📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀫𑀚𑁆𑀛𑀺𑀫𑀦𑀺𑀓𑀸𑀬𑁂

𑀫𑀽𑀮𑀧𑀡𑁆𑀡𑀸𑀲-𑀝𑀻𑀓𑀸

(𑀧𑀞𑀫𑁄 𑀪𑀸𑀕𑁄)

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸

𑁧. 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 ¶ ¶ 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀧𑀪𑀯𑀦𑀺𑀲𑁆𑀲𑀬𑀯𑀺𑀲𑀼𑀤𑁆𑀥𑀺𑀧𑀝𑀺𑀯𑁂𑀤𑀦𑀢𑁆𑀣𑀁, 𑀢𑀁 𑀧𑀦 𑀥𑀫𑁆𑀫𑀲𑀁𑀯𑀡𑁆𑀡𑀦𑀸𑀲𑀼 𑀯𑀺𑀜𑁆𑀜𑀽𑀦𑀁 𑀩𑀳𑀼𑀫𑀸𑀦𑀼𑀧𑁆𑀧𑀸𑀤𑀦𑀢𑁆𑀣𑀁, 𑀢𑀁 𑀲𑀫𑁆𑀫𑀤𑁂𑀯 𑀢𑁂𑀲𑀁 𑀉𑀕𑁆𑀕𑀳𑀥𑀸𑀭𑀡𑀸𑀤𑀺𑀓𑁆𑀓𑀫𑀮𑀤𑁆𑀥𑀩𑁆𑀩𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀲𑀩𑁆𑀩𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀢𑁆𑀣𑀁. 𑀅𑀣 𑀯𑀸 𑀫𑀗𑁆𑀕𑀮𑀪𑀸𑀯𑀢𑁄, 𑀲𑀩𑁆𑀩𑀓𑀺𑀭𑀺𑀬𑀸𑀲𑀼 𑀧𑀼𑀩𑁆𑀩𑀓𑀺𑀘𑁆𑀘𑀪𑀸𑀯𑀢𑁄, 𑀧𑀡𑁆𑀟𑀺𑀢𑁂𑀳𑀺 𑀲𑀫𑀸𑀘𑀭𑀺𑀢𑀪𑀸𑀯𑀢𑁄, 𑀆𑀬𑀢𑀺𑀁 𑀧𑀭𑁂𑀲𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑀢𑁄 𑀘 𑀲𑀁𑀯𑀡𑁆𑀡𑀦𑀸𑀬𑀁 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀺𑀭𑀺𑀬𑀸. 𑀅𑀣 𑀯𑀸 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀭𑀡𑀁 𑀧𑀽𑀚𑀦𑀻𑀬𑀧𑀽𑀚𑀸𑀧𑀼𑀜𑁆𑀜𑀯𑀺𑀲𑁂𑀲𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀁. 𑀢𑀁 𑀅𑀢𑁆𑀢𑀦𑁄 𑀬𑀣𑀸𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀓𑀲𑁆𑀲 𑀓𑀫𑁆𑀫𑀲𑁆𑀲 𑀩𑀮𑀸𑀦𑀼𑀧𑁆𑀧𑀤𑀸𑀦𑀢𑁆𑀣𑀁. 𑀅𑀦𑁆𑀢𑀭𑀸 𑀘 𑀢𑀲𑁆𑀲 𑀅𑀲𑀗𑁆𑀓𑁄𑀘𑀦𑀢𑁆𑀣𑀁. 𑀢𑀤𑀼𑀪𑀬𑀁 𑀅𑀦𑀦𑁆𑀢𑀭𑀸𑀬𑁂𑀦 𑀅𑀝𑁆𑀞𑀓𑀣𑀸𑀬 𑀧𑀭𑀺𑀲𑀫𑀸𑀧𑀦𑀢𑁆𑀣𑀁. 𑀇𑀤𑀫𑁂𑀯 𑀘 𑀧𑀬𑁄𑀚𑀦𑀁 𑀆𑀘𑀭𑀺𑀬𑁂𑀦 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀇𑀢𑀺 𑀫𑁂 𑀧𑀲𑀦𑁆𑀦𑀫𑀢𑀺𑀦𑁄…𑀧𑁂… 𑀢𑀲𑁆𑀲𑀸𑀦𑀼𑀪𑀸𑀯𑁂𑀦𑀸’’𑀢𑀺. 𑀯𑀢𑁆𑀣𑀼𑀢𑁆𑀢𑀬𑀧𑀽𑀚𑀸𑀳𑀺 𑀦𑀺𑀭𑀢𑀺𑀲𑀬𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀲𑀁𑀩𑀼𑀤𑁆𑀥𑀺𑀬𑀸 𑀅𑀧𑀭𑀺𑀫𑁂𑀬𑁆𑀬𑀧𑀪𑀸𑀯𑁄 𑀧𑀼𑀜𑁆𑀜𑀸𑀢𑀺𑀲𑀬𑁄𑀢𑀺 𑀩𑀳𑀼𑀯𑀺𑀥𑀦𑁆𑀢𑀭𑀸𑀬𑁂𑀧𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 ¶ 𑀅𑀦𑁆𑀢𑀭𑀸𑀬𑀦𑀺𑀩𑀦𑁆𑀥𑀦𑀲𑀓𑀮𑀲𑀁𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀸𑀬 𑀧𑀳𑁄𑀢𑀺. 𑀪𑀬𑀸𑀤𑀺𑀉𑀧𑀤𑁆𑀤𑀯𑀜𑁆𑀘 𑀦𑀺𑀯𑀸𑀭𑁂𑀢𑀺. 𑀬𑀣𑀸𑀳 𑁋

‘‘𑀧𑀽𑀚𑀸𑀭𑀳𑁂 𑀧𑀽𑀚𑀬𑀢𑁄. 𑀩𑀼𑀤𑁆𑀥𑁂 𑀬𑀤𑀺 𑀯 𑀲𑀸𑀯𑀓𑁂’’𑀢𑀺𑀆𑀤𑀺 (𑀥. 𑀧. 𑁧𑁯𑁫; 𑀅𑀧. 𑁧.𑁧𑁦.𑁧), 𑀢𑀣𑀸 ¶ 𑁋

‘‘𑀬𑁂, 𑀪𑀺𑀓𑁆𑀔𑀯𑁂, 𑀩𑀼𑀤𑁆𑀥𑁂 𑀧𑀲𑀦𑁆𑀦𑀸, 𑀅𑀕𑁆𑀕𑁂 𑀢𑁂 𑀧𑀲𑀦𑁆𑀦𑀸, 𑀅𑀕𑁆𑀕𑁂 𑀔𑁄 𑀧𑀦 𑀧𑀲𑀦𑁆𑀦𑀸𑀦𑀁 𑀅𑀕𑁆𑀕𑁄 𑀯𑀺𑀧𑀸𑀓𑁄 𑀳𑁄𑀢𑀻’’𑀢𑀺𑀆𑀤𑀺 (𑀇𑀢𑀺𑀯𑀼. 𑁯𑁦, 𑁯𑁧),

‘‘𑀩𑀼𑀤𑁆𑀥𑁄𑀢𑀺 𑀓𑀺𑀢𑁆𑀢𑀬𑀦𑁆𑀢𑀲𑁆𑀲, 𑀓𑀸𑀬𑁂 𑀪𑀯𑀢𑀺 𑀬𑀸 𑀧𑀻𑀢𑀺;

𑀯𑀭𑀫𑁂𑀯 𑀳𑀺 𑀲𑀸 𑀧𑀻𑀢𑀺, 𑀓𑀲𑀺𑀡𑁂𑀦𑀧𑀺 𑀚𑀫𑁆𑀩𑀼𑀤𑀻𑀧𑀲𑁆𑀲.

𑀥𑀫𑁆𑀫𑁄𑀢𑀺 𑀓𑀺𑀢𑁆𑀢𑀬𑀦𑁆𑀢𑀲𑁆𑀲…𑀧𑁂… 𑀓𑀲𑀺𑀡𑁂𑀦𑀧𑀺 𑀚𑀫𑁆𑀩𑀼𑀤𑀻𑀧𑀲𑁆𑀲;

𑀲𑀗𑁆𑀖𑁄𑀢𑀺 𑀓𑀺𑀢𑁆𑀢𑀬𑀦𑁆𑀢𑀲𑁆𑀲…𑀧𑁂… 𑀓𑀲𑀺𑀡𑁂𑀦𑀧𑀺 𑀚𑀫𑁆𑀩𑀼𑀤𑀻𑀧𑀲𑁆𑀲𑀸’’𑀢𑀺. (𑀇𑀢𑀺𑀯𑀼. 𑀅𑀝𑁆𑀞. 𑁯𑁦),

𑀢𑀣𑀸 𑁋

‘‘𑀬𑀲𑁆𑀫𑀺𑀁 𑀫𑀳𑀸𑀦𑀸𑀫 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲…𑀧𑁂… 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁬.𑁧𑁦; 𑁧𑁧.𑁧𑁧),

‘‘𑀅𑀭𑀜𑁆𑀜𑁂 𑀭𑀼𑀓𑁆𑀔𑀫𑀽𑀮𑁂 𑀯𑀸…𑀧𑁂…

𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸,

𑀮𑁄𑀫𑀳𑀁𑀲𑁄 𑀦 𑀳𑁂𑀲𑁆𑀲𑀢𑀻’’𑀢𑀺 𑀘. (𑀲𑀁. 𑀦𑀺. 𑁨.𑁨𑁪𑁯);

𑀢𑀢𑁆𑀣 𑀬𑀲𑁆𑀲 𑀯𑀢𑁆𑀣𑀼𑀢𑁆𑀢𑀬𑀲𑁆𑀲 𑀯𑀦𑁆𑀤𑀦𑀁 𑀓𑀢𑁆𑀢𑀼𑀓𑀸𑀫𑁄, 𑀢𑀲𑁆𑀲 𑀕𑀼𑀡𑀸𑀢𑀺𑀲𑀬𑀬𑁄𑀕𑀲𑀦𑁆𑀤𑀲𑁆𑀲𑀦𑀢𑁆𑀣𑀁 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺𑀆𑀤𑀺𑀦𑀸 𑀕𑀸𑀣𑀸𑀢𑁆𑀢𑀬𑀫𑀸𑀳. 𑀕𑀼𑀡𑀸𑀢𑀺𑀲𑀬𑀬𑁄𑀕𑁂𑀦 𑀳𑀺 𑀯𑀦𑁆𑀤𑀦𑀸𑀭𑀳𑀪𑀸𑀯𑁄, 𑀯𑀦𑁆𑀤𑀦𑀸𑀭𑀳𑁂 𑀘 𑀓𑀢𑀸 𑀯𑀦𑁆𑀤𑀦𑀸 𑀬𑀣𑀸𑀥𑀺𑀧𑁆𑀧𑁂𑀢𑀁 𑀧𑀬𑁄𑀚𑀦𑀁 𑀲𑀸𑀥𑁂𑀢𑀻𑀢𑀺. 𑀢𑀢𑁆𑀣 𑀬𑀲𑁆𑀲𑀸 𑀤𑁂𑀲𑀦𑀸𑀬 𑀲𑀁𑀯𑀡𑁆𑀡𑀦𑀁 𑀓𑀢𑁆𑀢𑀼𑀓𑀸𑀫𑁄. 𑀲𑀸 𑀦 𑀯𑀺𑀦𑀬𑀤𑁂𑀲𑀦𑀸 𑀯𑀺𑀬 𑀓𑀭𑀼𑀡𑀸𑀧𑁆𑀧𑀥𑀸𑀦𑀸, 𑀦𑀸𑀧𑀺 𑀅𑀪𑀺𑀥𑀫𑁆𑀫𑀤𑁂𑀲𑀦𑀸 𑀯𑀺𑀬 𑀧𑀜𑁆𑀜𑀸𑀧𑁆𑀧𑀥𑀸𑀦𑀸 ¶ , 𑀅𑀣 𑀔𑁄 𑀓𑀭𑀼𑀡𑀸𑀧𑀜𑁆𑀜𑀸𑀧𑁆𑀧𑀥𑀸𑀦𑀸𑀢𑀺 𑀢𑀤𑀼𑀪𑀬𑀧𑁆𑀧𑀥𑀸𑀦𑀫𑁂𑀯 𑀢𑀸𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀣𑁄𑀫𑀦𑀁 𑀓𑀸𑀢𑀼𑀁 𑀢𑀫𑁆𑀫𑀽𑀮𑀓𑀢𑁆𑀢𑀸 𑀲𑁂𑀲𑀭𑀢𑀦𑀸𑀦𑀁 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀺𑀭𑀢𑀻𑀢𑀺 𑀓𑀭𑀼𑀡𑀸, 𑀧𑀭𑀤𑀼𑀓𑁆𑀔𑀁 𑀯𑀺𑀓𑁆𑀔𑀺𑀧𑀢𑀺 𑀅𑀧𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀓𑀺𑀡𑀸𑀢𑀻𑀢𑀺 𑀓𑀭𑀼𑀡𑀸, 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀓𑀸𑀭𑀼𑀡𑀺𑀓𑀁 𑀳𑀺𑀁𑀲𑀢𑀺 𑀯𑀺𑀩𑀸𑀥𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀲𑀸𑀥𑀽𑀦𑀁 𑀓𑀫𑁆𑀧𑀦𑀁 𑀳𑀤𑀬𑀔𑁂𑀤𑀁 𑀓𑀭𑁄𑀢𑀻𑀢𑀺 𑀯𑀸 𑀓𑀭𑀼𑀡𑀸. 𑀅𑀣 𑀯𑀸 𑀓𑀫𑀺𑀢𑀺 𑀲𑀼𑀔𑀁, 𑀢𑀁 𑀭𑀼𑀦𑁆𑀥𑀢𑀻𑀢𑀺 𑀓𑀭𑀼𑀡𑀸. 𑀏𑀲𑀸 𑀳𑀺 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸𑀮𑀓𑁆𑀔𑀡𑀸 𑀅𑀢𑁆𑀢𑀲𑀼𑀔𑀦𑀺𑀭𑀧𑁂𑀓𑁆𑀔𑀢𑀸𑀬 𑀓𑀸𑀭𑀼𑀡𑀺𑀓𑀸𑀦𑀁 𑀲𑀼𑀔𑀁 𑀭𑀼𑀦𑁆𑀥𑀢𑀺 𑀯𑀺𑀩𑀦𑁆𑀥𑀢𑀻𑀢𑀺 𑀅𑀢𑁆𑀣𑁄 ¶ . 𑀓𑀭𑀼𑀡𑀸𑀬 𑀲𑀻𑀢𑀮𑀁 𑀓𑀭𑀼𑀡𑀸𑀲𑀻𑀢𑀮𑀁, 𑀓𑀭𑀼𑀡𑀸𑀲𑀻𑀢𑀮𑀁 𑀳𑀤𑀬𑀁 𑀅𑀲𑁆𑀲𑀸𑀢𑀺 𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑁄, 𑀢𑀁 𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑀁.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀭𑁂𑀲𑀁 𑀳𑀺𑀢𑁄𑀧𑀲𑀁𑀳𑀸𑀭𑀲𑀼𑀔𑀸𑀤𑀺𑀅𑀧𑀭𑀺𑀳𑀸𑀦𑀺𑀘𑁆𑀙𑀦𑀲𑀪𑀸𑀯𑀢𑀸𑀬, 𑀩𑁆𑀬𑀸𑀧𑀸𑀤𑀸𑀭𑀢𑀻𑀦𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑀸𑀬 𑀘 𑀧𑀭𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑀲𑀦𑁆𑀢𑀸𑀧𑀯𑀺𑀘𑁆𑀙𑁂𑀤𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀫𑁂𑀢𑁆𑀢𑀸𑀫𑀼𑀤𑀺𑀢𑀸𑀦𑀫𑁆𑀧𑀺 𑀘𑀺𑀢𑁆𑀢𑀲𑀻𑀢𑀮𑀪𑀸𑀯𑀓𑀸𑀭𑀡𑀢𑀸 𑀉𑀧𑀮𑀩𑁆𑀪𑀢𑀺, 𑀢𑀣𑀸𑀧𑀺 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀧𑀭𑀽𑀧𑀢𑀸𑀧𑀸𑀲𑀳𑀦𑀭𑀲𑀸 𑀅𑀯𑀺𑀳𑀺𑀁𑀲𑀸𑀪𑀽𑀢𑀸 𑀓𑀭𑀼𑀡𑀸𑀯 𑀯𑀺𑀲𑁂𑀲𑁂𑀦 𑀪𑀕𑀯𑀢𑁄 𑀘𑀺𑀢𑁆𑀢𑀲𑁆𑀲 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺 𑀯𑀺𑀬 𑀲𑀻𑀢𑀺𑀪𑀸𑀯𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺. 𑀓𑀭𑀼𑀡𑀸𑀫𑀼𑀔𑁂𑀦 𑀯𑀸 𑀫𑁂𑀢𑁆𑀢𑀸𑀫𑀼𑀤𑀺𑀢𑀸𑀦𑀫𑁆𑀧𑀺 𑀳𑀤𑀬𑀲𑀻𑀢𑀮𑀪𑀸𑀯𑀓𑀸𑀭𑀡𑀢𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀅𑀲𑀸𑀥𑀸𑀭𑀡𑀜𑀸𑀡𑀯𑀺𑀲𑁂𑀲𑀦𑀺𑀩𑀦𑁆𑀥𑀦𑀪𑀽𑀢𑀸 𑀲𑀸𑀢𑀺𑀲𑀬𑀁 𑀦𑀺𑀭𑀯𑀲𑁂𑀲𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀯𑀺𑀬 𑀲𑀯𑀺𑀲𑀬𑀩𑁆𑀬𑀸𑀧𑀺𑀢𑀸𑀬 𑀫𑀳𑀸𑀓𑀭𑀼𑀡𑀸𑀪𑀸𑀯𑀁 𑀉𑀧𑀕𑀢𑀸 𑀓𑀭𑀼𑀡𑀸𑀯 𑀪𑀕𑀯𑀢𑁄 𑀅𑀢𑀺𑀲𑀬𑁂𑀦 𑀳𑀤𑀬𑀲𑀻𑀢𑀮𑀪𑀸𑀯𑀳𑁂𑀢𑀽𑀢𑀺 𑀆𑀳 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺. 𑀅𑀣 𑀯𑀸 𑀲𑀢𑀺𑀧𑀺 𑀫𑁂𑀢𑁆𑀢𑀸𑀫𑀼𑀤𑀺𑀢𑀸𑀦𑀁 𑀲𑀸𑀢𑀺𑀲𑀬𑁂 𑀳𑀤𑀬𑀲𑀻𑀢𑀺𑀪𑀸𑀯𑀦𑀺𑀩𑀦𑁆𑀥𑀦𑀢𑁆𑀢𑁂 𑀲𑀓𑀮𑀩𑀼𑀤𑁆𑀥𑀕𑀼𑀡𑀯𑀺𑀲𑁂𑀲𑀓𑀸𑀭𑀡𑀢𑀸𑀬 𑀢𑀸𑀲𑀫𑁆𑀧𑀺 𑀓𑀸𑀭𑀡𑀦𑁆𑀢𑀺 𑀓𑀭𑀼𑀡𑀸𑀯 𑀪𑀕𑀯𑀢𑁄 ‘‘𑀳𑀤𑀬𑀲𑀻𑀢𑀮𑀪𑀸𑀯𑀓𑀸𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀸. 𑀓𑀭𑀼𑀡𑀸𑀦𑀺𑀤𑀸𑀦𑀸 𑀳𑀺 𑀲𑀩𑁆𑀩𑁂𑀧𑀺 𑀩𑀼𑀤𑁆𑀥𑀕𑀼𑀡𑀸. 𑀓𑀭𑀼𑀡𑀸𑀦𑀼𑀪𑀸𑀯𑀦𑀺𑀩𑁆𑀩𑀸𑀧𑀺𑀬𑀫𑀸𑀦𑀲𑀁𑀲𑀸𑀭𑀤𑀼𑀓𑁆𑀔𑀲𑀦𑁆𑀢𑀸𑀧𑀲𑁆𑀲 𑀳𑀺 𑀪𑀕𑀯𑀢𑁄 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸𑀬 𑀅𑀦𑁂𑀓𑀸𑀦𑀺𑀧𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀸𑀦𑀁 𑀅𑀓𑀺𑀮𑀦𑁆𑀢𑀭𑀽𑀧𑀲𑁆𑀲𑁂𑀯 𑀦𑀺𑀭𑀯𑀲𑁂𑀲𑀩𑀼𑀤𑁆𑀥𑀓𑀭𑀥𑀫𑁆𑀫𑀲𑀫𑁆𑀪𑀭𑀡𑀦𑀺𑀭𑀢𑀲𑁆𑀲 𑀲𑀫𑀥𑀺𑀕𑀢𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑀲𑁆𑀲 𑀘 𑀲𑀦𑁆𑀦𑀺𑀳𑀺𑀢𑁂𑀲𑀼𑀧𑀺 𑀲𑀢𑁆𑀢𑀲𑀗𑁆𑀔𑀸𑀭𑀲𑀫𑀼𑀧𑀦𑀻𑀢𑀳𑀤𑀬𑀽𑀧𑀢𑀸𑀧𑀦𑀺𑀫𑀺𑀢𑁆𑀢𑁂𑀲𑀼 𑀦 𑀈𑀲𑀓𑀫𑁆𑀧𑀺 𑀘𑀺𑀢𑁆𑀢𑀲𑀻𑀢𑀺𑀪𑀸𑀯𑀲𑁆𑀲 𑀅𑀜𑁆𑀜𑀣𑀢𑁆𑀢𑀫𑀳𑁄𑀲𑀻𑀢𑀺. 𑀏𑀢𑀲𑁆𑀫𑀺𑀜𑁆𑀘 𑀅𑀢𑁆𑀣𑀯𑀺𑀓𑀧𑁆𑀧𑁂 𑀢𑀻𑀲𑀼𑀧𑀺 𑀅𑀯𑀢𑁆𑀣𑀸𑀲𑀼 𑀪𑀕𑀯𑀢𑁄 𑀓𑀭𑀼𑀡𑀸 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸, 𑀬𑀣𑀸𑀲𑀪𑀸𑀯𑀁 𑀧𑀓𑀸𑀭𑁂𑀳𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀸𑀯 𑀜𑁂𑀬𑁆𑀬𑀸𑀯𑀭𑀡𑀧𑁆𑀧𑀳𑀸𑀦𑀢𑁄 𑀧𑀓𑀸𑀭𑁂𑀳𑀺 𑀥𑀫𑁆𑀫𑀲𑀪𑀸𑀯𑀚𑁄𑀢𑀦𑀝𑁆𑀞𑁂𑀦 𑀧𑀚𑁆𑀚𑁄𑀢𑁄𑀢𑀺 𑀧𑀜𑁆𑀜𑀸𑀧𑀚𑁆𑀚𑁄𑀢𑁄. 𑀲𑀯𑀸𑀲𑀦𑀧𑁆𑀧𑀳𑀸𑀦𑀢𑁄 𑀯𑀺𑀲𑁂𑀲𑁂𑀦 𑀳𑀢𑀁 𑀲𑀫𑀼𑀕𑁆𑀖𑀸𑀢𑀺𑀢𑀁 𑀯𑀺𑀳𑀢𑀁, 𑀧𑀜𑁆𑀜𑀸𑀧𑀚𑁆𑀚𑁄𑀢𑁂𑀦 𑀯𑀺𑀳𑀢𑀁 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀁. 𑀫𑀼𑀬𑁆𑀳𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀫𑀼𑀬𑁆𑀳𑀢𑀺, 𑀫𑁄𑀳𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀫𑁄𑀳𑁄, 𑀅𑀯𑀺𑀚𑁆𑀚𑀸, 𑀲𑁆𑀯𑁂𑀯 𑀯𑀺𑀲𑀬𑀲𑀪𑀸𑀯𑀧𑀝𑀺𑀘𑁆𑀙𑀸𑀤𑀦𑀢𑁄 𑀅𑀦𑁆𑀥𑀓𑀸𑀭𑀲𑀭𑀺𑀓𑁆𑀔𑀢𑀸𑀬 𑀢𑀫𑁄 𑀯𑀺𑀬𑀸𑀢𑀺 𑀢𑀫𑁄, 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑁄 ¶ 𑀫𑁄𑀳𑀢𑀫𑁄 𑀏𑀢𑀲𑁆𑀲𑀸𑀢𑀺 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫𑁄, 𑀢𑀁 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫𑀁. 𑀲𑀩𑁆𑀩𑁂𑀲𑀫𑁆𑀧𑀺 ¶ 𑀳𑀺 𑀔𑀻𑀡𑀸𑀲𑀯𑀸𑀦𑀁 𑀲𑀢𑀺𑀧𑀺 𑀧𑀜𑁆𑀜𑀸𑀧𑀚𑁆𑀚𑁄𑀢𑁂𑀦 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀲𑁆𑀲 𑀯𑀺𑀳𑀢𑀪𑀸𑀯𑁂 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁂𑀳𑀺 𑀯𑀺𑀬 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸𑀦𑀁 𑀲𑀸𑀯𑀓𑁂𑀳𑀺 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁂𑀳𑀺 𑀘 𑀲𑀯𑀸𑀲𑀦𑀧𑁆𑀧𑀳𑀸𑀦𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑀲𑁆𑀲 𑀯𑀺𑀲𑁂𑀲𑁄 𑀯𑀺𑀚𑁆𑀚𑀢𑀻𑀢𑀺 𑀲𑀸𑀢𑀺𑀲𑀬𑁂𑀦 𑀅𑀯𑀺𑀚𑁆𑀚𑀸𑀧𑀳𑀸𑀦𑁂𑀦 𑀪𑀕𑀯𑀦𑁆𑀢𑀁 𑀣𑁄𑀫𑁂𑀦𑁆𑀢𑁄 𑀆𑀳 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺.

𑀅𑀣 𑀯𑀸 𑀅𑀦𑁆𑀢𑀭𑁂𑀦 𑀧𑀭𑁄𑀧𑀤𑁂𑀲𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀅𑀘𑁆𑀘𑀦𑁆𑀢𑀁 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀯𑀺𑀕𑀫𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀢𑀢𑁆𑀢𑀸, 𑀢𑀣𑀸 𑀲𑀩𑁆𑀩𑀜𑁆𑀜𑀼𑀢𑀸𑀬 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯𑀲𑁆𑀲 𑀲𑀫𑀥𑀺𑀕𑀢𑀢𑁆𑀢𑀸, 𑀧𑀭𑀲𑀦𑁆𑀢𑀢𑀺𑀬𑀜𑁆𑀘 𑀥𑀫𑁆𑀫𑀤𑁂𑀲𑀦𑀸𑀢𑀺𑀲𑀬𑀸𑀦𑀼𑀪𑀸𑀯𑁂𑀦 𑀲𑀫𑁆𑀫𑀤𑁂𑀯 𑀢𑀲𑁆𑀲 𑀧𑀯𑀢𑁆𑀢𑀺𑀢𑀢𑁆𑀢𑀸 𑀪𑀕𑀯𑀸𑀯 𑀯𑀺𑀲𑁂𑀲𑀢𑁄 𑀫𑁄𑀳𑀢𑀫𑀯𑀺𑀕𑀫𑁂𑀦 𑀣𑁄𑀫𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑀯𑀺𑀓𑀧𑁆𑀧𑁂 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑁄’’𑀢𑀺 𑀧𑀤𑁂𑀦 𑀪𑀕𑀯𑀢𑁄 𑀧𑀝𑀺𑀯𑁂𑀥𑀧𑀜𑁆𑀜𑀸 𑀯𑀺𑀬 𑀤𑁂𑀲𑀦𑀸𑀧𑀜𑁆𑀜𑀸𑀧𑀺 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, 𑀏𑀓𑀲𑁂𑀲𑀦𑀬𑁂𑀦 𑀯𑀸 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀣 𑀯𑀸 𑀪𑀕𑀯𑀢𑁄 𑀜𑀸𑀡𑀲𑁆𑀲 𑀜𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀢𑁆𑀢𑀸 𑀲𑀓𑀮𑀜𑁂𑀬𑁆𑀬𑀥𑀫𑁆𑀫𑀲𑀪𑀸𑀯𑀸𑀯𑀩𑁄𑀥𑀦𑀲𑀫𑀢𑁆𑀣𑁂𑀦 𑀅𑀦𑀸𑀯𑀭𑀡𑀜𑀸𑀡𑀲𑀗𑁆𑀔𑀸𑀢𑁂𑀦 𑀧𑀜𑁆𑀜𑀸𑀧𑀚𑁆𑀚𑁄𑀢𑁂𑀦 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀲𑀪𑀸𑀯𑀘𑁆𑀙𑀸𑀤𑀓𑀲𑁆𑀲 𑀫𑁄𑀳𑀦𑁆𑀥𑀓𑀸𑀭𑀲𑁆𑀲 𑀯𑀺𑀥𑀫𑀺𑀢𑀢𑁆𑀢𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀪𑀕𑀯𑀢𑁄 𑀫𑁄𑀳𑀢𑀫𑀯𑀺𑀦𑀸𑀲𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺. 𑀏𑀢𑁆𑀣 𑀘 𑀫𑁄𑀳𑀢𑀫𑀯𑀺𑀥𑀫𑀦𑀦𑁆𑀢𑁂 𑀅𑀥𑀺𑀕𑀢𑀢𑁆𑀢𑀸 𑀅𑀦𑀸𑀯𑀭𑀡𑀜𑀸𑀡𑀁 𑀓𑀸𑀭𑀡𑀽𑀧𑀘𑀸𑀭𑁂𑀦 𑀲𑀲𑀦𑁆𑀢𑀸𑀦𑁂 𑀫𑁄𑀳𑀢𑀫𑀯𑀺𑀥𑀫𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀲𑀯𑀸𑀲𑀦𑀧𑁆𑀧𑀳𑀸𑀦𑀫𑁂𑀯 𑀳𑀺 𑀓𑀺𑀮𑁂𑀲𑀸𑀦𑀁 𑀜𑁂𑀬𑁆𑀬𑀸𑀯𑀭𑀡𑀧𑁆𑀧𑀳𑀸𑀦𑀦𑁆𑀢𑀺, 𑀧𑀭𑀲𑀦𑁆𑀢𑀸𑀦𑁂 𑀧𑀦 𑀫𑁄𑀳𑀢𑀫𑀯𑀺𑀥𑀫𑀦𑀲𑁆𑀲 𑀓𑀸𑀭𑀡𑀪𑀸𑀯𑀢𑁄 𑀅𑀦𑀸𑀯𑀭𑀡𑀜𑀸𑀡𑀁 ‘‘𑀫𑁄𑀳𑀢𑀫𑀯𑀺𑀥𑀫𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀓𑀺𑀁 𑀧𑀦 𑀓𑀸𑀭𑀡𑀁 𑀅𑀯𑀺𑀚𑁆𑀚𑀸𑀲𑀫𑀼𑀕𑁆𑀖𑀸𑀢𑁄𑀬𑁂𑀯𑁂𑀓𑁄 𑀧𑀳𑀸𑀦𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀪𑀕𑀯𑀢𑁄 𑀣𑁄𑀫𑀦𑀸𑀦𑀺𑀫𑀺𑀢𑁆𑀢𑀁 𑀕𑀬𑁆𑀳𑀢𑀺, 𑀦 𑀧𑀦 𑀲𑀸𑀢𑀺𑀲𑀬𑀁 𑀦𑀺𑀭𑀯𑀲𑁂𑀲𑀓𑀺𑀮𑁂𑀲𑀧𑁆𑀧𑀳𑀸𑀦𑀦𑁆𑀢𑀺? 𑀢𑀧𑁆𑀧𑀳𑀸𑀦𑀯𑀘𑀦𑁂𑀦𑁂𑀯 𑀢𑀤𑁂𑀓𑀝𑁆𑀞𑀢𑀸𑀬 𑀲𑀓𑀮𑀲𑀁𑀓𑀺𑀮𑁂𑀲𑀕𑀡𑀲𑀫𑀼𑀕𑁆𑀖𑀸𑀢𑀲𑁆𑀲 𑀚𑁄𑀢𑀺𑀢𑀪𑀸𑀯𑀢𑁄. 𑀦 𑀳𑀺 𑀲𑁄 𑀢𑀸𑀤𑀺𑀲𑁄 𑀓𑀺𑀮𑁂𑀲𑁄 𑀅𑀢𑁆𑀣𑀺, 𑀬𑁄 𑀦𑀺𑀭𑀯𑀲𑁂𑀲𑀅𑀯𑀺𑀚𑁆𑀚𑀸𑀧𑁆𑀧𑀳𑀸𑀦𑁂𑀦 𑀦 𑀧𑀳𑀻𑀬𑀢𑀻𑀢𑀺.

𑀅𑀣 𑀯𑀸 𑀯𑀺𑀚𑁆𑀚𑀸 𑀯𑀺𑀬 𑀲𑀓𑀮𑀓𑀼𑀲𑀮𑀥𑀫𑁆𑀫𑀲𑀫𑀼𑀧𑁆𑀧𑀢𑁆𑀢𑀺𑀬𑀸 𑀦𑀺𑀭𑀯𑀲𑁂𑀲𑀸𑀓𑀼𑀲𑀮𑀥𑀫𑁆𑀫𑀦𑀺𑀩𑁆𑀩𑀢𑁆𑀢𑀺𑀬𑀸 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀘 𑀅𑀯𑀺𑀚𑁆𑀚𑀸 𑀧𑀥𑀸𑀦𑀓𑀸𑀭𑀡𑀦𑁆𑀢𑀺 𑀢𑀩𑁆𑀩𑀺𑀖𑀸𑀢𑀯𑀘𑀦𑁂𑀦 ¶ 𑀲𑀓𑀮𑀲𑀁𑀓𑀺𑀮𑁂𑀲𑀕𑀡𑀲𑀫𑀼𑀕𑁆𑀖𑀸𑀢𑁄 𑀯𑀼𑀢𑁆𑀢𑁄𑀬𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺.

𑀦𑀭𑀸 ¶ 𑀘 𑀅𑀫𑀭𑀸 𑀘 𑀦𑀭𑀸𑀫𑀭𑀸, 𑀲𑀳 𑀦𑀭𑀸𑀫𑀭𑁂𑀳𑀻𑀢𑀺 𑀲𑀦𑀭𑀸𑀫𑀭𑁄, 𑀲𑀦𑀭𑀸𑀫𑀭𑁄 𑀘 𑀲𑁄 𑀮𑁄𑀓𑁄 𑀘𑀸𑀢𑀺 𑀲𑀦𑀭𑀸𑀫𑀭𑀮𑁄𑀓𑁄. 𑀢𑀲𑁆𑀲 𑀕𑀭𑀽𑀢𑀺 𑀲𑀦𑀭𑀸𑀫𑀭𑀮𑁄𑀓𑀕𑀭𑀼, 𑀢𑀁 𑀲𑀦𑀭𑀸𑀫𑀭𑀮𑁄𑀓𑀕𑀭𑀼𑀁. 𑀏𑀢𑁂𑀦 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀯𑀺𑀬 𑀢𑀤𑀯𑀲𑀺𑀝𑁆𑀞𑀲𑀢𑁆𑀢𑀸𑀦𑀫𑁆𑀧𑀺 𑀬𑀣𑀸𑀭𑀳𑀁 𑀕𑀼𑀡𑀯𑀺𑀲𑁂𑀲𑀸𑀯𑀳𑀢𑀸𑀬 𑀪𑀕𑀯𑀢𑁄 𑀉𑀧𑀓𑀸𑀭𑀺𑀢𑀁 𑀤𑀲𑁆𑀲𑁂𑀢𑀺. 𑀦 𑀘𑁂𑀢𑁆𑀣 𑀧𑀥𑀸𑀦𑀸𑀧𑁆𑀧𑀥𑀸𑀦𑀪𑀸𑀯𑁄 𑀘𑁄𑀤𑁂𑀢𑀩𑁆𑀩𑁄. 𑀅𑀜𑁆𑀜𑁄 𑀳𑀺 𑀲𑀤𑁆𑀤𑀓𑁆𑀓𑀫𑁄, 𑀅𑀜𑁆𑀜𑁄 𑀅𑀢𑁆𑀣𑀓𑁆𑀓𑀫𑁄. 𑀏𑀤𑀺𑀲𑁂𑀲𑀼 𑀳𑀺 𑀲𑀫𑀸𑀲𑀧𑀤𑁂𑀲𑀼 𑀧𑀥𑀸𑀦𑀫𑁆𑀧𑀺 𑀅𑀧𑁆𑀧𑀥𑀸𑀦𑀁 𑀯𑀺𑀬 𑀦𑀺𑀤𑁆𑀤𑀺𑀲𑀻𑀬𑀢𑀺 𑀬𑀣𑀸 ‘‘𑀲𑀭𑀸𑀚𑀺𑀓𑀸𑀬 𑀧𑀭𑀺𑀲𑀸𑀬𑀸’’𑀢𑀺 (𑀘𑀽𑀴𑀯. 𑁩𑁩𑁬). 𑀓𑀸𑀫𑀜𑁆𑀘𑁂𑀢𑁆𑀣 𑀲𑀢𑁆𑀢𑀲𑀗𑁆𑀔𑀸𑀭𑁄𑀓𑀸𑀲𑀯𑀲𑁂𑀦 𑀢𑀺𑀯𑀺𑀥𑁄 𑀮𑁄𑀓𑁄, 𑀕𑀭𑀼𑀪𑀸𑀯𑀲𑁆𑀲 𑀧𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀕𑀭𑀼𑀓𑀭𑀡𑀲𑀫𑀢𑁆𑀣𑀲𑁆𑀲𑁂𑀯 𑀬𑀼𑀚𑁆𑀚𑀦𑀢𑁄 𑀲𑀢𑁆𑀢𑀮𑁄𑀓𑀲𑁆𑀲 𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀲𑁄 𑀳𑀺 𑀮𑁄𑀓𑀻𑀬𑀦𑁆𑀢𑀺 𑀏𑀢𑁆𑀣 𑀧𑀼𑀜𑁆𑀜𑀧𑀸𑀧𑀸𑀦𑀺 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺 ‘‘𑀮𑁄𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀫𑀭𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀉𑀧𑀧𑀢𑁆𑀢𑀺𑀤𑁂𑀯𑀸 𑀅𑀥𑀺𑀧𑁆𑀧𑁂𑀢𑀸.

𑀅𑀣 𑀯𑀸 𑀲𑀫𑀽𑀳𑀢𑁆𑀣𑁄 𑀮𑁄𑀓𑀲𑀤𑁆𑀤𑁄 𑀲𑀫𑀼𑀤𑀸𑀬𑀯𑀲𑁂𑀦 𑀮𑁄𑀓𑀻𑀬𑀢𑀺 𑀧𑀜𑁆𑀜𑀸𑀧𑀻𑀬𑀢𑀻𑀢𑀺. 𑀲𑀳 𑀦𑀭𑁂𑀳𑀻𑀢𑀺 𑀲𑀦𑀭𑀸, 𑀲𑀦𑀭𑀸 𑀘 𑀢𑁂 𑀅𑀫𑀭𑀸 𑀘𑀸𑀢𑀺 𑀲𑀦𑀭𑀸𑀫𑀭𑀸, 𑀢𑁂𑀲𑀁 𑀮𑁄𑀓𑁄𑀢𑀺 𑀲𑀦𑀭𑀸𑀫𑀭𑀮𑁄𑀓𑁄𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀅𑀫𑀭𑀲𑀤𑁆𑀤𑁂𑀦 𑀘𑁂𑀢𑁆𑀣 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀧𑀺 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀢𑁂 𑀳𑀺 𑀫𑀭𑀡𑀸𑀪𑀸𑀯𑀢𑁄 𑀧𑀭𑀫𑀢𑁆𑀣𑀢𑁄 𑀅𑀫𑀭𑀸. 𑀦𑀭𑀸𑀫𑀭𑀸𑀦𑀁𑀬𑁂𑀯 𑀘 𑀕𑀳𑀡𑀁 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑀯𑀲𑁂𑀦 𑀬𑀣𑀸 ‘‘𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 (𑀤𑀻. 𑀦𑀺. 𑁧.𑁧𑁫𑁭). 𑀢𑀣𑀸 𑀳𑀺 𑀲𑀩𑁆𑀩𑀸𑀦𑀢𑁆𑀣𑀧𑀭𑀺𑀳𑀸𑀭𑀧𑀼𑀩𑁆𑀩𑀗𑁆𑀕𑀫𑀸𑀬 𑀦𑀺𑀭𑀯𑀲𑁂𑀲𑀳𑀺𑀢𑀲𑀼𑀔𑀯𑀺𑀥𑀸𑀦𑀢𑀧𑁆𑀧𑀭𑀸𑀬 𑀦𑀺𑀭𑀢𑀺𑀲𑀬𑀸𑀬 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀧𑀚𑀸𑀬 𑀅𑀘𑁆𑀘𑀦𑁆𑀢𑀽𑀧𑀓𑀸𑀭𑀺𑀢𑀸𑀬 𑀅𑀧𑀭𑀺𑀫𑀺𑀢𑀦𑀺𑀭𑀼𑀧𑀫𑀧𑁆𑀧𑀪𑀸𑀯𑀕𑀼𑀡𑀯𑀺𑀲𑁂𑀲𑀲𑀫𑀗𑁆𑀕𑀺𑀢𑀸𑀬 𑀘 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑁄 𑀪𑀕𑀯𑀸 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀉𑀢𑁆𑀢𑀫𑀕𑀸𑀭𑀯𑀝𑁆𑀞𑀸𑀦𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀦𑀭𑀸𑀫𑀭𑀮𑁄𑀓𑀕𑀭𑀼’’𑀦𑁆𑀢𑀺.

𑀲𑁄𑀪𑀦𑀁 𑀕𑀢𑀁 𑀕𑀫𑀦𑀁 𑀏𑀢𑀲𑁆𑀲𑀸𑀢𑀺 𑀲𑀼𑀕𑀢𑁄. 𑀪𑀕𑀯𑀢𑁄 𑀳𑀺 𑀯𑁂𑀦𑁂𑀬𑁆𑀬𑀚𑀦𑀼𑀧𑀲𑀗𑁆𑀓𑀫𑀦𑀁 𑀏𑀓𑀦𑁆𑀢𑁂𑀦 𑀢𑁂𑀲𑀁 𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀢𑁄 𑀲𑁄𑀪𑀦𑀁, 𑀢𑀣𑀸 ¶ 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢𑀭𑀽𑀧𑀓𑀸𑀬𑀢𑀸𑀬 𑀤𑀼𑀢𑀯𑀺𑀮𑀫𑁆𑀩𑀺𑀢-𑀔𑀮𑀺𑀢𑀸𑀦𑀼𑀓𑀟𑁆𑀠𑀦-𑀦𑀺𑀧𑁆𑀧𑀻𑀴𑀦𑀼𑀓𑁆𑀓𑀼𑀝𑀺𑀓-𑀓𑀼𑀝𑀺𑀮𑀸𑀓𑀼𑀮𑀢𑀸𑀤𑀺-𑀤𑁄𑀲𑀭𑀳𑀺𑀢-𑀫𑀯𑀳𑀲𑀺𑀢-𑀭𑀸𑀚𑀳𑀁𑀲- 𑀯𑀲𑀪𑀯𑀸𑀭𑀡-𑀫𑀺𑀕𑀭𑀸𑀚𑀕𑀫𑀦𑀁 𑀓𑀸𑀬𑀕𑀫𑀦𑀁 𑀜𑀸𑀡𑀕𑀫𑀦𑀜𑁆𑀘 𑀯𑀺𑀧𑀼𑀮𑀦𑀺𑀫𑁆𑀫𑀮𑀓𑀭𑀼𑀡𑀸-𑀲𑀢𑀺𑀯𑀻𑀭𑀺𑀬𑀸𑀤𑀺-𑀕𑀼𑀡𑀯𑀺𑀲𑁂𑀲𑀲𑀳𑀺𑀢𑀫𑀪𑀺𑀦𑀻𑀳𑀸𑀭𑀢𑁄 𑀬𑀸𑀯 𑀫𑀳𑀸𑀩𑁄𑀥𑀺𑀁 𑀅𑀦𑀯𑀚𑁆𑀚𑀢𑀸𑀬 𑀲𑁄𑀪𑀦𑀫𑁂𑀯𑀸𑀢𑀺. 𑀅𑀣 𑀯𑀸 𑀲𑀬𑀫𑁆𑀪𑀼𑀜𑀸𑀡𑁂𑀦 𑀲𑀓𑀮𑀫𑀧𑀺 𑀮𑁄𑀓𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦 𑀧𑀭𑀺𑀚𑀸𑀦𑀦𑁆𑀢𑁄 𑀜𑀸𑀡𑁂𑀦 𑀲𑀫𑁆𑀫𑀸 𑀕𑀢𑁄 𑀅𑀯𑀕𑀢𑁄𑀢𑀺 𑀲𑀼𑀕𑀢𑁄. 𑀢𑀣𑀸 𑀮𑁄𑀓𑀲𑀫𑀼𑀤𑀬𑀁 𑀧𑀳𑀸𑀦𑀸𑀪𑀺𑀲𑀫𑀬𑀯𑀲𑁂𑀦 𑀧𑀚𑀳𑀦𑁆𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑁂𑀦𑁆𑀢𑁄 𑀲𑀫𑁆𑀫𑀸 𑀕𑀢𑁄 𑀅𑀢𑀻𑀢𑁄𑀢𑀺 𑀲𑀼𑀕𑀢𑁄, 𑀮𑁄𑀓𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀲𑀫𑁆𑀫𑀸 𑀕𑀢𑁄 𑀅𑀥𑀺𑀕𑀢𑁄𑀢𑀺 𑀲𑀼𑀕𑀢𑁄, 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀲𑀫𑁆𑀫𑀸 𑀕𑀢𑁄 𑀧𑀝𑀺𑀧𑀦𑁆𑀦𑁄𑀢𑀺 𑀲𑀼𑀕𑀢𑁄. ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑀲𑀼𑀕𑀢𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁩𑁮; 𑀘𑀽𑀴𑀦𑀺. 𑁨𑁭) 𑀦𑀬𑁂𑀦 𑀅𑀬𑀫𑀢𑁆𑀣𑁄 ¶ 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀅𑀣 𑀯𑀸 𑀲𑀼𑀦𑁆𑀤𑀭𑀁 𑀞𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁, 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸 𑀕𑀢𑁄 𑀅𑀥𑀺𑀕𑀢𑁄𑀢𑀺 𑀲𑀼𑀕𑀢𑁄. 𑀬𑀲𑁆𑀫𑀸 𑀯𑀸 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀁𑀳𑀺𑀢𑀁 𑀯𑁂𑀦𑁂𑀬𑁆𑀬𑀸𑀦𑀁 𑀬𑀣𑀸𑀭𑀳𑀁 𑀓𑀸𑀮𑀬𑀼𑀢𑁆𑀢𑀫𑁂𑀯 𑀘 𑀥𑀫𑁆𑀫𑀁 𑀪𑀸𑀲𑀢𑀺, 𑀢𑀲𑁆𑀫𑀸 𑀲𑀫𑁆𑀫𑀸 𑀕𑀤𑀢𑀺 𑀯𑀤𑀢𑀻𑀢𑀺 𑀲𑀼𑀕𑀢𑁄 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸. 𑀇𑀢𑀺 𑀲𑁄𑀪𑀦𑀕𑀫𑀦𑀢𑀸𑀤𑀻𑀳𑀺 𑀲𑀼𑀕𑀢𑁄, 𑀢𑀁 𑀲𑀼𑀕𑀢𑀁.

𑀧𑀼𑀜𑁆𑀜𑀧𑀸𑀧𑀓𑀫𑁆𑀫𑁂𑀳𑀺 𑀉𑀧𑀧𑀚𑁆𑀚𑀦𑀯𑀲𑁂𑀦 𑀕𑀦𑁆𑀢𑀩𑁆𑀩𑀢𑁄 𑀕𑀢𑀺𑀬𑁄, 𑀉𑀧𑀧𑀢𑁆𑀢𑀺𑀪𑀯𑀯𑀺𑀲𑁂𑀲𑀸. 𑀢𑀸 𑀧𑀦 𑀦𑀺𑀭𑀬𑀸𑀤𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑀸. 𑀢𑀸𑀳𑀺 𑀲𑀓𑀮𑀲𑁆𑀲𑀧𑀺 𑀪𑀯𑀕𑀸𑀫𑀺𑀓𑀫𑁆𑀫𑀲𑁆𑀲 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑁂𑀦 𑀅𑀯𑀺𑀧𑀸𑀓𑀸𑀭𑀳𑀪𑀸𑀯𑀓𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀢𑁆𑀢𑀸 𑀪𑀕𑀯𑀸 𑀧𑀜𑁆𑀘𑀳𑀺𑀧𑀺 𑀕𑀢𑀻𑀳𑀺 𑀲𑀼𑀝𑁆𑀞𑀼 𑀫𑀼𑀢𑁆𑀢𑁄 𑀯𑀺𑀲𑀁𑀬𑀼𑀢𑁆𑀢𑁄𑀢𑀺 𑀆𑀳 ‘‘𑀕𑀢𑀺𑀯𑀺𑀫𑀼𑀢𑁆𑀢’’𑀦𑁆𑀢𑀺. 𑀏𑀢𑁂𑀦 𑀪𑀕𑀯𑀢𑁄 𑀓𑀢𑁆𑀣𑀘𑀺𑀧𑀺 𑀕𑀢𑀺𑀬𑀸 𑀅𑀧𑀭𑀺𑀬𑀸𑀧𑀦𑁆𑀦𑀢𑀁 𑀤𑀲𑁆𑀲𑁂𑀢𑀺, 𑀬𑀢𑁄 𑀪𑀕𑀯𑀸 ‘‘𑀤𑁂𑀯𑀸𑀢𑀺𑀤𑁂𑀯𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯𑀸𑀳 𑁋

‘‘𑀬𑁂𑀦 𑀤𑁂𑀯𑀽𑀧𑀧𑀢𑁆𑀬𑀲𑁆𑀲, 𑀕𑀦𑁆𑀥𑀩𑁆𑀩𑁄 𑀯𑀸 𑀯𑀺𑀳𑀗𑁆𑀕𑀫𑁄;

𑀬𑀓𑁆𑀔𑀢𑁆𑀢𑀁 𑀬𑁂𑀦 𑀕𑀘𑁆𑀙𑁂𑀬𑁆𑀬𑀁, 𑀫𑀦𑀼𑀲𑁆𑀲𑀢𑁆𑀢𑀜𑁆𑀘 𑀅𑀩𑁆𑀩𑀚𑁂;

𑀢𑁂 𑀫𑀬𑁆𑀳𑀁 𑀆𑀲𑀯𑀸 𑀔𑀻𑀡𑀸, 𑀯𑀺𑀤𑁆𑀥𑀲𑁆𑀢𑀸 𑀯𑀺𑀦𑀴𑀻𑀓𑀢𑀸’’𑀢𑀺. (𑀅. 𑀦𑀺. 𑁪.𑁩𑁬);

𑀢𑀁𑀢𑀁𑀕𑀢𑀺𑀲𑀁𑀯𑀢𑁆𑀢𑀦𑀓𑀸𑀦𑀜𑁆𑀳𑀺 𑀓𑀫𑁆𑀫𑀓𑀺𑀮𑁂𑀲𑀸𑀦𑀁 𑀅𑀕𑁆𑀕𑀫𑀕𑁆𑀕𑁂𑀦 𑀩𑁄𑀥𑀺𑀫𑀽𑀮𑁂𑀬𑁂𑀯 𑀲𑀼𑀧𑁆𑀧𑀳𑀻𑀦𑀢𑁆𑀢𑀸 𑀦𑀢𑁆𑀣𑀺 𑀪𑀕𑀯𑀢𑁄 𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀢𑀺 𑀅𑀘𑁆𑀘𑀦𑁆𑀢𑀫𑁂𑀯 𑀪𑀕𑀯𑀸 𑀲𑀩𑁆𑀩𑀪𑀯𑀬𑁄𑀦𑀺𑀕𑀢𑀺-𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺-𑀲𑀢𑁆𑀢𑀸𑀯𑀸𑀲-𑀲𑀢𑁆𑀢𑀦𑀺𑀓𑀸𑀬𑁂𑀳𑀺 𑀧𑀭𑀺𑀫𑀼𑀢𑁆𑀢𑁄, 𑀢𑀁 𑀕𑀢𑀺𑀯𑀺𑀫𑀼𑀢𑁆𑀢𑀁. 𑀯𑀦𑁆𑀤𑁂𑀢𑀺 𑀦𑀫𑀸𑀫𑀺, 𑀣𑁄𑀫𑁂𑀫𑀻𑀢𑀺 𑀯𑀸 𑀅𑀢𑁆𑀣𑁄.

𑀅𑀣 ¶ 𑀯𑀸 𑀕𑀢𑀺𑀯𑀺𑀫𑀼𑀢𑁆𑀢𑀦𑁆𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀧𑁆𑀧𑀢𑁆𑀢𑀺𑀬𑀸 𑀪𑀕𑀯𑀦𑁆𑀢𑀁 𑀣𑁄𑀫𑁂𑀢𑀺. 𑀏𑀢𑁆𑀣 𑀳𑀺 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀪𑀕𑀯𑀢𑁄 𑀣𑁄𑀫𑀦𑀸 𑀯𑁂𑀤𑀺𑀢𑀩𑁆𑀩𑀸 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺𑀢𑁄 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀢𑁄 𑀘. 𑀢𑁂𑀲𑀼 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 𑀅𑀦𑀸𑀯𑀭𑀡𑀜𑀸𑀡𑀸𑀥𑀺𑀕𑀫𑀢𑁄 𑀲𑀯𑀸𑀲𑀦𑀸𑀦𑀁 𑀲𑀩𑁆𑀩𑁂𑀲𑀁 𑀓𑀺𑀮𑁂𑀲𑀸𑀦𑀁 𑀅𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀢𑁄 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀢𑁄 𑀘 𑀯𑁂𑀤𑀺𑀢𑀩𑁆𑀩𑀸, 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀮𑀸𑀪𑀲𑀓𑁆𑀓𑀸𑀭𑀸𑀤𑀺𑀦𑀺𑀭𑀧𑁂𑀓𑁆𑀔𑀘𑀺𑀢𑁆𑀢𑀲𑁆𑀲 𑀲𑀩𑁆𑀩𑀤𑀼𑀓𑁆𑀔𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀤𑁂𑀲𑀦𑀢𑁄 𑀯𑀺𑀭𑀼𑀤𑁆𑀥𑁂𑀲𑀼𑀧𑀺 𑀦𑀺𑀘𑁆𑀘𑀁 𑀳𑀺𑀢𑀚𑁆𑀛𑀸𑀲𑀬𑀢𑁄 𑀜𑀸𑀡𑀧𑀭𑀺𑀧𑀸𑀓𑀓𑀸𑀮𑀸𑀕𑀫𑀦𑀢𑁄 𑀘. 𑀲𑀸 𑀧𑀦𑁂𑀢𑁆𑀣 𑀆𑀲𑀬𑀢𑁄 𑀧𑀬𑁄𑀕𑀢𑁄 𑀘 𑀤𑀼𑀯𑀺𑀥𑀸 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺, 𑀢𑀺𑀯𑀺𑀥𑀸 𑀘 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 𑀧𑀓𑀸𑀲𑀺𑀢𑀸 𑀳𑁄𑀢𑀺. 𑀓𑀣𑀁? ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺 𑀏𑀢𑁂𑀦 𑀆𑀲𑀬𑀢𑁄 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺, 𑀲𑀫𑁆𑀫𑀸𑀕𑀤𑀦𑀢𑁆𑀣𑁂𑀦 𑀲𑀼𑀕𑀢𑀲𑀤𑁆𑀤𑁂𑀦 𑀧𑀬𑁄𑀕𑀢𑁄 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺, ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫𑀁 𑀕𑀢𑀺𑀯𑀺𑀫𑀼𑀢𑁆𑀢’’𑀦𑁆𑀢𑀺 𑀏𑀢𑁂𑀳𑀺 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀢𑁆𑀣𑁂𑀦 𑀘 𑀲𑀼𑀕𑀢𑀲𑀤𑁆𑀤𑁂𑀦 𑀢𑀺𑀯𑀺𑀥𑀸𑀧𑀺 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺, 𑀅𑀯𑀲𑀺𑀝𑁆𑀞𑀝𑁆𑀞𑁂𑀦 ¶ 𑀢𑁂𑀦 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺 𑀏𑀢𑁂𑀦 𑀘𑀸𑀧𑀺 𑀲𑀩𑁆𑀩𑀸𑀧𑀺 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀧𑀓𑀸𑀲𑀺𑀢𑀸 𑀳𑁄𑀢𑀻𑀢𑀺.

𑀅𑀣 𑀯𑀸 𑀢𑀻𑀳𑀺 𑀆𑀓𑀸𑀭𑁂𑀳𑀺 𑀪𑀕𑀯𑀢𑁄 𑀣𑁄𑀫𑀦𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀳𑁂𑀢𑀼𑀢𑁄 𑀨𑀮𑀢𑁄 𑀉𑀧𑀓𑀸𑀭𑀢𑁄 𑀘. 𑀢𑀢𑁆𑀣 𑀳𑁂𑀢𑀼 𑀫𑀳𑀸𑀓𑀭𑀼𑀡𑀸, 𑀲𑀸 𑀧𑀞𑀫𑀧𑀤𑁂𑀦 𑀤𑀲𑁆𑀲𑀺𑀢𑀸. 𑀨𑀮𑀁 𑀘𑀢𑀼𑀩𑁆𑀩𑀺𑀥𑀁 𑀜𑀸𑀡𑀲𑀫𑁆𑀧𑀤𑀸 𑀧𑀳𑀸𑀦𑀲𑀫𑁆𑀧𑀤𑀸 𑀆𑀦𑀼𑀪𑀸𑀯𑀲𑀫𑁆𑀧𑀤𑀸 𑀭𑀽𑀧𑀓𑀸𑀬𑀲𑀫𑁆𑀧𑀤𑀸 𑀘𑀸𑀢𑀺. 𑀢𑀸𑀲𑀼 𑀜𑀸𑀡𑀧𑀳𑀸𑀦𑀲𑀫𑁆𑀧𑀤𑀸 𑀤𑀼𑀢𑀺𑀬𑀧𑀤𑁂𑀦 𑀲𑀘𑁆𑀘𑀧𑀝𑀺𑀯𑁂𑀥𑀢𑁆𑀣𑁂𑀦 𑀘 𑀲𑀼𑀕𑀢𑀲𑀤𑁆𑀤𑁂𑀦 𑀧𑀓𑀸𑀲𑀺𑀢𑀸 𑀳𑁄𑀦𑁆𑀢𑀺, 𑀆𑀦𑀼𑀪𑀸𑀯𑀲𑀫𑁆𑀧𑀤𑀸 𑀧𑀦 𑀢𑀢𑀺𑀬𑀧𑀤𑁂𑀦, 𑀭𑀽𑀧𑀓𑀸𑀬𑀲𑀫𑁆𑀧𑀤𑀸 𑀬𑀣𑀸𑀯𑀼𑀢𑁆𑀢𑀓𑀸𑀬𑀕𑀫𑀦𑀲𑁄𑀪𑀦𑀢𑁆𑀣𑁂𑀦 𑀲𑀼𑀕𑀢𑀲𑀤𑁆𑀤𑁂𑀦 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀧𑀸𑀭𑀺𑀧𑀽𑀭𑀺𑀬𑀸 𑀯𑀺𑀦𑀸 𑀢𑀤𑀪𑀸𑀯𑀢𑁄. 𑀉𑀧𑀓𑀸𑀭𑁄 𑀅𑀦𑀦𑁆𑀢𑀭𑀁 𑀅𑀩𑀸𑀳𑀺𑀭𑀁 𑀓𑀭𑀺𑀢𑁆𑀯𑀸 𑀢𑀺𑀯𑀺𑀥𑀬𑀸𑀦𑀫𑀼𑀔𑁂𑀦 𑀯𑀺𑀫𑀼𑀢𑁆𑀢𑀺𑀥𑀫𑁆𑀫𑀤𑁂𑀲𑀦𑀸. 𑀲𑁄 𑀲𑀫𑁆𑀫𑀸𑀕𑀤𑀦𑀢𑁆𑀣𑁂𑀦 𑀲𑀼𑀕𑀢𑀲𑀤𑁆𑀤𑁂𑀦 𑀧𑀓𑀸𑀲𑀺𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺 𑀏𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀫𑀽𑀮𑀁 𑀤𑀲𑁆𑀲𑁂𑀢𑀺. 𑀫𑀳𑀸𑀓𑀭𑀼𑀡𑀸𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀳𑀺 𑀪𑀕𑀯𑀸 𑀲𑀁𑀲𑀸𑀭𑀧𑀗𑁆𑀓𑀢𑁄 𑀲𑀢𑁆𑀢𑀸𑀦𑀁 𑀲𑀫𑀼𑀤𑁆𑀥𑀭𑀡𑀢𑁆𑀣𑀁 𑀓𑀢𑀸𑀪𑀺𑀦𑀻𑀳𑀸𑀭𑁄 𑀅𑀦𑀼𑀧𑀼𑀩𑁆𑀩𑁂𑀦 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀢𑁄𑀢𑀺 𑀓𑀭𑀼𑀡𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀫𑀽𑀮𑀁. ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺 𑀏𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀤𑀲𑁆𑀲𑁂𑀢𑀺 ¶ . 𑀅𑀦𑀸𑀯𑀭𑀡𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀳𑀺 𑀫𑀕𑁆𑀕𑀜𑀸𑀡𑀁, 𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀘 𑀅𑀦𑀸𑀯𑀭𑀡𑀜𑀸𑀡𑀁 ‘‘𑀲𑀫𑁆𑀫𑀸𑀲𑀫𑁆𑀩𑁄𑀥𑀻’’𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀲𑀫𑁆𑀫𑀸𑀕𑀫𑀦𑀢𑁆𑀣𑁂𑀦 𑀲𑀼𑀕𑀢𑀲𑀤𑁆𑀤𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 𑀮𑀻𑀦𑀼𑀤𑁆𑀥𑀘𑁆𑀘𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀓𑀸𑀫𑀲𑀼𑀔𑀮𑁆𑀮𑀺𑀓𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀪𑀺𑀦𑀺𑀯𑁂𑀲𑀸𑀤𑀺 𑀅𑀦𑁆𑀢𑀤𑁆𑀯𑀬𑀭𑀳𑀺𑀢𑀸𑀬 𑀓𑀭𑀼𑀡𑀸𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑀺𑀢𑀸𑀬 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀧𑀓𑀸𑀲𑀦𑀢𑁄 𑀲𑀼𑀕𑀢𑀲𑀤𑁆𑀤𑀲𑁆𑀲. 𑀇𑀢𑀭𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀧𑀥𑀸𑀦𑀸𑀧𑁆𑀧𑀥𑀸𑀦𑀪𑁂𑀤𑀁 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀺. 𑀲𑀁𑀲𑀸𑀭𑀫𑀳𑁄𑀖𑀢𑁄 𑀲𑀢𑁆𑀢𑀲𑀦𑁆𑀢𑀸𑀭𑀡𑀜𑁆𑀳𑁂𑀢𑁆𑀣 𑀧𑀥𑀸𑀦𑀁 𑀧𑀬𑁄𑀚𑀦𑀁, 𑀢𑀤𑀜𑁆𑀜𑀫𑀧𑁆𑀧𑀥𑀸𑀦𑀁. 𑀢𑁂𑀲𑀼 𑀧𑀥𑀸𑀦𑁂𑀦 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺, 𑀇𑀢𑀭𑁂𑀦 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺𑀁, 𑀢𑀤𑀼𑀪𑀬𑁂𑀦 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀸𑀤𑀻𑀲𑀼 𑀘𑀢𑀽𑀲𑀼 𑀧𑀼𑀕𑁆𑀕𑀮𑁂𑀲𑀼 𑀪𑀕𑀯𑀢𑁄 𑀘𑀢𑀼𑀢𑁆𑀣𑀧𑀼𑀕𑁆𑀕𑀮𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦 𑀘 𑀅𑀦𑀼𑀢𑁆𑀢𑀭𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀁 𑀉𑀢𑁆𑀢𑀫𑀯𑀦𑁆𑀤𑀦𑀻𑀬𑀪𑀸𑀯𑀁 𑀅𑀢𑁆𑀢𑀦𑁄 𑀘 𑀯𑀦𑁆𑀤𑀦𑀓𑀺𑀭𑀺𑀬𑀸𑀬 𑀔𑁂𑀢𑁆𑀢𑀗𑁆𑀕𑀢𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀏𑀢𑁆𑀣 𑀘 𑀓𑀭𑀼𑀡𑀸𑀕𑀳𑀡𑁂𑀦 𑀮𑁄𑀓𑀺𑀬𑁂𑀲𑀼 𑀫𑀳𑀕𑁆𑀕𑀢𑀪𑀸𑀯𑀧𑁆𑀧𑀢𑁆𑀢𑀸𑀲𑀸𑀥𑀸𑀭𑀡𑀕𑀼𑀡𑀤𑀻𑀧𑀦𑀢𑁄 𑀪𑀕𑀯𑀢𑁄 𑀲𑀩𑁆𑀩𑀮𑁄𑀓𑀺𑀬𑀕𑀼𑀡𑀲𑀫𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸 𑀳𑁄𑀢𑀺, 𑀧𑀜𑁆𑀜𑀸𑀕𑀳𑀡𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀫𑀕𑁆𑀕𑀜𑀸𑀡𑀤𑀻𑀧𑀦𑀢𑁄 𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑀕𑀼𑀡𑀲𑀫𑁆𑀧𑀢𑁆𑀢𑀺. 𑀢𑀤𑀼𑀪𑀬𑀕𑁆𑀕𑀳𑀡𑀲𑀺𑀤𑁆𑀥𑁄 𑀳𑀺 𑀅𑀢𑁆𑀣𑁄 ‘‘𑀲𑀦𑀭𑀸𑀫𑀭𑀮𑁄𑀓𑀕𑀭𑀼’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀧𑀜𑁆𑀘𑀻𑀬𑀢𑀻𑀢𑀺. 𑀓𑀭𑀼𑀡𑀸𑀕𑀳𑀡𑁂𑀦 𑀘 𑀉𑀧𑀕𑀫𑀦𑀁 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁 𑀤𑀲𑁆𑀲𑁂𑀢𑀺, 𑀧𑀜𑁆𑀜𑀸𑀕𑀳𑀡𑁂𑀦 𑀅𑀧𑀕𑀫𑀦𑀁. 𑀢𑀣𑀸 𑀓𑀭𑀼𑀡𑀸𑀕𑀳𑀡𑁂𑀦 𑀮𑁄𑀓𑀲𑀫𑀜𑁆𑀜𑀸𑀦𑀼𑀭𑀽𑀧𑀁 𑀪𑀕𑀯𑀢𑁄 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 𑀮𑁄𑀓𑀯𑁄𑀳𑀸𑀭𑀯𑀺𑀲𑀬𑀢𑁆𑀢𑀸 ¶ 𑀓𑀭𑀼𑀡𑀸𑀬, 𑀧𑀜𑁆𑀜𑀸𑀕𑀳𑀡𑁂𑀦 𑀲𑀫𑀜𑁆𑀜𑀸𑀬 𑀅𑀦𑀢𑀺𑀥𑀸𑀯𑀦𑀁 𑀲𑀪𑀸𑀯𑀸𑀦𑀯𑀩𑁄𑀥𑁂𑀦 𑀳𑀺 𑀥𑀫𑁆𑀫𑀸𑀦𑀁 𑀲𑀫𑀜𑁆𑀜𑀁 𑀅𑀢𑀺𑀥𑀸𑀯𑀺𑀢𑁆𑀯𑀸 𑀲𑀢𑁆𑀢𑀸𑀤𑀺𑀧𑀭𑀸𑀫𑀲𑀦𑀁 𑀳𑁄𑀢𑀻𑀢𑀺. 𑀢𑀣𑀸 𑀓𑀭𑀼𑀡𑀸𑀕𑀳𑀡𑁂𑀦 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀁 𑀤𑀲𑁆𑀲𑁂𑀢𑀺, 𑀧𑀜𑁆𑀜𑀸𑀕𑀳𑀡𑁂𑀦 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀁 𑀘𑀢𑀼𑀲𑀘𑁆𑀘𑀜𑀸𑀡𑀁 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀁 𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑀁.

𑀓𑀭𑀼𑀡𑀸𑀕𑀳𑀡𑁂𑀦 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀜𑀸𑀡𑀲𑁆𑀲 𑀕𑀳𑀺𑀢𑀢𑁆𑀢𑀸 𑀲𑁂𑀲𑀸𑀲𑀸𑀥𑀸𑀭𑀡𑀜𑀸𑀡𑀸𑀦𑀺, 𑀙 𑀅𑀪𑀺𑀜𑁆𑀜𑀸, 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀅𑀓𑀫𑁆𑀧𑀦𑀜𑀸𑀡𑀸𑀦𑀺, 𑀤𑀲 𑀩𑀮𑀸𑀦𑀺, 𑀘𑀼𑀤𑁆𑀤𑀲 𑀩𑀼𑀤𑁆𑀥𑀜𑀸𑀡𑀸𑀦𑀺, 𑀲𑁄𑀴𑀲 𑀜𑀸𑀡𑀘𑀭𑀺𑀬𑀸, 𑀅𑀝𑁆𑀞𑀸𑀭𑀲 𑀩𑀼𑀤𑁆𑀥𑀥𑀫𑁆𑀫𑀸, 𑀘𑀢𑀼𑀘𑀢𑁆𑀢𑀸𑀮𑀻𑀲 𑀜𑀸𑀡𑀯𑀢𑁆𑀣𑀽𑀦𑀺, 𑀲𑀢𑁆𑀢𑀲𑀢𑁆𑀢𑀢𑀺𑀜𑀸𑀡𑀯𑀢𑁆𑀣𑀽𑀦𑀻𑀢𑀺 𑀏𑀯𑀫𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀧𑀜𑁆𑀜𑀸𑀧𑀪𑁂𑀤𑀸𑀦𑀁 𑀯𑀲𑁂𑀦 𑀜𑀸𑀡𑀘𑀸𑀭𑀁 𑀤𑀲𑁆𑀲𑁂𑀢𑀺. 𑀢𑀣𑀸 𑀓𑀭𑀼𑀡𑀸𑀕𑀳𑀡𑁂𑀦 𑀘𑀭𑀡𑀲𑀫𑁆𑀧𑀢𑁆𑀢𑀺𑀁, 𑀧𑀜𑁆𑀜𑀸𑀕𑀳𑀡𑁂𑀦 𑀯𑀺𑀚𑁆𑀚𑀸𑀲𑀫𑁆𑀧𑀢𑁆𑀢𑀺𑀁. 𑀓𑀭𑀼𑀡𑀸𑀕𑀳𑀡𑁂𑀦 𑀅𑀢𑁆𑀢𑀸𑀥𑀺𑀧𑀢𑀺𑀢𑀸, 𑀧𑀜𑁆𑀜𑀸𑀕𑀳𑀡𑁂𑀦 𑀥𑀫𑁆𑀫𑀸𑀥𑀺𑀧𑀢𑀺𑀢𑀸. 𑀓𑀭𑀼𑀡𑀸𑀕𑀳𑀡𑁂𑀦 𑀮𑁄𑀓𑀦𑀸𑀣𑀪𑀸𑀯𑁄, 𑀧𑀜𑁆𑀜𑀸𑀕𑀳𑀡𑁂𑀦 ¶ 𑀅𑀢𑁆𑀢𑀦𑀸𑀣𑀪𑀸𑀯𑁄. 𑀢𑀣𑀸 𑀓𑀭𑀼𑀡𑀸𑀕𑀳𑀡𑁂𑀦 𑀧𑀼𑀩𑁆𑀩𑀓𑀸𑀭𑀺𑀪𑀸𑀯𑁄, 𑀧𑀜𑁆𑀜𑀸𑀕𑀳𑀡𑁂𑀦 𑀓𑀢𑀜𑁆𑀜𑀼𑀢𑀸. 𑀢𑀣𑀸 𑀓𑀭𑀼𑀡𑀸𑀕𑀳𑀡𑁂𑀦 𑀅𑀧𑀭𑀦𑁆𑀢𑀧𑀢𑀸, 𑀧𑀜𑁆𑀜𑀸𑀕𑀳𑀡𑁂𑀦 𑀅𑀦𑀢𑁆𑀢𑀦𑁆𑀢𑀧𑀢𑀸. 𑀓𑀭𑀼𑀡𑀸𑀕𑀳𑀡𑁂𑀦 𑀯𑀸 𑀩𑀼𑀤𑁆𑀥𑀓𑀭𑀥𑀫𑁆𑀫𑀲𑀺𑀤𑁆𑀥𑀺, 𑀧𑀜𑁆𑀜𑀸𑀕𑀳𑀡𑁂𑀦 𑀩𑀼𑀤𑁆𑀥𑀪𑀸𑀯𑀲𑀺𑀤𑁆𑀥𑀺. 𑀢𑀣𑀸 𑀓𑀭𑀼𑀡𑀸𑀕𑀳𑀡𑁂𑀦 𑀧𑀭𑁂𑀲𑀁 𑀢𑀸𑀭𑀡𑀁, 𑀧𑀜𑁆𑀜𑀸𑀕𑀳𑀡𑁂𑀦 𑀲𑀬𑀁 𑀢𑀭𑀡𑀁. 𑀢𑀣𑀸 𑀓𑀭𑀼𑀡𑀸𑀕𑀳𑀡𑁂𑀦 𑀲𑀩𑁆𑀩𑀲𑀢𑁆𑀢𑁂𑀲𑀼 𑀅𑀦𑀼𑀕𑁆𑀕𑀳𑀘𑀺𑀢𑁆𑀢𑀢𑀸, 𑀧𑀜𑁆𑀜𑀸𑀕𑀳𑀡𑁂𑀦 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀭𑀢𑁆𑀢𑀘𑀺𑀢𑁆𑀢𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺.

𑀲𑀩𑁆𑀩𑁂𑀲𑀜𑁆𑀘 𑀩𑀼𑀤𑁆𑀥𑀕𑀼𑀡𑀸𑀦𑀁 𑀓𑀭𑀼𑀡𑀸 𑀆𑀤𑀺 𑀢𑀦𑁆𑀦𑀺𑀤𑀸𑀦𑀪𑀸𑀯𑀢𑁄, 𑀧𑀜𑁆𑀜𑀸 𑀧𑀭𑀺𑀬𑁄𑀲𑀸𑀦𑀁 𑀢𑀢𑁄 𑀉𑀢𑁆𑀢𑀭𑀺 𑀓𑀭𑀡𑀻𑀬𑀸𑀪𑀸𑀯𑀢𑁄. 𑀇𑀢𑀺 𑀆𑀤𑀺𑀧𑀭𑀺𑀬𑁄𑀲𑀸𑀦𑀤𑀲𑁆𑀲𑀦𑁂𑀦 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀢𑀣𑀸 𑀓𑀭𑀼𑀡𑀸𑀕𑀳𑀡𑁂𑀦 𑀲𑀻𑀮𑀓𑁆𑀔𑀦𑁆𑀥𑀧𑀼𑀩𑁆𑀩𑀗𑁆𑀕𑀫𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀓𑀭𑀼𑀡𑀸𑀦𑀺𑀤𑀸𑀦𑀜𑁆𑀳𑀺 𑀲𑀻𑀮𑀁 𑀢𑀢𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀺𑀭𑀢𑀺𑀧𑁆𑀧𑀯𑀢𑁆𑀢𑀺𑀢𑁄, 𑀲𑀸 𑀘 𑀛𑀸𑀦𑀢𑁆𑀢𑀬𑀲𑀫𑁆𑀧𑀬𑁄𑀕𑀺𑀦𑀻𑀢𑀺. 𑀧𑀜𑁆𑀜𑀸𑀯𑀘𑀦𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀲𑀻𑀮𑀜𑁆𑀘 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑀸𑀦𑀁 𑀆𑀤𑀺, 𑀲𑀫𑀸𑀥𑀺 𑀫𑀚𑁆𑀛𑁂, 𑀧𑀜𑁆𑀜𑀸 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀏𑀯𑀫𑁆𑀧𑀺 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀤𑀲𑁆𑀲𑀦𑁂𑀦 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺 𑀦𑀬𑀢𑁄 𑀤𑀲𑁆𑀲𑀺𑀢𑀢𑁆𑀢𑀸. 𑀏𑀲𑁄 𑀏𑀯 𑀳𑀺 𑀦𑀺𑀭𑀯𑀲𑁂𑀲𑀢𑁄 𑀩𑀼𑀤𑁆𑀥𑀕𑀼𑀡𑀸𑀦𑀁 𑀤𑀲𑁆𑀲𑀦𑀼𑀧𑀸𑀬𑁄, 𑀬𑀤𑀺𑀤𑀁 𑀦𑀬𑀕𑁆𑀕𑀸𑀳𑀡𑀁. 𑀅𑀜𑁆𑀜𑀣𑀸 𑀓𑁄 𑀦𑀸𑀫 𑀲𑀫𑀢𑁆𑀣𑁄 𑀪𑀕𑀯𑀢𑁄 𑀕𑀼𑀡𑁂 𑀅𑀦𑀼𑀧𑀤𑀁 𑀦𑀺𑀭𑀯𑀲𑁂𑀲𑀢𑁄 𑀤𑀲𑁆𑀲𑁂𑀢𑀼𑀁. 𑀢𑁂𑀦𑁂𑀯𑀸𑀳 𑁋

‘‘𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁;

𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄.

𑀔𑀻𑀬𑁂𑀣 ¶ 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂;

𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁦𑁫; 𑁩.𑁧𑁪𑁧; 𑀫. 𑀦𑀺. 𑀅𑀝𑁆𑀞. 𑁨.𑁪𑁨𑁫; 𑀉𑀤𑀸. 𑀅𑀝𑁆𑀞. 𑁫𑁩; 𑀅𑀧. 𑀅𑀝𑁆𑀞. 𑁨.𑁭.𑁨𑁦; 𑀩𑀼. 𑀯𑀁. 𑀅𑀝𑁆𑀞. 𑁪.𑁪; 𑀘𑀭𑀺𑀬𑀸. 𑀅𑀝𑁆𑀞. 𑁩.𑁧𑁨𑁨 𑀧𑀓𑀺𑀡𑁆𑀡𑀓𑀓𑀣𑀸);

𑀢𑁂𑀦𑁂𑀯 𑀘 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦𑀧𑀺 𑀩𑀼𑀤𑁆𑀥𑀕𑀼𑀡𑀧𑀭𑀺𑀘𑁆𑀙𑁂𑀤𑀦𑀁 𑀧𑀢𑀺 𑀅𑀦𑀼𑀬𑀼𑀢𑁆𑀢𑁂𑀦 ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀧𑀺𑀘 𑀫𑁂, 𑀪𑀦𑁆𑀢𑁂, 𑀥𑀫𑁆𑀫𑀦𑁆𑀯𑀬𑁄 𑀯𑀺𑀤𑀺𑀢𑁄’’𑀢𑀺 (𑀤𑀻. 𑀦𑀺. 𑁨.𑁧𑁪𑁬) 𑀯𑀼𑀢𑁆𑀢𑀁.

𑁨. 𑀏𑀯𑀁 𑀲𑀗𑁆𑀔𑁂𑀧𑁂𑀦 𑀲𑀓𑀮𑀲𑀩𑁆𑀩𑀜𑁆𑀜𑀼𑀕𑀼𑀡𑁂𑀳𑀺 𑀪𑀕𑀯𑀦𑁆𑀢𑀁 𑀅𑀪𑀺𑀢𑁆𑀣𑀯𑀺𑀢𑁆𑀯𑀸 𑀇𑀤𑀸𑀦𑀺 𑀲𑀤𑁆𑀥𑀫𑁆𑀫𑀁 𑀣𑁄𑀫𑁂𑀢𑀼𑀁 ‘‘𑀩𑀼𑀤𑁆𑀥𑁄𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑀼𑀤𑁆𑀥𑁄𑀢𑀺 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄. 𑀩𑀼𑀤𑁆𑀥𑀪𑀸𑀯𑀦𑁆𑀢𑀺 𑀓𑀫𑁆𑀫𑀦𑀺𑀤𑁆𑀤𑁂𑀲𑁄. 𑀪𑀸𑀯𑁂𑀢𑁆𑀯𑀸 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀘 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄 ¶ . 𑀬𑀦𑁆𑀢𑀺 𑀅𑀦𑀺𑀬𑀫𑀢𑁄 𑀓𑀫𑁆𑀫𑀦𑀺𑀤𑁆𑀤𑁂𑀲𑁄. 𑀉𑀧𑀕𑀢𑁄𑀢𑀺 𑀅𑀧𑀭𑀓𑀸𑀮𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄. 𑀯𑀦𑁆𑀤𑁂𑀢𑀺 𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄. 𑀢𑀦𑁆𑀢𑀺 𑀦𑀺𑀬𑀫𑀦𑀁. 𑀥𑀫𑁆𑀫𑀦𑁆𑀢𑀺 𑀯𑀦𑁆𑀤𑀦𑀓𑀺𑀭𑀺𑀬𑀸𑀬 𑀓𑀫𑁆𑀫𑀦𑀺𑀤𑁆𑀤𑁂𑀲𑁄. 𑀕𑀢𑀫𑀮𑀁 𑀅𑀦𑀼𑀢𑁆𑀢𑀭𑀦𑁆𑀢𑀺 𑀘 𑀢𑀩𑁆𑀩𑀺𑀲𑁂𑀲𑀦𑀁.

𑀢𑀢𑁆𑀣 𑀩𑀼𑀤𑁆𑀥𑀲𑀤𑁆𑀤𑀲𑁆𑀲 𑀢𑀸𑀯 ‘‘𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄, 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑁂𑀲𑀦𑀬𑁂𑀦 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑁯𑁭) 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀲𑀯𑀸𑀲𑀦𑀸𑀬 𑀅𑀜𑁆𑀜𑀸𑀡𑀦𑀺𑀤𑁆𑀤𑀸𑀬 𑀅𑀘𑁆𑀘𑀦𑁆𑀢𑀯𑀺𑀕𑀫𑀢𑁄, 𑀩𑀼𑀤𑁆𑀥𑀺𑀬𑀸 𑀯𑀸 𑀯𑀺𑀓𑀲𑀺𑀢𑀪𑀸𑀯𑀢𑁄 𑀩𑀼𑀤𑁆𑀥𑀯𑀸𑀢𑀺 𑀩𑀼𑀤𑁆𑀥𑁄 𑀚𑀸𑀕𑀭𑀡𑀯𑀺𑀓𑀲𑀦𑀢𑁆𑀣𑀯𑀲𑁂𑀦. 𑀅𑀣 𑀯𑀸 𑀓𑀲𑁆𑀲𑀘𑀺𑀧𑀺 𑀜𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀦𑀯𑀩𑀼𑀤𑁆𑀥𑀲𑁆𑀲 𑀅𑀪𑀸𑀯𑁂𑀦 𑀜𑁂𑀬𑁆𑀬𑀯𑀺𑀲𑁂𑀲𑀲𑁆𑀲 𑀓𑀫𑁆𑀫𑀪𑀸𑀯𑁂𑀦 𑀅𑀕𑁆𑀕𑀳𑀡𑀢𑁄 𑀓𑀫𑁆𑀫𑀯𑀘𑀦𑀺𑀘𑁆𑀙𑀸𑀬 𑀅𑀪𑀸𑀯𑁂𑀦 𑀅𑀯𑀕𑀫𑀦𑀢𑁆𑀣𑀯𑀲𑁂𑀦𑁂𑀯 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄 𑀮𑀩𑁆𑀪𑀢𑀻𑀢𑀺 𑀩𑀼𑀤𑁆𑀥𑀯𑀸𑀢𑀺 𑀩𑀼𑀤𑁆𑀥𑁄 𑀬𑀣𑀸 ‘‘𑀤𑀺𑀓𑁆𑀔𑀺𑀢𑁄 𑀦 𑀤𑀤𑀸𑀢𑀻’’𑀢𑀺. 𑀅𑀢𑁆𑀣𑀢𑁄 𑀧𑀦 𑀧𑀸𑀭𑀫𑀺𑀢𑀸𑀧𑀭𑀺𑀪𑀸𑀯𑀺𑀢𑁄 𑀲𑀬𑀫𑁆𑀪𑀼𑀜𑀸𑀡𑁂𑀦 𑀲𑀳 𑀯𑀸𑀲𑀦𑀸𑀬 𑀯𑀺𑀳𑀢𑀯𑀺𑀤𑁆𑀥𑀲𑁆𑀢𑀦𑀺𑀭𑀯𑀲𑁂𑀲𑀓𑀺𑀮𑁂𑀲𑁄 𑀫𑀳𑀸𑀓𑀭𑀼𑀡𑀸𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀅𑀧𑀭𑀺𑀫𑁂𑀬𑁆𑀬𑀕𑀼𑀡𑀕𑀡𑀸𑀥𑀸𑀭𑁄 𑀔𑀦𑁆𑀥𑀲𑀦𑁆𑀢𑀸𑀦𑁄 𑀩𑀼𑀤𑁆𑀥𑁄. 𑀬𑀣𑀸𑀳 𑁋

‘‘𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽. 𑀅𑀦𑀸𑀘𑀭𑀺𑀬𑀓𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯’’𑀦𑁆𑀢𑀺 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑁯𑁭; 𑀧𑀝𑀺. 𑀫. 𑁩.𑁧𑁬𑁧).

𑀅𑀧𑀺-𑀲𑀤𑁆𑀤𑁄 ¶ 𑀲𑀫𑁆𑀪𑀸𑀯𑀦𑁂. 𑀢𑁂𑀦 ‘‘𑀏𑀯𑀁 𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑁄 𑀲𑁄𑀧𑀺 𑀦𑀸𑀫 𑀪𑀕𑀯𑀸’’𑀢𑀺 𑀯𑀓𑁆𑀔𑀫𑀸𑀦𑀕𑀼𑀡𑁂 𑀥𑀫𑁆𑀫𑁂 𑀲𑀫𑁆𑀪𑀸𑀯𑀦𑀁 𑀤𑀻𑀧𑁂𑀢𑀺. 𑀩𑀼𑀤𑁆𑀥𑀪𑀸𑀯𑀦𑁆𑀢𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁. 𑀪𑀸𑀯𑁂𑀢𑁆𑀯𑀸𑀢𑀺 𑀉𑀧𑁆𑀧𑀸𑀤𑁂𑀢𑁆𑀯𑀸 𑀯𑀟𑁆𑀠𑁂𑀢𑁆𑀯𑀸 𑀘. 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸. 𑀉𑀧𑀕𑀢𑁄𑀢𑀺 𑀧𑀢𑁆𑀢𑁄, 𑀅𑀥𑀺𑀕𑀢𑁄𑀢𑀺 𑀅𑀢𑁆𑀣𑁄. 𑀏𑀢𑀲𑁆𑀲 ‘‘𑀩𑀼𑀤𑁆𑀥𑀪𑀸𑀯’’𑀦𑁆𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀕𑀢𑀫𑀮𑀦𑁆𑀢𑀺 𑀯𑀺𑀕𑀢𑀫𑀮𑀁, 𑀦𑀺𑀤𑁆𑀤𑁄𑀲𑀦𑁆𑀢𑀺 𑀅𑀢𑁆𑀣𑁄. 𑀯𑀦𑁆𑀤𑁂𑀢𑀺 𑀧𑀡𑀫𑀸𑀫𑀺, 𑀣𑁄𑀫𑁂𑀫𑀺 𑀯𑀸. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀉𑀢𑁆𑀢𑀭𑀭𑀳𑀺𑀢𑀁, 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀦𑁆𑀢𑀺 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀅𑀧𑀸𑀬𑀢𑁄 𑀘 𑀲𑀁𑀲𑀸𑀭𑀢𑁄 𑀘 𑀅𑀧𑀢𑀫𑀸𑀦𑁂 𑀓𑀢𑁆𑀯𑀸 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀏𑀯𑀁 𑀯𑀺𑀯𑀺𑀥𑀕𑀼𑀡𑀕𑀡𑀲𑀫𑀦𑁆𑀦𑀸𑀕𑀢𑁄 𑀩𑀼𑀤𑁆𑀥𑁄𑀧𑀺 𑀪𑀕𑀯𑀸 𑀬𑀁 𑀅𑀭𑀺𑀬𑀫𑀕𑁆𑀕𑀲𑀗𑁆𑀔𑀸𑀢𑀁 𑀥𑀫𑁆𑀫𑀁 𑀪𑀸𑀯𑁂𑀢𑁆𑀯𑀸, 𑀨𑀮𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀧𑀦 𑀲𑀘𑁆𑀙𑀺𑀓𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀢𑁄, 𑀢𑀫𑁂𑀢𑀁 𑀩𑀼𑀤𑁆𑀥𑀸𑀦𑀫𑁆𑀧𑀺 𑀩𑀼𑀤𑁆𑀥𑀪𑀸𑀯𑀳𑁂𑀢𑀼𑀪𑀽𑀢𑀁 𑀲𑀩𑁆𑀩𑀤𑁄𑀲𑀫𑀮𑀭𑀳𑀺𑀢𑀁 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀢𑀭𑀸𑀪𑀸𑀯𑁂𑀦 𑀅𑀦𑀼𑀢𑁆𑀢𑀭𑀁 𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑀁 𑀦𑀫𑀸𑀫𑀻𑀢𑀺. 𑀧𑀭𑀺𑀬𑀢𑁆𑀢𑀺𑀲𑀤𑁆𑀥𑀫𑁆𑀫𑀲𑁆𑀲𑀸𑀧𑀺 𑀢𑀧𑁆𑀧𑀓𑀸𑀲𑀦𑀢𑁆𑀢𑀸 𑀇𑀥 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀅𑀣 ¶ 𑀯𑀸 ‘‘𑀅𑀪𑀺𑀥𑀫𑁆𑀫𑀦𑀬𑀲𑀫𑀼𑀤𑁆𑀤𑀁 𑀅𑀥𑀺𑀕𑀘𑁆𑀙𑀺, 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑀫𑁆𑀫𑀲𑀻’’𑀢𑀺 𑀘 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲𑀧𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀲𑀫𑁆𑀫𑀲𑀦𑀧𑀭𑀺𑀬𑀸𑀬𑁄 𑀮𑀩𑁆𑀪𑀢𑀻𑀢𑀺 𑀲𑁄𑀧𑀺 𑀇𑀥 𑀯𑀼𑀢𑁆𑀢𑁄 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 ‘‘𑀬𑀁 𑀥𑀫𑁆𑀫𑀁 𑀪𑀸𑀯𑁂𑀢𑁆𑀯𑀸 𑀲𑀘𑁆𑀘𑀺𑀓𑀢𑁆𑀯𑀸’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀩𑀼𑀤𑁆𑀥𑀓𑀭𑀥𑀫𑁆𑀫𑀪𑀽𑀢𑀸𑀳𑀺 𑀧𑀸𑀭𑀫𑀺𑀢𑀸𑀳𑀺 𑀲𑀳 𑀧𑀼𑀩𑁆𑀩𑀪𑀸𑀕𑁂 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀬𑁄𑀧𑀺 𑀇𑀥 𑀥𑀫𑁆𑀫𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀸𑀧𑀺 𑀳𑀺 𑀫𑀮𑀧𑀝𑀺𑀧𑀓𑁆𑀔𑀢𑀸𑀬 𑀕𑀢𑀫𑀮𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀅𑀦𑀼𑀢𑁆𑀢𑀭𑀸 𑀘𑀸𑀢𑀺. 𑀢𑀣𑀸 𑀳𑀺 𑀲𑀢𑁆𑀢𑀸𑀦𑀁 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀢𑁆𑀣𑀸𑀬 𑀓𑀢𑀫𑀳𑀸𑀪𑀺𑀦𑀻𑀳𑀸𑀭𑁄 𑀫𑀳𑀸𑀓𑀭𑀼𑀡𑀸𑀥𑀺𑀯𑀸𑀲𑀧𑁂𑀲𑀮𑀚𑁆𑀛𑀸𑀲𑀬𑁄 𑀧𑀜𑁆𑀜𑀸𑀯𑀺𑀲𑁂𑀲𑀧𑀭𑀺𑀥𑁄𑀢𑀦𑀺𑀫𑁆𑀫𑀮𑀸𑀦𑀁 𑀤𑀸𑀦𑀤𑀫𑀲𑀁𑀬𑀫𑀸𑀤𑀻𑀦𑀁 𑀉𑀢𑁆𑀢𑀫𑀥𑀫𑁆𑀫𑀸𑀦𑀁 𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀓𑀧𑁆𑀧𑀸𑀦𑀁 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀲𑀓𑁆𑀓𑀘𑁆𑀘𑀁 𑀦𑀺𑀭𑀦𑁆𑀢𑀭𑀁 𑀦𑀺𑀭𑀯𑀲𑁂𑀲𑀸𑀦𑀁 𑀪𑀸𑀯𑀦𑀸𑀧𑀘𑁆𑀘𑀓𑁆𑀔𑀓𑀭𑀡𑁂𑀳𑀺 𑀓𑀫𑁆𑀫𑀸𑀤𑀻𑀲𑀼 𑀅𑀥𑀺𑀕𑀢𑀯𑀲𑀻𑀪𑀸𑀯𑁄 𑀅𑀘𑁆𑀙𑀭𑀺𑀬𑀸𑀘𑀺𑀦𑁆𑀢𑁂𑀬𑁆𑀬𑀫𑀳𑀸𑀦𑀼𑀪𑀸𑀯𑁄 𑀅𑀥𑀺𑀲𑀻𑀮𑀸𑀥𑀺𑀘𑀺𑀢𑁆𑀢𑀸𑀦𑀁 𑀧𑀭𑀫𑀼𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀪𑀕𑀯𑀸 𑀧𑀘𑁆𑀘𑀬𑀸𑀓𑀸𑀭𑁂 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀼𑀔𑁂𑀦 𑀫𑀳𑀸𑀯𑀚𑀺𑀭𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺.

𑀏𑀢𑁆𑀣 𑀘 ‘‘𑀪𑀸𑀯𑁂𑀢𑁆𑀯𑀸’’𑀢𑀺 𑀏𑀢𑁂𑀦 𑀯𑀺𑀚𑁆𑀚𑀸𑀲𑀫𑁆𑀧𑀤𑀸𑀬 𑀥𑀫𑁆𑀫𑀁 𑀣𑁄𑀫𑁂𑀢𑀺, ‘‘𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺 𑀏𑀢𑁂𑀦 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀤𑀸𑀬. 𑀢𑀣𑀸 𑀧𑀞𑀫𑁂𑀦 𑀛𑀸𑀦𑀲𑀫𑁆𑀧𑀤𑀸𑀬, 𑀤𑀼𑀢𑀺𑀬𑁂𑀦 𑀯𑀺𑀫𑁄𑀓𑁆𑀔𑀲𑀫𑁆𑀧𑀤𑀸𑀬. 𑀧𑀞𑀫𑁂𑀦 𑀯𑀸 𑀲𑀫𑀸𑀥𑀺𑀲𑀫𑁆𑀧𑀤𑀸𑀬, 𑀤𑀼𑀢𑀺𑀬𑁂𑀦 𑀲𑀫𑀸𑀧𑀢𑁆𑀢𑀺𑀲𑀫𑁆𑀧𑀤𑀸𑀬. 𑀅𑀣 𑀯𑀸 𑀧𑀞𑀫𑁂𑀦 𑀔𑀬𑁂𑀜𑀸𑀡𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀅𑀦𑀼𑀧𑁆𑀧𑀸𑀤𑁂𑀜𑀸𑀡𑀪𑀸𑀯𑁂𑀦. 𑀧𑀼𑀭𑀺𑀫𑁂𑀦 𑀯𑀸 𑀯𑀺𑀚𑁆𑀚𑀽𑀧𑀫𑀢𑀸𑀬, 𑀤𑀼𑀢𑀺𑀬𑁂𑀦 𑀯𑀚𑀺𑀭𑀽𑀧𑀫𑀢𑀸𑀬. 𑀧𑀼𑀭𑀺𑀫𑁂𑀦 𑀯𑀸 𑀯𑀺𑀭𑀸𑀕𑀲𑀫𑁆𑀧𑀢𑁆𑀢𑀺𑀬𑀸, 𑀤𑀼𑀢𑀺𑀬𑁂𑀦 𑀦𑀺𑀭𑁄𑀥𑀲𑀫𑁆𑀧𑀢𑁆𑀢𑀺𑀬𑀸. 𑀢𑀣𑀸 𑀧𑀞𑀫𑁂𑀦 𑀦𑀺𑀬𑁆𑀬𑀸𑀦𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀦𑀺𑀲𑁆𑀲𑁆𑀲𑀭𑀡𑀪𑀸𑀯𑁂𑀦. 𑀧𑀞𑀫𑁂𑀦 𑀯𑀸 𑀳𑁂𑀢𑀼𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀅𑀲𑀗𑁆𑀔𑀢𑀪𑀸𑀯𑁂𑀦. 𑀧𑀞𑀫𑁂𑀦 𑀯𑀸 𑀤𑀲𑁆𑀲𑀦𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀯𑀺𑀯𑁂𑀓𑀪𑀸𑀯𑁂𑀦. 𑀧𑀞𑀫𑁂𑀦 𑀯𑀸 𑀅𑀥𑀺𑀧𑀢𑀺𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀅𑀫𑀢𑀪𑀸𑀯𑁂𑀦 𑀥𑀫𑁆𑀫𑀁 ¶ 𑀣𑁄𑀫𑁂𑀢𑀺. 𑀅𑀣 𑀯𑀸 ‘‘𑀬𑀁 𑀥𑀫𑁆𑀫𑀁 𑀪𑀸𑀯𑁂𑀢𑁆𑀯𑀸 𑀩𑀼𑀤𑁆𑀥𑀪𑀸𑀯𑀁 𑀉𑀧𑀕𑀢𑁄’’𑀢𑀺 𑀏𑀢𑁂𑀦 𑀲𑁆𑀯𑀸𑀓𑁆𑀔𑀸𑀢𑀢𑀸𑀬 𑀥𑀫𑁆𑀫𑀁 𑀣𑁄𑀫𑁂𑀢𑀺. ‘‘𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺 𑀏𑀢𑁂𑀦 𑀲𑀦𑁆𑀤𑀺𑀝𑁆𑀞𑀺𑀓𑀢𑀸𑀬. 𑀢𑀣𑀸 𑀧𑀼𑀭𑀺𑀫𑁂𑀦 𑀅𑀓𑀸𑀮𑀺𑀓𑀢𑀸𑀬, 𑀧𑀘𑁆𑀙𑀺𑀫𑁂𑀦 𑀏𑀳𑀺𑀧𑀲𑁆𑀲𑀺𑀓𑀢𑀸𑀬. 𑀧𑀼𑀭𑀺𑀫𑁂𑀦 𑀯𑀸 𑀑𑀧𑀦𑁂𑀬𑁆𑀬𑀺𑀓𑀢𑀸𑀬, 𑀧𑀘𑁆𑀙𑀺𑀫𑁂𑀦 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀢𑀸𑀬 𑀥𑀫𑁆𑀫𑀁 𑀣𑁄𑀫𑁂𑀢𑀺. ‘‘𑀕𑀢𑀫𑀮’’𑀦𑁆𑀢𑀺 𑀇𑀫𑀺𑀦𑀸 𑀲𑀁𑀓𑀺𑀮𑁂𑀲𑀸𑀪𑀸𑀯𑀤𑀻𑀧𑀦𑁂𑀦 𑀥𑀫𑁆𑀫𑀲𑁆𑀲 𑀧𑀭𑀺𑀲𑀼𑀤𑁆𑀥𑀢𑀁 𑀤𑀲𑁆𑀲𑁂𑀢𑀺, ‘‘𑀅𑀦𑀼𑀢𑁆𑀢𑀭’’𑀦𑁆𑀢𑀺 𑀏𑀢𑁂𑀦 𑀅𑀜𑁆𑀜𑀲𑁆𑀲 𑀯𑀺𑀲𑀺𑀝𑁆𑀞𑀲𑁆𑀲 𑀅𑀪𑀸𑀯𑀤𑀻𑀧𑀦𑁂𑀦 𑀯𑀺𑀧𑀼𑀮𑀧𑀭𑀺𑀧𑀼𑀡𑁆𑀡𑀢𑀁. 𑀧𑀞𑀫𑁂𑀦 𑀯𑀸 𑀧𑀳𑀸𑀦𑀲𑀫𑁆𑀧𑀤𑀁 𑀥𑀫𑁆𑀫𑀲𑁆𑀲 𑀤𑀲𑁆𑀲𑁂𑀢𑀺, 𑀤𑀼𑀢𑀺𑀬𑁂𑀦 𑀲𑀪𑀸𑀯𑀲𑀫𑁆𑀧𑀤𑀁. 𑀪𑀸𑀯𑁂𑀢𑀩𑁆𑀩𑀢𑀸𑀬 𑀯𑀸 𑀥𑀫𑁆𑀫𑀲𑁆𑀲 𑀕𑀢𑀫𑀮𑀪𑀸𑀯𑁄 𑀬𑁄𑀚𑁂𑀢𑀩𑁆𑀩𑁄 ¶ . 𑀪𑀸𑀯𑀦𑀸𑀕𑀼𑀡𑁂𑀦 𑀳𑀺 𑀲𑁄 𑀤𑁄𑀲𑀸𑀦𑀁 𑀲𑀫𑀼𑀕𑁆𑀖𑀸𑀢𑀓𑁄 𑀳𑁄𑀢𑀻𑀢𑀺. 𑀲𑀘𑁆𑀙𑀺𑀓𑀸𑀢𑀩𑁆𑀩𑀪𑀸𑀯𑁂𑀦 𑀅𑀦𑀼𑀢𑁆𑀢𑀭𑀪𑀸𑀯𑁄 𑀬𑁄𑀚𑁂𑀢𑀩𑁆𑀩𑁄. 𑀲𑀘𑁆𑀙𑀺𑀓𑀺𑀭𑀺𑀬𑀸𑀦𑀺𑀩𑁆𑀩𑀢𑁆𑀢𑀺𑀢𑁄 𑀳𑀺 𑀢𑀤𑀼𑀢𑁆𑀢𑀭𑀺𑀓𑀭𑀡𑀻𑀬𑀸𑀪𑀸𑀯𑀢𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀅𑀦𑀼𑀢𑁆𑀢𑀭𑁄𑀢𑀺. 𑀢𑀣𑀸 ‘‘𑀪𑀸𑀯𑁂𑀢𑁆𑀯𑀸’’𑀢𑀺 𑀏𑀢𑁂𑀦 𑀲𑀳 𑀧𑀼𑀩𑁆𑀩𑀪𑀸𑀕𑀲𑀻𑀮𑀸𑀤𑀻𑀳𑀺 𑀲𑁂𑀓𑁆𑀔𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀓𑁆𑀔𑀦𑁆𑀥𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺, ‘‘𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺 𑀏𑀢𑁂𑀦 𑀲𑀳 𑀅𑀲𑀗𑁆𑀔𑀢𑀸𑀬 𑀥𑀸𑀢𑀼𑀬𑀸 𑀅𑀲𑁂𑀓𑁆𑀔𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀓𑁆𑀔𑀦𑁆𑀥𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀻𑀢𑀺.

𑁩. 𑀏𑀯𑀁 𑀲𑀗𑁆𑀔𑁂𑀧𑁂𑀦𑁂𑀯 𑀲𑀩𑁆𑀩𑀥𑀫𑁆𑀫𑀕𑀼𑀡𑁂𑀳𑀺 𑀲𑀤𑁆𑀥𑀫𑁆𑀫𑀁 𑀅𑀪𑀺𑀢𑁆𑀣𑀯𑀺𑀢𑁆𑀯𑀸 𑀇𑀤𑀸𑀦𑀺 𑀅𑀭𑀺𑀬𑀲𑀗𑁆𑀖𑀁 𑀣𑁄𑀫𑁂𑀢𑀼𑀁 ‘‘𑀲𑀼𑀕𑀢𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀕𑀢𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑀦𑀺𑀤𑁆𑀤𑁂𑀲𑁄, 𑀢𑀲𑁆𑀲 ‘‘𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀑𑀭𑀲𑀸𑀦𑀦𑁆𑀢𑀺 𑀧𑀼𑀢𑁆𑀢𑀯𑀺𑀲𑁂𑀲𑀦𑀁. 𑀫𑀸𑀭𑀲𑁂𑀦𑀫𑀣𑀦𑀸𑀦𑀦𑁆𑀢𑀺 𑀑𑀭𑀲𑀧𑀼𑀢𑁆𑀢𑀪𑀸𑀯𑁂 𑀓𑀸𑀭𑀡𑀦𑀺𑀤𑁆𑀤𑁂𑀲𑁄. 𑀢𑁂𑀦 𑀓𑀺𑀮𑁂𑀲𑀧𑁆𑀧𑀳𑀸𑀦𑀫𑁂𑀯 𑀪𑀕𑀯𑀢𑁄 𑀑𑀭𑀲𑀧𑀼𑀢𑁆𑀢𑀪𑀸𑀯𑁂 𑀓𑀸𑀭𑀡𑀁 𑀅𑀦𑀼𑀚𑀸𑀦𑀸𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀝𑁆𑀞𑀦𑁆𑀦𑀦𑁆𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑀦𑀺𑀤𑁆𑀤𑁂𑀲𑁄. 𑀢𑁂𑀦 𑀲𑀢𑀺𑀧𑀺 𑀢𑁂𑀲𑀁 𑀲𑀢𑁆𑀢𑀯𑀺𑀲𑁂𑀲𑀪𑀸𑀯𑁂𑀦 𑀅𑀦𑁂𑀓𑀲𑀳𑀲𑁆𑀲𑀲𑀗𑁆𑀔𑀸𑀪𑀸𑀯𑁂 𑀇𑀫𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺 𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑀪𑀸𑀯𑀸𑀦𑀸𑀢𑀺𑀯𑀢𑁆𑀢𑀦𑀢𑁄. 𑀲𑀫𑀽𑀳𑀦𑁆𑀢𑀺 𑀲𑀫𑀼𑀤𑀸𑀬𑀦𑀺𑀤𑁆𑀤𑁂𑀲𑁄. 𑀅𑀭𑀺𑀬𑀲𑀗𑁆𑀖𑀦𑁆𑀢𑀺 𑀕𑀼𑀡𑀯𑀺𑀲𑀺𑀝𑁆𑀞𑀲𑀗𑁆𑀖𑀸𑀝𑀪𑀸𑀯𑀦𑀺𑀤𑁆𑀤𑁂𑀲𑁄. 𑀢𑁂𑀦 𑀅𑀲𑀪𑀺𑀧𑀺 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀓𑀸𑀬𑀲𑀸𑀫𑀕𑁆𑀕𑀺𑀬𑀁 𑀅𑀭𑀺𑀬𑀲𑀗𑁆𑀖𑀪𑀸𑀯𑀁 𑀤𑀲𑁆𑀲𑁂𑀢𑀺 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀪𑀸𑀯𑀢𑁄.

𑀢𑀢𑁆𑀣 𑀉𑀭𑀲𑀺 𑀪𑀯𑀸 𑀚𑀸𑀢𑀸 𑀲𑀁𑀯𑀤𑁆𑀥𑀸 𑀘 𑀑𑀭𑀲𑀸. 𑀬𑀣𑀸 𑀳𑀺 𑀲𑀢𑁆𑀢𑀸𑀦𑀁 𑀑𑀭𑀲𑀧𑀼𑀢𑁆𑀢𑀸 𑀅𑀢𑁆𑀢𑀚𑀸𑀢𑀢𑀸𑀬 𑀧𑀺𑀢𑀼 𑀲𑀦𑁆𑀢𑀓𑀲𑁆𑀲 𑀤𑀸𑀬𑀚𑁆𑀚𑀲𑁆𑀲 𑀯𑀺𑀲𑁂𑀲𑁂𑀦 𑀪𑀸𑀕𑀺𑀦𑁄 𑀳𑁄𑀦𑁆𑀢𑀺, 𑀏𑀯𑀫𑁂𑀯 𑀢𑁂𑀧𑀺 𑀅𑀭𑀺𑀬𑀧𑀼𑀕𑁆𑀕𑀮𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀥𑀫𑁆𑀫𑀲𑁆𑀲𑀯𑀦𑀦𑁆𑀢𑁂 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀢𑀸𑀬 𑀪𑀕𑀯𑀢𑁄 𑀲𑀦𑁆𑀢𑀓𑀲𑁆𑀲 𑀯𑀺𑀫𑀼𑀢𑁆𑀢𑀺𑀲𑀼𑀔𑀲𑁆𑀲 𑀅𑀭𑀺𑀬𑀥𑀫𑁆𑀫𑀭𑀢𑀦𑀲𑁆𑀲 𑀘 𑀏𑀓𑀦𑁆𑀢𑀪𑀸𑀕𑀺𑀦𑁄𑀢𑀺 𑀑𑀭𑀲𑀸 𑀯𑀺𑀬 𑀑𑀭𑀲𑀸. 𑀅𑀣 𑀯𑀸 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸𑀦𑀼𑀪𑀸𑀯𑁂𑀦 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀫𑀸𑀦𑀸 𑀑𑀓𑁆𑀓𑀦𑁆𑀢𑀸 𑀘 𑀅𑀭𑀺𑀬𑀲𑀸𑀯𑀓𑀸 𑀪𑀕𑀯𑀢𑁄 𑀉𑀭𑁂𑀦 𑀯𑀸𑀬𑀸𑀫𑀚𑀦𑀺𑀢𑀸𑀪𑀺𑀚𑀸𑀢𑀺𑀢𑀸𑀬 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 ‘‘𑀑𑀭𑀲𑀧𑀼𑀢𑁆𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀦𑁆𑀢𑀺. 𑀲𑀸𑀯𑀓𑁂𑀳𑀺 𑀧𑀯𑀢𑁆𑀢𑀺𑀬𑀫𑀸𑀦𑀸𑀧𑀺 𑀳𑀺 𑀥𑀫𑁆𑀫𑀤𑁂𑀲𑀦𑀸 ‘‘𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸’’𑀇𑀘𑁆𑀘𑁂𑀯 𑀯𑀼𑀘𑁆𑀘𑀢𑀺 𑀢𑀁𑀫𑀽𑀮𑀺𑀓𑀢𑁆𑀢𑀸 𑀮𑀓𑁆𑀔𑀡𑀸𑀤𑀺𑀯𑀺𑀲𑁂𑀲𑀸𑀪𑀸𑀯𑀢𑁄 𑀘.

𑀬𑀤𑀺𑀧𑀺 ¶ ¶ 𑀅𑀭𑀺𑀬𑀲𑀸𑀯𑀓𑀸𑀦𑀁 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀲𑀫𑀬𑁂 𑀪𑀕𑀯𑀢𑁄 𑀯𑀺𑀬 𑀢𑀤𑀦𑁆𑀢𑀭𑀸𑀬 𑀓𑀭𑀡𑀢𑁆𑀣𑀁 𑀤𑁂𑀯𑀧𑀼𑀢𑁆𑀢𑀫𑀸𑀭𑁄, 𑀫𑀸𑀭𑀯𑀸𑀳𑀺𑀦𑀻 𑀯𑀸 𑀦 𑀏𑀓𑀦𑁆𑀢𑁂𑀦 𑀅𑀧𑀲𑀸𑀤𑁂𑀢𑀺, 𑀢𑁂𑀳𑀺 𑀧𑀦 𑀅𑀧𑀲𑀸𑀤𑁂𑀢𑀩𑁆𑀩𑀢𑀸𑀬 𑀓𑀸𑀭𑀡𑁂 𑀯𑀺𑀫𑀣𑀺𑀢𑁂 𑀢𑁂𑀧𑀺 𑀯𑀺𑀫𑀣𑀺𑀢𑀸 𑀏𑀯 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀆𑀳 𑁋 ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 ‘‘𑀫𑀸𑀭𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀔𑀦𑁆𑀥𑀸𑀪𑀺𑀲𑀗𑁆𑀔𑀸𑀭𑀫𑀸𑀭𑀸𑀦𑀁 𑀯𑀺𑀬 𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑁆𑀲𑀧𑀺 𑀕𑀼𑀡𑀫𑀸𑀭𑀡𑁂 𑀲𑀳𑀸𑀬𑀪𑀸𑀯𑀽𑀧𑀕𑀫𑀦𑀢𑁄 𑀓𑀺𑀮𑁂𑀲𑀩𑀮𑀓𑀸𑀬𑁄 ‘‘𑀲𑁂𑀦𑀸’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 ‘‘𑀓𑀸𑀫𑀸 𑀢𑁂 𑀧𑀞𑀫𑀸 𑀲𑁂𑀦𑀸’’𑀢𑀺𑀆𑀤𑀺 (𑀲𑀼. 𑀦𑀺. 𑁪𑁩𑁮; 𑀫𑀳𑀸𑀦𑀺. 𑁨𑁮, 𑁬𑁮, 𑁧𑁪𑁯). 𑀲𑀸 𑀘 𑀢𑁂𑀳𑀺 𑀤𑀺𑀬𑀟𑁆𑀠𑀲𑀳𑀲𑁆𑀲𑀪𑁂𑀤𑀸 𑀅𑀦𑀦𑁆𑀢𑀪𑁂𑀤𑀸 𑀯𑀸 𑀓𑀺𑀮𑁂𑀲𑀯𑀸𑀳𑀺𑀦𑀻 𑀲𑀢𑀺𑀥𑀫𑁆𑀫𑀯𑀺𑀘𑀬𑀯𑀻𑀭𑀺𑀬𑀲𑀫𑀣𑀸𑀤𑀺𑀕𑀼𑀡𑀧𑀳𑀭𑀡𑁂𑀳𑀺 𑀑𑀥𑀺𑀲𑁄 𑀯𑀺𑀫𑀣𑀺𑀢𑀸 𑀯𑀺𑀳𑀢𑀸 𑀯𑀺𑀤𑁆𑀥𑀲𑁆𑀢𑀸 𑀘𑀸𑀢𑀺 𑀫𑀸𑀭𑀲𑁂𑀦𑀫𑀣𑀦𑀸, 𑀅𑀭𑀺𑀬𑀲𑀸𑀯𑀓𑀸. 𑀏𑀢𑁂𑀦 𑀢𑁂𑀲𑀁 𑀪𑀕𑀯𑀢𑁄 𑀅𑀦𑀼𑀚𑀸𑀢𑀧𑀼𑀢𑁆𑀢𑀢𑀁 𑀤𑀲𑁆𑀲𑁂𑀢𑀺.

𑀆𑀭𑀓𑀢𑁆𑀢𑀸 𑀓𑀺𑀮𑁂𑀲𑁂𑀳𑀺, 𑀅𑀦𑀬𑁂 𑀦 𑀇𑀭𑀺𑀬𑀦𑀢𑁄, 𑀅𑀬𑁂 𑀘 𑀇𑀭𑀺𑀬𑀦𑀢𑁄 𑀅𑀭𑀺𑀬𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀅𑀣 𑀯𑀸 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 ‘‘𑀲𑀭𑀡’’𑀦𑁆𑀢𑀺 𑀅𑀭𑀡𑀻𑀬𑀢𑁄 𑀉𑀧𑀕𑀦𑁆𑀢𑀩𑁆𑀩𑀢𑁄 𑀉𑀧𑀕𑀢𑀸𑀦𑀜𑁆𑀘 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄 𑀅𑀭𑀺𑀬𑀸, 𑀅𑀭𑀺𑀬𑀸𑀦𑀁 𑀲𑀗𑁆𑀖𑁄𑀢𑀺 𑀅𑀭𑀺𑀬𑀲𑀗𑁆𑀖𑁄, 𑀅𑀭𑀺𑀬𑁄 𑀘 𑀲𑁄 𑀲𑀗𑁆𑀖𑁄 𑀘𑀸𑀢𑀺 𑀯𑀸 𑀅𑀭𑀺𑀬𑀲𑀗𑁆𑀖𑁄, 𑀢𑀁 𑀅𑀭𑀺𑀬𑀲𑀗𑁆𑀖𑀁. 𑀪𑀕𑀯𑀢𑁄 𑀅𑀧𑀭𑀪𑀸𑀕𑁂 𑀩𑀼𑀤𑁆𑀥𑀥𑀫𑁆𑀫𑀭𑀢𑀦𑀸𑀦𑀫𑁆𑀧𑀺 𑀲𑀫𑀥𑀺𑀕𑀫𑁄 𑀲𑀗𑁆𑀖𑀭𑀢𑀦𑀸𑀥𑀻𑀦𑁄𑀢𑀺 𑀅𑀭𑀺𑀬𑀲𑀗𑁆𑀖𑀲𑁆𑀲 𑀩𑀳𑀽𑀧𑀓𑀸𑀭𑀢𑀁 𑀤𑀲𑁆𑀲𑁂𑀢𑀼𑀁 𑀇𑀥𑁂𑀯 ‘‘𑀲𑀺𑀭𑀲𑀸 𑀯𑀦𑁆𑀤𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀢𑁆𑀣 𑀘 ‘‘𑀲𑀼𑀕𑀢𑀲𑁆𑀲 𑀑𑀭𑀲𑀸𑀦𑀁 𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀏𑀢𑁂𑀦 𑀅𑀭𑀺𑀬𑀲𑀗𑁆𑀖𑀲𑁆𑀲 𑀧𑀪𑀯𑀲𑀫𑁆𑀧𑀤𑀁 𑀤𑀲𑁆𑀲𑁂𑀢𑀺, ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺 𑀏𑀢𑁂𑀦 𑀧𑀳𑀸𑀦𑀲𑀫𑁆𑀧𑀤𑀁 𑀲𑀓𑀮𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀤𑀻𑀧𑀦𑀢𑁄. ‘‘𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀽𑀳’’𑀦𑁆𑀢𑀺 𑀏𑀢𑁂𑀦 𑀜𑀸𑀡𑀲𑀫𑁆𑀧𑀤𑀁 𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑀪𑀸𑀯𑀤𑀻𑀧𑀦𑀢𑁄. ‘‘𑀅𑀭𑀺𑀬𑀲𑀗𑁆𑀖’’𑀦𑁆𑀢𑀺 𑀏𑀢𑁂𑀦 𑀧𑀪𑀸𑀯𑀲𑀫𑁆𑀧𑀤𑀁 𑀤𑀲𑁆𑀲𑁂𑀢𑀺 𑀲𑀩𑁆𑀩𑀲𑀗𑁆𑀖𑀸𑀦𑀁 𑀅𑀕𑁆𑀕𑀪𑀸𑀯𑀤𑀻𑀧𑀦𑀢𑁄. 𑀅𑀣 𑀯𑀸 ‘‘𑀲𑀼𑀕𑀢𑀲𑁆𑀲 𑀑𑀭𑀲𑀸𑀦𑀁 𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀅𑀭𑀺𑀬𑀲𑀗𑁆𑀖𑀲𑁆𑀲 𑀯𑀺𑀲𑀼𑀤𑁆𑀥𑀦𑀺𑀲𑁆𑀲𑀬𑀪𑀸𑀯𑀤𑀻𑀧𑀦𑀁, ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺 𑀲𑀫𑁆𑀫𑀸𑀉𑀚𑀼𑀜𑀸𑀬𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀪𑀸𑀯𑀤𑀻𑀧𑀦𑀁, ‘‘𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀽𑀳’’𑀦𑁆𑀢𑀺 𑀆𑀳𑀼𑀦𑁂𑀬𑁆𑀬𑀸𑀤𑀺𑀪𑀸𑀯𑀤𑀻𑀧𑀦𑀁, ‘‘𑀅𑀭𑀺𑀬𑀲𑀗𑁆𑀖’’𑀦𑁆𑀢𑀺 𑀅𑀦𑀼𑀢𑁆𑀢𑀭𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀪𑀸𑀯𑀤𑀻𑀧𑀦𑀁. 𑀢𑀣𑀸 ‘‘𑀲𑀼𑀕𑀢𑀲𑁆𑀲 𑀑𑀭𑀲𑀸𑀦𑀁 𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀏𑀢𑁂𑀦 𑀅𑀭𑀺𑀬𑀲𑀗𑁆𑀖𑀲𑁆𑀲 𑀮𑁄𑀓𑀼𑀢𑁆𑀢𑀭𑀲𑀭𑀡𑀕𑀫𑀦𑀲𑀩𑁆𑀪𑀸𑀯𑀁 𑀤𑀻𑀧𑁂𑀢𑀺. 𑀮𑁄𑀓𑀼𑀢𑁆𑀢𑀭𑀲𑀭𑀡𑀕𑀫𑀦𑁂𑀦 𑀳𑀺 𑀢𑁂 𑀪𑀕𑀯𑀢𑁄 𑀑𑀭𑀲𑀧𑀼𑀢𑁆𑀢𑀸 𑀚𑀸𑀢𑀸. ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺 𑀏𑀢𑁂𑀦 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀤𑀸𑀲𑀺𑀤𑁆𑀥𑀁 ¶ 𑀧𑀼𑀩𑁆𑀩𑀪𑀸𑀕𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀓𑀢𑀸𑀪𑀺𑀦𑀻𑀳𑀸𑀭𑀸 𑀳𑀺 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸 𑀫𑀸𑀭𑀁 𑀫𑀸𑀭𑀧𑀭𑀺𑀲𑀁 𑀯𑀸 𑀅𑀪𑀺𑀯𑀺𑀚𑀺𑀦𑀦𑁆𑀢𑀺. ‘‘𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀽𑀳’’𑀦𑁆𑀢𑀺 𑀏𑀢𑁂𑀦 𑀧𑀝𑀺𑀯𑀺𑀤𑁆𑀥𑀲𑁆𑀢𑀯𑀺𑀧𑀓𑁆𑀔𑁂 𑀲𑁂𑀓𑁆𑀔𑀸𑀲𑁂𑀓𑁆𑀔𑀥𑀫𑁆𑀫𑁂 𑀤𑀲𑁆𑀲𑁂𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀫𑀕𑁆𑀕𑀨𑀮𑀥𑀫𑁆𑀫𑀸𑀦𑀁 𑀧𑀓𑀸𑀲𑀺𑀢𑀢𑁆𑀢𑀸. ‘‘𑀅𑀭𑀺𑀬𑀲𑀗𑁆𑀖’’𑀦𑁆𑀢𑀺 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀭𑀡𑀕𑀫𑀦𑀜𑁆𑀘 𑀲𑀸𑀯𑀓𑀸𑀦𑀁 𑀲𑀩𑁆𑀩𑀕𑀼𑀡𑀸𑀦𑀁 𑀆𑀤𑀺, 𑀲𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀲𑁂𑀓𑁆𑀔𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀫𑀚𑁆𑀛𑁂, 𑀅𑀲𑁂𑀓𑁆𑀔𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 ¶ 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀗𑁆𑀔𑁂𑀧𑀢𑁄 𑀲𑀩𑁆𑀩𑁂 𑀅𑀭𑀺𑀬𑀲𑀗𑁆𑀖𑀕𑀼𑀡𑀸 𑀧𑀓𑀸𑀲𑀺𑀢𑀸 𑀳𑁄𑀦𑁆𑀢𑀺.

𑁪. 𑀏𑀯𑀁 𑀕𑀸𑀣𑀸𑀢𑁆𑀢𑀬𑁂𑀦 𑀲𑀗𑁆𑀔𑁂𑀧𑀢𑁄 𑀲𑀓𑀮𑀕𑀼𑀡𑀲𑀁𑀓𑀺𑀢𑁆𑀢𑀦𑀫𑀼𑀔𑁂𑀦 𑀭𑀢𑀦𑀢𑁆𑀢𑀬𑀲𑁆𑀲 𑀧𑀡𑀸𑀫𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀢𑀁𑀦𑀺𑀧𑀘𑁆𑀘𑀓𑀸𑀭𑀁 𑀬𑀣𑀸𑀥𑀺𑀧𑁆𑀧𑁂𑀢𑁂 𑀧𑀬𑁄𑀚𑀦𑁂 𑀧𑀭𑀺𑀡𑀸𑀫𑁂𑀦𑁆𑀢𑁄 ‘‘𑀇𑀢𑀺 𑀫𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀭𑀢𑀺𑀚𑀦𑀦𑀝𑁆𑀞𑁂𑀦 𑀭𑀢𑀦𑀁, 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀸. 𑀢𑁂𑀲𑀜𑁆𑀳𑀺 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀪𑀽𑀢𑀕𑀼𑀡𑁂 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀅𑀫𑀢𑀸𑀥𑀺𑀕𑀫𑀳𑁂𑀢𑀼𑀪𑀽𑀢𑀁 𑀅𑀦𑀧𑁆𑀧𑀓𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸𑀳 𑁋

‘‘𑀬𑀲𑁆𑀫𑀺𑀁 𑀫𑀳𑀸𑀦𑀸𑀫, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲…𑀧𑁂… 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺…𑀧𑁂… 𑀉𑀚𑀼𑀕𑀢𑀘𑀺𑀢𑁆𑀢𑁄 𑀔𑁄 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚𑀁, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁬.𑁧𑁦; 𑁧𑁧.𑁧𑁧).

𑀘𑀺𑀢𑁆𑀢𑀻𑀓𑀢𑀸𑀤𑀺𑀪𑀸𑀯𑁄 𑀯𑀸 𑀭𑀢𑀦𑀝𑁆𑀞𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀁 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩; 𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁨𑁨𑁩; 𑀔𑀼. 𑀧𑀸. 𑀅𑀝𑁆𑀞. 𑁬.𑁩; 𑀲𑀼. 𑀦𑀺. 𑀅𑀝𑁆𑀞. 𑁧.𑁨𑁨𑁬; 𑀫𑀳𑀸𑀦𑀺. 𑀅𑀝𑁆𑀞. 𑁫𑁦);

𑀘𑀺𑀢𑁆𑀢𑀺𑀓𑀢𑀪𑀸𑀯𑀸𑀤𑀬𑁄 𑀘 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀩𑀼𑀤𑁆𑀥𑀸𑀤𑀻𑀲𑀼 𑀏𑀯 𑀮𑀩𑁆𑀪𑀦𑁆𑀢𑀻𑀢𑀺.

𑀯𑀦𑁆𑀤𑀦𑀸𑀯 𑀯𑀦𑁆𑀤𑀦𑀸𑀫𑀬𑀁 𑀬𑀣𑀸 ‘‘𑀤𑀸𑀦𑀫𑀬𑀁 𑀲𑀻𑀮𑀫𑀬’’𑀦𑁆𑀢𑀺 (𑀤𑀻. 𑀦𑀺. 𑁩.𑁩𑁦𑁫; 𑀇𑀢𑀺𑀯𑀼. 𑁬𑁦). 𑀯𑀦𑁆𑀤𑀦𑀸 𑀘𑁂𑀢𑁆𑀣 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑀦𑀺𑀦𑁆𑀦𑀢𑀸, 𑀣𑁄𑀫𑀦𑀸 𑀯𑀸. 𑀧𑀼𑀚𑁆𑀚𑀪𑀯𑀨𑀮𑀦𑀺𑀩𑁆𑀩𑀢𑁆𑀢𑀦𑀢𑁄 ¶ 𑀧𑀼𑀜𑁆𑀜𑀁, 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀁 𑀧𑀼𑀦𑀸𑀢𑀻𑀢𑀺 𑀯𑀸. 𑀲𑀼𑀯𑀺𑀳𑀢𑀦𑁆𑀢𑀭𑀸𑀬𑁄𑀢𑀺 𑀲𑀼𑀝𑁆𑀞𑀼 𑀯𑀺𑀳𑀢𑀦𑁆𑀢𑀭𑀸𑀬𑁄. 𑀏𑀢𑁂𑀦 𑀅𑀢𑁆𑀢𑀦𑁄 𑀧𑀲𑀸𑀤𑀲𑀫𑁆𑀧𑀢𑁆𑀢𑀺𑀬𑀸 𑀭𑀢𑀦𑀢𑁆𑀢𑀬𑀲𑁆𑀲 𑀘 𑀔𑁂𑀢𑁆𑀢𑀪𑀸𑀯𑀲𑀫𑁆𑀧𑀢𑁆𑀢𑀺𑀬𑀸 𑀢𑀁 𑀧𑀼𑀜𑁆𑀜𑀁 𑀅𑀢𑁆𑀣𑀧𑁆𑀧𑀓𑀸𑀲𑀦𑀲𑁆𑀲 𑀉𑀧𑀖𑀸𑀢𑀓𑀉𑀧𑀤𑁆𑀤𑀯𑀸𑀦𑀁 𑀯𑀺𑀳𑀦𑀦𑁂 𑀲𑀫𑀢𑁆𑀣𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀳𑀼𑀢𑁆𑀯𑀸𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸. 𑀢𑀲𑁆𑀲 ‘‘𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀬𑀁 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸𑀫𑀬𑀁 𑀧𑀼𑀜𑁆𑀜𑀁, 𑀢𑀲𑁆𑀲. 𑀆𑀦𑀼𑀪𑀸𑀯𑁂𑀦𑀸𑀢𑀺 𑀩𑀮𑁂𑀦.

𑁫. 𑀏𑀯𑀁 ¶ 𑀭𑀢𑀦𑀢𑁆𑀢𑀬𑀲𑁆𑀲 𑀦𑀺𑀧𑀘𑁆𑀘𑀓𑀸𑀭𑁂 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀲𑀸 𑀥𑀫𑁆𑀫𑀤𑁂𑀲𑀦𑀸𑀬 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀢𑀼𑀓𑀸𑀫𑁄, 𑀢𑀲𑁆𑀲𑀸 𑀢𑀸𑀯 𑀕𑀼𑀡𑀸𑀪𑀺𑀢𑁆𑀣𑀯𑀦𑀯𑀲𑁂𑀦 𑀉𑀧𑀜𑁆𑀜𑀸𑀧𑀦𑀢𑁆𑀣𑀁 ‘‘𑀫𑀚𑁆𑀛𑀺𑀫𑀧𑀫𑀸𑀡𑀲𑀼𑀢𑁆𑀢𑀗𑁆𑀓𑀺𑀢𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀚𑁆𑀛𑀺𑀫𑀧𑀫𑀸𑀡𑀲𑀼𑀢𑁆𑀢𑀗𑁆𑀓𑀺𑀢𑀲𑁆𑀲𑀸𑀢𑀺 𑀦𑀸𑀢𑀺𑀤𑀻𑀖𑀦𑀸𑀢𑀺𑀔𑀼𑀤𑁆𑀤𑀓𑀧𑀫𑀸𑀡𑁂𑀳𑀺 𑀲𑀼𑀢𑁆𑀢𑀦𑁆𑀢𑁂𑀳𑀺 𑀮𑀓𑁆𑀔𑀺𑀢𑀲𑁆𑀲. 𑀬𑀣𑀸 𑀳𑀺 𑀤𑀻𑀖𑀸𑀕𑀫𑁂 𑀤𑀻𑀖𑀧𑀫𑀸𑀡𑀸𑀦𑀺 𑀲𑀼𑀢𑁆𑀢𑀸𑀦𑀺, 𑀬𑀣𑀸 𑀘 𑀲𑀁𑀬𑀼𑀢𑁆𑀢𑀗𑁆𑀕𑀼𑀢𑁆𑀢𑀭𑀸𑀕𑀫𑁂𑀲𑀼 𑀤𑁆𑀯𑀻𑀲𑀼 𑀔𑀼𑀤𑁆𑀤𑀓𑀧𑀫𑀸𑀡𑀸𑀦𑀺, 𑀦 𑀏𑀯𑀁 𑀇𑀥. 𑀇𑀥 𑀧𑀦 𑀧𑀫𑀸𑀡𑀢𑁄 𑀫𑀚𑁆𑀛𑀺𑀫𑀸𑀦𑀺 𑀲𑀼𑀢𑁆𑀢𑀸𑀦𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀚𑁆𑀛𑀺𑀫𑀧𑀫𑀸𑀡𑀲𑀼𑀢𑁆𑀢𑀗𑁆𑀓𑀺𑀢𑀲𑁆𑀲𑀸𑀢𑀺 𑀦𑀸𑀢𑀺𑀤𑀻𑀖𑀦𑀸𑀢𑀺𑀔𑀼𑀤𑁆𑀤𑀓𑀧𑀫𑀸𑀡𑁂𑀳𑀺 𑀲𑀼𑀢𑁆𑀢𑀦𑁆𑀢𑁂𑀳𑀺 𑀮𑀓𑁆𑀔𑀺𑀢𑀲𑁆𑀲𑀢𑀺 𑀅𑀢𑁆𑀣𑁄’’𑀢𑀺. 𑀏𑀢𑁂𑀦 ‘‘𑀫𑀚𑁆𑀛𑀺𑀫𑁄’’𑀢𑀺 𑀅𑀬𑀁 𑀇𑀫𑀲𑁆𑀲 𑀅𑀢𑁆𑀣𑀸𑀦𑀼𑀕𑀢𑀲𑀫𑀜𑁆𑀜𑀸𑀢𑀺 𑀤𑀲𑁆𑀲𑁂𑀢𑀺. 𑀦𑀦𑀼 𑀘 𑀲𑀼𑀢𑁆𑀢𑀸𑀦𑀺 𑀏𑀯 𑀆𑀕𑀫𑁄, 𑀓𑀲𑁆𑀲 𑀧𑀦 𑀲𑀼𑀢𑁆𑀢𑁂𑀳𑀺 𑀅𑀗𑁆𑀓𑀦𑀦𑁆𑀢𑀺? 𑀲𑀘𑁆𑀘𑀫𑁂𑀢𑀁 𑀧𑀭𑀫𑀢𑁆𑀣𑀢𑁄, 𑀲𑀼𑀢𑁆𑀢𑀸𑀦𑀺 𑀧𑀦 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑁄 𑀆𑀕𑀫𑁄. 𑀬𑀣𑁂𑀯 𑀳𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑀼𑀤𑀸𑀬𑁂 ‘‘𑀲𑀼𑀢𑁆𑀢’’𑀦𑁆𑀢𑀺 𑀯𑁄𑀳𑀸𑀭𑁄, 𑀏𑀯𑀁 𑀲𑀼𑀢𑁆𑀢𑀲𑀫𑀼𑀤𑀸𑀬𑁂 𑀅𑀬𑀁 ‘‘𑀆𑀕𑀫𑁄’’𑀢𑀺 𑀯𑁄𑀳𑀸𑀭𑁄. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀆𑀕𑀫𑀺𑀲𑁆𑀲𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦 𑀏𑀢𑀲𑁆𑀫𑀸 𑀯𑀸 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸𑀤𑀬𑁄𑀢𑀺 𑀆𑀕𑀫𑁄, 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸 𑀉𑀢𑁆𑀢𑀫𑀝𑁆𑀞𑁂𑀦 𑀢𑀁𑀢𑀁𑀅𑀪𑀺𑀧𑀢𑁆𑀣𑀺𑀢𑀲𑀫𑀺𑀤𑁆𑀥𑀺𑀳𑁂𑀢𑀼𑀢𑀸𑀬 𑀧𑀡𑁆𑀟𑀺𑀢𑁂𑀳𑀺 𑀯𑀭𑀺𑀢𑀩𑁆𑀩𑀢𑁄 𑀯𑀭𑁄, 𑀆𑀕𑀫𑁄 𑀘 𑀲𑁄 𑀯𑀭𑁄 𑀘𑀸𑀢𑀺 𑀆𑀕𑀫𑀯𑀭𑁄. 𑀆𑀕𑀫𑀲𑀫𑁆𑀫𑀢𑁂𑀳𑀺 𑀯𑀸 𑀯𑀭𑁄𑀢𑀺 𑀆𑀕𑀫𑀯𑀭𑁄, 𑀫𑀚𑁆𑀛𑀺𑀫𑁄 𑀘 𑀲𑁄 𑀆𑀕𑀫𑀯𑀭𑁄 𑀘𑀸𑀢𑀺 𑀫𑀚𑁆𑀛𑀺𑀫𑀸𑀕𑀫𑀯𑀭𑁄, 𑀢𑀲𑁆𑀲.

𑀩𑀼𑀤𑁆𑀥𑀸𑀦𑀁 𑀅𑀦𑀼𑀩𑀼𑀤𑁆𑀥𑀸𑀦𑀁 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀸, 𑀩𑀼𑀤𑁆𑀥𑀸𑀦𑀁 𑀲𑀘𑁆𑀘𑀧𑀝𑀺𑀯𑁂𑀥𑀁 𑀅𑀦𑀼𑀕𑀫𑁆𑀫 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑀸 𑀅𑀕𑁆𑀕𑀲𑀸𑀯𑀓𑀸𑀤𑀬𑁄 𑀅𑀭𑀺𑀬𑀸. 𑀢𑁂𑀳𑀺 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀕𑀼𑀡𑀲𑀁𑀯𑀡𑁆𑀡𑀦𑀸𑀦𑀁 𑀯𑀲𑁂𑀦 𑀲𑀁𑀯𑀡𑁆𑀡𑀺𑀢𑀲𑁆𑀲. 𑀅𑀣 𑀯𑀸 𑀩𑀼𑀤𑁆𑀥𑀸 𑀘 𑀅𑀦𑀼𑀩𑀼𑀤𑁆𑀥𑀸 𑀘 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑁂𑀯 𑀳𑀺 𑀯𑀺𑀦𑀬𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀸𑀦𑀁 𑀧𑀓𑀺𑀡𑁆𑀡𑀓𑀤𑁂𑀲𑀦𑀸𑀤𑀺𑀯𑀲𑁂𑀦 𑀬𑁄 𑀧𑀞𑀫𑀁 𑀅𑀢𑁆𑀣𑁄 𑀯𑀺𑀪𑀢𑁆𑀢𑁄, 𑀲𑁄 𑀏𑀯 𑀧𑀘𑁆𑀙𑀸 𑀢𑀲𑁆𑀲 𑀢𑀲𑁆𑀲 𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀲𑀗𑁆𑀕𑀳𑀁 𑀆𑀭𑁄𑀧𑀺𑀢𑁄𑀢𑀺. 𑀧𑀭𑀯𑀸𑀤𑀫𑀣𑀦𑀲𑁆𑀲𑀸𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀯𑀸𑀤𑀦𑀺𑀫𑁆𑀫𑀣𑀦𑀲𑁆𑀲, 𑀢𑁂𑀲𑀁 𑀤𑀺𑀝𑁆𑀞𑀺𑀕𑀢𑀪𑀜𑁆𑀚𑀦𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀳𑀺 ¶ 𑀆𑀕𑀫𑁄 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀲𑀩𑁆𑀩𑀸𑀲𑀯𑀲𑀼𑀢𑁆𑀢𑀸𑀤𑀻𑀲𑀼 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀤𑀺𑀝𑁆𑀞𑀺𑀕𑀢𑀤𑁄𑀲𑀯𑀺𑀪𑀸𑀯𑀦𑀢𑁄 𑀲𑀘𑁆𑀘𑀓𑀲𑀼𑀢𑁆𑀢𑀁 (𑀫. 𑀦𑀺. 𑁧.𑁩𑁫𑁩) 𑀉𑀧𑀸𑀮𑀺𑀲𑀼𑀢𑁆𑀢𑀸𑀤𑀻𑀲𑀼 (𑀫. 𑀦𑀺. 𑁨.𑁫𑁬) 𑀲𑀘𑁆𑀘𑀓𑀸𑀤𑀻𑀦𑀁 𑀫𑀺𑀘𑁆𑀙𑀸𑀯𑀸𑀤𑀦𑀺𑀫𑁆𑀫𑀣𑀦𑀤𑀻𑀧𑀦𑀢𑁄 𑀯𑀺𑀲𑁂𑀲𑀢𑁄 ‘‘𑀧𑀭𑀯𑀸𑀤𑀫𑀣𑀦𑁄’’𑀢𑀺 𑀣𑁄𑀫𑀺𑀢𑁄𑀢𑀺. 𑀲𑀁𑀯𑀡𑁆𑀡𑀦𑀸𑀲𑀼 𑀘𑀸𑀬𑀁 𑀆𑀘𑀭𑀺𑀬𑀲𑁆𑀲 𑀧𑀓𑀢𑀺, 𑀬𑀸 𑀢𑀁𑀢𑀁𑀲𑀁𑀯𑀡𑁆𑀡𑀦𑀸𑀲𑀼 𑀆𑀤𑀺𑀢𑁄 𑀢𑀲𑁆𑀲 𑀢𑀲𑁆𑀲 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀯𑀺𑀲𑁂𑀲𑀕𑀼𑀡𑀓𑀺𑀢𑁆𑀢𑀦𑁂𑀦 𑀣𑁄𑀫𑀦𑀸. 𑀢𑀣𑀸 𑀳𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀻𑀲𑀸𑀭𑀢𑁆𑀣𑀧𑀓𑀸𑀲𑀺𑀦𑀻𑀫𑀦𑁄𑀭𑀣𑀧𑀽𑀭𑀡𑀻𑀲𑀼 𑀅𑀝𑁆𑀞𑀲𑀸𑀮𑀺𑀦𑀻𑀆𑀤𑀻𑀲𑀼 𑀘 𑀬𑀣𑀸𑀓𑁆𑀓𑀫𑀁 ‘‘𑀲𑀤𑁆𑀥𑀸𑀯𑀳𑀕𑀼𑀡𑀲𑁆𑀲, 𑀜𑀸𑀡𑀧𑁆𑀧𑀪𑁂𑀤𑀚𑀦𑀦𑀲𑁆𑀲, 𑀥𑀫𑁆𑀫𑀓𑀣𑀺𑀓𑀧𑀼𑀗𑁆𑀕𑀯𑀸𑀦𑀁 𑀯𑀺𑀘𑀺𑀢𑁆𑀢𑀧𑀝𑀺𑀪𑀸𑀦𑀚𑀦𑀦𑀲𑁆𑀲, 𑀢𑀲𑁆𑀲 𑀕𑀫𑁆𑀪𑀻𑀭𑀜𑀸𑀡𑁂𑀳𑀺 𑀑𑀕𑀸𑀴𑁆𑀳𑀲𑁆𑀲 𑀅𑀪𑀺𑀡𑁆𑀳𑀲𑁄 𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀲𑁆𑀲 𑀅𑀪𑀺𑀥𑀫𑁆𑀫𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀣𑁄𑀫𑀦𑀸 𑀓𑀢𑀸.

𑁬. 𑀅𑀢𑁆𑀣𑁄 ¶ 𑀓𑀣𑀻𑀬𑀢𑀺 𑀏𑀢𑀸𑀬𑀸𑀢𑀺 𑀅𑀢𑁆𑀣𑀓𑀣𑀸, 𑀲𑀸 𑀏𑀯 𑀅𑀝𑁆𑀞𑀓𑀣𑀸 𑀢𑁆𑀣-𑀓𑀸𑀭𑀲𑁆𑀲 𑀝𑁆𑀞-𑀓𑀸𑀭𑀁 𑀓𑀢𑁆𑀯𑀸 𑀬𑀣𑀸 ‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄’’𑀢𑀺 (𑀧𑀝𑀺. 𑀫. 𑁧.𑁧𑁭; 𑁨.𑁮) 𑀆𑀤𑀺𑀢𑁄𑀢𑀺𑀆𑀤𑀺𑀫𑁆𑀳𑀺 𑀧𑀞𑀫𑀲𑀗𑁆𑀕𑀻𑀢𑀺𑀬𑀁. 𑀙𑀴𑀪𑀺𑀜𑁆𑀜𑀢𑀸𑀬 𑀧𑀭𑀫𑁂𑀦 𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀛𑀸𑀦𑀸𑀤𑀻𑀲𑀼 𑀧𑀜𑁆𑀘𑀯𑀺𑀥𑀯𑀲𑀺𑀢𑀸𑀲𑀩𑁆𑀪𑀸𑀯𑀢𑁄 𑀘 𑀯𑀲𑀺𑀦𑁄, 𑀣𑁂𑀭𑀸 𑀫𑀳𑀸𑀓𑀲𑁆𑀲𑀧𑀸𑀤𑀬𑁄. 𑀢𑁂𑀲𑀁 𑀲𑀢𑁂𑀳𑀺 𑀧𑀜𑁆𑀘𑀳𑀺. 𑀬𑀸𑀢𑀺 𑀬𑀸 𑀅𑀝𑁆𑀞𑀓𑀣𑀸. 𑀲𑀗𑁆𑀕𑀻𑀢𑀸𑀢𑀺 𑀅𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 ‘‘𑀅𑀬𑀁 𑀏𑀢𑀲𑁆𑀲 𑀅𑀢𑁆𑀣𑁄, 𑀅𑀬𑀁 𑀏𑀢𑀲𑁆𑀲 𑀅𑀢𑁆𑀣𑁄’’𑀢𑀺 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀸. 𑀅𑀦𑀼𑀲𑀗𑁆𑀕𑀻𑀢𑀸 𑀘 𑀬𑀲𑀢𑁆𑀣𑁂𑀭𑀸𑀤𑀻𑀳𑀺 𑀧𑀘𑁆𑀙𑀸𑀧𑀺 𑀤𑀼𑀢𑀺𑀬𑀢𑀢𑀺𑀬𑀲𑀗𑁆𑀕𑀻𑀢𑀻𑀲𑀼. 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀲𑀁𑀯𑀡𑁆𑀡𑀦𑀸𑀬 𑀆𑀕𑀫𑀦𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀺.

𑁭. 𑀲𑀻𑀳𑀲𑁆𑀲 𑀮𑀸𑀦𑀢𑁄 𑀕𑀳𑀡𑀢𑁄 𑀲𑀻𑀳𑀴𑁄, 𑀲𑀻𑀳𑀓𑀼𑀫𑀸𑀭𑁄. 𑀢𑀁𑀯𑀁𑀲𑀚𑀸𑀢𑀢𑀸𑀬 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀔𑀢𑁆𑀢𑀺𑀬𑀸𑀦𑀁, 𑀢𑁂𑀲𑀁 𑀦𑀺𑀯𑀸𑀲𑀢𑀸𑀬 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀲𑁆𑀲 𑀘 𑀲𑀻𑀳𑀴𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀪𑀢𑀸𑀢𑀺 𑀚𑀫𑁆𑀩𑀼𑀤𑀻𑀧𑀢𑁄 𑀆𑀦𑀻𑀢𑀸. 𑀅𑀣𑀸𑀢𑀺 𑀧𑀘𑁆𑀙𑀸. 𑀅𑀧𑀭𑀪𑀸𑀕𑁂 𑀳𑀺 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀻𑀳𑀺 𑀅𑀲𑀗𑁆𑀓𑀭𑀢𑁆𑀣𑀁 𑀲𑀻𑀳𑀴𑀪𑀸𑀲𑀸𑀬 𑀅𑀝𑁆𑀞𑀓𑀣𑀸 𑀞𑀧𑀺𑀢𑀸𑀢𑀺. 𑀢𑁂𑀦 𑀫𑀽𑀮𑀝𑁆𑀞𑀓𑀣𑀸 𑀲𑀩𑁆𑀩𑀲𑀸𑀥𑀸𑀭𑀡𑀸 𑀦 𑀳𑁄𑀢𑀻𑀢𑀺 𑀇𑀤𑀁 𑀅𑀢𑁆𑀣𑀧𑁆𑀧𑀓𑀸𑀲𑀦𑀁 𑀏𑀓𑀦𑁆𑀢𑁂𑀦 𑀓𑀭𑀡𑀻𑀬𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀤𑀻𑀧𑀯𑀸𑀲𑀻𑀦𑀫𑀢𑁆𑀣𑀸𑀬𑀸’’𑀢𑀺. 𑀢𑀢𑁆𑀣 𑀤𑀻𑀧𑀯𑀸𑀲𑀻𑀦𑀦𑁆𑀢𑀺 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀁, 𑀲𑀻𑀳𑀴𑀤𑀻𑀧𑀯𑀸𑀲𑀻𑀦𑀁 𑀯𑀸 𑀅𑀢𑁆𑀣𑀸𑀬 𑀲𑀻𑀳𑀴𑀪𑀸𑀲𑀸𑀬 𑀞𑀧𑀺𑀢𑀸𑀢𑀺 𑀬𑁄𑀚𑀦𑀸.

𑁮. 𑀅𑀧𑀦𑁂𑀢𑁆𑀯𑀸𑀦𑀸𑀢𑀺 ¶ 𑀓𑀜𑁆𑀘𑀼𑀓𑀲𑀤𑀺𑀲𑀁 𑀲𑀻𑀳𑀴𑀪𑀸𑀲𑀁 𑀅𑀧𑀦𑁂𑀢𑁆𑀯𑀸. 𑀢𑀢𑁄𑀢𑀺 𑀅𑀝𑁆𑀞𑀓𑀣𑀸𑀢𑁄. 𑀅𑀳𑀦𑁆𑀢𑀺 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑀺𑀲𑀢𑀺, 𑀫𑀦𑁄𑀭𑀫𑀁 𑀪𑀸𑀲𑀦𑁆𑀢𑀺 𑀫𑀸𑀕𑀥𑀪𑀸𑀲𑀁. 𑀲𑀸 𑀳𑀺 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀽𑀢𑀸 𑀧𑀡𑁆𑀟𑀺𑀢𑀸𑀦𑀁 𑀫𑀦𑀁 𑀭𑀫𑀬𑀢𑀻𑀢𑀺. 𑀢𑁂𑀦𑁂𑀯𑀸𑀳 ‘‘𑀢𑀦𑁆𑀢𑀺𑀦𑀬𑀸𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺, 𑀧𑀸𑀴𑀺𑀕𑀢𑀺𑀬𑀸 𑀅𑀦𑀼𑀮𑁄𑀫𑀺𑀓𑀁 𑀧𑀸𑀴𑀺𑀪𑀸𑀲𑀸𑀬𑀸𑀦𑀼𑀯𑀺𑀥𑀸𑀬𑀺𑀦𑀺𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀕𑀢𑀤𑁄𑀲𑀦𑁆𑀢𑀺 𑀅𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀸𑀲𑀦𑁆𑀢𑀭𑀭𑀳𑀺𑀢𑀁.

𑁯. 𑀲𑀫𑀬𑀁 𑀅𑀯𑀺𑀮𑁄𑀫𑁂𑀦𑁆𑀢𑁄𑀢𑀺 𑀲𑀺𑀤𑁆𑀥𑀦𑁆𑀢𑀁 𑀅𑀯𑀺𑀭𑁄𑀥𑁂𑀦𑁆𑀢𑁄. 𑀏𑀢𑁂𑀦 𑀅𑀢𑁆𑀣𑀤𑁄𑀲𑀸𑀪𑀸𑀯𑀫𑀸𑀳. 𑀅𑀯𑀺𑀭𑀼𑀤𑁆𑀥𑀢𑁆𑀢𑀸 𑀏𑀯 𑀳𑀺 𑀣𑁂𑀭𑀯𑀸𑀤𑀸𑀧𑀺 𑀇𑀥 𑀧𑀓𑀸𑀲𑀻𑀬𑀺𑀲𑁆𑀲𑀦𑁆𑀢𑀺. 𑀣𑁂𑀭𑀯𑀁𑀲𑀤𑀻𑀧𑀸𑀦𑀦𑁆𑀢𑀺 𑀣𑀺𑀭𑁂𑀳𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀣𑁂𑀭𑀸, 𑀫𑀳𑀸𑀓𑀲𑁆𑀲𑀧𑀸𑀤𑀬𑁄. 𑀢𑁂𑀳𑀺 𑀆𑀕𑀢𑀸 𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀣𑁂𑀭𑀯𑀁𑀲𑁄, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀸 𑀳𑀼𑀢𑁆𑀯𑀸 𑀆𑀕𑀫𑀸𑀥𑀺𑀕𑀫𑀲𑀫𑁆𑀧𑀦𑁆𑀦𑀢𑁆𑀢𑀸 𑀧𑀜𑁆𑀜𑀸𑀧𑀚𑁆𑀚𑁄𑀢𑁂𑀦 𑀢𑀲𑁆𑀲 𑀲𑀫𑀼𑀚𑁆𑀚𑀮𑀦𑀢𑁄 𑀣𑁂𑀭𑀯𑀁𑀲𑀤𑀻𑀧𑀸, 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄, 𑀢𑁂𑀲𑀁. 𑀯𑀺𑀯𑀺𑀥𑁂𑀳𑀺 𑀆𑀓𑀸𑀭𑁂𑀳𑀺 𑀦𑀺𑀘𑁆𑀙𑀻𑀬𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑁄, 𑀕𑀡𑁆𑀞𑀺𑀝𑁆𑀞𑀸𑀦𑁂𑀲𑀼 𑀔𑀻𑀮𑀫𑀤𑁆𑀤𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀯𑀺𑀫𑀢𑀺𑀘𑁆𑀙𑁂𑀤𑀦𑀻 𑀓𑀣𑀸. 𑀲𑀼𑀝𑁆𑀞𑀼 𑀦𑀺𑀧𑀼𑀡𑁄 𑀲𑀡𑁆𑀳𑁄 𑀯𑀺𑀦𑀺𑀘𑁆𑀙𑀬𑁄 𑀏𑀢𑁂𑀲𑀦𑁆𑀢𑀺 𑀲𑀼𑀦𑀺𑀧𑀼𑀡𑀯𑀺𑀦𑀺𑀘𑁆𑀙𑀬𑀸. 𑀅𑀣 𑀯𑀸 𑀯𑀺𑀦𑀺𑀘𑁆𑀙𑀺𑀦𑁄𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑁄, 𑀬𑀣𑀸𑀯𑀼𑀢𑁆𑀢𑀢𑁆𑀣𑀯𑀺𑀲𑀬𑀁 𑀜𑀸𑀡𑀁. 𑀲𑀼𑀝𑁆𑀞𑀼 𑀦𑀺𑀧𑀼𑀡𑁄 𑀙𑁂𑀓𑁄 𑀯𑀺𑀦𑀺𑀘𑁆𑀙𑀬𑁄 𑀏𑀢𑁂𑀲𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀢𑁂𑀦 𑀫𑀳𑀸𑀓𑀲𑁆𑀲𑀧𑀸𑀤𑀺𑀣𑁂𑀭𑀧𑀭𑀫𑁆𑀧𑀭𑀸𑀪𑀢𑁄, 𑀢𑀢𑁄 𑀏𑀯 𑀘 𑀅𑀯𑀺𑀧𑀭𑀻𑀢𑁄 𑀲𑀡𑁆𑀳𑁄 𑀲𑀼𑀔𑀼𑀫𑁄 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀯𑀺𑀦𑀺𑀘𑁆𑀙𑀬𑁄𑀢𑀺 𑀢𑀲𑁆𑀲 𑀧𑀫𑀸𑀡𑀪𑀽𑀢𑀢𑀁 𑀤𑀲𑁆𑀲𑁂𑀢𑀺.

𑁧𑁦. 𑀲𑀼𑀚𑀦𑀲𑁆𑀲 ¶ 𑀘𑀸𑀢𑀺 𑀘-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑁂𑀦 ‘‘𑀦 𑀓𑁂𑀯𑀮𑀁 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀫𑁂𑀯 𑀅𑀢𑁆𑀣𑀸𑀬, 𑀅𑀣 𑀔𑁄 𑀲𑀸𑀥𑀼𑀚𑀦𑀢𑁄𑀲𑀦𑀢𑁆𑀣𑀜𑁆𑀘𑀸’’𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦 𑀘 ‘‘𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀯𑀸𑀲𑀻𑀦𑀫𑁆𑀧𑀺 𑀅𑀢𑁆𑀣𑀸𑀬𑀸’’𑀢𑀺 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄 𑀳𑁄𑀢𑀺 𑀉𑀕𑁆𑀕𑀳𑀡𑀸𑀤𑀺𑀲𑀼𑀓𑀭𑀢𑀸𑀬 𑀢𑁂𑀲𑀫𑁆𑀧𑀺 𑀩𑀳𑀼𑀓𑀸𑀭𑀢𑁆𑀢𑀸. 𑀘𑀺𑀭𑀝𑁆𑀞𑀺𑀢𑀢𑁆𑀣𑀦𑁆𑀢𑀺 𑀘𑀺𑀭𑀝𑁆𑀞𑀺𑀢𑀺𑀅𑀢𑁆𑀣𑀁, 𑀘𑀺𑀭𑀓𑀸𑀮𑀝𑁆𑀞𑀺𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀳𑀺 𑀅𑀢𑁆𑀣𑀧𑁆𑀧𑀓𑀸𑀲𑀦𑀁 𑀅𑀯𑀺𑀧𑀭𑀻𑀢𑀧𑀤𑀩𑁆𑀬𑀜𑁆𑀚𑀦𑀲𑀼𑀦𑀺𑀓𑁆𑀔𑁂𑀧𑀲𑁆𑀲 𑀅𑀢𑁆𑀣𑀲𑀼𑀦𑀬𑀲𑁆𑀲 𑀘 𑀉𑀧𑀸𑀬𑀪𑀸𑀯𑀢𑁄 𑀲𑀤𑁆𑀥𑀫𑁆𑀫𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀬𑀸 𑀲𑀁𑀯𑀢𑁆𑀢𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀤𑁆𑀥𑀫𑁆𑀫𑀲𑁆𑀲 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀅𑀦𑀦𑁆𑀢𑀭𑀥𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀤𑁆𑀯𑁂? 𑀲𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀜𑁆𑀘 𑀧𑀤𑀩𑁆𑀬𑀜𑁆𑀚𑀦𑀁 𑀅𑀢𑁆𑀣𑁄 𑀘 𑀲𑀼𑀦𑀻𑀢𑁄’’𑀢𑀺 (𑀅. 𑀦𑀺. 𑁨.𑁨𑁦).

𑁧𑁧. 𑀬𑀁 ¶ 𑀅𑀢𑁆𑀣𑀯𑀡𑁆𑀡𑀦𑀁 𑀓𑀢𑁆𑀢𑀼𑀓𑀸𑀫𑁄, 𑀢𑀲𑁆𑀲𑀸 𑀫𑀳𑀢𑁆𑀢𑀁 𑀧𑀭𑀺𑀳𑀭𑀺𑀢𑀼𑀁 ‘‘𑀲𑀻𑀮𑀓𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀦 𑀢𑀁 𑀇𑀥 𑀯𑀺𑀘𑀸𑀭𑀬𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀯𑀸 𑀬𑀁 𑀅𑀝𑁆𑀞𑀓𑀣𑀁 𑀓𑀢𑁆𑀢𑀼𑀓𑀸𑀫𑁄, 𑀢𑀤𑁂𑀓𑀤𑁂𑀲𑀪𑀸𑀯𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀕𑀳𑁂𑀢𑀩𑁆𑀩𑁄𑀢𑀺 𑀓𑀣𑀺𑀓𑀸𑀦𑀁 𑀉𑀧𑀤𑁂𑀲𑀁 𑀓𑀭𑁄𑀦𑁆𑀢𑁄 𑀢𑀢𑁆𑀣 𑀯𑀺𑀘𑀸𑀭𑀺𑀢𑀥𑀫𑁆𑀫𑁂 𑀉𑀤𑁆𑀤𑁂𑀲𑀯𑀲𑁂𑀦 𑀤𑀲𑁆𑀲𑁂𑀢𑀺 ‘‘𑀲𑀻𑀮𑀓𑀣𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀲𑀻𑀮𑀓𑀣𑀸𑀢𑀺 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀸𑀤𑀺𑀯𑀲𑁂𑀦 𑀲𑀻𑀮𑀲𑁆𑀲 𑀯𑀺𑀢𑁆𑀣𑀸𑀭𑀓𑀣𑀸. 𑀥𑀼𑀢𑀥𑀫𑁆𑀫𑀸𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀸𑀤𑀬𑁄 𑀢𑁂𑀭𑀲 𑀓𑀺𑀮𑁂𑀲𑀥𑀼𑀦𑀦𑀓𑀥𑀫𑁆𑀫𑀸. 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀲𑀩𑁆𑀩𑀸𑀦𑀻𑀢𑀺 𑀧𑀸𑀴𑀺𑀬𑀁 𑀆𑀕𑀢𑀸𑀦𑀺 𑀅𑀝𑁆𑀞𑀢𑀺𑀁𑀲, 𑀅𑀝𑁆𑀞𑀓𑀣𑀸𑀬𑀁 𑀤𑁆𑀯𑁂𑀢𑀺 𑀦𑀺𑀭𑀯𑀲𑁂𑀲𑀸𑀦𑀺 𑀬𑁄𑀕𑀓𑀫𑁆𑀫𑀲𑁆𑀲 𑀪𑀸𑀯𑀦𑀸𑀬 𑀧𑀯𑀢𑁆𑀢𑀺𑀝𑁆𑀞𑀸𑀦𑀸𑀦𑀺. 𑀘𑀭𑀺𑀬𑀸𑀯𑀺𑀥𑀸𑀦𑀲𑀳𑀺𑀢𑁄𑀢𑀺 𑀭𑀸𑀕𑀘𑀭𑀺𑀢𑀸𑀤𑀻𑀦𑀁 𑀲𑀪𑀸𑀯𑀸𑀤𑀺𑀯𑀺𑀥𑀸𑀦𑁂𑀦 𑀲𑀳𑀺𑀢𑁄. 𑀛𑀸𑀦𑀸𑀦𑀺 𑀘𑀢𑁆𑀢𑀸𑀭𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺, 𑀲𑀫𑀸𑀧𑀢𑁆𑀢𑀺𑀬𑁄 𑀘𑀢𑀲𑁆𑀲𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄. 𑀅𑀝𑁆𑀞𑀧𑀺 𑀯𑀸 𑀧𑀝𑀺𑀮𑀤𑁆𑀥𑀫𑀢𑁆𑀢𑀸𑀦𑀺 𑀛𑀸𑀦𑀸𑀦𑀺, 𑀲𑀫𑀸𑀧𑀚𑁆𑀚𑀦𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀲𑀫𑀸𑀧𑀢𑁆𑀢𑀺𑀬𑁄. 𑀛𑀸𑀦𑀸𑀦𑀺 𑀯𑀸 𑀭𑀽𑀧𑀸𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺, 𑀲𑀫𑀸𑀧𑀢𑁆𑀢𑀺𑀬𑁄 𑀨𑀮𑀲𑀫𑀸𑀧𑀢𑁆𑀢𑀺𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑁄.

𑁧𑁨. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀪𑁂𑀤𑀸 𑀙 𑀅𑀪𑀺𑀜𑁆𑀜𑀸𑀬𑁄 𑀲𑀩𑁆𑀩𑀸 𑀅𑀪𑀺𑀜𑁆𑀜𑀸𑀬𑁄. 𑀜𑀸𑀡𑀯𑀺𑀪𑀗𑁆𑀕𑀸𑀤𑀻𑀲𑀼 (𑀯𑀺𑀪. 𑁭𑁫𑁧) 𑀆𑀕𑀢𑀦𑀬𑁂𑀦 𑀏𑀓𑀯𑀺𑀥𑀸𑀤𑀺𑀦𑀸 𑀧𑀜𑁆𑀜𑀸𑀬 𑀲𑀁𑀓𑀮𑁂𑀢𑁆𑀯𑀸 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀦𑀺𑀘𑁆𑀙𑀬𑁄 𑀧𑀜𑁆𑀜𑀸𑀲𑀗𑁆𑀓𑀮𑀦𑀦𑀺𑀘𑁆𑀙𑀬𑁄.

𑁧𑁩. 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀳𑁂𑀢𑀸𑀤𑀻𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀪𑀸𑀯𑁄 𑀧𑀘𑁆𑀘𑀬𑀸𑀓𑀸𑀭𑁄, 𑀢𑀲𑁆𑀲 𑀤𑁂𑀲𑀦𑀸 𑀧𑀘𑁆𑀘𑀬𑀸𑀓𑀸𑀭𑀤𑁂𑀲𑀦𑀸, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸𑀢𑀺 𑀅𑀢𑁆𑀣𑁄. 𑀲𑀸 𑀧𑀦 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀺𑀲𑀗𑁆𑀓𑀭𑀭𑀳𑀺𑀢𑀢𑀸𑀬 𑀲𑀼𑀝𑁆𑀞𑀼 𑀧𑀭𑀺𑀲𑀼𑀤𑁆𑀥𑀸, 𑀖𑀦𑀯𑀺𑀦𑀺𑀩𑁆𑀪𑁄𑀕𑀲𑁆𑀲 𑀲𑀼𑀤𑀼𑀓𑁆𑀓𑀭𑀢𑀸𑀬 𑀦𑀺𑀧𑀼𑀡𑀸 𑀲𑀡𑁆𑀳𑀲𑀼𑀔𑀼𑀫𑀸, 𑀏𑀓𑀢𑁆𑀢𑀦𑀬𑀸𑀤𑀺𑀲𑀳𑀺𑀢𑀸 𑀘 𑀢𑀢𑁆𑀣 𑀯𑀺𑀘𑀸𑀭𑀺𑀢𑀸𑀢𑀺 𑀆𑀳 ‘‘𑀲𑀼𑀧𑀭𑀺𑀲𑀼𑀤𑁆𑀥𑀦𑀺𑀧𑀼𑀡𑀦𑀬𑀸’’𑀢𑀺. 𑀧𑀝𑀺𑀲𑀫𑁆𑀪𑀺𑀤𑀸𑀤𑀻𑀲𑀼 𑀆𑀕𑀢𑀦𑀬𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀯𑀺𑀘𑀸𑀭𑀺𑀢𑀢𑁆𑀢𑀸 𑀅𑀯𑀺𑀫𑀼𑀢𑁆𑀢𑀢𑀦𑁆𑀢𑀺𑀫𑀕𑁆𑀕𑀸.

𑁧𑁪. 𑀇𑀢𑀺 ¶ 𑀧𑀦 𑀲𑀩𑁆𑀩𑀦𑁆𑀢𑀺 𑀇𑀢𑀺-𑀲𑀤𑁆𑀤𑁄 𑀧𑀭𑀺𑀲𑀫𑀸𑀧𑀦𑁂, 𑀧𑀦-𑀲𑀤𑁆𑀤𑁄 𑀯𑀘𑀦𑀸𑀮𑀗𑁆𑀓𑀸𑀭𑁂, 𑀏𑀢𑀁 𑀲𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀇𑀥𑀸𑀢𑀺 𑀇𑀫𑀺𑀲𑁆𑀲𑀸 𑀅𑀝𑁆𑀞𑀓𑀣𑀸𑀬. 𑀦 𑀢𑀁 𑀯𑀺𑀘𑀸𑀭𑀬𑀺𑀲𑁆𑀲𑀸𑀫𑀺 𑀧𑀼𑀦𑀭𑀼𑀢𑁆𑀢𑀺𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁫. 𑀇𑀤𑀸𑀦𑀺 𑀢𑀲𑁆𑀲𑁂𑀯 𑀅𑀯𑀺𑀘𑀸𑀭𑀡𑀲𑁆𑀲 𑀏𑀓𑀦𑁆𑀢𑀓𑀸𑀭𑀡𑀁 𑀦𑀺𑀤𑁆𑀥𑀸𑀭𑁂𑀦𑁆𑀢𑁄 ‘‘𑀫𑀚𑁆𑀛𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀫𑀚𑁆𑀛𑁂 𑀞𑀢𑁆𑀯𑀸’’𑀢𑀺 𑀏𑀢𑁂𑀦 𑀫𑀚𑁆𑀛𑀝𑁆𑀞𑀪𑀸𑀯𑀤𑀻𑀧𑀦𑁂𑀦 ¶ 𑀯𑀺𑀲𑁂𑀲𑀢𑁄 𑀘𑀢𑀼𑀦𑁆𑀦𑀁 𑀆𑀕𑀫𑀸𑀦𑀁 𑀲𑀸𑀥𑀸𑀭𑀡𑀝𑁆𑀞𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄, 𑀦 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀻𑀆𑀤𑀬𑁄 𑀯𑀺𑀬 𑀅𑀲𑀸𑀥𑀸𑀭𑀡𑀝𑁆𑀞𑀓𑀣𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀯𑀺𑀲𑁂𑀲𑀢𑁄’’𑀢𑀺 𑀘 𑀇𑀤𑀁 𑀯𑀺𑀦𑀬𑀸𑀪𑀺𑀥𑀫𑁆𑀫𑀸𑀦𑀫𑁆𑀧𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀬𑀣𑀸𑀭𑀳𑀁 𑀅𑀢𑁆𑀣𑀯𑀡𑁆𑀡𑀦𑀸 𑀳𑁄𑀢𑀺 𑀏𑀯𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑁧𑁬. 𑀇𑀘𑁆𑀘𑁂𑀯𑀸𑀢𑀺 𑀇𑀢𑀺 𑀏𑀯. 𑀢𑀫𑁆𑀧𑀻𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀫𑁆𑀧𑀺. 𑀏𑀢𑀸𑀬𑀸𑀢𑀺 𑀧𑀧𑀜𑁆𑀘𑀲𑀽𑀤𑀦𑀺𑀬𑀸. 𑀏𑀢𑁆𑀣 𑀘 ‘‘𑀲𑀻𑀳𑀴𑀤𑀻𑀧𑀁 𑀆𑀪𑀢𑀸’’𑀢𑀺𑀆𑀤𑀺𑀦𑀸 𑀅𑀝𑁆𑀞𑀓𑀣𑀸𑀓𑀭𑀡𑀲𑁆𑀲 𑀦𑀺𑀫𑀺𑀢𑁆𑀢𑀁 𑀤𑀲𑁆𑀲𑁂𑀢𑀺, ‘‘𑀤𑀻𑀧𑀯𑀸𑀲𑀻𑀦𑀫𑀢𑁆𑀣𑀸𑀬, 𑀲𑀼𑀚𑀦𑀲𑁆𑀲 𑀘 𑀢𑀼𑀝𑁆𑀞𑀢𑁆𑀣𑀁, 𑀘𑀺𑀭𑀝𑁆𑀞𑀺𑀢𑀢𑁆𑀣𑀜𑁆𑀘 𑀥𑀫𑁆𑀫𑀲𑁆𑀲𑀸’’𑀢𑀺 𑀏𑀢𑁂𑀦 𑀧𑀬𑁄𑀚𑀦𑀁, ‘‘𑀫𑀚𑁆𑀛𑀺𑀫𑀸𑀕𑀫𑀯𑀭𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀏𑀢𑁂𑀦 𑀧𑀺𑀡𑁆𑀟𑀢𑁆𑀣𑀁, ‘‘𑀅𑀧𑀦𑁂𑀢𑁆𑀯𑀸𑀦 𑀢𑀢𑁄𑀳𑀁 𑀲𑀻𑀳𑀴𑀪𑀸𑀲’’𑀦𑁆𑀢𑀺𑀆𑀤𑀺𑀦𑀸, ‘‘𑀲𑀻𑀮𑀓𑀣𑀸’’𑀢𑀺𑀆𑀤𑀺𑀦𑀸 𑀘 𑀓𑀭𑀡𑀧𑁆𑀧𑀓𑀸𑀭𑀁. 𑀲𑀻𑀮𑀓𑀣𑀸𑀤𑀻𑀦𑀁 𑀅𑀯𑀺𑀘𑀸𑀭𑀡𑀫𑁆𑀧𑀺 𑀳𑀺 𑀇𑀥 𑀓𑀭𑀡𑀧𑁆𑀧𑀓𑀸𑀭𑁄 𑀏𑀯𑀸𑀢𑀺.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸

𑁧. 𑀯𑀺𑀪𑀸𑀕𑀯𑀦𑁆𑀢𑀸𑀦𑀁 ¶ 𑀲𑀪𑀸𑀯𑀯𑀺𑀪𑀸𑀯𑀦𑀁 𑀯𑀺𑀪𑀸𑀕𑀤𑀲𑁆𑀲𑀦𑀫𑀼𑀔𑁂𑀦𑁂𑀯 𑀳𑁄𑀢𑀻𑀢𑀺 𑀧𑀞𑀫𑀁 𑀢𑀸𑀯 𑀧𑀡𑁆𑀡𑀸𑀲𑀯𑀕𑁆𑀕𑀲𑀼𑀢𑁆𑀢𑀸𑀤𑀺𑀯𑀲𑁂𑀦 𑀫𑀚𑁆𑀛𑀺𑀫𑀸𑀕𑀫𑀲𑁆𑀲 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀫𑀚𑁆𑀛𑀺𑀫𑀲𑀗𑁆𑀕𑀻𑀢𑀺 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀬𑀁 𑀯𑀼𑀢𑁆𑀢𑀁 ‘‘𑀫𑀚𑁆𑀛𑀺𑀫𑀸𑀕𑀫𑀯𑀭𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺, 𑀢𑀲𑁆𑀫𑀺𑀁 𑀯𑀘𑀦𑁂. 𑀬𑀸 𑀫𑀚𑁆𑀛𑀺𑀫𑀸𑀕𑀫𑀧𑀭𑀺𑀬𑀸𑀬𑁂𑀦 𑀫𑀚𑁆𑀛𑀺𑀫𑀲𑀗𑁆𑀕𑀻𑀢𑀺 𑀯𑀼𑀢𑁆𑀢𑀸, 𑀲𑀸 𑀧𑀡𑁆𑀡𑀸𑀲𑀸𑀤𑀺𑀢𑁄 𑀏𑀤𑀺𑀲𑀸𑀢𑀺 𑀤𑀲𑁆𑀲𑁂𑀢𑀺 ‘‘𑀫𑀚𑁆𑀛𑀺𑀫𑀲𑀗𑁆𑀕𑀻𑀢𑀺 𑀦𑀸𑀫𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣𑀸𑀢𑀺 𑀯𑀸 ‘‘𑀏𑀢𑀸𑀬 𑀅𑀝𑁆𑀞𑀓𑀣𑀸𑀬 𑀯𑀺𑀚𑀸𑀦𑀸𑀣 𑀫𑀚𑁆𑀛𑀺𑀫𑀲𑀗𑁆𑀕𑀻𑀢𑀺𑀬𑀸 𑀅𑀢𑁆𑀣’’𑀦𑁆𑀢𑀺 𑀏𑀢𑁆𑀣 𑀬𑀲𑁆𑀲𑀸 𑀫𑀚𑁆𑀛𑀺𑀫𑀲𑀗𑁆𑀕𑀻𑀢𑀺𑀬𑀸 𑀅𑀢𑁆𑀣𑀁 𑀯𑀺𑀚𑀸𑀦𑀸𑀣𑀸𑀢𑀺 𑀯𑀼𑀢𑁆𑀢𑀁, 𑀲𑀸 𑀫𑀚𑁆𑀛𑀺𑀫𑀲𑀗𑁆𑀕𑀻𑀢𑀺 𑀦𑀸𑀫 𑀧𑀡𑁆𑀡𑀸𑀲𑀸𑀤𑀺𑀢𑁄 𑀏𑀤𑀺𑀲𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀜𑁆𑀘 𑀤𑀲𑀓𑀸 𑀧𑀡𑁆𑀡𑀸𑀲𑀸, 𑀫𑀽𑀮𑁂 𑀆𑀤𑀺𑀫𑁆𑀳𑀺 𑀧𑀡𑁆𑀡𑀸𑀲𑀸, 𑀫𑀽𑀮𑀪𑀽𑀢𑀸 𑀯𑀸 𑀧𑀡𑁆𑀡𑀸𑀲𑀸 𑀫𑀽𑀮𑀧𑀡𑁆𑀡𑀸𑀲𑀸. 𑀫𑀚𑁆𑀛𑁂 𑀪𑀯𑀸 𑀫𑀚𑁆𑀛𑀺𑀫𑀸, 𑀫𑀚𑁆𑀛𑀺𑀫𑀸 𑀘 𑀲𑀸 𑀧𑀡𑁆𑀡𑀸𑀲𑀸 𑀘𑀸𑀢𑀺 𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑀸. 𑀉𑀧𑀭𑀺 𑀉𑀤𑁆𑀥𑀁 𑀧𑀡𑁆𑀡𑀸𑀲𑀸 𑀉𑀧𑀭𑀺𑀧𑀡𑁆𑀡𑀸𑀲𑀸. 𑀧𑀡𑁆𑀡𑀸𑀲𑀢𑁆𑀢𑀬𑀲𑀗𑁆𑀕𑀳𑀸𑀢𑀺 𑀧𑀡𑁆𑀡𑀸𑀲𑀢𑁆𑀢𑀬𑀧𑀭𑀺𑀕𑀡𑀦𑀸.

𑀅𑀬𑀁 𑀲𑀗𑁆𑀕𑀳𑁄 𑀦𑀸𑀫 𑀚𑀸𑀢𑀺𑀲𑀜𑁆𑀚𑀸𑀢𑀺𑀓𑀺𑀭𑀺𑀬𑀸𑀕𑀡𑀦𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄. 𑀢𑀢𑁆𑀣 ‘‘𑀬𑀸 𑀘𑀸𑀯𑀼𑀲𑁄 𑀯𑀺𑀲𑀸𑀔, 𑀲𑀫𑁆𑀫𑀸𑀯𑀸𑀘𑀸, 𑀬𑁄 𑀘 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀬𑁄 𑀘 𑀲𑀫𑁆𑀫𑀸𑀆𑀚𑀻𑀯𑁄 ¶ , 𑀇𑀫𑁂 𑀥𑀫𑁆𑀫𑀸 𑀲𑀻𑀮𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸’’𑀢𑀺 (𑀫. 𑀦𑀺. 𑁧.𑁪𑁬𑁨) 𑀅𑀬𑀁 𑀚𑀸𑀢𑀺𑀲𑀗𑁆𑀕𑀳𑁄. ‘‘𑀬𑁄 𑀘𑀸𑀯𑀼𑀲𑁄 𑀯𑀺𑀲𑀸𑀔, 𑀲𑀫𑁆𑀫𑀸𑀯𑀸𑀬𑀸𑀫𑁄. 𑀬𑀸 𑀘 𑀲𑀫𑁆𑀫𑀸𑀲𑀢𑀺, 𑀬𑁄 𑀘 𑀲𑀫𑁆𑀫𑀸𑀲𑀫𑀸𑀥𑀺, 𑀇𑀫𑁂 𑀥𑀫𑁆𑀫𑀸 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸’’𑀢𑀺 𑀅𑀬𑀁 𑀲𑀜𑁆𑀚𑀸𑀢𑀺𑀲𑀗𑁆𑀕𑀳𑁄. ‘‘𑀬𑀸 𑀘𑀸𑀯𑀼𑀲𑁄 𑀯𑀺𑀲𑀸𑀔, 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀬𑁄 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀇𑀫𑁂 𑀥𑀫𑁆𑀫𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀸’’𑀢𑀺 𑀅𑀬𑀁 𑀓𑀺𑀭𑀺𑀬𑀸𑀲𑀗𑁆𑀕𑀳𑁄. ‘‘𑀳𑀜𑁆𑀘𑀺 𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀓𑁆𑀔𑀦𑁆𑀥𑀕𑀡𑀦𑀁 𑀕𑀘𑁆𑀙𑀢𑀺, 𑀢𑁂𑀦 𑀯𑀢 𑀭𑁂 𑀯𑀢𑁆𑀢𑀩𑁆𑀩𑁂 𑀘𑀓𑁆𑀔𑀸𑀬𑀢𑀦𑀁 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢’’𑀦𑁆𑀢𑀺 (𑀓𑀣𑀸. 𑁪𑁭𑁧) 𑀅𑀬𑀁 𑀕𑀡𑀦𑀲𑀗𑁆𑀕𑀳𑁄. 𑀅𑀬𑀫𑁂𑀯 𑀘 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀡𑁆𑀡𑀸𑀲𑀢𑁆𑀢𑀬𑀲𑀗𑁆𑀕𑀳𑀸𑀢𑀺 𑀧𑀡𑁆𑀡𑀸𑀲𑀢𑁆𑀢𑀬𑀧𑀭𑀺𑀕𑀡𑀦𑀸’’𑀢𑀺.

𑀯𑀕𑁆𑀕𑀢𑁄𑀢𑀺 𑀲𑀫𑀽𑀳𑀢𑁄, 𑀲𑁄 𑀧𑀦𑁂𑀢𑁆𑀣 𑀤𑀲𑀓𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀲𑀸𑀲𑀦𑁂 𑀤𑀲𑀓𑁂 𑀯𑀕𑁆𑀕𑀯𑁄𑀳𑀸𑀭𑁄. 𑀢𑁂𑀦𑁂𑀯𑀸𑀳 ‘‘𑀏𑀓𑁂𑀓𑀸𑀬 𑀧𑀡𑁆𑀡𑀸𑀲𑀸𑀬 𑀧𑀜𑁆𑀘 𑀧𑀜𑁆𑀘 𑀯𑀕𑁆𑀕𑁂 𑀓𑀢𑁆𑀯𑀸’’𑀢𑀺. 𑀧𑀦𑁆𑀦𑀭𑀲𑀯𑀕𑁆𑀕𑀲𑀫𑀸𑀬𑁄𑀕𑀸𑀢𑀺 𑀧𑀦𑁆𑀦𑀭𑀲𑀯𑀕𑁆𑀕𑀲𑀁𑀬𑁄𑀕𑀸𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀧𑀦 𑀲𑀫𑀸𑀬𑁄𑀕𑀲𑀤𑁆𑀤𑀁 𑀲𑀫𑀼𑀤𑀸𑀬𑀢𑁆𑀣𑀁 𑀯𑀤𑀦𑁆𑀢𑀺. 𑀧𑀤𑀢𑁄𑀢𑀺 𑀏𑀢𑁆𑀣 𑀅𑀝𑁆𑀞𑀓𑁆𑀔𑀭𑁄 𑀕𑀸𑀣𑀸𑀧𑀸𑀤𑁄 ‘‘𑀧𑀤’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀫𑀸 ‘‘𑀅𑀓𑁆𑀔𑀭𑀢𑁄 𑀙 𑀅𑀓𑁆𑀔𑀭𑀲𑀢𑀲𑀳𑀲𑁆𑀲𑀸𑀦𑀺 𑀘𑀢𑀼𑀭𑀸𑀲𑀻𑀢𑀼𑀢𑁆𑀢𑀭𑀲𑀢𑀸𑀥𑀺𑀓𑀸𑀦𑀺 𑀘𑀢𑀼𑀘𑀢𑁆𑀢𑀸𑀮𑀻𑀲 𑀲𑀳𑀲𑁆𑀲𑀸𑀦𑀺 𑀘 𑀅𑀓𑁆𑀔𑀭𑀸𑀦𑀻’’𑀢𑀺 𑀧𑀸𑀞𑁂𑀦 ¶ 𑀪𑀯𑀺𑀢𑀩𑁆𑀩𑀦𑁆𑀢𑀺 𑀯𑀤𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀦𑀯𑀓𑁆𑀔𑀭𑁄 𑀬𑀸𑀯 𑀤𑁆𑀯𑀸𑀤𑀲𑀓𑁆𑀔𑀭𑁄 𑀘 𑀕𑀸𑀣𑀸𑀧𑀸𑀤𑁄 𑀲𑀁𑀯𑀺𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀸𑀤𑀺𑀲𑀸𑀦𑀫𑁆𑀧𑀺 𑀕𑀸𑀣𑀸𑀦𑀁 𑀯𑀲𑁂𑀦 𑀅𑀟𑁆𑀠𑀢𑁂𑀬𑁆𑀬𑀕𑀸𑀣𑀸𑀲𑀢𑀁 𑀪𑀸𑀡𑀯𑀸𑀭𑁄 𑀳𑁄𑀢𑀻𑀢𑀺 𑀓𑀢𑁆𑀯𑀸 ‘‘𑀅𑀓𑁆𑀔𑀭𑀢𑁄 𑀲𑀢𑁆𑀢 𑀅𑀓𑁆𑀔𑀭𑀲𑀢𑀲𑀳𑀲𑁆𑀲𑀸𑀦𑀺 𑀘𑀢𑁆𑀢𑀸𑀮𑀻𑀲𑀜𑁆𑀘 𑀲𑀳𑀲𑁆𑀲𑀸𑀦𑀺 𑀢𑁂𑀧𑀜𑁆𑀜𑀸𑀲𑀜𑁆𑀘 𑀅𑀓𑁆𑀔𑀭𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 𑀧𑀤𑀪𑀸𑀡𑀯𑀸𑀭𑀕𑀡𑀦𑀸𑀳𑀺 𑀅𑀓𑁆𑀔𑀭𑀕𑀡𑀦𑀸 𑀲𑀁𑀲𑀦𑁆𑀤𑀢𑀺, 𑀦𑁂𑀢𑀭𑀣𑀸. 𑀪𑀸𑀡𑀯𑀸𑀭𑁄𑀢𑀺 𑀘 𑀤𑁆𑀯𑀢𑁆𑀢𑀺𑀁𑀲𑀓𑁆𑀔𑀭𑀸𑀦𑀁 𑀕𑀸𑀣𑀸𑀦𑀁 𑀯𑀲𑁂𑀦 𑀅𑀟𑁆𑀠𑀢𑁂𑀬𑁆𑀬𑀕𑀸𑀣𑀸𑀲𑀢𑀁, 𑀅𑀬𑀜𑁆𑀘 𑀅𑀓𑁆𑀔𑀭𑀕𑀡𑀦𑀸 𑀪𑀸𑀡𑀯𑀸𑀭𑀕𑀡𑀦𑀸 𑀘 𑀧𑀤𑀕𑀡𑀦𑀸𑀦𑀼𑀲𑀸𑀭𑁂𑀦 𑀮𑀤𑁆𑀥𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀫𑁂𑀯 𑀳𑀺 𑀅𑀢𑁆𑀣𑀁 𑀜𑀸𑀧𑁂𑀢𑀼𑀁 𑀲𑀼𑀢𑁆𑀢𑀕𑀡𑀦𑀸𑀦𑀦𑁆𑀢𑀭𑀁 𑀪𑀸𑀡𑀯𑀸𑀭𑁂 𑀅𑀕𑀡𑁂𑀢𑁆𑀯𑀸 𑀧𑀤𑀸𑀦𑀺 𑀕𑀡𑀺𑀢𑀸𑀦𑀺. 𑀢𑀢𑁆𑀭𑀺𑀤𑀁 𑀯𑀼𑀘𑁆𑀘𑀢𑀺 𑁋

‘‘𑀪𑀸𑀡𑀯𑀸𑀭𑀸 𑀬𑀣𑀸𑀧𑀺 𑀳𑀺, 𑀫𑀚𑁆𑀛𑀺𑀫𑀲𑁆𑀲 𑀧𑀓𑀸𑀲𑀺𑀢𑀸;

𑀉𑀧𑀟𑁆𑀠𑀪𑀸𑀡𑀯𑀸𑀭𑁄 𑀘, 𑀢𑁂𑀯𑀻𑀲𑀢𑀺𑀧𑀤𑀸𑀥𑀺𑀓𑁄.

𑀲𑀢𑁆𑀢 𑀲𑀢𑀲𑀳𑀲𑁆𑀲𑀸𑀦𑀺, 𑀅𑀓𑁆𑀔𑀭𑀸𑀦𑀁 𑀯𑀺𑀪𑀸𑀯𑀬𑁂;

𑀘𑀢𑁆𑀢𑀸𑀮𑀻𑀲 𑀲𑀳𑀲𑁆𑀲𑀸𑀦𑀺, 𑀢𑁂𑀧𑀜𑁆𑀜𑀸𑀲𑀜𑁆𑀘 𑀅𑀓𑁆𑀔𑀭’’𑀦𑁆𑀢𑀺.

𑀅𑀦𑀼𑀲𑀦𑁆𑀥𑀺𑀢𑁄𑀢𑀺 ¶ 𑀤𑁂𑀲𑀦𑀸𑀦𑀼𑀲𑀦𑁆𑀥𑀺𑀢𑁄. 𑀏𑀓𑀲𑁆𑀫𑀺𑀁 𑀏𑀯 𑀳𑀺 𑀲𑀼𑀢𑁆𑀢𑁂 𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦𑀁 𑀤𑁂𑀲𑀦𑀸𑀪𑀸𑀕𑀸𑀦𑀁 𑀲𑀫𑁆𑀩𑀦𑁆𑀥𑁄 𑀅𑀦𑀼𑀲𑀦𑁆𑀥𑀸𑀦𑀢𑁄 𑀅𑀦𑀼𑀲𑀦𑁆𑀥𑀺. 𑀏𑀢𑁆𑀣 𑀘 𑀅𑀢𑁆𑀢𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺 𑀧𑀭𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀻𑀢𑀺 𑀤𑀼𑀯𑀺𑀥𑁄 𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺. 𑀲𑁄 𑀧𑀦 𑀓𑀢𑁆𑀣𑀘𑀺 𑀤𑁂𑀲𑀦𑀸𑀬 𑀯𑀺𑀧𑁆𑀧𑀓𑀢𑀸𑀬 𑀥𑀫𑁆𑀫𑀁 𑀲𑀼𑀡𑀦𑁆𑀢𑀸𑀦𑀁 𑀧𑀼𑀘𑁆𑀙𑀸𑀯𑀲𑁂𑀦, 𑀓𑀢𑁆𑀣𑀘𑀺 𑀤𑁂𑀲𑁂𑀦𑁆𑀢𑀲𑁆𑀲 𑀲𑀢𑁆𑀣𑀼 𑀲𑀸𑀯𑀓𑀲𑁆𑀲 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸𑀦𑀜𑁆𑀘 𑀅𑀚𑁆𑀛𑀸𑀲𑀬𑀯𑀲𑁂𑀦, 𑀓𑀢𑁆𑀣𑀘𑀺 𑀤𑁂𑀲𑁂𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀯𑀲𑁂𑀦 𑀳𑁄𑀢𑀻𑀢𑀺 𑀲𑀫𑀸𑀲𑀢𑁄 𑀢𑀺𑀧𑁆𑀧𑀓𑀸𑀭𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺𑀬𑀣𑀸𑀦𑀼𑀲𑀦𑁆𑀥𑀺𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀢𑀺𑀯𑀺𑀥𑁄 𑀅𑀦𑀼𑀲𑀦𑁆𑀥𑀻’’𑀢𑀺. 𑀲𑀗𑁆𑀔𑁂𑀧𑁂𑀦𑁂𑀯 𑀘 𑀘𑀢𑀼𑀩𑁆𑀩𑀺𑀥𑁄 𑀅𑀦𑀼𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 ‘‘𑀏𑀯𑀁 𑀯𑀼𑀢𑁆𑀢𑁂 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂, 𑀑𑀭𑀺𑀫𑀁 𑀢𑀻𑀭𑀁, 𑀓𑀺𑀁 𑀧𑀸𑀭𑀺𑀫𑀁 𑀢𑀻𑀭𑀁, 𑀓𑁄 𑀫𑀚𑁆𑀛𑁂 𑀲𑀁𑀲𑀻𑀤𑁄, 𑀓𑁄 𑀣𑀮𑁂 𑀉𑀲𑁆𑀲𑀸𑀤𑁄, 𑀓𑁄 𑀫𑀦𑀼𑀲𑁆𑀲𑀕𑁆𑀕𑀸𑀳𑁄, 𑀓𑁄 𑀅𑀫𑀦𑀼𑀲𑁆𑀲𑀕𑁆𑀕𑀸𑀳𑁄, 𑀓𑁄 𑀆𑀯𑀢𑁆𑀢𑀕𑁆𑀕𑀸𑀳𑁄, 𑀓𑁄 𑀅𑀦𑁆𑀢𑁄𑀧𑀽𑀢𑀺𑀪𑀸𑀯𑁄’𑀢𑀺’’ (𑀲𑀁. 𑀦𑀺. 𑁪.𑁨𑁪𑁧)? 𑀏𑀯𑀁 𑀧𑀼𑀘𑁆𑀙𑀦𑁆𑀢𑀸𑀦𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁂𑀦 𑀪𑀕𑀯𑀢𑀸 𑀧𑀯𑀢𑁆𑀢𑀺𑀢𑀤𑁂𑀲𑀦𑀸𑀯𑀲𑁂𑀦 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀻 𑀯𑁂𑀤𑀺𑀢𑀩𑁆𑀩𑁄. ‘‘𑀅𑀣 𑀔𑁄 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 ‘𑀇𑀢𑀺 𑀓𑀺𑀭 𑀪𑁄 𑀭𑀽𑀧𑀁 𑀅𑀦𑀢𑁆𑀢𑀸… 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸, 𑀅𑀦𑀢𑁆𑀢𑀓𑀢𑀸𑀦𑀺 𑀓𑀫𑁆𑀫𑀸𑀦𑀺 𑀓𑀫𑀢𑁆𑀢𑀸𑀦𑀁 𑀨𑀼𑀲𑀺𑀲𑁆𑀲𑀦𑁆𑀢𑀻’𑀢𑀺. 𑀅𑀣 𑀔𑁄 𑀪𑀕𑀯𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑁂𑀢𑀲𑀸 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀯𑀺𑀚𑁆𑀚𑀢𑀺, 𑀬𑀁 𑀇𑀥𑁂𑀓𑀘𑁆𑀘𑁄 𑀫𑁄𑀖𑀧𑀼𑀭𑀺𑀲𑁄 𑀅𑀯𑀺𑀤𑁆𑀯𑀸 𑀅𑀯𑀺𑀚𑁆𑀚𑀸𑀕𑀢𑁄 𑀢𑀡𑁆𑀳𑀸𑀥𑀺𑀧𑀢𑁂𑀬𑁆𑀬𑁂𑀦 𑀘𑁂𑀢𑀲𑀸 𑀲𑀢𑁆𑀣𑀼𑀲𑀸𑀲𑀦𑀁 𑀅𑀢𑀺𑀥𑀸𑀯𑀺𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬 ‘𑀇𑀢𑀺 𑀓𑀺𑀭 𑀪𑁄 𑀭𑀽𑀧𑀁 𑀅𑀦𑀢𑁆𑀢𑀸…𑀧𑁂… 𑀨𑀼𑀲𑀺𑀲𑁆𑀲𑀦𑁆𑀢𑀻’𑀢𑀺. 𑀢𑀁 𑀓𑀺𑀁 𑀫𑀜𑁆𑀜𑀣 ¶ , 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺 (𑀫. 𑀦𑀺. 𑁩.𑁯𑁦) 𑀏𑀯𑀁 𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 𑀪𑀕𑀯𑀢𑀸 𑀧𑀯𑀢𑁆𑀢𑀺𑀢𑀤𑁂𑀲𑀦𑀸𑀯𑀲𑁂𑀦 𑀧𑀭𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑁄.

‘‘𑀢𑀲𑁆𑀲 𑀫𑀬𑁆𑀳𑀁 𑀩𑁆𑀭𑀸𑀳𑁆𑀫𑀡 𑀏𑀢𑀤𑀳𑁄𑀲𑀺 ‘𑀬𑀁𑀦𑀽𑀦𑀸𑀳𑀁 𑀬𑀸 𑀢𑀸 𑀭𑀢𑁆𑀢𑀺𑀬𑁄 𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀮𑀓𑁆𑀔𑀺𑀢𑀸 𑀘𑀸𑀢𑀼𑀤𑁆𑀤𑀲𑀻 𑀧𑀜𑁆𑀘𑀤𑀲𑀻 𑀅𑀝𑁆𑀞𑀫𑀻 𑀘 𑀧𑀓𑁆𑀔𑀲𑁆𑀲, 𑀢𑀣𑀸𑀭𑀽𑀧𑀸𑀲𑀼 𑀭𑀢𑁆𑀢𑀻𑀲𑀼 𑀬𑀸𑀦𑀺 𑀢𑀸𑀦𑀺 𑀆𑀭𑀸𑀫𑀘𑁂𑀢𑀺𑀬𑀸𑀦𑀺 𑀯𑀦𑀘𑁂𑀢𑀺𑀬𑀸𑀦𑀺 𑀭𑀼𑀓𑁆𑀔𑀘𑁂𑀢𑀺𑀬𑀸𑀦𑀺 𑀪𑀺𑀁𑀲𑀦𑀓𑀸𑀦𑀺 𑀲𑀮𑁄𑀫𑀳𑀁𑀲𑀸𑀦𑀺, 𑀢𑀣𑀸𑀭𑀽𑀧𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀯𑀺𑀳𑀭𑁂𑀬𑁆𑀬𑀁 𑀅𑀧𑁆𑀧𑁂𑀯 𑀦𑀸𑀫𑀸𑀳𑀁 𑀪𑀬𑀪𑁂𑀭𑀯𑀁 𑀧𑀲𑁆𑀲𑁂𑀬𑁆𑀬’𑀦𑁆𑀢𑀺’’ (𑀫. 𑀦𑀺. 𑁧.𑁪𑁯) 𑀏𑀯𑀁 𑀪𑀕𑀯𑀢𑀸, ‘‘𑀢𑀢𑁆𑀭𑀸𑀯𑀼𑀲𑁄 𑀮𑁄𑀪𑁄 𑀘 𑀧𑀸𑀧𑀓𑁄 𑀤𑁄𑀲𑁄 𑀘 𑀧𑀸𑀧𑀓𑁄 𑀮𑁄𑀪𑀲𑁆𑀲 𑀘 𑀧𑀳𑀸𑀦𑀸𑀬 𑀤𑁄𑀲𑀲𑁆𑀲 𑀘 𑀧𑀳𑀸𑀦𑀸𑀬 𑀅𑀢𑁆𑀣𑀺 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸, 𑀘𑀓𑁆𑀔𑀼𑀓𑀭𑀡𑀻 ¶ 𑀜𑀸𑀡𑀓𑀭𑀡𑀻 𑀉𑀧𑀲𑀫𑀸𑀬 𑀅𑀪𑀺𑀜𑁆𑀜𑀸𑀬 𑀲𑀫𑁆𑀩𑁄𑀥𑀸𑀬 𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺 (𑀫. 𑀦𑀺. 𑁧.𑁩𑁩) 𑀏𑀯𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀘 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂𑀦𑁂𑀯 𑀧𑀯𑀢𑁆𑀢𑀺𑀢𑀤𑁂𑀲𑀦𑀸𑀯𑀲𑁂𑀦 𑀅𑀢𑁆𑀢𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑁄. 𑀬𑁂𑀦 𑀧𑀦 𑀥𑀫𑁆𑀫𑁂𑀦 𑀆𑀤𑀺𑀫𑁆𑀳𑀺 𑀤𑁂𑀲𑀦𑀸 𑀉𑀝𑁆𑀞𑀺𑀢𑀸, 𑀢𑀲𑁆𑀲 𑀅𑀦𑀼𑀭𑀽𑀧𑀥𑀫𑁆𑀫𑀯𑀲𑁂𑀦 𑀯𑀸 𑀧𑀝𑀺𑀧𑀓𑁆𑀔𑀥𑀫𑁆𑀫𑀯𑀲𑁂𑀦 𑀯𑀸 𑀬𑁂𑀲𑀼 𑀲𑀼𑀢𑁆𑀢𑁂𑀲𑀼 𑀉𑀧𑀭𑀺 𑀤𑁂𑀲𑀦𑀸 𑀆𑀕𑀘𑁆𑀙𑀢𑀺, 𑀢𑁂𑀲𑀁 𑀯𑀲𑁂𑀦 𑀬𑀣𑀸𑀦𑀼𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀬𑁆𑀬𑀣𑀺𑀤𑀁 𑀆𑀓𑀗𑁆𑀔𑁂𑀬𑁆𑀬𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁬𑁫) 𑀳𑁂𑀝𑁆𑀞𑀸 𑀲𑀻𑀮𑁂𑀦 𑀤𑁂𑀲𑀦𑀸 𑀉𑀝𑁆𑀞𑀺𑀢𑀸, 𑀉𑀧𑀭𑀺 𑀅𑀪𑀺𑀜𑁆𑀜𑀸 𑀆𑀕𑀢𑀸. 𑀯𑀢𑁆𑀣𑀼𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁭𑁦) 𑀳𑁂𑀝𑁆𑀞𑀸 𑀓𑀺𑀮𑁂𑀲𑁂𑀦 𑀤𑁂𑀲𑀦𑀸 𑀉𑀝𑁆𑀞𑀺𑀢𑀸, 𑀉𑀧𑀭𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀆𑀕𑀢𑀸. 𑀓𑁄𑀲𑀫𑁆𑀩𑀓𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁪𑁯𑁧) 𑀳𑁂𑀝𑁆𑀞𑀸 𑀪𑀡𑁆𑀟𑀦𑁂𑀦 𑀤𑁂𑀲𑀦𑀸 𑀉𑀝𑁆𑀞𑀺𑀢𑀸, 𑀉𑀧𑀭𑀺 𑀲𑀸𑀭𑀡𑀻𑀬𑀥𑀫𑁆𑀫𑀸 𑀆𑀕𑀢𑀸. 𑀓𑀓𑀘𑀽𑀧𑀫𑁂 (𑀫. 𑀦𑀺. 𑁧.𑁨𑁨𑁨) 𑀳𑁂𑀝𑁆𑀞𑀸 𑀅𑀓𑁆𑀔𑀦𑁆𑀢𑀺𑀬𑀸 𑀯𑀲𑁂𑀦 𑀤𑁂𑀲𑀦𑀸 𑀉𑀝𑁆𑀞𑀺𑀢𑀸, 𑀉𑀧𑀭𑀺 𑀓𑀓𑀘𑀽𑀧𑀫𑀸 𑀆𑀕𑀢𑀸𑀢𑀺.

𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑁆𑀣𑀸𑀢𑀺 𑀏𑀯𑀁 𑀲𑀗𑁆𑀔𑁂𑀧𑀢𑁄 𑀢𑀺𑀯𑀺𑀥𑁄 𑀘𑀢𑀼𑀩𑁆𑀩𑀺𑀥𑁄 𑀘 𑀅𑀦𑀼𑀲𑀦𑁆𑀥𑀺 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀼𑀢𑁆𑀢𑁂 𑀬𑀣𑀸𑀭𑀳𑀁 𑀯𑀺𑀢𑁆𑀣𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀯𑀺𑀜𑁆𑀜𑀸𑀬𑀫𑀸𑀦𑀸 𑀦𑀯𑀲𑀢𑀸𑀥𑀺𑀓𑀸𑀦𑀺 𑀢𑀻𑀡𑀺 𑀅𑀦𑀼𑀲𑀦𑁆𑀥𑀺𑀲𑀳𑀲𑁆𑀲𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸 𑀘𑁂𑀢𑀁 𑀧𑀡𑁆𑀡𑀸𑀲𑀸𑀤𑀺𑀯𑀺𑀪𑀸𑀕𑀯𑀘𑀦𑀁 𑀫𑀚𑁆𑀛𑀺𑀫𑀲𑀗𑁆𑀕𑀻𑀢𑀺𑀬𑀸 𑀲𑀭𑀽𑀧𑀤𑀲𑁆𑀲𑀦𑀢𑁆𑀣𑀁 𑀳𑁄𑀢𑀺, 𑀏𑀯𑀁 𑀧𑀓𑁆𑀔𑁂𑀧𑀤𑁄𑀲𑀧𑀭𑀺𑀳𑀭𑀡𑀢𑁆𑀣𑀜𑁆𑀘 𑀳𑁄𑀢𑀺. 𑀏𑀯𑀜𑁆𑀳𑀺 𑀧𑀡𑁆𑀡𑀸𑀲𑀸𑀤𑀻𑀲𑀼 𑀯𑀯𑀢𑁆𑀣𑀺𑀢𑁂𑀲𑀼 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀁 𑀓𑀺𑀜𑁆𑀘𑀺 𑀲𑀼𑀢𑁆𑀢𑀁 𑀬𑀸𑀯 𑀏𑀓𑀁 𑀧𑀤𑀫𑁆𑀧𑀺 𑀆𑀦𑁂𑀢𑁆𑀯𑀸 𑀇𑀫𑀁 𑀫𑀚𑁆𑀛𑀺𑀫𑀲𑀗𑁆𑀕𑀻𑀢𑀺𑀬𑀸𑀢𑀺 𑀓𑀲𑁆𑀲𑀘𑀺 𑀯𑀢𑁆𑀢𑀼𑀁 𑀑𑀓𑀸𑀲𑁄 𑀦 𑀲𑀺𑀬𑀸𑀢𑀺.

𑀏𑀯𑀁 𑀧𑀡𑁆𑀡𑀸𑀲𑀯𑀕𑁆𑀕𑀲𑀼𑀢𑁆𑀢𑀪𑀸𑀡𑀯𑀸𑀭𑀸𑀦𑀼𑀲𑀦𑁆𑀥𑀺𑀩𑁆𑀬𑀜𑁆𑀚𑀦𑀢𑁄 𑀫𑀚𑁆𑀛𑀺𑀫𑀲𑀗𑁆𑀕𑀻𑀢𑀺𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀇𑀤𑀸𑀦𑀺 𑀦𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀁𑀯𑀡𑁆𑀡𑁂𑀢𑀼𑀓𑀸𑀫𑁄 𑀅𑀢𑁆𑀢𑀦𑁄 𑀲𑀁𑀯𑀡𑁆𑀡𑀦𑀸𑀬 𑀢𑀲𑁆𑀲𑀸 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀬𑀁 𑀦𑀺𑀓𑁆𑀔𑀺𑀢𑁆𑀢𑀸𑀦𑀼𑀓𑁆𑀓𑀫𑁂𑀦𑁂𑀯 𑀧𑀯𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀧𑀡𑁆𑀡𑀸𑀲𑀸𑀲𑀼 𑀫𑀽𑀮𑀧𑀡𑁆𑀡𑀸𑀲𑀸 𑀆𑀤𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸𑀧𑀘𑁆𑀘𑀬𑀁 𑀢𑀢𑁆𑀣 𑀢𑀢𑁆𑀣 𑀤𑁂𑀲𑀺𑀢𑀢𑁆𑀢𑀸 𑀧𑀜𑁆𑀜𑀢𑁆𑀢𑀢𑁆𑀢𑀸 𑀘 𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀁 𑀥𑀫𑁆𑀫𑀯𑀺𑀦𑀬𑀸𑀦𑀁 𑀲𑀗𑁆𑀕𑀳𑁂𑀢𑁆𑀯𑀸 𑀕𑀸𑀬𑀦𑀁 ¶ 𑀓𑀣𑀦𑀁 𑀲𑀗𑁆𑀕𑀻𑀢𑀺, 𑀫𑀳𑀸𑀯𑀺𑀲𑀬𑀢𑁆𑀢𑀸 𑀧𑀽𑀚𑀦𑀻𑀬𑀢𑁆𑀢𑀸 𑀘 𑀫𑀳𑀢𑀻 𑀲𑀗𑁆𑀕𑀻𑀢𑀻𑀢𑀺 𑀫𑀳𑀸𑀲𑀗𑁆𑀕𑀻𑀢𑀺, 𑀧𑀞𑀫𑀸 𑀫𑀳𑀸𑀲𑀗𑁆𑀕𑀻𑀢𑀺 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺, 𑀢𑀲𑁆𑀲𑀸 𑀧𑀯𑀢𑁆𑀢𑀺𑀢𑀓𑀸𑀮𑁄 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁄, 𑀢𑀲𑁆𑀫𑀺𑀁 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂. 𑀦𑀺𑀤𑀤𑀸𑀢𑀺 𑀤𑁂𑀲𑀦𑀁 𑀤𑁂𑀲𑀓𑀸𑀮𑀸𑀤𑀺𑀯𑀲𑁂𑀦 𑀅𑀯𑀺𑀤𑀺𑀢𑀁 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀦𑀺𑀤𑀲𑁆𑀲𑁂𑀢𑀻𑀢𑀺 𑀦𑀺𑀤𑀸𑀦𑀁, 𑀬𑁄 𑀮𑁄𑀓𑀺𑀬𑁂𑀳𑀺 ‘‘𑀉𑀧𑁄𑀕𑁆𑀖𑀸𑀢𑁄’’𑀢𑀺 ¶ 𑀯𑀼𑀘𑁆𑀘𑀢𑀺, 𑀲𑁆𑀯𑀸𑀬𑀫𑁂𑀢𑁆𑀣 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀺𑀓𑁄 𑀕𑀦𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀧𑀦 ‘‘𑀲𑀦𑀺𑀤𑀸𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀫𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁧𑁨𑁬) 𑀯𑀺𑀬 𑀅𑀚𑁆𑀛𑀸𑀲𑀬𑀸𑀤𑀺𑀤𑁂𑀲𑀦𑀼𑀧𑁆𑀧𑀢𑁆𑀢𑀺𑀳𑁂𑀢𑀼. 𑀢𑁂𑀦𑁂𑀯𑀸𑀳 ‘‘𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂 𑀯𑀼𑀢𑁆𑀢𑀁 𑀦𑀺𑀤𑀸𑀦𑀫𑀸𑀤𑀻’’𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 𑀬𑀲𑁆𑀲𑀁 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀬𑀁 𑀦𑀺𑀓𑁆𑀔𑀺𑀢𑁆𑀢𑀸𑀦𑀼𑀓𑁆𑀓𑀫𑁂𑀦 𑀲𑀁𑀯𑀡𑁆𑀡𑀦𑀁 𑀓𑀢𑁆𑀢𑀼𑀓𑀸𑀫𑁄, 𑀲𑀸 𑀯𑀺𑀢𑁆𑀣𑀸𑀭𑀢𑁄 𑀯𑀢𑁆𑀢𑀩𑁆𑀩𑀸. 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀁 (𑀤𑀻. 𑀦𑀺. 𑀝𑀻. 𑁧.𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸) 𑀧𑀦 𑀅𑀢𑁆𑀢𑀦𑀸 𑀯𑀺𑀢𑁆𑀣𑀸𑀭𑀺𑀢𑀢𑁆𑀢𑀸 𑀢𑀢𑁆𑀣𑁂𑀯 𑀕𑀳𑁂𑀢𑀩𑁆𑀩𑀸𑀢𑀺 𑀇𑀫𑀺𑀲𑁆𑀲𑀸 𑀲𑀁𑀯𑀡𑁆𑀡𑀦𑀸𑀬 𑀫𑀳𑀦𑁆𑀢𑀢𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀲𑀸 𑀧𑀦𑁂𑀲𑀸’’𑀢𑀺𑀆𑀤𑀺𑀫𑀸𑀳.

𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀫𑀽𑀮𑀧𑀭𑀺𑀬𑀸𑀬𑀯𑀕𑁆𑀕𑁄

𑁧. 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑀅𑀩𑁆𑀪𑀦𑁆𑀢𑀭𑀦𑀺𑀤𑀸𑀦𑀯𑀡𑁆𑀡𑀦𑀸

𑁧. 𑀏𑀯𑀁 ¶ ¶ 𑀩𑀸𑀳𑀺𑀭𑀦𑀺𑀤𑀸𑀦𑁂 𑀯𑀢𑁆𑀢𑀩𑁆𑀩𑀁 𑀅𑀢𑀺𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀅𑀪𑀦𑁆𑀢𑀭𑀦𑀺𑀤𑀸𑀦𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀁𑀯𑀡𑁆𑀡𑁂𑀢𑀼𑀁 ‘‘𑀬𑀁 𑀧𑀦𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀲𑁆𑀫𑀸 𑀲𑀁𑀯𑀡𑁆𑀡𑀦𑀁 𑀓𑀭𑁄𑀦𑁆𑀢𑁂𑀦 𑀲𑀁𑀯𑀡𑁆𑀡𑁂𑀢𑀩𑁆𑀩𑁂 𑀥𑀫𑁆𑀫𑁂 𑀧𑀤𑀯𑀺𑀪𑀸𑀕𑀁 𑀧𑀤𑀢𑁆𑀣𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀧𑀺𑀡𑁆𑀟𑀢𑁆𑀢𑀸𑀤𑀺𑀤𑀲𑁆𑀲𑀦𑀯𑀲𑁂𑀦 𑀲𑀁𑀯𑀡𑁆𑀡𑀦𑀸 𑀓𑀸𑀢𑀩𑁆𑀩𑀸, 𑀢𑀲𑁆𑀫𑀸 𑀧𑀤𑀸𑀦𑀺 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀦𑁆𑀢𑀺 𑀦𑀺𑀧𑀸𑀢𑀧𑀤’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀤𑀯𑀺𑀪𑀸𑀕𑁄𑀢𑀺 𑀧𑀤𑀸𑀦𑀁 𑀯𑀺𑀲𑁂𑀲𑁄, 𑀦 𑀧𑀤𑀯𑀺𑀕𑁆𑀕𑀳𑁄. 𑀅𑀣 𑀯𑀸 𑀧𑀤𑀸𑀦𑀺 𑀘 𑀧𑀤𑀯𑀺𑀪𑀸𑀕𑁄 𑀘 𑀧𑀤𑀯𑀺𑀪𑀸𑀕𑁄, 𑀧𑀤𑀯𑀺𑀕𑁆𑀕𑀳𑁄 𑀘 𑀧𑀤𑀯𑀺𑀪𑀸𑀕𑁄 𑀘 𑀧𑀤𑀯𑀺𑀪𑀸𑀕𑁄𑀢𑀺 𑀯𑀸 𑀏𑀓𑀲𑁂𑀲𑀯𑀲𑁂𑀦 𑀧𑀤𑀧𑀤𑀯𑀺𑀕𑁆𑀕𑀳𑀸 𑀧𑀤𑀯𑀺𑀪𑀸𑀕𑀲𑀤𑁆𑀤𑁂𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀧𑀤𑀯𑀺𑀕𑁆𑀕𑀳𑁄 ‘‘𑀲𑀼𑀪𑀕𑀜𑁆𑀘 𑀢𑀁 𑀯𑀦𑀜𑁆𑀘𑀸𑀢𑀺 𑀲𑀼𑀪𑀕𑀯𑀦𑀁, 𑀲𑀸𑀮𑀸𑀦𑀁 𑀭𑀸𑀚𑀸, 𑀲𑀸𑀮𑁄 𑀘 𑀲𑁄 𑀭𑀸𑀚𑀸 𑀘 𑀇𑀢𑀺𑀧𑀺 𑀲𑀸𑀮𑀭𑀸𑀚𑀸’’𑀢𑀺𑀆𑀤𑀺𑀯𑀲𑁂𑀦 𑀲𑀫𑀸𑀲𑀧𑀤𑁂𑀲𑀼 𑀤𑀝𑁆𑀞𑀩𑁆𑀩𑁄.

𑀅𑀢𑁆𑀣𑀢𑁄𑀢𑀺 𑀧𑀤𑀢𑁆𑀣𑀢𑁄. 𑀢𑀁 𑀧𑀦 𑀧𑀤𑀢𑁆𑀣𑀁 𑀅𑀢𑁆𑀣𑀼𑀤𑁆𑀥𑀸𑀭𑀓𑁆𑀓𑀫𑁂𑀦 𑀧𑀞𑀫𑀁 𑀏𑀯𑀁𑀲𑀤𑁆𑀤𑀲𑁆𑀲 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁-𑀲𑀤𑁆𑀤𑁄 𑀢𑀸𑀯𑀸’’𑀢𑀺𑀆𑀤𑀺𑀫𑀸𑀳. 𑀅𑀯𑀥𑀸𑀭𑀡𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀇𑀤𑀫𑀢𑁆𑀣𑀧𑀼𑀘𑁆𑀙𑀸𑀧𑀭𑀺𑀫𑀸𑀡𑀸𑀤𑀺𑀅𑀢𑁆𑀣𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 ‘‘𑀏𑀯𑀁𑀕𑀢𑀸𑀦𑀺 𑀧𑀼𑀣𑀼𑀲𑀺𑀧𑁆𑀧𑀸𑀬𑀢𑀦𑀸𑀦𑀺 (𑀤𑀻. 𑀦𑀺. 𑁧.𑁧𑁬𑁩), 𑀏𑀯𑀯𑀺𑀥𑁄 𑀏𑀯𑀫𑀸𑀓𑀸𑀭𑁄’’𑀢𑀺 𑀘 𑀆𑀤𑀻𑀲𑀼 𑀇𑀤𑀁-𑀲𑀤𑁆𑀤𑀲𑁆𑀲 𑀅𑀢𑁆𑀣𑁂 𑀏𑀯𑀁-𑀲𑀤𑁆𑀤𑁄. 𑀕𑀢-𑀲𑀤𑁆𑀤𑁄 𑀳𑀺 𑀧𑀓𑀸𑀭𑀧𑀭𑀺𑀬𑀸𑀬𑁄, 𑀢𑀣𑀸 𑀯𑀺𑀥𑀸𑀓𑀸𑀭-𑀲𑀤𑁆𑀤𑀸 𑀘. 𑀢𑀣𑀸 𑀳𑀺 𑀯𑀺𑀥𑀬𑀼𑀢𑁆𑀢𑀕𑀢-𑀲𑀤𑁆𑀤𑁂 𑀮𑁄𑀓𑀺𑀬𑀸 𑀧𑀓𑀸𑀭𑀢𑁆𑀣𑁂 𑀯𑀤𑀦𑁆𑀢𑀺. ‘‘𑀏𑀯𑀁 𑀲𑀼 𑀢𑁂 𑀲𑀼𑀦𑁆𑀳𑀸𑀢𑀸 𑀲𑀼𑀯𑀺𑀮𑀺𑀢𑁆𑀢𑀸 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽 𑀆𑀫𑀼𑀓𑁆𑀓𑀫𑀡𑀺𑀓𑀼𑀡𑁆𑀟𑀮𑀸𑀪𑀭𑀡𑀸 𑀑𑀤𑀸𑀢𑀯𑀢𑁆𑀣𑀯𑀲𑀦𑀸 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀧𑀭𑀺𑀘𑀸𑀭𑁂𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀢𑁆𑀯𑀁 𑀏𑀢𑀭𑀳𑀺 𑀲𑀸𑀘𑀭𑀺𑀬𑀓𑁄𑀢𑀺. 𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁮𑁬) 𑀧𑀼𑀘𑁆𑀙𑀸𑀬𑀁. ‘‘𑀏𑀯𑀁𑀮𑀳𑀼𑀧𑀭𑀺𑀯𑀢𑁆𑀢𑀁 (𑀅. 𑀦𑀺. 𑁧.𑁪𑁮) 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄’’𑀢𑀺 (𑀧𑀸𑀭𑀸. 𑁧𑁨) 𑀘 𑀆𑀤𑀻𑀲𑀼 𑀧𑀭𑀺𑀫𑀸𑀡𑁂.

𑀦𑀦𑀼 ¶ 𑀘 ‘‘𑀏𑀯𑀁 𑀲𑀼 𑀢𑁂 𑀲𑀼𑀦𑁆𑀳𑀸𑀢𑀸 𑀲𑀼𑀯𑀺𑀮𑀺𑀢𑁆𑀢𑀸, 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄’’𑀢𑀺 𑀏𑀢𑁆𑀣 𑀏𑀯𑀁-𑀲𑀤𑁆𑀤𑁂𑀦 𑀧𑀼𑀘𑁆𑀙𑀦𑀸𑀓𑀸𑀭𑀧𑀭𑀺𑀫𑀸𑀡𑀸𑀓𑀸𑀭𑀸𑀦𑀁 𑀯𑀼𑀢𑁆𑀢𑀢𑁆𑀢𑀸 𑀆𑀓𑀸𑀭𑀢𑁆𑀣𑁄 𑀏𑀯 ¶ 𑀏𑀯𑀁-𑀲𑀤𑁆𑀤𑁄𑀢𑀺? 𑀦, 𑀯𑀺𑀲𑁂𑀲𑀲𑀩𑁆𑀪𑀸𑀯𑀢𑁄. 𑀆𑀓𑀸𑀭𑀫𑀢𑁆𑀢𑀯𑀸𑀘𑀓𑁄 𑀳𑀺 𑀏𑀯𑀁-𑀲𑀤𑁆𑀤𑁄 𑀆𑀓𑀸𑀭𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑁂𑀢𑁄 𑀬𑀣𑀸 ‘‘𑀏𑀯𑀁 𑀩𑁆𑀬𑀸 𑀔𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁩𑁪, 𑁩𑁯𑁬), 𑀦 𑀧𑀦 𑀆𑀓𑀸𑀭𑀯𑀺𑀲𑁂𑀲𑀯𑀸𑀘𑀓𑁄. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀏𑀯𑀁 𑀚𑀸𑀢𑁂𑀦 𑀫𑀘𑁆𑀘𑁂𑀦𑀸’’𑀢𑀺𑀆𑀤𑀻𑀦𑀺 𑀉𑀧𑀫𑀸𑀤𑀺𑀉𑀤𑀸𑀳𑀭𑀡𑀸𑀦𑀺 𑀉𑀧𑀧𑀦𑁆𑀦𑀸𑀦𑀺 𑀳𑁄𑀦𑁆𑀢𑀺. 𑀢𑀣𑀸 𑀳𑀺 ‘‘𑀬𑀣𑀸𑀧𑀺…𑀧𑁂… 𑀩𑀳𑀼’’𑀦𑁆𑀢𑀺 (𑀥. 𑀧. 𑁫𑁩) 𑀏𑀢𑁆𑀣 𑀧𑀼𑀧𑁆𑀨𑀭𑀸𑀲𑀺𑀝𑁆𑀞𑀸𑀦𑀺𑀬𑀢𑁄 𑀫𑀦𑀼𑀲𑁆𑀲𑀽𑀧𑀧𑀢𑁆𑀢𑀺-𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬-𑀲𑀤𑁆𑀥𑀫𑁆𑀫𑀲𑁆𑀲𑀯𑀦-𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭- 𑀪𑁄𑀕𑀲𑀫𑁆𑀧𑀢𑁆𑀢𑀺-𑀆𑀤𑀺𑀤𑀸𑀦𑀸𑀤𑀺-𑀧𑀼𑀜𑁆𑀜𑀓𑀺𑀭𑀺𑀬𑀳𑁂𑀢𑀼𑀲𑀫𑀼𑀤𑀸𑀬𑀢𑁄 𑀲𑁄𑀪𑀸-𑀲𑀼𑀕𑀦𑁆𑀥𑀢𑀸𑀤𑀺𑀕𑀼𑀡𑀬𑁄𑀕𑀢𑁄 𑀫𑀸𑀮𑀸𑀕𑀼𑀡𑀲𑀤𑀺𑀲𑀺𑀬𑁄 𑀧𑀳𑀽𑀢𑀸 𑀧𑀼𑀜𑁆𑀜𑀓𑀺𑀭𑀺𑀬𑀸 𑀫𑀭𑀺𑀢𑀩𑁆𑀩𑀲𑀪𑀸𑀯𑀢𑀸𑀬 𑀫𑀘𑁆𑀘𑁂𑀦 𑀲𑀢𑁆𑀢𑁂𑀦 𑀓𑀢𑁆𑀢𑀩𑁆𑀩𑀸𑀢𑀺 𑀚𑁄𑀢𑀺𑀢𑀢𑁆𑀢𑀸 𑀧𑀼𑀧𑁆𑀨𑀭𑀸𑀲𑀺𑀫𑀸𑀮𑀸𑀕𑀼𑀡𑀸𑀯 𑀉𑀧𑀫𑀸, 𑀢𑁂𑀲𑀁 𑀉𑀧𑀫𑀸𑀓𑀸𑀭𑁄 𑀬𑀣𑀸-𑀲𑀤𑁆𑀤𑁂𑀦 𑀅𑀦𑀺𑀬𑀫𑀢𑁄 𑀯𑀼𑀢𑁆𑀢𑁄𑀢𑀺 ‘‘𑀏𑀯𑀁-𑀲𑀤𑁆𑀤𑁄 𑀉𑀧𑀫𑀸𑀓𑀸𑀭𑀦𑀺𑀕𑀫𑀦𑀢𑁆𑀣𑁄’’𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁. 𑀲𑁄 𑀧𑀦 𑀉𑀧𑀫𑀸𑀓𑀸𑀭𑁄 𑀦𑀺𑀬𑀫𑀺𑀬𑀫𑀸𑀦𑁄 𑀅𑀢𑁆𑀣𑀢𑁄 𑀉𑀧𑀫𑀸𑀯 𑀳𑁄𑀢𑀻𑀢𑀺 𑀆𑀳 ‘‘𑀉𑀧𑀫𑀸𑀬𑀁 𑀆𑀕𑀢𑁄’’𑀢𑀺. 𑀢𑀣𑀸 ‘‘𑀏𑀯𑀁 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀅𑀪𑀺𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀉𑀧𑀤𑀺𑀲𑀺𑀬𑀫𑀸𑀦𑀸𑀬 𑀲𑀫𑀡𑀲𑀸𑀭𑀼𑀧𑁆𑀧𑀸𑀬 𑀆𑀓𑀧𑁆𑀧𑀲𑀫𑁆𑀧𑀢𑁆𑀢𑀺𑀬𑀸 𑀬𑁄 𑀢𑀢𑁆𑀣 𑀉𑀧𑀤𑀺𑀲𑀦𑀸𑀓𑀸𑀭𑁄, 𑀲𑁄 𑀅𑀢𑁆𑀣𑀢𑁄 𑀉𑀧𑀤𑁂𑀲𑁄 𑀏𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀏𑀯𑀁 𑀢𑁂…𑀧𑁂… 𑀉𑀧𑀤𑁂𑀲𑁂’’𑀢𑀺. 𑀢𑀣𑀸 ‘‘𑀏𑀯𑀫𑁂𑀢𑀁 𑀪𑀕𑀯𑀸, 𑀏𑀯𑀫𑁂𑀢𑀁 𑀲𑀼𑀕𑀢𑀸’’𑀢𑀺 𑀏𑀢𑁆𑀣 𑀘 𑀪𑀕𑀯𑀢𑀸 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀅𑀯𑀺𑀧𑀭𑀻𑀢𑀢𑁄 𑀚𑀸𑀦𑀦𑁆𑀢𑁂𑀳𑀺 𑀓𑀢𑀁 𑀢𑀢𑁆𑀣 𑀲𑀁𑀯𑀺𑀚𑁆𑀚𑀫𑀸𑀦𑀕𑀼𑀡𑀸𑀦𑀁 𑀧𑀓𑀸𑀭𑁂𑀳𑀺 𑀳𑀁𑀲𑀦𑀁 𑀉𑀤𑀕𑁆𑀕𑀢𑀸𑀓𑀭𑀡𑀁 𑀲𑀫𑁆𑀧𑀳𑀁𑀲𑀦𑀁. 𑀬𑁄 𑀢𑀢𑁆𑀣 𑀲𑀫𑁆𑀧𑀳𑀁𑀲𑀦𑀸𑀓𑀸𑀭𑁄𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀏𑀯𑀫𑁂𑀯𑀁 𑀧𑀦𑀸𑀬𑀦𑁆𑀢𑀺 𑀏𑀢𑁆𑀣 𑀕𑀭𑀳𑀡𑀸𑀓𑀸𑀭𑁄𑀢𑀺 𑀬𑁄𑀚𑁂𑀢𑀩𑁆𑀩𑀁, 𑀲𑁄 𑀘 𑀕𑀭𑀳𑀡𑀸𑀓𑀸𑀭𑁄 ‘‘𑀯𑀲𑀮𑀻’’𑀢𑀺𑀆𑀤𑀺𑀔𑀼𑀁𑀲𑀦𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀢𑁄 𑀇𑀥 𑀏𑀯𑀁-𑀲𑀤𑁆𑀤𑁂𑀦 𑀧𑀓𑀸𑀲𑀺𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀉𑀧𑀫𑀸𑀓𑀸𑀭𑀸𑀤𑀬𑁄𑀧𑀺 𑀉𑀧𑀫𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀸𑀦𑀁 𑀧𑀼𑀧𑁆𑀨𑀭𑀸𑀲𑀺𑀆𑀤𑀺𑀲𑀤𑁆𑀤𑀸𑀦𑀁 𑀲𑀦𑁆𑀦𑀺𑀥𑀸𑀦𑀢𑁄 𑀤𑀝𑁆𑀞𑀩𑁆𑀩𑀁. 𑀏𑀯𑀁, 𑀪𑀦𑁆𑀢𑁂𑀢𑀺 𑀧𑀦 𑀥𑀫𑁆𑀫𑀲𑁆𑀲 𑀲𑀸𑀥𑀼𑀓𑀁 𑀲𑀯𑀦𑀫𑀦𑀲𑀺𑀓𑀸𑀭𑁂 𑀲𑀦𑁆𑀦𑀺𑀬𑁄𑀚𑀺𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀅𑀢𑁆𑀢𑀦𑁄 𑀢𑀢𑁆𑀣 𑀞𑀺𑀢𑀪𑀸𑀯𑀲𑁆𑀲 𑀧𑀝𑀺𑀚𑀸𑀦𑀦𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀏𑀢𑁆𑀣 𑀏𑀯𑀁-𑀲𑀤𑁆𑀤𑁄 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑁄 𑀯𑀼𑀢𑁆𑀢𑁄. 𑀢𑁂𑀦 𑀏𑀯𑀁, 𑀪𑀦𑁆𑀢𑁂 𑀲𑀸𑀥𑀼, 𑀪𑀦𑁆𑀢𑁂, 𑀲𑀼𑀝𑁆𑀞𑀼, 𑀪𑀦𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀜𑁆𑀘 𑀯𑀤𑁂𑀳𑀻𑀢𑀺 ‘‘𑀬𑀣𑀸𑀳𑀁 𑀯𑀤𑀸𑀫𑀺, 𑀏𑀯𑀁 𑀲𑀫𑀡𑀁 𑀆𑀦𑀦𑁆𑀤𑀁 𑀯𑀤𑁂𑀳𑀻’’𑀢𑀺 𑀬𑁄 𑀏𑀯𑀁 𑀯𑀤𑀦𑀸𑀓𑀸𑀭𑁄 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑁄. 𑀲𑁄 𑀏𑀯𑀁𑀲𑀤𑁆𑀤𑁂𑀦 𑀦𑀺𑀤𑀲𑁆𑀲𑀻𑀬𑀢𑀻𑀢𑀺 ‘‘𑀦𑀺𑀤𑀲𑁆𑀲𑀦𑁂’’𑀢𑀺 𑀯𑀼𑀢𑁆𑀢𑁄𑀢𑀺. 𑀏𑀯𑀁 𑀦𑁄𑀢𑀺 𑀏𑀢𑁆𑀣𑀸𑀧𑀺 𑀢𑁂𑀲𑀁 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀳𑀺𑀢𑀤𑀼𑀓𑁆𑀔𑀸𑀯𑀳𑀪𑀸𑀯𑁂 𑀲𑀦𑁆𑀦𑀺𑀝𑁆𑀞𑀸𑀦𑀚𑀦𑀦𑀢𑁆𑀣𑀁 𑀅𑀦𑀼𑀫𑀢𑀺𑀕𑀳𑀡𑀯𑀲𑁂𑀦 ¶ ‘‘𑀲𑀁𑀯𑀢𑁆𑀢𑀦𑁆𑀢𑀺 𑀯𑀸 𑀦𑁄 𑀯𑀸, 𑀓𑀣𑀁 𑀯𑁄 𑀏𑀢𑁆𑀣 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀸𑀬 𑀓𑀢𑀸𑀬 ‘‘𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀤𑀸𑀓𑀸𑀭𑀲𑀦𑁆𑀦𑀺𑀝𑁆𑀞𑀸𑀦𑀁 𑀏𑀯𑀁-𑀲𑀤𑁆𑀤𑁂𑀦 𑀯𑀺𑀪𑀸𑀯𑀺𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀲𑁄 𑀧𑀦 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑀸𑀓𑀸𑀭𑁄 𑀦𑀺𑀬𑀫𑀺𑀬𑀫𑀸𑀦𑁄 𑀅𑀯𑀥𑀸𑀭𑀡𑀢𑁆𑀣𑁄 𑀳𑁄𑀢𑀻𑀢𑀺 𑀆𑀳 ‘‘𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀻𑀢𑀺𑀆𑀤𑀻𑀲𑀼 𑀅𑀯𑀥𑀸𑀭𑀡𑁂’’𑀢𑀺.

𑀦𑀸𑀦𑀸𑀦𑀬𑀦𑀺𑀧𑀼𑀡𑀦𑁆𑀢𑀺 ¶ 𑀏𑀓𑀢𑁆𑀢𑀦𑀸𑀦𑀢𑁆𑀢𑀅𑀩𑁆𑀬𑀸𑀧𑀸𑀭𑀏𑀯𑀁𑀥𑀫𑁆𑀫𑀢𑀸𑀲𑀗𑁆𑀔𑀸𑀢𑀸, 𑀦𑀦𑁆𑀤𑀺𑀬𑀸𑀯𑀢𑁆𑀢𑀢𑀺𑀧𑀼𑀓𑁆𑀔𑀮𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀅𑀗𑁆𑀓𑀼𑀲𑀤𑀺𑀲𑀸𑀮𑁄𑀘𑀦𑀲𑀗𑁆𑀔𑀸𑀢𑀸 𑀯𑀸 𑀆𑀥𑀸𑀭𑀸𑀤𑀺𑀪𑁂𑀤𑀯𑀲𑁂𑀦 𑀦𑀸𑀦𑀸𑀯𑀺𑀥𑀸 𑀦𑀬𑀸 𑀦𑀸𑀦𑀸𑀦𑀬𑀸, 𑀦𑀬𑀸 𑀯𑀸 𑀧𑀸𑀴𑀺𑀕𑀢𑀺𑀬𑁄, 𑀢𑀸 𑀘 𑀧𑀜𑁆𑀜𑀢𑁆𑀢𑀺𑀅𑀦𑀼𑀧𑀜𑁆𑀜𑀢𑁆𑀢𑀺𑀆𑀤𑀺𑀯𑀲𑁂𑀦 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀮𑁄𑀓𑀺𑀬𑀸𑀤𑀺𑀢𑀤𑀼𑀪𑀬𑀯𑁄𑀫𑀺𑀲𑁆𑀲𑀓𑀸𑀤𑀺𑀯𑀲𑁂𑀦 𑀓𑀼𑀲𑀮𑀸𑀤𑀺𑀯𑀲𑁂𑀦 𑀔𑀦𑁆𑀥𑀸𑀤𑀺𑀯𑀲𑁂𑀦 𑀲𑀗𑁆𑀕𑀳𑀸𑀤𑀺𑀯𑀲𑁂𑀦 𑀲𑀫𑀬𑀯𑀺𑀫𑀼𑀢𑁆𑀢𑀸𑀤𑀺𑀯𑀲𑁂𑀦 𑀞𑀧𑀦𑀸𑀤𑀺𑀯𑀲𑁂𑀦 𑀓𑀼𑀲𑀮𑀫𑀽𑀮𑀸𑀤𑀺𑀯𑀲𑁂𑀦 𑀢𑀺𑀓𑀧𑁆𑀧𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀘 𑀦𑀸𑀦𑀧𑁆𑀧𑀓𑀸𑀭𑀸𑀢𑀺 𑀦𑀸𑀦𑀸𑀦𑀬𑀸. 𑀢𑁂𑀳𑀺 𑀦𑀺𑀧𑀼𑀡𑀁 𑀲𑀡𑁆𑀳𑀁 𑀲𑀼𑀔𑀼𑀫𑀦𑁆𑀢𑀺 𑀦𑀸𑀦𑀸𑀦𑀬𑀦𑀺𑀧𑀼𑀡𑀁. 𑀆𑀲𑀬𑁄𑀯 𑀅𑀚𑁆𑀛𑀸𑀲𑀬𑁄, 𑀢𑁂 𑀘 𑀲𑀲𑁆𑀲𑀢𑀸𑀤𑀺𑀪𑁂𑀤𑁂𑀦, 𑀢𑀢𑁆𑀣 𑀘 𑀅𑀧𑁆𑀧𑀭𑀚𑀓𑁆𑀔𑀢𑀸𑀤𑀺𑀪𑁂𑀤𑁂𑀦 𑀅𑀦𑁂𑀓𑁂, 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀬𑁄 𑀏𑀯 𑀯𑀸 𑀲𑀫𑀼𑀝𑁆𑀞𑀸𑀦𑀁 𑀉𑀧𑁆𑀧𑀢𑁆𑀢𑀺𑀳𑁂𑀢𑀼 𑀏𑀢𑀲𑁆𑀲𑀸𑀢𑀺 𑀅𑀦𑁂𑀓𑀚𑁆𑀛𑀸𑀲𑀬𑀲𑀫𑀼𑀝𑁆𑀞𑀸𑀦𑀁. 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀦𑁆𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀭𑀺𑀧𑀼𑀡𑁆𑀡𑀁 𑀉𑀧𑀦𑁂𑀢𑀩𑁆𑀩𑀸𑀪𑀸𑀯𑀢𑁄, 𑀲𑀗𑁆𑀓𑀸𑀲𑀦𑀧𑀓𑀸𑀲𑀦-𑀯𑀺𑀯𑀭𑀡-𑀯𑀺𑀪𑀚𑀦-𑀉𑀢𑁆𑀢𑀸𑀦𑀻𑀓𑀭𑀡-𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀙𑀳𑀺 𑀅𑀢𑁆𑀣𑀧𑀤𑁂𑀳𑀺, 𑀅𑀓𑁆𑀔𑀭-𑀧𑀤𑀩𑁆𑀬𑀜𑁆𑀚𑀦𑀸𑀓𑀸𑀭𑀦𑀺𑀭𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀙𑀳𑀺 𑀩𑁆𑀬𑀜𑁆𑀚𑀦𑀧𑀤𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀯𑀺𑀯𑀺𑀥𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀏𑀢𑁆𑀣 𑀧𑀸𑀝𑀺𑀳𑀸𑀭𑀺𑀬𑀧𑀤𑀲𑁆𑀲 𑀯𑀘𑀦𑀢𑁆𑀣𑀁 (𑀉𑀤𑀸. 𑀅𑀝𑁆𑀞. 𑁧; 𑀇𑀢𑀺𑀯𑀼. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸; 𑀲𑀁. 𑀦𑀺. 𑀝𑀻. 𑁧.𑁧.𑁧 𑀤𑁂𑀯𑀢𑀸𑀲𑀁𑀬𑀼𑀢𑁆𑀢) ‘‘𑀧𑀝𑀺𑀧𑀓𑁆𑀔𑀳𑀭𑀡𑀢𑁄, 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀧𑀦𑀬𑀦𑀢𑁄 𑀘 𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀤𑀦𑁆𑀢𑀺, 𑀪𑀕𑀯𑀢𑁄 𑀧𑀦 𑀧𑀝𑀺𑀧𑀓𑁆𑀔𑀸 𑀭𑀸𑀕𑀸𑀤𑀬𑁄 𑀦 𑀲𑀦𑁆𑀢𑀺, 𑀬𑁂 𑀳𑀭𑀺𑀢𑀩𑁆𑀩𑀸. 𑀧𑀼𑀣𑀼𑀚𑁆𑀚𑀦𑀸𑀦𑀫𑁆𑀧𑀺 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀅𑀝𑁆𑀞𑀕𑀼𑀡𑀲𑀫𑀦𑁆𑀦𑀸𑀕𑀢𑁂 𑀘𑀺𑀢𑁆𑀢𑁂 𑀳𑀢𑀧𑀝𑀺𑀧𑀓𑁆𑀔𑁂 𑀇𑀤𑁆𑀥𑀺𑀯𑀺𑀥𑀁 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀧𑀯𑀢𑁆𑀢𑀯𑁄𑀳𑀸𑀭𑁂𑀦 𑀘 𑀦 𑀲𑀓𑁆𑀓𑀸 𑀇𑀥 ‘‘𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀢𑁆𑀢𑀼𑀁. 𑀲𑀘𑁂 𑀧𑀦 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀪𑀕𑀯𑀢𑁄 𑀯𑁂𑀦𑁂𑀬𑁆𑀬𑀕𑀢𑀸 𑀘 𑀓𑀺𑀮𑁂𑀲𑀸 𑀧𑀝𑀺𑀧𑀓𑁆𑀔𑀸, 𑀢𑁂𑀲𑀁 𑀳𑀭𑀡𑀢𑁄 ‘‘𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 𑀬𑀼𑀢𑁆𑀢𑀫𑁂𑀢𑀁. 𑀅𑀣 𑀯𑀸 𑀪𑀕𑀯𑀢𑁄 𑀘 𑀲𑀸𑀲𑀦𑀲𑁆𑀲 𑀘 𑀧𑀝𑀺𑀧𑀓𑁆𑀔𑀸 𑀢𑀺𑀢𑁆𑀣𑀺𑀬𑀸, 𑀢𑁂𑀲𑀁 𑀳𑀭𑀡𑀢𑁄 𑀧𑀸𑀝𑀺𑀳𑀸𑀭𑀺𑀬𑀁. 𑀢𑁂 𑀳𑀺 𑀤𑀺𑀝𑁆𑀞𑀺𑀳𑀭𑀡𑀯𑀲𑁂𑀦 𑀤𑀺𑀝𑁆𑀞𑀺𑀧𑀓𑀸𑀲𑀦𑁂 𑀅𑀲𑀫𑀢𑁆𑀣𑀪𑀸𑀯𑁂𑀦 𑀘 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀻𑀳𑀺 𑀳𑀭𑀺𑀢𑀸 𑀅𑀧𑀦𑀻𑀢𑀸 𑀳𑁄𑀦𑁆𑀢𑀻𑀢𑀺 ¶ . ‘‘𑀧𑀝𑀻’’𑀢𑀺 𑀯𑀸 𑀅𑀬𑀁 𑀲𑀤𑁆𑀤𑁄 ‘‘𑀧𑀘𑁆𑀙𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀩𑁄𑀥𑁂𑀢𑀺 ‘‘𑀢𑀲𑁆𑀫𑀺𑀁 𑀧𑀝𑀺𑀧𑀯𑀺𑀝𑁆𑀞𑀫𑁆𑀳𑀺, 𑀅𑀜𑁆𑀜𑁄 𑀆𑀕𑀜𑁆𑀙𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁯𑁮𑁫; 𑀘𑀽𑀴𑀦𑀺. 𑁪) 𑀯𑀺𑀬, 𑀢𑀲𑁆𑀫𑀸 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀘 𑀓𑀢𑀓𑀺𑀘𑁆𑀘𑁂𑀦 𑀧𑀘𑁆𑀙𑀸 𑀳𑀭𑀺𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀧𑀸𑀝𑀺𑀳𑀸𑀭𑀺𑀬𑀁, 𑀅𑀢𑁆𑀢𑀦𑁄 𑀯𑀸 𑀉𑀧𑀓𑁆𑀓𑀺𑀮𑁂𑀲𑁂𑀲𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑀕𑁆𑀕𑁂𑀳𑀺 𑀳𑀭𑀺𑀢𑁂𑀲𑀼 𑀧𑀘𑁆𑀙𑀸 𑀳𑀭𑀡𑀁 𑀧𑀸𑀝𑀺𑀳𑀸𑀭𑀺𑀬𑀁, 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀺𑀬𑁄 𑀘 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂𑀦 𑀓𑀢𑀓𑀺𑀘𑁆𑀘𑁂𑀦 𑀘 𑀲𑀢𑁆𑀢𑀳𑀺𑀢𑀢𑁆𑀣𑀁 𑀧𑀼𑀦 𑀧𑀯𑀢𑁆𑀢𑁂𑀢𑀩𑁆𑀩𑀸, 𑀳𑀭𑀺𑀢𑁂𑀲𑀼 𑀘 𑀅𑀢𑁆𑀢𑀦𑁄 𑀉𑀧𑀓𑁆𑀓𑀺𑀮𑁂𑀲𑁂𑀲𑀼 𑀧𑀭𑀲𑀢𑁆𑀢𑀸𑀦𑀁 𑀉𑀧𑀓𑀺𑀮𑁂𑀲𑀳𑀭𑀡𑀸𑀦𑀺 𑀳𑁄𑀦𑁆𑀢𑀻𑀢𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀪𑀯𑀦𑁆𑀢𑀺. 𑀧𑀸𑀝𑀺𑀳𑀸𑀭𑀺𑀬𑀫𑁂𑀯 𑀧𑀸𑀝𑀺𑀳𑀸𑀭𑀺𑀬𑀁, 𑀧𑀸𑀝𑀺𑀳𑀸𑀭𑀺𑀬𑁂 𑀯𑀸 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀺𑀲𑀫𑀼𑀤𑀸𑀬𑁂 𑀪𑀯𑀁 𑀏𑀓𑀫𑁂𑀓𑀁 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀸𑀝𑀺𑀳𑀸𑀭𑀺𑀬𑀁 𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀫𑀕𑁆𑀕𑁄 𑀘 𑀧𑀝𑀺𑀧𑀓𑁆𑀔𑀳𑀭𑀡𑀢𑁄, 𑀢𑀢𑁆𑀣 𑀚𑀸𑀢𑀁, 𑀢𑀲𑁆𑀫𑀺𑀁 𑀯𑀸 𑀦𑀺𑀫𑀺𑀢𑁆𑀢𑀪𑀽𑀢𑁂, 𑀢𑀢𑁄 𑀯𑀸 𑀆𑀕𑀢𑀦𑁆𑀢𑀺 ¶ 𑀧𑀸𑀝𑀺𑀳𑀸𑀭𑀺𑀬𑀁. 𑀢𑀲𑁆𑀲 𑀧𑀦 𑀇𑀤𑁆𑀥𑀺𑀆𑀤𑀺𑀪𑁂𑀤𑁂𑀦 𑀯𑀺𑀲𑀬𑀪𑁂𑀤𑁂𑀦 𑀘 𑀩𑀳𑀼𑀯𑀺𑀥𑀲𑁆𑀲 𑀪𑀕𑀯𑀢𑁄 𑀤𑁂𑀲𑀦𑀸𑀬𑀁 𑀮𑀩𑁆𑀪𑀫𑀸𑀦𑀢𑁆𑀢𑀸 𑀆𑀳 ‘‘𑀯𑀺𑀯𑀺𑀥𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺.

𑀦 𑀅𑀜𑁆𑀜𑀣𑀸𑀢𑀺 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀸𑀓𑀸𑀭𑀢𑁄 𑀦 𑀅𑀜𑁆𑀜𑀣𑀸𑀢𑀺 𑀅𑀢𑁆𑀣𑁄, 𑀦 𑀧𑀦 𑀪𑀕𑀯𑀢𑁄 𑀤𑁂𑀲𑀺𑀢𑀸𑀓𑀸𑀭𑀢𑁄. 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑀸 𑀳𑀺 𑀪𑀕𑀯𑀢𑁄 𑀤𑁂𑀲𑀦𑀸. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀓𑁄 𑀲𑀫𑀢𑁆𑀣𑁄 𑀯𑀺𑀜𑁆𑀜𑀸𑀢𑀼’’𑀦𑁆𑀢𑀺 𑀇𑀤𑀁 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀪𑀯𑀢𑀺, 𑀥𑀸𑀭𑀡𑀩𑀮𑀤𑀲𑁆𑀲𑀦𑀜𑁆𑀘 𑀦 𑀯𑀺𑀭𑀼𑀚𑁆𑀛𑀢𑀺 𑀲𑀼𑀢𑀸𑀓𑀸𑀭𑀸𑀯𑀺𑀭𑀚𑁆𑀛𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀦 𑀳𑁂𑀢𑁆𑀣 𑀅𑀢𑁆𑀣𑀦𑁆𑀢𑀭𑀢𑀸𑀧𑀭𑀺𑀳𑀸𑀭𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀢𑁆𑀣𑀸𑀦𑀁 𑀏𑀓𑀯𑀺𑀲𑀬𑀢𑁆𑀢𑀸. 𑀇𑀢𑀭𑀣𑀸 𑀣𑁂𑀭𑁄 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀲𑀩𑁆𑀩𑀣𑀸 𑀧𑀝𑀺𑀕𑁆𑀕𑀳𑀡𑁂 𑀲𑀫𑀢𑁆𑀣𑁄 𑀅𑀲𑀫𑀢𑁆𑀣𑁄 𑀘𑀸𑀢𑀺 𑀆𑀧𑀚𑁆𑀚𑁂𑀬𑁆𑀬𑀸𑀢𑀺.

‘‘𑀬𑁄 𑀧𑀭𑁄 𑀦 𑀳𑁄𑀢𑀺, 𑀲𑁄 𑀅𑀢𑁆𑀢𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀬 𑀦𑀺𑀬𑀓𑀚𑁆𑀛𑀢𑁆𑀢𑀲𑀗𑁆𑀔𑀸𑀢𑀸𑀬 𑀲𑀲𑀦𑁆𑀢𑀢𑀺𑀬𑀸 𑀯𑀢𑁆𑀢𑀦𑀢𑁄 𑀢𑀺𑀯𑀺𑀥𑁄𑀧𑀺 𑀫𑁂-𑀲𑀤𑁆𑀤𑁄 𑀓𑀺𑀜𑁆𑀘𑀸𑀧𑀺 𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀣𑁂 𑀤𑀺𑀲𑁆𑀲𑀢𑀺, 𑀓𑀭𑀡𑀲𑀫𑁆𑀧𑀤𑀸𑀦𑀲𑀸𑀫𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀧𑀦 𑀯𑀺𑀚𑁆𑀚𑀫𑀸𑀦𑀁 𑀪𑁂𑀤𑀁 𑀲𑀦𑁆𑀥𑀸𑀬𑀸𑀳 ‘‘𑀫𑁂-𑀲𑀤𑁆𑀤𑁄 𑀢𑀻𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀻’’𑀢𑀺.

𑀓𑀺𑀜𑁆𑀘𑀸𑀧𑀺 𑀉𑀧𑀲𑀕𑁆𑀕𑁄 𑀓𑀺𑀭𑀺𑀬𑀁 𑀯𑀺𑀲𑁂𑀲𑁂𑀢𑀺, 𑀚𑁄𑀢𑀓𑀪𑀸𑀯𑀢𑁄 𑀧𑀦 𑀲𑀢𑀺𑀧𑀺 𑀢𑀲𑁆𑀫𑀺𑀁 𑀲𑀼𑀢𑀲𑀤𑁆𑀤𑁄 𑀏𑀯 𑀢𑀁 𑀢𑀫𑀢𑁆𑀣𑀁 𑀯𑀤𑀢𑀻𑀢𑀺 𑀅𑀦𑀼𑀧𑀲𑀕𑁆𑀕𑀲𑁆𑀲 𑀲𑀼𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂 𑀲𑀉𑀧𑀲𑀕𑁆𑀕𑀲𑁆𑀲 𑀕𑀳𑀡𑀁 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀉𑀧𑀲𑀕𑁆𑀕𑁄 𑀘 𑀅𑀦𑀼𑀧𑀲𑀕𑁆𑀕𑁄 𑀘𑀸’’𑀢𑀺𑀆𑀤𑀺𑀫𑀸𑀳. 𑀅𑀲𑁆𑀲𑀸𑀢𑀺 𑀲𑀼𑀢𑀲𑀤𑁆𑀤𑀲𑁆𑀲. 𑀓𑀫𑁆𑀫𑀪𑀸𑀯𑀲𑀸𑀥𑀦𑀸𑀦𑀺 𑀇𑀥 𑀲𑀼𑀢𑀲𑀤𑁆𑀤𑁂 𑀲𑀫𑁆𑀪𑀯𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀉𑀧𑀥𑀸𑀭𑀺𑀢𑀦𑁆𑀢𑀺 𑀯𑀸 𑀉𑀧𑀥𑀸𑀭𑀡𑀦𑁆𑀢𑀺 𑀯𑀸 ¶ 𑀅𑀢𑁆𑀣𑁄’’𑀢𑀺. 𑀫𑀬𑀸𑀢𑀺 𑀅𑀢𑁆𑀣𑁂 𑀲𑀢𑀻𑀢𑀺 𑀬𑀤𑀸 𑀫𑁂-𑀲𑀤𑁆𑀤𑀲𑁆𑀲 𑀓𑀢𑁆𑀢𑀼𑀯𑀲𑁂𑀦 𑀓𑀭𑀡𑀦𑀺𑀤𑁆𑀤𑁂𑀲𑁄, 𑀢𑀤𑀸𑀢𑀺 𑀅𑀢𑁆𑀣𑁄. 𑀫𑀫𑀸𑀢𑀺 𑀅𑀢𑁆𑀣𑁂 𑀲𑀢𑀻𑀢𑀺 𑀬𑀤𑀸 𑀲𑀫𑁆𑀩𑀦𑁆𑀥𑀯𑀲𑁂𑀦 𑀲𑀸𑀫𑀺𑀦𑀺𑀤𑁆𑀤𑁂𑀲𑁄, 𑀢𑀤𑀸.

𑀲𑀼𑀢-𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂 𑀧𑀬𑀼𑀢𑁆𑀢𑁂𑀦 𑀏𑀯𑀁-𑀲𑀤𑁆𑀤𑁂𑀦 𑀲𑀯𑀦𑀓𑀺𑀭𑀺𑀬𑀸𑀚𑁄𑀢𑀓𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀏𑀯𑀦𑁆𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀺𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀁 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀤𑀪𑀺𑀦𑀻𑀳𑀝𑀸𑀦𑀜𑁆𑀘 𑀫𑀦𑁄𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑁂𑀲𑀫𑁆𑀧𑀺 𑀯𑀸𑀓𑁆𑀬𑀸𑀦𑀁 𑀏𑀯-𑀓𑀸𑀭𑀢𑁆𑀣𑀲𑀳𑀺𑀢𑀢𑁆𑀢𑀸 ‘‘𑀲𑀼𑀢’’𑀦𑁆𑀢𑀺 𑀏𑀢𑀲𑁆𑀲 𑀲𑀼𑀢𑀫𑁂𑀯𑀸𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀅𑀲𑁆𑀲𑀯𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺. 𑀏𑀢𑁂𑀦 𑀅𑀯𑀥𑀸𑀭𑀡𑁂𑀦 𑀦𑀺𑀭𑀸𑀲𑀗𑁆𑀓𑀢𑀁 𑀤𑀲𑁆𑀲𑁂𑀢𑀺. 𑀬𑀣𑀸 𑀘 𑀲𑀼𑀢𑀁 𑀲𑀼𑀢𑀫𑁂𑀯𑀸𑀢𑀺 𑀦𑀺𑀬𑀫𑁂𑀢𑀩𑁆𑀩𑀁, 𑀢𑀁 𑀲𑀫𑁆𑀫𑀸 𑀲𑀼𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀽𑀦𑀸𑀦𑀥𑀺𑀓𑀸𑀯𑀺𑀧𑀭𑀻𑀢𑀕𑁆𑀕𑀳𑀡𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀅𑀣 𑀯𑀸 𑀲𑀤𑁆𑀤𑀦𑁆𑀢𑀭𑀢𑁆𑀣𑀸𑀧𑁄𑀳𑀦𑀯𑀲𑁂𑀦 𑀲𑀤𑁆𑀤𑁄 𑀅𑀢𑁆𑀣𑀁 𑀯𑀤𑀢𑀻𑀢𑀺 𑀲𑀼𑀢𑀦𑁆𑀢𑀺 𑀅𑀲𑀼𑀢𑀁 𑀦 𑀳𑁄𑀢𑀻𑀢𑀺 𑀅𑀬𑀫𑁂𑀢𑀲𑁆𑀲 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀲𑁆𑀲𑀯𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺 ¶ . 𑀇𑀫𑀺𑀦𑀸 𑀤𑀺𑀝𑁆𑀞𑀸𑀤𑀺𑀯𑀺𑀦𑀺𑀯𑀢𑁆𑀢𑀦𑀁 𑀓𑀭𑁄𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀦 𑀇𑀤𑀁 𑀫𑀬𑀸 𑀤𑀺𑀝𑁆𑀞𑀁, 𑀦 𑀲𑀬𑀫𑁆𑀪𑀼𑀜𑀸𑀡𑁂𑀦 𑀲𑀘𑁆𑀙𑀺𑀓𑀢𑀁, 𑀅𑀣 𑀔𑁄 𑀲𑀼𑀢𑀁, 𑀢𑀜𑁆𑀘 𑀔𑁄 𑀲𑀫𑁆𑀫𑀤𑁂𑀯𑀸’’𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀅𑀦𑀽𑀦𑀸𑀦𑀥𑀺𑀓𑀸𑀯𑀺𑀧𑀭𑀻𑀢𑀕𑁆𑀕𑀳𑀡𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀅𑀯𑀥𑀸𑀭𑀡𑀢𑁆𑀣𑁂 𑀯𑀸 𑀏𑀯𑀁-𑀲𑀤𑁆𑀤𑁂 𑀅𑀬𑀫𑀢𑁆𑀣𑀬𑁄𑀚𑀦𑀸 𑀓𑀭𑀻𑀬𑀢𑀻𑀢𑀺 𑀢𑀤𑀧𑁂𑀓𑁆𑀔𑀲𑁆𑀲 𑀲𑀼𑀢-𑀲𑀤𑁆𑀤𑀲𑁆𑀲 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 ‘‘𑀅𑀲𑁆𑀲𑀯𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺. 𑀢𑁂𑀦𑁂𑀯𑀸𑀳 ‘‘𑀅𑀦𑀽𑀦𑀸𑀦𑀥𑀺𑀓𑀸𑀯𑀺𑀧𑀭𑀻𑀢𑀕𑁆𑀕𑀳𑀡𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀲𑀯𑀦𑀲𑀤𑁆𑀤𑁄 𑀘𑁂𑀢𑁆𑀣 𑀓𑀫𑁆𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 ‘‘𑀲𑀼𑀬𑁆𑀬𑀢𑀻’’𑀢𑀺.

𑀏𑀯𑀁 𑀲𑀯𑀦𑀳𑁂𑀢𑀼𑀲𑀼𑀡𑀦𑁆𑀢𑀧𑀼𑀕𑁆𑀕𑀮𑀲𑀯𑀦𑀯𑀺𑀲𑁂𑀲𑀯𑀲𑁂𑀦 𑀧𑀤𑀢𑁆𑀢𑀬𑀲𑁆𑀲 𑀏𑀓𑁂𑀦 𑀧𑀓𑀸𑀭𑁂𑀦 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀓𑀸𑀭𑀦𑁆𑀢𑀭𑁂𑀳𑀺𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸 𑀏𑀯’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀲𑁆𑀲𑀸𑀢𑀺 𑀬𑀸 𑀲𑀸 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀥𑀫𑁆𑀫𑀲𑁆𑀲𑀯𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀫𑀦𑁄𑀤𑁆𑀯𑀸𑀭𑀯𑀺𑀜𑁆𑀜𑀸𑀡𑀯𑀻𑀣𑀺, 𑀢𑀲𑁆𑀲𑀸. 𑀲𑀸 𑀳𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀢𑀼𑀁 𑀲𑀫𑀢𑁆𑀣𑀸. 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦𑀸’’𑀢𑀺. 𑀦𑀸𑀦𑀧𑁆𑀧𑀓𑀸𑀭𑁂𑀦𑀸𑀢𑀺 𑀯𑀓𑁆𑀔𑀫𑀸𑀦𑀸𑀦𑀁 𑀅𑀦𑁂𑀓𑀯𑀺𑀳𑀺𑀢𑀸𑀦𑀁 𑀩𑁆𑀬𑀜𑁆𑀚𑀦𑀢𑁆𑀣𑀕𑁆𑀕𑀳𑀡𑀸𑀦𑀁 𑀦𑀸𑀦𑀸𑀓𑀸𑀭𑁂𑀦. 𑀏𑀢𑁂𑀦 𑀇𑀫𑀺𑀲𑁆𑀲𑀸 𑀬𑁄𑀚𑀦𑀸𑀬 𑀆𑀓𑀸𑀭𑀢𑁆𑀣𑁄 𑀏𑀯𑀁-𑀲𑀤𑁆𑀤𑁄 𑀕𑀳𑀺𑀢𑁄𑀢𑀺 𑀤𑀻𑀧𑁂𑀢𑀺. 𑀧𑀯𑀢𑁆𑀢𑀺𑀪𑀸𑀯𑀧𑁆𑀧𑀓𑀸𑀲𑀦𑀦𑁆𑀢𑀺 𑀧𑀯𑀢𑁆𑀢𑀺𑀬𑀸 𑀅𑀢𑁆𑀣𑀺𑀪𑀸𑀯𑀧𑁆𑀧𑀓𑀸𑀲𑀦𑀁. 𑀲𑀼𑀢𑀦𑁆𑀢𑀺 𑀥𑀫𑁆𑀫𑀧𑁆𑀧𑀓𑀸𑀲𑀦𑀦𑁆𑀢𑀺 𑀬𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 ¶ 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀯𑀺𑀜𑁆𑀜𑀸𑀡𑀯𑀻𑀣𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀧𑀯𑀢𑁆𑀢𑀸, 𑀢𑀲𑁆𑀲 𑀥𑀫𑁆𑀫𑀢𑁆𑀢𑀸 𑀯𑀼𑀢𑁆𑀢𑀁, 𑀦 𑀲𑀼𑀢𑀲𑀤𑁆𑀤𑀲𑁆𑀲 𑀥𑀫𑁆𑀫𑀢𑁆𑀣𑀢𑁆𑀢𑀸. 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀸𑀓𑀝𑀻𑀓𑀭𑀡𑀁 ‘‘𑀅𑀬𑀜𑁆𑀳𑁂𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸𑀢𑀺 𑀓𑀭𑀡𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀫𑀬𑀸𑀢𑀺 𑀓𑀢𑁆𑀢𑀼𑀅𑀢𑁆𑀣𑁂.

𑀏𑀯𑀦𑁆𑀢𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀧𑁆𑀧𑀓𑀸𑀲𑀦𑀦𑁆𑀢𑀺 𑀦𑀺𑀤𑀲𑁆𑀲𑀦𑀢𑁆𑀣𑀁 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁 𑀦𑀺𑀤𑀲𑁆𑀲𑁂𑀢𑀩𑁆𑀩𑀲𑁆𑀲 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑁆𑀢𑀸𑀪𑀸𑀯𑀸𑀪𑀸𑀯𑀢𑁄. 𑀢𑁂𑀦 𑀏𑀯𑀁-𑀲𑀤𑁆𑀤𑁂𑀦 𑀲𑀓𑀮𑀫𑁆𑀧𑀺 𑀲𑀼𑀢𑁆𑀢𑀁 𑀧𑀘𑁆𑀘𑀸𑀫𑀝𑁆𑀞𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀼𑀢-𑀲𑀤𑁆𑀤𑀲𑁆𑀲 𑀓𑀺𑀭𑀺𑀬𑀸𑀲𑀤𑁆𑀤𑀢𑁆𑀢𑀸 𑀲𑀯𑀦𑀓𑀺𑀭𑀺𑀬𑀸𑀬 𑀘 𑀲𑀸𑀥𑀸𑀭𑀡𑀯𑀺𑀜𑁆𑀜𑀸𑀡𑀧𑀩𑀦𑁆𑀥𑀧𑀝𑀺𑀩𑀤𑁆𑀥𑀢𑁆𑀢𑀸 𑀢𑀢𑁆𑀣 𑀘 𑀧𑀼𑀕𑁆𑀕𑀮𑀯𑁄𑀳𑀸𑀭𑁄𑀢𑀺 𑀯𑀼𑀢𑁆𑀢𑀁 ‘‘𑀲𑀼𑀢𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀧𑁆𑀧𑀓𑀸𑀲𑀦’’𑀦𑁆𑀢𑀺. 𑀦 𑀳𑀺 𑀧𑀼𑀕𑁆𑀕𑀮𑀯𑁄𑀳𑀸𑀭𑀭𑀳𑀺𑀢𑁂 𑀥𑀫𑁆𑀫𑀧𑀩𑀦𑁆𑀥𑁂 𑀲𑀯𑀦𑀓𑀺𑀭𑀺𑀬𑀸 𑀮𑀩𑁆𑀪𑀢𑀻𑀢𑀺.

𑀬𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲𑀸𑀢𑀺𑀆𑀤𑀺𑀧𑀺 𑀆𑀓𑀸𑀭𑀢𑁆𑀣𑀫𑁂𑀯 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀧𑀼𑀭𑀺𑀫𑀬𑁄𑀚𑀦𑀸𑀬 𑀅𑀜𑁆𑀜𑀣𑀸 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀓𑀸𑀭𑀧𑀜𑁆𑀜𑀢𑁆𑀢𑀻𑀢𑀺 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀏𑀯 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑀽𑀧𑀸𑀤𑀸𑀦𑀯𑀲𑁂𑀦 𑀢𑀣𑀸 𑀯𑀼𑀢𑁆𑀢𑀸. 𑀲𑀼𑀢𑀦𑁆𑀢𑀺 𑀯𑀺𑀲𑀬𑀦𑀺𑀤𑁆𑀤𑁂𑀲𑁄𑀢𑀺 𑀲𑁄𑀢𑀩𑁆𑀩𑀪𑀽𑀢𑁄 𑀥𑀫𑁆𑀫𑁄 𑀲𑀯𑀦𑀓𑀺𑀭𑀺𑀬𑀸𑀓𑀢𑁆𑀢𑀼𑀧𑀼𑀕𑁆𑀕𑀮𑀲𑁆𑀲 𑀲𑀯𑀦𑀓𑀺𑀭𑀺𑀬𑀸𑀯𑀲𑁂𑀦 𑀧𑀯𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀲𑀦𑁆𑀢𑀸𑀦𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀧𑀭𑀫𑀢𑁆𑀣𑀢𑁄 𑀓𑀲𑁆𑀲𑀘𑀺 𑀓𑀢𑁆𑀢𑀼 𑀅𑀪𑀸𑀯𑁂𑀧𑀺 𑀲𑀤𑁆𑀤𑀯𑁄𑀳𑀸𑀭𑁂𑀦 𑀩𑀼𑀤𑁆𑀥𑀺𑀧𑀭𑀺𑀓𑀧𑁆𑀧𑀺𑀢𑀪𑁂𑀤𑀯𑀘𑀦𑀺𑀘𑁆𑀙𑀸𑀬 𑀘𑀺𑀢𑁆𑀢𑀲𑀦𑁆𑀢𑀸𑀦𑀢𑁄 𑀅𑀜𑁆𑀜𑀁 𑀯𑀺𑀬 𑀢𑀁𑀲𑀫𑀗𑁆𑀕𑀺𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀦 ¶ 𑀢𑀁𑀲𑀫𑀗𑁆𑀕𑀺𑀦𑁄’’𑀢𑀺. 𑀲𑀯𑀦𑀓𑀺𑀭𑀺𑀬𑀸𑀯𑀺𑀲𑀬𑁄𑀧𑀺 𑀲𑁄𑀢𑀩𑁆𑀩𑀥𑀫𑁆𑀫𑁄 𑀲𑀯𑀦𑀓𑀺𑀭𑀺𑀬𑀸𑀯𑀲𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀇𑀥 𑀧𑀭𑀫𑀢𑁆𑀣𑀢𑁄 𑀓𑀢𑁆𑀢𑀼𑀪𑀸𑀯𑀢𑁄, 𑀲𑀯𑀦𑀯𑀲𑁂𑀦 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀏𑀯 𑀯𑀸 𑀲𑀯𑀦𑀓𑀺𑀭𑀺𑀬𑀸𑀪𑀸𑀯𑀢𑁄 𑀢𑀁𑀓𑀺𑀭𑀺𑀬𑀸𑀓𑀢𑁆𑀢𑀼 𑀘 𑀯𑀺𑀲𑀬𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑀁𑀲𑀫𑀗𑁆𑀕𑀺𑀦𑁄 𑀓𑀢𑁆𑀢𑀼𑀯𑀺𑀲𑀬𑁂’’𑀢𑀺. 𑀲𑀼𑀢𑀸𑀓𑀸𑀭𑀲𑁆𑀲 𑀘 𑀣𑁂𑀭𑀲𑁆𑀲 𑀲𑀫𑁆𑀫𑀸𑀦𑀺𑀘𑁆𑀙𑀺𑀢𑀪𑀸𑀯𑀢𑁄 𑀆𑀳 ‘‘𑀕𑀳𑀡𑀲𑀦𑁆𑀦𑀺𑀝𑁆𑀞𑀸𑀦’’𑀦𑁆𑀢𑀺. 𑀏𑀢𑁂𑀦 𑀯𑀸 𑀅𑀯𑀥𑀸𑀭𑀡𑀢𑁆𑀣𑀁 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀅𑀬𑀫𑀢𑁆𑀣𑀬𑁄𑀚𑀦𑀸 𑀓𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀼𑀩𑁆𑀩𑁂 𑀲𑀼𑀢𑀸𑀦𑀁 𑀦𑀸𑀦𑀸𑀯𑀺𑀳𑀺𑀢𑀸𑀦𑀁 𑀲𑀼𑀢𑁆𑀢𑀲𑀗𑁆𑀔𑀸𑀢𑀸𑀦𑀁 𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀦𑀁 𑀉𑀧𑀥𑀸𑀭𑀺𑀢𑀭𑀽𑀧𑀲𑁆𑀲 𑀆𑀓𑀸𑀭𑀲𑁆𑀲 𑀦𑀺𑀤𑀲𑁆𑀲𑀦𑀲𑁆𑀲, 𑀅𑀯𑀥𑀸𑀭𑀡𑀲𑁆𑀲 𑀯𑀸 𑀧𑀓𑀸𑀲𑀦𑀲𑀪𑀸𑀯𑁄 𑀏𑀯𑀁-𑀲𑀤𑁆𑀤𑁄𑀢𑀺 𑀢𑀤𑀸𑀓𑀸𑀭𑀸𑀤𑀺𑀉𑀧𑀥𑀸𑀭𑀡𑀲𑁆𑀲 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀦𑀪𑀽𑀢𑀥𑀫𑁆𑀫𑀧𑀩𑀦𑁆𑀥𑀩𑁆𑀬𑀸𑀧𑀸𑀭𑀢𑀸𑀬 𑀯𑀼𑀢𑁆𑀢𑀁 𑁋 ‘‘𑀏𑀯𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄’’𑀢𑀺. 𑀲𑀯𑀦𑀓𑀺𑀭𑀺𑀬𑀸 𑀧𑀦 𑀧𑀼𑀕𑁆𑀕𑀮𑀯𑀸𑀤𑀺𑀦𑁄𑀧𑀺 𑀯𑀺𑀜𑁆𑀜𑀸𑀡𑀦𑀺𑀭𑀧𑁂𑀓𑁆𑀔𑀸 𑀦𑀢𑁆𑀣𑀻𑀢𑀺 𑀯𑀺𑀲𑁂𑀲𑀢𑁄 𑀯𑀺𑀜𑁆𑀜𑀸𑀡𑀩𑁆𑀬𑀸𑀧𑀸𑀭𑁄𑀢𑀺 𑀆𑀳 ‘‘𑀲𑀼𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄’’𑀢𑀺. ‘‘𑀫𑁂’’𑀢𑀺 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀬𑀸 𑀏𑀓𑀦𑁆𑀢𑁂𑀦𑁂𑀯 𑀲𑀢𑁆𑀢𑀯𑀺𑀲𑀬𑀢𑁆𑀢𑀸 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀲𑁆𑀲 𑀘 𑀢𑀢𑁆𑀣𑁂𑀯 𑀲𑀫𑁄𑀤𑀳𑀺𑀢𑀩𑁆𑀩𑀢𑁄 ¶ ‘‘𑀫𑁂𑀢𑀺 𑀉𑀪𑀬𑀓𑀺𑀘𑁆𑀘𑀬𑀼𑀢𑁆𑀢𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑁄’’𑀢𑀺 𑀯𑀼𑀢𑁆𑀢𑀁. 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀲𑀪𑀸𑀯𑀸 𑀬𑀣𑀸𑀓𑁆𑀓𑀫𑀁 𑀏𑀯𑀁-𑀲𑀤𑁆𑀤 𑁋 𑀲𑀼𑀢-𑀲𑀤𑁆𑀤𑀸𑀦𑀁 𑀅𑀢𑁆𑀣𑀸𑀢𑀺 𑀢𑁂 𑀢𑀣𑀸𑀭𑀽𑀧-𑀧𑀜𑁆𑀜𑀢𑁆𑀢𑀺-𑀉𑀧𑀸𑀤𑀸𑀦𑀪𑀽𑀢-𑀥𑀫𑁆𑀫𑀧𑀩𑀦𑁆𑀥𑀩𑁆𑀬𑀸𑀧𑀸𑀭𑀪𑀸𑀯𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀏𑀯𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄, 𑀲𑀼𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄’’𑀢𑀺. 𑀏𑀢𑁆𑀣 𑀘 𑀓𑀭𑀡𑀓𑀺𑀭𑀺𑀬𑀸𑀓𑀢𑁆𑀢𑀼𑀓𑀫𑁆𑀫𑀯𑀺𑀲𑁂𑀲𑀧𑁆𑀧𑀓𑀸𑀲𑀦𑀯𑀲𑁂𑀦 𑀧𑀼𑀕𑁆𑀕𑀮𑀩𑁆𑀬𑀸𑀧𑀸𑀭𑀯𑀺𑀲𑀬𑀧𑀼𑀕𑁆𑀕𑀮𑀩𑁆𑀬𑀸𑀧𑀸𑀭𑀦𑀺𑀤𑀲𑁆𑀲𑀦𑀯𑀲𑁂𑀦 𑀕𑀳𑀡𑀸𑀓𑀸𑀭𑀕𑀸𑀳𑀓𑀢𑀩𑁆𑀩𑀺𑀲𑀬𑀯𑀺𑀲𑁂𑀲𑀦𑀺𑀤𑁆𑀤𑁂𑀲𑀯𑀲𑁂𑀦 𑀓𑀢𑁆𑀢𑀼𑀓𑀭𑀡𑀩𑁆𑀬𑀸𑀧𑀸𑀭𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑀯𑀲𑁂𑀦 𑀘 𑀤𑀼𑀢𑀺𑀬𑀸𑀤𑀬𑁄 𑀘𑀢𑀲𑁆𑀲𑁄 𑀅𑀢𑁆𑀣𑀬𑁄𑀚𑀦𑀸 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀩𑁆𑀩𑀲𑁆𑀲𑀧𑀺 𑀲𑀤𑁆𑀤𑀸𑀥𑀺𑀕𑀫𑀦𑀻𑀬𑀲𑁆𑀲 𑀅𑀢𑁆𑀣𑀲𑁆𑀲 𑀧𑀜𑁆𑀜𑀢𑁆𑀢𑀺𑀫𑀼𑀔𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀲𑀩𑁆𑀩𑀧𑀜𑁆𑀜𑀢𑁆𑀢𑀻𑀦𑀜𑁆𑀘 𑀯𑀺𑀚𑁆𑀚𑀫𑀸𑀦𑀸𑀤𑀺𑀯𑀲𑁂𑀦 𑀙𑀲𑀼 𑀧𑀜𑁆𑀜𑀢𑁆𑀢𑀺𑀪𑁂𑀤𑁂𑀲𑀼 𑀅𑀦𑁆𑀢𑁄𑀕𑀥𑀢𑁆𑀢𑀸 𑀢𑁂𑀲𑀼 ‘‘𑀏𑀯’’𑀦𑁆𑀢𑀺𑀆𑀤𑀻𑀦𑀁 𑀧𑀜𑁆𑀜𑀢𑁆𑀢𑀻𑀦𑀁 𑀲𑀭𑀽𑀧𑀁 𑀦𑀺𑀤𑁆𑀥𑀸𑀭𑁂𑀦𑁆𑀢𑁄 𑀆𑀳 𑁋 ‘‘𑀏𑀯𑀦𑁆𑀢𑀺 𑀘 𑀫𑁂𑀢𑀺 𑀘𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀏𑀯’’𑀦𑁆𑀢𑀺 𑀘 ‘‘𑀫𑁂’’𑀢𑀺 𑀘 𑀯𑀼𑀘𑁆𑀘𑀫𑀸𑀦𑀲𑁆𑀲𑀢𑁆𑀣𑀲𑁆𑀲 𑀆𑀓𑀸𑀭𑀸𑀤𑀺𑀦𑁄 𑀥𑀫𑁆𑀫𑀸𑀦𑀁 𑀅𑀲𑀮𑁆𑀮𑀓𑁆𑀔𑀡𑀪𑀸𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑁄𑀢𑀺 𑀆𑀳 𑁋 ‘‘𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺. 𑀢𑀢𑁆𑀣 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦𑀸𑀢𑀺 𑀪𑀽𑀢𑀢𑁆𑀣𑀉𑀢𑁆𑀢𑀫𑀢𑁆𑀣𑀯𑀲𑁂𑀦. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀫𑀸𑀬𑀸𑀫𑀭𑀻𑀘𑀺𑀆𑀤𑀬𑁄 𑀯𑀺𑀬 𑀅𑀪𑀽𑀢𑀢𑁆𑀣𑁄, 𑀅𑀦𑀼𑀲𑁆𑀲𑀯𑀸𑀤𑀻𑀳𑀺 𑀕𑀳𑁂𑀢𑀩𑁆𑀩𑁄 𑀯𑀺𑀬 𑀅𑀦𑀼𑀢𑁆𑀢𑀫𑀢𑁆𑀣𑁄 𑀘 𑀦 𑀳𑁄𑀢𑀺, 𑀲𑁄 𑀭𑀽𑀧𑀲𑀤𑁆𑀤𑀸𑀤𑀺𑀲𑀪𑀸𑀯𑁄, 𑀭𑀼𑀧𑁆𑀧𑀦𑀸𑀦𑀼𑀪𑀯𑀦𑀸𑀤𑀺𑀲𑀪𑀸𑀯𑁄 𑀯𑀸 𑀅𑀢𑁆𑀣𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄 𑀘𑀸𑀢𑀺 𑀯𑀼𑀘𑁆𑀘𑀢𑀺, 𑀦 𑀢𑀣𑀸 ‘‘𑀏𑀯𑀁 𑀫𑁂’’𑀢𑀺 𑀧𑀤𑀸𑀦𑀁 𑀅𑀢𑁆𑀣𑁄𑀢𑀺. 𑀏𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀓𑀺𑀜𑁆𑀳𑁂𑀢𑁆𑀣 𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀼𑀢𑀦𑁆𑀢𑀺 𑀧𑀦 𑀲𑀤𑁆𑀤𑀸𑀬𑀢𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺. 𑀢𑁂𑀦𑁂𑀯 𑀳𑀺 ‘‘𑀬𑀜𑁆𑀳𑀺 𑀢𑀁 𑀏𑀢𑁆𑀣 𑀲𑁄𑀢𑁂𑀦 𑀉𑀧𑀮𑀤𑁆𑀥’’𑀦𑁆𑀢𑀺 𑀯𑀼𑀢𑁆𑀢𑀁, ‘‘𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀉𑀧𑀮𑀤𑁆𑀥’’𑀦𑁆𑀢𑀺 𑀧𑀦 𑀯𑀼𑀢𑁆𑀢𑁂 𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀤𑀺𑀲𑀩𑁆𑀩𑀁 𑀮𑀩𑁆𑀪𑀢𑀺.

