀚𑀢𑀺. 𑀭𑀼𑀓𑁆𑀔𑀝𑁆𑀞𑀓𑀯𑀺𑀫𑀸𑀦𑀁 𑀧𑀦 𑀬𑀸𑀯 𑀭𑀼𑀓𑁆𑀔𑀲𑁆𑀲 𑀫𑀽𑀮𑀫𑀢𑁆𑀢𑀫𑁆𑀧𑀺 𑀢𑀺𑀝𑁆𑀞𑀢𑀺, 𑀢𑀸𑀯 𑀦 𑀦𑀲𑁆𑀲𑀢𑀺. 𑀇𑀤𑀁 𑀧𑀦 𑀯𑀺𑀫𑀸𑀦𑀁 𑀲𑀸𑀔𑀝𑁆𑀞𑀓𑀁, 𑀢𑀲𑁆𑀫𑀸 𑀲𑀩𑁆𑀩𑀲𑀸𑀔𑀸𑀲𑀼 𑀲𑀁𑀪𑀺𑀚𑁆𑀚𑀫𑀸𑀦𑀸𑀲𑀼 𑀪𑀺𑀚𑁆𑀚𑀺𑀢𑁆𑀣. 𑀤𑁂𑀯𑀢𑀸 𑀧𑀼𑀢𑁆𑀢𑀓𑁂 𑀕𑀳𑁂𑀢𑁆𑀯𑀸 𑀔𑀸𑀡𑀼𑀓𑁂 𑀞𑀺𑀢𑀸 𑀧𑀭𑀺𑀤𑁂𑀯𑀺𑀢𑀼𑀁 𑀆𑀭𑀤𑁆𑀥𑀸.

𑁪𑁭𑁧. 𑀢𑀺𑀩𑁆𑀩𑀭𑀸𑀕𑀚𑀸𑀢𑀺𑀓𑁄𑀢𑀺 𑀩𑀳𑀮𑀭𑀸𑀕𑀲𑀪𑀸𑀯𑁄. 𑀭𑀸𑀕𑀚𑀁 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀢𑀺𑀩𑁆𑀩𑀭𑀸𑀕𑀚𑀸𑀢𑀺𑀓𑀢𑁆𑀢𑀸 𑀤𑀺𑀝𑁆𑀞𑁂 𑀤𑀺𑀝𑁆𑀞𑁂 𑀆𑀭𑀫𑁆𑀫𑀡𑁂 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀸𑀢𑀺. 𑀅𑀣𑀲𑁆𑀲 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀤𑀡𑁆𑀟𑀓𑀫𑁆𑀫𑀁 𑀆𑀡𑀸𑀧𑁂𑀦𑁆𑀢𑀺. 𑀲𑁄 𑀅𑀪𑀺𑀓𑁆𑀔𑀡𑀁 𑀤𑀡𑁆𑀟𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀦𑀢𑁆𑀯𑁂𑀯 𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀢𑀺. 𑀢𑀺𑀩𑁆𑀩𑀤𑁄𑀲𑀚𑀸𑀢𑀺𑀓𑁄𑀢𑀺 𑀅𑀧𑁆𑀧𑀫𑀢𑁆𑀢𑀺𑀓𑁂𑀦𑁂𑀯 𑀓𑀼𑀧𑁆𑀧𑀢𑀺, 𑀤𑀳𑀭𑀲𑀸𑀫𑀡𑁂𑀭𑁂𑀳𑀺 𑀲𑀤𑁆𑀥𑀺𑀁 𑀳𑀢𑁆𑀣𑀧𑀭𑀸𑀫𑀸𑀲𑀸𑀤𑀻𑀦𑀺 𑀓𑀭𑁄𑀦𑁆𑀢𑁄𑀯 𑀓𑀣𑁂𑀢𑀺. 𑀲𑁄𑀧𑀺 𑀤𑀡𑁆𑀟𑀓𑀫𑁆𑀫𑀧𑀘𑁆𑀘𑀬𑀸 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀫𑁄𑀳𑀚𑀸𑀢𑀺𑀓𑁄 𑀧𑀦 𑀇𑀥 𑀓𑀢𑀁 𑀯𑀸 𑀓𑀢𑀢𑁄 𑀅𑀓𑀢𑀁 𑀯𑀸 𑀅𑀓𑀢𑀢𑁄 𑀦 𑀲𑀮𑁆𑀮𑀓𑁆𑀔𑁂𑀢𑀺, 𑀢𑀸𑀦𑀺 𑀢𑀸𑀦𑀺 𑀓𑀺𑀘𑁆𑀘𑀸𑀦𑀺 𑀯𑀺𑀭𑀸𑀥𑁂𑀢𑀺. 𑀲𑁄𑀧𑀺 𑀤𑀡𑁆𑀟𑀓𑀫𑁆𑀫𑀧𑀘𑁆𑀘𑀬𑀸 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀁 𑀧𑀝𑀺𑀲𑀁𑀯𑁂𑀤𑁂𑀢𑀺.

𑁪𑁭𑁨. 𑀦 𑀢𑀺𑀩𑁆𑀩𑀭𑀸𑀕𑀚𑀸𑀢𑀺𑀓𑁄𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀓𑁄𑀘𑀺 𑀢𑀺𑀩𑁆𑀩𑀭𑀸𑀕𑀸𑀤𑀺𑀚𑀸𑀢𑀺𑀓𑁄 𑀳𑁄𑀢𑀺, 𑀓𑁄𑀘𑀺 𑀦 𑀢𑀺𑀩𑁆𑀩𑀭𑀸𑀕𑀸𑀤𑀺𑀚𑀸𑀢𑀺𑀓𑁄? 𑀓𑀫𑁆𑀫𑀦𑀺𑀬𑀸𑀫𑁂𑀦. 𑀬𑀲𑁆𑀲 𑀳𑀺 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀮𑁄𑀪𑁄 𑀩𑀮𑀯𑀸 𑀳𑁄𑀢𑀺, 𑀅𑀮𑁄𑀪𑁄 𑀫𑀦𑁆𑀤𑁄, 𑀅𑀤𑁄𑀲𑀸𑀫𑁄𑀳𑀸 𑀩𑀮𑀯𑀦𑁆𑀢𑁄, 𑀤𑁄𑀲𑀫𑁄𑀳𑀸 𑀫𑀦𑁆𑀤𑀸, 𑀢𑀲𑁆𑀲 𑀫𑀦𑁆𑀤𑁄 𑀅𑀮𑁄𑀪𑁄 𑀮𑁄𑀪𑀁 𑀧𑀭𑀺𑀬𑀸𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀤𑁄𑀲𑀸𑀫𑁄𑀳𑀸 𑀧𑀦 𑀩𑀮𑀯𑀦𑁆𑀢𑁄 𑀤𑁄𑀲𑀫𑁄𑀳𑁂 𑀧𑀭𑀺𑀬𑀸𑀤𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀢𑀲𑁆𑀫𑀸 𑀲𑁄 𑀢𑁂𑀦 𑀓𑀫𑁆𑀫𑁂𑀦 𑀤𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑁄 𑀮𑀼𑀤𑁆𑀥𑁄 𑀳𑁄𑀢𑀺, 𑀲𑀼𑀔𑀲𑀻𑀮𑁄 𑀅𑀓𑁆𑀓𑁄𑀥𑀦𑁄 𑀧𑀜𑁆𑀜𑀯𑀸 𑀯𑀚𑀺𑀭𑀽𑀧𑀫𑀜𑀸𑀡𑁄.

𑀬𑀲𑁆𑀲 𑀧𑀦 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀮𑁄𑀪𑀤𑁄𑀲𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀅𑀮𑁄𑀪𑀸𑀤𑁄𑀲𑀸 𑀫𑀦𑁆𑀤𑀸, 𑀅𑀫𑁄𑀳𑁄 𑀩𑀮𑀯𑀸, 𑀫𑁄𑀳𑁄 𑀫𑀦𑁆𑀤𑁄, 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀮𑀼𑀤𑁆𑀥𑁄 𑀘𑁂𑀯 𑀳𑁄𑀢𑀺 𑀤𑀼𑀝𑁆𑀞𑁄 𑀘, 𑀧𑀜𑁆𑀜𑀯𑀸 𑀧𑀦 𑀳𑁄𑀢𑀺 𑀯𑀚𑀺𑀭𑀽𑀧𑀫𑀜𑀸𑀡𑁄 𑀤𑀢𑁆𑀢𑀸𑀪𑀬𑀢𑁆𑀣𑁂𑀭𑁄 𑀯𑀺𑀬.

𑀬𑀲𑁆𑀲 𑀧𑀦 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀮𑁄𑀪𑀸𑀤𑁄𑀲𑀫𑁄𑀳𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀇𑀢𑀭𑁂 𑀫𑀦𑁆𑀤𑀸, 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀮𑀼𑀤𑁆𑀥𑁄 𑀘𑁂𑀯 𑀳𑁄𑀢𑀺 𑀤𑀦𑁆𑀥𑁄 𑀘, 𑀲𑀼𑀔𑀲𑀻𑀮𑀓𑁄 𑀧𑀦 𑀳𑁄𑀢𑀺 𑀅𑀓𑁆𑀓𑁄𑀥𑀦𑁄.

𑀢𑀣𑀸 𑀬𑀲𑁆𑀲 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀢𑀬𑁄𑀧𑀺 𑀮𑁄𑀪𑀤𑁄𑀲𑀫𑁄𑀳𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀅𑀮𑁄𑀪𑀸𑀤𑀬𑁄 𑀫𑀦𑁆𑀤𑀸, 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀮𑀼𑀤𑁆𑀥𑁄 𑀘𑁂𑀯 𑀳𑁄𑀢𑀺 𑀤𑀼𑀝𑁆𑀞𑁄 𑀘 𑀫𑀽𑀴𑁆𑀳𑁄 𑀘.

𑀬𑀲𑁆𑀲 𑀧𑀦 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀅𑀮𑁄𑀪𑀤𑁄𑀲𑀫𑁄𑀳𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀇𑀢𑀭𑁂 𑀫𑀦𑁆𑀤𑀸, 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀧𑁆𑀧𑀓𑀺𑀮𑁂𑀲𑁄 𑀳𑁄𑀢𑀺, 𑀤𑀺𑀩𑁆𑀩𑀸𑀭𑀫𑁆𑀫𑀡𑀫𑁆𑀧𑀺 𑀤𑀺𑀲𑁆𑀯𑀸 𑀦𑀺𑀘𑁆𑀘𑀮𑁄, 𑀤𑀼𑀝𑁆𑀞𑁄 𑀧𑀦 𑀳𑁄𑀢𑀺 𑀤𑀦𑁆𑀥𑀧𑀜𑁆𑀜𑁄 𑀘.

𑀬𑀲𑁆𑀲 𑀧𑀦 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀅𑀮𑁄𑀪𑀸𑀤𑁄𑀲𑀫𑁄𑀳𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀇𑀢𑀭𑁂 𑀫𑀦𑁆𑀤𑀸, 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀮𑀼𑀤𑁆𑀥𑁄 𑀘𑁂𑀯 𑀳𑁄𑀢𑀺 𑀲𑀼𑀔𑀲𑀻𑀮𑀓𑁄 𑀘, 𑀫𑀽𑀴𑁆𑀳𑁄 𑀧𑀦 𑀳𑁄𑀢𑀺.

𑀢𑀣𑀸 𑀬𑀲𑁆𑀲 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀅𑀮𑁄𑀪𑀤𑁄𑀲𑀸𑀫𑁄𑀳𑀸 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀇𑀢𑀭𑁂 𑀫𑀦𑁆𑀤𑀸, 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀮𑀼𑀤𑁆𑀥𑁄 𑀘𑁂𑀯 𑀳𑁄𑀢𑀺 𑀧𑀜𑁆𑀜𑀯𑀸 𑀘, 𑀤𑀼𑀝𑁆𑀞𑁄 𑀧𑀦 𑀳𑁄𑀢𑀺 𑀓𑁄𑀥𑀦𑁄.

𑀬𑀲𑁆𑀲 𑀧𑀦 𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀢𑀬𑁄𑀧𑀺 𑀅𑀮𑁄𑀪𑀸𑀤𑀬𑁄 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀮𑁄𑀪𑀸𑀤𑀬𑁄 𑀫𑀦𑁆𑀤𑀸, 𑀲𑁄 𑀫𑀳𑀸𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑁄 𑀯𑀺𑀬 𑀅𑀮𑀼𑀤𑁆𑀥𑁄 𑀅𑀤𑀼𑀝𑁆𑀞𑁄 𑀧𑀜𑁆𑀜𑀯𑀸 𑀘 𑀳𑁄𑀢𑀺.

𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀘𑀽𑀴𑀥𑀫𑁆𑀫𑀲𑀫𑀸𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀫𑀳𑀸𑀥𑀫𑁆𑀫𑀲𑀫𑀸𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭𑁩. 𑀏𑀯𑀁 𑀫𑁂 𑀲𑀼𑀢𑁆𑀢𑀦𑁆𑀢𑀺 𑀫𑀳𑀸𑀥𑀫𑁆𑀫𑀲𑀫𑀸𑀤𑀸𑀦𑀲𑀼𑀢𑁆𑀢𑀁. 𑀢𑀢𑁆𑀣 𑀏𑀯𑀁𑀓𑀸𑀫𑀸𑀢𑀺 𑀏𑀯𑀁𑀇𑀘𑁆𑀙𑀸. 𑀏𑀯𑀁𑀙𑀦𑁆𑀤𑀸𑀢𑀺 𑀏𑀯𑀁𑀅𑀚𑁆𑀛𑀸𑀲𑀬𑀸. 𑀏𑀯𑀁𑀅𑀥𑀺𑀧𑁆𑀧𑀸𑀬𑀸𑀢𑀺 𑀏𑀯𑀁𑀮𑀤𑁆𑀥𑀺𑀓𑀸. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀅𑀦𑀺𑀝𑁆𑀞𑀯𑀟𑁆𑀠𑀦𑁂 𑀘𑁂𑀯 𑀇𑀝𑁆𑀞𑀧𑀭𑀺𑀳𑀸𑀦𑁂 𑀘. 𑀪𑀕𑀯𑀁𑀫𑀽𑀮𑀓𑀸𑀢𑀺 𑀪𑀕𑀯𑀸 𑀫𑀽𑀮𑀁 𑀏𑀢𑁂𑀲𑀦𑁆𑀢𑀺 𑀪𑀕𑀯𑀁𑀫𑀽𑀮𑀓𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀫𑁂, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀥𑀫𑁆𑀫𑀸 𑀧𑀼𑀩𑁆𑀩𑁂 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀉𑀧𑁆𑀧𑀸𑀤𑀺𑀢𑀸, 𑀢𑀲𑁆𑀫𑀺𑀁 𑀧𑀭𑀺𑀦𑀺𑀩𑁆𑀩𑀼𑀢𑁂 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀅𑀜𑁆𑀜𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀇𑀫𑁂 𑀥𑀫𑁆𑀫𑁂 𑀉𑀧𑁆𑀧𑀸𑀤𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀸𑀳𑁄𑀲𑀺, 𑀪𑀕𑀯𑀢𑀸 𑀧𑀦 𑀦𑁄 𑀇𑀫𑁂 𑀥𑀫𑁆𑀫𑀸 𑀉𑀧𑁆𑀧𑀸𑀤𑀺𑀢𑀸. 𑀪𑀕𑀯𑀦𑁆𑀢𑀜𑁆𑀳𑀺 𑀦𑀺𑀲𑁆𑀲𑀸𑀬 𑀫𑀬𑀁 𑀇𑀫𑁂 𑀥𑀫𑁆𑀫𑁂 𑀆𑀚𑀸𑀦𑀸𑀫 𑀧𑀝𑀺𑀯𑀺𑀚𑁆𑀛𑀸𑀫𑀸𑀢𑀺 𑀏𑀯𑀁 𑀪𑀕𑀯𑀁𑀫𑀽𑀮𑀓𑀸 𑀦𑁄, 𑀪𑀦𑁆𑀢𑁂, 𑀥𑀫𑁆𑀫𑀸𑀢𑀺. 𑀪𑀕𑀯𑀁𑀦𑁂𑀢𑁆𑀢𑀺𑀓𑀸𑀢𑀺 𑀪𑀕𑀯𑀸 𑀳𑀺 𑀥𑀫𑁆𑀫𑀸𑀦𑀁 𑀦𑁂𑀢𑀸 𑀯𑀺𑀦𑁂𑀢𑀸 𑀅𑀦𑀼𑀦𑁂𑀢𑀸𑀢𑀺. 𑀬𑀣𑀸𑀲𑀪𑀸𑀯𑀢𑁄 𑀧𑀸𑀝𑀺𑀬𑁂𑀓𑁆𑀓𑀁 𑀧𑀸𑀝𑀺𑀬𑁂𑀓𑁆𑀓𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑀺𑀢𑀸 𑀥𑀫𑁆𑀫𑀸 𑀪𑀕𑀯𑀁𑀦𑁂𑀢𑁆𑀢𑀺𑀓𑀸 𑀦𑀸𑀫 𑀳𑁄𑀦𑁆𑀢𑀺. 𑀪𑀕𑀯𑀁𑀧𑀝𑀺𑀲𑀭𑀡𑀸𑀢𑀺 𑀘𑀢𑀼𑀪𑀽𑀫𑀓𑀸 𑀥𑀫𑁆𑀫𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀫𑀸𑀦𑀸 𑀪𑀕𑀯𑀢𑀺 𑀧𑀝𑀺𑀲𑀭𑀦𑁆𑀢𑀺 𑀦𑀸𑀫𑀸𑀢𑀺 𑀪𑀕𑀯𑀁𑀧𑀝𑀺𑀲𑀭𑀡𑀸. 𑀧𑀝𑀺𑀲𑀭𑀦𑁆𑀢𑀻𑀢𑀺 𑀑𑀲𑀭𑀦𑁆𑀢𑀺 𑀲𑀫𑁄𑀲𑀭𑀦𑁆𑀢𑀺. 𑀅𑀧𑀺𑀘 𑀫𑀳𑀸𑀩𑁄𑀥𑀺𑀫𑀡𑁆𑀟𑁂 𑀦𑀺𑀲𑀺𑀦𑁆𑀦𑀲𑁆𑀲 𑀪𑀕𑀯𑀢𑁄 𑀧𑀝𑀺𑀯𑁂𑀥𑀯𑀲𑁂𑀦 𑀨𑀲𑁆𑀲𑁄 𑀆𑀕𑀘𑁆𑀙𑀢𑀺, 𑀅𑀳𑀁 𑀪𑀕𑀯𑀸 𑀓𑀺𑀦𑁆𑀦𑀸𑀫𑁄𑀢𑀺? 𑀢𑁆𑀯𑀁 𑀨𑀼𑀲𑀦𑀝𑁆𑀞𑁂𑀦 𑀨𑀲𑁆𑀲𑁄 𑀦𑀸𑀫. 𑀯𑁂𑀤𑀦𑀸, 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸, 𑀯𑀺𑀜𑁆𑀜𑀸𑀡𑀁 𑀆𑀕𑀘𑁆𑀙𑀢𑀺. 𑀅𑀳𑀁 𑀪𑀕𑀯𑀸 𑀓𑀺𑀦𑁆𑀦𑀸𑀫𑀦𑁆𑀢𑀺? 𑀢𑁆𑀯𑀁 𑀯𑀺𑀚𑀸𑀦𑀦𑀝𑁆𑀞𑁂𑀦 𑀯𑀺𑀜𑁆𑀜𑀸𑀡𑀁 𑀦𑀸𑀫𑀸𑀢𑀺 𑀏𑀯𑀁 𑀘𑀢𑀼𑀪𑀽𑀫𑀓𑀥𑀫𑁆𑀫𑀸𑀦𑀁 𑀬𑀣𑀸𑀲𑀪𑀸𑀯𑀢𑁄 𑀧𑀸𑀝𑀺𑀬𑁂𑀓𑁆𑀓𑀁 𑀧𑀸𑀝𑀺𑀬𑁂𑀓𑁆𑀓𑀁 𑀦𑀸𑀫𑀁 𑀕𑀡𑁆𑀳𑀦𑁆𑀢𑁄 𑀪𑀕𑀯𑀸 𑀥𑀫𑁆𑀫𑁂 𑀧𑀝𑀺𑀲𑀭𑀢𑀻𑀢𑀺𑀧𑀺 𑀪𑀕𑀯𑀁𑀧𑀝𑀺𑀲𑀭𑀡𑀸. 𑀪𑀕𑀯𑀦𑁆𑀢𑀜𑁆𑀜𑁂𑀯 𑀧𑀝𑀺𑀪𑀸𑀢𑀽𑀢𑀺 𑀪𑀕𑀯𑀢𑁄𑀬𑁂𑀯 𑀏𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄 𑀉𑀧𑀝𑁆𑀞𑀸𑀢𑀼, 𑀢𑀼𑀫𑁆𑀳𑁂𑀬𑁂𑀯 𑀦𑁄 𑀓𑀣𑁂𑀢𑁆𑀯𑀸 𑀤𑁂𑀣𑀸𑀢𑀺 𑀅𑀢𑁆𑀣𑁄.

𑁪𑁭𑁪. 𑀲𑁂𑀯𑀺𑀢𑀩𑁆𑀩𑁂𑀢𑀺 𑀦𑀺𑀲𑁆𑀲𑀬𑀺𑀢𑀩𑁆𑀩𑁂. 𑀪𑀚𑀺𑀢𑀩𑁆𑀩𑁂𑀢𑀺 𑀉𑀧𑀕𑀦𑁆𑀢𑀩𑁆𑀩𑁂. 𑀬𑀣𑀸 𑀢𑀁 𑀅𑀯𑀺𑀤𑁆𑀤𑀲𑀼𑀦𑁄𑀢𑀺 𑀬𑀣𑀸 𑀅𑀯𑀺𑀤𑀼𑀦𑁄 𑀩𑀸𑀮𑀲𑁆𑀲 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀲𑁆𑀲. 𑀬𑀣𑀸 𑀢𑀁 𑀯𑀺𑀤𑁆𑀤𑀲𑀼𑀦𑁄𑀢𑀺 𑀬𑀣𑀸 𑀯𑀺𑀤𑀼𑀦𑁄 𑀫𑁂𑀥𑀸𑀯𑀺𑀦𑁄 𑀧𑀡𑁆𑀟𑀺𑀢𑀲𑁆𑀲.

𑁪𑁭𑁫. 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀲𑀫𑀸𑀤𑀸𑀦𑀦𑁆𑀢𑀺 𑀧𑀼𑀭𑀺𑀫𑀲𑀼𑀢𑁆𑀢𑁂 𑀉𑀧𑁆𑀧𑀝𑀺𑀧𑀸𑀝𑀺𑀆𑀓𑀸𑀭𑁂𑀦 𑀫𑀸𑀢𑀺𑀓𑀸 𑀞𑀧𑀺𑀢𑀸, 𑀇𑀥 𑀧𑀦 𑀬𑀣𑀸𑀥𑀫𑁆𑀫𑀭𑀲𑁂𑀦𑁂𑀯 𑀲𑀢𑁆𑀣𑀸 𑀫𑀸𑀢𑀺𑀓𑀁 𑀞𑀧𑁂𑀲𑀺. 𑀢𑀢𑁆𑀣 𑀥𑀫𑁆𑀫𑀲𑀫𑀸𑀤𑀸𑀦𑀦𑁆𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀕𑀳𑀡𑀁.

𑁪𑁭𑁬. 𑀅𑀯𑀺𑀚𑁆𑀚𑀸𑀕𑀢𑁄𑀢𑀺 𑀅𑀯𑀺𑀚𑁆𑀚𑀸𑀬 𑀲𑀫𑀦𑁆𑀦𑀸𑀕𑀢𑁄.

𑁪𑁭𑁭. 𑀯𑀺𑀚𑁆𑀚𑀸𑀕𑀢𑁄𑀢𑀺 𑀯𑀺𑀚𑁆𑀚𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀜𑁆𑀜𑀯𑀸.

𑁪𑁭𑁮. 𑀲𑀳𑀸𑀧𑀺 𑀤𑀼𑀓𑁆𑀔𑁂𑀦𑀸𑀢𑀺 𑀏𑀢𑁆𑀣 𑀫𑀺𑀘𑁆𑀙𑀸𑀘𑀸𑀭𑁄 𑀅𑀪𑀺𑀚𑁆𑀛𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀇𑀫𑁂 𑀢𑀸𑀯 𑀢𑀬𑁄 𑀧𑀼𑀩𑁆𑀩𑀘𑁂𑀢𑀦𑀸𑀬 𑀘 𑀅𑀧𑀭𑀘𑁂𑀢𑀦𑀸𑀬 𑀘𑀸𑀢𑀺 𑀤𑁆𑀯𑀺𑀦𑁆𑀦𑀁 𑀘𑁂𑀢𑀦𑀸𑀦𑀁 𑀯𑀲𑁂𑀦 𑀤𑀼𑀓𑁆𑀔𑀯𑁂𑀤𑀦𑀸 𑀳𑁄𑀦𑁆𑀢𑀺. 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀧𑀦 𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀸 𑀯𑀸 𑀉𑀧𑁂𑀓𑁆𑀔𑀸𑀲𑀫𑁆𑀧𑀬𑀼𑀢𑁆𑀢𑀸 𑀯𑀸 𑀳𑁄𑀢𑀺. 𑀲𑁂𑀲𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀲𑀢𑁆𑀢 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀘𑁂𑀢𑀦𑀸𑀦𑀁 𑀯𑀲𑁂𑀦 𑀤𑀼𑀓𑁆𑀔𑀯𑁂𑀤𑀦𑀸 𑀳𑁄𑀦𑁆𑀢𑀺. 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀲𑀳𑀸𑀧𑀺 𑀤𑀼𑀓𑁆𑀔𑁂𑀦 𑀲𑀳𑀸𑀧𑀺 𑀤𑁄𑀫𑀦𑀲𑁆𑀲𑁂𑀦𑀸’’𑀢𑀺. 𑀤𑁄𑀫𑀦𑀲𑁆𑀲𑀫𑁂𑀯 𑀘𑁂𑀢𑁆𑀣 𑀤𑀼𑀓𑁆𑀔𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀭𑀺𑀬𑁂𑀝𑁆𑀞𑀺𑀁 𑀯𑀸 𑀆𑀧𑀚𑁆𑀚𑀦𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀭𑀪𑀸𑀕𑁂𑀲𑀼 𑀓𑀸𑀬𑀺𑀓𑀁 𑀤𑀼𑀓𑁆𑀔𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯.

𑁪𑁭𑁯. 𑀲𑀳𑀸𑀧𑀺 𑀲𑀼𑀔𑁂𑀦𑀸𑀢𑀺 𑀏𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑁄 𑀨𑀭𑀼𑀲𑀯𑀸𑀘𑀸 𑀩𑁆𑀬𑀸𑀧𑀸𑀤𑁄𑀢𑀺 𑀇𑀫𑁂 𑀢𑀸𑀯 𑀢𑀬𑁄 𑀧𑀼𑀩𑁆𑀩𑀘𑁂𑀢𑀦𑀸𑀬 𑀘 𑀅𑀧𑀭𑀘𑁂𑀢𑀦𑀸𑀬 𑀘𑀸𑀢𑀺 𑀤𑁆𑀯𑀺𑀦𑁆𑀦𑀁 𑀘𑁂𑀢𑀦𑀸𑀦𑀁 𑀯𑀲𑁂𑀦 𑀲𑀼𑀔𑀯𑁂𑀤𑀦𑀸 𑀳𑁄𑀦𑁆𑀢𑀺. 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀧𑀦 𑀤𑀼𑀓𑁆𑀔𑀲𑀫𑁆𑀧𑀬𑀼𑀢𑁆𑀢𑀸𑀯 𑀳𑁄𑀢𑀺. 𑀲𑁂𑀲𑀸 𑀲𑀢𑁆𑀢 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀘𑁂𑀢𑀦𑀸𑀦𑀁 𑀯𑀲𑁂𑀦 𑀲𑀼𑀔𑀯𑁂𑀤𑀦𑀸 𑀳𑁄𑀦𑁆𑀢𑀺𑀬𑁂𑀯. 𑀲𑀳𑀸𑀧𑀺 𑀲𑁄𑀫𑀦𑀲𑁆𑀲𑁂𑀦𑀸𑀢𑀺 𑀲𑁄𑀫𑀦𑀲𑁆𑀲𑀫𑁂𑀯 𑀘𑁂𑀢𑁆𑀣 𑀲𑀼𑀔𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀝𑁆𑀞𑀨𑁄𑀝𑁆𑀞𑀩𑁆𑀩𑀲𑀫𑀗𑁆𑀕𑀺𑀦𑁄 𑀯𑀸 𑀧𑀼𑀩𑁆𑀩𑀪𑀸𑀕𑀧𑀭𑀪𑀸𑀕𑁂𑀲𑀼 𑀓𑀸𑀬𑀺𑀓𑀁 𑀲𑀼𑀔𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯.

𑁪𑁮𑁦. 𑀢𑀢𑀺𑀬𑀥𑀫𑁆𑀫𑀲𑀫𑀸𑀤𑀸𑀦𑁂 𑀇𑀥𑁂𑀓𑀘𑁆𑀘𑁄 𑀫𑀘𑁆𑀙𑀩𑀦𑁆𑀥𑁄 𑀯𑀸 𑀳𑁄𑀢𑀺, 𑀫𑀸𑀕𑀯𑀺𑀓𑁄 𑀯𑀸, 𑀧𑀸𑀡𑀼𑀧𑀖𑀸𑀢𑀁𑀬𑁂𑀯 𑀦𑀺𑀲𑁆𑀲𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺. 𑀢𑀲𑁆𑀲 𑀕𑀭𑀼𑀝𑁆𑀞𑀸𑀦𑀺𑀬𑁄 𑀪𑀺𑀓𑁆𑀔𑀼 𑀅𑀓𑀸𑀫𑀓𑀲𑁆𑀲𑁂𑀯 𑀧𑀸𑀡𑀸𑀢𑀺𑀧𑀸𑀢𑁂 𑀆𑀤𑀻𑀦𑀯𑀁, 𑀧𑀸𑀡𑀸𑀢𑀺𑀧𑀸𑀢𑀯𑀺𑀭𑀢𑀺𑀬𑀸 𑀘 𑀆𑀦𑀺𑀲𑀁𑀲𑀁 𑀓𑀣𑁂𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀁 𑀤𑁂𑀢𑀺. 𑀲𑁄 𑀕𑀡𑁆𑀳𑀦𑁆𑀢𑁄𑀧𑀺 𑀤𑀼𑀓𑁆𑀔𑀺𑀢𑁄 𑀤𑁄𑀫𑀦𑀲𑁆𑀲𑀺𑀢𑁄𑀯 𑀳𑀼𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀅𑀧𑀭𑀪𑀸𑀕𑁂 𑀓𑀢𑀺𑀧𑀸𑀳𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀭𑀓𑁆𑀔𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄𑀧𑀺 𑀤𑀼𑀓𑁆𑀔𑀺𑀢𑁄𑀯 𑀳𑁄𑀢𑀺, 𑀢𑀲𑁆𑀲 𑀧𑀼𑀩𑁆𑀩𑀸𑀧𑀭𑀘𑁂𑀢𑀦𑀸 𑀤𑀼𑀓𑁆𑀔𑀲𑀳𑀕𑀢𑀸𑀯 𑀳𑁄𑀦𑁆𑀢𑀺. 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀧𑀦 𑀲𑀼𑀔𑀲𑀳𑀕𑀢𑀸 𑀯𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀯𑀸𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀧𑀼𑀩𑁆𑀩𑀪𑀸𑀕𑀧𑀭𑀪𑀸𑀕𑀘𑁂𑀢𑀦𑀸𑀯 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 𑁋 ‘‘𑀲𑀳𑀸𑀧𑀺 𑀤𑀼𑀓𑁆𑀔𑁂𑀦 𑀲𑀳𑀸𑀧𑀺 𑀤𑁄𑀫𑀦𑀲𑁆𑀲𑁂𑀦𑀸’’𑀢𑀺. 𑀤𑁄𑀫𑀦𑀲𑁆𑀲𑀫𑁂𑀯 𑀘𑁂𑀢𑁆𑀣 𑀤𑀼𑀓𑁆𑀔𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁪𑁮𑁧. 𑀘𑀢𑀼𑀢𑁆𑀣𑀥𑀫𑁆𑀫𑀲𑀫𑀸𑀤𑀸𑀦𑁂 𑀤𑀲𑀲𑀼𑀧𑀺 𑀧𑀤𑁂𑀲𑀼 𑀢𑀺𑀲𑁆𑀲𑁄𑀧𑀺 𑀧𑀼𑀩𑁆𑀩𑀪𑀸𑀕𑀸𑀧𑀭𑀪𑀸𑀕𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀸 𑀳𑁄𑀦𑁆𑀢𑀺𑀬𑁂𑀯, 𑀢𑀁 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 𑁋 ‘‘𑀲𑀳𑀸𑀧𑀺 𑀲𑀼𑀔𑁂𑀦 𑀲𑀳𑀸𑀧𑀺 𑀲𑁄𑀫𑀦𑀲𑁆𑀲𑁂𑀦𑀸’’𑀢𑀺. 𑀲𑁄𑀫𑀦𑀲𑁆𑀲𑀫𑁂𑀯 𑀘𑁂𑀢𑁆𑀣 𑀲𑀼𑀔𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁪𑁮𑁨. 𑀢𑀺𑀢𑁆𑀢𑀓𑀸𑀮𑀸𑀩𑀽𑀢𑀺 𑀢𑀺𑀢𑁆𑀢𑀓𑀭𑀲𑀅𑀮𑀸𑀩𑀼. 𑀯𑀺𑀲𑁂𑀦 𑀲𑀁𑀲𑀝𑁆𑀞𑁄𑀢𑀺 𑀳𑀮𑀸𑀳𑀮𑀯𑀺𑀲𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀫𑀺𑀲𑁆𑀲𑀺𑀢𑁄 𑀮𑀼𑀴𑀺𑀢𑁄. 𑀦𑀘𑁆𑀙𑀸𑀤𑁂𑀲𑁆𑀲𑀢𑀻𑀢𑀺 𑀦 𑀭𑀼𑀘𑁆𑀘𑀺𑀲𑁆𑀲𑀢𑀺 𑀦 𑀢𑀼𑀝𑁆𑀞𑀺𑀁 𑀓𑀭𑀺𑀲𑁆𑀲𑀢𑀺. 𑀦𑀺𑀕𑀘𑁆𑀙𑀲𑀻𑀢𑀺 𑀕𑀫𑀺𑀲𑁆𑀲𑀲𑀺. 𑀅𑀧𑁆𑀧𑀝𑀺𑀲𑀗𑁆𑀔𑀸𑀬 𑀧𑀺𑀯𑁂𑀬𑁆𑀬𑀸𑀢𑀺 𑀢𑀁 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀺𑀯𑁂𑀬𑁆𑀬.

𑁪𑁮𑁩. 𑀆𑀧𑀸𑀦𑀻𑀬𑀓𑀁𑀲𑁄𑀢𑀺 𑀆𑀧𑀸𑀦𑀻𑀬𑀲𑁆𑀲 𑀫𑀥𑀼𑀭𑀧𑀸𑀦𑀓𑀲𑁆𑀲 𑀪𑀭𑀺𑀢𑀓𑀁𑀲𑁄. 𑀯𑀡𑁆𑀡𑀲𑀫𑁆𑀧𑀦𑁆𑀦𑁄𑀢𑀺 𑀧𑀸𑀦𑀓𑀯𑀡𑁆𑀡𑀸𑀤𑀻𑀳𑀺 𑀲𑀫𑁆𑀧𑀦𑁆𑀦𑀯𑀡𑁆𑀡𑁄, 𑀓𑀁𑀲𑁂 𑀧𑀓𑁆𑀔𑀺𑀢𑁆𑀢𑀧𑀸𑀦𑀓𑀯𑀲𑁂𑀦 𑀧𑀸𑀦𑀓𑀓𑀁𑀲𑁄𑀧𑀺 𑀏𑀯𑀁 𑀯𑀼𑀢𑁆𑀢𑁄. 𑀙𑀸𑀤𑁂𑀲𑁆𑀲𑀢𑀻𑀢𑀺 𑀢𑀜𑁆𑀳𑀺 𑀳𑀮𑀸𑀳𑀮𑀯𑀺𑀲𑀁 𑀬𑀢𑁆𑀣 𑀬𑀢𑁆𑀣 𑀧𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀲 𑀢𑀲𑁆𑀲𑁂𑀯 𑀭𑀲𑀁 𑀤𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀙𑀸𑀤𑁂𑀲𑁆𑀲𑀢𑀻’’𑀢𑀺.

𑁪𑁮𑁪. 𑀧𑀽𑀢𑀺𑀫𑀼𑀢𑁆𑀢𑀦𑁆𑀢𑀺 𑀫𑀼𑀢𑁆𑀢𑀫𑁂𑀯. 𑀬𑀣𑀸 𑀳𑀺 𑀫𑀦𑀼𑀲𑁆𑀲𑀪𑀸𑀯𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀧𑀽𑀢𑀺𑀓𑀸𑀬𑁄𑀢𑁆𑀯𑁂𑀯, 𑀢𑀤𑀳𑀼𑀚𑀸𑀢𑀸𑀧𑀺 𑀕𑀮𑁄𑀘𑀺𑀮𑀢𑀸 𑀧𑀽𑀢𑀺𑀮𑀢𑀸𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀏𑀯𑀁 𑀢𑀗𑁆𑀔𑀡𑀁 𑀕𑀳𑀺𑀢𑀁 𑀢𑀭𑀼𑀡𑀫𑁆𑀧𑀺 𑀫𑀼𑀢𑁆𑀢𑀁 𑀧𑀽𑀢𑀺𑀫𑀼𑀢𑁆𑀢𑀫𑁂𑀯. 𑀦𑀸𑀦𑀸𑀪𑁂𑀲𑀚𑁆𑀚𑁂𑀳𑀻𑀢𑀺 𑀳𑀭𑀻𑀢𑀓𑀸𑀫𑀮𑀓𑀸𑀤𑀻𑀳𑀺 𑀦𑀸𑀦𑁄𑀲𑀥𑁂𑀳𑀺. 𑀲𑀼𑀔𑀻 𑀅𑀲𑁆𑀲𑀸𑀢𑀺 𑀅𑀭𑁄𑀕𑁄 𑀲𑀼𑀯𑀡𑁆𑀡𑀯𑀡𑁆𑀡𑁄 𑀲𑀼𑀔𑀻 𑀪𑀯𑁂𑀬𑁆𑀬.

𑁪𑁮𑁫. 𑀤𑀥𑀺 𑀘 𑀫𑀥𑀼 𑀘𑀸𑀢𑀺 𑀲𑀼𑀧𑀭𑀺𑀲𑀼𑀤𑁆𑀥𑀁 𑀤𑀥𑀺 𑀘 𑀲𑀼𑀫𑀥𑀼𑀭𑀁 𑀫𑀥𑀼 𑀘. 𑀏𑀓𑀚𑁆𑀛𑀁 𑀲𑀁𑀲𑀝𑁆𑀞𑀦𑁆𑀢𑀺 𑀏𑀓𑀢𑁄 𑀓𑀢𑁆𑀯𑀸 𑀫𑀺𑀲𑁆𑀲𑀺𑀢𑀁 𑀆𑀮𑀼𑀴𑀺𑀢𑀁. 𑀢𑀲𑁆𑀲 𑀢𑀦𑁆𑀢𑀺 𑀢𑀲𑁆𑀲 𑀢𑀁 𑀘𑀢𑀼𑀫𑀥𑀼𑀭𑀪𑁂𑀲𑀚𑁆𑀚𑀁 𑀧𑀺𑀯𑀢𑁄 𑀭𑀼𑀘𑁆𑀘𑁂𑀬𑁆𑀬. 𑀇𑀤𑀜𑁆𑀘 𑀬𑀁 𑀪𑀕𑀦𑁆𑀤𑀭𑀲𑀁𑀲𑀝𑁆𑀞𑀁 𑀮𑁄𑀳𑀺𑀢𑀁 𑀧𑀓𑁆𑀔𑀦𑁆𑀤𑀢𑀺, 𑀦 𑀢𑀲𑁆𑀲 𑀪𑁂𑀲𑀚𑁆𑀚𑀁, 𑀆𑀳𑀸𑀭𑀁 𑀣𑀫𑁆𑀪𑁂𑀢𑁆𑀯𑀸 𑀫𑀕𑁆𑀕𑀁 𑀅𑀯𑀮𑀜𑁆𑀚𑀁 𑀓𑀭𑁄𑀢𑀺. 𑀬𑀁 𑀧𑀦 𑀧𑀺𑀢𑁆𑀢𑀲𑀁𑀲𑀝𑁆𑀞𑀁 𑀮𑁄𑀳𑀺𑀢𑀁, 𑀢𑀲𑁆𑀲𑁂𑀢𑀁 𑀪𑁂𑀲𑀚𑁆𑀚𑀁 𑀲𑀻𑀢𑀮𑀓𑀺𑀭𑀺𑀬𑀸𑀬 𑀧𑀭𑀺𑀬𑀢𑁆𑀢𑀪𑀽𑀢𑀁.

𑁪𑁮𑁬. 𑀯𑀺𑀤𑁆𑀥𑁂𑀢𑀺 𑀉𑀩𑁆𑀩𑀺𑀤𑁆𑀥𑁂. 𑀫𑁂𑀖𑀯𑀺𑀕𑀫𑁂𑀦 𑀤𑀽𑀭𑀻𑀪𑀽𑀢𑁂𑀢𑀺 𑀅𑀢𑁆𑀣𑁄. 𑀯𑀺𑀕𑀢𑀯𑀮𑀸𑀳𑀓𑁂𑀢𑀺 𑀅𑀧𑀕𑀢𑀫𑁂𑀖𑁂, 𑀤𑁂𑀯𑁂𑀢𑀺 𑀆𑀓𑀸𑀲𑁂. 𑀆𑀓𑀸𑀲𑀕𑀢𑀁 𑀢𑀫𑀕𑀢𑀦𑁆𑀢𑀺 𑀆𑀓𑀸𑀲𑀕𑀢𑀁 𑀢𑀫𑀁. 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀧𑀭𑀧𑁆𑀧𑀯𑀸𑀤𑁂𑀢𑀺 𑀧𑀼𑀣𑀽𑀦𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀗𑁆𑀔𑀸𑀢𑀸𑀦𑀁 𑀧𑀭𑁂𑀲𑀁 𑀯𑀸𑀤𑁂. 𑀅𑀪𑀺𑀯𑀺𑀳𑀘𑁆𑀘𑀸𑀢𑀺 𑀅𑀪𑀺𑀳𑀦𑁆𑀢𑁆𑀯𑀸. 𑀪𑀸𑀲𑀢𑁂 𑀘 𑀢𑀧𑀢𑁂 𑀘 𑀯𑀺𑀭𑁄𑀘𑀢𑁂 𑀘𑀸𑀢𑀺 𑀲𑀭𑀤𑀓𑀸𑀮𑁂 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂 𑀆𑀤𑀺𑀘𑁆𑀘𑁄𑀯 𑀑𑀪𑀸𑀲𑀁 𑀫𑀼𑀜𑁆𑀘𑀢𑀺 𑀢𑀧𑀢𑀺 𑀯𑀺𑀚𑁆𑀚𑁄𑀢𑀢𑀻𑀢𑀺.

𑀇𑀤𑀁 𑀧𑀦 𑀲𑀼𑀢𑁆𑀢𑀁 𑀤𑁂𑀯𑀢𑀸𑀦𑀁 𑀅𑀢𑀺𑀯𑀺𑀬 𑀧𑀺𑀬𑀁 𑀫𑀦𑀸𑀧𑀁. 𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀤𑀓𑁆𑀔𑀺𑀡𑀤𑀺𑀲𑀸𑀬𑀁 𑀓𑀺𑀭 𑀳𑀢𑁆𑀣𑀺𑀪𑁄𑀕𑀚𑀦𑀧𑀤𑁂 𑀲𑀗𑁆𑀕𑀭𑀯𑀺𑀳𑀸𑀭𑁄 𑀦𑀸𑀫 𑀅𑀢𑁆𑀣𑀺. 𑀢𑀲𑁆𑀲 𑀪𑁄𑀚𑀦𑀲𑀸𑀮𑀤𑁆𑀯𑀸𑀭𑁂 𑀲𑀗𑁆𑀕𑀭𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀭𑀢𑁆𑀢𑀺𑀪𑀸𑀕𑁂 𑀏𑀓𑀲𑁆𑀲 𑀤𑀳𑀭𑀲𑁆𑀲 𑀲𑀭𑀪𑀜𑁆𑀜𑀯𑀲𑁂𑀦 𑀇𑀤𑀁 𑀲𑀼𑀢𑁆𑀢𑀁 𑀑𑀲𑀸𑀭𑁂𑀦𑁆𑀢𑀲𑁆𑀲 𑀲𑀼𑀢𑁆𑀯𑀸 𑀲𑀸𑀥𑀼𑀓𑀸𑀭𑀁 𑀅𑀤𑀸𑀲𑀺. 𑀤𑀳𑀭𑁄 𑀓𑀺𑀁 𑀏𑀲𑁄𑀢𑀺 𑀆𑀳. 𑀅𑀳𑀁, 𑀪𑀦𑁆𑀢𑁂, 𑀇𑀫𑀲𑁆𑀫𑀺𑀁 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸𑀢𑀺. 𑀓𑀲𑁆𑀫𑀺𑀁 𑀤𑁂𑀯𑀢𑁂 𑀧𑀲𑀦𑁆𑀦𑀸𑀲𑀺, 𑀓𑀺𑀁 𑀲𑀤𑁆𑀤𑁂, 𑀉𑀤𑀸𑀳𑀼 𑀲𑀼𑀢𑁆𑀢𑁂𑀢𑀺? 𑀲𑀤𑁆𑀤𑁄 𑀦𑀸𑀫, 𑀪𑀦𑁆𑀢𑁂, 𑀬𑀲𑁆𑀲 𑀓𑀲𑁆𑀲𑀘𑀺 𑀳𑁄𑀢𑀺𑀬𑁂𑀯, 𑀲𑀼𑀢𑁆𑀢𑁂 𑀧𑀲𑀦𑁆𑀦𑀸𑀫𑁆𑀳𑀺. 𑀲𑀢𑁆𑀣𑀸𑀭𑀸 𑀚𑁂𑀢𑀯𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀣𑀺𑀢𑀤𑀺𑀯𑀲𑁂 𑀘 𑀅𑀚𑁆𑀚 𑀘 𑀏𑀓𑀩𑁆𑀬𑀜𑁆𑀚𑀦𑁂𑀧𑀺 𑀦𑀸𑀦𑀁 𑀦𑀢𑁆𑀣𑀻𑀢𑀺. 𑀅𑀲𑁆𑀲𑁄𑀲𑀺 𑀢𑁆𑀯𑀁 𑀤𑁂𑀯𑀢𑁂 𑀲𑀢𑁆𑀣𑀸𑀭𑀸 𑀓𑀣𑀺𑀢𑀤𑀺𑀯𑀲𑁂𑀢𑀺? 𑀆𑀫, 𑀪𑀦𑁆𑀢𑁂. 𑀓𑀢𑁆𑀣 𑀞𑀺𑀢𑀸 𑀅𑀲𑁆𑀲𑁄𑀲𑀻𑀢𑀺? 𑀚𑁂𑀢𑀯𑀦𑀁, 𑀪𑀦𑁆𑀢𑁂, 𑀕𑀢𑀸𑀫𑁆𑀳𑀺, 𑀫𑀳𑁂𑀲𑀓𑁆𑀔𑀸𑀲𑀼 𑀧𑀦 𑀤𑁂𑀯𑀢𑀸𑀲𑀼 𑀆𑀕𑀘𑁆𑀙𑀦𑁆𑀢𑀻𑀲𑀼 𑀢𑀢𑁆𑀣 𑀑𑀓𑀸𑀲𑀁 𑀅𑀮𑀪𑀺𑀢𑁆𑀯𑀸 𑀇𑀥𑁂𑀯 𑀞𑀢𑁆𑀯𑀸 𑀅𑀲𑁆𑀲𑁄𑀲𑀺𑀦𑁆𑀢𑀺. 𑀏𑀢𑁆𑀣 𑀞𑀺𑀢𑀸𑀬 𑀲𑀓𑁆𑀓𑀸 𑀲𑀼𑀢𑁆𑀣𑀼 𑀲𑀤𑁆𑀤𑁄 𑀲𑁄𑀢𑀼𑀦𑁆𑀢𑀺? 𑀢𑁆𑀯𑀁 𑀧𑀦, 𑀪𑀦𑁆𑀢𑁂, 𑀫𑀬𑁆𑀳𑀁 𑀲𑀤𑁆𑀤𑀁 𑀲𑀼𑀡𑀲𑀻𑀢𑀺? 𑀆𑀫 𑀤𑁂𑀯𑀢𑁂𑀢𑀺. 𑀤𑀓𑁆𑀔𑀺𑀡𑀓𑀡𑁆𑀡𑀧𑀲𑁆𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀣𑀦𑀓𑀸𑀮𑁄 𑀯𑀺𑀬, 𑀪𑀦𑁆𑀢𑁂, 𑀳𑁄𑀢𑀻𑀢𑀺. 𑀓𑀺𑀁 𑀧𑀦 𑀤𑁂𑀯𑀢𑁂 𑀲𑀢𑁆𑀣𑀼 𑀭𑀽𑀧𑀁 𑀧𑀲𑁆𑀲𑀲𑀻𑀢𑀺? 𑀲𑀢𑁆𑀣𑀸 𑀫𑀫𑁂𑀯 𑀑𑀮𑁄𑀓𑁂𑀢𑀻𑀢𑀺 𑀫𑀜𑁆𑀜𑀫𑀸𑀦𑀸 𑀲𑀡𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀪𑀦𑁆𑀢𑁂𑀢𑀺. 𑀯𑀺𑀲𑁂𑀲𑀁 𑀧𑀦 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀓𑁆𑀔𑀺𑀢𑁆𑀣 𑀤𑁂𑀯𑀢𑁂𑀢𑀺. 𑀤𑁂𑀯𑀢𑀸 𑀢𑀢𑁆𑀣𑁂𑀯 𑀅𑀦𑁆𑀢𑀭𑀥𑀸𑀬𑀺. 𑀢𑀁 𑀤𑀺𑀯𑀲𑀁 𑀓𑀺𑀭𑁂𑀲 𑀤𑁂𑀯𑀧𑀼𑀢𑁆𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁄. 𑀏𑀯𑀫𑀺𑀤𑀁 𑀲𑀼𑀢𑁆𑀢𑀁 𑀤𑁂𑀯𑀢𑀸𑀦𑀁 𑀧𑀺𑀬𑀁 𑀫𑀦𑀸𑀧𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀳𑀸𑀥𑀫𑁆𑀫𑀲𑀫𑀸𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀯𑀻𑀫𑀁𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮𑁭. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀯𑀻𑀫𑀁𑀲𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀯𑀻𑀫𑀁𑀲𑀓𑁂𑀦𑀸𑀢𑀺 𑀢𑀬𑁄 𑀯𑀻𑀫𑀁𑀲𑀓𑀸 𑁋 𑀅𑀢𑁆𑀣𑀯𑀻𑀫𑀁𑀲𑀓𑁄 𑀲𑀗𑁆𑀔𑀸𑀭𑀯𑀻𑀫𑀁𑀲𑀓𑁄 𑀲𑀢𑁆𑀣𑀼𑀯𑀻𑀫𑀁𑀲𑀓𑁄𑀢𑀺. 𑀢𑁂𑀲𑀼, ‘‘𑀧𑀡𑁆𑀟𑀺𑀢𑀸 𑀳𑀸𑀯𑀼𑀲𑁄, 𑀫𑀦𑀼𑀲𑁆𑀲𑀸 𑀯𑀻𑀫𑀁𑀲𑀓𑀸’’𑀢𑀺 (𑀲𑀁. 𑀦𑀺. 𑁩.𑁨) 𑀏𑀢𑁆𑀣 𑀅𑀢𑁆𑀣𑀯𑀻𑀫𑀁𑀲𑀓𑁄 𑀆𑀕𑀢𑁄. ‘‘𑀬𑀢𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀥𑀸𑀢𑀼𑀓𑀼𑀲𑀮𑁄 𑀘 𑀳𑁄𑀢𑀺, 𑀆𑀬𑀢𑀦𑀓𑀼𑀲𑀮𑁄 𑀘 𑀳𑁄𑀢𑀺, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑁄 𑀘 𑀳𑁄𑀢𑀺, 𑀞𑀸𑀦𑀸𑀝𑁆𑀞𑀸𑀦𑀓𑀼𑀲𑀮𑁄 𑀘 𑀳𑁄𑀢𑀺, 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀦𑀦𑁆𑀤, 𑀧𑀡𑁆𑀟𑀺𑀢𑁄 𑀪𑀺𑀓𑁆𑀔𑀼 𑀯𑀻𑀫𑀁𑀲𑀓𑁄𑀢𑀺 𑀅𑀮𑀁 𑀯𑀘𑀦𑀸𑀬𑀸’’𑀢𑀺 (𑀫. 𑀦𑀺. 𑁩.𑁧𑁨𑁪) 𑀏𑀢𑁆𑀣 𑀲𑀗𑁆𑀔𑀸𑀭𑀯𑀻𑀫𑀁𑀲𑀓𑁄 𑀆𑀕𑀢𑁄. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀲𑀢𑁆𑀣𑀼𑀯𑀻𑀫𑀁𑀲𑀓𑁄 𑀅𑀥𑀺𑀧𑁆𑀧𑁂𑀢𑁄. 𑀘𑁂𑀢𑁄𑀧𑀭𑀺𑀬𑀸𑀬𑀦𑁆𑀢𑀺 𑀘𑀺𑀢𑁆𑀢𑀯𑀸𑀭𑀁 𑀘𑀺𑀢𑁆𑀢𑀧𑀭𑀺𑀘𑁆𑀙𑁂𑀤𑀁. 𑀲𑀫𑀦𑁆𑀦𑁂𑀲𑀦𑀸𑀢𑀺 𑀏𑀲𑀦𑀸 𑀧𑀭𑀺𑀬𑁂𑀲𑀦𑀸 𑀉𑀧𑀧𑀭𑀺𑀓𑁆𑀔𑀸. 𑀇𑀢𑀺 𑀯𑀺𑀜𑁆𑀜𑀸𑀡𑀸𑀬𑀸𑀢𑀺 𑀏𑀯𑀁 𑀯𑀺𑀚𑀸𑀦𑀦𑀢𑁆𑀣𑀸𑀬.

𑁪𑁮𑁮. 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀢𑀣𑀸𑀕𑀢𑁄 𑀲𑀫𑀦𑁆𑀦𑁂𑀲𑀺𑀢𑀩𑁆𑀩𑁄𑀢𑀺 𑀇𑀥 𑀓𑀮𑁆𑀬𑀸𑀡𑀫𑀺𑀢𑁆𑀢𑀽𑀧𑀦𑀺𑀲𑁆𑀲𑀬𑀁 𑀤𑀲𑁆𑀲𑁂𑀢𑀺. 𑀫𑀳𑀸 𑀳𑀺 𑀏𑀲 𑀓𑀮𑁆𑀬𑀸𑀡𑀫𑀺𑀢𑁆𑀢𑀽𑀧𑀦𑀺𑀲𑁆𑀲𑀬𑁄 𑀦𑀸𑀫. 𑀢𑀲𑁆𑀲 𑀫𑀳𑀦𑁆𑀢𑀪𑀸𑀯𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄 𑁋 𑀏𑀓𑀲𑁆𑀫𑀺𑀁 𑀳𑀺 𑀲𑀫𑀬𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀉𑀧𑀟𑁆𑀠𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀳𑁄𑀢𑀺, 𑀉𑀧𑀟𑁆𑀠𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀦𑀼𑀪𑀸𑀯𑁂𑀦𑀸𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀦𑀺𑀘𑁆𑀙𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺, 𑁋 ‘‘𑀉𑀧𑀟𑁆𑀠𑀫𑀺𑀤𑀁, 𑀪𑀦𑁆𑀢𑁂, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲, 𑀬𑀤𑀺𑀤𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀓𑀮𑁆𑀬𑀸𑀡𑀲𑀳𑀸𑀬𑀢𑀸 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀢𑀸’’𑀢𑀺. 𑀪𑀕𑀯𑀸 𑀆𑀳 𑁋 ‘‘𑀫𑀸 𑀳𑁂𑀯𑀁, 𑀆𑀦𑀦𑁆𑀤, 𑀫𑀸 𑀳𑁂𑀯𑀁, 𑀆𑀦𑀦𑁆𑀤, 𑀲𑀓𑀮𑀫𑁂𑀯𑀺𑀤𑀁, 𑀆𑀦𑀦𑁆𑀤, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀬𑀤𑀺𑀤𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀓𑀮𑁆𑀬𑀸𑀡𑀲𑀳𑀸𑀬𑀢𑀸, 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀢𑀸. 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑀓𑀮𑁆𑀬𑀸𑀡𑀲𑀳𑀸𑀬𑀲𑁆𑀲 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀲𑁆𑀲, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀲𑁆𑀲𑀢𑀺, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑀺𑀲𑁆𑀲𑀢𑀺. 𑀓𑀣𑀜𑁆𑀘𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀫𑀺𑀢𑁆𑀢𑁄…𑀧𑁂… 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀢𑀺. 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀏𑀯𑀁 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀫𑀺𑀢𑁆𑀢𑁄…𑀧𑁂… 𑀩𑀳𑀼𑀮𑀻𑀓𑀭𑁄𑀢𑀺, 𑀢𑀤𑀫𑀺𑀦𑀸𑀧𑁂𑀢𑀁, 𑀆𑀦𑀦𑁆𑀤, 𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀲𑀓𑀮𑀫𑁂𑀯𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀬𑀤𑀺𑀤𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀓𑀮𑁆𑀬𑀸𑀡𑀲𑀳𑀸𑀬𑀢𑀸 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀢𑀸. 𑀫𑀫𑀜𑁆𑀳𑀺, 𑀆𑀦𑀦𑁆𑀤, 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀆𑀕𑀫𑁆𑀫 𑀚𑀸𑀢𑀺𑀥𑀫𑁆𑀫𑀸 𑀲𑀢𑁆𑀢𑀸 𑀚𑀸𑀢𑀺𑀬𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀺. 𑀚𑀭𑀸𑀥𑀫𑁆𑀫𑀸…𑀧𑁂… 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑀥𑀫𑁆𑀫𑀸 𑀲𑀢𑁆𑀢𑀸 𑀲𑁄𑀓𑀧𑀭𑀺𑀤𑁂𑀯𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀼𑀧𑀸𑀬𑀸𑀲𑁂𑀳𑀺 𑀧𑀭𑀺𑀫𑀼𑀘𑁆𑀘𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁫.𑁨).

𑀪𑀺𑀓𑁆𑀔𑀽𑀦𑀁 𑀩𑀸𑀳𑀺𑀭𑀗𑁆𑀕𑀲𑀫𑁆𑀧𑀢𑁆𑀢𑀺𑀁 𑀓𑀣𑁂𑀦𑁆𑀢𑁄𑀧𑀺 𑀆𑀳 𑁋 ‘‘𑀩𑀸𑀳𑀺𑀭𑀁, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑀦𑁆𑀢𑀺 𑀓𑀭𑀺𑀢𑁆𑀯𑀸 𑀦𑀸𑀜𑁆𑀜𑀁 𑀏𑀓𑀗𑁆𑀕𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀫𑀳𑀢𑁄 𑀅𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺, 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸. 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀪𑀺𑀓𑁆𑀔𑀯𑁂, 𑀫𑀳𑀢𑁄 𑀅𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺 (𑀅. 𑀦𑀺. 𑁧.𑁧𑁧𑁩). 𑀫𑀳𑀸𑀘𑀼𑀦𑁆𑀤𑀲𑁆𑀲 𑀓𑀺𑀮𑁂𑀲𑀲𑀮𑁆𑀮𑁂𑀔𑀧𑀝𑀺𑀧𑀤𑀁 𑀓𑀣𑁂𑀦𑁆𑀢𑁄𑀧𑀺, ‘‘𑀧𑀭𑁂 𑀧𑀸𑀧𑀫𑀺𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀫𑀬𑀫𑁂𑀢𑁆𑀣 𑀓𑀮𑁆𑀬𑀸𑀡𑀫𑀺𑀢𑁆𑀢𑀸 𑀪𑀯𑀺𑀲𑁆𑀲𑀸𑀫𑀸𑀢𑀺 𑀲𑀮𑁆𑀮𑁂𑀔𑁄 𑀓𑀭𑀡𑀻𑀬𑁄’’𑀢𑀺 (𑀫. 𑀦𑀺. 𑁧.𑁮𑁩) 𑀆𑀳. 𑀫𑁂𑀖𑀺𑀬𑀢𑁆𑀣𑁂𑀭𑀲𑁆𑀲 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀺𑀬𑀥𑀫𑁆𑀫𑁂 𑀓𑀣𑁂𑀦𑁆𑀢𑁄𑀧𑀺, ‘‘𑀅𑀧𑀭𑀺𑀧𑀓𑁆𑀓𑀸𑀬, 𑀫𑁂𑀖𑀺𑀬, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀧𑀜𑁆𑀘 𑀥𑀫𑁆𑀫𑀸 𑀧𑀭𑀺𑀧𑀸𑀓𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀫𑁂𑀖𑀺𑀬, 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀳𑁄𑀢𑀺’’𑀢𑀺 (𑀉𑀤𑀸. 𑁩𑁧) 𑀓𑀮𑁆𑀬𑀸𑀡𑀫𑀺𑀢𑁆𑀢𑀽𑀧𑀦𑀺𑀲𑁆𑀲𑀬𑀫𑁂𑀯 𑀯𑀺𑀲𑁂𑀲𑁂𑀲𑀺. 𑀧𑀺𑀬𑀧𑀼𑀢𑁆𑀢𑀲𑁆𑀲 𑀭𑀸𑀳𑀼𑀮𑀢𑁆𑀣𑁂𑀭𑀲𑁆𑀲 𑀅𑀪𑀺𑀡𑁆𑀳𑁄𑀯𑀸𑀤𑀁 𑀤𑁂𑀦𑁆𑀢𑁄𑀧𑀺 𑁋

‘‘𑀫𑀺𑀢𑁆𑀢𑁂 𑀪𑀚𑀲𑁆𑀲𑀼 𑀓𑀮𑁆𑀬𑀸𑀡𑁂, 𑀧𑀦𑁆𑀢𑀜𑁆𑀘 𑀲𑀬𑀦𑀸𑀲𑀦𑀁;

𑀯𑀺𑀯𑀺𑀢𑁆𑀢𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀁, 𑀫𑀢𑁆𑀢𑀜𑁆𑀜𑀽 𑀳𑁄𑀳𑀺 𑀪𑁄𑀚𑀦𑁂.