𑀢𑀁 ¶ 𑀢𑀁 𑀉𑀧𑀸𑀤𑀸𑀬 𑀯𑀢𑁆𑀢𑀩𑁆𑀩𑀢𑁄𑀢𑀺 𑀲𑁄𑀢𑀧𑀣𑀫𑀸𑀕𑀢𑁂 𑀥𑀫𑁆𑀫𑁂 𑀉𑀧𑀸𑀤𑀸𑀬 𑀢𑁂𑀲𑀁 𑀉𑀧𑀥𑀸𑀭𑀺𑀢𑀸𑀓𑀸𑀭𑀸𑀤𑀺𑀦𑁄 𑀧𑀘𑁆𑀘𑀸𑀫𑀲𑀦𑀯𑀲𑁂𑀦 ‘‘𑀏𑀯’’𑀦𑁆𑀢𑀺, 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁂 𑀔𑀦𑁆𑀥𑁂 𑀉𑀧𑀸𑀤𑀸𑀬 ‘‘𑀫𑁂’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀸𑀤𑀺𑀲𑀪𑀸𑀯𑀭𑀳𑀺𑀢𑁂 𑀲𑀤𑁆𑀤𑀸𑀬𑀢𑀦𑁂 𑀧𑀯𑀢𑁆𑀢𑀫𑀸𑀦𑁄𑀧𑀺 𑀲𑀼𑀢𑀯𑁄𑀳𑀸𑀭𑁄 ‘‘𑀤𑀼𑀢𑀺𑀬𑀁 𑀢𑀢𑀺𑀬’’𑀦𑁆𑀢𑀺𑀆𑀤𑀺𑀓𑁄 𑀯𑀺𑀬 𑀧𑀞𑀫𑀸𑀤𑀻𑀦𑀺 𑀤𑀺𑀝𑁆𑀞𑀫𑀼𑀢𑀯𑀺𑀜𑁆𑀜𑀸𑀢𑁂 𑀅𑀧𑁂𑀓𑁆𑀔𑀺𑀢𑁆𑀯𑀸𑀯 𑀧𑀯𑀢𑁆𑀢𑁄𑀢𑀺 𑀆𑀳 ‘‘𑀤𑀺𑀝𑁆𑀞𑀸𑀤𑀻𑀦𑀺 𑀉𑀧𑀦𑀺𑀥𑀸𑀬 𑀯𑀢𑁆𑀢𑀩𑁆𑀩𑀢𑁄’’𑀢𑀺 𑀅𑀲𑀼𑀢𑀁 𑀦 𑀳𑁄𑀢𑀻𑀢𑀺 𑀳𑀺 𑀲𑀼𑀢𑀦𑁆𑀢𑀺 𑀧𑀓𑀸𑀲𑀺𑀢𑁄𑀬𑀫𑀢𑁆𑀣𑁄𑀢𑀺. 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀸 𑀲𑀼𑀢𑁆𑀢𑀲𑁆𑀲 𑀧𑀓𑀸𑀭𑀯𑀺𑀲𑁂𑀲𑀸 ‘‘𑀏𑀯’’𑀦𑁆𑀢𑀺 𑀣𑁂𑀭𑁂𑀦 𑀧𑀘𑁆𑀘𑀸𑀫𑀝𑁆𑀞𑀸𑀢𑀺 𑀆𑀳 ‘‘𑀅𑀲𑀫𑁆𑀫𑁄𑀳𑀁 𑀤𑀻𑀧𑁂𑀢𑀻’’𑀢𑀺. 𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀲𑀫𑀢𑁆𑀣𑁄 𑀳𑁄𑀢𑀻𑀢𑀺 𑀏𑀢𑁂𑀦 ¶ 𑀯𑀓𑁆𑀔𑀫𑀸𑀦𑀲𑁆𑀲 𑀲𑀼𑀢𑁆𑀢𑀲𑁆𑀲 𑀦𑀸𑀦𑀧𑁆𑀧𑀓𑀸𑀭𑀢𑀁 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀲𑀼𑀢𑀲𑁆𑀲 𑀅𑀲𑀫𑁆𑀫𑁄𑀲𑀁 𑀤𑀻𑀧𑁂𑀢𑀻𑀢𑀺 𑀲𑀼𑀢𑀸𑀓𑀸𑀭𑀲𑁆𑀲 𑀬𑀸𑀣𑀸𑀯𑀢𑁄 𑀤𑀲𑁆𑀲𑀺𑀬𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀅𑀲𑀫𑁆𑀫𑁄𑀳𑁂𑀦𑀸𑀢𑀺 𑀲𑀫𑁆𑀫𑁄𑀳𑀸𑀪𑀸𑀯𑁂𑀦, 𑀧𑀜𑁆𑀜𑀸𑀬 𑀏𑀯 𑀯𑀸 𑀲𑀯𑀦𑀓𑀸𑀮𑀲𑀫𑁆𑀪𑀽𑀢𑀸𑀬 𑀢𑀤𑀼𑀢𑁆𑀢𑀭𑀓𑀸𑀮𑀧𑀜𑁆𑀜𑀸𑀲𑀺𑀤𑁆𑀥𑀺. 𑀏𑀯𑀁 𑀅𑀲𑀫𑁆𑀫𑁄𑀲𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀯𑀢𑁆𑀢𑀩𑁆𑀩𑀁. 𑀩𑁆𑀬𑀜𑁆𑀚𑀦𑀸𑀦𑀁 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄 𑀆𑀓𑀸𑀭𑁄 𑀦𑀸𑀢𑀺𑀕𑀫𑁆𑀪𑀻𑀭𑁄, 𑀬𑀣𑀸𑀲𑀼𑀢𑀥𑀸𑀭𑀡𑀫𑁂𑀯 𑀢𑀢𑁆𑀣 𑀓𑀭𑀡𑀻𑀬𑀦𑁆𑀢𑀺 𑀲𑀢𑀺𑀬𑀸 𑀩𑁆𑀬𑀸𑀧𑀸𑀭𑁄 𑀅𑀥𑀺𑀓𑁄, 𑀧𑀜𑁆𑀜𑀸 𑀢𑀢𑁆𑀣 𑀕𑀼𑀡𑀻𑀪𑀽𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀸𑀬𑀸’’𑀢𑀺𑀆𑀤𑀺 ‘‘𑀧𑀜𑁆𑀜𑀸𑀬 𑀧𑀼𑀩𑁆𑀩𑀗𑁆𑀕𑀫𑀸’’𑀢𑀺 𑀓𑀢𑁆𑀯𑀸. 𑀧𑀼𑀩𑁆𑀩𑀗𑁆𑀕𑀫𑀢𑀸 𑀘𑁂𑀢𑁆𑀣 𑀧𑀥𑀸𑀦𑀢𑀸 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁧, 𑁨) 𑀯𑀺𑀬. 𑀧𑀼𑀩𑁆𑀩𑀗𑁆𑀕𑀫𑀢𑀸𑀬 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀆𑀯𑀚𑁆𑀚𑀦𑀸𑀤𑀻𑀦𑀁 𑀯𑀺𑀬 𑀅𑀧𑁆𑀧𑀥𑀸𑀦𑀢𑁆𑀢𑁂 𑀧𑀜𑁆𑀜𑀸 𑀧𑀼𑀩𑁆𑀩𑀗𑁆𑀕𑀫𑀸 𑀏𑀢𑀺𑀲𑁆𑀲𑀸𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀏𑀯𑀁 𑀲𑀢𑀺𑀧𑀼𑀩𑁆𑀩𑀗𑁆𑀕𑀫𑀸𑀬𑀸𑀢𑀺 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀬𑀣𑀸𑀲𑀫𑁆𑀪𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀲𑁆𑀲𑀸𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀭𑀺𑀧𑀼𑀡𑁆𑀡𑀲𑁆𑀲, 𑀲𑀗𑁆𑀓𑀸𑀲𑀦𑀧𑀓𑀸𑀲𑀦𑀯𑀺𑀯𑀭𑀡𑀯𑀺𑀪𑀚𑀦𑀉𑀢𑁆𑀢𑀸𑀦𑀻𑀓𑀭𑀡𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀙𑀳𑀺 𑀅𑀢𑁆𑀣𑀧𑀤𑁂𑀳𑀺, 𑀅𑀓𑁆𑀔𑀭𑀧𑀤𑀩𑁆𑀬𑀜𑁆𑀚𑀦𑀸𑀓𑀸𑀭𑀦𑀺𑀭𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀙𑀳𑀺 𑀩𑁆𑀬𑀜𑁆𑀚𑀦𑀧𑀤𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑀲𑁆𑀲𑀸𑀢𑀺 𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀤𑀻𑀧𑁂𑀢𑀺 𑀏𑀯𑀁-𑀲𑀤𑁆𑀤𑁂𑀦 𑀯𑀼𑀘𑁆𑀘𑀫𑀸𑀦𑀸𑀦𑀁 𑀆𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑀢𑁆𑀣𑀸𑀦𑀁 𑀅𑀯𑀺𑀧𑀭𑀻𑀢𑀲𑀤𑁆𑀥𑀫𑁆𑀫𑀯𑀺𑀲𑀬𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀯𑀺𑀓𑁆𑀔𑁂𑀧𑀁 𑀤𑀻𑀧𑁂𑀢𑀻𑀢𑀺 ‘‘𑀫𑀽𑀮𑀧𑀭𑀺𑀬𑀸𑀬𑀁 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺𑀆𑀤𑀺𑀧𑀼𑀘𑁆𑀙𑀸𑀯𑀲𑁂𑀦 𑀧𑀓𑀭𑀡𑀧𑁆𑀧𑀢𑁆𑀢𑀲𑁆𑀲 𑀯𑀓𑁆𑀔𑀫𑀸𑀦𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀯𑀦𑀁 𑀲𑀫𑀸𑀥𑀸𑀦𑀫𑀦𑁆𑀢𑀭𑁂𑀦 𑀦 𑀲𑀫𑁆𑀪𑀯𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲𑀸𑀢𑀺𑀆𑀤𑀺 𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀲𑀫𑀢𑁆𑀣𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀤𑁂𑀲𑀓𑀧𑀬𑁄𑀚𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸. 𑀅𑀯𑀺𑀧𑀭𑀻𑀢𑀲𑀤𑁆𑀥𑀫𑁆𑀫𑀯𑀺𑀲𑀬𑁂𑀳𑀺 𑀯𑀺𑀬 𑀆𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑀢𑁆𑀣𑁂𑀳𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑁂𑀦 𑀯𑀺𑀬 𑀘 𑀅𑀯𑀺𑀓𑁆𑀔𑁂𑀧𑀲𑁆𑀲 𑀬𑀣𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀨𑀮𑀪𑀽𑀢𑁂𑀦 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸𑀦𑀁 𑀲𑀺𑀤𑁆𑀥𑀺 𑀯𑀼𑀢𑁆𑀢𑀸 𑀢𑀤𑀯𑀺𑀦𑀸𑀪𑀸𑀯𑀢𑁄, 𑀏𑀯𑀁 𑀅𑀯𑀺𑀓𑁆𑀔𑁂𑀧𑁂𑀦 𑀨𑀮𑀪𑀽𑀢𑁂𑀦 𑀓𑀸𑀭𑀡𑀪𑀽𑀢𑀸𑀦𑀁 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀦𑀁 𑀲𑀺𑀤𑁆𑀥𑀺 𑀤𑀲𑁆𑀲𑁂𑀢𑀩𑁆𑀩𑀸 𑀲𑀺𑀬𑀸 𑀅𑀲𑁆𑀲𑀼𑀢𑀯𑀢𑁄 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀭𑀳𑀺𑀢𑀲𑁆𑀲 𑀘 𑀢𑀤𑀪𑀸𑀯𑀢𑁄. 𑀦 𑀳𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄𑀢𑀺𑀆𑀤𑀺𑀦𑀸 𑀲𑀫𑀢𑁆𑀣𑀦𑀯𑀘𑀦𑁂𑀦 𑀧𑀦 𑀅𑀯𑀺𑀓𑁆𑀔𑁂𑀧𑁂𑀦 𑀓𑀸𑀭𑀡𑀪𑀽𑀢𑁂𑀦 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁂𑀦 𑀘 𑀨𑀮𑀪𑀽𑀢𑀲𑁆𑀲 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀲𑀺𑀤𑁆𑀥𑀺 𑀤𑀲𑁆𑀲𑀺𑀢𑀸. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀬𑀼𑀢𑁆𑀢𑁄 𑀲𑀺𑀬𑀸 𑁋 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸 ¶ 𑀦 ¶ 𑀏𑀓𑀦𑁆𑀢𑁂𑀦 𑀅𑀯𑀺𑀓𑁆𑀔𑁂𑀧𑀲𑁆𑀲 𑀓𑀸𑀭𑀡𑀁 𑀩𑀸𑀳𑀺𑀭𑀗𑁆𑀕𑀢𑁆𑀢𑀸, 𑀅𑀯𑀺𑀓𑁆𑀔𑁂𑀧𑁄 𑀧𑀦 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁄 𑀯𑀺𑀬 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀏𑀓𑀦𑁆𑀢𑀓𑀸𑀭𑀡𑀦𑁆𑀢𑀺. 𑀏𑀯𑀫𑁆𑀧𑀺 𑀅𑀯𑀺𑀓𑁆𑀔𑁂𑀧𑁂𑀦 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀲𑀺𑀤𑁆𑀥𑀺𑀚𑁄𑀢𑀦𑀸 𑀦 𑀲𑀫𑀢𑁆𑀣𑀺𑀢𑀸𑀯, 𑀦𑁄 𑀦 𑀲𑀫𑀢𑁆𑀣𑀺𑀢𑀸 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸𑀦𑀁 𑀲𑀧𑁆𑀧𑀼𑀭𑀺𑀲𑀧𑀬𑀺𑀭𑀼𑀧𑀸𑀲𑀦𑀸𑀪𑀸𑀯𑀲𑁆𑀲 𑀅𑀢𑁆𑀣𑀲𑀺𑀤𑁆𑀥𑀢𑁆𑀢𑀸. 𑀏𑀢𑁆𑀣 𑀘 𑀧𑀼𑀭𑀺𑀫𑀁 𑀨𑀮𑁂𑀦 𑀓𑀸𑀭𑀡𑀲𑁆𑀲 𑀲𑀺𑀤𑁆𑀥𑀺𑀤𑀲𑁆𑀲𑀦𑀁 𑀦𑀤𑀻𑀧𑀽𑀭𑁂𑀦 𑀯𑀺𑀬 𑀉𑀧𑀭𑀺 𑀯𑀼𑀝𑁆𑀞𑀺𑀲𑀩𑁆𑀪𑀸𑀯𑀲𑁆𑀲, 𑀤𑀼𑀢𑀺𑀬𑀁 𑀓𑀸𑀭𑀡𑁂𑀦 𑀨𑀮𑀲𑁆𑀲 𑀲𑀺𑀤𑁆𑀥𑀺𑀤𑀲𑁆𑀲𑀦𑀁 𑀤𑀝𑁆𑀞𑀩𑁆𑀩𑀁 𑀏𑀓𑀦𑁆𑀢𑀯𑀲𑁆𑀲𑀺𑀦𑀸 𑀯𑀺𑀬 𑀫𑁂𑀖𑀯𑀼𑀝𑁆𑀞𑀸𑀦𑁂𑀦 𑀯𑀼𑀝𑁆𑀞𑀺𑀧𑁆𑀧𑀯𑀢𑁆𑀢𑀺𑀬𑀸.

𑀪𑀕𑀯𑀢𑁄 𑀯𑀘𑀦𑀲𑁆𑀲 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀪𑁂𑀤𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀓𑀮𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀑𑀕𑀸𑀳𑀦𑀸𑀓𑀸𑀭𑁄 𑀦𑀺𑀭𑀯𑀲𑁂𑀲𑀧𑀭𑀳𑀺𑀢𑀧𑀸𑀭𑀺𑀧𑀽𑀭𑀺𑀓𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀏𑀯𑀁 𑀪𑀤𑁆𑀤𑀓𑁄 𑀆𑀓𑀸𑀭𑁄’’𑀢𑀺. 𑀬𑀲𑁆𑀫𑀸 𑀦 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸𑀲𑀗𑁆𑀔𑀸𑀢𑀁 𑀕𑀼𑀡𑀤𑁆𑀯𑀬𑀁. 𑀅𑀧𑀭𑀸𑀧𑀭𑀯𑀼𑀢𑁆𑀢𑀺𑀬𑀸 𑀘𑁂𑀢𑁆𑀣 𑀘𑀓𑁆𑀓𑀪𑀸𑀯𑁄, 𑀘𑀭𑀦𑁆𑀢𑀺 𑀏𑀢𑁂𑀳𑀺 𑀲𑀢𑁆𑀢𑀸 𑀲𑀫𑁆𑀧𑀢𑁆𑀢𑀺𑀪𑀯𑁂𑀲𑀽𑀢𑀺 𑀯𑀸. 𑀬𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀘𑀢𑀼𑀘𑀓𑁆𑀓𑀁 𑀯𑀢𑁆𑀢𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁪.𑁩𑁧). 𑀧𑀼𑀭𑀺𑀫𑀧𑀘𑁆𑀙𑀺𑀫𑀪𑀸𑀯𑁄 𑀘𑁂𑀢𑁆𑀣 𑀤𑁂𑀲𑀦𑀸𑀓𑁆𑀓𑀫𑀯𑀲𑁂𑀦 𑀤𑀝𑁆𑀞𑀩𑁆𑀩𑁄. 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑀺𑀤𑁆𑀥𑀺𑀬𑀸𑀢𑀺 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑁆𑀲 𑀅𑀢𑁆𑀣𑀺𑀢𑀸𑀬. 𑀲𑀫𑁆𑀫𑀸𑀧𑀡𑀺𑀳𑀺𑀢𑀢𑁆𑀢𑁄 𑀧𑀼𑀩𑁆𑀩𑁂 𑀘 𑀓𑀢𑀧𑀼𑀜𑁆𑀜𑁄 𑀲𑀼𑀤𑁆𑀥𑀸𑀲𑀬𑁄 𑀳𑁄𑀢𑀺 𑀢𑀤𑀲𑀼𑀤𑁆𑀥𑀺𑀳𑁂𑀢𑀽𑀦𑀁 𑀓𑀺𑀮𑁂𑀲𑀸𑀦𑀁 𑀤𑀽𑀭𑀻𑀪𑀸𑀯𑀢𑁄𑀢𑀺 𑀆𑀳 𑁋 ‘‘𑀆𑀲𑀬𑀲𑀼𑀤𑁆𑀥𑀺 𑀲𑀺𑀤𑁆𑀥𑀸 𑀳𑁄𑀢𑀻’’𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀲𑀫𑁆𑀫𑀸𑀧𑀡𑀺𑀳𑀺𑀢𑀁 𑀘𑀺𑀢𑁆𑀢𑀁, 𑀲𑁂𑀬𑁆𑀬𑀲𑁄 𑀦𑀁 𑀢𑀢𑁄 𑀓𑀭𑁂’’𑀢𑀺 (𑀥. 𑀧. 𑁪𑁩), ‘‘𑀓𑀢𑀧𑀼𑀜𑁆𑀜𑁄𑀲𑀺 𑀢𑁆𑀯𑀁 𑀆𑀦𑀦𑁆𑀤, 𑀧𑀥𑀸𑀦𑀫𑀦𑀼𑀬𑀼𑀜𑁆𑀚, 𑀔𑀺𑀧𑁆𑀧𑀁 𑀳𑁄𑀳𑀺𑀲𑀺 𑀅𑀦𑀸𑀲𑀯𑁄’’𑀢𑀺 (𑀤𑀻. 𑀦𑀺. 𑁨.𑁨𑁦𑁭) 𑀘. 𑀢𑁂𑀦𑁂𑀯𑀸𑀳 ‘‘𑀆𑀲𑀬𑀲𑀼𑀤𑁆𑀥𑀺𑀬𑀸 𑀅𑀥𑀺𑀕𑀫𑀩𑁆𑀬𑀢𑁆𑀢𑀺𑀲𑀺𑀤𑁆𑀥𑀻’’𑀢𑀺. 𑀧𑀬𑁄𑀕𑀲𑀼𑀤𑁆𑀥𑀺𑀬𑀸𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀼𑀩𑁆𑀩𑀗𑁆𑀕𑀫𑀲𑁆𑀲 𑀥𑀫𑁆𑀫𑀲𑁆𑀲𑀯𑀦𑀧𑀬𑁄𑀕𑀲𑁆𑀲 𑀯𑀺𑀲𑀤𑀪𑀸𑀯𑁂𑀦. 𑀢𑀣𑀸 𑀘𑀸𑀳 ‘‘𑀆𑀕𑀫𑀩𑁆𑀬𑀢𑁆𑀢𑀺𑀲𑀺𑀤𑁆𑀥𑀻’’𑀢𑀺. 𑀲𑀩𑁆𑀩𑀲𑁆𑀲 𑀯𑀸 𑀓𑀸𑀬𑀯𑀘𑀻𑀧𑀬𑁄𑀕𑀲𑁆𑀲 𑀦𑀺𑀤𑁆𑀤𑁄𑀲𑀪𑀸𑀯𑁂𑀦. 𑀧𑀭𑀺𑀲𑀼𑀤𑁆𑀥𑀓𑀸𑀬𑀯𑀘𑀻𑀧𑀬𑁄𑀕𑁄 𑀳𑀺 𑀯𑀺𑀧𑁆𑀧𑀝𑀺𑀲𑀸𑀭𑀸𑀪𑀸𑀯𑀢𑁄 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀭𑀺𑀬𑀢𑁆𑀢𑀺𑀬𑀁 𑀯𑀺𑀲𑀸𑀭𑀤𑁄 𑀳𑁄𑀢𑀻𑀢𑀺.

𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀤𑀻𑀧𑀓𑁂𑀦𑀸𑀢𑀺𑀆𑀤𑀺𑀦𑀸 𑀅𑀢𑁆𑀣𑀩𑁆𑀬𑀜𑁆𑀚𑀦𑁂𑀲𑀼 𑀣𑁂𑀭𑀲𑁆𑀲 𑀏𑀯𑀁𑀲𑀤𑁆𑀤𑀲𑀼𑀢-𑀲𑀤𑁆𑀤𑀸𑀦𑀁 𑀅𑀲𑀫𑁆𑀫𑁄𑀳𑀸𑀲𑀫𑁆𑀫𑁄𑀲𑀤𑀻𑀧𑀦𑀢𑁄 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀯𑀲𑁂𑀦 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀲𑁄𑀢𑀩𑁆𑀩𑀪𑁂𑀤𑀧𑀝𑀺𑀯𑁂𑀥𑀤𑀻𑀧𑀓𑁂𑀦𑀸𑀢𑀺 𑀏𑀢𑁂𑀦 𑀅𑀬𑀁 𑀲𑀼𑀢-𑀲𑀤𑁆𑀤𑁄 𑀏𑀯𑀁-𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀢𑁄, 𑀯𑀓𑁆𑀔𑀫𑀸𑀦𑀸𑀧𑁂𑀓𑁆𑀔𑀸𑀬 𑀯𑀸 𑀲𑀸𑀫𑀜𑁆𑀜𑁂𑀦𑁂𑀯 ¶ 𑀲𑁄𑀢𑀩𑁆𑀩𑀥𑀫𑁆𑀫𑀯𑀺𑀲𑁂𑀲𑀁 𑀆𑀫𑀲𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀫𑀦𑁄𑀤𑀺𑀝𑁆𑀞𑀺𑀓𑀭𑀡𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸𑀦𑀁 𑀅𑀦𑀼𑀧𑁂𑀓𑁆𑀔𑀦𑀲𑀼𑀧𑁆𑀧𑀝𑀺𑀯𑁂𑀥𑀸 𑀯𑀺𑀲𑁂𑀲𑀢𑁄 𑀫𑀦𑀲𑀺𑀓𑀸𑀭𑀧𑀝𑀺𑀩𑀤𑁆𑀥𑀸𑀢𑀺 𑀢𑁂 𑀯𑀼𑀢𑁆𑀢𑀦𑀬𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀤𑀻𑀧𑀓𑁂𑀦 𑀏𑀯𑀁𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸, 𑀲𑀯𑀦𑀥𑀸𑀭𑀡𑀯𑀘𑀻𑀧𑀭𑀺𑀘𑀬𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑁂𑀦 𑀲𑁄𑀢𑀸𑀯𑀥𑀸𑀦𑀧𑀝𑀺𑀩𑀤𑁆𑀥𑀸𑀢𑀺 𑀢𑁂 𑀅𑀯𑀺𑀓𑁆𑀔𑁂𑀧𑀤𑀻𑀧𑀓𑁂𑀦 𑀲𑀼𑀢-𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀬𑀸 ¶ 𑀥𑀫𑁆𑀫𑀲𑁆𑀲𑀯𑀦𑁂 𑀉𑀲𑁆𑀲𑀸𑀳𑀁 𑀚𑀦𑁂𑀢𑀺. 𑀢𑀢𑁆𑀣 𑀥𑀫𑁆𑀫𑀸𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸. 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸𑀢𑀺 ‘‘𑀇𑀥 𑀲𑀻𑀮𑀁 𑀓𑀣𑀺𑀢𑀁, 𑀇𑀥 𑀲𑀫𑀸𑀥𑀺, 𑀇𑀥 𑀧𑀜𑁆𑀜𑀸, 𑀏𑀢𑁆𑀢𑀓𑀸 𑀏𑀢𑁆𑀣 𑀅𑀦𑀼𑀲𑀦𑁆𑀥𑀺𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀦𑀲𑀸 𑀅𑀦𑀼 𑀅𑀦𑀼 𑀧𑁂𑀓𑁆𑀔𑀺𑀢𑀸. 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀢𑀺 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀪𑀽𑀢𑀸𑀬, 𑀜𑀸𑀢𑀧𑀭𑀺𑀜𑁆𑀜𑀸𑀲𑀗𑁆𑀔𑀸𑀢𑀸𑀬 𑀯𑀸 𑀤𑀺𑀝𑁆𑀞𑀺𑀬𑀸 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀭𑀽𑀧𑀸𑀭𑀽𑀧𑀥𑀫𑁆𑀫𑁂 ‘‘𑀇𑀢𑀺 𑀭𑀽𑀧𑀁, 𑀏𑀢𑁆𑀢𑀓𑀁 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀲𑀼𑀝𑁆𑀞𑀼 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀝𑀺𑀯𑀺𑀤𑁆𑀥𑀸.

𑀲𑀓𑀮𑁂𑀦 𑀯𑀘𑀦𑁂𑀦𑀸𑀢𑀺 𑀧𑀼𑀩𑁆𑀩𑁂 𑀢𑀻𑀳𑀺 𑀧𑀤𑁂𑀳𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀅𑀤𑀳𑀦𑁆𑀢𑁄𑀢𑀺 ‘‘𑀫𑀫𑁂𑀤’’𑀦𑁆𑀢𑀺 𑀅𑀢𑁆𑀢𑀦𑀺 𑀅𑀝𑁆𑀞𑀧𑁂𑀦𑁆𑀢𑁄. 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀦𑁆𑀢𑀺 𑀅𑀓𑀢𑀜𑁆𑀜𑀼𑀢𑀁 ‘‘𑀇𑀥𑁂𑀓𑀘𑁆𑀘𑁄 𑀧𑀸𑀧𑀪𑀺𑀓𑁆𑀔𑀼 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀅𑀢𑁆𑀢𑀦𑁄 𑀤𑀳𑀢𑀻’’𑀢𑀺 (𑀧𑀸𑀭𑀸. 𑁧𑁯𑁫) 𑀏𑀯𑀁 𑀯𑀼𑀢𑁆𑀢𑀁 𑀅𑀦𑀭𑀺𑀬𑀯𑁄𑀳𑀸𑀭𑀸𑀯𑀢𑁆𑀣𑀁, 𑀲𑀸 𑀏𑀯 𑀅𑀦𑀭𑀺𑀬𑀯𑁄𑀳𑀸𑀭𑀸𑀯𑀢𑁆𑀣𑀸 𑀅𑀲𑀤𑁆𑀥𑀫𑁆𑀫𑁄. 𑀦𑀦𑀼 𑀘 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 ‘‘𑀫𑀫𑁂𑀤𑀁 𑀯𑀘𑀦’’𑀦𑁆𑀢𑀺 𑀅𑀥𑀺𑀫𑀸𑀦𑀲𑁆𑀲, 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀸𑀤𑀻𑀦𑀜𑁆𑀘 𑀢𑀤𑀸𑀲𑀗𑁆𑀓𑀸𑀬 𑀅𑀪𑀸𑀯𑀢𑁄 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀲𑀫𑀢𑀺𑀓𑁆𑀓𑀫𑀸𑀤𑀺𑀯𑀘𑀦𑀁 𑀦𑀺𑀭𑀢𑁆𑀣𑀓𑀦𑁆𑀢𑀺? 𑀦𑀬𑀺𑀤𑀫𑁂𑀯𑀁 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺 𑀯𑀤𑀦𑁆𑀢𑁂𑀦 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀺𑀪𑀸𑀯𑀺𑀢𑁄𑀢𑀺 𑀤𑀲𑁆𑀲𑀦𑀢𑁄. 𑀓𑁂𑀘𑀺 𑀧𑀦 ‘‘𑀤𑁂𑀯𑀢𑀸𑀦𑀁 𑀧𑀭𑀺𑀯𑀺𑀢𑀓𑁆𑀓𑀸𑀧𑁂𑀓𑁆𑀔𑀁 𑀢𑀣𑀸𑀯𑀘𑀦𑀦𑁆𑀢𑀺 𑀏𑀤𑀺𑀲𑀻 𑀘𑁄𑀤𑀦𑀸 𑀅𑀦𑀯𑀓𑀸𑀲𑀸𑀯𑀸’’𑀢𑀺 𑀯𑀤𑀦𑁆𑀢𑀺. 𑀢𑀲𑁆𑀫𑀺𑀁 𑀓𑀺𑀭 𑀔𑀡𑁂 𑀏𑀓𑀘𑁆𑀘𑀸𑀦𑀁 𑀤𑁂𑀯𑀢𑀸𑀦𑀁 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 ‘‘𑀪𑀕𑀯𑀸 𑀘 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀬𑀜𑁆𑀘 𑀆𑀬𑀲𑁆𑀫𑀸 𑀤𑁂𑀲𑀦𑀸𑀓𑀼𑀲𑀮𑁄, 𑀇𑀤𑀸𑀦𑀺 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀲𑀓𑁆𑀬𑀓𑀼𑀮𑀧𑁆𑀧𑀲𑀼𑀢𑁄 𑀢𑀣𑀸𑀕𑀢𑀲𑁆𑀲 𑀪𑀸𑀢𑀸 𑀘𑀽𑀴𑀧𑀺𑀢𑀼𑀧𑀼𑀢𑁆𑀢𑁄, 𑀓𑀺𑀁 𑀦𑀼 𑀔𑁄 𑀲𑀬𑀁 𑀲𑀘𑁆𑀙𑀺𑀓𑀢𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀉𑀤𑀸𑀳𑀼 𑀪𑀕𑀯𑀢𑁄𑀬𑁂𑀯 𑀯𑀘𑀦𑀁 𑀬𑀣𑀸𑀲𑀼𑀢’’𑀦𑁆𑀢𑀺. 𑀏𑀯𑀁 𑀢𑀤𑀸𑀲𑀗𑁆𑀓𑀺𑀢𑀧𑁆𑀧𑀓𑀸𑀭𑀢𑁄 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀲𑀫𑁄𑀓𑁆𑀓𑀫𑀸𑀤𑀺𑀢𑁄 𑀅𑀢𑀺𑀓𑁆𑀓𑀫𑀸𑀤𑀺 𑀯𑀺𑀪𑀸𑀯𑀺𑀢𑀦𑁆𑀢𑀺. 𑀅𑀧𑁆𑀧𑁂𑀢𑀻𑀢𑀺 𑀦𑀺𑀤𑀲𑁆𑀲𑁂𑀢𑀺. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀲𑀼 𑀬𑀣𑀸𑀭𑀳𑀁 𑀲𑀢𑁆𑀢𑁂 𑀦𑁂𑀢𑀻𑀢𑀺 𑀦𑁂𑀢𑁆𑀢𑀺, 𑀥𑀫𑁆𑀫𑁄𑀬𑁂𑀯 𑀦𑁂𑀢𑁆𑀢𑀺 𑀥𑀫𑁆𑀫𑀦𑁂𑀢𑁆𑀢𑀺.

𑀤𑀴𑁆𑀳𑀢𑀭𑀦𑀺𑀯𑀺𑀝𑁆𑀞𑀸 𑀯𑀺𑀘𑀺𑀓𑀺𑀘𑁆𑀙𑀸 𑀓𑀗𑁆𑀔𑀸. 𑀦𑀸𑀢𑀺𑀲𑀁𑀲𑀧𑁆𑀧𑀦𑀸 𑀫𑀢𑀺𑀪𑁂𑀤𑀫𑀢𑁆𑀢𑀸 𑀯𑀺𑀫𑀢𑀺. 𑀅𑀲𑁆𑀲𑀤𑁆𑀥𑀺𑀬𑀁 𑀯𑀺𑀦𑀸𑀲𑁂𑀢𑀺 𑀪𑀕𑀯𑀢𑀸 𑀤𑁂𑀲𑀺𑀢𑀢𑁆𑀢𑀸, 𑀲𑀫𑁆𑀫𑀼𑀔𑀸𑀯𑀲𑁆𑀲 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸, 𑀔𑀮𑀺𑀢𑀤𑀼𑀭𑀼𑀢𑁆𑀢𑀸𑀤𑀺𑀕𑀳𑀡𑀤𑁄𑀲𑀸𑀪𑀸𑀯𑀢𑁄 ¶ 𑀘. 𑀏𑀢𑁆𑀣 𑀘 𑀧𑀞𑀫𑀸𑀤𑀬𑁄 𑀢𑀺𑀲𑁆𑀲𑁄 𑀅𑀢𑁆𑀣𑀬𑁄𑀚𑀦𑀸 𑀆𑀓𑀸𑀭𑀸𑀤𑀺𑀅𑀢𑁆𑀣𑁂𑀲𑀼 𑀅𑀕𑁆𑀕𑀳𑀺𑀢𑀯𑀺𑀲𑁂𑀲𑀫𑁂𑀯 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑀺𑀢𑀸, 𑀢𑀢𑁄 𑀧𑀭𑀸 𑀘𑀢𑀲𑁆𑀲𑁄 𑀆𑀓𑀸𑀭𑀢𑁆𑀣𑀫𑁂𑀯 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀯𑀺𑀪𑀸𑀯𑀺𑀢𑀸, 𑀧𑀘𑁆𑀙𑀺𑀫𑀸 𑀧𑀦 𑀢𑀺𑀲𑁆𑀲𑁄 𑀬𑀣𑀸𑀓𑁆𑀓𑀫𑀁 𑀆𑀓𑀸𑀭𑀢𑁆𑀣𑀁 𑀦𑀺𑀤𑀲𑁆𑀲𑀦𑀢𑁆𑀣𑀁 𑀅𑀯𑀥𑀸𑀭𑀡𑀢𑁆𑀣𑀜𑁆𑀘 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀬𑁄𑀚𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀓-𑀲𑀤𑁆𑀤𑁄 𑀅𑀜𑁆𑀜𑀲𑁂𑀝𑁆𑀞𑀸𑀲𑀳𑀸𑀬𑀲𑀗𑁆𑀔𑁆𑀬𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑁂𑀲 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜𑀦𑁆𑀢𑀺 𑀇𑀢𑁆𑀣𑁂𑀓𑁂 𑀅𑀪𑀺𑀯𑀤𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁨𑁭) 𑀅𑀜𑁆𑀜𑀢𑁆𑀣𑁂 𑀤𑀺𑀲𑁆𑀲𑀢𑀺 ¶ , ‘‘𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁨𑁮) 𑀲𑁂𑀝𑁆𑀞𑀢𑁆𑀣𑁂, ‘‘𑀏𑀓𑁄 𑀯𑀽𑀧𑀓𑀝𑁆𑀞𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁪𑁦𑁫) 𑀅𑀲𑀳𑀸𑀬𑁂, ‘‘𑀏𑀓𑁄𑀯 𑀔𑁄, 𑀪𑀺𑀓𑁆𑀔𑀯𑁂, 𑀔𑀡𑁄 𑀘 𑀲𑀫𑀬𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬𑀸’’𑀢𑀺𑀆𑀤𑀻𑀲𑀼 𑀲𑀗𑁆𑀔𑁆𑀬𑀸𑀬𑀁. 𑀇𑀥𑀸𑀧𑀺 𑀲𑀗𑁆𑀔𑁆𑀬𑀸𑀬𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑀦𑁆𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑀦𑀺𑀤𑁆𑀤𑁂𑀲𑁄’’𑀢𑀺. 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘𑀸𑀢𑀺 𑀬𑀼𑀢𑁆𑀢𑀓𑀸𑀮𑀜𑁆𑀘 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀜𑁆𑀘 𑀔𑀡𑁄𑀢𑀺 𑀑𑀓𑀸𑀲𑁄. 𑀢𑀣𑀸𑀕𑀢𑀼𑀧𑁆𑀧𑀸𑀤𑀸𑀤𑀺𑀓𑁄 𑀳𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀑𑀓𑀸𑀲𑁄 𑀢𑀧𑁆𑀧𑀘𑁆𑀘𑀬𑀧𑀝𑀺𑀮𑀸𑀪𑀳𑁂𑀢𑀼𑀢𑁆𑀢𑀸. 𑀔𑀡𑁄 𑀏𑀯 𑀘 𑀲𑀫𑀬𑁄. 𑀬𑁄 ‘‘𑀔𑀡𑁄’’𑀢𑀺 𑀘 ‘‘𑀲𑀫𑀬𑁄’’𑀢𑀺 𑀘 𑀯𑀼𑀘𑁆𑀘𑀢𑀺, 𑀲𑁄 𑀏𑀓𑁄𑀯𑀸𑀢𑀺 𑀳𑀺 𑀅𑀢𑁆𑀣𑁄 𑀫𑀳𑀸𑀲𑀫𑀬𑁄𑀢𑀺 𑀫𑀳𑀸𑀲𑀫𑀽𑀳𑁄. 𑀲𑀫𑀬𑁄𑀧𑀺 𑀔𑁄𑀢𑀺 𑀲𑀺𑀓𑁆𑀔𑀸𑀧𑀤𑀧𑀽𑀭𑀡𑀲𑁆𑀲 𑀳𑁂𑀢𑀼𑀧𑀺. 𑀲𑀫𑀬𑀧𑁆𑀧𑀯𑀸𑀤𑀓𑁂𑀢𑀺 𑀤𑀺𑀝𑁆𑀞𑀺𑀧𑁆𑀧𑀯𑀸𑀤𑀓𑁂. 𑀢𑀢𑁆𑀣 𑀳𑀺 𑀦𑀺𑀲𑀺𑀦𑁆𑀦𑀸 𑀢𑀺𑀢𑁆𑀣𑀺𑀬𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀫𑀬𑀁 𑀧𑀯𑀤𑀦𑁆𑀢𑀻𑀢𑀺. 𑀅𑀢𑁆𑀣𑀸𑀪𑀺𑀲𑀫𑀬𑀸𑀢𑀺 𑀳𑀺𑀢𑀧𑀝𑀺𑀮𑀸𑀪𑀸. 𑀅𑀪𑀺𑀲𑀫𑁂𑀢𑀩𑁆𑀩𑁄𑀢𑀺 𑀅𑀪𑀺𑀲𑀫𑀬𑁄, 𑀅𑀪𑀺𑀲𑀫𑀬𑁄 𑀅𑀢𑁆𑀣𑁄 𑀅𑀪𑀺𑀲𑀫𑀬𑀝𑁆𑀞𑁄𑀢𑀺 𑀧𑀻𑀴𑀦𑀸𑀤𑀻𑀦𑀺 𑀅𑀪𑀺𑀲𑀫𑁂𑀢𑀩𑁆𑀩𑀪𑀸𑀯𑁂𑀦 𑀏𑀓𑀻𑀪𑀸𑀯𑀁 𑀉𑀧𑀦𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀺. 𑀅𑀪𑀺𑀲𑀫𑀬𑀲𑁆𑀲 𑀯𑀸 𑀧𑀝𑀺𑀯𑁂𑀥𑀲𑁆𑀲 𑀯𑀺𑀲𑀬𑀪𑀽𑀢𑁄 𑀅𑀢𑁆𑀣𑁄 𑀅𑀪𑀺𑀲𑀫𑀬𑀝𑁆𑀞𑁄𑀢𑀺. 𑀢𑀸𑀦𑁂𑀯 𑀢𑀣𑀸 𑀏𑀓𑀢𑁆𑀢𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀧𑀻𑀴𑀦𑀁 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀢𑀁𑀲𑀫𑀗𑁆𑀕𑀺𑀦𑁄 𑀳𑀺𑀁𑀲𑀦𑀁 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀓𑀭𑀡𑀁. 𑀲𑀦𑁆𑀢𑀸𑀧𑁄 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀤𑀺𑀯𑀲𑁂𑀦 𑀲𑀦𑁆𑀢𑀸𑀧𑀦𑀁 𑀧𑀭𑀺𑀤𑀳𑀦𑀁.

𑀢𑀢𑁆𑀣 𑀲𑀳𑀓𑀸𑀭𑀻𑀓𑀸𑀭𑀡𑀁 𑀲𑀦𑁆𑀦𑀺𑀚𑁆𑀛𑀁 𑀲𑀫𑁂𑀢𑀺 𑀲𑀫𑀯𑁂𑀢𑀻𑀢𑀺 𑀲𑀫𑀬𑁄, 𑀲𑀫𑀯𑀸𑀬𑁄. 𑀲𑀫𑁂𑀢𑀺 𑀲𑀫𑀸𑀕𑀘𑁆𑀙𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀏𑀢𑁆𑀣 𑀢𑀤𑀸𑀥𑀸𑀭𑀧𑀼𑀕𑁆𑀕𑀮𑁂𑀳𑀻𑀢𑀺 𑀲𑀫𑀬𑁄, 𑀔𑀡𑁄. 𑀲𑀫𑁂𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸 𑀲𑀁𑀕𑀘𑁆𑀙𑀢𑀺 𑀲𑀢𑁆𑀢𑁄, 𑀲𑀪𑀸𑀯𑀥𑀫𑁆𑀫𑁄 𑀯𑀸 𑀲𑀳𑀚𑀸𑀢𑀸𑀤𑀻𑀳𑀺 𑀉𑀧𑁆𑀧𑀸𑀤𑀸𑀤𑀻𑀳𑀺 𑀯𑀸𑀢𑀺 𑀲𑀫𑀬𑁄, 𑀓𑀸𑀮𑁄. 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀢𑀸𑀬 𑀅𑀢𑁆𑀣𑀢𑁄 𑀅𑀪𑀽𑀢𑁄𑀧𑀺 𑀳𑀺 𑀓𑀸𑀮𑁄 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀅𑀥𑀺𑀓𑀭𑀡𑀁 𑀓𑀭𑀡𑀁 ¶ 𑀯𑀺𑀬 𑀘 𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑁂𑀦 𑀭𑀽𑀧𑁂𑀦 𑀯𑁄𑀳𑀭𑀻𑀬𑀢𑀻𑀢𑀺. 𑀲𑀫𑀁, 𑀲𑀳 𑀯𑀸 𑀅𑀯𑀬𑀯𑀸𑀦𑀁 𑀅𑀬𑀦𑀁 𑀧𑀯𑀢𑁆𑀢𑀺 𑀅𑀯𑀝𑁆𑀞𑀸𑀦𑀦𑁆𑀢𑀺 𑀲𑀫𑀬𑁄, 𑀲𑀫𑀽𑀳𑁄 𑀬𑀣𑀸 ‘‘𑀲𑀫𑀼𑀤𑀸𑀬𑁄’’𑀢𑀺. 𑀅𑀯𑀬𑀯𑀲𑀳𑀸𑀯𑀝𑁆𑀞𑀸𑀦𑀫𑁂𑀯 𑀳𑀺 𑀲𑀫𑀽𑀳𑁄𑀢𑀺. 𑀅𑀯𑀲𑁂𑀲𑀧𑀘𑁆𑀘𑀬𑀸𑀦𑀁 𑀲𑀫𑀸𑀕𑀫𑁂 𑀏𑀢𑀺 𑀨𑀮𑀁 𑀏𑀢𑀲𑁆𑀫𑀸 𑀉𑀧𑁆𑀧𑀚𑁆𑀚𑀢𑀺 𑀧𑀯𑀢𑁆𑀢𑀢𑀺 𑀘𑀸𑀢𑀺 𑀲𑀫𑀬𑁄, 𑀳𑁂𑀢𑀼 𑀬𑀣𑀸 ‘‘𑀲𑀫𑀼𑀤𑀬𑁄’’𑀢𑀺. 𑀲𑀫𑁂𑀢𑀺 𑀲𑀁𑀬𑁄𑀚𑀦𑀪𑀸𑀯𑀢𑁄 𑀲𑀫𑁆𑀩𑀦𑁆𑀥𑁄 𑀏𑀢𑀺 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀧𑀯𑀢𑁆𑀢𑀢𑀺, 𑀤𑀴𑁆𑀳𑀕𑁆𑀕𑀳𑀡𑀪𑀸𑀯𑀢𑁄 𑀯𑀸 𑀲𑀁𑀬𑀼𑀢𑁆𑀢𑀸 𑀅𑀬𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺 𑀲𑀢𑁆𑀢𑀸 𑀬𑀣𑀸𑀪𑀺𑀦𑀺𑀯𑁂𑀲𑀁 𑀏𑀢𑁂𑀦𑀸𑀢𑀺 𑀲𑀫𑀬𑁄, 𑀤𑀺𑀝𑁆𑀞𑀺; 𑀤𑀺𑀝𑁆𑀞𑀺𑀲𑀜𑁆𑀜𑁄𑀚𑀦𑁂𑀦 𑀳𑀺 𑀲𑀢𑁆𑀢𑀸 𑀅𑀢𑀺𑀯𑀺𑀬 𑀩𑀚𑁆𑀛𑀦𑁆𑀢𑀻𑀢𑀺. 𑀲𑀫𑀺𑀢𑀺 𑀲𑀗𑁆𑀕𑀢𑀺 𑀲𑀫𑁄𑀥𑀸𑀦𑀦𑁆𑀢𑀺 𑀲𑀫𑀬𑁄, 𑀧𑀝𑀺𑀮𑀸𑀪𑁄. 𑀲𑀫𑀬𑀦𑀁, 𑀲𑀫𑁆𑀫𑀸 𑀯𑀸 𑀅𑀬𑀦𑀁 𑀅𑀧𑀕𑀫𑁄𑀢𑀺 𑀲𑀫𑀬𑁄, 𑀧𑀳𑀸𑀦𑀁. 𑀅𑀪𑀺𑀫𑀼𑀔𑀁 𑀜𑀸𑀡𑁂𑀦 𑀲𑀫𑁆𑀫𑀸 𑀏𑀢𑀩𑁆𑀩𑁄 𑀅𑀪𑀺𑀲𑀫𑁂𑀢𑀩𑁆𑀩𑁄𑀢𑀺 𑀅𑀪𑀺𑀲𑀫𑀬𑁄, 𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑁄 𑀲𑀪𑀸𑀯𑁄. 𑀅𑀪𑀺𑀫𑀼𑀔𑀪𑀸𑀯𑁂𑀦 𑀲𑀫𑁆𑀫𑀸 𑀏𑀢𑀺 𑀕𑀘𑁆𑀙𑀢𑀺 𑀩𑀼𑀚𑁆𑀛𑀢𑀻𑀢𑀺 𑀅𑀪𑀺𑀲𑀫𑀬𑁄, 𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑀲𑀪𑀸𑀯𑀸𑀯𑀩𑁄𑀥𑁄. 𑀏𑀯𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀫𑀬-𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀫𑀬𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂 𑀅𑀪𑀺𑀲𑀫𑀬𑀲𑀤𑁆𑀤𑀲𑁆𑀲 𑀉𑀤𑀸𑀳𑀭𑀡𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀲𑁆𑀲𑀸𑀢𑀺 𑀲𑀫𑀬𑀲𑀤𑁆𑀤𑀲𑁆𑀲 ¶ . 𑀓𑀸𑀮𑁄 𑀅𑀢𑁆𑀣𑁄 𑀲𑀫𑀯𑀸𑀬𑀸𑀤𑀻𑀦𑀁 𑀅𑀢𑁆𑀣𑀸𑀦𑀁 𑀇𑀥 𑀅𑀲𑀫𑁆𑀪𑀯𑀢𑁄, 𑀤𑁂𑀲𑀤𑁂𑀲𑀓𑀧𑀭𑀺𑀲𑀸𑀦𑀁 𑀯𑀺𑀬 𑀲𑀼𑀢𑁆𑀢𑀲𑁆𑀲 𑀦𑀺𑀤𑀸𑀦𑀪𑀸𑀯𑁂𑀦 𑀓𑀸𑀮𑀲𑁆𑀲 𑀅𑀧𑀤𑀺𑀲𑀺𑀢𑀩𑁆𑀩𑀢𑁄 𑀘.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀅𑀦𑀺𑀬𑀫𑀺𑀢𑀯𑀲𑁂𑀦𑁂𑀯 𑀓𑀸𑀮𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀦 𑀉𑀢𑀼𑀲𑀁𑀯𑀘𑁆𑀙𑀭𑀸𑀤𑀺𑀯𑀲𑁂𑀦 𑀦𑀺𑀬𑀫𑁂𑀢𑁆𑀯𑀸𑀢𑀺? 𑀆𑀳 𑁋 ‘‘𑀢𑀢𑁆𑀣 𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀉𑀢𑀼𑀲𑀁𑀯𑀘𑁆𑀙𑀭𑀸𑀤𑀺𑀯𑀲𑁂𑀦 𑀦𑀺𑀬𑀫𑀁 𑀅𑀓𑀢𑁆𑀯𑀸 𑀲𑀫𑀬𑀲𑀤𑁆𑀤𑀲𑁆𑀲 𑀯𑀘𑀦𑁂𑀦 𑀅𑀬𑀫𑁆𑀧𑀺 𑀕𑀼𑀡𑁄 𑀮𑀤𑁆𑀥𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂 𑀯𑀸 𑀇𑀫𑁂’’𑀢𑀺𑀆𑀤𑀺𑀫𑀸𑀳. 𑀲𑀸𑀫𑀜𑁆𑀜𑀚𑁄𑀢𑀦𑀸 𑀳𑀺 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀻𑀢𑀺. 𑀢𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑀫𑀬𑁄 𑀤𑁂𑀯𑀲𑀺𑀓𑀁 𑀛𑀸𑀦𑀨𑀮𑀲𑀫𑀸𑀧𑀢𑁆𑀢𑀻𑀳𑀺 𑀯𑀻𑀢𑀺𑀦𑀸𑀫𑀦𑀓𑀸𑀮𑁄, 𑀯𑀺𑀲𑁂𑀲𑀢𑁄 𑀲𑀢𑁆𑀢𑀲𑀢𑁆𑀢𑀸𑀳𑀸𑀦𑀺. 𑀲𑀼𑀧𑁆𑀧𑀓𑀸𑀲𑀸𑀢𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀲𑀁𑀓𑀫𑁆𑀧𑀦𑀑𑀪𑀸𑀲𑀧𑀸𑀢𑀼𑀪𑀸𑀯𑀸𑀤𑀻𑀳𑀺 𑀧𑀸𑀓𑀝𑀸. 𑀬𑀣𑀸𑀯𑀼𑀢𑁆𑀢𑀪𑁂𑀤𑁂𑀲𑀼 𑀏𑀯 𑀲𑀫𑀬𑁂𑀲𑀼 𑀏𑀓𑀤𑁂𑀲𑀁 𑀧𑀓𑀸𑀭𑀦𑁆𑀢𑀭𑁂𑀳𑀺 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀘𑀸𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀣𑀸 𑀳𑀺 𑀜𑀸𑀡𑀓𑀺𑀘𑁆𑀘𑀲𑀫𑀬𑁄 𑀅𑀢𑁆𑀢𑀳𑀺𑀢𑀧𑀝𑀺𑀧𑀢𑁆𑀢𑀺𑀲𑀫𑀬𑁄 𑀘 𑀅𑀪𑀺𑀲𑀫𑁆𑀩𑁄𑀥𑀺𑀲𑀫𑀬𑁄, 𑀅𑀭𑀺𑀬𑀢𑀼𑀡𑁆𑀳𑀻𑀪𑀸𑀯𑀲𑀫𑀬𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑀫𑀬𑁄, 𑀓𑀭𑀼𑀡𑀸𑀓𑀺𑀘𑁆𑀘𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀺𑀓𑀣𑀸𑀲𑀫𑀬𑁄 𑀤𑁂𑀲𑀦𑀸𑀲𑀫𑀬𑁄 𑀏𑀯.

𑀓𑀭𑀡𑀯𑀘𑀦𑁂𑀦 ¶ 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀅𑀪𑀺𑀥𑀫𑁆𑀫𑀢𑀤𑀜𑁆𑀜𑀲𑀼𑀢𑁆𑀢𑀧𑀤𑀯𑀺𑀦𑀬𑁂𑀲𑀼. 𑀢𑀣𑀸𑀢𑀺 𑀪𑀼𑀫𑁆𑀫𑀓𑀭𑀡𑁂𑀳𑀺. 𑀅𑀥𑀺𑀓𑀭𑀡𑀢𑁆𑀣𑁄 𑀆𑀥𑀸𑀭𑀢𑁆𑀣𑁄. 𑀪𑀸𑀯𑁄 𑀦𑀸𑀫 𑀓𑀺𑀭𑀺𑀬𑀸, 𑀢𑀸𑀬 𑀓𑀺𑀭𑀺𑀬𑀦𑁆𑀢𑀭𑀮𑀓𑁆𑀔𑀡𑀁 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀁. 𑀢𑀢𑁆𑀣 𑀬𑀣𑀸 𑀓𑀸𑀮𑁄 𑀲𑀪𑀸𑀯𑀥𑀫𑁆𑀫𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀬𑀁 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀆𑀥𑀸𑀭𑀪𑀸𑀯𑁂𑀦 𑀧𑀜𑁆𑀜𑀸𑀢𑁄 𑀢𑀗𑁆𑀔𑀡𑀧𑁆𑀧𑀯𑀢𑁆𑀢𑀸𑀦𑀁 𑀢𑀢𑁄 𑀧𑀼𑀩𑁆𑀩𑁂 𑀧𑀭𑀢𑁄 𑀘 𑀅𑀪𑀸𑀯𑀢𑁄 ‘‘𑀧𑀼𑀩𑁆𑀩𑀡𑁆𑀳𑁂 𑀚𑀸𑀢𑁄, 𑀲𑀸𑀬𑀦𑁆𑀳𑁂 𑀕𑀘𑁆𑀙𑀢𑀻’’𑀢𑀺 𑀘 𑀆𑀤𑀻𑀲𑀼, 𑀲𑀫𑀽𑀳𑁄 𑀘 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑁄 𑀅𑀯𑀬𑀯𑀸𑀦𑀁 𑀆𑀥𑀸𑀭𑀪𑀸𑀯𑁂𑀦 𑀧𑀜𑁆𑀜𑀸𑀧𑀻𑀬𑀢𑀺 ‘‘𑀭𑀼𑀓𑁆𑀔𑁂 𑀲𑀸𑀔𑀸, 𑀬𑀯𑀭𑀸𑀲𑀺𑀬𑀁 𑀲𑀫𑁆𑀪𑀽𑀢𑁄’’𑀢𑀺𑀆𑀤𑀻𑀲𑀼, 𑀏𑀯𑀁 𑀇𑀥𑀸𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀥𑀺𑀓𑀭𑀡𑀜𑁆𑀳𑀺…𑀧𑁂… 𑀥𑀫𑁆𑀫𑀸𑀦’’𑀦𑁆𑀢𑀺. 𑀬𑀲𑁆𑀫𑀺𑀁 𑀓𑀸𑀮𑁂 𑀥𑀫𑁆𑀫𑀧𑀼𑀜𑁆𑀚𑁂 𑀯𑀸 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀏𑀯 𑀓𑀸𑀮𑁂 𑀥𑀫𑁆𑀫𑀧𑀼𑀜𑁆𑀚𑁂 𑀘 𑀨𑀲𑁆𑀲𑀸𑀤𑀬𑁄𑀧𑀺 𑀳𑁄𑀦𑁆𑀢𑀻𑀢𑀺 𑀅𑀬𑀜𑁆𑀳𑀺 𑀢𑀢𑁆𑀣 𑀅𑀢𑁆𑀣𑁄. 𑀬𑀣𑀸 𑀘 ‘‘𑀕𑀸𑀯𑀻𑀲𑀼 𑀤𑀼𑀬𑁆𑀳𑀫𑀸𑀦𑀸𑀲𑀼 𑀕𑀢𑁄, 𑀤𑀼𑀤𑁆𑀥𑀸𑀲𑀼 𑀆𑀕𑀢𑁄’’𑀢𑀺 𑀤𑁄𑀳𑀦𑀓𑀺𑀭𑀺𑀬𑀸𑀬 𑀕𑀫𑀦𑀓𑀺𑀭𑀺𑀬𑀸 𑀮𑀓𑁆𑀔𑀻𑀬𑀢𑀺, 𑀏𑀯𑀁 𑀇𑀥𑀸𑀧𑀺 ‘‘𑀬𑀲𑁆𑀫𑀺𑀁 𑀲𑀫𑀬𑁂, 𑀢𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀘 𑀯𑀼𑀢𑁆𑀢𑁂 ‘‘𑀲𑀢𑀻’’𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀫𑀸𑀦𑁄 𑀏𑀯 𑀳𑁄𑀢𑀺 𑀧𑀤𑀢𑁆𑀣𑀲𑁆𑀲 𑀲𑀢𑁆𑀢𑀸𑀯𑀺𑀭𑀳𑀸𑀪𑀸𑀯𑀢𑁄𑀢𑀺 𑀲𑀫𑀬𑀲𑁆𑀲 𑀲𑀢𑁆𑀢𑀸𑀓𑀺𑀭𑀺𑀬𑀸𑀬 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑀺𑀭𑀺𑀬𑀸 𑀨𑀲𑁆𑀲𑀸𑀤𑀻𑀦𑀁 𑀪𑀯𑀦𑀓𑀺𑀭𑀺𑀬𑀸 𑀘 𑀮𑀓𑁆𑀔𑀻𑀬𑀢𑀺. 𑀬𑀲𑁆𑀫𑀺𑀁 𑀲𑀫𑀬𑁂𑀢𑀺 𑀬𑀲𑁆𑀫𑀺𑀁 𑀦𑀯𑀫𑁂 𑀔𑀡𑁂, 𑀬𑀲𑁆𑀫𑀺𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀳𑁂𑀢𑀼𑀫𑁆𑀳𑀺, 𑀧𑀘𑁆𑀘𑀬𑀲𑀫𑀯𑀸𑀬𑁂 𑀯𑀸 𑀲𑀢𑀺 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂, 𑀳𑁂𑀢𑀼𑀫𑁆𑀳𑀺, 𑀧𑀘𑁆𑀘𑀬𑀲𑀫𑀯𑀸𑀬𑁂 𑀯𑀸 𑀨𑀲𑁆𑀲𑀸𑀤𑀬𑁄𑀧𑀺 𑀳𑁄𑀦𑁆𑀢𑀻𑀢𑀺 𑀉𑀪𑀬𑀢𑁆𑀣 𑀲𑀫𑀬𑀲𑀤𑁆𑀤𑁂 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁄 𑀓𑀢𑁄 𑀮𑀓𑁆𑀔𑀡𑀪𑀽𑀢𑀪𑀸𑀯𑀬𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀔𑀡…𑀧𑁂… 𑀮𑀓𑁆𑀔𑀻𑀬𑀢𑀻’’𑀢𑀺.

𑀳𑁂𑀢𑀼𑀅𑀢𑁆𑀣𑁄 ¶ 𑀓𑀭𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀺 ‘‘𑀅𑀦𑁆𑀦𑁂𑀦 𑀯𑀲𑀢𑀺, 𑀅𑀚𑁆𑀛𑁂𑀦𑁂𑀦 𑀯𑀲𑀢𑀺, 𑀨𑀭𑀲𑀼𑀦𑀸 𑀙𑀺𑀦𑁆𑀤𑀢𑀺, 𑀓𑀼𑀤𑀸𑀮𑁂𑀦 𑀔𑀡𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀯𑀻𑀢𑀺𑀓𑁆𑀓𑀫𑀜𑁆𑀳𑀺 𑀲𑀼𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀑𑀢𑀺𑀡𑁆𑀡𑀯𑀢𑁆𑀣𑀼𑀓𑀁 𑀧𑀼𑀕𑁆𑀕𑀮𑀁 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀕𑀭𑀳𑀺𑀢𑁆𑀯𑀸 𑀘 𑀢𑀁 𑀢𑀁 𑀯𑀢𑁆𑀣𑀼𑀁 𑀑𑀢𑀺𑀡𑁆𑀡𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑁂𑀦𑁂𑀯 𑀓𑀸𑀮𑁂𑀦 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀧𑁂𑀦𑁆𑀢𑁄 𑀪𑀕𑀯𑀸 𑀯𑀺𑀳𑀭𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀜𑁆𑀘 𑀅𑀧𑁂𑀓𑁆𑀔𑀫𑀸𑀦𑁄 𑀢𑀢𑀺𑀬𑀧𑀸𑀭𑀸𑀚𑀺𑀓𑀸𑀤𑀻𑀲𑀼 𑀯𑀺𑀬.

𑀅𑀘𑁆𑀘𑀦𑁆𑀢𑀫𑁂𑀯 𑀆𑀭𑀫𑁆𑀪𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑁂𑀲𑀦𑀸𑀦𑀺𑀝𑁆𑀞𑀸𑀦𑀁 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀓𑀭𑀼𑀡𑀸𑀯𑀺𑀳𑀸𑀭𑁂𑀦. 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑀚𑁄𑀢𑀦𑀢𑁆𑀣𑀁. 𑀉𑀧𑀬𑁄𑀕𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄 𑀬𑀣𑀸 ‘‘𑀫𑀸𑀲𑀁 𑀅𑀚𑁆𑀛𑁂𑀢𑀻’’𑀢𑀺.

𑀧𑁄𑀭𑀸𑀡𑀸𑀢𑀺 ¶ 𑀅𑀝𑁆𑀞𑀓𑀣𑀸𑀘𑀭𑀺𑀬𑀸. 𑀅𑀪𑀺𑀮𑀸𑀧𑀫𑀢𑁆𑀢𑀪𑁂𑀤𑁄𑀢𑀺 𑀯𑀘𑀦𑀫𑀢𑁆𑀢𑁂𑀦 𑀯𑀺𑀲𑁂𑀲𑁄. 𑀢𑁂𑀦 𑀲𑀼𑀢𑁆𑀢𑀯𑀺𑀦𑀬𑁂𑀲𑀼 𑀯𑀺𑀪𑀢𑁆𑀢𑀺𑀩𑁆𑀬𑀢𑁆𑀢𑀬𑁄 𑀓𑀢𑁄𑀢𑀺 𑀤𑀲𑁆𑀲𑁂𑀢𑀺.

𑀲𑁂𑀝𑁆𑀞𑀦𑁆𑀢𑀺 𑀲𑁂𑀝𑁆𑀞𑀯𑀸𑀘𑀓𑀁 𑀯𑀘𑀦𑀁 ‘‘𑀲𑁂𑀝𑁆𑀞’’𑀦𑁆𑀢𑀺 𑀯𑀼𑀢𑁆𑀢𑀁 𑀲𑁂𑀝𑁆𑀞𑀕𑀼𑀡𑀲𑀳𑀘𑀭𑀡𑀢𑁄. 𑀢𑀣𑀸 𑀉𑀢𑁆𑀢𑀫𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀕𑀸𑀭𑀯𑀬𑀼𑀢𑁆𑀢𑁄𑀢𑀺 𑀕𑀭𑀼𑀪𑀸𑀯𑀬𑀼𑀢𑁆𑀢𑁄 𑀕𑀭𑀼𑀕𑀼𑀡𑀬𑁄𑀕𑀢𑁄, 𑀕𑀭𑀼𑀓𑀭𑀡𑀸𑀭𑀳𑀢𑀸𑀬 𑀯𑀸 𑀕𑀸𑀭𑀯𑀬𑀼𑀢𑁆𑀢𑁄. 𑀯𑀼𑀢𑁆𑀢𑁄𑀬𑁂𑀯, 𑀦 𑀧𑀦 𑀇𑀥 𑀯𑀢𑁆𑀢𑀩𑁆𑀩𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑁆𑀲 𑀇𑀫𑀺𑀲𑁆𑀲𑀸 𑀅𑀝𑁆𑀞𑀓𑀣𑀸𑀬 𑀏𑀓𑀤𑁂𑀲𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀧𑀭𑁄 𑀦𑀬𑁄 (𑀲𑀁. 𑀦𑀺. 𑀝𑀻. 𑁧.𑁧.𑁧; 𑀲𑀸𑀭𑀢𑁆𑀣. 𑀝𑀻. 𑁧.𑀯𑀺𑀦𑀬𑀸𑀦𑀺𑀲𑀁𑀲𑀓𑀣𑀸𑀯𑀡𑁆𑀡𑀦𑀸; 𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁧𑁪𑁪; 𑀇𑀢𑀺𑀯𑀼. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑁋 𑀪𑀸𑀕𑀯𑀸𑀢𑀺 𑀪𑀕𑀯𑀸, 𑀪𑀢𑀯𑀸𑀢𑀺 𑀪𑀕𑀯𑀸, 𑀪𑀸𑀕𑁂 𑀯𑀦𑀻𑀢𑀺 𑀪𑀕𑀯𑀸, 𑀪𑀕𑁂 𑀯𑀦𑀻𑀢𑀺 𑀪𑀕𑀯𑀸, 𑀪𑀢𑁆𑀢𑀯𑀸𑀢𑀺 𑀪𑀕𑀯𑀸, 𑀪𑀕𑁂 𑀯𑀫𑀻𑀢𑀺 𑀪𑀕𑀯𑀸, 𑀪𑀸𑀕𑁂 𑀯𑀫𑀻𑀢𑀺 𑀪𑀕𑀯𑀸.

𑀪𑀕𑀯𑀸 𑀪𑀢𑀯𑀸 𑀪𑀸𑀕𑁂, 𑀪𑀕𑁂 𑀘 𑀯𑀦𑀺 𑀪𑀢𑁆𑀢𑀯𑀸;

𑀪𑀕𑁂 𑀯𑀫𑀺 𑀢𑀣𑀸 𑀪𑀸𑀕𑁂, 𑀯𑀫𑀻𑀢𑀺 𑀪𑀕𑀯𑀸 𑀚𑀺𑀦𑁄.

𑀢𑀢𑁆𑀣 𑀓𑀣𑀁 𑀪𑀸𑀕𑀯𑀸𑀢𑀺 𑀪𑀕𑀯𑀸? 𑀬𑁂 𑀢𑁂 𑀲𑀻𑀮𑀸𑀤𑀬𑁄 𑀥𑀫𑁆𑀫𑀓𑁆𑀔𑀦𑁆𑀥𑀸 𑀕𑀼𑀡𑀪𑀸𑀕𑀸 𑀕𑀼𑀡𑀓𑁄𑀝𑁆𑀞𑀸𑀲𑀸, 𑀢𑁂 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀦𑀺𑀭𑀢𑀺𑀲𑀬𑀸 𑀢𑀣𑀸𑀕𑀢𑀲𑁆𑀲 𑀅𑀢𑁆𑀣𑀺 𑀉𑀧𑀮𑀩𑁆𑀪𑀦𑁆𑀢𑀺. 𑀢𑀣𑀸 𑀳𑀺𑀲𑁆𑀲 𑀲𑀻𑀮𑀁, 𑀲𑀫𑀸𑀥𑀺, 𑀧𑀜𑁆𑀜𑀸, 𑀯𑀺𑀫𑀼𑀢𑁆𑀢𑀺, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁, 𑀳𑀺𑀭𑀻, 𑀑𑀢𑁆𑀢𑀧𑁆𑀧𑀁, 𑀲𑀤𑁆𑀥𑀸, 𑀯𑀻𑀭𑀺𑀬𑀁, 𑀲𑀢𑀺 𑀲𑀫𑁆𑀧𑀚𑀜𑁆𑀜𑀁, 𑀲𑀻𑀮𑀯𑀺𑀲𑀼𑀤𑁆𑀥𑀺, 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺, 𑀲𑀫𑀣𑁄, 𑀯𑀺𑀧𑀲𑁆𑀲𑀦𑀸, 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺, 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺, 𑀢𑀬𑁄 ¶ 𑀲𑀫𑁆𑀫𑀸𑀯𑀺𑀢𑀓𑁆𑀓𑀸, 𑀢𑀺𑀲𑁆𑀲𑁄 𑀅𑀦𑀯𑀚𑁆𑀚𑀲𑀜𑁆𑀜𑀸, 𑀢𑀺𑀲𑁆𑀲𑁄 𑀥𑀸𑀢𑀼𑀬𑁄, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀅𑀭𑀺𑀬𑀨𑀮𑀸𑀦𑀺, 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸, 𑀘𑀢𑀼𑀬𑁄𑀦𑀺𑀧𑀝𑀺𑀘𑁆𑀙𑁂𑀤𑀓𑀜𑀸𑀡𑀁, 𑀘𑀢𑁆𑀢𑀸𑀭𑁄 𑀅𑀭𑀺𑀬𑀯𑀁𑀲𑀸, 𑀘𑀢𑁆𑀢𑀸𑀭𑀺 𑀯𑁂𑀲𑀸𑀭𑀚𑁆𑀚𑀜𑀸𑀡𑀸𑀦𑀺, 𑀧𑀜𑁆𑀘 𑀧𑀥𑀸𑀦𑀺𑀬𑀗𑁆𑀕𑀸𑀦𑀺, 𑀧𑀜𑁆𑀘𑀗𑁆𑀕𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀺, 𑀧𑀜𑁆𑀘𑀜𑀸𑀡𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀺, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀧𑀜𑁆𑀘 𑀦𑀺𑀲𑁆𑀲𑀸𑀭𑀡𑀻𑀬𑀸 𑀥𑀸𑀢𑀼𑀬𑁄, 𑀧𑀜𑁆𑀘 𑀯𑀺𑀫𑀼𑀢𑁆𑀢𑀸𑀬𑀢𑀦𑀜𑀸𑀡𑀸𑀦𑀺, 𑀧𑀜𑁆𑀘 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀲𑀜𑁆𑀜𑀸, 𑀙 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀺, 𑀙 𑀕𑀸𑀭𑀯𑀸, 𑀙 𑀦𑀺𑀲𑁆𑀲𑀸𑀭𑀡𑀻𑀬𑀸 𑀥𑀸𑀢𑀼𑀬𑁄, 𑀙 𑀲𑀢𑀢𑀯𑀺𑀳𑀸𑀭𑀸, 𑀙 𑀅𑀦𑀼𑀢𑁆𑀢𑀭𑀺𑀬𑀸𑀦𑀺, 𑀙 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸 𑀲𑀜𑁆𑀜𑀸, 𑀙 𑀅𑀪𑀺𑀜𑁆𑀜𑀸, 𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺, 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸, 𑀲𑀢𑁆𑀢 𑀅𑀭𑀺𑀬𑀥𑀫𑁆𑀫𑀸, 𑀲𑀢𑁆𑀢 𑀅𑀭𑀺𑀬𑀥𑀦𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀲𑀢𑁆𑀢 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀸, 𑀲𑀢𑁆𑀢 𑀦𑀺𑀚𑁆𑀚𑀭𑀯𑀢𑁆𑀣𑀽𑀦𑀺, 𑀲𑀢𑁆𑀢 ¶ 𑀲𑀜𑁆𑀜𑀸, 𑀲𑀢𑁆𑀢 𑀤𑀓𑁆𑀔𑀺𑀡𑁂𑀬𑁆𑀬𑀧𑀼𑀕𑁆𑀕𑀮𑀤𑁂𑀲𑀦𑀸, 𑀲𑀢𑁆𑀢 𑀔𑀻𑀡𑀸𑀲𑀯𑀩𑀮𑀤𑁂𑀲𑀦𑀸, 𑀅𑀝𑁆𑀞 𑀧𑀜𑁆𑀜𑀸𑀧𑀝𑀺𑀮𑀸𑀪𑀳𑁂𑀢𑀼𑀤𑁂𑀲𑀦𑀸, 𑀅𑀝𑁆𑀞 𑀲𑀫𑁆𑀫𑀢𑁆𑀢𑀸𑀦𑀺, 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸𑀢𑀺𑀓𑁆𑀓𑀫𑀸, 𑀅𑀝𑁆𑀞 𑀆𑀭𑀫𑁆𑀪𑀯𑀢𑁆𑀣𑀽𑀦𑀺, 𑀅𑀝𑁆𑀞 𑀅𑀓𑁆𑀔𑀡𑀤𑁂𑀲𑀦𑀸, 𑀅𑀝𑁆𑀞 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑀸, 𑀅𑀝𑁆𑀞 𑀅𑀪𑀺𑀪𑀸𑀬𑀢𑀦𑀤𑁂𑀲𑀦𑀸, 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸, 𑀦𑀯 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀫𑀽𑀮𑀓𑀸 𑀥𑀫𑁆𑀫𑀸, 𑀦𑀯 𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀸𑀦𑀺, 𑀦𑀯 𑀲𑀢𑁆𑀢𑀸𑀯𑀸𑀲𑀤𑁂𑀲𑀦𑀸, 𑀦𑀯 𑀆𑀖𑀸𑀢𑀧𑀝𑀺𑀯𑀺𑀦𑀬𑀸, 𑀦𑀯 𑀲𑀜𑁆𑀜𑀸, 𑀦𑀯 𑀦𑀸𑀦𑀢𑁆𑀢𑀸, 𑀦𑀯 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀸, 𑀤𑀲 𑀦𑀸𑀣𑀓𑀭𑀡𑀸 𑀥𑀫𑁆𑀫𑀸, 𑀤𑀲 𑀓𑀲𑀺𑀡𑀸𑀬𑀢𑀦𑀸𑀦𑀺, 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸, 𑀤𑀲 𑀲𑀫𑁆𑀫𑀢𑁆𑀢𑀸𑀦𑀺, 𑀤𑀲 𑀅𑀭𑀺𑀬𑀯𑀸𑀲𑀸, 𑀤𑀲 𑀅𑀲𑁂𑀓𑁆𑀔𑀥𑀫𑁆𑀫𑀸, 𑀤𑀲 𑀢𑀣𑀸𑀕𑀢𑀩𑀮𑀸𑀦𑀺, 𑀏𑀓𑀸𑀤𑀲 𑀫𑁂𑀢𑁆𑀢𑀸𑀦𑀺𑀲𑀁𑀲𑀸, 𑀤𑁆𑀯𑀸𑀤𑀲 𑀥𑀫𑁆𑀫𑀘𑀓𑁆𑀓𑀸𑀓𑀸𑀭𑀸, 𑀢𑁂𑀭𑀲 𑀥𑀼𑀢𑀕𑀼𑀡𑀸, 𑀘𑀼𑀤𑁆𑀤𑀲 𑀩𑀼𑀤𑁆𑀥𑀜𑀸𑀡𑀸𑀦𑀺, 𑀧𑀜𑁆𑀘𑀤𑀲 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀥𑀫𑁆𑀫𑀸, 𑀲𑁄𑀴𑀲𑀯𑀺𑀥𑀸 𑀆𑀦𑀸𑀧𑀸𑀦𑀲𑁆𑀲𑀢𑀺, 𑀲𑁄𑀴𑀲 𑀅𑀧𑀭𑀦𑁆𑀢𑀧𑀦𑀻𑀬𑀸 𑀥𑀫𑁆𑀫𑀸, 𑀅𑀝𑁆𑀞𑀸𑀭𑀲 𑀩𑀼𑀤𑁆𑀥𑀥𑀫𑁆𑀫𑀸, 𑀏𑀓𑀽𑀦𑀯𑀻𑀲𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺, 𑀘𑀢𑀼𑀘𑀢𑁆𑀢𑀸𑀮𑀻𑀲 𑀜𑀸𑀡𑀯𑀢𑁆𑀣𑀽𑀦𑀺, 𑀧𑀜𑁆𑀜𑀸𑀲 𑀉𑀤𑀬𑀩𑁆𑀩𑀬𑀜𑀸𑀡𑀸𑀦𑀺, 𑀧𑀭𑁄𑀧𑀡𑁆𑀡𑀸𑀲 𑀓𑀼𑀲𑀮𑀥𑀫𑁆𑀫𑀸, 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀯𑀢𑁆𑀣𑀽𑀦𑀺, 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸𑀲𑀫𑀸𑀧𑀢𑁆𑀢𑀺𑀲𑀜𑁆𑀘𑀸𑀭𑀺𑀫𑀳𑀸𑀯𑀚𑀺𑀭𑀜𑀸𑀡𑀁, 𑀅𑀦𑀦𑁆𑀢𑀦𑀬𑀲𑀫𑀦𑁆𑀢𑀧𑀝𑁆𑀞𑀸𑀦𑀧𑀯𑀺𑀘𑀬𑀧𑀘𑁆𑀘𑀯𑁂𑀓𑁆𑀔𑀡𑀤𑁂𑀲𑀦𑀸𑀜𑀸𑀡𑀸𑀦𑀺 𑀢𑀣𑀸 𑀅𑀦𑀦𑁆𑀢𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀦𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀆𑀲𑀬𑀸𑀤𑀺𑀯𑀺𑀪𑀸𑀯𑀦𑀜𑀸𑀡𑀸𑀦𑀺 𑀘𑀸𑀢𑀺 𑀏𑀯𑀫𑀸𑀤𑀬𑁄 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑁂𑀤𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀦𑀺𑀭𑀢𑀺𑀲𑀬𑀸 𑀕𑀼𑀡𑀪𑀸𑀕𑀸 𑀕𑀼𑀡𑀓𑁄𑀝𑁆𑀞𑀸𑀲𑀸 𑀲𑀁𑀯𑀺𑀚𑁆𑀚𑀦𑁆𑀢𑀺 𑀉𑀧𑀮𑀩𑁆𑀪𑀦𑁆𑀢𑀺, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀯𑀺𑀪𑀸𑀕𑀸 𑀕𑀼𑀡𑀪𑀸𑀕𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 ‘‘𑀪𑀸𑀕𑀯𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀆-𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀓𑀢𑁆𑀯𑀸 ‘‘𑀪𑀕𑀯𑀸’’𑀢𑀺 𑀯𑀼𑀢𑁆𑀢𑁄. 𑀏𑀯𑀁 𑀢𑀸𑀯 𑀪𑀸𑀕𑀯𑀸𑀢𑀺 𑀪𑀕𑀯𑀸.

𑀬𑀲𑁆𑀫𑀸 𑀲𑀻𑀮𑀸𑀤𑀬𑁄 𑀲𑀩𑁆𑀩𑁂, 𑀕𑀼𑀡𑀪𑀸𑀕𑀸 𑀅𑀲𑁂𑀲𑀢𑁄;

𑀯𑀺𑀚𑁆𑀚𑀦𑁆𑀢𑀺 𑀲𑀼𑀕𑀢𑁂 𑀢𑀲𑁆𑀫𑀸, 𑀪𑀕𑀯𑀸𑀢𑀺 𑀧𑀯𑀼𑀘𑁆𑀘𑀢𑀻𑀢𑀺.

𑀓𑀣𑀁 𑀪𑀢𑀯𑀸𑀢𑀺 𑀪𑀕𑀯𑀸? 𑀬𑁂 𑀢𑁂 𑀲𑀩𑁆𑀩𑀮𑁄𑀓𑀳𑀺𑀢𑀸𑀬 𑀉𑀲𑁆𑀲𑀼𑀓𑁆𑀓𑀫𑀸𑀧𑀦𑁆𑀦𑁂𑀳𑀺 𑀫𑀦𑀼𑀲𑁆𑀲𑀢𑁆𑀢𑀸𑀤𑀺𑀓𑁂 𑀅𑀝𑁆𑀞 𑀥𑀫𑁆𑀫𑁂 ¶ 𑀲𑀫𑁄𑀥𑀸𑀦𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀓𑀢𑀫𑀳𑀸𑀪𑀺𑀦𑀻𑀳𑀸𑀭𑁂𑀳𑀺 𑀫𑀳𑀸𑀩𑁄𑀥𑀺𑀲𑀢𑁆𑀢𑁂𑀳𑀺 𑀧𑀭𑀺𑀧𑀽𑀭𑀺𑀢𑀩𑁆𑀩𑀸 𑀤𑀸𑀦𑀧𑀸𑀭𑀫𑀻, 𑀲𑀻𑀮, 𑀦𑁂𑀓𑁆𑀔𑀫𑁆𑀫, 𑀧𑀜𑁆𑀜𑀸, 𑀯𑀻𑀭𑀺𑀬, 𑀔𑀦𑁆𑀢𑀺, 𑀲𑀘𑁆𑀘, 𑀅𑀥𑀺𑀝𑁆𑀞𑀸𑀦, 𑀫𑁂𑀢𑁆𑀢𑀸, 𑀉𑀧𑁂𑀓𑁆𑀔𑀸𑀧𑀸𑀭𑀫𑀻𑀢𑀺 𑀤𑀲 𑀧𑀸𑀭𑀫𑀺𑀬𑁄 𑀤𑀲 𑀉𑀧𑀧𑀸𑀭𑀫𑀺𑀬𑁄 𑀤𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄𑀢𑀺 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄, 𑀤𑀸𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀲𑀗𑁆𑀕𑀳𑀯𑀢𑁆𑀣𑀽𑀦𑀺, 𑀲𑀘𑁆𑀘𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀅𑀥𑀺𑀝𑁆𑀞𑀸𑀦𑀸𑀦𑀺, 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑁄 𑀦𑀬𑀦𑀥𑀦𑀭𑀚𑁆𑀚𑀧𑀼𑀢𑁆𑀢𑀤𑀸𑀭𑀧𑀭𑀺𑀘𑁆𑀘𑀸𑀕𑁄𑀢𑀺 𑀧𑀜𑁆𑀘 𑀫𑀳𑀸𑀧𑀭𑀺𑀘𑀸𑀕𑀸, 𑀧𑀼𑀩𑁆𑀩𑀬𑁄𑀕𑁄, 𑀧𑀼𑀩𑁆𑀩𑀘𑀭𑀺𑀬𑀸, 𑀥𑀫𑁆𑀫𑀓𑁆𑀔𑀸𑀦𑀁, 𑀜𑀸𑀢𑀢𑁆𑀣𑀘𑀭𑀺𑀬𑀸, 𑀮𑁄𑀓𑀢𑁆𑀣𑀘𑀭𑀺𑀬𑀸, 𑀩𑀼𑀤𑁆𑀥𑀺𑀘𑀭𑀺𑀬𑀸𑀢𑀺 ¶ 𑀏𑀯𑀫𑀸𑀤𑀬𑁄, 𑀲𑀗𑁆𑀔𑁂𑀧𑀢𑁄 𑀯𑀸 𑀲𑀩𑁆𑀩𑁂 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑀸 𑀩𑀼𑀤𑁆𑀥𑀓𑀭𑀥𑀫𑁆𑀫𑀸, 𑀢𑁂 𑀫𑀳𑀸𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁂𑀬𑁆𑀬𑀸𑀦𑀺 𑀬𑀣𑀸 𑀳𑀸𑀦𑀪𑀸𑀕𑀺𑀬𑀸 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸 𑀞𑀺𑀢𑀺𑀪𑀸𑀕𑀺𑀬𑀸 𑀯𑀸 𑀦 𑀳𑁄𑀦𑁆𑀢𑀺, 𑀅𑀣 𑀔𑁄 𑀉𑀢𑁆𑀢𑀭𑀼𑀢𑁆𑀢𑀭𑀺 𑀯𑀺𑀲𑁂𑀲𑀪𑀸𑀕𑀺𑀬𑀸𑀯 𑀳𑁄𑀦𑁆𑀢𑀺, 𑀏𑀯𑀁 𑀲𑀓𑁆𑀓𑀘𑁆𑀘𑀁 𑀦𑀺𑀭𑀦𑁆𑀢𑀭𑀁 𑀅𑀦𑀯𑀲𑁂𑀲𑀢𑁄 𑀪𑀢𑀸 𑀲𑀫𑁆𑀪𑀢𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 ‘‘𑀪𑀢𑀯𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀪𑀕𑀯𑀸’’𑀢𑀺 𑀯𑀼𑀢𑁆𑀢𑁄 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀢-𑀓𑀸𑀭𑀲𑁆𑀲 𑀕-𑀓𑀸𑀭𑀁 𑀓𑀢𑁆𑀯𑀸. 𑀅𑀣 𑀯𑀸 𑀪𑀢𑀯𑀸𑀢𑀺 𑀢𑁂𑀬𑁂𑀯 𑀬𑀣𑀸𑀯𑀼𑀢𑁆𑀢𑁂 𑀩𑀼𑀤𑁆𑀥𑀓𑀭𑀥𑀫𑁆𑀫𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀪𑀭𑀺 𑀲𑀫𑁆𑀪𑀭𑀺, 𑀧𑀭𑀺𑀧𑀽𑀭𑁂𑀲𑀻𑀢𑀺 𑀅𑀢𑁆𑀣𑁄. 𑀏𑀯𑀫𑁆𑀧𑀺 𑀪𑀢𑀯𑀸𑀢𑀺 𑀪𑀕𑀯𑀸.

𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀲𑀩𑁆𑀩𑁂, 𑀤𑀸𑀦𑀧𑀸𑀭𑀫𑀺𑀆𑀤𑀺𑀓𑁂;

𑀲𑀫𑁆𑀪𑀸𑀭𑁂 𑀪𑀢𑀯𑀸 𑀦𑀸𑀣𑁄, 𑀢𑁂𑀦𑀸𑀧𑀺 𑀪𑀕𑀯𑀸 𑀫𑀢𑁄𑀢𑀺.

𑀓𑀣𑀁 𑀪𑀸𑀕𑁂 𑀯𑀦𑀻𑀢𑀺 𑀪𑀕𑀯𑀸? 𑀬𑁂 𑀢𑁂 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸 𑀤𑁂𑀯𑀲𑀺𑀓𑀁 𑀯𑀴𑀜𑁆𑀚𑀦𑀓𑀲𑀫𑀸𑀧𑀢𑁆𑀢𑀺𑀪𑀸𑀕𑀸, 𑀢𑁂 𑀅𑀦𑀯𑀲𑁂𑀲𑀢𑁄 𑀮𑁄𑀓𑀳𑀺𑀢𑀢𑁆𑀣𑀁 𑀅𑀢𑁆𑀢𑀦𑁄 𑀘 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀦𑀺 𑀪𑀚𑀺 𑀲𑁂𑀯𑀺 𑀩𑀳𑀼𑀮𑀫𑀓𑀸𑀲𑀻𑀢𑀺 𑀪𑀸𑀕𑁂 𑀯𑀦𑀻𑀢𑀺 𑀪𑀕𑀯𑀸. 𑀅𑀣 𑀯𑀸 𑀅𑀪𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑁂𑀲𑀼 𑀓𑀼𑀲𑀮𑀸𑀤𑀻𑀲𑀼 𑀔𑀦𑁆𑀥𑀸𑀤𑀻𑀲𑀼 𑀘 𑀬𑁂 𑀢𑁂 𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀺𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀯𑀸 𑀘𑀢𑀼𑀩𑁆𑀩𑀺𑀥𑀸 𑀅𑀪𑀺𑀲𑀫𑀬𑀪𑀸𑀕𑀸, 𑀯𑀺𑀢𑁆𑀣𑀸𑀭𑀢𑁄 𑀧𑀦 ‘‘𑀘𑀓𑁆𑀔𑀼 𑀧𑀭𑀺𑀜𑁆𑀜𑁂𑀬𑁆𑀬𑀁 𑀲𑁄𑀢𑀁…𑀧𑁂… 𑀚𑀭𑀸𑀫𑀭𑀡𑀁 𑀧𑀭𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁨𑁧) 𑀅𑀦𑁂𑀓𑁂 𑀧𑀭𑀺𑀜𑁆𑀜𑁂𑀬𑁆𑀬𑀪𑀸𑀕𑀸, ‘‘𑀘𑀓𑁆𑀔𑀼𑀲𑁆𑀲 𑀲𑀫𑀼𑀤𑀬𑁄 𑀧𑀳𑀸𑀢𑀩𑁆𑀩𑁄…𑀧𑁂… 𑀚𑀭𑀸𑀫𑀭𑀡𑀲𑁆𑀲 𑀲𑀫𑀼𑀤𑀬𑁄 𑀧𑀳𑀸𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀧𑀳𑀸𑀢𑀩𑁆𑀩𑀪𑀸𑀕𑀸, ‘‘𑀘𑀓𑁆𑀔𑀼𑀲𑁆𑀲 𑀦𑀺𑀭𑁄𑀥𑁄…𑀧𑁂… 𑀚𑀭𑀸𑀫𑀭𑀡𑀲𑁆𑀲 𑀦𑀺𑀭𑁄𑀥𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀪𑀸𑀕𑀸, ‘‘𑀘𑀓𑁆𑀔𑀼𑀲𑁆𑀲 𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’’𑀢𑀺𑀆𑀤𑀺𑀦𑀸, ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺𑀦𑀸 𑀘 𑀅𑀦𑁂𑀓𑀪𑁂𑀤𑀸 𑀪𑀸𑀯𑁂𑀢𑀩𑁆𑀩𑀪𑀸𑀕𑀸 𑀘 𑀥𑀫𑁆𑀫𑀸, 𑀢𑁂 𑀲𑀩𑁆𑀩𑁂 𑀯𑀦𑀺 𑀪𑀚𑀺 𑀬𑀣𑀸𑀭𑀳𑀁 𑀕𑁄𑀘𑀭𑀪𑀸𑀯𑀦𑀸𑀲𑁂𑀯𑀦𑀸𑀦𑀁 𑀯𑀲𑁂𑀦 𑀲𑁂𑀯𑀺. 𑀏𑀯𑀫𑁆𑀧𑀺 𑀪𑀸𑀕𑁂 𑀯𑀦𑀻𑀢𑀺 𑀪𑀕𑀯𑀸. 𑀅𑀣 𑀯𑀸 ‘‘𑀬𑁂 𑀇𑀫𑁂 𑀲𑀻𑀮𑀸𑀤𑀬𑁄 𑀥𑀫𑁆𑀫𑀓𑁆𑀔𑀦𑁆𑀥𑀸 𑀲𑀸𑀯𑀓𑁂𑀳𑀺 𑀲𑀸𑀥𑀸𑀭𑀡𑀸 𑀕𑀼𑀡𑀪𑀸𑀕𑀸 𑀕𑀼𑀡𑀓𑁄𑀝𑁆𑀞𑀸𑀲𑀸, 𑀓𑀺𑀦𑁆𑀢𑀺 𑀦𑀼 𑀔𑁄 𑀢𑁂 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑁂𑀲𑀼 𑀧𑀢𑀺𑀝𑁆𑀞𑀧𑁂𑀬𑁆𑀬’’𑀦𑁆𑀢𑀺 𑀫𑀳𑀸𑀓𑀭𑀼𑀡𑀸𑀬 𑀯𑀦𑀺 𑀅𑀪𑀺𑀧𑀢𑁆𑀣𑀬𑀺, 𑀲𑀸 𑀘𑀲𑁆𑀲 𑀅𑀪𑀺𑀧𑀢𑁆𑀣𑀦𑀸 𑀬𑀣𑀸𑀥𑀺𑀧𑁆𑀧𑁂𑀢𑀨𑀮𑀸𑀯𑀳𑀸 𑀅𑀳𑁄𑀲𑀺. 𑀏𑀯𑀫𑁆𑀧𑀺 𑀪𑀸𑀕𑁂 𑀯𑀦𑀻𑀢𑀺 𑀪𑀕𑀯𑀸.

𑀬𑀲𑁆𑀫𑀸 ¶ 𑀜𑁂𑀬𑁆𑀬𑀲𑀫𑀸𑀧𑀢𑁆𑀢𑀺𑀕𑀼𑀡𑀪𑀸𑀕𑁂 𑀅𑀲𑁂𑀲𑀢𑁄;

𑀪𑀚𑀺 𑀧𑀢𑁆𑀣𑀬𑀺 𑀲𑀢𑁆𑀢𑀸𑀦𑀁, 𑀳𑀺𑀢𑀸𑀬 𑀪𑀕𑀯𑀸 𑀢𑀢𑁄𑀢𑀺.

𑀓𑀣𑀁 ¶ 𑀪𑀕𑁂 𑀯𑀦𑀻𑀢𑀺 𑀪𑀕𑀯𑀸? 𑀲𑀫𑀸𑀲𑀢𑁄 𑀢𑀸𑀯 𑀓𑀢𑀧𑀼𑀜𑁆𑀜𑁂𑀳𑀺 𑀧𑀬𑁄𑀕𑀲𑀫𑁆𑀧𑀦𑁆𑀦𑁂𑀳𑀺 𑀬𑀣𑀸𑀯𑀺𑀪𑀯𑀁 𑀪𑀚𑀻𑀬𑀦𑁆𑀢𑀻𑀢𑀺 𑀪𑀕𑀸, 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀲𑀫𑁆𑀧𑀢𑁆𑀢𑀺𑀬𑁄. 𑀢𑀢𑁆𑀣 𑀮𑁄𑀓𑀺𑀬𑁂 𑀢𑀸𑀯 𑀢𑀣𑀸𑀕𑀢𑁄 𑀲𑀫𑁆𑀩𑁄𑀥𑀺𑀢𑁄 𑀧𑀼𑀩𑁆𑀩𑁂 𑀩𑁄𑀥𑀺𑀲𑀢𑁆𑀢𑀪𑀽𑀢𑁄 𑀧𑀭𑀫𑀼𑀓𑁆𑀓𑀁𑀲𑀕𑀢𑁂 𑀯𑀦𑀺 𑀪𑀚𑀺 𑀲𑁂𑀯𑀺, 𑀬𑀢𑁆𑀣 𑀧𑀢𑀺𑀝𑁆𑀞𑀸𑀬 𑀦𑀺𑀭𑀯𑀲𑁂𑀲𑀢𑁄 𑀩𑀼𑀤𑁆𑀥𑀓𑀭𑀥𑀫𑁆𑀫𑁂 𑀲𑀫𑀦𑁆𑀦𑀸𑀦𑁂𑀦𑁆𑀢𑁄 𑀩𑀼𑀤𑁆𑀥𑀥𑀫𑁆𑀫𑁂 𑀧𑀭𑀺𑀧𑀸𑀘𑁂𑀲𑀺, 𑀩𑀼𑀤𑁆𑀥𑀪𑀽𑀢𑁄 𑀧𑀦 𑀢𑁂 𑀦𑀺𑀭𑀯𑀚𑁆𑀚𑀲𑀼𑀔𑀽𑀧𑀲𑀁𑀳𑀺𑀢𑁂 𑀅𑀦𑀜𑁆𑀜𑀲𑀸𑀥𑀸𑀭𑀡𑁂 𑀮𑁄𑀓𑀼𑀢𑁆𑀢𑀭𑁂𑀧𑀺 𑀯𑀦𑀺 𑀪𑀚𑀺 𑀲𑁂𑀯𑀺, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀧𑀤𑁂𑀲𑀭𑀚𑁆𑀚𑀇𑀲𑁆𑀲𑀭𑀺𑀬𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺-𑀤𑁂𑀯𑀭𑀚𑁆𑀚𑀲𑀫𑁆𑀧𑀢𑁆𑀢𑀺𑀆𑀤𑀺𑀯𑀲𑁂𑀦- 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀺𑀜𑀸𑀡𑀤𑀲𑁆𑀲𑀦-𑀫𑀕𑁆𑀕𑀪𑀸𑀯𑀦𑀸𑀨𑀮𑀲𑀘𑁆𑀙𑀺- 𑀓𑀺𑀭𑀺𑀬𑀸𑀤𑀺-𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀯𑀲𑁂𑀦 𑀘 𑀅𑀦𑁂𑀓𑀯𑀺𑀳𑀺𑀢𑁂 𑀅𑀦𑀜𑁆𑀜𑀲𑀸𑀥𑀸𑀭𑀡𑁂 𑀪𑀕𑁂 𑀯𑀦𑀺 𑀪𑀚𑀺 𑀲𑁂𑀯𑀺. 𑀏𑀯𑀫𑁆𑀧𑀺 𑀪𑀕𑁂 𑀯𑀦𑀻𑀢𑀺 𑀪𑀕𑀯𑀸.

𑀬𑀸 𑀢𑀸 𑀲𑀫𑁆𑀧𑀢𑁆𑀢𑀺𑀬𑁄 𑀮𑁄𑀓𑁂, 𑀬𑀸 𑀘 𑀮𑁄𑀓𑀼𑀢𑁆𑀢𑀭𑀸 𑀧𑀼𑀣𑀼;

𑀲𑀩𑁆𑀩𑀸 𑀢𑀸 𑀪𑀚𑀺 𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀫𑀸𑀧𑀺 𑀪𑀕𑀯𑀸 𑀫𑀢𑁄𑀢𑀺.

𑀓𑀣𑀁 𑀪𑀢𑁆𑀢𑀯𑀸𑀢𑀺 𑀪𑀕𑀯𑀸? 𑀪𑀢𑁆𑀢𑀸 𑀤𑀴𑁆𑀳𑀪𑀢𑁆𑀢𑀺𑀓𑀸 𑀅𑀲𑁆𑀲 𑀩𑀳𑀽 𑀅𑀢𑁆𑀣𑀻𑀢𑀺 𑀪𑀢𑁆𑀢𑀯𑀸. 𑀢𑀣𑀸𑀕𑀢𑁄 𑀳𑀺 𑀫𑀳𑀸𑀓𑀭𑀼𑀡𑀸𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀅𑀧𑀭𑀺𑀫𑀺𑀢𑀦𑀺𑀭𑀼𑀧𑀫𑀧𑀪𑀸𑀯𑀕𑀼𑀡𑀯𑀺𑀲𑁂𑀲𑀲𑀫𑀗𑁆𑀕𑀺𑀪𑀸𑀯𑀢𑁄 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑁄, 𑀲𑀩𑁆𑀩𑀸𑀦𑀢𑁆𑀣𑀧𑀭𑀺𑀳𑀸𑀭𑀧𑀼𑀩𑁆𑀩𑀗𑁆𑀕𑀫𑀸𑀬 𑀦𑀺𑀭𑀯𑀲𑁂𑀲𑀳𑀺𑀢𑀲𑀼𑀔𑀯𑀺𑀥𑀸𑀦𑀢𑀧𑁆𑀧𑀭𑀸𑀬 𑀦𑀺𑀭𑀢𑀺𑀲𑀬𑀸𑀬 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀧𑀚𑀸𑀬 𑀅𑀘𑁆𑀘𑀦𑁆𑀢𑀽𑀧𑀓𑀸𑀭𑀺𑀢𑀸𑀬 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡-𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦-𑀩𑁆𑀬𑀸𑀫𑀧𑁆𑀧𑀪𑀸𑀤𑀺𑀅𑀦𑀜𑁆𑀜𑀲𑀸𑀥𑀸𑀭𑀡- 𑀯𑀺𑀲𑁂𑀲𑀧𑀝𑀺𑀫𑀡𑁆𑀟𑀺𑀢-𑀭𑀽𑀧𑀓𑀸𑀬𑀢𑀸𑀬 𑀬𑀣𑀸𑀪𑀼𑀘𑁆𑀘-𑀕𑀼𑀡𑀸𑀥𑀺𑀕𑀢𑁂𑀦 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀦 𑀮𑁄𑀓𑀢𑁆𑀢𑀬𑀩𑁆𑀬𑀸𑀧𑀺𑀦𑀸 𑀲𑀼𑀯𑀺𑀧𑀼𑀮𑁂𑀦 𑀲𑀼𑀯𑀺𑀲𑀼𑀤𑁆𑀥𑁂𑀦 𑀘 𑀣𑀼𑀢𑀺𑀖𑁄𑀲𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑀸𑀲𑀼 𑀅𑀧𑁆𑀧𑀺𑀘𑁆𑀙𑀢𑀸𑀲𑀦𑁆𑀢𑀼𑀝𑁆𑀞𑀺𑀆𑀤𑀻𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀢𑁄 𑀤𑀲𑀩𑀮𑀘𑀢𑀼𑀯𑁂𑀲𑀸𑀭𑀚𑁆𑀚𑀸𑀤𑀺𑀦𑀺𑀭𑀢𑀺𑀲𑀬𑀕𑀼𑀡𑀯𑀺𑀲𑁂𑀲-𑀲𑀫𑀗𑁆𑀕𑀺𑀪𑀸𑀯𑀢𑁄 𑀘 𑀭𑀽𑀧𑀧𑁆𑀧𑀫𑀸𑀡𑁄 𑀭𑀽𑀧𑀧𑁆𑀧𑀲𑀦𑁆𑀦𑁄, 𑀖𑁄𑀲𑀧𑁆𑀧𑀫𑀸𑀡𑁄 𑀖𑁄𑀲𑀧𑁆𑀧𑀲𑀦𑁆𑀦𑁄, 𑀮𑀽𑀔𑀧𑁆𑀧𑀫𑀸𑀡𑁄 𑀮𑀽𑀔𑀧𑁆𑀧𑀲𑀦𑁆𑀦𑁄, 𑀥𑀫𑁆𑀫𑀧𑁆𑀧𑀫𑀸𑀡𑁄 𑀥𑀫𑁆𑀫𑀧𑁆𑀧𑀲𑀦𑁆𑀦𑁄𑀢𑀺 𑀏𑀯𑀁 𑀘𑀢𑀼𑀧𑁆𑀧𑀫𑀸𑀡𑀺𑀓𑁂 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀲𑀩𑁆𑀩𑀣𑀸𑀧𑀺 𑀧𑀲𑀸𑀤𑀸𑀯𑀳𑀪𑀸𑀯𑁂𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀢𑁆𑀢𑀸 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀲𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀆𑀤𑀭𑀩𑀳𑀼𑀫𑀸𑀦𑀕𑀸𑀭𑀯𑀸𑀬𑀢𑀦𑀢𑀸𑀬 𑀧𑀭𑀫𑀧𑁂𑀫𑀲𑀫𑁆𑀪𑀢𑁆𑀢𑀺𑀝𑁆𑀞𑀸𑀦𑀁. 𑀬𑁂 𑀢𑀲𑁆𑀲 𑀑𑀯𑀸𑀤𑁂 𑀧𑀢𑀺𑀝𑁆𑀞𑀺𑀢𑀸 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸 𑀳𑁄𑀦𑁆𑀢𑀺, 𑀓𑁂𑀦𑀘𑀺 𑀅𑀲𑀁𑀳𑀸𑀭𑀺𑀬𑀸 𑀢𑁂𑀲𑀁 𑀧𑀲𑀸𑀤𑀪𑀢𑁆𑀢𑀺 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸. 𑀢𑀣𑀸 𑀳𑀺 𑀢𑁂 𑀅𑀢𑁆𑀢𑀦𑁄 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑁂𑀧𑀺 𑀢𑀢𑁆𑀣 𑀧𑀲𑀸𑀤𑀁 𑀦 𑀧𑀭𑀺𑀘𑁆𑀘𑀚𑀦𑁆𑀢𑀺, 𑀢𑀲𑁆𑀲 𑀯𑀸 𑀆𑀡𑀁 𑀤𑀴𑁆𑀳𑀪𑀢𑁆𑀢𑀺𑀪𑀸𑀯𑀢𑁄. 𑀢𑁂𑀦𑁂𑀯𑀸𑀳 𑁋

‘‘𑀬𑁄 ¶ ¶ 𑀯𑁂 𑀓𑀢𑀜𑁆𑀜𑀽 𑀓𑀢𑀯𑁂𑀤𑀺 𑀥𑀻𑀭𑁄;

𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀤𑀴𑁆𑀳𑀪𑀢𑁆𑀢𑀺 𑀘 𑀳𑁄𑀢𑀻’’𑀢𑀺. (𑀚𑀸. 𑁨.𑁧𑁭.𑁭𑁮);

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀞𑀺𑀢𑀥𑀫𑁆𑀫𑁄 𑀯𑁂𑀮𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀁 𑀫𑀬𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀢𑀁 𑀫𑀫 𑀲𑀸𑀯𑀓𑀸 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦𑀸𑀢𑀺𑀓𑁆𑀓𑀫𑀦𑁆𑀢𑀻’’𑀢𑀺 (𑀅. 𑀦𑀺. 𑁮.𑁨𑁦; 𑀉𑀤𑀸. 𑁪𑁫; 𑀘𑀽𑀴𑀯. 𑁩𑁮𑁫) 𑀘.

𑀏𑀯𑀁 𑀪𑀢𑁆𑀢𑀯𑀸𑀢𑀺 𑀪𑀕𑀯𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀏𑀓𑀲𑁆𑀲 𑀢-𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 𑀇𑀢𑀭𑀲𑁆𑀲 𑀕-𑀓𑀸𑀭𑀁 𑀓𑀢𑁆𑀯𑀸.

𑀕𑀼𑀡𑀸𑀢𑀺𑀲𑀬𑀬𑀼𑀢𑁆𑀢𑀲𑁆𑀲, 𑀬𑀲𑁆𑀫𑀸 𑀮𑁄𑀓𑀳𑀺𑀢𑁂𑀲𑀺𑀦𑁄;

𑀲𑀫𑁆𑀪𑀢𑁆𑀢𑀸 𑀩𑀳𑀯𑁄 𑀲𑀢𑁆𑀣𑀼, 𑀪𑀕𑀯𑀸 𑀢𑁂𑀦 𑀯𑀼𑀘𑁆𑀘𑀢𑀻𑀢𑀺.

𑀓𑀣𑀁 𑀪𑀕𑁂 𑀯𑀫𑀻𑀢𑀺 𑀪𑀕𑀯𑀸? 𑀬𑀲𑁆𑀫𑀸 𑀢𑀣𑀸𑀕𑀢𑁄 𑀩𑁄𑀥𑀺𑀲𑀢𑁆𑀢𑀪𑀽𑀢𑁄𑀧𑀺 𑀧𑀼𑀭𑀺𑀫𑀸𑀲𑀼 𑀚𑀸𑀢𑀻𑀲𑀼 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁄 𑀪𑀕𑀲𑀗𑁆𑀔𑀸𑀢𑀁 𑀲𑀺𑀭𑀺𑀁 𑀇𑀲𑁆𑀲𑀭𑀺𑀬𑀁 𑀬𑀲𑀜𑁆𑀘 𑀯𑀫𑀺, 𑀉𑀕𑁆𑀕𑀺𑀭𑀺, 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀅𑀦𑀧𑁂𑀓𑁆𑀔𑁄 𑀙𑀟𑁆𑀟𑀬𑀺; 𑀧𑀘𑁆𑀙𑀺𑀫𑀢𑁆𑀢𑀪𑀸𑀯𑁂𑀧𑀺 𑀳𑀢𑁆𑀣𑀸𑀕𑀢𑀁 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀁 𑀤𑁂𑀯𑀮𑁄𑀓𑀸𑀥𑀺𑀧𑀘𑁆𑀘𑀲𑀤𑀺𑀲𑀁 𑀘𑀢𑀼𑀤𑀻𑀧𑀺𑀲𑁆𑀲𑀭𑀺𑀬𑀁 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀲𑀦𑁆𑀦𑀺𑀲𑁆𑀲𑀬𑀁 𑀲𑀢𑁆𑀢𑀭𑀢𑀦𑀲𑀫𑀼𑀚𑁆𑀚𑀮𑀁 𑀬𑀲𑀜𑁆𑀘 𑀢𑀺𑀡𑀸𑀬𑀧𑀺 𑀅𑀫𑀜𑁆𑀜𑀫𑀸𑀦𑁄 𑀦𑀺𑀭𑀧𑁂𑀓𑁆𑀔𑁄 𑀧𑀳𑀸𑀬 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀫𑀸 𑀇𑀫𑁂 𑀲𑀺𑀭𑀺𑀆𑀤𑀺𑀓𑁂 𑀪𑀕𑁂 𑀯𑀫𑀻𑀢𑀺 𑀪𑀕𑀯𑀸. 𑀅𑀣 𑀯𑀸 𑀪𑀸𑀦𑀺 𑀦𑀸𑀫 𑀦𑀓𑁆𑀔𑀢𑁆𑀢𑀸𑀦𑀺, 𑀢𑁂𑀳𑀺 𑀲𑀫𑀁 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀪𑀕𑀸, 𑀲𑀺𑀦𑁂𑀭𑀼𑀬𑀼𑀕𑀦𑁆𑀥𑀭𑀉𑀢𑁆𑀢𑀭𑀓𑀼𑀭𑀼𑀳𑀺𑀫𑀯𑀦𑁆𑀢𑀸𑀤𑀺𑀪𑀸𑀚𑀦𑀮𑁄𑀓𑀯𑀺𑀲𑁂𑀲𑀲𑀦𑁆𑀦𑀺𑀲𑁆𑀲𑀬𑀸 𑀲𑁄𑀪𑀸 𑀓𑀧𑁆𑀧𑀝𑁆𑀞𑀺𑀬𑀪𑀸𑀯𑀢𑁄, 𑀢𑁂𑀧𑀺 𑀪𑀕𑁂 𑀯𑀫𑀺 𑀢𑀦𑁆𑀦𑀺𑀯𑀸𑀲𑀺𑀲𑀢𑁆𑀢𑀸𑀯𑀸𑀲𑀲𑀫𑀢𑀺𑀓𑁆𑀓𑀫𑀦𑀢𑁄, 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀧𑀳𑀸𑀦𑁂𑀦 𑀧𑀚𑀳𑀻𑀢𑀺. 𑀏𑀯𑀫𑁆𑀧𑀺 𑀪𑀕𑁂 𑀯𑀫𑀻𑀢𑀺 𑀪𑀕𑀯𑀸.

𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀁 𑀬𑀲𑁆𑀫𑀸, 𑀬𑀲𑀁 𑀇𑀲𑁆𑀲𑀭𑀺𑀬𑀁 𑀲𑀼𑀔𑀁;

𑀧𑀳𑀸𑀲𑀺 𑀮𑁄𑀓𑀘𑀺𑀢𑁆𑀢𑀜𑁆𑀘, 𑀲𑀼𑀕𑀢𑁄 𑀪𑀕𑀯𑀸 𑀢𑀢𑁄𑀢𑀺.

𑀓𑀣𑀁 𑀪𑀸𑀕𑁂 𑀯𑀫𑀻𑀢𑀺 𑀪𑀕𑀯𑀸? 𑀪𑀸𑀕𑀸 𑀦𑀸𑀫 𑀲𑀪𑀸𑀕𑀥𑀫𑁆𑀫𑀓𑁄𑀝𑁆𑀞𑀸𑀲𑀸, 𑀢𑁂 𑀔𑀦𑁆𑀥𑀸𑀬𑀢𑀦𑀥𑀸𑀢𑀸𑀤𑀺𑀯𑀲𑁂𑀦, 𑀢𑀢𑁆𑀣𑀸𑀧𑀺 𑀭𑀽𑀧𑀯𑁂𑀤𑀦𑀸𑀤𑀺𑀯𑀲𑁂𑀦, 𑀧𑀣𑀯𑀺𑀬𑀸𑀤𑀺𑀅𑀢𑀻𑀢𑀸𑀤𑀺𑀯𑀲𑁂𑀦 𑀘 𑀅𑀦𑁂𑀓𑀯𑀺𑀥𑀸. 𑀢𑁂 𑀪𑀕𑀯𑀸 𑀲𑀩𑁆𑀩𑀁 𑀧𑀧𑀜𑁆𑀘𑀁 𑀲𑀩𑁆𑀩𑀁 𑀬𑁄𑀕𑀁 𑀲𑀩𑁆𑀩𑀁 𑀕𑀦𑁆𑀣𑀁 𑀲𑀩𑁆𑀩𑀁 𑀲𑀁𑀬𑁄𑀚𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀫𑀢𑀁 𑀥𑀸𑀢𑀼𑀁 𑀲𑀫𑀥𑀺𑀕𑀘𑁆𑀙𑀦𑁆𑀢𑁄 𑀯𑀫𑀺 𑀉𑀕𑁆𑀕𑀺𑀭𑀺, 𑀅𑀦𑀧𑁂𑀓𑁆𑀔𑁄 𑀙𑀟𑁆𑀟𑀬𑀺 𑀦 𑀧𑀘𑁆𑀘𑀸𑀕𑀫𑀺. 𑀢𑀣𑀸 𑀳𑁂𑀲 ‘‘𑀲𑀩𑁆𑀩𑀢𑁆𑀣𑀫𑁂𑀯 𑀧𑀣𑀯𑀺𑀁 ¶ 𑀆𑀧𑀁 ¶ 𑀢𑁂𑀚𑀁 𑀯𑀸𑀬𑀁, 𑀘𑀓𑁆𑀔𑀼𑀁 𑀲𑁄𑀢𑀁 𑀖𑀸𑀦𑀁 𑀚𑀺𑀯𑁆𑀳𑀁 𑀓𑀸𑀬𑀁 𑀫𑀦𑀁, 𑀭𑀽𑀧𑁂 𑀲𑀤𑁆𑀤𑁂 𑀕𑀦𑁆𑀥𑁂 𑀭𑀲𑁂 𑀨𑁄𑀝𑁆𑀞𑀩𑁆𑀩𑁂 𑀥𑀫𑁆𑀫𑁂, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀁 𑀲𑀜𑁆𑀜𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀲𑀜𑁆𑀜𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀁 𑀘𑁂𑀢𑀦𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀘𑁂𑀢𑀦𑀁, 𑀭𑀽𑀧𑀢𑀡𑁆𑀳𑀁…𑀧𑁂… 𑀥𑀫𑁆𑀫𑀢𑀡𑁆𑀳𑀁, 𑀭𑀽𑀧𑀯𑀺𑀢𑀓𑁆𑀓𑀁…𑀧𑁂… 𑀥𑀫𑁆𑀫𑀯𑀺𑀢𑀓𑁆𑀓𑀁, 𑀭𑀽𑀧𑀯𑀺𑀘𑀸𑀭𑀁…𑀧𑁂… 𑀥𑀫𑁆𑀫𑀯𑀺𑀘𑀸𑀭’’𑀦𑁆𑀢𑀺𑀆𑀤𑀺𑀦𑀸 𑀅𑀦𑀼𑀧𑀤𑀥𑀫𑁆𑀫𑀯𑀺𑀪𑀸𑀕𑀯𑀲𑁂𑀦𑀧𑀺 𑀲𑀩𑁆𑀩𑁂𑀯 𑀥𑀫𑁆𑀫𑀓𑁄𑀝𑁆𑀞𑀸𑀲𑁂 𑀅𑀦𑀯𑀲𑁂𑀲𑀢𑁄 𑀯𑀫𑀺 𑀉𑀕𑁆𑀕𑀺𑀭𑀺, 𑀅𑀦𑀧𑁂𑀓𑁆𑀔𑀧𑀭𑀺𑀘𑁆𑀘𑀸𑀕𑁂𑀦 𑀙𑀟𑁆𑀟𑀬𑀺. 𑀯𑀼𑀢𑁆𑀢𑀁 𑀳𑁂𑀢𑀁 ‘‘𑀬𑀁 𑀢𑀁, 𑀆𑀦𑀦𑁆𑀤, 𑀘𑀢𑁆𑀢𑀁 𑀯𑀦𑁆𑀢𑀁 𑀫𑀼𑀢𑁆𑀢𑀁 𑀧𑀳𑀻𑀦𑀁 𑀧𑀝𑀺𑀦𑀺𑀲𑁆𑀲𑀝𑁆𑀞𑀁, 𑀢𑀁 𑀢𑀣𑀸𑀕𑀢𑁄 𑀧𑀼𑀦 𑀧𑀘𑁆𑀘𑀸𑀕𑀫𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 (𑀤𑀻. 𑀦𑀺. 𑁨.𑁧𑁮𑁩). 𑀏𑀯𑀫𑁆𑀧𑀺 𑀪𑀸𑀕𑁂 𑀯𑀫𑀻𑀢𑀺 𑀪𑀕𑀯𑀸. 𑀅𑀣 𑀯𑀸 𑀪𑀸𑀕𑁂 𑀯𑀫𑀻𑀢𑀺 𑀲𑀩𑁆𑀩𑁂𑀧𑀺 𑀓𑀼𑀲𑀮𑀸𑀓𑀼𑀲𑀮𑁂 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑁂 𑀳𑀻𑀦𑀧𑀡𑀻𑀢𑁂 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑁂 𑀥𑀫𑁆𑀫𑁂 𑀅𑀭𑀺𑀬𑀫𑀕𑁆𑀕𑀜𑀸𑀡𑀫𑀼𑀔𑁂𑀦 𑀯𑀫𑀺 𑀉𑀕𑁆𑀕𑀺𑀭𑀺 𑀅𑀦𑀧𑁂𑀓𑁆𑀔𑁄 𑀧𑀭𑀺𑀘𑁆𑀘𑀚𑀺 𑀧𑀚𑀳𑀺, 𑀧𑀭𑁂𑀲𑀜𑁆𑀘 𑀢𑀣𑀢𑁆𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀥𑀫𑁆𑀫𑀸𑀧𑀺 𑀯𑁄, 𑀪𑀺𑀓𑁆𑀔𑀯𑁂, 𑀧𑀳𑀸𑀢𑀩𑁆𑀩𑀸, 𑀧𑀕𑁂𑀯 𑀅𑀥𑀫𑁆𑀫𑀸 (𑀫. 𑀦𑀺. 𑁧.𑁨𑁪𑁦), 𑀓𑀼𑀮𑁆𑀮𑀽𑀧𑀫𑀁 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺 𑀦𑀺𑀢𑁆𑀣𑀭𑀡𑀢𑁆𑀣𑀸𑀬, 𑀦𑁄 𑀕𑀳𑀡𑀢𑁆𑀣𑀸𑀬𑀸’’𑀢𑀺𑀆𑀤𑀺 (𑀫. 𑀦𑀺. 𑁧.𑁨𑁪𑁦). 𑀏𑀯𑀫𑁆𑀧𑀺 𑀪𑀸𑀕𑁂 𑀯𑀫𑀻𑀢𑀺 𑀪𑀕𑀯𑀸.

𑀔𑀦𑁆𑀥𑀸𑀬𑀢𑀦𑀥𑀸𑀢𑀸𑀤𑀺-𑀥𑀫𑁆𑀫𑀪𑀸𑀕𑀸𑀫𑀳𑁂𑀲𑀺𑀦𑀸;

𑀓𑀡𑁆𑀳𑀲𑀼𑀓𑁆𑀓𑀸 𑀬𑀢𑁄 𑀯𑀦𑁆𑀢𑀸, 𑀢𑀢𑁄𑀧𑀺 𑀪𑀕𑀯𑀸 𑀫𑀢𑁄𑀢𑀺.

𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀪𑀸𑀕𑀯𑀸 𑀪𑀢𑀯𑀸 𑀪𑀸𑀕𑁂, 𑀪𑀕𑁂 𑀘 𑀯𑀦𑀺 𑀪𑀢𑁆𑀢𑀯𑀸;

𑀪𑀕𑁂 𑀯𑀫𑀺 𑀢𑀣𑀸 𑀪𑀸𑀕𑁂, 𑀯𑀫𑀻𑀢𑀺 𑀪𑀕𑀯𑀸 𑀚𑀺𑀦𑁄’’𑀢𑀺.

𑀥𑀫𑁆𑀫𑀲𑀭𑀻𑀭𑀁 𑀧𑀘𑁆𑀘𑀓𑁆𑀔𑀁 𑀓𑀭𑁄𑀢𑀻𑀢𑀺 ‘‘𑀬𑁄 𑀯𑁄, 𑀆𑀦𑀦𑁆𑀤, 𑀫𑀬𑀸 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄, 𑀲𑁄 𑀯𑁄 𑀫𑀫𑀘𑁆𑀘𑀬𑁂𑀦 𑀲𑀢𑁆𑀣𑀸’’𑀢𑀺 (𑀤𑀻. 𑀦𑀺. 𑁨.𑁨𑁧𑁬) 𑀯𑀘𑀦𑀢𑁄 𑀥𑀫𑁆𑀫𑀲𑁆𑀲 𑀲𑀢𑁆𑀣𑀼𑀪𑀸𑀯𑀧𑀭𑀺𑀬𑀸𑀬𑁄 𑀯𑀺𑀚𑁆𑀚𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀚𑀺𑀭𑀲𑀗𑁆𑀖𑀸𑀢𑀲𑀫𑀸𑀦𑀓𑀸𑀬𑁄 𑀧𑀭𑁂𑀳𑀺 𑀅𑀪𑁂𑀚𑁆𑀚𑀲𑀭𑀻𑀭𑀢𑁆𑀢𑀸. 𑀦 𑀳𑀺 𑀪𑀕𑀯𑀢𑁄 𑀭𑀽𑀧𑀓𑀸𑀬𑁂 𑀓𑁂𑀦𑀘𑀺 𑀲𑀓𑁆𑀓𑀸 𑀅𑀦𑁆𑀢𑀭𑀸𑀬𑁄 𑀓𑀸𑀢𑀼𑀦𑁆𑀢𑀺.

𑀤𑁂𑀲𑀦𑀸𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀯𑀓𑁆𑀔𑀫𑀸𑀦𑀲𑁆𑀲 𑀲𑀓𑀮𑀲𑁆𑀲 𑀲𑀼𑀢𑁆𑀢𑀲𑁆𑀲 ‘‘𑀏𑀯’’𑀦𑁆𑀢𑀺 𑀦𑀺𑀤𑀲𑁆𑀲𑀦𑀢𑁄. 𑀲𑀸𑀯𑀓𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁂𑀦 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀪𑀕𑀯𑀢𑀸 𑀏𑀢𑀤𑀕𑁆𑀕𑁂 𑀞𑀧𑀺𑀢𑁂𑀦 𑀫𑀬𑀸 𑀫𑀳𑀸𑀲𑀸𑀯𑀓𑁂𑀦 ¶ 𑀲𑀼𑀢𑀁, 𑀢𑀜𑁆𑀘 𑀔𑁄 𑀫𑀬𑀸𑀯 ¶ 𑀲𑀼𑀢𑀁, 𑀦 𑀅𑀦𑀼𑀲𑁆𑀲𑀼𑀢𑀺𑀓𑀁, 𑀦 𑀧𑀭𑀫𑁆𑀧𑀭𑀸𑀪𑀢𑀦𑁆𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀤𑀻𑀧𑀦𑀢𑁄. 𑀓𑀸𑀮𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀪𑀕𑀯𑀸-𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂 𑀧𑀬𑀼𑀢𑁆𑀢𑀲𑁆𑀲 𑀲𑀫𑀬-𑀲𑀤𑁆𑀤𑀲𑁆𑀲 𑀓𑀸𑀮𑀲𑁆𑀲 𑀩𑀼𑀤𑁆𑀥𑀼𑀧𑁆𑀧𑀸𑀤𑀧𑀝𑀺𑀫𑀡𑁆𑀟𑀺𑀢𑀪𑀸𑀯𑀤𑀻𑀧𑀦𑀢𑁄. 𑀩𑀼𑀤𑁆𑀥𑀼𑀧𑁆𑀧𑀸𑀤𑀧𑀭𑀫𑀸 𑀳𑀺 𑀓𑀸𑀮𑀲𑀫𑁆𑀧𑀤𑀸. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀓𑀧𑁆𑀧𑀓𑀲𑀸𑀬𑁂 𑀓𑀮𑀺𑀬𑀼𑀕𑁂, 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀅𑀳𑁄 𑀫𑀳𑀘𑁆𑀙𑀭𑀺𑀬𑀁;

𑀳𑀼𑀢𑀸𑀯𑀳𑀫𑀚𑁆𑀛𑁂 𑀚𑀸𑀢𑀁, 𑀲𑀫𑀼𑀤𑀺𑀢𑀫𑀓𑀭𑀦𑁆𑀤𑀫𑀭𑀯𑀺𑀦𑁆𑀤’’𑀦𑁆𑀢𑀺. (𑀤𑀻. 𑀦𑀺. 𑀝𑀻. 𑁧.𑁧; 𑀲𑀁. 𑀦𑀺. 𑀝𑀻. 𑁧.𑁧.𑁧; 𑀅. 𑀦𑀺. 𑀝𑀻. 𑁧.𑁧.𑁧 𑀭𑀽𑀧𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸);

𑀪𑀕𑀯𑀸𑀢𑀺 𑀤𑁂𑀲𑀓𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀕𑀼𑀡𑀯𑀺𑀲𑀺𑀝𑁆𑀞𑀲𑀢𑁆𑀢𑀼𑀢𑁆𑀢𑀫𑀕𑀭𑀼𑀕𑀸𑀭𑀯𑀸𑀥𑀺𑀯𑀘𑀦𑀪𑀸𑀯𑀢𑁄.

𑀫𑀗𑁆𑀕𑀮𑀤𑀺𑀯𑀲𑁄 𑀲𑀼𑀔𑀡𑁄 𑀲𑀼𑀦𑀓𑁆𑀔𑀢𑁆𑀢𑀦𑁆𑀢𑀺 𑀅𑀚𑁆𑀚 𑀫𑀗𑁆𑀕𑀮𑀤𑀺𑀯𑀲𑁄, 𑀢𑀲𑁆𑀫𑀸 𑀲𑀼𑀦𑀓𑁆𑀔𑀢𑁆𑀢𑀁, 𑀢𑀢𑁆𑀣𑀸𑀧𑀺 𑀅𑀬𑀁 𑀲𑀼𑀔𑀡𑁄. 𑀫𑀸 𑀅𑀢𑀺𑀓𑁆𑀓𑀫𑀻𑀢𑀺 𑀫𑀸 𑀭𑀢𑁆𑀢𑀺𑀯𑀺𑀪𑀸𑀬𑀦𑀁 𑀅𑀦𑀼𑀤𑀺𑀓𑁆𑀔𑀦𑁆𑀢𑀸𑀦𑀁 𑀭𑀢𑁆𑀢𑀺 𑀅𑀢𑀺𑀓𑁆𑀓𑀫𑀻𑀢𑀺 𑀏𑀯𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀓𑁆𑀓𑀸𑀲𑀼 𑀞𑀺𑀢𑀸𑀲𑀼 𑀞𑀺𑀢𑀸𑀢𑀺 𑀉𑀓𑁆𑀓𑀝𑁆𑀞𑀸 (𑀤𑀻. 𑀦𑀺. 𑀝𑀻. 𑁧.𑁨𑁫𑁫; 𑀅. 𑀦𑀺. 𑀝𑀻. 𑁨.𑁪.𑁩𑁬). 𑀉𑀓𑁆𑀓𑀸𑀲𑀼 𑀯𑀺𑀚𑁆𑀚𑁄𑀢𑀮𑀦𑁆𑀢𑀻𑀲𑀼 𑀞𑀺𑀢𑀸 𑀧𑀢𑀺𑀝𑁆𑀞𑀺𑀢𑀸𑀢𑀺 𑀫𑀽𑀮𑀯𑀺𑀪𑀽𑀚𑀸𑀤𑀺𑀧𑀓𑁆𑀔𑁂𑀧𑁂𑀦 (𑀧𑀸𑀡𑀺𑀦𑀺 𑁩.𑁨.𑁫) 𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀯𑀸 𑀉𑀓𑁆𑀓𑀸𑀲𑀼 𑀞𑀺𑀢𑀸𑀲𑀼 𑀞𑀺𑀢𑀸 𑀆𑀲𑀻𑀢𑀺 𑀉𑀓𑁆𑀓𑀝𑁆𑀞𑀸. 𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 ‘‘𑀪𑀽𑀫𑀺𑀪𑀸𑀕𑀲𑀫𑁆𑀧𑀢𑁆𑀢𑀺𑀬𑀸 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑀓𑀭𑀡𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀸 𑀦𑀕𑀭𑀻 𑀉𑀓𑁆𑀓𑀝𑁆𑀞𑀕𑀼𑀡𑀬𑁄𑀕𑀢𑁄 ‘𑀉𑀓𑁆𑀓𑀝𑁆𑀞𑀸’𑀢𑀺 𑀦𑀸𑀫𑀁 𑀮𑀪𑀻’’𑀢𑀺.

𑀅𑀯𑀺𑀲𑁂𑀲𑁂𑀦𑀸𑀢𑀺 𑀦 𑀯𑀺𑀲𑁂𑀲𑁂𑀦, 𑀯𑀺𑀳𑀸𑀭𑀪𑀸𑀯𑀲𑀸𑀫𑀜𑁆𑀜𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀭𑀺𑀬𑀸𑀧𑀣…𑀧𑁂… 𑀯𑀺𑀳𑀸𑀭𑁂𑀲𑀽𑀢𑀺 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁄 𑀤𑀺𑀩𑁆𑀩𑀯𑀺𑀳𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁄 𑀅𑀭𑀺𑀬𑀯𑀺𑀳𑀸𑀭𑁄𑀢𑀺 𑀏𑀢𑁂𑀲𑀼 𑀘𑀢𑀽𑀲𑀼 𑀯𑀺𑀳𑀸𑀭𑁂𑀲𑀼. 𑀲𑀫𑀗𑁆𑀕𑀺𑀧𑀭𑀺𑀤𑀻𑀧𑀦𑀦𑁆𑀢𑀺 𑀲𑀫𑀗𑁆𑀕𑀻𑀪𑀸𑀯𑀧𑀭𑀺𑀤𑀻𑀧𑀦𑀁. 𑀏𑀢𑀦𑁆𑀢𑀺 ‘‘𑀯𑀺𑀳𑀭𑀢𑀻’’𑀢𑀺 𑀏𑀢𑀁 𑀧𑀤𑀁. 𑀢𑀣𑀸 𑀳𑀺 𑀢𑀁 ‘‘𑀇𑀥𑁂𑀓𑀘𑁆𑀘𑁄 𑀕𑀺𑀳𑀻𑀳𑀺 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀲𑀳𑀦𑀦𑁆𑀤𑀻 𑀲𑀳𑀲𑁄𑀓𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁪.𑁨𑁪𑁧) 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂 𑀆𑀕𑀢𑀁; ‘‘𑀬𑀲𑁆𑀫𑀺𑀁 𑀲𑀫𑀬𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁬𑁦; 𑀯𑀺𑀪. 𑁬𑁨𑁪) 𑀤𑀺𑀩𑁆𑀩𑀯𑀺𑀳𑀸𑀭𑁂; ‘‘𑀲𑁄 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁫𑁫𑁬; 𑁩.𑁩𑁦𑁮; 𑀫. 𑀦𑀺. 𑁧.𑁭𑁭; 𑁨.𑁩𑁦𑁯; 𑁩.𑁨𑁩𑁦) 𑀩𑁆𑀭𑀳𑁆𑀫𑀯𑀺𑀳𑀸𑀭𑁂; ‘‘𑀲𑁄 𑀔𑁄 𑀅𑀳𑀁 𑀅𑀕𑁆𑀕𑀺𑀯𑁂𑀲𑁆𑀲𑀦 𑀢𑀲𑁆𑀲𑀸𑀬𑁂𑀯 𑀓𑀣𑀸𑀬 𑀧𑀭𑀺𑀬𑁄𑀲𑀸𑀦𑁂 𑀢𑀲𑁆𑀫𑀺𑀁 𑀏𑀯 𑀧𑀼𑀭𑀺𑀫𑀲𑁆𑀫𑀺𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁂 𑀅𑀚𑁆𑀛𑀢𑁆𑀢𑀫𑁂𑀯 ¶ ¶ 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀫𑀺 𑀲𑀦𑁆𑀦𑀺𑀲𑀸𑀤𑁂𑀫𑀺 𑀏𑀓𑁄𑀤𑀺𑀁 𑀓𑀭𑁄𑀫𑀺 𑀲𑀫𑀸𑀤𑀳𑀸𑀫𑀺, 𑀬𑁂𑀦 𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁮𑁭) 𑀅𑀭𑀺𑀬𑀯𑀺𑀳𑀸𑀭𑁂.

𑀢𑀢𑁆𑀣 𑀇𑀭𑀺𑀬𑀦𑀁 𑀯𑀢𑁆𑀢𑀦𑀁 𑀇𑀭𑀺𑀬𑀸, 𑀓𑀸𑀬𑀧𑁆𑀧𑀬𑁄𑀕𑁄. 𑀢𑀲𑁆𑀲𑀸 𑀧𑀯𑀢𑁆𑀢𑀦𑀼𑀧𑀸𑀬𑀪𑀸𑀯𑀢𑁄 𑀞𑀸𑀦𑀸𑀤𑀺 𑀇𑀭𑀺𑀬𑀸𑀧𑀣𑁄. 𑀞𑀸𑀦𑀲𑀫𑀗𑁆𑀕𑀻 𑀯𑀸 𑀳𑀺 𑀓𑀸𑀬𑁂𑀦 𑀓𑀺𑀜𑁆𑀘𑀺 𑀓𑀭𑁂𑀬𑁆𑀬 𑀕𑀫𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑀫𑀗𑁆𑀕𑀻 𑀯𑀸. 𑀅𑀣 𑀯𑀸 𑀇𑀭𑀺𑀬𑀢𑀺 𑀧𑀯𑀢𑁆𑀢𑀢𑀺 𑀏𑀢𑁂𑀦 𑀅𑀢𑁆𑀢𑀪𑀸𑀯𑁄, 𑀓𑀸𑀬𑀓𑀺𑀘𑁆𑀘𑀁 𑀯𑀸𑀢𑀺 𑀇𑀭𑀺𑀬𑀸, 𑀢𑀲𑁆𑀲𑀸 𑀧𑀯𑀢𑁆𑀢𑀺𑀬𑀸 𑀉𑀧𑀸𑀬𑀪𑀸𑀯𑀢𑁄 𑀧𑀣𑁄𑀢𑀺 𑀇𑀭𑀺𑀬𑀸𑀧𑀣𑁄, 𑀞𑀸𑀦𑀸𑀤𑀺 𑀏𑀯. 𑀲𑁄 𑀘 𑀅𑀢𑁆𑀣𑀢𑁄 𑀕𑀢𑀺𑀦𑀺𑀯𑀢𑁆𑀢𑀺𑀆𑀤𑀺𑀆𑀓𑀸𑀭𑁂𑀦 𑀧𑀯𑀢𑁆𑀢𑁄 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀧𑀩𑀦𑁆𑀥𑁄 𑀏𑀯. 𑀯𑀺𑀳𑀭𑀡𑀁, 𑀯𑀺𑀳𑀭𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀯𑀺𑀳𑀸𑀭𑁄, 𑀇𑀭𑀺𑀬𑀸𑀧𑀣𑁄 𑀏𑀯 𑀯𑀺𑀳𑀸𑀭𑁄 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁄. 𑀤𑀺𑀯𑀺 𑀪𑀯𑁄𑀢𑀺 𑀤𑀺𑀩𑁆𑀩𑁄. 𑀢𑀢𑁆𑀣 𑀩𑀳𑀼𑀮𑀧𑁆𑀧𑀯𑀢𑁆𑀢𑀺𑀬𑀸 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀺𑀤𑁂𑀯𑀮𑁄𑀓𑁂 𑀪𑀯𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀬𑁄 𑀤𑀺𑀩𑁆𑀩𑀸𑀦𑀼𑀪𑀸𑀯𑁄, 𑀢𑀤𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀯𑀸 𑀤𑀺𑀩𑁆𑀩𑁄, 𑀅𑀪𑀺𑀜𑁆𑀜𑀸𑀪𑀺𑀦𑀻𑀳𑀸𑀭𑀯𑀲𑁂𑀦 𑀫𑀳𑀸𑀕𑀢𑀺𑀓𑀢𑁆𑀢𑀸 𑀯𑀸 𑀤𑀺𑀩𑁆𑀩𑁄, 𑀤𑀺𑀩𑁆𑀩𑁄 𑀘 𑀲𑁄 𑀯𑀺𑀳𑀸𑀭𑁄 𑀘𑀸𑀢𑀺 𑀤𑀺𑀩𑁆𑀩𑀯𑀺𑀳𑀸𑀭𑁄, 𑀘𑀢𑀲𑁆𑀲𑁄 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀬𑁄. 𑀆𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺𑀬𑁄𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀩𑁆𑀭𑀳𑁆𑀫𑀽𑀦𑀁, 𑀩𑁆𑀭𑀳𑁆𑀫𑀸𑀦𑁄 𑀯𑀸 𑀯𑀺𑀳𑀸𑀭𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀸, 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄. 𑀅𑀭𑀺𑀬𑀸𑀦𑀁, 𑀅𑀭𑀺𑀬𑀸 𑀯𑀸 𑀯𑀺𑀳𑀸𑀭𑀸 𑀅𑀭𑀺𑀬𑀯𑀺𑀳𑀸𑀭𑀸, 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺. 𑀲𑁄 𑀳𑀺 𑀪𑀕𑀯𑀸 𑀏𑀓𑀁 𑀇𑀭𑀺𑀬𑀸𑀧𑀣𑀩𑀸𑀥𑀦𑀦𑁆𑀢𑀺𑀆𑀤𑀺 𑀬𑀤𑀺𑀧𑀺 𑀪𑀕𑀯𑀸 𑀏𑀓𑁂𑀦𑀧𑀺 𑀇𑀭𑀺𑀬𑀸𑀧𑀣𑁂𑀦 𑀘𑀺𑀭𑀢𑀭𑀁 𑀓𑀸𑀮𑀁 𑀅𑀢𑁆𑀢𑀪𑀸𑀯𑀁 𑀧𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀣𑀸𑀧𑀺 ‘‘𑀉𑀧𑀸𑀤𑀺𑀦𑁆𑀦𑀓𑀲𑀭𑀻𑀭𑀲𑁆𑀲 𑀦𑀸𑀫 𑀅𑀬𑀁 𑀲𑀪𑀸𑀯𑁄’’𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀯𑀸 𑀪𑀕𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀦𑁆𑀢𑁄 𑀯𑁂𑀦𑁂𑀬𑁆𑀬𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄, 𑀦𑀸𑀦𑀸𑀲𑀫𑀸𑀧𑀢𑁆𑀢𑀻𑀳𑀺 𑀘 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀯𑀲𑀢𑀻𑀢𑀺 𑀯𑁂𑀦𑁂𑀬𑁆𑀬𑀲𑀢𑁆𑀢𑀸𑀦𑀁 𑀅𑀢𑁆𑀢𑀦𑁄 𑀘 𑀯𑀺𑀯𑀺𑀥𑀁 𑀳𑀺𑀢𑀲𑀼𑀔𑀁 𑀳𑀭𑀢𑀺 𑀉𑀧𑀦𑁂𑀢𑀺 𑀉𑀧𑁆𑀧𑀸𑀤𑁂𑀢𑀺, 𑀢𑀲𑁆𑀫𑀸 𑀯𑀺𑀯𑀺𑀥𑀁 𑀳𑀭𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀼𑀪𑀕𑀢𑁆𑀢𑀸𑀢𑀺 𑀲𑀺𑀭𑀻𑀓𑀸𑀫𑀸𑀦𑀯𑀲𑁂𑀦 𑀲𑁄𑀪𑀦𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀲𑀼𑀦𑁆𑀤𑀭𑀲𑀺𑀭𑀺𑀓𑀢𑁆𑀢𑀸 𑀲𑀼𑀦𑁆𑀤𑀭𑀓𑀸𑀫𑀢𑁆𑀢𑀸 𑀘𑀸’’𑀢𑀺. 𑀙𑀡𑀲𑀫𑀚𑁆𑀚𑀉𑀲𑁆𑀲𑀯𑁂𑀢𑀺 𑀏𑀢𑁆𑀣 𑀙𑀡𑀁 𑀦𑀸𑀫 𑀨𑀕𑁆𑀕𑀼𑀦𑀫𑀸𑀲𑀸𑀤𑀻𑀲𑀼 𑀉𑀢𑁆𑀢𑀭𑀨𑀕𑁆𑀕𑀼𑀦𑀸𑀤𑀺-𑀅𑀪𑀺𑀮𑀓𑁆𑀔𑀺𑀢𑀤𑀺𑀯𑀲𑁂𑀲𑀼 𑀲𑀧𑀭𑀺𑀚𑀦𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀫𑀗𑁆𑀕𑀮𑀓𑀭𑀡𑀁. 𑀲𑀫𑀚𑁆𑀚𑀁 𑀦𑀸𑀫 𑀦𑀝𑀲𑀫𑀚𑁆𑀚𑀸𑀤𑀺. 𑀉𑀲𑁆𑀲𑀯𑁄 𑀦𑀓𑁆𑀔𑀢𑁆𑀢𑀁. 𑀬𑀢𑁆𑀣 𑀕𑀸𑀫𑀦𑀺𑀕𑀫𑀯𑀸𑀲𑀺𑀦𑁄 𑀢𑀬𑁄 𑀲𑀢𑁆𑀢 𑀯𑀸 𑀤𑀺𑀯𑀲𑁂 𑀦𑀓𑁆𑀔𑀢𑁆𑀢𑀖𑁄𑀲𑀦𑀁 𑀓𑀢𑁆𑀯𑀸 𑀬𑀣𑀸𑀯𑀺𑀪𑀯𑀁 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀪𑁄𑀕𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀦𑀓𑁆𑀔𑀢𑁆𑀢𑀓𑀻𑀴𑀦𑀁 ¶ 𑀓𑀻𑀴𑀦𑁆𑀢𑀺. 𑀢𑁂𑀲𑀁 𑀢𑀁 𑀢𑀣𑁂𑀯 𑀳𑁄𑀢𑀻𑀢𑀺 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀢𑀁 𑀧𑀢𑁆𑀣𑀦𑀁 𑀢𑀦𑁆𑀦𑀺𑀯𑀸𑀲𑀺𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀬𑁂𑀪𑀼𑀬𑁆𑀬𑁂𑀦 𑀢𑀣𑁂𑀯 𑀳𑁄𑀢𑀺, 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀩𑀳𑀼𑀚𑀦𑀓𑀦𑁆𑀢𑀢𑀸𑀬𑀸𑀢𑀺 𑀇𑀫𑀺𑀦𑀸 ‘‘𑀲𑀼𑀦𑁆𑀤𑀭𑀓𑀸𑀫𑀢𑁆𑀢𑀸’’𑀢𑀺 𑀏𑀢𑀲𑁆𑀲𑁂𑀯 𑀧𑀤𑀲𑁆𑀲 𑀧𑀓𑀸𑀭𑀦𑁆𑀢𑀭𑁂𑀦 𑀅𑀢𑁆𑀣𑀁 𑀯𑀺𑀪𑀸𑀯𑁂𑀢𑀺. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀓𑀫𑀦𑀻𑀬𑀝𑁆𑀞𑁂𑀦 𑀲𑀼𑀝𑁆𑀞𑀼 𑀪𑀚𑀻𑀬𑀢𑀻𑀢𑀺 𑀲𑀼𑀪𑀕𑀁, 𑀲𑀼𑀪𑀸 𑀅𑀕𑀸 𑀭𑀼𑀓𑁆𑀔𑀸 𑀏𑀢𑁆𑀣𑀸𑀢𑀺 𑀯𑀸 𑀲𑀼𑀪𑀕𑀁, 𑀲𑀼𑀦𑁆𑀤𑀭𑀓𑀺𑀢𑁆𑀢𑀺𑀬𑁄𑀕𑀢𑁄 𑀯𑀸 ‘‘𑀲𑀼𑀪𑀕’’𑀦𑁆𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑀁 𑀯𑀡𑁆𑀡𑁂𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀲𑀼𑀪𑀸𑀕𑀯𑀦𑁂’’𑀢𑀺 𑀧𑀞𑀦𑁆𑀢𑀺, ‘‘𑀲𑀼𑀦𑁆𑀤𑀭𑀪𑀽𑀫𑀺𑀪𑀸𑀕𑁂 ¶ 𑀯𑀦𑁂’’𑀢𑀺 𑀘𑀲𑁆𑀲 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀲𑀼𑀪𑀕𑀲𑁆𑀲 𑀦𑀸𑀫 𑀬𑀓𑁆𑀔𑀲𑁆𑀲 𑀯𑀦𑀁 𑀢𑁂𑀦 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸𑀢𑀺 ‘‘𑀲𑀼𑀪𑀕𑀯𑀦’’𑀦𑁆𑀢𑀺 𑀅𑀜𑁆𑀜𑁂. 𑀯𑀦𑀦𑀁 𑀪𑀢𑁆𑀢𑀻𑀢𑀺𑀅𑀢𑁆𑀣𑁂 𑀢𑀁 𑀯𑀦𑀦𑀁 𑀓𑀸𑀭𑁂𑀢𑀻𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀯𑀦𑀬𑀢𑀻𑀢𑀺 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑁂𑀯𑀸𑀳 ‘‘𑀅𑀢𑁆𑀢𑀦𑀺 𑀲𑀺𑀦𑁂𑀳𑀁 𑀉𑀧𑁆𑀧𑀸𑀤𑁂𑀢𑀻’’𑀢𑀺. 𑀬𑀸𑀘𑀦𑀢𑁆𑀣𑁂 𑀯𑀦𑀼𑀢𑁂 𑀇𑀢𑀺 𑀯𑀦𑀦𑁆𑀢𑀺 𑀉𑀧𑀘𑀸𑀭𑀓𑀧𑁆𑀧𑀦𑀸𑀯𑀲𑁂𑀦 𑀯𑀦-𑀲𑀤𑁆𑀤𑁄 𑀯𑁂𑀤𑀺𑀢𑀩𑁆𑀩𑁄.

𑀉𑀚𑀼𑀯𑀁𑀲𑀸𑀢𑀺 𑀉𑀚𑀼𑀪𑀽𑀢𑀯𑀺𑀝𑀧𑀸. 𑀫𑀳𑀸𑀲𑀸𑀮𑀸𑀢𑀺 𑀫𑀳𑀸𑀭𑀼𑀓𑁆𑀔𑀸. 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀸𑀮𑀫𑀽𑀮𑁂𑀢𑀺 𑀅𑀜𑁆𑀜𑀢𑀭𑀲𑁆𑀲 𑀭𑀼𑀓𑁆𑀔𑀲𑁆𑀲 𑀫𑀽𑀮𑁂. 𑀯𑀦𑀧𑁆𑀧𑀢𑀺𑀚𑁂𑀝𑁆𑀞𑀓𑀭𑀼𑀓𑁆𑀔𑁄𑀢𑀺 𑀯𑀦𑀧𑁆𑀧𑀢𑀺𑀪𑀽𑀢𑁄 𑀚𑁂𑀝𑁆𑀞𑀓𑀭𑀼𑀓𑁆𑀔𑁄. 𑀢𑀫𑁂𑀯 𑀚𑁂𑀝𑁆𑀞𑀓𑀪𑀸𑀯𑀦𑁆𑀢𑀺 𑀯𑀦𑀧𑁆𑀧𑀢𑀺𑀪𑀸𑀯𑁂𑀦𑀸𑀕𑀢𑀁 𑀲𑁂𑀝𑁆𑀞𑀪𑀸𑀯𑀁 𑀧𑀥𑀸𑀦𑀪𑀸𑀯𑀁. 𑀢𑁂𑀦 𑀳𑀺 𑀲𑁄 ‘‘𑀲𑀸𑀮𑀭𑀸𑀚𑀸’’𑀢𑀺 𑀯𑀼𑀢𑁆𑀢𑁄. 𑀉𑀧𑀕𑀢𑀸𑀦𑀁 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀚𑀸, 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀢𑀸𑀤𑀺𑀲𑁂 𑀭𑀼𑀓𑁆𑀔𑁂 𑀭𑀸𑀚𑀯𑁄𑀳𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀧𑀢𑀺𑀝𑁆𑀞𑀺𑀢𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀩𑁆𑀭𑀸𑀳𑁆𑀫𑀡 𑀥𑀫𑁆𑀫𑀺𑀓𑀸𑀢𑀺 𑀆𑀮𑀧𑀦𑀁. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀲𑀸𑀔𑀸𑀤𑀺𑀫𑀢𑁄 𑀲𑀗𑁆𑀖𑀸𑀢𑀲𑁆𑀲 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑁂 𑀅𑀯𑀬𑀯𑀯𑀺𑀲𑁂𑀲𑁂 𑀧𑀯𑀢𑁆𑀢𑀫𑀸𑀦𑁄 𑀫𑀽𑀮-𑀲𑀤𑁆𑀤𑁄. 𑀬𑀲𑁆𑀫𑀸 𑀢𑀁𑀲𑀤𑀺𑀲𑁂𑀲𑀼 𑀢𑀦𑁆𑀦𑀺𑀲𑁆𑀲𑀬𑁂 𑀧𑀤𑁂𑀲𑁂 𑀘 𑀭𑀼𑀴𑁆𑀳𑀻𑀯𑀲𑁂𑀦 𑀧𑀭𑀺𑀬𑀸𑀬𑀢𑁄 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 ‘‘𑀫𑀽𑀮𑀸𑀦𑀺 𑀉𑀤𑁆𑀥𑀭𑁂𑀬𑁆𑀬𑀸’’𑀢𑀺 𑀏𑀢𑁆𑀣 𑀦𑀺𑀧𑁆𑀧𑀭𑀺𑀬𑀸𑀬𑀫𑀽𑀮𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀏𑀓𑁂𑀦 𑀫𑀽𑀮-𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀆𑀳 ‘‘𑀫𑀽𑀮𑀫𑀽𑀮𑁂 𑀤𑀺𑀲𑁆𑀲𑀢𑀻’’𑀢𑀺 𑀬𑀣𑀸 ‘‘𑀤𑀼𑀓𑁆𑀔𑀤𑀼𑀓𑁆𑀔𑀁 (𑀲𑀁. 𑀦𑀺. 𑁪.𑁩𑁨𑁭), 𑀭𑀽𑀧𑀭𑀽𑀧’’𑀦𑁆𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁪𑁪𑁯) 𑀘. 𑀅𑀲𑀸𑀥𑀸𑀭𑀡𑀳𑁂𑀢𑀼𑀫𑁆𑀳𑀻𑀢𑀺 𑀅𑀲𑀸𑀥𑀸𑀭𑀡𑀓𑀸𑀭𑀡𑁂. 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀏𑀯 𑀆𑀯𑁂𑀡𑀺𑀓𑁂 𑀦𑁂𑀲𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑀢𑁄 𑀫𑀽𑀮𑀝𑁆𑀞𑁂𑀦 𑀉𑀧𑀓𑀸𑀭𑀓𑁂 𑀧𑀘𑁆𑀘𑀬𑀥𑀫𑁆𑀫𑁂 𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑀢𑀢𑁆𑀣𑀸𑀢𑀺 ‘‘𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀉𑀓𑁆𑀓𑀝𑁆𑀞𑀸𑀬𑀁 𑀯𑀺𑀳𑀭𑀢𑀺 𑀲𑀼𑀪𑀕𑀯𑀦𑁂 𑀲𑀸𑀮𑀭𑀸𑀚𑀫𑀽𑀮𑁂’’𑀢𑀺 𑀬𑀁 𑀯𑀼𑀢𑁆𑀢𑀁 𑀯𑀸𑀓𑁆𑀬𑀁, 𑀢𑀢𑁆𑀢. 𑀲𑀺𑀬𑀸𑀢𑀺 𑀓𑀲𑁆𑀲𑀘𑀺 𑀏𑀯𑀁 𑀧𑀭𑀺𑀯𑀺𑀢𑀓𑁆𑀓𑁄 𑀲𑀺𑀬𑀸, 𑀯𑀓𑁆𑀔𑀫𑀸𑀦𑀸𑀓𑀸𑀭𑁂𑀦 𑀓𑀤𑀸𑀘𑀺 𑀘𑁄𑀤𑁂𑀬𑁆𑀬 𑀯𑀸𑀢𑀺 𑀅𑀢𑁆𑀣𑁄. 𑀅𑀣 𑀢𑀢𑁆𑀣 𑀯𑀺𑀳𑀭𑀢𑀻𑀢𑀺 𑀬𑀤𑀺 𑀲𑀼𑀪𑀕𑀯𑀦𑁂 𑀲𑀸𑀮𑀭𑀸𑀚𑀫𑀽𑀮𑁂 𑀯𑀺𑀳𑀭𑀢𑀺. 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀦𑀸𑀦𑀸𑀞𑀸𑀦𑀪𑀽𑀢𑀢𑁆𑀢𑀸 ¶ 𑀉𑀓𑁆𑀓𑀝𑁆𑀞𑀸𑀲𑀼𑀪𑀕𑀯𑀦𑀸𑀦𑀁, 𑀏𑀓𑀁 𑀲𑀫𑀬𑀦𑁆𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀸𑀦𑀺 𑀘𑁄𑀤𑀓𑁄 𑀢𑀫𑁂𑀯 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 ‘‘𑀦 𑀳𑀺 𑀲𑀓𑁆𑀓𑀸’’𑀢𑀺𑀆𑀤𑀺𑀦𑀸 𑀯𑀺𑀯𑀭𑀢𑀺. 𑀇𑀢𑀭𑁄 𑀲𑀩𑁆𑀩𑀫𑁂𑀢𑀁 𑀅𑀯𑀺𑀧𑀭𑀻𑀢𑀁 𑀅𑀢𑁆𑀣𑀁 𑀅𑀚𑀸𑀦𑀦𑁆𑀢𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩’’𑀦𑁆𑀢𑀺 𑀆𑀳. 𑀢𑀢𑁆𑀣 𑀏𑀢𑀦𑁆𑀢𑀺 ‘‘𑀉𑀓𑁆𑀓𑀝𑁆𑀞𑀸𑀬𑀁 𑀯𑀺𑀳𑀭𑀢𑀺 𑀲𑀼𑀪𑀕𑀯𑀦𑁂 𑀲𑀸𑀮𑀭𑀸𑀚𑀫𑀽𑀮𑁂’’𑀢𑀺 𑀏𑀢𑀁 𑀯𑀘𑀦𑀁. 𑀏𑀯𑀦𑁆𑀢𑀺 ‘‘𑀬𑀤𑀺 𑀢𑀸𑀯 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀬𑀁 𑀢𑀁 𑀪𑀯𑀢𑀸 𑀘𑁄𑀤𑀺𑀢𑀁, 𑀢𑀁 𑀅𑀢𑁆𑀣𑀢𑁄 𑀏𑀯𑀁 𑀦 𑀔𑁄 𑀧𑀦 𑀤𑀝𑁆𑀞𑀩𑁆𑀩𑀁, 𑀦 𑀉𑀪𑀬𑀢𑁆𑀣 𑀅𑀧𑀼𑀩𑁆𑀩𑀅𑀘𑀭𑀺𑀫𑀁 𑀯𑀺𑀳𑀸𑀭𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀅𑀢𑁆𑀢𑀦𑁄 𑀬𑀣𑀸𑀥𑀺𑀧𑁆𑀧𑁂𑀢𑀁 𑀅𑀯𑀺𑀧𑀭𑀻𑀢𑀁 𑀅𑀢𑁆𑀣𑀁, 𑀢𑀲𑁆𑀲 𑀘 𑀧𑀝𑀺𑀓𑀘𑁆𑀘𑁂𑀯 𑀯𑀼𑀢𑁆𑀢𑀪𑀸𑀯𑀁, 𑀢𑁂𑀦 𑀘 𑀅𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀦𑀦𑀼 𑀅𑀯𑁄𑀘𑀼𑀫𑁆𑀳…𑀧𑁂… 𑀲𑀸𑀮𑀭𑀸𑀚𑀫𑀽𑀮𑁂’’𑀢𑀺 𑀆𑀳. 𑀏𑀯𑀫𑁆𑀧𑀺 ‘‘𑀲𑀼𑀪𑀕𑀯𑀦𑁂 ¶ 𑀲𑀸𑀮𑀭𑀸𑀚𑀫𑀽𑀮𑁂 𑀯𑀺𑀳𑀭𑀢𑀻’’𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀁, 𑀦 ‘‘𑀉𑀓𑁆𑀓𑀝𑁆𑀞𑀸𑀬’’𑀦𑁆𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀕𑁄𑀘𑀭𑀕𑀸𑀫𑀦𑀺𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺𑀆𑀤𑀺.

𑀅𑀯𑀲𑁆𑀲𑀁 𑀘𑁂𑀢𑁆𑀣 𑀕𑁄𑀘𑀭𑀕𑀸𑀫𑀓𑀺𑀢𑁆𑀢𑀦𑀁 𑀓𑀸𑀢𑀩𑁆𑀩𑀁. 𑀢𑀣𑀸 𑀳𑀺 𑀢𑀁 𑀬𑀣𑀸 𑀲𑀼𑀪𑀕𑀯𑀦𑀸𑀤𑀺𑀓𑀺𑀢𑁆𑀢𑀦𑀁 𑀧𑀩𑁆𑀩𑀚𑀺𑀢𑀸𑀦𑀼𑀕𑁆𑀕𑀳𑀓𑀭𑀡𑀸𑀤𑀺𑀅𑀦𑁂𑀓𑀧𑁆𑀧𑀬𑁄𑀚𑀦𑀁, 𑀏𑀯𑀁 𑀕𑀳𑀝𑁆𑀞𑀸𑀦𑀼𑀕𑁆𑀕𑀳𑀓𑀭𑀡𑀸𑀤𑀺𑀯𑀺𑀯𑀺𑀥𑀧𑁆𑀧𑀬𑁄𑀚𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀓𑁆𑀓𑀝𑁆𑀞𑀸𑀓𑀺𑀢𑁆𑀢𑀦𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀘𑁆𑀘𑀬𑀕𑁆𑀕𑀳𑀡𑁂𑀦 𑀉𑀧𑀲𑀗𑁆𑀓𑀫𑀦𑀧𑀬𑀺𑀭𑀼𑀧𑀸𑀲𑀦𑀸𑀦𑀁 𑀑𑀓𑀸𑀲𑀤𑀸𑀦𑁂𑀦 𑀥𑀫𑁆𑀫𑀤𑁂𑀲𑀦𑀸𑀬 𑀲𑀭𑀡𑁂𑀲𑀼 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑀦𑁂𑀦 𑀬𑀣𑀽𑀧𑀦𑀺𑀲𑁆𑀲𑀬𑀁 𑀉𑀧𑀭𑀺𑀯𑀺𑀲𑁂𑀲𑀸𑀥𑀺𑀕𑀫𑀸𑀯𑀳𑀦𑁂𑀦 𑀘 𑀕𑀳𑀝𑁆𑀞𑀸𑀦𑀕𑁆𑀕𑀳𑀓𑀭𑀡𑀁, 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀲𑁆𑀲 𑀘 𑀅𑀦𑀼𑀭𑀽𑀧𑀯𑀲𑀦𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑁂𑀦𑁂𑀢𑁆𑀣 𑀧𑀩𑁆𑀩𑀚𑀺𑀢𑀸𑀦𑀼𑀕𑁆𑀕𑀳𑀓𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀭𑀼𑀡𑀸𑀬 𑀉𑀧𑀕𑀫𑀦𑀁, 𑀦 𑀮𑀸𑀪𑀸𑀤𑀺𑀦𑀺𑀫𑀺𑀢𑁆𑀢𑀁, 𑀧𑀜𑁆𑀜𑀸𑀬 𑀅𑀧𑀕𑀫𑀦𑀁, 𑀦 𑀯𑀺𑀭𑁄𑀥𑀸𑀤𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀉𑀧𑀕𑀫𑀦𑀸𑀧𑀕𑀫𑀦𑀸𑀦𑀁 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑀁 𑀯𑀺𑀪𑀸𑀯𑁂𑀢𑀺. 𑀥𑀫𑁆𑀫𑀺𑀓𑀲𑀼𑀔𑀁 𑀦𑀸𑀫 𑀅𑀦𑀯𑀚𑁆𑀚𑀲𑀼𑀔𑀁. 𑀤𑁂𑀯𑀸𑀦𑀁 𑀉𑀧𑀓𑀸𑀭𑀩𑀳𑀼𑀮𑀢𑀸 𑀚𑀦𑀯𑀺𑀯𑀺𑀢𑁆𑀢𑀢𑀸𑀬. 𑀧𑀘𑀼𑀭𑀚𑀦𑀯𑀺𑀯𑀺𑀢𑁆𑀢𑀁 𑀳𑀺 𑀞𑀸𑀦𑀁 𑀤𑁂𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺. 𑀢𑀤𑀢𑁆𑀣𑀧𑀭𑀺𑀦𑀺𑀧𑁆𑀨𑀸𑀤𑀦𑀦𑁆𑀢𑀺 𑀮𑁄𑀓𑀢𑁆𑀣𑀦𑀺𑀧𑁆𑀨𑀸𑀤𑀦𑀁, 𑀩𑀼𑀤𑁆𑀥𑀓𑀺𑀘𑁆𑀘𑀲𑀫𑁆𑀧𑀸𑀤𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀫𑀸𑀤𑀺𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀉𑀓𑁆𑀓𑀝𑁆𑀞𑀸𑀓𑀺𑀢𑁆𑀢𑀦𑀢𑁄 𑀭𑀽𑀧𑀓𑀸𑀬𑀲𑁆𑀲 𑀅𑀦𑀼𑀕𑁆𑀕𑀡𑁆𑀳𑀦𑀁 𑀤𑀲𑁆𑀲𑁂𑀢𑀺, 𑀲𑀼𑀪𑀕𑀯𑀦𑀸𑀤𑀺𑀓𑀺𑀢𑁆𑀢𑀦𑀢𑁄 𑀥𑀫𑁆𑀫𑀓𑀸𑀬𑀲𑁆𑀲. 𑀢𑀣𑀸 𑀧𑀼𑀭𑀺𑀫𑁂𑀦 𑀧𑀭𑀸𑀥𑀻𑀦𑀓𑀺𑀭𑀺𑀬𑀸𑀓𑀭𑀡𑀁, 𑀤𑀼𑀢𑀺𑀬𑁂𑀦 𑀅𑀢𑁆𑀢𑀸𑀥𑀻𑀦𑀓𑀺𑀭𑀺𑀬𑀸𑀓𑀭𑀡𑀁. 𑀧𑀼𑀭𑀺𑀫𑁂𑀦 𑀯𑀸 𑀓𑀭𑀼𑀡𑀸𑀓𑀺𑀘𑁆𑀘𑀁, 𑀇𑀢𑀭𑁂𑀦 𑀧𑀜𑁆𑀜𑀸𑀓𑀺𑀘𑁆𑀘𑀁. 𑀧𑀼𑀭𑀺𑀫𑁂𑀦 𑀘𑀲𑁆𑀲 𑀧𑀭𑀫𑀸𑀬 𑀅𑀦𑀼𑀓𑀫𑁆𑀧𑀸𑀬 𑀲𑀫𑀦𑁆𑀦𑀸𑀕𑀫𑀁, 𑀧𑀘𑁆𑀙𑀺𑀫𑁂𑀦 𑀧𑀭𑀫𑀸𑀬 𑀉𑀧𑁂𑀓𑁆𑀔𑀸𑀬 𑀲𑀫𑀦𑁆𑀦𑀸𑀕𑀫𑀁 ¶ 𑀤𑀻𑀧𑁂𑀢𑀺. 𑀪𑀕𑀯𑀸 𑀳𑀺 𑀲𑀩𑁆𑀩𑀲𑀢𑁆𑀢𑁂 𑀧𑀭𑀫𑀸𑀬 𑀅𑀦𑀼𑀓𑀫𑁆𑀧𑀸𑀬 𑀅𑀦𑀼𑀓𑀫𑁆𑀧𑀢𑀺, 𑀦 𑀘 𑀢𑀢𑁆𑀣 𑀲𑀺𑀦𑁂𑀳𑀤𑁄𑀲𑀸𑀦𑀼𑀧𑀢𑀺𑀢𑁄 𑀧𑀭𑀫𑀼𑀧𑁂𑀓𑁆𑀔𑀓𑀪𑀸𑀯𑀢𑁄, 𑀉𑀧𑁂𑀓𑁆𑀔𑀓𑁄 𑀘 𑀦 𑀘 𑀧𑀭𑀳𑀺𑀢𑀲𑀼𑀔𑀓𑀭𑀡𑁂 𑀅𑀧𑁆𑀧𑁄𑀲𑀼𑀓𑁆𑀓𑁄 𑀫𑀳𑀸𑀓𑀸𑀭𑀼𑀡𑀺𑀓𑀪𑀸𑀯𑀢𑁄.

𑀢𑀲𑁆𑀲 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀮𑁄𑀓𑀦𑀸𑀣𑀢𑀸, 𑀉𑀧𑁂𑀓𑁆𑀔𑀓𑀢𑀸𑀬 𑀅𑀢𑁆𑀢𑀦𑀸𑀣𑀢𑀸. 𑀢𑀣𑀸 𑀳𑁂𑀲 𑀩𑁄𑀥𑀺𑀲𑀢𑁆𑀢𑀪𑀽𑀢𑁄 𑀫𑀳𑀸𑀓𑀭𑀼𑀡𑀸𑀬 𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀲𑀓𑀮𑀮𑁄𑀓𑀳𑀺𑀢𑀸𑀬 𑀉𑀲𑁆𑀲𑀼𑀓𑁆𑀓𑀫𑀸𑀧𑀦𑁆𑀦𑁄 𑀫𑀳𑀸𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀢𑀤𑀢𑁆𑀣𑀦𑀺𑀧𑁆𑀨𑀸𑀤𑀦𑀢𑁆𑀣𑀁 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑁂 𑀲𑀫𑁆𑀧𑀸𑀤𑁂𑀦𑁆𑀢𑁄 𑀅𑀧𑀭𑀺𑀫𑀺𑀢𑀁 𑀓𑀸𑀮𑀁 𑀅𑀦𑀧𑁆𑀧𑀓𑀁 𑀤𑀼𑀓𑁆𑀔𑀫𑀦𑀼𑀪𑁄𑀲𑀺, 𑀉𑀧𑁂𑀓𑁆𑀔𑀓𑀢𑀸𑀬 𑀲𑀫𑁆𑀫𑀸 𑀧𑀢𑀺𑀢𑁂𑀳𑀺 𑀤𑀼𑀓𑁆𑀔𑁂𑀳𑀺 𑀦 𑀯𑀺𑀓𑀫𑁆𑀧𑀺. 𑀢𑀣𑀸 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀲𑀁𑀲𑀸𑀭𑀸𑀪𑀺𑀫𑀼𑀔𑀢𑀸, 𑀉𑀧𑁂𑀓𑁆𑀔𑀓𑀢𑀸𑀬 𑀢𑀢𑁄 𑀦𑀺𑀩𑁆𑀩𑀺𑀦𑁆𑀤𑀦𑀸. 𑀢𑀣𑀸 𑀉𑀧𑁂𑀓𑁆𑀔𑀓𑀢𑀸𑀬 𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑀢𑀸, 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀢𑀤𑀥𑀺𑀕𑀫𑁄. 𑀢𑀣𑀸 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀧𑀭𑁂𑀲𑀁 𑀅𑀪𑀺𑀁𑀲𑀸𑀧𑀦𑀁, 𑀉𑀧𑁂𑀓𑁆𑀔𑀓𑀢𑀸𑀬 𑀲𑀬𑀁 𑀧𑀭𑁂𑀳𑀺 𑀅𑀪𑀸𑀬𑀦𑀁. 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀧𑀭𑀁 𑀭𑀓𑁆𑀔𑀢𑁄 𑀅𑀢𑁆𑀢𑀦𑁄 𑀭𑀓𑁆𑀔𑀡𑀁, 𑀉𑀧𑁂𑀓𑁆𑀔𑀓𑀢𑀸𑀬 𑀅𑀢𑁆𑀢𑀸𑀦𑀁 𑀭𑀓𑁆𑀔𑀢𑁄 𑀧𑀭𑁂𑀲𑀁 𑀭𑀓𑁆𑀔𑀡𑀁. 𑀢𑁂𑀦𑀲𑁆𑀲 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀸𑀤𑀻𑀲𑀼 𑀘𑀢𑀼𑀢𑁆𑀣𑀧𑀼𑀕𑁆𑀕𑀮𑀪𑀸𑀯𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀢𑀣𑀸 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀲𑁆𑀲 𑀘𑀸𑀕𑀸𑀥𑀺𑀝𑁆𑀞𑀸𑀦𑀲𑁆𑀲 𑀘 𑀧𑀸𑀭𑀺𑀧𑀽𑀭𑀺, 𑀉𑀧𑁂𑀓𑁆𑀔𑀓𑀢𑀸𑀬 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀲𑁆𑀲 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀲𑁆𑀲 𑀘 𑀧𑀸𑀭𑀺𑀧𑀽𑀭𑀺. 𑀏𑀯𑀁 𑀧𑀭𑀺𑀲𑀼𑀤𑁆𑀥𑀸𑀲𑀬𑀧𑀬𑁄𑀕𑀲𑁆𑀲 ¶ 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀮𑁄𑀓𑀳𑀺𑀢𑀢𑁆𑀣𑀫𑁂𑀯 𑀭𑀚𑁆𑀚𑀲𑀫𑁆𑀧𑀤𑀸𑀤𑀺𑀪𑀯𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑀕𑀫𑀦𑀁, 𑀉𑀧𑁂𑀓𑁆𑀔𑀓𑀢𑀸𑀬 𑀢𑀺𑀡𑀸𑀬𑀧𑀺 𑀅𑀫𑀜𑁆𑀜𑀫𑀸𑀦𑀲𑁆𑀲 𑀢𑀢𑁄 𑀅𑀧𑀕𑀫𑀦𑀁. 𑀇𑀢𑀺 𑀲𑀼𑀯𑀺𑀲𑀼𑀤𑁆𑀥𑀉𑀧𑀕𑀫𑀸𑀧𑀕𑀫𑀲𑁆𑀲 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀮𑁄𑀓𑀳𑀺𑀢𑀢𑁆𑀣𑀫𑁂𑀯 𑀤𑀸𑀦𑀯𑀲𑁂𑀦 𑀲𑀫𑁆𑀧𑀢𑁆𑀢𑀻𑀦𑀁 𑀧𑀭𑀺𑀘𑁆𑀘𑀚𑀦𑀸, 𑀉𑀧𑁂𑀓𑁆𑀔𑀓𑀢𑀸𑀬 𑀘𑀲𑁆𑀲 𑀨𑀮𑀲𑁆𑀲 𑀅𑀢𑁆𑀢𑀦𑁄 𑀅𑀧𑀘𑁆𑀘𑀸𑀲𑀻𑀲𑀦𑀸. 𑀏𑀯𑀁 𑀲𑀫𑀼𑀤𑀸𑀕𑀫𑀦𑀢𑁄 𑀧𑀝𑁆𑀞𑀸𑀬 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀕𑀼𑀡𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀧𑀭𑁂𑀲𑀁 𑀳𑀺𑀢𑀲𑀼𑀔𑀢𑁆𑀣𑀁 𑀅𑀢𑀺𑀤𑀼𑀓𑁆𑀓𑀭𑀓𑀸𑀭𑀺𑀢𑀸, 𑀉𑀧𑁂𑀓𑁆𑀔𑀓𑀢𑀸𑀬 𑀓𑀸𑀬𑀫𑁆𑀧𑀺 𑀅𑀦𑀮𑀁𑀓𑀸𑀭𑀺𑀢𑀸.

𑀢𑀣𑀸 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀘𑀭𑀺𑀫𑀢𑁆𑀢𑀪𑀸𑀯𑁂 𑀚𑀺𑀡𑁆𑀡𑀸𑀢𑀼𑀭𑀫𑀢𑀤𑀲𑁆𑀲𑀦𑁂𑀦 𑀲𑀜𑁆𑀚𑀸𑀢𑀲𑀁𑀯𑁂𑀕𑁄, 𑀉𑀧𑁂𑀓𑁆𑀔𑀓𑀢𑀸𑀬 𑀉𑀴𑀸𑀭𑁂𑀲𑀼 𑀤𑁂𑀯𑀪𑁄𑀕𑀲𑀤𑀺𑀲𑁂𑀲𑀼 𑀪𑁄𑀕𑁂𑀲𑀼 𑀦𑀺𑀭𑀧𑁂𑀓𑁆𑀔𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺. 𑀢𑀣𑀸 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 ‘‘𑀓𑀺𑀘𑁆𑀙𑀁 𑀯𑀢𑀸𑀬𑀁 𑀮𑁄𑀓𑁄 𑀆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁫𑁭; 𑀲𑀁. 𑀦𑀺. 𑁨.𑁪, 𑁧𑁦) 𑀓𑀭𑀼𑀡𑀸𑀫𑀼𑀔𑁂𑀦𑁂𑀯 𑀯𑀺𑀧𑀲𑁆𑀲𑀦𑀸𑀭𑀫𑁆𑀪𑁄 ¶ , 𑀉𑀧𑁂𑀓𑁆𑀔𑀓𑀢𑀸𑀬 𑀩𑀼𑀤𑁆𑀥𑀪𑀽𑀢𑀲𑁆𑀲 𑀲𑀢𑁆𑀢 𑀲𑀢𑁆𑀢𑀸𑀳𑀸𑀦𑀺 𑀯𑀺𑀯𑁂𑀓𑀲𑀼𑀔𑁂𑀦𑁂𑀯 𑀯𑀻𑀢𑀺𑀦𑀸𑀫𑀦𑀁. 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀥𑀫𑁆𑀫𑀕𑀫𑁆𑀪𑀻𑀭𑀢𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀬 𑀅𑀧𑁆𑀧𑁄𑀲𑀼𑀓𑁆𑀓𑀢𑀁 𑀆𑀧𑀚𑁆𑀚𑀺𑀢𑁆𑀯𑀸𑀧𑀺 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀅𑀚𑁆𑀛𑁂𑀲𑀦𑀸𑀧𑀤𑁂𑀲𑁂𑀦 𑀑𑀓𑀸𑀲𑀓𑀭𑀡𑀁, 𑀉𑀧𑁂𑀓𑁆𑀔𑀓𑀢𑀸𑀬 𑀧𑀜𑁆𑀘𑀯𑀕𑁆𑀕𑀺𑀬𑀸𑀤𑀺 𑀯𑁂𑀦𑁂𑀬𑁆𑀬𑀸𑀦𑀁 𑀅𑀦𑀦𑀼𑀭𑀽𑀧𑀲𑀫𑀼𑀤𑀸𑀘𑀸𑀭𑁂𑀧𑀺 𑀅𑀦𑀜𑁆𑀜𑀣𑀸𑀪𑀸𑀯𑁄. 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀓𑀢𑁆𑀣𑀘𑀺 𑀧𑀝𑀺𑀖𑀸𑀢𑀸𑀪𑀸𑀯𑁂𑀦𑀲𑁆𑀲 𑀲𑀩𑁆𑀩𑀢𑁆𑀣 𑀅𑀫𑀺𑀢𑁆𑀢𑀲𑀜𑁆𑀜𑀸𑀬 𑀅𑀪𑀸𑀯𑁄, 𑀉𑀧𑁂𑀓𑁆𑀔𑀓𑀢𑀸𑀬 𑀓𑀢𑁆𑀣𑀘𑀺𑀧𑀺 𑀅𑀦𑀼𑀭𑁄𑀥𑀸𑀪𑀸𑀯𑁂𑀦 𑀲𑀩𑁆𑀩𑀢𑁆𑀣 𑀲𑀺𑀦𑁂𑀳𑀲𑀦𑁆𑀣𑀯𑀸𑀪𑀸𑀯𑁄. 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀕𑀸𑀫𑀸𑀤𑀻𑀦𑀁 𑀆𑀲𑀦𑁆𑀦𑀝𑁆𑀞𑀸𑀦𑁂 𑀯𑀲𑀦𑁆𑀢𑀲𑁆𑀲𑀧𑀺 𑀉𑀧𑁂𑀓𑁆𑀔𑀓𑀢𑀸𑀬 𑀅𑀭𑀜𑁆𑀜𑀝𑁆𑀞𑀸𑀦𑁂 𑀏𑀯 𑀯𑀺𑀳𑀭𑀡𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀭𑀺𑀫𑁂𑀦 𑀘𑀲𑁆𑀲 𑀧𑀭𑀫𑀸𑀬 𑀅𑀦𑁆𑀦𑀼𑀓𑀫𑁆𑀧𑀸𑀬 𑀲𑀫𑀦𑁆𑀦𑀸𑀕𑀫𑀁, 𑀧𑀘𑁆𑀙𑀺𑀫𑁂𑀦 𑀧𑀭𑀫𑀸𑀬 𑀉𑀧𑁂𑀓𑁆𑀔𑀸𑀬 𑀲𑀫𑀦𑁆𑀦𑀸𑀕𑀫𑀁 𑀤𑀻𑀧𑁂𑀢𑀻’’𑀢𑀺.

𑀢𑀦𑁆𑀢𑀺 ‘‘𑀢𑀢𑁆𑀭𑀸’’𑀢𑀺 𑀧𑀤𑀁. 𑀤𑁂𑀲𑀓𑀸𑀮𑀧𑀭𑀺𑀤𑀻𑀧𑀦𑀦𑁆𑀢𑀺 𑀬𑁂 𑀤𑁂𑀲𑀓𑀸𑀮𑀸 𑀇𑀥 𑀯𑀺𑀳𑀭𑀡𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀢𑁂𑀲𑀁 𑀧𑀭𑀺𑀤𑀻𑀧𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀁 𑀲𑀫𑀬𑀁…𑀧𑁂… 𑀤𑀻𑀧𑁂𑀢𑀻’’𑀢𑀺 𑀆𑀳. 𑀢𑀁-𑀲𑀤𑁆𑀤𑁄 𑀳𑀺 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀝𑀺𑀦𑀺𑀤𑁆𑀤𑁂𑀲𑁄, 𑀢𑀲𑁆𑀫𑀸 𑀇𑀥 𑀓𑀸𑀮𑀲𑁆𑀲, 𑀤𑁂𑀲𑀲𑁆𑀲 𑀯𑀸 𑀧𑀝𑀺𑀦𑀺𑀤𑁆𑀤𑁂𑀲𑁄 𑀪𑀯𑀺𑀢𑀼𑀁 𑀅𑀭𑀳𑀢𑀺, 𑀦 𑀅𑀜𑁆𑀜𑀲𑁆𑀲. 𑀅𑀬𑀁 𑀢𑀸𑀯 𑀢𑀢𑁆𑀭-𑀲𑀤𑁆𑀤𑀲𑁆𑀲 𑀧𑀝𑀺𑀦𑀺𑀤𑁆𑀤𑁂𑀲𑀪𑀸𑀯𑁂 𑀅𑀢𑁆𑀣𑀯𑀺𑀪𑀸𑀯𑀦𑀸. 𑀬𑀲𑁆𑀫𑀸 𑀧𑀦 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀢𑀢𑁆𑀭-𑀲𑀤𑁆𑀤𑁄 𑀥𑀫𑁆𑀫𑀤𑁂𑀲𑀦𑀸𑀯𑀺𑀲𑀺𑀝𑁆𑀞𑀁 𑀤𑁂𑀲𑀁 𑀓𑀸𑀮𑀜𑁆𑀘 𑀯𑀺𑀪𑀸𑀯𑁂𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀪𑀸𑀲𑀺𑀢𑀩𑁆𑀩𑀬𑀼𑀢𑁆𑀢𑁂 𑀯𑀸 𑀤𑁂𑀲𑀓𑀸𑀮𑁂 𑀤𑀻𑀧𑁂𑀢𑀻’’𑀢𑀺. 𑀢𑁂𑀦 𑀢𑀢𑁆𑀭𑀸𑀢𑀺 𑀬𑀢𑁆𑀣 𑀪𑀕𑀯𑀸 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀪𑀺𑀓𑁆𑀔𑀽 𑀆𑀮𑀧𑀺 𑀅𑀪𑀸𑀲𑀺, 𑀢𑀸𑀤𑀺𑀲𑁂 𑀤𑁂𑀲𑁂, 𑀓𑀸𑀮𑁂 𑀯𑀸𑀢𑀺 𑀅𑀢𑁆𑀣𑁄. 𑀦 𑀳𑀻𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀺. 𑀦𑀦𑀼 𑀘 𑀬𑀢𑁆𑀣 𑀞𑀺𑀢𑁄 𑀪𑀕𑀯𑀸 ‘‘𑀅𑀓𑀸𑀮𑁄 𑀔𑁄 𑀢𑀸𑀯𑀸’’𑀢𑀺𑀆𑀤𑀺𑀦𑀸 𑀩𑀸𑀳𑀺𑀬𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀧𑀝𑀺𑀓𑁆𑀔𑀺𑀧𑀺, 𑀢𑀢𑁆𑀣𑁂𑀯 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀺𑀢𑁄 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀅𑀤𑁂𑀲𑁂𑀢𑀩𑁆𑀩𑀓𑀸𑀮𑁂 𑀅𑀤𑁂𑀲𑀦𑀸𑀬 𑀇𑀤𑀁 𑀉𑀤𑀸𑀳𑀭𑀡𑀁. 𑀢𑁂𑀦𑁂𑀯𑀸𑀳 ‘‘𑀅𑀓𑀸𑀮𑁄 𑀔𑁄 𑀢𑀸𑀯𑀸’’𑀢𑀺. 𑀬𑀁 𑀧𑀦 𑀢𑀢𑁆𑀣 𑀯𑀼𑀢𑁆𑀢𑀁 ¶ ‘‘𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑀫𑁆𑀳𑀸’’𑀢𑀺 (𑀉𑀤𑀸. 𑁧𑁦), 𑀢𑀫𑁆𑀧𑀺 𑀢𑀲𑁆𑀲 𑀅𑀓𑀸𑀮𑀪𑀸𑀯𑀲𑁆𑀲𑁂𑀯 𑀧𑀭𑀺𑀬𑀸𑀬𑁂𑀦 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀲𑁆𑀲 𑀳𑀺 𑀢𑀤𑀸 𑀅𑀤𑁆𑀥𑀸𑀦𑀧𑀭𑀺𑀲𑁆𑀲𑀫𑁂𑀦 𑀭𑀽𑀧𑀓𑀸𑀬𑁂 𑀅𑀓𑀫𑁆𑀫𑀜𑁆𑀜𑀢𑀸 𑀅𑀳𑁄𑀲𑀺, 𑀩𑀮𑀯𑀧𑀻𑀢𑀺𑀯𑁂𑀕𑁂𑀦 𑀦𑀸𑀫𑀓𑀸𑀬𑁂, 𑀢𑀤𑀼𑀪𑀬𑀲𑁆𑀲 𑀯𑀽𑀧𑀲𑀫𑀁 𑀆𑀕𑀫𑁂𑀦𑁆𑀢𑁄 𑀧𑀧𑀜𑁆𑀘𑀧𑀭𑀺𑀳𑀸𑀭𑀢𑁆𑀣𑀁 𑀪𑀕𑀯𑀸 ‘‘𑀅𑀓𑀸𑀮𑁄 𑀔𑁄’’𑀢𑀺 𑀧𑀭𑀺𑀬𑀸𑀬𑁂𑀦 𑀧𑀝𑀺𑀓𑁆𑀔𑀺𑀧𑀺. 𑀅𑀤𑁂𑀲𑁂𑀢𑀩𑁆𑀩𑀤𑁂𑀲𑁂 𑀅𑀤𑁂𑀲𑀦𑀸𑀬 𑀧𑀦 𑀉𑀤𑀸𑀳𑀭𑀡𑀁 ‘‘𑀅𑀣 𑀔𑁄 𑀪𑀕𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 ¶ 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺 (𑀲𑀁. 𑀦𑀺. 𑁨.𑁧𑁫𑁪), 𑀯𑀺𑀳𑀸𑀭𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀺𑀳𑀸𑀭𑀧𑀘𑁆𑀙𑀸𑀬𑀸𑀬𑀁 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀻’’𑀢𑀺 (𑀤𑀻. 𑀦𑀺. 𑁧.𑁩𑁬𑁩) 𑀘 𑀏𑀯𑀫𑀸𑀤𑀺𑀓𑀁 𑀇𑀥 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀁.

‘‘𑀅𑀣 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀇𑀥 𑀧𑀼𑀩𑁆𑀩𑁂 𑀭𑀲𑀸𑀤𑁄 𑀇𑀥 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁨𑁫𑁧) 𑀧𑀤𑀧𑀽𑀭𑀡𑀫𑀢𑁆𑀢𑁂 𑀔𑁄-𑀲𑀤𑁆𑀤𑁄, ‘‘𑀤𑀼𑀓𑁆𑀔𑀁 𑀔𑁄 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 𑀅𑀧𑁆𑀧𑀢𑀺𑀲𑁆𑀲𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁨𑁧) 𑀅𑀯𑀥𑀸𑀭𑀡𑁂, ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀆𑀯𑀼𑀲𑁄, 𑀲𑀢𑁆𑀣𑀼 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀲𑀸𑀯𑀓𑀸 𑀯𑀺𑀯𑁂𑀓𑀁 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁧) 𑀆𑀤𑀺𑀓𑀸𑀮𑀢𑁆𑀣𑁂. 𑀯𑀸𑀓𑁆𑀬𑀸𑀭𑀫𑁆𑀪𑁂𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀧𑀤𑀧𑀽𑀭𑀡𑁂𑀦 𑀯𑀘𑀦𑀸𑀮𑀗𑁆𑀓𑀸𑀭𑀫𑀢𑁆𑀢𑀁 𑀓𑀢𑀁 𑀳𑁄𑀢𑀺, 𑀆𑀤𑀺𑀓𑀸𑀮𑀢𑁆𑀣𑁂𑀦 𑀯𑀸𑀓𑁆𑀬𑀲𑁆𑀲 𑀉𑀧𑀜𑁆𑀜𑀸𑀲𑀫𑀢𑁆𑀢𑀁, 𑀅𑀯𑀥𑀸𑀭𑀢𑁆𑀣𑁂𑀦 𑀧𑀦 𑀦𑀺𑀬𑀫𑀤𑀲𑁆𑀲𑀦𑀁, 𑀢𑀲𑁆𑀫𑀸 𑀆𑀫𑀦𑁆𑀢𑁂𑀲𑀺 𑀏𑀯𑀸𑀢𑀺 𑀆𑀫𑀦𑁆𑀢𑀦𑁂 𑀦𑀺𑀬𑀫𑁄 𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺.

‘‘𑀪𑀕𑀯𑀸𑀢𑀺 𑀮𑁄𑀓𑀕𑀭𑀼𑀤𑀻𑀧𑀦’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀧𑀼𑀩𑁆𑀩𑁂𑀧𑀺 𑀪𑀕𑀯𑀸-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺? 𑀬𑀤𑀺𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄, 𑀢𑀁 𑀧𑀦𑀲𑁆𑀲 𑀬𑀣𑀸𑀯𑀼𑀢𑁆𑀢𑁂 𑀞𑀸𑀦𑁂 𑀯𑀺𑀳𑀭𑀡𑀓𑀺𑀭𑀺𑀬𑀸𑀬 𑀓𑀢𑁆𑀢𑀼𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀓𑀢𑀁, 𑀦 𑀆𑀫𑀦𑁆𑀢𑀦𑀓𑀺𑀭𑀺𑀬𑀸𑀬, 𑀇𑀥 𑀧𑀦 𑀆𑀫𑀦𑁆𑀢𑀦𑀓𑀺𑀭𑀺𑀬𑀸𑀬, 𑀢𑀲𑁆𑀫𑀸 𑀢𑀤𑀢𑁆𑀣𑀁 𑀧𑀼𑀦 ‘‘𑀪𑀕𑀯𑀸’’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀢𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀕𑀯𑀸𑀢𑀺 𑀮𑁄𑀓𑀕𑀭𑀼𑀤𑀻𑀧𑀦’’𑀦𑁆𑀢𑀺 𑀆𑀳. 𑀓𑀣𑀸𑀲𑀯𑀦𑀬𑀼𑀢𑁆𑀢𑀧𑀼𑀕𑁆𑀕𑀮𑀯𑀘𑀦𑀦𑁆𑀢𑀺 𑀯𑀓𑁆𑀔𑀫𑀸𑀦𑀸𑀬 𑀫𑀽𑀮𑀧𑀭𑀺𑀬𑀸𑀬𑀤𑁂𑀲𑀦𑀸𑀬 𑀲𑀯𑀦𑀬𑁄𑀕𑁆𑀬𑀧𑀼𑀕𑁆𑀕𑀮𑀯𑀘𑀦𑀁. 𑀘𑀢𑀽𑀲𑀼𑀧𑀺 𑀧𑀭𑀺𑀲𑀸𑀲𑀼 𑀪𑀺𑀓𑁆𑀔𑀽 𑀏𑀯 𑀏𑀤𑀺𑀲𑀸𑀦𑀁 𑀤𑁂𑀲𑀦𑀸𑀦𑀁 𑀯𑀺𑀲𑁂𑀲𑁂𑀦 𑀪𑀸𑀚𑀦𑀪𑀽𑀢𑀸, 𑀇𑀢𑀺 𑀲𑀸𑀢𑀺𑀲𑀬𑀲𑀸𑀲𑀦𑀲𑀫𑁆𑀧𑀝𑀺𑀕𑁆𑀕𑀸𑀳𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀇𑀥 𑀪𑀺𑀓𑁆𑀔𑀼𑀕𑀳𑀡𑀦𑁆𑀢𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀤𑁆𑀤𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀪𑀺𑀓𑁆𑀔𑀓𑁄𑀢𑀺 𑀪𑀺𑀓𑁆𑀔𑀽𑀢𑀺 𑀪𑀺𑀓𑁆𑀔𑀦𑀥𑀫𑁆𑀫𑀢𑀸𑀬 𑀪𑀺𑀓𑁆𑀔𑀽𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄𑀢𑀺 𑀩𑀼𑀤𑁆𑀥𑀸𑀤𑀻𑀳𑀺𑀧𑀺 𑀅𑀚𑁆𑀛𑀼𑀧𑀕𑀢𑀁 𑀪𑀺𑀓𑁆𑀔𑀸𑀘𑀭𑀺𑀬𑀁 𑀉𑀜𑁆𑀙𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑀢𑁆𑀢𑀸 𑀅𑀦𑀼𑀝𑁆𑀞𑀺𑀢𑀢𑁆𑀢𑀸 𑀪𑀺𑀓𑁆𑀔𑀽. 𑀬𑁄 𑀳𑀺 𑀓𑁄𑀘𑀺 𑀅𑀧𑁆𑀧𑀁 𑀯𑀸 𑀫𑀳𑀦𑁆𑀢𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀲𑁄 𑀓𑀲𑀺𑀕𑁄𑀭𑀓𑁆𑀔𑀸𑀤𑀻𑀳𑀺 𑀚𑀻𑀯𑀺𑀓𑀸𑀓𑀧𑁆𑀧𑀦𑀁 𑀳𑀺𑀢𑁆𑀯𑀸 𑀮𑀺𑀗𑁆𑀕𑀲𑀫𑁆𑀧𑀝𑀺𑀘𑁆𑀙𑀦𑁂𑀦𑁂𑀯 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑀢𑁆𑀢𑀸 𑀪𑀺𑀓𑁆𑀔𑀼, 𑀧𑀭𑀧𑀝𑀺𑀩𑀤𑁆𑀥𑀚𑀻𑀯𑀺𑀓𑀢𑁆𑀢𑀸 𑀯𑀸 𑀯𑀺𑀳𑀸𑀭𑀫𑀚𑁆𑀛𑁂 𑀓𑀸𑀚𑀪𑀢𑁆𑀢𑀁 𑀪𑀼𑀜𑁆𑀚𑀫𑀸𑀦𑁄𑀧𑀺 𑀪𑀺𑀓𑁆𑀔𑀸𑀘𑀭𑀺𑀬𑀁 ¶ 𑀅𑀚𑁆𑀛𑀼𑀧𑀕𑀢𑁄𑀢𑀺 𑀪𑀺𑀓𑁆𑀔𑀼, 𑀧𑀺𑀡𑁆𑀟𑀺𑀬𑀸𑀮𑁄𑀧𑀪𑁄𑀚𑀦𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸𑀬 𑀉𑀲𑁆𑀲𑀸𑀳𑀚𑀸𑀢𑀢𑁆𑀢𑀸 𑀯𑀸 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄𑀢𑀺 𑀪𑀺𑀓𑁆𑀔𑀽𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀆𑀤𑀺𑀦𑀸 𑀦𑀬𑁂𑀦𑀸𑀢𑀺 ‘‘𑀪𑀺𑀦𑁆𑀦𑀧𑀝𑀥𑀭𑁄𑀢𑀺 𑀪𑀺𑀓𑁆𑀔𑀼, 𑀪𑀺𑀦𑁆𑀤𑀢𑀺 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂𑀢𑀺 𑀪𑀺𑀓𑁆𑀔𑀼, 𑀪𑀺𑀦𑁆𑀦𑀢𑁆𑀢𑀸 ¶ 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸 𑀯𑀺𑀪𑀗𑁆𑀕𑁂 (𑀯𑀺𑀪. 𑁫𑁧𑁦) 𑀆𑀕𑀢𑀦𑀬𑁂𑀦. 𑀜𑀸𑀧𑀦𑁂𑀢𑀺 𑀅𑀯𑀩𑁄𑀥𑀦𑁂, 𑀧𑀝𑀺𑀯𑁂𑀤𑀦𑁂𑀢𑀺 𑀅𑀢𑁆𑀣𑁄.

𑀪𑀺𑀓𑁆𑀔𑀦𑀲𑀻𑀮𑀢𑀸𑀢𑀺𑀆𑀤𑀻𑀲𑀼 𑀪𑀺𑀓𑁆𑀔𑀦𑀲𑀻𑀮𑀢𑀸 𑀪𑀺𑀓𑁆𑀔𑀦𑁂𑀦 𑀆𑀚𑀻𑀯𑀦𑀲𑀻𑀮𑀢𑀸, 𑀦 𑀓𑀲𑀺𑀯𑀡𑀺𑀚𑁆𑀚𑀸𑀤𑀻𑀳𑀺 𑀆𑀚𑀻𑀯𑀦𑀲𑀻𑀮𑀢𑀸. 𑀪𑀺𑀓𑁆𑀔𑀦𑀥𑀫𑁆𑀫𑀢𑀸 ‘‘𑀉𑀤𑁆𑀤𑀺𑀲𑁆𑀲 𑀅𑀭𑀺𑀬𑀸 𑀢𑀺𑀝𑁆𑀞𑀦𑁆𑀢𑀻’’𑀢𑀺 (𑀧𑀝𑀺. 𑀫. 𑁧𑁫𑁩; 𑀫𑀺. 𑀧. 𑁪.𑁫.𑁯) 𑀏𑀯𑀁 𑀯𑀼𑀢𑁆𑀢𑀪𑀺𑀓𑁆𑀔𑀦𑀲𑀪𑀸𑀯𑀢𑀸, 𑀦 𑀲𑀫𑁆𑀪𑀸𑀯𑀦𑀸𑀓𑁄𑀳𑀜𑁆𑀜𑀲𑀪𑀸𑀯𑀢𑀸. 𑀪𑀺𑀓𑁆𑀔𑀦𑁂 𑀲𑀸𑀥𑀼𑀓𑀸𑀭𑀺𑀢𑀸 ‘‘𑀉𑀢𑁆𑀢𑀺𑀝𑁆𑀞𑁂 𑀦𑀧𑁆𑀧𑀫𑀚𑁆𑀚𑁂𑀬𑁆𑀬𑀸’’𑀢𑀺 (𑀥. 𑀧. 𑁧𑁬𑁮) 𑀯𑀘𑀦𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀢𑀢𑁆𑀣 𑀅𑀧𑁆𑀧𑀫𑀚𑁆𑀚𑀦𑀸. 𑀅𑀣 𑀯𑀸 𑀲𑀻𑀮𑀁 𑀦𑀸𑀫 𑀧𑀓𑀢𑀺𑀲𑀪𑀸𑀯𑁄, 𑀇𑀥 𑀧𑀦 𑀢𑀤𑀥𑀺𑀝𑁆𑀞𑀸𑀦𑀁. 𑀥𑀫𑁆𑀫𑁄𑀢𑀺 𑀯𑀢𑀁. 𑀅𑀧𑀭𑁂 𑀧𑀦 ‘‘𑀲𑀻𑀮𑀁 𑀦𑀸𑀫 𑀯𑀢𑀲𑀫𑀸𑀤𑀸𑀦𑀁, 𑀥𑀫𑁆𑀫𑁄 𑀦𑀸𑀫 𑀧𑀯𑁂𑀡𑀻𑀆𑀕𑀢𑀁 𑀘𑀸𑀭𑀺𑀢𑁆𑀢𑀁, 𑀲𑀸𑀥𑀼𑀓𑀸𑀭𑀺𑀢𑀸𑀢𑀺 𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸 𑀆𑀤𑀭𑀓𑀺𑀭𑀺𑀬𑀸’’𑀢𑀺 𑀯𑀡𑁆𑀡𑁂𑀦𑁆𑀢𑀺. 𑀳𑀻𑀦𑀸𑀥𑀺𑀓𑀚𑀦𑀲𑁂𑀯𑀺𑀢𑀦𑁆𑀢𑀺 𑀬𑁂 𑀪𑀺𑀓𑁆𑀔𑀼𑀪𑀸𑀯𑁂 𑀞𑀺𑀢𑀸𑀧𑀺 𑀚𑀸𑀢𑀺𑀫𑀤𑀸𑀤𑀺𑀯𑀲𑁂𑀦 𑀉𑀤𑁆𑀥𑀢𑀸 𑀉𑀦𑁆𑀦𑀴𑀸. 𑀬𑁂 𑀘 𑀕𑀺𑀳𑀺𑀪𑀸𑀯𑁂 𑀧𑀭𑁂𑀲𑀼 𑀅𑀢𑁆𑀣𑀺𑀓𑀪𑀸𑀯𑀫𑁆𑀧𑀺 𑀅𑀦𑀼𑀧𑀕𑀢𑀢𑀸𑀬 𑀪𑀺𑀓𑁆𑀔𑀸𑀘𑀭𑀺𑀬𑀁 𑀧𑀭𑀫𑀓𑀸𑀧𑀜𑁆𑀜𑀢𑀁 𑀫𑀜𑁆𑀜𑀦𑁆𑀢𑀺, 𑀢𑁂𑀲𑀁 𑀉𑀪𑀬𑁂𑀲𑀫𑁆𑀧𑀺 𑀬𑀣𑀸𑀓𑁆𑀓𑀫𑀁 ‘‘𑀪𑀺𑀓𑁆𑀔𑀯𑁄’’𑀢𑀺 𑀯𑀘𑀦𑁂𑀦 𑀳𑀻𑀦𑀚𑀦𑁂𑀳𑀺 𑀤𑀮𑀺𑀤𑁆𑀤𑁂𑀳𑀺 𑀧𑀭𑀫𑀓𑀸𑀧𑀜𑁆𑀜𑀢𑀁 𑀧𑀢𑁆𑀢𑁂𑀳𑀺 𑀧𑀭𑀓𑀼𑀮𑁂𑀲𑀼 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁂𑀳𑀺 𑀲𑁂𑀯𑀺𑀢𑀁 𑀯𑀼𑀢𑁆𑀢𑀺𑀁 𑀧𑀓𑀸𑀲𑁂𑀦𑁆𑀢𑁄 𑀉𑀤𑁆𑀥𑀢𑀪𑀸𑀯𑀦𑀺𑀕𑁆𑀕𑀳𑀁 𑀓𑀭𑁄𑀢𑀺, 𑀅𑀥𑀺𑀓𑀚𑀦𑁂𑀳𑀺 𑀉𑀴𑀸𑀭𑀪𑁄𑀕𑀔𑀢𑁆𑀢𑀺𑀬𑀓𑀼𑀮𑀸𑀤𑀺𑀢𑁄 𑀧𑀩𑁆𑀩𑀚𑀺𑀢𑁂𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀆𑀚𑀻𑀯𑀯𑀺𑀲𑁄𑀥𑀦𑀢𑁆𑀣𑀁 𑀲𑁂𑀯𑀺𑀢𑀁 𑀯𑀼𑀢𑁆𑀢𑀺𑀁 𑀧𑀓𑀸𑀲𑁂𑀦𑁆𑀢𑁄 𑀤𑀻𑀦𑀪𑀸𑀯𑀦𑀺𑀕𑁆𑀕𑀳𑀁 𑀓𑀭𑁄𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀬𑀲𑁆𑀫𑀸 ‘‘𑀪𑀺𑀓𑁆𑀔𑀯𑁄’’𑀢𑀺 𑀯𑀘𑀦𑀁 𑀆𑀫𑀦𑁆𑀢𑀦𑀪𑀸𑀯𑀢𑁄 𑀅𑀪𑀺𑀫𑀼𑀔𑀻𑀓𑀭𑀡𑀁, 𑀧𑀓𑀭𑀡𑀢𑁄 𑀲𑀸𑀫𑀢𑁆𑀣𑀺𑀬𑀢𑁄 𑀘 𑀲𑀼𑀲𑁆𑀲𑀽𑀲𑀸𑀚𑀦𑀦𑀁 𑀲𑀓𑁆𑀓𑀘𑁆𑀘𑀲𑀯𑀦𑀫𑀦𑀲𑀺𑀓𑀸𑀭𑀦𑀺𑀬𑁄𑀚𑀦𑀜𑁆𑀘 𑀳𑁄𑀢𑀺. 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀺𑀓𑁆𑀔𑀯𑁄𑀢𑀺 𑀇𑀫𑀺𑀦𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀲𑀸𑀥𑀼𑀓𑀲𑀯𑀦𑀫𑀦𑀲𑀺𑀓𑀸𑀭𑁂𑀢𑀺 𑀲𑀸𑀥𑀼𑀓𑀲𑀯𑀦𑁂 𑀲𑀸𑀥𑀼𑀓𑀫𑀦𑀲𑀺𑀓𑀸𑀭𑁂 𑀘. 𑀓𑀣𑀁 𑀧𑀦 𑀧𑀯𑀢𑁆𑀢𑀺𑀢𑀸 𑀲𑀯𑀦𑀸𑀤𑀬𑁄 𑀲𑀸𑀥𑀼𑀓𑀁 𑀧𑀯𑀢𑁆𑀢𑀺𑀢𑀸 𑀳𑁄𑀦𑁆𑀢𑀻𑀢𑀺? ‘‘𑀅𑀤𑁆𑀥𑀸 𑀇𑀫𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀲𑀓𑀮𑀲𑀸𑀲𑀦𑀲𑀫𑁆𑀧𑀢𑁆𑀢𑀺 𑀳𑀢𑁆𑀣𑀕𑀢𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀤𑀭𑀕𑀸𑀭𑀯𑀬𑁄𑀕𑁂𑀦, 𑀓𑀣𑀸𑀤𑀻𑀲𑀼 𑀅𑀧𑀭𑀺𑀪𑀯𑀦𑀸𑀤𑀺𑀦𑀸 𑀘. 𑀯𑀼𑀢𑁆𑀢𑀁 𑀳𑀺 ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀼𑀡𑀦𑁆𑀢𑁄 𑀲𑀤𑁆𑀥𑀫𑁆𑀫𑀁 𑀪𑀩𑁆𑀩𑁄 𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀁. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀦 𑀓𑀣𑀁 𑀧𑀭𑀺𑀪𑁄𑀢𑀺, 𑀦 𑀓𑀣𑀺𑀓𑀁 𑀧𑀭𑀺𑀪𑁄𑀢𑀺, 𑀦 𑀅𑀢𑁆𑀢𑀸𑀦𑀁 𑀧𑀭𑀺𑀪𑁄𑀢𑀺, 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺 𑀏𑀓𑀕𑁆𑀕𑀘𑀺𑀢𑁆𑀢𑁄, 𑀬𑁄𑀦𑀺𑀲𑁄 𑀘 𑀫𑀦𑀲𑀺 𑀓𑀭𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂 ¶ , 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀼𑀡𑀦𑁆𑀢𑁄 𑀲𑀤𑁆𑀥𑀫𑁆𑀫𑀁 𑀪𑀩𑁆𑀩𑁄 𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 ¶ 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁫.𑁧𑁫𑁧). 𑀢𑁂𑀦𑁂𑀯𑀸𑀳 ‘‘𑀲𑀸𑀥𑀼𑀓𑀲𑀯𑀦𑀫𑀦𑀲𑀺𑀓𑀸𑀭𑀸𑀬𑀢𑁆𑀢𑀸 𑀳𑀺 𑀲𑀸𑀲𑀦𑀲𑀫𑁆𑀧𑀢𑁆𑀢𑀻’’𑀢𑀺. 𑀲𑀸𑀲𑀦𑀲𑀫𑁆𑀧𑀢𑁆𑀢𑀺 𑀦𑀸𑀫 𑀲𑀻𑀮𑀸𑀤𑀺𑀦𑀺𑀧𑁆𑀨𑀢𑁆𑀢𑀺.

𑀧𑀞𑀫𑀁 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀥𑀺𑀕𑀫𑀯𑀲𑁂𑀦. 𑀲𑀢𑁆𑀣𑀼𑀘𑀭𑀺𑀬𑀸𑀦𑀼𑀯𑀺𑀥𑀸𑀬𑀓𑀢𑁆𑀢𑀸 𑀲𑀻𑀮𑀸𑀤𑀺𑀕𑀼𑀡𑀸𑀦𑀼𑀝𑁆𑀞𑀸𑀦𑁂𑀦. 𑀢𑀺𑀡𑁆𑀡𑀁 𑀬𑀸𑀦𑀸𑀦𑀁 𑀯𑀲𑁂𑀦 𑀅𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀲𑀓𑀮𑀲𑀸𑀲𑀦𑀧𑀝𑀺𑀕𑁆𑀕𑀸𑀳𑀓𑀢𑁆𑀢𑀸. 𑀲𑀦𑁆𑀢𑀺𑀓𑀢𑁆𑀢𑀸𑀢𑀺 𑀲𑀫𑀻𑀧𑀪𑀸𑀯𑀢𑁄. 𑀲𑀦𑁆𑀢𑀺𑀓𑀸𑀯𑀘𑀭𑀢𑁆𑀢𑀸𑀢𑀺 𑀲𑀩𑁆𑀩𑀓𑀸𑀮𑀁 𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑀢𑁄. 𑀬𑀣𑀸𑀦𑀼𑀲𑀺𑀝𑁆𑀞𑀦𑁆𑀢𑀺 𑀅𑀦𑀼𑀲𑀸𑀲𑀦𑀺𑀅𑀦𑀼𑀭𑀽𑀧𑀁, 𑀅𑀦𑀼𑀲𑀸𑀲𑀦𑀺𑀁 𑀅𑀦𑀯𑀲𑁂𑀲𑀢𑁄 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽𑀬𑁂𑀯 𑀲𑀦𑁆𑀥𑀸𑀬𑀸𑀢𑀺 𑀬𑁂 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 ‘‘𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼’’𑀦𑁆𑀢𑀺 𑀯𑀼𑀢𑁆𑀢𑀸 𑀧𑀜𑁆𑀘𑀲𑀢𑀸 𑀩𑁆𑀭𑀸𑀳𑁆𑀫𑀡𑀧𑀩𑁆𑀩𑀚𑀺𑀢𑀸, 𑀢𑁂 𑀲𑀦𑁆𑀥𑀸𑀬.

𑀧𑀼𑀩𑁆𑀩𑁂 𑀲𑀩𑁆𑀩𑀧𑀭𑀺𑀲𑀲𑀸𑀥𑀸𑀭𑀡𑀢𑁆𑀢𑁂𑀧𑀺 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸𑀬 ‘‘𑀚𑁂𑀝𑁆𑀞𑀲𑁂𑀝𑁆𑀞𑀸’’𑀢𑀺𑀆𑀤𑀺𑀦𑀸 𑀪𑀺𑀓𑁆𑀔𑀽𑀦𑀁 𑀏𑀯 𑀆𑀫𑀦𑁆𑀢𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸𑀯 𑀥𑀫𑁆𑀫𑀤𑁂𑀲𑀦𑀸𑀬 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀫𑀢𑁆𑀣𑀁 𑀧𑀦 𑀪𑀕𑀯𑀸’’𑀢𑀺 𑀘𑁄𑀤𑀦𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀢𑀢𑁆𑀣 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑀸𑀢𑀺 𑀅𑀜𑁆𑀜𑀯𑀺𑀳𑀺𑀢𑀸. 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸𑀢𑀺 𑀅𑀲𑀫𑀸𑀳𑀺𑀢𑀘𑀺𑀢𑁆𑀢𑀸. 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀸𑀢𑀺 𑀢𑀤𑀸 𑀳𑀺𑀬𑁆𑀬𑁄 𑀢𑀢𑁄 𑀧𑀭𑀤𑀺𑀯𑀲𑁂𑀲𑀼 𑀯𑀸 𑀲𑀼𑀢𑀥𑀫𑁆𑀫𑀁 𑀧𑀢𑀺 𑀧𑀢𑀺 𑀫𑀦𑀲𑀸 𑀅𑀯𑁂𑀓𑁆𑀔𑀦𑁆𑀢𑀸. 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀤𑁂𑀲𑀦𑀁 𑀲𑀮𑁆𑀮𑀓𑁆𑀔𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺 𑀇𑀫𑀫𑁂𑀯𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀢𑁂 𑀅𑀦𑀸𑀫𑀦𑁆𑀢𑁂𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀪𑀺𑀓𑁆𑀔𑀯𑁄𑀢𑀻𑀢𑀺 𑀘 𑀲𑀦𑁆𑀥𑀺𑀯𑀲𑁂𑀦 𑀇-𑀓𑀸𑀭𑀮𑁄𑀧𑁄 𑀤𑀝𑁆𑀞𑀩𑁆𑀩𑁄 ‘‘𑀪𑀺𑀓𑁆𑀔𑀯𑁄 𑀇𑀢𑀻’’𑀢𑀺. 𑀅𑀬𑀁 𑀳𑀺 𑀇𑀢𑀺-𑀲𑀤𑁆𑀤𑁄 𑀳𑁂𑀢𑀼-𑀧𑀭𑀺𑀲𑀫𑀸𑀧𑀦𑀸𑀤𑀺𑀧𑀤𑀢𑁆𑀣𑀯𑀺𑀧𑀭𑀺𑀬𑀸𑀬-𑀧𑀓𑀸𑀭𑀸𑀯𑀥𑀸𑀭𑀡𑀦𑀺𑀤𑀲𑁆𑀲𑀦𑀸𑀤𑀺𑀅𑀦𑁂𑀓𑀢𑁆𑀣𑀧𑁆𑀧𑀪𑁂𑀤𑁄. 𑀢𑀣𑀸 𑀳𑁂𑀲 ‘‘𑀭𑀼𑀧𑁆𑀧𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 ‘𑀭𑀽𑀧’𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁭𑁯) 𑀳𑁂𑀢𑀼𑀅𑀢𑁆𑀣𑁂 𑀤𑀺𑀲𑁆𑀲𑀢𑀺; ‘‘𑀢𑀲𑁆𑀫𑀸 𑀢𑀺𑀳 𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀤𑀸𑀬𑀸𑀤𑀸 𑀪𑀯𑀣, 𑀫𑀸 𑀆𑀫𑀺𑀲𑀤𑀸𑀬𑀸𑀤𑀸, 𑀅𑀢𑁆𑀣𑀺 𑀫𑁂 𑀢𑀼𑀫𑁆𑀳𑁂𑀲𑀼 𑀅𑀦𑀼𑀓𑀫𑁆𑀧𑀸 ‘𑀓𑀺𑀦𑁆𑀢𑀺 𑀫𑁂 𑀲𑀸𑀯𑀓𑀸 𑀥𑀫𑁆𑀫𑀤𑀸𑀬𑀸𑀤𑀸 𑀪𑀯𑁂𑀬𑁆𑀬𑀼𑀁, 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸’𑀢𑀺’’𑀆𑀤𑀻𑀲𑀼 𑀧𑀭𑀺𑀲𑀫𑀸𑀧𑀦𑁂; ‘‘𑀇𑀢𑀺 𑀯𑀸, 𑀇𑀢𑀺 𑀏𑀯𑀭𑀽𑀧𑀸 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀸 ¶ 𑀧𑀝𑀺𑀯𑀺𑀭𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁩) 𑀆𑀤𑀺𑀅𑀢𑁆𑀣𑁂; ‘‘𑀫𑀸𑀕𑀡𑁆𑀞𑀺𑀬𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀫𑀪𑀺𑀮𑀸𑀧𑁄’’𑀢𑀺𑀆𑀤𑀻𑀲𑀼 (𑀫𑀳𑀸𑀦𑀺. 𑁭𑁩) 𑀧𑀤𑀢𑁆𑀣𑀯𑀺𑀧𑀭𑀺𑀬𑀸𑀬𑁂; ‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀝𑀺𑀪𑀬𑁄 𑀩𑀸𑀮𑁄, 𑀅𑀧𑁆𑀧𑀝𑀺𑀪𑀬𑁄 𑀧𑀡𑁆𑀟𑀺𑀢𑁄, 𑀲𑀉𑀧𑀤𑁆𑀤𑀯𑁄 𑀩𑀸𑀮𑁄, 𑀅𑀦𑀼𑀧𑀤𑁆𑀤𑀯𑁄 𑀧𑀡𑁆𑀟𑀺𑀢𑁄, 𑀲𑀉𑀧𑀲𑀕𑁆𑀕𑁄 𑀩𑀸𑀮𑁄, 𑀅𑀦𑀼𑀧𑀲𑀕𑁆𑀕𑁄 𑀧𑀡𑁆𑀟𑀺𑀢𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁨𑁪) 𑀧𑀓𑀸𑀭𑁂; ‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀇𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, 𑀆𑀦𑀦𑁆𑀤, 𑀅𑀢𑁆𑀣𑀻𑀢𑀺𑀲𑁆𑀲 𑀯𑀘𑀦𑀻𑀬𑀁, 𑀓𑀺𑀁 𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 ¶ 𑀇𑀢𑀺 𑀘𑁂 𑀯𑀤𑁂𑀬𑁆𑀬, 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁯𑁬) 𑀅𑀯𑀥𑀸𑀭𑀡𑁂; ‘‘𑀲𑀩𑁆𑀩𑀫𑀢𑁆𑀣𑀻𑀢𑀺 𑀔𑁄, 𑀓𑀘𑁆𑀘𑀸𑀦, 𑀅𑀬𑀫𑁂𑀓𑁄 𑀅𑀦𑁆𑀢𑁄, 𑀲𑀩𑁆𑀩𑀁 𑀦𑀢𑁆𑀣𑀻𑀢𑀺 𑀔𑁄, 𑀓𑀘𑁆𑀘𑀸𑀦, 𑀅𑀬𑀁 𑀤𑀼𑀢𑀺𑀬𑁄 𑀅𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁧𑁫) 𑀦𑀺𑀤𑀲𑁆𑀲𑀦𑁂. 𑀇𑀥𑀸𑀧𑀺 𑀦𑀺𑀤𑀲𑁆𑀲𑀦𑁂𑀯 𑀤𑀝𑁆𑀞𑀩𑁆𑀩𑁄. 𑀪𑀺𑀓𑁆𑀔𑀯𑁄𑀢𑀺 𑀳𑀺 𑀆𑀫𑀦𑁆𑀢𑀺𑀢𑀸𑀓𑀸𑀭𑁄, 𑀢𑀫𑁂𑀲 𑀇𑀢𑀺-𑀲𑀤𑁆𑀤𑁄 𑀦𑀺𑀤𑀲𑁆𑀲𑁂𑀢𑀺 ‘‘𑀪𑀺𑀓𑁆𑀔𑀯𑁄𑀢𑀺 𑀆𑀫𑀦𑁆𑀢𑁂𑀲𑀻’’𑀢𑀺. 𑀇𑀫𑀺𑀦𑀸 𑀦𑀬𑁂𑀦 ‘‘𑀪𑀤𑁆𑀤𑀦𑁆𑀢𑁂’’𑀢𑀺𑀆𑀤𑀻𑀲𑀼𑀧𑀺 𑀬𑀣𑀸𑀭𑀳𑀁 𑀇𑀢𑀺-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀩𑁆𑀩𑁂 ‘‘𑀪𑀕𑀯𑀸 𑀆𑀫𑀦𑁆𑀢𑁂𑀲𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼’’𑀦𑁆𑀢𑀺 𑀇𑀥 ‘‘𑀪𑀕𑀯𑀢𑁄’’𑀢𑀺 𑀲𑀸𑀫𑀺𑀯𑀘𑀦𑀁 𑀆𑀫𑀦𑁆𑀢𑀦𑀫𑁂𑀯 𑀲𑀫𑁆𑀩𑀦𑁆𑀥𑀻𑀅𑀦𑁆𑀢𑀭𑀁 𑀅𑀧𑁂𑀓𑁆𑀔𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀪𑀕𑀯𑀢𑁄 𑀆𑀫𑀦𑁆𑀢𑀦𑀁 𑀧𑀝𑀺𑀅𑀲𑁆𑀲𑁄𑀲𑀼’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀪𑀕𑀯𑀢𑁄’’𑀢𑀺 𑀧𑀦 𑀇𑀤𑀁 𑀧𑀝𑀺𑀲𑁆𑀲𑀯𑀲𑀫𑁆𑀩𑀦𑁆𑀥𑀦𑁂𑀦 𑀲𑀫𑁆𑀧𑀤𑀸𑀦𑀯𑀘𑀦𑀁 𑀬𑀣𑀸 ‘‘𑀤𑁂𑀯𑀤𑀢𑁆𑀢𑀲𑁆𑀲 𑀧𑀝𑀺𑀲𑁆𑀲𑀼𑀡𑁄𑀢𑀻’’𑀢𑀺.

𑀬𑀁 𑀦𑀺𑀤𑀸𑀦𑀁 𑀪𑀸𑀲𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀣𑀸𑀳 𑁋 𑀓𑀺𑀫𑀢𑁆𑀣𑀁 𑀧𑀦 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑁂 𑀓𑀭𑀺𑀬𑀫𑀸𑀦𑁂 𑀦𑀺𑀤𑀸𑀦𑀯𑀘𑀦𑀁, 𑀦𑀦𑀼 𑀪𑀕𑀯𑀢𑀸 𑀪𑀸𑀲𑀺𑀢𑀯𑀘𑀦𑀲𑁆𑀲𑁂𑀯 𑀲𑀗𑁆𑀕𑀳𑁄 𑀓𑀸𑀢𑀩𑁆𑀩𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀤𑁂𑀲𑀦𑀸𑀬 𑀞𑀺𑀢𑀺𑀅𑀲𑀫𑁆𑀫𑁄𑀲𑀲𑀤𑁆𑀥𑁂𑀬𑁆𑀬𑀪𑀸𑀯𑀲𑀫𑁆𑀧𑀸𑀤𑀦𑀢𑁆𑀣𑀁. 𑀓𑀸𑀮𑀤𑁂𑀲𑀤𑁂𑀲𑀓𑀦𑀺𑀫𑀺𑀢𑁆𑀢𑀧𑀭𑀺𑀲𑀸𑀧𑀤𑁂𑀲𑁂𑀳𑀺 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀸 𑀳𑀺 𑀤𑁂𑀲𑀦𑀸 𑀘𑀺𑀭𑀝𑁆𑀞𑀺𑀢𑀺𑀓𑀸 𑀳𑁄𑀢𑀺 𑀅𑀲𑀫𑁆𑀫𑁄𑀲𑀥𑀫𑁆𑀫𑀸 𑀲𑀤𑁆𑀥𑁂𑀬𑁆𑀬𑀸 𑀘, 𑀤𑁂𑀲𑀓𑀸𑀮𑀓𑀢𑁆𑀢𑀼𑀲𑁄𑀢𑀼𑀦𑀺𑀫𑀺𑀢𑁆𑀢𑁂𑀳𑀺 𑀉𑀧𑀦𑀺𑀩𑀤𑁆𑀥𑁄 𑀯𑀺𑀬 𑀯𑁄𑀳𑀸𑀭𑀯𑀺𑀦𑀺𑀘𑁆𑀙𑀬𑁄. 𑀢𑁂𑀦𑁂𑀯 𑀘 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 ‘‘𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀁 𑀆𑀯𑀼𑀲𑁄, 𑀆𑀦𑀦𑁆𑀤, 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀤𑁂𑀲𑀸𑀤𑀺𑀧𑀼𑀘𑁆𑀙𑀸𑀲𑀼 𑀓𑀢𑀸𑀲𑀼 𑀢𑀸𑀲𑀁 𑀯𑀺𑀲𑁆𑀲𑀚𑁆𑀚𑀦𑀁 𑀓𑀭𑁄𑀦𑁆𑀢𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀺𑀦𑀸 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀦𑀺𑀤𑀸𑀦𑀁 𑀪𑀸𑀲𑀺𑀢𑀁. 𑀅𑀧𑀺𑀘 𑀲𑀢𑁆𑀣𑀼𑀲𑀫𑁆𑀧𑀢𑁆𑀢𑀺𑀧𑀓𑀸𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦𑀁. 𑀢𑀣𑀸𑀕𑀢𑀲𑁆𑀲 𑀳𑀺 𑀪𑀕𑀯𑀢𑁄 𑀧𑀼𑀩𑁆𑀩𑀭𑀘𑀦𑀸𑀦𑀼𑀫𑀸𑀦𑀸𑀕𑀫𑀢𑀓𑁆𑀓𑀸𑀪𑀸𑀯𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑀲𑀺𑀤𑁆𑀥𑀺 ¶ . 𑀦 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀼𑀩𑁆𑀩𑀭𑀘𑀦𑀸𑀤𑀻𑀳𑀺 𑀅𑀢𑁆𑀣𑁄 𑀅𑀢𑁆𑀣𑀺 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑀢𑀸𑀬 𑀏𑀓𑀧𑁆𑀧𑀫𑀸𑀡𑀢𑁆𑀢𑀸 𑀘 𑀜𑁂𑀬𑁆𑀬𑀥𑀫𑁆𑀫𑁂𑀲𑀼. 𑀢𑀣𑀸 𑀆𑀘𑀭𑀺𑀬𑀫𑀼𑀝𑁆𑀞𑀺𑀥𑀫𑁆𑀫𑀫𑀘𑁆𑀙𑀭𑀺𑀬𑀲𑀸𑀲𑀦𑀲𑀸𑀯𑀓𑀸𑀦𑀼𑀭𑁄𑀥𑀸𑀪𑀸𑀯𑀢𑁄 𑀔𑀻𑀡𑀸𑀲𑀯𑀪𑀸𑀯𑀲𑀺𑀤𑁆𑀥𑀺. 𑀦 𑀳𑀺 𑀲𑀩𑁆𑀩𑀲𑁄 𑀔𑀻𑀡𑀸𑀲𑀯𑀲𑁆𑀲 𑀢𑁂 𑀲𑀫𑁆𑀪𑀯𑀦𑁆𑀢𑀻𑀢𑀺 𑀲𑀼𑀯𑀺𑀲𑀼𑀤𑁆𑀥𑀲𑁆𑀲 𑀧𑀭𑀸𑀦𑀼𑀕𑁆𑀕𑀳𑀧𑁆𑀧𑀯𑀢𑁆𑀢𑀺. 𑀏𑀯𑀁 𑀤𑁂𑀲𑀓𑀲𑀁𑀓𑀺𑀮𑁂𑀲𑀪𑀽𑀢𑀸𑀦𑀁 𑀤𑀺𑀝𑁆𑀞𑀺𑀲𑀻𑀮𑀲𑀫𑁆𑀧𑀤𑀸𑀤𑀽𑀲𑀓𑀸𑀦𑀁 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀁 𑀅𑀘𑁆𑀘𑀦𑁆𑀢𑀸𑀪𑀸𑀯𑀲𑀁𑀲𑀽𑀘𑀓𑁂𑀳𑀺 𑀜𑀸𑀡𑀲𑀫𑁆𑀧𑀤𑀸𑀧𑀳𑀸𑀦𑀲𑀫𑁆𑀧𑀤𑀸𑀪𑀺𑀩𑁆𑀬𑀜𑁆𑀚𑀓𑁂𑀳𑀺 𑀘 𑀲𑀫𑁆𑀩𑀼𑀤𑁆𑀥𑀯𑀺𑀲𑀼𑀤𑁆𑀥𑀪𑀸𑀯𑁂𑀳𑀺 𑀧𑀼𑀭𑀺𑀫𑀯𑁂𑀲𑀸𑀭𑀚𑁆𑀚𑀤𑁆𑀯𑀬𑀲𑀺𑀤𑁆𑀥𑀺, 𑀢𑀢𑁄 𑀏𑀯 𑀘 𑀅𑀦𑁆𑀢𑀭𑀸𑀬𑀺𑀓𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑁂𑀲𑀼 𑀲𑀫𑁆𑀫𑁄𑀳𑀸𑀪𑀸𑀯𑀲𑀺𑀤𑁆𑀥𑀺𑀢𑁄 𑀧𑀘𑁆𑀙𑀺𑀫𑀯𑁂𑀲𑀸𑀭𑀚𑁆𑀚𑀤𑁆𑀯𑀬𑀲𑀺𑀤𑁆𑀥𑀻𑀢𑀺 𑀪𑀕𑀯𑀢𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀲𑀫𑀦𑁆𑀦𑀸𑀕𑀫𑁄 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀘 𑀦𑀺𑀤𑀸𑀦𑀯𑀘𑀦𑁂𑀦 𑀧𑀓𑀸𑀲𑀺𑀢𑀸 𑀳𑁄𑀢𑀺 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀧𑀢𑁆𑀢𑀧𑀭𑀺𑀬𑀸𑀬 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀝𑀺𑀪𑀸𑀦𑁂𑀦 𑀥𑀫𑁆𑀫𑀤𑁂𑀲𑀦𑀸𑀤𑀻𑀧𑀦𑀢𑁄, 𑀇𑀥 𑀧𑀦 𑀧𑀣𑀯𑀻𑀆𑀤𑀻𑀲𑀼 𑀯𑀢𑁆𑀣𑀽𑀲𑀼 𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀝𑀺𑀧𑀢𑁆𑀢𑀺𑀯𑀺𑀪𑀸𑀕𑀯𑀯𑀢𑁆𑀣𑀸𑀧𑀓𑀤𑁂𑀲𑀦𑀸𑀤𑀻𑀧𑀦𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀢𑁆𑀣𑀼𑀲𑀫𑁆𑀧𑀢𑁆𑀢𑀺𑀧𑀓𑀸𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦’’𑀦𑁆𑀢𑀺.

𑀢𑀣𑀸 ¶ 𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀧𑀓𑀸𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦𑀁. 𑀜𑀸𑀡𑀓𑀭𑀼𑀡𑀸𑀧𑀭𑀺𑀕𑁆𑀕𑀳𑀺𑀢𑀲𑀩𑁆𑀩𑀓𑀺𑀭𑀺𑀬𑀲𑁆𑀲 𑀳𑀺 𑀪𑀕𑀯𑀢𑁄 𑀦𑀢𑁆𑀣𑀺 𑀦𑀺𑀭𑀢𑁆𑀣𑀺𑀓𑀸 𑀧𑀝𑀺𑀧𑀢𑁆𑀢𑀺, 𑀅𑀢𑁆𑀢𑀳𑀺𑀢𑀢𑁆𑀣𑀸 𑀯𑀸. 𑀢𑀲𑁆𑀫𑀸 𑀧𑀭𑁂𑀲𑀁 𑀏𑀯 𑀅𑀢𑁆𑀣𑀸𑀬 𑀧𑀯𑀢𑁆𑀢𑀲𑀩𑁆𑀩𑀓𑀺𑀭𑀺𑀬𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀓𑀮𑀫𑁆𑀧𑀺 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀁 𑀬𑀣𑀸𑀧𑀯𑀢𑁆𑀢𑀁 𑀯𑀼𑀘𑁆𑀘𑀫𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀬𑀣𑀸𑀭𑀳𑀁 𑀲𑀢𑁆𑀢𑀸𑀦𑀁 𑀅𑀦𑀼𑀲𑀸𑀲𑀦𑀝𑁆𑀞𑁂𑀦 𑀲𑀸𑀲𑀦𑀁, 𑀦 𑀓𑀩𑁆𑀬𑀭𑀘𑀦𑀸, 𑀢𑀬𑀺𑀤𑀁 𑀲𑀢𑁆𑀣𑀼𑀘𑀭𑀺𑀢𑀁 𑀓𑀸𑀮𑀤𑁂𑀲𑀤𑁂𑀲𑀓𑀧𑀭𑀺𑀲𑀸𑀧𑀤𑁂𑀲𑁂𑀳𑀺 𑀲𑀤𑁆𑀥𑀺𑀁 𑀢𑀢𑁆𑀣 𑀢𑀢𑁆𑀣 𑀦𑀺𑀤𑀸𑀦𑀯𑀘𑀦𑁂𑀳𑀺 𑀬𑀣𑀸𑀭𑀳𑀁 𑀧𑀓𑀸𑀲𑀻𑀬𑀢𑀺, 𑀇𑀥 𑀧𑀦 ‘‘𑀧𑀣𑀯𑀺𑀬𑀸𑀤𑀻𑀲𑀼 𑀯𑀢𑁆𑀣𑀽𑀲𑀽’’𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀧𑀓𑀸𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦’’𑀦𑁆𑀢𑀺. 𑀅𑀧𑀺𑀘 𑀲𑀢𑁆𑀣𑀼𑀦𑁄 𑀧𑀫𑀸𑀡𑀪𑀸𑀯𑀧𑁆𑀧𑀓𑀸𑀲𑀦𑁂𑀦 𑀲𑀸𑀲𑀦𑀲𑁆𑀲 𑀧𑀫𑀸𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦𑀁, 𑀢𑀜𑁆𑀘 𑀤𑁂𑀲𑀓𑀧𑁆𑀧𑀫𑀸𑀡𑀪𑀸𑀯𑀤𑀲𑁆𑀲𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 ‘‘𑀪𑀕𑀯𑀸’’𑀢𑀺 𑀘 𑀇𑀫𑀺𑀦𑀸 𑀧𑀤𑁂𑀦 𑀯𑀺𑀪𑀸𑀯𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀪𑀕𑀯𑀸’’𑀢𑀺 𑀇𑀫𑀺𑀦𑀸 𑀢𑀣𑀸𑀕𑀢𑀲𑁆𑀲 𑀭𑀸𑀕𑀤𑁄𑀲𑀫𑁄𑀳𑀸𑀤𑀺𑀲𑀩𑁆𑀩𑀓𑀺𑀮𑁂𑀲𑀫𑀮𑀤𑀼𑀘𑁆𑀘𑀭𑀺𑀢𑀸𑀤𑀺𑀤𑁄𑀲𑀧𑁆𑀧𑀳𑀸𑀦𑀤𑀻𑀧𑀦𑁂𑀦 𑀯𑀘𑀦𑁂𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑀲𑀼𑀧𑀭𑀺𑀲𑀼𑀤𑁆𑀥𑀜𑀸𑀡𑀓𑀭𑀼𑀡𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑁄𑀕𑀧𑀭𑀺𑀤𑀻𑀧𑀦𑁂𑀦 𑀢𑀢𑁄 𑀏𑀯 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑀪𑀸𑀯𑀤𑀻𑀧𑀦𑁂𑀦 𑀅𑀬𑀫𑀢𑁆𑀣𑁄 𑀲𑀩𑁆𑀩𑀣𑀸 𑀧𑀓𑀸𑀲𑀺𑀢𑁄 𑀳𑁄𑀢𑀻𑀢𑀺 𑀇𑀤𑀫𑁂𑀢𑁆𑀣 𑀦𑀺𑀤𑀸𑀦𑀯𑀘𑀦𑀧𑁆𑀧𑀬𑁄𑀚𑀦𑀲𑁆𑀲 𑀫𑀼𑀔𑀫𑀢𑁆𑀢𑀤𑀲𑁆𑀲𑀦𑀁.

𑀅𑀩𑁆𑀪𑀦𑁆𑀢𑀭𑀦𑀺𑀤𑀸𑀦𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀯𑀡𑁆𑀡𑀦𑀸

𑀦𑀺𑀓𑁆𑀔𑀺𑀢𑁆𑀢𑀲𑁆𑀲𑀸𑀢𑀺 ¶ 𑀤𑁂𑀲𑀺𑀢𑀲𑁆𑀲. 𑀤𑁂𑀲𑀦𑀸𑀧𑀺 𑀳𑀺 𑀤𑁂𑀲𑁂𑀢𑀩𑁆𑀩𑀲𑁆𑀲 𑀲𑀻𑀮𑀸𑀤𑀺𑀅𑀢𑁆𑀣𑀲𑁆𑀲 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑁂𑀲𑀼 𑀦𑀺𑀓𑁆𑀔𑀺𑀧𑀦𑀢𑁄 ‘‘𑀦𑀺𑀓𑁆𑀔𑁂𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀁 𑀯𑀺𑀘𑀸𑀭𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀸 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀲𑀸𑀫𑀜𑁆𑀜𑀢𑁄 𑀪𑀕𑀯𑀢𑁄 𑀤𑁂𑀲𑀦𑀸𑀲𑀫𑀼𑀝𑁆𑀞𑀸𑀦𑀲𑁆𑀲 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀏𑀢𑁆𑀣𑀸𑀬𑀁 𑀤𑁂𑀲𑀦𑀸 𑀏𑀯𑀁𑀲𑀫𑀼𑀝𑁆𑀞𑀸𑀦𑀸’’𑀢𑀺 𑀤𑁂𑀲𑀦𑀸𑀬 𑀲𑀫𑀼𑀝𑁆𑀞𑀸𑀦𑁂 𑀤𑀲𑁆𑀲𑀺𑀢𑁂 𑀲𑀼𑀢𑁆𑀢𑀲𑁆𑀲 𑀲𑀫𑁆𑀫𑀤𑁂𑀯 𑀦𑀺𑀤𑀸𑀦𑀧𑀭𑀺𑀚𑀸𑀦𑀦𑁂𑀦 𑀯𑀡𑁆𑀡𑀦𑀸𑀬 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 ‘‘𑀅𑀲𑁆𑀲𑀼𑀢𑀯𑀸 𑀪𑀺𑀓𑁆𑀔𑀯𑁂 𑀧𑀼𑀣𑀼𑀚𑁆𑀚𑀦𑁄’’𑀢𑀺𑀆𑀤𑀺𑀦𑀸, ‘‘𑀬𑁄𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁮), ‘‘𑀢𑀣𑀸𑀕𑀢𑁄𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁨) 𑀘 𑀧𑀯𑀢𑁆𑀢𑀤𑁂𑀲𑀦𑀸 𑀅𑀦𑀼𑀲𑀦𑁆𑀥𑀺𑀤𑀲𑁆𑀲𑀦𑀲𑀼𑀔𑀢𑀸𑀬 𑀲𑀼𑀯𑀺𑀜𑁆𑀜𑁂𑀬𑁆𑀬𑀸 𑀳𑁄𑀢𑀺. 𑀢𑀢𑁆𑀣 𑀬𑀣𑀸 𑀅𑀦𑁂𑀓𑀲𑀢𑀅𑀦𑁂𑀓𑀲𑀳𑀲𑁆𑀲𑀪𑁂𑀤𑀸𑀦𑀺𑀧𑀺 𑀲𑀼𑀢𑁆𑀢𑀦𑁆𑀢𑀸𑀦𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀧𑀥𑀸𑀦𑀦𑀬𑀯𑀲𑁂𑀦 𑀲𑁄𑀴𑀲𑀯𑀺𑀥𑀢𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀺𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀪𑀸𑀯𑀦𑁆𑀢𑀺 𑀆𑀳 ‘‘𑀘𑀢𑁆𑀢𑀸𑀭𑁄 𑀳𑀺 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸’’𑀢𑀺.

𑀏𑀢𑁆𑀣 𑀘 𑀬𑀣𑀸 𑀅𑀢𑁆𑀢𑀚𑁆𑀛𑀸𑀲𑀬𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀘 𑀧𑀭𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀳𑀺 𑀲𑀤𑁆𑀥𑀺𑀁 𑀲𑀁𑀲𑀕𑁆𑀕𑀪𑁂𑀤𑁄 𑀲𑀫𑁆𑀪𑀯𑀢𑀺 ¶ ‘‘𑀅𑀢𑁆𑀢𑀚𑁆𑀛𑀸𑀲𑀬𑁄 𑀘 𑀧𑀭𑀚𑁆𑀛𑀸𑀲𑀬𑁄 𑀘, 𑀅𑀢𑁆𑀢𑀚𑁆𑀛𑀸𑀲𑀬𑁄 𑀘 𑀧𑀼𑀘𑁆𑀙𑀸𑀯𑀲𑀺𑀓𑁄 𑀘, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄 𑀘 𑀧𑀭𑀚𑁆𑀛𑀸𑀲𑀬𑁄 𑀘, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄 𑀘 𑀧𑀼𑀘𑁆𑀙𑀸𑀯𑀲𑀺𑀓𑁄 𑀘𑀸’’𑀢𑀺 𑀅𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀲𑀩𑁆𑀪𑀸𑀯𑀢𑁄, 𑀏𑀯𑀁 𑀬𑀤𑀺𑀧𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀅𑀢𑁆𑀢𑀚𑁆𑀛𑀸𑀲𑀬𑁂𑀦𑀧𑀺 𑀲𑀁𑀲𑀕𑁆𑀕𑀪𑁂𑀤𑁄 𑀲𑀫𑁆𑀪𑀯𑀢𑀺, 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀻𑀳𑀺 𑀧𑀦 𑀧𑀼𑀭𑀢𑁄 𑀞𑀺𑀢𑁂𑀳𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀲𑀁𑀲𑀕𑁆𑀕𑁄 𑀦𑀢𑁆𑀣𑀻𑀢𑀺 𑀦𑀬𑀺𑀥 𑀦𑀺𑀭𑀯𑀲𑁂𑀲𑁄 𑀯𑀺𑀢𑁆𑀣𑀸𑀭𑀦𑀬𑁄 𑀲𑀫𑁆𑀪𑀯𑀢𑀻𑀢𑀺 ‘‘𑀘𑀢𑁆𑀢𑀸𑀭𑁄 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸’’𑀢𑀺 𑀯𑀼𑀢𑁆𑀢𑀁, 𑀢𑀤𑀦𑁆𑀢𑁄𑀕𑀥𑀢𑁆𑀢𑀸 𑀯𑀸 𑀲𑀫𑁆𑀪𑀯𑀦𑁆𑀢𑀸𑀦𑀁 𑀲𑁂𑀲𑀦𑀺𑀓𑁆𑀔𑁂𑀧𑀸𑀦𑀁 𑀫𑀽𑀮𑀦𑀺𑀓𑁆𑀔𑁂𑀧𑀯𑀲𑁂𑀦 𑀘𑀢𑁆𑀢𑀸𑀭𑁄𑀯 𑀤𑀲𑁆𑀲𑀺𑀢𑀸. 𑀢𑀣𑀸𑀤𑀲𑁆𑀲𑀦𑀜𑁆𑀘𑁂𑀢𑁆𑀣 𑀅𑀬𑀁 𑀲𑀁𑀲𑀕𑁆𑀕𑀪𑁂𑀤𑁄 𑀕𑀳𑁂𑀢𑀩𑁆𑀩𑁄𑀢𑀺.

𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀦𑀺𑀓𑁆𑀔𑀺𑀧𑀻𑀬𑀢𑀻𑀢𑀺 𑀦𑀺𑀓𑁆𑀔𑁂𑀧𑁄, 𑀲𑀼𑀢𑁆𑀢𑀁 𑀏𑀯 𑀦𑀺𑀓𑁆𑀔𑁂𑀧𑁄 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄. 𑀅𑀣 𑀯𑀸 𑀦𑀺𑀓𑁆𑀔𑀺𑀧𑀦𑀁 𑀦𑀺𑀓𑁆𑀔𑁂𑀧𑁄, 𑀲𑀼𑀢𑁆𑀢𑀲𑁆𑀲 𑀦𑀺𑀓𑁆𑀔𑁂𑀧𑁄 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄, 𑀲𑀼𑀢𑁆𑀢𑀤𑁂𑀲𑀦𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁄 𑀅𑀢𑁆𑀢𑀚𑁆𑀛𑀸𑀲𑀬𑁄, 𑀲𑁄 𑀅𑀲𑁆𑀲 𑀅𑀢𑁆𑀣𑀺 𑀓𑀸𑀭𑀡𑀪𑀽𑀢𑁄𑀢𑀺 𑀅𑀢𑁆𑀢𑀚𑁆𑀛𑀸𑀲𑀬𑁄. 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁄 𑀏𑀢𑀲𑁆𑀲𑀸𑀢𑀺 𑀯𑀸 𑀅𑀢𑁆𑀢𑀚𑁆𑀛𑀸𑀲𑀬𑁄. 𑀧𑀭𑀚𑁆𑀛𑀸𑀲𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀘𑁆𑀙𑀸𑀬 𑀯𑀲𑁄 𑀧𑀼𑀘𑁆𑀙𑀸𑀯𑀲𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 ¶ 𑀧𑀼𑀘𑁆𑀙𑀸𑀯𑀲𑀺𑀓𑁄. 𑀲𑀼𑀢𑁆𑀢𑀤𑁂𑀲𑀦𑀸𑀯𑀢𑁆𑀣𑀼𑀪𑀽𑀢𑀲𑁆𑀲 𑀅𑀢𑁆𑀣𑀲𑁆𑀲 𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀼𑀧𑁆𑀧𑀢𑁆𑀢𑀺, 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑁂𑀯 𑀅𑀝𑁆𑀞𑀼𑀧𑁆𑀧𑀢𑁆𑀢𑀺 𑀢𑁆𑀣-𑀓𑀸𑀭𑀲𑁆𑀲 𑀝𑁆𑀞-𑀓𑀸𑀭𑀁 𑀓𑀢𑁆𑀯𑀸. 𑀲𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄. 𑀅𑀣 𑀯𑀸 𑀦𑀺𑀓𑁆𑀔𑀺𑀧𑀻𑀬𑀢𑀺 𑀲𑀼𑀢𑁆𑀢𑀁 𑀏𑀢𑁂𑀦𑀸𑀢𑀺 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄, 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀺 𑀏𑀯. 𑀏𑀢𑀲𑁆𑀫𑀺𑀁 𑀧𑀦 𑀅𑀢𑁆𑀢𑀯𑀺𑀓𑀧𑁆𑀧𑁂 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁄 𑀅𑀢𑁆𑀢𑀚𑁆𑀛𑀸𑀲𑀬𑁄. 𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑁄 𑀧𑀭𑀚𑁆𑀛𑀸𑀲𑀬𑁄. 𑀧𑀼𑀘𑁆𑀙𑀻𑀬𑀢𑀻𑀢𑀺 𑀧𑀼𑀘𑁆𑀙𑀸, 𑀧𑀼𑀘𑁆𑀙𑀺𑀢𑀩𑁆𑀩𑁄 𑀅𑀢𑁆𑀣𑁄. 𑀧𑀼𑀘𑁆𑀙𑀦𑀯𑀲𑁂𑀦 𑀧𑀯𑀢𑁆𑀢𑀁 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀯𑀘𑀦𑀁 𑀧𑀼𑀘𑁆𑀙𑀸𑀯𑀲𑀺𑀓𑀁, 𑀢𑀤𑁂𑀯 𑀦𑀺𑀓𑁆𑀔𑁂𑀧-𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 ‘‘𑀧𑀼𑀘𑁆𑀙𑀸𑀯𑀲𑀺𑀓𑁄’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺 𑀏𑀯 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀺𑀘𑁂𑀢𑁆𑀣 𑀧𑀭𑁂𑀲𑀁 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀸𑀤𑀺𑀓𑀸𑀭𑀡𑀦𑀺𑀭𑀧𑁂𑀓𑁆𑀔𑀢𑁆𑀢𑀸 𑀅𑀢𑁆𑀢𑀚𑁆𑀛𑀸𑀲𑀬𑀲𑁆𑀲 𑀯𑀺𑀲𑀼𑀁 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀪𑀸𑀯𑁄 𑀬𑀼𑀢𑁆𑀢𑁄 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂𑀦𑁂𑀯 𑀥𑀫𑁆𑀫𑀢𑀦𑁆𑀢𑀺𑀞𑀧𑀦𑀢𑁆𑀣𑀁 𑀧𑀯𑀢𑁆𑀢𑀺𑀢𑀤𑁂𑀲𑀦𑀢𑁆𑀢𑀸. 𑀧𑀭𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀯𑀲𑀺𑀓𑀸𑀦𑀁 𑀧𑀦 𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀦𑀁 𑀤𑁂𑀲𑀦𑀸𑀧𑀯𑀢𑁆𑀢𑀺𑀳𑁂𑀢𑀼𑀪𑀽𑀢𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀁 𑀧𑀯𑀢𑁆𑀢𑀺𑀢𑀸𑀦𑀁 𑀓𑀣𑀫𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀅𑀦𑀯𑀭𑁄𑀥𑁄, 𑀧𑀼𑀘𑁆𑀙𑀸𑀯𑀲𑀺𑀓𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀸𑀦𑀁 𑀯𑀸 𑀧𑀭𑀚𑁆𑀛𑀸𑀲𑀬𑀸𑀦𑀼𑀭𑁄𑀥𑁂𑀦 𑀧𑀯𑀢𑁆𑀢𑀺𑀓𑀸𑀦𑀁 𑀓𑀣𑀁 𑀧𑀭𑀚𑁆𑀛𑀸𑀲𑀬𑁂 𑀅𑀦𑀯𑀭𑁄𑀥𑁄𑀢𑀺? 𑀦 𑀘𑁄𑀤𑁂𑀢𑀩𑁆𑀩𑀫𑁂𑀢𑀁. 𑀧𑀭𑁂𑀲𑀜𑁆𑀳𑀺 𑀅𑀪𑀺𑀦𑀻𑀳𑀸𑀭𑀧𑀭𑀺𑀧𑀼𑀘𑁆𑀙𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀲𑁆𑀲𑁂𑀯 𑀲𑀼𑀢𑁆𑀢𑀤𑁂𑀲𑀦𑀸𑀓𑀸𑀭𑀡𑀼𑀧𑁆𑀧𑀸𑀤𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 𑀧𑀭𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀯𑀲𑀺𑀓𑀸𑀦𑀁 𑀯𑀺𑀲𑀼𑀁 𑀕𑀳𑀡𑀁. 𑀢𑀣𑀸 𑀳𑀺 𑀩𑁆𑀭𑀳𑁆𑀫𑀚𑀸𑀮 (𑀤𑀻. 𑀦𑀺. 𑁧.𑁧) 𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀸𑀤𑀻𑀦𑀁 (𑀫. 𑀦𑀺. 𑁧.𑁨𑁯) 𑀯𑀡𑁆𑀡𑀸𑀯𑀡𑁆𑀡𑀆𑀫𑀺𑀲𑀼𑀧𑁆𑀧𑀸𑀤𑀸𑀤𑀺𑀤𑁂𑀲𑀦𑀸𑀦𑀺𑀫𑀺𑀢𑁆𑀢𑀁 ‘‘𑀅𑀝𑁆𑀞𑀼𑀧𑁆𑀧𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀭𑁂𑀲𑀁 𑀧𑀼𑀘𑁆𑀙𑀁 𑀯𑀺𑀦𑀸 𑀅𑀚𑁆𑀛𑀸𑀲𑀬𑀁 𑀏𑀯 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀤𑁂𑀲𑀺𑀢𑁄 𑀧𑀭𑀚𑁆𑀛𑀸𑀲𑀬𑁄, 𑀧𑀼𑀘𑁆𑀙𑀸𑀯𑀲𑁂𑀦 𑀤𑁂𑀲𑀺𑀢𑁄 𑀧𑀼𑀘𑁆𑀙𑀸𑀯𑀲𑀺𑀓𑁄𑀢𑀺 𑀧𑀸𑀓𑀝𑁄𑀬𑀫𑀢𑁆𑀣𑁄𑀢𑀺.

𑀅𑀢𑁆𑀢𑀦𑁄 ¶ 𑀅𑀚𑁆𑀛𑀸𑀲𑀬𑁂𑀦𑁂𑀯 𑀓𑀣𑁂𑀲𑀺 𑀥𑀫𑁆𑀫𑀢𑀦𑁆𑀢𑀺𑀞𑀧𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀫𑁆𑀫𑀧𑁆𑀧𑀥𑀸𑀦𑀲𑀼𑀢𑁆𑀢𑀦𑁆𑀢𑀳𑀸𑀭𑀓𑁄𑀢𑀺 𑀅𑀦𑀼𑀧𑀼𑀩𑁆𑀩𑁂𑀦 𑀦𑀺𑀓𑁆𑀔𑀺𑀢𑁆𑀢𑀸𑀦𑀁 𑀲𑀁𑀬𑀼𑀢𑁆𑀢𑀓𑁂 𑀲𑀫𑁆𑀫𑀧𑁆𑀧𑀥𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁 𑀲𑀼𑀢𑁆𑀢𑀸𑀦𑀁 𑀆𑀯𑀴𑀺. 𑀢𑀣𑀸 𑀇𑀤𑁆𑀥𑀺𑀧𑀸𑀤𑀳𑀸𑀭𑀓𑀸𑀤𑀬𑁄.

𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀥𑀫𑁆𑀫𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀬𑁄. 𑀅𑀚𑁆𑀛𑀸𑀲𑀬𑀦𑁆𑀢𑀺 𑀅𑀥𑀺𑀫𑀼𑀢𑁆𑀢𑀺𑀁. 𑀔𑀦𑁆𑀢𑀺𑀦𑁆𑀢𑀺 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀁. 𑀫𑀦𑀦𑁆𑀢𑀺 𑀘𑀺𑀢𑁆𑀢𑀁. 𑀅𑀪𑀺𑀦𑀺𑀳𑀸𑀭𑀦𑁆𑀢𑀺 𑀧𑀡𑀺𑀥𑀸𑀦𑀁. 𑀩𑀼𑀚𑁆𑀛𑀦𑀪𑀸𑀯𑀦𑁆𑀢𑀺 𑀩𑀼𑀚𑁆𑀛𑀦𑀲𑀪𑀸𑀯𑀁, 𑀧𑀝𑀺𑀯𑀺𑀚𑁆𑀛𑀦𑀸𑀓𑀸𑀭𑀁 𑀯𑀸.

𑀉𑀧𑁆𑀧𑀦𑁆𑀦𑁂 𑀫𑀸𑀦𑁂 𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀦𑀺 𑀢𑀻𑀡𑀺 𑀮𑀺𑀗𑁆𑀕𑀸𑀦𑀺. 𑀦𑀸𑀫𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺. 𑀧𑀞𑀫𑀸𑀤𑀬𑁄 𑀲𑀢𑁆𑀢 𑀯𑀺𑀪𑀢𑁆𑀢𑀺𑀬𑁄. 𑀫𑀼𑀜𑁆𑀘𑀺𑀢𑁆𑀯𑀸 𑀦 𑀓𑀺𑀜𑁆𑀘𑀺 𑀓𑀣𑁂𑀢𑀺 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀬𑀸 ¶ 𑀢𑀣𑁂𑀯 𑀧𑀯𑀢𑁆𑀢𑀦𑀢𑁄. 𑀕𑀡𑁆𑀞𑀺𑀪𑀽𑀢𑀁 𑀧𑀤𑀁. 𑀬𑀣𑀸 𑀳𑀺 𑀭𑀼𑀓𑁆𑀔𑀲𑁆𑀲 𑀕𑀡𑁆𑀞𑀺𑀝𑁆𑀞𑀸𑀦𑀁 𑀤𑀼𑀩𑁆𑀩𑀺𑀦𑀺𑀩𑁆𑀩𑁂𑀥𑀁 𑀤𑀼𑀢𑁆𑀢𑀘𑁆𑀙𑀺𑀢𑀜𑁆𑀘 𑀳𑁄𑀢𑀺, 𑀏𑀯𑀫𑁂𑀯𑀁 𑀬𑀁 𑀧𑀤𑀁 𑀅𑀢𑁆𑀣𑀢𑁄 𑀯𑀺𑀯𑀭𑀺𑀢𑀼𑀁 𑀦 𑀲𑀓𑁆𑀓𑀸, 𑀢𑀁 ‘‘𑀕𑀡𑁆𑀞𑀺𑀧𑀤’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀼𑀧𑀳𑀘𑁆𑀘𑀸𑀢𑀺 𑀅𑀦𑀼𑀤𑁆𑀥𑀭𑀺𑀢𑁆𑀯𑀸.

𑀬𑁂𑀦 𑀬𑁂𑀦 𑀲𑀫𑁆𑀩𑀦𑁆𑀥𑀁 𑀕𑀘𑁆𑀙𑀢𑀺, 𑀢𑀲𑁆𑀲 𑀢𑀲𑁆𑀲 𑀅𑀦𑀯𑀲𑁂𑀲𑀢𑀁 𑀤𑀻𑀧𑁂𑀢𑀻𑀢𑀺 𑀇𑀫𑀺𑀦𑀸 𑀇𑀫𑀲𑁆𑀲 𑀲𑀩𑁆𑀩-𑀲𑀤𑁆𑀤𑀲𑁆𑀲 𑀲𑀧𑁆𑀧𑀤𑁂𑀲𑀢𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩-𑀲𑀤𑁆𑀤𑁄 𑀳𑀺 𑀲𑀩𑁆𑀩𑀲𑀩𑁆𑀩𑀁 𑀧𑀤𑁂𑀲𑀲𑀩𑁆𑀩𑀁 𑀆𑀬𑀢𑀦𑀲𑀩𑁆𑀩𑀁 𑀲𑀓𑁆𑀓𑀸𑀬𑀲𑀩𑁆𑀩𑀦𑁆𑀢𑀺 𑀘𑀢𑀽𑀲𑀼 𑀯𑀺𑀲𑀬𑁂𑀲𑀼 𑀤𑀺𑀝𑁆𑀞𑀧𑁆𑀧𑀬𑁄𑀕𑁄. 𑀢𑀣𑀸 𑀳𑁂𑀲 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑀼𑀔𑁂 𑀆𑀧𑀸𑀣𑀫𑀸𑀕𑀘𑁆𑀙𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫𑀳𑀸𑀦𑀺. 𑁧𑁫𑁬; 𑀘𑀽𑀴𑀦𑀺. 𑁮𑁫; 𑀧𑀝𑀺. 𑀫. 𑁩.𑁬) 𑀲𑀩𑁆𑀩𑀲𑀩𑁆𑀩𑀲𑁆𑀫𑀺𑀁 𑀆𑀕𑀢𑁄. ‘‘𑀲𑀩𑁆𑀩𑁂𑀲𑀁 𑀯𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑀼𑀪𑀸𑀲𑀺𑀢𑀁 𑀧𑀭𑀺𑀬𑀸𑀬𑁂𑀦𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁪𑁫) 𑀧𑀤𑁂𑀲𑀲𑀩𑁆𑀩𑀲𑁆𑀫𑀺𑀁. ‘‘𑀲𑀩𑁆𑀩𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺…𑀧𑁂… 𑀘𑀓𑁆𑀔𑀼𑀜𑁆𑀘𑁂𑀯 𑀭𑀽𑀧𑀸 𑀘…𑀧𑁂… 𑀫𑀦𑁄 𑀘𑁂𑀯 𑀥𑀫𑁆𑀫𑀸 𑀘𑀸’’𑀢𑀺 (𑀲𑀁. 𑀦𑀺. 𑁪.𑁨𑁩) 𑀏𑀢𑁆𑀣 𑀆𑀬𑀢𑀦𑀲𑀩𑁆𑀩𑀲𑁆𑀫𑀺𑀁. ‘‘𑀲𑀩𑁆𑀩𑀁 𑀲𑀩𑁆𑀩𑀢𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁫) 𑀲𑀓𑁆𑀓𑀸𑀬𑀲𑀩𑁆𑀩𑀲𑁆𑀫𑀺𑀁. 𑀢𑀢𑁆𑀣 𑀲𑀩𑁆𑀩𑀲𑀩𑁆𑀩𑀲𑁆𑀫𑀺𑀁 𑀆𑀕𑀢𑁄 𑀦𑀺𑀧𑁆𑀧𑀤𑁂𑀲𑁄, 𑀇𑀢𑀭𑁂𑀲𑀼 𑀢𑀻𑀲𑀼𑀧𑀺 𑀆𑀕𑀢𑁄 𑀲𑀧𑁆𑀧𑀤𑁂𑀲𑁄, 𑀇𑀥 𑀧𑀦 𑀲𑀓𑁆𑀓𑀸𑀬𑀲𑀩𑁆𑀩𑀲𑁆𑀫𑀺𑀁 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀸 𑀧𑀦 𑀢𑁂𑀪𑀽𑀫𑀓𑀥𑀫𑁆𑀫𑀸𑀯 𑀅𑀦𑀯𑀲𑁂𑀲𑀢𑁄 𑀯𑁂𑀤𑀺𑀢𑀩𑁆𑀩𑀸’’𑀢𑀺 (𑀫. 𑀦𑀺. 𑀅𑀝𑁆𑀞. 𑁧.𑁧 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀯𑀡𑁆𑀡𑀦𑀸).

𑀲𑀘𑁆𑀘𑁂𑀲𑀽𑀢𑀺 𑀅𑀭𑀺𑀬𑀲𑀘𑁆𑀘𑁂𑀲𑀼. 𑀏𑀢𑁂 𑀘𑀢𑀼𑀭𑁄 𑀥𑀫𑁆𑀫𑀸𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑁂 𑀲𑀘𑁆𑀘𑀸𑀤𑀺𑀓𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀢𑁆𑀣 𑀲𑀘𑁆𑀘𑀦𑁆𑀢𑀺 𑀯𑀘𑀻𑀲𑀘𑁆𑀘𑀁. 𑀞𑀺𑀢𑀻𑀢𑀺 𑀯𑀻𑀭𑀺𑀬𑀁, ‘‘𑀥𑀺𑀢𑀻’’𑀢𑀺 𑀯𑀸 𑀧𑀸𑀞𑁄, 𑀲𑁄 𑀏𑀯𑀢𑁆𑀣𑁄. 𑀘𑀸𑀕𑁄𑀢𑀺 𑀅𑀮𑁄𑀪𑁄. 𑀤𑀺𑀝𑁆𑀞𑀁 𑀲𑁄 𑀅𑀢𑀺𑀯𑀢𑁆𑀢𑀢𑀻𑀢𑀺 𑀬𑀲𑁆𑀫𑀺𑀁 𑀏𑀢𑁂 𑀲𑀘𑁆𑀘𑀸𑀤𑀬𑁄 𑀥𑀫𑁆𑀫𑀸 𑀉𑀧𑀮𑀩𑁆𑀪𑀦𑁆𑀢𑀺, 𑀲𑁄 𑀤𑀺𑀝𑁆𑀞𑀁 𑀅𑀢𑁆𑀢𑀦𑁄 𑀅𑀫𑀺𑀢𑁆𑀢𑀁 𑀅𑀢𑀺𑀓𑁆𑀓𑀫𑀢𑀺, 𑀦 𑀢𑀲𑁆𑀲 𑀳𑀢𑁆𑀣𑀢𑀁 𑀕𑀘𑁆𑀙𑀢𑀺, 𑀅𑀣 𑀔𑁄 𑀦𑀁 ¶ 𑀅𑀪𑀺𑀪𑀯𑀢𑀺 𑀏𑀯𑀸𑀢𑀺 𑀅𑀢𑁆𑀣𑁄. 𑀲𑀪𑀸𑀯𑁂 𑀯𑀢𑁆𑀢𑀢𑀺 𑀅𑀲𑀪𑀸𑀯𑀥𑀫𑁆𑀫𑀲𑁆𑀲 𑀓𑀸𑀭𑀡𑀸𑀲𑀫𑁆𑀪𑀯𑀢𑁄. 𑀦 𑀳𑀺 𑀦𑀺𑀲𑁆𑀲𑀪𑀸𑀯𑀸 𑀥𑀫𑁆𑀫𑀸 𑀓𑁂𑀦𑀘𑀺 𑀦𑀺𑀩𑁆𑀩𑀢𑁆𑀢𑀻𑀬𑀦𑁆𑀢𑀺. 𑀅𑀢𑁆𑀢𑀦𑁄 𑀮𑀓𑁆𑀔𑀡𑀁 𑀥𑀸𑀭𑁂𑀦𑁆𑀢𑀻𑀢𑀺 𑀬𑀤𑀺𑀧𑀺 𑀮𑀓𑁆𑀔𑀡𑀯𑀺𑀦𑀺𑀫𑀼𑀢𑁆𑀢𑀸 𑀥𑀫𑁆𑀫𑀸 𑀦𑀸𑀫 𑀦𑀢𑁆𑀣𑀺, 𑀢𑀣𑀸𑀧𑀺 𑀬𑀣𑀸 𑀤𑀺𑀝𑁆𑀞𑀺𑀢𑀡𑁆𑀳𑀸𑀧𑀭𑀺𑀓𑀧𑁆𑀧𑀺𑀢𑀸𑀓𑀸𑀭𑀫𑀢𑁆𑀢𑀸 𑀅𑀢𑁆𑀢𑀲𑀼𑀪𑀲𑀼𑀔𑀲𑀲𑁆𑀲𑀢𑀸𑀤𑀬𑁄, 𑀧𑀓𑀢𑀺𑀬𑀸𑀤𑀬𑁄, 𑀤𑀩𑁆𑀩𑀸𑀤𑀬𑁄, 𑀚𑀻𑀯𑀸𑀤𑀬𑁄, 𑀓𑀸𑀬𑀸𑀤𑀬𑁄 𑀮𑁄𑀓𑀯𑁄𑀳𑀸𑀭𑀫𑀢𑁆𑀢𑀲𑀺𑀤𑁆𑀥𑀸 𑀕𑀕𑀡𑀓𑀼𑀲𑀼𑀫𑀸𑀤𑀬𑁄𑀯 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀢𑁄 𑀦 𑀉𑀧𑀮𑀩𑁆𑀪𑀦𑁆𑀢𑀺, 𑀦 𑀏𑀯𑀫𑁂𑀢𑁂, 𑀏𑀢𑁂 𑀧𑀦 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀪𑀽𑀢𑀸 𑀉𑀧𑀮𑀩𑁆𑀪𑀦𑁆𑀢𑀺, 𑀢𑀢𑁄 𑀏𑀯 𑀲𑀢𑁆𑀢𑀸𑀤𑀺𑀯𑀺𑀲𑁂𑀲𑀯𑀺𑀭𑀳𑀢𑁄 𑀥𑀫𑁆𑀫𑀫𑀢𑁆𑀢𑀸 𑀲𑀪𑀸𑀯𑀯𑀦𑁆𑀢𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀢𑁆𑀢𑀦𑁄 𑀮𑀓𑁆𑀔𑀡𑀁 𑀥𑀸𑀭𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁 ¶ . 𑀪𑀯𑀢𑀺 𑀳𑀺 𑀪𑁂𑀤𑀸𑀪𑀸𑀯𑁂𑀧𑀺 𑀲𑀼𑀔𑀸𑀯𑀩𑁄𑀥𑀦𑀢𑁆𑀣𑀁 𑀉𑀧𑀘𑀸𑀭𑀫𑀢𑁆𑀢𑀲𑀺𑀤𑁆𑀥𑁂𑀦 𑀪𑁂𑀤𑁂𑀦 𑀦𑀺𑀤𑁆𑀤𑁂𑀲𑁄 𑀬𑀣𑀸 ‘‘𑀲𑀺𑀮𑀸𑀧𑀼𑀢𑁆𑀢𑀓𑀲𑁆𑀲 𑀲𑀭𑀻𑀭’’𑀦𑁆𑀢𑀺. 𑀥𑀸𑀭𑀻𑀬𑀦𑁆𑀢𑀺 𑀯𑀸 𑀬𑀣𑀸𑀲𑀪𑀸𑀯𑀢𑁄 𑀅𑀯𑀥𑀸𑀭𑀻𑀬𑀦𑁆𑀢𑀺 𑀜𑀸𑀬𑀦𑁆𑀢𑀻𑀢𑀺 𑀥𑀫𑁆𑀫𑀸, 𑀓𑀓𑁆𑀔𑀴𑀨𑀼𑀲𑀦𑀸𑀤𑀬𑁄.

𑀅𑀲𑀸𑀥𑀸𑀭𑀡𑀳𑁂𑀢𑀼𑀫𑁆𑀳𑀻𑀢𑀺 𑀅𑀲𑀸𑀥𑀸𑀭𑀡𑀓𑀸𑀭𑀡𑁂, 𑀲𑀓𑁆𑀓𑀸𑀬𑀥𑀫𑁆𑀫𑁂𑀲𑀼 𑀢𑀲𑁆𑀲 𑀢𑀲𑁆𑀲 𑀆𑀯𑁂𑀡𑀺𑀓𑀧𑀘𑁆𑀘𑀬𑁂𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀦 𑀢𑀦𑁆𑀢𑀺? 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀬𑁄, 𑀅𑀯𑀺𑀚𑁆𑀚𑀸𑀤𑀬𑁄𑀧𑀺 𑀯𑀸. 𑀬𑀣𑁂𑀯 𑀳𑀺 𑀧𑀣𑀯𑀻𑀆𑀤𑀻𑀲𑀼 𑀫𑀜𑁆𑀜𑀦𑀸𑀯𑀢𑁆𑀣𑀽𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀸 𑀢𑀡𑁆𑀳𑀸𑀤𑀬𑁄 𑀫𑀜𑁆𑀜𑀦𑀸 𑀢𑁂𑀲𑀁 𑀧𑀯𑀢𑁆𑀢𑀺𑀬𑀸 𑀫𑀽𑀮𑀓𑀸𑀭𑀡𑀁, 𑀏𑀯𑀁 𑀅𑀯𑀺𑀚𑁆𑀚𑀸𑀤𑀬𑁄𑀧𑀺. 𑀢𑀣𑀸 𑀳𑀺 ‘‘𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄’’𑀢𑀺𑀆𑀤𑀺𑀦𑀸 ‘‘𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸𑀢𑀺 𑀯𑀤𑀸𑀫𑀻’’𑀢𑀺 (𑀫. 𑀦𑀺. 𑁧.𑁨) ‘‘𑀦𑀦𑁆𑀤𑀻 𑀤𑀼𑀓𑁆𑀔𑀲𑁆𑀲 𑀫𑀽𑀮’’𑀦𑁆𑀢𑀺 (𑀫. 𑀦𑀺. 𑁧.𑁧𑁩) 𑀘 𑀅𑀦𑁆𑀯𑀬𑀢𑁄, ‘‘𑀔𑀬𑀸 𑀭𑀸𑀕𑀲𑁆𑀲…𑀧𑁂… 𑀯𑀻𑀢𑀫𑁄𑀳𑀢𑁆𑀢𑀸’’𑀢𑀺 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀢𑁂𑀲𑀁 𑀫𑀽𑀮𑀓𑀸𑀭𑀡𑀪𑀸𑀯𑁄 𑀯𑀺𑀪𑀸𑀯𑀺𑀢𑁄.

𑀧𑀭𑀺𑀬𑀸𑀬𑁂𑀢𑀺 𑀤𑁂𑀲𑁂𑀢𑀩𑁆𑀩𑀫𑀢𑁆𑀣𑀁 𑀅𑀯𑀕𑀫𑁂𑀢𑀺 𑀩𑁄𑀥𑀬𑀢𑀻𑀢𑀺 𑀧𑀭𑀺𑀬𑀸𑀬𑁄, 𑀤𑁂𑀲𑀦𑀸. 𑀧𑀭𑀺𑀬𑀸𑀬𑀢𑀺 𑀅𑀢𑁆𑀢𑀦𑁄 𑀨𑀮𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀢𑁆𑀢𑀢𑀺 𑀢𑀲𑁆𑀲 𑀯𑀸 𑀓𑀸𑀭𑀡𑀪𑀸𑀯𑀁 𑀕𑀘𑁆𑀙𑀢𑀻𑀢𑀺 𑀧𑀭𑀺𑀬𑀸𑀬𑁄, 𑀓𑀸𑀭𑀡𑀁. 𑀧𑀭𑀺𑀬𑀸𑀬𑀢𑀺 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑀢𑀻𑀢𑀺 𑀧𑀭𑀺𑀬𑀸𑀬𑁄, 𑀯𑀸𑀭𑁄. 𑀏𑀯𑀁 𑀧𑀭𑀺𑀬𑀸𑀬𑀲𑀤𑁆𑀤𑀲𑁆𑀲 𑀤𑁂𑀲𑀦𑀸𑀓𑀸𑀭𑀡𑀯𑀸𑀭𑁂𑀲𑀼 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸𑀭𑀼𑀢𑀯𑀲𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀢𑁆𑀣𑀁 𑀦𑁂𑀬𑁆𑀬𑀢𑁆𑀣𑀁. 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸𑀯 𑀅𑀦𑀯𑀲𑁂𑀲𑀢𑁄 𑀯𑁂𑀤𑀺𑀢𑀩𑁆𑀩𑀸 𑀫𑀜𑁆𑀜𑀦𑀸𑀯𑀢𑁆𑀣𑀼𑀪𑀽𑀢𑀸𑀦𑀁 𑀲𑀩𑁆𑀩𑁂𑀲𑀁 𑀧𑀣𑀯𑀻𑀆𑀤𑀺𑀥𑀫𑁆𑀫𑀸𑀦𑀁 𑀅𑀥𑀺𑀧𑁆𑀧𑁂𑀢𑀢𑁆𑀢𑀸.

𑀓𑀸𑀭𑀡𑀤𑁂𑀲𑀦𑀦𑁆𑀢𑀺 𑀓𑀸𑀭𑀡𑀜𑀸𑀧𑀦𑀁 𑀤𑁂𑀲𑀦𑀁. 𑀢𑀁 𑀅𑀢𑁆𑀣𑀦𑁆𑀢𑀺 𑀢𑀁 𑀲𑀩𑁆𑀩𑀥𑀫𑁆𑀫𑀸𑀦𑀁 𑀫𑀽𑀮𑀓𑀸𑀭𑀡𑀲𑀗𑁆𑀔𑀸𑀢𑀁, 𑀓𑀸𑀭𑀡𑀤𑁂𑀲𑀦𑀸𑀲𑀗𑁆𑀔𑀸𑀢𑀁 𑀯𑀸 𑀅𑀢𑁆𑀣𑀁. 𑀢𑁂𑀦𑁂𑀯𑀸𑀳 ‘‘𑀢𑀁 𑀓𑀸𑀭𑀡𑀁 𑀢𑀁 𑀤𑁂𑀲𑀦’’𑀦𑁆𑀢𑀺. 𑀏𑀓𑀢𑁆𑀣𑀫𑁂𑀢𑀦𑁆𑀢𑀺 𑀏𑀢𑀁 𑀧𑀤𑀤𑁆𑀯𑀬𑀁 𑀏𑀓𑀢𑁆𑀣𑀁. 𑀲𑀸𑀥𑀼-𑀲𑀤𑁆𑀤𑁄 𑀏𑀯 𑀳𑀺 𑀓-𑀓𑀸𑀭𑁂𑀦 𑀯𑀟𑁆𑀠𑁂𑀢𑁆𑀯𑀸 ‘‘𑀲𑀸𑀥𑀼𑀓’’𑀦𑁆𑀢𑀺 𑀯𑀼𑀢𑁆𑀢𑁄. 𑀢𑁂𑀦𑁂𑀯 𑀳𑀺 𑀲𑀸𑀥𑀼𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀤𑀦𑁆𑀢𑁂𑀦 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀲𑀸𑀥𑀼𑀓𑀲𑀤𑁆𑀤𑁄 𑀉𑀤𑀸𑀳𑀝𑁄. 𑀥𑀫𑁆𑀫𑀭𑀼𑀘𑀻𑀢𑀺 𑀧𑀼𑀜𑁆𑀜𑀓𑀸𑀫𑁄. 𑀧𑀜𑁆𑀜𑀸𑀡𑀯𑀸𑀢𑀺 𑀧𑀜𑁆𑀜𑀯𑀸. 𑀅𑀤𑁆𑀤𑀼𑀩𑁆𑀪𑁄𑀢𑀺 𑀅𑀤𑀽𑀲𑀓𑁄, 𑀅𑀦𑀼𑀧𑀖𑀸𑀢𑀓𑁄𑀢𑀺 𑀅𑀢𑁆𑀣𑁄. 𑀇𑀥𑀸𑀧𑀻𑀢𑀺 𑀇𑀫𑀲𑁆𑀫𑀺𑀁 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑁂𑀧𑀺. 𑀅𑀬𑀦𑁆𑀢𑀺 𑀲𑀸𑀥𑀼𑀓𑀲𑀤𑁆𑀤𑁄. 𑀏𑀢𑁆𑀣𑁂𑀯 𑀤𑀴𑁆𑀳𑀻𑀓𑀫𑁆𑀫𑁂𑀢𑀺 𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸𑀬𑀁. 𑀆𑀡𑀢𑁆𑀢𑀺𑀬𑀦𑁆𑀢𑀺 ¶ 𑀆𑀡𑀸𑀧𑀦𑁂. ‘‘𑀲𑀼𑀡𑀸𑀣 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣𑀸’’𑀢𑀺 𑀳𑀺 𑀯𑀼𑀢𑁆𑀢𑁂 𑀲𑀸𑀥𑀼𑀓𑀲𑀤𑁆𑀤𑁂𑀦 𑀲𑀯𑀦𑀫𑀦𑀲𑀺𑀓𑀸𑀭𑀸𑀦𑀁 𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸 𑀯𑀺𑀬 𑀢𑀤𑀸𑀡𑀸𑀧𑀦𑀫𑁆𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀆𑀬𑀸𑀘𑀦𑀢𑁆𑀣𑀢𑀸 𑀯𑀺𑀬 𑀘𑀲𑁆𑀲 𑀆𑀡𑀸𑀧𑀦𑀢𑁆𑀣𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀇𑀤𑀸𑀦𑁂𑀢𑁆𑀣 ¶ 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄𑀢𑀺𑀦𑁆𑀤𑁆𑀭𑀺𑀬𑀯𑀺𑀓𑁆𑀔𑁂𑀧𑀯𑀸𑀭𑀡𑀁 𑀲𑀯𑀦𑁂 𑀦𑀺𑀬𑁄𑀚𑀦𑀯𑀲𑁂𑀦 𑀓𑀺𑀭𑀺𑀬𑀦𑁆𑀢𑀭𑀧𑀝𑀺𑀲𑁂𑀥𑀦𑀪𑀸𑀯𑀢𑁄, 𑀲𑁄𑀢𑀁 𑀑𑀤𑀳𑀣𑀸𑀢𑀺 𑀅𑀢𑁆𑀣𑁄. 𑀫𑀦𑀺𑀦𑁆𑀤𑁆𑀭𑀺𑀬𑀯𑀺𑀓𑁆𑀔𑁂𑀧𑀦𑀺𑀯𑀸𑀭𑀡𑀁 𑀅𑀜𑁆𑀜𑀘𑀺𑀦𑁆𑀢𑀸𑀧𑀝𑀺𑀲𑁂𑀥𑀦𑀢𑁄. 𑀧𑀼𑀭𑀺𑀫𑀦𑁆𑀢𑀺 ‘‘𑀲𑀼𑀡𑀸𑀣𑀸’’𑀢𑀺 𑀧𑀤𑀁. 𑀏𑀢𑁆𑀣𑀸𑀢𑀺 𑀲𑀼𑀡𑀸𑀣, 𑀫𑀦𑀲𑀺 𑀓𑀭𑁄𑀣𑀸’’𑀢𑀺 𑀧𑀤𑀤𑁆𑀯𑀬𑁂, 𑀏𑀢𑀲𑁆𑀫𑀺𑀁 𑀯𑀸 𑀅𑀥𑀺𑀓𑀸𑀭𑁂. 𑀩𑁆𑀬𑀜𑁆𑀚𑀦𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑀯𑀸𑀭𑀡𑀁 𑀲𑁄𑀢𑀤𑁆𑀯𑀸𑀭𑁂 𑀯𑀺𑀓𑁆𑀔𑁂𑀧𑀧𑀝𑀺𑀩𑀸𑀳𑀓𑀢𑁆𑀢𑀸. 𑀦 𑀳𑀺 𑀬𑀸𑀣𑀸𑀯𑀢𑁄 𑀲𑀼𑀡𑀦𑁆𑀢𑀲𑁆𑀲 𑀲𑀤𑁆𑀤𑀢𑁄 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑁄 𑀳𑁄𑀢𑀺. 𑀅𑀢𑁆𑀣𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑀯𑀸𑀭𑀡𑀁 𑀫𑀦𑀺𑀦𑁆𑀤𑁆𑀭𑀺𑀬𑀯𑀺𑀓𑁆𑀔𑁂𑀧𑀧𑀝𑀺𑀩𑀸𑀳𑀓𑀢𑁆𑀢𑀸. 𑀦 𑀳𑀺 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑀁 𑀉𑀧𑀥𑀸𑀭𑁂𑀦𑁆𑀢𑀲𑁆𑀲 𑀅𑀢𑁆𑀣𑀢𑁄 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑁄 𑀳𑁄𑀢𑀺. 𑀥𑀫𑁆𑀫𑀲𑁆𑀲𑀯𑀦𑁂 𑀦𑀺𑀬𑁄𑀚𑁂𑀢𑀺 𑀲𑀼𑀡𑀸𑀣𑀸𑀢𑀺 𑀯𑀺𑀤𑀳𑀦𑀢𑁄. 𑀥𑀸𑀭𑀡𑀽𑀧𑀧𑀭𑀺𑀓𑁆𑀔𑀸𑀲𑀽𑀢𑀺 𑀉𑀧𑀧𑀭𑀺𑀓𑁆𑀔𑀕𑁆𑀕𑀳𑀡𑁂𑀦 𑀢𑀼𑀮𑀦𑀢𑀻𑀭𑀡𑀸𑀤𑀺𑀓𑁂 𑀤𑀺𑀝𑁆𑀞𑀺𑀬𑀸 𑀘 𑀲𑀼𑀧𑁆𑀧𑀝𑀺𑀯𑁂𑀥𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀲𑀩𑁆𑀬𑀜𑁆𑀚𑀦𑁄𑀢𑀺 𑀏𑀢𑁆𑀣 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀩𑁆𑀬𑀜𑁆𑀚𑀬𑀢𑀻𑀢𑀺 𑀩𑁆𑀬𑀜𑁆𑀚𑀦𑀁, 𑀲𑀪𑀸𑀯𑀦𑀺𑀭𑀼𑀢𑁆𑀢𑀺. 𑀲𑀳 𑀩𑁆𑀬𑀜𑁆𑀚𑀦𑁂𑀦𑀸𑀢𑀺 𑀲𑀩𑁆𑀬𑀜𑁆𑀚𑀦𑁄, 𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀅𑀭𑀡𑀻𑀬𑀢𑁄 𑀉𑀧𑀕𑀦𑁆𑀥𑀩𑁆𑀩𑀢𑁄 𑀅𑀦𑀼𑀝𑁆𑀞𑀸𑀢𑀩𑁆𑀩𑀢𑁄 𑀅𑀢𑁆𑀣𑁄, 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀤𑀺𑀓𑁄. 𑀲𑀳 𑀅𑀢𑁆𑀣𑁂𑀦𑀸𑀢𑀺 𑀲𑀸𑀢𑁆𑀣𑁄, 𑀅𑀢𑁆𑀣𑀲𑀫𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀕𑀫𑁆𑀪𑀻𑀭𑁄𑀢𑀺𑀆𑀤𑀻𑀲𑀼 𑀥𑀫𑁆𑀫𑁄 𑀦𑀸𑀫 𑀢𑀦𑁆𑀢𑀺. 𑀤𑁂𑀲𑀦𑀸 𑀦𑀸𑀫 𑀢𑀲𑁆𑀲𑀸 𑀫𑀦𑀲𑀸 𑀯𑀯𑀢𑁆𑀣𑀸𑀧𑀺𑀢𑀸𑀬 𑀢𑀦𑁆𑀢𑀺𑀬𑀸 𑀤𑁂𑀲𑀦𑀸. 𑀅𑀢𑁆𑀣𑁄 𑀦𑀸𑀫 𑀢𑀦𑁆𑀢𑀺𑀬𑀸 𑀅𑀢𑁆𑀣𑁄. 𑀧𑀝𑀺𑀯𑁂𑀥𑁄 𑀦𑀸𑀫 𑀢𑀦𑁆𑀢𑀺𑀬𑀸 𑀢𑀦𑁆𑀢𑀺𑀅𑀢𑁆𑀣𑀲𑁆𑀲 𑀘 𑀬𑀣𑀸𑀪𑀽𑀢𑀸𑀯𑀩𑁄𑀥𑁄. 𑀬𑀲𑁆𑀫𑀸 𑀘𑁂𑀢𑁂 𑀥𑀫𑁆𑀫𑀤𑁂𑀲𑀦𑀸𑀅𑀢𑁆𑀣𑀧𑀝𑀺𑀯𑁂𑀥𑀸 𑀲𑀲𑀸𑀤𑀻𑀳𑀺 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑁄 𑀫𑀦𑁆𑀤𑀩𑀼𑀤𑁆𑀥𑀻𑀳𑀺 𑀤𑀼𑀓𑁆𑀔𑁄𑀕𑀸𑀴𑁆𑀳𑀸 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑀸 𑀘, 𑀢𑀲𑁆𑀫𑀸 𑀕𑀫𑁆𑀪𑀻𑀭𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀲𑁆𑀫𑀸 𑀅𑀬𑀁 𑀥𑀫𑁆𑀫𑁄…𑀧𑁂… 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣𑀸’’𑀢𑀺. 𑀏𑀢𑁆𑀣 𑀘 𑀧𑀝𑀺𑀯𑁂𑀥𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄 𑀥𑀫𑁆𑀫𑀢𑁆𑀣𑀸𑀦𑀁 𑀤𑁂𑀲𑀦𑀸𑀜𑀸𑀡𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄 𑀤𑁂𑀲𑀦𑀸𑀬 𑀤𑀼𑀓𑁆𑀔𑁄𑀕𑀸𑀳𑀢𑀸, 𑀧𑀝𑀺𑀯𑁂𑀥𑀲𑁆𑀲 𑀧𑀦 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀢𑀩𑁆𑀩𑀺𑀲𑀬𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀘 𑀤𑀼𑀓𑁆𑀓𑀭𑀪𑀸𑀯𑀢𑁄 𑀤𑀼𑀓𑁆𑀔𑁄𑀕𑀸𑀳𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀤𑁂𑀲𑀦𑀁 𑀦𑀸𑀫 𑀉𑀤𑁆𑀤𑀺𑀲𑀦𑀁. 𑀢𑀲𑁆𑀲 𑀦𑀺𑀤𑁆𑀤𑀺𑀲𑀦𑀁 𑀪𑀸𑀲𑀦𑀦𑁆𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀯𑀺𑀢𑁆𑀣𑀸𑀭𑀢𑁄𑀧𑀺 𑀦𑀁 𑀪𑀸𑀲𑀺𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀧𑀭𑀺𑀩𑁆𑀬𑀢𑁆𑀢𑀁 𑀓𑀣𑀦𑀁 𑀯𑀸 𑀪𑀸𑀲𑀦𑀁. 𑀲𑀸𑀴𑀺𑀓𑀸𑀬𑀺𑀯 𑀦𑀺𑀕𑁆𑀖𑁄𑀲𑁄𑀢𑀺 𑀲𑀸𑀴𑀺𑀓𑀸𑀬 𑀆𑀮𑀸𑀧𑁄 𑀯𑀺𑀬 𑀫𑀥𑀼𑀭𑁄 𑀓𑀡𑁆𑀡𑀲𑀼𑀔𑁄 𑀧𑁂𑀫𑀦𑀻𑀬𑁄. 𑀧𑀝𑀺𑀪𑀸𑀦𑀦𑁆𑀢𑀺 𑀲𑀤𑁆𑀤𑁄. 𑀉𑀤𑀻𑀭𑀬𑀻𑀢𑀺 𑀉𑀘𑁆𑀘𑀸𑀭𑀻𑀬𑀢𑀺, 𑀯𑀼𑀘𑁆𑀘𑀢𑀺 𑀯𑀸.

𑀏𑀯𑀁 ¶ 𑀯𑀼𑀢𑁆𑀢𑁂 𑀉𑀲𑁆𑀲𑀸𑀳𑀚𑀸𑀢𑀸𑀢𑀺 𑀏𑀯𑀁 ‘‘𑀲𑀼𑀡𑀸𑀣 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀦 ¶ 𑀓𑀺𑀭 𑀲𑀢𑁆𑀣𑀸 𑀲𑀗𑁆𑀔𑁂𑀧𑁂𑀦𑁂𑀯 𑀤𑁂𑀲𑁂𑀲𑁆𑀲𑀢𑀺, 𑀯𑀺𑀢𑁆𑀣𑀸𑀭𑁂𑀦𑀧𑀺 𑀪𑀸𑀲𑀺𑀲𑁆𑀲𑀢𑀻𑀢𑀺 𑀲𑀜𑁆𑀚𑀸𑀢𑀼𑀲𑁆𑀲𑀸𑀳𑀸 𑀳𑀝𑁆𑀞𑀢𑀼𑀝𑁆𑀞𑀸 𑀳𑀼𑀢𑁆𑀯𑀸. 𑀇𑀥𑀸𑀢𑀺 𑀇𑀫𑀺𑀦𑀸 𑀯𑀼𑀘𑁆𑀘𑀫𑀸𑀦𑀅𑀥𑀺𑀓𑀭𑀡𑀁 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀤𑁂𑀲𑀸𑀧𑀤𑁂𑀲𑁂 𑀦𑀺𑀧𑀸𑀢𑁄’’𑀢𑀺. 𑀮𑁄𑀓𑀦𑁆𑀢𑀺 𑀑𑀓𑀸𑀲𑀮𑁄𑀓𑀁. 𑀇𑀥 𑀢𑀣𑀸𑀕𑀢𑁄 𑀮𑁄𑀓𑁂𑀢𑀺 𑀳𑀺 𑀚𑀸𑀢𑀺𑀔𑁂𑀢𑁆𑀢𑀁, 𑀢𑀢𑁆𑀣𑀸𑀧𑀺 𑀅𑀬𑀁 𑀘𑀓𑁆𑀓𑀯𑀸𑀴𑁄 𑀅𑀥𑀺𑀧𑁆𑀧𑁂𑀢𑁄. 𑀲𑀫𑀡𑁄𑀢𑀺 𑀲𑁄𑀢𑀸𑀧𑀦𑁆𑀦𑁄. 𑀤𑀼𑀢𑀺𑀬𑁄 𑀲𑀫𑀡𑁄𑀢𑀺 𑀲𑀓𑀤𑀸𑀕𑀸𑀫𑀻. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀲𑀫𑀡𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀻’’𑀢𑀺 (𑀅. 𑀦𑀺. 𑁪.𑁨𑁪𑁧) ‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑁄 𑀲𑀫𑀡𑁄? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸 𑀲𑀓𑀤𑀸𑀕𑀸𑀫𑀻 𑀳𑁄𑀢𑀻’’𑀢𑀺 𑀘 (𑀅. 𑀦𑀺. 𑁪.𑁨𑁪𑁧). 𑀇𑀥𑁂𑀯 𑀢𑀺𑀝𑁆𑀞𑀫𑀸𑀦𑀲𑁆𑀲𑀸𑀢𑀺 𑀇𑀫𑀺𑀲𑁆𑀲𑀸 𑀏𑀯 𑀇𑀦𑁆𑀤𑀲𑀸𑀮𑀕𑀼𑀳𑀸𑀬𑀁 𑀢𑀺𑀝𑁆𑀞𑀫𑀸𑀦𑀲𑁆𑀲.

𑁨. 𑀅𑀲𑁆𑀲𑀼𑀢𑀯𑀸𑀢𑀺 𑀏𑀢𑁆𑀣 (𑀅. 𑀦𑀺. 𑀝𑀻. 𑁧.𑁧.𑁫𑁧) 𑀲𑀼𑀢𑀦𑁆𑀢𑀺 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀉𑀧𑀥𑀸𑀭𑀺𑀢𑀁, 𑀉𑀧𑀥𑀸𑀭𑀡𑀁 𑀯𑀸, 𑀲𑀼𑀢𑀁 𑀅𑀲𑁆𑀲𑀢𑁆𑀣𑀻𑀢𑀺 𑀲𑀼𑀢𑀯𑀸. 𑀯𑀸-𑀲𑀤𑁆𑀤𑀲𑁆𑀲 𑀳𑀺 𑀅𑀢𑁆𑀣𑁄 𑀅𑀢𑁆𑀣𑀺𑀢𑀸𑀫𑀢𑁆𑀢𑀸𑀤𑀺𑀯𑀲𑁂𑀦 𑀅𑀦𑁂𑀓𑀯𑀺𑀥𑁄. 𑀢𑀣𑀸 𑀳𑀺 ‘‘𑀅𑀦𑁆𑀢𑀯𑀸 𑀅𑀬𑀁 𑀮𑁄𑀓𑁄 𑀧𑀭𑀺𑀯𑀝𑀼𑀫𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁫𑁪; 𑀧𑀝𑀺. 𑀫. 𑁧.𑁧𑁪𑁦) 𑀅𑀢𑁆𑀣𑀺𑀢𑀸𑀫𑀢𑁆𑀢𑀁 𑀅𑀢𑁆𑀣𑁄. ‘‘𑀥𑀦𑀯𑀸 𑀪𑁄𑀕𑀯𑀸, 𑀮𑀸𑀪𑀻 𑀅𑀦𑁆𑀦𑀲𑁆𑀲𑀸’’𑀢𑀺 𑀘 𑀆𑀤𑀻𑀲𑀼 𑀩𑀳𑀼𑀪𑀸𑀯𑁄. ‘‘𑀭𑁄𑀕𑀯𑀸 𑀳𑁄𑀢𑀺 𑀭𑁄𑀕𑀸𑀪𑀺𑀪𑀽𑀢𑁄’’𑀢𑀺𑀆𑀤𑀻𑀲𑀼 𑀓𑀸𑀬𑀸𑀩𑀸𑀥𑁄. ‘‘𑀓𑀼𑀝𑁆𑀞𑀻 𑀓𑀼𑀝𑁆𑀞𑀘𑀻𑀯𑀭𑁂𑀦𑀸’’𑀢𑀺𑀆𑀤𑀻𑀲𑀼 𑀦𑀺𑀦𑁆𑀤𑀸, ‘‘𑀇𑀲𑁆𑀲𑀼𑀓𑀻 𑀫𑀘𑁆𑀙𑀭𑀻 𑀲𑀞𑁄 𑀫𑀸𑀬𑀸𑀯𑀺𑀦𑁄 𑀓𑁂𑀝𑀼𑀪𑀺𑀦𑁄’’𑀢𑀺𑀆𑀤𑀻𑀲𑀼 𑀅𑀪𑀺𑀡𑁆𑀳𑀬𑁄𑀕𑁄. ‘‘𑀤𑀡𑁆𑀟𑀻 𑀙𑀢𑁆𑀢𑀻 𑀅𑀮𑀫𑁆𑀩𑀭𑀻’’𑀢𑀺𑀆𑀤𑀻𑀲𑀼 (𑀯𑀺𑀲𑀼𑀤𑁆𑀥𑀺. 𑁧.𑁧𑁪𑁨) 𑀲𑀁𑀲𑀕𑁆𑀕𑁄. ‘‘𑀧𑀡𑁆𑀟𑀺𑀢𑁄 𑀯𑀸𑀧𑀺 𑀢𑁂𑀦 𑀲𑁄’’𑀢𑀺𑀆𑀤𑀻𑀲𑀼 (𑀥. 𑀧. 𑁬𑁩) 𑀉𑀧𑀫𑀸𑀦𑀁, 𑀲𑀤𑀺𑀲𑀪𑀸𑀯𑁄𑀢𑀺 𑀅𑀢𑁆𑀣𑁄. ‘‘𑀢𑀁 𑀯𑀸𑀧𑀺 𑀥𑀻𑀭𑀸 𑀫𑀼𑀦𑀺𑀁 𑀯𑁂𑀤𑀬𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁨𑁧𑁩) 𑀲𑀫𑀼𑀘𑁆𑀘𑀬𑁄. ‘‘𑀓𑁂 𑀯𑀸 𑀇𑀫𑁂 𑀓𑀲𑁆𑀲 𑀯𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨𑁯𑁬) 𑀲𑀁𑀲𑀬𑁄. ‘‘𑀅𑀬𑀁 𑀯𑀸 𑀇𑀫𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀩𑁆𑀩𑀩𑀸𑀮𑁄 𑀲𑀩𑁆𑀩𑀫𑀽𑀴𑁆𑀳𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁮𑁧) 𑀯𑀺𑀪𑀸𑀯𑀦𑁄. ‘‘𑀦 𑀯𑀸𑀬𑀁 𑀓𑀼𑀫𑀸𑀭𑁄 𑀫𑀢𑁆𑀢𑀫𑀜𑁆𑀜𑀸𑀲𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁧𑁫𑁪) 𑀧𑀤𑀧𑀽𑀭𑀡𑀁. ‘‘𑀬𑁂 𑀳𑀺 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁭𑁦) 𑀯𑀺𑀓𑀧𑁆𑀧𑁄. ‘‘𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀺𑀭𑀻𑀫𑀢𑁄 ¶ (𑀤𑀻. 𑀦𑀺. 𑁩.𑁨𑁭𑁭), 𑀲𑀻𑀮𑀯𑀢𑁄 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀻’’𑀢𑀺 (𑀤𑀻. 𑀦𑀺. 𑁨.𑁧𑁫𑁦; 𑁩.𑁩𑁧𑁬; 𑀅. 𑀦𑀺. 𑁫.𑁨𑁧𑁩; 𑀫𑀳𑀸𑀯. 𑁨𑁮𑁫) 𑀘 𑀆𑀤𑀻𑀲𑀼 𑀧𑀲𑀁𑀲𑀸. ‘‘𑀧𑀜𑁆𑀜𑀯𑀸 𑀳𑁄𑀢𑀺 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁧𑁭, 𑁩𑁫𑁫) 𑀅𑀢𑀺𑀲𑀬𑁄. 𑀇𑀥𑀸𑀧𑀺 𑀅𑀢𑀺𑀲𑀬𑁄, 𑀧𑀲𑀁𑀲𑀸 𑀯𑀸 𑀅𑀢𑁆𑀣𑁄, 𑀢𑀲𑁆𑀫𑀸 𑀬𑀲𑁆𑀲 𑀧𑀲𑀁𑀲𑀺𑀢𑀁, 𑀅𑀢𑀺𑀲𑀬𑁂𑀦 𑀯𑀸 𑀲𑀼𑀢𑀁 𑀅𑀢𑁆𑀣𑀺, 𑀲𑁄 𑀲𑀼𑀢𑀯𑀸𑀢𑀺 𑀲𑀁𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀲𑀫𑀢𑁆𑀣𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲𑀯𑀦𑀁, 𑀢𑀁 𑀲𑀼𑀢𑁆𑀯𑀸 ¶ 𑀢𑀣𑀢𑁆𑀢𑀸𑀬 𑀧𑀝𑀺𑀧𑀢𑁆𑀢𑀺 𑀘 ‘‘𑀲𑀼𑀢𑀯𑀸’’𑀢𑀺 𑀇𑀫𑀺𑀦𑀸 𑀲𑀤𑁆𑀤𑁂𑀦 𑀧𑀓𑀸𑀲𑀺𑀢𑀸. 𑀅𑀣 𑀯𑀸 𑀲𑁄𑀢𑀩𑁆𑀩𑀬𑀼𑀢𑁆𑀢𑀁 𑀲𑀼𑀢𑁆𑀯𑀸 𑀓𑀢𑁆𑀢𑀩𑁆𑀩𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦 𑀲𑀼𑀡𑀻𑀢𑀺 𑀲𑀼𑀢𑀯𑀸, 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀦 𑀲𑀼𑀢𑀯𑀸𑀢𑀺 𑀅𑀲𑁆𑀲𑀼𑀢𑀯𑀸.

𑀅𑀬𑀜𑁆𑀳𑀺 𑀅-𑀓𑀸𑀭𑁄 ‘‘𑀅𑀳𑁂𑀢𑀼𑀓𑀸 𑀥𑀫𑁆𑀫𑀸 (𑀥. 𑀲. 𑁨.𑀤𑀼𑀓𑀫𑀸𑀢𑀺𑀓𑀸), 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁧𑁦𑁪𑁬, 𑁧𑁦𑁪𑁭) 𑀢𑀁𑀲𑀳𑀬𑁄𑀕𑀦𑀺𑀯𑀢𑁆𑀢𑀺𑀬𑀁 𑀇𑀘𑁆𑀙𑀺𑀢𑁄. ‘‘𑀅𑀧𑀘𑁆𑀘𑀬𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑁭.𑀤𑀼𑀓𑀫𑀸𑀢𑀺𑀓𑀸) 𑀢𑀁𑀲𑀫𑁆𑀩𑀦𑁆𑀥𑀻𑀪𑀸𑀯𑀦𑀺𑀯𑀢𑁆𑀢𑀺𑀬𑀁. 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀜𑁆𑀳𑀺 𑀧𑀘𑁆𑀘𑀬𑀲𑀫𑁆𑀩𑀦𑁆𑀥𑀻𑀢𑀺 𑀅𑀧𑁆𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁆𑀢𑀸 𑀅𑀢𑀁𑀲𑀫𑁆𑀩𑀦𑁆𑀥𑀺𑀢𑀸 𑀏𑀢𑁆𑀣 𑀚𑁄𑀢𑀺𑀢𑀸. ‘‘𑀅𑀦𑀺𑀤𑀲𑁆𑀲𑀦𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑁯.𑀤𑀼𑀓𑀫𑀸𑀢𑀺𑀓𑀸) 𑀢𑀁𑀲𑀪𑀸𑀯𑀦𑀺𑀯𑀢𑁆𑀢𑀺𑀬𑀁. 𑀦𑀺𑀤𑀲𑁆𑀲𑀦𑀜𑁆𑀳𑀺 𑀤𑀝𑁆𑀞𑀩𑁆𑀩𑀢𑀸. 𑀅𑀣 𑀯𑀸 𑀧𑀲𑁆𑀲𑀢𑀻𑀢𑀺 𑀦𑀺𑀤𑀲𑁆𑀲𑀦𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀕𑁆𑀕𑀳𑁂𑀢𑀩𑁆𑀩𑀪𑀸𑀯𑀦𑀺𑀯𑀢𑁆𑀢𑀺𑀬𑀁 𑀬𑀣𑀸 ‘‘𑀅𑀦𑀸𑀲𑀯𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑁧𑁫.𑀤𑀼𑀓𑀫𑀸𑀢𑀺𑀓𑀸), ‘‘𑀅𑀧𑁆𑀧𑀝𑀺𑀖𑀸 𑀥𑀫𑁆𑀫𑀸 (𑀥. 𑀲. 𑁧𑁦.𑀤𑀼𑀓𑀫𑀸𑀢𑀺𑀓𑀸), 𑀅𑀦𑀸𑀭𑀫𑁆𑀫𑀡𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑁫𑁫.𑀤𑀼𑀓𑀫𑀸𑀢𑀺𑀓𑀸) 𑀢𑀁𑀓𑀺𑀘𑁆𑀘𑀦𑀺𑀯𑀢𑁆𑀢𑀺𑀬𑀁, ‘‘𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 (𑀥. 𑀲. 𑁧𑁧.𑀤𑀼𑀓𑀫𑀸𑀢𑀺𑀓𑀸) 𑀅𑀘𑁂𑀢𑀲𑀺𑀓𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑁫𑁭.𑀤𑀼𑀓𑀫𑀸𑀢𑀺𑀓𑀸) 𑀢𑀩𑁆𑀪𑀸𑀯𑀦𑀺𑀯𑀢𑁆𑀢𑀺𑀬𑀁. 𑀢𑀤𑀜𑁆𑀜𑀣𑀸 𑀳𑀺 𑀏𑀢𑁆𑀣 𑀧𑀓𑀸𑀲𑀺𑀢𑀸. ‘‘𑀅𑀫𑀦𑀼𑀲𑁆𑀲𑁄’’𑀢𑀺 𑀢𑀩𑁆𑀪𑀸𑀯𑀫𑀢𑁆𑀢𑀦𑀺𑀯𑀢𑁆𑀢𑀺𑀬𑀁. 𑀫𑀦𑀼𑀲𑁆𑀲𑀫𑀢𑁆𑀢𑀁 𑀦𑀢𑁆𑀣𑀺, 𑀅𑀜𑁆𑀜𑀁 𑀲𑀫𑀸𑀦𑀦𑁆𑀢𑀺. 𑀲𑀤𑀺𑀲𑀢𑀸 𑀳𑀺 𑀏𑀢𑁆𑀣 𑀲𑀽𑀘𑀺𑀢𑀸. ‘‘𑀅𑀲𑁆𑀲𑀫𑀡𑁄 𑀲𑀫𑀡𑀧𑀝𑀺𑀜𑁆𑀜𑁄, 𑀅𑀦𑀭𑀺𑀬𑁄’’𑀢𑀺 (𑀅. 𑀦𑀺. 𑁩.𑁧𑁩) 𑀘 𑀢𑀁𑀲𑀫𑁆𑀪𑀸𑀯𑀦𑀻𑀬𑀕𑀼𑀡𑀦𑀺𑀯𑀢𑁆𑀢𑀺𑀬𑀁. 𑀕𑀭𑀳𑀸 𑀳𑀺 𑀇𑀥 𑀜𑀸𑀬𑀢𑀺. ‘‘𑀓𑀘𑁆𑀘𑀺 𑀪𑁄𑀢𑁄 𑀅𑀦𑀸𑀫𑀬𑀁, 𑀅𑀦𑀼𑀤𑀭𑀸 𑀓𑀜𑁆𑀜𑀸’’𑀢𑀺 (𑀚𑀸. 𑁨.𑁨𑁦.𑁧𑁨𑁯) 𑀢𑀤𑀦𑀧𑁆𑀧𑀪𑀸𑀯𑀦𑀺𑀯𑀢𑁆𑀢𑀺𑀬𑀁, ‘‘𑀅𑀦𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑁧𑁭.𑀢𑀺𑀓𑀫𑀸𑀢𑀺𑀓𑀸) 𑀢𑀁𑀲𑀤𑀺𑀲𑀪𑀸𑀯𑀦𑀺𑀯𑀢𑁆𑀢𑀺𑀬𑀁. 𑀅𑀢𑀻𑀢𑀸𑀦𑀜𑁆𑀳𑀺 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀢𑁆𑀢𑀸 𑀉𑀧𑁆𑀧𑀸𑀤𑀺𑀥𑀫𑁆𑀫𑀸𑀦𑀜𑁆𑀘 𑀧𑀘𑁆𑀘𑀬𑁂𑀓𑀤𑁂𑀲𑀦𑀺𑀧𑁆𑀨𑀢𑁆𑀢𑀺𑀬𑀸 𑀆𑀭𑀤𑁆𑀥𑀼𑀧𑁆𑀧𑀸𑀤𑀺𑀪𑀸𑀯𑀢𑁄 𑀓𑀸𑀮𑀯𑀺𑀫𑀼𑀢𑁆𑀢𑀲𑁆𑀲 𑀘 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀉𑀧𑁆𑀧𑀦𑁆𑀦𑀸𑀦𑀼𑀓𑀽𑀮𑀢𑀸 𑀧𑀕𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀢𑀩𑁆𑀩𑀺𑀤𑀽𑀭𑀢𑀸𑀯 𑀏𑀢𑁆𑀣 𑀯𑀺𑀜𑁆𑀜𑀸𑀬𑀢𑀺 ‘‘𑀅𑀲𑁂𑀓𑁆𑀔𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑁧𑁧.𑀢𑀺𑀓𑀫𑀸𑀢𑀺𑀓𑀸) 𑀢𑀤𑀧𑀭𑀺𑀬𑁄𑀲𑀸𑀦𑀦𑀺𑀯𑀢𑁆𑀢𑀺𑀬𑀁. 𑀢𑀦𑁆𑀦𑀺𑀝𑁆𑀞𑀸𑀦𑀜𑁆𑀳𑀺 𑀏𑀢𑁆𑀣 𑀧𑀓𑀸𑀲𑀺𑀢𑀦𑁆𑀢𑀺. 𑀏𑀯𑀫𑀦𑁂𑀓𑁂𑀲𑀁 𑀅𑀢𑁆𑀣𑀸𑀦𑀁 𑀚𑁄𑀢𑀓𑁄. 𑀇𑀥 𑀧𑀦 ‘‘𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀘𑁂𑀢𑀲𑀺𑀓𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀢𑀩𑁆𑀪𑀸𑀯𑀦𑀺𑀯𑀢𑁆𑀢𑀺𑀬𑀁 ¶ 𑀤𑀝𑁆𑀞𑀩𑁆𑀩𑁄, 𑀅𑀜𑁆𑀜𑀢𑁆𑀣𑁂𑀢𑀺 𑀅𑀢𑁆𑀣𑁄. 𑀏𑀢𑁂𑀦𑀲𑁆𑀲 𑀲𑀼𑀢𑀸𑀤𑀺𑀜𑀸𑀡𑀯𑀺𑀭𑀳𑀢𑀁 𑀤𑀲𑁆𑀲𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀕𑀫𑀸𑀥𑀺𑀕𑀫𑀸𑀪𑀸𑀯𑀸 𑀜𑁂𑀬𑁆𑀬𑁄 𑀅𑀲𑁆𑀲𑀼𑀢𑀯𑀸 𑀇𑀢𑀻’’𑀢𑀺.

𑀇𑀤𑀸𑀦𑀺 𑀢𑀲𑁆𑀲 𑀅𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 𑀬𑀲𑁆𑀫𑀸 𑀔𑀦𑁆𑀥𑀥𑀸𑀢𑁆𑀯𑀸𑀤𑀺𑀓𑁄𑀲𑀮𑁆𑀮𑁂𑀦𑀧𑀺 𑀫𑀜𑁆𑀜𑀦𑀸𑀧𑀝𑀺𑀲𑁂𑀥𑀦𑀲𑀫𑀢𑁆𑀣𑀁 𑀩𑀸𑀳𑀼𑀲𑀘𑁆𑀘𑀁 𑀳𑁄𑀢𑀺. 𑀬𑀣𑀸𑀳 ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺? 𑀬𑀢𑁄 𑀔𑁄 𑀪𑀺𑀓𑁆𑀔𑀼 𑀔𑀦𑁆𑀥𑀓𑀼𑀲𑀮𑁄 𑀳𑁄𑀢𑀺 𑀥𑀸𑀢𑀼, 𑀆𑀬𑀢𑀦, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑁄 𑀳𑁄𑀢𑀺, 𑀏𑀢𑁆𑀢𑀸𑀯𑀢𑀸 𑀔𑁄 𑀪𑀺𑀓𑁆𑀔𑀼 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀻’’𑀢𑀺, 𑀢𑀲𑁆𑀫𑀸 ‘‘𑀬𑀲𑁆𑀲 𑀳𑀺 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀲𑀘𑁆𑀘𑀧𑀘𑁆𑀘𑀬𑀸𑀓𑀸𑀭𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀲𑀽𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀸𑀘𑀼𑀕𑁆𑀕𑀢𑀓𑀭𑀡𑀁 𑀉𑀕𑁆𑀕𑀳𑁄. 𑀅𑀢𑁆𑀣𑀧𑀭𑀺𑀧𑀼𑀘𑁆𑀙𑀦𑀁 𑀧𑀭𑀺𑀧𑀼𑀘𑁆𑀙𑀸. 𑀓𑀼𑀲𑀮𑁂𑀳𑀺 𑀲𑀳 𑀘𑁄𑀤𑀦𑀸𑀧𑀭𑀺𑀳𑀭𑀡𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑀓𑀭𑀡𑀁 𑀯𑀺𑀦𑀺𑀘𑁆𑀙𑀬𑁄. 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀅𑀥𑀺𑀕𑀫𑁄.

𑀩𑀳𑀽𑀦𑀁 ¶ (𑀥. 𑀲. 𑀫𑀽𑀮𑀝𑀻. 𑁧𑁦𑁦𑁭) 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀓𑀺𑀮𑁂𑀲𑀲𑀓𑁆𑀓𑀸𑀬𑀤𑀺𑀝𑁆𑀞𑀻𑀦𑀁 𑀅𑀯𑀺𑀳𑀢𑀢𑁆𑀢𑀸 𑀢𑀸 𑀚𑀦𑁂𑀦𑁆𑀢𑀺, 𑀢𑀸𑀳𑀺 𑀯𑀸 𑀚𑀦𑀺𑀢𑀸𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀅𑀯𑀺𑀖𑀸𑀢𑀫𑁂𑀯 𑀯𑀸 𑀚𑀦-𑀲𑀤𑁆𑀤𑁄 𑀯𑀤𑀢𑀺. 𑀧𑀼𑀣𑀼 𑀲𑀢𑁆𑀣𑀸𑀭𑀸𑀦𑀁 𑀫𑀼𑀔𑀫𑀼𑀮𑁆𑀮𑁄𑀓𑀺𑀓𑀸𑀢𑀺 𑀏𑀢𑁆𑀣 𑀧𑀼𑀣𑀼 𑀚𑀦𑀸 𑀲𑀢𑁆𑀣𑀼𑀧𑀝𑀺𑀜𑁆𑀜𑀸 𑀏𑀢𑁂𑀲𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸𑀢𑀺 𑀯𑀘𑀦𑀢𑁆𑀣𑁄. 𑀧𑀼𑀣𑀼 𑀲𑀩𑁆𑀩𑀕𑀢𑀻𑀳𑀺 𑀅𑀯𑀼𑀝𑁆𑀞𑀺𑀢𑀸𑀢𑀺 𑀏𑀢𑁆𑀣 𑀚𑀦𑁂𑀢𑀩𑁆𑀩𑀸, 𑀚𑀸𑀬𑀦𑁆𑀢𑀺 𑀯𑀸 𑀏𑀢𑁆𑀣 𑀲𑀢𑁆𑀢𑀸𑀢𑀺 𑀚𑀦𑀸, 𑀦𑀸𑀦𑀸𑀕𑀢𑀺𑀬𑁄, 𑀢𑀸 𑀧𑀼𑀣𑀽 𑀏𑀢𑁂𑀲𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀇𑀢𑁄 𑀧𑀭𑁂 𑀚𑀸𑀬𑀦𑁆𑀢𑀺 𑀏𑀢𑁂𑀳𑀻𑀢𑀺 𑀚𑀦𑀸, 𑀅𑀪𑀺𑀲𑀗𑁆𑀔𑀸𑀭𑀸𑀤𑀬𑁄, 𑀢𑁂 𑀏𑀢𑁂𑀲𑀁 𑀧𑀼𑀣𑀽 𑀯𑀺𑀚𑁆𑀚𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀅𑀪𑀺𑀲𑀗𑁆𑀔𑀭𑀡𑀸𑀤𑀺𑀅𑀢𑁆𑀣𑁄 𑀏𑀯 𑀯𑀸 𑀚𑀦-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀑𑀖𑀸 𑀓𑀸𑀫𑁄𑀖𑀸𑀤𑀬𑁄. 𑀭𑀸𑀕𑀕𑁆𑀕𑀺𑀆𑀤𑀬𑁄 𑀲𑀦𑁆𑀢𑀸𑀧𑀸. 𑀢𑁂 𑀏𑀯, 𑀲𑀩𑁆𑀩𑁂𑀧𑀺 𑀯𑀸 𑀓𑀺𑀮𑁂𑀲𑀸 𑀧𑀭𑀺𑀴𑀸𑀳𑀸. 𑀧𑀼𑀣𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀭𑀢𑁆𑀢𑀸𑀢𑀺 𑀏𑀢𑁆𑀣 𑀚𑀸𑀬𑀢𑀻𑀢𑀺 𑀚𑀦𑁄, 𑀭𑀸𑀕𑁄 𑀕𑁂𑀥𑁄𑀢𑀺 𑀏𑀯𑀫𑀸𑀤𑀺𑀓𑁄, 𑀧𑀼𑀣𑀼 𑀚𑀦𑁄 𑀏𑀢𑁂𑀲𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀧𑀼𑀣𑀽𑀲𑀼 𑀯𑀸 𑀚𑀦𑀸 𑀚𑀸𑀢𑀸 𑀭𑀢𑁆𑀢𑀸𑀢𑀺 𑀏𑀯𑀁 𑀭𑀸𑀕𑀸𑀤𑀺𑀅𑀢𑁆𑀣𑁄 𑀏𑀯 𑀯𑀸 𑀚𑀦𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀭𑀢𑁆𑀢𑀸𑀢𑀺 𑀯𑀢𑁆𑀣𑀁 𑀯𑀺𑀬 𑀭𑀗𑁆𑀕𑀚𑀸𑀢𑁂𑀦 𑀘𑀺𑀢𑁆𑀢𑀲𑁆𑀲 𑀯𑀺𑀧𑀭𑀺𑀡𑀸𑀫𑀓𑀭𑁂𑀦 𑀙𑀦𑁆𑀤𑀭𑀸𑀕𑁂𑀦 𑀭𑀢𑁆𑀢𑀸 𑀲𑀸𑀭𑀢𑁆𑀢𑀸. 𑀕𑀺𑀤𑁆𑀥𑀸𑀢𑀺 𑀅𑀪𑀺𑀓𑀗𑁆𑀔𑀦𑀲𑀪𑀸𑀯𑁂𑀦 𑀅𑀪𑀺𑀚𑁆𑀛𑀸𑀦𑁂𑀦 𑀕𑀺𑀤𑁆𑀥𑀸 𑀕𑁂𑀥𑀁 𑀆𑀧𑀦𑁆𑀦𑀸. 𑀕𑀥𑀺𑀢𑀸𑀢𑀺 𑀕𑀦𑁆𑀣𑀺𑀢𑀸 𑀯𑀺𑀬 𑀤𑀼𑀫𑁆𑀫𑁄𑀘𑀦𑀻𑀬𑀪𑀸𑀯𑁂𑀦 𑀢𑀢𑁆𑀣 𑀧𑀝𑀺𑀩𑀤𑁆𑀥𑀸. 𑀫𑀼𑀘𑁆𑀙𑀺𑀢𑀸𑀢𑀺 𑀓𑀺𑀮𑁂𑀲𑀯𑀲𑁂𑀦 𑀯𑀺𑀲𑀜𑁆𑀜𑀻𑀪𑀽𑀢𑀸 𑀯𑀺𑀬 𑀅𑀦𑀜𑁆𑀜𑀓𑀺𑀘𑁆𑀘𑀸 𑀫𑀼𑀘𑁆𑀙𑀁 𑀫𑁄𑀳𑀫𑀸𑀧𑀦𑁆𑀦𑀸. 𑀅𑀚𑁆𑀛𑁄𑀲𑀦𑁆𑀦𑀸𑀢𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑁂 𑀯𑀺𑀬 𑀓𑀢𑁆𑀯𑀸 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀞𑀺𑀢𑀸. 𑀮𑀕𑁆𑀕𑀸𑀢𑀺 𑀯𑀗𑁆𑀓𑀤𑀡𑁆𑀟𑀓𑁂 𑀯𑀺𑀬 𑀆𑀲𑀢𑁆𑀢𑀸 𑀫𑀳𑀸𑀧𑀮𑀺𑀧𑁂 𑀯𑀸 𑀬𑀸𑀯 𑀦𑀸𑀲𑀺𑀓𑀕𑁆𑀕𑀸 𑀧𑀮𑀺𑀧𑀦𑁆𑀦𑀧𑀼𑀭𑀺𑀲𑁄 𑀯𑀺𑀬 𑀉𑀤𑁆𑀥𑀭𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑁂𑀦 𑀦𑀺𑀫𑀼𑀕𑁆𑀕𑀸 ¶ , 𑀮𑀕𑀺𑀢𑀸𑀢𑀺 𑀫𑀓𑁆𑀓𑀝𑀸𑀮𑁂𑀧𑁂 𑀆𑀮𑀕𑁆𑀕𑀪𑀸𑀯𑁂𑀦 𑀧𑀘𑁆𑀘𑀼𑀟𑁆𑀟𑀺𑀢𑁄 𑀯𑀺𑀬 𑀫𑀓𑁆𑀓𑀝𑁄 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀆𑀮𑀕𑁆𑀕𑀺𑀢𑀸. 𑀧𑀮𑀺𑀩𑀼𑀤𑁆𑀥𑀸𑀢𑀺 𑀩𑀤𑁆𑀥𑀸, 𑀉𑀧𑀤𑁆𑀤𑀼𑀢𑀸 𑀯𑀸. 𑀆𑀯𑀼𑀝𑀸𑀢𑀺 𑀆𑀯𑀼𑀦𑀺𑀢𑀸, 𑀦𑀺𑀯𑀼𑀢𑀸𑀢𑀺 𑀦𑀺𑀯𑀸𑀭𑀺𑀢𑀸. 𑀑𑀯𑀼𑀢𑀸𑀢𑀺 𑀧𑀮𑀺𑀕𑀼𑀡𑁆𑀞𑀺𑀢𑀸, 𑀧𑀭𑀺𑀬𑁄𑀦𑀤𑁆𑀥𑀸 𑀯𑀸. 𑀧𑀺𑀳𑀺𑀢𑀸𑀢𑀺 𑀧𑀺𑀤𑀳𑀺𑀢𑀸, 𑀧𑀝𑀺𑀘𑁆𑀙𑀦𑁆𑀦𑀸𑀢𑀺 𑀧𑀝𑀺𑀘𑁆𑀙𑀸𑀤𑀺𑀢𑀸. 𑀧𑀝𑀺𑀓𑀼𑀚𑁆𑀚𑀺𑀢𑀸𑀢𑀺 𑀳𑁂𑀝𑁆𑀞𑀸𑀫𑀼𑀔𑀚𑀸𑀢𑀸. 𑀧𑀼𑀣𑀽𑀦𑀁 𑀯𑀸 𑀕𑀡𑀦𑀧𑀣𑀫𑀢𑀻𑀢𑀸𑀦𑀦𑁆𑀢𑀺𑀆𑀤𑀺𑀦𑀸 𑀧𑀼𑀣𑀼 𑀚𑀦𑁄 𑀧𑀼𑀣𑀼𑀚𑁆𑀚𑀦𑁄𑀢𑀺 𑀤𑀲𑁆𑀲𑁂𑀢𑀺.

‘‘𑀅𑀲𑁆𑀲𑀼𑀢𑀯𑀸’’𑀢𑀺 𑀏𑀢𑁂𑀦 𑀅𑀯𑀺𑀚𑁆𑀚𑀦𑁆𑀥𑀢𑀸 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑁄 𑀯𑀼𑀢𑁆𑀢𑁄 𑀳𑁄𑀢𑀻’’𑀢𑀺. 𑀆𑀭𑀓𑀢𑁆𑀢𑀸 (𑀲𑀁. 𑀦𑀺. 𑀝𑀻. 𑁨.𑁩.𑁧) 𑀓𑀺𑀮𑁂𑀲𑁂𑀳𑀺 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸. 𑀅𑀦𑀬𑁂𑀢𑀺 𑀅𑀯𑀟𑁆𑀠𑀺𑀬𑀁, 𑀅𑀦𑀢𑁆𑀣𑁂𑀢𑀺 𑀅𑀢𑁆𑀣𑁄. 𑀅𑀦𑀬𑁂 𑀯𑀸 𑀅𑀦𑀼𑀧𑀸𑀬𑁂. 𑀦𑀇𑀭𑀺𑀬𑀦𑀢𑁄 𑀅𑀯𑀢𑁆𑀢𑀦𑀢𑁄. 𑀅𑀬𑁂𑀢𑀺 𑀯𑀟𑁆𑀠𑀺𑀬𑀁, 𑀅𑀢𑁆𑀣𑁂, 𑀉𑀧𑀸𑀬𑁂 𑀯𑀸. 𑀅𑀭𑀡𑀻𑀬𑀢𑁄𑀢𑀺 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑀢𑁄. 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸 𑀧𑀼𑀭𑀺𑀫𑁂𑀲𑀼 𑀅𑀢𑁆𑀣𑀯𑀺𑀓𑀧𑁆𑀧𑁂𑀲𑀼. 𑀧𑀘𑁆𑀙𑀺𑀫𑁂 𑀧𑀦 𑀲𑀤𑁆𑀤𑀲𑀢𑁆𑀣𑀯𑀲𑁂𑀦𑀧𑀺. 𑀬𑀤𑀺𑀧𑀺 𑀅𑀭𑀺𑀬-𑀲𑀤𑁆𑀤𑁄 ‘‘𑀬𑁂 𑀳𑀺 𑀯𑁄 𑀅𑀭𑀺𑀬𑀸 𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁫) 𑀯𑀺𑀲𑀼𑀤𑁆𑀥𑀸𑀲𑀬𑀧𑀬𑁄𑀕𑁂𑀲𑀼 𑀧𑀼𑀣𑀼𑀚𑁆𑀚𑀦𑁂𑀲𑀼𑀧𑀺 𑀯𑀢𑁆𑀢𑀢𑀺. 𑀇𑀥 𑀧𑀦 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑁂𑀦 𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑀪𑀸𑀯𑁂𑀦 𑀘 𑀅𑀭𑀺𑀬𑀪𑀸𑀯𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀩𑀼𑀤𑁆𑀥𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀢𑀣𑀸𑀕𑀢𑀲𑀸𑀯𑀓𑀸 𑀘 𑀲𑀧𑁆𑀧𑀼𑀭𑀺𑀲𑀸’’𑀢𑀺 𑀇𑀤𑀁 𑀅𑀭𑀺𑀬𑀸 𑀲𑀧𑁆𑀧𑀼𑀭𑀺𑀲𑀸𑀢𑀺 𑀇𑀥 𑀯𑀼𑀢𑁆𑀢𑀧𑀤𑀸𑀦𑀁 𑀅𑀢𑁆𑀣𑀁 𑀅𑀲𑀗𑁆𑀓𑀭𑀢𑁄 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀅𑀭𑀺𑀬𑀲𑀧𑁆𑀧𑀼𑀭𑀺𑀲𑀪𑀸𑀯𑀸 𑀅𑀪𑀺𑀦𑁆𑀦𑀲𑀪𑀸𑀯𑀸. 𑀢𑀲𑁆𑀫𑀸 ‘‘𑀲𑀩𑁆𑀩𑁂𑀯 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀏𑀢𑁆𑀢𑀸𑀯𑀢𑀸 ¶ 𑀳𑀺 𑀩𑀼𑀤𑁆𑀥𑀲𑀸𑀯𑀓𑁄 𑀯𑀼𑀢𑁆𑀢𑁄. 𑀢𑀲𑁆𑀲 𑀳𑀺 𑀏𑀓𑀦𑁆𑀢𑁂𑀦 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀇𑀘𑁆𑀙𑀺𑀢𑀩𑁆𑀩𑁄 𑀧𑀭𑀢𑁄𑀖𑁄𑀲𑀫𑀦𑁆𑀢𑀭𑁂𑀦 𑀧𑀞𑀫𑀫𑀕𑁆𑀕𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀯𑀺𑀲𑁂𑀲𑀢𑁄 𑀘𑀲𑁆𑀲 𑀪𑀕𑀯𑀸𑀯 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀅𑀥𑀺𑀧𑁆𑀧𑁂𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀫𑀫𑀜𑁆𑀳𑀺, 𑀆𑀦𑀦𑁆𑀤, 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀆𑀕𑀫𑁆𑀫 𑀚𑀸𑀢𑀺𑀥𑀫𑁆𑀫𑀸 𑀲𑀢𑁆𑀢𑀸 𑀚𑀸𑀢𑀺𑀬𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁫.𑁨). 𑀲𑁄 𑀏𑀯 𑀘 𑀅𑀯𑁂𑀘𑁆𑀘𑀧𑀲𑀸𑀤𑀸𑀥𑀺𑀕𑀫𑁂𑀦 𑀤𑀴𑁆𑀳𑀪𑀢𑁆𑀢𑀺 𑀦𑀸𑀫. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀬𑀁 𑀫𑀬𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀢𑀁 𑀫𑀫 𑀲𑀸𑀯𑀓𑀸 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦𑀸𑀢𑀺𑀓𑁆𑀓𑀫𑀦𑁆𑀢𑀻’’𑀢𑀺 (𑀉𑀤𑀸. 𑁪𑁫). 𑀓𑀢𑀜𑁆𑀜𑀼𑀢𑀸𑀤𑀻𑀳𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀩𑀼𑀤𑁆𑀥𑀸𑀢𑀺 𑀏𑀢𑁆𑀣 𑀓𑀢𑀁 𑀚𑀸𑀦𑀸𑀢𑀻𑀢𑀺 𑀓𑀢𑀜𑁆𑀜𑀽. 𑀓𑀢𑀁 𑀯𑀺𑀤𑀺𑀢𑀁 𑀧𑀸𑀓𑀝𑀁 𑀓𑀭𑁄𑀢𑀻𑀢𑀺 𑀓𑀢𑀯𑁂𑀤𑀻. 𑀅𑀦𑁂𑀓𑁂𑀲𑀼𑀧𑀺 𑀳𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑁂𑀲𑀼 𑀓𑀢𑀁 𑀉𑀧𑀓𑀸𑀭𑀁 𑀚𑀸𑀦𑀦𑁆𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀧𑀸𑀓𑀝𑀜𑁆𑀘 𑀓𑀭𑁄𑀦𑁆𑀢𑀺 𑀲𑀢𑀺𑀚𑀦𑀦𑀆𑀫𑀺𑀲𑀧𑀝𑀺𑀕𑁆𑀕𑀳𑀡𑀸𑀤𑀺𑀦𑀸 ¶ , 𑀢𑀣𑀸 𑀲𑀁𑀲𑀸𑀭𑀤𑀼𑀓𑁆𑀔𑀤𑀼𑀓𑁆𑀔𑀺𑀢𑀲𑁆𑀲 𑀲𑀓𑁆𑀓𑀘𑁆𑀘𑀁 𑀓𑀭𑁄𑀦𑁆𑀢𑀺 𑀓𑀺𑀘𑁆𑀘𑀁, 𑀬𑀁 𑀅𑀢𑁆𑀢𑀦𑀸 𑀓𑀸𑀢𑀼𑀁 𑀲𑀓𑁆𑀓𑀸. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀓𑀧𑁆𑀧𑀸𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀲𑀳𑀲𑁆𑀲𑁂𑀲𑀼𑀧𑀺 𑀓𑀢𑀁 𑀉𑀧𑀓𑀸𑀭𑀁 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑀜𑁆𑀘 𑀚𑀸𑀦𑀸𑀢𑀺, 𑀧𑀸𑀓𑀝𑀜𑁆𑀘 𑀓𑀭𑁄𑀢𑀺, 𑀲𑀻𑀳𑁄 𑀯𑀺𑀬 𑀘 𑀏𑀯𑀁 𑀲𑀩𑁆𑀩𑀢𑁆𑀣 𑀲𑀓𑁆𑀓𑀘𑁆𑀘𑀫𑁂𑀯 𑀥𑀫𑁆𑀫𑀤𑁂𑀲𑀦𑀁 𑀓𑀭𑁄𑀦𑁆𑀢𑁄 𑀩𑀼𑀤𑁆𑀥𑀓𑀺𑀘𑁆𑀘𑀁 𑀓𑀭𑁄𑀢𑀺. 𑀬𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀲𑁆𑀲𑀸 𑀅𑀧𑁆𑀧𑀝𑀺𑀧𑀚𑁆𑀚𑀦𑀪𑀸𑀯𑁄, 𑀢𑀢𑁆𑀣 𑀘 𑀆𑀤𑀭𑀸𑀪𑀸𑀯𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀲𑀻𑀮𑀢𑀸 𑀘, 𑀦 𑀘 𑀤𑀲𑁆𑀲𑀦𑁂 𑀲𑀸𑀥𑀼𑀓𑀸𑀭𑀺𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀘𑀓𑁆𑀔𑀼𑀦𑀸 𑀅𑀤𑀲𑁆𑀲𑀸𑀯𑀻𑀢𑀺 𑀏𑀢𑁆𑀢 𑀘𑀓𑁆𑀔𑀼 𑀦𑀸𑀫 𑀦 𑀫𑀁𑀲𑀘𑀓𑁆𑀔𑀼 𑀏𑀯, 𑀅𑀣 𑀔𑁄 𑀤𑀺𑀩𑁆𑀩𑀘𑀓𑁆𑀔𑀼𑀧𑀻𑀢𑀺 𑀆𑀳 ‘‘𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀯𑀸’’𑀢𑀺. 𑀅𑀭𑀺𑀬𑀪𑀸𑀯𑁄𑀢𑀺 𑀬𑁂𑀳𑀺 𑀬𑁄𑀕𑀢𑁄 ‘‘𑀅𑀭𑀺𑀬𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂 𑀫𑀕𑁆𑀕𑀨𑀮𑀥𑀫𑁆𑀫𑀸 𑀤𑀝𑁆𑀞𑀩𑁆𑀩𑀸.

𑀢𑀢𑁆𑀭𑀸𑀢𑀺 𑀜𑀸𑀡𑀤𑀲𑁆𑀲𑀦𑀲𑁆𑀲𑁂𑀯 𑀤𑀲𑁆𑀲𑀦𑀪𑀸𑀯𑁂. 𑀯𑀢𑁆𑀣𑀽𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀣𑀜𑀸𑀧𑀦𑀓𑀸𑀭𑀡𑀁. 𑀏𑀯𑀁 𑀯𑀼𑀢𑁆𑀢𑁂𑀧𑀻𑀢𑀺 𑀏𑀯𑀁 𑀅𑀜𑁆𑀜𑀸𑀧𑀤𑁂𑀲𑁂𑀦 𑀅𑀢𑁆𑀢𑀽𑀧𑀦𑀸𑀬𑀺𑀓𑀁 𑀓𑀢𑁆𑀯𑀸 𑀯𑀼𑀢𑁆𑀢𑁂𑀧𑀺. 𑀥𑀫𑁆𑀫𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁, 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀯𑀸. 𑀅𑀭𑀺𑀬𑀓𑀭𑀥𑀫𑁆𑀫𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀬𑁄 𑀯𑀺𑀧𑀲𑁆𑀲𑀺𑀬𑀫𑀸𑀦𑀸 𑀅𑀦𑀺𑀘𑁆𑀘𑀸𑀤𑀬𑁄, 𑀘𑀢𑁆𑀢𑀸𑀭𑀺 𑀯𑀸 𑀅𑀭𑀺𑀬𑀲𑀘𑁆𑀘𑀸𑀦𑀺.

𑀅𑀯𑀺𑀦𑀻𑀢𑁄𑀢𑀺 𑀦 𑀯𑀺𑀦𑀻𑀢𑁄, 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀺𑀯𑀲𑁂𑀦 𑀦 𑀲𑀺𑀓𑁆𑀔𑀺𑀢𑁄. 𑀬𑁂𑀲𑀁 𑀲𑀁𑀯𑀭𑀯𑀺𑀦𑀬𑀸𑀤𑀻𑀦𑀁 𑀅𑀪𑀸𑀯𑁂𑀦 𑀅𑀬𑀁 𑀅𑀯𑀺𑀦𑀻𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀢𑁂 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀯𑀺𑀥𑁄 𑀯𑀺𑀦𑀬𑁄 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀻𑀮𑀲𑀁𑀯𑀭𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄 𑀯𑁂𑀤𑀺𑀢𑀩𑁆𑀩𑁄, 𑀲𑁄 𑀘 𑀅𑀢𑁆𑀣𑀢𑁄 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄. 𑀲𑀢𑀺𑀲𑀁𑀯𑀭𑁄𑀢𑀺 𑀇𑀦𑁆𑀤𑁆𑀭𑀺𑀬𑀭𑀓𑁆𑀔𑀸, 𑀲𑀸 𑀘 𑀢𑀣𑀸𑀧𑀯𑀢𑁆𑀢𑀸 𑀲𑀢𑀺 𑀏𑀯. 𑀜𑀸𑀡𑀲𑀁𑀯𑀭𑁄𑀢𑀺 ‘‘𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀻’’𑀢𑀺 (𑀲𑀼. 𑀦𑀺. 𑁧𑁦𑁪𑁦) 𑀯𑀢𑁆𑀯𑀸 ‘‘𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂’’𑀢𑀺 𑀯𑀘𑀦𑀢𑁄 𑀲𑁄𑀢𑀲𑀗𑁆𑀔𑀸𑀢𑀸𑀦𑀁 𑀢𑀡𑁆𑀳𑀸𑀤𑀺𑀝𑁆𑀞𑀺𑀤𑀼𑀘𑁆𑀘𑀭𑀺𑀢𑀅𑀯𑀺𑀚𑁆𑀚𑀸𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀸𑀦𑀁 𑀲𑀁𑀯𑀭𑁄 𑀧𑀺𑀤𑀳𑀦𑀁 𑀲𑀫𑀼𑀘𑁆𑀙𑁂𑀤𑀜𑀸𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀔𑀦𑁆𑀢𑀺𑀲𑀁𑀯𑀭𑁄𑀢𑀺 𑀅𑀥𑀺𑀯𑀸𑀲𑀦𑀸, 𑀲𑀸 𑀘 𑀢𑀣𑀸𑀧𑀯𑀢𑁆𑀢𑀸 𑀔𑀦𑁆𑀥𑀸, 𑀅𑀤𑁄𑀲𑁄 𑀯𑀸. 𑀧𑀜𑁆𑀜𑀸𑀢𑀺 𑀏𑀓𑁂, 𑀢𑀁 𑀅𑀝𑁆𑀞𑀓𑀣𑀸𑀬 𑀯𑀺𑀭𑀼𑀚𑁆𑀛𑀢𑀺. 𑀯𑀻𑀭𑀺𑀬𑀲𑀁𑀯𑀭𑁄 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀦𑀁 𑀯𑀺𑀦𑁄𑀤𑀦𑀯𑀲𑁂𑀦 ¶ 𑀧𑀯𑀢𑁆𑀢𑀁 𑀯𑀻𑀭𑀺𑀬𑀫𑁂𑀯. 𑀢𑁂𑀦 𑀢𑁂𑀦 𑀕𑀼𑀡𑀗𑁆𑀕𑁂𑀦 𑀢𑀲𑁆𑀲 𑀢𑀲𑁆𑀲 𑀅𑀕𑀼𑀡𑀗𑁆𑀕𑀲𑁆𑀲 𑀧𑀳𑀸𑀦𑀁 𑀢𑀤𑀗𑁆𑀕𑀧𑀳𑀸𑀦𑀁. 𑀯𑀺𑀓𑁆𑀔𑀫𑁆𑀪𑀦𑁂𑀦 𑀧𑀳𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀧𑀳𑀸𑀦𑀁. 𑀲𑁂𑀲𑀧𑀤𑀢𑁆𑀣𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦𑀸𑀢𑀺𑀆𑀤𑀺 𑀲𑀻𑀮𑀲𑀁𑀯𑀭𑀸𑀤𑀻𑀦𑀁 𑀯𑀺𑀯𑀭𑀡𑀁. 𑀢𑀢𑁆𑀣 𑀲𑀫𑀼𑀧𑁂𑀢𑁄𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀲𑀢𑁆𑀣𑁄. 𑀢𑁂𑀦 ‘‘𑀲𑀳𑀕𑀢𑁄 𑀲𑀫𑀼𑀧𑀕𑀢𑁄’’𑀢𑀺𑀆𑀤𑀺𑀦𑀸 ¶ 𑀯𑀺𑀪𑀗𑁆𑀕𑁂 (𑀯𑀺𑀪. 𑁫𑁧𑁧) 𑀆𑀕𑀢𑀁 𑀲𑀁𑀯𑀭𑀯𑀺𑀪𑀗𑁆𑀕𑀁 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀦𑁆𑀢𑀺 𑀤𑀼𑀲𑁆𑀲𑀻𑀮𑁆𑀬𑀲𑀗𑁆𑀔𑀸𑀢𑀸𑀦𑀁 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀫𑀼𑀝𑁆𑀞𑀲𑁆𑀲𑀘𑁆𑀘𑀲𑀗𑁆𑀔𑀸𑀢𑀲𑁆𑀲 𑀧𑀫𑀸𑀤𑀲𑁆𑀲 𑀅𑀪𑀺𑀚𑁆𑀛𑀸𑀤𑀻𑀦𑀁 𑀯𑀸 𑀅𑀓𑁆𑀔𑀦𑁆𑀢𑀺𑀅𑀜𑁆𑀜𑀸𑀡𑀓𑁄𑀲𑀚𑁆𑀚𑀸𑀦𑀜𑁆𑀘. 𑀲𑀁𑀯𑀭𑀡𑀢𑁄𑀢𑀺 𑀧𑀺𑀤𑀳𑀦𑀢𑁄 𑀣𑀓𑀦𑀢𑁄. 𑀯𑀺𑀦𑀬𑀦𑀢𑁄𑀢𑀺 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀸𑀦𑀁 𑀯𑀺𑀭𑀽𑀧𑀧𑁆𑀧𑀯𑀢𑁆𑀢𑀺𑀬𑀸 𑀯𑀺𑀦𑀬𑀦𑀢𑁄 𑀅𑀧𑀦𑀬𑀦𑀢𑁄, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀯𑀸 𑀯𑀺𑀦𑀬𑀦𑀢𑁄, 𑀓𑀸𑀬𑀸𑀤𑀻𑀦𑀁 𑀯𑀸 𑀚𑀺𑀫𑁆𑀳𑀧𑁆𑀧𑀯𑀢𑁆𑀢𑀺𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀉𑀚𑀼𑀓𑀁 𑀦𑀬𑀦𑀢𑁄𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀲𑀫𑀯𑀸𑀬𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀸𑀦𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀢𑀣𑀸 𑀢𑀣𑀸 𑀅𑀦𑀼𑀧𑁆𑀧𑀸𑀤𑀦𑀫𑁂𑀯 𑀲𑀁𑀯𑀭𑀡𑀁 𑀯𑀺𑀦𑀬𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀁.

𑀬𑀁 𑀧𑀳𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀸𑀤𑀻𑀲𑀼 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀲𑀽’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀓𑀗𑁆𑀔𑀸𑀯𑀺𑀢𑀭𑀡𑀸𑀦𑀺 𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀦𑀺 𑀲𑀫𑁆𑀫𑀲𑀦𑀸𑀓𑀸𑀭𑁂𑀦 𑀅𑀧𑁆𑀧𑀯𑀢𑁆𑀢𑀦𑀢𑁄? 𑀲𑀘𑁆𑀘𑀫𑁂𑀢𑀁. 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀧𑀦 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀏𑀯𑀁 𑀯𑀼𑀢𑁆𑀢𑀁. ‘‘𑀦𑀸𑀫𑀭𑀽𑀧𑀫𑀢𑁆𑀢𑀫𑀺𑀤𑀁, 𑀦𑀢𑁆𑀣𑀺 𑀏𑀢𑁆𑀣 𑀅𑀢𑁆𑀢𑀸 𑀯𑀸 𑀅𑀢𑁆𑀢𑀦𑀺𑀬𑀁 𑀯𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀜𑀸𑀡𑀁 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑀁. 𑀲𑀢𑀺 𑀯𑀺𑀚𑁆𑀚𑀫𑀸𑀦𑁂 𑀔𑀦𑁆𑀥𑀧𑀜𑁆𑀘𑀓𑀲𑀗𑁆𑀔𑀸𑀢𑁂 𑀓𑀸𑀬𑁂, 𑀲𑀬𑀁 𑀯𑀸 𑀲𑀢𑀻 𑀢𑀲𑁆𑀫𑀺𑀁 𑀓𑀸𑀬𑁂 𑀤𑀺𑀝𑁆𑀞𑀻𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺. ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁩.𑁮𑁧; 𑁪.𑁩𑁪𑁫) 𑀏𑀯𑀁 𑀧𑀯𑀢𑁆𑀢𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀢𑀲𑁆𑀲𑁂𑀯 𑀭𑀽𑀧𑀸𑀭𑀽𑀧𑀲𑁆𑀲 𑀓𑀫𑁆𑀫𑀸𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬𑀧𑀭𑀺𑀕𑁆𑀕𑀡𑁆𑀳𑀦𑀜𑀸𑀡𑀁 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄. ‘‘𑀦𑀢𑁆𑀣𑀺 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬𑀸’’𑀢𑀺 (𑀤𑀻. 𑀦𑀺. 𑁧.𑁧𑁬𑁮) 𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀅𑀳𑁂𑀢𑀼𑀓𑀤𑀺𑀝𑁆𑀞𑀺. ‘‘𑀇𑀲𑁆𑀲𑀭𑀧𑀼𑀭𑀺𑀲𑀧𑀚𑀸𑀧𑀢𑀺𑀧𑀓𑀢𑀺𑀅𑀡𑀼𑀓𑀸𑀮𑀸𑀤𑀻𑀳𑀺 𑀮𑁄𑀓𑁄 𑀧𑀯𑀢𑁆𑀢𑀢𑀺 𑀦𑀺𑀯𑀢𑁆𑀢𑀢𑀺 𑀘𑀸’’𑀢𑀺 𑀧𑀯𑀢𑁆𑀢𑀸 𑀯𑀺𑀲𑀫𑀳𑁂𑀢𑀼𑀤𑀺𑀝𑁆𑀞𑀺. 𑀢𑀲𑁆𑀲𑁂𑀯𑀸𑀢𑀺 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀲𑁆𑀲𑁂𑀯. 𑀓𑀗𑁆𑀔𑀸𑀯𑀺𑀢𑀭𑀡𑁂𑀦𑀸𑀢𑀺 𑀬𑀣𑀸 𑀏𑀢𑀭𑀳𑀺 𑀦𑀸𑀫𑀭𑀽𑀧𑀲𑁆𑀲 𑀓𑀫𑁆𑀫𑀸𑀤𑀺𑀧𑀘𑁆𑀘𑀬𑀢𑁄 𑀉𑀧𑁆𑀧𑀢𑁆𑀢𑀺, 𑀏𑀯𑀁 𑀅𑀢𑀻𑀢𑀸𑀦𑀸𑀕𑀢𑁂𑀲𑀼𑀧𑀻𑀢𑀺 𑀢𑀻𑀲𑀼𑀧𑀺 𑀓𑀸𑀮𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸𑀧𑀦𑀬𑀦𑀜𑀸𑀡𑁂𑀦. 𑀓𑀣𑀁𑀓𑀣𑀻𑀪𑀸𑀯𑀲𑁆𑀲𑀸𑀢𑀺 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀫𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀬 𑀲𑀁𑀲𑀬𑀧𑁆𑀧𑀯𑀢𑁆𑀢𑀺𑀬𑀸. 𑀓𑀮𑀸𑀧𑀲𑀫𑁆𑀫𑀲𑀦𑁂𑀦𑀸𑀢𑀺 ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁩𑁬𑁧; 𑁨.𑁧𑁧𑁩; 𑁩.𑁮𑁬, 𑁮𑁯) 𑀔𑀦𑁆𑀥𑀧𑀜𑁆𑀘𑀓𑀁 𑀏𑀓𑀸𑀤𑀲𑀲𑀼 𑀑𑀓𑀸𑀲𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀫𑁆𑀫𑀲𑀦𑀯𑀲𑁂𑀦 𑀧𑀯𑀢𑁆𑀢𑁂𑀦 𑀦𑀬𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 ¶ . 𑀅𑀳𑀁 𑀫𑀫𑀸𑀢𑀺 𑀕𑀸𑀳𑀲𑁆𑀲𑀸𑀢𑀺 𑀅𑀢𑁆𑀢𑀢𑁆𑀢𑀦𑀺𑀬𑀕𑀳𑀡𑀲𑁆𑀲. 𑀫𑀕𑁆𑀕𑀸𑀫𑀕𑁆𑀕𑀯𑀯𑀢𑁆𑀣𑀸𑀦𑁂𑀦𑀸𑀢𑀺 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀯𑀺𑀲𑀼𑀤𑁆𑀥𑀺𑀬𑀸. 𑀅𑀫𑀕𑁆𑀕𑁂 𑀫𑀕𑁆𑀕𑀲𑀜𑁆𑀜𑀸𑀬𑀸𑀢𑀺 𑀑𑀪𑀸𑀲𑀸𑀤𑀺𑀓𑁂 𑀅𑀫𑀕𑁆𑀕𑁂 ‘‘𑀫𑀕𑁆𑀕𑁄’’𑀢𑀺 𑀉𑀧𑁆𑀧𑀦𑁆𑀦𑀲𑀜𑁆𑀜𑀸𑀬.

𑀬𑀲𑁆𑀫𑀸 ¶ 𑀲𑀫𑁆𑀫𑀤𑁂𑀯 𑀲𑀗𑁆𑀔𑀸𑀭𑀸𑀦𑀁 𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 ‘‘𑀏𑀯𑀫𑁂𑀯 𑀲𑀗𑁆𑀔𑀸𑀭𑀸 𑀅𑀦𑀼𑀭𑀽𑀧𑀓𑀸𑀭𑀡𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀧𑀦 𑀉𑀘𑁆𑀙𑀺𑀚𑁆𑀚𑀦𑁆𑀢𑀻’’𑀢𑀺 𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀉𑀤𑀬𑀤𑀲𑁆𑀲𑀦𑁂𑀦 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸’’𑀢𑀺. 𑀬𑀲𑁆𑀫𑀸 𑀧𑀦 𑀲𑀗𑁆𑀔𑀸𑀭𑀸𑀦𑀁 𑀯𑀬𑀁 𑀧𑀲𑁆𑀲𑀦𑁆𑀢𑁄 ‘‘𑀬𑀤𑀺𑀧𑀺𑀫𑁂 𑀲𑀗𑁆𑀔𑀸𑀭𑀸 𑀅𑀯𑀺𑀘𑁆𑀙𑀺𑀦𑁆𑀦𑀸 𑀯𑀢𑁆𑀢𑀦𑁆𑀢𑀺, 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀸 𑀧𑀦 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸 𑀦𑀺𑀭𑀼𑀚𑁆𑀛𑀦𑁆𑀢𑁂 𑀯𑀸’’𑀢𑀺 𑀧𑀲𑁆𑀲𑀢𑀺, 𑀢𑀲𑁆𑀲𑁂𑀯𑀁 𑀧𑀲𑁆𑀲𑀢𑁄 𑀓𑀼𑀢𑁄 𑀲𑀲𑁆𑀲𑀢𑀕𑁆𑀕𑀸𑀳𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀯𑀬𑀤𑀲𑁆𑀲𑀦𑁂𑀦 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸’’𑀢𑀺. 𑀪𑀬𑀤𑀲𑁆𑀲𑀦𑁂𑀦𑀸𑀢𑀺 𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑁂𑀦. 𑀲𑀪𑀬𑁂𑀢𑀺 𑀲𑀩𑁆𑀩𑀪𑀬𑀸𑀦𑀁 𑀆𑀓𑀭𑀪𑀸𑀯𑀢𑁄 𑀲𑀓𑀮𑀤𑀼𑀓𑁆𑀔𑀯𑀽𑀧𑀲𑀫𑀲𑀗𑁆𑀔𑀸𑀢𑀲𑁆𑀲 𑀧𑀭𑀫𑀲𑁆𑀲𑀸𑀲𑀲𑁆𑀲 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀘 𑀲𑀪𑀬𑁂 𑀔𑀦𑁆𑀥𑀧𑀜𑁆𑀘𑀓𑁂. 𑀅𑀪𑀬𑀲𑀜𑁆𑀜𑀸𑀬𑀸𑀢𑀺 ‘‘𑀅𑀪𑀬𑀁 𑀔𑁂𑀫’’𑀦𑁆𑀢𑀺 𑀉𑀧𑁆𑀧𑀦𑁆𑀦𑀲𑀜𑁆𑀜𑀸𑀬. 𑀅𑀲𑁆𑀲𑀸𑀤𑀲𑀜𑁆𑀜𑀸 𑀦𑀸𑀫 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀅𑀲𑁆𑀲𑀸𑀤𑀯𑀲𑁂𑀦 𑀧𑀯𑀢𑁆𑀢𑀲𑀜𑁆𑀜𑀸, 𑀬𑀸 ‘‘𑀆𑀮𑀬𑀸𑀪𑀺𑀦𑀺𑀯𑁂𑀲𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀅𑀪𑀺𑀭𑀢𑀺𑀲𑀜𑁆𑀜𑀸 𑀢𑀢𑁆𑀣𑁂𑀯 𑀅𑀪𑀺𑀭𑀢𑀺𑀯𑀲𑁂𑀦 𑀧𑀯𑀢𑁆𑀢𑀲𑀜𑁆𑀜𑀸, 𑀬𑀸 ‘‘𑀦𑀦𑁆𑀤𑀻’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀅𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸 𑀆𑀤𑀸𑀦𑀁. 𑀅𑀦𑀼𑀧𑁂𑀓𑁆𑀔𑀸 𑀲𑀗𑁆𑀔𑀸𑀭𑁂𑀳𑀺 𑀅𑀦𑀺𑀩𑁆𑀩𑀺𑀦𑁆𑀤𑀦𑀁, 𑀲𑀸𑀮𑀬𑀢𑀸𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀝𑁆𑀞𑀺𑀢𑀺𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀧𑀝𑀺𑀮𑁄𑀫𑀪𑀸𑀯𑁄 𑀲𑀲𑁆𑀲𑀢𑀼𑀘𑁆𑀙𑁂𑀤𑀕𑁆𑀕𑀸𑀳𑁄, 𑀧𑀘𑁆𑀘𑀬𑀸𑀓𑀸𑀭𑀧𑀝𑀺𑀘𑁆𑀙𑀸𑀤𑀓𑀫𑁄𑀳𑁄 𑀯𑀸, 𑀦𑀺𑀩𑁆𑀩𑀸𑀦𑁂 𑀧𑀝𑀺𑀮𑁄𑀫𑀪𑀸𑀯𑁄 𑀲𑀗𑁆𑀔𑀸𑀭𑁂𑀲𑀼 𑀭𑀢𑀺, 𑀦𑀺𑀩𑁆𑀩𑀸𑀦𑀧𑀝𑀺𑀘𑁆𑀙𑀸𑀤𑀓𑀫𑁄𑀳𑁄 𑀯𑀸. 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄𑀢𑀺 𑀬𑀸𑀤𑀺𑀲𑀲𑁆𑀲 𑀓𑀺𑀮𑁂𑀲𑀲𑁆𑀲 𑀅𑀧𑁆𑀧𑀳𑀻𑀦𑀢𑁆𑀢𑀸 𑀯𑀺𑀧𑀲𑁆𑀲𑀦𑀸 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁 𑀦 𑀫𑀼𑀜𑁆𑀘𑀢𑀺, 𑀲𑁄 𑀓𑀺𑀮𑁂𑀲𑁄, 𑀬𑁄 ‘‘𑀲𑀁𑀬𑁄𑀕𑀸𑀪𑀺𑀦𑀺𑀯𑁂𑀲𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀲𑁆𑀲 𑀅𑀢𑀺𑀓𑁆𑀓𑀫𑀦𑀫𑁂𑀯 𑀯𑀸 𑀧𑀳𑀸𑀦𑀁.

𑀧𑀯𑀢𑁆𑀢𑀺 𑀏𑀯 𑀧𑀯𑀢𑁆𑀢𑀺𑀪𑀸𑀯𑁄, 𑀧𑀭𑀺𑀬𑀼𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀦𑀻𑀯𑀭𑀡𑀸𑀤𑀺𑀥𑀫𑁆𑀫𑀸𑀦𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀦𑀻𑀯𑀭𑀡𑀧𑀓𑁆𑀔𑀺𑀬𑀸 𑀓𑀺𑀮𑁂𑀲𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀤𑀬𑁄 𑀘 𑀕𑀬𑁆𑀳𑀦𑁆𑀢𑀺.

𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀅𑀘𑁆𑀘𑀦𑁆𑀢𑀁 𑀅𑀧𑁆𑀧𑀯𑀢𑁆𑀢𑀺𑀪𑀸𑀯𑁂𑀦 𑀬𑀁 𑀧𑀳𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑁂𑀦 𑀧𑀳𑀸𑀦𑀦𑁆𑀢𑀺? 𑀅𑀭𑀺𑀬𑀫𑀕𑁆𑀕𑁂𑀳𑁂𑀯𑀸𑀢𑀺 𑀯𑀺𑀜𑁆𑀜𑀸𑀬𑀫𑀸𑀦𑁄𑀬𑀫𑀢𑁆𑀣𑁄 𑀢𑁂𑀲𑀁 𑀪𑀸𑀯𑀺𑀢𑀢𑁆𑀢𑀸 𑀅𑀧𑁆𑀧𑀯𑀢𑁆𑀢𑀺𑀯𑀘𑀦𑀢𑁄. 𑀲𑀫𑀼𑀤𑀬𑀧𑀓𑁆𑀔𑀺𑀓𑀲𑁆𑀲𑀸𑀢𑀺 𑀏𑀢𑁆𑀣 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀘𑀢𑀼𑀲𑀘𑁆𑀘𑀸𑀪𑀺𑀲𑀫𑀬𑀸𑀢𑀺 𑀓𑀢𑁆𑀯𑀸 𑀢𑁂𑀳𑀺 𑀧𑀳𑀸𑀢𑀩𑁆𑀩𑁂𑀦 𑀢𑁂𑀦 𑀢𑁂𑀦 𑀲𑀫𑀼𑀤𑀬𑁂𑀦 𑀲𑀳 𑀧𑀳𑀸𑀢𑀩𑁆𑀩𑀢𑁆𑀢𑀸 𑀲𑀫𑀼𑀤𑀬𑀲𑀪𑀸𑀕𑀢𑁆𑀢𑀸, 𑀲𑀘𑁆𑀘𑀯𑀺𑀪𑀗𑁆𑀕𑁂 𑀘 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀲𑀫𑀼𑀤𑀬𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀫𑀼𑀤𑀬𑀧𑀓𑁆𑀔𑀺𑀓𑀸’’𑀢𑀺 𑀤𑀺𑀝𑁆𑀞𑀺𑀆𑀤𑀬𑁄 𑀯𑀼𑀘𑁆𑀘𑀦𑁆𑀢𑀺. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀁 𑀯𑀼𑀧𑀲𑀦𑁆𑀢𑀢𑀸. 𑀲𑀗𑁆𑀔𑀢𑀦𑀺𑀲𑁆𑀲𑀝𑀢𑀸 𑀲𑀗𑁆𑀔𑀸𑀭𑀲𑀪𑀸𑀯𑀸𑀪𑀸𑀯𑁄. 𑀧𑀳𑀻𑀦𑀲𑀩𑁆𑀩𑀲𑀗𑁆𑀔𑀢𑀦𑁆𑀢𑀺 𑀯𑀺𑀭𑀳𑀺𑀢𑀲𑀩𑁆𑀩𑀲𑀗𑁆𑀔𑀢𑀁, 𑀯𑀺𑀲𑀗𑁆𑀔𑀸𑀭𑀦𑁆𑀢𑀺 ¶ 𑀅𑀢𑁆𑀣𑁄. 𑀧𑀳𑀸𑀦𑀜𑁆𑀘 𑀢𑀁 𑀯𑀺𑀦𑀬𑁄 𑀘𑀸𑀢𑀺 𑀧𑀳𑀸𑀦𑀯𑀺𑀦𑀬𑁄 𑀧𑀼𑀭𑀺𑀫𑁂𑀦 𑀅𑀢𑁆𑀣𑁂𑀦, 𑀤𑀼𑀢𑀺𑀬𑁂𑀦 𑀧𑀦 𑀧𑀳𑀻𑀬𑀢𑀻𑀢𑀺 𑀧𑀳𑀸𑀦𑀁, 𑀢𑀲𑁆𑀲 𑀯𑀺𑀦𑀬𑁄𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀪𑀺𑀦𑁆𑀦𑀲𑀁𑀯𑀭𑀢𑁆𑀢𑀸𑀢𑀺 ¶ 𑀦𑀝𑁆𑀞𑀲𑀁𑀯𑀭𑀢𑁆𑀢𑀸, 𑀲𑀁𑀯𑀭𑀸𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦 𑀅𑀲𑀫𑀸𑀤𑀺𑀦𑁆𑀦𑀲𑀁𑀯𑀭𑁄𑀧𑀺 𑀲𑀗𑁆𑀕𑀳𑀺𑀢𑁄 𑀳𑁄𑀢𑀺. 𑀲𑀫𑀸𑀤𑀸𑀦𑁂𑀦 𑀳𑀺 𑀲𑀫𑁆𑀧𑀸𑀤𑁂𑀢𑀩𑁆𑀩𑁄 𑀲𑀁𑀯𑀭𑁄 𑀢𑀤𑀪𑀸𑀯𑁂 𑀦 𑀳𑁄𑀢𑀻𑀢𑀺. 𑀏𑀯𑀜𑁆𑀳𑀺 𑀮𑁄𑀓𑁂 𑀯𑀢𑁆𑀢𑀸𑀭𑁄 𑀳𑁄𑀦𑁆𑀢𑀺 ‘‘𑀫𑀳𑀸 𑀯𑀢 𑀦𑁄 𑀪𑁄𑀕𑁄, 𑀲𑁄 𑀦𑀝𑁆𑀞𑁄 𑀢𑀣𑀸 𑀅𑀓𑀢𑀢𑁆𑀢𑀸’’𑀢𑀺. 𑀅𑀭𑀺𑀬𑁂𑀢𑀺 𑀅𑀭𑀺𑀬𑁄. 𑀧𑀘𑁆𑀘𑀢𑁆𑀢𑀯𑀘𑀦𑀜𑁆𑀳𑁂𑀢𑀁. 𑀏𑀲𑁂𑀲𑁂𑀢𑀺 𑀏𑀲𑁄 𑀲𑁄 𑀏𑀯, 𑀅𑀢𑁆𑀣𑀢𑁄 𑀅𑀦𑀜𑁆𑀜𑁄𑀢𑀺 𑀅𑀢𑁆𑀣𑁄. 𑀢𑀚𑁆𑀚𑀸𑀢𑁂𑀢𑀺 𑀅𑀢𑁆𑀣𑀢𑁄 𑀢𑀁𑀲𑀪𑀸𑀯𑁄, 𑀲𑀧𑁆𑀧𑀼𑀭𑀺𑀲𑁄 𑀅𑀭𑀺𑀬𑀲𑀪𑀸𑀯𑁄, 𑀅𑀭𑀺𑀬𑁄 𑀘 𑀲𑀧𑁆𑀧𑀼𑀭𑀺𑀲𑀲𑀪𑀸𑀯𑁄𑀢𑀺 𑀅𑀢𑁆𑀣𑁄.

𑀢𑀁 𑀅𑀢𑁆𑀣𑀦𑁆𑀢𑀺 ‘‘𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀫𑀢𑁆𑀣𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸 𑀤𑁂𑀲𑀦𑀸 𑀓𑀢𑀸𑀢𑀺? 𑀬𑀤𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 ‘‘𑀬𑀲𑁆𑀫𑀸 𑀧𑀼𑀣𑀼𑀚𑁆𑀚𑀦𑁄 𑀅𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑀅𑀝𑁆𑀞. 𑁧.𑁨) 𑀲𑀬𑀫𑁂𑀯 𑀯𑀓𑁆𑀔𑀢𑀺. 𑀥𑀫𑁆𑀫𑁄 𑀅𑀥𑀺𑀝𑁆𑀞𑀸𑀦𑀁 𑀏𑀢𑀺𑀲𑁆𑀲𑀸𑀢𑀺 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸, 𑀲𑀪𑀸𑀯𑀥𑀫𑁆𑀫𑁂 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀺𑀢𑀤𑁂𑀲𑀦𑀸. 𑀥𑀫𑁆𑀫𑀯𑀲𑁂𑀦𑁂𑀯 𑀧𑀯𑀢𑁆𑀢𑀸 𑀧𑀞𑀫𑀸, 𑀧𑀼𑀕𑁆𑀕𑀮𑀯𑀲𑁂𑀦 𑀉𑀝𑁆𑀞𑀳𑀺𑀢𑁆𑀯𑀸 𑀧𑀼𑀕𑁆𑀕𑀮𑀯𑀲𑁂𑀦𑁂𑀯 𑀕𑀢𑀸 𑀢𑀢𑀺𑀬𑀸, 𑀇𑀢𑀭𑀸 𑀥𑀫𑁆𑀫𑀧𑀼𑀕𑁆𑀕𑀮𑀸𑀦𑀁 𑀯𑁄𑀫𑀺𑀲𑁆𑀲𑀓𑀯𑀲𑁂𑀦. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀏𑀯𑀁 𑀯𑀺𑀪𑀸𑀕𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺? 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑁂𑀦 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀘. 𑀬𑁂 𑀳𑀺 𑀯𑁂𑀦𑁂𑀬𑁆𑀬𑀸 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀲𑀼𑀔𑁂𑀦 𑀅𑀢𑁆𑀣𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀬𑀲𑁆𑀲𑀸 𑀘 𑀥𑀫𑁆𑀫𑀥𑀸𑀢𑀼𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑁄 𑀳𑁄𑀢𑀺, 𑀲𑀸𑀬𑀁 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸, 𑀢𑀲𑁆𑀫𑀸 𑀤𑁂𑀲𑀦𑀸𑀯𑀺𑀮𑀸𑀲𑀧𑁆𑀧𑀢𑁆𑀢𑁄 𑀥𑀫𑁆𑀫𑀺𑀲𑁆𑀲𑀭𑁄 𑀥𑀫𑁆𑀫𑀭𑀸𑀚𑀸 𑀬𑀣𑀸 𑀬𑀣𑀸 𑀇𑀘𑁆𑀙𑀢𑀺, 𑀢𑀣𑀸 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀏𑀯𑀁 𑀇𑀫𑀺𑀦𑀸 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑁂𑀦 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀘 𑀏𑀯𑀁 𑀯𑀺𑀪𑀸𑀕𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀙𑀥𑀸𑀢𑀼𑀭𑁄𑀢𑀺 𑀧𑀣𑀯𑀺𑀥𑀸𑀢𑀼 𑀆𑀧𑁄-𑀢𑁂𑀚𑁄-𑀯𑀸𑀬𑁄-𑀆𑀓𑀸𑀲𑀥𑀸𑀢𑀼 𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀇𑀫𑁂𑀲𑀁 𑀙𑀦𑁆𑀦𑀁 𑀥𑀸𑀢𑀽𑀦𑀁 𑀯𑀲𑁂𑀦 𑀙𑀥𑀸𑀢𑀼𑀭𑁄. ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀁 𑀭𑀽𑀧𑀁 𑀉𑀧𑀯𑀺𑀘𑀭𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁩𑁨𑁪) 𑀯𑀼𑀢𑁆𑀢𑀸𑀦𑀁 𑀙𑀦𑁆𑀦𑀁 𑀲𑁄𑀫𑀦𑀲𑁆𑀲𑀽𑀧𑀯𑀺𑀘𑀸𑀭𑀸𑀦𑀁, 𑀙𑀦𑁆𑀦𑀁 𑀤𑁄𑀫𑀦𑀲𑁆𑀲𑀉𑀧𑁂𑀓𑁆𑀔𑀽𑀧𑀯𑀺𑀘𑀸𑀭𑀸𑀦𑀜𑁆𑀘 𑀯𑀲𑁂𑀦 𑀅𑀝𑁆𑀞𑀸𑀭𑀲𑀫𑀦𑁄𑀧𑀯𑀺𑀘𑀸𑀭𑁄. 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀘𑀢𑀼𑀭𑀸𑀥𑀺𑀝𑁆𑀞𑀸𑀦𑁄. 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑁆𑀲 𑀲𑀫𑁆𑀧𑀭𑀸𑀬𑀺𑀓𑀲𑁆𑀲 𑀘 𑀅𑀢𑁆𑀣𑀲𑁆𑀲 𑀅𑀤𑀲𑁆𑀲𑀦𑀢𑁄 𑀅𑀦𑁆𑀥𑁄, 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑁆𑀲𑁂𑀯 𑀤𑀲𑁆𑀲𑀦𑀢𑁄 𑀏𑀓𑀘𑀓𑁆𑀔𑀼, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀤𑀲𑁆𑀲𑀦𑀢𑁄 𑀤𑁆𑀯𑀺𑀘𑀓𑁆𑀔𑀼, 𑀯𑁂𑀤𑀺𑀢𑀩𑁆𑀩𑁄.

𑀲𑁆𑀯𑀸𑀬𑀁 ¶ 𑀦𑀺𑀤𑁆𑀤𑀺𑀲𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁆𑀯𑀸𑀬𑀦𑁆𑀢𑀺 𑀘 𑀲𑁄 𑀅𑀬𑀁, 𑀬𑀣𑀸𑀯𑀼𑀢𑁆𑀢𑀤𑁂𑀲𑀦𑀸𑀯𑀺𑀪𑀸𑀕𑀓𑀼𑀲𑀮𑁄 𑀪𑀕𑀯𑀸𑀢𑀺 𑀅𑀢𑁆𑀣𑁄. 𑀅𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑁄𑀢𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀅𑀧𑀭𑀺𑀜𑁆𑀜𑀸𑀢𑀓𑁆𑀔𑀦𑁆𑀥𑁄. 𑀔𑀦𑁆𑀥𑀸 𑀳𑀺 𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼. 𑀅𑀧𑀭𑀺𑀜𑁆𑀜𑀸𑀫𑀽𑀮𑀺𑀓𑀸𑀢𑀺 𑀧𑀭𑀺𑀚𑀸𑀦𑀦𑀸𑀪𑀸𑀯𑀦𑀺𑀫𑀺𑀢𑁆𑀢𑀸 𑀢𑀲𑁆𑀫𑀺𑀁 𑀲𑀢𑀺 𑀪𑀸𑀯𑀢𑁄. 𑀧𑀭𑀺𑀜𑁆𑀜𑀸𑀦𑀜𑁆𑀳𑀺 ¶ 𑀅𑀯𑀺𑀚𑁆𑀚𑀸𑀤𑀬𑁄 𑀓𑀺𑀮𑁂𑀲𑀸 𑀧𑀝𑀺𑀧𑀓𑁆𑀔𑀸 𑀢𑀫𑁆𑀫𑀽𑀮𑀺𑀓𑀸 𑀘 𑀲𑀩𑁆𑀩𑀫𑀜𑁆𑀜𑀦𑀸𑀢𑀺. 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. 𑀢𑁂𑀦 ‘‘𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄’’𑀢𑀺𑀆𑀤𑀺𑀓𑀁 𑀧𑀼𑀣𑀼𑀚𑀦𑀲𑁆𑀲 𑀯𑀺𑀲𑁂𑀲𑀦𑀪𑀸𑀯𑁂𑀦 𑀧𑀯𑀢𑁆𑀢𑀁 𑀧𑀸𑀴𑀺𑀲𑁂𑀲𑀁 𑀕𑀡𑁆𑀳𑀸𑀢𑀺 𑀧𑀼𑀣𑀼𑀚𑁆𑀚𑀦𑀦𑀺𑀤𑁆𑀤𑁂𑀲𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀏𑀯𑀁 𑀧𑀼𑀣𑀼𑀚𑁆𑀚𑀦𑀁 𑀦𑀺𑀤𑁆𑀤𑀺𑀲𑀻’’𑀢𑀺.

𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀣𑀯𑀻𑀯𑀸𑀭𑀯𑀡𑁆𑀡𑀦𑀸

𑀢𑀲𑁆𑀲𑀸𑀢𑀺 𑀧𑀼𑀣𑀼𑀚𑁆𑀚𑀦𑀲𑁆𑀲. 𑀯𑀲𑀢𑀺 𑀏𑀢𑁆𑀣 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑀸𑀢𑀺 𑀆𑀭𑀫𑁆𑀫𑀡𑀫𑁆𑀧𑀺 𑀯𑀢𑁆𑀣𑀽𑀢𑀺 𑀯𑀼𑀘𑁆𑀘𑀢𑀺 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄𑀢𑀺 𑀆𑀳 ‘‘𑀧𑀣𑀯𑀻𑀆𑀤𑀻𑀲𑀼 𑀯𑀢𑁆𑀣𑀽𑀲𑀽’’𑀢𑀺. 𑀲𑀓𑁆𑀓𑀸𑀬𑀥𑀫𑁆𑀫𑀸𑀦𑀫𑁆𑀧𑀺 𑀆𑀭𑀫𑁆𑀫𑀡𑀸𑀤𑀺𑀦𑀸 𑀲𑀢𑀺𑀧𑀺 𑀫𑀜𑁆𑀜𑀦𑀸𑀳𑁂𑀢𑀼𑀪𑀸𑀯𑁂 𑀫𑀜𑁆𑀜𑀦𑀸𑀳𑁂𑀢𑀼𑀓𑀢𑁆𑀢𑁂𑀦𑁂𑀯 𑀢𑁂𑀲𑀁 𑀦𑀺𑀩𑁆𑀩𑀢𑁆𑀢𑀺𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀲𑀓𑁆𑀓𑀸𑀬𑀥𑀫𑁆𑀫𑀚𑀦𑀺𑀢𑀁 𑀫𑀜𑁆𑀜𑀦’’𑀦𑁆𑀢𑀺. 𑀏𑀢𑁆𑀣 𑀘 𑀧𑀣𑀯𑀻𑀥𑀸𑀢𑀼 𑀲𑁂𑀲𑀥𑀸𑀢𑀽𑀦𑀁 𑀲𑀲𑀫𑁆𑀪𑀸𑀭𑀸𑀲𑀫𑁆𑀪𑀸𑀭𑀪𑀸𑀯𑀸 𑀲𑀢𑀺𑀧𑀺 𑀧𑀫𑀸𑀡𑀢𑁄 𑀲𑀫𑀪𑀸𑀯𑁂 𑀲𑀸𑀫𑀢𑁆𑀣𑀺𑀬𑀢𑁄 𑀅𑀥𑀺𑀓𑀸𑀦𑀥𑀺𑀓𑀪𑀸𑀯𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀲𑀫𑁆𑀪𑀸𑀭𑀦𑁆𑀢𑀻𑀢𑀺 𑀲𑀫𑁆𑀪𑀸𑀭𑀸, 𑀧𑀭𑀺𑀯𑀸𑀭𑀸. 𑀢𑀁𑀢𑀁𑀓𑀮𑀸𑀧𑁂𑀳𑀺 𑀮𑀓𑁆𑀔𑀡𑀧𑀣𑀯𑀺𑀬𑀸 𑀲𑁂𑀲𑀥𑀫𑁆𑀫𑀸 𑀬𑀣𑀸𑀭𑀳𑀁 𑀧𑀘𑁆𑀘𑀬𑀪𑀸𑀯𑁂𑀦 𑀧𑀭𑀺𑀯𑀸𑀭𑀪𑀸𑀯𑁂𑀦 𑀘 𑀧𑀯𑀢𑁆𑀢𑀦𑁆𑀢𑀺. 𑀢𑁂𑀦𑀸𑀳 ‘‘𑀲𑀸 𑀳𑀺 𑀯𑀡𑁆𑀡𑀸𑀤𑀻𑀳𑀺 𑀲𑀫𑁆𑀪𑀸𑀭𑁂𑀳𑀺 𑀲𑀤𑁆𑀥𑀺𑀁 𑀧𑀣𑀯𑀻𑀢𑀺 𑀲𑀲𑀫𑁆𑀪𑀸𑀭𑀧𑀣𑀯𑀻’’𑀢𑀺. 𑀧𑀣𑀯𑀺𑀢𑁄𑀢𑀺 𑀏𑀢𑁆𑀣 𑀧𑀼𑀣𑀼𑀮𑀝𑁆𑀞𑁂𑀦 𑀧𑀼𑀣𑀼𑀯𑀻, 𑀧𑀼𑀣𑀼𑀯𑀻 𑀏𑀯 𑀧𑀣𑀯𑀻. 𑀲𑀸 𑀳𑀺 𑀲𑀢𑀺𑀧𑀺 𑀧𑀭𑀺𑀘𑁆𑀙𑀺𑀦𑁆𑀦𑀯𑀼𑀢𑁆𑀢𑀺𑀬𑀁 𑀲𑀩𑁆𑀩𑁂𑀲𑀁 𑀲𑀓𑀮𑀸𑀧𑀪𑀸𑀯𑀸𑀦𑀁 𑀆𑀥𑀸𑀭𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸 𑀧𑀼𑀣𑀼𑀮𑀸 𑀧𑀢𑁆𑀣𑀝𑀸 𑀯𑀺𑀢𑁆𑀣𑀺𑀡𑁆𑀡𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺, 𑀦 𑀧𑀦 𑀢𑀁 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀸 𑀆𑀧𑀸𑀤𑀬𑁄. 𑀲𑀲𑀫𑁆𑀪𑀸𑀭𑀧𑀣𑀯𑀺𑀬𑀸 𑀧𑀦 𑀧𑀼𑀣𑀼𑀮𑀪𑀸𑀯𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀆𑀭𑀫𑁆𑀫𑀡𑀧𑀣𑀯𑀺𑀬𑀁 𑀯𑀟𑁆𑀠𑀦𑀨𑀭𑀡𑀝𑁆𑀞𑁂𑀳𑀺 𑀧𑀼𑀣𑀼𑀮𑀝𑁆𑀞𑁄, 𑀇𑀢𑀭𑀲𑁆𑀫𑀺𑀁 𑀭𑀼𑀴𑁆𑀳𑀺𑀬𑀸𑀯 𑀤𑀝𑁆𑀞𑀩𑁆𑀩𑁄. 𑀆𑀭𑀫𑁆𑀫𑀡𑀧𑀣𑀯𑀻𑀢𑀺 𑀛𑀸𑀦𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑀁 𑀧𑀣𑀯𑀻𑀲𑀗𑁆𑀔𑀸𑀢𑀁 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁. 𑀢𑁂𑀦𑀸𑀳 ‘‘𑀦𑀺𑀫𑀺𑀢𑁆𑀢𑀧𑀣𑀯𑀻𑀢𑀺𑀧𑀺 𑀯𑀼𑀘𑁆𑀘𑀢𑀻’’𑀢𑀺. 𑀆𑀕𑀫𑀦𑀯𑀲𑁂𑀦𑀸𑀢𑀺 𑀧𑀣𑀯𑀻𑀓𑀲𑀺𑀡𑀪𑀸𑀯𑀦𑀸𑀕𑀫𑀦𑀯𑀲𑁂𑀦. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀆𑀧𑁄 𑀘 𑀤𑁂𑀯𑀸 𑀧𑀣𑀯𑀻, 𑀢𑁂𑀚𑁄 𑀯𑀸𑀬𑁄 𑀢𑀤𑀸𑀕𑀫𑀼’’𑀦𑁆𑀢𑀺 (𑀤𑀻. 𑀦𑀺. 𑁨.𑁩𑁪𑁦).

𑀲𑀩𑁆𑀩𑀸𑀧𑀻𑀢𑀺 𑀘𑀢𑀼𑀩𑁆𑀩𑀺𑀥𑀸 𑀧𑀣𑀯𑀻𑀧𑀺. 𑀅𑀦𑀼𑀲𑁆𑀲𑀯𑀸𑀤𑀺𑀫𑀢𑁆𑀢𑀮𑀤𑁆𑀥𑀸 𑀫𑀜𑁆𑀜𑀦𑀸 𑀯𑀢𑁆𑀣𑀼 𑀳𑁄𑀢𑀺𑀬𑁂𑀯. 𑀢𑀣𑀸 𑀳𑀺 ‘‘𑀓𑀓𑁆𑀔𑀴𑀁 𑀔𑀭𑀺𑀕𑀢’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀪. 𑁧𑁭𑁩) 𑀮𑀓𑁆𑀔𑀡𑀧𑀣𑀯𑀻𑀧𑀺 𑀉𑀤𑁆𑀥𑀭𑀻𑀬𑀢𑀺. 𑀬𑀁 ¶ 𑀧𑀦𑁂𑀓𑁂 𑀯𑀤𑀦𑁆𑀢𑀺 ‘‘𑀮𑀓𑁆𑀔𑀡𑁂 𑀤𑀺𑀝𑁆𑀞𑁂 𑀫𑀜𑁆𑀜𑀦𑀸 𑀦𑀢𑁆𑀣𑀺, 𑀲𑀜𑁆𑀚𑀸𑀦𑀸𑀢𑀻𑀢𑀺 𑀯𑀼𑀢𑁆𑀢𑀲𑀜𑁆𑀜𑀸 𑀘 𑀤𑀺𑀝𑁆𑀞𑀺𑀕𑁆𑀕𑀸𑀳𑀲𑁆𑀲 𑀫𑀽𑀮𑀪𑀽𑀢𑀸 𑀧𑀺𑀡𑁆𑀟𑀕𑁆𑀕𑀸𑀳𑀺𑀢𑀸, 𑀲𑀸 𑀮𑀓𑁆𑀔𑀡𑁂 𑀦𑀓𑁆𑀔𑀫𑀢𑀺, 𑀢𑀲𑁆𑀫𑀸 𑀮𑀓𑁆𑀔𑀡𑀧𑀣𑀯𑀻 𑀦 𑀕𑀳𑁂𑀢𑀩𑁆𑀩𑀸’’𑀢𑀺, 𑀢𑀤𑀬𑀼𑀢𑁆𑀢𑀁 𑀮𑀓𑁆𑀔𑀡𑀧𑀝𑀺𑀯𑁂𑀥𑀲𑁆𑀲 𑀇𑀥 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀮𑁄𑀓𑀯𑁄𑀳𑀸𑀭𑀁 𑀕𑀳𑁂𑀢𑁆𑀯𑀸’’𑀢𑀺. 𑀦 𑀘 𑀲𑀩𑁆𑀩𑀲𑀜𑁆𑀜𑀸 𑀧𑀺𑀡𑁆𑀟𑀕𑁆𑀕𑀸𑀳𑀺𑀓𑀸 ¶ , 𑀦𑀸𑀧𑀺 𑀤𑀺𑀝𑁆𑀞𑀺𑀕𑁆𑀕𑀸𑀳𑀲𑁆𑀲𑁂𑀯 𑀫𑀽𑀮𑀪𑀽𑀢𑀸, 𑀢𑀲𑁆𑀫𑀸 𑀮𑀓𑁆𑀔𑀡𑀧𑀣𑀯𑀺𑀬𑀸𑀧𑀺 𑀓𑀸𑀬𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀅𑀜𑁆𑀜𑀣𑀸 𑀘 𑀉𑀧𑀝𑁆𑀞𑀺𑀢𑀸𑀬 𑀫𑀜𑁆𑀜𑀦𑀸 𑀧𑀯𑀢𑁆𑀢𑀢𑁂𑀯. 𑀢𑁂𑀦𑁂𑀯 𑀘 ‘‘𑀅𑀦𑀼𑀲𑁆𑀲𑀯𑀸𑀤𑀺𑀫𑀢𑁆𑀢𑀮𑀤𑁆𑀥𑀸’’𑀢𑀺 𑀯𑀼𑀢𑁆𑀢𑀁. 𑀧𑀣𑀯𑀺𑀢𑁄𑀢𑀺 𑀧𑀘𑁆𑀘𑀢𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀣𑀯𑀻𑀢𑀺 𑀲𑀜𑁆𑀚𑀸𑀦𑀸𑀢𑀻’’𑀢𑀺 𑀆𑀳. 𑀬𑀲𑁆𑀫𑀸 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀧𑀣𑀯𑀺𑀁 ‘‘𑀧𑀣𑀯𑀻’𑀢𑀺 𑀲𑀜𑁆𑀚𑀸𑀦𑀦𑁆𑀢𑁄 𑀢𑁂𑀦 𑀢𑁂𑀦 𑀦𑀬𑁂𑀦 𑀧𑀣𑀯𑀻𑀓𑁄𑀝𑁆𑀞𑀸𑀲𑁂𑀦𑁂𑀯 𑀲𑀜𑁆𑀚𑀸𑀦𑀸𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀦 𑀆𑀧𑀸𑀤𑀺𑀓𑁄𑀝𑁆𑀞𑀸𑀲𑁂𑀦, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀣𑀯𑀺𑀪𑀸𑀕𑁂𑀦 𑀲𑀜𑁆𑀚𑀸𑀦𑀸𑀢𑀻’’𑀢𑀺. 𑀮𑁄𑀓𑀯𑁄𑀳𑀸𑀭𑀁 𑀕𑀳𑁂𑀢𑁆𑀯𑀸𑀢𑀺 𑀮𑁄𑀓𑀲𑀫𑀜𑁆𑀜𑀁 𑀅𑀯𑀺𑀚𑀳𑀺𑀢𑁆𑀯𑀸. 𑀏𑀢𑁂𑀦 𑀮𑀓𑁆𑀔𑀡𑀧𑀣𑀯𑀺𑀬𑀫𑁆𑀧𑀺 𑀯𑁄𑀳𑀸𑀭𑀫𑀼𑀔𑁂𑀦𑁂𑀯𑀲𑁆𑀲𑀸 𑀧𑀯𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀬𑀤𑀺 𑀮𑁄𑀓𑀯𑁄𑀳𑀸𑀭𑁂𑀦 𑀢𑀢𑁆𑀣 𑀧𑀯𑀢𑁆𑀢𑀺, 𑀓𑁄 𑀏𑀢𑁆𑀣 𑀤𑁄𑀲𑁄, 𑀦𑀦𑀼 𑀅𑀭𑀺𑀬𑀸𑀧𑀺 ‘‘𑀅𑀬𑀜𑁆𑀳𑀺 𑀪𑀦𑁆𑀢𑁂 𑀫𑀳𑀸𑀧𑀣𑀯𑀻’’𑀢𑀺𑀆𑀤𑀺𑀦𑀸 𑀮𑁄𑀓𑀯𑁄𑀳𑀸𑀭𑁂𑀦 𑀧𑀯𑀢𑁆𑀢𑀦𑁆𑀢𑀻𑀢𑀺? 𑀦 𑀏𑀢𑁆𑀣 𑀯𑁄𑀳𑀸𑀭𑀫𑀢𑁆𑀢𑁂 𑀅𑀯𑀝𑁆𑀞𑀸𑀦𑀁 𑀅𑀥𑀺𑀧𑁆𑀧𑁂𑀢𑀁, 𑀅𑀣 𑀔𑁄 𑀯𑁄𑀳𑀸𑀭𑀫𑀼𑀔𑁂𑀦 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁂𑀦 𑀲𑀜𑁆𑀚𑀸𑀦𑀸𑀢𑀻’’𑀢𑀺 𑀆𑀳. 𑀢𑀲𑁆𑀲𑀢𑁆𑀣𑁄 𑁋 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑁆𑀪𑀽𑀢𑀸𑀬 ‘‘𑀲𑀼𑀪’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀬 𑀯𑀺𑀧𑀭𑀻𑀢𑀲𑀜𑁆𑀜𑀸𑀬 𑀲𑀜𑁆𑀚𑀸𑀦𑀸𑀢𑀻𑀢𑀺. 𑀏𑀢𑁂𑀦 𑀤𑀼𑀩𑁆𑀩𑀮𑀸 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀫𑀜𑁆𑀜𑀦𑀸 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀲𑀜𑁆𑀜𑀸 𑀕𑀳𑀺𑀢𑀸𑀢𑀺? 𑀧𑀸𑀓𑀝𑀪𑀸𑀯𑀢𑁄. 𑀬𑀣𑀸 𑀦𑀸𑀫 𑀅𑀕𑁆𑀕𑀺𑀫𑁆𑀳𑀺 𑀫𑀣𑀺𑀬𑀫𑀸𑀦𑁂 𑀬𑀤𑀸 𑀥𑀽𑀫𑁄 𑀉𑀧𑀮𑀩𑁆𑀪𑀢𑀺, 𑀓𑀺𑀜𑁆𑀘𑀸𑀧𑀺 𑀢𑀤𑀸 𑀯𑀺𑀚𑁆𑀚𑀢𑁂𑀯 𑀧𑀸𑀯𑀓𑁄 𑀅𑀯𑀺𑀦𑀸𑀪𑀸𑀯𑀢𑁄, 𑀧𑀸𑀓𑀝𑀪𑀸𑀯𑀢𑁄 𑀧𑀦 𑀥𑀽𑀫𑁄 𑀚𑀸𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀦 𑀅𑀕𑁆𑀕𑀺 𑀚𑀸𑀢𑁄𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀬𑀤𑀺𑀧𑀺 𑀢𑀢𑁆𑀣 𑀫𑀜𑁆𑀜𑀦𑀸𑀓𑀺𑀘𑁆𑀘𑀁 𑀅𑀢𑁆𑀣𑀺, 𑀦 𑀧𑀦 𑀯𑀺𑀪𑀽𑀢𑀁 𑀅𑀧𑀸𑀓𑀝𑀪𑀸𑀯𑀢𑁄 𑀲𑀜𑁆𑀜𑀸𑀓𑀺𑀘𑁆𑀘𑀫𑁂𑀯 𑀯𑀺𑀪𑀽𑀢𑀁, 𑀢𑀁 𑀧𑀦 𑀫𑀜𑁆𑀜𑀦𑀸𑀦𑀼𑀓𑀽𑀮𑀁 𑀫𑀜𑁆𑀜𑀦𑀸𑀲𑀳𑀺𑀢𑀁 𑀘𑀸𑀢𑀺 𑀆𑀳 ‘‘𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁂𑀦 𑀲𑀜𑁆𑀚𑀸𑀦𑀸𑀢𑀻’’𑀢𑀺. 𑀏𑀯𑀁 𑀧𑀣𑀯𑀻𑀪𑀸𑀕𑀁 𑀅𑀫𑀼𑀜𑁆𑀘𑀦𑁆𑀢𑁄𑀬𑁂𑀯 𑀯𑀸 𑀲𑀜𑁆𑀚𑀸𑀦𑀸𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁄 𑀳𑀺 𑀯𑀼𑀢𑁆𑀢𑀧𑁆𑀧𑀪𑁂𑀤𑀸𑀬 𑀧𑀣𑀯𑀺𑀬𑀸 𑀧𑀣𑀯𑀺𑀪𑀸𑀕𑀁 𑀅𑀫𑀼𑀜𑁆𑀘𑀦𑁆𑀢𑁄𑀬𑁂𑀯 𑀅𑀯𑀺𑀚𑀳𑀦𑁆𑀢𑁄𑀬𑁂𑀯 𑀲𑀻𑀲𑀧𑀺𑀡𑁆𑀟𑁂 𑀲𑀼𑀯𑀡𑁆𑀡𑀲𑀜𑁆𑀜𑀻 𑀯𑀺𑀬 𑀅𑀦𑀢𑁆𑀢𑀸𑀤𑀺𑀲𑀪𑀸𑀯𑀁𑀬𑁂𑀯 𑀢𑀁 𑀅𑀢𑁆𑀢𑀸𑀤𑀺𑀯𑀲𑁂𑀦 𑀲𑀜𑁆𑀚𑀸𑀦𑀸𑀢𑀺, 𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁 ‘‘𑀧𑀣𑀯𑀻’’𑀢𑀺𑀆𑀤𑀺. 𑀦 𑀯𑀢𑁆𑀢𑀩𑁆𑀩𑀁 𑀧𑀼𑀣𑀼𑀚𑁆𑀚𑀦𑀕𑁆𑀕𑀸𑀳𑀲𑁆𑀲 𑀬𑀼𑀢𑁆𑀢𑀺𑀫𑀕𑁆𑀕𑀦𑀦𑀺𑀯𑀸𑀭𑀡𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀉𑀫𑁆𑀫𑀢𑁆𑀢𑀓𑁄 𑀯𑀺𑀬…𑀧𑁂… 𑀕𑀡𑁆𑀳𑀸𑀢𑀻’’𑀢𑀺 ¶ . 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀺𑀢𑀸𑀤𑀺𑀪𑁂𑀤𑀦𑁆𑀢𑀺 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀺𑀢𑀸𑀤𑀺𑀯𑀺𑀲𑁂𑀲𑀁 𑀯𑀤𑀦𑁆𑀢𑁂𑀦 𑀪𑀕𑀯𑀢𑀸𑀯 𑀏𑀢𑁆𑀣 𑀬𑀣𑀸𑀯𑀼𑀢𑁆𑀢𑀲𑀜𑁆𑀚𑀸𑀦𑀦𑁂 𑀓𑀸𑀭𑀡𑀁 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑀦𑀸.

𑀏𑀯𑀦𑁆𑀢𑀺 ‘‘𑀧𑀣𑀯𑀺𑀪𑀸𑀕𑁂𑀦 𑀲𑀜𑁆𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀲𑀜𑁆𑀚𑀸𑀦𑀺𑀢𑁆𑀯𑀸𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀅𑀧𑀭𑀪𑀸𑀕𑁂…𑀧𑁂… 𑀕𑀡𑁆𑀳𑀸𑀢𑀻’’𑀢𑀺. 𑀧𑀧𑀜𑁆𑀘𑀲𑀗𑁆𑀔𑀸𑀢𑀺 𑀧𑀧𑀜𑁆𑀘𑀓𑁄𑀝𑁆𑀞𑀸𑀲𑀸. 𑀧𑀧𑀜𑁆𑀘𑀦𑁆𑀢𑀺 𑀲𑀢𑁆𑀢𑀸 𑀲𑀁𑀲𑀸𑀭𑁂 𑀘𑀺𑀭𑀸𑀬𑀦𑁆𑀢𑀺 𑀏𑀢𑁂𑀳𑀻𑀢𑀺 𑀧𑀧𑀜𑁆𑀘𑀸, 𑀫𑀜𑁆𑀜𑀦𑁆𑀢𑀺 ‘‘𑀏𑀢𑀁 𑀫𑀫𑀸’’𑀢𑀺𑀆𑀤𑀺𑀦𑀸 𑀧𑀭𑀺𑀓𑀧𑁆𑀧𑁂𑀦𑁆𑀢𑀺 𑀏𑀢𑀸𑀳𑀻𑀢𑀺 𑀫𑀜𑁆𑀜𑀦𑀸𑀢𑀺 𑀤𑁆𑀯𑀻𑀳𑀺𑀧𑀺 𑀧𑀭𑀺𑀬𑀸𑀬𑁂𑀳𑀺 𑀢𑀡𑁆𑀳𑀸𑀤𑀬𑁄𑀯 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀧𑀧𑀜𑁆𑀘𑁂𑀳𑀺 𑀇𑀥 𑀫𑀜𑁆𑀜𑀦𑀸𑀦𑀸𑀫𑁂𑀦 𑀯𑀼𑀢𑁆𑀢𑁂𑀳𑀻’’𑀢𑀺. 𑀅𑀚𑀜𑁆𑀜𑀲𑁆𑀲 𑀚𑀜𑁆𑀜𑀢𑁄, 𑀅𑀲𑁂𑀬𑁆𑀬𑀸𑀤𑀺𑀓𑀲𑁆𑀲 ¶ 𑀲𑁂𑀬𑁆𑀬𑀸𑀤𑀺𑀢𑁄 𑀕𑀳𑀡𑀢𑁄 𑀤𑀺𑀝𑁆𑀞𑀺𑀫𑀜𑁆𑀜𑀦𑀸 𑀯𑀺𑀬 𑀢𑀡𑁆𑀳𑀸𑀫𑀸𑀦𑀫𑀜𑁆𑀜𑀦𑀸𑀧𑀺 𑀅𑀜𑁆𑀜𑀣𑀸 𑀕𑀸𑀳𑁄 𑀏𑀯𑀸𑀢𑀺 𑀆𑀳 ‘‘𑀅𑀜𑁆𑀜𑀣𑀸 𑀕𑀡𑁆𑀳𑀸𑀢𑀻’’𑀢𑀺. 𑀆𑀭𑀫𑁆𑀫𑀡𑀸𑀪𑀺𑀦𑀺𑀭𑁄𑀧𑀦𑀸𑀤𑀺𑀦𑀸 𑀪𑀺𑀦𑁆𑀦𑀲𑀪𑀸𑀯𑀸𑀦𑀫𑁆𑀧𑀺 𑀯𑀺𑀢𑀓𑁆𑀓𑀸𑀤𑀻𑀦𑀁 𑀲𑀸𑀥𑀸𑀭𑀡𑁄 𑀉𑀧𑀦𑀺𑀚𑁆𑀛𑀸𑀬𑀦𑀲𑀪𑀸𑀯𑁄 𑀯𑀺𑀬 𑀅𑀦𑀼𑀕𑀺𑀚𑁆𑀛𑀦𑀼𑀡𑁆𑀡𑀢𑀺𑀧𑀭𑀸𑀫𑀲𑀦𑀲𑀪𑀸𑀯𑀸𑀦𑀫𑁆𑀧𑀺 𑀢𑀡𑁆𑀳𑀸𑀤𑀻𑀦𑀁 𑀲𑀸𑀥𑀸𑀭𑀡𑁂𑀦 𑀆𑀭𑀫𑁆𑀫𑀡𑀧𑀭𑀺𑀓𑀧𑁆𑀧𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀺 𑀫𑀜𑁆𑀜𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀢𑀻𑀳𑀺 𑀫𑀜𑁆𑀜𑀦𑀸𑀳𑀺 𑀫𑀜𑁆𑀜𑀢𑀻’’𑀢𑀺𑀆𑀤𑀺. 𑀅𑀲𑁆𑀲𑀸𑀢𑀺 𑀧𑀼𑀣𑀼𑀚𑁆𑀚𑀦𑀲𑁆𑀲, 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀤𑀻𑀲𑀼 𑀯𑀺𑀬 𑀲𑀼𑀔𑀼𑀫𑀦𑀬𑁂𑀦𑀧𑀺 𑀫𑀜𑁆𑀜𑀦𑀸𑀧𑀯𑀢𑁆𑀢𑀺 𑀅𑀢𑁆𑀣𑀻𑀢𑀺 𑀯𑀺𑀪𑀸𑀯𑀦𑀲𑀼𑀔𑀢𑀸𑀬 𑀣𑀽𑀮𑀁𑀬𑁂𑀯 𑀢𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 ‘‘𑀑𑀴𑀸𑀭𑀺𑀓𑀦𑀬𑁂𑀦𑀸’’𑀢𑀺𑀆𑀳. 𑀑𑀴𑀸𑀭𑀺𑀓𑁂 𑀳𑀺 𑀯𑀺𑀪𑀸𑀕𑁂 𑀤𑀲𑁆𑀲𑀺𑀢𑁂 𑀲𑀼𑀔𑀼𑀫𑀯𑀺𑀪𑀸𑀯𑀦𑀸 𑀲𑀼𑀓𑀭𑀸𑀢𑀺 𑀤𑀲𑁆𑀲𑁂𑀢𑀼𑀁 𑀅𑀬𑀫𑀢𑁆𑀣𑀬𑁄𑀚𑀦𑀸 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀚𑁆𑀛𑀢𑁆𑀢𑀺𑀓𑀸𑀢𑀺 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀸 𑀲𑀢𑁆𑀢𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀸 𑀦𑀺𑀬𑀓𑀚𑁆𑀛𑀢𑁆𑀢𑀸 𑀯𑀼𑀢𑁆𑀢𑀸 𑀯𑀺𑀪𑀗𑁆𑀕𑁂 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀘.

𑀯𑀺𑀪𑀗𑁆𑀕𑁂𑀢𑀺 𑀥𑀸𑀢𑀼𑀯𑀺𑀪𑀗𑁆𑀕𑁂 (𑀯𑀺𑀪. 𑁧𑁭𑁩). 𑀩𑀸𑀳𑀺𑀭𑀸𑀢𑀺 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀸 𑀲𑀗𑁆𑀔𑀸𑀭𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀸. 𑀓𑀓𑁆𑀔𑀴𑀦𑁆𑀢𑀺 𑀣𑀤𑁆𑀥𑀁. 𑀔𑀭𑀺𑀕𑀢𑀦𑁆𑀢𑀺 𑀨𑀭𑀼𑀲𑀁. 𑀓𑀓𑁆𑀔𑀴𑀪𑀸𑀯𑁄 𑀓𑀓𑁆𑀔𑀴𑀢𑁆𑀢𑀁. 𑀓𑀓𑁆𑀔𑀴𑀪𑀸𑀯𑁄𑀢𑀺 𑀓𑀓𑁆𑀔𑀴𑀲𑀪𑀸𑀯𑁄. 𑀩𑀳𑀺𑀤𑁆𑀥𑀸𑀢𑀺 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀢𑁄 𑀩𑀳𑀺𑀤𑁆𑀥𑀸𑀪𑀽𑀢𑀁. 𑀅𑀦𑀼𑀧𑀸𑀤𑀺𑀦𑁆𑀦𑀦𑁆𑀢𑀺 𑀦 𑀉𑀧𑀸𑀤𑀺𑀦𑁆𑀦𑀁. 𑀅𑀬𑁄𑀢𑀺 𑀓𑀸𑀴𑀮𑁄𑀳𑀁. 𑀮𑁄𑀳𑀦𑁆𑀢𑀺 𑀚𑀸𑀢𑀺𑀮𑁄𑀳𑀁 𑀯𑀺𑀚𑀸𑀢𑀺𑀮𑁄𑀳𑀁 𑀓𑀺𑀢𑁆𑀢𑀺𑀫𑀮𑁄𑀳𑀁 𑀧𑀺𑀲𑀸𑀘𑀮𑁄𑀳𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁. 𑀢𑀢𑁆𑀣 𑀅𑀬𑁄 𑀲𑀚𑁆𑀛𑀼 𑀲𑀼𑀯𑀡𑁆𑀡𑀁 𑀢𑀺𑀧𑀼 𑀲𑀻𑀲𑀁 𑀢𑀫𑁆𑀩𑀮𑁄𑀳𑀁 𑀯𑁂𑀓𑀦𑁆𑀢𑀓𑀮𑁄𑀳𑀦𑁆𑀢𑀺 𑀇𑀫𑀸𑀦𑀺 𑀲𑀢𑁆𑀢 𑀚𑀸𑀢𑀺𑀮𑁄𑀳𑀸𑀦𑀺 𑀦𑀸𑀫. 𑀦𑀸𑀕𑀦𑀸𑀲𑀺𑀓𑀸𑀮𑁄𑀳𑀁 𑀯𑀺𑀚𑀸𑀢𑀺𑀮𑁄𑀳𑀁 𑀦𑀸𑀫. 𑀓𑀁𑀲𑀮𑁄𑀳𑀁 𑀯𑀝𑁆𑀝𑀮𑁄𑀳𑀁 𑀆𑀭𑀓𑀼𑀝𑀦𑁆𑀢𑀺 𑀢𑀻𑀡𑀺 𑀓𑀺𑀢𑁆𑀢𑀺𑀫𑀮𑁄𑀳𑀸𑀦𑀺 𑀦𑀸𑀫. 𑀫𑁄𑀭𑀓𑁆𑀔𑀓𑀁 𑀧𑀼𑀣𑀼𑀓𑀁 𑀫𑀮𑀺𑀦𑀓𑀁 𑀘𑀧𑀮𑀓𑀁 𑀲𑀮𑀓𑀁 𑀆𑀝𑀮𑀁 𑀪𑀢𑁆𑀢𑀓𑀁 ¶ 𑀤𑀼𑀲𑀺𑀮𑁄𑀳𑀦𑁆𑀢𑀺 𑀅𑀝𑁆𑀞 𑀧𑀺𑀲𑀸𑀘𑀮𑁄𑀳𑀸𑀦𑀺 𑀦𑀸𑀫. 𑀢𑁂𑀲𑀼 𑀯𑁂𑀓𑀦𑁆𑀢𑀓𑀮𑁄𑀳𑀁 𑀦𑀸𑀫 𑀲𑀩𑁆𑀩𑀮𑁄𑀳𑀘𑁆𑀙𑁂𑀤𑀦𑀲𑀫𑀢𑁆𑀣𑀸 𑀏𑀓𑀸 𑀮𑁄𑀳𑀚𑀸𑀢𑀺. 𑀢𑀣𑀸 𑀳𑀺 𑀢𑀁 𑀯𑀺𑀓𑀦𑁆𑀢𑀢𑀺 𑀙𑀺𑀦𑁆𑀤𑀢𑀻𑀢𑀺 𑀯𑀺𑀓𑀦𑁆𑀢𑀓𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀓𑀦𑁆𑀢𑀓𑀫𑁂𑀯 𑀯𑁂𑀓𑀦𑁆𑀢𑀓𑀁. 𑀦𑀸𑀕𑀦𑀸𑀲𑀺𑀓𑀸𑀮𑁄𑀳𑀁 𑀮𑁄𑀳𑀲𑀤𑀺𑀲𑀁 𑀮𑁄𑀳𑀯𑀺𑀚𑀸𑀢𑀺 𑀳𑀮𑀺𑀤𑁆𑀤𑀸𑀤𑀺𑀯𑀺𑀚𑀸𑀢𑀺 𑀯𑀺𑀬. 𑀢𑀣𑀸 𑀳𑀺 𑀢𑀁 𑀮𑁄𑀳𑀸𑀓𑀸𑀭𑀁 𑀮𑁄𑀳𑀫𑀮𑀁 𑀯𑀺𑀬 𑀖𑀦𑀲𑀁𑀳𑀢𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀸𑀧𑁂𑀢𑁆𑀯𑀸 𑀢𑀸𑀴𑀺𑀢𑀁 𑀧𑀦 𑀪𑀺𑀦𑁆𑀦𑀁 𑀪𑀺𑀦𑁆𑀦𑀁 𑀳𑀼𑀢𑁆𑀯𑀸 𑀯𑀺𑀲𑀭𑀢𑀺 𑀫𑀼𑀤𑀼 𑀫𑀝𑁆𑀞𑀁 𑀓𑀫𑁆𑀫𑀦𑀺𑀬𑀁 𑀯𑀸 𑀦 𑀳𑁄𑀢𑀺. 𑀢𑀺𑀧𑀼𑀢𑀫𑁆𑀩𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 𑀓𑀁𑀲𑀮𑁄𑀳𑀁. 𑀲𑀻𑀲𑀢𑀫𑁆𑀩𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 𑀯𑀝𑁆𑀝𑀮𑁄𑀳𑀁. 𑀚𑀲𑀢𑀫𑁆𑀩𑁂 𑀫𑀺𑀲𑁆𑀲𑁂𑀢𑁆𑀯𑀸 𑀓𑀢𑀁 𑀆𑀭𑀓𑀼𑀝𑀁. 𑀢𑁂𑀦𑁂𑀯 𑀢𑀁 𑀓𑀭𑀡𑁂𑀦 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀓𑀺𑀢𑁆𑀢𑀺𑀫𑀮𑁄𑀳𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀁 𑀧𑀦 𑀓𑁂𑀯𑀮𑀁 𑀭𑀲𑀓𑀥𑀸𑀢𑀼 𑀯𑀺𑀦𑀺𑀕𑁆𑀕𑀢𑀁, 𑀢𑀁 ‘‘𑀧𑀺𑀢𑁆𑀢𑀮’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀢𑀁 𑀇𑀥 𑀦𑀸𑀥𑀺𑀧𑁆𑀧𑁂𑀢𑀁, 𑀬𑀣𑀸𑀯𑀼𑀢𑁆𑀢𑀁 𑀫𑀺𑀲𑁆𑀲𑀓𑀫𑁂𑀯 𑀓𑀢𑁆𑀯𑀸 𑀬𑁄𑀚𑀺𑀢𑀁 𑀓𑀺𑀢𑁆𑀢𑀺𑀫𑀦𑁆𑀢𑀺 𑀯𑀼𑀢𑁆𑀢𑀁. 𑀫𑁄𑀭𑀓𑁆𑀔𑀓𑀸𑀤𑀻𑀦𑀺 𑀏𑀯𑀁𑀦𑀸𑀫𑀸𑀦𑁂𑀯𑁂𑀢𑀸𑀦𑀺. 𑀢𑁂𑀲𑀼 𑀬𑀲𑁆𑀫𑀸 𑀧𑀜𑁆𑀘 𑀚𑀸𑀢𑀺𑀮𑁄𑀳𑀸𑀦𑀺 𑀧𑀸𑀴𑀺𑀬𑀁 𑀯𑀺𑀲𑀼𑀁 𑀯𑀼𑀢𑁆𑀢𑀸𑀦𑁂𑀯, 𑀢𑀲𑁆𑀫𑀸 𑀯𑁂𑀓𑀦𑁆𑀢𑀓𑀮𑁄𑀳𑁂𑀦 𑀲𑀤𑁆𑀥𑀺𑀁 𑀯𑀼𑀢𑁆𑀢𑀸𑀯𑀲𑁂𑀲𑀁 𑀲𑀩𑁆𑀩𑀁 𑀇𑀥 𑀮𑁄𑀳𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀺𑀧𑀽𑀢𑀺 𑀲𑁂𑀢𑀢𑀺𑀧𑀼. 𑀲𑀻𑀲𑀦𑁆𑀢𑀺 𑀓𑀸𑀴𑀢𑀺𑀧𑀼. 𑀲𑀚𑁆𑀛𑀦𑁆𑀢𑀺 𑀭𑀚𑀢𑀁. 𑀫𑀼𑀢𑁆𑀢𑀸𑀢𑀺 𑀳𑀢𑁆𑀣𑀺𑀓𑀼𑀫𑁆𑀪𑀚𑀸𑀤𑀺𑀓𑀸 𑀅𑀝𑁆𑀞𑀯𑀺𑀥𑀸𑀧𑀺 𑀫𑀼𑀢𑁆𑀢𑀸. 𑀢𑀣𑀸 𑀳𑀺 𑀳𑀢𑁆𑀣𑀺𑀓𑀼𑀫𑁆𑀪𑀁 𑀯𑀭𑀸𑀳𑀤𑀸𑀞𑀸 𑀪𑀽𑀚𑀗𑁆𑀕𑀲𑀻𑀲𑀁 𑀯𑀮𑀸𑀳𑀓𑀽𑀝𑀁 𑀯𑁂𑀴𑀽 𑀫𑀘𑁆𑀙𑀲𑀻𑀭𑁄 𑀲𑀗𑁆𑀔𑁄 ¶ 𑀲𑀺𑀧𑁆𑀧𑀻𑀢𑀺 𑀅𑀝𑁆𑀞 𑀫𑀼𑀢𑁆𑀢𑀸𑀬𑁄𑀦𑀺𑀬𑁄. 𑀢𑀢𑁆𑀣 𑀳𑀢𑁆𑀣𑀺𑀓𑀼𑀫𑁆𑀪𑀚𑀸 𑀧𑀻𑀢𑀯𑀡𑁆𑀡𑀸 𑀧𑀪𑀸𑀳𑀻𑀦𑀸. 𑀯𑀭𑀸𑀳𑀤𑀸𑀞𑀸 𑀯𑀭𑀸𑀳𑀤𑀸𑀞𑀯𑀡𑁆𑀡𑀸𑀯. 𑀪𑀼𑀚𑀗𑁆𑀕𑀲𑀻𑀲𑀚𑀸 𑀦𑀻𑀮𑀸𑀤𑀺𑀯𑀡𑁆𑀡𑀸 𑀲𑀼𑀯𑀺𑀲𑀼𑀤𑁆𑀥𑀸 𑀯𑀝𑁆𑀝𑀮𑀸 𑀘. 𑀯𑀮𑀸𑀳𑀓𑀚𑀸 𑀪𑀸𑀲𑀼𑀭𑀸 𑀤𑀼𑀩𑁆𑀩𑀺𑀪𑀸𑀕𑀭𑀽𑀧𑀸 𑀭𑀢𑁆𑀢𑀺𑀪𑀸𑀕𑁂 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀦𑁆𑀢𑀺𑀬𑁄 𑀢𑀺𑀝𑁆𑀞𑀦𑁆𑀢𑀺, 𑀤𑁂𑀯𑀽𑀧𑀪𑁄𑀕𑀸 𑀏𑀯 𑀘 𑀳𑁄𑀦𑁆𑀢𑀺. 𑀯𑁂𑀴𑀼𑀚𑀸 𑀓𑀭𑀓𑀼𑀧𑀮𑀲𑀫𑀸𑀦𑀯𑀡𑁆𑀡𑀸 𑀦 𑀪𑀸𑀲𑀼𑀭𑀸, 𑀢𑁂 𑀘 𑀯𑁂𑀴𑀽 𑀅𑀫𑀦𑀼𑀲𑁆𑀲𑀕𑁄𑀘𑀭𑁂 𑀏𑀯 𑀧𑀤𑁂𑀲𑁂 𑀚𑀸𑀬𑀦𑁆𑀢𑀺. 𑀫𑀘𑁆𑀙𑀲𑀻𑀭𑀚𑀸 𑀧𑀸𑀞𑀻𑀦𑀧𑀺𑀝𑁆𑀞𑀺𑀲𑀫𑀸𑀦𑀯𑀡𑁆𑀡𑀸 𑀯𑀝𑁆𑀝𑀮𑀸 𑀮𑀖𑀯𑁄 𑀘 𑀳𑁄𑀦𑁆𑀢𑀺 𑀧𑀪𑀸𑀯𑀺𑀳𑀻𑀦𑀸, 𑀢𑁂 𑀘 𑀫𑀘𑁆𑀙𑀸 𑀲𑀫𑀼𑀤𑁆𑀤𑀫𑀚𑁆𑀛𑁂 𑀏𑀯 𑀚𑀸𑀬𑀦𑁆𑀢𑀺. 𑀲𑀗𑁆𑀔𑀚𑀸 𑀲𑀗𑁆𑀔𑁄𑀤𑀭𑀘𑁆𑀙𑀯𑀺𑀯𑀡𑁆𑀡𑀸 𑀓𑁄𑀮𑀧𑁆𑀧𑀫𑀸𑀡𑀸𑀧𑀺 𑀳𑁄𑀦𑁆𑀢𑀺 𑀧𑀪𑀸𑀯𑀺𑀳𑀻𑀦𑀸𑀯. 𑀲𑀺𑀧𑁆𑀧𑀺𑀚𑀸 𑀧𑀪𑀸𑀯𑀺𑀲𑁂𑀲𑀬𑀼𑀢𑁆𑀢𑀸 𑀳𑁄𑀦𑁆𑀢𑀺 𑀦𑀸𑀦𑀸𑀲𑀡𑁆𑀞𑀸𑀦𑀸. 𑀏𑀯𑀁 𑀚𑀸𑀢𑀺𑀢𑁄 𑀅𑀝𑁆𑀞𑀯𑀺𑀥𑀸𑀲𑀼𑀧𑀺 𑀫𑀼𑀢𑁆𑀢𑀸𑀲𑀼 𑀬𑀸 𑀫𑀘𑁆𑀙𑀲𑀗𑁆𑀔𑀲𑀺𑀧𑁆𑀧𑀺𑀚𑀸, 𑀢𑀸 𑀲𑀸𑀫𑀼𑀤𑁆𑀤𑀺𑀓𑀸 𑀳𑁄𑀦𑁆𑀢𑀺, 𑀪𑀼𑀚𑀗𑁆𑀕𑀚𑀸𑀧𑀺 𑀓𑀸𑀘𑀺 𑀲𑀸𑀫𑀼𑀤𑁆𑀤𑀺𑀓𑀸 𑀳𑁄𑀦𑁆𑀢𑀺, 𑀇𑀢𑀭𑀸 𑀅𑀲𑀸𑀫𑀼𑀤𑁆𑀤𑀺𑀓𑀸. 𑀬𑀲𑁆𑀫𑀸 𑀩𑀳𑀼𑀮𑀁 𑀲𑀸𑀫𑀼𑀤𑁆𑀤𑀺𑀓𑀸𑀯 𑀫𑀼𑀢𑁆𑀢𑀸 𑀮𑁄𑀓𑁂 𑀤𑀺𑀲𑁆𑀲𑀦𑁆𑀢𑀺, 𑀢𑀢𑁆𑀣𑀸𑀧𑀺 𑀲𑀺𑀧𑁆𑀧𑀺𑀚𑀸𑀯, 𑀇𑀢𑀭𑀸 𑀓𑀸𑀤𑀸𑀘𑀺𑀓𑀸. 𑀢𑀲𑁆𑀫𑀸 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 (𑀯𑀺𑀪. 𑀅𑀝𑁆𑀞. 𑁧𑁭𑁩) ‘‘𑀫𑀼𑀢𑁆𑀢𑀸𑀢𑀺 𑀲𑀸𑀫𑀼𑀤𑁆𑀤𑀺𑀓𑀸 𑀫𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑀫𑀡𑀻𑀢𑀺 ¶ 𑀞𑀧𑁂𑀢𑁆𑀯𑀸 𑀧𑀸𑀴𑀺𑀆𑀕𑀢𑁂 𑀯𑁂𑀴𑀼𑀭𑀺𑀬𑀸𑀤𑀺𑀓𑁂 𑀲𑁂𑀲𑁄 𑀚𑁄𑀢𑀺𑀭𑀲𑀸𑀤𑀺𑀪𑁂𑀤𑁄 𑀲𑀩𑁆𑀩𑁄𑀧𑀺 𑀫𑀡𑀺. 𑀯𑁂𑀴𑀼𑀭𑀺𑀬𑀦𑁆𑀢𑀺 𑀯𑀁𑀲𑀯𑀡𑁆𑀡𑀫𑀡𑀺. 𑀲𑀗𑁆𑀔𑁄𑀢𑀺 𑀲𑀸𑀫𑀼𑀤𑁆𑀤𑀺𑀓𑀲𑀗𑁆𑀔𑁄. 𑀲𑀺𑀮𑀸𑀢𑀺 𑀓𑀸𑀴𑀲𑀺𑀮𑀸 𑀧𑀡𑁆𑀟𑀼𑀲𑀺𑀮𑀸 𑀲𑁂𑀢𑀲𑀺𑀮𑀸𑀤𑀺𑀪𑁂𑀤𑀸 𑀅𑀝𑁆𑀞𑀧𑀺 𑀲𑀺𑀮𑀸. 𑀭𑀚𑀢𑀦𑁆𑀢𑀺 𑀓𑀳𑀸𑀧𑀡𑀸𑀤𑀺𑀓𑀁 𑀯𑀼𑀢𑁆𑀢𑀸𑀯𑀲𑁂𑀲𑀁 𑀭𑀚𑀢𑀲𑀫𑁆𑀫𑀢𑀁. 𑀚𑀸𑀢𑀭𑀽𑀧𑀦𑁆𑀢𑀺 𑀲𑀼𑀯𑀡𑁆𑀡𑀁. 𑀮𑁄𑀳𑀺𑀢𑀗𑁆𑀕𑁄𑀢𑀺 𑀭𑀢𑁆𑀢𑀫𑀡𑀺. 𑀫𑀲𑀸𑀭𑀕𑀮𑁆𑀮𑀦𑁆𑀢𑀺 𑀓𑀩𑀭𑀫𑀡𑀺 𑀢𑀺𑀡𑀸𑀤𑀻𑀲𑀼 𑀩𑀳𑀺𑀪𑀸𑀭𑀸 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀬𑁄𑀧𑀺 𑀢𑀺𑀡𑀁 𑀦𑀸𑀫. 𑀅𑀦𑁆𑀢𑁄𑀲𑀸𑀭𑀁 𑀔𑀤𑀺𑀭𑀸𑀤𑀺 𑀅𑀦𑁆𑀢𑀫𑀲𑁄 𑀤𑀸𑀭𑀼𑀔𑀡𑁆𑀟𑀫𑁆𑀧𑀺 𑀓𑀝𑁆𑀞𑀁 𑀦𑀸𑀫. 𑀫𑀼𑀕𑁆𑀕𑀫𑀢𑁆𑀢𑀢𑁄 𑀬𑀸𑀯 𑀫𑀼𑀝𑁆𑀞𑀺𑀧𑁆𑀧𑀫𑀸𑀡𑀸 𑀫𑀭𑀼𑀫𑁆𑀩𑀸 𑀲𑀓𑁆𑀔𑀭𑀸 𑀦𑀸𑀫. 𑀫𑀼𑀕𑁆𑀕𑀫𑀢𑁆𑀢𑀢𑁄 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸 𑀯𑀸𑀮𑀺𑀓𑀸 𑀦𑀸𑀫. 𑀓𑀞𑀮𑀦𑁆𑀢𑀺 𑀓𑀧𑀸𑀮𑀔𑀡𑁆𑀟𑀁. 𑀪𑀽𑀫𑀻𑀢𑀺 𑀲𑀲𑀫𑁆𑀪𑀸𑀭𑀧𑀣𑀯𑀻. 𑀧𑀸𑀲𑀸𑀡𑁄𑀢𑀺 𑀅𑀦𑁆𑀢𑁄𑀫𑀼𑀝𑁆𑀞𑀺𑀬𑀁 𑀅𑀲𑀡𑁆𑀞𑀳𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀳𑀢𑁆𑀣𑀺𑀧𑁆𑀧𑀫𑀸𑀡𑀁 𑀧𑀸𑀲𑀸𑀡𑀁, 𑀳𑀢𑁆𑀣𑀺𑀧𑁆𑀧𑀫𑀸𑀡𑀢𑁄 𑀧𑀦 𑀧𑀝𑁆𑀞𑀸𑀬 𑀉𑀧𑀭𑀺 𑀧𑀩𑁆𑀩𑀢𑁄𑀢𑀺. 𑀅𑀬𑀁 𑀅𑀬𑁄𑀆𑀤𑀻𑀲𑀼 𑀯𑀺𑀪𑀸𑀕𑀦𑀺𑀤𑁆𑀤𑁂𑀲𑁄. 𑀦𑀺𑀫𑀺𑀢𑁆𑀢𑀧𑀣𑀯𑀻𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀪𑀽𑀢𑀁 𑀧𑀣𑀯𑀺𑀓𑀲𑀺𑀡𑀁. 𑀢𑀫𑁆𑀧𑀺 𑀳𑀺 ‘‘𑀭𑀽𑀧𑀸𑀯𑀘𑀭𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀁 𑀓𑀼𑀲𑀮𑀢𑁄 𑀘 𑀯𑀺𑀧𑀸𑀓𑀢𑁄 𑀘 𑀓𑀺𑀭𑀺𑀬𑀢𑁄 𑀘 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀯𑀺𑀧𑀸𑀓𑁄 𑀇𑀫𑁂 𑀥𑀫𑁆𑀫𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸’’𑀢𑀺 𑀯𑀘𑀦𑀢𑁄 ‘‘𑀩𑀸𑀳𑀺𑀭𑀸 𑀧𑀣𑀯𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀸 𑀘 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀦𑀺𑀫𑀺𑀢𑁆𑀢𑀧𑀣𑀯𑀻, 𑀢𑀁 𑀕𑀳𑁂𑀢𑁆𑀯𑀸’’𑀢𑀺. 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀜𑁆𑀘𑁂𑀢𑁆𑀣 𑀢𑀁𑀕𑀢𑀺𑀓𑀫𑁂𑀯 𑀤𑀝𑁆𑀞𑀩𑁆𑀩𑀁, 𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀢𑁄 𑀧𑀦 𑀧𑀼𑀩𑁆𑀩𑁂 𑀪𑀽𑀫𑀺𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀦𑁆𑀢𑀺.

𑀢𑀻𑀳𑀺 𑀫𑀜𑁆𑀜𑀦𑀸𑀳𑀻𑀢𑀺 𑀯𑀼𑀢𑁆𑀢𑀁 𑀫𑀜𑁆𑀜𑀦𑀸𑀢𑁆𑀢𑀬𑀁 𑀲𑀧𑀭𑀲𑀦𑁆𑀢𑀸𑀦𑁂𑀲𑀼 𑀲𑀗𑁆𑀔𑁂𑀧𑀢𑁄 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀳𑀁 𑀧𑀣𑀯𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀳𑀁 𑀧𑀣𑀯𑀻𑀢𑀺𑀆𑀤𑀻𑀦𑀸 𑀅𑀚𑁆𑀛𑀢𑁆𑀢𑀯𑀺𑀲𑀬𑀁 𑀤𑀺𑀝𑁆𑀞𑀺𑀫𑀜𑁆𑀜𑀦𑀁 𑀫𑀸𑀦𑀫𑀜𑁆𑀜𑀦𑀜𑁆𑀘 𑀤𑀲𑁆𑀲𑁂𑀢𑀺 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀸𑀳𑀁𑀓𑀸𑀭𑀤𑀻𑀧𑀦𑀢𑁄. 𑀫𑀫 𑀧𑀣𑀯𑀻𑀢𑀺 𑀇𑀫𑀺𑀦𑀸 𑀢𑀡𑁆𑀳𑀸𑀫𑀜𑁆𑀜𑀦𑀁 𑀫𑀸𑀦𑀫𑀜𑁆𑀜𑀦𑀫𑁆𑀧𑀺 𑀯𑀸 𑀧𑀭𑀺𑀕𑁆𑀕𑀳𑀪𑀽𑀢𑀸𑀬𑀧𑀺 𑀧𑀣𑀯𑀺𑀬𑀸 𑀲𑁂𑀬𑁆𑀬𑀸𑀤𑀺𑀢𑁄 𑀫𑀸𑀦𑀚𑀧𑁆𑀧𑀦𑀢𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀇𑀫𑀺𑀦𑀸𑀦𑀬𑁂𑀦 𑀫𑀜𑁆𑀜𑀦𑀸𑀯𑀺𑀪𑀸𑀕𑁄 ¶ 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀧𑀣𑀯𑀺𑀓𑀲𑀺𑀡𑀚𑁆𑀛𑀸𑀦𑀮𑀸𑀪𑀻 𑀛𑀸𑀦𑀘𑀓𑁆𑀔𑀼𑀦𑀸 𑀕𑀳𑀺𑀢𑀛𑀸𑀦𑀸𑀭𑀫𑁆𑀫𑀡𑀁 ‘‘𑀅𑀢𑁆𑀢𑀸’’𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑁄 𑀢𑀜𑁆𑀘 𑀲𑁂𑀬𑁆𑀬𑀸𑀤𑀺𑀢𑁄 𑀤𑀳𑀦𑁆𑀢𑁄 𑀅𑀢𑁆𑀣𑀢𑁄 ‘‘𑀅𑀳𑀁 𑀧𑀣𑀯𑀻’’𑀢𑀺 𑀫𑀜𑁆𑀜𑀢𑀺 𑀦𑀸𑀫, 𑀢𑀫𑁂𑀯 ‘‘𑀅𑀬𑀁 𑀫𑀬𑁆𑀳𑀁 𑀅𑀢𑁆𑀢𑀸’’𑀢𑀺 𑀕𑀳𑀡𑁂 𑀧𑀦 ‘‘𑀫𑀫 𑀧𑀣𑀯𑀻’’𑀢𑀺 𑀫𑀜𑁆𑀜𑀢𑀺 𑀦𑀸𑀫. 𑀢𑀣𑀸 𑀢𑀁 ‘‘𑀧𑀭𑀧𑀼𑀭𑀺𑀲𑁄’’𑀢𑀺 𑀯𑀸 ‘‘𑀤𑁂𑀯𑁄’’𑀢𑀺 𑀯𑀸 𑀯𑀸𑀤𑀯𑀲𑁂𑀦 ‘‘𑀅𑀬𑀫𑁂𑀯 𑀧𑀭𑁂𑀲𑀁 𑀅𑀢𑁆𑀢𑀸’’𑀢𑀺 𑀯𑀸 𑀅𑀪𑀺𑀦𑀺𑀯𑀺𑀲𑀦𑁆𑀢𑁄 ‘‘𑀧𑀭𑁄 𑀧𑀣𑀯𑀻, 𑀧𑀭𑀲𑁆𑀲 𑀧𑀣𑀯𑀻’’𑀢𑀺 𑀫𑀜𑁆𑀜𑀢𑀺 𑀦𑀸𑀫. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀣𑀯𑀻𑀲𑀼𑀧𑀺 𑀬𑀣𑀸𑀭𑀳𑀁 𑀘𑀢𑀼𑀓𑁆𑀓𑀁 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀁.

𑀏𑀯𑀁 ‘‘𑀧𑀣𑀯𑀺𑀁 𑀫𑀜𑁆𑀜𑀢𑀻’’𑀢𑀺 𑀏𑀢𑁆𑀣 𑀘𑀢𑀼𑀓𑁆𑀓𑀯𑀲𑁂𑀦 𑀫𑀜𑁆𑀜𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀫𑀜𑁆𑀜𑀦𑀸𑀯𑀢𑁆𑀣𑀼𑀁 𑀫𑀜𑁆𑀜𑀦𑀸𑀬𑁄 𑀘 𑀯𑀺𑀪𑀚𑀺𑀢𑁆𑀯𑀸 𑀅𑀦𑁂𑀓𑀯𑀺𑀳𑀺𑀢𑀁 𑀢𑀲𑁆𑀲 𑀫𑀜𑁆𑀜𑀦𑀸𑀓𑀸𑀭𑀁 ¶ 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀬𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑁄 𑀧𑀼𑀣𑀼𑀚𑁆𑀚𑀦𑁄. 𑀙𑀦𑁆𑀤𑀭𑀸𑀕𑀦𑁆𑀢𑀺 𑀩𑀳𑀮𑀭𑀸𑀕𑀁. 𑀅𑀲𑁆𑀲𑀸𑀤𑁂𑀢𑀻𑀢𑀺 𑀦𑀺𑀓𑀸𑀫𑁂𑀢𑀺, ‘‘𑀇𑀫𑁂 𑀓𑁂𑀲𑀸 𑀫𑀼𑀤𑀼𑀲𑀺𑀦𑀺𑀤𑁆𑀥𑀓𑀼𑀜𑁆𑀘𑀺𑀢𑀦𑀻𑀮𑁄𑀪𑀸𑀲𑀸’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀭𑀲𑀁 𑀯𑀺𑀦𑁆𑀤𑀢𑀺. 𑀅𑀪𑀺𑀦𑀦𑁆𑀤𑀢𑀻𑀢𑀺 𑀲𑀧𑁆𑀧𑀻𑀢𑀺𑀓𑀸𑀬 𑀢𑀡𑁆𑀳𑀸𑀬 𑀅𑀪𑀺𑀫𑀼𑀔𑁄 𑀦𑀦𑁆𑀤𑀢𑀺 𑀧𑀫𑁄𑀤𑀢𑀺. 𑀅𑀪𑀺𑀯𑀤𑀢𑀻𑀢𑀺 𑀉𑀧𑁆𑀧𑀦𑁆𑀦𑀁 𑀢𑀡𑁆𑀳𑀸𑀪𑀺𑀦𑀦𑁆𑀤𑀦𑀸𑀯𑁂𑀕𑀁 𑀳𑀤𑀬𑁂𑀦 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀅𑀳𑁄 𑀫𑁂 𑀓𑁂𑀲𑀸’’𑀢𑀺 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀢𑀺. 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀻𑀢𑀺 𑀩𑀮𑀯𑀢𑀡𑁆𑀳𑀸𑀪𑀺𑀦𑀺𑀯𑁂𑀲𑁂𑀦 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀅𑀜𑁆𑀜𑀢𑀭𑀁 𑀯𑀸 𑀧𑀦 𑀭𑀚𑁆𑀚𑀦𑀻𑀬𑀯𑀢𑁆𑀣𑀼𑀦𑁆𑀢𑀺 𑀓𑁂𑀲𑀸𑀤𑀺𑀢𑁄 𑀅𑀜𑁆𑀜𑀢𑀭𑀁 𑀯𑀸 𑀓𑀭𑀘𑀭𑀡𑀸𑀤𑀺𑀧𑁆𑀧𑀪𑁂𑀤𑀁 𑀦𑀺𑀬𑀓𑀚𑁆𑀛𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀁 𑀭𑀸𑀕𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀯𑀢𑁆𑀣𑀼𑀁. 𑀇𑀢𑀻𑀢𑀺 𑀇𑀫𑀺𑀦𑀸 𑀲𑀺𑀦𑀺𑀤𑁆𑀥𑀸𑀤𑀺𑀧𑁆𑀧𑀓𑀸𑀭𑁂𑀦𑀸𑀢𑀺 𑀧𑀢𑁆𑀣𑀬𑀺𑀢𑀩𑁆𑀩𑀸𑀓𑀸𑀭𑀁 𑀧𑀭𑀸𑀫𑀲𑀢𑀺. 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀦𑀸𑀦𑁂𑀢𑀻𑀢𑀺 𑀢𑁂𑀲𑀼 𑀪𑀸𑀯𑀻𑀲𑀼 𑀓𑁂𑀲𑀸𑀤𑀻𑀲𑀼 𑀲𑀺𑀤𑁆𑀥𑀁 𑀯𑀺𑀬 𑀓𑀢𑁆𑀯𑀸 𑀦𑀦𑁆𑀤𑀺𑀁 𑀢𑀡𑁆𑀳𑀁 𑀲𑀫𑀦𑁆𑀦𑀸𑀳𑀭𑀢𑀺 𑀲𑀫𑀼𑀧𑀘𑀸𑀭𑁂𑀢𑀺. 𑀧𑀡𑀺𑀤𑀳𑀢𑀻𑀢𑀺 𑀧𑀢𑁆𑀣𑀦𑀁 𑀞𑀧𑁂𑀢𑀺.

𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺, 𑀯𑀺𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 ‘‘𑀳𑀻𑀦𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑀁 𑀚𑀦𑁂𑀢𑀻𑀢𑀺 𑀬𑁄𑀚𑀦𑀸. 𑀧𑀣𑀯𑀻𑀓𑁄𑀝𑁆𑀞𑀸𑀲𑀪𑀽𑀢𑀸𑀦𑀁 𑀓𑁂𑀲𑀸𑀤𑀻𑀦𑀁 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀻𑀳𑀺 𑀫𑀸𑀦𑀚𑀧𑁆𑀧𑀦𑀸 𑀧𑀣𑀯𑀺𑀬𑀸 𑀫𑀜𑁆𑀜𑀦𑀸 𑀳𑁄𑀢𑀻𑀢𑀺 𑀆𑀳 ‘‘𑀏𑀯𑀁 𑀅𑀚𑁆𑀛𑀢𑁆𑀢𑀺𑀓𑀁 𑀧𑀣𑀯𑀺𑀁 𑀫𑀸𑀦𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀻’’𑀢𑀺. 𑀅𑀯𑀬𑀯𑀩𑁆𑀬𑀢𑀺𑀭𑁂𑀓𑁂𑀦 𑀲𑀫𑀼𑀤𑀸𑀬𑀲𑁆𑀲 𑀅𑀪𑀸𑀯𑀢𑁄 𑀲𑀫𑀼𑀤𑀸𑀬𑁄 𑀚𑀻𑀯𑀸𑀪𑀺𑀦𑀺𑀯𑁂𑀲𑁄 𑀅𑀯𑀬𑀯𑁂𑀧𑀺 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀆𑀕𑀢𑀦𑀬𑁂𑀦 𑀧𑀦 𑀓𑁂𑀲𑀁 ‘𑀚𑀻𑀯𑁄’𑀢𑀺 𑀅𑀪𑀺𑀦𑀺𑀯𑀺𑀲𑀢𑀻’’𑀢𑀺 𑀆𑀳. ‘‘𑀓𑁂𑀲𑀸 𑀦𑀸𑀫𑁂𑀢𑁂 𑀇𑀲𑁆𑀲𑀭𑀯𑀺𑀳𑀺𑀢𑀸 𑀧𑀚𑀸𑀧𑀢𑀺𑀦𑀺𑀲𑁆𑀲𑀺𑀢𑀸 𑀅𑀡𑀼𑀲𑀜𑁆𑀘𑀬𑁄 𑀧𑀓𑀢𑀺𑀧𑀭𑀺𑀡𑀸𑀫𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦𑀧𑁂𑀢𑁆𑀣 𑀤𑀺𑀝𑁆𑀞𑀺𑀫𑀜𑁆𑀜𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀇𑀫𑀺𑀲𑁆𑀲𑀸 𑀧𑀯𑀢𑁆𑀢𑀺𑀬𑀸𑀢𑀺 𑀦𑀺𑀓𑀦𑁆𑀢𑀺𑀫𑀸𑀦𑀤𑀺𑀝𑁆𑀞𑀻𑀦𑀁 𑀧𑀭𑀺𑀬𑀸𑀤𑀸𑀦𑀲𑀫𑀼𑀕𑁆𑀖𑀸𑀝𑀧𑁆𑀧𑀯𑀢𑁆𑀢𑀺𑀬𑀸. ‘‘𑀏𑀢𑀁 𑀫𑀫𑀸’’𑀢𑀺𑀆𑀤𑀺𑀦𑀸 𑀬𑀤𑀺𑀧𑀺 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀫𑀜𑁆𑀜𑀦𑀸𑀦𑀁 𑀲𑀫𑁆𑀪𑀯𑁄 𑀤𑀲𑁆𑀲𑀺𑀢𑁄. 𑀢𑀡𑁆𑀳𑀸𑀫𑀸𑀦𑀫𑀜𑁆𑀜𑀦𑀸𑀦𑀁 𑀧𑀦 𑀳𑁂𑀝𑁆𑀞𑀸 ¶ 𑀤𑀲𑁆𑀲𑀺𑀢𑀢𑁆𑀢𑀸 𑀤𑀺𑀝𑁆𑀞𑀺𑀫𑀜𑁆𑀜𑀦𑀸 𑀏𑀯𑁂𑀢𑁆𑀣 𑀯𑀺𑀲𑁂𑀲𑀢𑁄 𑀉𑀤𑁆𑀥𑀝𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀏𑀯𑀫𑁆𑀧𑀺 𑀅𑀚𑁆𑀛𑀢𑁆𑀢𑀺𑀓𑀁 𑀧𑀣𑀯𑀺𑀁 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀻’’𑀢𑀺.

𑀩𑀸𑀳𑀺𑀭𑀫𑁆𑀧𑀺 𑀧𑀣𑀯𑀺𑀁 𑀢𑀻𑀳𑀺 𑀫𑀜𑁆𑀜𑀦𑀸𑀳𑀺 𑀫𑀜𑁆𑀜𑀢𑀻𑀢𑀺 𑀬𑁄𑀚𑀦𑀸. 𑀢𑀁 𑀧𑀦 𑀫𑀜𑁆𑀜𑀦𑀸𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀣’’𑀦𑁆𑀢𑀺 𑀆𑀳. 𑀢𑀲𑁆𑀲𑀢𑁆𑀣𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀅𑀬𑀁 ¶ 𑀚𑀻𑀯𑁄𑀢𑀺 𑀅𑀬𑀁 𑀓𑀸𑀴𑀮𑁄𑀳𑀁 ‘‘𑀚𑀻𑀯𑁄 𑀅𑀢𑁆𑀢𑀸’’𑀢𑀺 𑀅𑀪𑀺𑀦𑀺𑀯𑀺𑀲𑀢𑀺 𑀏𑀓𑀘𑁆𑀘𑁂 𑀦𑀺𑀕𑀡𑁆𑀞𑀸 𑀯𑀺𑀬. 𑀏𑀯𑀁 𑀩𑀸𑀳𑀺𑀭𑀁 𑀧𑀣𑀯𑀺𑀁 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀻𑀢𑀺 𑀏𑀢𑁆𑀣𑀸𑀧𑀺 ‘‘𑀬𑀸 𑀘𑁂𑀯 𑀔𑁄 𑀧𑀦 𑀅𑀚𑁆𑀛𑀢𑁆𑀢𑀺𑀓𑀸 𑀧𑀣𑀯𑀻𑀥𑀸𑀢𑀼, 𑀬𑀸 𑀘 𑀩𑀸𑀳𑀺𑀭𑀸 𑀧𑀣𑀯𑀻𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑁄.

𑀧𑀣𑀯𑀻𑀓𑀲𑀺𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀅𑀬𑀫𑁆𑀧𑀺 𑀘 𑀦𑀬𑁄 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 𑀏𑀢𑁆𑀣𑁂𑀯 𑀅𑀦𑁆𑀢𑁄𑀕𑀥𑁄𑀢𑀺 𑀤𑀝𑁆𑀞𑀩𑁆𑀩𑁄 𑀓𑀲𑀺𑀡𑀸𑀦𑀫𑁆𑀧𑀺 𑀭𑀽𑀧𑀲𑀫𑀜𑁆𑀜𑀸𑀲𑀫𑁆𑀪𑀸𑀯𑀢𑁄. 𑀧𑀣𑀯𑀺𑀁 𑀫𑀜𑁆𑀜𑀢𑀻𑀢𑀺 𑀏𑀢𑁆𑀣 𑀬𑀸𑀤𑀺𑀲𑁄 𑀫𑀜𑁆𑀜𑀦𑀸𑀯𑀢𑁆𑀣𑀼𑀫𑀜𑁆𑀜𑀦𑀸𑀦𑀁 𑀯𑀺𑀢𑁆𑀣𑀸𑀭𑀦𑀬𑁄 𑀯𑀼𑀢𑁆𑀢𑁄, 𑀢𑀸𑀤𑀺𑀲𑁄 𑀇𑀢𑁄 𑀧𑀭𑀁 𑀯𑀼𑀢𑁆𑀢𑀦𑀬𑁄𑀯𑀸𑀢𑀺 𑀆𑀳 ‘‘𑀇𑀢𑁄 𑀧𑀭𑀁 𑀲𑀗𑁆𑀔𑁂𑀧𑁂𑀦𑁂𑀯 𑀓𑀣𑀬𑀺𑀲𑁆𑀲𑀸𑀫𑀸’’𑀢𑀺, 𑀅𑀢𑀸𑀤𑀺𑀲𑁄 𑀧𑀦 𑀯𑀺𑀢𑁆𑀣𑀸𑀭𑀢𑁄𑀧𑀺 𑀓𑀣𑀬𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 ‘‘𑀧𑀣𑀯𑀺𑀬𑀸’’𑀢𑀺 𑀇𑀤𑀁 𑀪𑀼𑀫𑁆𑀫𑀯𑀘𑀦𑀁, 𑀢𑀲𑁆𑀫𑀸, 𑀲𑁄 𑀅𑀢𑁆𑀢𑀧𑀭𑀢𑁆𑀢𑀤𑀼𑀧𑀓𑀭𑀡𑀸𑀦𑀁 𑀆𑀥𑀸𑀭𑀪𑀸𑀯𑁂𑀦 𑀢𑀁 𑀫𑀜𑁆𑀜𑀦𑀸𑀯𑀢𑁆𑀣𑀼𑀁 𑀓𑀧𑁆𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀳𑀁 𑀧𑀣𑀯𑀺𑀬𑀸’’𑀢𑀺𑀆𑀤𑀺. 𑀦𑀦𑀼 𑀘 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀧𑀪𑁂𑀤𑀲𑁆𑀲 𑀥𑀫𑁆𑀫𑀧𑁆𑀧𑀩𑀦𑁆𑀥𑀲𑁆𑀲 𑀲𑀲𑀫𑁆𑀪𑀸𑀭𑀧𑀣𑀯𑀻 𑀘 𑀆𑀥𑀸𑀭𑀦𑀺𑀲𑁆𑀲𑀬𑁄, 𑀇𑀢𑀭𑀸 𑀆𑀭𑀫𑁆𑀫𑀡𑀦𑀺𑀲𑁆𑀲𑀬𑁄 𑀢𑀤𑀸𑀭𑀫𑁆𑀫𑀡𑀲𑁆𑀲𑀸𑀢𑀺 𑀏𑀢𑁆𑀣 𑀦𑀺𑀩𑁆𑀩𑀺𑀭𑁄𑀥𑁄𑀢𑀺? 𑀦, 𑀫𑀜𑁆𑀜𑀦𑀸𑀯𑀢𑁆𑀣𑀼𑀁 𑀦𑀺𑀲𑁆𑀲𑀬𑀪𑀸𑀯𑁂𑀦 𑀧𑀭𑀺𑀓𑀧𑁆𑀧𑀦𑀢𑁄. 𑀅𑀬𑀜𑁆𑀳𑀺 ‘‘𑀅𑀳’’𑀦𑁆𑀢𑀺 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬 𑀫𑀸𑀦𑀫𑀜𑁆𑀜𑀦𑀸𑀬 𑀘 𑀯𑀢𑁆𑀣𑀼𑀪𑀽𑀢𑀲𑁆𑀲 𑀅𑀢𑁆𑀢𑀦𑁄 𑀧𑀣𑀯𑀺𑀲𑀦𑁆𑀦𑀺𑀲𑁆𑀲𑀬𑀁 𑀓𑀢𑁆𑀯𑀸 ‘‘𑀅𑀳𑀁 𑀧𑀣𑀯𑀺𑀬𑀸’’𑀢𑀺 𑀫𑀜𑁆𑀜𑀢𑀺, 𑀢𑀡𑁆𑀳𑀸𑀫𑀜𑁆𑀜𑀦𑀸𑀬 𑀯𑀢𑁆𑀣𑀼𑀪𑀽𑀢𑀲𑁆𑀲 𑀉𑀧𑀓𑀭𑀡𑀲𑁆𑀲 𑀧𑀣𑀯𑀺𑀁 𑀲𑀦𑁆𑀦𑀺𑀲𑁆𑀲𑀬𑀁 𑀓𑀢𑁆𑀯𑀸 ‘‘𑀫𑀬𑁆𑀳𑀁 𑀓𑀺𑀜𑁆𑀘𑀦𑀁 𑀧𑀮𑀺𑀩𑁄𑀥𑁄 𑀧𑀣𑀯𑀺𑀬𑀸’’𑀢𑀺 𑀫𑀜𑁆𑀜𑀢𑀺. 𑀧𑀭𑁄𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀬𑁆𑀯𑀸𑀬𑀁 𑀅𑀢𑁆𑀣𑀦𑀬𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀼𑀢𑁆𑀢𑁄 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂. 𑀏𑀢𑁂𑀦𑁂𑀯 𑀦𑀬𑁂𑀦𑀸𑀢𑀺 𑀬𑁆𑀯𑀸𑀬𑀁 ‘‘𑀲𑁄 𑀔𑁄 𑀧𑀦 𑀫𑁂 𑀅𑀢𑁆𑀢𑀸 𑀇𑀫𑀲𑁆𑀫𑀺𑀁 𑀭𑀽𑀧𑁂’’𑀢𑀺 𑀲𑀫𑀼𑀤𑀸𑀬𑀲𑁆𑀲 𑀆𑀥𑀸𑀭𑀪𑀸𑀯𑀤𑀻𑀧𑀦𑁄 𑀅𑀢𑁆𑀣𑀦𑀬𑁄 𑀯𑀼𑀢𑁆𑀢𑁄, 𑀏𑀢𑁂𑀦𑁂𑀯 𑀦𑀬𑁂𑀦. 𑀦 𑀳𑀺 𑀅𑀯𑀬𑀯𑀩𑁆𑀬𑀢𑀺𑀭𑁂𑀓𑁂𑀦 𑀲𑀫𑀼𑀤𑀸𑀬𑁄 𑀮𑀩𑁆𑀪𑀢𑀺, 𑀢𑀲𑁆𑀫𑀸 𑀲𑀫𑀼𑀤𑀸𑀬𑁂 𑀯𑀼𑀢𑁆𑀢𑀯𑀺𑀥𑀺 𑀅𑀯𑀬𑀯𑁂𑀧𑀺 𑀮𑀩𑁆𑀪𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀇𑀫𑀺𑀲𑁆𑀲𑀸 𑀧𑀣𑀯𑀺𑀬𑀸𑀢𑀺 𑀫𑀜𑁆𑀜𑀦𑁆𑀢𑁄𑀢𑀺. 𑀢𑀲𑁆𑀫𑀺𑀁𑀬𑁂𑀯 𑀧𑀦𑀲𑁆𑀲 𑀅𑀢𑁆𑀢𑀦𑀻𑀢𑀺 𑀏𑀢𑁆𑀣 𑀅𑀲𑁆𑀲𑀸𑀢𑀺 𑀧𑀼𑀣𑀼𑀚𑁆𑀚𑀦𑀲𑁆𑀲. 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀦𑀻𑀢𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀧𑀣𑀯𑀻𑀲𑀦𑁆𑀦𑀺𑀲𑁆𑀲𑀬𑁂 ¶ 𑀅𑀢𑁆𑀢𑀦𑀺. ‘‘𑀧𑀣𑀯𑀺𑀬𑀸 𑀫𑀜𑁆𑀜𑀢𑀻’’𑀢𑀺 𑀧𑀤𑀲𑁆𑀲𑀸𑀬𑀁 𑀯𑀡𑁆𑀡𑀦𑀸. 𑀏𑀯𑀁 ‘‘𑀧𑀣𑀯𑀺𑀬𑀸 𑀫𑀜𑁆𑀜𑀢𑀻’’𑀢𑀺 𑀏𑀢𑁆𑀣 𑀅𑀢𑁆𑀢𑀯𑀲𑁂𑀦 𑀤𑀺𑀝𑁆𑀞𑀺𑀫𑀸𑀦𑀢𑀡𑁆𑀳𑀸𑀫𑀜𑁆𑀜𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀭𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑀤𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀲𑁆𑀲𑀸𑀢𑀺 ¶ 𑀧𑀭𑀲𑁆𑀲. 𑀢𑀤𑀸𑀢𑀺 𑀧𑀭𑀯𑀲𑁂𑀦 𑀫𑀜𑁆𑀜𑀦𑀸𑀬𑀁. 𑀤𑀺𑀝𑁆𑀞𑀺𑀫𑀜𑁆𑀜𑀦𑀸 𑀏𑀯 𑀬𑀼𑀚𑁆𑀚𑀢𑀺 𑀢𑀢𑁆𑀣 𑀦𑀺𑀘𑁆𑀘𑀸𑀪𑀺𑀦𑀺𑀯𑁂𑀲𑀸𑀤𑀬𑁄 𑀲𑀫𑁆𑀪𑀯𑀦𑁆𑀢𑀻𑀢𑀺 𑀓𑀢𑁆𑀯𑀸. 𑀅𑀯𑀥𑀸𑀭𑀡𑁂𑀦 𑀫𑀸𑀦𑀢𑀡𑁆𑀳𑀸𑀫𑀜𑁆𑀜𑀦𑀸 𑀦𑀺𑀯𑀢𑁆𑀢𑁂𑀢𑀺. 𑀦 𑀳𑀺 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸, ‘‘𑀫𑀬𑁆𑀳’’𑀦𑁆𑀢𑀺 𑀘 𑀧𑀯𑀢𑁆𑀢𑀮𑀓𑁆𑀔𑀡𑀸 𑀫𑀸𑀦𑀢𑀡𑁆𑀳𑀸 𑀧𑀭𑀲𑁆𑀫𑀺𑀁 𑀧𑀭𑀲𑁆𑀲 𑀲𑀦𑁆𑀢𑀓𑀪𑀸𑀯𑁂𑀦 𑀕𑀳𑀺𑀢𑁂 𑀘 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀭𑀸𑀬𑁄𑀧𑀻𑀢𑀺 𑀫𑀸𑀦𑀢𑀡𑁆𑀳𑀸𑀫𑀜𑁆𑀜𑀦𑀸𑀬𑁄𑀧𑀺. 𑀇𑀘𑁆𑀙𑀦𑁆𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸. 𑀧𑀭𑀲𑁆𑀲𑀧𑀺 𑀳𑀺 𑀧𑀣𑀯𑀻𑀲𑀦𑁆𑀦𑀺𑀲𑁆𑀲𑀬𑁂𑀦 𑀲𑀫𑁆𑀧𑀢𑁆𑀢𑀺𑀇𑀲𑁆𑀲𑀭𑀺𑀬𑀸𑀤𑀺𑀓𑀲𑁆𑀲 𑀯𑀲𑁂𑀦 𑀅𑀢𑁆𑀢𑀦𑀺 𑀲𑁂𑀬𑁆𑀬𑀸𑀤𑀺𑀪𑀸𑀯𑀁 𑀤𑀳𑀢𑁄 𑀧𑀡𑀺𑀤𑀳𑀢𑁄 𑀘 𑀘𑀺𑀢𑁆𑀢𑀁 𑀢𑀣𑀸𑀪𑀸𑀯𑀸𑀬 𑀫𑀸𑀦𑀢𑀡𑁆𑀳𑀸𑀫𑀜𑁆𑀜𑀦𑀸 𑀲𑀫𑁆𑀪𑀯𑀦𑁆𑀢𑀻𑀢𑀺 𑀆𑀘𑀭𑀺𑀬𑀸𑀦𑀁 𑀅𑀥𑀺𑀧𑁆𑀧𑀸𑀬𑁄. ‘‘𑀧𑀭𑁄 𑀧𑀣𑀯𑀻 𑀧𑀭𑀲𑁆𑀲 𑀧𑀣𑀯𑀻’’𑀢𑀺 𑀏𑀢𑁆𑀣𑀸𑀧𑀺 𑀇𑀫𑁂 𑀤𑁆𑀯𑁂 𑀧𑀓𑀸𑀭𑀸 𑀲𑀸𑀥𑀺𑀧𑁆𑀧𑀸𑀬𑀸 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸.

‘‘𑀧𑀣𑀯𑀺𑀢𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺, ‘‘𑀆𑀤𑀺𑀢𑁄’’𑀢𑀺 𑀘 𑀆𑀤𑀻𑀲𑀼 𑀅𑀦𑀺𑀲𑁆𑀲𑀓𑁆𑀓𑀯𑀘𑀦𑁂𑀧𑀺 𑀢𑁄-𑀲𑀤𑁆𑀤𑁄 𑀤𑀺𑀝𑁆𑀞𑁄𑀢𑀺 𑀆𑀳 ‘‘𑀧𑀣𑀯𑀺𑀢𑁄𑀢𑀺 𑀦𑀺𑀲𑁆𑀲𑀓𑁆𑀓𑀯𑀘𑀦’’𑀦𑁆𑀢𑀺. 𑀲𑀉𑀧𑀓𑀭𑀡𑀲𑁆𑀲𑀸𑀢𑀺 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀕𑀢𑀲𑁆𑀲 𑀤𑀸𑀲𑀧𑁄𑀭𑀺𑀲𑀸𑀤𑀺𑀦𑀸 𑀯𑀺𑀢𑁆𑀢𑀼𑀧𑀓𑀭𑀡𑁂𑀦 𑀲𑀉𑀧𑀓𑀭𑀡𑀲𑁆𑀲, 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸 𑀢𑁂𑀲𑀁 𑀉𑀧𑀓𑀭𑀡𑀲𑁆𑀲 𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀯𑀼𑀢𑁆𑀢𑀧𑁆𑀧𑀪𑁂𑀤𑀢𑁄𑀢𑀺 𑀮𑀓𑁆𑀔𑀡𑀸𑀤𑀺𑀅𑀚𑁆𑀛𑀢𑁆𑀢𑀺𑀓𑀸𑀤𑀺𑀯𑀼𑀢𑁆𑀢𑀧𑁆𑀧𑀓𑀸𑀭𑀯𑀺𑀪𑀸𑀕𑀢𑁄. 𑀉𑀧𑁆𑀧𑀢𑁆𑀢𑀺𑀁 𑀯𑀸 𑀦𑀺𑀕𑁆𑀕𑀫𑀦𑀁 𑀯𑀸𑀢𑀺 ‘‘𑀢𑀁 𑀅𑀡𑁆𑀟𑀁 𑀅𑀳𑁄𑀲𑀺 𑀳𑁂𑀫𑀫𑀬𑀁, 𑀢𑀲𑁆𑀫𑀺𑀁 𑀲𑀬𑀁 𑀩𑁆𑀭𑀳𑁆𑀫𑀸 𑀉𑀧𑁆𑀧𑀦𑁆𑀦𑁄’’𑀢𑀺 𑀩𑁆𑀭𑀳𑁆𑀫𑀡𑁆𑀟𑀯𑀸𑀤𑀯𑀲𑁂𑀦 𑀯𑀸 ‘‘𑀤𑁆𑀯𑀻𑀳𑀺 𑀅𑀡𑀽𑀳𑀺 𑀤𑁆𑀯𑀺𑀅𑀡𑀼𑀓’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀅𑀡𑀼𑀓𑀯𑀸𑀤𑀯𑀲𑁂𑀦 𑀯𑀸 𑀧𑀣𑀯𑀺𑀢𑁄 𑀉𑀧𑁆𑀧𑀢𑁆𑀢𑀺𑀁 𑀯𑀸 ‘‘𑀲𑀩𑁆𑀩𑁄𑀬𑀁 𑀮𑁄𑀓𑁄 𑀇𑀲𑁆𑀲𑀭𑀢𑁄 𑀯𑀺𑀦𑀺𑀕𑁆𑀕𑀢𑁄’’𑀢𑀺 𑀇𑀲𑁆𑀲𑀭𑀯𑀸𑀤𑀯𑀲𑁂𑀦 𑀇𑀲𑁆𑀲𑀭𑀓𑀼𑀢𑁆𑀢𑀢𑁄 𑀧𑀣𑀯𑀺𑀢𑁄 𑀦𑀺𑀕𑁆𑀕𑀫𑀦𑀁 𑀯𑀸 𑀫𑀜𑁆𑀜𑀫𑀸𑀦𑁄𑀢𑀺 𑀬𑁄𑀚𑀦𑀸. 𑀧𑀣𑀯𑀺𑀢𑁄 𑀯𑀸 𑀅𑀜𑁆𑀜𑁄 𑀆𑀧𑀸𑀤𑀺𑀓𑁄 𑀅𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀘 𑀧𑀼𑀭𑀺𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀓𑀸𑀭𑀓𑀮𑀓𑁆𑀔𑀡𑀁 𑀦𑀺𑀲𑁆𑀲𑀓𑁆𑀓𑀯𑀘𑀦𑀁, 𑀤𑀼𑀢𑀺𑀬𑀲𑁆𑀫𑀺𑀁 𑀉𑀧𑀧𑀤𑀮𑀓𑁆𑀔𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀢𑁆𑀢𑀦𑁄 𑀧𑀭𑀺𑀕𑁆𑀕𑀳𑀪𑀽𑀢𑀧𑀣𑀯𑀺𑀢𑁄 𑀲𑀼𑀔𑀧𑁆𑀧𑀢𑁆𑀢𑀺𑀁 𑀢𑀢𑁄 𑀏𑀯 𑀘 𑀧𑀭𑁂𑀳𑀺 𑀲𑁂𑀬𑁆𑀬𑀸𑀤𑀺𑀪𑀸𑀯𑀁 𑀓𑀧𑁆𑀧𑁂𑀦𑁆𑀢𑀲𑁆𑀲 𑀯𑀲𑁂𑀦𑀧𑁂𑀢𑁆𑀣 𑀢𑀡𑁆𑀳𑀸𑀫𑀸𑀦𑀫𑀜𑁆𑀜𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀭𑁂𑀢𑀺 𑀲𑀸𑀭𑀲𑀫𑀸𑀲𑀸𑀘𑀭𑀺𑀬𑀸. 𑀢𑀢𑁄 𑀅𑀜𑁆𑀜𑀁 𑀅𑀧𑁆𑀧𑀫𑀸𑀡𑀁 𑀅𑀢𑁆𑀢𑀸𑀦𑀁 𑀕𑀳𑁂𑀢𑁆𑀯𑀸𑀢𑀺 𑀧𑀼𑀩𑁆𑀩𑁂 𑀪𑀸𑀯𑀺𑀢𑀆𑀧𑀸𑀤𑀺𑀅𑀧𑁆𑀧𑀫𑀸𑀡𑀓𑀲𑀺𑀡𑀯𑀲𑁂𑀦 𑀯𑀸 𑀓𑀸𑀧𑀺𑀮𑀓𑀸𑀡𑀸𑀤𑀤𑀺𑀝𑁆𑀞𑀺𑀯𑀲𑁂𑀦 𑀯𑀸 𑀅𑀧𑁆𑀧𑀫𑀸𑀡𑀁 𑀩𑁆𑀬𑀸𑀧𑀺𑀦𑀁 𑀅𑀢𑁆𑀢𑀸𑀦𑀁 𑀕𑀳𑁂𑀢𑁆𑀯𑀸. 𑀧𑀣𑀯𑀺𑀢𑁄𑀢𑀺 𑀧𑀘𑁆𑀙𑀸 𑀅𑀪𑀸𑀯𑀺𑀢𑀅𑀯𑀟𑁆𑀠𑀺𑀢𑀧𑀣𑀯𑀻𑀓𑀲𑀺𑀡𑀲𑀗𑁆𑀔𑀸𑀢𑀧𑀣𑀯𑀺𑀢𑁄. 𑀩𑀳𑀺𑀤𑁆𑀥𑀸𑀧𑀺 𑀫𑁂 𑀅𑀢𑁆𑀢𑀸𑀢𑀺 𑀇𑀢𑁄 𑀧𑀣𑀯𑀺𑀢𑁄 𑀩𑀳𑀺𑀧𑀺 𑀫𑁂 𑀅𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑁂𑀯𑀮𑀦𑁆𑀢𑀺 ¶ 𑀅𑀦𑀯𑀲𑁂𑀲𑀁. 𑀫𑀳𑀸𑀧𑀣𑀯𑀺𑀁 𑀢𑀡𑁆𑀳𑀸𑀯𑀲𑁂𑀦 𑀫𑀫𑀸𑀬𑀢𑀺, 𑀅𑀬𑀜𑁆𑀘 𑀦𑀬𑁄 𑀘𑀢𑀼𑀤𑀻𑀧𑀺𑀲𑁆𑀲𑀭𑀺𑀬𑁂 𑀞𑀺𑀢𑀲𑁆𑀲 𑀤𑀻𑀧𑀘𑀓𑁆𑀓𑀯𑀢𑁆𑀢𑀺𑀦𑁄 𑀘 𑀮𑀩𑁆𑀪𑁂𑀬𑁆𑀬, 𑀫𑀡𑁆𑀟𑀮𑀺𑀓𑀭𑀸𑀚𑀫𑀳𑀸𑀫𑀢𑁆𑀢𑀓𑀼𑀝𑀼𑀫𑁆𑀩𑀺𑀓𑀸𑀦𑀫𑁆𑀧𑀺 𑀯𑀲𑁂𑀦 𑀮𑀩𑁆𑀪𑀢𑁂𑀯 𑀢𑁂𑀲𑀫𑁆𑀧𑀺 𑀬𑀣𑀸𑀧𑀭𑀺𑀕𑁆𑀕𑀳𑀁 𑀅𑀦𑀯𑀲𑁂𑀲𑁂𑀢𑁆𑀯𑀸 𑀫𑀜𑁆𑀜𑀦𑀸𑀬 𑀲𑀫𑁆𑀪𑀯𑀢𑁄. ‘‘𑀏𑀯𑀁 𑀫𑀫𑀸’’𑀢𑀺 𑀕𑀸𑀳𑀲𑁆𑀲 ‘‘𑀏𑀲𑁄𑀳𑀫𑀲𑁆𑀫𑀺𑀁, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀕𑀸𑀳𑀯𑀺𑀥𑀽𑀭𑀢𑀸𑀬 𑀯𑀼𑀢𑁆𑀢𑀁 ‘‘𑀏𑀓𑀸 𑀢𑀡𑁆𑀳𑀸𑀫𑀜𑁆𑀜𑀦𑀸 𑀏𑀯 𑀮𑀩𑁆𑀪𑀢𑀻’’𑀢𑀺 ¶ . 𑀇𑀫𑀺𑀦𑀸 𑀦𑀬𑁂𑀦𑀸𑀢𑀺 𑀯𑀼𑀢𑁆𑀢𑀫𑀢𑀺𑀤𑁂𑀲𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀲𑀸 𑀘𑀸𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀸 𑀘𑀸𑀬𑀦𑁆𑀢𑀺 𑀲𑀸 𑀘 𑀅𑀬𑀁 𑀢𑀡𑁆𑀳𑀸𑀫𑀜𑁆𑀜𑀦𑀸 𑀬𑁄𑀚𑁂𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀣𑀸 𑀧𑀦 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀫𑀜𑁆𑀜𑀺𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀲𑀺𑀦𑁂𑀳𑀁 𑀫𑀸𑀦𑀜𑁆𑀘 𑀉𑀧𑁆𑀧𑀸𑀤𑀬𑀢𑁄 𑀢𑀡𑁆𑀳𑀸𑀫𑀸𑀦𑀫𑀜𑁆𑀜𑀦𑀸 𑀲𑀫𑁆𑀪𑀯𑀦𑁆𑀢𑀺, 𑀏𑀯𑀁 𑀢𑀡𑁆𑀳𑀸𑀫𑀜𑁆𑀜𑀦𑀸𑀫𑀜𑁆𑀜𑀺𑀢𑁂𑀦 𑀯𑀢𑁆𑀣𑀼𑀦𑀸 𑀅𑀢𑁆𑀢𑀸𑀦𑀁 𑀲𑁂𑀬𑁆𑀬𑀸𑀤𑀺𑀢𑁄 𑀤𑀳𑀢𑁄 𑀢𑀜𑁆𑀘 𑀅𑀢𑁆𑀢𑀦𑀺𑀬𑀁 𑀦𑀺𑀘𑁆𑀘𑀁 𑀢𑀣𑀸 𑀢𑀁𑀲𑀸𑀫𑀺𑀪𑀽𑀢𑀁 𑀅𑀢𑁆𑀢𑀸𑀦𑀜𑁆𑀘 𑀧𑀭𑀺𑀓𑀧𑁆𑀧𑁂𑀦𑁆𑀢𑀲𑁆𑀲 𑀇𑀢𑀭𑀫𑀜𑁆𑀜𑀦𑀸𑀧𑀺 𑀲𑀫𑁆𑀪𑀯𑀦𑁆𑀢𑀻𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. ‘‘𑀫𑁂’’𑀢𑀺 𑀳𑀺 𑀇𑀫𑀺𑀦𑀸 𑀅𑀢𑁆𑀣𑀕𑁆𑀕𑀳𑀡𑀫𑀼𑀔𑁂𑀦𑁂𑀯 𑀅𑀢𑁆𑀢𑀦𑀺𑀬𑀲𑀫𑁆𑀩𑀦𑁆𑀥𑁄 𑀧𑀓𑀸𑀲𑀻𑀬𑀢𑀻𑀢𑀺.

𑀅𑀪𑀺𑀦𑀦𑁆𑀤𑀢𑀻𑀢𑀺 𑀇𑀫𑀺𑀦𑀸 𑀢𑀡𑁆𑀳𑀸𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀸𑀦𑀁 𑀲𑀗𑁆𑀕𑀳𑀺𑀢𑀢𑁆𑀢𑀸 𑀢𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀲𑁆𑀲𑀸𑀤𑁂𑀢𑀺 𑀧𑀭𑀸𑀫𑀲𑀢𑀺 𑀘𑀸’’𑀢𑀺 𑀆𑀳. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀘𑁂𑀢𑀲𑁆𑀲 𑀤𑁆𑀯𑀬𑀲𑁆𑀲 𑀅𑀲𑀗𑁆𑀓𑀭𑀢𑁄 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀏𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀧𑀺 𑀯𑀸 𑀅𑀥𑀺𑀧𑀢𑀺𑀥𑀫𑁆𑀫𑀸𑀦𑀁 𑀯𑀺𑀬 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀢𑀲𑁆𑀲 𑀢𑀲𑁆𑀲 𑀩𑀮𑀯𑀪𑀸𑀯𑁂𑀦 𑀧𑀯𑀢𑁆𑀢𑀺. 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀅𑀪𑀺𑀦𑀦𑁆𑀤𑀦𑀢𑁆𑀣𑁂. 𑀏𑀢𑀦𑁆𑀢𑀺 ‘‘𑀧𑀣𑀯𑀺𑀁 𑀅𑀪𑀺𑀦𑀦𑁆𑀤𑀢𑀻’’𑀢𑀺 𑀏𑀢𑀁 𑀧𑀤𑀁. 𑀬𑁂𑀲𑀁 𑀯𑀺𑀦𑁂𑀬𑁆𑀬𑀸𑀦𑀁 𑀬𑁂𑀳𑀺 𑀧𑀓𑀸𑀭𑀯𑀺𑀲𑁂𑀲𑁂𑀳𑀺 𑀥𑀫𑁆𑀫𑀸𑀦𑀁 𑀯𑀺𑀪𑀸𑀯𑀦𑁂 𑀓𑀢𑁂 𑀯𑀺𑀲𑁂𑀲𑀸𑀥𑀺𑀕𑀫𑁄 𑀳𑁄𑀢𑀺, 𑀢𑁂𑀲𑀁 𑀢𑁂𑀳𑀺 𑀧𑀓𑀸𑀭𑀯𑀺𑀲𑁂𑀲𑁂𑀳𑀺 𑀥𑀫𑁆𑀫𑀯𑀺𑀪𑀸𑀯𑀦𑀁. 𑀬𑁂𑀲𑀁 𑀧𑀦 𑀬𑁂𑀦 𑀏𑀓𑁂𑀦𑁂𑀯 𑀧𑀓𑀸𑀭𑁂𑀦 𑀥𑀫𑁆𑀫𑀯𑀺𑀪𑀸𑀯𑀦𑁂 𑀓𑀢𑁂 𑀯𑀺𑀲𑁂𑀲𑀸𑀥𑀺𑀕𑀫𑁄 𑀳𑁄𑀢𑀺, 𑀢𑁂𑀲𑀫𑁆𑀧𑀺 𑀢𑀁 𑀯𑀢𑁆𑀯𑀸 𑀥𑀫𑁆𑀫𑀺𑀲𑁆𑀲𑀭𑀢𑀸𑀬 𑀢𑀤𑀜𑁆𑀜𑀦𑀺𑀭𑀯𑀲𑁂𑀲𑀧𑁆𑀧𑀓𑀸𑀭𑀯𑀺𑀪𑀸𑀯𑀦𑀜𑁆𑀘 𑀤𑁂𑀲𑀦𑀸𑀯𑀺𑀮𑀸𑀲𑁄. 𑀢𑁂𑀦𑀸𑀳 ‘‘𑀧𑀼𑀩𑁆𑀩𑁂 𑀫𑀜𑁆𑀜𑀦𑀸𑀯𑀲𑁂𑀦 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀪𑀺𑀦𑀦𑁆𑀤𑀦𑀸𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄’’𑀢𑀺. 𑀥𑀫𑁆𑀫𑀥𑀸𑀢𑀼𑀬𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸. 𑀲𑀸 𑀳𑀺 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀁 𑀬𑀣𑀸𑀲𑀪𑀸𑀯𑀢𑁄 𑀥𑀸𑀭𑁂𑀢𑀺 𑀉𑀧𑀥𑀸𑀭𑁂𑀢𑀺, 𑀲𑀓𑀮𑀜𑁆𑀘 𑀯𑀺𑀦𑁂𑀬𑁆𑀬𑀲𑀢𑁆𑀢𑀲𑀗𑁆𑀔𑀸𑀢𑀥𑀫𑁆𑀫𑀧𑁆𑀧𑀩𑀦𑁆𑀥𑀁 𑀅𑀧𑀸𑀬𑀤𑀼𑀓𑁆𑀔𑀲𑀁𑀲𑀸𑀭𑀤𑀼𑀓𑁆𑀔𑀧𑀢𑀦𑀢𑁄 𑀥𑀸𑀭𑁂𑀢𑀺, 𑀲𑀬𑀜𑁆𑀘 𑀅𑀯𑀺𑀧𑀭𑀻𑀢𑀧𑀯𑀢𑁆𑀢𑀺𑀆𑀓𑀸𑀭𑀸 𑀥𑀸𑀢𑀽𑀢𑀺 𑀥𑀫𑁆𑀫𑀥𑀸𑀢𑀽𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀳𑀺 𑀫𑀕𑁆𑀕𑀜𑀸𑀡𑀁, 𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀻𑀢𑀺. 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸𑀢𑀺 ¶ 𑀲𑀼𑀝𑁆𑀞𑀼 𑀧𑀝𑀺𑀯𑀺𑀤𑁆𑀥𑀪𑀸𑀯𑀢𑁄, 𑀲𑀫𑁆𑀫𑀸 𑀅𑀥𑀺𑀕𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀪𑀺𑀓𑀗𑁆𑀔𑀦𑀲𑀫𑁆𑀧𑀕𑁆𑀕𑀳𑀧𑀭𑀸𑀫𑀲𑀦𑀸𑀦𑀁 𑀯𑀲𑁂𑀦 𑀆𑀭𑀫𑁆𑀫𑀡𑁂 𑀧𑀭𑀺𑀓𑀧𑁆𑀧𑀦𑀸𑀧𑀯𑀢𑁆𑀢𑀺 𑀫𑀜𑁆𑀜𑀦𑀸. 𑀢𑀢𑁆𑀣 ‘‘𑀫𑀫𑀁, 𑀅𑀳’’𑀦𑁆𑀢𑀺 𑀘 𑀅𑀪𑀺𑀦𑀺𑀯𑁂𑀲𑀦𑀁 𑀧𑀭𑀺𑀓𑀧𑁆𑀧𑀦𑀁. 𑀬𑁂𑀦 𑀅𑀚𑁆𑀛𑁄𑀲𑀸𑀦𑀁 𑀳𑁄𑀢𑀺, 𑀅𑀬𑀁 𑀅𑀪𑀺𑀦𑀦𑁆𑀤𑀦𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀲𑀼𑀢𑁆𑀢𑀸𑀤𑀺𑀅𑀯𑀺𑀭𑀼𑀤𑁆𑀥𑀸𑀬𑁂𑀯 𑀅𑀢𑁆𑀢𑀦𑁄𑀫𑀢𑀺 𑀇𑀘𑁆𑀙𑀺𑀢𑀩𑁆𑀩𑀸, 𑀦 𑀇𑀢𑀭𑀸𑀢𑀺 𑀲𑀼𑀢𑁆𑀢𑁂𑀦 𑀢𑀲𑁆𑀲𑀸 𑀲𑀗𑁆𑀕𑀳𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀼𑀢𑁆𑀢𑀜𑁆𑀘𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑁂𑀲𑀦𑀸𑀯𑀺𑀮𑀸𑀲𑀯𑀺𑀪𑀸𑀯𑀦𑀲𑁆𑀲 𑀧𑀦 𑀲𑀳𑁂𑀢𑀼𑀓𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑀸𑀤𑀺𑀤𑁂𑀲𑀦𑀸𑀬 𑀦𑀺𑀩𑀤𑁆𑀥𑀢𑀸 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸.

𑀢𑀲𑁆𑀲𑀸𑀢𑀺 𑀢𑁂𑀦. 𑀜𑀸𑀢𑀲𑀤𑁆𑀤𑀲𑀫𑁆𑀩𑀦𑁆𑀥𑁂𑀦 𑀳𑁂𑀢𑀁 𑀓𑀢𑁆𑀢𑀭𑀺 𑀲𑀸𑀫𑀺𑀯𑀘𑀦𑀁. 𑀢𑀲𑁆𑀫𑀸𑀢𑀺 𑀅𑀧𑀭𑀺𑀜𑁆𑀜𑀸𑀢𑀢𑁆𑀢𑀸. ‘‘𑀅𑀧𑀭𑀺𑀜𑁆𑀜𑀸𑀢’’𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑀫𑀼𑀔𑁂𑀦 𑀬𑀁 𑀧𑀭𑀺𑀚𑀸𑀦𑀦𑀁 𑀯𑀼𑀢𑁆𑀢𑀁, 𑀢𑀁 𑀅𑀢𑁆𑀣𑀢𑁄 𑀢𑀺𑀯𑀺𑀥𑀸 𑀧𑀭𑀺𑀜𑁆𑀜𑀸 𑀳𑁄𑀢𑀻𑀢𑀺 𑀢𑀁 𑀲𑀭𑀽𑀧𑀢𑁄 𑀧𑀯𑀢𑁆𑀢𑀺𑀆𑀓𑀸𑀭𑀢𑁄 𑀘 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀬𑁄 𑀳𑀻’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 ¶ 𑀬𑀸𑀬 𑀧𑀜𑁆𑀜𑀸𑀬 𑀯𑀺𑀧𑀲𑁆𑀲𑀦𑀸𑀪𑀽𑀫𑀺𑀁 𑀧𑀭𑀺𑀚𑀸𑀦𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀢𑀺, 𑀲𑀸 𑀧𑀭𑀺𑀚𑀸𑀦𑀦𑀧𑀜𑁆𑀜𑀸 𑀜𑀸𑀢𑀧𑀭𑀺𑀜𑁆𑀜𑀸. 𑀲𑀸 𑀳𑀺 𑀢𑁂𑀪𑀽𑀫𑀓𑀥𑀫𑁆𑀫𑀚𑀸𑀢𑀁 ‘‘𑀅𑀬𑀁 𑀯𑀺𑀧𑀲𑁆𑀲𑀦𑀸𑀪𑀽𑀫𑀻’’𑀢𑀺 𑀜𑀸𑀢𑀁 𑀯𑀺𑀤𑀺𑀢𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑀻𑀬𑁂𑀯 𑀮𑀓𑁆𑀔𑀡𑀭𑀲𑀸𑀤𑀺𑀢𑁄 𑀅𑀚𑁆𑀛𑀢𑁆𑀢𑀺𑀓𑀸𑀤𑀺𑀯𑀺𑀪𑀸𑀕𑀢𑁄 𑀘 𑀧𑀭𑀺𑀘𑁆𑀙𑀺𑀚𑁆𑀚 𑀚𑀸𑀦𑀸𑀢𑀺. 𑀇𑀥 𑀧𑀦 𑀧𑀣𑀯𑀻𑀥𑀸𑀢𑀼𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀣𑀯𑀻𑀥𑀸𑀢𑀼𑀁 𑀧𑀭𑀺𑀚𑀸𑀦𑀸𑀢𑀻’’𑀢𑀺𑀆𑀤𑀺. 𑀢𑀻𑀭𑀡𑀧𑀭𑀺𑀜𑁆𑀜𑀸𑀢𑀺 𑀓𑀻𑀭𑀡𑀯𑀲𑁂𑀦 𑀧𑀭𑀺𑀚𑀸𑀦𑀦𑀓𑀧𑀜𑁆𑀜𑀸. 𑀲𑀸 𑀳𑀺 𑀧𑀭𑀺𑀯𑀸𑀭𑁂𑀳𑀺 𑀅𑀦𑀺𑀘𑁆𑀘𑀢𑀸𑀤𑀺𑀆𑀓𑀸𑀭𑁂𑀳𑀺 𑀅𑀦𑀺𑀘𑁆𑀘𑀢𑀸𑀤𑀺𑀲𑀪𑀸𑀯𑀲𑁆𑀲 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀲𑁆𑀲 𑀢𑀻𑀭𑀡𑀯𑀲𑁂𑀦 𑀲𑀫𑁆𑀫𑀲𑀦𑀯𑀲𑁂𑀦 𑀢𑀁 𑀧𑀭𑀺𑀘𑁆𑀙𑀺𑀚𑁆𑀚 𑀚𑀸𑀦𑀸𑀢𑀺. 𑀅𑀕𑁆𑀕𑀫𑀕𑁆𑀕𑁂𑀦𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦. 𑀲𑁄 𑀳𑀺 𑀅𑀦𑀯𑀲𑁂𑀲𑀢𑁄 𑀙𑀦𑁆𑀤𑀭𑀸𑀕𑀁 𑀧𑀚𑀳𑀢𑀺. 𑀅𑀕𑁆𑀕𑀫𑀕𑁆𑀕𑁂𑀦𑀸𑀢𑀺 𑀯𑀸 𑀅𑀕𑁆𑀕𑀪𑀽𑀢𑁂𑀦 𑀫𑀕𑁆𑀕𑁂𑀦, 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁂𑀦𑀸𑀢𑀺 𑀅𑀢𑁆𑀣𑁄. 𑀉𑀪𑀬𑀣𑀸𑀧𑀺 𑀳𑀺 𑀲𑀫𑀼𑀘𑁆𑀙𑁂𑀤𑀧𑀳𑀸𑀦𑀓𑀸𑀭𑀻 𑀏𑀯 𑀧𑀜𑁆𑀜𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀳𑀸𑀦𑀧𑀭𑀺𑀜𑁆𑀜𑀸𑀢𑀺 𑀤𑀲𑁆𑀲𑁂𑀢𑀺.

𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑀦𑁆𑀢𑀺 𑀏𑀢𑁂𑀦 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄𑀧𑀺 𑀲𑀗𑁆𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄 𑀦𑀸𑀫𑀭𑀽𑀧𑀲𑁆𑀲 𑀳𑁂𑀢𑀼𑀯𑀯𑀢𑁆𑀣𑀸𑀦𑀪𑀸𑀯𑀢𑁄. 𑀲𑁄𑀧𑀺 𑀳𑀺 𑀳𑁂𑀢𑀼𑀧𑀘𑁆𑀘𑀬𑀫𑀼𑀔𑁂𑀦 𑀦𑀸𑀫𑀭𑀽𑀧𑀲𑁆𑀲 𑀯𑀯𑀢𑁆𑀣𑀸𑀦𑀫𑁂𑀯𑀸𑀢𑀺. 𑀓𑀮𑀸𑀧𑀲𑀫𑁆𑀫𑀲𑀦𑀸𑀤𑀺𑀯𑀲𑁂𑀦 𑀢𑀻𑀭𑀡𑀧𑀭𑀺𑀜𑁆𑀜𑀸 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑀫𑁆𑀫𑀲𑀦𑀪𑀸𑀯𑀢𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀢𑀸 𑀧𑀭𑀺𑀜𑁆𑀜𑀸𑀬𑁄 𑀦𑀢𑁆𑀣𑀺, 𑀢𑀲𑁆𑀫𑀸. 𑀅𑀣 𑀯𑀸 𑀢𑀲𑁆𑀫𑀸 𑀅𑀧𑀭𑀺𑀜𑁆𑀜𑀸𑀢𑀢𑁆𑀢𑀸𑀢𑀺 𑀬𑀲𑁆𑀫𑀸 𑀅𑀧𑀭𑀺𑀜𑁆𑀜𑀸𑀢𑀸 𑀧𑀣𑀯𑀻, 𑀢𑀲𑁆𑀫𑀸 𑀅𑀧𑀭𑀺𑀜𑁆𑀜𑀸𑀢𑀢𑁆𑀢𑀸 𑀧𑀣𑀯𑀺𑀬𑀸 𑀢𑀁 𑀧𑀣𑀯𑀺𑀁 𑀫𑀜𑁆𑀜𑀢𑀺 𑀘 𑀅𑀪𑀺𑀦𑀦𑁆𑀤𑀢𑀺 𑀘𑀸𑀢𑀺.

𑀧𑀣𑀯𑀻𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀧𑁄𑀯𑀸𑀭𑀸𑀤𑀺𑀯𑀡𑁆𑀡𑀦𑀸

𑀆𑀧𑀁 ¶ 𑀆𑀧𑀢𑁄𑀢𑀺 𑀏𑀢𑁆𑀣 𑀅𑀧𑁆𑀧𑁄𑀢𑀺, 𑀅𑀧𑁆𑀧𑀸𑀬𑀢𑀻𑀢𑀺 𑀯𑀸 𑀆𑀧𑁄, 𑀬𑀲𑁆𑀫𑀺𑀁 𑀲𑀗𑁆𑀖𑀸𑀢𑁂 𑀲𑀬𑀁 𑀅𑀢𑁆𑀣𑀺, 𑀢𑀁 𑀆𑀩𑀦𑁆𑀥𑀦𑀯𑀲𑁂𑀦 𑀩𑁆𑀬𑀸𑀧𑁂𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀧𑀭𑀺𑀩𑁆𑀭𑀽𑀳𑁂𑀢𑀻𑀢𑀺 𑀯𑀸 𑀅𑀢𑁆𑀣𑁄. 𑀅𑀢𑁆𑀣𑀸𑀦𑀁 𑀅𑀥𑀺 𑀅𑀚𑁆𑀛𑀢𑁆𑀢𑀁. 𑀧𑀢𑀺 𑀧𑀢𑀺 𑀅𑀢𑁆𑀢𑀸𑀦𑀦𑁆𑀢𑀺 𑀧𑀘𑁆𑀘𑀢𑁆𑀢𑀁. 𑀉𑀪𑀬𑁂𑀦𑀧𑀺 𑀲𑀢𑁆𑀢𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀫𑁂𑀯 𑀯𑀤𑀢𑀺. 𑀆𑀧𑁄 𑀆𑀧𑁄𑀕𑀢𑀦𑁆𑀢𑀺𑀆𑀤𑀻𑀲𑀼 𑀆𑀩𑀦𑁆𑀥𑀦𑀫𑁂𑀯 𑀆𑀧𑁄, 𑀢𑀤𑁂𑀯 𑀆𑀧𑁄𑀲𑀪𑀸𑀯𑀁 𑀕𑀢𑀢𑁆𑀢𑀸 𑀆𑀧𑁄𑀕𑀢𑀁, 𑀲𑀪𑀸𑀯𑁂𑀦𑁂𑀯 𑀆𑀧𑀪𑀸𑀯𑀁 𑀧𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀺𑀦𑁂𑀳𑀦𑀯𑀲𑁂𑀦 𑀲𑀺𑀦𑁂𑀳𑁄, 𑀲𑁄𑀬𑁂𑀯 𑀲𑀺𑀦𑁂𑀳𑀦𑀲𑀪𑀸𑀯𑀁 𑀕𑀢𑀢𑁆𑀢𑀸 𑀲𑀺𑀦𑁂𑀳𑀕𑀢𑀁. 𑀩𑀦𑁆𑀥𑀦𑀢𑁆𑀢𑀁 𑀭𑀽𑀧𑀲𑁆𑀲𑀸𑀢𑀺 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀲𑁆𑀲 𑀩𑀦𑁆𑀥𑀦𑀪𑀸𑀯𑁄, 𑀅𑀯𑀺𑀧𑁆𑀧𑀓𑀺𑀭𑀡𑀯𑀲𑁂𑀦 𑀲𑀫𑁆𑀧𑀺𑀡𑁆𑀟𑀦𑀦𑁆𑀢𑀺 𑀅𑀢𑁆𑀣𑁄. 𑀉𑀕𑁆𑀕𑀡𑁆𑀳𑀦𑁆𑀢𑁄𑀢𑀺 𑀬𑀣𑀸𑀧𑀭𑀺𑀘𑁆𑀙𑀺𑀦𑁆𑀦𑁂 𑀆𑀧𑁄𑀫𑀡𑁆𑀟𑀮𑁂 𑀬𑀣𑀸 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀉𑀧𑀮𑀩𑁆𑀪𑀢𑀺, 𑀢𑀣𑀸 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑁄. 𑀯𑀼𑀢𑁆𑀢𑁄𑀢𑀺 ‘‘𑀆𑀧𑀲𑁆𑀫𑀺’’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀆𑀧𑁄. 𑀲𑁄 𑀳𑀺 𑀲𑀲𑀫𑁆𑀪𑀸𑀭𑀆𑀧𑁄, 𑀦 ‘‘𑀆𑀧𑁄𑀓𑀲𑀺𑀡’’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀆𑀧𑁄. 𑀲𑁂𑀲𑀦𑁆𑀢𑀺 𑀆𑀭𑀫𑁆𑀫𑀡𑀲𑀫𑁆𑀫𑀼𑀢𑀺𑀆𑀧𑀸𑀦𑀁 𑀲𑀭𑀽𑀧𑀯𑀺𑀪𑀸𑀯𑀦𑀁. ‘‘𑀆𑀧𑀁 ¶ 𑀆𑀧𑀢𑁄 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀧𑀸𑀴𑀺𑀬𑀸 𑀅𑀢𑁆𑀣𑀯𑀺𑀪𑀸𑀯𑀦𑀜𑁆𑀘𑁂𑀯 𑀢𑀢𑁆𑀣 𑀢𑀢𑁆𑀣 𑀫𑀜𑁆𑀜𑀦𑀸𑀯𑀺𑀪𑀸𑀕𑀤𑀲𑁆𑀲𑀦𑀜𑁆𑀘 𑀧𑀣𑀯𑀺𑀬𑀁 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸𑀢𑀺. 𑀢𑀢𑁆𑀣 ‘‘𑀧𑀣𑀯𑀻𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁩𑁬𑁦; 𑀅. 𑀦𑀺. 𑁧𑁦.𑁨𑁫) 𑀯𑀼𑀢𑁆𑀢𑀁, 𑀇𑀥 ‘‘𑀆𑀧𑁄𑀓𑀲𑀺𑀡𑀫𑁂𑀓𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀁. 𑀢𑀢𑁆𑀣 𑀘 ‘‘𑀧𑀣𑀯𑀻𑀢𑀺 𑀲𑀜𑁆𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀁, 𑀇𑀥 𑀧𑀦 ‘‘𑀆𑀧𑁄𑀢𑀺 𑀲𑀜𑁆𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀏𑀯𑀫𑀸𑀤𑀺 𑀏𑀯 𑀯𑀺𑀲𑁂𑀲𑁄. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀣𑀯𑀺𑀬𑀁 𑀯𑀼𑀢𑁆𑀢𑀲𑀤𑀺𑀲𑀫𑁂𑀯𑀸’’𑀢𑀺. 𑀬𑁄 𑀧𑀦𑁂𑀢𑁆𑀣 𑀯𑀺𑀲𑁂𑀲𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀓𑁂𑀯𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀽𑀮𑀭𑀲𑁄𑀢𑀺 𑀫𑀽𑀮𑀁 𑀧𑀝𑀺𑀘𑁆𑀘 𑀦𑀺𑀩𑁆𑀩𑀢𑁆𑀢𑀭𑀲𑁄. 𑀔𑀦𑁆𑀥𑀭𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀔𑀻𑀭𑀸𑀤𑀻𑀦𑀺 𑀧𑀸𑀓𑀝𑀸𑀦𑁂𑀯. 𑀬𑀣𑀸 𑀧𑀦 𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑁂 (𑀧𑀸𑀭𑀸. 𑁬𑁧𑁮-𑁬𑁨𑁫), 𑀦 𑀏𑀯𑀫𑀺𑀥 𑀦𑀺𑀬𑀫𑁄 𑀅𑀢𑁆𑀣𑀺. 𑀬𑀁 𑀓𑀺𑀜𑁆𑀘𑀺 𑀔𑀻𑀭𑀁 𑀔𑀻𑀭𑀫𑁂𑀯. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀪𑀼𑀫𑁆𑀫𑀸𑀦𑀻𑀢𑀺 𑀆𑀯𑀸𑀝𑀸𑀤𑀻𑀲𑀼 𑀞𑀺𑀢𑀉𑀤𑀓𑀸𑀦𑀺. 𑀅𑀦𑁆𑀢𑀮𑀺𑀓𑁆𑀔𑀸𑀦𑀻𑀢𑀺 𑀧𑀣𑀯𑀺𑀁 𑀅𑀧𑁆𑀧𑀢𑁆𑀢𑀸𑀦𑀺 𑀯𑀲𑁆𑀲𑁄𑀤𑀓𑀸𑀦𑀺, 𑀧𑀢𑁆𑀢𑀸𑀦𑀺 𑀧𑀦 𑀪𑀼𑀫𑁆𑀫𑀸𑀦𑁂𑀯. 𑀏𑀯𑀁 𑀯𑀼𑀢𑁆𑀢𑀸 𑀘𑀸𑀢𑀺 𑀘-𑀲𑀤𑁆𑀤𑁂𑀦 𑀳𑀺𑀫𑁄𑀤𑀓𑀓𑀧𑁆𑀧𑀯𑀺𑀦𑀸𑀲𑀓𑀉𑀤𑀓𑀧𑀣𑀯𑀺𑀬𑀸𑀅𑀦𑁆𑀢𑁄𑀉𑀤𑀓𑀧𑀣𑀯𑀻𑀲𑀦𑁆𑀥𑀸𑀭𑀓𑀉𑀤𑀓𑀸𑀤𑀺𑀁 𑀧𑀼𑀩𑁆𑀩𑁂 𑀅𑀯𑀼𑀢𑁆𑀢𑀫𑁆𑀧𑀺 𑀲𑀫𑀼𑀘𑁆𑀘𑀺𑀦𑁄𑀢𑀺.

𑀢𑁂𑀚𑀁 𑀢𑁂𑀚𑀢𑁄𑀢𑀺 𑀏𑀢𑁆𑀣 𑀢𑁂𑀚𑀦𑀝𑁆𑀞𑁂𑀦 𑀢𑁂𑀚𑁄, 𑀢𑁂𑀚𑀦𑀁 𑀦𑀸𑀫 𑀤𑀳𑀦𑀧𑀘𑀦𑀸𑀤𑀺𑀲𑀫𑀢𑁆𑀣𑀁 𑀦𑀺𑀲𑀸𑀦𑀁, 𑀬𑀁 𑀉𑀡𑁆𑀳𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑁂𑀦 𑀘𑀸𑀢𑀺 𑀬𑁂𑀦 𑀢𑁂𑀚𑁄𑀕𑀢𑁂𑀦 ¶ 𑀓𑀼𑀧𑀺𑀢𑁂𑀦. 𑀲𑀦𑁆𑀢𑀧𑁆𑀧𑀢𑀻𑀢𑀺 𑀅𑀬𑀁 𑀓𑀸𑀬𑁄 𑀲𑀫𑀦𑁆𑀢𑀢𑁄 𑀢𑀧𑁆𑀧𑀢𑀺 𑀏𑀓𑀸𑀳𑀺𑀓𑀚𑀭𑀸𑀤𑀺𑀪𑀸𑀯𑁂𑀦 𑀉𑀲𑀼𑀫𑀚𑀸𑀢𑁄 𑀳𑁄𑀢𑀺. 𑀬𑁂𑀦 𑀘 𑀚𑀻𑀭𑀻𑀬𑀢𑀻𑀢𑀺 𑀬𑁂𑀦 𑀅𑀬𑀁 𑀓𑀸𑀬𑁄 𑀚𑀻𑀭𑀻𑀬𑀢𑀺, 𑀇𑀦𑁆𑀤𑁆𑀭𑀺𑀬𑀯𑁂𑀓𑀮𑁆𑀮𑀢𑀁 𑀩𑀮𑀧𑀭𑀺𑀓𑁆𑀔𑀬𑀁 𑀯𑀮𑀺𑀢𑀸𑀤𑀺𑀪𑀸𑀯𑀜𑁆𑀘 𑀧𑀸𑀧𑀼𑀡𑀸𑀢𑀺. 𑀬𑁂𑀦 𑀘 𑀧𑀭𑀺𑀟𑀬𑁆𑀳𑀢𑀻𑀢𑀺 𑀬𑁂𑀦 𑀓𑀼𑀧𑀺𑀢𑁂𑀦 𑀅𑀬𑀁 𑀓𑀸𑀬𑁄 𑀧𑀭𑀺𑀢𑁄 𑀟𑀬𑁆𑀳𑀢𑀺, 𑀲𑁄 𑀘 𑀧𑀼𑀕𑁆𑀕𑀮𑁄 𑀟𑀬𑁆𑀳𑀸𑀫𑀻𑀢𑀺 𑀲𑀢𑀥𑁄𑀢𑀲𑀧𑁆𑀧𑀺𑀕𑁄𑀲𑀻𑀢𑀘𑀦𑁆𑀤𑀦𑀸𑀤𑀺𑀮𑁂𑀧𑀜𑁆𑀘𑁂𑀯 𑀢𑀸𑀮𑀯𑀡𑁆𑀝𑀯𑀸𑀢𑀜𑁆𑀘 𑀧𑀘𑁆𑀘𑀸𑀲𑀻𑀲𑀢𑀺. 𑀬𑁂𑀦 𑀘 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀁 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀕𑀘𑁆𑀙𑀢𑀻𑀢𑀺 𑀬𑁂𑀦 𑀅𑀲𑀺𑀢𑀁 𑀯𑀸 𑀑𑀤𑀦𑀸𑀤𑀺, 𑀧𑀻𑀢𑀁 𑀯𑀸 𑀧𑀸𑀦𑀓𑀸𑀤𑀺, 𑀔𑀸𑀬𑀺𑀢𑀁 𑀯𑀸 𑀧𑀺𑀞𑀔𑀚𑁆𑀚𑀓𑀸𑀤𑀺, 𑀲𑀸𑀬𑀺𑀢𑀁 𑀯𑀸 𑀅𑀫𑁆𑀩𑀧𑀓𑁆𑀓𑀫𑀥𑀼𑀨𑀸𑀡𑀺𑀢𑀸𑀤𑀺 𑀲𑀫𑁆𑀫𑀤𑁂𑀯 𑀧𑀭𑀺𑀧𑀸𑀓𑀁 𑀕𑀘𑁆𑀙𑀢𑀺, 𑀭𑀲𑀸𑀤𑀺𑀪𑀸𑀯𑁂𑀦 𑀯𑀺𑀯𑁂𑀓𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀲𑀭𑀻𑀭𑀲𑁆𑀲 𑀧𑀓𑀢𑀺𑀉𑀲𑀼𑀫𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀉𑀡𑁆𑀳𑀪𑀸𑀯𑁄 𑀲𑀦𑁆𑀢𑀸𑀧𑁄, 𑀲𑀭𑀻𑀭𑀤𑀳𑀦𑀯𑀲𑁂𑀦 𑀧𑀯𑀢𑁆𑀢𑁄 𑀫𑀳𑀸𑀤𑀸𑀳𑁄 𑀧𑀭𑀺𑀤𑀸𑀳𑁄, 𑀲𑀢𑀯𑀸𑀭𑀁 𑀢𑀸𑀧𑁂𑀢𑁆𑀯𑀸 𑀉𑀤𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑁆𑀥𑀝𑀲𑀧𑁆𑀧𑀺 𑀲𑀢𑀥𑁄𑀢𑀲𑀧𑁆𑀧𑀺, 𑀭𑀲𑀭𑀼𑀥𑀺𑀭𑀫𑀁𑀲𑀫𑁂𑀤𑀅𑀝𑁆𑀞𑀺𑀅𑀝𑁆𑀞𑀺𑀫𑀺𑀜𑁆𑀚𑀲𑀼𑀓𑁆𑀓𑀸 𑀭𑀲𑀸𑀤𑀬𑁄. 𑀢𑀢𑁆𑀣 𑀧𑀼𑀭𑀺𑀫𑀸 𑀢𑀬𑁄 𑀢𑁂𑀚𑀸 𑀘𑀢𑀼𑀲𑀫𑀼𑀝𑁆𑀞𑀸𑀦𑀸, 𑀧𑀘𑁆𑀙𑀺𑀫𑁄 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁄𑀯.

𑀢𑁂𑀚𑁄𑀪𑀸𑀯𑀁 𑀕𑀢𑀢𑁆𑀢𑀸 𑀢𑁂𑀚𑁄𑀕𑀢𑀁. 𑀉𑀲𑁆𑀫𑀸𑀢𑀺 𑀉𑀡𑁆𑀳𑀸𑀓𑀸𑀭𑁄. 𑀉𑀲𑁆𑀫𑀸𑀯 𑀉𑀲𑁆𑀫𑀸𑀪𑀸𑀯𑀁 𑀕𑀢𑀢𑁆𑀢𑀸 𑀉𑀲𑁆𑀫𑀸𑀕𑀢𑀁. 𑀉𑀲𑀼𑀫𑀦𑁆𑀢𑀺 𑀘𑀡𑁆𑀟𑀉𑀲𑀼𑀫𑀁. 𑀢𑀤𑁂𑀯 𑀉𑀲𑀼𑀫𑀕𑀢𑀁, 𑀲𑀪𑀸𑀯𑁂𑀦𑁂𑀯 𑀉𑀲𑀼𑀫𑀪𑀸𑀯𑀁 𑀧𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀝𑁆𑀞𑀕𑁆𑀕𑀻𑀢𑀺 𑀓𑀝𑁆𑀞𑀼𑀧𑀸𑀤𑀸𑀦𑁄 𑀅𑀕𑁆𑀕𑀺. 𑀲𑀓𑀮𑀺𑀓𑀕𑁆𑀕𑀻𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀗𑁆𑀓𑀸𑀭𑀕𑁆𑀕𑀻𑀢𑀺 𑀓𑀘𑀯𑀭𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀅𑀕𑁆𑀕𑀺. 𑀇𑀦𑁆𑀤𑀕𑁆𑀕𑀻𑀢𑀺 𑀅𑀲𑀦𑀺𑀅𑀕𑁆𑀕𑀺. 𑀲𑀦𑁆𑀢𑀸𑀧𑁄𑀢𑀺 𑀚𑀸𑀮𑀸𑀬 𑀯𑀸 𑀯𑀻𑀢𑀘𑁆𑀘𑀺𑀢𑀗𑁆𑀕𑀸𑀭𑀸𑀦𑀁 𑀯𑀸 𑀲𑀦𑁆𑀢𑀸𑀧𑁄 ¶ . 𑀲𑀽𑀭𑀺𑀬𑀲𑀦𑁆𑀢𑀸𑀧𑁄𑀢𑀺 𑀆𑀢𑀧𑁄. 𑀓𑀝𑁆𑀞𑀲𑀦𑁆𑀦𑀺𑀘𑀬𑀲𑀦𑁆𑀢𑀸𑀧𑁄𑀢𑀺 𑀓𑀝𑁆𑀞𑀭𑀸𑀲𑀺𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀲𑀦𑁆𑀢𑀸𑀧𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀯𑀼𑀢𑁆𑀢𑀸 𑀘𑀸𑀢𑀺. 𑀘-𑀲𑀤𑁆𑀤𑁂𑀦 𑀧𑁂𑀢𑀕𑁆𑀕𑀺𑀓𑀧𑁆𑀧𑀯𑀺𑀦𑀸𑀲𑀓𑀕𑁆𑀕𑀺𑀦𑀺𑀭𑀬𑀕𑁆𑀕𑀺𑀆𑀤𑀺𑀓𑁂 𑀅𑀯𑀼𑀢𑁆𑀢𑁂𑀧𑀺 𑀲𑀫𑀼𑀘𑁆𑀘𑀺𑀦𑁄𑀢𑀺.

𑀯𑀸𑀬𑀁 𑀯𑀸𑀬𑀢𑁄𑀢𑀺 𑀏𑀢𑁆𑀣 𑀯𑀸𑀬𑀦𑀝𑁆𑀞𑁂𑀦 𑀯𑀸𑀬𑁄. 𑀓𑀺𑀫𑀺𑀤𑀁 𑀯𑀸𑀬𑀦𑀁 𑀦𑀸𑀫? 𑀯𑀺𑀢𑁆𑀣𑀫𑁆𑀪𑀦𑀁, 𑀲𑀫𑀼𑀤𑀻𑀭𑀡𑀁 𑀯𑀸, 𑀯𑀸𑀬𑀦𑀁 𑀕𑀫𑀦𑀦𑁆𑀢𑀺 𑀏𑀓𑁂. 𑀉𑀤𑁆𑀥𑀗𑁆𑀕𑀫𑀸 𑀯𑀸𑀢𑀸𑀢𑀺 𑀉𑀕𑁆𑀕𑀸𑀭𑀳𑀺𑀓𑁆𑀓𑀸𑀤𑀺𑀧𑀯𑀢𑁆𑀢𑀓𑀸 𑀉𑀤𑁆𑀥𑀁 𑀆𑀭𑁄𑀳𑀦𑀯𑀸𑀢𑀸. 𑀅𑀥𑁄𑀕𑀫𑀸 𑀯𑀸𑀢𑀸𑀢𑀺 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸𑀤𑀺𑀦𑀻𑀳𑀭𑀡𑀢𑀸 𑀅𑀥𑁄 𑀑𑀭𑁄𑀳𑀦𑀯𑀸𑀢𑀸. 𑀓𑀼𑀘𑁆𑀙𑀺𑀲𑀬𑀸 𑀯𑀸𑀢𑀸𑀢𑀺 𑀅𑀦𑁆𑀢𑀸𑀦𑀁 𑀩𑀳𑀺𑀯𑀸𑀢𑀸. 𑀓𑁄𑀝𑁆𑀞𑀸𑀲𑀬𑀸 𑀯𑀸𑀢𑀸𑀢𑀺 𑀅𑀦𑁆𑀢𑀸𑀦𑀁 𑀅𑀦𑁆𑀢𑁄𑀯𑀸𑀢𑀸. 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀺𑀦𑁄 𑀯𑀸𑀢𑀸𑀢𑀺 𑀥𑀫𑀦𑀻𑀚𑀸𑀮𑀸𑀦𑀼𑀲𑀸𑀭𑁂𑀦 𑀲𑀓𑀮𑀲𑀭𑀻𑀭𑁂 𑀅𑀗𑁆𑀕𑀫𑀗𑁆𑀕𑀸𑀦𑀺 𑀅𑀦𑀼𑀲𑀝𑀸 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀸𑀤𑀺𑀦𑀺𑀩𑁆𑀩𑀢𑁆𑀢𑀓𑀸 𑀯𑀸𑀢𑀸 ¶ . 𑀲𑀢𑁆𑀣𑀓𑀯𑀸𑀢𑀸𑀢𑀺 𑀲𑀦𑁆𑀥𑀺𑀩𑀦𑁆𑀥𑀦𑀸𑀦𑀺 𑀓𑀢𑁆𑀢𑀭𑀺𑀬𑀸 𑀙𑀺𑀦𑁆𑀤𑀦𑁆𑀢𑀸 𑀯𑀺𑀬 𑀧𑀯𑀢𑁆𑀢𑀯𑀸𑀢𑀸. 𑀔𑀼𑀭𑀓𑀯𑀸𑀢𑀸𑀢𑀺 𑀔𑀼𑀭𑁂𑀦 𑀯𑀺𑀬 𑀳𑀤𑀬𑀫𑀁𑀲𑀙𑁂𑀤𑀦𑀨𑀸𑀮𑀦𑀓𑀯𑀸𑀢𑀸. 𑀉𑀧𑁆𑀧𑀮𑀓𑀯𑀸𑀢𑀸𑀢𑀺 𑀳𑀤𑀬𑀫𑀁𑀲𑀲𑁆𑀲 𑀲𑀫𑀼𑀧𑁆𑀧𑀸𑀝𑀦𑀓𑀯𑀸𑀢𑀸. 𑀅𑀲𑁆𑀲𑀸𑀲𑁄𑀢𑀺 𑀅𑀦𑁆𑀢𑁄𑀧𑀯𑀺𑀲𑀦𑀓𑀦𑀸𑀲𑀺𑀓𑀸𑀯𑀸𑀢𑁄. 𑀧𑀲𑁆𑀲𑀸𑀲𑁄𑀢𑀺 𑀩𑀳𑀺𑀦𑀺𑀓𑁆𑀔𑀫𑀦𑀦𑀸𑀲𑀺𑀓𑀸𑀯𑀸𑀢𑁄. 𑀏𑀢𑁆𑀣 𑀘 𑀧𑀼𑀭𑀺𑀫𑀸 𑀲𑀩𑁆𑀩𑁂 𑀘𑀢𑀼𑀲𑀫𑀼𑀝𑁆𑀞𑀸𑀦𑀸, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀯.

𑀯𑀸𑀬𑁄𑀕𑀢𑀦𑁆𑀢𑀺 𑀯𑀸𑀬𑁄𑀯 𑀯𑀸𑀬𑁄𑀕𑀢𑀁, 𑀲𑀪𑀸𑀯𑁂𑀦𑁂𑀯 𑀯𑀸𑀬𑁄𑀪𑀸𑀯𑀁 𑀧𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀣𑀫𑁆𑀪𑀺𑀢𑀢𑁆𑀢𑀁 𑀭𑀽𑀧𑀲𑁆𑀲𑀸𑀢𑀺 𑀅𑀯𑀺𑀦𑀺𑀩𑁆𑀪𑁄𑀕𑀭𑀽𑀧𑀲𑁆𑀲 𑀣𑀫𑁆𑀪𑀺𑀢𑀪𑀸𑀯𑁄. 𑀧𑀼𑀭𑀢𑁆𑀣𑀺𑀫𑀸 𑀯𑀸𑀢𑀸𑀢𑀺 𑀧𑀼𑀭𑀢𑁆𑀣𑀺𑀫𑀤𑀺𑀲𑀢𑁄 𑀆𑀕𑀢𑀸 𑀯𑀸𑀢𑀸. 𑀧𑀘𑁆𑀙𑀺𑀫𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀭𑀚𑀸𑀤𑀻𑀲𑀼 𑀲𑀳 𑀭𑀚𑁂𑀦 𑀲𑀭𑀚𑀸, 𑀭𑀚𑀯𑀺𑀭𑀳𑀺𑀢𑀸 𑀲𑀼𑀤𑁆𑀥𑀸 𑀅𑀭𑀚𑀸. 𑀲𑀻𑀢𑀉𑀢𑀼𑀲𑀫𑀼𑀝𑁆𑀞𑀸𑀦𑀸, 𑀲𑀻𑀢𑀯𑀮𑀸𑀳𑀓𑀦𑁆𑀢𑀭𑁂 𑀯𑀸 𑀚𑀸𑀢𑀸 𑀲𑀻𑀢𑀸. 𑀉𑀡𑁆𑀳𑀉𑀢𑀼𑀲𑀫𑀼𑀝𑁆𑀞𑀸𑀦𑀸, 𑀉𑀡𑁆𑀳𑀯𑀮𑀸𑀳𑀓𑀦𑁆𑀢𑀭𑁂 𑀯𑀸 𑀚𑀸𑀢𑀸 𑀉𑀡𑁆𑀳𑀸. 𑀧𑀭𑀺𑀢𑁆𑀢𑀸𑀢𑀺 𑀫𑀦𑁆𑀤𑀸 𑀢𑀦𑀼𑀓𑀯𑀸𑀢𑀸. 𑀅𑀥𑀺𑀫𑀢𑁆𑀢𑀸𑀢𑀺 𑀩𑀮𑀯𑀯𑀸𑀢𑀸. 𑀓𑀸𑀴𑀸𑀢𑀺 𑀓𑀸𑀴𑀯𑀮𑀸𑀳𑀓𑀦𑁆𑀢𑀭𑁂 𑀲𑀫𑀼𑀝𑁆𑀞𑀺𑀢𑀸. 𑀬𑁂𑀳𑀺 𑀅𑀩𑁆𑀪𑀸𑀳𑀢𑁄 𑀙𑀯𑀺𑀯𑀡𑁆𑀡𑁄 𑀓𑀸𑀴𑀓𑁄 𑀳𑁄𑀢𑀺, 𑀢𑁂𑀲𑀁 𑀏𑀢𑀁 𑀅𑀥𑀺𑀯𑀘𑀦𑀦𑁆𑀢𑀺𑀧𑀺 𑀏𑀓𑁂. 𑀯𑁂𑀭𑀫𑁆𑀪𑀯𑀸𑀢𑀸𑀢𑀺 𑀬𑁄𑀚𑀦𑀢𑁄 𑀉𑀧𑀭𑀺 𑀯𑀸𑀬𑀦𑀯𑀸𑀢𑀸. 𑀧𑀓𑁆𑀔𑀯𑀸𑀢𑀸𑀢𑀺 𑀅𑀦𑁆𑀢𑀫𑀲𑁄 𑀫𑀓𑁆𑀔𑀺𑀓𑀸𑀬𑀧𑀺 𑀧𑀓𑁆𑀔𑀸𑀬𑀽𑀳𑀦𑀯𑀸𑀢𑀸. 𑀲𑀼𑀧𑀡𑁆𑀡𑀯𑀸𑀢𑀸𑀢𑀺 𑀕𑀭𑀼𑀴𑀯𑀸𑀢𑀸. 𑀓𑀸𑀫𑀁 𑀘𑁂𑀢𑁂𑀧𑀺 𑀧𑀓𑁆𑀔𑀯𑀸𑀢𑀸𑀯, 𑀉𑀲𑁆𑀲𑀤𑀯𑀲𑁂𑀦 𑀧𑀦 𑀯𑀺𑀲𑀼𑀁 𑀕𑀳𑀺𑀢𑀸. 𑀢𑀸𑀮𑀯𑀡𑁆𑀝𑀯𑀸𑀢𑀸𑀢𑀺 𑀢𑀸𑀮𑀯𑀡𑁆𑀡𑁂𑀳𑀺 𑀓𑀢𑁂𑀦, 𑀅𑀜𑁆𑀜𑁂𑀳𑀺 𑀯𑀸 𑀓𑀢𑁂𑀦 𑀓𑁂𑀦𑀘𑀺 𑀫𑀡𑁆𑀟𑀮𑀲𑀡𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀸𑀧𑀺𑀢𑀯𑀸𑀢𑀸. 𑀯𑀺𑀥𑀽𑀧𑀦𑀯𑀸𑀢𑀸𑀢𑀺 𑀩𑀻𑀚𑀦𑀧𑀢𑁆𑀢𑀓𑁂𑀦 𑀲𑀫𑀼𑀝𑁆𑀞𑀸𑀧𑀺𑀢𑀯𑀸𑀢𑀸. 𑀇𑀫𑀸𑀦𑀺 𑀘 𑀢𑀸𑀮𑀯𑀡𑁆𑀝𑀯𑀺𑀥𑀽𑀧𑀦𑀸𑀦𑀺 𑀅𑀦𑀼𑀧𑁆𑀧𑀦𑁆𑀦𑀫𑁆𑀧𑀺 𑀯𑀸𑀢𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀉𑀧𑁆𑀧𑀦𑁆𑀦𑀫𑁆𑀧𑀺 𑀧𑀭𑀺𑀯𑀢𑁆𑀢𑁂𑀦𑁆𑀢𑀺. 𑀇𑀥𑀸𑀧𑀺 𑀘-𑀲𑀤𑁆𑀤𑁄 𑀉𑀤𑀓𑀲𑀦𑁆𑀥𑀸𑀭𑀓𑀯𑀸𑀢𑀓𑀧𑁆𑀧𑀯𑀺𑀦𑀸𑀲𑀓𑀯𑀸𑀢𑀚𑀸𑀮𑀸𑀧𑁂𑀮𑁆𑀮𑀦𑀓𑀯𑀸𑀢𑀸𑀤𑀺𑀓𑁂 𑀅𑀯𑀼𑀢𑁆𑀢𑁂𑀧𑀺 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀏𑀢𑁆𑀣 𑀘 ‘‘𑀆𑀧𑀁 𑀫𑀜𑁆𑀜𑀢𑀻’’𑀢𑀺𑀆𑀤𑀻𑀲𑀼 𑀬𑀲𑁆𑀫𑀸 𑀢𑀻𑀳𑀺 𑀫𑀜𑁆𑀜𑀦𑀸𑀳𑀺 𑁋 ‘‘𑀅𑀳𑀁 𑀆𑀧𑁄𑀢𑀺 𑀫𑀜𑁆𑀜𑀢𑀺, 𑀫𑀫 𑀆𑀧𑁄𑀢𑀺 𑀫𑀜𑁆𑀜𑀢𑀻’’𑀢𑀺𑀆𑀤𑀺𑀦𑀸 𑀧𑀣𑀯𑀻𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦 𑀲𑀓𑁆𑀓𑀸 𑀫𑀜𑁆𑀜𑀦𑀸𑀯𑀺𑀪𑀸𑀕𑁄 𑀯𑀺𑀪𑀸𑀯𑁂𑀢𑀼𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸’’𑀢𑀺. 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀇𑀫𑁂𑀲𑀼 𑀢𑀻𑀲𑀼 𑀯𑀸𑀭𑁂𑀲𑀼 𑀬𑀣𑀸𑀭𑀳𑀁 𑀫𑀜𑁆𑀜𑀦𑀸𑀯𑀺𑀪𑀸𑀕𑁄 𑀯𑀺𑀪𑀸𑀯𑁂𑀢𑀩𑁆𑀩𑁄.

𑀏𑀢𑁆𑀢𑀸𑀯𑀢𑀸𑀢𑀺 ¶ 𑀏𑀢𑁆𑀢𑀓𑁂𑀦 𑀇𑀫𑀺𑀦𑀸 𑀘𑀢𑀼𑀯𑀸𑀭𑀧𑀭𑀺𑀫𑀸𑀡𑁂𑀦 𑀤𑁂𑀲𑀦𑀸𑀯𑀺𑀲𑁂𑀲𑁂𑀦. 𑀘-𑀲𑀤𑁆𑀤𑁄 𑀩𑁆𑀬𑀢𑀺𑀭𑁂𑀓𑁄. 𑀢𑁂𑀦 𑀯𑀓𑁆𑀔𑀫𑀸𑀦𑀁𑀬𑁂𑀯 𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀬𑁆𑀯𑀸𑀬𑀦𑁆𑀢𑀺 𑀬𑁄 𑀅𑀬𑀁 𑀮𑀓𑁆𑀔𑀡𑁄 𑀦𑀸𑀫 𑀳𑀸𑀭𑁄 𑀯𑀼𑀢𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁄 𑀧𑀦 𑀮𑀓𑁆𑀔𑀡𑀳𑀸𑀭𑁄 𑀬𑀁𑀮𑀓𑁆𑀔𑀡𑁄 𑀢𑀢𑁆𑀣 𑀯𑀼𑀢𑁆𑀢𑁄, 𑀢𑀁 𑀤𑀲𑁆𑀲𑁂𑀢𑀼𑀁 ¶ ‘‘𑀯𑀼𑀢𑁆𑀢𑀫𑁆𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀼𑀢𑁆𑀢𑀫𑁆𑀳𑀺 𑀏𑀓𑀥𑀫𑁆𑀫𑁂𑀢𑀺 𑀓𑀼𑀲𑀮𑀸𑀤𑀻𑀲𑀼 𑀔𑀦𑁆𑀥𑀸𑀤𑀻𑀲𑀼 𑀯𑀸 𑀬𑀲𑁆𑀫𑀺𑀁 𑀓𑀲𑁆𑀫𑀺𑀜𑁆𑀘𑀺 𑀏𑀓𑀥𑀫𑁆𑀫𑁂 𑀲𑀼𑀢𑁆𑀢𑁂 𑀲𑀭𑀽𑀧𑀢𑁄 𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀯𑀸 𑀓𑀣𑀺𑀢𑁂. 𑀬𑁂 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀸 𑀢𑁂𑀦𑀸𑀢𑀺 𑀬𑁂 𑀓𑁂𑀘𑀺 𑀥𑀫𑁆𑀫𑀸 𑀓𑀼𑀲𑀮𑀸𑀤𑀺𑀪𑀸𑀯𑁂𑀦, 𑀭𑀽𑀧𑀓𑁆𑀔𑀦𑁆𑀥𑀸𑀤𑀺𑀪𑀸𑀯𑁂𑀦 𑀯𑀸 𑀢𑁂𑀦 𑀯𑀼𑀢𑁆𑀢𑀥𑀫𑁆𑀫𑁂𑀦 𑀲𑀫𑀸𑀦𑀮𑀓𑁆𑀔𑀡𑀸. 𑀯𑀼𑀢𑁆𑀢𑀸 𑀪𑀯𑀦𑁆𑀢𑀺 𑀲𑀩𑁆𑀩𑁂𑀢𑀺 𑀲𑀩𑁆𑀩𑁂𑀧𑀺 𑀓𑀼𑀲𑀮𑀸𑀤𑀺𑀲𑀪𑀸𑀯𑀸, 𑀔𑀦𑁆𑀥𑀸𑀤𑀺𑀲𑀪𑀸𑀯𑀸 𑀯𑀸 𑀥𑀫𑁆𑀫𑀸 𑀲𑀼𑀢𑁆𑀢𑁂 𑀅𑀯𑀼𑀢𑁆𑀢𑀸𑀧𑀺 𑀢𑀸𑀬 𑀲𑀫𑀸𑀦𑀮𑀓𑁆𑀔𑀡𑀢𑀸𑀬 𑀯𑀼𑀢𑁆𑀢𑀸 𑀪𑀯𑀦𑁆𑀢𑀺, 𑀆𑀦𑁂𑀢𑁆𑀯𑀸 𑀲𑀁𑀯𑀡𑁆𑀡𑀦𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀢𑁆𑀣 𑀘 𑀏𑀓𑀮𑀓𑁆𑀔𑀡𑀸𑀢𑀺 𑀲𑀫𑀸𑀦𑀮𑀓𑁆𑀔𑀡𑀸 𑀯𑀼𑀢𑁆𑀢𑀸. 𑀢𑁂𑀦 𑀲𑀳𑀘𑀭𑀺𑀢𑀸 𑀲𑀫𑀸𑀦𑀓𑀺𑀘𑁆𑀘𑀢𑀸 𑀲𑀫𑀸𑀦𑀳𑁂𑀢𑀼𑀢𑀸 𑀲𑀫𑀸𑀦𑀨𑀮𑀢𑀸 𑀲𑀫𑀸𑀦𑀸𑀭𑀫𑁆𑀫𑀡𑀢𑀸𑀢𑀺 𑀏𑀯𑀫𑀸𑀤𑀻𑀳𑀺𑀧𑀺 𑀅𑀯𑀼𑀢𑁆𑀢𑀸𑀦𑀁 𑀯𑀼𑀢𑁆𑀢𑀸𑀦𑀁 𑀯𑀺𑀬 𑀦𑀺𑀤𑁆𑀥𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀻𑀢𑀺 𑀇𑀫𑀺𑀦𑀸 𑀧𑀓𑀸𑀭𑁂𑀦. 𑀢𑁂𑀦𑀸𑀳 ‘‘𑀏𑀯𑀁 𑀦𑁂𑀢𑁆𑀢𑀺𑀬𑀁 𑀮𑀓𑁆𑀔𑀡𑁄 𑀦𑀸𑀫 𑀳𑀸𑀭𑁄 𑀯𑀼𑀢𑁆𑀢𑁄’’𑀢𑀺, 𑀦𑁂𑀢𑁆𑀢𑀺𑀧𑀸𑀴𑀺𑀬𑀁 (𑀦𑁂𑀢𑁆𑀢𑀺. 𑁨𑁩) 𑀧𑀦 ‘‘𑀬𑁂 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀸 𑀓𑁂𑀘𑀺 𑀲𑁄 𑀳𑀸𑀭𑁄 𑀮𑀓𑁆𑀔𑀡𑁄 𑀦𑀸𑀫𑀸’’𑀢𑀺 𑀧𑀸𑀞𑁄 𑀆𑀕𑀢𑁄. 𑀢𑀲𑁆𑀲 𑀯𑀲𑁂𑀦𑀸𑀢𑀺 𑀢𑀲𑁆𑀲 𑀮𑀓𑁆𑀔𑀡𑀳𑀸𑀭𑀲𑁆𑀲 𑀯𑀲𑁂𑀦. 𑀭𑀽𑀧𑀮𑀓𑁆𑀔𑀡𑀁 𑀅𑀦𑀢𑀻𑀢𑀢𑁆𑀢𑀸𑀢𑀺 𑀭𑀼𑀧𑁆𑀧𑀦𑀲𑀪𑀸𑀯𑁂𑀦 𑀲𑀫𑀸𑀦𑀲𑀪𑀸𑀯𑀢𑁆𑀢𑀸. 𑀯𑀤𑀦𑁆𑀢𑁂𑀦 𑀪𑀕𑀯𑀢𑀸. 𑀏𑀢𑀸𑀢𑀺 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀤𑀺𑀝𑁆𑀞𑀻. 𑀏𑀢𑁆𑀣 𑀘 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀤𑀲𑁆𑀲𑀦𑁂𑀦𑁂𑀯 𑀲𑀓𑀮𑀭𑀽𑀧𑀯𑀢𑁆𑀣𑀼𑀓𑀸 𑀢𑀡𑁆𑀳𑀸𑀫𑀸𑀦𑀫𑀜𑁆𑀜𑀦𑀸𑀧𑀺 𑀤𑀲𑁆𑀲𑀺𑀢𑀸 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀢𑀲𑁆𑀫𑀺𑀁𑀬𑁂𑀯 𑀧𑀦𑀲𑁆𑀲 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬 𑀫𑀜𑁆𑀜𑀺𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀲𑀺𑀦𑁂𑀳𑀁 𑀫𑀸𑀦𑀜𑁆𑀘 𑀉𑀧𑁆𑀧𑀸𑀤𑀬𑀢𑁄 𑀢𑀡𑁆𑀳𑀸𑀫𑀸𑀦𑀫𑀜𑁆𑀜𑀦𑀸𑀧𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀅𑀣 𑀯𑀸 𑀧𑀣𑀯𑀺𑀁 𑀆𑀧𑀁 𑀢𑁂𑀚𑀁 𑀯𑀸𑀬𑀁 𑀫𑁂𑀢𑀺 𑀫𑀜𑁆𑀜𑀢𑀺 𑀅𑀪𑀺𑀦𑀦𑁆𑀤𑀢𑀻𑀢𑀺 𑀘 𑀯𑀤𑀦𑁆𑀢𑁂𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀓𑀮𑀭𑀽𑀧𑀯𑀢𑁆𑀣𑀼𑀓𑀸 𑀢𑀡𑁆𑀳𑀸𑀫𑀜𑁆𑀜𑀦𑀸 𑀢𑀤𑀦𑀼𑀲𑀸𑀭𑁂𑀦 𑀫𑀸𑀦𑀫𑀜𑁆𑀜𑀦𑀸𑀧𑀺 𑀯𑀼𑀢𑁆𑀢𑀸𑀯 𑀳𑁄𑀢𑀻𑀢𑀺 𑀏𑀯𑀫𑁆𑀧𑁂𑀢𑁆𑀣 𑀇𑀢𑀭𑀫𑀜𑁆𑀜𑀦𑀸𑀧𑀺 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸.

𑀆𑀧𑁄𑀯𑀸𑀭𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀽𑀢𑀯𑀸𑀭𑀸𑀤𑀺𑀯𑀡𑁆𑀡𑀦𑀸

𑁩. ‘‘𑀧𑀣𑀯𑀺𑀁 𑀫𑀜𑁆𑀜𑀢𑀺, 𑀧𑀣𑀯𑀺𑀬𑀸 𑀫𑀜𑁆𑀜𑀢𑀻’’𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀭𑀽𑀧𑀲𑁆𑀫𑀺𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀻𑀦𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀻𑀦𑀁 𑀦𑀺𑀤𑁆𑀥𑀸𑀭𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀏𑀯𑀁 𑀭𑀽𑀧𑀫𑀼𑀔𑁂𑀦 𑀲𑀗𑁆𑀔𑀸𑀭𑀯𑀢𑁆𑀣𑀼𑀓𑀁 𑀫𑀜𑁆𑀜𑀦𑀁 𑀯𑀢𑁆𑀯𑀸’’𑀢𑀺 ¶ . 𑀢𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀲𑀢𑁆𑀢𑁂𑀲𑀼𑀧𑀻𑀢𑀺 𑀢𑀤𑀼𑀧𑀸𑀤𑀸𑀦𑁂𑀲𑀼𑀧𑀺 𑀲𑀢𑁆𑀢𑁂𑀲𑀼 ¶ . 𑀥𑀸𑀢𑀽𑀲𑀽𑀢𑀺 𑀧𑀣𑀯𑀻𑀆𑀤𑀻𑀲𑀼 𑀘𑀢𑀽𑀲𑀼 𑀥𑀸𑀢𑀽𑀲𑀼. ‘‘𑀚𑀸𑀢𑀁 𑀪𑀽𑀢𑀁 𑀲𑀗𑁆𑀔𑀢’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁦𑁭; 𑀲𑀁. 𑀦𑀺. 𑁫.𑁩𑁭𑁯) 𑀪𑀽𑀢-𑀲𑀤𑁆𑀤𑁄 𑀉𑀧𑁆𑀧𑀸𑀤𑁂 𑀤𑀺𑀲𑁆𑀲𑀢𑀺, 𑀲𑀉𑀧𑀲𑀕𑁆𑀕𑁄 𑀧𑀦 ‘‘𑀧𑀪𑀽𑀢𑀫𑀭𑀺𑀬𑁄 𑀧𑀓𑀭𑁄𑀢𑀺 𑀧𑀼𑀜𑁆𑀜’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀧𑀼𑀮𑁂, ‘‘𑀬𑁂𑀪𑀼𑀬𑁆𑀬𑁂𑀦 𑀪𑀺𑀓𑁆𑀔𑀽𑀦𑀁 𑀧𑀭𑀺𑀪𑀽𑀢𑀭𑀽𑀧𑁄’’𑀢𑀺𑀆𑀤𑀻𑀲𑀼 𑀳𑀺𑀁𑀲𑀦𑁂, ‘‘𑀲𑀫𑁆𑀪𑀽𑀢𑁄 𑀲𑀸𑀡𑀯𑀸𑀲𑀻’’𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁪𑁫𑁦) 𑀧𑀜𑁆𑀜𑀢𑁆𑀢𑀺𑀬𑀁, ‘‘𑀅𑀪𑀺𑀪𑀽𑀢𑁄 𑀫𑀸𑀭𑁄 𑀯𑀺𑀚𑀺𑀢𑁄 𑀲𑀗𑁆𑀕𑀸𑀫𑁄’’𑀢𑀺𑀆𑀤𑀻𑀲𑀼 𑀯𑀺𑀫𑀣𑀦𑁂, ‘‘𑀧𑀭𑀸𑀪𑀽𑀢𑀭𑀽𑀧𑁄 𑀔𑁄 𑀅𑀬𑀁 𑀅𑀘𑁂𑀮𑁄 𑀧𑀸𑀣𑀺𑀓𑀧𑀼𑀢𑁆𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁨𑁩, 𑁨𑁫, 𑁩𑁧, 𑁩𑁨) 𑀧𑀭𑀸𑀚𑀬𑁂, ‘‘𑀅𑀦𑀼𑀪𑀽𑀢𑀁 𑀲𑀼𑀔𑀤𑀼𑀓𑁆𑀔’’𑀦𑁆𑀢𑀺𑀆𑀤𑀻𑀲𑀼 𑀯𑁂𑀤𑀺𑀬𑀦𑁂, ‘‘𑀯𑀺𑀪𑀽𑀢𑀁 𑀯𑀺𑀪𑀸𑀯𑀺𑀢𑀁 𑀧𑀜𑁆𑀜𑀸𑀬𑀸’’𑀢𑀺𑀆𑀤𑀻𑀲𑀼 𑀧𑀸𑀓𑀝𑀻𑀓𑀭𑀡𑁂 𑀤𑀺𑀲𑁆𑀲𑀢𑀺. 𑀢𑁂 𑀲𑀩𑁆𑀩𑁂 𑀭𑀼𑀓𑁆𑀔𑀸𑀤𑀻𑀲𑀽𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. ‘‘𑀓𑀸𑀮𑁄 𑀖𑀲𑀢𑀺 𑀪𑀽𑀢𑀸𑀦𑀻𑀢𑀺 (𑀚𑀸. 𑁧.𑁨.𑁧𑁯𑁦), 𑀪𑀽𑀢𑀸 𑀮𑁄𑀓𑁂 𑀲𑀫𑀼𑀲𑁆𑀲𑀬’’𑀦𑁆𑀢𑀺 (𑀤𑀻. 𑀦𑀺. 𑁨.𑁨𑁨𑁦; 𑀲𑀁. 𑀦𑀺. 𑁧.𑁧𑁮𑁬) 𑀘 𑀆𑀤𑀻𑀲𑀼 𑀅𑀯𑀺𑀲𑁂𑀲𑁂𑀦 𑀲𑀢𑁆𑀢𑀯𑀸𑀘𑀓𑁄𑀧𑀺 𑀪𑀽𑀢𑀲𑀤𑁆𑀤𑁄, 𑀉𑀧𑀭𑀺 𑀤𑁂𑀯𑀸𑀤𑀺𑀧𑀤𑁂𑀳𑀺 𑀲𑀢𑁆𑀢𑀯𑀺𑀲𑁂𑀲𑀸𑀦𑀁 𑀕𑀳𑀺𑀢𑀢𑁆𑀢𑀸 𑀇𑀥 𑀢𑀤𑀯𑀲𑀺𑀝𑁆𑀞𑀸 𑀪𑀽𑀢𑀲𑀤𑁆𑀤𑁂𑀦 𑀕𑀬𑁆𑀳𑀦𑁆𑀢𑀻𑀢𑀺 𑀆𑀳 ‘‘𑀦𑁄 𑀘 𑀔𑁄 𑀅𑀯𑀺𑀲𑁂𑀲𑁂𑀦𑀸’’𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀜𑁆𑀳𑀺 𑀳𑁂𑀝𑁆𑀞𑀸 𑀲𑀢𑁆𑀢𑀸 𑀇𑀥 𑀪𑀽𑀢𑀸𑀢𑀺 𑀅𑀥𑀺𑀧𑁆𑀧𑁂𑀢𑀸’’𑀢𑀺. 𑀬𑁄 𑀳𑀺 𑀲𑀢𑁆𑀢𑀦𑀺𑀓𑀸𑀬𑁄 𑀧𑀭𑀺𑀧𑀼𑀡𑁆𑀡𑀬𑁄𑀦𑀺𑀓𑁄 𑀘𑀢𑀽𑀳𑀺𑀧𑀺 𑀬𑁄𑀦𑀻𑀳𑀺 𑀦𑀺𑀩𑁆𑀩𑀢𑁆𑀢𑀦𑀸𑀭𑀳𑁄, 𑀢𑀢𑁆𑀣𑀸𑀬𑀁 𑀪𑀽𑀢𑀲𑀫𑀜𑁆𑀜𑀸 𑀅𑀡𑁆𑀟𑀚𑀸𑀤𑀺𑀯𑀲𑁂𑀦 𑀪𑀯𑀦𑀢𑁄.

𑀪𑀽𑀢𑁂𑀢𑀺 𑀯𑀼𑀢𑁆𑀢𑀤𑁂𑀲𑀆𑀤𑁂𑀲𑀺𑀢𑁂 𑀪𑀽𑀢𑁂. 𑀪𑀽𑀢𑀢𑁄 𑀲𑀜𑁆𑀚𑀸𑀦𑀸𑀢𑀻𑀢𑀺 𑀇𑀫𑀺𑀦𑀸 ‘‘𑀪𑀽𑀢𑀸’’𑀢𑀺 𑀮𑁄𑀓𑀯𑁄𑀳𑀸𑀭𑀁 𑀕𑀳𑁂𑀢𑁆𑀯𑀸 𑀬𑀣𑀸 𑀢𑀢𑁆𑀣 𑀢𑀡𑁆𑀳𑀸𑀤𑀺𑀫𑀜𑁆𑀜𑀦𑀸 𑀲𑀫𑁆𑀪𑀯𑀦𑁆𑀢𑀺, 𑀏𑀯𑀁 𑀯𑀺𑀧𑀭𑀻𑀢𑀲𑀜𑁆𑀜𑀸𑀬 𑀲𑀜𑁆𑀚𑀸𑀦𑀦𑀁 𑀧𑀓𑀸𑀲𑀻𑀬𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀳𑁂𑀝𑁆𑀞𑀸 ‘‘𑀧𑀣𑀯𑀺𑀢𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀦𑁆𑀢𑀺 𑀆𑀳 ‘‘𑀯𑀼𑀢𑁆𑀢𑀦𑀬𑀫𑁂𑀯𑀸’’𑀢𑀺. 𑀬𑀣𑀸 𑀲𑀼𑀤𑁆𑀥𑀸𑀯𑀸𑀲𑀸 𑀲𑀩𑁆𑀩𑀤𑀸 𑀅𑀪𑀸𑀯𑀢𑁄 𑀇𑀫𑀁 𑀤𑁂𑀲𑀦𑀁 𑀦𑀸𑀭𑀼𑀴𑁆𑀳𑀸, 𑀏𑀯𑀁 𑀦𑁂𑀭𑀬𑀺𑀓𑀸𑀧𑀺 𑀲𑀩𑁆𑀩𑀫𑀜𑁆𑀜𑀦𑀸𑀦𑀥𑀺𑀝𑁆𑀞𑀸𑀦𑀢𑁄. 𑀏𑀢𑁂𑀦𑁂𑀯 𑀏𑀓𑀘𑁆𑀘𑀧𑁂𑀢𑀸𑀦𑀫𑁆𑀧𑁂𑀢𑁆𑀣 𑀅𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀧𑀭𑁂 𑀧𑀦 ‘‘𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀥𑀺𑀝𑁆𑀞𑀸𑀦𑀢𑁄 𑀢𑁂𑀲𑀫𑁆𑀧𑁂𑀢𑁆𑀣 𑀲𑀗𑁆𑀕𑀳𑁄 𑀇𑀘𑁆𑀙𑀺𑀢𑁄𑀬𑁂𑀯𑀸’’𑀢𑀺 𑀯𑀤𑀦𑁆𑀢𑀺. ‘‘𑀲𑀫𑀗𑁆𑀕𑀺𑀪𑀽𑀢𑀁 𑀧𑀭𑀺𑀘𑀸𑀭𑁂𑀦𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦. 𑀭𑀚𑁆𑀚𑀢𑀻𑀢𑀺 ‘‘𑀲𑀼𑀪𑀸 𑀲𑀼𑀔𑀺𑀢𑀸’’𑀢𑀺 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑁂𑀦 𑀢𑀢𑁆𑀣 𑀭𑀸𑀕𑀁 𑀚𑀦𑁂𑀢𑀺. 𑀏𑀯𑀫𑁂𑀢𑁆𑀣 𑀭𑀚𑁆𑀚𑀦𑁆𑀢𑁄 𑀘 𑀦 𑀓𑁂𑀯𑀮𑀁 𑀤𑀲𑁆𑀲𑀦𑀯𑀲𑁂𑀦𑁂𑀯, 𑀲𑀯𑀦𑀸𑀤𑀺𑀯𑀲𑁂𑀦𑀧𑀺 𑀭𑀚𑁆𑀚𑀢𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀺𑀲𑁆𑀯𑀸𑀧𑀺…𑀧𑁂… 𑀉𑀢𑁆𑀯𑀸𑀧𑀻’’𑀢𑀺 𑀆𑀳. 𑀢𑀢𑁆𑀣 𑀖𑀸𑀬𑀦𑀸𑀤𑀺𑀯𑀲𑁂𑀦 𑀭𑀚𑁆𑀚𑀦𑀁 𑀢𑁂𑀳𑀺 𑀅𑀦𑀼𑀪𑀽𑀢𑀕𑀦𑁆𑀥𑀫𑀸𑀮𑀸𑀤𑀺𑀯𑀲𑁂𑀦 𑀘𑁂𑀯 𑀯𑀺𑀲𑀪𑀸𑀕𑀯𑀢𑁆𑀣𑀼𑀪𑀽𑀢𑀸𑀦𑀁 𑀢𑁂𑀲𑀁 ¶ 𑀧𑀭𑀺𑀪𑁄𑀕𑀯𑀲𑁂𑀦 𑀘 𑀬𑀣𑀸𑀦𑀼𑀪𑀯𑀁 𑀅𑀦𑀼𑀲𑁆𑀲𑀭𑀡𑀯𑀲𑁂𑀦 𑀘 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀪𑀽𑀢𑁂 𑀢𑀡𑁆𑀳𑀸𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀻𑀢𑀺 𑀯𑀼𑀢𑁆𑀢𑀦𑀬𑁂𑀦 𑀪𑀽𑀢𑁂 𑀧𑀝𑀺𑀘𑁆𑀘 𑀙𑀦𑁆𑀤𑀭𑀸𑀕𑀁 𑀚𑀦𑁂𑀦𑁆𑀢𑁄 𑀢𑁂𑀲𑀁 𑀧𑀝𑀺𑀧𑀢𑁆𑀢𑀺𑀁 𑀅𑀲𑁆𑀲𑀸𑀤𑁂𑀦𑁆𑀢𑁄 𑀅𑀪𑀺𑀦𑀦𑁆𑀤𑀦𑁆𑀢𑁄 𑀅𑀪𑀺𑀯𑀤𑀦𑁆𑀢𑁄 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀦𑁆𑀢𑁄 ‘‘𑀈𑀤𑀺𑀲𑀻 𑀅𑀯𑀢𑁆𑀣𑀸 𑀫𑀫 𑀅𑀦𑀸𑀕𑀢𑀫𑀤𑁆𑀥𑀸𑀦𑀁 𑀲𑀺𑀬𑀸’’𑀢𑀺𑀆𑀤𑀺𑀦𑀸 𑀯𑀸 𑀧𑀦 𑀦𑀬𑁂𑀦 𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀦𑀸𑀦𑁂𑀦𑁆𑀢𑁄 𑀪𑀽𑀢𑁂 𑀢𑀡𑁆𑀳𑀸𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀻𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀝𑀺𑀮𑀤𑁆𑀥𑀲𑁆𑀲 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀤𑀺𑀪𑀸𑀯𑀲𑁆𑀲, 𑀲𑀫𑁆𑀧𑀢𑁆𑀢𑀺𑀁 𑀯𑀺𑀧𑀢𑁆𑀢𑀺𑀦𑁆𑀢𑀺 𑀚𑀸𑀢𑀺𑀯𑀲𑁂𑀦 𑀉𑀓𑁆𑀓𑀝𑁆𑀝𑀦𑀺𑀳𑀻𑀦𑀢𑀁. 𑀤𑀳𑀢𑀻𑀢𑀺 𑀞𑀧𑁂𑀢𑀺. 𑀬𑁄 ¶ 𑀏𑀯𑀭𑀽𑀧𑁄 𑀫𑀸𑀦𑁄𑀢𑀺 𑀬𑁄 𑀏𑀲𑁄 ‘‘𑀅𑀬𑀁 𑀧𑀼𑀩𑁆𑀩𑁂 𑀫𑀬𑀸 𑀲𑀤𑀺𑀲𑁄, 𑀇𑀤𑀸𑀦𑀺 𑀅𑀬𑀁 𑀲𑁂𑀝𑁆𑀞𑁄 𑀅𑀬𑀁 𑀳𑀻𑀦𑀢𑀭𑁄’’𑀢𑀺 𑀉𑀧𑁆𑀧𑀦𑁆𑀦𑁄 𑀫𑀸𑀦𑁄. 𑀅𑀬𑀁 𑀯𑀼𑀘𑁆𑀘𑀢𑀺 𑀫𑀸𑀦𑀸𑀢𑀺𑀫𑀸𑀦𑁄𑀢𑀺 𑀅𑀬𑀁 𑀪𑀸𑀭𑀸𑀢𑀺𑀪𑀸𑀭𑁄 𑀯𑀺𑀬 𑀧𑀼𑀭𑀺𑀫𑀁 𑀲𑀤𑀺𑀲𑀫𑀸𑀦𑀁 𑀉𑀧𑀸𑀤𑀸𑀬 𑀫𑀸𑀦𑀸𑀢𑀺𑀫𑀸𑀦𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄.

𑀦𑀺𑀘𑁆𑀘𑀸𑀢𑀺𑀆𑀤𑀻𑀲𑀼 𑀉𑀧𑁆𑀧𑀸𑀤𑀸𑀪𑀸𑀯𑀢𑁄 𑀦𑀺𑀘𑁆𑀘𑀸, 𑀫𑀭𑀡𑀸𑀪𑀸𑀯𑀢𑁄 𑀥𑀼𑀯𑀸, 𑀲𑀩𑁆𑀩𑀤𑀸 𑀪𑀸𑀯𑀢𑁄 𑀲𑀲𑁆𑀲𑀢𑀸. 𑀅𑀦𑀺𑀘𑁆𑀘𑀧𑀝𑀺𑀧𑀓𑁆𑀔𑀢𑁄 𑀯𑀸 𑀦𑀺𑀘𑁆𑀘𑀸, 𑀣𑀺𑀭𑀪𑀸𑀯𑀢𑁄 𑀥𑀼𑀯𑀸, 𑀲𑀲𑁆𑀲𑀢𑀺𑀲𑀫𑀢𑀸𑀬 𑀲𑀲𑁆𑀲𑀢𑀸, 𑀚𑀭𑀸𑀤𑀺𑀯𑀲𑁂𑀦 𑀯𑀺𑀧𑀭𑀺𑀡𑀸𑀫𑀲𑁆𑀲 𑀅𑀪𑀸𑀯𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸𑀢𑀺 𑀫𑀜𑁆𑀜𑀢𑀺. 𑀲𑀩𑁆𑀩𑁂 𑀲𑀢𑁆𑀢𑀸𑀢𑀺 𑀑𑀝𑁆𑀞𑀕𑁄𑀡𑀕𑀤𑁆𑀭𑀪𑀸𑀤𑀬𑁄 𑀅𑀦𑀯𑀲𑁂𑀲𑀸 𑀲𑀜𑁆𑀚𑀦𑀝𑁆𑀞𑁂𑀦 𑀲𑀢𑁆𑀢𑀸. 𑀲𑀩𑁆𑀩𑁂 𑀧𑀸𑀡𑀸𑀢𑀺 ‘‘𑀏𑀓𑀺𑀦𑁆𑀤𑁆𑀭𑀺𑀬𑁄 𑀧𑀸𑀡𑁄 𑀤𑁆𑀯𑀺𑀦𑁆𑀤𑁆𑀭𑀺𑀬𑁄 𑀧𑀸𑀡𑁄’’𑀢𑀺𑀆𑀤𑀺𑀯𑀲𑁂𑀦 𑀯𑀼𑀢𑁆𑀢𑀸 𑀅𑀦𑀯𑀲𑁂𑀲𑀸 𑀧𑀸𑀡𑀦𑀝𑁆𑀞𑁂𑀦 𑀧𑀸𑀡𑀸. 𑀲𑀩𑁆𑀩𑁂 𑀪𑀽𑀢𑀸𑀢𑀺 𑀅𑀦𑀯𑀲𑁂𑀲𑀸 𑀅𑀡𑁆𑀟𑀓𑁄𑀲𑀸𑀤𑀻𑀲𑀼 𑀪𑀽𑀢𑀸 𑀲𑀜𑁆𑀚𑀸𑀢𑀸𑀢𑀺 𑀪𑀽𑀢𑀸. 𑀲𑀩𑁆𑀩𑁂 𑀚𑀻𑀯𑀸𑀢𑀺 𑀲𑀸𑀮𑀺𑀬𑀯𑀕𑁄𑀥𑀽𑀫𑀸𑀤𑀬𑁄 𑀅𑀦𑀯𑀲𑁂𑀲𑀸 𑀚𑀻𑀯𑀦𑀝𑁆𑀞𑁂𑀦 𑀚𑀻𑀯𑀸. 𑀢𑁂𑀲𑀼 𑀳𑀺 𑀲𑁄 𑀯𑀺𑀭𑀽𑀳𑀪𑀸𑀯𑁂𑀦 𑀚𑀻𑀯𑀲𑀜𑁆𑀜𑀻. 𑀅𑀯𑀲𑀸 𑀅𑀩𑀮𑀸 𑀅𑀯𑀻𑀭𑀺𑀬𑀸𑀢𑀺 𑀢𑁂𑀲𑀁 𑀅𑀢𑁆𑀢𑀦𑁄 𑀯𑀲𑁄 𑀯𑀸 𑀩𑀮𑀁 𑀯𑀸 𑀯𑀻𑀭𑀺𑀬𑀁 𑀯𑀸 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀦𑀺𑀬𑀢𑀺𑀲𑀗𑁆𑀕𑀢𑀺𑀪𑀸𑀯𑀧𑀭𑀺𑀡𑀢𑀸𑀢𑀺 𑀏𑀢𑁆𑀣 𑀦𑀺𑀬𑀢𑀻𑀢𑀺. 𑀦𑀺𑀬𑀢𑀢𑀸, 𑀅𑀘𑁆𑀙𑁂𑀚𑁆𑀚𑀲𑀼𑀢𑁆𑀢𑀸𑀯𑀼𑀢𑀅𑀪𑁂𑀚𑁆𑀚𑀫𑀡𑀺 𑀯𑀺𑀬 𑀅𑀯𑀺𑀚𑀳𑀺𑀢𑀧𑀓𑀢𑀺𑀢𑀸. 𑀲𑀗𑁆𑀕𑀢𑀻𑀢𑀺 𑀙𑀦𑁆𑀦𑀁 𑀅𑀪𑀺𑀚𑀸𑀢𑀻𑀦𑀁 𑀢𑀢𑁆𑀣 𑀲𑀗𑁆𑀕𑀫𑁄. 𑀪𑀸𑀯𑁄𑀢𑀺 𑀲𑀪𑀸𑀯𑁄𑀬𑁂𑀯, 𑀓𑀡𑁆𑀟𑀓𑀸𑀦𑀁 𑀢𑀺𑀔𑀺𑀡𑀢𑀸, 𑀓𑀧𑀺𑀝𑁆𑀞𑀨𑀮𑀸𑀤𑀻𑀦𑀁 𑀧𑀭𑀺𑀫𑀡𑁆𑀟𑀮𑀸𑀤𑀺𑀢𑀸, 𑀫𑀺𑀕𑀧𑀓𑁆𑀔𑀻𑀦𑀁 𑀯𑀺𑀘𑀺𑀢𑁆𑀢𑀯𑀡𑁆𑀡𑀸𑀤𑀺𑀢𑀸𑀢𑀺 𑀏𑀯𑀫𑀸𑀤𑀺𑀓𑁄. 𑀏𑀯𑀁 𑀦𑀺𑀬𑀢𑀺𑀬𑀸 𑀘 𑀲𑀗𑁆𑀕𑀢𑀺𑀬𑀸 𑀘 𑀪𑀸𑀯𑁂 𑀘 𑀧𑀭𑀺𑀡𑀢𑀸 𑀦𑀸𑀦𑀧𑁆𑀧𑀓𑀸𑀭𑀢𑀁 𑀧𑀢𑁆𑀢𑀸. 𑀬𑁂𑀦 𑀳𑀺 𑀬𑀣𑀸 𑀪𑀯𑀺𑀢𑀩𑁆𑀩𑀁, 𑀲𑁄 𑀢𑀣𑁂𑀯 𑀪𑀯𑀢𑀺. 𑀬𑁂𑀦 𑀦 𑀪𑀯𑀺𑀢𑀩𑁆𑀩𑀁, 𑀲𑁄 𑀦 𑀪𑀯𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀙𑀲𑁆𑀯𑁂𑀯𑀸𑀪𑀺𑀚𑀸𑀢𑀻𑀲𑀽𑀢𑀺 𑀓𑀡𑁆𑀳𑀸𑀪𑀺𑀚𑀸𑀢𑀺𑀆𑀤𑀻𑀲𑀼 𑀙𑀲𑀼 𑀏𑀯 𑀅𑀪𑀺𑀚𑀸𑀢𑀻𑀲𑀼 𑀞𑀢𑁆𑀯𑀸 𑀲𑀼𑀔𑀜𑁆𑀘 𑀤𑀼𑀓𑁆𑀔𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀺, 𑀅𑀜𑁆𑀜𑀸 𑀲𑀼𑀔𑀤𑀼𑀓𑁆𑀔𑀪𑀽𑀫𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀯𑀸-𑀲𑀤𑁆𑀤𑁂𑀦 𑀅𑀦𑁆𑀢𑀸𑀤𑀺𑀪𑁂𑀤𑁂 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑁂 𑀲𑀗𑁆𑀕𑀡𑁆𑀳𑀸𑀢𑀺.

𑀉𑀧𑀧𑀢𑁆𑀢𑀺𑀦𑁆𑀢𑀺 ¶ 𑀇𑀫𑀺𑀦𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀢𑁆𑀢𑀦𑀺𑀓𑀸𑀬𑁂 𑀪𑀽𑀢𑀸𑀦𑀁 𑀲𑀳𑀩𑁆𑀬𑀢𑀁 𑀆𑀓𑀗𑁆𑀔𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀼𑀔𑀼𑀧𑁆𑀧𑀢𑁆𑀢𑀺𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀢𑀢𑁆𑀣 𑀢𑀢𑁆𑀣 𑀉𑀧𑁆𑀧𑀦𑁆𑀦𑀲𑁆𑀲 𑀲𑀼𑀔𑀼𑀧𑁆𑀧𑀢𑁆𑀢𑀺𑀁. 𑀏𑀓𑀘𑁆𑀘𑁂 𑀪𑀽𑀢𑁂 𑀦𑀺𑀘𑁆𑀘𑀸𑀢𑀺𑀆𑀤𑀺𑀦𑀸 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀤𑀺𑀝𑁆𑀞𑀺𑀁 𑀤𑀲𑁆𑀲𑁂𑀢𑀺. 𑀅𑀳𑀫𑁆𑀧𑀺 𑀪𑀽𑀢𑁂𑀲𑀼 𑀅𑀜𑁆𑀜𑀢𑀭𑁄𑀲𑁆𑀫𑀻𑀢𑀺 𑀇𑀫𑀺𑀦𑀸 𑀧𑀦 𑀘𑀢𑀼𑀢𑁆𑀣𑀁 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀯𑀸𑀤𑀁 𑀤𑀲𑁆𑀲𑁂𑀢𑀺.

𑀬𑀢𑁄 𑀓𑀼𑀢𑁄𑀘𑀻𑀢𑀺 𑀇𑀲𑁆𑀲𑀭𑀧𑀼𑀭𑀺𑀲𑀸𑀤𑀺𑀪𑁂𑀤𑀢𑁄 𑀬𑀢𑁄 𑀓𑀼𑀢𑁄𑀘𑀺. 𑀏𑀓𑀸 𑀢𑀡𑁆𑀳𑀸𑀫𑀜𑁆𑀜𑀦𑀸𑀯 𑀮𑀩𑁆𑀪𑀢𑀻𑀢𑀺 𑀇𑀥𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀇𑀢𑀭𑀫𑀜𑁆𑀜𑀦𑀸𑀦𑀫𑁆𑀧𑀺 𑀲𑀫𑁆𑀪𑀯𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀬𑁂𑀯 𑀪𑀽𑀢𑁂 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀅𑀪𑀺𑀦𑀦𑁆𑀤𑀢𑀻𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀢𑁆𑀢𑀸 𑀆𑀳 ‘‘𑀯𑀼𑀢𑁆𑀢𑀦𑀬𑀫𑁂𑀯𑀸’’𑀢𑀺. 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 ‘‘𑀬𑁄 𑀪𑀽𑀢𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀦𑀪𑀽𑀢𑁂 𑀔𑀦𑁆𑀥𑁂 𑀧𑀭𑀺𑀚𑀸𑀦𑀸𑀢𑀺, 𑀲𑁄 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀅𑀧𑀭𑁂 𑀧𑀦𑁂𑀢𑁆𑀣 𑀪𑀽𑀢𑀕𑀸𑀫𑁄𑀧𑀺 𑀪𑀽𑀢-𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑁄𑀢𑀺 𑀭𑀼𑀓𑁆𑀔𑀸𑀤𑀺𑀯𑀲𑁂𑀦𑀧𑀺 ¶ 𑀫𑀜𑁆𑀜𑀦𑀸𑀯𑀺𑀪𑀸𑀕𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀺, 𑀢𑀣𑀸 𑀫𑀳𑀸𑀪𑀽𑀢𑀯𑀲𑁂𑀦𑀧𑀺, 𑀢𑀁 𑀅𑀝𑁆𑀞𑀓𑀣𑀸𑀬𑀁 𑀦𑀢𑁆𑀣𑀺.

𑀪𑀽𑀫𑀺𑀯𑀺𑀲𑁂𑀲𑀸𑀤𑀺𑀦𑀸 𑀪𑁂𑀤𑁂𑀦𑀸𑀢𑀺 𑀪𑀽𑀫𑀺𑀯𑀺𑀲𑁂𑀲𑀉𑀧𑀧𑀢𑁆𑀢𑀺𑀯𑀺𑀲𑁂𑀲𑀸𑀤𑀺𑀯𑀺𑀪𑀸𑀕𑁂𑀦. 𑀇𑀤𑁆𑀥𑀺𑀬𑀸𑀢𑀺 𑀧𑀼𑀜𑁆𑀜𑀯𑀺𑀲𑁂𑀲𑀦𑀺𑀩𑁆𑀩𑀢𑁆𑀢𑁂𑀦 𑀆𑀦𑀼𑀪𑀸𑀯𑁂𑀦. 𑀓𑀺𑀜𑁆𑀘𑀸𑀧𑀺 𑀤𑁂𑀯-𑀲𑀤𑁆𑀤𑁄 ‘‘𑀯𑀺𑀤𑁆𑀥𑁂 𑀯𑀺𑀕𑀢𑀯𑀮𑀸𑀳𑀓𑁂 𑀤𑁂𑀯𑁂’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁧𑁦; 𑁩.𑁧𑁦𑁨; 𑁫.𑁧𑁪𑁬-𑁧𑁪𑁮; 𑀫. 𑀦𑀺. 𑁧.𑁪𑁮𑁬; 𑀅. 𑀦𑀺. 𑁧𑁦.𑁧𑁫; 𑀇𑀢𑀺𑀯𑀼. 𑁨𑁭) 𑀅𑀚𑀝𑀸𑀓𑀸𑀲𑁂 𑀆𑀕𑀢𑁄, ‘‘𑀤𑁂𑀯𑁄 𑀘 𑀣𑁄𑀓𑀁 𑀣𑁄𑀓𑀁 𑀨𑀼𑀲𑀸𑀬𑀢𑀻’’𑀢𑀺𑀆𑀤𑀻𑀲𑀼 𑀫𑁂𑀖𑁂, ‘‘𑀅𑀬𑀜𑁆𑀳𑀺 𑀤𑁂𑀯 𑀓𑀼𑀫𑀸𑀭𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁪, 𑁩𑁫, 𑁩𑁬) 𑀔𑀢𑁆𑀢𑀺𑀬𑁂 𑀆𑀕𑀢𑁄, ‘‘𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑁄 𑀲𑀫𑀗𑁆𑀕𑀺𑀪𑀽𑀢𑁄 𑀧𑀭𑀺𑀘𑀸𑀭𑁂𑀢𑀺 𑀤𑁂𑀯𑁄 𑀫𑀜𑁆𑀜𑁂’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁮𑁩; 𑀫. 𑀦𑀺. 𑁨.𑁨𑁧𑁧) 𑀯𑀺𑀬 𑀇𑀥 𑀉𑀧𑀧𑀢𑁆𑀢𑀺𑀤𑁂𑀯𑁂𑀲𑀼 𑀆𑀕𑀢𑁄, 𑀤𑁂𑀯-𑀲𑀤𑁆𑀤𑁂𑀦 𑀧𑀦 𑀯𑀢𑁆𑀢𑀩𑁆𑀩𑀲𑀢𑁆𑀢𑁂 𑀅𑀦𑀯𑀲𑁂𑀲𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀢𑀢𑁄 𑀇𑀥𑀸𑀥𑀺𑀧𑁆𑀧𑁂𑀢𑁂 𑀤𑀲𑁆𑀲𑁂𑀢𑀼𑀁 ‘‘𑀢𑁂 𑀢𑀺𑀯𑀺𑀥𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁂𑀲𑀸 𑀙 𑀓𑀸𑀫𑀸𑀯𑀘𑀭𑀸 𑀇𑀥 𑀤𑁂𑀯𑀸𑀢𑀺 𑀅𑀥𑀺𑀧𑁆𑀧𑁂𑀢𑀸 𑀇𑀢𑀭𑁂𑀲𑀁 𑀧𑀤𑀦𑁆𑀢𑀭𑁂𑀳𑀺 𑀦𑀺𑀯𑀢𑁆𑀢𑀺𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀽𑀢𑀸 𑀤𑁂𑀯𑀸𑀢𑀺 𑀕𑀳𑀺𑀢𑁂𑀲𑀼 𑀲𑀢𑁆𑀢𑁂𑀲𑀼 𑀢𑀡𑁆𑀳𑀸𑀤𑀺𑀫𑀜𑁆𑀜𑀦𑀸𑀦𑀁 𑀧𑀯𑀢𑁆𑀢𑀸𑀓𑀸𑀭𑁂𑀦𑀧𑀺 𑀢𑀺𑀯𑀺𑀥𑀮𑀓𑁆𑀔𑀡𑀦𑁆𑀢𑀺 𑀆𑀳 ‘‘𑀪𑀽𑀢𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸’’𑀢𑀺.

‘‘𑀅𑀜𑁆𑀜𑀢𑀭𑀲𑁆𑀲 𑀉𑀧𑀸𑀲𑀓𑀲𑁆𑀲 𑀧𑀚𑀸𑀧𑀢𑀺 𑀅𑀪𑀺𑀭𑀽𑀧𑀸 𑀳𑁄𑀢𑀻’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧𑁬𑁮) 𑀧𑀚𑀸𑀧𑀢𑀺-𑀲𑀤𑁆𑀤𑁄 𑀖𑀭𑀡𑀺𑀬𑀁 𑀆𑀕𑀢𑁄, ‘‘𑀧𑀚𑀸𑀧𑀢𑀺 𑀓𑀸𑀫𑀤𑀸𑀬𑀻 𑀲𑀼𑀯𑀡𑁆𑀡𑀯𑀡𑁆𑀡𑀸 𑀫𑁂 𑀧𑀚𑀸 𑀳𑁄𑀢𑀽’’𑀢𑀺𑀆𑀤𑀻𑀲𑀼 𑀤𑀺𑀝𑁆𑀞𑀺𑀕𑀢𑀺𑀓𑀧𑀭𑀺𑀓𑀧𑁆𑀧𑀺𑀢𑁂, ‘‘𑀧𑀚𑀸𑀧𑀢𑀺𑀲𑁆𑀲 𑀤𑁂𑀯𑀭𑀸𑀚𑀲𑁆𑀲 ¶ 𑀥𑀚𑀕𑁆𑀕𑀁 𑀉𑀮𑁆𑀮𑁄𑀓𑁂𑀬𑁆𑀬𑀸𑀣𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁪𑁯) 𑀤𑁂𑀯𑀚𑁂𑀝𑁆𑀞𑀓𑁂, 𑀇𑀥 𑀧𑀦 𑀅𑀥𑀺𑀧𑀢𑀻𑀢𑀺 𑀯𑀤𑀦𑁆𑀢𑀺, 𑀢𑀁 𑀉𑀧𑀭𑀺 𑀩𑁆𑀭𑀳𑁆𑀫𑀼𑀦𑁄 𑀕𑀬𑁆𑀳𑀫𑀸𑀦𑀢𑁆𑀢𑀸 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁. 𑀤𑁂𑀯𑀸𑀦𑀦𑁆𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀺𑀤𑁂𑀯𑀸𑀦𑀁. 𑀫𑀳𑀸𑀭𑀸𑀚𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀓𑁆𑀓𑀲𑀼𑀬𑀸𑀫𑀲𑀦𑁆𑀢𑀼𑀲𑁆𑀲𑀺𑀢𑀲𑀼𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀦𑁄 𑀕𑀳𑀺𑀢𑀸. 𑀢𑁂𑀲𑀦𑁆𑀢𑀺 𑀫𑀳𑀸𑀭𑀸𑀚𑀸𑀤𑀻𑀦𑀁. 𑀲𑀢𑁆𑀢𑀲𑀗𑁆𑀔𑀸𑀢𑀸𑀬𑀸𑀢𑀺 𑀓𑀸𑀫𑀪𑀽𑀫𑀺𑀬𑀁 𑀲𑀢𑁆𑀢𑀲𑀗𑁆𑀔𑀸𑀢𑀸𑀬. 𑀧𑀚𑀸𑀧𑀢𑀺𑀦𑁆𑀢𑀺 𑀧𑀚𑀸𑀧𑀢𑀺𑀪𑀸𑀯𑀁. 𑀧𑀚𑀸𑀧𑀢𑀺𑀪𑀸𑀯𑁂𑀦 𑀳𑀺 𑀫𑀸𑀦𑀁 𑀚𑀧𑁆𑀧𑁂𑀦𑁆𑀢𑁄 𑀧𑀚𑀸𑀧𑀢𑀺𑀁 𑀫𑀸𑀦𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀻𑀢𑀺 𑀯𑀼𑀢𑁆𑀢𑁄.

𑀏𑀓𑀸 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀯 𑀬𑀼𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁, 𑀧𑀚𑀸𑀧𑀢𑀺𑀦𑁄 𑀧𑀦 𑀲𑀫𑀺𑀧𑀢𑀁 𑀲𑀮𑁄𑀓𑀢𑀁 𑀯𑀸 𑀆𑀓𑀗𑁆𑀔𑀢𑁄, 𑀢𑀣𑀸𑀪𑀸𑀯𑀸𑀬 𑀘𑀺𑀢𑁆𑀢𑀁 𑀧𑀡𑀺𑀤𑀳𑀢𑁄, 𑀢𑀣𑀸𑀮𑀤𑁆𑀥𑀩𑁆𑀩𑀸𑀬 𑀲𑀫𑁆𑀧𑀢𑁆𑀢𑀺𑀬𑀸 𑀅𑀢𑁆𑀢𑀦𑁄 𑀲𑁂𑀬𑁆𑀬𑀸𑀤𑀺𑀪𑀸𑀯𑀁 𑀤𑀳𑀢𑁄 𑀘 𑀢𑀡𑁆𑀳𑀸𑀫𑀸𑀦𑀫𑀜𑁆𑀜𑀦𑀸𑀧𑀺 𑀲𑀫𑁆𑀪𑀯𑀦𑁆𑀢𑀻𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀬𑁂 𑀘 𑀥𑀫𑁆𑀫𑀸𑀢𑀺 𑀆𑀬𑀼𑀯𑀡𑁆𑀡𑀸𑀤𑀺𑀓𑁂 𑀯𑀤𑀢𑀺. 𑀧𑀚𑀸𑀧𑀢𑀺𑀦𑁆𑀢𑀺 𑀏𑀢𑁆𑀣𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀇𑀢𑀭𑀫𑀜𑁆𑀜𑀦𑀸𑀦𑀫𑁆𑀧𑀺 𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀩𑁆𑀭𑀽𑀳𑀺𑀢𑁄𑀢𑀺 ¶ 𑀧𑀭𑀺𑀯𑀼𑀤𑁆𑀥𑁄. 𑀕𑀼𑀡𑀯𑀺𑀲𑁂𑀲𑁂𑀳𑀻𑀢𑀺 𑀛𑀸𑀦𑀸𑀤𑀻𑀳𑀺 𑀯𑀺𑀲𑀺𑀝𑁆𑀞𑁂𑀳𑀺 𑀕𑀼𑀡𑁂𑀳𑀺 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀢𑀸𑀬. 𑀩𑁆𑀭𑀳𑁆𑀫-𑀲𑀤𑁆𑀤𑀲𑁆𑀲 𑀲𑀢𑀺𑀧𑀺 𑀅𑀯𑀺𑀲𑁂𑀲𑀢𑁄 𑀯𑀺𑀲𑀺𑀝𑁆𑀞𑀯𑀸𑀘𑀓𑀢𑁆𑀢𑁂 𑀬𑀢𑁆𑀣 𑀬𑀢𑁆𑀣 𑀧𑀦𑀲𑁆𑀲 𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑀸𑀤𑀺𑀭𑀽𑀧𑀸 𑀧𑀯𑀢𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀳𑀲𑁆𑀲𑁄𑀢𑀺 𑀲𑀳𑀲𑁆𑀲𑀺𑀬𑀸 𑀮𑁄𑀓𑀥𑀸𑀢𑀼𑀬𑀸 𑀅𑀥𑀺𑀧𑀢𑀺𑀪𑀽𑀢𑁄. 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑁄𑀢𑀺 𑀧𑀡𑀻𑀢𑁂𑀦 𑀧𑀞𑀫𑀛𑀸𑀦𑁂𑀦 𑀦𑀺𑀩𑁆𑀩𑀢𑁆𑀢𑁄, 𑀧𑀞𑀫𑀚𑁆𑀛𑀸𑀦𑀪𑀽𑀫𑀺𑀬𑀁 𑀯𑀸 𑀧𑀞𑀫𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁄. 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸 𑀧𑀥𑀸𑀦𑀕𑁆𑀕𑀳𑀡𑁂𑀦 𑀅𑀧𑁆𑀧𑀥𑀸𑀦𑀸𑀦𑀫𑁆𑀧𑀺 𑀓𑁂𑀦𑀘𑀺 𑀲𑀫𑁆𑀩𑀦𑁆𑀥𑁂𑀦 𑀕𑀳𑀺𑀢𑀪𑀸𑀯𑀲𑀺𑀤𑁆𑀥𑀺𑀢𑁄. 𑀏𑀢𑁆𑀣 𑀘 𑀩𑁆𑀭𑀳𑁆𑀫𑀸𑀢𑀺 𑀫𑀳𑀸𑀩𑁆𑀭𑀳𑁆𑀫𑀸 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀳𑀺 𑀯𑀡𑁆𑀡𑀯𑀦𑁆𑀢𑀢𑀸𑀬 𑀘𑁂𑀯 𑀤𑀻𑀖𑀸𑀬𑀼𑀓𑀢𑀸𑀬 𑀘 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀻𑀳𑀺 𑀫𑀳𑀦𑁆𑀢𑁄 𑀩𑁆𑀭𑀳𑁆𑀫𑀸𑀢𑀺 𑀫𑀳𑀸𑀩𑁆𑀭𑀳𑁆𑀫𑀸, 𑀢𑀲𑁆𑀲 𑀧𑀦 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑁂 𑀞𑀺𑀢𑀸𑀢𑀺 𑀩𑁆𑀭𑀳𑁆𑀫𑀧𑀼𑀭𑁄𑀳𑀺𑀢𑀸, 𑀧𑀭𑀺𑀲𑀸𑀬𑀁 𑀪𑀯𑀸 𑀧𑀭𑀺𑀘𑀸𑀭𑀓𑀸𑀢𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀉𑀓𑁆𑀓𑀝𑁆𑀞𑁂𑀓𑀧𑀼𑀕𑁆𑀕𑀮𑀪𑀸𑀯𑀢𑁄 𑀧𑀚𑀸𑀧𑀢𑀺𑀲𑁆𑀫𑀺𑀁 𑀯𑀺𑀬 𑀩𑁆𑀭𑀳𑁆𑀫𑀦𑀺 𑀫𑀜𑁆𑀜𑀦𑀸 𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀚𑀸𑀧𑀢𑀺𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀢𑀣𑀸 𑀳𑀺 𑀩𑀳𑀼𑀧𑀼𑀕𑁆𑀕𑀮𑀪𑀸𑀯𑀲𑀸𑀫𑀜𑁆𑀜𑀢𑁄 𑀆𑀪𑀲𑁆𑀲𑀭𑀯𑀸𑀭𑀸𑀤𑀻𑀦𑀁 𑀪𑀽𑀢𑀯𑀸𑀭𑀲𑀤𑀺𑀲𑀢𑀸 𑀯𑀼𑀢𑁆𑀢𑀸.

𑀬𑀣𑀸𑀯𑀼𑀢𑁆𑀢𑀧𑀪𑀸𑀬 𑀆𑀪𑀸𑀲𑀦𑀲𑀻𑀮𑀸 𑀯𑀸 𑀆𑀪𑀲𑁆𑀲𑀭𑀸. 𑀏𑀓𑀢𑀮𑀯𑀸𑀲𑀺𑀦𑁄𑀢𑀺 𑀇𑀤𑀁 𑀛𑀸𑀦𑀦𑁆𑀢𑀭𑀪𑀽𑀫𑀻𑀦𑀁 𑀯𑀺𑀬 𑀳𑁂𑀝𑁆𑀞𑀼𑀧𑀭𑀺𑀪𑀸𑀯𑀸𑀪𑀸𑀯𑀢𑁄 𑀯𑀼𑀢𑁆𑀢𑀁, 𑀞𑀸𑀦𑀸𑀦𑀺 ¶ 𑀧𑀦 𑀦𑁂𑀲𑀁 𑀧𑀭𑀺𑀘𑁆𑀙𑀺𑀦𑁆𑀦𑀸𑀦𑁂𑀯. 𑀆𑀪𑀲𑁆𑀲𑀭𑁂𑀳𑀺 𑀧𑀭𑀺𑀢𑁆𑀢𑀸 𑀆𑀪𑀸 𑀏𑀢𑁂𑀲𑀦𑁆𑀢𑀺 𑀧𑀭𑀺𑀢𑁆𑀢𑀸𑀪𑀸. 𑀅𑀧𑁆𑀧𑀫𑀸𑀡𑀸 𑀆𑀪𑀸 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀫𑀸𑀡𑀸𑀪𑀸.

𑀲𑀼𑀪𑀸𑀢𑀺 𑀲𑁄𑀪𑀦𑀸 𑀧𑀪𑀸. 𑀓𑀜𑁆𑀘𑀦𑀧𑀺𑀡𑁆𑀟𑁄 𑀯𑀺𑀬 𑀲𑀲𑁆𑀲𑀺𑀭𑀺𑀓𑀸 𑀓𑀜𑁆𑀘𑀦𑀧𑀺𑀡𑁆𑀟𑀲𑀲𑁆𑀲𑀺𑀭𑀺𑀓𑀸. 𑀢𑀢𑁆𑀣 𑀲𑁄𑀪𑀦𑀸𑀬 𑀧𑀪𑀸𑀬 𑀓𑀺𑀡𑁆𑀡𑀸 𑀲𑀼𑀪𑀸𑀓𑀺𑀡𑁆𑀡𑀸𑀢𑀺 𑀯𑀢𑁆𑀢𑀩𑁆𑀩𑁂 𑀪𑀸-𑀲𑀤𑁆𑀤𑀲𑁆𑀲 𑀭𑀲𑁆𑀲𑀢𑁆𑀢𑀁, 𑀅𑀦𑁆𑀢𑀺𑀫-𑀡-𑀓𑀸𑀭𑀲𑁆𑀲 𑀳-𑀓𑀸𑀭𑀜𑁆𑀘 𑀓𑀢𑁆𑀯𑀸 ‘‘𑀲𑀼𑀪𑀓𑀺𑀡𑁆𑀳𑀸’’𑀢𑀺 𑀯𑀼𑀢𑁆𑀢𑀸. 𑀲𑀼𑀪𑀸𑀢𑀺 𑀘 𑀏𑀓𑀕𑁆𑀖𑀦𑀸 𑀦𑀺𑀘𑁆𑀘𑀮𑀸 𑀧𑀪𑀸 𑀯𑀼𑀘𑁆𑀘𑀢𑀺, 𑀧𑀭𑀺𑀢𑁆𑀢𑀸 𑀲𑀼𑀪𑀸 𑀏𑀢𑁂𑀲𑀦𑁆𑀢𑀺 𑀧𑀭𑀺𑀢𑁆𑀢𑀲𑀼𑀪𑀸. 𑀅𑀧𑁆𑀧𑀫𑀸𑀡𑀸 𑀲𑀼𑀪𑀸 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀫𑀸𑀡𑀲𑀼𑀪𑀸.

𑀯𑀺𑀧𑀼𑀮𑀨𑀮𑀸𑀢𑀺 𑀯𑀺𑀧𑀼𑀮𑀲𑀦𑁆𑀢𑀲𑀼𑀔𑀸𑀬𑀼𑀯𑀡𑁆𑀡𑀸𑀤𑀺𑀨𑀮𑀸.

𑀲𑀢𑀺𑀧𑀺 𑀤𑁂𑀯𑀩𑁆𑀭𑀳𑁆𑀫𑀸𑀤𑀻𑀦𑀁 𑀧𑀼𑀜𑁆𑀜𑀨𑀮𑁂𑀦 𑀛𑀸𑀦𑀨𑀮𑁂𑀦 𑀘 𑀧𑀝𑀺𑀧𑀓𑁆𑀔𑀸𑀪𑀺𑀪𑀯𑁂 𑀬𑁂𑀲𑀁 𑀧𑀦 𑀧𑀼𑀣𑀼𑀚𑁆𑀚𑀦𑀅𑀲𑀜𑁆𑀜𑀲𑀢𑁆𑀢𑁂𑀲𑀼 𑀅𑀪𑀺𑀪𑀽𑀯𑁄𑀳𑀸𑀭𑁄 𑀧𑀸𑀓𑀝𑁄 𑀦𑀺𑀭𑀼𑀴𑁆𑀳𑁄 𑀘, 𑀢𑁂𑀲𑀁 𑀯𑀲𑁂𑀦𑀸𑀬𑀁 𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀲𑀜𑁆𑀜𑀪𑀯𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀬𑀣𑀸 𑀧𑀚𑀸𑀧𑀢𑀺𑀯𑀸𑀭𑁂 ‘‘𑀇𑀥𑁂𑀓𑀘𑁆𑀘𑁄 𑀧𑀚𑀸𑀧𑀢𑀺𑀲𑁆𑀫𑀺𑀁𑀬𑁂𑀯𑀸’’𑀢𑀺𑀆𑀤𑀺𑀦𑀸 𑀫𑀜𑁆𑀜𑀦𑀸𑀧𑀯𑀢𑁆𑀢𑀺 𑀤𑀲𑁆𑀲𑀺𑀢𑀸, 𑀢𑀣𑀸 𑀇𑀥𑀸𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 𑀲𑀓𑁆𑀓𑀸𑀢𑀺 𑀆𑀳 ‘‘𑀲𑁂𑀲𑀁 𑀧𑀚𑀸𑀧𑀢𑀺𑀯𑀸𑀭𑁂 𑀯𑀼𑀢𑁆𑀢𑀦𑀬𑀫𑁂𑀯𑀸’’𑀢𑀺.