𑀘𑀻𑀯𑀭𑁂 𑀧𑀺𑀡𑁆𑀟𑀧𑀸𑀢𑁂 𑀘, 𑀧𑀘𑁆𑀘𑀬𑁂 𑀲𑀬𑀦𑀸𑀲𑀦𑁂;

𑀏𑀢𑁂𑀲𑀼 𑀢𑀡𑁆𑀳𑀁 𑀫𑀸𑀓𑀸𑀲𑀺, 𑀫𑀸 𑀮𑁄𑀓𑀁 𑀧𑀼𑀦𑀭𑀸𑀕𑀫𑀻’’𑀢𑀺. (𑀲𑀼. 𑀦𑀺. 𑁩𑁪𑁦, 𑁩𑁪𑁧) 𑁋

𑀓𑀮𑁆𑀬𑀸𑀡𑀫𑀺𑀢𑁆𑀢𑀽𑀧𑀦𑀺𑀲𑁆𑀲𑀬𑀫𑁂𑀯 𑀲𑀩𑁆𑀩𑀧𑀞𑀫𑀁 𑀓𑀣𑁂𑀲𑀺. 𑀏𑀯𑀁 𑀫𑀳𑀸 𑀏𑀲 𑀓𑀮𑁆𑀬𑀸𑀡𑀫𑀺𑀢𑁆𑀢𑀽𑀧𑀦𑀺𑀲𑁆𑀲𑀬𑁄 𑀦𑀸𑀫. 𑀇𑀥𑀸𑀧𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀢𑀣𑀸𑀕𑀢𑁄 𑀲𑀫𑀦𑁆𑀦𑁂𑀲𑀺𑀢𑀩𑁆𑀩𑁄𑀢𑀺 𑀤𑁂𑀲𑀦𑀁 𑀆𑀭𑀪𑀺. 𑀧𑀡𑁆𑀟𑀺𑀢𑁄 𑀪𑀺𑀓𑁆𑀔𑀼 𑀤𑁆𑀯𑀻𑀲𑀼 𑀥𑀫𑁆𑀫𑁂𑀲𑀼 𑀢𑀣𑀸𑀕𑀢𑀁 𑀏𑀲𑀢𑀼 𑀕𑀯𑁂𑀲𑀢𑀽𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀪𑀕𑀯𑀸 𑀅𑀬𑀁 𑀫𑀳𑀸𑀚𑀘𑁆𑀘𑁄𑀢𑀺 𑀯𑀸, 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄𑀢𑀺 𑀯𑀸, 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄𑀢𑀺 𑀯𑀸, 𑀅𑀪𑀺𑀜𑁆𑀜𑀸𑀢𑁄 𑀅𑀪𑀺𑀮𑀓𑁆𑀔𑀺𑀢𑁄𑀢𑀺 𑀯𑀸, 𑀇𑀫𑀁 𑀦𑀺𑀲𑁆𑀲𑀸𑀬𑀸𑀳𑀁 𑀘𑀻𑀯𑀭𑀸𑀤𑀬𑁄 𑀧𑀘𑁆𑀘𑀬𑁂 𑀮𑀪𑀺𑀲𑁆𑀲𑀸𑀫𑀻𑀢𑀺 𑀯𑀸, 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀫𑀁 𑀦𑀺𑀲𑁆𑀲𑀸𑀬 𑀯𑀲𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀬𑁄 𑀧𑀦 𑀏𑀯𑀁 𑀲𑀮𑁆𑀮𑀓𑁆𑀔𑁂𑀢𑀺, ‘‘𑀧𑀳𑁄𑀢𑀺 𑀫𑁂 𑀏𑀲 𑀲𑀢𑁆𑀣𑀸 𑀳𑀼𑀢𑁆𑀯𑀸 𑀲𑀢𑁆𑀣𑀼𑀓𑀺𑀘𑁆𑀘𑀁 𑀲𑀸𑀥𑁂𑀢𑀼’’𑀦𑁆𑀢𑀺, 𑀲𑁄 𑀫𑀁 𑀪𑀚𑀢𑀽𑀢𑀺 𑀲𑀻𑀳𑀦𑀸𑀤𑀁 𑀦𑀤𑀢𑀺. 𑀩𑀼𑀤𑁆𑀥𑀲𑀻𑀳𑀦𑀸𑀤𑁄 𑀓𑀺𑀭 𑀦𑀸𑀫𑁂𑀲 𑀲𑀼𑀢𑁆𑀢𑀦𑁆𑀢𑁄𑀢𑀺.

𑀇𑀤𑀸𑀦𑀺 𑀢𑁂 𑀤𑁆𑀯𑁂 𑀥𑀫𑁆𑀫𑁂 𑀤𑀲𑁆𑀲𑁂𑀦𑁆𑀢𑁄 𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁂𑀲𑀽𑀢𑀺 𑀆𑀳. 𑀢𑀢𑁆𑀣 𑀲𑀢𑁆𑀣𑀼 𑀓𑀸𑀬𑀺𑀓𑁄 𑀲𑀫𑀸𑀘𑀸𑀭𑁄 𑀯𑀻𑀫𑀁𑀲𑀓𑀲𑁆𑀲 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁄 𑀥𑀫𑁆𑀫𑁄 𑀦𑀸𑀫. 𑀯𑀸𑀘𑀲𑀺𑀓𑁄 𑀲𑀫𑀸𑀘𑀸𑀭𑁄 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄 𑀥𑀫𑁆𑀫𑁄 𑀦𑀸𑀫. 𑀇𑀤𑀸𑀦𑀺 𑀢𑁂𑀲𑀼 𑀲𑀫𑀦𑁆𑀦𑁂𑀲𑀺𑀢𑀩𑁆𑀩𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀬𑁂 𑀲𑀁𑀓𑀺𑀮𑀺𑀝𑁆𑀞𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀁𑀓𑀺𑀮𑀺𑀝𑁆𑀞𑀸𑀢𑀺 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀸. 𑀢𑁂 𑀘 𑀦 𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸. 𑀬𑀣𑀸 𑀧𑀦 𑀉𑀤𑀓𑁂 𑀘𑀮𑀦𑁆𑀢𑁂 𑀯𑀸 𑀧𑀼𑀧𑁆𑀨𑀼𑀴𑀓𑁂 𑀯𑀸 𑀫𑀼𑀜𑁆𑀘𑀦𑁆𑀢𑁂 𑀅𑀦𑁆𑀢𑁄 𑀫𑀘𑁆𑀙𑁄 𑀅𑀢𑁆𑀣𑀻𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀏𑀯𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀯𑀸 𑀓𑀭𑁄𑀦𑁆𑀢𑀲𑁆𑀲, 𑀫𑀼𑀲𑀸𑀯𑀸𑀤𑀸𑀤𑀻𑀦𑀺 𑀯𑀸 𑀪𑀡𑀦𑁆𑀢𑀲𑁆𑀲 𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑁂 𑀤𑀺𑀲𑁆𑀯𑀸 𑀘 𑀲𑀼𑀢𑁆𑀯𑀸 𑀘 𑀢𑀁𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀁 𑀲𑀁𑀓𑀺𑀮𑀺𑀝𑁆𑀞𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀲𑁆𑀲 𑀳𑀺 𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑀸𑀧𑀺 𑀲𑀁𑀓𑀺𑀮𑀺𑀝𑁆𑀞𑀸𑀬𑁂𑀯 𑀦𑀸𑀫. 𑀦 𑀢𑁂 𑀢𑀣𑀸𑀕𑀢𑀲𑁆𑀲 𑀲𑀁𑀯𑀺𑀚𑁆𑀚𑀦𑁆𑀢𑀻𑀢𑀺 𑀦 𑀢𑁂 𑀢𑀣𑀸𑀕𑀢𑀲𑁆𑀲 𑀅𑀢𑁆𑀣𑀺. 𑀦 𑀉𑀧𑀮𑀩𑁆𑀪𑀦𑁆𑀢𑀻𑀢𑀺 𑀏𑀯𑀁 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀦𑀢𑁆𑀣𑀺𑀢𑀸𑀬𑁂𑀯 𑀳𑀺 𑀢𑁂 𑀦 𑀉𑀧𑀮𑀩𑁆𑀪𑀦𑁆𑀢𑀺 𑀦 𑀧𑀝𑀺𑀘𑁆𑀙𑀦𑁆𑀦𑀢𑀸𑀬. 𑀢𑀣𑀸 𑀳𑀺 𑀪𑀕𑀯𑀸 𑀏𑀓𑀤𑀺𑀯𑀲𑀁 𑀇𑀫𑁂𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀯𑀸𑀭𑁂𑀦𑁆𑀢𑁄 𑀆𑀳 𑁋 ‘‘𑀳𑀦𑁆𑀤 𑀤𑀸𑀦𑀺, 𑀪𑀺𑀓𑁆𑀔𑀯𑁂, 𑀧𑀯𑀸𑀭𑁂𑀫𑀺 𑀯𑁄, 𑀦 𑀘 𑀫𑁂 𑀓𑀺𑀜𑁆𑀘𑀺 𑀕𑀭𑀳𑀣 𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀜𑁆𑀚𑀮𑀺𑀁 𑀧𑀡𑀸𑀫𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀦 𑀔𑁄 𑀫𑀬𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀓𑀺𑀜𑁆𑀘𑀺 𑀕𑀭𑀳𑀸𑀫 𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸. 𑀪𑀕𑀯𑀸 𑀳𑀺, 𑀪𑀦𑁆𑀢𑁂, 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸, 𑀅𑀲𑀜𑁆𑀚𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀲𑀜𑁆𑀚𑀸𑀦𑁂𑀢𑀸, 𑀅𑀦𑀓𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀓𑁆𑀔𑀸𑀢𑀸, 𑀫𑀕𑁆𑀕𑀜𑁆𑀜𑀽 𑀫𑀕𑁆𑀕𑀯𑀺𑀤𑀽 𑀫𑀕𑁆𑀕𑀓𑁄𑀯𑀺𑀤𑁄. 𑀫𑀕𑁆𑀕𑀸𑀦𑀼𑀕𑀸 𑀘, 𑀪𑀦𑁆𑀢𑁂, 𑀏𑀢𑀭𑀳𑀺 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺 𑀧𑀘𑁆𑀙𑀸𑀲𑀫𑀦𑁆𑀦𑀸𑀕𑀢𑀸’’𑀢𑀺 (𑀲𑀁. 𑀦𑀺. 𑁧.𑁨𑁧𑁫). 𑀏𑀯𑀁 𑀧𑀭𑀺𑀲𑀼𑀤𑁆𑀥𑀸 𑀢𑀣𑀸𑀕𑀢𑀲𑁆𑀲 𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑀸. 𑀉𑀢𑁆𑀢𑀭𑁄𑀧𑀺 𑀲𑀼𑀤𑀁 𑀫𑀸𑀡𑀯𑁄 𑀢𑀣𑀸𑀕𑀢𑀲𑁆𑀲 𑀓𑀸𑀬𑀯𑀘𑀻𑀤𑁆𑀯𑀸𑀭𑁂 𑀅𑀦𑀸𑀭𑀸𑀥𑀦𑀻𑀬𑀁 𑀓𑀺𑀜𑁆𑀘𑀺 𑀧𑀲𑁆𑀲𑀺𑀲𑁆𑀲𑀸𑀫𑀻𑀢𑀺 𑀲𑀢𑁆𑀢 𑀫𑀸𑀲𑁂 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀮𑀺𑀓𑁆𑀔𑀸𑀫𑀢𑁆𑀢𑀫𑁆𑀧𑀺 𑀦 𑀅𑀤𑁆𑀤𑀲. 𑀫𑀦𑀼𑀲𑁆𑀲𑀪𑀽𑀢𑁄 𑀯𑀸 𑀏𑀲 𑀩𑀼𑀤𑁆𑀥𑀪𑀽𑀢𑀲𑁆𑀲 𑀓𑀸𑀬𑀯𑀘𑀻𑀤𑁆𑀯𑀸𑀭𑁂 𑀓𑀺𑀁 𑀅𑀦𑀸𑀭𑀸𑀥𑀦𑀻𑀬𑀁 𑀧𑀲𑁆𑀲𑀺𑀲𑁆𑀲𑀢𑀺? 𑀫𑀸𑀭𑁄𑀧𑀺 𑀤𑁂𑀯𑀧𑀼𑀢𑁆𑀢𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀲𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀢𑁄 𑀧𑀝𑁆𑀞𑀸𑀬 𑀙𑀩𑁆𑀩𑀲𑁆𑀲𑀸𑀦𑀺 𑀕𑀯𑁂𑀲𑀫𑀸𑀦𑁄 𑀓𑀺𑀜𑁆𑀘𑀺 𑀅𑀦𑀸𑀭𑀸𑀥𑀦𑀻𑀬𑀁 𑀦𑀸𑀤𑁆𑀤𑀲, 𑀅𑀦𑁆𑀢𑀫𑀲𑁄 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀢𑁆𑀢𑀫𑁆𑀧𑀺. 𑀫𑀸𑀭𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀲𑁆𑀲 𑀯𑀺𑀢𑀓𑁆𑀓𑀺𑀢𑀫𑀢𑁆𑀢𑀫𑁆𑀧𑀺 𑀅𑀓𑀼𑀲𑀮𑀁 𑀧𑀲𑁆𑀲𑀺𑀲𑁆𑀲𑀸𑀫𑀺, 𑀢𑀢𑁆𑀣𑁂𑀯 𑀦𑀁 𑀫𑀼𑀤𑁆𑀥𑀦𑀺 𑀧𑀳𑀭𑀺𑀢𑁆𑀯𑀸 𑀧𑀓𑁆𑀓𑀫𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀙𑀩𑁆𑀩𑀲𑁆𑀲𑀸𑀦𑀺 𑀅𑀤𑀺𑀲𑁆𑀯𑀸 𑀩𑀼𑀤𑁆𑀥𑀪𑀽𑀢𑀫𑁆𑀧𑀺 𑀏𑀓𑀁 𑀯𑀲𑁆𑀲𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀓𑀺𑀜𑁆𑀘𑀺 𑀯𑀚𑁆𑀚𑀁 𑀅𑀧𑀲𑁆𑀲𑀦𑁆𑀢𑁄 𑀕𑀫𑀦𑀲𑀫𑀬𑁂 𑀯𑀦𑁆𑀤𑀺𑀢𑁆𑀯𑀸 𑁋

‘‘𑀫𑀳𑀸𑀯𑀻𑀭 𑀫𑀳𑀸𑀧𑀼𑀜𑁆𑀜𑀁, 𑀇𑀤𑁆𑀥𑀺𑀬𑀸 𑀬𑀲𑀲𑀸 𑀚𑀮𑀁;

𑀲𑀩𑁆𑀩𑀯𑁂𑀭𑀪𑀬𑀸𑀢𑀻𑀢𑀁, 𑀧𑀸𑀤𑁂 𑀯𑀦𑁆𑀤𑀸𑀫𑀺 𑀕𑁄𑀢𑀫’’𑀦𑁆𑀢𑀺. (𑀲𑀁. 𑀦𑀺. 𑁧.𑁧𑁫𑁯) 𑁋

𑀕𑀸𑀣𑀁 𑀯𑀢𑁆𑀯𑀸 𑀕𑀢𑁄.

𑀯𑀻𑀢𑀺𑀫𑀺𑀲𑁆𑀲𑀸𑀢𑀺 𑀓𑀸𑀮𑁂 𑀓𑀡𑁆𑀳𑀸, 𑀓𑀸𑀮𑁂 𑀲𑀼𑀓𑁆𑀓𑀸𑀢𑀺 𑀏𑀯𑀁 𑀯𑁄𑀫𑀺𑀲𑁆𑀲𑀓𑀸. 𑀯𑁄𑀤𑀸𑀢𑀸𑀢𑀺 𑀧𑀭𑀺𑀲𑀼𑀤𑁆𑀥𑀸 𑀦𑀺𑀓𑁆𑀓𑀺𑀮𑁂𑀲𑀸. 𑀲𑀁𑀯𑀺𑀚𑁆𑀚𑀦𑁆𑀢𑀻𑀢𑀺 𑀯𑁄𑀤𑀸𑀢𑀸 𑀥𑀫𑁆𑀫𑀸 𑀅𑀢𑁆𑀣𑀺 𑀉𑀧𑀮𑀩𑁆𑀪𑀦𑁆𑀢𑀺. 𑀢𑀣𑀸𑀕𑀢𑀲𑁆𑀲 𑀳𑀺 𑀧𑀭𑀺𑀲𑀼𑀤𑁆𑀥𑀸 𑀓𑀸𑀬𑀲𑀫𑀸𑀘𑀸𑀭𑀸𑀤𑀬𑁄. 𑀢𑁂𑀦𑀸𑀳 𑁋 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀅𑀭𑀓𑁆𑀔𑁂𑀬𑁆𑀬𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀧𑀭𑀺𑀲𑀼𑀤𑁆𑀥𑀓𑀸𑀬𑀲𑀫𑀸𑀘𑀸𑀭𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄, 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀓𑀸𑀬𑀤𑀼𑀘𑁆𑀘𑀭𑀺𑀢𑀁, 𑀬𑀁 𑀢𑀣𑀸𑀕𑀢𑁄 𑀭𑀓𑁆𑀔𑁂𑀬𑁆𑀬, ‘𑀫𑀸 𑀫𑁂 𑀇𑀤𑀁 𑀧𑀭𑁄 𑀅𑀜𑁆𑀜𑀸𑀲𑀻’𑀢𑀺. 𑀧𑀭𑀺𑀲𑀼𑀤𑁆𑀥𑀯𑀘𑀻𑀲𑀫𑀸𑀘𑀸𑀭𑁄… 𑀧𑀭𑀺𑀲𑀼𑀤𑁆𑀥𑀫𑀦𑁄𑀲𑀫𑀸𑀘𑀸𑀭𑁄… 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄, 𑀦𑀢𑁆𑀣𑀺 𑀢𑀣𑀸𑀕𑀢𑀲𑁆𑀲 𑀫𑀺𑀘𑁆𑀙𑀸𑀚𑀻𑀯𑁄, 𑀬𑀁 𑀢𑀣𑀸𑀕𑀢𑁄 𑀭𑀓𑁆𑀔𑁂𑀬𑁆𑀬, 𑀫𑀸 𑀫𑁂 𑀇𑀤𑀁 𑀧𑀭𑁄 𑀅𑀜𑁆𑀜𑀸𑀲𑀻’’𑀢𑀺 (𑀅. 𑀦𑀺. 𑁭.𑁫𑁮).

𑀇𑀫𑀁 𑀓𑀼𑀲𑀮𑀁 𑀥𑀫𑁆𑀫𑀦𑁆𑀢𑀺 𑀇𑀫𑀁 𑀅𑀦𑀯𑀚𑁆𑀚𑀁 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀁. ‘‘𑀅𑀬𑀫𑀸𑀬𑀲𑁆𑀫𑀸 𑀲𑀢𑁆𑀣𑀸 𑀓𑀺𑀁 𑀦𑀼 𑀔𑁄 𑀤𑀻𑀖𑀭𑀢𑁆𑀢𑀁 𑀲𑀫𑀸𑀧𑀦𑁆𑀦𑁄 𑀅𑀢𑀺𑀘𑀺𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀇𑀫𑀺𑀦𑀸 𑀲𑀫𑀦𑁆𑀦𑀸𑀕𑀢𑁄, 𑀉𑀤𑀸𑀳𑀼 𑀇𑀢𑁆𑀢𑀭𑀲𑀫𑀸𑀧𑀦𑁆𑀦𑁄 𑀳𑀺𑀬𑁆𑀬𑁄 𑀯𑀸 𑀧𑀭𑁂 𑀯𑀸 𑀧𑀭𑀲𑀼𑀯𑁂 𑀯𑀸 𑀤𑀺𑀯𑀲𑁂 𑀲𑀫𑀸𑀧𑀦𑁆𑀦𑁄’’𑀢𑀺 𑀏𑀯𑀁 𑀕𑀯𑁂𑀲𑀢𑀽𑀢𑀺 𑀅𑀢𑁆𑀣𑁄. 𑀏𑀓𑀘𑁆𑀘𑁂𑀦 𑀳𑀺 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀲𑀦𑁆𑀢𑁂𑀦 𑀩𑀳𑀼 𑀫𑀺𑀘𑁆𑀙𑀸𑀚𑀻𑀯𑀓𑀫𑁆𑀫𑀁 𑀓𑀢𑀁, 𑀢𑀁 𑀢𑀢𑁆𑀣 𑀓𑀸𑀮𑀸𑀢𑀺𑀓𑁆𑀓𑀫𑁂 𑀧𑀜𑁆𑀜𑀸𑀬𑀢𑀺, 𑀧𑀸𑀓𑀝𑀁 𑀳𑁄𑀢𑀺. 𑀲𑁄 𑀅𑀜𑁆𑀜𑀢𑀭𑀁 𑀧𑀘𑁆𑀘𑀦𑁆𑀢𑀕𑀸𑀫𑀁 𑀯𑀸 𑀲𑀫𑀼𑀤𑁆𑀤𑀢𑀻𑀭𑀁 𑀯𑀸 𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀆𑀭𑀜𑁆𑀜𑀓𑁄 𑀯𑀺𑀬 𑀳𑀼𑀢𑁆𑀯𑀸 𑀯𑀺𑀳𑀭𑀢𑀺. 𑀫𑀦𑀼𑀲𑁆𑀲𑀸 𑀲𑀫𑁆𑀪𑀸𑀯𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀲𑁆𑀲 𑀧𑀡𑀻𑀢𑁂 𑀧𑀘𑁆𑀘𑀬𑁂 𑀤𑁂𑀦𑁆𑀢𑀺. 𑀚𑀦𑀧𑀤𑀯𑀸𑀲𑀺𑀦𑁄 𑀪𑀺𑀓𑁆𑀔𑀽 𑀢𑀲𑁆𑀲 𑀧𑀭𑀺𑀳𑀸𑀭𑀁 𑀤𑀺𑀲𑁆𑀯𑀸, ‘‘𑀅𑀢𑀺𑀤𑀧𑁆𑀧𑀺𑀢𑁄 𑀯𑀢𑀸𑀬𑀁 𑀆𑀬𑀲𑁆𑀫𑀸, 𑀓𑁄 𑀦𑀼 𑀔𑁄 𑀏𑀲𑁄’’𑀢𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀸, ‘‘𑀅𑀲𑀼𑀓𑀝𑁆𑀞𑀸𑀦𑁂 𑀅𑀲𑀼𑀓𑀁 𑀦𑀸𑀫 𑀫𑀺𑀘𑁆𑀙𑀸𑀚𑀻𑀯𑀁 𑀓𑀢𑁆𑀯𑀸 𑀧𑀓𑁆𑀓𑀦𑁆𑀢𑀪𑀺𑀓𑁆𑀔𑀽’’𑀢𑀺 𑀜𑀢𑁆𑀯𑀸 𑀦 𑀲𑀓𑁆𑀓𑀸 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀉𑀧𑁄𑀲𑀣𑁄 𑀯𑀸 𑀧𑀯𑀸𑀭𑀡𑀸 𑀯𑀸 𑀓𑀸𑀢𑀼𑀦𑁆𑀢𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀉𑀓𑁆𑀔𑁂𑀧𑀦𑀻𑀬𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀺. 𑀏𑀯𑀭𑀽𑀧𑀸𑀬 𑀧𑀝𑀺𑀘𑁆𑀙𑀦𑁆𑀦𑀧𑀝𑀺𑀧𑀢𑁆𑀢𑀺𑀬𑀸 𑀅𑀢𑁆𑀣𑀺𑀪𑀸𑀯𑀁 𑀯𑀸 𑀦𑀢𑁆𑀣𑀺𑀪𑀸𑀯𑀁 𑀯𑀸 𑀯𑀻𑀫𑀁𑀲𑀸𑀧𑁂𑀢𑀼𑀁 𑀏𑀯𑀫𑀸𑀳.

𑀏𑀯𑀁 𑀚𑀸𑀦𑀸𑀢𑀻𑀢𑀺 𑀤𑀻𑀖𑀭𑀢𑁆𑀢𑀁 𑀲𑀫𑀸𑀧𑀦𑁆𑀦𑁄, 𑀦 𑀇𑀢𑁆𑀢𑀭𑀲𑀫𑀸𑀧𑀦𑁆𑀦𑁄𑀢𑀺 𑀚𑀸𑀦𑀸𑀢𑀺. 𑀅𑀦𑀘𑁆𑀙𑀭𑀺𑀬𑀁 𑀘𑁂𑀢𑀁. 𑀬𑀁 𑀢𑀣𑀸𑀕𑀢𑀲𑁆𑀲 𑀏𑀢𑀭𑀳𑀺 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑀲𑁆𑀲 𑀤𑀻𑀖𑀭𑀢𑁆𑀢𑀁 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀁 𑀧𑀭𑀺𑀲𑀼𑀤𑁆𑀥𑀁 𑀪𑀯𑁂𑀬𑁆𑀬. 𑀬𑀲𑁆𑀲 𑀩𑁄𑀥𑀺𑀲𑀢𑁆𑀢𑀓𑀸𑀮𑁂𑀧𑀺 𑀏𑀯𑀁 𑀅𑀳𑁄𑀲𑀺.

𑀅𑀢𑀻𑀢𑁂 𑀓𑀺𑀭 𑀕𑀦𑁆𑀥𑀸𑀭𑀭𑀸𑀚𑀸 𑀘 𑀯𑁂𑀤𑁂𑀳𑀭𑀸𑀚𑀸 𑀘 𑀤𑁆𑀯𑁂𑀧𑀺 𑀲𑀳𑀸𑀬𑀓𑀸 𑀳𑀼𑀢𑁆𑀯𑀸 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀭𑀚𑁆𑀚𑀸𑀦𑀺 𑀧𑀼𑀢𑁆𑀢𑀸𑀦𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀅𑀭𑀜𑁆𑀜𑀕𑀸𑀫𑀓𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺. 𑀧𑀘𑁆𑀘𑀦𑁆𑀢𑁄 𑀦𑀸𑀫 𑀤𑀼𑀮𑁆𑀮𑀪𑀮𑁄𑀡𑁄 𑀳𑁄𑀢𑀺. 𑀢𑀢𑁄 𑀅𑀮𑁄𑀡𑀁 𑀬𑀸𑀕𑀼𑀁 𑀮𑀪𑀺𑀢𑁆𑀯𑀸 𑀏𑀓𑀺𑀲𑁆𑀲𑀸𑀬 𑀲𑀸𑀮𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀧𑀺𑀯𑀦𑁆𑀢𑀺. 𑀅𑀦𑁆𑀢𑀭𑀦𑁆𑀢𑀭𑁂 𑀫𑀦𑀼𑀲𑁆𑀲𑀸 𑀮𑁄𑀡𑀘𑀼𑀡𑁆𑀡𑀁 𑀆𑀳𑀭𑀺𑀢𑁆𑀯𑀸 𑀤𑁂𑀦𑁆𑀢𑀺. 𑀏𑀓𑀤𑀺𑀯𑀲𑀁 𑀏𑀓𑁄 𑀯𑁂𑀤𑁂𑀳𑀺𑀲𑀺𑀲𑁆𑀲 𑀧𑀡𑁆𑀡𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀮𑁄𑀡𑀘𑀼𑀡𑁆𑀡𑀁 𑀅𑀤𑀸𑀲𑀺. 𑀯𑁂𑀤𑁂𑀳𑀺𑀲𑀺 𑀕𑀳𑁂𑀢𑁆𑀯𑀸 𑀉𑀧𑀟𑁆𑀠𑀁 𑀕𑀦𑁆𑀥𑀸𑀭𑀺𑀲𑀺𑀲𑁆𑀲-𑀲𑀦𑁆𑀢𑀺𑀓𑁂 𑀞𑀧𑁂𑀢𑁆𑀯𑀸 𑀉𑀧𑀟𑁆𑀠𑀁 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀞𑀧𑁂𑀲𑀺. 𑀢𑀢𑁄 𑀣𑁄𑀓𑀁 𑀧𑀭𑀺𑀪𑀼𑀢𑁆𑀢𑀸𑀯𑀲𑁂𑀲𑀁 𑀤𑀺𑀲𑁆𑀯𑀸, ‘‘𑀫𑀸 𑀇𑀤𑀁 𑀦𑀲𑁆𑀲𑀻’’𑀢𑀺 𑀧𑀡𑁆𑀡𑁂𑀦 𑀯𑁂𑀞𑁂𑀢𑁆𑀯𑀸 𑀢𑀺𑀡𑀕𑀳𑀦𑁂 𑀞𑀧𑁂𑀲𑀺. 𑀧𑀼𑀦 𑀏𑀓𑀲𑁆𑀫𑀺𑀁 𑀤𑀺𑀯𑀲𑁂 𑀬𑀸𑀕𑀼𑀧𑀸𑀦𑀓𑀸𑀮𑁂 𑀲𑀢𑀺𑀁 𑀓𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀕𑀦𑁆𑀥𑀸𑀭𑀺𑀲𑀺𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀇𑀢𑁄 𑀣𑁄𑀓𑀁 𑀕𑀡𑁆𑀳𑀣 𑀆𑀘𑀭𑀺𑀬𑀸’’𑀢𑀺 𑀆𑀳. 𑀓𑀼𑀢𑁄 𑀢𑁂 𑀮𑀤𑁆𑀥𑀁 𑀯𑁂𑀤𑁂𑀳𑀺𑀲𑀻𑀢𑀺? 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀧𑀭𑀺𑀪𑀼𑀢𑁆𑀢𑀸𑀯𑀲𑁂𑀲𑀁 ‘‘𑀫𑀸 𑀦𑀲𑁆𑀲𑀻’’𑀢𑀺 𑀫𑀬𑀸 𑀞𑀧𑀺𑀢𑀦𑁆𑀢𑀺. 𑀕𑀦𑁆𑀥𑀸𑀭𑀺𑀲𑀺 𑀕𑀳𑁂𑀢𑀼𑀁 𑀦 𑀇𑀘𑁆𑀙𑀢𑀺, 𑀅𑀮𑁄𑀡𑀓𑀁𑀬𑁂𑀯 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀯𑁂𑀤𑁂𑀳𑀁 𑀇𑀲𑀺𑀁 𑀅𑀯𑁄𑀘 𑁋

‘‘𑀳𑀺𑀢𑁆𑀯𑀸 𑀕𑀸𑀫𑀲𑀳𑀲𑁆𑀲𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀲𑁄𑀴𑀲;

𑀓𑁄𑀝𑁆𑀞𑀸𑀕𑀸𑀭𑀸𑀦𑀺 𑀨𑀻𑀢𑀸𑀦𑀺, 𑀲𑀦𑁆𑀦𑀺𑀥𑀺𑀁 𑀤𑀸𑀦𑀺 𑀓𑀼𑀩𑁆𑀩𑀲𑀻’’𑀢𑀺. (𑀚𑀸. 𑁧.𑁭.𑁭𑁬);

𑀯𑁂𑀤𑁂𑀳𑀺𑀲𑀺 𑀅𑀯𑁄𑀘 𑁋 ‘‘𑀢𑀼𑀫𑁆𑀳𑁂 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑀸, 𑀇𑀤𑀸𑀦𑀺 𑀓𑀲𑁆𑀫𑀸 𑀮𑁄𑀡𑀘𑀼𑀡𑁆𑀡𑀫𑀢𑁆𑀢𑀲𑀦𑁆𑀦𑀺𑀥𑀺𑀓𑀸𑀭𑀡𑀸 𑀧𑀩𑁆𑀩𑀚𑁆𑀚𑀸𑀬 𑀅𑀦𑀼𑀘𑁆𑀙𑀯𑀺𑀓𑀁 𑀦 𑀓𑀭𑁄𑀣𑀸’’𑀢𑀺? 𑀓𑀺𑀁 𑀫𑀬𑀸 𑀓𑀢𑀁 𑀯𑁂𑀤𑁂𑀳𑀺𑀲𑀻𑀢𑀺? 𑀅𑀣 𑀦𑀁 𑀆𑀳 𑁋

‘‘𑀳𑀺𑀢𑁆𑀯𑀸 𑀕𑀦𑁆𑀥𑀸𑀭𑀯𑀺𑀲𑀬𑀁, 𑀧𑀳𑀽𑀢𑀥𑀦𑀥𑀸𑀭𑀺𑀬𑀁;

𑀧𑀲𑀸𑀲𑀦𑀢𑁄 𑀦𑀺𑀓𑁆𑀔𑀦𑁆𑀢𑁄, 𑀇𑀥 𑀤𑀸𑀦𑀺 𑀧𑀲𑀸𑀲𑀲𑀻’’𑀢𑀺. (𑀚𑀸. 𑁧.𑁭.𑁭𑁭);

𑀕𑀦𑁆𑀥𑀸𑀭𑁄 𑀆𑀳 𑁋

‘‘𑀥𑀫𑁆𑀫𑀁 𑀪𑀡𑀸𑀫𑀺 𑀯𑁂𑀤𑁂𑀳, 𑀅𑀥𑀫𑁆𑀫𑁄 𑀫𑁂 𑀦 𑀭𑀼𑀘𑁆𑀘𑀢𑀺;

𑀥𑀫𑁆𑀫𑀁 𑀫𑁂 𑀪𑀡𑀫𑀸𑀦𑀲𑁆𑀲, 𑀦 𑀧𑀸𑀧𑀫𑀼𑀧𑀮𑀺𑀫𑁆𑀧𑀢𑀻’’𑀢𑀺. (𑀚𑀸. 𑁧.𑁭.𑁭𑁮);

𑀯𑁂𑀤𑁂𑀳𑁄 𑀆𑀳 𑁋

‘‘𑀬𑁂𑀦 𑀓𑁂𑀦𑀘𑀺 𑀯𑀡𑁆𑀡𑁂𑀦, 𑀧𑀭𑁄 𑀮𑀪𑀢𑀺 𑀭𑀼𑀧𑁆𑀧𑀦𑀁;

𑀫𑀳𑀢𑁆𑀣𑀺𑀬𑀫𑁆𑀧𑀺 𑀘𑁂 𑀯𑀸𑀘𑀁, 𑀦 𑀢𑀁 𑀪𑀸𑀲𑁂𑀬𑁆𑀬 𑀧𑀡𑁆𑀟𑀺𑀢𑁄’’𑀢𑀺. (𑀚𑀸. 𑁧.𑁭.𑁭𑁯);

𑀕𑀦𑁆𑀥𑀸𑀭𑁄 𑀆𑀳 𑁋

‘‘𑀓𑀸𑀫𑀁 𑀭𑀼𑀧𑁆𑀧𑀢𑀼 𑀯𑀸 𑀫𑀸 𑀯𑀸, 𑀪𑀼𑀲𑀁𑀯 𑀯𑀺𑀓𑀺𑀭𑀻𑀬𑀢𑀼;

𑀥𑀫𑁆𑀫𑀁 𑀫𑁂 𑀪𑀡𑀫𑀸𑀦𑀲𑁆𑀲, 𑀦 𑀧𑀸𑀧𑀫𑀼𑀧𑀮𑀺𑀫𑁆𑀧𑀢𑀻’’𑀢𑀺. (𑀚𑀸. 𑁧.𑁭.𑁮𑁦);

𑀢𑀢𑁄 𑀯𑁂𑀤𑁂𑀳𑀺𑀲𑀺 𑀬𑀲𑁆𑀲 𑀲𑀓𑀸𑀧𑀺 𑀩𑀼𑀤𑁆𑀥𑀺 𑀦𑀢𑁆𑀣𑀺, 𑀆𑀘𑀭𑀺𑀬𑀲𑀦𑁆𑀢𑀺𑀓𑁂 𑀯𑀺𑀦𑀬𑀁 𑀦 𑀲𑀺𑀓𑁆𑀔𑀢𑀺, 𑀲𑁄 𑀅𑀦𑁆𑀥𑀫𑀳𑀺𑀁𑀲𑁄 𑀯𑀺𑀬 𑀯𑀦𑁂 𑀘𑀭𑀢𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳 𑁋

‘‘𑀦𑁄 𑀘𑁂 𑀅𑀲𑁆𑀲 𑀲𑀓𑀸 𑀩𑀼𑀤𑁆𑀥𑀺, 𑀯𑀺𑀦𑀬𑁄 𑀯𑀸 𑀲𑀼𑀲𑀺𑀓𑁆𑀔𑀺𑀢𑁄;

𑀯𑀦𑁂 𑀅𑀦𑁆𑀥𑀫𑀳𑀺𑀁𑀲𑁄𑀯, 𑀘𑀭𑁂𑀬𑁆𑀬 𑀩𑀳𑀼𑀓𑁄 𑀚𑀦𑁄.

𑀬𑀲𑁆𑀫𑀸 𑀘 𑀧𑀦𑀺𑀥𑁂𑀓𑀘𑁆𑀘𑁂, 𑀆𑀘𑁂𑀭𑀫𑁆𑀳𑀺 𑀲𑀼𑀲𑀺𑀓𑁆𑀔𑀺𑀢𑀸;

𑀢𑀲𑁆𑀫𑀸 𑀯𑀺𑀦𑀻𑀢𑀯𑀺𑀦𑀬𑀸, 𑀘𑀭𑀦𑁆𑀢𑀺 𑀲𑀼𑀲𑀫𑀸𑀳𑀺𑀢𑀸’’𑀢𑀺. (𑀚𑀸. 𑁧.𑁭.𑁮𑁧-𑁮𑁨);

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀯𑁂𑀤𑁂𑀳𑀺𑀲𑀺 𑀅𑀚𑀸𑀦𑀺𑀢𑁆𑀯𑀸 𑀫𑀬𑀸 𑀓𑀢𑀦𑁆𑀢𑀺 𑀕𑀦𑁆𑀥𑀸𑀭𑀺𑀲𑀺𑀁 𑀔𑀫𑀸𑀧𑁂𑀲𑀺. 𑀢𑁂 𑀉𑀪𑁄𑀧𑀺 𑀢𑀧𑀁 𑀘𑀭𑀺𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑀁 𑀅𑀕𑀫𑀁𑀲𑀼. 𑀏𑀯𑀁 𑀢𑀣𑀸𑀕𑀢𑀲𑁆𑀲 𑀩𑁄𑀥𑀺𑀲𑀢𑁆𑀢𑀓𑀸𑀮𑁂𑀧𑀺 𑀤𑀻𑀖𑀭𑀢𑁆𑀢𑀁 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀁 𑀧𑀭𑀺𑀲𑀼𑀤𑁆𑀥𑀁 𑀅𑀳𑁄𑀲𑀺.

𑀉𑀢𑁆𑀢𑀚𑁆𑀛𑀸𑀧𑀦𑁆𑀦𑁄 𑀅𑀬𑀫𑀸𑀬𑀲𑁆𑀫𑀸 𑀪𑀺𑀓𑁆𑀔𑀼 𑀬𑀲𑀧𑀢𑁆𑀢𑁄𑀢𑀺 𑀅𑀬𑀫𑀸𑀬𑀲𑁆𑀫𑀸 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸 𑀪𑀺𑀓𑁆𑀔𑀼 𑀜𑀢𑁆𑀢𑀁 𑀧𑀜𑁆𑀜𑀸𑀢𑀪𑀸𑀯𑀁 𑀧𑀸𑀓𑀝𑀪𑀸𑀯𑀁 𑀅𑀚𑁆𑀛𑀸𑀧𑀦𑁆𑀦𑁄 𑀦𑀼 𑀔𑁄, 𑀲𑀬𑀜𑁆𑀘 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀢𑁄 𑀦𑀼 𑀔𑁄 𑀦𑁄𑀢𑀺. 𑀢𑁂𑀦 𑀘𑀲𑁆𑀲 𑀧𑀜𑁆𑀜𑀸𑀢𑀚𑁆𑀛𑀸𑀧𑀦𑁆𑀦𑀪𑀸𑀯𑁂𑀦 𑀬𑀲𑀲𑀦𑁆𑀦𑀺𑀲𑁆𑀲𑀺𑀢𑀪𑀸𑀯𑁂𑀦 𑀘 𑀓𑀺𑀁 𑀏𑀓𑀘𑁆𑀘𑁂 𑀆𑀤𑀻𑀦𑀯𑀸 𑀲𑀦𑁆𑀤𑀺𑀲𑁆𑀲𑀦𑁆𑀢𑀺 𑀉𑀤𑀸𑀳𑀼 𑀦𑁄𑀢𑀺 𑀏𑀯𑀁 𑀲𑀫𑀦𑁆𑀦𑁂𑀲𑀦𑁆𑀢𑀽𑀢𑀺 𑀤𑀲𑁆𑀲𑁂𑀢𑀺. 𑀦 𑀢𑀸𑀯, 𑀪𑀺𑀓𑁆𑀔𑀯𑁂𑀢𑀺, 𑀪𑀺𑀓𑁆𑀔𑀯𑁂, 𑀬𑀸𑀯 𑀪𑀺𑀓𑁆𑀔𑀼 𑀦 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀲𑀼 𑀅𑀪𑀺𑀜𑁆𑀜𑀸𑀢𑀪𑀸𑀯𑀁 𑀯𑀸 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀁 𑀯𑀸 𑀆𑀧𑀦𑁆𑀦𑁄 𑀳𑁄𑀢𑀺, 𑀢𑀸𑀯 𑀏𑀓𑀘𑁆𑀘𑁂 𑀫𑀸𑀦𑀸𑀢𑀺𑀫𑀸𑀦𑀸𑀤𑀬𑁄 𑀆𑀤𑀻𑀦𑀯𑀸 𑀦 𑀲𑀁𑀯𑀺𑀚𑁆𑀚𑀦𑁆𑀢𑀺 𑀉𑀧𑀲𑀦𑁆𑀢𑀽𑀧𑀲𑀦𑁆𑀢𑁄 𑀯𑀺𑀬 𑀲𑁄𑀢𑀸𑀧𑀦𑁆𑀦𑁄 𑀯𑀺𑀬 𑀲𑀓𑀤𑀸𑀕𑀸𑀫𑀻 𑀯𑀺𑀬 𑀘 𑀯𑀺𑀳𑀭𑀢𑀺. 𑀅𑀭𑀺𑀬𑁄 𑀦𑀼 𑀔𑁄 𑀧𑀼𑀣𑀼𑀚𑁆𑀚𑀦𑁄 𑀦𑀼 𑀔𑁄𑀢𑀺𑀧𑀺 𑀜𑀸𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀢𑀺.

𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂𑀢𑀺 𑀬𑀤𑀸 𑀧𑀦 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀜𑀸𑀢𑁄 𑀳𑁄𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑁄 𑀯𑀸, 𑀢𑀤𑀸 𑀢𑀺𑀡𑁆𑀳𑁂𑀦 𑀲𑀺𑀗𑁆𑀕𑁂𑀦 𑀕𑁄𑀕𑀡𑀁 𑀯𑀺𑀚𑁆𑀛𑀦𑁆𑀢𑁄 𑀤𑀼𑀝𑁆𑀞𑀕𑁄𑀡𑁄 𑀯𑀺𑀬, 𑀫𑀺𑀕𑀲𑀗𑁆𑀖𑀁 𑀅𑀪𑀺𑀫𑀤𑁆𑀤𑀫𑀸𑀦𑁄 𑀤𑀻𑀧𑀺 𑀯𑀺𑀬 𑀘 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀢𑀢𑁆𑀣 𑀢𑀢𑁆𑀣 𑀯𑀺𑀚𑁆𑀛𑀦𑁆𑀢𑁄 𑀅𑀕𑀸𑀭𑀯𑁄 𑀅𑀲𑀪𑀸𑀕𑀯𑀼𑀢𑁆𑀢𑀺 𑀅𑀕𑁆𑀕𑀧𑀸𑀤𑁂𑀦 𑀪𑀽𑀫𑀺𑀁 𑀨𑀼𑀲𑀦𑁆𑀢𑁄 𑀯𑀺𑀬 𑀘𑀭𑀢𑀺. 𑀏𑀓𑀘𑁆𑀘𑁄 𑀧𑀦 𑀓𑀼𑀮𑀧𑀼𑀢𑁆𑀢𑁄 𑀬𑀣𑀸 𑀬𑀣𑀸 𑀜𑀸𑀢𑁄 𑀳𑁄𑀢𑀺 𑀬𑀲𑀲𑁆𑀲𑀻, 𑀢𑀣𑀸 𑀢𑀣𑀸 𑀨𑀮𑀪𑀸𑀭𑀪𑀭𑀺𑀢𑁄 𑀯𑀺𑀬 𑀲𑀸𑀮𑀺 𑀲𑀼𑀝𑁆𑀞𑀼𑀢𑀭𑀁 𑀑𑀦𑀫𑀢𑀺, 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀲𑀼 𑀉𑀧𑀲𑀗𑁆𑀓𑀫𑀦𑁆𑀢𑁂𑀲𑀼 𑀅𑀓𑀺𑀜𑁆𑀘𑀦𑀪𑀸𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀲𑀫𑀡𑀲𑀜𑁆𑀜𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀙𑀺𑀦𑁆𑀦𑀯𑀺𑀲𑀸𑀡𑀉𑀲𑀪𑁄 𑀯𑀺𑀬, 𑀘𑀡𑁆𑀟𑀸𑀮𑀤𑀸𑀭𑀓𑁄 𑀯𑀺𑀬 𑀘 𑀲𑁄𑀭𑀢𑁄 𑀦𑀺𑀯𑀸𑀢𑁄 𑀦𑀻𑀘𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘𑁂𑀯 𑀲𑀤𑁂𑀯𑀓𑀲𑁆𑀲 𑀘 𑀮𑁄𑀓𑀲𑁆𑀲, 𑀳𑀺𑀢𑀸𑀬 𑀲𑀼𑀔𑀸𑀬 𑀧𑀝𑀺𑀧𑀚𑁆𑀚𑀢𑀺. 𑀏𑀯𑀭𑀽𑀧𑀁 𑀧𑀝𑀺𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 ‘‘𑀦𑀸𑀲𑁆𑀲 𑀇𑀥𑁂𑀓𑀘𑁆𑀘𑁂 𑀆𑀤𑀻𑀦𑀯𑀸’’𑀢𑀺 𑀆𑀳.

𑀢𑀣𑀸𑀕𑀢𑁄 𑀧𑀦 𑀅𑀝𑁆𑀞𑀲𑀼 𑀮𑁄𑀓𑀥𑀫𑁆𑀫𑁂𑀲𑀼 𑀢𑀸𑀤𑀻, 𑀲𑁄 𑀳𑀺 𑀮𑀸𑀪𑁂𑀧𑀺 𑀢𑀸𑀤𑀻, 𑀅𑀮𑀸𑀪𑁂𑀧𑀺 𑀢𑀸𑀤𑀻, 𑀬𑀲𑁂𑀧𑀺 𑀢𑀸𑀤𑀻, 𑀅𑀬𑀲𑁂𑀧𑀺 𑀢𑀸𑀤𑀻, 𑀧𑀲𑀁𑀲𑀸𑀬𑀧𑀺 𑀢𑀸𑀤𑀻, 𑀦𑀺𑀦𑁆𑀤𑀸𑀬𑀧𑀺 𑀢𑀸𑀤𑀻, 𑀲𑀼𑀔𑁂𑀧𑀺 𑀢𑀸𑀤𑀻, 𑀤𑀼𑀓𑁆𑀔𑁂𑀧𑀺 𑀢𑀸𑀤𑀻, 𑀢𑀲𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀦𑀸𑀲𑁆𑀲 𑀇𑀥𑁂𑀓𑀘𑁆𑀘𑁂 𑀆𑀤𑀻𑀦𑀯𑀸 𑀲𑀁𑀯𑀺𑀚𑁆𑀚𑀦𑁆𑀢𑀺. 𑀅𑀪𑀬𑀽𑀧𑀭𑀢𑁄𑀢𑀺 𑀅𑀪𑀬𑁄 𑀳𑀼𑀢𑁆𑀯𑀸 𑀉𑀧𑀭𑀢𑁄, 𑀅𑀘𑁆𑀘𑀦𑁆𑀢𑀽𑀧𑀭𑀢𑁄 𑀲𑀢𑀢𑀽𑀧𑀭𑀢𑁄𑀢𑀺 𑀅𑀢𑁆𑀣𑁄. 𑀦 𑀯𑀸 𑀪𑀬𑁂𑀦 𑀉𑀧𑀭𑀢𑁄𑀢𑀺𑀧𑀺 𑀅𑀪𑀬𑀽𑀧𑀭𑀢𑁄. 𑀘𑀢𑁆𑀢𑀸𑀭𑀺 𑀳𑀺 𑀪𑀬𑀸𑀦𑀺 𑀓𑀺𑀮𑁂𑀲𑀪𑀬𑀁 𑀯𑀝𑁆𑀝𑀪𑀬𑀁 𑀤𑀼𑀕𑁆𑀕𑀢𑀺𑀪𑀬𑀁 𑀉𑀧𑀯𑀸𑀤𑀪𑀬𑀦𑁆𑀢𑀺. 𑀧𑀼𑀣𑀼𑀚𑁆𑀚𑀦𑁄 𑀘𑀢𑀽𑀳𑀺𑀧𑀺 𑀪𑀬𑁂𑀳𑀺 𑀪𑀸𑀬𑀢𑀺. 𑀲𑁂𑀓𑁆𑀔𑀸 𑀢𑀻𑀳𑀺, 𑀢𑁂𑀲𑀜𑁆𑀳𑀺 𑀤𑀼𑀕𑁆𑀕𑀢𑀺𑀪𑀬𑀁 𑀧𑀳𑀻𑀦𑀁, 𑀇𑀢𑀺 𑀲𑀢𑁆𑀢 𑀲𑁂𑀓𑁆𑀔𑀸 𑀪𑀬𑀽𑀧𑀭𑀢𑀸, 𑀔𑀻𑀡𑀸𑀲𑀯𑁄 𑀅𑀪𑀬𑀽𑀧𑀭𑀢𑁄 𑀦𑀸𑀫, 𑀢𑀲𑁆𑀲 𑀳𑀺 𑀏𑀓𑀫𑁆𑀧𑀺 𑀪𑀬𑀁 𑀦𑀢𑁆𑀣𑀺. 𑀓𑀺𑀁 𑀧𑀭𑀯𑀸𑀤𑀪𑀬𑀁 𑀦𑀢𑁆𑀣𑀻𑀢𑀺? 𑀦𑀢𑁆𑀣𑀺. 𑀧𑀭𑀸𑀦𑀼𑀤𑁆𑀤𑀬𑀁 𑀧𑀦 𑀧𑀝𑀺𑀘𑁆𑀘, ‘‘𑀫𑀸𑀤𑀺𑀲𑀁 𑀔𑀻𑀡𑀸𑀲𑀯𑀁 𑀧𑀝𑀺𑀘𑁆𑀘 𑀲𑀢𑁆𑀢𑀸 𑀫𑀸 𑀦𑀲𑁆𑀲𑀦𑁆𑀢𑀽’’𑀢𑀺 𑀉𑀧𑀯𑀸𑀤𑀁 𑀭𑀓𑁆𑀔𑀢𑀺. 𑀫𑀽𑀮𑀼𑀧𑁆𑀧𑀮𑀯𑀸𑀧𑀺𑀯𑀺𑀳𑀸𑀭𑀯𑀸𑀲𑀻 𑀬𑀲𑀢𑁆𑀣𑁂𑀭𑁄 𑀯𑀺𑀬.

𑀣𑁂𑀭𑁄 𑀓𑀺𑀭 𑀫𑀽𑀮𑀼𑀧𑁆𑀧𑀮𑀯𑀸𑀧𑀺𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀣𑀲𑁆𑀲 𑀉𑀧𑀝𑁆𑀞𑀸𑀓𑀓𑀼𑀮𑀤𑁆𑀯𑀸𑀭𑀁 𑀧𑀢𑁆𑀢𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀣𑀡𑁆𑀟𑀺𑀮𑀧𑀻𑀞𑀓𑀁 𑀦𑀺𑀲𑁆𑀲𑀸𑀬 𑀆𑀲𑀦𑀁 𑀧𑀜𑁆𑀜𑀧𑁂𑀲𑀼𑀁. 𑀅𑀫𑀘𑁆𑀘𑀥𑀻𑀢𑀸𑀧𑀺 𑀢𑀁𑀬𑁂𑀯 𑀧𑀻𑀞𑀓𑀁 𑀦𑀺𑀲𑁆𑀲𑀸𑀬 𑀧𑀭𑀢𑁄𑀪𑀸𑀕𑁂 𑀦𑀻𑀘𑀢𑀭𑀁 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀏𑀓𑁄 𑀦𑁂𑀯𑀸𑀲𑀺𑀓𑁄 𑀪𑀺𑀓𑁆𑀔𑀼 𑀧𑀘𑁆𑀙𑀸 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄 𑀤𑁆𑀯𑀸𑀭𑁂 𑀞𑀢𑁆𑀯𑀸𑀯 𑀑𑀮𑁄𑀓𑁂𑀦𑁆𑀢𑁄 𑀣𑁂𑀭𑁄 𑀅𑀫𑀘𑁆𑀘𑀥𑀻𑀢𑀭𑀸 𑀲𑀤𑁆𑀥𑀺𑀁 𑀏𑀓𑀫𑀜𑁆𑀘𑁂 𑀦𑀺𑀲𑀺𑀦𑁆𑀦𑁄𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸, ‘‘𑀅𑀬𑀁 𑀧𑀁𑀲𑀼𑀓𑀽𑀮𑀺𑀓𑁄 𑀯𑀺𑀳𑀸𑀭𑁂𑀯 𑀉𑀧𑀲𑀦𑁆𑀢𑀽𑀧𑀲𑀦𑁆𑀢𑁄 𑀯𑀺𑀬 𑀯𑀺𑀳𑀭𑀢𑀺, 𑀅𑀦𑁆𑀢𑁄𑀕𑀸𑀫𑁂 𑀧𑀦 𑀉𑀧𑀝𑁆𑀞𑀸𑀬𑀺𑀓𑀸𑀳𑀺 𑀲𑀤𑁆𑀥𑀺𑀁 𑀏𑀓𑀫𑀜𑁆𑀘𑁂 𑀦𑀺𑀲𑀻𑀤𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀓𑀺𑀁 𑀦𑀼 𑀔𑁄 𑀫𑀬𑀸 𑀤𑀼𑀤𑁆𑀤𑀺𑀝𑁆𑀞’’𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀑𑀮𑁄𑀓𑁂𑀢𑁆𑀯𑀸 𑀢𑀣𑀸𑀲𑀜𑁆𑀜𑀻𑀯 𑀳𑀼𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀣𑁂𑀭𑁄𑀧𑀺 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀦𑀺𑀲𑀻𑀤𑀺. 𑀦𑁂𑀯𑀸𑀲𑀺𑀓𑁄𑀧𑀺 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸, ‘‘𑀢𑀁 𑀧𑀁𑀲𑀼𑀓𑀽𑀮𑀺𑀓𑀁 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀺𑀲𑁆𑀲𑀸𑀫𑀻’’𑀢𑀺 𑀅𑀲𑀜𑁆𑀜𑀢𑀦𑀻𑀳𑀸𑀭𑁂𑀦 𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀭𑀺𑀪𑁄𑀕𑀖𑀝𑀢𑁄 𑀉𑀮𑀼𑀗𑁆𑀓𑁂𑀦 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑁄 𑀧𑀸𑀤𑁂 𑀥𑁄𑀯𑀺. 𑀣𑁂𑀭𑁄, ‘‘𑀓𑁄 𑀦𑀼 𑀔𑁄 𑀅𑀬𑀁 𑀅𑀲𑀜𑁆𑀜𑀢𑀘𑀸𑀭𑀺𑀓𑁄’’𑀢𑀺 𑀆𑀯𑀚𑁆𑀚𑀦𑁆𑀢𑁄 𑀲𑀩𑁆𑀩𑀁 𑀜𑀢𑁆𑀯𑀸, ‘‘𑀅𑀬𑀁 𑀫𑀬𑀺 𑀫𑀦𑀁 𑀧𑀤𑁄𑀲𑁂𑀢𑁆𑀯𑀸 𑀅𑀧𑀸𑀬𑀽𑀧𑀕𑁄 𑀫𑀸 𑀅𑀳𑁄𑀲𑀻’’𑀢𑀺 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀓𑀡𑁆𑀡𑀺𑀓𑀸𑀫𑀡𑁆𑀟𑀮𑀲𑀫𑀻𑀧𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺. 𑀦𑁂𑀯𑀸𑀲𑀺𑀓𑁄 𑀤𑀼𑀝𑁆𑀞𑀸𑀓𑀸𑀭𑁂𑀦 𑀖𑀝𑀺𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀅𑀦𑁆𑀢𑁄 𑀧𑀯𑀺𑀝𑁆𑀞𑁄 𑀣𑁂𑀭𑀁 𑀅𑀧𑀲𑁆𑀲𑀦𑁆𑀢𑁄, ‘‘𑀳𑁂𑀝𑁆𑀞𑀸𑀫𑀜𑁆𑀘𑀁 𑀧𑀯𑀺𑀝𑁆𑀞𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀑𑀮𑁄𑀓𑁂𑀢𑁆𑀯𑀸 𑀢𑀢𑁆𑀣𑀸𑀧𑀺 𑀅𑀧𑀲𑁆𑀲𑀦𑁆𑀢𑁄 𑀦𑀺𑀓𑁆𑀔𑀫𑀺𑀢𑀼𑀁 𑀆𑀭𑀪𑀺. 𑀣𑁂𑀭𑁄 𑀉𑀓𑁆𑀓𑀸𑀲𑀺. 𑀇𑀢𑀭𑁄 𑀉𑀤𑁆𑀥𑀁 𑀑𑀮𑁄𑀓𑁂𑀦𑁆𑀢𑁄 𑀤𑀺𑀲𑁆𑀯𑀸 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀏𑀯𑀫𑀸𑀳 𑁋 ‘‘𑀧𑀢𑀺𑀭𑀽𑀧𑀁 𑀢𑁂, 𑀆𑀯𑀼𑀲𑁄, 𑀧𑀁𑀲𑀼𑀓𑀽𑀮𑀺𑀓 𑀏𑀯𑀁 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑀲𑁆𑀲 𑀉𑀧𑀝𑁆𑀞𑀸𑀬𑀺𑀓𑀸𑀬 𑀲𑀤𑁆𑀥𑀺𑀁 𑀏𑀓𑀫𑀜𑁆𑀘𑁂 𑀦𑀺𑀲𑀻𑀤𑀺𑀢𑀼’’𑀦𑁆𑀢𑀺. 𑀧𑀩𑁆𑀩𑀚𑀺𑀢𑀸 𑀦𑀸𑀫, 𑀪𑀦𑁆𑀢𑁂, 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀦 𑀏𑀓𑀫𑀜𑁆𑀘𑁂 𑀦𑀺𑀲𑀻𑀤𑀦𑁆𑀢𑀺, 𑀢𑀼𑀫𑁆𑀳𑁂𑀳𑀺 𑀧𑀦 𑀤𑀼𑀤𑁆𑀤𑀺𑀝𑁆𑀞𑀫𑁂𑀢𑀦𑁆𑀢𑀺. 𑀏𑀯𑀁 𑀔𑀻𑀡𑀸𑀲𑀯𑀸 𑀧𑀭𑀸𑀦𑀼𑀤𑁆𑀤𑀬𑀸𑀬 𑀉𑀧𑀯𑀸𑀤𑀁 𑀭𑀓𑁆𑀔𑀦𑁆𑀢𑀺.

𑀔𑀬𑀸 𑀭𑀸𑀕𑀲𑁆𑀲𑀸𑀢𑀺 𑀭𑀸𑀕𑀲𑁆𑀲 𑀔𑀬𑁂𑀦𑁂𑀯. 𑀯𑀻𑀢𑀭𑀸𑀕𑀢𑁆𑀢𑀸 𑀓𑀸𑀫𑁂 𑀦 𑀧𑀝𑀺𑀲𑁂𑀯𑀢𑀺, 𑀦 𑀧𑀝𑀺𑀲𑀗𑁆𑀔𑀸𑀬 𑀯𑀸𑀭𑁂𑀢𑁆𑀯𑀸𑀢𑀺. 𑀢𑀜𑁆𑀘𑁂𑀢𑀺 𑀏𑀯𑀁 𑀢𑀣𑀸𑀕𑀢𑀲𑁆𑀲 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀜𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀞𑀺𑀢𑀦𑀺𑀲𑀺𑀦𑁆𑀦𑀓𑀸𑀮𑀸𑀤𑀻𑀲𑀼𑀧𑀺 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀅𑀮𑀗𑁆𑀓𑀢𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸𑀧𑀺 𑀇𑀢𑀺𑀧𑀺 𑀲𑀢𑁆𑀣𑀸 𑀯𑀻𑀢𑀭𑀸𑀕𑁄 𑀯𑀻𑀢𑀤𑁄𑀲𑁄 𑀯𑀻𑀢𑀫𑁄𑀳𑁄 𑀯𑀦𑁆𑀢𑀓𑀺𑀮𑁂𑀲𑁄 𑀧𑀳𑀻𑀦𑀫𑀮𑁄 𑀅𑀩𑁆𑀪𑀸 𑀫𑀼𑀢𑁆𑀢𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀲𑀼𑀧𑀭𑀺𑀲𑀼𑀤𑁆𑀥𑁄𑀢𑀺 𑀏𑀯𑀁 𑀢𑀣𑀸𑀕𑀢𑀲𑁆𑀲 𑀓𑀺𑀮𑁂𑀲𑀧𑁆𑀧𑀳𑀸𑀦𑁂 𑀯𑀡𑁆𑀡𑀁 𑀓𑀣𑀬𑀫𑀸𑀦𑀁 𑀢𑀁 𑀯𑀻𑀫𑀁𑀲𑀓𑀁 𑀪𑀺𑀓𑁆𑀔𑀼𑀁 𑀧𑀭𑁂 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑀘𑁂𑀢𑀺 𑀅𑀢𑁆𑀣𑁄.

𑀆𑀓𑀸𑀭𑀸𑀢𑀺 𑀓𑀸𑀭𑀡𑀸𑀦𑀺. 𑀅𑀦𑁆𑀯𑀬𑀸𑀢𑀺 𑀅𑀦𑀼𑀩𑀼𑀤𑁆𑀥𑀺𑀬𑁄. 𑀲𑀗𑁆𑀖𑁂 𑀯𑀸 𑀯𑀺𑀳𑀭𑀦𑁆𑀢𑁄𑀢𑀺 𑀅𑀧𑁆𑀧𑁂𑀓𑀤𑀸 𑀅𑀧𑀭𑀺𑀘𑁆𑀙𑀺𑀦𑁆𑀦𑀕𑀡𑀦𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 𑀯𑀺𑀳𑀭𑀦𑁆𑀢𑁄. 𑀏𑀓𑁄 𑀯𑀸 𑀯𑀺𑀳𑀭𑀦𑁆𑀢𑁄𑀢𑀺 𑀇𑀘𑁆𑀙𑀸𑀫𑀳𑀁, 𑀪𑀺𑀓𑁆𑀔𑀯𑁂, 𑀅𑀟𑁆𑀠𑀫𑀸𑀲𑀁 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀦𑁆𑀢𑀺, 𑀢𑁂𑀫𑀸𑀲𑀁 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀦𑁆𑀢𑀺 𑀏𑀯𑀁 𑀧𑀝𑀺𑀲𑀮𑁆𑀮𑀸𑀦𑁂 𑀘𑁂𑀯 𑀧𑀸𑀮𑀺𑀮𑁂𑀬𑁆𑀬𑀓𑀯𑀦𑀲𑀡𑁆𑀟𑁂 𑀘 𑀏𑀓𑀓𑁄 𑀯𑀺𑀳𑀭𑀦𑁆𑀢𑁄. 𑀲𑀼𑀕𑀢𑀸𑀢𑀺 𑀲𑀼𑀝𑁆𑀞𑀼𑀕𑀢𑀸 𑀲𑀼𑀧𑁆𑀧𑀝𑀺𑀧𑀦𑁆𑀦𑀸 𑀓𑀸𑀭𑀓𑀸 𑀬𑀼𑀢𑁆𑀢𑀧𑀬𑀼𑀢𑁆𑀢𑀸. 𑀏𑀯𑀭𑀽𑀧𑀸𑀧𑀺 𑀳𑀺 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀅𑀢𑁆𑀣𑀺. 𑀤𑀼𑀕𑁆𑀕𑀢𑀸𑀢𑀺 𑀤𑀼𑀝𑁆𑀞𑀼𑀕𑀢𑀸 𑀤𑀼𑀧𑁆𑀧𑀝𑀺𑀧𑀦𑁆𑀦𑀸 𑀓𑀸𑀬𑀤𑀴𑁆𑀳𑀺𑀩𑀳𑀼𑀮𑀸 𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀝𑁆𑀞𑀸𑀦𑀸. 𑀏𑀯𑀭𑀽𑀧𑀸𑀧𑀺 𑀏𑀓𑀘𑁆𑀘𑁂 𑀅𑀢𑁆𑀣𑀺. 𑀕𑀡𑀫𑀦𑀼𑀲𑀸𑀲𑀦𑁆𑀢𑀻𑀢𑀺 𑀕𑀡𑀩𑀦𑁆𑀥𑀦𑁂𑀦 𑀩𑀤𑁆𑀥𑀸 𑀕𑀡𑀸𑀭𑀸𑀫𑀸 𑀕𑀡𑀩𑀳𑀼𑀮𑀺𑀓𑀸 𑀳𑀼𑀢𑁆𑀯𑀸 𑀕𑀡𑀁 𑀧𑀭𑀺𑀳𑀭𑀦𑁆𑀢𑀺. 𑀏𑀯𑀭𑀽𑀧𑀸𑀧𑀺 𑀏𑀓𑀘𑁆𑀘𑁂 𑀅𑀢𑁆𑀣𑀺. 𑀢𑁂𑀲𑀁 𑀧𑀝𑀺𑀧𑀓𑁆𑀔𑀪𑀽𑀢𑀸 𑀕𑀡𑀢𑁄 𑀦𑀺𑀲𑁆𑀲𑀝𑀸 𑀯𑀺𑀲𑀁𑀲𑀝𑁆𑀞𑀸 𑀯𑀺𑀧𑁆𑀧𑀫𑀼𑀢𑁆𑀢𑀯𑀺𑀳𑀸𑀭𑀺𑀦𑁄𑀧𑀺 𑀅𑀢𑁆𑀣𑀺.

𑀆𑀫𑀺𑀲𑁂𑀲𑀼 𑀲𑀦𑁆𑀤𑀺𑀲𑁆𑀲𑀦𑁆𑀢𑀻𑀢𑀺 𑀆𑀫𑀺𑀲𑀕𑀺𑀤𑁆𑀥𑀸 𑀆𑀫𑀺𑀲𑀘𑀓𑁆𑀔𑀼𑀓𑀸 𑀘𑀢𑀼𑀧𑀘𑁆𑀘𑀬𑀆𑀫𑀺𑀲𑀢𑁆𑀣𑀫𑁂𑀯 𑀆𑀳𑀺𑀡𑁆𑀟𑀫𑀸𑀦𑀸 𑀆𑀫𑀺𑀲𑁂𑀲𑀼 𑀲𑀦𑁆𑀤𑀺𑀲𑁆𑀲𑀫𑀸𑀦𑀓𑀪𑀺𑀓𑁆𑀔𑀽𑀧𑀺 𑀅𑀢𑁆𑀣𑀺. 𑀆𑀫𑀺𑀲𑁂𑀦 𑀅𑀦𑀼𑀧𑀮𑀺𑀢𑁆𑀢𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀯𑀺𑀦𑀺𑀯𑀢𑁆𑀢𑀫𑀸𑀦𑀲𑀸 𑀅𑀩𑁆𑀪𑀸 𑀫𑀼𑀢𑁆𑀢𑀘𑀦𑁆𑀤𑀲𑀤𑀺𑀲𑀸 𑀳𑀼𑀢𑁆𑀯𑀸 𑀯𑀺𑀳𑀭𑀫𑀸𑀦𑀸𑀧𑀺 𑀅𑀢𑁆𑀣𑀺. 𑀦𑀸𑀬𑀫𑀸𑀬𑀲𑁆𑀫𑀸 𑀢𑀁 𑀢𑁂𑀦 𑀅𑀯𑀚𑀸𑀦𑀸𑀢𑀻𑀢𑀺 𑀅𑀬𑀁 𑀆𑀬𑀲𑁆𑀫𑀸 𑀲𑀢𑁆𑀣𑀸 𑀢𑀸𑀬 𑀢𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀢𑀁 𑀢𑀁 𑀧𑀼𑀕𑁆𑀕𑀮𑀁 𑀦𑀸𑀯𑀚𑀸𑀦𑀸𑀢𑀺, 𑀅𑀬𑀁 𑀧𑀝𑀺𑀧𑀦𑁆𑀦𑁄 𑀓𑀸𑀭𑀓𑁄, 𑀅𑀬𑀁 𑀕𑀡𑀢𑁄 𑀦𑀺𑀲𑁆𑀲𑀝𑁄 𑀯𑀺𑀲𑀁𑀲𑀝𑁆𑀞𑁄. 𑀅𑀬𑀁 𑀆𑀫𑀺𑀲𑁂𑀦 𑀅𑀦𑀼𑀧𑀮𑀺𑀢𑁆𑀢𑁄 𑀧𑀘𑁆𑀘𑀬𑁂𑀳𑀺 𑀯𑀺𑀦𑀺𑀯𑀢𑁆𑀢𑀫𑀸𑀦𑀲𑁄 𑀅𑀩𑁆𑀪𑀸 𑀫𑀼𑀢𑁆𑀢𑁄 𑀘𑀦𑁆𑀤𑀺𑀫𑀸 𑀯𑀺𑀬𑀸𑀢𑀺 𑀏𑀯𑀫𑀲𑁆𑀲 𑀕𑁂𑀳𑀲𑀺𑀢𑀯𑀲𑁂𑀦 𑀉𑀲𑁆𑀲𑀸𑀤𑀦𑀸𑀧𑀺 𑀦𑀢𑁆𑀣𑀺. 𑀅𑀬𑀁 𑀤𑀼𑀧𑁆𑀧𑀝𑀺𑀧𑀦𑁆𑀦𑁄 𑀅𑀓𑀸𑀭𑀓𑁄 𑀓𑀸𑀬𑀤𑀴𑁆𑀳𑀺𑀩𑀳𑀼𑀮𑁄 𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀝𑁆𑀞𑀸𑀦𑁄, 𑀅𑀬𑀁 𑀕𑀡𑀩𑀦𑁆𑀥𑀦𑀩𑀤𑁆𑀥𑁄, 𑀅𑀬𑀁 𑀆𑀫𑀺𑀲𑀕𑀺𑀤𑁆𑀥𑁄 𑀮𑁄𑀮𑁄 𑀆𑀫𑀺𑀲𑀘𑀓𑁆𑀔𑀼𑀓𑁄𑀢𑀺 𑀏𑀯𑀫𑀲𑁆𑀲 𑀕𑁂𑀳𑀲𑀺𑀢𑀯𑀲𑁂𑀦 𑀅𑀧𑀲𑀸𑀤𑀦𑀸𑀧𑀺 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀓𑀺𑀁 𑀓𑀣𑀺𑀢𑀁 𑀳𑁄𑀢𑀺? 𑀢𑀣𑀸𑀕𑀢𑀲𑁆𑀲 𑀲𑀢𑁆𑀢𑁂𑀲𑀼 𑀢𑀸𑀤𑀺𑀪𑀸𑀯𑁄 𑀓𑀣𑀺𑀢𑁄 𑀳𑁄𑀢𑀺. 𑀅𑀬𑀜𑁆𑀳𑀺 𑁋

‘‘𑀯𑀥𑀓𑀲𑁆𑀲 𑀤𑁂𑀯𑀤𑀢𑁆𑀢𑀲𑁆𑀲, 𑀘𑁄𑀭𑀲𑁆𑀲𑀗𑁆𑀕𑀼𑀮𑀺𑀫𑀸𑀮𑀺𑀦𑁄;

𑀥𑀦𑀧𑀸𑀮𑁂 𑀭𑀸𑀳𑀼𑀮𑁂 𑀘, 𑀲𑀩𑁆𑀩𑁂𑀲𑀁 𑀲𑀫𑀓𑁄 𑀫𑀼𑀦𑀻’’𑀢𑀺. (𑀫𑀺. 𑀧. 𑁬.𑁬.𑁫);

𑁪𑁮𑁯. 𑀢𑀢𑁆𑀭, 𑀪𑀺𑀓𑁆𑀔𑀯𑁂𑀢𑀺 𑀢𑁂𑀲𑀼 𑀤𑁆𑀯𑀻𑀲𑀼 𑀯𑀻𑀫𑀁𑀲𑀓𑁂𑀲𑀼. 𑀬𑁄, ‘‘𑀓𑁂 𑀧𑀦𑀸𑀬𑀲𑁆𑀫𑀢𑁄 𑀆𑀓𑀸𑀭𑀸’’𑀢𑀺 𑀧𑀼𑀘𑁆𑀙𑀸𑀬𑀁 𑀆𑀕𑀢𑁄 𑀕𑀡𑁆𑀞𑀺𑀯𑀻𑀫𑀁𑀲𑀓𑁄 𑀘, 𑀬𑁄 ‘‘𑀅𑀪𑀬𑀽𑀧𑀭𑀢𑁄 𑀅𑀬𑀫𑀸𑀬𑀲𑁆𑀫𑀸’’𑀢𑀺 𑀆𑀕𑀢𑁄 𑀫𑀽𑀮𑀯𑀻𑀫𑀁𑀲𑀓𑁄 𑀘. 𑀢𑁂𑀲𑀼 𑀫𑀽𑀮𑀯𑀻𑀫𑀁𑀲𑀓𑁂𑀦 𑀢𑀣𑀸𑀕𑀢𑁄𑀯 𑀉𑀢𑁆𑀢𑀭𑀺 𑀧𑀝𑀺𑀧𑀼𑀘𑁆𑀙𑀺𑀢𑀩𑁆𑀩𑁄. 𑀲𑁄 𑀳𑀺 𑀧𑀼𑀩𑁆𑀩𑁂 𑀧𑀭𑀲𑁆𑀲𑁂𑀯 𑀓𑀣𑀸𑀬 𑀦𑀺𑀝𑁆𑀞𑀗𑁆𑀕𑀢𑁄. 𑀧𑀭𑁄 𑀘 𑀦𑀸𑀫 𑀚𑀸𑀦𑀺𑀢𑁆𑀯𑀸𑀧𑀺 𑀓𑀣𑁂𑀬𑁆𑀬 𑀅𑀚𑀸𑀦𑀺𑀢𑁆𑀯𑀸𑀧𑀺. 𑀏𑀯𑀫𑀲𑁆𑀲 𑀓𑀣𑀸 𑀪𑀽𑀢𑀸𑀧𑀺 𑀳𑁄𑀢𑀺 𑀅𑀪𑀽𑀢𑀸𑀧𑀺, 𑀢𑀲𑁆𑀫𑀸 𑀧𑀭𑀲𑁆𑀲𑁂𑀯 𑀓𑀣𑀸𑀬 𑀦𑀺𑀝𑁆𑀞𑀁 𑀅𑀕𑀦𑁆𑀢𑁆𑀯𑀸 𑀢𑀢𑁄 𑀉𑀢𑁆𑀢𑀭𑀺 𑀢𑀣𑀸𑀕𑀢𑁄𑀯 𑀧𑀝𑀺𑀧𑀼𑀘𑁆𑀙𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑀩𑁆𑀬𑀸𑀓𑀭𑀫𑀸𑀦𑁄𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀢𑀣𑀸𑀕𑀢𑀲𑁆𑀲 𑀫𑀺𑀘𑁆𑀙𑀸𑀩𑁆𑀬𑀸𑀓𑀭𑀡𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀫𑁆𑀫𑀸 𑀫𑀺𑀘𑁆𑀙𑀸𑀢𑀺 𑀅𑀯𑀢𑁆𑀯𑀸 𑀩𑁆𑀬𑀸𑀓𑀭𑀫𑀸𑀦𑁄𑀢𑁆𑀯𑁂𑀯 𑀯𑀼𑀢𑁆𑀢𑀁. 𑀏𑀢𑀁 𑀧𑀣𑁄𑀳𑀫𑀲𑁆𑀫𑀺 𑀏𑀢𑀁 𑀕𑁄𑀘𑀭𑁄𑀢𑀺 𑀏𑀲 𑀫𑀬𑁆𑀳𑀁 𑀧𑀣𑁄 𑀏𑀲 𑀕𑁄𑀘𑀭𑁄𑀢𑀺 𑀅𑀢𑁆𑀣𑁄. ‘‘𑀏𑀢𑀸𑀧𑀸𑀣𑁄’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲𑀢𑁆𑀣𑁄 𑀫𑀬𑁆𑀳𑀁 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀁 𑀧𑀭𑀺𑀲𑀼𑀤𑁆𑀥𑀁, 𑀲𑁆𑀯𑀸𑀳𑀁 𑀢𑀲𑁆𑀲 𑀧𑀭𑀺𑀲𑀼𑀤𑁆𑀥𑀪𑀸𑀯𑁂𑀦 𑀯𑀻𑀫𑀁𑀲𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀜𑀸𑀡𑀫𑀼𑀔𑁂 𑀏𑀢𑀸𑀧𑀸𑀣𑁄, 𑀏𑀯𑀁 𑀆𑀧𑀸𑀣𑀁 𑀕𑀘𑁆𑀙𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑁄 𑀘 𑀢𑁂𑀦 𑀢𑀫𑁆𑀫𑀬𑁄𑀢𑀺 𑀢𑁂𑀦𑀧𑀺 𑀘𑀸𑀳𑀁 𑀧𑀭𑀺𑀲𑀼𑀤𑁆𑀥𑁂𑀦 𑀲𑀻𑀮𑁂𑀦 𑀦 𑀢𑀫𑁆𑀫𑀬𑁄, 𑀦 𑀲𑀢𑀡𑁆𑀳𑁄, 𑀧𑀭𑀺𑀲𑀼𑀤𑁆𑀥𑀲𑀻𑀮𑀢𑁆𑀢𑀸𑀯 𑀦𑀺𑀢𑁆𑀢𑀡𑁆𑀳𑁄𑀳𑀫𑀲𑁆𑀫𑀻𑀢𑀺 𑀤𑀻𑀧𑁂𑀢𑀺.

𑀉𑀢𑁆𑀢𑀭𑀼𑀢𑁆𑀢𑀭𑀺𑀁 𑀧𑀡𑀻𑀢𑀧𑀡𑀻𑀢𑀦𑁆𑀢𑀺 𑀉𑀢𑁆𑀢𑀭𑀼𑀢𑁆𑀢𑀭𑀺𑀁 𑀘𑁂𑀯 𑀧𑀡𑀻𑀢𑀢𑀭𑀜𑁆𑀘 𑀓𑀢𑁆𑀯𑀸 𑀤𑁂𑀲𑁂𑀢𑀺. 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑀦𑁆𑀢𑀺 𑀓𑀡𑁆𑀳𑀁 𑀘𑁂𑀯 𑀲𑀼𑀓𑁆𑀓𑀜𑁆𑀘, 𑀢𑀜𑁆𑀘 𑀔𑁄 𑀲𑀧𑁆𑀧𑀝𑀺𑀪𑀸𑀕𑀁 𑀲𑀯𑀺𑀧𑀓𑁆𑀔𑀁 𑀓𑀢𑁆𑀯𑀸, 𑀓𑀡𑁆𑀳𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀲𑀼𑀓𑁆𑀓𑀦𑁆𑀢𑀺 𑀲𑀼𑀓𑁆𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀓𑀡𑁆𑀳𑀦𑁆𑀢𑀺 𑀏𑀯𑀁 𑀲𑀧𑁆𑀧𑀝𑀺𑀪𑀸𑀕𑀁 𑀓𑀢𑁆𑀯𑀸 𑀓𑀡𑁆𑀳𑀲𑀼𑀓𑁆𑀓𑀁 𑀤𑁂𑀲𑁂𑀢𑀺. 𑀓𑀡𑁆𑀳𑀁 𑀤𑁂𑀲𑁂𑀦𑁆𑀢𑁄𑀧𑀺 𑀲𑀉𑀲𑁆𑀲𑀸𑀳𑀁 𑀲𑀯𑀺𑀧𑀸𑀓𑀁 𑀤𑁂𑀲𑁂𑀢𑀺, 𑀲𑀼𑀓𑁆𑀓𑀁 𑀤𑁂𑀲𑁂𑀦𑁆𑀢𑁄𑀧𑀺 𑀲𑀉𑀲𑁆𑀲𑀸𑀳𑀁 𑀲𑀯𑀺𑀧𑀸𑀓𑀁 𑀤𑁂𑀲𑁂𑀢𑀺. 𑀅𑀪𑀺𑀜𑁆𑀜𑀸𑀬 𑀇𑀥𑁂𑀓𑀘𑁆𑀘𑀁 𑀥𑀫𑁆𑀫𑀁 𑀥𑀫𑁆𑀫𑁂𑀲𑀼 𑀦𑀺𑀝𑁆𑀞𑀁 𑀕𑀘𑁆𑀙𑀢𑀻𑀢𑀺 𑀢𑀲𑁆𑀫𑀺𑀁 𑀤𑁂𑀲𑀺𑀢𑁂 𑀥𑀫𑁆𑀫𑁂 𑀏𑀓𑀘𑁆𑀘𑀁 𑀧𑀝𑀺𑀯𑁂𑀥𑀥𑀫𑁆𑀫𑀁 𑀅𑀪𑀺𑀜𑁆𑀜𑀸𑀬 𑀢𑁂𑀦 𑀧𑀝𑀺𑀯𑁂𑀥𑀥𑀫𑁆𑀫𑁂𑀦 𑀤𑁂𑀲𑀦𑀸𑀥𑀫𑁆𑀫𑁂 𑀦𑀺𑀝𑁆𑀞𑀁 𑀕𑀘𑁆𑀙𑀢𑀺. 𑀲𑀢𑁆𑀣𑀭𑀺 𑀧𑀲𑀻𑀤𑀢𑀻𑀢𑀺 𑀏𑀯𑀁 𑀥𑀫𑁆𑀫𑁂 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑁄 𑀪𑀕𑀯𑀸𑀢𑀺 𑀲𑀢𑁆𑀣𑀭𑀺 𑀧𑀲𑀻𑀤𑀢𑀺. 𑀢𑁂𑀦 𑀧𑀦 𑀪𑀕𑀯𑀢𑀸 𑀬𑁄 𑀥𑀫𑁆𑀫𑁄 𑀅𑀓𑁆𑀔𑀸𑀢𑁄, 𑀲𑁄𑀧𑀺 𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄 𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸. 𑀬𑁆𑀯𑀸𑀲𑁆𑀲 𑀢𑀁 𑀥𑀫𑁆𑀫𑀁 𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄, 𑀲𑁄𑀧𑀺 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀯𑀗𑁆𑀓𑀸𑀤𑀺𑀤𑁄𑀲𑀭𑀳𑀺𑀢𑀁 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀢𑁆𑀢𑀸𑀢𑀺 𑀏𑀯𑀁 𑀥𑀫𑁆𑀫𑁂 𑀲𑀗𑁆𑀖𑁂𑀧𑀺 𑀧𑀲𑀻𑀤𑀢𑀺. 𑀢𑀜𑁆𑀘𑁂𑀢𑀺 𑀢𑀁 𑀏𑀯𑀁 𑀧𑀲𑀦𑁆𑀦𑀁 𑀢𑀢𑁆𑀣 𑀢𑀢𑁆𑀣 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀯𑀡𑁆𑀡𑀁 𑀓𑀣𑁂𑀦𑁆𑀢𑀁 𑀪𑀺𑀓𑁆𑀔𑀼𑀁.

𑁪𑁯𑁦. 𑀇𑀫𑁂𑀳𑀺 𑀆𑀓𑀸𑀭𑁂𑀳𑀻𑀢𑀺 𑀇𑀫𑁂𑀳𑀺 𑀲𑀢𑁆𑀣𑀼𑀯𑀻𑀫𑀁𑀲𑀦𑀓𑀸𑀭𑀡𑁂𑀳𑀺. 𑀇𑀫𑁂𑀳𑀺 𑀧𑀤𑁂𑀳𑀻𑀢𑀺 𑀇𑀫𑁂𑀳𑀺 𑀅𑀓𑁆𑀔𑀭𑀲𑀫𑁆𑀧𑀺𑀡𑁆𑀟𑀦𑀧𑀤𑁂𑀳𑀺. 𑀇𑀫𑁂𑀳𑀺 𑀩𑁆𑀬𑀜𑁆𑀚𑀦𑁂𑀳𑀻𑀢𑀺 𑀇𑀫𑁂𑀳𑀺 𑀇𑀥 𑀯𑀼𑀢𑁆𑀢𑁂𑀳𑀺 𑀅𑀓𑁆𑀔𑀭𑁂𑀳𑀺. 𑀲𑀤𑁆𑀥𑀸 𑀦𑀺𑀯𑀺𑀝𑁆𑀞𑀸𑀢𑀺 𑀑𑀓𑀧𑁆𑀧𑀦𑀸 𑀧𑀢𑀺𑀝𑁆𑀞𑀺𑀢𑀸. 𑀫𑀽𑀮𑀚𑀸𑀢𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀯𑀲𑁂𑀦 𑀲𑀜𑁆𑀚𑀸𑀢𑀫𑀽𑀮𑀸. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀳𑀺 𑀲𑀤𑁆𑀥𑀸𑀬 𑀫𑀽𑀮𑀁 𑀦𑀸𑀫. 𑀆𑀓𑀸𑀭𑀯𑀢𑀻𑀢𑀺 𑀓𑀸𑀭𑀡𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀕𑀳𑀺𑀢𑀢𑁆𑀢𑀸 𑀲𑀓𑀸𑀭𑀡𑀸. 𑀤𑀲𑁆𑀲𑀦𑀫𑀽𑀮𑀺𑀓𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀫𑀽𑀮𑀺𑀓𑀸. 𑀲𑁄 𑀳𑀺 𑀤𑀲𑁆𑀲𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀤𑀴𑁆𑀳𑀸𑀢𑀺 𑀣𑀺𑀭𑀸. 𑀅𑀲𑀁𑀳𑀸𑀭𑀺𑀬𑀸𑀢𑀺 𑀳𑀭𑀺𑀢𑀼𑀁 𑀦 𑀲𑀓𑁆𑀓𑀸. 𑀲𑀫𑀡𑁂𑀦 𑀯𑀸𑀢𑀺 𑀲𑀫𑀺𑀢𑀧𑀸𑀧𑀲𑀫𑀡𑁂𑀦 𑀯𑀸. 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸𑀢𑀺 𑀩𑀸𑀳𑀺𑀢𑀧𑀸𑀧𑀩𑁆𑀭𑀸𑀳𑁆𑀫𑀡𑁂𑀦 𑀯𑀸. 𑀤𑁂𑀯𑁂𑀦 𑀯𑀸𑀢𑀺 𑀉𑀧𑀧𑀢𑁆𑀢𑀺𑀤𑁂𑀯𑁂𑀦 𑀯𑀸. 𑀫𑀸𑀭𑁂𑀦 𑀯𑀸𑀢𑀺 𑀯𑀲𑀯𑀢𑁆𑀢𑀺𑀫𑀸𑀭𑁂𑀦 𑀯𑀸, 𑀲𑁄𑀢𑀸𑀧𑀦𑁆𑀦𑀲𑁆𑀲 𑀳𑀺 𑀯𑀲𑀯𑀢𑁆𑀢𑀺𑀫𑀸𑀭𑁂𑀦𑀸𑀧𑀺 𑀲𑀤𑁆𑀥𑀸 𑀅𑀲𑀁𑀳𑀸𑀭𑀺𑀬𑀸 𑀳𑁄𑀢𑀺 𑀲𑀽𑀭𑀫𑁆𑀩𑀝𑁆𑀞𑀲𑁆𑀲 𑀯𑀺𑀬.

𑀲𑁄 𑀓𑀺𑀭 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀕𑁂𑀳𑀁 𑀆𑀕𑀢𑁄. 𑀅𑀣 𑀫𑀸𑀭𑁄 𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀧𑁆𑀧𑀝𑀺𑀫𑀡𑁆𑀟𑀺𑀢𑀁 𑀩𑀼𑀤𑁆𑀥𑀭𑀽𑀧𑀁 𑀫𑀸𑀧𑁂𑀢𑁆𑀯𑀸 𑀢𑀲𑁆𑀲 𑀖𑀭𑀤𑁆𑀯𑀸𑀭𑁂 𑀞𑀢𑁆𑀯𑀸 𑁋 ‘‘𑀲𑀢𑁆𑀣𑀸 𑀆𑀕𑀢𑁄’’𑀢𑀺 𑀲𑀸𑀲𑀦𑀁 𑀧𑀳𑀺𑀡𑀺. 𑀲𑀽𑀭𑁄 𑀘𑀺𑀦𑁆𑀢𑁂𑀲𑀺, ‘‘𑀅𑀳𑀁 𑀇𑀤𑀸𑀦𑁂𑀯 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀆𑀕𑀢𑁄, 𑀓𑀺𑀁 𑀦𑀼 𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀢𑁆𑀣𑀼𑀲𑀜𑁆𑀜𑀸𑀬 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀫𑀸𑀭𑁄 𑀆𑀳 𑁋 ‘‘𑀬𑀁 𑀢𑁂 𑀫𑀬𑀸, 𑀲𑀽𑀭𑀫𑁆𑀩𑀝𑁆𑀞, 𑀭𑀽𑀧𑀁 𑀅𑀦𑀺𑀘𑁆𑀘𑀁…𑀧𑁂… 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀦𑁆𑀢𑀺 𑀓𑀣𑀺𑀢𑀁, 𑀢𑀁 𑀅𑀦𑀼𑀧𑀥𑀸𑀭𑁂𑀢𑁆𑀯𑀸𑀯 𑀲𑀳𑀲𑀸 𑀫𑀬𑀸 𑀏𑀯𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀢𑁆𑀯𑀁 𑀭𑀽𑀧𑀁 𑀦𑀺𑀘𑁆𑀘𑀁…𑀧𑁂… 𑀯𑀺𑀜𑁆𑀜𑀸𑀡𑀁 𑀦𑀺𑀘𑁆𑀘𑀦𑁆𑀢𑀺 𑀕𑀡𑁆𑀳𑀸𑀳𑀻’’𑀢𑀺. 𑀲𑀽𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀬𑀁 𑀩𑀼𑀤𑁆𑀥𑀸 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀅𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀓𑀺𑀜𑁆𑀘𑀺 𑀓𑀣𑁂𑀬𑁆𑀬𑀼𑀁, 𑀅𑀤𑁆𑀥𑀸 𑀅𑀬𑀁 𑀫𑀬𑁆𑀳𑀁 𑀯𑀺𑀩𑀸𑀥𑀦𑀢𑁆𑀣𑀁 𑀫𑀸𑀭𑁄 𑀆𑀕𑀢𑁄’’𑀢𑀺. 𑀢𑀢𑁄 𑀦𑀁 𑀢𑁆𑀯𑀁 𑀫𑀸𑀭𑁄𑀢𑀺 𑀆𑀳. 𑀲𑁄 𑀫𑀼𑀲𑀸𑀯𑀸𑀤𑀁 𑀓𑀸𑀢𑀼𑀁 𑀦𑀸𑀲𑀓𑁆𑀔𑀺, 𑀆𑀫 𑀫𑀸𑀭𑁄𑀲𑁆𑀫𑀻𑀢𑀺 𑀧𑀝𑀺𑀚𑀸𑀦𑀺. 𑀓𑀲𑁆𑀫𑀸 𑀆𑀕𑀢𑁄𑀲𑀻𑀢𑀺 𑀯𑀼𑀢𑁆𑀢𑁂 𑀢𑀯 𑀲𑀤𑁆𑀥𑀸𑀘𑀸𑀮𑀦𑀢𑁆𑀣𑀦𑁆𑀢𑀺 𑀆𑀳. 𑀓𑀡𑁆𑀳 𑀧𑀸𑀧𑀺𑀫, 𑀢𑁆𑀯𑀁 𑀢𑀸𑀯 𑀏𑀓𑀓𑁄 𑀢𑀺𑀝𑁆𑀞, 𑀢𑀸𑀤𑀺𑀲𑀸𑀦𑀁 𑀫𑀸𑀭𑀸𑀦𑀁 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀫𑀫 𑀲𑀤𑁆𑀥𑀁 𑀘𑀸𑀮𑁂𑀢𑀼𑀁 𑀅𑀲𑀫𑀢𑁆𑀣𑀁, 𑀫𑀕𑁆𑀕𑁂𑀦 𑀆𑀕𑀢𑀸 𑀲𑀤𑁆𑀥𑀸 𑀦𑀸𑀫 𑀲𑀺𑀮𑀸𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑀲𑀺𑀦𑁂𑀭𑀼 𑀯𑀺𑀬 𑀅𑀘𑀮𑀸 𑀳𑁄𑀢𑀺, 𑀓𑀺𑀁 𑀢𑁆𑀯𑀁 𑀏𑀢𑁆𑀣𑀸𑀢𑀺 𑀅𑀘𑁆𑀙𑀭𑀁 𑀧𑀳𑀭𑀺. 𑀲𑁄 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀢𑁆𑀣𑁂𑀯𑀦𑁆𑀢𑀭𑀥𑀸𑀬𑀺. 𑀩𑁆𑀭𑀳𑁆𑀫𑀼𑀦𑀸 𑀯𑀸𑀢𑀺 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀻𑀲𑀼 𑀅𑀜𑁆𑀜𑀢𑀭𑀩𑁆𑀭𑀳𑁆𑀫𑀼𑀦𑀸 𑀯𑀸. 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀦𑁆𑀢𑀺 𑀏𑀢𑁂 𑀲𑀫𑀡𑀸𑀤𑀬𑁄 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀦𑀧𑀺 𑀓𑁂𑀦𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁 𑀳𑀭𑀺𑀢𑀼𑀁 𑀦 𑀲𑀓𑁆𑀓𑀸. 𑀥𑀫𑁆𑀫𑀲𑀫𑀦𑁆𑀦𑁂𑀲𑀦𑀸𑀢𑀺 𑀲𑀪𑀸𑀯𑀲𑀫𑀦𑁆𑀦𑁂𑀲𑀦𑀸. 𑀥𑀫𑁆𑀫𑀢𑀸𑀲𑀼𑀲𑀫𑀦𑁆𑀦𑀺𑀝𑁆𑀞𑁄𑀢𑀺 𑀥𑀫𑁆𑀫𑀢𑀸𑀬 𑀲𑀼𑀲𑀫𑀦𑁆𑀦𑀺𑀝𑁆𑀞𑁄, 𑀲𑀪𑀸𑀯𑁂𑀦𑁂𑀯 𑀲𑀼𑀝𑁆𑀞𑀼 𑀲𑀫𑀦𑁆𑀦𑁂𑀲𑀺𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀯𑀻𑀫𑀁𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀓𑁄𑀲𑀫𑁆𑀩𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁯𑁧. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀓𑁄𑀲𑀫𑁆𑀩𑀺𑀬𑀲𑀼𑀢𑁆𑀢𑀁. 𑀢𑀢𑁆𑀣 𑀓𑁄𑀲𑀫𑁆𑀩𑀺𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀢𑀲𑁆𑀲 𑀓𑀺𑀭 𑀦𑀕𑀭𑀲𑁆𑀲 𑀆𑀭𑀸𑀫𑀧𑁄𑀓𑁆𑀔𑀭𑀡𑀻𑀆𑀤𑀻𑀲𑀼 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀓𑁄𑀲𑀫𑁆𑀩𑀭𑀼𑀓𑁆𑀔𑀸𑀯 𑀉𑀲𑁆𑀲𑀦𑁆𑀦𑀸 𑀅𑀳𑁂𑀲𑀼𑀁, 𑀢𑀲𑁆𑀫𑀸 𑀓𑁄𑀲𑀫𑁆𑀩𑀻𑀢𑀺 𑀲𑀗𑁆𑀔𑀁 𑀅𑀕𑀫𑀸𑀲𑀺. 𑀓𑀼𑀲𑀫𑁆𑀩𑀲𑁆𑀲 𑀦𑀸𑀫 𑀇𑀲𑀺𑀦𑁄 𑀅𑀲𑁆𑀲𑀫𑀢𑁄 𑀅𑀯𑀺𑀤𑀽𑀭𑁂 𑀫𑀸𑀧𑀺𑀢𑀢𑁆𑀢𑀸𑀢𑀺𑀧𑀺 𑀏𑀓𑁂. 𑀖𑁄𑀲𑀺𑀢𑀸𑀭𑀸𑀫𑁂𑀢𑀺 𑀖𑁄𑀲𑀺𑀢𑀲𑁂𑀝𑁆𑀞𑀺𑀦𑀸 𑀓𑀸𑀭𑀺𑀢𑁂 𑀆𑀭𑀸𑀫𑁂.

𑀧𑀼𑀩𑁆𑀩𑁂 𑀓𑀺𑀭 𑀅𑀤𑁆𑀤𑀺𑀮𑀭𑀝𑁆𑀞𑀁 𑀦𑀸𑀫 𑀅𑀳𑁄𑀲𑀺. 𑀢𑀢𑁄 𑀓𑁄𑀢𑀽𑀳𑀮𑀓𑁄 𑀦𑀸𑀫 𑀤𑀮𑀺𑀤𑁆𑀤𑁄 𑀙𑀸𑀢𑀓𑀪𑀬𑁂𑀦 𑀲𑀧𑀼𑀢𑁆𑀢𑀤𑀸𑀭𑁄 𑀓𑁂𑀤𑀸𑀭𑀧𑀭𑀺𑀘𑁆𑀙𑀺𑀦𑁆𑀦𑀁 𑀲𑀼𑀪𑀺𑀓𑁆𑀔𑀁 𑀭𑀝𑁆𑀞𑀁 𑀕𑀘𑁆𑀙𑀦𑁆𑀢𑁄 𑀧𑀼𑀢𑁆𑀢𑀁 𑀯𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀙𑀟𑁆𑀟𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀫𑀸𑀢𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀕𑀢𑀸. 𑀢𑁂 𑀏𑀓𑀁 𑀕𑁄𑀧𑀸𑀮𑀓𑀕𑀸𑀫𑀓𑀁 𑀧𑀯𑀺𑀲𑀺𑀁𑀲𑀼, 𑀕𑁄𑀧𑀸𑀮𑀓𑀸𑀦𑀜𑁆𑀘 𑀢𑀤𑀸 𑀧𑀳𑀢𑀧𑀸𑀬𑀲𑁄 𑀧𑀝𑀺𑀬𑀢𑁆𑀢𑁄 𑀳𑁄𑀢𑀺, 𑀢𑀢𑁄 𑀧𑀸𑀬𑀲𑀁 𑀮𑀪𑀺𑀢𑁆𑀯𑀸 𑀪𑀼𑀜𑁆𑀚𑀺𑀁𑀲𑀼. 𑀅𑀣 𑀲𑁄 𑀧𑀼𑀭𑀺𑀲𑁄 𑀧𑀳𑀽𑀢𑀧𑀸𑀬𑀲𑀁 𑀪𑀼𑀜𑁆𑀚𑀺𑀢𑁆𑀯𑀸 𑀚𑀺𑀭𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀭𑀢𑁆𑀢𑀺𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀲𑀼𑀦𑀔𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀓𑀼𑀓𑁆𑀓𑀼𑀭𑁄 𑀚𑀸𑀢𑁄. 𑀲𑁄 𑀕𑁄𑀧𑀸𑀮𑀓𑀲𑁆𑀲 𑀧𑀺𑀬𑁄 𑀅𑀳𑁄𑀲𑀺 𑀫𑀦𑀸𑀧𑁄, 𑀕𑁄𑀧𑀸𑀮𑀓𑁄 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀉𑀧𑀝𑁆𑀞𑀸𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄𑀧𑀺 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀓𑀼𑀓𑁆𑀓𑀼𑀭𑀲𑁆𑀲 𑀏𑀓𑀁 𑀧𑀺𑀡𑁆𑀟𑀁 𑀤𑁂𑀢𑀺. 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀕𑁄𑀧𑀸𑀮𑀓𑁂𑀦 𑀲𑀤𑁆𑀥𑀺𑀁 𑀧𑀡𑁆𑀡𑀲𑀸𑀮𑀫𑁆𑀧𑀺 𑀕𑀘𑁆𑀙𑀢𑀺.

𑀲𑁄 𑀕𑁄𑀧𑀸𑀮𑀓𑁂 𑀅𑀲𑀦𑁆𑀦𑀺𑀳𑀺𑀢𑁂 𑀪𑀢𑁆𑀢𑀯𑁂𑀮𑀸𑀬 𑀲𑀬𑀫𑁂𑀯 𑀕𑀦𑁆𑀢𑁆𑀯𑀸 𑀓𑀸𑀮𑀸𑀭𑁄𑀘𑀦𑀢𑁆𑀣𑀁 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀪𑀼𑀲𑁆𑀲𑀢𑀺, 𑀅𑀦𑁆𑀢𑀭𑀸𑀫𑀕𑁆𑀕𑁂𑀧𑀺 𑀘𑀡𑁆𑀟𑀫𑀺𑀕𑁂 𑀤𑀺𑀲𑁆𑀯𑀸 𑀪𑀼𑀲𑁆𑀲𑀺𑀢𑁆𑀯𑀸 𑀧𑀮𑀸𑀧𑁂𑀢𑀺. 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀫𑀼𑀤𑀼𑀓𑁂𑀦 𑀘𑀺𑀢𑁆𑀢𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁆𑀭𑀲𑁆𑀲 𑀖𑁄𑀲𑀓𑀤𑁂𑀯𑀧𑀼𑀢𑁆𑀢𑁄𑀢𑁆𑀯𑁂𑀯 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀓𑁄𑀲𑀫𑁆𑀩𑀺𑀬𑀁 𑀏𑀓𑀲𑁆𑀫𑀺𑀁 𑀓𑀼𑀮𑀖𑀭𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀁 𑀅𑀧𑀼𑀢𑁆𑀢𑀓𑁄 𑀲𑁂𑀝𑁆𑀞𑀺 𑀢𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀥𑀦𑀁 𑀤𑀢𑁆𑀯𑀸 𑀧𑀼𑀢𑁆𑀢𑀁 𑀓𑀢𑁆𑀯𑀸 𑀅𑀕𑁆𑀕𑀳𑁂𑀲𑀺. 𑀅𑀣 𑀲𑁄 𑀅𑀢𑁆𑀢𑀦𑁄 𑀧𑀼𑀢𑁆𑀢𑁂 𑀚𑀸𑀢𑁂 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀫𑀸𑀭𑀸𑀧𑁂𑀢𑀼𑀁 𑀉𑀧𑀓𑁆𑀓𑀫𑀺. 𑀲𑁄 𑀧𑀼𑀜𑁆𑀜𑀯𑀦𑁆𑀢𑀢𑀸𑀬 𑀲𑀢𑁆𑀢𑀲𑀼𑀧𑀺 𑀞𑀸𑀦𑁂𑀲𑀼 𑀫𑀭𑀡𑀁 𑀅𑀧𑁆𑀧𑀢𑁆𑀯𑀸 𑀅𑀯𑀲𑀸𑀦𑁂 𑀏𑀓𑀸𑀬 𑀲𑁂𑀝𑁆𑀞𑀺𑀥𑀻𑀢𑀸𑀬 𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀮𑀤𑁆𑀥𑀚𑀻𑀯𑀺𑀓𑁄 𑀅𑀧𑀭𑀪𑀸𑀕𑁂 𑀧𑀺𑀢𑀼𑀅𑀘𑁆𑀘𑀬𑁂𑀦 𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀧𑀢𑁆𑀯𑀸 𑀖𑁄𑀲𑀺𑀢𑀲𑁂𑀝𑁆𑀞𑀺 𑀦𑀸𑀫 𑀚𑀸𑀢𑁄. 𑀅𑀜𑁆𑀜𑁂𑀧𑀺 𑀓𑁄𑀲𑀫𑁆𑀩𑀺𑀬𑀁 𑀓𑀼𑀓𑁆𑀓𑀼𑀝𑀲𑁂𑀝𑁆𑀞𑀺 𑀧𑀸𑀯𑀸𑀭𑀺𑀓𑀲𑁂𑀝𑁆𑀞𑀻𑀢𑀺 𑀤𑁆𑀯𑁂 𑀲𑁂𑀝𑁆𑀞𑀺𑀦𑁄 𑀲𑀦𑁆𑀢𑀺. 𑀇𑀫𑁂𑀳𑀺 𑀲𑀤𑁆𑀥𑀺𑀁 𑀢𑀬𑁄 𑀅𑀳𑁂𑀲𑀼𑀁.

𑀢𑁂𑀦 𑀘 𑀲𑀫𑀬𑁂𑀦 𑀢𑁂𑀲𑀁 𑀲𑀳𑀸𑀬𑀓𑀸𑀦𑀁 𑀲𑁂𑀝𑁆𑀞𑀻𑀦𑀁 𑀓𑀼𑀮𑀽𑀧𑀓𑀸 𑀧𑀜𑁆𑀘𑀲𑀢𑀸 𑀇𑀲𑀬𑁄 𑀧𑀩𑁆𑀩𑀢𑀧𑀸𑀤𑁂 𑀯𑀲𑀺𑀁𑀲𑀼. 𑀢𑁂 𑀓𑀸𑀮𑁂𑀦 𑀓𑀸𑀮𑀁 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀫𑀦𑀼𑀲𑁆𑀲𑀧𑀣𑀁 𑀆𑀕𑀘𑁆𑀙𑀦𑁆𑀢𑀺. 𑀅𑀣𑁂𑀓𑀲𑁆𑀫𑀺𑀁 𑀯𑀸𑀭𑁂 𑀕𑀺𑀫𑁆𑀳𑀲𑀫𑀬𑁂 𑀫𑀦𑀼𑀲𑁆𑀲𑀧𑀣𑀁 𑀆𑀕𑀘𑁆𑀙𑀦𑁆𑀢𑀸 𑀦𑀺𑀭𑀼𑀤𑀓𑀫𑀳𑀸𑀓𑀦𑁆𑀢𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀓𑀦𑁆𑀢𑀸𑀭𑀧𑀭𑀺𑀬𑁄𑀲𑀸𑀦𑁂 𑀫𑀳𑀦𑁆𑀢𑀁 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀬𑀸𑀤𑀺𑀲𑁄 𑀅𑀬𑀁 𑀭𑀼𑀓𑁆𑀔𑁄, 𑀅𑀤𑁆𑀥𑀸 𑀏𑀢𑁆𑀣 𑀫𑀳𑁂𑀲𑀓𑁆𑀔𑀸𑀬 𑀤𑁂𑀯𑀢𑀸𑀬 𑀪𑀯𑀺𑀢𑀩𑁆𑀩𑀁, 𑀲𑀸𑀥𑀼 𑀯𑀢𑀲𑁆𑀲, 𑀲𑀘𑁂 𑀦𑁄 𑀧𑀸𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀤𑀤𑁂𑀬𑁆𑀬𑀸’’𑀢𑀺. 𑀤𑁂𑀯𑀢𑀸 𑀇𑀲𑀻𑀦𑀁 𑀅𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 𑀇𑀫𑁂𑀲𑀁 𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀯𑀺𑀝𑀧𑀦𑁆𑀢𑀭𑀢𑁄 𑀦𑀗𑁆𑀕𑀮𑀲𑀻𑀲𑀫𑀢𑁆𑀢𑀁 𑀉𑀤𑀓𑀥𑀸𑀭𑀁 𑀧𑀯𑀢𑁆𑀢𑁂𑀲𑀺. 𑀇𑀲𑀺𑀕𑀡𑁄 𑀭𑀚𑀢𑀓𑁆𑀔𑀦𑁆𑀥𑀲𑀤𑀺𑀲𑀁 𑀉𑀤𑀓𑀯𑀝𑁆𑀝𑀺𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀪𑀸𑀚𑀦𑁂𑀳𑀺 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑁄𑀕𑀁 𑀓𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀤𑁂𑀯𑀢𑀸𑀬 𑀅𑀫𑁆𑀳𑀸𑀓𑀁 𑀧𑀭𑀺𑀪𑁄𑀕𑀉𑀤𑀓𑀁 𑀤𑀺𑀦𑁆𑀦𑀁, 𑀇𑀤𑀁 𑀧𑀦 𑀅𑀕𑀸𑀫𑀓𑀁 𑀫𑀳𑀸𑀅𑀭𑀜𑁆𑀜𑀁, 𑀲𑀸𑀥𑀼 𑀯𑀢𑀲𑁆𑀲, 𑀲𑀘𑁂 𑀦𑁄 𑀆𑀳𑀸𑀭𑀫𑁆𑀧𑀺 𑀤𑀤𑁂𑀬𑁆𑀬𑀸’’𑀢𑀺. 𑀤𑁂𑀯𑀢𑀸 𑀇𑀲𑀻𑀦𑀁 𑀉𑀧𑀲𑀁𑀓𑀧𑁆𑀧𑀦𑀯𑀲𑁂𑀦 𑀤𑀺𑀩𑁆𑀩𑀸𑀦𑀺 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀦𑀺 𑀤𑀢𑁆𑀯𑀸 𑀲𑀦𑁆𑀢𑀧𑁆𑀧𑁂𑀲𑀺. 𑀇𑀲𑀬𑁄 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀤𑁂𑀯𑀢𑀸𑀬 𑀅𑀫𑁆𑀳𑀸𑀓𑀁 𑀧𑀭𑀺𑀪𑁄𑀕𑀉𑀤𑀓𑀫𑁆𑀧𑀺 𑀪𑁄𑀚𑀦𑀫𑁆𑀧𑀺 𑀲𑀩𑁆𑀩𑀁 𑀤𑀺𑀦𑁆𑀦𑀁, 𑀲𑀸𑀥𑀼 𑀯𑀢𑀲𑁆𑀲, 𑀲𑀘𑁂 𑀦𑁄 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀬𑁆𑀬𑀸’’𑀢𑀺.

𑀤𑁂𑀯𑀢𑀸 𑀢𑁂𑀲𑀁 𑀅𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 𑀉𑀧𑀟𑁆𑀠𑀓𑀸𑀬𑀁 𑀤𑀲𑁆𑀲𑁂𑀲𑀺. 𑀢𑁂 𑀆𑀳𑀁𑀲𑀼 𑁋 ‘‘𑀤𑁂𑀯𑀢𑁂, 𑀫𑀳𑀢𑀻 𑀢𑁂 𑀲𑀫𑁆𑀧𑀢𑁆𑀢𑀺, 𑀓𑀺𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀇𑀫𑀁 𑀲𑀫𑁆𑀧𑀢𑁆𑀢𑀺𑀁 𑀅𑀥𑀺𑀕𑀢𑀸𑀲𑀻’’𑀢𑀺? 𑀪𑀦𑁆𑀢𑁂, 𑀦𑀸𑀢𑀺𑀫𑀳𑀦𑁆𑀢𑀁 𑀧𑀭𑀺𑀢𑁆𑀢𑀓𑀁 𑀓𑀫𑁆𑀫𑀁 𑀓𑀢𑁆𑀯𑀸𑀢𑀺. 𑀉𑀧𑀟𑁆𑀠𑀉𑀧𑁄𑀲𑀣𑀓𑀫𑁆𑀫𑀁 𑀦𑀺𑀲𑁆𑀲𑀸𑀬 𑀳𑀺 𑀤𑁂𑀯𑀢𑀸𑀬 𑀲𑀸 𑀲𑀫𑁆𑀧𑀢𑁆𑀢𑀺 𑀮𑀤𑁆𑀥𑀸.

𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀓𑀺𑀭 𑀕𑁂𑀳𑁂 𑀅𑀬𑀁 𑀤𑁂𑀯𑀧𑀼𑀢𑁆𑀢𑁄 𑀓𑀫𑁆𑀫𑀓𑀸𑀭𑁄 𑀅𑀳𑁄𑀲𑀺. 𑀲𑁂𑀝𑁆𑀞𑀺𑀲𑁆𑀲 𑀳𑀺 𑀕𑁂𑀳𑁂 𑀉𑀧𑁄𑀲𑀣𑀤𑀺𑀯𑀲𑁂𑀲𑀼 𑀅𑀦𑁆𑀢𑀫𑀲𑁄 𑀤𑀸𑀲𑀓𑀫𑁆𑀫𑀓𑀸𑀭𑁂 𑀉𑀧𑀸𑀤𑀸𑀬 𑀲𑀩𑁆𑀩𑁄 𑀚𑀦𑁄 𑀉𑀧𑁄𑀲𑀣𑀺𑀓𑁄 𑀳𑁄𑀢𑀺. 𑀏𑀓𑀤𑀺𑀯𑀲𑀁 𑀅𑀬𑀁 𑀓𑀫𑁆𑀫𑀓𑀸𑀭𑁄 𑀏𑀓𑀓𑁄𑀯 𑀧𑀸𑀢𑁄 𑀉𑀝𑁆𑀞𑀸𑀬 𑀓𑀫𑁆𑀫𑀦𑁆𑀢𑀁 𑀕𑀢𑁄. 𑀫𑀳𑀸𑀲𑁂𑀝𑁆𑀞𑀺 𑀦𑀺𑀯𑀸𑀧𑀁 𑀮𑀪𑀦𑀫𑀦𑀼𑀲𑁆𑀲𑁂 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀏𑀢𑀲𑁆𑀲𑁂𑀯𑁂𑀓𑀲𑁆𑀲 𑀅𑀭𑀜𑁆𑀜𑀁 𑀕𑀢𑀪𑀸𑀯𑀁 𑀜𑀢𑁆𑀯𑀸 𑀅𑀲𑁆𑀲 𑀲𑀸𑀬𑀫𑀸𑀲𑀢𑁆𑀣𑀸𑀬 𑀦𑀺𑀯𑀸𑀧𑀁 𑀅𑀤𑀸𑀲𑀺. 𑀪𑀢𑁆𑀢𑀓𑀸𑀭𑀺𑀓𑀸 𑀤𑀸𑀲𑀻 𑀏𑀓𑀲𑁆𑀲𑁂𑀯 𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀅𑀭𑀜𑁆𑀜𑀢𑁄 𑀆𑀕𑀢𑀲𑁆𑀲 𑀪𑀢𑁆𑀢𑀁 𑀯𑀟𑁆𑀠𑁂𑀢𑁆𑀯𑀸 𑀅𑀤𑀸𑀲𑀺, 𑀓𑀫𑁆𑀫𑀓𑀸𑀭𑁄 𑀆𑀳 𑁋 ‘‘𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀕𑁂𑀳𑀁 𑀏𑀓𑀲𑀤𑁆𑀤𑀁 𑀅𑀳𑁄𑀲𑀺, 𑀅𑀚𑁆𑀚 𑀅𑀢𑀺𑀯𑀺𑀬 𑀲𑀦𑁆𑀦𑀺𑀲𑀺𑀦𑁆𑀦𑀁, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺? 𑀢𑀲𑁆𑀲 𑀲𑀸 𑀆𑀘𑀺𑀓𑁆𑀔𑀺 𑁋 ‘‘𑀅𑀚𑁆𑀚 𑀇𑀫𑀲𑁆𑀫𑀺𑀁 𑀕𑁂𑀳𑁂 𑀲𑀩𑁆𑀩𑁂 𑀫𑀦𑀼𑀲𑁆𑀲𑀸 𑀉𑀧𑁄𑀲𑀣𑀺𑀓𑀸, 𑀫𑀳𑀸𑀲𑁂𑀝𑁆𑀞𑀺 𑀢𑀼𑀬𑁆𑀳𑁂𑀯𑁂𑀓𑀲𑁆𑀲 𑀦𑀺𑀯𑀸𑀧𑀁 𑀅𑀤𑀸𑀲𑀻’’𑀢𑀺. 𑀏𑀯𑀁 𑀅𑀫𑁆𑀫𑀸𑀢𑀺? 𑀆𑀫 𑀲𑀸𑀫𑀻𑀢𑀺. 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀉𑀧𑁄𑀲𑀣𑀁 𑀲𑀫𑀸𑀤𑀺𑀦𑁆𑀦𑀲𑁆𑀲 𑀉𑀧𑁄𑀲𑀣𑀓𑀫𑁆𑀫𑀁 𑀳𑁄𑀢𑀺 𑀦 𑀳𑁄𑀢𑀻𑀢𑀺 𑀫𑀳𑀸𑀲𑁂𑀝𑁆𑀞𑀺𑀁 𑀧𑀼𑀘𑁆𑀙 𑀅𑀫𑁆𑀫𑀸𑀢𑀺? 𑀢𑀸𑀬 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺𑀢𑁄 𑀫𑀳𑀸𑀲𑁂𑀝𑁆𑀞𑀺 𑀆𑀳 𑁋 ‘‘𑀲𑀓𑀮𑀉𑀧𑁄𑀲𑀣𑀓𑀫𑁆𑀫𑀁 𑀦 𑀳𑁄𑀢𑀺, 𑀉𑀧𑀟𑁆𑀠𑀓𑀫𑁆𑀫𑀁 𑀧𑀦 𑀳𑁄𑀢𑀺, 𑀉𑀧𑁄𑀲𑀣𑀺𑀓𑁄 𑀳𑁄𑀢𑀽’’𑀢𑀺. 𑀓𑀫𑁆𑀫𑀓𑀸𑀭𑁄 𑀪𑀢𑁆𑀢𑀁 𑀅𑀪𑀼𑀜𑁆𑀚𑀺𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀉𑀧𑁄𑀲𑀣𑀺𑀓𑁄 𑀳𑀼𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀢𑀲𑁆𑀲 𑀆𑀳𑀸𑀭𑀧𑀭𑀺𑀓𑁆𑀔𑀻𑀡𑀓𑀸𑀬𑀲𑁆𑀲 𑀭𑀢𑁆𑀢𑀺𑀁 𑀯𑀸𑀢𑁄 𑀓𑀼𑀧𑁆𑀧𑀺. 𑀲𑁄 𑀧𑀘𑁆𑀘𑀽𑀲𑀲𑀫𑀬𑁂 𑀓𑀸𑀮𑀁 𑀓𑀢𑁆𑀯𑀸 𑀉𑀧𑀟𑁆𑀠𑀉𑀧𑁄𑀲𑀣𑀓𑀫𑁆𑀫𑀦𑀺𑀲𑁆𑀲𑀦𑁆𑀤𑁂𑀦 𑀫𑀳𑀸𑀯𑀝𑁆𑀝𑀦𑀺𑀅𑀝𑀯𑀺𑀬𑀁 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑁂 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀢𑀁 𑀧𑀯𑀢𑁆𑀢𑀺𑀁 𑀇𑀲𑀻𑀦𑀁 𑀆𑀭𑁄𑀘𑁂𑀲𑀺.