𑀪𑀽𑀢𑀯𑀸𑀭𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀯𑀸𑀭𑀸𑀤𑀺𑀯𑀡𑁆𑀡𑀦𑀸

𑁪. 𑀏𑀯𑀁 ¶ 𑀲𑀢𑁆𑀢𑀯𑀲𑁂𑀦 𑀪𑀽𑀫𑀺𑀓𑁆𑀓𑀫𑀤𑀲𑁆𑀲𑀦𑁂 𑀲𑀼𑀤𑁆𑀥𑀸𑀯𑀸𑀲𑀸𑀦𑀁 𑀅𑀕𑁆𑀕𑀳𑀡𑁂 𑀓𑀸𑀭𑀡𑀁 𑀦𑀺𑀤𑁆𑀥𑀸𑀭𑁂𑀦𑁆𑀢𑁄 ‘‘𑀏𑀯𑀁 𑀪𑀕𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀸𑀕𑀸𑀫𑀺𑀔𑀻𑀡𑀸𑀲𑀯𑀸𑀢𑀺 𑀅𑀦𑀸𑀕𑀸𑀫𑀺𑀦𑁄 𑀘 𑀔𑀻𑀡𑀸𑀲𑀯𑀸 𑀘. 𑀓𑀺𑀜𑁆𑀘𑀸𑀧𑀺 𑀲𑀼𑀤𑁆𑀥𑀸𑀯𑀸𑀲𑀸 𑀅𑀢𑁆𑀣𑁂𑀯 𑀅𑀦𑁂𑀓𑀓𑀧𑁆𑀧𑀲𑀳𑀲𑁆𑀲𑀸𑀬𑀼𑀓𑀸, 𑀉𑀓𑁆𑀓𑀁𑀲𑀧𑀭𑀺𑀘𑁆𑀙𑁂𑀤𑀢𑁄 𑀧𑀦 𑀲𑁄𑀴𑀲𑀓𑀧𑁆𑀧𑀲𑀳𑀲𑁆𑀲𑀸𑀬𑀼𑀓𑀸𑀯, 𑀦 𑀢𑀢𑁄 𑀧𑀭𑀦𑁆𑀢𑀺 𑀆𑀳 ‘‘𑀓𑀢𑀺𑀧𑀬𑀓𑀧𑁆𑀧𑀲𑀳𑀲𑁆𑀲𑀸𑀬𑀼𑀓𑀸’’𑀢𑀺. 𑀓𑀸𑀫𑀭𑀽𑀧𑀪𑀯𑁂𑀲𑀼 𑀧𑀯𑀢𑁆𑀢𑀫𑀸𑀦𑀸𑀧𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀺𑀥𑀫𑁆𑀫𑀸 𑀅𑀭𑀽𑀧𑀸𑀯𑀘𑀭𑀪𑀸𑀯𑀢𑁄 𑀢𑀁𑀪𑀽𑀫𑀺𑀓𑀯𑁄𑀳𑀸𑀭𑀁 𑀦 𑀮𑀪𑀦𑁆𑀢𑀻𑀢𑀺 ‘‘𑀢𑀢𑁆𑀭𑀽𑀧𑀧𑀦𑁆𑀦𑀸𑀬𑁂𑀯𑀸’’𑀢𑀺 𑀅𑀯𑀥𑀸𑀭𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀪𑀺𑀪𑀽𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸 𑀬𑀣𑀸𑀭𑀳𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑁂𑀢𑁆𑀣 𑀯𑀡𑁆𑀡𑀯𑀦𑁆𑀢𑀢𑀸𑀤𑀺 𑀲𑀫𑁆𑀪𑀯𑀢𑀻𑀢𑀺. 𑀧𑀚𑀸𑀧𑀢𑀺𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ¶ 𑀏𑀢𑁆𑀣 ‘‘𑀅𑀳𑀫𑀲𑁆𑀫𑀺 𑀅𑀭𑀽𑀧𑁄 𑀧𑀳𑀻𑀦𑀭𑀽𑀧𑀧𑀝𑀺𑀖𑀲𑀜𑁆𑀜𑁄’’𑀢𑀺𑀆𑀤𑀺𑀦𑀸 𑀫𑀸𑀦𑀫𑀜𑁆𑀜𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀯𑀸𑀭𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀺𑀝𑁆𑀞𑀲𑀼𑀢𑀯𑀸𑀭𑀸𑀤𑀺𑀯𑀡𑁆𑀡𑀦𑀸

𑁫. 𑀭𑀽𑀧𑀫𑀼𑀔𑁂𑀦 𑀫𑀜𑁆𑀜𑀦𑀸𑀯𑀢𑁆𑀣𑀼𑀤𑀲𑁆𑀲𑀦𑀁 𑀲𑀗𑁆𑀔𑁂𑀧𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀯𑀺𑀢𑁆𑀣𑀸𑀭𑀢𑁄𑀧𑀻’’𑀢𑀺. 𑀢𑀫𑁆𑀧𑀺 𑀳𑀺 ‘‘𑀬𑀢𑁆𑀣 𑀦𑁂𑀯 𑀧𑀣𑀯𑀻, 𑀦 𑀆𑀧𑁄, 𑀦 𑀢𑁂𑀚𑁄, 𑀦 𑀯𑀸𑀬𑁄, 𑀦 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦’’𑀦𑁆𑀢𑀺𑀆𑀤𑀺𑀕𑁆𑀕𑀳𑀡𑀁 𑀯𑀺𑀬 𑀲𑀗𑁆𑀔𑁂𑀧𑀢𑁄 𑀧𑀜𑁆𑀘𑀯𑁄𑀓𑀸𑀭𑀪𑀯𑀤𑀲𑁆𑀲𑀦𑀁 𑀳𑁄𑀢𑀻𑀢𑀺.

𑀤𑀺𑀝𑁆𑀞𑀦𑁆𑀢𑀺 𑀬𑀁 𑀘𑀓𑁆𑀔𑀼𑀤𑁆𑀯𑀸𑀭𑁂𑀦 𑀓𑀢𑀤𑀲𑁆𑀲𑀦𑀓𑀺𑀭𑀺𑀬𑀸𑀲𑀫𑀸𑀧𑀦𑀁, 𑀬𑀜𑁆𑀘 𑀘𑀓𑁆𑀔𑀼 𑀤𑁆𑀯𑀬𑀁 𑀧𑀲𑁆𑀲𑀢𑀺 𑀧𑀲𑁆𑀲𑀺𑀲𑁆𑀲𑀢𑀺 𑀲𑀢𑀺 𑀲𑀫𑁆𑀪𑀯𑁂 𑀧𑀲𑁆𑀲𑁂𑀬𑁆𑀬, 𑀢𑀁 𑀲𑀩𑁆𑀩𑀓𑀸𑀮𑀦𑁆𑀢𑀺 𑀯𑀺𑀲𑁂𑀲𑀯𑀘𑀦𑀺𑀘𑁆𑀙𑀸𑀬 𑀅𑀪𑀸𑀯𑀢𑁄 𑀤𑀺𑀝𑁆𑀞𑀦𑁆𑀢𑁂𑀯 𑀯𑀼𑀢𑁆𑀢𑀁 𑀬𑀣𑀸 ‘‘𑀤𑀼𑀤𑁆𑀥’’𑀦𑁆𑀢𑀺. 𑀢𑁂𑀦𑀸𑀳 ‘‘𑀭𑀽𑀧𑀸𑀬𑀢𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀅𑀬𑀜𑁆𑀘 𑀦𑀬𑁄 𑀲𑀼𑀢𑀸𑀤𑀻𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑁄. 𑀲𑀢𑁆𑀢𑀸𑀢𑀺 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀸 𑀯𑀺𑀲𑀢𑁆𑀢𑀸𑀢𑀺 𑀲𑀢𑁆𑀢𑀸. 𑀲𑀜𑁆𑀚𑀦𑀝𑁆𑀞𑁂𑀦 𑀲𑀸𑀫𑀜𑁆𑀜𑀲𑀤𑁆𑀤𑁄𑀧𑀺 𑀘𑁂𑀲 𑀲𑀢𑁆𑀢-𑀲𑀤𑁆𑀤𑁄 ‘‘𑀇𑀢𑁆𑀣𑀺𑀭𑀽𑀧𑁂’’𑀢𑀺 𑀯𑀺𑀲𑀬𑀯𑀺𑀲𑁂𑀲𑀺𑀢𑀢𑁆𑀢𑀸 𑀇𑀥 𑀧𑀼𑀭𑀺𑀲𑀯𑀸𑀘𑀓𑁄 𑀤𑀝𑁆𑀞𑀩𑁆𑀩𑁄. 𑀭𑀢𑁆𑀢𑀸𑀢𑀺 𑀯𑀢𑁆𑀣𑀁 𑀯𑀺𑀬 𑀭𑀗𑁆𑀕𑀚𑀸𑀢𑁂𑀦 𑀘𑀺𑀢𑁆𑀢𑀲𑁆𑀲 𑀯𑀺𑀧𑀭𑀺𑀡𑀸𑀫𑀓𑀸𑀭𑀓𑁂𑀦 𑀙𑀦𑁆𑀤𑀭𑀸𑀕𑁂𑀦 𑀭𑀢𑁆𑀢𑀸 𑀲𑀸𑀭𑀢𑁆𑀢𑀸. 𑀕𑀺𑀤𑁆𑀥𑀸𑀢𑀺 𑀅𑀪𑀺𑀓𑀗𑁆𑀔𑀦𑀲𑀪𑀸𑀯𑁂𑀦 𑀅𑀪𑀺𑀕𑀺𑀚𑁆𑀛𑀦𑁂𑀦 𑀕𑀺𑀤𑁆𑀥𑀸 𑀕𑁂𑀥𑀁 𑀆𑀧𑀦𑁆𑀦𑀸. 𑀕𑀥𑀺𑀢𑀸𑀢𑀺 𑀕𑀦𑁆𑀣𑀺𑀢𑀸 𑀯𑀺𑀬 𑀮𑁄𑀪𑁂𑀦 𑀤𑀼𑀫𑁆𑀫𑁄𑀘𑀦𑀻𑀬𑀪𑀸𑀯𑁂𑀦 𑀆𑀭𑀫𑁆𑀫𑀡𑁂 𑀧𑀝𑀺𑀩𑀤𑁆𑀥𑀸. 𑀫𑀼𑀘𑁆𑀙𑀺𑀢𑀸𑀢𑀺 𑀓𑀺𑀮𑁂𑀲𑀯𑀲𑁂𑀦 𑀯𑀺𑀲𑀜𑁆𑀜𑀻𑀪𑀽𑀢𑀸 𑀯𑀺𑀬 𑀅𑀦𑀜𑁆𑀜𑀓𑀺𑀘𑁆𑀘𑀸 𑀫𑀼𑀘𑁆𑀙𑀁 𑀫𑁄𑀳𑀁 𑀆𑀧𑀦𑁆𑀦𑀸. 𑀅𑀚𑁆𑀛𑁄𑀲𑀦𑁆𑀦𑀸𑀢𑀺 𑀯𑀺𑀲𑀬𑁂 𑀅𑀜𑁆𑀜𑀲𑀸𑀥𑀸𑀭𑀡𑁂 𑀯𑀺𑀬 𑀓𑀢𑁆𑀯𑀸 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀯𑀺𑀬 𑀞𑀺𑀢𑀸. 𑀇𑀫𑀺𑀦𑀸𑀢𑀺 𑀲𑀼𑀯𑀡𑁆𑀡𑀯𑀡𑁆𑀡𑀸𑀤𑀺𑀆𑀓𑀸𑀭𑁂𑀦. 𑀫𑀗𑁆𑀕𑀮𑀁 𑀅𑀫𑀗𑁆𑀕𑀮𑀦𑁆𑀢𑀺 𑀈𑀤𑀺𑀲𑀁 𑀤𑀺𑀝𑁆𑀞𑀁 𑀫𑀗𑁆𑀕𑀮𑀁, 𑀈𑀤𑀺𑀲𑀁 𑀅𑀫𑀗𑁆𑀕𑀮𑀦𑁆𑀢𑀺 ¶ . 𑀭𑀽𑀧𑀲𑁆𑀫𑀺𑀁 𑀅𑀢𑁆𑀢𑀸𑀦𑀁 𑀲𑀫𑀦𑀼𑀧𑀲𑁆𑀲𑀦𑀦𑀬𑁂𑀦𑀸𑀢𑀺 𑀇𑀤𑀁 𑀯𑁂𑀤𑀦𑀸𑀤𑀺𑀅𑀭𑀽𑀧𑀥𑀫𑁆𑀫𑁂, 𑀭𑀽𑀧𑀸𑀬𑀢𑀦𑀯𑀺𑀦𑀺𑀫𑀼𑀢𑁆𑀢𑀲𑀩𑁆𑀩𑀥𑀫𑁆𑀫𑁂 𑀯𑀸 𑀅𑀢𑁆𑀢𑀢𑁄 𑀕𑀳𑁂𑀢𑁆𑀯𑀸 𑀢𑀢𑁄 𑀅𑀚𑁆𑀛𑀢𑁆𑀢𑀺𑀓𑀁, 𑀩𑀸𑀳𑀺𑀭𑀁 𑀯𑀸 𑀭𑀽𑀧𑀸𑀬𑀢𑀦𑀁 𑀢𑀲𑁆𑀲𑁄𑀓𑀸𑀲𑀪𑀸𑀯𑁂𑀦 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 ‘‘𑀲𑁄 𑀔𑁄 𑀧𑀦 𑀫𑁂 𑀅𑀬𑀁 𑀅𑀢𑁆𑀢𑀸 𑀇𑀫𑀲𑁆𑀫𑀺𑀁 𑀭𑀽𑀧𑀸𑀬𑀢𑀦𑁂’’𑀢𑀺 𑀫𑀜𑁆𑀜𑀦𑁆𑀢𑁄 𑀤𑀺𑀝𑁆𑀞𑀲𑁆𑀫𑀺𑀁 𑀫𑀜𑁆𑀜𑀢𑀻𑀢𑀺 𑀇𑀫𑀁 𑀦𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀧𑀣𑀯𑀺𑀢𑁄 𑀫𑀜𑁆𑀜𑀢𑀻’’𑀢𑀺𑀆𑀤𑀻𑀲𑀼 𑀬𑀣𑀸 ‘‘𑀲𑀉𑀧𑀓𑀭𑀡𑀲𑁆𑀲 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 ¶ 𑀯𑀸’’𑀢𑀺𑀆𑀤𑀺𑀫𑀜𑁆𑀜𑀦𑀸𑀧𑀯𑀢𑁆𑀢𑀺 𑀤𑀲𑁆𑀲𑀺𑀢𑀸, 𑀏𑀯𑀁 ‘‘𑀤𑀺𑀝𑁆𑀞𑀢𑁄 𑀫𑀜𑁆𑀜𑀢𑀻’’𑀢𑀺𑀆𑀤𑀻𑀲𑀼 𑀲𑀓𑁆𑀓𑀸 𑀢𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀆𑀳 ‘‘𑀢𑁂𑀲𑀁 𑀧𑀣𑀯𑀻𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺.

𑀆𑀳𑀘𑁆𑀘𑀸𑀢𑀺 𑀯𑀺𑀲𑀬𑀁 𑀅𑀦𑁆𑀯𑀸𑀬, 𑀧𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀉𑀧𑀕𑀦𑁆𑀢𑁆𑀯𑀸’’𑀢𑀺. 𑀅𑀜𑁆𑀜𑀫𑀜𑁆𑀜𑀲𑀁𑀲𑀺𑀮𑁂𑀲𑁂𑀢𑀺 𑀘𑀓𑁆𑀔𑀼𑀭𑀽𑀧𑀲𑁄𑀢𑀲𑀤𑁆𑀤𑀸 𑀯𑀺𑀬 𑀤𑀼𑀭𑁂 𑀅𑀳𑀼𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀅𑀮𑁆𑀮𑀺𑀬𑀦𑁂.

𑀫𑀦𑀲𑀸 𑀯𑀺𑀜𑁆𑀜𑀸𑀢𑀁 𑀓𑁂𑀯𑀮𑀦𑁆𑀢𑀺 𑀅𑀢𑁆𑀣𑁄. 𑀇𑀢𑀭𑀸𑀦𑀺𑀧𑀺 𑀳𑀺 𑀫𑀦𑀲𑀸 𑀯𑀺𑀜𑁆𑀜𑀸𑀬𑀦𑁆𑀢𑀻𑀢𑀺. 𑀲𑁂𑀲𑁂𑀳𑀺 𑀲𑀢𑁆𑀢𑀳𑀺 𑀆𑀬𑀢𑀦𑁂𑀳𑀺 𑀧𑀜𑁆𑀜𑀢𑁆𑀢𑀺𑀬𑀸 𑀅𑀲𑀗𑁆𑀕𑀳𑀺𑀢𑀢𑁆𑀢𑀸 𑀢𑀫𑁆𑀧𑀺 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀥𑀫𑁆𑀫𑀸𑀭𑀫𑁆𑀫𑀡𑀲𑁆𑀲 𑀯𑀸’’𑀢𑀺 𑀯𑀼𑀢𑁆𑀢𑀁. 𑀤𑁆𑀯𑀻𑀲𑀼𑀧𑀺 𑀯𑀺𑀓𑀧𑁆𑀧𑁂𑀲𑀼 𑀮𑁄𑀓𑀼𑀢𑁆𑀢𑀭𑀸𑀦𑀫𑁆𑀧𑀺 𑀲𑀗𑁆𑀕𑀳𑁄 𑀆𑀧𑀦𑁆𑀦𑁄𑀢𑀺 𑀆𑀳 ‘‘𑀇𑀥 𑀧𑀦 𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀫𑁂𑀯 𑀮𑀩𑁆𑀪𑀢𑀻’’𑀢𑀺. 𑀯𑀺𑀢𑁆𑀣𑀸𑀭𑁄𑀢𑀺 𑀫𑀜𑁆𑀜𑀦𑀸𑀦𑀁 𑀧𑀯𑀢𑁆𑀢𑀦𑀸𑀓𑀸𑀭𑀯𑀺𑀢𑁆𑀣𑀸𑀭𑁄. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀲𑀼𑀢𑀯𑀸𑀭𑀸𑀤𑀻𑀲𑀼.

𑀤𑀺𑀝𑁆𑀞𑀲𑀼𑀢𑀯𑀸𑀭𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀏𑀓𑀢𑁆𑀢𑀯𑀸𑀭𑀸𑀤𑀺𑀯𑀡𑁆𑀡𑀦𑀸

𑁬. 𑀲𑀫𑀸𑀧𑀦𑁆𑀦𑀓𑀯𑀸𑀭𑁂𑀦𑀸𑀢𑀺 𑀲𑀫𑀸𑀧𑀦𑁆𑀦𑀓𑀧𑁆𑀧𑀯𑀢𑁆𑀢𑀺𑀬𑀸, 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀛𑀸𑀦𑀧𑁆𑀧𑀯𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀲𑀸 𑀳𑀺 𑀏𑀓𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂 𑀏𑀓𑀸𑀓𑀸𑀭𑁂𑀦 𑀧𑀯𑀢𑁆𑀢𑀢𑀻𑀢𑀺 𑀓𑀢𑁆𑀯𑀸 ‘‘𑀏𑀓𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀜𑁆𑀘 𑀓𑀢𑁆𑀯𑀸 𑀯𑀺𑀧𑀸𑀓𑀚𑁆𑀛𑀸𑀦𑀧𑁆𑀧𑀯𑀢𑁆𑀢𑀺𑀧𑀺 𑀇𑀥 𑀲𑀫𑀸𑀧𑀦𑁆𑀦𑀓𑀯𑀸𑀭𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀅𑀲𑀫𑀸𑀧𑀦𑁆𑀦𑀓𑀯𑀸𑀭𑁂𑀦𑀸𑀢𑀺 𑀓𑀸𑀫𑀸𑀯𑀘𑀭𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸. 𑀉𑀧𑀘𑀸𑀭𑀚𑁆𑀛𑀸𑀦𑁂𑀦𑀧𑀺 𑀳𑀺 𑀘𑀺𑀢𑁆𑀢𑀁 𑀦 𑀲𑀫𑁆𑀫𑀸 𑀏𑀓𑀢𑁆𑀢𑀁 𑀕𑀢𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀬𑁄𑀚𑀦𑀸𑀢𑀺 𑀫𑀜𑁆𑀜𑀦𑀸𑀬𑁄𑀚𑀦𑀸. 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀯𑀺𑀪𑀚𑀺𑀢𑁆𑀯𑀸. 𑀲𑀸𑀲𑀦𑀦𑀬𑁂𑀦𑀸𑀢𑀺 𑀧𑀸𑀴𑀺𑀦𑀬𑁂𑀦. 𑀢𑀢𑁆𑀣 ‘‘𑀏𑀓𑀢𑁆𑀢𑀁 𑀫𑀜𑁆𑀜𑀢𑀻’’𑀢𑀺𑀆𑀤𑀻𑀲𑀼 ‘‘𑀯𑁂𑀤𑀦𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦, ‘‘𑀦𑀸𑀦𑀢𑁆𑀢𑀁 𑀫𑀜𑁆𑀜𑀢𑀻’’𑀢𑀺𑀆𑀤𑀻𑀲𑀼 ¶ 𑀧𑀦 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀯𑀺𑀥𑀺𑀁 𑀅𑀦𑀼𑀕𑀦𑁆𑀢𑁆𑀯𑀸 𑀫𑀜𑁆𑀜𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀧𑀣𑀯𑀻𑀯𑀸𑀭𑀸𑀤𑀻𑀲𑀼 𑀯𑀼𑀢𑁆𑀢𑁂𑀦 𑀘 𑀅𑀝𑁆𑀞𑀓𑀣𑀸𑀦𑀬𑁂𑀦𑀸𑀢𑀺 ‘‘𑀅𑀳𑀁 𑀯𑁂𑀤𑀦𑀸𑀢𑀺 𑀫𑀜𑁆𑀜𑀢𑀺, 𑀫𑀫 𑀯𑁂𑀤𑀦𑀸𑀢𑀺 𑀫𑀜𑁆𑀜𑀢𑀻’’𑀢𑀺𑀆𑀤𑀺𑀦𑀸, ‘‘𑀅𑀳𑀁 𑀭𑀽𑀧𑀦𑁆𑀢𑀺 𑀫𑀜𑁆𑀜𑀢𑀺, 𑀫𑀫 𑀭𑀽𑀧𑀦𑁆𑀢𑀺 𑀫𑀜𑁆𑀜𑀢𑀻’’𑀢𑀺𑀆𑀤𑀺𑀦𑀸 𑀘𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀬𑀣𑀸𑀦𑀼𑀭𑀽𑀧𑀁 ¶ 𑀯𑀻𑀫𑀁𑀲𑀺𑀢𑁆𑀯𑀸’’𑀢𑀺, 𑀏𑀓𑀢𑁆𑀢𑀦𑀸𑀦𑀢𑁆𑀢𑀪𑀸𑀯𑁂𑀲𑀼 𑀬𑁄 𑀬𑁄𑀚𑀦𑀸𑀦𑀬𑁄 𑀲𑀫𑁆𑀪𑀯𑀢𑀺, 𑀢𑀤𑀦𑀼𑀭𑀽𑀧𑀁 𑀯𑀺𑀘𑀸𑀭𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑁂𑀘𑀻𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄. 𑀅𑀧𑀭𑁂𑀢𑀺 𑀲𑀸𑀭𑀲𑀫𑀸𑀲𑀸𑀘𑀭𑀺𑀬𑀸. 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀁 𑀯𑀤𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀫𑀜𑁆𑀜𑀦𑀸 𑀦𑀸𑀫 𑀲𑀓𑁆𑀓𑀸𑀬𑀁 𑀪𑀺𑀦𑁆𑀤𑀺𑀢𑁆𑀯𑀸𑀯 𑀬𑀣𑀸𑀉𑀧𑀝𑁆𑀞𑀺𑀢𑀯𑀺𑀲𑀬𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺 𑀦 𑀢𑀢𑁆𑀣 𑀅𑀬𑀫𑁂𑀓𑀢𑁆𑀢𑀦𑀬𑁄 𑀅𑀬𑀁 𑀦𑀸𑀦𑀢𑁆𑀢𑀦𑀬𑁄𑀢𑀺 𑀯𑀺𑀪𑀸𑀕𑀯𑀲𑁂𑀦𑁂𑀯, 𑀏𑀓𑀢𑁆𑀢𑀲𑀜𑁆𑀜𑀻 𑀅𑀢𑁆𑀢𑀸 𑀳𑁄𑀢𑀻𑀢𑀺𑀆𑀤𑀻𑀲𑀼 𑀘 𑀅𑀢𑁆𑀢𑀦𑁄 𑀏𑀓𑀢𑁆𑀢𑀦𑀸𑀦𑀢𑁆𑀢𑀲𑀜𑁆𑀜𑀺𑀢𑀸 𑀯𑀼𑀢𑁆𑀢𑀸, 𑀦 𑀧𑀦 𑀏𑀓𑀢𑁆𑀢𑀁 𑀦𑀸𑀦𑀢𑁆𑀢𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀲𑁆𑀲 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀲𑁆𑀲 𑀏𑀓𑀢𑁆𑀢𑀦𑀸𑀦𑀢𑁆𑀢𑀪𑀸𑀯𑁄𑀢𑀺 𑀏𑀯𑀫𑁂𑀢𑁆𑀣 𑀢𑀤𑀼𑀪𑀬𑀲𑁆𑀲 𑀇𑀥 𑀅𑀦𑀥𑀺𑀧𑁆𑀧𑁂𑀢𑀪𑀸𑀯𑁄 𑀤𑀝𑁆𑀞𑀩𑁆𑀩𑁄.

𑀬𑀁 𑀬𑀣𑀸𑀯𑀼𑀢𑁆𑀢𑀧𑀼𑀣𑀼𑀚𑁆𑀚𑀦𑁄 𑀅𑀦𑀯𑀲𑁂𑀲𑀢𑁄 𑀕𑀡𑁆𑀳𑀦𑁆𑀢𑁄 𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀁 𑀢𑀲𑁆𑀲 𑀅𑀦𑀯𑀲𑁂𑀲𑀢𑁄 𑀕𑀳𑁂𑀢𑀩𑁆𑀩𑀢𑀁 𑀉𑀧𑀸𑀤𑀸𑀬 ‘‘𑀲𑀩𑁆𑀩’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀫𑁂𑀯𑀸’’𑀢𑀺 𑀆𑀳, 𑀲𑀓𑁆𑀓𑀸𑀬𑀲𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀢𑁂𑀪𑀽𑀫𑀓𑀥𑀫𑁆𑀫𑁂 𑀆𑀤𑀻𑀦𑀯𑀤𑀲𑁆𑀲𑀦𑁂 𑀅𑀲𑀢𑀺 𑀦𑀺𑀩𑁆𑀩𑀺𑀤𑀸𑀪𑀸𑀯𑀢𑁄 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀦𑀸𑀬 𑀢𑀡𑁆𑀳𑀸 𑀯𑀟𑁆𑀠𑀢𑁂𑀯𑀸𑀢𑀺 𑀆𑀳 ‘‘𑀲𑀩𑁆𑀩𑀁 𑀅𑀲𑁆𑀲𑀸𑀤𑁂𑀦𑁆𑀢𑁄 𑀲𑀩𑁆𑀩𑀁 𑀢𑀡𑁆𑀳𑀸𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀻’’𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋 ‘‘𑀲𑀁𑀬𑁄𑀚𑀦𑀺𑀬𑁂𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀻’’𑀢𑀺 (𑀲𑀁. 𑀦𑀺. 𑁨.𑁫𑁩, 𑁫𑁭). ‘‘𑀲𑀩𑁆𑀩𑀫𑀺𑀤𑀁 𑀫𑀬𑀸 𑀦𑀺𑀫𑁆𑀫𑀺𑀢’’𑀦𑁆𑀢𑀺 𑀢𑁂𑀦 𑀦𑀺𑀫𑁆𑀫𑀺𑀢𑀫𑀜𑁆𑀜𑀦𑀸𑀬 𑀅𑀢𑁆𑀢𑀸𑀦𑀁 𑀲𑁂𑀬𑁆𑀬𑀸𑀤𑀺𑀢𑁄 𑀤𑀳𑀦𑁆𑀢𑁄 𑀢𑁂𑀦 𑀫𑀸𑀦𑁂𑀦 𑀦𑀺𑀫𑁆𑀫𑀺𑀢𑀁 𑀫𑀜𑁆𑀜𑀢𑀺𑀬𑁂𑀯 𑀦𑀸𑀫 𑀦𑀺𑀫𑁆𑀫𑀺𑀢𑀫𑀜𑁆𑀜𑀦𑀸𑀬 𑀯𑀺𑀦𑀸 𑀢𑀣𑀸𑀫𑀸𑀦𑀼𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄𑀢𑀺 𑀆𑀳 ‘‘𑀅𑀢𑁆𑀢𑀦𑀸 𑀦𑀺𑀫𑁆𑀫𑀺𑀢𑀁 𑀫𑀜𑁆𑀜𑀦𑁆𑀢𑁄 𑀲𑀩𑁆𑀩𑀁 𑀫𑀸𑀦𑀫𑀜𑁆𑀜𑀦𑀸𑀬 𑀫𑀜𑁆𑀜𑀢𑀻’’𑀢𑀺. 𑀲𑀩𑁆𑀩𑀁 𑀦𑀢𑁆𑀣𑀻𑀢𑀺𑀆𑀤𑀺𑀦𑀸 𑀦𑀬𑁂𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀦𑀺𑀬𑀢𑀺𑀯𑀸𑀤𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀫𑀳𑀸 𑀫𑁂 𑀅𑀢𑁆𑀢𑀸𑀢𑀺 𑀇𑀫𑀺𑀦𑀸 𑀲𑀩𑁆𑀩𑀢𑁄 𑀅𑀢𑁆𑀢𑀦𑁄 𑀯𑀺𑀪𑀽𑀢𑀺𑀧𑀯𑀢𑁆𑀢𑀺𑀯𑀸𑀤𑀁 𑀤𑀲𑁆𑀲𑁂𑀢𑀺. ‘‘𑀲𑀩𑁆𑀩𑀁 𑀲𑀩𑁆𑀩𑀢𑁆𑀣𑀓’’𑀦𑁆𑀢𑀺 𑀤𑀺𑀝𑁆𑀞𑀺𑀯𑀲𑁂𑀦 𑁋 ‘‘𑀅𑀳𑀁 𑀲𑀩𑁆𑀩𑀲𑁆𑀫𑀺𑀁 𑀫𑀬𑁆𑀳𑀁 𑀓𑀺𑀜𑁆𑀘𑀦𑀁 𑀧𑀮𑀺𑀩𑁄𑀥𑁄 𑀲𑀩𑁆𑀩𑀲𑁆𑀫𑀺𑀁, 𑀧𑀭𑁄 𑀲𑀩𑁆𑀩𑀲𑁆𑀫𑀺𑀁 𑀧𑀭𑀲𑁆𑀲 𑀓𑀺𑀜𑁆𑀘𑀦𑀁 𑀧𑀮𑀺𑀩𑁄𑀥𑁄 𑀲𑀩𑁆𑀩𑀲𑁆𑀫𑀺’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦𑀧𑁂𑀢𑁆𑀣 𑀫𑀜𑁆𑀜𑀦𑀸 𑀲𑀫𑁆𑀪𑀯𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑁂𑀲𑀁 𑀧𑀣𑀯𑀻𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺. 𑀅𑀧𑀺𑀘 ‘‘𑀲𑀩𑁆𑀩𑁄𑀬𑀁 𑀮𑁄𑀓𑁄 𑀧𑀼𑀭𑀺𑀲𑀫𑀬𑁄’’𑀢𑀺 𑀏𑀯𑀁𑀤𑀺𑀝𑁆𑀞𑀺𑀓𑁄 𑀧𑀼𑀭𑀺𑀲𑀲𑀗𑁆𑀔𑀸𑀢𑀢𑁄 𑀲𑀩𑁆𑀩𑀢𑁄, 𑀅𑀢𑁆𑀢𑀦𑁄 𑀉𑀧𑁆𑀧𑀢𑁆𑀢𑀺𑀁 𑀯𑀸 𑀦𑀺𑀕𑁆𑀕𑀫𑀦𑀁 𑀯𑀸 𑀫𑀜𑁆𑀜𑀦𑁆𑀢𑁄 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬 𑀲𑀩𑁆𑀩𑀢𑁄 𑀫𑀜𑁆𑀜𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀧𑀦 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬 𑀫𑀜𑁆𑀜𑀺𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀲𑀺𑀦𑁂𑀳𑀁 𑀫𑀸𑀦𑀜𑁆𑀘 𑀉𑀧𑁆𑀧𑀸𑀤𑀬𑀢𑁄 𑀢𑀡𑁆𑀳𑀸𑀫𑀜𑁆𑀜𑀦𑀸 𑀫𑀸𑀦𑀫𑀜𑁆𑀜𑀦𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀢𑀁𑀬𑁂𑀯 𑀧𑀦 𑀲𑀩𑁆𑀩𑀁 𑀫𑀬𑁆𑀳𑀁 𑀅𑀢𑁆𑀢𑀸 𑀓𑀢𑁆𑀢𑀸 ¶ 𑀲𑀸𑀫𑀻𑀢𑀺 𑀯𑀸 𑀫𑀜𑁆𑀜𑀦𑁆𑀢𑁄 ‘‘𑀲𑀩𑁆𑀩𑀁 ¶ 𑀫𑁂’’𑀢𑀺 𑀫𑀜𑁆𑀜𑀢𑀺, 𑀢𑀣𑀸𑀬𑀁 𑀤𑀺𑀝𑁆𑀞𑀺𑀢𑀡𑁆𑀳𑀸𑀪𑀺𑀦𑀦𑁆𑀤𑀦𑀸𑀳𑀺 𑀅𑀪𑀺𑀦𑀦𑁆𑀤𑀦𑁆𑀢𑁄 𑀲𑀩𑁆𑀩𑀁 𑀅𑀪𑀺𑀦𑀦𑁆𑀤𑀢𑀻𑀢𑀺 𑀏𑀯𑀫𑁆𑀧𑁂𑀢𑁆𑀣 𑀫𑀜𑁆𑀜𑀦𑀸𑀦𑀁 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀢𑀦𑁆𑀢𑀺 𑀲𑀓𑁆𑀓𑀸𑀬𑀁. 𑀉𑀓𑁆𑀓𑀁𑀲𑀕𑀢𑀲𑀼𑀔𑀲𑀳𑀺𑀢𑀜𑁆𑀳𑀺 𑀔𑀦𑁆𑀥𑀧𑀜𑁆𑀘𑀓𑀁 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀻 𑀦𑀺𑀩𑁆𑀩𑀸𑀦𑀦𑁆𑀢𑀺 𑀫𑀜𑁆𑀜𑀢𑀺, 𑀢𑀁 𑀧𑀦𑀢𑁆𑀣𑀢𑁄 𑀲𑀓𑁆𑀓𑀸𑀬𑁄𑀬𑁂𑀯𑀸𑀢𑀺. 𑀏𑀓𑀥𑀸𑀢𑀺 𑀧𑀜𑁆𑀘𑀯𑀺𑀥𑀫𑁆𑀧𑀺 𑀦𑀺𑀩𑁆𑀩𑀸𑀦𑀪𑀸𑀯𑁂𑀦 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀬𑀢𑁄𑀢𑀺 𑀬𑀲𑁆𑀫𑀸. 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀻𑀢𑀺 𑀫𑀦𑀸𑀧𑀺𑀬𑀭𑀽𑀧𑀸𑀤𑀻𑀳𑀺 𑀧𑀜𑁆𑀘𑀳𑀺 𑀓𑀸𑀫𑀓𑁄𑀝𑁆𑀞𑀸𑀲𑁂𑀳𑀺, 𑀩𑀦𑁆𑀥𑀦𑁂𑀳𑀺 𑀯𑀸. 𑀲𑀫𑀧𑁆𑀧𑀺𑀢𑁄 𑀲𑀼𑀝𑁆𑀞𑀼 𑀅𑀧𑁆𑀧𑀺𑀢𑁄 𑀅𑀮𑁆𑀮𑀻𑀦𑁄 𑀳𑀼𑀢𑁆𑀯𑀸 𑀞𑀺𑀢𑁄. 𑀲𑀫𑀗𑁆𑀕𑀺𑀪𑀽𑀢𑁄𑀢𑀺 𑀲𑀫𑀦𑁆𑀦𑀸𑀕𑀢𑁄. 𑀧𑀭𑀺𑀘𑀸𑀭𑁂𑀢𑀻𑀢𑀺 𑀢𑁂𑀲𑀼 𑀓𑀸𑀫𑀕𑀼𑀡𑁂𑀲𑀼 𑀓𑀸𑀫𑀓𑁄𑀝𑁆𑀞𑀸𑀲𑁂𑀲𑀼 𑀬𑀣𑀸𑀲𑀼𑀔𑀁 𑀇𑀦𑁆𑀤𑁆𑀭𑀺𑀬𑀸𑀦𑀺 𑀘𑀸𑀭𑁂𑀢𑀺 𑀲𑀜𑁆𑀘𑀸𑀭𑁂𑀢𑀺 𑀇𑀢𑁄 𑀘𑀺𑀢𑁄 𑀘 𑀉𑀧𑀦𑁂𑀢𑀺. 𑀅𑀣 𑀯𑀸 𑀮𑀴𑀢𑀺 𑀭𑀫𑀢𑀺 𑀓𑀻𑀴𑀢𑀺. 𑀏𑀢𑁆𑀣 𑀤𑁆𑀯𑀺𑀥𑀸 𑀓𑀸𑀫𑀕𑀼𑀡𑀸 𑀫𑀸𑀦𑀼𑀲𑀓𑀸 𑀘𑁂𑀯 𑀤𑀺𑀩𑁆𑀩𑀸 𑀘. 𑀫𑀸𑀦𑀼𑀲𑀓𑀸 𑀘 𑀫𑀦𑁆𑀥𑀸𑀢𑀼𑀓𑀸𑀫𑀕𑀼𑀡𑀲𑀤𑀺𑀲𑀸, 𑀤𑀺𑀩𑁆𑀩𑀸 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀤𑁂𑀯𑀭𑀸𑀚𑀲𑁆𑀲 𑀓𑀸𑀫𑀕𑀼𑀡𑀲𑀤𑀺𑀲𑀸. 𑀏𑀯𑀭𑀽𑀧𑁂 𑀓𑀸𑀫𑁂 𑀉𑀧𑀕𑀢𑀸𑀦𑀜𑁆𑀳𑀺 𑀢𑁂 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀢𑁂𑀦𑀸𑀳 ‘‘𑀏𑀢𑁆𑀢𑀸𑀯𑀢𑀸 𑀔𑁄…𑀧𑁂… 𑀳𑁄𑀢𑀻’’𑀢𑀺. 𑀤𑀺𑀝𑁆𑀞𑀥𑀫𑁆𑀫𑁄𑀢𑀺 𑀧𑀘𑁆𑀘𑀓𑁆𑀔𑀥𑀫𑁆𑀫𑁄 𑀯𑀼𑀘𑁆𑀘𑀢𑀺, 𑀢𑀢𑁆𑀣 𑀢𑀢𑁆𑀣 𑀧𑀝𑀺𑀮𑀤𑁆𑀥𑀢𑁆𑀢𑀪𑀸𑀯𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀤𑀺𑀝𑁆𑀞𑀥𑀫𑁆𑀫𑁂 𑀦𑀺𑀩𑁆𑀩𑀸𑀦𑀁 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀤𑀼𑀓𑁆𑀔𑀯𑀽𑀧𑀲𑀫𑀦𑀁 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁. 𑀧𑀭𑀫𑀁 𑀉𑀢𑁆𑀢𑀫𑀁 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁, 𑀢𑀁 𑀧𑀢𑁆𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀥𑀸 𑀆𑀕𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀫𑀕𑀼𑀡𑀲𑀼𑀔𑀲𑁆𑀲 𑀘𑁂𑀯 𑀘𑀢𑀼𑀩𑁆𑀩𑀺𑀥𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀲𑀼𑀔𑀲𑁆𑀲 𑀘 𑀯𑀲𑁂𑀦 𑀧𑀸𑀴𑀺𑀬𑀁 𑀧𑀜𑁆𑀘𑀧𑁆𑀧𑀓𑀸𑀭𑁂𑀦 𑀆𑀕𑀢𑀁. 𑀦𑀺𑀩𑁆𑀩𑀸𑀦𑀁 𑀅𑀲𑁆𑀲𑀸𑀤𑁂𑀦𑁆𑀢𑁄𑀢𑀺 𑀧𑀭𑀫𑀁 𑀲𑀼𑀔𑀁 𑀦𑀺𑀲𑁆𑀲𑀭𑀡𑀦𑁆𑀢𑀺 𑀫𑀜𑁆𑀜𑀦𑀸𑀬 𑀅𑀲𑁆𑀲𑀸𑀤𑁂𑀦𑁆𑀢𑁄.

‘‘𑀇𑀫𑀲𑁆𑀫𑀺𑀁 𑀦𑀺𑀩𑁆𑀩𑀸𑀦𑁂 𑀧𑀢𑁆𑀢𑁂 𑀦 𑀚𑀸𑀬𑀢𑀺, 𑀦 𑀚𑀻𑀭𑀢𑀺, 𑀦 𑀫𑀻𑀬𑀢𑀻’’𑀢𑀺 𑀏𑀯𑀫𑁆𑀧𑀺 𑀦𑀺𑀩𑁆𑀩𑀸𑀦𑀲𑁆𑀫𑀺𑀁 𑀫𑀜𑁆𑀜𑀢𑀺. ‘‘𑀇𑀢𑁄 𑀧𑀭𑀁 𑀧𑀭𑀫𑀲𑁆𑀲𑀸𑀲𑀪𑀽𑀢𑀁 𑀦𑀢𑁆𑀣𑀻’’𑀢𑀺 𑀕𑀡𑁆𑀳𑀦𑁆𑀢𑁄 𑀦𑀺𑀩𑁆𑀩𑀸𑀦𑀢𑁄 𑀫𑀜𑁆𑀜𑀢𑀺. 𑀢𑀬𑀺𑀤𑀁 𑀦𑀺𑀩𑁆𑀩𑀸𑀦𑀁 𑀫𑀬𑀸 𑀅𑀥𑀺𑀕𑀢𑀁, 𑀢𑀲𑁆𑀫𑀸 ‘‘𑀦𑀺𑀩𑁆𑀩𑀸𑀦𑀁 𑀫𑁂’’𑀢𑀺 𑀫𑀜𑁆𑀜𑀢𑀺. 𑀢𑀢𑁄𑀬𑁂𑀯 𑀢𑀁 𑀦𑀺𑀩𑁆𑀩𑀸𑀦𑀁 𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸𑀬 𑀅𑀪𑀺𑀦𑀦𑁆𑀤𑀢𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀤𑀺𑀝𑁆𑀞𑀺𑀫𑀜𑁆𑀜𑀦𑀸. 𑀢𑀲𑁆𑀫𑀺𑀁𑀬𑁂𑀯 𑀧𑀦 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬 𑀫𑀜𑁆𑀜𑀺𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀲𑀺𑀦𑁂𑀳𑀁 𑀫𑀸𑀦𑀜𑁆𑀘 𑀉𑀧𑁆𑀧𑀸𑀤𑀬𑀢𑁄 𑀢𑀡𑁆𑀳𑀸𑀫𑀸𑀦𑀫𑀜𑁆𑀜𑀦𑀸𑀧𑀺 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸.

𑀬𑀸𑀤𑀺𑀲𑁄𑀢𑀺 𑀬𑀣𑀸𑀭𑀽𑀧𑁄, 𑀬𑁂𑀳𑀺 𑀚𑁂𑀕𑀼𑀘𑁆𑀙𑀸𑀤𑀺𑀲𑀪𑀸𑀯𑁂𑀳𑀺 𑀧𑀲𑁆𑀲𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀏𑀲𑀸𑀢𑀺 𑀅𑀬𑀁. 𑀢𑁂𑀦𑀲𑁆𑀲 𑀅𑀢𑁆𑀢𑀦𑁄 𑀲𑀼𑀡𑀦𑁆𑀢𑀸𑀦𑀜𑁆𑀘 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑀢𑀫𑀸𑀳. 𑀅𑀲𑀼𑀪𑀸𑀤𑀺𑀲𑀪𑀸𑀯𑁂𑀦 𑀲𑀳 𑀯𑀺𑀚𑁆𑀚𑀫𑀸𑀦𑀸𑀦𑀁 𑀭𑀽𑀧𑀸𑀤𑀺𑀥𑀫𑁆𑀫𑀸𑀦𑀁 𑀓𑀸𑀬𑁄 𑀲𑀫𑀽𑀳𑁄𑀢𑀺 𑀲𑀓𑁆𑀓𑀸𑀬𑁄, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀢𑀣𑀸𑀢𑀺 𑀢𑀲𑁆𑀲 𑀪𑀸𑀯𑀪𑀽𑀢𑁂𑀦 𑀧𑀝𑀺𑀓𑀽𑀮𑀢𑀸𑀤𑀺𑀧𑁆𑀧𑀓𑀸𑀭𑁂𑀦. 𑀲𑀩𑁆𑀩𑀫𑀜𑁆𑀜𑀦𑀸𑀢𑀺 𑀧𑀣𑀯𑀻𑀆𑀤𑀺𑀓𑁂 𑀲𑀭𑀽𑀧𑀸𑀯𑀥𑀸𑀭𑀡𑀸𑀤𑀺𑀯𑀺𑀪𑀸𑀕𑀪𑀺𑀦𑁆𑀦𑁂 ¶ 𑀯𑀺𑀲𑀬𑁂 𑀧𑀯𑀢𑁆𑀢𑀺𑀬𑀸 𑀅𑀦𑁂𑀓𑀯𑀺𑀳𑀺𑀢𑀸 𑀲𑀩𑁆𑀩𑀸 𑀢𑀡𑁆𑀳𑀸𑀫𑀜𑁆𑀜𑀦𑀸.

𑀚𑁂𑀕𑀼𑀘𑁆𑀙𑁄𑀢𑀺 ¶ 𑀚𑀺𑀕𑀼𑀘𑁆𑀙𑀦𑀻𑀬𑁄. 𑀢𑁂𑀦𑀲𑁆𑀲 𑀅𑀲𑀼𑀪𑀸𑀚𑀜𑁆𑀜𑀤𑀼𑀕𑁆𑀕𑀦𑁆𑀥𑀧𑀝𑀺𑀓𑀽𑀮𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀺𑀤𑀼𑀭𑁄𑀢𑀺 𑀔𑀡𑁂 𑀔𑀡𑁂 𑀪𑀺𑀚𑁆𑀚𑀦𑀲𑀪𑀸𑀯𑁄. 𑀢𑁂𑀦𑀲𑁆𑀲 𑀅𑀦𑀺𑀘𑁆𑀘𑀅𑀤𑁆𑀥𑀼𑀯𑀔𑀬𑀯𑀬𑀧𑀪𑀗𑁆𑀕𑀼𑀭𑀲𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀬𑀦𑁆𑀢𑀺 𑀲𑀓𑁆𑀓𑀸𑀬𑁄. 𑀤𑀼𑀓𑁆𑀔𑁄𑀢𑀺 𑀦 𑀲𑀼𑀔𑁄. 𑀢𑁂𑀦𑀲𑁆𑀲 𑀓𑀺𑀘𑁆𑀙𑀓𑀲𑀺𑀭𑀸𑀩𑀸𑀥𑀤𑀼𑀓𑁆𑀔𑀯𑀼𑀢𑁆𑀢𑀺𑀢𑀁 𑀤𑀲𑁆𑀲𑁂𑀢𑀺. 𑀅𑀧𑀭𑀺𑀡𑀸𑀬𑀓𑁄𑀢𑀺 𑀧𑀭𑀺𑀡𑀸𑀬𑀓𑀭𑀳𑀺𑀢𑁄. 𑀢𑁂𑀦𑀲𑁆𑀲 𑀅𑀢𑁆𑀢𑀲𑀼𑀜𑁆𑀜𑀅𑀲𑀸𑀭𑀯𑀼𑀢𑁆𑀢𑀺𑀢𑀁 𑀤𑀲𑁆𑀲𑁂𑀢𑀺. 𑀢𑀦𑁆𑀢𑀺 𑀲𑀓𑁆𑀓𑀸𑀬𑀁. 𑀧𑀘𑁆𑀘𑀦𑀻𑀓𑀢𑁄𑀢𑀺 𑀲𑀪𑀸𑀯𑀧𑀝𑀺𑀧𑀓𑁆𑀔𑀢𑁄, 𑀲𑀼𑀪𑀦𑀺𑀘𑁆𑀘𑀲𑀼𑀔𑀅𑀢𑁆𑀢𑀸𑀤𑀺𑀢𑁄𑀢𑀺 𑀅𑀢𑁆𑀣𑁄. 𑀕𑀡𑁆𑀳𑀦𑁆𑀢𑀺 𑀕𑀡𑁆𑀳𑀦𑁆𑀢𑁄, 𑀢𑀢𑁆𑀣 𑀲𑀼𑀪𑀸𑀤𑀺𑀕𑀸𑀳𑀯𑀲𑁂𑀦 𑀅𑀪𑀺𑀦𑀺𑀯𑀺𑀲𑀦𑁆𑀢𑁄𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀢𑀺𑀲𑁆𑀲𑁄𑀧𑀺 𑀫𑀜𑁆𑀜𑀦𑀸 𑀉𑀧𑀫𑀸𑀳𑀺 𑀯𑀺𑀪𑀸𑀯𑁂𑀢𑀼𑀁 ‘‘𑀲𑀼𑀪𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸 𑀫𑀳𑀸𑀧𑀭𑀺𑀴𑀸𑀳𑁂 𑀯𑀺𑀧𑀼𑀮𑀸𑀦𑀢𑁆𑀣𑀸𑀯𑀳𑁂 𑀘 𑀅𑀕𑁆𑀕𑀺𑀫𑁆𑀳𑀺 𑀲𑀮𑀪𑀲𑁆𑀲 𑀧𑀢𑀦𑀁 𑀲𑀼𑀪𑀲𑀼𑀔𑀲𑀜𑁆𑀜𑀸𑀬, 𑀏𑀯𑀁 𑀢𑀸𑀤𑀺𑀲𑁂 𑀲𑀓𑁆𑀓𑀸𑀬𑁂 𑀲𑀮𑀪𑀲𑁆𑀲 𑀢𑀡𑁆𑀳𑀸𑀫𑀜𑁆𑀜𑀦𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀲𑀼𑀪𑀢𑁄…𑀧𑁂… 𑀢𑀡𑁆𑀳𑀸𑀬 𑀫𑀜𑁆𑀜𑀦𑀸’’𑀢𑀺 𑀇𑀫𑀺𑀦𑀸.

𑀕𑀽𑀣𑀸𑀤𑀻 𑀓𑀻𑀝𑀓𑁄 𑀕𑀽𑀣𑀭𑀸𑀲𑀺𑀁 𑀮𑀤𑁆𑀥𑀸 𑀅𑀲𑀫𑁆𑀧𑀦𑁆𑀦𑁂𑀧𑀺 𑀢𑀲𑁆𑀫𑀺𑀁 𑀲𑀫𑁆𑀧𑀦𑁆𑀦𑀸𑀓𑀸𑀭𑀁 𑀧𑀯𑀢𑁆𑀢𑀬𑀫𑀸𑀦𑁄 𑀅𑀢𑁆𑀢𑀸𑀦𑀁 𑀉𑀓𑁆𑀓𑀁𑀲𑁂𑀢𑀺, 𑀏𑀯𑀫𑀦𑁂𑀓𑀸𑀤𑀻𑀦𑀯𑁂 𑀏𑀓𑀦𑁆𑀢𑀪𑁂𑀤𑀺𑀦𑀺 𑀲𑀓𑁆𑀓𑀸𑀬𑁂 𑀦𑀺𑀘𑁆𑀘𑀲𑀜𑁆𑀜𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀲𑀫𑁆𑀧𑀢𑁆𑀢𑀺𑀫𑀤𑁂𑀦 𑀢𑀢𑁆𑀣 𑀩𑀸𑀮𑁄 𑀫𑀸𑀦𑀁 𑀚𑀧𑁆𑀧𑁂𑀢𑀻𑀢𑀺 𑀇𑀫𑀫𑀢𑁆𑀣𑀫𑀸𑀳 ‘‘𑀦𑀺𑀘𑁆𑀘𑀲𑀜𑁆𑀜𑀁…𑀧𑁂… 𑀫𑀸𑀦𑁂𑀦 𑀫𑀜𑁆𑀜𑀦𑀸’’𑀢𑀺.

𑀬𑀣𑀸 𑀩𑀸𑀮𑁄 𑀫𑀼𑀤𑁆𑀥𑀥𑀸𑀢𑀼𑀓𑁄 𑀲𑀫𑁆𑀫𑀽𑀴𑁆𑀳𑁄 𑀓𑁄𑀘𑀺 𑀆𑀤𑀸𑀲𑁂 𑀅𑀢𑁆𑀢𑀦𑁄 𑀧𑀝𑀺𑀩𑀺𑀫𑁆𑀩𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑀜𑁆𑀜𑁂 𑀆𑀤𑀸𑀲𑀲𑀸𑀫𑀺𑀓𑁄, 𑀬𑀤𑀺 𑀅𑀳𑀫𑀺𑀫𑀁 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑁂𑀬𑁆𑀬𑀁, 𑀅𑀦𑀢𑁆𑀣𑀫𑁆𑀧𑀺 𑀫𑁂 𑀓𑀭𑁂𑀬𑁆𑀬𑀸’’𑀢𑀺 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀦𑁆𑀢𑁄 𑀢𑀢𑁆𑀣 𑀅𑀯𑀺𑀚𑁆𑀚𑀫𑀸𑀦𑀫𑁂𑀯 𑀓𑀺𑀜𑁆𑀘𑀺 𑀯𑀺𑀚𑁆𑀚𑀫𑀸𑀦𑀁 𑀓𑀢𑁆𑀯𑀸 𑀕𑀡𑁆𑀳𑀺, 𑀢𑀣𑀽𑀧𑀫𑁄 𑀅𑀬𑀁 𑀩𑀸𑀮𑁄 𑀲𑀓𑁆𑀓𑀸𑀬𑁂 𑀅𑀢𑁆𑀢𑀢𑁆𑀢𑀦𑀺𑀬𑀕𑀸𑀳𑀁 𑀕𑀡𑁆𑀳𑀦𑁆𑀢𑁄𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺 ‘‘𑀅𑀢𑁆𑀢𑀸…𑀧𑁂… 𑀤𑀺𑀝𑁆𑀞𑀺𑀬𑀸 𑀳𑁄𑀢𑀺 𑀫𑀜𑁆𑀜𑀦𑀸’’𑀢𑀺 𑀇𑀫𑀺𑀦𑀸.

𑀲𑀼𑀔𑀼𑀫𑀁 𑀫𑀸𑀭𑀩𑀦𑁆𑀥𑀦𑀁 𑀯𑁂𑀧𑀘𑀺𑀢𑁆𑀢𑀺𑀩𑀦𑁆𑀥𑀦𑀢𑁄𑀧𑀺 𑀲𑀼𑀔𑀼𑀫𑀢𑀭𑀢𑁆𑀢𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀅𑀳𑁄 𑀲𑀼𑀔𑀼𑀫𑀢𑀭𑀁 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀭𑀩𑀦𑁆𑀥𑀦’’𑀦𑁆𑀢𑀺.

𑀩𑀳𑀼𑀦𑁆𑀢𑀺 𑀅𑀢𑀺𑀯𑀺𑀬, 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀯𑀸. 𑀯𑀺𑀧𑁆𑀨𑀦𑁆𑀤𑀫𑀸𑀦𑁄𑀧𑀺 𑀲𑀓𑁆𑀓𑀸𑀬𑀁 𑀦𑀸𑀢𑀺𑀯𑀢𑁆𑀢𑀢𑀺 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀦𑀢𑁄. 𑀬𑀣𑀸𑀳 ‘‘𑀬𑁂 𑀢𑁂, 𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀲𑀢𑁄 𑀲𑀢𑁆𑀢𑀲𑁆𑀲 𑀉𑀘𑁆𑀙𑁂𑀤𑀁 𑀯𑀺𑀦𑀸𑀲𑀁 𑀯𑀺𑀪𑀯𑀁 𑀧𑀜𑁆𑀜𑀧𑁂𑀦𑁆𑀢𑀺, 𑀢𑁂, 𑀲𑀓𑁆𑀓𑀸𑀬𑀁𑀬𑁂𑀯 𑀅𑀦𑀼𑀧𑀭𑀺𑀥𑀸𑀯𑀦𑁆𑀢𑀺 𑀲𑁂𑀬𑁆𑀬𑀣𑀸𑀧𑀺 𑀲𑀸 𑀕𑀤𑁆𑀤𑀼𑀮𑀩𑀦𑁆𑀥𑀦𑁄’’𑀢𑀺𑀆𑀤𑀺. 𑀬𑀣𑀸 𑀳𑀺 𑀲𑀢𑁆𑀢𑀲𑀼𑀧𑀺 ¶ 𑀉𑀘𑁆𑀙𑁂𑀤𑀯𑀺𑀓𑀧𑁆𑀧𑁂𑀲𑀼 𑀲𑀁𑀲𑀸𑀭𑀦𑀸𑀬𑀺𑀓𑀸𑀦𑀁 𑀢𑀡𑁆𑀳𑀸𑀤𑀺𑀝𑁆𑀞𑀻𑀦𑀁 𑀧𑀳𑀸𑀦𑀁 𑀲𑀫𑁆𑀪𑀯𑀢𑀺, 𑀏𑀯𑀁 𑀲𑀲𑁆𑀲𑀢𑀯𑀺𑀓𑀧𑁆𑀧𑁂𑀲𑀼𑀧𑀻𑀢𑀺 ¶ 𑀓𑀣𑀜𑁆𑀘𑀺 𑀧𑀦 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀪𑀯𑀯𑀺𑀧𑁆𑀧𑀫𑁄𑀓𑁆𑀔𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀓𑁆𑀓𑀸𑀬𑀁 𑀦𑀸𑀢𑀺𑀯𑀢𑁆𑀢𑀢𑀻’’𑀢𑀺.

𑀲𑀲𑁄𑀢𑀺 𑀲𑁄 𑀏𑀲𑁄 𑀧𑀼𑀣𑀼𑀚𑁆𑀚𑀦𑁄. 𑀦𑀺𑀘𑁆𑀘𑀦𑁆𑀢𑀺 𑀲𑀩𑁆𑀩𑀓𑀸𑀮𑀁.

𑀢𑀦𑁆𑀢𑀺 𑀢𑀲𑁆𑀫𑀸 𑀲𑀓𑁆𑀓𑀸𑀬𑀫𑀮𑀻𑀦𑀲𑁆𑀲 𑀚𑀸𑀢𑀺𑀬𑀸𑀤𑀻𑀦𑀫𑀦𑀢𑀺𑀯𑀢𑁆𑀢𑀦𑀢𑁄. 𑀅𑀲𑀸𑀢𑀢𑁄𑀢𑀺 𑀤𑀼𑀓𑁆𑀔𑀢𑁄.

𑀧𑀲𑁆𑀲𑀁 𑀏𑀯𑀫𑀺𑀫𑀦𑁆𑀢𑀺 𑀅𑀲𑀼𑀪𑀸𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀲𑀪𑀸𑀯𑀁 𑀢𑀁 𑀲𑀓𑁆𑀓𑀸𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀬𑀣𑀸𑀪𑀽𑀢𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀲𑀳𑀺𑀢𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀧𑀲𑁆𑀲𑀦𑁆𑀢𑁄. 𑀧𑀳𑀸𑀬𑀸𑀢𑀺 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀲𑀩𑁆𑀩𑀸 𑀫𑀜𑁆𑀜𑀦𑀸𑀬𑁄 𑀧𑀚𑀳𑀺𑀢𑁆𑀯𑀸. 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻𑀢𑀺 𑀲𑀓𑀮𑀲𑁆𑀫𑀸𑀧𑀺 𑀯𑀝𑁆𑀝𑀤𑀼𑀓𑁆𑀔𑀢𑁄 𑀧𑀫𑀼𑀘𑁆𑀘𑀢𑀻𑀢𑀺.

𑀏𑀓𑀢𑁆𑀢𑀯𑀸𑀭𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑁂𑀓𑁆𑀔𑀯𑀸𑀭𑀤𑀼𑀢𑀺𑀬𑀦𑀬𑀯𑀡𑁆𑀡𑀦𑀸

𑁭. 𑀅𑀥𑀺𑀧𑁆𑀧𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀦𑀺𑀬𑀫𑁂𑀢𑁆𑀯𑀸 𑀯𑀘𑀦𑀁 𑀉𑀤𑁆𑀤𑁂𑀲𑁄, 𑀦𑀺𑀬𑀫𑁂𑀢𑁆𑀯𑀸 𑀯𑀘𑀦𑀁 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀬𑁄𑀢𑀺 𑀉𑀤𑁆𑀤𑁂𑀲𑀯𑀘𑀦𑀁, 𑀲𑁄𑀢𑀺 𑀦𑀺𑀤𑁆𑀤𑁂𑀲𑀯𑀘𑀦’’𑀦𑁆𑀢𑀺. 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄𑀢𑀺 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀲𑀫𑁆𑀧𑀺𑀡𑁆𑀟𑀦𑀜𑁆𑀘 𑀲𑀪𑀸𑀕𑀢𑀸𑀯𑀲𑁂𑀦 𑀳𑁄𑀢𑀻𑀢𑀺 𑀆𑀳 𑁋 ‘‘𑀆𑀭𑀫𑁆𑀫𑀡𑀲𑀪𑀸𑀕𑁂𑀦𑀸’’𑀢𑀺, 𑀆𑀭𑀫𑁆𑀫𑀡𑀲𑁆𑀲 𑀲𑀪𑀸𑀕𑀢𑀸𑀬 𑀲𑀤𑀺𑀲𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀲𑁂𑀓𑁆𑀔𑀁 𑀤𑀲𑁆𑀲𑁂𑀢𑀺 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 𑀯𑀺𑀲𑁂𑀲𑁂 𑀅𑀯𑀝𑁆𑀞𑀸𑀦𑀢𑁄, 𑀲𑁂𑀓𑁆𑀔𑀯𑀺𑀲𑀬𑀢𑁆𑀢𑀸 𑀘 𑀢𑀲𑁆𑀲 𑀯𑀘𑀦𑀲𑁆𑀲.

𑀓𑁂𑀦𑀝𑁆𑀞𑁂𑀦𑀸𑀢𑀺 𑀬𑀲𑁆𑀫𑀸 𑀜𑀸𑀡𑁂𑀦 𑀅𑀭𑀡𑀻𑀬𑀢𑁄 𑀅𑀢𑁆𑀣𑁄 𑀲𑀪𑀸𑀯𑁄, 𑀢𑀲𑁆𑀫𑀸 𑀓𑁂𑀦𑀝𑁆𑀞𑁂𑀦 𑀓𑁂𑀦 𑀲𑀪𑀸𑀯𑁂𑀦 𑀓𑁂𑀦 𑀮𑀓𑁆𑀔𑀡𑁂𑀦 𑀲𑁂𑀓𑁆𑀔𑁄 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀲𑁂𑀓𑁆𑀔𑀥𑀫𑁆𑀫𑀸𑀥𑀺𑀕𑀫𑁂𑀦 𑀧𑀼𑀕𑁆𑀕𑀮𑁂 𑀲𑁂𑀓𑁆𑀔𑀯𑁄𑀳𑀸𑀭𑀧𑁆𑀧𑀯𑀢𑁆𑀢𑀺, 𑀢𑀲𑁆𑀫𑀸 ‘‘𑀲𑁂𑀓𑁆𑀔𑀥𑀫𑁆𑀫𑀧𑀝𑀺𑀮𑀸𑀪𑀢𑁄 𑀲𑁂𑀓𑁆𑀔𑁄’’𑀢𑀺 𑀯𑀼𑀢𑁆𑀢𑀁. 𑀲𑁂𑀓𑁆𑀔𑀥𑀫𑁆𑀫𑀸 𑀦𑀸𑀫 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼, 𑀳𑁂𑀝𑁆𑀞𑀺𑀫𑁂𑀲𑀼 𑀘 𑀢𑀻𑀲𑀼 𑀨𑀮𑁂𑀲𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄. 𑀢𑁂𑀦𑀸𑀳 ‘‘𑀲𑁂𑀓𑁆𑀔𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸…𑀧𑁂… 𑀏𑀢𑁆𑀢𑀸𑀯𑀢𑀸 𑀔𑁄 𑀪𑀺𑀓𑁆𑀔𑀼 𑀲𑁂𑀓𑁆𑀔𑁄 𑀳𑁄𑀢𑀻’’𑀢𑀺. 𑀏𑀯𑀁 𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀲𑁂𑀓𑁆𑀔𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑁆𑀯𑀸 ¶ 𑀇𑀤𑀸𑀦𑀺 𑀲𑀼𑀢𑁆𑀢𑀦𑁆𑀢𑀺𑀓𑀧𑀭𑀺𑀬𑀸𑀬𑁂𑀦𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀺𑀓𑁆𑀔𑀢𑀻𑀢𑀺 𑀇𑀫𑀺𑀦𑀸 𑀲𑀺𑀓𑁆𑀔𑀸𑀢𑁆𑀢𑀬𑀲𑀫𑀗𑁆𑀕𑀻 𑀅𑀧𑀭𑀺𑀦𑀺𑀝𑁆𑀞𑀺𑀢𑀲𑀺𑀓𑁆𑀔𑁄 𑀲𑁂𑀓𑁆𑀔𑁄𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀲𑀺𑀓𑁆𑀔𑀢𑀻’’𑀢𑀺𑀆𑀤𑀺 ¶ . 𑀲𑀺𑀓𑁆𑀔𑀸𑀳𑀺 𑀦𑀺𑀘𑁆𑀘𑀲𑀫𑀸𑀬𑁄𑀕𑀤𑀻𑀧𑀦𑀢𑁆𑀣𑀜𑁆𑀘𑁂𑀢𑁆𑀣 ‘‘𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀢𑀻’’𑀢𑀺 𑀆𑀫𑁂𑀟𑀺𑀢𑀯𑀘𑀦𑀁. 𑀅𑀣 𑀯𑀸 𑀲𑀺𑀓𑁆𑀔𑀦𑀁 𑀲𑀺𑀓𑁆𑀔𑀸, 𑀲𑀸 𑀏𑀢𑀲𑁆𑀲 𑀲𑀻𑀮𑀦𑁆𑀢𑀺 𑀲𑁂𑀓𑁆𑀔𑁄. 𑀲𑁄 𑀳𑀺 𑀅𑀧𑀭𑀺𑀬𑁄𑀲𑀺𑀢𑀲𑀺𑀓𑁆𑀔𑀢𑁆𑀢𑀸 𑀢𑀤𑀥𑀺𑀫𑀼𑀢𑁆𑀢𑀢𑁆𑀢𑀸 𑀘 𑀏𑀓𑀦𑁆𑀢𑁂𑀦 𑀲𑀺𑀓𑁆𑀔𑀦𑀲𑀻𑀮𑁄, 𑀦 𑀅𑀲𑁂𑀓𑁆𑀔𑁄 𑀯𑀺𑀬 𑀧𑀭𑀺𑀦𑀺𑀝𑁆𑀞𑀺𑀢𑀲𑀺𑀓𑁆𑀔𑁄 𑀢𑀢𑁆𑀣 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀼𑀲𑁆𑀲𑀼𑀓𑁆𑀓𑁄, 𑀦𑀸𑀧𑀺 𑀯𑀺𑀲𑁆𑀲𑀝𑁆𑀞𑀲𑀺𑀓𑁆𑀔𑁄 𑀧𑀘𑀼𑀭𑀚𑀦𑁄 𑀯𑀺𑀬 𑀢𑀢𑁆𑀣 𑀅𑀦𑀥𑀺𑀫𑀼𑀢𑁆𑀢𑁄. 𑀅𑀣 𑀯𑀸 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀚𑀸𑀢𑁄, 𑀢𑀢𑁆𑀣 𑀯𑀸 𑀪𑀯𑁄𑀢𑀺 𑀲𑁂𑀓𑁆𑀔𑁄. 𑀅𑀣 𑀯𑀸 𑀇𑀓𑁆𑀔𑀢𑀺 𑀏𑀢𑀸𑀬𑀸𑀢𑀺 𑀇𑀓𑁆𑀔𑀸, 𑀫𑀕𑁆𑀕𑀨𑀮𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀳 𑀇𑀓𑁆𑀔𑀸𑀬𑀸𑀢𑀺 𑀲𑁂𑀓𑁆𑀔𑁄.

𑀅𑀦𑀼𑀮𑁄𑀫𑀧𑀝𑀺𑀧𑀤𑀸𑀬 𑀧𑀭𑀺𑀧𑀽𑀭𑀓𑀸𑀭𑀻𑀢𑀺 𑀬𑀸 𑀲𑀸 𑀲𑀻𑀮𑀸𑀤𑀺𑀓𑀸 𑀯𑀺𑀧𑀲𑁆𑀲𑀦𑀦𑁆𑀢𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀮𑁄𑀓𑀼𑀢𑁆𑀢𑀭𑀸𑀬 𑀧𑀝𑀺𑀧𑀤𑀸𑀬 𑀅𑀦𑀼𑀮𑁄𑀫𑀦𑀢𑁄 𑀅𑀦𑀼𑀮𑁄𑀫𑀧𑀝𑀺𑀧𑀤𑀸, 𑀢𑀲𑁆𑀲𑀸 𑀲𑀫𑁆𑀧𑀸𑀤𑀦𑁂𑀦 𑀧𑀭𑀺𑀧𑀽𑀭𑀓𑀸𑀭𑀻𑀢𑀺. 𑀇𑀤𑀸𑀦𑀺 𑀢𑀁 𑀧𑀝𑀺𑀧𑀤𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀮𑀲𑀫𑁆𑀧𑀦𑁆𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀧𑀭𑀺𑀧𑀼𑀡𑁆𑀡𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑁄 𑀯𑀸. 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑀜𑁆𑀳𑀺 𑀇𑀥 ‘‘𑀲𑀻𑀮’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁 𑀧𑀥𑀸𑀦𑀪𑀸𑀯𑀢𑁄. 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑁂𑀲𑀼 𑀅𑀪𑀺𑀚𑁆𑀛𑀸𑀤𑀻𑀦𑀁 𑀧𑀯𑀢𑁆𑀢𑀺𑀦𑀺𑀯𑀸𑀭𑀡𑀲𑀗𑁆𑀔𑀸𑀢𑁂𑀦 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀺𑀥𑀸𑀦𑁂𑀦 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄. 𑀧𑀭𑀺𑀬𑁂𑀲𑀦𑀸𑀤𑀺𑀯𑀲𑁂𑀦 𑀪𑁄𑀚𑀦𑁂 𑀧𑀫𑀸𑀡𑀚𑀸𑀦𑀦𑁂𑀦 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽. 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄 𑀳𑀼𑀢𑁆𑀯𑀸 𑀭𑀢𑁆𑀢𑀺𑀦𑁆𑀤𑀺𑀯𑀁 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁂 𑀬𑀼𑀢𑁆𑀢𑀢𑀸𑀬 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄. 𑀓𑀣𑀁 𑀧𑀦 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄 𑀳𑁄𑀢𑀻𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀩𑁆𑀩𑀭𑀢𑁆𑀢𑀸…𑀧𑁂… 𑀯𑀺𑀳𑀭𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀣𑀸𑀳 ‘‘𑀓𑀣𑀜𑁆𑀘 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀁 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀳𑁄𑀢𑀺? 𑀇𑀥 𑀪𑀺𑀓𑁆𑀔𑀼 𑀤𑀺𑀯𑀲𑀁 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬 𑀆𑀯𑀭𑀡𑀻𑀬𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑀺, 𑀭𑀢𑁆𑀢𑀺𑀬𑀸 𑀧𑀞𑀫𑀁 𑀬𑀸𑀫𑀁 𑀘𑀗𑁆𑀓𑀫𑁂𑀦…𑀧𑁂… 𑀲𑁄𑀥𑁂𑀢𑀺, 𑀏𑀯𑀁 𑀔𑁄 𑀪𑀺𑀓𑁆𑀔𑀼 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀁 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀳𑁄𑀢𑀻’’𑀢𑀺 (𑀯𑀺𑀪. 𑁫𑁧𑁯). 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂𑀢𑀺 ‘‘𑀫𑀜𑁆𑀜𑀢𑀺, 𑀦 𑀫𑀜𑁆𑀜𑀢𑀻’’𑀢𑀺 𑀘 𑀯𑀢𑁆𑀢𑀩𑁆𑀩𑀪𑀸𑀯𑀲𑀗𑁆𑀔𑀸𑀢𑁂 𑀅𑀢𑁆𑀣𑁂. 𑀦𑁄 𑀧𑀼𑀣𑀼𑀚𑁆𑀚𑀦𑁄 𑀅𑀥𑀺𑀧𑁆𑀧𑁂𑀢𑁄 ‘‘𑀅𑀧𑁆𑀧𑀢𑁆𑀢𑀫𑀸𑀦𑀲𑁄, 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀧𑀢𑁆𑀣𑀬𑀫𑀸𑀦𑁄’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸.

𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀫𑀦𑀲𑀺 𑀪𑀯𑁄𑀢𑀺 𑀭𑀸𑀕𑁄 𑀫𑀸𑀦𑀲𑁄, 𑀫𑀦𑁄 𑀏𑀯 𑀫𑀸𑀦𑀲𑀦𑁆𑀢𑀺 𑀓𑀢𑁆𑀯𑀸 𑀘𑀺𑀢𑁆𑀢𑀁 𑀫𑀸𑀦𑀲𑀁, 𑀅𑀦𑀯𑀲𑁂𑀲𑀢𑁄 𑀫𑀸𑀦𑀁 𑀲𑀻𑀬𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀢𑀻𑀢𑀺 𑀅𑀕𑁆𑀕𑀫𑀕𑁆𑀕𑁄 ¶ 𑀫𑀸𑀦𑀲𑀁, 𑀢𑀦𑁆𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀧𑀦 𑀅𑀭𑀳𑀢𑁆𑀢𑀲𑁆𑀲 𑀫𑀸𑀦𑀲𑀢𑀸 𑀤𑀝𑁆𑀞𑀩𑁆𑀩𑀸. 𑀚𑀦𑁂𑀲𑀼𑀢𑀸𑀢𑀺 𑀚𑀦𑁂 𑀲𑀓𑀮𑀲𑀢𑁆𑀢𑀮𑁄𑀓𑁂 𑀯𑀺𑀲𑁆𑀲𑀼𑀢𑀸, 𑀧𑀢𑁆𑀣𑀝𑀬𑀲𑀸𑀢𑀺 𑀅𑀢𑁆𑀣𑁄.

𑀦𑀢𑁆𑀣𑀺 𑀇𑀢𑁄 𑀉𑀢𑁆𑀢𑀭𑀦𑁆𑀢𑀺 𑀅𑀦𑀼𑀢𑁆𑀢𑀭𑀁. 𑀢𑀁 𑀧𑀦 𑀲𑀩𑁆𑀩𑀲𑁂𑀝𑁆𑀞𑀁 𑀳𑁄𑀦𑁆𑀢𑀁 𑀏𑀓𑀦𑁆𑀢𑀢𑁄 𑀲𑀤𑀺𑀲𑀭𑀳𑀺𑀢𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀦𑀼𑀢𑁆𑀢𑀭𑀦𑁆𑀢𑀺 𑀲𑁂𑀝𑁆𑀞𑀁, 𑀅𑀲𑀤𑀺𑀲𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀧𑀢𑁆𑀣𑀬𑀫𑀸𑀦𑀲𑁆𑀲𑀸𑀢𑀺 𑀢𑀡𑁆𑀳𑀸𑀬𑀦𑁆𑀢𑀲𑁆𑀲. 𑀧𑀚𑀧𑁆𑀧𑀺𑀢𑀸𑀦𑀻𑀢𑀺 𑀫𑀸𑀦𑀚𑀧𑁆𑀧𑀦𑀸𑀦𑀺. 𑀬𑀲𑁆𑀫𑀺𑀜𑁆𑀳𑀺 𑀯𑀢𑁆𑀣𑀼𑀲𑁆𑀫𑀺𑀁 𑀢𑀡𑁆𑀳𑀸𑀬𑀦𑀸 𑀧𑀢𑁆𑀣𑀬𑀫𑀸𑀦𑀫𑀜𑁆𑀜𑀦𑀸 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀺𑀁𑀬𑁂𑀯 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀻𑀦𑀺 𑀧𑀚𑀧𑁆𑀧𑀺𑀢𑀸𑀦𑀺 𑀲𑀫𑁆𑀪𑀯𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀯𑁂𑀥𑀻𑀢𑀦𑁆𑀢𑀺 𑀧𑀭𑀺𑀯𑀸𑀲𑀺𑀢𑀁. 𑀧𑀓𑀧𑁆𑀧𑀺𑀢𑁂𑀲𑀽𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀓𑀧𑁆𑀧𑁂𑀳𑀺 𑀧𑀭𑀺𑀓𑀧𑁆𑀧𑀺𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼. 𑀲𑁄𑀢𑀦𑁆𑀢𑀺 𑀓𑀺𑀮𑁂𑀲𑀲𑁄𑀢𑀁 ¶ . 𑀢𑀲𑁆𑀫𑀺𑀜𑁆𑀳𑀺 𑀙𑀺𑀦𑁆𑀦𑁂 𑀇𑀢𑀭𑀲𑁄𑀢𑀁 𑀙𑀺𑀦𑁆𑀦𑀫𑁂𑀯𑀸𑀢𑀺. 𑀯𑀺𑀤𑁆𑀥𑀲𑁆𑀢𑀦𑁆𑀢𑀺 𑀯𑀺𑀦𑀸𑀲𑀺𑀢𑀁. 𑀢𑀜𑁆𑀘 𑀔𑁄 𑀮𑁄𑀫𑀳𑀁𑀲𑀫𑀢𑁆𑀢𑀫𑁆𑀧𑀺 𑀅𑀲𑁂𑀲𑁂𑀢𑁆𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀯𑀺𑀦𑀴𑀻𑀓𑀢’’𑀦𑁆𑀢𑀺, 𑀯𑀺𑀕𑀢𑀸𑀯𑀲𑁂𑀲𑀁 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀥𑀺𑀫𑀼𑀢𑁆𑀢𑀺𑀬𑀸 𑀇𑀥𑀸𑀥𑀺𑀧𑁆𑀧𑁂𑀢𑀧𑀢𑁆𑀣𑀦𑀸 𑀧𑀸𑀓𑀝𑀸 𑀳𑁄𑀢𑀻𑀢𑀺 ‘‘𑀢𑀦𑁆𑀦𑀺𑀦𑁆𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀦 𑀧𑀦 𑀓𑀼𑀲𑀮𑀘𑁆𑀙𑀦𑁆𑀤𑀲𑁆𑀲 𑀅𑀥𑀺𑀫𑀼𑀢𑁆𑀢𑀺𑀪𑀸𑀯𑀢𑁄. 𑀅𑀥𑀺𑀫𑀼𑀘𑁆𑀘𑀦𑁆𑀢𑁄𑀢𑀺 𑀑𑀓𑀧𑁆𑀧𑁂𑀦𑁆𑀢𑁄.

𑀲𑀩𑁆𑀩𑀸𑀓𑀸𑀭𑀯𑀺𑀧𑀭𑀻𑀢𑀸𑀬𑀸𑀢𑀺 ‘‘𑀲𑀼𑀪𑀁 𑀲𑀼𑀔𑀁 𑀦𑀺𑀘𑁆𑀘’’𑀦𑁆𑀢𑀺𑀆𑀤𑀻𑀦𑀁 𑀲𑀩𑁆𑀩𑁂𑀲𑀁 𑀅𑀢𑁆𑀢𑀦𑀸 𑀕𑀳𑁂𑀢𑀩𑁆𑀩𑀸𑀓𑀸𑀭𑀸𑀦𑀁 𑀯𑀲𑁂𑀦 𑀢𑀩𑁆𑀩𑀺𑀧𑀭𑀻𑀢𑀢𑀸𑀬, 𑀅𑀦𑀯𑀲𑁂𑀲𑀢𑁄 𑀥𑀫𑁆𑀫𑀲𑀪𑀸𑀯𑀯𑀺𑀧𑀭𑀻𑀢𑀸𑀓𑀸𑀭𑀕𑀸𑀳𑀺𑀦𑀺𑀬𑀸𑀢𑀺 𑀅𑀢𑁆𑀣𑁄. 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦𑀸𑀢𑀺 𑀅𑀲𑀫𑁆𑀧𑀚𑀸𑀦𑀦𑀫𑀺𑀘𑁆𑀙𑀸𑀚𑀸𑀦𑀦𑀸𑀦𑀺 𑀯𑀺𑀬 𑀦 𑀥𑀫𑁆𑀫𑀲𑀪𑀸𑀯𑀁 𑀅𑀧𑁆𑀧𑀢𑁆𑀯𑀸 𑀦𑀸𑀧𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸, 𑀅𑀣 𑀔𑁄 𑀅𑀯𑀺𑀭𑀚𑁆𑀛𑀺𑀢𑁆𑀯𑀸 𑀥𑀫𑁆𑀫𑀲𑀪𑀸𑀯𑀲𑁆𑀲 𑀅𑀪𑀺𑀫𑀼𑀔𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦, 𑀜𑀸𑀢𑀧𑀭𑀺𑀜𑁆𑀜𑀸𑀥𑀺𑀝𑁆𑀞𑀸𑀦𑀸𑀬 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀧𑀳𑀸𑀦𑀧𑀭𑀺𑀜𑁆𑀜𑁂𑀓𑀤𑁂𑀲𑁂𑀦 𑀘𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀣𑀯𑀻𑀢𑀺…𑀧𑁂… 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀧𑀣𑀯𑀻𑀪𑀸𑀯𑀦𑁆𑀢𑀺 𑀧𑀣𑀯𑀺𑀬𑀁 𑀅𑀪𑀺𑀜𑁆𑀜𑁂𑀬𑁆𑀬𑀪𑀸𑀯𑀁. 𑀮𑀓𑁆𑀔𑀡𑀧𑀣𑀯𑀻 𑀳𑀺 𑀇𑀥𑀸𑀥𑀺𑀧𑁆𑀧𑁂𑀢𑀸, 𑀧𑀭𑀺𑀜𑁆𑀜𑁂𑀬𑁆𑀬𑀪𑀸𑀯𑁄 𑀧𑀦𑀲𑁆𑀲𑀸 ‘‘𑀅𑀦𑀺𑀘𑁆𑀘𑀸𑀢𑀺𑀧𑀻’’𑀢𑀺𑀆𑀤𑀺𑀦𑀸 𑀕𑀳𑀺𑀢𑁄𑀢𑀺. 𑀅𑀪𑀺𑀜𑁆𑀜𑀢𑁆𑀯𑀸𑀢𑀺 𑀜𑀸𑀢𑀢𑀻𑀭𑀡𑀧𑀳𑀸𑀦𑀧𑀭𑀺𑀜𑁆𑀜𑀸𑀳𑀺 𑀳𑁂𑀝𑁆𑀞𑀺𑀫𑀫𑀕𑁆𑀕𑀜𑀸𑀡𑁂𑀳𑀺 𑀘 𑀅𑀪𑀺𑀚𑀸𑀦𑀺𑀢𑁆𑀯𑀸. 𑀫𑀸𑀫𑀜𑁆𑀜𑀻𑀢𑀺 𑀅𑀧𑁆𑀧𑀳𑀻𑀦𑀸𑀦𑀁 𑀫𑀜𑁆𑀜𑀦𑀸𑀦𑀁 𑀯𑀲𑁂𑀦 𑀫𑀸𑀢𑀺 𑀫𑀜𑁆𑀜𑀢𑀻𑀢𑀺 𑀫𑀸, 𑀧𑀳𑀻𑀦𑀸𑀦𑀁 𑀧𑀦 𑀯𑀲𑁂𑀦 𑀦 𑀫𑀜𑁆𑀜𑀢𑀻𑀢𑀺 𑀅𑀫𑀜𑁆𑀜𑀻, 𑀫𑀸 𑀘 𑀲𑁄 𑀅𑀫𑀜𑁆𑀜𑀻 𑀘 𑀫𑀸𑀫𑀜𑁆𑀜𑀻𑀢𑀺 𑀏𑀯𑀫𑁂𑀢𑁆𑀣 𑀧𑀤𑀯𑀺𑀪𑀸𑀕𑀢𑁄 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀬𑁂𑀦 𑀪𑀸𑀕𑁂𑀦 𑀅𑀫𑀜𑁆𑀜𑀻, 𑀢𑁂𑀦 𑀫𑀜𑁆𑀜𑀻𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀬𑁂𑀦 𑀧𑀦 𑀪𑀸𑀕𑁂𑀦 𑀫𑀜𑁆𑀜𑀻, 𑀢𑁂𑀦 𑀅𑀫𑀜𑁆𑀜𑀻𑀢𑀺 𑀦 𑀯𑀢𑁆𑀢𑀩𑁆𑀩𑁄𑀢𑀺. 𑀏𑀯𑀁 𑀧𑀝𑀺𑀓𑁆𑀔𑁂𑀧𑀧𑁆𑀧𑀥𑀸𑀦𑀁 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀫𑀜𑁆𑀜𑀻 𑀘 𑀦 𑀫𑀜𑁆𑀜𑀻 𑀘 𑀦 𑀯𑀢𑁆𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀓𑁆𑀔𑁂𑀧𑀧𑁆𑀧𑀥𑀸𑀦𑀢𑀸 𑀘𑁂𑀢𑁆𑀣 ¶ 𑀮𑀩𑁆𑀪𑀫𑀸𑀦𑀸𑀦𑀫𑁆𑀧𑀺 𑀫𑀜𑁆𑀜𑀦𑀸𑀦𑀁 𑀤𑀼𑀩𑁆𑀩𑀮𑀪𑀸𑀯𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑁂𑀯𑀸𑀳 𑁋 ‘‘𑀇𑀢𑀭𑀸 𑀧𑀦 𑀢𑀦𑀼𑀪𑀸𑀯𑀁 𑀕𑀢𑀸’’𑀢𑀺. 𑀫𑀸𑀢𑀺 𑀘 𑀦𑀺𑀧𑀸𑀢𑀧𑀤𑀫𑁂𑀢𑀁, 𑀅𑀦𑁂𑀓𑀢𑁆𑀣𑀸 𑀘 𑀦𑀺𑀧𑀸𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀏𑀢𑀲𑁆𑀫𑀺𑀜𑁆𑀳𑀺 𑀅𑀢𑁆𑀣𑁂 𑀇𑀫𑀁 𑀧𑀤𑀁 𑀦𑀺𑀧𑀸𑀢𑁂𑀢𑁆𑀯𑀸 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀦𑀺𑀧𑀸𑀢𑁂𑀢𑁆𑀯𑀸𑀢𑀺 𑀘 𑀧𑀓𑀢𑀺𑀆𑀤𑀺𑀯𑀺𑀪𑀸𑀕𑀦𑀺𑀤𑁆𑀥𑀸𑀭𑀡𑁂 𑀅𑀦𑀼𑀫𑀸𑀦𑀦𑀬𑀁 𑀫𑀼𑀜𑁆𑀘𑀺𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑁂 𑀅𑀢𑁆𑀣𑁂 𑀧𑀘𑁆𑀘𑀓𑁆𑀔𑀢𑁄𑀯 𑀤𑀲𑁆𑀲𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀼𑀣𑀼𑀚𑁆𑀚𑀦𑁄 𑀯𑀺𑀬𑀸𑀢𑀺 𑀏𑀢𑁂𑀦𑀲𑁆𑀲 𑀉𑀧𑀭𑀺𑀫𑀕𑁆𑀕𑀯𑀚𑁆𑀛𑀢𑀡𑁆𑀳𑀸𑀫𑀸𑀦𑀯𑀲𑁂𑀦 𑀫𑀜𑁆𑀜𑀦𑀸 𑀦 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑀤𑀻𑀧𑁂𑀢𑀺.

𑀅𑀣 𑀯𑀸 𑀫𑀸 𑀫𑀜𑁆𑀜𑀻𑀢𑀺 𑀧𑀭𑀺𑀓𑀧𑁆𑀧𑀓𑀺𑀭𑀺𑀬𑀸𑀧𑀝𑀺𑀓𑁆𑀔𑁂𑀧𑀯𑀘𑀦𑀫𑁂𑀢𑀁 ‘‘𑀫𑀸 𑀭𑀦𑁆𑀥𑀬𑀼𑀁, 𑀫𑀸 𑀚𑀻𑀭𑀻’’𑀢𑀺𑀆𑀤𑀻𑀲𑀼 𑀯𑀺𑀬, 𑀦 𑀫𑀜𑁆𑀜𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀜𑁆𑀳𑁄𑀢𑀺. 𑀬𑀣𑀸 𑀳𑀺 𑀧𑀼𑀣𑀼𑀚𑁆𑀚𑀦𑁄 𑀲𑀩𑁆𑀩𑀲𑁄 𑀅𑀧𑁆𑀧𑀳𑀻𑀦𑀫𑀜𑁆𑀜𑀦𑀢𑁆𑀢𑀸 ‘‘𑀫𑀜𑁆𑀜𑀢𑀺’’𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑁄, 𑀬𑀣𑀸 𑀘 𑀔𑀻𑀡𑀸𑀲𑀯𑁄 𑀲𑀩𑁆𑀩𑀲𑁄 𑀧𑀳𑀻𑀦𑀫𑀜𑁆𑀜𑀦𑀢𑁆𑀢𑀸 𑀦 𑀫𑀜𑁆𑀜𑀢𑀺 𑀏𑀯, 𑀦 𑀏𑀯𑀁 𑀲𑁂𑀓𑁆𑀔𑁄. 𑀢𑀲𑁆𑀲 𑀳𑀺 𑀏𑀓𑀘𑁆𑀘𑀸 𑀫𑀜𑁆𑀜𑀦𑀸 𑀧𑀳𑀻𑀦𑀸, 𑀏𑀓𑀘𑁆𑀘𑀸 𑀅𑀧𑁆𑀧𑀳𑀻𑀦𑀸, 𑀢𑀲𑁆𑀫𑀸 𑀉𑀪𑀬𑀪𑀸𑀯𑀢𑁄 𑀉𑀪𑀬𑀣𑀸𑀧𑀺 𑀦 𑀯𑀢𑁆𑀢𑀩𑁆𑀩𑁄. 𑀦𑀦𑀼 𑀘 𑀉𑀪𑀬𑀪𑀸𑀯𑀢𑁄 𑀉𑀪𑀬𑀣𑀸𑀧𑀺 𑀯𑀢𑁆𑀢𑀩𑁆𑀩𑁄𑀢𑀺? 𑀦. 𑀬𑀸 𑀳𑀺 𑀅𑀧𑁆𑀧𑀳𑀻𑀦𑀸, 𑀢𑀸𑀧𑀺𑀲𑁆𑀲 𑀢𑀦𑀼𑀪𑀸𑀯𑀁 𑀕𑀢𑀸𑀢𑀺 𑀢𑀸𑀳𑀺𑀧𑀺 𑀲𑁄 𑀦 𑀫𑀜𑁆𑀜𑁂𑀬𑁆𑀬 𑀯𑀺𑀪𑀽𑀢𑀢𑀭𑀸𑀬 ¶ 𑀫𑀜𑁆𑀜𑀦𑀸𑀬 𑀅𑀪𑀸𑀯𑀢𑁄, 𑀧𑀕𑁂𑀯 𑀇𑀢𑀭𑀸𑀳𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀫𑀸 𑀫𑀜𑁆𑀜𑀻’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀸 𑀫𑀜𑁆𑀜𑀻𑀢𑀺 𑀧𑀭𑀺𑀓𑀧𑁆𑀧𑀓𑀺𑀭𑀺𑀬𑀸𑀧𑀝𑀺𑀓𑁆𑀔𑁂𑀧𑀯𑀘𑀦𑀫𑁂𑀢𑀁 ‘𑀫𑀸 𑀭𑀦𑁆𑀥𑀬𑀼𑀁, 𑀫𑀸 𑀚𑀻𑀭𑀻’𑀢𑀺𑀆𑀤𑀻𑀲𑀼 𑀯𑀺𑀬, 𑀦 𑀫𑀜𑁆𑀜𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀅𑀬𑀜𑁆𑀘𑀲𑁆𑀲 𑀅𑀫𑀜𑁆𑀜𑀦𑀸 𑀯𑀢𑁆𑀣𑀼𑀦𑁄 𑀧𑀭𑀺𑀜𑁆𑀜𑁂𑀬𑁆𑀬𑀢𑁆𑀢𑀸, 𑀦 𑀅𑀲𑁂𑀓𑁆𑀔𑀲𑁆𑀲 𑀯𑀺𑀬 𑀧𑀭𑀺𑀜𑁆𑀜𑀸𑀢𑀢𑁆𑀢𑀸. 𑀬𑀜𑁆𑀳𑀺 𑀏𑀓𑀦𑁆𑀢𑀢𑁄 𑀧𑀭𑀺𑀚𑀸𑀦𑀺𑀢𑀩𑁆𑀩𑀁 𑀧𑀭𑀺𑀚𑀸𑀦𑀺𑀢𑀼𑀁 𑀲𑀓𑁆𑀓𑀸, 𑀦 𑀢𑀢𑁆𑀣 𑀢𑀩𑁆𑀩𑀺𑀥𑀼𑀭𑁂 𑀯𑀺𑀬 𑀧𑀼𑀣𑀼𑀚𑁆𑀚𑀦𑀲𑁆𑀲 𑀫𑀜𑁆𑀜𑀦𑀸 𑀲𑀫𑁆𑀪𑀯𑀦𑁆𑀢𑀺. 𑀢𑁂𑀦𑀸𑀳 ‘‘𑀧𑀭𑀺𑀜𑁆𑀜𑁂𑀬𑁆𑀬𑀁 𑀢𑀲𑁆𑀲𑀸𑀢𑀺 𑀯𑀤𑀸𑀫𑀻’’𑀢𑀺.

𑀑𑀓𑁆𑀓𑀦𑁆𑀢𑀦𑀺𑀬𑀸𑀫𑀢𑁆𑀢𑀸𑀢𑀺 𑀅𑀦𑀼𑀧𑀯𑀺𑀝𑁆𑀞𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀢𑁆𑀢𑀸, 𑀑𑀢𑀺𑀡𑁆𑀡𑀫𑀕𑁆𑀕𑀲𑁄𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑀢𑁆𑀢𑀸𑀢𑀺 𑀉𑀧𑀭𑀺𑀫𑀕𑁆𑀕𑀲𑀫𑁆𑀩𑁄𑀥𑀺𑀧𑀝𑀺𑀲𑀭𑀡𑀢𑁆𑀢𑀸, 𑀢𑀤𑀥𑀺𑀕𑀫𑀸𑀬 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀉𑀪𑀬𑁂𑀦𑀧𑀺 𑀢𑀲𑁆𑀲 𑀅𑀯𑀲𑁆𑀲𑀁𑀪𑀸𑀯𑀺𑀦𑀻 𑀲𑁂𑀲𑀧𑀭𑀺𑀜𑁆𑀜𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀭𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀧𑀭𑀺𑀚𑀸𑀦𑀺𑀢𑀩𑁆𑀩𑀪𑀸𑀯𑁂𑀦 𑀞𑀺𑀢𑀁, 𑀧𑀭𑀺𑀜𑁆𑀜𑀸𑀢𑀼𑀁 𑀯𑀸 𑀲𑀓𑁆𑀓𑀼𑀡𑁂𑀬𑁆𑀬𑀁. 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀧𑀭𑀺𑀜𑁆𑀜𑁂𑀬𑁆𑀬𑀁. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀯𑀺𑀬𑀸𑀢𑀺 𑀏𑀢𑁂𑀦 𑀇𑀥𑀸𑀥𑀺𑀧𑁆𑀧𑁂𑀢𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀭𑀺𑀜𑁆𑀜𑁂𑀬𑁆𑀬𑀪𑀸𑀯𑀸𑀲𑀗𑁆𑀓𑀸 𑀏𑀯 𑀦𑀢𑁆𑀣𑀺 𑀅𑀦𑀥𑀺𑀓𑀸𑀭𑀢𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀫𑀸𑀪𑀺𑀦𑀦𑁆𑀤𑀻’’𑀢𑀺 𑀏𑀢𑁆𑀣𑀸𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑁂𑀓𑁆𑀔𑀯𑀸𑀭𑀤𑀼𑀢𑀺𑀬𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀔𑀻𑀡𑀸𑀲𑀯𑀯𑀸𑀭𑀢𑀢𑀺𑀬𑀸𑀤𑀺𑀦𑀬𑀯𑀡𑁆𑀡𑀦𑀸

𑁮. 𑀲𑀪𑀸𑀕𑁄 ¶ 𑀤𑀺𑀝𑁆𑀞𑀲𑀘𑁆𑀘𑀢𑀸𑀤𑀺𑀲𑀸𑀫𑀜𑁆𑀜𑁂𑀦. 𑀆𑀭𑀓𑀸 𑀓𑀺𑀮𑁂𑀲𑁂𑀳𑀺 𑀅𑀭𑀳𑀦𑁆𑀢𑀺 𑀧𑀤𑀲𑁆𑀲 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀅𑀢𑁆𑀣𑀁 𑀯𑀢𑁆𑀯𑀸 𑀢𑀁 𑀧𑀸𑀴𑀺𑀬𑀸 𑀲𑀫𑀸𑀦𑁂𑀦𑁆𑀢𑁄 ‘‘𑀯𑀼𑀢𑁆𑀢𑀜𑁆𑀘𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀸𑀧𑀓𑀸𑀢𑀺 𑀮𑀸𑀫𑀓𑀝𑁆𑀞𑁂𑀦 𑀤𑀼𑀕𑁆𑀕𑀢𑀺𑀲𑀫𑁆𑀧𑀸𑀧𑀦𑀝𑁆𑀞𑁂𑀦 𑀘 𑀧𑀸𑀧𑀓𑀸. 𑀲𑀸𑀯𑀚𑁆𑀚𑀝𑁆𑀞𑁂𑀦 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦 𑀘 𑀅𑀓𑀼𑀲𑀮𑀸. 𑀲𑀁𑀓𑀺𑀮𑁂𑀲𑀁 𑀅𑀭𑀳𑀦𑁆𑀢𑀺, 𑀢𑀢𑁆𑀣 𑀯𑀸 𑀦𑀺𑀬𑀼𑀢𑁆𑀢𑀸𑀢𑀺 𑀲𑀁𑀓𑀺𑀮𑁂𑀲𑀺𑀓𑀸. 𑀧𑀼𑀦𑀩𑁆𑀪𑀯𑀲𑁆𑀲 𑀓𑀭𑀡𑀲𑀻𑀮𑀸, 𑀧𑀼𑀦𑀩𑁆𑀪𑀯𑀨𑀮𑀁 𑀅𑀭𑀳𑀦𑁆𑀢𑀻𑀢𑀺 𑀯𑀸 𑀧𑁄𑀦𑁄𑀪𑀯𑀺𑀓𑀸. 𑀲𑀳 𑀤𑀭𑀣𑁂𑀦 𑀧𑀭𑀺𑀴𑀸𑀳𑁂𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀲𑀤𑀭𑀸. 𑀤𑀼𑀓𑁆𑀔𑁄 𑀓𑀝𑀼𑀓𑁄, 𑀤𑀼𑀓𑁆𑀔𑀫𑁄 𑀯𑀸 𑀯𑀺𑀧𑀸𑀓𑁄 𑀏𑀢𑁂𑀲𑀦𑁆𑀢𑀺 𑀤𑀼𑀓𑁆𑀔𑀯𑀺𑀧𑀸𑀓𑀸. 𑀅𑀦𑀸𑀕𑀢𑁂 𑀚𑀸𑀢𑀺𑀬𑀸 𑀘𑁂𑀯 𑀚𑀭𑀸𑀫𑀭𑀡𑀸𑀦𑀜𑁆𑀘 𑀯𑀟𑁆𑀠𑀦𑁂𑀦 𑀚𑀸𑀢𑀺𑀚𑀭𑀸𑀫𑀭𑀡𑀺𑀬𑀸𑀢𑀺. 𑀏𑀯𑀫𑁂𑀢𑁂𑀲𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀸𑀫𑀜𑁆𑀘𑀸𑀬𑀁 𑀲𑀼𑀢𑁆𑀢𑀦𑁆𑀢𑀯𑀡𑁆𑀡𑀦𑀸, 𑀅𑀪𑀺𑀥𑀫𑁆𑀫𑀦𑀬𑁄 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑁄𑀢𑀺 𑀢𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀢𑁆𑀢𑀸𑀭𑁄 𑀆𑀲𑀯𑀸’’𑀢𑀺𑀆𑀤𑀺𑀫𑀸𑀳. 𑀲𑀫𑀼𑀘𑁆𑀙𑀺𑀦𑁆𑀦𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸𑀢𑀺 𑀦 𑀓𑁂𑀯𑀮𑀁 𑀲𑀫𑀼𑀘𑁆𑀙𑀺𑀦𑁆𑀦𑀸 𑀏𑀯, 𑀅𑀣 𑀔𑁄 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸𑀧𑀻𑀢𑀺 𑀫𑀕𑁆𑀕𑀓𑀺𑀘𑁆𑀘𑁂𑀦 𑀲𑀤𑀺𑀲𑀁 𑀨𑀮𑀓𑀺𑀘𑁆𑀘𑀫𑁆𑀧𑀺 𑀦𑀺𑀤𑁆𑀥𑀸𑀭𑁂𑀢𑀺.

𑀲𑀻𑀮𑀯𑀺𑀲𑁄𑀥𑀦𑀸𑀤𑀺𑀦𑀸 ¶ 𑀕𑀭𑀽𑀦𑀁 𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀼𑀓𑀭𑀡𑀁 𑀕𑀭𑀼𑀲𑀁𑀯𑀸𑀲𑁄. 𑀅𑀭𑀺𑀬𑀫𑀕𑁆𑀕𑀧𑀝𑀺𑀧𑀢𑁆𑀢𑀺 𑀏𑀯 𑀅𑀭𑀺𑀬𑀫𑀕𑁆𑀕𑀲𑀁𑀯𑀸𑀲𑁄. 𑀤𑀲 𑀅𑀭𑀺𑀬𑀸𑀯𑀸𑀲𑀸 𑀦𑀸𑀫 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀢𑀸𑀤𑀬𑁄. 𑀬𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀤𑀲𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀸𑀯𑀸𑀲𑀸, 𑀬𑁂 𑀅𑀭𑀺𑀬𑀸 𑀆𑀯𑀲𑀺𑀁𑀲𑀼 𑀯𑀸 𑀆𑀯𑀲𑀦𑁆𑀢𑀺 𑀯𑀸 𑀆𑀯𑀲𑀺𑀲𑁆𑀲𑀦𑁆𑀢𑀺 𑀯𑀸. 𑀓𑀢𑀫𑁂 𑀤𑀲? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑁄 𑀳𑁄𑀢𑀺 𑀙𑀴𑀗𑁆𑀕𑀲𑀫𑀦𑁆𑀦𑀸𑀕𑀢𑁄, 𑀏𑀓𑀸𑀭𑀓𑁆𑀔𑁄, 𑀘𑀢𑀼𑀭𑀸𑀧𑀲𑁆𑀲𑁂𑀦𑁄, 𑀧𑀦𑀼𑀡𑁆𑀡𑀧𑀘𑁆𑀘𑁂𑀓𑀲𑀘𑁆𑀘𑁄, 𑀲𑀫𑀯𑀬𑀲𑀝𑁆𑀞𑁂𑀲𑀦𑁄, 𑀅𑀦𑀸𑀯𑀺𑀮𑀲𑀗𑁆𑀓𑀧𑁆𑀧𑁄, 𑀧𑀲𑁆𑀲𑀤𑁆𑀥𑀓𑀸𑀬𑀲𑀗𑁆𑀔𑀸𑀭𑁄, 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄, 𑀲𑀼𑀯𑀺𑀫𑀼𑀢𑁆𑀢𑀧𑀜𑁆𑀜𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀤𑀲 𑀅𑀭𑀺𑀬𑀸𑀯𑀸𑀲𑀸’’𑀢𑀺 (𑀅. 𑀦𑀺. 𑁧𑁦.𑁧𑁯).

𑀯𑀼𑀲𑁆𑀲𑀢𑀻𑀢𑀺 𑀯𑀸 𑀯𑀼𑀲𑀺𑀢𑀁, 𑀅𑀭𑀺𑀬𑀫𑀕𑁆𑀕𑁄, 𑀅𑀭𑀺𑀬𑀨𑀮𑀜𑁆𑀘, 𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀢𑀺𑀲𑀬𑀯𑀘𑀦𑀺𑀘𑁆𑀙𑀸𑀯𑀲𑁂𑀦 𑀅𑀭𑀳𑀸 ‘‘𑀯𑀼𑀲𑀺𑀢𑀯𑀸’’𑀢𑀺 𑀯𑀼𑀢𑁆𑀢𑁄. 𑀓𑀭𑀡𑀻𑀬𑀦𑁆𑀢𑀺 𑀧𑀭𑀺𑀜𑁆𑀜𑀸𑀧𑀳𑀸𑀦𑀪𑀸𑀯𑀦𑀸𑀲𑀘𑁆𑀙𑀺𑀓𑀺𑀭𑀺𑀬𑀫𑀸𑀳. 𑀢𑀁 𑀧𑀦 𑀬𑀲𑁆𑀫𑀸 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀓𑀢𑁆𑀢𑀩𑁆𑀩𑀢𑁆𑀢𑀸 𑀲𑁄𑀴𑀲𑀯𑀺𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 ¶ 𑀓𑀭𑀡𑀻𑀬’’𑀦𑁆𑀢𑀺. 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀅𑀕𑁆𑀕𑀫𑀕𑁆𑀕𑀨𑀮𑀧𑀜𑁆𑀜𑀸𑀳𑀺 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀻𑀦𑀁 𑀯𑀲𑁂𑀦 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑀲𑁆𑀲. 𑀲𑀦𑁆𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀢𑀢𑁄 𑀏𑀯 𑀲𑀩𑁆𑀩𑀓𑀺𑀮𑁂𑀲𑀤𑀭𑀣𑀧𑀭𑀺𑀴𑀸𑀳𑀸𑀦𑀁 𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑀲𑁆𑀲. 𑀪𑀺𑀦𑁆𑀦𑀓𑀺𑀮𑁂𑀲𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀓𑀢𑀲𑁆𑀲 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀲𑁆𑀲 𑀧𑀝𑀺𑀘𑀬𑁄 𑀧𑀼𑀦 𑀓𑀭𑀡𑀁 𑀦𑀢𑁆𑀣𑀺, 𑀢𑀢𑁄 𑀏𑀯 𑀓𑀭𑀡𑀻𑀬𑀁 𑀦 𑀯𑀺𑀚𑁆𑀚𑀢𑀺 𑀦 𑀉𑀧𑀮𑀩𑁆𑀪𑀢𑀺.

𑀪𑀸𑀭𑀸𑀢𑀺 𑀑𑀲𑀻𑀤𑀸𑀧𑀦𑀝𑁆𑀞𑁂𑀦 𑀪𑀸𑀭𑀸 𑀯𑀺𑀬𑀸𑀢𑀺 𑀪𑀸𑀭𑀸. 𑀯𑀼𑀢𑁆𑀢𑀜𑁆𑀳𑀺 ‘‘𑀪𑀸𑀭𑀸 𑀳𑀯𑁂 𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺𑀆𑀤𑀺 (𑀲𑀁. 𑀦𑀺. 𑁩.𑁨𑁨). 𑀅𑀢𑁆𑀢𑀦𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀬𑀢𑁆𑀢𑀦𑁆𑀢𑀺 𑀅𑀢𑁆𑀢𑀼𑀧𑀦𑀺𑀩𑀦𑁆𑀥𑀁, 𑀲𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀅𑀢𑁆𑀢𑀸𑀦𑀁 𑀅𑀯𑀺𑀚𑀳𑀦𑀁. 𑀢𑀬𑀺𑀤𑀁 𑀬𑀤𑀺𑀧𑀺 𑀲𑀩𑁆𑀩𑀲𑁆𑀫𑀺𑀁 𑀅𑀦𑀯𑀚𑁆𑀚𑀥𑀫𑁆𑀫𑁂 𑀲𑀫𑁆𑀪𑀯𑀢𑀺, 𑀅𑀓𑀼𑀧𑁆𑀧𑀲𑀪𑀸𑀯𑀸𑀧𑀭𑀺𑀳𑀸𑀦𑀥𑀫𑁆𑀫𑁂𑀲𑀼 𑀧𑀦 𑀅𑀕𑁆𑀕𑀪𑀽𑀢𑁂 𑀅𑀭𑀳𑀢𑁆𑀢𑁂 𑀲𑀸𑀢𑀺𑀲𑀬𑀁, 𑀦𑁂𑀢𑀭𑁂𑀲𑀽𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀢𑁆𑀢𑀦𑁄 𑀧𑀭𑀫𑀢𑁆𑀣𑀝𑁆𑀞𑁂𑀦 𑀯𑀸’’𑀢𑀺, 𑀉𑀢𑁆𑀢𑀫𑀝𑁆𑀞𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄.

𑀲𑀼𑀢𑁆𑀢𑀦𑁆𑀢𑀦𑀬𑁄 𑀦𑀸𑀫 𑀧𑀭𑀺𑀬𑀸𑀬𑀦𑀬𑁄𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀦𑀬𑁂𑀦 𑀲𑀁𑀬𑁄𑀚𑀦𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀯𑀭𑀸𑀕𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀲𑀁𑀬𑁄𑀚𑀦’’𑀦𑁆𑀢𑀺 𑀆𑀳, 𑀦 𑀧𑀦 ‘‘𑀭𑀽𑀧𑀭𑀸𑀕𑁄’’𑀢𑀺𑀆𑀤𑀺𑀦𑀸. 𑀪𑀯𑁂𑀲𑀼 𑀲𑀁𑀬𑁄𑀚𑀦𑁆𑀢𑀻𑀢𑀺 𑀓𑀺𑀮𑁂𑀲𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑀸𑀦𑀁 𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀦𑀺𑀲𑁆𑀲𑀭𑀺𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀩𑀦𑁆𑀥𑀦𑁆𑀢𑀺. 𑀲𑀢𑀺𑀧𑀺 𑀳𑀺 𑀅𑀜𑁆𑀜𑁂𑀲𑀁 𑀢𑀧𑁆𑀧𑀘𑁆𑀘𑀬𑀪𑀸𑀯𑁂 𑀦 𑀯𑀺𑀦𑀸 𑀲𑀁𑀬𑁄𑀚𑀦𑀸𑀦𑀺 𑀢𑁂𑀲𑀁 𑀢𑀧𑁆𑀧𑀘𑁆𑀘𑀬𑀪𑀸𑀯𑁄 𑀅𑀢𑁆𑀣𑀺, 𑀑𑀭𑀫𑁆𑀪𑀸𑀕𑀺𑀬𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀗𑁆𑀕𑀳𑀺𑀢𑁂𑀳𑀺 𑀘 𑀢𑁂𑀳𑀺 𑀢𑀁𑀢𑀁𑀪𑀯𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀦𑀺𑀬𑀫𑁄 𑀪𑀯𑀦𑀺𑀬𑀫𑁄 𑀘 𑀳𑁄𑀢𑀺 ¶ , 𑀦 𑀘 𑀉𑀧𑀘𑁆𑀙𑀺𑀦𑁆𑀦𑀲𑀁𑀬𑁄𑀚𑀦𑀲𑁆𑀲 𑀓𑀢𑀸𑀦𑀺𑀧𑀺 𑀓𑀫𑁆𑀫𑀸𑀦𑀺 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 𑀢𑁂𑀲𑀁𑀬𑁂𑀯 𑀲𑀁𑀬𑁄𑀚𑀦𑀝𑁆𑀞𑁄 𑀤𑀝𑁆𑀞𑀩𑁆𑀩𑁄.

𑀲𑀫𑁆𑀫𑀸 𑀅𑀜𑁆𑀜𑀸𑀬𑀸𑀢𑀺 𑀆𑀚𑀸𑀦𑀦𑀪𑀽𑀢𑀸𑀬 𑀅𑀕𑁆𑀕𑀫𑀕𑁆𑀕𑀧𑀜𑁆𑀜𑀸𑀬 𑀲𑀫𑁆𑀫𑀸 𑀬𑀣𑀸𑀪𑀽𑀢𑀁 𑀤𑀼𑀓𑁆𑀔𑀸𑀤𑀻𑀲𑀼 𑀬𑁄 𑀬𑀣𑀸 𑀚𑀸𑀦𑀺𑀢𑀩𑁆𑀩𑁄, 𑀢𑀁 𑀢𑀣𑀸 𑀚𑀸𑀦𑀺𑀢𑁆𑀯𑀸. 𑀘𑀺𑀢𑁆𑀢𑀯𑀺𑀫𑀼𑀢𑁆𑀢𑀺 𑀲𑀩𑁆𑀩𑀲𑁆𑀲 𑀘𑀺𑀢𑁆𑀢𑀲𑀁𑀓𑀺𑀮𑁂𑀲𑀲𑁆𑀲 𑀯𑀺𑀲𑁆𑀲𑀕𑁆𑀕𑁄. 𑀦𑀺𑀩𑁆𑀩𑀸𑀦𑀸𑀥𑀺𑀫𑀼𑀢𑁆𑀢𑀺 𑀦𑀺𑀩𑁆𑀩𑀸𑀦𑁂 𑀅𑀥𑀺𑀫𑀼𑀘𑁆𑀘𑀦𑀁 𑀢𑀢𑁆𑀣 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀢𑀸. 𑀢𑀦𑁆𑀢𑀺 𑀧𑀣𑀯𑀻𑀆𑀤𑀺𑀓𑀁. 𑀧𑀭𑀺𑀜𑁆𑀜𑀸𑀢𑀁, 𑀦 𑀧𑀼𑀣𑀼𑀚𑁆𑀚𑀦𑀲𑁆𑀲 𑀯𑀺𑀬 𑀅𑀧𑀭𑀺𑀜𑁆𑀜𑀸𑀢𑀁, 𑀲𑁂𑀓𑁆𑀔𑀲𑁆𑀲 𑀯𑀺𑀬 𑀧𑀭𑀺𑀜𑁆𑀜𑁂𑀬𑁆𑀬𑀁 𑀯𑀸. 𑀢𑀲𑁆𑀫𑀸𑀢𑀺 𑀧𑀭𑀺𑀜𑁆𑀜𑀸𑀢𑀢𑁆𑀢𑀸.

𑀘𑀢𑀼𑀢𑁆𑀣𑀧𑀜𑁆𑀘𑀫𑀙𑀝𑁆𑀞𑀯𑀸𑀭𑀸 𑀢𑀢𑁆𑀣 𑀢𑀢𑁆𑀣 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑀓𑀺𑀢𑁆𑀢𑀦𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀦𑀺𑀩𑁆𑀩𑀸𑀦𑀯𑀸𑀭𑀸 𑀦𑀸𑀫. 𑀢𑀢𑁆𑀣 𑀧𑀣𑀯𑀻𑀆𑀤𑀻𑀦𑀁 𑀧𑀭𑀺𑀜𑁆𑀜𑀸𑀢𑀢𑁆𑀢𑀸 𑀅𑀫𑀜𑁆𑀜𑀦𑀸, 𑀲𑀸 𑀧𑀦 𑀧𑀭𑀺𑀜𑁆𑀜𑀸 𑀭𑀸𑀕𑀸𑀤𑀻𑀦𑀁 𑀔𑀬𑁂𑀦 𑀲𑀺𑀤𑁆𑀥𑀸𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀤𑀻𑀧𑀦𑀯𑀲𑁂𑀦 𑀧𑀸𑀴𑀺 𑀧𑀯𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸𑀢𑀺 𑀲𑀩𑁆𑀩𑀧𑀤𑁂𑀳𑀺 𑀬𑁄𑀚𑁂𑀢𑁆𑀯𑀸 𑀧𑀼𑀦 ¶ 𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑀢𑁆𑀢𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀲 𑀦𑀬𑁄 𑀇𑀢𑀭𑁂𑀲𑀽’’𑀢𑀺 𑀆𑀳. 𑀢𑀢𑁆𑀣 𑀇𑀢𑀭𑁂𑀲𑀽𑀢𑀺 𑀧𑀜𑁆𑀘𑀫𑀙𑀝𑁆𑀞𑀯𑀸𑀭𑁂𑀲𑀼. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀧𑀸𑀴𑀺 𑀏𑀯𑀁 𑀦 𑀤𑀺𑀲𑁆𑀲𑀢𑀻𑀢𑀺 𑀆𑀳 ‘‘𑀤𑁂𑀲𑀦𑀸 𑀧𑀦 𑀏𑀓𑀢𑁆𑀣 𑀯𑀼𑀢𑁆𑀢𑀁 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀲𑀁𑀔𑀺𑀢𑁆𑀢𑀸’’𑀢𑀺.

𑀦 𑀔𑀬𑀸 𑀭𑀸𑀕𑀲𑁆𑀲 𑀯𑀻𑀢𑀭𑀸𑀕𑁄 𑀲𑀩𑁆𑀩𑀲𑁄 𑀅𑀧𑁆𑀧𑀳𑀻𑀦𑀭𑀸𑀕𑀢𑁆𑀢𑀸. 𑀯𑀺𑀓𑁆𑀔𑀫𑁆𑀪𑀺𑀢𑀭𑀸𑀕𑁄 𑀳𑀺 𑀲𑁄𑀢𑀺. 𑀩𑀸𑀳𑀺𑀭𑀓𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀢𑀣𑀸𑀪𑀸𑀯𑀲𑁆𑀲𑁂𑀯 𑀢𑁂𑀲𑀼 𑀮𑀩𑁆𑀪𑀦𑀢𑁄, 𑀦 𑀢𑁂𑀲𑀼 𑀏𑀯 𑀢𑀣𑀸𑀪𑀸𑀯𑀲𑁆𑀲 𑀮𑀩𑁆𑀪𑀦𑀢𑁄. 𑀇𑀤𑀸𑀦𑀺 𑀬𑀸 𑀲𑀸 ‘‘𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸’’𑀢𑀺 𑀲𑀩𑁆𑀩𑀧𑀤𑁂𑀳𑀺 𑀬𑁄𑀚𑀦𑀸 𑀯𑀼𑀢𑁆𑀢𑀸, 𑀢𑀁 𑀯𑀺𑀦𑀸𑀧𑀺 𑀦𑀺𑀩𑁆𑀩𑀸𑀦𑀯𑀸𑀭𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫𑀜𑁆𑀜𑀦𑀁 𑀦 𑀫𑀜𑁆𑀜𑀢𑀻𑀢𑀺 𑀫𑀜𑁆𑀜𑀦𑀸 𑀦𑀧𑁆𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀫𑀜𑁆𑀜𑀦𑀸𑀬 𑀫𑀜𑁆𑀜𑀺𑀢𑀩𑁆𑀩𑀢𑁆𑀢𑁂𑀧𑀺 𑀢𑀲𑁆𑀲𑀸 𑀯𑀢𑁆𑀣𑀼𑀅𑀦𑁆𑀢𑁄𑀕𑀥𑀢𑁆𑀢𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀬𑀤𑀺𑀧𑀺 𑀧𑀭𑀺𑀜𑁆𑀜𑀸𑀢𑀧𑀤𑀁 𑀅𑀕𑁆𑀕𑀳𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀯𑀸𑀭𑀤𑁂𑀲𑀦𑀸 𑀧𑀯𑀢𑁆𑀢𑀸, 𑀏𑀯𑀫𑁆𑀧𑀺 ‘‘𑀔𑀬𑀸’’𑀢𑀺𑀆𑀤𑀺𑀧𑀤𑁂𑀳𑀺 𑀧𑀭𑀺𑀜𑁆𑀜𑀸𑀲𑀺𑀤𑁆𑀥𑀺 𑀏𑀯 𑀧𑀓𑀸𑀲𑀻𑀬𑀢𑀻𑀢𑀺 𑀓𑁄 𑀢𑁂𑀲𑀁 𑀯𑀺𑀲𑁂𑀲𑁄𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺. 𑀫𑀕𑁆𑀕𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑁄, 𑀫𑀕𑁆𑀕𑀓𑀺𑀘𑁆𑀘𑀦𑁆𑀢𑀸 𑀳𑀺 𑀧𑀭𑀺𑀜𑁆𑀜𑀸𑀬𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀭𑁂…𑀧𑁂… 𑀯𑁂𑀤𑀺𑀢𑀩𑁆𑀩𑀸 𑀯𑀻𑀢𑀭𑀸𑀕𑀸𑀤𑀺𑀓𑀺𑀢𑁆𑀢𑀦𑀢𑁄𑀢𑀺. 𑀤𑁆𑀯𑀻𑀳𑀺 𑀯𑀸 𑀓𑀸𑀭𑀡𑁂𑀳𑀻𑀢𑀺 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀤𑁆𑀯𑀬𑁂𑀦. 𑀅𑀲𑁆𑀲𑀸𑀢𑀺 𑀔𑀻𑀡𑀸𑀲𑀯𑀲𑁆𑀲. 𑀅𑀬𑀁 𑀯𑀺𑀲𑁂𑀲𑁄𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑁄 𑀯𑀺𑀲𑁂𑀲𑁄. 𑀬𑀤𑀺𑀧𑀺 𑀔𑀻𑀡𑀸𑀲𑀯𑁄 𑀏𑀓𑀦𑁆𑀢𑁂𑀦 𑀯𑀻𑀢𑀭𑀸𑀕𑁄 𑀯𑀻𑀢𑀤𑁄𑀲𑁄 𑀯𑀻𑀢𑀫𑁄𑀳𑁄 𑀏𑀯 𑀘 𑀳𑁄𑀢𑀺, 𑀬𑀸𑀬 𑀧𑀦 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀯𑀻𑀢𑀭𑀸𑀕𑀢𑀸𑀤𑀬𑁄 𑀲𑀯𑀺𑀲𑁂𑀲𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀻𑀲𑀼 𑀳𑀻’’𑀢𑀺𑀆𑀤𑀺𑀫𑀸𑀳 ¶ . ‘‘𑀭𑀢𑁆𑀢𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 (𑀦𑁂𑀢𑁆𑀢𑀺. 𑁧𑁧) 𑀭𑀸𑀕𑁂 𑀆𑀤𑀻𑀦𑀯𑀁 𑀧𑀲𑁆𑀲𑀢𑁄 ‘‘𑀭𑀸𑀕𑁄 𑀘 𑀦𑀸𑀫 𑀲𑀼𑀔𑀸𑀪𑀺𑀲𑀗𑁆𑀕𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀲𑀼𑀔𑀜𑁆𑀘 𑀯𑀺𑀧𑀭𑀺𑀡𑀸𑀫𑀢𑁄 𑀤𑀼𑀓𑁆𑀔𑀁. 𑀧𑀕𑁂𑀯 𑀇𑀢𑀭’’𑀦𑁆𑀢𑀺 𑀲𑀳𑁂𑀢𑀼𑀓𑁂 𑀭𑀸𑀕𑁂 𑀆𑀤𑀻𑀦𑀯𑀤𑀲𑁆𑀲𑀦𑀁 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀫𑀺𑀢𑁆𑀢𑀁, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀘 𑀧𑀡𑀺𑀥𑀺𑀬𑀸 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀁 𑀧𑀭𑀺𑀧𑀼𑀭𑁂𑀢𑀻𑀢𑀺 𑀆𑀳 ‘‘𑀭𑀸𑀕𑁂…𑀧𑁂… 𑀯𑀻𑀢𑀭𑀸𑀕𑁄 𑀳𑁄𑀢𑀻’’𑀢𑀺. 𑀢𑀣𑀸 ‘‘𑀤𑀼𑀝𑁆𑀞𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 (𑀇𑀢𑀺𑀯𑀼. 𑁮𑁮) 𑀤𑁄𑀲𑁂 𑀆𑀤𑀻𑀦𑀯𑀁 𑀧𑀲𑁆𑀲𑀢𑁄 ‘‘𑀤𑁄𑀲𑁄 𑀘 𑀦𑀸𑀫 𑀤𑀼𑀓𑁆𑀔𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺, 𑀢𑀜𑁆𑀘 𑀉𑀪𑀬𑀁 𑀅𑀦𑀯𑀝𑁆𑀞𑀺𑀢𑀁 𑀇𑀢𑁆𑀢𑀭𑀁 𑀧𑀪𑀗𑁆𑀕𑀽’’𑀢𑀺 𑀲𑀳𑁂𑀢𑀼𑀓𑁂 𑀤𑁄𑀲𑁂 𑀆𑀤𑀻𑀦𑀯𑀤𑀲𑁆𑀲𑀦𑀁 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀫𑀺𑀢𑁆𑀢𑀁, 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀘 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑀆𑀳 ‘‘𑀤𑁄𑀲𑁂…𑀧𑁂… 𑀳𑁄𑀢𑀻’’𑀢𑀺. 𑀢𑀣𑀸 ‘‘𑀫𑀽𑀴𑁆𑀳𑁄 ¶ 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 (𑀇𑀢𑀺𑀯𑀼. 𑁮𑁮) 𑀫𑁄𑀳𑁂 𑀆𑀤𑀻𑀦𑀯𑀁 𑀧𑀲𑁆𑀲𑀢𑁄 ‘‘𑀫𑁄𑀳𑁄 𑀦𑀸𑀫 𑀬𑀣𑀸𑀲𑀪𑀸𑀯𑀕𑁆𑀕𑀳𑀡𑀲𑁆𑀲 𑀧𑀭𑀺𑀩𑁆𑀪𑀫𑀦𑁆𑀢𑁄’’𑀢𑀺 𑀫𑁄𑀳𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀁 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀫𑀺𑀢𑁆𑀢𑀁, 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀬 𑀘 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀲𑁆𑀲 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀲𑀼𑀜𑁆𑀜𑀢𑀁 𑀯𑀺𑀫𑁄𑀓𑁆𑀔𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑀆𑀳 ‘‘𑀫𑁄𑀳𑁂…𑀧𑁂… 𑀯𑀻𑀢𑀫𑁄𑀳𑁄 𑀳𑁄𑀢𑀻’’𑀢𑀺.

𑀏𑀯𑀁 𑀲𑀦𑁆𑀢𑁂𑀢𑀺 𑀬𑀤𑀺 𑀯𑀻𑀢𑀭𑀸𑀕𑀢𑀸𑀤𑀬𑁄 𑀯𑀺𑀫𑁄𑀓𑁆𑀔𑀯𑀺𑀪𑀸𑀕𑁂𑀦 𑀯𑀼𑀢𑁆𑀢𑀸, 𑀏𑀯𑀁 𑀲𑀦𑁆𑀢𑁂. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀯𑀺𑀫𑁄𑀓𑁆𑀔𑀫𑀼𑀔𑀯𑀺𑀫𑁄𑀓𑁆𑀔𑀸𑀦𑀁 𑀯𑀲𑁂𑀦 𑀦𑀺𑀬𑀫𑁂𑀢𑁆𑀯𑀸 𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸. 𑀬𑀁 𑀓𑀺𑀜𑁆𑀘𑀺 𑀅𑀭𑀳𑀢𑁄 𑀲𑀫𑁆𑀪𑀯𑀦𑁆𑀢𑀁 𑀯𑀺𑀪𑀚𑀺𑀢𑁆𑀯𑀸 𑀯𑀼𑀘𑁆𑀘𑀢𑀻𑀢𑀺 𑀯𑀸𑀭𑀢𑁆𑀢𑀬𑀤𑁂𑀲𑀦𑀸 𑀓𑀢𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀬𑀁 𑀅𑀭𑀳𑀢𑁄’’𑀢𑀺𑀆𑀤𑀺𑀦𑀸.

𑀏𑀯𑀁 𑀯𑀺𑀫𑀼𑀢𑁆𑀢𑀺𑀯𑀺𑀪𑀸𑀕𑁂𑀦 𑀔𑀻𑀡𑀸𑀲𑀯𑀲𑁆𑀲 𑀯𑀺𑀪𑀸𑀕𑀁 𑀯𑀸𑀭𑀢𑁆𑀢𑀬𑀤𑁂𑀲𑀦𑀸𑀦𑀺𑀩𑀦𑁆𑀥𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀯𑀺𑀪𑀸𑀕𑁂𑀦𑀧𑀺 𑀢𑀢𑁆𑀣 𑀧𑀭𑀺𑀜𑁆𑀜𑀸𑀯𑀺𑀲𑀬𑀲𑁆𑀲 𑀅𑀦𑀼𑀲𑀬𑀯𑀺𑀲𑀬𑀲𑁆𑀲 𑀘 𑀯𑀺𑀪𑀸𑀕𑀁 𑀢𑀲𑁆𑀲 𑀦𑀺𑀩𑀦𑁆𑀥𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀯𑀺𑀲𑁂𑀲𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 𑀯𑀺𑀲𑁂𑀲𑀢𑁄 𑀲𑀗𑁆𑀔𑀸𑀭𑀤𑀼𑀓𑁆𑀔𑀁 𑀲𑀫𑁆𑀫𑁄𑀳𑀸𑀥𑀺𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀲𑀗𑁆𑀔𑀸𑀭…𑀧𑁂… 𑀫𑁄𑀳𑁄’’𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀔𑀻𑀡𑀸𑀲𑀯𑀯𑀸𑀭𑀢𑀢𑀺𑀬𑀸𑀤𑀺𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀣𑀸𑀕𑀢𑀯𑀸𑀭𑀲𑀢𑁆𑀢𑀫𑀦𑀬𑀯𑀡𑁆𑀡𑀦𑀸

𑁧𑁨. 𑀬𑁂𑀳𑀺 (𑀤𑀻. 𑀦𑀺. 𑀅𑀪𑀺. 𑀝𑀻. 𑁧.𑁭.𑀘𑀽𑀴𑀲𑀻𑀮𑀯𑀡𑁆𑀡𑀦𑀸; 𑀅. 𑀦𑀺. 𑀝𑀻. 𑁧.𑁧.𑁧𑁭𑁦) 𑀕𑀼𑀡𑀯𑀺𑀲𑁂𑀲𑁂𑀳𑀺 𑀦𑀺𑀫𑀺𑀢𑁆𑀢𑀪𑀽𑀢𑁂𑀳𑀺 𑀪𑀕𑀯𑀢𑀺 ‘‘𑀢𑀣𑀸𑀕𑀢𑁄’’𑀢𑀺 𑀅𑀬𑀁 𑀲𑀫𑀜𑁆𑀜𑀸 𑀧𑀯𑀢𑁆𑀢𑀸, 𑀢𑀁 𑀤𑀲𑁆𑀲𑀦𑀢𑁆𑀣𑀁 ¶ ‘‘𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀢𑀣𑀸𑀕𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑀼𑀡𑀦𑁂𑀫𑀺𑀢𑁆𑀢𑀓𑀸𑀦𑁂𑀯 𑀳𑀺 𑀪𑀕𑀯𑀢𑁄 𑀲𑀩𑁆𑀩𑀸𑀦𑀺 𑀦𑀸𑀫𑀸𑀦𑀺. 𑀬𑀣𑀸𑀳 𑁋

‘‘𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀦𑀸𑀫𑀸𑀦𑀺, 𑀲𑀕𑀼𑀡𑁂𑀦 𑀫𑀳𑁂𑀲𑀺𑀦𑁄;

𑀕𑀼𑀡𑁂𑀦 𑀦𑀸𑀫𑀫𑀼𑀤𑁆𑀥𑁂𑀬𑁆𑀬𑀁, 𑀅𑀧𑀺 𑀦𑀸𑀫𑀲𑀳𑀲𑁆𑀲𑀢𑁄’’𑀢𑀺. (𑀥. 𑀲. 𑀅𑀝𑁆𑀞. 𑁧𑁩𑁧𑁩; 𑀉𑀤𑀸. 𑀅𑀝𑁆𑀞. 𑁫𑁩; 𑀧𑀝𑀺. 𑀫. 𑀅𑀝𑁆𑀞. 𑁧.𑁭𑁬; 𑀤𑀻. 𑀦𑀺. 𑀅𑀪𑀺. 𑀝𑀻. 𑁧.𑁭.𑀘𑀽𑀴𑀲𑀻𑀮𑀯𑀡𑁆𑀡𑀦𑀸; 𑀅. 𑀦𑀺. 𑀝𑀻. 𑁧.𑁧.𑁧𑁭𑁦) 𑁋

𑀢𑀣𑀸 𑀆𑀕𑀢𑁄𑀢𑀺 𑀏𑀢𑁆𑀣 𑀆𑀓𑀸𑀭𑀦𑀺𑀬𑀫𑀦𑀯𑀲𑁂𑀦 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀢𑁆𑀣𑁄 𑀢𑀣𑀸-𑀲𑀤𑁆𑀤𑁄. 𑀲𑀸𑀫𑀜𑁆𑀜𑀚𑁄𑀢𑀦𑀸 𑀳𑀺 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀻𑀢𑀺 𑀧𑀝𑀺𑀧𑀸𑀤𑀕𑀫𑀦𑀢𑁆𑀣𑁄 𑀆𑀕𑀢-𑀲𑀤𑁆𑀤𑁄, 𑀦 𑀜𑀸𑀡𑀕𑀫𑀦𑀢𑁆𑀣𑁄 ‘‘𑀢𑀣𑀮𑀓𑁆𑀔𑀡𑀁 𑀆𑀕𑀢𑁄’’𑀢𑀺𑀆𑀤𑀻𑀲𑀼 ¶ (𑀤𑀻. 𑀦𑀺. 𑀅𑀝𑁆𑀞. 𑁧.𑁭; 𑀫. 𑀦𑀺. 𑀅𑀝𑁆𑀞. 𑁧.𑁧𑁨; 𑀲𑀁. 𑀦𑀺. 𑀅𑀝𑁆𑀞. 𑁨.𑁩.𑁭𑁮; 𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁭𑁦; 𑀉𑀤𑀸. 𑀅𑀝𑁆𑀞. 𑁧𑁮; 𑀇𑀢𑀺𑀯𑀼. 𑀅𑀝𑁆𑀞. 𑁩𑁮; 𑀣𑁂𑀭𑀕𑀸. 𑀅𑀝𑁆𑀞. 𑁧.𑁧.𑁩; 𑀩𑀼. 𑀯𑀁. 𑀅𑀝𑁆𑀞. 𑁨.𑀩𑀸𑀳𑀺𑀭𑀦𑀺𑀤𑀸𑀦; 𑀫𑀳𑀸𑀦𑀺. 𑀅𑀝𑁆𑀞. 𑁧𑁪) 𑀯𑀺𑀬, 𑀦𑀸𑀧𑀺 𑀓𑀸𑀬𑀕𑀫𑀦𑀸𑀤𑀺𑀅𑀢𑁆𑀣𑁄 ‘‘𑀆𑀕𑀢𑁄 𑀔𑁄 𑀫𑀳𑀸𑀲𑀫𑀡𑁄, 𑀫𑀸𑀕𑀥𑀸𑀦𑀁 𑀕𑀺𑀭𑀺𑀩𑁆𑀩𑀚’’𑀦𑁆𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁬𑁩) 𑀯𑀺𑀬. 𑀢𑀢𑁆𑀣 𑀬𑀤𑀸𑀓𑀸𑀭𑀦𑀺𑀬𑀫𑀦𑀯𑀲𑁂𑀦 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀢𑁆𑀣𑁄 𑀢𑀣𑀸-𑀲𑀤𑁆𑀤𑁄, 𑀢𑀁 𑀓𑀭𑀼𑀡𑀸𑀧𑁆𑀧𑀥𑀸𑀦𑀢𑁆𑀢𑀸 𑀫𑀳𑀸𑀓𑀭𑀼𑀡𑀸𑀫𑀼𑀔𑁂𑀦 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀁 𑀆𑀕𑀫𑀦𑀧𑀝𑀺𑀧𑀤𑀁 𑀉𑀤𑀸𑀳𑀭𑀡𑀯𑀲𑁂𑀦 𑀲𑀸𑀫𑀜𑁆𑀜𑀢𑁄 𑀤𑀲𑁆𑀲𑁂𑀦𑁆𑀢𑁄 𑀬𑀁𑀢𑀁𑀲𑀤𑁆𑀤𑀸𑀦𑀁 𑀏𑀓𑀦𑁆𑀢𑀲𑀫𑁆𑀩𑀦𑁆𑀥𑀪𑀸𑀯𑀢𑁄 ‘‘𑀬𑀣𑀸 𑀲𑀩𑁆𑀩𑀮𑁄𑀓…𑀧𑁂… 𑀆𑀕𑀢𑀸’’𑀢𑀺 𑀲𑀸𑀥𑀸𑀭𑀡𑀢𑁄 𑀯𑀢𑁆𑀯𑀸 𑀧𑀼𑀦 𑀢𑀁 𑀧𑀝𑀺𑀧𑀤𑀁 𑀫𑀳𑀸𑀧𑀤𑀸𑀦𑀲𑀼𑀢𑁆𑀢𑀸𑀤𑀻𑀲𑀼 (𑀤𑀻. 𑀦𑀺. 𑁨.𑁪) 𑀲𑀫𑁆𑀩𑀳𑀼𑀮𑀦𑀺𑀤𑁆𑀤𑁂𑀲𑁂𑀦 𑀲𑀼𑀧𑀸𑀓𑀝𑀸𑀦𑀁 𑀆𑀲𑀦𑁆𑀦𑀸𑀦𑀜𑁆𑀘 𑀯𑀺𑀧𑀲𑁆𑀲𑀻𑀆𑀤𑀻𑀦𑀁 𑀙𑀦𑁆𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀯𑀺𑀧𑀲𑁆𑀲𑀻 𑀪𑀕𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑁂𑀦 𑀅𑀪𑀺𑀦𑀻𑀳𑀸𑀭𑁂𑀦𑀸𑀢𑀺 𑀫𑀦𑀼𑀲𑁆𑀲𑀢𑁆𑀢-𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀺-𑀳𑁂𑀢𑀼-𑀲𑀢𑁆𑀣𑀸𑀭𑀤𑀲𑁆𑀲𑀦-𑀧𑀩𑁆𑀩𑀚𑁆𑀚𑀸-𑀅𑀪𑀺𑀜𑁆𑀜𑀸𑀤𑀺𑀕𑀼𑀡𑀲𑀫𑁆𑀧𑀢𑁆𑀢𑀺-𑀅𑀥𑀺𑀓𑀸𑀭-𑀙𑀦𑁆𑀤𑀸𑀦𑀁 𑀯𑀲𑁂𑀦 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 𑀓𑀸𑀬𑀧𑀡𑀺𑀥𑀸𑀦𑀫𑀳𑀸𑀧𑀡𑀺𑀥𑀸𑀦𑁂𑀦. 𑀲𑀩𑁆𑀩𑁂𑀲𑀜𑁆𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀓𑀸𑀬𑀧𑀡𑀺𑀥𑀸𑀦𑀁 𑀇𑀫𑀺𑀦𑀸𑀯 𑀦𑀻𑀳𑀸𑀭𑁂𑀦 𑀲𑀫𑀺𑀚𑁆𑀛𑀢𑀻𑀢𑀺.

𑀏𑀯𑀁 𑀫𑀳𑀸𑀪𑀺𑀦𑀻𑀳𑀸𑀭𑀯𑀲𑁂𑀦 ‘‘𑀢𑀣𑀸𑀕𑀢𑁄’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀧𑀸𑀭𑀫𑀻𑀧𑀽𑀭𑀡𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸 𑀬𑀣𑀸 𑀯𑀺𑀧𑀲𑁆𑀲𑀻 𑀪𑀕𑀯𑀸…𑀧𑁂… 𑀬𑀣𑀸 𑀓𑀲𑁆𑀲𑀧𑁄 𑀪𑀕𑀯𑀸 𑀤𑀸𑀦𑀧𑀸𑀭𑀫𑀺𑀁 𑀧𑀽𑀭𑁂𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀲𑀼𑀢𑁆𑀢𑀦𑁆𑀢𑀺𑀓𑀸𑀦𑀁 𑀫𑀳𑀸𑀩𑁄𑀥𑀺𑀬𑀸𑀦𑀧𑀝𑀺𑀧𑀤𑀸𑀬 𑀓𑁄𑀲𑀮𑁆𑀮𑀚𑀦𑀦𑀢𑁆𑀣𑀁 𑀧𑀸𑀭𑀫𑀻𑀓𑀣𑀸 𑀯𑀢𑁆𑀢𑀩𑁆𑀩𑀸, 𑀲𑀸 𑀧𑀦 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀸 𑀘𑀭𑀺𑀬𑀸𑀧𑀺𑀝𑀓𑀯𑀡𑁆𑀡𑀦𑀸𑀬 (𑀘𑀭𑀺𑀬𑀸. 𑀧𑀓𑀺𑀡𑁆𑀡𑀓𑀓𑀣𑀸) 𑀯𑀺𑀢𑁆𑀣𑀸𑀭𑀢𑁄 𑀦𑀺𑀤𑁆𑀤𑀺𑀝𑁆𑀞𑀸, 𑀢𑀲𑁆𑀫𑀸 𑀅𑀢𑁆𑀣𑀺𑀓𑁂𑀳𑀺 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 ¶ 𑀧𑀦 𑀧𑀼𑀩𑁆𑀩𑁂 𑀯𑀺𑀧𑀲𑁆𑀲𑀻𑀆𑀤𑀬𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀢𑁆𑀢𑀺𑀬𑀁 𑀧𑀢𑀺𑀝𑁆𑀞𑀸𑀬 𑀲𑀼𑀯𑀺𑀲𑀼𑀤𑁆𑀥𑀸𑀬 𑀧𑀝𑀺𑀧𑀤𑀸𑀬 𑀅𑀦𑀯𑀲𑁂𑀲𑀢𑁄 𑀲𑀫𑁆𑀫𑀤𑁂𑀯 𑀲𑀩𑁆𑀩𑀸 𑀧𑀸𑀭𑀫𑀺𑀬𑁄 𑀧𑀭𑀺𑀧𑀽𑀭𑁂𑀲𑀼𑀁, 𑀏𑀯𑀁 𑀅𑀫𑁆𑀳𑀸𑀓𑀫𑁆𑀧𑀺 𑀪𑀕𑀯𑀸 𑀧𑀭𑀺𑀧𑀽𑀭𑁂𑀲𑀻𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀫𑀢𑁆𑀢𑀺𑀁 𑀲𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸’’𑀢𑀺. 𑀲𑀢𑀺𑀧𑀺 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑀸𑀤𑀻𑀦𑀁 𑀤𑀸𑀦𑀧𑀸𑀭𑀫𑀺𑀪𑀸𑀯𑁂 𑀧𑀭𑀺𑀘𑁆𑀘𑀸𑀕𑀯𑀺𑀲𑁂𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀯 𑀲𑀼𑀤𑀼𑀓𑁆𑀓𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘 ‘‘𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂’’𑀢𑀺 𑀯𑀺𑀲𑀼𑀁 𑀕𑀳𑀡𑀁, 𑀢𑀢𑁄𑀬𑁂𑀯 𑀘 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑀢𑁄 𑀯𑀺𑀲𑀼𑀁 𑀦𑀬𑀦𑀧𑀭𑀺𑀘𑁆𑀘𑀸𑀕𑀕𑁆𑀕𑀳𑀡𑀫𑁆𑀧𑀺 𑀓𑀢𑀁, 𑀧𑀭𑀺𑀕𑁆𑀕𑀳𑀧𑀭𑀺𑀘𑁆𑀘𑀸𑀕𑀪𑀸𑀯𑀲𑀸𑀫𑀜𑁆𑀜𑁂𑀧𑀺 𑀥𑀦𑀭𑀚𑁆𑀚𑀧𑀭𑀺𑀘𑁆𑀘𑀸𑀕𑀢𑁄 𑀧𑀼𑀢𑁆𑀢𑀤𑀸𑀭𑀧𑀭𑀺𑀘𑁆𑀘𑀸𑀕𑀕𑁆𑀕𑀳𑀡𑀜𑁆𑀘 𑀓𑀢𑀁.

𑀕𑀢𑀧𑀘𑁆𑀘𑀸𑀕𑀢𑀺𑀓𑀯𑀢𑁆𑀢𑀧𑀽𑀭𑀡𑀸𑀤𑀺𑀓𑀸𑀬 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀲𑀤𑁆𑀥𑀺𑀁 𑀅𑀪𑀺𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀁 𑀧𑀼𑀩𑁆𑀩𑀬𑁄𑀕𑁄, 𑀤𑀸𑀦𑀸𑀤𑀻𑀲𑀼𑀬𑁂𑀯 𑀲𑀸𑀢𑀺𑀲𑀬𑀧𑀝𑀺𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀁 𑀧𑀼𑀩𑁆𑀩𑀘𑀭𑀺𑀬𑀸 ¶ , 𑀲𑀸 𑀘𑀭𑀺𑀬𑀸𑀧𑀺𑀝𑀓𑀲𑀗𑁆𑀕𑀳𑀺𑀢𑀸. 𑀅𑀪𑀺𑀦𑀻𑀳𑀸𑀭𑁄 𑀧𑀼𑀩𑁆𑀩𑀬𑁄𑀕𑁄, 𑀤𑀸𑀦𑀸𑀤𑀺𑀧𑀝𑀺𑀧𑀢𑁆𑀢𑀺, 𑀓𑀸𑀬𑀯𑀺𑀯𑁂𑀓𑀯𑀲𑁂𑀦 𑀏𑀓𑀘𑀭𑀺𑀬𑀸 𑀯𑀸 𑀧𑀼𑀩𑁆𑀩𑀘𑀭𑀺𑀬𑀸𑀢𑀺 𑀓𑁂𑀘𑀺. 𑀤𑀸𑀦𑀸𑀤𑀻𑀦𑀜𑁆𑀘𑁂𑀯 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀜𑁆𑀘 𑀲𑀁𑀲𑀸𑀭𑀦𑀺𑀩𑁆𑀩𑀸𑀦𑁂𑀲𑀼 𑀆𑀤𑀻𑀦𑀯𑀸𑀦𑀺𑀲𑀁𑀲𑀸𑀦𑀜𑁆𑀘 𑀯𑀺𑀪𑀸𑀯𑀦𑀯𑀲𑁂𑀦 𑀲𑀢𑁆𑀢𑀸𑀦𑀁 𑀩𑁄𑀥𑀺𑀢𑁆𑀢𑀬𑁂 𑀧𑀢𑀺𑀝𑁆𑀞𑀸𑀧𑀦𑀧𑀭𑀺𑀧𑀸𑀘𑀦𑀯𑀲𑁂𑀦 𑀘 𑀧𑀯𑀢𑁆𑀢𑀸 𑀓𑀣𑀸 𑀥𑀫𑁆𑀫𑀓𑁆𑀔𑀸𑀦𑀁, 𑀜𑀸𑀢𑀻𑀦𑀁 𑀅𑀢𑁆𑀣𑀘𑀭𑀺𑀬𑀸 𑀜𑀸𑀢𑀢𑁆𑀣𑀘𑀭𑀺𑀬𑀸, 𑀲𑀸𑀧𑀺 𑀓𑀭𑀼𑀡𑀸𑀬 𑀯𑀲𑁂𑀦𑁂𑀯. 𑀆𑀤𑀺-𑀲𑀤𑁆𑀤𑁂𑀦 𑀮𑁄𑀓𑀢𑁆𑀣𑀘𑀭𑀺𑀬𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀯𑀲𑁂𑀦, 𑀅𑀦𑀯𑀚𑁆𑀚𑀓𑀫𑁆𑀫𑀸𑀬𑀢𑀦𑀲𑀺𑀧𑁆𑀧𑀸𑀬𑀢𑀦𑀯𑀺𑀚𑁆𑀚𑀸𑀝𑁆𑀞𑀸𑀦𑀧𑀭𑀺𑀘𑀬𑀯𑀲𑁂𑀦 𑀔𑀦𑁆𑀥𑀸𑀬𑀢𑀦𑀸𑀤𑀺𑀧𑀭𑀺𑀘𑀬𑀯𑀲𑁂𑀦, 𑀮𑀓𑁆𑀔𑀡𑀢𑁆𑀢𑀬𑀢𑀻𑀭𑀡𑀯𑀲𑁂𑀦 𑀘 𑀜𑀸𑀡𑀘𑀸𑀭𑁄 𑀩𑀼𑀤𑁆𑀥𑀺𑀘𑀭𑀺𑀬𑀸, 𑀲𑀸 𑀧𑀦 𑀅𑀢𑁆𑀣𑀢𑁄 𑀧𑀜𑁆𑀜𑀸𑀧𑀸𑀭𑀫𑀻𑀬𑁂𑀯, 𑀜𑀸𑀡𑀲𑀫𑁆𑀪𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀺𑀲𑀼𑀁 𑀕𑀳𑀡𑀁. 𑀓𑁄𑀝𑀻𑀢𑀺 𑀧𑀭𑀺𑀬𑀦𑁆𑀢𑁄, 𑀉𑀓𑁆𑀓𑀁𑀲𑁄𑀢𑀺 𑀅𑀢𑁆𑀣𑁄.

𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀪𑀸𑀯𑁂𑀢𑁆𑀯𑀸 𑀩𑁆𑀭𑀽𑀳𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀪𑀸𑀯𑁂𑀢𑁆𑀯𑀸𑀢𑀺 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀩𑁆𑀭𑀽𑀳𑁂𑀢𑁆𑀯𑀸𑀢𑀺 𑀯𑀟𑁆𑀠𑁂𑀢𑁆𑀯𑀸. 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀕𑁆𑀕𑀳𑀡𑁂𑀦 𑀆𑀕𑀫𑀦𑀧𑀝𑀺𑀧𑀤𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀯𑀺𑀧𑀲𑁆𑀲𑀦𑀸𑀲𑀳𑀕𑀢𑀸 𑀏𑀯 𑀯𑀸 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀤𑀝𑁆𑀞𑀩𑁆𑀩𑀸. 𑀏𑀢𑁆𑀣 𑀘 ‘‘𑀬𑁂𑀦 𑀅𑀪𑀺𑀦𑀻𑀳𑀸𑀭𑁂𑀦𑀸’’𑀢𑀺𑀆𑀤𑀺𑀦𑀸 𑀆𑀕𑀫𑀦𑀧𑀝𑀺𑀧𑀤𑀸𑀬 𑀆𑀤𑀺𑀁 𑀤𑀲𑁆𑀲𑁂𑀢𑀺, ‘‘𑀤𑀸𑀦𑀧𑀸𑀭𑀫𑀻’’𑀢𑀺𑀆𑀤𑀺𑀦𑀸 𑀫𑀚𑁆𑀛𑀁, ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂’’𑀢𑀺𑀆𑀤𑀺𑀦𑀸 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀫𑁆𑀧𑀢𑀺𑀚𑀸𑀢𑁄𑀢𑀺 𑀫𑀼𑀳𑀼𑀢𑁆𑀢𑀚𑀸𑀢𑁄 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀫𑀼𑀢𑁆𑀢𑀫𑀢𑁆𑀢𑁄, 𑀦 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁄. 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑀜𑁆𑀳𑀺 𑀫𑀳𑀸𑀲𑀢𑁆𑀢𑀁 𑀧𑀞𑀫𑀁 𑀩𑁆𑀭𑀳𑁆𑀫𑀸𑀦𑁄 𑀲𑀼𑀯𑀡𑁆𑀡𑀚𑀸𑀮𑁂𑀦 𑀧𑀝𑀺𑀕𑁆𑀕𑀡𑁆𑀳𑀺𑀁𑀲𑀼, 𑀢𑁂𑀲𑀁 𑀳𑀢𑁆𑀣𑀢𑁄 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀅𑀚𑀺𑀦𑀧𑁆𑀧𑀯𑁂𑀡𑀺𑀬𑀸, 𑀢𑁂𑀲𑀁 𑀳𑀢𑁆𑀣𑀢𑁄 𑀫𑀦𑀼𑀲𑁆𑀲𑀸 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂𑀦 𑀧𑀝𑀺𑀕𑁆𑀕𑀡𑁆𑀳𑀺𑀁𑀲𑀼, 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑁄𑀢𑀺. 𑀬𑀣𑀸𑀳 𑀪𑀕𑀯𑀸 𑀫𑀳𑀸𑀧𑀤𑀸𑀦𑀤𑁂𑀲𑀦𑀸𑀬𑀁. 𑀲𑁂𑀢𑀫𑁆𑀳𑀺 𑀙𑀢𑁆𑀢𑁂𑀢𑀺 𑀤𑀺𑀩𑁆𑀩𑀲𑁂𑀢𑀘𑁆𑀙𑀢𑁆𑀢𑁂. 𑀅𑀦𑀼𑀥𑀸𑀭𑀻𑀬𑀫𑀸𑀦𑁂𑀢𑀺 𑀥𑀸𑀭𑀻𑀬𑀫𑀸𑀦𑁂. 𑀏𑀢𑁆𑀣 𑀘 𑀙𑀢𑁆𑀢𑀕𑁆𑀕𑀳𑀡𑁂𑀦𑁂𑀯 𑀔𑀕𑁆𑀕𑀸𑀤𑀻𑀦𑀺 𑀧𑀜𑁆𑀘 𑀓𑀓𑀼𑀥𑀪𑀡𑁆𑀝𑀸𑀦𑀺𑀧𑀺 𑀯𑀼𑀢𑁆𑀢𑀸𑀦𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀔𑀕𑁆𑀕𑀢𑀸𑀮𑀯𑀡𑁆𑀝𑀫𑁄𑀭𑀳𑀢𑁆𑀣𑀓𑀯𑀸𑀮𑀩𑀻𑀚𑀦𑀻𑀉𑀡𑁆𑀳𑀻𑀲𑀧𑀝𑁆𑀝𑀸𑀧𑀺 ¶ 𑀳𑀺 𑀙𑀢𑁆𑀢𑁂𑀦 𑀲𑀳 𑀢𑀤𑀸 𑀉𑀧𑀝𑁆𑀞𑀺𑀢𑀸 𑀅𑀳𑁂𑀲𑀼𑀁, 𑀙𑀢𑁆𑀢𑀸𑀤𑀻𑀦𑀺𑀬𑁂𑀯 𑀘 𑀢𑀤𑀸 𑀧𑀜𑁆𑀜𑀸𑀬𑀺𑀁𑀲𑀼, 𑀦 𑀙𑀢𑁆𑀢𑀸𑀤𑀺𑀕𑁆𑀕𑀸𑀳𑀓𑀸. 𑀲𑀩𑁆𑀩𑀸 𑀘 𑀤𑀺𑀲𑀸𑀢𑀺 𑀤𑀲𑀧𑀺 𑀤𑀺𑀲𑀸. 𑀦𑀬𑀺𑀤𑀁 𑀲𑀩𑁆𑀩𑀤𑀺𑀲𑀸𑀯𑀺𑀮𑁄𑀓𑀦𑀁 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑀼𑀢𑁆𑀢𑀭𑀓𑀸𑀮𑀁 𑀤𑀝𑁆𑀞𑀩𑁆𑀩𑀁. 𑀫𑀳𑀸𑀲𑀢𑁆𑀢𑁄 𑀳𑀺 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀤𑀺𑀲𑀁 ¶ 𑀑𑀮𑁄𑀓𑁂𑀲𑀺. 𑀢𑀢𑁆𑀣 𑀤𑁂𑀯𑀫𑀦𑀼𑀲𑁆𑀲𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑀸 ‘‘𑀫𑀳𑀸𑀧𑀼𑀭𑀺𑀲 𑀇𑀥 𑀢𑀼𑀫𑁆𑀳𑁂𑀳𑀺 𑀲𑀤𑀺𑀲𑁄𑀧𑀺 𑀦𑀢𑁆𑀣𑀺, 𑀓𑀼𑀢𑁄 𑀉𑀢𑁆𑀢𑀭𑀺𑀢𑀭𑁄’’𑀢𑀺 𑀆𑀳𑀁𑀲𑀼. 𑀏𑀯𑀁 𑀘𑀢𑀲𑁆𑀲𑁄 𑀤𑀺𑀲𑀸, 𑀘𑀢𑀲𑁆𑀲𑁄 𑀅𑀦𑀼𑀤𑀺𑀲𑀸; 𑀳𑁂𑀝𑁆𑀞𑀸, 𑀉𑀧𑀭𑀻𑀢𑀺 𑀲𑀩𑁆𑀩𑀸 𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀲𑀩𑁆𑀩𑀢𑁆𑀣 𑀅𑀢𑁆𑀢𑀦𑀸 𑀲𑀤𑀺𑀲𑀁 𑀅𑀤𑀺𑀲𑁆𑀯𑀸 ‘‘𑀅𑀬𑀁 𑀉𑀢𑁆𑀢𑀭𑀸 𑀤𑀺𑀲𑀸’’𑀢𑀺 𑀢𑀢𑁆𑀣 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀅𑀕𑀫𑀸𑀲𑀺. 𑀆𑀲𑀪𑀺𑀦𑁆𑀢𑀺 𑀉𑀢𑁆𑀢𑀫𑀁. 𑀅𑀕𑁆𑀕𑁄𑀢𑀺 𑀲𑀩𑁆𑀩𑀧𑀞𑀫𑁄. 𑀚𑁂𑀝𑁆𑀞𑁄 𑀲𑁂𑀝𑁆𑀞𑁄𑀢𑀺 𑀘 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀧𑀢𑁆𑀢𑀩𑁆𑀩𑀁 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀸𑀲𑀺.

𑀅𑀦𑁂𑀓𑁂𑀲𑀁 𑀯𑀺𑀲𑁂𑀲𑀸𑀥𑀺𑀕𑀫𑀸𑀦𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀸𑀯𑁂𑀦𑀸𑀢𑀺 𑀲𑀁𑀔𑀺𑀢𑁆𑀢𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 ‘‘𑀬𑀜𑁆𑀳𑀻’’𑀢𑀺𑀆𑀤𑀺𑀦𑀸 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀏𑀢𑁆𑀣𑀸𑀢𑀺 𑁋

‘‘𑀅𑀦𑁂𑀓𑀲𑀸𑀔𑀜𑁆𑀘 𑀲𑀳𑀲𑁆𑀲𑀫𑀡𑁆𑀟𑀮𑀁,

𑀙𑀢𑁆𑀢𑀁 𑀫𑀭𑀽 𑀥𑀸𑀭𑀬𑀼𑀫𑀦𑁆𑀢𑀮𑀺𑀓𑁆𑀔𑁂;

𑀲𑀼𑀯𑀡𑁆𑀡𑀤𑀡𑁆𑀟𑀸 𑀯𑀻𑀢𑀺𑀧𑀢𑀦𑁆𑀢𑀺 𑀘𑀸𑀫𑀭𑀸,

𑀦 𑀤𑀺𑀲𑁆𑀲𑀭𑁂 𑀘𑀸𑀫𑀭𑀙𑀢𑁆𑀢𑀕𑀸𑀳𑀓𑀸’’𑀢𑀺. (𑀲𑀼. 𑀦𑀺. 𑁬𑁯𑁩);

𑀇𑀫𑀺𑀲𑁆𑀲𑀸 𑀕𑀸𑀣𑀸𑀬. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀘𑀸𑀭𑀢𑀸𑀬 𑀅𑀦𑀸𑀯𑀭𑀡𑀜𑀸𑀡𑀦𑁆𑀢𑀺 𑀆𑀳 ‘‘𑀲𑀩𑁆𑀩𑀜𑁆𑀜𑀼𑀢𑀸𑀦𑀸𑀯𑀭𑀡𑀜𑀸𑀡𑀧𑀝𑀺𑀮𑀸𑀪𑀲𑁆𑀲𑀸’’𑀢𑀺. 𑀢𑀣𑀸 𑀅𑀬𑀁 𑀪𑀕𑀯𑀸𑀧𑀺 𑀕𑀢𑁄…𑀧𑁂… 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀸𑀯𑁂𑀦𑀸𑀢𑀺 𑀏𑀢𑁂𑀦 𑀅𑀪𑀺𑀚𑀸𑀢𑀺𑀬𑀁 𑀥𑀫𑁆𑀫𑀢𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀯𑀺𑀲𑁂𑀲𑀸 𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀸𑀭𑀫𑀺𑀢𑀸𑀦𑀺𑀲𑁆𑀲𑀦𑁆𑀤𑀸 𑀳𑀺 𑀢𑁂𑀢𑀺.

𑀯𑀺𑀓𑁆𑀓𑀫𑀻𑀢𑀺 𑀅𑀕𑀫𑀸𑀲𑀺. 𑀫𑀭𑀽𑀢𑀺 𑀤𑁂𑀯𑀸. 𑀲𑀫𑀸𑀢𑀺 𑀯𑀺𑀮𑁄𑀓𑀦𑀲𑀫𑀢𑀸𑀬 𑀲𑀫𑀸 𑀲𑀤𑀺𑀲𑀺𑀬𑁄. 𑀫𑀳𑀸𑀧𑀼𑀭𑀺𑀲𑁄 𑀳𑀺 𑀬𑀣𑀸 𑀏𑀓𑀁 𑀤𑀺𑀲𑀁 𑀯𑀺𑀮𑁄𑀓𑁂𑀲𑀺, 𑀏𑀯𑀁 𑀲𑁂𑀲𑀤𑀺𑀲𑀸𑀧𑀺, 𑀦 𑀓𑀢𑁆𑀣𑀘𑀺 𑀯𑀺𑀮𑁄𑀓𑀦𑁂 𑀯𑀺𑀩𑀦𑁆𑀥𑁄 𑀢𑀲𑁆𑀲 𑀅𑀳𑁄𑀲𑀻𑀢𑀺. 𑀲𑀫𑀸𑀢𑀺 𑀯𑀸 𑀯𑀺𑀮𑁄𑀓𑁂𑀢𑀼𑀁 𑀬𑀼𑀢𑁆𑀢𑀸, 𑀯𑀺𑀲𑀫𑀭𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀦 𑀳𑀺 𑀢𑀤𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀺𑀭𑀽𑀧𑀩𑀻𑀪𑀘𑁆𑀙𑀯𑀺𑀲𑀫𑀭𑀽𑀧𑀸𑀦𑀺 𑀯𑀺𑀮𑁄𑀓𑁂𑀢𑀼𑀁 𑀅𑀬𑀼𑀢𑁆𑀢𑀸𑀦𑀺 𑀤𑀺𑀲𑀸𑀲𑀼 𑀉𑀧𑀝𑁆𑀞𑀳𑀦𑁆𑀢𑀻𑀢𑀺.

𑀏𑀯𑀁 ‘‘𑀢𑀣𑀸 𑀕𑀢𑁄’’𑀢𑀺 𑀓𑀸𑀬𑀕𑀫𑀦𑀝𑁆𑀞𑁂𑀦 𑀕𑀢-𑀲𑀤𑁆𑀤𑁂𑀦 𑀢𑀣𑀸𑀕𑀢-𑀲𑀤𑁆𑀤𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀜𑀸𑀡𑀕𑀫𑀦𑀝𑁆𑀞𑁂𑀦 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑁂𑀓𑁆𑀔𑀫𑁆𑀫𑁂𑀦𑀸𑀢𑀺 𑀅𑀮𑁄𑀪𑀧𑁆𑀧𑀥𑀸𑀦𑁂𑀦 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 ¶ . 𑀓𑀼𑀲𑀮𑀸 𑀳𑀺 ¶ 𑀥𑀫𑁆𑀫𑀸 𑀇𑀥 𑀦𑁂𑀓𑁆𑀔𑀫𑁆𑀫𑀁, 𑀦 𑀧𑀩𑁆𑀩𑀚𑁆𑀚𑀸𑀤𑀬𑁄, ‘‘𑀧𑀞𑀫𑀚𑁆𑀛𑀸𑀦’’𑀦𑁆𑀢𑀺 (𑀤𑀻. 𑀦𑀺. 𑀅𑀪𑀺. 𑀝𑀻. 𑁧.𑁭.𑀘𑀽𑀴𑀲𑀻𑀮𑀯𑀡𑁆𑀡𑀦𑀸; 𑀅. 𑀦𑀺. 𑀝𑀻. 𑁧.𑁧.𑁧𑁭𑁦) 𑀘 𑀯𑀤𑀦𑁆𑀢𑀺. 𑀧𑀳𑀸𑀬𑀸𑀢𑀺 𑀧𑀚𑀳𑀺𑀢𑁆𑀯𑀸. 𑀕𑀢𑁄 𑀅𑀥𑀺𑀕𑀢𑁄, 𑀧𑀝𑀺𑀧𑀦𑁆𑀦𑁄 𑀉𑀢𑁆𑀢𑀭𑀺𑀯𑀺𑀲𑁂𑀲𑀦𑁆𑀢𑀺 𑀅𑀢𑁆𑀣𑁄. 𑀧𑀳𑀸𑀬𑀸𑀢𑀺 𑀯𑀸 𑀧𑀳𑀸𑀦𑀳𑁂𑀢𑀼, 𑀧𑀳𑀸𑀦𑀮𑀓𑁆𑀔𑀡𑀁 𑀯𑀸. 𑀳𑁂𑀢𑀼𑀮𑀓𑁆𑀔𑀡𑀢𑁆𑀣𑁄 𑀳𑀺 𑀅𑀬𑀁 𑀧𑀳𑀸𑀬-𑀲𑀤𑁆𑀤𑁄. 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀧𑁆𑀧𑀳𑀸𑀦𑀳𑁂𑀢𑀼𑀓𑀁 ‘‘𑀕𑀢𑁄’’𑀢𑀺 𑀳𑁂𑀢𑁆𑀣 𑀯𑀼𑀢𑁆𑀢𑀁 𑀕𑀫𑀦𑀁 𑀅𑀯𑀩𑁄𑀥𑁄, 𑀧𑀝𑀺𑀧𑀢𑁆𑀢𑀺 𑀏𑀯 𑀯𑀸 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀧𑁆𑀧𑀳𑀸𑀦𑁂𑀦 𑀘 𑀮𑀓𑁆𑀔𑀻𑀬𑀢𑀻𑀢𑀺. 𑀏𑀲 𑀦𑀬𑁄 𑀧𑀤𑀸𑀮𑁂𑀢𑁆𑀯𑀸𑀢𑀺𑀆𑀤𑀻𑀲𑀼𑀧𑀺. 𑀅𑀩𑁆𑀬𑀸𑀧𑀸𑀤𑁂𑀦𑀸𑀢𑀺 𑀫𑁂𑀢𑁆𑀢𑀸𑀬. 𑀆𑀮𑁄𑀓𑀲𑀜𑁆𑀜𑀸𑀬𑀸𑀢𑀺 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀫𑀦𑀲𑀺𑀓𑀭𑀡𑁂𑀦 (𑀤𑀻. 𑀦𑀺. 𑀅𑀪𑀺. 𑀝𑀻. 𑁧.𑁭.𑀘𑀽𑀴𑀲𑀻𑀮𑀯𑀡𑁆𑀡𑀦𑀸) 𑀉𑀧𑀝𑁆𑀞𑀺𑀢𑀆𑀮𑁄𑀓𑀲𑀜𑁆𑀘𑀸𑀦𑀦𑁂𑀦. 𑀅𑀯𑀺𑀓𑁆𑀔𑁂𑀧𑁂𑀦𑀸𑀢𑀺 𑀲𑀫𑀸𑀥𑀺𑀦𑀸. 𑀥𑀫𑁆𑀫𑀯𑀯𑀢𑁆𑀣𑀸𑀦𑁂𑀦𑀸𑀢𑀺 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀬𑀸𑀣𑀸𑀯𑀦𑀺𑀘𑁆𑀙𑀬𑁂𑀦. ‘‘𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑁂𑀦𑀸’’𑀢𑀺𑀧𑀺 𑀯𑀤𑀦𑁆𑀢𑀺.

𑀏𑀯𑀁 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀦𑀻𑀯𑀭𑀡𑀧𑁆𑀧𑀳𑀸𑀦𑁂𑀦 ‘‘𑀅𑀪𑀺𑀚𑁆𑀛𑀁 𑀮𑁄𑀓𑁂 𑀧𑀳𑀸𑀬𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁦𑁮) 𑀯𑀼𑀢𑁆𑀢𑀸𑀬 𑀧𑀞𑀫𑀚𑁆𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀪𑀕𑀯𑀢𑁄 𑀢𑀣𑀸𑀕𑀢𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀳 𑀉𑀧𑀸𑀬𑁂𑀦 𑀅𑀝𑁆𑀞𑀳𑀺 𑀲𑀫𑀸𑀧𑀢𑁆𑀢𑀻𑀳𑀺 𑀅𑀝𑁆𑀞𑀸𑀭𑀲𑀳𑀺 𑀘 𑀫𑀳𑀸𑀯𑀺𑀧𑀲𑁆𑀲𑀦𑀸𑀳𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀜𑀸𑀡𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑀓𑀗𑁆𑀔𑀸𑀯𑀺𑀢𑀭𑀡𑀸𑀦𑀜𑁆𑀳𑀺 𑀯𑀺𑀦𑀺𑀩𑀦𑁆𑀥𑀪𑀽𑀢𑀲𑁆𑀲 𑀫𑁄𑀳𑀲𑁆𑀲 𑀤𑀽𑀭𑀻𑀓𑀭𑀡𑁂𑀦 𑀜𑀸𑀢𑀧𑀭𑀺𑀜𑁆𑀜𑀸𑀬𑀁 𑀞𑀺𑀢𑀲𑁆𑀲 𑀅𑀦𑀺𑀘𑁆𑀘𑀲𑀜𑁆𑀜𑀸𑀤𑀬𑁄 𑀲𑀺𑀚𑁆𑀛𑀦𑁆𑀢𑀺, 𑀢𑀣𑀸 𑀛𑀸𑀦𑀲𑀫𑀸𑀧𑀢𑁆𑀢𑀻𑀲𑀼 𑀅𑀪𑀺𑀭𑀢𑀺𑀦𑀺𑀫𑀺𑀢𑁆𑀢𑁂𑀦 𑀧𑀸𑀫𑁄𑀚𑁆𑀚𑁂𑀦. 𑀢𑀢𑁆𑀣 ‘‘𑀅𑀦𑀪𑀺𑀭𑀢𑀺𑀬𑀸 𑀯𑀺𑀦𑁄𑀤𑀺𑀢𑀸𑀬 𑀛𑀸𑀦𑀸𑀤𑀻𑀦𑀁 𑀲𑀫𑀥𑀺𑀕𑀫𑁄’’𑀢𑀺 𑀲𑀫𑀸𑀧𑀢𑁆𑀢𑀺𑀯𑀺𑀧𑀲𑁆𑀲𑀦𑀸𑀦𑀁 𑀅𑀭𑀢𑀺𑀯𑀺𑀦𑁄𑀤𑀦𑀅𑀯𑀺𑀚𑁆𑀚𑀸𑀧𑀤𑀸𑀮𑀦𑀸𑀤𑀻𑀦𑀺 𑀉𑀧𑀸𑀬𑁄, 𑀉𑀧𑁆𑀧𑀝𑀺𑀧𑀸𑀝𑀺𑀦𑀺𑀤𑁆𑀤𑁂𑀲𑁄 𑀧𑀦 𑀦𑀻𑀯𑀭𑀡𑀲𑀪𑀸𑀯𑀸𑀬 𑀅𑀯𑀺𑀚𑁆𑀚𑀸𑀬 𑀳𑁂𑀝𑁆𑀞𑀸 𑀦𑀺𑀯𑀭𑀡𑁂𑀲𑀼𑀧𑀺 𑀲𑀗𑁆𑀕𑀳𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀧𑁆𑀧𑀯𑁂𑀲𑀯𑀺𑀩𑀦𑁆𑀥𑀦𑁂𑀦 𑀦𑀻𑀯𑀭𑀡𑀸𑀦𑀺 𑀓𑀯𑀸𑀝𑀲𑀤𑀺𑀲𑀸𑀦𑀻𑀢𑀺 𑀆𑀳 ‘‘𑀦𑀻𑀯𑀭𑀡𑀓𑀯𑀸𑀝𑀁 𑀉𑀕𑁆𑀖𑀸𑀝𑁂𑀢𑁆𑀯𑀸’’𑀢𑀺. ‘‘𑀭𑀢𑁆𑀢𑀺𑀁 𑀅𑀦𑀼𑀯𑀺𑀢𑀓𑁆𑀓𑁂𑀢𑁆𑀯𑀸 𑀅𑀦𑀼𑀯𑀺𑀘𑀸𑀭𑁂𑀢𑁆𑀯𑀸 𑀤𑀺𑀯𑀸 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀢𑀻’’𑀢𑀺 (𑀫. 𑀦𑀺. 𑁧.𑁨𑁫𑁧) 𑀯𑀼𑀢𑁆𑀢𑀝𑁆𑀞𑀸𑀦𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀥𑀽𑀫𑀸𑀬𑀦𑀸𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀥𑀽𑀫’’𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 𑀧𑀞𑀫𑀚𑁆𑀛𑀸𑀦𑀼𑀧𑀘𑀸𑀭𑁂𑀬𑁂𑀯 𑀤𑀼𑀓𑁆𑀔𑀁, 𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑀘𑀸𑀭𑁂 𑀘 𑀲𑀼𑀔𑀁 𑀧𑀳𑀻𑀬𑀢𑀺, 𑀅𑀢𑀺𑀲𑀬𑀧𑁆𑀧𑀳𑀸𑀦𑀁 𑀧𑀦 𑀲𑀦𑁆𑀥𑀸𑀬𑀸𑀳 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀦 𑀲𑀼𑀔𑀤𑀼𑀓𑁆𑀔𑀁 𑀧𑀳𑀸𑀬𑀸’’𑀢𑀺.

𑀅𑀦𑀺𑀘𑁆𑀘𑀲𑁆𑀲, 𑀅𑀦𑀺𑀘𑁆𑀘𑀦𑁆𑀢𑀺 𑀘 𑀅𑀦𑀼𑀧𑀲𑁆𑀲𑀦𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸, 𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀁 𑀅𑀦𑀺𑀘𑁆𑀘𑀢𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸𑀬 𑀯𑀺𑀧𑀲𑁆𑀲𑀦𑀸𑀬𑁂𑀢𑀁 𑀦𑀸𑀫𑀁. 𑀦𑀺𑀘𑁆𑀘𑀲𑀜𑁆𑀜𑀦𑁆𑀢𑀺 𑀲𑀗𑁆𑀔𑀢𑀥𑀫𑁆𑀫𑁂𑀲𑀼 ‘‘𑀦𑀺𑀘𑁆𑀘𑀸 𑀲𑀲𑁆𑀲𑀢𑀸’’𑀢𑀺 𑀏𑀯𑀁𑀧𑀯𑀢𑁆𑀢𑀫𑀺𑀘𑁆𑀙𑀸𑀲𑀜𑁆𑀜𑀁. 𑀲𑀜𑁆𑀜𑀸𑀲𑀻𑀲𑁂𑀦 𑀤𑀺𑀝𑁆𑀞𑀺𑀘𑀺𑀢𑁆𑀢𑀸𑀦𑀫𑁆𑀧𑀺 ¶ 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀚𑁆𑀚𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸𑀬 𑀅𑀦𑀼𑀧𑀲𑁆𑀲𑀦𑀸𑀬. 𑀦𑀦𑁆𑀤𑀺𑀦𑁆𑀢𑀺 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀁. 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀲𑀗𑁆𑀔𑀸𑀭𑁂𑀲𑀼 𑀯𑀺𑀭𑀚𑁆𑀚𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸𑀬 𑀅𑀦𑀼𑀧𑀲𑁆𑀲𑀦𑀸𑀬. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 ¶ 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑀲𑁆𑀲 𑀅𑀦𑀼𑀧𑀲𑁆𑀲𑀦𑀸𑀬. 𑀬𑀣𑀸 𑀯𑀸 𑀲𑀗𑁆𑀔𑀸𑀭𑀸 𑀦𑀺𑀭𑀼𑀚𑁆𑀛𑀦𑁆𑀢𑀺𑀬𑁂𑀯, 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀯𑀲𑁂𑀦 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀅𑀦𑀼𑀧𑀲𑁆𑀲𑀦𑀸 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸. 𑀢𑁂𑀦𑁂𑀯𑀸𑀳 ‘‘𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀭𑁄𑀥𑁂𑀢𑀺, 𑀦𑁄 𑀲𑀫𑀼𑀤𑁂𑀢𑀻’’𑀢𑀺. 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸 𑀳𑀺 𑀅𑀬𑀁 𑀩𑀮𑀧𑁆𑀧𑀢𑁆𑀢𑀸𑀢𑀺. 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀅𑀦𑀼𑀧𑀲𑁆𑀲𑀦𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸, 𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸 𑀳𑀺 𑀅𑀬𑀁. 𑀆𑀤𑀸𑀦𑀦𑁆𑀢𑀺 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀳𑀡𑀁. 𑀲𑀦𑁆𑀢𑀢𑀺𑀲𑀫𑀽𑀳𑀓𑀺𑀘𑁆𑀘𑀸𑀭𑀫𑁆𑀫𑀡𑀸𑀦𑀁 𑀯𑀲𑁂𑀦 𑀏𑀓𑀢𑁆𑀢𑀕𑁆𑀕𑀳𑀡𑀁 𑀖𑀦𑀲𑀜𑁆𑀜𑀸. 𑀆𑀬𑀽𑀳𑀦𑀁 𑀅𑀪𑀺𑀲𑀗𑁆𑀔𑀭𑀡𑀁. 𑀅𑀯𑀢𑁆𑀣𑀸𑀯𑀺𑀲𑁂𑀲𑀸𑀧𑀢𑁆𑀢𑀺 𑀯𑀺𑀧𑀭𑀺𑀡𑀸𑀫𑁄. 𑀥𑀼𑀯𑀲𑀜𑁆𑀜𑀦𑁆𑀢𑀺 𑀣𑀺𑀭𑀪𑀸𑀯𑀕𑁆𑀕𑀳𑀡𑀁. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀫𑀽𑀳𑀸𑀤𑀺𑀖𑀦𑀯𑀲𑁂𑀦 𑀲𑀓𑀺𑀘𑁆𑀘𑀧𑀭𑀺𑀘𑁆𑀙𑁂𑀤𑀢𑀸𑀬 𑀘 𑀲𑀗𑁆𑀔𑀸𑀭𑀸𑀦𑀁 𑀲𑀯𑀺𑀕𑁆𑀕𑀳𑀕𑁆𑀕𑀳𑀡𑀁. 𑀧𑀡𑀺𑀥𑀺𑀦𑁆𑀢𑀺 𑀭𑀸𑀕𑀸𑀤𑀺𑀧𑀡𑀺𑀥𑀺𑀁. 𑀲𑀸 𑀧𑀦𑀢𑁆𑀣𑀢𑁄 𑀢𑀡𑁆𑀳𑀸𑀯𑀲𑁂𑀦 𑀲𑀗𑁆𑀔𑀸𑀭𑁂𑀲𑀼 𑀦𑀺𑀦𑁆𑀦𑀢𑀸. 𑀅𑀪𑀺𑀦𑀺𑀯𑁂𑀲𑀦𑁆𑀢𑀺 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁.

𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀤𑀺𑀯𑀲𑁂𑀦 𑀲𑀩𑁆𑀩𑀥𑀫𑁆𑀫𑀢𑀻𑀭𑀡𑀁 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸. 𑀲𑀸𑀭𑀸𑀤𑀸𑀦𑀸𑀪𑀺𑀦𑀺𑀯𑁂𑀲𑀦𑁆𑀢𑀺 𑀅𑀲𑀸𑀭𑁂𑀲𑀼 𑀲𑀸𑀭𑀕𑁆𑀕𑀳𑀡𑀯𑀺𑀧𑀮𑁆𑀮𑀸𑀲𑀁. 𑀇𑀲𑁆𑀲𑀭𑀓𑀼𑀢𑁆𑀢𑀸𑀤𑀺𑀯𑀲𑁂𑀦 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄𑀢𑀺 𑀅𑀪𑀺𑀦𑀺𑀯𑁂𑀲𑁄 𑀲𑀫𑁆𑀫𑁄𑀳𑀸𑀪𑀺𑀦𑀺𑀯𑁂𑀲𑁄. 𑀓𑁂𑀘𑀺 𑀧𑀦 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 𑀅𑀢𑀻𑀢𑀫𑀤𑁆𑀥𑀸𑀦𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀧𑀯𑀢𑁆𑀢𑀲𑀁𑀲𑀬𑀸𑀧𑀢𑁆𑀢𑀺 𑀲𑀫𑁆𑀫𑁄𑀳𑀸𑀪𑀺𑀦𑀺𑀯𑁂𑀲𑁄’’𑀢𑀺 𑀯𑀤𑀦𑁆𑀢𑀺. 𑀲𑀗𑁆𑀔𑀸𑀭𑁂𑀲𑀼 𑀮𑁂𑀡𑀢𑀸𑀡𑀪𑀸𑀯𑀕𑁆𑀕𑀳𑀡𑀁 𑀆𑀮𑀬𑀸𑀪𑀺𑀦𑀺𑀯𑁂𑀲𑁄. ‘‘𑀆𑀮𑀬𑀭𑀢𑀸 𑀆𑀮𑀬𑀲𑀫𑁆𑀫𑀼𑀤𑀺𑀢𑀸’’𑀢𑀺 (𑀤𑀻. 𑀦𑀺. 𑁨.𑁬𑁪, 𑁬𑁭; 𑀫. 𑀦𑀺. 𑁧.𑁨𑁮𑁧; 𑁨.𑁩𑁩𑁭; 𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁭, 𑁮) 𑀯𑀘𑀦𑀢𑁄 𑀆𑀮𑀬𑁄 𑀢𑀡𑁆𑀳𑀸, 𑀲𑀸𑀬𑁂𑀯 𑀘𑀓𑁆𑀔𑀸𑀤𑀻𑀲𑀼 𑀭𑀽𑀧𑀸𑀤𑀻𑀲𑀼 𑀘 𑀅𑀪𑀺𑀦𑀺𑀯𑀺𑀲𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀆𑀮𑀬𑀸𑀪𑀺𑀦𑀺𑀯𑁂𑀲𑁄𑀢𑀺 𑀓𑁂𑀘𑀺. ‘‘𑀏𑀯𑀁𑀯𑀺𑀥𑀸 𑀲𑀗𑁆𑀔𑀸𑀭𑀸 𑀧𑀝𑀺𑀦𑀺𑀲𑁆𑀲𑀚𑁆𑀚𑀻𑀬𑀦𑁆𑀢𑀻’’𑀢𑀺 𑀧𑀯𑀢𑁆𑀢𑀁 𑀜𑀸𑀡𑀁 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸. 𑀯𑀝𑁆𑀝𑀢𑁄 𑀯𑀺𑀕𑀢𑀢𑁆𑀢𑀸 𑀯𑀺𑀯𑀝𑁆𑀝𑀁, 𑀦𑀺𑀩𑁆𑀩𑀸𑀦𑀁, 𑀢𑀢𑁆𑀣 𑀆𑀭𑀫𑁆𑀫𑀡𑀓𑀭𑀡𑀲𑀗𑁆𑀔𑀸𑀢𑁂𑀦 𑀅𑀦𑀼𑀧𑀲𑁆𑀲𑀦𑁂𑀦 𑀧𑀯𑀢𑁆𑀢𑀺𑀬𑀸 𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀸, 𑀕𑁄𑀢𑁆𑀭𑀪𑀽. 𑀲𑀁𑀬𑁄𑀕𑀸𑀪𑀺𑀦𑀺𑀯𑁂𑀲𑀦𑁆𑀢𑀺 𑀲𑀁𑀬𑀼𑀚𑁆𑀚𑀦𑀯𑀲𑁂𑀦 𑀲𑀗𑁆𑀔𑀸𑀭𑁂𑀲𑀼 𑀦𑀺𑀯𑀺𑀲𑀦𑀁. 𑀤𑀺𑀝𑁆𑀞𑁂𑀓𑀝𑁆𑀞𑁂𑀢𑀺 𑀤𑀺𑀝𑁆𑀞𑀺𑀬𑀸 𑀲𑀳𑀚𑀸𑀢𑁂𑀓𑀝𑁆𑀞𑁂 𑀧𑀳𑀸𑀦𑁂𑀓𑀝𑁆𑀞𑁂 𑀘. 𑀑𑀴𑀸𑀭𑀺𑀓𑁂𑀢𑀺 𑀉𑀧𑀭𑀺𑀫𑀕𑁆𑀕𑀯𑀚𑁆𑀛𑀓𑀺𑀮𑁂𑀲𑁂 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀼𑀢𑁆𑀢𑀁, 𑀅𑀜𑁆𑀜𑀣𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸𑀧𑀺 𑀤𑀼𑀢𑀺𑀬𑀫𑀕𑁆𑀕𑀯𑀚𑁆𑀛𑁂𑀳𑀺 𑀑𑀴𑀸𑀭𑀺𑀓𑀸𑀢𑀺. 𑀅𑀡𑀼𑀲𑀳𑀕𑀢𑁂𑀢𑀺 𑀅𑀡𑀼𑀪𑀽𑀢𑁂. 𑀇𑀤𑀁 𑀳𑁂𑀝𑁆𑀞𑀺𑀫𑀫𑀕𑁆𑀕𑀯𑀚𑁆𑀛𑁂 𑀅𑀧𑁂𑀓𑁆𑀔𑀺𑀢𑁆𑀯𑀸 ¶ 𑀯𑀼𑀢𑁆𑀢𑀁. 𑀲𑀩𑁆𑀩𑀓𑀺𑀮𑁂𑀲𑁂𑀢𑀺 𑀅𑀯𑀲𑀺𑀝𑁆𑀞𑀲𑀩𑁆𑀩𑀓𑀺𑀮𑁂𑀲𑁂. 𑀦 𑀳𑀺 𑀧𑀞𑀫𑀸𑀤𑀺𑀫𑀕𑁆𑀕𑁂𑀳𑀺 𑀧𑀳𑀻𑀦𑀸 𑀓𑀺𑀮𑁂𑀲𑀸 𑀧𑀼𑀦 𑀧𑀳𑀻𑀬𑀦𑁆𑀢𑀻𑀢𑀺.

𑀓𑀓𑁆𑀔𑀴𑀢𑁆𑀢𑀁 𑀓𑀣𑀺𑀦𑀪𑀸𑀯𑁄. 𑀧𑀕𑁆𑀖𑀭𑀡𑀁 𑀤𑁆𑀭𑀯𑀪𑀸𑀯𑁄. 𑀮𑁄𑀓𑀺𑀬𑀯𑀸𑀬𑀼𑀦𑀸 𑀪𑀲𑁆𑀢𑀲𑁆𑀲 𑀯𑀺𑀬 𑀬𑁂𑀦 𑀯𑀸𑀬𑀼𑀦𑀸 𑀢𑀁𑀢𑀁𑀓𑀮𑀸𑀧𑀲𑁆𑀲 𑀉𑀤𑁆𑀥𑀼𑀫𑀸𑀬𑀦𑀁, 𑀣𑀤𑁆𑀥𑀪𑀸𑀯𑁄 𑀯𑀸, 𑀢𑀁 𑀯𑀺𑀢𑁆𑀣𑀫𑁆𑀪𑀦𑀁. 𑀯𑀺𑀚𑁆𑀚𑀫𑀸𑀦𑁂𑀧𑀺 𑀓𑀮𑀸𑀧𑀦𑁆𑀢𑀭𑀪𑀽𑀢𑀸𑀦𑀁 𑀓𑀮𑀸𑀧𑀦𑁆𑀢𑀭𑀪𑀽𑀢𑁂𑀳𑀺 𑀲𑀫𑁆𑀨𑀼𑀝𑁆𑀞𑀪𑀸𑀯𑁂 𑀢𑀁𑀢𑀁𑀪𑀽𑀢𑀯𑀺𑀯𑀺𑀢𑁆𑀢𑀢𑀸 𑀭𑀽𑀧𑀧𑀭𑀺𑀬𑀦𑁆𑀢𑁄 𑀆𑀓𑀸𑀲𑁄𑀢𑀺 𑀬𑁂𑀲𑀁 𑀬𑁄 𑀧𑀭𑀺𑀘𑁆𑀙𑁂𑀤𑁄, 𑀢𑁂𑀳𑀺 𑀲𑁄 𑀅𑀲𑀫𑁆𑀨𑀼𑀝𑁆𑀞𑁄𑀯, 𑀅𑀜𑁆𑀜𑀣𑀸 𑀪𑀽𑀢𑀸𑀦𑀁 𑀧𑀭𑀺𑀘𑁆𑀙𑁂𑀤𑀲𑀪𑀸𑀯𑁄 𑀦 𑀲𑀺𑀬𑀸 𑀩𑁆𑀬𑀸𑀧𑀻𑀪𑀸𑀯𑀸𑀧𑀢𑁆𑀢𑀺𑀢𑁄, 𑀅𑀩𑁆𑀬𑀸𑀧𑀺𑀢𑀸𑀯 ¶ 𑀅𑀲𑀫𑁆𑀨𑀼𑀝𑁆𑀞𑀢𑀸𑀢𑀺 𑀬𑀲𑁆𑀫𑀺𑀁 𑀓𑀮𑀸𑀧𑁂 𑀪𑀽𑀢𑀸𑀦𑀁 𑀧𑀭𑀺𑀘𑁆𑀙𑁂𑀤𑁄, 𑀢𑁂𑀳𑀺 𑀅𑀲𑀫𑁆𑀨𑀼𑀝𑁆𑀞𑀪𑀸𑀯𑁄 𑀅𑀲𑀫𑁆𑀨𑀼𑀝𑁆𑀞𑀮𑀓𑁆𑀔𑀡𑀁. 𑀢𑁂𑀦𑀸𑀳 𑀪𑀕𑀯𑀸 𑀆𑀓𑀸𑀲𑀥𑀸𑀢𑀼𑀦𑀺𑀤𑁆𑀤𑁂𑀲𑁂 (𑀥. 𑀲. 𑁬𑁩𑁭) ‘‘𑀅𑀲𑀫𑁆𑀨𑀼𑀝𑁆𑀞𑀁 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀻’’𑀢𑀺.

𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀦𑁆𑀦𑀺𑀧𑀸𑀢𑁂 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺 𑀭𑀼𑀧𑁆𑀧𑀦𑀁. 𑀘𑁂𑀢𑀦𑀸𑀧𑀥𑀸𑀦𑀢𑁆𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀦𑀁 𑀘𑁂𑀢𑀦𑀸𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁 ‘‘𑀲𑀗𑁆𑀔𑀸𑀭𑀸𑀦𑀁 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡’’𑀦𑁆𑀢𑀺. 𑀢𑀣𑀸 𑀳𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀯𑀺𑀪𑀗𑁆𑀕𑁂 (𑀯𑀺𑀪. 𑁯𑁨) ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸’’𑀢𑀺𑀆𑀤𑀺𑀦𑀸 𑀘𑁂𑀢𑀦𑀸𑀯 𑀯𑀺𑀪𑀢𑁆𑀢𑀸. 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡𑀸 𑀘 𑀘𑁂𑀢𑀦𑀸. 𑀬𑀣𑀸𑀳 ‘‘𑀢𑀢𑁆𑀣 𑀓𑀢𑀫𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄? 𑀓𑀼𑀲𑀮𑀸 𑀘𑁂𑀢𑀦𑀸 𑀓𑀸𑀫𑀸𑀯𑀘𑀭𑀸’’𑀢𑀺𑀆𑀤𑀺. 𑀨𑀭𑀡𑀁 𑀲𑀯𑀺𑀧𑁆𑀨𑀸𑀭𑀺𑀓𑀢𑀸. 𑀅𑀲𑁆𑀲𑀤𑁆𑀥𑀺𑀬𑁂𑀢𑀺 𑀅𑀲𑀤𑁆𑀥𑀺𑀬𑀳𑁂𑀢𑀼. 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁. 𑀏𑀲 𑀦𑀬𑁄 𑀓𑁄𑀲𑀚𑁆𑀚𑁂𑀢𑀺𑀆𑀤𑀻𑀲𑀼. 𑀉𑀧𑀲𑀫𑀮𑀓𑁆𑀔𑀡𑀦𑁆𑀢𑀺 𑀓𑀸𑀬𑀘𑀺𑀢𑁆𑀢𑀧𑀭𑀺𑀴𑀸𑀳𑀽𑀧𑀲𑀫𑀮𑀓𑁆𑀔𑀡𑀁. 𑀮𑀻𑀦𑀼𑀤𑁆𑀥𑀘𑁆𑀘𑀭𑀳𑀺𑀢𑁂 𑀅𑀥𑀺𑀘𑀺𑀢𑁆𑀢𑁂 𑀧𑀯𑀢𑁆𑀢𑀫𑀸𑀦𑁂 𑀧𑀕𑁆𑀕𑀳𑀦𑀺𑀕𑁆𑀕𑀳𑀲𑀫𑁆𑀧𑀳𑀁𑀲𑀦𑁂𑀲𑀼 𑀅𑀩𑁆𑀬𑀸𑀯𑀝𑀢𑀸𑀬 𑀅𑀚𑁆𑀛𑀼𑀧𑁂𑀓𑁆𑀔𑀦𑀁 𑀧𑀝𑀺𑀲𑀗𑁆𑀔𑀸𑀦𑀁 𑀧𑀓𑁆𑀔𑀧𑀸𑀢𑀼𑀧𑀘𑁆𑀙𑁂𑀤𑀢𑁄.

𑀫𑀼𑀲𑀸𑀯𑀸𑀤𑀸𑀤𑀻𑀦𑀁 𑀯𑀺𑀲𑀁𑀯𑀸𑀤𑀦𑀸𑀤𑀺𑀓𑀺𑀘𑁆𑀘𑀢𑀸𑀬 𑀮𑀽𑀔𑀸𑀦𑀁 𑀅𑀧𑀭𑀺𑀕𑁆𑀕𑀸𑀳𑀓𑀸𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀧𑀭𑀺𑀕𑁆𑀕𑀸𑀳𑀓𑀲𑀪𑀸𑀯𑀸 𑀲𑀫𑁆𑀫𑀸𑀯𑀸𑀘𑀸 𑀲𑀺𑀦𑀺𑀤𑁆𑀥𑀪𑀸𑀯𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀲𑀫𑁆𑀫𑀸𑀯𑀸𑀘𑀸𑀧𑀘𑁆𑀘𑀬𑀲𑀼𑀪𑀸𑀲𑀺𑀢𑀸𑀦𑀁 𑀲𑁄𑀢𑀸𑀭𑀜𑁆𑀘 𑀧𑀼𑀕𑁆𑀕𑀮𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀢𑀲𑁆𑀲𑀸 𑀧𑀭𑀺𑀕𑁆𑀕𑀸𑀳𑀮𑀓𑁆𑀔𑀡𑀁 𑀯𑀼𑀢𑁆𑀢𑀁. 𑀓𑀸𑀬𑀺𑀓𑀓𑀺𑀭𑀺𑀬𑀸 𑀓𑀺𑀜𑁆𑀘𑀺 𑀓𑀢𑁆𑀢𑀩𑁆𑀩𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀲𑀬𑀜𑁆𑀘 𑀲𑀫𑀼𑀝𑁆𑀞𑀳𑀦𑀁 𑀖𑀝𑀦𑀁 𑀳𑁄𑀢𑀻𑀢𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢 𑀲𑀗𑁆𑀔𑀸𑀢𑀸𑀬 𑀯𑀺𑀭𑀢𑀺𑀬𑀸 𑀲𑀫𑀼𑀝𑁆𑀞𑀸𑀦𑀮𑀓𑁆𑀔𑀡𑀁 𑀤𑀝𑁆𑀞𑀩𑁆𑀩𑀁. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀸 𑀉𑀓𑁆𑀔𑀺𑀧𑀦𑀁 𑀲𑀫𑀼𑀝𑁆𑀞𑀸𑀧𑀦𑀁 𑀓𑀸𑀬𑀺𑀓𑀓𑀺𑀭𑀺𑀬𑀸𑀬 𑀪𑀸𑀭𑀼𑀓𑁆𑀔𑀺𑀧𑀦𑀁 𑀯𑀺𑀬. 𑀚𑀻𑀯𑀫𑀸𑀦𑀲𑁆𑀲 𑀲𑀢𑁆𑀢𑀲𑁆𑀲, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑁆𑀧𑀯𑀢𑁆𑀢𑀺𑀬𑀸, 𑀆𑀚𑀻𑀯𑀲𑁆𑀲𑁂𑀯 𑀯𑀸 𑀲𑀼𑀤𑁆𑀥𑀺 𑀯𑁄𑀤𑀸𑀦𑀁. 𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀲𑀫𑁆𑀫𑀤𑁂𑀯 𑀧𑀕𑁆𑀕𑀡𑁆𑀳𑀦𑀁 𑀧𑀕𑁆𑀕𑀳𑁄.

‘‘𑀲𑀗𑁆𑀔𑀸𑀭𑀸’’𑀢𑀺 ¶ 𑀇𑀥 𑀘𑁂𑀢𑀦𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀗𑁆𑀔𑀸𑀭𑀸𑀦𑀁 𑀘𑁂𑀢𑀦𑀸𑀮𑀓𑁆𑀔𑀡’’𑀦𑁆𑀢𑀺. 𑀦𑀫𑀦𑀁 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀪𑀸𑀯𑁄. 𑀆𑀬𑀢𑀦𑀁 𑀧𑀯𑀢𑁆𑀢𑀦𑀁. 𑀆𑀬𑀢𑀦𑀸𑀦𑀁 𑀯𑀲𑁂𑀦 𑀳𑀺 𑀆𑀬𑀲𑀗𑁆𑀔𑀸𑀢𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀯𑀢𑁆𑀢𑀺. 𑀢𑀡𑁆𑀳𑀸𑀬 𑀳𑁂𑀢𑀼𑀮𑀓𑁆𑀔𑀡𑀦𑁆𑀢𑀺 𑀯𑀝𑁆𑀝𑀲𑁆𑀲 𑀚𑀦𑀓𑀳𑁂𑀢𑀼𑀪𑀸𑀯𑁄, 𑀫𑀕𑁆𑀕𑀲𑁆𑀲 𑀧𑀦 𑀦𑀺𑀩𑁆𑀩𑀸𑀦𑀲𑀫𑁆𑀧𑀸𑀧𑀓𑀢𑁆𑀢𑀦𑁆𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀢𑀣𑀮𑀓𑁆𑀔𑀡𑀁 𑀅𑀯𑀺𑀧𑀭𑀻𑀢𑀲𑀪𑀸𑀯𑁄. 𑀏𑀓𑀭𑀲𑁄 𑀅𑀜𑁆𑀜𑀫𑀜𑁆𑀜𑀸𑀦𑀢𑀺𑀯𑀢𑁆𑀢𑀦𑀁 𑀅𑀦𑀽𑀦𑀸𑀦𑀥𑀺𑀓𑀪𑀸𑀯𑁄. 𑀬𑀼𑀕𑀦𑀤𑁆𑀥𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀯. 𑀲𑀤𑁆𑀥𑀸𑀧𑀜𑁆𑀜𑀸 𑀧𑀕𑁆𑀕𑀳𑀸𑀯𑀺𑀓𑁆𑀔𑁂𑀧𑀸𑀢𑀺𑀧𑀺 𑀯𑀤𑀦𑁆𑀢𑀺.

𑀔𑀻𑀡𑁄𑀢𑀺 ¶ 𑀓𑀺𑀮𑁂𑀲𑁂 𑀔𑁂𑀧𑀢𑀻𑀢𑀺 𑀔𑀬𑁄, 𑀫𑀕𑁆𑀕𑁄. 𑀅𑀦𑀼𑀧𑁆𑀧𑀸𑀤𑀧𑀭𑀺𑀬𑁄𑀲𑀸𑀦𑀢𑀸𑀬 𑀅𑀦𑀼𑀧𑁆𑀧𑀸𑀤𑁄, 𑀨𑀮𑀁. 𑀧𑀲𑁆𑀲𑀤𑁆𑀥𑀺 𑀓𑀺𑀮𑁂𑀲𑀯𑀽𑀧𑀲𑀫𑁄. 𑀙𑀦𑁆𑀤𑀲𑁆𑀲𑀸𑀢𑀺 𑀓𑀢𑁆𑀢𑀼𑀓𑀸𑀫𑀢𑀸𑀙𑀦𑁆𑀤𑀲𑁆𑀲. 𑀫𑀽𑀮𑀮𑀓𑁆𑀔𑀡𑀁 𑀧𑀢𑀺𑀝𑁆𑀞𑀸𑀪𑀸𑀯𑁄. 𑀲𑀫𑀼𑀝𑁆𑀞𑀸𑀦𑀪𑀸𑀯𑁄 𑀲𑀫𑀼𑀝𑁆𑀞𑀸𑀦𑀮𑀓𑁆𑀔𑀡𑀁 𑀆𑀭𑀫𑁆𑀫𑀡𑀧𑀝𑀺𑀧𑀸𑀤𑀓𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑀸. 𑀲𑀫𑁄𑀥𑀸𑀦𑀁 𑀯𑀺𑀲𑀬𑀸𑀤𑀺𑀲𑀦𑁆𑀦𑀺𑀧𑀸𑀢𑁂𑀦 𑀕𑀳𑁂𑀢𑀩𑁆𑀩𑀸𑀓𑀸𑀭𑁄, 𑀬𑀸 𑀲𑀗𑁆𑀕𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀁 𑀲𑀳 𑀑𑀤𑀳𑀦𑁆𑀢𑀺 𑀅𑀦𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀢𑀺 𑀯𑀸 𑀲𑀫𑁄𑀥𑀸𑀦𑀁, 𑀨𑀲𑁆𑀲𑁄. 𑀲𑀫𑁄𑀲𑀭𑀦𑁆𑀢𑀺 𑀲𑀦𑁆𑀦𑀺𑀧𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀫𑁄𑀲𑀭𑀡𑀁. 𑀯𑁂𑀤𑀦𑀸𑀬 𑀯𑀺𑀦𑀸 𑀅𑀧𑁆𑀧𑀯𑀢𑁆𑀢𑀫𑀸𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀯𑁂𑀤𑀦𑀸𑀦𑀼𑀪𑀯𑀦𑀦𑀺𑀫𑀺𑀢𑁆𑀢𑀁 𑀲𑀫𑁄𑀲𑀝𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀕𑁄𑀧𑀸𑀦𑀲𑀻𑀦𑀁 𑀓𑀽𑀝𑀁 𑀯𑀺𑀬 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀧𑀸𑀫𑁄𑀓𑁆𑀔𑀪𑀸𑀯𑁄 𑀧𑀫𑀼𑀔𑀮𑀓𑁆𑀔𑀡𑀁. 𑀢𑀢𑁄, 𑀢𑁂𑀲𑀁 𑀯𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀉𑀢𑁆𑀢𑀭𑀺 𑀧𑀥𑀸𑀦𑀦𑁆𑀢𑀺 𑀢𑀢𑀼𑀢𑁆𑀢𑀭𑀺, 𑀧𑀜𑁆𑀜𑀼𑀢𑁆𑀢𑀭𑀸 𑀳𑀺 𑀓𑀼𑀲𑀮𑀸 𑀥𑀫𑁆𑀫𑀸. 𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀨𑀮𑀲𑁆𑀲. 𑀢𑀜𑁆𑀳𑀺 𑀲𑀻𑀮𑀸𑀤𑀺𑀕𑀼𑀡𑀲𑀸𑀭𑀲𑁆𑀲 𑀧𑀭𑀫𑀼𑀓𑁆𑀓𑀁𑀲𑀪𑀸𑀯𑁂𑀦 𑀲𑀸𑀭𑀁. 𑀅𑀬𑀜𑁆𑀘 𑀮𑀓𑁆𑀔𑀡𑀯𑀺𑀪𑀸𑀕𑁄 𑀙𑀥𑀸𑀢𑀼𑀧𑀜𑁆𑀘𑀛𑀸𑀦𑀗𑁆𑀕𑀸𑀤𑀺𑀯𑀲𑁂𑀦 𑀢𑀁𑀢𑀁𑀲𑀼𑀢𑁆𑀢𑀧𑀤𑀸𑀦𑀼𑀲𑀸𑀭𑁂𑀦 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀁 𑀆𑀕𑀢𑀦𑀬𑁂𑀦 𑀘 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄𑀧𑀺 𑀓𑁄𑀘𑀺 𑀥𑀫𑁆𑀫𑁄 𑀧𑀭𑀺𑀬𑀸𑀬𑀦𑁆𑀢𑀭𑀧𑀓𑀸𑀲𑀦𑀢𑁆𑀣𑀁 𑀧𑀼𑀦 𑀤𑀲𑁆𑀲𑀺𑀢𑁄. 𑀢𑀢𑁄 𑀏𑀯 𑀘 ‘‘𑀙𑀦𑁆𑀤𑀫𑀽𑀮𑀓𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀫𑀦𑀲𑀺𑀓𑀸𑀭𑀲𑀫𑀼𑀝𑁆𑀞𑀸𑀦𑀸 𑀨𑀲𑁆𑀲𑀲𑀫𑁄𑀥𑀸𑀦𑀸 𑀯𑁂𑀤𑀦𑀸𑀲𑀫𑁄𑀲𑀭𑀡𑀸’’𑀢𑀺, ‘‘𑀧𑀜𑁆𑀜𑀼𑀢𑁆𑀢𑀭𑀸 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺, ‘‘𑀯𑀺𑀫𑀼𑀢𑁆𑀢𑀺𑀲𑀸𑀭𑀫𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺, ‘‘𑀦𑀺𑀩𑁆𑀩𑀸𑀦𑁄𑀕𑀥𑀜𑁆𑀳𑀺 𑀆𑀯𑀼𑀲𑁄 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺 (𑀫. 𑀦𑀺. 𑁧.𑁪𑁬𑁬) 𑀘 𑀲𑀼𑀢𑁆𑀢𑀧𑀤𑀸𑀦𑀁 𑀯𑀲𑁂𑀦 ‘‘𑀙𑀦𑁆𑀤𑀲𑁆𑀲 𑀫𑀽𑀮𑀮𑀓𑁆𑀔𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀣𑀥𑀫𑁆𑀫𑀸 𑀦𑀸𑀫 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀅𑀯𑀺𑀧𑀭𑀻𑀢𑀲𑀪𑀸𑀯𑀢𑁆𑀢𑀸. 𑀢𑀣𑀸𑀦𑀺 𑀢𑀁𑀲𑀪𑀸𑀯𑀢𑁆𑀢𑀸. 𑀅𑀯𑀺𑀢𑀣𑀸𑀦𑀺 𑀅𑀫𑀼𑀲𑀸𑀲𑀪𑀸𑀯𑀢𑁆𑀢𑀸. 𑀅𑀦𑀜𑁆𑀜𑀣𑀸𑀦𑀺 𑀅𑀜𑁆𑀜𑀸𑀓𑀸𑀭𑀭𑀳𑀺𑀢𑀢𑁆𑀢𑀸. 𑀚𑀸𑀢𑀺𑀧𑀘𑁆𑀘𑀬𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄𑀢𑀺 𑀚𑀸𑀢𑀺𑀧𑀘𑁆𑀘𑀬𑀸 𑀲𑀫𑁆𑀪𑀽𑀢𑀁 ¶ 𑀳𑀼𑀢𑁆𑀯𑀸 𑀲𑀳𑀺𑀢𑀲𑁆𑀲 𑀅𑀢𑁆𑀢𑀦𑁄 𑀧𑀘𑁆𑀘𑀬𑀸𑀦𑀼𑀭𑀽𑀧𑀲𑁆𑀲 𑀉𑀤𑁆𑀥𑀁 𑀆𑀕𑀢𑀪𑀸𑀯𑁄, 𑀅𑀦𑀼𑀧𑀯𑀢𑁆𑀢𑀦𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀫𑁆𑀪𑀽𑀢𑀝𑁆𑀞𑁄 𑀘 𑀲𑀫𑀼𑀤𑀸𑀕𑀢𑀝𑁆𑀞𑁄 𑀘 𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄, 𑀦 𑀚𑀸𑀢𑀺𑀢𑁄 𑀚𑀭𑀸𑀫𑀭𑀡𑀁 𑀦 𑀳𑁄𑀢𑀺, 𑀦 𑀘 𑀚𑀸𑀢𑀺𑀁 𑀯𑀺𑀦𑀸 𑀅𑀜𑁆𑀜𑀢𑁄 𑀳𑁄𑀢𑀻𑀢𑀺 𑀚𑀸𑀢𑀺𑀧𑀘𑁆𑀘𑀬𑀲𑀫𑁆𑀪𑀽𑀢𑀝𑁆𑀞𑁄. 𑀇𑀢𑁆𑀣𑀜𑁆𑀘 𑀚𑀸𑀢𑀺𑀢𑁄 𑀲𑀫𑀼𑀤𑀸𑀕𑀘𑁆𑀙𑀢𑀻𑀢𑀺 𑀚𑀸𑀢𑀺𑀧𑀘𑁆𑀘𑀬𑀲𑀫𑀼𑀤𑀸𑀕𑀢𑀝𑁆𑀞𑁄, 𑀬𑀸 𑀬𑀸 𑀚𑀸𑀢𑀺 𑀬𑀣𑀸 𑀬𑀣𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀤𑀦𑀼𑀭𑀽𑀧𑀁 𑀧𑀸𑀢𑀼𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀝𑁆𑀞𑁄𑀢𑀺 𑀏𑀢𑁆𑀣𑀸𑀧𑀺 𑀦 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀦 𑀘 𑀅𑀯𑀺𑀚𑁆𑀚𑀁 𑀯𑀺𑀦𑀸 𑀲𑀗𑁆𑀔𑀸𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀬𑀸 𑀬𑀸 𑀅𑀯𑀺𑀚𑁆𑀚𑀸 𑀬𑁂𑀲𑀁 𑀬𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀬𑀣𑀸 𑀬𑀣𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀬𑀁 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀝𑁆𑀞𑁄 𑀧𑀘𑁆𑀘𑀬𑀪𑀸𑀯𑁄𑀢𑀺 𑀅𑀢𑁆𑀣𑁄.

𑀪𑀕𑀯𑀸 𑀢𑀁 𑀲𑀩𑁆𑀩𑀸𑀓𑀸𑀭𑀢𑁄 𑀚𑀸𑀦𑀸𑀢𑀺 𑀧𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦𑀸𑀢𑀺 𑀪𑀕𑀯𑀢𑀸. 𑀢𑀁 𑀯𑀺𑀪𑀚𑁆𑀚𑀫𑀸𑀦𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀦𑁆𑀢𑀺 𑀭𑀼𑀧𑀸𑀬𑀢𑀦𑀁. 𑀇𑀝𑁆𑀞𑀸𑀦𑀺𑀝𑁆𑀞𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀚𑁆𑀛𑀢𑁆𑀢𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀢𑀣𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀭𑀺𑀢𑁆𑀢𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀢𑀤𑀼𑀪𑀬𑀸𑀤𑀺𑀪𑁂𑀤𑀁. 𑀮𑀩𑁆𑀪𑀫𑀸𑀦𑀓𑀧𑀤𑀯𑀲𑁂𑀦𑀸𑀢𑀺 ‘‘𑀭𑀽𑀧𑀸𑀬𑀢𑀦𑀁 ¶ 𑀤𑀺𑀝𑁆𑀞𑀁, 𑀲𑀤𑁆𑀤𑀸𑀬𑀢𑀦𑀁 𑀲𑀼𑀢𑀁, 𑀕𑀦𑁆𑀥𑀸𑀬𑀢𑀦𑀁 𑀭𑀲𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀫𑀼𑀢𑀁, 𑀲𑀩𑁆𑀩𑀁 𑀭𑀽𑀧𑀁 𑀫𑀦𑀲𑀸 𑀯𑀺𑀜𑁆𑀜𑀸𑀢’’𑀦𑁆𑀢𑀺 (𑀥. 𑀲. 𑁯𑁬𑁬) 𑀯𑀘𑀦𑀢𑁄 𑀤𑀺𑀝𑁆𑀞𑀧𑀤𑀜𑁆𑀘 𑀯𑀺𑀜𑁆𑀜𑀸𑀢𑀧𑀤𑀜𑁆𑀘 𑀭𑀽𑀧𑀸𑀭𑀫𑁆𑀫𑀡𑁂 𑀮𑀩𑁆𑀪𑀢𑀺, 𑀭𑀽𑀧𑀸𑀭𑀫𑁆𑀫𑀡𑀁 𑀇𑀝𑁆𑀞𑀁 𑀅𑀦𑀺𑀝𑁆𑀞𑀁 𑀫𑀚𑁆𑀛𑀢𑁆𑀢𑀁 𑀧𑀭𑀺𑀢𑁆𑀢𑀁 𑀅𑀢𑀻𑀢𑀁 𑀅𑀦𑀸𑀕𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀤𑀺𑀝𑁆𑀞𑀁 𑀯𑀺𑀜𑁆𑀜𑀸𑀢𑀁 𑀭𑀽𑀧𑀁 𑀭𑀽𑀧𑀸𑀬𑀢𑀦𑀁 𑀭𑀽𑀧𑀥𑀸𑀢𑀼 𑀯𑀡𑁆𑀡𑀦𑀺𑀪𑀸 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀦𑀻𑀮𑀁 𑀧𑀻𑀢𑀓𑀦𑁆𑀢𑀺 𑀏𑀯𑀫𑀸𑀤𑀻𑀳𑀺 𑀅𑀦𑁂𑀓𑁂𑀳𑀺 𑀦𑀸𑀫𑁂𑀳𑀺.

𑀢𑁂𑀭𑀲𑀳𑀺 𑀯𑀸𑀭𑁂𑀳𑀻𑀢𑀺 𑀭𑀽𑀧𑀓𑀡𑁆𑀟𑁂 (𑀥. 𑀲. 𑁬𑁧𑁬) 𑀆𑀕𑀢𑁂 𑀢𑁂𑀭𑀲 𑀦𑀺𑀤𑁆𑀤𑁂𑀲𑀯𑀸𑀭𑁂 𑀲𑀦𑁆𑀥𑀸𑀬𑀸𑀳. 𑀏𑀓𑁂𑀓𑀲𑁆𑀫𑀺𑀜𑁆𑀘 𑀯𑀸𑀭𑁂 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀯𑀯𑀢𑁆𑀣𑀸𑀧𑀦𑀦𑀬𑀸𑀦𑀁 𑀯𑀲𑁂𑀦 ‘‘𑀤𑁆𑀯𑁂𑀧𑀜𑁆𑀜𑀸𑀲𑀸𑀬 𑀦𑀬𑁂𑀳𑀻’’𑀢𑀺 𑀆𑀳. 𑀢𑀣𑀫𑁂𑀯 𑀅𑀯𑀺𑀧𑀭𑀻𑀢𑀤𑀲𑁆𑀲𑀺𑀢𑀸𑀬 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀤𑁂𑀲𑀦𑀢𑀸𑀬 𑀘. ‘‘𑀚𑀸𑀦𑀸𑀫𑀺 𑀅𑀪𑀺𑀜𑁆𑀜𑀸𑀲𑀺’’𑀦𑁆𑀢𑀺 𑀯𑀢𑁆𑀢𑀫𑀸𑀦𑀸𑀢𑀻𑀢𑀓𑀸𑀮𑁂𑀲𑀼 𑀜𑀸𑀡𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑁂𑀦 𑀅𑀦𑀸𑀕𑀢𑁂𑀧𑀺 𑀜𑀸𑀡𑀧𑁆𑀧𑀯𑀢𑁆𑀢𑀺 𑀯𑀼𑀢𑁆𑀢𑀸𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀺𑀤𑀺𑀢-𑀲𑀤𑁆𑀤𑁄 𑀅𑀦𑀸𑀫𑀝𑁆𑀞𑀓𑀸𑀮𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄 ‘‘𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢’’𑀦𑁆𑀢𑀺𑀆𑀤𑀻𑀲𑀼 (𑀥. 𑀲. 𑁯𑁬𑁬) 𑀯𑀺𑀬. 𑀦 𑀉𑀧𑀝𑁆𑀞𑀸𑀲𑀻𑀢𑀺 𑀅𑀢𑁆𑀢𑀢𑁆𑀢𑀦𑀺𑀬𑀯𑀲𑁂𑀦 𑀦 𑀉𑀧𑀕𑀘𑁆𑀙𑀺. 𑀬𑀣𑀸 𑀭𑀽𑀧𑀸𑀭𑀫𑁆𑀫𑀡𑀸𑀤𑀬𑁄 𑀥𑀫𑁆𑀫𑀸 𑀬𑀁𑀲𑀪𑀸𑀯𑀸 𑀬𑀁𑀧𑀓𑀸𑀭𑀸 𑀘, 𑀢𑀣𑀸 𑀦𑁂 𑀧𑀲𑁆𑀲𑀢𑀺 𑀚𑀸𑀦𑀸𑀢𑀺 𑀕𑀘𑁆𑀙𑀢𑀻𑀢𑀺 𑀢𑀣𑀸𑀕𑀢𑁄𑀢𑀺 𑀏𑀯𑀁 𑀧𑀤𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀘𑀺 𑀧𑀦 ‘‘𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑀺𑀲𑁄𑀤𑀭𑀸𑀤𑀺𑀧𑀓𑁆𑀔𑁂𑀧𑁂𑀦 (𑀧𑀸𑀡𑀺𑀦𑀺 𑁬.𑁩.𑁧𑁦𑁯) 𑀯𑀸 𑀤𑀲𑁆𑀲𑀺-𑀲𑀤𑁆𑀤𑀲𑁆𑀲 𑀮𑁄𑀧𑀁, 𑀆𑀕𑀢-𑀲𑀤𑁆𑀤𑀲𑁆𑀲 𑀘𑀸𑀕𑀫𑀁 𑀓𑀢𑁆𑀯𑀸 𑀢𑀣𑀸𑀕𑀢𑁄’’𑀢𑀺 𑀯𑀡𑁆𑀡𑁂𑀦𑁆𑀢𑀺.

𑀦𑀺𑀤𑁆𑀤𑁄𑀲𑀢𑀸𑀬 ¶ 𑀅𑀦𑀼𑀧𑀯𑀚𑁆𑀚𑀁. 𑀧𑀓𑁆𑀔𑀺𑀧𑀺𑀢𑀩𑁆𑀩𑀸𑀪𑀸𑀯𑁂𑀦 𑀅𑀦𑀽𑀦𑀁. 𑀅𑀧𑀦𑁂𑀢𑀩𑁆𑀩𑀸𑀪𑀸𑀯𑁂𑀦 𑀅𑀦𑀥𑀺𑀓𑀁. 𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀼𑀡𑁆𑀡𑀁. 𑀦𑁄 𑀅𑀜𑁆𑀜𑀣𑀸𑀢𑀺 ‘‘𑀢𑀣𑁂𑀯𑀸’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑁂𑀦 𑀲𑀫𑁆𑀧𑀸𑀤𑁂𑀢𑀺. 𑀢𑁂𑀦 𑀬𑀤𑀢𑁆𑀣𑀁 𑀪𑀸𑀲𑀺𑀢𑀁, 𑀏𑀓𑀦𑁆𑀢𑁂𑀦 𑀢𑀤𑀢𑁆𑀣𑀦𑀺𑀧𑁆𑀨𑀸𑀤𑀦𑀢𑁄 𑀬𑀣𑀸 𑀪𑀸𑀲𑀺𑀢𑀁 𑀪𑀕𑀯𑀢𑀸, 𑀢𑀣𑁂𑀯𑀸𑀢𑀺 𑀅𑀯𑀺𑀧𑀭𑀻𑀢𑀤𑁂𑀲𑀦𑀢𑀁 𑀤𑀲𑁆𑀲𑁂𑀢𑀺. 𑀕𑀤𑀅𑀢𑁆𑀣𑁄𑀢𑀺 𑀏𑀢𑁂𑀦 𑀢𑀣𑀁 𑀕𑀤𑀢𑀻𑀢𑀺 𑀢𑀣𑀸𑀕𑀢𑁄𑀢𑀺 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑁄 𑀓𑀢𑁄 𑀦𑀺𑀭𑀼𑀢𑁆𑀢𑀺𑀦𑀬𑁂𑀦𑀸𑀢𑀺 𑀤𑀲𑁆𑀲𑁂𑀢𑀺.

𑀢𑀣𑀸 𑀕𑀢𑀫𑀲𑁆𑀲𑀸𑀢𑀺 𑀢𑀣𑀸𑀕𑀢𑁄. 𑀕𑀢𑀦𑁆𑀢𑀺 𑀘 𑀓𑀸𑀬𑀯𑀸𑀘𑀸𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸𑀢𑀺 𑀘 𑀯𑀼𑀢𑁆𑀢𑁂 𑀬𑀁𑀢𑀁𑀲𑀤𑁆𑀤𑀸𑀦𑀁 𑀅𑀩𑁆𑀬𑀪𑀺𑀘𑀸𑀭𑀺𑀲𑀫𑁆𑀩𑀦𑁆𑀥𑀺𑀢𑀸𑀬 𑀬𑀣𑀸𑀢𑀺 𑀅𑀬𑀫𑀢𑁆𑀣𑁄 𑀉𑀧𑀝𑁆𑀞𑀺𑀢𑁄𑀬𑁂𑀯 𑀳𑁄𑀢𑀺, 𑀓𑀸𑀬𑀯𑀘𑀻𑀓𑀺𑀭𑀺𑀬𑀸𑀦𑀜𑁆𑀘 𑀅𑀜𑁆𑀜𑀫𑀜𑁆𑀜𑀸𑀦𑀼𑀮𑁄𑀫𑁂𑀦 𑀯𑀘𑀦𑀺𑀘𑁆𑀙𑀸𑀬𑀁 𑀓𑀸𑀬𑀲𑁆𑀲 𑀯𑀸𑀘𑀸, 𑀯𑀸𑀘𑀸𑀬 𑀘 𑀓𑀸𑀬𑁄 𑀲𑀫𑁆𑀩𑀦𑁆𑀥𑀻𑀪𑀸𑀯𑁂𑀦 𑀉𑀧𑀢𑀺𑀝𑁆𑀞𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀪𑀕𑀯𑀢𑁄 𑀳𑀻’’𑀢𑀺𑀆𑀤𑀺. 𑀇𑀫𑀲𑁆𑀫𑀺𑀁 𑀧𑀦 𑀅𑀢𑁆𑀣𑁂 𑀢𑀣𑀸𑀯𑀸𑀤𑀻𑀢𑀸𑀬 𑀢𑀣𑀸𑀕𑀢𑁄𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀲𑁄 𑀧𑀦 𑀧𑀼𑀩𑁆𑀩𑁂 𑀧𑀓𑀸𑀭𑀦𑁆𑀢𑀭𑁂𑀦 𑀤𑀲𑁆𑀲𑀺𑀢𑁄𑀢𑀺 𑀆𑀳 ‘‘𑀏𑀯𑀁 𑀢𑀣𑀸𑀓𑀸𑀭𑀺𑀢𑀸𑀬 𑀢𑀣𑀸𑀕𑀢𑁄’’𑀢𑀺.

𑀢𑀺𑀭𑀺𑀬𑀁 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀽𑀢𑀺 𑀏𑀢𑁂𑀦 𑀬𑀤𑁂𑀓𑁂 ‘‘𑀢𑀺𑀭𑀺𑀬𑀁 𑀯𑀺𑀬 𑀉𑀧𑀭𑀺 𑀅𑀥𑁄 𑀘 𑀲𑀦𑁆𑀢𑀺 𑀮𑁄𑀓𑀥𑀸𑀢𑀼𑀬𑁄’’𑀢𑀺 ¶ 𑀯𑀤𑀦𑁆𑀢𑀺, 𑀢𑀁 𑀧𑀝𑀺𑀲𑁂𑀥𑁂𑀢𑀺. 𑀤𑁂𑀲𑀦𑀸𑀯𑀺𑀮𑀸𑀲𑁄𑀬𑁂𑀯 𑀤𑁂𑀲𑀦𑀸𑀯𑀺𑀮𑀸𑀲𑀫𑀬𑁄 𑀬𑀣𑀸 ‘‘𑀧𑀼𑀜𑁆𑀜𑀫𑀬𑀁, 𑀤𑀸𑀦𑀫𑀬’’𑀦𑁆𑀢𑀺𑀆𑀤𑀻𑀲𑀼.

𑀦𑀺𑀧𑀸𑀢𑀸𑀦𑀁 𑀯𑀸𑀘𑀓𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂 𑀢𑀤𑀢𑁆𑀣𑀚𑁄𑀢𑀦𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄 𑀕𑀢-𑀲𑀤𑁆𑀤𑁄𑀬𑁂𑀯 𑀅𑀯𑀕𑀢𑀢𑁆𑀣𑀁 𑀅𑀢𑀻𑀢𑀢𑁆𑀣𑀜𑁆𑀘 𑀯𑀤𑀢𑀻𑀢𑀺 𑀆𑀳 ‘‘𑀕𑀢𑁄𑀢𑀺 𑀅𑀯𑀕𑀢𑁄 𑀅𑀢𑀻𑀢𑁄’’𑀢𑀺.

𑀅𑀣 𑀯𑀸 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀫𑁆𑀫𑀸𑀲𑀫𑁆𑀩𑁄𑀥𑀺, 𑀏𑀢𑁆𑀣𑀦𑁆𑀢𑀭𑁂 𑀫𑀳𑀸𑀩𑁄𑀥𑀺𑀬𑀸𑀦𑀧𑀝𑀺𑀧𑀢𑁆𑀢𑀺𑀬𑀸 𑀳𑀸𑀦𑀝𑁆𑀞𑀸𑀦𑀲𑀁𑀓𑀺𑀮𑁂𑀲𑀦𑀺𑀯𑀢𑁆𑀢𑀻𑀦𑀁 𑀅𑀪𑀸𑀯𑀢𑁄 𑀬𑀣𑀸 𑀧𑀡𑀺𑀥𑀸𑀦𑀁, 𑀢𑀣𑀸 𑀕𑀢𑁄 𑀅𑀪𑀺𑀦𑀻𑀳𑀸𑀭𑀸𑀦𑀼𑀭𑀽𑀧𑀁 𑀧𑀝𑀺𑀧𑀦𑁆𑀦𑁄𑀢𑀺 𑀢𑀣𑀸𑀕𑀢𑁄. 𑀅𑀣 𑀯𑀸 𑀫𑀳𑀺𑀤𑁆𑀥𑀺𑀓𑀢𑀸𑀬 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀉𑀓𑁆𑀓𑀁𑀲𑀸𑀥𑀺𑀕𑀫𑁂𑀦 𑀅𑀦𑀸𑀯𑀭𑀡𑀜𑀸𑀡𑀢𑀸𑀬 𑀘 𑀓𑀢𑁆𑀣𑀘𑀺𑀧𑀺 𑀧𑀝𑀺𑀖𑀸𑀢𑀸𑀪𑀸𑀯𑀢𑁄 𑀬𑀣𑀸 𑀭𑀼𑀘𑀺, 𑀢𑀣𑀸 𑀓𑀸𑀬𑀯𑀘𑀻𑀘𑀺𑀢𑁆𑀢𑀸𑀦𑀁 𑀕𑀢𑀸𑀦𑀺 𑀕𑀫𑀦𑀸𑀦𑀺 𑀧𑀯𑀢𑁆𑀢𑀺𑀬𑁄 𑀏𑀢𑀲𑁆𑀲𑀸𑀢𑀺 𑀢𑀣𑀸𑀕𑀢𑁄. 𑀬𑀲𑁆𑀫𑀸 𑀘 𑀮𑁄𑀓𑁂 𑀯𑀺𑀥-𑀬𑀼𑀢𑁆𑀢-𑀕𑀢-𑀧𑁆𑀧𑀓𑀸𑀭-𑀲𑀤𑁆𑀤𑀸 𑀲𑀫𑀸𑀦𑀢𑁆𑀣𑀸 𑀤𑀺𑀲𑁆𑀲𑀦𑁆𑀢𑀺. 𑀢𑀲𑁆𑀫𑀸 𑀬𑀣𑀸𑀯𑀺𑀥𑀸 𑀯𑀺𑀧𑀲𑁆𑀲𑀻𑀆𑀤𑀬𑁄 𑀪𑀕𑀯𑀦𑁆𑀢𑁄, 𑀅𑀬𑀫𑁆𑀧𑀺 𑀪𑀕𑀯𑀸 𑀢𑀣𑀸𑀯𑀺𑀥𑁄𑀢𑀺 𑀢𑀣𑀸𑀕𑀢𑁄 ¶ , 𑀬𑀣𑀸𑀬𑀼𑀢𑁆𑀢𑀸 𑀘 𑀢𑁂 𑀪𑀕𑀯𑀦𑁆𑀢𑁄, 𑀅𑀬𑀫𑁆𑀧𑀺 𑀪𑀕𑀯𑀸 𑀢𑀣𑀸𑀬𑀼𑀢𑁆𑀢𑁄𑀢𑀺 𑀢𑀣𑀸𑀕𑀢𑁄. 𑀅𑀣 𑀯𑀸 𑀬𑀲𑁆𑀫𑀸 𑀲𑀘𑁆𑀘𑀁 𑀢𑀘𑁆𑀙𑀁 𑀢𑀣𑀦𑁆𑀢𑀺 𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀲𑁆𑀫𑀸 𑀢𑀣𑁂𑀦 𑀜𑀸𑀡𑁂𑀦 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄. 𑀏𑀯𑀫𑁆𑀧𑀺 𑀢𑀣𑀸𑀕𑀢-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀳𑀸𑀬 𑀓𑀸𑀫𑀸𑀤𑀺𑀫𑀮𑁂 𑀬𑀣𑀸 𑀕𑀢𑀸,

𑀲𑀫𑀸𑀥𑀺𑀜𑀸𑀡𑁂𑀳𑀺 𑀯𑀺𑀧𑀲𑁆𑀲𑀺𑀆𑀤𑀬𑁄;

𑀫𑀳𑁂𑀲𑀺𑀦𑁄 𑀲𑀓𑁆𑀬𑀫𑀼𑀦𑀻 𑀚𑀼𑀢𑀺𑀦𑁆𑀥𑀭𑁄,

𑀢𑀣𑀸 𑀕𑀢𑁄 𑀢𑁂𑀦 𑀫𑀢𑁄 𑀢𑀣𑀸𑀕𑀢𑁄.

𑀢𑀣𑀜𑁆𑀘 𑀥𑀸𑀢𑀸𑀬𑀢𑀦𑀸𑀤𑀺𑀮𑀓𑁆𑀔𑀡𑀁,

𑀲𑀪𑀸𑀯𑀲𑀸𑀫𑀜𑁆𑀜𑀯𑀺𑀪𑀸𑀕𑀪𑁂𑀤𑀢𑁄;

𑀲𑀬𑀫𑁆𑀪𑀼𑀜𑀸𑀡𑁂𑀦 𑀚𑀺𑀦𑁄 𑀲𑀫𑀸𑀕𑀢𑁄,

𑀢𑀣𑀸𑀕𑀢𑁄 𑀯𑀼𑀘𑁆𑀘𑀢𑀺 𑀲𑀓𑁆𑀬𑀧𑀼𑀗𑁆𑀕𑀯𑁄.

𑀢𑀣𑀸𑀦𑀺 𑀲𑀘𑁆𑀘𑀸𑀦𑀺 𑀲𑀫𑀦𑁆𑀢𑀘𑀓𑁆𑀔𑀼𑀦𑀸,

𑀢𑀣𑀸 𑀇𑀤𑀧𑁆𑀧𑀘𑁆𑀘𑀬𑀢𑀸 𑀘 𑀲𑀩𑁆𑀩𑀲𑁄;

𑀅𑀦𑀜𑁆𑀜𑀦𑁂𑀬𑁆𑀬𑁂𑀦 𑀬𑀢𑁄 𑀯𑀺𑀪𑀸𑀯𑀺𑀢𑀸,

𑀬𑀸𑀣𑀸𑀯𑀢𑁄 𑀢𑁂𑀦 𑀚𑀺𑀦𑁄 𑀢𑀣𑀸𑀕𑀢𑁄.

𑀅𑀦𑁂𑀓𑀪𑁂𑀤𑀸𑀲𑀼𑀧𑀺 ¶ 𑀮𑁄𑀓𑀥𑀸𑀢𑀼𑀲𑀼,

𑀚𑀺𑀦𑀲𑁆𑀲 𑀭𑀽𑀧𑀸𑀬𑀢𑀦𑀸𑀤𑀺𑀕𑁄𑀘𑀭𑁂;

𑀯𑀺𑀘𑀺𑀢𑁆𑀭𑀪𑁂𑀤𑀁 𑀢𑀣𑀫𑁂𑀯 𑀤𑀲𑁆𑀲𑀦𑀁,

𑀢𑀣𑀸𑀕𑀢𑁄 𑀢𑁂𑀦 𑀲𑀫𑀦𑁆𑀢𑀮𑁄𑀘𑀦𑁄.

𑀬𑀢𑁄 𑀘 𑀥𑀫𑁆𑀫𑀁 𑀢𑀣𑀫𑁂𑀯 𑀪𑀸𑀲𑀢𑀺,

𑀓𑀭𑁄𑀢𑀺 𑀯𑀸𑀘𑀸𑀬𑀦𑀼𑀮𑁄𑀫𑀫𑀢𑁆𑀢𑀦𑁄;

𑀕𑀼𑀡𑁂𑀳𑀺 𑀮𑁄𑀓𑀁 𑀅𑀪𑀺𑀪𑀼𑀬𑁆𑀬𑀺𑀭𑀻𑀬𑀢𑀺,

𑀢𑀣𑀸𑀕𑀢𑁄 𑀢𑁂𑀦𑀧𑀺 𑀮𑁄𑀓𑀦𑀸𑀬𑀓𑁄.

𑀬𑀣𑀸𑀪𑀺𑀦𑀻𑀳𑀸𑀭𑀫𑀢𑁄 𑀬𑀣𑀸𑀭𑀼𑀘𑀺,

𑀧𑀯𑀢𑁆𑀢𑀯𑀸𑀘𑀸 𑀢𑀦𑀼𑀘𑀺𑀢𑁆𑀢𑀪𑀸𑀯𑀢𑁄;

𑀬𑀣𑀸𑀯𑀺𑀥𑀸 𑀬𑁂𑀦 𑀧𑀼𑀭𑀸 𑀫𑀳𑁂𑀲𑀺𑀦𑁄,

𑀢𑀣𑀸𑀯𑀺𑀥𑁄 𑀢𑁂𑀦 𑀚𑀺𑀦𑁄 𑀢𑀣𑀸𑀕𑀢𑁄𑀢𑀺. (𑀇𑀢𑀺𑀯𑀼. 𑀅𑀝𑁆𑀞. 𑁩𑁮; 𑀤𑀻. 𑀦𑀺. 𑀝𑀻. 𑁧.𑁭 𑀘𑀽𑀴𑀲𑀻𑀮𑀯𑀡𑁆𑀡𑀦𑀸);

𑀆𑀭𑀓𑀢𑁆𑀢𑀸𑀢𑀺𑀆𑀤𑀻𑀦𑀁 ¶ 𑀧𑀤𑀸𑀦𑀁 𑀅𑀢𑁆𑀣𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁨𑁫) 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀲𑀁𑀯𑀡𑁆𑀡𑀦𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀤𑁆𑀥𑀢𑁆𑀢𑀸𑀢𑀺 𑀇𑀫𑀺𑀦𑀸𑀲𑁆𑀲 𑀧𑀭𑁄𑀧𑀤𑁂𑀲𑀭𑀳𑀺𑀢𑀲𑁆𑀲 𑀲𑀩𑁆𑀩𑀸𑀓𑀸𑀭𑁂𑀦 𑀲𑀩𑁆𑀩𑀥𑀫𑁆𑀫𑀸𑀯𑀩𑁄𑀥𑀦𑀲𑀫𑀢𑁆𑀣𑀲𑁆𑀲 𑀆𑀓𑀗𑁆𑀔𑀸𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀦𑁄 𑀅𑀦𑀸𑀯𑀭𑀡𑀜𑀸𑀡𑀲𑀗𑁆𑀔𑀸𑀢𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀅𑀥𑀺𑀕𑀫𑁄 𑀤𑀲𑁆𑀲𑀺𑀢𑁄.

𑀦𑀦𑀼 𑀘 (𑀇𑀢𑀺𑀯𑀼. 𑀅𑀝𑁆𑀞. 𑁩𑁮) 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀢𑁄 𑀅𑀜𑁆𑀜𑀁 𑀅𑀦𑀸𑀯𑀭𑀡𑀜𑀸𑀡𑀁, 𑀅𑀜𑁆𑀜𑀣𑀸 𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺 𑀩𑀼𑀤𑁆𑀥𑀜𑀸𑀡𑀸𑀦𑀻𑀢𑀺 𑀯𑀘𑀦𑀁 𑀯𑀺𑀭𑀼𑀚𑁆𑀛𑁂𑀬𑁆𑀬𑀸𑀢𑀺? 𑀦 𑀯𑀺𑀭𑀼𑀚𑁆𑀛𑀢𑀺 𑀯𑀺𑀲𑀬𑀧𑁆𑀧𑀯𑀢𑁆𑀢𑀺𑀪𑁂𑀤𑀯𑀲𑁂𑀦 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀜𑀸𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀏𑀓𑀲𑁆𑀲𑁂𑀯 𑀜𑀸𑀡𑀲𑁆𑀲 𑀤𑁆𑀯𑀺𑀥𑀸 𑀯𑀼𑀢𑁆𑀢𑀢𑁆𑀢𑀸. 𑀏𑀓𑀫𑁂𑀯 𑀳𑀺 𑀢𑀁 𑀜𑀸𑀡𑀁 𑀅𑀦𑀯𑀲𑁂𑀲𑀲𑀗𑁆𑀔𑀢𑀸𑀲𑀗𑁆𑀔𑀢𑀲𑀫𑁆𑀫𑀼𑀢𑀺𑀥𑀫𑁆𑀫𑀯𑀺𑀲𑀬𑀢𑀸𑀬 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀢𑀢𑁆𑀣 𑀘 𑀆𑀯𑀭𑀡𑀸𑀪𑀸𑀯𑀢𑁄 𑀦𑀺𑀲𑁆𑀲𑀗𑁆𑀕𑀘𑀸𑀭𑀫𑀼𑀧𑀸𑀤𑀸𑀬 𑀅𑀦𑀸𑀯𑀭𑀡𑀜𑀸𑀡𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀣𑀸𑀳 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁧.𑁧𑁧𑁯) ‘‘𑀲𑀩𑁆𑀩𑀁 𑀲𑀗𑁆𑀔𑀢𑀸𑀲𑀗𑁆𑀔𑀢𑀫𑀦𑀯𑀲𑁂𑀲𑀁 𑀚𑀸𑀦𑀸𑀢𑀻𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀢𑀢𑁆𑀣𑀸𑀯𑀭𑀡𑀁 𑀦𑀢𑁆𑀣𑀻𑀢𑀺 𑀅𑀦𑀸𑀯𑀭𑀡𑀜𑀸𑀡’’𑀦𑁆𑀢𑀺𑀆𑀤𑀺, 𑀢𑀲𑁆𑀫𑀸 𑀦𑀢𑁆𑀣𑀺 𑀦𑁂𑀲𑀁 𑀅𑀢𑁆𑀣𑀢𑁄 𑀪𑁂𑀤𑁄, 𑀏𑀓𑀦𑁆𑀢𑁂𑀦 𑀘𑁂𑀢𑀁 𑀏𑀯𑀫𑀺𑀘𑁆𑀙𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀲𑀩𑁆𑀩𑀜𑁆𑀜𑀼𑀢𑀸𑀦𑀸𑀯𑀭𑀡𑀜𑀸𑀡𑀸𑀦𑀁 𑀲𑀸𑀯𑀭𑀡𑀢𑀸 𑀅𑀲𑀩𑁆𑀩𑀥𑀫𑁆𑀫𑀸𑀭𑀫𑁆𑀫𑀡𑀢𑀸 𑀘 𑀆𑀧𑀚𑁆𑀚𑁂𑀬𑁆𑀬. 𑀦 𑀳𑀺 𑀪𑀕𑀯𑀢𑁄 𑀜𑀸𑀡𑀲𑁆𑀲 𑀅𑀡𑀼𑀫𑀢𑀫𑁆𑀧𑀺 𑀆𑀯𑀭𑀡𑀁 𑀅𑀢𑁆𑀣𑀺, 𑀅𑀦𑀸𑀯𑀭𑀡𑀜𑀸𑀡𑀲𑁆𑀲 𑀘 𑀅𑀲𑀩𑁆𑀩𑀥𑀫𑁆𑀫𑀸𑀭𑀫𑁆𑀫𑀡𑀪𑀸𑀯𑁂 ¶ 𑀬𑀢𑁆𑀣 𑀢𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀢𑀢𑁆𑀣𑀸𑀯𑀭𑀡𑀲𑀩𑁆𑀪𑀸𑀯𑀢𑁄 𑀅𑀦𑀸𑀯𑀭𑀡𑀪𑀸𑀯𑁄𑀬𑁂𑀯 𑀦 𑀲𑀺𑀬𑀸. 𑀅𑀣 𑀯𑀸 𑀧𑀦 𑀳𑁄𑀢𑀼 𑀅𑀜𑁆𑀜𑀫𑁂𑀯 𑀅𑀦𑀸𑀯𑀭𑀡𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀢𑁄, 𑀇𑀥 𑀧𑀦 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀯𑀼𑀢𑁆𑀢𑀺𑀢𑀸𑀬 𑀅𑀦𑀸𑀯𑀭𑀡𑀜𑀸𑀡𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀲 𑀘𑀸𑀥𑀺𑀕𑀫𑁂𑀦 𑀪𑀕𑀯𑀸 𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀯𑀺𑀤𑀽 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀘 𑀯𑀼𑀘𑁆𑀘𑀢𑀺, 𑀦 𑀲𑀓𑀺𑀫𑁂𑀯 𑀲𑀩𑁆𑀩𑀥𑀫𑁆𑀫𑀸𑀯𑀩𑁄𑀥𑀢𑁄. 𑀢𑀣𑀸 𑀘 𑀯𑀼𑀢𑁆𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁧.𑁧𑁬𑁨) ‘‘𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀫𑁂𑀢𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁄𑀥𑀺𑀬𑀸 𑀫𑀽𑀮𑁂 𑀲𑀳 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀝𑀺𑀮𑀸𑀪𑀸 𑀲𑀘𑁆𑀙𑀺𑀓𑀸 𑀧𑀜𑁆𑀜𑀢𑁆𑀢𑀺 𑀬𑀤𑀺𑀤𑀁 𑀩𑀼𑀤𑁆𑀥𑁄’’𑀢𑀺. 𑀲𑀩𑁆𑀩𑀥𑀫𑁆𑀫𑀸𑀯𑀩𑁄𑀥𑀦𑀲𑀫𑀢𑁆𑀣𑀜𑀸𑀡𑀲𑀫𑀥𑀺𑀕𑀫𑁂𑀦 𑀳𑀺 𑀪𑀕𑀯𑀢𑁄 𑀲𑀦𑁆𑀢𑀸𑀦𑁂 𑀅𑀦𑀯𑀲𑁂𑀲𑀥𑀫𑁆𑀫𑁂 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑀢𑀸 𑀅𑀳𑁄𑀲𑀻𑀢𑀺.

𑀏𑀢𑁆𑀣𑀸𑀳 𑁋 𑀓𑀺𑀁 𑀧𑀦𑀺𑀤𑀁 𑀜𑀸𑀡𑀁 𑀧𑀯𑀢𑁆𑀢𑀫𑀸𑀦𑀁 𑀲𑀓𑀺𑀁𑀬𑁂𑀯 𑀲𑀩𑁆𑀩𑀲𑁆𑀫𑀺𑀁 𑀯𑀺𑀲𑀬𑁂 𑀧𑀯𑀢𑁆𑀢𑀢𑀺, 𑀉𑀤𑀸𑀳𑀼 𑀓𑀫𑁂𑀦𑀸𑀢𑀺. 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀢𑀸𑀯 𑀲𑀓𑀺𑀁𑀬𑁂𑀯 𑀲𑀩𑁆𑀩𑀲𑁆𑀫𑀺𑀁 𑀯𑀺𑀲𑀬𑁂 𑀧𑀯𑀢𑁆𑀢𑀢𑀺, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀤𑀺𑀪𑁂𑀤𑁂𑀦 𑀪𑀺𑀦𑁆𑀦𑀸𑀦𑀁 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 ¶ 𑀅𑀲𑀗𑁆𑀔𑀢𑀲𑀫𑁆𑀫𑀼𑀢𑀺𑀥𑀫𑁆𑀫𑀸𑀦𑀜𑁆𑀘 𑀏𑀓𑀚𑁆𑀛𑀁 𑀉𑀧𑀝𑁆𑀞𑀸𑀦𑁂 𑀤𑀽𑀭𑀢𑁄 𑀘𑀺𑀢𑁆𑀢𑀧𑀝𑀁 𑀅𑀯𑁂𑀓𑁆𑀔𑀦𑁆𑀢𑀲𑁆𑀲 𑀯𑀺𑀬 𑀧𑀝𑀺𑀯𑀺𑀪𑀸𑀕𑁂𑀦𑀸𑀯𑀩𑁄𑀥𑁄 𑀦 𑀲𑀺𑀬𑀸, 𑀢𑀣𑀸 𑀘 𑀲𑀢𑀺 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀯𑀺𑀧𑀲𑁆𑀲𑀦𑁆𑀢𑀸𑀦𑀁 𑀅𑀦𑀢𑁆𑀢𑀸𑀓𑀸𑀭𑁂𑀦 𑀯𑀺𑀬 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀺𑀭𑀽𑀧𑀺𑀢𑀭𑀽𑀧𑁂𑀦 𑀪𑀕𑀯𑀢𑁄 𑀜𑀸𑀡𑀲𑁆𑀲 𑀯𑀺𑀲𑀬𑀸 𑀳𑁄𑀦𑁆𑀢𑀻𑀢𑀺 𑀆𑀧𑀚𑁆𑀚𑀢𑀺. 𑀬𑁂𑀧𑀺 ‘‘𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀸𑀦𑀁 𑀞𑀺𑀢𑀮𑀓𑁆𑀔𑀡𑀯𑀺𑀲𑀬𑀁 𑀯𑀺𑀓𑀧𑁆𑀧𑀭𑀳𑀺𑀢𑀁 𑀲𑀩𑁆𑀩𑀓𑀸𑀮𑀁 𑀩𑀼𑀤𑁆𑀥𑀸𑀦𑀁 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀢𑁂𑀦 𑀢𑁂 𑀲𑀩𑁆𑀩𑀯𑀺𑀤𑀽𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘𑀘𑀭𑀁 𑀲𑀫𑀸𑀳𑀺𑀢𑁄 𑀦𑀸𑀕𑁄, 𑀢𑀺𑀝𑁆𑀞𑀦𑁆𑀢𑁄𑀧𑀺 𑀲𑀫𑀸𑀳𑀺𑀢𑁄’𑀢𑀺 𑀇𑀤𑀫𑁆𑀧𑀺 𑀯𑀘𑀦𑀁 𑀲𑀼𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀯𑀼𑀢𑁆𑀢𑀤𑁄𑀲𑀸𑀦𑀢𑀺𑀯𑀢𑁆𑀢𑀺. 𑀞𑀺𑀢𑀮𑀓𑁆𑀔𑀡𑀸𑀭𑀫𑁆𑀫𑀡𑀢𑀸𑀬 𑀳𑀺 𑀅𑀢𑀻𑀢𑀸𑀦𑀸𑀕𑀢𑀲𑀫𑁆𑀫𑀼𑀢𑀺𑀥𑀫𑁆𑀫𑀸𑀦𑀁 𑀢𑀤𑀪𑀸𑀯𑀢𑁄 𑀏𑀓𑀤𑁂𑀲𑀯𑀺𑀲𑀬𑀫𑁂𑀯 𑀪𑀕𑀯𑀢𑁄 𑀜𑀸𑀡𑀁 𑀲𑀺𑀬𑀸, 𑀢𑀲𑁆𑀫𑀸 𑀲𑀓𑀺𑀁𑀬𑁂𑀯 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺.

𑀅𑀣 𑀓𑀫𑁂𑀦 𑀲𑀩𑁆𑀩𑀲𑁆𑀫𑀺𑀁 𑀯𑀺𑀲𑀬𑁂 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀏𑀯𑀫𑁆𑀧𑀺 𑀦 𑀬𑀼𑀚𑁆𑀚𑀢𑀺. 𑀦 𑀳𑀺 𑀚𑀸𑀢𑀺𑀪𑀽𑀫𑀺𑀲𑀪𑀸𑀯𑀸𑀤𑀺𑀯𑀲𑁂𑀦 𑀤𑀺𑀲𑀸𑀤𑁂𑀲𑀓𑀸𑀮𑀸𑀤𑀺𑀯𑀲𑁂𑀦 𑀘 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑁂 𑀦𑁂𑀬𑁆𑀬𑁂 𑀓𑀫𑁂𑀦 𑀕𑀬𑁆𑀳𑀫𑀸𑀦𑁂 𑀢𑀲𑁆𑀲 𑀅𑀦𑀯𑀲𑁂𑀲𑀧𑀝𑀺𑀯𑁂𑀥𑁄 𑀲𑀫𑁆𑀪𑀯𑀢𑀺 𑀅𑀧𑀭𑀺𑀬𑀦𑁆𑀢𑀪𑀸𑀯𑀢𑁄 𑀜𑁂𑀬𑁆𑀬𑀲𑁆𑀲. 𑀬𑁂 𑀧𑀦 ‘‘𑀅𑀢𑁆𑀣𑀲𑁆𑀲 𑀅𑀯𑀺𑀲𑀁𑀯𑀸𑀤𑀦𑀢𑁄 𑀜𑁂𑀬𑁆𑀬𑀲𑁆𑀲 𑀏𑀓𑀤𑁂𑀲𑀁 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀲𑁂𑀲𑁂𑀧𑀺 𑀏𑀯𑀦𑁆𑀢𑀺 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀯𑀢𑁆𑀣𑀸𑀧𑀦𑁂𑀦 𑀲𑀩𑁆𑀩𑀜𑁆𑀜𑀽 𑀪𑀕𑀯𑀸, 𑀢𑀜𑁆𑀘 𑀜𑀸𑀡𑀁 𑀅𑀦𑀦𑀼𑀫𑀸𑀦𑀺𑀓𑀁 𑀲𑀁𑀲𑀬𑀸𑀪𑀸𑀯𑀢𑁄. 𑀲𑀁𑀲𑀬𑀸𑀦𑀼𑀩𑀦𑁆𑀥𑀜𑁆𑀳𑀺 𑀮𑁄𑀓𑁂 𑀅𑀦𑀼𑀫𑀸𑀦𑀜𑀸𑀡’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀢𑀁 𑀦 𑀬𑀼𑀢𑁆𑀢𑀁. 𑀲𑀩𑁆𑀩𑀲𑁆𑀲 𑀳𑀺 𑀅𑀧𑁆𑀧𑀘𑁆𑀘𑀓𑁆𑀔𑀪𑀸𑀯𑁂 𑀅𑀢𑁆𑀣𑀲𑁆𑀲 𑀅𑀯𑀺𑀲𑀁𑀯𑀸𑀤𑀦𑁂𑀦 𑀜𑁂𑀬𑁆𑀬𑀲𑁆𑀲 𑀏𑀓𑀤𑁂𑀲𑀁 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀲𑁂𑀲𑁂𑀧𑀺 𑀏𑀯𑀦𑁆𑀢𑀺 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀯𑀢𑁆𑀣𑀸𑀧𑀦𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀬𑀜𑁆𑀳𑀺 𑀢𑀁 𑀲𑁂𑀲𑀁, 𑀢𑀁 𑀅𑀧𑁆𑀧𑀘𑁆𑀘𑀓𑁆𑀔𑀦𑁆𑀢𑀺. 𑀅𑀣 𑀢𑀫𑁆𑀧𑀺 𑀧𑀘𑁆𑀘𑀓𑁆𑀔𑀁, 𑀢𑀲𑁆𑀲 𑀲𑁂𑀲𑀪𑀸𑀯𑁄 𑀏𑀯 𑀦 𑀲𑀺𑀬𑀸𑀢𑀺? 𑀲𑀩𑁆𑀩𑀫𑁂𑀢𑀁 𑀅𑀓𑀸𑀭𑀡𑀁. 𑀓𑀲𑁆𑀫𑀸? 𑀅𑀯𑀺𑀲𑀬𑀯𑀺𑀘𑀸𑀭𑀡𑀪𑀸𑀯𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ¶ ‘‘𑀩𑀼𑀤𑁆𑀥𑀯𑀺𑀲𑀬𑁄 𑀪𑀺𑀓𑁆𑀔𑀯𑁂, 𑀅𑀘𑀺𑀦𑁆𑀢𑁂𑀬𑁆𑀬𑁄 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄, 𑀬𑁄 𑀘𑀺𑀦𑁆𑀢𑁂𑀬𑁆𑀬, 𑀉𑀫𑁆𑀫𑀸𑀤𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲𑀸’’𑀢𑀺 (𑀅. 𑀦𑀺. 𑁪.𑁭𑁭). 𑀇𑀤𑀁 𑀧𑀦𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁 𑁋 𑀬𑀁 𑀓𑀺𑀜𑁆𑀘𑀺 𑀪𑀕𑀯𑀢𑀸 𑀜𑀸𑀢𑀼𑀁 𑀇𑀘𑁆𑀙𑀺𑀢𑀁 𑀲𑀓𑀮𑀫𑁂𑀓𑀤𑁂𑀲𑁄 𑀯𑀸, 𑀢𑀢𑁆𑀣 𑀅𑀧𑁆𑀧𑀝𑀺𑀳𑀢𑀯𑀼𑀢𑁆𑀢𑀺𑀢𑀸𑀬 𑀧𑀘𑁆𑀘𑀓𑁆𑀔𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀦𑀺𑀘𑁆𑀘𑀲𑀫𑀸𑀥𑀸𑀦𑀜𑁆𑀘 𑀯𑀺𑀓𑁆𑀔𑁂𑀧𑀸𑀪𑀸𑀯𑀢𑁄, 𑀜𑀸𑀢𑀼𑀁 𑀇𑀘𑁆𑀙𑀺𑀢𑀲𑁆𑀲 𑀘 𑀲𑀓𑀮𑀲𑁆𑀲 𑀅𑀯𑀺𑀲𑀬𑀪𑀸𑀯𑁂 𑀢𑀲𑁆𑀲 𑀆𑀓𑀗𑁆𑀔𑀸𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸 𑀦 𑀲𑀺𑀬𑀸, 𑀏𑀓𑀦𑁆𑀢𑁂𑀦𑁂𑀯 𑀘 𑀲𑀸 𑀇𑀘𑁆𑀙𑀺𑀢𑀩𑁆𑀩𑀸 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀆𑀯𑀚𑁆𑀚𑀦𑀧𑀝𑀺𑀩𑀤𑁆𑀥𑀸 𑀆𑀓𑀗𑁆𑀔𑀧𑀝𑀺𑀩𑀤𑁆𑀥𑀸 𑀫𑀦𑀲𑀺𑀓𑀸𑀭𑀧𑀝𑀺𑀩𑀤𑁆𑀥𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀝𑀺𑀩𑀤𑁆𑀥𑀸’’𑀢𑀺 (𑀫𑀳𑀸𑀦𑀺. 𑁬𑁯, 𑁧𑁫𑁬; 𑀘𑀽𑀴𑀦𑀺. 𑁮𑁫; 𑀧𑀝𑀺. 𑀫. 𑁩.𑁫) 𑀯𑀘𑀦𑀢𑁄. 𑀅𑀢𑀻𑀢𑀸𑀦𑀸𑀕𑀢𑀯𑀺𑀲𑀬𑀫𑁆𑀧𑀺 𑀪𑀕𑀯𑀢𑁄 𑀜𑀸𑀡𑀁 𑀅𑀦𑀼𑀫𑀸𑀦𑀸𑀕𑀫𑀢𑀓𑁆𑀓𑀕𑀳𑀡𑀯𑀺𑀭𑀳𑀺𑀢𑀢𑁆𑀢𑀸 𑀧𑀘𑁆𑀘𑀓𑁆𑀔𑀫𑁂𑀯.

𑀦𑀦𑀼 ¶ 𑀘 𑀏𑀢𑀲𑁆𑀫𑀺𑀫𑁆𑀧𑀺 𑀧𑀓𑁆𑀔𑁂 𑀬𑀤𑀸 𑀲𑀓𑀮𑀁 𑀜𑀸𑀢𑀼𑀁 𑀇𑀘𑁆𑀙𑀺𑀢𑀁, 𑀢𑀤𑀸 𑀲𑀓𑀺𑀁𑀬𑁂𑀯 𑀲𑀓𑀮𑀯𑀺𑀲𑀬𑀢𑀸𑀬 𑀅𑀦𑀺𑀭𑀽𑀧𑀺𑀢𑀭𑀽𑀧𑁂𑀦 𑀪𑀕𑀯𑀢𑁄 𑀜𑀸𑀡𑀁 𑀧𑀯𑀢𑁆𑀢𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀤𑁄𑀲𑀸𑀦𑀢𑀺𑀯𑀢𑁆𑀢𑀺𑀬𑁂𑀯𑀸𑀢𑀺? 𑀦, 𑀢𑀲𑁆𑀲 𑀯𑀺𑀲𑁄𑀥𑀺𑀢𑀢𑁆𑀢𑀸. 𑀯𑀺𑀲𑁄𑀥𑀺𑀢𑁄 𑀳𑀺 𑀲𑁄 𑀩𑀼𑀤𑁆𑀥𑀯𑀺𑀲𑀬𑁄 𑀅𑀘𑀺𑀦𑁆𑀢𑁂𑀬𑁆𑀬𑁄𑀢𑀺. 𑀅𑀜𑁆𑀜𑀣𑀸 𑀧𑀘𑀼𑀭𑀚𑀦𑀜𑀸𑀡𑀲𑀫𑀸𑀦𑀯𑀼𑀢𑁆𑀢𑀺𑀢𑀸𑀬 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀜𑀸𑀡𑀲𑁆𑀲 𑀅𑀘𑀺𑀦𑁆𑀢𑁂𑀬𑁆𑀬𑀢𑀸 𑀦 𑀲𑀺𑀬𑀸, 𑀢𑀲𑁆𑀫𑀸 𑀲𑀓𑀮𑀥𑀫𑁆𑀫𑀸𑀭𑀫𑁆𑀫𑀡𑀫𑁆𑀧𑀺 𑀢𑀁 𑀏𑀓𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀺𑀬 𑀲𑀼𑀯𑀯𑀢𑁆𑀣𑀸𑀧𑀺𑀢𑁂𑀬𑁂𑀯 𑀢𑁂 𑀥𑀫𑁆𑀫𑁂 𑀓𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀇𑀤𑀫𑁂𑀢𑁆𑀣 𑀅𑀘𑀺𑀦𑁆𑀢𑁂𑀬𑁆𑀬𑀁, 𑀅𑀦𑀦𑁆𑀢𑀜𑁆𑀘 𑀜𑀸𑀡𑀁 𑀜𑁂𑀬𑁆𑀬𑀁 𑀯𑀺𑀬. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑀸𑀯𑀢𑀓𑀁 𑀜𑁂𑀬𑁆𑀬𑀁, 𑀢𑀸𑀯𑀢𑀓𑀁 𑀜𑀸𑀡𑀁. 𑀬𑀸𑀯𑀢𑀓𑀁 𑀜𑀸𑀡𑀁, 𑀢𑀸𑀯𑀢𑀓𑀁 𑀜𑁂𑀬𑁆𑀬𑀁. 𑀜𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀜𑁂𑀬𑁆𑀬’’𑀦𑁆𑀢𑀺 (𑀫𑀳𑀸𑀦𑀺. 𑁬𑁯, 𑁧𑁫𑁬; 𑀘𑀽𑀴𑀦𑀺. 𑁮𑁫; 𑀧𑀝𑀺. 𑀫. 𑁩.𑁫). 𑀏𑀯𑀫𑁂𑀓𑀚𑁆𑀛𑀁, 𑀯𑀺𑀲𑀼𑀁 𑀲𑀓𑀺𑀁, 𑀓𑀫𑁂𑀦 𑀯𑀸 𑀇𑀘𑁆𑀙𑀸𑀦𑀼𑀭𑀽𑀧𑀁 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄.

𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀧𑀣𑀯𑀻𑀆𑀤𑀺𑀪𑁂𑀤𑀁. 𑀧𑀭𑀺𑀜𑁆𑀜𑀸𑀢𑀦𑁆𑀢𑀺 𑀧𑀭𑀺𑀢𑁄 𑀲𑀫𑀦𑁆𑀢𑀢𑁄 𑀲𑀩𑁆𑀩𑀸𑀓𑀸𑀭𑀢𑁄 𑀜𑀸𑀢𑀁, 𑀢𑀁 𑀧𑀭𑀺𑀚𑀸𑀦𑀺𑀢𑀩𑁆𑀩𑀪𑀸𑀯𑀁 𑀓𑀺𑀜𑁆𑀘𑀺 𑀅𑀲𑁂𑀲𑁂𑀢𑁆𑀯𑀸 𑀜𑀸𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀯 𑀳𑀺 𑀅𑀢𑁆𑀣𑁄 ‘‘𑀧𑀭𑀺𑀜𑁆𑀜𑀸𑀢𑀦𑁆𑀢’’𑀦𑁆𑀢𑀺 𑀇𑀫𑀺𑀦𑀸𑀧𑀺 𑀧𑀤𑁂𑀦 𑀧𑀓𑀸𑀲𑀺𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀭𑀺𑀜𑁆𑀜𑀸𑀢𑀦𑁆𑀢𑀁 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀓𑀺𑀮𑁂𑀲𑀧𑁆𑀧𑀳𑀸𑀦𑁂𑀦 𑀯𑀺𑀲𑁂𑀲𑁄 𑀦𑀢𑁆𑀣𑀻𑀢𑀺 𑀇𑀤𑀁 𑀢𑀁𑀢𑀁𑀫𑀕𑁆𑀕𑀯𑀚𑁆𑀛𑀓𑀺𑀮𑁂𑀲𑀸𑀦𑀁 𑀩𑀼𑀤𑁆𑀥𑀸𑀦𑀁 𑀲𑀸𑀯𑀓𑀸𑀦𑀜𑁆𑀘 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦𑁂𑀯 𑀧𑀳𑀸𑀢𑀩𑁆𑀩𑀪𑀸𑀯𑀲𑀸𑀫𑀜𑁆𑀜𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀲𑀸𑀯𑀓𑁂𑀳𑀺 𑀩𑀼𑀤𑁆𑀥𑀸𑀦𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑀯𑀺𑀲𑁂𑀲𑀸𑀪𑀸𑀯𑀢𑁄. 𑀢𑀣𑀸 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀯 𑀲𑀯𑀸𑀲𑀦𑀓𑀺𑀮𑁂𑀲𑁂 𑀚𑀳𑀦𑁆𑀢𑀺, 𑀦 𑀲𑀸𑀯𑀓𑀸. 𑀏𑀓𑀤𑁂𑀲𑀫𑁂𑀯𑀸𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀕𑀢𑀫𑁂𑀯. 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀥𑀫𑁆𑀫𑀧𑀭𑀺𑀜𑁆𑀜𑀸𑀫𑀢𑁆𑀢𑁂𑀦𑀧𑀺 𑀳𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸 𑀲𑀫𑀺𑀚𑁆𑀛𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀇𑀫𑀲𑁆𑀫𑀺𑀁𑀬𑁂𑀯 𑀩𑁆𑀬𑀸𑀫𑀫𑀢𑁆𑀢𑁂 𑀓𑀴𑁂𑀯𑀭𑁂 𑀲𑀲𑀜𑁆𑀜𑀺𑀫𑁆𑀳𑀺 𑀲𑀫𑀦𑀓𑁂 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀫𑀺 𑀮𑁄𑀓𑀲𑀫𑀼𑀤𑀬𑀜𑁆𑀘 𑀧𑀜𑁆𑀜𑀧𑁂𑀫𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁧.𑁧𑁦𑁭; 𑀅. 𑀦𑀺. 𑁪.𑁪𑁫). 𑀅𑀡𑀼𑀧𑁆𑀧𑀫𑀸𑀡𑀫𑁆𑀧𑀺 ¶ …𑀧𑁂… 𑀦𑀢𑁆𑀣𑀺, 𑀬𑀢𑁄 𑀙𑀢𑁆𑀢𑀺𑀁𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀼𑀔𑁂𑀦 𑀩𑀼𑀤𑁆𑀥𑀸𑀦𑀁 𑀫𑀳𑀸𑀯𑀚𑀺𑀭𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀯𑀤𑀦𑁆𑀢𑀺.

𑀢𑀣𑀸𑀕𑀢𑀯𑀸𑀭𑀲𑀢𑁆𑀢𑀫𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀣𑀸𑀕𑀢𑀯𑀸𑀭𑀅𑀝𑁆𑀞𑀫𑀦𑀬𑀯𑀡𑁆𑀡𑀦𑀸

𑁧𑁩. 𑀧𑀼𑀭𑀺𑀫𑀢𑀡𑁆𑀳𑀸𑀢𑀺 ¶ 𑀧𑀼𑀭𑀺𑀫𑀢𑀭𑁂𑀲𑀼 𑀪𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑁆𑀢𑀪𑀸𑀯𑀳𑁂𑀢𑀼𑀪𑀽𑀢𑀸 𑀢𑀡𑁆𑀳𑀸. 𑀢𑀕𑁆𑀕𑀳𑀡𑁂𑀦𑁂𑀯 𑀘 𑀅𑀢𑀻𑀢𑀤𑁆𑀥𑀲𑀗𑁆𑀕𑀳𑀸 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸 𑀲𑀤𑁆𑀥𑀺𑀁 𑀉𑀧𑀸𑀤𑀸𑀦𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀏𑀢𑁆𑀣𑀸𑀢𑀺 ‘‘𑀪𑀯𑀸 𑀚𑀸𑀢𑀻’’𑀢𑀺 𑀏𑀢𑀲𑁆𑀫𑀺𑀁 𑀧𑀤𑁂. 𑀢𑁂𑀦 𑀉𑀧𑀧𑀢𑁆𑀢𑀺𑀪𑀯𑁂𑀦𑀸𑀢𑀺 ‘‘𑀪𑀯𑀸 𑀚𑀸𑀢𑀻’’𑀢𑀺 𑀚𑀸𑀢𑀺𑀲𑀻𑀲𑁂𑀦 𑀯𑀼𑀢𑁆𑀢𑀉𑀧𑀧𑀢𑁆𑀢𑀺𑀪𑀯𑁂𑀦. 𑀪𑀽𑀢𑀲𑁆𑀲𑀸𑀢𑀺 𑀦𑀺𑀩𑁆𑀩𑀢𑁆𑀢𑀲𑁆𑀲. 𑀲𑁄 𑀧𑀦 𑀬𑀲𑁆𑀫𑀸 𑀲𑀢𑁆𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀢𑁆𑀢𑀲𑁆𑀲𑀸’’𑀢𑀺. 𑀏𑀯𑀜𑁆𑀘 𑀚𑀸𑀦𑀺𑀢𑁆𑀯𑀸𑀢𑀺 𑀇𑀫𑀺𑀦𑀸 ‘‘𑀪𑀽𑀢𑀲𑁆𑀲 𑀚𑀭𑀸𑀫𑀭𑀡’’𑀦𑁆𑀢𑀺 𑀏𑀢𑁆𑀣𑀸𑀧𑀺 ‘‘𑀇𑀢𑀺 𑀯𑀺𑀤𑀺𑀢𑁆𑀯𑀸’’𑀢𑀺 𑀇𑀤𑀁 𑀧𑀤𑀁 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀬𑀤𑀺𑀧𑀺 𑀢𑁂𑀪𑀽𑀫𑀓𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 (𑀯𑀺𑀪. 𑁨; 𑀫. 𑀦𑀺. 𑁧.𑁨𑁪𑁪) 𑀏𑀓𑀸𑀤𑀲𑀲𑀼 𑀑𑀓𑀸𑀲𑁂𑀲𑀼 𑀧𑀓𑁆𑀔𑀺𑀧𑀺𑀢𑀩𑁆𑀩𑀸 𑀲𑀫𑁆𑀫𑀲𑀺𑀢𑀩𑁆𑀩𑀸 𑀘, 𑀢𑁂 𑀧𑀦 𑀬𑀲𑁆𑀫𑀸 𑀪𑀕𑀯𑀢𑀸 ‘‘𑀓𑀺𑀫𑁆𑀳𑀺 𑀦𑀼 𑀔𑁄 𑀲𑀢𑀺 𑀚𑀭𑀸𑀫𑀭𑀡𑀁 𑀳𑁄𑀢𑀺, 𑀓𑀺𑀁𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁫𑁭; 𑀲𑀁. 𑀦𑀺. 𑁨.𑁪, 𑁧𑁦) 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀫𑀼𑀔𑁂𑀦 𑀲𑀫𑁆𑀫𑀲𑀺𑀢𑀸, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀘 𑀧𑀯𑀢𑁆𑀢𑀺𑀧𑀯𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄 𑀧𑀼𑀭𑀺𑀫𑀲𑀘𑁆𑀘𑀤𑁆𑀯𑀬𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀢𑀤𑀪𑀺𑀲𑀫𑀬𑀁 ‘‘𑀫𑀜𑁆𑀜𑀦𑀸𑀪𑀸𑀯𑀳𑁂𑀢𑀼 𑀧𑀘𑁆𑀘𑀬𑀸𑀓𑀸𑀭𑀧𑀝𑀺𑀯𑁂𑀥𑁄’’𑀢𑀺 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀬𑀁 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂…𑀧𑁂… 𑀤𑀲𑁆𑀲𑁂𑀦𑁆𑀢𑁄’’𑀢𑀺 𑀆𑀳. 𑀲𑀁𑀔𑀺𑀧𑁆𑀧𑀦𑁆𑀢𑀺 𑀏𑀢𑁆𑀣 𑀅𑀯𑀺𑀚𑁆𑀚𑀸𑀤𑀬𑁄 𑀯𑀺𑀜𑁆𑀜𑀸𑀡𑀸𑀤𑀬𑁄 𑀘𑀸𑀢𑀺 𑀲𑀗𑁆𑀔𑁂𑀧𑀸, 𑀅𑀢𑀻𑀢𑁂 𑀳𑁂𑀢𑀼𑀆𑀤𑀬𑁄 ‘‘𑀳𑁂𑀢𑀼, 𑀨𑀮’’𑀦𑁆𑀢𑀺 𑀏𑀯𑀁 𑀲𑀁𑀔𑀺𑀧𑁆𑀧𑀦𑁆𑀢𑀻𑀢𑀺 𑀯𑀸 𑀲𑀗𑁆𑀔𑁂𑀧𑀸, 𑀅𑀯𑀺𑀚𑁆𑀚𑀸𑀤𑀬𑁄 𑀯𑀺𑀜𑁆𑀜𑀸𑀡𑀸𑀤𑀬𑁄 𑀘. 𑀲𑀗𑁆𑀔𑁂𑀧-𑀲𑀤𑁆𑀤𑁄 𑀪𑀸𑀕𑀸𑀥𑀺𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑁄. 𑀢𑁂𑀦𑀸𑀳 ‘‘𑀓𑁄𑀝𑁆𑀞𑀸𑀲𑀸𑀢𑀺 𑀅𑀢𑁆𑀣𑁄’’𑀢𑀺. 𑀢𑁂 𑀧𑀦 𑀅𑀢𑀻𑀢𑁂 𑀳𑁂𑀢𑀼𑀲𑀗𑁆𑀔𑁂𑀧𑁄, 𑀏𑀢𑀭𑀳𑀺 𑀨𑀮𑀲𑀗𑁆𑀔𑁂𑀧𑁄, 𑀏𑀢𑀭𑀳𑀺 𑀳𑁂𑀢𑀼𑀲𑀗𑁆𑀔𑁂𑀧𑁄, 𑀆𑀬𑀢𑀺𑀁 𑀨𑀮𑀲𑀗𑁆𑀔𑁂𑀧𑁄𑀢𑀺 𑀘𑀢𑁆𑀢𑀸𑀭𑁄 𑀲𑀗𑁆𑀔𑁂𑀧𑀸 𑀏𑀢𑀲𑁆𑀲𑀸𑀢𑀺 𑀘𑀢𑀼𑀲𑀗𑁆𑀔𑁂𑀧𑁄, 𑀢𑀁 𑀘𑀢𑀼𑀲𑀗𑁆𑀔𑁂𑀧𑀁. 𑀳𑁂𑀢𑀼𑀨𑀮𑀲𑀦𑁆𑀥𑀺, 𑀨𑀮𑀳𑁂𑀢𑀼𑀲𑀦𑁆𑀥𑀺, 𑀧𑀼𑀦 𑀳𑁂𑀢𑀼𑀨𑀮𑀲𑀦𑁆𑀥𑀻𑀢𑀺 𑀏𑀯𑀁 𑀢𑀬𑁄 𑀲𑀦𑁆𑀥𑀻 𑀏𑀢𑀲𑁆𑀲𑀸𑀢𑀺 𑀢𑀺𑀲𑀦𑁆𑀥𑀺, 𑀢𑀁 𑀢𑀺𑀲𑀦𑁆𑀥𑀺𑀁. 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀪𑁂𑀤𑀸 𑀢𑀬𑁄 𑀅𑀤𑁆𑀥𑀸 𑀏𑀢𑀲𑁆𑀲𑀸𑀢𑀺 𑀢𑀺𑀬𑀤𑁆𑀥𑁄, 𑀢𑀁 𑀢𑀺𑀬𑀤𑁆𑀥𑀁. 𑀲𑀭𑀽𑀧𑀢𑁄 𑀅𑀯𑀼𑀢𑁆𑀢𑀸𑀧𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀗𑁆𑀔𑁂𑀧𑁂 𑀆𑀓𑀺𑀭𑀻𑀬𑀦𑁆𑀢𑀺 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀺𑀕𑁆𑀕𑀳𑀡𑁂𑀳𑀺 𑀧𑀓𑀸𑀲𑀻𑀬𑀦𑁆𑀢𑀻𑀢𑀺 𑀆𑀓𑀸𑀭𑀸, 𑀅𑀢𑀻𑀢𑀳𑁂𑀢𑀼𑀆𑀤𑀻𑀦𑀁 𑀯𑀸 𑀧𑀓𑀸𑀭𑀸 𑀆𑀓𑀸𑀭𑀸, 𑀢𑁂 𑀏𑀓𑁂𑀓𑀲𑀗𑁆𑀔𑁂𑀧𑁂 𑀧𑀜𑁆𑀘 𑀧𑀜𑁆𑀘 𑀓𑀢𑁆𑀯𑀸 𑀯𑀻𑀲𑀢𑀺 𑀆𑀓𑀸𑀭𑀸 𑀏𑀢𑀲𑁆𑀲𑀸𑀢𑀺 𑀯𑀻𑀲𑀢𑀸𑀓𑀸𑀭𑁄, 𑀢𑀁 𑀯𑀻𑀲𑀢𑀸𑀓𑀸𑀭𑀁.

𑀏𑀲 ¶ ¶ 𑀲𑀩𑁆𑀩𑁄𑀢𑀺 𑀏𑀲 𑀘𑀢𑀼𑀲𑀗𑁆𑀔𑁂𑀧𑀸𑀤𑀺𑀧𑀪𑁂𑀤𑁄 𑀅𑀦𑀯𑀲𑁂𑀲𑁄 𑀧𑀘𑁆𑀘𑀬𑁄. 𑀧𑀘𑁆𑀘𑀬𑀮𑀓𑁆𑀔𑀡𑁂𑀦𑀸𑀢𑀺 𑀧𑀘𑁆𑀘𑀬𑀪𑀸𑀯𑁂𑀦 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦, 𑀅𑀯𑀺𑀦𑀸𑀪𑀸𑀯𑀮𑀓𑁆𑀔𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀳𑀺 𑀢𑀡𑁆𑀳𑀁 𑀯𑀺𑀦𑀸 𑀅𑀯𑀺𑀚𑁆𑀚𑀸𑀤𑀬𑁄 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀸 𑀦 𑀳𑁄𑀦𑁆𑀢𑀺, 𑀏𑀯𑀁 𑀢𑀡𑁆𑀳𑀸𑀧𑀺 𑀅𑀯𑀺𑀚𑁆𑀚𑀸𑀤𑀺𑀓𑁂 𑀯𑀺𑀦𑀸𑀢𑀺. 𑀏𑀢𑁆𑀣 𑀤𑀼𑀓𑁆𑀔𑀕𑁆𑀕𑀳𑀡𑁂𑀦 𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀲𑀴𑀸𑀬𑀢𑀦𑀨𑀲𑁆𑀲𑀯𑁂𑀤𑀦𑀸𑀦𑀁, 𑀪𑀯𑀕𑁆𑀕𑀳𑀡𑁂𑀦 𑀘 𑀢𑀡𑁆𑀳𑀸𑀲𑀗𑁆𑀔𑀸𑀭𑀼𑀧𑀸𑀤𑀸𑀦𑀸𑀦𑀁 𑀕𑀳𑀺𑀢𑀢𑀸 𑀯𑀼𑀢𑁆𑀢𑀦𑀬𑀸 𑀏𑀯𑀸𑀢𑀺 𑀦 𑀉𑀤𑁆𑀥𑀝𑀸.

𑀇𑀤𑀸𑀦𑀺 𑀢𑁂 𑀯𑀻𑀲𑀢𑀺 𑀆𑀓𑀸𑀭𑁂 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀧𑀸𑀴𑀺𑀬𑀸 𑀯𑀺𑀪𑀸𑀯𑁂𑀢𑀼𑀁 ‘‘𑀏𑀯𑀫𑁂𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 (𑀧𑀝𑀺. 𑀫. 𑀅𑀝𑁆𑀞. 𑁧.𑁪𑁭) 𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀦𑁆𑀢𑀺 𑀧𑀼𑀭𑀺𑀫𑁂 𑀓𑀫𑁆𑀫𑀪𑀯𑁂, 𑀅𑀢𑀻𑀢𑀚𑀸𑀢𑀺𑀬𑀁 𑀓𑀫𑁆𑀫𑀪𑀯𑁂 𑀓𑀬𑀺𑀭𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀫𑁄𑀳𑁄 𑀅𑀯𑀺𑀚𑁆𑀚𑀸𑀢𑀺 𑀬𑁄 𑀢𑀤𑀸 𑀤𑀼𑀓𑁆𑀔𑀸𑀤𑀻𑀲𑀼 𑀫𑁄𑀳𑁄, 𑀬𑁂𑀦 𑀫𑀽𑀴𑁆𑀳𑁄 𑀓𑀫𑁆𑀫𑀁 𑀓𑀭𑁄𑀢𑀺, 𑀲𑀸 𑀅𑀯𑀺𑀚𑁆𑀚𑀸. 𑀆𑀬𑀽𑀳𑀦𑀸 𑀲𑀗𑁆𑀔𑀸𑀭𑀸𑀢𑀺 𑀢𑀁 𑀢𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀤𑀸𑀦𑀼𑀧𑀓𑀭𑀡𑀸𑀤𑀺 𑀲𑀚𑁆𑀚𑀦𑀸𑀤𑀺𑀯𑀲𑁂𑀦 𑀬𑀸 𑀧𑀼𑀭𑀺𑀫𑀘𑁂𑀢𑀦𑀸𑀬𑁄, 𑀢𑁂 𑀲𑀗𑁆𑀔𑀸𑀭𑀸. 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀧𑀦 𑀳𑀢𑁆𑀣𑁂 𑀤𑁂𑀬𑁆𑀬𑀥𑀫𑁆𑀫𑀁 𑀧𑀢𑀺𑀝𑁆𑀞𑀸𑀧𑀬𑀢𑁄 𑀘𑁂𑀢𑀦𑀸 𑀪𑀯𑁄. 𑀏𑀓𑀸𑀯𑀚𑁆𑀚𑀦𑀚𑀯𑀦𑁂𑀲𑀼 𑀯𑀸 𑀧𑀼𑀭𑀺𑀫𑀸 𑀘𑁂𑀢𑀦𑀸 𑀆𑀬𑀽𑀳𑀦𑀸 𑀲𑀗𑁆𑀔𑀸𑀭𑀸, 𑀲𑀢𑁆𑀢𑀫𑀸 𑀪𑀯𑁄. 𑀬𑀸 𑀓𑀸𑀘𑀺 𑀯𑀸 𑀧𑀦 𑀘𑁂𑀢𑀦𑀸 𑀪𑀯𑁄, 𑀲𑀫𑁆𑀧𑀬𑀼𑀢𑁆𑀢𑀸 𑀆𑀬𑀽𑀳𑀦𑀸 𑀲𑀗𑁆𑀔𑀸𑀭𑀸. 𑀦𑀺𑀓𑀦𑁆𑀢𑀺 𑀢𑀡𑁆𑀳𑀸𑀢𑀺 𑀬𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀉𑀧𑀧𑀢𑁆𑀢𑀺𑀪𑀯𑁂 𑀢𑀲𑁆𑀲 𑀨𑀮𑀲𑁆𑀲 𑀦𑀺𑀓𑀸𑀫𑀦𑀸 𑀧𑀢𑁆𑀣𑀦𑀸, 𑀲𑀸 𑀢𑀡𑁆𑀳𑀸 𑀦𑀸𑀫. 𑀉𑀧𑀕𑀫𑀦𑀁 𑀉𑀧𑀸𑀤𑀸𑀦𑀦𑁆𑀢𑀺 𑀬𑀁 𑀓𑀫𑁆𑀫𑀪𑀯𑀲𑁆𑀲 𑀧𑀘𑁆𑀘𑀬𑀪𑀽𑀢𑀁 ‘‘𑀇𑀤𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀓𑀸𑀫𑁂 𑀲𑁂𑀯𑀺𑀲𑁆𑀲𑀸𑀫𑀺 𑀉𑀘𑁆𑀙𑀺𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀁 𑀉𑀧𑀕𑀫𑀦𑀁 𑀕𑀳𑀡𑀁 𑀧𑀭𑀸𑀫𑀲𑀦𑀁, 𑀇𑀤𑀁 𑀉𑀧𑀸𑀤𑀸𑀦𑀁 𑀦𑀸𑀫. 𑀘𑁂𑀢𑀦𑀸 𑀪𑀯𑁄𑀢𑀺 𑀤𑁆𑀯𑀻𑀲𑀼 𑀅𑀢𑁆𑀣𑀯𑀺𑀓𑀧𑁆𑀧𑁂𑀲𑀼 𑀯𑀼𑀢𑁆𑀢𑀲𑁆𑀲 𑀆𑀬𑀽𑀳𑀦𑀲𑁆𑀲 𑀅𑀯𑀲𑀸𑀦𑁂 𑀯𑀼𑀢𑁆𑀢𑀘𑁂𑀢𑀦𑀸, 𑀢𑀢𑀺𑀬𑁂 𑀧𑀦 𑀆𑀬𑀽𑀳𑀦𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑀦𑀸 𑀪𑀯𑁄. 𑀇𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀧𑀼𑀭𑀺𑀫𑀓𑀫𑁆𑀫𑀪𑀯𑀲𑁆𑀫𑀺𑀁 𑀇𑀥 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀸𑀢𑀺 𑀇𑀫𑁂 𑀬𑀣𑀸𑀯𑀼𑀢𑁆𑀢𑀸 𑀫𑁄𑀳𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀸 𑀅𑀢𑀻𑀢𑀓𑀫𑁆𑀫𑀪𑀯𑀲𑀺𑀤𑁆𑀥𑀸 𑀏𑀢𑀭𑀳𑀺 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀪𑀽𑀢𑀸𑀢𑀺 𑀅𑀢𑁆𑀣𑁄.