𑀇𑀲𑀬𑁄 𑀢𑀼𑀫𑁆𑀳𑁂𑀳𑀺 𑀫𑀬𑀁 𑀩𑀼𑀤𑁆𑀥𑁄, 𑀥𑀫𑁆𑀫𑁄, 𑀲𑀗𑁆𑀖𑁄𑀢𑀺 𑀅𑀲𑀼𑀢𑀧𑀼𑀩𑁆𑀩𑀁 𑀲𑀸𑀯𑀺𑀢𑀸, 𑀉𑀧𑁆𑀧𑀦𑁆𑀦𑁄 𑀦𑀼 𑀔𑁄 𑀮𑁄𑀓𑁂 𑀩𑀼𑀤𑁆𑀥𑁄𑀢𑀺? 𑀆𑀫, 𑀪𑀦𑁆𑀢𑁂, 𑀉𑀧𑁆𑀧𑀦𑁆𑀦𑁄𑀢𑀺. 𑀇𑀤𑀸𑀦𑀺 𑀓𑀼𑀳𑀺𑀁 𑀯𑀲𑀢𑀻𑀢𑀺? 𑀲𑀸𑀯𑀢𑁆𑀣𑀺𑀁 𑀦𑀺𑀲𑁆𑀲𑀸𑀬 𑀚𑁂𑀢𑀯𑀦𑁂, 𑀪𑀦𑁆𑀢𑁂𑀢𑀺. 𑀇𑀲𑀬𑁄 𑀢𑀺𑀝𑁆𑀞𑀣 𑀢𑀸𑀯 𑀢𑀼𑀫𑁆𑀳𑁂 𑀫𑀬𑀁 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀸𑀢𑀺 𑀳𑀝𑁆𑀞𑀢𑀼𑀝𑁆𑀞𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀓𑁄𑀲𑀫𑁆𑀩𑀺𑀦𑀕𑀭𑀁 𑀲𑀫𑁆𑀧𑀸𑀧𑀼𑀡𑀺𑀁𑀲𑀼. 𑀫𑀳𑀸𑀲𑁂𑀝𑁆𑀞𑀺𑀦𑁄, ‘‘𑀇𑀲𑀬𑁄 𑀆𑀕𑀢𑀸’’𑀢𑀺 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸, ‘‘𑀲𑁆𑀯𑁂 𑀅𑀫𑁆𑀳𑀸𑀓𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣, 𑀪𑀦𑁆𑀢𑁂’’𑀢𑀺 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀇𑀲𑀺𑀕𑀡𑀲𑁆𑀲 𑀫𑀳𑀸𑀤𑀸𑀦𑀁 𑀅𑀤𑀁𑀲𑀼. 𑀇𑀲𑀬𑁄 𑀪𑀼𑀜𑁆𑀚𑀺𑀢𑁆𑀯𑀸𑀯 𑀕𑀘𑁆𑀙𑀸𑀫𑀸𑀢𑀺 𑀆𑀧𑀼𑀘𑁆𑀙𑀺𑀁𑀲𑀼. 𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀏𑀓𑀫𑁆𑀧𑀺 𑀫𑀸𑀲𑀁 𑀤𑁆𑀯𑁂𑀧𑀺 𑀢𑀬𑁄𑀧𑀺 𑀘𑀢𑁆𑀢𑀸𑀭𑁄𑀧𑀺 𑀫𑀸𑀲𑁂 𑀯𑀲𑀺𑀢𑁆𑀯𑀸 𑀕𑀘𑁆𑀙𑀣. 𑀇𑀫𑀲𑁆𑀫𑀺𑀁 𑀧𑀦 𑀯𑀸𑀭𑁂 𑀳𑀺𑀬𑁆𑀬𑁄 𑀆𑀕𑀦𑁆𑀢𑁆𑀯𑀸 𑀅𑀚𑁆𑀚𑁂𑀯 𑀕𑀘𑁆𑀙𑀸𑀫𑀸𑀢𑀺 𑀯𑀤𑀣, 𑀓𑀺𑀫𑀺𑀤𑀦𑁆𑀢𑀺? 𑀆𑀫 𑀕𑀳𑀧𑀢𑀬𑁄 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀦 𑀔𑁄 𑀧𑀦 𑀲𑀓𑁆𑀓𑀸 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀯𑀺𑀤𑀺𑀢𑀼𑀁, 𑀢𑁂𑀦 𑀫𑀬𑀁 𑀢𑀼𑀭𑀺𑀢𑀸 𑀕𑀘𑁆𑀙𑀸𑀫𑀸𑀢𑀺. 𑀢𑁂𑀦 𑀳𑀺, 𑀪𑀦𑁆𑀢𑁂, 𑀫𑀬𑀫𑁆𑀧𑀺 𑀕𑀘𑁆𑀙𑀸𑀫, 𑀅𑀫𑁆𑀳𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀕𑀘𑁆𑀙𑀣𑀸𑀢𑀺. 𑀢𑀼𑀫𑁆𑀳𑁂 𑀅𑀕𑀸𑀭𑀺𑀬𑀸 𑀦𑀸𑀫 𑀫𑀳𑀸𑀚𑀝𑀸, 𑀢𑀺𑀝𑁆𑀞𑀣 𑀢𑀼𑀫𑁆𑀳𑁂, 𑀫𑀬𑀁 𑀧𑀼𑀭𑁂𑀢𑀭𑀁 𑀕𑀫𑀺𑀲𑁆𑀲𑀸𑀫𑀸𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀤𑁆𑀯𑁂𑀧𑀺 𑀤𑀺𑀯𑀲𑀸𑀦𑀺 𑀅𑀯𑀲𑀺𑀢𑁆𑀯𑀸 𑀢𑀼𑀭𑀺𑀢𑀕𑀫𑀦𑁂𑀦𑁂𑀯 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀚𑁂𑀢𑀯𑀦𑀯𑀺𑀳𑀸𑀭𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑀫𑁂𑀯 𑀅𑀕𑀫𑀁𑀲𑀼. 𑀲𑀢𑁆𑀣𑀼 𑀫𑀥𑀼𑀭𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑀩𑁆𑀩𑁂𑀯 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼.

𑀢𑁂𑀧𑀺 𑀢𑀬𑁄 𑀲𑁂𑀝𑁆𑀞𑀺𑀦𑁄 𑀧𑀜𑁆𑀘𑀳𑀺 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀘𑁂𑀯 𑀧𑀝𑁆𑀝𑀼𑀦𑁆𑀦𑀤𑀼𑀓𑀽𑀮𑀸𑀤𑀻𑀦𑀺 𑀘 𑀆𑀤𑀸𑀬 𑀓𑁄𑀲𑀫𑁆𑀩𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀚𑁂𑀢𑀯𑀦𑀲𑀸𑀫𑀦𑁆𑀢𑁂 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀢𑀺𑀡𑁆𑀡𑀫𑁆𑀧𑀺 𑀲𑀳𑀸𑀬𑀓𑀸𑀦𑀁 𑀫𑀥𑀼𑀭𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀢𑁂 𑀩𑀮𑀯𑀲𑁄𑀫𑀦𑀲𑁆𑀲𑀚𑀸𑀢𑀸 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀫𑀳𑀸𑀤𑀸𑀦𑀁 𑀅𑀤𑀁𑀲𑀼. 𑀧𑀼𑀦 𑀦𑀺𑀫𑀦𑁆𑀢𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂𑀢𑀺 𑀏𑀯𑀁 𑀅𑀟𑁆𑀠𑀫𑀸𑀲𑀁 𑀤𑀸𑀦𑀁 𑀤𑀢𑁆𑀯𑀸, ‘‘𑀅𑀫𑁆𑀳𑀸𑀓𑀁 𑀚𑀦𑀧𑀤𑀁 𑀆𑀕𑀫𑀦𑀸𑀬 𑀧𑀝𑀺𑀜𑁆𑀜𑀁 𑀤𑁂𑀣𑀸’’𑀢𑀺 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀁𑀲𑀼. 𑀪𑀕𑀯𑀸, ‘‘𑀲𑀼𑀜𑁆𑀜𑀸𑀕𑀸𑀭𑁂 𑀔𑁄 𑀕𑀳𑀧𑀢𑀬𑁄 𑀢𑀣𑀸𑀕𑀢𑀸 𑀅𑀪𑀺𑀭𑀫𑀦𑁆𑀢𑀻’’𑀢𑀺 𑀆𑀳. 𑀏𑀢𑁆𑀢𑀸𑀯𑀢𑀸 𑀧𑀝𑀺𑀜𑁆𑀜𑀸 𑀤𑀺𑀦𑁆𑀦𑀸 𑀦𑀸𑀫 𑀳𑁄𑀢𑀻𑀢𑀺 𑀕𑀳𑀧𑀢𑀬𑁄 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀤𑀺𑀦𑁆𑀦𑀸 𑀦𑁄 𑀪𑀕𑀯𑀢𑀸 𑀧𑀝𑀺𑀜𑁆𑀜𑀸𑀢𑀺 𑀤𑀲𑀩𑀮𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀬𑁄𑀚𑀦𑁂 𑀬𑁄𑀚𑀦𑁂 𑀞𑀸𑀦𑁂 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀓𑁄𑀲𑀫𑁆𑀩𑀺𑀁 𑀧𑀢𑁆𑀯𑀸, ‘‘𑀮𑁄𑀓𑁂 𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀓𑀣𑀬𑀺𑀁𑀲𑀼. 𑀢𑀬𑁄𑀧𑀺 𑀚𑀦𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀆𑀭𑀸𑀫𑁂 𑀫𑀳𑀦𑁆𑀢𑀁 𑀥𑀦𑀧𑀭𑀺𑀘𑁆𑀘𑀸𑀕𑀁 𑀓𑀢𑁆𑀯𑀸 𑀪𑀕𑀯𑀢𑁄 𑀯𑀲𑀦𑀢𑁆𑀣𑀸𑀬 𑀯𑀺𑀳𑀸𑀭𑁂 𑀓𑀸𑀭𑀸𑀧𑀬𑀺𑀁𑀲𑀼. 𑀢𑀢𑁆𑀣 𑀓𑀼𑀓𑁆𑀓𑀼𑀝𑀲𑁂𑀝𑁆𑀞𑀺𑀦𑀸 𑀓𑀸𑀭𑀺𑀢𑁄 𑀓𑀼𑀓𑁆𑀓𑀼𑀝𑀸𑀭𑀸𑀫𑁄 𑀦𑀸𑀫 𑀅𑀳𑁄𑀲𑀺. 𑀧𑀸𑀯𑀸𑀭𑀺𑀓𑀲𑁂𑀝𑁆𑀞𑀺𑀦𑀸 𑀅𑀫𑁆𑀩𑀯𑀦𑁂 𑀓𑀸𑀭𑀺𑀢𑁄 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑁄 𑀦𑀸𑀫 𑀅𑀳𑁄𑀲𑀺. 𑀖𑁄𑀲𑀺𑀢𑁂𑀦 𑀓𑀸𑀭𑀺𑀢𑁄 𑀖𑁄𑀲𑀺𑀢𑀸𑀭𑀸𑀫𑁄 𑀦𑀸𑀫 𑀅𑀳𑁄𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀖𑁄𑀲𑀺𑀢𑀲𑁂𑀝𑁆𑀞𑀺𑀦𑀸 𑀓𑀸𑀭𑀺𑀢𑁂 𑀆𑀭𑀸𑀫𑁂’’𑀢𑀺.

𑀪𑀡𑁆𑀟𑀦𑀚𑀸𑀢𑀸𑀢𑀺𑀆𑀤𑀻𑀲𑀼 𑀓𑀮𑀳𑀲𑁆𑀲 𑀧𑀼𑀩𑁆𑀩𑀪𑀸𑀕𑁄 𑀪𑀡𑁆𑀟𑀦𑀁 𑀦𑀸𑀫, 𑀢𑀁 𑀚𑀸𑀢𑀁 𑀏𑀢𑁂𑀲𑀦𑁆𑀢𑀺 𑀪𑀡𑁆𑀟𑀦𑀚𑀸𑀢𑀸. 𑀳𑀢𑁆𑀣𑀧𑀭𑀸𑀫𑀸𑀲𑀸𑀤𑀺𑀯𑀲𑁂𑀦 𑀫𑀢𑁆𑀣𑀓𑀁 𑀧𑀢𑁆𑀢𑁄 𑀓𑀮𑀳𑁄 𑀚𑀸𑀢𑁄 𑀏𑀢𑁂𑀲𑀦𑁆𑀢𑀺 𑀓𑀮𑀳𑀚𑀸𑀢𑀸. 𑀯𑀺𑀭𑀼𑀤𑁆𑀥𑀪𑀽𑀢𑀁 𑀯𑀸𑀤𑀦𑁆𑀢𑀺 𑀯𑀺𑀯𑀸𑀤𑀁, 𑀢𑀁 𑀆𑀧𑀦𑁆𑀦𑀸𑀢𑀺 𑀯𑀺𑀯𑀸𑀤𑀸𑀧𑀦𑁆𑀦𑀸. 𑀫𑀼𑀔𑀲𑀢𑁆𑀢𑀻𑀳𑀻𑀢𑀺 𑀯𑀸𑀘𑀸𑀲𑀢𑁆𑀢𑀻𑀳𑀺. 𑀯𑀺𑀢𑀼𑀤𑀦𑁆𑀢𑀸𑀢𑀺 𑀯𑀺𑀚𑁆𑀛𑀦𑁆𑀢𑀸. 𑀢𑁂 𑀦 𑀘𑁂𑀯 𑀅𑀜𑁆𑀜𑀫𑀜𑁆𑀜𑀁 𑀲𑀜𑁆𑀜𑀸𑀧𑁂𑀦𑁆𑀢𑀺 𑀦 𑀘 𑀲𑀜𑁆𑀜𑀢𑁆𑀢𑀺𑀁 𑀉𑀧𑁂𑀦𑁆𑀢𑀻𑀢𑀺 𑀢𑁂 𑀅𑀢𑁆𑀣𑀜𑁆𑀘 𑀓𑀸𑀭𑀡𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀦𑁂𑀯 𑀅𑀜𑁆𑀜𑀫𑀜𑁆𑀜𑀁 𑀚𑀸𑀦𑀸𑀧𑁂𑀦𑁆𑀢𑀺. 𑀲𑀘𑁂𑀧𑀺 𑀲𑀜𑁆𑀜𑀸𑀧𑁂𑀢𑀼𑀁 𑀆𑀭𑀪𑀦𑁆𑀢𑀺, 𑀢𑀣𑀸𑀧𑀺 𑀲𑀜𑁆𑀜𑀢𑁆𑀢𑀺𑀁 𑀦 𑀉𑀧𑁂𑀦𑁆𑀢𑀺, 𑀚𑀸𑀦𑀺𑀢𑀼𑀁 𑀦 𑀇𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀚𑁆𑀛𑀢𑁆𑀢𑀺𑀬𑀸𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀦𑀺𑀚𑁆𑀛𑀢𑁆𑀢𑀻𑀢𑀺 𑀲𑀜𑁆𑀜𑀢𑁆𑀢𑀺𑀯𑁂𑀯𑀘𑀦𑀫𑁂𑀯𑁂𑀢𑀁. 𑀓𑀲𑁆𑀫𑀸 𑀧𑀦𑁂𑀢𑁂 𑀪𑀡𑁆𑀟𑀦𑀚𑀸𑀢𑀸 𑀅𑀳𑁂𑀲𑀼𑀦𑁆𑀢𑀺? 𑀅𑀧𑁆𑀧𑀫𑀢𑁆𑀢𑀓𑁂𑀦 𑀓𑀸𑀭𑀡𑁂𑀦.

𑀤𑁆𑀯𑁂 𑀓𑀺𑀭 𑀪𑀺𑀓𑁆𑀔𑀽 𑀏𑀓𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑀦𑁆𑀢𑀺 𑀯𑀺𑀦𑀬𑀥𑀭𑁄 𑀘 𑀲𑀼𑀢𑁆𑀢𑀦𑁆𑀢𑀺𑀓𑁄 𑀘. 𑀢𑁂𑀲𑀼 𑀲𑀼𑀢𑁆𑀢𑀦𑁆𑀢𑀺𑀓𑁄 𑀪𑀺𑀓𑁆𑀔𑀼 𑀏𑀓𑀤𑀺𑀯𑀲𑀁 𑀯𑀘𑁆𑀘𑀓𑀼𑀝𑀺𑀁 𑀧𑀯𑀺𑀝𑁆𑀞𑁄 𑀆𑀘𑀫𑀦𑀉𑀤𑀓𑀸𑀯𑀲𑁂𑀲𑀁 𑀪𑀸𑀚𑀦𑁂 𑀞𑀧𑁂𑀢𑁆𑀯𑀸𑀯 𑀦𑀺𑀓𑁆𑀔𑀫𑀺. 𑀯𑀺𑀦𑀬𑀥𑀭𑁄 𑀧𑀘𑁆𑀙𑀸 𑀧𑀯𑀺𑀝𑁆𑀞𑁄 𑀢𑀁 𑀉𑀤𑀓𑀁 𑀤𑀺𑀲𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀁 𑀪𑀺𑀓𑁆𑀔𑀼𑀁 𑀧𑀼𑀘𑁆𑀙𑀺, 𑀆𑀯𑀼𑀲𑁄, 𑀢𑀬𑀸 𑀇𑀤𑀁 𑀉𑀤𑀓𑀁 𑀞𑀧𑀺𑀢𑀦𑁆𑀢𑀺? 𑀆𑀫, 𑀆𑀯𑀼𑀲𑁄𑀢𑀺. 𑀢𑁆𑀯𑀫𑁂𑀢𑁆𑀣 𑀆𑀧𑀢𑁆𑀢𑀺𑀪𑀸𑀯𑀁 𑀦 𑀚𑀸𑀦𑀸𑀲𑀻𑀢𑀺? 𑀆𑀫 𑀦 𑀚𑀸𑀦𑀸𑀫𑀻𑀢𑀺. 𑀳𑁄𑀢𑀺, 𑀆𑀯𑀼𑀲𑁄, 𑀏𑀢𑁆𑀣 𑀆𑀧𑀢𑁆𑀢𑀻𑀢𑀺. 𑀲𑀘𑁂 𑀳𑁄𑀢𑀺 𑀤𑁂𑀲𑁂𑀲𑁆𑀲𑀸𑀫𑀻𑀢𑀺. 𑀲𑀘𑁂 𑀧𑀦 𑀢𑁂, 𑀆𑀯𑀼𑀲𑁄, 𑀅𑀲𑀜𑁆𑀘𑀺𑀘𑁆𑀘 𑀅𑀲𑀢𑀺𑀬𑀸 𑀓𑀢𑀁, 𑀦𑀢𑁆𑀣𑀺 𑀢𑁂 𑀆𑀧𑀢𑁆𑀢𑀻𑀢𑀺. 𑀲𑁄 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀅𑀦𑀸𑀧𑀢𑁆𑀢𑀺𑀤𑀺𑀝𑁆𑀞𑀺 𑀅𑀳𑁄𑀲𑀺.

𑀯𑀺𑀦𑀬𑀥𑀭𑁄 𑀅𑀢𑁆𑀢𑀦𑁄 𑀦𑀺𑀲𑁆𑀲𑀺𑀢𑀓𑀸𑀦𑀁, ‘‘𑀅𑀬𑀁 𑀲𑀼𑀢𑁆𑀢𑀦𑁆𑀢𑀺𑀓𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀫𑀸𑀦𑁄𑀧𑀺 𑀦 𑀚𑀸𑀦𑀸𑀢𑀻’’𑀢𑀺 𑀆𑀭𑁄𑀘𑁂𑀲𑀺. 𑀢𑁂 𑀢𑀲𑁆𑀲 𑀦𑀺𑀲𑁆𑀲𑀺𑀢𑀓𑁂 𑀤𑀺𑀲𑁆𑀯𑀸 𑁋 ‘‘𑀢𑀼𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸𑀧𑀺 𑀆𑀧𑀢𑁆𑀢𑀺𑀪𑀸𑀯𑀁 𑀦 𑀚𑀸𑀦𑀸𑀢𑀻’’𑀢𑀺 𑀆𑀳𑀁𑀲𑀼. 𑀢𑁂 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑁄 𑀏𑀯𑀫𑀸𑀳 𑁋 ‘‘𑀅𑀬𑀁 𑀯𑀺𑀦𑀬𑀥𑀭𑁄 𑀧𑀼𑀩𑁆𑀩𑁂 ‘𑀅𑀦𑀸𑀧𑀢𑁆𑀢𑀻’𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 ‘𑀆𑀧𑀢𑁆𑀢𑀻’𑀢𑀺 𑀯𑀤𑀢𑀺, 𑀫𑀼𑀲𑀸𑀯𑀸𑀤𑀻 𑀏𑀲𑁄’’𑀢𑀺. 𑀢𑁂 𑀕𑀦𑁆𑀢𑁆𑀯𑀸, ‘‘𑀢𑀼𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑁄 𑀫𑀼𑀲𑀸𑀯𑀸𑀤𑀻’’𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀓𑀮𑀳𑀁 𑀯𑀟𑁆𑀠𑀬𑀺𑀁𑀲𑀼, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀸𑀢𑀺 𑀏𑀢𑀁, ‘‘𑀇𑀥, 𑀪𑀦𑁆𑀢𑁂, 𑀓𑁄𑀲𑀫𑁆𑀩𑀺𑀬𑀁 𑀪𑀺𑀓𑁆𑀔𑀽 𑀪𑀡𑁆𑀟𑀦𑀚𑀸𑀢𑀸’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀢𑀜𑁆𑀘 𑀔𑁄 𑀦𑁂𑀯 𑀧𑀺𑀬𑀓𑀫𑁆𑀬𑀢𑀸𑀬 𑀦 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦, 𑀅𑀣 𑀔𑁄 𑀅𑀢𑁆𑀣𑀓𑀸𑀫𑀢𑀸𑀬 𑀳𑀺𑀢𑀓𑀸𑀫𑀢𑀸𑀬. 𑀲𑀸𑀫𑀕𑁆𑀕𑀺𑀓𑀸𑀭𑀓𑁄 𑀓𑀺𑀭𑁂𑀲 𑀪𑀺𑀓𑁆𑀔𑀼, 𑀢𑀲𑁆𑀫𑀸𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀬𑀣𑀸 𑀇𑀫𑁂 𑀪𑀺𑀓𑁆𑀔𑀽 𑀯𑀺𑀯𑀸𑀤𑀁 𑀆𑀭𑀤𑁆𑀥𑀸, 𑀦 𑀲𑀓𑁆𑀓𑀸 𑀫𑀬𑀸, 𑀦𑀸𑀧𑀺 𑀅𑀜𑁆𑀜𑁂𑀦 𑀪𑀺𑀓𑁆𑀔𑀼𑀦𑀸 𑀲𑀫𑀕𑁆𑀕𑀸 𑀓𑀸𑀢𑀼𑀁, 𑀅𑀧𑁆𑀧𑁂𑀯 𑀦𑀸𑀫 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄 𑀪𑀕𑀯𑀸 𑀲𑀬𑀁 𑀯𑀸 𑀕𑀦𑁆𑀢𑁆𑀯𑀸, 𑀅𑀢𑁆𑀢𑀦𑁄 𑀯𑀸 𑀲𑀦𑁆𑀢𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀏𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀔𑀦𑁆𑀢𑀺𑀫𑁂𑀢𑁆𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑀁 𑀲𑀸𑀭𑀡𑀻𑀬𑀥𑀫𑁆𑀫𑀤𑁂𑀲𑀦𑀁 𑀓𑀣𑁂𑀢𑁆𑀯𑀸 𑀲𑀸𑀫𑀕𑁆𑀕𑀺𑀁 𑀓𑀭𑁂𑀬𑁆𑀬𑀸’’𑀢𑀺 𑀅𑀢𑁆𑀣𑀓𑀸𑀫𑀢𑀸𑀬 𑀳𑀺𑀢𑀓𑀸𑀫𑀢𑀸𑀬 𑀕𑀦𑁆𑀢𑁆𑀯𑀸 𑀅𑀯𑁄𑀘.

𑁪𑁯𑁨. 𑀙𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀸𑀭𑀡𑀻𑀬𑀸𑀢𑀺 𑀳𑁂𑀝𑁆𑀞𑀸 𑀓𑀮𑀳𑀪𑀡𑁆𑀟𑀦𑀯𑀲𑁂𑀦 𑀤𑁂𑀲𑀦𑀸 𑀆𑀭𑀤𑁆𑀥𑀸. 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀙 𑀲𑀸𑀭𑀡𑀻𑀬𑀸 𑀥𑀫𑁆𑀫𑀸 𑀆𑀕𑀢𑀸𑀢𑀺 𑀏𑀯𑀫𑀺𑀤𑀁 𑀓𑁄𑀲𑀫𑁆𑀩𑀺𑀬𑀲𑀼𑀢𑁆𑀢𑀁 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀕𑀢𑀁 𑀳𑁄𑀢𑀺. 𑀢𑀢𑁆𑀣 𑀲𑀸𑀭𑀡𑀻𑀬𑀸𑀢𑀺 𑀲𑀭𑀺𑀢𑀩𑁆𑀩𑀬𑀼𑀢𑁆𑀢𑀸 𑀅𑀤𑁆𑀥𑀸𑀦𑁂 𑀅𑀢𑀺𑀓𑁆𑀓𑀦𑁆𑀢𑁂𑀧𑀺 𑀦 𑀧𑀫𑀼𑀲𑁆𑀲𑀺𑀢𑀩𑁆𑀩𑀸. 𑀬𑁄 𑀢𑁂 𑀥𑀫𑁆𑀫𑁂 𑀧𑀽𑀭𑁂𑀢𑀺, 𑀢𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑀁 𑀓𑀭𑁄𑀦𑁆𑀢𑀻𑀢𑀺 𑀧𑀺𑀬𑀓𑀭𑀡𑀸. 𑀕𑀭𑀼𑀁 𑀓𑀭𑁄𑀦𑁆𑀢𑀻𑀢𑀺 𑀕𑀭𑀼𑀓𑀭𑀡𑀸. 𑀲𑀗𑁆𑀕𑀳𑀸𑀬𑀸𑀢𑀺 𑀲𑀗𑁆𑀕𑀳𑀡𑀢𑁆𑀣𑀸𑀬. 𑀅𑀯𑀺𑀯𑀸𑀤𑀸𑀬𑀸𑀢𑀺 𑀅𑀯𑀺𑀯𑀸𑀤𑀦𑀢𑁆𑀣𑀸𑀬. 𑀲𑀸𑀫𑀕𑁆𑀕𑀺𑀬𑀸𑀢𑀺 𑀲𑀫𑀕𑁆𑀕𑀪𑀸𑀯𑀢𑁆𑀣𑀸𑀬. 𑀏𑀓𑀻𑀪𑀸𑀯𑀸𑀬𑀸𑀢𑀺 𑀏𑀓𑀻𑀪𑀸𑀯𑀢𑁆𑀣𑀸𑀬 𑀦𑀺𑀦𑁆𑀦𑀸𑀦𑀸𑀓𑀭𑀡𑀸𑀬. 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀪𑀯𑀦𑁆𑀢𑀺. 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀦𑁆𑀢𑀺 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀓𑀢𑁆𑀢𑀩𑁆𑀩𑀁 𑀓𑀸𑀬𑀓𑀫𑁆𑀫𑀁. 𑀯𑀘𑀻𑀓𑀫𑁆𑀫𑀫𑀦𑁄𑀓𑀫𑁆𑀫𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀸𑀦𑀺 𑀪𑀺𑀓𑁆𑀔𑀽𑀦𑀁 𑀯𑀲𑁂𑀦 𑀆𑀕𑀢𑀸𑀦𑀺, 𑀕𑀺𑀳𑀻𑀲𑀼𑀧𑀺 𑀮𑀩𑁆𑀪𑀦𑁆𑀢𑀺𑀬𑁂𑀯. 𑀪𑀺𑀓𑁆𑀔𑀽𑀦𑀜𑁆𑀳𑀺 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀆𑀪𑀺𑀲𑀫𑀸𑀘𑀸𑀭𑀺𑀓𑀥𑀫𑁆𑀫𑀧𑀽𑀭𑀡𑀁 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀕𑀺𑀳𑀻𑀦𑀁 𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣𑀸𑀬 𑀩𑁄𑀥𑀺𑀯𑀦𑁆𑀤𑀦𑀢𑁆𑀣𑀸𑀬 𑀲𑀗𑁆𑀖𑀦𑀺𑀫𑀦𑁆𑀢𑀦𑀢𑁆𑀣𑀸𑀬 𑀕𑀫𑀦𑀁 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁂 𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀧𑀢𑁆𑀢𑀧𑀝𑀺𑀕𑁆𑀕𑀳𑀡𑀁 𑀆𑀲𑀦𑀧𑀜𑁆𑀜𑀸𑀧𑀦𑀁 𑀅𑀦𑀼𑀕𑀫𑀦𑀦𑁆𑀢𑀺 𑀏𑀯𑀫𑀸𑀤𑀺𑀓𑀁 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫.

𑀪𑀺𑀓𑁆𑀔𑀽𑀦𑀁 𑀫𑁂𑀢𑁆𑀢𑀘𑀺𑀢𑁆𑀢𑁂𑀦 𑀆𑀘𑀸𑀭𑀧𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀁, 𑀓𑀫𑁆𑀫𑀝𑁆𑀞𑀸𑀦𑀓𑀣𑀦𑀁 𑀥𑀫𑁆𑀫𑀤𑁂𑀲𑀦𑀸 𑀢𑁂𑀧𑀺𑀝𑀓𑀫𑁆𑀧𑀺 𑀩𑀼𑀤𑁆𑀥𑀯𑀘𑀦𑀁 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫. 𑀕𑀺𑀳𑀻𑀦𑀜𑁆𑀘, ‘‘𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣𑀸𑀬 𑀕𑀘𑁆𑀙𑀸𑀫, 𑀩𑁄𑀥𑀺𑀯𑀦𑁆𑀤𑀦𑀢𑁆𑀣𑀸𑀬 𑀕𑀘𑁆𑀙𑀸𑀫, 𑀥𑀫𑁆𑀫𑀲𑁆𑀲𑀯𑀦𑀁 𑀓𑀭𑀺𑀲𑁆𑀲𑀸𑀫, 𑀧𑀤𑀻𑀧𑀫𑀸𑀮𑀸𑀧𑀼𑀧𑁆𑀨𑀧𑀽𑀚𑀁 𑀓𑀭𑀺𑀲𑁆𑀲𑀸𑀫, 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀲𑀫𑀸𑀤𑀸𑀬 𑀯𑀢𑁆𑀢𑀺𑀲𑁆𑀲𑀸𑀫, 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀤𑀲𑁆𑀲𑀸𑀫, 𑀯𑀲𑁆𑀲𑀸𑀯𑀸𑀲𑀺𑀓𑀁 𑀤𑀲𑁆𑀲𑀸𑀫, 𑀅𑀚𑁆𑀚 𑀲𑀗𑁆𑀖𑀲𑁆𑀲 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀤𑀲𑁆𑀲𑀸𑀫, 𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀔𑀸𑀤𑀦𑀻𑀬𑀸𑀤𑀻𑀦𑀺 𑀲𑀁𑀯𑀺𑀤𑀳𑀣, 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀣, 𑀧𑀸𑀦𑀻𑀬𑀁 𑀉𑀧𑀝𑁆𑀞𑀧𑁂𑀣, 𑀲𑀗𑁆𑀖𑀁 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀆𑀦𑁂𑀣, 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀙𑀦𑁆𑀤𑀚𑀸𑀢𑀸 𑀉𑀲𑁆𑀲𑀸𑀳𑀚𑀸𑀢𑀸 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁄𑀣𑀸’’𑀢𑀺𑀆𑀤𑀺𑀓𑀣𑀦𑀓𑀸𑀮𑁂 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫.

𑀪𑀺𑀓𑁆𑀔𑀽𑀦𑀁 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀸𑀤𑀻𑀦𑀺 𑀘 𑀓𑀢𑁆𑀯𑀸 𑀯𑀺𑀯𑀺𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸, ‘‘𑀇𑀫𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀲𑀼𑀔𑀻 𑀳𑁄𑀦𑁆𑀢𑀼, 𑀅𑀯𑁂𑀭𑀸 𑀅𑀩𑁆𑀬𑀸𑀧𑀚𑁆𑀛𑀸’’𑀢𑀺 𑀘𑀺𑀦𑁆𑀢𑀦𑀁 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫. 𑀕𑀺𑀳𑀻𑀦𑀁 ‘‘𑀅𑀬𑁆𑀬𑀸 𑀲𑀼𑀔𑀻 𑀳𑁄𑀦𑁆𑀢𑀼, 𑀅𑀯𑁂𑀭𑀸 𑀅𑀩𑁆𑀬𑀸𑀧𑀚𑁆𑀛𑀸’’𑀢𑀺 𑀘𑀺𑀦𑁆𑀢𑀦𑀁 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫.

𑀆𑀯𑀺 𑀘𑁂𑀯 𑀭𑀳𑁄 𑀘𑀸𑀢𑀺 𑀲𑀫𑁆𑀫𑀼𑀔𑀸 𑀘 𑀧𑀭𑀫𑁆𑀫𑀼𑀔𑀸 𑀘. 𑀢𑀢𑁆𑀣 𑀦𑀯𑀓𑀸𑀦𑀁 𑀘𑀻𑀯𑀭𑀓𑀫𑁆𑀫𑀸𑀤𑀻𑀲𑀼 𑀲𑀳𑀸𑀬𑀪𑀸𑀯𑀽𑀧𑀕𑀫𑀦𑀁 𑀲𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀣𑁂𑀭𑀸𑀦𑀁 𑀧𑀦 𑀧𑀸𑀤𑀥𑁄𑀯𑀦𑀯𑀦𑁆𑀤𑀦𑀩𑀻𑀚𑀦𑀤𑀸𑀦𑀸𑀤𑀺𑀪𑁂𑀤𑀫𑁆𑀧𑀺 𑀲𑀩𑁆𑀩𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀲𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀉𑀪𑀬𑁂𑀳𑀺𑀧𑀺 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀸𑀦𑀁 𑀤𑀸𑀭𑀼𑀪𑀡𑁆𑀟𑀸𑀤𑀻𑀦𑀁 𑀢𑁂𑀲𑀼 𑀅𑀯𑀫𑀜𑁆𑀜𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑀸 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀸𑀦𑀁 𑀯𑀺𑀬 𑀧𑀝𑀺𑀲𑀸𑀫𑀦𑀁 𑀧𑀭𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀤𑁂𑀯𑀢𑁆𑀣𑁂𑀭𑁄 𑀢𑀺𑀲𑁆𑀲𑀢𑁆𑀣𑁂𑀭𑁄𑀢𑀺 𑀏𑀯𑀁 𑀧𑀕𑁆𑀕𑀬𑁆𑀳 𑀯𑀘𑀦𑀁 𑀲𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫. 𑀯𑀺𑀳𑀸𑀭𑁂 𑀅𑀲𑀦𑁆𑀢𑀁 𑀧𑀦 𑀧𑀭𑀺𑀧𑀼𑀘𑁆𑀙𑀦𑁆𑀢𑀲𑁆𑀲, 𑀓𑀼𑀳𑀺𑀁 𑀅𑀫𑁆𑀳𑀸𑀓𑀁 𑀤𑁂𑀯𑀢𑁆𑀣𑁂𑀭𑁄, 𑀅𑀫𑁆𑀳𑀸𑀓𑀁 𑀢𑀺𑀲𑁆𑀲𑀢𑁆𑀣𑁂𑀭𑁄 𑀓𑀤𑀸 𑀦𑀼 𑀔𑁄 𑀆𑀕𑀫𑀺𑀲𑁆𑀲𑀢𑀻𑀢𑀺 𑀏𑀯𑀁 𑀫𑀫𑀸𑀬𑀦𑀯𑀘𑀦𑀁 𑀧𑀭𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫. 𑀫𑁂𑀢𑁆𑀢𑀸𑀲𑀺𑀦𑁂𑀳𑀲𑀺𑀦𑀺𑀤𑁆𑀥𑀸𑀦𑀺 𑀧𑀦 𑀦𑀬𑀦𑀸𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀲𑀼𑀧𑁆𑀧𑀲𑀦𑁆𑀦𑁂𑀦 𑀫𑀼𑀔𑁂𑀦 𑀑𑀮𑁄𑀓𑀦𑀁 𑀲𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫. 𑀤𑁂𑀯𑀢𑁆𑀣𑁂𑀭𑁄, 𑀢𑀺𑀲𑁆𑀲𑀢𑁆𑀣𑁂𑀭𑁄 𑀅𑀭𑁄𑀕𑁄 𑀳𑁄𑀢𑀼 𑀅𑀧𑁆𑀧𑀸𑀩𑀸𑀥𑁄𑀢𑀺 𑀲𑀫𑀦𑁆𑀦𑀸𑀳𑀭𑀡𑀁 𑀧𑀭𑀫𑁆𑀫𑀼𑀔𑀸 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫.

𑀮𑀸𑀪𑀸𑀢𑀺 𑀘𑀻𑀯𑀭𑀸𑀤𑀬𑁄 𑀮𑀤𑁆𑀥𑀧𑀘𑁆𑀘𑀬𑀸. 𑀥𑀫𑁆𑀫𑀺𑀓𑀸𑀢𑀺 𑀓𑀼𑀳𑀦𑀸𑀤𑀺𑀪𑁂𑀤𑀁 𑀫𑀺𑀘𑁆𑀙𑀸𑀚𑀻𑀯𑀁 𑀯𑀚𑁆𑀚𑁂𑀢𑁆𑀯𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀪𑀺𑀓𑁆𑀔𑀸𑀘𑀭𑀺𑀬𑀯𑀢𑁆𑀢𑁂𑀦 𑀉𑀧𑁆𑀧𑀦𑁆𑀦𑀸. 𑀅𑀦𑁆𑀢𑀫𑀲𑁄 𑀧𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀫𑀢𑁆𑀢𑀫𑁆𑀧𑀻𑀢𑀺 𑀧𑀘𑁆𑀙𑀺𑀫𑀓𑁄𑀝𑀺𑀬𑀸 𑀧𑀢𑁆𑀢𑁂 𑀧𑀭𑀺𑀬𑀸𑀧𑀦𑁆𑀦𑀁 𑀧𑀢𑁆𑀢𑀲𑁆𑀲 𑀅𑀦𑁆𑀢𑁄𑀕𑀢𑀁 𑀤𑁆𑀯𑀢𑁆𑀢𑀺𑀓𑀝𑀘𑁆𑀙𑀼𑀪𑀺𑀓𑁆𑀔𑀸𑀫𑀢𑁆𑀢𑀫𑁆𑀧𑀺. 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀻𑀢𑀺 𑀏𑀢𑁆𑀣 𑀤𑁆𑀯𑁂 𑀧𑀝𑀺𑀯𑀺𑀪𑀢𑁆𑀢𑀸𑀦𑀺 𑀦𑀸𑀫 𑀆𑀫𑀺𑀲𑀧𑀝𑀺𑀯𑀺𑀪𑀢𑁆𑀢𑀁 𑀧𑀼𑀕𑁆𑀕𑀮𑀧𑀝𑀺𑀯𑀺𑀪𑀢𑁆𑀢𑀜𑁆𑀘. 𑀢𑀢𑁆𑀣, ‘‘𑀏𑀢𑁆𑀢𑀓𑀁 𑀤𑀲𑁆𑀲𑀸𑀫𑀺, 𑀏𑀢𑁆𑀢𑀓𑀁 𑀦 𑀤𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀘𑀺𑀢𑁆𑀢𑁂𑀦 𑀯𑀺𑀪𑀚𑀦𑀁 𑀆𑀫𑀺𑀲𑀧𑀝𑀺𑀯𑀺𑀪𑀢𑁆𑀢𑀁 𑀦𑀸𑀫. ‘‘𑀅𑀲𑀼𑀓𑀲𑁆𑀲 𑀤𑀲𑁆𑀲𑀸𑀫𑀺, 𑀅𑀲𑀼𑀓𑀲𑁆𑀲 𑀦 𑀤𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀘𑀺𑀢𑁆𑀢𑁂𑀦 𑀯𑀺𑀪𑀚𑀦𑀁 𑀧𑀦 𑀧𑀼𑀕𑁆𑀕𑀮𑀧𑀝𑀺𑀯𑀺𑀪𑀢𑁆𑀢𑀁 𑀦𑀸𑀫. 𑀢𑀤𑀼𑀪𑀬𑀫𑁆𑀧𑀺 𑀅𑀓𑀢𑁆𑀯𑀸 𑀬𑁄 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀁 𑀪𑀼𑀜𑁆𑀚𑀢𑀺, 𑀅𑀬𑀁 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀪𑁄𑀕𑀻 𑀦𑀸𑀫.

𑀲𑀻𑀮𑀯𑀦𑁆𑀢𑁂𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀸𑀥𑀸𑀭𑀡𑀪𑁄𑀕𑀻𑀢𑀺 𑀏𑀢𑁆𑀣 𑀲𑀸𑀥𑀸𑀭𑀡𑀪𑁄𑀕𑀺𑀦𑁄 𑀇𑀤𑀁 𑀮𑀓𑁆𑀔𑀡𑀁, 𑀬𑀁 𑀬𑀁 𑀧𑀡𑀻𑀢𑀁 𑀮𑀩𑁆𑀪𑀢𑀺, 𑀢𑀁 𑀢𑀁 𑀦𑁂𑀯 𑀮𑀸𑀪𑁂𑀦 𑀮𑀸𑀪𑀁 𑀚𑀺𑀕𑀻𑀲𑀦𑀸𑀫𑀼𑀔𑁂𑀦 𑀕𑀺𑀳𑀻𑀦𑀁 𑀤𑁂𑀢𑀺, 𑀦 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀢𑀺; 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄𑀯 𑀲𑀗𑁆𑀖𑁂𑀦 𑀲𑀸𑀥𑀸𑀭𑀡𑀁 𑀳𑁄𑀢𑀽𑀢𑀺 𑀕𑀳𑁂𑀢𑁆𑀯𑀸 𑀕𑀡𑁆𑀟𑀺𑀁 𑀧𑀳𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁 𑀲𑀗𑁆𑀖𑀲𑀦𑁆𑀢𑀓𑀁 𑀯𑀺𑀬 𑀧𑀲𑁆𑀲𑀢𑀺. 𑀇𑀤𑀁 𑀧𑀦 𑀲𑀸𑀭𑀡𑀻𑀬𑀥𑀫𑁆𑀫𑀁 𑀓𑁄 𑀧𑀽𑀭𑁂𑀢𑀺, 𑀓𑁄 𑀦 𑀧𑀽𑀭𑁂𑀢𑀻𑀢𑀺? 𑀤𑀼𑀲𑁆𑀲𑀻𑀮𑁄 𑀢𑀸𑀯 𑀦 𑀧𑀽𑀭𑁂𑀢𑀺. 𑀦 𑀳𑀺 𑀢𑀲𑁆𑀲 𑀲𑀦𑁆𑀢𑀓𑀁 𑀲𑀻𑀮𑀯𑀦𑁆𑀢𑀸 𑀕𑀡𑁆𑀳𑀦𑁆𑀢𑀺. 𑀧𑀭𑀺𑀲𑀼𑀤𑁆𑀥𑀲𑀻𑀮𑁄 𑀧𑀦 𑀯𑀢𑁆𑀢𑀁 𑀅𑀔𑀡𑁆𑀟𑁂𑀦𑁆𑀢𑁄 𑀧𑀽𑀭𑁂𑀢𑀺.

𑀢𑀢𑁆𑀭𑀺𑀤𑀁 𑀯𑀢𑁆𑀢𑀁 𑁋 𑀬𑁄 𑀳𑀺 𑀑𑀤𑀺𑀲𑁆𑀲𑀓𑀁 𑀓𑀢𑁆𑀯𑀸 𑀫𑀸𑀢𑀼 𑀯𑀸 𑀧𑀺𑀢𑀼 𑀯𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀤𑀻𑀦𑀁 𑀯𑀸 𑀤𑁂𑀢𑀺, 𑀲𑁄 𑀤𑀸𑀢𑀩𑁆𑀩𑀁 𑀤𑁂𑀢𑀺, 𑀲𑀸𑀭𑀡𑀻𑀬𑀥𑀫𑁆𑀫𑁄 𑀧𑀦𑀲𑁆𑀲 𑀦 𑀳𑁄𑀢𑀺, 𑀧𑀮𑀺𑀩𑁄𑀥𑀚𑀕𑁆𑀕𑀦𑀁 𑀦𑀸𑀫 𑀳𑁄𑀢𑀺. 𑀲𑀸𑀭𑀡𑀻𑀬𑀥𑀫𑁆𑀫𑁄 𑀳𑀺 𑀫𑀼𑀢𑁆𑀢𑀧𑀮𑀺𑀩𑁄𑀥𑀲𑁆𑀲𑁂𑀯 𑀯𑀝𑁆𑀝𑀢𑀺, 𑀢𑁂𑀦 𑀧𑀦 𑀑𑀤𑀺𑀲𑁆𑀲𑀓𑀁 𑀤𑁂𑀦𑁆𑀢𑁂𑀦 𑀕𑀺𑀮𑀸𑀦𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀆𑀕𑀦𑁆𑀢𑀼𑀓𑀕𑀫𑀺𑀓𑀸𑀦𑀜𑁆𑀘𑁂𑀯 𑀦𑀯𑀧𑀩𑁆𑀩𑀚𑀺𑀢𑀲𑁆𑀲 𑀘 𑀲𑀗𑁆𑀖𑀸𑀝𑀺𑀧𑀢𑁆𑀢𑀕𑁆𑀕𑀳𑀡𑀁 𑀅𑀚𑀸𑀦𑀦𑁆𑀢𑀲𑁆𑀲 𑀤𑀸𑀢𑀩𑁆𑀩𑀁. 𑀏𑀢𑁂𑀲𑀁 𑀤𑀢𑁆𑀯𑀸 𑀅𑀯𑀲𑁂𑀲𑀁 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀣𑁄𑀓𑀁 𑀣𑁄𑀓𑀁 𑀅𑀤𑀢𑁆𑀯𑀸 𑀬𑁄 𑀬𑀢𑁆𑀢𑀓𑀁 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀢𑀢𑁆𑀢𑀓𑀁 𑀤𑀸𑀢𑀩𑁆𑀩𑀁. 𑀅𑀯𑀲𑀺𑀝𑁆𑀞𑁂 𑀅𑀲𑀢𑀺 𑀧𑀼𑀦 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀣𑁂𑀭𑀸𑀲𑀦𑀢𑁄 𑀧𑀝𑁆𑀞𑀸𑀬 𑀬𑀁 𑀬𑀁 𑀧𑀡𑀻𑀢𑀁, 𑀢𑀁 𑀢𑀁 𑀤𑀢𑁆𑀯𑀸 𑀲𑁂𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁, ‘‘𑀲𑀻𑀮𑀯𑀦𑁆𑀢𑁂𑀳𑀻’’𑀢𑀺 𑀯𑀘𑀦𑀢𑁄 𑀤𑀼𑀲𑁆𑀲𑀻𑀮𑀲𑁆𑀲 𑀅𑀤𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀺.

𑀅𑀬𑀁 𑀧𑀦 𑀲𑀸𑀭𑀡𑀻𑀬𑀥𑀫𑁆𑀫𑁄 𑀲𑀼𑀲𑀺𑀓𑁆𑀔𑀺𑀢𑀸𑀬 𑀧𑀭𑀺𑀲𑀸𑀬 𑀲𑀼𑀧𑀽𑀭𑁄 𑀳𑁄𑀢𑀺, 𑀦𑁄 𑀅𑀲𑀺𑀓𑁆𑀔𑀺𑀢𑀸𑀬 𑀧𑀭𑀺𑀲𑀸𑀬. 𑀲𑀼𑀲𑀺𑀓𑁆𑀔𑀺𑀢𑀸𑀬 𑀳𑀺 𑀧𑀭𑀺𑀲𑀸𑀬 𑀬𑁄 𑀅𑀜𑁆𑀜𑀢𑁄 𑀮𑀪𑀢𑀺, 𑀲𑁄 𑀦 𑀕𑀡𑁆𑀳𑀸𑀢𑀺, 𑀅𑀜𑁆𑀜𑀢𑁄 𑀅𑀮𑀪𑀦𑁆𑀢𑁄𑀧𑀺 𑀧𑀫𑀸𑀡𑀬𑀼𑀢𑁆𑀢𑀫𑁂𑀯 𑀕𑀡𑁆𑀳𑀸𑀢𑀺, 𑀦 𑀅𑀢𑀺𑀭𑁂𑀓𑀁. 𑀅𑀬𑀜𑁆𑀘 𑀧𑀦 𑀲𑀸𑀭𑀡𑀻𑀬𑀥𑀫𑁆𑀫𑁄 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀮𑀤𑁆𑀥𑀁 𑀮𑀤𑁆𑀥𑀁 𑀤𑁂𑀦𑁆𑀢𑀲𑁆𑀲𑀸𑀧𑀺 𑀤𑁆𑀯𑀸𑀤𑀲𑀳𑀺 𑀯𑀲𑁆𑀲𑁂𑀳𑀺 𑀧𑀽𑀭𑀢𑀺, 𑀦 𑀢𑀢𑁄 𑀑𑀭𑀁. 𑀲𑀘𑁂 𑀳𑀺 𑀤𑁆𑀯𑀸𑀤𑀲𑀫𑁂𑀧𑀺 𑀯𑀲𑁆𑀲𑁂 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑁄 𑀧𑀺𑀡𑁆𑀟𑀧𑀸𑀢𑀧𑀽𑀭𑀁 𑀧𑀢𑁆𑀢𑀁 𑀆𑀲𑀦𑀲𑀸𑀮𑀸𑀬𑀁 𑀞𑀧𑁂𑀢𑁆𑀯𑀸 𑀦𑀳𑀸𑀬𑀺𑀢𑀼𑀁 𑀕𑀘𑁆𑀙𑀢𑀺, 𑀲𑀗𑁆𑀖𑀢𑁆𑀣𑁂𑀭𑁄 𑀘 𑀓𑀲𑁆𑀲𑁂𑀲𑁄 𑀧𑀢𑁆𑀢𑁄𑀢𑀺? 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑀲𑁆𑀲𑀸𑀢𑀺 𑀯𑀼𑀢𑁆𑀢𑁂 𑁋 ‘‘𑀆𑀳𑀭𑀣 𑀦’’𑀦𑁆𑀢𑀺 𑀲𑀩𑁆𑀩𑀁 𑀧𑀺𑀡𑁆𑀟𑀧𑀸𑀢𑀁 𑀯𑀺𑀘𑀸𑀭𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀘 𑀭𑀺𑀢𑁆𑀢𑀧𑀢𑁆𑀢𑀁 𑀞𑀧𑁂𑀢𑀺. 𑀅𑀣 𑀲𑁄 𑀪𑀺𑀓𑁆𑀔𑀼 𑀭𑀺𑀢𑁆𑀢𑀧𑀢𑁆𑀢𑀁 𑀤𑀺𑀲𑁆𑀯𑀸, ‘‘𑀫𑀬𑁆𑀳𑀁 𑀅𑀲𑁂𑀲𑁂𑀢𑁆𑀯𑀸𑀯 𑀧𑀭𑀺𑀪𑀼𑀜𑁆𑀚𑀺𑀁𑀲𑀽’’𑀢𑀺 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀢𑀺, 𑀲𑀸𑀭𑀡𑀻𑀬𑀥𑀫𑁆𑀫𑁄 𑀪𑀺𑀚𑁆𑀚𑀢𑀺, 𑀧𑀼𑀦 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀧𑀽𑀭𑁂𑀢𑀩𑁆𑀩𑁄 𑀳𑁄𑀢𑀺, 𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑀲𑀤𑀺𑀲𑁄 𑀳𑁂𑀲. 𑀲𑀓𑀺𑀁 𑀔𑀡𑁆𑀟𑁂 𑀚𑀸𑀢𑁂 𑀧𑀼𑀦 𑀧𑀽𑀭𑁂𑀢𑀩𑁆𑀩𑁄𑀯. 𑀬𑁄 𑀧𑀦, ‘‘𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂, 𑀬𑀲𑁆𑀲 𑀫𑁂 𑀧𑀢𑁆𑀢𑀕𑀢𑀁 𑀅𑀦𑀸𑀧𑀼𑀘𑁆𑀙𑀸𑀯 𑀲𑀩𑁆𑀭𑀳𑁆𑀫𑀘𑀸𑀭𑀻 𑀧𑀭𑀺𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀲𑁄𑀫𑀦𑀲𑁆𑀲𑀁 𑀚𑀦𑁂𑀢𑀺, 𑀢𑀲𑁆𑀲 𑀧𑀼𑀡𑁆𑀡𑁄 𑀦𑀸𑀫 𑀳𑁄𑀢𑀺.

𑀏𑀯𑀁 𑀧𑀽𑀭𑀺𑀢𑀲𑀸𑀭𑀡𑀻𑀬𑀥𑀫𑁆𑀫𑀲𑁆𑀲 𑀧𑀦 𑀦𑁂𑀯 𑀇𑀲𑁆𑀲𑀸, 𑀦 𑀫𑀘𑁆𑀙𑀭𑀺𑀬𑀁 𑀳𑁄𑀢𑀺, 𑀲𑁄 𑀫𑀦𑀼𑀲𑁆𑀲𑀸𑀦𑀁 𑀧𑀺𑀬𑁄 𑀳𑁄𑀢𑀺, 𑀲𑀼𑀮𑀪𑀧𑀘𑁆𑀘𑀬𑁄; 𑀧𑀢𑁆𑀢𑀕𑀢𑀫𑀲𑁆𑀲 𑀤𑀻𑀬𑀫𑀸𑀦𑀫𑁆𑀧𑀺 𑀦 𑀔𑀻𑀬𑀢𑀺, 𑀪𑀸𑀚𑀦𑀻𑀬𑀪𑀡𑁆𑀟𑀝𑁆𑀞𑀸𑀦𑁂 𑀅𑀕𑁆𑀕𑀪𑀡𑁆𑀟𑀁 𑀮𑀪𑀢𑀺, 𑀪𑀬𑁂 𑀯𑀸 𑀙𑀸𑀢𑀓𑁂 𑀯𑀸 𑀲𑀫𑁆𑀧𑀢𑁆𑀢𑁂 𑀤𑁂𑀯𑀢𑀸 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀦𑁆𑀢𑀺.

𑀢𑀢𑁆𑀭𑀺𑀫𑀸𑀦𑀺 𑀯𑀢𑁆𑀣𑀽𑀦𑀺 𑁋 𑀮𑁂𑀡𑀕𑀺𑀭𑀺𑀯𑀸𑀲𑀻 𑀢𑀺𑀲𑁆𑀲𑀢𑁆𑀣𑁂𑀭𑁄 𑀓𑀺𑀭 𑀫𑀳𑀸𑀕𑀺𑀭𑀺𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀲𑀢𑀺. 𑀧𑀜𑁆𑀜𑀸𑀲 𑀫𑀳𑀸𑀣𑁂𑀭𑀸 𑀦𑀸𑀕𑀤𑀻𑀧𑀁 𑀘𑁂𑀢𑀺𑀬𑀯𑀦𑁆𑀤𑀦𑀢𑁆𑀣𑀸𑀬 𑀕𑀘𑁆𑀙𑀦𑁆𑀢𑀸 𑀕𑀺𑀭𑀺𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀺𑀜𑁆𑀘𑀺 𑀅𑀮𑀤𑁆𑀥𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀣𑁂𑀭𑁄 𑀧𑀯𑀺𑀲𑀦𑁆𑀢𑁄 𑀢𑁂 𑀤𑀺𑀲𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀮𑀤𑁆𑀥𑀁, 𑀪𑀦𑁆𑀢𑁂’’𑀢𑀺? 𑀯𑀺𑀘𑀭𑀺𑀫𑁆𑀳𑀸, 𑀆𑀯𑀼𑀲𑁄𑀢𑀺. 𑀲𑁄 𑀅𑀮𑀤𑁆𑀥𑀪𑀸𑀯𑀁 𑀜𑀢𑁆𑀯𑀸 𑀆𑀳 𑁋 ‘‘𑀬𑀸𑀯𑀸𑀳𑀁, 𑀪𑀦𑁆𑀢𑁂, 𑀆𑀕𑀘𑁆𑀙𑀸𑀫𑀺, 𑀢𑀸𑀯 𑀇𑀥𑁂𑀯 𑀳𑁄𑀣𑀸’’𑀢𑀺. 𑀫𑀬𑀁, 𑀆𑀯𑀼𑀲𑁄, 𑀧𑀜𑁆𑀜𑀸𑀲 𑀚𑀦𑀸 𑀧𑀢𑁆𑀢𑀢𑁂𑀫𑀦𑀫𑀢𑁆𑀢𑀫𑁆𑀧𑀺 𑀦 𑀮𑀪𑀺𑀫𑁆𑀳𑀸𑀢𑀺. 𑀦𑁂𑀯𑀸𑀲𑀺𑀓𑀸 𑀦𑀸𑀫, 𑀪𑀦𑁆𑀢𑁂, 𑀧𑀝𑀺𑀩𑀮𑀸 𑀳𑁄𑀦𑁆𑀢𑀺, 𑀅𑀮𑀪𑀦𑁆𑀢𑀸𑀧𑀺 𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑀲𑀪𑀸𑀯𑀁 𑀚𑀸𑀦𑀦𑁆𑀢𑀻𑀢𑀺. 𑀣𑁂𑀭𑀸 𑀆𑀕𑀫𑀺𑀁𑀲𑀼. 𑀣𑁂𑀭𑁄 𑀕𑀸𑀫𑀁 𑀧𑀸𑀯𑀺𑀲𑀺. 𑀥𑀼𑀭𑀕𑁂𑀳𑁂𑀬𑁂𑀯 𑀫𑀳𑀸𑀉𑀧𑀸𑀲𑀺𑀓𑀸 𑀔𑀻𑀭𑀪𑀢𑁆𑀢𑀁 𑀲𑀚𑁆𑀚𑁂𑀢𑁆𑀯𑀸 𑀣𑁂𑀭𑀁 𑀑𑀮𑁄𑀓𑀬𑀫𑀸𑀦𑀸 𑀞𑀺𑀢𑀸 𑀣𑁂𑀭𑀲𑁆𑀲 𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑀲𑁆𑀲𑁂𑀯 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀢𑀁 𑀆𑀤𑀸𑀬 𑀣𑁂𑀭𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀕𑀡𑁆𑀳𑀣, 𑀪𑀦𑁆𑀢𑁂’’𑀢𑀺 𑀲𑀗𑁆𑀖𑀢𑁆𑀣𑁂𑀭𑀫𑀸𑀳. 𑀣𑁂𑀭𑁄, ‘‘𑀅𑀫𑁆𑀳𑁂𑀳𑀺 𑀏𑀢𑁆𑀢𑀓𑁂𑀳𑀺 𑀓𑀺𑀜𑁆𑀘𑀺 𑀦 𑀮𑀤𑁆𑀥𑀁, 𑀅𑀬𑀁 𑀲𑀻𑀖𑀫𑁂𑀯 𑀕𑀳𑁂𑀢𑁆𑀯𑀸 𑀆𑀕𑀢𑁄, 𑀓𑀺𑀁 𑀦𑀼 𑀔𑁄’’𑀢𑀺 𑀲𑁂𑀲𑀸𑀦𑀁 𑀫𑀼𑀔𑀁 𑀑𑀮𑁄𑀓𑁂𑀲𑀺. 𑀣𑁂𑀭𑁄 𑀑𑀮𑁄𑀓𑀦𑀸𑀓𑀸𑀭𑁂𑀦𑁂𑀯 𑀜𑀢𑁆𑀯𑀸 𑁋 ‘‘𑀥𑀫𑁆𑀫𑁂𑀦 𑀲𑀫𑁂𑀦 𑀮𑀤𑁆𑀥𑀧𑀺𑀡𑁆𑀟𑀧𑀸𑀢𑁄, 𑀦𑀺𑀓𑁆𑀓𑀼𑀓𑁆𑀓𑀼𑀘𑁆𑀘𑀸 𑀕𑀡𑁆𑀳𑀣 𑀪𑀦𑁆𑀢𑁂’’𑀢𑀺𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑁂𑀲𑀁 𑀬𑀸𑀯𑀤𑀢𑁆𑀣𑀁 𑀤𑀢𑁆𑀯𑀸 𑀅𑀢𑁆𑀢𑀦𑀸𑀧𑀺 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀺.

𑀅𑀣 𑀦𑀁 𑀪𑀢𑁆𑀢𑀓𑀺𑀘𑁆𑀘𑀸𑀯𑀲𑀸𑀦𑁂 𑀣𑁂𑀭𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀤𑀸, 𑀆𑀯𑀼𑀲𑁄, 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀻’’𑀢𑀺? 𑀦𑀢𑁆𑀣𑀺 𑀫𑁂, 𑀪𑀦𑁆𑀢𑁂, 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄𑀢𑀺. 𑀛𑀸𑀦𑀮𑀸𑀪𑀻𑀲𑀺, 𑀆𑀯𑀼𑀲𑁄𑀢𑀺? 𑀏𑀢𑀫𑁆𑀧𑀺 𑀫𑁂, 𑀪𑀦𑁆𑀢𑁂, 𑀦𑀢𑁆𑀣𑀻𑀢𑀺. 𑀦𑀦𑀼, 𑀆𑀯𑀼𑀲𑁄, 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺? 𑀲𑀸𑀭𑀡𑀻𑀬𑀥𑀫𑁆𑀫𑁄 𑀫𑁂, 𑀪𑀦𑁆𑀢𑁂, 𑀧𑀽𑀭𑀺𑀢𑁄, 𑀢𑀲𑁆𑀲 𑀫𑁂 𑀥𑀫𑁆𑀫𑀲𑁆𑀲 𑀧𑀽𑀭𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀘𑁂𑀧𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀁 𑀳𑁄𑀢𑀺, 𑀧𑀢𑁆𑀢𑀕𑀢𑀁 𑀦 𑀔𑀻𑀬𑀢𑀻𑀢𑀺. 𑀲𑀸𑀥𑀼 𑀲𑀸𑀥𑀼, 𑀲𑀧𑁆𑀧𑀼𑀭𑀺𑀲, 𑀅𑀦𑀼𑀘𑁆𑀙𑀯𑀺𑀓𑀫𑀺𑀤𑀁 𑀢𑀼𑀬𑁆𑀳𑀦𑁆𑀢𑀺. 𑀇𑀤𑀁 𑀢𑀸𑀯 𑀧𑀢𑁆𑀢𑀕𑀢𑀁 𑀦 𑀔𑀻𑀬𑀢𑀻𑀢𑀺 𑀏𑀢𑁆𑀣 𑀯𑀢𑁆𑀣𑀼.