𑀇𑀥 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀦𑁆𑀢𑀺 𑀬𑀁 𑀪𑀯𑀦𑁆𑀢𑀭𑀧𑀝𑀺𑀲𑀦𑁆𑀥𑀸𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀢𑁆𑀢𑀸 𑀧𑀝𑀺𑀲𑀦𑁆𑀥𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀯𑀺𑀜𑁆𑀜𑀸𑀡𑀁. 𑀑𑀓𑁆𑀓𑀦𑁆𑀢𑀺 𑀦𑀸𑀫𑀭𑀽𑀧𑀦𑁆𑀢𑀺 𑀬𑀸 𑀕𑀩𑁆𑀪𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀑𑀓𑁆𑀓𑀦𑁆𑀢𑀺 𑀆𑀕𑀦𑁆𑀢𑁆𑀯𑀸 𑀧𑀯𑀺𑀲𑀦𑁆𑀢𑀻 𑀯𑀺𑀬, 𑀇𑀤𑀁 𑀦𑀸𑀫𑀭𑀽𑀧𑀁. 𑀧𑀲𑀸𑀤𑁄 𑀆𑀬𑀢𑀦𑀦𑁆𑀢𑀺 𑀇𑀤𑀁 𑀘𑀓𑁆𑀔𑀸𑀤𑀺𑀧𑀜𑁆𑀘𑀸𑀬𑀢𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀨𑀼𑀝𑁆𑀞𑁄 𑀨𑀲𑁆𑀲𑁄𑀢𑀺 𑀬𑁄 𑀆𑀭𑀫𑁆𑀫𑀡𑀁 𑀨𑀼𑀝𑁆𑀞𑁄 𑀨𑀼𑀲𑀦𑁆𑀢𑁄 𑀉𑀧𑁆𑀧𑀦𑁆𑀦𑁄, 𑀅𑀬𑀁 𑀨𑀲𑁆𑀲𑁄. 𑀯𑁂𑀤𑀬𑀺𑀢𑀁 ¶ 𑀯𑁂𑀤𑀦𑀸𑀢𑀺 𑀬𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂𑀦 𑀯𑀸 𑀲𑀴𑀸𑀬𑀢𑀦𑀧𑀘𑁆𑀘𑀬𑁂𑀦 𑀯𑀸 𑀨𑀲𑁆𑀲𑁂𑀦 𑀲𑀳𑀼𑀧𑁆𑀧𑀦𑁆𑀦𑀁 𑀯𑀺𑀧𑀸𑀓𑀯𑁂𑀤𑀬𑀺𑀢𑀁, 𑀲𑀸 𑀯𑁂𑀤𑀦𑀸. 𑀇𑀢𑀺 𑀇𑀫𑁂…𑀧𑁂… 𑀧𑀘𑁆𑀘𑀬𑀸𑀢𑀺 𑀇𑀫𑁂 𑀯𑀺𑀜𑁆𑀜𑀸𑀡𑀸𑀤𑀬𑁄 𑀧𑀜𑁆𑀘 𑀓𑁄𑀝𑁆𑀞𑀸𑀲𑀺𑀓𑀸 𑀥𑀫𑁆𑀫𑀸 𑀧𑀼𑀭𑀺𑀫𑀪𑀯𑁂 𑀓𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀫𑁆𑀫𑀯𑀝𑁆𑀝𑀲𑁆𑀲 𑀧𑀘𑁆𑀘𑀬𑀸, 𑀧𑀘𑁆𑀘𑀬𑀪𑀸𑀯𑀢𑁄 𑀢𑀁 𑀧𑀝𑀺𑀘𑁆𑀘 𑀇𑀥 𑀏𑀢𑀭𑀳𑀺 𑀉𑀧𑀧𑀢𑁆𑀢𑀺𑀪𑀯𑀲𑁆𑀫𑀺𑀁 𑀉𑀧𑀧𑀢𑁆𑀢𑀺𑀪𑀯𑀪𑀸𑀯𑁂𑀦 𑀯𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀇𑀥 ¶ 𑀧𑀭𑀺𑀧𑀓𑁆𑀓𑀢𑁆𑀢𑀸 𑀆𑀬𑀢𑀦𑀸𑀦𑀁 𑀫𑁄𑀳𑁄𑀢𑀺 𑀧𑀭𑀺𑀧𑀓𑁆𑀓𑀸𑀬𑀢𑀦𑀲𑁆𑀲 𑀓𑀫𑁆𑀫𑀓𑀭𑀡𑀓𑀸𑀮𑁂 𑀅𑀲𑀫𑁆𑀫𑁄𑀳𑀁 𑀤𑀲𑁆𑀲𑁂𑀢𑀺. 𑀤𑀳𑀭𑀲𑁆𑀲 𑀳𑀺 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀪𑀯𑀗𑁆𑀕𑀩𑀳𑀼𑀮𑀸 𑀬𑁂𑀪𑀼𑀬𑁆𑀬𑁂𑀦 𑀪𑀯𑀦𑁆𑀢𑀭𑀚𑀦𑀓𑀓𑀫𑁆𑀫𑀸𑀬𑀽𑀳𑀦𑀲𑀫𑀢𑁆𑀣𑀸 𑀦 𑀳𑁄𑀢𑀻𑀢𑀺. 𑀓𑀫𑁆𑀫𑀓𑀭𑀡𑀓𑀸𑀮𑁂𑀢𑀺 𑀘 𑀇𑀫𑀺𑀦𑀸 𑀲𑀩𑁆𑀩𑁄 𑀓𑀫𑁆𑀫𑀲𑁆𑀲 𑀧𑀘𑁆𑀘𑀬𑀪𑀽𑀢𑁄 𑀲𑀫𑁆𑀫𑁄𑀳𑁄 𑀕𑀳𑀺𑀢𑁄, 𑀦 𑀲𑀫𑁆𑀧𑀬𑀼𑀢𑁆𑀢𑁄𑀯. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀧𑀤𑀬𑁄𑀚𑀦𑀸𑀬𑀸𑀢𑀺 ‘‘𑀢𑀲𑁆𑀫𑀸’’𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀲𑀫𑁆𑀩𑀦𑁆𑀥𑁂𑀦 𑀲𑀳. 𑀅𑀢𑁆𑀣𑀦𑀺𑀕𑀫𑀦𑀦𑁆𑀢𑀺 𑀇𑀫𑀲𑁆𑀫𑀺𑀁 𑀅𑀝𑁆𑀞𑀫𑀯𑀸𑀭𑁂 𑀤𑁂𑀲𑀦𑀢𑁆𑀣𑀦𑀺𑀕𑀫𑀦𑀁. 𑀦𑀦𑁆𑀤𑀻𑀢𑀺 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀲𑀩𑁆𑀩𑀢𑀡𑁆𑀳𑀸𑀦𑀦𑁆𑀢𑀺 ‘‘𑀦𑀦𑁆𑀤𑀻 𑀤𑀼𑀓𑁆𑀔𑀲𑁆𑀲 𑀫𑀽𑀮’’𑀦𑁆𑀢𑀺 𑀏𑀯𑀁 𑀦𑀦𑁆𑀤𑀦𑀢𑁆𑀣𑀲𑀸𑀫𑀜𑁆𑀜𑀢𑁄 𑀏𑀓𑀯𑀘𑀦𑁂𑀦 𑀯𑀼𑀢𑁆𑀢𑀸𑀦𑀁 𑀲𑀩𑁆𑀩𑀢𑀡𑁆𑀳𑀸𑀦𑀁 𑀲𑀦𑁆𑀢𑀸𑀦𑀸𑀭𑀫𑁆𑀫𑀡𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀆𑀓𑀸𑀭𑀸𑀤𑀺𑀪𑁂𑀤𑁂𑀦 𑀅𑀦𑁂𑀓𑀪𑁂𑀤𑀸𑀦𑀁 𑀲𑀩𑁆𑀩𑀸𑀲𑀁 𑀢𑀡𑁆𑀳𑀸𑀦𑀁. 𑀔𑀬𑀯𑁂𑀯𑀘𑀦𑀸𑀦𑁂𑀯𑀸𑀢𑀺 𑀲𑀫𑀼𑀘𑁆𑀙𑁂𑀤𑀧𑀳𑀸𑀦𑀯𑁂𑀯𑀘𑀦𑀸𑀦𑁂𑀯. ‘‘𑀅𑀘𑁆𑀘𑀦𑁆𑀢𑀓𑁆𑀔𑀬𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀘𑀢𑀼𑀫𑀕𑁆𑀕𑀓𑀺𑀘𑁆𑀘𑀲𑀸𑀥𑀸𑀭𑀡𑀫𑁂𑀢𑀦𑁆𑀢𑀺 𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀸𑀦𑀁 𑀧𑀳𑀸𑀦𑀓𑀺𑀘𑁆𑀘𑀲𑁆𑀲 𑀲𑀸𑀥𑀸𑀭𑀡𑀁 𑀲𑀸𑀫𑀜𑁆𑀜𑀢𑁄 𑀕𑀳𑀡𑀁 𑀏𑀢𑀁 𑀔𑀬𑀸𑀤𑀺𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀲𑀁 𑀧𑀦 𑀫𑀕𑁆𑀕𑀸𑀦𑀁 𑀓𑀫𑁂𑀦 𑀧𑀯𑀢𑁆𑀢𑀦𑀁 𑀓𑀺𑀘𑁆𑀘𑀓𑀫𑁂𑀦𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀭𑀸𑀕𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁄…𑀧𑁂… 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺 𑀆𑀳. 𑀢𑀣𑀸 𑀲𑀢𑀺𑀧𑀺 𑀔𑀬𑀸𑀤𑀺𑀲𑀤𑁆𑀤𑀸𑀦𑀁 𑀧𑀳𑀸𑀦𑀧𑀭𑀺𑀬𑀸𑀬𑀪𑀸𑀯𑁂 𑀧𑀳𑀸𑀢𑀩𑁆𑀩𑀸𑀬 𑀧𑀦 𑀯𑀺𑀲𑀬𑀪𑁂𑀤𑀪𑀺𑀦𑁆𑀦𑀸𑀬 𑀢𑀡𑁆𑀳𑀸𑀬 𑀅𑀦𑀯𑀲𑁂𑀲𑀢𑁄 𑀧𑀳𑀻𑀦𑀪𑀸𑀯𑀤𑀻𑀧𑀦𑀢𑁆𑀣𑀁 𑀔𑀬𑀸𑀤𑀺𑀧𑀭𑀺𑀬𑀸𑀬𑀦𑁆𑀢𑀭𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀸𑀳𑀻’’𑀢𑀺𑀆𑀤𑀺𑀫𑀸𑀳. 𑀬𑀣𑀸𑀯𑀼𑀢𑁆𑀢𑀲𑀜𑁆𑀚𑀦𑀦𑀸𑀤𑀺𑀳𑁂𑀢𑀼𑀪𑀽𑀢𑀸𑀬 𑀢𑀡𑁆𑀳𑀸𑀬 𑀧𑀳𑀻𑀦𑀢𑁆𑀢𑀸 𑀢𑀧𑁆𑀧𑀳𑀸𑀦𑀤𑀻𑀧𑀦𑀁 𑀓𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀁 𑀔𑀬𑀸𑀤𑀺𑀯𑀘𑀦𑀁 𑀦 𑀓𑀣𑀜𑁆𑀘𑀺 𑀥𑀫𑁆𑀫𑀢𑀁 𑀯𑀺𑀮𑁄𑀫𑁂𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀦 𑀓𑀺𑀜𑁆𑀘𑀺 𑀯𑀺𑀭𑀼𑀚𑁆𑀛𑀢𑀻’’𑀢𑀺.

𑀉𑀢𑁆𑀢𑀭𑀯𑀺𑀭𑀳𑀺𑀢𑀦𑁆𑀢𑀺 𑀅𑀢𑁆𑀢𑀸𑀦𑀁 𑀉𑀢𑁆𑀢𑀭𑀺𑀢𑀼𑀁 𑀲𑀫𑀢𑁆𑀣𑀢𑁆𑀢𑀸 𑀉𑀢𑁆𑀢𑀭𑁂𑀦 𑀅𑀥𑀺𑀓𑁂𑀦 𑀯𑀺𑀭𑀳𑀺𑀢𑀁. 𑀅𑀬𑀜𑁆𑀘𑀲𑁆𑀲 𑀉𑀢𑁆𑀢𑀭𑀯𑀺𑀭𑀳𑀢𑀸 𑀅𑀢𑁆𑀢𑀦𑁄 𑀲𑁂𑀝𑁆𑀞𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀲𑀩𑁆𑀩𑀲𑁂𑀝𑁆𑀞’’𑀦𑁆𑀢𑀺. 𑀬𑀣𑀸 𑀲𑀫𑁆𑀫𑀸-𑀲𑀁-𑀲𑀤𑁆𑀤𑀸 ‘‘𑀅𑀯𑀺𑀧𑀭𑀻𑀢𑀁, 𑀲𑀸𑀫’’𑀦𑁆𑀢𑀺 𑀇𑀫𑁂𑀲𑀁 𑀧𑀤𑀸𑀦𑀁 𑀅𑀢𑁆𑀣𑀁 𑀯𑀤𑀦𑁆𑀢𑀺, 𑀏𑀯𑀁 𑀧𑀸𑀲𑀁𑀲𑀲𑁄𑀪𑀦𑀢𑁆𑀣𑁂𑀧𑀻𑀢𑀺 𑀆𑀳 ‘‘𑀲𑀫𑁆𑀫𑀸 𑀲𑀸𑀫𑀜𑁆𑀘 𑀩𑁄𑀥𑀺𑀁 𑀧𑀲𑀢𑁆𑀣𑀁 𑀲𑀼𑀦𑁆𑀤𑀭𑀜𑁆𑀘 𑀩𑁄𑀥𑀺’’𑀦𑁆𑀢𑀺. 𑀩𑀼𑀚𑁆𑀛𑀺 𑀏𑀢𑁆𑀣 𑀧𑀝𑀺𑀯𑀺𑀚𑁆𑀛𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀲𑀩𑁆𑀩𑀫𑁆𑀧𑀺 𑀯𑀸 𑀦𑁂𑀬𑁆𑀬𑀦𑁆𑀢𑀺 𑀭𑀼𑀓𑁆𑀔𑁄 𑀩𑁄𑀥𑀺, 𑀩𑀼𑀚𑁆𑀛𑀢𑀺 𑀏𑀢𑁂𑀦𑀸𑀢𑀺 𑀧𑀦 𑀫𑀕𑁆𑀕𑁄 𑀩𑁄𑀥𑀺, 𑀢𑀣𑀸 ¶ 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀦𑀺𑀩𑁆𑀩𑀸𑀦𑀁 𑀧𑀦 𑀩𑀼𑀚𑁆𑀛𑀺𑀢𑀩𑁆𑀩𑀢𑁄 𑀩𑁄𑀥𑀻𑀢𑀺 𑀅𑀬𑀫𑁂𑀢𑁆𑀣 𑀲𑀸𑀥𑀦𑀯𑀺𑀪𑀸𑀕𑁄 𑀤𑀝𑁆𑀞𑀩𑁆𑀩𑁄. 𑀧𑀡𑁆𑀡𑀢𑁆𑀢𑀺𑀬𑀫𑁆𑀧𑀺 𑀅𑀢𑁆𑀣𑁂𑀯 𑀩𑁄𑀥𑀺-𑀲𑀤𑁆𑀤𑁄 ‘‘𑀩𑁄𑀥𑀺𑀭𑀸𑀚𑀓𑀼𑀫𑀸𑀭𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁩𑁨𑁪; 𑀘𑀽𑀴𑀯. 𑁨𑁬𑁮). 𑀅𑀧𑀭𑁂𑀢𑀺 𑀲𑀸𑀭𑀲𑀫𑀸𑀲𑀸𑀘𑀭𑀺𑀬𑀸. 𑀏𑀢𑁆𑀣 𑀘 𑀲𑀉𑀧𑀲𑀕𑁆𑀕𑀲𑁆𑀲 𑀩𑁄𑀥𑀺-𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂 𑀅𑀦𑀼𑀧𑀲𑀕𑁆𑀕𑀸𑀦𑀁 𑀉𑀤𑀸𑀳𑀭𑀡𑁂 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀮𑁄𑀓𑀼𑀢𑁆𑀢𑀭𑀪𑀸𑀯𑀢𑁄 𑀯𑀸 𑀢𑀢𑁆𑀣𑀸𑀧𑀺 𑀳𑁂𑀝𑁆𑀞𑀺𑀫𑀫𑀕𑁆𑀕𑀸𑀦𑀁 𑀯𑀺𑀬 𑀢𑀢𑀼𑀢𑁆𑀢𑀭𑀺𑀫𑀕𑁆𑀕𑀸𑀪𑀸𑀯𑀢𑁄 𑀘 ‘‘𑀲𑀺𑀬𑀸 𑀦𑀼 𑀔𑁄 𑀅𑀦𑀼𑀢𑁆𑀢𑀭𑀸 𑀩𑁄𑀥𑀻’’𑀢𑀺 𑀆𑀲𑀗𑁆𑀓𑀁 𑀲𑀦𑁆𑀥𑀸𑀬 𑀢𑀁 𑀯𑀺𑀥𑀫𑀺𑀢𑀼𑀁 ‘‘𑀲𑀸𑀯𑀓𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀨𑀮𑀯𑀺𑀲𑁂𑀲𑀪𑀽𑀢𑁂𑀳𑀺 𑀜𑀸𑀡𑀯𑀺𑀲𑁂𑀲𑁂𑀳𑀺 𑀏𑀓𑀘𑁆𑀘𑁂𑀳𑀺 𑀲𑀓𑀮𑁂𑀳𑀺 𑀲𑀤𑁆𑀥𑀺𑀁 𑀲𑀫𑀺𑀚𑁆𑀛𑀫𑀸𑀦𑁄 ¶ 𑀫𑀕𑁆𑀕𑁄 𑀅𑀭𑀺𑀬𑀸𑀦𑀁 𑀢𑀁 𑀢𑀁 𑀜𑀸𑀡𑀯𑀺𑀲𑁂𑀲𑀸𑀤𑀺𑀁 𑀤𑁂𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀢𑀲𑁆𑀲 𑀅𑀲𑀩𑁆𑀩𑀕𑀼𑀡𑀤𑀸𑀬𑀓𑀢𑁆𑀢𑀁 𑀯𑀼𑀢𑁆𑀢𑀁. 𑀢𑁂𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑀸𑀪𑀺𑀦𑀻𑀳𑀸𑀭𑀲𑀫𑁆𑀧𑀤𑀸𑀲𑀺𑀤𑁆𑀥𑀲𑁆𑀲 𑀦𑀺𑀭𑀢𑀺𑀲𑀬-𑀕𑀼𑀡𑀸𑀦𑀼𑀩𑀦𑁆𑀥𑀲𑁆𑀲 𑀯𑀲𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀦𑀼𑀢𑁆𑀢𑀭𑀸 𑀩𑁄𑀥𑀺 𑀦𑀸𑀫 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁 𑀅𑀜𑁆𑀜𑁂𑀳𑀺 𑀲𑀸𑀯𑀓𑁂𑀳𑀺 𑀅𑀲𑀸𑀥𑀸𑀭𑀡𑀁 𑀫𑀳𑀸𑀲𑀸𑀯𑀓𑀸𑀦𑀁𑀬𑁂𑀯 𑀆𑀯𑁂𑀡𑀺𑀓𑀁 𑀜𑀸𑀡𑀁. 𑀧𑀘𑁆𑀘𑁂𑀓𑀁 𑀲𑀘𑁆𑀘𑀸𑀦𑀺 𑀩𑀼𑀤𑁆𑀥𑀯𑀦𑁆𑀢𑁄𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸. 𑀦𑀦𑀼 𑀘 𑀲𑀩𑁆𑀩𑁂𑀧𑀺 𑀅𑀭𑀺𑀬𑀸 𑀧𑀘𑁆𑀘𑁂𑀓𑀫𑁂𑀯 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀺 𑀥𑀫𑁆𑀫𑀲𑁆𑀲 𑀧𑀘𑁆𑀘𑀢𑁆𑀢𑀁 𑀯𑁂𑀤𑀦𑀻𑀬𑀪𑀸𑀯𑀢𑁄𑀢𑀺? 𑀲𑀘𑁆𑀘𑀁, 𑀦𑀬𑀺𑀤𑀫𑀻𑀤𑀺𑀲𑀁 𑀧𑀝𑀺𑀯𑁂𑀥𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀬𑀣𑀸 𑀧𑀦 𑀲𑀸𑀯𑀓𑀸 𑀅𑀜𑁆𑀜𑀲𑀦𑁆𑀦𑀺𑀲𑁆𑀲𑀬𑁂𑀦 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀺 𑀧𑀭𑀢𑁄𑀖𑁄𑀲𑁂𑀦 𑀯𑀺𑀦𑀸 𑀢𑁂𑀲𑀁 𑀤𑀲𑁆𑀲𑀦𑀫𑀕𑁆𑀕𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑀢𑁄, 𑀬𑀣𑀸 𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀜𑁆𑀜𑁂𑀲𑀁 𑀦𑀺𑀲𑁆𑀲𑀬𑀪𑀸𑀯𑁂𑀦 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑁆𑀢𑀺, 𑀦 𑀏𑀯𑀫𑁂𑀢𑁂, 𑀏𑀢𑁂 𑀧𑀦 𑀅𑀧𑀭𑀦𑁂𑀬𑁆𑀬𑀸 𑀳𑀼𑀢𑁆𑀯𑀸 𑀅𑀧𑀭𑀺𑀡𑀸𑀬𑀓𑀪𑀸𑀯𑁂𑀦 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀘𑁆𑀘𑁂𑀓𑀁 𑀲𑀘𑁆𑀘𑀸𑀦𑀺 𑀩𑀼𑀤𑁆𑀥𑀯𑀦𑁆𑀢𑁄𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸’’𑀢𑀺.

𑀇𑀢𑀻𑀢𑀺 𑀓𑀭𑀻𑀬𑀢𑀺 𑀉𑀘𑁆𑀘𑀸𑀭𑀻𑀬𑀢𑀻𑀢𑀺 𑀇𑀢𑀺𑀓𑀸𑀭𑁄, 𑀇𑀢𑀺-𑀲𑀤𑁆𑀤𑁄. 𑀓𑀸𑀭𑀡𑀢𑁆𑀣𑁄 𑀅𑀦𑀺𑀬𑀫𑀭𑀽𑀧𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀬𑀲𑁆𑀫𑀸 𑀘𑀸’’𑀢𑀺. 𑀧𑀼𑀩𑁆𑀩𑁂 𑀧𑀦 𑀇𑀢𑀺-𑀲𑀤𑁆𑀤𑀁 𑀧𑀓𑀸𑀭𑀢𑁆𑀣𑀁 𑀓𑀢𑁆𑀯𑀸 ‘‘𑀏𑀯𑀁 𑀚𑀸𑀦𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, 𑀇𑀥𑀸𑀧𑀺 𑀢𑀁 𑀧𑀓𑀸𑀭𑀢𑁆𑀣𑀫𑁂𑀯 𑀓𑀢𑁆𑀯𑀸 𑀅𑀣𑁄 𑀬𑀼𑀚𑁆𑀚𑀢𑀺. 𑀓𑀣𑀁? 𑀯𑀺𑀤𑀺𑀢𑁆𑀯𑀸𑀢𑀺 𑀳𑀺 𑀧𑀤𑀁 𑀳𑁂𑀢𑀼𑀅𑀢𑁆𑀣𑁂 𑀤𑀝𑁆𑀞𑀩𑁆𑀩𑀁 ‘‘𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸’’𑀢𑀺 (𑀫. 𑀦𑀺. 𑁧.𑁨𑁭𑁧), ‘‘𑀖𑀢𑀁 𑀧𑀺𑀯𑀺𑀢𑁆𑀯𑀸 𑀩𑀮𑀁 𑀳𑁄𑀢𑀻’’𑀢𑀺 𑀘 𑀏𑀯𑀫𑀸𑀤𑀻𑀲𑀼 𑀯𑀺𑀬, 𑀢𑀲𑁆𑀫𑀸 𑀧𑀓𑀸𑀭𑀢𑁆𑀣𑁂𑀧𑀺 𑀇𑀢𑀺-𑀲𑀤𑁆𑀤𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀯𑀺𑀤𑀺𑀢𑀢𑁆𑀢𑀸𑀢𑀺 𑀅𑀬𑀁 𑀅𑀢𑁆𑀣𑁄 𑀮𑀩𑁆𑀪𑀢𑁂𑀯. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑁆𑀣𑀸𑀧𑀺 𑀳𑁂𑀢𑀼𑀅𑀢𑁆𑀣𑁂 𑀯𑀺𑀤𑀺𑀢𑁆𑀯𑀸-𑀲𑀤𑁆𑀤𑁂 𑀬𑀣𑀸𑀯𑀼𑀢𑁆𑀢𑀸 𑀅𑀢𑁆𑀣𑀬𑁄𑀚𑀦𑀸 𑀬𑀼𑀚𑁆𑀚𑀢𑁂𑀯. 𑀏𑀢𑁆𑀣 𑀘 𑀧𑀞𑀫𑀯𑀺𑀓𑀧𑁆𑀧𑁂 𑀧𑀝𑀺𑀘𑁆𑀘𑀲𑀫𑀼𑀧𑀸𑀤𑀲𑁆𑀲 𑀯𑀺𑀤𑀺𑀢𑀢𑁆𑀣𑀁 𑀫𑀜𑁆𑀜𑀦𑀸𑀪𑀸𑀯𑀲𑁆𑀲 𑀓𑀸𑀭𑀡𑀁 ¶ 𑀯𑀢𑁆𑀯𑀸 𑀢𑀡𑁆𑀳𑀸𑀫𑀽𑀮𑀓𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 𑀏𑀢𑁆𑀣 𑀢𑀡𑁆𑀳𑀸𑀧𑁆𑀧𑀳𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀅𑀥𑀺𑀕𑀫𑀦𑀓𑀸𑀭𑀡𑀁 𑀉𑀤𑁆𑀥𑀢𑀦𑁆𑀢𑀺 𑀤𑀲𑁆𑀲𑀺𑀢𑀁, 𑀢𑀲𑁆𑀫𑀸 ‘‘𑀧𑀣𑀯𑀺𑀁 𑀦 𑀫𑀜𑁆𑀜𑀢𑀻’’𑀢𑀺𑀆𑀤𑀺 𑀦𑀺𑀕𑀫𑀦𑀁 𑀤𑀝𑁆𑀞𑀩𑁆𑀩𑀁. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀦 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑁂𑀤𑀦𑀁 𑀢𑀡𑁆𑀳𑀸𑀧𑁆𑀧𑀳𑀸𑀦𑀲𑁆𑀲 𑀓𑀸𑀭𑀡𑀁 𑀯𑀼𑀢𑁆𑀢𑀁, 𑀢𑀁 𑀅𑀪𑀺𑀲𑀫𑁆𑀩𑁄𑀥𑀺𑀬𑀸 𑀅𑀪𑀺𑀲𑀫𑁆𑀩𑁄𑀥𑀺𑀫𑀜𑁆𑀜𑀦𑀸𑀪𑀸𑀯𑀲𑁆𑀲𑀸𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄𑀢𑀺 𑀅𑀬𑀫𑁂𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀅𑀢𑁆𑀣𑀯𑀺𑀓𑀧𑁆𑀧𑀸𑀦𑀁 𑀯𑀺𑀲𑁂𑀲𑁄, 𑀢𑀲𑁆𑀫𑀸 ‘‘𑀦𑀦𑁆𑀤𑀻 𑀤𑀼𑀓𑁆𑀔𑀲𑁆𑀲 𑀫𑀽𑀮’’𑀦𑁆𑀢𑀺 𑀯𑀼𑀢𑁆𑀢𑀁.

𑀢𑀁 𑀓𑀼𑀢𑁄 𑀮𑀩𑁆𑀪𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀢𑁆𑀣 𑀬𑀢𑁆𑀣 𑀳𑀻’’𑀢𑀺𑀆𑀤𑀺. 𑀲𑀸𑀲𑀦𑀬𑀼𑀢𑁆𑀢𑀺 𑀅𑀬𑀁 𑀲𑀸𑀲𑀦𑁂𑀧𑀺 𑀏𑀯𑀁 𑀲𑀫𑁆𑀩𑀦𑁆𑀥𑁄 𑀤𑀺𑀲𑁆𑀲𑀢𑀻𑀢𑀺 𑀓𑀢𑁆𑀯𑀸. 𑀮𑁄𑀓𑁂𑀧𑀺 𑀳𑀺 𑀬𑀁-𑀢𑀁-𑀲𑀤𑁆𑀤𑀸𑀦𑀁 𑀅𑀩𑁆𑀬𑀪𑀺𑀘𑀸𑀭𑀺𑀲𑀫𑁆𑀩𑀦𑁆𑀥𑀢𑀸 𑀲𑀺𑀤𑁆𑀥𑀸.

𑀏𑀯𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀯𑀤𑀸𑀫𑀻𑀢𑀺 𑀅𑀪𑀺𑀲𑀫𑁆𑀩𑀼𑀤𑁆𑀥𑀪𑀸𑀯𑀲𑁆𑀲 𑀕𑀳𑀺𑀢𑀢𑁆𑀢𑀸, 𑀅𑀲𑀩𑁆𑀩𑀜𑁆𑀜𑀼𑀦𑀸 𑀏𑀯𑀁 𑀤𑁂𑀲𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀘 ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀤𑀲𑁆𑀲𑁂𑀦𑁆𑀢𑁄’’𑀢𑀺𑀆𑀤𑀺𑀫𑀸𑀳.

𑀯𑀺𑀘𑀺𑀢𑁆𑀭𑀦𑀬𑀤𑁂𑀲𑀦𑀸𑀯𑀺𑀮𑀸𑀲𑀬𑀼𑀢𑁆𑀢𑀦𑁆𑀢𑀺 ¶ 𑀧𑀼𑀣𑀼𑀚𑁆𑀚𑀦𑀯𑀸𑀭𑀸𑀤𑀺𑀯𑀺𑀪𑀸𑀕𑀪𑀺𑀦𑁆𑀦𑁂𑀳𑀺 𑀯𑀺𑀘𑀺𑀢𑁆𑀢𑁂𑀳𑀺 𑀢𑀦𑁆𑀢𑀺 𑀦𑀬𑁂𑀳𑀺, 𑀮𑀓𑁆𑀔𑀡𑀓𑀫𑁆𑀫𑀢𑀡𑁆𑀳𑀸𑀫𑀜𑁆𑀜𑀦𑀸𑀤𑀺𑀯𑀺𑀪𑀸𑀕𑀪𑀺𑀦𑁆𑀦𑁂𑀳𑀺 𑀯𑀺𑀘𑀺𑀢𑁆𑀢𑁂𑀳𑀺 𑀅𑀢𑁆𑀣𑀦𑀬𑁂𑀳𑀺, 𑀅𑀪𑀺𑀦𑀦𑁆𑀤𑀦𑀧𑀘𑁆𑀘𑀬𑀸𑀓𑀸𑀭𑀸𑀤𑀺𑀯𑀺𑀲𑁂𑀲𑀸𑀧𑀤𑁂𑀲𑀲𑀺𑀤𑁆𑀥𑁂𑀦 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀘 𑀬𑀼𑀢𑁆𑀢𑀁. 𑀬𑀣𑀸 𑀢𑁂 𑀦 𑀚𑀸𑀦𑀦𑁆𑀢𑀺, 𑀢𑀣𑀸 𑀤𑁂𑀲𑁂𑀲𑀻𑀢𑀺 𑀇𑀫𑀺𑀦𑀸𑀧𑀺 𑀪𑀕𑀯𑀢𑁄 𑀤𑁂𑀲𑀦𑀸𑀯𑀺𑀮𑀸𑀲𑀁𑀬𑁂𑀯 𑀯𑀺𑀪𑀸𑀯𑁂𑀢𑀺. 𑀢𑀁𑀬𑁂𑀯 𑀓𑀺𑀭 𑀧𑀣𑀯𑀺𑀦𑁆𑀢𑀺 𑀏𑀢𑁆𑀣 𑀧𑀣𑀯𑀻𑀕𑀳𑀡𑀁 𑀉𑀧𑀮𑀓𑁆𑀔𑀡𑀫𑀢𑁆𑀢𑀁 𑀆𑀧𑀸𑀤𑀺𑀯𑀲𑁂𑀦𑀧𑀺, 𑀢𑀣𑀸 ‘‘𑀓𑀻𑀤𑀺𑀲𑀸 𑀦𑀼 𑀔𑁄 𑀇𑀥 𑀧𑀣𑀯𑀻 𑀅𑀥𑀺𑀧𑁆𑀧𑁂𑀢𑀸, 𑀓𑀲𑁆𑀫𑀸 𑀘 𑀪𑀽𑀢𑀭𑀽𑀧𑀸𑀦𑀺𑀬𑁂𑀯 𑀕𑀳𑀺𑀢𑀸𑀦𑀺, 𑀦 𑀲𑁂𑀲𑀭𑀽𑀧𑀸𑀦𑀻’’𑀢𑀺𑀆𑀤𑀺𑀦𑀸𑀧𑀺 𑀢𑁂𑀲𑀁 𑀲𑀁𑀲𑀬𑀼𑀧𑁆𑀧𑀢𑁆𑀢𑀺 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. 𑀅𑀣 𑀯𑀸 𑀓𑀣𑀁 𑀦𑀸𑀫𑀺𑀤𑀦𑁆𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀧𑀓𑀸𑀭𑀢𑁆𑀣𑁄. 𑀢𑁂𑀦 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀩𑁆𑀩𑀸𑀬𑀧𑀺 𑀢𑁂𑀲𑀁 𑀲𑀁𑀲𑀬𑀼𑀧𑁆𑀧𑀢𑁆𑀢𑀺𑀬𑀸 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀤𑀝𑁆𑀞𑀩𑁆𑀩𑀸. 𑀅𑀦𑁆𑀢𑀦𑁆𑀢𑀺 𑀫𑀭𑀺𑀬𑀸𑀤𑀁, 𑀤𑁂𑀲𑀦𑀸𑀬 𑀅𑀦𑁆𑀢𑀁 𑀧𑀭𑀺𑀘𑁆𑀙𑁂𑀤𑀦𑁆𑀢𑀺 𑀅𑀢𑁆𑀣𑁄, 𑀬𑁄 𑀅𑀦𑀼𑀲𑀦𑁆𑀥𑀻𑀢𑀺 𑀯𑀼𑀘𑁆𑀘𑀢𑀺. 𑀓𑁄𑀝𑀺𑀦𑁆𑀢𑀺 𑀧𑀭𑀺𑀬𑀦𑁆𑀢𑀁, 𑀤𑁂𑀲𑀦𑀸𑀬 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀉𑀪𑀬𑁂𑀦 𑀲𑀼𑀢𑁆𑀢𑁂 𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺 𑀬𑀣𑀸𑀦𑀼𑀲𑀦𑁆𑀥𑀻𑀢𑀺 𑀯𑀤𑀢𑀺.

𑀅𑀦𑁆𑀢𑀭𑀸𑀓𑀣𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀦𑀁 𑀅𑀦𑁆𑀢𑀭𑀸 𑀅𑀜𑁆𑀜𑀸 𑀏𑀓𑀸 𑀢𑀣𑀸. 𑀯𑀺𑀧𑁆𑀧𑀓𑀣𑀸𑀢𑀺 𑀅𑀦𑀺𑀝𑁆𑀞𑀺𑀢𑀸 𑀲𑀺𑀔𑀁 𑀅𑀧𑁆𑀧𑀢𑁆𑀢𑀸. 𑀓𑀗𑁆𑀔𑀡𑀸𑀦𑀼𑀭𑀽𑀧𑁂𑀦𑀸𑀢𑀺 𑀢𑀲𑁆𑀫𑀺𑀁 𑀔𑀡𑁂 𑀥𑀫𑁆𑀫𑀲𑀪𑀸𑀬𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑁂𑀦. 𑀇𑀤𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀁 𑀫𑀽𑀮𑀧𑀭𑀺𑀬𑀸𑀬𑀚𑀸𑀢𑀓𑀁.

𑀤𑀺𑀲𑀸𑀧𑀸𑀫𑁄𑀓𑁆𑀔𑁄𑀢𑀺 ¶ 𑀧𑀡𑁆𑀟𑀺𑀢𑀪𑀸𑀯𑁂𑀦 𑀲𑀩𑁆𑀩𑀤𑀺𑀲𑀸𑀲𑀼 𑀧𑀫𑀼𑀔𑀪𑀽𑀢𑁄. 𑀩𑁆𑀭𑀸𑀳𑁆𑀫𑀡𑁄𑀢𑀺 𑀩𑁆𑀭𑀳𑁆𑀫𑀁 𑀅𑀡𑀢𑀻𑀢𑀺 𑀩𑁆𑀭𑀸𑀳𑁆𑀫𑀡𑁄, 𑀫𑀦𑁆𑀢𑁂 𑀲𑀚𑁆𑀛𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀢𑀺𑀡𑁆𑀡𑀁 𑀯𑁂𑀤𑀸𑀦𑀦𑁆𑀢𑀺 𑀇𑀭𑀼𑀯𑁂𑀤-𑀬𑀚𑀼𑀯𑁂𑀤-𑀲𑀸𑀫𑀯𑁂𑀤𑀸𑀦𑀁. 𑀧𑀸𑀭𑀕𑀽𑀢𑀺 𑀅𑀢𑁆𑀣𑀲𑁄 𑀩𑁆𑀬𑀜𑁆𑀚𑀦𑀲𑁄 𑀘 𑀧𑀸𑀭𑀁 𑀧𑀭𑀺𑀬𑀦𑁆𑀢𑀁 𑀕𑀢𑁄. 𑀲𑀳 𑀦𑀺𑀖𑀡𑁆𑀟𑀼𑀦𑀸 𑀘 𑀓𑁂𑀝𑀼𑀪𑁂𑀦 𑀘𑀸𑀢𑀺 𑀲𑀦𑀺𑀖𑀡𑁆𑀟𑀼𑀓𑁂𑀝𑀼𑀪𑀸, 𑀢𑁂𑀲𑀁. 𑀦𑀺𑀖𑀡𑁆𑀟𑀽𑀢𑀺 𑀭𑀼𑀓𑁆𑀔𑀸𑀤𑀻𑀦𑀁 𑀯𑁂𑀯𑀘𑀦𑀧𑁆𑀧𑀓𑀸𑀲𑀓𑀁 𑀲𑀢𑁆𑀣𑀁. 𑀓𑁂𑀝𑀼𑀪𑀦𑁆𑀢𑀺 𑀓𑀺𑀭𑀺𑀬𑀸𑀓𑀧𑁆𑀧𑀯𑀺𑀓𑀧𑁆𑀧𑁄, 𑀓𑀯𑀻𑀦𑀁 𑀉𑀧𑀓𑀸𑀭𑀸𑀯𑀳𑀁 𑀲𑀢𑁆𑀣𑀁. 𑀲𑀳 𑀅𑀓𑁆𑀔𑀭𑀧𑁆𑀧𑀪𑁂𑀤𑁂𑀦𑀸𑀢𑀺 𑀲𑀸𑀓𑁆𑀔𑀭𑀧𑁆𑀧𑀪𑁂𑀤𑀸, 𑀢𑁂𑀲𑀁, 𑀲𑀺𑀓𑁆𑀔𑀸𑀦𑀺𑀭𑀼𑀢𑁆𑀢𑀺𑀲𑀳𑀺𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀦𑁆𑀢𑀺 𑀆𑀣𑀩𑁆𑀩𑀡𑀯𑁂𑀤𑀁 𑀘𑀢𑀼𑀢𑁆𑀣𑀁 𑀓𑀢𑁆𑀯𑀸 ‘‘𑀇𑀢𑀺𑀳 𑀅𑀲, 𑀇𑀢𑀺𑀳 𑀅𑀲𑀸’’𑀢𑀺 𑀈𑀤𑀺𑀲𑀯𑀘𑀦𑀧𑀝𑀺𑀲𑀁𑀬𑀼𑀢𑁆𑀢𑁄 𑀧𑀼𑀭𑀸𑀡𑀓𑀣𑀸𑀲𑀗𑁆𑀔𑀸𑀢𑁄 𑀇𑀢𑀺𑀳𑀸𑀲𑁄 𑀧𑀜𑁆𑀘𑀫𑁄 𑀏𑀢𑁂𑀲𑀦𑁆𑀢𑀺 𑀇𑀢𑀺𑀳𑀸𑀲𑀧𑀜𑁆𑀘𑀫𑀸, 𑀢𑁂𑀲𑀁. 𑀧𑀤𑀁 𑀢𑀤𑀯𑀲𑁂𑀲𑀜𑁆𑀘 𑀩𑁆𑀬𑀸𑀓𑀭𑀡𑀁 𑀓𑀸𑀬𑀢𑀺 𑀅𑀚𑁆𑀛𑁂𑀢𑀺 𑀯𑁂𑀤𑁂𑀢𑀺 𑀘𑀸𑀢𑀺 𑀧𑀤𑀓𑁄, 𑀯𑁂𑀬𑁆𑀬𑀸𑀓𑀭𑀡𑁄. 𑀮𑁄𑀓𑀸𑀬𑀢𑀁 𑀯𑀼𑀘𑁆𑀘𑀢𑀺 𑀯𑀺𑀢𑀡𑁆𑀟𑀲𑀢𑁆𑀣𑀁. 𑀫𑀳𑀸𑀧𑀼𑀭𑀺𑀲𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀮𑀓𑁆𑀔𑀡𑀤𑀻𑀧𑀦𑀕𑀦𑁆𑀣𑁄 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀁. 𑀢𑁂𑀲𑀼 𑀅𑀦𑀽𑀦𑁄 𑀧𑀭𑀺𑀧𑀽𑀭𑀓𑀸𑀭𑀻𑀢𑀺 𑀅𑀦𑀯𑀬𑁄.

𑀫𑀦𑁆𑀢𑁂𑀢𑀺 𑀯𑁂𑀤𑁂. 𑀬𑀤𑀺𑀧𑀺 𑀯𑁂𑀤𑁄 ‘‘𑀫𑀦𑁆𑀢𑁄, 𑀩𑁆𑀭𑀳𑁆𑀫𑀁, 𑀓𑀧𑁆𑀧𑁄’’𑀢𑀺 𑀢𑀺𑀯𑀺𑀥𑁄, 𑀫𑀦𑁆𑀢𑁄 𑀏𑀯 𑀧𑀦 𑀫𑀽𑀮𑀯𑁂𑀤𑁄, 𑀢𑀤𑀢𑁆𑀣𑀯𑀺𑀯𑀭𑀡𑀁 𑀩𑁆𑀭𑀳𑁆𑀫𑀁, 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀬𑀜𑁆𑀜𑀓𑀺𑀭𑀺𑀬𑀸𑀯𑀺𑀥𑀸𑀦𑀁 𑀓𑀧𑁆𑀧𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀦𑁆𑀢𑁂𑀢𑀺 𑀯𑁂𑀤𑁂’’𑀢𑀺. 𑀧𑀡𑁆𑀟𑀺𑀢𑀸𑀢𑀺 𑀧𑀜𑁆𑀜𑀸𑀯𑀦𑁆𑀢𑁄. 𑀢𑀣𑀸 𑀳𑀺 𑀢𑁂 𑀧𑀼𑀣𑀼𑀧𑀜𑁆𑀜𑀸𑀢𑀸𑀬 𑀩𑀳𑀼𑀁 𑀲𑀳𑀲𑁆𑀲𑀤𑁆𑀯𑀺𑀲𑀳𑀲𑁆𑀲𑀸𑀤𑀺𑀧𑀭𑀺𑀫𑀸𑀡𑀁 𑀕𑀦𑁆𑀣𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑀺 𑀉𑀕𑁆𑀕𑀡𑁆𑀳𑀦𑁆𑀢𑀺, 𑀚𑀯𑀦𑀧𑀜𑁆𑀜𑀢𑀸𑀬 𑀮𑀳𑀼𑀁 𑀲𑀻𑀖𑀁 𑀕𑀡𑁆𑀳𑀦𑁆𑀢𑀺, 𑀢𑀺𑀓𑁆𑀔𑀧𑀜𑁆𑀜𑀢𑀸𑀬 ¶ 𑀲𑀼𑀝𑁆𑀞𑀼 𑀅𑀯𑀺𑀭𑀚𑁆𑀛𑀦𑁆𑀢𑀸 𑀉𑀧𑀥𑀸𑀭𑁂𑀦𑁆𑀢𑀺, 𑀲𑀢𑀺𑀦𑁂𑀧𑀓𑁆𑀓𑀲𑀫𑁆𑀧𑀢𑁆𑀢𑀺𑀬𑀸 𑀕𑀳𑀺𑀢𑀜𑁆𑀘 𑀦𑁂𑀲𑀁 𑀦 𑀯𑀺𑀦𑀲𑁆𑀲𑀢𑀺 𑀦 𑀲𑀫𑁆𑀫𑀼𑀲𑁆𑀲𑀢𑀻𑀢𑀺. 𑀲𑀩𑁆𑀩𑀫𑁆𑀧𑀺 𑀲𑀺𑀧𑁆𑀧𑀦𑁆𑀢𑀺 𑀅𑀝𑁆𑀞𑀸𑀭𑀲𑀯𑀺𑀚𑁆𑀚𑀸𑀝𑁆𑀞𑀸𑀦𑀸𑀤𑀺𑀪𑁂𑀤𑀁 𑀲𑀺𑀓𑁆𑀔𑀺𑀢𑀩𑁆𑀩𑀝𑁆𑀞𑁂𑀦 𑀲𑀺𑀧𑁆𑀧𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀢𑀁 𑀲𑀩𑁆𑀩𑀁 𑀩𑀸𑀳𑀺𑀭𑀓𑀲𑀢𑁆𑀣𑀁 𑀫𑁄𑀓𑁆𑀔𑀸𑀯𑀳𑀲𑀫𑁆𑀫𑀢𑀫𑁆𑀧𑀺 𑀦 𑀫𑁄𑀓𑁆𑀔𑀁 𑀆𑀯𑀳𑀢𑀻𑀢𑀺 𑀆𑀳 ‘‘𑀤𑀺𑀝𑁆𑀞𑀥𑀫𑁆𑀫𑀲𑀫𑁆𑀧𑀭𑀸𑀬𑀳𑀺𑀢’’𑀦𑁆𑀢𑀺. 𑀲𑀫𑁆𑀧𑀺𑀡𑁆𑀟𑀺𑀢𑀸 𑀳𑀼𑀢𑁆𑀯𑀸𑀢𑀺 𑀬𑀣𑀸 𑀫𑀺𑀢𑁆𑀢𑀸, 𑀢𑀣𑀸 𑀧𑀺𑀡𑁆𑀟𑀺𑀢𑀯𑀲𑁂𑀦 𑀲𑀦𑁆𑀦𑀺𑀧𑀢𑀺𑀢𑀸 𑀳𑀼𑀢𑁆𑀯𑀸. ‘‘𑀏𑀯𑀁 𑀕𑀬𑁆𑀳𑀫𑀸𑀦𑁂 𑀆𑀤𑀺𑀦𑀸 𑀯𑀺𑀭𑀼𑀚𑁆𑀛𑁂𑀬𑁆𑀬, 𑀏𑀯𑀁 𑀅𑀦𑁆𑀢𑁂𑀦𑀸’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀸 𑀜𑀸𑀢𑀼𑀁 𑀇𑀘𑁆𑀙𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀼𑀩𑁆𑀩𑁂𑀦𑀸𑀧𑀭𑀁 𑀅𑀯𑀺𑀭𑀼𑀤𑁆𑀥𑀁 𑀦𑀺𑀘𑁆𑀙𑀬𑀁 𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀦 𑀆𑀤𑀺𑀁, 𑀦 𑀅𑀦𑁆𑀢𑀁 𑀅𑀤𑁆𑀤𑀲𑀁𑀲𑀼.

𑀮𑁄𑀫𑀲𑀸𑀦𑀻𑀢𑀺 𑀮𑁄𑀫𑀯𑀦𑁆𑀢𑀸𑀦𑀺, 𑀖𑀦𑀓𑁂𑀲𑀫𑀲𑁆𑀲𑀼𑀯𑀸𑀦𑀻𑀢𑀺 𑀅𑀢𑁆𑀣𑁄. 𑀓𑁂𑀲𑀸𑀧𑀺 𑀳𑀺 𑀮𑁄𑀫𑀕𑁆𑀕𑀳𑀡𑁂𑀦 𑀕𑀬𑁆𑀳𑀦𑁆𑀢𑀺 𑀬𑀣𑀸 ‘‘𑀮𑁄𑀫𑀦𑀔𑀁 𑀨𑀼𑀲𑀺𑀢𑁆𑀯𑀸 𑀲𑀼𑀤𑁆𑀥𑀺 𑀓𑀸𑀢𑀩𑁆𑀩𑀸’’𑀢𑀺. 𑀓𑀡𑁆𑀡𑀁 𑀯𑀺𑀬𑀸𑀢𑀺 𑀓𑀡𑁆𑀡𑀁, 𑀧𑀜𑁆𑀜𑀸, 𑀢𑀸𑀬 𑀲𑀼𑀢𑁆𑀯𑀸 𑀓𑀸𑀢𑀩𑁆𑀩𑀓𑀺𑀘𑁆𑀘𑀲𑀸𑀥𑀦𑀢𑁄 𑀯𑀼𑀢𑁆𑀢𑀁 ‘‘𑀓𑀡𑁆𑀡𑀯𑀸𑀢𑀺 𑀧𑀜𑁆𑀜𑀯𑀸’’𑀢𑀺.

𑀬𑀲𑁆𑀫𑀸 ¶ 𑀲𑀢𑁆𑀢𑀸𑀦𑀁 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀆𑀬𑀼𑀯𑀡𑁆𑀡𑀸𑀤𑀺𑀧𑀭𑀺𑀓𑁆𑀔𑀬𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀓𑀸𑀮𑁂𑀦 𑀓𑀢𑀁 𑀯𑀺𑀬 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀦𑁂𑀲𑀁 𑀆𑀬𑀼…𑀧𑁂… 𑀔𑀸𑀤𑀢𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀅𑀪𑀺𑀜𑁆𑀜𑀸𑀬𑀸𑀢𑀺 𑀓𑀼𑀲𑀮𑀸𑀤𑀺𑀪𑁂𑀤𑀁 𑀔𑀦𑁆𑀥𑀸𑀤𑀺𑀪𑁂𑀤𑀜𑁆𑀘 𑀤𑁂𑀲𑁂𑀢𑀩𑁆𑀩𑀁 𑀥𑀫𑁆𑀫𑀁, 𑀯𑁂𑀦𑁂𑀬𑁆𑀬𑀸𑀦𑀜𑁆𑀘 𑀆𑀲𑀬𑀸𑀦𑀼𑀲𑀬𑀘𑀭𑀺𑀬𑀸𑀯𑀺𑀫𑀼𑀢𑁆𑀢𑀺𑀆𑀤𑀺𑀪𑁂𑀤𑀁, 𑀢𑀲𑁆𑀲 𑀘 𑀦𑁂𑀲𑀁 𑀤𑁂𑀲𑁂𑀢𑀩𑁆𑀩𑀧𑁆𑀧𑀓𑀸𑀭𑀁 𑀬𑀸𑀣𑀸𑀯𑀢𑁄 𑀅𑀪𑀺𑀚𑀸𑀦𑀺𑀢𑁆𑀯𑀸. 𑀥𑀫𑁆𑀫𑀁 𑀤𑁂𑀲𑁂𑀫𑀻𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀦𑀺𑀩𑁆𑀩𑀸𑀦𑀳𑀺𑀢𑀸𑀯𑀳𑀁 𑀲𑀤𑁆𑀥𑀫𑁆𑀫𑀁 𑀓𑀣𑀬𑀸𑀫𑀺. 𑀦𑁄 𑀅𑀦𑀪𑀺𑀜𑁆𑀜𑀸𑀬𑀸𑀢𑀺 𑀬𑀣𑀸 𑀩𑀸𑀳𑀺𑀭𑀓𑀸 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀯𑀼𑀢𑁆𑀢𑀯𑀺𑀥𑀺𑀁 𑀅𑀚𑀸𑀦𑀦𑁆𑀢𑀸𑀬𑀁 𑀓𑀺𑀜𑁆𑀘𑀺 𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀯𑀻𑀫𑀁𑀲𑀸𑀦𑀼𑀘𑀭𑀺𑀢𑀁 𑀲𑀬𑀁𑀧𑀝𑀺𑀪𑀸𑀦𑀁 𑀓𑀣𑁂𑀦𑁆𑀢𑀺, 𑀏𑀯𑀁 𑀦 𑀤𑁂𑀲𑁂𑀫𑀻𑀢𑀺 𑀅𑀢𑁆𑀣𑁄. 𑀲𑀦𑀺𑀤𑀸𑀦𑀦𑁆𑀢𑀺 𑀲𑀓𑀸𑀭𑀡𑀁, 𑀯𑁂𑀦𑁂𑀬𑁆𑀬𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀯𑀸 𑀧𑀼𑀘𑁆𑀙𑀸𑀬 𑀯𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀯𑀸 𑀲𑀦𑀺𑀫𑀺𑀢𑁆𑀢𑀁 𑀳𑁂𑀢𑀼𑀉𑀤𑀸𑀳𑀭𑀡𑀲𑀳𑀺𑀢𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀲𑀦𑀺𑀲𑁆𑀲𑀭𑀡𑀁 𑀲𑀧𑁆𑀧𑀝𑀺𑀳𑀭𑀡𑀁, 𑀧𑀘𑁆𑀘𑀦𑀻𑀓𑀧𑀝𑀺𑀳𑀭𑀡𑁂𑀦 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀫𑁂𑀯 𑀓𑀢𑁆𑀯𑀸 𑀤𑁂𑀲𑁂𑀫𑀻𑀢𑀺 𑀅𑀢𑁆𑀣𑁄. 𑀅𑀧𑀭𑁂 𑀧𑀦 ‘‘𑀬𑀣𑀸𑀭𑀳𑀁 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀺𑀧𑀸𑀝𑀺𑀳𑀸𑀭𑀺𑀬𑀲𑀳𑀺𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀅𑀦𑀼𑀲𑀸𑀲𑀦𑀺𑀧𑀸𑀝𑀺𑀳𑀸𑀭𑀺𑀬𑀳𑀺𑀢𑀸 𑀧𑀦 𑀤𑁂𑀲𑀦𑀸 𑀦𑀢𑁆𑀣𑀻𑀢𑀺. 𑀳𑀺𑀢𑀽𑀧𑀤𑁂𑀲𑀦𑀸 𑀑𑀯𑀸𑀤𑁄, 𑀲𑀸 𑀏𑀯 𑀅𑀦𑀼𑀲𑀸𑀲𑀦𑀻. 𑀅𑀦𑁄𑀢𑀺𑀡𑁆𑀡𑀯𑀢𑁆𑀣𑀼𑀯𑀺𑀲𑀬𑁄 𑀯𑀸 𑀑𑀯𑀸𑀤𑁄, 𑀑𑀢𑀺𑀡𑁆𑀡𑀯𑀢𑁆𑀣𑀼𑀯𑀺𑀲𑀬𑀸 𑀅𑀦𑀼𑀲𑀸𑀲𑀦𑀻. 𑀧𑀞𑀫𑀽𑀧𑀤𑁂𑀲𑁄 𑀯𑀸 𑀑𑀯𑀸𑀤𑁄, 𑀇𑀢𑀭𑀸 𑀅𑀦𑀼𑀲𑀸𑀲𑀦𑀻. 𑀅𑀮𑀜𑁆𑀘 𑀧𑀦𑀸𑀢𑀺 𑀬𑀼𑀢𑁆𑀢𑀫𑁂𑀯. 𑀦𑀺𑀝𑁆𑀞𑀫𑀕𑀫𑀸𑀲𑀻𑀢𑀺 𑀅𑀢𑁆𑀣𑀲𑀺𑀤𑁆𑀥𑀺𑀁 𑀕𑀢𑀸.

𑀢𑀣𑀸𑀕𑀢𑀯𑀸𑀭𑀅𑀝𑁆𑀞𑀫𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀬𑀁 𑀢𑀸𑀯𑁂𑀢𑁆𑀣 𑀅𑀝𑁆𑀞𑀓𑀣𑀸𑀬 𑀮𑀻𑀦𑀢𑁆𑀣𑀯𑀡𑁆𑀡𑀦𑀸.

𑀦𑁂𑀢𑁆𑀢𑀺𑀦𑀬𑀯𑀡𑁆𑀡𑀦𑀸

𑀇𑀤𑀸𑀦𑀺 ¶ (𑀤𑀻. 𑀦𑀺. 𑀝𑀻. 𑁧.𑁧𑁪𑁯; 𑀲𑀁. 𑀦𑀺. 𑀝𑀻. 𑁧.𑁧.𑀦𑁂𑀢𑁆𑀢𑀺𑀦𑀬𑀯𑀡𑁆𑀡𑀦𑀸; 𑀅. 𑀦𑀺. 𑀝𑀻. 𑀦𑁂𑀢𑁆𑀢𑀺𑀦𑀬𑀯𑀡𑁆𑀡𑀦𑀸) 𑀧𑀓𑀭𑀡𑀦𑀬𑁂𑀦 𑀧𑀸𑀴𑀺𑀬𑀸 𑀅𑀢𑁆𑀣𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫. 𑀲𑀸 𑀧𑀦𑀸𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑀬𑀲𑁆𑀫𑀸 𑀤𑁂𑀲𑀦𑀸𑀬 𑀲𑀫𑀼𑀝𑁆𑀞𑀸𑀦𑀧𑀬𑁄𑀚𑀦𑀪𑀸𑀚𑀦𑁂𑀲𑀼 𑀧𑀺𑀡𑁆𑀟𑀢𑁆𑀣𑁂𑀲𑀼 𑀘 𑀦𑀺𑀤𑁆𑀥𑀸𑀭𑀺𑀢𑁂𑀲𑀼 𑀲𑀼𑀢𑀭𑀸 𑀳𑁄𑀢𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸 𑀘, 𑀢𑀲𑁆𑀫𑀸 𑀲𑀼𑀢𑁆𑀢𑀤𑁂𑀲𑀦𑀸𑀬 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀞𑀫𑀁 𑀦𑀺𑀤𑁆𑀥𑀸𑀭𑀬𑀺𑀲𑁆𑀲𑀸𑀫. 𑀢𑀢𑁆𑀣 𑀲𑀫𑀼𑀝𑁆𑀞𑀸𑀦𑀁 𑀢𑀸𑀯 𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀫𑀸𑀦𑀼𑀧𑁆𑀧𑀸𑀤𑁄, 𑀧𑀬𑁄𑀚𑀦𑀁𑀫𑀸𑀦𑀫𑀤𑁆𑀤𑀦𑀁. 𑀯𑀼𑀢𑁆𑀢𑀜𑁆𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀼𑀢𑀧𑀭𑀺𑀬𑀢𑁆𑀢𑀺𑀁…𑀧𑁂… 𑀆𑀭𑀪𑀻’’𑀢𑀺. 𑀅𑀧𑀺𑀘 𑀯𑁂𑀦𑁂𑀬𑁆𑀬𑀸𑀦𑀁 𑀧𑀣𑀯𑀻𑀆𑀤𑀺𑀪𑀽𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑁂 𑀲𑀓𑁆𑀓𑀸𑀬𑁂 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑁂𑀓𑁆𑀔𑀸𑀤𑀺𑀅𑀭𑀺𑀬𑀲𑁆𑀲 𑀘 𑀲𑀤𑁆𑀥𑀺𑀁 𑀳𑁂𑀢𑀼𑀦𑀸 𑀫𑀜𑁆𑀜𑀦𑀸𑀫𑀜𑁆𑀜𑀦𑀯𑀲𑁂𑀦 ¶ 𑀧𑀯𑀢𑁆𑀢𑀺𑀯𑀺𑀪𑀸𑀕𑀸𑀦𑀯𑀩𑁄𑀥𑁄 𑀲𑀫𑀼𑀝𑁆𑀞𑀸𑀦𑀁, 𑀬𑀣𑀸𑀯𑀼𑀢𑁆𑀢𑀯𑀺𑀪𑀸𑀕𑀸𑀯𑀩𑁄𑀥𑁄 𑀧𑀬𑁄𑀚𑀦𑀁, 𑀯𑁂𑀦𑁂𑀬𑁆𑀬𑀸𑀦𑀜𑁆𑀳𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀯𑀺𑀲𑀬𑁂 𑀬𑀣𑀸𑀯𑀼𑀢𑁆𑀢𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑀤𑁆𑀥𑀺𑀁 𑀳𑁂𑀢𑀼𑀦𑀸 𑀫𑀜𑁆𑀜𑀦𑀸𑀫𑀜𑁆𑀜𑀦𑀯𑀲𑁂𑀦 𑀧𑀯𑀢𑁆𑀢𑀺𑀯𑀺𑀪𑀸𑀕𑀸𑀯𑀩𑁄𑀥𑁄 𑀧𑀬𑁄𑀚𑀦𑀁.

𑀅𑀧𑀺𑀘 𑀲𑀫𑀼𑀝𑁆𑀞𑀸𑀦𑀁 𑀦𑀸𑀫 𑀤𑁂𑀲𑀦𑀸𑀦𑀺𑀤𑀸𑀦𑀁. 𑀢𑀁 𑀲𑀸𑀥𑀸𑀭𑀡𑀁 𑀅𑀲𑀸𑀥𑀸𑀭𑀡𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀢𑁆𑀣 𑀲𑀸𑀥𑀸𑀭𑀡𑀫𑁆𑀧𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀪𑁂𑀤𑀢𑁄 𑀤𑀼𑀯𑀺𑀥𑀁. 𑀢𑀢𑁆𑀣 𑀲𑀸𑀥𑀸𑀭𑀡𑀁 𑀅𑀚𑁆𑀛𑀢𑁆𑀢𑀺𑀓𑀲𑀫𑀼𑀝𑁆𑀞𑀸𑀦𑀁 𑀦𑀸𑀫 𑀮𑁄𑀓𑀦𑀸𑀣𑀲𑁆𑀲 𑀫𑀳𑀸𑀓𑀭𑀼𑀡𑀸. 𑀢𑀸𑀬 𑀳𑀺 𑀲𑀫𑀼𑀲𑁆𑀲𑀸𑀳𑀺𑀢𑀲𑁆𑀲 𑀪𑀕𑀯𑀢𑁄 𑀯𑁂𑀦𑁂𑀬𑁆𑀬𑀸𑀦𑀁 𑀥𑀫𑁆𑀫𑀤𑁂𑀲𑀦𑀸𑀬 𑀘𑀺𑀢𑁆𑀢𑀁 𑀉𑀤𑀧𑀸𑀤𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀢𑁆𑀢𑁂𑀲𑀼 𑀘 𑀓𑀸𑀭𑀼𑀜𑁆𑀜𑀢𑀁 𑀧𑀝𑀺𑀘𑁆𑀘 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀲𑀻’’𑀢𑀺𑀆𑀤𑀺 (𑀫. 𑀦𑀺. 𑁧.𑁨𑁮𑁩; 𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁯). 𑀏𑀢𑁆𑀣 𑀘 𑀳𑁂𑀢𑀸𑀯𑀢𑁆𑀣𑀸𑀬𑀧𑀺 𑀫𑀳𑀸𑀓𑀭𑀼𑀡𑀸𑀬 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄 𑀬𑀸𑀯𑀤𑁂𑀯 𑀲𑀁𑀲𑀸𑀭𑀫𑀳𑁄𑀖𑀢𑁄 𑀲𑀤𑁆𑀥𑀫𑁆𑀫𑀤𑁂𑀲𑀦𑀸𑀳𑀢𑁆𑀣𑀤𑀸𑀦𑁂𑀳𑀺 𑀲𑀢𑁆𑀢𑀲𑀦𑁆𑀢𑀸𑀭𑀡𑀢𑁆𑀣𑀁 𑀢𑀤𑀼𑀧𑁆𑀧𑀢𑁆𑀢𑀺𑀢𑁄. 𑀬𑀣𑀸 𑀘 𑀫𑀳𑀸𑀓𑀭𑀼𑀡𑀸, 𑀏𑀯𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀤𑀲𑀩𑀮𑀜𑀸𑀡𑀸𑀤𑀻𑀦𑀺 𑀘 𑀤𑁂𑀲𑀦𑀸𑀬 𑀅𑀩𑁆𑀪𑀦𑁆𑀢𑀭𑀲𑀫𑀼𑀝𑁆𑀞𑀸𑀦𑀪𑀸𑀯𑁂 𑀯𑀢𑁆𑀢𑀩𑁆𑀩𑀸𑀦𑀺. 𑀲𑀩𑁆𑀩𑀫𑁆𑀧𑀺 𑀳𑀺 𑀜𑁂𑀬𑁆𑀬𑀥𑀫𑁆𑀫𑀁, 𑀢𑁂𑀲𑀁 𑀤𑁂𑀲𑁂𑀢𑀩𑁆𑀩𑀧𑁆𑀧𑀓𑀸𑀭𑀁, 𑀲𑀢𑁆𑀢𑀸𑀦𑀜𑁆𑀘 𑀆𑀲𑀬𑀸𑀦𑀼𑀲𑀬𑀸𑀤𑀺𑀁 𑀬𑀸𑀣𑀸𑀯𑀢𑁄 𑀚𑀸𑀦𑀦𑁆𑀢𑁄 𑀪𑀕𑀯𑀸 𑀞𑀸𑀦𑀸𑀝𑁆𑀞𑀸𑀦𑀸𑀤𑀻𑀲𑀼 𑀓𑁄𑀲𑀮𑁆𑀮𑁂𑀦 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀯𑀺𑀘𑀺𑀢𑁆𑀢𑀦𑀬𑀤𑁂𑀲𑀦𑀁 𑀧𑀯𑀢𑁆𑀢𑁂𑀲𑀻𑀢𑀺. 𑀩𑀸𑀳𑀺𑀭𑀁 𑀧𑀦 𑀲𑀸𑀥𑀸𑀭𑀡𑀁 𑀲𑀫𑀼𑀝𑁆𑀞𑀸𑀦𑀁 𑀤𑀲𑀲𑀳𑀲𑁆𑀲𑀩𑁆𑀭𑀳𑁆𑀫𑀧𑀭𑀺𑀯𑀸𑀭𑀺𑀢𑀲𑁆𑀲 𑀲𑀳𑀫𑁆𑀧𑀢𑀺𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀅𑀚𑁆𑀛𑁂𑀲𑀦𑀁. 𑀢𑀤𑀚𑁆𑀛𑁂𑀲𑀦𑀼𑀢𑁆𑀢𑀭𑀓𑀸𑀮𑀜𑁆𑀳𑀺 𑀥𑀫𑁆𑀫𑀕𑀫𑁆𑀪𑀻𑀭𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀸𑀚𑀦𑀺𑀢𑀁 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑁆𑀯𑀸 𑀥𑀫𑁆𑀫𑀲𑁆𑀲𑀸𑀫𑀻 𑀥𑀫𑁆𑀫𑀤𑁂𑀲𑀦𑀸𑀬 𑀉𑀲𑁆𑀲𑀸𑀳𑀚𑀸𑀢𑁄 𑀅𑀳𑁄𑀲𑀺. 𑀅𑀲𑀸𑀥𑀸𑀭𑀡𑀫𑁆𑀧𑀺 𑀅𑀫𑁆𑀪𑀦𑁆𑀢𑀭𑀩𑀸𑀳𑀺𑀭𑀪𑁂𑀤𑀢𑁄 𑀤𑀼𑀯𑀺𑀥𑀫𑁂𑀯. 𑀢𑀢𑁆𑀣 𑀅𑀩𑁆𑀪𑀦𑁆𑀢𑀭𑀁 𑀬𑀸𑀬 𑀫𑀳𑀸𑀓𑀭𑀼𑀡𑀸𑀬 𑀬𑁂𑀦 𑀘 𑀤𑁂𑀲𑀦𑀸𑀜𑀸𑀡𑁂𑀦 𑀇𑀤𑀁 𑀲𑀼𑀢𑁆𑀢𑀁 𑀧𑀯𑀢𑁆𑀢𑀺𑀢𑀁, 𑀢𑀤𑀼𑀪𑀬𑀁 𑀯𑁂𑀤𑀺𑀢𑀩𑁆𑀩𑀁. 𑀩𑀸𑀳𑀺𑀭𑀁 𑀧𑀦 𑀧𑀜𑁆𑀘𑀲𑀢𑀸𑀦𑀁 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀫𑀸𑀦𑀼𑀧𑁆𑀧𑀸𑀤𑀦𑀁, 𑀯𑀼𑀢𑁆𑀢𑀫𑁂𑀯 𑀢𑀁 𑀅𑀝𑁆𑀞𑀓𑀣𑀸𑀬𑀁.

𑀧𑀬𑁄𑀚𑀦𑀫𑁆𑀧𑀺 𑀲𑀸𑀥𑀸𑀭𑀡𑀁 𑀅𑀲𑀸𑀥𑀸𑀭𑀡𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀢𑁆𑀣 𑀲𑀸𑀥𑀸𑀭𑀡𑀁 𑀅𑀦𑀼𑀓𑁆𑀓𑀫𑁂𑀦 𑀬𑀸𑀯 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 ¶ 𑀯𑀺𑀫𑀼𑀢𑁆𑀢𑀺𑀭𑀲𑀢𑁆𑀢𑀸 𑀪𑀕𑀯𑀢𑁄 𑀤𑁂𑀲𑀦𑀸𑀬. 𑀢𑁂𑀦𑁂𑀯𑀸𑀳 ‘‘𑀏𑀢𑀤𑀢𑁆𑀣𑀸 𑀢𑀣𑀸, 𑀏𑀢𑀤𑀢𑁆𑀣𑀸 𑀫𑀦𑁆𑀢𑀦𑀸’’𑀢𑀺𑀆𑀤𑀺 (𑀧𑀭𑀺. 𑁩𑁬𑁬). 𑀏𑀢𑁂𑀦𑁂𑀯 𑀘 𑀲𑀁𑀲𑀸𑀭𑀘𑀓𑁆𑀓𑀦𑀺𑀯𑀢𑁆𑀢𑀺 𑀲𑀤𑁆𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀺 𑀲𑀲𑁆𑀲𑀢𑀸𑀤𑀺𑀫𑀺𑀘𑁆𑀙𑀸𑀯𑀸𑀤𑀦𑀺𑀭𑀸𑀓𑀭𑀡𑀁 𑀲𑀫𑁆𑀫𑀸𑀯𑀸𑀤𑀧𑀼𑀭𑁂𑀓𑁆𑀔𑀸𑀭𑁄 𑀅𑀓𑀼𑀲𑀮𑀫𑀽𑀮𑀲𑀫𑀽𑀳𑀦𑀦𑀁 𑀓𑀼𑀲𑀮𑀫𑀽𑀮𑀲𑀁𑀭𑁄𑀧𑀦𑀁 𑀅𑀧𑀸𑀬𑀤𑁆𑀯𑀸𑀭𑀧𑀺𑀤𑀳𑀦𑀁 𑀲𑀕𑁆𑀕𑀫𑁄𑀓𑁆𑀔𑀤𑁆𑀯𑀸𑀭𑀯𑀺𑀯𑀭𑀡𑀁 𑀧𑀭𑀺𑀬𑀼𑀝𑁆𑀞𑀸𑀦𑀯𑀽𑀧𑀲𑀫𑀦𑀁 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑀦𑀁 ¶ ‘‘𑀫𑀼𑀢𑁆𑀢𑁄 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 (𑀉𑀤𑀸. 𑀅𑀝𑁆𑀞. 𑁧𑁮; 𑀇𑀢𑀺𑀯𑀼. 𑀅𑀝𑁆𑀞. 𑁩𑁮) 𑀧𑀼𑀭𑀺𑀫𑀧𑀝𑀺𑀜𑁆𑀜𑀸𑀅𑀯𑀺𑀲𑀁𑀯𑀸𑀤𑀦𑀁 𑀢𑀧𑁆𑀧𑀝𑀺𑀧𑀓𑁆𑀔𑀫𑀸𑀭𑀫𑀦𑁄𑀭𑀣𑀯𑀺𑀲𑀁𑀯𑀸𑀤𑀦𑀁 𑀢𑀺𑀢𑁆𑀣𑀺𑀬𑀥𑀫𑁆𑀫𑀦𑀺𑀫𑁆𑀫𑀣𑀦𑀁 𑀩𑀼𑀤𑁆𑀥𑀥𑀫𑁆𑀫𑀧𑀢𑀺𑀝𑁆𑀞𑀸𑀧𑀦𑀦𑁆𑀢𑀺 𑀏𑀯𑀫𑀸𑀤𑀻𑀦𑀫𑁆𑀧𑀺 𑀧𑀬𑁄𑀚𑀦𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀲𑀸𑀥𑀸𑀭𑀡𑀁 𑀧𑀦 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀫𑀸𑀦𑀫𑀤𑁆𑀤𑀦𑀁. 𑀯𑀼𑀢𑁆𑀢𑀜𑁆𑀘𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁧.𑁧) ‘‘𑀤𑁂𑀲𑀦𑀸𑀓𑀼𑀲𑀮𑁄 𑀪𑀕𑀯𑀸 𑀫𑀸𑀦𑀪𑀜𑁆𑀚𑀦𑀢𑁆𑀣𑀁 ‘𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬’𑀦𑁆𑀢𑀺 𑀤𑁂𑀲𑀦𑀁 𑀆𑀭𑀪𑀻’’𑀢𑀺. 𑀉𑀪𑀬𑀫𑁆𑀧𑁂𑀢𑀁 𑀩𑀸𑀳𑀺𑀬𑀫𑁂𑀯. 𑀲𑀘𑁂 𑀧𑀦 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑀕𑀢𑀫𑁆𑀧𑀺 𑀤𑁂𑀲𑀦𑀸𑀩𑀮𑀲𑀺𑀤𑁆𑀥𑀺𑀲𑀗𑁆𑀔𑀸𑀢𑀁 𑀧𑀬𑁄𑀚𑀦𑀁 𑀅𑀥𑀺𑀧𑁆𑀧𑀸𑀬𑀲𑀫𑀺𑀚𑁆𑀛𑀦𑀪𑀸𑀯𑀢𑁄 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀲𑀺𑀤𑁆𑀥𑀺𑀬𑀸 𑀬𑀣𑀸𑀓𑀸𑀭𑀼𑀡𑀺𑀓𑀲𑁆𑀲 𑀪𑀕𑀯𑀢𑁄𑀧𑀺 𑀧𑀬𑁄𑀚𑀦𑀫𑁂𑀯𑀸𑀢𑀺 𑀕𑀡𑁆𑀳𑁂𑀬𑁆𑀬, 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦𑀲𑁆𑀲 𑀅𑀩𑁆𑀪𑀦𑁆𑀢𑀭𑀢𑀸𑀧𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀧𑀺𑀘 𑀯𑁂𑀦𑁂𑀬𑁆𑀬𑀸𑀦𑀁 𑀧𑀣𑀯𑀻𑀆𑀤𑀺𑀪𑀽𑀢𑀸𑀤𑀺𑀯𑀺𑀪𑀸𑀕𑀪𑀺𑀦𑁆𑀦𑁂 𑀲𑀓𑁆𑀓𑀸𑀬𑁂 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑁂𑀓𑁆𑀔𑀸𑀤𑀺𑀅𑀭𑀺𑀬𑀲𑁆𑀲 𑀘 𑀲𑀤𑁆𑀥𑀺𑀁 𑀳𑁂𑀢𑀼𑀦𑀸 𑀫𑀜𑁆𑀜𑀦𑀸𑀫𑀜𑁆𑀜𑀦𑀯𑀲𑁂𑀦 𑀧𑀯𑀢𑁆𑀢𑀺𑀯𑀺𑀪𑀸𑀕𑀸𑀦𑀯𑀩𑁄𑀥𑁄 𑀲𑀫𑀼𑀝𑁆𑀞𑀸𑀦𑀁, 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀯𑀺𑀪𑀸𑀕𑀸𑀯𑀩𑁄𑀥𑁄 𑀧𑀬𑁄𑀚𑀦𑀦𑁆𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀯𑁂𑀦𑁂𑀬𑁆𑀬𑀸𑀦𑀜𑁆𑀳𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀯𑀺𑀲𑀬𑁂 𑀬𑀣𑀸𑀯𑀼𑀢𑁆𑀢𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀲𑀤𑁆𑀥𑀺𑀁 𑀳𑁂𑀢𑀼𑀦𑀸 𑀫𑀜𑁆𑀜𑀦𑀸𑀫𑀜𑁆𑀜𑀦𑀸𑀦𑀁 𑀯𑀲𑁂𑀦 𑀧𑀯𑀢𑁆𑀢𑀺𑀯𑀺𑀪𑀸𑀕𑀸𑀯𑀩𑁄𑀥𑁄 𑀇𑀫𑀁 𑀤𑁂𑀲𑀦𑀁 𑀧𑀬𑁄𑀚𑁂𑀢𑀺 ‘‘𑀢𑀦𑁆𑀦𑀺𑀧𑁆𑀨𑀸𑀤𑀦𑀧𑀭𑀸𑀬𑀁 𑀤𑁂𑀲𑀦𑀸’’𑀢𑀺 𑀓𑀢𑁆𑀯𑀸. 𑀬𑀜𑁆𑀳𑀺 𑀤𑁂𑀲𑀦𑀸𑀬 𑀲𑀸𑀥𑁂𑀢𑀩𑁆𑀩𑀁 𑀨𑀮𑀁, 𑀢𑀁 𑀆𑀓𑀗𑁆𑀔𑀺𑀢𑀩𑁆𑀩𑀢𑁆𑀢𑀸 𑀤𑁂𑀲𑀓𑀁 𑀤𑁂𑀲𑀦𑀸𑀬 𑀧𑀬𑁄𑀚𑁂𑀢𑀻𑀢𑀺 𑀧𑀬𑁄𑀚𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀯𑁂𑀦𑁂𑀬𑁆𑀬𑀸𑀦𑀁 𑀲𑀩𑁆𑀩𑀲𑁄 𑀏𑀓𑀤𑁂𑀲𑀢𑁄 𑀘 𑀫𑀜𑁆𑀜𑀦𑀸𑀦𑀁 𑀅𑀧𑁆𑀧𑀳𑀸𑀦𑀁, 𑀢𑀢𑁆𑀣 𑀘 𑀆𑀤𑀻𑀦𑀯𑀸𑀤𑀲𑁆𑀲𑀦𑀁, 𑀦𑀺𑀭𑀗𑁆𑀓𑀼𑀲𑀸𑀦𑀁 𑀫𑀜𑁆𑀜𑀦𑀸𑀦𑀁 𑀅𑀦𑁂𑀓𑀸𑀓𑀸𑀭𑀯𑁄𑀳𑀸𑀭𑀲𑁆𑀲 𑀲𑀓𑁆𑀓𑀸𑀬𑁂 𑀧𑀯𑀢𑁆𑀢𑀺𑀯𑀺𑀲𑁂𑀲𑀲𑁆𑀲 𑀅𑀚𑀸𑀦𑀦𑀁, 𑀢𑀢𑁆𑀣 𑀘 𑀧𑀳𑀻𑀦𑀫𑀜𑁆𑀜𑀦𑀸𑀦𑀁 𑀧𑀝𑀺𑀧𑀢𑁆𑀢𑀺𑀬𑀸 𑀅𑀚𑀸𑀦𑀦𑀁, 𑀢𑀡𑁆𑀳𑀸𑀫𑀼𑀔𑁂𑀦 𑀧𑀘𑁆𑀘𑀬𑀸𑀓𑀸𑀭𑀲𑁆𑀲 𑀘 𑀅𑀦𑀯𑀩𑁄𑀥𑁄𑀢𑀺 𑀏𑀯𑀫𑀸𑀤𑀻𑀦𑀺 𑀘 𑀧𑀬𑁄𑀚𑀦𑀸𑀦𑀺 𑀇𑀥 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀪𑀽𑀫𑀺𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑁂𑀲𑀼 𑀅𑀲𑀗𑁆𑀔𑀸𑀢𑀥𑀫𑁆𑀫𑀯𑀺𑀧𑁆𑀧𑀓𑀢𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀲𑀗𑁆𑀔𑀸𑀢𑀥𑀫𑁆𑀫𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀘 𑀧𑀝𑀺𑀧𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑀸 𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀥𑀸𑀭𑀡𑀧𑀭𑀺𑀘𑀬𑀫𑀦𑀲𑀺𑀓𑀸𑀭𑀧𑀭𑀸 𑀲𑀤𑁆𑀥𑀫𑁆𑀫𑀲𑁆𑀲𑀯𑀦-𑀥𑀸𑀭𑀡𑀧𑀭𑀺𑀘𑀬𑀧𑀝𑀺𑀯𑁂𑀥𑀯𑀺𑀫𑀼𑀔𑀸 𑀘 𑀯𑁂𑀦𑁂𑀬𑁆𑀬𑀸 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀪𑀸𑀚𑀦𑀁. 𑀧𑀺𑀡𑁆𑀟𑀢𑁆𑀣𑀸 𑀧𑀦 ‘‘𑀅𑀲𑁆𑀲𑀼𑀢𑀯𑀸’’𑀢𑀺𑀆𑀤𑀺𑀦𑀸 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑀅𑀓𑀼𑀲𑀮𑀫𑀽𑀮-𑀲𑀫𑀸𑀬𑁄𑀕𑁄 𑀑𑀮𑀻𑀬𑀦𑀸𑀢𑀺𑀥𑀸𑀯𑀦𑀸𑀧𑀭𑀺𑀕𑁆𑀕𑀳𑁄 𑀉𑀧𑀸𑀬𑀯𑀺𑀦𑀺𑀩𑀤𑁆𑀥𑀸𑀦𑀼𑀩𑁆𑀭𑀽𑀳𑀦𑀸 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀲𑀫𑀦𑁆𑀦𑀸𑀕𑀫𑁄 𑀅𑀯𑀺𑀚𑁆𑀚𑀸𑀢𑀡𑁆𑀳𑀸-𑀧𑀭𑀺𑀲𑀼𑀤𑁆𑀥𑀺 ¶ 𑀯𑀝𑁆𑀝𑀢𑁆𑀢𑀬𑀸𑀦𑀼𑀧𑀭𑀫𑁄 𑀆𑀲𑀯𑁄𑀖𑀬𑁄𑀕𑀕𑀦𑁆𑀣𑀸𑀕𑀢𑀺𑀢𑀡𑁆𑀳𑀼𑀧𑁆𑀧𑀸𑀤𑀼𑀧𑀸𑀤𑀸𑀦𑀸𑀯𑀺𑀬𑁄𑀕𑁄 𑀘𑁂𑀢𑁄𑀔𑀺𑀮-𑀘𑁂𑀢𑁄𑀯𑀺𑀦𑀺𑀩𑀤𑁆𑀥𑀅𑀪𑀺𑀦𑀦𑁆𑀤𑀦-𑀦𑀻𑀯𑀭𑀡𑀲𑀗𑁆𑀕𑀸𑀦𑀢𑀺𑀓𑁆𑀓𑀫𑁄 ¶ 𑀯𑀺𑀯𑀸𑀤𑀫𑀽𑀮𑀸𑀧𑀭𑀺𑀘𑁆𑀘𑀸𑀕𑁄 𑀅𑀦𑀼𑀲𑀬𑀸𑀦𑀼𑀧𑀘𑁆𑀙𑁂𑀤𑁄 𑀫𑀺𑀘𑁆𑀙𑀢𑁆𑀢𑀸𑀦𑀢𑀺𑀯𑀢𑁆𑀢𑀦𑀁 𑀢𑀡𑁆𑀳𑀸𑀫𑀽𑀮𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀬𑀢𑀸 𑀅𑀓𑀼𑀲𑀮𑀓𑀫𑁆𑀫𑀧𑀣𑀸𑀦𑀼𑀬𑁄𑀕𑁄 𑀲𑀩𑁆𑀩𑀓𑀺𑀮𑁂𑀲-𑀧𑀭𑀺𑀴𑀸𑀳𑀲𑀸𑀭𑀤𑁆𑀥𑀓𑀸𑀬𑀘𑀺𑀢𑁆𑀢𑀢𑀸𑀢𑀺 𑀏𑀯𑀫𑀸𑀤𑀬𑁄 𑀤𑀻𑀧𑀺𑀢𑀸 𑀳𑁄𑀦𑁆𑀢𑀺. ‘‘𑀧𑀣𑀯𑀺𑀁 𑀧𑀣𑀯𑀺𑀢𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀢𑀡𑁆𑀳𑀸𑀯𑀺𑀘𑀭𑀺𑀢𑀦𑀺𑀤𑁆𑀤𑁂𑀲𑁄 𑀫𑀸𑀦𑀚𑀧𑁆𑀧𑀦𑀸 𑀯𑀺𑀧𑀭𑀺𑀬𑁂𑀲𑀸𑀪𑀺𑀦𑀺𑀯𑁂𑀲𑁄 𑀲𑀁𑀓𑀺𑀮𑁂𑀲𑁄 𑀲𑀓𑁆𑀓𑀸𑀬𑀧𑀭𑀺𑀕𑁆𑀕𑀳𑁄 𑀩𑀸𑀮𑀮𑀓𑁆𑀔𑀡𑀸𑀧𑀤𑁂𑀲𑁄 𑀯𑀗𑁆𑀓𑀢𑁆𑀢𑀬𑀯𑀺𑀪𑀸𑀯𑀦𑀸𑀦𑀼𑀬𑁄𑀕𑁄 𑀩𑀳𑀼𑀓𑀸𑀭𑀧𑀝𑀺𑀧𑀓𑁆𑀔𑀤𑀻𑀧𑀦𑀸 𑀢𑀺𑀯𑀺𑀥𑀦𑀺𑀲𑁆𑀲𑀬𑀲𑀁𑀲𑀽𑀘𑀦𑀸 𑀆𑀲𑀯𑀓𑁆𑀔𑀬𑀓𑀣𑀦𑀦𑁆𑀢𑀺 𑀏𑀯𑀫𑀸𑀤𑀬𑁄 𑀤𑀻𑀧𑀺𑀢𑀸 𑀳𑁄𑀦𑁆𑀢𑀺.

𑀲𑁄𑀴𑀲𑀳𑀸𑀭𑀯𑀡𑁆𑀡𑀦𑀸

𑁧. 𑀤𑁂𑀲𑀦𑀸𑀳𑀸𑀭𑀯𑀡𑁆𑀡𑀦𑀸

𑀢𑀢𑁆𑀣 𑀬𑁂 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀥𑀫𑁆𑀫𑁂 𑀉𑀧𑀸𑀤𑀸𑀬 𑀧𑀣𑀯𑀻𑀆𑀤𑀺𑀪𑀽𑀢𑀸𑀤𑀺𑀪𑁂𑀤𑀸 𑀧𑀜𑁆𑀜𑀢𑁆𑀢𑀺, 𑀢𑁂 𑀧𑀜𑁆𑀜𑀢𑁆𑀢𑀺𑀧𑀝𑀺𑀧𑀸𑀤𑀦𑀪𑀸𑀯𑁂𑀦 𑀚𑀸𑀢𑀺𑀚𑀭𑀸𑀫𑀭𑀡𑀯𑀺𑀲𑁂𑀲𑀦𑀤𑀼𑀓𑁆𑀔𑀧𑀭𑀺𑀬𑀸𑀬𑁂𑀦 𑀘 𑀯𑀼𑀢𑁆𑀢𑀸 𑀢𑀡𑁆𑀳𑀸𑀯𑀚𑁆𑀚𑀸 𑀢𑁂𑀪𑀽𑀫𑀓𑀥𑀫𑁆𑀫𑀸 𑀤𑀼𑀓𑁆𑀔𑀲𑀘𑁆𑀘𑀁. 𑀫𑀜𑁆𑀜𑀦𑀸𑀪𑀺𑀦𑀦𑁆𑀤𑀦𑀦𑀦𑁆𑀤𑀻𑀧𑀭𑀺𑀬𑀸𑀬𑁂𑀳𑀺 𑀯𑀼𑀢𑁆𑀢𑀸 𑀢𑀡𑁆𑀳𑀸 𑀲𑀫𑀼𑀤𑀬𑀲𑀘𑁆𑀘𑀁. 𑀅𑀬𑀁 𑀢𑀸𑀯 𑀲𑀼𑀢𑁆𑀢𑀦𑁆𑀢𑀦𑀬𑁄. 𑀅𑀪𑀺𑀥𑀫𑁆𑀫𑀦𑀬𑁂 𑀧𑀦 𑀬𑀣𑀸𑀯𑀼𑀢𑁆𑀢𑀢𑀡𑁆𑀳𑀸𑀬 𑀲𑀤𑁆𑀥𑀺𑀁 ‘‘𑀅𑀲𑁆𑀲𑀼𑀢𑀯𑀸’’𑀢𑀺𑀆𑀤𑀺𑀦𑀸 𑀤𑀻𑀧𑀺𑀢𑀸 𑀅𑀯𑀺𑀚𑁆𑀚𑀸𑀤𑀬𑁄, 𑀫𑀜𑁆𑀜𑀦𑀸𑀧𑀭𑀺𑀬𑀸𑀬𑁂𑀦 𑀕𑀳𑀺𑀢𑀸 𑀫𑀸𑀦𑀤𑀺𑀝𑁆𑀞𑀺𑀬𑁄, 𑀪𑀯𑀧𑀤𑁂𑀦 𑀕𑀳𑀺𑀢𑁄 𑀓𑀫𑁆𑀫𑀪𑀯𑁄 𑀘𑀸𑀢𑀺 𑀲𑀩𑁆𑀩𑁂𑀧𑀺 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀸 𑀲𑀫𑀼𑀤𑀬𑀲𑀘𑁆𑀘𑀁. 𑀉𑀪𑀺𑀦𑁆𑀦𑀁 𑀅𑀧𑁆𑀧𑀯𑀢𑁆𑀢𑀺 𑀦𑀺𑀭𑁄𑀥𑀲𑀘𑁆𑀘𑀁. 𑀅𑀭𑀺𑀬𑀥𑀫𑁆𑀫𑀕𑁆𑀕𑀳𑀡𑁂𑀦, 𑀧𑀭𑀺𑀜𑁆𑀜𑀸𑀪𑀺𑀓𑁆𑀔𑀼𑀲𑁂𑀓𑁆𑀔𑀸𑀪𑀺𑀜𑁆𑀜𑀸𑀕𑀳𑀡𑁂𑀳𑀺, 𑀭𑀸𑀕𑀸𑀤𑀺𑀔𑀬𑀯𑀘𑀦𑁂𑀳𑀺, 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀕𑀳𑀡𑁂𑀦 𑀘 𑀫𑀕𑁆𑀕𑀲𑀘𑁆𑀘𑀁. 𑀓𑁂𑀘𑀺 𑀧𑀦 𑀢𑀡𑁆𑀳𑀸𑀓𑁆𑀔𑀬𑀸𑀤𑀺𑀯𑀘𑀦𑁂𑀳𑀺 𑀦𑀺𑀭𑁄𑀥𑀲𑀘𑁆𑀘𑀁 𑀉𑀤𑁆𑀥𑀭𑀦𑁆𑀢𑀺, 𑀢𑀁 𑀅𑀝𑁆𑀞𑀓𑀣𑀸𑀬 𑀯𑀺𑀭𑀼𑀚𑁆𑀛𑀢𑀺 𑀢𑀢𑁆𑀣 𑀢𑀡𑁆𑀳𑀸𑀓𑁆𑀔𑀬𑀸𑀤𑀻𑀦𑀁 𑀫𑀕𑁆𑀕𑀓𑀺𑀘𑁆𑀘𑀪𑀸𑀯𑀲𑁆𑀲 𑀉𑀤𑁆𑀥𑀝𑀢𑁆𑀢𑀸.

𑀢𑀢𑁆𑀣 𑀲𑀫𑀼𑀤𑀬𑁂𑀦 𑀅𑀲𑁆𑀲𑀸𑀤𑁄, 𑀤𑀼𑀓𑁆𑀔𑁂𑀦 𑀆𑀤𑀻𑀦𑀯𑁄, 𑀫𑀕𑁆𑀕𑀦𑀺𑀭𑁄𑀥𑁂𑀳𑀺 𑀦𑀺𑀲𑁆𑀲𑀭𑀡𑀁, 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀫𑀸𑀦𑀪𑀜𑁆𑀚𑀦𑀁 𑀨𑀮𑀁, 𑀢𑀣𑀸 ‘‘𑀬𑀣𑀸𑀯𑀼𑀢𑁆𑀢𑀯𑀺𑀪𑀸𑀕𑀸𑀯𑀩𑁄𑀥𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀧𑀬𑁄𑀚𑀦𑀜𑁆𑀘. 𑀢𑀲𑁆𑀲 𑀦𑀺𑀧𑁆𑀨𑀢𑁆𑀢𑀺𑀓𑀸𑀭𑀡𑀢𑁆𑀢𑀸 𑀤𑁂𑀲𑀦𑀸𑀬 𑀯𑀺𑀘𑀺𑀢𑁆𑀢𑀢𑀸 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀬𑀸𑀣𑀸𑀯𑀢𑁄 𑀲𑀪𑀸𑀯𑀽𑀧𑀥𑀸𑀭𑀡𑀜𑁆𑀘 𑀉𑀧𑀸𑀬𑁄 ¶ , 𑀧𑀣𑀯𑀻𑀆𑀤𑀻𑀲𑀼 𑀧𑀼𑀣𑀼𑀚𑁆𑀚𑀦𑀸𑀤𑀻𑀦𑀁 𑀧𑀯𑀢𑁆𑀢𑀺𑀤𑀲𑁆𑀲𑀦𑀸𑀧𑀤𑁂𑀲𑁂𑀦 𑀧𑀣𑀯𑀻𑀆𑀤𑀬𑁄 𑀏𑀓𑀦𑁆𑀢𑀢𑁄 𑀧𑀭𑀺𑀚𑀸𑀦𑀺𑀢𑀩𑁆𑀩𑀸, 𑀫𑀜𑁆𑀜𑀦𑀸 𑀘 𑀧𑀳𑀸𑀢𑀩𑁆𑀩𑀸𑀢𑀺 𑀅𑀬𑀫𑁂𑀢𑁆𑀣 𑀪𑀕𑀯𑀢𑁄 𑀆𑀡𑀢𑁆𑀢𑀻𑀢𑀺. 𑀅𑀬𑀁 𑀤𑁂𑀲𑀦𑀸𑀳𑀸𑀭𑁄.

𑁨. 𑀯𑀺𑀘𑀬𑀳𑀸𑀭𑀯𑀡𑁆𑀡𑀦𑀸

𑀫𑀜𑁆𑀜𑀦𑀸𑀦𑀁 ¶ 𑀲𑀓𑁆𑀓𑀸𑀬𑀲𑁆𑀲 𑀅𑀯𑀺𑀲𑁂𑀲𑀳𑁂𑀢𑀼𑀪𑀸𑀯𑀢𑁄, 𑀓𑀲𑁆𑀲𑀘𑀺𑀧𑀺 𑀢𑀢𑁆𑀣 𑀅𑀲𑁂𑀲𑀺𑀢𑀩𑁆𑀩𑀢𑁄 𑀘 𑀲𑀩𑁆𑀩𑀕𑀳𑀡𑀁, 𑀲𑀪𑀸𑀯𑀥𑀸𑀭𑀡𑀢𑁄 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀢𑁄 𑀘 𑀥𑀫𑁆𑀫𑀕𑁆𑀕𑀳𑀡𑀁, 𑀧𑀢𑀺𑀝𑁆𑀞𑀸𑀪𑀸𑀯𑀢𑁄 𑀆𑀯𑁂𑀡𑀺𑀓𑀳𑁂𑀢𑀼𑀪𑀸𑀯𑀢𑁄 𑀘 𑀫𑀽𑀮𑀕𑁆𑀕𑀳𑀡𑀁, 𑀓𑀸𑀭𑀡𑀪𑀸𑀯𑀢𑁄 𑀤𑁂𑀲𑀦𑀢𑁆𑀣𑀲𑀫𑁆𑀪𑀯𑀢𑁄 𑀘 𑀧𑀭𑀺𑀬𑀸𑀬𑀕𑁆𑀕𑀳𑀡𑀁, 𑀲𑀫𑁆𑀫𑀼𑀔𑀪𑀸𑀯𑀢𑁄 𑀲𑀫𑁆𑀧𑀤𑀸𑀦𑀢𑁆𑀣𑀲𑀫𑁆𑀪𑀯𑀢𑁄 𑀘 ‘‘𑀯𑁄’’𑀢𑀺 𑀯𑀘𑀦𑀁, 𑀢𑀣𑀸𑀭𑀽𑀧𑀕𑀼𑀡𑀬𑁄𑀕𑀢𑁄 𑀅𑀪𑀺𑀫𑀼𑀔𑀻𑀓𑀭𑀡𑀢𑁄 𑀘 ‘‘𑀪𑀺𑀓𑁆𑀔𑀯𑁂’’𑀢𑀺 𑀆𑀮𑀧𑀦𑀁. 𑀤𑁂𑀲𑁂𑀢𑀼𑀁 𑀲𑀫𑀢𑁆𑀣𑀪𑀸𑀯𑀢𑁄 𑀢𑁂𑀲𑀁 𑀲𑀢𑀼𑀧𑁆𑀧𑀸𑀤𑀦𑀢𑁆𑀣𑀜𑁆𑀘 ‘‘𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀚𑀸𑀦𑀦𑀁, 𑀤𑁂𑀲𑁂𑀢𑀩𑁆𑀩𑀢𑀸𑀬 𑀧𑀝𑀺𑀜𑁆𑀜𑀸𑀢𑀪𑀸𑀯𑀢𑁄, 𑀬𑀣𑀸𑀧𑀝𑀺𑀜𑁆𑀜𑀜𑁆𑀘 𑀤𑁂𑀲𑀦𑀢𑁄 ‘‘𑀢’’𑀦𑁆𑀢𑀺 𑀧𑀘𑁆𑀘𑀸𑀫𑀲𑀦𑀁, 𑀲𑁄𑀢𑀩𑁆𑀩𑀪𑀸𑀯𑀢𑁄, 𑀲𑀯𑀦𑀢𑁆𑀣𑀲𑁆𑀲 𑀘 𑀏𑀓𑀦𑁆𑀢𑁂𑀦 𑀦𑀺𑀧𑁆𑀨𑀸𑀤𑀦𑀢𑁄 ‘‘𑀲𑀼𑀡𑀸𑀣𑀸’’𑀢𑀺 𑀯𑀼𑀢𑁆𑀢𑀁. 𑀲𑀓𑁆𑀓𑀸𑀢𑀩𑁆𑀩𑀢𑁄, 𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸𑀬 𑀏𑀯 𑀘 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄 ‘‘𑀲𑀸𑀥𑀼𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀲𑁆𑀲 𑀫𑀦𑀲𑀺𑀓𑀭𑀡𑀻𑀬𑀢𑁄 𑀢𑀤𑀥𑀻𑀦𑀢𑁆𑀢𑀸 𑀘 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀦𑀁 ‘‘𑀫𑀦𑀲𑀺 𑀓𑀭𑁄𑀣𑀸’’𑀢𑀺 𑀯𑀼𑀢𑁆𑀢𑀁 𑀬𑀣𑀸𑀧𑀭𑀺𑀜𑁆𑀜𑀸𑀢𑀸𑀬 𑀤𑁂𑀲𑀦𑀸𑀬 𑀧𑀭𑀺𑀩𑁆𑀬𑀢𑁆𑀢𑀪𑀸𑀯𑀢𑁄 𑀯𑀺𑀢𑁆𑀣𑀸𑀭𑀢𑁆𑀣𑀲𑀫𑁆𑀪𑀯𑀢𑁄 𑀘 ‘‘𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀁. 𑀪𑀕𑀯𑀢𑁄 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀯𑀘𑀦𑀢𑁆𑀢𑀸, 𑀢𑀲𑁆𑀲 𑀘 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀲𑀸𑀥𑀦𑀢𑁄 ‘‘𑀏𑀯’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀢𑁆𑀣𑀼 𑀉𑀢𑁆𑀢𑀫𑀕𑀸𑀭𑀯𑀝𑁆𑀞𑀸𑀦𑀪𑀸𑀯𑀢𑁄, 𑀢𑀢𑁆𑀣 𑀘 𑀕𑀸𑀭𑀯𑀲𑁆𑀲 𑀉𑀴𑀸𑀭𑀧𑀼𑀜𑁆𑀜𑀪𑀸𑀯𑀢𑁄 ‘‘𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀽𑀦𑀁 𑀢𑀣𑀸𑀓𑀺𑀭𑀺𑀬𑀸𑀬 𑀦𑀺𑀘𑁆𑀙𑀺𑀢𑀪𑀸𑀯𑀢𑁄 𑀯𑀘𑀦𑀸𑀮𑀗𑁆𑀓𑀸𑀭𑀢𑁄 𑀘 ‘‘𑀔𑁄’’𑀢𑀺 𑀯𑀼𑀢𑁆𑀢𑀁. 𑀲𑀯𑀦𑀲𑁆𑀲 𑀧𑀝𑀺𑀚𑀸𑀦𑀺𑀢𑀩𑁆𑀩𑀢𑁄, 𑀢𑀣𑀸 𑀢𑁂𑀳𑀺 𑀧𑀝𑀺𑀧𑀦𑁆𑀦𑀢𑁆𑀢𑀸 𑀘 ‘‘𑀧𑀘𑁆𑀘𑀲𑁆𑀲𑁄𑀲𑀼’’𑀦𑁆𑀢𑀺 𑀯𑀼𑀢𑁆𑀢𑀁 𑀧𑀘𑁆𑀘𑀓𑁆𑀔𑀪𑀸𑀯𑀢𑁄, 𑀲𑀓𑀮𑀲𑁆𑀲𑀧𑀺 𑀏𑀓𑀚𑁆𑀛𑀁 𑀓𑀭𑀡𑀢𑁄 ‘‘𑀏𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀯𑀼𑀘𑁆𑀘𑀫𑀸𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀮𑁄𑀓𑀸𑀥𑀸𑀭𑀢𑁆𑀢𑀸 𑀘 𑀮𑁄𑀓𑀁 𑀉𑀧𑀸𑀤𑀸𑀬 ‘‘𑀇𑀥𑀸’’𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀯𑁂𑀥𑀩𑀸𑀳𑀼𑀲𑀘𑁆𑀘𑀸𑀪𑀸𑀯𑀢𑁄 𑀧𑀭𑀺𑀬𑀢𑁆𑀢𑀺𑀩𑀸𑀳𑀼𑀲𑀘𑁆𑀘𑀸𑀪𑀸𑀯𑀢𑁄 𑀘 ‘‘𑀅𑀲𑁆𑀲𑀼𑀢𑀯𑀸’’𑀢𑀺 𑀯𑀼𑀢𑁆𑀢𑀁. 𑀧𑀼𑀣𑀽𑀲𑀼, 𑀧𑀼𑀣𑀼 𑀯𑀸 𑀚𑀦𑀪𑀸𑀯𑀢𑁄 ‘‘𑀧𑀼𑀣𑀼𑀚𑁆𑀚𑀦𑁄’’𑀢𑀺 𑀯𑀼𑀢𑁆𑀢𑀁. 𑀅𑀦𑀭𑀺𑀬𑀥𑀫𑁆𑀫𑀯𑀺𑀭𑀳𑀢𑁄 𑀅𑀭𑀺𑀬𑀥𑀫𑁆𑀫𑀲𑀫𑀦𑁆𑀦𑀸𑀕𑀫𑀢𑁄 𑀘 ‘‘𑀅𑀭𑀺𑀬𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀭𑀺𑀬𑀪𑀸𑀯𑀓𑀭𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄, 𑀢𑀢𑁆𑀣 𑀓𑁄𑀲𑀮𑁆𑀮𑀤𑀫𑀣𑀸𑀪𑀸𑀯𑀢𑁄 ‘‘𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀲𑀦𑁆𑀢𑀥𑀫𑁆𑀫𑀲𑁆𑀲𑀯𑀦𑀢𑁄 𑀲𑀦𑁆𑀢𑀥𑀫𑁆𑀫𑀲𑀫𑀦𑁆𑀦𑀸𑀕𑀫𑀢𑁄 𑀲𑀩𑁆𑀪𑀺 𑀧𑀸𑀲𑀁𑀲𑀺𑀬𑀢𑁄 ¶ 𑀘 ‘‘𑀲𑀧𑁆𑀧𑀼𑀭𑀺𑀲𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀧𑁆𑀧𑀼𑀭𑀺𑀲𑀪𑀸𑀯𑀓𑀭𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄, 𑀢𑀢𑁆𑀣 𑀘 𑀓𑁄𑀲𑀮𑁆𑀮𑀤𑀫𑀣𑀸𑀪𑀸𑀯𑀢𑁄 ‘‘𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀣𑀯𑀻𑀯𑀢𑁆𑀣𑀼𑀓𑀸𑀦𑀁 𑀫𑀜𑁆𑀜𑀦𑀸𑀦𑀁, 𑀉𑀧𑀭𑀺 𑀯𑀼𑀘𑁆𑀘𑀫𑀸𑀦𑀸𑀦𑀜𑁆𑀘𑀫𑀜𑁆𑀜𑀦𑀸𑀦𑀁 𑀫𑀽𑀮𑀓𑀢𑁆𑀢𑀸 𑀧𑀧𑀜𑁆𑀘𑀲𑀗𑁆𑀔𑀸𑀦𑀁 ‘‘𑀧𑀣𑀯𑀺𑀁 𑀧𑀣𑀯𑀺𑀢𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀳𑀁𑀓𑀸𑀭-𑀫𑀫𑀁𑀓𑀸𑀭𑀸𑀦𑀁 𑀓𑀢𑁆𑀣𑀘𑀺𑀧𑀺 𑀅𑀧𑁆𑀧𑀳𑀻𑀦𑀢𑁆𑀢𑀸 ‘‘𑀧𑀣𑀯𑀺𑀁 𑀫𑀜𑁆𑀜𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀧𑀼𑀩𑁆𑀩𑁂 ¶ 𑀅𑀕𑁆𑀕𑀳𑀺𑀢𑀢𑁆𑀢𑀸, 𑀲𑀸𑀫𑀜𑁆𑀜𑀢𑁄 𑀘 𑀕𑀬𑁆𑀳𑀫𑀸𑀦𑀢𑁆𑀢𑀸, 𑀧𑀼𑀕𑁆𑀕𑀮𑀲𑁆𑀲 𑀧𑀣𑀯𑀻𑀆𑀤𑀺𑀆𑀭𑀫𑁆𑀫𑀡𑀲𑀪𑀸𑀕𑀢𑀸𑀬 𑀮𑀩𑁆𑀪𑀫𑀸𑀦𑀢𑁆𑀢𑀸 𑀘 ‘‘𑀬𑁄𑀧𑀻’’𑀢𑀺 𑀯𑀼𑀢𑁆𑀢𑀁. ‘‘𑀬𑁄’’𑀢𑀺 𑀅𑀦𑀺𑀬𑀫𑁂𑀦 𑀕𑀳𑀺𑀢𑀲𑁆𑀲 𑀦𑀺𑀬𑀫𑁂𑀢𑀩𑁆𑀩𑀢𑁄 𑀧𑀝𑀺𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑁄 𑀘; ‘‘𑀲𑁄’’𑀢𑀺 𑀯𑀼𑀢𑁆𑀢𑀁 𑀲𑀸𑀢𑀺𑀲𑀬𑀁 𑀲𑀁𑀲𑀸𑀭𑁂 𑀪𑀬𑀲𑁆𑀲 𑀇𑀓𑁆𑀔𑀦𑀢𑁄 𑀓𑀺𑀮𑁂𑀲𑀪𑁂𑀤𑀦𑀲𑀫𑁆𑀪𑀯𑀢𑁄 𑀘 ‘‘𑀪𑀺𑀓𑁆𑀔𑀽’’𑀢𑀺 𑀯𑀼𑀢𑁆𑀢𑀁. 𑀲𑀺𑀓𑁆𑀔𑀸𑀳𑀺 𑀲𑀫𑀦𑁆𑀦𑀸𑀕𑀫𑀢𑁄 𑀲𑁂𑀓𑁆𑀔𑀥𑀫𑁆𑀫𑀧𑀝𑀺𑀮𑀸𑀪𑀢𑁄 𑀘 ‘‘𑀲𑁂𑀓𑁆𑀔𑁄’’𑀢𑀺 𑀯𑀼𑀢𑁆𑀢𑀁. 𑀫𑀦𑀲𑀸 𑀮𑀤𑁆𑀥𑀩𑁆𑀩𑀲𑁆𑀲 𑀅𑀭𑀳𑀢𑁆𑀢𑀲𑁆𑀲 𑀅𑀦𑀥𑀺𑀕𑀢𑀢𑁆𑀢𑀸 𑀅𑀥𑀺𑀕𑀫𑀦𑀻𑀬𑀢𑁄 𑀘 ‘‘𑀅𑀧𑁆𑀧𑀢𑁆𑀢𑀫𑀸𑀦𑀲𑁄’’𑀢𑀺 𑀯𑀼𑀢𑁆𑀢𑀁. 𑀅𑀧𑀭𑁂𑀦 𑀅𑀦𑀼𑀢𑁆𑀢𑀭𑀡𑀻𑀬𑀢𑁄, 𑀧𑀭𑀁 𑀅𑀦𑀼𑀘𑁆𑀙𑀯𑀺𑀓𑀪𑀸𑀯𑁂𑀦 𑀉𑀢𑁆𑀢𑀭𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀘 ‘‘𑀅𑀦𑀼𑀢𑁆𑀢𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑁄𑀕𑁂𑀦 𑀪𑀸𑀯𑀦𑀸𑀬 𑀓𑀸𑀫𑀬𑁄𑀕𑀸𑀤𑀺𑀢𑁄 𑀘 𑀔𑁂𑀫𑀁 𑀲𑀺𑀯𑀁 𑀅𑀦𑀼𑀧𑀤𑁆𑀤𑀯𑀦𑁆𑀢𑀺 ‘‘𑀬𑁄𑀕𑀓𑁆𑀔𑁂𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀙𑀦𑁆𑀤𑀧𑁆𑀧𑀯𑀢𑁆𑀢𑀺𑀬𑀸 𑀉𑀲𑁆𑀲𑀼𑀓𑁆𑀓𑀸𑀧𑀢𑁆𑀢𑀺𑀬𑀸 𑀘 ‘‘𑀧𑀢𑁆𑀣𑀬𑀫𑀸𑀦𑁄’’𑀢𑀺 𑀯𑀼𑀢𑁆𑀢𑀁. 𑀢𑀤𑀢𑁆𑀣𑀲𑁆𑀲 𑀲𑀩𑁆𑀩𑀲𑁄 𑀲𑀩𑁆𑀩𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑀲𑁆𑀲 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀺𑀳𑀸𑀭𑀲𑁆𑀲 𑀤𑀺𑀩𑁆𑀩𑀯𑀺𑀳𑀸𑀭𑀲𑁆𑀲 𑀘 𑀯𑀲𑁂𑀦 ‘‘𑀯𑀺𑀳𑀭𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑁂𑀓𑁆𑀔𑀲𑁆𑀲 𑀲𑀩𑁆𑀩𑀲𑁄 𑀅𑀪𑀺𑀜𑁆𑀜𑁂𑀬𑁆𑀬𑀪𑀸𑀯𑀜𑁆𑀘𑁂𑀯 𑀧𑀭𑀺𑀜𑁆𑀜𑁂𑀬𑁆𑀬𑀪𑀸𑀯𑀜𑁆𑀘 𑀜𑀸𑀡𑁂𑀦 𑀅𑀪𑀺𑀪𑀯𑀺𑀢𑁆𑀯𑀸 𑀚𑀸𑀦𑀦𑀢𑁄 ‘‘𑀅𑀪𑀺𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑁂𑀓𑁆𑀔𑀲𑁆𑀲 𑀲𑀩𑁆𑀩𑀲𑁄 𑀅𑀧𑁆𑀧𑀳𑀻𑀦𑀫𑀜𑁆𑀜𑀦𑀢𑀸𑀬 𑀅𑀪𑀸𑀯𑀢𑁄 ‘‘𑀫𑀸 𑀫𑀜𑁆𑀜𑀻’’𑀢𑀺 𑀯𑀼𑀢𑁆𑀢𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀺𑀦𑀸 𑀦𑀬𑁂𑀦 𑀇𑀢𑁄 𑀧𑀭𑀁 𑀲𑀩𑁆𑀩𑀧𑀤𑁂𑀲𑀼 𑀯𑀺𑀦𑀺𑀘𑁆𑀙𑀬𑁄 𑀓𑀸𑀢𑀩𑁆𑀩𑁄. 𑀲𑀓𑁆𑀓𑀸 𑀳𑀺 𑀅𑀝𑁆𑀞𑀓𑀣𑀁 𑀢𑀲𑁆𑀲𑀸 𑀮𑀻𑀦𑀢𑁆𑀣𑀯𑀡𑁆𑀡𑀦𑀜𑁆𑀘 𑀅𑀦𑀼𑀕𑀦𑁆𑀢𑁆𑀯𑀸 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀽𑀳𑀺 𑀯𑀺𑀪𑀸𑀯𑁂𑀢𑀼𑀦𑁆𑀢𑀺 𑀅𑀢𑀺𑀯𑀺𑀢𑁆𑀣𑀸𑀭𑀪𑀬𑁂𑀦 𑀦 𑀯𑀺𑀢𑁆𑀣𑀸𑀭𑀬𑀺𑀫𑁆𑀳. 𑀇𑀢𑀺 𑀅𑀦𑀼𑀧𑀤𑀯𑀺𑀘𑀬𑀢𑁄 𑀯𑀺𑀘𑀬𑁄 𑀳𑀸𑀭𑁄.

𑁩. 𑀬𑀼𑀢𑁆𑀢𑀺𑀳𑀸𑀭𑀯𑀡𑁆𑀡𑀦𑀸

𑀲𑀓𑁆𑀓𑀸𑀬𑀲𑁆𑀲 𑀲𑀩𑁆𑀩𑀫𑀜𑁆𑀜𑀦𑀸𑀦𑀁 𑀫𑀽𑀮𑀪𑀸𑀯𑁄 𑀬𑀼𑀚𑁆𑀚𑀢𑀺 𑀧𑀭𑀺𑀓𑀧𑁆𑀧𑀫𑀢𑁆𑀢𑀓𑀢𑁆𑀢𑀸 𑀮𑁄𑀓𑀯𑀺𑀘𑀺𑀢𑁆𑀢𑀲𑁆𑀲. 𑀩𑁆𑀬𑀸𑀳𑀼𑀲𑀘𑁆𑀘𑀤𑁆𑀯𑀬𑀭𑀳𑀺𑀢𑀲𑁆𑀲 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀪𑀸𑀯𑁄 𑀬𑀼𑀚𑁆𑀚𑀢𑀺 𑀧𑀼𑀣𑀼𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀚𑀦𑀦𑀸𑀤𑀺𑀲𑀪𑀸𑀯𑀢𑁆𑀢𑀸. 𑀬𑀣𑀸𑀯𑀼𑀢𑁆𑀢𑀧𑀼𑀣𑀼𑀚𑁆𑀚𑀦𑀲𑁆𑀲 𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀩𑀸𑀳𑀼𑀲𑀘𑁆𑀘𑀸𑀪𑀸𑀯𑁄 𑀬𑀼𑀚𑁆𑀚𑀢𑀺 𑀢𑀲𑁆𑀫𑀺𑀁 𑀲𑀢𑀺 𑀲𑀩𑁆𑀪𑀸𑀯𑀢𑁄. 𑀢𑀢𑁆𑀣 𑀅𑀲𑁆𑀲𑀼𑀢𑀯𑀢𑁄 ¶ 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀭𑀺𑀬𑀸𑀦𑀁 𑀲𑀧𑁆𑀧𑀼𑀭𑀺𑀲𑀸𑀦𑀜𑁆𑀘 𑀅𑀤𑀲𑁆𑀲𑀸𑀯𑀺𑀢𑀸𑀤𑀺 𑀬𑀼𑀚𑁆𑀚𑀢𑀺 𑀅𑀭𑀺𑀬𑀓𑀭𑀥𑀫𑁆𑀫𑀸𑀦𑀁 𑀅𑀭𑀺𑀬𑀪𑀸𑀯𑀲𑁆𑀲 𑀘 𑀢𑁂𑀦 𑀅𑀤𑀺𑀝𑁆𑀞𑀢𑁆𑀢𑀸 𑀅𑀧𑁆𑀧𑀝𑀺𑀧𑀦𑁆𑀦𑀢𑁆𑀢𑀸 𑀘 𑀢𑀣𑀸 𑀢𑀲𑁆𑀲 𑀧𑀣𑀯𑀺𑀬𑀸 ‘‘𑀅𑀳𑀁 𑀧𑀣𑀯𑀻, 𑀫𑀫 𑀧𑀣𑀯𑀻, 𑀧𑀭𑁄 𑀧𑀣𑀯𑀻’’𑀢𑀺 𑀲𑀜𑁆𑀚𑀸𑀦𑀦𑀁 𑀬𑀼𑀚𑁆𑀚𑀢𑀺 𑀅𑀳𑀁𑀓𑀸𑀭𑀫𑀫𑀁𑀓𑀸𑀭𑀸𑀦𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀧𑁆𑀧𑀳𑀻𑀦𑀢𑁆𑀢𑀸. 𑀢𑀣𑀸 𑀲𑀜𑁆𑀚𑀸𑀦𑀢𑁄 𑀘𑀲𑁆𑀲 𑀧𑀣𑀯𑀺𑀁 𑀓𑀫𑁆𑀫𑀸𑀤𑀺𑀓𑀭𑀡𑀸𑀤𑀺𑀯𑀲𑁂𑀦 𑀕𑀳𑁂𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀢𑁄 𑀫𑀜𑁆𑀜𑀦𑀸𑀧𑀯𑀢𑁆𑀢𑀺 𑀬𑀼𑀚𑁆𑀚𑀢𑀺 𑀲𑀜𑁆𑀜𑀸𑀦𑀺𑀤𑀸𑀦𑀢𑁆𑀢𑀸 𑀧𑀧𑀜𑁆𑀘𑀲𑀗𑁆𑀔𑀸𑀦𑀁. 𑀬𑁄 𑀫𑀜𑁆𑀜𑀢𑀺, 𑀢𑀲𑁆𑀲 𑀅𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀢𑀸 𑀬𑀼𑀚𑁆𑀚𑀢𑀺 𑀧𑀭𑀺𑀜𑁆𑀜𑀸𑀬 𑀯𑀺𑀦𑀸 𑀫𑀜𑁆𑀜𑀦𑀸𑀧𑀳𑀸𑀦𑀸𑀪𑀸𑀯𑀢𑁄. ‘‘𑀆𑀧𑀁 𑀆𑀧𑀢𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀧𑀭𑀺𑀬𑁄𑀲𑀺𑀢𑀲𑀺𑀓𑁆𑀔𑀲𑁆𑀲 𑀅𑀧𑁆𑀧𑀢𑁆𑀢𑀫𑀸𑀦𑀲𑀢𑀸 𑀬𑀼𑀚𑁆𑀚𑀢𑀺 𑀓𑀢𑀓𑀺𑀘𑁆𑀘𑀢𑀸𑀪𑀸𑀯𑀢𑁄. 𑀲𑁂𑀓𑁆𑀔𑀲𑁆𑀲 𑀲𑀢𑁄 𑀬𑁄𑀕𑀓𑁆𑀔𑁂𑀫𑀧𑀢𑁆𑀣𑀦𑀸 𑀬𑀼𑀚𑁆𑀚𑀢𑀺 𑀢𑀤𑀥𑀺𑀫𑀼𑀢𑁆𑀢𑀪𑀸𑀯𑀢𑁄. 𑀢𑀣𑀸 𑀢𑀲𑁆𑀲 𑀧𑀣𑀯𑀺𑀬𑀸 𑀅𑀪𑀺𑀚𑀸𑀦𑀦𑀸 𑀬𑀼𑀚𑁆𑀚𑀢𑀺 𑀧𑀭𑀺𑀜𑁆𑀜𑀸𑀧𑀳𑀸𑀦𑁂𑀲𑀼 𑀫𑀢𑁆𑀢𑀲𑁄 𑀓𑀸𑀭𑀺𑀪𑀸𑀯𑀢𑁄. 𑀢𑀢𑁄 𑀏𑀯 𑀘𑀲𑁆𑀲 ‘‘𑀫𑀸 𑀫𑀜𑁆𑀜𑀻’’𑀢𑀺 𑀯𑀢𑁆𑀢𑀩𑁆𑀩𑀢𑀸 𑀬𑀼𑀚𑁆𑀚𑀢𑀺 𑀯𑀢𑁆𑀣𑀼𑀧𑀭𑀺𑀜𑁆𑀜𑀸𑀬 ¶ 𑀯𑀺𑀬 𑀫𑀜𑁆𑀜𑀦𑀸𑀧𑀳𑀸𑀦𑀲𑁆𑀲𑀧𑀺 𑀯𑀺𑀧𑁆𑀧𑀓𑀢𑀪𑀸𑀯𑀢𑁄. 𑀲𑁂𑀓𑁆𑀔𑀲𑁆𑀲 𑀧𑀣𑀯𑀺𑀬𑀸 𑀧𑀭𑀺𑀜𑁆𑀜𑁂𑀬𑁆𑀬𑀢𑀸 𑀬𑀼𑀚𑁆𑀚𑀢𑀺 𑀧𑀭𑀺𑀜𑁆𑀜𑀸𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀲𑀩𑁆𑀩𑀲𑁄 𑀅𑀧𑀭𑀺𑀜𑁆𑀜𑀸𑀢𑀢𑁆𑀢𑀸 𑀘. ‘‘𑀆𑀧𑀁 𑀆𑀧𑀢𑁄’’𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀭𑀳𑀢𑁆𑀢𑀸𑀤𑀺𑀬𑀼𑀢𑁆𑀢𑀲𑁆𑀲 𑀧𑀣𑀯𑀺𑀬𑀸𑀤𑀻𑀦𑀁 𑀅𑀪𑀺𑀚𑀸𑀦𑀦𑀸 𑀫𑀜𑁆𑀜𑀦𑀸𑀪𑀸𑀯𑁄 𑀘 𑀬𑀼𑀚𑁆𑀚𑀢𑀺 𑀲𑀗𑁆𑀔𑀸𑀢𑀥𑀫𑁆𑀫𑀢𑁆𑀢𑀸, 𑀲𑀩𑁆𑀩𑀲𑁄 𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸, 𑀢𑀢𑁄 𑀏𑀯 𑀘𑀲𑁆𑀲 𑀯𑀻𑀢𑀭𑀸𑀕𑀸𑀤𑀺𑀪𑀸𑀯𑁄 𑀢𑀢𑁄 𑀲𑀫𑁆𑀫𑀤𑁂𑀯 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀧𑀝𑀺𑀯𑀺𑀤𑁆𑀥𑀢𑀸𑀢𑀺. 𑀅𑀬𑀁 𑀬𑀼𑀢𑁆𑀢𑀺𑀳𑀸𑀭𑁄.

𑁪. 𑀧𑀤𑀝𑁆𑀞𑀸𑀦𑀳𑀸𑀭𑀯𑀡𑁆𑀡𑀦𑀸

𑀓𑀺𑀲𑁆𑀲𑁄𑀧𑀺 𑀫𑀜𑁆𑀜𑀦𑀸 𑀲𑀓𑁆𑀓𑀸𑀬𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀫𑀜𑁆𑀜𑀦𑀸𑀦𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀧𑀤𑀝𑁆𑀞𑀸𑀦𑀁, 𑀲𑀼𑀢𑀤𑁆𑀯𑀬𑀯𑀺𑀭𑀳𑁄 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀪𑀸𑀯𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀲𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀺𑀢𑀸𑀬 𑀧𑀤𑀝𑁆𑀞𑀸𑀦𑀁, 𑀲𑀸 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑀢𑀸𑀬 𑀧𑀤𑀝𑁆𑀞𑀸𑀦𑀁, 𑀲𑀸 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑀢𑀸𑀬 𑀧𑀤𑀝𑁆𑀞𑀸𑀦𑀁. ‘‘𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻’’𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑁄 𑀫𑀜𑁆𑀜𑀦𑀸𑀦𑀁 𑀧𑀤𑀝𑁆𑀞𑀸𑀦𑀁. 𑀲𑀜𑁆𑀜𑀸𑀦𑀺𑀤𑀸𑀦𑀸 𑀳𑀺 𑀧𑀧𑀜𑁆𑀘𑀲𑀗𑁆𑀔𑀸𑀢𑀺. 𑀫𑀜𑁆𑀜𑀦𑀸𑀲𑀼 𑀘 𑀢𑀡𑁆𑀳𑀸𑀫𑀜𑁆𑀜𑀦𑀸 𑀇𑀢𑀭𑀫𑀜𑁆𑀜𑀦𑀸𑀦𑀁 𑀧𑀤𑀝𑁆𑀞𑀸𑀦𑀁 ‘‘𑀢𑀡𑁆𑀳𑀸𑀕𑀢𑀸𑀦𑀁 𑀧𑀭𑀺𑀢𑀲𑁆𑀲𑀺𑀢𑀯𑀺𑀧𑁆𑀨𑀦𑁆𑀤𑀺𑀢’’𑀦𑁆𑀢𑀺, (𑀤𑀻. 𑀦𑀺. 𑁧.𑁧𑁦𑁫-𑁧𑁦𑁯) ‘‘𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦’’𑀦𑁆𑀢𑀺 (𑀫. 𑀦𑀺. 𑁩.𑁧𑁨𑁬; 𑀫𑀳𑀸𑀯. 𑁧) 𑀘 𑀯𑀘𑀦𑀢𑁄, 𑀢𑀡𑁆𑀳𑀸𑀕𑀢𑀲𑁆𑀲𑁂𑀯 𑀘 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀺’’𑀦𑁆𑀢𑀺𑀆𑀤𑀺𑀦𑀸 𑀫𑀸𑀦𑀚𑀧𑁆𑀧𑀦𑀸𑀲𑀩𑁆𑀪𑀸𑀯𑀢𑀸. 𑀲𑀩𑁆𑀩𑀸𑀧𑀺 𑀯𑀸 𑀫𑀜𑁆𑀜𑀦𑀸 𑀲𑀩𑁆𑀩𑀸𑀲𑀁 𑀫𑀜𑁆𑀜𑀦𑀸𑀦𑀁 𑀧𑀤𑀝𑁆𑀞𑀸𑀦𑀁 ¶ . ‘‘𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀢𑀡𑁆𑀳𑀸’’𑀢𑀺 𑀳𑀺 𑀯𑀘𑀦𑀢𑁄 𑀤𑀺𑀝𑁆𑀞𑀺𑀧𑀺 𑀢𑀡𑁆𑀳𑀸𑀬 𑀧𑀤𑀝𑁆𑀞𑀸𑀦𑀁. ‘‘𑀅𑀳𑀫𑀲𑁆𑀫𑀺 𑀩𑁆𑀭𑀳𑁆𑀫𑀸 𑀫𑀳𑀸𑀩𑁆𑀭𑀳𑁆𑀫𑀸’’𑀢𑀺 (𑀤𑀻. 𑀦𑀺. 𑁧.𑁪𑁨; 𑁩.𑁩𑁯) 𑀆𑀤𑀺𑀯𑀘𑀦𑀢𑁄 𑀫𑀸𑀦𑁄𑀧𑀺 𑀤𑀺𑀝𑁆𑀞𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀢𑀣𑀸 ‘‘𑀅𑀲𑁆𑀫𑀻𑀢𑀺 𑀲𑀢𑀺 𑀇𑀢𑁆𑀣𑀁𑀲𑁆𑀫𑀻𑀢𑀺 𑀳𑁄𑀢𑀺, 𑀏𑀯𑀁𑀲𑁆𑀫𑀻𑀢𑀺 𑀳𑁄𑀢𑀺, 𑀅𑀜𑁆𑀜𑀣𑀸𑀲𑁆𑀫𑀻𑀢𑀺 𑀳𑁄𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 𑀫𑀸𑀦𑀲𑁆𑀲𑀧𑀺 𑀢𑀡𑁆𑀳𑀸𑀬 𑀧𑀤𑀝𑁆𑀞𑀸𑀦𑀢𑀸 𑀮𑀩𑁆𑀪𑀢𑁂𑀯. 𑀲𑁂𑀓𑁆𑀔𑀸 𑀥𑀫𑁆𑀫𑀸 𑀲𑀧𑁆𑀧𑀤𑁂𑀲𑀢𑁄 𑀫𑀜𑁆𑀜𑀦𑀸𑀧𑀳𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀲𑁂𑀓𑁆𑀔𑀸 𑀦𑀺𑀧𑁆𑀧𑀤𑁂𑀲𑀢𑁄 𑀫𑀜𑁆𑀜𑀦𑀸𑀧𑀳𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀓𑀫𑁆𑀫𑀪𑀯𑁄 𑀘 𑀚𑀸𑀢𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀚𑀸𑀢𑀺 𑀚𑀭𑀸𑀫𑀭𑀡𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀧𑀘𑁆𑀘𑀬𑀸𑀓𑀸𑀭𑀲𑁆𑀲 𑀬𑀣𑀸𑀪𑀽𑀢𑀸𑀯𑀩𑁄𑀥𑁄 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀧𑀤𑀝𑁆𑀞𑀸𑀦𑀦𑁆𑀢𑀺. 𑀅𑀬𑀁 𑀧𑀤𑀝𑁆𑀞𑀸𑀦𑁄 𑀳𑀸𑀭𑁄.

𑁫. 𑀮𑀓𑁆𑀔𑀡𑀳𑀸𑀭𑀯𑀡𑁆𑀡𑀦𑀸

‘‘𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬’’𑀦𑁆𑀢𑀺 𑀏𑀢𑁆𑀣 𑀫𑀽𑀮𑀕𑁆𑀕𑀳𑀡𑁂𑀦 𑀫𑀽𑀮𑀧𑀭𑀺𑀬𑀸𑀬𑀕𑁆𑀕𑀳𑀡𑁂𑀦 𑀯𑀸 𑀬𑀣𑀸 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀬𑁄 𑀕𑀬𑁆𑀳𑀦𑁆𑀢𑀺, 𑀏𑀯𑀁 𑀤𑁄𑀲𑀫𑁄𑀳𑀸𑀤𑀻𑀦𑀫𑁆𑀧𑀺 𑀲𑀓𑁆𑀓𑀸𑀬𑀫𑀽𑀮𑀥𑀫𑁆𑀫𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄 𑀲𑀓𑁆𑀓𑀸𑀬𑀲𑁆𑀲 𑀫𑀽𑀮𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. ‘‘𑀅𑀲𑁆𑀲𑀼𑀢𑀯𑀸’’𑀢𑀺 𑀇𑀫𑀺𑀦𑀸 𑀬𑀣𑀸 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀬𑀢𑁆𑀢𑀺𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑀸𑀦𑀁 𑀅𑀪𑀸𑀯𑁄 𑀕𑀬𑁆𑀳𑀢𑀺, 𑀏𑀯𑀁 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑀲𑁆𑀲𑀧𑀺 𑀅𑀪𑀸𑀯𑁄 𑀕𑀬𑁆𑀳𑀢𑀺 𑀲𑀤𑁆𑀥𑀫𑁆𑀫𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀓𑀸𑀫𑀢𑀸𑀤𑀺𑀮𑀓𑁆𑀔𑀡𑀸. ‘‘𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄’’𑀢𑀺 ¶ 𑀇𑀫𑀺𑀦𑀸 𑀅𑀭𑀺𑀬𑀥𑀫𑁆𑀫𑀸𑀥𑀺𑀕𑀫𑀲𑁆𑀲 𑀯𑀺𑀩𑀦𑁆𑀥𑀪𑀽𑀢𑀁 𑀅𑀜𑁆𑀜𑀸𑀡𑀁. ‘‘𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄’’𑀢𑀺 𑀇𑀫𑀺𑀦𑀸 𑀅𑀭𑀺𑀬𑀯𑀺𑀦𑀬𑀸𑀪𑀸𑀯𑁄. 𑀲𑁄 𑀧𑀦𑀢𑁆𑀣𑀢𑁄 𑀅𑀭𑀺𑀬𑀯𑀺𑀦𑀬𑁂 𑀅𑀧𑁆𑀧𑀝𑀺𑀧𑀢𑁆𑀢𑀺 𑀏𑀯 𑀯𑀸𑀢𑀺 𑀢𑀻𑀳𑀺𑀧𑀺 𑀧𑀤𑁂𑀳𑀺 𑀬𑀣𑀸𑀯𑀼𑀢𑁆𑀢𑀯𑀺𑀲𑀬𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀘 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀢𑀕𑁆𑀕𑀳𑀡𑁂𑀦 𑀘 𑀲𑀩𑁆𑀩𑁂𑀧𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀗𑁆𑀕𑀳𑀺𑀢𑀸𑀯 𑀳𑁄𑀦𑁆𑀢𑀺 𑀲𑀁𑀓𑀺𑀮𑁂𑀲𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. ‘‘𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻’’𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

‘‘𑀧𑀣𑀯𑀺𑀁 𑀧𑀣𑀯𑀺𑀢𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺 𑀇𑀤𑀁 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀤𑀻𑀦𑀁 𑀲𑀜𑁆𑀜𑀸𑀬 𑀓𑀸𑀭𑀡𑀪𑀸𑀯𑀤𑀲𑁆𑀲𑀦𑀁. 𑀢𑀢𑁆𑀣 𑀬𑀣𑀸 𑀲𑀜𑁆𑀜𑀸, 𑀏𑀯𑀁 𑀯𑀺𑀢𑀓𑁆𑀓𑀨𑀲𑁆𑀲𑀸𑀯𑀺𑀚𑁆𑀚𑀸𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀬𑁄𑀧𑀺 𑀢𑀸𑀲𑀁 𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑀢𑁄 𑀢𑁂𑀲𑀫𑁆𑀧𑁂𑀢𑁆𑀣 𑀲𑀗𑁆𑀕𑀳𑁄 𑀯𑀼𑀢𑁆𑀢𑁄 𑀳𑁄𑀢𑀺 𑀫𑀜𑁆𑀜𑀦𑀸𑀦𑀁 𑀓𑀸𑀭𑀡𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. ‘‘𑀫𑀜𑁆𑀜𑀢𑀻’’𑀢𑀺 𑀇𑀫𑀺𑀦𑀸 𑀫𑀜𑁆𑀜𑀦𑀸𑀓𑀺𑀘𑁆𑀘𑁂𑀦 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀬𑁄 𑀕𑀳𑀺𑀢𑀸 ¶ 𑀢𑀸𑀲𑀁 𑀓𑀺𑀮𑁂𑀲𑀲𑀪𑀸𑀯𑀢𑁆𑀢𑀸. 𑀢𑀕𑁆𑀕𑀳𑀡𑁂𑀦𑁂𑀯 𑀯𑀺𑀘𑀺𑀓𑀺𑀘𑁆𑀙𑀸𑀤𑀺𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄 𑀓𑀺𑀮𑁂𑀲𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀢𑀣𑀸 𑀢𑀡𑁆𑀳𑀸𑀬 𑀳𑁂𑀢𑀼𑀲𑀪𑀸𑀯𑀢𑁆𑀢𑀸 𑀢𑀕𑁆𑀕𑀳𑀡𑁂𑀦𑁂𑀯 𑀅𑀯𑀲𑀺𑀝𑁆𑀞𑀸𑀓𑀼𑀲𑀮𑀳𑁂𑀢𑀽𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄 𑀳𑁂𑀢𑀼𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀢𑀣𑀸 𑀢𑀡𑁆𑀳𑀸𑀤𑀺𑀝𑁆𑀞𑀻𑀦𑀁 𑀆𑀲𑀯𑀸𑀤𑀺𑀲𑀪𑀸𑀯𑀢𑁆𑀢𑀸 𑀢𑀕𑁆𑀕𑀳𑀡𑁂𑀦𑁂𑀯 𑀅𑀯𑀲𑀺𑀝𑁆𑀞𑀸𑀲𑀯𑁄𑀖𑀬𑁄𑀕𑀕𑀦𑁆𑀣𑀦𑀻𑀯𑀭𑀡𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄 𑀆𑀲𑀯𑀸𑀤𑀺𑀲𑀪𑀸𑀯𑀢𑁆𑀢𑀸 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀢𑀣𑀸 ‘‘𑀧𑀣𑀯𑀺𑀁 𑀫𑀜𑁆𑀜𑀢𑀻’’𑀢𑀺𑀆𑀤𑀺𑀦𑀸 𑀧𑀣𑀯𑀻𑀆𑀤𑀻𑀦𑀁 𑀭𑀽𑀧𑀲𑀪𑀸𑀯𑀢𑁆𑀢𑀸 𑀢𑀩𑁆𑀩𑀺𑀲𑀬𑀸𑀦𑀜𑁆𑀘 𑀫𑀜𑁆𑀜𑀦𑀸𑀦𑀁 𑀭𑀽𑀧𑀯𑀺𑀲𑀬𑀢𑁆𑀢𑀸 𑀢𑀕𑁆𑀕𑀳𑀡𑁂𑀦𑁂𑀯 𑀲𑀓𑀮𑀭𑀽𑀧𑀓𑁆𑀔𑀦𑁆𑀥𑀯𑀺𑀲𑀬𑀸𑀧𑀺 𑀫𑀜𑁆𑀜𑀦𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺 𑀭𑀽𑀧𑀯𑀺𑀲𑀬𑀮𑀓𑁆𑀔𑀡𑁂𑀦 𑀆𑀲𑀁 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀏𑀯𑀁 𑀘𑀓𑁆𑀔𑀸𑀬𑀢𑀦𑀸𑀤𑀺𑀯𑀺𑀲𑀬𑀸𑀧𑀺 𑀫𑀜𑁆𑀜𑀦𑀸 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸. ‘‘𑀅𑀧𑀭𑀺𑀜𑁆𑀜𑀸𑀢’’𑀦𑁆𑀢𑀺 𑀧𑀭𑀺𑀜𑁆𑀜𑀸𑀧𑀝𑀺𑀓𑁆𑀔𑁂𑀧𑁂𑀦 𑀢𑀧𑁆𑀧𑀝𑀺𑀩𑀤𑁆𑀥𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀧𑀝𑀺𑀓𑁆𑀔𑁂𑀧𑁄𑀢𑀺 𑀤𑀝𑁆𑀞𑀩𑁆𑀩𑁄 𑀫𑀕𑁆𑀕𑀓𑀺𑀘𑁆𑀘𑀪𑀸𑀯𑁂𑀦 𑀧𑀭𑀺𑀜𑁆𑀜𑀸𑀧𑀳𑀸𑀦𑀸𑀦𑀁 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑁂𑀲𑀼𑀧𑀺 𑀬𑀣𑀸𑀭𑀳𑀁 𑀏𑀓𑀮𑀓𑁆𑀔𑀡𑀸 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀸𑀢𑀺. 𑀅𑀬𑀁 𑀮𑀓𑁆𑀔𑀡𑁄 𑀳𑀸𑀭𑁄.

𑁬. 𑀘𑀢𑀼𑀩𑁆𑀬𑀽𑀳𑀳𑀸𑀭𑀯𑀡𑁆𑀡𑀦𑀸

𑀧𑀣𑀯𑀻𑀆𑀤𑀻𑀲𑀼 𑀯𑀢𑁆𑀣𑀽𑀲𑀼 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀥𑀫𑁆𑀫𑀕𑀫𑁆𑀪𑀻𑀭𑀢𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀸𑀤𑀺𑀦𑀸 𑀯𑀜𑁆𑀘𑀺𑀢𑀸 𑀳𑀼𑀢𑁆𑀯𑀸 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀥𑀸𑀭𑀡𑀧𑀭𑀺𑀘𑀬𑀫𑀦𑀲𑀺𑀓𑀸𑀭𑀯𑀺𑀫𑀼𑀔𑀸 𑀧𑀣𑀯𑀻𑀆𑀤𑀻𑀲𑀼 𑀯𑀢𑁆𑀣𑀽𑀲𑀼 𑀧𑀼𑀣𑀼𑀚𑁆𑀚𑀦𑀲𑁂𑀓𑁆𑀔𑀸𑀲𑁂𑀓𑁆𑀔𑀢𑀣𑀸𑀕𑀢𑀸𑀦𑀁 𑀧𑀝𑀺𑀧𑀢𑁆𑀢𑀺𑀯𑀺𑀲𑁂𑀲𑀁 𑀅𑀚𑀸𑀦𑀦𑁆𑀢𑀸 𑀘 𑀯𑁂𑀦𑁂𑀬𑁆𑀬𑀸 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀦𑀺𑀤𑀸𑀦𑀁. 𑀢𑁂 ‘‘𑀓𑀣𑀁 𑀦𑀼 𑀔𑁄 𑀬𑀣𑀸𑀯𑀼𑀢𑁆𑀢𑀤𑁄𑀲𑀯𑀺𑀦𑀺𑀫𑀼𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀜𑁆𑀘 𑀯𑀺𑀲𑁂𑀲𑀁 𑀚𑀸𑀦𑀦𑁆𑀢𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀉𑀪𑀬𑀳𑀺𑀢𑀧𑀭𑀸𑀬𑀡𑀸 𑀲𑀯𑁂𑀬𑁆𑀬𑀼’’𑀦𑁆𑀢𑀺 𑀅𑀬𑀫𑁂𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄. 𑀧𑀤𑀦𑀺𑀩𑁆𑀩𑀘𑀦𑀁 𑀦𑀺𑀭𑀼𑀢𑁆𑀢𑀁, 𑀢𑀁 ‘‘𑀏𑀯’’𑀦𑁆𑀢𑀺𑀆𑀤𑀺𑀦𑀺𑀤𑀸𑀦𑀧𑀤𑀸𑀦𑀁, ‘‘𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬’’𑀦𑁆𑀢𑀺𑀆𑀤𑀺𑀧𑀸𑀴𑀺𑀧𑀤𑀸𑀦𑀜𑁆𑀘 ¶ 𑀅𑀝𑁆𑀞𑀓𑀣𑀸𑀬𑀁, 𑀢𑀲𑁆𑀲𑀸 𑀮𑀻𑀦𑀢𑁆𑀣𑀯𑀡𑁆𑀡𑀦𑀸𑀬𑀜𑁆𑀘𑁂𑀯 𑀯𑀼𑀢𑁆𑀢𑀦𑀬𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀅𑀢𑀺𑀯𑀺𑀢𑁆𑀣𑀸𑀭𑀪𑀬𑁂𑀦 𑀦 𑀯𑀺𑀢𑁆𑀣𑀸𑀭𑀬𑀺𑀫𑁆𑀳.

𑀧𑀤𑀧𑀤𑀢𑁆𑀣𑀤𑁂𑀲𑀦𑀸𑀦𑀺𑀓𑁆𑀔𑁂𑀧𑀲𑀼𑀢𑁆𑀢𑀲𑀦𑁆𑀥𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑀸 𑀲𑀦𑁆𑀥𑀺. 𑀢𑀢𑁆𑀣 𑀧𑀤𑀲𑁆𑀲 𑀧𑀤𑀦𑁆𑀢𑀭𑁂𑀦 𑀲𑀫𑁆𑀩𑀦𑁆𑀥𑁄 𑀧𑀤𑀲𑀦𑁆𑀥𑀺, 𑀢𑀣𑀸 𑀧𑀤𑀢𑁆𑀣𑀲𑁆𑀲 𑀧𑀤𑀢𑁆𑀣𑀦𑁆𑀢𑀭𑁂𑀦 𑀲𑀫𑁆𑀩𑀦𑁆𑀥𑁄 𑀧𑀤𑀢𑁆𑀣𑀲𑀦𑁆𑀥𑀺, 𑀬𑁄 ‘‘𑀓𑀺𑀭𑀺𑀬𑀸𑀓𑀸𑀭𑀓𑀲𑀫𑁆𑀩𑀦𑁆𑀥𑁄’’𑀢𑀺 𑀯𑀼𑀘𑁆𑀘𑀢𑀺. 𑀦𑀸𑀦𑀸𑀦𑀼𑀲𑀦𑁆𑀥𑀺𑀓𑀲𑁆𑀲 𑀲𑀼𑀢𑁆𑀢𑀲𑁆𑀲 𑀢𑀁𑀢𑀁𑀅𑀦𑀼𑀲𑀦𑁆𑀥𑀻𑀳𑀺 𑀲𑀫𑁆𑀩𑀦𑁆𑀥𑁄, 𑀏𑀓𑀸𑀦𑀼𑀲𑀦𑁆𑀥𑀺𑀓𑀲𑁆𑀲 𑀧𑀦 𑀧𑀼𑀩𑁆𑀩𑀸𑀧𑀭𑀲𑀫𑁆𑀩𑀦𑁆𑀥𑁄 𑀤𑁂𑀲𑀦𑀸𑀲𑀦𑁆𑀥𑀺. 𑀬𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺 𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺 𑀬𑀣𑀸𑀦𑀼𑀲𑀦𑁆𑀥𑀻’’𑀢𑀺 ¶ 𑀢𑀺𑀥𑀸 𑀯𑀺𑀪𑀢𑁆𑀢𑀸. 𑀅𑀚𑁆𑀛𑀸𑀲𑀬𑁄 𑀘𑁂𑀢𑁆𑀣 𑀅𑀢𑁆𑀢𑀚𑁆𑀛𑀸𑀲𑀬𑁄 𑀧𑀭𑀚𑁆𑀛𑀸𑀲𑀬𑁄𑀢𑀺 𑀤𑁆𑀯𑀺𑀥𑀸 𑀯𑁂𑀤𑀺𑀢𑀩𑁆𑀩𑁄. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀦𑀺𑀤𑀸𑀦𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀫𑁂𑀯. 𑀦𑀺𑀓𑁆𑀔𑁂𑀧𑀲𑀦𑁆𑀥𑀺 𑀘𑀢𑀼𑀦𑁆𑀦𑀁 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀢𑁆𑀢𑀲𑀦𑁆𑀥𑀺 𑀇𑀥 𑀧𑀞𑀫𑀦𑀺𑀓𑁆𑀔𑁂𑀧𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀫𑁂𑀯 𑀧𑀞𑀫𑀁 𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺? 𑀦𑀸𑀬𑀫𑀦𑀼𑀬𑁄𑀕𑁄 𑀓𑀢𑁆𑀣𑀘𑀺 𑀦𑀧𑁆𑀧𑀯𑀢𑁆𑀢𑀢𑀺, 𑀅𑀧𑀺𑀘 𑀬𑀲𑁆𑀫𑀸 𑀫𑀜𑁆𑀜𑀦𑀸𑀫𑀽𑀮𑀓𑀁 𑀲𑀓𑁆𑀓𑀸𑀬𑀁, 𑀲𑀩𑁆𑀩𑀫𑀜𑁆𑀜𑀦𑀸 𑀘 𑀢𑀢𑁆𑀣 𑀏𑀯 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀸 𑀧𑀯𑀢𑁆𑀢𑀢𑀺, 𑀦 𑀢𑀲𑁆𑀲𑀸 𑀲𑀯𑀺𑀲𑀬𑀸𑀬 𑀮𑁂𑀲𑀫𑀢𑁆𑀢𑀫𑁆𑀧𑀺 𑀲𑀸𑀭𑀁 𑀅𑀢𑁆𑀣𑀻𑀢𑀺 𑀧𑀣𑀯𑀻𑀆𑀤𑀺𑀯𑀺𑀪𑀸𑀕𑀪𑀺𑀦𑁆𑀦𑁂𑀲𑀼 𑀫𑀜𑁆𑀜𑀦𑀸𑀲𑀼 𑀘 𑀲𑀸𑀢𑀺𑀲𑀬𑀁 𑀦𑀺𑀩𑁆𑀩𑁂𑀥𑀯𑀺𑀭𑀸𑀕𑀲𑀜𑁆𑀚𑀦𑀦𑀻 𑀉𑀧𑀭𑀺 𑀲𑁂𑀓𑁆𑀔𑀸𑀲𑁂𑀓𑁆𑀔𑀢𑀣𑀸𑀕𑀢𑀕𑀼𑀡𑀯𑀺𑀪𑀸𑀯𑀦𑀻 𑀘 𑀅𑀬𑀁 𑀤𑁂𑀲𑀦𑀸. 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸 𑀘 𑀯𑀺𑀲𑁂𑀲𑀢𑁄 𑀤𑀺𑀝𑁆𑀞𑀺𑀯𑀺𑀦𑀺𑀯𑁂𑀞𑀦𑀓𑀣𑀸, 𑀢𑀲𑁆𑀫𑀸 𑀲𑀦𑀺𑀲𑁆𑀲𑀬𑀲𑁆𑀲 𑀤𑀺𑀝𑁆𑀞𑀺𑀕𑁆𑀕𑀸𑀳𑀲𑁆𑀲 𑀆𑀤𑀺𑀢𑁄 𑀅𑀲𑀸𑀭𑀪𑀸𑀯𑀤𑀻𑀧𑀦𑀁 𑀉𑀧𑀭𑀺 𑀘 𑀲𑀩𑁆𑀩𑁂𑀲𑀁 𑀅𑀭𑀺𑀬𑀸𑀦𑀁 𑀕𑀼𑀡𑀯𑀺𑀲𑁂𑀲𑀯𑀺𑀪𑀸𑀯𑀦𑀫𑀺𑀤𑀁 𑀲𑀼𑀢𑁆𑀢𑀁 𑀧𑀞𑀫𑀁 𑀦𑀺𑀓𑁆𑀔𑀺𑀢𑁆𑀢𑀁. 𑀓𑀺𑀜𑁆𑀘 𑀲𑀓𑁆𑀓𑀸𑀬𑁂 𑀫𑀜𑁆𑀜𑀦𑀸𑀫𑀜𑁆𑀜𑀦𑀸𑀫𑀼𑀔𑁂𑀦 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀻𑀲𑀼 𑀆𑀤𑀻𑀦𑀯𑀸𑀦𑀺𑀲𑀁𑀲𑀯𑀺𑀪𑀸𑀯𑀦𑀢𑁄 𑀲𑀩𑁆𑀩𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀧𑀝𑀺𑀧𑀢𑁆𑀢𑀺𑀯𑀺𑀪𑀸𑀕𑀢𑁄 𑀘 𑀇𑀤𑀫𑁂𑀯 𑀲𑀼𑀢𑁆𑀢𑀁 𑀧𑀞𑀫𑀁 𑀦𑀺𑀓𑁆𑀔𑀺𑀢𑁆𑀢𑀁.

𑀬𑀁 𑀧𑀦 𑀏𑀓𑀺𑀲𑁆𑀲𑀸 𑀤𑁂𑀲𑀦𑀸𑀬 𑀤𑁂𑀲𑀦𑀦𑁆𑀢𑀭𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑀁, 𑀅𑀬𑀫𑁆𑀧𑀺 𑀤𑁂𑀲𑀦𑀸𑀲𑀦𑁆𑀥𑀺, 𑀲𑀸 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸. ‘‘𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄…𑀧𑁂… 𑀦𑀺𑀩𑁆𑀩𑀸𑀦𑀁 𑀅𑀪𑀺𑀦𑀦𑁆𑀤𑀢𑀻’’𑀢𑀺 𑀅𑀬𑀁 𑀤𑁂𑀲𑀦𑀸. ‘‘𑀇𑀥, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄…𑀧𑁂… 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀫𑀦𑀲𑀺𑀓𑀭𑀡𑀻𑀬𑁂 𑀥𑀫𑁆𑀫𑁂 𑀦𑀧𑁆𑀧𑀚𑀸𑀦𑀸𑀢𑀺, 𑀅𑀫𑀦𑀲𑀺𑀓𑀭𑀡𑀻𑀬𑁂 𑀘 𑀥𑀫𑁆𑀫𑁂 𑀦𑀧𑁆𑀧𑀚𑀸𑀦𑀸𑀢𑀺, 𑀲𑁄 𑀫𑀦𑀲𑀺𑀓𑀭𑀡𑀻𑀬𑁂 𑀥𑀫𑁆𑀫𑁂 𑀅𑀧𑁆𑀧𑀚𑀸𑀦𑀦𑁆𑀢𑁄 𑀅𑀫𑀦𑀲𑀺𑀓𑀭𑀡𑀻𑀬𑁂 𑀘 𑀥𑀫𑁆𑀫𑁂 𑀅𑀧𑁆𑀧𑀚𑀸𑀦𑀦𑁆𑀢𑁄 𑀬𑁂 𑀥𑀫𑁆𑀫𑀸 𑀦 𑀫𑀦𑀲𑀺𑀓𑀭𑀡𑀻𑀬𑀸, 𑀢𑁂 𑀥𑀫𑁆𑀫𑁂 𑀫𑀦𑀲𑀺 𑀓𑀭𑁄𑀢𑀺…𑀧𑁂… 𑀅𑀦𑀼𑀧𑁆𑀧𑀦𑁆𑀦𑁄 𑀯𑀸 𑀓𑀸𑀫𑀸𑀲𑀯𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀯𑀸 𑀓𑀸𑀫𑀸𑀲𑀯𑁄 𑀧𑀯𑀟𑁆𑀠𑀢𑀺. 𑀅𑀦𑀼𑀧𑁆𑀧𑀦𑁆𑀦𑁄 𑀯𑀸 𑀪𑀯𑀸𑀲𑀯𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀯𑀸 𑀪𑀯𑀸𑀲𑀯𑁄 𑀧𑀯𑀟𑁆𑀠𑀢𑀺, 𑀅𑀦𑀼𑀧𑁆𑀧𑀦𑁆𑀦𑁄 𑀯𑀸 𑀅𑀯𑀺𑀚𑁆𑀚𑀸𑀲𑀯𑁄 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀯𑀸 𑀅𑀯𑀺𑀚𑁆𑀚𑀸𑀲𑀯𑁄 𑀧𑀯𑀟𑁆𑀠𑀢𑀻’’𑀢𑀺 (𑀫. 𑀦𑀺. 𑁧.𑁧𑁭) 𑀇𑀫𑀸𑀬 𑀤𑁂𑀲𑀦𑀸𑀬 𑀲𑀁𑀲𑀦𑁆𑀤𑀢𑀺. 𑀢𑀣𑀸 ‘‘𑀢𑀲𑁆𑀲𑁂𑀢𑀁 𑀧𑀸𑀝𑀺𑀓𑀗𑁆𑀔𑀁 𑀲𑀼𑀪𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑀺𑀲𑁆𑀲𑀢𑀺, 𑀢𑀲𑁆𑀲 𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲 𑀫𑀦𑀲𑀺𑀓𑀸𑀭𑀸 𑀭𑀸𑀕𑁄 𑀘𑀺𑀢𑁆𑀢𑀁 𑀅𑀦𑀼𑀤𑁆𑀥𑀁𑀲𑁂𑀲𑁆𑀲𑀢𑀺, 𑀲𑁄 𑀲𑀭𑀸𑀕𑁄 𑀲𑀤𑁄𑀲𑁄 𑀲𑀫𑁄𑀳𑁄 𑀲𑀸𑀗𑁆𑀕𑀡𑁄 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀓𑀸𑀮𑀁 𑀓𑀭𑀺𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁧.𑁫𑁯) 𑀇𑀫𑀸𑀬 𑀤𑁂𑀲𑀦𑀸𑀬 𑀲𑀁𑀲𑀦𑁆𑀤𑀢𑀺. 𑀢𑀣𑀸 ‘‘𑀘𑀓𑁆𑀔𑀼𑀜𑁆𑀘𑀸𑀯𑀼𑀲𑁄 ¶ 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄, 𑀨𑀲𑁆𑀲𑀧𑀘𑁆𑀘𑀬𑀸 ¶ 𑀯𑁂𑀤𑀦𑀸. 𑀬𑀁 𑀯𑁂𑀤𑁂𑀢𑀺 𑀢𑀁 𑀲𑀜𑁆𑀚𑀸𑀦𑀸𑀢𑀺, 𑀬𑀁 𑀲𑀜𑁆𑀚𑀸𑀦𑀸𑀢𑀺 𑀢𑀁 𑀯𑀺𑀢𑀓𑁆𑀓𑁂𑀢𑀺, 𑀬𑀁 𑀯𑀺𑀢𑀓𑁆𑀓𑁂𑀢𑀺 𑀢𑀁 𑀧𑀧𑀜𑁆𑀘𑁂𑀢𑀺, 𑀬𑀁 𑀧𑀧𑀜𑁆𑀘𑁂𑀢𑀺 𑀢𑀢𑁄𑀦𑀺𑀤𑀸𑀦𑀁 𑀧𑀼𑀭𑀺𑀲𑀁 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸 𑀲𑀫𑀼𑀤𑀸𑀘𑀭𑀦𑁆𑀢𑀻’’𑀢𑀺 (𑀫. 𑀦𑀺. 𑁧.𑁨𑁦𑁪) 𑀇𑀫𑀸𑀬 𑀤𑁂𑀲𑀦𑀸𑀬 𑀲𑀁𑀲𑀦𑁆𑀤𑀢𑀺. 𑀢𑀣𑀸 ‘‘𑀇𑀥, 𑀪𑀺𑀓𑁆𑀔𑀯𑁂, 𑀅𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄…𑀧𑁂… 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀭𑀽𑀧𑀁 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺. 𑀯𑁂𑀤𑀦𑀁…𑀧𑁂…, 𑀲𑀜𑁆𑀜𑀁…𑀧𑁂…, 𑀲𑀗𑁆𑀔𑀸𑀭𑁂…𑀧𑁂…, 𑀯𑀺𑀜𑁆𑀜𑀸𑀡𑀁 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺. 𑀬𑀫𑁆𑀧𑀺 𑀢𑀁 𑀤𑀺𑀝𑁆𑀞𑀁…𑀧𑁂… 𑀬𑀫𑁆𑀧𑀺 𑀢𑀁 𑀤𑀺𑀝𑁆𑀞𑀺𑀝𑁆𑀞𑀸𑀦𑀁, 𑀲𑁄 𑀮𑁄𑀓𑁄 𑀲𑁄 𑀅𑀢𑁆𑀢𑀸 𑀲𑁄 𑀧𑁂𑀘𑁆𑀘 𑀪𑀯𑀺𑀲𑁆𑀲𑀸𑀫𑀺 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀸𑀫𑀻𑀢𑀺, 𑀢𑀫𑁆𑀧𑀺 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁧.𑁨𑁪𑁧) 𑀇𑀫𑀸𑀬 𑀤𑁂𑀲𑀦𑀸𑀬 𑀲𑀁𑀲𑀦𑁆𑀤𑀢𑀺.

‘‘𑀬𑁄𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼…𑀧𑁂… 𑀦𑀺𑀩𑁆𑀩𑀸𑀦𑀁 𑀫𑀸𑀪𑀺𑀦𑀦𑁆𑀤𑀻’’𑀢𑀺 𑀅𑀬𑀁 𑀤𑁂𑀲𑀦𑀸. ‘‘𑀇𑀥, 𑀤𑁂𑀯𑀸𑀦𑀫𑀺𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀲𑀼𑀢𑀁 𑀳𑁄𑀢𑀺 ‘𑀲𑀩𑁆𑀩𑁂 𑀥𑀫𑁆𑀫𑀸 𑀦𑀸𑀮𑀁 𑀅𑀪𑀺𑀦𑀺𑀯𑁂𑀲𑀸𑀬𑀸’𑀢𑀺, 𑀏𑀯𑀜𑁆𑀘𑁂𑀢𑀁, 𑀤𑁂𑀯𑀸𑀦𑀫𑀺𑀦𑁆𑀤, 𑀪𑀺𑀓𑁆𑀔𑀼𑀦𑁄 𑀲𑀼𑀢𑀁 𑀳𑁄𑀢𑀺 ‘𑀲𑀩𑁆𑀩𑁂 𑀥𑀫𑁆𑀫𑀸 𑀦𑀸𑀮𑀁 𑀅𑀪𑀺𑀦𑀺𑀯𑁂𑀲𑀸𑀬𑀸’𑀢𑀺, 𑀲𑁄 𑀲𑀩𑁆𑀩𑀁 𑀥𑀫𑁆𑀫𑀁 𑀅𑀪𑀺𑀚𑀸𑀦𑀸𑀢𑀺, 𑀲𑀩𑁆𑀩𑀁 𑀥𑀫𑁆𑀫𑀁 𑀅𑀪𑀺𑀜𑁆𑀜𑀸𑀬 𑀲𑀩𑁆𑀩𑀁 𑀥𑀫𑁆𑀫𑀁 𑀧𑀭𑀺𑀚𑀸𑀦𑀸𑀢𑀺, 𑀲𑀩𑁆𑀩𑀁 𑀥𑀫𑁆𑀫𑀁 𑀧𑀭𑀺𑀜𑁆𑀜𑀸𑀬 𑀬𑀁 𑀓𑀺𑀜𑁆𑀘𑀺 𑀯𑁂𑀤𑀦𑀁 𑀯𑁂𑀤𑁂𑀢𑀺 𑀲𑀼𑀔𑀁 𑀯𑀸 𑀤𑀼𑀓𑁆𑀔𑀁 𑀯𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀯𑀸, 𑀲𑁄 𑀢𑀸𑀲𑀼 𑀯𑁂𑀤𑀦𑀸𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻’’𑀢𑀺 (𑀫. 𑀦𑀺. 𑁧.𑁩𑁯𑁦) 𑀇𑀫𑀸𑀬 𑀤𑁂𑀲𑀦𑀸𑀬 𑀲𑀁𑀲𑀦𑁆𑀤𑀢𑀺. ‘‘𑀬𑁄𑀧𑀺 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀭𑀳𑀁…𑀧𑁂… 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀯𑀤𑀸𑀫𑀻’’𑀢𑀺 𑀅𑀬𑀁 𑀤𑁂𑀲𑀦𑀸 ‘‘𑀲𑀼𑀢𑀯𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄…𑀧𑁂… 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀲𑀼𑀯𑀺𑀦𑀻𑀢𑁄 𑀭𑀽𑀧𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺, 𑀯𑁂𑀤𑀦𑀁…𑀧𑁂…, 𑀲𑀜𑁆𑀜𑀁…𑀧𑁂…, 𑀲𑀗𑁆𑀔𑀸𑀭𑁂…𑀧𑁂…, 𑀯𑀺𑀜𑁆𑀜𑀸𑀡𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺. 𑀬𑀫𑁆𑀧𑀺 𑀢𑀁 𑀤𑀺𑀝𑁆𑀞𑀁 𑀲𑀼𑀢𑀁 𑀯𑀺𑀜𑁆𑀜𑀸𑀢𑀁 𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸, 𑀢𑀫𑁆𑀧𑀺 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺. 𑀬𑀫𑁆𑀧𑀺 𑀢𑀁 𑀤𑀺𑀝𑁆𑀞𑀺𑀝𑁆𑀞𑀸𑀦𑀁, 𑀲𑁄 𑀮𑁄𑀓𑁄 𑀲𑁄 𑀅𑀢𑁆𑀢𑀸 𑀲𑁄 𑀧𑁂𑀘𑁆𑀘 𑀪𑀯𑀺𑀲𑁆𑀲𑀸𑀫𑀺 ‘𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀧𑀺 𑀧𑀭𑀺𑀡𑀸𑀫𑀥𑀫𑁆𑀫𑁄 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀸𑀫𑀻’𑀢𑀺, 𑀢𑀫𑁆𑀧𑀺 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁄 𑀏𑀯𑀁 𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀦 𑀧𑀭𑀺𑀢𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁧.𑁨𑁪𑁧) 𑀏𑀯𑀫𑀸𑀤𑀺𑀤𑁂𑀲𑀦𑀸𑀳𑀺 𑀲𑀁𑀲𑀦𑁆𑀤𑀢𑀻𑀢𑀺, 𑀅𑀬𑀁 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄.

𑁭. 𑀆𑀯𑀢𑁆𑀢𑀳𑀸𑀭𑀯𑀡𑁆𑀡𑀦𑀸

‘‘𑀅𑀲𑁆𑀲𑀼𑀢𑀯𑀸 ¶ ¶ 𑀧𑀼𑀣𑀼𑀚𑁆𑀚𑀦𑁄’’𑀢𑀺 𑀇𑀫𑀺𑀦𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀝𑀺𑀓𑁆𑀔𑁂𑀧𑀫𑀼𑀔𑁂𑀦 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀭𑀺𑀕𑁆𑀕𑀳𑁄 𑀤𑀻𑀧𑀺𑀢𑁄. ‘‘𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻’’𑀢𑀺𑀆𑀤𑀺𑀦𑀸 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀤𑀺𑀧𑀝𑀺𑀓𑁆𑀔𑁂𑀧𑀫𑀼𑀔𑁂𑀦 𑀅𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀤𑀺𑀧𑀭𑀺𑀕𑁆𑀕𑀳𑁄 𑀤𑀻𑀧𑀺𑀢𑁄. 𑀢𑁂𑀲𑀼 𑀧𑀼𑀭𑀺𑀫𑀦𑀬𑁂𑀦 𑀆𑀲𑀬𑀯𑀺𑀧𑀢𑁆𑀢𑀺 𑀓𑀺𑀢𑁆𑀢𑀺𑀢𑀸, 𑀤𑀼𑀢𑀺𑀬𑁂𑀦 𑀧𑀬𑁄𑀕𑀯𑀺𑀧𑀢𑁆𑀢𑀺. 𑀧𑀼𑀭𑀺𑀫𑁂𑀦 𑀘𑀲𑁆𑀲 𑀓𑀺𑀮𑁂𑀲𑀯𑀝𑁆𑀝𑀁, 𑀢𑀜𑁆𑀘 𑀬𑀢𑁄 𑀯𑀺𑀧𑀸𑀓𑀯𑀝𑁆𑀝𑀦𑁆𑀢𑀺 𑀲𑀓𑀮𑀁 𑀲𑀁𑀲𑀸𑀭𑀘𑀓𑁆𑀓𑀫𑀸𑀯𑀢𑁆𑀢𑀢𑀺. ‘‘𑀧𑀣𑀯𑀺𑀁 𑀫𑀜𑁆𑀜𑀢𑀻’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀢𑀺𑀲𑁆𑀲𑁄 𑀫𑀜𑁆𑀜𑀦𑀸 𑀯𑀼𑀢𑁆𑀢𑀸. 𑀢𑀸𑀲𑀼 𑀢𑀡𑁆𑀳𑀸𑀫𑀜𑁆𑀜𑀦𑀸 ‘‘𑀏𑀢𑀁 𑀫𑀫𑀸’’𑀢𑀺 𑀢𑀡𑁆𑀳𑀸𑀕𑁆𑀕𑀸𑀳𑁄, 𑀫𑀸𑀦𑀫𑀜𑁆𑀜𑀦𑀸 ‘‘𑀏𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑀕𑁆𑀕𑀸𑀳𑁄, 𑀤𑀺𑀝𑁆𑀞𑀺𑀫𑀜𑁆𑀜𑀦𑀸 ‘‘𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀤𑀺𑀝𑁆𑀞𑀺𑀕𑁆𑀕𑀸𑀳𑁄. 𑀢𑀢𑁆𑀣 𑀢𑀡𑁆𑀳𑀸𑀕𑁆𑀕𑀸𑀳𑁂𑀦 ‘‘𑀢𑀡𑁆𑀳𑀁 𑀧𑀝𑀺𑀘𑁆𑀘𑀧𑀭𑀺𑀬𑁂𑀲𑀦𑀸’’𑀢𑀺𑀆𑀤𑀺𑀓𑀸 (𑀤𑀻. 𑀦𑀺. 𑁨.𑁧𑁦𑁩; 𑀤𑀻. 𑀦𑀺. 𑁩.𑁩𑁫𑁯; 𑀅. 𑀦𑀺. 𑁩.𑁨𑁩; 𑀯𑀺𑀪. 𑁯𑁬𑁩) 𑀦𑀯 𑀢𑀡𑁆𑀳𑀸𑀫𑀽𑀮𑀓𑀸 𑀥𑀫𑁆𑀫𑀸 𑀆𑀯𑀢𑁆𑀢𑀦𑁆𑀢𑀺. 𑀫𑀸𑀦𑀕𑁆𑀕𑀸𑀳𑁂𑀦 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀓𑀸 𑀦𑀯 𑀫𑀸𑀦𑀯𑀺𑀥𑀸 𑀆𑀯𑀢𑁆𑀢𑀦𑁆𑀢𑀺. 𑀤𑀺𑀝𑁆𑀞𑀺𑀕𑁆𑀕𑀸𑀳𑁂𑀦 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺𑀓𑀸 (𑀲𑀁. 𑀦𑀺. 𑁪.𑁩𑁪𑁫) 𑀯𑀻𑀲𑀢𑀺𑀯𑀢𑁆𑀣𑀼𑀓𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀆𑀯𑀢𑁆𑀢𑀢𑀺. 𑀢𑀻𑀲𑀼 𑀘 𑀕𑀸𑀳𑁂𑀲𑀼 𑀬𑀸𑀬 𑀲𑀜𑁆𑀜𑀸𑀬 𑀢𑀡𑁆𑀳𑀸𑀕𑁆𑀕𑀸𑀳𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀸, 𑀲𑀸 𑀤𑀼𑀓𑁆𑀔𑀲𑀜𑁆𑀜𑀸 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸. 𑀬𑀸𑀬 𑀲𑀜𑁆𑀜𑀸𑀬 𑀫𑀸𑀦𑀕𑁆𑀕𑀸𑀳𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀸, 𑀲𑀸 𑀅𑀦𑀺𑀘𑁆𑀘𑀲𑀜𑁆𑀜𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸. 𑀬𑀸𑀬 𑀧𑀦 𑀲𑀜𑁆𑀜𑀸𑀬 𑀤𑀺𑀝𑁆𑀞𑀺𑀕𑁆𑀕𑀸𑀳𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀸, 𑀲𑀸 𑀅𑀦𑀢𑁆𑀢𑀲𑀜𑁆𑀜𑀸 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸. 𑀢𑀢𑁆𑀣 𑀧𑀞𑀫𑀕𑁆𑀕𑀸𑀳𑀯𑀺𑀲𑀪𑀸𑀕𑀢𑁄 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀫𑀼𑀔𑀁 𑀆𑀯𑀢𑁆𑀢𑀢𑀺, 𑀤𑀼𑀢𑀺𑀬𑀕𑁆𑀕𑀸𑀳𑀯𑀺𑀲𑀪𑀸𑀕𑀢𑁄 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀫𑀼𑀔𑀁 𑀆𑀯𑀢𑁆𑀢𑀢𑀺, 𑀢𑀢𑀺𑀬𑀕𑁆𑀕𑀸𑀳𑀯𑀺𑀲𑀪𑀸𑀕𑀢𑁄 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀫𑀼𑀔𑀁 𑀆𑀯𑀢𑁆𑀢𑀢𑀺.

𑀲𑁂𑀓𑁆𑀔𑀕𑁆𑀕𑀳𑀡𑁂𑀦 𑀅𑀭𑀺𑀬𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀗𑁆𑀕𑀳𑁄, 𑀢𑀢𑁄 𑀘 𑀧𑀭𑀢𑁄𑀖𑁄𑀲𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸 𑀤𑀻𑀧𑀺𑀢𑀸 𑀳𑁄𑀦𑁆𑀢𑀺. 𑀧𑀭𑀢𑁄𑀖𑁄𑀲𑁂𑀦 𑀘 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄𑀢𑀺 𑀆𑀯𑀢𑁆𑀢𑀢𑀺, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀦𑀯 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀫𑀽𑀮𑀓𑀸 𑀥𑀫𑁆𑀫𑀸 𑀆𑀯𑀢𑁆𑀢𑀦𑁆𑀢𑀺, 𑀘𑀢𑀼𑀩𑁆𑀩𑀺𑀥𑀜𑁆𑀘 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀁. ‘‘𑀫𑀸 𑀫𑀜𑁆𑀜𑀻’’𑀢𑀺 𑀫𑀜𑁆𑀜𑀦𑀸𑀦𑀁 𑀯𑀺𑀧𑁆𑀧𑀓𑀢𑀧𑁆𑀧𑀳𑀸𑀦𑀢𑀸𑀕𑀳𑀡𑁂𑀦 𑀏𑀓𑀘𑁆𑀘𑀸𑀲𑀯𑀧𑀭𑀺𑀓𑁆𑀔𑀬𑁄 𑀤𑀻𑀧𑀺𑀢𑁄 𑀳𑁄𑀢𑀺, 𑀢𑁂𑀦 𑀘 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀓𑀸𑀬𑀲𑀓𑁆𑀔𑀺𑀪𑀸𑀯𑀸 𑀆𑀯𑀢𑁆𑀢𑀦𑁆𑀢𑀺. ‘‘𑀅𑀭𑀳𑀁 𑀔𑀻𑀡𑀸𑀲𑀯𑁄’’𑀢𑀺𑀆𑀤𑀺𑀦𑀸 𑀅𑀲𑁂𑀓𑁆𑀔𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺, 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀧𑀸𑀭𑀺𑀧𑀽𑀭𑀺𑀬𑀸 𑀘 𑀤𑀲 𑀦𑀸𑀣𑀓𑀭𑀡𑀸 𑀥𑀫𑁆𑀫𑀸 𑀆𑀯𑀢𑁆𑀢𑀦𑁆𑀢𑀺. ‘‘𑀦 𑀫𑀜𑁆𑀜𑀢𑀻’’𑀢𑀺 𑀫𑀜𑁆𑀜𑀦𑀸𑀧𑀝𑀺𑀓𑁆𑀔𑁂𑀧𑁂𑀦 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 ‘‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’’𑀢𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀤𑀲𑁆𑀲𑀺𑀢𑀸, 𑀢𑀸𑀬 𑀘 𑀲𑀸𑀢𑀺𑀲𑀬𑀸 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀫𑀸𑀦𑀲𑀫𑀼𑀕𑁆𑀖𑀸𑀝𑀦𑀤𑀺𑀝𑁆𑀞𑀺𑀉𑀕𑁆𑀖𑀸𑀝𑀦𑀸𑀦𑀺 ¶ 𑀧𑀓𑀸𑀲𑀺𑀢𑀸𑀦𑀻𑀢𑀺 𑀅𑀧𑁆𑀧𑀡𑀺𑀳𑀺𑀢𑀸𑀦𑀺𑀫𑀺𑀢𑁆𑀢-𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀸 𑀆𑀯𑀢𑁆𑀢𑀦𑁆𑀢𑀺.

‘‘𑀢𑀣𑀸𑀕𑀢𑁄’’𑀢𑀺𑀆𑀤𑀺𑀦𑀸 ¶ 𑀲𑀩𑁆𑀩𑀜𑁆𑀜𑀼𑀕𑀼𑀡𑀸 𑀯𑀺𑀪𑀸𑀯𑀺𑀢𑀸𑀢𑀺 𑀢𑀤𑀯𑀺𑀦𑀸𑀪𑀸𑀯𑀢𑁄 𑀤𑀲𑀩𑀮-𑀘𑀢𑀼𑀯𑁂𑀲𑀸𑀭𑀚𑁆𑀚𑀅𑀲𑀸𑀥𑀸𑀭𑀡𑀜𑀸𑀡𑀆𑀯𑁂𑀡𑀺𑀓𑀩𑀼𑀤𑁆𑀥𑀥𑀫𑁆𑀫𑀸 𑀆𑀯𑀢𑁆𑀢𑀦𑁆𑀢𑀺. ‘‘𑀦𑀦𑁆𑀤𑀻 𑀤𑀼𑀓𑁆𑀔𑀲𑁆𑀲 𑀫𑀽𑀮’’𑀦𑁆𑀢𑀺𑀆𑀤𑀺𑀦𑀸 𑀲𑀤𑁆𑀥𑀺𑀁 𑀳𑁂𑀢𑀼𑀦𑀸 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀦𑁆𑀢𑀺 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀢𑀤𑀼𑀪𑀬𑀳𑁂𑀢𑀼𑀯𑀺𑀪𑀸𑀯𑀦𑁂𑀦 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀆𑀯𑀢𑁆𑀢𑀦𑁆𑀢𑀺. ‘‘𑀢𑀡𑁆𑀳𑀸𑀦𑀁 𑀔𑀬𑀸’’𑀢𑀺𑀆𑀤𑀺𑀦𑀸 𑀢𑀡𑁆𑀳𑀧𑁆𑀧𑀳𑀸𑀦𑀸𑀧𑀤𑁂𑀲𑁂𑀦 𑀢𑀤𑁂𑀓𑀝𑁆𑀞𑀪𑀸𑀯𑀢𑁄 𑀤𑀺𑀬𑀟𑁆𑀠𑀲𑁆𑀲 𑀓𑀺𑀮𑁂𑀲𑀲𑀳𑀲𑁆𑀲𑀲𑁆𑀲 𑀧𑀳𑀸𑀦𑀁 𑀆𑀯𑀢𑁆𑀢𑀢𑀺. ‘‘𑀲𑀩𑁆𑀩𑀲𑁄 𑀢𑀡𑁆𑀳𑀸𑀦𑀁 𑀔𑀬𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 ‘‘𑀦𑀦𑁆𑀤𑀻 𑀤𑀼𑀓𑁆𑀔𑀲𑁆𑀲 𑀫𑀽𑀮’’𑀦𑁆𑀢𑀺, ‘‘𑀇𑀢𑀺 𑀯𑀺𑀤𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲 𑀫𑀜𑁆𑀜𑀦𑀸𑀪𑀸𑀯𑀳𑁂𑀢𑀼𑀪𑀽𑀢𑀲𑁆𑀲 𑀧𑀘𑁆𑀘𑀬𑀸𑀓𑀸𑀭𑀯𑁂𑀤𑀦𑀲𑁆𑀲 𑀲𑀸𑀯𑀓𑁂𑀳𑀺 𑀅𑀲𑀸𑀥𑀸𑀭𑀡𑀜𑀸𑀡𑀘𑀸𑀭𑀪𑀸𑀯𑁄 𑀤𑀲𑁆𑀲𑀺𑀢𑁄, 𑀢𑁂𑀦 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀫𑀸𑀧𑀢𑁆𑀢𑀺𑀲𑀜𑁆𑀘𑀸𑀭𑀺 𑀪𑀕𑀯𑀢𑁄 𑀫𑀳𑀸𑀯𑀚𑀺𑀭𑀜𑀸𑀡𑀁 𑀆𑀯𑀢𑁆𑀢𑀢𑀻𑀢𑀺. 𑀅𑀬𑀁 𑀆𑀯𑀢𑁆𑀢𑁄 𑀳𑀸𑀭𑁄.

𑁮. 𑀯𑀺𑀪𑀢𑁆𑀢𑀺𑀳𑀸𑀭𑀯𑀡𑁆𑀡𑀦𑀸

‘‘𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬’’𑀦𑁆𑀢𑀺 𑀏𑀢𑁆𑀣 𑀲𑀩𑁆𑀩𑀥𑀫𑁆𑀫𑀸 𑀦𑀸𑀫 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸 𑀲𑀓𑁆𑀓𑀸𑀬𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑁂𑀲𑀁 𑀫𑀜𑁆𑀜𑀦𑀸 𑀧𑀤𑀝𑁆𑀞𑀸𑀦𑀁 𑀧𑀧𑀜𑁆𑀘𑀲𑀗𑁆𑀔𑀸𑀦𑀺𑀫𑀺𑀢𑁆𑀢𑀢𑁆𑀢𑀸 𑀮𑁄𑀓𑀯𑀺𑀘𑀺𑀢𑁆𑀢𑀲𑁆𑀲. 𑀢𑀬𑀺𑀫𑁂 𑀓𑀼𑀲𑀮𑀸 𑀅𑀓𑀼𑀲𑀮𑀸 𑀅𑀩𑁆𑀬𑀸𑀓𑀢𑀸𑀢𑀺 𑀢𑀺𑀯𑀺𑀥𑀸. 𑀢𑁂𑀲𑀼 𑀓𑀼𑀲𑀮𑀸𑀦𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺 𑀧𑀤𑀝𑁆𑀞𑀸𑀦𑀁, 𑀅𑀓𑀼𑀲𑀮𑀸𑀦𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺, 𑀅𑀩𑁆𑀬𑀸𑀓𑀢𑀸𑀦𑀁 𑀓𑀫𑁆𑀫𑀪𑀯𑀆𑀯𑀚𑁆𑀚𑀦𑀪𑀽𑀢𑀭𑀽𑀧𑀸𑀤𑀺 𑀧𑀤𑀝𑁆𑀞𑀸𑀦𑀁. 𑀢𑀢𑁆𑀣 𑀓𑀼𑀲𑀮𑀸 𑀓𑀸𑀫𑀸𑀯𑀘𑀭𑀸𑀤𑀺𑀯𑀲𑁂𑀦 𑀪𑀽𑀫𑀺𑀢𑁄 𑀢𑀺𑀯𑀺𑀥𑀸, 𑀢𑀣𑀸 𑀅𑀩𑁆𑀬𑀸𑀓𑀢𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀪𑀸𑀯𑀸, 𑀅𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀪𑀸𑀯𑀸 𑀧𑀦 𑀓𑀸𑀫𑀸𑀯𑀘𑀭𑀸𑀯 𑀢𑀣𑀸 𑀅𑀓𑀼𑀲𑀮𑀸. 𑀧𑀭𑀺𑀬𑀢𑁆𑀢𑀺𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀲𑀼𑀢𑀓𑀺𑀘𑁆𑀘𑀸𑀪𑀸𑀯𑁂𑀦 𑀢𑀺𑀯𑀺𑀥𑁄 𑀅𑀲𑁆𑀲𑀼𑀢𑀯𑀸. 𑀅𑀦𑁆𑀥𑀓𑀮𑁆𑀬𑀸𑀡𑀯𑀺𑀪𑀸𑀕𑁂𑀦 𑀤𑀼𑀯𑀺𑀥𑁄 𑀧𑀼𑀣𑀼𑀚𑁆𑀚𑀦𑁄. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀸𑀯𑀓𑀪𑁂𑀤𑁂𑀦 𑀢𑀺𑀯𑀺𑀥𑀸 𑀅𑀭𑀺𑀬𑀸. 𑀫𑀁𑀲𑀘𑀓𑁆𑀔𑀼𑀤𑀺𑀩𑁆𑀩𑀘𑀓𑁆𑀔𑀼𑀧𑀜𑁆𑀜𑀸𑀘𑀓𑁆𑀔𑀽𑀳𑀺 𑀤𑀲𑁆𑀲𑀦𑀸𑀪𑀸𑀯𑁂𑀦 𑀢𑀺𑀯𑀺𑀥𑁄 𑀅𑀤𑀲𑁆𑀲𑀸𑀯𑀻. 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀪𑁂𑀤𑁂𑀦 𑀢𑀺𑀯𑀺𑀥𑁄, 𑀦𑀯𑀯𑀺𑀥𑁄 𑀯𑀸 𑀅𑀭𑀺𑀬𑀥𑀫𑁆𑀫𑁄. 𑀲𑀯𑀦𑀥𑀸𑀭𑀡𑀧𑀭𑀺𑀘𑀬𑀫𑀦𑀲𑀺𑀓𑀸𑀭𑀧𑀝𑀺𑀯𑁂𑀥𑀯𑀲𑁂𑀦 𑀧𑀜𑁆𑀘𑀯𑀺𑀥𑀸 𑀅𑀭𑀺𑀬𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀢𑀸. 𑀢𑀤𑀪𑀸𑀯𑀢𑁄 𑀅𑀓𑁄𑀯𑀺𑀤𑁄. 𑀲𑀁𑀯𑀭𑀧𑀳𑀸𑀦𑀪𑁂𑀤𑁂𑀦 𑀤𑀼𑀯𑀺𑀥𑁄, 𑀤𑀲𑀯𑀺𑀥𑁄 𑀯𑀸 𑀅𑀭𑀺𑀬𑀥𑀫𑁆𑀫𑀯𑀺𑀦𑀬𑁄, 𑀢𑀤𑀪𑀸𑀯𑀢𑁄 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄. 𑀏𑀢𑁆𑀣 𑀧𑀤𑀝𑁆𑀞𑀸𑀦𑀯𑀺𑀪𑀸𑀕𑁄 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑁄𑀬𑁂𑀯. ‘‘𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻’’𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. ‘‘𑀧𑀣𑀯𑀺𑀁 𑀫𑀜𑁆𑀜𑀢𑀻’’𑀢𑀺𑀆𑀤𑀻𑀲𑀼 𑀫𑀜𑁆𑀜𑀦𑀸𑀯𑀢𑁆𑀣𑀼𑀯𑀺𑀪𑀸𑀕𑁄 𑀧𑀸𑀴𑀺𑀬𑀁 𑀆𑀕𑀢𑁄𑀯, 𑀢𑀣𑀸 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀤𑀺𑀓𑁄 𑀘 𑀅𑀦𑁆𑀢𑀭𑀯𑀺𑀪𑀸𑀕𑁄.

𑀫𑀜𑁆𑀜𑀦𑀸 ¶ 𑀧𑀦 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀢𑀺𑀯𑀺𑀥𑀸, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀢𑀡𑁆𑀳𑀸𑀫𑀜𑁆𑀜𑀦𑀸 𑀢𑀸𑀯 𑀓𑀸𑀫𑀢𑀡𑁆𑀳𑀸𑀤𑀺𑀯𑀲𑁂𑀦 𑀅𑀝𑁆𑀞𑀲𑀢𑀯𑀺𑀥𑀸, 𑀢𑀣𑀸 ‘‘𑀅𑀲𑁆𑀫𑀻𑀢𑀺 𑀲𑀢𑀺 𑀇𑀢𑁆𑀣𑀁𑀲𑁆𑀫𑀻𑀢𑀺 𑀳𑁄𑀢𑀻’’𑀢𑀺𑀆𑀤𑀺𑀦𑀸. 𑀏𑀯𑀁 𑀫𑀸𑀦𑀫𑀜𑁆𑀜𑀦𑀸𑀧𑀺. ‘‘𑀅𑀲𑁆𑀫𑀻𑀢𑀺 𑀲𑀢𑀺 𑀇𑀢𑁆𑀣𑀁𑀲𑁆𑀫𑀻𑀢𑀺 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀧𑀧𑀜𑁆𑀘𑀢𑁆𑀢𑀬𑀁 𑀉𑀤𑁆𑀤𑀺𑀝𑁆𑀞𑀁 𑀦𑀺𑀤𑁆𑀤𑀺𑀝𑁆𑀞𑀜𑁆𑀘𑀸𑀢𑀺 ¶ . 𑀏𑀢𑁂𑀦 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬𑀧𑀺 𑀅𑀝𑁆𑀞𑀲𑀢𑀯𑀺𑀥𑀢𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀺𑀘 𑀲𑁂𑀬𑁆𑀬𑀲𑁆𑀲 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸 𑀫𑀸𑀦𑀫𑀜𑁆𑀜𑀦𑀸𑀬 𑀦𑀯𑀯𑀺𑀥𑀢𑀸 𑀢𑀤𑀦𑁆𑀢𑀭𑀪𑁂𑀤𑁂𑀦 𑀅𑀦𑁂𑀓𑀯𑀺𑀥𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀜𑁆𑀘 𑀅𑀢𑁆𑀣𑁄 𑀳𑀻𑀦𑀢𑁆𑀢𑀺𑀓𑀢𑁆𑀣𑀯𑀡𑁆𑀡𑀦𑀸𑀬 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬 𑀧𑀦 𑀩𑁆𑀭𑀳𑁆𑀫𑀚𑀸𑀮𑁂 𑀆𑀕𑀢𑀦𑀬𑁂𑀦 𑀤𑁆𑀯𑀸𑀲𑀝𑁆𑀞𑀺𑀯𑀺𑀥𑀢𑀸 𑀢𑀤𑀦𑁆𑀢𑀭𑀪𑁂𑀤𑁂𑀦 𑀅𑀦𑁂𑀓𑀯𑀺𑀥𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. ‘‘𑀅𑀧𑀭𑀺𑀜𑁆𑀜𑀸𑀢’’𑀦𑁆𑀢𑀺 𑀏𑀢𑁆𑀣 𑀜𑀸𑀢𑀧𑀭𑀺𑀜𑁆𑀜𑀸𑀤𑀺𑀯𑀲𑁂𑀦 𑀘𑁂𑀯 𑀭𑀽𑀧𑀫𑀼𑀔𑀸𑀤𑀺𑀅𑀪𑀺𑀦𑀺𑀯𑁂𑀲𑀪𑁂𑀤𑀸𑀤𑀺𑀯𑀲𑁂𑀦 𑀘 𑀧𑀭𑀺𑀜𑁆𑀜𑀸𑀦𑀁 𑀅𑀦𑁂𑀓𑀯𑀺𑀥𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀅𑀝𑁆𑀞𑀫𑀓𑀸𑀤𑀺𑀯𑀲𑁂𑀦 𑀲𑁂𑀓𑁆𑀔𑀯𑀺𑀪𑀸𑀕𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀸𑀤𑀺𑀯𑀲𑁂𑀦 𑀅𑀲𑁂𑀓𑁆𑀔𑀯𑀺𑀪𑀸𑀕𑁄 𑀘. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀯𑀺𑀪𑀸𑀕𑁄. 𑀧𑀤𑀝𑁆𑀞𑀸𑀦𑀯𑀺𑀪𑀸𑀕𑁄 𑀘 𑀪𑀽𑀫𑀺𑀯𑀺𑀪𑀸𑀕𑁄 𑀘 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀅𑀬𑀁 𑀯𑀺𑀪𑀢𑁆𑀢𑀺𑀳𑀸𑀭𑁄.

𑁯. 𑀧𑀭𑀺𑀯𑀢𑁆𑀢𑀳𑀸𑀭𑀯𑀡𑁆𑀡𑀦𑀸

‘‘𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬’’𑀦𑁆𑀢𑀺 𑀏𑀢𑁆𑀣 ‘‘𑀲𑀩𑁆𑀩𑀥𑀫𑁆𑀫𑀸’’𑀢𑀺 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀕𑀳𑀺𑀢𑀸, 𑀢𑁂𑀲𑀁 𑀫𑀽𑀮𑀓𑀸𑀭𑀡𑀦𑁆𑀢𑀺 𑀘 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀬𑁄. 𑀢𑀣𑀸 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄…𑀧𑁂… 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄𑀢𑀺. 𑀬𑀸𑀯𑀓𑀻𑀯𑀜𑁆𑀘 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀲𑀼𑀪𑀢𑁄 𑀲𑀼𑀔𑀢𑁄 𑀦𑀺𑀘𑁆𑀘𑀢𑁄 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀦𑀯𑀲𑁂𑀦 ‘‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀕𑀸𑀳𑀸 𑀦 𑀲𑀫𑀼𑀘𑁆𑀙𑀺𑀚𑁆𑀚𑀦𑁆𑀢𑀺, 𑀢𑀸𑀯 𑀦𑁂𑀲𑀁 𑀧𑀩𑀦𑁆𑀥𑀽𑀧𑀭𑀫𑁄 𑀲𑀼𑀧𑀺𑀦𑀦𑁆𑀢𑁂𑀧𑀺 𑀦 𑀓𑁂𑀦𑀘𑀺 𑀮𑀤𑁆𑀥𑀧𑀼𑀩𑁆𑀩𑁄. 𑀬𑀤𑀸 𑀧𑀦 𑀦𑁂𑀲𑀁 𑀅𑀲𑀼𑀪𑀢𑁄 𑀤𑀼𑀓𑁆𑀔𑀢𑁄 𑀅𑀦𑀺𑀘𑁆𑀘𑀢𑁄 𑀅𑀦𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀦𑀯𑀲𑁂𑀦 ‘‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’’𑀢𑀺 𑀧𑀯𑀢𑁆𑀢𑀫𑀸𑀦𑀸 𑀅𑀧𑁆𑀧𑀡𑀺𑀳𑀺𑀢𑀸𑀦𑀺𑀫𑀺𑀢𑁆𑀢𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀅𑀣 𑀦𑁂𑀲𑀁 𑀧𑀩𑀦𑁆𑀥𑀽𑀧𑀭𑀫𑁄 𑀳𑁄𑀢𑀺 𑀅𑀘𑁆𑀘𑀦𑁆𑀢𑀅𑀧𑁆𑀧𑀜𑁆𑀜𑀢𑁆𑀢𑀺𑀓𑀪𑀸𑀯𑀽𑀧𑀕𑀫𑀦𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀥𑀫𑁆𑀫𑀸𑀢𑀺 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀕𑀳𑀺𑀢𑀸, 𑀢𑁂𑀲𑀁 𑀫𑀽𑀮𑀓𑀸𑀭𑀡𑀦𑁆𑀢𑀺 𑀘 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀬𑁄’’𑀢𑀺. 𑀢𑀣𑀸 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄…𑀧𑁂… 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀢𑀻𑀳𑀺𑀧𑀺 𑀫𑀜𑁆𑀜𑀦𑀸𑀳𑀺 𑀧𑀣𑀯𑀺𑀁 𑀫𑀜𑁆𑀜𑀢𑀺 𑀬𑀸𑀯 𑀦𑀺𑀩𑁆𑀩𑀸𑀦𑀁 𑀅𑀪𑀺𑀦𑀦𑁆𑀤𑀢𑀺, 𑀢𑀻𑀳𑀺𑀧𑀺 𑀧𑀭𑀺𑀜𑁆𑀜𑀸𑀳𑀺 𑀢𑀲𑁆𑀲 𑀢𑀁 𑀯𑀢𑁆𑀣𑀼 𑀅𑀧𑀭𑀺𑀜𑁆𑀜𑀸𑀢𑀦𑁆𑀢𑀺 𑀓𑀢𑁆𑀯𑀸. 𑀬𑀲𑁆𑀲 𑀧𑀦 𑀢𑀁 𑀯𑀢𑁆𑀣𑀼 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀜𑁆𑀜𑀸𑀢𑀁, 𑀦 𑀲𑁄 𑀇𑀢𑀭𑁄 𑀯𑀺𑀬 𑀢𑀁 𑀫𑀜𑁆𑀜𑀢𑀺. 𑀢𑁂𑀦𑀸𑀳 ¶ 𑀪𑀕𑀯𑀸 ‘‘𑀲𑀼𑀢𑀯𑀸 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄…𑀧𑁂… 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀲𑀼𑀯𑀺𑀦𑀻𑀢𑁄 𑀭𑀽𑀧𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺, 𑀯𑁂𑀤𑀦𑀁…𑀧𑁂… 𑀅𑀲𑀢𑀺 𑀦 𑀧𑀭𑀺𑀢𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁧.𑁨𑁪𑁧). 𑀲𑁂𑀓𑁆𑀔𑁄 𑀧𑀣𑀯𑀺𑀁 𑀫𑀸 𑀫𑀜𑁆𑀜𑀺, 𑀬𑀸𑀯 𑀦𑀺𑀩𑁆𑀩𑀸𑀦𑀁 𑀫𑀸𑀪𑀺𑀦𑀦𑁆𑀤𑀺, 𑀅𑀭𑀳𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀘 𑀧𑀣𑀯𑀺𑀁 𑀦 𑀫𑀜𑁆𑀜𑀢𑀺, 𑀬𑀸𑀯 𑀦𑀺𑀩𑁆𑀩𑀸𑀦𑀁 𑀦𑀸𑀪𑀺𑀦𑀦𑁆𑀤𑀢𑀺, 𑀫𑀜𑁆𑀜𑀦𑀸𑀫𑀜𑁆𑀜𑀺𑀢𑁂𑀲𑀼 𑀯𑀢𑁆𑀣𑀽𑀲𑀼 𑀫𑀢𑁆𑀢𑀲𑁄 𑀲𑀩𑁆𑀩𑀲𑁄 𑀘 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀲𑀁𑀲𑀺𑀤𑁆𑀥𑀺𑀬𑀸 𑀧𑀳𑀸𑀦𑀸𑀪𑀺𑀲𑀫𑀬𑀦𑀺𑀩𑁆𑀩𑀢𑁆𑀢𑀺𑀢𑁄. 𑀬𑀲𑁆𑀲 𑀧𑀦 𑀢𑁂𑀲𑀼 𑀯𑀢𑁆𑀣𑀽𑀲𑀼 𑀲𑀩𑁆𑀩𑀲𑁄 𑀫𑀢𑁆𑀢𑀲𑁄 𑀯𑀸 𑀧𑀭𑀺𑀜𑁆𑀜𑀸 𑀏𑀯 𑀦𑀢𑁆𑀣𑀺, 𑀓𑀼𑀢𑁄 𑀧𑀳𑀸𑀦𑀁, 𑀲𑁄 𑀬𑀣𑀸𑀧𑀭𑀺𑀓𑀧𑁆𑀧𑀁 𑀦𑀺𑀭𑀗𑁆𑀓𑀼𑀲𑀸𑀳𑀺 𑀫𑀜𑁆𑀜𑀦𑀸𑀳𑀺 ‘‘𑀏𑀢𑀁 𑀫𑀫𑀸’’𑀢𑀺𑀆𑀤𑀺𑀦𑀸 ¶ 𑀫𑀜𑁆𑀜𑀢𑁂𑀯. 𑀢𑁂𑀦𑀸𑀳 𑀪𑀕𑀯𑀸 ‘‘𑀇𑀥, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄…𑀧𑁂… 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄 𑀭𑀽𑀧𑀁 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’𑀢𑀺 𑀲𑀫𑀦𑀼𑀧𑀲𑁆𑀲𑀢𑀺, 𑀯𑁂𑀤𑀦𑀁…𑀧𑁂…, 𑀲𑀜𑁆𑀜…𑀧𑁂…’’𑀦𑁆𑀢𑀺𑀆𑀤𑀺 (𑀫. 𑀦𑀺. 𑁧.𑁨𑁪𑁧). 𑀅𑀬𑀁 𑀧𑀭𑀺𑀯𑀢𑁆𑀢𑁄 𑀳𑀸𑀭𑁄.

𑁧𑁦. 𑀯𑁂𑀯𑀘𑀦𑀳𑀸𑀭𑀯𑀡𑁆𑀡𑀦𑀸

‘‘𑀲𑀩𑁆𑀩𑀥𑀫𑁆𑀫𑀸 𑀲𑀓𑀮𑀥𑀫𑁆𑀫𑀸 𑀅𑀦𑀯𑀲𑁂𑀲𑀥𑀫𑁆𑀫𑀸’’𑀢𑀺 𑀧𑀭𑀺𑀬𑀸𑀬𑀯𑀘𑀦𑀁, ‘‘𑀫𑀽𑀮𑀧𑀭𑀺𑀬𑀸𑀬𑀁 𑀫𑀽𑀮𑀓𑀸𑀭𑀡𑀁 𑀅𑀲𑀸𑀥𑀸𑀭𑀡𑀳𑁂𑀢𑀼’’𑀦𑁆𑀢𑀺 𑀧𑀭𑀺𑀬𑀸𑀬𑀯𑀘𑀦𑀁, ‘‘𑀫𑀽𑀮𑀧𑀭𑀺𑀬𑀸𑀬𑀦𑁆𑀢𑀺 𑀯𑀸 𑀫𑀽𑀮𑀤𑁂𑀲𑀦𑀁 𑀓𑀸𑀭𑀡𑀢𑀣𑀦’’𑀦𑁆𑀢𑀺 𑀧𑀭𑀺𑀬𑀸𑀬𑀯𑀘𑀦𑀁, ‘‘𑀯𑁄 𑀢𑀼𑀫𑁆𑀳𑀸𑀓𑀁 𑀢𑀼𑀫𑁆𑀳’’𑀦𑁆𑀢𑀺 𑀧𑀭𑀺𑀬𑀸𑀬𑀯𑀘𑀦𑀁, ‘‘𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀢𑀧𑀲𑁆𑀲𑀺𑀦𑁄’’𑀢𑀺 𑀧𑀭𑀺𑀬𑀸𑀬𑀯𑀘𑀦𑀁, ‘‘𑀤𑁂𑀲𑁂𑀲𑁆𑀲𑀸𑀫𑀻 𑀓𑀣𑁂𑀲𑁆𑀲𑀸𑀫𑀻 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀬𑀸𑀬𑀯𑀘𑀦𑀁, ‘‘𑀲𑀼𑀡𑀸𑀣 𑀲𑁄𑀢𑀁 𑀑𑀤𑀳𑀣 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀉𑀧𑀥𑀸𑀭𑁂𑀣𑀸’’𑀢𑀺 𑀧𑀭𑀺𑀬𑀸𑀬𑀯𑀘𑀦𑀁, ‘‘𑀲𑀸𑀥𑀼𑀓𑀁 𑀲𑀫𑁆𑀫𑀸 𑀲𑀓𑁆𑀓𑀘𑁆𑀘’’𑀦𑁆𑀢𑀺 𑀧𑀭𑀺𑀬𑀸𑀬𑀯𑀘𑀦𑀁, ‘‘𑀫𑀦𑀲𑀺 𑀓𑀭𑁄𑀣 𑀘𑀺𑀢𑁆𑀢𑁂 𑀞𑀧𑁂𑀣 𑀲𑀫𑀦𑁆𑀦𑀸𑀳𑀭𑀣𑀸’’𑀢𑀺 𑀧𑀭𑀺𑀬𑀸𑀬𑀯𑀘𑀦𑀁, ‘‘𑀪𑀸𑀲𑀺𑀲𑁆𑀲𑀸𑀫𑀺 𑀩𑁆𑀬𑀢𑁆𑀢𑀁 𑀓𑀣𑁂𑀲𑁆𑀲𑀸𑀫𑀺 𑀯𑀺𑀪𑀚𑀺𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀬𑀸𑀬𑀯𑀘𑀦𑀁, ‘‘𑀏𑀯𑀁, 𑀪𑀦𑁆𑀢𑁂, 𑀲𑀸𑀥𑀼 𑀲𑀼𑀝𑁆𑀞𑀼 𑀪𑀦𑁆𑀢𑁂’’𑀢𑀺 𑀧𑀭𑀺𑀬𑀸𑀬𑀯𑀘𑀦𑀁, ‘‘𑀧𑀘𑁆𑀘𑀲𑁆𑀲𑁄𑀲𑀼𑀁 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼 𑀲𑀫𑁆𑀧𑀝𑀺𑀕𑁆𑀕𑀳𑁂𑀲𑀼’’𑀦𑁆𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀯𑁂𑀯𑀘𑀦𑀁 𑀯𑀢𑁆𑀢𑀩𑁆𑀩𑀦𑁆𑀢𑀺. 𑀅𑀬𑀁 𑀯𑁂𑀯𑀘𑀦𑁄 𑀳𑀸𑀭𑁄.

𑁧𑁧. 𑀧𑀜𑁆𑀜𑀢𑁆𑀢𑀺𑀳𑀸𑀭𑀯𑀡𑁆𑀡𑀦𑀸

‘‘𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬’’𑀦𑁆𑀢𑀺 𑀏𑀢𑁆𑀣 𑀲𑀩𑁆𑀩𑀥𑀫𑁆𑀫𑀸 𑀦𑀸𑀫 𑀲𑀓𑁆𑀓𑀸𑀬𑀥𑀫𑁆𑀫𑀸, 𑀢𑁂 𑀔𑀦𑁆𑀥𑀯𑀲𑁂𑀦 𑀧𑀜𑁆𑀘𑀥𑀸 𑀧𑀜𑁆𑀜𑀢𑁆𑀢𑀸, 𑀆𑀬𑀢𑀦𑀯𑀲𑁂𑀦 𑀤𑁆𑀯𑀸𑀤𑀲𑀥𑀸, 𑀥𑀸𑀢𑀼𑀯𑀲𑁂𑀦 𑀅𑀝𑁆𑀞𑀸𑀭𑀲𑀥𑀸 ¶ 𑀧𑀜𑁆𑀜𑀢𑁆𑀢𑀸. ‘‘𑀫𑀽𑀮’’𑀦𑁆𑀢𑀺 𑀯𑀸 ‘‘𑀫𑀽𑀮𑀧𑀭𑀺𑀬𑀸𑀬’’𑀦𑁆𑀢𑀺 𑀯𑀸 𑀫𑀜𑁆𑀜𑀦𑀸 𑀯𑀼𑀢𑁆𑀢𑀸, 𑀢𑀸 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀢𑀺𑀥𑀸 𑀅𑀦𑁆𑀢𑀭𑀪𑁂𑀤𑁂𑀦 𑀅𑀦𑁂𑀓𑀥𑀸 𑀘 𑀧𑀜𑁆𑀜𑀢𑁆𑀢𑀸. 𑀅𑀣 𑀯𑀸 ‘‘𑀲𑀩𑁆𑀩𑀥𑀫𑁆𑀫𑀸’’𑀢𑀺 𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀁 𑀲𑀗𑁆𑀕𑀳𑀧𑀜𑁆𑀜𑀢𑁆𑀢𑀺, ‘‘𑀫𑀽𑀮𑀧𑀭𑀺𑀬𑀸𑀬’’𑀦𑁆𑀢𑀺 𑀢𑁂𑀲𑀁 𑀧𑀪𑀯𑀧𑀜𑁆𑀜𑀢𑁆𑀢𑀺, ‘‘𑀯𑁄’’𑀢𑀺 𑀲𑀫𑁆𑀧𑀤𑀸𑀦𑀧𑀜𑁆𑀜𑀢𑀺, ‘‘𑀤𑁂𑀲𑁂𑀲𑁆𑀲𑀸𑀫𑀺 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀜𑁆𑀜𑀸𑀧𑀜𑁆𑀜𑀢𑁆𑀢𑀺, ‘‘𑀲𑀼𑀡𑀸𑀣 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣𑀸’’𑀢𑀺 𑀘 𑀆𑀡𑀸𑀧𑀦𑀧𑀜𑁆𑀜𑀢𑁆𑀢𑀺, ‘‘𑀅𑀲𑁆𑀲𑀼𑀢𑀯𑀸’’𑀢𑀺 𑀧𑀝𑀺𑀯𑁂𑀥𑀯𑀺𑀫𑀼𑀔𑀢𑀸𑀧𑀜𑁆𑀜𑀢𑁆𑀢𑀺 𑀘𑁂𑀯 𑀧𑀭𑀺𑀬𑀢𑁆𑀢𑀺𑀯𑀺𑀫𑀼𑀔𑀢𑀸𑀧𑀜𑁆𑀜𑀢𑁆𑀢𑀺 𑀘, ‘‘𑀧𑀼𑀣𑀼𑀚𑁆𑀚𑀦𑁄’’𑀢𑀺 𑀅𑀦𑀭𑀺𑀬𑀧𑀜𑁆𑀜𑀢𑁆𑀢𑀺, 𑀲𑀸 𑀅𑀭𑀺𑀬𑀥𑀫𑁆𑀫𑀧𑀝𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺 𑀘𑁂𑀯 𑀅𑀭𑀺𑀬𑀥𑀫𑁆𑀫𑀯𑀺𑀭𑀳𑀧𑀜𑁆𑀜𑀢𑁆𑀢𑀺 𑀘, ‘‘𑀅𑀭𑀺𑀬𑀸𑀦’’𑀦𑁆𑀢𑀺 𑀅𑀲𑀫𑀧𑀜𑁆𑀜𑀢𑁆𑀢𑀺 𑀘𑁂𑀯 𑀲𑀫𑀧𑀜𑁆𑀜𑀢𑁆𑀢𑀺 𑀘. 𑀢𑀢𑁆𑀣 𑀅𑀲𑀫𑀧𑀜𑁆𑀜𑀢𑁆𑀢𑀺 𑀢𑀣𑀸𑀕𑀢𑀧𑀜𑁆𑀜𑀢𑁆𑀢𑀺, 𑀲𑀫𑀧𑀜𑁆𑀜𑀢𑁆𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀜𑁆𑀘𑁂𑀯 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸𑀤𑀻𑀦𑀜𑁆𑀘 𑀯𑀲𑁂𑀦 𑀅𑀝𑁆𑀞𑀯𑀺𑀥𑀸 𑀯𑁂𑀤𑀺𑀢𑀩𑁆𑀩𑀸. ‘‘𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻’’𑀢𑀺𑀆𑀤𑀺 𑀤𑀲𑁆𑀲𑀦𑀪𑀸𑀯𑀦𑀸𑀧𑀝𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺, ‘‘𑀧𑀣𑀯𑀺𑀁 𑀫𑀜𑁆𑀜𑀢𑀻’’𑀢𑀺𑀆𑀤𑀺 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀤𑁆𑀯𑀸𑀤𑀲𑀦𑁆𑀦𑀁 𑀆𑀬𑀢𑀦𑀸𑀦𑀁 𑀅𑀝𑁆𑀞𑀸𑀭𑀲𑀦𑁆𑀦𑀁 𑀥𑀸𑀢𑀽𑀦𑀁 𑀲𑀫𑁆𑀫𑀲𑀦𑀼𑀧𑀕𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀦𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺 ¶ 𑀘𑁂𑀯 𑀧𑀪𑀯𑀧𑀜𑁆𑀜𑀢𑁆𑀢𑀺 𑀘, 𑀢𑀣𑀸 𑀯𑀺𑀧𑀮𑁆𑀮𑀸𑀲𑀸𑀦𑀁 𑀓𑀺𑀘𑁆𑀘𑀧𑀜𑁆𑀜𑀢𑁆𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀁 𑀤𑀲𑁆𑀲𑀦𑀧𑀜𑁆𑀜𑀢𑁆𑀢𑀺 𑀓𑀺𑀮𑁂𑀲𑀸𑀦𑀁 𑀨𑀮𑀧𑀜𑁆𑀜𑀢𑁆𑀢𑀺 𑀅𑀪𑀺𑀲𑀗𑁆𑀔𑀸𑀭𑀸𑀦𑀁 𑀯𑀺𑀭𑀽𑀳𑀦𑀧𑀜𑁆𑀜𑀢𑁆𑀢𑀺 𑀢𑀡𑁆𑀳𑀸𑀬 𑀅𑀲𑁆𑀲𑀸𑀤𑀦𑀧𑀜𑁆𑀜𑀢𑁆𑀢𑀺 𑀤𑀺𑀝𑁆𑀞𑀺𑀬𑀸 𑀯𑀺𑀧𑁆𑀨𑀦𑁆𑀤𑀦𑀧𑀜𑁆𑀜𑀢𑁆𑀢𑀺, ‘‘𑀲𑁂𑀓𑁆𑀔𑀸’’𑀢𑀺 𑀲𑀤𑁆𑀥𑀸𑀦𑀼𑀲𑀸𑀭𑀻𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀓𑀸𑀬𑀲𑀓𑁆𑀔𑀻𑀦𑀁 𑀤𑀲𑁆𑀲𑀦𑀧𑀜𑁆𑀜𑀢𑁆𑀢𑀺 𑀘𑁂𑀯 𑀪𑀸𑀯𑀦𑀸𑀧𑀜𑁆𑀜𑀢𑁆𑀢𑀺 𑀘 ‘‘𑀅𑀧𑁆𑀧𑀢𑁆𑀢𑀫𑀸𑀦𑀲𑁄’’𑀢𑀺 𑀲𑁂𑀓𑁆𑀔𑀥𑀫𑁆𑀫𑀸𑀦𑀁 𑀞𑀺𑀢𑀺𑀧𑀜𑁆𑀜𑀢𑁆𑀢𑀺, ‘‘𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀧𑀢𑁆𑀣𑀬𑀫𑀸𑀦𑁄’’𑀢𑀺 𑀧𑀜𑁆𑀜𑀸𑀬 𑀅𑀪𑀺𑀦𑀺𑀩𑁆𑀩𑀺𑀤𑀸𑀧𑀜𑁆𑀜𑀢𑁆𑀢𑀺, ‘‘𑀅𑀪𑀺𑀚𑀸𑀦𑀸𑀢𑀻’’𑀢𑀺 𑀅𑀪𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀧𑀜𑁆𑀜𑀢𑁆𑀢𑀺, 𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀧𑀜𑁆𑀜𑀢𑁆𑀢𑀺, 𑀲𑀫𑀼𑀤𑀬𑀲𑁆𑀲 𑀧𑀳𑀸𑀦𑀧𑀜𑁆𑀜𑀢𑁆𑀢𑀺, 𑀦𑀺𑀭𑁄𑀥𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀜𑁆𑀜𑀢𑁆𑀢𑀺, 𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀧𑀜𑁆𑀜𑀢𑁆𑀢𑀺, ‘‘𑀫𑀸 𑀫𑀜𑁆𑀜𑀻’’𑀢𑀺 𑀫𑀜𑁆𑀜𑀦𑀸𑀦𑀁 𑀧𑀝𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺, 𑀲𑀫𑀼𑀤𑀬𑀲𑁆𑀲 𑀧𑀳𑀸𑀦𑀧𑀜𑁆𑀜𑀢𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀤𑁂𑀲𑀼𑀧𑀺 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀅𑀬𑀁 𑀧𑀜𑁆𑀜𑀢𑁆𑀢𑀺 𑀳𑀸𑀭𑁄.

𑁧𑁨. 𑀑𑀢𑀭𑀡𑀳𑀸𑀭𑀯𑀡𑁆𑀡𑀦𑀸

‘‘𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬’’𑀦𑁆𑀢𑀺 𑀏𑀢𑁆𑀣 𑀲𑀩𑁆𑀩𑀥𑀫𑁆𑀫𑀸 𑀦𑀸𑀫 𑀮𑁄𑀓𑀺𑀬𑀸 𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀏𑀓𑀽𑀦𑀯𑀺𑀲𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀤𑁆𑀯𑀸𑀤𑀲𑀧𑀤𑀺𑀓𑁄 𑀧𑀘𑁆𑀘𑀬𑀸𑀓𑀸𑀭𑁄𑀢𑀺, 𑀅𑀬𑀁 𑀲𑀩𑁆𑀩𑀥𑀫𑁆𑀫𑀕𑁆𑀕𑀳𑀡𑁂𑀦 𑀔𑀦𑁆𑀥𑀸𑀤𑀺𑀫𑀼𑀔𑁂𑀦 𑀤𑁂𑀲𑀦𑀸𑀬 𑀑𑀢𑀭𑀡𑀁. ‘‘𑀫𑀽𑀮’’𑀦𑁆𑀢𑀺 𑀯𑀸 ‘‘𑀫𑀽𑀮𑀧𑀭𑀺𑀬𑀸𑀬’’𑀦𑁆𑀢𑀺 𑀯𑀸 𑀫𑀜𑁆𑀜𑀦𑀸 𑀯𑀼𑀢𑁆𑀢𑀸, 𑀢𑀸 𑀅𑀢𑁆𑀣𑀢𑁄 𑀢𑀡𑁆𑀳𑀸 𑀫𑀸𑀦𑁄 𑀤𑀺𑀝𑁆𑀞𑀺 𑀘𑀸𑀢𑀺 𑀢𑁂𑀲𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀗𑁆𑀕𑀳𑁄𑀢𑀺 𑀅𑀬𑀁 𑀔𑀦𑁆𑀥𑀫𑀼𑀔𑁂𑀦 𑀑𑀢𑀭𑀡𑀁. 𑀢𑀣𑀸 ‘‘𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽𑀳𑀺 𑀲𑀗𑁆𑀕𑀳𑁄’’𑀢𑀺 𑀅𑀬𑀁 𑀆𑀬𑀢𑀦𑀫𑀼𑀔𑁂𑀦 𑀥𑀸𑀢𑀼𑀫𑀼𑀔𑁂𑀦 𑀘 𑀑𑀢𑀭𑀡𑀁. ‘‘𑀅𑀲𑁆𑀲𑀼𑀢𑀯𑀸’’𑀢𑀺 𑀇𑀫𑀺𑀦𑀸 𑀲𑀼𑀢𑀲𑁆𑀲 ¶ 𑀯𑀺𑀩𑀦𑁆𑀥𑀪𑀽𑀢𑀸 𑀅𑀯𑀺𑀚𑁆𑀚𑀸𑀤𑀬𑁄 𑀕𑀳𑀺𑀢𑀸, ‘‘𑀧𑀼𑀣𑀼𑀚𑁆𑀚𑀦𑁄’’𑀢𑀺 𑀇𑀫𑀺𑀦𑀸 𑀬𑁂𑀲𑀁 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀸𑀦𑀁 𑀚𑀦𑀦𑀸𑀤𑀺𑀦𑀸 𑀧𑀼𑀣𑀼𑀚𑁆𑀚𑀦𑁄𑀢𑀺 𑀯𑀼𑀘𑁆𑀘𑀢𑀺, 𑀢𑁂 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀸𑀤𑀬𑁄 𑀕𑀳𑀺𑀢𑀸, ‘‘𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻’’𑀢𑀺𑀆𑀤𑀺𑀦𑀸 𑀬𑁂𑀲𑀁 𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀯𑀲𑁂𑀦 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀺𑀆𑀤𑀺𑀪𑀸𑀯𑁄 𑀳𑁄𑀢𑀺, 𑀢𑁂 𑀤𑀺𑀝𑁆𑀞𑀺𑀫𑀸𑀦𑀸𑀯𑀺𑀚𑁆𑀚𑀸𑀤𑀬𑁄 𑀕𑀳𑀺𑀢𑀸𑀢𑀺 𑀲𑀩𑁆𑀩𑁂𑀳𑀺 𑀢𑁂𑀳𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀗𑁆𑀕𑀳𑁄𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀑𑀢𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀲𑀜𑁆𑀚𑀸𑀦𑀸𑀢𑀺 𑀫𑀜𑁆𑀜𑀢𑀺 𑀅𑀪𑀺𑀚𑀸𑀦𑀸𑀢𑀺 𑀦 𑀫𑀜𑁆𑀜𑀢𑀻’’𑀢𑀺 𑀏𑀢𑁆𑀣𑀸𑀧𑀺 𑀲𑀜𑁆𑀚𑀸𑀦𑀦𑀫𑀜𑁆𑀜𑀦𑀸𑀅𑀪𑀺𑀚𑀸𑀦𑀦𑀸𑀦𑀼𑀧𑀲𑁆𑀲𑀦𑀸𑀦𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀑𑀢𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀲𑁂𑀓𑁆𑀔𑀕𑁆𑀕𑀳𑀡𑁂𑀦 𑀲𑁂𑀓𑁆𑀔𑀸, ‘‘𑀅𑀭𑀳’’𑀦𑁆𑀢𑀺𑀆𑀤𑀺𑀦𑀸 𑀅𑀲𑁂𑀓𑁆𑀔𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀕𑀳𑀺𑀢𑀸𑀢𑀺 𑀏𑀯𑀫𑁆𑀧𑀺 𑀔𑀦𑁆𑀥𑀫𑀼𑀔𑁂𑀦 𑀑𑀢𑀭𑀡𑀁, 𑀆𑀬𑀢𑀦𑀥𑀸𑀢𑀸𑀤𑀺𑀫𑀼𑀔𑁂𑀦 𑀘 𑀑𑀢𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 ‘‘𑀦 𑀫𑀜𑁆𑀜𑀢𑀻’’𑀢𑀺 𑀢𑀡𑁆𑀳𑀸𑀕𑀸𑀳𑀸𑀤𑀺𑀧𑀝𑀺𑀓𑁆𑀔𑁂𑀧𑁂𑀦 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀤𑀬𑁄 𑀕𑀳𑀺𑀢𑀸, 𑀢𑁂𑀲𑀁 𑀯𑀲𑁂𑀦 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀫𑀼𑀔𑀸𑀤𑀻𑀳𑀺 𑀑𑀢𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. ‘‘𑀧𑀭𑀺𑀜𑁆𑀜𑀸𑀢’’𑀦𑁆𑀢𑀺 𑀇𑀫𑀺𑀦𑀸 𑀧𑀭𑀺𑀚𑀸𑀦𑀦𑀓𑀺𑀘𑁆𑀘𑁂𑀦 𑀧𑀯𑀢𑁆𑀢𑀫𑀸𑀦𑀸 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀕𑀬𑁆𑀳𑀦𑁆𑀢𑀻𑀢𑀺 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀫𑀼𑀔𑁂𑀦 𑀑𑀢𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀦𑀦𑁆𑀤𑀺𑀕𑁆𑀕𑀳𑀡𑁂𑀦 𑀪𑀯𑀕𑁆𑀕𑀳𑀡𑁂𑀦 𑀢𑀡𑁆𑀳𑀸𑀕𑀳𑀡𑁂𑀦 𑀘 𑀲𑀫𑀼𑀤𑀬𑀲𑀘𑁆𑀘𑀁, 𑀤𑀼𑀓𑁆𑀔𑀕𑁆𑀕𑀳𑀡𑁂𑀦 𑀚𑀸𑀢𑀺𑀚𑀭𑀸𑀫𑀭𑀡𑀕𑁆𑀕𑀳𑀡𑁂𑀦 𑀘 𑀤𑀼𑀓𑁆𑀔𑀲𑀘𑁆𑀘𑀁, ‘‘𑀢𑀡𑁆𑀳𑀸𑀦𑀁 𑀔𑀬𑀸’’𑀢𑀺𑀆𑀤𑀺𑀦𑀸 ¶ 𑀦𑀺𑀭𑁄𑀥𑀲𑀘𑁆𑀘𑀁, 𑀅𑀪𑀺𑀲𑀫𑁆𑀩𑁄𑀥𑀺𑀬𑀸 𑀕𑀳𑀡𑁂𑀦 𑀫𑀕𑁆𑀕𑀲𑀘𑁆𑀘𑀁 𑀕𑀳𑀺𑀢𑀦𑁆𑀢𑀺 𑀅𑀭𑀺𑀬𑀲𑀘𑁆𑀘𑁂𑀳𑀺 𑀑𑀢𑀭𑀡𑀦𑁆𑀢𑀺. 𑀅𑀬𑀁 𑀑𑀢𑀭𑀡𑁄 𑀳𑀸𑀭𑁄.

𑁧𑁩. 𑀲𑁄𑀥𑀦𑀳𑀸𑀭𑀯𑀡𑁆𑀡𑀦𑀸

‘‘𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬𑀁 𑀯𑁄, 𑀪𑀺𑀓𑁆𑀔𑀯𑁂…𑀧𑁂… 𑀇𑀥, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸…𑀧𑁂… 𑀧𑀣𑀯𑀺𑀁 𑀧𑀣𑀯𑀺𑀢𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺 𑀆𑀭𑀫𑁆𑀪𑁄. ‘‘𑀧𑀣𑀯𑀺𑀁 𑀧𑀣𑀯𑀺𑀬𑀸 𑀲𑀜𑁆𑀜𑀢𑁆𑀯𑀸 𑀧𑀣𑀯𑀺𑀁 𑀫𑀜𑁆𑀜𑀢𑀻’’𑀢𑀺 𑀧𑀤𑀲𑀼𑀤𑁆𑀥𑀺, 𑀦𑁄 𑀆𑀭𑀫𑁆𑀪𑀲𑀼𑀤𑁆𑀥𑀺. 𑀢𑀣𑀸 ‘‘𑀧𑀣𑀯𑀺𑀬𑀸 𑀫𑀜𑁆𑀜𑀢𑀺 𑀧𑀣𑀯𑀺𑀢𑁄 𑀫𑀜𑁆𑀜𑀢𑀺 𑀧𑀣𑀯𑀺𑀁 𑀫𑁂𑀢𑀺 𑀫𑀜𑁆𑀜𑀢𑀺 𑀧𑀣𑀯𑀺𑀁 𑀅𑀪𑀺𑀦𑀦𑁆𑀤𑀢𑀻’’𑀢𑀺 𑀧𑀤𑀲𑀼𑀤𑁆𑀥𑀺, 𑀦𑁄 𑀆𑀭𑀫𑁆𑀪𑀲𑀼𑀤𑁆𑀥𑀺. ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀼 𑀅𑀧𑀭𑀺𑀜𑁆𑀜𑀸𑀢𑀁 𑀢𑀲𑁆𑀲𑀸𑀢𑀺 𑀯𑀤𑀸𑀫𑀻’’𑀢𑀺 𑀧𑀤𑀲𑀼𑀤𑁆𑀥𑀺 𑀘𑁂𑀯 𑀆𑀭𑀫𑁆𑀪𑀲𑀼𑀤𑁆𑀥𑀺 𑀘. 𑀲𑁂𑀲𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺. 𑀅𑀬𑀁 𑀲𑁄𑀥𑀦𑁄 𑀳𑀸𑀭𑁄.

𑁧𑁪. 𑀅𑀥𑀺𑀝𑁆𑀞𑀸𑀦𑀳𑀸𑀭𑀯𑀡𑁆𑀡𑀦𑀸

‘‘𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬’’𑀦𑁆𑀢𑀺 𑀏𑀢𑁆𑀣 𑀲𑀩𑁆𑀩𑀥𑀫𑁆𑀫𑀕𑁆𑀕𑀳𑀡𑀁 𑀲𑀸𑀫𑀜𑁆𑀜𑀢𑁄 𑀅𑀥𑀺𑀝𑁆𑀞𑀸𑀦𑀁. ‘‘𑀧𑀣𑀯𑀺𑀁 𑀆𑀧’’𑀦𑁆𑀢𑀺𑀆𑀤𑀺 𑀧𑀦 𑀢𑀁 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀺𑀲𑁂𑀲𑀯𑀘𑀦𑀁. 𑀢𑀣𑀸 ‘‘𑀫𑀽𑀮𑀧𑀭𑀺𑀬𑀸𑀬’’𑀦𑁆𑀢𑀺 ¶ 𑀲𑀸𑀫𑀜𑁆𑀜𑀢𑁄 𑀅𑀥𑀺𑀝𑁆𑀞𑀸𑀦𑀁, 𑀢𑀁 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀺𑀲𑁂𑀲𑀯𑀘𑀦𑀁 ‘‘𑀧𑀣𑀯𑀺𑀁 𑀫𑀜𑁆𑀜𑀢𑀺…𑀧𑁂… 𑀅𑀪𑀺𑀦𑀦𑁆𑀤𑀢𑀻’’𑀢𑀺. ‘‘𑀧𑀣𑀯𑀺𑀁 𑀫𑀜𑁆𑀜𑀢𑀻’’𑀢𑀺 𑀘 𑀲𑀸𑀫𑀜𑁆𑀜𑀢𑁄 𑀅𑀥𑀺𑀝𑁆𑀞𑀸𑀦𑀁 𑀢𑀡𑁆𑀳𑀸𑀤𑀺𑀕𑁆𑀕𑀸𑀳𑀸𑀦𑀁 𑀲𑀸𑀥𑀸𑀭𑀡𑀢𑁆𑀢𑀸 𑀫𑀜𑁆𑀜𑀦𑀸𑀬, 𑀢𑀁 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀺𑀲𑁂𑀲𑀯𑀘𑀦𑀁 ‘‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺, 𑀏𑀯𑀁 𑀲𑀼𑀢𑁆𑀢𑀦𑁆𑀢𑀭𑀧𑀤𑀸𑀦𑀺𑀧𑀺 𑀆𑀦𑁂𑀢𑁆𑀯𑀸 𑀯𑀺𑀲𑁂𑀲𑀯𑀘𑀦𑀁 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀁. 𑀲𑁂𑀲𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. ‘‘𑀲𑁂𑀓𑁆𑀔𑁄’’𑀢𑀺 𑀲𑀸𑀫𑀜𑁆𑀜𑀢𑁄 𑀅𑀥𑀺𑀝𑁆𑀞𑀸𑀦𑀁, 𑀢𑀁 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀺𑀲𑁂𑀲𑀯𑀘𑀦𑀁 ‘‘𑀓𑀸𑀬𑀲𑀓𑁆𑀔𑀻 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀲𑀤𑁆𑀥𑀸𑀦𑀼𑀲𑀸𑀭𑀻 𑀥𑀫𑁆𑀫𑀸𑀦𑀼𑀲𑀸𑀭𑀻’’𑀢𑀺. 𑀢𑀣𑀸 ‘‘𑀲𑁂𑀓𑁆𑀔𑁄’’𑀢𑀺 𑀲𑀸𑀫𑀜𑁆𑀜𑀢𑁄 𑀅𑀥𑀺𑀝𑁆𑀞𑀸𑀦𑀁, 𑀢𑀁 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀺𑀲𑁂𑀲𑀯𑀘𑀦𑀁 ‘‘𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑁂𑀓𑁆𑀔𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺…𑀧𑁂… 𑀲𑁂𑀓𑁆𑀔𑁂𑀦 𑀲𑀫𑁆𑀫𑀸𑀲𑀫𑀸𑀥𑀺𑀦𑀸 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁩). ‘‘𑀅𑀭𑀳’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀅𑀥𑀺𑀝𑁆𑀞𑀸𑀦𑀁, 𑀢𑀁 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀺𑀲𑁂𑀲𑀯𑀘𑀦𑀁 ‘‘𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 (𑀧𑀼. 𑀧. 𑁧𑁩.𑁨; 𑁧𑁫.𑁧 𑀫𑀸𑀢𑀺𑀓𑀸), 𑀢𑁂𑀯𑀺𑀚𑁆𑀚𑁄 𑀙𑀴𑀪𑀺𑀜𑁆𑀜𑁄’’𑀢𑀺 (𑀧𑀼. 𑀧. 𑁭.𑁨𑁬, 𑁨𑁭 𑀫𑀸𑀢𑀺𑀓𑀸) 𑀘. ‘‘𑀔𑀻𑀡𑀸𑀲𑀯𑁄’’𑀢𑀺 𑀲𑀸𑀫𑀜𑁆𑀜𑀢𑁄 𑀅𑀥𑀺𑀝𑁆𑀞𑀸𑀦𑀁, 𑀢𑀁 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀺𑀲𑁂𑀲𑀯𑀘𑀦𑀁 ‘‘𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀢𑁆𑀣, 𑀪𑀯𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀢𑁆𑀣𑀸’’𑀢𑀺𑀆𑀤𑀺 (𑀧𑀸𑀭𑀸. 𑁧𑁪). 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. ‘‘𑀅𑀪𑀺𑀚𑀸𑀦𑀸𑀢𑀻’’𑀢𑀺 𑀲𑀸𑀫𑀜𑁆𑀜𑀢𑁄 𑀅𑀥𑀺𑀝𑁆𑀞𑀸𑀦𑀁, 𑀢𑀁 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀺𑀲𑁂𑀲𑀯𑀘𑀦𑀁 ‘‘𑀫𑀜𑁆𑀜𑀢𑀻’’𑀢𑀺. 𑀫𑀜𑁆𑀜𑀦𑀸𑀪𑀸𑀯𑁄 𑀳𑀺𑀲𑁆𑀲 𑀧𑀳𑀸𑀦𑀧𑀝𑀺𑀯𑁂𑀥𑀲𑀺𑀤𑁆𑀥𑁄, 𑀧𑀳𑀸𑀦𑀧𑀝𑀺𑀯𑁂𑀥𑁄 ¶ 𑀘 𑀧𑀭𑀺𑀜𑁆𑀜𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸𑀧𑀝𑀺𑀯𑁂𑀥𑁂𑀳𑀺 𑀦 𑀯𑀺𑀦𑀸𑀢𑀺 𑀲𑀩𑁆𑀩𑁂𑀧𑀺 𑀅𑀪𑀺𑀜𑁆𑀜𑀸𑀯𑀺𑀲𑁂𑀲𑀸 𑀫𑀜𑁆𑀜𑀦𑀸𑀧𑀝𑀺𑀓𑁆𑀔𑁂𑀧𑁂𑀦 𑀅𑀢𑁆𑀣𑀢𑁄 𑀕𑀳𑀺𑀢𑀸𑀯 𑀳𑁄𑀦𑁆𑀢𑀻𑀢𑀺. 𑀢𑀣𑀸 ‘‘𑀅𑀭𑀳’’𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀅𑀥𑀺𑀝𑁆𑀞𑀸𑀦𑀁, 𑀢𑀁 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀺𑀲𑁂𑀲𑀯𑀘𑀦𑀁 ‘‘𑀯𑀻𑀢𑀭𑀸𑀕𑀢𑁆𑀢𑀸 𑀯𑀻𑀢𑀤𑁄𑀲𑀢𑁆𑀢𑀸 𑀯𑀻𑀢𑀫𑁄𑀳𑀢𑁆𑀢𑀸’’𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀤𑁂𑀲𑀼𑀧𑀺 𑀲𑀸𑀫𑀜𑁆𑀜𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑁄.

𑁧𑁪. 𑀧𑀭𑀺𑀓𑁆𑀔𑀸𑀭𑀳𑀸𑀭𑀯𑀡𑁆𑀡𑀦𑀸

‘‘𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬’’𑀦𑁆𑀢𑀺 𑀏𑀢𑁆𑀣 𑀲𑀩𑁆𑀩𑀥𑀫𑁆𑀫𑀸 𑀦𑀸𑀫 𑀧𑀭𑀺𑀬𑀸𑀧𑀦𑁆𑀦𑀥𑀫𑁆𑀫𑀸, 𑀢𑁂 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀪𑁂𑀤𑁂𑀦 𑀢𑀺𑀯𑀺𑀥𑀸. 𑀢𑁂𑀲𑀼 𑀓𑀼𑀲𑀮𑀸𑀦𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀅𑀮𑁄𑀪𑀸𑀤𑀬𑁄 𑀘 𑀳𑁂𑀢𑀽, 𑀅𑀓𑀼𑀲𑀮𑀸𑀦𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀮𑁄𑀪𑀸𑀤𑀬𑁄 𑀘 𑀳𑁂𑀢𑀽, 𑀅𑀩𑁆𑀬𑀸𑀓𑀢𑁂𑀲𑀼 𑀯𑀺𑀧𑀸𑀓𑀸𑀦𑀁 𑀬𑀣𑀸𑀲𑀓𑀁 𑀓𑀫𑁆𑀫𑀁, 𑀇𑀢𑀭𑁂𑀲𑀁 𑀪𑀯𑀗𑁆𑀕𑀫𑀸𑀯𑀚𑁆𑀚𑀦𑀲𑀫𑀦𑁆𑀦𑀸𑀳𑀸𑀭𑀸𑀤𑀺 𑀘 𑀳𑁂𑀢𑀽. 𑀏𑀢𑁆𑀣 𑀘 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀤𑀺𑀓𑁄 𑀧𑀘𑁆𑀘𑀬𑁄 𑀳𑁂𑀢𑀼𑀫𑁆𑀳𑀺 𑀏𑀯 𑀲𑀫𑀯𑀭𑀼𑀴𑁆𑀳𑁄, 𑀲𑁄 𑀢𑀢𑁆𑀣 ¶ 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. ‘‘𑀫𑀽𑀮’’𑀦𑁆𑀢𑀺 𑀯𑀼𑀢𑁆𑀢𑀸𑀦𑀁 𑀫𑀜𑁆𑀜𑀦𑀸𑀦𑀁 𑀳𑁂𑀢𑀼𑀪𑀸𑀯𑁄 𑀧𑀸𑀴𑀺𑀬𑀁 𑀯𑀼𑀢𑁆𑀢𑁄 𑀏𑀯. 𑀫𑀜𑁆𑀜𑀦𑀸𑀲𑀼 𑀧𑀦 𑀢𑀡𑁆𑀳𑀸𑀫𑀜𑁆𑀜𑀦𑀸𑀬 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀦𑀸 𑀳𑁂𑀢𑀼. ‘‘𑀲𑀜𑁆𑀜𑁄𑀚𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀻’’𑀢𑀺 (𑀲𑀁. 𑀦𑀺. 𑁨.𑁫𑁨) 𑀳𑀺 𑀯𑀼𑀢𑁆𑀢𑀁. 𑀫𑀸𑀦𑀫𑀜𑁆𑀜𑀦𑀸𑀬 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑁄 𑀳𑁂𑀢𑀼 𑀓𑁂𑀯𑀮𑀁 𑀲𑀁𑀲𑀕𑁆𑀕𑀯𑀲𑁂𑀦 ‘‘𑀅𑀳𑀫𑀲𑁆𑀫𑀻’’𑀢𑀺 𑀧𑀯𑀢𑁆𑀢𑀦𑀢𑁄. 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬 𑀏𑀓𑀢𑁆𑀢𑀦𑀬𑀸𑀤𑀻𑀦𑀁 𑀅𑀬𑀸𑀣𑀸𑀯𑀕𑁆𑀕𑀸𑀳𑁄 𑀳𑁂𑀢𑀼, 𑀅𑀲𑁆𑀲𑀼𑀢𑀪𑀸𑀯𑁄 𑀧𑀼𑀣𑀼𑀚𑁆𑀚𑀦𑀪𑀸𑀯𑀲𑁆𑀲 𑀳𑁂𑀢𑀼, 𑀲𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀲𑀻𑀮𑀢𑀸𑀬, 𑀲𑀸 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑀢𑀸𑀬, 𑀲𑀸 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑀢𑀸𑀬 𑀳𑁂𑀢𑀼, 𑀲𑀩𑁆𑀩𑀸 𑀘𑀸𑀬𑀁 𑀳𑁂𑀢𑀼𑀧𑀭𑀫𑁆𑀧𑀭𑀸 𑀧𑀣𑀯𑀻𑀆𑀤𑀻𑀲𑀼 ‘‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀢𑀺𑀲𑁆𑀲𑀦𑁆𑀦𑀁 𑀫𑀜𑁆𑀜𑀦𑀸𑀦𑀁 𑀳𑁂𑀢𑀼, 𑀲𑁂𑀓𑁆𑀔𑀸𑀭𑀳𑀸𑀤𑀺𑀪𑀸𑀯𑀸 𑀧𑀦 𑀫𑀢𑁆𑀢𑀲𑁄 𑀲𑀩𑁆𑀩𑀲𑁄 𑀘 𑀫𑀜𑁆𑀜𑀦𑀸𑀪𑀸𑀯𑀲𑁆𑀲 𑀳𑁂𑀢𑀽𑀢𑀺. 𑀅𑀬𑀁 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑁄.

𑁧𑁬. 𑀲𑀫𑀸𑀭𑁄𑀧𑀦𑀳𑀸𑀭𑀯𑀡𑁆𑀡𑀦𑀸

‘‘𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬’’𑀦𑁆𑀢𑀺𑀆𑀤𑀻𑀲𑀼 𑀫𑀽𑀮𑀧𑀭𑀺𑀬𑀸𑀬𑀕𑁆𑀕𑀳𑀡𑁂𑀦 𑀅𑀲𑁆𑀲𑀼𑀢𑀯𑀸𑀕𑀳𑀡𑁂𑀦 𑀲𑀜𑁆𑀚𑀸𑀦𑀦𑀫𑀜𑁆𑀜𑀦𑀸𑀧𑀭𑀺𑀜𑁆𑀜𑀸𑀕𑀳𑀡𑁂𑀳𑀺 𑀘 𑀲𑀁𑀓𑀺𑀮𑁂𑀲𑀥𑀫𑁆𑀫𑀸 𑀤𑀲𑁆𑀲𑀺𑀢𑀸, 𑀢𑁂 𑀘 𑀲𑀗𑁆𑀔𑁂𑀧𑀢𑁄 𑀢𑀺𑀯𑀺𑀥𑀸 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑁄𑀢𑀺. 𑀢𑀢𑁆𑀣 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀲𑁆𑀲, 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀲𑁆𑀲, 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀲𑁆𑀲 𑀘 𑀧𑀤𑀝𑁆𑀞𑀸𑀦𑀁, 𑀢𑀣𑀸 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀲𑁆𑀲, 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀲𑁆𑀲, 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀲𑁆𑀲 𑀘 𑀧𑀤𑀝𑁆𑀞𑀸𑀦𑀁, 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑁄𑀧𑀺 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀲𑁆𑀲, 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀲𑁆𑀲, 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀲𑁆𑀲 𑀘 𑀧𑀤𑀝𑁆𑀞𑀸𑀦𑀁. 𑀢𑁂𑀲𑀼 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑁄 𑀅𑀢𑁆𑀣𑀢𑁄 𑀮𑁄𑀪𑁄𑀯, 𑀬𑁄 ‘‘𑀮𑁄𑀪𑁄 𑀮𑀼𑀩𑁆𑀪𑀦𑀸 𑀮𑀼𑀩𑁆𑀪𑀺𑀢𑀢𑁆𑀢𑀁 𑀲𑀸𑀭𑀸𑀕𑁄 𑀲𑀸𑀭𑀚𑁆𑀚𑀦𑀸 𑀲𑀸𑀭𑀚𑁆𑀚𑀺𑀢𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 ¶ (𑀥. 𑀲. 𑁩𑁮𑁯) 𑀅𑀦𑁂𑀓𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀯𑀺𑀪𑀢𑁆𑀢𑁄. 𑀢𑀣𑀸 𑀤𑀺𑀝𑁆𑀞𑀺𑀬𑁂𑀯 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑁄, 𑀬𑁄 ‘‘𑀤𑀺𑀝𑁆𑀞𑀺𑀕𑀢𑀁 𑀤𑀺𑀝𑁆𑀞𑀺𑀕𑀳𑀦𑀁 𑀤𑀺𑀝𑁆𑀞𑀺𑀓𑀦𑁆𑀢𑀸𑀭𑁄 𑀤𑀺𑀝𑁆𑀞𑀺𑀯𑀺𑀲𑀽𑀓𑀁 𑀤𑀺𑀝𑁆𑀞𑀺𑀯𑀺𑀧𑁆𑀨𑀦𑁆𑀤𑀺𑀢’’𑀦𑁆𑀢𑀺𑀆𑀤𑀺𑀦𑀸 (𑀥. 𑀲. 𑁧𑁧𑁦𑁫) 𑀅𑀦𑁂𑀓𑁂𑀳𑀺 𑀧𑀭𑀺𑀬𑀸𑀬𑁂𑀳𑀺, ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁩𑁦) 𑀤𑁆𑀯𑀸𑀲𑀝𑁆𑀞𑀺𑀬𑀸 𑀧𑀪𑁂𑀤𑁂𑀳𑀺 𑀘 𑀯𑀺𑀪𑀢𑁆𑀢𑁄. 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑁄 𑀧𑀦 𑀅𑀢𑁆𑀣𑀢𑁄 𑀤𑀼𑀲𑁆𑀲𑀻𑀮𑁆𑀬𑀘𑁂𑀢𑀦𑀸 𑀘𑁂𑀯 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀘, 𑀬𑀸 ‘‘𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀓𑀸𑀬𑀯𑀺𑀲𑀫𑀁 𑀯𑀘𑀻𑀯𑀺𑀲𑀫’’𑀦𑁆𑀢𑀺 (𑀯𑀺𑀪. 𑁯𑁧𑁩, 𑁯𑁨𑁪), ‘‘𑀧𑀸𑀡𑀸𑀢𑀺𑀧𑀸𑀢𑁄 𑀅𑀤𑀺𑀦𑁆𑀦𑀸𑀤𑀸𑀦’’𑀦𑁆𑀢𑀺 (𑀯𑀺𑀪. 𑁯𑁧𑁩) 𑀘 𑀆𑀤𑀺𑀦𑀸 𑀅𑀦𑁂𑀓𑁂𑀳𑀺 𑀧𑀭𑀺𑀬𑀸𑀬𑁂𑀳𑀺, 𑀅𑀦𑁂𑀓𑁂𑀳𑀺 𑀧𑀪𑁂𑀤𑁂𑀳𑀺 𑀘 𑀯𑀺𑀪𑀢𑁆𑀢𑀸.

𑀢𑁂𑀲𑀼 ¶ 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀲𑁆𑀲 𑀲𑀫𑀣𑁄 𑀧𑀝𑀺𑀧𑀓𑁆𑀔𑁄, 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀲𑁆𑀲 𑀯𑀺𑀧𑀲𑁆𑀲𑀦𑀸, 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀲𑁆𑀲 𑀲𑀻𑀮𑀁 𑀧𑀝𑀺𑀧𑀓𑁆𑀔𑁄. 𑀢𑁂 𑀧𑀦 𑀲𑀻𑀮𑀸𑀤𑀬𑁄 𑀥𑀫𑁆𑀫𑀸 𑀇𑀥 𑀧𑀭𑀺𑀜𑁆𑀜𑀸𑀕𑀳𑀡𑁂𑀦 𑀲𑁂𑀓𑁆𑀔𑀕𑁆𑀕𑀳𑀡𑁂𑀦 ‘‘𑀅𑀭𑀳’’𑀦𑁆𑀢𑀺𑀆𑀤𑀺𑀦𑀸 𑀅𑀭𑀺𑀬𑀢𑀸𑀤𑀺𑀕𑁆𑀕𑀳𑀡𑁂𑀦 𑀘 𑀕𑀳𑀺𑀢𑀸. 𑀢𑀢𑁆𑀣 𑀲𑀻𑀮𑁂𑀦 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀲𑀺𑀚𑁆𑀛𑀢𑀺, 𑀢𑀣𑀸 𑀢𑀤𑀗𑁆𑀕𑀧𑁆𑀧𑀳𑀸𑀦𑀁 𑀯𑀻𑀢𑀺𑀓𑁆𑀓𑀫𑀧𑁆𑀧𑀳𑀸𑀦𑀜𑁆𑀘, 𑀲𑀫𑀣𑁂𑀦 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀲𑀺𑀚𑁆𑀛𑀢𑀺, 𑀢𑀣𑀸 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀜𑁆𑀘. 𑀯𑀺𑀧𑀲𑁆𑀲𑀦𑀸𑀬 𑀤𑀺𑀝𑁆𑀞𑀺𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀲𑀺𑀚𑁆𑀛𑀢𑀺, 𑀢𑀣𑀸 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁 𑀅𑀦𑀼𑀲𑀬𑀧𑁆𑀧𑀳𑀸𑀦𑀜𑁆𑀘. 𑀢𑀢𑁆𑀣 𑀧𑀼𑀩𑁆𑀩𑀪𑀸𑀕𑁂 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀲𑀫𑀣𑁄, 𑀲𑀫𑀣𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀯𑀺𑀧𑀲𑁆𑀲𑀦𑀸, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀲𑀫𑀓𑀸𑀮𑀫𑁂𑀯 𑀪𑀯𑀦𑁆𑀢𑀺. 𑀧𑀼𑀩𑁆𑀩𑁂𑀬𑁂𑀯 𑀳𑀺 𑀲𑀼𑀧𑀭𑀺𑀲𑀼𑀤𑁆𑀥𑀓𑀸𑀬𑀯𑀘𑀻𑀓𑀫𑁆𑀫𑀲𑁆𑀲 𑀲𑀼𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑀲𑁆𑀲 𑀘 𑀲𑀫𑀣𑀯𑀺𑀧𑀲𑁆𑀲𑀦𑀸 𑀆𑀭𑀤𑁆𑀥𑀸 𑀕𑀩𑁆𑀪𑀁 𑀕𑀡𑁆𑀳𑀦𑁆𑀢𑀺𑀬𑁄 𑀧𑀭𑀺𑀧𑀸𑀓𑀁 𑀕𑀘𑁆𑀙𑀦𑁆𑀢𑀺𑀬𑁄 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀁 𑀧𑀭𑀺𑀩𑁆𑀭𑀽𑀳𑁂𑀦𑁆𑀢𑀺, 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀻 𑀫𑀕𑁆𑀕𑁂𑀦 𑀖𑀝𑁂𑀦𑁆𑀢𑀺 𑀫𑀕𑁆𑀕𑀓𑁆𑀔𑀡𑁂 𑀲𑀫𑀣𑀯𑀺𑀧𑀲𑁆𑀲𑀦𑀸 𑀧𑀭𑀺𑀧𑀽𑀭𑁂𑀢𑀺. 𑀅𑀣 𑀫𑀕𑁆𑀕𑀓𑁆𑀔𑀡𑁂 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸 𑀅𑀦𑀯𑀲𑁂𑀲𑀲𑀁𑀓𑀺𑀮𑁂𑀲𑀥𑀫𑁆𑀫𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺𑀬𑁄 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀦𑁆𑀢𑀻𑀢𑀺. 𑀅𑀬𑀁 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄.

𑀲𑁄𑀴𑀲𑀳𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀯𑀺𑀥𑀦𑀬𑀯𑀡𑁆𑀡𑀦𑀸

𑁧. 𑀦𑀦𑁆𑀤𑀺𑀬𑀸𑀯𑀝𑁆𑀝𑀦𑀬𑀯𑀡𑁆𑀡𑀦𑀸

‘‘𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬’’𑀦𑁆𑀢𑀺𑀆𑀤𑀻𑀲𑀼 ¶ 𑀲𑀩𑁆𑀩𑀥𑀫𑁆𑀫𑀫𑀽𑀮𑀕𑁆𑀕𑀳𑀡𑁂𑀦 𑀫𑀜𑁆𑀜𑀦𑀸𑀕𑀳𑀡𑁂𑀦 𑀘 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀬𑁄 𑀕𑀳𑀺𑀢𑀸. 𑀫𑀜𑁆𑀜𑀦𑀸𑀦𑀫𑁆𑀧𑀺 𑀳𑀺 𑀫𑀜𑁆𑀜𑀦𑀸 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑀺𑀢𑁄𑀬𑀫𑀢𑁆𑀣𑁄. ‘‘𑀅𑀲𑁆𑀲𑀼𑀢𑀯𑀸’’𑀢𑀺𑀆𑀤𑀺𑀦𑀸 𑀅𑀯𑀺𑀚𑁆𑀚𑀸𑀫𑀸𑀦𑀤𑀺𑀝𑁆𑀞𑀺𑀬𑁄 𑀕𑀳𑀺𑀢𑀸, 𑀲𑀩𑁆𑀩𑁂𑀧𑀺 𑀯𑀸 𑀲𑀁𑀓𑀺𑀮𑁂𑀲𑀥𑀫𑁆𑀫𑀸, 𑀢𑀣𑀸 𑀲𑀜𑁆𑀜𑀸𑀅𑀧𑀭𑀺𑀜𑁆𑀜𑀸𑀢𑀕𑁆𑀕𑀳𑀡𑁂𑀦. ‘‘𑀔𑀻𑀡𑀸𑀲𑀯𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀜𑁆𑀜𑁄𑀚𑀦𑁄’’𑀢𑀺 𑀏𑀢𑁆𑀣 𑀧𑀦 𑀆𑀲𑀯𑀸 𑀲𑀜𑁆𑀜𑁄𑀚𑀦𑀸𑀦𑀺 𑀘 𑀲𑀭𑀽𑀧𑀢𑁄 𑀕𑀳𑀺𑀢𑀸𑀦𑀺, 𑀢𑀣𑀸 𑀦𑀦𑁆𑀤𑀺𑀕𑁆𑀕𑀳𑀡𑁂𑀦 𑀢𑀡𑁆𑀳𑀸𑀕𑀳𑀡𑁂𑀦 𑀘 𑀢𑀡𑁆𑀳𑀸, 𑀏𑀯𑀫𑁆𑀧𑁂𑀢𑁆𑀣 𑀲𑀭𑀽𑀧𑀢𑁄 𑀧𑀭𑀺𑀬𑀸𑀬𑀢𑁄 𑀘 𑀢𑀡𑁆𑀳𑀸 𑀅𑀯𑀺𑀚𑁆𑀚𑀸 𑀢𑀧𑁆𑀧𑀓𑁆𑀔𑀺𑀬𑀥𑀫𑁆𑀫𑀸 𑀘 𑀕𑀳𑀺𑀢𑀸. 𑀢𑀢𑁆𑀣 𑀢𑀡𑁆𑀳𑀸𑀬 𑀯𑀺𑀲𑁂𑀲𑀢𑁄 𑀭𑀽𑀧𑀥𑀫𑁆𑀫𑀸 𑀅𑀥𑀺𑀝𑁆𑀞𑀸𑀦𑀁, 𑀅𑀯𑀺𑀚𑁆𑀚𑀸𑀬 𑀅𑀭𑀽𑀧𑀥𑀫𑁆𑀫𑀸, 𑀢𑁂 𑀧𑀦 𑀲𑀩𑁆𑀩𑀥𑀫𑁆𑀫𑀕𑁆𑀕𑀳𑀡𑁂𑀦 𑀧𑀣𑀯𑀻𑀆𑀤𑀺𑀕𑁆𑀕𑀳𑀡𑁂𑀦 𑀘 𑀤𑀲𑁆𑀲𑀺𑀢𑀸 𑀏𑀯. 𑀢𑀸𑀲𑀁 𑀲𑀫𑀣𑁄 𑀯𑀺𑀧𑀲𑁆𑀲𑀦𑀸 𑀘 𑀧𑀝𑀺𑀧𑀓𑁆𑀔𑁄, 𑀢𑁂𑀲𑀫𑁂𑀢𑁆𑀣 𑀕𑀳𑁂𑀢𑀩𑁆𑀩𑀸𑀓𑀸𑀭𑁄 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑁄 𑀏𑀯. 𑀲𑀫𑀣𑀲𑁆𑀲 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀨𑀮𑀁 ¶ , 𑀯𑀺𑀧𑀲𑁆𑀲𑀦𑀸𑀬 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺. 𑀢𑀣𑀸 𑀳𑀺 𑀢𑀸 ‘‘𑀭𑀸𑀕𑀯𑀺𑀭𑀸𑀕𑀸’’𑀢𑀺𑀆𑀤𑀺𑀦𑀸 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀘𑁆𑀘𑀦𑁆𑀢𑀺, 𑀇𑀫𑀸𑀲𑀫𑁂𑀢𑁆𑀣 𑀕𑀳𑀡𑀁 𑀲𑀫𑁆𑀫𑀤𑀜𑁆𑀜𑀸𑀯𑀺𑀫𑀼𑀢𑁆𑀢𑀯𑀻𑀢𑀭𑀸𑀕𑀸𑀤𑀺𑀯𑀘𑀦𑁂𑀳𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀢𑀡𑁆𑀳𑀸𑀯𑀺𑀚𑁆𑀚𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀢𑀧𑁆𑀧𑀓𑁆𑀔𑀺𑀬𑀥𑀫𑁆𑀫𑀸 𑀧𑀦 𑀢𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀲𑀁 𑀅𑀥𑀺𑀝𑁆𑀞𑀸𑀦𑀪𑀽𑀢𑀸 𑀯𑀼𑀢𑁆𑀢𑀧𑁆𑀧𑀪𑁂𑀤𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀤𑀼𑀓𑁆𑀔𑀲𑀘𑁆𑀘𑀁, 𑀢𑁂𑀲𑀁 𑀅𑀧𑁆𑀧𑀯𑀢𑁆𑀢𑀺 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑀚𑀸𑀦𑀦𑀸 𑀧𑀝𑀺𑀧𑀤𑀸 𑀫𑀕𑁆𑀕𑀲𑀘𑁆𑀘𑀁. 𑀢𑀡𑁆𑀳𑀸𑀕𑀳𑀡𑁂𑀦 𑀘𑁂𑀢𑁆𑀣 𑀫𑀸𑀬𑀸-𑀲𑀸𑀞𑁂𑀬𑁆𑀬-𑀫𑀸𑀦𑀸𑀢𑀺𑀫𑀸𑀦-𑀫𑀤𑀧𑁆𑀧𑀫𑀸𑀤-𑀧𑀸𑀧𑀺𑀘𑁆𑀙𑀢𑀸-𑀧𑀸𑀧𑀫𑀺𑀢𑁆𑀢𑀢𑀸-𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀸𑀤𑀺𑀯𑀲𑁂𑀦 𑀅𑀓𑀼𑀲𑀮𑀧𑀓𑁆𑀔𑁄 𑀦𑁂𑀢𑀩𑁆𑀩𑁄, 𑀅𑀯𑀺𑀚𑁆𑀚𑀸𑀕𑀳𑀡𑁂𑀦 𑀯𑀺𑀧𑀭𑀻𑀢𑀫𑀦𑀲𑀺𑀓𑀸𑀭-𑀓𑁄𑀥𑀽𑀧𑀦𑀸𑀳-𑀫𑀓𑁆𑀔-𑀧𑀴𑀸𑀲-𑀇𑀲𑁆𑀲𑀸-𑀫𑀘𑁆𑀙𑀭𑀺𑀬- 𑀲𑀸𑀭𑀫𑁆𑀪𑀤𑁄𑀯𑀘𑀲𑁆𑀲𑀢𑀸-𑀪𑀯𑀤𑀺𑀝𑁆𑀞𑀺-𑀯𑀺𑀪𑀯𑀤𑀺𑀝𑁆𑀞𑀺𑀆𑀤𑀺𑀯𑀲𑁂𑀦 𑀅𑀓𑀼𑀲𑀮𑀧𑀓𑁆𑀔𑁄 𑀦𑁂𑀢𑀩𑁆𑀩𑁄, 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀫𑀸𑀬𑀸𑀅𑀲𑀸𑀞𑁂𑀬𑁆𑀬𑀸𑀤𑀺𑀅𑀯𑀺𑀧𑀭𑀻𑀢𑀫𑀦𑀲𑀺𑀓𑀸𑀭𑀸𑀤𑀺𑀯𑀲𑁂𑀦, 𑀢𑀣𑀸 𑀲𑀫𑀣𑀧𑀓𑁆𑀔𑀺𑀬𑀸𑀦𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀯𑀺𑀧𑀲𑁆𑀲𑀦𑀸𑀧𑀓𑁆𑀔𑀺𑀬𑀸𑀦𑀁 𑀅𑀦𑀺𑀘𑁆𑀘𑀲𑀜𑁆𑀜𑀸𑀤𑀻𑀦𑀜𑁆𑀘 𑀯𑀲𑁂𑀦 𑀯𑁄𑀤𑀸𑀦𑀧𑀓𑁆𑀔𑁄 𑀦𑁂𑀢𑀩𑁆𑀩𑁄𑀢𑀺. 𑀅𑀬𑀁 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀦 𑀬𑀲𑁆𑀲 𑀪𑀽𑀫𑀺.

𑁨. 𑀢𑀺𑀧𑀼𑀓𑁆𑀔𑀮𑀦𑀬𑀯𑀡𑁆𑀡𑀦𑀸

𑀢𑀣𑀸 𑀯𑀼𑀢𑁆𑀢𑀦𑀬𑁂𑀦 𑀲𑀭𑀽𑀧𑀢𑁄 𑀧𑀭𑀺𑀬𑀸𑀬𑀢𑁄 𑀘 𑀕𑀳𑀺𑀢𑁂𑀲𑀼 𑀢𑀡𑁆𑀳𑀸𑀯𑀺𑀚𑁆𑀚𑀸𑀢𑀧𑁆𑀧𑀓𑁆𑀔𑀺𑀬𑀥𑀫𑁆𑀫𑁂𑀲𑀼 𑀢𑀡𑁆𑀳𑀸 𑀮𑁄𑀪𑁄, 𑀅𑀯𑀺𑀚𑁆𑀚𑀸 𑀫𑁄𑀳𑁄, 𑀅𑀯𑀺𑀚𑁆𑀚𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀮𑁄𑀳𑀺𑀢𑁂 𑀲𑀢𑀺 𑀧𑀼𑀩𑁆𑀩𑁄 𑀯𑀺𑀬 𑀢𑀡𑁆𑀳𑀸𑀬 𑀲𑀢𑀺 𑀲𑀺𑀚𑁆𑀛𑀫𑀸𑀦𑁄 𑀆𑀖𑀸𑀢𑁄 𑀤𑁄𑀲𑁄, 𑀇𑀢𑀺 𑀢𑀻𑀳𑀺 𑀅𑀓𑀼𑀲𑀮𑀫𑀽𑀮𑁂𑀳𑀺 𑀕𑀳𑀺𑀢𑁂𑀳𑀺, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀫𑀜𑁆𑀜𑀦𑀸𑀧𑀝𑀺𑀓𑁆𑀔𑁂𑀧𑀧𑀭𑀺𑀜𑁆𑀜𑀸𑀕𑀳𑀡𑀸𑀤𑀻𑀳𑀺 𑀘 𑀓𑀼𑀲𑀮𑀫𑀽𑀮𑀸𑀦𑀺 𑀲𑀺𑀤𑁆𑀥𑀸𑀦𑀺𑀬𑁂𑀯 𑀳𑁄𑀦𑁆𑀢𑀺. 𑀇𑀥𑀸𑀧𑀺 ‘‘𑀮𑁄𑀪𑁄 𑀲𑀩𑁆𑀩𑀸𑀦𑀺 ¶ 𑀯𑀸 𑀲𑀸𑀲𑀯𑀓𑀼𑀲𑀮𑀸𑀓𑀼𑀲𑀮𑀫𑀽𑀮𑀸𑀦𑀺 𑀲𑀫𑀼𑀤𑀬𑀲𑀘𑁆𑀘𑀁, 𑀢𑁂𑀳𑀺 𑀦𑀺𑀩𑁆𑀩𑀢𑁆𑀢𑀸, 𑀢𑁂𑀲𑀁 𑀅𑀥𑀺𑀝𑁆𑀞𑀸𑀦𑀕𑁄𑀘𑀭𑀪𑀽𑀢𑀸 𑀘 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀲𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀲𑀘𑁆𑀘𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀨𑀮𑀁 𑀧𑀦𑁂𑀢𑁆𑀣 𑀢𑀬𑁄 𑀯𑀺𑀫𑁄𑀓𑁆𑀔𑀸, 𑀢𑀻𑀳𑀺 𑀧𑀦 𑀅𑀓𑀼𑀲𑀮𑀫𑀽𑀮𑁂𑀳𑀺 𑀢𑀺𑀯𑀺𑀥𑀤𑀼𑀘𑁆𑀘𑀭𑀺𑀢-𑀲𑀁𑀓𑀺𑀮𑁂𑀲𑀫𑀮-𑀯𑀺𑀲𑀫𑀅𑀓𑀼𑀲𑀮-𑀲𑀜𑁆𑀜𑀸-𑀯𑀺𑀢𑀓𑁆𑀓𑀸𑀤𑀺𑀯𑀲𑁂𑀦 𑀅𑀓𑀼𑀲𑀮𑀧𑀓𑁆𑀔𑁄 𑀦𑁂𑀢𑀩𑁆𑀩𑁄. 𑀢𑀣𑀸 𑀢𑀻𑀳𑀺 𑀓𑀼𑀲𑀮𑀫𑀽𑀮𑁂𑀳𑀺 𑀢𑀺𑀯𑀺𑀥𑀲𑀼𑀘𑀭𑀺𑀢-𑀲𑀫𑀓𑀼𑀲𑀮-𑀲𑀜𑁆𑀜𑀸-𑀯𑀺𑀢𑀓𑁆𑀓-𑀲𑀤𑁆𑀥𑀫𑁆𑀫-𑀲𑀫𑀸𑀥𑀺-𑀯𑀺𑀫𑁄𑀓𑁆𑀔𑀫𑀼𑀔-𑀯𑀺𑀫𑁄𑀓𑁆𑀔𑀸-𑀤𑀺𑀯𑀲𑁂𑀦 𑀓𑀼𑀲𑀮𑀧𑀓𑁆𑀔𑁄 𑀦𑁂𑀢𑀩𑁆𑀩𑁄𑀢𑀺. 𑀅𑀬𑀁 𑀢𑀺𑀧𑀼𑀓𑁆𑀔𑀮𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺.

𑁩. 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀦𑀬𑀯𑀡𑁆𑀡𑀦𑀸

𑀢𑀣𑀸 𑀯𑀼𑀢𑁆𑀢𑀦𑀬𑁂𑀦 𑀲𑀭𑀽𑀧𑀢𑁄 𑀧𑀭𑀺𑀬𑀸𑀬𑀢𑁄 𑀘 𑀕𑀳𑀺𑀢𑁂𑀲𑀼 𑀢𑀡𑁆𑀳𑀸𑀯𑀺𑀚𑁆𑀚𑀸𑀢𑀧𑁆𑀧𑀓𑁆𑀔𑀺𑀬𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀢𑁄 𑀢𑀡𑁆𑀳𑀸𑀤𑀺𑀝𑁆𑀞𑀻𑀦𑀁 𑀯𑀲𑁂𑀦 𑀅𑀲𑀼𑀪𑁂 ‘‘𑀲𑀼𑀪’’𑀦𑁆𑀢𑀺 ¶ , 𑀤𑀼𑀓𑁆𑀔𑁂 ‘‘𑀲𑀼𑀔’’𑀦𑁆𑀢𑀺 𑀘 𑀯𑀺𑀧𑀮𑁆𑀮𑀸𑀲𑀸, 𑀅𑀯𑀺𑀚𑁆𑀚𑀸𑀤𑀺𑀝𑁆𑀞𑀻𑀦𑀁 𑀯𑀲𑁂𑀦 𑀅𑀦𑀺𑀘𑁆𑀘𑁂 ‘‘𑀦𑀺𑀘𑁆𑀘’’𑀦𑁆𑀢𑀺, 𑀅𑀦𑀢𑁆𑀢𑀦𑀺 ‘‘𑀅𑀢𑁆𑀢𑀸’’𑀢𑀺 𑀘 𑀯𑀺𑀧𑀮𑁆𑀮𑀸𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀲𑀁 𑀧𑀝𑀺𑀧𑀓𑁆𑀔𑀢𑁄 𑀫𑀜𑁆𑀜𑀦𑀸𑀧𑀝𑀺𑀓𑁆𑀔𑁂𑀧𑀧𑀭𑀺𑀜𑁆𑀜𑀸𑀕𑀳𑀡𑀸𑀤𑀺𑀲𑀺𑀤𑁆𑀥𑁂𑀳𑀺 𑀲𑀢𑀺𑀯𑀻𑀭𑀺𑀬𑀲𑀫𑀸𑀥𑀺𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂𑀳𑀺 𑀘𑀢𑁆𑀢𑀸𑀭𑀺 𑀲𑀢𑀺𑀧𑀝𑁆𑀞𑀸𑀦𑀸𑀦𑀺 𑀲𑀺𑀤𑁆𑀥𑀸𑀦𑁂𑀯 𑀳𑁄𑀦𑁆𑀢𑀺. 𑀢𑀢𑁆𑀣 𑀘𑀢𑀽𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀓𑀣𑀁? 𑀤𑀼𑀯𑀺𑀥𑁄 𑀳𑀺 𑀢𑀡𑁆𑀳𑀸𑀘𑀭𑀺𑀢𑁄 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄𑀢𑀺, 𑀢𑀣𑀸 𑀤𑀺𑀝𑁆𑀞𑀺𑀘𑀭𑀺𑀢𑁄. 𑀢𑁂𑀲𑀁 𑀧𑀞𑀫𑁄 𑀅𑀲𑀼𑀪𑁂 ‘‘𑀲𑀼𑀪’’𑀦𑁆𑀢𑀺 𑀯𑀺𑀧𑀭𑀺𑀬𑀸𑀲𑀕𑁆𑀕𑀸𑀳𑀻 𑀲𑀢𑀺𑀩𑀮𑁂𑀦 𑀬𑀣𑀸𑀪𑀽𑀢𑀁 𑀓𑀸𑀬𑀲𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀢𑀁 𑀯𑀺𑀧𑀮𑁆𑀮𑀸𑀲𑀁 𑀲𑀫𑀼𑀕𑁆𑀖𑀸𑀝𑁂𑀢𑁆𑀯𑀸 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀤𑀼𑀢𑀺𑀬𑁄 𑀅𑀲𑀼𑀔𑁂 ‘‘𑀲𑀼𑀔’’𑀦𑁆𑀢𑀺 𑀯𑀺𑀧𑀭𑀺𑀬𑀸𑀲𑀕𑁆𑀕𑀸𑀳𑀻 ‘‘𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁩𑁧𑁦; 𑀫. 𑀦𑀺. 𑁧.𑁨𑁬; 𑀅. 𑀦𑀺. 𑁪.𑁧𑁪, 𑁧𑁧𑁪; 𑀅. 𑀦𑀺. 𑁬.𑁫𑁮) 𑀯𑀼𑀢𑁆𑀢𑁂𑀦 𑀯𑀻𑀭𑀺𑀬𑀲𑀁𑀯𑀭𑀪𑀽𑀢𑁂𑀦 𑀯𑀻𑀭𑀺𑀬𑀩𑀮𑁂𑀦 𑀢𑀁 𑀯𑀺𑀧𑀮𑁆𑀮𑀸𑀲𑀁 𑀯𑀺𑀥𑀫𑁂𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀢𑀢𑀺𑀬𑁄 𑀅𑀦𑀺𑀘𑁆𑀘𑁂 ‘‘𑀦𑀺𑀘𑁆𑀘’’𑀦𑁆𑀢𑀺 𑀅𑀬𑀸𑀣𑀸𑀯𑀕𑁆𑀕𑀸𑀳𑀻 𑀲𑀫𑀸𑀥𑀺𑀩𑀮𑁂𑀦 𑀲𑀫𑀸𑀳𑀺𑀢𑀘𑀺𑀢𑁆𑀢𑁄 𑀲𑀗𑁆𑀔𑀸𑀭𑀸𑀦𑀁 𑀔𑀡𑀺𑀓𑀪𑀸𑀯𑀲𑀮𑁆𑀮𑀓𑁆𑀔𑀡𑁂𑀦 𑀢𑀁 𑀯𑀺𑀧𑀮𑁆𑀮𑀸𑀲𑀁 𑀲𑀫𑀼𑀕𑁆𑀖𑀸𑀝𑁂𑀦𑁆𑀢𑁄 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀢𑀺. 𑀘𑀢𑀼𑀢𑁆𑀣𑁄 𑀲𑀦𑁆𑀢𑀢𑀺𑀲𑀫𑀽𑀳𑀓𑀺𑀘𑁆𑀘𑀸𑀭𑀫𑁆𑀫𑀡𑀖𑀦𑀯𑀜𑁆𑀘𑀺𑀢𑀢𑀸𑀬 𑀨𑀲𑁆𑀲𑀸𑀤𑀺𑀥𑀫𑁆𑀫𑀧𑀼𑀜𑁆𑀚𑀫𑀢𑁆𑀢𑁂 𑀅𑀦𑀢𑁆𑀢𑀦𑀺 ‘‘𑀅𑀢𑁆𑀢𑀸’’𑀢𑀺 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀻 𑀘𑀢𑀼𑀓𑁄𑀝𑀺𑀓𑀲𑀼𑀜𑁆𑀜𑀢𑀸𑀫𑀦𑀲𑀺𑀓𑀸𑀭𑁂𑀦 𑀢𑀁 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀁 𑀯𑀺𑀤𑁆𑀥𑀁𑀲𑁂𑀦𑁆𑀢𑁄 𑀲𑀸𑀫𑀜𑁆𑀜𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀺.

𑀇𑀥𑀸𑀧𑀺 𑀲𑀼𑀪𑀲𑀜𑁆𑀜𑀸𑀲𑀼𑀔𑀲𑀜𑁆𑀜𑀸𑀳𑀺 𑀘𑀢𑀽𑀳𑀺𑀧𑀺 𑀯𑀸 𑀯𑀺𑀧𑀮𑁆𑀮𑀸𑀲𑁂𑀳𑀺 𑀲𑀫𑀼𑀤𑀬𑀲𑀘𑁆𑀘𑀁, 𑀢𑁂𑀲𑀁 𑀅𑀥𑀺𑀝𑁆𑀞𑀸𑀦𑀸𑀭𑀫𑁆𑀫𑀡𑀪𑀽𑀢𑀸 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀲𑀘𑁆𑀘𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀨𑀮𑀁 𑀧𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀘𑀢𑀽𑀳𑀺 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁂𑀳𑀺 𑀘𑀢𑀼𑀭𑀸𑀲𑀯𑁄𑀖-𑀬𑁄𑀕-𑀓𑀸𑀬𑀕𑀦𑁆𑀣-𑀅𑀕𑀢𑀺-𑀢𑀡𑁆𑀳𑀼𑀧𑁆𑀧𑀸𑀤-𑀲𑀮𑁆𑀮𑀼𑀧𑀸𑀤𑀸𑀦-𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺-𑀅𑀧𑀭𑀺𑀜𑁆𑀜𑀸𑀤𑀺𑀯𑀲𑁂𑀦 𑀅𑀓𑀼𑀲𑀮𑀧𑀓𑁆𑀔𑁄 𑀦𑁂𑀢𑀩𑁆𑀩𑁄. 𑀢𑀣𑀸 𑀘𑀢𑀽𑀳𑀺 𑀲𑀢𑀺𑀧𑀝𑁆𑀞𑀸𑀦𑁂𑀳𑀺 ¶ 𑀘𑀢𑀼𑀩𑁆𑀩𑀺𑀥𑀛𑀸𑀦-𑀯𑀺𑀳𑀸𑀭𑀸𑀥𑀺𑀝𑁆𑀞𑀸𑀦-𑀲𑀼𑀔𑀪𑀸𑀕𑀺𑀬𑀥𑀫𑁆𑀫-𑀅𑀧𑁆𑀧𑀫𑀜𑁆𑀜𑀸-𑀲𑀫𑁆𑀫𑀧𑁆𑀧𑀥𑀸𑀦-𑀇𑀤𑁆𑀥𑀺𑀧𑀸𑀤𑀸- 𑀤𑀺𑀯𑀲𑁂𑀦 𑀯𑁄𑀤𑀸𑀦𑀧𑀓𑁆𑀔𑁄 𑀦𑁂𑀢𑀩𑁆𑀩𑁄𑀢𑀺. 𑀅𑀬𑀁 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺.

𑁪-𑁫. 𑀤𑀺𑀲𑀸𑀮𑁄𑀘𑀦-𑀅𑀗𑁆𑀓𑀼𑀲𑀦𑀬𑀤𑁆𑀯𑀬𑀯𑀡𑁆𑀡𑀦𑀸

𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀁 𑀅𑀢𑁆𑀣𑀦𑀬𑀸𑀦𑀁 𑀲𑀺𑀤𑁆𑀥𑀺𑀬𑀸 𑀯𑁄𑀳𑀸𑀭𑁂𑀦 𑀦𑀬𑀤𑁆𑀯𑀬𑀁 𑀲𑀺𑀤𑁆𑀥𑀫𑁂𑀯 𑀳𑁄𑀢𑀺. 𑀢𑀣𑀸 𑀳𑀺 𑀅𑀢𑁆𑀣𑀦𑀬𑀸𑀦𑀁 𑀤𑀺𑀲𑀸𑀪𑀽𑀢𑀥𑀫𑁆𑀫𑀸𑀦𑀁 𑀲𑀫𑀸𑀮𑁄𑀘𑀦𑀁 𑀤𑀺𑀲𑀸𑀮𑁄𑀘𑀦𑀁, 𑀢𑁂𑀲𑀁 𑀲𑀫𑀸𑀦𑀬𑀦𑀁 𑀅𑀗𑁆𑀓𑀼𑀲𑁄𑀢𑀺 𑀧𑀜𑁆𑀘𑀧𑀺 𑀦𑀬𑀸 𑀦𑀺𑀬𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀧𑀜𑁆𑀘𑀯𑀺𑀥𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀲𑀦𑀧𑀝𑁆𑀞𑀸𑀦𑀯𑀡𑁆𑀡𑀦𑀸

𑀇𑀤𑀜𑁆𑀘 ¶ 𑀲𑀼𑀢𑁆𑀢𑀁 𑀲𑁄𑀴𑀲𑀯𑀺𑀥𑁂 𑀲𑀼𑀢𑁆𑀢𑀦𑁆𑀢𑀧𑀝𑁆𑀞𑀸𑀦𑁂 𑀲𑀁𑀓𑀺𑀮𑁂𑀲𑀦𑀺𑀩𑁆𑀩𑁂𑀥𑀸𑀲𑁂𑀓𑁆𑀔𑀪𑀸𑀕𑀺𑀬𑀁, 𑀲𑀩𑁆𑀩𑀪𑀸𑀕𑀺𑀬𑀫𑁂𑀯 𑀯𑀸 ‘‘𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬’’𑀦𑁆𑀢𑀺 𑀏𑀢𑁆𑀣 𑀲𑀩𑁆𑀩𑀥𑀫𑁆𑀫𑀕𑁆𑀕𑀳𑀡𑁂𑀦 𑀮𑁄𑀓𑀺𑀬𑀓𑀼𑀲𑀮𑀸𑀦𑀫𑁆𑀧𑀺 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑁂𑀦 𑀧𑀦 𑀲𑀼𑀢𑁆𑀢𑀦𑁆𑀢𑀧𑀝𑁆𑀞𑀸𑀦𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀩𑁆𑀩𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁 𑀜𑀸𑀡𑀜𑁂𑀬𑁆𑀬𑀁 𑀤𑀲𑁆𑀲𑀦𑀪𑀸𑀯𑀦𑀁 𑀲𑀓𑀯𑀘𑀦𑀁 𑀯𑀺𑀲𑁆𑀲𑀚𑁆𑀚𑀦𑀻𑀬𑀁 𑀓𑀼𑀲𑀮𑀸𑀓𑀼𑀲𑀮𑀁 𑀅𑀦𑀼𑀜𑁆𑀜𑀸𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀁 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀦𑁂𑀢𑁆𑀢𑀺𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁨. 𑀲𑀩𑁆𑀩𑀸𑀲𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪. 𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸𑀢𑀺 ¶ 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀳𑁂𑀝𑁆𑀞𑀸 𑀅𑀕𑁆𑀕𑀳𑀺𑀢𑀢𑀸𑀬 𑀅𑀧𑀼𑀩𑁆𑀩𑀲𑁆𑀲 𑀅𑀪𑀺𑀦𑀯𑀲𑁆𑀲 𑀧𑀤𑀲𑁆𑀲 𑀯𑀡𑁆𑀡𑀦𑀸 𑀅𑀢𑁆𑀣𑀯𑀺𑀪𑀚𑀦𑀸. ‘‘𑀳𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀸𑀕𑀢𑀫𑀢𑁆𑀣’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀦𑀺𑀯𑀸𑀲𑀝𑁆𑀞𑀸𑀦𑀪𑀽𑀢𑀸 𑀪𑀽𑀢𑀧𑀼𑀩𑁆𑀩𑀦𑀺𑀯𑀸𑀲𑀝𑁆𑀞𑀸𑀦𑀪𑀽𑀢𑀸, 𑀦𑀺𑀯𑀸𑀲𑀝𑁆𑀞𑀸𑀦𑁂 𑀯𑀸 𑀪𑀽𑀢𑀸 𑀦𑀺𑀩𑁆𑀩𑀢𑁆𑀢𑀸 𑀦𑀺𑀯𑀸𑀲𑀝𑁆𑀞𑀸𑀦𑀪𑀽𑀢𑀸, 𑀢𑀢𑁆𑀣 𑀫𑀸𑀧𑀺𑀢𑀸𑀢𑀺 𑀅𑀢𑁆𑀣𑁄. 𑀬𑀣𑀸 𑀓𑀸𑀓𑀦𑁆𑀤𑀻 𑀫𑀸𑀓𑀦𑁆𑀤𑀻 𑀓𑁄𑀲𑀫𑁆𑀩𑀻𑀢𑀺 𑀬𑀣𑀸 𑀓𑀸𑀓𑀦𑁆𑀤𑀲𑁆𑀲 𑀇𑀲𑀺𑀦𑁄 𑀦𑀺𑀯𑀸𑀲𑀝𑁆𑀞𑀸𑀦𑁂 𑀫𑀸𑀧𑀺𑀢𑀸 𑀦𑀕𑀭𑀻 𑀓𑀸𑀓𑀦𑁆𑀤𑀻, 𑀫𑀸𑀓𑀦𑁆𑀤𑀲𑁆𑀲 𑀦𑀺𑀯𑀸𑀲𑀝𑁆𑀞𑀸𑀦𑁂 𑀫𑀸𑀧𑀺𑀢𑀸 𑀫𑀸𑀓𑀦𑁆𑀤𑀻, 𑀓𑀼𑀲𑀫𑁆𑀩𑀲𑁆𑀲𑀦𑀺𑀯𑀸𑀲𑀝𑁆𑀞𑀸𑀦𑁂 𑀫𑀸𑀧𑀺𑀢𑀸 𑀓𑁄𑀲𑀫𑁆𑀩𑀻𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀲𑀸𑀯𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀉𑀧𑀦𑁂𑀢𑁆𑀯𑀸 𑀲𑀫𑀻𑀧𑁂 𑀓𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀉𑀧𑀪𑁄𑀕𑁄, 𑀲𑀯𑀺𑀜𑁆𑀜𑀸𑀡𑀓𑀯𑀢𑁆𑀣𑀼. 𑀧𑀭𑀺𑀢𑁄 𑀲𑀩𑁆𑀩𑀤𑀸 𑀪𑀼𑀜𑁆𑀚𑀺𑀢𑀩𑁆𑀩𑀢𑁄 𑀧𑀭𑀺𑀪𑁄𑀕𑁄, 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸𑀤𑀺 𑀅𑀯𑀺𑀜𑁆𑀜𑀸𑀡𑀓𑀯𑀢𑁆𑀣𑀼. 𑀲𑀩𑁆𑀩𑀫𑁂𑀢𑁆𑀣 𑀅𑀢𑁆𑀣𑀻𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀲𑀸𑀯𑀢𑁆𑀣𑀻-𑀲𑀤𑁆𑀤𑀲𑀺𑀤𑁆𑀥𑀺𑀫𑀸𑀳. 𑀲𑀢𑁆𑀣𑀲𑀫𑀸𑀬𑁄𑀕𑁂𑀢𑀺 𑀲𑀢𑁆𑀣𑀲𑁆𑀲 𑀦𑀕𑀭𑀺𑀬𑀸 𑀲𑀫𑀸𑀕𑀫𑁂, 𑀲𑀢𑁆𑀣𑁂 𑀢𑀁 𑀦𑀕𑀭𑀁 𑀉𑀧𑀕𑀢𑁂𑀢𑀺 𑀅𑀢𑁆𑀣𑁄. 𑀧𑀼𑀘𑁆𑀙𑀺𑀢𑁂 𑀲𑀢𑁆𑀣𑀺𑀓𑀚𑀦𑁂𑀳𑀺.

𑀲𑀫𑁄𑀳𑀺𑀢𑀦𑁆𑀢𑀺 𑀲𑀦𑁆𑀦𑀺𑀘𑀺𑀢𑀁. 𑀭𑀫𑁆𑀫𑀦𑁆𑀢𑀺 𑀅𑀦𑁆𑀢𑁄 𑀩𑀳𑀺 𑀘 𑀪𑀽𑀫𑀺𑀪𑀸𑀕𑀲𑀫𑁆𑀧𑀢𑁆𑀢𑀺𑀬𑀸 𑀘𑁂𑀯 𑀆𑀭𑀸𑀫𑀼𑀬𑁆𑀬𑀸𑀦𑀲𑀫𑁆𑀧𑀢𑁆𑀢𑀺𑀬𑀸 𑀘 𑀭𑀫𑀡𑀻𑀬𑀁. 𑀤𑀲𑁆𑀲𑀦𑁂𑀬𑁆𑀬𑀦𑁆𑀢𑀺 𑀯𑀺𑀲𑀺𑀔𑀸𑀲𑀦𑁆𑀦𑀺𑀯𑁂𑀲𑀲𑀫𑁆𑀧𑀢𑁆𑀢𑀺𑀬𑀸 𑀘𑁂𑀯 𑀧𑀸𑀲𑀸𑀤𑀓𑀽𑀝𑀸𑀕𑀸𑀭𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀘 𑀤𑀲𑁆𑀲𑀦𑀻𑀬𑀁 𑀧𑀲𑁆𑀲𑀺𑀢𑀩𑁆𑀩𑀬𑀼𑀢𑁆𑀢𑀁. 𑀉𑀧𑀪𑁄𑀕𑀧𑀭𑀺𑀪𑁄𑀕𑀯𑀢𑁆𑀣𑀼𑀲𑀫𑁆𑀧𑀢𑁆𑀢𑀺𑀬𑀸 𑀘𑁂𑀯 𑀦𑀺𑀯𑀸𑀲𑀲𑀼𑀔𑀢𑀸𑀬 𑀘 𑀦𑀺𑀩𑀤𑁆𑀥𑀯𑀸𑀲𑀁 𑀯𑀲𑀦𑁆𑀢𑀸𑀦𑀁 𑀇𑀢𑀭𑁂𑀲𑀜𑁆𑀘 𑀲𑀢𑁆𑀢𑀸𑀦𑀁 𑀫𑀦𑀁 𑀭𑀫𑁂𑀢𑀻𑀢𑀺 𑀫𑀦𑁄𑀭𑀫𑀁. 𑀤𑀲𑀳𑀺 𑀲𑀤𑁆𑀤𑁂𑀳𑀻𑀢𑀺 𑀳𑀢𑁆𑀣𑀺𑀲𑀤𑁆𑀤𑁄, 𑀅𑀲𑁆𑀲-𑀭𑀣-𑀪𑁂𑀭𑀺-𑀲𑀗𑁆𑀔-𑀫𑀼𑀤𑀺𑀗𑁆𑀕-𑀯𑀻𑀡𑀸-𑀕𑀻𑀢 𑀲𑀫𑁆𑀫𑀢𑀸𑀴𑀲𑀤𑁆𑀤𑁄, 𑀅𑀲𑁆𑀦𑀸𑀣-𑀧𑀺𑀯𑀣-𑀔𑀸𑀤𑀣𑀸𑀢𑀺-𑀲𑀤𑁆𑀤𑁄𑀢𑀺 ¶ 𑀇𑀫𑁂𑀳𑀺 𑀤𑀲𑀳𑀺 𑀲𑀤𑁆𑀤𑁂𑀳𑀺. 𑀅𑀯𑀺𑀯𑀺𑀢𑁆𑀢𑀦𑁆𑀢𑀺 𑀦 𑀯𑀺𑀯𑀺𑀢𑁆𑀢𑀁, 𑀲𑀩𑁆𑀩𑀓𑀸𑀮𑀁 𑀖𑁄𑀲𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀯𑀼𑀤𑁆𑀥𑀺𑀁 𑀯𑁂𑀧𑀼𑀮𑁆𑀮𑀢𑀁 𑀧𑀢𑁆𑀢𑀦𑁆𑀢𑀺 𑀢𑀦𑁆𑀦𑀺𑀯𑀸𑀲𑀻 𑀲𑀢𑁆𑀢𑀯𑀼𑀤𑁆𑀥𑀺𑀬𑀸 𑀯𑀼𑀤𑁆𑀥𑀺𑀁, 𑀢𑀸𑀬 𑀧𑀭𑀺𑀯𑀼𑀤𑁆𑀥𑀺𑀢𑀸𑀬𑁂𑀯 𑀯𑀺𑀧𑀼𑀮𑀪𑀸𑀯𑀁 𑀧𑀢𑁆𑀢𑀁, 𑀩𑀳𑀼𑀚𑀦𑀁 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀢𑁆𑀢𑀽𑀧𑀓𑀭𑀡𑀲𑀫𑀺𑀤𑁆𑀥𑀺𑀬𑀸 𑀇𑀤𑁆𑀥𑀁. 𑀲𑀩𑁆𑀩𑀓𑀸𑀮𑀁 𑀲𑀼𑀪𑀺𑀓𑁆𑀔𑀪𑀸𑀯𑁂𑀦 𑀨𑀻𑀢𑀁. 𑀅𑀦𑁆𑀢𑀫𑀲𑁄 𑀯𑀺𑀖𑀸𑀲𑀸𑀤𑁂 𑀉𑀧𑀸𑀤𑀸𑀬 𑀲𑀩𑁆𑀩𑁂𑀲𑀁 𑀓𑀧𑀡𑀤𑁆𑀥𑀺𑀓𑀯𑀦𑀺𑀩𑁆𑀩𑀓𑀬𑀸𑀘𑀓𑀸𑀦𑀫𑁆𑀧𑀺 𑀇𑀘𑁆𑀙𑀺 𑀢𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀬𑀸 𑀫𑀦𑀼𑀜𑁆𑀜𑀁 𑀚𑀸𑀢𑀁, 𑀧𑀕𑁂𑀯 𑀇𑀲𑁆𑀲𑀭𑀺𑀬𑁂 𑀞𑀺𑀢𑀸𑀦𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 𑀧𑀼𑀦 ‘‘𑀫𑀦𑁄𑀭𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀴𑀓𑀫𑀦𑁆𑀤𑀸𑀯𑀸𑀢𑀺 𑀆𑀝𑀸𑀦𑀸𑀝𑀸𑀤𑀻𑀲𑀼 𑀤𑀲𑀲𑀼 𑀯𑁂𑀲𑁆𑀲𑀯𑀡𑀫𑀳𑀸𑀭𑀸𑀚𑀲𑁆𑀲 𑀦𑀕𑀭𑀻𑀲𑀼 𑀅𑀴𑀓𑀫𑀦𑁆𑀤𑀸 𑀦𑀸𑀫 𑀏𑀓𑀸 𑀦𑀕𑀭𑀻, 𑀬𑀸 𑀮𑁄𑀓𑁂 𑀅𑀴𑀸𑀓𑀸 𑀏𑀯 𑀯𑀼𑀘𑁆𑀘𑀢𑀺 ¶ . 𑀲𑀸 𑀬𑀣𑀸 𑀧𑀼𑀜𑁆𑀜𑀓𑀫𑁆𑀫𑀻𑀦𑀁 𑀆𑀯𑀸𑀲𑀪𑀽𑀢𑀸 𑀆𑀭𑀸𑀫𑀭𑀸𑀫𑀡𑁂𑀬𑁆𑀬𑀓𑀸𑀤𑀺𑀦𑀸 𑀲𑁄𑀪𑀕𑁆𑀕𑀧𑁆𑀧𑀢𑁆𑀢𑀸, 𑀏𑀯𑀁 𑀲𑀸𑀯𑀢𑁆𑀣𑀻𑀧𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀴𑀓𑀫𑀦𑁆𑀤𑀸𑀯𑀸’’𑀢𑀺. 𑀤𑁂𑀯𑀸𑀦𑀦𑁆𑀢𑀺 𑀯𑁂𑀲𑁆𑀲𑀯𑀡𑀧𑀓𑁆𑀔𑀺𑀬𑀸𑀦𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀤𑁂𑀯𑀸𑀦𑀁.