𑀅𑀬𑀫𑁂𑀯 𑀧𑀦 𑀣𑁂𑀭𑁄 𑀘𑁂𑀢𑀺𑀬𑀧𑀩𑁆𑀩𑀢𑁂 𑀕𑀺𑀭𑀺𑀪𑀡𑁆𑀟𑀫𑀳𑀸𑀧𑀽𑀚𑀸𑀬 𑀤𑀸𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸, ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑀺𑀁 𑀯𑀭𑀪𑀡𑁆𑀟’’𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀤𑁆𑀯𑁂 𑀲𑀸𑀝𑀓𑀸, 𑀪𑀦𑁆𑀢𑁂𑀢𑀺. 𑀏𑀢𑁂 𑀫𑀬𑁆𑀳𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀻𑀢𑀺. 𑀢𑀁 𑀲𑀼𑀢𑁆𑀯𑀸 𑀅𑀫𑀘𑁆𑀘𑁄 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺 𑁋 ‘‘𑀏𑀓𑁄 𑀤𑀳𑀭𑁄 𑀏𑀯𑀁 𑀯𑀤𑀢𑀻’’𑀢𑀺. ‘‘𑀤𑀳𑀭𑀲𑁆𑀲𑁂𑀯𑀁 𑀘𑀺𑀢𑁆𑀢𑀁, 𑀫𑀳𑀸𑀣𑁂𑀭𑀸𑀦𑀁 𑀧𑀦 𑀲𑀼𑀔𑀼𑀫𑀲𑀸𑀝𑀓𑀸 𑀯𑀝𑁆𑀝𑀦𑁆𑀢𑀻’’𑀢𑀺 𑀯𑀢𑁆𑀯𑀸, ‘‘𑀫𑀳𑀸𑀣𑁂𑀭𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀞𑀧𑁂𑀲𑀺. 𑀢𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀝𑀺𑀧𑀸𑀝𑀺𑀬𑀸 𑀞𑀺𑀢𑁂 𑀤𑁂𑀦𑁆𑀢𑀲𑁆𑀲 𑀫𑀢𑁆𑀣𑀓𑁂 𑀞𑀧𑀺𑀢𑀸𑀧𑀺 𑀢𑁂 𑀲𑀸𑀝𑀓𑀸 𑀳𑀢𑁆𑀣𑀁 𑀦𑀸𑀭𑁄𑀳𑀦𑁆𑀢𑀺, 𑀅𑀜𑁆𑀜𑁂𑀯 𑀆𑀭𑁄𑀳𑀦𑁆𑀢𑀺. 𑀤𑀳𑀭𑀲𑁆𑀲 𑀤𑀸𑀦𑀓𑀸𑀮𑁂 𑀧𑀦 𑀳𑀢𑁆𑀣𑀁 𑀆𑀭𑀼𑀴𑁆𑀳𑀸. 𑀲𑁄 𑀢𑀲𑁆𑀲 𑀳𑀢𑁆𑀣𑁂 𑀞𑀧𑁂𑀢𑁆𑀯𑀸 𑀅𑀫𑀘𑁆𑀘𑀲𑁆𑀲 𑀫𑀼𑀔𑀁 𑀑𑀮𑁄𑀓𑁂𑀢𑁆𑀯𑀸 𑀤𑀳𑀭𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀤𑀸𑀦𑀁 𑀤𑀢𑁆𑀯𑀸 𑀲𑀗𑁆𑀖𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑀳𑀭𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸, ‘‘𑀓𑀤𑀸, 𑀪𑀦𑁆𑀢𑁂, 𑀇𑀫𑀁 𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀣𑀸’’𑀢𑀺 𑀆𑀳. 𑀲𑁄 𑀧𑀭𑀺𑀬𑀸𑀬𑁂𑀦𑀧𑀺 𑀅𑀲𑀦𑁆𑀢𑀁 𑀅𑀯𑀤𑀦𑁆𑀢𑁄, ‘‘𑀦𑀢𑁆𑀣𑀺 𑀫𑀬𑁆𑀳𑀁, 𑀫𑀳𑀸𑀭𑀸𑀚, 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄’’𑀢𑀺 𑀆𑀳. 𑀦𑀦𑀼, 𑀪𑀦𑁆𑀢𑁂, 𑀧𑀼𑀩𑁆𑀩𑁂𑀯 𑀅𑀯𑀘𑀼𑀢𑁆𑀣𑀸𑀢𑀺? 𑀆𑀫, 𑀫𑀳𑀸𑀭𑀸𑀚, 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀓𑁄 𑀅𑀳𑀁, 𑀢𑀲𑁆𑀲 𑀫𑁂 𑀥𑀫𑁆𑀫𑀲𑁆𑀲 𑀧𑀽𑀭𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀪𑀸𑀚𑀦𑀻𑀬𑀪𑀡𑁆𑀟𑀝𑁆𑀞𑀸𑀦𑁂 𑀅𑀕𑁆𑀕𑀪𑀡𑁆𑀟𑀁 𑀧𑀸𑀧𑀼𑀡𑀸𑀢𑀻𑀢𑀺. 𑀲𑀸𑀥𑀼 𑀲𑀸𑀥𑀼, 𑀪𑀦𑁆𑀢𑁂, 𑀅𑀦𑀼𑀘𑁆𑀙𑀯𑀺𑀓𑀫𑀺𑀤𑀁 𑀢𑀼𑀫𑁆𑀳𑀸𑀓𑀦𑁆𑀢𑀺 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀇𑀤𑀁 𑀪𑀸𑀚𑀦𑀻𑀬𑀪𑀡𑁆𑀟𑀝𑁆𑀞𑀸𑀦𑁂 𑀅𑀕𑁆𑀕𑀪𑀡𑁆𑀟𑀁 𑀧𑀸𑀧𑀼𑀡𑀸𑀢𑀻𑀢𑀺 𑀏𑀢𑁆𑀣 𑀯𑀢𑁆𑀣𑀼.

𑀩𑁆𑀭𑀸𑀳𑁆𑀫𑀡𑀢𑀺𑀲𑁆𑀲𑀪𑀬𑁂 𑀧𑀦 𑀪𑀸𑀢𑀭𑀕𑀸𑀫𑀯𑀸𑀲𑀺𑀦𑁄 𑀦𑀸𑀕𑀢𑁆𑀣𑁂𑀭𑀺𑀬𑀸 𑀅𑀦𑀸𑀭𑁄𑀘𑁂𑀢𑁆𑀯𑀸𑀯 𑀧𑀮𑀸𑀬𑀺𑀁𑀲𑀼. 𑀣𑁂𑀭𑀻 𑀧𑀘𑁆𑀘𑀽𑀲𑀓𑀸𑀮𑁂, ‘‘𑀅𑀢𑀺𑀯𑀺𑀬 𑀅𑀧𑁆𑀧𑀦𑀺𑀕𑁆𑀖𑁄𑀲𑁄 𑀕𑀸𑀫𑁄, 𑀉𑀧𑀥𑀸𑀭𑁂𑀣 𑀢𑀸𑀯𑀸’’𑀢𑀺 𑀤𑀳𑀭𑀪𑀺𑀓𑁆𑀔𑀼𑀦𑀺𑀬𑁄 𑀆𑀳. 𑀢𑀸 𑀕𑀦𑁆𑀢𑁆𑀯𑀸 𑀲𑀩𑁆𑀩𑁂𑀲𑀁 𑀕𑀢𑀪𑀸𑀯𑀁 𑀜𑀢𑁆𑀯𑀸 𑀆𑀕𑀫𑁆𑀫 𑀣𑁂𑀭𑀺𑀬𑀸 𑀆𑀭𑁄𑀘𑁂𑀲𑀼𑀁. 𑀲𑀸 𑀲𑀼𑀢𑁆𑀯𑀸, ‘‘𑀫𑀸 𑀢𑀼𑀫𑁆𑀳𑁂 𑀢𑁂𑀲𑀁 𑀕𑀢𑀪𑀸𑀯𑀁 𑀘𑀺𑀦𑁆𑀢𑀬𑀺𑀢𑁆𑀣, 𑀅𑀢𑁆𑀢𑀦𑁄 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀲𑀼𑀬𑁂𑀯 𑀬𑁄𑀕𑀁 𑀓𑀭𑁄𑀣𑀸’’𑀢𑀺 𑀯𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀧𑀸𑀭𑀼𑀧𑀺𑀢𑁆𑀯𑀸 𑀅𑀢𑁆𑀢𑀤𑁆𑀯𑀸𑀤𑀲𑀫𑀸 𑀕𑀸𑀫𑀤𑁆𑀯𑀸𑀭𑁂 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑁂 𑀅𑀝𑁆𑀞𑀸𑀲𑀺. 𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀤𑁆𑀯𑀸𑀤𑀲𑀦𑁆𑀦𑀫𑁆𑀧𑀺 𑀪𑀺𑀓𑁆𑀔𑀼𑀦𑀻𑀦𑀁 𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸, ‘‘𑀅𑀬𑁆𑀬𑁂, 𑀅𑀜𑁆𑀜𑀢𑁆𑀣 𑀫𑀸 𑀕𑀘𑁆𑀙𑀣, 𑀦𑀺𑀘𑁆𑀘𑀁 𑀇𑀥𑁂𑀯 𑀏𑀣𑀸’’𑀢𑀺 𑀆𑀳. 𑀣𑁂𑀭𑀺𑀬𑀸 𑀧𑀦 𑀓𑀦𑀺𑀝𑁆𑀞𑀪𑀸𑀢𑀸 𑀦𑀸𑀕𑀢𑁆𑀣𑁂𑀭𑁄 𑀦𑀸𑀫 𑀅𑀢𑁆𑀣𑀺. 𑀲𑁄, ‘‘𑀫𑀳𑀦𑁆𑀢𑀁 𑀪𑀬𑀁, 𑀦 𑀲𑀓𑁆𑀓𑀸 𑀇𑀥 𑀬𑀸𑀧𑁂𑀢𑀼𑀁, 𑀧𑀭𑀢𑀻𑀭𑀁 𑀕𑀫𑀺𑀲𑁆𑀲𑀸𑀫𑀸𑀢𑀺 𑀅𑀢𑁆𑀢𑀤𑁆𑀯𑀸𑀤𑀲𑀫𑁄𑀯 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀸 𑀦𑀺𑀓𑁆𑀔𑀦𑁆𑀢𑁄 𑀣𑁂𑀭𑀺𑀁 𑀤𑀺𑀲𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀪𑀸𑀢𑀭𑀕𑀸𑀫𑀁 𑀆𑀕𑀢𑁄. 𑀣𑁂𑀭𑀻, ‘‘𑀣𑁂𑀭𑀸 𑀆𑀕𑀢𑀸’’𑀢𑀺 𑀲𑀼𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, 𑀓𑀺𑀁 𑀅𑀬𑁆𑀬𑀸𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺. 𑀲𑀸, ‘‘𑀅𑀚𑁆𑀚 𑀏𑀓𑀤𑀺𑀯𑀲𑀁 𑀯𑀺𑀳𑀸𑀭𑁂𑀬𑁂𑀯 𑀯𑀲𑀺𑀢𑁆𑀯𑀸 𑀲𑁆𑀯𑁂𑀯 𑀕𑀫𑀺𑀲𑁆𑀲𑀣𑀸’’𑀢𑀺 𑀆𑀳. 𑀣𑁂𑀭𑀸 𑀯𑀺𑀳𑀸𑀭𑀁 𑀅𑀕𑀫𑀁𑀲𑀼.

𑀣𑁂𑀭𑀻 𑀧𑀼𑀦𑀤𑀺𑀯𑀲𑁂 𑀭𑀼𑀓𑁆𑀔𑀫𑀽𑀮𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀇𑀫𑀁 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀣𑀸’’𑀢𑀺 𑀆𑀳. 𑀣𑁂𑀭𑁄, ‘‘𑀯𑀝𑁆𑀝𑀺𑀲𑁆𑀲𑀢𑀺 𑀣𑁂𑀭𑀻’’𑀢𑀺 𑀯𑀢𑁆𑀯𑀸 𑀢𑀼𑀡𑁆𑀳𑀻 𑀅𑀝𑁆𑀞𑀸𑀲𑀺. 𑀥𑀫𑁆𑀫𑀺𑀓𑁄 𑀢𑀸𑀢𑀸 𑀧𑀺𑀡𑁆𑀟𑀧𑀸𑀢𑁄 𑀓𑀼𑀓𑁆𑀓𑀼𑀘𑁆𑀘𑀁 𑀅𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀣𑀸𑀢𑀺. 𑀯𑀝𑁆𑀝𑀺𑀲𑁆𑀲𑀢𑀺 𑀣𑁂𑀭𑀻𑀢𑀺. 𑀲𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂 𑀔𑀺𑀧𑀺, 𑀧𑀢𑁆𑀢𑁄 𑀆𑀓𑀸𑀲𑁂 𑀅𑀝𑁆𑀞𑀸𑀲𑀺. 𑀣𑁂𑀭𑁄, ‘‘𑀲𑀢𑁆𑀢𑀢𑀸𑀮𑀫𑀢𑁆𑀢𑁂 𑀞𑀺𑀢𑀫𑁆𑀧𑀺 𑀪𑀺𑀓𑁆𑀔𑀼𑀦𑀻𑀪𑀢𑁆𑀢𑀫𑁂𑀯, 𑀣𑁂𑀭𑀻𑀢𑀺 𑀯𑀢𑁆𑀯𑀸 𑀪𑀬𑀁 𑀦𑀸𑀫 𑀲𑀩𑁆𑀩𑀓𑀸𑀮𑀁 𑀦 𑀳𑁄𑀢𑀺, 𑀪𑀬𑁂 𑀯𑀽𑀧𑀲𑀦𑁆𑀢𑁂 𑀅𑀭𑀺𑀬𑀯𑀁𑀲𑀁 𑀓𑀣𑀬𑀫𑀸𑀦𑁄, ‘𑀪𑁄 𑀧𑀺𑀡𑁆𑀟𑀧𑀸𑀢𑀺𑀓 𑀪𑀺𑀓𑁆𑀔𑀼𑀦𑀻𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀻𑀢𑀺𑀦𑀸𑀫𑀬𑀺𑀢𑁆𑀣𑀸’𑀢𑀺 𑀘𑀺𑀢𑁆𑀢𑁂𑀦 𑀅𑀦𑀼𑀯𑀤𑀺𑀬𑀫𑀸𑀦𑁄 𑀲𑀦𑁆𑀣𑀫𑁆𑀪𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣 𑀣𑁂𑀭𑀺𑀬𑁄’’𑀢𑀺 𑀫𑀕𑁆𑀕𑀁 𑀆𑀭𑀼𑀳𑀺.

𑀭𑀼𑀓𑁆𑀔𑀤𑁂𑀯𑀢𑀸𑀧𑀺, ‘‘𑀲𑀘𑁂 𑀣𑁂𑀭𑁄 𑀣𑁂𑀭𑀺𑀬𑀸 𑀳𑀢𑁆𑀣𑀢𑁄 𑀧𑀺𑀡𑁆𑀟𑀧𑀸𑀢𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀢𑀺, 𑀦 𑀦𑀁 𑀦𑀺𑀯𑀢𑁆𑀢𑁂𑀲𑁆𑀲𑀸𑀫𑀺, 𑀲𑀘𑁂 𑀧𑀦 𑀦 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀢𑀺, 𑀦𑀺𑀯𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑀬𑀫𑀸𑀦𑀸 𑀞𑀢𑁆𑀯𑀸 𑀣𑁂𑀭𑀲𑁆𑀲 𑀕𑀫𑀦𑀁 𑀤𑀺𑀲𑁆𑀯𑀸 𑀭𑀼𑀓𑁆𑀔𑀸 𑀑𑀭𑀼𑀬𑁆𑀳 𑀧𑀢𑁆𑀢𑀁, 𑀪𑀦𑁆𑀢𑁂, 𑀤𑁂𑀣𑀸𑀢𑀺 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀣𑁂𑀭𑀁 𑀭𑀼𑀓𑁆𑀔𑀫𑀽𑀮𑀁𑀬𑁂𑀯 𑀆𑀦𑁂𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀁 𑀧𑀝𑀺𑀜𑁆𑀜𑀁 𑀓𑀸𑀭𑁂𑀢𑁆𑀯𑀸 𑀤𑁆𑀯𑀸𑀤𑀲 𑀪𑀺𑀓𑁆𑀔𑀼𑀦𑀺𑀬𑁄, 𑀤𑁆𑀯𑀸𑀤𑀲 𑀘 𑀪𑀺𑀓𑁆𑀔𑀽 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀉𑀧𑀝𑁆𑀞𑀳𑀺. 𑀇𑀤𑀁 𑀤𑁂𑀯𑀢𑀸 𑀉𑀲𑁆𑀲𑀼𑀓𑁆𑀓𑀁 𑀆𑀧𑀚𑁆𑀚𑀦𑁆𑀢𑀻𑀢𑀺 𑀏𑀢𑁆𑀣 𑀯𑀢𑁆𑀣𑀼, 𑀢𑀢𑁆𑀭 𑀳𑀺 𑀣𑁂𑀭𑀻 𑀲𑀸𑀭𑀡𑀻𑀬𑀥𑀫𑁆𑀫𑀧𑀽𑀭𑀺𑀓𑀸 𑀅𑀳𑁄𑀲𑀺.

𑀅𑀔𑀡𑁆𑀟𑀸𑀦𑀻𑀢𑀺𑀆𑀤𑀻𑀲𑀼 𑀬𑀲𑁆𑀲 𑀲𑀢𑁆𑀢𑀲𑀼 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀲𑀼 𑀆𑀤𑀺𑀫𑁆𑀳𑀺 𑀯𑀸 𑀅𑀦𑁆𑀢𑁂 𑀯𑀸 𑀲𑀺𑀓𑁆𑀔𑀸𑀧𑀤𑀁 𑀪𑀺𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀲 𑀲𑀻𑀮𑀁 𑀧𑀭𑀺𑀬𑀦𑁆𑀢𑁂 𑀙𑀺𑀦𑁆𑀦𑀲𑀸𑀝𑀓𑁄 𑀯𑀺𑀬 𑀔𑀡𑁆𑀟𑀁 𑀦𑀸𑀫. 𑀬𑀲𑁆𑀲 𑀧𑀦 𑀯𑁂𑀫𑀚𑁆𑀛𑁂 𑀪𑀺𑀦𑁆𑀦𑀁, 𑀢𑀲𑁆𑀲 𑀫𑀚𑁆𑀛𑁂 𑀙𑀺𑀤𑁆𑀤𑀲𑀸𑀝𑀓𑁄 𑀯𑀺𑀬 𑀙𑀺𑀤𑁆𑀤𑀁 𑀦𑀸𑀫 𑀳𑁄𑀢𑀺. 𑀬𑀲𑁆𑀲 𑀧𑀦 𑀧𑀝𑀺𑀧𑀸𑀝𑀺𑀬𑀸 𑀤𑁆𑀯𑁂 𑀢𑀻𑀡𑀺 𑀪𑀺𑀦𑁆𑀦𑀸𑀦𑀺, 𑀢𑀲𑁆𑀲 𑀧𑀺𑀝𑁆𑀞𑀺𑀬𑀁 𑀯𑀸 𑀓𑀼𑀘𑁆𑀙𑀺𑀬𑀁 𑀯𑀸 𑀉𑀝𑁆𑀞𑀺𑀢𑁂𑀦 𑀯𑀺𑀲𑀪𑀸𑀕𑀯𑀡𑁆𑀡𑁂𑀦 𑀓𑀸𑀴𑀭𑀢𑁆𑀢𑀸𑀤𑀻𑀦𑀁 𑀅𑀜𑁆𑀜𑀢𑀭𑀯𑀡𑁆𑀡𑀸 𑀕𑀸𑀯𑀻 𑀯𑀺𑀬 𑀲𑀩𑀮𑀁 𑀦𑀸𑀫 𑀳𑁄𑀢𑀺. 𑀬𑀲𑁆𑀲 𑀧𑀦 𑀅𑀦𑁆𑀢𑀭𑀦𑁆𑀢𑀭𑀸 𑀪𑀺𑀦𑁆𑀦𑀸𑀦𑀺, 𑀢𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀯𑀺𑀲𑀪𑀸𑀕𑀩𑀺𑀦𑁆𑀤𑀼𑀘𑀺𑀢𑁆𑀭𑀸 𑀕𑀸𑀯𑀻 𑀯𑀺𑀬 𑀓𑀫𑁆𑀫𑀸𑀲𑀁 𑀦𑀸𑀫 𑀳𑁄𑀢𑀺. 𑀬𑀲𑁆𑀲 𑀧𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀪𑀺𑀦𑁆𑀦𑀸𑀦𑀺, 𑀢𑀲𑁆𑀲 𑀢𑀸𑀦𑀺 𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀢𑀸𑀦𑀺 𑀧𑀦𑁂𑀢𑀸𑀦𑀺 𑀢𑀡𑁆𑀳𑀸𑀤𑀸𑀲𑀩𑁆𑀬𑀢𑁄 𑀫𑁄𑀘𑁂𑀢𑁆𑀯𑀸 𑀪𑀼𑀚𑀺𑀲𑁆𑀲𑀪𑀸𑀯𑀓𑀭𑀡𑀢𑁄 𑀪𑀼𑀚𑀺𑀲𑁆𑀲𑀸𑀦𑀺. 𑀩𑀼𑀤𑁆𑀥𑀸𑀤𑀻𑀳𑀺 𑀯𑀺𑀜𑁆𑀜𑀽𑀳𑀺 𑀧𑀲𑀢𑁆𑀣𑀢𑁆𑀢𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺. 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀅𑀧𑀭𑀸𑀫𑀝𑁆𑀞𑀢𑁆𑀢𑀸, ‘‘𑀇𑀤𑀁 𑀦𑀸𑀫 𑀢𑁆𑀯𑀁 𑀆𑀧𑀦𑁆𑀦𑀧𑀼𑀩𑁆𑀩𑁄’’𑀢𑀺 𑀓𑁂𑀦𑀘𑀺 𑀧𑀭𑀸𑀫𑀝𑁆𑀞𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀘 𑀅𑀧𑀭𑀸𑀫𑀝𑁆𑀞𑀸𑀦𑀺. 𑀉𑀧𑀘𑀸𑀭𑀲𑀫𑀸𑀥𑀺𑀁 𑀯𑀸 𑀅𑀧𑁆𑀧𑀦𑀸𑀲𑀫𑀸𑀥𑀺𑀁 𑀯𑀸 𑀲𑀁𑀯𑀢𑁆𑀢𑀬𑀦𑁆𑀢𑀻𑀢𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀻𑀮𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻𑀢𑀺 𑀢𑁂𑀲𑀼 𑀢𑁂𑀲𑀼 𑀤𑀺𑀲𑀸𑀪𑀸𑀕𑁂𑀲𑀼 𑀯𑀺𑀳𑀭𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀫𑀸𑀦𑀪𑀸𑀯𑀽𑀧𑀕𑀢𑀲𑀻𑀮𑁄 𑀯𑀺𑀳𑀭𑀢𑀺. 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀜𑁆𑀳𑀺 𑀲𑀻𑀮𑀁 𑀲𑀫𑀼𑀤𑁆𑀤𑀦𑁆𑀢𑀭𑁂𑀧𑀺 𑀤𑁂𑀯𑀮𑁄𑀓𑁂𑀧𑀺 𑀯𑀲𑀦𑁆𑀢𑀸𑀦𑀁 𑀅𑀜𑁆𑀜𑁂𑀲𑀁 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀲𑀻𑀮𑁂𑀦 𑀲𑀫𑀸𑀦𑀫𑁂𑀯 𑀳𑁄𑀢𑀺, 𑀦𑀢𑁆𑀣𑀺 𑀫𑀕𑁆𑀕𑀲𑀻𑀮𑁂 𑀦𑀸𑀦𑀢𑁆𑀢𑀁, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀬𑀸𑀬𑀁 𑀤𑀺𑀝𑁆𑀞𑀻𑀢𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀅𑀭𑀺𑀬𑀸𑀢𑀺 𑀦𑀺𑀤𑁆𑀤𑁄𑀲𑀸. 𑀦𑀺𑀬𑁆𑀬𑀸𑀢𑀻𑀢𑀺 𑀦𑀺𑀬𑁆𑀬𑀸𑀦𑀺𑀓𑀸. 𑀢𑀓𑁆𑀓𑀭𑀲𑁆𑀲𑀸𑀢𑀺 𑀬𑁄 𑀢𑀣𑀸𑀓𑀸𑀭𑀻 𑀳𑁄𑀢𑀺. 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑀢𑁆𑀣𑀁. 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑁄𑀢𑀺 𑀲𑀫𑀸𑀦𑀤𑀺𑀝𑁆𑀞𑀺𑀪𑀸𑀯𑀁 𑀉𑀧𑀕𑀢𑁄 𑀳𑀼𑀢𑁆𑀯𑀸 𑀯𑀺𑀳𑀭𑀢𑀺. 𑀅𑀕𑁆𑀕𑀦𑁆𑀢𑀺 𑀚𑁂𑀝𑁆𑀞𑀓𑀁. 𑀲𑀩𑁆𑀩𑀕𑁄𑀧𑀸𑀦𑀲𑀺𑀬𑁄 𑀲𑀗𑁆𑀕𑀡𑁆𑀳𑀸𑀢𑀻𑀢𑀺 𑀲𑀗𑁆𑀕𑀸𑀳𑀺𑀓𑀁. 𑀲𑀩𑁆𑀩𑀕𑁄𑀧𑀸𑀦𑀲𑀻𑀦𑀁 𑀲𑀗𑁆𑀖𑀸𑀝𑀁 𑀓𑀭𑁄𑀢𑀻𑀢𑀺 𑀲𑀗𑁆𑀖𑀸𑀝𑀦𑀺𑀓𑀁. 𑀲𑀗𑁆𑀖𑀸𑀝𑀦𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀬𑀤𑀺𑀤𑀁 𑀓𑀽𑀝𑀦𑁆𑀢𑀺 𑀬𑀫𑁂𑀢𑀁 𑀓𑀽𑀝𑀸𑀕𑀸𑀭𑀓𑀡𑁆𑀡𑀺𑀓𑀸𑀲𑀗𑁆𑀔𑀸𑀢𑀁 𑀓𑀽𑀝𑀁 𑀦𑀸𑀫. 𑀧𑀜𑁆𑀘𑀪𑀽𑀫𑀺𑀓𑀸𑀤𑀺𑀧𑀸𑀲𑀸𑀤𑀸 𑀳𑀺 𑀓𑀽𑀝𑀩𑀤𑁆𑀥𑀸𑀯 𑀢𑀺𑀝𑁆𑀞𑀦𑁆𑀢𑀺. 𑀬𑀲𑁆𑀫𑀺𑀁 𑀧𑀢𑀺𑀢𑁂 𑀫𑀢𑁆𑀢𑀺𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑁂 𑀧𑀢𑀦𑁆𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀏𑀯𑀫𑁂𑀯 𑀔𑁄𑀢𑀺 𑀬𑀣𑀸 𑀓𑀽𑀝𑀁 𑀓𑀽𑀝𑀸𑀕𑀸𑀭𑀲𑁆𑀲, 𑀏𑀯𑀁 𑀇𑀫𑁂𑀲𑀫𑁆𑀧𑀺 𑀲𑀸𑀭𑀡𑀻𑀬𑀥𑀫𑁆𑀫𑀸𑀦𑀁 𑀬𑀸 𑀅𑀬𑀁 𑀅𑀭𑀺𑀬𑀸 𑀤𑀺𑀝𑁆𑀞𑀺, 𑀲𑀸 𑀅𑀕𑁆𑀕𑀸 𑀘 𑀲𑀗𑁆𑀕𑀸𑀳𑀺𑀓𑀸 𑀘 𑀲𑀗𑁆𑀖𑀸𑀝𑀦𑀺𑀬𑀸 𑀘𑀸𑀢𑀺 𑀤𑀝𑁆𑀞𑀩𑁆𑀩𑀸.

𑁪𑁯𑁩. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀬𑀸𑀬𑀁 𑀤𑀺𑀝𑁆𑀞𑀻𑀢𑀺 𑀏𑀢𑁆𑀣, 𑀪𑀺𑀓𑁆𑀔𑀯𑁂, 𑀬𑀸𑀬𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀤𑀺𑀝𑁆𑀞𑀺 𑀅𑀭𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀸 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀯𑀼𑀢𑁆𑀢𑀸, 𑀲𑀸 𑀓𑀣𑀁 𑀓𑁂𑀦 𑀓𑀸𑀭𑀡𑁂𑀦 𑀦𑀺𑀬𑁆𑀬𑀸𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄𑀯 𑀳𑁄𑀢𑀻𑀢𑀺 𑀏𑀢𑁆𑀢𑀸𑀯𑀢𑀸𑀧𑀺 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄𑀬𑁂𑀯 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀲𑀼𑀧𑁆𑀧𑀡𑀺𑀳𑀺𑀢𑀁 𑀫𑁂 𑀫𑀸𑀦𑀲𑀦𑁆𑀢𑀺 𑀫𑀬𑁆𑀳𑀁 𑀘𑀺𑀢𑁆𑀢𑀁 𑀲𑀼𑀝𑁆𑀞𑀼 𑀞𑀧𑀺𑀢𑀁. 𑀲𑀘𑁆𑀘𑀸𑀦𑀁 𑀩𑁄𑀥𑀸𑀬𑀸𑀢𑀺 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀩𑁄𑀥𑀢𑁆𑀣𑀸𑀬. 𑀅𑀭𑀺𑀬𑀦𑁆𑀢𑀺𑀆𑀤𑀻𑀲𑀼 𑀢𑀁 𑀜𑀸𑀡𑀁 𑀬𑀲𑁆𑀫𑀸 𑀅𑀭𑀺𑀬𑀸𑀦𑀁 𑀳𑁄𑀢𑀺, 𑀦 𑀧𑀼𑀣𑀼𑀚𑁆𑀚𑀦𑀸𑀦𑀁, 𑀢𑀲𑁆𑀫𑀸 𑀅𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀁. 𑀬𑁂𑀲𑀁 𑀧𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄𑀧𑀺 𑀅𑀢𑁆𑀣𑀺, 𑀢𑁂𑀲𑀁𑀬𑁂𑀯 𑀳𑁄𑀢𑀺, 𑀦 𑀅𑀜𑁆𑀜𑁂𑀲𑀁, 𑀢𑀲𑁆𑀫𑀸 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀦 𑀅𑀪𑀸𑀯𑀢𑁄 𑀅𑀲𑀸𑀥𑀸𑀭𑀡𑀁 𑀧𑀼𑀣𑀼𑀚𑁆𑀚𑀦𑁂𑀳𑀻𑀢𑀺 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀲𑀩𑁆𑀩𑀯𑀸𑀭𑁂𑀲𑀼.

𑁪𑁯𑁪. 𑀮𑀪𑀸𑀫𑀺 𑀧𑀘𑁆𑀘𑀢𑁆𑀢𑀁 𑀲𑀫𑀣𑀦𑁆𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀲𑀫𑀣𑀁 𑀮𑀪𑀸𑀫𑀻𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀼𑀢𑀺𑀬𑀫𑁆𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀲𑀫𑀣𑁄𑀢𑀺 𑀏𑀓𑀕𑁆𑀕𑀢𑀸. 𑀦𑀺𑀩𑁆𑀩𑀼𑀢𑀻𑀢𑀺 𑀓𑀺𑀮𑁂𑀲𑀯𑀽𑀧𑀲𑀫𑁄.

𑁪𑁯𑁫. 𑀢𑀣𑀸𑀭𑀽𑀧𑀸𑀬 𑀤𑀺𑀝𑁆𑀞𑀺𑀬𑀸𑀢𑀺 𑀏𑀯𑀭𑀽𑀧𑀸𑀬 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀤𑀺𑀝𑁆𑀞𑀺𑀬𑀸.

𑁪𑁯𑁬. 𑀥𑀫𑁆𑀫𑀢𑀸𑀬𑀸𑀢𑀺 𑀲𑀪𑀸𑀯𑁂𑀦. 𑀥𑀫𑁆𑀫𑀢𑀸 𑀏𑀲𑀸𑀢𑀺 𑀲𑀪𑀸𑀯𑁄 𑀏𑀲. 𑀯𑀼𑀝𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀻𑀢𑀺 𑀲𑀗𑁆𑀖𑀓𑀫𑁆𑀫𑀯𑀲𑁂𑀦 𑀯𑀸 𑀤𑁂𑀲𑀦𑀸𑀬 𑀯𑀸 𑀯𑀼𑀝𑁆𑀞𑀸𑀦𑀁 𑀤𑀺𑀲𑁆𑀲𑀢𑀺. 𑀅𑀭𑀺𑀬𑀲𑀸𑀯𑀓𑁄 𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑁄 𑀕𑀭𑀼𑀓𑀸𑀧𑀢𑁆𑀢𑀻𑀲𑀼 𑀓𑀼𑀝𑀺𑀓𑀸𑀭𑀲𑀤𑀺𑀲𑀁, 𑀮𑀳𑀼𑀓𑀸𑀧𑀢𑁆𑀢𑀻𑀲𑀼 𑀲𑀳𑀲𑁂𑀬𑁆𑀬𑀸𑀤𑀺𑀲𑀤𑀺𑀲𑀁 𑀅𑀘𑀺𑀢𑁆𑀢𑀓𑀸𑀧𑀢𑁆𑀢𑀺𑀁𑀬𑁂𑀯 𑀆𑀧𑀚𑁆𑀚𑀢𑀺, 𑀢𑀫𑁆𑀧𑀺 𑀅𑀲𑀜𑁆𑀘𑀺𑀘𑁆𑀘, 𑀦𑁄 𑀲𑀜𑁆𑀘𑀺𑀘𑁆𑀘, 𑀆𑀧𑀦𑁆𑀦𑀁 𑀦 𑀧𑀝𑀺𑀘𑁆𑀙𑀸𑀤𑁂𑀢𑀺. 𑀢𑀲𑁆𑀫𑀸 𑀅𑀣 𑀔𑁄 𑀦𑀁 𑀔𑀺𑀧𑁆𑀧𑀫𑁂𑀯𑀸𑀢𑀺𑀆𑀤𑀺𑀫𑀸𑀳. 𑀤𑀳𑀭𑁄𑀢𑀺 𑀢𑀭𑀼𑀡𑁄. 𑀓𑀼𑀫𑀸𑀭𑁄𑀢𑀺 𑀦 𑀫𑀳𑀮𑁆𑀮𑀓𑁄. 𑀫𑀦𑁆𑀤𑁄𑀢𑀺 𑀘𑀓𑁆𑀔𑀼𑀲𑁄𑀢𑀸𑀤𑀻𑀦𑀁 𑀫𑀦𑁆𑀤𑀢𑀸𑀬 𑀫𑀦𑁆𑀤𑁄. 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁄𑀢𑀺 𑀅𑀢𑀺𑀤𑀳𑀭𑀢𑀸𑀬 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁄, 𑀤𑀓𑁆𑀔𑀺𑀡𑁂𑀦 𑀯𑀸 𑀯𑀸𑀫𑁂𑀦 𑀯𑀸 𑀧𑀲𑁆𑀲𑁂𑀦 𑀲𑀬𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀗𑁆𑀕𑀸𑀭𑀁 𑀅𑀓𑁆𑀓𑀫𑀺𑀢𑁆𑀯𑀸𑀢𑀺 𑀇𑀢𑁄 𑀘𑀺𑀢𑁄 𑀘 𑀧𑀲𑀸𑀭𑀺𑀢𑁂𑀦 𑀳𑀢𑁆𑀣𑁂𑀦 𑀯𑀸 𑀧𑀸𑀤𑁂𑀦 𑀯𑀸 𑀨𑀼𑀲𑀺𑀢𑁆𑀯𑀸. 𑀏𑀯𑀁 𑀨𑀼𑀲𑀦𑁆𑀢𑀸𑀦𑀁 𑀧𑀦 𑀫𑀦𑀼𑀲𑁆𑀲𑀸𑀦𑀁 𑀦 𑀲𑀻𑀖𑀁 𑀳𑀢𑁆𑀣𑁄 𑀛𑀸𑀬𑀢𑀺, 𑀢𑀣𑀸 𑀳𑀺 𑀏𑀓𑀘𑁆𑀘𑁂 𑀳𑀢𑁆𑀣𑁂𑀦 𑀅𑀗𑁆𑀕𑀸𑀭𑀁 𑀕𑀳𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑀫𑀸𑀦𑀸 𑀤𑀽𑀭𑀫𑁆𑀧𑀺 𑀕𑀘𑁆𑀙𑀦𑁆𑀢𑀺. 𑀤𑀳𑀭𑀲𑁆𑀲 𑀧𑀦 𑀳𑀢𑁆𑀣𑀧𑀸𑀤𑀸 𑀲𑀼𑀔𑀼𑀫𑀸𑀮𑀸 𑀳𑁄𑀦𑁆𑀢𑀺, 𑀲𑁄 𑀨𑀼𑀝𑁆𑀞𑀫𑀢𑁆𑀢𑁂𑀦𑁂𑀯 𑀤𑀬𑁆𑀳𑀫𑀸𑀦𑁄 𑀘𑀺𑀭𑀻𑀢𑀺 𑀲𑀤𑁆𑀤𑀁 𑀓𑀭𑁄𑀦𑁆𑀢𑁄 𑀔𑀺𑀧𑁆𑀧𑀁 𑀧𑀝𑀺𑀲𑀁𑀳𑀭𑀢𑀺, 𑀢𑀲𑁆𑀫𑀸 𑀇𑀥 𑀤𑀳𑀭𑁄𑀯 𑀤𑀲𑁆𑀲𑀺𑀢𑁄. 𑀫𑀳𑀮𑁆𑀮𑀓𑁄 𑀘 𑀤𑀬𑁆𑀳𑀦𑁆𑀢𑁄𑀧𑀺 𑀅𑀥𑀺𑀯𑀸𑀲𑁂𑀢𑀺, 𑀅𑀬𑀁 𑀧𑀦 𑀅𑀥𑀺𑀯𑀸𑀲𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸𑀧𑀺 𑀤𑀳𑀭𑁄𑀯 𑀤𑀲𑁆𑀲𑀺𑀢𑁄. 𑀤𑁂𑀲𑁂𑀢𑀻𑀢𑀺 𑀆𑀧𑀢𑁆𑀢𑀺𑀧𑀝𑀺𑀕𑁆𑀕𑀸𑀳𑀓𑁂 𑀲𑀪𑀸𑀕𑀧𑀼𑀕𑁆𑀕𑀮𑁂 𑀲𑀢𑀺 𑀏𑀓𑀁 𑀤𑀺𑀯𑀲𑀁 𑀯𑀸 𑀭𑀢𑁆𑀢𑀺𑀁 𑀯𑀸 𑀅𑀦𑀥𑀺𑀯𑀸𑀲𑁂𑀢𑁆𑀯𑀸 𑀭𑀢𑁆𑀢𑀺𑀁 𑀘𑀢𑀼𑀭𑀗𑁆𑀕𑁂𑀧𑀺 𑀢𑀫𑁂 𑀲𑀪𑀸𑀕𑀪𑀺𑀓𑁆𑀔𑀼𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀤𑁂𑀲𑁂𑀢𑀺𑀬𑁂𑀯.

𑁪𑁯𑁭. 𑀉𑀘𑁆𑀘𑀸𑀯𑀘𑀸𑀦𑀻𑀢𑀺 𑀉𑀘𑁆𑀘𑀦𑀻𑀘𑀸𑀦𑀺. 𑀓𑀺𑀁 𑀓𑀭𑀡𑀻𑀬𑀸𑀦𑀻𑀢𑀺 𑀓𑀺𑀁 𑀓𑀭𑁄𑀫𑀻𑀢𑀺 𑀏𑀯𑀁 𑀯𑀢𑁆𑀯𑀸 𑀓𑀢𑁆𑀢𑀩𑁆𑀩𑀓𑀫𑁆𑀫𑀸𑀦𑀺. 𑀢𑀢𑁆𑀣 𑀉𑀘𑁆𑀘𑀓𑀫𑁆𑀫𑀁 𑀦𑀸𑀫 𑀘𑀻𑀯𑀭𑀲𑁆𑀲 𑀓𑀭𑀡𑀁 𑀭𑀚𑀦𑀁 𑀘𑁂𑀢𑀺𑀬𑁂 𑀲𑀼𑀥𑀸𑀓𑀫𑁆𑀫𑀁 𑀉𑀧𑁄𑀲𑀣𑀸𑀕𑀸𑀭𑀘𑁂𑀢𑀺𑀬𑀖𑀭𑀩𑁄𑀥𑀺𑀖𑀭𑁂𑀲𑀼 𑀓𑀢𑁆𑀢𑀩𑁆𑀩𑀓𑀫𑁆𑀫𑀦𑁆𑀢𑀺 𑀏𑀯𑀫𑀸𑀤𑀺. 𑀅𑀯𑀘𑀓𑀫𑁆𑀫𑀁 𑀦𑀸𑀫 𑀧𑀸𑀤𑀥𑁄𑀯𑀦𑀫𑀓𑁆𑀔𑀦𑀸𑀤𑀺𑀔𑀼𑀤𑁆𑀤𑀓𑀓𑀫𑁆𑀫𑀁, 𑀅𑀣 𑀯𑀸 𑀘𑁂𑀢𑀺𑀬𑁂 𑀲𑀼𑀥𑀸𑀓𑀫𑁆𑀫𑀸𑀤𑀺 𑀉𑀘𑁆𑀘𑀓𑀫𑁆𑀫𑀁 𑀦𑀸𑀫. 𑀢𑀢𑁆𑀣𑁂𑀯 𑀓𑀲𑀸𑀯𑀧𑀘𑀦𑀉𑀤𑀓𑀸𑀦𑀬𑀦𑀓𑀼𑀘𑁆𑀙𑀓𑀭𑀡 𑀦𑀺𑀬𑁆𑀬𑀸𑀲𑀩𑀦𑁆𑀥𑀦𑀸𑀤𑀺 𑀅𑀯𑀘𑀓𑀫𑁆𑀫𑀁 𑀦𑀸𑀫. 𑀉𑀲𑁆𑀲𑀼𑀓𑁆𑀓𑀁 𑀆𑀧𑀦𑁆𑀦𑁄 𑀳𑁄𑀢𑀻𑀢𑀺 𑀉𑀲𑁆𑀲𑀼𑀓𑁆𑀓𑀪𑀸𑀯𑀁 𑀓𑀢𑁆𑀢𑀩𑁆𑀩𑀢𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀢𑀺𑀩𑁆𑀩𑀸𑀧𑁂𑀓𑁆𑀔𑁄 𑀳𑁄𑀢𑀻𑀢𑀺 𑀩𑀳𑀮𑀧𑀢𑁆𑀣𑀦𑁄 𑀳𑁄𑀢𑀺. 𑀣𑀫𑁆𑀩𑀜𑁆𑀘 𑀆𑀮𑀼𑀫𑁆𑀧𑀢𑀻𑀢𑀺 𑀢𑀺𑀡𑀜𑁆𑀘 𑀆𑀮𑀼𑀫𑁆𑀧𑀫𑀸𑀦𑀸 𑀔𑀸𑀤𑀢𑀺. 𑀯𑀘𑁆𑀙𑀓𑀜𑁆𑀘 𑀅𑀧𑀘𑀺𑀦𑀸𑀢𑀻𑀢𑀺 𑀯𑀘𑁆𑀙𑀓𑀜𑁆𑀘 𑀅𑀧𑀮𑁄𑀓𑁂𑀢𑀺. 𑀢𑀭𑀼𑀡𑀯𑀘𑁆𑀙𑀸 𑀳𑀺 𑀕𑀸𑀯𑀻 𑀅𑀭𑀜𑁆𑀜𑁂 𑀏𑀓𑀢𑁄 𑀆𑀕𑀢𑀁 𑀯𑀘𑁆𑀙𑀓𑀁 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀦𑀺𑀧𑀦𑁆𑀦𑀁 𑀧𑀳𑀸𑀬 𑀤𑀽𑀭𑀁 𑀦 𑀕𑀘𑁆𑀙𑀢𑀺, 𑀯𑀘𑁆𑀙𑀓𑀲𑁆𑀲 𑀆𑀲𑀦𑁆𑀦𑀝𑁆𑀞𑀸𑀦𑁂 𑀘𑀭𑀫𑀸𑀦𑀸 𑀢𑀺𑀡𑀁 𑀆𑀮𑀼𑀫𑁆𑀧𑀺𑀢𑁆𑀯𑀸 𑀕𑀻𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀦𑁆𑀢𑀁 𑀯𑀘𑁆𑀙𑀓𑀫𑁂𑀯 𑀘 𑀯𑀺𑀮𑁄𑀓𑁂𑀢𑀺, 𑀏𑀯𑀫𑁂𑀯 𑀲𑁄𑀢𑀸𑀧𑀦𑁆𑀦𑁄 𑀉𑀘𑁆𑀘𑀸𑀯𑀘𑀸𑀦𑀺 𑀓𑀺𑀁 𑀓𑀭𑀡𑀻𑀬𑀸𑀦𑀺 𑀓𑀭𑁄𑀦𑁆𑀢𑁄 𑀢𑀦𑁆𑀦𑀺𑀦𑁆𑀦𑁄 𑀳𑁄𑀢𑀺, 𑀅𑀲𑀺𑀣𑀺𑀮𑀧𑀽𑀭𑀓𑁄 𑀢𑀺𑀩𑁆𑀩𑀘𑁆𑀙𑀦𑁆𑀤𑁄 𑀩𑀳𑀮𑀧𑀢𑁆𑀣𑀦𑁄 𑀳𑀼𑀢𑁆𑀯𑀸𑀯 𑀓𑀭𑁄𑀢𑀺.

𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀫𑀳𑀸𑀘𑁂𑀢𑀺𑀬𑁂 𑀓𑀺𑀭 𑀲𑀼𑀥𑀸𑀓𑀫𑁆𑀫𑁂 𑀓𑀭𑀺𑀬𑀫𑀸𑀦𑁂 𑀏𑀓𑁄 𑀅𑀭𑀺𑀬𑀲𑀸𑀯𑀓𑁄 𑀏𑀓𑁂𑀦 𑀳𑀢𑁆𑀣𑁂𑀦 𑀲𑀼𑀥𑀸𑀪𑀸𑀚𑀦𑀁, 𑀏𑀓𑁂𑀦 𑀓𑀼𑀘𑁆𑀙𑀁 𑀕𑀳𑁂𑀢𑁆𑀯𑀸 𑀲𑀼𑀥𑀸𑀓𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀘𑁂𑀢𑀺𑀬𑀗𑁆𑀕𑀡𑀁 𑀆𑀭𑀼𑀴𑁆𑀳𑁄. 𑀏𑀓𑁄 𑀓𑀸𑀬𑀤𑀴𑁆𑀳𑀺𑀩𑀳𑀼𑀮𑁄 𑀪𑀺𑀓𑁆𑀔𑀼 𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀅𑀝𑁆𑀞𑀸𑀲𑀺. 𑀣𑁂𑀭𑁄 𑀅𑀜𑁆𑀜𑀲𑁆𑀫𑀺𑀁 𑀲𑀢𑀺 𑀧𑀧𑀜𑁆𑀘𑁄 𑀳𑁄𑀢𑀻𑀢𑀺 𑀢𑀲𑁆𑀫𑀸 𑀞𑀸𑀦𑀸 𑀅𑀜𑁆𑀜𑀁 𑀞𑀸𑀦𑀁 𑀕𑀢𑁄. 𑀲𑁄𑀧𑀺 𑀪𑀺𑀓𑁆𑀔𑀼 𑀢𑀢𑁆𑀣𑁂𑀯 𑀅𑀕𑀫𑀸𑀲𑀺. 𑀣𑁂𑀭𑁄 𑀧𑀼𑀦 𑀅𑀜𑁆𑀜𑀁 𑀞𑀸𑀦𑀦𑁆𑀢𑀺 𑀏𑀯𑀁 𑀓𑀢𑀺𑀧𑀬𑀝𑁆𑀞𑀸𑀦𑁂 𑀆𑀕𑀢𑀁, 𑁋 ‘‘𑀲𑀧𑁆𑀧𑀼𑀭𑀺𑀲 𑀫𑀳𑀦𑁆𑀢𑀁 𑀘𑁂𑀢𑀺𑀬𑀗𑁆𑀕𑀡𑀁 𑀓𑀺𑀁 𑀅𑀜𑁆𑀜𑀲𑁆𑀫𑀺𑀁 𑀞𑀸𑀦𑁂 𑀑𑀓𑀸𑀲𑀁 𑀦 𑀮𑀪𑀣𑀸’’𑀢𑀺 𑀆𑀳. 𑀦 𑀇𑀢𑀭𑁄 𑀧𑀓𑁆𑀓𑀸𑀫𑀻𑀢𑀺.

𑁪𑁯𑁮. 𑀩𑀮𑀢𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀅𑀝𑁆𑀞𑀺𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑀺𑀓𑀪𑀸𑀯𑀁 𑀓𑀢𑁆𑀯𑀸, 𑀅𑀢𑁆𑀣𑀺𑀓𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀫𑀦𑀲𑀺𑀓𑀢𑁆𑀯𑀸𑀢𑀺 𑀫𑀦𑀲𑁆𑀫𑀺𑀁 𑀓𑀭𑀺𑀢𑁆𑀯𑀸. 𑀲𑀩𑁆𑀩𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸𑀢𑀺 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀯𑀺𑀓𑁆𑀔𑁂𑀧𑀁 𑀅𑀓𑀭𑁄𑀦𑁆𑀢𑁄 𑀲𑀓𑀮𑀘𑀺𑀢𑁆𑀢𑁂𑀦 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸. 𑀑𑀳𑀺𑀢𑀲𑁄𑀢𑁄𑀢𑀺 𑀞𑀧𑀺𑀢𑀲𑁄𑀢𑁄. 𑀅𑀭𑀺𑀬𑀲𑀸𑀯𑀓𑀸 𑀳𑀺 𑀧𑀺𑀬𑀥𑀫𑁆𑀫𑀲𑁆𑀲𑀯𑀦𑀸 𑀳𑁄𑀦𑁆𑀢𑀺, 𑀥𑀫𑁆𑀫𑀲𑁆𑀲𑀯𑀦𑀕𑁆𑀕𑀁 𑀕𑀦𑁆𑀢𑁆𑀯𑀸 𑀦𑀺𑀤𑁆𑀤𑀸𑀬𑀫𑀸𑀦𑀸 𑀯𑀸 𑀬𑁂𑀦 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀲𑀮𑁆𑀮𑀧𑀫𑀸𑀦𑀸 𑀯𑀸 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸 𑀯𑀸 𑀦 𑀦𑀺𑀲𑀻𑀤𑀦𑁆𑀢𑀺, 𑀅𑀣 𑀔𑁄 𑀅𑀫𑀢𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀯𑀺𑀬 𑀅𑀢𑀺𑀢𑁆𑀢𑀸𑀯 𑀳𑁄𑀦𑁆𑀢𑀺 𑀥𑀫𑁆𑀫𑀲𑁆𑀲𑀯𑀦𑁂, 𑀅𑀣 𑀅𑀭𑀼𑀡𑀁 𑀉𑀕𑁆𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳.

𑁫𑁦𑁦. 𑀥𑀫𑁆𑀫𑀢𑀸 𑀲𑀼𑀲𑀫𑀦𑁆𑀦𑀺𑀝𑁆𑀞𑀸 𑀳𑁄𑀢𑀻𑀢𑀺 𑀲𑀪𑀸𑀯𑁄 𑀲𑀼𑀝𑁆𑀞𑀼 𑀲𑀫𑀦𑁆𑀦𑁂𑀲𑀺𑀢𑁄 𑀳𑁄𑀢𑀺. 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸𑀢𑀺 𑀓𑀭𑀡𑀯𑀘𑀦𑀁, 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀢𑀜𑀸𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀢𑁆𑀢𑀗𑁆𑀕𑀲𑀫𑀦𑁆𑀦𑀸𑀕𑀢𑁄𑀢𑀺 𑀏𑀯𑀁 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀫𑀳𑀸𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀅𑀬𑀁 𑀢𑀸𑀯 𑀆𑀘𑀭𑀺𑀬𑀸𑀦𑀁 𑀲𑀫𑀸𑀦𑀓𑀣𑀸. 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀳𑀺 𑀩𑀳𑀼𑀘𑀺𑀢𑁆𑀢𑀓𑁆𑀔𑀡𑀺𑀓𑁄 𑀦𑀸𑀫 𑀦𑀢𑁆𑀣𑀺.

𑀯𑀺𑀢𑀡𑁆𑀟𑀯𑀸𑀤𑀻 𑀧𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑁄 𑀦𑀸𑀫 𑀫𑀕𑁆𑀕𑁄 𑀦𑀢𑁆𑀣𑀺, ‘‘𑀏𑀯𑀁 𑀪𑀸𑀯𑁂𑀬𑁆𑀬 𑀲𑀢𑁆𑀢 𑀯𑀲𑁆𑀲𑀸𑀦𑀻’’𑀢𑀺 𑀳𑀺 𑀯𑀘𑀦𑀢𑁄 𑀲𑀢𑁆𑀢𑀧𑀺 𑀯𑀲𑁆𑀲𑀸𑀦𑀺 𑀫𑀕𑁆𑀕𑀪𑀸𑀯𑀦𑀸 𑀳𑁄𑀦𑁆𑀢𑀺. 𑀓𑀺𑀮𑁂𑀲𑀸 𑀧𑀦 𑀮𑀳𑀼 𑀙𑀺𑀚𑁆𑀚𑀦𑁆𑀢𑀸 𑀲𑀢𑁆𑀢𑀳𑀺 𑀜𑀸𑀡𑁂𑀳𑀺 𑀙𑀺𑀚𑁆𑀚𑀦𑁆𑀢𑀻𑀢𑀺 𑀯𑀤𑀢𑀺. 𑀲𑁄 𑀲𑀼𑀢𑁆𑀢𑀁 𑀆𑀳𑀭𑀸𑀢𑀺 𑀯𑀢𑁆𑀢𑀩𑁆𑀩𑁄, 𑀅𑀤𑁆𑀥𑀸 𑀅𑀜𑁆𑀜𑀁 𑀲𑀼𑀢𑁆𑀢𑀁 𑀅𑀧𑀲𑁆𑀲𑀦𑁆𑀢𑁄, ‘‘𑀇𑀤𑀫𑀲𑁆𑀲 𑀧𑀞𑀫𑀁 𑀜𑀸𑀡𑀁 𑀅𑀥𑀺𑀕𑀢𑀁 𑀳𑁄𑀢𑀺, 𑀇𑀤𑀫𑀲𑁆𑀲 𑀤𑀼𑀢𑀺𑀬𑀁 𑀜𑀸𑀡𑀁…𑀧𑁂… 𑀇𑀤𑀫𑀲𑁆𑀲 𑀲𑀢𑁆𑀢𑀫𑀁 𑀜𑀸𑀡𑀁 𑀅𑀥𑀺𑀕𑀢𑀁 𑀳𑁄𑀢𑀻’’𑀢𑀺 𑀇𑀫𑀫𑁂𑀯 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀲𑁆𑀲𑀢𑀺. 𑀢𑀢𑁄 𑀯𑀢𑁆𑀢𑀩𑁆𑀩𑁄 𑀓𑀺𑀁 𑀧𑀦𑀺𑀤𑀁 𑀲𑀼𑀢𑁆𑀢𑀁 𑀦𑁂𑀬𑁆𑀬𑀢𑁆𑀣𑀁 𑀦𑀻𑀢𑀢𑁆𑀣𑀦𑁆𑀢𑀺. 𑀢𑀢𑁄 𑀯𑀓𑁆𑀔𑀢𑀺 𑁋 ‘‘𑀦𑀻𑀢𑀢𑁆𑀣𑀢𑁆𑀣𑀁, 𑀬𑀣𑀸𑀲𑀼𑀢𑁆𑀢𑀁 𑀢𑀣𑁂𑀯 𑀅𑀢𑁆𑀣𑁄’’𑀢𑀺. 𑀲𑁄 𑀯𑀢𑁆𑀢𑀩𑁆𑀩𑁄 𑁋 ‘‘𑀥𑀫𑁆𑀫𑀢𑀸 𑀲𑀼𑀲𑀫𑀦𑁆𑀦𑀺𑀝𑁆𑀞𑀸 𑀳𑁄𑀢𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸𑀢𑀺 𑀏𑀢𑁆𑀣 𑀓𑁄 𑀅𑀢𑁆𑀣𑁄’’𑀢𑀺? 𑀅𑀤𑁆𑀥𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀢𑁆𑀣𑁄𑀢𑀺 𑀯𑀓𑁆𑀔𑀢𑀺. 𑀢𑀢𑁄 𑀧𑀼𑀘𑁆𑀙𑀺𑀢𑀩𑁆𑀩𑁄, ‘‘𑀫𑀕𑁆𑀕𑀲𑀫𑀗𑁆𑀕𑀻 𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀨𑀮𑀲𑀫𑀗𑁆𑀕𑀻’’𑀢𑀺. 𑀚𑀸𑀦𑀦𑁆𑀢𑁄, ‘‘𑀨𑀮𑀲𑀫𑀗𑁆𑀕𑀻 𑀲𑀘𑁆𑀙𑀺𑀓𑀭𑁄𑀢𑀻’’𑀢𑀺 𑀯𑀓𑁆𑀔𑀢𑀺. 𑀢𑀢𑁄 𑀯𑀢𑁆𑀢𑀩𑁆𑀩𑁄, 𑁋 ‘‘𑀏𑀯𑀁 𑀲𑀢𑁆𑀢𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀻𑀢𑀺 𑀇𑀥 𑀫𑀕𑁆𑀕𑀁 𑀅𑀪𑀸𑀯𑁂𑀢𑁆𑀯𑀸 𑀫𑀡𑁆𑀟𑀽𑀓𑁄 𑀯𑀺𑀬 𑀉𑀧𑁆𑀧𑀢𑀺𑀢𑁆𑀯𑀸 𑀅𑀭𑀺𑀬𑀲𑀸𑀯𑀓𑁄 𑀨𑀮𑀫𑁂𑀯 𑀕𑀡𑁆𑀳𑀺𑀲𑁆𑀲𑀢𑀺. 𑀫𑀸 𑀲𑀼𑀢𑁆𑀢𑀁 𑀫𑁂 𑀮𑀤𑁆𑀥𑀦𑁆𑀢𑀺 𑀬𑀁 𑀯𑀸 𑀢𑀁 𑀯𑀸 𑀅𑀯𑀘. 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁂𑀦 𑀦𑀸𑀫 𑀆𑀘𑀭𑀺𑀬𑀲𑀦𑁆𑀢𑀺𑀓𑁂 𑀯𑀲𑀺𑀢𑁆𑀯𑀸 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀢𑁆𑀣𑀭𑀲𑀁 𑀯𑀺𑀤𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑀁 𑀳𑁄𑀢𑀻’’𑀢𑀺. ‘‘𑀇𑀫𑀸𑀦𑀺 𑀲𑀢𑁆𑀢 𑀜𑀸𑀡𑀸𑀦𑀺 𑀅𑀭𑀺𑀬𑀲𑀸𑀯𑀓𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑁂𑀯, 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀩𑀳𑀼𑀘𑀺𑀢𑁆𑀢𑀓𑁆𑀔𑀡𑀺𑀓𑁄 𑀦𑀸𑀫 𑀦𑀢𑁆𑀣𑀺, 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑁄𑀬𑁂𑀯𑀸’’𑀢𑀺 𑀲𑀜𑁆𑀜𑀸𑀧𑁂𑀢𑀩𑁆𑀩𑁄. 𑀲𑀘𑁂 𑀲𑀜𑁆𑀚𑀸𑀦𑀸𑀢𑀺 𑀲𑀜𑁆𑀚𑀸𑀦𑀸𑀢𑀼. 𑀦𑁄 𑀘𑁂 𑀲𑀜𑁆𑀚𑀸𑀦𑀸𑀢𑀺, ‘‘𑀕𑀘𑁆𑀙 𑀧𑀸𑀢𑁄𑀯 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀬𑀸𑀕𑀼𑀁 𑀧𑀺𑀯𑀸𑀳𑀻’’𑀢𑀺 𑀉𑀬𑁆𑀬𑁄𑀚𑁂𑀢𑀩𑁆𑀩𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀓𑁄𑀲𑀫𑁆𑀩𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀩𑁆𑀭𑀳𑁆𑀫𑀦𑀺𑀫𑀦𑁆𑀢𑀦𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦𑁧. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀩𑁆𑀭𑀳𑁆𑀫𑀦𑀺𑀫𑀦𑁆𑀢𑀦𑀺𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀧𑀸𑀧𑀓𑀁 𑀤𑀺𑀝𑁆𑀞𑀺𑀕𑀢𑀦𑁆𑀢𑀺 𑀮𑀸𑀫𑀓𑀸 𑀲𑀲𑁆𑀲𑀢𑀤𑀺𑀝𑁆𑀞𑀺. 𑀇𑀤𑀁 𑀦𑀺𑀘𑁆𑀘𑀦𑁆𑀢𑀺 𑀇𑀤𑀁 𑀲𑀳 𑀓𑀸𑀬𑁂𑀦 𑀩𑁆𑀭𑀳𑁆𑀫𑀝𑁆𑀞𑀸𑀦𑀁 𑀅𑀦𑀺𑀘𑁆𑀘𑀁 ‘‘𑀦𑀺𑀘𑁆𑀘’’𑀦𑁆𑀢𑀺 𑀯𑀤𑀢𑀺. 𑀥𑀼𑀯𑀸𑀤𑀻𑀦𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. 𑀢𑀢𑁆𑀣 𑀥𑀼𑀯𑀦𑁆𑀢𑀺 𑀣𑀺𑀭𑀁. 𑀲𑀲𑁆𑀲𑀢𑀦𑁆𑀢𑀺 𑀲𑀤𑀸 𑀯𑀺𑀚𑁆𑀚𑀫𑀸𑀦𑀁. 𑀓𑁂𑀯𑀮𑀦𑁆𑀢𑀺 𑀅𑀔𑀡𑁆𑀟𑀁 𑀲𑀓𑀮𑀁. 𑀅𑀘𑀯𑀦𑀥𑀫𑁆𑀫𑀦𑁆𑀢𑀺 𑀅𑀘𑀯𑀦𑀲𑀪𑀸𑀯𑀁. 𑀇𑀤𑀜𑁆𑀳𑀺 𑀦 𑀚𑀸𑀬𑀢𑀻𑀢𑀺𑀆𑀤𑀻𑀲𑀼 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀓𑁄𑀘𑀺 𑀚𑀸𑀬𑀦𑀓𑁄 𑀯𑀸 𑀚𑀻𑀬𑀦𑀓𑁄 𑀯𑀸 𑀫𑀻𑀬𑀦𑀓𑁄 𑀯𑀸 𑀘𑀯𑀦𑀓𑁄 𑀯𑀸 𑀉𑀧𑀧𑀚𑁆𑀚𑀦𑀓𑁄 𑀯𑀸 𑀦𑀢𑁆𑀣𑀻𑀢𑀺 𑀲𑀦𑁆𑀥𑀸𑀬 𑀯𑀤𑀢𑀺. 𑀇𑀢𑁄 𑀘 𑀧𑀦𑀜𑁆𑀜𑀦𑁆𑀢𑀺 𑀇𑀢𑁄 𑀲𑀳 𑀓𑀸𑀬𑀓𑀸 𑀩𑁆𑀭𑀳𑁆𑀫𑀝𑁆𑀞𑀸𑀦𑀸 𑀉𑀢𑁆𑀢𑀭𑀺 𑀅𑀜𑁆𑀜𑀁 𑀦𑀺𑀲𑁆𑀲𑀭𑀡𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀏𑀯𑀫𑀲𑁆𑀲 𑀣𑀸𑀫𑀕𑀢𑀸 𑀲𑀲𑁆𑀲𑀢𑀤𑀺𑀝𑁆𑀞𑀺 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺. 𑀏𑀯𑀁𑀯𑀸𑀤𑀻 𑀧𑀦 𑀲𑁄 𑀉𑀧𑀭𑀺 𑀢𑀺𑀲𑁆𑀲𑁄 𑀛𑀸𑀦𑀪𑀽𑀫𑀺𑀬𑁄 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺 𑀦𑀺𑀩𑁆𑀩𑀸𑀦𑀦𑁆𑀢𑀺 𑀲𑀩𑁆𑀩𑀁 𑀧𑀝𑀺𑀩𑀸𑀳𑀢𑀺. 𑀅𑀯𑀺𑀚𑁆𑀚𑀸𑀕𑀢𑁄𑀢𑀺 𑀅𑀯𑀺𑀚𑁆𑀚𑀸𑀬 𑀕𑀢𑁄 𑀲𑀫𑀦𑁆𑀦𑀸𑀕𑀢𑁄 𑀅𑀜𑁆𑀜𑀸𑀡𑀻 𑀅𑀦𑁆𑀥𑀻𑀪𑀽𑀢𑁄. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑁄 𑀦𑀸𑀫.

𑁫𑁦𑁨. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀭𑁄 𑀧𑀸𑀧𑀺𑀫𑀸𑀢𑀺 𑀫𑀸𑀭𑁄 𑀓𑀣𑀁 𑀪𑀕𑀯𑀦𑁆𑀢𑀁 𑀅𑀤𑁆𑀤𑀲? 𑀲𑁄 𑀓𑀺𑀭 𑀅𑀢𑁆𑀢𑀦𑁄 𑀪𑀯𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀸𑀮𑁂𑀦 𑀓𑀸𑀮𑀁 𑀲𑀢𑁆𑀣𑀸𑀭𑀁 𑀆𑀯𑀚𑁆𑀚𑁂𑀢𑀺 𑁋 ‘‘𑀅𑀚𑁆𑀚 𑀲𑀫𑀡𑁄 𑀕𑁄𑀢𑀫𑁄 𑀓𑀢𑀭𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀯𑀲𑀢𑀻’’𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀆𑀯𑀚𑁆𑀚𑀦𑁆𑀢𑁄, ‘‘𑀉𑀓𑁆𑀓𑀝𑁆𑀞𑀁 𑀦𑀺𑀲𑁆𑀲𑀸𑀬 𑀲𑀼𑀪𑀕𑀯𑀦𑁂 𑀯𑀺𑀳𑀭𑀢𑀻’’𑀢𑀺 𑀜𑀢𑁆𑀯𑀸, ‘‘𑀓𑀢𑁆𑀣 𑀦𑀼 𑀔𑁄 𑀕𑀢𑁄’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑀁 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸, ‘‘𑀲𑀫𑀡𑁄 𑀕𑁄𑀢𑀫𑁄 𑀩𑁆𑀭𑀳𑁆𑀫𑀮𑁄𑀓𑀁 𑀕𑀘𑁆𑀙𑀢𑀺, 𑀬𑀸𑀯 𑀢𑀢𑁆𑀣 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸 𑀩𑁆𑀭𑀳𑁆𑀫𑀕𑀡𑀁 𑀫𑀫 𑀯𑀺𑀲𑀬𑀸 𑀦𑀸𑀢𑀺𑀓𑁆𑀓𑀫𑁂𑀢𑀺, 𑀢𑀸𑀯 𑀕𑀦𑁆𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀬𑀁 𑀯𑀺𑀙𑀦𑁆𑀤𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀣𑀼 𑀧𑀤𑀸𑀦𑀼𑀧𑀤𑀺𑀓𑁄 𑀕𑀦𑁆𑀢𑁆𑀯𑀸 𑀩𑁆𑀭𑀳𑁆𑀫𑀕𑀡𑀲𑁆𑀲 𑀅𑀦𑁆𑀢𑀭𑁂 𑀅𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀅𑀝𑁆𑀞𑀸𑀲𑀺. 𑀲𑁄, ‘‘𑀲𑀢𑁆𑀣𑀸𑀭𑀸 𑀩𑀓𑀩𑁆𑀭𑀳𑁆𑀫𑀸 𑀅𑀧𑀲𑀸𑀤𑀺𑀢𑁄’’𑀢𑀺 𑀜𑀢𑁆𑀯𑀸 𑀩𑁆𑀭𑀳𑁆𑀫𑀼𑀦𑁄 𑀉𑀧𑀢𑁆𑀣𑀫𑁆𑀪𑁄 𑀳𑀼𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀭𑁄 𑀧𑀸𑀧𑀺𑀫𑀸’’𑀢𑀺.

𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀁 𑀅𑀦𑁆𑀯𑀸𑀯𑀺𑀲𑀺𑀢𑁆𑀯𑀸𑀢𑀺 𑀏𑀓𑀲𑁆𑀲 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀲𑁆𑀲 𑀲𑀭𑀻𑀭𑀁 𑀧𑀯𑀺𑀲𑀺𑀢𑁆𑀯𑀸. 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀧𑀦 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸𑀦𑀁 𑀯𑀸 𑀅𑀦𑁆𑀯𑀸𑀯𑀺𑀲𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀫𑁂𑀢𑀫𑀸𑀲𑀤𑁄𑀢𑀺 𑀫𑀸 𑀏𑀢𑀁 𑀅𑀧𑀲𑀸𑀤𑀬𑀺𑀢𑁆𑀣. 𑀅𑀪𑀺𑀪𑀽𑀢𑀺 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑁄 𑀚𑁂𑀝𑁆𑀞𑀓𑁄. 𑀅𑀦𑀪𑀺𑀪𑀽𑀢𑁄𑀢𑀺 𑀅𑀜𑁆𑀜𑁂𑀳𑀺 𑀅𑀦𑀪𑀺𑀪𑀽𑀢𑁄. 𑀅𑀜𑁆𑀜𑀤𑀢𑁆𑀣𑀽𑀢𑀺 𑀏𑀓𑀁𑀲𑀯𑀘𑀦𑁂 𑀦𑀺𑀧𑀸𑀢𑁄. 𑀤𑀲𑁆𑀲𑀦𑀯𑀲𑁂𑀦 𑀤𑀲𑁄, 𑀲𑀩𑁆𑀩𑀁 𑀧𑀲𑁆𑀲𑀢𑀻𑀢𑀺 𑀤𑀻𑀧𑁂𑀢𑀺. 𑀯𑀲𑀯𑀢𑁆𑀢𑀻𑀢𑀺 𑀲𑀩𑁆𑀩𑀚𑀦𑀁 𑀯𑀲𑁂 𑀯𑀢𑁆𑀢𑁂𑀢𑀺. 𑀇𑀲𑁆𑀲𑀭𑁄𑀢𑀺 𑀮𑁄𑀓𑁂 𑀇𑀲𑁆𑀲𑀭𑁄. 𑀓𑀢𑁆𑀢𑀸 𑀦𑀺𑀫𑁆𑀫𑀸𑀢𑀸𑀢𑀺 𑀮𑁄𑀓𑀲𑁆𑀲 𑀓𑀢𑁆𑀢𑀸 𑀘 𑀦𑀺𑀫𑁆𑀫𑀸𑀢𑀸 𑀘, 𑀧𑀣𑀯𑀻𑀳𑀺𑀫𑀯𑀦𑁆𑀢𑀲𑀺𑀦𑁂𑀭𑀼𑀘𑀓𑁆𑀓𑀯𑀸𑀴𑀫𑀳𑀸𑀲𑀫𑀼𑀤𑁆𑀤𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀘 𑀇𑀫𑀺𑀦𑀸 𑀦𑀺𑀫𑁆𑀫𑀺𑀢𑀸𑀢𑀺 𑀤𑀻𑀧𑁂𑀢𑀺.

𑀲𑁂𑀝𑁆𑀞𑁄 𑀲𑀚𑀺𑀢𑀸𑀢𑀺 𑀅𑀬𑀁 𑀮𑁄𑀓𑀲𑁆𑀲 𑀉𑀢𑁆𑀢𑀫𑁄 𑀘 𑀲𑀚𑀺𑀢𑀸 𑀘. ‘‘𑀢𑁆𑀯𑀁 𑀔𑀢𑁆𑀢𑀺𑀬𑁄 𑀦𑀸𑀫 𑀳𑁄𑀳𑀺, 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡𑁄 𑀦𑀸𑀫, 𑀯𑁂𑀲𑁆𑀲𑁄 𑀦𑀸𑀫, 𑀲𑀼𑀤𑁆𑀤𑁄 𑀦𑀸𑀫, 𑀕𑀳𑀝𑁆𑀞𑁄 𑀦𑀸𑀫, 𑀧𑀩𑁆𑀩𑀚𑀺𑀢𑁄 𑀦𑀸𑀫, 𑀅𑀦𑁆𑀢𑀫𑀲𑁄 𑀑𑀝𑁆𑀞𑁄 𑀳𑁄𑀳𑀺, 𑀕𑁄𑀡𑁄 𑀳𑁄𑀳𑀻’’𑀢𑀺 𑀏𑀯𑀁 𑀲𑀢𑁆𑀢𑀸𑀦𑀁 𑀯𑀺𑀲𑀚𑁆𑀚𑁂𑀢𑀸 𑀅𑀬𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀯𑀲𑀻 𑀧𑀺𑀢𑀸 𑀪𑀽𑀢𑀪𑀩𑁆𑀬𑀸𑀦𑀦𑁆𑀢𑀺 𑀅𑀬𑀁 𑀘𑀺𑀡𑁆𑀡𑀯𑀲𑀺𑀢𑀸𑀬 𑀯𑀲𑀻, 𑀅𑀬𑀁 𑀧𑀺𑀢𑀸 𑀪𑀽𑀢𑀸𑀦𑀜𑁆𑀘 𑀪𑀩𑁆𑀬𑀸𑀦𑀜𑁆𑀘𑀸𑀢𑀺 𑀯𑀤𑀢𑀺. 𑀢𑀢𑁆𑀣 𑀅𑀡𑁆𑀟𑀚𑀚𑀮𑀸𑀩𑀼𑀚𑀸 𑀲𑀢𑁆𑀢𑀸 𑀅𑀦𑁆𑀢𑁄𑀅𑀡𑁆𑀟𑀓𑁄𑀲𑁂 𑀘𑁂𑀯 𑀅𑀦𑁆𑀢𑁄𑀯𑀢𑁆𑀣𑀺𑀫𑁆𑀳𑀺 𑀘 𑀪𑀩𑁆𑀬𑀸 𑀦𑀸𑀫, 𑀩𑀳𑀺 𑀦𑀺𑀓𑁆𑀔𑀦𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀪𑀽𑀢𑀸. 𑀲𑀁𑀲𑁂𑀤𑀚𑀸 𑀧𑀞𑀫𑀘𑀺𑀢𑁆𑀢𑀓𑁆𑀔𑀡𑁂 𑀪𑀩𑁆𑀬𑀸, 𑀤𑀼𑀢𑀺𑀬𑀢𑁄 𑀧𑀝𑁆𑀞𑀸𑀬 𑀪𑀽𑀢𑀸. 𑀑𑀧𑀧𑀸𑀢𑀺𑀓𑀸 𑀧𑀞𑀫𑀇𑀭𑀺𑀬𑀸𑀧𑀣𑁂 𑀪𑀩𑁆𑀬𑀸, 𑀤𑀼𑀢𑀺𑀬𑀢𑁄 𑀧𑀝𑁆𑀞𑀸𑀬 𑀪𑀽𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀲𑀩𑁆𑀩𑁂𑀧𑀺 𑀏𑀢𑀲𑁆𑀲 𑀧𑀼𑀢𑁆𑀢𑀸𑀢𑀺 𑀲𑀜𑁆𑀜𑀸𑀬, ‘‘𑀧𑀺𑀢𑀸 𑀪𑀽𑀢𑀪𑀩𑁆𑀬𑀸𑀦’’𑀦𑁆𑀢𑀺 𑀆𑀳.

𑀧𑀣𑀯𑀻𑀕𑀭𑀳𑀓𑀸𑀢𑀺 𑀬𑀣𑀸 𑀢𑁆𑀯𑀁 𑀏𑀢𑀭𑀳𑀺, ‘‘𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸’’𑀢𑀺 𑀧𑀣𑀯𑀺𑀁 𑀕𑀭𑀳𑀲𑀺 𑀚𑀺𑀕𑀼𑀘𑁆𑀙𑀲𑀺, 𑀏𑀯𑀁 𑀢𑁂𑀧𑀺 𑀧𑀣𑀯𑀻𑀕𑀭𑀳𑀓𑀸 𑀅𑀳𑁂𑀲𑀼𑀁, 𑀦 𑀓𑁂𑀯𑀮𑀁 𑀢𑁆𑀯𑀁𑀬𑁂𑀯𑀸𑀢𑀺 𑀤𑀻𑀧𑁂𑀢𑀺. 𑀆𑀧𑀕𑀭𑀳𑀓𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀳𑀻𑀦𑁂 𑀓𑀸𑀬𑁂 𑀧𑀢𑀺𑀝𑁆𑀞𑀺𑀢𑀸𑀢𑀺 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀸. 𑀧𑀣𑀯𑀻𑀧𑀲𑀁𑀲𑀓𑀸𑀢𑀺 𑀬𑀣𑀸 𑀢𑁆𑀯𑀁 𑀕𑀭𑀳𑀲𑀺, 𑀏𑀯𑀁 𑀅𑀕𑀭𑀳𑀺𑀢𑁆𑀯𑀸, ‘‘𑀦𑀺𑀘𑁆𑀘𑀸 𑀥𑀼𑀯𑀸 𑀲𑀲𑁆𑀲𑀢𑀸 𑀅𑀘𑁆𑀙𑁂𑀚𑁆𑀚𑀸 𑀅𑀪𑁂𑀚𑁆𑀚𑀸 𑀅𑀓𑁆𑀔𑀬𑀸’’𑀢𑀺 𑀏𑀯𑀁 𑀧𑀣𑀯𑀻𑀧𑀲𑀁𑀲𑀓𑀸 𑀧𑀣𑀯𑀺𑀬𑀸 𑀯𑀡𑁆𑀡𑀯𑀸𑀤𑀺𑀦𑁄 𑀅𑀳𑁂𑀲𑀼𑀦𑁆𑀢𑀺 𑀯𑀤𑀢𑀺. 𑀧𑀣𑀯𑀸𑀪𑀺𑀦𑀦𑁆𑀤𑀺𑀦𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀧𑀣𑀯𑀺𑀬𑀸 𑀅𑀪𑀺𑀦𑀦𑁆𑀤𑀺𑀦𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀡𑀻𑀢𑁂 𑀓𑀸𑀬𑁂 𑀧𑀢𑀺𑀝𑁆𑀞𑀺𑀢𑀸𑀢𑀺 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸. 𑀢𑀁 𑀢𑀸𑀳𑀦𑁆𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀢𑀁 𑀅𑀳𑀁. 𑀇𑀗𑁆𑀖𑀸𑀢𑀺 𑀘𑁄𑀤𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀉𑀧𑀸𑀢𑀺𑀯𑀢𑁆𑀢𑀺𑀢𑁆𑀣𑁄𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀣. ‘‘𑀉𑀧𑀸𑀢𑀺𑀯𑀢𑁆𑀢𑀺𑀢𑁄’’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. 𑀤𑀡𑁆𑀟𑁂𑀦 𑀧𑀝𑀺𑀧𑁆𑀧𑀡𑀸𑀫𑁂𑀬𑁆𑀬𑀸𑀢𑀺 𑀘𑀢𑀼𑀳𑀢𑁆𑀣𑁂𑀦 𑀫𑀼𑀕𑁆𑀕𑀭𑀤𑀡𑁆𑀟𑁂𑀦 𑀧𑁄𑀣𑁂𑀢𑁆𑀯𑀸 𑀧𑀮𑀸𑀧𑁂𑀬𑁆𑀬. 𑀦𑀭𑀓𑀧𑀧𑀸𑀢𑁂𑀢𑀺 𑀲𑀢𑀧𑁄𑀭𑀺𑀲𑁂 𑀫𑀳𑀸𑀲𑁄𑀩𑁆𑀪𑁂. 𑀯𑀺𑀭𑀸𑀥𑁂𑀬𑁆𑀬𑀸𑀢𑀺 𑀳𑀢𑁆𑀣𑁂𑀦 𑀕𑀳𑀡𑀬𑀼𑀢𑁆𑀢𑁂 𑀯𑀸 𑀧𑀸𑀤𑁂𑀦 𑀧𑀢𑀺𑀝𑁆𑀞𑀸𑀦𑀬𑀼𑀢𑁆𑀢𑁂 𑀯𑀸 𑀞𑀸𑀦𑁂 𑀕𑀳𑀡𑀧𑀢𑀺𑀝𑁆𑀞𑀸𑀦𑀸𑀦𑀺 𑀓𑀸𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬. 𑀦𑀦𑀼 𑀢𑁆𑀯𑀁 𑀪𑀺𑀓𑁆𑀔𑀼 𑀧𑀲𑁆𑀲𑀲𑀻𑀢𑀺 𑀪𑀺𑀓𑁆𑀔𑀼 𑀦𑀦𑀼 𑀢𑁆𑀯𑀁 𑀇𑀫𑀁 𑀩𑁆𑀭𑀳𑁆𑀫𑀧𑀭𑀺𑀲𑀁 𑀲𑀦𑁆𑀦𑀺𑀧𑀢𑀺𑀢𑀁 𑀑𑀪𑀸𑀲𑀫𑀸𑀦𑀁 𑀯𑀺𑀭𑁄𑀘𑀫𑀸𑀦𑀁 𑀚𑁄𑀢𑀬𑀫𑀸𑀦𑀁 𑀧𑀲𑁆𑀲𑀲𑀻𑀢𑀺 𑀩𑁆𑀭𑀳𑁆𑀫𑀼𑀦𑁄 𑀑𑀯𑀸𑀤𑁂 𑀞𑀺𑀢𑀸𑀦𑀁 𑀇𑀤𑁆𑀥𑀸𑀦𑀼𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀇𑀢𑀺 𑀔𑁄 𑀫𑀁, 𑀪𑀺𑀓𑁆𑀔𑀯𑁂, 𑀫𑀸𑀭𑁄 𑀧𑀸𑀧𑀺𑀫𑀸 𑀩𑁆𑀭𑀳𑁆𑀫𑀧𑀭𑀺𑀲𑀁 𑀉𑀧𑀦𑁂𑀲𑀻𑀢𑀺, 𑀪𑀺𑀓𑁆𑀔𑀯𑁂, 𑀫𑀸𑀭𑁄 𑀧𑀸𑀧𑀺𑀫𑀸 𑀦𑀦𑀼 𑀢𑁆𑀯𑀁 𑀪𑀺𑀓𑁆𑀔𑀼 𑀧𑀲𑁆𑀲𑀲𑀺 𑀩𑁆𑀭𑀳𑁆𑀫𑀧𑀭𑀺𑀲𑀁 𑀬𑀲𑁂𑀦 𑀘 𑀲𑀺𑀭𑀺𑀬𑀸 𑀘 𑀑𑀪𑀸𑀲𑀫𑀸𑀦𑀁 𑀯𑀺𑀭𑁄𑀘𑀫𑀸𑀦𑀁 𑀚𑁄𑀢𑀬𑀫𑀸𑀦𑀁, 𑀬𑀤𑀺 𑀢𑁆𑀯𑀫𑁆𑀧𑀺 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀯𑀘𑀦𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀬𑀤𑁂𑀯 𑀢𑁂 𑀩𑁆𑀭𑀳𑁆𑀫𑀸 𑀯𑀤𑀢𑀺, 𑀢𑀁 𑀓𑀭𑁂𑀬𑁆𑀬𑀸𑀲𑀺, 𑀢𑁆𑀯𑀫𑁆𑀧𑀺 𑀏𑀯𑀫𑁂𑀯𑀁 𑀬𑀲𑁂𑀦 𑀘 𑀲𑀺𑀭𑀺𑀬𑀸 𑀘 𑀯𑀺𑀭𑁄𑀘𑁂𑀬𑁆𑀬𑀸𑀲𑀻𑀢𑀺 𑀏𑀯𑀁 𑀯𑀤𑀦𑁆𑀢𑁄 𑀫𑀁 𑀩𑁆𑀭𑀳𑁆𑀫𑀧𑀭𑀺𑀲𑀁 𑀉𑀧𑀦𑁂𑀲𑀺 𑀉𑀧𑀲𑀁𑀳𑀭𑀺. 𑀫𑀸 𑀢𑁆𑀯𑀁 𑀫𑀜𑁆𑀜𑀺𑀢𑁆𑀣𑁄𑀢𑀺 𑀫𑀸 𑀢𑁆𑀯𑀁 𑀫𑀜𑁆𑀜𑀺. 𑀫𑀸𑀭𑁄 𑀢𑁆𑀯𑀫𑀲𑀺 𑀧𑀸𑀧𑀺𑀫𑀸𑀢𑀺 𑀧𑀸𑀧𑀺𑀫 𑀢𑁆𑀯𑀁 𑀫𑀳𑀸𑀚𑀦𑀲𑁆𑀲 𑀫𑀸𑀭𑀡𑀢𑁄 𑀫𑀸𑀭𑁄 𑀦𑀸𑀫, 𑀧𑀸𑀧𑀓𑀁 𑀮𑀸𑀫𑀓𑀁 𑀫𑀳𑀸𑀚𑀦𑀲𑁆𑀲 𑀅𑀬𑀲𑀁 𑀓𑀭𑀡𑀢𑁄 𑀧𑀸𑀧𑀺𑀫𑀸 𑀦𑀸𑀫𑀸𑀢𑀺 𑀚𑀸𑀦𑀸𑀫𑀺.

𑁫𑁦𑁩. 𑀓𑀲𑀺𑀡𑀁 𑀆𑀬𑀼𑀦𑁆𑀢𑀺 𑀲𑀓𑀮𑀁 𑀆𑀬𑀼𑀁. 𑀢𑁂 𑀔𑁄 𑀏𑀯𑀁 𑀚𑀸𑀦𑁂𑀬𑁆𑀬𑀼𑀦𑁆𑀢𑀺 𑀢𑁂 𑀏𑀯𑀁 𑀫𑀳𑀦𑁆𑀢𑁂𑀦 𑀢𑀧𑁄𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀢𑁆𑀯𑀁 𑀧𑀦 𑀧𑀼𑀭𑀺𑀫𑀤𑀺𑀯𑀲𑁂 𑀚𑀸𑀢𑁄, 𑀓𑀺𑀁 𑀚𑀸𑀦𑀺𑀲𑁆𑀲𑀲𑀺, 𑀬𑀲𑁆𑀲 𑀢𑁂 𑀅𑀚𑁆𑀚𑀸𑀧𑀺 𑀫𑀼𑀔𑁂 𑀔𑀻𑀭𑀕𑀦𑁆𑀥𑁄 𑀯𑀸𑀬𑀢𑀻𑀢𑀺 𑀖𑀝𑁆𑀝𑁂𑀦𑁆𑀢𑁄 𑀯𑀤𑀢𑀺. 𑀧𑀣𑀯𑀺𑀁 𑀅𑀚𑁆𑀛𑁄𑀲𑀺𑀲𑁆𑀲𑀲𑀻𑀢𑀺 𑀧𑀣𑀯𑀺𑀁 𑀅𑀚𑁆𑀛𑁄𑀲𑀸𑀬 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀻𑀳𑀺 𑀕𑀡𑁆𑀳𑀺𑀲𑁆𑀲𑀲𑀺. 𑀑𑀧𑀲𑀸𑀬𑀺𑀓𑁄 𑀫𑁂 𑀪𑀯𑀺𑀲𑁆𑀲𑀲𑀻𑀢𑀺 𑀫𑀬𑁆𑀳𑀁 𑀲𑀫𑀻𑀧𑀲𑀬𑁄 𑀪𑀯𑀺𑀲𑁆𑀲𑀲𑀺, 𑀫𑀁 𑀕𑀘𑁆𑀙𑀦𑁆𑀢𑀁 𑀅𑀦𑀼𑀕𑀘𑁆𑀙𑀺𑀲𑁆𑀲𑀲𑀺, 𑀞𑀺𑀢𑀁 𑀉𑀧𑀢𑀺𑀝𑁆𑀞𑀺𑀲𑁆𑀲𑀲𑀺, 𑀦𑀺𑀲𑀺𑀦𑁆𑀦𑀁 𑀉𑀧𑀦𑀺𑀲𑀻𑀤𑀺𑀲𑁆𑀲𑀲𑀺, 𑀦𑀺𑀧𑀦𑁆𑀦𑀁 𑀉𑀧𑀦𑀺𑀧𑀚𑁆𑀚𑀺𑀲𑁆𑀲𑀲𑀻𑀢𑀺 𑀅𑀢𑁆𑀣𑁄. 𑀯𑀢𑁆𑀣𑀼𑀲𑀸𑀬𑀺𑀓𑁄𑀢𑀺 𑀫𑀫 𑀯𑀢𑁆𑀣𑀼𑀲𑁆𑀫𑀺𑀁 𑀲𑀬𑀦𑀓𑁄. 𑀬𑀣𑀸𑀓𑀸𑀫𑀓𑀭𑀡𑀻𑀬𑁄 𑀩𑀸𑀳𑀺𑀢𑁂𑀬𑁆𑀬𑁄𑀢𑀺 𑀫𑀬𑀸 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀬𑀁 𑀇𑀘𑁆𑀙𑀸𑀫𑀺, 𑀢𑀁 𑀓𑀢𑁆𑀢𑀩𑁆𑀩𑁄, 𑀩𑀸𑀳𑀺𑀢𑁆𑀯𑀸 𑀘 𑀧𑀦 𑀚𑀚𑁆𑀛𑀭𑀺𑀓𑀸𑀕𑀼𑀫𑁆𑀩𑀢𑁄𑀧𑀺 𑀦𑀻𑀘𑀢𑀭𑁄 𑀮𑀓𑀼𑀡𑁆𑀟𑀝𑀓𑀢𑀭𑁄 𑀓𑀸𑀢𑀩𑁆𑀩𑁄 𑀪𑀯𑀺𑀲𑁆𑀲𑀲𑀻𑀢𑀺 𑀅𑀢𑁆𑀣𑁄.

𑀇𑀫𑀺𑀦𑀸 𑀏𑀲 𑀪𑀕𑀯𑀦𑁆𑀢𑀁 𑀉𑀧𑀮𑀸𑀧𑁂𑀢𑀺 𑀯𑀸 𑀅𑀧𑀲𑀸𑀤𑁂𑀢𑀺 𑀯𑀸. 𑀉𑀧𑀮𑀸𑀧𑁂𑀢𑀺 𑀦𑀸𑀫 𑀲𑀘𑁂 𑀔𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀢𑀡𑁆𑀳𑀸𑀤𑀻𑀳𑀺 𑀧𑀣𑀯𑀺𑀁 𑀅𑀚𑁆𑀛𑁄𑀲𑀺𑀲𑁆𑀲𑀲𑀺, 𑀑𑀧𑀲𑀸𑀬𑀺𑀓𑁄 𑀫𑁂 𑀪𑀯𑀺𑀲𑁆𑀲𑀲𑀺, 𑀫𑀬𑀺 𑀕𑀘𑁆𑀙𑀦𑁆𑀢𑁂 𑀕𑀫𑀺𑀲𑁆𑀲𑀲𑀺, 𑀢𑀺𑀝𑁆𑀞𑀦𑁆𑀢𑁂 𑀞𑀲𑁆𑀲𑀲𑀺, 𑀦𑀺𑀲𑀺𑀦𑁆𑀦𑁂 𑀦𑀺𑀲𑀻𑀤𑀺𑀲𑁆𑀲𑀲𑀺, 𑀦𑀺𑀧𑀦𑁆𑀦𑁂 𑀦𑀺𑀧𑀚𑁆𑀚𑀺𑀲𑁆𑀲𑀲𑀺, 𑀅𑀳𑀁 𑀢𑀁 𑀲𑁂𑀲𑀚𑀦𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀯𑀺𑀲𑁆𑀲𑀸𑀲𑀺𑀓𑀁 𑀅𑀩𑁆𑀪𑀦𑁆𑀢𑀭𑀺𑀓𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀢𑀸𑀯 𑀉𑀧𑀮𑀸𑀧𑁂𑀢𑀺 𑀦𑀸𑀫. 𑀲𑁂𑀲𑀧𑀤𑁂𑀳𑀺 𑀧𑀦 𑀅𑀧𑀲𑀸𑀤𑁂𑀢𑀺 𑀦𑀸𑀫. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀲𑀘𑁂 𑀢𑁆𑀯𑀁 𑀧𑀣𑀯𑀺𑀁 𑀅𑀚𑁆𑀛𑁄𑀲𑀺𑀲𑁆𑀲𑀲𑀺, 𑀯𑀢𑁆𑀣𑀼𑀲𑀸𑀬𑀺𑀓𑁄 𑀫𑁂 𑀪𑀯𑀺𑀲𑁆𑀲𑀲𑀺, 𑀫𑀫 𑀕𑀫𑀦𑀸𑀤𑀻𑀦𑀺 𑀆𑀕𑀫𑁂𑀢𑁆𑀯𑀸 𑀕𑀫𑀺𑀲𑁆𑀲𑀲𑀺 𑀯𑀸 𑀞𑀲𑁆𑀲𑀲𑀺 𑀯𑀸 𑀦𑀺𑀲𑀻𑀤𑀺𑀲𑁆𑀲𑀲𑀺 𑀯𑀸 𑀦𑀺𑀧𑀚𑁆𑀚𑀺𑀲𑁆𑀲𑀲𑀺 𑀯𑀸, 𑀫𑀫 𑀯𑀢𑁆𑀣𑀼𑀲𑁆𑀫𑀺𑀁 𑀫𑀬𑁆𑀳𑀁 𑀆𑀭𑀓𑁆𑀔𑀁 𑀕𑀡𑁆𑀳𑀺𑀲𑁆𑀲𑀲𑀺, 𑀅𑀳𑀁 𑀧𑀦 𑀢𑀁 𑀬𑀣𑀸𑀓𑀸𑀫𑀁 𑀓𑀭𑀺𑀲𑁆𑀲𑀸𑀫𑀺 𑀩𑀸𑀳𑀺𑀢𑁆𑀯𑀸 𑀘 𑀚𑀚𑁆𑀛𑀭𑀺𑀓𑀸𑀕𑀼𑀫𑁆𑀩𑀢𑁄𑀧𑀺 𑀮𑀓𑀼𑀡𑁆𑀟𑀓𑀢𑀭𑀦𑁆𑀢𑀺 𑀏𑀯𑀁 𑀅𑀧𑀲𑀸𑀤𑁂𑀢𑀺 𑀦𑀸𑀫. 𑀅𑀬𑀁 𑀧𑀦 𑀩𑁆𑀭𑀳𑁆𑀫𑀸 𑀫𑀸𑀦𑀦𑀺𑀲𑁆𑀲𑀺𑀢𑁄, 𑀢𑀲𑁆𑀫𑀸 𑀇𑀥 𑀅𑀧𑀲𑀸𑀤𑀦𑀸𑀯 𑀅𑀥𑀺𑀧𑁆𑀧𑁂𑀢𑀸. 𑀆𑀧𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀅𑀧𑀺𑀘 𑀢𑁂 𑀅𑀳𑀁 𑀩𑁆𑀭𑀳𑁆𑀫𑁂𑀢𑀺 𑀇𑀤𑀸𑀦𑀺 𑀪𑀕𑀯𑀸, ‘‘𑀅𑀬𑀁 𑀩𑁆𑀭𑀳𑁆𑀫𑀸 𑀫𑀸𑀦𑀦𑀺𑀲𑁆𑀲𑀺𑀢𑁄 ‘𑀅𑀳𑀁 𑀚𑀸𑀦𑀸𑀫𑀻’𑀢𑀺 𑀫𑀜𑁆𑀜𑀢𑀺, 𑀅𑀢𑁆𑀢𑀦𑁄 𑀬𑀲𑁂𑀦 𑀲𑀫𑁆𑀫𑀢𑁆𑀢𑁄 𑀲𑀭𑀻𑀭𑀁 𑀨𑀼𑀲𑀺𑀢𑀼𑀫𑁆𑀧𑀺 𑀲𑀫𑀢𑁆𑀣𑀁 𑀓𑀺𑀜𑁆𑀘𑀺 𑀦 𑀧𑀲𑁆𑀲𑀢𑀺, 𑀣𑁄𑀓𑀁 𑀦𑀺𑀕𑁆𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀕𑀢𑀺𑀜𑁆𑀘 𑀧𑀚𑀸𑀦𑀸𑀫𑀻𑀢𑀺 𑀦𑀺𑀧𑁆𑀨𑀢𑁆𑀢𑀺𑀜𑁆𑀘 𑀧𑀚𑀸𑀦𑀸𑀫𑀺. 𑀚𑀼𑀢𑀺𑀜𑁆𑀘𑀸𑀢𑀺 𑀆𑀦𑀼𑀪𑀸𑀯𑀜𑁆𑀘 𑀧𑀚𑀸𑀦𑀸𑀫𑀺. 𑀏𑀯𑀁 𑀫𑀳𑁂𑀲𑀓𑁆𑀔𑁄𑀢𑀺 𑀏𑀯𑀁 𑀫𑀳𑀸𑀬𑀲𑁄 𑀫𑀳𑀸𑀧𑀭𑀺𑀯𑀸𑀭𑁄.

𑀬𑀸𑀯𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀳𑀭𑀦𑁆𑀢𑀻𑀢𑀺 𑀬𑀢𑁆𑀢𑀓𑁂 𑀞𑀸𑀦𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀯𑀺𑀘𑀭𑀦𑁆𑀢𑀺. 𑀤𑀺𑀲𑀸 𑀪𑀦𑁆𑀢𑀺 𑀯𑀺𑀭𑁄𑀘𑀦𑀸𑀢𑀺 𑀤𑀺𑀲𑀸𑀲𑀼 𑀯𑀺𑀭𑁄𑀘𑀫𑀸𑀦𑀸 𑀑𑀪𑀸𑀲𑀦𑁆𑀢𑀺, 𑀤𑀺𑀲𑀸 𑀯𑀸 𑀢𑁂𑀳𑀺 𑀯𑀺𑀭𑁄𑀘𑀫𑀸𑀦𑀸 𑀑𑀪𑀸𑀲𑀦𑁆𑀢𑀺. 𑀢𑀸𑀯 𑀲𑀳𑀲𑁆𑀲𑀥𑀸 𑀮𑁄𑀓𑁄𑀢𑀺 𑀢𑀢𑁆𑀢𑀓𑁂𑀦 𑀧𑀫𑀸𑀡𑁂𑀦 𑀲𑀳𑀲𑁆𑀲𑀥𑀸 𑀮𑁄𑀓𑁄, 𑀇𑀫𑀺𑀦𑀸 𑀘𑀓𑁆𑀓𑀯𑀸𑀴𑁂𑀦 𑀲𑀤𑁆𑀥𑀺𑀁 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀢𑁂 𑀯𑀢𑁆𑀢𑀢𑁂 𑀯𑀲𑁄𑀢𑀺 𑀏𑀢𑁆𑀣 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂 𑀢𑀼𑀬𑁆𑀳𑀁 𑀯𑀲𑁄 𑀯𑀢𑁆𑀢𑀢𑀺. 𑀧𑀭𑁄𑀧𑀭𑀜𑁆𑀘 𑀚𑀸𑀦𑀸𑀲𑀻𑀢𑀺 𑀏𑀢𑁆𑀣 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂 𑀧𑀭𑁄𑀧𑀭𑁂 𑀉𑀘𑁆𑀘𑀦𑀻𑀘𑁂 𑀳𑀻𑀦𑀧𑁆𑀧𑀡𑀻𑀢𑁂 𑀲𑀢𑁆𑀢𑁂 𑀚𑀸𑀦𑀸𑀲𑀺. 𑀅𑀣𑁄 𑀭𑀸𑀕𑀯𑀺𑀭𑀸𑀕𑀺𑀦𑀦𑁆𑀢𑀺 𑀦 𑀓𑁂𑀯𑀮𑀁, ‘‘𑀅𑀬𑀁 𑀇𑀤𑁆𑀥𑁄 𑀅𑀬𑀁 𑀧𑀓𑀢𑀺𑀫𑀦𑀼𑀲𑁆𑀲𑁄’’𑀢𑀺 𑀧𑀭𑁄𑀧𑀭𑀁, ‘‘𑀅𑀬𑀁 𑀧𑀦 𑀲𑀭𑀸𑀕𑁄 𑀅𑀬𑀁 𑀯𑀻𑀢𑀭𑀸𑀕𑁄’’𑀢𑀺 𑀏𑀯𑀁 𑀭𑀸𑀕𑀯𑀺𑀭𑀸𑀕𑀺𑀦𑀫𑁆𑀧𑀺 𑀚𑀦𑀁 𑀚𑀸𑀦𑀸𑀲𑀺. 𑀇𑀢𑁆𑀣𑀁𑀪𑀸𑀯𑀜𑁆𑀜𑀣𑀸𑀪𑀸𑀯𑀦𑁆𑀢𑀺 𑀇𑀢𑁆𑀣𑀁𑀪𑀸𑀯𑁄𑀢𑀺 𑀇𑀤𑀁 𑀘𑀓𑁆𑀓𑀯𑀸𑀴𑀁. 𑀅𑀜𑁆𑀜𑀣𑀸𑀪𑀸𑀯𑁄𑀢𑀺 𑀇𑀢𑁄 𑀲𑁂𑀲𑀁 𑀏𑀓𑀽𑀦𑀲𑀳𑀲𑁆𑀲𑀁. 𑀲𑀢𑁆𑀢𑀸𑀦𑀁 𑀆𑀕𑀢𑀺𑀁 𑀕𑀢𑀺𑀦𑁆𑀢𑀺 𑀏𑀢𑁆𑀣 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀢𑁆𑀢𑀸𑀦𑀁 𑀆𑀕𑀢𑀺𑀁, 𑀘𑀼𑀢𑀺𑀯𑀲𑁂𑀦 𑀕𑀢𑀺𑀁 𑀘 𑀚𑀸𑀦𑀸𑀲𑀺. 𑀢𑀼𑀬𑁆𑀳𑀁 𑀧𑀦 𑀅𑀢𑀺𑀫𑀳𑀦𑁆𑀢𑁄𑀳𑀫𑀲𑁆𑀫𑀻𑀢𑀺 𑀲𑀜𑁆𑀜𑀸 𑀳𑁄𑀢𑀺, 𑀲𑀳𑀲𑁆𑀲𑀺𑀩𑁆𑀭𑀳𑁆𑀫𑀸 𑀦𑀸𑀫 𑀢𑁆𑀯𑀁, 𑀅𑀜𑁆𑀜𑁂𑀲𑀁 𑀧𑀦 𑀢𑀬𑀸 𑀉𑀢𑁆𑀢𑀭𑀺 𑀤𑁆𑀯𑀺𑀲𑀳𑀲𑁆𑀲𑀸𑀦𑀁 𑀢𑀺𑀲𑀳𑀲𑁆𑀲𑀸𑀦𑀁 𑀘𑀢𑀼𑀲𑀳𑀲𑁆𑀲𑀸𑀦𑀁 𑀧𑀜𑁆𑀘𑀲𑀳𑀲𑁆𑀲𑀸𑀦𑀁 𑀤𑀲𑀲𑀳𑀲𑁆𑀲𑀸𑀦𑀁 𑀲𑀢𑀲𑀳𑀲𑁆𑀲𑀸𑀦𑀜𑁆𑀘 𑀩𑁆𑀭𑀳𑁆𑀫𑀸𑀦𑀁 𑀧𑀫𑀸𑀡𑀁 𑀦𑀢𑁆𑀣𑀺, 𑀘𑀢𑀼𑀳𑀢𑁆𑀣𑀸𑀬 𑀧𑀺𑀮𑁄𑀢𑀺𑀓𑀸𑀬 𑀧𑀝𑀧𑁆𑀧𑀫𑀸𑀡𑀁 𑀓𑀸𑀢𑀼𑀁 𑀯𑀸𑀬𑀫𑀦𑁆𑀢𑁄 𑀯𑀺𑀬 𑀫𑀳𑀦𑁆𑀢𑁄𑀲𑁆𑀫𑀻𑀢𑀺 𑀲𑀜𑁆𑀜𑀁 𑀓𑀭𑁄𑀲𑀻𑀢𑀺 𑀦𑀺𑀕𑁆𑀕𑀡𑁆𑀳𑀸𑀢𑀺.

𑁫𑁦𑁪. 𑀇𑀥𑀽𑀧𑀧𑀦𑁆𑀦𑁄𑀢𑀺 𑀇𑀥 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀉𑀧𑀧𑀦𑁆𑀦𑁄. 𑀢𑁂𑀦 𑀢𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀻𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀢𑀁 𑀓𑀸𑀬𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺. 𑀦𑁂𑀯 𑀢𑁂 𑀲𑀫𑀲𑀫𑁄𑀢𑀺 𑀚𑀸𑀦𑀺𑀢𑀩𑁆𑀩𑀝𑁆𑀞𑀸𑀦𑀁 𑀧𑀢𑁆𑀯𑀸𑀧𑀺 𑀢𑀬𑀸 𑀲𑀫𑀲𑀫𑁄 𑀦 𑀳𑁄𑀫𑀺. 𑀅𑀪𑀺𑀜𑁆𑀜𑀸𑀬𑀸𑀢𑀺 𑀅𑀜𑁆𑀜𑀸𑀬. 𑀓𑀼𑀢𑁄 𑀦𑀻𑀘𑁂𑀬𑁆𑀬𑀦𑁆𑀢𑀺 𑀢𑀬𑀸 𑀦𑀻𑀘𑀢𑀭𑀪𑀸𑀯𑁄 𑀧𑀦 𑀫𑀬𑁆𑀳𑀁 𑀓𑀼𑀢𑁄.

𑀳𑁂𑀝𑁆𑀞𑀽𑀧𑀧𑀢𑁆𑀢𑀺𑀓𑁄 𑀓𑀺𑀭𑁂𑀲 𑀩𑁆𑀭𑀳𑁆𑀫𑀸 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀓𑀸𑀮𑀁 𑀓𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀪𑀽𑀫𑀺𑀬𑀁 𑀯𑁂𑀳𑀧𑁆𑀨𑀮𑀩𑁆𑀭𑀳𑁆𑀫𑀮𑁄𑀓𑁂 𑀧𑀜𑁆𑀘𑀓𑀧𑁆𑀧𑀲𑀢𑀺𑀓𑀁 𑀆𑀬𑀼𑀁 𑀕𑀳𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀳𑁂𑀝𑁆𑀝𑀽𑀧𑀧𑀢𑁆𑀢𑀺𑀓𑀁 𑀓𑀢𑁆𑀯𑀸 𑀢𑀢𑀺𑀬𑀚𑁆𑀛𑀸𑀦𑀁 𑀧𑀡𑀻𑀢𑀁 𑀪𑀸𑀯𑁂𑀢𑁆𑀯𑀸 𑀲𑀼𑀪𑀓𑀺𑀡𑁆𑀳𑀩𑁆𑀭𑀳𑁆𑀫𑀮𑁄𑀓𑁂 𑀘𑀢𑀼𑀲𑀝𑁆𑀞𑀺𑀓𑀧𑁆𑀧𑀁 𑀆𑀬𑀼𑀁 𑀕𑀳𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁆𑀣 𑀤𑀼𑀢𑀺𑀬𑀚𑁆𑀛𑀸𑀦𑀁 𑀪𑀸𑀯𑁂𑀢𑁆𑀯𑀸 𑀆𑀪𑀲𑁆𑀲𑀭𑁂𑀲𑀼 𑀅𑀝𑁆𑀞𑀓𑀧𑁆𑀧𑀁 𑀆𑀬𑀼𑀁 𑀕𑀳𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑀢𑁆𑀣 𑀧𑀞𑀫𑀚𑁆𑀛𑀸𑀦𑀁 𑀪𑀸𑀯𑁂𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀓𑀧𑁆𑀧𑀸𑀬𑀼𑀓𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺, 𑀲𑁄 𑀧𑀞𑀫𑀓𑀸𑀮𑁂 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀜𑁆𑀘 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀜𑁆𑀘 𑀅𑀜𑁆𑀜𑀸𑀲𑀺, 𑀓𑀸𑀮𑁂 𑀧𑀦 𑀕𑀘𑁆𑀙𑀦𑁆𑀢𑁂 𑀉𑀪𑀬𑀁 𑀧𑀫𑀼𑀲𑁆𑀲𑀺𑀢𑁆𑀯𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀁 𑀉𑀧𑁆𑀧𑀸𑀤𑁂𑀲𑀺. 𑀢𑁂𑀦 𑀦𑀁 𑀪𑀕𑀯𑀸, ‘‘𑀢𑁂𑀦 𑀢𑀁 𑀢𑁆𑀯𑀁 𑀦 𑀚𑀸𑀦𑀸𑀲𑀺…𑀧𑁂… 𑀓𑀼𑀢𑁄 𑀦𑀻𑀘𑁂𑀬𑁆𑀬’’𑀦𑁆𑀢𑀺 𑀆𑀳.

𑀅𑀣 𑀩𑁆𑀭𑀳𑁆𑀫𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀫𑀡𑁄 𑀕𑁄𑀢𑀫𑁄 𑀫𑀬𑁆𑀳𑀁 𑀆𑀬𑀼𑀜𑁆𑀘 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀜𑁆𑀘 𑀧𑀼𑀩𑁆𑀩𑁂𑀓𑀢𑀓𑀫𑁆𑀫𑀜𑁆𑀘 𑀚𑀸𑀦𑀸𑀢𑀺, 𑀳𑀦𑁆𑀤 𑀦𑀁 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀸𑀫𑀻’’𑀢𑀺 𑀲𑀢𑁆𑀣𑀸𑀭𑀁 𑀅𑀢𑁆𑀢𑀦𑁄 𑀧𑀼𑀩𑁆𑀩𑁂𑀓𑀢𑀓𑀫𑁆𑀫𑀁 𑀧𑀼𑀘𑁆𑀙𑀺. 𑀲𑀢𑁆𑀣𑀸 𑀓𑀣𑁂𑀲𑀺.

𑀧𑀼𑀩𑁆𑀩𑁂 𑀓𑀺𑀭𑁂𑀲 𑀓𑀼𑀮𑀖𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸, ‘‘𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀲𑁆𑀲 𑀅𑀦𑁆𑀢𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀫𑁆𑀫 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀮𑀸𑀪𑀻 𑀳𑀼𑀢𑁆𑀯𑀸 𑀕𑀗𑁆𑀕𑀸𑀢𑀻𑀭𑁂 𑀧𑀡𑁆𑀡𑀲𑀸𑀮𑀁 𑀓𑀸𑀭𑁂𑀢𑁆𑀯𑀸 𑀛𑀸𑀦𑀭𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀢𑀺. 𑀢𑀤𑀸 𑀘 𑀓𑀸𑀮𑁂𑀦 𑀓𑀸𑀮𑀁 𑀲𑀢𑁆𑀣𑀯𑀸𑀳𑀸 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀫𑀭𑀼𑀓𑀦𑁆𑀢𑀸𑀭𑀁 𑀧𑀝𑀺𑀧𑀚𑁆𑀚𑀦𑁆𑀢𑀺. 𑀫𑀭𑀼𑀓𑀦𑁆𑀢𑀸𑀭𑁂 𑀧𑀦 𑀤𑀺𑀯𑀸 𑀦 𑀲𑀓𑁆𑀓𑀸 𑀕𑀦𑁆𑀢𑀼𑀁, 𑀭𑀢𑁆𑀢𑀺𑀁 𑀕𑀫𑀦𑀁 𑀳𑁄𑀢𑀺. 𑀅𑀣 𑀧𑀼𑀭𑀺𑀫𑀲𑀓𑀝𑀲𑁆𑀲 𑀅𑀕𑁆𑀕𑀬𑀼𑀕𑁂 𑀬𑀼𑀢𑁆𑀢𑀩𑀮𑀺𑀩𑀤𑁆𑀤𑀸 𑀕𑀘𑁆𑀙𑀦𑁆𑀢𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀕𑀢𑀫𑀕𑁆𑀕𑀸𑀪𑀺𑀫𑀼𑀔𑀸𑀯 𑀅𑀳𑁂𑀲𑀼𑀁. 𑀇𑀢𑀭𑀲𑀓𑀝𑀸𑀦𑀺 𑀢𑀣𑁂𑀯 𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀭𑀼𑀡𑁂 𑀉𑀕𑁆𑀕𑀢𑁂 𑀦𑀺𑀯𑀢𑁆𑀢𑀺𑀢𑀪𑀸𑀯𑀁 𑀚𑀸𑀦𑀺𑀁𑀲𑀼. 𑀢𑁂𑀲𑀜𑁆𑀘 𑀢𑀤𑀸 𑀓𑀦𑁆𑀢𑀸𑀭𑀁 𑀅𑀢𑀺𑀓𑁆𑀓𑀫𑀦𑀤𑀺𑀯𑀲𑁄 𑀅𑀳𑁄𑀲𑀺. 𑀲𑀩𑁆𑀩𑀁 𑀤𑀸𑀭𑀼𑀤𑀓𑀁 𑀧𑀭𑀺𑀓𑁆𑀔𑀻𑀡𑀁, 𑀢𑀲𑁆𑀫𑀸, ‘‘𑀦𑀢𑁆𑀣𑀺 𑀤𑀸𑀦𑀺 𑀅𑀫𑁆𑀳𑀸𑀓𑀁 𑀚𑀻𑀯𑀺𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀕𑁄𑀡𑁂 𑀘𑀓𑁆𑀓𑁂𑀲𑀼 𑀩𑀦𑁆𑀥𑀺𑀢𑁆𑀯𑀸 𑀫𑀦𑀼𑀲𑁆𑀲𑀸 𑀲𑀓𑀝𑀧𑀘𑁆𑀙𑀸𑀬𑀸𑀬𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀁𑀲𑀼. 𑀢𑀸𑀧𑀲𑁄𑀧𑀺 𑀓𑀸𑀮𑀲𑁆𑀲𑁂𑀯 𑀧𑀡𑁆𑀡𑀲𑀸𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀤𑁆𑀯𑀸𑀭𑁂 𑀦𑀺𑀲𑀺𑀦𑁆𑀦𑁄 𑀕𑀗𑁆𑀕𑀁 𑀑𑀮𑁄𑀓𑀬𑀫𑀸𑀦𑁄 𑀅𑀤𑁆𑀤𑀲 𑀕𑀗𑁆𑀕𑀁 𑀫𑀳𑀢𑀸 𑀉𑀤𑀓𑁄𑀖𑁂𑀦 𑀯𑀼𑀬𑁆𑀳𑀫𑀸𑀦𑀁 𑀧𑀯𑀢𑁆𑀢𑀺𑀢𑀫𑀡𑀺𑀓𑁆𑀔𑀦𑁆𑀥𑀁 𑀯𑀺𑀬 𑀆𑀕𑀘𑁆𑀙𑀦𑁆𑀢𑀺𑀁. 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀏𑀯𑀭𑀽𑀧𑀲𑁆𑀲 𑀫𑀥𑀼𑀭𑁄𑀤𑀓𑀲𑁆𑀲 𑀅𑀮𑀸𑀪𑁂𑀦 𑀓𑀺𑀮𑀺𑀲𑁆𑀲𑀫𑀸𑀦𑀸 𑀲𑀢𑁆𑀢𑀸’’𑀢𑀺. 𑀲𑁄 𑀏𑀯𑀁 𑀆𑀯𑀚𑁆𑀚𑀦𑁆𑀢𑁄 𑀫𑀭𑀼𑀓𑀦𑁆𑀢𑀸𑀭𑁂 𑀢𑀁 𑀲𑀢𑁆𑀣𑀁 𑀤𑀺𑀲𑁆𑀯𑀸, ‘‘𑀇𑀫𑁂 𑀲𑀢𑁆𑀢𑀸 𑀫𑀸 𑀦𑀲𑁆𑀲𑀦𑁆𑀢𑀽’’𑀢𑀺, ‘‘𑀇𑀢𑁄 𑀫𑀳𑀸 𑀉𑀤𑀓𑀓𑁆𑀔𑀦𑁆𑀥𑁄 𑀙𑀺𑀚𑁆𑀚𑀺𑀢𑁆𑀯𑀸 𑀫𑀭𑀼𑀓𑀦𑁆𑀢𑀸𑀭𑁂 𑀲𑀢𑁆𑀣𑀸𑀪𑀺𑀫𑀼𑀔𑁄 𑀕𑀘𑁆𑀙𑀢𑀽’’𑀢𑀺 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑁂𑀦 𑀅𑀥𑀺𑀝𑁆𑀞𑀸𑀲𑀺. 𑀲𑀳𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀫𑀸𑀢𑀺𑀓𑀸𑀭𑀼𑀴𑁆𑀳𑀁 𑀯𑀺𑀬 𑀉𑀤𑀓𑀁 𑀢𑀢𑁆𑀣 𑀅𑀕𑀫𑀸𑀲𑀺. 𑀫𑀦𑀼𑀲𑁆𑀲𑀸 𑀉𑀤𑀓𑀲𑀤𑁆𑀤𑁂𑀦 𑀯𑀼𑀝𑁆𑀞𑀸𑀬 𑀉𑀤𑀓𑀁 𑀤𑀺𑀲𑁆𑀯𑀸 𑀳𑀢𑁆𑀣𑀢𑀼𑀝𑁆𑀞𑀸 𑀦𑁆𑀳𑀸𑀬𑀺𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀕𑁄𑀡𑁂𑀧𑀺 𑀧𑀸𑀬𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀅𑀕𑀫𑀁𑀲𑀼. 𑀲𑀢𑁆𑀣𑀸 𑀢𑀁 𑀩𑁆𑀭𑀳𑁆𑀫𑀼𑀦𑁄 𑀧𑀼𑀩𑁆𑀩𑀓𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀬𑀁 𑀢𑁆𑀯𑀁 𑀅𑀧𑀸𑀬𑁂𑀲𑀺 𑀩𑀳𑀽 𑀫𑀦𑀼𑀲𑁆𑀲𑁂,

𑀧𑀺𑀧𑀸𑀲𑀺𑀢𑁂 𑀖𑀫𑁆𑀫𑀦𑀺 𑀲𑀫𑁆𑀧𑀭𑁂𑀢𑁂;

𑀢𑀁 𑀢𑁂 𑀧𑀼𑀭𑀸𑀡𑀁 𑀯𑀢𑀲𑀻𑀮𑀯𑀢𑁆𑀢𑀁,

𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄𑀯 𑀅𑀦𑀼𑀲𑁆𑀲𑀭𑀸𑀫𑀻’’𑀢𑀺. (𑀚𑀸. 𑁧.𑁭.𑁭𑁧) 𑁋

𑀇𑀫𑀁 𑀕𑀸𑀣𑀫𑀸𑀳.

𑀅𑀧𑀭𑀲𑁆𑀫𑀺𑀁 𑀲𑀫𑀬𑁂 𑀢𑀸𑀧𑀲𑁄 𑀕𑀗𑁆𑀕𑀸𑀢𑀻𑀭𑁂 𑀧𑀡𑁆𑀡𑀲𑀸𑀮𑀁 𑀫𑀸𑀧𑁂𑀢𑁆𑀯𑀸 𑀆𑀭𑀜𑁆𑀜𑀓𑀁 𑀕𑀸𑀫𑀁 𑀦𑀺𑀲𑁆𑀲𑀸𑀬 𑀯𑀲𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀘𑁄𑀭𑀸 𑀢𑀁 𑀕𑀸𑀫𑀁 𑀧𑀳𑀭𑀺𑀢𑁆𑀯𑀸 𑀳𑀢𑁆𑀣𑀲𑀸𑀭𑀁 𑀕𑀳𑁂𑀢𑁆𑀯𑀸 𑀕𑀸𑀯𑀺𑀬𑁄 𑀘 𑀓𑀭𑀫𑀭𑁂 𑀘 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀕𑀸𑀯𑁄𑀧𑀺 𑀲𑀼𑀦𑀔𑀸𑀧𑀺 𑀫𑀦𑀼𑀲𑁆𑀲𑀸𑀧𑀺 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀦𑁆𑀢𑀺. 𑀢𑀸𑀧𑀲𑁄 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀆𑀯𑀚𑁆𑀚𑀦𑁆𑀢𑁄, ‘‘𑀫𑀦𑀼𑀲𑁆𑀲𑀸𑀦𑀁 𑀪𑀬𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀜𑀢𑁆𑀯𑀸, ‘‘𑀫𑀬𑀺 𑀧𑀲𑁆𑀲𑀦𑁆𑀢𑁂 𑀇𑀫𑁂 𑀲𑀢𑁆𑀢𑀸 𑀫𑀸 𑀦𑀲𑁆𑀲𑀦𑁆𑀢𑀽’’𑀢𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑁂𑀦 𑀘𑁄𑀭𑀸𑀦𑀁 𑀧𑀝𑀺𑀧𑀣𑁂 𑀘𑀢𑀼𑀭𑀗𑁆𑀕𑀺𑀦𑀺𑀲𑁂𑀦𑀁 𑀫𑀸𑀧𑁂𑀲𑀺 𑀓𑀫𑁆𑀫𑀲𑀚𑁆𑀚𑀁 𑀆𑀕𑀘𑁆𑀙𑀦𑁆𑀢𑀺𑀁. 𑀘𑁄𑀭𑀸 𑀤𑀺𑀲𑁆𑀯𑀸, ‘‘𑀭𑀸𑀚𑀸’’𑀢𑀺 𑀢𑁂 𑀫𑀜𑁆𑀜𑀫𑀸𑀦𑀸 𑀯𑀺𑀮𑁄𑀧𑀁 𑀙𑀟𑁆𑀟𑁂𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀢𑀸𑀧𑀲𑁄 ‘‘𑀬𑀁 𑀬𑀲𑁆𑀲 𑀲𑀦𑁆𑀢𑀓𑀁, 𑀢𑀁 𑀢𑀲𑁆𑀲𑁂𑀯 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺, 𑀢𑀁 𑀢𑀣𑁂𑀯 𑀅𑀳𑁄𑀲𑀺. 𑀫𑀳𑀸𑀚𑀦𑁄 𑀲𑁄𑀢𑁆𑀣𑀺𑀪𑀸𑀯𑀁 𑀧𑀸𑀧𑀼𑀡𑀺. 𑀲𑀢𑁆𑀣𑀸 𑀇𑀤𑀫𑁆𑀧𑀺 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀬𑀁 𑀏𑀡𑀺𑀓𑀽𑀮𑀲𑁆𑀫𑀺𑀁 𑀚𑀦𑀁 𑀕𑀳𑀻𑀢𑀁,

𑀅𑀫𑁄𑀘𑀬𑀻 𑀕𑀬𑁆𑀳𑀓 𑀦𑀻𑀬𑀫𑀸𑀦𑀁;

𑀢𑀁 𑀢𑁂 𑀧𑀼𑀭𑀸𑀡𑀁 𑀯𑀢𑀲𑀻𑀮𑀯𑀢𑁆𑀢𑀁,

𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄𑀯 𑀅𑀦𑀼𑀲𑁆𑀲𑀭𑀸𑀫𑀻’’𑀢𑀺. (𑀚𑀸. 𑁧.𑁭.𑁭𑁨) 𑁋

𑀇𑀫𑀁 𑀕𑀸𑀣𑀫𑀸𑀳. 𑀏𑀢𑁆𑀣 𑀏𑀡𑀺𑀓𑀽𑀮𑀲𑁆𑀫𑀺𑀦𑁆𑀢𑀺 𑀕𑀗𑁆𑀕𑀸𑀢𑀻𑀭𑁂.