𑀚𑀺𑀦𑀸𑀢𑀻𑀢𑀺 𑀇𑀫𑀺𑀦𑀸 𑀲𑁄𑀢-𑀲𑀤𑁆𑀤𑁄 𑀯𑀺𑀬 𑀓𑀢𑁆𑀢𑀼𑀲𑀸𑀥𑀦𑁄 𑀚𑁂𑀢-𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀢𑀺. 𑀭𑀜𑁆𑀜𑀸𑀢𑀺 𑀧𑀲𑁂𑀦𑀤𑀺𑀓𑁄𑀲𑀮𑀭𑀸𑀚𑁂𑀦. 𑀭𑀸𑀚𑀕𑀢𑀁 𑀚𑀬𑀁 𑀆𑀭𑁄𑀧𑁂𑀢𑁆𑀯𑀸 𑀓𑀼𑀫𑀸𑀭𑁄 𑀚𑀺𑀢𑀯𑀸𑀢𑀺 𑀚𑁂𑀢𑁄𑀢𑀺 𑀯𑀼𑀢𑁆𑀢𑁄. 𑀫𑀗𑁆𑀕𑀮𑀓𑀩𑁆𑀬𑀢𑀸𑀬𑀸𑀢𑀺𑀆𑀤𑀺𑀦𑀸 ‘‘𑀚𑁂𑀬𑁆𑀬𑁄’’𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀚𑁂𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀢𑀸𑀬𑀸𑀢𑀺 𑀲𑀩𑁆𑀩𑁂𑀳𑀺 𑀉𑀧𑀪𑁄𑀕𑀧𑀭𑀺𑀪𑁄𑀕𑀯𑀢𑁆𑀣𑀽𑀳𑀺 𑀨𑀻𑀢𑀪𑀸𑀯𑁂𑀦 𑀯𑀺𑀪𑀯𑀲𑀫𑁆𑀧𑀦𑁆𑀦𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀲𑀫𑀺𑀤𑁆𑀥𑀸𑀧𑀺 𑀫𑀘𑁆𑀙𑀭𑀺𑀦𑁄 𑀓𑀺𑀜𑁆𑀘𑀺 𑀦 𑀤𑁂𑀦𑁆𑀢𑀻𑀢𑀺 𑀆𑀳 ‘‘𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑀢𑀸𑀬𑀸’’𑀢𑀺, 𑀭𑀸𑀕𑀤𑁄𑀲𑀸𑀤𑀺𑀫𑀮𑀸𑀦𑀜𑁆𑀘𑁂𑀯 𑀫𑀘𑁆𑀙𑀭𑀺𑀬𑀲𑁆𑀲 𑀘 𑀅𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀫𑀺𑀤𑁆𑀥𑀸 𑀅𑀫𑀘𑁆𑀙𑀭𑀺𑀦𑁄𑀧𑀺 𑀘 𑀓𑀭𑀼𑀡𑀸𑀲𑀤𑁆𑀥𑀸𑀤𑀺𑀕𑀼𑀡𑀯𑀺𑀭𑀳𑀺𑀢𑀸 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀧𑀭𑁂𑀲𑀁 𑀦 𑀤𑀤𑁂𑀬𑁆𑀬𑀼𑀦𑁆𑀢𑀺 𑀆𑀳 ‘‘𑀓𑀭𑀼𑀡𑀸𑀤𑀺𑀕𑀼𑀡𑀲𑀫𑀗𑁆𑀕𑀺𑀢𑀸𑀬 𑀘𑀸’’𑀢𑀺. 𑀢𑁂𑀦𑀸𑀢𑀺 𑀅𑀦𑀸𑀣𑀸𑀦𑀁 𑀧𑀺𑀡𑁆𑀟𑀤𑀸𑀦𑁂𑀦. 𑀲𑀤𑁆𑀤𑀢𑁆𑀣𑀢𑁄 𑀧𑀦 𑀤𑀸𑀢𑀩𑁆𑀩𑀪𑀸𑀯𑁂𑀦 𑀲𑀩𑁆𑀩𑀓𑀸𑀮𑀁 𑀉𑀧𑀝𑁆𑀞𑀧𑀺𑀢𑁄 𑀅𑀦𑀸𑀣𑀸𑀦𑀁 𑀧𑀺𑀡𑁆𑀟𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁄. 𑀧𑀜𑁆𑀘𑀯𑀺𑀥𑀲𑁂𑀦𑀸𑀲𑀦𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸𑀢𑀺 ‘‘𑀦𑀸𑀢𑀺𑀤𑀽𑀭𑀁 𑀦𑀘𑁆𑀘𑀸𑀲𑀦𑁆𑀦𑀁 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦’’𑀦𑁆𑀢𑀺 𑀏𑀓𑀁 𑀅𑀗𑁆𑀕𑀁, ‘‘𑀤𑀺𑀯𑀸 𑀅𑀧𑁆𑀧𑀸𑀓𑀺𑀡𑁆𑀡𑀁 𑀭𑀢𑁆𑀢𑀺𑀁 𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲’’𑀦𑁆𑀢𑀺 𑀏𑀓𑀁, ‘‘𑀅𑀧𑁆𑀧𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲’’𑀦𑁆𑀢𑀺 𑀏𑀓𑀁, ‘‘𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀯𑀺𑀳𑀭𑀦𑁆𑀢𑀲𑁆𑀲 𑀅𑀧𑁆𑀧𑀓𑀲𑀺𑀭𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀻𑀯𑀭…𑀧𑁂… 𑀧𑀭𑀺𑀓𑁆𑀔𑀸𑀭𑀸’’𑀢𑀺 𑀏𑀓𑀁, ‘‘𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀣𑁂𑀭𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸’’𑀢𑀺 𑀏𑀓𑀁, 𑀏𑀯𑀫𑁂𑀢𑁂𑀳𑀺 𑀧𑀜𑁆𑀘𑀯𑀺𑀥𑀲𑁂𑀦𑀸𑀲𑀦𑀗𑁆𑀕𑁂𑀳𑀺 𑀲𑀫𑁆𑀧𑀦𑁆𑀦𑀢𑀸𑀬. 𑀬𑀤𑀺 𑀚𑁂𑀢𑀯𑀦𑀁 𑀢𑀣𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁄𑀢𑀺 𑀆𑀳 ‘‘𑀲𑁄 𑀳𑀻’’𑀢𑀺𑀆𑀤𑀺.

𑀓𑀻𑀢𑀓𑀸𑀮𑀢𑁄 ¶ 𑀧𑀝𑁆𑀞𑀸𑀬 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲𑁂𑀯 𑀢𑀁 𑀯𑀦𑀁, 𑀅𑀣 𑀓𑀲𑁆𑀫𑀸 𑀉𑀪𑀺𑀦𑁆𑀦𑀁 𑀧𑀭𑀺𑀓𑀺𑀢𑁆𑀢𑀦𑀦𑁆𑀢𑀺 𑀆𑀳 ‘‘𑀚𑁂𑀢𑀯𑀦𑁂’’𑀢𑀺𑀆𑀤𑀺. ‘‘𑀬𑀤𑀺𑀧𑀺 𑀲𑁄 𑀪𑀽𑀫𑀺𑀪𑀸𑀕𑁄 𑀓𑁄𑀝𑀺𑀲𑀦𑁆𑀣𑀭𑁂𑀦 𑀫𑀳𑀸𑀲𑁂𑀝𑁆𑀞𑀺𑀦𑀸 𑀓𑀻𑀢𑁄, 𑀭𑀼𑀓𑁆𑀔𑀸 𑀧𑀦 𑀚𑁂𑀢𑁂𑀦 𑀦 𑀯𑀺𑀓𑁆𑀓𑀻𑀢𑀸𑀢𑀺 𑀚𑁂𑀢𑀯𑀦𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀻’’𑀢𑀺 𑀯𑀤𑀦𑁆𑀢𑀺.

𑀓𑀲𑁆𑀫𑀸 𑀇𑀤𑀁 𑀲𑀼𑀢𑁆𑀢𑀫𑀪𑀸𑀲𑀻𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀬 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀁 𑀧𑀼𑀘𑁆𑀙𑀢𑀺. 𑀲𑀸𑀫𑀜𑁆𑀜𑀢𑁄 𑀳𑀺 𑀪𑀕𑀯𑀢𑁄 𑀤𑁂𑀲𑀦𑀸𑀓𑀸𑀭𑀡𑀁 𑀧𑀸𑀓𑀝𑀫𑁂𑀯𑀸𑀢𑀺. 𑀓𑁄 𑀧𑀦𑀸𑀬𑀁 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄𑀢𑀺? 𑀅𑀢𑁆𑀢𑀚𑁆𑀛𑀸𑀲𑀬𑁄. 𑀧𑀭𑁂𑀳𑀺 𑀅𑀦𑀚𑁆𑀛𑀺𑀝𑁆𑀞𑁄 𑀏𑀯 𑀳𑀺 𑀪𑀕𑀯𑀸 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂𑀦 𑀇𑀫𑀁 𑀲𑀼𑀢𑁆𑀢𑀁 𑀤𑁂𑀲𑁂𑀢𑀻𑀢𑀺 𑀆𑀘𑀭𑀺𑀬𑀸. 𑀬𑀲𑁆𑀫𑀸 𑀧𑀦𑁂𑀲 𑀪𑀺𑀓𑁆𑀔𑀽𑀦𑀁 𑀉𑀧𑀓𑁆𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀢𑀁 𑀯𑀺𑀤𑀺𑀢𑁆𑀯𑀸 ‘‘𑀇𑀫𑁂 𑀪𑀺𑀓𑁆𑀔𑀽 𑀇𑀫𑀸𑀬 𑀤𑁂𑀲𑀦𑀸𑀬 𑀉𑀧𑀓𑁆𑀓𑀺𑀮𑁂𑀲𑀯𑀺𑀲𑁄𑀥𑀦𑀁 𑀓𑀢𑁆𑀯𑀸 𑀆𑀲𑀯𑀓𑁆𑀔𑀬𑀸𑀬 𑀧𑀝𑀺𑀧𑀚𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺 𑀅𑀬𑀁 𑀤𑁂𑀲𑀦𑀸 𑀆𑀭𑀤𑁆𑀥𑀸, 𑀢𑀲𑁆𑀫𑀸 𑀧𑀭𑀚𑁆𑀛𑀸𑀲𑀬𑁄𑀢𑀺 𑀅𑀧𑀭𑁂. 𑀉𑀪𑀬𑀫𑁆𑀧𑀺 𑀧𑀦 𑀬𑀼𑀢𑁆𑀢𑀁. 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀻𑀦𑀜𑁆𑀳𑀺 𑀲𑀁𑀲𑀕𑁆𑀕𑀪𑁂𑀤𑀲𑁆𑀲 𑀲𑀫𑁆𑀪𑀯𑁄 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑁄𑀯𑀸𑀢𑀺. 𑀢𑁂𑀲𑀁 𑀪𑀺𑀓𑁆𑀔𑀽𑀦𑀦𑁆𑀢𑀺 𑀢𑀤𑀸 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀢𑀪𑀺𑀓𑁆𑀔𑀽𑀦𑀁. 𑀉𑀧𑀓𑁆𑀓𑀺𑀮𑁂𑀲𑀯𑀺𑀲𑁄𑀥𑀦𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑀢𑁄 ¶ 𑀘𑀺𑀢𑁆𑀢𑀲𑁆𑀲 𑀯𑀺𑀲𑁄𑀥𑀦𑀁. 𑀧𑀞𑀫𑀜𑁆𑀳𑀺 𑀪𑀕𑀯𑀸 𑀅𑀦𑀼𑀧𑀼𑀩𑁆𑀩𑀺𑀓𑀣𑀸𑀤𑀺𑀦𑀸 𑀧𑀝𑀺𑀧𑀢𑁆𑀢𑀺𑀬𑀸 𑀲𑀁𑀓𑀺𑀮𑁂𑀲𑀁 𑀦𑀻𑀳𑀭𑀺𑀢𑁆𑀯𑀸 𑀧𑀘𑁆𑀙𑀸 𑀲𑀸𑀫𑀼𑀓𑁆𑀓𑀁𑀲𑀺𑀓𑀁 𑀤𑁂𑀲𑀦𑀁 𑀤𑁂𑀲𑁂𑀢𑀺 𑀔𑁂𑀢𑁆𑀢𑁂 𑀔𑀸𑀡𑀼𑀓𑀡𑁆𑀝𑀓𑀕𑀼𑀫𑁆𑀩𑀸𑀤𑀺𑀓𑁂 𑀅𑀯𑀳𑀭𑀺𑀢𑁆𑀯𑀸 𑀓𑀲𑀦𑀁 𑀯𑀺𑀬, 𑀢𑀲𑁆𑀫𑀸 𑀓𑀫𑁆𑀫𑀝𑁆𑀞𑀸𑀦𑀫𑁂𑀯 𑀅𑀯𑀢𑁆𑀯𑀸 𑀇𑀫𑀸𑀬 𑀅𑀦𑀼𑀧𑀼𑀩𑁆𑀩𑀺𑀬𑀸 𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀁𑀯𑀭𑀪𑀽𑀢𑀦𑁆𑀢𑀺 𑀲𑀻𑀮𑀲𑀁𑀯𑀭𑀸𑀤𑀺𑀲𑀁𑀯𑀭𑀪𑀽𑀢𑀁 𑀲𑀁𑀯𑀭𑀡𑀲𑀪𑀸𑀯𑀁 𑀓𑀸𑀭𑀡𑀁, 𑀢𑀁 𑀧𑀦 𑀅𑀢𑁆𑀣𑀢𑁄 𑀤𑀲𑁆𑀲𑀦𑀸𑀤𑀺 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀁𑀯𑀭𑀺𑀢𑀸𑀢𑀺 𑀧𑀯𑀢𑁆𑀢𑀺𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀲𑀫𑁆𑀫𑀸, 𑀲𑀩𑁆𑀩𑀣𑀸 𑀯𑀸 𑀯𑀸𑀭𑀺𑀢𑀸. 𑀏𑀯𑀁𑀪𑀽𑀢𑀸 𑀘 𑀬𑀲𑁆𑀫𑀸 𑀧𑀯𑀢𑁆𑀢𑀺𑀤𑁆𑀯𑀸𑀭𑀧𑀺𑀥𑀸𑀦𑁂𑀦 𑀧𑀺𑀳𑀺𑀢𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀯𑀺𑀤𑀳𑀺𑀢𑀸 𑀳𑀼𑀢𑁆𑀯𑀸’’𑀢𑀺. 𑀏𑀯𑀁 𑀅𑀘𑁆𑀘𑀦𑁆𑀢𑀺𑀓𑀲𑁆𑀲 𑀲𑀁𑀯𑀭𑀲𑁆𑀲 𑀓𑀸𑀭𑀡𑀪𑀽𑀢𑀁 𑀅𑀦𑀘𑁆𑀘𑀦𑁆𑀢𑀺𑀓𑀁 𑀲𑀁𑀯𑀭𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀘𑁆𑀘𑀦𑁆𑀢𑀺𑀓𑀫𑁂𑀯 𑀲𑀁𑀯𑀭𑀁 𑀤𑀲𑁆𑀲𑁂𑀦𑁆𑀢𑁄 𑀬𑀲𑁆𑀫𑀺𑀁 𑀤𑀲𑁆𑀲𑀦𑀸𑀤𑀺𑀫𑁆𑀳𑀺 𑀲𑀢𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑀸 𑀆𑀲𑀯𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑁄 𑀢𑁂𑀲𑀁 𑀅𑀦𑀼𑀧𑁆𑀧𑀸𑀤𑁄 𑀦𑀺𑀭𑁄𑀥𑁄 𑀔𑀬𑁄 𑀧𑀳𑀸𑀦𑀦𑁆𑀢𑀺 𑀘 𑀯𑀼𑀘𑁆𑀘𑀫𑀸𑀦𑁄 𑀅𑀢𑁆𑀣𑀢𑁄 𑀅𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀦𑁆𑀢𑀺 𑀢𑀲𑁆𑀲 𑀘 𑀤𑀲𑁆𑀲𑀦𑀸𑀤𑀺 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀬𑁂𑀦 𑀓𑀸𑀭𑀡𑁂𑀦 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀲𑀗𑁆𑀔𑀸𑀢𑀁 𑀔𑀬𑀁 𑀕𑀘𑁆𑀙𑀦𑁆𑀢𑀺 𑀧𑀳𑀻𑀬𑀦𑁆𑀢𑀺 𑀦𑀧𑁆𑀧𑀯𑀢𑁆𑀢𑀦𑁆𑀢𑀺, 𑀢𑀁 𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄’’𑀢𑀺.

𑀘𑀓𑁆𑀔𑀼𑀢𑁄𑀧𑀺…𑀧𑁂… 𑀫𑀦𑀢𑁄𑀧𑀻𑀢𑀺 (𑀥. 𑀲. 𑀫𑀽𑀮𑀝𑀻. 𑁧𑁪-𑁧𑁯) 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀯𑀻𑀣𑀻𑀲𑀼 𑀢𑀤𑀦𑀼𑀕𑀢𑀫𑀦𑁄𑀯𑀺𑀜𑁆𑀜𑀸𑀡𑀯𑀻𑀣𑀻𑀲𑀼 𑀘 𑀓𑀺𑀜𑁆𑀘𑀸𑀧𑀺 𑀓𑀼𑀲𑀮𑀸𑀤𑀻𑀦𑀫𑁆𑀧𑀺 𑀧𑀯𑀢𑁆𑀢𑀺 𑀅𑀢𑁆𑀣𑀺, 𑀓𑀸𑀫𑀸𑀲𑀯𑀸𑀤𑀬𑁄 ¶ 𑀏𑀯 𑀧𑀦 𑀯𑀡𑀢𑁄 𑀬𑀽𑀲𑀁 𑀯𑀺𑀬 𑀧𑀕𑁆𑀖𑀭𑀡𑀓𑀅𑀲𑀼𑀘𑀺𑀪𑀸𑀯𑁂𑀦 𑀲𑀦𑁆𑀤𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀏𑀯 ‘‘𑀆𑀲𑀯𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀢𑁆𑀣 𑀳𑀺 𑀧𑀕𑁆𑀖𑀭𑀡𑀅𑀲𑀼𑀘𑀺𑀫𑁆𑀳𑀺 𑀦𑀺𑀭𑀼𑀴𑁆𑀳𑁄 𑀆𑀲𑀯-𑀲𑀤𑁆𑀤𑁄𑀢𑀺. 𑀥𑀫𑁆𑀫𑀢𑁄 𑀬𑀸𑀯 𑀕𑁄𑀢𑁆𑀭𑀪𑀼𑀦𑁆𑀢𑀺 𑀢𑀢𑁄 𑀧𑀭𑀁 𑀫𑀕𑁆𑀕𑀨𑀮𑁂𑀲𑀼 𑀅𑀧𑁆𑀧𑀯𑀢𑁆𑀢𑀦𑀢𑁄 𑀯𑀼𑀢𑁆𑀢𑀁. 𑀏𑀢𑁂 𑀳𑀺 𑀆𑀭𑀫𑁆𑀫𑀡𑀯𑀲𑁂𑀦 𑀥𑀫𑁆𑀫𑁂 𑀕𑀘𑁆𑀙𑀦𑁆𑀢𑀸 𑀢𑀢𑁄 𑀧𑀭𑀁 𑀦 𑀕𑀘𑁆𑀙𑀦𑁆𑀢𑀺. 𑀦𑀦𑀼 𑀢𑀢𑁄 𑀧𑀭𑀁 𑀪𑀯𑀗𑁆𑀕𑀸𑀤𑀻𑀦𑀺𑀧𑀺 𑀕𑀘𑁆𑀙𑀦𑁆𑀢𑀻𑀢𑀺 𑀘𑁂? 𑀦, 𑀢𑁂𑀲𑀫𑁆𑀧𑀺 𑀧𑀼𑀩𑁆𑀩𑁂 𑀆𑀮𑀫𑁆𑀩𑀺𑀢𑁂𑀲𑀼 𑀮𑁄𑀓𑀺𑀬𑀥𑀫𑁆𑀫𑁂𑀲𑀼 𑀲𑀸𑀲𑀯𑀪𑀸𑀯𑁂𑀦 𑀅𑀦𑁆𑀢𑁄𑀕𑀥𑀢𑁆𑀢𑀸 𑀢𑀢𑁄 𑀧𑀭𑀢𑀸𑀪𑀸𑀯𑀢𑁄. 𑀏𑀢𑁆𑀣 𑀘 𑀕𑁄𑀢𑁆𑀭𑀪𑀼𑀯𑀘𑀦𑁂𑀦 𑀕𑁄𑀢𑁆𑀭𑀪𑀼𑀯𑁄𑀤𑀸𑀦𑀨𑀮𑀲𑀫𑀸𑀧𑀢𑁆𑀢𑀺𑀧𑀼𑀭𑁂𑀘𑀸𑀭𑀺𑀓𑀧𑀭𑀺𑀓𑀫𑁆𑀫𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀧𑀞𑀫𑀫𑀕𑁆𑀕𑀧𑀼𑀭𑁂𑀘𑀸𑀭𑀺𑀓𑀫𑁂𑀯 𑀯𑀸 𑀕𑁄𑀢𑁆𑀭𑀪𑀼 𑀅𑀯𑀥𑀺𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀕𑀳𑀺𑀢𑀁, 𑀢𑀢𑁄 𑀧𑀭𑀁 𑀧𑀦 𑀫𑀕𑁆𑀕𑀨𑀮𑀲𑀫𑀸𑀦𑀢𑀸𑀬 𑀅𑀜𑁆𑀜𑁂𑀲𑀼 𑀫𑀕𑁆𑀕𑁂𑀲𑀼 𑀫𑀕𑁆𑀕𑀯𑀻𑀣𑀺𑀬𑀁 𑀲𑀫𑀸𑀧𑀢𑁆𑀢𑀺𑀯𑀻𑀣𑀺𑀬𑀁 𑀦𑀺𑀭𑁄𑀥𑀸𑀦𑀦𑁆𑀢𑀭𑀜𑁆𑀘 𑀧𑀯𑀢𑁆𑀢𑀫𑀸𑀦𑁂𑀲𑀼 𑀨𑀮𑁂𑀲𑀼 𑀦𑀺𑀩𑁆𑀩𑀸𑀦𑁂 𑀘 𑀆𑀲𑀯𑀸𑀦𑀁 𑀧𑀯𑀢𑁆𑀢𑀺 𑀦𑀺𑀯𑀸𑀭𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀯𑀦𑁆𑀢𑀻𑀢𑀺 𑀕𑀘𑁆𑀙𑀦𑁆𑀢𑀺, 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀯𑀥𑀺𑀅𑀢𑁆𑀣𑁄 𑀆-𑀓𑀸𑀭𑁄, 𑀅𑀯𑀥𑀺 𑀘 𑀫𑀭𑀺𑀬𑀸𑀤𑀸𑀪𑀺𑀯𑀺𑀥𑀺𑀪𑁂𑀤𑀢𑁄 𑀤𑀼𑀯𑀺𑀥𑁄. 𑀢𑀢𑁆𑀣 𑀫𑀭𑀺𑀬𑀸𑀤𑀁 𑀓𑀺𑀭𑀺𑀬𑀁 𑀩𑀳𑀺 𑀓𑀢𑁆𑀯𑀸 𑀧𑀯𑀢𑁆𑀢𑀢𑀺 𑀬𑀣𑀸 ‘‘𑀆𑀧𑀸𑀝𑀮𑀺𑀧𑀼𑀢𑁆𑀢𑀸 𑀯𑀼𑀝𑁆𑀞𑁄 𑀤𑁂𑀯𑁄’’𑀢𑀺. 𑀅𑀪𑀺𑀯𑀺𑀥𑀺 𑀧𑀦 𑀓𑀺𑀭𑀺𑀬𑀁 𑀩𑁆𑀬𑀸𑀧𑁂𑀢𑁆𑀯𑀸 𑀧𑀯𑀢𑁆𑀢𑀢𑀺 𑀬𑀣𑀸 ‘‘𑀆𑀪𑀯𑀕𑁆𑀕𑀸 𑀪𑀕𑀯𑀢𑁄 𑀬𑀲𑁄 𑀧𑀯𑀢𑁆𑀢𑀢𑀻’’𑀢𑀺. 𑀅𑀪𑀺𑀯𑀺𑀥𑀺𑀅𑀢𑁆𑀣𑁄 𑀘𑀸𑀬𑀁 𑀆-𑀓𑀸𑀭𑁄 𑀇𑀥 𑀕𑀳𑀺𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀦𑁆𑀢𑁄𑀓𑀭𑀡𑀢𑁆𑀣𑁄’’𑀢𑀺.

𑀫𑀤𑀺𑀭𑀸𑀤𑀬𑁄𑀢𑀺 ¶ 𑀆𑀤𑀺-𑀲𑀤𑁆𑀤𑁂𑀦 𑀲𑀺𑀦𑁆𑀥𑀯𑀓𑀸𑀤𑀫𑁆𑀩𑀭𑀺𑀓𑀸𑀧𑁄𑀢𑀺𑀓𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀘𑀺𑀭𑀧𑀸𑀭𑀺𑀯𑀸𑀲𑀺𑀬𑀝𑁆𑀞𑁄 𑀯𑀺𑀭𑀧𑀭𑀺𑀯𑀼𑀢𑁆𑀣𑀢𑀸 𑀧𑀼𑀭𑀸𑀡𑀪𑀸𑀯𑁄. 𑀅𑀯𑀺𑀚𑁆𑀚𑀸 𑀦𑀸𑀳𑁄𑀲𑀻𑀢𑀺𑀆𑀤𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 ‘‘𑀧𑀼𑀭𑀺𑀫𑀸, 𑀪𑀺𑀓𑁆𑀔𑀯𑁂, 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺 𑀪𑀯𑀢𑀡𑁆𑀳𑀸𑀬𑀸’’𑀢𑀺 (𑀅. 𑀦𑀺. 𑁧𑁦.𑁬𑁨) 𑀇𑀤𑀁 𑀲𑀼𑀢𑁆𑀢𑀁 𑀲𑀗𑁆𑀕𑀳𑀺𑀢𑀁. 𑀅𑀯𑀺𑀚𑁆𑀚𑀸𑀲𑀯𑀪𑀯𑀸𑀲𑀯𑀸𑀦𑀁 𑀘𑀺𑀭𑀧𑀭𑀺𑀯𑀼𑀢𑁆𑀣𑀢𑀸𑀬 𑀤𑀲𑁆𑀲𑀺𑀢𑀸𑀬 𑀢𑀩𑁆𑀪𑀸𑀯𑀪𑀸𑀯𑀺𑀦𑁄 𑀓𑀸𑀫𑀸𑀲𑀯𑀲𑁆𑀲 𑀘𑀺𑀭𑀧𑀭𑀺𑀯𑀼𑀢𑁆𑀣𑀢𑀸 𑀤𑀲𑁆𑀲𑀺𑀢𑀸𑀯 𑀳𑁄𑀢𑀺. 𑀅𑀜𑁆𑀜𑁂𑀲𑀼 𑀘 𑀬𑀣𑀸𑀯𑀼𑀢𑁆𑀢𑁂 𑀥𑀫𑁆𑀫𑁂 𑀑𑀓𑀸𑀲𑀜𑁆𑀘 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁂𑀲𑀼 𑀫𑀸𑀦𑀸𑀤𑀻𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀅𑀢𑁆𑀢𑀢𑁆𑀢𑀦𑀺𑀬𑀸𑀤𑀺𑀕𑁆𑀕𑀸𑀳𑀯𑀲𑁂𑀦 𑀅𑀪𑀺𑀩𑁆𑀬𑀸𑀧𑀦𑀁 𑀫𑀤𑀓𑀭𑀡𑀯𑀲𑁂𑀦 𑀆𑀲𑀯𑀲𑀤𑀺𑀲𑀢𑀸 𑀘 𑀏𑀢𑁂𑀲𑀁𑀬𑁂𑀯, 𑀦 𑀅𑀜𑁆𑀜𑁂𑀲𑀦𑁆𑀢𑀺 𑀏𑀢𑁂𑀲𑁆𑀯𑁂𑀯 𑀆𑀲𑀯-𑀲𑀤𑁆𑀤𑁄 𑀦𑀺𑀭𑀼𑀴𑁆𑀳𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀦 𑀘𑁂𑀢𑁆𑀣 𑀤𑀺𑀝𑁆𑀞𑀸𑀲𑀯𑁄 𑀦𑀸𑀕𑀢𑁄𑀢𑀺 𑀕𑀳𑁂𑀢𑀩𑁆𑀩𑀁 𑀪𑀯𑀢𑀡𑁆𑀳𑀸𑀬 𑀯𑀺𑀬 𑀪𑀯𑀤𑀺𑀝𑁆𑀞𑀺𑀬𑀸𑀧𑀺 𑀪𑀯𑀸𑀲𑀯𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀢𑁆𑀢𑀸. 𑀆𑀬𑀢𑀁 𑀅𑀦𑀸𑀤𑀺𑀓𑀸𑀮𑀺𑀓𑀢𑁆𑀢𑀸. 𑀧𑀲𑀯𑀦𑁆𑀢𑀻𑀢𑀺 𑀨𑀮𑀦𑁆𑀢𑀺. 𑀦 𑀳𑀺 𑀢𑀁 𑀓𑀺𑀜𑁆𑀘𑀺 𑀲𑀁𑀲𑀸𑀭𑀤𑀼𑀓𑁆𑀔𑀁 ¶ 𑀅𑀢𑁆𑀣𑀺, 𑀬𑀁 𑀆𑀲𑀯𑁂𑀳𑀺 𑀯𑀺𑀦𑀸 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀧𑀼𑀭𑀺𑀫𑀸𑀦𑀺 𑀘𑁂𑀢𑁆𑀣𑀸𑀢𑀺 𑀏𑀢𑁆𑀣 𑀏𑀢𑁂𑀲𑀼 𑀘𑀢𑀽𑀲𑀼 𑀅𑀢𑁆𑀣𑀯𑀺𑀢𑀧𑁆𑀧𑁂𑀲𑀼 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺. 𑀬𑀢𑁆𑀣𑀸𑀢𑀺 𑀬𑁂𑀲𑀼 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀧𑀤𑁂𑀲𑁂𑀲𑀼. 𑀢𑀢𑁆𑀣 𑀬𑀼𑀚𑁆𑀚𑀦𑁆𑀢𑀺 𑀓𑀺𑀮𑁂𑀲𑁂𑀲𑀼𑀬𑁂𑀯 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀢𑁆𑀢𑀬𑀲𑁆𑀲 𑀲𑀫𑁆𑀪𑀯𑀢𑁄. 𑀧𑀘𑁆𑀙𑀺𑀫𑀁 ‘‘𑀆𑀬𑀢𑀁 𑀯𑀸 𑀲𑀁𑀲𑀸𑀭𑀤𑀼𑀓𑁆𑀔𑀁 𑀲𑀯𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀦𑀺𑀩𑁆𑀩𑀘𑀦𑀁. 𑀓𑀫𑁆𑀫𑁂𑀧𑀺 𑀬𑀼𑀚𑁆𑀚𑀢𑀺 𑀤𑀼𑀓𑁆𑀔𑀧𑁆𑀧𑀲𑀯𑀦𑀲𑁆𑀲 𑀓𑀺𑀮𑁂𑀲𑀓𑀫𑁆𑀫𑀲𑀸𑀥𑀸𑀭𑀡𑀢𑁆𑀢𑀸.

𑀤𑀺𑀝𑁆𑀞𑀥𑀫𑁆𑀫𑀸 𑀯𑀼𑀘𑁆𑀘𑀦𑁆𑀢𑀺 𑀧𑀘𑁆𑀘𑀓𑁆𑀔𑀪𑀽𑀢𑀸 𑀔𑀦𑁆𑀥𑀸, 𑀤𑀺𑀝𑁆𑀞𑀥𑀫𑁆𑀫𑁂 𑀪𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀸. 𑀯𑀺𑀯𑀸𑀤𑀫𑀽𑀮𑀪𑀽𑀢𑀸𑀢𑀺 𑀯𑀺𑀯𑀸𑀤𑀲𑁆𑀲 𑀫𑀽𑀮𑀓𑀸𑀭𑀡𑀪𑀽𑀢𑀸 𑀓𑁄𑀥𑀽𑀧𑀦𑀸𑀳-𑀫𑀓𑁆𑀔-𑀧𑀴𑀸𑀲-𑀇𑀲𑁆𑀲𑀸-𑀫𑀘𑁆𑀙𑀭𑀺𑀬-𑀫𑀸𑀬𑀸-𑀲𑀸𑀞𑁂𑀬𑁆𑀬-𑀣𑀫𑁆𑀪-𑀲𑀸𑀭𑀫𑁆𑀪-𑀫𑀸𑀦𑀸𑀢𑀺𑀫𑀸𑀦𑀸.

𑀬𑁂𑀦 𑀤𑁂𑀯𑀽𑀧𑀧𑀢𑁆𑀬𑀲𑁆𑀲𑀸𑀢𑀺 𑀬𑁂𑀦 𑀓𑀫𑁆𑀫𑀓𑀺𑀮𑁂𑀲𑀧𑁆𑀧𑀓𑀸𑀭𑁂𑀦 𑀆𑀲𑀯𑁂𑀦 𑀤𑁂𑀯𑁂𑀲𑀼 𑀉𑀧𑀧𑀢𑁆𑀢𑀺 𑀦𑀺𑀩𑁆𑀩𑀢𑁆𑀢𑀺 𑀅𑀲𑁆𑀲 𑀫𑀬𑁆𑀳𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀕𑀦𑁆𑀥𑀩𑁆𑀩𑁄 𑀯𑀸 𑀯𑀺𑀳𑀗𑁆𑀕𑀫𑁄 𑀆𑀓𑀸𑀲𑀘𑀸𑀭𑀻 𑀅𑀲𑁆𑀲𑀦𑁆𑀢𑀺 𑀯𑀺𑀪𑀢𑁆𑀢𑀺𑀁 𑀧𑀭𑀺𑀡𑀸𑀫𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀏𑀢𑁆𑀣 𑀘 𑀬𑀓𑁆𑀔𑀕𑀦𑁆𑀥𑀩𑁆𑀩𑀢𑀸𑀬 𑀯𑀺𑀦𑀺𑀫𑀼𑀢𑁆𑀢𑀸 𑀲𑀩𑁆𑀩𑀸 𑀤𑁂𑀯𑀕𑀢𑀺 𑀤𑁂𑀯𑀕𑁆𑀕𑀳𑀡𑁂𑀦 𑀕𑀳𑀺𑀢𑀸. 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀅𑀓𑀼𑀲𑀮𑀓𑀫𑁆𑀫𑀢𑁄 𑀅𑀯𑀲𑁂𑀲𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀆𑀲𑀯𑀸𑀢𑀺 𑀆𑀕𑀢𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀧𑀝𑀺𑀖𑀸𑀢𑀸𑀬𑀸𑀢𑀺 𑀧𑀝𑀺𑀲𑁂𑀥𑀦𑀸𑀬. 𑀧𑀭𑀽𑀧𑀯𑀸…𑀧𑁂… 𑀉𑀧𑀤𑁆𑀤𑀯𑀸𑀢𑀺 𑀇𑀤𑀁 𑀬𑀤𑀺 𑀪𑀕𑀯𑀸 𑀲𑀺𑀓𑁆𑀔𑀸𑀧𑀤𑀁 𑀦 𑀧𑀜𑁆𑀜𑀧𑁂𑀬𑁆𑀬, 𑀢𑀢𑁄 𑀅𑀲𑀤𑁆𑀥𑀫𑁆𑀫𑀧𑁆𑀧𑀝𑀺𑀲𑁂𑀯𑀦𑀅𑀤𑀺𑀦𑁆𑀦𑀸𑀤𑀸𑀦𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀳𑁂𑀢𑀼 𑀬𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀧𑀭𑀽𑀧𑀯𑀸𑀤𑀸𑀤𑀬𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀸 𑀦𑀸𑀦𑀧𑁆𑀧𑀓𑀸𑀭𑀸 𑀅𑀦𑀢𑁆𑀣𑀸, 𑀬𑁂 𑀘 𑀢𑀦𑁆𑀦𑀺𑀫𑀺𑀢𑁆𑀢𑀸 𑀏𑀯 𑀦𑀺𑀭𑀬𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀲𑁆𑀲 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀓𑀫𑁆𑀫𑀓𑀸𑀭𑀡𑀸𑀤𑀺𑀯𑀲𑁂𑀦 𑀫𑀳𑀸𑀤𑀼𑀓𑁆𑀔𑀸𑀦𑀼𑀪𑀯𑀸𑀤𑀺𑀧𑁆𑀧𑀓𑀸𑀭𑀸 𑀅𑀦𑀢𑁆𑀣𑀸, 𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂 𑀧𑀦𑁂𑀢𑁂𑀢𑀺 𑀏𑀢𑁂 𑀓𑀸𑀫𑀭𑀸𑀕𑀸𑀤𑀺𑀓𑀺𑀮𑁂𑀲-𑀢𑁂𑀪𑀽𑀫𑀓𑀓𑀫𑁆𑀫𑀧𑀭𑀽𑀧𑀯𑀸𑀤𑀸𑀤𑀺𑀉𑀧𑀤𑁆𑀤𑀯𑀧𑁆𑀧𑀓𑀸𑀭𑀸 𑀆𑀲𑀯𑀸. 𑀬𑀢𑁆𑀣𑀸𑀢𑀺 ¶ 𑀬𑀲𑁆𑀫𑀺𑀁 𑀯𑀺𑀦𑀬𑀸𑀤𑀺𑀧𑀸𑀴𑀺𑀧𑀤𑁂𑀲𑁂. 𑀬𑀣𑀸𑀢𑀺 𑀬𑁂𑀦 𑀤𑀼𑀯𑀺𑀥𑀸𑀤𑀺𑀧𑁆𑀧𑀓𑀸𑀭𑁂𑀦 𑀅𑀜𑁆𑀜𑁂𑀲𑀼 𑀘 𑀲𑀼𑀢𑁆𑀢𑀦𑁆𑀢𑁂𑀲𑀼 𑀆𑀕𑀢𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀦𑀺𑀭𑀬𑀁 𑀕𑀫𑁂𑀦𑁆𑀢𑀻𑀢𑀺 𑀦𑀺𑀭𑀬𑀕𑀸𑀫𑀺𑀦𑀺𑀬𑀸. 𑀙𑀓𑁆𑀓𑀦𑀺𑀧𑀸𑀢𑁂 𑀆𑀳𑀼𑀦𑁂𑀬𑁆𑀬𑀲𑀼𑀢𑁆𑀢𑁂. 𑀢𑀢𑁆𑀣 𑀳𑀺 𑀆𑀲𑀯𑀸 𑀙𑀥𑀸 𑀆𑀕𑀢𑀸 𑀆𑀲𑀯-𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀲𑁆𑀲 𑀅𑀢𑁆𑀣𑀲𑁆𑀲 𑀧𑀪𑁂𑀤𑁄𑀧𑀘𑀸𑀭𑁂𑀦 𑀆𑀲𑀯-𑀧𑀤𑁂 𑀧𑀪𑁂𑀤𑁄𑀢𑀺 𑀯𑀼𑀢𑁆𑀢𑁄, 𑀓𑁄𑀝𑁆𑀞𑀸𑀲𑀢𑁆𑀣𑁄 𑀯𑀸 𑀧𑀤-𑀲𑀤𑁆𑀤𑁄𑀢𑀺 𑀆𑀲𑀯𑀧𑀤𑁂𑀢𑀺 𑀆𑀲𑀯𑀧𑁆𑀧𑀓𑀸𑀭𑁂 𑀲𑀤𑁆𑀤𑀓𑁄𑀝𑁆𑀞𑀸𑀲𑁂 𑀅𑀢𑁆𑀣𑀓𑁄𑀝𑁆𑀞𑀸𑀲𑁂 𑀯𑀸𑀢𑀺 𑀅𑀢𑁆𑀣𑁄.

𑀢𑀣𑀸 ¶ 𑀳𑀻𑀢𑀺 𑀢𑀲𑁆𑀫𑀸 𑀲𑀁𑀯𑀭𑀡𑀁 𑀧𑀺𑀤𑀳𑀦𑀁 𑀧𑀯𑀢𑁆𑀢𑀺𑀢𑀼𑀁 𑀅𑀧𑁆𑀧𑀤𑀸𑀦𑀁, 𑀢𑁂𑀦𑁂𑀯 𑀓𑀸𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀻𑀮𑀸𑀤𑀺𑀲𑀁𑀯𑀭𑁂 𑀅𑀥𑀺𑀧𑁆𑀧𑁂𑀢𑁂 𑀧𑀯𑀢𑁆𑀢𑀺𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀣𑀓𑀦𑀪𑀸𑀯𑀲𑀸𑀫𑀜𑁆𑀜𑀢𑁄 𑀤𑁆𑀯𑀸𑀭𑀁 𑀲𑀁𑀯𑀭𑀺𑀢𑁆𑀯𑀸𑀢𑀺 𑀕𑁂𑀳𑀤𑁆𑀯𑀸𑀭𑀲𑀁𑀯𑀭𑀡𑀫𑁆𑀧𑀺 𑀉𑀤𑀸𑀳𑀝𑀁. 𑀲𑀻𑀮𑀲𑀁𑀯𑀭𑁄𑀢𑀺𑀆𑀤𑀺 𑀳𑁂𑀝𑁆𑀞𑀸 𑀫𑀽𑀮𑀧𑀭𑀺𑀬𑀸𑀬𑀯𑀡𑁆𑀡𑀦𑀸𑀬 𑀯𑀼𑀢𑁆𑀢𑀫𑁆𑀧𑀺 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀯𑀢𑁆𑀢𑀼𑀓𑀸𑀫𑁄 𑀧𑀼𑀦 𑀯𑀤𑀢𑀺. 𑀬𑀼𑀢𑁆𑀢𑀁 𑀢𑀸𑀯 𑀲𑀻𑀮𑀲𑀢𑀺𑀜𑀸𑀡𑀸𑀦𑀁 𑀲𑀁𑀯𑀭𑀢𑁆𑀣𑁄 𑀧𑀸𑀴𑀺𑀬𑀁 𑀢𑀣𑀸 𑀆𑀕𑀢𑀢𑁆𑀢𑀸, 𑀔𑀦𑁆𑀢𑀺𑀯𑀻𑀭𑀺𑀬𑀸𑀦𑀁 𑀧𑀦 𑀓𑀣𑀦𑁆𑀢𑀺 𑀆𑀳 ‘‘𑀢𑁂𑀲𑀜𑁆𑀘𑀸’’𑀢𑀺𑀆𑀤𑀺. 𑀢𑀲𑁆𑀲𑀢𑁆𑀣𑁄 𑁋 𑀬𑀤𑀺𑀧𑀺 ‘‘𑀔𑀫𑁄 𑀳𑁄𑀢𑀺…𑀧𑁂… 𑀲𑀻𑀢𑀲𑁆𑀲 𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀻’’𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑁂 𑀔𑀦𑁆𑀢𑀺𑀯𑀻𑀭𑀺𑀬𑀸𑀦𑀁 𑀲𑀁𑀯𑀭𑀧𑀭𑀺𑀬𑀸𑀬𑁄 𑀦𑀸𑀕𑀢𑁄, 𑀉𑀤𑁆𑀤𑁂𑀲𑁂 𑀧𑀦 𑀲𑀩𑁆𑀩𑀸𑀲𑀯𑀲𑀁𑀯𑀭𑀧𑀭𑀺𑀬𑀸𑀬𑀦𑁆𑀢𑀺 𑀲𑀁𑀯𑀭𑀧𑀭𑀺𑀬𑀸𑀬𑁂𑀦 𑀕𑀳𑀺𑀢𑀢𑁆𑀢𑀸 𑀅𑀢𑁆𑀣𑁂𑀯 𑀢𑁂𑀲𑀁 𑀲𑀁𑀯𑀭𑀪𑀸𑀯𑁄𑀢𑀺.

𑀧𑀼𑀩𑁆𑀩𑁂 𑀲𑀻𑀮𑀲𑀢𑀺𑀜𑀸𑀡𑀸𑀦𑀁 𑀧𑀸𑀞𑀦𑁆𑀢𑀭𑁂𑀦 𑀲𑀁𑀯𑀭𑀪𑀸𑀯𑁄 𑀤𑀲𑁆𑀲𑀺𑀢𑁄𑀢𑀺 𑀇𑀤𑀸𑀦𑀺 𑀢𑀁 𑀇𑀫𑀺𑀦𑀸𑀧𑀺 𑀲𑀼𑀢𑁆𑀢𑁂𑀦 𑀕𑀳𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀔𑀦𑁆𑀢𑀺𑀯𑀻𑀭𑀺𑀬𑀲𑀁𑀯𑀭𑀸 𑀯𑀼𑀢𑁆𑀢𑀸𑀬𑁂𑀯 ‘‘𑀔𑀫𑁄 𑀳𑁄𑀢𑀺 𑀲𑀻𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁧𑁪) 𑀧𑀸𑀴𑀺𑀬𑀸 𑀤𑀲𑁆𑀲𑀦𑀯𑀲𑁂𑀦. ‘‘𑀢𑀜𑁆𑀘 𑀅𑀦𑀸𑀲𑀦𑀁, 𑀢𑀜𑁆𑀘 𑀅𑀕𑁄𑀘𑀭’’𑀦𑁆𑀢𑀺 𑀅𑀬𑀁 𑀧𑀦𑁂𑀢𑁆𑀣 𑀲𑀻𑀮𑀲𑀁𑀯𑀭𑁄𑀢𑀺 𑀢𑀜𑁆𑀘 ‘‘𑀬𑀣𑀸𑀭𑀽𑀧𑁂’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀅𑀬𑀼𑀢𑁆𑀢𑀁 𑀅𑀦𑀺𑀬𑀢𑀯𑀢𑁆𑀣𑀼𑀓𑀁 𑀭𑀳𑁄 𑀧𑀝𑀺𑀘𑁆𑀙𑀦𑁆𑀦𑀸𑀲𑀦𑀁, 𑀢𑀜𑁆𑀘 𑀬𑀣𑀸𑀯𑀼𑀢𑁆𑀢𑀁 𑀅𑀬𑀼𑀢𑁆𑀢𑀁 𑀯𑁂𑀲𑀺𑀬𑀸𑀤𑀺𑀕𑁄𑀘𑀭𑀁, ‘‘𑀧𑀝𑀺𑀲𑀗𑁆𑀔𑀸𑀬𑁄𑀦𑀺𑀲𑁄 𑀧𑀭𑀺𑀯𑀚𑁆𑀚𑁂𑀢𑀻’’𑀢𑀺 𑀆𑀕𑀢𑀁 𑀬𑀁 𑀧𑀭𑀺𑀯𑀚𑁆𑀚𑀦𑀁, 𑀅𑀬𑀁 𑀧𑀦 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀲𑀼𑀢𑁆𑀢𑁂 𑀆𑀕𑀢𑁄 𑀲𑀻𑀮𑀲𑀁𑀯𑀭𑁄𑀢𑀺 𑀅𑀢𑁆𑀣𑁄. 𑀅𑀦𑀸𑀲𑀦𑀧𑀭𑀺𑀯𑀚𑁆𑀚𑀦𑁂𑀦 𑀳𑀺 𑀅𑀦𑀸𑀘𑀸𑀭𑀧𑀭𑀺𑀯𑀚𑁆𑀚𑀦𑀁 𑀯𑀼𑀢𑁆𑀢𑀁, 𑀅𑀦𑀸𑀘𑀸𑀭𑀸𑀕𑁄𑀘𑀭𑀧𑀭𑀺𑀯𑀚𑁆𑀚𑀦𑀁 𑀘𑀸𑀭𑀺𑀢𑁆𑀢𑀲𑀻𑀮𑀢𑀸𑀬𑀲𑀻𑀮𑀲𑀁𑀯𑀭𑁄. 𑀢𑀣𑀸 𑀳𑀺 𑀪𑀕𑀯𑀢𑀸 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀻’’𑀢𑀺 (𑀯𑀺𑀪. 𑁫𑁦𑁮) 𑀲𑀻𑀮𑀲𑀁𑀯𑀭𑀯𑀺𑀪𑀚𑀦𑁂 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀅𑀢𑁆𑀣𑀺 𑀅𑀦𑀸𑀘𑀸𑀭𑁄, 𑀅𑀢𑁆𑀣𑀺 𑀅𑀕𑁄𑀘𑀭𑁄’’𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁧𑁩, 𑁫𑁧𑁪) 𑀅𑀦𑀸𑀘𑀸𑀭𑀸𑀕𑁄𑀘𑀭𑀸 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀸. 𑀇𑀤𑀜𑁆𑀘 𑀏𑀓𑀤𑁂𑀲𑁂𑀦 𑀲𑀫𑀼𑀤𑀸𑀬𑀦𑀺𑀤𑀲𑁆𑀲𑀦𑀁 𑀤𑀝𑁆𑀞𑀩𑁆𑀩𑀁 𑀲𑀫𑀼𑀤𑁆𑀤𑀧𑀩𑁆𑀩𑀢𑀦𑀺𑀤𑀲𑁆𑀲𑀦𑀁 𑀯𑀺𑀬.

𑀲𑀩𑁆𑀩𑀢𑁆𑀣 𑀧𑀝𑀺𑀲𑀗𑁆𑀔𑀸 𑀜𑀸𑀡𑀲𑀁𑀯𑀭𑁄𑀢𑀺 𑀏𑀢𑁆𑀣 ‘‘𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄, 𑀧𑀝𑀺𑀲𑀗𑁆𑀔𑀸 𑀜𑀸𑀡𑀲𑀁𑀯𑀭𑁄’’𑀢𑀺 𑀯𑀢𑁆𑀢𑀩𑁆𑀩𑀁 ¶ . 𑀦 𑀳𑀺 𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑀦𑀺𑀤𑁆𑀤𑁂𑀲𑁂 𑀧𑀝𑀺𑀲𑀗𑁆𑀔𑀸𑀕𑀳𑀡𑀁 𑀅𑀢𑁆𑀣𑀺, ‘‘𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀻’’𑀢𑀺 𑀧𑀦 𑀯𑀼𑀢𑁆𑀢𑀁. 𑀬𑁄𑀦𑀺𑀲𑁄𑀫𑀦𑀲𑀺𑀓𑀭𑀡𑀫𑁆𑀧𑀺 𑀅𑀢𑁆𑀣𑀢𑁄 𑀧𑀝𑀺𑀲𑀗𑁆𑀔𑀸 𑀜𑀸𑀡𑀲𑀁𑀯𑀭𑀫𑁂𑀯𑀸𑀢𑀺 𑀏𑀯𑀁 𑀧𑀦 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀬𑀼𑀢𑁆𑀢𑀫𑁂𑀢𑀁 𑀲𑀺𑀬𑀸. 𑀓𑁂𑀘𑀺 𑀧𑀦 ‘‘𑀬𑀢𑁆𑀣 𑀬𑀢𑁆𑀣 ‘𑀇𑀥 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄’𑀢𑀺 𑀆𑀕𑀢𑀁 ¶ , 𑀢𑀁 𑀲𑀩𑁆𑀩𑀁 𑀲𑀦𑁆𑀥𑀸𑀬 ‘𑀲𑀩𑁆𑀩𑀢𑁆𑀣 𑀧𑀝𑀺𑀲𑀗𑁆𑀔𑀸 𑀜𑀸𑀡𑀲𑀁𑀯𑀭𑁄’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑁂𑀲𑀁 𑀫𑀢𑁂𑀦 ‘‘𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀻’’𑀢𑀺𑀆𑀤𑀺𑀓𑀲𑁆𑀲 𑀜𑀸𑀡𑀲𑀁𑀯𑀭𑁂𑀦 𑀘 𑀅𑀲𑀗𑁆𑀕𑀳𑁄 𑀲𑀺𑀬𑀸, ‘‘𑀤𑀲𑁆𑀲𑀦𑀁 𑀧𑀝𑀺𑀲𑁂𑀯𑀦𑀸 𑀪𑀸𑀯𑀦𑀸 𑀘 𑀜𑀸𑀡𑀲𑀁𑀯𑀭𑁄’’𑀢𑀺 𑀘 𑀯𑀘𑀦𑀁 𑀯𑀺𑀭𑀼𑀚𑁆𑀛𑁂𑀬𑁆𑀬, 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀲𑀩𑁆𑀩𑀢𑁆𑀣 𑀧𑀝𑀺𑀲𑀗𑁆𑀔𑀸 𑀜𑀸𑀡𑀲𑀁𑀯𑀭𑁄’’𑀢𑀺 𑀇𑀫𑀺𑀦𑀸 𑀲𑀢𑁆𑀢𑀲𑀼𑀧𑀺 𑀞𑀸𑀦𑁂𑀲𑀼 𑀬𑀁 𑀜𑀸𑀡𑀁, 𑀲𑁄 𑀜𑀸𑀡𑀲𑀁𑀯𑀭𑁄𑀢𑀺 𑀧𑀭𑀺𑀯𑀚𑁆𑀚𑀦𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀸 𑀲𑀻𑀮𑀸𑀤𑀬𑁄 𑀲𑀻𑀮𑀲𑀁𑀯𑀭𑀸𑀤𑀬𑁄𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀏𑀯𑀁 𑀲𑀢𑀺 𑀲𑀁𑀯𑀭𑀸𑀦𑀁 𑀲𑀗𑁆𑀓𑀭𑁄 𑀯𑀺𑀬 𑀳𑁄𑀢𑀻𑀢𑀺 𑀢𑁂 𑀅𑀲𑀗𑁆𑀓𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦𑀸’’𑀢𑀺 𑀯𑀼𑀢𑁆𑀢𑀁 𑀧𑀭𑀺𑀯𑀚𑁆𑀚𑀦𑀯𑀺𑀲𑁂𑀲𑀲𑀁𑀯𑀭𑀸𑀥𑀺𑀯𑀸𑀲𑀦𑀯𑀺𑀦𑁄𑀤𑀦𑀸𑀦𑀁 𑀲𑀻𑀮𑀲𑀁𑀯𑀭𑀸𑀤𑀺𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸, 𑀢𑀣𑀸 𑀅𑀕𑁆𑀕𑀳𑀺𑀢𑀸𑀦𑀁 𑀕𑀳𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂 𑀧𑀦 𑀅𑀕𑁆𑀕𑀳𑀺𑀢𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀲𑁆𑀲𑀦𑀁 𑀧𑀝𑀺𑀲𑁂𑀯𑀦𑀸 𑀪𑀸𑀯𑀦𑀸’’𑀢𑀺 𑀆𑀳.

𑀏𑀢𑁂𑀦 𑀲𑀻𑀮𑀲𑀁𑀯𑀭𑀸𑀤𑀺𑀦𑀸 𑀓𑀭𑀡𑀪𑀽𑀢𑁂𑀦, 𑀓𑀸𑀭𑀡𑀪𑀽𑀢𑁂𑀦 𑀯𑀸. 𑀥𑀫𑁆𑀫𑀸𑀢𑀺 𑀓𑀼𑀲𑀮𑀸𑀓𑀼𑀲𑀮𑀥𑀫𑁆𑀫𑀸. 𑀲𑀻𑀮𑀲𑀁𑀯𑀭𑀸𑀤𑀺𑀦𑀸 𑀳𑀺 𑀲𑀳𑀚𑀸𑀢𑀓𑁄𑀝𑀺𑀬𑀸, 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀯𑀸 𑀧𑀘𑁆𑀘𑀬𑀪𑀽𑀢𑁂𑀦 𑀅𑀦𑀼𑀧𑁆𑀧𑀦𑁆𑀦𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀢𑁆𑀢𑀺𑀁 𑀕𑀘𑁆𑀙𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀣𑀸 𑀅𑀦𑀺𑀭𑀼𑀤𑁆𑀥𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀦𑀺𑀭𑁄𑀥𑀁 𑀕𑀘𑁆𑀙𑀦𑁆𑀢𑀺 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀸𑀴𑀺𑀬𑀁 𑀧𑀦 ‘‘𑀅𑀦𑀼𑀧𑁆𑀧𑀦𑁆𑀦𑀸 𑀘𑁂𑀯 𑀆𑀲𑀯𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀆𑀲𑀯𑀸 𑀧𑀳𑀻𑀬𑀦𑁆𑀢𑀻’’𑀢𑀺 𑀅𑀓𑀼𑀲𑀮𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀧𑀳𑀸𑀦𑀸𑀦𑀺 𑀏𑀯 𑀯𑀼𑀢𑁆𑀢𑀸𑀦𑀺, 𑀦 𑀓𑀼𑀲𑀮𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀸𑀤𑀬𑁄𑀢𑀺? 𑀦𑀬𑀺𑀤𑀫𑁂𑀯𑀁 𑀤𑀝𑁆𑀞𑀩𑁆𑀩𑀁, ‘‘𑀬𑁄𑀦𑀺𑀲𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀫𑀦𑀲𑀺𑀓𑀭𑁄𑀢𑁄’’𑀢𑀺𑀆𑀤𑀺𑀦𑀸 𑀓𑀼𑀲𑀮𑀥𑀫𑁆𑀫𑀸𑀦𑀫𑁆𑀧𑀺 𑀉𑀧𑁆𑀧𑀢𑁆𑀢𑀺 𑀧𑀓𑀸𑀲𑀺𑀢𑀸𑀯 𑀆𑀲𑀯𑀲𑀁𑀯𑀭𑀡𑀲𑁆𑀲 𑀧𑀥𑀸𑀦𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸. 𑀢𑀣𑀸 𑀳𑀺 𑀧𑀭𑀺𑀬𑁄𑀲𑀸𑀦𑁂𑀧𑀺 ‘‘𑀬𑁂 𑀆𑀲𑀯𑀸 𑀤𑀲𑁆𑀲𑀦𑀸 𑀧𑀳𑀸𑀢𑀩𑁆𑀩𑀸, 𑀢𑁂 𑀤𑀲𑁆𑀲𑀦𑀸 𑀧𑀳𑀻𑀦𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁮) 𑀆𑀲𑀯𑀧𑁆𑀧𑀳𑀸𑀦𑀫𑁂𑀯 𑀧𑀥𑀸𑀦𑀁 𑀓𑀢𑁆𑀯𑀸 𑀦𑀺𑀕𑀫𑀺𑀢𑀁.

𑁧𑁫. 𑀚𑀸𑀦𑀢𑁄 𑀧𑀲𑁆𑀲𑀢𑁄𑀢𑀺 𑀏𑀢𑁆𑀣 𑀤𑀲𑁆𑀲𑀦𑀫𑁆𑀧𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑀸𑀯 𑀤𑀲𑁆𑀲𑀦𑀁 𑀅𑀥𑀺𑀧𑁆𑀧𑁂𑀢𑀁, 𑀦 𑀫𑀁𑀲𑀘𑀓𑁆𑀔𑀼𑀦𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀯𑀸𑀢𑀺 𑀆𑀳 ‘‘𑀤𑁆𑀯𑁂𑀧𑀺 𑀧𑀤𑀸𑀦𑀺 𑀏𑀓𑀢𑁆𑀣𑀸𑀦𑀻’’𑀢𑀺. 𑀏𑀯𑀁 𑀲𑀦𑁆𑀢𑁂𑀧𑀻𑀢𑀺 𑀧𑀤𑀤𑁆𑀯𑀬𑀲𑁆𑀲 𑀏𑀓𑀢𑁆𑀣𑀢𑁆𑀣𑁂𑀧𑀺. 𑀜𑀸𑀡𑀮𑀓𑁆𑀔𑀡𑀦𑁆𑀢𑀺 𑀜𑀸𑀡𑀲𑁆𑀲 𑀲𑀪𑀸𑀯𑀁, 𑀯𑀺𑀲𑀬𑀲𑁆𑀲 𑀬𑀣𑀸𑀲𑀪𑀸𑀯𑀸𑀯𑀩𑁄𑀥𑀦𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀚𑀸𑀦𑀦𑀮𑀓𑁆𑀔𑀡𑀜𑁆𑀳𑀺 𑀜𑀸𑀡’’𑀦𑁆𑀢𑀺. 𑀜𑀸𑀡𑀧𑁆𑀧𑀪𑀸𑀯𑀦𑁆𑀢𑀺 𑀜𑀸𑀡𑀸𑀦𑀼𑀪𑀸𑀯𑀁, 𑀜𑀸𑀡𑀓𑀺𑀘𑁆𑀘𑀁 𑀯𑀺𑀲𑀬𑁄𑀪𑀸𑀲𑀦𑀦𑁆𑀢𑀺 ¶ 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀜𑀸𑀡𑁂𑀦 𑀯𑀺𑀯𑀝𑁂 𑀥𑀫𑁆𑀫𑁂’’𑀢𑀺. ‘‘𑀚𑀸𑀦𑀢𑁄 𑀧𑀲𑁆𑀲𑀢𑁄’’𑀢𑀺 𑀘 𑀚𑀸𑀦𑀦𑀤𑀲𑁆𑀲𑀦𑀫𑀼𑀔𑁂𑀦 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸 𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺 𑀆𑀳 ‘‘𑀜𑀸𑀡𑀮𑀓𑁆𑀔𑀡𑀁 𑀜𑀸𑀡𑀧𑁆𑀧𑀪𑀸𑀯𑀁 𑀉𑀧𑀸𑀤𑀸𑀬 𑀧𑀼𑀕𑁆𑀕𑀮𑀁 𑀦𑀺𑀤𑁆𑀤𑀺𑀲𑀢𑀻’’𑀢𑀺. 𑀚𑀸𑀦𑀢𑁄 𑀧𑀲𑁆𑀲𑀢𑁄𑀢𑀺 ‘‘𑀬𑁄𑀦𑀺𑀲𑁄 𑀘 𑀫𑀦𑀲𑀺𑀓𑀸𑀭𑀁 𑀅𑀬𑁄𑀦𑀺𑀲𑁄 𑀘 𑀫𑀦𑀲𑀺𑀓𑀸𑀭’’𑀦𑁆𑀢𑀺 ¶ 𑀯𑀓𑁆𑀔𑀫𑀸𑀦𑀢𑁆𑀢𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀺𑀲𑀬𑀚𑀸𑀦𑀦𑀁, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀺𑀲𑀬𑀤𑀲𑁆𑀲𑀦𑀁. 𑀢𑀜𑁆𑀘 𑀔𑁄 𑀧𑀦 𑀦𑁂𑀲𑀁 𑀆𑀲𑀯𑀸𑀦𑀁 𑀔𑀬𑀽𑀧𑀸𑀬𑀲𑀪𑀸𑀯𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀉𑀧𑁆𑀧𑀸𑀤𑀦𑀸𑀦𑀼𑀧𑁆𑀧𑀸𑀤𑀦𑀯𑀲𑁂𑀦 𑀦 𑀆𑀭𑀫𑁆𑀫𑀡𑀫𑀢𑁆𑀢𑁂𑀦𑀸𑀢𑀺 𑀅𑀬𑀫𑀢𑁆𑀣𑁄 𑀬𑀼𑀢𑁆𑀢𑁄𑀢𑀺 𑀆𑀳 ‘‘𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁…𑀧𑁂… 𑀅𑀬𑀫𑁂𑀢𑁆𑀣 𑀲𑀸𑀭𑁄’’𑀢𑀺.

‘‘𑀚𑀸𑀦𑀢𑁄’’𑀢𑀺 𑀯𑀢𑁆𑀯𑀸 𑀚𑀸𑀦𑀦𑀜𑁆𑀘 𑀅𑀦𑀼𑀲𑁆𑀲𑀯𑀸𑀓𑀸𑀭𑀧𑀝𑀺𑀯𑀺𑀢𑀓𑁆𑀓𑀫𑀢𑁆𑀢𑀯𑀲𑁂𑀦 𑀦 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀅𑀣 𑀔𑁄 𑀭𑀽𑀧𑀸𑀤𑀺 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀧𑀘𑁆𑀘𑀓𑁆𑀔𑁂 𑀓𑀢𑁆𑀯𑀸 𑀢𑁂𑀲𑀁 𑀉𑀧𑁆𑀧𑀸𑀤𑀯𑀲𑁂𑀦 𑀤𑀲𑁆𑀲𑀦𑀦𑁆𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀧𑀲𑁆𑀲𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀜𑁆𑀜𑀢𑁆𑀣𑀸𑀧𑀺 𑀳𑀺 ‘‘𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄 (𑀇𑀢𑀺𑀯𑀼. 𑁧𑁦𑁨), 𑀚𑀸𑀦𑀁 𑀚𑀸𑀦𑀸𑀢𑀺 𑀧𑀲𑁆𑀲𑀁 𑀧𑀲𑁆𑀲𑀢𑀺 (𑀫. 𑀦𑀺. 𑁧.𑁨𑁦𑁩), 𑀏𑀯𑀁 𑀚𑀸𑀦𑀦𑁆𑀢𑀸 𑀏𑀯𑀁 𑀧𑀲𑁆𑀲𑀦𑁆𑀢𑀸 (𑀫. 𑀦𑀺. 𑁧.𑁪𑁦𑁭), 𑀅𑀚𑀸𑀦𑀢𑀁 𑀅𑀧𑀲𑁆𑀲𑀢’’𑀦𑁆𑀢𑀺 𑀘 𑀆𑀤𑀻𑀲𑀼 𑀜𑀸𑀡𑀓𑀺𑀘𑁆𑀘𑀲𑁆𑀲 𑀲𑀸𑀫𑀜𑁆𑀜𑀯𑀺𑀲𑁂𑀲𑀤𑀻𑀧𑀦𑀯𑀲𑁂𑀦𑁂𑀢𑀁 𑀧𑀤𑀤𑁆𑀯𑀬𑀁 𑀆𑀕𑀢𑀦𑁆𑀢𑀺. 𑀓𑁂𑀘𑀻𑀢𑀺 𑀅𑀪𑀬𑀕𑀺𑀭𑀺𑀯𑀸𑀲𑀺𑀲𑀸𑀭𑀲𑀫𑀸𑀲𑀸𑀘𑀭𑀺𑀬𑀸. 𑀢𑁂 𑀳𑀺 ‘‘𑀲𑀫𑀸𑀥𑀺𑀦𑀸 𑀚𑀸𑀦𑀢𑁄 𑀯𑀺𑀧𑀲𑁆𑀲𑀦𑀸𑀬 𑀧𑀲𑁆𑀲𑀢𑁄 𑀚𑀸𑀦𑀁 𑀚𑀸𑀦𑀸𑀢𑀺 𑀧𑀲𑁆𑀲𑀁 𑀧𑀲𑁆𑀲𑀢𑀺, 𑀏𑀯𑀁 𑀚𑀸𑀦𑀦𑀸 𑀲𑀫𑀣𑁄, 𑀧𑀲𑁆𑀲𑀦𑀸 𑀯𑀺𑀧𑀲𑁆𑀲𑀦𑀸’’𑀢𑀺 𑀘 𑀆𑀤𑀺𑀦𑀸 𑀧𑀧𑀜𑁆𑀘𑁂𑀦𑁆𑀢𑀺. 𑀢𑁂𑀢𑀺 𑀧𑀧𑀜𑁆𑀘𑀸. 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂𑀢𑀺 ‘‘𑀚𑀸𑀦𑀢𑁄’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑀧𑀤𑀅𑀢𑁆𑀣𑁂 𑀦𑀺𑀤𑁆𑀥𑀸𑀭𑀺𑀬𑀫𑀸𑀦𑁂. 𑀦 𑀬𑀼𑀚𑁆𑀚𑀦𑁆𑀢𑀺 𑀚𑀸𑀦𑀦𑀤𑀲𑁆𑀲𑀦𑀸𑀦𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀺𑀲𑀬𑀪𑀸𑀯𑀲𑁆𑀲 𑀧𑀸𑀴𑀺𑀬𑀁 𑀯𑀼𑀢𑁆𑀢𑀢𑁆𑀢𑀸.

𑀆𑀲𑀯𑀧𑁆𑀧𑀳𑀸𑀦𑀁 𑀆𑀲𑀯𑀸𑀦𑀁 𑀅𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀁. 𑀲𑁄 𑀧𑀦 𑀦𑁂𑀲𑀁 𑀅𑀦𑀼𑀧𑁆𑀧𑀸𑀤𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀔𑀻𑀡𑀢𑀸 𑀅𑀪𑀸𑀯𑁄 𑀏𑀯𑀸𑀢𑀺 𑀆𑀳 ‘‘𑀆𑀲𑀯𑀸𑀦𑀁 𑀅𑀘𑁆𑀘𑀦𑁆𑀢𑀔𑀬𑀫𑀲𑀫𑀼𑀧𑁆𑀧𑀸𑀤𑀁 𑀔𑀻𑀡𑀸𑀓𑀸𑀭𑀁 𑀦𑀢𑁆𑀣𑀺𑀪𑀸𑀯’’𑀦𑁆𑀢𑀺. 𑀉𑀚𑀼𑀫𑀕𑁆𑀕𑀸𑀦𑀼𑀲𑀸𑀭𑀺𑀦𑁄𑀢𑀺 𑀓𑀺𑀮𑁂𑀲𑀯𑀗𑁆𑀓𑀲𑁆𑀲 𑀓𑀸𑀬𑀯𑀗𑁆𑀓𑀸𑀤𑀻𑀦𑀜𑁆𑀘 𑀧𑀳𑀸𑀦𑁂𑀦 𑀉𑀚𑀼𑀪𑀽𑀢𑁂 𑀲𑀯𑀺𑀧𑀲𑁆𑀲𑀦𑁂 𑀳𑁂𑀝𑁆𑀞𑀺𑀫𑀫𑀕𑁆𑀕𑁂 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲. 𑀢𑀤𑁂𑀯 𑀳𑀺𑀲𑁆𑀲 𑀲𑀺𑀓𑁆𑀔𑀦𑀁. 𑀔𑀬𑀲𑁆𑀫𑀺𑀁 𑀧𑀞𑀫𑀁 𑀜𑀸𑀡𑀁. 𑀢𑀢𑁄 𑀅𑀜𑁆𑀜𑀸 𑀅𑀦𑀦𑁆𑀢𑀭𑀸𑀢𑀺 𑀔𑀬𑀲𑀗𑁆𑀔𑀸𑀢𑁂 𑀅𑀕𑁆𑀕𑀫𑀕𑁆𑀕𑁂 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀫𑁂𑀯 𑀜𑀸𑀡𑀁 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺 ¶ , 𑀢𑀤𑀦𑀦𑁆𑀢𑀭𑀁 𑀧𑀦 𑀅𑀜𑁆𑀜𑀁 𑀅𑀭𑀳𑀢𑁆𑀢𑀦𑁆𑀢𑀺. 𑀬𑀤𑀺𑀧𑀺 𑀕𑀸𑀣𑀸𑀬𑀁 ‘‘𑀔𑀬𑀲𑁆𑀫𑀺𑀁’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀦 𑀆𑀲𑀯𑁂𑀳𑀺 𑀔𑀻𑀡𑁄𑀢𑀻𑀢𑀺 𑀫𑀕𑁆𑀕𑁄 𑀔𑀬𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀫𑀕𑁆𑀕𑁄 𑀆𑀲𑀯𑀓𑁆𑀔𑀬𑁄𑀢𑀺 𑀯𑀼𑀢𑁆𑀢𑁄’’𑀢𑀺. 𑀲𑀫𑀡𑁄𑀢𑀺 𑀲𑀫𑀺𑀢𑀧𑀸𑀧𑁄 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀧𑀦 𑀔𑀻𑀡𑀸𑀲𑀯𑁄 𑀳𑁄𑀢𑀻𑀢𑀺 ‘‘𑀆𑀲𑀯𑀸𑀦𑀁 𑀔𑀬𑀸’’𑀢𑀺 𑀇𑀫𑀲𑁆𑀲 𑀨𑀮𑀧𑀭𑀺𑀬𑀸𑀬𑀢𑀸 𑀯𑀼𑀢𑁆𑀢𑀸, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀆𑀲𑀯𑀓𑁆𑀔𑀬𑁄 𑀫𑀕𑁆𑀕𑁄, 𑀢𑁂𑀦 𑀧𑀢𑁆𑀢𑀩𑁆𑀩𑀢𑁄 𑀨𑀮𑀁. 𑀏𑀢𑁂𑀦𑁂𑀯 𑀦𑀺𑀩𑁆𑀩𑀸𑀦𑀲𑁆𑀲𑀧𑀺 𑀆𑀲𑀯𑀓𑁆𑀔𑀬𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

‘‘𑀚𑀸𑀦𑀢𑁄 𑀧𑀲𑁆𑀲𑀢𑁄’’𑀢𑀺 𑀚𑀸𑀦𑀢𑁄 𑀏𑀯 𑀧𑀲𑁆𑀲𑀢𑁄 𑀏𑀯𑀸𑀢𑀺 𑀏𑀯𑀫𑁂𑀢𑁆𑀣 𑀦𑀺𑀬𑀫𑁄 𑀇𑀘𑁆𑀙𑀺𑀢𑁄, 𑀦 𑀅𑀜𑁆𑀜𑀣𑀸 𑀯𑀺𑀲𑁂𑀲𑀸𑀪𑀸𑀯𑀢𑁄 𑀅𑀦𑀺𑀝𑁆𑀞𑀲𑀸𑀥𑀦𑀢𑁄 𑀘𑀸𑀢𑀺 𑀢𑀲𑁆𑀲 𑀦𑀺𑀬𑀫𑀲𑁆𑀲 𑀨𑀮𑀁 𑀤𑀲𑁆𑀲𑁂𑀢𑀼𑀁 ‘‘𑀦𑁄 𑀅𑀚𑀸𑀦𑀢𑁄 𑀦𑁄 ¶ 𑀅𑀧𑀲𑁆𑀲𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑁄 𑀧𑀦 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀢𑀲𑁆𑀲 𑀦𑁂𑀯 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄’’𑀢𑀺. 𑀇𑀫𑀺𑀦𑀸 𑀤𑀽𑀭𑀻𑀓𑀢𑀸𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀘 𑀆𑀲𑀯𑀓𑁆𑀔𑀬𑀲𑁆𑀲 𑀏𑀓𑀦𑁆𑀢𑀺𑀓𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁂𑀦𑀸𑀢𑀺 ‘‘𑀦𑁄 𑀅𑀚𑀸𑀦𑀢𑁄 𑀦𑁄 𑀅𑀧𑀲𑁆𑀲𑀢𑁄’’𑀢𑀺 𑀯𑀘𑀦𑁂𑀦. 𑀢𑁂 𑀧𑀝𑀺𑀓𑁆𑀔𑀺𑀢𑁆𑀢𑀸𑀢𑀺 𑀓𑁂 𑀧𑀦 𑀢𑁂𑀢𑀺? ‘‘𑀩𑀸𑀮𑁂 𑀘 𑀧𑀡𑁆𑀟𑀺𑀢𑁂 𑀘 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺 (𑀤𑀻. 𑀦𑀺. 𑁧.𑁧𑁬𑁮; 𑀫. 𑀦𑀺. 𑁨.𑁨𑁨𑁮), 𑀅𑀳𑁂𑀢𑀽 𑀅𑀧𑀘𑁆𑀘𑀬𑀸 𑀲𑀢𑁆𑀢𑀸 𑀯𑀺𑀲𑀼𑀚𑁆𑀛𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑁧.𑁧𑁬𑁮; 𑀫. 𑀦𑀺. 𑁨.𑁨𑁨𑁭) 𑀏𑀯𑀫𑀸𑀤𑀺𑀯𑀸𑀤𑀸. 𑀢𑁂𑀲𑀼 𑀳𑀺 𑀓𑁂𑀘𑀺 𑀅𑀪𑀺𑀚𑀸𑀢𑀺𑀲𑀗𑁆𑀓𑀦𑁆𑀢𑀺𑀫𑀢𑁆𑀢𑁂𑀦 𑀪𑀯𑀲𑀗𑁆𑀓𑀦𑁆𑀢𑀺𑀫𑀢𑁆𑀢𑁂𑀦 𑀘 𑀲𑀁𑀲𑀸𑀭𑀲𑀼𑀤𑁆𑀥𑀺𑀁 𑀧𑀝𑀺𑀚𑀸𑀦𑀦𑁆𑀢𑀺, 𑀅𑀜𑁆𑀜𑁂 𑀇𑀲𑁆𑀲𑀭𑀧𑀚𑀸𑀧𑀢𑀺𑀓𑀸𑀮𑀸𑀤𑀺𑀯𑀲𑁂𑀦, 𑀢𑀬𑀺𑀤𑀁 𑀲𑀩𑁆𑀩𑀁 ‘‘𑀲𑀁𑀲𑀸𑀭𑀸𑀤𑀻𑀳𑀻’’𑀢𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀼𑀭𑀺𑀫𑁂𑀦 𑀯𑀸 𑀧𑀤𑀤𑁆𑀯𑀬𑁂𑀦𑀸𑀢𑀺 ‘‘𑀚𑀸𑀦𑀢𑁄, 𑀧𑀲𑁆𑀲𑀢𑁄’’𑀢𑀺 𑀇𑀫𑀺𑀦𑀸 𑀧𑀤𑀤𑁆𑀯𑀬𑁂𑀦. 𑀉𑀧𑀸𑀬𑁄 𑀯𑀼𑀢𑁆𑀢𑁄 ‘‘𑀆𑀲𑀯𑀓𑁆𑀔𑀬𑀲𑁆𑀲𑀸’’𑀢𑀺 𑀅𑀥𑀺𑀓𑀸𑀭𑀢𑁄 𑀯𑀺𑀜𑁆𑀜𑀸𑀬𑀢𑀺. 𑀇𑀫𑀺𑀦𑀸𑀢𑀺 ‘‘𑀦𑁄 𑀅𑀚𑀸𑀦𑀢𑁄, 𑀦𑁄 𑀅𑀧𑀲𑁆𑀲𑀢𑁄’’𑀢𑀺 𑀇𑀫𑀺𑀦𑀸 𑀧𑀤𑀤𑁆𑀯𑀬𑁂𑀦. 𑀅𑀦𑀼𑀧𑀸𑀬𑁄 𑀏𑀯 𑀳𑀺 𑀆𑀲𑀯𑀸𑀦𑀁 𑀔𑀬𑀲𑁆𑀲 𑀬𑀤𑀺𑀤𑀁 𑀬𑁄𑀦𑀺𑀲𑁄 𑀘 𑀅𑀬𑁄𑀦𑀺𑀲𑁄 𑀘 𑀫𑀦𑀲𑀺𑀓𑀸𑀭𑀲𑁆𑀲 𑀅𑀚𑀸𑀦𑀦𑀁 𑀅𑀤𑀲𑁆𑀲𑀦𑀜𑁆𑀘, 𑀢𑁂𑀦 𑀢𑀣𑀢𑁆𑀢𑀸𑀬 𑀅𑀧𑁆𑀧𑀝𑀺𑀧𑀢𑁆𑀢𑀺𑀢𑁄 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀢𑁄 𑀘. 𑀦𑀦𑀼 ‘‘𑀧𑀲𑁆𑀲𑀢𑁄’’𑀢𑀺 𑀇𑀫𑀺𑀦𑀸 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀬𑀣𑀸 𑀦 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀤𑀲𑁆𑀲𑀦𑁂 𑀅𑀥𑀺𑀧𑁆𑀧𑁂𑀢𑁂 𑀧𑀼𑀭𑀺𑀫𑁂𑀦𑁂𑀯 𑀅𑀦𑀼𑀧𑀸𑀬𑀧𑀝𑀺𑀲𑁂𑀥𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺? 𑀦 𑀳𑁄𑀢𑀺, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀦𑀼𑀧𑁆𑀧𑀸𑀤𑀦𑀲𑁆𑀲𑀧𑀺 𑀉𑀧𑀸𑀬𑀪𑀸𑀯𑀢𑁄 𑀲𑀢𑀺𑀩𑀮𑁂𑀦 𑀲𑀁𑀯𑀼𑀢𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀢𑀸 𑀯𑀺𑀬 𑀲𑀫𑁆𑀧𑀚𑀜𑁆𑀜𑀩𑀮𑁂𑀦𑁂𑀯 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀅𑀪𑀽𑀢𑀚𑀸𑀦𑀦𑀸𑀪𑀸𑀯𑁄 ¶ 𑀳𑁄𑀢𑀻𑀢𑀺. 𑀢𑁂𑀦𑀸𑀳 ‘‘𑀲𑀗𑁆𑀔𑁂𑀧𑁂𑀦…𑀧𑁂… 𑀳𑁄𑀢𑀻’’𑀢𑀺. 𑀢𑀢𑁆𑀣 𑀲𑀗𑁆𑀔𑁂𑀧𑁂𑀦𑀸𑀢𑀺 𑀲𑀫𑀸𑀲𑁂𑀦, 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀯𑀺𑀢𑁆𑀣𑀸𑀭𑀁 𑀅𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀜𑀸𑀡𑀁…𑀧𑁂… 𑀤𑀲𑁆𑀲𑀺𑀢𑀁 𑀳𑁄𑀢𑀺 ‘‘𑀚𑀸𑀦𑀢𑁄’’𑀢𑀺𑀆𑀤𑀺𑀦𑀸 𑀜𑀸𑀡𑀲𑁆𑀲𑁂𑀯 𑀕𑀳𑀺𑀢𑀢𑁆𑀢𑀸. 𑀬𑀤𑀺 𑀏𑀯𑀁 ‘‘𑀲𑁆𑀯𑀸𑀬𑀁 𑀲𑀁𑀯𑀭𑁄’’𑀢𑀺𑀆𑀤𑀺 𑀓𑀣𑀁 𑀦𑀻𑀬𑀢𑀻𑀢𑀺? 𑀜𑀸𑀡𑀲𑁆𑀲 𑀧𑀥𑀸𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀏𑀯𑀫𑀬𑀁 𑀤𑁂𑀲𑀦𑀸 𑀓𑀢𑀸𑀢𑀺 𑀦𑀸𑀬𑀁 𑀤𑁄𑀲𑁄, 𑀢𑀣𑀸 𑀅𑀜𑁆𑀜𑀢𑁆𑀣𑀸𑀧𑀺 ‘‘𑀅𑀭𑀺𑀬𑀁 𑀯𑁄 𑀪𑀺𑀓𑁆𑀔𑀯𑁂 𑀲𑀫𑁆𑀫𑀸𑀲𑀫𑀸𑀥𑀺𑀁 𑀤𑁂𑀲𑁂𑀲𑁆𑀲𑀸𑀫𑀺 𑀲𑀉𑀧𑀦𑀺𑀲𑀁 𑀲𑀧𑀭𑀺𑀓𑁆𑀔𑀸𑀭’’𑀦𑁆𑀢𑀺 (𑀫. 𑀦𑀺. 𑁩.𑁧𑁩𑁬) 𑀯𑀺𑀢𑁆𑀣𑀸𑀭𑁄.

𑀤𑀩𑁆𑀩𑀚𑀸𑀢𑀺𑀓𑁄𑀢𑀺 𑀤𑀩𑁆𑀩𑀭𑀽𑀧𑁄. 𑀲𑁄 𑀳𑀺 𑀤𑁆𑀭𑀩𑁆𑀬𑁄𑀢𑀺 𑀯𑀼𑀘𑁆𑀘𑀢𑀺 ‘‘𑀤𑁆𑀭𑀩𑁆𑀬𑀁 𑀯𑀺𑀦𑀲𑁆𑀲𑀢𑀺 𑀦𑀸𑀤𑁆𑀭𑀩𑁆𑀬’’𑀦𑁆𑀢𑀺𑀆𑀤𑀻𑀲𑀼. 𑀤𑀩𑁆𑀩𑀚𑀸𑀢𑀺𑀓𑁄 𑀯𑀸 𑀲𑀸𑀭𑀲𑀪𑀸𑀯𑁄, 𑀲𑀸𑀭𑀼𑀧𑁆𑀧𑀲𑀻𑀮𑀸𑀘𑀸𑀭𑁄𑀢𑀺 𑀅𑀢𑁆𑀣𑁄. 𑀬𑀣𑀸𑀳 ‘‘𑀦 𑀔𑁄 𑀤𑀩𑁆𑀩 𑀤𑀩𑁆𑀩𑀸 𑀏𑀯𑀁 𑀦𑀺𑀩𑁆𑀩𑁂𑀞𑁂𑀦𑁆𑀢𑀻’’𑀢𑀺 (𑀧𑀸𑀭𑀸. 𑁩𑁮𑁪, 𑁩𑁯𑁧; 𑀘𑀽𑀴𑀯. 𑁧𑁯𑁩). 𑀯𑀢𑁆𑀢𑀲𑀻𑀲𑁂 𑀞𑀢𑁆𑀯𑀸𑀢𑀺 𑀯𑀢𑁆𑀢𑀁 𑀉𑀢𑁆𑀢𑀫𑀗𑁆𑀕𑀁, 𑀥𑀼𑀭𑀁 𑀯𑀸 𑀓𑀢𑁆𑀯𑀸. 𑀬𑁄 𑀳𑀺 𑀧𑀭𑀺𑀲𑀼𑀤𑁆𑀥𑀸𑀚𑀻𑀯𑁄 𑀓𑀸𑀢𑀼𑀁 𑀅𑀚𑀸𑀦𑀦𑁆𑀢𑀸𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁, 𑀅𑀢𑁆𑀢𑀦𑁄 𑀯𑀸 𑀯𑀸𑀢𑀸𑀢𑀧𑀸𑀤𑀺𑀧𑀝𑀺𑀩𑀸𑀳𑀦𑀢𑁆𑀣𑀁 𑀙𑀢𑁆𑀢𑀸𑀤𑀻𑀦𑀺 𑀓𑀭𑁄𑀢𑀺, 𑀲𑁄 𑀯𑀢𑁆𑀢𑀲𑀻𑀲𑁂 𑀞𑀢𑁆𑀯𑀸 𑀓𑀭𑁄𑀢𑀺 𑀦𑀸𑀫. 𑀧𑀤𑀝𑁆𑀞𑀸𑀦𑀁 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸 𑀦𑀸𑀣𑀓𑀭𑀡𑀥𑀫𑁆𑀫𑀪𑀸𑀯𑁂𑀦 𑀉𑀧𑀦𑀺𑀲𑁆𑀲𑀬𑀪𑀸𑀯𑀢𑁄. 𑀯𑀼𑀢𑁆𑀢𑀜𑁆𑀳𑀺 ¶ ‘‘𑀬𑀸𑀦𑀺 𑀢𑀸𑀦𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀉𑀘𑁆𑀘𑀸𑀯𑀘𑀸𑀦𑀺 𑀓𑀺𑀘𑁆𑀘𑀓𑀭𑀡𑀻𑀬𑀸𑀦𑀺, 𑀢𑀢𑁆𑀣 𑀤𑀓𑁆𑀔𑁄 𑀳𑁄𑀢𑀻’’𑀢𑀺𑀆𑀤𑀺 (𑀫. 𑀦𑀺. 𑁧.𑁪𑁯𑁭).

𑀉𑀧𑀸𑀬𑀫𑀦𑀲𑀺𑀓𑀸𑀭𑁄𑀢𑀺 𑀓𑀼𑀲𑀮𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀓𑀸𑀭𑀡𑀪𑀽𑀢𑁄 𑀫𑀦𑀲𑀺𑀓𑀸𑀭𑁄. 𑀧𑀣𑀫𑀦𑀲𑀺𑀓𑀸𑀭𑁄𑀢𑀺 𑀢𑀲𑁆𑀲𑀸 𑀏𑀯 𑀫𑀕𑁆𑀕𑀪𑀽𑀢𑁄 𑀫𑀦𑀲𑀺𑀓𑀸𑀭𑁄. 𑀅𑀦𑀺𑀘𑁆𑀘𑀸𑀤𑀻𑀲𑀼 𑀅𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀦𑀸𑀢𑀺 𑀅𑀦𑀺𑀘𑁆𑀘𑀤𑀼𑀓𑁆𑀔𑀅𑀲𑀼𑀪𑀅𑀦𑀢𑁆𑀢𑀲𑀪𑀸𑀯𑁂𑀲𑀼 𑀥𑀫𑁆𑀫𑁂𑀲𑀼 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀲𑀼𑀪𑀁 𑀅𑀦𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀏𑀯 𑀦𑀬𑁂𑀦, 𑀅𑀯𑀺𑀧𑀭𑀻𑀢𑀲𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑁂𑀦 𑀯𑀸𑀢𑀺 𑀲𑀘𑁆𑀘𑀸𑀪𑀺𑀲𑀫𑀬𑀲𑁆𑀲 𑀅𑀦𑀼𑀮𑁄𑀫𑀯𑀲𑁂𑀦. 𑀘𑀺𑀢𑁆𑀢𑀲𑁆𑀲 𑀆𑀯𑀝𑁆𑀝𑀦𑀸𑀢𑀺𑀆𑀤𑀺𑀦𑀸 𑀆𑀯𑀝𑁆𑀝𑀦𑀸𑀬 𑀧𑀘𑁆𑀘𑀬𑀪𑀽𑀢𑀸 𑀢𑀢𑁄 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀸 𑀫𑀦𑁄𑀤𑁆𑀯𑀸𑀭𑀺𑀓𑀸 𑀓𑀼𑀲𑀮𑀚𑀯𑀦𑀧𑁆𑀧𑀯𑀢𑁆𑀢𑀺 𑀨𑀮𑀯𑁄𑀳𑀸𑀭𑁂𑀦 𑀢𑀣𑀸 𑀯𑀼𑀢𑁆𑀢𑀸. 𑀢𑀲𑁆𑀲𑀸 𑀳𑀺 𑀯𑀲𑁂𑀦 𑀲𑀸 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀆𑀯𑀚𑁆𑀚𑀦𑀸 𑀳𑀺 𑀪𑀯𑀗𑁆𑀕𑀘𑀺𑀢𑁆𑀢𑀁 𑀆𑀯𑀝𑁆𑀝𑀬𑀢𑀻𑀢𑀺 𑀆𑀯𑀝𑁆𑀝𑀦𑀸. 𑀅𑀦𑀼 𑀅𑀦𑀼 𑀆𑀯𑀝𑁆𑀝𑁂𑀢𑀻𑀢𑀺 𑀅𑀦𑁆𑀯𑀸𑀯𑀝𑁆𑀝𑀦𑀸. 𑀪𑀯𑀗𑁆𑀕𑀸𑀭𑀫𑁆𑀫𑀡𑀢𑁄 𑀅𑀜𑁆𑀜𑀁 𑀆𑀪𑀼𑀚𑀢𑀻𑀢𑀺 𑀆𑀪𑁄𑀕𑁄. 𑀲𑀫𑀦𑁆𑀦𑀸𑀳𑀭𑀢𑀻𑀢𑀺 𑀲𑀫𑀦𑁆𑀦𑀸𑀳𑀸𑀭𑁄. 𑀢𑀤𑁂𑀯𑀸𑀭𑀫𑁆𑀫𑀡𑀁 𑀅𑀢𑁆𑀢𑀸𑀦𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀫𑀦𑀲𑀺 𑀓𑀭𑁄𑀢𑀺 𑀞𑀧𑁂𑀢𑀻𑀢𑀺 𑀫𑀦𑀲𑀺𑀓𑀸𑀭𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀉𑀧𑀸𑀬𑀧𑀣𑀫𑀦𑀲𑀺𑀓𑀸𑀭𑀮𑀓𑁆𑀔𑀡𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀦𑀸𑀫 𑀯𑀼𑀘𑁆𑀘𑀢𑀺, 𑀬𑀲𑁆𑀲 𑀯𑀲𑁂𑀦 𑀧𑀼𑀕𑁆𑀕𑀮𑁄 𑀤𑀼𑀓𑁆𑀔𑀸𑀤𑀻𑀦𑀺 𑀲𑀘𑁆𑀘𑀸𑀦𑀺 𑀆𑀯𑀚𑁆𑀚𑀺𑀢𑀼𑀁 𑀲𑀓𑁆𑀓𑁄𑀢𑀺 ¶ . 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀲𑀘𑁆𑀘𑀧𑀝𑀺𑀓𑀽𑀮𑁂𑀦𑀸𑀢𑀺 𑀲𑀘𑁆𑀘𑀸𑀪𑀺𑀲𑀫𑀬𑀲𑁆𑀲 𑀅𑀦𑀦𑀼𑀮𑁄𑀫𑀯𑀲𑁂𑀦. 𑀲𑁂𑀲𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀬𑀼𑀢𑁆𑀢𑀺𑀦𑁆𑀢𑀺 𑀉𑀧𑀧𑀢𑁆𑀢𑀺𑀲𑀸𑀥𑀦𑀬𑀼𑀢𑁆𑀢𑀺𑀁, 𑀳𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀬𑀲𑁆𑀫𑀸’’𑀢𑀺𑀆𑀤𑀺. 𑀏𑀢𑁆𑀣𑀸𑀢𑀺 ‘‘𑀅𑀬𑁄𑀦𑀺𑀲𑁄 𑀪𑀺𑀓𑁆𑀔𑀯𑁂…𑀧𑁂… 𑀧𑀳𑀻𑀬𑀦𑁆𑀢𑀻’’𑀢𑀺 𑀏𑀢𑀲𑁆𑀫𑀺𑀁 𑀧𑀸𑀞𑁂. 𑀢𑀢𑁆𑀣𑀸𑀢𑀺 𑀯𑀸𑀓𑁆𑀬𑁄𑀧𑀜𑁆𑀜𑀸𑀲𑀦𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀅𑀬𑀫𑀼𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑁄 𑀧𑀭𑀺𑀯𑀢𑁆𑀢𑁄𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀬𑁄𑀦𑀺𑀲𑁄’’𑀢𑀺𑀆𑀤𑀺. 𑀢𑀢𑁆𑀣 𑀫𑀦𑀲𑀺𑀓𑀸𑀭𑀧𑀤𑀁 𑀤𑁆𑀯𑀺𑀦𑁆𑀦𑀁 𑀲𑀸𑀥𑀸𑀭𑀡𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀬𑁄𑀦𑀺𑀲𑁄 𑀅𑀬𑁄𑀦𑀺𑀲𑁄𑀢𑀺 𑀇𑀫𑁂𑀳𑀺 𑀢𑀸𑀯 𑀤𑁆𑀯𑀻𑀳𑀺 𑀧𑀤𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀬𑁄𑀦𑀺𑀲𑁄𑀢𑀺 𑀳𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄, 𑀅𑀬𑁄𑀦𑀺𑀲𑁄𑀢𑀺 𑀘 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀢𑀢𑁆𑀣 𑀅𑀦𑀼𑀯𑀢𑁆𑀢𑀦𑀢𑁄 𑀯𑀓𑁆𑀔𑀫𑀸𑀦𑀢𑁆𑀢𑀸 𑀘. 𑀲𑀢𑀺𑀧𑀺 𑀅𑀦𑀢𑁆𑀣𑀼𑀧𑁆𑀧𑀢𑁆𑀢𑀺𑀲𑀸𑀫𑀜𑁆𑀜𑁂 𑀪𑀯𑀸𑀤𑀻𑀲𑀼 𑀧𑀼𑀕𑁆𑀕𑀮𑀲𑁆𑀲 𑀩𑀳𑀼𑀮𑀺𑀲𑀸𑀫𑀜𑁆𑀜𑀁 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀢𑀁 𑀦𑀸𑀯𑀸𑀤𑀺 𑀉𑀧𑀫𑀸𑀢𑁆𑀢𑀬𑀕𑁆𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀘𑀓𑁆𑀓𑀬𑀦𑁆𑀢𑀁 𑀆𑀳𑀝𑀖𑀝𑀻𑀬𑀦𑁆𑀢𑀦𑁆𑀢𑀺 𑀯𑀤𑀦𑁆𑀢𑀺.

𑀅𑀦𑀼𑀧𑁆𑀧𑀦𑁆𑀦𑀸𑀢𑀺 𑀅𑀦𑀺𑀩𑁆𑀩𑀢𑁆𑀢𑀸. 𑀆𑀭𑀫𑁆𑀫𑀡𑀯𑀺𑀲𑁂𑀲𑀯𑀲𑁂𑀦 𑀢𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀦 𑀭𑀽𑀧𑀸𑀭𑀫𑁆𑀫𑀡𑀸𑀤𑀺𑀆𑀭𑀫𑁆𑀫𑀡𑀲𑀸𑀫𑀜𑁆𑀜𑁂𑀦, 𑀦𑀸𑀧𑀺 𑀆𑀲𑀯𑀯𑀲𑁂𑀦. 𑀢𑁂𑀦𑀸𑀳 ‘‘𑀅𑀦𑀦𑀼𑀪𑀽𑀢𑀧𑀼𑀩𑁆𑀩𑀁 𑀆𑀭𑀫𑁆𑀫𑀡𑀁…𑀧𑁂… 𑀅𑀜𑁆𑀜𑀣𑀸 𑀳𑀺 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀅𑀦𑀼𑀧𑁆𑀧𑀦𑁆𑀦𑀸 𑀦𑀸𑀫 𑀆𑀲𑀯𑀸 𑀦 𑀲𑀦𑁆𑀢𑀻’’𑀢𑀺. 𑀯𑀢𑁆𑀣𑀼𑀦𑁆𑀢𑀺 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑀧𑁆𑀧𑀪𑁂𑀤𑀁 𑀆𑀲𑀯𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀁. 𑀆𑀭𑀫𑁆𑀫𑀡𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀭𑀽𑀧𑀸𑀤𑀻𑀦𑀺 ¶ . 𑀇𑀤𑀸𑀦𑀺 𑀆𑀲𑀯𑀯𑀲𑁂𑀦𑀧𑀺 𑀅𑀦𑀼𑀧𑁆𑀧𑀦𑁆𑀦𑀧𑀭𑀺𑀬𑀸𑀬𑁄 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀪𑀽𑀢𑀧𑀼𑀩𑁆𑀩𑁂𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀓𑀢𑀺𑀲𑀼𑀤𑁆𑀥𑀺𑀬𑀸𑀢𑀺 𑀧𑀼𑀩𑁆𑀩𑀘𑀭𑀺𑀬𑀢𑁄 𑀓𑀺𑀮𑁂𑀲𑀤𑀽𑀭𑀻𑀪𑀸𑀯𑀲𑀺𑀤𑁆𑀥𑀸𑀬 𑀲𑀼𑀤𑁆𑀥𑀺𑀧𑀓𑀢𑀺𑀢𑀸𑀬. 𑀧𑀸𑀴𑀺𑀬𑀸 𑀉𑀤𑁆𑀤𑀺𑀲𑀦𑀁 𑀉𑀤𑁆𑀤𑁂𑀲𑁄, 𑀅𑀢𑁆𑀣𑀓𑀣𑀦𑀁 𑀧𑀭𑀺𑀧𑀼𑀘𑁆𑀙𑀸. 𑀅𑀚𑁆𑀛𑀬𑀦𑀁 𑀧𑀭𑀺𑀬𑀢𑁆𑀢𑀺, 𑀘𑀻𑀯𑀭𑀲𑀺𑀩𑁆𑀩𑀸𑀤𑀺 𑀦𑀯𑀓𑀫𑁆𑀫𑀁, 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀼𑀬𑁄𑀕𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄. 𑀢𑀸𑀤𑀺𑀲𑁂𑀦𑀸𑀢𑀺 𑀬𑀸𑀤𑀺𑀲𑁂𑀦 ‘‘𑀫𑀦𑀼𑀜𑁆𑀜𑀯𑀢𑁆𑀣𑀽’’𑀢𑀺𑀫𑀦𑀲𑀺𑀓𑀸𑀭𑀸𑀤𑀺𑀦𑀸 𑀓𑀸𑀫𑀸𑀲𑀯𑀸𑀤𑀬𑁄 𑀲𑀫𑁆𑀪𑀯𑁂𑀬𑁆𑀬𑀼𑀁, 𑀢𑀸𑀤𑀺𑀲𑁂𑀦. 𑀆𑀲𑀯𑀸𑀦𑀁 𑀯𑀟𑁆𑀠𑀺 𑀦𑀸𑀫 𑀧𑀭𑀺𑀬𑀼𑀝𑁆𑀞𑀸𑀦𑀢𑀺𑀩𑁆𑀩𑀢𑀸𑀬 𑀯𑁂𑀤𑀺𑀢𑀩𑁆𑀩𑀸, 𑀲𑀸 𑀘 𑀅𑀪𑀺𑀡𑁆𑀳𑀼𑀧𑁆𑀧𑀢𑁆𑀢𑀺𑀬𑀸 𑀩𑀳𑀼𑀮𑀻𑀓𑀸𑀭𑀢𑁄𑀢𑀺 𑀢𑁂 𑀮𑀤𑁆𑀥𑀸𑀲𑁂𑀯𑀦𑀸 𑀩𑀳𑀼𑀮𑀪𑀸𑀯𑀁 𑀧𑀢𑁆𑀢𑀸 𑀫𑀤𑁆𑀤𑀦𑁆𑀢𑀸 𑀨𑀭𑀦𑁆𑀢𑀸 𑀙𑀸𑀤𑁂𑀦𑁆𑀢𑀸 𑀅𑀦𑁆𑀥𑀸𑀓𑀸𑀭𑀁 𑀓𑀭𑁄𑀦𑁆𑀢𑀸 𑀅𑀧𑀭𑀸𑀧𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀏𑀓𑀲𑀦𑁆𑀢𑀸𑀦𑀦𑀬𑁂𑀦 ‘‘𑀉𑀧𑁆𑀧𑀦𑁆𑀦𑀸 𑀧𑀯𑀟𑁆𑀠𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀦𑁆𑀦𑀸 𑀧𑀯𑀟𑁆𑀠𑀦𑁆𑀢𑀻𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺. 𑀇𑀢𑁄 𑀅𑀜𑁆𑀜𑀣𑀸𑀢𑀺 𑀇𑀢𑁄 ¶ 𑀅𑀧𑀭𑀸𑀧𑀭𑀼𑀧𑁆𑀧𑀦𑁆𑀦𑀸𑀦𑀁 𑀏𑀓𑀢𑁆𑀢𑀕𑁆𑀕𑀳𑀡𑀢𑁄 𑀅𑀜𑁆𑀜𑀣𑀸 𑀯𑀟𑁆𑀠𑀺 𑀦𑀸𑀫 𑀦𑀢𑁆𑀣𑀺 𑀔𑀡𑀺𑀓𑀪𑀸𑀯𑀢𑁄.

𑀲𑁄 𑀘 𑀚𑀸𑀦𑀸𑀢𑀻𑀢𑀺 𑀥𑀫𑁆𑀫𑀼𑀤𑁆𑀥𑀘𑁆𑀘𑀯𑀺𑀕𑁆𑀕𑀳𑀸𑀪𑀸𑀯𑀫𑀸𑀳. 𑀓𑀸𑀭𑀓𑀲𑁆𑀲𑁂𑀯𑀸𑀢𑀺 𑀬𑀼𑀢𑁆𑀢𑀬𑁄𑀕𑀲𑁆𑀲𑁂𑀯. 𑀬𑀲𑁆𑀲 𑀧𑀦𑀸𑀢𑀺𑀆𑀤𑀺𑀦𑀸 𑀅𑀦𑀼𑀤𑁆𑀤𑁂𑀲𑀺𑀓𑀁 𑀓𑀢𑁆𑀯𑀸 𑀯𑀼𑀢𑁆𑀢𑀫𑀢𑁆𑀣𑀁 𑀧𑀼𑀭𑀸𑀢𑀦𑀲𑁆𑀲 𑀧𑀼𑀭𑀺𑀲𑀸𑀢𑀺𑀲𑀬𑀲𑁆𑀲 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑁂𑀦 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀫𑀡𑁆𑀟𑀮𑀸𑀭𑀸𑀫𑀯𑀸𑀲𑀻𑀫𑀳𑀸𑀢𑀺𑀲𑁆𑀲𑀪𑀽𑀢𑀢𑁆𑀣𑁂𑀭𑀲𑁆𑀲 𑀯𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀆𑀬𑀢𑀺𑀁 𑀢𑀣𑀸𑀧𑀝𑀺𑀧𑀢𑁆𑀢𑀺𑀓𑀸𑀭𑀡𑀁 𑀳𑁄𑀢𑀺, 𑀬𑀢𑁄 𑀏𑀤𑀺𑀲𑀁 𑀯𑀢𑁆𑀣𑀼 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀬𑁂𑀯𑀸𑀢𑀺 𑀫𑀡𑁆𑀟𑀮𑀸𑀭𑀸𑀫𑁂𑀬𑁂𑀯. 𑀆𑀘𑀭𑀺𑀬𑀁 𑀆𑀧𑀼𑀘𑁆𑀙𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀉𑀤𑁆𑀤𑁂𑀲𑀸𑀘𑀭𑀺𑀬𑀁 𑀓𑀫𑁆𑀫𑀝𑁆𑀞𑀸𑀦𑀕𑁆𑀕𑀳𑀡𑀢𑁆𑀣𑀁 𑀕𑀦𑁆𑀢𑀼𑀁 𑀆𑀧𑀼𑀘𑁆𑀙𑀺𑀢𑁆𑀯𑀸. 𑀆𑀘𑀭𑀺𑀬𑀁 𑀯𑀦𑁆𑀤𑀺𑀢𑁆𑀯𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀤𑀸𑀬𑀓𑀁 𑀫𑀳𑀸𑀭𑀓𑁆𑀔𑀺𑀢𑀢𑁆𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸. 𑀉𑀤𑁆𑀤𑁂𑀲𑀫𑀕𑁆𑀕𑀦𑁆𑀢𑀺 𑀬𑀣𑀸𑀆𑀭𑀤𑁆𑀥𑀁 𑀉𑀤𑁆𑀤𑁂𑀲𑀧𑀩𑀦𑁆𑀥𑀁. 𑀢𑀤𑀸 𑀓𑀺𑀭 𑀫𑀼𑀔𑀧𑀸𑀞𑁂𑀦𑁂𑀯 𑀩𑀳𑀽 𑀏𑀓𑀚𑁆𑀛𑀁 𑀉𑀤𑁆𑀤𑀺𑀲𑀸𑀧𑁂𑀢𑁆𑀯𑀸 𑀫𑀦𑁄𑀲𑀚𑁆𑀛𑀸𑀬𑀯𑀲𑁂𑀦 𑀥𑀫𑁆𑀫𑀁 𑀲𑀚𑁆𑀛𑀸𑀬𑀦𑁆𑀢𑀺. 𑀢𑀢𑁆𑀣𑀸𑀬𑀁 𑀣𑁂𑀭𑁄 𑀧𑀜𑁆𑀜𑀯𑀦𑁆𑀢𑀢𑀸𑀬 𑀉𑀤𑁆𑀤𑁂𑀲𑀁 𑀕𑀡𑁆𑀳𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑁄𑀭𑀬𑁆𑀳𑁄, 𑀲𑁄 ‘‘𑀇𑀤𑀸𑀦𑀸𑀳𑀁 𑀅𑀦𑀸𑀕𑀸𑀫𑀻, 𑀓𑀺𑀁 𑀫𑀬𑁆𑀳𑀁 𑀉𑀤𑁆𑀤𑁂𑀲𑁂𑀦𑀸’’𑀢𑀺 𑀲𑀗𑁆𑀓𑁄𑀘𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀉𑀤𑁆𑀤𑁂𑀲𑀓𑀸𑀮𑁂 𑀆𑀘𑀭𑀺𑀬𑀁 𑀉𑀧𑀲𑀗𑁆𑀓𑀫𑀺. ‘‘𑀉𑀧𑁆𑀧𑀦𑁆𑀦𑀸 𑀧𑀳𑀻𑀬𑀦𑁆𑀢𑀻’’𑀢𑀺 𑀏𑀢𑁆𑀣 𑀉𑀧𑁆𑀧𑀦𑁆𑀦𑀲𑀤𑀺𑀲𑀸 ‘‘𑀉𑀧𑁆𑀧𑀦𑁆𑀦𑀸’’𑀢𑀺 𑀯𑀼𑀢𑁆𑀢𑀸, 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸. 𑀦 𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀆𑀲𑀯𑁂𑀲𑀼 𑀫𑀕𑁆𑀕𑁂𑀦 𑀧𑀳𑀸𑀦𑀁 𑀲𑀫𑁆𑀪𑀯𑀢𑀻𑀢𑀺 𑀆𑀳 ‘‘𑀬𑁂 𑀧𑀦…𑀧𑁂… 𑀦𑀢𑁆𑀣𑀻’’𑀢𑀺. 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀸 𑀔𑀡𑀢𑁆𑀢𑀬𑀲𑀫𑀗𑁆𑀕𑀺𑀦𑁄. 𑀢𑁂𑀲𑀁 𑀧𑀝𑀺𑀧𑀢𑁆𑀢𑀺𑀬𑀸 𑀧𑀳𑀸𑀦𑀁 𑀦𑀢𑁆𑀣𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑀸𑀦𑀁 𑀧𑀘𑁆𑀘𑀬𑀖𑀸𑀢𑁂𑀦 𑀅𑀦𑀼𑀧𑁆𑀧𑀸𑀤𑀦𑀫𑁂𑀯 𑀢𑀸𑀬 𑀧𑀳𑀸𑀦𑀦𑁆𑀢𑀺.

𑁧𑁬. 𑀬𑀤𑀺 𑀏𑀯𑀁 𑀤𑀼𑀢𑀺𑀬𑀧𑀤𑀁 𑀓𑀺𑀫𑀢𑁆𑀣𑀺𑀬𑀦𑁆𑀢𑀺? 𑀧𑀤𑀤𑁆𑀯𑀬𑀕𑁆𑀕𑀳𑀡𑀁 𑀆𑀲𑀯𑀸𑀦𑀁 𑀉𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀦𑁆𑀦𑀪𑀸𑀯𑀲𑀫𑁆𑀪𑀯𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀯 𑀧𑀳𑀸𑀬𑀓𑀯𑀺𑀪𑀸𑀕𑁂𑀦 𑀧𑀳𑀸𑀢𑀩𑁆𑀩𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀜𑁆𑀘. 𑀢𑁂𑀦𑀸𑀳 ‘‘𑀇𑀤𑀫𑁂𑀯 𑀧𑀤𑀁 𑀕𑀳𑁂𑀢𑁆𑀯𑀸’’𑀢𑀺. 𑀅𑀜𑁆𑀜𑀫𑁆𑀧𑀻𑀢𑀺 𑀜𑀸𑀡𑀢𑁄 𑀅𑀜𑁆𑀜𑀫𑁆𑀧𑀺 𑀲𑀢𑀺𑀲𑀁𑀯𑀭𑀸𑀤𑀺𑀁. 𑀤𑀲𑁆𑀲𑀦𑀸𑀢𑀺 𑀇𑀤𑀁 𑀳𑁂𑀢𑀼𑀫𑁆𑀳𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀤𑀲𑁆𑀲𑀦𑁂𑀦𑀸𑀢𑀺 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑁂𑀦 𑀢𑀤𑀢𑁆𑀣𑀁 𑀯𑀺𑀯𑀭𑀢𑀺. 𑀏𑀲 𑀦𑀬𑁄𑀢𑀺 𑀢𑀫𑁂𑀯𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀤𑀲𑁆𑀲𑀦𑁂𑀦𑀸𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦. 𑀲𑁄 𑀳𑀺 𑀧𑀞𑀫𑀁 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀢𑁄 ‘‘𑀤𑀲𑁆𑀲𑀦’’𑀦𑁆𑀢𑀺 ¶ 𑀯𑀼𑀘𑁆𑀘𑀢𑀺. 𑀬𑀤𑀺𑀧𑀺 𑀢𑀁 𑀕𑁄𑀢𑁆𑀭𑀪𑀼 𑀧𑀞𑀫𑀢𑀭𑀁 𑀧𑀲𑁆𑀲𑀢𑀺, 𑀤𑀺𑀲𑁆𑀯𑀸 𑀧𑀦 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀓𑀺𑀮𑁂𑀲𑀧𑁆𑀧𑀳𑀸𑀦𑀲𑁆𑀲 𑀅𑀓𑀭𑀡𑀢𑁄 𑀦 𑀢𑀁 𑀤𑀲𑁆𑀲𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀯𑀚𑁆𑀚𑀦𑀝𑁆𑀞𑀸𑀦𑀺𑀬𑀜𑁆𑀳𑀺 𑀢𑀁 𑀜𑀸𑀡𑀁 𑀫𑀕𑁆𑀕𑀲𑁆𑀲, 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁆𑀢𑀲𑀸𑀫𑀜𑁆𑀜𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁, 𑀦 𑀦𑀺𑀩𑁆𑀩𑀸𑀦𑀧𑀝𑀺𑀯𑀺𑀚𑁆𑀛𑀦𑁂𑀦, 𑀢𑀲𑁆𑀫𑀸 𑀥𑀫𑁆𑀫𑀘𑀓𑁆𑀔𑀼 𑀧𑀼𑀦𑀧𑁆𑀧𑀼𑀦𑀁 𑀦𑀺𑀩𑁆𑀩𑀢𑁆𑀢𑀦𑁂𑀦 𑀪𑀸𑀯𑀦𑀁 𑀅𑀧𑁆𑀧𑀢𑁆𑀢𑀁 𑀤𑀲𑁆𑀲𑀦𑀁 𑀦𑀸𑀫, 𑀥𑀫𑁆𑀫𑀘𑀓𑁆𑀔𑀼𑀜𑁆𑀘 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀓𑀭𑀡𑀯𑀲𑁂𑀦 𑀘𑀢𑀼𑀲𑀘𑁆𑀘𑀥𑀫𑁆𑀫𑀤𑀲𑁆𑀲𑀦𑀁 𑀢𑀤𑀪𑀺𑀲𑀫𑀬𑁄𑀢𑀺 𑀦𑀼𑀢𑁆𑀣𑁂𑀢𑁆𑀣 𑀕𑁄𑀢𑁆𑀭𑀪𑀼𑀲𑁆𑀲 𑀤𑀲𑁆𑀲𑀦𑀪𑀸𑀯𑀧𑁆𑀧𑀢𑁆𑀢𑀺 ¶ . 𑀅𑀬𑀜𑁆𑀘 𑀯𑀺𑀘𑀸𑀭𑁄 𑀧𑀭𑀢𑁄 𑀅𑀝𑁆𑀞𑀓𑀣𑀸𑀬𑀫𑁂𑀯 (𑀫. 𑀦𑀺. 𑀅𑀝𑁆𑀞. 𑁧.𑁨𑁨) 𑀆𑀕𑀫𑀺𑀲𑁆𑀲𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 ‘‘𑀲𑀁𑀯𑀭𑀸 𑀧𑀳𑀸𑀢𑀩𑁆𑀩𑀸’’𑀢𑀺𑀆𑀤𑀻𑀲𑀼. 𑀲𑀁𑀯𑀭𑀸𑀢𑀺 𑀲𑀁𑀯𑀭𑁂𑀦, ‘‘𑀲𑀁𑀯𑀭𑁄’’𑀢𑀺 𑀘𑁂𑀢𑁆𑀣 𑀲𑀢𑀺𑀲𑀁𑀯𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀝𑀺𑀲𑁂𑀯𑀢𑀺 𑀏𑀢𑁂𑀦𑀸𑀢𑀺 𑀧𑀝𑀺𑀲𑁂𑀯𑀦𑀁, 𑀧𑀘𑁆𑀘𑀬𑁂𑀲𑀼 𑀇𑀤𑀫𑀢𑁆𑀣𑀺𑀓𑀢𑀸𑀜𑀸𑀡𑀁. 𑀅𑀥𑀺𑀯𑀸𑀲𑁂𑀢𑀺 𑀔𑀫𑀢𑀺 𑀏𑀢𑀸𑀬𑀸𑀢𑀺 𑀅𑀥𑀺𑀯𑀸𑀲𑀦𑀸, 𑀲𑀻𑀢𑀸𑀤𑀻𑀦𑀁 𑀔𑀫𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑁄 𑀅𑀤𑁄𑀲𑁄, 𑀢𑀧𑁆𑀧𑀥𑀸𑀦𑀸 𑀯𑀸 𑀘𑀢𑁆𑀢𑀸𑀭𑁄 𑀓𑀼𑀲𑀮𑀓𑁆𑀔𑀦𑁆𑀥𑀸. 𑀧𑀭𑀺𑀯𑀚𑁆𑀚𑁂𑀢𑀺 𑀏𑀢𑁂𑀦𑀸𑀢𑀺 𑀧𑀭𑀺𑀯𑀚𑁆𑀚𑀦𑀁, 𑀯𑀸𑀴𑀫𑀺𑀕𑀸𑀤𑀻𑀦𑀁 𑀧𑀭𑀺𑀳𑀭𑀡𑀯𑀲𑁂𑀦 𑀧𑀯𑀢𑁆𑀢𑀸 𑀘𑁂𑀢𑀦𑀸, 𑀢𑀣𑀸𑀧𑀯𑀢𑁆𑀢𑀸 𑀯𑀸 𑀘𑀢𑁆𑀢𑀸𑀭𑁄 𑀓𑀼𑀲𑀮𑀓𑁆𑀔𑀦𑁆𑀥𑀸. 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀓𑁂 𑀯𑀺𑀦𑁄𑀤𑁂𑀢𑀺 𑀯𑀺𑀢𑀼𑀤𑀢𑀺 𑀏𑀢𑁂𑀦𑀸𑀢𑀺 𑀯𑀺𑀦𑁄𑀤𑀦𑀁, 𑀓𑀼𑀲𑀮𑀯𑀻𑀭𑀺𑀬𑀁. 𑀧𑀞𑀫𑀫𑀕𑁆𑀕𑁂𑀦 𑀤𑀺𑀝𑁆𑀞𑁂 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀪𑀸𑀯𑀦𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀢𑁄 𑀪𑀸𑀯𑀦𑀸, 𑀲𑁂𑀲𑀫𑀕𑁆𑀕𑀢𑁆𑀢𑀬𑀁. 𑀦 𑀳𑀺 𑀢𑀁 𑀅𑀤𑀺𑀝𑁆𑀞𑀧𑀼𑀩𑁆𑀩𑀁 𑀓𑀺𑀜𑁆𑀘𑀺 𑀧𑀲𑁆𑀲𑀢𑀺, 𑀏𑀯𑀁 𑀤𑀲𑁆𑀲𑀦𑀸𑀤𑀻𑀦𑀁 𑀯𑀘𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀤𑀲𑁆𑀲𑀦𑀸𑀧𑀳𑀸𑀢𑀩𑁆𑀩𑀆𑀲𑀯𑀯𑀡𑁆𑀡𑀦𑀸

𑁧𑁭. 𑀓𑀼𑀲𑀮𑀸𑀓𑀼𑀲𑀮𑀥𑀫𑁆𑀫𑁂𑀳𑀺 𑀆𑀮𑀫𑁆𑀩𑀺𑀬𑀫𑀸𑀦𑀸𑀧𑀺 𑀆𑀭𑀫𑁆𑀫𑀡𑀥𑀫𑁆𑀫𑀸 𑀆𑀯𑀚𑁆𑀚𑀦𑀫𑀼𑀔𑁂𑀦𑁂𑀯 𑀢𑀩𑁆𑀪𑀸𑀯𑀁 𑀕𑀘𑁆𑀙𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀦𑀲𑀺𑀓𑀭𑀡𑀻𑀬𑁂’’𑀢𑀺 𑀧𑀤𑀲𑁆𑀲 ‘‘𑀆𑀯𑀚𑁆𑀚𑀺𑀢𑀩𑁆𑀩𑁂’’𑀢𑀺 𑀅𑀢𑁆𑀣𑀫𑀸𑀳. 𑀳𑀺𑀢𑀲𑀼𑀔𑀸𑀯𑀳𑀪𑀸𑀯𑁂𑀦 𑀫𑀦𑀲𑀺𑀓𑀭𑀡𑀁 𑀅𑀭𑀳𑀦𑁆𑀢𑀻𑀢𑀺 𑀫𑀦𑀲𑀺𑀓𑀭𑀡𑀻𑀬𑀸, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀫𑀦𑀲𑀺𑀓𑀭𑀡𑀻𑀬𑀸𑀢𑀺 𑀆𑀳 ‘‘𑀅𑀫𑀦𑀲𑀺𑀓𑀭𑀡𑀻𑀬𑁂𑀢𑀺 𑀢𑀩𑁆𑀩𑀺𑀧𑀭𑀻𑀢𑁂’’𑀢𑀺. 𑀲𑁂𑀲𑀧𑀤𑁂𑀲𑀽𑀢𑀺 ‘‘𑀫𑀦𑀲𑀺𑀓𑀭𑀡𑀻𑀬𑁂 𑀥𑀫𑁆𑀫𑁂 𑀅𑀧𑁆𑀧𑀚𑀸𑀦𑀦𑁆𑀢𑁄’’𑀢𑀺𑀆𑀤𑀻𑀲𑀼. 𑀬𑀲𑁆𑀫𑀸 𑀓𑀼𑀲𑀮𑀥𑀫𑁆𑀫𑁂𑀲𑀼𑀧𑀺 𑀲𑀼𑀪𑀲𑀼𑀔𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀫𑀦𑀲𑀺𑀓𑀸𑀭𑁄 𑀅𑀲𑁆𑀲𑀸𑀤𑀦𑀸𑀤𑀺𑀳𑁂𑀢𑀼𑀢𑀸𑀬 𑀲𑀸𑀯𑀚𑁆𑀚𑁄 𑀅𑀳𑀺𑀢𑀤𑀼𑀓𑁆𑀔𑀸𑀯𑀳𑁄 𑀅𑀓𑀼𑀲𑀮𑀥𑀫𑁆𑀫𑁂𑀲𑀼𑀧𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀫𑀦𑀲𑀺𑀓𑀸𑀭𑁄 𑀦𑀺𑀩𑁆𑀩𑀺𑀤𑀸𑀤𑀺𑀳𑁂𑀢𑀼𑀢𑀸𑀬 𑀅𑀦𑀯𑀚𑁆𑀚𑁄 𑀳𑀺𑀢𑀲𑀼𑀔𑀸𑀯𑀳𑁄, 𑀢𑀲𑁆𑀫𑀸 ‘‘𑀥𑀫𑁆𑀫𑀢𑁄 𑀦𑀺𑀬𑀫𑁄 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 ‘‘𑀆𑀓𑀸𑀭𑀢𑁄 𑀧𑀦 𑀅𑀢𑁆𑀣𑀻’’𑀢𑀺 𑀆𑀳.

𑀯𑀸-𑀲𑀤𑁆𑀤𑁄 𑀬𑁂𑀪𑀼𑀬𑁆𑀬𑁂𑀦 ‘‘𑀫𑀫𑀁 𑀯𑀸 𑀳𑀺 𑀪𑀺𑀓𑁆𑀔𑀯𑁂 (𑀤𑀻. 𑀦𑀺. 𑁧.𑁫, 𑁬), 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄 𑀯𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁮𑁬; 𑀫. 𑀦𑀺. 𑁨.𑁭𑁯, 𑁮𑁦) 𑀯𑀺𑀓𑀧𑁆𑀧𑀢𑁆𑀣𑁄 𑀤𑀺𑀝𑁆𑀞𑁄, 𑀦 𑀲𑀫𑀼𑀘𑁆𑀘𑀬𑀢𑁆𑀣𑁄𑀢𑀺 𑀢𑀢𑁆𑀣 𑀲𑀫𑀼𑀘𑁆𑀘𑀬𑀢𑁆𑀣𑁂 𑀧𑀬𑁄𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀲𑀫𑀼𑀘𑁆𑀘𑀬𑀢𑁆𑀣𑀤𑀻𑀧𑀓𑀁 𑀧𑀦𑁂𑀢𑀁 𑀲𑀼𑀢𑁆𑀢𑀧𑀤𑀁 𑀲𑀫𑀼𑀤𑀸𑀳𑀝𑀁.

𑀓𑀸𑀫𑀸𑀲𑀯𑁄𑀢𑀺 ¶ 𑀧𑀜𑁆𑀘𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑁂 𑀓𑀸𑀫𑁂 𑀆𑀲𑀯𑁄 𑀓𑀸𑀫𑀸𑀲𑀯𑁄. 𑀢𑁂𑀦𑀸𑀳 ‘‘𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄’’𑀢𑀺. 𑀪𑀯𑀸𑀲𑀯𑀁 𑀧𑀦 𑀞𑀧𑁂𑀢𑁆𑀯𑀸 𑀲𑀩𑁆𑀩𑁄 ¶ 𑀮𑁄𑀪𑁄 𑀓𑀸𑀫𑀸𑀲𑀯𑁄𑀢𑀺 𑀬𑀼𑀢𑁆𑀢𑀁 𑀲𑀺𑀬𑀸. 𑀭𑀽𑀧𑀸𑀭𑀽𑀧𑀪𑀯𑁂𑀢𑀺 𑀓𑀫𑁆𑀫𑀼𑀧𑀧𑀢𑁆𑀢𑀺𑀪𑁂𑀤𑀢𑁄 𑀤𑀼𑀯𑀺𑀥𑁂𑀧𑀺 𑀭𑀽𑀧𑀸𑀭𑀽𑀧𑀪𑀯𑁂 𑀙𑀦𑁆𑀤𑀭𑀸𑀕𑁄. 𑀛𑀸𑀦𑀦𑀺𑀓𑀦𑁆𑀢𑀻𑀢𑀺 𑀛𑀸𑀦𑀲𑁆𑀲𑀸𑀤𑁄. ‘‘𑀲𑀼𑀦𑁆𑀤𑀭𑀫𑀺𑀤𑀁 𑀞𑀸𑀦𑀁 𑀦𑀺𑀘𑁆𑀘𑀁 𑀥𑀼𑀯’’𑀦𑁆𑀢𑀺𑀆𑀤𑀺𑀦𑀸 𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀫𑀸𑀦𑁄 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀳𑀕𑀢𑁄 𑀭𑀸𑀕𑁄 𑀪𑀯𑁂 𑀆𑀲𑀯𑁄𑀢𑀺 𑀪𑀯𑀸𑀲𑀯𑁄. 𑀏𑀯𑀦𑁆𑀢𑀺 𑀲𑀩𑁆𑀩𑀤𑀺𑀝𑁆𑀞𑀻𑀦𑀁 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀗𑁆𑀕𑀳𑀢𑁄 𑀪𑀯𑀸𑀲𑀯𑁂𑀦𑁂𑀯 𑀤𑀺𑀝𑁆𑀞𑀸𑀲𑀯𑁄 𑀕𑀳𑀺𑀢𑁄 𑀢𑀁𑀲𑀳𑀕𑀢𑀭𑀸𑀕𑀢𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑀭𑁂 𑀧𑀦 ‘‘𑀤𑀺𑀝𑁆𑀞𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁂𑀦 𑀘 𑀲𑀗𑁆𑀕𑀳𑀺𑀢𑁄’’𑀢𑀺 𑀯𑀤𑀦𑁆𑀢𑀺. 𑀏𑀢𑁆𑀣 𑀘 ‘‘𑀪𑀯𑀸𑀲𑀯𑁄 𑀘𑀢𑀽𑀲𑀼 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀥. 𑀲. 𑁧𑁪𑁬𑁫) 𑀯𑀘𑀦𑀢𑁄 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀭𑀸𑀕𑀲𑁆𑀲 𑀪𑀯𑀸𑀲𑀯𑀪𑀸𑀯𑁄 𑀯𑀺𑀘𑀸𑀭𑁂𑀢𑀩𑁆𑀩𑁄, 𑀅𑀣 ‘‘𑀓𑀸𑀫𑀲𑀳𑀕𑀢𑀸 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁪.𑁩𑁩𑁨) 𑀯𑀺𑀬 𑀆𑀭𑀫𑁆𑀫𑀡𑀓𑀭𑀡𑀢𑁆𑀣𑁄 𑀲𑀳𑀕𑀢𑀢𑁆𑀣𑁄, 𑀏𑀯𑀁 𑀲𑀢𑀺 𑀪𑀯𑀸𑀲𑀯𑁂 𑀤𑀺𑀝𑁆𑀞𑀸𑀲𑀯𑀲𑁆𑀲 𑀲𑀫𑁄𑀥𑀸𑀦𑀕𑀫𑀦𑀁 𑀓𑀢𑀁 𑀦 𑀲𑀺𑀬𑀸. 𑀦 𑀳𑀺 𑀢𑀫𑁆𑀧𑀬𑁄𑀕𑀢𑀩𑁆𑀪𑀸𑀯𑀸𑀤𑀺𑀓𑁂 𑀅𑀲𑀢𑀺 𑀢𑀁𑀲𑀗𑁆𑀕𑀳𑁄 𑀬𑀼𑀢𑁆𑀢𑁄, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀧𑀸𑀴𑀺𑀁 𑀅𑀦𑀼𑀲𑀸𑀭𑁂𑀦 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑀮𑁄𑀪𑁄𑀧𑀺 𑀓𑀸𑀫𑀸𑀲𑀯𑁄𑀢𑀺 𑀬𑀼𑀢𑁆𑀢𑀁 𑀲𑀺𑀬𑀸. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀤𑀼𑀓𑁆𑀔𑀸𑀦𑀜𑁆𑀳𑀺 𑀓𑀸𑀭𑀡𑀪𑀽𑀢𑀸 𑀓𑀸𑀫𑀸𑀲𑀯𑀸𑀤𑀬𑁄𑀧𑀺 𑀤𑁆𑀯𑀺𑀥𑀸 𑀯𑀼𑀢𑁆𑀢𑀸.

𑀅𑀪𑀺𑀥𑀫𑁆𑀫𑁂 (𑀥. 𑀲. 𑁧𑁧𑁦𑁩) 𑀘 𑀓𑀸𑀫𑀸𑀲𑀯𑀦𑀺𑀤𑁆𑀤𑁂𑀲𑁂 ‘‘𑀓𑀸𑀫𑁂𑀲𑀽𑀢𑀺 𑀓𑀸𑀫𑀭𑀸𑀕𑀤𑀺𑀝𑁆𑀞𑀺𑀭𑀸𑀕𑀸𑀤𑀻𑀦𑀁 𑀆𑀭𑀫𑁆𑀫𑀡𑀪𑀽𑀢𑁂𑀲𑀼 𑀢𑁂𑀪𑀽𑀫𑀓𑁂𑀲𑀼 𑀯𑀢𑁆𑀣𑀼𑀓𑀸𑀫𑁂𑀲𑀽’’𑀢𑀺 𑀅𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀢𑀢𑁆𑀣 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀸 𑀢𑀡𑁆𑀳𑀸 𑀲𑀩𑁆𑀩𑀸𑀧𑀺 𑀦 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀦𑀸𑀫𑀁 𑀦 𑀮𑀪𑀢𑀻𑀢𑀺. 𑀬𑀤𑀺 𑀧𑀦 𑀮𑁄𑀪𑁄 𑀓𑀸𑀫𑀸𑀲𑀯𑀪𑀯𑀸𑀲𑀯𑀯𑀺𑀦𑀺𑀫𑀼𑀢𑁆𑀢𑁄𑀧𑀺 𑀲𑀺𑀬𑀸, 𑀲𑁄 𑀬𑀤𑀸 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀘𑀺𑀢𑁆𑀢𑁂𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀅𑀯𑀺𑀚𑁆𑀚𑀸𑀲𑀯𑁄 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑁄𑀢𑀺 𑀤𑁄𑀫𑀦𑀲𑁆𑀲𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀯𑀺𑀬 𑀢𑀲𑁆𑀲𑀧𑀺 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀢𑀸 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸 ‘‘𑀘𑀢𑀽𑀲𑀼 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀦𑁆𑀦𑁄 𑀫𑁄𑀳𑁄 𑀲𑀺𑀬𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑁄, 𑀲𑀺𑀬𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑁄’’𑀢𑀺. ‘‘𑀓𑀸𑀫𑀸𑀲𑀯𑁄 𑀅𑀝𑁆𑀞𑀲𑀼 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀚𑁆𑀚𑀢𑀻’𑀢𑀺 (𑀥. 𑀲. 𑁧𑁪𑁬𑁫), ‘‘𑀓𑀸𑀫𑀸𑀲𑀯𑀁 𑀧𑀝𑀺𑀘𑁆𑀘 𑀤𑀺𑀝𑁆𑀞𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄’’𑀢𑀺 (𑀧𑀝𑁆𑀞𑀸. 𑁩.𑁩.𑁧𑁦𑁯) 𑀘 𑀯𑀘𑀦𑀢𑁄 𑀤𑀺𑀝𑁆𑀞𑀺𑀲𑀳𑀕𑀢𑀭𑀸𑀕𑁄 𑀓𑀸𑀫𑀸𑀲𑀯𑁄 𑀦 𑀳𑁄𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀓𑀺𑀜𑁆𑀘 𑀅𑀪𑀺𑀚𑁆𑀛𑀸𑀓𑀸𑀫𑀭𑀸𑀕𑀸𑀦𑀁 𑀯𑀺𑀲𑁂𑀲𑁄 𑀆𑀲𑀯𑀤𑁆𑀯𑀬𑀏𑀓𑀸𑀲𑀯𑀪𑀸𑀯𑁄 𑀲𑀺𑀬𑀸, 𑀦 𑀅𑀪𑀺𑀚𑁆𑀛𑀸𑀬 𑀘 𑀦𑁄𑀆𑀲𑀯𑀪𑀸𑀯𑁄𑀢𑀺 𑀦𑁄𑀆𑀲𑀯𑀮𑁄𑀪𑀲𑁆𑀲 𑀲𑀩𑁆𑀪𑀸𑀯𑁄 𑀯𑀺𑀘𑀸𑀭𑁂𑀢𑀩𑁆𑀩𑁄. 𑀦 𑀳𑀺 𑀅𑀢𑁆𑀣𑀺 𑀅𑀪𑀺𑀥𑀫𑁆𑀫𑁂 ‘‘𑀆𑀲𑀯𑁄 𑀘 ¶ 𑀦𑁄𑀆𑀲𑀯𑁄 𑀘 𑀥𑀫𑁆𑀫𑀸 𑀆𑀲𑀯𑀲𑁆𑀲 𑀥𑀫𑁆𑀫𑀲𑁆𑀲 𑀆𑀲𑀯𑀲𑁆𑀲 𑀘 𑀦𑁄𑀆𑀲𑀯𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁩.𑁩.𑁧𑁬-𑁧𑁭) 𑀲𑀢𑁆𑀢𑀫𑁄 𑀦𑀯𑀫𑁄 𑀘 𑀧𑀜𑁆𑀳𑁄. 𑀕𑀡𑀦𑀸𑀬𑀜𑁆𑀘 ‘‘𑀳𑁂𑀢𑀼𑀬𑀸 𑀲𑀢𑁆𑀢𑀸’’𑀢𑀺 (𑀧𑀝𑁆𑀞𑀸. 𑁩.𑁩.𑁪𑁦) 𑀯𑀼𑀢𑁆𑀢𑀁, 𑀦𑁄 ‘‘𑀦𑀯𑀸’’𑀢𑀺. 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑁂 𑀧𑀦 𑀮𑁄𑀪𑁂 𑀦𑁄𑀆𑀲𑀯𑁂 𑀯𑀺𑀚𑁆𑀚𑀫𑀸𑀦𑁂 𑀲𑀢𑁆𑀢𑀫𑀦𑀯𑀫𑀸𑀧𑀺 𑀧𑀜𑁆𑀳𑀸 𑀯𑀺𑀲𑁆𑀲𑀚𑁆𑀚𑀦𑀁 𑀮𑀪𑁂𑀬𑁆𑀬𑀼𑀁, 𑀕𑀡𑀦𑀸𑀬 𑀘 ‘‘𑀳𑁂𑀢𑀼𑀬𑀸 𑀦𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀧𑀦 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑁂 𑀘 𑀮𑁄𑀪𑁂 𑀦𑁄𑀆𑀲𑀯𑁂 𑀯𑀺𑀚𑁆𑀚𑀫𑀸𑀦𑁂 𑀯𑀢𑁆𑀢𑀩𑁆𑀩𑀁 ¶ 𑀯𑀼𑀢𑁆𑀢𑀫𑁂𑀯. 𑀬𑀲𑁆𑀫𑀸 𑀧𑀦 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸 𑀦𑀸𑀫 𑀧𑀭𑀺𑀬𑀸𑀬𑀓𑀣𑀸, 𑀦 𑀅𑀪𑀺𑀥𑀫𑁆𑀫𑀤𑁂𑀲𑀦𑀸 𑀯𑀺𑀬 𑀦𑀺𑀧𑁆𑀧𑀭𑀺𑀬𑀸𑀬𑀓𑀣𑀸, 𑀢𑀲𑁆𑀫𑀸 𑀩𑀮𑀯𑀓𑀸𑀫𑀭𑀸𑀕𑀲𑁆𑀲𑁂𑀯 𑀓𑀸𑀫𑀸𑀲𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀫𑀸𑀲𑀯𑁄𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄’’𑀢𑀺 𑀯𑀼𑀢𑁆𑀢𑀁, 𑀢𑀣𑀸 𑀪𑀯𑀸𑀪𑀺𑀦𑀦𑁆𑀤𑀦𑀦𑁆𑀢𑀺.

𑀲𑀸𑀫𑀜𑁆𑀜𑁂𑀦 𑀪𑀯𑀸𑀲𑀯𑁄 𑀤𑀺𑀝𑁆𑀞𑀸𑀲𑀯𑀁 𑀅𑀦𑁆𑀢𑁄𑀕𑀥𑀁 𑀓𑀢𑁆𑀯𑀸 𑀇𑀥 𑀢𑀬𑁄 𑀏𑀯 𑀆𑀲𑀯𑀸 𑀯𑀼𑀢𑁆𑀢𑀸𑀢𑀺 𑀢𑀲𑁆𑀲 𑀢𑀤𑀦𑁆𑀢𑁄𑀕𑀥𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀤𑀺𑀝𑁆𑀞𑀸𑀲𑀯𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 𑀪𑀯𑀸𑀲𑀯𑀲𑁆𑀲 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀧𑀝𑀺𑀧𑀓𑁆𑀔𑀢𑀁. 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀅𑀜𑁆𑀜𑀸𑀡𑀦𑁆𑀢𑀺 𑀇𑀤𑀁 𑀲𑀼𑀢𑁆𑀢𑀦𑁆𑀢𑀦𑀬𑀁 𑀦𑀺𑀲𑁆𑀲𑀸𑀬 𑀯𑀼𑀢𑁆𑀢𑀁. 𑀲𑀼𑀢𑁆𑀢𑀦𑁆𑀢𑀲𑀁𑀯𑀡𑁆𑀡𑀦𑀸 𑀳𑁂𑀲𑀸𑀢𑀺, 𑀢𑀤𑀦𑁆𑀢𑁄𑀕𑀥𑀢𑁆𑀢𑀸 𑀯𑀸 𑀧𑀼𑀩𑁆𑀩𑀦𑁆𑀢𑀸𑀤𑀻𑀦𑀁. 𑀬𑀣𑀸 𑀅𑀢𑁆𑀣𑀢𑁄 𑀓𑀸𑀫𑀸𑀲𑀯𑀸𑀤𑀬𑁄 𑀯𑀯𑀢𑁆𑀣𑀸𑀧𑀺𑀢𑀸, 𑀢𑀣𑀸 𑀦𑁂𑀲𑀁 𑀉𑀧𑁆𑀧𑀸𑀤𑀯𑀟𑁆𑀠𑀺𑀬𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀫𑀕𑀼𑀡𑁂’’𑀢𑀺𑀆𑀤𑀺𑀫𑀸𑀳. 𑀅𑀲𑁆𑀲𑀸𑀤𑀢𑁄 𑀫𑀦𑀲𑀺𑀓𑀭𑁄𑀢𑁄𑀢𑀺 ‘‘𑀲𑀼𑀪𑀲𑀼𑀔𑀸’’𑀢𑀺𑀆𑀤𑀺𑀦𑀸 𑀅𑀲𑁆𑀲𑀸𑀤𑀦𑀯𑀲𑁂𑀦 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲. 𑀘𑀢𑀼𑀯𑀺𑀧𑀮𑁆𑀮𑀸𑀲𑀧𑀤𑀝𑁆𑀞𑀸𑀦𑀪𑀸𑀯𑁂𑀦𑀸𑀢𑀺 𑀲𑀼𑀪𑀲𑀜𑁆𑀜𑀸𑀤𑀻𑀦𑀁 𑀯𑀢𑁆𑀣𑀼𑀪𑀸𑀯𑁂𑀦. 𑀯𑀼𑀢𑁆𑀢𑀦𑀬𑀧𑀘𑁆𑀘𑀦𑀻𑀓𑀢𑁄𑀢𑀺 ‘‘𑀓𑀸𑀫𑀸 𑀦𑀸𑀫𑁂𑀢𑁂 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀓𑀸𑀫𑀕𑀼𑀡𑁂𑀲𑀼 𑀆𑀤𑀻𑀦𑀯𑀤𑀲𑁆𑀲𑀦𑀧𑀼𑀩𑁆𑀩𑀓𑀦𑁂𑀓𑁆𑀔𑀫𑁆𑀫𑀧𑀝𑀺𑀧𑀢𑁆𑀢𑀺𑀬𑀸 𑀙𑀦𑁆𑀤𑀭𑀸𑀕𑀁 𑀯𑀺𑀓𑁆𑀔𑀫𑁆𑀪𑀬𑀢𑁄 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲 𑀘 𑀅𑀦𑀼𑀧𑁆𑀧𑀦𑁆𑀦𑁄 𑀘 𑀓𑀸𑀫𑀸𑀲𑀯𑁄 𑀦 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑁄 𑀘 𑀧𑀳𑀻𑀬𑀢𑀺. 𑀢𑀣𑀸 𑀫𑀳𑀕𑁆𑀕𑀢𑀥𑀫𑁆𑀫𑁂𑀲𑀼 𑀘𑁂𑀯 𑀲𑀓𑀮𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼 𑀘 𑀆𑀤𑀻𑀦𑀯𑀤𑀲𑁆𑀲𑀦𑀧𑀼𑀩𑁆𑀩𑀓𑀅𑀦𑀺𑀘𑁆𑀘𑀸𑀤𑀺𑀫𑀦𑀲𑀺𑀓𑀸𑀭𑀯𑀲𑁂𑀦 𑀦𑀺𑀲𑁆𑀲𑀭𑀡𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀼𑀧𑁆𑀧𑀦𑁆𑀦𑀸 𑀘 𑀪𑀯𑀸𑀲𑀯𑀅𑀯𑀺𑀚𑁆𑀚𑀸𑀲𑀯𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀘 𑀧𑀳𑀻𑀬𑀦𑁆𑀢𑀻𑀢𑀺 𑀏𑀯𑀁 𑀢𑀡𑁆𑀳𑀸𑀧𑀓𑁆𑀔𑁂 𑀯𑀼𑀢𑁆𑀢𑀲𑁆𑀲 𑀦𑀬𑀲𑁆𑀲 𑀧𑀝𑀺𑀧𑀓𑁆𑀔𑀢𑁄 𑀲𑀼𑀓𑁆𑀓𑀧𑀓𑁆𑀔𑁂 𑀯𑀺𑀢𑁆𑀣𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀬𑁄 𑀏𑀯𑀸𑀢𑀺 𑀅𑀪𑀺𑀥𑀫𑁆𑀫𑁂 𑀯𑀺𑀬 ‘‘𑀘𑀢𑁆𑀢𑀸𑀭𑁄’’𑀢𑀺 𑀅𑀯𑀢𑁆𑀯𑀸 𑀓𑀲𑁆𑀫𑀸 𑀢𑀬𑁄 𑀏𑀯 𑀆𑀲𑀯𑀸 𑀇𑀥 𑀇𑀫𑀺𑀲𑁆𑀲𑀁 𑀤𑀲𑁆𑀲𑀦𑀸𑀧𑀳𑀸𑀢𑀩𑁆𑀩𑀓𑀣𑀸𑀬𑀁 𑀯𑀼𑀢𑁆𑀢𑀸? 𑀢𑀢𑁆𑀣 𑀓𑀸𑀫𑀸𑀲𑀯𑀲𑁆𑀲 𑀢𑀡𑁆𑀳𑀸𑀧𑀡𑀺𑀥𑀺𑀪𑀸𑀯𑀢𑁄 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀧𑀝𑀺𑀧𑀓𑁆𑀔𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀪𑀯𑁂𑀲𑀼 𑀦𑀺𑀘𑁆𑀘𑀕𑁆𑀕𑀸𑀳𑀸𑀦𑀼𑀲𑀸𑀭𑀢𑁄 𑀬𑁂𑀪𑀼𑀬𑁆𑀬𑀢𑁄 𑀪𑀯𑀭𑀸𑀕𑀲𑀫𑁆𑀧𑀢𑁆𑀢𑀺𑀢𑁄 𑀪𑀯𑀸𑀲𑀯𑀲𑁆𑀲 𑀅𑀦𑀺𑀫𑀺𑀢𑁆𑀢𑀯𑀺𑀫𑁄𑀓𑁆𑀔𑀧𑀝𑀺𑀧𑀓𑁆𑀔𑀢𑀸, 𑀪𑀯𑀤𑀺𑀝𑁆𑀞𑀺𑀬𑀸 𑀧𑀦 ¶ 𑀪𑀯𑀸𑀲𑀯𑀪𑀸𑀯𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀅𑀦𑀢𑁆𑀢𑀲𑀜𑁆𑀜𑀸𑀬 𑀜𑀸𑀡𑀸𑀦𑀼𑀪𑀸𑀯𑀲𑀺𑀤𑁆𑀥𑀺𑀢𑁄 𑀅𑀯𑀺𑀚𑁆𑀚𑀸𑀲𑀯𑀲𑁆𑀲 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀧𑀝𑀺𑀧𑀓𑁆𑀔𑀢𑀸. 𑀏𑀢𑁆𑀣𑀸𑀢𑀺 𑀏𑀢𑀺𑀲𑁆𑀲𑀁 𑀆𑀲𑀯𑀓𑀣𑀸𑀬𑀁. 𑀯𑀡𑁆𑀡𑀺𑀢𑀦𑁆𑀢𑀺 𑀓𑀣𑀺𑀢𑀁. 𑀅𑀪𑁂𑀤𑀢𑁄𑀢𑀺 𑀲𑀸𑀫𑀜𑁆𑀜𑀢𑁄.

𑁧𑁮. 𑀓𑀸𑀫𑀸𑀲𑀯𑀸𑀤𑀻𑀦𑀦𑁆𑀢𑀺 𑀫𑀦𑀼𑀲𑁆𑀲𑀮𑁄𑀓𑀤𑁂𑀯𑀮𑁄𑀓𑀕𑀫𑀦𑀻𑀬𑀸𑀦𑀁 𑀓𑀸𑀫𑀸𑀲𑀯𑀸𑀤𑀻𑀦𑀁. 𑀦𑀺𑀭𑀬𑀸𑀤𑀺𑀕𑀫𑀦𑀻𑀬𑀸 𑀧𑀦 𑀓𑀸𑀫𑀸𑀲𑀯𑀸𑀤𑀬𑁄 ‘‘𑀤𑀲𑁆𑀲𑀦𑀸 𑀧𑀳𑀸𑀢𑀩𑁆𑀩𑁂 𑀆𑀲𑀯𑁂’’𑀢𑀺 𑀏𑀢𑁆𑀣𑁂𑀯 𑀲𑀫𑀸𑀭𑀼𑀴𑁆𑀳𑀸. 𑀅𑀣 𑀯𑀸 𑀬𑀤𑀕𑁆𑀕𑁂𑀦 𑀲𑁄 𑀧𑀼𑀕𑁆𑀕𑀮𑁄𑀤𑀲𑁆𑀲𑀦𑀸𑀧𑀳𑀸𑀢𑀩𑁆𑀩𑀸𑀦𑀁 𑀆𑀲𑀯𑀸𑀦𑀁 𑀅𑀥𑀺𑀝𑁆𑀞𑀸𑀦𑀁, 𑀢𑀤𑀕𑁆𑀕𑁂𑀦 𑀓𑀸𑀫𑀸𑀲𑀯𑀸𑀤𑀻𑀦𑀫𑁆𑀧𑀺 𑀅𑀥𑀺𑀝𑁆𑀞𑀸𑀦𑀁. 𑀦 𑀳𑀺 𑀲𑀫𑀜𑁆𑀜𑀸𑀪𑁂𑀤𑁂𑀦 𑀯𑀢𑁆𑀣𑀼𑀪𑁂𑀤𑁄 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀢𑀸𑀯𑀢𑀸’’𑀢𑀺𑀆𑀤𑀺 ¶ 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀸𑀦’’𑀦𑁆𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀤𑀲𑁆𑀲𑀦𑀸𑀧𑀳𑀸𑀢𑀩𑁆𑀩𑁂𑀲𑀼 𑀆𑀲𑀯𑁂𑀲𑀼 𑀤𑀲𑁆𑀲𑁂𑀢𑀩𑁆𑀩𑁂𑀲𑀼 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀘𑀺𑀓𑀺𑀘𑁆𑀙𑀸 𑀤𑀲𑁆𑀲𑀺𑀢𑀸𑀢𑀺 𑀆𑀳 ‘‘𑀯𑀺𑀘𑀺𑀓𑀺𑀘𑁆𑀙𑀸𑀲𑀻𑀲𑁂𑀦 𑀘𑁂𑀢𑁆𑀣𑀸’’𑀢𑀺𑀆𑀤𑀺. 𑀏𑀯𑀦𑁆𑀢𑀺 𑀬𑀣𑀸 𑀲𑁄𑀴𑀲𑀯𑀢𑁆𑀣𑀼𑀓𑀸 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄𑀢𑀺.

𑀯𑀺𑀚𑁆𑀚𑀫𑀸𑀦𑀢𑀁 𑀅𑀯𑀺𑀚𑁆𑀚𑀫𑀸𑀦𑀢𑀜𑁆𑀘𑀸𑀢𑀺 (𑀲𑀁. 𑀦𑀺. 𑀝𑀻. 𑁨.𑁨.𑁨𑁦) 𑀲𑀲𑁆𑀲𑀢𑀸𑀲𑀗𑁆𑀓𑀁 𑀦𑀺𑀲𑁆𑀲𑀸𑀬 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀫𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺 𑀅𑀢𑀻𑀢𑁂 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀢𑀁, 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀢𑁆𑀢𑀺𑀆𑀲𑀗𑁆𑀓𑀁 𑀦𑀺𑀲𑁆𑀲𑀸𑀬 ‘‘𑀬𑀢𑁄 𑀧𑀪𑀼𑀢𑀺 𑀅𑀳𑀁, 𑀢𑀢𑁄 𑀧𑀼𑀩𑁆𑀩𑁂 𑀦 𑀦𑀼 𑀔𑁄 𑀅𑀳𑁄𑀲𑀺’’𑀦𑁆𑀢𑀺 𑀅𑀢𑀻𑀢𑁂 𑀅𑀢𑁆𑀢𑀦𑁄 𑀅𑀯𑀺𑀚𑁆𑀚𑀫𑀸𑀦𑀢𑀜𑁆𑀘 𑀓𑀗𑁆𑀔𑀢𑀺. 𑀓𑀲𑁆𑀫𑀸? 𑀯𑀺𑀘𑀺𑀓𑀺𑀘𑁆𑀙𑀸𑀬 𑀆𑀓𑀸𑀭𑀤𑁆𑀯𑀬𑀸𑀯𑀮𑀫𑁆𑀩𑀦𑀢𑁄. 𑀢𑀲𑁆𑀲𑀸 𑀧𑀦 𑀅𑀢𑀻𑀢𑀯𑀢𑁆𑀣𑀼𑀢𑀸𑀬 𑀕𑀳𑀺𑀢𑀢𑁆𑀢𑀸 𑀲𑀲𑁆𑀲𑀢𑀸𑀥𑀺𑀘𑁆𑀘𑀲𑀫𑀼𑀧𑁆𑀧𑀢𑁆𑀢𑀺𑀆𑀓𑀸𑀭𑀦𑀺𑀲𑁆𑀲𑀬𑀢𑀸 𑀤𑀲𑁆𑀲𑀺𑀢𑀸. 𑀏𑀯𑀁 𑀆𑀲𑀧𑁆𑀧𑀦𑀧𑀭𑀺𑀲𑀧𑁆𑀧𑀦𑀸𑀧𑀯𑀢𑁆𑀢𑀺𑀓𑀁 𑀓𑀢𑁆𑀣𑀘𑀺𑀧𑀺 𑀅𑀧𑁆𑀧𑀝𑀺𑀯𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀯𑀺𑀘𑀺𑀓𑀺𑀘𑁆𑀙𑀁 𑀓𑀲𑁆𑀫𑀸 𑀉𑀧𑁆𑀧𑀸𑀤𑁂𑀢𑀻𑀢𑀺 𑀦 𑀘𑁄𑀤𑁂𑀢𑀩𑁆𑀩𑀫𑁂𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀓𑀺𑀁 𑀓𑀸𑀭𑀡𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩’’𑀦𑁆𑀢𑀺. 𑀲𑁆𑀯𑁂𑀯 𑀧𑀼𑀣𑀼𑀚𑁆𑀚𑀦𑀪𑀸𑀯𑁄 𑀏𑀯. 𑀬𑀤𑀺 𑀏𑀯𑀁 𑀢𑀲𑁆𑀲 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦𑁂𑀯 𑀪𑀯𑀺𑀢𑀩𑁆𑀩𑀦𑁆𑀢𑀺 𑀆𑀧𑀦𑁆𑀦𑀦𑁆𑀢𑀺 𑀆𑀳 ‘‘𑀦𑀦𑀼 𑀘 𑀧𑀼𑀣𑀼𑀚𑁆𑀚𑀦𑁄𑀧𑀺 𑀬𑁄𑀦𑀺𑀲𑁄 𑀫𑀦𑀲𑀺 𑀓𑀭𑁄𑀢𑀻’’𑀢𑀺. 𑀢𑀢𑁆𑀣𑀸𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀭𑀡𑁂.

𑀚𑀸𑀢𑀺𑀮𑀺𑀗𑁆𑀕𑀽𑀧𑀧𑀢𑁆𑀢𑀺𑀬𑁄𑀢𑀺 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸𑀤𑀺𑀚𑀸𑀢𑀺𑀁 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀤𑀺𑀮𑀺𑀗𑁆𑀕𑀁 𑀤𑁂𑀯𑀫𑀦𑀼𑀲𑁆𑀲𑀸𑀤𑀺𑀉𑀧𑀧𑀢𑁆𑀢𑀺𑀜𑁆𑀘. 𑀦𑀺𑀲𑁆𑀲𑀸𑀬𑀸𑀢𑀺 𑀉𑀧𑀸𑀤𑀸𑀬.

𑀢𑀲𑁆𑀫𑀺𑀁 𑀓𑀸𑀮𑁂 𑀲𑀢𑁆𑀢𑀸𑀦𑀁 𑀫𑀚𑁆𑀛𑀺𑀫𑀧𑁆𑀧𑀫𑀸𑀡𑀁, 𑀢𑁂𑀦 𑀬𑀼𑀢𑁆𑀢𑁄 𑀧𑀫𑀸𑀡𑀺𑀓𑁄, 𑀢𑀤𑀪𑀸𑀯𑀢𑁄, 𑀢𑀢𑁄 𑀅𑀢𑀻𑀢𑀪𑀸𑀯𑀢𑁄 𑀯𑀸 𑀅𑀧𑁆𑀧𑀫𑀸𑀡𑀺𑀓𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀘𑀻𑀢𑀺 𑀲𑀸𑀭𑀲𑀫𑀸𑀲𑀸𑀘𑀭𑀺𑀬𑀸. 𑀢𑁂 𑀳𑀺 ‘‘𑀓𑀣𑀁 𑀦𑀼 𑀔𑁄𑀢𑀺 𑀇𑀲𑁆𑀲𑀭𑁂𑀦 ¶ 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀧𑀼𑀩𑁆𑀩𑀓𑀢𑁂𑀦 𑀯𑀸 𑀅𑀳𑁂𑀢𑀼𑀢𑁄 𑀯𑀸 𑀦𑀺𑀩𑁆𑀩𑀢𑁆𑀢𑁄𑀢𑀺 𑀘𑀺𑀦𑁆𑀢𑁂𑀢𑀻’’𑀢𑀺 𑀆𑀳𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀳𑁂𑀢𑀼𑀢𑁄 𑀓𑀗𑁆𑀔𑀢𑀻𑀢𑀺 𑀯𑀤𑀦𑁆𑀢𑀻’’𑀢𑀺. 𑀅𑀳𑁂𑀢𑀼𑀢𑁄 𑀦𑀺𑀩𑁆𑀩𑀢𑁆𑀢𑀺𑀓𑀗𑁆𑀔𑀸𑀧𑀺 𑀳𑀺 𑀳𑁂𑀢𑀼𑀧𑀭𑀸𑀫𑀲𑀦𑀫𑁂𑀯𑀸𑀢𑀺.

𑀧𑀭𑀫𑁆𑀧𑀭𑀦𑁆𑀢𑀺 𑀧𑀼𑀩𑁆𑀩𑀸𑀧𑀭𑀧𑁆𑀧𑀯𑀢𑁆𑀢𑀺𑀁. 𑀅𑀤𑁆𑀥𑀸𑀦𑀦𑁆𑀢𑀺 𑀓𑀸𑀮𑀸𑀥𑀺𑀯𑀘𑀦𑀁, 𑀢𑀜𑁆𑀘 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁 𑀤𑀝𑁆𑀞𑀩𑁆𑀩𑀁.

𑀯𑀺𑀚𑁆𑀚𑀫𑀸𑀦𑀢𑀁 𑀅𑀯𑀺𑀚𑁆𑀚𑀫𑀸𑀦𑀢𑀜𑁆𑀘𑀸𑀢𑀺 𑀲𑀲𑁆𑀲𑀢𑀸𑀲𑀗𑁆𑀓𑀁 𑀦𑀺𑀲𑁆𑀲𑀸𑀬 ‘‘𑀪𑀯𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀅𑀳𑀫𑀦𑀸𑀕𑀢𑀫𑀤𑁆𑀥𑀸𑀦’’𑀦𑁆𑀢𑀺 𑀅𑀦𑀸𑀕𑀢𑁂 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀢𑀁, 𑀉𑀘𑁆𑀙𑁂𑀤𑀸𑀲𑀗𑁆𑀓𑀁 𑀦𑀺𑀲𑁆𑀲𑀸𑀬 ‘‘𑀬𑀲𑁆𑀫𑀺𑀜𑁆𑀘 𑀅𑀢𑁆𑀢𑀪𑀸𑀯𑁂 𑀅𑀳𑀁, 𑀢𑀢𑁄 𑀧𑀭𑀁 𑀦 𑀦𑀼 𑀔𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀅𑀦𑀸𑀕𑀢𑁂 𑀅𑀢𑁆𑀢𑀦𑁄 𑀅𑀯𑀺𑀚𑁆𑀚𑀫𑀸𑀦𑀢𑀜𑁆𑀘 𑀓𑀗𑁆𑀔𑀢𑀻𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀬𑁄𑀚𑁂𑀢𑀩𑁆𑀩𑀁.

𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑀤𑁆𑀥𑀸𑀦𑀦𑁆𑀢𑀺 ¶ 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀧𑀝𑀺𑀲𑀦𑁆𑀥𑀺𑀁 𑀆𑀤𑀺𑀁 𑀓𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀇𑀤𑀁 𑀓𑀣𑀁 𑀇𑀤𑀁 𑀓𑀣’’𑀦𑁆𑀢𑀺 𑀧𑀯𑀢𑁆𑀢𑀦𑀢𑁄 𑀓𑀣𑀁𑀓𑀣𑀸, 𑀯𑀺𑀘𑀺𑀓𑀺𑀘𑁆𑀙𑀸, 𑀲𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀓𑀣𑀁𑀓𑀣𑀻𑀢𑀺 𑀆𑀳 ‘‘𑀯𑀺𑀘𑀺𑀓𑀺𑀘𑁆𑀙𑁄 𑀳𑁄𑀢𑀻’’𑀢𑀺. 𑀓𑀸 𑀏𑀢𑁆𑀣 𑀘𑀺𑀦𑁆𑀢𑀸, 𑀉𑀫𑁆𑀫𑀢𑁆𑀢𑀓𑁄 𑀯𑀺𑀬 𑀳𑀺 𑀩𑀸𑀮𑀧𑀼𑀣𑀼𑀚𑁆𑀚𑀦𑁄𑀢𑀺 𑀧𑀝𑀺𑀓𑀘𑁆𑀘𑁂𑀯 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀁 𑀫𑀳𑀸𑀫𑀸𑀢𑀸𑀬 𑀧𑀼𑀢𑁆𑀢𑀁. 𑀫𑀼𑀡𑁆𑀟𑁂𑀲𑀼𑀦𑁆𑀢𑀺 𑀫𑀼𑀡𑁆𑀟𑁂𑀦 𑀅𑀦𑀺𑀘𑁆𑀙𑀦𑁆𑀢𑀁 𑀚𑀸𑀕𑀭𑀡𑀓𑀸𑀮𑁂 𑀦 𑀲𑀓𑁆𑀓𑀸𑀢𑀺 𑀲𑀼𑀢𑁆𑀢𑀁 𑀫𑀼𑀡𑁆𑀟𑁂𑀲𑀼𑀁 𑀓𑀼𑀮𑀥𑀫𑁆𑀫𑀢𑀸𑀬 𑀬𑀣𑀸 𑀢𑀁 𑀏𑀓𑀘𑁆𑀘𑁂 𑀓𑀼𑀮𑀢𑀸𑀧𑀲𑀸, 𑀭𑀸𑀚𑀪𑀬𑁂𑀦𑀸𑀢𑀺 𑀘 𑀯𑀤𑀦𑁆𑀢𑀺.

𑀲𑀻𑀢𑀺𑀪𑀽𑀢𑀦𑁆𑀢𑀺 𑀇𑀤𑀁 𑀫𑀥𑀼𑀭𑀓𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀯𑀘𑀦𑀁. ‘‘𑀲𑁂𑀢𑀺𑀪𑀽𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀉𑀤𑀓𑁂 𑀘𑀺𑀭𑀝𑁆𑀞𑀸𑀦𑁂𑀦 𑀲𑁂𑀢𑀪𑀸𑀯𑀁 𑀧𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀅𑀢𑁆𑀢𑀦𑁄 𑀔𑀢𑁆𑀢𑀺𑀬𑀪𑀸𑀯𑀁 𑀓𑀗𑁆𑀔𑀢𑀺 𑀓𑀡𑁆𑀡𑁄 𑀯𑀺𑀬 𑀲𑀽𑀢𑀧𑀼𑀢𑁆𑀢𑀲𑀜𑁆𑀜𑀻. 𑀚𑀸𑀢𑀺𑀬𑀸 𑀯𑀺𑀪𑀸𑀯𑀺𑀬𑀫𑀸𑀦𑀸𑀬 ‘‘𑀅𑀳’’𑀦𑁆𑀢𑀺 𑀢𑀲𑁆𑀲 𑀅𑀢𑁆𑀢𑀦𑁄 𑀧𑀭𑀸𑀫𑀲𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀏𑀯𑀜𑁆𑀳𑀺 𑀲𑀺𑀬𑀸 𑀓𑀗𑁆𑀔𑀸’’𑀢𑀺. 𑀫𑀦𑀼𑀲𑁆𑀲𑀸𑀧𑀺 𑀘 𑀭𑀸𑀚𑀸𑀦𑁄 𑀯𑀺𑀬𑀸𑀢𑀺 𑀫𑀦𑀼𑀲𑁆𑀲𑀸𑀧𑀺 𑀓𑁂𑀘𑀺 𑀏𑀓𑀘𑁆𑀘𑁂 𑀭𑀸𑀚𑀸𑀦𑁄 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀯𑀼𑀢𑁆𑀢𑀦𑀬𑀫𑁂𑀯 ‘‘𑀲𑀡𑁆𑀞𑀸𑀦𑀸𑀓𑀸𑀭𑀁 𑀦𑀺𑀲𑁆𑀲𑀸𑀬𑀸’’𑀢𑀺𑀆𑀤𑀺𑀦𑀸. 𑀏𑀢𑁆𑀣𑀸𑀢𑀺 ‘‘𑀓𑀣𑀁 𑀦𑀼 𑀔𑁄𑀲𑁆𑀫𑀻’’𑀢𑀺 𑀧𑀤𑁂. 𑀅𑀩𑁆𑀪𑀦𑁆𑀢𑀭𑁂 𑀚𑀻𑀯𑁄𑀢𑀺 𑀧𑀭𑀧𑀭𑀺𑀓𑀧𑁆𑀧𑀺𑀢𑀁 𑀅𑀦𑁆𑀢𑀭𑀢𑁆𑀢𑀸𑀦𑀁 𑀯𑀤𑀢𑀺. 𑀲𑁄𑀴𑀲𑀁𑀲𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀭𑀻𑀭-𑀧𑀭𑀺𑀫𑀸𑀡-𑀧𑀭𑀺𑀫𑀡𑁆𑀟𑀮-𑀅𑀗𑁆𑀕𑀼𑀝𑁆𑀞𑀬𑀯𑀧𑀭𑀫𑀸𑀡𑀼-𑀧𑀭𑀺𑀫𑀸𑀡𑀢𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺.

‘‘𑀲𑀢𑁆𑀢𑀧𑀜𑁆𑀜𑀢𑁆𑀢𑀺 ¶ 𑀚𑀻𑀯𑀯𑀺𑀲𑀬𑀸’’𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑀸𑀦𑀁 𑀫𑀢𑀺𑀫𑀢𑁆𑀢𑀁, 𑀧𑀭𑀫𑀢𑁆𑀣𑀢𑁄 𑀧𑀦 𑀲𑀸 𑀅𑀢𑁆𑀢𑀪𑀸𑀯𑀯𑀺𑀲𑀬𑀸𑀯𑀸𑀢𑀺 𑀆𑀳 ‘‘𑀅𑀢𑁆𑀢𑀪𑀸𑀯𑀲𑁆𑀲 𑀆𑀕𑀢𑀺𑀕𑀢𑀺𑀝𑁆𑀞𑀸𑀦’’𑀦𑁆𑀢𑀺, 𑀬𑀢𑀸𑀬𑀁 𑀆𑀕𑀢𑁄, 𑀬𑀢𑁆𑀣 𑀘 𑀕𑀫𑀺𑀲𑁆𑀲𑀢𑀺, 𑀢𑀁 𑀞𑀸𑀦𑀦𑁆𑀢𑀺 𑀅𑀢𑁆𑀣𑁄.

𑁧𑁯. 𑀬𑀣𑀸 𑀅𑀬𑀁 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀬𑀁 𑀯𑀼𑀢𑁆𑀢𑀧𑁆𑀧𑀪𑁂𑀤𑀸 𑀯𑀺𑀘𑀺𑀓𑀺𑀘𑁆𑀙𑀸 𑀬𑀣𑀸 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄. 𑀏𑀢𑁂𑀦 𑀯𑀺𑀘𑀺𑀓𑀺𑀘𑁆𑀙𑀸𑀬 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀲𑀦𑁆𑀦𑀺𑀲𑁆𑀲𑀬𑀢𑀫𑀸𑀳. 𑀬𑀣𑀸 𑀳𑀺 𑀯𑀺𑀘𑀺𑀓𑀺𑀘𑁆𑀙𑀸 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑀺, 𑀬𑀢𑁄 𑀲𑀸 𑀲𑀲𑁆𑀲𑀢𑀸𑀥𑀺𑀘𑁆𑀘𑀲𑀫𑀼𑀧𑁆𑀧𑀢𑁆𑀢𑀺𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀓𑀸𑀭𑀸𑀯𑀮𑀫𑁆𑀩𑀺𑀦𑀻 𑀯𑀼𑀢𑁆𑀢𑀸, 𑀏𑀯𑀁 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑁄𑀧𑀺 𑀢𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑀺 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳’’𑀦𑁆𑀢𑀺𑀆𑀤𑀺𑀦𑀸 𑀅𑀦𑁆𑀢𑁄𑀕𑀥𑀸𑀳𑀁𑀓𑀸𑀭𑀲𑁆𑀲 𑀓𑀣𑀁𑀓𑀣𑀺𑀪𑀸𑀯𑀲𑁆𑀲 𑀅𑀢𑁆𑀢𑀕𑁆𑀕𑀸𑀳𑀲𑀦𑁆𑀦𑀺𑀲𑁆𑀲𑀬𑀪𑀸𑀯𑀢𑁄. 𑀢𑁂𑀦𑁂𑀯𑀸𑀳 ‘‘𑀲𑀯𑀺𑀘𑀺𑀓𑀺𑀘𑁆𑀙𑀲𑁆𑀲 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲 𑀣𑀸𑀫𑀕𑀢𑀢𑁆𑀢𑀸’’𑀢𑀺. 𑀯𑀺𑀓𑀧𑁆𑀧𑀢𑁆𑀣𑁄𑀢𑀺 𑀅𑀦𑀺𑀬𑀫𑀢𑁆𑀣𑁄. ‘‘𑀅𑀜𑁆𑀜𑀢𑀭𑀸 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀲𑀼𑀝𑁆𑀞𑀼 𑀤𑀴𑁆𑀳𑀪𑀸𑀯𑁂𑀦𑀸𑀢𑀺 𑀅𑀪𑀺𑀦𑀺𑀯𑁂𑀲𑀲𑁆𑀲 𑀅𑀢𑀺𑀯𑀺𑀬 𑀣𑀸𑀫𑀕𑀢𑀪𑀸𑀯𑁂𑀦. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀪𑀯𑁂. 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 ¶ 𑀅𑀦𑀸𑀕𑀢𑁂 𑀅𑀢𑁆𑀣𑀺𑀪𑀸𑀯𑀁 𑀦𑀺𑀯𑀢𑁆𑀢𑁂𑀢𑀺, 𑀦 𑀅𑀢𑀻𑀢𑁂 𑀢𑀢𑁆𑀣𑀧𑀺 𑀲𑀢𑀺 𑀅𑀢𑁆𑀣𑀺𑀢𑀸𑀬 𑀉𑀘𑁆𑀙𑁂𑀤𑀕𑁆𑀕𑀸𑀳𑀲𑁆𑀲 𑀲𑀩𑁆𑀪𑀸𑀯𑀢𑁄. 𑀅𑀢𑀻𑀢𑁂 𑀏𑀯 𑀦𑀢𑁆𑀣𑀺, 𑀦 𑀅𑀦𑀸𑀕𑀢𑁂𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀜𑁆𑀜𑀸𑀓𑁆𑀔𑀦𑁆𑀥𑀲𑀻𑀲𑁂𑀦𑀸𑀢𑀺 𑀲𑀜𑁆𑀜𑀸𑀓𑁆𑀔𑀦𑁆𑀥𑀧𑀫𑀼𑀔𑁂𑀦, 𑀲𑀜𑁆𑀜𑀸𑀓𑁆𑀔𑀦𑁆𑀥𑀁 𑀧𑀫𑀼𑀔𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀔𑀦𑁆𑀥𑁂𑀢𑀺 𑀧𑀜𑁆𑀘𑀧𑀺 𑀔𑀦𑁆𑀥𑁂. 𑀅𑀢𑁆𑀢𑀸𑀢𑀺 𑀕𑀳𑁂𑀢𑁆𑀯𑀸𑀢𑀺 ‘‘𑀲𑀜𑁆𑀚𑀸𑀦𑀦𑀲𑀪𑀸𑀯𑁄 𑀫𑁂 𑀅𑀢𑁆𑀢𑀸’’𑀢𑀺 𑀅𑀪𑀺𑀦𑀺𑀯𑀺𑀲𑁆𑀲. 𑀧𑀓𑀸𑀲𑁂𑀢𑀩𑁆𑀩𑀁 𑀯𑀢𑁆𑀣𑀼𑀁 𑀯𑀺𑀬, 𑀅𑀢𑁆𑀢𑀸𑀦𑀫𑁆𑀧𑀺 𑀧𑀓𑀸𑀲𑁂𑀦𑁆𑀢𑁄 𑀧𑀤𑀻𑀧𑁄 𑀯𑀺𑀬, 𑀲𑀜𑁆𑀚𑀸𑀦𑀺𑀢𑀩𑁆𑀩𑀁 𑀦𑀻𑀮𑀸𑀤𑀺𑀆𑀭𑀫𑁆𑀫𑀡𑀁 𑀯𑀺𑀬 𑀅𑀢𑁆𑀢𑀸𑀦𑀫𑁆𑀧𑀺 𑀲𑀜𑁆𑀚𑀸𑀦𑀸𑀢𑀻𑀢𑀺 𑀏𑀯𑀁𑀤𑀺𑀝𑁆𑀞𑀺𑀢𑁄𑀧𑀺 𑀤𑀺𑀝𑁆𑀞𑀺𑀕𑀢𑀺𑀢𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀲𑀜𑁆𑀚𑀸𑀦𑀸𑀫𑀻’’𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀲𑀜𑁆𑀜𑀁 𑀢𑀤𑀜𑁆𑀜𑀢𑀭𑀥𑀫𑁆𑀫𑁂 𑀘 ‘‘𑀅𑀢𑁆𑀢𑀸 𑀅𑀦𑀢𑁆𑀢𑀸’’𑀢𑀺 𑀘 𑀕𑀳𑀡𑀯𑀲𑁂𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀜𑁆𑀜𑀸𑀓𑁆𑀔𑀦𑁆𑀥𑀲𑀻𑀲𑁂𑀦𑀸’’𑀢𑀺𑀆𑀤𑀺. 𑀏𑀢𑁆𑀣 𑀘 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑁄 𑀅𑀢𑁆𑀢𑀸𑀢𑀺 𑀕𑀡𑁆𑀳𑀢𑁄 𑀲𑀲𑁆𑀲𑀢𑀤𑀺𑀝𑁆𑀞𑀺, 𑀔𑀦𑁆𑀥𑀁 𑀧𑀦 ‘‘𑀅𑀢𑁆𑀢𑀸’’𑀢𑀺 𑀕𑀡𑁆𑀳𑀢𑁄 𑀉𑀘𑁆𑀙𑁂𑀤𑀤𑀺𑀝𑁆𑀞𑀻𑀢𑀺 𑀆𑀳 ‘‘𑀲𑀩𑁆𑀩𑀸𑀧𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄𑀯𑀸’’𑀢𑀺.

𑀅𑀪𑀺𑀦𑀺𑀯𑁂𑀲𑀸𑀓𑀸𑀭𑀸𑀢𑀺 𑀯𑀺𑀧𑀭𑀺𑀬𑁂𑀲𑀸𑀓𑀸𑀭𑀸. 𑀯𑀤𑀢𑀻𑀢𑀺 𑀇𑀫𑀺𑀦𑀸 𑀓𑀸𑀭𑀓𑀯𑁂𑀤𑀓𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀸𑀯𑀩𑁄𑀥𑀦𑀲𑀫𑀢𑁆𑀣𑀢𑀁 𑀅𑀢𑁆𑀢𑀦𑁄 𑀤𑀻𑀧𑁂𑀢𑀺. 𑀢𑁂𑀦𑀸𑀳 ‘‘𑀯𑀘𑀻𑀓𑀫𑁆𑀫𑀲𑁆𑀲 𑀓𑀸𑀭𑀓𑁄’’𑀢𑀺. 𑀯𑁂𑀤𑁂𑀢𑀻𑀢𑀺 𑀯𑁂𑀤𑀺𑀬𑁄, 𑀯𑁂𑀤𑀺𑀬𑁄𑀯 𑀯𑁂𑀤𑁂𑀬𑁆𑀬𑁄. 𑀈𑀤𑀺𑀲𑀸𑀦𑀜𑁆𑀳𑀺 𑀧𑀤𑀸𑀦𑀁 𑀩𑀳𑀼𑀮𑀸 𑀓𑀢𑁆𑀢𑀼𑀲𑀸𑀥𑀦𑀢𑀁 𑀲𑀤𑁆𑀤𑀲𑀢𑁆𑀣𑀯𑀺𑀤𑀽 𑀫𑀜𑁆𑀜𑀦𑁆𑀢𑀺. 𑀉𑀧𑁆𑀧𑀸𑀤𑀯𑀢𑁄 𑀏𑀓𑀦𑁆𑀢𑁂𑀦𑁂𑀯 𑀯𑀬𑁄 𑀇𑀘𑁆𑀙𑀺𑀢𑀩𑁆𑀩𑁄, 𑀲𑀢𑀺 𑀘 𑀉𑀤𑀬𑀩𑁆𑀩𑀬𑀢𑁆𑀢𑁂 𑀦𑁂𑀯 ¶ 𑀦𑀺𑀘𑁆𑀘𑀢𑀸𑀢𑀺 ‘‘𑀦𑀺𑀘𑁆𑀘𑁄’’𑀢𑀺 𑀯𑀤𑀦𑁆𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀦𑁆𑀢𑁄 𑀆𑀳 ‘‘𑀉𑀧𑁆𑀧𑀸𑀤𑀯𑀬𑀭𑀳𑀺𑀢𑁄’’𑀢𑀺. 𑀲𑀸𑀭𑀪𑀽𑀢𑁄𑀢𑀺 𑀦𑀺𑀘𑁆𑀘𑀢𑀸𑀬 𑀏𑀯 𑀲𑀸𑀭𑀪𑀸𑀯𑁄. 𑀲𑀩𑁆𑀩𑀓𑀸𑀮𑀺𑀓𑁄𑀢𑀺 𑀲𑀩𑁆𑀩𑀲𑁆𑀫𑀺𑀁 𑀓𑀸𑀮𑁂 𑀯𑀺𑀚𑁆𑀚𑀫𑀸𑀦𑁄. 𑀧𑀓𑀢𑀺𑀪𑀸𑀯𑀦𑁆𑀢𑀺 𑀲𑀪𑀸𑀯𑀪𑀽𑀢𑀁 𑀧𑀓𑀢𑀺𑀁, ‘‘𑀯𑀤𑁄’’𑀢𑀺𑀆𑀤𑀺𑀦𑀸 𑀯𑀸 𑀯𑀼𑀢𑁆𑀢𑀁 𑀧𑀓𑀢𑀺𑀲𑀗𑁆𑀔𑀸𑀢𑀁 𑀲𑀪𑀸𑀯𑀁. 𑀲𑀲𑁆𑀲𑀢𑀺𑀲𑀫𑀦𑁆𑀢𑀺 𑀲𑀲𑁆𑀲𑀢𑀺𑀬𑀸 𑀲𑀫𑀁 𑀲𑀲𑁆𑀲𑀢𑀺𑀲𑀫𑀁, 𑀣𑀸𑀯𑀭𑀁 𑀦𑀺𑀘𑁆𑀘𑀓𑀸𑀮𑀦𑁆𑀢𑀺 𑀅𑀢𑁆𑀣𑁄. 𑀢𑀣𑁂𑀯 𑀞𑀲𑁆𑀲𑀢𑀻𑀢𑀺 𑀬𑁂𑀦𑀸𑀓𑀸𑀭𑁂𑀦 𑀧𑀼𑀩𑁆𑀩𑁂 𑀅𑀝𑁆𑀞𑀸𑀲𑀺, 𑀏𑀢𑀭𑀳𑀺 𑀢𑀺𑀝𑁆𑀞𑀢𑀺, 𑀢𑀣𑁂𑀯 𑀢𑁂𑀦𑀸𑀓𑀸𑀭𑁂𑀦 𑀅𑀦𑀸𑀕𑀢𑁂𑀧𑀺 𑀞𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑀧𑀘𑁆𑀘𑀓𑁆𑀔𑀦𑀺𑀤𑀲𑁆𑀲𑀦𑀁 𑀇𑀤𑀁-𑀲𑀤𑁆𑀤𑀲𑁆𑀲 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀪𑀸𑀯𑀁 𑀓𑀢𑁆𑀯𑀸. 𑀤𑀺𑀝𑁆𑀞𑀺𑀬𑁂𑀯 𑀤𑀺𑀝𑁆𑀞𑀺𑀕𑀢𑀦𑁆𑀢𑀺 𑀕𑀢-𑀲𑀤𑁆𑀤𑀲𑁆𑀲 𑀧𑀤𑀯𑀟𑁆𑀠𑀦𑀫𑀢𑁆𑀢𑀢𑀁 𑀆𑀳. 𑀤𑀺𑀝𑁆𑀞𑀻𑀲𑀼𑀕𑀢𑀦𑁆𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀲𑀼 𑀧𑀭𑀺𑀬𑀸𑀧𑀦𑁆𑀦𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀅𑀦𑁆𑀢𑁄𑀕𑀥𑀢𑁆𑀢𑀸’’𑀢𑀺. 𑀤𑀺𑀝𑁆𑀞𑀺𑀬𑀸 𑀕𑀫𑀦𑀫𑀢𑁆𑀢𑀦𑁆𑀢𑀺 𑀤𑀺𑀝𑁆𑀞𑀺𑀬𑀸 𑀕𑀳𑀡𑀫𑀢𑁆𑀢𑀁. 𑀬𑀣𑀸 𑀧𑀦 𑀧𑀩𑁆𑀩𑀢𑀚𑀮𑀯𑀺𑀤𑀼𑀕𑁆𑀕𑀸𑀦𑀺 𑀤𑀼𑀦𑁆𑀦𑀺𑀕𑁆𑀕𑀫𑀦𑀸𑀦𑀺, 𑀏𑀯𑀁 𑀤𑀺𑀝𑁆𑀞𑀺𑀕𑁆𑀕𑀸𑀳𑁄𑀧𑀻𑀢𑀺 𑀆𑀳 ‘‘𑀤𑀼𑀦𑁆𑀦𑀺𑀕𑁆𑀕𑀫𑀦𑀝𑁆𑀞𑁂𑀦 𑀕𑀳𑀦’’𑀦𑁆𑀢𑀺. 𑀢𑀁 𑀦𑀸𑀫 𑀉𑀤𑀓𑀁, 𑀢𑀁 𑀕𑀳𑁂𑀢𑁆𑀯𑀸 𑀢𑀁 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀢𑁄 𑀓𑀦𑁆𑀢𑀸𑀭𑁄, 𑀦𑀺𑀭𑀼𑀤𑀓𑀯𑀦𑀁, 𑀢𑀁 𑀧𑀯𑀦𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀅𑀜𑁆𑀜𑁄 𑀧𑀦 𑀅𑀭𑀜𑁆𑀜𑀧𑀤𑁂𑀲𑁄 𑀤𑀼𑀭𑀢𑀺𑀓𑁆𑀓𑀫𑀦𑀝𑁆𑀞𑁂𑀦 𑀓𑀦𑁆𑀢𑀸𑀭𑁄 𑀯𑀺𑀬𑀸𑀢𑀺, 𑀏𑀯𑀁 𑀤𑀺𑀝𑁆𑀞𑀺𑀧𑀻𑀢𑀺 𑀆𑀳 ‘‘𑀤𑀼𑀭𑀢𑀺𑀓𑁆𑀓𑀫𑀦𑀝𑁆𑀞𑁂𑀦𑀸’’𑀢𑀺𑀆𑀤𑀺. 𑀯𑀺𑀦𑀺𑀯𑀺𑀚𑁆𑀛𑀦𑀁 𑀯𑀺𑀢𑀼𑀤𑀦𑀁. 𑀯𑀺𑀮𑁄𑀫𑀦𑀁 𑀯𑀺𑀧𑀭𑀺𑀡𑀸𑀫𑀪𑀸𑀯𑁄. 𑀅𑀦𑀯𑀝𑁆𑀞𑀺𑀢𑀲𑀪𑀸𑀯𑀢𑀸𑀬 𑀯𑀺𑀘𑀮𑀺𑀢𑀁 𑀯𑀺𑀧𑁆𑀨𑀦𑁆𑀤𑀺𑀢𑀦𑁆𑀢𑀺 𑀆𑀳 ‘‘𑀓𑀤𑀸𑀘𑀻’’𑀢𑀺𑀆𑀤𑀺. 𑀅𑀦𑁆𑀤𑀼𑀩𑀦𑁆𑀥𑀦𑀸𑀤𑀺 𑀯𑀺𑀬 𑀦𑀺𑀲𑁆𑀲𑀭𑀺𑀢𑀼𑀁 ¶ 𑀅𑀧𑁆𑀧𑀤𑀸𑀦𑀯𑀲𑁂𑀦 𑀅𑀲𑁂𑀭𑀺𑀪𑀸𑀯𑀓𑀭𑀡𑀁 𑀩𑀦𑁆𑀥𑀦𑀝𑁆𑀞𑁄, 𑀓𑀺𑀮𑁂𑀲𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑀸𑀦𑀁 𑀧𑀘𑁆𑀘𑀬𑀪𑀸𑀯𑁂𑀦 𑀤𑀽𑀭𑀕𑀢𑀫𑁆𑀧𑀺 𑀆𑀓𑀟𑁆𑀠𑀺𑀢𑁆𑀯𑀸 𑀲𑀁𑀬𑁄𑀚𑀦𑀁 𑀲𑀁𑀬𑁄𑀚𑀦𑀝𑁆𑀞𑁄, 𑀤𑀺𑀝𑁆𑀞𑀺𑀧𑀺 𑀢𑀣𑀸𑀭𑀽𑀧𑀸𑀢𑀺 𑀯𑀼𑀢𑁆𑀢𑀁 ‘‘𑀤𑀺𑀝𑁆𑀞𑀺𑀲𑀁𑀬𑁄𑀚𑀦’’𑀦𑁆𑀢𑀺. 𑀩𑀦𑁆𑀥𑀦𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯𑀸𑀳 ‘‘𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑁂𑀦…𑀧𑁂… 𑀫𑀼𑀘𑁆𑀘𑀢𑀻’’𑀢𑀺. 𑀢𑀢𑁆𑀣 𑀏𑀢𑁂𑀳𑀻𑀢𑀺 𑀇𑀫𑀺𑀦𑀸 𑀚𑀸𑀢𑀺𑀆𑀤𑀺𑀤𑀼𑀓𑁆𑀔𑀲𑁆𑀲 𑀧𑀘𑁆𑀘𑀬𑀪𑀸𑀯𑀫𑀸𑀳. 𑀚𑀸𑀢𑀺𑀆𑀤𑀺𑀓𑁂 𑀤𑀼𑀓𑁆𑀔𑀥𑀫𑁆𑀫𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑁆𑀯𑀸𑀧𑀺 ‘‘𑀦 𑀧𑀭𑀺𑀫𑀼𑀘𑁆𑀘𑀢𑀺 𑀤𑀼𑀓𑁆𑀔𑀲𑁆𑀫𑀸’’𑀢𑀺 𑀯𑀤𑀦𑁆𑀢𑁂𑀦 𑀪𑀕𑀯𑀢𑀸 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁 𑀦𑀸𑀫 𑀲𑀩𑁆𑀩𑀸𑀦𑀢𑁆𑀣𑀓𑀭𑀁 𑀫𑀳𑀸𑀲𑀸𑀯𑀚𑁆𑀚𑀁 𑀲𑀩𑁆𑀩𑀲𑁆𑀲𑀧𑀺 𑀤𑀼𑀓𑁆𑀔𑀲𑁆𑀲 𑀫𑀽𑀮𑀪𑀽𑀢𑀦𑁆𑀢𑀺 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑀺𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀁 𑀯𑀸 𑀩𑀳𑀼𑀦𑀸, 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀢𑁄𑀧𑀺 𑀦 𑀫𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁.

𑁨𑁦. 𑀦𑀦𑀼 𑀘𑁂𑀢𑁆𑀣 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀤𑀲𑁆𑀲𑀦𑁂𑀦 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄𑀧𑀺 𑀤𑀲𑁆𑀲𑁂𑀢𑀩𑁆𑀩𑁄, 𑀏𑀯𑀜𑁆𑀳𑀺 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀆𑀲𑀯𑀸 𑀅𑀦𑀯𑀲𑁂𑀲𑀢𑁄 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀲𑁆𑀫𑀸’’𑀢𑀺𑀆𑀤𑀺. 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄 𑀓𑀸𑀫𑀸𑀲𑀯𑀸𑀤𑀺𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑁄 𑀳𑁄𑀢𑀺 𑀓𑀸𑀫𑀸𑀲𑀯𑀸𑀤𑀺𑀳𑁂𑀢𑀼𑀓𑀢𑁆𑀢𑀸 𑀢𑀲𑁆𑀲. 𑀅𑀧𑁆𑀧𑀳𑀻𑀦𑀓𑀸𑀫𑀭𑀸𑀕𑀸𑀤𑀺𑀓𑁄 𑀳𑀺 𑀓𑀸𑀫𑀲𑀼𑀔𑀢𑁆𑀣𑀁 𑀯𑀸 𑀪𑀯𑀲𑀼𑀤𑁆𑀥𑀢𑁆𑀣𑀁 ¶ 𑀯𑀸 𑀏𑀯𑀁 𑀪𑀯𑀯𑀺𑀲𑀼𑀤𑁆𑀥𑀺 𑀳𑁄𑀢𑀻𑀢𑀺 𑀲𑀻𑀮𑀩𑁆𑀩𑀢𑀸𑀦𑀺 𑀧𑀭𑀸𑀫𑀲𑀦𑁆𑀢𑀺, ‘‘𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀢𑀧𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄 𑀯𑀸’’𑀢𑀺 (𑀫. 𑀦𑀺. 𑁧.𑁧𑁮𑁬; 𑀫. 𑀦𑀺. 𑁨.𑁭𑁯), ‘‘𑀢𑀢𑁆𑀣 𑀦𑀺𑀘𑁆𑀘𑁄 𑀥𑀼𑀯𑁄 𑀲𑀲𑁆𑀲𑀢𑁄 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄 𑀲𑀲𑁆𑀲𑀢𑀺𑀲𑀫𑀁 𑀢𑀣𑁂𑀯 𑀞𑀲𑁆𑀲𑀸𑀫𑀻’’𑀢𑀺 (𑀫. 𑀦𑀺. 𑁧.𑁧𑁯), ‘‘𑀲𑀻𑀮𑁂𑀦 𑀲𑀼𑀤𑁆𑀥𑀺 𑀯𑀢𑁂𑀦 𑀲𑀼𑀤𑁆𑀥𑀺 𑀲𑀻𑀮𑀩𑁆𑀩𑀢𑁂𑀦 𑀲𑀼𑀤𑁆𑀥𑀻’’𑀢𑀺 (𑀥. 𑀲. 𑁧𑁨𑁨𑁨) 𑀘 𑀲𑀼𑀢𑁆𑀢𑁂𑀯𑀼𑀢𑁆𑀢𑀁 𑀲𑀻𑀮𑀩𑁆𑀩𑀢𑀁 𑀧𑀭𑀸𑀫𑀲𑀦𑁆𑀢𑀺. 𑀢𑀢𑁆𑀣 𑀪𑀯𑀲𑀼𑀔𑀪𑀯𑀯𑀺𑀲𑀼𑀤𑁆𑀥𑀺𑀅𑀢𑁆𑀣𑀦𑁆𑀢𑀺 𑀪𑀯𑀲𑀼𑀔𑀢𑁆𑀣𑀜𑁆𑀘 𑀪𑀯𑀯𑀺𑀲𑀼𑀤𑁆𑀥𑀺𑀅𑀢𑁆𑀣𑀜𑁆𑀘. 𑀢𑀲𑁆𑀲 𑀕𑀳𑀺𑀢𑀢𑁆𑀢𑀸𑀢𑀺 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀲𑁆𑀲 𑀤𑀺𑀝𑁆𑀞𑀺𑀕𑁆𑀕𑀳𑀡𑁂𑀦 𑀕𑀳𑀺𑀢𑀢𑁆𑀢𑀸 𑀬𑀣𑀸 ‘‘𑀤𑀺𑀝𑁆𑀞𑀺𑀕𑀢𑀸𑀦𑀁 𑀧𑀳𑀸𑀦𑀸𑀬𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁨𑁭𑁭). 𑀢𑁂𑀲𑀦𑁆𑀢𑀺 𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑀸𑀦𑀁. 𑀤𑀲𑁆𑀲𑁂𑀢𑀼𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬. 𑀢𑀩𑁆𑀩𑀺𑀧𑀭𑀻𑀢𑀲𑁆𑀲𑀸𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀭𑁄𑀢𑁄 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀲𑁆𑀲.

𑀢𑀲𑁆𑀲𑀸𑀢𑀺 ‘‘𑀲𑀼𑀢𑀯𑀸’’𑀢𑀺𑀆𑀤𑀺𑀧𑀸𑀞𑀲𑁆𑀲. 𑀢𑀸𑀯𑀸𑀢𑀺 ‘‘𑀲𑀼𑀢𑀯𑀸’’𑀢𑀺 𑀇𑀢𑁄 𑀧𑀝𑁆𑀞𑀸𑀬 𑀬𑀸𑀯 ‘‘𑀲𑁄 𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀧𑀤𑀁, 𑀢𑀸𑀯 𑀇𑀫𑀁 𑀧𑀤𑀁 𑀅𑀯𑀥𑀺𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀅𑀭𑀺𑀬𑀲𑀧𑁆𑀧𑀼𑀭𑀺𑀲-𑀅𑀭𑀺𑀬𑀥𑀫𑁆𑀫-𑀲𑀧𑁆𑀧𑀼𑀭𑀺𑀲𑀥𑀫𑁆𑀫-𑀫𑀦𑀲𑀺𑀓𑀭𑀡𑀻𑀬-𑀅𑀫𑀦𑀲𑀺𑀓𑀭𑀡𑀻𑀬𑀧𑀤𑀸𑀦𑀁 𑀬𑀣𑀸𑀓𑁆𑀓𑀫𑀁 𑀫𑀽𑀮𑀧𑀭𑀺𑀬𑀸𑀬𑁂 𑀇𑀥 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀼𑀢𑁆𑀢𑀧𑀘𑁆𑀘𑀦𑀻𑀓𑀢𑁄𑀢𑀺 ‘‘𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄, 𑀅𑀭𑀺𑀬𑀸𑀦𑀁 𑀤𑀲𑁆𑀲𑀸𑀯𑀻, 𑀲𑀧𑁆𑀧𑀼𑀭𑀺𑀲𑀸𑀦𑀁 𑀤𑀲𑁆𑀲𑀸𑀯𑀻’’𑀢𑀺 𑀏𑀢𑁂𑀲𑀁 𑀧𑀤𑀸𑀦𑀁 𑀲𑀩𑁆𑀩𑀸𑀓𑀸𑀭𑁂𑀦 𑀯𑀼𑀢𑁆𑀢𑀯𑀺𑀧𑀭𑀻𑀢𑀢𑁄 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀓𑁄𑀯𑀺𑀤𑀯𑀺𑀦𑀻𑀢𑀧𑀤𑀸𑀦𑀁 𑀧𑀦 𑀦 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀯𑀼𑀢𑁆𑀢𑀯𑀺𑀧𑀭𑀻𑀢𑀢𑁄. 𑀅𑀭𑀳𑀸 𑀳𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀅𑀭𑀺𑀬𑀥𑀫𑁆𑀫𑁂 𑀓𑁄𑀯𑀺𑀤𑁄 𑀅𑀭𑀺𑀬𑀥𑀫𑁆𑀫𑁂 𑀲𑀼𑀯𑀺𑀦𑀻𑀢𑁄 𑀘 𑀦𑀸𑀫. 𑀢𑁂𑀦𑀸𑀳 ‘‘𑀧𑀘𑁆𑀘𑀦𑀻𑀓𑀢𑁄 𑀘 𑀲𑀩𑁆𑀩𑀸𑀓𑀸𑀭𑁂𑀦…𑀧𑁂… 𑀅𑀭𑀺𑀬𑀲𑀸𑀯𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀁 𑀲𑀺𑀔𑀸𑀧𑁆𑀧𑀢𑁆𑀢𑀯𑀺𑀧𑀲𑁆𑀲𑀦𑀸. 𑀓𑁂𑀘𑀺 𑀧𑀦 ‘‘𑀪𑀗𑁆𑀕𑀜𑀸𑀡𑀢𑁄 𑀧𑀝𑁆𑀞𑀸𑀬 𑀲𑀺𑀔𑀸𑀧𑀢𑁆𑀢𑀯𑀺𑀧𑀲𑁆𑀲𑀦𑀸’’𑀢𑀺 𑀯𑀤𑀦𑁆𑀢𑀺, 𑀢𑀤𑀬𑀼𑀢𑁆𑀢𑀁 ¶ . 𑀢𑀤𑀦𑀼𑀭𑀽𑀧𑁂𑀦 𑀅𑀢𑁆𑀣𑁂𑀦𑀸𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀦𑀼𑀭𑀽𑀧𑁂𑀦 𑀅𑀭𑀺𑀬𑀝𑁆𑀞𑁂𑀦, 𑀦 𑀧𑀝𑀺𑀯𑁂𑀥𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁄 𑀳𑀺 𑀅𑀬𑀁. 𑀬𑀣𑀸 𑀘𑀲𑁆𑀲 ‘‘𑀬𑁄𑀧𑀺 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁄’’𑀢𑀺 𑀆𑀭𑀪𑀺𑀢𑁆𑀯𑀸 ‘‘𑀲𑁄𑀧𑀺 𑀯𑀼𑀘𑁆𑀘𑀢𑀺 𑀲𑀺𑀓𑁆𑀔𑀢𑀻𑀢𑀺 𑀲𑁂𑀓𑁆𑀔𑁄’’𑀢𑀺 𑀧𑀭𑀺𑀬𑀸𑀬𑁂𑀦 𑀲𑁂𑀓𑁆𑀔𑀲𑀼𑀢𑁆𑀢𑁂 (𑀲𑀁. 𑀦𑀺. 𑁫.𑁧𑁩) 𑀲𑁂𑀓𑁆𑀔𑀪𑀸𑀯𑁄 𑀯𑀼𑀢𑁆𑀢𑁄, 𑀏𑀯𑀁 𑀇𑀥 𑀅𑀭𑀺𑀬𑀲𑀸𑀯𑀓𑀪𑀸𑀯𑁄 𑀯𑀼𑀢𑁆𑀢𑁄. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀯𑀺𑀧𑀲𑁆𑀲𑀦𑀸𑀮𑀓𑁆𑀔𑀡𑁂𑀳𑀺 𑀬𑁂 𑀅𑀭𑀺𑀬𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀯𑀺𑀦𑀬𑀲𑀗𑁆𑀔𑀸𑀢𑀸 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀏𑀯 𑀯𑀸 𑀲𑀫𑁆𑀪𑀯𑀦𑁆𑀢𑀺, 𑀢𑁂𑀲𑀁 𑀯𑀲𑁂𑀦 𑀇𑀫𑀲𑁆𑀲 𑀅𑀭𑀺𑀬𑀲𑀸𑀯𑀓𑀸𑀤𑀺𑀪𑀸𑀯𑁄 𑀯𑀼𑀢𑁆𑀢𑁄 ¶ . 𑀢𑁂𑀦𑀸𑀳 ‘‘𑀢𑀤𑀦𑀼𑀭𑀽𑀧𑁂𑀦 𑀅𑀢𑁆𑀣𑁂𑀦𑀸’’𑀢𑀺. 𑀅𑀭𑀺𑀬𑀲𑁆𑀲 𑀲𑀸𑀯𑀓𑁄𑀢𑀺 𑀯𑀸 𑀅𑀭𑀺𑀬𑀲𑀸𑀯𑀓𑀢𑁆𑀣𑁂𑀦 𑀏𑀯 𑀯𑀼𑀢𑁆𑀢𑁄 𑀬𑀣𑀸 ‘‘𑀅𑀕𑀫𑀸 𑀭𑀸𑀚𑀕𑀳𑀁 𑀩𑀼𑀤𑁆𑀥𑁄’’𑀢𑀺 (𑀲𑀼. 𑀦𑀺. 𑁪𑁧𑁦). 𑀲𑀺𑀔𑀸𑀧𑁆𑀧𑀢𑁆𑀢𑀯𑀺𑀧𑀲𑁆𑀲𑀦𑀸𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀦𑀺𑀯𑀢𑁆𑀢𑀺𑀧𑀝𑀺𑀧𑀤𑀸𑀬𑀁 𑀞𑀺𑀢𑀲𑁆𑀲 𑀕𑀳𑀡𑀢𑁆𑀣𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀸 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀲𑀼𑀝𑁆𑀞𑀼𑀢𑀭𑀁 𑀬𑀼𑀚𑁆𑀚𑀢𑁂𑀯.

𑁨𑁧. 𑀬𑀣𑀸 𑀥𑀸𑀢𑀼𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀁 𑀅𑀪𑀺𑀦𑀺𑀯𑀺𑀝𑁆𑀞𑁄 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀺𑀓𑁄 𑀆𑀬𑀢𑀦𑀸𑀤𑀺𑀫𑀼𑀔𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑁄 𑀆𑀬𑀢𑀦𑀸𑀤𑀺𑀓𑀫𑁆𑀫𑀝𑁆𑀞𑀸𑀦𑀺𑀓𑁄, 𑀏𑀯𑀁 𑀲𑀘𑁆𑀘𑀫𑀼𑀔𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑁄𑀢𑀺 𑀯𑀼𑀢𑁆𑀢𑀁 ‘‘𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀺𑀓𑁄’’𑀢𑀺. 𑀘𑀢𑀼𑀭𑁄𑀖𑀦𑀺𑀢𑁆𑀣𑀭𑀡𑀢𑁆𑀣𑀺𑀓𑁂𑀳𑀺 𑀓𑀸𑀢𑀩𑁆𑀩𑀢𑁄 𑀓𑀫𑁆𑀫𑀁, 𑀪𑀸𑀯𑀦𑀸. 𑀓𑀫𑁆𑀫𑀫𑁂𑀯 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀞𑀸𑀦𑀁 𑀓𑀸𑀭𑀡𑀦𑁆𑀢𑀺, 𑀓𑀫𑁆𑀫𑁂 𑀯𑀸 𑀬𑀣𑀸𑀯𑀼𑀢𑁆𑀢𑀦𑀝𑁆𑀞𑁂𑀦 𑀞𑀸𑀦𑀁 𑀅𑀯𑀝𑁆𑀞𑀸𑀦𑀁 𑀪𑀸𑀯𑀦𑀸𑀭𑀫𑁆𑀪𑁄𑀓𑀫𑁆𑀫𑀝𑁆𑀞𑀸𑀦𑀁, 𑀢𑀤𑁂𑀯 𑀘𑀢𑀼𑀲𑀘𑁆𑀘𑀫𑀼𑀔𑁂𑀦 𑀧𑀯𑀢𑁆𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀺𑀓𑁄. 𑀉𑀪𑀬𑀁 𑀦𑀧𑁆𑀧𑀯𑀢𑁆𑀢𑀢𑀺 𑀏𑀢𑁆𑀣𑀸𑀢𑀺 𑀅𑀧𑁆𑀧𑀯𑀢𑁆𑀢𑀺. 𑀉𑀕𑁆𑀕𑀳𑀺𑀢𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑁄𑀢𑀺 𑀘 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀁 𑀧𑀸𑀴𑀺𑀢𑁄 𑀅𑀢𑁆𑀣𑀢𑁄 𑀘 𑀉𑀕𑁆𑀕𑀳𑁂𑀢𑁆𑀯𑀸 𑀫𑀦𑀲𑀺𑀓𑀸𑀭𑀬𑁄𑀕𑁆𑀕𑀁 𑀓𑀢𑁆𑀯𑀸 𑀞𑀺𑀢𑁄. 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀁 𑀲𑀫𑀸𑀭𑀼𑀴𑁆𑀳𑁄𑀢𑀺 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀤𑀲𑁆𑀲𑀦𑁂 𑀧𑀢𑀺𑀝𑁆𑀞𑀸𑀬 𑀢𑀤𑁂𑀯 𑀦𑀸𑀫𑀭𑀽𑀧𑀁 𑀅𑀦𑀺𑀘𑁆𑀘𑀸𑀤𑀺𑀢𑁄 𑀲𑀫𑁆𑀫𑀲𑀦𑁆𑀢𑁄. 𑀲𑀫𑀦𑁆𑀦𑀸𑀳𑀭𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀯𑀚𑁆𑀚𑀦𑀁 𑀲𑀦𑁆𑀥𑀸𑀬𑀸𑀳, 𑀢𑀲𑁆𑀫𑀸 𑀬𑀣𑀸 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀏𑀯𑀁 𑀲𑀫𑀦𑁆𑀦𑀸𑀳𑀭𑀢𑀺 𑀆𑀯𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀓𑀣𑀁 𑀧𑀦𑁂𑀢𑁆𑀣 ‘‘𑀫𑀦𑀲𑀺 𑀓𑀭𑁄𑀢𑀻’’𑀢𑀺 𑀇𑀫𑀺𑀦𑀸 ‘‘𑀯𑀺𑀧𑀲𑁆𑀲𑀢𑀻’’𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀏𑀢𑁆𑀣…𑀧𑁂… 𑀯𑀼𑀢𑁆𑀢𑀸’’𑀢𑀺. 𑀏𑀢𑁆𑀣𑀸𑀢𑀺 𑀘 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂𑀢𑀺 𑀅𑀢𑁆𑀣𑁄. 𑀯𑀺𑀧𑀲𑁆𑀲𑀢𑀻𑀢𑀺 𑀘 𑀬𑀣𑀸 𑀉𑀧𑀭𑀺 𑀯𑀺𑀲𑁂𑀲𑀸𑀥𑀺𑀕𑀫𑁄 𑀳𑁄𑀢𑀺, 𑀏𑀯𑀁 𑀜𑀸𑀡𑀘𑀓𑁆𑀔𑀼𑀦𑀸 𑀯𑀺𑀧𑀲𑁆𑀲𑀢𑀺, 𑀑𑀮𑁄𑀓𑁂𑀢𑀻𑀢𑀺 𑀅𑀢𑁆𑀣𑁄. 𑀫𑀕𑁆𑀕𑁄𑀧𑀺 𑀯𑀢𑁆𑀢𑀩𑁆𑀩𑁄. 𑀧𑀼𑀭𑀺𑀫𑀜𑁆𑀳𑀺 𑀲𑀘𑁆𑀘𑀤𑁆𑀯𑀬𑀁 𑀕𑀫𑁆𑀪𑀻𑀭𑀢𑁆𑀢𑀸 𑀤𑀼𑀤𑁆𑀤𑀲𑀁, 𑀇𑀢𑀭𑀁 𑀤𑀼𑀤𑁆𑀤𑀲𑀢𑁆𑀢𑀸 𑀕𑀫𑁆𑀪𑀻𑀭𑀁.

𑀅𑀪𑀺𑀦𑀺𑀯𑁂𑀲𑁄𑀢𑀺 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄 𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀢𑁆𑀢𑀺. 𑀢𑀤𑀸𑀭𑀫𑁆𑀫𑀡𑁂𑀢𑀺 𑀢𑀁 𑀭𑀽𑀧𑀓𑁆𑀔𑀦𑁆𑀥𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑁂. 𑀬𑀸𑀣𑀸𑀯𑀲𑀭𑀲𑀮𑀓𑁆𑀔𑀡𑀁 𑀯𑀯𑀢𑁆𑀣𑀧𑁂𑀢𑁆𑀯𑀸𑀢𑀺 𑀅𑀯𑀺𑀧𑀭𑀻𑀢𑀁 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀁 𑀲𑀪𑀸𑀯𑀘𑁆𑀙𑁂𑀤𑀦𑀸𑀤𑀺𑀓𑀺𑀘𑁆𑀘𑀜𑁆𑀘𑁂𑀯 𑀅𑀜𑁆𑀜𑀸𑀡𑀸𑀤𑀺𑀮𑀓𑁆𑀔𑀡𑀜𑁆𑀘 𑀅𑀲𑀗𑁆𑀓𑀭𑀢𑁄 𑀳𑀤𑀬𑁂 𑀞𑀧𑁂𑀢𑁆𑀯𑀸. 𑀇𑀫𑀺𑀦𑀸 𑀧𑀼𑀩𑁆𑀩𑁂 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂 𑀓𑀢𑁂𑀧𑀺 𑀥𑀫𑁆𑀫𑀸𑀦𑀁 𑀲𑀮𑀓𑁆𑀔𑀡𑀯𑀯𑀢𑁆𑀣𑀸𑀧𑀦𑀁 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂𑀦 𑀲𑀼𑀯𑀯𑀢𑁆𑀣𑀸𑀧𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺 𑀬𑀣𑀸 ‘‘𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀩𑀤𑁆𑀥𑀁 𑀲𑀼𑀩𑀤𑁆𑀥’’𑀦𑁆𑀢𑀺. 𑀏𑀯𑀜𑁆𑀳𑀺 𑀜𑀸𑀢𑀧𑀭𑀺𑀜𑁆𑀜𑀸𑀬 𑀓𑀺𑀘𑁆𑀘𑀁 𑀲𑀺𑀤𑁆𑀥𑀁 𑀦𑀸𑀫 ¶ 𑀳𑁄𑀢𑀺. 𑀧𑀘𑁆𑀘𑀬𑀢𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄 𑀘 𑀯𑀯𑀢𑁆𑀣𑀸𑀧𑀺𑀢𑀢𑁆𑀢𑀸 𑀧𑀸𑀓𑀝𑀪𑀸𑀯𑁂𑀦 𑀲𑀺𑀤𑁆𑀥𑁂𑀦𑀧𑀺 𑀲𑀺𑀤𑁆𑀥𑀪𑀸𑀯𑁄 𑀧𑀸𑀓𑀝𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀳𑀼𑀢𑁆𑀯𑀸 𑀳𑁄𑀦𑁆𑀢𑀻’’𑀢𑀺. 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀻𑀢𑀺 𑀅𑀲𑀢𑁄 𑀳𑀺 ¶ 𑀉𑀧𑁆𑀧𑀸𑀤𑁂𑀦 𑀪𑀯𑀺𑀢𑀩𑁆𑀩𑀁, 𑀦 𑀲𑀢𑁄, 𑀉𑀧𑁆𑀧𑀸𑀤𑀯𑀦𑁆𑀢𑀢𑁄 𑀘 𑀦𑁂𑀲𑀁 𑀏𑀓𑀦𑁆𑀢𑁂𑀦 𑀇𑀘𑁆𑀙𑀺𑀢𑀩𑁆𑀩𑀸 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀪𑀸𑀯𑀢𑁄, 𑀲𑀢𑀺 𑀉𑀧𑁆𑀧𑀸𑀤𑁂 𑀅𑀯𑀲𑁆𑀲𑀁𑀪𑀸𑀯𑀻 𑀦𑀺𑀭𑁄𑀥𑁄𑀢𑀺 𑀦𑀢𑁆𑀣𑁂𑀯 𑀦𑀺𑀘𑁆𑀘𑀢𑀸𑀯𑀓𑀸𑀲𑁄𑀢𑀺. 𑀲𑀽𑀧𑀝𑁆𑀞𑀺𑀢𑀸𑀦𑀺𑀘𑁆𑀘𑀢𑀸𑀬 𑀘 𑀉𑀤𑀬𑀩𑁆𑀩𑀬𑀥𑀫𑁆𑀫𑁂𑀳𑀺 𑀅𑀪𑀺𑀡𑁆𑀳𑀧𑀝𑀺𑀧𑀻𑀴𑀦𑀢𑁄 𑀤𑀼𑀓𑁆𑀔𑀫𑀦𑀝𑁆𑀞𑁂𑀦 𑀤𑀼𑀓𑁆𑀔𑀁. 𑀢𑁂𑀦𑀸𑀳 ‘‘𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀺𑀢𑀢𑁆𑀢𑀸 𑀤𑀼𑀓𑁆𑀔𑀸𑀢𑀺 𑀤𑀼𑀓𑁆𑀔𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀻’’𑀢𑀺. 𑀓𑀢𑁆𑀣𑀘𑀺𑀧𑀺 𑀲𑀗𑁆𑀔𑀸𑀭𑀕𑀢𑁂 ‘‘𑀫𑀸 𑀚𑀻𑀭𑀺 𑀫𑀸 𑀩𑁆𑀬𑀸𑀥𑀺𑀬𑀻’’𑀢𑀺 𑀅𑀮𑀩𑁆𑀪𑀦𑀢𑁄 𑀦𑀢𑁆𑀣𑀺 𑀯𑀲𑀯𑀢𑁆𑀢𑀦𑀦𑁆𑀢𑀺 𑀆𑀳 ‘‘𑀅𑀯𑀲𑀯𑀢𑁆𑀢𑀦𑀢𑁄 𑀅𑀦𑀢𑁆𑀢𑀸𑀢𑀺 𑀅𑀦𑀢𑁆𑀢𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑀻’’𑀢𑀺. 𑀧𑀝𑀺𑀧𑀸𑀝𑀺𑀬𑀸𑀢𑀺 𑀉𑀤𑀬𑀩𑁆𑀩𑀬𑀜𑀸𑀡𑀸𑀤𑀺𑀧𑀭𑀫𑁆𑀧𑀭𑀸𑀬.

𑀢𑀲𑁆𑀫𑀺𑀁 𑀔𑀡𑁂𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂. 𑀏𑀓𑀧𑀝𑀺𑀯𑁂𑀥𑁂𑀦𑁂𑀯𑀸𑀢𑀺 𑀏𑀓𑀜𑀸𑀡𑁂𑀦𑁂𑀯 𑀧𑀝𑀺𑀯𑀺𑀚𑁆𑀛𑀦𑁂𑀦. 𑀧𑀝𑀺𑀯𑁂𑀥𑁄 𑀧𑀝𑀺𑀖𑀸𑀢𑀸𑀪𑀸𑀯𑁂𑀦 𑀯𑀺𑀲𑀬𑁂 𑀦𑀺𑀲𑁆𑀲𑀗𑁆𑀕𑀘𑀸𑀭𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀺𑀚𑁆𑀛𑀦𑀁. 𑀅𑀪𑀺𑀲𑀫𑀬𑁄 𑀅𑀯𑀺𑀭𑀚𑁆𑀛𑀺𑀢𑁆𑀯𑀸 𑀯𑀺𑀲𑀬𑀲𑁆𑀲 𑀅𑀥𑀺𑀕𑀫𑀲𑀗𑁆𑀔𑀸𑀢𑁄 𑀅𑀯𑀩𑁄𑀥𑁄. ‘‘𑀇𑀤𑀁 𑀤𑀼𑀓𑁆𑀔𑀁, 𑀏𑀢𑁆𑀢𑀓𑀁 𑀤𑀼𑀓𑁆𑀔𑀁, 𑀦 𑀇𑀢𑁄 𑀪𑀺𑀬𑁆𑀬𑁄’’𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀚𑀸𑀦𑀦𑀫𑁂𑀯 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀯𑁂𑀥𑁄𑀢𑀺 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑁄. 𑀅𑀬𑀁 𑀬𑀣𑀸 𑀜𑀸𑀡𑁂 𑀧𑀯𑀢𑁆𑀢𑁂 𑀧𑀘𑁆𑀙𑀸 𑀤𑀼𑀓𑁆𑀔𑀲𑁆𑀲 𑀲𑀭𑀽𑀧𑀸𑀤𑀺𑀧𑀭𑀺𑀘𑁆𑀙𑁂𑀤𑁂 𑀲𑀫𑁆𑀫𑁄𑀳𑁄 𑀦 𑀳𑁄𑀢𑀺, 𑀢𑀣𑀸 𑀧𑀯𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑁄, 𑀦 𑀧𑀦 𑀫𑀕𑁆𑀕𑀜𑀸𑀡𑀲𑁆𑀲 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀦𑀸𑀧𑀺 𑀯𑀢𑁆𑀢𑀦𑀢𑁄. 𑀢𑁂𑀦𑀸𑀳 ‘‘𑀦 𑀳𑀺𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂’’𑀢𑀺𑀆𑀤𑀺. 𑀧𑀳𑀻𑀦𑀲𑁆𑀲 𑀧𑀼𑀦 𑀅𑀧𑁆𑀧𑀳𑀸𑀢𑀩𑁆𑀩𑀢𑀸𑀬 𑀧𑀓𑀝𑁆𑀞𑀁 𑀳𑀸𑀦𑀁 𑀘𑀚𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀁 𑀧𑀳𑀸𑀦𑀁, 𑀧𑀳𑀸𑀦𑀫𑁂𑀯 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀯𑁂𑀥𑁄𑀢𑀺 𑀧𑀳𑀸𑀦𑀧𑀝𑀺𑀯𑁂𑀥𑁄. 𑀅𑀬𑀫𑁆𑀧𑀺 𑀬𑁂𑀦 𑀓𑀺𑀮𑁂𑀲𑁂𑀦 𑀅𑀧𑁆𑀧𑀳𑀻𑀬𑀫𑀸𑀦𑁂𑀦 𑀫𑀕𑁆𑀕𑀪𑀸𑀯𑀦𑀸𑀬 𑀦 𑀪𑀯𑀺𑀢𑀩𑁆𑀩𑀁, 𑀅𑀲𑀢𑀺 𑀘 𑀫𑀕𑁆𑀕𑀪𑀸𑀯𑀦𑀸𑀬 𑀬𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀲 𑀓𑀺𑀮𑁂𑀲𑀲𑁆𑀲 𑀧𑀤𑀖𑀸𑀢𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑁂𑀦𑁆𑀢𑀲𑁆𑀲 𑀜𑀸𑀡𑀲𑁆𑀲 𑀢𑀣𑀸𑀧𑀯𑀢𑁆𑀢𑀺𑀬𑀸 𑀧𑀝𑀺𑀖𑀸𑀢𑀸𑀪𑀸𑀯𑁂𑀦 𑀦𑀺𑀲𑁆𑀲𑀗𑁆𑀕𑀘𑀸𑀭𑀁 𑀉𑀧𑀸𑀤𑀸𑀬 𑀏𑀯𑀁 𑀯𑀼𑀢𑁆𑀢𑁄. 𑀲𑀘𑁆𑀙𑀺𑀓𑀺𑀭𑀺𑀬𑀸 𑀧𑀘𑁆𑀘𑀓𑁆𑀔𑀓𑀭𑀡𑀁, 𑀅𑀦𑀼𑀲𑁆𑀲𑀯𑀸𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀸𑀤𑀺𑀓𑁂 𑀫𑀼𑀜𑁆𑀘𑀺𑀢𑁆𑀯𑀸 𑀲𑀭𑀽𑀧𑀢𑁄 𑀆𑀭𑀫𑁆𑀫𑀡𑀓𑀭𑀡𑀁 𑀇𑀤𑀁 𑀢𑀦𑁆𑀢𑀺 𑀬𑀣𑀸𑀲𑀪𑀸𑀯𑀢𑁄 𑀕𑀳𑀡𑀁, 𑀲𑀸 𑀏𑀯 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀯𑁂𑀥𑁄𑀢𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀝𑀺𑀯𑁂𑀥𑁄. 𑀅𑀬𑀁 𑀧𑀦 𑀬𑀲𑁆𑀲 𑀆𑀯𑀭𑀡𑀲𑁆𑀲 𑀅𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄 𑀜𑀸𑀡𑀁 𑀦𑀺𑀭𑁄𑀥𑀁 𑀆𑀮𑀫𑁆𑀩𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄 𑀢𑀁 𑀲𑀭𑀽𑀧𑀢𑁄 𑀯𑀺𑀪𑀸𑀯𑀺𑀢𑀫𑁂𑀯 𑀧𑀯𑀢𑁆𑀢𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑁄.

𑀪𑀸𑀯𑀦𑀸 𑀉𑀧𑁆𑀧𑀸𑀤𑀦𑀸 𑀯𑀟𑁆𑀠𑀦𑀸 𑀘, 𑀢𑀢𑁆𑀣 𑀧𑀞𑀫𑀫𑀕𑁆𑀕𑁂 𑀉𑀧𑁆𑀧𑀸𑀤𑀦𑀝𑁆𑀞𑁂𑀦, 𑀤𑀼𑀢𑀺𑀬𑀸𑀤𑀻𑀲𑀼 𑀯𑀟𑁆𑀠𑀦𑀝𑁆𑀞𑁂𑀦, 𑀉𑀪𑀬𑀢𑁆𑀣𑀸𑀧𑀺 𑀯𑀸 𑀉𑀪𑀬𑀣𑀸𑀧𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀞𑀫𑀫𑀕𑁆𑀕𑁄𑀧𑀺 𑀳𑀺 𑀬𑀣𑀸𑀭𑀳𑀁 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀬𑀁 𑀧𑀯𑀢𑁆𑀢𑀁 𑀧𑀭𑀺𑀚𑀸𑀦𑀦𑀸𑀤𑀺𑀁 𑀯𑀟𑁆𑀠𑁂𑀦𑁆𑀢𑁄 𑀧𑀯𑀢𑁆𑀢𑁄𑀢𑀺 𑀢𑀢𑁆𑀣𑀸𑀧𑀺 𑀯𑀟𑁆𑀠𑀦𑀝𑁆𑀞𑁂𑀦 𑀪𑀸𑀯𑀦𑀸 ¶ 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀤𑀼𑀢𑀺𑀬𑀸𑀤𑀻𑀲𑀼𑀧𑀺 𑀅𑀧𑁆𑀧𑀳𑀻𑀦𑀓𑀺𑀮𑁂𑀲𑀧𑁆𑀧𑀳𑀸𑀦𑀢𑁄 𑀧𑀼𑀕𑁆𑀕𑀮𑀦𑁆𑀢𑀭𑀲𑀸𑀥𑀦𑀢𑁄 𑀉𑀧𑁆𑀧𑀸𑀤𑀦𑀝𑁆𑀞𑁂𑀦 𑀪𑀸𑀯𑀦𑀸, 𑀲𑀸 𑀏𑀯 𑀯𑀼𑀢𑁆𑀢𑀦𑀬𑁂𑀦 𑀧𑀝𑀺𑀯𑁂𑀥𑁄𑀢𑀺 𑀪𑀸𑀯𑀦𑀸 𑀧𑀝𑀺𑀯𑁂𑀥𑁄. 𑀅𑀬𑀫𑁆𑀧𑀺 𑀳𑀺 𑀬𑀣𑀸 𑀜𑀸𑀡𑁂 𑀧𑀯𑀢𑁆𑀢𑁂 𑀧𑀘𑁆𑀙𑀸 𑀫𑀕𑁆𑀕𑀥𑀫𑁆𑀫𑀸𑀦𑀁 𑀲𑀭𑀽𑀧𑀧𑀭𑀺𑀘𑁆𑀙𑁂𑀤𑁂 ¶ 𑀲𑀫𑁆𑀫𑁄𑀳𑁄 𑀦 𑀳𑁄𑀢𑀺, 𑀢𑀣𑀸 𑀧𑀯𑀢𑁆𑀢𑀺𑀫𑁂𑀯 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑁄, 𑀢𑀺𑀝𑁆𑀞𑀢𑀼 𑀢𑀸𑀯 𑀬𑀣𑀸𑀥𑀺𑀕𑀢𑀫𑀕𑁆𑀕𑀥𑀫𑁆𑀫𑀁 𑀬𑀣𑀸𑀧𑀯𑀢𑁆𑀢𑁂𑀲𑀼 𑀨𑀮𑀥𑀫𑁆𑀫𑁂𑀲𑀼𑀧𑀺 𑀅𑀬𑀁 𑀬𑀣𑀸𑀥𑀺𑀕𑀢𑀲𑀘𑁆𑀘𑀥𑀫𑁆𑀫𑁂𑀲𑀼 𑀯𑀺𑀬 𑀯𑀺𑀕𑀢𑀲𑀫𑁆𑀫𑁄𑀳𑁄𑀯 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀺𑀝𑁆𑀞𑀥𑀫𑁆𑀫𑁄 𑀧𑀢𑁆𑀢𑀥𑀫𑁆𑀫𑁄 𑀯𑀺𑀤𑀺𑀢𑀥𑀫𑁆𑀫𑁄 𑀧𑀭𑀺𑀬𑁄𑀕𑀸𑀴𑁆𑀳𑀥𑀫𑁆𑀫𑁄’’𑀢𑀺 (𑀤𑀻. 𑀦𑀺. 𑁧.𑁨𑁯𑁯, 𑁩𑁫𑁬; 𑀫𑀳𑀸𑀯. 𑁨𑁭, 𑁫𑁭). 𑀬𑀢𑁄 𑀘𑀲𑁆𑀲 𑀥𑀫𑁆𑀫𑀢𑀸𑀲𑀜𑁆𑀘𑁄𑀤𑀺𑀢𑀸 𑀬𑀣𑀸𑀥𑀺𑀕𑀢𑀲𑀘𑁆𑀘𑀥𑀫𑁆𑀫𑀸𑀯𑀮𑀫𑁆𑀩𑀺𑀦𑀺𑀬𑁄 𑀫𑀕𑁆𑀕𑀯𑀻𑀣𑀺𑀢𑁄 𑀧𑀭𑀢𑁄 𑀫𑀕𑁆𑀕𑀨𑀮𑀧𑀳𑀻𑀦𑀸𑀯𑀲𑀺𑀝𑁆𑀞𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀸 𑀧𑀯𑀢𑁆𑀢𑀦𑁆𑀢𑀺. 𑀤𑀼𑀓𑁆𑀔𑀲𑀘𑁆𑀘𑀥𑀫𑁆𑀫𑀸 𑀳𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀬𑁄. 𑀅𑀬𑀜𑁆𑀘 𑀅𑀢𑁆𑀣𑀯𑀡𑁆𑀡𑀦𑀸 ‘‘𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦𑀸’’𑀢𑀺𑀆𑀤𑀻𑀲𑀼𑀧𑀺 𑀯𑀺𑀪𑀸𑀯𑁂𑀢𑀩𑁆𑀩𑀸. 𑀏𑀓𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀻𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀽𑀢𑀢𑀭𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀦𑁄 𑀘 𑀔𑁄 𑀅𑀜𑁆𑀜𑀫𑀜𑁆𑀜𑁂𑀦 𑀜𑀸𑀡𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀯𑀺𑀢𑀡𑁆𑀟𑀯𑀸𑀤𑀻 𑀧𑀦𑀸𑀳 ‘‘𑀅𑀭𑀺𑀬𑀫𑀕𑁆𑀕𑀜𑀸𑀡𑀁 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀦𑀸𑀦𑀸𑀪𑀺𑀲𑀫𑀬𑀯𑀲𑁂𑀦 𑀓𑀺𑀘𑁆𑀘𑀓𑀭𑀡𑀁, 𑀦 𑀏𑀓𑀸𑀪𑀺𑀲𑀫𑀬𑀯𑀲𑁂𑀦. 𑀢𑀜𑁆𑀳𑀺 𑀓𑀸𑀮𑁂𑀦 𑀤𑀼𑀓𑁆𑀔𑀁 𑀧𑀚𑀸𑀦𑀸𑀢𑀺, 𑀓𑀸𑀮𑁂𑀦 𑀲𑀫𑀼𑀤𑀬𑀁 𑀧𑀚𑀳𑀢𑀺, 𑀓𑀸𑀮𑁂𑀦 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀓𑀸𑀮𑁂𑀦 𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀅𑀜𑁆𑀜𑀣𑀸 𑀏𑀓𑀲𑁆𑀲 𑀜𑀸𑀡𑀲𑁆𑀲 𑀏𑀓𑀲𑁆𑀫𑀺𑀁 𑀔𑀡𑁂 𑀘𑀢𑀼𑀓𑀺𑀘𑁆𑀘𑀓𑀭𑀡𑀁 𑀦 𑀬𑀼𑀚𑁆𑀚𑀢𑀺. 𑀦 𑀳𑀺𑀤𑀁 𑀓𑀢𑁆𑀣𑀘𑀺 𑀤𑀺𑀝𑁆𑀞𑀫𑁆𑀧𑀺 𑀲𑀼𑀢𑁆𑀢𑀁 𑀅𑀢𑁆𑀣𑀻’’𑀢𑀺. 𑀲𑁄 𑀯𑀢𑁆𑀢𑀩𑁆𑀩𑁄 𑁋 𑀬𑀤𑀺 𑀅𑀭𑀺𑀬𑀫𑀕𑁆𑀕𑀜𑀸𑀡𑀁 𑀦𑀸𑀦𑀸𑀪𑀺𑀲𑀫𑀬𑀯𑀲𑁂𑀦 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁂𑀢𑀺, 𑀦 𑀏𑀓𑀸𑀪𑀺𑀲𑀫𑀬𑀯𑀲𑁂𑀦, 𑀏𑀯𑀁 𑀲𑀦𑁆𑀢𑁂 𑀧𑀘𑁆𑀘𑁂𑀓𑀫𑁆𑀧𑀺 𑀲𑀘𑁆𑀘𑁂𑀲𑀼 𑀦𑀸𑀦𑀓𑁆𑀔𑀡𑁂𑀦𑁂𑀯 𑀧𑀯𑀢𑁆𑀢𑁂𑀬𑁆𑀬, 𑀦 𑀏𑀓𑀓𑁆𑀔𑀡𑁂𑀦, 𑀢𑀣𑀸 𑀲𑀢𑀺 𑀤𑀼𑀓𑁆𑀔𑀸𑀤𑀻𑀦𑀁 𑀏𑀓𑀤𑁂𑀲𑁂𑀓𑀤𑁂𑀲𑀫𑁂𑀯 𑀧𑀭𑀺𑀚𑀸𑀦𑀸𑀢𑀺 𑀧𑀚𑀳𑀢𑀻𑀢𑀺 𑀆𑀧𑀚𑁆𑀚𑀢𑀻𑀢𑀺 𑀦𑀸𑀦𑀸𑀪𑀺𑀲𑀫𑀬𑁂 𑀧𑀞𑀫𑀫𑀕𑁆𑀕𑀸𑀤𑀻𑀳𑀺 𑀧𑀳𑀸𑀢𑀩𑁆𑀩𑀸𑀦𑀁 𑀲𑀜𑁆𑀜𑁄𑀚𑀦𑀢𑁆𑀢𑀬𑀸𑀤𑀻𑀦𑀁 𑀏𑀓𑀤𑁂𑀲𑁂𑀓𑀤𑁂𑀲𑀧𑁆𑀧𑀳𑀸𑀦𑀁 𑀲𑀺𑀬𑀸𑀢𑀺 𑀏𑀓𑀤𑁂𑀲𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀸𑀤𑀺𑀢𑀸, 𑀢𑀢𑁄 𑀏𑀯 𑀏𑀓𑀤𑁂𑀲𑀲𑁄𑀢𑀸𑀧𑀦𑁆𑀦𑀸𑀤𑀺𑀢𑀸 𑀘 𑀆𑀧𑀚𑁆𑀚𑀢𑀺 𑀅𑀦𑀦𑁆𑀢𑀭𑀨𑀮𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸𑀦𑀁, 𑀦 𑀘 𑀢𑀁 𑀬𑀼𑀢𑁆𑀢𑀁. 𑀦 𑀳𑀺 𑀓𑀸𑀮𑀪𑁂𑀤𑁂𑀦 𑀯𑀺𑀦𑀸 𑀲𑁄 𑀏𑀯 𑀲𑁄𑀢𑀸𑀧𑀦𑁆𑀦𑁄 𑀘 𑀅𑀲𑁄𑀢𑀸𑀧𑀦𑁆𑀦𑁄 𑀘𑀸𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁.

𑀅𑀧𑀺𑀘𑀸𑀬𑀁 𑀦𑀸𑀦𑀸𑀪𑀺𑀲𑀫𑀬𑀯𑀸𑀤𑀻 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑁄 ‘‘𑀫𑀕𑁆𑀕𑀜𑀸𑀡𑀁 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀁 𑀓𑀺𑀁 𑀆𑀭𑀫𑁆𑀫𑀡𑀢𑁄 𑀧𑀝𑀺𑀯𑀺𑀚𑁆𑀛𑀢𑀺, 𑀉𑀤𑀸𑀳𑀼 𑀓𑀺𑀘𑁆𑀘𑀢𑁄’’𑀢𑀺? 𑀚𑀸𑀦𑀫𑀸𑀦𑁄 ‘‘𑀓𑀺𑀘𑁆𑀘𑀢𑁄’’𑀢𑀺 𑀯𑀤𑁂𑀬𑁆𑀬, ‘‘𑀓𑀺𑀘𑁆𑀘𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑀲𑁆𑀲 𑀓𑀺𑀁 𑀦𑀸𑀦𑀸𑀪𑀺𑀲𑀫𑀬𑁂𑀦𑀸’’𑀢𑀺 𑀯𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸𑀦𑀺𑀤𑀲𑁆𑀲𑀦𑁂𑀦 ¶ 𑀲𑀜𑁆𑀜𑀸𑀧𑁂𑀢𑀩𑁆𑀩𑁄. 𑀅𑀣 ‘‘𑀆𑀭𑀫𑁆𑀫𑀡𑀢𑁄’’𑀢𑀺 𑀯𑀤𑁂𑀬𑁆𑀬, 𑀏𑀯𑀁 𑀲𑀦𑁆𑀢𑁂 𑀢𑀲𑁆𑀲 𑀜𑀸𑀡𑀲𑁆𑀲 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀯𑀺𑀬 𑀤𑀼𑀓𑁆𑀔𑀲𑀫𑀼𑀤𑀬𑀸𑀦𑀁 𑀅𑀘𑁆𑀘𑀦𑁆𑀢𑀧𑀭𑀺𑀜𑁆𑀜𑀸𑀲𑀫𑀼𑀘𑁆𑀙𑁂𑀤𑀸 𑀦 𑀬𑀼𑀢𑁆𑀢𑀸 𑀅𑀦𑀺𑀲𑁆𑀲𑀝𑀢𑁆𑀢𑀸. 𑀢𑀣𑀸 𑀫𑀕𑁆𑀕𑀤𑀲𑁆𑀲𑀦𑀁. 𑀦 𑀳𑀺 𑀫𑀕𑁆𑀕𑁄 𑀲𑀬𑀫𑁂𑀯 𑀅𑀢𑁆𑀢𑀸𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑀻𑀢𑀺 𑀬𑀼𑀢𑁆𑀢𑀁, 𑀫𑀕𑁆𑀕𑀦𑁆𑀢𑀭𑀧𑀭𑀺𑀓𑀧𑁆𑀧𑀦𑀸𑀬 𑀧𑀦 𑀅𑀦𑀯𑀝𑁆𑀞𑀸𑀦𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀻𑀡𑀺 𑀲𑀘𑁆𑀘𑀸𑀦𑀺 𑀓𑀺𑀘𑁆𑀘𑀢𑁄, 𑀦𑀺𑀭𑁄𑀥𑀁 𑀓𑀺𑀘𑁆𑀘𑀢𑁄 𑀘 𑀆𑀭𑀫𑁆𑀫𑀡𑀢𑁄 𑀘 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀏𑀯𑀁 𑀅𑀲𑀫𑁆𑀫𑁄𑀳𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑀲𑁆𑀲 𑀫𑀕𑁆𑀕𑀜𑀸𑀡𑀲𑁆𑀲 𑀦𑀢𑁆𑀣𑁂𑀯 𑀦𑀸𑀦𑀸𑀪𑀺𑀲𑀫𑀬𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑁄 𑀪𑀺𑀓𑁆𑀔𑀯𑁂 𑀤𑀼𑀓𑁆𑀔𑀁 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀲𑀫𑀼𑀤𑀬𑀫𑁆𑀧𑀺 𑀲𑁄 𑀧𑀲𑁆𑀲𑀢𑀻’’𑀢𑀺𑀆𑀤𑀺. 𑀦 𑀘𑁂𑀢𑀁 𑀓𑀸𑀮𑀦𑁆𑀢𑀭𑀤𑀲𑁆𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀬𑁄 𑀦𑀼 𑀔𑁄, 𑀆𑀯𑀼𑀲𑁄, 𑀤𑀼𑀓𑁆𑀔𑀁 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀲𑀫𑀼𑀤𑀬𑀫𑁆𑀧𑀺 ¶ …𑀧𑁂… 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀫𑁆𑀧𑀺 𑀲𑁄 𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁧𑁦𑁦) 𑀏𑀓𑀘𑁆𑀘𑀤𑀲𑁆𑀲𑀦𑀲𑀫𑀗𑁆𑀕𑀺𑀦𑁄 𑀅𑀜𑁆𑀜𑀲𑀘𑁆𑀘𑀤𑀲𑁆𑀲𑀦𑀲𑀫𑀗𑁆𑀕𑀺𑀪𑀸𑀯𑀯𑀺𑀘𑀸𑀭𑀡𑀸𑀬𑀁 𑀢𑀤𑀢𑁆𑀣𑀲𑀸𑀥𑀦𑀢𑁆𑀣𑀁 𑀆𑀬𑀲𑁆𑀫𑀢𑀸 𑀕𑀯𑀫𑁆𑀧𑀢𑀺𑀢𑁆𑀣𑁂𑀭𑁂𑀦 𑀆𑀪𑀢𑀢𑁆𑀢𑀸, 𑀧𑀘𑁆𑀘𑁂𑀓𑀜𑁆𑀘 𑀲𑀘𑁆𑀘𑀢𑁆𑀢𑀬𑀤𑀲𑁆𑀲𑀦𑀲𑁆𑀲 𑀬𑁄𑀚𑀺𑀢𑀢𑁆𑀢𑀸, 𑀅𑀜𑁆𑀜𑀣𑀸 𑀧𑀼𑀭𑀺𑀫𑀤𑀺𑀝𑁆𑀞𑀲𑁆𑀲 𑀧𑀼𑀦 𑀅𑀤𑀲𑁆𑀲𑀦𑀢𑁄 𑀲𑀫𑀼𑀤𑀬𑀸𑀤𑀺𑀤𑀲𑁆𑀲𑀦𑀫𑀬𑁄𑀚𑀦𑀺𑀬𑀁 𑀲𑀺𑀬𑀸. 𑀦 𑀳𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀮𑁄𑀓𑀺𑀬𑀫𑀕𑁆𑀕𑁄 𑀯𑀺𑀬 𑀓𑀢𑀓𑀸𑀭𑀻𑀪𑀸𑀯𑁂𑀦 𑀧𑀯𑀢𑁆𑀢𑀢𑀺 𑀲𑀫𑀼𑀘𑁆𑀙𑁂𑀤𑀓𑀢𑁆𑀢𑀸, 𑀢𑀣𑀸 𑀬𑁄𑀚𑀦𑁂𑀦 𑀘 𑀲𑀩𑁆𑀩𑀤𑀲𑁆𑀲𑀦𑀁 𑀤𑀲𑁆𑀲𑀦𑀦𑁆𑀢𑀭𑀧𑀭𑀫𑀦𑁆𑀢𑀺 𑀤𑀲𑁆𑀲𑀦𑀸𑀦𑀼𑀧𑀭𑀫𑁄 𑀲𑀺𑀬𑀸𑀢𑀺 𑀏𑀯𑀁 𑀆𑀕𑀫𑀢𑁄 𑀬𑀼𑀢𑁆𑀢𑀺𑀢𑁄 𑀘 𑀦𑀸𑀦𑀸𑀪𑀺𑀲𑀫𑀬𑁄 𑀦 𑀬𑀼𑀚𑁆𑀚𑀢𑀻𑀢𑀺 𑀲𑀜𑁆𑀜𑀸𑀧𑁂𑀢𑀩𑁆𑀩𑁄. 𑀏𑀯𑀁 𑀘𑁂 𑀲𑀜𑁆𑀜𑀢𑁆𑀢𑀺𑀁 𑀕𑀘𑁆𑀙𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀕𑀘𑁆𑀙𑀢𑀺, 𑀅𑀪𑀺𑀥𑀫𑁆𑀫𑁂 (𑀓𑀣𑀸. 𑁨𑁭𑁪) 𑀑𑀥𑀺𑀲𑁄𑀓𑀣𑀸𑀬 𑀲𑀜𑁆𑀜𑀸𑀧𑁂𑀢𑀩𑁆𑀩𑁄𑀢𑀺.

𑀦𑀺𑀭𑁄𑀥𑀁 𑀆𑀭𑀫𑁆𑀫𑀡𑀢𑁄𑀢𑀺 𑀦𑀺𑀭𑁄𑀥𑀫𑁂𑀯 𑀆𑀭𑀫𑁆𑀫𑀡𑀢𑁄𑀢𑀺 𑀦𑀺𑀬𑀫𑁄 𑀕𑀳𑁂𑀢𑀩𑁆𑀩𑁄, 𑀦 𑀆𑀭𑀫𑁆𑀫𑀡𑀢𑁄𑀯𑀸𑀢𑀺. 𑀢𑁂𑀦 𑀦𑀺𑀭𑁄𑀥𑁂 𑀓𑀺𑀘𑁆𑀘𑀢𑁄𑀧𑀺 𑀧𑀝𑀺𑀯𑁂𑀥𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀲𑀘𑁆𑀘𑀸𑀦𑀁 𑀅𑀪𑀺𑀲𑀫𑀬𑁂. 𑀯𑀻𑀲𑀢𑀺𑀯𑀢𑁆𑀣𑀼𑀓𑀸𑀢𑀺𑀆𑀤𑀺 ‘‘𑀢𑀻𑀡𑀺 𑀲𑀜𑁆𑀜𑁄𑀚𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀁 𑀲𑀭𑀽𑀧𑀤𑀲𑁆𑀲𑀦𑀁. 𑀘𑀢𑀽𑀲𑀼 𑀆𑀲𑀯𑁂𑀲𑀽𑀢𑀺 𑀇𑀤𑀁 𑀅𑀪𑀺𑀥𑀫𑁆𑀫𑀦𑀬𑁂𑀦 𑀯𑀼𑀢𑁆𑀢𑀁, 𑀦 𑀲𑀼𑀢𑁆𑀢𑀦𑁆𑀢𑀦𑀬𑁂𑀦. 𑀦 𑀳𑀺 𑀲𑀼𑀢𑁆𑀢𑁂 𑀓𑀢𑁆𑀣𑀘𑀺 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀆𑀕𑀢𑀸 𑀅𑀢𑁆𑀣𑀺. 𑀬𑀤𑀺 𑀯𑀺𑀘𑀺𑀓𑀺𑀘𑁆𑀙𑀸 𑀦 𑀆𑀲𑀯𑁄, 𑀅𑀣 𑀓𑀲𑁆𑀫𑀸 ‘‘𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀯𑀺𑀘𑀺𑀓𑀺𑀘𑁆𑀙𑀸 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑁄, 𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀤𑀲𑁆𑀲𑀦𑀸 𑀧𑀳𑀸𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀤𑀲𑁆𑀲𑀦𑀸 𑀧𑀳𑀸𑀢𑀩𑁆𑀩𑀸’’𑀢𑀺𑀆𑀤𑀺. 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸𑀢𑀺 𑀏𑀢𑁂𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲 𑀯𑀺𑀬 𑀧𑀜𑁆𑀜𑀸𑀓𑁆𑀔𑀦𑁆𑀥𑁂 𑀓𑀺𑀘𑁆𑀘𑀲𑀪𑀸𑀕𑀢𑀸𑀬 𑀇𑀥 𑀯𑀺𑀘𑀺𑀓𑀺𑀘𑁆𑀙𑀸𑀬 𑀆𑀲𑀯𑀲𑀗𑁆𑀕𑀳𑁄 𑀓𑀢𑁄𑀢𑀺 𑀤𑀲𑁆𑀲𑁂𑀢𑀺.

𑀲𑀩𑁆𑀩𑁄 ¶ 𑀅𑀢𑁆𑀢𑀕𑁆𑀕𑀸𑀳𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀯𑀺𑀦𑀺𑀫𑀼𑀢𑁆𑀢𑁄 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 ‘‘𑀙𑀦𑁆𑀦𑀁 𑀤𑀺𑀝𑁆𑀞𑀻𑀦𑀁…𑀧𑁂… 𑀯𑀺𑀪𑀢𑁆𑀢𑀸’’𑀢𑀺. 𑀲𑀸 𑀳𑀺 𑀤𑀺𑀝𑁆𑀞𑀺 𑀏𑀓𑀲𑁆𑀫𑀺𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀲𑀦𑁆𑀢𑀸𑀦𑁂 𑀘 𑀞𑀺𑀢𑀁 𑀏𑀓𑀝𑁆𑀞𑀁, 𑀢𑀢𑁆𑀣 𑀧𑀞𑀫𑀁 𑀲𑀳𑀚𑀸𑀢𑁂𑀓𑀝𑁆𑀞𑀁, 𑀇𑀢𑀭𑀁 𑀧𑀳𑀸𑀦𑁂𑀓𑀝𑁆𑀞𑀁, 𑀢𑀤𑀼𑀪𑀬𑀫𑁆𑀧𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀤𑀺𑀝𑁆𑀞𑀸𑀲𑀯𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀣𑀸𑀧𑀻𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦, 𑀲𑀳𑀚𑀸𑀢𑁂𑀓𑀝𑁆𑀞𑀧𑀳𑀸𑀦𑁂𑀓𑀝𑁆𑀞𑀧𑁆𑀧𑀓𑀸𑀭𑁂𑀳𑀻𑀢𑀺 𑀅𑀢𑁆𑀣𑁄. 𑀅𑀯𑀲𑁂𑀲𑀸𑀢𑀺 𑀤𑀺𑀝𑁆𑀞𑀸𑀲𑀯𑀢𑁄 𑀅𑀯𑀲𑀺𑀝𑁆𑀞𑀸. 𑀢𑀬𑁄𑀧𑀺 𑀆𑀲𑀯𑀸𑀢𑀺 𑀓𑀸𑀫𑀸𑀲𑀯𑀪𑀯𑀸𑀲𑀯𑀅𑀯𑀺𑀚𑁆𑀚𑀸𑀲𑀯𑀸. 𑀢𑀣𑀸 𑀳𑀺 𑀧𑀼𑀩𑁆𑀩𑁂 ‘‘𑀘𑀢𑀽𑀲𑀼 𑀆𑀲𑀯𑁂𑀲𑀽’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀩𑀳𑀽 𑀏𑀯𑁂𑀢𑁆𑀣 𑀆𑀲𑀯𑀸 𑀧𑀳𑀸𑀢𑀩𑁆𑀩𑀸, 𑀢𑀲𑁆𑀫𑀸 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄 ‘‘𑀇𑀫𑁂 𑀯𑀼𑀘𑁆𑀘𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀆𑀲𑀯𑀸 𑀤𑀲𑁆𑀲𑀦𑀸 𑀧𑀳𑀸𑀢𑀩𑁆𑀩𑀸’’𑀢𑀺. 𑀧𑁄𑀭𑀸𑀡𑀸𑀦𑀦𑁆𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁, ‘‘𑀧𑀼𑀭𑀸𑀢𑀦𑀸𑀦𑀁 𑀫𑀚𑁆𑀛𑀺𑀫𑀪𑀸𑀡𑀓𑀸𑀦’’𑀦𑁆𑀢𑀺 𑀘 𑀯𑀤𑀦𑁆𑀢𑀺.

𑀤𑀲𑁆𑀲𑀦𑀸 𑀧𑀳𑀸𑀢𑀩𑁆𑀩𑀸𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀤𑀲𑁆𑀲𑀦𑀸𑀧𑀳𑀸𑀢𑀩𑁆𑀩𑀆𑀲𑀯𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀁𑀯𑀭𑀸𑀧𑀳𑀸𑀢𑀩𑁆𑀩𑀆𑀲𑀯𑀯𑀡𑁆𑀡𑀦𑀸

𑁨𑁨. 𑀲𑀁𑀯𑀭𑀸𑀤𑀻𑀳𑀻𑀢𑀺 ¶ 𑀲𑀁𑀯𑀭𑀧𑀝𑀺𑀲𑁂𑀯𑀦𑀅𑀥𑀺𑀯𑀸𑀲𑀦𑀧𑀭𑀺𑀯𑀚𑁆𑀚𑀦𑀯𑀺𑀦𑁄𑀤𑀦𑁂𑀳𑀺. 𑀲𑀩𑁆𑀩𑁂𑀲𑀫𑁆𑀧𑀻𑀢𑀺 𑀘𑀢𑀼𑀦𑁆𑀦𑀫𑁆𑀧𑀺 𑀅𑀭𑀺𑀬𑀫𑀕𑁆𑀕𑀸𑀦𑀁. 𑀅𑀬𑀦𑁆𑀢𑀺 𑀲𑀁𑀯𑀭𑀸𑀧𑀳𑀸𑀢𑀩𑁆𑀩𑀸𑀤𑀺𑀓𑀣𑀸 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀳𑀺 𑀳𑁂𑀝𑁆𑀞𑀸 ‘‘𑀉𑀧𑀓𑁆𑀓𑀺𑀮𑁂𑀲𑀯𑀺𑀲𑁄𑀥𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀆𑀲𑀯𑀓𑁆𑀔𑀬𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 𑀧𑀬𑁄𑀚𑀦𑀁 𑀯𑀼𑀢𑁆𑀢𑀁. 𑀦 𑀳𑀺 𑀲𑀓𑁆𑀓𑀸 𑀆𑀤𑀺𑀢𑁄 𑀏𑀯 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀼𑀁, 𑀅𑀣 𑀔𑁄 𑀲𑀫𑀸𑀤𑀺𑀦𑁆𑀦𑀲𑀻𑀮𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 ‘‘𑀲𑀗𑁆𑀔𑀸𑀬𑁂𑀓𑀁 𑀧𑀝𑀺𑀲𑁂𑀯𑀢𑀺, 𑀲𑀗𑁆𑀔𑀸𑀬𑁂𑀓𑀁 𑀅𑀥𑀺𑀯𑀸𑀲𑁂𑀢𑀺, 𑀲𑀗𑁆𑀔𑀸𑀬𑁂𑀓𑀁 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀗𑁆𑀔𑀸𑀬𑁂𑀓𑀁 𑀯𑀺𑀦𑁄𑀤𑁂𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁪𑁮; 𑀫. 𑀦𑀺. 𑁨.𑁧𑁬𑁮) 𑀏𑀯𑀁 𑀯𑀼𑀢𑁆𑀢𑀁 𑀘𑀢𑀼𑀭𑀸𑀧𑀲𑁆𑀲𑁂𑀦𑀧𑀝𑀺𑀧𑀢𑁆𑀢𑀺𑀁 𑀧𑀝𑀺𑀧𑀚𑁆𑀚𑀫𑀸𑀦𑁄 𑀲𑀫𑁆𑀫𑀲𑀦𑀯𑀺𑀥𑀺𑀁 𑀑𑀢𑀭𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀆𑀲𑀯𑁂 𑀔𑁂𑀧𑁂𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀅𑀦𑀼𑀧𑀼𑀩𑁆𑀩𑀦𑀺𑀦𑁆𑀦𑁄 𑀅𑀦𑀼𑀧𑀼𑀩𑁆𑀩𑀧𑁄𑀡𑁄 𑀅𑀦𑀼𑀧𑀼𑀩𑁆𑀩𑀧𑀩𑁆𑀪𑀸𑀭𑁄, 𑀦 𑀆𑀬𑀢𑀓𑁂𑀦𑁂𑀯 𑀧𑀧𑀸𑀢𑁄, 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀅𑀦𑀼𑀧𑀼𑀩𑁆𑀩𑀲𑀺𑀓𑁆𑀔𑀸 𑀅𑀦𑀼𑀧𑀼𑀩𑁆𑀩𑀓𑀺𑀭𑀺𑀬𑀸 𑀅𑀦𑀼𑀧𑀼𑀩𑁆𑀩𑀧𑀝𑀺𑀧𑀤𑀸, 𑀦 𑀆𑀬𑀢𑀓𑁂𑀦𑁂𑀯 𑀅𑀜𑁆𑀜𑀸𑀧𑀝𑀺𑀯𑁂𑀥𑁄’’𑀢𑀺 (𑀅. 𑀦𑀺. 𑁮.𑁨𑁦; 𑀉𑀤𑀸. 𑁪𑁫; 𑀘𑀽𑀴𑀯. 𑁩𑁮𑁫).

𑀇𑀥𑀸𑀢𑀺 ¶ 𑀅𑀬𑀁 𑀇𑀥-𑀲𑀤𑁆𑀤𑁄 𑀲𑀩𑁆𑀩𑀸𑀓𑀸𑀭𑀢𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀁𑀯𑀼𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀦𑀺𑀲𑁆𑀲𑀬𑀪𑀽𑀢𑀲𑀸𑀲𑀦𑀧𑀭𑀺𑀤𑀻𑀧𑀦𑁄, 𑀅𑀜𑁆𑀜𑀲𑀸𑀲𑀦𑀲𑁆𑀲 𑀢𑀣𑀸𑀪𑀸𑀯𑀧𑀝𑀺𑀲𑁂𑀥𑀦𑁄 𑀘𑀸𑀢𑀺 𑀯𑀼𑀢𑁆𑀢𑀁 ‘‘𑀇𑀫𑀲𑁆𑀫𑀺𑀁 𑀲𑀸𑀲𑀦𑁂’’𑀢𑀺. 𑀆𑀤𑀻𑀦𑀯𑀧𑀝𑀺𑀲𑀗𑁆𑀔𑀸𑀢𑀺 𑀆𑀤𑀻𑀦𑀯𑀧𑀘𑁆𑀘𑀯𑁂𑀓𑁆𑀔𑀡𑀸. 𑀲𑀫𑁆𑀧𑀮𑀺𑀫𑀝𑁆𑀞𑀦𑁆𑀢𑀺 (𑀅. 𑀦𑀺. 𑀝𑀻. 𑁩.𑁬.𑁫𑁮) 𑀖𑀁𑀲𑀺𑀢𑀁. 𑀅𑀦𑀼𑀩𑁆𑀬𑀜𑁆𑀚𑀦𑀲𑁄𑀢𑀺 𑀳𑀢𑁆𑀣𑀧𑀸𑀤𑀳𑀲𑀺𑀢𑀓𑀣𑀺𑀢𑀯𑀺𑀮𑁄𑀓𑀺𑀢𑀸𑀤𑀺𑀧𑁆𑀧𑀓𑀸𑀭𑀪𑀸𑀕𑀲𑁄. 𑀢𑀜𑁆𑀳𑀺 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄 𑀓𑀺𑀮𑁂𑀲𑀸𑀦𑀁 𑀅𑀦𑀼 𑀅𑀦𑀼 𑀩𑁆𑀬𑀜𑁆𑀚𑀦𑀢𑁄 ‘‘𑀅𑀦𑀼𑀩𑁆𑀬𑀜𑁆𑀚𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀸𑀤𑀺𑀓𑀲𑁆𑀲 𑀯𑀸 𑀓𑀺𑀮𑁂𑀲𑀯𑀢𑁆𑀣𑀼𑀪𑀽𑀢𑀲𑁆𑀲 𑀯𑀸 𑀦𑀺𑀫𑀺𑀢𑁆𑀢𑀲𑁆𑀲 𑀕𑀸𑀳𑁄. 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀦𑀬𑁂𑀦𑀸𑀢𑀺 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑁂 (𑀲𑀁. 𑀦𑀺. 𑁪.𑁨𑁮; 𑀫𑀳𑀸𑀯. 𑁫𑁪) 𑀆𑀕𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸 𑀆𑀤𑀻𑀦𑀯𑀧𑀝𑀺𑀲𑀗𑁆𑀔𑀸𑀢𑀺 𑀬𑁄𑀚𑀦𑀸. 𑀬𑀣𑀸 𑀇𑀢𑁆𑀣𑀺𑀬𑀸 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁, 𑀦 𑀏𑀯𑀫𑀺𑀤𑀁, 𑀇𑀤𑀁 𑀧𑀦 𑀘𑀓𑁆𑀔𑀼𑀫𑁂𑀯 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀦𑁆𑀢𑀺. 𑀢𑀺𑀢𑁆𑀣𑀓𑀸𑀓𑁄 𑀯𑀺𑀬𑀸𑀢𑀺 𑀢𑀺𑀢𑁆𑀣𑁂 𑀓𑀸𑀓𑁄 𑀢𑀺𑀢𑁆𑀣𑀓𑀸𑀓𑁄, 𑀦𑀤𑀺𑀬𑀸 𑀲𑀫𑀢𑀺𑀓𑁆𑀓𑀫𑀦𑀢𑀺𑀢𑁆𑀣𑁂 𑀦𑀺𑀬𑀢𑀝𑁆𑀞𑀺𑀢𑀺𑀓𑁄. 𑀆𑀯𑀸𑀝𑀓𑀘𑁆𑀙𑀧𑁄𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀏𑀯𑀁 𑀢𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀦𑀺𑀬𑀢𑀝𑁆𑀞𑀸𑀦𑁄 𑀲𑀁𑀯𑀭𑁄 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑀁𑀯𑀭𑁄. 𑀫𑀼𑀝𑁆𑀞𑀲𑁆𑀲𑀘𑁆𑀘𑀁 𑀲𑀢𑀺𑀧𑀝𑀺𑀧𑀓𑁆𑀔𑀸 𑀅𑀓𑀼𑀲𑀮𑀥𑀫𑁆𑀫𑀸. 𑀬𑀤𑀺𑀧𑀺 𑀅𑀜𑁆𑀜𑀢𑁆𑀣 𑀅𑀲𑀗𑁆𑀔𑁂𑀬𑁆𑀬𑀫𑁆𑀧𑀺 𑀪𑀯𑀗𑁆𑀕𑀘𑀺𑀢𑁆𑀢𑀁 𑀦𑀺𑀭𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀲𑀸𑀤𑀖𑀝𑁆𑀝𑀦𑀸𑀯𑀚𑁆𑀚𑀦𑀼𑀧𑁆𑀧𑀸𑀤𑀸𑀦𑀁 𑀧𑀦 𑀅𑀦𑁆𑀢𑀭𑁂 𑀤𑁆𑀯𑁂 𑀏𑀯 𑀪𑀯𑀗𑁆𑀕𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀬𑀁 𑀘𑀺𑀢𑁆𑀢𑀦𑀺𑀬𑀸𑀫𑁄𑀢𑀺 𑀆𑀳 𑀪𑀯𑀗𑁆𑀕𑁂 ‘‘𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑁂’’𑀢𑀺.

𑀚𑀯𑀦𑀓𑁆𑀔𑀡𑁂 ¶ 𑀧𑀦 𑀲𑀘𑁂 𑀤𑀼𑀲𑁆𑀲𑀻𑀮𑁆𑀬𑀁 𑀯𑀸𑀢𑀺𑀆𑀤𑀺 (𑀯𑀺𑀲𑀼𑀤𑁆𑀥𑀺. 𑀝𑀻. 𑁧.𑁧𑁫; 𑀥. 𑀲. 𑀫𑀽𑀮𑀝𑀻. 𑁧𑁩𑁫𑁨) 𑀧𑀼𑀦 𑀅𑀯𑀘𑀦𑀢𑁆𑀣𑀁 𑀇𑀥𑁂𑀯 𑀲𑀩𑁆𑀩𑀁 𑀯𑀼𑀢𑁆𑀢𑀦𑁆𑀢𑀺 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀁. 𑀦 𑀳𑀺 𑀧𑀜𑁆𑀘𑀤𑁆𑀯𑀸𑀭𑁂 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀲𑀗𑁆𑀔𑀸𑀢𑁄 𑀤𑀼𑀲𑁆𑀲𑀻𑀮𑁆𑀬𑀲𑀁𑀯𑀭𑁄 𑀅𑀢𑁆𑀣𑀻𑀢𑀺 𑀲𑁄 𑀫𑀦𑁄𑀤𑁆𑀯𑀸𑀭𑀯𑀲𑁂𑀦, 𑀇𑀢𑀭𑁄 𑀙𑀦𑁆𑀦𑀫𑁆𑀧𑀺 𑀤𑁆𑀯𑀸𑀭𑀸𑀦𑀁 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑁄. 𑀫𑀼𑀝𑁆𑀞𑀲𑁆𑀲𑀘𑁆𑀘𑀸𑀤𑀻𑀦𑀜𑁆𑀳𑀺 𑀲𑀢𑀺𑀧𑀝𑀺𑀧𑀓𑁆𑀔𑀸𑀤𑀺𑀮𑀓𑁆𑀔𑀡𑀸𑀦𑀁 𑀅𑀓𑀼𑀲𑀮𑀥𑀫𑁆𑀫𑀸𑀦𑀁 𑀲𑀺𑀬𑀸 𑀧𑀜𑁆𑀘𑀤𑁆𑀯𑀸𑀭𑁂 𑀉𑀧𑁆𑀧𑀢𑁆𑀢𑀺, 𑀦 𑀢𑁆𑀯𑁂𑀯 𑀓𑀸𑀬𑀺𑀓𑀯𑀸𑀘𑀲𑀺𑀓𑀯𑀻𑀢𑀺𑀓𑁆𑀓𑀫𑀪𑀽𑀢𑀲𑁆𑀲 𑀤𑀼𑀲𑁆𑀲𑀻𑀮𑁆𑀬𑀲𑁆𑀲 𑀢𑀢𑁆𑀣 𑀉𑀧𑁆𑀧𑀢𑁆𑀢𑀺 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑀸𑀦𑀁 𑀅𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀢𑁆𑀢𑀸𑀢𑀺.

𑀬𑀣𑀸 𑀓𑀺𑀦𑁆𑀢𑀺 𑀬𑁂𑀦 𑀧𑀓𑀸𑀭𑁂𑀦 𑀚𑀯𑀦𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀅𑀲𑀁𑀯𑀭𑁄 ‘‘𑀘𑀓𑁆𑀔𑀼𑀤𑁆𑀯𑀸𑀭𑁂 𑀅𑀲𑀁𑀯𑀭𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀦𑀺𑀤𑀲𑁆𑀲𑀦𑀁 𑀓𑀺𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸𑀢𑀺𑀆𑀤𑀺𑀦𑀸 𑀦𑀕𑀭𑀤𑁆𑀯𑀸𑀭𑁂 𑀅𑀲𑀁𑀯𑀭𑁂 𑀲𑀢𑀺 𑀢𑀁𑀲𑀫𑁆𑀩𑀦𑁆𑀥𑀸𑀦𑀁 𑀖𑀭𑀸𑀤𑀻𑀦𑀁 𑀅𑀲𑀁𑀯𑀼𑀢𑀢𑀸 ¶ 𑀯𑀺𑀬 𑀚𑀯𑀦𑁂 𑀅𑀲𑀁𑀯𑀭𑁂 𑀲𑀢𑀺 𑀢𑀁𑀲𑀫𑁆𑀩𑀦𑁆𑀥𑀸𑀦𑀁 𑀤𑁆𑀯𑀸𑀭𑀸𑀤𑀻𑀦𑀁 𑀅𑀲𑀁𑀯𑀼𑀢𑀢𑀸𑀢𑀺 𑀅𑀜𑁆𑀜𑀸𑀲𑀁𑀯𑀭𑁂 𑀅𑀜𑁆𑀜𑀸𑀲𑀁𑀯𑀼𑀢𑀢𑀸𑀲𑀸𑀫𑀜𑁆𑀜𑀫𑁂𑀯 𑀦𑀺𑀤𑀲𑁆𑀲𑁂𑀢𑀺, 𑀦 𑀧𑀼𑀩𑁆𑀩𑀸𑀧𑀭𑀲𑀸𑀫𑀜𑁆𑀜𑀁, 𑀅𑀦𑁆𑀢𑁄𑀩𑀳𑀺𑀲𑀸𑀫𑀜𑁆𑀜𑀁 𑀯𑀸. 𑀲𑀫𑁆𑀩𑀦𑁆𑀥𑁄 𑀘 𑀚𑀯𑀦𑁂𑀦 𑀤𑁆𑀯𑀸𑀭𑀸𑀤𑀻𑀦𑀁 𑀏𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀏𑀯 𑀤𑀝𑁆𑀞𑀩𑁆𑀩𑁄. 𑀧𑀘𑁆𑀘𑀬𑀪𑀸𑀯𑁂𑀦 𑀧𑀼𑀭𑀺𑀫𑀦𑀺𑀧𑁆𑀨𑀦𑁆𑀦𑀁 𑀚𑀯𑀦𑀓𑀸𑀮𑁂 𑀅𑀲𑀦𑁆𑀢𑀫𑁆𑀧𑀺 𑀪𑀯𑀗𑁆𑀕𑀸𑀤𑀺 𑀨𑀮𑀦𑀺𑀧𑁆𑀨𑀢𑁆𑀢𑀺𑀬𑀸 𑀘𑀓𑁆𑀔𑀸𑀤𑀺 𑀯𑀺𑀬 𑀲𑀦𑁆𑀢𑀁𑀬𑁂𑀯 𑀦𑀸𑀫. 𑀦 𑀳𑀺 𑀥𑀭𑀫𑀸𑀦𑀁𑀬𑁂𑀯 ‘‘𑀲𑀦𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀲𑀢𑀺 𑀤𑁆𑀯𑀸𑀭𑀪𑀯𑀗𑁆𑀕𑀸𑀤𑀺𑀓𑁂 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀚𑀯𑀦𑀁 𑀩𑀸𑀳𑀺𑀭𑀁 𑀯𑀺𑀬 𑀓𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑀲𑀫𑀸𑀦𑀁 𑀯𑀼𑀢𑁆𑀢𑀁. 𑀇𑀢𑀭𑀜𑁆𑀘 𑀅𑀦𑁆𑀢𑁄𑀦𑀕𑀭𑀖𑀭𑀸𑀤𑀺𑀲𑀫𑀸𑀦𑀁. 𑀚𑀯𑀦𑀲𑁆𑀲 𑀳𑀺 𑀧𑀭𑀫𑀢𑁆𑀣𑀢𑁄 𑀅𑀲𑀢𑀺𑀧𑀺 𑀩𑀸𑀳𑀺𑀭𑀪𑀸𑀯𑁂 𑀇𑀢𑀭𑀲𑁆𑀲 𑀘 𑀅𑀩𑁆𑀪𑀦𑁆𑀢𑀭𑀪𑀸𑀯𑁂 ‘‘𑀧𑀪𑀲𑁆𑀲𑀭𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁, 𑀢𑀜𑁆𑀘 𑀔𑁄 𑀆𑀕𑀦𑁆𑀢𑀼𑀓𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞’’𑀦𑁆𑀢𑀺 (𑀅. 𑀦𑀺. 𑁧.𑁪𑁯) 𑀆𑀤𑀺𑀯𑀘𑀦𑀢𑁄 𑀆𑀕𑀦𑁆𑀢𑀼𑀓𑀪𑀽𑀢𑀲𑁆𑀲 𑀓𑀤𑀸𑀘𑀺 𑀓𑀤𑀸𑀘𑀺 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀚𑀯𑀦𑀲𑁆𑀲 𑀩𑀸𑀳𑀺𑀭𑀪𑀸𑀯𑁄, 𑀢𑀩𑁆𑀩𑀺𑀥𑀼𑀭𑀲𑀪𑀸𑀯𑀲𑁆𑀲 𑀇𑀢𑀭𑀲𑁆𑀲 𑀅𑀩𑁆𑀪𑀦𑁆𑀢𑀭𑀪𑀸𑀯𑁄 𑀘 𑀧𑀭𑀺𑀬𑀸𑀬𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀚𑀯𑀦𑁂 𑀯𑀸 𑀅𑀲𑀁𑀯𑀭𑁂 𑀉𑀧𑁆𑀧𑀦𑁆𑀦𑁂 𑀢𑀢𑁄 𑀧𑀭𑀁 𑀤𑁆𑀯𑀸𑀭𑀪𑀯𑀗𑁆𑀕𑀸𑀤𑀻𑀦𑀁 𑀅𑀲𑀁𑀯𑀭𑀳𑁂𑀢𑀼𑀪𑀸𑀯𑀸𑀧𑀢𑁆𑀢𑀺𑀢𑁄 𑀦𑀕𑀭𑀤𑁆𑀯𑀸𑀭𑀲𑀤𑀺𑀲𑁂𑀦 𑀚𑀯𑀦𑁂𑀦 𑀧𑀯𑀺𑀲𑀺𑀢𑁆𑀯𑀸 𑀤𑀼𑀲𑁆𑀲𑀻𑀮𑁆𑀬𑀸𑀤𑀺𑀘𑁄𑀭𑀸𑀦𑀁 𑀤𑁆𑀯𑀸𑀭𑀪𑀯𑀗𑁆𑀕𑀸𑀤𑀻𑀲𑀼 𑀫𑀼𑀲𑀦𑀁 𑀓𑀼𑀲𑀮𑀪𑀡𑁆𑀟𑀯𑀺𑀦𑀸𑀲𑀦𑀁 𑀤𑀝𑁆𑀞𑀩𑁆𑀩𑀁. 𑀉𑀧𑁆𑀧𑀦𑁆𑀦𑁂 𑀳𑀺 𑀅𑀲𑀁𑀯𑀭𑁂 𑀤𑁆𑀯𑀸𑀭𑀸𑀤𑀻𑀦𑀁 𑀢𑀲𑁆𑀲 𑀳𑁂𑀢𑀼𑀪𑀸𑀯𑁄 𑀧𑀜𑁆𑀜𑀸𑀬𑀢𑀺, 𑀲𑁄 𑀘 𑀉𑀧𑁆𑀧𑀚𑁆𑀚𑀫𑀸𑀦𑁄𑀬𑁂𑀯 𑀤𑁆𑀯𑀸𑀭𑀸𑀤𑀻𑀦𑀁 𑀲𑀁𑀯𑀭𑀽𑀧𑀦𑀺𑀲𑁆𑀲𑀬𑀪𑀸𑀯𑀁 𑀧𑀝𑀺𑀩𑀸𑀳𑁂𑀦𑁆𑀢𑁄𑀬𑁂𑀯 𑀧𑀯𑀢𑁆𑀢𑀢𑀻𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀲𑀁𑀯𑀭𑀸𑀤𑀻𑀦𑀁 𑀧𑀯𑀢𑁆𑀢𑀺𑀦𑀬𑁄. 𑀧𑀜𑁆𑀘𑀤𑁆𑀯𑀸𑀭𑁂 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀬𑀣𑀸𑀧𑀘𑁆𑀘𑀬𑀁 𑀅𑀓𑀼𑀲𑀮𑀚𑀯𑀦𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀺𑀡𑁆𑀡𑁂 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀁 𑀢𑀁𑀬𑁂𑀯 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀢𑀺, 𑀧𑀼𑀦 𑀢𑀲𑁆𑀫𑀺𑀁𑀬𑁂𑀯 𑀤𑁆𑀯𑀸𑀭𑁂 ‘‘𑀇𑀢𑁆𑀣𑀻 𑀧𑀼𑀭𑀺𑀲𑁄’’𑀢𑀺𑀆𑀤𑀺𑀦𑀸 𑀯𑀺𑀲𑀬𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀚𑀯𑀦𑀁 𑀪𑀯𑀗𑁆𑀕𑀁 𑀑𑀢𑀭𑀢𑀺, 𑀧𑀼𑀦 𑀯𑀸𑀭𑁂 𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀚𑀯𑀦𑀁 𑀚𑀯𑀢𑀺, 𑀧𑀼𑀦𑀧𑀺 𑀬𑀤𑀺 𑀢𑀸𑀤𑀺𑀲𑀁 𑀆𑀭𑀫𑁆𑀫𑀡𑀁 𑀆𑀧𑀸𑀣𑀫𑀸𑀕𑀘𑁆𑀙𑀢𑀺, 𑀢𑀁𑀲𑀤𑀺𑀲𑀫𑁂𑀯 𑀧𑀜𑁆𑀘𑀤𑁆𑀯𑀸𑀭𑁂 𑀭𑀽𑀧𑀸𑀤𑀻𑀲𑀼 𑀚𑀯𑀦𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀏𑀯𑀫𑁂𑀯 𑀚𑀯𑀦𑁂 𑀤𑀼𑀲𑁆𑀲𑀻𑀮𑁆𑀬𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀢𑀲𑁆𑀫𑀺𑀁 𑀅𑀲𑀁𑀯𑀭𑁂 𑀲𑀢𑀺 𑀤𑁆𑀯𑀸𑀭𑀫𑁆𑀧𑀺 𑀅𑀕𑀼𑀢𑁆𑀢’’𑀦𑁆𑀢𑀺𑀆𑀤𑀺. 𑀅𑀬𑀁 𑀢𑀸𑀯 𑀅𑀲𑀁𑀯𑀭𑀧𑀓𑁆𑀔𑁂 𑀅𑀢𑁆𑀣𑀯𑀡𑁆𑀡𑀦𑀸.

𑀲𑀁𑀯𑀭𑀧𑀓𑁆𑀔𑁂𑀧𑀺 ¶ 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀁𑀯𑀭𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀲𑀁𑀯𑀼𑀢𑁄𑀢𑀺 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀉𑀧𑁂𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀏𑀓𑀚𑁆𑀛𑀁 𑀓𑀢𑁆𑀯𑀸𑀢𑀺 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄’’𑀢𑀺 𑀧𑀤𑀜𑁆𑀘 𑀅𑀢𑁆𑀣𑀢𑁄 𑀅𑀪𑀺𑀦𑁆𑀦𑀁 𑀲𑀫𑀸𑀦𑀁 𑀓𑀢𑁆𑀯𑀸. 𑀅𑀬𑀫𑁂𑀯 𑀘𑁂𑀢𑁆𑀣 𑀅𑀢𑁆𑀣𑁄 𑀲𑀼𑀦𑁆𑀤𑀭𑀢𑀭𑁄 ¶ 𑀉𑀧𑀭𑀺𑀧𑀸𑀴𑀺𑀬𑀸 𑀲𑀁𑀲𑀦𑁆𑀤𑀦𑀢𑁄. 𑀢𑁂𑀦𑀸𑀳 ‘‘𑀢𑀣𑀸𑀳𑀻’’𑀢𑀺𑀆𑀤𑀺. 𑀬𑀦𑁆𑀢𑀺 𑀆𑀤𑁂𑀲𑁄𑀢𑀺 𑀇𑀫𑀺𑀦𑀸 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀲𑀤𑁆𑀥𑀺𑀁 𑀯𑀘𑀦𑀯𑀺𑀧𑀮𑁆𑀮𑀸𑀲𑁄 𑀓𑀢𑁄𑀢𑀺 𑀤𑀲𑁆𑀲𑁂𑀢𑀺, 𑀦𑀺𑀧𑀸𑀢𑀧𑀤𑀁 𑀯𑀸 𑀏𑀢𑀁 𑀧𑀘𑁆𑀘𑀢𑁆𑀢𑀧𑀼𑀣𑀼𑀯𑀘𑀦𑀢𑁆𑀣𑀁. 𑀯𑀺𑀖𑀸𑀢𑀓𑀭𑀸𑀢𑀺 𑀘𑀺𑀢𑁆𑀢𑀯𑀺𑀖𑀸𑀢𑀓𑀭𑀡𑀸 𑀘𑀺𑀢𑁆𑀢𑀤𑀼𑀓𑁆𑀔𑀦𑀺𑀩𑁆𑀩𑀢𑁆𑀢𑀓𑀸 𑀘. 𑀬𑀣𑀸𑀯𑀼𑀢𑁆𑀢𑀓𑀺𑀮𑁂𑀲𑀳𑁂𑀢𑀼𑀓𑀸 𑀤𑀸𑀳𑀸𑀦𑀼𑀩𑀦𑁆𑀥𑀸 𑀯𑀺𑀧𑀸𑀓𑀸 𑀏𑀯 𑀯𑀺𑀧𑀸𑀓𑀧𑀭𑀺𑀴𑀸𑀳𑀸. 𑀬𑀣𑀸 𑀧𑀦𑁂𑀢𑁆𑀣 𑀆𑀲𑀯𑀸 𑀅𑀜𑁆𑀜𑁂 𑀘 𑀯𑀺𑀖𑀸𑀢𑀓𑀭𑀸 𑀓𑀺𑀮𑁂𑀲𑀯𑀺𑀧𑀸𑀓𑀧𑀭𑀺𑀴𑀸𑀳𑀸 𑀲𑀫𑁆𑀪𑀯𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀓𑁆𑀔𑀼𑀤𑁆𑀯𑀸𑀭𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀏𑀢𑁆𑀣 𑀘 𑀲𑀁𑀯𑀭𑀡𑀽𑀧𑀸𑀬𑁄, 𑀲𑀁𑀯𑀭𑀺𑀢𑀩𑁆𑀩𑀁, 𑀲𑀁𑀯𑀭𑁄, 𑀬𑀢𑁄 𑀲𑁄 𑀲𑀁𑀯𑀭𑁄, 𑀬𑀢𑁆𑀣 𑀲𑀁𑀯𑀭𑁄, 𑀬𑀜𑁆𑀘 𑀲𑀁𑀯𑀭𑀨𑀮𑀦𑁆𑀢𑀺 𑀅𑀬𑀁 𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀣𑀁? 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄𑀢𑀺 𑀳𑀺 𑀲𑀁𑀯𑀭𑀡𑀽𑀧𑀸𑀬𑁄. 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀲𑀁𑀯𑀭𑀺𑀢𑀩𑁆𑀩𑀁. 𑀲𑀁𑀯𑀭𑀕𑁆𑀕𑀳𑀡𑁂𑀦 𑀕𑀳𑀺𑀢𑀸 𑀲𑀢𑀺 𑀲𑀁𑀯𑀭𑁄. 𑀅𑀲𑀁𑀯𑀼𑀢𑀲𑁆𑀲𑀸𑀢𑀺 𑀲𑀁𑀯𑀭𑀡𑀸𑀯𑀥𑀺. 𑀅𑀲𑀁𑀯𑀭𑀢𑁄 𑀳𑀺 𑀲𑀁𑀯𑀭𑀡𑀁. 𑀲𑀁𑀯𑀭𑀺𑀢𑀩𑁆𑀩𑀕𑁆𑀕𑀳𑀡𑁂𑀦 𑀲𑀺𑀤𑁆𑀥𑁄 𑀇𑀥 𑀲𑀁𑀯𑀭𑀯𑀺𑀲𑀬𑁄. 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀜𑁆𑀳𑀺 𑀲𑀁𑀯𑀭𑀜𑀸𑀡𑀁 𑀭𑀽𑀧𑀸𑀭𑀫𑁆𑀫𑀡𑁂 𑀲𑀁𑀯𑀭𑀻𑀬𑀢𑀻𑀢𑀺 𑀅𑀯𑀼𑀢𑁆𑀢𑀲𑀺𑀤𑁆𑀥𑁄𑀬𑀫𑀢𑁆𑀣𑁄. 𑀆𑀲𑀯𑀢𑀦𑁆𑀦𑀺𑀫𑀺𑀢𑁆𑀢𑀓𑀺𑀮𑁂𑀲𑀸𑀤𑀺𑀧𑀭𑀺𑀴𑀸𑀳𑀸𑀪𑀸𑀯𑁄 𑀨𑀮𑀁. 𑀏𑀯𑀁 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀩𑁆𑀩𑀢𑁆𑀣𑁂𑀯𑀸𑀢𑀺 𑀫𑀦𑁄𑀤𑁆𑀯𑀸𑀭𑁂 𑀧𑀜𑁆𑀘𑀤𑁆𑀯𑀸𑀭𑁂 𑀘𑀸𑀢𑀺 𑀲𑀩𑁆𑀩𑀲𑁆𑀫𑀺𑀁 𑀤𑁆𑀯𑀸𑀭𑁂.