𑀧𑀼𑀦 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀉𑀧𑀭𑀺𑀕𑀗𑁆𑀕𑀸𑀯𑀸𑀲𑀺𑀓𑀁 𑀓𑀼𑀮𑀁 𑀳𑁂𑀝𑁆𑀞𑀸𑀕𑀗𑁆𑀕𑀸𑀯𑀸𑀲𑀺𑀓𑁂𑀦 𑀓𑀼𑀮𑁂𑀦 𑀲𑀤𑁆𑀥𑀺𑀁 𑀫𑀺𑀢𑁆𑀢𑀲𑀦𑁆𑀣𑀯𑀁 𑀓𑀢𑁆𑀯𑀸 𑀦𑀸𑀯𑀸𑀲𑀗𑁆𑀖𑀸𑀝𑀁 𑀩𑀦𑁆𑀥𑀺𑀢𑁆𑀯𑀸 𑀩𑀳𑀼𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀜𑁆𑀘𑁂𑀯 𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀘 𑀆𑀭𑁄𑀧𑁂𑀢𑁆𑀯𑀸 𑀕𑀗𑁆𑀕𑀸𑀲𑁄𑀢𑁂𑀦 𑀆𑀕𑀘𑁆𑀙𑀢𑀺. 𑀫𑀦𑀼𑀲𑁆𑀲𑀸 𑀔𑀸𑀤𑀫𑀸𑀦𑀸 𑀪𑀼𑀜𑁆𑀚𑀫𑀸𑀦𑀸 𑀦𑀘𑁆𑀘𑀦𑁆𑀢𑀸 𑀕𑀸𑀬𑀦𑁆𑀢𑀸 𑀤𑁂𑀯𑀯𑀺𑀫𑀸𑀦𑁂𑀦 𑀕𑀘𑁆𑀙𑀦𑁆𑀢𑀸 𑀯𑀺𑀬 𑀩𑀮𑀯𑀲𑁄𑀫𑀦𑀲𑁆𑀲𑀸 𑀅𑀳𑁂𑀲𑀼𑀁. 𑀕𑀗𑁆𑀕𑁂𑀬𑁆𑀬𑀓𑁄 𑀦𑀸𑀕𑁄 𑀤𑀺𑀲𑁆𑀯𑀸 𑀓𑀼𑀧𑀺𑀢𑁄, ‘‘𑀇𑀫𑁂 𑀫𑀬𑀺 𑀲𑀜𑁆𑀜𑀫𑁆𑀧𑀺 𑀦 𑀓𑀭𑁄𑀦𑁆𑀢𑀺, 𑀇𑀤𑀸𑀦𑀺 𑀦𑁂 𑀲𑀫𑀼𑀤𑁆𑀤𑀫𑁂𑀯 𑀧𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀫𑀳𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀫𑀸𑀧𑁂𑀢𑁆𑀯𑀸 𑀉𑀤𑀓𑀁 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀸𑀬 𑀨𑀡𑀁 𑀓𑀢𑁆𑀯𑀸 𑀲𑀼𑀲𑁆𑀲𑀽𑀓𑀸𑀭𑀁 𑀓𑀭𑁄𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀫𑀳𑀸𑀚𑀦𑁄 𑀤𑀺𑀲𑁆𑀯𑀸 𑀪𑀻𑀢𑁄 𑀯𑀺𑀲𑁆𑀲𑀭𑀫𑀓𑀸𑀲𑀺. 𑀢𑀸𑀧𑀲𑁄 𑀧𑀡𑁆𑀡𑀲𑀸𑀮𑀸𑀬 𑀦𑀺𑀲𑀺𑀦𑁆𑀦𑁄 𑀲𑀼𑀢𑁆𑀯𑀸, ‘‘𑀇𑀫𑁂 𑀕𑀸𑀬𑀦𑁆𑀢𑀸 𑀦𑀘𑁆𑀘𑀦𑁆𑀢𑀸 𑀲𑁄𑀫𑀦𑀲𑁆𑀲𑀚𑀸𑀢𑀸 𑀆𑀕𑀘𑁆𑀙𑀦𑁆𑀢𑀺, 𑀇𑀤𑀸𑀦𑀺 𑀧𑀦 𑀪𑀬𑀭𑀯𑀁 𑀭𑀯𑀺𑀁𑀲𑀼, 𑀓𑀺𑀁 𑀦𑀼 𑀔𑁄’’𑀢𑀺 𑀆𑀯𑀚𑁆𑀚𑀦𑁆𑀢𑁄 𑀦𑀸𑀕𑀭𑀸𑀚𑀁 𑀤𑀺𑀲𑁆𑀯𑀸, ‘‘𑀫𑀬𑀺 𑀧𑀲𑁆𑀲𑀦𑁆𑀢𑁂 𑀇𑀫𑁂 𑀲𑀢𑁆𑀢𑀸 𑀫𑀸 𑀦𑀲𑁆𑀲𑀦𑁆𑀢𑀽’’𑀢𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀲𑀼𑀧𑀡𑁆𑀡𑀯𑀡𑁆𑀡𑀁 𑀫𑀸𑀧𑁂𑀢𑁆𑀯𑀸 𑀦𑀸𑀕𑀭𑀸𑀚𑀲𑁆𑀲 𑀤𑀲𑁆𑀲𑁂𑀲𑀺. 𑀦𑀸𑀕𑀭𑀸𑀚𑀸 𑀪𑀻𑀢𑁄 𑀨𑀡𑀁 𑀲𑀁𑀳𑀭𑀺𑀢𑁆𑀯𑀸 𑀉𑀤𑀓𑀁 𑀧𑀯𑀺𑀝𑁆𑀞𑁄. 𑀫𑀳𑀸𑀚𑀦𑁄 𑀲𑁄𑀢𑁆𑀣𑀺𑀪𑀸𑀯𑀁 𑀧𑀸𑀧𑀼𑀡𑀺. 𑀲𑀢𑁆𑀣𑀸 𑀇𑀤𑀫𑁆𑀧𑀺 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀕𑀗𑁆𑀕𑀸𑀬 𑀲𑁄𑀢𑀲𑁆𑀫𑀺𑀁 𑀕𑀳𑀻𑀢𑀦𑀸𑀯𑀁,

𑀮𑀼𑀤𑁆𑀤𑁂𑀦 𑀦𑀸𑀕𑁂𑀦 𑀫𑀦𑀼𑀲𑁆𑀲𑀓𑀧𑁆𑀧𑀸;

𑀅𑀫𑁄𑀘𑀬𑀺𑀢𑁆𑀣 𑀩𑀮𑀲𑀸 𑀧𑀲𑀬𑁆𑀳,

𑀢𑀁 𑀢𑁂 𑀧𑀼𑀭𑀸𑀡𑀁 𑀯𑀢𑀲𑀻𑀮𑀯𑀢𑁆𑀢𑀁;

𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄𑀯 𑀅𑀦𑀼𑀲𑁆𑀲𑀭𑀸𑀫𑀻’’𑀢𑀺. (𑀚𑀸. 𑁧.𑁭.𑁭𑁩) 𑁋

𑀇𑀫𑀁 𑀕𑀸𑀣𑀫𑀸𑀳.

𑀅𑀧𑀭𑀲𑁆𑀫𑀺𑀁 𑀲𑀫𑀬𑁂 𑀏𑀲 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀓𑁂𑀲𑀯𑁄 𑀦𑀸𑀫 𑀢𑀸𑀧𑀲𑁄 𑀅𑀳𑁄𑀲𑀺. 𑀢𑁂𑀦 𑀲𑀫𑀬𑁂𑀦 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀓𑀧𑁆𑀧𑁄 𑀦𑀸𑀫 𑀫𑀸𑀡𑀯𑁄 𑀓𑁂𑀲𑀯𑀲𑁆𑀲 𑀩𑀤𑁆𑀥𑀘𑀭𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀳𑀼𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀓𑀺𑀁𑀓𑀸𑀭𑀧𑀝𑀺𑀲𑁆𑀲𑀸𑀯𑀻 𑀫𑀦𑀸𑀧𑀘𑀸𑀭𑀻 𑀩𑀼𑀤𑁆𑀥𑀺𑀲𑀫𑁆𑀧𑀦𑁆𑀦𑁄 𑀅𑀢𑁆𑀣𑀘𑀭𑁄 𑀅𑀳𑁄𑀲𑀺. 𑀓𑁂𑀲𑀯𑁄 𑀢𑀁 𑀯𑀺𑀦𑀸 𑀯𑀢𑁆𑀢𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀢𑀁 𑀦𑀺𑀲𑁆𑀲𑀸𑀬𑁂𑀯 𑀚𑀻𑀯𑀺𑀓𑀁 𑀓𑀧𑁆𑀧𑁂𑀲𑀺. 𑀲𑀢𑁆𑀣𑀸 𑀇𑀤𑀫𑁆𑀧𑀺 𑀢𑀲𑁆𑀲 𑀧𑀼𑀩𑁆𑀩𑀓𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁄 𑁋

‘‘𑀓𑀧𑁆𑀧𑁄 𑀘 𑀢𑁂 𑀩𑀤𑁆𑀥𑀘𑀭𑁄 𑀅𑀳𑁄𑀲𑀺,

𑀲𑀫𑁆𑀩𑀼𑀤𑁆𑀥𑀺𑀫𑀦𑁆𑀢𑀁 𑀯𑀢𑀺𑀦𑀁 𑀅𑀫𑀜𑁆𑀜𑀺;

𑀢𑀁 𑀢𑁂 𑀧𑀼𑀭𑀸𑀡𑀁 𑀯𑀢𑀲𑀻𑀮𑀯𑀢𑁆𑀢𑀁,

𑀲𑀼𑀢𑁆𑀢𑀧𑁆𑀧𑀩𑀼𑀤𑁆𑀥𑁄𑀯 𑀅𑀦𑀼𑀲𑁆𑀲𑀭𑀸𑀫𑀻’’𑀢𑀺. (𑀚𑀸. 𑁧.𑁭.𑁭𑁪) 𑁋

𑀇𑀫𑀁 𑀕𑀸𑀣𑀫𑀸𑀳.

𑀏𑀯𑀁 𑀩𑁆𑀭𑀳𑁆𑀫𑀼𑀦𑁄 𑀦𑀸𑀦𑀢𑁆𑀢𑀪𑀸𑀯𑁂𑀲𑀼 𑀓𑀢𑀓𑀫𑁆𑀫𑀁 𑀲𑀢𑁆𑀣𑀸 𑀧𑀓𑀸𑀲𑁂𑀲𑀺. 𑀲𑀢𑁆𑀣𑀭𑀺 𑀓𑀣𑁂𑀦𑁆𑀢𑁂𑀬𑁂𑀯 𑀩𑁆𑀭𑀳𑁆𑀫𑀸 𑀲𑀮𑁆𑀮𑀓𑁆𑀔𑁂𑀲𑀺, 𑀤𑀻𑀧𑀲𑀳𑀲𑁆𑀲𑁂 𑀉𑀚𑁆𑀚𑀮𑀺𑀢𑁂 𑀭𑀽𑀧𑀸𑀦𑀺 𑀯𑀺𑀬 𑀲𑀩𑁆𑀩𑀓𑀫𑁆𑀫𑀸𑀦𑀺𑀲𑁆𑀲 𑀧𑀸𑀓𑀝𑀸𑀦𑀺 𑀅𑀳𑁂𑀲𑀼𑀁. 𑀲𑁄 𑀧𑀲𑀦𑁆𑀦𑀘𑀺𑀢𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀅𑀤𑁆𑀥𑀸 𑀧𑀚𑀸𑀦𑀸𑀲𑀺 𑀫𑀫𑁂𑀢𑀫𑀸𑀬𑀼𑀁,

𑀅𑀜𑁆𑀜𑀫𑁆𑀧𑀺 𑀚𑀸𑀦𑀸𑀲𑀺 𑀢𑀣𑀸 𑀳𑀺 𑀩𑀼𑀤𑁆𑀥𑁄;

𑀢𑀣𑀸 𑀳𑀺 𑀢𑀸𑀬𑀁 𑀚𑀮𑀺𑀢𑀸𑀦𑀼𑀪𑀸𑀯𑁄,

𑀑𑀪𑀸𑀲𑀬𑀁 𑀢𑀺𑀝𑁆𑀞𑀢𑀺 𑀩𑁆𑀭𑀳𑁆𑀫𑀮𑁄𑀓’’𑀦𑁆𑀢𑀺. (𑀚𑀸. 𑁧.𑁭.𑁭𑁫);

𑀅𑀣𑀲𑁆𑀲 𑀪𑀕𑀯𑀸 𑀉𑀢𑁆𑀢𑀭𑀺 𑀅𑀲𑀫𑀲𑀫𑀢𑀁 𑀧𑀓𑀸𑀲𑁂𑀦𑁆𑀢𑁄 𑀧𑀣𑀯𑀺𑀁 𑀔𑁄 𑀅𑀳𑀁 𑀩𑁆𑀭𑀳𑁆𑀫𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀣𑀯𑀺𑀬𑀸 𑀧𑀣𑀯𑀢𑁆𑀢𑁂𑀦 𑀅𑀦𑀦𑀼𑀪𑀽𑀢𑀦𑁆𑀢𑀺 𑀧𑀣𑀯𑀺𑀬𑀸 𑀧𑀣𑀯𑀺𑀲𑀪𑀸𑀯𑁂𑀦 𑀅𑀦𑀦𑀼𑀪𑀽𑀢𑀁 𑀅𑀧𑁆𑀧𑀢𑁆𑀢𑀁. 𑀓𑀺𑀁 𑀧𑀦 𑀢𑀦𑁆𑀢𑀺? 𑀦𑀺𑀩𑁆𑀩𑀸𑀦𑀁. 𑀢𑀜𑁆𑀳𑀺 𑀲𑀩𑁆𑀩𑀲𑁆𑀫𑀸 𑀲𑀗𑁆𑀔𑀢𑀸 𑀦𑀺𑀲𑁆𑀲𑀝𑀢𑁆𑀢𑀸 𑀧𑀣𑀯𑀺𑀲𑀪𑀸𑀯𑁂𑀦 𑀅𑀧𑁆𑀧𑀢𑁆𑀢𑀁 𑀦𑀸𑀫. 𑀢𑀤𑀪𑀺𑀜𑁆𑀜𑀸𑀬𑀸𑀢𑀺 𑀢𑀁 𑀦𑀺𑀩𑁆𑀩𑀸𑀦𑀁 𑀚𑀸𑀦𑀺𑀢𑁆𑀯𑀸 𑀲𑀘𑁆𑀙𑀺𑀓𑀢𑁆𑀯𑀸. 𑀧𑀣𑀯𑀺𑀁 𑀦𑀸𑀧𑀳𑁄𑀲𑀺𑀦𑁆𑀢𑀺 𑀧𑀣𑀯𑀺𑀁 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀕𑀸𑀳𑁂𑀳𑀺 𑀦 𑀕𑀡𑁆𑀳𑀺𑀁. 𑀆𑀧𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀫𑀽𑀮𑀧𑀭𑀺𑀬𑀸𑀬𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀲𑀘𑁂 𑀔𑁄 𑀢𑁂, 𑀫𑀸𑀭𑀺𑀲, 𑀲𑀩𑁆𑀩𑀲𑁆𑀲 𑀲𑀩𑁆𑀩𑀢𑁆𑀢𑁂𑀦𑀸𑀢𑀺 𑀇𑀤𑀫𑁂𑀯 𑀩𑁆𑀭𑀳𑁆𑀫𑀸 𑀅𑀢𑁆𑀢𑀦𑁄 𑀯𑀸𑀤𑀺𑀢𑀸𑀬 𑀲𑀩𑁆𑀩𑀦𑁆𑀢𑀺 𑀅𑀓𑁆𑀔𑀭𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀅𑀓𑁆𑀔𑀭𑁂 𑀤𑁄𑀲𑀁 𑀕𑀡𑁆𑀳𑀦𑁆𑀢𑁄 𑀆𑀳. 𑀲𑀢𑁆𑀣𑀸 𑀧𑀦 𑀲𑀓𑁆𑀓𑀸𑀬𑀁 𑀲𑀦𑁆𑀥𑀸𑀬 ‘‘𑀲𑀩𑁆𑀩’’𑀦𑁆𑀢𑀺 𑀯𑀤𑀢𑀺, 𑀩𑁆𑀭𑀳𑁆𑀫𑀸 𑀲𑀩𑁆𑀩𑀲𑀩𑁆𑀩𑀁 𑀲𑀦𑁆𑀥𑀸𑀬. 𑀢𑁆𑀯𑀁 ‘‘𑀲𑀩𑁆𑀩’’𑀦𑁆𑀢𑀺 𑀯𑀤𑀲𑀺, ‘‘𑀲𑀩𑁆𑀩𑀲𑁆𑀲 𑀲𑀩𑁆𑀩𑀢𑁆𑀢𑁂𑀦 𑀅𑀦𑀦𑀼𑀪𑀽𑀢’’𑀦𑁆𑀢𑀺 𑀯𑀤𑀲𑀺, 𑀬𑀤𑀺 𑀲𑀩𑁆𑀩𑀁 𑀅𑀦𑀦𑀼𑀪𑀽𑀢𑀁 𑀦𑀢𑁆𑀣𑀺, 𑀅𑀣𑀲𑁆𑀲 𑀅𑀦𑀦𑀼𑀪𑀽𑀢𑀁 𑀅𑀢𑁆𑀣𑀺. 𑀫𑀸 𑀳𑁂𑀯 𑀢𑁂 𑀭𑀺𑀢𑁆𑀢𑀓𑀫𑁂𑀯 𑀅𑀳𑁄𑀲𑀺 𑀢𑀼𑀘𑁆𑀙𑀓𑀫𑁂𑀯 𑀅𑀳𑁄𑀲𑀻𑀢𑀺 𑀢𑀼𑀬𑁆𑀳𑀁 𑀯𑀘𑀦𑀁 𑀭𑀺𑀢𑁆𑀢𑀓𑀁 𑀫𑀸 𑀳𑁄𑀢𑀼, 𑀢𑀼𑀘𑁆𑀙𑀓𑀁 𑀫𑀸 𑀳𑁄𑀢𑀽𑀢𑀺 𑀲𑀢𑁆𑀣𑀸𑀭𑀁 𑀫𑀼𑀲𑀸𑀯𑀸𑀤𑁂𑀦 𑀦𑀺𑀕𑁆𑀕𑀡𑁆𑀳𑀸𑀢𑀺.

𑀲𑀢𑁆𑀣𑀸 𑀧𑀦 𑀏𑀢𑀲𑁆𑀫𑀸 𑀩𑁆𑀭𑀳𑁆𑀫𑀼𑀦𑀸 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀲𑀢𑀲𑀳𑀲𑁆𑀲𑀕𑀼𑀡𑁂𑀦 𑀯𑀸𑀤𑀻𑀢𑀭𑁄, 𑀢𑀲𑁆𑀫𑀸 𑀅𑀳𑀁 𑀲𑀩𑁆𑀩𑀜𑁆𑀘 𑀯𑀓𑁆𑀔𑀸𑀫𑀺, 𑀅𑀦𑀦𑀼𑀪𑀽𑀢𑀜𑁆𑀘 𑀯𑀓𑁆𑀔𑀸𑀫𑀺, 𑀲𑀼𑀡𑀸𑀳𑀺 𑀫𑁂𑀢𑀺 𑀢𑀲𑁆𑀲 𑀯𑀸𑀤𑀫𑀤𑁆𑀤𑀦𑀢𑁆𑀣𑀁 𑀓𑀸𑀭𑀡𑀁 𑀆𑀳𑀭𑀦𑁆𑀢𑁄 𑀯𑀺𑀜𑁆𑀜𑀸𑀡𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀚𑀸𑀦𑀺𑀢𑀩𑁆𑀩𑀁. 𑀅𑀦𑀺𑀤𑀲𑁆𑀲𑀦𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀧𑀸𑀣𑀁 𑀅𑀦𑀼𑀧𑀕𑀫𑀦𑀢𑁄 𑀅𑀦𑀺𑀤𑀲𑁆𑀲𑀦𑀁 𑀦𑀸𑀫, 𑀧𑀤𑀤𑁆𑀯𑀬𑁂𑀦𑀧𑀺 𑀦𑀺𑀩𑁆𑀩𑀸𑀦𑀫𑁂𑀯 𑀯𑀼𑀢𑁆𑀢𑀁. 𑀅𑀦𑀦𑁆𑀢𑀦𑁆𑀢𑀺 𑀢𑀬𑀺𑀤𑀁 𑀉𑀧𑁆𑀧𑀸𑀤𑀯𑀬𑀅𑀦𑁆𑀢𑀭𑀳𑀺𑀢𑀢𑁆𑀢𑀸 𑀅𑀦𑀦𑁆𑀢𑀁 𑀦𑀸𑀫. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑁋

‘‘𑀅𑀦𑁆𑀢𑀯𑀦𑁆𑀢𑀸𑀦𑀺 𑀪𑀽𑀢𑀸𑀦𑀺, 𑀅𑀲𑀫𑁆𑀪𑀽𑀢𑀁 𑀅𑀦𑀦𑁆𑀢𑀓𑀁;

𑀪𑀽𑀢𑁂 𑀅𑀦𑁆𑀢𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀪𑀽𑀢𑁂 𑀅𑀦𑁆𑀢𑀸 𑀧𑀓𑀸𑀲𑀺𑀢𑀸’’𑀢𑀺.

𑀲𑀩𑁆𑀩𑀢𑁄𑀧𑀪𑀦𑁆𑀢𑀺 𑀲𑀩𑁆𑀩𑀲𑁄 𑀧𑀪𑀸𑀲𑀫𑁆𑀧𑀦𑁆𑀦𑀁. 𑀦𑀺𑀩𑁆𑀩𑀸𑀦𑀢𑁄 𑀳𑀺 𑀅𑀜𑁆𑀜𑁄 𑀥𑀫𑁆𑀫𑁄 𑀲𑀧𑀪𑀢𑀭𑁄 𑀯𑀸 𑀚𑁄𑀢𑀺𑀯𑀦𑁆𑀢𑀢𑀭𑁄 𑀯𑀸 𑀧𑀭𑀺𑀲𑀼𑀤𑁆𑀥𑀢𑀭𑁄 𑀯𑀸 𑀧𑀡𑁆𑀟𑀭𑀢𑀭𑁄 𑀯𑀸 𑀦𑀢𑁆𑀣𑀺. 𑀲𑀩𑁆𑀩𑀢𑁄 𑀯𑀸 𑀢𑀣𑀸 𑀧𑀪𑀽𑀢𑀫𑁂𑀯, 𑀦 𑀓𑀢𑁆𑀣𑀘𑀺 𑀦𑀢𑁆𑀣𑀻𑀢𑀺 𑀲𑀩𑁆𑀩𑀢𑁄𑀧𑀪𑀁. 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀤𑀻𑀲𑀼 𑀳𑀺 𑀅𑀲𑀼𑀓𑀤𑀺𑀲𑀸𑀬 𑀦𑀸𑀫 𑀦𑀺𑀩𑁆𑀩𑀸𑀦𑀁 𑀦𑀢𑁆𑀣𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀅𑀣 𑀯𑀸 𑀧𑀪𑀦𑁆𑀢𑀺 𑀢𑀺𑀢𑁆𑀣𑀲𑁆𑀲 𑀦𑀸𑀫𑀁, 𑀲𑀩𑁆𑀩𑀢𑁄 𑀧𑀪𑀫𑀲𑁆𑀲𑀸𑀢𑀺 𑀲𑀩𑁆𑀩𑀢𑁄𑀧𑀪𑀁. 𑀦𑀺𑀩𑁆𑀩𑀸𑀦𑀲𑁆𑀲 𑀓𑀺𑀭 𑀬𑀣𑀸 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀬𑀢𑁄 𑀬𑀢𑁄 𑀑𑀢𑀭𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀁 𑀢𑀤𑁂𑀯 𑀢𑀺𑀢𑁆𑀣𑀁, 𑀅𑀢𑀺𑀢𑁆𑀣𑀁 𑀦𑀸𑀫 𑀦𑀢𑁆𑀣𑀺. 𑀏𑀯𑀫𑁂𑀯𑀁 𑀅𑀝𑁆𑀞𑀢𑀺𑀁𑀲𑀸𑀬 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀬𑁂𑀦 𑀬𑁂𑀦 𑀫𑀼𑀔𑁂𑀦 𑀦𑀺𑀩𑁆𑀩𑀸𑀦𑀁 𑀑𑀢𑀭𑀺𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀁 𑀢𑀤𑁂𑀯 𑀢𑀺𑀢𑁆𑀣𑀁. 𑀦𑀺𑀩𑁆𑀩𑀸𑀦𑀲𑁆𑀲 𑀅𑀢𑀺𑀢𑁆𑀣𑀁 𑀦𑀸𑀫 𑀓𑀫𑁆𑀫𑀝𑁆𑀞𑀸𑀦𑀁 𑀦𑀢𑁆𑀣𑀺. 𑀢𑁂𑀦 𑀯𑀼𑀢𑁆𑀢𑀁 𑀲𑀩𑁆𑀩𑀢𑁄𑀧𑀪𑀦𑁆𑀢𑀺. 𑀢𑀁 𑀧𑀣𑀯𑀺𑀬𑀸 𑀧𑀣𑀯𑀢𑁆𑀢𑁂𑀦𑀸𑀢𑀺 𑀢𑀁 𑀦𑀺𑀩𑁆𑀩𑀸𑀦𑀁 𑀧𑀣𑀯𑀺𑀬𑀸 𑀧𑀣𑀯𑀻𑀲𑀪𑀸𑀯𑁂𑀦 𑀢𑀢𑁄 𑀧𑀭𑁂𑀲𑀁 𑀆𑀧𑀸𑀤𑀻𑀦𑀁 𑀆𑀧𑀸𑀤𑀺𑀲𑀪𑀸𑀯𑁂𑀦 𑀘 𑀅𑀦𑀦𑀼𑀪𑀽𑀢𑀁. 𑀇𑀢𑀺 𑀬𑀁 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀯𑀺𑀲𑀬𑀪𑀽𑀢𑀁 𑀲𑀩𑁆𑀩𑀢𑁂𑀪𑀽𑀫𑀓𑀥𑀫𑁆𑀫𑀚𑀸𑀢𑀁 𑀢𑀲𑁆𑀲 𑀲𑀩𑁆𑀩𑀢𑁆𑀢𑁂𑀦 𑀢𑀁 𑀯𑀺𑀜𑁆𑀜𑀸𑀡𑀁 𑀅𑀦𑀺𑀤𑀲𑁆𑀲𑀦𑀁 𑀅𑀦𑀦𑁆𑀢𑀁 𑀲𑀩𑁆𑀩𑀢𑁄𑀧𑀢𑀁 𑀅𑀦𑀦𑀼𑀪𑀽𑀢𑀦𑁆𑀢𑀺 𑀯𑀸𑀤𑀁 𑀧𑀢𑀺𑀝𑁆𑀞𑀧𑁂𑀲𑀺.

𑀢𑀢𑁄 𑀩𑁆𑀭𑀳𑁆𑀫𑀸 𑀕𑀳𑀺𑀢𑀕𑀳𑀺𑀢𑀁 𑀲𑀢𑁆𑀣𑀸𑀭𑀸 𑀯𑀺𑀲𑁆𑀲𑀚𑁆𑀚𑀸𑀧𑀺𑀢𑁄 𑀓𑀺𑀜𑁆𑀘𑀺 𑀕𑀳𑁂𑀢𑀩𑁆𑀩𑀁 𑀅𑀤𑀺𑀲𑁆𑀯𑀸 𑀮𑀴𑀺𑀢𑀓𑀁 𑀓𑀸𑀢𑀼𑀓𑀸𑀫𑁄 𑀳𑀦𑁆𑀤 𑀘𑀭𑀳𑀺 𑀢𑁂, 𑀫𑀸𑀭𑀺𑀲, 𑀅𑀦𑁆𑀢𑀭𑀥𑀸𑀬𑀸𑀫𑀻𑀢𑀺 𑀆𑀳. 𑀢𑀢𑁆𑀣 𑀅𑀦𑁆𑀢𑀭𑀥𑀸𑀬𑀸𑀫𑀻𑀢𑀺 𑀅𑀤𑀺𑀲𑁆𑀲𑀫𑀸𑀦𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀫𑀻𑀢𑀺 𑀆𑀳. 𑀲𑀘𑁂 𑀯𑀺𑀲𑀳𑀲𑀻𑀢𑀺 𑀬𑀤𑀺 𑀲𑀓𑁆𑀓𑁄𑀲𑀺 𑀫𑀬𑁆𑀳𑀁 𑀅𑀦𑁆𑀢𑀭𑀥𑀸𑀬𑀺𑀢𑀼𑀁, 𑀅𑀦𑁆𑀢𑀭𑀥𑀸𑀬𑀲𑀺, 𑀧𑀸𑀝𑀺𑀳𑀸𑀭𑀺𑀬𑀁 𑀓𑀭𑁄𑀳𑀻𑀢𑀺. 𑀦𑁂𑀯𑀲𑁆𑀲𑀼 𑀫𑁂 𑀲𑀓𑁆𑀓𑁄𑀢𑀺 𑀅𑀦𑁆𑀢𑀭𑀥𑀸𑀬𑀺𑀢𑀼𑀦𑁆𑀢𑀺 𑀫𑀬𑁆𑀳𑀁 𑀅𑀦𑁆𑀢𑀭𑀥𑀸𑀬𑀺𑀢𑀼𑀁 𑀦𑁂𑀯 𑀲𑀓𑁆𑀓𑁄𑀢𑀺. 𑀓𑀺𑀁 𑀧𑀦𑁂𑀲 𑀓𑀸𑀢𑀼𑀓𑀸𑀫𑁄 𑀅𑀳𑁄𑀲𑀻𑀢𑀺? 𑀫𑀽𑀮𑀧𑀝𑀺𑀲𑀦𑁆𑀥𑀺𑀁 𑀕𑀦𑁆𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀩𑁆𑀭𑀳𑁆𑀫𑀸𑀦𑀜𑁆𑀳𑀺 𑀫𑀽𑀮𑀧𑀝𑀺𑀲𑀦𑁆𑀥𑀺𑀓𑀅𑀢𑁆𑀢𑀪𑀸𑀯𑁄 𑀲𑀼𑀔𑀼𑀫𑁄, 𑀅𑀜𑁆𑀜𑁂𑀲𑀁 𑀅𑀦𑀸𑀧𑀸𑀣𑁄, 𑀅𑀪𑀺𑀲𑀗𑁆𑀔𑀢𑀓𑀸𑀬𑁂𑀦𑁂𑀯 𑀢𑀺𑀝𑁆𑀞𑀦𑁆𑀢𑀺. 𑀲𑀢𑁆𑀣𑀸 𑀢𑀲𑁆𑀲 𑀫𑀽𑀮𑀧𑀝𑀺𑀲𑀦𑁆𑀥𑀺𑀁 𑀕𑀦𑁆𑀢𑀼𑀁 𑀦 𑀅𑀤𑀸𑀲𑀺. 𑀫𑀽𑀮𑀧𑀝𑀺𑀲𑀦𑁆𑀥𑀺𑀁 𑀯𑀸 𑀅𑀕𑀦𑁆𑀢𑁆𑀯𑀸𑀧𑀺 𑀬𑁂𑀦 𑀢𑀫𑁂𑀦 𑀅𑀢𑁆𑀢𑀸𑀦𑀁 𑀅𑀦𑁆𑀢𑀭𑀥𑀸𑀧𑁂𑀢𑁆𑀯𑀸 𑀅𑀤𑀺𑀲𑁆𑀲𑀫𑀸𑀦𑀓𑁄 𑀪𑀯𑁂𑀬𑁆𑀬, 𑀲𑀢𑁆𑀣𑀸 𑀢𑀁 𑀢𑀫𑀁 𑀯𑀺𑀦𑁄𑀤𑁂𑀲𑀺, 𑀢𑀲𑁆𑀫𑀸 𑀅𑀦𑁆𑀢𑀭𑀥𑀸𑀬𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀲𑁄 𑀅𑀲𑀓𑁆𑀓𑁄𑀦𑁆𑀢𑁄 𑀯𑀺𑀫𑀸𑀦𑁂 𑀦𑀺𑀮𑀻𑀬𑀢𑀺, 𑀓𑀧𑁆𑀧𑀭𑀼𑀓𑁆𑀔𑁂 𑀦𑀺𑀮𑀻𑀬𑀢𑀺, 𑀉𑀓𑁆𑀓𑀼𑀝𑀺𑀓𑁄 𑀦𑀺𑀲𑀻𑀤𑀢𑀺. 𑀩𑁆𑀭𑀳𑁆𑀫𑀕𑀡𑁄 𑀓𑁂𑀴𑀺𑀫𑀓𑀸𑀲𑀺 𑁋 ‘‘𑀏𑀲 𑀔𑁄 𑀩𑀓𑁄 𑀩𑁆𑀭𑀳𑁆𑀫𑀸 𑀯𑀺𑀫𑀸𑀦𑁂 𑀦𑀺𑀮𑀻𑀬𑀢𑀺, 𑀓𑀧𑁆𑀧𑀭𑀼𑀓𑁆𑀔𑁂 𑀦𑀺𑀮𑀻𑀬𑀢𑀺, 𑀉𑀓𑁆𑀓𑀼𑀝𑀺𑀓𑁄 𑀦𑀺𑀲𑀻𑀤𑀢𑀺, 𑀩𑁆𑀭𑀳𑁆𑀫𑁂 𑀢𑁆𑀯𑀁 𑀅𑀦𑁆𑀢𑀭𑀳𑀺𑀢𑁄𑀫𑁆𑀳𑀻’’𑀢𑀺 𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀲𑀺 𑀦𑀸𑀫𑀸𑀢𑀺. 𑀲𑁄 𑀩𑁆𑀭𑀳𑁆𑀫𑀕𑀡𑁂𑀦 𑀉𑀧𑁆𑀧𑀡𑁆𑀟𑀺𑀢𑁄 𑀫𑀗𑁆𑀓𑀼 𑀅𑀳𑁄𑀲𑀺.

𑀏𑀯𑀁 𑀯𑀼𑀢𑁆𑀢𑁂 𑀅𑀳𑀁, 𑀪𑀺𑀓𑁆𑀔𑀯𑁂𑀢𑀺, 𑀪𑀺𑀓𑁆𑀔𑀯𑁂, 𑀏𑀢𑁂𑀦 𑀩𑁆𑀭𑀳𑁆𑀫𑀼𑀦𑀸, ‘‘𑀳𑀦𑁆𑀤 𑀘𑀭𑀳𑀺 𑀢𑁂, 𑀫𑀸𑀭𑀺𑀲, 𑀅𑀦𑁆𑀢𑀭𑀥𑀸𑀬𑀸𑀫𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑁂 𑀢𑀁 𑀅𑀦𑁆𑀢𑀭𑀥𑀸𑀬𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 𑀤𑀺𑀲𑁆𑀯𑀸 𑀅𑀳𑀁 𑀏𑀢𑀤𑀯𑁄𑀘𑀁. 𑀇𑀫𑀁 𑀕𑀸𑀣𑀫𑀪𑀸𑀲𑀺𑀦𑁆𑀢𑀺 𑀓𑀲𑁆𑀫𑀸 𑀪𑀕𑀯𑀸 𑀕𑀸𑀣𑀫𑀪𑀸𑀲𑀻𑀢𑀺? 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀢𑁆𑀣𑀺𑀪𑀸𑀯𑁄 𑀯𑀸 𑀦𑀢𑁆𑀣𑀺𑀪𑀸𑀯𑁄 𑀯𑀸 𑀓𑀣𑀁 𑀲𑀓𑁆𑀓𑀸 𑀚𑀸𑀦𑀺𑀢𑀼𑀦𑁆𑀢𑀺 𑀏𑀯𑀁 𑀩𑁆𑀭𑀳𑁆𑀫𑀕𑀡𑀲𑁆𑀲 𑀯𑀘𑀦𑁄𑀓𑀸𑀲𑁄 𑀫𑀸 𑀳𑁄𑀢𑀽𑀢𑀺 𑀅𑀦𑁆𑀢𑀭𑀳𑀺𑀢𑁄𑀯 𑀕𑀸𑀣𑀫𑀪𑀸𑀲𑀺.

𑀢𑀢𑁆𑀣 𑀪𑀯𑁂𑀯𑀸𑀳𑀁 𑀪𑀬𑀁 𑀤𑀺𑀲𑁆𑀯𑀸𑀢𑀺 𑀅𑀳𑀁 𑀪𑀯𑁂 𑀪𑀬𑀁 𑀤𑀺𑀲𑁆𑀯𑀸𑀬𑁂𑀯. 𑀪𑀯𑀜𑁆𑀘 𑀯𑀺𑀪𑀯𑁂𑀲𑀺𑀦𑀦𑁆𑀢𑀺 𑀇𑀫𑀜𑁆𑀘 𑀓𑀸𑀫𑀪𑀯𑀸𑀤𑀺𑀢𑀺𑀯𑀺𑀥𑀫𑁆𑀧𑀺 𑀲𑀢𑁆𑀢𑀪𑀯𑀁 𑀯𑀺𑀪𑀯𑁂𑀲𑀺𑀦𑀁 𑀯𑀺𑀪𑀯𑀁 𑀕𑀯𑁂𑀲𑀫𑀸𑀦𑀁 𑀧𑀭𑀺𑀬𑁂𑀲𑀫𑀸𑀦𑀫𑁆𑀧𑀺 𑀧𑀼𑀦𑀧𑁆𑀧𑀼𑀦𑀁 𑀪𑀯𑁂𑀬𑁂𑀯 𑀤𑀺𑀲𑁆𑀯𑀸. 𑀪𑀯𑀁 𑀦𑀸𑀪𑀺𑀯𑀤𑀺𑀦𑁆𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀓𑀺𑀜𑁆𑀘𑀺 𑀪𑀯𑀁 𑀦 𑀅𑀪𑀺𑀯𑀤𑀺𑀁, 𑀦 𑀕𑀯𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀦𑀦𑁆𑀤𑀺𑀜𑁆𑀘 𑀦 𑀉𑀧𑀸𑀤𑀺𑀬𑀺𑀦𑁆𑀢𑀺 𑀪𑀯𑀢𑀡𑁆𑀳𑀁 𑀦 𑀉𑀧𑀕𑀜𑁆𑀙𑀺𑀁, 𑀦 𑀅𑀕𑁆𑀕𑀳𑁂𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀇𑀢𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀦𑁆𑀢𑁄 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀯𑀺𑀧𑀲𑁆𑀲𑀦𑀸𑀕𑀩𑁆𑀪𑀁 𑀕𑀸𑀳𑀸𑀧𑁂𑀢𑁆𑀯𑀸 𑀤𑀲𑀫𑀢𑁆𑀢𑀸𑀦𑀺 𑀩𑁆𑀭𑀳𑁆𑀫𑀲𑀳𑀲𑁆𑀲𑀸𑀦𑀺 𑀫𑀕𑁆𑀕𑀨𑀮𑀸𑀫𑀢𑀧𑀸𑀦𑀁 𑀧𑀺𑀯𑀺𑀁𑀲𑀼.

𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀘𑀺𑀢𑁆𑀢𑀚𑀸𑀢𑀸𑀢𑀺 𑀅𑀘𑁆𑀙𑀭𑀺𑀬𑀚𑀸𑀢𑀸 𑀅𑀩𑁆𑀪𑀼𑀢𑀚𑀸𑀢𑀸 𑀢𑀼𑀝𑁆𑀞𑀺𑀚𑀸𑀢𑀸 𑀘 𑀅𑀳𑁂𑀲𑀼𑀁. 𑀲𑀫𑀽𑀮𑀁 𑀪𑀯𑀁 𑀉𑀤𑀩𑁆𑀩𑀳𑀻𑀢𑀺 𑀩𑁄𑀥𑀺𑀫𑀡𑁆𑀟𑁂 𑀅𑀢𑁆𑀢𑀦𑁄 𑀢𑀸𑀬 𑀢𑀸𑀬 𑀤𑁂𑀲𑀦𑀸𑀬 𑀅𑀜𑁆𑀜𑁂𑀲𑀫𑁆𑀧𑀺 𑀩𑀳𑀽𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀲𑀫𑀽𑀮𑀓𑀁 𑀪𑀯𑀁 𑀉𑀤𑀩𑁆𑀩𑀳𑀺, 𑀉𑀤𑁆𑀥𑀭𑀺 𑀉𑀧𑁆𑀧𑀸𑀝𑁂𑀲𑀻𑀢𑀺 𑀅𑀢𑁆𑀣𑁄.

𑁫𑁦𑁫. 𑀢𑀲𑁆𑀫𑀺𑀁 𑀧𑀦 𑀲𑀫𑀬𑁂 𑀫𑀸𑀭𑁄 𑀧𑀸𑀧𑀺𑀫𑀸 𑀓𑁄𑀥𑀸𑀪𑀺𑀪𑀽𑀢𑁄 𑀳𑀼𑀢𑁆𑀯𑀸, ‘‘𑀫𑀬𑀺 𑀯𑀺𑀘𑀭𑀦𑁆𑀢𑁂𑀬𑁂𑀯 𑀲𑀫𑀡𑁂𑀦 𑀕𑁄𑀢𑀫𑁂𑀦 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸 𑀤𑀲𑀫𑀢𑁆𑀢𑀸𑀦𑀺 𑀩𑁆𑀭𑀳𑁆𑀫𑀲𑀳𑀲𑁆𑀲𑀸𑀦𑀺 𑀫𑀫 𑀯𑀲𑀁 𑀅𑀢𑀺𑀯𑀢𑁆𑀢𑀺𑀢𑀸𑀦𑀻’’𑀢𑀺 𑀓𑁄𑀥𑀸𑀪𑀺𑀪𑀽𑀢𑀢𑀸𑀬 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀲𑁆𑀲 𑀲𑀭𑀻𑀭𑁂 𑀅𑀥𑀺𑀫𑀼𑀘𑁆𑀘𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀅𑀣 𑀔𑁄, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀘𑁂 𑀢𑁆𑀯𑀁 𑀏𑀯𑀁 𑀅𑀦𑀼𑀩𑀼𑀤𑁆𑀥𑁄𑀢𑀺 𑀲𑀘𑁂 𑀢𑁆𑀯𑀁 𑀏𑀯𑀁 𑀅𑀢𑁆𑀢𑀦𑀸𑀯 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀅𑀦𑀼𑀩𑀼𑀤𑁆𑀥𑁄. 𑀫𑀸 𑀲𑀸𑀯𑀓𑁂 𑀉𑀧𑀦𑁂𑀲𑀻𑀢𑀺 𑀕𑀺𑀳𑀺𑀲𑀸𑀯𑀓𑁂 𑀯𑀸 𑀧𑀩𑁆𑀩𑀚𑀺𑀢𑀲𑀸𑀯𑀓𑁂 𑀯𑀸 𑀢𑀁 𑀥𑀫𑁆𑀫𑀁 𑀫𑀸 𑀉𑀧𑀦𑀬𑀲𑀺. 𑀳𑀻𑀦𑁂 𑀓𑀸𑀬𑁂 𑀧𑀢𑀺𑀝𑁆𑀞𑀺𑀢𑀸𑀢𑀺 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀧𑀢𑀺𑀝𑁆𑀞𑀺𑀢𑀸. 𑀧𑀡𑀻𑀢𑁂 𑀓𑀸𑀬𑁂 𑀧𑀢𑀺𑀝𑁆𑀞𑀺𑀢𑀸𑀢𑀺 𑀩𑁆𑀭𑀳𑁆𑀫𑀮𑁄𑀓𑁂 𑀧𑀢𑀺𑀝𑁆𑀞𑀺𑀢𑀸. 𑀇𑀤𑀁 𑀓𑁂 𑀲𑀦𑁆𑀥𑀸𑀬 𑀯𑀤𑀢𑀺? 𑀩𑀸𑀳𑀺𑀭𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁂 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑁂. 𑀅𑀦𑀼𑀧𑁆𑀧𑀦𑁆𑀦𑁂 𑀳𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀓𑀼𑀮𑀧𑀼𑀢𑁆𑀢𑀸 𑀢𑀸𑀧𑀲𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀅𑀯𑀺𑀘𑀸𑀭𑁂𑀢𑁆𑀯𑀸 𑀏𑀓𑀘𑀭𑀸 𑀳𑀼𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑀺𑀁𑀲𑀼, 𑀢𑁂 𑀲𑀦𑁆𑀥𑀸𑀬 𑀏𑀯𑀫𑀸𑀳. 𑀅𑀦𑀓𑁆𑀔𑀸𑀢𑀁 𑀓𑀼𑀲𑀮𑀜𑁆𑀳𑀺 𑀫𑀸𑀭𑀺𑀲𑀸𑀢𑀺 𑀧𑀭𑁂𑀲𑀁 𑀅𑀦𑀓𑁆𑀔𑀸𑀢𑀁 𑀅𑀦𑁄𑀯𑀤𑀦𑀁 𑀥𑀫𑁆𑀫𑀓𑀣𑀸𑀬 𑀅𑀓𑀣𑀦𑀁 𑀓𑀼𑀲𑀮𑀁 𑀏𑀢𑀁 𑀲𑁂𑀬𑁆𑀬𑁄. 𑀫𑀸 𑀧𑀭𑀁 𑀑𑀯𑀤𑀸𑀳𑀻𑀢𑀺 𑀓𑀸𑀮𑁂𑀦 𑀫𑀦𑀼𑀲𑁆𑀲𑀮𑁄𑀓𑀁, 𑀓𑀸𑀮𑁂𑀦 𑀤𑁂𑀯𑀮𑁄𑀓𑀁, 𑀓𑀸𑀮𑁂𑀦 𑀩𑁆𑀭𑀳𑁆𑀫𑀮𑁄𑀓𑀁, 𑀓𑀸𑀮𑁂𑀦 𑀦𑀸𑀕𑀮𑁄𑀓𑀁 𑀆𑀳𑀺𑀡𑁆𑀟𑀦𑁆𑀢𑁄 𑀫𑀸 𑀯𑀺𑀘𑀭𑀺, 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀦𑀺𑀲𑀺𑀦𑁆𑀦𑁄 𑀛𑀸𑀦𑀫𑀕𑁆𑀕𑀨𑀮𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀳𑀻𑀢𑀺. 𑀅𑀦𑀸𑀮𑀧𑀦𑀢𑀸𑀬𑀸𑀢𑀺 𑀅𑀦𑀼𑀮𑁆𑀮𑀧𑀦𑀢𑀸𑀬. 𑀩𑁆𑀭𑀳𑁆𑀫𑀼𑀦𑁄 𑀘 𑀅𑀪𑀺𑀦𑀺𑀫𑀦𑁆𑀢𑀦𑀢𑀸𑀬𑀸𑀢𑀺 𑀩𑀓𑀩𑁆𑀭𑀳𑁆𑀫𑀼𑀦𑁄 𑀘 𑀇𑀤𑀜𑁆𑀳𑀺, 𑀫𑀸𑀭𑀺𑀲, 𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀳 𑀓𑀸𑀬𑀓𑁂𑀦 𑀩𑁆𑀭𑀳𑁆𑀫𑀝𑁆𑀞𑀸𑀦𑁂𑀦 𑀦𑀺𑀫𑀦𑁆𑀢𑀦𑀯𑀘𑀦𑁂𑀦. 𑀢𑀲𑁆𑀫𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦. 𑀇𑀫𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑀲𑁆𑀲 𑀩𑁆𑀭𑀳𑁆𑀫𑀦𑀺𑀫𑀦𑁆𑀢𑀦𑀺𑀓𑀁𑀢𑁆𑀯𑁂𑀯 𑀅𑀥𑀺𑀯𑀘𑀦𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀚𑀸𑀢𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀩𑁆𑀭𑀳𑁆𑀫𑀦𑀺𑀫𑀦𑁆𑀢𑀦𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀫𑀸𑀭𑀢𑀚𑁆𑀚𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦𑁬. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀸𑀭𑀢𑀚𑁆𑀚𑀦𑀻𑀬𑀲𑀼𑀢𑁆𑀢𑀁. 𑀢𑀢𑁆𑀣 𑀓𑁄𑀝𑁆𑀞𑀫𑀦𑀼𑀧𑀯𑀺𑀝𑁆𑀞𑁄𑀢𑀺 𑀓𑀼𑀘𑁆𑀙𑀺𑀁 𑀧𑀯𑀺𑀲𑀺𑀢𑁆𑀯𑀸 𑀅𑀦𑁆𑀢𑀸𑀦𑀁 𑀅𑀦𑁆𑀢𑁄 𑀅𑀦𑀼𑀧𑀯𑀺𑀝𑁆𑀞𑁄, 𑀧𑀓𑁆𑀓𑀸𑀲𑀬𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄. 𑀕𑀭𑀼𑀕𑀭𑁄 𑀯𑀺𑀬𑀸𑀢𑀺 𑀕𑀭𑀼𑀓𑀕𑀭𑀼𑀓𑁄 𑀯𑀺𑀬 𑀣𑀤𑁆𑀥𑁄 𑀧𑀸𑀲𑀸𑀡𑀧𑀼𑀜𑁆𑀚𑀲𑀤𑀺𑀲𑁄. 𑀫𑀸𑀲𑀸𑀘𑀺𑀢𑀁 𑀫𑀜𑁆𑀜𑁂𑀢𑀺 𑀫𑀸𑀲𑀪𑀢𑁆𑀢𑀁 𑀪𑀼𑀢𑁆𑀢𑀲𑁆𑀲 𑀓𑀼𑀘𑁆𑀙𑀺 𑀯𑀺𑀬 𑀫𑀸𑀲𑀧𑀽𑀭𑀺𑀢𑀧𑀲𑀺𑀩𑁆𑀩𑀓𑁄 𑀯𑀺𑀬 𑀢𑀺𑀦𑁆𑀢𑀫𑀸𑀲𑁄 𑀯𑀺𑀬 𑀘𑀸𑀢𑀺 𑀅𑀢𑁆𑀣𑁄. 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸𑀢𑀺 𑀲𑀘𑁂 𑀆𑀳𑀸𑀭𑀤𑁄𑀲𑁂𑀦 𑀏𑀲 𑀕𑀭𑀼𑀪𑀸𑀯𑁄, 𑀅𑀩𑁆𑀪𑁄𑀓𑀸𑀲𑁂 𑀘𑀗𑁆𑀓𑀫𑀺𑀢𑀼𑀁 𑀦 𑀲𑀧𑁆𑀧𑀸𑀬𑀦𑁆𑀢𑀺 𑀘𑀗𑁆𑀓𑀫𑀸 𑀑𑀭𑁄𑀳𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀧𑀓𑀢𑀺𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀧𑀘𑁆𑀘𑀢𑁆𑀢𑀁 𑀬𑁄𑀦𑀺𑀲𑁄 𑀫𑀦𑀲𑀸𑀓𑀸𑀲𑀻𑀢𑀺, ‘‘𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀆𑀯𑀚𑁆𑀚𑀫𑀸𑀦𑁄 𑀅𑀢𑁆𑀢𑀦𑁄𑀬𑁂𑀯 𑀉𑀧𑀸𑀬𑁂𑀦 𑀫𑀦𑀲𑀺 𑀅𑀓𑀸𑀲𑀺. 𑀲𑀘𑁂 𑀧𑀦 𑀣𑁂𑀭𑁄 𑀅𑀢𑁆𑀢𑀦𑁄 𑀲𑀻𑀮𑀁 𑀆𑀯𑀚𑁆𑀚𑁂𑀢𑁆𑀯𑀸, ‘‘𑀬𑀁 𑀳𑀺𑀬𑁆𑀬𑁄 𑀯𑀸 𑀧𑀭𑁂 𑀯𑀸 𑀧𑀭𑀲𑀼𑀯𑁂 𑀯𑀸 𑀧𑀭𑀺𑀪𑀼𑀢𑁆𑀢𑀁 𑀅𑀯𑀺𑀧𑀓𑁆𑀓𑀫𑀢𑁆𑀣𑀺, 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀯𑀺𑀲𑀪𑀸𑀕𑀤𑁄𑀲𑁄, 𑀲𑀩𑁆𑀩𑀁 𑀚𑀻𑀭𑀢𑀼 𑀨𑀸𑀲𑀼𑀓𑀁 𑀳𑁄𑀢𑀽’’𑀢𑀺 𑀳𑀢𑁆𑀣𑁂𑀦 𑀓𑀼𑀘𑁆𑀙𑀺𑀁 𑀧𑀭𑀸𑀫𑀲𑀺𑀲𑁆𑀲, 𑀫𑀸𑀭𑁄 𑀧𑀸𑀧𑀺𑀫𑀸 𑀯𑀺𑀮𑀻𑀬𑀺𑀢𑁆𑀯𑀸 𑀅𑀕𑀫𑀺𑀲𑁆𑀲. 𑀣𑁂𑀭𑁄 𑀧𑀦 𑀢𑀣𑀸 𑀅𑀓𑀢𑁆𑀯𑀸 𑀬𑁄𑀦𑀺𑀲𑁄 𑀫𑀦𑀲𑀺 𑀅𑀓𑀸𑀲𑀺. 𑀫𑀸 𑀢𑀣𑀸𑀕𑀢𑀁 𑀯𑀺𑀳𑁂𑀲𑁂𑀲𑀻𑀢𑀺 𑀬𑀣𑀸 𑀳𑀺 𑀧𑀼𑀢𑁆𑀢𑁂𑀲𑀼 𑀯𑀺𑀳𑁂𑀲𑀺𑀢𑁂𑀲𑀼 𑀫𑀸𑀢𑀸𑀧𑀺𑀢𑀭𑁄 𑀯𑀺𑀳𑁂𑀲𑀺𑀢𑀸𑀯 𑀳𑁄𑀦𑁆𑀢𑀺, 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀯𑀺𑀳𑁂𑀲𑀺𑀢𑁂𑀲𑀼 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀯𑀺𑀳𑁂𑀲𑀺𑀢𑀸𑀯, 𑀚𑀦𑀧𑀤𑁂 𑀯𑀺𑀳𑁂𑀲𑀺𑀢𑁂 𑀭𑀸𑀚𑀸 𑀯𑀺𑀳𑁂𑀲𑀺𑀢𑁄𑀯 𑀳𑁄𑀢𑀺, 𑀏𑀯𑀁 𑀢𑀣𑀸𑀕𑀢𑀲𑀸𑀯𑀓𑁂 𑀯𑀺𑀳𑁂𑀲𑀺𑀢𑁂 𑀢𑀣𑀸𑀕𑀢𑁄 𑀯𑀺𑀳𑁂𑀲𑀺𑀢𑁄𑀯 𑀳𑁄𑀢𑀺. 𑀢𑁂𑀦𑀸𑀳 𑁋 ‘‘𑀫𑀸 𑀢𑀣𑀸𑀕𑀢𑀁 𑀯𑀺𑀳𑁂𑀲𑁂𑀲𑀻’’𑀢𑀺.

𑀧𑀘𑁆𑀘𑀕𑁆𑀕𑀴𑁂 𑀅𑀝𑁆𑀞𑀸𑀲𑀻𑀢𑀺 𑀧𑀢𑀺𑀅𑀕𑁆𑀕𑀴𑁂𑀯 𑀅𑀝𑁆𑀞𑀸𑀲𑀺. 𑀅𑀕𑁆𑀕𑀴𑀁 𑀯𑀼𑀘𑁆𑀘𑀢𑀺 𑀓𑀯𑀸𑀝𑀁, 𑀫𑀼𑀔𑁂𑀦 𑀉𑀕𑁆𑀕𑀦𑁆𑀢𑁆𑀯𑀸 𑀧𑀡𑁆𑀡𑀲𑀸𑀮𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺𑀧𑀡𑁆𑀡𑀲𑀸𑀮𑀸𑀬 𑀓𑀯𑀸𑀝𑀁 𑀦𑀺𑀲𑁆𑀲𑀸𑀬 𑀅𑀝𑁆𑀞𑀸𑀲𑀻𑀢𑀺 𑀅𑀢𑁆𑀣𑁄.

𑁫𑁦𑁭. 𑀪𑀽𑀢𑀧𑀼𑀩𑁆𑀩𑀸𑀳𑀁 𑀧𑀸𑀧𑀺𑀫𑀸𑀢𑀺 𑀓𑀲𑁆𑀫𑀸 𑀇𑀤𑀁 𑀤𑁂𑀲𑀦𑀁 𑀆𑀭𑀪𑀺? 𑀣𑁂𑀭𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀆𑀓𑀸𑀲𑀝𑁆𑀞𑀓𑀤𑁂𑀯𑀢𑀸𑀦𑀁 𑀢𑀸𑀯 𑀫𑀦𑀼𑀲𑁆𑀲𑀕𑀦𑁆𑀥𑁄 𑀬𑁄𑀚𑀦𑀲𑀢𑁂 𑀞𑀺𑀢𑀸𑀦𑀁 𑀆𑀩𑀸𑀥𑀁 𑀓𑀭𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘𑀬𑁄𑀚𑀦𑀲𑀢𑀁 𑀔𑁄 𑀭𑀸𑀚𑀜𑁆𑀜 𑀫𑀦𑀼𑀲𑁆𑀲𑀕𑀦𑁆𑀥𑁄 𑀤𑁂𑀯𑁂 𑀉𑀩𑁆𑀩𑀸𑀥𑀢𑀻’𑀢𑀺 (𑀤𑀻. 𑀦𑀺. 𑁨.𑁪𑁧𑁫). 𑀅𑀬𑀁 𑀧𑀦 𑀫𑀸𑀭𑁄 𑀦𑀸𑀕𑀭𑀺𑀓𑁄 𑀧𑀭𑀺𑀘𑁄𑀓𑁆𑀔𑁄 𑀫𑀳𑁂𑀲𑀓𑁆𑀔𑁄 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑁄 𑀤𑁂𑀯𑀭𑀸𑀚𑀸 𑀲𑀫𑀸𑀦𑁄 𑀫𑀫 𑀓𑀼𑀘𑁆𑀙𑀺𑀬𑀁 𑀧𑀯𑀺𑀲𑀺𑀢𑁆𑀯𑀸 𑀅𑀦𑁆𑀢𑀸𑀦𑀁 𑀅𑀦𑁆𑀢𑁄 𑀧𑀓𑁆𑀓𑀸𑀲𑀬𑁄𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀅𑀢𑀺𑀯𑀺𑀬 𑀧𑀤𑀼𑀝𑁆𑀞𑁄 𑀪𑀯𑀺𑀲𑁆𑀲𑀢𑀺. 𑀏𑀯𑀭𑀽𑀧𑀁 𑀦𑀸𑀫 𑀚𑁂𑀕𑀼𑀘𑁆𑀙𑀁 𑀧𑀝𑀺𑀓𑀽𑀮𑀁 𑀑𑀓𑀸𑀲𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀲𑁆𑀲 𑀓𑀺𑀫𑀜𑁆𑀜𑀁 𑀅𑀓𑀭𑀡𑀻𑀬𑀁 𑀪𑀯𑀺𑀲𑁆𑀲𑀢𑀺, 𑀓𑀺𑀁 𑀅𑀜𑁆𑀜𑀁 𑀮𑀚𑁆𑀚𑀺𑀲𑁆𑀲𑀢𑀺, 𑀢𑁆𑀯𑀁 𑀫𑀫 𑀜𑀸𑀢𑀺𑀓𑁄𑀢𑀺 𑀧𑀦 𑀯𑀼𑀢𑁆𑀢𑁂 𑀫𑀼𑀤𑀼𑀪𑀸𑀯𑀁 𑀅𑀦𑀸𑀧𑀚𑁆𑀚𑀫𑀸𑀦𑁄 𑀦𑀸𑀫 𑀦𑀢𑁆𑀣𑀺, 𑀳𑀦𑁆𑀤𑀲𑁆𑀲 𑀜𑀸𑀢𑀺𑀓𑁄𑀝𑀺𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀫𑀼𑀤𑀼𑀓𑁂𑀦𑁂𑀯 𑀦𑀁 𑀉𑀧𑀸𑀬𑁂𑀦 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀇𑀫𑀁 𑀤𑁂𑀲𑀦𑀫𑀸𑀭𑀪𑀺.