𑀲𑀁𑀯𑀭𑀸𑀧𑀳𑀸𑀢𑀩𑁆𑀩𑀆𑀲𑀯𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀝𑀺𑀲𑁂𑀯𑀦𑀸𑀧𑀳𑀸𑀢𑀩𑁆𑀩𑀆𑀲𑀯𑀯𑀡𑁆𑀡𑀦𑀸

𑁨𑁩. 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀘𑀻𑀯𑀭𑀦𑁆𑀢𑀺𑀆𑀤𑀻𑀲𑀼 ‘‘𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀡𑀫𑁂𑀯 𑀬𑁄𑀦𑀺𑀲𑁄 𑀧𑀝𑀺𑀲𑀗𑁆𑀔𑀸. 𑀈𑀤𑀺𑀲𑀦𑁆𑀢𑀺 𑀏𑀯𑀭𑀽𑀧𑀁 𑀇𑀝𑁆𑀞𑀸𑀭𑀫𑁆𑀫𑀡𑀁. 𑀪𑀯𑀧𑀢𑁆𑀣𑀦𑀸𑀬 𑀅𑀲𑁆𑀲𑀸𑀤𑀬𑀢𑁄𑀢𑀺 𑀪𑀯𑀧𑀢𑁆𑀣𑀦𑀸𑀫𑀼𑀔𑁂𑀦 𑀪𑀸𑀯𑀺𑀢𑀁 𑀆𑀭𑀫𑁆𑀫𑀡𑀁 𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲. 𑀘𑀻𑀯𑀭𑀦𑁆𑀢𑀺 𑀦𑀺𑀯𑀸𑀲𑀦𑀸𑀤𑀺 𑀬𑀁 𑀓𑀺𑀜𑁆𑀘𑀺 𑀘𑀻𑀯𑀭𑀁. 𑀧𑀝𑀺𑀲𑁂𑀯𑀢𑀻𑀢𑀺 𑀦𑀺𑀯𑀸𑀲𑀦𑀸𑀤𑀺𑀯𑀲𑁂𑀦 𑀧𑀭𑀺𑀪𑀼𑀜𑁆𑀚𑀢𑀺. 𑀬𑀸𑀯𑀤𑁂𑀯𑀸𑀢𑀺 𑀧𑀬𑁄𑀚𑀦𑀧𑀭𑀺𑀫𑀸𑀡𑀦𑀺𑀬𑀫𑀦𑀁. 𑀲𑀻𑀢𑀧𑀝𑀺𑀖𑀸𑀢𑀸𑀤𑀺𑀬𑁂𑀯 𑀳𑀺 𑀬𑁄𑀕𑀺𑀦𑁄 𑀘𑀻𑀯𑀭𑀧𑀝𑀺𑀲𑁂𑀯𑀦𑁂 𑀧𑀬𑁄𑀚𑀦𑀁. 𑀲𑀻𑀢𑀲𑁆𑀲𑀸𑀢𑀺 𑀥𑀸𑀢𑀼𑀓𑁆𑀔𑁄𑀪𑀢𑁄 𑀯𑀸 𑀉𑀢𑀼𑀧𑀭𑀺𑀡𑀸𑀫𑀢𑁄 𑀯𑀸 𑀉𑀧𑁆𑀧𑀦𑁆𑀦𑀲𑀻𑀢𑀲𑁆𑀲. 𑀧𑀝𑀺𑀖𑀸𑀢𑀸𑀬𑀸𑀢𑀺 𑀧𑀝𑀺𑀩𑀸𑀳𑀦𑀢𑁆𑀣𑀁 𑀢𑀧𑁆𑀧𑀘𑁆𑀘𑀬𑀲𑁆𑀲 𑀯𑀺𑀓𑀸𑀭𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀁. 𑀉𑀡𑁆𑀳𑀲𑁆𑀲𑀸𑀢𑀺 𑀅𑀕𑁆𑀕𑀺𑀲𑀦𑁆𑀢𑀸𑀧𑀢𑁄 𑀉𑀧𑁆𑀧𑀦𑁆𑀦𑀲𑁆𑀲 𑀉𑀡𑁆𑀳𑀲𑁆𑀲. 𑀟𑀁𑀲𑀸𑀤𑀬𑁄 𑀧𑀸𑀓𑀝𑀸𑀬𑁂𑀯. 𑀧𑀼𑀦 𑀬𑀸𑀯𑀤𑁂𑀯𑀸𑀢𑀺 𑀦𑀺𑀬𑀢𑀧𑀬𑁄𑀚𑀦𑀧𑀭𑀺𑀫𑀸𑀡𑀦𑀺𑀬𑀫𑀦𑀁. 𑀦𑀺𑀬𑀢𑀜𑁆𑀳𑀺 𑀧𑀬𑁄𑀚𑀦𑀁 𑀘𑀻𑀯𑀭𑀧𑀝𑀺𑀲𑁂𑀯𑀦𑀲𑁆𑀲 𑀳𑀺𑀭𑀺𑀓𑁄𑀧𑀻𑀦𑀧𑀝𑀺𑀘𑁆𑀙𑀸𑀤𑀦𑀁, 𑀇𑀢𑀭𑀁 𑀓𑀤𑀸𑀘𑀺 𑀓𑀤𑀸𑀘𑀺 ¶ . 𑀳𑀺𑀭𑀺𑀓𑁄𑀧𑀻𑀦𑀦𑁆𑀢𑀺 𑀲𑀫𑁆𑀩𑀸𑀥𑀝𑁆𑀞𑀸𑀦𑀁 ¶ . 𑀬𑀲𑁆𑀫𑀺𑀜𑁆𑀳𑀺 𑀅𑀗𑁆𑀕𑁂 𑀯𑀺𑀯𑀝𑁂 𑀳𑀺𑀭𑀻𑀓𑀼𑀧𑁆𑀧𑀢𑀺 𑀯𑀺𑀦𑀲𑁆𑀲𑀢𑀺, 𑀢𑀁 𑀳𑀺𑀭𑀺𑀬𑀸 𑀓𑁄𑀧𑀦𑀢𑁄 𑀳𑀺𑀭𑀺𑀓𑁄𑀧𑀻𑀦𑀁, 𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁 𑀘𑀻𑀯𑀭𑀁 𑀧𑀝𑀺𑀲𑁂𑀯𑀢𑀺.

𑀧𑀺𑀡𑁆𑀟𑀧𑀸𑀢𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀆𑀳𑀸𑀭𑀁. 𑀲𑁄 𑀳𑀺 𑀧𑀺𑀡𑁆𑀟𑁄𑀮𑁆𑀬𑁂𑀦 𑀪𑀺𑀓𑁆𑀔𑀦𑀸𑀬 𑀧𑀢𑁆𑀢𑁂 𑀧𑀢𑀦𑀢𑁄 𑀢𑀢𑁆𑀣 𑀢𑀢𑁆𑀣 𑀮𑀤𑁆𑀥𑀪𑀺𑀓𑁆𑀔𑀸𑀧𑀺𑀡𑁆𑀟𑀸𑀦𑀁 𑀧𑀸𑀢𑁄 𑀲𑀦𑁆𑀦𑀺𑀧𑀸𑀢𑁄𑀢𑀺 ‘‘𑀧𑀺𑀡𑁆𑀟𑀧𑀸𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀦𑁂𑀯 𑀤𑀯𑀸𑀬𑀸𑀢𑀺 𑀦 𑀓𑀻𑀴𑀦𑀸𑀬. 𑀦 𑀫𑀤𑀸𑀬𑀸𑀢𑀺 𑀦 𑀩𑀮𑀫𑀤𑀫𑀸𑀦𑀫𑀤𑀧𑀼𑀭𑀺𑀲𑀫𑀤𑀢𑁆𑀣𑀁. 𑀦 𑀫𑀡𑁆𑀟𑀦𑀸𑀬𑀸𑀢𑀺 𑀦 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀧𑀻𑀡𑀦𑀪𑀸𑀯𑀢𑁆𑀣𑀁. 𑀦 𑀯𑀺𑀪𑀽𑀲𑀦𑀸𑀬𑀸𑀢𑀺 𑀦 𑀢𑁂𑀲𑀁𑀬𑁂𑀯 𑀲𑁄𑀪𑀦𑀢𑁆𑀣𑀁, 𑀙𑀯𑀺𑀲𑀫𑁆𑀧𑀢𑀺𑀅𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀇𑀫𑀸𑀦𑀺 𑀘 𑀧𑀤𑀸𑀦𑀺 𑀬𑀣𑀸𑀓𑁆𑀓𑀫𑀁 𑀫𑁄𑀳-𑀤𑁄𑀲-𑀲𑀡𑁆𑀞𑀸𑀦-𑀯𑀡𑁆𑀡-𑀭𑀸𑀕𑀽𑀧𑀦𑀺𑀲𑁆𑀲𑀬-𑀧𑀳𑀸𑀦𑀢𑁆𑀣𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀧𑀼𑀭𑀺𑀫𑀁 𑀯𑀸 𑀤𑁆𑀯𑀬𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀁𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀦𑀺𑀲𑁂𑀥𑀦𑀢𑁆𑀣𑀁, 𑀇𑀢𑀭𑀁 𑀧𑀭𑀲𑁆𑀲𑀧𑀺. 𑀘𑀢𑁆𑀢𑀸𑀭𑀺𑀧𑀺 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀲𑁆𑀲 𑀧𑀳𑀸𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀓𑀸𑀬𑀲𑁆𑀲𑀸𑀢𑀺 𑀭𑀽𑀧𑀓𑀸𑀬𑀲𑁆𑀲. 𑀞𑀺𑀢𑀺𑀬𑀸 𑀬𑀸𑀧𑀦𑀸𑀬𑀸𑀢𑀺 𑀧𑀩𑀦𑁆𑀥𑀝𑁆𑀞𑀺𑀢𑀢𑁆𑀣𑀜𑁆𑀘𑁂𑀯 𑀧𑀯𑀢𑁆𑀢𑀺𑀬𑀸 𑀅𑀯𑀺𑀘𑁆𑀙𑁂𑀤𑀦𑀢𑁆𑀣𑀜𑁆𑀘 𑀘𑀺𑀭𑀓𑀸𑀮𑀝𑁆𑀞𑀺𑀢𑀢𑁆𑀣𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀯𑀢𑁆𑀢𑀸𑀧𑀦𑀢𑁆𑀣𑀁. 𑀯𑀺𑀳𑀺𑀁𑀲𑀽𑀧𑀭𑀢𑀺𑀬𑀸𑀢𑀺 𑀚𑀺𑀖𑀘𑁆𑀙𑀸𑀤𑀼𑀓𑁆𑀔𑀲𑁆𑀲 𑀉𑀧𑀭𑀫𑀡𑀢𑁆𑀣𑀁. 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬𑀸𑀢𑀺 𑀲𑀸𑀲𑀦𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀁 𑀅𑀦𑀼𑀕𑁆𑀕𑀳𑀢𑁆𑀣𑀁. 𑀇𑀢𑀻𑀢𑀺 𑀏𑀯𑀁 𑀇𑀫𑀺𑀦𑀸 𑀉𑀧𑀸𑀬𑁂𑀦. 𑀧𑀼𑀭𑀸𑀡𑀜𑁆𑀘 𑀯𑁂𑀤𑀦𑀁 𑀧𑀝𑀺𑀳𑀗𑁆𑀔𑀸𑀫𑀻𑀢𑀺 𑀧𑀼𑀭𑀸𑀡𑀁 𑀅𑀪𑀼𑀢𑁆𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀁 𑀧𑀝𑀺𑀳𑀦𑀺𑀲𑁆𑀲𑀸𑀫𑀺. 𑀦𑀯𑀜𑁆𑀘 𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀦𑀯𑀁 𑀪𑀼𑀢𑁆𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀁 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺. 𑀢𑀲𑁆𑀲𑀸 𑀳𑀺 𑀅𑀦𑀼𑀧𑁆𑀧𑀦𑁆𑀦𑀸𑀬 𑀅𑀦𑀼𑀧𑁆𑀧𑀚𑁆𑀚𑀦𑀢𑁆𑀣𑀫𑁂𑀯 𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀢𑀺. 𑀏𑀢𑁆𑀣 𑀘 𑀅𑀪𑀼𑀢𑁆𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀸 𑀦𑀸𑀫 𑀬𑀣𑀸𑀧𑀯𑀢𑁆𑀢𑀸 𑀚𑀺𑀖𑀘𑁆𑀙𑀸𑀦𑀺𑀫𑀺𑀢𑁆𑀢𑀸 𑀯𑁂𑀤𑀦𑀸. 𑀲𑀸 𑀳𑀺 𑀅𑀪𑀼𑀜𑁆𑀚𑀦𑁆𑀢𑀲𑁆𑀲 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀧𑀯𑀟𑁆𑀠𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺, 𑀪𑀼𑀢𑁆𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀸𑀧𑀺 𑀔𑀼𑀤𑀸𑀦𑀺𑀫𑀺𑀢𑁆𑀢𑀸𑀯 𑀅𑀗𑁆𑀕𑀤𑀸𑀳𑀲𑀽𑀮𑀸𑀤𑀺𑀯𑁂𑀤𑀦𑀸 𑀅𑀧𑁆𑀧𑀯𑀢𑁆𑀢𑀸. 𑀲𑀸 𑀳𑀺 𑀪𑀼𑀢𑁆𑀢𑀧𑀘𑁆𑀘𑀬𑀸 𑀅𑀦𑀼𑀧𑁆𑀧𑀦𑁆𑀦𑀸𑀯 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺. 𑀯𑀺𑀳𑀺𑀁𑀲𑀸𑀦𑀺𑀫𑀺𑀢𑁆𑀢𑀢𑀸 𑀘𑁂𑀢𑀸𑀲𑀁 𑀯𑀺𑀳𑀺𑀁𑀲𑀸𑀬 𑀯𑀺𑀲𑁂𑀲𑁄.

𑀬𑀸𑀢𑁆𑀭𑀸 𑀘 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀬𑀸𑀧𑀦𑀸 𑀘 𑀫𑁂 𑀘𑀢𑀼𑀦𑁆𑀦𑀁 𑀇𑀭𑀺𑀬𑀸𑀧𑀣𑀸𑀦𑀁 𑀪𑀯𑀺𑀲𑁆𑀲𑀢𑀺. 𑀬𑀸𑀧𑀦𑀸𑀬𑀸𑀢𑀺 𑀇𑀫𑀺𑀦𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀬𑀸𑀧𑀦𑀸 𑀯𑀼𑀢𑁆𑀢𑀸, 𑀇𑀥 𑀘𑀢𑀼𑀦𑁆𑀦𑀁 𑀇𑀭𑀺𑀬𑀸𑀧𑀣𑀸𑀦𑀁 𑀅𑀯𑀺𑀘𑁆𑀙𑁂𑀤𑀲𑀗𑁆𑀔𑀸𑀢𑀸 𑀬𑀸𑀧𑀦𑀸𑀢𑀺 𑀅𑀬𑀫𑁂𑀢𑀸𑀲𑀁 𑀯𑀺𑀲𑁂𑀲𑁄. 𑀅𑀦𑀯𑀚𑁆𑀚𑀢𑀸 𑀘 𑀨𑀸𑀲𑀼𑀯𑀺𑀳𑀸𑀭𑁄 𑀘𑀸𑀢𑀺 𑀅𑀬𑀼𑀢𑁆𑀢𑀧𑀭𑀺𑀬𑁂𑀲𑀦𑀧𑀝𑀺𑀕𑁆𑀕𑀳𑀡𑀧𑀭𑀺𑀪𑁄𑀕𑀧𑀭𑀺𑀯𑀚𑁆𑀚𑀦𑁂𑀦 𑀅𑀦𑀯𑀚𑁆𑀚𑀢𑀸, 𑀧𑀭𑀺𑀫𑀺𑀢𑀧𑀭𑀺𑀪𑁄𑀕𑁂𑀦 𑀨𑀸𑀲𑀼𑀯𑀺𑀳𑀸𑀭𑁄. 𑀅𑀲𑀧𑁆𑀧𑀸𑀬𑀸𑀧𑀭𑀺𑀫𑀺𑀢𑀪𑁄𑀚𑀦𑀧𑀘𑁆𑀘𑀬𑀸 𑀅𑀭𑀢𑀺𑀢𑀦𑁆𑀤𑀻𑀯𑀺𑀚𑀫𑁆𑀪𑀺𑀢𑀸𑀯𑀺𑀜𑁆𑀜𑀼𑀕𑀭𑀳𑀸𑀤𑀺𑀤𑁄𑀲𑀸𑀪𑀸𑀯𑁂𑀦 𑀯𑀸 𑀅𑀦𑀯𑀚𑁆𑀚𑀢𑀸, 𑀲𑀧𑁆𑀧𑀸𑀬𑀧𑀭𑀺𑀫𑀺𑀢𑀪𑁄𑀚𑀦𑀧𑀘𑁆𑀘𑀬𑀸 𑀓𑀸𑀬𑀩𑀮𑀲𑀫𑁆𑀪𑀯𑁂𑀦 ¶ 𑀨𑀸𑀲𑀼𑀯𑀺𑀳𑀸𑀭𑁄. 𑀬𑀸𑀯𑀤𑀢𑁆𑀣𑀉𑀤𑀭𑀸𑀯𑀤𑁂𑀳𑀓𑀪𑁄𑀚𑀦𑀧𑀭𑀺𑀯𑀚𑁆𑀚𑀦𑁂𑀦 𑀲𑁂𑀬𑁆𑀬𑀲𑀼𑀔𑀧𑀲𑁆𑀲𑀲𑀼𑀔𑀫𑀺𑀤𑁆𑀥𑀲𑀼𑀔𑀸𑀤𑀻𑀦𑀁 𑀅𑀪𑀸𑀯𑀢𑁄 𑀅𑀦𑀯𑀚𑁆𑀚𑀢𑀸, 𑀘𑀢𑀼𑀧𑀜𑁆𑀘𑀸𑀮𑁄𑀧𑀫𑀢𑁆𑀢𑀜𑁆𑀜𑀻𑀦𑀪𑁄𑀚𑀦𑁂𑀦 𑀘𑀢𑀼𑀇𑀭𑀺𑀬𑀸𑀧𑀣𑀬𑁄𑀕𑁆𑀬𑀢𑀸𑀧𑀸𑀤𑀦𑀢𑁄 𑀨𑀸𑀲𑀼𑀯𑀺𑀳𑀸𑀭𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀘𑀢𑁆𑀢𑀸𑀭𑁄 ¶ 𑀧𑀜𑁆𑀘 𑀆𑀮𑁄𑀧𑁂, 𑀅𑀪𑀼𑀢𑁆𑀯𑀸 𑀉𑀤𑀓𑀁 𑀧𑀺𑀯𑁂;

𑀅𑀮𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺. (𑀣𑁂𑀭𑀕𑀸. 𑁯𑁮𑁩);

𑀏𑀢𑁆𑀢𑀸𑀯𑀢𑀸 𑀧𑀬𑁄𑀚𑀦𑀧𑀭𑀺𑀕𑁆𑀕𑀳𑁄, 𑀫𑀚𑁆𑀛𑀺𑀫𑀸 𑀘 𑀧𑀝𑀺𑀧𑀤𑀸 𑀤𑀻𑀧𑀺𑀢𑀸 𑀳𑁄𑀢𑀺.

𑀲𑁂𑀦𑀸𑀲𑀦𑀦𑁆𑀢𑀺 𑀲𑀬𑀦𑀜𑁆𑀘 𑀆𑀲𑀦𑀜𑁆𑀘. 𑀬𑀢𑁆𑀣 𑀳𑀺 𑀯𑀺𑀳𑀸𑀭𑀸𑀤𑀺𑀓𑁂 𑀲𑁂𑀢𑀺 𑀦𑀺𑀧𑀚𑁆𑀚𑀢𑀺, 𑀆𑀲𑀢𑀺 𑀦𑀺𑀲𑀻𑀤𑀢𑀺, 𑀢𑀁 𑀲𑁂𑀦𑀸𑀲𑀦𑀁. 𑀉𑀢𑀼𑀧𑀭𑀺𑀲𑁆𑀲𑀬𑀯𑀺𑀦𑁄𑀤𑀦𑀧𑀝𑀺𑀲𑀮𑁆𑀮𑀸𑀦𑀸𑀭𑀸𑀫𑀢𑁆𑀣𑀦𑁆𑀢𑀺 𑀉𑀢𑀼𑀬𑁂𑀯 𑀧𑀭𑀺𑀲𑀳𑀦𑀝𑁆𑀞𑁂𑀦 𑀧𑀭𑀺𑀲𑁆𑀲𑀬𑁄, 𑀲𑀭𑀻𑀭𑀸𑀩𑀸𑀥𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀓𑀭𑁄, 𑀅𑀣 𑀯𑀸 𑀬𑀣𑀸𑀯𑀼𑀢𑁆𑀢𑁄 𑀉𑀢𑀼 𑀘 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀧𑀸𑀓𑀝𑀧𑀭𑀺𑀲𑁆𑀲𑀬𑁄 𑀘 𑀭𑀸𑀕𑀤𑁄𑀲𑀸𑀤𑀺𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑁄 𑀘 𑀉𑀢𑀼𑀧𑀭𑀺𑀲𑁆𑀲𑀬𑁄, 𑀢𑀲𑁆𑀲 𑀯𑀺𑀦𑁄𑀤𑀦𑀢𑁆𑀣𑀜𑁆𑀘𑁂𑀯 𑀏𑀓𑀻𑀪𑀸𑀯𑀲𑀼𑀔𑀢𑁆𑀣𑀜𑁆𑀘. 𑀇𑀤𑀜𑁆𑀘 𑀘𑀻𑀯𑀭𑀧𑀝𑀺𑀲𑁂𑀯𑀦𑁂 𑀳𑀺𑀭𑀺𑀓𑁄𑀧𑀻𑀦𑀧𑀝𑀺𑀘𑁆𑀙𑀸𑀤𑀦𑀁 𑀯𑀺𑀬 𑀢𑀲𑁆𑀲 𑀦𑀺𑀬𑀢𑀧𑀬𑁄𑀚𑀦𑀦𑁆𑀢𑀺 𑀧𑀼𑀦 ‘‘𑀬𑀸𑀯𑀤𑁂𑀯𑀸’’𑀢𑀺 𑀯𑀼𑀢𑁆𑀢𑀁.

𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀭𑁄𑀕𑀲𑁆𑀲 𑀧𑀘𑁆𑀘𑀦𑀻𑀓𑀧𑁆𑀧𑀯𑀢𑁆𑀢𑀺𑀬𑀸 𑀕𑀺𑀮𑀸𑀦𑀧𑀘𑁆𑀘𑀬𑁄, 𑀢𑀢𑁄 𑀏𑀯 𑀪𑀺𑀲𑀓𑁆𑀓𑀲𑁆𑀲 𑀅𑀦𑀼𑀜𑁆𑀜𑀸𑀢𑀯𑀢𑁆𑀣𑀼𑀢𑀸𑀬 𑀪𑁂𑀲𑀚𑁆𑀚𑀁, 𑀚𑀻𑀯𑀺𑀢𑀲𑁆𑀲 𑀧𑀭𑀺𑀯𑀸𑀭𑀲𑀫𑁆𑀪𑀸𑀭𑀪𑀸𑀯𑁂𑀳𑀺 𑀧𑀭𑀺𑀓𑁆𑀔𑀸𑀭𑁄 𑀘𑀸𑀢𑀺 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁄, 𑀢𑀁. 𑀉𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀚𑀸𑀢𑀸𑀦𑀁 𑀦𑀺𑀩𑁆𑀩𑀢𑁆𑀢𑀸𑀦𑀁. 𑀯𑁂𑀬𑁆𑀬𑀸𑀩𑀸𑀥𑀺𑀓𑀸𑀦𑀦𑁆𑀢𑀺 𑀩𑁆𑀬𑀸𑀩𑀸𑀥𑀢𑁄 𑀥𑀸𑀢𑀼𑀓𑁆𑀔𑁄𑀪𑀢𑁄 𑀘 𑀢𑀦𑁆𑀦𑀺𑀩𑁆𑀩𑀢𑁆𑀢𑀭𑁄𑀕𑀢𑁄 𑀘 𑀚𑀸𑀢𑀸𑀦𑀁. 𑀯𑁂𑀤𑀦𑀸𑀦𑀦𑁆𑀢𑀺 𑀤𑀼𑀓𑁆𑀔𑀯𑁂𑀤𑀦𑀸𑀦𑀁. 𑀅𑀩𑁆𑀬𑀸𑀩𑀚𑁆𑀛𑀧𑀭𑀫𑀢𑀸𑀬𑀸𑀢𑀺 𑀦𑀺𑀤𑁆𑀤𑀼𑀓𑁆𑀔𑀧𑀭𑀫𑀪𑀸𑀯𑀸𑀬 𑀧𑀝𑀺𑀲𑁂𑀯𑀸𑀫𑀻𑀢𑀺 𑀬𑁄𑀚𑀦𑀸. 𑀏𑀯𑀫𑁂𑀢𑁆𑀣 𑀲𑀗𑁆𑀔𑁂𑀧𑁂𑀦𑁂𑀯 𑀧𑀸𑀴𑀺𑀯𑀡𑁆𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀦𑀯𑀯𑁂𑀤𑀦𑀼𑀧𑁆𑀧𑀸𑀤𑀦𑀢𑁄𑀧𑀻𑀢𑀺 𑀦 𑀓𑁂𑀯𑀮𑀁 𑀆𑀬𑀢𑀺𑀁 𑀏𑀯 𑀯𑀺𑀧𑀸𑀓𑀧𑀭𑀺𑀴𑀸𑀳𑀸, 𑀅𑀣 𑀔𑁄 𑀅𑀢𑀺𑀪𑁄𑀚𑀦𑀧𑀘𑁆𑀘𑀬𑀸 𑀅𑀮𑀁𑀲𑀸𑀝𑀓𑀸𑀤𑀻𑀦𑀁 𑀯𑀺𑀬 𑀦𑀯𑀯𑁂𑀤𑀦𑀼𑀧𑁆𑀧𑀸𑀤𑀦𑀢𑁄𑀧𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄.

𑀧𑀝𑀺𑀲𑁂𑀯𑀦𑀸𑀧𑀳𑀸𑀢𑀩𑁆𑀩𑀆𑀲𑀯𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀥𑀺𑀯𑀸𑀲𑀦𑀸𑀧𑀳𑀸𑀢𑀩𑁆𑀩𑀆𑀲𑀯𑀯𑀡𑁆𑀡𑀦𑀸

𑁨𑁪. 𑀔𑀫𑁄𑀢𑀺 ¶ 𑀔𑀫𑀦𑀓𑁄. 𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲 𑀘𑀮𑀦𑀁 𑀦𑀸𑀫 𑀓𑀫𑁆𑀫𑀝𑁆𑀞𑀸𑀦𑀧𑀭𑀺𑀘𑁆𑀘𑀸𑀕𑁄𑀢𑀺 𑀆𑀳 ‘‘𑀘𑀮𑀢𑀺 𑀓𑀫𑁆𑀧𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀚𑀳𑀢𑀻’’𑀢𑀺. 𑀅𑀥𑀺𑀫𑀢𑁆𑀢𑀫𑁆𑀧𑀺 𑀉𑀡𑁆𑀳𑀁 𑀲𑀳𑀢𑀺, 𑀲𑀳𑀦𑁆𑀢𑁄 𑀘 𑀦 𑀦𑀕𑁆𑀕𑀲𑀫𑀡𑀸𑀤𑀬𑁄 𑀯𑀺𑀬 𑀲𑀳𑀢𑀺, 𑀅𑀣 𑀔𑁄 𑀓𑀫𑁆𑀫𑀝𑁆𑀞𑀸𑀦𑀸𑀯𑀺𑀚𑀳𑀦𑁂𑀦𑀸𑀢𑀺 𑀆𑀳 ‘‘𑀲𑁆𑀯𑁂𑀯 𑀣𑁂𑀭𑁄 𑀯𑀺𑀬𑀸’’𑀢𑀺. 𑀩𑀳𑀺𑀘𑀗𑁆𑀓𑀫𑁂𑀢𑀺 𑀮𑁂𑀡𑀢𑁄 𑀩𑀳𑀺 𑀘𑀗𑁆𑀓𑀫𑁂. 𑀉𑀡𑁆𑀳𑀪𑀬𑁂𑀦𑁂𑀯𑀸𑀢𑀺 𑀦𑀭𑀓𑀕𑁆𑀕𑀺𑀉𑀡𑁆𑀳𑀪𑀬𑁂𑀦𑁂𑀯. 𑀢𑁂𑀦𑀸𑀳 ‘‘𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸’’𑀢𑀺, 𑀢𑀫𑁆𑀧𑀺 ‘‘𑀫𑀬𑀸 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀅𑀦𑀼𑀪𑀽𑀢𑀁, 𑀇𑀤𑀁 𑀧𑀦 𑀢𑀢𑁄 𑀫𑀼𑀤𑀼𑀢𑀭’’𑀦𑁆𑀢𑀺 ¶ 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀞𑀸𑀦𑁂. 𑀅𑀕𑁆𑀕𑀺𑀲𑀦𑁆𑀢𑀸𑀧𑁄𑀯 𑀯𑁂𑀤𑀺𑀢𑀩𑁆𑀩𑁄 𑀲𑀽𑀭𑀺𑀬𑀲𑀦𑁆𑀢𑀸𑀧𑀲𑁆𑀲 𑀧𑀭𑀢𑁄 𑀯𑀼𑀘𑁆𑀘𑀫𑀸𑀦𑀢𑁆𑀢𑀸.

𑀧𑀭𑀺𑀲𑀼𑀤𑁆𑀥𑀲𑀻𑀮𑁄𑀳𑀫𑀲𑁆𑀫𑀻𑀢𑀺 𑀲𑀩𑁆𑀩𑀣𑀸𑀧𑀺 ‘‘𑀯𑀺𑀲𑀼𑀤𑁆𑀥𑀲𑀻𑀮𑁄𑀳𑀫𑀲𑁆𑀫𑀻’’𑀢𑀺 𑀫𑀭𑀡𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀯𑀺𑀧𑁆𑀧𑀝𑀺𑀲𑀸𑀭𑀫𑀽𑀮𑀺𑀓𑀁 𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀲𑀺. 𑀲𑀳 𑀧𑀻𑀢𑀼𑀧𑁆𑀧𑀸𑀤𑀸𑀢𑀺 𑀨𑀭𑀡𑀧𑀻𑀢𑀺𑀬𑀸 𑀉𑀧𑁆𑀧𑀸𑀤𑁂𑀦 𑀲𑀳𑁂𑀯. 𑀯𑀺𑀲𑀁 𑀦𑀺𑀯𑀢𑁆𑀢𑀺𑀢𑁆𑀯𑀸𑀢𑀺 𑀧𑀻𑀢𑀺𑀯𑁂𑀕𑁂𑀦 𑀅𑀚𑁆𑀛𑁄𑀢𑁆𑀣𑀢𑀁 𑀤𑀝𑁆𑀞𑀫𑀼𑀔𑁂𑀦𑁂𑀯 𑀪𑀲𑁆𑀲𑀺𑀢𑁆𑀯𑀸. 𑀢𑀢𑁆𑀣𑁂𑀯𑀸𑀢𑀺 𑀲𑀧𑁆𑀧𑁂𑀦 𑀤𑀝𑁆𑀞𑀝𑁆𑀞𑀸𑀦𑁂𑀬𑁂𑀯. 𑀘𑀺𑀢𑁆𑀢𑁂𑀓𑀕𑁆𑀕𑀢𑀁 𑀮𑀪𑀺𑀢𑁆𑀯𑀸𑀢𑀺 ‘‘𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁪𑁬𑁬; 𑁩.𑁩𑁫𑁯; 𑀲𑀁. 𑀦𑀺. 𑁫.𑁩𑁭𑁬; 𑀅. 𑀦𑀺. 𑁩.𑁯𑁬; 𑁧𑁧.𑁧𑁨) 𑀦𑀬𑁂𑀦 𑀲𑀫𑀸𑀥𑀸𑀦𑀁 𑀧𑀸𑀧𑀼𑀡𑀺𑀢𑁆𑀯𑀸.

𑀧𑀘𑁆𑀘𑀬𑁂𑀲𑀼 𑀲𑀦𑁆𑀢𑁄𑀲𑁄 𑀪𑀸𑀯𑀦𑀸𑀬 𑀘 𑀆𑀭𑀫𑀺𑀢𑀩𑁆𑀩𑀝𑁆𑀞𑀸𑀦𑀢𑀸𑀬 𑀆𑀭𑀸𑀫𑁄 𑀅𑀲𑁆𑀲𑀸𑀢𑀺 𑀧𑀘𑁆𑀘𑀬𑀲𑀦𑁆𑀢𑁄𑀲𑀪𑀸𑀯𑀦𑀸𑀭𑀸𑀫𑁄, 𑀢𑀲𑁆𑀲 𑀪𑀸𑀯𑁄 𑀧𑀘𑁆𑀘𑀬…𑀧𑁂… 𑀭𑀸𑀫𑀢𑀸, 𑀢𑀸𑀬. 𑀫𑀳𑀸𑀣𑁂𑀭𑁄𑀢𑀺 𑀯𑀼𑀟𑁆𑀠𑀢𑀭𑁄 𑀣𑁂𑀭𑁄. 𑀯𑀘𑀦𑀫𑁂𑀯 𑀢𑀤𑀢𑁆𑀣𑀁 𑀜𑀸𑀧𑁂𑀢𑀼𑀓𑀸𑀫𑀸𑀦𑀁 𑀧𑀣𑁄𑀢𑀺 𑀯𑀘𑀦𑀧𑀣𑁄.

𑀅𑀲𑀼𑀔𑀝𑁆𑀞𑁂𑀦 𑀯𑀸 𑀢𑀺𑀩𑁆𑀩𑀸. 𑀬𑀜𑁆𑀳𑀺 𑀦 𑀲𑀼𑀔𑀁, 𑀢𑀁 𑀅𑀦𑀺𑀝𑁆𑀞𑀁 ‘‘𑀢𑀺𑀩𑁆𑀩’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁𑀲𑀪𑀸𑀯𑁄𑀢𑀺 ‘‘𑀅𑀥𑀺𑀯𑀸𑀲𑀦𑀚𑀸𑀢𑀺𑀬𑁄’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀫𑀸𑀳. 𑀫𑀼𑀳𑀼𑀢𑁆𑀢𑁂𑀦 𑀔𑀡𑁂𑀯 𑀯𑀸𑀢𑁂 𑀳𑀤𑀬𑀁 𑀨𑀸𑀮𑁂𑀢𑀼𑀁 𑀆𑀭𑀤𑁆𑀥𑁂𑀬𑁂𑀯. 𑀅𑀦𑀸𑀕𑀸𑀫𑀻 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀏𑀯𑀁 𑀲𑀩𑁆𑀩𑀢𑁆𑀣𑀸𑀢𑀺 ‘‘𑀉𑀡𑁆𑀳𑁂𑀦 𑀨𑀼𑀝𑁆𑀞𑀲𑁆𑀲 𑀲𑀻𑀢𑀁 𑀧𑀢𑁆𑀣𑀬𑀢𑁄’’𑀢𑀺𑀆𑀤𑀺𑀦𑀸 𑀲𑀩𑁆𑀩𑀢𑁆𑀣 𑀉𑀡𑁆𑀳𑀸𑀤𑀺𑀦𑀺𑀫𑀺𑀢𑁆𑀢𑀁 𑀓𑀸𑀫𑀸𑀲𑀯𑀼𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀲𑀻𑀢𑀁 𑀯𑀸 𑀉𑀡𑁆𑀳𑀁 𑀯𑀸 𑀅𑀦𑀺𑀝𑁆𑀞𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀢𑁆𑀢𑀕𑁆𑀕𑀸𑀳𑁂 𑀲𑀢𑀺 𑀅𑀢𑁆𑀢𑀦𑀺𑀬𑀕𑁆𑀕𑀸𑀳𑁄𑀢𑀺 𑀆𑀳 ‘‘𑀫𑀬𑁆𑀳𑀁 𑀲𑀻𑀢𑀁 𑀉𑀡𑁆𑀳𑀦𑁆𑀢𑀺 𑀕𑀸𑀳𑁄 𑀤𑀺𑀝𑁆𑀞𑀸𑀲𑀯𑁄’’𑀢𑀺. 𑀲𑀻𑀢𑀸𑀤𑀺𑀓𑁂 𑀉𑀧𑀕𑀢𑁂 𑀲𑀳𑀦𑁆𑀢𑀻 𑀔𑀫𑀦𑁆𑀢𑀻 𑀢𑁂 𑀅𑀢𑁆𑀢𑀦𑁄 𑀉𑀧𑀭𑀺 𑀯𑀸𑀲𑁂𑀦𑁆𑀢𑀻 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀆𑀭𑁄𑀧𑁂𑀢𑁆𑀯𑀸 𑀯𑀸𑀲𑁂𑀢𑀺𑀬𑁂𑀯𑀸’’𑀢𑀺 ¶ . 𑀦 𑀦𑀺𑀭𑀲𑁆𑀲𑀢𑀻𑀢𑀺 𑀦 𑀯𑀺𑀥𑀼𑀦𑀢𑀺. 𑀬𑁄 𑀳𑀺 𑀲𑀻𑀢𑀸𑀤𑀺𑀓𑁂 𑀦 𑀲𑀳𑀢𑀺, 𑀲𑁄 𑀢𑁂 𑀦𑀺𑀭𑀲𑁆𑀲𑀦𑁆𑀢𑁄 𑀯𑀺𑀥𑀼𑀦𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺.

𑀅𑀥𑀺𑀯𑀸𑀲𑀦𑀸𑀧𑀳𑀸𑀢𑀩𑁆𑀩𑀆𑀲𑀯𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀭𑀺𑀯𑀚𑁆𑀚𑀦𑀸𑀧𑀳𑀸𑀢𑀩𑁆𑀩𑀆𑀲𑀯𑀯𑀡𑁆𑀡𑀦𑀸

𑁨𑁫. 𑀅𑀳𑀁 ¶ 𑀲𑀫𑀡𑁄𑀢𑀺 (𑀅. 𑀦𑀺. 𑀝𑀻. 𑁩.𑁬.𑁫𑁮) ‘‘𑀅𑀳𑀁 𑀲𑀫𑀡𑁄, 𑀓𑀺𑀁 𑀫𑀫 𑀚𑀻𑀯𑀺𑀢𑁂𑀦 𑀯𑀸 𑀫𑀭𑀡𑁂𑀦 𑀯𑀸’’𑀢𑀺 𑀏𑀯𑀁 𑀅𑀘𑀺𑀦𑁆𑀢𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸𑀢𑀺 𑀕𑀸𑀫𑀧𑁆𑀧𑀤𑁂𑀲𑀁 𑀧𑀬𑁄𑀚𑀦𑀸𑀤𑀺𑀜𑁆𑀘 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸. 𑀧𑀝𑀺𑀓𑁆𑀓𑀫𑀢𑀻𑀢𑀺 𑀳𑀢𑁆𑀣𑀺𑀆𑀤𑀻𑀦𑀁 𑀲𑀫𑀻𑀧𑀕𑀫𑀦𑀢𑁄 𑀅𑀧𑀓𑁆𑀓𑀫𑀢𑀺. 𑀓𑀡𑁆𑀝𑀓𑀸 𑀬𑀢𑁆𑀣 𑀢𑀺𑀝𑁆𑀞𑀦𑁆𑀢𑀺, 𑀢𑀁 𑀓𑀡𑁆𑀝𑀓𑀝𑁆𑀞𑀸𑀦𑀁. 𑀅𑀫𑀦𑀼𑀲𑁆𑀲𑀤𑀼𑀝𑁆𑀞𑀸𑀦𑀻𑀢𑀺 𑀅𑀫𑀦𑀼𑀲𑁆𑀲𑀲𑀜𑁆𑀘𑀸𑀭𑁂𑀦 𑀤𑀽𑀲𑀺𑀢𑀸𑀦𑀺, 𑀲𑀧𑀭𑀺𑀲𑁆𑀲𑀬𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀫𑀸𑀦𑀦𑁆𑀢𑀺 𑀲𑀫𑀁, 𑀅𑀯𑀺𑀲𑀫𑀦𑁆𑀢𑀺 𑀅𑀢𑁆𑀣𑁄. 𑀅𑀓𑀸𑀲𑀺 𑀯𑀸 𑀢𑀸𑀤𑀺𑀲𑀁 𑀅𑀦𑀸𑀘𑀸𑀭𑀁.

𑀲𑀻𑀮𑀲𑀁𑀯𑀭𑀲𑀗𑁆𑀔𑀸𑀢𑁂𑀦𑀸𑀢𑀺 ‘‘𑀓𑀣𑀁 𑀧𑀭𑀺𑀯𑀚𑁆𑀚𑀦𑀁 𑀲𑀻𑀮’’𑀦𑁆𑀢𑀺 𑀬𑀤𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀅𑀧𑀺𑀘 ‘‘𑀘𑀡𑁆𑀟𑀁 𑀳𑀢𑁆𑀣𑀺𑀁 𑀧𑀭𑀺𑀯𑀚𑁆𑀚𑁂𑀢𑀻’’𑀢𑀺 𑀯𑀘𑀦𑀢𑁄 𑀳𑀢𑁆𑀣𑀺𑀆𑀤𑀺𑀧𑀭𑀺𑀯𑀚𑁆𑀚𑀦𑀫𑁆𑀧𑀺 𑀪𑀕𑀯𑀢𑁄 𑀯𑀘𑀦𑀸𑀦𑀼𑀝𑁆𑀞𑀸𑀦𑀦𑁆𑀢𑀺 𑀓𑀢𑁆𑀯𑀸 𑀆𑀘𑀸𑀭𑀲𑀻𑀮𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀭𑀺𑀯𑀚𑁆𑀚𑀦𑀸𑀧𑀳𑀸𑀢𑀩𑁆𑀩𑀆𑀲𑀯𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀦𑁄𑀤𑀦𑀸𑀧𑀳𑀸𑀢𑀩𑁆𑀩𑀆𑀲𑀯𑀯𑀡𑁆𑀡𑀦𑀸

𑁨𑁬. 𑀇𑀢𑀺𑀧𑀻𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑀼𑀝𑁆𑀞𑀺𑀢𑀢𑁆𑀢𑀸𑀧𑀺 𑀮𑁄𑀪𑀸𑀤𑀺𑀲𑀳𑀕𑀢𑀢𑁆𑀢𑀸𑀧𑀺 𑀓𑀼𑀲𑀮𑀧𑀝𑀺𑀧𑀓𑁆𑀔𑀢𑁄𑀧𑀻𑀢𑀺𑀆𑀤𑀻𑀳𑀺 𑀓𑀸𑀭𑀡𑁂𑀳𑀺 𑀅𑀬𑀁 𑀯𑀺𑀢𑀓𑁆𑀓𑁄 𑀅𑀓𑀼𑀲𑀮𑁄𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀦𑀬𑁂𑀦 𑀲𑀸𑀯𑀚𑁆𑀚𑁄𑀢𑀺𑀆𑀤𑀻𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀅𑀓𑀼𑀲𑀮𑁄𑀢𑀺𑀆𑀤𑀺𑀦𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀓𑀸𑀫𑀯𑀺𑀢𑀓𑁆𑀓𑀲𑁆𑀲 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑀺, 𑀤𑀼𑀓𑁆𑀔𑀯𑀺𑀧𑀸𑀓𑁄𑀢𑀺 𑀇𑀫𑀺𑀦𑀸 𑀲𑀫𑁆𑀧𑀭𑀸𑀬𑀺𑀓𑀁. 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬 𑀲𑀁𑀯𑀢𑁆𑀢𑀢𑀻𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀆𑀤𑀻𑀦𑀯𑀯𑀺𑀪𑀸𑀯𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀉𑀧𑁆𑀧𑀦𑁆𑀦𑀲𑁆𑀲 𑀓𑀸𑀫𑀯𑀺𑀢𑀓𑁆𑀓𑀲𑁆𑀲 𑀅𑀦𑀥𑀺𑀯𑀸𑀲𑀦𑀁 𑀦𑀸𑀫 𑀧𑀼𑀦 𑀢𑀸𑀤𑀺𑀲𑀲𑁆𑀲 𑀅𑀦𑀼𑀧𑁆𑀧𑀸𑀤𑀦𑀁, 𑀢𑀁 𑀧𑀦𑀲𑁆𑀲 𑀧𑀳𑀸𑀦𑀁 𑀯𑀺𑀦𑁄𑀤𑀦𑀁 𑀩𑁆𑀬𑀦𑁆𑀢𑀺𑀓𑀭𑀡𑀁 𑀅𑀦𑀪𑀸𑀯𑀕𑀫𑀦𑀦𑁆𑀢𑀺 ¶ 𑀘 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀧𑀸𑀴𑀺𑀬𑀁 ‘‘𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀻’’𑀢𑀺 𑀯𑀢𑁆𑀯𑀸 ‘‘𑀧𑀚𑀳𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀥𑀺𑀯𑀸𑀲𑁂𑀦𑁆𑀢𑁄 𑀓𑀺𑀁 𑀓𑀭𑁄𑀢𑀻𑀢𑀺 𑀧𑀚𑀳𑀢𑀻’’𑀢𑀺𑀆𑀤𑀺𑀫𑀸𑀳. 𑀧𑀳𑀸𑀦𑀜𑁆𑀘𑁂𑀢𑁆𑀣 𑀯𑀺𑀓𑁆𑀔𑀫𑁆𑀪𑀦𑀫𑁂𑀯, 𑀦 𑀲𑀫𑀼𑀘𑁆𑀙𑁂𑀤𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀦𑁄𑀤𑁂𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦𑁂𑀯 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄.

𑀓𑀸𑀫𑀯𑀺𑀢𑀓𑁆𑀓𑁄𑀢𑀺 𑀲𑀫𑁆𑀧𑀬𑁄𑀕𑀢𑁄 𑀆𑀭𑀫𑁆𑀫𑀡𑀢𑁄 𑀘 𑀓𑀸𑀫𑀲𑀳𑀕𑀢𑁄 𑀯𑀺𑀢𑀓𑁆𑀓𑁄. 𑀢𑁂𑀦𑀸𑀳 ‘‘𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑁄 ¶ 𑀢𑀓𑁆𑀓𑁄’’𑀢𑀺𑀆𑀤𑀺. 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀳𑀺 𑀓𑀸𑀫𑀭𑀸𑀕𑀲𑀗𑁆𑀔𑀸𑀢𑁂𑀦 𑀓𑀸𑀫𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀯𑀢𑁆𑀣𑀼𑀓𑀸𑀫𑀲𑀗𑁆𑀔𑀸𑀢𑁂𑀦 𑀧𑀝𑀺𑀩𑀤𑁆𑀥𑁄 𑀘. 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂𑀢𑀺 𑀢𑁂𑀲𑀁 𑀧𑀸𑀧𑀯𑀺𑀢𑀓𑁆𑀓𑀸𑀦𑀁 𑀉𑀧𑁆𑀧𑀸𑀤𑀸𑀯𑀢𑁆𑀣𑀸𑀕𑀳𑀡𑀁 𑀯𑀸 𑀓𑀢𑀁 𑀲𑀺𑀬𑀸 𑀅𑀦𑀯𑀲𑁂𑀲𑀕𑁆𑀕𑀳𑀡𑀁 𑀯𑀸. 𑀢𑁂𑀲𑀼 𑀧𑀞𑀫𑀁 𑀲𑀦𑁆𑀥𑀸𑀬𑀸𑀳 ‘‘𑀉𑀧𑀦𑁆𑀦𑀫𑀢𑁆𑀢𑁂’’𑀢𑀺, 𑀲𑀫𑁆𑀧𑀢𑀺𑀚𑀸𑀢𑁂𑀢𑀺 𑀅𑀢𑁆𑀣𑁄. 𑀅𑀦𑀯𑀲𑁂𑀲𑀕𑁆𑀕𑀳𑀡𑀁 𑀩𑁆𑀬𑀸𑀧𑀦𑀺𑀘𑁆𑀙𑀸𑀬 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀉𑀧𑁆𑀧𑀦𑁆𑀦𑁂’’𑀢𑀺 𑀯𑀼𑀢𑁆𑀢𑀁. 𑀜𑀸𑀢𑀺𑀯𑀺𑀢𑀓𑁆𑀓𑁄𑀢𑀺 ‘‘𑀅𑀫𑁆𑀳𑀸𑀓𑀁 𑀜𑀸𑀢𑀬𑁄 𑀲𑀼𑀔𑀚𑀻𑀯𑀺𑀦𑁄 𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀕𑁂𑀳𑀲𑁆𑀲𑀺𑀢𑀧𑁂𑀫𑀯𑀲𑁂𑀦 𑀜𑀸𑀢𑀓𑁂 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀯𑀺𑀢𑀓𑁆𑀓𑁄. 𑀚𑀦𑀧𑀤𑀯𑀺𑀢𑀓𑁆𑀓𑁄𑀢𑀺 ‘‘𑀅𑀫𑁆𑀳𑀸𑀓𑀁 𑀚𑀦𑀧𑀤𑁄 𑀲𑀼𑀪𑀺𑀓𑁆𑀔𑁄 𑀲𑀫𑁆𑀧𑀦𑁆𑀦𑀲𑀲𑁆𑀲𑁄 𑀭𑀫𑀡𑀻𑀬𑁄’’𑀢𑀺𑀆𑀤𑀺𑀦𑀸 𑀕𑁂𑀳𑀲𑁆𑀲𑀺𑀢𑀧𑁂𑀫𑀯𑀲𑁂𑀦𑁂𑀯 𑀚𑀦𑀧𑀤𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀯𑀺𑀢𑀓𑁆𑀓𑁄. 𑀉𑀓𑁆𑀓𑀼𑀝𑀺𑀓𑀧𑁆𑀧𑀥𑀸𑀦𑀸𑀤𑀻𑀳𑀺 𑀤𑀼𑀓𑁆𑀔𑁂 𑀦𑀺𑀚𑁆𑀚𑀺𑀡𑁆𑀡𑁂 𑀲𑀫𑁆𑀧𑀭𑀸𑀬𑁂 𑀅𑀢𑁆𑀢𑀸 𑀲𑀼𑀔𑀻 𑀳𑁄𑀢𑀺 𑀅𑀫𑀭𑁄𑀢𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀧𑀝𑀺𑀲𑀁𑀬𑀼𑀢𑁆𑀢𑁄 𑀅𑀫𑀭𑀢𑁆𑀣𑀸𑀬 𑀯𑀺𑀢𑀓𑁆𑀓𑁄, 𑀢𑀁 𑀯𑀸 𑀆𑀭𑀩𑁆𑀪 𑀅𑀫𑀭𑀸𑀯𑀺𑀓𑁆𑀔𑁂𑀧𑀤𑀺𑀝𑁆𑀞𑀺𑀲𑀳𑀕𑀢𑁄 𑀅𑀫𑀭𑁄 𑀘 𑀲𑁄 𑀯𑀺𑀢𑀓𑁆𑀓𑁄 𑀘𑀸𑀢𑀺 𑀅𑀫𑀭𑀯𑀺𑀢𑀓𑁆𑀓𑁄. 𑀧𑀭𑀸𑀦𑀼𑀤𑁆𑀤𑀬𑀢𑀸𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀧𑀭𑁂𑀲𑀼 𑀉𑀧𑀝𑁆𑀞𑀸𑀓𑀸𑀤𑀻𑀲𑀼 𑀲𑀳𑀦𑀦𑁆𑀤𑀺𑀓𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑁄 𑀅𑀦𑀼𑀤𑁆𑀤𑀬𑀢𑀸𑀧𑀢𑀺𑀭𑀽𑀧𑀓𑁄 𑀕𑁂𑀳𑀲𑁆𑀲𑀺𑀢𑀧𑁂𑀫𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄. 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀘𑀻𑀯𑀭𑀸𑀤𑀺𑀮𑀸𑀪𑁂𑀦 𑀘𑁂𑀯 𑀲𑀓𑁆𑀓𑀸𑀭𑁂𑀦 𑀘 𑀓𑀺𑀢𑁆𑀢𑀺𑀲𑀤𑁆𑀤𑁂𑀦 𑀘 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑁄. 𑀅𑀦𑀯𑀜𑁆𑀜𑀢𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 ‘‘𑀅𑀳𑁄 𑀯𑀢 𑀫𑀁 𑀧𑀭𑁂 𑀦 𑀅𑀯𑀚𑀸𑀦𑁂𑀬𑁆𑀬𑀼𑀁, 𑀦 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀫𑀜𑁆𑀜𑁂𑀬𑁆𑀬𑀼𑀁, 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀕𑀭𑀼𑀁 𑀓𑀭𑁂𑀬𑁆𑀬𑀼’’𑀦𑁆𑀢𑀺 𑀉𑀧𑁆𑀧𑀦𑁆𑀦𑀯𑀺𑀢𑀓𑁆𑀓𑁄.

𑀓𑀸𑀫𑀯𑀺𑀢𑀓𑁆𑀓𑁄 𑀓𑀸𑀫𑀲𑀗𑁆𑀓𑀧𑁆𑀧𑀦𑀲𑀪𑀸𑀯𑀢𑁆𑀢𑀸 𑀓𑀸𑀫𑀲𑀗𑁆𑀓𑀧𑁆𑀧𑀧𑀯𑀢𑁆𑀢𑀺𑀬𑀸 𑀲𑀸𑀢𑀺𑀲𑀬𑀢𑁆𑀢𑀸 𑀘 𑀓𑀸𑀫𑀦𑀸𑀓𑀸𑀭𑁄𑀢𑀺 𑀆𑀳 ‘‘𑀓𑀸𑀫𑀯𑀺𑀢𑀓𑁆𑀓𑁄 𑀧𑀦𑁂𑀢𑁆𑀣 𑀓𑀸𑀫𑀸𑀲𑀯𑁄’’𑀢𑀺. 𑀢𑀩𑁆𑀩𑀺𑀲𑁂𑀲𑁄𑀢𑀺 𑀓𑀸𑀫𑀸𑀲𑀯𑀯𑀺𑀲𑁂𑀲𑁄, 𑀭𑀸𑀕𑀲𑀳𑀯𑀼𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀓𑁂 𑀯𑀺𑀦𑁄𑀤𑁂𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀢𑁄 ¶ 𑀦𑀻𑀳𑀭𑀢𑀺 𑀏𑀢𑁂𑀦𑀸𑀢𑀺 𑀯𑀺𑀦𑁄𑀤𑀦𑀁, 𑀯𑀻𑀭𑀺𑀬𑀦𑁆𑀢𑀺 𑀆𑀳 ‘‘𑀯𑀻𑀭𑀺𑀬𑀲𑀁𑀯𑀭𑀲𑀗𑁆𑀔𑀸𑀢𑁂𑀦 𑀯𑀺𑀦𑁄𑀤𑀦𑁂𑀦𑀸’’𑀢𑀺.

𑀯𑀺𑀦𑁄𑀤𑀦𑀸𑀧𑀳𑀸𑀢𑀩𑁆𑀩𑀆𑀲𑀯𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀸𑀯𑀦𑀸𑀧𑀳𑀸𑀢𑀩𑁆𑀩𑀆𑀲𑀯𑀯𑀡𑁆𑀡𑀦𑀸

𑁨𑁭. ‘‘𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀬𑁄 𑀧𑀭𑀺𑀧𑀽𑀭𑁂𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁫.𑁧𑁮𑁭) 𑀯𑀘𑀦𑀢𑁄 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀻𑀦𑀁 𑀅𑀦𑀥𑀺𑀕𑀫𑁄 𑀢𑀢𑁄 𑀘 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀸𑀦𑀢𑀺𑀯𑀢𑁆𑀢𑀺 𑀅𑀪𑀸𑀯𑀦𑀸𑀬 𑀆𑀤𑀻𑀦𑀯𑁄, 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀪𑀕𑀯𑀢𑁄 𑀑𑀭𑀲𑀧𑀼𑀢𑁆𑀢𑀪𑀸𑀯𑀸𑀤𑀺𑀯𑀲𑁂𑀦 𑀘 𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀲𑀫𑀬𑀲𑀫𑁆𑀪𑀽𑀢𑀸𑀢𑀺 𑀤𑀼𑀢𑀺𑀬𑀸𑀤𑀺𑀫𑀕𑁆𑀕𑀓𑁆𑀔𑀡𑁂 𑀚𑀸𑀢𑀸, 𑀪𑀸𑀯𑀦𑀸𑀥𑀺𑀓𑀸𑀭𑀢𑁄 𑀤𑀼𑀢𑀺𑀬𑀫𑀕𑁆𑀕𑀸𑀤𑀺𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀦𑀦𑀼 𑀘 𑀢𑁂 𑀮𑁄𑀓𑀼𑀢𑁆𑀢𑀭𑀸 𑀏𑀯, 𑀓𑀲𑁆𑀫𑀸 𑀯𑀺𑀲𑁂𑀲𑀦𑀁 ¶ 𑀓𑀢𑀦𑁆𑀢𑀺? 𑀦𑀬𑀺𑀤𑀁 𑀯𑀺𑀲𑁂𑀲𑀦𑀁, 𑀯𑀺𑀲𑁂𑀲𑀺𑀢𑀩𑁆𑀩𑀁 𑀧𑀦𑁂𑀢𑀁, 𑀮𑁄𑀓𑀼𑀢𑁆𑀢𑀭𑀩𑁄𑀚𑁆𑀛𑀗𑁆𑀕𑀸 𑀏𑀯 𑀅𑀥𑀺𑀧𑁆𑀧𑁂𑀢𑀸, 𑀢𑁂 𑀘 𑀔𑁄 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀲𑀫𑀬𑀲𑀫𑁆𑀪𑀽𑀢𑀸𑀢𑀺. 𑀩𑁄𑀚𑁆𑀛𑀗𑁆𑀕𑁂𑀲𑀼 𑀅𑀲𑀫𑁆𑀫𑁄𑀳𑀢𑁆𑀣𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀛𑀸𑀦𑀫𑀕𑁆𑀕𑀨𑀮𑀩𑁄𑀚𑁆𑀛𑀗𑁆𑀕𑁂𑀲𑀼 𑀲𑀫𑁆𑀫𑁄𑀳𑀸𑀪𑀸𑀯𑀢𑁆𑀣𑀁. 𑀫𑀺𑀲𑁆𑀲𑀓𑀦𑀬𑁂𑀦 𑀳𑀺 𑀩𑁄𑀚𑁆𑀛𑀗𑁆𑀕𑁂𑀲𑀼 𑀯𑀼𑀘𑁆𑀘𑀫𑀸𑀦𑁂𑀲𑀼 𑀢𑀤𑀗𑁆𑀕𑀸𑀤𑀺𑀯𑀺𑀯𑁂𑀓𑀤𑀲𑁆𑀲𑀦𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀩𑁄𑀚𑁆𑀛𑀗𑁆𑀕𑀸𑀤𑀬𑁄 𑀯𑀺𑀪𑀚𑀺𑀢𑁆𑀯𑀸 𑀯𑀼𑀘𑁆𑀘𑀦𑁆𑀢𑀺, 𑀦 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀩𑁄𑀚𑁆𑀛𑀗𑁆𑀕𑀸 𑀏𑀯𑀸𑀢𑀺 𑀩𑁄𑀚𑁆𑀛𑀗𑁆𑀕𑁂𑀲𑀼 𑀲𑀫𑁆𑀫𑁄𑀳𑁄 𑀦 𑀳𑁄𑀢𑀺 𑀩𑁄𑀚𑁆𑀛𑀗𑁆𑀕𑀪𑀸𑀯𑀦𑀸𑀧𑀝𑀺𑀧𑀢𑁆𑀢𑀺𑀬𑀸 𑀘 𑀲𑀫𑁆𑀫𑀤𑁂𑀯 𑀧𑀓𑀸𑀲𑀺𑀢𑀢𑁆𑀢𑀸. 𑀇𑀥 𑀧𑀦𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂, 𑀇𑀫𑀲𑁆𑀫𑀺𑀁 𑀯𑀸 𑀅𑀥𑀺𑀓𑀸𑀭𑁂. 𑀮𑁄𑀓𑀼𑀢𑁆𑀢𑀭𑀦𑀬𑁄 𑀏𑀯 𑀕𑀳𑁂𑀢𑀩𑁆𑀩𑁄 𑀪𑀸𑀯𑀦𑀸𑀫𑀕𑁆𑀕𑀲𑁆𑀲 𑀅𑀥𑀺𑀓𑀢𑀢𑁆𑀢𑀸.

𑀆𑀤𑀺𑀧𑀤𑀸𑀦𑀦𑁆𑀢𑀺 (𑀅. 𑀦𑀺. 𑀝𑀻. 𑁧.𑁧.𑁪𑁧𑁮) ‘‘𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕’’𑀦𑁆𑀢𑀺 𑀏𑀯𑀫𑀸𑀤𑀻𑀦𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀸𑀓𑁆𑀬𑁂 𑀆𑀤𑀺𑀪𑀽𑀢𑀸𑀦𑀁 𑀧𑀤𑀸𑀦𑀁. 𑀅𑀢𑁆𑀣𑀢𑁄𑀢𑀺 𑀯𑀺𑀲𑁂𑀲𑀯𑀲𑁂𑀦 𑀲𑀸𑀫𑀜𑁆𑀜𑀯𑀲𑁂𑀦 𑀘 𑀧𑀤𑀢𑁆𑀣𑀢𑁄. 𑀮𑀓𑁆𑀔𑀡𑀸𑀤𑀻𑀳𑀻𑀢𑀺 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑁄. 𑀓𑀫𑀢𑁄𑀢𑀺 𑀅𑀦𑀼𑀧𑀼𑀩𑁆𑀩𑀺𑀢𑁄. 𑀅𑀦𑀽𑀦𑀸𑀥𑀺𑀓𑀢𑁄𑀢𑀺 𑀢𑀸𑀯𑀢𑁆𑀢𑀓𑀢𑁄. 𑀯𑀺𑀪𑀸𑀯𑀺𑀦𑀸𑀢𑀺 𑀯𑀺𑀜𑁆𑀜𑀼𑀦𑀸.

𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁂𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀧𑀤𑁂. 𑀲𑀭𑀡𑀝𑁆𑀞𑁂𑀦𑀸𑀢𑀺 𑀅𑀦𑀼𑀲𑁆𑀲𑀭𑀡𑀝𑁆𑀞𑁂𑀦. 𑀘𑀺𑀭𑀓𑀢𑀸𑀤𑀺𑀪𑁂𑀤𑀁 𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀞𑀸𑀦𑀁, 𑀅𑀦𑀺𑀲𑁆𑀲𑀚𑁆𑀚𑀦𑀁 𑀯𑀸 𑀉𑀧𑀝𑁆𑀞𑀸𑀦𑀁. 𑀉𑀤𑀓𑁂 𑀅𑀮𑀸𑀩𑀼 𑀯𑀺𑀬 𑀧𑀺𑀮𑀯𑀺𑀢𑁆𑀯𑀸 𑀕𑀦𑁆𑀢𑀼𑀁 𑀅𑀤𑀢𑁆𑀯𑀸 𑀧𑀸𑀲𑀸𑀡𑀲𑁆𑀲 𑀯𑀺𑀬 𑀦𑀺𑀘𑁆𑀘𑀮𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀞𑀧𑀦𑀁 𑀲𑀸𑀭𑀡𑀁 𑀅𑀲𑀫𑁆𑀫𑀼𑀝𑁆𑀞𑀢𑀸𑀓𑀭𑀡𑀁 𑀅𑀧𑀺𑀮𑀸𑀧𑀦𑀁. 𑀯𑀼𑀢𑁆𑀢𑀫𑁆𑀧𑀺 ¶ 𑀳𑁂𑀢𑀁 𑀫𑀺𑀮𑀺𑀦𑁆𑀤𑀧𑀜𑁆𑀳𑁂. 𑀪𑀡𑁆𑀟𑀸𑀕𑀸𑀭𑀺𑀓𑁄𑀢𑀺 𑀪𑀡𑁆𑀟𑀕𑁄𑀧𑀓𑁄. 𑀅𑀧𑀺𑀮𑀸𑀧𑁂 𑀓𑀭𑁄𑀢𑀺 𑀅𑀧𑀺𑀮𑀸𑀧𑁂𑀢𑀺. 𑀣𑁂𑀭𑁂𑀦𑀸𑀢𑀺 𑀦𑀸𑀕𑀲𑁂𑀦𑀢𑁆𑀣𑁂𑀭𑁂𑀦. 𑀲𑀫𑁆𑀫𑁄𑀲𑀧𑀘𑁆𑀘𑀦𑀻𑀓𑀁 𑀓𑀺𑀘𑁆𑀘𑀁 𑀅𑀲𑀫𑁆𑀫𑁄𑀲𑁄, 𑀦 𑀲𑀫𑁆𑀫𑁄𑀲𑀸𑀪𑀸𑀯𑀫𑀢𑁆𑀢𑀁. 𑀕𑁄𑀘𑀭𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀢𑀺 𑀓𑀸𑀬𑀸𑀤𑀺𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸.

𑀩𑁄𑀥𑀺𑀬𑀸 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸, 𑀅𑀗𑁆𑀕𑁄 𑀅𑀯𑀬𑀯𑁄, 𑀩𑁄𑀥𑀺𑀲𑁆𑀲 𑀯𑀸 𑀅𑀭𑀺𑀬𑀲𑀸𑀯𑀓𑀲𑁆𑀲 𑀅𑀗𑁆𑀕𑁄 𑀓𑀸𑀭𑀡𑀁. 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀸 𑀑𑀖𑀢𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁧) 𑁋

‘‘𑀓𑀺𑀮𑁂𑀲𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁, 𑀅𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀆𑀬𑀽𑀳𑀦𑀸. 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀧𑀢𑀺𑀝𑁆𑀞𑀸𑀦𑀁, 𑀅𑀯𑀲𑁂𑀲𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀆𑀬𑀽𑀳𑀦𑀸. 𑀢𑀡𑁆𑀳𑀸𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁, 𑀤𑀺𑀝𑁆𑀞𑀺𑀯𑀲𑁂𑀦 𑀆𑀬𑀽𑀳𑀦𑀸. 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀧𑀢𑀺𑀝𑁆𑀞𑀸𑀦𑀁, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀆𑀬𑀽𑀳𑀦𑀸. 𑀮𑀻𑀦𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁, 𑀉𑀤𑁆𑀥𑀘𑁆𑀘𑀯𑀲𑁂𑀦 𑀆𑀬𑀽𑀳𑀦𑀸. 𑀓𑀸𑀫𑀲𑀼𑀔𑀸𑀦𑀼𑀬𑁄𑀕𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁, 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀯𑀲𑁂𑀦 𑀆𑀬𑀽𑀳𑀦𑀸. 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁, 𑀲𑀩𑁆𑀩𑀮𑁄𑀓𑀺𑀬𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀆𑀬𑀽𑀳𑀦𑀸’’𑀢𑀺 𑁋

𑀯𑀼𑀢𑁆𑀢𑁂𑀲𑀼 𑀧𑀓𑀸𑀭𑁂𑀲𑀼 𑀇𑀥 𑀅𑀯𑀼𑀢𑁆𑀢𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀬𑀸 𑀳𑀺 𑀅𑀬𑀁 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁 ¶ . ‘‘𑀩𑀼𑀚𑁆𑀛𑀢𑀻’’𑀢𑀺 𑀧𑀤𑀲𑁆𑀲 𑀧𑀝𑀺𑀩𑀼𑀚𑁆𑀛𑀢𑀻𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀓𑀺𑀮𑁂𑀲𑀲𑀦𑁆𑀢𑀸𑀦𑀦𑀺𑀤𑁆𑀤𑀸𑀬 𑀉𑀝𑁆𑀞𑀳𑀢𑀻’’𑀢𑀺. 𑀢𑀁 𑀧𑀦 𑀧𑀝𑀺𑀩𑀼𑀚𑁆𑀛𑀦𑀁 𑀅𑀢𑁆𑀣𑀢𑁄 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀧𑀝𑀺𑀯𑁂𑀥𑁄, 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀯𑀸 𑀲𑀘𑁆𑀙𑀺𑀓𑀺𑀭𑀺𑀬𑀸𑀢𑀺 𑀆𑀳 ‘‘𑀘𑀢𑁆𑀢𑀸𑀭𑀻’’𑀢𑀺𑀆𑀤𑀺. 𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀸𑀤𑀬𑁄 𑀯𑀺𑀬𑀸𑀢𑀺 𑀬𑀣𑀸 𑀅𑀗𑁆𑀕𑀸𑀦𑀺 𑀏𑀯 𑀛𑀸𑀦𑀫𑀕𑁆𑀕𑀸, 𑀦 𑀅𑀗𑁆𑀕𑀯𑀺𑀦𑀺𑀫𑀼𑀢𑁆𑀢𑀸, 𑀏𑀯𑀫𑀺𑀥𑀸𑀧𑀻𑀢𑀺 𑀅𑀢𑁆𑀣𑁄. 𑀲𑁂𑀦𑀗𑁆𑀕𑀭𑀣𑀗𑁆𑀕𑀸𑀤𑀬𑁄 𑀯𑀺𑀬𑀸𑀢𑀺 𑀏𑀢𑁂𑀦 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀬𑀸 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸𑀢𑀺 𑀇𑀤𑀁 𑀓𑀸𑀭𑀡𑀢𑁆𑀣𑁄 𑀅𑀗𑁆𑀕-𑀲𑀤𑁆𑀤𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀥𑀺𑀬𑁄, 𑀩𑁄𑀥𑀺𑀬𑁄 𑀏𑀯 𑀅𑀗𑁆𑀕𑀸𑀢𑀺 𑀩𑁄𑀚𑁆𑀛𑀗𑁆𑀕𑀸𑀢𑀺 𑀯𑀼𑀢𑁆𑀢𑀁 ‘‘𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸’’𑀢𑀺. 𑀅𑀦𑀼𑀩𑀼𑀚𑁆𑀛𑀦𑁆𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀤𑀻𑀦𑀁 𑀓𑀸𑀭𑀡𑀸𑀦𑀁 𑀩𑀼𑀚𑁆𑀛𑀺𑀢𑀩𑁆𑀩𑀸𑀦𑀜𑁆𑀘 𑀲𑀘𑁆𑀘𑀸𑀦𑀁 𑀅𑀦𑀼𑀭𑀽𑀧𑀁 𑀩𑀼𑀚𑁆𑀛𑀦𑁆𑀢𑀺. 𑀧𑀝𑀺𑀩𑀼𑀚𑁆𑀛𑀦𑁆𑀢𑀻𑀢𑀺 𑀓𑀺𑀮𑁂𑀲𑀦𑀺𑀤𑁆𑀤𑀸𑀬 𑀉𑀝𑁆𑀞𑀳𑀦𑀢𑁄 𑀧𑀘𑁆𑀘𑀓𑁆𑀔𑀪𑀸𑀯𑁂𑀦 𑀯𑀸 𑀧𑀝𑀺𑀫𑀼𑀔𑀁 𑀩𑀼𑀚𑁆𑀛𑀦𑁆𑀢𑀺. 𑀲𑀫𑁆𑀩𑀼𑀚𑁆𑀛𑀦𑁆𑀢𑀻𑀢𑀺 𑀅𑀯𑀺𑀧𑀭𑀻𑀢𑀪𑀸𑀯𑁂𑀦 𑀲𑀫𑁆𑀫𑀸 𑀘 𑀩𑀼𑀚𑁆𑀛𑀦𑁆𑀢𑀺. 𑀏𑀯𑀁 𑀉𑀧𑀲𑀕𑁆𑀕𑀸𑀦𑀁 𑀅𑀢𑁆𑀣𑀯𑀺𑀲𑁂𑀲𑀤𑀻𑀧𑀦𑀢𑀸 𑀤𑀝𑁆𑀞𑀩𑁆𑀩𑀸. 𑀩𑁄𑀥𑀺-𑀲𑀤𑁆𑀤𑁄 𑀳𑀺 𑀲𑀩𑁆𑀩𑀯𑀺𑀲𑁂𑀲𑀬𑀼𑀢𑁆𑀢𑀁 𑀩𑀼𑀚𑁆𑀛𑀦𑀁 𑀲𑀸𑀫𑀜𑁆𑀜𑁂𑀦 𑀕𑀳𑁂𑀢𑁆𑀯𑀸 𑀞𑀺𑀢𑁄.

𑀯𑀺𑀘𑀺𑀦𑀸𑀢𑀻𑀢𑀺 ¶ ‘‘𑀢𑀬𑀺𑀤𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀦𑀸 𑀯𑀻𑀫𑀁𑀲𑀢𑀺. 𑀑𑀪𑀸𑀲𑀦𑀁 𑀥𑀫𑁆𑀫𑀸𑀦𑀁 𑀬𑀣𑀸𑀪𑀽𑀢𑀲𑀪𑀸𑀯𑀧𑀝𑀺𑀘𑁆𑀙𑀸𑀤𑀓𑀲𑁆𑀲 𑀲𑀫𑁆𑀫𑁄𑀳𑀲𑁆𑀲 𑀯𑀺𑀤𑁆𑀥𑀁𑀲𑀦𑀁 𑀬𑀣𑀸 𑀆𑀮𑁄𑀓𑁄 𑀅𑀦𑁆𑀥𑀓𑀸𑀭𑀲𑁆𑀲. 𑀬𑀲𑁆𑀫𑀺𑀁 𑀥𑀫𑁆𑀫𑁂 𑀲𑀢𑀺 𑀯𑀻𑀭𑁄 𑀦𑀸𑀫 𑀳𑁄𑀢𑀺, 𑀲𑁄 𑀥𑀫𑁆𑀫𑁄 𑀯𑀻𑀭𑀪𑀸𑀯𑁄. 𑀈𑀭𑀬𑀺𑀢𑀩𑁆𑀩𑀢𑁄𑀢𑀺 𑀧𑀯𑀢𑁆𑀢𑁂𑀢𑀩𑁆𑀩𑀢𑁄. 𑀓𑁄𑀲𑀚𑁆𑀚𑀧𑀓𑁆𑀔𑀢𑁄 𑀧𑀢𑀺𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀧𑀕𑁆𑀕𑀡𑁆𑀳𑀦𑀁 𑀧𑀕𑁆𑀕𑀳𑁄. 𑀉𑀧𑀢𑁆𑀣𑀫𑁆𑀪𑀦𑀁 𑀅𑀦𑀼𑀩𑀮𑀧𑁆𑀧𑀤𑀸𑀦𑀁. 𑀑𑀲𑀻𑀤𑀦𑀁 𑀮𑀬𑀸𑀧𑀢𑁆𑀢𑀺, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀦𑁄𑀲𑀻𑀤𑀦𑀁 𑀤𑀝𑁆𑀞𑀩𑁆𑀩𑀁. 𑀧𑀻𑀡𑀬𑀢𑀻𑀢𑀺 𑀢𑀧𑁆𑀧𑁂𑀢𑀺 𑀯𑀟𑁆𑀠𑁂𑀢𑀺 𑀯𑀸. 𑀨𑀭𑀡𑀁 𑀧𑀡𑀻𑀢𑀭𑀽𑀧𑁂𑀳𑀺 𑀓𑀸𑀬𑀲𑁆𑀲 𑀩𑁆𑀬𑀸𑀧𑀦𑀁. 𑀢𑀼𑀝𑁆𑀞𑀺 𑀦𑀸𑀫 𑀧𑀻𑀢𑀺. 𑀉𑀤𑀕𑁆𑀕𑀪𑀸𑀯𑁄 𑀑𑀤𑀕𑁆𑀬𑀁, 𑀓𑀸𑀬𑀘𑀺𑀢𑁆𑀢𑀸𑀦𑀁 𑀉𑀓𑁆𑀔𑀺𑀧𑀦𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀬𑀘𑀺𑀢𑁆𑀢𑀤𑀭𑀣𑀧𑀲𑁆𑀲𑀫𑁆𑀪𑀦𑀢𑁄𑀢𑀺 𑀓𑀸𑀬𑀤𑀭𑀣𑀲𑁆𑀲 𑀘𑀺𑀢𑁆𑀢𑀤𑀭𑀣𑀲𑁆𑀲 𑀘 𑀧𑀲𑁆𑀲𑀫𑁆𑀪𑀦𑀢𑁄 𑀯𑀽𑀧𑀲𑀫𑀦𑀢𑁄. 𑀓𑀸𑀬𑁄𑀢𑀺 𑀘𑁂𑀢𑁆𑀣 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀔𑀦𑁆𑀥𑀸. 𑀤𑀭𑀣𑁄 𑀲𑀸𑀭𑀫𑁆𑀪𑁄, 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀧𑀘𑁆𑀘𑀬𑀸𑀦𑀁 𑀉𑀤𑁆𑀥𑀘𑁆𑀘𑀸𑀤𑀺𑀓𑀺𑀮𑁂𑀲𑀸𑀦𑀁, 𑀢𑀧𑁆𑀧𑀥𑀸𑀦𑀸𑀦𑀁 𑀯𑀸 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀅𑀥𑀺𑀯𑀘𑀦𑀁. 𑀉𑀤𑁆𑀥𑀘𑁆𑀘𑀸𑀤𑀺𑀓𑀺𑀮𑁂𑀲𑀧𑀝𑀺𑀧𑀓𑁆𑀔𑀪𑀸𑀯𑁄 𑀤𑀝𑁆𑀞𑀩𑁆𑀩𑁄, 𑀏𑀯𑀜𑁆𑀘𑁂𑀢𑁆𑀣 𑀧𑀲𑁆𑀲𑀤𑁆𑀥𑀺𑀬𑀸 𑀅𑀧𑀭𑀺𑀧𑁆𑀨𑀦𑁆𑀤𑀦𑀲𑀻𑀢𑀺𑀪𑀸𑀯𑁄 𑀤𑀝𑁆𑀞𑀩𑁆𑀩𑁄 𑀅𑀲𑀸𑀭𑀤𑁆𑀥𑀪𑀸𑀯𑀢𑁄. 𑀢𑁂𑀦𑀸𑀳 𑀪𑀕𑀯𑀸 ‘‘𑀧𑀲𑁆𑀲𑀤𑁆𑀥𑁄 𑀓𑀸𑀬𑁄 𑀅𑀲𑀸𑀭𑀤𑁆𑀥𑁄’’𑀢𑀺 (𑀫. 𑀦𑀺. 𑁧.𑁫𑁨).

𑀲𑀫𑀸𑀥𑀸𑀦𑀢𑁄𑀢𑀺 𑀲𑀫𑁆𑀫𑀸 𑀘𑀺𑀢𑁆𑀢𑀲𑁆𑀲 𑀆𑀥𑀸𑀦𑀢𑁄 𑀞𑀧𑀦𑀢𑁄. 𑀅𑀯𑀺𑀓𑁆𑀔𑁂𑀧𑁄 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀅𑀯𑀺𑀓𑁆𑀔𑀺𑀢𑁆𑀢𑀢𑀸, 𑀬𑁂𑀦 𑀲𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀅𑀯𑀺𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀲𑁄 𑀥𑀫𑁆𑀫𑁄 𑀅𑀯𑀺𑀓𑁆𑀔𑁂𑀧𑁄𑀢𑀺. 𑀅𑀯𑀺𑀲𑀸𑀭𑁄 𑀅𑀢𑁆𑀢𑀦𑁄 𑀏𑀯 𑀅𑀯𑀺𑀲𑀭𑀡𑀲𑀪𑀸𑀯𑁄. 𑀲𑀫𑁆𑀧𑀺𑀡𑁆𑀟𑀦𑀁 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀅𑀯𑀺𑀧𑁆𑀧𑀓𑀺𑀡𑁆𑀡𑀪𑀸𑀯𑀸𑀧𑀸𑀤𑀦𑀁 𑀦𑁆𑀳𑀸𑀦𑀻𑀬𑀘𑀼𑀡𑁆𑀡𑀸𑀦𑀁 𑀉𑀤𑀓𑀁 𑀯𑀺𑀬. 𑀘𑀺𑀢𑁆𑀢𑀝𑁆𑀞𑀺𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑁄𑀢𑀺 ‘‘𑀘𑀺𑀢𑁆𑀢𑀲𑁆𑀲 𑀞𑀺𑀢𑀻’’𑀢𑀺 (𑀥. 𑀲. 𑁧𑁧) 𑀯𑀘𑀦𑀢𑁄 𑀘𑀺𑀢𑁆𑀢𑀲𑁆𑀲 𑀧𑀩𑀦𑁆𑀥𑀞𑀺𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑁄𑀢𑀺 𑀉𑀤𑀸𑀲𑀻𑀦𑀪𑀸𑀯𑀢𑁄. 𑀲𑀸𑀢𑀺 𑀩𑁄𑀚𑁆𑀛𑀗𑁆𑀕𑀉𑀧𑁂𑀓𑁆𑀔𑀸 ¶ . 𑀲𑀫𑀧𑁆𑀧𑀯𑀢𑁆𑀢𑁂 𑀥𑀫𑁆𑀫𑁂 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀢𑀺 𑀢𑀤𑀸𑀓𑀸𑀭𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀧𑀝𑀺𑀲𑀗𑁆𑀔𑀸𑀦𑀮𑀓𑁆𑀔𑀡𑀸, 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀧𑀝𑀺𑀲𑀗𑁆𑀔𑀸 𑀲𑀦𑁆𑀢𑀺𑀝𑁆𑀞𑀦𑀸 𑀕𑀳𑀡𑁂 𑀫𑀚𑁆𑀛𑀢𑁆𑀢𑀢𑀸’’𑀢𑀺 𑀉𑀧𑁂𑀓𑁆𑀔𑀸𑀓𑀺𑀘𑁆𑀘𑀸𑀥𑀺𑀫𑀢𑁆𑀢𑀢𑀸𑀬 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀯𑀼𑀢𑁆𑀢𑀸. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀬𑀣𑀸𑀲𑀓𑀓𑀺𑀘𑁆𑀘𑀓𑀭𑀡𑀯𑀲𑁂𑀦 𑀲𑀫𑀁 𑀧𑀯𑀢𑁆𑀢𑀦𑀧𑀘𑁆𑀘𑀬𑀢𑀸 𑀲𑀫𑀯𑀸𑀳𑀺𑀢𑀸. 𑀅𑀮𑀻𑀦𑀸𑀦𑀼𑀤𑁆𑀥𑀢𑀧𑁆𑀧𑀯𑀢𑁆𑀢𑀺𑀧𑀘𑁆𑀘𑀬𑀢𑀸 𑀊𑀦𑀸𑀥𑀺𑀓𑀢𑀸𑀦𑀺𑀯𑀸𑀭𑀡𑀁. 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀅𑀲𑀫𑀧𑁆𑀧𑀯𑀢𑁆𑀢𑀺𑀳𑁂𑀢𑀼𑀓𑀧𑀓𑁆𑀔𑀧𑀸𑀢𑀁 𑀉𑀧𑀘𑁆𑀙𑀺𑀦𑁆𑀤𑀦𑁆𑀢𑀻 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀓𑁆𑀔𑀧𑀸𑀢𑀼𑀧𑀘𑁆𑀙𑁂𑀤𑀭𑀲𑀸’’𑀢𑀺. 𑀅𑀚𑁆𑀛𑀼𑀧𑁂𑀓𑁆𑀔𑀦𑀫𑁂𑀯 𑀫𑀚𑁆𑀛𑀢𑁆𑀢𑀪𑀸𑀯𑁄.

𑀲𑀩𑁆𑀩𑀲𑁆𑀫𑀺𑀁 𑀮𑀻𑀦𑀧𑀓𑁆𑀔𑁂 𑀉𑀤𑁆𑀥𑀘𑁆𑀘𑀧𑀓𑁆𑀔𑁂 𑀘 𑀅𑀢𑁆𑀣𑀺𑀓𑀸 𑀧𑀢𑁆𑀣𑀦𑀻𑀬𑀸 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀲𑀩𑁆𑀩𑀢𑁆𑀣𑀺𑀓𑀸, 𑀢𑀁 𑀲𑀩𑁆𑀩𑀢𑁆𑀣𑀺𑀓𑀁. 𑀲𑀫𑀸𑀦𑀓𑁆𑀔𑀡𑀧𑀯𑀢𑁆𑀢𑀻𑀲𑀼 𑀲𑀢𑁆𑀢𑀲𑀼𑀧𑀺 𑀲𑀫𑁆𑀩𑁄𑀚𑁆𑀛𑀗𑁆𑀕𑁂𑀲𑀼 𑀯𑀸𑀘𑀸𑀬 ¶ 𑀓𑀫𑀧𑁆𑀧𑀯𑀢𑁆𑀢𑀺𑀢𑁄 𑀧𑀝𑀺𑀧𑀸𑀝𑀺𑀬𑀸 𑀯𑀢𑁆𑀢𑀩𑁆𑀩𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀧𑀞𑀫𑀁 𑀅𑀯𑀢𑁆𑀯𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲𑁂𑀯 𑀧𑀞𑀫𑀁 𑀯𑀘𑀦𑀲𑁆𑀲 𑀓𑀸𑀭𑀡𑀁 𑀲𑀩𑁆𑀩𑁂𑀲𑀁 𑀉𑀧𑀓𑀸𑀭𑀓𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀲𑀩𑁆𑀩𑁂𑀲’’𑀦𑁆𑀢𑀺𑀆𑀤𑀺. 𑀲𑀩𑁆𑀩𑁂𑀲𑀦𑁆𑀢𑀺 𑀘 𑀮𑀻𑀦𑀼𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀸𑀦𑀁, 𑀅𑀜𑁆𑀜𑀣𑀸 𑀲𑀩𑁆𑀩𑁂𑀧𑀺 𑀲𑀩𑁆𑀩𑁂𑀲𑀁 𑀧𑀘𑁆𑀘𑀬𑀸𑀢𑀺.

‘‘𑀓𑀲𑁆𑀫𑀸 𑀲𑀢𑁆𑀢𑁂𑀯 𑀩𑁄𑀚𑁆𑀛𑀗𑁆𑀕𑀸 𑀯𑀼𑀢𑁆𑀢𑀸’’𑀢𑀺 𑀘𑁄𑀤𑀓𑁄 𑀲𑀤𑁆𑀥𑀸𑀮𑁄𑀪𑀸𑀤𑀻𑀦𑀫𑁆𑀧𑀺 𑀩𑁄𑀚𑁆𑀛𑀗𑁆𑀕𑀪𑀸𑀯𑀁 𑀆𑀲𑀗𑁆𑀓𑀢𑀺, 𑀇𑀢𑀭𑁄 𑀲𑀢𑀺𑀆𑀤𑀻𑀦𑀁𑀬𑁂𑀯 𑀪𑀸𑀯𑀦𑀸𑀬 𑀉𑀧𑀓𑀸𑀭𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀮𑀻𑀦𑀼𑀤𑁆𑀥𑀘𑁆𑀘𑀧𑀝𑀺𑀧𑀓𑁆𑀔𑀢𑁄 𑀲𑀩𑁆𑀩𑀢𑁆𑀣𑀺𑀓𑀢𑁄 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀮𑀻𑀦𑀲𑁆𑀲𑀸𑀢𑀺 𑀅𑀢𑀺𑀲𑀺𑀣𑀺𑀮𑀯𑀻𑀭𑀺𑀬𑀢𑀸𑀤𑀻𑀳𑀺 𑀪𑀸𑀯𑀦𑀸𑀯𑀻𑀣𑀺𑀁 𑀅𑀦𑁄𑀢𑀭𑀺𑀢𑁆𑀯𑀸 𑀲𑀁𑀓𑀼𑀝𑀺𑀢𑀲𑁆𑀲 𑀘𑀺𑀢𑁆𑀢𑀲𑁆𑀲. 𑀢𑀤𑀸 𑀳𑀺 𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀸 𑀦 𑀪𑀸𑀯𑁂𑀢𑀩𑁆𑀩𑀸. 𑀢𑀜𑁆𑀳𑀺 𑀏𑀢𑁂𑀳𑀺 𑀅𑀮𑁆𑀮𑀢𑀺𑀡𑀸𑀤𑀻𑀳𑀺 𑀯𑀺𑀬 𑀧𑀭𑀺𑀢𑁆𑀢𑁄 𑀅𑀕𑁆𑀕𑀺 𑀤𑀼𑀲𑁆𑀲𑀫𑀼𑀝𑁆𑀞𑀸𑀧𑀺𑀬𑀁 𑀳𑁄𑀢𑀻𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀧𑀭𑀺𑀢𑁆𑀢𑀁 𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑁂𑀢𑀼𑀓𑀸𑀫𑁄 𑀅𑀲𑁆𑀲, 𑀲𑁄 𑀢𑀢𑁆𑀣 𑀅𑀮𑁆𑀮𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬𑀸’’𑀢𑀺𑀆𑀤𑀺 (𑀲𑀁. 𑀦𑀺. 𑁫.𑁨𑁩𑁪). 𑀥𑀫𑁆𑀫𑀯𑀺𑀘𑀬𑀯𑀻𑀭𑀺𑀬𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸 𑀧𑀦 𑀪𑀸𑀯𑁂𑀢𑀩𑁆𑀩𑀸, 𑀲𑀼𑀓𑁆𑀔𑀢𑀺𑀡𑀸𑀤𑀻𑀳𑀺 𑀯𑀺𑀬 𑀧𑀭𑀺𑀢𑁆𑀢𑁄 𑀅𑀕𑁆𑀕𑀺 𑀮𑀻𑀦𑀁 𑀘𑀺𑀢𑁆𑀢𑀁 𑀏𑀢𑁂𑀳𑀺 𑀲𑀼𑀲𑀫𑀼𑀝𑁆𑀞𑀸𑀧𑀺𑀬𑀁 𑀳𑁄𑀢𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀲𑁆𑀫𑀺𑀜𑁆𑀘 𑀔𑁄’’𑀢𑀺𑀆𑀤𑀺. 𑀢𑀢𑁆𑀣 𑀬𑀣𑀸𑀲𑀓𑀁 𑀆𑀳𑀸𑀭𑀯𑀲𑁂𑀦 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀻𑀦𑀁 𑀪𑀸𑀯𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸…𑀧𑁂… 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬…𑀧𑁂… 𑀲𑀁𑀯𑀢𑁆𑀢𑀢𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁨). 𑀢𑀢𑁆𑀣 𑀲𑀪𑀸𑀯𑀲𑀸𑀫𑀜𑁆𑀜𑀮𑀓𑁆𑀔𑀡𑀧𑀝𑀺𑀯𑁂𑀥𑀯𑀲𑁂𑀦 𑀧𑀯𑀢𑁆𑀢𑀫𑀦𑀲𑀺𑀓𑀸𑀭𑁄…𑀧𑁂… 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀬𑁄 𑀪𑀸𑀯𑁂𑀢𑀺 𑀦𑀸𑀫.

𑀉𑀤𑁆𑀥𑀘𑁆𑀘𑀲𑁆𑀲𑀸𑀢𑀺 𑀘𑀺𑀢𑁆𑀢𑀲𑁆𑀲 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑀸𑀤𑀻𑀳𑀺 𑀲𑀻𑀢𑀺𑀪𑀸𑀯𑀧𑀢𑀺𑀝𑁆𑀞𑀺𑀢𑀪𑀸𑀯𑀁 𑀅𑀦𑁄𑀢𑀺𑀡𑁆𑀡𑀢𑀸𑀬, 𑀢𑀤𑀸 𑀥𑀫𑁆𑀫𑀯𑀺𑀘𑀬𑀯𑀻𑀭𑀺𑀬𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸 𑀦 𑀪𑀸𑀯𑁂𑀢𑀩𑁆𑀩𑀸. 𑀢𑀜𑁆𑀳𑀺 𑀏𑀢𑁂𑀳𑀺 𑀲𑀼𑀓𑁆𑀔𑀢𑀺𑀡𑀸𑀤𑀻𑀳𑀺 𑀯𑀺𑀬 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀤𑀼𑀯𑀽𑀧𑀲𑀫𑀬𑀁 𑀳𑁄𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 ¶ 𑀦𑀺𑀩𑁆𑀩𑀸𑀧𑁂𑀢𑀼𑀓𑀸𑀫𑁄 𑀅𑀲𑁆𑀲, 𑀲𑁄 𑀢𑀢𑁆𑀣 𑀲𑀼𑀓𑁆𑀔𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬𑀸’’𑀢𑀺𑀆𑀤𑀺 (𑀲𑀁. 𑀦𑀺. 𑁫.𑁨𑁩𑁪). 𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀸 𑀧𑀦 𑀪𑀸𑀯𑁂𑀢𑀩𑁆𑀩𑀸, 𑀅𑀮𑁆𑀮𑀢𑀺𑀡𑀸𑀤𑀻𑀳𑀺 𑀯𑀺𑀬 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀉𑀤𑁆𑀥𑀢𑀁 𑀘𑀺𑀢𑁆𑀢𑀁 𑀏𑀢𑁂𑀳𑀺 𑀲𑀼𑀯𑀽𑀧𑀲𑀫𑀬𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀲𑁆𑀫𑀺𑀜𑁆𑀘 𑀔𑁄’’𑀢𑀺𑀆𑀤𑀺. 𑀏𑀢𑁆𑀣𑀸𑀧𑀺 𑀬𑀣𑀸𑀲𑀓𑀁 𑀆𑀳𑀸𑀭𑀯𑀲𑁂𑀦 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀻𑀦𑀁 𑀪𑀸𑀯𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀓𑀸𑀬𑀧𑀲𑁆𑀲𑀤𑁆𑀥𑀺 ¶ 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺…𑀧𑁂… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀺𑀬𑁆𑀬𑁄𑀪𑀸𑀯𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁨). 𑀢𑀢𑁆𑀣 𑀬𑀣𑀸𑀲𑁆𑀲 𑀧𑀲𑁆𑀲𑀤𑁆𑀥𑀺𑀆𑀤𑀬𑁄 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀸, 𑀢𑀁 𑀆𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑁂𑀲𑀁 𑀉𑀧𑁆𑀧𑀸𑀤𑀦𑀯𑀲𑁂𑀦 𑀢𑀣𑀸 𑀫𑀦𑀲𑀺𑀓𑀭𑁄𑀦𑁆𑀢𑁄𑀯 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀬𑁄 𑀪𑀸𑀯𑁂𑀢𑀺 𑀦𑀸𑀫. 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀧𑀦 𑀲𑀩𑁆𑀩𑀢𑁆𑀣 𑀩𑀳𑀽𑀧𑀓𑀸𑀭𑁄. 𑀲𑁄 𑀳𑀺 𑀘𑀺𑀢𑁆𑀢𑀁 𑀮𑀻𑀦𑀧𑀓𑁆𑀔𑀺𑀓𑀸𑀦𑀁 𑀧𑀲𑁆𑀲𑀤𑁆𑀥𑀺𑀆𑀤𑀻𑀦𑀁 𑀯𑀲𑁂𑀦 𑀮𑀬𑀸𑀧𑀢𑁆𑀢𑀺𑀢𑁄, 𑀉𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀸𑀦𑀜𑁆𑀘 𑀥𑀫𑁆𑀫𑀯𑀺𑀘𑀬𑀸𑀤𑀻𑀦𑀁 𑀯𑀲𑁂𑀦 𑀉𑀤𑁆𑀥𑀘𑁆𑀘𑀧𑀸𑀢𑀢𑁄 𑀭𑀓𑁆𑀔𑀢𑀺, 𑀢𑀲𑁆𑀫𑀸 𑀲𑁄 𑀮𑁄𑀡𑀥𑀽𑀧𑀦𑀁 𑀯𑀺𑀬 𑀲𑀩𑁆𑀩𑀩𑁆𑀬𑀜𑁆𑀚𑀦𑁂𑀲𑀼 𑀲𑀩𑁆𑀩𑀓𑀫𑁆𑀫𑀺𑀓𑀅𑀫𑀘𑁆𑀘𑁄 𑀯𑀺𑀬 𑀘 𑀭𑀸𑀚𑀓𑀺𑀘𑁆𑀘𑁂𑀲𑀼 𑀲𑀩𑁆𑀩𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀲𑀢𑀺𑀜𑁆𑀘 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀢𑁆𑀣𑀺𑀓𑀁 𑀯𑀤𑀸𑀫𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁪).

𑀜𑀢𑁆𑀯𑀸 𑀜𑀸𑀢𑀩𑁆𑀩𑀸𑀢𑀺 (𑀲𑀁. 𑀦𑀺. 𑀝𑀻. 𑁧.𑁧.𑁧𑁨𑁯) 𑀲𑀫𑁆𑀩𑀦𑁆𑀥𑁄. 𑀯𑀟𑁆𑀠𑀺 𑀦𑀸𑀫 𑀯𑁂𑀧𑀼𑀮𑁆𑀮𑀁 𑀪𑀺𑀬𑁆𑀬𑁄𑀪𑀸𑀯𑁄 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀸𑀤𑁄 𑀏𑀯𑀸𑀢𑀺 𑀆𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀚𑀦𑁂𑀢𑀻’’𑀢𑀺. 𑀅𑀪𑀺𑀯𑀼𑀤𑁆𑀥𑀺𑀁 𑀧𑀸𑀧𑁂𑀦𑁆𑀢𑁄 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀯𑀺𑀯𑀺𑀢𑁆𑀢𑀢𑀸𑀢𑀺 𑀯𑀺𑀯𑀺𑀢𑁆𑀢𑀪𑀸𑀯𑁄. 𑀬𑁄 𑀳𑀺 𑀯𑀺𑀯𑁂𑀘𑀦𑀻𑀬𑀢𑁄 𑀯𑀺𑀯𑀺𑀘𑁆𑀘𑀢𑀺, 𑀬𑀁 𑀯𑀺𑀯𑀺𑀘𑁆𑀘𑀺𑀢𑁆𑀯𑀸 𑀞𑀺𑀢𑀁, 𑀢𑀤𑀼𑀪𑀬𑀁 𑀇𑀥 𑀯𑀺𑀯𑀺𑀢𑁆𑀢𑀪𑀸𑀯𑀲𑀸𑀫𑀜𑁆𑀜𑁂𑀦 ‘‘𑀯𑀺𑀯𑀺𑀢𑁆𑀢𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀼 𑀧𑀼𑀭𑀺𑀫𑁄 𑀯𑀺𑀯𑁂𑀘𑀦𑀻𑀬𑀢𑁄 𑀯𑀺𑀯𑀺𑀘𑁆𑀘𑀫𑀸𑀦𑀢𑀸𑀬 𑀯𑀺𑀯𑁂𑀓𑀲𑀗𑁆𑀔𑀸𑀢𑀸𑀬 𑀯𑀺𑀯𑀺𑀘𑁆𑀘𑀦𑀓𑀺𑀭𑀺𑀬𑀸𑀬 𑀲𑀫𑀗𑁆𑀕𑀻 𑀥𑀫𑁆𑀫𑀲𑀫𑀽𑀳𑁄 𑀢𑀸𑀬 𑀏𑀯 𑀯𑀺𑀯𑀺𑀘𑁆𑀘𑀦𑀓𑀺𑀭𑀺𑀬𑀸𑀬 𑀯𑀲𑁂𑀦 𑀯𑀺𑀯𑁂𑀓𑁄𑀢𑀺 𑀕𑀳𑀺𑀢𑁄. 𑀇𑀢𑀭𑁄 𑀲𑀩𑁆𑀩𑀲𑁄 𑀢𑀢𑁄 𑀢𑀢𑁄 𑀯𑀺𑀯𑀺𑀢𑁆𑀢𑀲𑀪𑀸𑀯𑀢𑀸𑀬. 𑀢𑀢𑁆𑀣 𑀬𑀲𑁆𑀫𑀺𑀁 𑀥𑀫𑁆𑀫𑀧𑀼𑀜𑁆𑀚𑁂 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀯𑀺𑀯𑀺𑀘𑁆𑀘𑀦𑀓𑀺𑀭𑀺𑀬𑀸𑀬 𑀧𑀯𑀢𑁆𑀢𑀢𑀺, 𑀢𑀁 𑀬𑀣𑀸𑀯𑀼𑀢𑁆𑀢𑀸𑀬 𑀯𑀺𑀯𑀺𑀘𑁆𑀘𑀫𑀸𑀦𑀢𑀸𑀬 𑀯𑀺𑀯𑁂𑀓𑀲𑀗𑁆𑀔𑀸𑀢𑀁 𑀦𑀺𑀲𑁆𑀲𑀸𑀬𑁂𑀯 𑀧𑀯𑀢𑁆𑀢𑀢𑀺, 𑀇𑀢𑀭𑀁 𑀧𑀦 𑀢𑀦𑁆𑀦𑀺𑀦𑁆𑀦𑀢𑀸𑀢𑀤𑀸𑀭𑀫𑁆𑀫𑀡𑀢𑀸𑀳𑀻𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀯𑁂𑀓𑁂 𑀦𑀺𑀲𑁆𑀲𑀺𑀢’’𑀦𑁆𑀢𑀺. 𑀬𑀣𑀸 𑀯𑀸 𑀯𑀺𑀯𑁂𑀓𑀯𑀲𑁂𑀦 𑀧𑀯𑀢𑁆𑀢𑀁 𑀛𑀸𑀦𑀁 ‘‘𑀯𑀺𑀯𑁂𑀓𑀚’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀯𑀺𑀯𑁂𑀓𑀯𑀲𑁂𑀦 𑀧𑀯𑀢𑁆𑀢𑁄 𑀩𑁄𑀚𑁆𑀛𑀗𑁆𑀕𑁄 ‘‘𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑁄’’𑀢𑀺 𑀤𑀝𑁆𑀞𑀩𑁆𑀩𑁄. 𑀦𑀺𑀲𑁆𑀲𑀬𑀝𑁆𑀞𑁄 𑀘 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀸𑀦𑀁 𑀯𑀲𑁂𑀦 𑀫𑀕𑁆𑀕𑀨𑀮𑀸𑀦𑀁 𑀯𑁂𑀤𑀺𑀢𑀩𑁆𑀩𑁄. 𑀅𑀲𑀢𑀺𑀧𑀺 𑀧𑀼𑀩𑁆𑀩𑀸𑀧𑀭𑀪𑀸𑀯𑁂 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸’’𑀢𑀺 𑀏𑀢𑁆𑀣 𑀧𑀘𑁆𑀘𑀬𑀸𑀦𑀁 𑀲𑀫𑀼𑀧𑁆𑀧𑀸𑀤𑀦𑀁 𑀯𑀺𑀬 𑀅𑀪𑀺𑀦𑁆𑀦𑀥𑀫𑁆𑀫𑀸𑀥𑀸𑀭𑀸 𑀦𑀺𑀲𑁆𑀲𑀬𑀦𑀪𑀸𑀯𑀦𑀸 𑀲𑀫𑁆𑀪𑀯𑀦𑁆𑀢𑀻𑀢𑀺. 𑀅𑀬𑀫𑁂𑀯𑀸𑀢𑀺 𑀯𑀺𑀯𑁂𑀓𑁄 𑀏𑀯. 𑀯𑀺𑀯𑁂𑀓𑁄 𑀳𑀺 𑀧𑀳𑀸𑀦𑀯𑀺𑀦𑀬𑀯𑀺𑀭𑀸𑀕𑀦𑀺𑀭𑁄𑀥𑀸 𑀘 𑀲𑀫𑀸𑀦𑀢𑁆𑀣𑀸.

𑀢𑀤𑀗𑁆𑀕𑀲𑀫𑀼𑀘𑁆𑀙𑁂𑀤𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀢𑀁 𑀯𑀢𑁆𑀯𑀸 𑀧𑀝𑀺𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀢𑀸𑀬 𑀅𑀯𑀘𑀦𑀁 ‘‘𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀢𑀻’’𑀢𑀺𑀆𑀤𑀺𑀦𑀸 𑀪𑀸𑀯𑁂𑀢𑀩𑁆𑀩𑀸𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀇𑀥 𑀯𑀼𑀢𑁆𑀢𑀢𑁆𑀢𑀸. 𑀪𑀸𑀯𑀺𑀢𑀩𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀳𑀺 𑀬𑁂 𑀲𑀘𑁆𑀙𑀺𑀓𑀸𑀢𑀩𑁆𑀩𑀸 𑀨𑀮𑀩𑁄𑀚𑁆𑀛𑀗𑁆𑀕𑀸, 𑀢𑁂𑀲𑀁 𑀓𑀺𑀘𑁆𑀘𑀁 𑀧𑀝𑀺𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑁄. 𑀅𑀚𑁆𑀛𑀸𑀲𑀬𑀢𑁄𑀢𑀺 ¶ ‘‘𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀫𑀳𑀦𑁆𑀢𑀅𑀚𑁆𑀛𑀸𑀲𑀬𑀢𑁄. 𑀬𑀤𑀺𑀧𑀺 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀁 ¶ 𑀘𑀺𑀢𑁆𑀢𑀁, 𑀲𑀗𑁆𑀔𑀸𑀭𑁂𑀲𑀼 𑀧𑀦 𑀆𑀤𑀻𑀦𑀯𑀁 𑀲𑀼𑀝𑁆𑀞𑀼 𑀤𑀺𑀲𑁆𑀯𑀸 𑀢𑀧𑁆𑀧𑀝𑀺𑀧𑀓𑁆𑀔𑁂 𑀦𑀺𑀩𑁆𑀩𑀸𑀦𑁂 𑀅𑀥𑀺𑀫𑀼𑀢𑁆𑀢𑀢𑀸𑀬 𑀅𑀚𑁆𑀛𑀸𑀲𑀬𑀢𑁄 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀢𑀸 𑀤𑀸𑀳𑀸𑀪𑀺𑀪𑀽𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀻𑀢𑀦𑀺𑀦𑁆𑀦𑀘𑀺𑀢𑀢𑁆𑀢𑀸 𑀯𑀺𑀬. 𑀦 𑀧𑀝𑀺𑀲𑀺𑀤𑁆𑀥𑀸 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑁂𑀲𑀼 𑀓𑀲𑀺𑀡𑀸𑀭𑀫𑁆𑀫𑀡𑀸𑀤𑀺𑀛𑀸𑀦𑁂𑀲𑀼 𑀲𑀢𑀺𑀆𑀤𑀻𑀦𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀢𑁆𑀢𑀸. 𑀅𑀦𑀼𑀤𑁆𑀥𑀭𑀦𑁆𑀢𑀸 𑀧𑀦 𑀯𑀺𑀧𑀲𑁆𑀲𑀦𑀸 𑀯𑀺𑀬 𑀩𑁄𑀥𑀺𑀬𑀸 𑀫𑀕𑁆𑀕𑀲𑁆𑀲 𑀆𑀲𑀦𑁆𑀦𑀓𑀸𑀭𑀡𑀁 𑀛𑀸𑀦𑀁 𑀦 𑀳𑁄𑀢𑀺, 𑀦𑀸𑀧𑀺 𑀢𑀣𑀸 𑀏𑀓𑀦𑁆𑀢𑀺𑀓𑀁 𑀓𑀸𑀭𑀡𑀁, 𑀦 𑀘 𑀯𑀺𑀧𑀲𑁆𑀲𑀦𑀸𑀓𑀺𑀘𑁆𑀘𑀲𑁆𑀲 𑀯𑀺𑀬 𑀛𑀸𑀦𑀓𑀺𑀘𑁆𑀘𑀲𑁆𑀲 𑀦𑀺𑀝𑁆𑀞𑀸𑀦𑀁 𑀫𑀕𑁆𑀕𑁄𑀢𑀺 𑀓𑀢𑁆𑀯𑀸 𑀦 𑀉𑀤𑁆𑀥𑀭𑀦𑁆𑀢𑀺. 𑀏𑀢𑁆𑀣 𑀘 𑀓𑀲𑀺𑀡𑀕𑁆𑀕𑀳𑀡𑁂𑀦 𑀢𑀤𑀸𑀬𑀢𑁆𑀢𑀸𑀦𑀺 𑀆𑀭𑀼𑀧𑁆𑀧𑀸𑀦𑀺𑀧𑀺 𑀕𑀳𑀺𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀢𑀸𑀦𑀺𑀧𑀺 𑀳𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸𑀦𑀺 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸𑀦𑀺 𑀘 𑀳𑁄𑀦𑁆𑀢𑀻𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺 𑀢𑀦𑁆𑀦𑀺𑀦𑁆𑀦𑀪𑀸𑀯𑀲𑀩𑁆𑀪𑀸𑀯𑀢𑁄. 𑀬𑀤𑀕𑁆𑀕𑁂𑀦 𑀳𑀺 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀢𑀸, 𑀢𑀤𑀕𑁆𑀕𑁂𑀦 𑀨𑀮𑀦𑀺𑀦𑁆𑀦𑀢𑀸𑀧𑀺 𑀲𑀺𑀬𑀸. ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀁 𑀢𑀤𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺 (𑀫. 𑀦𑀺. 𑁧.𑁪𑁬𑁫) 𑀆𑀤𑀺𑀯𑀘𑀦𑀫𑁆𑀧𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀓𑀁.

𑀯𑁄𑀲𑁆𑀲𑀕𑁆𑀕-𑀲𑀤𑁆𑀤𑁄 𑀧𑀭𑀺𑀘𑁆𑀘𑀸𑀕𑀢𑁆𑀣𑁄 𑀧𑀓𑁆𑀔𑀦𑁆𑀤𑀦𑀢𑁆𑀣𑁄 𑀘𑀸𑀢𑀺 𑀯𑁄𑀲𑁆𑀲𑀕𑁆𑀕𑀲𑁆𑀲 𑀤𑀼𑀯𑀺𑀥𑀢𑀸 𑀯𑀼𑀢𑁆𑀢𑀸. 𑀯𑁄𑀲𑁆𑀲𑀚𑁆𑀚𑀦𑀜𑁆𑀳𑀺 𑀧𑀳𑀸𑀦𑀁, 𑀯𑀺𑀲𑁆𑀲𑀝𑁆𑀞𑀪𑀸𑀯𑁂𑀦 𑀦𑀺𑀭𑀸𑀲𑀗𑁆𑀓𑀧𑀯𑀢𑀺 𑀘, 𑀢𑀲𑁆𑀫𑀸 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀢𑀤𑀗𑁆𑀕𑀯𑀲𑁂𑀦, 𑀫𑀕𑁆𑀕𑀓𑁆𑀔𑀡𑁂 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀝𑀺𑀧𑀓𑁆𑀔𑀲𑁆𑀲 𑀧𑀳𑀸𑀦𑀁 𑀯𑁄𑀲𑁆𑀲𑀕𑁆𑀕𑁄, 𑀢𑀣𑀸 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀢𑀦𑁆𑀦𑀺𑀦𑁆𑀦𑀪𑀸𑀯𑁂𑀦, 𑀫𑀕𑁆𑀕𑀓𑁆𑀔𑀡𑁂 𑀆𑀭𑀫𑁆𑀫𑀡𑀓𑀭𑀡𑁂𑀦 𑀯𑀺𑀲𑁆𑀲𑀝𑁆𑀞𑀲𑀪𑀸𑀯𑀢𑁄 𑀯𑁄𑀲𑁆𑀲𑀕𑁆𑀕𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀯𑀼𑀢𑁆𑀢𑁂𑀦 𑀧𑀓𑀸𑀭𑁂𑀦𑀸𑀢𑀺 𑀢𑀤𑀗𑁆𑀕𑀲𑀫𑀼𑀘𑁆𑀙𑁂𑀤𑀧𑀓𑀸𑀭𑁂𑀦 𑀢𑀦𑁆𑀦𑀺𑀦𑁆𑀦𑀢𑀤𑀸𑀭𑀫𑁆𑀫𑀡𑀓𑀭𑀡𑀧𑀓𑀸𑀭𑁂𑀦 𑀘. 𑀧𑀼𑀩𑁆𑀩𑁂 𑀯𑁄𑀲𑁆𑀲𑀕𑁆𑀕-𑀧𑀤𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀲𑀓𑀮𑁂𑀦 𑀯𑀘𑀦𑁂𑀦𑀸’’𑀢𑀺. 𑀧𑀭𑀺𑀡𑀫𑀦𑁆𑀢𑀁 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂, 𑀧𑀭𑀺𑀡𑀢𑀁 𑀫𑀕𑁆𑀕𑀓𑁆𑀔𑀡𑁂. 𑀧𑀭𑀺𑀡𑀸𑀫𑁄 𑀦𑀸𑀫 𑀧𑀭𑀺𑀧𑀸𑀓𑁄𑀢𑀺 𑀆𑀳 ‘‘𑀧𑀭𑀺𑀧𑀘𑁆𑀘𑀦𑁆𑀢𑀁 𑀧𑀭𑀺𑀧𑀓𑁆𑀓𑀜𑁆𑀘𑀸’’𑀢𑀺. 𑀧𑀭𑀺𑀧𑀸𑀓𑁄 𑀘 𑀆𑀲𑁂𑀯𑀦𑀮𑀸𑀪𑁂𑀦 𑀆𑀳𑀺𑀢𑀲𑀸𑀫𑀢𑁆𑀣𑀺𑀬𑀲𑁆𑀲 𑀓𑀺𑀮𑁂𑀲𑀲𑁆𑀲 𑀧𑀭𑀺𑀘𑁆𑀘𑀚𑀺𑀢𑀼𑀁 𑀦𑀺𑀩𑁆𑀩𑀸𑀦𑀜𑁆𑀘 𑀧𑀓𑁆𑀔𑀦𑁆𑀤𑀺𑀢𑀼𑀁 𑀢𑀺𑀓𑁆𑀔𑀯𑀺𑀲𑀤𑀲𑀪𑀸𑀯𑁄. 𑀢𑁂𑀦𑀸𑀳 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺. 𑀏𑀲 𑀦𑀬𑁄𑀢𑀺 𑀬𑁆𑀯𑀸𑀬𑀁 ‘‘𑀢𑀤𑀗𑁆𑀕𑀯𑀺𑀯𑁂𑀓𑀦𑀺𑀲𑁆𑀲𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁂 𑀯𑀼𑀢𑁆𑀢𑁄, 𑀲𑁂𑀲𑁂𑀲𑀼 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀻𑀲𑀼𑀧𑀺 𑀏𑀲 𑀦𑀬𑁄𑀢𑀺 𑀏𑀯𑀁 𑀢𑀢𑁆𑀣 𑀦𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀏𑀯𑀁 𑀆𑀤𑀺𑀓𑀫𑁆𑀫𑀺𑀓𑀸𑀦𑀁 𑀩𑁄𑀚𑁆𑀛𑀗𑁆𑀕𑁂𑀲𑀼 𑀅𑀲𑀫𑁆𑀫𑁄𑀳𑀢𑁆𑀣𑀁 𑀫𑀺𑀲𑁆𑀲𑀓𑀦𑀬𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀩𑁄𑀚𑁆𑀛𑀗𑁆𑀕𑀯𑀲𑁂𑀦 𑀅𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀇𑀥 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀥 𑀧𑀦𑀸𑀢𑀺 𑀇𑀫𑀲𑁆𑀫𑀺𑀁 𑀲𑀩𑁆𑀩𑀸𑀲𑀯𑀲𑀼𑀢𑁆𑀢𑀦𑁆𑀢𑁂. 𑀫𑀕𑁆𑀕𑁄 𑀏𑀯 𑀯𑁄𑀲𑁆𑀲𑀕𑁆𑀕𑀯𑀺𑀧𑀭𑀺𑀡𑀸𑀫𑀻 𑀪𑀸𑀯𑀦𑀸𑀫𑀕𑁆𑀕𑀲𑁆𑀲 𑀇𑀥 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑀜𑁆𑀘 𑀔𑁄𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁. 𑀲𑀫𑀼𑀘𑁆𑀙𑁂𑀤𑀢𑁄𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄.

𑀤𑀺𑀝𑁆𑀞𑀸𑀲𑀯𑀲𑁆𑀲 ¶ 𑀧𑀞𑀫𑀫𑀕𑁆𑀕𑀯𑀚𑁆𑀛𑀢𑁆𑀢𑀸 ‘‘𑀢𑀬𑁄 𑀆𑀲𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀧𑀺 𑀅𑀦𑀧𑀸𑀬𑀕𑀫𑀦𑀻𑀬𑀸 𑀏𑀯 𑀯𑁂𑀤𑀺𑀢𑀩𑁆𑀩𑀸 ¶ 𑀅𑀧𑀸𑀬𑀕𑀫𑀦𑀻𑀬𑀸𑀦𑀁 𑀤𑀲𑁆𑀲𑀦𑁂𑀦𑁂𑀯 𑀧𑀳𑀻𑀦𑀢𑁆𑀢𑀸. 𑀲𑀢𑀺𑀧𑀺 𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀫𑀕𑁆𑀕𑀪𑀸𑀯𑁂 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀪𑀸𑀯𑀸𑀦𑀁 𑀫𑀕𑁆𑀕𑀥𑀫𑁆𑀫𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀫𑀕𑁆𑀕𑀢𑁆𑀢𑀬𑀲𑀫𑁆𑀧𑀬𑀼𑀢𑁆𑀢𑀸 𑀩𑁄𑀚𑁆𑀛𑀗𑁆𑀕𑀸𑀢𑀺 𑀧𑀘𑁆𑀘𑁂𑀓𑀩𑁄𑀚𑁆𑀛𑀗𑁆𑀕𑁂 ‘‘𑀩𑁄𑀚𑁆𑀛𑀗𑁆𑀕𑀪𑀸𑀯𑀦𑀸𑀬𑀸’’𑀢𑀺 𑀇𑀫𑀺𑀦𑀸 𑀕𑀡𑁆𑀳𑀦𑁆𑀢𑁄 ‘‘𑀫𑀕𑁆𑀕𑀢𑁆𑀢𑀬𑀲𑀫𑁆𑀧𑀬𑀼𑀢𑁆𑀢𑀸𑀬𑀸’’𑀢𑀺 𑀆𑀳.

𑀪𑀸𑀯𑀦𑀸𑀧𑀳𑀸𑀢𑀩𑁆𑀩𑀆𑀲𑀯𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁮. 𑀣𑁄𑀫𑁂𑀦𑁆𑀢𑁄𑀢𑀺 𑀆𑀲𑀯𑀧𑁆𑀧𑀳𑀸𑀦𑀲𑁆𑀲 𑀲𑀼𑀤𑀼𑀓𑁆𑀓𑀭𑀢𑁆𑀢𑀸 𑀢𑀸𑀬 𑀏𑀯 𑀤𑀼𑀓𑁆𑀓𑀭𑀓𑀺𑀭𑀺𑀬𑀸𑀬 𑀢𑀁 𑀅𑀪𑀺𑀢𑁆𑀣𑀯𑀦𑁆𑀢𑁄. 𑀅𑀲𑁆𑀲𑀸𑀢𑀺 𑀧𑀳𑀻𑀦𑀸𑀲𑀯𑀪𑀺𑀓𑁆𑀔𑀼𑀦𑁄. 𑀆𑀦𑀺𑀲𑀁𑀲𑀦𑁆𑀢𑀺 𑀢𑀡𑁆𑀳𑀸𑀘𑁆𑀙𑁂𑀤𑀸𑀤𑀺𑀤𑀼𑀓𑁆𑀔𑀓𑁆𑀔𑀬𑀧𑀭𑀺𑀬𑁄𑀲𑀸𑀦𑀁 𑀉𑀤𑁆𑀭𑀬𑀁. 𑀏𑀢𑁂𑀳𑀺 𑀧𑀳𑀸𑀦𑀸𑀤𑀺𑀲𑀁𑀓𑀺𑀢𑁆𑀢𑀦𑁂𑀳𑀺. 𑀉𑀲𑁆𑀲𑀼𑀓𑁆𑀓𑀁 𑀚𑀦𑁂𑀦𑁆𑀢𑁄𑀢𑀺 𑀏𑀯𑀁 𑀥𑀫𑁆𑀫𑀲𑁆𑀲𑀸𑀫𑀺𑀦𑀸𑀧𑀺 𑀅𑀪𑀺𑀢𑁆𑀣𑀯𑀦𑀻𑀬𑀁 𑀫𑀳𑀸𑀦𑀺𑀲𑀁𑀲𑀜𑁆𑀘 𑀆𑀲𑀯𑀧𑁆𑀧𑀳𑀸𑀦𑀦𑁆𑀢𑀺 𑀢𑀢𑁆𑀣 𑀆𑀤𑀭𑀲𑀳𑀺𑀢𑀁 𑀉𑀲𑁆𑀲𑀸𑀳𑀁 𑀉𑀧𑁆𑀧𑀸𑀤𑁂𑀦𑁆𑀢𑁄. 𑀤𑀲𑁆𑀲𑀦𑁂𑀦𑁂𑀯 𑀧𑀳𑀻𑀦𑀸𑀢𑀺 𑀤𑀲𑁆𑀲𑀦𑁂𑀦 𑀧𑀳𑀻𑀦𑀸 𑀏𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀦 𑀅𑀧𑁆𑀧𑀳𑀻𑀦𑁂𑀲𑀼𑀬𑁂𑀯 𑀧𑀳𑀻𑀦𑀲𑀜𑁆𑀜𑀻’’𑀢𑀺.

𑀲𑀩𑁆𑀩-𑀲𑀤𑁆𑀤𑁂𑀦 𑀆𑀲𑀯𑀸𑀦𑀁, 𑀆𑀲𑀯𑀲𑀁𑀯𑀭𑀸𑀦𑀜𑁆𑀘 𑀲𑀫𑁆𑀩𑀦𑁆𑀥𑀯𑀲𑁂𑀦 𑀤𑀼𑀢𑀺𑀬𑀧𑀞𑀫𑀯𑀺𑀓𑀧𑁆𑀧𑀸𑀦𑀁 𑀪𑁂𑀤𑁄 𑀤𑀝𑁆𑀞𑀩𑁆𑀩𑁄. 𑀤𑀲𑁆𑀲𑀦𑀸𑀪𑀺𑀲𑀫𑀬𑀸𑀢𑀺 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸 𑀧𑀭𑀺𑀜𑁆𑀜𑀸𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸. 𑀢𑁂𑀦𑀸𑀳 ‘‘𑀓𑀺𑀘𑁆𑀘𑀯𑀲𑁂𑀦𑀸’’𑀢𑀺, 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀫𑀼𑀲𑁆𑀲𑀬𑁄 𑀓𑀸𑀬𑁄, 𑀅𑀢𑁆𑀢𑀪𑀸𑀯𑁄 𑀯𑀸.

𑀅𑀦𑀯𑀚𑁆𑀚𑀧𑀻𑀢𑀺𑀲𑁄𑀫𑀦𑀲𑁆𑀲𑀲𑀳𑀺𑀢𑀁 𑀘𑀺𑀢𑁆𑀢𑀁 ‘‘𑀅𑀢𑁆𑀢𑀦𑁄’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺 𑀅𑀢𑁆𑀣𑀸𑀯𑀳𑀢𑁆𑀢𑀸, 𑀦 𑀢𑀩𑁆𑀩𑀺𑀧𑀭𑀻𑀢𑀁 𑀅𑀦𑀢𑁆𑀣𑀸𑀯𑀳𑀢𑁆𑀢𑀸𑀢𑀺 𑀧𑀻𑀢𑀺𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀢𑁆𑀢𑀫𑀦𑀸𑀢𑀺 𑀲𑀓𑀫𑀦𑀸’’𑀢𑀺. 𑀢𑁂𑀦𑀸𑀳 ‘‘𑀢𑀼𑀝𑁆𑀞𑀫𑀦𑀸’’𑀢𑀺. 𑀅𑀢𑁆𑀢𑀫𑀦𑀸𑀢𑀺 𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑁂𑀳𑀺 𑀕𑀳𑀺𑀢𑀫𑀦𑀸. 𑀬𑀲𑁆𑀫𑀸 𑀧𑀦 𑀢𑁂𑀳𑀺 𑀕𑀳𑀺𑀢𑀢𑀸 𑀲𑀫𑁆𑀧𑀬𑀼𑀢𑁆𑀢𑀢𑀸𑀯, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀻𑀢𑀺𑀲𑁄𑀫𑀦𑀲𑁆𑀲𑁂𑀳𑀺 𑀯𑀸 𑀲𑀫𑁆𑀧𑀬𑀼𑀢𑁆𑀢𑀫𑀦𑀸’’𑀢𑀺. 𑀬𑀤𑁂𑀢𑁆𑀣 𑀅𑀢𑁆𑀣𑀢𑁄 𑀦 𑀯𑀺𑀪𑀢𑁆𑀢𑀁, 𑀢𑀁 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀩𑁆𑀩𑀸𑀲𑀯𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁩. 𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯. 𑀢𑀲𑁆𑀫𑀸 ¶ ¶ 𑀢𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀬𑀲𑁆𑀫𑀸 𑀲𑀼𑀢𑁆𑀢𑀦𑁆𑀢𑀯𑀡𑁆𑀡𑀦𑀸 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀁 𑀤𑀲𑁆𑀲𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀸 𑀧𑀸𑀓𑀝𑀸 𑀳𑁄𑀢𑀺, 𑀬𑀲𑁆𑀫𑀸 𑀘𑀲𑁆𑀲 𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄 𑀦𑀺𑀓𑁆𑀔𑁂𑀧𑁄, 𑀢𑀲𑁆𑀫𑀸 𑀢𑀁 𑀦𑀺𑀓𑁆𑀔𑁂𑀧𑀁 𑀤𑀲𑁆𑀲𑁂𑀢𑁆𑀯𑀸, 𑀓𑀣𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀮𑀸𑀪𑀲𑀓𑁆𑀓𑀸𑀭𑁂𑀢𑀺 (𑀲𑀁. 𑀦𑀺. 𑀝𑀻. 𑁨.𑁨.𑁬𑁩) 𑀮𑀸𑀪𑀲𑀓𑁆𑀓𑀸𑀭𑀲𑀗𑁆𑀔𑀸𑀢𑀸𑀬 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸𑀢𑀺 𑀓𑁂𑀘𑀺, 𑀮𑀸𑀪𑀲𑀓𑁆𑀓𑀸𑀭𑁂 𑀯𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸𑀢𑀺 𑀅𑀧𑀭𑁂. 𑀬𑀸 𑀳𑀺 𑀮𑀸𑀪𑀲𑀓𑁆𑀓𑀸𑀭𑀦𑀺𑀫𑀺𑀢𑁆𑀢𑀁 𑀢𑀤𑀸 𑀪𑀺𑀓𑁆𑀔𑀽𑀲𑀼 𑀧𑀘𑁆𑀘𑀬𑀩𑀸𑀳𑀼𑀮𑁆𑀮𑀺𑀓𑀢𑀸 𑀚𑀸𑀢𑀸, 𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀪𑀕𑀯𑀸 𑀇𑀫𑀁 𑀤𑁂𑀲𑁂𑀲𑀻𑀢𑀺. 𑀬𑀫𑀓𑀫𑀳𑀸𑀫𑁂𑀖𑁄𑀢𑀺 𑀳𑁂𑀝𑁆𑀞𑀸𑀑𑀮𑀫𑁆𑀩𑀦𑀉𑀧𑀭𑀺𑀉𑀕𑁆𑀕𑀫𑀦𑀯𑀲𑁂𑀦 𑀲𑀢𑀧𑀝𑀮𑁄 𑀲𑀳𑀲𑁆𑀲𑀧𑀝𑀮𑁄 𑀬𑀼𑀕𑀴𑀫𑀳𑀸𑀫𑁂𑀖𑁄. 𑀢𑀺𑀝𑁆𑀞𑀦𑁆𑀢𑀺 𑀘𑁂𑀯 𑀪𑀕𑀯𑀢𑀺 𑀓𑀢𑁆𑀣𑀘𑀺 𑀦𑀺𑀩𑀤𑁆𑀥𑀯𑀸𑀲𑀁 𑀯𑀲𑀦𑁆𑀢𑁂, 𑀘𑀸𑀭𑀺𑀓𑀁 𑀧𑀦 𑀕𑀘𑁆𑀙𑀦𑁆𑀢𑁂 𑀅𑀦𑀼𑀩𑀦𑁆𑀥𑀦𑁆𑀢𑀺 𑀘. 𑀪𑀺𑀓𑁆𑀔𑀽𑀦𑀫𑁆𑀧𑀺 𑀬𑁂𑀪𑀼𑀬𑁆𑀬𑁂𑀦 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀢𑀢𑁄 𑀪𑀺𑀬𑁆𑀬𑁄𑀧𑀺 𑀧𑀽𑀭𑀺𑀢𑀤𑀸𑀦𑀧𑀸𑀭𑀫𑀺𑀲𑀜𑁆𑀘𑀬𑀢𑁆𑀢𑀸 𑀢𑀤𑀸 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀻𑀢𑀺 𑀯𑀼𑀢𑁆𑀢𑀁 ‘‘𑀏𑀯𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀧𑀻’’𑀢𑀺.

𑀲𑀓𑁆𑀓𑀢𑁄𑀢𑀺 𑀲𑀓𑁆𑀓𑀸𑀭𑀧𑁆𑀧𑀢𑁄. 𑀕𑀭𑀼𑀓𑀢𑁄𑀢𑀺 𑀕𑀭𑀼𑀓𑀸𑀭𑀧𑁆𑀧𑀢𑁆𑀢𑁄. 𑀫𑀸𑀦𑀺𑀢𑁄𑀢𑀺 𑀩𑀳𑀼𑀫𑀢𑁄 𑀫𑀦𑀲𑀸 𑀧𑀺𑀬𑀸𑀬𑀺𑀢𑁄 𑀘. 𑀧𑀽𑀚𑀺𑀢𑁄𑀢𑀺 𑀫𑀸𑀮𑀸𑀤𑀺𑀧𑀽𑀚𑀸𑀬 𑀘𑁂𑀯 𑀘𑀢𑀼𑀧𑀘𑁆𑀘𑀬𑀸𑀪𑀺𑀧𑀽𑀚𑀸𑀬 𑀘 𑀧𑀽𑀚𑀺𑀢𑁄. 𑀅𑀧𑀘𑀺𑀢𑁄𑀢𑀺 𑀅𑀧𑀘𑀸𑀬𑀦𑀧𑁆𑀧𑀢𑁆𑀢𑁄. 𑀬𑀲𑁆𑀲 𑀳𑀺 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀲𑀓𑁆𑀓𑀢𑁆𑀯𑀸𑀧𑀺 𑀅𑀪𑀺𑀲𑀗𑁆𑀔𑀢𑁂 𑀧𑀡𑀻𑀢𑀧𑀡𑀻𑀢𑁂 𑀉𑀧𑀦𑁂𑀦𑁆𑀢𑀺, 𑀲𑁄 𑀲𑀓𑁆𑀓𑀢𑁄. 𑀬𑀲𑁆𑀫𑀺𑀁 𑀕𑀭𑀼𑀪𑀸𑀯𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀢𑁂 𑀤𑁂𑀦𑁆𑀢𑀺, 𑀲𑁄 𑀕𑀭𑀼𑀓𑀢𑁄. 𑀬𑀁 𑀫𑀦𑀲𑀸 𑀧𑀺𑀬𑀸𑀬𑀦𑁆𑀢𑀺 𑀩𑀳𑀼𑀫𑀜𑁆𑀜𑀦𑁆𑀢𑀺 𑀘, 𑀲𑁄 𑀩𑀳𑀼𑀫𑀢𑁄. 𑀬𑀲𑁆𑀲 𑀲𑀩𑁆𑀩𑀫𑁂𑀢𑀁 𑀧𑀽𑀚𑀸𑀯𑀲𑁂𑀦 𑀓𑀭𑁄𑀦𑁆𑀢𑀺, 𑀲𑁄 𑀧𑀽𑀚𑀺𑀢𑁄. 𑀬𑀲𑁆𑀲 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀜𑁆𑀚𑀮𑀺𑀓𑀫𑁆𑀫𑀸𑀤𑀺𑀯𑀲𑁂𑀦 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀲𑁄 𑀅𑀧𑀘𑀺𑀢𑁄. 𑀪𑀕𑀯𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑁂 𑀘 𑀮𑁄𑀓𑁄 𑀏𑀯𑀁 𑀧𑀝𑀺𑀧𑀦𑁆𑀦𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑁂𑀦 𑀔𑁄 𑀧𑀦…𑀧𑁂… 𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺. 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑀢𑁆𑀢𑀦𑁆𑀢𑀺 𑀮𑀸𑀪𑀲𑁆𑀲 𑀘 𑀬𑀲𑀲𑁆𑀲 𑀘 𑀅𑀕𑁆𑀕𑀁 𑀉𑀓𑁆𑀓𑀁𑀲𑀁 𑀧𑀢𑁆𑀢𑀁.

𑀧𑀘𑁆𑀘𑀬𑀸 𑀘𑀻𑀯𑀭𑀸𑀤𑀬𑁄 𑀕𑀭𑀼𑀓𑀸𑀢𑀩𑁆𑀩𑀸 𑀏𑀢𑁂𑀲𑀦𑁆𑀢𑀺 𑀧𑀘𑁆𑀘𑀬𑀕𑀭𑀼𑀓𑀸, 𑀆𑀫𑀺𑀲𑀘𑀓𑁆𑀔𑀼𑀓𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑁂𑀲𑀼 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀧𑀘𑁆𑀘𑀬𑀸𑀦𑀁 𑀩𑀳𑀼𑀮𑀪𑀸𑀯𑀸𑀬 𑀧𑀝𑀺𑀧𑀦𑁆𑀦𑀸𑀢𑀺 𑀧𑀘𑁆𑀘𑀬𑀩𑀸𑀳𑀼𑀮𑀺𑀓𑀸. 𑀪𑀕𑀯𑀢𑁄𑀧𑀺 𑀧𑀸𑀓𑀝𑀸 𑀅𑀳𑁄𑀲𑀺 𑀧𑀓𑀢𑀺𑀘𑀸𑀭𑀺𑀢𑁆𑀢𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄 𑀅𑀜𑁆𑀜𑀣𑀸 𑀅𑀧𑀸𑀓𑀝𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀥𑀫𑁆𑀫𑀲𑀪𑀸𑀯𑀘𑀺𑀦𑁆𑀢𑀸𑀯𑀲𑁂𑀦 𑀧𑀯𑀢𑁆𑀢𑀁 𑀲𑀳𑁄𑀢𑁆𑀢𑀧𑁆𑀧𑀜𑀸𑀡𑀁 𑀥𑀫𑁆𑀫𑀲𑀁𑀯𑁂𑀕𑁄, 𑀇𑀥 ¶ 𑀧𑀦 𑀲𑁄 𑀪𑀺𑀓𑁆𑀔𑀽𑀦𑀁 𑀮𑀸𑀪𑀕𑀭𑀼𑀢𑀸𑀥𑀫𑁆𑀫𑀯𑀲𑁂𑀦 ¶ 𑀯𑁂𑀤𑀺𑀢𑀩𑁆𑀩𑁄. 𑀲𑀫𑀡𑀥𑀫𑁆𑀫𑀯𑀼𑀢𑁆𑀢𑀻𑀢𑀺 𑀲𑀫𑀡𑀥𑀫𑁆𑀫𑀓𑀭𑀡𑀁. 𑀲𑀸𑀢𑀺 𑀥𑀫𑁆𑀫𑀤𑀸𑀬𑀸𑀤𑀤𑁂𑀲𑀦𑀸. 𑀧𑀝𑀺𑀩𑀺𑀫𑁆𑀩𑀤𑀲𑁆𑀲𑀦𑀯𑀲𑁂𑀦 𑀲𑀩𑁆𑀩𑀓𑀸𑀬𑀲𑁆𑀲 𑀤𑀲𑁆𑀲𑀦𑀬𑁄𑀕𑁆𑀕𑁄 𑀆𑀤𑀸𑀲𑁄𑀢𑀺 𑀲𑀩𑁆𑀩𑀓𑀸𑀬𑀺𑀓𑀆𑀤𑀸𑀲𑁄.

𑀧𑀺𑀢𑀼-𑀤𑀸𑀬𑀁, 𑀢𑁂𑀦 𑀤𑀸𑀢𑀩𑁆𑀩𑀁, 𑀢𑀢𑁄 𑀮𑀤𑁆𑀥𑀩𑁆𑀩𑀁 𑀅𑀭𑀳𑀪𑀸𑀯𑁂𑀦 𑀆𑀤𑀺𑀬𑀦𑁆𑀢𑀻𑀢𑀺 𑀤𑀸𑀬𑀸𑀤𑀸, 𑀧𑀼𑀢𑁆𑀢𑀸. 𑀢𑀜𑁆𑀘 𑀮𑁄𑀓𑁂 𑀆𑀫𑀺𑀲𑀫𑁂𑀯, 𑀲𑀸𑀲𑀦𑁂 𑀧𑀦 𑀥𑀫𑁆𑀫𑁄𑀧𑀻𑀢𑀺 𑀢𑀢𑁆𑀣 𑀬𑀁 𑀲𑀸𑀯𑀚𑁆𑀚𑀁 𑀅𑀦𑀺𑀬𑁆𑀬𑀸𑀦𑀺𑀓𑀜𑁆𑀘, 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸, 𑀬𑀁 𑀦𑀺𑀬𑁆𑀬𑀸𑀦𑀺𑀓𑀁 𑀅𑀦𑀯𑀚𑁆𑀚𑀜𑁆𑀘, 𑀢𑀢𑁆𑀣 𑀪𑀺𑀓𑁆𑀔𑀽 𑀦𑀺𑀬𑁄𑀚𑁂𑀦𑁆𑀢𑁄 𑀪𑀕𑀯𑀸 𑀅𑀯𑁄𑀘 ‘‘𑀥𑀫𑁆𑀫𑀤𑀸𑀬𑀸𑀤𑀸 𑀫𑁂, 𑀪𑀺𑀓𑁆𑀔𑀯𑁂, 𑀪𑀯𑀣, 𑀫𑀸 𑀆𑀫𑀺𑀲𑀤𑀸𑀬𑀸𑀤𑀸’’𑀢𑀺. 𑀥𑀫𑁆𑀫𑀲𑁆𑀲 𑀫𑁂 𑀤𑀸𑀬𑀸𑀤𑀸𑀢𑀺 𑀫𑀫 𑀥𑀫𑁆𑀫𑀲𑁆𑀲 𑀑𑀕𑀸𑀳𑀺𑀦𑁄, 𑀥𑀫𑁆𑀫𑀪𑀸𑀕𑀪𑀸𑀕𑀺𑀦𑁄𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀥𑀫𑁆𑀫𑀓𑁄𑀝𑁆𑀞𑀸𑀲𑀲𑁆𑀲𑁂𑀯 𑀲𑀸𑀫𑀺𑀦𑁄’’𑀢𑀺 (𑀫. 𑀦𑀺. 𑀅𑀝𑁆𑀞.𑁧.𑁨𑁯). 𑀦𑀺𑀩𑁆𑀩𑀢𑁆𑀢𑀺𑀢𑀥𑀫𑁆𑀫𑁄𑀢𑀺 𑀅𑀲𑀁𑀓𑀺𑀮𑁂𑀲𑀺𑀓𑀸𑀦𑀼𑀢𑁆𑀢𑀭𑀸𑀤𑀺𑀪𑀸𑀯𑁂𑀦 𑀥𑀫𑁆𑀫𑀲𑀸𑀫𑀜𑁆𑀜𑀢𑁄 𑀦𑀺𑀤𑁆𑀥𑀸𑀭𑀺𑀢𑀥𑀫𑁆𑀫𑁄. 𑀧𑀭𑀺𑀬𑀸𑀬𑁂𑀢𑀺 𑀲𑀪𑀸𑀯𑀢𑁄 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀜𑀸𑀧𑁂𑀢𑀺 𑀏𑀢𑁂𑀦𑀸𑀢𑀺 𑀧𑀭𑀺𑀬𑀸𑀬𑁄, 𑀮𑁂𑀲𑁄, 𑀮𑁂𑀲𑀓𑀸𑀭𑀡𑀁 𑀯𑀸. 𑀢𑀤𑀪𑀸𑀯𑀢𑁄 𑀦𑀺𑀧𑁆𑀧𑀭𑀺𑀬𑀸𑀬𑀥𑀫𑁆𑀫𑁄 𑀫𑀕𑁆𑀕𑀧𑁆𑀧𑀢𑁆𑀢𑀺𑀬𑀸 𑀅𑀧𑀸𑀬𑀧𑀢𑀦𑀸𑀤𑀺𑀢𑁄 𑀅𑀘𑁆𑀘𑀦𑁆𑀢𑀫𑁂𑀯 𑀯𑀸𑀭𑀡𑀢𑁄. 𑀇𑀢𑀭𑁄 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑀢𑁄 𑀧𑀭𑀺𑀬𑀸𑀬𑀥𑀫𑁆𑀫𑁄 𑀅𑀘𑁆𑀘𑀦𑁆𑀢𑀁 𑀅𑀧𑀸𑀬𑀤𑀼𑀓𑁆𑀔𑀯𑀝𑁆𑀝𑀤𑀼𑀓𑁆𑀔𑀧𑀸𑀢𑀦𑀢𑁄 𑀧𑀭𑀫𑁆𑀧𑀭𑀸𑀬 𑀯𑀸𑀭𑀡𑀢𑁄. 𑀬𑀣𑀸 𑀳𑀺 𑀮𑁄𑀓𑀺𑀬𑀁 𑀓𑀼𑀲𑀮𑀁 𑀤𑀸𑀦𑀲𑀻𑀮𑀸𑀤𑀺 𑀯𑀺𑀯𑀝𑁆𑀝𑀁 𑀉𑀤𑁆𑀤𑀺𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀢𑀁, 𑀅𑀬𑀁 𑀢𑀁 𑀅𑀲𑀫𑁆𑀧𑀸𑀤𑁂𑀦𑁆𑀢𑀫𑁆𑀧𑀺 𑀢𑀁 𑀲𑀫𑁆𑀧𑀸𑀧𑀓𑀲𑁆𑀲 𑀥𑀫𑁆𑀫𑀲𑁆𑀲 𑀦𑀺𑀩𑁆𑀩𑀢𑁆𑀢𑀓𑀸𑀭𑀡𑀪𑀸𑀯𑀧𑀭𑀺𑀬𑀸𑀬𑁂𑀦 𑀧𑀭𑀺𑀬𑀸𑀬𑀥𑀫𑁆𑀫𑁄 𑀦𑀸𑀫 𑀳𑁄𑀢𑀺, 𑀏𑀯𑀁 𑀢𑀁 𑀯𑀝𑁆𑀝𑀁 𑀉𑀤𑁆𑀤𑀺𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀢𑀁, 𑀬𑀁 𑀢𑀡𑁆𑀳𑀸𑀤𑀻𑀳𑀺 𑀲𑀯𑀺𑀲𑁂𑀲𑀁 𑀆𑀫𑀲𑀺𑀢𑀩𑁆𑀩𑀢𑁄 𑀆𑀫𑀺𑀲𑀦𑁆𑀢𑀺 𑀮𑁄𑀓𑁂 𑀧𑀸𑀓𑀝𑀁 𑀅𑀘𑁆𑀙𑀸𑀤𑀦𑀪𑁄𑀚𑀦𑀸𑀤𑀺, 𑀢𑀲𑁆𑀲, 𑀢𑀁𑀲𑀤𑀺𑀲𑀲𑁆𑀲 𑀘 𑀨𑀮𑀯𑀺𑀲𑁂𑀲𑀲𑁆𑀲 𑀦𑀺𑀫𑀺𑀢𑁆𑀢𑀪𑀸𑀯𑀧𑀭𑀺𑀬𑀸𑀬𑁂𑀦 𑀧𑀭𑀺𑀬𑀸𑀬𑀸𑀫𑀺𑀲𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀬𑀁 𑀧𑀦𑀺𑀤𑀁…𑀧𑁂… 𑀇𑀤𑀁 𑀧𑀭𑀺𑀬𑀸𑀬𑀸𑀫𑀺𑀲𑀁 𑀦𑀸𑀫𑀸’’𑀢𑀺.

‘‘𑀲𑀓𑀮𑀫𑁂𑀯 𑀳𑀺𑀤𑀁, 𑀆𑀦𑀦𑁆𑀤, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀬𑀤𑀺𑀤𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸’’𑀢𑀺 (𑀲𑀁. 𑀦𑀺. 𑁫.𑁨, 𑁩) 𑀆𑀤𑀺𑀯𑀘𑀦𑀢𑁄 𑀲𑀸𑀯𑀓𑁂𑀳𑀺 𑀅𑀥𑀺𑀕𑀢𑁄𑀧𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀲𑀢𑁆𑀣𑀼𑀬𑁂𑀯𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀦𑀺𑀧𑁆𑀧𑀭𑀺𑀬𑀸𑀬𑀥𑀫𑁆𑀫𑁄𑀧𑀺 𑀪𑀕𑀯𑀢𑁄𑀬𑁂𑀯 𑀲𑀦𑁆𑀢𑀓𑁄’’𑀢𑀺. 𑀲𑀸𑀯𑀓𑀸𑀦𑀜𑁆𑀳𑀺 𑀥𑀫𑁆𑀫𑀤𑀺𑀝𑁆𑀞𑀺𑀧𑀘𑁆𑀘𑀬𑀲𑁆𑀲𑀧𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄 𑀧𑀭𑀢𑁄𑀖𑁄𑀲𑁄 𑀘 𑀢𑀣𑀸𑀕𑀢𑀸𑀥𑀻𑀦𑁄𑀢𑀺 𑀢𑁂𑀳𑀺 𑀧𑀝𑀺𑀯𑀺𑀤𑁆𑀥𑁄𑀧𑀺 𑀥𑀫𑁆𑀫𑁄 𑀥𑀫𑁆𑀫𑀲𑁆𑀲𑀸𑀫𑀺𑀦𑁄𑀬𑁂𑀯𑀸𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀪𑀕𑀯𑀢𑀸 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲𑀸𑀢𑀺 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀦𑁆𑀢𑀭𑀥𑀸𑀦𑀢𑁄 𑀧𑀪𑀼𑀢𑀺 𑀬𑀸𑀯 𑀇𑀫𑀲𑁆𑀫𑀸 𑀩𑀼𑀤𑁆𑀥𑀼𑀧𑁆𑀧𑀸𑀤𑀸 𑀅𑀲𑀫𑁆𑀩𑁄𑀥𑀯𑀲𑁂𑀦 𑀦 𑀉𑀧𑁆𑀧𑀦𑁆𑀦𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲. 𑀉𑀧𑁆𑀧𑀸𑀤𑁂𑀢𑀸𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀸. 𑀢𑀁 𑀧𑀦𑁂𑀢𑀁 𑀫𑀕𑁆𑀕𑀲𑁆𑀲 ¶ 𑀪𑀕𑀯𑀢𑁄 𑀦𑀺𑀩𑁆𑀩𑀢𑁆𑀢𑀦𑀁, 𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀯𑀺𑀬 𑀲𑀲𑀦𑁆𑀢𑀸𑀦𑁂𑀬𑁂𑀯, 𑀅𑀣 𑀔𑁄 𑀧𑀭𑀲𑀦𑁆𑀢𑀸𑀦𑁂𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀜𑁆𑀚𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀲𑀜𑁆𑀚𑀦𑁂𑀢𑀸, 𑀅𑀦𑀓𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀓𑁆𑀔𑀸𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀬𑀺𑀤𑀁 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑀦𑀁 𑀲𑀜𑁆𑀚𑀸𑀦𑀦𑀜𑁆𑀘 𑀅𑀢𑁆𑀣𑀢𑁄 𑀚𑀸𑀦𑀦𑀜𑁆𑀜𑁂𑀯 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀫𑀕𑁆𑀕𑀜𑁆𑀜𑀽 𑀫𑀕𑁆𑀕𑀯𑀺𑀤𑀽’’𑀢𑀺. 𑀅𑀓𑁆𑀔𑀸𑀦𑀁 𑀧𑀦𑀲𑁆𑀲 𑀲𑀼𑀓𑀼𑀲𑀮𑀪𑀸𑀯𑁂𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀫𑀕𑁆𑀕𑀓𑁄𑀯𑀺𑀤𑁄’’𑀢𑀺. 𑀲𑀢𑁆𑀣𑀸𑀭𑀸 ¶ 𑀬𑀣𑀸𑀕𑀢𑀁 𑀫𑀕𑁆𑀕𑀁 𑀅𑀦𑀼𑀕𑀘𑁆𑀙𑀦𑁆𑀢𑀻𑀢𑀺 𑀫𑀕𑁆𑀕𑀸𑀦𑀼𑀕𑀸 𑀪𑀕𑀯𑀢𑁄 𑀏𑀯 𑀢𑀁 𑀫𑀕𑁆𑀕𑀁 𑀲𑀼𑀝𑁆𑀞𑀼 𑀅𑀥𑀺𑀕𑀫𑀦𑀢𑁄. 𑀧𑀘𑁆𑀙𑀸 𑀧𑀭𑀢𑁄 𑀲𑀫𑁆𑀫𑀸 𑀅𑀦𑀼 𑀅𑀦𑀼 𑀆𑀕𑀢𑀸 𑀧𑀝𑀺𑀧𑀦𑁆𑀦𑀸𑀢𑀺 𑀧𑀘𑁆𑀙𑀸 𑀲𑀫𑀦𑁆𑀦𑀸𑀕𑀢𑀸.

𑀚𑀸𑀦𑀁 𑀚𑀸𑀦𑀸𑀢𑀻𑀢𑀺 𑀚𑀸𑀦𑀺𑀢𑀩𑁆𑀩𑀫𑁂𑀯 𑀅𑀪𑀺𑀜𑁆𑀜𑁂𑀬𑁆𑀬𑀸𑀤𑀺𑀪𑁂𑀤𑀁 𑀚𑀸𑀦𑀸𑀢𑀺 𑀏𑀓𑀦𑁆𑀢𑀳𑀺𑀢𑀧𑀝𑀺𑀧𑀢𑁆𑀢𑀺𑀢𑁄. 𑀧𑀲𑁆𑀲𑀁 𑀧𑀲𑁆𑀲𑀢𑀻𑀢𑀺 𑀢𑀣𑀸 𑀧𑀲𑁆𑀲𑀺𑀢𑀩𑁆𑀩𑀫𑁂𑀯 𑀧𑀲𑁆𑀲𑀢𑀺. 𑀅𑀣 𑀯𑀸 𑀚𑀸𑀦𑀁 𑀚𑀸𑀦𑀸𑀢𑀻𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀚𑀸𑀦𑀺𑀢𑀩𑁆𑀩𑀁 𑀚𑀸𑀦𑀸𑀢𑀺𑀬𑁂𑀯. 𑀦 𑀳𑀺 𑀧𑀤𑁂𑀲𑀜𑀸𑀡𑁂𑀦 𑀚𑀸𑀦𑀺𑀢𑀩𑁆𑀩𑀁 𑀲𑀩𑁆𑀩𑀁 𑀏𑀓𑀦𑁆𑀢𑀢𑁄 𑀚𑀸𑀦𑀸𑀢𑀺. 𑀧𑀲𑁆𑀲𑀁 𑀧𑀲𑁆𑀲𑀢𑀻𑀢𑀺 𑀤𑀺𑀩𑁆𑀩𑀘𑀓𑁆𑀔𑀼 𑀧𑀜𑁆𑀜𑀸𑀘𑀓𑁆𑀔𑀼 𑀥𑀫𑁆𑀫𑀘𑀓𑁆𑀔𑀼 𑀩𑀼𑀤𑁆𑀥𑀘𑀓𑁆𑀔𑀼 𑀲𑀫𑀦𑁆𑀢𑀘𑀓𑁆𑀔𑀼𑀲𑀗𑁆𑀔𑀸𑀢𑁂𑀳𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀧𑀲𑁆𑀲𑀺𑀢𑀩𑁆𑀩𑀁 𑀧𑀲𑁆𑀲𑀢𑀺𑀬𑁂𑀯. 𑀅𑀣 𑀯𑀸 𑀚𑀸𑀦𑀁 𑀚𑀸𑀦𑀸𑀢𑀻𑀢𑀺 𑀬𑀣𑀸 𑀅𑀜𑁆𑀜𑁂 𑀲𑀯𑀺𑀧𑀮𑁆𑀮𑀸𑀲𑀸 𑀓𑀸𑀫𑀭𑀽𑀧𑀧𑀭𑀺𑀜𑁆𑀜𑀸𑀯𑀸𑀤𑀺𑀦𑁄 𑀚𑀸𑀦𑀦𑁆𑀢𑀸𑀧𑀺 𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀚𑀸𑀦𑀦𑁆𑀢𑀺, 𑀦 𑀏𑀯𑀁 𑀪𑀕𑀯𑀸. 𑀪𑀕𑀯𑀸 𑀧𑀦 𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑁆𑀢𑀸 𑀚𑀸𑀦𑀦𑁆𑀢𑁄 𑀚𑀸𑀦𑀸𑀢𑀺𑀬𑁂𑀯, 𑀤𑀺𑀝𑁆𑀞𑀺𑀤𑀲𑁆𑀲𑀦𑀲𑁆𑀲 𑀘 𑀅𑀪𑀸𑀯𑀸 𑀧𑀲𑁆𑀲𑀦𑁆𑀢𑁄 𑀧𑀲𑁆𑀲𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀘𑀓𑁆𑀔𑀼𑀪𑀽𑀢𑁄𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀫𑀬𑀢𑁆𑀢𑀸 𑀢𑀲𑁆𑀲 𑀘 𑀧𑀢𑁆𑀢𑀢𑁆𑀢𑀸 𑀲𑀢𑁆𑀢𑁂𑀲𑀼 𑀘 𑀢𑀤𑀼𑀧𑁆𑀧𑀸𑀤𑀦𑀢𑁄 𑀤𑀲𑁆𑀲𑀦𑀧𑀭𑀺𑀡𑀸𑀬𑀓𑀝𑁆𑀞𑁂𑀦 𑀮𑁄𑀓𑀲𑁆𑀲 𑀘𑀓𑁆𑀔𑀼 𑀯𑀺𑀬 𑀪𑀽𑀢𑁄. 𑀜𑀸𑀡𑀪𑀽𑀢𑁄𑀢𑀺 𑀏𑀢𑀲𑁆𑀲 𑀘 𑀏𑀯𑀫𑁂𑀯 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀥𑀫𑁆𑀫𑀸 𑀩𑁄𑀥𑀺𑀧𑀓𑁆𑀔𑀺𑀬𑀸, 𑀩𑁆𑀭𑀳𑁆𑀫𑀸 𑀫𑀕𑁆𑀕𑁄, 𑀢𑁂𑀳𑀺 𑀉𑀧𑁆𑀧𑀦𑁆𑀦𑀢𑁆𑀢𑀸, 𑀢𑁂𑀲𑀁𑀯𑀸 𑀧𑀢𑁆𑀢𑀢𑁆𑀢𑀸 𑀅𑀥𑀺𑀕𑀢𑀢𑁆𑀢𑀸, 𑀮𑁄𑀓𑀲𑁆𑀲 𑀘 𑀢𑀤𑀼𑀧𑁆𑀧𑀸𑀤𑀦𑀢𑁄 ‘‘𑀥𑀫𑁆𑀫𑀪𑀽𑀢𑁄, 𑀩𑁆𑀭𑀳𑁆𑀫𑀪𑀽𑀢𑁄’’𑀢𑀺 𑀘 𑀯𑁂𑀤𑀺𑀢𑀩𑁆𑀩𑁄. 𑀯𑀢𑁆𑀢𑀸𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀯𑀤𑀢𑀻𑀢𑀺 𑀯𑀢𑁆𑀢𑀸. 𑀘𑀺𑀭𑀁 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀁 𑀧𑀯𑀢𑁆𑀢𑁂𑀦𑁆𑀢𑁄 𑀯𑀤𑀢𑀻𑀢𑀺 𑀧𑀯𑀢𑁆𑀢𑀸. 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸𑀢𑀺 𑀥𑀫𑁆𑀫𑀢𑀸𑀲𑀗𑁆𑀔𑀸𑀢𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀜𑁆𑀘 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀸, 𑀧𑀸𑀧𑀬𑀺𑀢𑀸 𑀯𑀸. 𑀅𑀫𑀢𑀲𑁆𑀲 𑀤𑀸𑀢𑀸𑀢𑀺 𑀅𑀫𑀢𑀁 𑀲𑀘𑁆𑀙𑀺𑀓𑀺𑀭𑀺𑀬𑀁 𑀲𑀢𑁆𑀢𑁂𑀲𑀼 𑀉𑀧𑁆𑀧𑀸𑀤𑁂𑀦𑁆𑀢𑁄 𑀅𑀫𑀢𑀁 𑀤𑀤𑀸𑀢𑀻𑀢𑀺 𑀅𑀫𑀢𑀲𑁆𑀲 𑀤𑀸𑀢𑀸. 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀢𑀤𑀸𑀬𑀢𑁆𑀢𑀪𑀸𑀯𑀢𑁄 𑀥𑀫𑁆𑀫𑀲𑁆𑀲𑀸𑀫𑀻.

‘‘𑀬𑀸 𑀘 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺, 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀺;

𑀲𑀼𑀔𑁄 𑀯𑀺𑀧𑀸𑀓𑁄 𑀧𑀼𑀜𑁆𑀜𑀸𑀦𑀁, 𑀅𑀥𑀺𑀧𑁆𑀧𑀸𑀬𑁄 𑀲𑀫𑀺𑀚𑁆𑀛𑀢𑀺. (𑀧𑁂𑀝𑀓𑁄. 𑁨𑁩);

𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑁄, 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀤𑀸𑀬𑀓𑁄’’𑀢𑀺 𑁋

𑀏𑀯𑀫𑀸𑀤𑀺𑀁 ¶ 𑀪𑀕𑀯𑀢𑁄 𑀯𑀘𑀦𑀁 𑀲𑀼𑀢𑁆𑀯𑀸 𑀏𑀯 𑀪𑀺𑀓𑁆𑀔𑀽 𑀤𑀸𑀦𑀸𑀤𑀺𑀧𑀼𑀜𑁆𑀜𑀸𑀦𑀁 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀬𑀢𑀁 𑀚𑀸𑀦𑀦𑁆𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀭𑀺𑀬𑀸𑀬𑀥𑀫𑁆𑀫𑁄𑀧𑀺…𑀧𑁂… 𑀧𑀝𑀺𑀮𑀪𑀢𑀻’’𑀢𑀺. ‘‘𑀏𑀤𑀺𑀲𑀁 𑀧𑀭𑀺𑀪𑀼𑀜𑁆𑀘𑀺𑀢𑀩𑁆𑀩’’𑀦𑁆𑀢𑀺 𑀓𑀧𑁆𑀧𑀺𑀬𑀲𑁆𑀲 𑀘 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀲𑁆𑀲 𑀪𑀕𑀯𑀢𑁄 𑀯𑀘𑀦𑁂𑀦 𑀯𑀺𑀦𑀸 𑀧𑀝𑀺𑀕𑁆𑀕𑀳𑁄𑀧𑀺 𑀪𑀺𑀓𑁆𑀔𑀽𑀦𑀁 𑀦 𑀲𑀫𑁆𑀪𑀯𑀢𑀺, 𑀓𑀼𑀢𑁄 𑀧𑀭𑀺𑀪𑁄𑀕𑁄𑀢𑀺 𑀆𑀳 ‘‘𑀦𑀺𑀧𑁆𑀧𑀭𑀺𑀬𑀸𑀬𑀸𑀫𑀺𑀲𑀫𑁆𑀧𑀻’’𑀢𑀺𑀆𑀤𑀺.

𑀧𑀭𑀺𑀬𑀸𑀬𑀸𑀫𑀺𑀲𑀲𑁆𑀲 𑀪𑀕𑀯𑀢𑁄 𑀲𑀦𑁆𑀢𑀓𑀪𑀸𑀯𑁄 𑀧𑀭𑀺𑀬𑀸𑀬𑀥𑀫𑁆𑀫𑀲𑁆𑀲 𑀢𑀩𑁆𑀪𑀸𑀯𑁂𑀦𑁂𑀯 𑀤𑀻𑀧𑀺𑀢𑁄. 𑀢𑀤𑁂𑀯 𑀲𑀸𑀫𑀺𑀪𑀸𑀯𑀁 ¶ 𑀤𑀲𑁆𑀲𑁂𑀦𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀫𑀸𑀢𑀺 𑀅𑀢𑁆𑀢𑀸𑀥𑀻𑀦𑀧𑀝𑀺𑀮𑀸𑀪𑀧𑀝𑀺𑀕𑁆𑀕𑀳𑀢𑀸𑀬 𑀅𑀢𑁆𑀢𑀦𑁄 𑀲𑀦𑁆𑀢𑀓𑀢𑁆𑀢𑀸 𑀘. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀥𑀫𑁆𑀫𑀸𑀫𑀺𑀲𑁂.

𑀧𑀘𑁆𑀘𑀬𑀸 𑀘𑀻𑀯𑀭𑀸𑀤𑀬𑁄 𑀧𑀭𑀫𑀸 𑀧𑀸𑀧𑀼𑀡𑀺𑀢𑀩𑁆𑀩𑀪𑀸𑀯𑁂𑀦 𑀉𑀢𑁆𑀢𑀫𑀫𑀭𑀺𑀬𑀸𑀤𑀸 𑀏𑀢𑀲𑁆𑀲 𑀦 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀅𑀧𑁆𑀧𑀺𑀘𑁆𑀙𑀢𑀸𑀤𑀬𑁄 𑀘𑀸𑀢𑀺 𑀧𑀘𑁆𑀘𑀬𑀧𑀭𑀫𑁄, 𑀮𑀸𑀪𑀕𑀭𑀽𑀢𑀺 𑀅𑀢𑁆𑀣𑁄. 𑀢𑀡𑁆𑀳𑀼𑀧𑁆𑀧𑀸𑀤𑁂𑀲𑀽𑀢𑀺 ‘‘𑀘𑀻𑀯𑀭𑀳𑁂𑀢𑀼 𑀯𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀇𑀢𑀺𑀪𑀯𑀸𑀪𑀯𑀳𑁂𑀢𑀼 𑀯𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁧𑁧; 𑀅. 𑀦𑀺. 𑁪.𑁯; 𑀇𑀢𑀺𑀯𑀼. 𑁧𑁦𑁫) 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀢𑀡𑁆𑀳𑀼𑀧𑁆𑀧𑀢𑁆𑀢𑀺𑀓𑁄𑀝𑁆𑀞𑀸𑀲𑁂𑀲𑀼. 𑀅𑀧𑁆𑀧𑀺𑀘𑁆𑀙𑀢𑀸𑀲𑀦𑁆𑀢𑀼𑀝𑁆𑀞𑀺𑀲𑀮𑁆𑀮𑁂𑀔𑀧𑀯𑀺𑀯𑁂𑀓𑀸𑀤𑀬𑁄 𑀅𑀧𑁆𑀧𑀺𑀘𑁆𑀙𑀢𑀸𑀤𑀬𑁄.

𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀑𑀯𑀸𑀤𑁂, 𑀢𑁂𑀲𑀼 𑀯𑀸 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑁂𑀲𑀼 𑀪𑀺𑀓𑁆𑀔𑀽𑀲𑀼. 𑀪𑀯𑀺𑀲𑁆𑀲𑀢𑀺 𑀯𑀸 𑀬𑁂𑀲𑀁 𑀢𑀢𑁆𑀣𑀸𑀢𑀺 𑀬𑁄𑀚𑀦𑀸. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀑𑀯𑀸𑀤𑁂 𑀇𑀘𑁆𑀘𑁂𑀯 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀥𑀺𑀧𑁆𑀧𑀸𑀬𑁄 𑀆𑀫𑀺𑀲𑀤𑀸𑀬𑀸𑀤𑀢𑀸𑀬 𑀉𑀧𑁆𑀧𑀚𑁆𑀚𑀦𑀓𑀅𑀦𑀢𑁆𑀣𑀸𑀦𑀼𑀧𑁆𑀧𑀸𑀤𑀲𑁆𑀲 𑀥𑀫𑁆𑀫𑀤𑀸𑀬𑀸𑀤𑀢𑀸𑀬 𑀉𑀧𑁆𑀧𑀚𑁆𑀚𑀦𑀓𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀘 𑀆𑀓𑀗𑁆𑀔𑀸. 𑀢𑁂𑀦𑀸𑀳 ‘‘𑀧𑀲𑁆𑀲𑀢𑀻’’𑀢𑀺𑀆𑀤𑀺. 𑀢𑀢𑁆𑀣 𑀆𑀫𑀺𑀲𑁂 𑀉𑀧𑀓𑁆𑀔𑀮𑀺𑀢𑀸𑀦𑀦𑁆𑀢𑀺 𑀆𑀫𑀺𑀲𑀳𑁂𑀢𑀼 𑀯𑀺𑀧𑁆𑀧𑀝𑀺𑀧𑀦𑁆𑀦𑀸𑀦𑀁. 𑀅𑀢𑀻𑀢𑀓𑀸𑀮𑁂𑀢𑀺 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂. 𑀓𑀧𑀺𑀮𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀢𑁆𑀣𑀼 𑀓𑀧𑀺𑀮𑀲𑀼𑀢𑁆𑀢𑁂𑀦, ‘‘𑀲𑀗𑁆𑀖𑀸𑀝𑀺𑀧𑀺𑀆𑀤𑀺𑀢𑁆𑀢𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀮𑀓𑁆𑀔𑀡𑀲𑀼𑀢𑁆𑀢𑁂𑀦 (𑀲𑀁. 𑀦𑀺. 𑁨.𑁨𑁧𑁮) 𑀘 𑀯𑀺𑀪𑀸𑀯𑁂𑀢𑀩𑁆𑀩𑀁. 𑀆𑀫𑀺𑀲𑀕𑀭𑀼𑀓𑁄 𑀅𑀧𑁆𑀧𑀕𑁆𑀖𑀪𑀸𑀯𑁂𑀦 𑀓𑀽𑀝𑀓𑀳𑀸𑀧𑀡𑁄 𑀯𑀺𑀬 𑀦𑀺𑀢𑁆𑀢𑁂𑀚𑁄 𑀲𑀫𑀡𑀢𑁂𑀚𑁂𑀦 𑀅𑀦𑀼𑀚𑁆𑀚𑀮𑀢𑁄 𑀦𑀺𑀩𑁆𑀩𑀼𑀢𑀗𑁆𑀕𑀸𑀭𑁄 𑀯𑀺𑀬 𑀦𑀺𑀧𑁆𑀧𑀪𑁄 𑀘 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁄𑀢𑀺 𑀧𑀘𑁆𑀘𑀬𑀕𑀭𑀼𑀓𑀪𑀸𑀯𑀢𑁄. 𑀯𑀺𑀯𑀢𑁆𑀢𑀺𑀢𑀘𑀺𑀢𑁆𑀢𑁄𑀢𑀺 𑀯𑀺𑀦𑀺𑀯𑀢𑁆𑀢𑀺𑀢𑀫𑀸𑀦𑀲𑁄, 𑀲𑀮𑁆𑀮𑁂𑀔𑀯𑀼𑀢𑁆𑀢𑀻𑀢𑀺 𑀅𑀢𑁆𑀣𑁄.

𑀥𑀫𑁆𑀫𑀤𑀸𑀬𑀸𑀤𑀸𑀢𑀺 ¶ 𑀏𑀢𑁆𑀢𑀸𑀯𑀢𑀸 𑀅𑀦𑁆𑀢𑁄𑀕𑀥𑀸𑀯𑀥𑀸𑀭𑀡𑀁 𑀯𑀘𑀦𑀦𑁆𑀢𑀺 𑀢𑁂𑀦 𑀅𑀯𑀥𑀸𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀫𑀸 𑀆𑀫𑀺𑀲𑀤𑀸𑀬𑀸𑀤𑀸’’𑀢𑀺 𑀧𑀝𑀺𑀓𑁆𑀔𑁂𑀧𑁄 𑀤𑀲𑁆𑀲𑀺𑀢𑁄. 𑀢𑀣𑁂𑀯 𑀘 𑀯𑀺𑀪𑀸𑀯𑁂𑀢𑀼𑀁 𑀅𑀥𑀺𑀧𑁆𑀧𑀸𑀬𑀸𑀦𑀺𑀲𑀁𑀲𑀯𑀺𑀪𑀸𑀯𑀦𑁂𑀲𑀼𑀧𑀺 𑀤𑀲𑁆𑀲𑀺𑀢𑁄, 𑀢𑀣𑀸 𑀆𑀤𑀻𑀦𑀯𑀯𑀺𑀪𑀸𑀯𑀦𑁂𑀦 𑀥𑀫𑁆𑀫𑀤𑀸𑀬𑀸𑀤𑀢𑀸𑀧𑀝𑀺𑀓𑁆𑀔𑁂𑀧𑁄. 𑀅𑀧𑀤𑀺𑀲𑀺𑀢𑀩𑁆𑀩𑀸𑀢𑀺 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀸𑀢𑀺. 𑀆𑀤𑀺𑀬𑀸𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀆-𑀓𑀸𑀭𑁄 𑀫𑀭𑀺𑀬𑀸𑀤𑀢𑁆𑀣𑁄, 𑀢𑀲𑁆𑀫𑀸 𑀥𑀫𑁆𑀫𑀤𑀸𑀬𑀸𑀤𑀢𑀸𑀯𑀺𑀥𑀼𑀭𑁂𑀦 𑀆𑀫𑀺𑀲𑀤𑀸𑀬𑀸𑀤𑀪𑀸𑀯𑁂𑀦 𑀳𑁂𑀢𑀼𑀪𑀽𑀢𑁂𑀦, 𑀓𑀭𑀡𑀪𑀽𑀢𑁂𑀦 𑀯𑀸 𑀆𑀤𑀺𑀬𑀁 𑀯𑀺𑀯𑁂𑀘𑀦𑀁 𑀯𑀺𑀜𑁆𑀜𑀽𑀳𑀺 𑀯𑀺𑀲𑀼𑀁 𑀓𑀭𑀡𑀁 𑀯𑀯𑀢𑁆𑀣𑀸𑀦𑀲𑁆𑀲 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀲𑀼𑀁 𑀓𑀸𑀢𑀩𑁆𑀩𑀸’’𑀢𑀺. 𑀢𑁂𑀦𑀸𑀳 ‘‘𑀯𑀺𑀜𑁆𑀜𑀽𑀳𑀺 𑀕𑀸𑀭𑀬𑁆𑀳𑀸 𑀪𑀯𑁂𑀬𑁆𑀬𑀸𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺.

‘‘𑀅𑀢𑁆𑀣𑀺 𑀫𑁂 𑀢𑀼𑀫𑁆𑀳𑁂𑀲𑀼 𑀅𑀦𑀼𑀓𑀫𑁆𑀧𑀸…𑀧𑁂… 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸’’𑀢𑀺 𑀪𑀺𑀓𑁆𑀔𑀽𑀲𑀼 𑀅𑀢𑁆𑀢𑀦𑁄 𑀓𑀭𑀼𑀡𑀸𑀬𑀦𑀸𑀓𑀺𑀢𑁆𑀢𑀦𑀁 ¶ 𑀢𑁂𑀲𑀁 𑀫𑀼𑀤𑀼𑀓𑀭𑀡𑀁, ‘‘𑀅𑀳𑀫𑁆𑀧𑀺 𑀢𑁂𑀦𑀸’’𑀢𑀺𑀆𑀤𑀺 𑀧𑀦 𑀢𑀢𑁄𑀧𑀺 𑀲𑀯𑀺𑀲𑁂𑀲𑀁 𑀫𑀼𑀤𑀼𑀓𑀭𑀡𑀦𑁆𑀢𑀺 𑀆𑀳 ‘‘𑀅𑀢𑀻𑀯 𑀫𑀼𑀤𑀼𑀓𑀭𑀡𑀢𑁆𑀣’’𑀦𑁆𑀢𑀺.

𑀦𑀸𑀴𑀓𑀧𑀝𑀺𑀧𑀤𑀸𑀤𑀬𑁄 𑀦𑀸𑀴𑀓𑀲𑀼𑀢𑁆𑀢𑀸𑀤𑀻𑀲𑀼 (𑀲𑀼. 𑀦𑀺. 𑁬𑁮𑁪-𑁭𑁨𑁮) 𑀆𑀕𑀢𑀧𑀝𑀺𑀧𑀢𑁆𑀢𑀺𑀬𑁄. 𑀢𑀸 𑀧𑀦 𑀬𑀲𑁆𑀫𑀸 𑀦𑀸𑀴𑀓𑀢𑁆𑀣𑁂𑀭𑀸𑀤𑀻𑀳𑀺 𑀧𑀝𑀺𑀧𑀦𑁆𑀦𑀸 𑀧𑀭𑀫𑀲𑀮𑁆𑀮𑁂𑀔𑀯𑀼𑀢𑁆𑀢𑀺𑀪𑀽𑀢𑀸 𑀅𑀢𑀺𑀉𑀓𑁆𑀓𑀝𑁆𑀞𑀧𑀝𑀺𑀧𑀢𑁆𑀢𑀺𑀬𑁄, 𑀢𑀲𑁆𑀫𑀸 𑀇𑀥 𑀥𑀫𑁆𑀫𑀤𑀸𑀬𑀸𑀤𑀧𑀝𑀺𑀧𑀤𑀸𑀬 𑀉𑀤𑀸𑀳𑀭𑀡𑀪𑀸𑀯𑁂𑀦 𑀉𑀤𑁆𑀥𑀝𑀸. 𑀲𑀓𑁆𑀔𑀺𑀪𑀽𑀢𑀸𑀢𑀺 𑀢𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀯𑀼𑀘𑁆𑀘𑀫𑀸𑀦𑀸𑀬 ‘‘𑀓𑀺𑀁 𑀫𑁂 𑀯𑀺𑀦𑀸 𑀧𑀝𑀺𑀧𑀚𑁆𑀚𑀦𑀓𑁄 𑀅𑀢𑁆𑀣𑀻’’𑀢𑀺 𑀅𑀲𑀤𑁆𑀤𑀳𑀦𑁆𑀢𑀸𑀦𑀁 𑀧𑀘𑁆𑀘𑀓𑁆𑀔𑀓𑀭𑀡𑁂𑀦 𑀲𑀓𑁆𑀔𑀺𑀪𑀽𑀢𑀸. 𑀇𑀫𑀲𑁆𑀫𑀺𑀦𑁆𑀢𑀺 ‘‘𑀢𑀼𑀫𑁆𑀳𑁂 𑀘 𑀫𑁂 𑀪𑀺𑀓𑁆𑀔𑀯𑁂 𑀥𑀫𑁆𑀫𑀤𑀸𑀬𑀸𑀤𑀸’’𑀢𑀺𑀆𑀤𑀺𑀓𑁂 𑀯𑀸𑀓𑁆𑀬𑁂. 𑀲𑁂𑀲𑀦𑁆𑀢𑀺 ‘‘𑀢𑀼𑀫𑁆𑀳𑁂 𑀘 𑀫𑁂’’𑀢𑀺𑀆𑀤𑀺𑀓𑀁 𑀲𑀼𑀓𑁆𑀓𑀧𑀓𑁆𑀔𑁂 𑀆𑀕𑀢𑀁 𑀧𑀸𑀴𑀺𑀧𑀤𑀁. 𑀯𑀼𑀢𑁆𑀢𑀦𑀬𑀧𑀘𑁆𑀘𑀦𑀻𑀓𑁂𑀦𑀸𑀢𑀺 ‘‘𑀢𑁂𑀦 𑀥𑀫𑁆𑀫𑀤𑀸𑀬𑀸𑀤𑀪𑀸𑀯𑁂𑀦 𑀦𑁄 𑀆𑀫𑀺𑀲𑀤𑀸𑀬𑀸𑀤𑀪𑀸𑀯𑁂𑀦𑀸’’𑀢𑀺 𑀏𑀯𑀁 𑀓𑀡𑁆𑀳𑀧𑀓𑁆𑀔𑁂 𑀯𑀼𑀢𑁆𑀢𑀦𑀬𑀲𑁆𑀲 𑀧𑀝𑀺𑀧𑀓𑁆𑀔𑁂𑀦.

𑁩𑁦. 𑀣𑁄𑀫𑀦𑀁 𑀲𑀼𑀢𑁆𑀯𑀸𑀢𑀺 𑀧𑀝𑀺𑀧𑀚𑁆𑀚𑀦𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀲𑀁𑀲𑀦𑀁 𑀲𑀼𑀢𑁆𑀯𑀸 𑀬𑀣𑀸 𑀢𑀁 𑀲𑀧𑀭𑀺𑀲𑀲𑁆𑀲 𑀆𑀬𑀲𑁆𑀫𑀢𑁄 𑀉𑀧𑀲𑁂𑀦𑀲𑁆𑀲 𑀧𑀝𑀺𑀧𑀢𑁆𑀢𑀺𑀬𑀸 𑀲𑀻𑀮𑀣𑁄𑀫𑀦𑀁 𑀲𑀼𑀢𑁆𑀯𑀸. 𑀦𑀺𑀧𑀸𑀢𑀧𑀤𑀦𑁆𑀢𑀺 𑀇𑀫𑀺𑀦𑀸 𑀇𑀥-𑀲𑀤𑁆𑀤𑀲𑁆𑀲 𑀅𑀦𑀢𑁆𑀣𑀓𑀢𑀫𑀸𑀳. 𑀧𑀯𑀸𑀭𑀺𑀢𑁄𑀢𑀺 𑀧𑀝𑀺𑀓𑁆𑀔𑁂𑀧𑀺𑀢𑁄. 𑀬𑁄 𑀳𑀺 𑀪𑀼𑀜𑁆𑀚𑀦𑁆𑀢𑁄 𑀪𑁄𑀚𑀦𑁂𑀦 𑀢𑀺𑀢𑁆𑀢𑁄 𑀧𑀭𑀺𑀯𑁂𑀲𑀓𑁂𑀦 𑀉𑀧𑀦𑀻𑀢𑀪𑁄𑀚𑀦𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀲𑁄 𑀢𑁂𑀦 𑀧𑀯𑀸𑀭𑀺𑀢𑁂𑀦 𑀧𑀝𑀺𑀓𑁆𑀔𑁂𑀧𑀺𑀢𑁄 𑀦𑀸𑀫 𑀳𑁄𑀢𑀺. 𑀢𑁂𑀦𑀸𑀳 ‘‘𑀧𑀯𑀸𑀭𑀺𑀢𑁄𑀢𑀺…𑀧𑁂… 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀧𑀓𑀸𑀭𑁂𑀳𑀺 𑀤𑀺𑀝𑁆𑀞𑀸𑀤𑀻𑀳𑀺 𑀯𑀸𑀭𑁂𑀢𑀺 𑀲𑀗𑁆𑀖𑀸𑀤𑀺𑀓𑁂 𑀬𑀸𑀘𑀸𑀧𑁂𑀢𑀺 𑀪𑀢𑁆𑀢𑁂 ¶ 𑀓𑀭𑁄𑀢𑀺 𑀏𑀢𑀸𑀬𑀸𑀢𑀺 𑀧𑀯𑀸𑀭𑀡𑀸, 𑀆𑀧𑀢𑁆𑀢𑀺𑀯𑀺𑀲𑁄𑀥𑀦𑀸𑀬 𑀅𑀢𑁆𑀢𑀯𑁄𑀲𑁆𑀲𑀕𑁆𑀕𑁄 𑀑𑀓𑀸𑀲𑀤𑀸𑀦𑀁. 𑀲𑀸 𑀧𑀦 𑀬𑀲𑁆𑀫𑀸 𑀬𑁂𑀪𑀼𑀬𑁆𑀬𑁂𑀦 𑀯𑀲𑁆𑀲𑀁𑀯𑀼𑀢𑁆𑀣𑁂𑀳𑀺 𑀓𑀸𑀢𑀩𑁆𑀩𑀸 𑀯𑀼𑀢𑁆𑀢𑀸, 𑀢𑀲𑁆𑀫𑀸 ‘‘𑀯𑀲𑁆𑀲𑀁𑀯𑀼𑀢𑁆𑀣𑀧𑀯𑀸𑀭𑀡𑀸’’𑀢𑀺 𑀯𑀼𑀢𑁆𑀢𑀁. 𑀧𑀯𑀸𑀭𑁂𑀢𑀺 𑀧𑀘𑁆𑀘𑀬𑁂 𑀇𑀘𑁆𑀙𑀸𑀧𑁂𑀢𑀺 𑀏𑀢𑀸𑀬𑀸𑀢𑀺 𑀧𑀯𑀸𑀭𑀡𑀸, 𑀘𑀻𑀯𑀭𑀸𑀤𑀻𑀳𑀺 𑀉𑀧𑀦𑀺𑀫𑀦𑁆𑀢𑀦𑀸. 𑀧𑀓𑀸𑀭𑀬𑀼𑀢𑁆𑀢𑀸 𑀯𑀸𑀭𑀡𑀸𑀢𑀺 𑀧𑀯𑀸𑀭𑀡𑀸, 𑀯𑀺𑀧𑁆𑀧𑀓𑀢𑀪𑁄𑀚𑀦𑀢𑀸𑀤𑀺𑀘𑀢𑀼𑀭𑀗𑁆𑀕𑀲𑀳𑀺𑀢𑁄 𑀪𑁄𑀚𑀦𑀧𑀝𑀺𑀓𑁆𑀔𑁂𑀧𑁄. 𑀲𑀸 𑀧𑀦 𑀬𑀲𑁆𑀫𑀸 𑀅𑀦𑀢𑀺𑀭𑀺𑀢𑁆𑀢𑀪𑁄𑀚𑀦𑀦𑀺𑀫𑀺𑀢𑁆𑀢𑀸𑀬 𑀆𑀧𑀢𑁆𑀢𑀺𑀬𑀸 𑀓𑀸𑀭𑀡𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀅𑀦𑀢𑀺𑀭𑀺𑀢𑁆𑀢𑀧𑀯𑀸𑀭𑀡𑀸’’𑀢𑀺 𑀯𑀼𑀢𑁆𑀢𑀸. 𑀬𑀸𑀯𑀤𑀢𑁆𑀣𑀪𑁄𑀚𑀦𑀲𑁆𑀲 𑀧𑀯𑀸𑀭𑀡𑀸 𑀬𑀸𑀯𑀤𑀢𑁆𑀣𑀧𑀯𑀸𑀭𑀡𑀸, 𑀧𑀭𑀺𑀬𑁄𑀲𑀺𑀢𑀪𑁄𑀚𑀦𑀲𑁆𑀲 𑀉𑀧𑀦𑀻𑀢𑀸𑀳𑀸𑀭𑀧𑀝𑀺𑀓𑁆𑀔𑁂𑀧𑁄𑀢𑀺 𑀅𑀢𑁆𑀣𑁄.

‘‘𑀪𑀼𑀢𑁆𑀢𑀸𑀯𑀻’’𑀢𑀺 𑀯𑀘𑀦𑀢𑁄 𑀪𑁄𑀚𑀦𑀧𑀸𑀭𑀺𑀧𑀽𑀭𑀺𑀢𑀸 𑀇𑀥𑀸𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀧𑀭𑀺𑀧𑀼𑀡𑁆𑀡𑁄𑀢𑀺 𑀪𑁄𑀚𑀦𑁂𑀦 𑀧𑀭𑀺𑀧𑀼𑀡𑁆𑀡𑁄’’𑀢𑀺. 𑀧𑀭𑀺𑀬𑁄𑀲𑀺𑀢𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄 ‘‘𑀪𑁄𑀚𑀦𑁂𑀦 𑀪𑁄𑀚𑀦𑀓𑀺𑀭𑀺𑀬𑀸𑀬 𑀧𑀭𑀺𑀬𑁄𑀲𑀺𑀢𑁄’’𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀥𑀺𑀧𑁆𑀧𑁂𑀢𑀢𑁆𑀣𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀪𑁄𑀚𑀦-𑀲𑀤𑁆𑀤𑀲𑁆𑀲 𑀮𑁄𑀧𑁄 𑀯𑀼𑀢𑁆𑀢𑁄. 𑀥𑀸𑀢𑁄𑀢𑀺 𑀢𑀺𑀢𑁆𑀢𑁄. 𑀲𑀸𑀥𑀓𑀸𑀦𑀻𑀢𑀺 𑀜𑀸𑀧𑀓𑀸𑀦𑀺. 𑀧𑀭𑀺𑀬𑁄𑀲𑀺𑀢𑀪𑁄𑀚𑀦𑀁 𑀲𑀼𑀳𑀺𑀢𑀬𑀸𑀯𑀤𑀢𑁆𑀣𑀢𑀸𑀕𑀳𑀡𑁂𑀳𑀺 𑀪𑀼𑀢𑁆𑀢𑀸𑀯𑀺𑀢𑀸𑀤𑀬𑁄, 𑀪𑀼𑀢𑁆𑀢𑀸𑀯𑀺𑀢𑀸𑀤𑀺𑀕𑁆𑀕𑀳𑀡𑁂𑀳𑀺 𑀯𑀸 𑀇𑀢𑀭𑁂 𑀩𑁄𑀥𑀺𑀢𑀸 𑀳𑁄𑀦𑁆𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀁 𑀦𑁂𑀲𑀁 𑀜𑀸𑀧𑀓𑀜𑀸𑀧𑁂𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀙𑀳𑀺𑀧𑀺 𑀧𑀤𑁂𑀳𑀺 𑀉𑀤𑀭𑀸𑀯𑀤𑁂𑀳𑀓𑀁 𑀪𑁄𑀚𑀦𑀁 𑀤𑀲𑁆𑀲𑀺𑀢𑀁 ¶ , 𑀢𑀜𑁆𑀘 𑀔𑁄 𑀧𑀭𑀺𑀓𑀧𑁆𑀧𑀦𑀸𑀯𑀲𑁂𑀦. 𑀦 𑀳𑀺 𑀪𑀕𑀯𑀸 𑀏𑀯𑀁 𑀪𑀼𑀜𑁆𑀚𑀢𑀺. 𑀢𑁂𑀦𑀸𑀳 ‘‘𑀲𑀩𑁆𑀩𑀜𑁆𑀘𑁂𑀢𑀁 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀯𑀼𑀢𑁆𑀢’’𑀦𑁆𑀢𑀺.

‘‘𑀲𑀺𑀬𑀸 𑀏𑀯, 𑀦𑀸𑀧𑀺 𑀲𑀺𑀬𑀸’’𑀢𑀺 𑀘 𑀇𑀤𑀁 𑀅𑀢𑁆𑀣𑀤𑁆𑀯𑀬𑀫𑁆𑀧𑀺 𑀇𑀥 𑀲𑀫𑁆𑀪𑀯𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀇𑀥 𑀉𑀪𑀬𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺. 𑀅𑀣𑀸𑀢𑀺 𑀅𑀦𑀦𑁆𑀢𑀭𑀁, 𑀫𑀫 𑀪𑁄𑀚𑀦𑀲𑀫𑀦𑀦𑁆𑀢𑀭𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀢𑀁 𑀧𑀦 𑀬𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀓𑀸𑀮𑀧𑀘𑁆𑀘𑀸𑀫𑀲𑀦𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀢𑀫𑁆𑀳𑀺 𑀓𑀸𑀮𑁂’’𑀢𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀭𑀼𑀴𑁆𑀳𑀳𑀭𑀺𑀢𑁂𑀢𑀺 𑀭𑀼𑀳𑀫𑀸𑀦𑀢𑀺𑀡𑀸𑀤𑀺𑀳𑀭𑀺𑀢𑀭𑀳𑀺𑀢𑁂. 𑀅𑀪𑀸𑀯𑀢𑁆𑀣𑁄 𑀘 𑀅𑀬𑀁 𑀅𑀧𑁆𑀧-𑀲𑀤𑁆𑀤𑁄 ‘‘𑀅𑀧𑁆𑀧𑀺𑀘𑁆𑀙𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁫𑁨, 𑁩𑁩𑁬; 𑀲𑀁. 𑀦𑀺. 𑁨.𑁧𑁪𑁮) 𑀯𑀺𑀬.

𑀓𑀣𑀺𑀢𑁂𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄. 𑀢𑁂𑀦 𑀯𑀸𑀧𑀲𑀫𑀻𑀓𑀭𑀡𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀣𑀸 𑀳𑁂𑀲 𑀯𑀼𑀢𑁆𑀢-𑀲𑀤𑁆𑀤𑁄 ‘‘𑀦𑁄 𑀘 𑀔𑁄 𑀧𑀝𑀺𑀯𑀼𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁨𑁮𑁯) 𑀯𑀸𑀧𑀲𑀫𑀻𑀓𑀭𑀡𑁂 𑀤𑀺𑀲𑁆𑀲𑀢𑀺, ‘‘𑀧𑀦𑁆𑀦𑀮𑁄𑀫𑁄 𑀧𑀭𑀤𑀢𑁆𑀢𑀯𑀼𑀢𑁆𑀢𑁄’’𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁩𑁩𑁨) 𑀚𑀻𑀯𑀺𑀢𑀯𑀼𑀢𑁆𑀢𑀺𑀬𑀁, ‘‘𑀧𑀡𑁆𑀟𑀼𑀧𑀮𑀸𑀲𑁄 𑀩𑀦𑁆𑀥𑀦𑀸 𑀧𑀯𑀼𑀢𑁆𑀢𑁄’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁯𑁨; 𑀧𑀸𑀘𑀺. 𑁬𑁬𑁬; 𑀫𑀳𑀸𑀯. 𑁧𑁨𑁯; 𑀫. 𑀦𑀺. 𑁩.𑁫𑁯) 𑀅𑀧𑀕𑀫𑁂, ‘‘𑀕𑀻𑀢𑀁 𑀧𑀯𑀼𑀢𑁆𑀢𑀁 ¶ 𑀲𑀫𑀺𑀳𑀺𑀢’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁮𑁫) 𑀧𑀸𑀯𑀘𑀦𑀪𑀸𑀯𑁂𑀦 𑀧𑀯𑀢𑁆𑀢𑀺𑀢𑁂, 𑀮𑁄𑀓𑁂 𑀧𑀦 ‘‘𑀯𑀼𑀢𑁆𑀢𑀁 𑀧𑀭𑀸𑀬𑀡’’𑀦𑁆𑀢𑀺𑀆𑀤𑀻𑀲𑀼 (𑀫𑀳𑀸𑀪𑀸𑀲 𑁭.𑁨.𑁨𑁬) 𑀅𑀚𑁆𑀛𑁂𑀦𑁂 𑀤𑀺𑀲𑁆𑀲𑀢𑀻𑀢𑀺.

𑀦 𑀏𑀢𑁆𑀣 𑀧𑀺𑀡𑁆𑀟𑀧𑀸𑀢𑀪𑁄𑀚𑀦𑁂𑀦 𑀥𑀫𑁆𑀫𑀤𑀸𑀬𑀸𑀤𑀢𑀸 𑀦𑀺𑀯𑀸𑀭𑀺𑀢𑀸, 𑀧𑀺𑀡𑁆𑀟𑀧𑀸𑀢𑀪𑁄𑀚𑀦𑀁 𑀧𑀦 𑀅𑀦𑀸𑀤𑀭𑀺𑀢𑁆𑀯𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀢𑁆𑀢𑀻𑀢𑀺 𑀏𑀢𑁆𑀣 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀺𑀡𑁆𑀟𑀧𑀸𑀢𑀁…𑀧𑁂… 𑀯𑀻𑀢𑀺𑀦𑀸𑀫𑁂𑀬𑁆𑀬𑀸’’𑀢𑀺. 𑀢𑀢𑁆𑀣 𑀯𑀻𑀢𑀺𑀦𑀸𑀫𑁂𑀬𑁆𑀬𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑁂𑀦 𑀔𑁂𑀧𑁂𑀬𑁆𑀬. 𑀢𑁂𑀦𑀸𑀳 ‘‘𑀆𑀤𑀺𑀢𑁆𑀢𑀲𑀻𑀲𑀽𑀧𑀫𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸’’𑀢𑀺. 𑀆𑀤𑀺𑀢𑁆𑀢𑀲𑀻𑀲𑀽𑀧𑀫𑀦𑁆𑀢𑀺𑀆𑀤𑀺𑀢𑁆𑀢𑀲𑀻𑀲𑀽𑀧𑀫𑀲𑀼𑀢𑁆𑀢𑀁.

𑀓𑀺𑀜𑁆𑀘𑀸𑀧𑀻𑀢𑀺 𑀅𑀬𑀁 ‘‘𑀬𑀤𑀺𑀧𑀻’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑁄 𑀦𑀺𑀧𑀸𑀢𑁄. 𑀦𑀺𑀧𑀸𑀢𑁄 𑀘 𑀦𑀸𑀫 𑀬𑀢𑁆𑀣 𑀬𑀢𑁆𑀣 𑀯𑀸𑀓𑁆𑀬𑁂 𑀧𑀬𑀼𑀚𑁆𑀚𑀢𑀺, 𑀢𑁂𑀦 𑀢𑁂𑀦 𑀯𑀢𑁆𑀢𑀩𑁆𑀩𑀢𑁆𑀣𑀚𑁄𑀢𑀓𑁄 𑀳𑁄𑀢𑀻𑀢𑀺 𑀇𑀥 ‘‘𑀧𑀺𑀡𑁆𑀟𑀧𑀸𑀢’’𑀦𑁆𑀢𑀺𑀆𑀤𑀺𑀦𑀸 𑀅𑀦𑀼𑀜𑁆𑀜𑀸𑀧𑀲𑀁𑀲𑀸𑀯𑀲𑁂𑀦 𑀯𑀼𑀘𑁆𑀘𑀫𑀸𑀦𑀲𑁆𑀲 𑀅𑀢𑁆𑀣𑀲𑁆𑀲 𑀚𑁄𑀢𑀓𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀅𑀦𑀼𑀚𑀸𑀦𑀦𑀧𑀲𑀁𑀲𑀦𑀢𑁆𑀣𑁂 𑀦𑀺𑀧𑀸𑀢𑁄’’𑀢𑀺 𑀯𑀼𑀢𑁆𑀢𑀁, 𑀅𑀦𑀼𑀜𑁆𑀜𑀸𑀧𑀲𑀁𑀲𑀸𑀭𑀫𑁆𑀪𑁂 𑀧𑀦 ‘‘𑀅𑀲𑀫𑁆𑀪𑀸𑀯𑀦𑀢𑁆𑀣𑁂’’𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸 𑀧𑀼𑀭𑀺𑀫𑁂𑀬𑁂𑀯 𑀲𑀫𑁆𑀪𑀸𑀯𑀦𑀸𑀯𑀺𑀪𑀸𑀯𑀦𑀢𑁄 𑀅𑀥𑀺𑀓𑀢𑁆𑀢𑀸𑀦𑀼𑀮𑁄𑀫𑀢𑁄 𑀘.

𑀏𑀓𑀯𑀸𑀭𑀁 𑀧𑀯𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀔𑀺𑀧𑀦𑀁 𑀓𑀣𑀁 𑀤𑀻𑀖𑀭𑀢𑁆𑀢𑀁 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀁 𑀓𑀸𑀭𑀡𑀁 𑀳𑁄𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀲𑁆𑀲 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀅𑀢𑁆𑀭𑀺𑀘𑁆𑀙𑀢𑀸𑀢𑀺 𑀅𑀢𑁆𑀭 𑀇𑀘𑁆𑀙𑀢𑀻𑀢𑀺 𑀅𑀢𑁆𑀭𑀺𑀘𑁆𑀙𑁄, 𑀢𑀲𑁆𑀲 𑀪𑀸𑀯𑁄 𑀅𑀢𑁆𑀭𑀺𑀘𑁆𑀙𑀢𑀸, 𑀅𑀢𑁆𑀣𑀢𑁄 𑀧𑀭𑀮𑀸𑀪𑀧𑀢𑁆𑀣𑀦𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀧𑀼𑀭𑀺𑀫𑁂𑀬𑁂𑀯 𑀲𑀓𑀮𑀸𑀪𑁂𑀦 𑀅𑀲𑀦𑁆𑀢𑀼𑀝𑁆𑀞𑀺, 𑀧𑀭𑀮𑀸𑀪𑁂 ¶ 𑀘 𑀧𑀢𑁆𑀣𑀦𑀸, 𑀏𑀢𑀁 𑀅𑀢𑁆𑀭𑀺𑀘𑁆𑀙𑀢𑀸𑀮𑀓𑁆𑀔𑀡’’𑀦𑁆𑀢𑀺 (𑀯𑀺𑀪. 𑀅𑀝𑁆𑀞. 𑁮𑁪𑁯). 𑀧𑀸𑀧𑀺𑀘𑁆𑀙𑀢𑀸𑀢𑀺 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀸𑀥𑀺𑀧𑁆𑀧𑀸𑀬𑀢𑀸. 𑀧𑀸𑀧𑀸 𑀇𑀘𑁆𑀙𑀸 𑀏𑀢𑀲𑁆𑀲𑀸𑀢𑀺 𑀧𑀸𑀧𑀺𑀘𑁆𑀙𑁄, 𑀢𑀲𑁆𑀲 𑀪𑀸𑀯𑁄 𑀧𑀸𑀧𑀺𑀘𑁆𑀙𑀢𑀸. 𑀬𑀣𑀸𑀳 ‘‘𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀢𑀸 𑀧𑀝𑀺𑀕𑁆𑀕𑀳𑀡𑁂 𑀘 𑀅𑀫𑀢𑁆𑀢𑀜𑁆𑀜𑀼𑀢𑀸, 𑀏𑀢𑀁 𑀧𑀸𑀧𑀺𑀘𑁆𑀙𑀮𑀓𑁆𑀔𑀡’’𑀦𑁆𑀢𑀺 (𑀯𑀺𑀪. 𑀅𑀝𑁆𑀞. 𑁮𑁫𑁧). 𑀫𑀳𑀦𑁆𑀢𑀸𑀦𑀺 𑀯𑀢𑁆𑀣𑀽𑀦𑀺 𑀇𑀘𑁆𑀙𑀢𑀺, 𑀫𑀳𑀢𑀻 𑀯𑀸 𑀢𑀲𑁆𑀲 𑀇𑀘𑁆𑀙𑀸𑀢𑀺 𑀫𑀳𑀺𑀘𑁆𑀙𑁄, 𑀢𑀲𑁆𑀲 𑀪𑀸𑀯𑁄 𑀫𑀳𑀺𑀘𑁆𑀙𑀢𑀸. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀢𑀸 𑀧𑀝𑀺𑀕𑁆𑀕𑀳𑀡𑁂 𑀘 𑀅𑀫𑀢𑁆𑀢𑀜𑁆𑀜𑀼𑀢𑀸, 𑀏𑀢𑀁 𑀫𑀳𑀺𑀘𑁆𑀙𑀮𑀓𑁆𑀔𑀡’’𑀦𑁆𑀢𑀺. 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀦𑀺𑀯𑀸𑀭𑁂𑀲𑁆𑀲𑀢𑀻𑀢𑀺 𑀬𑁄𑀚𑀦𑀸. 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀁𑀯𑀢𑁆𑀢𑀺𑀲𑁆𑀲𑀢𑀺 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀔𑁂𑀧𑁄.

𑀫𑀳𑀺𑀘𑁆𑀙𑁄 𑀧𑀼𑀕𑁆𑀕𑀮𑁄 𑀬𑀣𑀸 𑀧𑀘𑁆𑀘𑀬𑀤𑀸𑀦𑀯𑀲𑁂𑀦 𑀧𑀘𑁆𑀘𑀬𑀤𑀸𑀬𑀓𑁂𑀳𑀺 𑀪𑀭𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄, 𑀏𑀯𑀁 𑀧𑀘𑁆𑀘𑀬𑀧𑀭𑀺𑀬𑁂𑀲𑀦𑀯𑀲𑁂𑀦 𑀅𑀢𑁆𑀢𑀦𑀸𑀧𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀢𑁆𑀢𑀦𑁄𑀧𑀺 ¶ 𑀉𑀧𑀝𑁆𑀞𑀸𑀓𑀸𑀦𑀫𑁆𑀧𑀺 𑀤𑀼𑀩𑁆𑀪𑀭𑁄 𑀳𑁄𑀢𑀻’’𑀢𑀺. 𑀲𑀤𑁆𑀥𑀸𑀤𑁂𑀬𑁆𑀬𑀲𑁆𑀲 𑀯𑀺𑀦𑀺𑀧𑀸𑀢𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀅𑀜𑁆𑀜𑀲𑁆𑀲 𑀖𑀭𑁂 𑀙𑀟𑁆𑀟𑁂𑀦𑁆𑀢𑁄. 𑀭𑀺𑀢𑁆𑀢𑀧𑀢𑁆𑀢𑁄𑀯𑀸𑀢𑀺 𑀬𑁂𑀲𑀼 𑀓𑀼𑀮𑁂𑀲𑀼 𑀧𑀝𑀺𑀧𑀺𑀡𑁆𑀟𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀢𑁂𑀲𑀁 𑀲𑀩𑁆𑀩𑀧𑀘𑁆𑀙𑀺𑀫𑀁 𑀅𑀢𑁆𑀢𑀦𑁄 𑀬𑀣𑀸𑀮𑀤𑁆𑀥𑀁 𑀤𑀢𑁆𑀯𑀸 𑀢𑀢𑁆𑀣 𑀓𑀺𑀜𑁆𑀘𑀺 𑀅𑀮𑀤𑁆𑀥𑀸 𑀭𑀺𑀢𑁆𑀢𑀧𑀢𑁆𑀢𑁄 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀚𑁆𑀚𑀢𑀺 𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑁆𑀬𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸𑀮𑀤𑁆𑀥𑀧𑀘𑁆𑀘𑀬𑀧𑀭𑀺𑀪𑁄𑀕𑁂𑀦, 𑀧𑀼𑀦 𑀧𑀭𑀺𑀬𑁂𑀲𑀦𑀸𑀦𑀸𑀧𑀚𑁆𑀚𑀦𑁂𑀦 𑀅𑀢𑁆𑀢𑀦𑁄 𑀲𑀼𑀪𑀭𑀢𑀸, 𑀬𑀣𑀸𑀮𑀤𑁆𑀥𑀧𑀘𑁆𑀘𑀬𑁂𑀦 𑀅𑀯𑀜𑁆𑀜𑀁 𑀅𑀓𑀢𑁆𑀯𑀸 𑀲𑀦𑁆𑀢𑁄𑀲𑀸𑀧𑀢𑁆𑀢𑀺𑀬𑀸 𑀉𑀧𑀝𑁆𑀞𑀸𑀓𑀸𑀦𑀁 𑀲𑀼𑀪𑀭𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀓𑀣𑀸𑀯𑀢𑁆𑀣𑀽𑀦𑀻𑀢𑀺 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁 𑀓𑀣𑀸𑀦𑀁 𑀯𑀢𑁆𑀣𑀽𑀦𑀻𑀢𑀺 𑀓𑀣𑀸𑀯𑀢𑁆𑀣𑀽𑀦𑀺, 𑀅𑀧𑁆𑀧𑀺𑀘𑁆𑀙𑀢𑀸𑀤𑀬𑁄 𑀏𑀯. 𑀢𑀻𑀡𑀻𑀢𑀺 𑀢𑀻𑀡𑀺 𑀓𑀣𑀸𑀯𑀢𑁆𑀣𑀽𑀦𑀺. 𑀅𑀪𑀺𑀲𑀮𑁆𑀮𑁂𑀔𑀺𑀓𑀸𑀢𑀺 𑀅𑀢𑀺𑀯𑀺𑀬 𑀓𑀺𑀮𑁂𑀲𑁂 𑀲𑀮𑁆𑀮𑀺𑀔𑀢𑀻𑀢𑀺 𑀅𑀪𑀺𑀲𑀮𑁆𑀮𑁂𑀔𑁄, 𑀅𑀧𑁆𑀧𑀺𑀘𑁆𑀙 𑀢𑀸𑀤𑀺𑀕𑀼𑀡𑀲𑀫𑀼𑀤𑀸𑀬𑁄, 𑀲𑁄 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀅𑀪𑀺𑀲𑀮𑁆𑀮𑁂𑀔𑀺𑀓𑀸, 𑀫𑀳𑀺𑀘𑁆𑀙𑀢𑀸𑀤𑀻𑀦𑀁 𑀢𑀦𑀼𑀪𑀸𑀯𑀸𑀬 𑀬𑀼𑀢𑁆𑀢𑀭𑀽𑀧𑀸 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀢𑀸. 𑀘𑁂𑀢𑁄𑀯𑀺𑀦𑀻𑀯𑀭𑀡𑀲𑀧𑁆𑀧𑀸𑀬𑀸𑀢𑀺 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀦𑀺𑀯𑀸𑀭𑀓𑀸𑀦𑀁 𑀦𑀻𑀯𑀭𑀡𑀸𑀦𑀁 𑀤𑀽𑀭𑀻𑀪𑀸𑀯𑀓𑀭𑀡𑁂𑀦 𑀘𑁂𑀢𑁄𑀯𑀺𑀦𑀻𑀯𑀭𑀡𑀲𑀗𑁆𑀔𑀸𑀢𑀸𑀦𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀲𑀧𑁆𑀧𑀸𑀬𑀸. 𑀲𑀫𑀣𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑁆𑀲𑁂𑀯 𑀯𑀸 𑀯𑀺𑀪𑀽𑀢𑀺𑀪𑀸𑀯𑀓𑀭𑀡𑀸𑀬 𑀲𑀧𑁆𑀧𑀸𑀬𑀸 𑀉𑀧𑀓𑀸𑀭𑀺𑀓𑀸𑀢𑀺 𑀘𑁂𑀢𑁄𑀯𑀺𑀦𑀻𑀯𑀭𑀡𑀲𑀧𑁆𑀧𑀸𑀬𑀸. 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬𑀸𑀢𑀺𑀆𑀤𑀺 𑀬𑁂𑀦 𑀦𑀺𑀩𑁆𑀩𑀺𑀤𑀸𑀤𑀺𑀆𑀦𑀺𑀲𑀁𑀲𑁂𑀦 𑀅𑀬𑀁 𑀓𑀣𑀸 𑀅𑀪𑀺𑀲𑀮𑁆𑀮𑁂𑀔𑀺𑀓𑀸 𑀘𑁂𑀢𑁄𑀯𑀺𑀦𑀻𑀯𑀭𑀡𑀲𑀧𑁆𑀧𑀸𑀬𑀸 𑀘 𑀦𑀸𑀫 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬𑀸𑀢𑀺 𑀏𑀓𑀁𑀲𑁂𑀦 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀣𑀸𑀬. 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬𑀸𑀢𑀺 𑀢𑀲𑁆𑀲𑁂𑀯 𑀯𑀺𑀭𑀚𑁆𑀚𑀦𑀢𑁆𑀣𑀜𑁆𑀘 𑀦𑀺𑀭𑀼𑀚𑁆𑀛𑀦𑀢𑁆𑀣𑀜𑁆𑀘. 𑀉𑀧𑀲𑀫𑀸𑀬𑀸𑀢𑀺 𑀲𑀩𑁆𑀩𑀓𑀺𑀮𑁂𑀲𑀯𑀽𑀧𑀲𑀫𑀸𑀬. 𑀅𑀪𑀺𑀜𑁆𑀜𑀸𑀬𑀸𑀢𑀺 𑀲𑀩𑁆𑀩𑀲𑁆𑀲𑀧𑀺 𑀅𑀪𑀺𑀜𑁆𑀜𑁂𑀬𑁆𑀬𑀲𑁆𑀲 𑀅𑀪𑀺𑀚𑀸𑀦𑀦𑀸𑀬. 𑀲𑀫𑁆𑀩𑁄𑀥𑀸𑀬𑀸𑀢𑀺 𑀘𑀢𑀼𑀫𑀕𑁆𑀕𑀲𑀫𑁆𑀩𑁄𑀥𑀸𑀬. 𑀦𑀺𑀩𑁆𑀩𑀸𑀦𑀸𑀬𑀸𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀸𑀬. 𑀏𑀢𑁂𑀲𑀼 𑀳𑀺 𑀆𑀤𑀺𑀢𑁄 𑀢𑀻𑀳𑀺 𑀯𑀺𑀧𑀲𑁆𑀲𑀦𑀸 𑀯𑀼𑀢𑁆𑀢𑀸, 𑀧𑀼𑀦 𑀢𑀻𑀳𑀺 𑀫𑀕𑁆𑀕𑁄, 𑀇𑀢𑀭𑁂𑀦 𑀦𑀺𑀩𑁆𑀩𑀸𑀦𑀁. 𑀢𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀆𑀤𑀺𑀁 𑀓𑀢𑁆𑀯𑀸 𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦𑁄 𑀅𑀬𑀁 𑀲𑀩𑁆𑀩𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 𑀤𑀲𑀓𑀣𑀸𑀯𑀢𑁆𑀣𑀼𑀮𑀸𑀪𑀺𑀦𑁄 𑀲𑀫𑁆𑀪𑀯𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻𑀢𑀺 𑀢𑀁𑀲𑀪𑀸𑀯𑀢𑁄 𑀉𑀧𑀓𑀸𑀭𑀢𑁄 ¶ 𑀘 𑀲𑀁𑀯𑀢𑁆𑀢𑀺𑀲𑁆𑀲𑀦𑁆𑀢𑀺. 𑀅𑀧𑁆𑀧𑀺𑀘𑁆𑀙𑀢𑀸𑀤𑀬𑁄 𑀳𑀺 𑀏𑀓𑀯𑀸𑀭𑀉𑀧𑁆𑀧𑀦𑁆𑀦𑀸 𑀉𑀧𑀭𑀺 𑀢𑀤𑀢𑁆𑀣𑀸𑀬 𑀲𑀁𑀯𑀢𑁆𑀢𑀺𑀲𑁆𑀲𑀦𑁆𑀢𑀺. 𑀓𑀣𑀸𑀯𑀢𑁆𑀣𑀼𑀧𑀭𑀺𑀧𑀽𑀭𑀡𑀁 𑀲𑀺𑀓𑁆𑀔𑀸𑀧𑀭𑀺𑀧𑀽𑀭𑀡𑀜𑁆𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀁. 𑀇𑀢𑀭𑀸 𑀧𑀦 𑀲𑁂𑀓𑁆𑀔𑀸𑀲𑁂𑀓𑁆𑀔𑀥𑀫𑁆𑀫𑀧𑀸𑀭𑀺𑀧𑀽𑀭𑀺𑀬𑀸 𑀧𑀭𑀺𑀧𑀼𑀡𑁆𑀡𑀸. 𑀦𑀺𑀩𑁆𑀩𑀸𑀦𑀧𑀸𑀭𑀺𑀧𑀽𑀭𑀺 𑀘𑁂𑀢𑁆𑀣 𑀢𑀤𑀸𑀯𑀳𑀥𑀫𑁆𑀫𑀧𑀸𑀭𑀺𑀧𑀽𑀭𑀺𑀯𑀲𑁂𑀦 𑀧𑀭𑀺𑀬𑀸𑀬𑀢𑁄 ¶ 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀤𑀸𑀦𑀺 𑀬𑀸𑀬𑀁 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀁 𑀅𑀦𑀼𑀓𑁆𑀓𑀫𑀧𑀭𑀺𑀯𑀼𑀤𑁆𑀥𑀺𑀬𑀸 𑀕𑀼𑀡𑀧𑀸𑀭𑀺𑀧𑀽𑀭𑀺𑀢𑀸, 𑀢𑀁 𑀉𑀧𑀫𑀸𑀬 𑀲𑀸𑀥𑁂𑀦𑁆𑀢𑁄 ‘‘𑀲𑁂𑀬𑁆𑀬𑀣𑀸𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀸𑀯𑀼𑀲𑁆𑀲𑀓𑁄𑀢𑀺 𑀯𑀲𑁆𑀲𑀸𑀦𑀫𑀸𑀲𑁂 𑀉𑀝𑁆𑀞𑀺𑀢𑁄. 𑀲𑁄 𑀳𑀺 𑀘𑀺𑀭𑀸𑀦𑀼𑀧𑁆𑀧𑀯𑀢𑁆𑀢𑀺 𑀳𑁄𑀢𑀺. 𑀧𑀩𑁆𑀩𑀢𑀓𑀦𑁆𑀤𑀭𑀸 𑀧𑀩𑁆𑀩𑀢𑁂𑀲𑀼 𑀉𑀧𑀘𑁆𑀘𑀓𑀸𑀥𑀺𑀘𑁆𑀘𑀓𑀸𑀧𑀪𑀯𑀦𑀺𑀚𑁆𑀛𑀭𑀸𑀤𑀺𑀦𑀤𑀺𑀬𑁄. 𑀲𑀭𑀲𑀸𑀔𑀸𑀢𑀺 𑀬𑀢𑁆𑀣 𑀉𑀧𑀭𑀺𑀉𑀦𑁆𑀦𑀢𑀧𑀤𑁂𑀲𑀢𑁄 𑀉𑀤𑀓𑀁 𑀆𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀢𑀺 𑀘𑁂𑀯 𑀲𑀦𑁆𑀤𑀢𑀺 𑀘, 𑀢𑁂. 𑀓𑀼𑀲𑁄𑀩𑁆𑀪𑀸 𑀔𑀼𑀤𑁆𑀤𑀓𑀢𑀴𑀸𑀓𑀸. 𑀓𑀼𑀦𑁆𑀦𑀤𑀺𑀬𑁄𑀢𑀺 𑀧𑀩𑁆𑀩𑀢𑀧𑀸𑀤𑀢𑁄 𑀦𑀺𑀓𑁆𑀔𑀦𑁆𑀢𑀸 𑀔𑀼𑀤𑁆𑀤𑀓𑀦𑀤𑀺𑀬𑁄. 𑀢𑀸 𑀳𑀺 𑀫𑀳𑀸𑀦𑀤𑀺𑀬𑁄 𑀑𑀢𑀭𑀦𑁆𑀢𑀺𑀬𑁄 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀧𑀭𑀫𑀥𑀫𑁆𑀫𑀤𑀸𑀬𑀸𑀤𑀦𑁆𑀢𑀺 𑀧𑀭𑀫𑀁 𑀉𑀢𑁆𑀢𑀫𑀁 𑀥𑀫𑁆𑀫𑀤𑀸𑀬𑀸𑀤𑀪𑀸𑀯𑀁, 𑀧𑀭𑀫𑀁 𑀥𑀫𑁆𑀫𑀤𑀸𑀬𑀚𑁆𑀚𑀁 𑀯𑀸. 𑀢𑁂 𑀪𑀺𑀓𑁆𑀔𑀽𑀢𑀺 𑀢𑁂 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑁂 𑀪𑀺𑀓𑁆𑀔𑀽. 𑀲𑀦𑁆𑀦𑀺𑀬𑁄𑀚𑁂𑀦𑁆𑀢𑁄𑀢𑀺 𑀫𑀽𑀮𑀕𑀼𑀡𑁂𑀳𑀺 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀳𑀺 𑀬𑁄𑀚𑁂𑀦𑁆𑀢𑁄.

𑀉𑀕𑁆𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑀢𑁄 𑀩𑁆𑀬𑀜𑁆𑀚𑀦𑀢𑁄 𑀘 𑀉𑀧𑀥𑀸𑀭𑀡𑀯𑀲𑁂𑀦 𑀕𑀳𑁂𑀢𑁆𑀯𑀸 𑀅𑀯𑀺𑀧𑀭𑀻𑀢𑀁 𑀕𑀳𑁂𑀢𑁆𑀯𑀸. 𑀲𑀁𑀲𑀦𑁆𑀤𑁂𑀢𑁆𑀯𑀸𑀢𑀺 𑀫𑀫 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀫𑀫𑀚𑁆𑀛𑀸𑀲𑀬𑀁 𑀅𑀯𑀺𑀭𑀚𑁆𑀛𑀺𑀢𑁆𑀯𑀸. 𑀬𑀣𑀸 𑀇𑀥𑁂𑀯 𑀘𑀺𑀦𑁆𑀢𑁂𑀲𑀻𑀢𑀺 𑀬𑀣𑀸 𑀇𑀫𑀺𑀲𑁆𑀲𑀸 𑀥𑀫𑁆𑀫𑀤𑀸𑀬𑀸𑀤𑀤𑁂𑀲𑀦𑀸𑀬 𑀘𑀺𑀦𑁆𑀢𑁂𑀲𑀺, 𑀏𑀯𑀁 𑀅𑀜𑁆𑀜𑀢𑁆𑀣𑀸𑀧𑀺 𑀥𑀫𑁆𑀫𑀣𑁄𑀫𑀦𑀢𑁆𑀣𑀁 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀦𑁆𑀢𑁄 𑀘𑀺𑀦𑁆𑀢𑁂𑀲𑀺. 𑀏𑀓𑀚𑁆𑀛𑀸𑀲𑀬𑀸𑀬𑀸𑀢𑀺 𑀲𑀫𑀸𑀦𑀸𑀥𑀺𑀧𑁆𑀧𑀸𑀬𑀸𑀬. 𑀫𑀢𑀺𑀬𑀸𑀢𑀺 𑀧𑀜𑁆𑀜𑀸𑀬. 𑀅𑀬𑀁 𑀤𑁂𑀲𑀦𑀸 𑀅𑀕𑁆𑀕𑀸𑀢𑀺𑀆𑀤𑀺 𑀪𑀕𑀯𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀕𑀼𑀡𑀢𑁄 𑀏𑀯 𑀧𑀕𑁆𑀕𑀡𑁆𑀳𑀸𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀘𑀺𑀢𑁆𑀢𑀕𑀢𑀺𑀬𑀸𑀢𑀺 𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀲𑁆𑀲 𑀧𑀭𑀺𑀡𑀸𑀫𑀦𑁂𑀦 ‘‘𑀅𑀬𑀁 𑀓𑀸𑀬𑁄 𑀇𑀤𑀁 𑀘𑀺𑀢𑁆𑀢𑀁 𑀯𑀺𑀬 𑀳𑁄𑀢𑀽’’𑀢𑀺 𑀓𑀸𑀬𑀲𑁆𑀲 𑀘𑀺𑀢𑁆𑀢𑁂𑀦 𑀲𑀫𑀸𑀦𑀕𑀢𑀺𑀓𑀢𑀸𑀥𑀺𑀝𑁆𑀞𑀸𑀦𑁂𑀦. 𑀓𑀣𑀁 𑀧𑀦 𑀓𑀸𑀬𑁄 𑀤𑀦𑁆𑀥𑀧𑁆𑀧𑀯𑀢𑁆𑀢𑀺𑀓𑁄 𑀮𑀳𑀼𑀧𑀭𑀺𑀯𑀢𑁆𑀢𑀦𑀘𑀺𑀢𑁆𑀢𑁂𑀦 𑀲𑀫𑀸𑀦𑀕𑀢𑀺𑀓𑁄 𑀳𑁄𑀢𑀻𑀢𑀺? 𑀦 𑀲𑀩𑁆𑀩𑀣𑀸 𑀲𑀫𑀸𑀦𑀕𑀢𑀺𑀓𑁄. 𑀬𑀣𑁂𑀯 𑀳𑀺 𑀓𑀸𑀬𑀯𑀲𑁂𑀦 𑀘𑀺𑀢𑁆𑀢𑀧𑀭𑀺𑀡𑀸𑀫𑀦𑁂 𑀘𑀺𑀢𑁆𑀢𑀁 𑀲𑀩𑁆𑀩𑀣𑀸 𑀓𑀸𑀬𑁂𑀦 𑀲𑀫𑀸𑀦𑀕𑀢𑀺𑀓𑀁 𑀦 𑀳𑁄𑀢𑀺. 𑀦 𑀳𑀺 𑀢𑀤𑀸 𑀘𑀺𑀢𑁆𑀢𑀁 𑀲𑀪𑀸𑀯𑀲𑀺𑀤𑁆𑀥𑁂𑀦 𑀅𑀢𑁆𑀢𑀦𑁄 𑀔𑀡𑁂𑀦 𑀅𑀯𑀢𑁆𑀢𑀺𑀢𑁆𑀯𑀸 𑀤𑀦𑁆𑀥𑀯𑀼𑀢𑁆𑀢𑀺𑀓𑀲𑁆𑀲 𑀭𑀽𑀧𑀥𑀫𑁆𑀫𑀲𑁆𑀲 𑀔𑀡𑁂𑀦 𑀯𑀢𑁆𑀢𑀺𑀢𑀼𑀁 𑀲𑀓𑁆𑀓𑁄𑀢𑀺, ‘‘𑀇𑀤𑀁 𑀘𑀺𑀢𑁆𑀢𑀁 𑀅𑀬𑀁 𑀓𑀸𑀬𑁄 𑀯𑀺𑀬 𑀳𑁄𑀢𑀽’’𑀢𑀺 𑀧𑀦 𑀅𑀥𑀺𑀝𑁆𑀞𑀸𑀦𑁂𑀦 𑀤𑀦𑁆𑀥𑀕𑀢𑀺𑀓𑀲𑁆𑀲 𑀓𑀸𑀬𑀲𑁆𑀲 𑀅𑀦𑀼𑀯𑀢𑁆𑀢𑀦𑀢𑁄 𑀬𑀸𑀯 𑀇𑀘𑁆𑀙𑀺𑀢𑀝𑁆𑀞𑀸𑀦𑀧𑁆𑀧𑀢𑁆𑀢𑀺, 𑀢𑀸𑀯 𑀓𑀸𑀬𑀕𑀢𑀺𑀁 𑀅𑀦𑀼𑀮𑁄𑀫𑁂𑀦𑁆𑀢𑀫𑁂𑀯 𑀳𑀼𑀢𑁆𑀯𑀸 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀘𑀺𑀢𑁆𑀢𑀁 𑀓𑀸𑀬𑀕𑀢𑀺𑀓𑀁 𑀓𑀢𑁆𑀯𑀸 𑀧𑀭𑀺𑀡𑀸𑀫𑀺𑀢𑀁 𑀦𑀸𑀫 𑀳𑁄𑀢𑀺, 𑀏𑀯𑀁 ‘‘𑀅𑀬𑀁 𑀓𑀸𑀬𑁄 𑀇𑀤𑀁 𑀘𑀺𑀢𑁆𑀢𑀁 𑀯𑀺𑀬 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀦𑁂𑀦 𑀧𑀕𑁂𑀯 𑀮𑀳𑀼𑀲𑀜𑁆𑀜𑀸𑀬 𑀲𑀼𑀔𑀼𑀫𑀲𑀜𑁆𑀜𑀸𑀬 𑀘 𑀲𑀫𑁆𑀧𑀸𑀤𑀺𑀢𑀢𑁆𑀢𑀸 𑀅𑀪𑀸𑀯𑀺𑀢𑀺𑀤𑁆𑀥𑀺𑀧𑀸𑀤𑀸𑀦𑀁 𑀯𑀺𑀬 𑀤𑀦𑁆𑀥𑀁 𑀅𑀯𑀢𑁆𑀢𑀺𑀢𑁆𑀯𑀸 𑀬𑀣𑀸 𑀮𑀳𑀼𑀁 𑀓𑀢𑀺𑀧𑀬𑀘𑀺𑀢𑁆𑀢𑀯𑀸𑀭𑁂𑀳𑁂𑀯 𑀇𑀘𑁆𑀙𑀺𑀢𑀝𑁆𑀞𑀸𑀦𑀧𑁆𑀧𑀢𑁆𑀢𑀺 𑀳𑁄𑀢𑀺 ¶ , 𑀏𑀯𑀁 𑀧𑀯𑀢𑁆𑀢𑀫𑀸𑀦𑁄 𑀓𑀸𑀬𑁄 𑀘𑀺𑀢𑁆𑀢𑀕𑀢𑀺𑀓𑀪𑀸𑀯𑁂𑀦𑁂𑀯 𑀧𑀭𑀺𑀡𑀸𑀫𑀺𑀢𑁄 𑀦𑀸𑀫 𑀳𑁄𑀢𑀺, 𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑁂𑀦𑁂𑀯 𑀧𑀯𑀢𑁆𑀢𑀺𑀬𑀸. 𑀏𑀯𑀜𑁆𑀘 𑀓𑀢𑁆𑀯𑀸 ¶ 𑀩𑀸𑀳𑀼𑀲𑀫𑀺𑀜𑁆𑀚𑀦𑀧𑁆𑀧𑀲𑀸𑀭𑀡𑀽𑀧𑀫𑀸𑀧𑀺 𑀉𑀧𑀘𑀸𑀭𑁂𑀦 𑀯𑀺𑀦𑀸 𑀲𑀼𑀝𑁆𑀞𑀼𑀢𑀭𑀁 𑀬𑀼𑀢𑁆𑀢𑀸 𑀳𑁄𑀢𑀺, 𑀅𑀜𑁆𑀜𑀣𑀸 𑀥𑀫𑁆𑀫𑀢𑀸𑀯𑀺𑀮𑁄𑀫𑀺𑀢𑀸 𑀲𑀺𑀬𑀸. 𑀦 𑀳𑀺 𑀥𑀫𑁆𑀫𑀸𑀦𑀁 𑀮𑀓𑁆𑀔𑀡𑀜𑁆𑀜𑀣𑀢𑁆𑀢𑀁 𑀇𑀤𑁆𑀥𑀺𑀩𑀮𑁂𑀦 𑀓𑀸𑀢𑀼𑀁 𑀲𑀓𑁆𑀓𑀸, 𑀪𑀸𑀯𑀜𑁆𑀜𑀣𑀢𑁆𑀢𑀫𑁂𑀯 𑀧𑀦 𑀲𑀓𑁆𑀓𑀸𑀢𑀺.

𑁩𑁧. 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀸𑀦𑀼𑀭𑀽𑀧𑀁 𑀪𑀺𑀓𑁆𑀔𑀽𑀦𑀜𑁆𑀘 𑀅𑀚𑁆𑀛𑀸𑀲𑀬𑀁 𑀜𑀢𑁆𑀯𑀸𑀢𑀺 𑀯𑀘𑀦𑀲𑁂𑀲𑁄. 𑀤𑁂𑀲𑀓𑀸𑀮𑁂 𑀯𑀺𑀬 𑀪𑀸𑀚𑀦𑀫𑁆𑀧𑀺 𑀑𑀮𑁄𑀓𑁂𑀢𑁆𑀯𑀸 𑀏𑀯 𑀫𑀳𑀸𑀣𑁂𑀭𑁄 𑀥𑀫𑁆𑀫𑀁 𑀓𑀣𑁂𑀢𑀺. 𑀧𑀓𑁆𑀓𑀦𑁆𑀢𑀲𑁆𑀲𑀸𑀢𑀺 𑀇𑀤𑀁 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀓𑁆𑀓𑀦𑁆𑀢𑀲𑁆𑀲 𑀲𑀢𑁄’’𑀢𑀺𑀆𑀤𑀺𑀫𑀸𑀳. 𑀓𑀺𑀢𑁆𑀢𑀓𑁂𑀦𑀸𑀢𑀺 𑀓𑁂𑀦 𑀧𑀭𑀺𑀫𑀸𑀡𑁂𑀦. 𑀢𑀁 𑀧𑀦 𑀧𑀭𑀺𑀫𑀸𑀡𑀁 𑀬𑀲𑁆𑀫𑀸 𑀧𑀭𑀺𑀫𑁂𑀬𑁆𑀬𑀲𑁆𑀲 𑀅𑀢𑁆𑀣𑀲𑁆𑀲 𑀧𑀭𑀺𑀘𑁆𑀙𑀺𑀦𑁆𑀤𑀦𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀓𑀺𑀢𑁆𑀢𑀸𑀯𑀢𑀸𑀢𑀺 𑀧𑀭𑀺𑀘𑁆𑀙𑁂𑀤𑀯𑀘𑀦’’𑀦𑁆𑀢𑀺 𑀆𑀳. 𑀦𑀼𑀓𑀸𑀭𑁄 𑀧𑀼𑀘𑁆𑀙𑀸𑀬𑀦𑁆𑀢𑀺 𑀅𑀬𑀁 𑀦𑀼-𑀲𑀤𑁆𑀤𑁄 𑀇𑀥𑁂𑀯 𑀧𑀼𑀘𑁆𑀙𑀸𑀬𑀁 𑀆𑀕𑀢𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀦𑀼-𑀲𑀤𑁆𑀤𑁂𑀦 𑀳𑁂𑀢𑁆𑀣 𑀚𑁄𑀢𑀺𑀬𑀫𑀸𑀦𑁄 𑀅𑀢𑁆𑀣𑁄 𑀓𑀺𑀁-𑀲𑀤𑁆𑀤𑁂𑀦 𑀧𑀭𑀺𑀫𑀸𑀡𑁄 𑀅𑀢𑁆𑀣𑁄 𑀧𑀭𑀺𑀫𑁂𑀬𑁆𑀬𑀢𑁆𑀣𑁄 𑀘. 𑀏𑀢𑁆𑀣 𑀲𑀁𑀓𑀺𑀮𑁂𑀲𑀧𑀓𑁆𑀔𑁄 𑀯𑀺𑀯𑁂𑀓𑀲𑁆𑀲 𑀅𑀦𑀦𑀼𑀲𑀺𑀓𑁆𑀔𑀦𑀁 𑀆𑀫𑀺𑀲𑀤𑀸𑀬𑀸𑀤𑀢𑀸, 𑀯𑁄𑀤𑀸𑀦𑀧𑀓𑁆𑀔𑁄 𑀢𑀲𑁆𑀲 𑀅𑀦𑀼𑀲𑀺𑀓𑁆𑀔𑀦𑀁 𑀥𑀫𑁆𑀫𑀤𑀸𑀬𑀸𑀤𑀢𑀸𑀢𑀺. 𑀢𑀻𑀳𑀺 𑀯𑀺𑀯𑁂𑀓𑁂𑀳𑀻𑀢𑀺 𑀯𑀺𑀯𑁂𑀓𑀢𑁆𑀢𑀬𑀕𑁆𑀕𑀳𑀡𑀁 𑀢𑀤𑀦𑁆𑀢𑁄𑀕𑀥𑀢𑁆𑀢𑀸 𑀯𑀺𑀯𑁂𑀓𑀧𑀜𑁆𑀘𑀓𑀲𑁆𑀲. 𑀯𑀺𑀯𑁂𑀓𑀧𑀜𑁆𑀘𑀓𑀕𑁆𑀕𑀳𑀡𑁂 𑀧𑀦𑀲𑁆𑀲 𑀲𑀭𑀽𑀧𑁂𑀦 𑀓𑀸𑀬𑀯𑀺𑀯𑁂𑀓𑁄 𑀕𑀳𑀺𑀢𑁄 𑀦 𑀲𑀺𑀬𑀸, 𑀢𑀤𑀸𑀬𑀢𑁆𑀢𑀢𑁆𑀢𑀸 𑀯𑀸 𑀲𑀢𑁆𑀣𑀸𑀭𑀸 𑀢𑀤𑀸 𑀧𑀬𑀼𑀚𑁆𑀚𑀫𑀸𑀦𑀯𑀺𑀯𑁂𑀓𑀤𑀲𑁆𑀲𑀦𑀯𑀲𑁂𑀦 ‘‘𑀢𑀻𑀳𑀺 𑀯𑀺𑀯𑁂𑀓𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀢𑀭𑀫𑁆𑀧𑀻𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀦 𑀳𑀺 𑀓𑀸𑀬𑀯𑀺𑀯𑁂𑀓𑀫𑀢𑁆𑀢𑁂𑀦 𑀥𑀫𑁆𑀫𑀤𑀸𑀬𑀸𑀤𑀪𑀸𑀯𑁄 𑀲𑀺𑀚𑁆𑀛𑀢𑀻𑀢𑀺? 𑀦, 𑀯𑀺𑀯𑁂𑀓𑀤𑁆𑀯𑀬𑀲𑀦𑁆𑀦𑀺𑀲𑁆𑀲𑀬𑀲𑁆𑀲𑁂𑀯 𑀓𑀸𑀬𑀯𑀺𑀯𑁂𑀓𑀲𑁆𑀲 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸. 𑀏𑀯𑀜𑁆𑀘 𑀓𑀢𑁆𑀯𑀸 𑀘𑀺𑀢𑁆𑀢𑀯𑀺𑀯𑁂𑀓𑀕𑁆𑀕𑀳𑀡𑀫𑁆𑀧𑀺 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀦 𑀳𑀺 𑀮𑁄𑀓𑀺𑀬𑀚𑁆𑀛𑀸𑀦𑀸𑀥𑀺𑀕𑀫𑀫𑀢𑁆𑀢𑁂𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀢𑁆𑀣𑀼𑀥𑀫𑁆𑀫𑀤𑀸𑀬𑀸𑀤𑀪𑀸𑀯𑁄 𑀇𑀘𑁆𑀙𑀺𑀢𑁄, 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑁂𑀦 𑀧𑀦 𑀲𑁄 𑀇𑀘𑁆𑀙𑀺𑀢𑁄, 𑀢𑀲𑁆𑀫𑀸 𑀲𑀩𑁆𑀩𑀸𑀧𑀺 𑀲𑀸𑀲𑀦𑁂 𑀯𑀺𑀯𑁂𑀓𑀸𑀦𑀼𑀲𑀺𑀓𑁆𑀔𑀦𑀸 𑀦𑀺𑀩𑁆𑀩𑀸𑀦𑀧𑁄𑀡𑀸 𑀦𑀺𑀩𑁆𑀩𑀸𑀦𑀧𑀩𑁆𑀪𑀸𑀭𑀸 𑀦𑀺𑀩𑁆𑀩𑀸𑀦𑁄𑀕𑀥𑀸 𑀘𑀸𑀢𑀺 𑀯𑀼𑀢𑁆𑀢𑀁 ‘‘𑀢𑀺𑀡𑁆𑀡𑀁 𑀯𑀺𑀯𑁂𑀓𑀸𑀦𑀁 𑀅𑀜𑁆𑀜𑀢𑀭𑀫𑁆𑀧𑀻’’𑀢𑀺. 𑀅𑀲𑀢𑀺 𑀆𑀮𑁄𑀓𑁂 𑀅𑀦𑁆𑀥𑀓𑀸𑀭𑁄 𑀯𑀺𑀬 𑀅𑀲𑀢𑀺 𑀥𑀫𑁆𑀫𑀤𑀸𑀬𑀸𑀤𑀢𑀸𑀬 𑀏𑀓𑀁𑀲𑀺𑀬𑀸 𑀆𑀫𑀺𑀲𑀤𑀸𑀬𑀸𑀤𑀢𑀸𑀢𑀺 𑀆𑀳 ‘‘𑀆𑀫𑀺𑀲𑀤𑀸𑀬𑀸𑀤𑀸𑀯 𑀳𑁄𑀦𑁆𑀢𑀻’’𑀢𑀺. 𑀏𑀲 𑀦𑀬𑁄 𑀲𑀼𑀓𑁆𑀓𑀧𑀓𑁆𑀔𑁂𑀧𑀻𑀢𑀺 𑀓𑀡𑁆𑀳𑀧𑀓𑁆𑀔𑀢𑁄 𑀲𑀸𑀥𑀸𑀭𑀡𑀯𑀲𑁂𑀦 𑀮𑀩𑁆𑀪𑀫𑀸𑀦𑀁 𑀅𑀢𑁆𑀣𑀲𑀸𑀫𑀜𑁆𑀜𑀁 𑀅𑀢𑀺𑀤𑀺𑀲𑀢𑀺, 𑀦 𑀅𑀢𑁆𑀣𑀯𑀺𑀲𑁂𑀲𑀁 𑀢𑀲𑁆𑀲 𑀯𑀺𑀲𑀤𑀺𑀲𑀢𑁆𑀢𑀸, 𑀅𑀢𑁆𑀣𑀯𑀺𑀲𑁂𑀲𑀫𑁂𑀯 𑀯𑀸 𑀅𑀢𑀺𑀤𑀺𑀲𑀢𑀺 𑀯𑀺𑀲𑀤𑀺𑀲𑀽𑀤𑀸𑀳𑀭𑀡𑀽𑀧𑀸𑀬𑀜𑀸𑀬𑁂𑀦. ‘‘𑀢𑀺𑀡𑁆𑀡𑀁 𑀯𑀺𑀯𑁂𑀓𑀸𑀦𑀁 𑀅𑀜𑁆𑀜𑀢𑀭’’𑀦𑁆𑀢𑀺 𑀇𑀤𑀁 𑀇𑀥 𑀦 𑀮𑀩𑁆𑀪𑀢𑀺. 𑀢𑀬𑁄𑀧𑀺 ¶ 𑀳𑀺 𑀯𑀺𑀯𑁂𑀓𑀸, 𑀢𑁂𑀲𑀼 𑀏𑀓𑁄 𑀯𑀸 𑀇𑀢𑀭𑀤𑁆𑀯𑀬𑀲𑀦𑁆𑀦𑀺𑀲𑁆𑀲𑀬𑁄 𑀇𑀥 𑀮𑀩𑁆𑀪𑀢𑀺.

𑀤𑀽𑀭𑀢𑁄𑀧𑀻𑀢𑀺 𑀤𑀽𑀭𑀝𑁆𑀞𑀸𑀦𑀢𑁄𑀧𑀺. 𑀢𑁂𑀦𑀸𑀳 ‘‘𑀢𑀺𑀭𑁄𑀭𑀝𑁆𑀞𑀢𑁄𑀧𑀻’’𑀢𑀺𑀆𑀤𑀺. 𑀓𑀸𑀫𑀁 ‘‘𑀧𑀝𑀺𑀪𑀸𑀢𑀽’’𑀢𑀺 𑀏𑀢𑁆𑀣 𑀧𑀝𑀺-𑀲𑀤𑁆𑀤𑀸𑀧𑁂𑀓𑁆𑀔𑀸𑀬 ‘‘𑀲𑀸𑀭𑀺𑀧𑀼𑀢𑁆𑀢’’𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀁, 𑀅𑀢𑁆𑀣𑁄 𑀧𑀦 𑀲𑀸𑀫𑀺𑀯𑀘𑀦𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀆𑀬𑀲𑁆𑀫𑀢𑁄𑀬𑁂𑀯 𑀲𑀸𑀭𑀺𑀧𑀼𑀢𑁆𑀢𑀲𑁆𑀲𑀸’’𑀢𑀺. 𑀪𑀸𑀕𑁄 𑀳𑁄𑀢𑀽𑀢𑀺 𑀇𑀫𑀺𑀦𑀸𑀪𑀸𑀕𑀢𑁆𑀣𑁄 𑀧𑀝𑀺-𑀲𑀤𑁆𑀤𑁄𑀢𑀺 𑀤𑀲𑁆𑀲𑁂𑀢𑀺 𑀮𑀓𑁆𑀔𑀡𑀸𑀤𑀺𑀅𑀢𑁆𑀣𑀸𑀦𑀁 𑀇𑀥 𑀅𑀬𑀼𑀚𑁆𑀚𑀦𑀢𑁄. 𑀢𑁂𑀦𑀸𑀳 ‘‘𑀏𑀯𑀁 𑀲𑀤𑁆𑀤𑀮𑀓𑁆𑀔𑀡𑁂𑀦 𑀲𑀫𑁂𑀢𑀻’’𑀢𑀺. 𑀤𑀺𑀲𑁆𑀲𑀢𑀽𑀢𑀺 𑀜𑀸𑀡𑁂𑀦 𑀤𑀺𑀲𑁆𑀲𑀢𑀼, 𑀧𑀲𑁆𑀲𑀢𑀽𑀢𑀺 𑀯𑀸 𑀅𑀢𑁆𑀣𑁄. 𑀉𑀧𑀝𑁆𑀞𑀸𑀢𑀽𑀢𑀺 𑀜𑀸𑀡𑀲𑁆𑀲 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀼. 𑀉𑀕𑁆𑀕𑀳𑁂𑀲𑁆𑀲𑀦𑁆𑀢𑀻𑀢𑀺 ¶ 𑀯𑀸𑀘𑀼𑀕𑁆𑀕𑀢𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀯𑀸𑀘𑀼𑀕𑁆𑀕𑀢𑀓𑀭𑀡𑀜𑁆𑀳𑀺 𑀉𑀕𑁆𑀕𑀳𑁄. 𑀧𑀭𑀺𑀬𑀸𑀧𑀼𑀡𑀺𑀲𑁆𑀲𑀦𑁆𑀢𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀼𑀭𑀺𑀧𑀼𑀘𑁆𑀙𑀦𑀸𑀤𑀺𑀦𑀸 𑀯𑀸 𑀅𑀢𑁆𑀣𑀲𑁆𑀲 𑀘𑀺𑀢𑁆𑀢𑁂 𑀆𑀧𑀸𑀤𑀦𑀁 𑀧𑀝𑁆𑀞𑀧𑀦𑀁 𑀧𑀭𑀺𑀬𑀸𑀧𑀼𑀡𑀦𑀁. 𑀓𑀸𑀭𑀡𑀯𑀘𑀦𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀓𑀸𑀭𑀡𑀪𑀸𑀯𑁂𑀦 𑀯𑀘𑀦𑀁 ‘‘𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦’’𑀦𑁆𑀢𑀺 𑀓𑀢𑁆𑀯𑀸. 𑀯𑀼𑀢𑁆𑀢𑀢𑁆𑀣𑀧𑀘𑁆𑀘𑀸𑀫𑀲𑀦𑀁 𑀢𑀁-𑀲𑀤𑁆𑀤𑁂𑀦 𑀓𑀭𑀻𑀬𑀢𑀻𑀢𑀺. 𑀢𑁂𑀦𑀸𑀳 ‘‘𑀬𑀲𑁆𑀫𑀸’’𑀢𑀺𑀆𑀤𑀺.

𑀏𑀓𑁂𑀦𑁂𑀯𑀸𑀓𑀸𑀭𑁂𑀦𑀸𑀢𑀺 𑀆𑀫𑀺𑀲𑀤𑀸𑀬𑀸𑀤𑀢𑀸𑀲𑀺𑀤𑁆𑀥𑁂𑀦 𑀆𑀤𑀺𑀬𑀢𑀸𑀲𑀗𑁆𑀔𑀸𑀢𑁂𑀦 𑀏𑀓𑁂𑀦𑁂𑀯 𑀧𑀓𑀸𑀭𑁂𑀦. 𑀢𑀫𑁂𑀯 𑀳𑀺 𑀆𑀓𑀸𑀭𑀁 𑀲𑀦𑁆𑀥𑀸𑀬𑀸𑀳 ‘‘𑀪𑀕𑀯𑀢𑀸 𑀯𑀼𑀢𑁆𑀢𑀫𑀢𑁆𑀣’’𑀦𑁆𑀢𑀺. 𑀅𑀜𑁆𑀜𑀣𑀸 ‘‘𑀲𑀢𑁆𑀣𑀼 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀲𑀸𑀯𑀓𑀸 𑀯𑀺𑀯𑁂𑀓𑀁 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀻’𑀢𑀺 𑀏𑀓𑁂𑀦𑁂𑀯 𑀆𑀓𑀸𑀭𑁂𑀦 𑀲𑁄 𑀅𑀢𑁆𑀣𑁄 𑀣𑁂𑀭𑁂𑀦𑀧𑀺 𑀯𑀼𑀢𑁆𑀢𑁄. 𑀢𑀻𑀳𑀺 𑀆𑀓𑀸𑀭𑁂𑀳𑀻𑀢𑀺 𑀆𑀫𑀺𑀲𑀤𑀸𑀬𑀸𑀤𑀧𑀝𑀺𑀧𑀤𑀸𑀪𑀽𑀢𑁂𑀳𑀺 𑀢𑀺𑀡𑁆𑀡𑀁 𑀯𑀺𑀯𑁂𑀓𑀸𑀦𑀁 𑀅𑀦𑀦𑀼𑀲𑀺𑀓𑁆𑀔𑀦𑀸𑀓𑀸𑀭𑁂𑀳𑀺. 𑀏𑀢𑁆𑀢𑀸𑀯𑀢𑀸𑀢𑀺 ‘‘𑀇𑀥𑀸𑀯𑀼𑀲𑁄…𑀧𑁂… 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀻’’𑀢𑀺 𑀏𑀢𑁆𑀢𑀓𑁂𑀦 𑀓𑀡𑁆𑀳𑀧𑀓𑁆𑀔𑁂 𑀉𑀤𑁆𑀤𑁂𑀲𑀧𑀸𑀞𑁂𑀦.

𑀯𑀺𑀢𑁆𑀣𑀸𑀭𑀢𑁄 𑀲𑀼𑀯𑀺𑀪𑀢𑁆𑀢𑁄 𑀳𑁄𑀢𑀺 𑀅𑀦𑀯𑀲𑁂𑀲𑀢𑁄 𑀲𑀫𑁆𑀫𑀤𑁂𑀯 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸. 𑀦𑀦𑀼 𑀘 𑀉𑀤𑁆𑀤𑁂𑀲𑁂 𑀲𑀢𑁆𑀣𑀼𑀦𑁄𑀧𑀺 𑀆𑀤𑀺𑀬𑀢𑀸 𑀪𑀕𑀯𑀢𑀸 𑀕𑀳𑀺𑀢𑀸, 𑀲𑀸 𑀦 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬𑀸𑀳 ‘‘𑀲𑁄 𑀘 𑀔𑁄’’𑀢𑀺𑀆𑀤𑀺. 𑀲𑀸𑀯𑀓𑁂 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀢𑀺 ‘‘𑀆𑀫𑀺𑀲𑀤𑀸𑀬𑀸𑀤𑀸 𑀲𑀢𑁆𑀣𑀼 𑀲𑀸𑀯𑀓𑀸’’𑀢𑀺 𑀲𑀢𑁆𑀣𑀼 𑀧𑀭𑀧𑁆𑀧𑀯𑀸𑀤𑀧𑀭𑀺𑀳𑀭𑀡𑀢𑁆𑀣𑀫𑁆𑀧𑀺 ‘‘𑀢𑀼𑀫𑁆𑀳𑁂𑀳𑀺 𑀥𑀫𑁆𑀫𑀤𑀸𑀬𑀸𑀤𑁂𑀳𑀺 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀲𑀸𑀯𑀓𑁂 𑀅𑀦𑀼𑀓𑀫𑁆𑀧𑀫𑀸𑀦𑀲𑁆𑀲. 𑀲𑀸𑀯𑀓𑀸𑀦𑀁 𑀢𑀁 𑀦 𑀬𑀼𑀢𑁆𑀢𑀁 𑀲𑀸𑀫𑀻𑀘𑀺𑀅𑀪𑀸𑀯𑀢𑁄𑀢𑀺 𑀬𑁄𑀚𑀦𑀸. 𑀏𑀲 𑀦𑀬𑁄𑀢𑀺 𑀬𑀤𑀺𑀤𑀁 ‘‘𑀏𑀢𑁆𑀢𑀸𑀯𑀢𑀸𑀬𑀁 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀓𑀡𑁆𑀳𑀧𑀓𑁆𑀔𑁂 𑀉𑀤𑁆𑀤𑁂𑀲𑀲𑁆𑀲 𑀅𑀢𑁆𑀣𑀯𑀺𑀪𑀸𑀕𑀤𑀲𑁆𑀲𑀦𑀫𑀼𑀔𑁂𑀦 𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑀁, 𑀏𑀲 𑀦𑀬𑁄 𑀲𑀼𑀓𑁆𑀓𑀧𑀓𑁆𑀔𑁂𑀧𑀺 𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀅𑀬𑀁 𑀢𑀸𑀯𑁂𑀢𑁆𑀣 𑀅𑀦𑀼𑀲𑀦𑁆𑀥𑀺𑀓𑁆𑀓𑀫𑀬𑁄𑀚𑀦𑀸’’𑀢𑀺, 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑀸𑀬 𑀉𑀤𑁆𑀤𑁂𑀲𑀤𑁂𑀲𑀦𑀸𑀬 𑀫𑀳𑀸𑀣𑁂𑀭𑁂𑀦 ¶ 𑀤𑁂𑀲𑀺𑀢𑀸𑀬 𑀘 𑀅𑀦𑀼𑀲𑀦𑁆𑀥𑀺𑀓𑁆𑀓𑀫𑁂𑀦 𑀲𑀫𑁆𑀩𑀦𑁆𑀥𑁄𑀢𑀺 𑀅𑀢𑁆𑀣𑁄. 𑀬𑀣𑀸𑀦𑀼𑀲𑀦𑁆𑀥𑀺 𑀏𑀯 𑀘𑁂𑀢𑁆𑀣 𑀅𑀦𑀼𑀲𑀦𑁆𑀥𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀘𑁆𑀘𑀦𑁆𑀢𑀧𑀯𑀺𑀯𑀺𑀢𑁆𑀢𑀲𑁆𑀲𑀸𑀢𑀺 𑀏𑀓𑀦𑁆𑀢𑀉𑀧𑀥𑀺𑀯𑀺𑀯𑁂𑀓𑁄 𑀯𑀺𑀬 𑀇𑀢𑀭𑁂𑀧𑀺 𑀯𑀺𑀯𑁂𑀓𑁄 𑀲𑀢𑁆𑀣𑀼 𑀏𑀓𑀦𑁆𑀢𑀺𑀓𑀸𑀯𑀸𑀢𑀺. 𑀅𑀦𑀼𑀲𑀺𑀓𑁆𑀔𑀦𑀁 𑀦𑀸𑀫 𑀅𑀦𑀼 𑀅𑀦𑀼 𑀧𑀽𑀭𑀡𑀦𑁆𑀢𑀺 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀆𑀳 ‘‘𑀦 𑀧𑀭𑀺𑀧𑀽𑀭𑁂𑀦𑁆𑀢𑀻’’𑀢𑀺, 𑀦 𑀧𑀭𑀺𑀩𑁆𑀭𑀽𑀳𑁂𑀦𑁆𑀢𑀻𑀢𑀺 𑀅𑀢𑁆𑀣𑁄, 𑀦 𑀧𑀭𑀺𑀧𑀽𑀭𑁂𑀦𑁆𑀢𑀻𑀢𑀺 𑀯𑀸 𑀦 𑀧𑀭𑀺𑀧𑀸𑀮𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀬𑀤𑀕𑁆𑀕𑁂𑀦 𑀳𑀺 𑀯𑀺𑀯𑁂𑀓𑀁 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀺, 𑀢𑀤𑀕𑁆𑀕𑁂𑀦 𑀦 𑀧𑀭𑀺𑀩𑁆𑀭𑀽𑀳𑁂𑀦𑁆𑀢𑀺, 𑀦 𑀧𑀭𑀺𑀧𑀸𑀮𑁂𑀦𑁆𑀢𑀻𑀢𑀺 𑀯𑀸 𑀯𑀢𑁆𑀢𑀩𑁆𑀩𑀢𑀁 𑀮𑀪𑀦𑁆𑀢𑀻𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 ‘‘𑀯𑀺𑀯𑁂𑀓𑀁 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀻’’𑀢𑀺 𑀉𑀤𑁆𑀤𑁂𑀲𑁂 𑀯𑀺𑀬 𑀅𑀯𑀺𑀲𑁂𑀲𑀯𑀘𑀦𑁂 𑀓𑀸𑀬𑀯𑀺𑀯𑁂𑀓𑀲𑁆𑀲𑁂𑀯 𑀕𑀳𑀡𑀁 𑀓𑀢𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀤𑀺 𑀧𑀦𑀸’’𑀢𑀺𑀆𑀤𑀺. 𑀧𑀼𑀘𑁆𑀙𑀸𑀬𑀸𑀢𑀺 𑀧𑀼𑀘𑁆𑀙𑀸𑀢𑁄 𑀅𑀯𑀺𑀲𑁂𑀲𑁄 𑀲𑀺𑀬𑀸 𑀯𑀺𑀪𑀸𑀕𑀲𑁆𑀲 𑀅𑀮𑀩𑁆𑀪𑀫𑀸𑀦𑀢𑁆𑀢𑀸 𑀯𑀺𑀲𑁆𑀲𑀚𑁆𑀚𑀦𑀲𑁆𑀲. 𑀦𑀦𑀼 𑀘 ‘‘𑀯𑀺𑀯𑁂𑀓𑀁 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀻’’𑀢𑀺 𑀅𑀯𑀺𑀲𑁂𑀲𑀯𑀘𑀦𑀢𑁄 𑀧𑀸𑀴𑀺𑀬𑀁 𑀯𑀺𑀪𑀸𑀕𑁄 𑀦 𑀮𑀩𑁆𑀪𑀢𑁂𑀯𑀸𑀢𑀺? 𑀦, 𑀧𑀤𑀦𑁆𑀢𑀭𑁂𑀦 𑀯𑀺𑀪𑀸𑀯𑀺𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀬𑁂𑀲𑀜𑁆𑀘 𑀥𑀫𑁆𑀫𑀸𑀦’’𑀦𑁆𑀢𑀺𑀆𑀤𑀺. 𑀩𑁆𑀬𑀸𑀓𑀭𑀡𑀧𑀓𑁆𑀔𑁄𑀢𑀺 𑀯𑀺𑀲𑁆𑀲𑀚𑁆𑀚𑀦𑀧𑀓𑁆𑀔𑁄. 𑀯𑀺𑀲𑁆𑀲𑀚𑁆𑀚𑀦𑀜𑁆𑀘 𑀦 𑀧𑀼𑀘𑁆𑀙𑀸 𑀯𑀺𑀬 𑀅𑀯𑀺𑀲𑁂𑀲𑀚𑁄𑀢𑀦𑀸 ¶ , 𑀅𑀣 𑀔𑁄 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀯𑀺𑀪𑀚𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀫𑀺𑀦𑀸 𑀧𑀤𑁂𑀦𑀸𑀢𑀺 ‘‘𑀯𑀺𑀯𑁂𑀓𑀁 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀓𑀸𑀬𑀯𑀺𑀯𑁂𑀓𑀁 𑀅𑀧𑀭𑀺𑀧𑀽𑀭𑀺𑀬𑀫𑀸𑀦𑀁 𑀤𑀲𑁆𑀲𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀺𑀢𑁆𑀢𑀯𑀺𑀯𑁂𑀓𑀁 𑀉𑀧𑀥𑀺𑀯𑀺𑀯𑁂𑀓𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀏𑀢𑁆𑀣 𑀘 𑀦𑀧𑁆𑀧𑀚𑀳𑀦𑁆𑀢𑀻𑀢𑀺 𑀧𑀳𑀸𑀢𑀩𑁆𑀩𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀪𑀸𑀯𑀯𑀘𑀦𑀁 𑀧𑀳𑀸𑀦𑀮𑀓𑁆𑀔𑀡𑀯𑀺𑀯𑁂𑀓𑀸𑀪𑀸𑀯𑀤𑀻𑀧𑀦𑀁, 𑀢𑀁 𑀯𑀢𑁆𑀯𑀸 𑀧𑀼𑀦 ‘‘𑀯𑀺𑀯𑁂𑀓𑁂 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀸’’𑀢𑀺 𑀯𑀘𑀦𑀁 𑀢𑀢𑁄 𑀲𑀸𑀢𑀺𑀲𑀬𑀯𑀺𑀯𑁂𑀓𑀸𑀪𑀸𑀯𑀤𑀻𑀧𑀦𑀦𑁆𑀢𑀺 𑀢𑀤𑀼𑀪𑀬𑀯𑀺𑀯𑁂𑀓𑀸𑀪𑀸𑀯𑀤𑀲𑁆𑀲𑀦𑁂𑀦 ‘‘𑀬𑁂𑀲𑀜𑁆𑀘 𑀥𑀫𑁆𑀫𑀸𑀦’’𑀦𑁆𑀢𑀺𑀆𑀤𑀺𑀦𑀸𑀯 𑀧𑀸𑀭𑀺𑀲𑁂𑀲𑀜𑀸𑀬𑁂𑀦 ‘‘𑀯𑀺𑀯𑁂𑀓𑀁 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀯𑀺𑀯𑁂𑀓𑀤𑁆𑀯𑀬𑀫𑀽𑀮𑀪𑀽𑀢𑀓𑀸𑀬𑀯𑀺𑀯𑁂𑀓𑀸𑀪𑀸𑀯𑀤𑀲𑁆𑀲𑀦𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀯𑀺𑀕𑀢𑀢𑀡𑁆𑀳𑀢𑀸𑀬 𑀢𑀁 𑀢𑀁 𑀧𑀭𑀺𑀓𑁆𑀔𑀸𑀭𑀚𑀸𑀢𑀁 𑀩𑀳𑀼𑀁 𑀮𑀦𑁆𑀢𑀺 𑀆𑀤𑀺𑀬𑀦𑁆𑀢𑀻𑀢𑀺 𑀩𑀳𑀼𑀮𑀸, 𑀩𑀳𑀼𑀮𑀸 𑀏𑀯 𑀩𑀸𑀳𑀼𑀮𑀺𑀓𑀸 𑀬𑀣𑀸 ‘‘𑀯𑁂𑀦𑀬𑀺𑀓𑁄’’𑀢𑀺 (𑀫. 𑀦𑀺. 𑁧.𑁨𑁪𑁬; 𑀅. 𑀦𑀺. 𑁮.𑁧𑁧; 𑀧𑀸𑀭𑀸. 𑁮). 𑀢𑁂 𑀧𑀦 𑀬𑀲𑁆𑀫𑀸 𑀧𑀘𑁆𑀘𑀬𑀩𑀳𑀼𑀮𑀪𑀸𑀯𑀸𑀬 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀆𑀳 ‘‘𑀘𑀻𑀯𑀭𑀸𑀤𑀺𑀩𑀸𑀳𑀼𑀮𑁆𑀮𑀸𑀬 𑀧𑀝𑀺𑀧𑀦𑁆𑀦𑀸’’𑀢𑀺. 𑀲𑀺𑀓𑁆𑀔𑀸𑀬 𑀆𑀤𑀭𑀪𑀸𑀯𑀸𑀪𑀸𑀯𑀢𑁄 𑀲𑀺𑀣𑀺𑀮𑀁 𑀅𑀤𑀴𑁆𑀳𑀁 𑀕𑀡𑁆𑀳𑀦𑁆𑀢𑀻𑀢𑀺 ‘‘𑀲𑀸𑀣𑀮𑀺𑀓𑀸’’𑀢𑀺 𑀯𑀼𑀢𑁆𑀢𑀁. 𑀲𑀺𑀣𑀺𑀮𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀲𑀺𑀣𑀺𑀮-𑀲𑀤𑁆𑀤𑁂𑀦 𑀯𑀸 𑀲𑀫𑀸𑀦𑀢𑁆𑀣𑀲𑁆𑀲 𑀲𑀸𑀣𑀮-𑀲𑀤𑁆𑀤𑀲𑁆𑀲 𑀯𑀲𑁂𑀦 ‘‘𑀲𑀸𑀣𑀮𑀺𑀓𑀸’’𑀢𑀺 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀯𑀕𑀫𑀦𑀝𑁆𑀞𑁂𑀦𑀸𑀢𑀺 𑀅𑀥𑁄𑀕𑀫𑀦𑀝𑁆𑀞𑁂𑀦 ¶ , 𑀑𑀭𑀫𑁆𑀪𑀸𑀕𑀺𑀬𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀉𑀧𑀥𑀺𑀯𑀺𑀯𑁂𑀓𑁂𑀢𑀺 𑀲𑀩𑁆𑀩𑀽𑀧𑀥𑀺𑀧𑀝𑀺𑀦𑀺𑀲𑁆𑀲𑀕𑁆𑀕𑀢𑀸𑀬 𑀉𑀧𑀥𑀻𑀳𑀺 𑀯𑀺𑀯𑀺𑀢𑁆𑀢𑁂. 𑀑𑀭𑁄𑀧𑀺𑀢𑀥𑀼𑀭𑀸𑀢𑀺 𑀉𑀚𑁆𑀛𑀺𑀢𑀼𑀲𑁆𑀲𑀸𑀳𑀸.

𑀅𑀦𑀺𑀬𑀫𑁂𑀦𑁂𑀯𑀸𑀢𑀺 𑀓𑀺𑀜𑁆𑀘𑀺 𑀯𑀺𑀲𑁂𑀲𑀁 𑀅𑀦𑀸𑀫𑀲𑀺𑀢𑁆𑀯𑀸 ‘‘𑀲𑀸𑀯𑀓𑀸’’𑀢𑀺 𑀅𑀯𑀺𑀲𑁂𑀲𑁂𑀦𑁂𑀯. 𑀦𑀺𑀬𑀫𑁂𑀦𑁆𑀢𑁄‘‘𑀣𑁂𑀭𑀸’’𑀢𑀺𑀆𑀤𑀺𑀦𑀸. 𑀤𑀲𑀯𑀲𑁆𑀲𑁂 𑀉𑀧𑀸𑀤𑀸𑀬𑀸𑀢𑀺 𑀤𑀲𑀯𑀲𑁆𑀲𑀢𑁄 𑀧𑀝𑁆𑀞𑀸𑀬. 𑀇𑀲𑁆𑀲𑀭𑀺𑀬𑁂𑀢𑀺 ‘‘𑀲𑁂𑀝𑁆𑀞𑀺𑀝𑁆𑀞𑀸𑀦𑀁 𑀲𑁂𑀦𑀸𑀧𑀢𑀺𑀝𑁆𑀞𑀸𑀦’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀘𑀺𑀭𑀓𑁆𑀔𑀡𑁄𑀪𑀸𑀲𑁂𑀦 𑀮𑀓𑁆𑀔𑀯𑁂𑀥𑀓𑁄 𑀅𑀓𑁆𑀔𑀡𑀯𑁂𑀥𑀺. 𑀞𑀺𑀢𑀺𑀬𑀦𑁆𑀢𑀺 𑀅𑀯𑀝𑁆𑀞𑀸𑀦𑁂. 𑀞𑀸𑀦𑀲𑁄𑀢𑀺 𑀢𑀗𑁆𑀔𑀡𑁂𑀬𑁂𑀯. 𑀢𑀺𑀝𑁆𑀞𑀢𑀻𑀢𑀺 𑀆𑀥𑀸𑀭𑀸𑀥𑁂𑀬𑁆𑀬𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀪𑀸𑀯𑁂𑀦𑀸’’𑀢𑀺. 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀦𑀸 𑀲𑀢𑁆𑀢𑀲𑀗𑁆𑀔𑀸𑀭𑁂𑀲𑀼 𑀉𑀤𑀸𑀲𑀻𑀦𑀢𑀸𑀧𑀺 𑀅𑀲𑀗𑁆𑀔𑀢𑀸𑀥𑀺𑀕𑀫𑀲𑁆𑀲 𑀉𑀧𑀸𑀬𑁄𑀢𑀺 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀘𑀻𑀯𑀭𑀸𑀤𑀺𑀫𑀡𑁆𑀟𑀦𑀸 𑀦 𑀉𑀧𑀥𑀺𑀯𑀺𑀯𑁂𑀓𑀧𑀸𑀭𑀺𑀧𑀽𑀭𑀺𑀬𑀸 𑀲𑀁𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀘𑀻𑀯𑀭𑀧𑀢𑁆𑀢…𑀧𑁂… 𑀅𑀧𑀽𑀭𑀬𑀫𑀸𑀦𑀸’’𑀢𑀺. 𑀢𑀢𑁆𑀣𑀸𑀢𑀺 𑀣𑁂𑀭𑀯𑀸𑀭𑁂. 𑀇𑀥𑀸𑀢𑀺 𑀫𑀚𑁆𑀛𑀺𑀫𑀦𑀯𑀓𑀯𑀸𑀭𑁂𑀲𑀼. 𑀢𑀣𑀸 𑀳𑀺 ‘‘𑀫𑀚𑁆𑀛𑀺𑀫𑀣𑁂𑀭𑀓𑀸𑀮𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁩𑁨. 𑀇𑀫𑀲𑁆𑀫𑀺𑀜𑁆𑀘 𑀓𑀡𑁆𑀳𑀧𑀓𑁆𑀔𑁂𑀢𑀺 𑀇𑀫𑀲𑁆𑀫𑀺𑀜𑁆𑀘 𑀦𑀺𑀤𑁆𑀤𑁂𑀲𑀯𑀸𑀭𑁂 𑀓𑀡𑁆𑀳𑀧𑀓𑁆𑀔𑁂, 𑀦 𑀉𑀤𑁆𑀤𑁂𑀲𑀯𑀸𑀭𑁂 𑀓𑀡𑁆𑀳𑀧𑀓𑁆𑀔𑁂. 𑀉𑀤𑁆𑀤𑁂𑀲𑀯𑀸𑀭𑁂 𑀧𑀦 𑀓𑀡𑁆𑀳𑀧𑀓𑁆𑀔𑁂 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀕𑀳𑁂𑀢𑀩𑁆𑀩𑀢𑁆𑀣𑁄 ‘‘𑀏𑀲 𑀦𑀬𑁄 𑀲𑀼𑀓𑁆𑀓𑀧𑀓𑁆𑀔𑁂𑀧𑀻’’𑀢𑀺 𑀅𑀢𑀺𑀤𑁂𑀲𑁂𑀦 𑀤𑀲𑁆𑀲𑀺𑀢𑁄. 𑀯𑀼𑀢𑁆𑀢𑀧𑀘𑁆𑀘𑀦𑀻𑀓𑀦𑀬𑁂𑀦𑀸𑀢𑀺 ‘‘𑀓𑀸𑀬𑀯𑀺𑀯𑁂𑀓𑀁 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀺 𑀦 𑀧𑀭𑀺𑀧𑀽𑀭𑁂𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀘𑁆𑀘𑀦𑀻𑀓𑀦𑀬𑁂𑀦, ‘‘𑀓𑀸𑀬𑀯𑀺𑀯𑁂𑀓𑀁 𑀅𑀦𑀼𑀲𑀺𑀓𑁆𑀔𑀦𑁆𑀢𑀺 𑀧𑀭𑀺𑀧𑀽𑀭𑁂𑀦𑁆𑀢𑀻’’𑀢𑀺𑀆𑀤𑀺𑀦𑀸 ¶ 𑀦𑀬𑁂𑀦. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀲𑀼𑀓𑁆𑀓𑀧𑀓𑁆𑀔𑁂. 𑀲𑀗𑁆𑀔𑁂𑀧𑁄𑀢𑀺 𑀅𑀢𑁆𑀣𑀲𑀗𑁆𑀔𑁂𑀧𑁄. 𑀬𑁄𑀚𑀦𑀧𑀭𑀫𑁆𑀧𑀭𑀸𑀬𑀸𑀢𑀺 𑀕𑀸𑀫𑀦𑁆𑀢𑀢𑁄 𑀤𑀽𑀭𑀪𑀸𑀯𑁂𑀦 𑀏𑀓𑀁 𑀤𑁆𑀯𑁂 𑀢𑀻𑀡𑀻𑀢𑀺 𑀏𑀯𑀁 𑀬𑁄𑀚𑀦𑀸𑀦𑀁 𑀧𑀝𑀺𑀧𑀸𑀝𑀺𑀬𑀸. 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀻𑀢𑀺 𑀅𑀭𑀜𑁆𑀜𑁂𑀲𑀼 𑀯𑀦𑀲𑀡𑁆𑀟𑀪𑀽𑀢𑀸𑀦𑀺. 𑀧𑀦𑁆𑀢𑀸𑀦𑀻𑀢𑀺 𑀧𑀭𑀺𑀬𑀦𑁆𑀢𑀸𑀦𑀺. 𑀉𑀧𑀕𑀦𑁆𑀢𑀼𑀁 𑀬𑀼𑀢𑁆𑀢𑀓𑀸𑀮𑁄 𑀚𑀭𑀸𑀚𑀺𑀡𑁆𑀡𑀓𑀸𑀮𑁄 𑀕𑁄𑀘𑀭𑀕𑀸𑀫𑁂 𑀤𑀽𑀭𑁂 𑀕𑀫𑀦𑀸𑀕𑀫𑀦𑀲𑀫𑀢𑁆𑀣𑀢𑀸𑀪𑀸𑀯𑀢𑁄. ‘‘𑀏𑀯𑀁 𑀕𑀼𑀡𑀯𑀦𑁆𑀢𑁂𑀲𑀼 𑀤𑀺𑀦𑁆𑀦𑀁 𑀅𑀳𑁄 𑀲𑀼𑀤𑀺𑀦𑁆𑀦’’𑀦𑁆𑀢𑀺 𑀧𑀘𑁆𑀘𑀬𑀤𑀸𑀬𑀓𑀸𑀦𑀁 𑀧𑀲𑀸𑀤𑀁 𑀚𑀦𑁂𑀦𑁆𑀢𑀺. 𑀧𑀸𑀲𑀁𑀲𑀸𑀢𑀺 𑀧𑀲𑀁𑀲𑀺𑀢𑀩𑁆𑀩𑀸. 𑀅𑀬𑀫𑁆𑀧𑀺 𑀫𑀳𑀸𑀣𑁂𑀭𑁄𑀢𑀺𑀆𑀤𑀺 𑀏𑀓𑀁 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀺𑀦𑀁 𑀯𑀼𑀤𑁆𑀥𑀢𑀭𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀯𑀤𑀦𑁆𑀢𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀯𑀺𑀝𑁆𑀞𑁄 𑀯𑀺𑀯𑁂𑀓𑀝𑁆𑀞𑀸𑀦𑀁. 𑀲𑀸𑀬𑀁 𑀦𑀺𑀓𑁆𑀔𑀫𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀉𑀧𑀩𑁆𑀭𑀽𑀳𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀭𑁄𑀢𑀺, 𑀦 𑀬𑀁 𑀓𑀺𑀜𑁆𑀘𑀺 𑀓𑀺𑀘𑁆𑀘𑀦𑁆𑀢𑀭𑀁. 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀦 𑀫𑁄𑀖𑀫𑀦𑀲𑀺𑀓𑀸𑀭𑀁. 𑀲𑀩𑁆𑀩𑀣𑀸𑀢𑀺𑀆𑀤𑀺𑀢𑁄 𑀢𑀸𑀯 𑀢𑀤𑀗𑁆𑀕𑀯𑀲𑁂𑀦 𑀓𑀺𑀮𑁂𑀲𑁂𑀳𑀺 𑀘𑀺𑀢𑁆𑀢𑀁 𑀯𑀺𑀯𑁂𑀘𑁂𑀦𑁆𑀢𑁄 𑀢𑀢𑁄 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀝𑀺𑀧𑀲𑁆𑀲𑀤𑁆𑀥𑀺𑀯𑀲𑁂𑀦𑀸𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀘𑀺𑀢𑁆𑀢𑀯𑀺𑀯𑁂𑀓𑀁 𑀧𑀽𑀭𑁂𑀢𑀺. 𑀧𑀁𑀲𑀼𑀓𑀽𑀮𑀸𑀦𑀺 𑀥𑀸𑀭𑁂𑀢𑀻𑀢𑀺 𑀇𑀫𑀺𑀦𑀸 𑀩𑀸𑀳𑀼𑀮𑀺𑀓𑀢𑀸𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀅𑀲𑀺𑀣𑀺𑀮𑀁 𑀲𑀸𑀲𑀦𑀁 ¶ 𑀕𑀳𑁂𑀢𑁆𑀯𑀸𑀢𑀺 𑀇𑀫𑀺𑀦𑀸 𑀲𑀸𑀣𑀮𑀺𑀓𑀢𑀸𑀪𑀸𑀯𑀁, 𑀯𑀺𑀕𑀢𑀦𑀻𑀯𑀭𑀡𑁄𑀢𑀺 𑀇𑀫𑀺𑀦𑀸 𑀑𑀓𑁆𑀓𑀫𑀦𑁂 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀁, 𑀨𑀮𑀲𑀫𑀸𑀧𑀢𑁆𑀢𑀺𑀦𑁆𑀢𑀺𑀆𑀤𑀺𑀦𑀸 𑀧𑀯𑀺𑀯𑁂𑀓𑀧𑀼𑀩𑁆𑀩𑀗𑁆𑀕𑀫𑀢𑀁 𑀤𑀲𑁆𑀲𑁂𑀢𑀺.

𑁩𑁩. 𑀢𑀢𑁆𑀭𑀸𑀯𑀼𑀲𑁄𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. 𑀢𑁂𑀦 ‘‘𑀮𑁄𑀪𑁄 𑀘 𑀧𑀸𑀧𑀓𑁄’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀉𑀧𑀭𑀺𑀤𑁂𑀲𑀦𑀁 𑀅𑀦𑀯𑀲𑁂𑀲𑀢𑁄 𑀧𑀭𑀺𑀬𑀸𑀤𑀺𑀬𑀢𑀺. 𑀓𑁄 𑀅𑀦𑀼𑀲𑀦𑁆𑀥𑀻𑀢𑀺 𑀬𑀸 𑀲𑀸 𑀪𑀕𑀯𑀢𑀸 𑀲𑀁𑀓𑀺𑀮𑁂𑀲𑀧𑀓𑁆𑀔𑁂𑀦 𑀲𑀳 𑀥𑀫𑁆𑀫𑀤𑀸𑀬𑀸𑀤𑀧𑀝𑀺𑀧𑀢𑁆𑀢𑀺𑀪𑀸𑀯𑀺𑀦𑀻 ‘‘𑀥𑀫𑁆𑀫𑀤𑀸𑀬𑀸𑀤𑀸 𑀫𑁂, 𑀪𑀺𑀓𑁆𑀔𑀯𑁂, 𑀪𑀯𑀣, 𑀫𑀸 𑀆𑀫𑀺𑀲𑀤𑀸𑀬𑀸𑀤𑀸’’𑀢𑀺𑀆𑀤𑀺𑀦𑀸 𑀤𑁂𑀲𑀦𑀸 𑀉𑀤𑁆𑀤𑀺𑀝𑁆𑀞𑀸, 𑀢𑀁 ‘‘𑀲𑀢𑁆𑀣𑀼 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄’’𑀢𑀺𑀆𑀤𑀺𑀦𑀸 𑀆𑀭𑀪𑀺𑀢𑁆𑀯𑀸 𑀅𑀝𑁆𑀞𑀸𑀭𑀲𑀯𑀸𑀭𑀧𑀝𑀺𑀫𑀡𑁆𑀟𑀺𑀢𑀸𑀬 𑀦𑀺𑀤𑁆𑀤𑁂𑀲𑀤𑁂𑀲𑀦𑀸𑀬 𑀯𑀺𑀪𑀚𑀺𑀢𑁆𑀯𑀸 𑀢𑀢𑁄 𑀧𑀭𑀁 ‘‘𑀢𑀢𑁆𑀭𑀸𑀯𑀼𑀲𑁄 𑀮𑁄𑀪𑁄 𑀘 𑀧𑀸𑀧𑀓𑁄’’𑀢𑀺𑀆𑀤𑀺𑀦𑀬𑀸𑀬 𑀉𑀧𑀭𑀺𑀤𑁂𑀲𑀦𑀸𑀬 𑀲𑀫𑁆𑀩𑀦𑁆𑀥𑀁 𑀧𑀼𑀘𑁆𑀙𑀢𑀺. 𑀏𑀯𑀦𑁆𑀢𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 ‘‘𑀦𑀧𑁆𑀧𑀚𑀳𑀦𑁆𑀢𑀻’’𑀢𑀺 𑀧𑀳𑀸𑀦𑀸𑀪𑀸𑀯𑀤𑀲𑁆𑀲𑀦𑀯𑀲𑁂𑀦, 𑀯𑁄𑀤𑀸𑀦𑀧𑀓𑁆𑀔𑁂 ‘‘𑀧𑀚𑀳𑀦𑁆𑀢𑀻’’𑀢𑀺 𑀧𑀳𑀸𑀦𑀲𑀩𑁆𑀪𑀸𑀯𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀏𑀯𑀁. 𑀅𑀦𑀺𑀤𑁆𑀥𑀸𑀭𑀺𑀢𑀲𑀭𑀽𑀧𑀸 𑀬𑀁-𑀢𑀁-𑀲𑀤𑁆𑀤𑁂𑀳𑀺 𑀥𑀫𑁆𑀫-𑀲𑀤𑁆𑀤𑁂𑀦 𑀲𑀸𑀫𑀜𑁆𑀜𑀢𑁄 𑀬𑁂 𑀧𑀳𑀸𑀢𑀩𑁆𑀩𑀥𑀫𑁆𑀫𑀸 𑀯𑀼𑀢𑁆𑀢𑀸, 𑀢𑁂 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀦𑁆𑀢𑀺 𑀬𑁄𑀚𑀦𑀸. 𑀇𑀫𑁂 𑀢𑁂𑀢𑀺 𑀏𑀢𑁆𑀣 𑀓𑀲𑁆𑀫𑀸 𑀮𑁄𑀪𑀸𑀤𑀬𑁄 𑀏𑀯 𑀧𑀳𑀸𑀢𑀩𑁆𑀩𑀥𑀫𑁆𑀫𑀸 𑀯𑀼𑀢𑁆𑀢𑀸, 𑀦𑀦𑀼 𑀇𑀢𑁄 𑀅𑀜𑁆𑀜𑁂𑀧𑀺 𑀫𑁄𑀳𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀤𑀬𑁄 𑀧𑀳𑀸𑀢𑀩𑁆𑀩𑀥𑀫𑁆𑀫𑀸 𑀲𑀦𑁆𑀢𑀻𑀢𑀺? 𑀲𑀘𑁆𑀘𑀁 𑀲𑀦𑁆𑀢𑀺, 𑀢𑁂 𑀧𑀦 𑀮𑁄𑀪𑀸𑀤𑀻𑀳𑀺 𑀢𑀤𑁂𑀓𑀝𑁆𑀞𑀢𑀸 𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀸. 𑀅𑀣 𑀯𑀸 𑀇𑀫𑁂𑀲𑀁𑀬𑁂𑀯𑁂𑀢𑁆𑀣 𑀕𑀳𑀡𑁂 𑀓𑀸𑀭𑀡𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑀇𑀤𑀸𑀦𑀺 𑀉𑀧𑀘𑀬𑁂𑀦 𑀅𑀦𑀼𑀲𑀦𑁆𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀸𑀯𑀓𑀸𑀦𑀁 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀤𑀸𑀬𑀸𑀤𑀪𑀸𑀯𑁄 𑀲𑀢𑁆𑀣𑀼 𑀅𑀪𑀺𑀭𑀼𑀘𑀺𑀢𑁄, 𑀲𑁄 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀪𑀸𑀯𑁂𑀢𑀻’’𑀢𑀺𑀆𑀤𑀺𑀦𑀸 𑀅𑀓𑀢𑁆𑀣𑁂𑀢𑁆𑀯𑀸 ‘‘𑀯𑀺𑀯𑁂𑀓𑀁 𑀅𑀦𑀼𑀲𑀺𑀓𑁆𑀔𑀦𑁆𑀢𑀺, 𑀢𑁂 𑀘 𑀥𑀫𑁆𑀫𑁂 𑀧𑀚𑀳𑀦𑁆𑀢𑀺, 𑀦 𑀘 𑀩𑀸𑀳𑀼𑀮𑀺𑀓𑀸’’𑀢𑀺𑀆𑀤𑀺𑀦𑀸 𑀓𑀣𑀺𑀢𑀢𑁆𑀢𑀸 ¶ 𑀳𑁂𑀝𑁆𑀞𑀸 𑀧𑀭𑀺𑀬𑀸𑀬𑁂𑀦𑁂𑀯 𑀥𑀫𑁆𑀫𑁄 𑀓𑀣𑀺𑀢𑁄𑀢𑀺 𑀯𑀼𑀢𑁆𑀢𑀁. ‘‘𑀢𑁂 𑀘 𑀥𑀫𑁆𑀫𑁂 𑀦𑀧𑁆𑀧𑀚𑀳𑀦𑁆𑀢𑀺, 𑀑𑀓𑁆𑀓𑀫𑀦𑁂 𑀧𑀼𑀩𑁆𑀩𑀗𑁆𑀕𑀫𑀸’’𑀢𑀺𑀆𑀤𑀺𑀦𑀸 𑀆𑀫𑀺𑀲𑀁 𑀧𑀭𑀺𑀬𑀸𑀬𑁂𑀦𑀧𑀺 𑀓𑀣𑀺𑀢𑀁. ‘‘𑀲𑀺𑀬𑀸 𑀘 𑀫𑁂 𑀧𑀺𑀡𑁆𑀟𑀧𑀸𑀢𑁄’’𑀢𑀺𑀆𑀤𑀺𑀦𑀸, ‘‘𑀩𑀸𑀳𑀼𑀮𑀺𑀓𑀸 𑀘 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀘 𑀆𑀫𑀺𑀲𑀁 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑀧𑀺 𑀓𑀣𑀺𑀢𑀁. 𑀅𑀣 𑀯𑀸 𑀬𑀸𑀬𑀁 𑀪𑀕𑀯𑀢𑀸 𑀆𑀫𑀺𑀲𑀤𑀸𑀬𑀸𑀤𑀧𑀝𑀺𑀓𑁆𑀔𑁂𑀧𑀦𑀸 𑀥𑀫𑁆𑀫𑀤𑀸𑀬𑀸𑀤𑀢𑀸 𑀯𑀼𑀢𑁆𑀢𑀸, 𑀬𑀜𑁆𑀘 𑀢𑀤𑀢𑁆𑀣𑀁 𑀯𑀺𑀪𑀚𑀦𑁆𑀢𑁂𑀦 𑀫𑀳𑀸𑀣𑁂𑀭𑁂𑀦 𑀅𑀢𑁆𑀢𑀦𑀸 𑀯𑀺𑀯𑁂𑀓𑀸𑀦𑀼𑀲𑀺𑀓𑁆𑀔𑀦𑀸𑀤𑀺 𑀯𑀼𑀢𑁆𑀢𑀁, 𑀢𑀤𑀼𑀪𑀬𑀁 𑀳𑁂𑀢𑀼𑀯𑀲𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀢𑀢𑁆𑀭𑀸𑀯𑀼𑀲𑁄, 𑀮𑁄𑀪𑁄 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁 ¶ . 𑀳𑁂𑀢𑀼𑀦𑀺𑀭𑁄𑀥𑁂𑀦 𑀳𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑀲𑁆𑀲, 𑀦𑀺𑀭𑁄𑀥𑀳𑁂𑀢𑀼𑀲𑀫𑁆𑀧𑀸𑀤𑀦𑁂𑀦 𑀘 𑀯𑁄𑀤𑀸𑀦𑀧𑀓𑁆𑀔𑀲𑁆𑀲 𑀢𑀧𑁆𑀧𑀸𑀧𑀓𑀢𑀸.

𑀅𑀢𑀻𑀢𑀤𑁂𑀲𑀦𑀸𑀦𑀺𑀤𑀲𑁆𑀲𑀦𑀦𑁆𑀢𑀺 𑀅𑀢𑀻𑀢𑀸𑀬 𑀣𑁂𑀭𑁂𑀦 𑀬𑀣𑀸𑀤𑁂𑀲𑀺𑀢𑀸𑀬 𑀤𑁂𑀲𑀦𑀸𑀬 𑀘 𑀧𑀘𑁆𑀘𑀸𑀫𑀲𑀦𑀁. 𑀢𑁂𑀦𑁂𑀯𑀸𑀳 ‘‘𑀲𑀢𑁆𑀣𑀼 𑀧𑀯𑀺𑀯𑀺𑀢𑁆𑀢𑀲𑁆𑀲…𑀧𑁂… 𑀤𑁂𑀲𑀦𑀸𑀬𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀢𑀢𑁆𑀣𑀸𑀢𑀺 𑀬𑀁 𑀯𑀼𑀢𑁆𑀢𑀁 𑀯𑀺𑀲𑁂𑀲𑀢𑁄 ‘‘𑀬𑁂𑀲𑀁 𑀥𑀫𑁆𑀫𑀸𑀦𑀁 𑀲𑀢𑁆𑀣𑀸 𑀧𑀳𑀸𑀦𑀫𑀸𑀳𑀸’’𑀢𑀺, 𑀏𑀢𑀲𑁆𑀫𑀺𑀁 𑀧𑀤𑁂. 𑀢𑀢𑁆𑀣 𑀳𑀺 𑀧𑀳𑀸𑀢𑀩𑁆𑀩𑀥𑀫𑁆𑀫𑀸 𑀮𑁄𑀪𑀸𑀤𑀬𑁄 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀸. 𑀮𑀸𑀫𑀓𑀸𑀢𑀺 𑀦𑀺𑀳𑀻𑀦𑀸. 𑀮𑁄𑀪𑀤𑁄𑀲𑀸 𑀳𑀺 𑀳𑁂𑀢𑀼𑀢𑁄 𑀧𑀘𑁆𑀘𑀬𑀢𑁄 𑀲𑀪𑀸𑀯𑀢𑁄 𑀨𑀮𑀢𑁄 𑀦𑀺𑀲𑁆𑀲𑀦𑁆𑀤𑀢𑁄 𑀲𑀁𑀓𑀺𑀮𑀺𑀝𑁆𑀞𑀧𑀓𑀢𑀺𑀓𑀸, 𑀆𑀬𑀢𑀺𑀁 𑀤𑀼𑀓𑁆𑀔𑀲𑁆𑀲 𑀧𑀸𑀧𑀦𑀝𑁆𑀞𑁂𑀦 𑀯𑀸 𑀧𑀸𑀧𑀓𑀸. 𑀮𑀼𑀩𑁆𑀪𑀦𑀮𑀓𑁆𑀔𑀡𑁄𑀢𑀺 𑀆𑀭𑀫𑁆𑀫𑀡𑀲𑁆𑀲 𑀅𑀪𑀺𑀕𑀺𑀚𑁆𑀛𑀦𑀮𑀓𑁆𑀔𑀡𑁄. 𑀢𑀣𑀸 𑀳𑀺 𑀲𑁄 𑀮𑀼𑀩𑁆𑀪𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀮𑀼𑀩𑁆𑀪𑀢𑀺, 𑀮𑀼𑀩𑁆𑀪𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 ‘‘𑀮𑁄𑀪𑁄’’𑀢𑀺 𑀯𑀼𑀘𑁆𑀘𑀢𑀺. 𑀭𑀲𑀸𑀤𑀻𑀲𑀼 𑀅𑀪𑀺𑀲𑀗𑁆𑀕𑀭𑀲𑁄, 𑀅𑀧𑀭𑀺𑀘𑁆𑀘𑀸𑀕𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀲𑀁𑀬𑁄𑀚𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀤𑀲𑁆𑀲𑀦𑀧𑀤𑀝𑁆𑀞𑀸𑀦𑁄. 𑀤𑀼𑀲𑁆𑀲𑀦𑀮𑀓𑁆𑀔𑀡𑁄𑀢𑀺 𑀆𑀭𑀫𑁆𑀫𑀡𑁂 𑀩𑁆𑀬𑀸𑀧𑀚𑁆𑀚𑀦𑀮𑀓𑁆𑀔𑀡𑁄. 𑀢𑀣𑀸 𑀳𑀺 𑀲𑁄 𑀤𑀼𑀲𑁆𑀲𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀤𑀼𑀲𑁆𑀲𑀢𑀺, 𑀤𑀼𑀲𑁆𑀲𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 ‘‘𑀤𑁄𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀭𑀲𑀸𑀤𑀻𑀲𑀼 𑀯𑀺𑀲𑀧𑁆𑀧𑀦𑀭𑀲𑁄, 𑀲𑀦𑀺𑀲𑁆𑀲𑀬𑀤𑀳𑀦𑀭𑀲𑁄 𑀯𑀸, 𑀤𑀼𑀲𑁆𑀲𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀆𑀖𑀸𑀢𑀯𑀢𑁆𑀣𑀼𑀧𑀤𑀝𑁆𑀞𑀸𑀦𑁄.