𑀲𑁄 𑀫𑁂 𑀢𑁆𑀯𑀁 𑀪𑀸𑀕𑀺𑀦𑁂𑀬𑁆𑀬𑁄 𑀳𑁄𑀲𑀻𑀢𑀺 𑀲𑁄 𑀢𑁆𑀯𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀫𑀬𑁆𑀳𑀁 𑀪𑀸𑀕𑀺𑀦𑁂𑀬𑁆𑀬𑁄 𑀳𑁄𑀲𑀺. 𑀇𑀤𑀁 𑀧𑀯𑁂𑀡𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀤𑁂𑀯𑀮𑁄𑀓𑀲𑁆𑀫𑀺𑀁 𑀧𑀦 𑀫𑀸𑀭𑀲𑁆𑀲 𑀧𑀺𑀢𑀼 𑀯𑀁𑀲𑁄 𑀧𑀺𑀢𑀸𑀫𑀳𑀲𑁆𑀲 𑀯𑀁𑀲𑁄 𑀭𑀚𑁆𑀚𑀁 𑀓𑀭𑁄𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀧𑀼𑀜𑁆𑀜𑀯𑀲𑁂𑀦 𑀤𑁂𑀯𑀮𑁄𑀓𑁂 𑀤𑁂𑀯𑀭𑀸𑀚𑀸 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄, 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀘𑀯𑀢𑀺. 𑀅𑀜𑁆𑀜𑁄 𑀏𑀓𑁄 𑀅𑀢𑁆𑀢𑀦𑀸 𑀓𑀢𑁂𑀦 𑀓𑀫𑁆𑀫𑁂𑀦 𑀢𑀲𑁆𑀫𑀺𑀁 𑀞𑀸𑀦𑁂 𑀅𑀥𑀺𑀧𑀢𑀺 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀢𑀺. 𑀇𑀢𑀺 𑀅𑀬𑀁 𑀫𑀸𑀭𑁄𑀧𑀺 𑀢𑀤𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀧𑀼𑀦 𑀓𑀼𑀲𑀮𑀁 𑀓𑀢𑁆𑀯𑀸 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀢𑀲𑁆𑀫𑀺𑀁 𑀅𑀥𑀺𑀧𑀢𑀺𑀝𑁆𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀥𑀼𑀭𑁄𑀢𑀺 𑀯𑀺𑀕𑀢𑀥𑀼𑀭𑁄, 𑀅𑀜𑁆𑀜𑁂𑀳𑀺 𑀲𑀤𑁆𑀥𑀺𑀁 𑀅𑀲𑀤𑀺𑀲𑁄𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀓𑀲𑀺𑀭𑁂𑀦𑀸𑀢𑀺 𑀅𑀧𑁆𑀧𑀤𑀼𑀓𑁆𑀔𑁂𑀦. 𑀧𑀲𑀼𑀧𑀸𑀮𑀓𑀸𑀢𑀺 𑀅𑀚𑁂𑀴𑀓𑀧𑀸𑀮𑀓𑀸. 𑀧𑀣𑀸𑀯𑀺𑀦𑁄𑀢𑀺 𑀫𑀕𑁆𑀕𑀧𑀝𑀺𑀧𑀦𑁆𑀦𑀸. 𑀓𑀸𑀬𑁂 𑀉𑀧𑀘𑀺𑀦𑀺𑀢𑁆𑀯𑀸𑀢𑀺 𑀲𑀫𑀦𑁆𑀢𑀢𑁄 𑀘𑀺𑀢𑀓𑀁 𑀩𑀦𑁆𑀥𑀺𑀢𑁆𑀯𑀸. 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀽𑀢𑀺 𑀏𑀢𑁆𑀢𑀓𑁂𑀦 𑀲𑀭𑀻𑀭𑀁 𑀧𑀭𑀺𑀬𑀸𑀤𑀸𑀦𑀁 𑀕𑀫𑀺𑀲𑁆𑀲𑀢𑀻𑀢𑀺 𑀘𑀺𑀢𑀓𑀲𑁆𑀲 𑀧𑀫𑀸𑀡𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼. 𑀘𑀺𑀢𑀓𑁄 𑀧𑀤𑀻𑀧𑀲𑀺𑀔𑀸 𑀯𑀺𑀬 𑀧𑀚𑁆𑀚𑀮𑀺, 𑀣𑁂𑀭𑀲𑁆𑀲 𑀉𑀤𑀓𑀮𑁂𑀡𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺. 𑀘𑀻𑀯𑀭𑀸𑀦𑀺 𑀧𑀧𑁆𑀨𑁄𑀝𑁂𑀢𑁆𑀯𑀸𑀢𑀺 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀯𑀺𑀕𑀢𑀥𑀽𑀫𑁂 𑀓𑀺𑀁𑀲𑀼𑀓𑀯𑀡𑁆𑀡𑁂 𑀅𑀗𑁆𑀕𑀸𑀭𑁂 𑀫𑀤𑁆𑀤𑀫𑀸𑀦𑁄 𑀘𑀻𑀯𑀭𑀸𑀦𑀺 𑀯𑀺𑀥𑀼𑀦𑀺𑀢𑁆𑀯𑀸. 𑀲𑀭𑀻𑀭𑁂 𑀧𑀦𑀲𑁆𑀲 𑀉𑀲𑀼𑀫𑀫𑀢𑁆𑀢𑀫𑁆𑀧𑀺 𑀦𑀸𑀳𑁄𑀲𑀺, 𑀘𑀻𑀯𑀭𑁂𑀲𑀼 𑀅𑀁𑀲𑀼𑀫𑀢𑁆𑀢𑀫𑁆𑀧𑀺 𑀦𑀚𑁆𑀛𑀸𑀬𑀺, 𑀲𑀫𑀸𑀧𑀢𑁆𑀢𑀺𑀨𑀮𑀁 𑀦𑀸𑀫𑁂𑀢𑀁.

𑁫𑁦𑁮. 𑀅𑀓𑁆𑀓𑁄𑀲𑀣𑀸𑀢𑀺 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀣. 𑀧𑀭𑀺𑀪𑀸𑀲𑀣𑀸𑀢𑀺 𑀯𑀸𑀘𑀸𑀬 𑀧𑀭𑀺𑀪𑀸𑀲𑀣. 𑀭𑁄𑀲𑁂𑀣𑀸𑀢𑀺 𑀖𑀝𑁆𑀝𑁂𑀣. 𑀯𑀺𑀳𑁂𑀲𑁂𑀣𑀸𑀢𑀺 𑀤𑀼𑀓𑁆𑀔𑀸𑀧𑁂𑀣. 𑀲𑀩𑁆𑀩𑀫𑁂𑀢𑀁 𑀯𑀸𑀘𑀸𑀬 𑀖𑀝𑁆𑀝𑀦𑀲𑁆𑀲𑁂𑀯 𑀅𑀥𑀺𑀯𑀘𑀦𑀁. 𑀬𑀣𑀸 𑀢𑀁 𑀤𑀽𑀲𑀻 𑀫𑀸𑀭𑁄𑀢𑀺 𑀬𑀣𑀸 𑀏𑀢𑁂𑀲𑀁 𑀤𑀽𑀲𑀻 𑀫𑀸𑀭𑁄. 𑀮𑀪𑁂𑀣 𑀑𑀢𑀸𑀭𑀦𑁆𑀢𑀺 𑀮𑀪𑁂𑀣 𑀙𑀺𑀤𑁆𑀤𑀁, 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀬𑀸 𑀆𑀭𑀫𑁆𑀫𑀡𑀁 𑀧𑀘𑁆𑀘𑀬𑀁 𑀮𑀪𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀫𑀼𑀡𑁆𑀟𑀓𑀸𑀢𑀺𑀆𑀤𑀻𑀲𑀼 𑀫𑀼𑀡𑁆𑀟𑁂 𑀫𑀼𑀡𑁆𑀟𑀸𑀢𑀺 𑀲𑀫𑀡𑁂 𑀘 𑀲𑀫𑀡𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑁂𑀬𑁆𑀬, 𑀇𑀫𑁂 𑀧𑀦 𑀳𑀻𑀴𑁂𑀦𑁆𑀢𑀸 𑀫𑀼𑀡𑁆𑀟𑀓𑀸 𑀲𑀫𑀡𑀓𑀸𑀢𑀺 𑀆𑀳𑀁𑀲𑀼. 𑀇𑀩𑁆𑀪𑀸𑀢𑀺 𑀕𑀳𑀧𑀢𑀺𑀓𑀸. 𑀓𑀺𑀡𑁆𑀳𑀸𑀢𑀺 𑀓𑀡𑁆𑀳𑀸, 𑀓𑀸𑀴𑀓𑀸𑀢𑀺 𑀅𑀢𑁆𑀣𑁄. 𑀩𑀦𑁆𑀥𑀼𑀧𑀸𑀤𑀸𑀧𑀘𑁆𑀘𑀸𑀢𑀺 𑀏𑀢𑁆𑀣 𑀩𑀦𑁆𑀥𑀽𑀢𑀺 𑀩𑁆𑀭𑀳𑁆𑀫𑀸 𑀅𑀥𑀺𑀧𑁆𑀧𑁂𑀢𑁄. 𑀢𑀜𑁆𑀳𑀺 𑀩𑁆𑀭𑀸𑀳𑁆𑀫𑀡𑀸 𑀧𑀺𑀢𑀸𑀫𑀳𑁄𑀢𑀺 𑀯𑁄𑀳𑀭𑀦𑁆𑀢𑀺. 𑀧𑀸𑀤𑀸𑀦𑀁 𑀅𑀧𑀘𑁆𑀘𑀸 𑀧𑀸𑀤𑀸𑀧𑀘𑁆𑀘𑀸, 𑀩𑁆𑀭𑀳𑁆𑀫𑀼𑀦𑁄 𑀧𑀺𑀝𑁆𑀞𑀺𑀧𑀸𑀤𑀢𑁄 𑀚𑀸𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀲𑀁 𑀓𑀺𑀭 𑀅𑀬𑀁 𑀮𑀤𑁆𑀥𑀺 𑁋 ‘‘𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀳𑁆𑀫𑀼𑀦𑁄 𑀫𑀼𑀔𑀢𑁄 𑀦𑀺𑀓𑁆𑀔𑀦𑁆𑀢𑀸, 𑀔𑀢𑁆𑀢𑀺𑀬𑀸 𑀉𑀭𑀢𑁄, 𑀯𑁂𑀲𑁆𑀲𑀸 𑀦𑀸𑀪𑀺𑀢𑁄, 𑀲𑀼𑀤𑁆𑀤𑀸 𑀚𑀸𑀡𑀼𑀢𑁄, 𑀲𑀫𑀡𑀸 𑀧𑀺𑀝𑁆𑀞𑀺𑀧𑀸𑀤𑀢𑁄’’𑀢𑀺.

𑀛𑀸𑀬𑀺𑀦𑁄𑀲𑁆𑀫𑀸 𑀛𑀸𑀬𑀺𑀦𑁄𑀲𑁆𑀫𑀸𑀢𑀺 𑀛𑀸𑀬𑀺𑀦𑁄 𑀫𑀬𑀁 𑀛𑀸𑀬𑀺𑀦𑁄 𑀫𑀬𑀦𑁆𑀢𑀺. 𑀫𑀥𑀼𑀭𑀓𑀚𑀸𑀢𑀸𑀢𑀺 𑀆𑀮𑀲𑀺𑀬𑀚𑀸𑀢𑀸. 𑀛𑀸𑀬𑀦𑁆𑀢𑀻𑀢𑀺 𑀘𑀺𑀦𑁆𑀢𑀬𑀦𑁆𑀢𑀺. 𑀧𑀚𑁆𑀛𑀸𑀬𑀦𑁆𑀢𑀻𑀢𑀺𑀆𑀤𑀻𑀦𑀺 𑀉𑀧𑀲𑀕𑁆𑀕𑀯𑀲𑁂𑀦 𑀯𑀟𑁆𑀠𑀺𑀢𑀸𑀦𑀺. 𑀫𑀽𑀲𑀺𑀓𑀁 𑀫𑀕𑁆𑀕𑀬𑀫𑀸𑀦𑁄𑀢𑀺 𑀲𑀸𑀬𑀁 𑀕𑁄𑀘𑀭𑀢𑁆𑀣𑀸𑀬 𑀲𑀼𑀲𑀺𑀭𑀭𑀼𑀓𑁆𑀔𑀢𑁄 𑀦𑀺𑀓𑁆𑀔𑀦𑁆𑀢𑀁 𑀭𑀼𑀓𑁆𑀔𑀲𑀸𑀔𑀸𑀬 𑀫𑀽𑀲𑀺𑀓𑀁 𑀧𑀭𑀺𑀬𑁂𑀲𑀦𑁆𑀢𑁄. 𑀲𑁄 𑀓𑀺𑀭 𑀉𑀧𑀲𑀦𑁆𑀢𑀽𑀧𑀲𑀦𑁆𑀢𑁄 𑀯𑀺𑀬 𑀦𑀺𑀘𑁆𑀘𑀮𑁄𑀯 𑀢𑀺𑀝𑁆𑀞𑀢𑀺, 𑀲𑀫𑁆𑀧𑀢𑁆𑀢𑀓𑀸𑀮𑁂 𑀫𑀽𑀲𑀺𑀓𑀁 𑀲𑀳𑀲𑀸 𑀕𑀡𑁆𑀳𑀸𑀢𑀺. 𑀓𑁄𑀢𑁆𑀣𑀽𑀢𑀺 𑀲𑀺𑀗𑁆𑀕𑀸𑀮𑁄, 𑀲𑁄𑀡𑁄𑀢𑀺𑀧𑀺 𑀯𑀤𑀦𑁆𑀢𑀺. 𑀲𑀦𑁆𑀥𑀺𑀲𑀫𑀮𑀲𑀗𑁆𑀓𑀝𑀺𑀭𑁂𑀢𑀺 𑀲𑀦𑁆𑀥𑀺𑀫𑁆𑀳𑀺 𑀘 𑀲𑀫𑀮𑁂 𑀘 𑀲𑀗𑁆𑀓𑀝𑀺𑀭𑁂 𑀘. 𑀢𑀢𑁆𑀣 𑀲𑀦𑁆𑀥𑀺 𑀦𑀸𑀫 𑀖𑀭𑀲𑀦𑁆𑀥𑀺. 𑀲𑀫𑀮𑁄 𑀦𑀸𑀫 𑀕𑀽𑀣𑀦𑀺𑀤𑁆𑀥𑀫𑀦𑀧𑀦𑀸𑀴𑀺. 𑀲𑀗𑁆𑀓𑀝𑀺𑀭𑀁 𑀦𑀸𑀫 𑀲𑀗𑁆𑀓𑀸𑀭𑀝𑁆𑀞𑀸𑀦𑀁. 𑀯𑀳𑀘𑁆𑀙𑀺𑀦𑁆𑀦𑁄𑀢𑀺 𑀓𑀦𑁆𑀢𑀸𑀭𑀢𑁄 𑀦𑀺𑀓𑁆𑀔𑀦𑁆𑀢𑁄 𑀙𑀺𑀦𑁆𑀦𑀯𑀳𑁄. 𑀲𑀦𑁆𑀥𑀺𑀲𑀫𑀮𑀲𑀗𑁆𑀓𑀝𑀺𑀭𑁂𑀢𑀺 𑀲𑀦𑁆𑀥𑀺𑀫𑁆𑀳𑀺 𑀯𑀸 𑀲𑀫𑀮𑁂 𑀯𑀸 𑀲𑀗𑁆𑀓𑀝𑀺𑀭𑁂 𑀯𑀸. 𑀲𑁄𑀧𑀺 𑀳𑀺 𑀩𑀤𑁆𑀥𑀕𑀢𑁆𑀢𑁄 𑀯𑀺𑀬 𑀦𑀺𑀘𑁆𑀘𑀮𑁄 𑀛𑀸𑀬𑀢𑀺.

𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀻𑀢𑀺 𑀲𑀘𑁂 𑀫𑀸𑀭𑁄 𑀫𑀦𑀼𑀲𑁆𑀲𑀸𑀦𑀁 𑀲𑀭𑀻𑀭𑁂 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀏𑀯𑀁 𑀓𑀭𑁂𑀬𑁆𑀬, 𑀫𑀦𑀼𑀲𑁆𑀲𑀸𑀦𑀁 𑀅𑀓𑀼𑀲𑀮𑀁 𑀦 𑀪𑀯𑁂𑀬𑁆𑀬, 𑀫𑀸𑀭𑀲𑁆𑀲𑁂𑀯 𑀪𑀯𑁂𑀬𑁆𑀬. 𑀲𑀭𑀻𑀭𑁂 𑀧𑀦 𑀅𑀦𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀲𑀪𑀸𑀕𑀯𑀢𑁆𑀣𑀼𑀁 𑀯𑀺𑀧𑁆𑀧𑀝𑀺𑀲𑀸𑀭𑀸𑀭𑀫𑁆𑀫𑀡𑀁 𑀤𑀲𑁆𑀲𑁂𑀢𑀺, 𑀢𑀤𑀸 𑀓𑀺𑀭 𑀲𑁄 𑀪𑀺𑀓𑁆𑀔𑀽 𑀔𑀺𑀧𑁆𑀧𑀁 𑀕𑀳𑁂𑀢𑁆𑀯𑀸 𑀫𑀘𑁆𑀙𑁂 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁂 𑀯𑀺𑀬, 𑀚𑀸𑀮𑀁 𑀕𑀳𑁂𑀢𑁆𑀯𑀸 𑀫𑀘𑁆𑀙𑁂 𑀕𑀡𑁆𑀳𑀦𑁆𑀢𑁂 𑀯𑀺𑀬, 𑀮𑁂𑀧𑀬𑀝𑁆𑀞𑀺𑀁 𑀑𑀟𑁆𑀟𑁂𑀢𑁆𑀯𑀸 𑀲𑀓𑀼𑀡𑁂 𑀩𑀦𑁆𑀥𑀦𑁆𑀢𑁂 𑀯𑀺𑀬, 𑀲𑀼𑀦𑀔𑁂𑀳𑀺 𑀲𑀤𑁆𑀥𑀺𑀁 𑀅𑀭𑀜𑁆𑀜𑁂 𑀫𑀺𑀕𑀯𑀁 𑀘𑀭𑀦𑁆𑀢𑁂 𑀯𑀺𑀬, 𑀫𑀸𑀢𑀼𑀕𑀸𑀫𑁂 𑀕𑀳𑁂𑀢𑁆𑀯𑀸 𑀆𑀧𑀸𑀦𑀪𑀽𑀫𑀺𑀬𑀁 𑀦𑀺𑀲𑀺𑀦𑁆𑀦𑁂 𑀯𑀺𑀬, 𑀦𑀘𑁆𑀘𑀦𑁆𑀢𑁂 𑀯𑀺𑀬, 𑀕𑀸𑀬𑀦𑁆𑀢𑁂 𑀯𑀺𑀬, 𑀪𑀺𑀓𑁆𑀔𑀼𑀦𑀻𑀦𑀁 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑁂𑀲𑀼 𑀯𑀺𑀲𑀪𑀸𑀕𑀫𑀦𑀼𑀲𑁆𑀲𑁂 𑀦𑀺𑀲𑀺𑀦𑁆𑀦𑁂 𑀯𑀺𑀬, 𑀞𑀺𑀢𑁂 𑀯𑀺𑀬 𑀘 𑀓𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀫𑀦𑀼𑀲𑁆𑀲𑀸 𑀅𑀭𑀜𑁆𑀜𑀕𑀢𑀸𑀧𑀺 𑀯𑀦𑀕𑀢𑀸𑀧𑀺 𑀯𑀺𑀳𑀸𑀭𑀕𑀢𑀸𑀧𑀺 𑀯𑀺𑀧𑁆𑀧𑀝𑀺𑀲𑀸𑀭𑀸𑀭𑀫𑁆𑀫𑀡𑀁 𑀧𑀲𑁆𑀲𑀺𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀅𑀜𑁆𑀜𑁂𑀲𑀁 𑀓𑀣𑁂𑀦𑁆𑀢𑀺 𑁋 ‘‘𑀲𑀫𑀡𑀸 𑀏𑀯𑀭𑀽𑀧𑀁 𑀅𑀲𑁆𑀲𑀫𑀡𑀓𑀁 𑀅𑀦𑀦𑀼𑀘𑁆𑀙𑀯𑀺𑀓𑀁 𑀓𑀭𑁄𑀦𑁆𑀢𑀺, 𑀏𑀢𑁂𑀲𑀁 𑀤𑀺𑀦𑁆𑀦𑁂 𑀓𑀼𑀢𑁄 𑀓𑀼𑀲𑀮𑀁, 𑀫𑀸 𑀏𑀢𑁂𑀲𑀁 𑀓𑀺𑀜𑁆𑀘𑀺 𑀅𑀤𑀢𑁆𑀣𑀸’’𑀢𑀺. 𑀏𑀯𑀁 𑀢𑁂 𑀫𑀦𑀼𑀲𑁆𑀲𑀸 𑀤𑀺𑀝𑁆𑀞𑀤𑀺𑀝𑁆𑀞𑀝𑁆𑀞𑀸𑀦𑁂 𑀲𑀻𑀮𑀯𑀦𑁆𑀢𑁂 𑀅𑀓𑁆𑀓𑁄𑀲𑀦𑁆𑀢𑀸 𑀅𑀧𑀼𑀜𑁆𑀜𑀁 𑀧𑀲𑀯𑀺𑀢𑁆𑀯𑀸 𑀅𑀧𑀸𑀬𑀧𑀽𑀭𑀓𑀸 𑀅𑀳𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀺𑀭𑀬𑀁 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺.

𑁫𑁦𑁯. 𑀅𑀦𑁆𑀯𑀸𑀯𑀺𑀝𑁆𑀞𑀸𑀢𑀺 𑀆𑀯𑀝𑁆𑀝𑀺𑀢𑀸. 𑀨𑀭𑀺𑀢𑁆𑀯𑀸 𑀯𑀺𑀳𑀭𑀺𑀁𑀲𑀽𑀢𑀺 𑀦 𑀓𑁂𑀯𑀮𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀺𑀁𑀲𑀼. 𑀓𑀓𑀼𑀲𑀦𑁆𑀥𑀲𑁆𑀲 𑀧𑀦 𑀪𑀕𑀯𑀢𑁄 𑀑𑀯𑀸𑀤𑁂 𑀞𑀢𑁆𑀯𑀸 𑀇𑀫𑁂 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀧𑀤𑀝𑁆𑀞𑀸𑀦𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼.

𑁫𑁧𑁦. 𑀆𑀕𑀢𑀺𑀁 𑀯𑀸 𑀕𑀢𑀺𑀁 𑀯𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀆𑀕𑀫𑀦𑀝𑁆𑀞𑀸𑀦𑀁 𑀯𑀸, 𑀘𑀼𑀢𑀺𑀯𑀲𑁂𑀦 𑀕𑀫𑀦𑀝𑁆𑀞𑀸𑀦𑀁 𑀯𑀸 𑀦 𑀚𑀸𑀦𑀸𑀫𑀺. 𑀲𑀺𑀬𑀸 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀲𑁄𑀫𑀦𑀲𑁆𑀲𑀯𑀲𑁂𑀦 𑀅𑀜𑁆𑀜𑀣𑀢𑁆𑀢𑀁 𑀪𑀯𑁂𑀬𑁆𑀬. 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀻𑀢𑀺 𑀇𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀳𑀺 𑀧𑀼𑀩𑁆𑀩𑁂 𑀯𑀺𑀧𑁆𑀧𑀝𑀺𑀲𑀸𑀭𑀓𑀭𑀁 𑀆𑀭𑀫𑁆𑀫𑀡𑀁 𑀤𑀲𑁆𑀲𑁂𑀢𑀺, 𑀏𑀯𑀫𑀺𑀥𑀸𑀧𑀺 𑀧𑀲𑀸𑀤𑀓𑀭𑀁. 𑀲𑁄 𑀓𑀺𑀭 𑀢𑀤𑀸 𑀫𑀦𑀼𑀲𑁆𑀲𑀸𑀦𑀁 𑀤𑀲𑁆𑀲𑀦𑀝𑁆𑀞𑀸𑀦𑁂 𑀪𑀺𑀓𑁆𑀔𑀽 𑀆𑀓𑀸𑀲𑁂 𑀕𑀘𑁆𑀙𑀦𑁆𑀢𑁂 𑀯𑀺𑀬, 𑀞𑀺𑀢𑁂 𑀯𑀺𑀬 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑁂 𑀯𑀺𑀬, 𑀆𑀓𑀸𑀲𑁂 𑀲𑀽𑀘𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑁂 𑀯𑀺𑀬, 𑀧𑁄𑀢𑁆𑀣𑀓𑀁 𑀯𑀸𑀘𑁂𑀦𑁆𑀢𑁂 𑀯𑀺𑀬, 𑀆𑀓𑀸𑀲𑁂 𑀘𑀻𑀯𑀭𑀁 𑀧𑀲𑀸𑀭𑁂𑀢𑁆𑀯𑀸 𑀓𑀸𑀬𑀁 𑀉𑀢𑀼𑀁 𑀕𑀡𑁆𑀳𑀸𑀧𑁂𑀦𑁆𑀢𑁂 𑀯𑀺𑀬, 𑀦𑀯𑀧𑀩𑁆𑀩𑀚𑀺𑀢𑁂 𑀆𑀓𑀸𑀲𑁂𑀦 𑀘𑀭𑀦𑁆𑀢𑁂 𑀯𑀺𑀬, 𑀢𑀭𑀼𑀡𑀲𑀸𑀫𑀡𑁂𑀭𑁂 𑀆𑀓𑀸𑀲𑁂 𑀞𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀑𑀘𑀺𑀦𑀦𑁆𑀢𑁂 𑀯𑀺𑀬 𑀓𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀫𑀦𑀼𑀲𑁆𑀲𑀸 𑀅𑀭𑀜𑁆𑀜𑀕𑀢𑀸𑀧𑀺 𑀯𑀦𑀕𑀢𑀸𑀧𑀺 𑀯𑀺𑀳𑀸𑀭𑀕𑀢𑀸𑀧𑀺 𑀧𑀩𑁆𑀩𑀚𑀺𑀢𑀸𑀦𑀁 𑀢𑀁 𑀧𑀝𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀆𑀕𑀦𑁆𑀢𑁆𑀯𑀸 𑀅𑀜𑁆𑀜𑁂𑀲𑀁 𑀓𑀣𑁂𑀦𑁆𑀢𑀺 𑁋 ‘‘𑀪𑀺𑀓𑁆𑀔𑀽𑀲𑀼 𑀅𑀦𑁆𑀢𑀫𑀲𑁄 𑀲𑀸𑀫𑀡𑁂𑀭𑀸𑀧𑀺 𑀏𑀯𑀁𑀫𑀳𑀺𑀤𑁆𑀥𑀺𑀓𑁄 𑀫𑀳𑀸𑀦𑀼𑀪𑀸𑀯𑀸, 𑀏𑀢𑁂𑀲𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁 𑀦𑀸𑀫 𑀳𑁄𑀢𑀺, 𑀏𑀢𑁂𑀲𑀁 𑀤𑁂𑀣 𑀲𑀓𑁆𑀓𑀭𑁄𑀣𑀸’’𑀢𑀺. 𑀢𑀢𑁄 𑀫𑀦𑀼𑀲𑁆𑀲𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀓𑁆𑀓𑀭𑁄𑀦𑁆𑀢𑀸 𑀩𑀳𑀼𑀁 𑀧𑀼𑀜𑁆𑀜𑀁 𑀓𑀢𑁆𑀯𑀸 𑀲𑀕𑁆𑀕𑀧𑀣𑀧𑀽𑀭𑀓𑀸 𑀅𑀳𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺.

𑁫𑁧𑁧. 𑀏𑀣 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀲𑀼𑀪𑀸𑀦𑀼𑀧𑀲𑁆𑀲𑀺𑀦𑁄 𑀓𑀸𑀬𑁂 𑀯𑀺𑀳𑀭𑀣𑀸𑀢𑀺 𑀪𑀕𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀆𑀳𑀺𑀡𑁆𑀟𑀦𑁆𑀢𑁄 𑀅𑀦𑁆𑀢𑀫𑀲𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀢𑀺𑀡𑁆𑀡𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀯𑀲𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑁋

‘‘𑀅𑀲𑀼𑀪𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀫𑁂𑀣𑀼𑀦𑀥𑀫𑁆𑀫𑀲𑀫𑀸𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀢𑁆𑀢𑀢𑀺 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺, 𑀉𑀧𑁂𑀓𑁆𑀔𑀸 𑀯𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀸 𑀲𑀡𑁆𑀞𑀸𑀢𑀺.

𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀭𑀲𑀢𑀡𑁆𑀳𑀸𑀬 𑀘𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀢𑁆𑀢𑀢𑀺 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺, 𑀉𑀧𑁂𑀓𑁆𑀔𑀸 𑀯𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀸 𑀲𑀡𑁆𑀞𑀸𑀢𑀺.

𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀺𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀮𑁄𑀓𑀘𑀺𑀢𑁆𑀭𑁂𑀲𑀼 𑀘𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀢𑁆𑀢𑀢𑀺 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺, 𑀉𑀧𑁂𑀓𑁆𑀔𑀸 𑀯𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀸 𑀲𑀡𑁆𑀞𑀸𑀢𑀺.

𑀅𑀦𑀺𑀘𑁆𑀘𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂 𑀘𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀢𑁆𑀢𑀢𑀺 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺, 𑀉𑀧𑁂𑀓𑁆𑀔𑀸 𑀯𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀸 𑀲𑀡𑁆𑀞𑀸𑀢𑀻’’𑀢𑀺 (𑀅. 𑀦𑀺. 𑁭.𑁪𑁯) 𑀏𑀯𑀁 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸 𑁋

𑀏𑀣 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀲𑀼𑀪𑀸𑀦𑀼𑀧𑀲𑁆𑀲𑀻 𑀓𑀸𑀬𑁂 𑀯𑀺𑀳𑀭𑀣, 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀺𑀦𑁄 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀺𑀲𑀜𑁆𑀜𑀺𑀦𑁄 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀺𑀦𑁄𑀢𑀺. 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀓𑀣𑁂𑀲𑀺. 𑀢𑁂𑀧𑀺 𑀪𑀺𑀓𑁆𑀔𑀽 𑀇𑀫𑁂𑀲𑀼 𑀘𑀢𑀽𑀲𑀼 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑀩𑁆𑀩𑀸𑀲𑀯𑁂 𑀔𑁂𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀇𑀫𑀸𑀦𑀺𑀧𑀺 𑀘𑀢𑁆𑀢𑀸𑀭𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀭𑀸𑀕𑀲𑀦𑁆𑀢𑀸𑀦𑀺 𑀤𑁄𑀲𑀫𑁄𑀳𑀲𑀦𑁆𑀢𑀸𑀦𑀺 𑀭𑀸𑀕𑀧𑀝𑀺𑀖𑀸𑀢𑀸𑀦𑀺 𑀤𑁄𑀲𑀫𑁄𑀳𑀧𑀝𑀺𑀖𑀸𑀢𑀸𑀦𑀺 𑀘𑀸𑀢𑀺.

𑁫𑁧𑁨. 𑀲𑀓𑁆𑀔𑀭𑀁 𑀕𑀳𑁂𑀢𑁆𑀯𑀸𑀢𑀺 𑀅𑀦𑁆𑀢𑁄𑀫𑀼𑀝𑁆𑀞𑀺𑀬𑀁 𑀢𑀺𑀝𑁆𑀞𑀦𑀧𑀫𑀸𑀡𑀁 𑀧𑀸𑀲𑀸𑀡𑀁 𑀕𑀳𑁂𑀢𑁆𑀯𑀸. 𑀅𑀬𑀜𑁆𑀳𑀺 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑁂𑀳𑀺 𑀪𑀺𑀓𑁆𑀔𑀽 𑀅𑀓𑁆𑀓𑁄𑀲𑀸𑀧𑁂𑀢𑁆𑀯𑀸𑀧𑀺, 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸𑀦𑀁 𑀯𑀲𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀁 𑀉𑀧𑁆𑀧𑀸𑀤𑀸𑀧𑁂𑀢𑁆𑀯𑀸𑀧𑀺, 𑀑𑀢𑀸𑀭𑀁 𑀅𑀮𑀪𑀦𑁆𑀢𑁄 𑀇𑀤𑀸𑀦𑀺 𑀲𑀳𑀢𑁆𑀣𑀸 𑀉𑀧𑀓𑁆𑀓𑀫𑀺𑀢𑀼𑀓𑀸𑀫𑁄 𑀅𑀜𑁆𑀜𑀢𑀭𑀲𑁆𑀲 𑀓𑀼𑀫𑀸𑀭𑀲𑁆𑀲 𑀲𑀭𑀻𑀭𑁂 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀏𑀯𑀭𑀽𑀧𑀁 𑀧𑀸𑀲𑀸𑀡𑀁 𑀅𑀕𑁆𑀕𑀳𑁂𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀓𑁆𑀔𑀭𑀁 𑀕𑀳𑁂𑀢𑁆𑀯𑀸’’𑀢𑀺.

𑀲𑀻𑀲𑀁 𑀯𑁄 𑀪𑀺𑀦𑁆𑀤𑀻𑀢𑀺 𑀲𑀻𑀲𑀁 𑀪𑀺𑀦𑁆𑀤𑀺, 𑀫𑀳𑀸𑀘𑀫𑁆𑀫𑀁 𑀙𑀺𑀚𑁆𑀚𑀺𑀢𑁆𑀯𑀸 𑀫𑀁𑀲𑀁 𑀤𑁆𑀯𑁂𑀥𑀸 𑀅𑀳𑁄𑀲𑀺. 𑀲𑀓𑁆𑀔𑀭𑀸 𑀧𑀦𑀲𑁆𑀲 𑀲𑀻𑀲𑀓𑀝𑀸𑀳𑀁 𑀅𑀪𑀺𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀺𑀁 𑀆𑀳𑀘𑁆𑀘𑁂𑀯 𑀦𑀺𑀯𑀢𑁆𑀢𑀸. 𑀦𑀸𑀕𑀸𑀧𑀮𑁄𑀓𑀺𑀢𑀁 𑀅𑀧𑀮𑁄𑀓𑁂𑀲𑀻𑀢𑀺 𑀧𑀳𑀸𑀭𑀲𑀤𑁆𑀤𑀁 𑀲𑀼𑀢𑁆𑀯𑀸 𑀬𑀣𑀸 𑀦𑀸𑀫 𑀳𑀢𑁆𑀣𑀺𑀦𑀸𑀕𑁄 𑀇𑀢𑁄 𑀯𑀸 𑀏𑀢𑁆𑀢𑁄 𑀯𑀸 𑀅𑀧𑀮𑁄𑀓𑁂𑀢𑀼𑀓𑀸𑀫𑁄 𑀕𑀻𑀯𑀁 𑀅𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀲𑀓𑀮𑀲𑀭𑀻𑀭𑁂𑀦𑁂𑀯 𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀧𑀮𑁄𑀓𑁂𑀢𑀺. 𑀏𑀯𑀁 𑀲𑀓𑀮𑀲𑀭𑀻𑀭𑁂𑀦𑁂𑀯 𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀧𑀮𑁄𑀓𑁂𑀲𑀺. 𑀬𑀣𑀸 𑀳𑀺 𑀫𑀳𑀸𑀚𑀦𑀲𑁆𑀲 𑀅𑀝𑁆𑀞𑀻𑀦𑀺 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀆𑀳𑀘𑁆𑀘 𑀞𑀺𑀢𑀸𑀦𑀺, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀅𑀗𑁆𑀓𑀼𑀲𑀮𑀕𑁆𑀕𑀸𑀦𑀺, 𑀦 𑀏𑀯𑀁 𑀩𑀼𑀤𑁆𑀥𑀸𑀦𑀁. 𑀩𑀼𑀤𑁆𑀥𑀸𑀦𑀁 𑀧𑀦 𑀲𑀗𑁆𑀔𑀮𑀺𑀓𑀸𑀦𑀺 𑀯𑀺𑀬 𑀏𑀓𑀸𑀩𑀤𑁆𑀥𑀸𑀦𑀺 𑀳𑀼𑀢𑁆𑀯𑀸 𑀞𑀺𑀢𑀸𑀦𑀺, 𑀢𑀲𑁆𑀫𑀸 𑀧𑀘𑁆𑀙𑀢𑁄 𑀅𑀧𑀮𑁄𑀓𑀦𑀓𑀸𑀮𑁂 𑀦 𑀲𑀓𑁆𑀓𑀸 𑀳𑁄𑀢𑀺 𑀕𑀻𑀯𑀁 𑀧𑀭𑀺𑀯𑀢𑁆𑀢𑁂𑀢𑀼𑀁. 𑀬𑀣𑀸 𑀧𑀦 𑀳𑀢𑁆𑀣𑀺𑀦𑀸𑀕𑁄 𑀧𑀘𑁆𑀙𑀸𑀪𑀸𑀕𑀁 𑀅𑀧𑀮𑁄𑀓𑁂𑀢𑀼𑀓𑀸𑀫𑁄 𑀲𑀓𑀮𑀲𑀭𑀻𑀭𑁂𑀦𑁂𑀯 𑀧𑀭𑀺𑀯𑀢𑁆𑀢𑀢𑀺, 𑀏𑀯𑀁 𑀧𑀭𑀺𑀯𑀢𑁆𑀢𑀺𑀢𑀩𑁆𑀩𑀁 𑀳𑁄𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀬𑀦𑁆𑀢𑁂𑀦 𑀧𑀭𑀺𑀯𑀢𑁆𑀢𑀺𑀢𑀸 𑀲𑀼𑀯𑀡𑁆𑀡𑀧𑀝𑀺𑀫𑀸 𑀯𑀺𑀬 𑀲𑀓𑀮𑀲𑀭𑀻𑀭𑁂𑀦𑁂𑀯 𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀧𑀮𑁄𑀓𑁂𑀲𑀺, 𑀅𑀧𑀮𑁄𑀓𑁂𑀢𑁆𑀯𑀸 𑀞𑀺𑀢𑁄 𑀧𑀦, ‘‘𑀦 𑀯𑀸𑀬𑀁 𑀤𑀽𑀲𑀻 𑀫𑀸𑀭𑁄 𑀫𑀢𑁆𑀢𑀫𑀜𑁆𑀜𑀸𑀲𑀻’’𑀢𑀺 𑀆𑀳. 𑀢𑀲𑁆𑀲𑀢𑁆𑀣𑁄, 𑀅𑀬𑀁 𑀤𑀽𑀲𑀻 𑀫𑀸𑀭𑁄 𑀧𑀸𑀧𑀁 𑀓𑀭𑁄𑀦𑁆𑀢𑁄 𑀦𑁂𑀯 𑀧𑀫𑀸𑀡𑀁 𑀅𑀜𑁆𑀜𑀸𑀲𑀺, 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀫𑀓𑀸𑀲𑀻𑀢𑀺.

𑀲𑀳𑀸𑀧𑀮𑁄𑀓𑀦𑀸𑀬𑀸𑀢𑀺 𑀓𑀓𑀼𑀲𑀦𑁆𑀥𑀲𑁆𑀲 𑀪𑀕𑀯𑀢𑁄 𑀅𑀧𑀮𑁄𑀓𑀦𑁂𑀦𑁂𑀯 𑀲𑀳 𑀢𑀗𑁆𑀔𑀡𑀜𑁆𑀜𑁂𑀯. 𑀢𑀫𑁆𑀳𑀸 𑀘 𑀞𑀸𑀦𑀸 𑀘𑀯𑀻𑀢𑀺 𑀢𑀫𑁆𑀳𑀸 𑀘 𑀤𑁂𑀯𑀝𑁆𑀞𑀸𑀦𑀸 𑀘𑀼𑀢𑁄, 𑀫𑀳𑀸𑀦𑀺𑀭𑀬𑀁 𑀉𑀧𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀘𑀯𑀫𑀸𑀦𑁄 𑀳𑀺 𑀦 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀺𑀢𑁄 𑀘𑀯𑀢𑀺, 𑀢𑀲𑁆𑀫𑀸 𑀯𑀲𑀯𑀢𑁆𑀢𑀺𑀤𑁂𑀯𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀘𑀼𑀢𑁄, ‘‘𑀲𑀳𑀸𑀧𑀮𑁄𑀓𑀦𑀸𑀬𑀸’’𑀢𑀺 𑀘 𑀯𑀘𑀦𑀢𑁄 𑀦 𑀪𑀕𑀯𑀢𑁄 𑀅𑀧𑀮𑁄𑀓𑀺𑀢𑀢𑁆𑀢𑀸 𑀘𑀼𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀘𑀼𑀢𑀺𑀓𑀸𑀮𑀤𑀲𑁆𑀲𑀦𑀫𑀢𑁆𑀢𑀫𑁂𑀯 𑀳𑁂𑀢𑀁. 𑀉𑀴𑀸𑀭𑁂 𑀧𑀦 𑀫𑀳𑀸𑀲𑀸𑀯𑀓𑁂 𑀯𑀺𑀭𑀤𑁆𑀥𑀢𑁆𑀢𑀸 𑀓𑀼𑀤𑀸𑀭𑀺𑀬𑀸 𑀧𑀳𑀝𑀁 𑀯𑀺𑀬𑀲𑁆𑀲 𑀆𑀬𑀼 𑀢𑀢𑁆𑀣𑁂𑀯 𑀙𑀺𑀚𑁆𑀚𑀺𑀢𑁆𑀯𑀸 𑀕𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀬𑁄 𑀦𑀸𑀫𑀥𑁂𑀬𑁆𑀬𑀸 𑀳𑁄𑀦𑁆𑀢𑀻𑀢𑀺 𑀢𑀻𑀡𑀺 𑀦𑀸𑀫𑀸𑀦𑀺 𑀳𑁄𑀦𑁆𑀢𑀺. 𑀙𑀨𑀲𑁆𑀲𑀸𑀬𑀢𑀦𑀺𑀓𑁄𑀢𑀺 𑀙𑀲𑀼 𑀨𑀲𑁆𑀲𑀸𑀬𑀢𑀦𑁂𑀲𑀼 𑀧𑀸𑀝𑀺𑀬𑁂𑀓𑁆𑀓𑀸𑀬 𑀯𑁂𑀤𑀦𑀸𑀬 𑀧𑀘𑁆𑀘𑀬𑁄.

𑀲𑀗𑁆𑀓𑀼𑀲𑀫𑀸𑀳𑀢𑁄𑀢𑀺 𑀅𑀬𑀲𑀽𑀮𑁂𑀳𑀺 𑀲𑀫𑀸𑀳𑀢𑁄. 𑀧𑀘𑁆𑀘𑀢𑁆𑀢𑀯𑁂𑀤𑀦𑀺𑀬𑁄𑀢𑀺 𑀲𑀬𑀫𑁂𑀯 𑀯𑁂𑀤𑀦𑀸𑀚𑀦𑀓𑁄. 𑀲𑀗𑁆𑀓𑀼𑀦𑀸 𑀲𑀗𑁆𑀓𑀼 𑀳𑀤𑀬𑁂 𑀲𑀫𑀸𑀕𑀘𑁆𑀙𑁂𑀬𑁆𑀬𑀸𑀢𑀺 𑀅𑀬𑀲𑀽𑀮𑁂𑀦 𑀲𑀤𑁆𑀥𑀺𑀁 𑀅𑀬𑀲𑀽𑀮𑀁 𑀳𑀤𑀬𑀫𑀚𑁆𑀛𑁂 𑀲𑀫𑀸𑀕𑀘𑁆𑀙𑁂𑀬𑁆𑀬. 𑀢𑀲𑁆𑀫𑀺𑀁 𑀓𑀺𑀭 𑀦𑀺𑀭𑀬𑁂 𑀉𑀧𑀧𑀦𑁆𑀦𑀸𑀦𑀁 𑀢𑀺𑀕𑀸𑀯𑀼𑀢𑁄 𑀅𑀢𑁆𑀢𑀪𑀸𑀯𑁄 𑀳𑁄𑀢𑀺, 𑀣𑁂𑀭𑀲𑁆𑀲𑀸𑀧𑀺 𑀢𑀸𑀤𑀺𑀲𑁄 𑀅𑀳𑁄𑀲𑀺. 𑀅𑀣𑀲𑁆𑀲 𑀳𑀺 𑀦𑀺𑀭𑀬𑀧𑀸𑀮𑀸 𑀢𑀸𑀮𑀓𑁆𑀔𑀦𑁆𑀥𑀧𑀫𑀸𑀡𑀸𑀦𑀺 𑀅𑀬𑀲𑀽𑀮𑀸𑀦𑀺 𑀆𑀤𑀺𑀢𑁆𑀢𑀸𑀦𑀺 𑀲𑀫𑁆𑀧𑀚𑁆𑀚𑀮𑀺𑀢𑀸𑀦𑀺 𑀲𑀚𑁄𑀢𑀺𑀪𑀽𑀢𑀸𑀦𑀺 𑀲𑀬𑀫𑁂𑀯 𑀕𑀳𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀦𑀺𑀯𑀢𑁆𑀢𑀫𑀸𑀦𑀸, 𑁋 ‘‘𑀇𑀫𑀺𑀦𑀸 𑀢𑁂 𑀞𑀸𑀦𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 𑀧𑀸𑀧𑀁 𑀓𑀢’’𑀦𑁆𑀢𑀺 𑀧𑀽𑀯𑀤𑁄𑀡𑀺𑀬𑀁 𑀧𑀽𑀯𑀁 𑀓𑁄𑀝𑁆𑀝𑁂𑀦𑁆𑀢𑁄 𑀯𑀺𑀬 𑀳𑀤𑀬𑀫𑀚𑁆𑀛𑀁 𑀓𑁄𑀝𑁆𑀝𑁂𑀢𑁆𑀯𑀸, 𑀧𑀡𑁆𑀡𑀸𑀲 𑀚𑀦𑀸 𑀧𑀸𑀤𑀸𑀪𑀺𑀫𑀼𑀔𑀸 𑀧𑀡𑁆𑀡𑀸𑀲 𑀚𑀦𑀸 𑀲𑀻𑀲𑀸𑀪𑀺𑀫𑀼𑀔𑀸 𑀓𑁄𑀝𑁆𑀝𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀏𑀯𑀁 𑀕𑀘𑁆𑀙𑀦𑁆𑀢𑀸 𑀧𑀜𑁆𑀘𑀳𑀺 𑀯𑀲𑁆𑀲𑀲𑀢𑁂𑀳𑀺 𑀉𑀪𑁄 𑀅𑀦𑁆𑀢𑁂 𑀧𑀢𑁆𑀯𑀸 𑀧𑀼𑀦 𑀦𑀺𑀯𑀢𑁆𑀢𑀫𑀸𑀦𑀸 𑀧𑀜𑁆𑀘𑀳𑀺 𑀯𑀲𑁆𑀲𑀲𑀢𑁂𑀳𑀺 𑀳𑀤𑀬𑀫𑀚𑁆𑀛𑀁 𑀆𑀕𑀘𑁆𑀙𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬 𑀏𑀯𑀁 𑀯𑀼𑀢𑁆𑀢𑀁.

𑀯𑀼𑀝𑁆𑀞𑀸𑀦𑀺𑀫𑀦𑁆𑀢𑀺 𑀯𑀺𑀧𑀸𑀓𑀯𑀼𑀝𑁆𑀞𑀸𑀦𑀯𑁂𑀤𑀦𑀁. 𑀲𑀸 𑀓𑀺𑀭 𑀫𑀳𑀸𑀦𑀺𑀭𑀬𑁂 𑀯𑁂𑀤𑀦𑀸𑀢𑁄 𑀤𑀼𑀓𑁆𑀔𑀢𑀭𑀸 𑀳𑁄𑀢𑀺, 𑀬𑀣𑀸 𑀳𑀺 𑀲𑀺𑀦𑁂𑀳𑀧𑀸𑀦𑀲𑀢𑁆𑀢𑀸𑀳𑀢𑁄 𑀧𑀭𑀺𑀳𑀸𑀭𑀲𑀢𑁆𑀢𑀸𑀳𑀁 𑀤𑀼𑀓𑁆𑀔𑀢𑀭𑀁, 𑀏𑀯𑀁 𑀫𑀳𑀸𑀦𑀺𑀭𑀬𑀤𑀼𑀓𑁆𑀔𑀢𑁄 𑀉𑀲𑁆𑀲𑀤𑁂 𑀯𑀺𑀧𑀸𑀓𑀯𑀼𑀝𑁆𑀞𑀸𑀦𑀯𑁂𑀤𑀦𑀸 𑀤𑀼𑀓𑁆𑀔𑀢𑀭𑀸𑀢𑀺 𑀯𑀤𑀦𑁆𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀫𑀘𑁆𑀙𑀲𑁆𑀲𑀸𑀢𑀺 𑀧𑀼𑀭𑀺𑀲𑀲𑀻𑀲𑀜𑁆𑀳𑀺 𑀯𑀝𑁆𑀝𑀁 𑀳𑁄𑀢𑀺, 𑀲𑀽𑀮𑁂𑀦 𑀧𑀳𑀭𑀦𑁆𑀢𑀲𑁆𑀲 𑀧𑀳𑀸𑀭𑁄 𑀞𑀸𑀦𑀁 𑀦 𑀮𑀪𑀢𑀺 𑀧𑀭𑀺𑀕𑀮𑀢𑀺, 𑀫𑀘𑁆𑀙𑀲𑀻𑀲𑀁 𑀆𑀬𑀢𑀁 𑀧𑀼𑀣𑀼𑀮𑀁, 𑀧𑀳𑀸𑀭𑁄 𑀞𑀸𑀦𑀁 𑀮𑀪𑀢𑀺, 𑀅𑀯𑀺𑀭𑀚𑁆𑀛𑀺𑀢𑁆𑀯𑀸 𑀓𑀫𑁆𑀫𑀓𑀸𑀭𑀡𑀸 𑀲𑀼𑀓𑀭𑀸 𑀳𑁄𑀢𑀺, 𑀢𑀲𑁆𑀫𑀸 𑀏𑀯𑀭𑀽𑀧𑀁 𑀲𑀻𑀲𑀁 𑀳𑁄𑀢𑀺.

𑁫𑁧𑁩. 𑀯𑀺𑀥𑀼𑀭𑀁 𑀲𑀸𑀯𑀓𑀫𑀸𑀲𑀚𑁆𑀚𑀸𑀢𑀺 𑀯𑀺𑀥𑀼𑀭𑀁 𑀲𑀸𑀯𑀓𑀁 𑀖𑀝𑁆𑀝𑀬𑀺𑀢𑁆𑀯𑀸. 𑀧𑀘𑁆𑀘𑀢𑁆𑀢𑀯𑁂𑀤𑀦𑀸𑀢𑀺 𑀲𑀬𑀫𑁂𑀯 𑀧𑀸𑀝𑀺𑀬𑁂𑀓𑁆𑀓𑀯𑁂𑀤𑀦𑀸𑀚𑀦𑀓𑀸. 𑀈𑀤𑀺𑀲𑁄 𑀦𑀺𑀭𑀬𑁄 𑀆𑀲𑀻𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦𑀺𑀭𑀬𑁄 𑀤𑁂𑀯𑀤𑀽𑀢𑀲𑀼𑀢𑁆𑀢𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀓𑀡𑁆𑀳-𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀲𑀻𑀢𑀺 𑀓𑀸𑀴𑀓-𑀫𑀸𑀭, 𑀤𑀼𑀓𑁆𑀔𑀁 𑀯𑀺𑀦𑁆𑀤𑀺𑀲𑁆𑀲𑀲𑀺. 𑀫𑀚𑁆𑀛𑁂 𑀲𑀭𑀲𑁆𑀲𑀸𑀢𑀺 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀫𑀚𑁆𑀛𑁂 𑀉𑀤𑀓𑀁 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀯𑀺𑀫𑀸𑀦𑀸𑀦𑀺 𑀓𑀧𑁆𑀧𑀝𑁆𑀞𑀺𑀢𑀺𑀓𑀸𑀦𑀺 𑀳𑁄𑀦𑁆𑀢𑀺, 𑀢𑁂𑀲𑀁 𑀯𑁂𑀴𑀼𑀭𑀺𑀬𑀲𑁆𑀲 𑀯𑀺𑀬 𑀯𑀡𑁆𑀡𑁄 𑀳𑁄𑀢𑀺, 𑀧𑀩𑁆𑀩𑀢𑀫𑀢𑁆𑀣𑀓𑁂 𑀚𑀮𑀺𑀢𑀦𑀴𑀕𑁆𑀕𑀺𑀓𑁆𑀔𑀦𑁆𑀥𑁄 𑀯𑀺𑀬 𑀘 𑀦𑁂𑀲𑀁 𑀅𑀘𑁆𑀘𑀺𑀬𑁄 𑀚𑁄𑀢𑀦𑁆𑀢𑀺, 𑀧𑀪𑀲𑁆𑀲𑀭𑀸 𑀧𑀪𑀸𑀲𑀫𑁆𑀧𑀦𑁆𑀦𑀸 𑀳𑁄𑀦𑁆𑀢𑀺, 𑀢𑁂𑀲𑀼 𑀯𑀺𑀫𑀸𑀦𑁂𑀲𑀼 𑀦𑀻𑀮𑀪𑁂𑀤𑀸𑀤𑀺𑀯𑀲𑁂𑀦 𑀦𑀸𑀦𑀢𑁆𑀢𑀯𑀡𑁆𑀡𑀸 𑀅𑀘𑁆𑀙𑀭𑀸 𑀦𑀘𑁆𑀘𑀦𑁆𑀢𑀺. 𑀬𑁄 𑀏𑀢𑀫𑀪𑀺𑀚𑀸𑀦𑀸𑀢𑀻𑀢𑀺 𑀬𑁄 𑀏𑀢𑀁 𑀯𑀺𑀫𑀸𑀦𑀯𑀢𑁆𑀣𑀼𑀁 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀫𑁂𑀢𑁆𑀣 𑀯𑀺𑀫𑀸𑀦𑀧𑁂𑀢𑀯𑀢𑁆𑀣𑀼𑀓𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀸𑀤𑀗𑁆𑀕𑀼𑀝𑁆𑀞𑁂𑀦 𑀓𑀫𑁆𑀧𑀬𑀻𑀢𑀺 𑀇𑀤𑀁 𑀧𑀸𑀲𑀸𑀤𑀓𑀫𑁆𑀧𑀦𑀲𑀼𑀢𑁆𑀢𑁂𑀦 𑀤𑀻𑀧𑁂𑀢𑀩𑁆𑀩𑀁. 𑀬𑁄 𑀯𑁂𑀚𑀬𑀦𑁆𑀢𑀁 𑀧𑀸𑀲𑀸𑀤𑀦𑁆𑀢𑀺 𑀇𑀤𑀁 𑀘𑀽𑀴𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺𑀲𑀼𑀢𑁆𑀢𑁂𑀦 𑀤𑀻𑀧𑁂𑀢𑀩𑁆𑀩𑀁. 𑀲𑀓𑁆𑀓𑀁 𑀲𑁄 𑀧𑀭𑀺𑀧𑀼𑀘𑁆𑀙𑀢𑀻𑀢𑀺 𑀇𑀤𑀫𑁆𑀧𑀺 𑀢𑁂𑀦𑁂𑀯 𑀤𑀻𑀧𑁂𑀢𑀩𑁆𑀩𑀁. 𑀲𑀼𑀥𑀫𑁆𑀫𑀸𑀬𑀸𑀪𑀺𑀢𑁄 𑀲𑀪𑀦𑁆𑀢𑀺 𑀲𑀼𑀥𑀫𑁆𑀫𑀲𑀪𑀸𑀬 𑀲𑀫𑀻𑀧𑁂, 𑀅𑀬𑀁 𑀧𑀦 𑀩𑁆𑀭𑀳𑁆𑀫𑀮𑁄𑀓𑁂 𑀲𑀼𑀥𑀫𑁆𑀫𑀲𑀪𑀸𑀯, 𑀦 𑀢𑀸𑀯𑀢𑀺𑀁𑀲𑀪𑀯𑀦𑁂. 𑀲𑀼𑀥𑀫𑁆𑀫𑀲𑀪𑀸𑀯𑀺𑀭𑀳𑀺𑀢𑁄 𑀳𑀺 𑀤𑁂𑀯𑀮𑁄𑀓𑁄 𑀦𑀸𑀫 𑀦𑀢𑁆𑀣𑀺.

𑀩𑁆𑀭𑀳𑁆𑀫𑀮𑁄𑀓𑁂 𑀧𑀪𑀲𑁆𑀲𑀭𑀦𑁆𑀢𑀺 𑀩𑁆𑀭𑀳𑁆𑀫𑀮𑁄𑀓𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀫𑀳𑀸𑀓𑀲𑁆𑀲𑀧𑀸𑀤𑀻𑀳𑀺 𑀲𑀸𑀯𑀓𑁂𑀳𑀺 𑀲𑀤𑁆𑀥𑀺𑀁 𑀢𑀲𑁆𑀲 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀪𑀕𑀯𑀢𑁄 𑀑𑀪𑀸𑀲𑀁. 𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀪𑀕𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀲𑀼𑀥𑀫𑁆𑀫𑀸𑀬 𑀤𑁂𑀯𑀲𑀪𑀸𑀬 𑀲𑀦𑁆𑀦𑀺𑀧𑀢𑀺𑀢𑁆𑀯𑀸, 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑁄𑀘𑀺 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀏𑀯𑀁𑀫𑀳𑀺𑀤𑁆𑀥𑀺𑀓𑁄. 𑀬𑁄 𑀇𑀥 𑀆𑀕𑀦𑁆𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀲𑁆𑀲𑁂𑀯 𑀩𑁆𑀭𑀳𑁆𑀫𑀕𑀡𑀲𑁆𑀲 𑀘𑀺𑀢𑁆𑀢𑀫𑀜𑁆𑀜𑀸𑀬 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀩𑁆𑀭𑀳𑁆𑀫𑀕𑀡𑀲𑁆𑀲 𑀫𑀢𑁆𑀣𑀓𑁂 𑀦𑀺𑀲𑀺𑀦𑁆𑀦𑁄 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀻𑀦𑀁 𑀆𑀕𑀫𑀦𑀁 𑀘𑀺𑀦𑁆𑀢𑁂𑀲𑀺. 𑀢𑁂𑀧𑀺 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀘𑁂𑀓𑀁 𑀤𑀺𑀲𑀸𑀲𑀼 𑀦𑀺𑀲𑀻𑀤𑀺𑀁𑀲𑀼, 𑀲𑀓𑀮𑀩𑁆𑀭𑀳𑁆𑀫𑀮𑁄𑀓𑁄 𑀏𑀓𑁄𑀪𑀸𑀲𑁄 𑀅𑀳𑁄𑀲𑀺. 𑀲𑀢𑁆𑀣𑀸 𑀘𑀢𑀼𑀲𑀘𑁆𑀘𑀧𑁆𑀧𑀓𑀸𑀲𑀦𑀁 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀅𑀦𑁂𑀓𑀸𑀦𑀺 𑀩𑁆𑀭𑀳𑁆𑀫𑀲𑀳𑀲𑁆𑀲𑀸𑀦𑀺 𑀫𑀕𑁆𑀕𑀨𑀮𑁂𑀲𑀼 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀢𑀁 𑀲𑀦𑁆𑀥𑀸𑀬𑀺𑀫𑀸 𑀕𑀸𑀣𑀸 𑀯𑀼𑀢𑁆𑀢𑀸, 𑀲𑁄 𑀧𑀦𑀸𑀬𑀫𑀢𑁆𑀣𑁄 𑀅𑀜𑁆𑀜𑀢𑀭𑀩𑁆𑀭𑀳𑁆𑀫𑀲𑀼𑀢𑁆𑀢𑁂𑀦 𑀤𑀻𑀧𑁂𑀢𑀩𑁆𑀩𑁄.

𑀯𑀺𑀫𑁄𑀓𑁆𑀔𑁂𑀦 𑀅𑀨𑀲𑁆𑀲𑀬𑀻𑀢𑀺 𑀛𑀸𑀦𑀯𑀺𑀫𑁄𑀓𑁆𑀔𑁂𑀦 𑀨𑀼𑀲𑀺. 𑀯𑀦𑀦𑁆𑀢𑀺 𑀚𑀫𑁆𑀩𑀼𑀤𑀻𑀧𑀁. 𑀧𑀼𑀩𑁆𑀩𑀯𑀺𑀤𑁂𑀳𑀸𑀦𑀦𑁆𑀢𑀺 𑀧𑀼𑀩𑁆𑀩𑀯𑀺𑀤𑁂𑀳𑀸𑀦𑀜𑁆𑀘 𑀤𑀻𑀧𑀁. 𑀬𑁂 𑀘 𑀪𑀽𑀫𑀺𑀲𑀬𑀸 𑀦𑀭𑀸𑀢𑀺 𑀪𑀽𑀫𑀺𑀲𑀬𑀸 𑀦𑀭𑀸 𑀦𑀸𑀫 𑀅𑀧𑀭𑀕𑁄𑀬𑀸𑀦𑀓𑀸 𑀘 𑀉𑀢𑁆𑀢𑀭𑀓𑀼𑀭𑀼𑀓𑀸 𑀘. 𑀢𑁂𑀧𑀺 𑀲𑀩𑁆𑀩𑁂 𑀨𑀼𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀁 𑀧𑀦 𑀅𑀢𑁆𑀣𑁄 𑀦𑀦𑁆𑀤𑁄𑀧𑀦𑀦𑁆𑀤𑀤𑀫𑀦𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀯𑀢𑁆𑀣𑀼 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀇𑀤𑁆𑀥𑀺𑀓𑀣𑀸𑀬 𑀯𑀺𑀢𑁆𑀣𑀸𑀭𑀺𑀢𑀁. 𑀅𑀧𑀼𑀜𑁆𑀜𑀁 𑀧𑀲𑀯𑀻𑀢𑀺 𑀅𑀧𑀼𑀜𑁆𑀜𑀁 𑀧𑀝𑀺𑀮𑀪𑀺. 𑀆𑀲𑀁 𑀫𑀸 𑀅𑀓𑀸𑀲𑀺 𑀪𑀺𑀓𑁆𑀔𑀽𑀲𑀽𑀢𑀺 𑀪𑀺𑀓𑁆𑀔𑀽 𑀯𑀺𑀳𑁂𑀲𑁂𑀫𑀻𑀢𑀺 𑀏𑀢𑀁 𑀆𑀲𑀁 𑀫𑀸 𑀅𑀓𑀸𑀲𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀸𑀭𑀢𑀚𑁆𑀚𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀽𑀮𑀧𑀡𑁆𑀡𑀸𑀲𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.