𑀢𑁂𑀲𑀽𑀢𑀺𑀆𑀤𑀺𑀦𑀸 𑀤𑀲𑁆𑀲𑀦𑁂𑀦 𑀮𑁄𑀪𑀤𑁄𑀲𑀸𑀦𑀁 𑀏𑀓𑀦𑁆𑀢𑀢𑁄 𑀧𑀳𑀸𑀢𑀩𑁆𑀩𑀢𑀸𑀤𑀲𑁆𑀲𑀦𑀁. 𑀆𑀫𑀺𑀲𑀤𑀸𑀬𑀸𑀤𑀲𑁆𑀲 𑀧𑀘𑁆𑀘𑀬𑀸𑀦𑀁 𑀮𑀸𑀪𑁂 𑀳𑁄𑀢𑀻𑀢𑀺 𑀇𑀤𑀁 𑀮𑁄𑀪𑀲𑁆𑀲 𑀆𑀭𑀫𑁆𑀫𑀡𑀕𑁆𑀕𑀳𑀡𑀲𑀪𑀸𑀯𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀡𑁆𑀳𑀸𑀬 𑀯𑀲𑁂𑀦 𑀧𑀦 𑀅𑀦𑀼𑀕𑀺𑀚𑁆𑀛𑀦𑀁 𑀲𑀦𑁆𑀥𑀸𑀬 ‘‘𑀅𑀮𑀤𑁆𑀥𑀁 𑀧𑀢𑁆𑀣𑁂𑀢𑀻’’𑀢𑀺 𑀆𑀳. 𑀅𑀮𑀸𑀪𑁂 𑀧𑀘𑁆𑀘𑀬𑀸𑀦𑀁 𑀆𑀫𑀺𑀲𑀤𑀸𑀬𑀸𑀤𑀲𑁆𑀲 𑀳𑁄𑀢𑀻𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑀦𑀸. 𑀅𑀮𑀪𑀦𑁆𑀢𑁄𑀢𑀺 𑀏𑀢𑁆𑀣 ‘‘𑀧𑀘𑁆𑀘𑀬𑁂’’𑀢𑀺 𑀯𑀺𑀪𑀢𑁆𑀢𑀺𑀁 𑀧𑀭𑀺𑀡𑀸𑀫𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀯𑀺𑀖𑀸𑀢𑀯𑀸𑀢𑀺 ‘‘𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺, 𑀢𑀫𑁆𑀧𑀺 𑀤𑀼𑀓𑁆𑀔’’𑀦𑁆𑀢𑀺 (𑀫. 𑀦𑀺. 𑁧.𑁧𑁨𑁦; 𑀯𑀺𑀪. 𑁧𑁯𑁦) 𑀯𑀘𑀦𑀢𑁄 𑀇𑀘𑁆𑀙𑀸𑀯𑀺𑀖𑀸𑀢𑀯𑀸. 𑀮𑁄𑀪𑁄 𑀘 𑀤𑁂𑀬𑁆𑀬𑀥𑀫𑁆𑀫𑁂 𑀳𑁄𑀢𑀺 𑀆𑀫𑀺𑀲𑀤𑀸𑀬𑀸𑀤𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀲 𑀦𑀬𑁄 𑀅𑀦𑀦𑁆𑀢𑀭𑀧𑀤𑁂𑀧𑀺. 𑀤𑁂𑀬𑁆𑀬𑀥𑀫𑁆𑀫𑁂𑀢𑀺 𑀘 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀲𑀢𑁆𑀢𑀓𑁂𑀮𑀸𑀬𑀦𑀸𑀤𑀺𑀯𑀲𑁂𑀦𑀧𑀺 𑀢𑀲𑁆𑀲 𑀮𑁄𑀪𑀼𑀧𑁆𑀧𑀢𑁆𑀢𑀺𑀲𑀩𑁆𑀪𑀸𑀯𑀢𑁄. ‘‘𑀢𑀡𑁆𑀳𑀁 𑀧𑀝𑀺𑀘𑁆𑀘 𑀧𑀭𑀺𑀬𑁂𑀲𑀦𑀸, 𑀧𑀭𑀺𑀬𑁂𑀲𑀦𑀁 𑀧𑀝𑀺𑀘𑁆𑀘 𑀮𑀸𑀪𑁄’’𑀢𑀺 𑀏𑀯𑀫𑀸𑀤𑀬𑁄 𑀦𑀯 𑀢𑀡𑁆𑀳𑀸𑀫𑀽𑀮𑀓𑀸. 𑀧𑀭𑀺𑀧𑀽𑀭𑁂𑀢𑀺 𑀆𑀫𑀺𑀲𑀤𑀸𑀬𑀸𑀤𑁄𑀢𑀺 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀯𑀸𑀲𑀫𑀘𑁆𑀙𑀭𑀺𑀬𑀸𑀤𑀻𑀦𑀺 𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺.

𑀫𑀕𑁆𑀕𑀦𑁆𑀢𑀺 ¶ ¶ 𑀅𑀭𑀺𑀬𑀫𑀕𑁆𑀕𑀁. 𑀲𑁄 𑀳𑀺 𑀓𑀺𑀮𑁂𑀲𑁂 𑀫𑀸𑀭𑁂𑀦𑁆𑀢𑁄 𑀕𑀘𑁆𑀙𑀢𑀺, 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀘 𑀫𑀕𑁆𑀕𑀻𑀬𑀢𑀺, 𑀲𑀬𑀁 𑀯𑀸 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀢𑀻𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 ‘‘𑀫𑀕𑁆𑀕𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀓𑁄 𑀅𑀦𑁆𑀢𑁄𑀢𑀺 𑀇𑀢𑀭𑁂𑀦 𑀅𑀲𑀫𑁆𑀫𑀺𑀲𑁆𑀲𑁄 𑀏𑀓𑁄 𑀓𑁄𑀝𑁆𑀞𑀸𑀲𑁄, 𑀳𑀻𑀦𑀢𑀸𑀬 𑀯𑀸 𑀮𑀸𑀫𑀓𑀝𑁆𑀞𑁂𑀦 𑀏𑀓𑁄 𑀅𑀦𑁆𑀢𑁄. 𑀓𑀸𑀫𑀁 𑀅𑀜𑁆𑀜𑁂𑀧𑀺 𑀓𑀼𑀲𑀮𑀥𑀫𑁆𑀫𑀸 𑀏𑀢𑁂 𑀅𑀦𑁆𑀢𑁂 𑀅𑀲𑀫𑁆𑀧𑀬𑁄𑀕𑀢𑁄 𑀦 𑀉𑀧𑁂𑀦𑁆𑀢𑀺, 𑀢𑁂𑀳𑀺 𑀯𑀺𑀫𑀼𑀢𑁆𑀢𑀸 𑀏𑀯, 𑀅𑀬𑀁 𑀧𑀦 𑀅𑀘𑁆𑀘𑀦𑁆𑀢𑀯𑀺𑀫𑀼𑀢𑁆𑀢𑀺𑀬𑀸 𑀦 𑀉𑀧𑁂𑀢𑀻𑀢𑀺 𑀆𑀳 ‘‘𑀯𑀺𑀫𑀼𑀢𑁆𑀢𑁄 𑀏𑀢𑁂𑀳𑀺 𑀅𑀦𑁆𑀢𑁂𑀳𑀻’’𑀢𑀺. 𑀢𑀲𑁆𑀫𑀸𑀢𑀺 𑀅𑀦𑁆𑀢𑀤𑁆𑀯𑀬𑀯𑀺𑀫𑀼𑀢𑁆𑀢𑀢𑁆𑀢𑀸. 𑀏𑀢𑁂𑀲𑀁 𑀫𑀚𑁆𑀛𑁂 𑀪𑀯𑀢𑁆𑀢𑀸𑀢𑀺 𑀇𑀤𑀁 𑀫𑀕𑁆𑀕𑀲𑁆𑀲 𑀉𑀪𑀬𑀦𑁆𑀢𑀯𑀺𑀫𑀼𑀢𑁆𑀢𑀢𑀸𑀬 𑀏𑀯 𑀯𑀼𑀢𑁆𑀢𑀁, 𑀦 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑀸𑀬, 𑀯𑀝𑁆𑀝𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀢𑁆𑀣𑀺𑀓𑁂𑀳𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁄 𑀘. 𑀢𑀣𑀸𑀢𑀺 𑀬𑀣𑀸 𑀇𑀢𑀭𑁂𑀦 𑀅𑀲𑀫𑁆𑀫𑀺𑀲𑁆𑀲𑀝𑁆𑀞𑁂𑀦 𑀮𑀸𑀫𑀓𑀝𑁆𑀞𑁂𑀦 𑀘 𑀮𑁄𑀪𑁄 𑀏𑀓𑁄 𑀅𑀦𑁆𑀢𑁄, 𑀢𑀣𑀸 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀫𑀕𑁆𑀕𑀲𑁆𑀲 𑀅𑀦𑀼𑀧𑀕𑀫𑀦𑀜𑁆𑀘 𑀦𑁂𑀲𑀁 𑀅𑀦𑁆𑀢𑀸𑀦𑀁 𑀲𑀩𑁆𑀩𑀲𑁄 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦𑁂𑀯 𑀤𑀝𑁆𑀞𑀩𑁆𑀩𑀁. 𑀧𑀼𑀭𑀺𑀫𑀦𑀬𑁂𑀦𑀸𑀢𑀺 ‘‘𑀏𑀢𑁂 𑀤𑁆𑀯𑁂 𑀅𑀦𑁆𑀢𑁂 𑀦 𑀉𑀧𑁂𑀢𑀻’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦.

𑀲𑀘𑁆𑀘𑀸𑀦𑀦𑁆𑀢𑀺 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁. 𑀤𑀲𑁆𑀲𑀦𑀧𑀭𑀺𑀡𑀸𑀬𑀓𑀝𑁆𑀞𑁂𑀦𑀸𑀢𑀺 𑀤𑀲𑁆𑀲𑀦𑀲𑁆𑀲 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀪𑁂𑀤𑀲𑁆𑀲 𑀧𑀭𑀺𑀢𑁄 𑀲𑀩𑁆𑀩𑀣𑀸 𑀦𑀬𑀦𑀝𑁆𑀞𑁂𑀦 𑀧𑀯𑀢𑁆𑀢𑀦𑀝𑁆𑀞𑁂𑀦. 𑀘𑀓𑁆𑀔𑀼𑀓𑀭𑀡𑀻𑀢𑀺 𑀥𑀫𑁆𑀫𑀘𑀓𑁆𑀔𑀼𑀲𑁆𑀲 𑀓𑀭𑀡𑀻 𑀦𑀺𑀧𑁆𑀨𑀸𑀤𑀺𑀓𑀸. 𑀢𑀬𑀺𑀤𑀁 𑀲𑀢𑀺𑀧𑀺 𑀧𑀝𑀺𑀧𑀤𑀸𑀬 𑀥𑀫𑁆𑀫𑀘𑀓𑁆𑀔𑀼𑀢𑁄 𑀅𑀦𑀜𑁆𑀜𑀢𑁆𑀢𑁂 𑀅𑀯𑀬𑀯𑀯𑀲𑁂𑀦 𑀲𑀺𑀚𑁆𑀛𑀫𑀸𑀦𑁄 𑀅𑀢𑁆𑀣𑁄 𑀲𑀫𑀼𑀤𑀸𑀬𑁂𑀦 𑀓𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀉𑀧𑀘𑀸𑀭𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀫𑀕𑁆𑀕𑁄𑀬𑁂𑀯 𑀳𑀺 𑀫𑀕𑁆𑀕𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺 𑀫𑀕𑁆𑀕𑁂𑀦 𑀓𑀸𑀢𑀩𑁆𑀩𑀓𑀺𑀘𑁆𑀘𑀓𑀭𑀡𑀢𑁄’’𑀢𑀺. 𑀜𑀸𑀡𑀸𑀬𑀸𑀢𑀺 𑀬𑀸𑀣𑀸𑀯𑀢𑁄 𑀚𑀸𑀦𑀦𑀸𑀬. 𑀢𑁂𑀦𑀸𑀳 ‘‘𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦𑀸’’𑀢𑀺. 𑀯𑀺𑀲𑁂𑀲𑀜𑀸𑀢𑀪𑀸𑀯𑀸𑀧𑀸𑀤𑀦𑀜𑁆𑀳𑀺 𑀯𑀺𑀤𑀺𑀢𑀓𑀭𑀡𑀁. 𑀯𑀽𑀧𑀲𑀫𑀦𑀢𑁄𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀦𑀯𑀲𑁂𑀦 𑀯𑀽𑀧𑀲𑀫𑀦𑀢𑁄. 𑀤𑀼𑀓𑁆𑀔𑀸𑀤𑀻𑀦𑀁 𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀺𑀪𑀸𑀯𑁄 𑀯𑀺𑀬 𑀅𑀪𑀺𑀜𑁆𑀜𑁂𑀬𑁆𑀬𑀪𑀸𑀯𑁄𑀧𑀺 𑀫𑀕𑁆𑀕𑀯𑀲𑁂𑀦𑁂𑀯 𑀧𑀸𑀓𑀝𑁄 𑀳𑁄𑀢𑀻𑀢𑀺 𑀆𑀳 ‘‘𑀘𑀢𑀼𑀦𑁆𑀦𑀫𑁆𑀧𑀺 𑀲𑀘𑁆𑀘𑀸𑀦𑀁 𑀅𑀪𑀺𑀜𑁆𑀜𑁂𑀬𑁆𑀬𑀪𑀸𑀯𑀤𑀲𑁆𑀲𑀦𑀢𑁄’’𑀢𑀺, 𑀯𑀺𑀪𑀸𑀯𑀦𑀢𑁄𑀢𑀺 𑀅𑀢𑁆𑀣𑁄. 𑀲𑀫𑁆𑀩𑁄𑀥𑁄𑀢𑀺 𑀫𑀕𑁆𑀕𑁄 ‘‘𑀲𑀫𑁆𑀩𑀼𑀚𑁆𑀛𑀢𑀺 𑀏𑀢𑁂𑀦𑀸’’𑀢𑀺 𑀓𑀢𑁆𑀯𑀸. 𑀢𑀲𑁆𑀲𑀢𑁆𑀣𑀸𑀬𑀸𑀢𑀺 𑀫𑀕𑁆𑀕𑀓𑀺𑀘𑁆𑀘𑀢𑁆𑀣𑀸𑀬. 𑀦 𑀳𑀺 𑀫𑀕𑁆𑀕𑀢𑁄 𑀅𑀜𑁆𑀜𑁄 𑀫𑀕𑁆𑀕𑀓𑀺𑀘𑁆𑀘𑀓𑀭𑁄 𑀅𑀢𑁆𑀣𑀺. 𑀢𑁂𑀦𑀸𑀳 ‘‘𑀫𑀕𑁆𑀕𑁄𑀬𑁂𑀯 𑀳𑀻’’𑀢𑀺𑀆𑀤𑀺. 𑀅𑀣 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑁂𑀦 𑀇𑀢𑀭𑁂 𑀉𑀧𑁆𑀧𑀸𑀤𑁂𑀢𑀺, 𑀏𑀯𑀁 𑀲𑁂𑀲𑀫𑀕𑁆𑀕𑀥𑀫𑁆𑀫𑀸𑀧𑀻𑀢𑀺 𑀏𑀯𑀫𑁆𑀧𑀺 𑀫𑀕𑁆𑀕𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀘𑁆𑀘𑀓𑁆𑀔𑀓𑀫𑁆𑀫𑀸𑀬𑀸𑀢𑀺 𑀲𑀘𑁆𑀙𑀺𑀓𑀭𑀡𑀲𑀗𑁆𑀔𑀸𑀢𑀧𑀘𑁆𑀘𑀓𑁆𑀔𑀓𑀫𑁆𑀫𑀸𑀬. 𑀦𑀺𑀩𑁆𑀩𑀸𑀦𑀸𑀬𑀸𑀢𑀺 𑀯𑀸 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀸𑀬. 𑀉𑀧𑀲𑀫𑀸𑀬𑀸𑀢𑀺 ¶ 𑀇𑀫𑀺𑀦𑀸 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀁 𑀕𑀳𑀺𑀢𑀦𑁆𑀢𑀺. 𑀅𑀬𑀦𑁆𑀢𑀺 ‘‘𑀲𑀸 𑀳𑀺 𑀲𑀘𑁆𑀘𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑁄 𑀅𑀢𑁆𑀣𑀦𑀬𑁄. 𑀏𑀢𑁆𑀣𑀸𑀢𑀺 ‘‘𑀘𑀓𑁆𑀔𑀼𑀓𑀭𑀡𑀻’’𑀢𑀺𑀆𑀤𑀻𑀲𑀼 𑀧𑀤𑁂𑀲𑀼. 𑀲𑀸𑀭𑁄 𑀲𑀼𑀦𑁆𑀤𑀭𑁄 𑀅𑀦𑀧𑀦𑀻𑀢𑁄. 𑀇𑀢𑁄 𑀅𑀜𑁆𑀜𑀣𑀸𑀢𑀺 ‘‘𑀤𑀼𑀓𑁆𑀔𑀲𑁆𑀲 𑀧𑀭𑀺𑀜𑁆𑀜𑀸𑀬 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀁 𑀓𑀭𑁄𑀢𑀻𑀢𑀺 𑀘𑀓𑁆𑀔𑀼𑀓𑀭𑀡𑀻’’𑀢𑀺𑀆𑀤𑀺𑀦𑀸 𑀅𑀢𑁆𑀣𑀯𑀡𑁆𑀡𑀦𑀸𑀧𑀧𑀜𑁆𑀘𑁄 𑀓𑁂𑀯𑀮𑀁 𑀯𑀺𑀢𑁆𑀣𑀸𑀭𑀢𑁆𑀣𑀸𑀬.

𑀅𑀬𑀫𑁂𑀯𑀸𑀢𑀺 𑀏𑀢𑁆𑀣 𑀅𑀬𑀦𑁆𑀢𑀺 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀅𑀜𑁆𑀜𑁂𑀲𑀜𑁆𑀘 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀅𑀭𑀺𑀬𑀸𑀦𑀁 𑀫𑀕𑁆𑀕𑀲𑁆𑀲 ¶ 𑀧𑀘𑁆𑀘𑀓𑁆𑀔𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀯𑀸𑀘𑀻 𑀳𑀺 𑀅𑀬𑀁-𑀲𑀤𑁆𑀤𑁄. 𑀅𑀜𑁆𑀜𑀫𑀕𑁆𑀕𑀧𑀝𑀺𑀲𑁂𑀥𑀦𑀢𑁆𑀣𑀦𑁆𑀢𑀺 𑀅𑀜𑁆𑀜𑀲𑁆𑀲 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑀕𑁆𑀕𑀲𑁆𑀲 𑀅𑀢𑁆𑀣𑀺𑀪𑀸𑀯𑀧𑀝𑀺𑀲𑁂𑀥𑀦𑀢𑁆𑀣𑀁. 𑀲𑀢𑁆𑀢𑀸𑀧𑀝𑀺𑀓𑁆𑀔𑁂𑀧𑁄 𑀳𑀺 𑀇𑀥 𑀧𑀝𑀺𑀲𑁂𑀥𑀦𑀁 𑀅𑀮𑀩𑁆𑀪𑀫𑀸𑀦𑀢𑁆𑀢𑀸 𑀅𑀜𑁆𑀜𑀲𑁆𑀲 𑀫𑀕𑁆𑀕𑀲𑁆𑀲. 𑀩𑀼𑀤𑁆𑀥𑀸𑀤𑀻𑀦𑀁 𑀲𑀸𑀥𑀸𑀭𑀡𑀪𑀸𑀯𑁄 𑀅𑀦𑀜𑁆𑀜𑀢𑀸. 𑀢𑁂𑀦𑀸𑀳 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑁋

‘‘𑀏𑀓𑀸𑀬𑀦𑀁 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻,

𑀫𑀕𑁆𑀕𑀁 𑀧𑀚𑀸𑀦𑀸𑀢𑀺 𑀳𑀺𑀢𑀸𑀦𑀼𑀓𑀫𑁆𑀧𑀻;

𑀏𑀢𑁂𑀦 𑀫𑀕𑁆𑀕𑁂𑀦 𑀢𑀭𑀺𑀁𑀲𑀼 𑀧𑀼𑀩𑁆𑀩𑁂,

𑀢𑀭𑀺𑀲𑁆𑀲𑀦𑁆𑀢𑀺 𑀬𑁂 𑀘 𑀢𑀭𑀦𑁆𑀢𑀺 𑀑𑀖’’𑀦𑁆𑀢𑀺. (𑀲𑀁. 𑀦𑀺. 𑁫.𑁩𑁮𑁪, 𑁪𑁦𑁯; 𑀫𑀳𑀸𑀦𑀺. 𑁧𑁯𑁧; 𑀘𑀽𑀴𑀦𑀺. 𑁧𑁦𑁭, 𑁧𑁨𑁧; 𑀦𑁂𑀢𑁆𑀢𑀺. 𑁧𑁭𑁦);

𑀆𑀭𑀓𑀢𑁆𑀢𑀸𑀢𑀺 𑀇𑀫𑀺𑀦𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀅𑀭𑀺𑀬-𑀲𑀤𑁆𑀤𑀲𑀺𑀤𑁆𑀥𑀺𑀫𑀸𑀳. 𑀅𑀭𑀺𑀧𑀳𑀸𑀦𑀸𑀬𑀸𑀢𑀺 𑀅𑀢𑁆𑀣𑀯𑀘𑀦𑀫𑀢𑁆𑀢𑀁. 𑀅𑀭𑀬𑁄 𑀧𑀸𑀧𑀥𑀫𑁆𑀫𑀸 𑀬𑀦𑁆𑀢𑀺 𑀅𑀧𑀕𑀫𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀭𑀺𑀬𑁄. 𑀅𑀭𑀺𑀬𑁂𑀦 𑀤𑁂𑀲𑀺𑀢𑁄𑀢𑀺 𑀏𑀢𑁆𑀣 𑀅𑀭𑀺𑀬𑀲𑁆𑀲 𑀪𑀕𑀯𑀢𑁄 𑀅𑀬𑀦𑁆𑀢𑀺 𑀅𑀭𑀺𑀬𑁄. 𑀅𑀭𑀺𑀬𑀪𑀸𑀯𑀧𑁆𑀧𑀝𑀺𑀮𑀸𑀪𑀸𑀬𑀸𑀢𑀺 𑀏𑀢𑁆𑀣 𑀅𑀭𑀺𑀬𑀓𑀭𑁄 𑀅𑀭𑀺𑀬𑁄𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀅𑀭𑀺𑀬-𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀲𑁆𑀫𑀸 𑀫𑀕𑁆𑀕𑀗𑁆𑀕𑀲𑀫𑀼𑀤𑀸𑀬𑁂 𑀫𑀕𑁆𑀕𑀯𑁄𑀳𑀸𑀭𑁄 𑀳𑁄𑀢𑀺, 𑀲𑀫𑀼𑀤𑀸𑀬𑁄 𑀘 𑀲𑀫𑀼𑀤𑀸𑀬𑀻𑀳𑀺 𑀲𑀫𑀦𑁆𑀦𑀸𑀕𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀅𑀝𑁆𑀞𑀳𑀺 𑀅𑀗𑁆𑀕𑁂𑀳𑀺 𑀉𑀧𑁂𑀢𑀢𑁆𑀢𑀸’’𑀢𑀺, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀅𑀯𑀬𑀯𑀪𑀽𑀢𑀸𑀦𑀺 𑀅𑀝𑁆𑀞 𑀅𑀗𑁆𑀕𑀸𑀦𑀺 𑀏𑀢𑀲𑁆𑀲 𑀲𑀦𑁆𑀢𑀻𑀢𑀺 𑀅𑀝𑁆𑀞𑀗𑁆𑀕𑀺𑀓𑁄. 𑀬𑀲𑁆𑀫𑀸 𑀧𑀦 𑀧𑀭𑀫𑀢𑁆𑀣𑀢𑁄 𑀅𑀗𑁆𑀕𑀸𑀦𑀺𑀬𑁂𑀯 𑀫𑀕𑁆𑀕𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦 𑀘 𑀅𑀗𑁆𑀕𑀯𑀺𑀦𑀺𑀫𑀼𑀢𑁆𑀢𑁄’’𑀢𑀺 𑀬𑀣𑀸 ‘‘𑀙𑀴𑀗𑁆𑀕𑁄 𑀯𑁂𑀤𑁄’’𑀢𑀺. 𑀲𑀤𑀺𑀲𑀽𑀤𑀸𑀳𑀭𑀡𑀁 𑀧𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀸𑀤𑀻𑀦𑀺 𑀯𑀺𑀬𑀸’’𑀢𑀺 𑀆𑀳. 𑀆𑀤𑀺-𑀲𑀤𑁆𑀤𑁂𑀦 𑀘𑀢𑀼𑀭𑀗𑁆𑀕𑀺𑀦𑀻 𑀲𑁂𑀦𑀸𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀫𑀸𑀭𑁂𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀲𑀤𑁆𑀤𑀲𑀺𑀤𑁆𑀥𑀺𑀫𑀸𑀳. 𑀫𑀕𑁆𑀕𑀢𑀻𑀢𑀺 𑀕𑀯𑁂𑀲𑀢𑀺. 𑀅𑀭𑀺𑀬𑀫𑀕𑁆𑀕𑁄 𑀳𑀺 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑁄 𑀢𑀁 𑀕𑀯𑁂𑀲𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺. 𑀫𑀕𑁆𑀕𑀻𑀬𑀢𑀺 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀧𑀼𑀜𑁆𑀜𑀓𑀭𑀡𑀢𑁄 ¶ 𑀧𑀝𑁆𑀞𑀸𑀬 𑀢𑀤𑀢𑁆𑀣𑀁 𑀧𑀝𑀺𑀧𑀢𑁆𑀢𑀺𑀢𑁄. 𑀕𑀫𑁆𑀫𑀢𑀻𑀢𑀺 𑀏𑀢𑁂𑀦 𑀆𑀤𑀺𑀅𑀦𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀲𑀤𑁆𑀤𑀲𑀺𑀤𑁆𑀥𑀺𑀫𑀸𑀳 𑀬𑀣𑀸 ‘‘𑀓𑀓𑀽’’𑀢𑀺. ‘‘𑀲𑁂𑀬𑁆𑀬𑀣𑀺𑀤𑀦𑁆𑀢𑀺 𑀦𑀺𑀧𑀸𑀢𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀲𑀩𑁆𑀩𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀯𑀘𑀦𑀲𑀸𑀥𑀸𑀭𑀡𑀢𑀸𑀬 ‘‘𑀓𑀢𑀫𑀸𑀦𑀺 𑀢𑀸𑀦𑀺 𑀅𑀝𑁆𑀞𑀗𑁆𑀕𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀦𑀦𑀼 𑀘 𑀅𑀗𑁆𑀕𑀸𑀦𑀺 𑀲𑀫𑀼𑀤𑀺𑀢𑀸𑀦𑀺 𑀫𑀕𑁆𑀕𑁄 𑀅𑀦𑁆𑀢𑀫𑀲𑁄 𑀲𑀢𑁆𑀢𑀗𑁆𑀕𑀯𑀺𑀓𑀮𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀪𑀸𑀯𑀢𑁄𑀢𑀺? 𑀲𑀘𑁆𑀘𑀫𑁂𑀢𑀁 𑀲𑀘𑁆𑀘𑀧𑀝𑀺𑀯𑁂𑀥𑁂𑀦, 𑀫𑀕𑁆𑀕𑀧𑀘𑁆𑀘𑀬𑀢𑀸𑀬 𑀧𑀦 𑀬𑀣𑀸𑀲𑀓𑀁 𑀓𑀺𑀘𑁆𑀘𑀓𑀭𑀡𑁂𑀦 𑀧𑀘𑁆𑀘𑁂𑀓𑀫𑁆𑀧𑀺 𑀢𑀸𑀦𑀺 𑀫𑀕𑁆𑀕𑁄𑀬𑁂𑀯𑀸𑀢𑀺 𑀆𑀳 ‘‘𑀏𑀓𑀫𑁂𑀓𑀜𑁆𑀳𑀺 𑀅𑀗𑁆𑀕𑀁 𑀫𑀕𑁆𑀕𑁄𑀬𑁂𑀯𑀸’’𑀢𑀺, 𑀅𑀜𑁆𑀜𑀣𑀸 𑀲𑀫𑀼𑀤𑀺𑀢𑀸𑀦𑀫𑁆𑀧𑀺 𑀦𑁂𑀲𑀁 𑀫𑀕𑁆𑀕𑀓𑀺𑀘𑁆𑀘𑀁 𑀦 𑀲𑀫𑁆𑀪𑀯𑁂𑀬𑁆𑀬𑀸𑀢𑀺. 𑀇𑀤𑀸𑀦𑀺 𑀢𑀫𑁂𑀯𑀢𑁆𑀣𑀁 𑀧𑀸𑀴𑀺𑀬𑀸 𑀲𑀫𑀢𑁆𑀣𑁂𑀢𑀼𑀁 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀫𑀕𑁆𑀕𑁄 𑀘𑁂𑀯 𑀳𑁂𑀢𑀼 𑀘𑀸’’𑀢𑀺 𑀯𑀼𑀢𑁆𑀢𑀁.

𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀯𑀲𑁂𑀦 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀤𑀲𑁆𑀲𑀦𑀁 𑀧𑀝𑀺𑀯𑀺𑀚𑁆𑀛𑀦𑀁 𑀮𑀓𑁆𑀔𑀡𑀁 ¶ 𑀏𑀢𑀺𑀲𑁆𑀲𑀸𑀢𑀺 𑀲𑀫𑁆𑀫𑀸𑀤𑀲𑁆𑀲𑀦𑀮𑀓𑁆𑀔𑀡𑀸. 𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂 𑀅𑀪𑀺𑀦𑀺𑀭𑁄𑀧𑀦𑀁 𑀅𑀧𑁆𑀧𑀦𑀸𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀲𑀫𑁆𑀫𑀸𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄 𑀫𑀼𑀲𑀸𑀯𑀸𑀤𑀸𑀤𑀻𑀦𑀁 𑀯𑀺𑀲𑀁𑀯𑀸𑀤𑀦𑀸𑀤𑀺𑀓𑀺𑀘𑁆𑀘𑀢𑀸𑀬 𑀮𑀽𑀔𑀸𑀦𑀁 𑀅𑀧𑀭𑀺𑀕𑁆𑀕𑀸𑀳𑀓𑀸𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀲𑀺𑀦𑀺𑀤𑁆𑀥𑀲𑀪𑀸𑀯𑀢𑁆𑀢𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂, 𑀲𑀫𑁆𑀫𑀸𑀯𑀸𑀘𑀧𑁆𑀧𑀘𑁆𑀘𑀬𑀲𑀼𑀪𑀸𑀲𑀺𑀢𑀲𑁄𑀢𑀸𑀭𑀜𑁆𑀘 𑀚𑀦𑀁 𑀲𑀫𑁆𑀫𑀤𑁂𑀯 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸𑀧𑀭𑀺𑀕𑁆𑀕𑀳𑁄 𑀮𑀓𑁆𑀔𑀡𑀁 𑀏𑀢𑀺𑀲𑁆𑀲𑀸𑀢𑀺 𑀲𑀫𑁆𑀫𑀸𑀧𑀭𑀺𑀕𑁆𑀕𑀳𑀮𑀓𑁆𑀔𑀡𑀸. 𑀬𑀣𑀸 𑀓𑀸𑀬𑀺𑀓𑀸 𑀓𑀺𑀭𑀺𑀬𑀸 𑀓𑀺𑀜𑁆𑀘𑀺 𑀓𑀢𑁆𑀢𑀩𑁆𑀩𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀲𑀬𑀜𑁆𑀘 𑀲𑀫𑀼𑀝𑁆𑀞𑀳𑀦𑀁 𑀖𑀝𑀦𑀁 𑀳𑁄𑀢𑀺, 𑀢𑀣𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑀗𑁆𑀔𑀸𑀢𑀸 𑀯𑀺𑀭𑀢𑀺𑀧𑀻𑀢𑀺 𑀲𑀫𑁆𑀫𑀸𑀲𑀫𑀼𑀝𑁆𑀞𑀸𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀸 𑀉𑀓𑁆𑀔𑀺𑀧𑀦𑀁 𑀲𑀫𑀼𑀝𑁆𑀞𑀸𑀦𑀁 𑀓𑀸𑀬𑀺𑀓𑀓𑀺𑀭𑀺𑀬𑀸𑀬 𑀪𑀸𑀭𑀼𑀓𑁆𑀔𑀺𑀧𑀦𑀁 𑀯𑀺𑀬. 𑀚𑀻𑀯𑀫𑀸𑀦𑀲𑁆𑀲 𑀲𑀢𑁆𑀢𑀲𑁆𑀲, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀸 𑀲𑀼𑀤𑁆𑀥𑀺 𑀯𑁄𑀤𑀸𑀦𑀁, 𑀆𑀚𑀻𑀯𑀲𑁆𑀲𑁂𑀯 𑀯𑀸 𑀚𑀻𑀯𑀺𑀢𑀧𑁆𑀧𑀯𑀢𑁆𑀢𑀺𑀬𑀸 𑀲𑀼𑀤𑁆𑀥𑀺 𑀯𑁄𑀤𑀸𑀦𑀁 𑀏𑀢𑁂𑀦𑀸𑀢𑀺 𑀲𑀫𑁆𑀫𑀸𑀯𑁄𑀤𑀸𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀆𑀚𑀻𑀯𑁄. 𑀓𑁄𑀲𑀚𑁆𑀚𑀧𑀓𑁆𑀔𑁂 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀕𑁆𑀕𑀡𑁆𑀳𑀦𑀁 𑀅𑀦𑀼𑀩𑀮𑀧𑁆𑀧𑀤𑀸𑀦𑀁 𑀧𑀕𑁆𑀕𑀳𑁄. 𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀞𑀸𑀦𑀁, 𑀢𑀲𑁆𑀲 𑀯𑀸 𑀅𑀦𑀺𑀲𑁆𑀲𑀚𑁆𑀚𑀦𑀁 𑀉𑀧𑀝𑁆𑀞𑀸𑀦𑀁. 𑀆𑀭𑀫𑁆𑀫𑀡𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀲𑀫𑁆𑀫𑀸, 𑀲𑀫𑀁 𑀯𑀸 𑀆𑀥𑀸𑀦𑀁 𑀲𑀫𑀸𑀥𑀸𑀦𑀁. 𑀲𑀫𑁆𑀫𑀸 𑀲𑀗𑁆𑀓𑀧𑁆𑀧𑁂𑀢𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀆𑀭𑀫𑁆𑀫𑀡𑁂 𑀅𑀪𑀺𑀦𑀺𑀭𑁄𑀧𑁂𑀢𑀻𑀢𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄. 𑀲𑀫𑁆𑀫𑀸 𑀯𑀤𑀢𑀺 𑀏𑀢𑀸𑀬𑀸𑀢𑀺 𑀲𑀫𑁆𑀫𑀸𑀯𑀸𑀘𑀸. 𑀲𑀫𑁆𑀫𑀸 𑀓𑀭𑁄𑀢𑀺 𑀏𑀢𑁂𑀦𑀸𑀢𑀺 𑀲𑀫𑁆𑀫𑀸𑀓𑀫𑁆𑀫𑀁, 𑀢𑀤𑁂𑀯 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄. 𑀲𑀫𑁆𑀫𑀸 𑀆𑀚𑀻𑀯𑀢𑀺 𑀏𑀢𑁂𑀦𑀸𑀢𑀺 𑀲𑀫𑁆𑀫𑀸𑀆𑀚𑀻𑀯𑁄. 𑀲𑀫𑁆𑀫𑀸 𑀯𑀸𑀬𑀫𑀢𑀺 𑀉𑀲𑁆𑀲𑀳𑀢𑀺 𑀏𑀢𑁂𑀦𑀸𑀢𑀺 𑀲𑀫𑁆𑀫𑀸𑀯𑀸𑀬𑀸𑀫𑁄. 𑀲𑀫𑁆𑀫𑀸 𑀲𑀭𑀢𑀺 𑀅𑀦𑀼𑀲𑁆𑀲𑀭𑀢𑀻𑀢𑀺 𑀲𑀫𑁆𑀫𑀸𑀲𑀢𑀺 ¶ . 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺 𑀘𑀺𑀢𑁆𑀢𑀁 𑀏𑀢𑁂𑀦𑀸𑀢𑀺 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑀏𑀯𑀁 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀻𑀦𑀁 𑀦𑀺𑀩𑁆𑀩𑀘𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑁆𑀢𑀺 𑀲𑀩𑁆𑀩𑀫𑁆𑀧𑀺 𑀫𑀺𑀘𑁆𑀙𑀸𑀤𑀲𑁆𑀲𑀦𑀁. 𑀢𑀧𑁆𑀧𑀘𑁆𑀘𑀦𑀻𑀬𑀓𑀺𑀮𑁂𑀲𑁂𑀢𑀺 𑀏𑀢𑁆𑀣 𑀢𑀁-𑀲𑀤𑁆𑀤𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀦 𑀳𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀓𑀺𑀮𑁂𑀲𑀸 𑀧𑀘𑁆𑀘𑀦𑀻𑀬𑀸, 𑀅𑀣 𑀔𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸. 𑀅𑀯𑀺𑀚𑁆𑀚𑀜𑁆𑀘𑀸𑀢𑀺 𑀅𑀯𑀺𑀚𑁆𑀚𑀸𑀕𑁆𑀕𑀳𑀡𑀁 𑀢𑀲𑁆𑀲𑀸 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀧𑀫𑀼𑀔𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀅𑀯𑀺𑀚𑁆𑀚𑀸, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑀗𑁆𑀕𑀫𑀸 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸’’𑀢𑀺 (𑀲𑀁. 𑀦𑀺. 𑁫.𑁧). 𑀤𑀲𑁆𑀲𑀦𑀦𑀺𑀯𑀸𑀭𑀓𑀲𑁆𑀲 𑀲𑀫𑁆𑀫𑁄𑀳𑀲𑁆𑀲 𑀲𑀫𑀼𑀕𑁆𑀖𑀸𑀢𑁂𑀦 𑀅𑀲𑀫𑁆𑀫𑁄𑀳𑀢𑁄. 𑀏𑀢𑁆𑀣 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁…𑀧𑁂… 𑀧𑀚𑀳𑀢𑀻𑀢𑀺 𑀏𑀢𑁂𑀦 𑀧𑀳𑀸𑀦𑀸𑀪𑀺𑀲𑀫𑀬𑀁, 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀻𑀢𑀺 𑀏𑀢𑁂𑀦 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀁, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀢𑀺𑀆𑀤𑀺𑀦𑀸 𑀪𑀸𑀯𑀦𑀸𑀪𑀺𑀲𑀫𑀬𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀺𑀘𑁆𑀘𑀁 𑀤𑀲𑁆𑀲𑁂𑀢𑀺. 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁄 𑀧𑀦 𑀦𑀸𑀦𑀦𑁆𑀢𑀭𑀺𑀬𑀢𑀸𑀬 𑀅𑀢𑁆𑀣𑀢𑁄 𑀯𑀼𑀢𑁆𑀢𑁄 𑀏𑀯 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄.

𑀓𑀣𑀁 𑀧𑀦 𑀏𑀓𑀫𑁂𑀯 𑀜𑀸𑀡𑀁 𑀏𑀓𑀲𑁆𑀫𑀺𑀁 𑀔𑀡𑁂 𑀘𑀢𑁆𑀢𑀸𑀭𑀺 𑀓𑀺𑀘𑁆𑀘𑀸𑀦𑀺 𑀲𑀸𑀥𑁂𑀦𑁆𑀢𑀁 𑀧𑀯𑀢𑁆𑀢𑀢𑀺. 𑀦 𑀳𑀺 𑀢𑀸𑀤𑀺𑀲𑀁 𑀮𑁄𑀓𑁂 𑀤𑀺𑀝𑁆𑀞𑀁, 𑀦 𑀆𑀕𑀫𑁄 𑀯𑀸 𑀢𑀸𑀤𑀺𑀲𑁄 𑀅𑀢𑁆𑀣𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀬𑀣𑀸 𑀳𑀺 𑀧𑀤𑀻𑀧𑁄 𑀏𑀓𑀲𑁆𑀫𑀺𑀁𑀬𑁂𑀯 𑀔𑀡𑁂 𑀯𑀝𑁆𑀝𑀺𑀁 𑀤𑀳𑀢𑀺, 𑀲𑁆𑀦𑁂𑀳𑀁 𑀧𑀭𑀺𑀬𑀸𑀤𑀺𑀬𑀢𑀺, 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀢𑀺, 𑀆𑀮𑁄𑀓𑀜𑁆𑀘 𑀯𑀺𑀤𑀁𑀲𑁂𑀢𑀺, 𑀏𑀯𑀫𑁂𑀢𑀁 𑀜𑀸𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀜𑀸𑀡𑀁 𑀤𑀼𑀓𑁆𑀔𑁂𑀧𑁂𑀢𑀁 𑀜𑀸𑀡𑀁, 𑀤𑀼𑀓𑁆𑀔𑀲𑀫𑀼𑀤𑀬𑁂𑀧𑁂𑀢𑀁 𑀜𑀸𑀡𑀁 ¶ , 𑀤𑀼𑀓𑁆𑀔𑀦𑀺𑀭𑁄𑀥𑁂𑀧𑁂𑀢𑀁 𑀜𑀸𑀡𑀁, 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬𑀧𑁂𑀢𑀁 𑀜𑀸𑀡𑀦𑁆𑀢𑀺 𑀲𑀼𑀢𑁆𑀢𑀧𑀤𑀁 (𑀯𑀺𑀪. 𑁭𑁫𑁪) 𑀏𑀢𑁆𑀣 𑀉𑀤𑀸𑀳𑀭𑀺𑀢𑀩𑁆𑀩𑀁. 𑀬𑀣𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀼𑀩𑁆𑀩𑀪𑀸𑀕𑁂 𑀤𑀼𑀓𑁆𑀔𑀸𑀤𑀻𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀯𑀢𑁆𑀢𑀺𑀢𑁆𑀯𑀸 𑀫𑀕𑁆𑀕𑀓𑁆𑀔𑀡𑁂 𑀏𑀓𑀸𑀯 𑀘𑀢𑀼𑀦𑁆𑀦𑀁 𑀜𑀸𑀡𑀸𑀦𑀁 𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀻 𑀧𑀯𑀢𑁆𑀢𑀢𑀺, 𑀏𑀯𑀁 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀬𑁄 𑀧𑀼𑀩𑁆𑀩𑀪𑀸𑀕𑁂 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀸𑀤𑀺𑀦𑀸𑀫𑀓𑀸 𑀳𑀼𑀢𑁆𑀯𑀸 𑀓𑀸𑀫𑀲𑀗𑁆𑀓𑀧𑁆𑀧𑀸𑀤𑀻𑀦𑀁 𑀧𑀚𑀳𑀦𑀯𑀲𑁂𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀯𑀢𑁆𑀢𑀺𑀢𑁆𑀯𑀸 𑀫𑀕𑁆𑀕𑀓𑁆𑀔𑀡𑁂 𑀢𑀺𑀡𑁆𑀡𑀁 𑀘𑀢𑀼𑀦𑁆𑀦𑀜𑁆𑀘 𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀸 𑀧𑀯𑀢𑁆𑀢𑀦𑁆𑀢𑀺. 𑀲𑀫𑁆𑀫𑀸𑀲𑀫𑀸𑀥𑀺 𑀧𑀦 𑀧𑀼𑀩𑁆𑀩𑀪𑀸𑀕𑁂𑀧𑀺 𑀫𑀕𑁆𑀕𑀓𑁆𑀔𑀡𑁂𑀧𑀺 𑀦𑀸𑀦𑀸𑀬𑁂𑀯 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀓𑀸𑀫𑀜𑁆𑀘𑁂𑀢𑁆𑀣 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀩𑁆𑀩𑁂𑀧𑀺 𑀧𑀸𑀧𑀥𑀫𑁆𑀫𑀸 𑀧𑀝𑀺𑀧𑀓𑁆𑀔𑀸, 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑀸𑀤𑀲𑁆𑀲𑀦𑀯𑀲𑁂𑀦 𑀧𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑁆𑀕𑀳𑀡𑀁 𑀓𑀢𑀁. 𑀢𑁂𑀦𑁂𑀯 𑀘 ‘‘𑀢𑀧𑁆𑀧𑀘𑁆𑀘𑀦𑀻𑀬𑀓𑀺𑀮𑁂𑀲𑁂 𑀘𑀸’’𑀢𑀺 𑀯𑀼𑀢𑁆𑀢𑀁.

𑀬𑁂𑀲𑀁 𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑀘𑁆𑀙𑀺𑀦𑁆𑀤𑀦𑁂 𑀲𑀫𑁆𑀫𑀸𑀤𑀺𑀝𑁆𑀞𑀺 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀳𑀚𑁂𑀓𑀝𑁆𑀞𑀢𑀸𑀬 𑀢𑀤𑁂𑀓𑀝𑁆𑀞𑀸𑀯 𑀢𑀧𑁆𑀧𑀘𑁆𑀘𑀦𑀻𑀬𑀓𑀺𑀮𑁂𑀲𑀸 𑀤𑀝𑁆𑀞𑀩𑁆𑀩𑀸. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀻𑀦𑀁 𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀺𑀯𑀲𑁂𑀦 𑀘𑀢𑁆𑀢𑀸𑀭𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀪𑀸𑀯𑀲𑀸𑀫𑀜𑁆𑀜𑁂𑀦 𑀏𑀓𑀢𑁄 𑀓𑀢𑁆𑀯𑀸. 𑀮𑁄𑀪𑀤𑁄𑀲𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀬𑀲𑁆𑀲 𑀧𑀦 𑀲𑁄 𑀲𑀫𑀼𑀤𑀬𑁄 𑀢𑀁 𑀤𑀼𑀓𑁆𑀔𑀲𑀘𑁆𑀘𑀁, 𑀧𑀳𑀸𑀦𑀪𑀸𑀯𑁄 𑀫𑀕𑁆𑀕𑀲𑀘𑁆𑀘𑀁, 𑀬𑀢𑁆𑀣 𑀢𑀁 ¶ 𑀧𑀳𑀸𑀦𑀁, 𑀢𑀁 𑀦𑀺𑀭𑁄𑀥𑀲𑀘𑁆𑀘𑀦𑁆𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀮𑁄𑀪𑀤𑁄𑀲𑀸𑀦𑀁 𑀯𑀺𑀲𑀼𑀁 𑀆𑀤𑀺𑀢𑁄 𑀘 𑀕𑀳𑀡𑀁? 𑀯𑀺𑀲𑀼𑀁 𑀕𑀳𑀡𑀁 𑀢𑀸𑀯 𑀢𑀣𑀸𑀩𑀼𑀚𑁆𑀛𑀦𑀓𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦, 𑀇𑀫𑁂𑀳𑀺 𑀮𑁄𑀪𑀤𑁄𑀲𑁂𑀳𑀺 𑀆𑀫𑀺𑀲𑀤𑀸𑀬𑀸𑀤𑀢𑀸, 𑀢𑀧𑁆𑀧𑀳𑀸𑀦𑁂𑀦 𑀘 𑀥𑀫𑁆𑀫𑀤𑀸𑀬𑀸𑀤𑀢𑀸𑀢𑀺 𑀤𑀲𑁆𑀲𑀦𑀢𑁆𑀣𑀁, 𑀢𑀤𑀦𑀼𑀲𑀸𑀭𑁂𑀦 𑀘𑀢𑀼𑀲𑀘𑁆𑀘𑀬𑁄𑀚𑀦𑀸𑀬 𑀏𑀯𑀁 𑀏𑀓𑁂𑀓𑀲𑁆𑀲 𑀦𑀺𑀬𑁆𑀬𑀸𑀦𑀫𑀼𑀔𑀁 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀜𑁆𑀘. 𑀲𑁂𑀲𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀆𑀤𑀺𑀢𑁄 𑀕𑀳𑀡𑀁 𑀧𑀦 𑀅𑀢𑀺𑀯𑀺𑀬 𑀑𑀴𑀸𑀭𑀺𑀓𑀢𑀸𑀬 𑀲𑀼𑀧𑀸𑀓𑀝𑀪𑀸𑀯𑀢𑁄 𑀯𑀓𑁆𑀔𑀫𑀸𑀦𑀸𑀦𑀁 𑀅𑀜𑁆𑀜𑁂𑀲𑀜𑁆𑀘 𑀧𑀸𑀧𑀥𑀫𑁆𑀫𑀸𑀦𑀁 𑀫𑀽𑀮𑀪𑀸𑀯𑀢𑁄 𑀢𑀤𑁂𑀓𑀝𑁆𑀞𑀢𑀸𑀬 𑀘 𑀯𑁂𑀤𑀺𑀢𑀩𑁆𑀩𑀁.

𑀓𑀼𑀚𑁆𑀛𑀦𑀮𑀓𑁆𑀔𑀡𑁄𑀢𑀺 𑀓𑀼𑀧𑁆𑀧𑀦𑀲𑀪𑀸𑀯𑁄, 𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀚𑁆𑀚𑀦𑀸𑀢𑀺 𑀅𑀢𑁆𑀣𑁄. 𑀘𑀡𑁆𑀟𑀺𑀓𑁆𑀓𑀁 𑀮𑀼𑀤𑁆𑀤𑀢𑀸, 𑀓𑀼𑀭𑀼𑀭𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀆𑀖𑀸𑀢𑀓𑀭𑀡𑀭𑀲𑁄𑀢𑀺 ‘‘𑀅𑀦𑀢𑁆𑀣𑀁 𑀫𑁂 𑀅𑀘𑀭𑀻’’𑀢𑀺𑀆𑀤𑀺𑀦𑀸 𑀘𑀺𑀢𑁆𑀢𑁂 𑀆𑀖𑀸𑀢𑀲𑁆𑀲 𑀓𑀭𑀡𑀭𑀲𑁄. 𑀤𑀼𑀲𑁆𑀲𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄𑀢𑀺 𑀲𑀧𑀭𑀲𑀦𑁆𑀢𑀸𑀦𑀲𑁆𑀲 𑀯𑀺𑀦𑀸𑀲𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄 𑀮𑀤𑁆𑀥𑁄𑀓𑀸𑀲𑁄 𑀯𑀺𑀬 𑀲𑀧𑀢𑁆𑀢𑁄. 𑀉𑀧𑀦𑀦𑁆𑀥𑀦𑀁 𑀦𑀸𑀦𑀧𑁆𑀧𑀓𑀸𑀭𑀲𑁆𑀲 𑀉𑀧𑀭𑀽𑀧𑀭𑀺 𑀦𑀦𑁆𑀥𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀓𑀢𑁆𑀯𑀸. 𑀢𑀣𑀸 𑀳𑁂𑀲 ‘‘𑀯𑁂𑀭𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀭𑀲𑁄, 𑀓𑁄𑀥𑀸𑀦𑀼𑀧𑀩𑀦𑁆𑀥𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄’’𑀢𑀺 𑀘 𑀯𑀼𑀢𑁆𑀢𑁄. 𑀅𑀧𑀭𑀓𑀸𑀮𑁂 𑀉𑀧𑀦𑀸𑀳𑁄𑀢𑀺𑀆𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀉𑀧𑀦𑀬𑁆𑀳𑀦𑀸 𑀉𑀧𑀦𑀬𑁆𑀳𑀺𑀢𑀢𑁆𑀢𑀁 𑀆𑀞𑀧𑀦𑀸 𑀞𑀧𑀦𑀸 𑀲𑀡𑁆𑀞𑀧𑀦𑀸 𑀅𑀦𑀼𑀲𑀁𑀲𑀦𑁆𑀤𑀦𑀸 𑀅𑀦𑀼𑀧𑁆𑀧𑀩𑀦𑁆𑀥𑀦𑀸 𑀤𑀴𑁆𑀳𑀻𑀓𑀫𑁆𑀫’’𑀦𑁆𑀢𑀺𑀆𑀤𑀻𑀦𑀁 (𑀯𑀺𑀪. 𑁮𑁯𑁧) 𑀦𑀺𑀤𑁆𑀤𑁂𑀲𑀧𑀤𑀸𑀦𑀁 𑀅𑀢𑁆𑀣𑀯𑀡𑁆𑀡𑀦𑀁 𑀲𑀗𑁆𑀕𑀬𑁆𑀳𑀢𑀺. 𑀉𑀧𑀦𑀸𑀳𑀲𑀫𑀗𑁆𑀕𑀻 𑀳𑀺 𑀧𑀼𑀕𑁆𑀕𑀮𑁄 𑀯𑁂𑀭𑀲𑁆𑀲 𑀅𑀦𑀺𑀲𑁆𑀲𑀚𑁆𑀚𑀦𑀢𑁄 𑀆𑀤𑀺𑀢𑁆𑀢𑀧𑀽𑀢𑀺𑀅𑀮𑀸𑀢𑀁 𑀯𑀺𑀬 𑀚𑀮𑀢𑀺 𑀏𑀯, 𑀘𑀺𑀢𑁆𑀢𑀜𑁆𑀘𑀲𑁆𑀲 𑀥𑁄𑀯𑀺𑀬𑀫𑀸𑀦𑀁 𑀅𑀘𑁆𑀙𑀘𑀫𑁆𑀫𑀁 𑀯𑀺𑀬, 𑀫𑀲𑀺𑀫𑀓𑁆𑀔𑀺𑀢𑀧𑀺𑀮𑁄𑀢𑀺𑀓𑀸 𑀯𑀺𑀬 𑀘 𑀦 𑀲𑀼𑀚𑁆𑀛𑀢𑁂𑀯.

𑀧𑀭𑀕𑀼𑀡𑀫𑀓𑁆𑀔𑀦𑀮𑀓𑁆𑀔𑀡𑁄𑀢𑀺 ¶ 𑀉𑀤𑀓𑀧𑀼𑀜𑁆𑀙𑀦𑀺𑀬𑀸 𑀉𑀤𑀓𑀁 𑀯𑀺𑀬 𑀧𑀭𑁂𑀲𑀁 𑀕𑀼𑀡𑀸𑀦𑀁 𑀫𑀓𑁆𑀔𑀦𑀲𑀪𑀸𑀯𑁄. 𑀢𑀣𑀸𑀪𑀽𑀢𑁄 𑀘𑀸𑀬𑀁 𑀅𑀢𑁆𑀢𑀦𑁄 𑀓𑀸𑀭𑀓𑀁 𑀕𑀽𑀣𑁂𑀦 𑀧𑀳𑀭𑀦𑁆𑀢𑀁 𑀕𑀽𑀣𑁄 𑀯𑀺𑀬 𑀧𑀞𑀫𑀢𑀭𑀁 𑀫𑀓𑁆𑀔𑁂𑀢𑀺 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑁂𑀲𑁆𑀲 𑀲𑀧𑀭𑀲𑀦𑁆𑀢𑀸𑀦𑁂𑀲𑀼 𑀕𑀼𑀡𑀁 𑀫𑀓𑁆𑀔𑁂𑀢𑀻𑀢𑀺 𑀫𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀼𑀕𑀕𑁆𑀕𑀸𑀳𑁄 𑀲𑀫𑀥𑀼𑀭𑀕𑁆𑀕𑀳𑀡𑀁 𑀅𑀲𑀫𑀸𑀦𑀲𑁆𑀲𑀧𑀺 𑀅𑀪𑀽𑀢𑀲𑁆𑀲 𑀲𑀫𑀸𑀭𑁄𑀧𑀦𑀁. 𑀲𑀫𑀪𑀸𑀯𑀓𑀭𑀡𑀁 𑀲𑀫𑀻𑀓𑀭𑀡𑀁. 𑀧𑀭𑁂𑀲𑀁 𑀕𑀼𑀡𑀧𑁆𑀧𑀫𑀸𑀡𑁂𑀦 𑀅𑀢𑁆𑀢𑀦𑁄 𑀕𑀼𑀡𑀸𑀦𑀁 𑀉𑀧𑀝𑁆𑀞𑀸𑀦𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀻𑀢𑀺 𑀆𑀳 ‘‘𑀧𑀭𑁂𑀲𑀁 𑀕𑀼𑀡𑀧𑁆𑀧𑀫𑀸𑀡𑁂𑀦 𑀉𑀧𑀝𑁆𑀞𑀸𑀦𑀧𑀘𑁆𑀘𑀼𑀧𑀝𑁆𑀞𑀸𑀦𑁄’’𑀢𑀺. 𑀢𑀣𑀸 𑀳𑁂𑀲 𑀧𑀭𑁂𑀲𑀁 𑀕𑀼𑀡𑁂 𑀟𑀁𑀲𑀺𑀢𑁆𑀯𑀸 𑀯𑀺𑀬 𑀅𑀢𑁆𑀢𑀦𑁄 𑀕𑀼𑀡𑁂𑀳𑀺 𑀲𑀫𑁂 𑀓𑀭𑁄𑀢𑀻𑀢𑀺 𑀧𑀴𑀸𑀲𑁄𑀢𑀺 𑀯𑀼𑀘𑁆𑀘𑀢𑀺.

𑀧𑀭𑀲𑀫𑁆𑀧𑀢𑁆𑀢𑀺𑀔𑀻𑀬𑀦𑀁 ¶ 𑀧𑀭𑀲𑀫𑁆𑀧𑀢𑁆𑀢𑀺𑀬𑀸 𑀉𑀲𑀽𑀬𑀦𑀁. 𑀇𑀲𑁆𑀲𑀢𑀺 𑀧𑀭𑀲𑀫𑁆𑀧𑀢𑁆𑀢𑀺𑀁 𑀦 𑀲𑀳𑀢𑀻𑀢𑀺 𑀇𑀲𑁆𑀲𑀸. 𑀢𑀣𑀸 𑀳𑁂𑀲𑀸 ‘‘𑀧𑀭𑀲𑀫𑁆𑀧𑀢𑁆𑀢𑀺𑀬𑀸 𑀅𑀓𑁆𑀔𑀫𑀦𑀮𑀓𑁆𑀔𑀡𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣𑀸𑀢𑀺 𑀧𑀭𑀲𑀫𑁆𑀧𑀢𑁆𑀢𑀺𑀬𑀁. 𑀅𑀦𑀪𑀺𑀭𑀢𑀺𑀭𑀲𑀸 𑀅𑀪𑀺𑀭𑀢𑀺𑀧𑀝𑀺𑀧𑀓𑁆𑀔𑀓𑀺𑀘𑁆𑀘𑀸. 𑀯𑀺𑀫𑀼𑀔𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀧𑀭𑀲𑀫𑁆𑀧𑀢𑁆𑀢𑀺𑀁 𑀧𑀲𑁆𑀲𑀺𑀢𑀼𑀫𑁆𑀧𑀺 𑀅𑀧𑁆𑀧𑀤𑀸𑀦𑀢𑁄. 𑀦𑀺𑀕𑀽𑀳𑀦𑀮𑀓𑁆𑀔𑀡𑀁 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀬𑀸 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀸𑀲𑀳𑀦𑀢𑁄. 𑀅𑀲𑀼𑀔𑀸𑀬𑀦𑀁 𑀦 𑀲𑀼𑀔𑀦𑀁 𑀤𑀼𑀓𑁆𑀔𑀦𑀁, 𑀅𑀭𑁄𑀘𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑀢𑀲𑁆𑀲 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀧𑀸𑀧𑀲𑁆𑀲 𑀧𑀝𑀺𑀘𑁆𑀙𑀸𑀤𑀦𑀁 𑀓𑀢𑀧𑀸𑀧𑀧𑀝𑀺𑀘𑁆𑀙𑀸𑀤𑀦𑀁. 𑀢𑀲𑁆𑀲 𑀧𑀸𑀧𑀲𑁆𑀲 𑀆𑀯𑀭𑀡𑀪𑀸𑀯𑁂𑀦 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀻𑀢𑀺 𑀢𑀤𑀸𑀯𑀭𑀡𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀫𑀸𑀬𑀸, 𑀬𑀸𑀬 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀪𑀲𑁆𑀫𑀙𑀦𑁆𑀦𑁄 𑀯𑀺𑀬 𑀅𑀗𑁆𑀕𑀸𑀭𑁄, 𑀉𑀤𑀓𑀙𑀦𑁆𑀦𑁄 𑀯𑀺𑀬 𑀔𑀸𑀡𑀼, 𑀧𑀺𑀮𑁄𑀢𑀺𑀓𑀧𑀝𑀺𑀘𑁆𑀙𑀸𑀤𑀺𑀢𑀁 𑀯𑀺𑀬 𑀘 𑀲𑀢𑁆𑀣𑀁 𑀳𑁄𑀢𑀺. 𑀅𑀯𑀺𑀚𑁆𑀚𑀫𑀸𑀦𑀕𑀼𑀡𑀧𑁆𑀧𑀓𑀸𑀲𑀦𑀁 𑀅𑀢𑁆𑀢𑀦𑀺 𑀅𑀯𑀺𑀚𑁆𑀚𑀫𑀸𑀦𑀲𑀻𑀮𑀸𑀤𑀺𑀕𑀼𑀡𑀯𑀺𑀪𑀸𑀯𑀦𑀁, 𑀬𑁂𑀦 𑀲𑀸𑀞𑁂𑀬𑁆𑀬𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑁂𑀦 𑀘𑀺𑀢𑁆𑀢𑀸𑀦𑀼𑀭𑀽𑀧𑀓𑀺𑀭𑀺𑀬𑀸𑀯𑀺𑀳𑀭𑀢𑁄 ‘‘𑀏𑀯𑀁𑀘𑀺𑀢𑁆𑀢𑁄, 𑀏𑀯𑀁𑀓𑀺𑀭𑀺𑀬𑁄’’𑀢𑀺 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀓𑀼𑀘𑁆𑀙𑀺𑀁 𑀯𑀸 𑀧𑀺𑀝𑁆𑀞𑀺𑀁 𑀯𑀸 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀸. 𑀬𑀢𑁄 𑁋

‘‘𑀯𑀸𑀫𑁂𑀦 𑀲𑀽𑀓𑀭𑁄 𑀳𑁄𑀢𑀺, 𑀤𑀓𑁆𑀔𑀺𑀡𑁂𑀦 𑀅𑀚𑀸𑀫𑀺𑀕𑁄;

𑀲𑀭𑁂𑀦 𑀦𑁂𑀮𑀓𑁄 𑀳𑁄𑀢𑀺, 𑀯𑀺𑀲𑀸𑀡𑁂𑀦 𑀚𑀭𑀕𑁆𑀕𑀯𑁄’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁨.𑁨𑁯𑁬; 𑀯𑀺𑀪. 𑀅𑀝𑁆𑀞. 𑁮𑁯𑁪; 𑀫𑀳𑀸𑀦𑀺. 𑀅𑀝𑁆𑀞. 𑁧𑁬𑁬) 𑁋

𑀏𑀯𑀁 𑀯𑀼𑀢𑁆𑀢𑀬𑀓𑁆𑀓𑀲𑀽𑀓𑀭𑀲𑀤𑀺𑀲𑁄 𑀳𑁄𑀢𑀺.

𑀘𑀺𑀢𑁆𑀢𑀲𑁆𑀲 𑀉𑀤𑁆𑀥𑀼𑀫𑀸𑀢𑀪𑀸𑀯𑁄 𑀣𑀤𑁆𑀥𑀮𑀽𑀔𑀪𑀸𑀯𑁄. 𑀅𑀧𑁆𑀧𑀢𑀺𑀲𑁆𑀲𑀬𑀯𑀼𑀢𑁆𑀢𑀻𑀢𑀺 𑀅𑀦𑀺𑀯𑀸𑀢𑀯𑀼𑀢𑁆𑀢𑀺. 𑀅𑀫𑀤𑁆𑀤𑀯𑀸𑀓𑀸𑀭𑁂𑀦 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀺, 𑀅𑀫𑀤𑁆𑀤𑀯𑀢𑀁 𑀯𑀸 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀻𑀢𑀺 𑀅𑀫𑀤𑁆𑀤𑀯𑀢𑀸𑀧𑀘𑁆𑀘𑀼𑀧𑀝𑁆𑀞𑀸𑀦𑁄, 𑀣𑀫𑁆𑀪𑁄, 𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀕𑀺𑀮𑀺𑀢𑀦𑀗𑁆𑀕𑀮𑀲𑀻𑀲𑁄 𑀯𑀺𑀬 𑀅𑀚𑀕𑀭𑁄, 𑀯𑀸𑀢𑀪𑀭𑀺𑀢𑀪𑀲𑁆𑀢𑀸 𑀯𑀺𑀬 𑀘 𑀣𑀤𑁆𑀥𑁄 𑀳𑀼𑀢𑁆𑀯𑀸 𑀕𑀭𑀼𑀝𑁆𑀞𑀸𑀦𑀺𑀬𑁂 𑀘 ¶ 𑀤𑀺𑀲𑁆𑀯𑀸 𑀑𑀦𑀫𑀺𑀢𑀼𑀫𑁆𑀧𑀺 𑀦 𑀇𑀘𑁆𑀙𑀢𑀺, 𑀧𑀭𑀺𑀬𑀦𑁆𑀢𑁂𑀦𑁂𑀯 𑀘𑀭𑀢𑀺. 𑀓𑀭𑀡𑀲𑁆𑀲 𑀉𑀢𑁆𑀢𑀭𑀓𑀺𑀭𑀺𑀬𑀸 𑀓𑀭𑀡𑀼𑀢𑁆𑀢𑀭𑀺𑀬𑀁. 𑀯𑀺𑀲𑁂𑀲𑀢𑁄 𑀧𑀘𑁆𑀘𑀦𑀻𑀓𑀪𑀸𑀯𑁄 𑀯𑀺𑀧𑀘𑁆𑀘𑀦𑀻𑀓𑀢𑀸. 𑀧𑀭𑁂𑀦 𑀳𑀺 𑀓𑀺𑀲𑁆𑀫𑀺𑀜𑁆𑀘𑀺 𑀓𑀢𑁂 𑀢𑀤𑁆𑀤𑀺𑀕𑀼𑀡𑀁 𑀓𑀭𑀡𑀯𑀲𑁂𑀦 𑀲𑀸𑀭𑀫𑁆𑀪𑁄 𑀧𑀯𑀢𑁆𑀢𑀢𑀺.

𑀲𑁂𑀬𑁆𑀬𑀸𑀤𑀺𑀆𑀓𑀸𑀭𑁂𑀳𑀺 𑀉𑀦𑁆𑀦𑀫𑀦𑀁 𑀉𑀦𑁆𑀦𑀢𑀺. 𑀑𑀫𑀸𑀦𑁄𑀧𑀺 𑀳𑀺 𑀏𑀯𑀁 𑀓𑀭𑀡𑀫𑀼𑀔𑁂𑀦 𑀲𑀫𑁆𑀧𑀕𑁆𑀕𑀳𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀺. ‘‘𑀅𑀳𑀫𑀲𑁆𑀫𑀺 𑀲𑁂𑀬𑁆𑀬𑁄’’𑀢𑀺𑀆𑀤𑀺𑀦𑀸 𑀅𑀳𑀁𑀓𑀭𑀡𑀁 𑀲𑀫𑁆𑀧𑀕𑁆𑀕𑀳𑁄 𑀅𑀳𑀗𑁆𑀓𑀸𑀭𑁄. 𑀧𑀭𑁂 𑀅𑀪𑀺𑀪𑀯𑀺𑀢𑁆𑀯𑀸 𑀅𑀥𑀺𑀓𑀁 𑀉𑀦𑁆𑀦𑀫𑀦𑀁 𑀅𑀩𑁆𑀪𑀼𑀦𑁆𑀦𑀢𑀺 ¶ . 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀧𑀼𑀩𑁆𑀩𑀓𑀸𑀮𑁂 𑀅𑀢𑁆𑀢𑀸𑀦𑀁 𑀳𑀻𑀦𑀢𑁄 𑀤𑀳𑀢𑀺 𑀅𑀧𑀭𑀓𑀸𑀮𑁂 𑀲𑁂𑀬𑁆𑀬𑀢𑁄’’𑀢𑀺 (𑀯𑀺𑀪. 𑁮𑁭𑁭).

𑀫𑀢𑁆𑀢𑀪𑀸𑀯𑁄 𑀚𑀸𑀢𑀺𑀆𑀤𑀺𑀁 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑁆𑀲 𑀫𑀚𑁆𑀚𑀦𑀸𑀓𑀸𑀭𑁄, 𑀬𑀲𑁆𑀲 𑀯𑀸 𑀥𑀫𑁆𑀫𑀲𑁆𑀲 𑀯𑀲𑁂𑀦 𑀧𑀼𑀕𑁆𑀕𑀮𑁄 𑀫𑀢𑁆𑀢𑁄 𑀦𑀸𑀫 𑀳𑁄𑀢𑀺, 𑀲𑁄 𑀥𑀫𑁆𑀫𑁄 𑀫𑀢𑁆𑀢𑀪𑀸𑀯𑁄. 𑀫𑀤𑀕𑁆𑀕𑀸𑀳𑀡𑀭𑀲𑁄 𑀫𑀤𑀲𑁆𑀲 𑀕𑀸𑀳𑀡𑀓𑀺𑀘𑁆𑀘𑁄. 𑀫𑀤𑁄 𑀳𑀺 𑀅𑀢𑁆𑀢𑀦𑁄 𑀫𑀚𑁆𑀚𑀦𑀸𑀓𑀸𑀭𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀕𑀸𑀳𑁂𑀦𑁆𑀢𑁄 𑀯𑀺𑀬 𑀧𑀯𑀢𑁆𑀢𑀫𑀸𑀦𑁄 𑀢𑀁𑀲𑀫𑀗𑁆𑀕𑀺𑀁 𑀧𑀼𑀕𑁆𑀕𑀮𑀫𑁆𑀧𑀺 𑀢𑀣𑀸 𑀓𑀭𑁄𑀦𑁆𑀢𑁄 𑀯𑀺𑀬 𑀳𑁄𑀢𑀺. 𑀅𑀳𑀗𑁆𑀓𑀸𑀭𑀯𑀲𑁂𑀦 𑀧𑀼𑀕𑁆𑀕𑀮𑀁 𑀅𑀦𑀺𑀝𑁆𑀞𑀁 𑀓𑀭𑁄𑀦𑁆𑀢𑁄 𑀘𑀺𑀢𑁆𑀢𑀲𑁆𑀲 𑀉𑀫𑁆𑀫𑀸𑀤𑀪𑀸𑀯𑁄 𑀯𑀺𑀬 𑀳𑁄𑀢𑀻𑀢𑀺 𑀉𑀫𑁆𑀫𑀸𑀤𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀲𑀢𑀺𑀬𑀸 𑀅𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀯𑁄𑀲𑁆𑀲𑀚𑁆𑀚𑀦𑀁 𑀘𑀺𑀢𑁆𑀢𑀯𑁄𑀲𑁆𑀲𑀕𑁆𑀕𑁄, 𑀲𑀢𑀺𑀯𑀺𑀭𑀳𑀺𑀢𑁄𑀢𑀺 𑀅𑀢𑁆𑀣𑁄. 𑀬𑀣𑀸𑀯𑀼𑀢𑁆𑀢𑀲𑁆𑀲 𑀯𑁄𑀲𑁆𑀲𑀕𑁆𑀕𑀲𑁆𑀲 𑀅𑀦𑀼𑀧𑁆𑀧𑀤𑀸𑀦𑀁 𑀧𑀼𑀦𑀧𑁆𑀧𑀼𑀦𑀁 𑀯𑀺𑀲𑁆𑀲𑀚𑁆𑀚𑀦𑀁 𑀯𑁄𑀲𑁆𑀲𑀕𑁆𑀕𑀸𑀦𑀼𑀧𑁆𑀧𑀤𑀸𑀦𑀁. 𑀇𑀫𑁂𑀲𑀁 𑀓𑁄𑀥𑀸𑀤𑀻𑀦𑀁 𑀮𑁄𑀪𑀸𑀤𑀻𑀦𑀫𑁆𑀧𑀺 𑀯𑀸. 𑀮𑀓𑁆𑀔𑀡𑀸𑀤𑀻𑀦𑀻𑀢𑀺 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀸𑀦𑀺. 𑀧𑀤𑀝𑁆𑀞𑀸𑀦𑀁 𑀧𑀦 𑀥𑀫𑁆𑀫𑀦𑁆𑀢𑀭𑀢𑀸𑀬 𑀦 𑀕𑀳𑀺𑀢𑀁. 𑀦𑀺𑀩𑁆𑀩𑀘𑀦𑀁 ‘‘𑀓𑀼𑀚𑁆𑀛𑀢𑀻𑀢𑀺 𑀓𑁄𑀥𑁄, 𑀉𑀧𑀦𑀬𑁆𑀳𑀢𑀻𑀢𑀺 𑀉𑀧𑀦𑀸𑀳𑁄’’𑀢𑀺𑀆𑀤𑀺𑀦𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺 𑀦 𑀯𑀼𑀢𑁆𑀢𑀁, 𑀅𑀢𑁆𑀣𑀢𑁄 𑀧𑀦 𑀓𑁄𑀥𑁄 𑀤𑁄𑀲𑁄 𑀏𑀯, 𑀢𑀣𑀸 𑀉𑀧𑀦𑀸𑀳𑁄. 𑀧𑀯𑀢𑁆𑀢𑀺𑀆𑀓𑀸𑀭𑀫𑀢𑁆𑀢𑀢𑁄 𑀳𑀺 𑀓𑀢𑁄 𑀦𑁂𑀲𑀁 𑀪𑁂𑀤𑁄, 𑀫𑀓𑁆𑀔𑀧𑀴𑀸𑀲𑀲𑀸𑀭𑀫𑁆𑀪𑀸 𑀢𑀤𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀧𑀝𑀺𑀖𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀥𑀫𑁆𑀫𑀸, 𑀫𑀸𑀬𑀸𑀲𑀸𑀞𑁂𑀬𑁆𑀬𑀣𑀫𑁆𑀪𑀫𑀤𑀧𑁆𑀧𑀫𑀸𑀤𑀸 𑀢𑀤𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀥𑀫𑁆𑀫𑀸. 𑀣𑀫𑁆𑀪𑁄 𑀯𑀸 𑀫𑀸𑀦𑀯𑀺𑀲𑁂𑀲𑁄 𑀘𑀺𑀢𑁆𑀢𑀲𑁆𑀲 𑀣𑀤𑁆𑀥𑀪𑀸𑀯𑁂𑀦 𑀕𑀳𑁂𑀢𑀩𑁆𑀩𑀢𑁄, 𑀢𑀣𑀸 𑀫𑀤𑁄. 𑀢𑀣𑀸 𑀳𑀺 𑀲𑁄 ‘‘𑀫𑀸𑀦𑁄 𑀫𑀜𑁆𑀜𑀦𑀸’’𑀢𑀺𑀆𑀤𑀺𑀦𑀸 𑀯𑀺𑀪𑀗𑁆𑀕𑁂 (𑀯𑀺𑀪. 𑁮𑁭𑁮) 𑀦𑀺𑀤𑁆𑀤𑀺𑀝𑁆𑀞𑁄. 𑀇𑀥 𑀧𑀦 𑀫𑀸𑀦𑀸𑀢𑀺𑀫𑀸𑀦𑀸𑀦𑀁 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀫𑀚𑁆𑀚𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀥𑀫𑁆𑀫𑀸 𑀏𑀯 ‘‘𑀫𑀤𑁄’’𑀢𑀺 𑀕𑀳𑁂𑀢𑀩𑁆𑀩𑀸. 𑀲𑁂𑀲𑀸𑀦𑀁 𑀥𑀫𑁆𑀫𑀦𑁆𑀢𑀭𑀪𑀸𑀯𑁄 𑀧𑀸𑀓𑀝𑁄 𑀏𑀯.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀏𑀢𑁂 𑀏𑀯 𑀅𑀝𑁆𑀞 𑀤𑀼𑀓𑀸 𑀕𑀳𑀺𑀢𑀸, 𑀓𑀺𑀫𑀺𑀢𑁄 𑀅𑀜𑁆𑀜𑁂𑀧𑀺 𑀓𑀺𑀮𑁂𑀲𑀥𑀫𑁆𑀫𑀸 𑀦𑀢𑁆𑀣𑀻𑀢𑀺? 𑀦𑁄 𑀦𑀢𑁆𑀣𑀺, 𑀇𑀫𑁂 𑀧𑀦 𑀆𑀫𑀺𑀲𑀤𑀸𑀬𑀸𑀤𑀲𑁆𑀲 𑀲𑀯𑀺𑀲𑁂𑀲𑀁 𑀓𑀺𑀮𑁂𑀲𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀢𑀁 𑀯𑀺𑀲𑁂𑀲𑀁 𑀯𑀺𑀪𑀸𑀯𑁂𑀦𑁆𑀢𑁂𑀦 𑀆𑀫𑀺𑀲𑀤𑀸𑀬𑀸𑀤𑀲𑁆𑀲 𑀮𑁄𑀪𑀸𑀤𑀻𑀦𑀁 𑀧𑀯𑀢𑁆𑀢𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀲𑁂𑀲𑀢𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀮𑁄𑀪𑀸𑀤𑀻𑀲𑀼. 𑀅𑀮𑀪𑀦𑁆𑀢𑁄 𑀆𑀫𑀺𑀲𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑀼𑀢𑁆𑀢𑀭𑀺 𑀉𑀧𑁆𑀧𑀦𑁆𑀦𑁄 𑀓𑁄𑀥𑁄𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀲𑀦𑁆𑀢𑁂𑀧𑀻𑀢𑀺 𑀯𑀺𑀚𑁆𑀚𑀫𑀸𑀦𑁂𑀧𑀺. 𑀇𑀲𑁆𑀲𑀢𑀻𑀢𑀺 𑀇𑀲𑁆𑀲𑀁 𑀚𑀦𑁂𑀢𑀺. 𑀧𑀤𑀼𑀲𑁆𑀲𑀢𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀢𑀣𑀸 𑀳𑀺 𑀲𑀸 ‘‘𑀇𑀲𑁆𑀲𑀢𑀺 𑀤𑀼𑀲𑁆𑀲𑀢𑀺 𑀧𑀤𑀼𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀸. 𑀬𑀲𑁆𑀫𑀸 𑀯𑀸 𑀇𑀲𑁆𑀲𑀁 ¶ ¶ 𑀚𑀦𑁂𑀦𑁆𑀢𑁄 𑀏𑀓𑀁𑀲𑀢𑁄 𑀧𑀤𑀼𑀝𑁆𑀞𑀘𑀺𑀢𑁆𑀢𑁄 𑀏𑀯 𑀳𑁄𑀢𑀺, 𑀢𑀲𑁆𑀫𑀸 ‘‘𑀧𑀤𑀼𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀲𑁆𑀲𑀸𑀢𑀺 𑀆𑀫𑀺𑀲𑀤𑀸𑀬𑀸𑀤𑀲𑁆𑀲. 𑀏𑀯𑀁 𑀧𑀝𑀺𑀧𑀦𑁆𑀦𑁄𑀢𑀺 𑀏𑀯𑀁 𑀅𑀲𑀦𑁆𑀢𑀕𑀼𑀡𑀧𑁆𑀧𑀓𑀸𑀲𑀦𑀁 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄. 𑀑𑀯𑀤𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄𑀢𑀺 𑀏𑀢𑁂𑀦 𑀣𑀫𑁆𑀪𑁄 𑀦𑀸𑀫 𑀤𑁄𑀯𑀘𑀲𑁆𑀲𑀓𑀭𑀡𑁄 𑀥𑀫𑁆𑀫𑁄𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀜𑁆𑀘𑀺 𑀯𑀤𑀢𑀺 𑀑𑀯𑀸𑀤𑀤𑀸𑀦𑀯𑀲𑁂𑀦. 𑀣𑀫𑁆𑀪𑁂𑀦…𑀧𑁂… 𑀫𑀜𑁆𑀜𑀦𑁆𑀢𑁄𑀢𑀺 𑀇𑀫𑀺𑀦𑀸 𑀘 𑀣𑀫𑁆𑀪𑀲𑁆𑀲 𑀫𑀸𑀦𑀯𑀺𑀲𑁂𑀲𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀣𑀫𑁆𑀪𑁂𑀦 𑀯𑀸 𑀳𑁂𑀢𑀼𑀦𑀸𑀢𑀺 𑀅𑀢𑁆𑀣𑁄. 𑀫𑀢𑁆𑀢𑁄 𑀲𑀫𑀸𑀦𑁄𑀢𑀺 𑀫𑀢𑁆𑀢𑁄 𑀳𑁄𑀦𑁆𑀢𑁄. 𑀓𑀸𑀫…𑀧𑁂… 𑀧𑀫𑀚𑁆𑀚𑀢𑀻𑀢𑀺 𑀏𑀢𑁂𑀦 𑀫𑀤𑀯𑀲𑁂𑀦 𑀏𑀓𑀁𑀲𑀢𑁄 𑀧𑀫𑀸𑀤𑀫𑀸𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀏𑀯𑀦𑁆𑀢𑀺 𑀇𑀫𑀺𑀦𑀸 𑀆𑀫𑀺𑀲𑀤𑀸𑀬𑀸𑀤𑀲𑁆𑀲 𑀮𑁄𑀪𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑀤𑀲𑁆𑀲𑀦𑁂𑀦𑁂𑀯 𑀇𑀥 𑀧𑀸𑀴𑀺𑀬𑀁 𑀦𑁂𑀲𑀁 𑀤𑁂𑀲𑀦𑀸𑀓𑁆𑀓𑀫𑁄𑀧𑀺 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀦 𑀓𑁂𑀯𑀮𑀁 𑀇𑀫𑁂𑀳𑁂𑀯, 𑀅𑀣 𑀔𑁄 𑀅𑀜𑁆𑀜𑁂𑀳𑀺 𑀘 𑀏𑀯𑀭𑀽𑀧𑁂𑀳𑀺 𑀧𑀸𑀧𑀓𑁂𑀳𑀺 𑀥𑀫𑁆𑀫𑁂𑀳𑀺 𑀅𑀧𑀭𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑁂 𑀧𑀦 𑀢𑁂𑀢𑀺? 𑀅𑀢𑁆𑀭𑀺𑀘𑁆𑀙𑀢𑀸𑀫𑀳𑀺𑀘𑁆𑀙𑀢𑀸𑀤𑀬𑁄𑀢𑀺. 𑀏𑀯𑀁 𑀫𑀳𑀸𑀤𑀻𑀦𑀯𑀸 𑀆𑀫𑀺𑀲𑀤𑀸𑀬𑀸𑀤𑀢𑀸𑀢𑀺 𑀢𑀢𑁄 𑀩𑀮𑀯𑀢𑀭𑁄 𑀲𑀁𑀯𑁂𑀕𑁄 𑀚𑀦𑁂𑀢𑀩𑁆𑀩𑁄𑀢𑀺 𑀅𑀬𑀫𑁂𑀢𑁆𑀣 𑀑𑀯𑀸𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀲𑀼𑀢𑁆𑀢𑁂. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀯𑀸𑀭𑁂𑀲𑀼. 𑀦𑀺𑀩𑁆𑀩𑀺𑀲𑁂𑀲𑁄𑀬𑁂𑀯𑀸𑀢𑀺 𑀏𑀢𑁂𑀦𑁂𑀯 𑀧𑀞𑀫𑀢𑀭𑀁 𑀇𑀥 𑀤𑀲𑁆𑀲𑀺𑀢𑀲𑀘𑁆𑀘𑀬𑁄𑀚𑀦𑀸𑀦𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀬𑁄𑀚𑁂𑀢𑀩𑁆𑀩𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀜𑀸𑀡𑀧𑀭𑀺𑀘𑀬𑀧𑀸𑀝𑀯𑀢𑁆𑀣𑀦𑁆𑀢𑀺 𑀫𑀕𑁆𑀕𑀲𑁆𑀲 𑀅𑀝𑁆𑀞𑀗𑁆𑀕𑀲𑀢𑁆𑀢𑀗𑁆𑀕𑀢𑀸𑀤𑀺𑀯𑀺𑀲𑁂𑀲𑀯𑀺𑀪𑀸𑀯𑀦𑀸𑀬 𑀜𑀸𑀡𑀲𑁆𑀲 𑀆𑀲𑁂𑀯𑀦𑀝𑁆𑀞𑁂𑀦 𑀧𑀭𑀺𑀘𑀬𑁄 𑀜𑀸𑀡𑀧𑀭𑀺𑀘𑀬𑁄, 𑀢𑀲𑁆𑀲 𑀧𑀝𑀼𑀪𑀸𑀯𑀢𑁆𑀣𑀁 𑀓𑁄𑀲𑀮𑁆𑀮𑀢𑁆𑀣𑀁. 𑀏𑀢𑁆𑀣𑀸𑀢𑀺 𑀅𑀭𑀺𑀬𑀫𑀕𑁆𑀕𑁂. 𑀪𑁂𑀤𑁄𑀢𑀺 𑀯𑀺𑀲𑁂𑀲𑁄. 𑀓𑀫𑁄𑀢𑀺 𑀅𑀗𑁆𑀕𑀸𑀦𑀁 𑀤𑁂𑀲𑀦𑀸𑀦𑀼𑀧𑀼𑀩𑁆𑀩𑀻. 𑀪𑀸𑀯𑀦𑀸𑀦𑀬𑁄𑀢𑀺 𑀪𑀸𑀯𑀦𑀸𑀯𑀺𑀥𑀺. ‘‘𑀓𑀤𑀸𑀘𑀺 𑀅𑀝𑁆𑀞𑀗𑁆𑀕𑀺𑀓𑁄, 𑀓𑀤𑀸𑀘𑀺 𑀲𑀢𑁆𑀢𑀗𑁆𑀕𑀺𑀓𑁄’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 𑀧𑀼𑀦 ‘‘𑀅𑀬𑀁 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀮𑁄𑀓𑀼𑀢𑁆𑀢𑀭𑀧𑀞𑀫𑀚𑁆𑀛𑀸𑀦𑀯𑀲𑁂𑀦𑀸𑀢𑀺 𑀮𑁄𑀓𑀼𑀢𑁆𑀢𑀭𑀲𑁆𑀲 𑀧𑀞𑀫𑀚𑁆𑀛𑀸𑀦𑀲𑁆𑀲 𑀯𑀲𑁂𑀦. 𑀏𑀢𑁆𑀣 𑀘 𑀓𑁂𑀘𑀺 𑀛𑀸𑀦𑀥𑀫𑁆𑀫𑀸 𑀫𑀕𑁆𑀕𑀲𑀪𑀸𑀯𑀸𑀢𑀺 𑀏𑀓𑀦𑁆𑀢𑀢𑁄 𑀛𑀸𑀦𑀁 𑀫𑀕𑁆𑀕𑀢𑁄 𑀯𑀺𑀲𑀼𑀁 𑀓𑀢𑁆𑀯𑀸 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸𑀢𑀺 ‘‘𑀮𑁄𑀓𑀼𑀢𑁆𑀢𑀭𑀧𑀞𑀫𑀚𑁆𑀛𑀸𑀦𑀲𑀳𑀺𑀢𑁄’’𑀢𑀺 𑀅𑀯𑀢𑁆𑀯𑀸 ‘‘𑀮𑁄𑀓𑀼𑀢𑁆𑀢𑀭𑀧𑀞𑀫𑀚𑁆𑀛𑀸𑀦𑀯𑀲𑁂𑀦’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀅𑀣 𑀯𑀸 𑀮𑁄𑀓𑀼𑀢𑁆𑀢𑀭𑀧𑀞𑀫𑀚𑁆𑀛𑀸𑀦𑀯𑀲𑁂𑀦𑀸𑀢𑀺 𑀮𑁄𑀓𑀼𑀢𑁆𑀢𑀭𑀸 𑀳𑀼𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀲𑁆𑀲 𑀯𑀲𑁂𑀦𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀭𑀺𑀬𑀫𑀕𑁆𑀕𑁄 𑀳𑀺 𑀯𑀺𑀧𑀲𑁆𑀲𑀦𑀸𑀬 𑀧𑀸𑀤𑀓𑀪𑀽𑀢𑀲𑁆𑀲, 𑀲𑀫𑁆𑀫𑀲𑀺𑀢𑀲𑁆𑀲 𑀯𑀸 𑀧𑀞𑀫𑀚𑁆𑀛𑀸𑀦𑀲𑁆𑀲 𑀯𑀲𑁂𑀦 𑀅𑀝𑁆𑀞𑀗𑁆𑀕𑀺𑀓𑁄 𑀳𑁄𑀢𑀺. 𑀅𑀣 𑀯𑀸 𑀅𑀛𑀸𑀦𑀮𑀸𑀪𑀺𑀦𑁄 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲, 𑀛𑀸𑀦𑀮𑀸𑀪𑀺𑀦𑁄 𑀯𑀸 𑀧𑀸𑀤𑀓𑀫𑀓𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀲𑁆𑀲, 𑀧𑀓𑀺𑀡𑁆𑀡𑀓𑀲𑀗𑁆𑀔𑀸𑀭𑀸𑀦𑀁 𑀯𑀸 𑀲𑀫𑁆𑀫𑀲𑀦𑁂 ¶ 𑀉𑀧𑁆𑀧𑀦𑁆𑀦𑁄 𑀅𑀭𑀺𑀬𑀫𑀕𑁆𑀕𑁄 𑀅𑀝𑁆𑀞𑀗𑁆𑀕𑀺𑀓𑁄 𑀳𑁄𑀢𑀺, 𑀲𑁆𑀯𑀸𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀪𑀸𑀯𑁄 𑀧𑀞𑀫𑀚𑁆𑀛𑀸𑀦𑀺𑀓𑀪𑀸𑀯𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀞𑀫𑀚𑁆𑀛𑀸𑀦𑀯𑀲𑁂𑀦𑀸’’𑀢𑀺 𑀆𑀳. 𑀏𑀯𑀁 ‘‘𑀅𑀯𑀲𑁂𑀲𑀚𑁆𑀛𑀸𑀦𑀯𑀲𑁂𑀦𑀸’’𑀢𑀺 𑀏𑀢𑁆𑀣𑀸𑀢𑀺 𑀬𑀣𑀸𑀭𑀳𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀤𑀺 𑀅𑀭𑀺𑀬𑀫𑀕𑁆𑀕𑁄 𑀲𑀢𑁆𑀢𑀗𑁆𑀕𑀺𑀓𑁄𑀧𑀺 𑀳𑁄𑀢𑀺, 𑀅𑀣 𑀓𑀲𑁆𑀫𑀸 𑀧𑀸𑀴𑀺𑀬𑀁 ‘‘𑀅𑀝𑁆𑀞𑀗𑁆𑀕𑀺𑀓𑁄’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑀢𑁄’’𑀢𑀺𑀆𑀤𑀺. 𑀬𑀣𑀸 𑀘𑁂𑀢𑁆𑀣 𑀧𑀝𑀺𑀧𑀤𑀸𑀬 𑀫𑀕𑁆𑀕𑀯𑀲𑁂𑀦 𑀅𑀝𑁆𑀞𑀗𑁆𑀕𑀺𑀓𑀲𑀢𑁆𑀢𑀗𑁆𑀕𑀺𑀓𑀪𑁂𑀤𑁄 ¶ , 𑀏𑀯𑀁 𑀩𑁄𑀚𑁆𑀛𑀗𑁆𑀕𑀯𑀲𑁂𑀦 𑀲𑀢𑁆𑀢𑀗𑁆𑀕𑀺𑀓𑀙𑀴𑀗𑁆𑀕𑀺𑀓𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄 𑀅𑀧𑁆𑀧𑀻𑀢𑀺𑀓𑀚𑁆𑀛𑀸𑀦𑀯𑀲𑁂𑀦 𑀙𑀴𑀗𑁆𑀕𑀺𑀓𑀢𑁆𑀢𑀸, 𑀫𑀕𑁆𑀕𑀯𑀲𑁂𑀦 𑀧𑀦 𑀤𑁂𑀲𑀦𑀸 𑀆𑀕𑀢𑀸𑀢𑀺 𑀲𑁆𑀯𑀸𑀬𑀁 𑀪𑁂𑀤𑁄 𑀅𑀝𑁆𑀞𑀓𑀣𑀸𑀬𑀁 𑀦 𑀉𑀤𑁆𑀥𑀝𑁄. 𑀇𑀢𑁄 𑀧𑀭𑀦𑁆𑀢𑀺 𑀇𑀢𑁄 𑀅𑀝𑁆𑀞𑀗𑁆𑀕𑀢𑁄 𑀧𑀭𑀁 𑀉𑀓𑁆𑀓𑀁𑀲𑀢𑁄, 𑀅𑀯𑀓𑀁𑀲𑀢𑁄 𑀧𑀦 𑀲𑀢𑁆𑀢𑀗𑁆𑀕𑀢𑁄 𑀧𑀭𑀁 𑀫𑀕𑁆𑀕𑀗𑁆𑀕𑀁 𑀦𑀸𑀫 𑀦𑀢𑁆𑀣𑀻𑀢𑀺. 𑀦𑀦𑀼 𑀫𑀕𑁆𑀕𑀯𑀺𑀪𑀗𑁆𑀕𑁂 (𑀯𑀺𑀪. 𑁪𑁯𑁩-𑁫𑁦𑁨) 𑀧𑀜𑁆𑀘𑀗𑁆𑀕𑀺𑀓𑀯𑀸𑀭𑁂 𑀧𑀜𑁆𑀘𑁂𑀯 𑀫𑀕𑁆𑀕𑀗𑁆𑀕𑀸𑀦𑀺 𑀉𑀤𑁆𑀥𑀝𑀸𑀦𑀺, 𑀫𑀳𑀸𑀲𑀴𑀸𑀬𑀢𑀦𑁂 (𑀫. 𑀦𑀺. 𑁩.𑁪𑁩𑁧) 𑀘 ‘‘𑀬𑀸 𑀢𑀣𑀸𑀪𑀽𑀢𑀲𑁆𑀲 𑀤𑀺𑀝𑁆𑀞𑀺, 𑀬𑁄 𑀢𑀣𑀸𑀪𑀽𑀢𑀲𑁆𑀲 𑀲𑀗𑁆𑀓𑀧𑁆𑀧𑁄, 𑀬𑁄 𑀢𑀣𑀸𑀪𑀽𑀢𑀲𑁆𑀲 𑀯𑀸𑀬𑀸𑀫𑁄, 𑀬𑀸 𑀢𑀣𑀸𑀪𑀽𑀢𑀲𑁆𑀲 𑀲𑀢𑀺, 𑀬𑁄 𑀢𑀣𑀸𑀪𑀽𑀢𑀲𑁆𑀲 𑀲𑀫𑀸𑀥𑀺, 𑀲𑁆𑀯𑀸𑀲𑁆𑀲 𑀳𑁄𑀢𑀺 𑀲𑀫𑁆𑀫𑀸𑀲𑀫𑀸𑀥𑀻’’𑀢𑀺 𑀯𑀢𑁆𑀯𑀸 𑀧𑀼𑀩𑁆𑀩𑀪𑀸𑀕𑀯𑀲𑁂𑀦 𑀧𑀦 ‘‘𑀧𑀼𑀩𑁆𑀩𑁂𑀯 𑀔𑁄 𑀧𑀦𑀲𑁆𑀲 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀆𑀚𑀻𑀯𑁄 𑀲𑀼𑀧𑀭𑀺𑀲𑀼𑀤𑁆𑀥𑁄 𑀳𑁄𑀢𑀻’’𑀢𑀺 𑀲𑀫𑁆𑀫𑀸𑀯𑀸𑀘𑀸𑀤𑀬𑁄 𑀆𑀕𑀢𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑀁 𑀧𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀓𑀸𑀭𑀸𑀧𑀓𑀗𑁆𑀕𑀸𑀦𑀁 𑀅𑀢𑀺𑀭𑁂𑀓𑀓𑀺𑀘𑁆𑀘𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦 𑀅𑀭𑀺𑀬𑀫𑀕𑁆𑀕𑁄 𑀲𑀫𑁆𑀫𑀸𑀯𑀸𑀘𑀸𑀤𑀺𑀯𑀺𑀭𑀳𑀺𑀢𑁄 𑀅𑀢𑁆𑀣𑀻𑀢𑀺 ‘‘𑀇𑀢𑁄 𑀧𑀭𑀜𑁆𑀳𑀺 𑀫𑀕𑁆𑀕𑀗𑁆𑀕𑀁 𑀦𑀢𑁆𑀣𑀻’’𑀢𑀺 𑀲𑀼𑀯𑀼𑀢𑁆𑀢𑀫𑁂𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀩𑁆𑀩𑀓𑀼𑀲𑀮𑀸𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀓𑀼𑀲𑀮𑀥𑀫𑁆𑀫𑀸𑀦𑀁. 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀓𑀸𑀫𑀸𑀯𑀘𑀭𑀸𑀤𑀺𑀯𑀲𑁂𑀦 𑀢𑀁𑀢𑀁𑀓𑀼𑀲𑀮𑀥𑀫𑁆𑀫𑁂𑀲𑀼 𑀲𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑁂𑀝𑁆𑀞𑀸. 𑀢𑀲𑁆𑀲𑀸 𑀲𑁂𑀝𑁆𑀞𑀪𑀸𑀯𑁂𑀦 𑀳𑀺 ‘‘𑀧𑀜𑁆𑀜𑀸𑀚𑀻𑀯𑀺𑀁 𑀚𑀻𑀯𑀺𑀢𑀫𑀸𑀳𑀼 𑀲𑁂𑀝𑁆𑀞’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁮𑁪) 𑀯𑀼𑀢𑁆𑀢𑀁, 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀦 𑀲𑀩𑁆𑀩𑀲𑁂𑀝𑁆𑀞𑀪𑀸𑀯𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀓𑀼𑀲𑀮𑀯𑀸𑀭𑁂𑀢𑀺 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀲𑀫𑀬𑁂. 𑀧𑀼𑀩𑁆𑀩𑀗𑁆𑀕𑀫𑀸 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀬𑀸𑀣𑀸𑀯𑀲𑀪𑀸𑀯𑀩𑁄𑀥𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀭𑀺𑀡𑀸𑀬𑀓𑀪𑀸𑀯𑀢𑁄. 𑀢𑁂𑀦𑁂𑀯𑀸𑀳 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺. 𑀲𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀪𑀯𑁄 𑀏𑀢𑀲𑁆𑀲𑀸𑀢𑀺 𑀢𑀧𑁆𑀧𑀪𑀯𑁄, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄. 𑀲𑀫𑁆𑀫𑀸𑀤𑀲𑁆𑀲𑀦𑀯𑀲𑁂𑀦 𑀳𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀳𑁄𑀢𑀺. 𑀢𑀢𑁄 𑀅𑀪𑀺𑀦𑀺𑀩𑁆𑀩𑀢𑁆𑀢𑀸𑀦𑀻𑀢𑀺 𑀢𑀧𑁆𑀧𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀸𑀦𑀺. 𑀢𑀧𑁆𑀧𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀸𑀦𑀺𑀧𑀺 ‘‘𑀢𑀤𑀪𑀺𑀦𑀺𑀩𑁆𑀩𑀢𑁆𑀢𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺 𑀓𑀸𑀭𑀡𑀓𑀸𑀭𑀡𑁂𑀧𑀺 𑀓𑀸𑀭𑀡𑀽𑀧𑀘𑀸𑀭𑀢𑁄𑀢𑀺 𑀆𑀳 ‘‘𑀢𑀧𑁆𑀧𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀸𑀦𑀺 𑀲𑁂𑀲𑀗𑁆𑀕𑀸𑀦𑀻’’𑀢𑀺. 𑀢𑁂𑀦𑀸𑀳 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑁆𑀲𑀸’’𑀢𑀺𑀆𑀤𑀺. 𑀬𑀣𑀸 𑀳𑀺 𑀲𑀫𑁆𑀫𑀸𑀤𑀲𑁆𑀲𑀦𑀁 ¶ 𑀲𑀫𑁆𑀫𑀸𑀯𑀺𑀢𑀓𑁆𑀓𑀦𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀏𑀯𑀁 𑀲𑀫𑁆𑀫𑀸𑀯𑀺𑀢𑀓𑁆𑀓𑀦𑀁 𑀲𑀫𑁆𑀫𑀸𑀧𑀭𑀺𑀕𑁆𑀕𑀳𑀲𑁆𑀲 𑀲𑀫𑁆𑀫𑀸𑀧𑀭𑀺𑀕𑁆𑀕𑀳𑁄 𑀲𑀫𑁆𑀫𑀸𑀲𑀫𑀼𑀝𑁆𑀞𑀸𑀦𑀲𑁆𑀲, 𑀲𑀫𑁆𑀫𑀸𑀲𑀫𑀼𑀝𑁆𑀞𑀸𑀦𑀁 𑀲𑀫𑁆𑀫𑀸𑀯𑁄𑀤𑀸𑀦𑀲𑁆𑀲, 𑀲𑀫𑁆𑀫𑀸𑀯𑁄𑀤𑀸𑀦𑀁 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲, 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀉𑀧𑀝𑁆𑀞𑀸𑀦𑀲𑁆𑀲, 𑀲𑀫𑁆𑀫𑀸𑀉𑀧𑀝𑁆𑀞𑀸𑀦𑀁 𑀲𑀫𑁆𑀫𑀸𑀥𑀸𑀦𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄, 𑀢𑀲𑁆𑀫𑀸 ‘‘𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀧𑀘𑁆𑀙𑀺𑀫𑀲𑁆𑀲 𑀧𑀘𑁆𑀙𑀺𑀫𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀯𑀺𑀲𑁂𑀲𑀧𑀘𑁆𑀘𑀬𑀪𑀸𑀯𑀤𑀲𑁆𑀲𑀦𑀢𑁆𑀣𑁂𑀦 𑀓𑀫𑁂𑀦 𑀏𑀢𑀸𑀦𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀺 𑀅𑀗𑁆𑀕𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀤𑀲𑁆𑀲𑀺𑀢𑀸𑀦𑀺.

𑀪𑀸𑀯𑀦𑀸𑀦𑀬𑁄𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀬𑀼𑀕𑀦𑀤𑁆𑀥𑀪𑀸𑀯𑁂𑀦 𑀧𑀯𑀢𑁆𑀢𑁄 𑀪𑀸𑀯𑀦𑀸𑀯𑀺𑀥𑀺. 𑀅𑀬𑀜𑁆𑀳𑀺 𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑁂 𑀪𑀸𑀯𑀦𑀸𑀯𑀺𑀥𑀺. 𑀢𑀲𑁆𑀲 𑀧𑀦 𑀧𑀼𑀩𑁆𑀩𑀪𑀸𑀕𑁂 𑀪𑀸𑀯𑀦𑀸𑀦𑀬𑁄 𑀓𑀲𑁆𑀲𑀘𑀺 𑀲𑀫𑀣𑀧𑀼𑀩𑁆𑀩𑀗𑁆𑀕𑀫𑁄 𑀳𑁄𑀢𑀺 ¶ , 𑀓𑀲𑁆𑀲𑀘𑀺 𑀯𑀺𑀧𑀲𑁆𑀲𑀦𑀸𑀧𑀼𑀩𑁆𑀩𑀗𑁆𑀕𑀫𑁄𑀢𑀺. 𑀢𑀁 𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀓𑁄𑀘𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀧𑀞𑀫𑁄 𑀲𑀫𑀣𑀬𑀸𑀦𑀺𑀓𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑁄, 𑀤𑀼𑀢𑀺𑀬𑁄 𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑀲𑁆𑀲. 𑀢𑁂𑀦𑀸𑀳 ‘‘𑀇𑀥𑁂𑀓𑀘𑁆𑀘𑁄’’𑀢𑀺𑀆𑀤𑀺. 𑀢𑀦𑁆𑀢𑀺 𑀲𑀫𑀣𑀁 𑀲𑀫𑀸𑀥𑀺𑀁, 𑀛𑀸𑀦𑀥𑀫𑁆𑀫𑁂𑀢𑀺 𑀯𑀸 𑀅𑀢𑁆𑀣𑁄. 𑀢𑀁𑀲𑀫𑁆𑀧𑀬𑀼𑀢𑁆𑀢𑁂𑀢𑀺 𑀲𑀫𑀸𑀥𑀺𑀲𑀫𑁆𑀧𑀬𑀼𑀢𑁆𑀢𑁂, 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑁂 𑀯𑀸 𑀥𑀫𑁆𑀫𑁂. 𑀅𑀬𑀜𑁆𑀘 𑀦𑀬𑁄 𑀬𑁂𑀪𑀼𑀬𑁆𑀬𑁂𑀦 𑀲𑀫𑀣𑀬𑀸𑀦𑀺𑀓𑀸 𑀅𑀭𑀽𑀧𑀫𑀼𑀔𑁂𑀦, 𑀢𑀢𑁆𑀣𑀸𑀧𑀺 𑀛𑀸𑀦𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀁 𑀓𑀭𑁄𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑁄. 𑀯𑀺𑀧𑀲𑁆𑀲𑀦𑀁 𑀪𑀸𑀯𑀬𑀢𑁄𑀢𑀺 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀁 𑀆𑀭𑀪𑀺𑀢𑁆𑀯𑀸 𑀬𑀣𑀸𑀥𑀺𑀕𑀢𑀁 𑀢𑀭𑀼𑀡𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑀲𑁆𑀲. 𑀫𑀕𑁆𑀕𑁄 𑀲𑀜𑁆𑀚𑀸𑀬𑀢𑀻𑀢𑀺 𑀧𑀼𑀩𑁆𑀩𑀪𑀸𑀕𑀺𑀬𑁄 𑀮𑁄𑀓𑀺𑀬𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀆𑀲𑁂𑀯𑀢𑀺 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦. 𑀪𑀸𑀯𑁂𑀢𑀺 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀯𑀲𑁂𑀦. 𑀩𑀳𑀼𑀮𑀻𑀓𑀭𑁄𑀢𑀺 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦. 𑀆𑀲𑁂𑀯𑀢𑀺 𑀯𑀸 𑀪𑀬𑀢𑀽𑀧𑀝𑁆𑀞𑀸𑀦𑀜𑀸𑀡𑀯𑀲𑁂𑀦. 𑀩𑀳𑀼𑀮𑀻𑀓𑀭𑁄𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀯𑀲𑁂𑀦. 𑀲𑀁𑀬𑁄𑀚𑀦𑀸𑀦𑀺 𑀧𑀳𑀻𑀬𑀦𑁆𑀢𑀺, 𑀅𑀦𑀼𑀲𑀬𑀸 𑀩𑁆𑀬𑀦𑁆𑀢𑀻 𑀳𑁄𑀦𑁆𑀢𑀺 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸.

𑀲𑀫𑀣𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀉𑀧𑀘𑀸𑀭𑀲𑀫𑀸𑀥𑀺𑀁 𑀦𑀺𑀯𑀢𑁆𑀢𑁂𑀢𑀺, 𑀦 𑀔𑀡𑀺𑀓𑀲𑀫𑀸𑀥𑀺𑀁. 𑀦 𑀳𑀺 𑀔𑀡𑀺𑀓𑀲𑀫𑀸𑀥𑀺𑀁 𑀯𑀺𑀦𑀸 𑀯𑀺𑀧𑀲𑁆𑀲𑀦𑀸 𑀲𑀫𑁆𑀪𑀯𑀢𑀺. 𑀯𑀺𑀧𑀲𑁆𑀲𑀦𑀸𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀯𑀺𑀧𑀲𑁆𑀲𑀦𑀸𑀬 𑀧𑀭𑀺𑀧𑀼𑀡𑁆𑀡𑀢𑀸𑀬 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀪𑀸𑀯𑀧𑁆𑀧𑀢𑁆𑀢𑀺𑀬𑀸. 𑀢𑀢𑁆𑀣𑀚𑀸𑀢𑀸𑀦𑀦𑁆𑀢𑀺 𑀢𑀲𑁆𑀫𑀺𑀁 𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀸𑀦𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀥𑀫𑁆𑀫𑀸𑀦𑀁. 𑀦𑀺𑀤𑁆𑀥𑀸𑀭𑀡𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀯𑀯𑀲𑁆𑀲𑀕𑁆𑀕𑀸𑀭𑀫𑁆𑀫𑀡𑀢𑁄𑀢𑀺 𑀯𑀯𑀲𑁆𑀲𑀕𑁆𑀕𑀲𑁆𑀲 𑀆𑀭𑀫𑁆𑀫𑀡𑀢𑀸𑀬. 𑀯𑀯𑀲𑁆𑀲𑀕𑁆𑀕𑁄 𑀯𑁄𑀲𑁆𑀲𑀕𑁆𑀕𑁄 𑀧𑀝𑀺𑀦𑀺𑀲𑁆𑀲𑀕𑁆𑀕𑁄𑀢𑀺 𑀘 𑀅𑀧𑀯𑀕𑁆𑀕𑁄𑀢𑀺 𑀘 𑀅𑀢𑁆𑀣𑀢𑁄 𑀏𑀓𑀁, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑀲𑁆𑀲 𑀆𑀭𑀫𑁆𑀫𑀡𑀓𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀸𑀢𑀺 𑀫𑀕𑁆𑀕𑀲𑀫𑁆𑀫𑀸𑀲𑀫𑀸𑀥𑀺𑀫𑀸𑀳. 𑀅𑀭𑀺𑀬𑀫𑀕𑁆𑀕𑁄 𑀳𑀺 𑀏𑀓𑀦𑁆𑀢 𑀲𑀫𑀸𑀳𑀺𑀢𑁄 𑀅𑀲𑀫𑀸𑀥𑀸𑀦𑀳𑁂𑀢𑀽𑀦𑀁 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑁂𑀤𑀦𑀢𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀬𑀼𑀕𑀦𑀤𑁆𑀥𑀸𑀯 ¶ 𑀳𑁄𑀦𑁆𑀢𑀺 𑀢𑀤𑀸 𑀲𑀫𑀸𑀥𑀺𑀧𑀜𑁆𑀜𑀸𑀦𑀁 𑀲𑀫𑀭𑀲𑀢𑀸𑀬 𑀇𑀘𑁆𑀙𑀺𑀢𑀩𑁆𑀩𑀢𑁄. 𑀫𑀕𑁆𑀕𑀓𑁆𑀔𑀡𑁂 𑀳𑀺 𑀦 𑀲𑀫𑀣𑀪𑀸𑀯𑀦𑀸𑀬𑀁 𑀯𑀺𑀬 𑀲𑀫𑀸𑀥𑀺, 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀬𑀁 𑀯𑀺𑀬 𑀘 𑀧𑀜𑁆𑀜𑀸 𑀓𑀺𑀘𑁆𑀘𑀢𑁄 𑀅𑀥𑀺𑀓𑀸 𑀇𑀘𑁆𑀙𑀺𑀢𑀩𑁆𑀩𑀸, 𑀲𑀫𑀭𑀲𑀢𑀸𑀬 𑀧𑀦 𑀅𑀜𑁆𑀜𑀫𑀜𑁆𑀜𑀲𑁆𑀲 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦 𑀤𑁆𑀯𑁂𑀧𑀺 𑀬𑀼𑀕𑀦𑀤𑁆𑀥𑀸 𑀯𑀺𑀬 𑀧𑀯𑀢𑁆𑀢𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀫𑀣𑀯𑀺𑀧𑀲𑁆𑀲𑀦𑀸 𑀬𑀼𑀕𑀦𑀤𑁆𑀥𑀸𑀯 𑀳𑁄𑀦𑁆𑀢𑀻’’𑀢𑀺.

𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁪. 𑀪𑀬𑀪𑁂𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪. 𑀏𑀯𑀁 ¶ 𑀫𑁂 𑀲𑀼𑀢𑀦𑁆𑀢𑀺 𑀪𑀬𑀪𑁂𑀭𑀯𑀲𑀼𑀢𑁆𑀢𑀁. 𑀓𑁄 𑀦𑀺𑀓𑁆𑀔𑁂𑀧𑁄? 𑀓𑁂𑀘𑀺 𑀢𑀸𑀯 𑀏𑀯𑀫𑀸𑀳𑀼 ‘‘𑀧𑀼𑀘𑁆𑀙𑀸𑀯𑀲𑀺𑀓𑁄 𑀦𑀺𑀓𑁆𑀔𑁂𑀧𑁄’’𑀢𑀺. 𑀤𑀼𑀯𑀺𑀥𑀸 𑀳𑀺 𑀧𑀼𑀘𑁆𑀙𑀸 𑀧𑀸𑀓𑀝𑀸𑀧𑀸𑀓𑀝𑀪𑁂𑀤𑀢𑁄. 𑀢𑀢𑁆𑀣 𑀬𑀲𑁆𑀲𑀸 𑀤𑁂𑀲𑀦𑀸𑀬 𑀦𑀺𑀫𑀺𑀢𑁆𑀢𑀪𑀽𑀢𑁄 𑀜𑀸𑀢𑀼𑀁 𑀇𑀘𑁆𑀙𑀺𑀢𑁄 𑀅𑀢𑁆𑀣𑁄 𑀓𑀺𑀁-𑀲𑀤𑁆𑀤𑀧𑀼𑀩𑁆𑀩𑀓𑁂𑀦 𑀧𑀓𑀸𑀲𑀻𑀬𑀢𑀺, 𑀲𑀸 𑀧𑀸𑀓𑀝𑀸 𑀧𑀼𑀘𑁆𑀙𑀸 𑀬𑀣𑀸 ‘‘𑀓𑀺𑀁𑀲𑀽𑀥 𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞’’𑀦𑁆𑀢𑀺 𑀏𑀯𑀫𑀸𑀤𑀺 (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁮𑁩). 𑀬𑀲𑁆𑀲𑀸 𑀧𑀦 𑀤𑁂𑀲𑀦𑀸𑀬 𑀦𑀺𑀫𑀺𑀢𑁆𑀢𑀪𑀽𑀢𑁄 𑀜𑀸𑀢𑀼𑀁 𑀇𑀘𑁆𑀙𑀺𑀢𑁄 𑀅𑀢𑁆𑀣𑁄 𑀓𑀺𑀁-𑀲𑀤𑁆𑀤𑀭𑀳𑀺𑀢𑁂𑀦 𑀓𑁂𑀯𑀮𑁂𑀦𑁂𑀯 𑀲𑀤𑁆𑀤𑀧𑀬𑁄𑀕𑁂𑀦 𑀧𑀓𑀸𑀲𑀻𑀬𑀢𑀺, 𑀲𑀸 𑀅𑀧𑀸𑀓𑀝𑀸 𑀧𑀼𑀘𑁆𑀙𑀸. 𑀜𑀸𑀢𑀼𑀁 𑀇𑀘𑁆𑀙𑀺𑀢𑁄 𑀳𑀺 𑀅𑀢𑁆𑀣𑁄 ‘‘𑀧𑀜𑁆𑀳𑀸, 𑀧𑀼𑀘𑁆𑀙𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸𑀬𑁂𑀯 𑀇𑀥 ‘‘𑀬𑁂 𑀫𑁂 𑀪𑁄 𑀕𑁄𑀢𑀫𑀸’’𑀢𑀺𑀆𑀤𑀺𑀓𑀸 𑀅𑀧𑀸𑀓𑀝𑀸𑀢𑀺 ‘‘𑀧𑀼𑀘𑁆𑀙𑀸𑀯𑀲𑀺𑀓𑁄 𑀦𑀺𑀓𑁆𑀔𑁂𑀧𑁄’’𑀢𑀺. 𑀢𑀬𑀺𑀤𑀁 𑀅𑀓𑀸𑀭𑀡𑀁, 𑀬𑀲𑁆𑀫𑀸 𑀲𑁄 𑀩𑁆𑀭𑀸𑀳𑁆𑀫𑀡𑁄 ‘‘𑀬𑁂𑀫𑁂 𑀪𑁄 𑀕𑁄𑀢𑀫𑀸’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀦 𑀢𑀢𑁆𑀣 𑀓𑀗𑁆𑀔𑀻 𑀯𑀺𑀘𑀺𑀓𑀺𑀘𑁆𑀙𑀻 𑀲𑀁𑀲𑀬𑀫𑀸𑀧𑀦𑁆𑀦𑁄 𑀅𑀯𑁄𑀘, 𑀅𑀣 𑀔𑁄 𑀅𑀢𑁆𑀢𑀦𑀸 𑀬𑀣𑀸𑀦𑀺𑀘𑁆𑀙𑀺𑀢𑀫𑀢𑁆𑀣𑀁 𑀪𑀕𑀯𑀢𑀺 𑀧𑀲𑀸𑀤𑀪𑀸𑀯𑀩𑀳𑀼𑀫𑀸𑀦𑀁 𑀧𑀯𑁂𑀤𑁂𑀦𑁆𑀢𑁄 𑀓𑀣𑁂𑀲𑀺. 𑀢𑁂𑀦𑀸𑀳 ‘‘𑀪𑀕𑀯𑀢𑀺 𑀧𑀲𑀸𑀤𑀁 𑀅𑀮𑀢𑁆𑀣𑀸’’𑀢𑀺𑀆𑀤𑀺 (𑀫. 𑀦𑀺. 𑀅𑀝𑁆𑀞. 𑁧.𑁩𑁪). 𑀯𑀺𑀳𑀸𑀭𑁂𑀢𑀺 𑀯𑀺𑀳𑀸𑀭𑀓𑁂 𑀦𑀺𑀯𑀸𑀲𑁂. 𑀅𑀯𑀺𑀘𑁆𑀙𑀺𑀦𑁆𑀦𑁂𑀬𑁂𑀯𑀸𑀢𑀺 𑀧𑀯𑀢𑁆𑀢𑀫𑀸𑀦𑁂𑀬𑁂𑀯. 𑀧𑀤𑀤𑁆𑀯𑀬𑀲𑁆𑀲𑀧𑀺 𑀯𑀲𑀦𑁆𑀢𑁂 𑀏𑀯𑀸𑀢𑀺 𑀅𑀢𑁆𑀣𑁄. 𑀏𑀢𑀁 𑀧𑀼𑀭𑁄𑀳𑀺𑀢𑀝𑁆𑀞𑀸𑀦𑀁 𑀉𑀡𑁆𑀳𑀻𑀲𑀸𑀤𑀺𑀓𑀓𑀼𑀥𑀪𑀡𑁆𑀟𑁂𑀳𑀺 𑀲𑀤𑁆𑀥𑀺𑀁 𑀮𑀤𑁆𑀥𑀁, 𑀢𑀣𑀸 𑀘 ‘‘𑀅𑀲𑁆𑀲 𑀭𑀜𑁆𑀜𑀸 𑀤𑀺𑀦𑁆𑀦’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑁂𑀦𑀸𑀳 ‘‘𑀢𑀁 𑀢𑀲𑁆𑀲 𑀭𑀜𑁆𑀜𑀸 𑀤𑀺𑀦𑁆𑀦’’𑀦𑁆𑀢𑀺. 𑀩𑁆𑀭𑀳𑁆𑀫𑀦𑁆𑀢𑀺 𑀯𑁂𑀤𑀁. 𑀲𑁄 𑀧𑀦 𑀫𑀦𑁆𑀢𑀩𑁆𑀭𑀳𑁆𑀫𑀓𑀧𑁆𑀧𑀯𑀲𑁂𑀦 𑀢𑀺𑀯𑀺𑀥𑁄. 𑀢𑀢𑁆𑀣 𑀫𑀦𑁆𑀢𑀸 𑀧𑀥𑀸𑀦𑀁 𑀫𑀽𑀮𑀪𑀸𑀯𑀢𑁄, 𑀬𑁂 𑀅𑀝𑁆𑀞𑀓𑀸𑀤𑀻𑀳𑀺 𑀧𑀯𑀼𑀢𑁆𑀢𑀸, 𑀇𑀢𑀭𑁂 𑀢𑀦𑁆𑀦𑀺𑀲𑁆𑀲𑀬𑁂𑀦 𑀚𑀸𑀢𑀸, 𑀢𑁂𑀦 𑀢𑁂𑀲𑀁𑀬𑁂𑀯 𑀕𑀳𑀡𑀁 ‘‘𑀫𑀦𑁆𑀢𑁂 𑀲𑀚𑁆𑀛𑀸𑀬𑀢𑀻’’𑀢𑀺 ¶ . 𑀢𑁂 𑀳𑀺 𑀕𑀼𑀢𑁆𑀢𑀪𑀸𑀲𑀺𑀢𑀩𑁆𑀩𑀢𑀸𑀬 ‘‘𑀫𑀦𑁆𑀢𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀤𑀫𑁂𑀯 𑀳𑀻𑀢𑀺 𑀅𑀯𑀥𑀸𑀭𑀡𑁂𑀦 ‘‘𑀩𑁆𑀭𑀳𑁆𑀫𑀢𑁄 𑀚𑀸𑀢𑀸’’𑀢𑀺𑀆𑀤𑀺𑀓𑀁 𑀦𑀺𑀭𑀼𑀢𑁆𑀢𑀺𑀁 𑀧𑀝𑀺𑀓𑁆𑀔𑀺𑀧𑀢𑀺.

𑀬𑁂𑀦 𑀯𑀸 𑀓𑀸𑀭𑀡𑁂𑀦𑀸𑀢𑀺 (𑀲𑀸𑀭𑀢𑁆𑀣. 𑀝𑀻. 𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸𑀬𑀁 𑁨; 𑀲𑀁. 𑀦𑀺. 𑀝𑀻. 𑁧.𑁧.𑁧; 𑀅. 𑀦𑀺. 𑀝𑀻. 𑁨.𑁨.𑁧𑁬) 𑀳𑁂𑀢𑀼𑀫𑁆𑀳𑀺 𑀇𑀤𑀁 𑀓𑀭𑀡𑀯𑀘𑀦𑀁. 𑀳𑁂𑀢𑀼𑀅𑀢𑁆𑀣𑁄 𑀳𑀺 𑀓𑀺𑀭𑀺𑀬𑀸𑀓𑀸𑀭𑀡𑀁, 𑀦 𑀓𑀭𑀡𑀁 𑀯𑀺𑀬 𑀓𑀺𑀭𑀺𑀬𑀢𑁆𑀣𑁄, 𑀢𑀲𑁆𑀫𑀸 𑀦𑀸𑀦𑀧𑁆𑀧𑀓𑀸𑀭𑀕𑀼𑀡𑀯𑀺𑀲𑁂𑀲𑀸𑀥𑀺𑀕𑀫𑀢𑁆𑀣𑀸 𑀇𑀥 𑀉𑀧𑀲𑀗𑁆𑀓𑀫𑀦𑀓𑀺𑀭𑀺𑀬𑀸𑀢𑀺 ‘‘𑀅𑀦𑁆𑀦𑁂𑀦 𑀯𑀲𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀳𑁂𑀢𑀼𑀅𑀢𑁆𑀣𑀫𑁂𑀯𑁂𑀢𑀁 𑀓𑀭𑀡𑀯𑀘𑀦𑀁 𑀬𑀼𑀢𑁆𑀢𑀁, 𑀦 𑀓𑀭𑀡𑀢𑁆𑀣𑀁 𑀢𑀲𑁆𑀲 𑀅𑀬𑀼𑀚𑁆𑀚𑀫𑀸𑀦𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀬𑁂𑀦 𑀯𑀸 𑀓𑀸𑀭𑀡𑁂𑀦𑀸’’𑀢𑀺𑀆𑀤𑀺. 𑀪𑀕𑀯𑀢𑁄 𑀲𑀢𑀢𑀧𑁆𑀧𑀯𑀢𑁆𑀢𑀦𑀺𑀭𑀢𑀺𑀲𑀬𑀲𑀸𑀤𑀼𑀯𑀺𑀧𑀼𑀮𑀸𑀫𑀢𑀭𑀲𑀲𑀤𑁆𑀥𑀫𑁆𑀫𑀨𑀮𑀢𑀸𑀬 𑀲𑀸𑀤𑀼𑀨𑀮𑀦𑀺𑀘𑁆𑀘𑀨𑀮𑀺𑀢𑀫𑀳𑀸𑀭𑀼𑀓𑁆𑀔𑁂𑀦 𑀪𑀕𑀯𑀸 𑀉𑀧𑀫𑀺𑀢𑁄, 𑀲𑀸𑀤𑀼𑀨𑀮𑀽𑀧𑀪𑁄𑀕𑀸𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑁂𑀦𑁂𑀯 𑀳𑀺 𑀫𑀳𑀸𑀭𑀼𑀓𑁆𑀔𑀲𑁆𑀲 𑀲𑀸𑀤𑀼𑀨𑀮𑀢𑀸 𑀕𑀳𑀺𑀢𑀸𑀢𑀺.

𑀉𑀧𑀲𑀗𑁆𑀓𑀫𑀻𑀢𑀺 ¶ 𑀉𑀧𑀲𑀗𑁆𑀓𑀦𑁆𑀢𑁄. 𑀲𑀫𑁆𑀧𑀢𑁆𑀢𑀼𑀓𑀸𑀫𑀢𑀸𑀬 𑀳𑀺 𑀓𑀺𑀜𑁆𑀘𑀺 𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀢𑀁𑀢𑀁𑀧𑀤𑁂𑀲𑀸𑀢𑀺𑀓𑁆𑀓𑀫𑀦𑁂𑀦 𑀉𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀦𑁆𑀢𑁄𑀢𑀺 𑀯𑀸 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺. 𑀢𑁂𑀦𑀸𑀳 ‘‘𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺, 𑀉𑀧𑀕𑀢𑁄𑀢𑀺 𑀅𑀢𑁆𑀣𑁄. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀉𑀧𑀲𑀗𑁆𑀓𑀫𑀦𑀧𑀭𑀺𑀬𑁄𑀲𑀸𑀦𑀤𑀻𑀧𑀦’’𑀦𑁆𑀢𑀺. 𑀢𑀢𑁄𑀢𑀺 𑀬𑀁 𑀞𑀸𑀦𑀁 𑀧𑀢𑁆𑀢𑁄 ‘‘𑀉𑀧𑀲𑀗𑁆𑀓𑀫𑀻’’𑀢𑀺 𑀯𑀼𑀢𑁆𑀢𑁄, 𑀢𑀢𑁄 𑀉𑀧𑀕𑀢𑀝𑁆𑀞𑀸𑀦𑀢𑁄. 𑀬𑀣𑀸 𑀔𑀫𑀦𑀻𑀬𑀸𑀤𑀻𑀦𑀺 𑀧𑀼𑀘𑁆𑀙𑀦𑁆𑀢𑁄𑀢𑀺 (𑀲𑀁. 𑀦𑀺. 𑀝𑀻. 𑁧.𑁧.𑁧𑁧𑁨) 𑀬𑀣𑀸 𑀪𑀕𑀯𑀸 ‘‘𑀓𑀘𑁆𑀘𑀺 𑀢𑁂 𑀩𑁆𑀭𑀸𑀳𑁆𑀫𑀡 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬’’𑀦𑁆𑀢𑀺𑀆𑀤𑀺𑀦𑀸 𑀔𑀫𑀦𑀻𑀬𑀸𑀤𑀻𑀦𑀺 𑀧𑀼𑀘𑁆𑀙𑀦𑁆𑀢𑁄 𑀢𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀲𑀤𑁆𑀥𑀺𑀁 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑁄 𑀅𑀳𑁄𑀲𑀺 𑀧𑀼𑀩𑁆𑀩𑀪𑀸𑀲𑀺𑀢𑀸𑀬, 𑀢𑀤𑀦𑀼𑀓𑀭𑀡𑁂𑀦 𑀏𑀯𑀁 𑀲𑁄𑀧𑀺 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑁄 𑀅𑀳𑁄𑀲𑀻𑀢𑀺 𑀬𑁄𑀚𑀦𑀸. 𑀢𑀁 𑀧𑀦 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑀢𑀁 𑀉𑀧𑀫𑀸𑀬 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀢𑁄𑀤𑀓𑀁 𑀯𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀫𑁆𑀫𑁄𑀤𑀺𑀢𑀦𑁆𑀢𑀺 𑀲𑀁𑀲𑀦𑁆𑀤𑀺𑀢𑀁. 𑀏𑀓𑀻𑀪𑀸𑀯𑀦𑁆𑀢𑀺 𑀲𑀫𑁆𑀫𑁄𑀤𑀦𑀓𑀺𑀭𑀺𑀬𑀸𑀬 𑀲𑀫𑀸𑀦𑀢𑀁 𑀏𑀓𑀭𑀽𑀧𑀢𑀁. 𑀔𑀫𑀦𑀻𑀬𑀦𑁆𑀢𑀺 ‘‘𑀇𑀤𑀁 𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭𑀁 𑀲𑀭𑀻𑀭𑀬𑀦𑁆𑀢𑀁 𑀔𑀡𑀪𑀗𑁆𑀕𑀼𑀭𑀢𑀸𑀬 𑀲𑀪𑀸𑀯𑀢𑁄 𑀤𑀼𑀲𑁆𑀲𑀳𑀁, 𑀓𑀘𑁆𑀘𑀺 𑀔𑀫𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬’’𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀬𑀸𑀧𑀦𑀻𑀬𑀦𑁆𑀢𑀺 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀓𑀁 𑀘𑀺𑀭𑀧𑁆𑀧𑀩𑀦𑁆𑀥𑀲𑀗𑁆𑀔𑀸𑀢𑀸𑀬 𑀬𑀸𑀧𑀦𑀸𑀬 𑀓𑀘𑁆𑀘𑀺 𑀬𑀸𑀧𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀁. 𑀲𑀻𑀲𑀭𑁄𑀕𑀸𑀤𑀺𑀆𑀩𑀸𑀥𑀸𑀪𑀸𑀯𑁂𑀦 𑀓𑀘𑁆𑀘𑀺 𑀅𑀧𑁆𑀧𑀸𑀩𑀸𑀥𑀁. 𑀤𑀼𑀓𑁆𑀔𑀚𑀻𑀯𑀺𑀓𑀸𑀪𑀸𑀯𑁂𑀦 𑀓𑀘𑁆𑀘𑀺 𑀅𑀧𑁆𑀧𑀸𑀢𑀗𑁆𑀓𑀁. 𑀢𑀁𑀢𑀁𑀓𑀺𑀘𑁆𑀘𑀓𑀭𑀡𑁂 𑀉𑀝𑁆𑀞𑀸𑀦𑀲𑀼𑀔𑀢𑀸𑀬 𑀓𑀘𑁆𑀘𑀺 𑀮𑀳𑀼𑀝𑁆𑀞𑀸𑀦𑀁. 𑀢𑀤𑀦𑀭𑀽𑀧𑀩𑀮𑀬𑁄𑀕𑀢𑁄 𑀓𑀘𑁆𑀘𑀺 𑀩𑀮𑀁. 𑀲𑀼𑀔𑀯𑀺𑀳𑀸𑀭𑀲𑀩𑁆𑀪𑀸𑀯𑁂𑀦 𑀓𑀘𑁆𑀘𑀺 𑀨𑀸𑀲𑀼𑀯𑀺𑀳𑀸𑀭𑁄 𑀅𑀢𑁆𑀣𑀻𑀢𑀺 𑀢𑀢𑁆𑀣 𑀢𑀢𑁆𑀣 𑀓𑀘𑁆𑀘𑀺-𑀲𑀤𑁆𑀤𑀁 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀩𑀮𑀯𑀧𑁆𑀧𑀢𑁆𑀢𑀸 ¶ 𑀧𑀻𑀢𑀺 𑀧𑀻𑀢𑀺𑀬𑁂𑀯. 𑀢𑀭𑀼𑀡𑀧𑀻𑀢𑀺 𑀧𑀸𑀫𑁄𑀚𑁆𑀚𑀁. 𑀲𑀫𑁆𑀫𑁄𑀤𑀦𑀁 𑀚𑀦𑁂𑀢𑀺 𑀓𑀭𑁄𑀢𑀻𑀢𑀺 𑀲𑀫𑁆𑀫𑁄𑀤𑀦𑀺𑀓𑀁, 𑀢𑀤𑁂𑀯 𑀲𑀫𑁆𑀫𑁄𑀤𑀦𑀻𑀬𑀦𑁆𑀢𑀺 𑀆𑀳 ‘‘𑀲𑀫𑁆𑀫𑁄𑀤𑀚𑀦𑀦𑀢𑁄’’𑀢𑀺. 𑀲𑀫𑁆𑀫𑁄𑀤𑀺𑀢𑀩𑁆𑀩𑀢𑁄 𑀲𑀫𑁆𑀫𑁄𑀤𑀦𑀻𑀬𑀦𑁆𑀢𑀺 𑀇𑀫𑀁 𑀧𑀦 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑁆𑀫𑁄𑀤𑀺𑀢𑀼𑀁 𑀬𑀼𑀢𑁆𑀢𑀪𑀸𑀯𑀢𑁄’’𑀢𑀺 𑀆𑀳. 𑀲𑀭𑀺𑀢𑀩𑁆𑀩𑀪𑀸𑀯𑀢𑁄𑀢𑀺 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀪𑀸𑀯𑀢𑁄. ‘‘𑀲𑀭𑀡𑀻𑀬’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀤𑀻𑀖𑀁 𑀓𑀢𑁆𑀯𑀸 ‘‘𑀲𑀸𑀭𑀡𑀻𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀼𑀬𑁆𑀬𑀫𑀸𑀦𑀲𑀼𑀔𑀢𑁄𑀢𑀺 𑀆𑀧𑀸𑀣𑀫𑀥𑀼𑀭𑀢𑀁 𑀆𑀳, 𑀅𑀦𑀼𑀲𑁆𑀲𑀭𑀺𑀬𑀫𑀸𑀦𑀲𑀼𑀔𑀢𑁄𑀢𑀺 𑀯𑀺𑀫𑀤𑁆𑀤𑀭𑀫𑀡𑀻𑀬𑀢𑀁. 𑀩𑁆𑀬𑀜𑁆𑀚𑀦𑀧𑀭𑀺𑀲𑀼𑀤𑁆𑀥𑀢𑀸𑀬𑀸𑀢𑀺 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀸𑀯𑁂𑀦 𑀢𑀲𑁆𑀲𑀸 𑀓𑀣𑀸𑀬 𑀯𑀘𑀦𑀘𑀸𑀢𑀼𑀭𑀺𑀬𑀫𑀸𑀳, 𑀅𑀢𑁆𑀣𑀧𑀭𑀺𑀲𑀼𑀤𑁆𑀥𑀢𑀸𑀬𑀸𑀢𑀺 𑀅𑀢𑁆𑀣𑀲𑁆𑀲 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑀁. 𑀅𑀦𑁂𑀓𑁂𑀳𑀺 𑀧𑀭𑀺𑀬𑀸𑀬𑁂𑀳𑀻𑀢𑀺 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺.

𑀅𑀪𑀺𑀤𑀽𑀭𑀅𑀘𑁆𑀘𑀸𑀲𑀦𑁆𑀦𑀧𑀝𑀺𑀓𑁆𑀔𑁂𑀧𑁂𑀦 𑀦𑀸𑀢𑀺𑀤𑀽𑀭𑀦𑀸𑀘𑁆𑀘𑀸𑀲𑀦𑁆𑀦𑀁 𑀦𑀸𑀫 𑀕𑀳𑀺𑀢𑀁, 𑀢𑀁 𑀧𑀦 𑀅𑀯𑀓𑀁𑀲𑀢𑁄 𑀉𑀪𑀺𑀦𑁆𑀦𑀁 𑀧𑀲𑀸𑀭𑀺𑀢𑀳𑀢𑁆𑀣𑀲𑀗𑁆𑀖𑀝𑁆𑀝𑀦𑁂𑀦 𑀤𑀝𑁆𑀞𑀩𑁆𑀩𑀁. 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸𑀢𑀺 𑀕𑀻𑀯𑀁 𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀧𑀲𑀸𑀭𑁂𑀢𑁆𑀯𑀸.

𑀬𑁂𑀫𑁂𑀢𑀺 𑀏𑀢𑁆𑀣 𑀲𑀦𑁆𑀥𑀺𑀯𑀲𑁂𑀦 𑀇𑀓𑀸𑀭𑀮𑁄𑀧𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂 𑀇𑀫𑁂’’𑀢𑀺𑀆𑀤𑀺𑀫𑀸𑀳. 𑀉𑀘𑁆𑀘𑀸𑀓𑀼𑀮𑀻𑀦𑀢𑀸𑀬 𑀚𑀸𑀢𑀺𑀯𑀲𑁂𑀦 𑀅𑀪𑀺𑀚𑀸𑀢𑀸 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀉𑀘𑁆𑀘𑀸𑀓𑀼𑀮𑀧𑁆𑀧𑀲𑀼𑀢𑀸’’𑀢𑀺. 𑀆𑀘𑀸𑀭𑀲𑀫𑁆𑀧𑀢𑁆𑀢𑀺𑀬𑀸 ¶ 𑀅𑀪𑀺𑀚𑀸𑀢𑀸 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀆𑀘𑀸𑀭𑀲𑀫𑁆𑀧𑀦𑁆𑀦𑀸’’𑀢𑀺. 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀧𑀸𑀓𑀝𑁂𑀧𑀺 𑀓𑀼𑀮𑁂. 𑀢𑁂𑀦 𑀩𑁆𑀭𑀸𑀳𑁆𑀫𑀡𑁂𑀦 𑀅𑀥𑀺𑀧𑁆𑀧𑁂𑀢𑀸 𑀪𑀺𑀓𑁆𑀔𑀽𑀲𑀼 𑀤𑀼𑀯𑀺𑀥𑀸𑀧𑀺 𑀲𑀁𑀯𑀺𑀚𑁆𑀚𑀦𑁆𑀢𑀻𑀢𑀺 𑀆𑀳 ‘‘𑀇𑀥 𑀧𑀦 𑀤𑁆𑀯𑀻𑀳𑀺𑀧𑀺 𑀓𑀸𑀭𑀡𑁂𑀳𑀺 𑀓𑀼𑀮𑀧𑀼𑀢𑁆𑀢𑀸𑀬𑁂𑀯𑀸’’𑀢𑀺.

𑀲𑀤𑁆𑀥𑀸𑀢𑀺 𑀇𑀤𑀁 𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀤𑁆𑀥𑀸𑀬𑀸’’𑀢𑀺, 𑀲𑀤𑁆𑀥𑀸𑀢𑀺 𑀯𑀸 𑀲𑀤𑁆𑀤𑀳𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀧𑀸𑀴𑀺𑀬𑀁 𑀬-𑀓𑀸𑀭𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀕𑀸𑀭𑀢𑁄𑀢𑀺 𑀅𑀕𑀸𑀭𑀯𑀸𑀲𑀢𑁄, 𑀉𑀢𑁆𑀢𑀭𑀧𑀤𑀮𑁄𑀧𑁂𑀦, 𑀦𑀺𑀲𑁆𑀲𑀬𑀽𑀧𑀘𑀸𑀭𑁂𑀦 𑀯𑀸 𑀅𑀬𑀁 𑀦𑀺𑀤𑁆𑀤𑁂𑀲𑁄𑀢𑀺. 𑀪𑀺𑀓𑁆𑀔𑀦𑀲𑀻𑀮𑀢𑀸𑀤𑀺𑀮𑀓𑁆𑀔𑀡𑁄 𑀪𑀺𑀓𑁆𑀔𑀼𑀪𑀸𑀯𑁄 𑀧𑀩𑁆𑀩𑀚𑁆𑀚𑀸𑀲𑀳𑀘𑀭𑀺𑀢𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀪𑀸𑀯𑀁 𑀅𑀦𑁆𑀯𑀸𑀘𑀺𑀦𑀦𑁆𑀢𑁄𑀢𑀺 𑀆𑀳 ‘‘𑀧𑀩𑁆𑀩𑀚𑁆𑀚𑀁 𑀪𑀺𑀓𑁆𑀔𑀼𑀪𑀸𑀯𑀜𑁆𑀘𑀸’’𑀢𑀺. 𑀓𑀫𑁆𑀫𑀯𑀸𑀘𑀸𑀮𑀓𑁆𑀔𑀡𑁂 𑀧𑀦 𑀪𑀺𑀓𑁆𑀔𑀼𑀪𑀸𑀯𑁂 𑀅𑀥𑀺𑀧𑁆𑀧𑁂𑀢𑁂 𑀲𑀫𑀼𑀘𑁆𑀘𑀬𑀢𑁆𑀣𑁄 𑀘-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀅𑀦𑀕𑀸𑀭𑀲𑁆𑀲 𑀪𑀸𑀯𑁄𑀢𑀺 𑀏𑀢𑁂𑀦 𑀧𑀩𑁆𑀩𑀚𑁆𑀚𑀸𑀦𑀺𑀲𑁆𑀲𑀺𑀢𑁄 𑀲𑀼𑀯𑀺𑀲𑀼𑀤𑁆𑀥𑁄 𑀲𑀻𑀮𑀸𑀘𑀸𑀭𑀕𑀼𑀡𑀯𑀺𑀲𑁂𑀲𑁄 𑀕𑀳𑀺𑀢𑁄, 𑀓𑀲𑀺𑀕𑁄𑀭𑀓𑁆𑀔𑀸𑀤𑀺𑀓𑀫𑁆𑀫𑀧𑀝𑀺𑀓𑁆𑀔𑁂𑀧𑁄 𑀇𑀥 𑀅𑀦𑀼𑀧𑁆𑀧𑀸𑀤𑀸𑀤𑀻𑀳𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀕𑁆𑀕𑀳𑀡𑁂 𑀧𑀦 𑀲𑀭𑀡𑀕𑀫𑀦𑀸𑀤𑀺𑀯𑀲𑁂𑀦 𑀧𑀩𑁆𑀩𑀚𑁆𑀚𑀸𑀬, 𑀲𑀭𑀡𑀕𑀫𑀦𑀸𑀤𑀺𑀯𑀲𑁂𑀦 𑀉𑀧𑀲𑀫𑁆𑀧𑀤𑀸𑀬 𑀘 𑀅𑀦𑁂𑀓𑀪𑁂𑀤𑀢𑁆𑀢𑀸 𑀆𑀳 ‘‘𑀲𑀩𑁆𑀩𑀣𑀸𑀧𑀻’’𑀢𑀺, 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀼𑀭𑀢𑁄𑀕𑀸𑀫𑀺𑀢𑀸 𑀧𑀝𑀺𑀧𑀢𑁆𑀢𑀺𑀕𑀫𑀦𑁂𑀦, 𑀦 𑀓𑀸𑀬𑀕𑀫𑀦𑁂𑀦𑀸𑀢𑀺 𑀆𑀳 ‘‘𑀦𑀸𑀬𑀓𑁄’’𑀢𑀺 ¶ , 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀦𑀺𑀩𑁆𑀩𑀸𑀦𑀲𑀫𑁆𑀧𑀸𑀧𑀓𑁄𑀢𑀺 𑀅𑀢𑁆𑀣𑁄. 𑀳𑀺𑀢𑀓𑀺𑀭𑀺𑀬𑀸𑀬𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀳𑀺𑀢𑀘𑀭𑀺𑀬𑀸𑀬. 𑀕𑀸𑀳𑀡𑀁 𑀅𑀥𑀺𑀲𑀻𑀮𑀸𑀤𑀻𑀲𑀼 𑀅𑀘𑁆𑀘𑀦𑁆𑀢𑀸𑀬 𑀦𑀺𑀬𑁄𑀚𑀦𑀁, 𑀦 𑀓𑀣𑀦𑀫𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀕𑀸𑀳𑁂𑀢𑀸’’𑀢𑀺 𑀯𑀢𑁆𑀯𑀸 ‘‘𑀲𑀺𑀓𑁆𑀔𑀸𑀧𑁂𑀢𑀸’’𑀢𑀺 𑀆𑀳. 𑀤𑀺𑀝𑁆𑀞𑀸𑀦𑀼𑀕𑀢𑀺𑀦𑁆𑀢𑀺 𑀤𑀺𑀝𑁆𑀞𑀺𑀬𑀸 𑀅𑀦𑀼𑀕𑀫𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀲𑁆𑀲𑀦𑀸𑀦𑀼𑀕𑀢𑀺’’𑀦𑁆𑀢𑀺 𑀯𑀢𑁆𑀯𑀸 𑀲𑀺𑀓𑁆𑀔𑀸𑀢𑁆𑀢𑀬𑀲𑀗𑁆𑀕𑀳𑀁 𑀪𑀕𑀯𑀢𑁄 𑀲𑀸𑀲𑀦𑀁 𑀢𑁂𑀦 𑀤𑀺𑀝𑁆𑀞𑀢𑁆𑀢𑀸 𑀤𑀺𑀝𑁆𑀞𑀺, 𑀢𑀲𑁆𑀲 𑀢𑀲𑁆𑀲𑁂𑀯 𑀔𑀫𑀦𑀯𑀲𑁂𑀦 𑀔𑀦𑁆𑀢𑀺, 𑀭𑀼𑀘𑁆𑀘𑀦𑀯𑀲𑁂𑀦 𑀭𑀼𑀘𑀺, 𑀢𑀁𑀤𑀺𑀝𑁆𑀞𑀺𑀔𑀦𑁆𑀢𑀺𑀭𑀼𑀘𑀺𑀓𑀸𑀯 𑀪𑀕𑀯𑀢𑁄 𑀲𑀸𑀯𑀓𑀸𑀢𑀺 𑀆𑀳 ‘‘𑀬𑀁𑀤𑀺𑀝𑁆𑀞𑀺𑀓𑁄’’𑀢𑀺𑀆𑀤𑀺.

𑀏𑀲 𑀓𑀺𑀭 𑀅𑀮𑀢𑁆𑀣𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀤𑁂𑀯𑀧𑀼𑀢𑁆𑀢𑁂 𑀯𑀺𑀬𑀸𑀢𑀺𑀆𑀤𑀺 𑀓𑀲𑁆𑀲𑀘𑀺 𑀧𑀸𑀭𑀺𑀚𑀼𑀜𑁆𑀜𑀲𑁆𑀲 𑀅𑀪𑀸𑀯𑀤𑀻𑀧𑀦𑀢𑁄 ‘‘𑀲𑀤𑁆𑀥𑀸𑀬𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲 𑀧𑀩𑁆𑀩𑀚𑀺𑀢𑀪𑀸𑀯𑀲𑁆𑀲 𑀧𑀸𑀓𑀝𑀻𑀓𑀭𑀡𑀁. 𑀲𑀤𑁆𑀥𑀸𑀬 𑀖𑀭𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑁆𑀯𑀸𑀢𑀺 𑀇𑀤𑀁 𑀳𑀝𑁆𑀞𑀧𑀳𑀝𑁆𑀞𑀸𑀤𑀺𑀪𑀸𑀯𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑀢𑀸𑀬 𑀲𑀦𑁆𑀢𑀼𑀝𑁆𑀞𑁂𑀢𑀺 𑀇𑀤𑀁 𑀅𑀦𑀼𑀲𑁆𑀲𑀗𑁆𑀓𑀺𑀢𑀸𑀧𑀭𑀺𑀲𑀗𑁆𑀓𑀺𑀢𑀢𑀸𑀬 𑀓𑀸𑀭𑀡𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀯𑀫𑁂𑀢𑀦𑁆𑀢𑀺𑀆𑀤𑀺𑀦𑀸 𑀆𑀫𑁂𑀟𑀺𑀢𑀯𑀘𑀦𑀁 𑀲𑀫𑁆𑀧𑀳𑀁𑀲𑀦𑀯𑀲𑁂𑀦, 𑀧𑀲𑀸𑀤𑀯𑀲𑁂𑀦 𑀯𑀸 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀏𑀯𑀁-𑀲𑀤𑁆𑀤𑁄 𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑁄 𑀅𑀩𑁆𑀪𑀦𑀼𑀫𑁄𑀤𑀦𑀢𑁆𑀣𑁄 𑀘 𑀯𑀼𑀢𑁆𑀢𑁄. 𑀫𑀫𑀦𑁆𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀦𑀺𑀧𑀸𑀢𑀧𑀤𑀁 𑀯𑀸 𑀏𑀢𑀁 ‘‘𑀫’’𑀦𑁆𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀦𑀚𑀻𑀯𑀺𑀓𑀸𑀧𑀓𑀢𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺 𑀈𑀤𑀺𑀲𑀸𑀦𑀁𑀬𑁂𑀯𑀸𑀢𑀺 𑀲𑀤𑁆𑀥𑀸𑀧𑀩𑁆𑀩𑀚𑁆𑀚𑀸𑀬 𑀯𑀺𑀪𑀸𑀯𑀺𑀢𑀅𑀦𑀪𑀺𑀚𑁆𑀛𑀸𑀮𑀼𑀆𑀤𑀺𑀲𑀪𑀸𑀯𑀸𑀦𑀁𑀬𑁂𑀯, 𑀦 𑀇𑀢𑀭𑁂𑀲𑀁 𑀅𑀪𑀺𑀚𑁆𑀛𑀸𑀮𑀼𑀲𑀪𑀸𑀯𑀸𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑀗𑁆𑀖𑀸𑀝𑀺𑀓𑀡𑁆𑀡𑁂 ¶ 𑀘𑁂𑀧𑀺 𑀫𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀕𑀳𑁂𑀢𑁆𑀯𑀸 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑁄 𑀅𑀲𑁆𑀲 𑀧𑀤𑁂 𑀧𑀤𑀁 𑀦𑀺𑀓𑁆𑀔𑀺𑀧𑀦𑁆𑀢𑁄, 𑀲𑁄 𑀘 𑀳𑁄𑀢𑀺 𑀅𑀪𑀺𑀚𑁆𑀛𑀸𑀮𑀼 𑀓𑀸𑀫𑁂𑀲𑀼 𑀢𑀺𑀩𑁆𑀩𑀲𑀸𑀭𑀸𑀕𑁄 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄 𑀫𑀼𑀝𑁆𑀞𑀲𑁆𑀲𑀢𑀺 𑀅𑀲𑀫𑁆𑀧𑀚𑀸𑀦𑁄 𑀅𑀲𑀫𑀸𑀳𑀺𑀢𑁄 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁄 𑀧𑀸𑀓𑀝𑀺𑀦𑁆𑀤𑁆𑀭𑀺𑀬𑁄, 𑀅𑀣 𑀔𑁄 𑀆𑀭𑀓𑀸𑀯 𑀫𑀫 𑀅𑀳𑀜𑁆𑀘 𑀢𑀲𑁆𑀲𑀸’’𑀢𑀺 (𑀇𑀢𑀺𑀯𑀼. 𑁯𑁨).

𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀅𑀥𑀺𑀧𑁆𑀧𑁂𑀢𑀢𑁆𑀣𑀁 𑀲𑀫𑁆𑀪𑀯𑀺𑀢𑀼𑀁 𑀲𑀸𑀥𑁂𑀢𑀼𑀁 𑀤𑀼𑀓𑁆𑀔𑀸𑀦𑀻𑀢𑀺 𑀤𑀼𑀭𑀪𑀺𑀲𑀫𑁆𑀪𑀯𑀸𑀦𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀢𑀢𑁆𑀣 𑀦𑀺𑀯𑀸𑀲𑁄𑀬𑁂𑀯 𑀤𑀼𑀓𑁆𑀔𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀪𑀯𑀺𑀢𑀼𑀁 𑀤𑀼𑀓𑁆𑀔𑀸𑀦𑀺 𑀤𑀼𑀲𑁆𑀲𑀳𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀻𑀢𑀺 𑀅𑀭𑀜𑁆𑀜𑀮𑀓𑁆𑀔𑀡𑀧𑁆𑀧𑀢𑁆𑀢𑀸𑀦𑀺 𑀯𑀦𑀲𑀡𑁆𑀟𑀸𑀦𑀺. 𑀯𑀦𑀧𑀢𑁆𑀣-𑀲𑀤𑁆𑀤𑁄 𑀳𑀺 𑀲𑀡𑁆𑀟𑀪𑀽𑀢𑁂 𑀭𑀼𑀓𑁆𑀔𑀲𑀫𑀽𑀳𑁂𑀧𑀺 𑀯𑀢𑁆𑀢𑀢𑀻𑀢𑀺 ¶ 𑀅𑀭𑀜𑁆𑀜𑀕𑁆𑀕𑀳𑀡𑀁. 𑀓𑀺𑀜𑁆𑀘𑀸𑀧𑀻𑀢𑀺 𑀅𑀦𑀼𑀚𑀸𑀦𑀦𑀲𑀫𑁆𑀪𑀸𑀯𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀓𑀺𑀁 𑀅𑀦𑀼𑀚𑀸𑀦𑀸𑀢𑀺? 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀅𑀭𑀜𑁆𑀜𑀸𑀪𑀸𑀯𑀁 ‘‘𑀕𑀸𑀫𑀢𑁄 𑀩𑀳𑀺 𑀅𑀭𑀜𑁆𑀜’’𑀦𑁆𑀢𑀺. 𑀢𑁂𑀦𑀸𑀳 ‘‘𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑀸’’𑀢𑀺𑀆𑀤𑀺. 𑀓𑀺𑀁 𑀲𑀫𑁆𑀪𑀸𑀯𑁂𑀢𑀺? 𑀆𑀭𑀜𑁆𑀜𑀓𑀗𑁆𑀕𑀦𑀺𑀧𑁆𑀨𑀸𑀤𑀓𑀢𑁆𑀢𑀁. 𑀬𑀜𑁆𑀳𑀺 𑀆𑀭𑀜𑁆𑀜𑀓𑀗𑁆𑀕𑀦𑀺𑀧𑁆𑀨𑀸𑀤𑀓𑀁, 𑀢𑀁 𑀯𑀺𑀲𑁂𑀲𑀢𑁄 ‘‘𑀅𑀭𑀜𑁆𑀜’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀬𑀁 𑀢𑀁 𑀧𑀜𑁆𑀘𑀥𑀦𑀼𑀲𑀢𑀺𑀓’’𑀦𑁆𑀢𑀺𑀆𑀤𑀺. 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸𑀢𑀺 𑀇𑀦𑁆𑀤𑀔𑀻𑀮𑀢𑁄 𑀩𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸, 𑀢𑀢𑁄 𑀩𑀳𑀺 𑀧𑀝𑁆𑀞𑀸𑀬𑀸𑀢𑀺 𑀅𑀢𑁆𑀣𑁄. 𑀩𑀳𑀺 𑀇𑀦𑁆𑀤𑀔𑀻𑀮𑀸𑀢𑀺 𑀬𑀢𑁆𑀣 𑀤𑁆𑀯𑁂 𑀢𑀻𑀡𑀺 𑀇𑀦𑁆𑀤𑀔𑀻𑀮𑀸𑀦𑀺, 𑀢𑀢𑁆𑀣 𑀩𑀳𑀺𑀤𑁆𑀥𑀸 𑀇𑀦𑁆𑀤𑀔𑀻𑀮𑀢𑁄 𑀧𑀝𑁆𑀞𑀸𑀬, 𑀬𑀢𑁆𑀣 𑀢𑀁 𑀦𑀢𑁆𑀣𑀺, 𑀢𑀢𑁆𑀣 𑀢𑀤𑀭𑀳𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬𑀸𑀢𑀺 𑀯𑀤𑀦𑁆𑀢𑀺. 𑀬𑀲𑁆𑀫𑀸 𑀩𑀳𑀺 𑀇𑀦𑁆𑀤𑀔𑀻𑀮𑀢𑁄 𑀧𑀝𑁆𑀞𑀸𑀬 𑀫𑀦𑀼𑀲𑁆𑀲𑀽𑀧𑀘𑀸𑀭𑁂 𑀪𑀬𑀪𑁂𑀭𑀯𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀇𑀥 𑀦𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀕𑀸𑀫𑀦𑁆𑀢𑀦𑁆𑀢𑀺 𑀕𑀸𑀫𑀲𑀫𑀻𑀧𑀁. 𑀅𑀦𑀼𑀧𑀘𑀸𑀭𑀝𑁆𑀞𑀸𑀦𑀦𑁆𑀢𑀺 𑀦𑀺𑀘𑁆𑀘𑀓𑀺𑀘𑁆𑀘𑀯𑀲𑁂𑀦 𑀦𑀼𑀧𑀘𑀭𑀺𑀢𑀩𑁆𑀩𑀝𑁆𑀞𑀸𑀦𑀁. 𑀢𑁂𑀦𑀸𑀳 ‘‘𑀬𑀢𑁆𑀣 𑀦 𑀓𑀲𑀻𑀬𑀢𑀺 𑀦 𑀯𑀧𑀻𑀬𑀢𑀻’’𑀢𑀺. 𑀧𑀦𑁆𑀢𑀸𑀦𑀻𑀢𑀺 𑀇𑀫𑀺𑀦𑀸 ‘‘𑀧𑀭𑀺𑀬𑀦𑁆𑀢𑀸𑀦’’𑀦𑁆𑀢𑀺 𑀇𑀫𑀲𑁆𑀲 𑀧𑀭𑀺𑀬𑀸𑀬𑀲𑁆𑀲 𑀇𑀥 𑀧𑀸𑀴𑀺𑀬𑀁 𑀕𑀳𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀧𑀭𑀺𑀬𑀦𑁆𑀢𑀸𑀦𑀦𑁆𑀢𑀺 𑀇𑀫𑀫𑁂𑀓𑀁 𑀧𑀭𑀺𑀬𑀸𑀬𑀁 𑀞𑀧𑁂𑀢𑁆𑀯𑀸’’𑀢𑀺. 𑀤𑀽𑀭𑀸𑀦𑀦𑁆𑀢𑀺 𑀧𑀦 𑀅𑀬𑀁 𑀧𑀭𑀺𑀬𑀸𑀬𑁄 𑀞𑀧𑁂𑀢𑀩𑁆𑀩𑁄 𑀲𑀺𑀬𑀸 𑀢𑀲𑁆𑀲𑀸𑀧𑀺 ‘‘𑀧𑀦𑁆𑀢𑀸𑀦𑀻’’𑀢𑀺 𑀇𑀫𑀺𑀦𑀸𑀯 𑀅𑀢𑁆𑀣𑀢𑁄 𑀕𑀳𑀺𑀢𑀢𑁆𑀢𑀸, 𑀢𑀣𑀸 𑀲𑀢𑀺 ‘‘𑀦 𑀫𑀦𑀼𑀲𑁆𑀲𑀽𑀧𑀘𑀸𑀭𑀸𑀦’’𑀦𑁆𑀢𑀺 𑀏𑀤𑀺𑀲𑀸𑀦𑀫𑁆𑀧𑀺 𑀞𑀧𑁂𑀢𑀩𑁆𑀩𑀢𑀸 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀲𑀤𑁆𑀤𑀢𑁄 𑀏𑀯 𑀞𑀧𑀦𑀁 𑀤𑀝𑁆𑀞𑀩𑁆𑀩𑀁. 𑀧𑀯𑀺𑀯𑁂𑀓𑀦𑁆𑀢𑀺 𑀧𑀓𑀸𑀭𑀢𑁄, 𑀧𑀓𑀸𑀭𑁂𑀳𑀺 𑀯𑀸 𑀯𑀺𑀯𑁂𑀘𑀦𑀁, 𑀭𑀽𑀧𑀸𑀤𑀺𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂 𑀧𑀓𑀸𑀭𑀢𑁄 𑀕𑀫𑀦𑀸𑀤𑀺𑀇𑀭𑀺𑀬𑀸𑀧𑀣𑀧𑁆𑀧𑀓𑀸𑀭𑁂𑀳𑀺 𑀅𑀢𑁆𑀢𑀦𑁄 𑀓𑀸𑀬𑀲𑁆𑀲 𑀯𑀺𑀯𑁂𑀘𑀦𑀁 𑀕𑀘𑁆𑀙𑀢𑁄𑀧𑀺 𑀢𑀺𑀝𑁆𑀞𑀢𑁄𑀧𑀺 𑀦𑀺𑀲𑀚𑁆𑀚𑀢𑁄𑀧𑀺 𑀏𑀓𑀲𑁆𑀲𑁂𑀯 𑀧𑀯𑀢𑁆𑀢𑀢𑀺. 𑀢𑁂𑀦𑁂𑀯 𑀳𑀺 𑀯𑀺𑀯𑁂𑀘𑁂𑀢𑀩𑁆𑀩𑀸𑀦𑀁 𑀯𑀺𑀯𑁂𑀘𑀦𑀸𑀓𑀸𑀭𑀲𑁆𑀲 𑀘 𑀪𑁂𑀤𑀢𑁄 𑀩𑀳𑀼𑀯𑀺𑀥𑀢𑁆𑀢𑀸 𑀢𑁂 𑀏𑀓𑀢𑁆𑀢𑁂𑀦 𑀕𑀳𑁂𑀢𑁆𑀯𑀸 ‘‘𑀧𑀯𑀺𑀯𑁂𑀓’’𑀦𑁆𑀢𑀺 𑀏𑀓𑀯𑀘𑀦𑁂𑀦 𑀯𑀼𑀢𑁆𑀢𑀁. 𑀤𑀼𑀓𑁆𑀓𑀭𑀁 𑀧𑀯𑀺𑀯𑁂𑀓𑀦𑁆𑀢𑀺 𑀯𑀸 𑀧𑀯𑀺𑀯𑁂𑀓𑀁 𑀓𑀢𑁆𑀢𑀼𑀁 𑀦 𑀲𑀼𑀔𑀦𑁆𑀢𑀺 𑀅𑀢𑁆𑀣𑁄. 𑀏𑀓𑀻𑀪𑀸𑀯𑁂𑀢𑀺 𑀏𑀓𑀺𑀓𑀪𑀸𑀯𑁂. 𑀤𑁆𑀯𑀬𑀁𑀤𑁆𑀯𑀬𑀸𑀭𑀸𑀫𑁄𑀢𑀺 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀪𑀸𑀯𑀸𑀪𑀺𑀭𑀢𑁄. 𑀳𑀭𑀦𑁆𑀢𑀺 𑀯𑀺𑀬𑀸𑀢𑀺 𑀲𑀁𑀳𑀭𑀦𑁆𑀢𑀺 𑀯𑀺𑀬 𑀯𑀺𑀖𑀸𑀢𑀼𑀧𑁆𑀧𑀸𑀤𑀦𑁂𑀦. 𑀢𑁂𑀦𑀸𑀳 ‘‘𑀖𑀲𑀦𑁆𑀢𑀺 𑀯𑀺𑀬𑀸’’𑀢𑀺, 𑀪𑀬𑀲𑀦𑁆𑀢𑀸𑀲𑀼𑀧𑁆𑀧𑀸𑀤𑀦𑁂𑀦 𑀔𑀸𑀤𑀺𑀢𑀼𑀁 𑀆𑀕𑀢𑀸 𑀬𑀓𑁆𑀔𑀭𑀓𑁆𑀔𑀲𑀧𑀺𑀲𑀸𑀘𑀸𑀤𑀬𑁄 𑀯𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀈𑀤𑀺𑀲𑀲𑁆𑀲𑀸𑀢𑀺 𑀅𑀮𑀤𑁆𑀥𑀲𑀫𑀸𑀥𑀺𑀦𑁄. 𑀢𑀺𑀡𑀧𑀡𑁆𑀡𑀫𑀺𑀕𑀸𑀤𑀺𑀲𑀤𑁆𑀤𑁂𑀳𑀻𑀢𑀺 𑀯𑀸𑀢𑁂𑀭𑀺𑀢𑀸𑀦𑀁 𑀢𑀺𑀡𑀧𑀡𑁆𑀡𑀸𑀤𑀻𑀦𑀁 𑀫𑀺𑀕𑀧𑀓𑁆𑀔𑀺𑀆𑀤𑀻𑀦𑀜𑁆𑀘 ¶ 𑀪𑀺𑀁𑀲𑀦𑀓𑁂𑀳𑀺 𑀪𑁂𑀭𑀯𑁂𑀳𑀺 𑀲𑀤𑁆𑀤𑁂𑀳𑀺 𑀯𑀺𑀯𑀺𑀥𑁂𑀳𑀺 𑀘 𑀅𑀜𑁆𑀜𑁂𑀳𑀺 𑀔𑀸𑀡𑀼𑀆𑀤𑀻𑀳𑀺 𑀬𑀓𑁆𑀔𑀸𑀤𑀺𑀆𑀓𑀸𑀭𑁂𑀳𑀺 𑀉𑀧𑀝𑁆𑀞𑀺𑀢𑁂𑀳𑀺 𑀪𑀺𑀁𑀲𑀦𑀓𑁂𑀳𑀺. 𑀏𑀯𑀁 𑀤𑀼𑀓𑁆𑀓𑀭𑀁 𑀤𑀼𑀭𑀪𑀺𑀲𑀫𑁆𑀪𑀯𑀁 𑀦𑀸𑀫 𑀓𑀭𑁄𑀦𑁆𑀢𑁄 𑀅𑀳𑁄 𑀅𑀘𑁆𑀙𑀭𑀺𑀬𑀸 𑀏𑀢𑁂𑀢𑀺 𑀯𑀺𑀫𑁆𑀳𑀺𑀢𑁄.

𑀓𑀸𑀬𑀓𑀫𑁆𑀫𑀦𑁆𑀢𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁩𑁫. 𑀲𑁄𑀴𑀲𑀲𑀼 ¶ 𑀞𑀸𑀦𑁂𑀲𑀽𑀢𑀺 ‘‘𑀬𑁂 𑀔𑁄 𑀓𑁂𑀘𑀻’’𑀢𑀺𑀆𑀤𑀺𑀦𑀸 𑀧𑀸𑀴𑀺𑀬𑀁 𑀯𑀓𑁆𑀔𑀫𑀸𑀦𑁂𑀲𑀼 𑀲𑁄𑀴𑀲𑀲𑀼 𑀓𑀸𑀭𑀡𑁂𑀲𑀼. 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑀢𑀸𑀤𑀬𑁄 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑀸𑀦𑀁 𑀘𑀺𑀢𑁆𑀢𑀼𑀢𑁆𑀭𑀸𑀲𑀦𑀺𑀫𑀺𑀢𑁆𑀢𑀢𑀸𑀬 𑀯𑀺𑀲𑁂𑀲𑀢𑁄 𑀯𑀺𑀓𑁆𑀔𑁂𑀧𑀸𑀯𑀳𑀸, 𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑀢𑀸𑀤𑀬𑁄 𑀧𑀦 𑀢𑀤𑀪𑀸𑀯𑀢𑁄 𑀢𑁂𑀲𑀁 𑀅𑀯𑀺𑀓𑁆𑀔𑁂𑀧𑀸𑀯𑀳𑀸. 𑀢𑁂𑀦𑀸𑀳 ‘‘𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑀲𑀦𑁆𑀤𑁄𑀲𑀳𑁂𑀢𑀽’’𑀢𑀺𑀆𑀤𑀺. 𑀲𑁄𑀴𑀲𑀲𑀽𑀢𑀺 𑀘 𑀯𑁄𑀤𑀸𑀦𑀧𑀓𑁆𑀔𑀁𑀬𑁂𑀯 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀁𑀓𑀺𑀮𑁂𑀲𑀕𑁆𑀕𑀳𑀡𑀫𑁆𑀧𑀺 𑀬𑀸𑀯𑀤𑁂𑀯 𑀯𑁄𑀤𑀸𑀦𑀤𑀲𑁆𑀲𑀦𑀢𑁆𑀣𑀦𑁆𑀢𑀺. 𑀆𑀭𑀫𑁆𑀫𑀡𑀧𑀭𑀺𑀕𑁆𑀕𑀳𑀭𑀳𑀺𑀢𑀸𑀦𑀦𑁆𑀢𑀺 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑀸𑀤𑀺𑀓𑀲𑁆𑀲 𑀅𑀭𑀜𑁆𑀜𑁂 𑀤𑀺𑀝𑁆𑀞𑀲𑁆𑀲 𑀢𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 ‘‘𑀬𑁂 𑀔𑁄 𑀓𑁂𑀘𑀻’’𑀢𑀺𑀆𑀤𑀺𑀦𑀸 𑀧𑀸𑀴𑀺𑀬𑀁 𑀆𑀕𑀢𑀦𑀬𑁂𑀦 𑀧𑀭𑀺𑀕𑁆𑀕𑀡𑁆𑀳𑀦𑀜𑀸𑀡𑀭𑀳𑀺𑀢𑀸𑀦𑀁. 𑀆𑀭𑀫𑁆𑀫𑀡𑀧𑀭𑀺𑀕𑁆𑀕𑀳𑀬𑀼𑀢𑁆𑀢𑀸𑀦𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀢𑀦𑀸𑀢𑀺 𑀪𑀕𑀯𑀦𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺, 𑀲𑀬𑀦𑁆𑀢𑀺 𑀅𑀢𑁆𑀣𑁄. 𑀢𑀸𑀤𑀺𑀲𑁄𑀢𑀺 𑀆𑀭𑀫𑁆𑀫𑀡𑀧𑀭𑀺𑀕𑁆𑀕𑀳𑀬𑀼𑀢𑁆𑀢𑁄.

𑀲𑀫𑁆𑀩𑀼𑀚𑁆𑀛𑀢𑀺 𑀏𑀢𑁂𑀦𑀸𑀢𑀺 𑀲𑀫𑁆𑀩𑁄𑀥𑁄, 𑀅𑀭𑀺𑀬𑀫𑀕𑁆𑀕𑁄𑀢𑀺 𑀆𑀳 ‘‘𑀅𑀭𑀺𑀬𑀫𑀕𑁆𑀕𑀧𑁆𑀧𑀢𑁆𑀢𑀺𑀢𑁄’’𑀢𑀺. 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑀸𑀥𑀻𑀦𑁄 𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀥𑀺𑀕𑀫𑁄𑀢𑀺 𑀆𑀳 ‘‘𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀲𑁆𑀲𑀸𑀢𑀺 𑀅𑀧𑁆𑀧𑀝𑀺𑀯𑀺𑀤𑁆𑀥𑀘𑀢𑀼𑀲𑀘𑁆𑀘𑀲𑁆𑀲𑀸’’𑀢𑀺. 𑀅𑀦𑀯𑀲𑁂𑀲𑀢𑁄 𑀜𑁂𑀬𑁆𑀬𑀁, 𑀩𑀼𑀚𑁆𑀛𑀺𑀢𑀼𑀁 𑀅𑀭𑀳𑀢𑀻𑀢𑀺 𑀩𑁄𑀥𑀺, 𑀫𑀳𑀸𑀯𑀻𑀭𑀺𑀬𑀢𑀸𑀤𑀺𑀦𑀸 𑀢𑀢𑁆𑀣 𑀯𑀺𑀲𑁂𑀲𑀬𑁄𑀕𑀢𑁄 𑀲𑀢𑁆𑀢𑁄𑀢𑀺 𑀆𑀳 ‘‘𑀩𑀼𑀚𑁆𑀛𑀦𑀓𑀲𑀢𑁆𑀢𑀲𑁆𑀲𑀸’’𑀢𑀺. 𑀢𑁂𑀦𑀸𑀳 ‘‘𑀲𑀫𑁆𑀫𑀸𑀲𑀫𑁆𑀩𑁄𑀥𑀺’’𑀦𑁆𑀢𑀺𑀆𑀤𑀺. 𑀦𑀺𑀬𑀢𑀪𑀸𑀯𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀫𑀳𑀸𑀲𑀢𑁆𑀢𑀸 𑀬𑀣𑀸 𑀫𑀳𑀸𑀩𑁄𑀥𑀺𑀬𑀸𑀦𑀧𑀝𑀺𑀧𑀤𑀸 𑀳𑀸𑀦𑀪𑀸𑀕𑀺𑀬𑀸, 𑀞𑀺𑀢𑀺𑀪𑀸𑀕𑀺𑀬𑀸 𑀯𑀸 𑀦 𑀳𑁄𑀢𑀺, 𑀅𑀣 𑀔𑁄 𑀯𑀺𑀲𑁂𑀲𑀪𑀸𑀕𑀺𑀬𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸 𑀘 𑀳𑁄𑀢𑀺, 𑀢𑀣𑀸 𑀧𑀝𑀺𑀧𑀚𑁆𑀚𑀦𑀢𑁄 𑀩𑁄𑀥𑀺𑀬𑀁 𑀦𑀺𑀦𑁆𑀦𑀕𑁄𑀡𑀧𑀩𑁆𑀪𑀸𑀭𑀸 𑀏𑀯𑀸𑀢𑀺 𑀆𑀳 ‘‘𑀩𑁄𑀥𑀺𑀬𑀸 𑀯𑀸 𑀲𑀢𑁆𑀢𑀲𑁆𑀲𑁂𑀯 𑀮𑀕𑁆𑀕𑀲𑁆𑀲𑁂𑀯𑀸’’𑀢𑀺. 𑀢𑁂𑀦𑀸𑀳 ‘‘𑀤𑀻𑀧𑀗𑁆𑀓𑀭𑀲𑁆𑀲 𑀳𑀻’’𑀢𑀺𑀆𑀤𑀺. 𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑁂𑀦𑀸𑀢𑀺 𑁋

‘‘𑀫𑀦𑀼𑀲𑁆𑀲𑀢𑁆𑀢𑀁 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀺, 𑀳𑁂𑀢𑀼 𑀲𑀢𑁆𑀣𑀸𑀭𑀤𑀲𑁆𑀲𑀦𑀁;

𑀧𑀩𑁆𑀩𑀚𑁆𑀚𑀸 𑀕𑀼𑀡𑀲𑀫𑁆𑀧𑀢𑁆𑀢𑀺, 𑀅𑀥𑀺𑀓𑀸𑀭𑁄 𑀘 𑀙𑀦𑁆𑀤𑀢𑀸’’𑀢𑀺. (𑀩𑀼. 𑀯𑀁. 𑁨.𑁫𑁯) 𑁋

𑀇𑀫𑁂𑀲𑀁 𑀅𑀪𑀺𑀦𑀻𑀳𑀸𑀭𑀲𑁆𑀲 𑀅𑀗𑁆𑀕𑀪𑀽𑀢𑀸𑀦𑀁 𑀅𑀝𑁆𑀞𑀦𑁆𑀦𑀁 𑀥𑀫𑁆𑀫𑀸𑀦𑀁 𑀲𑀫𑁄𑀥𑀸𑀦𑁂𑀦 𑀲𑀫𑀯𑀥𑀸𑀦𑁂𑀦.

𑀧𑀩𑁆𑀩𑀚𑁆𑀚𑀽𑀧𑀕𑀢𑀸𑀢𑀺 ¶ ¶ 𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑀸. 𑀢𑁂𑀦 𑀧𑀩𑁆𑀩𑀚𑁆𑀚𑀸𑀫𑀢𑁆𑀢𑁂𑀦 𑀲𑀫𑀡𑀸, 𑀦 𑀲𑀫𑀺𑀢𑀧𑀸𑀧𑀢𑀸𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀚𑀸𑀢𑀺𑀫𑀢𑁆𑀢𑁂𑀦 𑀇𑀥 𑀩𑁆𑀭𑀸𑀳𑁆𑀫𑀡𑀸𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀪𑁄𑀯𑀸𑀤𑀺𑀦𑁄 𑀯𑀸’’𑀢𑀺. 𑀢𑁂 𑀳𑀺 ‘‘𑀪𑁄 𑀪𑁄’’𑀢𑀺 𑀯𑀤𑀦𑀲𑀻𑀮𑀸, 𑀢𑁂𑀦𑀸𑀳 ‘‘𑀪𑁄𑀯𑀸𑀤𑀻 𑀦𑀸𑀫 𑀲𑁄 𑀳𑁄𑀢𑀺, 𑀲𑀘𑁂 𑀳𑁄𑀢𑀺 𑀲𑀓𑀺𑀜𑁆𑀘𑀦𑁄’’𑀢𑀺 (𑀥. 𑀧. 𑁩𑁯𑁬; 𑀲𑀼. 𑀦𑀺. 𑁬𑁨𑁫). 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀤𑀺𑀦𑁆𑀦𑀸𑀤𑀸𑀦𑀁 𑀅𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀧𑀭𑀺𑀲𑀼𑀤𑁆𑀥𑁂𑀦𑀸𑀢𑀺 𑀘 𑀯𑀺𑀲𑁂𑀲𑀦𑀁 𑀓𑀸𑀬𑀓𑀫𑁆𑀫𑀦𑁆𑀢𑀸𑀧𑁂𑀓𑁆𑀔𑀸𑀬, 𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀧𑁂𑀓𑁆𑀔𑀸𑀬. 𑀦 𑀳𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑁄 𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀬𑁄𑀕𑁄 𑀘 𑀓𑁄𑀘𑀺 𑀧𑀭𑀺𑀲𑀼𑀤𑁆𑀥𑁄 𑀦𑀸𑀫 𑀅𑀢𑁆𑀣𑀺. 𑀪𑀸𑀬𑀦𑀝𑁆𑀞𑁂𑀦 𑀪𑀬𑀁, 𑀪𑀻𑀭𑀼𑀢𑀸𑀯𑀳𑀝𑁆𑀞𑁂𑀦 𑀪𑁂𑀭𑀯𑀁. 𑀲𑀦𑁆𑀤𑁄𑀲𑀳𑁂𑀢𑀽𑀢𑀺 𑀲𑀤𑁄𑀲𑀳𑁂𑀢𑀼. 𑀲-𑀲𑀤𑁆𑀤𑁄 𑀳𑀺 𑀇𑀥 𑀲𑀸𑀦𑀼𑀲𑀸𑀭𑁄 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑁄 𑀤𑁄𑀲𑀲𑁆𑀲 𑀳𑁂𑀢𑀽’’𑀢𑀺. 𑀏𑀓𑀦𑁆𑀢𑁂𑀦 𑀘𑀺𑀢𑁆𑀢𑀼𑀢𑁆𑀭𑀸𑀲𑀮𑀓𑁆𑀔𑀡𑀲𑁆𑀲 𑀪𑀬𑀲𑁆𑀲 𑀯𑀲𑁂𑀦 ‘‘𑀲𑀸𑀯𑀚𑁆𑀚’’𑀦𑁆𑀢𑀺 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀼𑀢𑁆𑀭𑀸𑀲𑁄 𑀳𑀺 𑀏𑀓𑀦𑁆𑀢𑀲𑀸𑀯𑀚𑁆𑀚𑁄 𑀪𑀸𑀬𑀦𑀝𑁆𑀞𑁂𑀦 𑀪𑀬𑀜𑁆𑀘𑀸𑀢𑀺. 𑀅𑀓𑁆𑀔𑁂𑀫𑀦𑁆𑀢𑀺 𑀇𑀤𑀁 𑀉𑀪𑀬𑀯𑀲𑁂𑀦. 𑀘𑀺𑀢𑁆𑀢𑀼𑀢𑁆𑀭𑀸𑀲𑁄𑀧𑀺 𑀳𑀺 𑀲𑀭𑀻𑀭𑀘𑀺𑀢𑁆𑀢𑀸𑀦𑀁 𑀅𑀦𑀢𑁆𑀣𑀸𑀯𑀳𑀢𑁄 𑀅𑀓𑁆𑀔𑁂𑀫, 𑀢𑀣𑀸 𑀪𑀬𑀸𑀦𑀓𑀸𑀭𑀫𑁆𑀫𑀡𑀫𑁆𑀧𑀻𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀢𑁆𑀣𑀤𑁆𑀯𑀬𑀁 𑀬𑀣𑀸𑀲𑀗𑁆𑀔𑁆𑀬𑀁 𑀬𑁄𑀚𑀺𑀢𑀁. 𑀲𑀬𑀁 𑀧𑀭𑀺𑀓𑀧𑁆𑀧𑀺𑀢𑀪𑀬𑀸𑀦𑀓𑀸𑀭𑀫𑁆𑀫𑀡𑀦𑀺𑀫𑀺𑀢𑁆𑀢𑀁 𑀘𑀺𑀢𑁆𑀢𑀼𑀢𑁆𑀭𑀸𑀲𑀲𑀫𑀼𑀧𑁆𑀧𑀸𑀤𑀦𑀯𑀲𑁂𑀦 𑀆𑀦𑁂𑀦𑁆𑀢𑀸 𑀪𑀬𑀪𑁂𑀭𑀯𑀁 𑀅𑀯𑁆𑀳𑀸𑀬𑀦𑁆𑀢𑀺 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀯𑁆𑀳𑀸𑀬𑀦𑁆𑀢𑀻𑀢𑀺 𑀧𑀓𑁆𑀓𑁄𑀲𑀦𑁆𑀢𑀻’’𑀢𑀺. 𑀢𑁂𑀢𑀺 𑀫𑀸𑀭𑀺𑀢𑀫𑀦𑀼𑀲𑁆𑀲𑀸𑀦𑀁 𑀜𑀸𑀢𑀺𑀫𑀺𑀢𑁆𑀢𑀸𑀤𑀬𑁄. 𑀕𑀘𑁆𑀙𑀁 𑀕𑀳𑀦𑀪𑀽𑀢𑀁 𑀫𑀳𑀦𑁆𑀢𑀁 𑀓𑀡𑁆𑀝𑀓𑀲𑀡𑁆𑀟𑀁, 𑀕𑀼𑀫𑁆𑀩𑀁 𑀦𑀸𑀢𑀺𑀫𑀳𑀦𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀕𑀘𑁆𑀙𑀦𑁆𑀢𑀺 𑀧𑀦 𑀢𑀺𑀡𑀯𑀦𑀁 𑀯𑁂𑀤𑀺𑀢𑀩𑁆𑀩𑀁, ‘‘𑀕𑀘𑁆𑀙𑁂 𑀭𑀼𑀴𑁆𑀳𑀢𑀺𑀡𑁂’’𑀢𑀺 𑀯𑀼𑀢𑁆𑀢𑀁, 𑀕𑀼𑀫𑁆𑀩𑀁 𑀓𑀡𑁆𑀝𑀓𑀮𑀢𑀸𑀤𑀺𑀪𑀭𑀺𑀢𑀸𑀯𑀺𑀭𑀼𑀴𑁆𑀳𑀁. 𑀩𑀤𑁆𑀥𑀸 𑀯𑀥𑀺𑀢𑀸 𑀯𑀺𑀬𑀸𑀢𑀺 𑀩𑀤𑁆𑀥𑀸 𑀳𑀼𑀢𑁆𑀯𑀸 𑀢𑀸𑀴𑀺𑀬𑀫𑀸𑀦𑀸 𑀯𑀺𑀬.

‘‘𑀦 𑀔𑁄 𑀧𑀦𑀸𑀢𑀺 𑀏𑀢𑁆𑀣 𑀔𑁄𑀢𑀺 𑀅𑀯𑀥𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄, 𑀧𑀦𑀸’’𑀢𑀺 𑀯𑀺𑀲𑁂𑀲𑀢𑁆𑀣𑁂. 𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 ‘‘𑀅𑀜𑁆𑀜𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀯𑀺𑀬 𑀅𑀳𑀁 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑁄 𑀳𑀼𑀢𑁆𑀯𑀸 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀦 𑀔𑁄 𑀧𑀦 𑀧𑀝𑀺𑀲𑁂𑀯𑀸𑀫𑀺, 𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑁄𑀬𑁂𑀯 𑀧𑀦 𑀳𑀼𑀢𑁆𑀯𑀸 𑀢𑀸𑀦𑀺 𑀧𑀝𑀺𑀲𑁂𑀯𑀸𑀫𑀻’’𑀢𑀺. 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. ‘‘𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑁄𑀳𑀫𑀲𑁆𑀫𑀻’’𑀢𑀺 𑀳𑀺 𑀢𑁂𑀦 𑀅𑀯𑀥𑀸𑀭𑀡𑁂𑀦 𑀯𑀺𑀪𑀸𑀯𑀺𑀢𑀢𑁆𑀣𑀤𑀲𑁆𑀲𑀦𑀁. 𑀢𑁂𑀲𑀫𑀳𑀁 𑀅𑀜𑁆𑀜𑀢𑀭𑁄𑀢𑀺 𑀢𑀸𑀬 𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀢𑀸𑀬 𑀢𑁂𑀲𑀁 𑀅𑀭𑀺𑀬𑀸𑀦𑀁 𑀅𑀳𑀁 𑀅𑀜𑁆𑀜𑀢𑀭𑁄𑀢𑀺 𑀓𑀸𑀬𑀓𑀫𑁆𑀫𑀧𑀸𑀭𑀺𑀲𑀼𑀤𑁆𑀥𑀺𑀬𑀸 𑀫𑀳𑀸𑀲𑀢𑁆𑀢𑁄 𑀅𑀢𑁆𑀢𑀸𑀦𑀁 𑀅𑀭𑀺𑀬𑁂𑀲𑀼 𑀧𑀓𑁆𑀔𑀺𑀧𑀢𑀺. 𑀧𑀭𑀫𑀲𑀮𑁆𑀮𑁂𑀔𑀪𑀸𑀯𑀧𑁆𑀧𑀢𑁆𑀢𑀸 𑀳𑀺 𑀢𑀤𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀸𑀬𑀓𑀫𑁆𑀫𑀧𑀸𑀭𑀺𑀲𑀼𑀤𑁆𑀥𑀺 ¶ , 𑀢𑀣𑀸 𑀯𑀘𑀻𑀓𑀫𑁆𑀫𑀸𑀤𑀺𑀧𑀸𑀭𑀺𑀲𑀼𑀤𑁆𑀥𑀺, 𑀬𑀢𑁄 𑀫𑀸𑀭𑁄 𑀭𑀦𑁆𑀥𑀕𑀯𑁂𑀲𑀻 𑀳𑀼𑀢𑁆𑀯𑀸 𑀙𑀩𑁆𑀩𑀲𑁆𑀲𑀸𑀦𑀺 𑀦𑀺𑀭𑀦𑁆𑀢𑀭𑀁 𑀅𑀦𑀼𑀩𑀦𑁆𑀥𑁄 𑀅𑀦𑁆𑀢𑀭𑀁 𑀦 𑀮𑀪𑀢𑀺. 𑀢𑁂𑀦𑀸𑀳 𑁋

‘‘𑀲𑀢𑁆𑀢 𑀯𑀲𑁆𑀲𑀸𑀦𑀺 𑀪𑀕𑀯𑀦𑁆𑀢𑀁, 𑀅𑀦𑀼𑀩𑀦𑁆𑀥𑀺𑀁 𑀧𑀤𑀸𑀧𑀤𑀁;

𑀑𑀢𑀸𑀭𑀁 𑀦𑀸𑀥𑀺𑀕𑀘𑁆𑀙𑀺𑀲𑁆𑀲𑀁, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀢𑀻𑀫𑀢𑁄’’𑀢𑀺. (𑀲𑀼. 𑀦𑀺. 𑁪𑁪𑁮);

𑀪𑀺𑀬𑁆𑀬𑁄𑀢𑀺 ¶ 𑀅𑀥𑀺𑀓𑀁 𑀲𑀯𑀺𑀲𑁂𑀲𑀁, 𑀉𑀧𑀭𑀽𑀧𑀭𑀺 𑀯𑀸. 𑀪𑀻𑀢𑀢𑀲𑀺𑀢𑀸 𑀪𑀬𑀽𑀧𑀤𑁆𑀤𑀯𑁂𑀦 𑀙𑀫𑁆𑀪𑀺𑀢𑀲𑀭𑀻𑀭𑀸 𑀳𑀝𑁆𑀞𑀮𑁄𑀫𑀸 𑀳𑁄𑀦𑁆𑀢𑀺, 𑀅𑀪𑀻𑀢𑀸𑀢𑀲𑀺𑀢𑀸 𑀧𑀦 𑀪𑀬𑀽𑀧𑀤𑁆𑀤𑀯𑀸𑀪𑀸𑀯𑀢𑁄 𑀅𑀳𑀝𑁆𑀞𑀮𑁄𑀫𑀸 𑀔𑁂𑀫𑁂𑀦 𑀲𑁄𑀢𑁆𑀣𑀺𑀦𑀸 𑀢𑀺𑀝𑁆𑀞𑀦𑁆𑀢𑀻𑀢𑀺 𑀢𑁂𑀲𑀁 𑀔𑁂𑀫𑀧𑁆𑀧𑀢𑁆𑀢𑀺 𑀲𑁄𑀢𑁆𑀣𑀺𑀪𑀸𑀯𑁄 𑀯𑀸 𑀧𑀦𑁆𑀦𑀮𑁄𑀫𑀢𑀸𑀬 𑀧𑀸𑀓𑀝𑁄 𑀳𑁄𑀢𑀻𑀢𑀺 𑀧𑀸𑀴𑀺𑀬𑀁 ‘‘𑀧𑀮𑁆𑀮𑁄𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀧𑀦𑁆𑀦𑀮𑁄𑀫𑀢’’𑀦𑁆𑀢𑀺𑀆𑀤𑀺. 𑀏𑀢𑁆𑀣 𑀘 𑀪𑀺𑀬𑁆𑀬𑁄 𑀧𑀮𑁆𑀮𑁄𑀫𑀫𑀸𑀧𑀸𑀤𑀺𑀁 𑀅𑀭𑀜𑁆𑀜𑁂 𑀯𑀺𑀳𑀸𑀭𑀸𑀬𑀸𑀢𑀺 𑀧𑀝𑀺𑀜𑁆𑀜𑀸𑀦𑀺𑀤𑁆𑀤𑁂𑀲𑁄. 𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑁄𑀳𑀫𑀲𑁆𑀫𑀻𑀢𑀺 𑀳𑁂𑀢𑀼𑀤𑀲𑁆𑀲𑀦𑀁. ‘‘𑀬𑁂 𑀳𑀺 𑀯𑁄 𑀅𑀭𑀺𑀬𑀸’’𑀢𑀺 𑀲𑀤𑀺𑀲𑀽𑀤𑀸𑀳𑀭𑀡𑀤𑀲𑁆𑀲𑀦𑀁. 𑀬𑁂 𑀔𑁄 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸𑀢𑀺 𑀯𑀺𑀲𑀤𑀺𑀲𑀽𑀤𑀸𑀳𑀭𑀡𑀤𑀲𑁆𑀲𑀦𑀁. 𑀲𑁂𑀲𑀸𑀦𑀺 𑀅𑀦𑁆𑀯𑀬𑀩𑁆𑀬𑀢𑀺𑀭𑁂𑀓𑀯𑀺𑀪𑀸𑀯𑀦𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀦𑁆𑀢𑀺 𑀅𑀬𑀫𑁂𑀢𑁆𑀣 𑀬𑀼𑀢𑁆𑀢𑀺𑀯𑀺𑀪𑀸𑀯𑀦𑀸. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀯𑀸𑀭𑁂𑀲𑀼𑀧𑀺 𑀬𑀼𑀢𑁆𑀢𑀺𑀯𑀺𑀪𑀸𑀯𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀓𑀸𑀬𑀓𑀫𑁆𑀫𑀦𑁆𑀢𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀘𑀻𑀓𑀫𑁆𑀫𑀦𑁆𑀢𑀯𑀸𑀭𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁩𑁬. 𑀅𑀧𑀭𑀺𑀲𑀼𑀤𑁆𑀥𑁂𑀦 𑀫𑀼𑀲𑀸𑀯𑀸𑀤𑀸𑀤𑀺𑀦𑀸𑀢𑀺 𑀏𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀆𑀤𑀺-𑀲𑀤𑁆𑀤𑁂𑀦 𑀧𑀦 𑀲𑀗𑁆𑀕𑀳𑀺𑀢𑀁 𑀢𑁂𑀲𑀜𑁆𑀘 𑀫𑀼𑀲𑀸𑀯𑀸𑀤𑀸𑀤𑀻𑀦𑀁 𑀧𑀯𑀢𑁆𑀢𑀺𑀪𑁂𑀤𑀁 𑀪𑀬𑀪𑁂𑀭𑀯𑀸𑀯𑁆𑀳𑀸𑀦𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀓𑀣’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀪𑀡𑁆𑀟𑁂𑀲𑀽𑀢𑀺 𑀲𑀯𑀺𑀜𑁆𑀜𑀸𑀡𑀓𑀸𑀯𑀺𑀜𑁆𑀜𑀸𑀡𑀓𑁂𑀲𑀼 𑀪𑀡𑁆𑀟𑁂𑀲𑀼. 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀯𑀲𑁂𑀦 𑀅𑀪𑀺𑀚𑁆𑀛𑀸𑀲𑀗𑁆𑀔𑀸𑀢𑀁 𑀯𑀺𑀲𑀫𑀮𑁄𑀪𑀁 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀓𑀼𑀚𑁆𑀛𑀺𑀢𑁆𑀯𑀸𑀢𑀺 𑀯𑀺𑀦𑀸𑀲𑀘𑀺𑀦𑁆𑀢𑀸𑀯𑀲𑁂𑀦 𑀧𑀭𑀲𑁆𑀲 𑀓𑀼𑀚𑁆𑀛𑀺𑀢𑁆𑀯𑀸. 𑀏𑀯𑀜𑁆𑀳𑀺 𑀦𑁂𑀲𑀁 ‘‘𑀬𑁂𑀲𑀁 𑀅𑀧𑀭𑀚𑁆𑀛𑀺𑀫𑁆𑀳𑀸, 𑀢𑁂 𑀇𑀤𑀸𑀦𑀺 𑀅𑀦𑀼𑀩𑀦𑁆𑀥𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀧𑀘𑁆𑀙𑀸 𑀆𑀲𑀗𑁆𑀓𑀼𑀧𑁆𑀧𑀢𑁆𑀢𑀺 𑀲𑀺𑀬𑀸. ‘‘𑀏𑀢𑁂 𑀅𑀫𑁆𑀳𑀸𑀓𑀁 𑀧𑀭𑀺𑀕𑁆𑀕𑀳𑀯𑀢𑁆𑀣𑀼𑀁 𑀕𑀳𑁂𑀢𑀼𑀓𑀸𑀫𑀸 𑀫𑀜𑁆𑀜𑁂, 𑀯𑀺𑀦𑀸𑀲𑀁 𑀓𑀸𑀢𑀼𑀓𑀸𑀫𑀸 𑀫𑀜𑁆𑀜𑁂’’𑀢𑀺 𑀬𑀣𑀸 𑀧𑀭𑁂 𑀧𑀭𑀢𑁄 𑀢𑁂𑀲𑀁 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀧𑁆𑀧𑀯𑀢𑁆𑀢𑀺𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺, 𑀢𑀸𑀤𑀺𑀲𑀁 ¶ 𑀫𑀦𑁄𑀓𑀫𑁆𑀫𑀦𑁆𑀢𑀁 𑀲𑀦𑁆𑀥𑀸𑀬 ‘‘𑀢𑁂 𑀧𑀭𑁂𑀲’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀸𑀫𑀁 𑀅𑀓𑀼𑀲𑀮𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀧𑀯𑀢𑁆𑀢𑀺𑀓𑀸𑀮𑁂𑀧𑀺 𑀅𑀪𑀺𑀚𑁆𑀛𑀸𑀤𑀬𑁄 𑀧𑀯𑀢𑁆𑀢𑀦𑁆𑀢𑀺𑀬𑁂𑀯, 𑀢𑀤𑀸 𑀧𑀦 𑀢𑁂 𑀘𑁂𑀢𑀦𑀸𑀧𑀓𑁆𑀔𑀺𑀓𑀸 𑀯𑀸 𑀅𑀩𑁆𑀩𑁄𑀳𑀸𑀭𑀺𑀓𑀸 𑀯𑀸𑀢𑀺 𑀫𑀦𑁄𑀓𑀫𑁆𑀫𑀦𑁆𑀢𑀯𑀸𑀭𑁂 𑀏𑀯 𑀅𑀪𑀺𑀚𑁆𑀛𑀸𑀤𑀺𑀯𑀲𑁂𑀦 𑀬𑁄𑀚𑀦𑀸 𑀓𑀢𑀸. 𑀅𑀣 𑀯𑀸 𑀤𑁆𑀯𑀸𑀭𑀦𑁆𑀢𑀭𑁂 𑀧𑀯𑀢𑁆𑀢𑀸𑀦𑀫𑁆𑀧𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀯𑀘𑀻𑀓𑀫𑁆𑀫𑀸𑀤𑀺𑀪𑀸𑀯𑀸𑀪𑀸𑀯𑁄 𑀯𑀺𑀬 𑀤𑁆𑀯𑀸𑀭𑀦𑁆𑀢𑀭𑁂 𑀧𑀯𑀢𑁆𑀢𑀸𑀦𑀫𑁆𑀧𑀺 𑀅𑀪𑀺𑀚𑁆𑀛𑀸𑀤𑀻𑀦𑀁 𑀓𑀸𑀬𑀓𑀫𑁆𑀫𑀸𑀤𑀺𑀪𑀸𑀯𑀸𑀪𑀸𑀯𑁄, 𑀫𑀦𑁄𑀓𑀫𑁆𑀫𑀪𑀸𑀯𑁄 𑀏𑀯 𑀧𑀦 𑀲𑀺𑀤𑁆𑀥𑁄𑀢𑀺 𑀓𑀢𑁆𑀯𑀸 𑀫𑀦𑁄𑀓𑀫𑁆𑀫𑀦𑁆𑀢𑀯𑀸𑀭𑁂 𑀏𑀯 𑀅𑀪𑀺𑀚𑁆𑀛𑀸𑀤𑀬𑁄 𑀉𑀤𑁆𑀥𑀝𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋

‘‘𑀤𑁆𑀯𑀸𑀭𑁂 ¶ 𑀘𑀭𑀦𑁆𑀢𑀺 𑀓𑀫𑁆𑀫𑀸𑀦𑀺, 𑀦 𑀤𑁆𑀯𑀸𑀭𑀸 𑀤𑁆𑀯𑀸𑀭𑀘𑀸𑀭𑀺𑀦𑁄;

𑀢𑀲𑁆𑀫𑀸 𑀤𑁆𑀯𑀸𑀭𑁂𑀳𑀺 𑀓𑀫𑁆𑀫𑀸𑀦𑀺, 𑀅𑀜𑁆𑀜𑀫𑀜𑁆𑀜𑀁 𑀯𑀯𑀢𑁆𑀣𑀺𑀢𑀸’’𑀢𑀺. (𑀥. 𑀲. 𑀅𑀝𑁆𑀞. 𑁧.𑀓𑀸𑀬𑀓𑀫𑁆𑀫𑀤𑁆𑀯𑀸𑀭);

𑀓𑀺𑀜𑁆𑀘𑀸𑀧𑀺 𑀅𑀝𑁆𑀞𑀓𑀣𑀸𑀬𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀯𑀲𑁂𑀦 𑀆𑀚𑀻𑀯𑀯𑀸𑀭𑁂 𑀪𑀬𑀪𑁂𑀭𑀯𑀸𑀯𑁆𑀳𑀸𑀦𑀁 𑀬𑁄𑀚𑀺𑀢𑀁, ‘‘𑀬𑁂 𑀔𑁄 𑀓𑁂𑀘𑀺 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸’’𑀢𑀺 𑀧𑀦 𑀯𑀘𑀦𑀢𑁄 𑀩𑀸𑀳𑀺𑀭𑀓𑀯𑀲𑁂𑀦 𑀕𑀳𑀝𑁆𑀞𑀯𑀲𑁂𑀦 𑀘 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀕𑀳𑀝𑁆𑀞𑀸𑀦𑀫𑁆𑀧𑀺 𑀳𑀺 𑀚𑀸𑀢𑀺𑀥𑀫𑁆𑀫𑀓𑀼𑀮𑀥𑀫𑁆𑀫𑀤𑁂𑀲𑀥𑀫𑁆𑀫𑀯𑀺𑀮𑁄𑀫𑀦𑀯𑀲𑁂𑀦 𑀅𑀜𑁆𑀜𑀣𑀸𑀧𑀺 𑀫𑀺𑀘𑁆𑀙𑀸𑀚𑀻𑀯𑁄 𑀮𑀩𑁆𑀪𑀢𑁂𑀯, 𑀢𑀸𑀬 𑀏𑀯 𑀘 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀅𑀜𑁆𑀜𑀣𑀸 𑀯𑀸 𑀦𑁂𑀲𑀁 𑀅𑀭𑀜𑁆𑀜𑀯𑀸𑀲𑁄 𑀲𑀫𑁆𑀪𑀯𑁂𑀬𑁆𑀬𑀸𑀢𑀺.

𑁩𑁭. 𑀏𑀯𑀁 𑀆𑀚𑀻𑀯𑀝𑁆𑀞𑀫𑀓𑀲𑀻𑀮𑀯𑀲𑁂𑀦 𑀪𑀬𑀪𑁂𑀭𑀯𑀁 𑀤𑀲𑁆𑀲𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀦𑀻𑀯𑀭𑀡𑀧𑁆𑀧𑀳𑀸𑀦𑀸𑀤𑀺𑀯𑀲𑁂𑀦 𑀢𑀁 𑀤𑀲𑁆𑀲𑁂𑀢𑀼𑀁 𑀤𑁂𑀲𑀦𑀸 𑀯𑀟𑁆𑀠𑀺𑀢𑀸𑀢𑀺 𑀢𑀤𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀇𑀢𑁄 𑀧𑀭’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀻𑀯𑀭𑀡𑀯𑀲𑁂𑀦 𑀧𑀼𑀦 𑀯𑀼𑀢𑁆𑀢𑀸𑀢𑀺 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀏𑀯𑀁 𑀲𑀻𑀮𑀯𑀺𑀲𑀼𑀤𑁆𑀥𑀺𑀫𑀢𑁆𑀢𑀫𑁆𑀧𑀺 𑀅𑀭𑀜𑁆𑀜𑁂 𑀯𑀺𑀳𑀭𑀢𑁄 𑀪𑀬𑀪𑁂𑀭𑀯𑀸𑀪𑀸𑀯𑀁 𑀆𑀯𑀳𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀦𑀻𑀯𑀭𑀡𑀸𑀦𑀺 𑀧𑀳𑀸𑀬 𑀅𑀧𑁆𑀧𑀦𑀸𑀲𑀫𑀸𑀥𑀺𑀁, 𑀉𑀧𑀘𑀸𑀭𑀲𑀫𑀸𑀥𑀺𑀫𑁂𑀯 𑀯𑀸 𑀲𑀫𑁆𑀧𑀸𑀤𑀬𑀢𑁄𑀢𑀺 𑀲𑀫𑀸𑀥𑀺𑀲𑀫𑁆𑀧𑀤𑀸𑀬 𑀪𑀬𑀪𑁂𑀭𑀯𑀸𑀪𑀸𑀯𑀳𑁂𑀢𑀼𑀓𑀁 𑀤𑀲𑁆𑀲𑁂𑀢𑀼𑀁 𑀉𑀧𑀭𑀺 𑀤𑁂𑀲𑀦𑀸 𑀯𑀟𑁆𑀠𑀺𑀢𑀸𑀢𑀺 𑀅𑀓𑀼𑀲𑀮𑀫𑀦𑁄𑀓𑀫𑁆𑀫𑀦𑁆𑀢𑀪𑀸𑀯𑁂𑀦 𑀕𑀳𑀺𑀢𑀸𑀧𑀺 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀸 𑀦𑀻𑀯𑀭𑀡𑀯𑀲𑁂𑀦 𑀧𑀼𑀦 𑀯𑀼𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀪𑀺-𑀧𑀼𑀩𑁆𑀩𑁄 𑀛𑀸-𑀲𑀤𑁆𑀤𑁄 𑀅𑀪𑀺𑀚𑁆𑀛𑀸𑀬𑀦𑀢𑁆𑀣𑁄𑀢𑀺 𑀆𑀳 ‘‘𑀧𑀭𑀪𑀡𑁆𑀟𑀸𑀤𑀺𑀅𑀪𑀺𑀚𑁆𑀛𑀸𑀬𑀦𑀲𑀻𑀮𑀸’’𑀢𑀺. 𑀯𑀢𑁆𑀣𑀼𑀓𑀸𑀫𑁂𑀲𑀽𑀢𑀺 𑀭𑀽𑀧𑀸𑀤𑀻𑀲𑀼 𑀓𑀺𑀮𑁂𑀲𑀓𑀸𑀫𑀲𑁆𑀲 𑀯𑀢𑁆𑀣𑀼𑀪𑀽𑀢𑁂𑀲𑀼 𑀓𑀸𑀫𑁂𑀲𑀼. 𑀩𑀳𑀮𑀓𑀺𑀮𑁂𑀲𑀭𑀸𑀕𑀸𑀢𑀺 𑀣𑀺𑀭𑀫𑀽𑀮𑀤𑀼𑀫𑁆𑀫𑁄𑀘𑀦𑀻𑀬𑀢𑀸𑀳𑀺 𑀅𑀚𑁆𑀛𑁄𑀲𑀸𑀦𑁂 𑀧𑀪𑀽𑀢𑀓𑀺𑀮𑁂𑀲𑀓𑀸𑀫𑀸. 𑀅𑀪𑀺𑀚𑁆𑀛𑀸 𑀘𑁂𑀢𑁆𑀣 𑀅𑀧𑁆𑀧𑀢𑁆𑀢𑀯𑀺𑀲𑀬𑀧𑀢𑁆𑀣𑀦𑀸, 𑀢𑀺𑀩𑁆𑀩𑀲𑀸𑀭𑀸𑀕𑁄 𑀲𑀫𑁆𑀧𑀢𑁆𑀢𑀺𑀯𑀺𑀲𑀬𑀸𑀪𑀺𑀦𑀺𑀯𑁂𑀲𑁄. 𑀢𑁂 ¶ 𑀳𑀺 𑀮𑁄𑀪𑀸𑀪𑀺𑀪𑀽𑀢𑀸 𑀧𑀼𑀕𑁆𑀕𑀮𑀸 𑀅𑀢𑁆𑀢𑀦𑀺 𑀢𑀺𑀩𑁆𑀩𑀲𑀸𑀧𑁂𑀓𑁆𑀔𑀢𑀸𑀬 𑀏𑀯 𑀮𑁄𑀪𑀸𑀪𑀺𑀪𑀽𑀢𑀢𑀸𑀬 𑀅𑀯𑀯𑀢𑁆𑀣𑀺𑀢𑀸𑀭𑀫𑁆𑀫𑀡𑀸 𑀅𑀯𑀺𑀦𑀺𑀘𑁆𑀙𑀺𑀢𑀯𑀺𑀲𑀬𑀸 𑀅𑀭𑀜𑁆𑀜𑁂 𑀢𑀁 𑀢𑀁 𑀯𑀺𑀲𑀬𑀁 𑀅𑀦𑀼𑀧𑀥𑀸𑀭𑀺𑀢𑁆𑀯𑀸 𑀯𑀺𑀳𑀭𑀦𑁆𑀢𑀺, 𑀭𑀚𑁆𑀚𑀼𑀆𑀤𑀻𑀦𑀺 𑀬𑀸𑀣𑀸𑀯𑀢𑁄 𑀦 𑀲𑀮𑁆𑀮𑀓𑁆𑀔𑁂𑀦𑁆𑀢𑀺. 𑀢𑁂𑀦𑀸𑀳 ‘‘𑀢𑁂𑀲’’𑀦𑁆𑀢𑀺𑀆𑀤𑀺. 𑀉𑀧𑀝𑁆𑀞𑀸𑀢𑀺 𑀲𑀦𑁆𑀢𑀘𑀺𑀢𑁆𑀢𑀢𑀸𑀬. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀆𑀓𑀼𑀮𑀘𑀺𑀢𑁆𑀢𑀸’’𑀢𑀺. ‘‘𑀇𑀤𑀸𑀦𑀺𑀫𑁆𑀳 𑀦𑀝𑁆𑀞𑀸’’𑀢𑀺 𑀢𑀲𑀦𑁆𑀢𑀺 𑀯𑀺𑀢𑀲𑀦𑁆𑀢𑀺, 𑀆𑀕𑀦𑁆𑀢𑁆𑀯𑀸 𑀩𑀸𑀥𑀺𑀬𑀫𑀸𑀦𑀸 𑀯𑀺𑀬 𑀳𑁄𑀦𑁆𑀢𑀺, 𑀏𑀯𑀁 𑀢𑀁 𑀪𑀬𑀪𑁂𑀭𑀯𑀁 𑀅𑀢𑁆𑀢𑀦𑀺 𑀲𑀫𑀸𑀭𑁄𑀧𑀦𑀝𑁆𑀞𑁂𑀦 𑀅𑀯𑁆𑀳𑀸𑀬𑀦𑁆𑀢𑀺 𑀧𑀓𑁆𑀓𑁄𑀲𑀦𑁆𑀢𑀻𑀢𑀺 𑀬𑁄𑀚𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸’’𑀢𑀺. ‘‘𑀅𑀦𑀪𑀺𑀚𑁆𑀛𑀸𑀮𑀼𑀳𑀫𑀲𑁆𑀫𑀻’’𑀢𑀺 𑀧𑀸𑀴𑀺𑀧𑀤𑁂 𑀘𑀺𑀭𑀧𑀭𑀺𑀘𑀺𑀢𑀅𑀮𑁄𑀪𑀚𑁆𑀛𑀸𑀲𑀬𑀢𑀸𑀬 𑀓𑀫𑀮𑀤𑀮𑁂 𑀚𑀮𑀩𑀺𑀦𑁆𑀤𑀼 𑀯𑀺𑀬 𑀅𑀮𑀕𑁆𑀕𑀫𑀸𑀦𑀲𑀢𑁆𑀢𑀸 𑀲𑀩𑁆𑀩𑀢𑁆𑀣 𑀅𑀦𑀧𑁂𑀓𑁆𑀔𑁄𑀳𑀫𑀲𑁆𑀫𑀻𑀢𑀺 𑀅𑀢𑁆𑀣𑁄.

𑁩𑁮. 𑀧𑀓𑀢𑀺𑀪𑀸𑀯𑀯𑀺𑀚𑀳𑀦𑁂𑀦𑀸𑀢𑀺 𑀧𑀭𑀺𑀲𑀼𑀤𑁆𑀥𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀘 𑀧𑀓𑀢𑀺𑀪𑀸𑀯𑀲𑁆𑀲 𑀯𑀺𑀚𑀳𑀦𑁂𑀦. 𑀲𑀸𑀯𑀚𑁆𑀚𑀥𑀫𑁆𑀫𑀲𑀫𑀼𑀧𑁆𑀧𑀢𑁆𑀢𑀺𑀬𑀸 𑀳𑀺 𑀘𑀺𑀢𑁆𑀢𑀲𑁆𑀲 𑀅𑀦𑀯𑀚𑁆𑀚𑀪𑀸𑀯𑁄 𑀚𑀳𑀺𑀢𑁄 𑀳𑁄𑀢𑀻𑀢𑀺. 𑀯𑀺𑀧𑀦𑁆𑀦𑀘𑀺𑀢𑁆𑀢𑀸𑀢𑀺 𑀓𑀺𑀮𑁂𑀲𑀸𑀲𑀼𑀘𑀺𑀤𑀽𑀲𑀺𑀢𑀢𑀸𑀬 ¶ 𑀓𑀼𑀣𑀺𑀢𑀘𑀺𑀢𑁆𑀢𑀸. 𑀢𑁂𑀦𑀸𑀳 ‘‘𑀓𑀺𑀮𑁂𑀲𑀸𑀦𑀼𑀕𑀢𑀁…𑀧𑁂… 𑀧𑀽𑀢𑀺𑀓𑀁 𑀳𑁄𑀢𑀻’’𑀢𑀺. 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑀸𑀢𑀺 𑀯𑀺𑀲𑀲𑀁𑀲𑀝𑁆𑀞𑀫𑀼𑀢𑁆𑀢𑀁 𑀯𑀺𑀬 𑀤𑁄𑀲𑁂𑀦 𑀧𑀤𑀽𑀲𑀺𑀢𑀘𑀺𑀢𑁆𑀢𑀲𑀗𑁆𑀓𑀧𑁆𑀧𑀸. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀢𑁂 𑀅𑀯𑀯𑀢𑁆𑀣𑀺𑀢𑀸𑀭𑀫𑁆𑀫𑀡𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀅𑀪𑀺𑀚𑁆𑀛𑀸𑀮𑀼𑀯𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀬𑀣𑀸 𑀳𑀺 𑀮𑁄𑀪𑀯𑀲𑁂𑀦, 𑀏𑀯𑀁 𑀤𑁄𑀲𑀸𑀤𑀺𑀯𑀲𑁂𑀦𑀧𑀺 𑀅𑀯𑀯𑀢𑁆𑀣𑀺𑀢𑀸𑀭𑀫𑁆𑀫𑀡𑀸 𑀳𑁄𑀦𑁆𑀢𑀻𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀳𑁂𑀝𑁆𑀞𑀸 𑀉𑀧𑀭𑀺 𑀘𑀸𑀢𑀺 𑀲𑀩𑁆𑀩𑀢𑁆𑀣 𑀞𑀸𑀦𑁂𑀲𑀼 𑀯𑀡𑁆𑀡𑁂𑀢𑀩𑁆𑀩𑀸.

𑁩𑁯. ‘‘𑀬𑀸 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀮𑀢𑀸 𑀅𑀓𑀫𑁆𑀫𑀜𑁆𑀜𑀢𑀸’’𑀢𑀺 𑀯𑀘𑀦𑀢𑁄 𑀣𑀺𑀦𑀁 𑀘𑀺𑀢𑁆𑀢𑀲𑁆𑀲 𑀕𑁂𑀮𑀜𑁆𑀜𑀪𑀸𑀯𑁂𑀦 𑀕𑀳𑀡𑀁 𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀘𑀺𑀢𑁆𑀢𑀕𑁂𑀮𑀜𑁆𑀜𑀪𑀽𑀢𑁂𑀦 𑀣𑀺𑀦𑁂𑀦𑀸’’𑀢𑀺. 𑀢𑀣𑀸 ‘‘𑀬𑀸 𑀓𑀸𑀬𑀲𑁆𑀲 𑀅𑀓𑀮𑁆𑀮𑀢𑀸 𑀅𑀓𑀫𑁆𑀫𑀜𑁆𑀜𑀢𑀸’’𑀢𑀺 (𑀥. 𑀲. 𑁧𑁧𑁬𑁩) 𑀯𑀘𑀦𑀢𑁄 𑀫𑀺𑀤𑁆𑀥𑀁 𑀯𑀺𑀲𑁂𑀲𑀢𑁄 𑀦𑀸𑀫𑀓𑀸𑀬𑀲𑁆𑀲 𑀕𑁂𑀮𑀜𑁆𑀜𑀪𑀸𑀯𑁂𑀦 𑀕𑀳𑀡𑀁 𑀕𑀘𑁆𑀙𑀢𑀻𑀢𑀺 𑀆𑀳 ‘‘𑀲𑁂𑀲𑀦𑀸𑀫𑀓𑀸𑀬𑀕𑁂𑀮𑀜𑁆𑀜𑀪𑀽𑀢𑁂𑀦 𑀫𑀺𑀤𑁆𑀥𑁂𑀦𑀸’’𑀢𑀺. 𑀲𑁂𑀲𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀘𑀺𑀢𑁆𑀢𑀦𑀺𑀯𑀢𑁆𑀢𑀦𑀢𑁆𑀣𑀁. 𑀇𑀤𑀜𑁆𑀘 𑀫𑀺𑀤𑁆𑀥𑀁 𑀭𑀽𑀧𑀓𑀸𑀬𑀲𑁆𑀲𑀧𑀺 𑀕𑁂𑀮𑀜𑁆𑀜𑀸𑀯𑀳𑀦𑁆𑀢𑀺 𑀤𑀝𑁆𑀞𑀩𑁆𑀩𑀁 𑀦𑀺𑀤𑁆𑀤𑀸𑀬 𑀳𑁂𑀢𑀼𑀪𑀸𑀯𑀢𑁄. 𑀢𑀣𑀸 𑀳𑀺 𑀢𑀁 ‘‘𑀦𑀺𑀤𑁆𑀤𑀸 𑀘𑀧𑀮𑀸𑀬𑀺𑀓𑀸’’𑀢𑀺 𑀦𑀺𑀤𑁆𑀤𑀺𑀝𑁆𑀞𑀁. 𑀢𑁂𑀦𑀸𑀳 ‘‘𑀢𑁂 𑀦𑀺𑀤𑁆𑀤𑀸𑀩𑀳𑀼𑀮𑀸 𑀳𑁄𑀦𑁆𑀢𑀻’’𑀢𑀺.

𑁪𑁦. 𑀉𑀤𑁆𑀥𑀘𑁆𑀘𑀧𑀓𑀢𑀺𑀓𑀸𑀢𑀺 𑀉𑀤𑁆𑀥𑀘𑁆𑀘𑀲𑀻𑀮𑀸 𑀅𑀦𑀯𑀝𑁆𑀞𑀺𑀢𑀲𑀪𑀸𑀯𑀸. 𑀅𑀦𑀯𑀝𑁆𑀞𑀸𑀦𑀭𑀲𑀜𑁆𑀳𑀺 𑀉𑀤𑁆𑀥𑀘𑁆𑀘𑀁. 𑀢𑁂𑀦𑀸𑀳 ‘‘𑀯𑀺𑀧𑁆𑀨𑀦𑁆𑀤𑀫𑀸𑀦𑀘𑀺𑀢𑁆𑀢𑀸’’𑀢𑀺𑀆𑀤𑀺. 𑀇𑀥𑀸𑀢𑀺 ‘‘𑀅𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑀸’’𑀢𑀺 𑀇𑀫𑀲𑁆𑀫𑀺𑀁 ¶ 𑀧𑀤𑁂. 𑀓𑀼𑀓𑁆𑀓𑀼𑀘𑁆𑀘𑀁 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺 𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀧𑀘𑁆𑀙𑀸𑀦𑀼𑀢𑀸𑀧𑀲𑁆𑀲𑀧𑀺 𑀘𑀺𑀢𑁆𑀢𑀲𑁆𑀲 𑀅𑀯𑀽𑀧𑀲𑀫𑀓𑀭𑀢𑁆𑀢𑀸. 𑀉𑀤𑁆𑀥𑀘𑁆𑀘𑀁 𑀧𑀦 𑀲𑀭𑀽𑀧𑁂𑀦𑁂𑀯 𑀕𑀳𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁧. 𑀏𑀓𑀫𑁂𑀯𑀺𑀤𑀁 𑀧𑀜𑁆𑀘𑀫𑀁 𑀦𑀻𑀯𑀭𑀡𑀁 𑀬𑀤𑀺𑀤𑀁 𑀓𑀗𑁆𑀔𑀸 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀘. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀓𑀺𑀁 𑀦𑀼 𑀔𑁄’’𑀢𑀺𑀆𑀤𑀺. 𑀓𑀗𑁆𑀔𑀦𑀢𑁄𑀢𑀺 𑀲𑀁𑀲𑀬𑀦𑀢𑁄. 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀯𑀼𑀘𑁆𑀘𑀢𑀺 ‘‘𑀥𑀫𑁆𑀫𑀲𑀪𑀸𑀯𑀁 𑀯𑀺𑀘𑀺𑀦𑀦𑁆𑀢𑁄 𑀏𑀢𑀸𑀬 𑀓𑀺𑀘𑁆𑀙𑀢𑀺, 𑀯𑀺𑀕𑀢𑀸 𑀢𑀺𑀓𑀺𑀘𑁆𑀙𑀸 𑀯𑀸’’𑀢𑀺 𑀓𑀢𑁆𑀯𑀸.

𑁪𑁨. 𑀏𑀯𑀁 𑀦𑀻𑀯𑀭𑀡𑀸𑀪𑀸𑀯𑀓𑀺𑀢𑁆𑀢𑀦𑀫𑀼𑀔𑁂𑀦 𑀲𑀫𑀸𑀥𑀺𑀲𑀫𑁆𑀧𑀤𑀸𑀬 𑀪𑀬𑀪𑁂𑀭𑀯𑀸𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀼𑀓𑁆𑀓𑀁𑀲𑀦𑀸𑀤𑀺𑀅𑀪𑀸𑀯𑀓𑀺𑀢𑁆𑀢𑀦𑀫𑀼𑀔𑁂𑀦 𑀧𑀜𑁆𑀜𑀸𑀲𑀫𑁆𑀧𑀤𑀸𑀬 𑀪𑀬𑀪𑁂𑀭𑀯𑀸𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀬𑁂 𑀔𑁄 𑀓𑁂𑀘𑀻’’𑀢𑀺𑀆𑀤𑀺𑀦𑀸 𑀉𑀧𑀭𑀺 𑀤𑁂𑀲𑀦𑀸 𑀯𑀟𑁆𑀠𑀺𑀢𑀸, 𑀢𑀤𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀅𑀢𑁆𑀢𑀼𑀓𑁆𑀓𑀁𑀲𑀦𑀓𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀓𑁆𑀓𑀁𑀲𑁂𑀦𑁆𑀢𑀺 𑀫𑀸𑀦𑀯𑀲𑁂𑀦 𑀧𑀕𑁆𑀕𑀡𑁆𑀳𑀦𑁂𑀦. 𑀢𑁂𑀦𑀸𑀳 ‘‘𑀉𑀘𑁆𑀘𑁂 𑀞𑀸𑀦𑁂 𑀞𑀧𑁂𑀦𑁆𑀢𑀻’’𑀢𑀺. 𑀣𑀺𑀦𑀫𑀺𑀤𑁆𑀥𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸𑀯𑀸𑀭𑁂𑀲𑀼 𑀕𑀬𑁆𑀳𑀫𑀸𑀦𑀁 𑀅𑀪𑀺𑀚𑁆𑀛𑀸𑀮𑀼𑀯𑀸𑀭𑀲𑀤𑀺𑀲𑀦𑁆𑀢𑀺 𑀢𑀢𑁆𑀣 𑀢𑀁 𑀅𑀦𑀸𑀫𑀲𑀺𑀢𑁆𑀯𑀸 𑀅𑀢𑁆𑀢𑀼𑀓𑁆𑀓𑀁𑀲𑀓𑀯𑀸𑀭𑁂 𑀓𑀺𑀜𑁆𑀘𑀺 𑀯𑀺𑀲𑀤𑀺𑀲𑀁 𑀅𑀢𑁆𑀣𑀻𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂 𑀓𑀣’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁪𑁩. 𑀙𑀫𑁆𑀪𑀦𑀁 ¶ 𑀙𑀫𑁆𑀪𑁄, 𑀓𑀸𑀬𑀲𑁆𑀲 𑀙𑀫𑁆𑀪𑀺𑀢𑀢𑁆𑀢𑀳𑁂𑀢𑀼𑀪𑀽𑀢𑁄 𑀩𑀮𑀯𑀘𑀺𑀢𑁆𑀢𑀼𑀢𑁆𑀭𑀸𑀲𑁄. 𑀲𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀙𑀫𑁆𑀪𑀻. 𑀢𑁂𑀦𑀸𑀳 ‘‘𑀓𑀸𑀬𑀣𑀫𑁆𑀪𑀦𑀸’’𑀢𑀺𑀆𑀤𑀺. 𑀪𑀻𑀭𑀼𑀓𑀚𑀸𑀢𑀺𑀓𑀸𑀢𑀺 𑀪𑀸𑀬𑀦𑀓𑀲𑀻𑀮𑀸. 𑀏𑀓𑀫𑁂𑀯 𑀘𑁂𑀢𑀁 𑀲𑀸𑀯𑀚𑁆𑀚𑀪𑀬𑀁 𑀓𑀸𑀬𑁂 𑀙𑀫𑁆𑀪𑀺𑀢𑀢𑁆𑀢𑀲𑁆𑀲, 𑀘𑀺𑀢𑁆𑀢𑁂 𑀘 𑀓𑀸𑀬𑁂 𑀘 𑀣𑀤𑁆𑀥𑀪𑀸𑀯𑀲𑁆𑀲 𑀉𑀧𑁆𑀧𑀸𑀤𑀦𑀯𑀲𑁂𑀦 ‘‘𑀙𑀫𑁆𑀪𑁄 𑀪𑀻𑀭𑀼𑀢𑀸’’𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺 𑀢𑀁𑀲𑀫𑀗𑁆𑀕𑀺𑀦𑁄 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 ‘‘𑀙𑀫𑁆𑀪𑀻 𑀪𑀻𑀭𑀼𑀓𑀚𑀸𑀢𑀺𑀓𑀸’’𑀢𑀺 𑀯𑀼𑀢𑁆𑀢𑀸, 𑀇𑀥 𑀪𑀬𑀪𑁂𑀭𑀯𑀁 𑀲𑀭𑀽𑀧𑁂𑀦𑁂𑀯 𑀕𑀳𑀺𑀢𑀁.

𑁪𑁪. 𑀮𑀩𑁆𑀪𑀢𑀺 𑀧𑀸𑀧𑀼𑀡𑀻𑀬𑀢𑀻𑀢𑀺 𑀮𑀸𑀪𑀲𑀤𑁆𑀤𑀲𑁆𑀲 𑀓𑀫𑁆𑀫𑀲𑀸𑀥𑀦𑀢𑁆𑀢𑀫𑀸𑀳. 𑀲𑀓𑁆𑀓𑀘𑁆𑀘𑀁 𑀓𑀸𑀢𑀩𑁆𑀩𑁄 𑀤𑀸𑀢𑀩𑁆𑀩𑁄𑀢𑀺 𑀲𑀓𑁆𑀓𑀸𑀭𑁄. 𑀢𑀤𑀢𑁆𑀣𑀤𑀻𑀧𑀓𑀦𑁆𑀢𑀺 𑀮𑀸𑀪𑀸𑀤𑀺𑀁 𑀧𑀳𑀸𑀬 𑀅𑀭𑀜𑁆𑀜𑁂 𑀯𑀲𑀢𑁄 𑀪𑀬𑀪𑁂𑀭𑀯𑀸𑀯𑁆𑀳𑀸𑀬𑀦𑀁 𑀦𑀢𑁆𑀣𑀻𑀢𑀺 𑀤𑀻𑀧𑀓𑀁. 𑀲𑁄 𑀓𑀺𑀭 𑀮𑀸𑀪𑀕𑀭𑀼𑀢𑀸𑀬𑁂𑀯 𑀧𑀺𑀬𑁄 𑀕𑀸𑀫𑁄 𑀏𑀢𑀲𑁆𑀲𑀸𑀢𑀺 ‘‘𑀧𑀺𑀬𑀕𑀸𑀫𑀺𑀓𑁄’’𑀢𑀺 𑀦𑀸𑀫𑀁 𑀮𑀪𑀢𑀺. 𑀓𑀫𑁆𑀫𑀫𑀼𑀢𑁆𑀢𑁄𑀢𑀺 𑀚𑀭𑀸𑀚𑀺𑀡𑁆𑀡𑀢𑁆𑀢𑀸 𑀓𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀲𑀸𑀫𑀺𑀓𑁂𑀳𑀺 𑀯𑀺𑀲𑁆𑀲𑀝𑁆𑀞𑁄.

𑁪𑁫. 𑀅𑀮𑀲𑀪𑀸𑀯𑁂𑀦 ¶ 𑀲𑀫𑁆𑀫𑀸𑀯𑀸𑀬𑀸𑀫𑀲𑁆𑀲 𑀅𑀓𑀭𑀡𑀢𑁄 𑀓𑀼𑀘𑁆𑀙𑀺𑀢𑀁 𑀲𑀻𑀤𑀦𑁆𑀢𑀻𑀢𑀺 𑀓𑀼𑀲𑀻𑀢𑀸. 𑀯𑀻𑀭𑀲𑁆𑀲 𑀪𑀸𑀯𑁄, 𑀓𑀫𑁆𑀫𑀁 𑀯𑀸 𑀯𑀻𑀭𑀺𑀬𑀁, 𑀯𑀺𑀥𑀺𑀦𑀸 𑀯𑀸 𑀈𑀭𑁂𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀯𑀻𑀭𑀺𑀬𑀁, 𑀲𑀫𑁆𑀫𑀸𑀯𑀸𑀬𑀸𑀫𑁄. 𑀢𑁂𑀦 𑀳𑀻𑀦𑀸 𑀳𑀻𑀦𑀯𑀻𑀭𑀺𑀬𑀸. 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀫𑀼𑀝𑁆𑀞𑀸𑀦𑀯𑀲𑁂𑀦 𑀧𑀯𑀢𑁆𑀢𑀯𑀻𑀭𑀺𑀬𑀁 𑀓𑀸𑀬𑀺𑀓𑀯𑀻𑀭𑀺𑀬𑀁, 𑀯𑀢𑁆𑀢𑀓𑀭𑀡𑀘𑀗𑁆𑀓𑀫𑀦𑀸𑀤𑀻𑀲𑀼 𑀤𑀝𑁆𑀞𑀩𑁆𑀩𑀁. 𑀦𑀺𑀲𑀚𑁆𑀚 𑀲𑀬𑀺𑀢𑁆𑀯𑀸 𑀘 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑀯𑀲𑁂𑀦 𑀧𑀯𑀢𑁆𑀢𑀯𑀻𑀭𑀺𑀬𑀁 𑀘𑁂𑀢𑀲𑀺𑀓𑀯𑀻𑀭𑀺𑀬𑀁. 𑀢𑀢𑁆𑀣 𑀧𑀼𑀭𑀺𑀫𑀁 𑀯𑀺𑀲𑁂𑀲𑀢𑁄 𑀓𑁄𑀲𑀚𑁆𑀚𑀧𑀝𑀺𑀧𑀓𑁆𑀔𑀢𑀸𑀯𑀲𑁂𑀦, 𑀤𑀼𑀢𑀺𑀬𑀁 𑀯𑀻𑀭𑀺𑀬𑀸𑀭𑀫𑁆𑀪𑀢𑀸𑀯𑀲𑁂𑀦 𑀧𑀸𑀓𑀝𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀼𑀲𑀻𑀢𑀸’’𑀢𑀺𑀆𑀤𑀺𑀫𑀸𑀳. 𑀢𑁂 𑀳𑀺 𑀳𑀻𑀦𑀯𑀻𑀭𑀺𑀬𑀸 𑀅𑀮𑀲𑀢𑀸𑀬𑁂𑀯 𑀆𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀫𑀢𑁆𑀢𑀫𑁆𑀧𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺.

𑁪𑁬. 𑀦𑀝𑁆𑀞𑀲𑁆𑀲𑀢𑀻𑀢𑀺 𑀅𑀮𑀩𑁆𑀪𑀫𑀸𑀦𑀲𑁆𑀲𑀢𑀺, 𑀧𑀘𑁆𑀘𑀬𑀯𑁂𑀓𑀮𑁆𑀮𑁂𑀦 𑀯𑀺𑀚𑁆𑀚𑀫𑀸𑀦𑀸𑀬𑀧𑀺 𑀲𑀢𑀺𑀬𑀸 𑀲𑀢𑀺𑀓𑀺𑀘𑁆𑀘𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀏𑀯𑀁 𑀯𑀼𑀢𑁆𑀢𑀁. 𑀦 𑀲𑀫𑁆𑀧𑀚𑀸𑀦𑀸𑀢𑀺 𑀅𑀲𑀫𑁆𑀧𑀚𑀸𑀦𑀸. 𑀢𑀁𑀬𑁄𑀕𑀦𑀺𑀯𑀢𑁆𑀢𑀺𑀬𑀜𑁆𑀘𑀸𑀬𑀁 𑀅-𑀓𑀸𑀭𑁄 ‘‘𑀅𑀳𑁂𑀢𑀼𑀓𑀸 𑀥𑀫𑁆𑀫𑀸 (𑀥. 𑀲. 𑁨.𑀤𑀼𑀓𑀫𑀸𑀢𑀺𑀓𑀸), 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄’’𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁭𑁬) 𑀯𑀺𑀬𑀸𑀢𑀺 𑀆𑀳 ‘‘𑀧𑀜𑁆𑀜𑀸𑀭𑀳𑀺𑀢𑀸’’𑀢𑀺. 𑀦𑀦𑀼 𑀲𑁄𑀴𑀲𑀫𑁄 𑀧𑀜𑁆𑀜𑀸𑀯𑀸𑀭𑁄, 𑀅𑀬𑀁 𑀲𑀢𑀺𑀯𑀸𑀭𑁄, 𑀢𑀢𑁆𑀣 𑀓𑀲𑁆𑀫𑀸 𑀲𑀁𑀓𑀺𑀮𑁂𑀲𑀧𑀓𑁆𑀔𑁂 𑀧𑀜𑁆𑀜𑀸 𑀕𑀳𑀺𑀢𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀇𑀫𑀲𑁆𑀲 𑀘𑀸’’𑀢𑀺𑀆𑀤𑀺. 𑀲𑀢𑀺𑀪𑀸𑀚𑀦𑀻𑀬𑀫𑁂𑀯𑁂𑀢𑀁, 𑀬𑀤𑀺𑀤𑀁 𑀘𑀼𑀤𑁆𑀤𑀲𑀫𑁄 𑀯𑀸𑀭𑁄, 𑀧𑀜𑁆𑀜𑀸 𑀧𑀦𑁂𑀢𑁆𑀣 𑀘𑀼𑀤𑁆𑀤𑀲𑀫𑁂 𑀯𑀸𑀭𑁂 𑀓𑁂𑀯𑀮𑀸 𑀲𑀢𑀺 𑀤𑀼𑀩𑁆𑀩𑀮𑀸𑀢𑀺 𑀲𑀢𑀺𑀤𑀼𑀩𑁆𑀩𑀮𑁆𑀬𑀤𑀻𑀧𑀦𑀢𑁆𑀣𑀁 ‘‘𑀅𑀲𑀫𑁆𑀧𑀚𑀸𑀦𑀸’’𑀢𑀺 𑀧𑀝𑀺𑀓𑁆𑀔𑁂𑀧𑀫𑀼𑀔𑁂𑀦 𑀯𑀼𑀢𑁆𑀢𑀸. 𑀇𑀤𑀸𑀦𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀤𑀼𑀯𑀺𑀥𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁪𑁭. 𑀅𑀧𑁆𑀧𑀦𑀸𑀲𑀫𑀸𑀥𑀺𑀦𑀸, 𑀉𑀧𑀘𑀸𑀭𑀲𑀫𑀸𑀥𑀺𑀦𑀸 𑀯𑀸 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑁂 𑀲𑀫𑀁, 𑀲𑀫𑁆𑀫𑀸 𑀯𑀸 𑀆𑀳𑀺𑀢𑀁 𑀦𑀸𑀫 𑀳𑁄𑀢𑀺, 𑀦𑀸𑀜𑁆𑀜𑀣𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀲𑀫𑀸𑀳𑀺𑀢𑀸𑀢𑀺 𑀉𑀧𑀘𑀸𑀭𑀧𑁆𑀧𑀦𑀸𑀲𑀫𑀸𑀥𑀺𑀯𑀺𑀭𑀳𑀺𑀢𑀸’’𑀢𑀺 𑀆𑀳 ¶ . 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑀸𑀢𑀺 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀸. 𑀧𑀼𑀩𑁆𑀩𑁂 𑀦𑀻𑀯𑀭𑀡𑀪𑀸𑀯𑀲𑀸𑀫𑀜𑁆𑀜𑁂𑀦 𑀉𑀤𑁆𑀥𑀘𑁆𑀘𑀁 𑀕𑀳𑀺𑀢𑀁 ‘‘𑀉𑀤𑁆𑀥𑀢𑀸 𑀅𑀯𑀽𑀧𑀲𑀦𑁆𑀢𑀘𑀺𑀢𑁆𑀢𑀸’’𑀢𑀺, 𑀇𑀥 𑀲𑀫𑀸𑀥𑀸𑀦𑀸𑀪𑀸𑀯𑁂𑀦 𑀉𑀤𑁆𑀥𑀘𑁆𑀘𑀳𑁂𑀢𑀼𑀓𑁄 𑀘𑀺𑀢𑁆𑀢𑀯𑀺𑀩𑁆𑀪𑀫𑁄 𑀯𑀼𑀢𑁆𑀢𑁄 ‘‘𑀅𑀲𑀫𑀸𑀳𑀺𑀢𑀸 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑀸’’𑀢𑀺, 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀧𑀼𑀩𑁆𑀩𑁂 ‘‘𑀉𑀤𑁆𑀥𑀘𑁆𑀘𑁂𑀦 𑀳𑀺 𑀏𑀓𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀯𑀺𑀧𑁆𑀨𑀦𑁆𑀤𑀢𑀺 𑀥𑀚𑀬𑀝𑁆𑀞𑀺𑀬𑀁 𑀯𑀸𑀢𑁂𑀦 𑀧𑀝𑀸𑀓𑀸 𑀯𑀺𑀬𑀸’’𑀢𑀺 (𑀫. 𑀦𑀺. 𑀅𑀝𑁆𑀞. 𑁧.𑁪𑁦) 𑀯𑀼𑀢𑁆𑀢𑀦𑀬𑁂𑀦. 𑀲𑀩𑁆𑀩𑀁 𑀧𑀼𑀩𑁆𑀩𑀲𑀤𑀺𑀲𑀫𑁂𑀯𑀸𑀢𑀺 𑀪𑀬𑀪𑁂𑀭𑀯𑀸𑀯𑁆𑀳𑀸𑀬𑀦𑀲𑁆𑀲 𑀅𑀪𑀺𑀚𑁆𑀛𑀸𑀮𑀼𑀯𑀸𑀭𑁂 𑀯𑀼𑀢𑁆𑀢𑀲𑀤𑀺𑀲𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑁪𑁮. 𑀤𑀼𑀧𑁆𑀧𑀜𑁆𑀜𑀸𑀢𑀺 ¶ 𑀏𑀢𑁆𑀣 𑀤𑀼-𑀲𑀤𑁆𑀤𑁄 ‘‘𑀤𑀼𑀲𑁆𑀲𑀻𑀮𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀅𑀪𑀸𑀯𑀢𑁆𑀣𑁄, 𑀦 ‘‘𑀤𑀼𑀕𑁆𑀕𑀢𑀺, 𑀤𑀼𑀧𑁆𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀕𑀭𑀳𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀧𑁆𑀧𑀜𑁆𑀜𑀸𑀦𑀫𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀯𑀢𑁆𑀯𑀸 ‘‘𑀧𑀜𑁆𑀜𑀸 𑀧𑀦 𑀤𑀼𑀝𑁆𑀞𑀸 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀢𑀺 𑀤𑀼𑀧𑁆𑀧𑀜𑁆𑀜𑀸. 𑀲𑀩𑁆𑀩𑀢𑁆𑀣𑀸𑀢𑀺 𑀘𑀢𑀽𑀲𑀼𑀧𑀺 𑀧𑀸𑀞𑀯𑀺𑀓𑀧𑁆𑀧𑁂𑀲𑀼. 𑀏𑀮𑀦𑁆𑀢𑀺 𑀯𑀸 𑀤𑁄𑀲𑁄 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀬𑀸 𑀲𑀸 𑀯𑀸𑀘𑀸 𑀦𑁂𑀮𑀸 𑀓𑀡𑁆𑀡𑀲𑀼𑀔𑀸’’𑀢𑀺. 𑀢𑀣𑀸 𑀳𑀺 𑀲𑀻𑀮𑀁 ‘‘𑀦𑁂𑀮𑀗𑁆𑀕’’𑀦𑁆𑀢𑀺 𑀯𑀼𑀢𑁆𑀢𑀁. 𑀤𑀼𑀧𑁆𑀧𑀜𑁆𑀜𑀸 𑀘 𑀓𑀣𑁂𑀦𑁆𑀢𑀸 𑀲𑀤𑁄𑀲𑀫𑁂𑀯 𑀓𑀣𑀁 𑀓𑀣𑁂𑀦𑁆𑀢𑀺 𑀅𑀧𑀡𑁆𑀟𑀺𑀢𑀪𑀸𑀯𑀢𑁄. 𑀢𑁂𑀦𑁂𑀯𑀸𑀳 ‘‘𑀤𑀼𑀩𑁆𑀪𑀸𑀲𑀺𑀢𑀪𑀸𑀲𑀻’’𑀢𑀺. 𑀢𑀲𑁆𑀫𑀸 𑀏𑀮𑀲𑀩𑁆𑀪𑀸𑀯𑀢𑁄 𑀏𑀮𑀁 𑀫𑀼𑀔𑀁 𑀏𑀢𑁂𑀲𑀦𑁆𑀢𑀺 𑀏𑀮𑀫𑀽𑀕𑀸𑀢𑀺 𑀯𑀼𑀢𑁆𑀢𑀸𑀢𑀺 𑀏𑀯𑀫𑁆𑀧𑀺 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀸𑀬 𑀧𑀜𑁆𑀜𑀸𑀬 𑀯𑀲𑁂𑀦 ‘‘𑀧𑀜𑁆𑀜𑀸𑀲𑀫𑁆𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀦𑁄 𑀘 𑀔𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀦𑀼 𑀘 𑀩𑁄𑀥𑀺𑀲𑀢𑁆𑀢𑀸 𑀩𑀳𑀼𑀮𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸 𑀳𑁄𑀦𑁆𑀢𑀻𑀢𑀺? 𑀳𑁄𑀦𑁆𑀢𑀺, 𑀢𑀤𑀸 𑀧𑀦 𑀩𑁄𑀥𑀺𑀲𑀢𑁆𑀢𑁂𑀦 𑀦 𑀯𑀺𑀧𑀲𑁆𑀲𑀦𑀸𑀭𑀫𑁆𑀪𑁄 𑀓𑀢𑁄, 𑀦𑁄 𑀘 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀦𑁄 𑀘 𑀔𑁄 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬𑀸’’𑀢𑀺.

𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀲𑀤𑁆𑀥𑀸𑀯𑀺𑀭𑀳𑀺𑀢𑀸 𑀅𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑀸𑀤𑀬𑁄 𑀯𑀺𑀬 𑀪𑀬𑀪𑁂𑀭𑀯𑀸𑀯𑁆𑀳𑀸𑀬𑀦𑀲𑁆𑀲 𑀯𑀺𑀲𑁂𑀲𑀓𑀸𑀭𑀡𑀁, 𑀦𑀸𑀧𑀺 𑀲𑀤𑁆𑀥𑀸𑀮𑀼𑀢𑀸 𑀧𑀮𑁆𑀮𑁄𑀫𑀢𑀸𑀬𑀸𑀢𑀺 𑀲𑀤𑁆𑀥𑀸𑀯𑀸𑀭𑁄 𑀅𑀦𑀼𑀤𑁆𑀥𑀝𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀓𑀸𑀭𑀡𑀁. 𑀓𑀫𑁆𑀫𑀨𑀮𑁂 𑀳𑀺 𑀲𑀤𑁆𑀤𑀳𑀦𑁆𑀢𑁄 𑀓𑀫𑁆𑀫𑀧𑀝𑀺𑀲𑀭𑀡𑀢𑀁𑀬𑁂𑀯 𑀦𑀺𑀲𑁆𑀲𑀸𑀬 𑀪𑀬𑀪𑁂𑀭𑀯𑀁 𑀢𑀺𑀡𑀸𑀬𑀧𑀺 𑀅𑀫𑀜𑁆𑀜𑀫𑀸𑀦𑁄 𑀧𑀮𑁆𑀮𑁄𑀫𑀢𑀫𑀸𑀧𑀚𑁆𑀚𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀯𑀻𑀭𑀺𑀬𑀸𑀤𑀬𑁄 𑀲𑀤𑁆𑀥𑀸𑀬 𑀯𑀺𑀦𑀸 𑀦𑀧𑁆𑀧𑀯𑀢𑁆𑀢𑀦𑁆𑀢𑀻𑀢𑀺 𑀢𑁂𑀲𑀁 𑀉𑀧𑀦𑀺𑀲𑁆𑀲𑀬𑀪𑀽𑀢𑀸 𑀲𑀳𑀚𑀸𑀢𑀸 𑀘 𑀲𑀸 𑀢𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸 𑀳𑁄𑀢𑀻𑀢𑀺 𑀯𑀺𑀲𑀼𑀁 𑀦 𑀉𑀤𑁆𑀥𑀝𑀸. 𑀢𑀣𑀸 𑀳𑀺 𑀲𑀸 𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬𑀫𑁆𑀧𑀺 𑀦 𑀉𑀤𑁆𑀥𑀝𑀸, 𑀓𑀺𑀁 𑀯𑀸 𑀏𑀢𑀸𑀬 𑀲𑀤𑁆𑀥𑀸𑀬, 𑀅𑀤𑁆𑀥𑀸 𑀲𑀸 𑀇𑀫𑀲𑁆𑀫𑀺𑀁 𑀆𑀭𑀫𑁆𑀫𑀡𑀧𑀭𑀺𑀕𑁆𑀕𑀳𑀝𑁆𑀞𑀸𑀦𑁂 𑀦 𑀕𑀳𑁂𑀢𑀩𑁆𑀩𑀸𑀯, 𑀢𑀢𑁄 𑀥𑀫𑁆𑀫𑀲𑁆𑀲𑀸𑀫𑀺𑀦𑀸 𑀇𑀥 𑀦 𑀉𑀤𑁆𑀥𑀝𑀸, 𑀏𑀯𑀁 𑀅𑀜𑁆𑀜𑁂𑀲𑀼𑀧𑀺 𑀏𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀦𑀺𑀘𑁆𑀙𑀬𑁄 𑀓𑀸𑀢𑀩𑁆𑀩𑁄. 𑀬𑀣𑀸𑀦𑀼𑀮𑁄𑀫𑀤𑁂𑀲𑀦𑀸 𑀳𑀺 𑀲𑀼𑀢𑁆𑀢𑀦𑁆𑀢𑀓𑀣𑀸𑀢𑀺.

𑀯𑀘𑀻𑀓𑀫𑁆𑀫𑀦𑁆𑀢𑀯𑀸𑀭𑀸𑀤𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑁄𑀴𑀲𑀝𑁆𑀞𑀸𑀦𑀸𑀭𑀫𑁆𑀫𑀡𑀧𑀭𑀺𑀕𑁆𑀕𑀳𑁄 𑀦𑀺𑀝𑁆𑀞𑀺𑀢𑁄.

𑀪𑀬𑀪𑁂𑀭𑀯𑀲𑁂𑀦𑀸𑀲𑀦𑀸𑀤𑀺𑀯𑀡𑁆𑀡𑀦𑀸

𑁪𑁯. 𑀲𑁄𑀴𑀲𑀸𑀭𑀫𑁆𑀫𑀡𑀸𑀦𑀻𑀢𑀺 ¶ 𑀲𑁄𑀴𑀲𑀝𑁆𑀞𑀸𑀦𑀸𑀦𑀺 𑀆𑀭𑀫𑁆𑀫𑀡𑀸𑀦𑀺. 𑀏𑀯𑀭𑀽𑀧𑀸𑀲𑀼 𑀭𑀢𑁆𑀢𑀻𑀲𑀽𑀢𑀺 𑀘𑀸𑀢𑀼𑀤𑁆𑀤𑀲𑀻𑀆𑀤𑀺𑀓𑀸 𑀉𑀧𑀭𑀺 𑀯𑀓𑁆𑀔𑀫𑀸𑀦𑀸 𑀭𑀢𑁆𑀢𑀺𑀬𑁄 𑀲𑀦𑁆𑀥𑀸𑀬 𑀯𑀤𑀢𑀺 ¶ . 𑀏𑀯𑀭𑀽𑀧𑁂 𑀲𑁂𑀦𑀸𑀲𑀦𑁂𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀬𑀸𑀢𑀺 𑀅𑀦𑀺𑀬𑀫𑀢𑁄 𑀉𑀤𑁆𑀤𑀺𑀝𑁆𑀞𑀸𑀦𑀁 𑀧𑀼𑀦 ‘‘𑀢𑀸’’𑀢𑀺 𑀯𑀘𑀦𑀁 𑀦𑀺𑀤𑁆𑀤𑁂𑀲𑁄 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀬𑀸 𑀢𑀸𑀢𑀺 𑀉𑀪𑀬𑀫𑁂𑀢𑀁 𑀭𑀢𑁆𑀢𑀻𑀦𑀁𑀬𑁂𑀯 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀯𑀘𑀦’’𑀦𑁆𑀢𑀺. 𑀅𑀪𑀻𑀢𑀺 𑀮𑀓𑁆𑀔𑀡𑀢𑁆𑀣𑁂 ‘‘𑀅𑀜𑁆𑀜𑁂 𑀘 𑀅𑀪𑀺𑀜𑁆𑀜𑀸𑀢𑀸 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀓𑀣𑀁 𑀧𑀦𑁂𑀢𑁆𑀣 𑀮𑀓𑁆𑀔𑀡𑀢𑁆𑀣𑀢𑀸 𑀯𑁂𑀤𑀺𑀢𑀩𑁆𑀩𑀸? 𑀮𑀓𑁆𑀔𑀻𑀬𑀢𑀺 𑀏𑀢𑁂𑀦𑀸𑀢𑀺 𑀮𑀓𑁆𑀔𑀡𑀦𑁆𑀢𑀺 𑀆𑀳 ‘‘𑀘𑀦𑁆𑀤𑀧𑀸𑀭𑀺𑀧𑀽𑀭𑀺𑀬𑀸’’𑀢𑀺𑀆𑀤𑀺. 𑀧𑀼𑀡𑁆𑀡𑀫𑀸𑀲𑀺𑀬𑀁 𑀘𑀦𑁆𑀤𑀧𑀸𑀭𑀺𑀧𑀽𑀭𑀺𑀬𑀸 𑀅𑀫𑀸𑀯𑀸𑀲𑀺𑀬𑀁 𑀘𑀦𑁆𑀤𑀧𑀭𑀺𑀓𑁆𑀔𑀬𑁂𑀦. 𑀆𑀤𑀺-𑀲𑀤𑁆𑀤𑁂𑀦 𑀘𑀦𑁆𑀤𑀲𑁆𑀲 𑀉𑀧𑀟𑁆𑀠𑀫𑀡𑁆𑀟𑀮𑀢𑀸𑀭𑀸𑀳𑀼𑀕𑁆𑀕𑀳𑀢𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀉𑀧𑀲𑀕𑁆𑀕𑀫𑀢𑁆𑀢𑀫𑁂𑀯 𑀅𑀪𑀺-𑀲𑀤𑁆𑀤𑁄 𑀮𑀓𑁆𑀔𑀺𑀢𑀲𑀤𑁆𑀤𑁂𑀦𑁂𑀯 𑀮𑀓𑁆𑀔𑀡𑀢𑁆𑀣𑀲𑁆𑀲 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀞𑀫𑀤𑀺𑀯𑀲𑀢𑁄 𑀧𑀪𑀼𑀢𑀻𑀢𑀺 𑀧𑀞𑀫𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀧𑀝𑁆𑀞𑀸𑀬. 𑀬𑀲𑁆𑀫𑀸 𑀘𑁄𑀤𑀓𑁄 𑀪𑀕𑀯𑀢𑁄 𑀓𑀸𑀮𑁂 𑀅𑀦𑀪𑀺𑀮𑀓𑁆𑀔𑀺𑀢𑀸𑀧𑀺 𑀅𑀧𑀭𑀪𑀸𑀕𑁂 𑀅𑀪𑀺𑀮𑀓𑁆𑀔𑀺𑀢𑀸 𑀚𑀸𑀢𑀸, 𑀢𑀲𑁆𑀫𑀸 𑀢𑀁 𑀅𑀪𑀺𑀮𑀓𑁆𑀔𑀡𑀻𑀬𑀢𑀁 𑀉𑀧𑀸𑀤𑀸𑀬 ‘‘𑀲𑀩𑁆𑀩𑀤𑀲𑁆𑀲𑀺𑀦𑀸 𑀪𑀕𑀯𑀢𑀸 𑀧𑀜𑁆𑀘𑀫𑀻 𑀓𑀲𑁆𑀫𑀸 𑀦 𑀕𑀳𑀺𑀢𑀸’’𑀢𑀺 𑀘𑁄𑀤𑁂𑀢𑀺, 𑀇𑀢𑀭𑁄 𑀲𑀩𑁆𑀩𑀓𑀸𑀮𑀺𑀓𑀸𑀲𑀼 𑀘𑀸𑀢𑀼𑀤𑁆𑀤𑀲𑀻𑀆𑀤𑀻𑀲𑀼 𑀕𑀬𑁆𑀳𑀫𑀸𑀦𑀸𑀲𑀼 𑀅𑀲𑀩𑁆𑀩𑀓𑀸𑀮𑀺𑀓𑀸𑀬 𑀓𑀣𑀁 𑀕𑀳𑀡𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀅𑀲𑀩𑁆𑀩𑀓𑀸𑀮𑀺𑀓𑀢𑁆𑀢𑀸’’𑀢𑀺 𑀧𑀭𑀺𑀳𑀭𑀢𑀺.

𑀢𑀣𑀸𑀯𑀺𑀥𑀸𑀲𑀽𑀢𑀺 ‘‘𑀅𑀪𑀺𑀜𑁆𑀜𑀸𑀢𑀸’’𑀢𑀺𑀆𑀤𑀺𑀦𑀸 𑀬𑀣𑀸 𑀯𑀼𑀢𑁆𑀢𑀸, 𑀢𑀣𑀸𑀯𑀺𑀥𑀸𑀲𑀼. 𑀤𑁂𑀯𑀢𑀸𑀥𑀺𑀝𑁆𑀞𑀺𑀢𑀪𑀸𑀯𑁂𑀦 𑀆𑀭𑀸𑀫𑀸𑀤𑀻𑀦𑀁 𑀮𑁄𑀓𑀲𑁆𑀲 𑀘𑁂𑀢𑀺𑀬𑀪𑀸𑀯𑁄𑀢𑀺 𑀆𑀳 ‘‘𑀧𑀽𑀚𑀦𑀻𑀬𑀝𑁆𑀞𑁂𑀦𑀸’’𑀢𑀺. 𑀫𑀦𑀼𑀲𑁆𑀲𑀸 𑀬𑁂𑀪𑀼𑀬𑁆𑀬𑁂𑀦 𑀕𑀸𑀫𑀸𑀤𑀻𑀦𑀁 𑀤𑁆𑀯𑀸𑀭𑁂𑀲𑀼 𑀢𑀣𑀸𑀭𑀽𑀧𑁂 𑀭𑀼𑀓𑁆𑀔𑁂 𑀘𑁂𑀢𑀺𑀬𑀝𑁆𑀞𑀸𑀦𑀺𑀬𑁂 𑀓𑀢𑁆𑀯𑀸 𑀯𑁄𑀳𑀭𑀦𑁆𑀢𑀻𑀢𑀺 𑀆𑀳 ‘‘𑀕𑀸𑀫𑀦𑀺𑀕𑀫𑀸𑀤𑀺𑀤𑁆𑀯𑀸𑀭𑁂𑀲𑀽’’𑀢𑀺𑀆𑀤𑀺. 𑀤𑀲𑁆𑀲𑀦𑀫𑀢𑁆𑀢𑁂𑀦𑀧𑀺 𑀲𑀯𑀦𑀫𑀢𑁆𑀢𑁂𑀦𑀧𑀺 𑀪𑀬𑀼𑀧𑁆𑀧𑀸𑀤𑀦𑁂𑀦 𑀧𑀸𑀓𑀢𑀺𑀓𑀲𑀢𑁆𑀢𑁂 𑀪𑀺𑀁𑀲𑁂𑀦𑁆𑀢𑀻𑀢𑀺 𑀪𑀺𑀁𑀲𑀦𑀓𑀸𑀦𑀺. 𑀢𑁂𑀦𑀸𑀳 ‘‘𑀪𑀬𑀚𑀦𑀓𑀸𑀦𑀻’’𑀢𑀺𑀆𑀤𑀺. 𑀪𑀸𑀬𑀢𑀺 𑀏𑀢𑀲𑁆𑀫𑀸𑀢𑀺 𑀪𑀬𑀁, 𑀅𑀢𑀺𑀯𑀺𑀬 𑀲𑀧𑁆𑀧𑀝𑀺𑀪𑀬𑀁 𑀪𑁂𑀭𑀯𑀁.

𑀆𑀬𑀸𑀘𑀦𑀉𑀧𑀳𑀸𑀭𑀓𑀭𑀡𑀸𑀭𑀳𑀦𑁆𑀢𑀺 𑀢𑀁𑀢𑀁𑀩𑀮𑀺𑀓𑀫𑁆𑀫𑀧𑀡𑀺𑀥𑀺𑀓𑀫𑁆𑀫𑀓𑀭𑀡𑀬𑁄𑀕𑁆𑀕𑀁. 𑀧𑀼𑀧𑁆𑀨𑀥𑀽𑀧…𑀧𑁂… 𑀥𑀭𑀡𑀺𑀢𑀮𑀦𑁆𑀢𑀺 𑀇𑀤𑀁 𑀬𑀣𑀸𑀧𑀝𑀺𑀲𑀽𑀢𑁂𑀦 𑀲𑀼𑀧𑁆𑀧𑀸𑀤𑀺𑀦𑀸 𑀉𑀧𑀳𑀸𑀭𑀓𑀭𑀡𑀤𑀲𑁆𑀲𑀦𑀁. 𑀓𑁄𑀝𑁆𑀝𑁂𑀦𑁆𑀢𑁄𑀢𑀺 𑀧𑀳𑀭𑀦𑁆𑀢𑁄, 𑀲𑀺𑀗𑁆𑀕𑀧𑁆𑀧𑀳𑀸𑀭𑀔𑀼𑀭𑀧𑁆𑀧𑀳𑀸𑀭𑁂𑀳𑀺 𑀲𑀤𑁆𑀤𑀁 𑀓𑀭𑁄𑀦𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀩𑁆𑀩𑀘𑀢𑀼𑀧𑁆𑀧𑀤𑀸𑀦𑀁 𑀇𑀥 𑀫𑀕𑁄𑀢𑀺 𑀦𑀸𑀫𑀁, 𑀦 ‘‘𑀅𑀘𑁆𑀙𑀘𑀫𑁆𑀫𑀁 𑀫𑀺𑀕𑀘𑀫𑁆𑀫𑀁 𑀏𑀴𑀓𑀘𑀫𑁆𑀫’’𑀦𑁆𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁨𑁫𑁯) 𑀯𑀺𑀬, 𑀭𑁄𑀳𑀺𑀢𑁄𑀢𑀺𑀆𑀤𑀺 𑀫𑀺𑀕𑀯𑀺𑀲𑁂𑀲𑀸𑀦𑀦𑁆𑀢𑀺 ¶ 𑀅𑀥𑀺𑀧𑁆𑀧𑀸𑀬𑁄. 𑀘𑀸𑀮𑁂𑀢𑁆𑀯𑀸𑀢𑀺 𑀅𑀕𑁆𑀕𑀫𑀤𑁆𑀤𑀦𑁂𑀦 𑀘𑀸𑀮𑁂𑀢𑁆𑀯𑀸. 𑀫𑁄𑀭𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀉𑀧𑀮𑀓𑁆𑀔𑀡𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀇𑀥 𑀲𑀩𑁆𑀩𑀧𑀓𑁆𑀔𑀺𑀕𑀳𑀡𑀁 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺. 𑀏𑀲 𑀦𑀬𑁄𑀢𑀺 𑀇𑀤𑀁 𑀬𑀣𑀸 ‘‘𑀫𑁄𑀭𑁄 𑀯𑀸’’𑀢𑀺 ¶ 𑀏𑀢𑁆𑀣 𑀯𑀸-𑀲𑀤𑁆𑀤𑁄 𑀅𑀯𑀼𑀢𑁆𑀢𑀯𑀺𑀓𑀧𑁆𑀧𑀦𑀢𑁆𑀣𑁄, 𑀏𑀯𑀁 ‘‘𑀫𑀺𑀕𑁄 𑀯𑀸’’𑀢𑀺 𑀏𑀢𑁆𑀣𑀸𑀧𑀻𑀢𑀺 𑀫𑀺𑀕𑀲𑀤𑁆𑀤𑀲𑁆𑀲 𑀯𑀺𑀲𑁂𑀲𑀢𑁆𑀣𑀯𑀼𑀢𑁆𑀢𑀺𑀢𑀁 𑀲𑀦𑁆𑀥𑀸𑀬𑀸𑀳. 𑀇𑀢𑁄 𑀧𑀪𑀽𑀢𑀻𑀢𑀺 ‘‘𑀬𑀁𑀦𑀽𑀦𑀸𑀳𑀁 𑀬𑀸 𑀢𑀸 𑀭𑀢𑁆𑀢𑀺𑀬𑁄’’𑀢𑀺𑀆𑀤𑀺𑀦𑀸 𑀪𑀬𑀪𑁂𑀭𑀯𑀲𑁆𑀲 𑀕𑀯𑁂𑀲𑀦𑀘𑀺𑀦𑁆𑀢𑀦𑀢𑁄 𑀧𑀪𑀼𑀢𑀺, 𑀦 𑀕𑀯𑁂𑀲𑀦𑀸𑀭𑀫𑁆𑀪𑀢𑁄 𑀧𑀪𑀼𑀢𑀺. ‘‘𑀅𑀧𑁆𑀧𑁂𑀯 𑀦𑀸𑀫𑀸𑀳𑀁 𑀪𑀬𑀪𑁂𑀭𑀯𑀁 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺 𑀏𑀢𑁆𑀣𑀸𑀧𑀺 𑀳𑀺 𑀆𑀭𑀫𑁆𑀫𑀡𑀫𑁂𑀯 𑀪𑀬𑀪𑁂𑀭𑀯𑀁. 𑀲𑀼𑀔𑀸𑀭𑀫𑁆𑀫𑀡𑀁 𑀭𑀽𑀧𑀁 𑀲𑀼𑀔𑀫𑀺𑀯 ‘‘𑀭𑀽𑀧𑀁 𑀲𑀼𑀔𑀁 𑀲𑀼𑀔𑀸𑀦𑀼𑀧𑀢𑀺𑀢𑀁 𑀲𑀼𑀔𑀸𑀯𑀓𑁆𑀓𑀦𑁆𑀢’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁬𑁦). 𑀓𑀣𑀁 𑀪𑀬𑀕𑁆𑀕𑀳𑀡𑁂𑀦 𑀘 𑀭𑀽𑀧𑀸𑀭𑀫𑁆𑀫𑀡𑀕𑁆𑀕𑀳𑀡𑀦𑁆𑀢𑀺 𑀆𑀳 ‘‘𑀧𑀭𑀺𑀢𑁆𑀢𑀲𑁆𑀲 𑀘𑀸’’𑀢𑀺𑀆𑀤𑀺. ‘‘𑀆𑀕𑀘𑁆𑀙𑀢𑀻’’𑀢𑀺 𑀯𑀘𑀦𑀢𑁄 𑀕𑀯𑁂𑀲𑀦𑀸𑀭𑀫𑁆𑀪𑀢𑁄 𑀧𑀪𑀼𑀢𑀺 ‘‘𑀏𑀢𑀁 𑀪𑀬’’𑀦𑁆𑀢𑀺 𑀆𑀭𑀫𑁆𑀫𑀡𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀓𑁂𑀘𑀺 ‘‘𑀢𑀁 𑀦 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺 𑀘𑀓𑁆𑀔𑀼𑀦𑀸 𑀤𑀲𑁆𑀲𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀪𑀬𑀁 𑀆𑀓𑀗𑁆𑀔𑀫𑀸𑀦𑁄𑀢𑀺 𑀉𑀧𑀧𑀭𑀺𑀓𑁆𑀔𑀦𑀯𑀲𑁂𑀦 𑀅𑀳𑀁 𑀪𑀬𑀯𑀢𑁆𑀣𑀼𑀁 𑀆𑀓𑀗𑁆𑀔𑀦𑁆𑀢𑁄 𑀯𑀺𑀳𑀭𑀸𑀫𑀺, 𑀢𑀁 𑀓𑀺𑀫𑀢𑁆𑀣𑀺𑀬𑀁, 𑀏𑀢𑁆𑀢𑀓𑁄𑀧𑀺 𑀪𑀬𑀲𑀫𑀦𑁆𑀦𑀸𑀳𑀸𑀭𑁄 𑀫𑀬𑁆𑀳𑀁 𑀅𑀬𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑀁 𑀧𑀓𑀸𑀭𑀁 𑀪𑀽𑀢𑁄 𑀬𑀣𑀸𑀪𑀽𑀢𑁄, 𑀲𑁄 𑀧𑀦𑁂𑀢𑁆𑀣 𑀧𑀓𑀸𑀭𑁄 𑀇𑀭𑀺𑀬𑀸𑀧𑀣𑀯𑀲𑁂𑀦 𑀬𑀼𑀢𑁆𑀢𑁄 𑀧𑀸𑀴𑀺𑀬𑀁 𑀢𑀣𑀸 𑀆𑀕𑀢𑀢𑁆𑀢𑀸𑀢𑀺 𑀆𑀳 ‘‘𑀬𑁂𑀦 𑀬𑁂𑀦 𑀇𑀭𑀺𑀬𑀸𑀧𑀣𑁂𑀦 𑀪𑀽𑀢𑀲𑁆𑀲𑀸’’𑀢𑀺. 𑀪𑀯𑀺𑀢𑀲𑁆𑀲𑀸𑀢𑀺 𑀇𑀤𑀁 ‘‘𑀪𑀽𑀢𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑀁 𑀧𑀤𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀲𑀫𑀗𑁆𑀕𑀻𑀪𑀽𑀢𑀲𑁆𑀲𑀸’’𑀢𑀺 𑀧𑀤𑀁 𑀧𑀼𑀭𑀺𑀫𑀧𑀤𑀮𑁄𑀧𑁂𑀦 𑀪𑀽𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑀗𑁆𑀕𑀻𑀪𑀽𑀢𑀲𑁆𑀲 𑀯𑀸’’𑀢𑀺 𑀆𑀳. 𑀪𑀬𑀪𑁂𑀭𑀯𑀸𑀭𑀫𑁆𑀫𑀡𑁂𑀢𑀺 𑀪𑀬𑀪𑁂𑀭𑀯𑀸𑀪𑀺𑀫𑀢𑁂 𑀆𑀭𑀫𑁆𑀫𑀡𑁂. 𑀦𑁂𑀯 𑀫𑀳𑀸𑀲𑀢𑁆𑀢𑁄 𑀢𑀺𑀝𑁆𑀞𑀢𑀻𑀢𑀺𑀆𑀤𑀺 ‘‘𑀢𑀣𑀸𑀪𑀽𑀢𑁄 𑀘 𑀢𑀁 𑀧𑀝𑀺𑀯𑀺𑀦𑁂𑀬𑁆𑀬’’𑀦𑁆𑀢𑀺 𑀬𑀣𑀸 𑀘𑀺𑀦𑁆𑀢𑀺𑀢𑀁, 𑀢𑀣𑀸 𑀧𑀝𑀺𑀧𑀦𑁆𑀦𑀪𑀸𑀯𑀤𑀲𑁆𑀲𑀦𑀁. 𑀇𑀭𑀺𑀬𑀸𑀧𑀣𑀧𑀝𑀺𑀧𑀸𑀝𑀺 𑀦𑀸𑀫 𑀞𑀸𑀦𑀕𑀫𑀦𑀦𑀺𑀲𑀚𑁆𑀚𑀸𑀦𑀺𑀧𑀚𑁆𑀚𑀸𑀢𑀺 𑀯𑀤𑀦𑁆𑀢𑀺, 𑀉𑀧𑁆𑀧𑀝𑀺𑀧𑀸𑀝𑀺 𑀧𑀦 𑀧𑀞𑀫𑀁 𑀦𑀺𑀧𑀚𑁆𑀚𑀸, 𑀧𑀼𑀦 𑀦𑀺𑀲𑀚𑁆𑀚𑀸, 𑀧𑀼𑀦 𑀞𑀸𑀦𑀁, 𑀧𑀘𑁆𑀙𑀸 𑀕𑀫𑀦𑀦𑁆𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸. 𑀆𑀲𑀦𑁆𑀦𑀧𑀝𑀺𑀧𑀸𑀝𑀺𑀬𑀸𑀢𑀺 𑀕𑀫𑀦𑀲𑁆𑀲 𑀢𑀸𑀯 𑀞𑀸𑀦𑀁 𑀆𑀲𑀦𑁆𑀦𑀁, 𑀞𑀸𑀦𑀲𑁆𑀲 𑀦𑀺𑀲𑀚𑁆𑀚𑀸 𑀕𑀫𑀦𑀜𑁆𑀘, 𑀦𑀺𑀲𑀚𑁆𑀚𑀸𑀬 𑀦𑀺𑀧𑀚𑁆𑀚𑀸 𑀞𑀸𑀦𑀜𑁆𑀘, 𑀦𑀺𑀧𑀚𑁆𑀚𑀸𑀬 𑀦𑀺𑀲𑀚𑁆𑀚𑀸 𑀆𑀲𑀦𑁆𑀦𑀸. 𑀇𑀥 𑀧𑀦 𑀕𑀫𑀦𑀲𑁆𑀲 𑀞𑀸𑀦𑀁, 𑀞𑀸𑀦𑀲𑁆𑀲 𑀘 𑀕𑀫𑀦𑀁, 𑀦𑀺𑀲𑀚𑁆𑀚𑀸𑀬 𑀘 𑀦𑀺𑀧𑀚𑁆𑀚𑀸, 𑀦𑀺𑀧𑀚𑁆𑀚𑀸𑀬 𑀘 𑀦𑀺𑀲𑀚𑁆𑀚𑀸 𑀆𑀲𑀦𑁆𑀦𑀪𑀸𑀯𑁂𑀦 𑀕𑀳𑀺𑀢𑀸, 𑀇𑀢𑀭𑁂 𑀧𑀭𑀫𑁆𑀧𑀭𑀸𑀯𑀲𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀪𑀺𑀓𑁆𑀔𑀼𑀲𑁆𑀲 𑀧𑀦 𑀇𑀭𑀺𑀬𑀸𑀧𑀣𑀸 𑀲𑀫𑁆𑀧𑀢𑁆𑀢𑀧𑀝𑀺𑀧𑀸𑀝𑀺𑀬𑀸 𑀯𑀺𑀬 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀯𑀼𑀘𑁆𑀘𑀦𑁆𑀢𑀺.

𑀪𑀬𑀪𑁂𑀭𑀯𑀲𑁂𑀦𑀸𑀲𑀦𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀲𑀫𑁆𑀫𑁄𑀳𑀯𑀺𑀳𑀸𑀭𑀯𑀡𑁆𑀡𑀦𑀸

𑁫𑁦. 𑀅𑀬𑀜𑁆𑀘 ¶ 𑀫𑁂 𑀲𑀩𑁆𑀩𑀲𑁄 𑀪𑀬𑀪𑁂𑀭𑀯𑀸𑀪𑀸𑀯𑁄 𑀯𑀺𑀲𑁂𑀲𑀢𑁄 𑀅𑀲𑀫𑁆𑀫𑁄𑀳𑀥𑀫𑁆𑀫𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀦𑁆𑀢𑀺 ¶ 𑀔𑁄 𑀧𑀦𑀸’’𑀢𑀺𑀆𑀤𑀺𑀦𑀸 𑀉𑀧𑀭𑀺 𑀤𑁂𑀲𑀦𑀸 𑀯𑀟𑁆𑀠𑀺𑀢𑀸𑀢𑀺 𑀅𑀬𑀁 𑀯𑀸 𑀏𑀢𑁆𑀣 𑀅𑀦𑀼𑀲𑀦𑁆𑀥𑀺. 𑀛𑀸𑀬𑀻𑀦𑀁 𑀲𑀫𑁆𑀫𑁄𑀳𑀝𑁆𑀞𑀸𑀦𑁂𑀲𑀽𑀢𑀺 𑀇𑀫𑀺𑀦𑀸 𑀅𑀚𑁆𑀛𑀸𑀬𑀻𑀦𑀁 𑀲𑀫𑁆𑀫𑁄𑀳𑀝𑁆𑀞𑀸𑀦𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀢𑁆𑀣𑀻𑀢𑀺 𑀇𑀤𑀁 𑀦𑀺𑀧𑀸𑀢𑀧𑀤𑀁 𑀧𑀼𑀣𑀼𑀯𑀘𑀦𑀫𑁆𑀧𑀺 𑀳𑁄𑀢𑀺 ‘‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁭𑁩-𑁩𑁭𑁪; 𑀫. 𑀦𑀺. 𑁧.𑁧𑁧𑁦; 𑁩.𑁧𑁫𑁪; 𑀲𑀁. 𑀦𑀺. 𑁪.𑁧𑁨𑁭; 𑀔𑀼. 𑀧𑀸. 𑁩.𑀤𑁆𑀯𑀢𑀺𑀁𑀲𑀸𑀓𑀸𑀭) 𑀯𑀺𑀬𑀸𑀢𑀺 ‘‘𑀲𑀦𑁆𑀢𑀻’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀓𑀺𑀁 𑀔𑀡𑀢𑁆𑀢𑀬𑀲𑀫𑀗𑁆𑀕𑀺𑀢𑀸𑀬 𑀢𑁂 𑀅𑀢𑁆𑀣𑀺, 𑀦𑁄𑀢𑀺 𑀆𑀳 ‘‘𑀲𑀁𑀯𑀺𑀚𑁆𑀚𑀦𑁆𑀢𑀺 𑀉𑀧𑀮𑀩𑁆𑀪𑀦𑁆𑀢𑀻’’𑀢𑀺, 𑀫𑀳𑀢𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀏𑀤𑀺𑀲𑀸𑀧𑀺 𑀲𑀁𑀯𑀺𑀚𑁆𑀚𑀦𑁆𑀢𑀺 𑀜𑀸𑀡𑁂𑀦 𑀕𑀳𑁂𑀢𑀩𑁆𑀩𑀢𑀸𑀬 𑀉𑀧𑀮𑀩𑁆𑀪𑀦𑁆𑀢𑀻𑀢𑀺. 𑀑𑀤𑀸𑀢𑀓𑀲𑀺𑀡𑀮𑀸𑀪𑀻𑀢𑀺 𑀅𑀧𑁆𑀧𑀫𑀸𑀡𑀑𑀤𑀸𑀢𑀓𑀲𑀺𑀡𑀮𑀸𑀪𑀻. 𑀏𑀯𑀁 𑀳𑀺𑀲𑁆𑀲 𑀲𑀫𑀦𑁆𑀢𑀢𑁄 𑀆𑀮𑁄𑀓𑁄 𑀯𑀺𑀬 𑀉𑀧𑀝𑁆𑀞𑀸𑀢𑀺. 𑀧𑀭𑀺𑀓𑀫𑁆𑀫𑀦𑁆𑀢𑀺 𑀲𑀫𑀸𑀧𑀢𑁆𑀢𑀺𑀧𑀼𑀩𑁆𑀩𑀪𑀸𑀕𑀫𑀸𑀳. 𑀏𑀢𑁆𑀢𑀓𑀁 𑀲𑀽𑀭𑀺𑀬𑁂 𑀕𑀢𑁂 𑀯𑀼𑀝𑁆𑀞𑀳𑀸𑀫𑀻𑀢𑀺, 𑀦𑁄 𑀘 𑀔𑁄 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑁂 𑀓𑀼𑀲𑀮𑁄 𑀳𑁄𑀢𑀺, 𑀓𑁂𑀯𑀮𑀁 ‘‘𑀤𑀺𑀯𑀸 𑀏𑀯 𑀯𑀼𑀝𑁆𑀞𑀳𑀸𑀫𑀻’’𑀢𑀺 𑀫𑀦𑀲𑀺𑀓𑀸𑀭𑀁 𑀉𑀧𑁆𑀧𑀸𑀤𑁂𑀲𑀺. 𑀯𑀺𑀲𑀤𑀁 𑀳𑁄𑀢𑀺 𑀲𑀩𑁆𑀩𑀁 𑀆𑀭𑀫𑁆𑀫𑀡𑀚𑀸𑀢𑀁, 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀧𑀲𑁆𑀲𑀦𑁆𑀢𑀲𑁆𑀲 𑀯𑀺𑀬 𑀯𑀺𑀪𑀽𑀢𑀁. 𑀅𑀯𑀺𑀲𑀤𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁𑀲𑀜𑁆𑀜𑀺𑀦𑁄𑀢𑀺 𑀭𑀢𑁆𑀢𑀺𑀁 ‘‘𑀤𑀺𑀯𑀸’’𑀢𑀺, 𑀤𑀺𑀯𑀸 𑀘 ‘‘𑀭𑀢𑁆𑀢𑀻’’𑀢𑀺 𑀏𑀯𑀁𑀲𑀜𑁆𑀜𑀺𑀦𑁄.

𑀅𑀦𑁆𑀢𑁄𑀲𑁂𑀦𑀸𑀲𑀦𑁂 𑀭𑀢𑁆𑀢𑀺𑀁 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺 𑀭𑀢𑁆𑀢𑀺-𑀲𑀤𑁆𑀤𑁄 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑁄. 𑀧𑀭𑀺𑀢𑁆𑀢𑀸𑀲𑀦𑀸𑀤𑀻𑀳𑀺, 𑀅𑀜𑁆𑀜𑁂𑀳𑀺 𑀯𑀸 𑀓𑀸𑀭𑀡𑁂𑀳𑀺. 𑀕𑀫𑁆𑀪𑀻𑀭𑀸𑀬 𑀪𑀽𑀫𑀺𑀕𑀩𑁆𑀪𑀲𑀤𑀺𑀲𑀸𑀬 𑀖𑀦𑀯𑀦𑀧𑀝𑀺𑀘𑁆𑀙𑀦𑁆𑀦𑀸𑀬 𑀩𑀳𑀮𑀢𑀭𑀚𑀸𑀮𑀯𑀦𑀧𑀝𑀮𑀧𑀝𑀺𑀘𑁆𑀙𑀦𑁆𑀦𑀸𑀬. 𑀅𑀦𑁆𑀢𑀭𑀳𑀺𑀢𑀲𑀽𑀭𑀺𑀬𑀸𑀮𑁄𑀓𑁂 𑀓𑀸𑀮𑁂𑀢𑀺 𑀏𑀢𑁂𑀦𑁂𑀯 𑀤𑀺𑀯𑀸𑀢𑀺 𑀅𑀯𑀼𑀢𑁆𑀢𑀲𑀺𑀤𑁆𑀥𑁄. 𑀲𑀫𑁆𑀫𑁄𑀳𑀯𑀺𑀳𑀸𑀭𑁄 𑀦𑀸𑀫 𑀩𑀳𑀼𑀯𑀺𑀥𑁄𑀢𑀺 𑀆𑀳 ‘‘𑀲𑀫𑁆𑀫𑁄𑀳𑀯𑀺𑀳𑀸𑀭𑀸𑀦𑀁 𑀅𑀜𑁆𑀜𑀢𑀭’’𑀦𑁆𑀢𑀺.

𑀧𑀸𑀓𑀝𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀭𑀢𑁆𑀢𑀺𑀦𑁆𑀤𑀺𑀯𑀧𑀭𑀺𑀘𑁆𑀙𑁂𑀤𑁄 𑀅𑀦𑁆𑀢𑀫𑀲𑁄 𑀮𑀯𑀢𑀼𑀝𑀺𑀔𑀡𑀲𑁆𑀲𑀧𑀺 𑀉𑀧𑀸𑀤𑀸𑀬 𑀲𑀼𑀯𑀯𑀢𑁆𑀣𑀺𑀢𑀢𑁆𑀢𑀸, 𑀢𑀣𑀸 𑀭𑀢𑁆𑀢𑀺𑀤𑀺𑀯𑀲𑀓𑁄𑀝𑁆𑀞𑀸𑀲𑀧𑀭𑀺𑀘𑁆𑀙𑁂𑀤𑁄 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀓𑀺𑀘𑁆𑀘𑀯𑀲𑁂𑀦 𑀓𑀸𑀮𑀜𑀸𑀡𑀯𑀲𑁂𑀦 𑀘.

𑀓𑀸𑀮𑀣𑀫𑁆𑀪𑁂 ¶ 𑀮𑀤𑁆𑀥𑀩𑁆𑀩𑀙𑀸𑀬𑀸𑀯𑀲𑁂𑀦 𑀤𑁆𑀯𑀗𑁆𑀕𑀼𑀮𑀓𑀸𑀮𑁂. 𑀬𑀸𑀫𑀖𑀡𑁆𑀝𑀺𑀓𑀁 𑀧𑀳𑀭𑀢𑀺 𑀲𑀗𑁆𑀖𑀲𑁆𑀲 𑀢𑀁𑀢𑀁𑀯𑀢𑁆𑀢𑀓𑀭𑀡𑀢𑁆𑀣𑀁. 𑀫𑀼𑀕𑁆𑀕𑀭𑀦𑁆𑀢𑀺 𑀖𑀡𑁆𑀝𑀺𑀓𑀧𑁆𑀧𑀳𑀭𑀡𑀫𑀼𑀕𑁆𑀕𑀭𑀁. 𑀬𑀸𑀫𑀬𑀦𑁆𑀢𑀁 𑀧𑀢𑀢𑀺 𑀅𑀜𑁆𑀜𑁂𑀳𑀺 𑀪𑀺𑀓𑁆𑀔𑀽𑀳𑀺 𑀬𑁄𑀚𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀸𑀯 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀪𑁄𑀚𑀦𑀲𑀸𑀮𑀁 𑀉𑀧𑀕𑀘𑁆𑀙𑀦𑁆𑀢𑀺, 𑀢𑀸𑀯 𑀤𑀺𑀯𑀸𑀯𑀺𑀳𑀸𑀭𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑀺.

𑀬𑀁 𑀔𑁄 𑀢𑀦𑁆𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀅𑀦𑀺𑀬𑀫𑀼𑀤𑁆𑀤𑁂𑀲𑁄, 𑀔𑁄𑀢𑀺 𑀅𑀯𑀥𑀸𑀭𑀡𑁂, 𑀬𑀫𑁂𑀯 𑀧𑀼𑀕𑁆𑀕𑀮𑀦𑁆𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑀯𑀘𑀦𑀁. 𑀫𑀫𑁂𑀯𑀸𑀢𑀺 𑀫𑀁 𑀏𑀯. 𑀅𑀲𑀫𑁆𑀫𑁄𑀳𑀲𑀪𑀸𑀯𑁄𑀢𑀺 𑀲𑀪𑀸𑀯𑀪𑀽𑀢𑀅𑀲𑀫𑁆𑀫𑁄𑀳𑁄. ‘‘𑀉𑀧𑁆𑀧𑀦𑁆𑀦𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀫𑀦𑀼𑀲𑁆𑀲𑀮𑁄𑀓𑁂’’𑀢𑀺 𑀯𑀼𑀢𑁆𑀢𑀁. 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀬𑀸𑀣𑀸𑀯𑀢𑁄 𑀳𑀺𑀢𑀲𑁆𑀲 𑀚𑀸𑀦𑀦𑀲𑀫𑀢𑁆𑀣𑁂𑀦 𑀅𑀢𑁆𑀢𑀦𑁄 𑀧𑀜𑁆𑀜𑀸𑀕𑀼𑀡𑁂𑀦, 𑀦 𑀓𑁂𑀯𑀮𑀁 𑀅𑀚𑁆𑀛𑀸𑀲𑀬𑁂𑀦𑁂𑀯 𑀳𑀺𑀢𑁂𑀲𑀺𑀢𑀸, 𑀅𑀣 𑀔𑁄 𑀧𑀬𑁄𑀕𑁂𑀦𑀸𑀢𑀺 ¶ 𑀤𑀲𑁆𑀲𑁂𑀦𑁆𑀢𑁄 ‘‘𑀳𑀺𑀢𑀽𑀧𑀤𑁂𑀲𑀓𑁄’’𑀢𑀺 𑀆𑀳. 𑀅𑀚𑁆𑀛𑀸𑀲𑀬𑁂𑀦 𑀧𑀦 𑀳𑀺𑀢𑁂𑀲𑀺𑀢𑀸 ‘‘𑀮𑁄𑀓𑀸𑀦𑀼𑀓𑀫𑁆𑀧𑀸𑀬𑀸’’𑀢𑀺 𑀇𑀫𑀺𑀦𑀸 𑀤𑀲𑁆𑀲𑀺𑀢𑀸. 𑀉𑀧𑀓𑀭𑀡𑁂𑀳𑀺 𑀯𑀺𑀦𑀸 𑀦 𑀓𑀤𑀸𑀘𑀺 𑀪𑁄𑀕𑀲𑀼𑀔𑀁 𑀉𑀧𑀓𑀭𑀡𑀤𑀸𑀦𑀜𑁆𑀘 𑀘𑀸𑀕𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀓𑀦𑁆𑀢𑀺 𑀆𑀳 ‘‘𑀘𑀸𑀕𑀲𑀫𑁆𑀧𑀢𑁆𑀢𑀺𑀬𑀸…𑀧𑁂… 𑀤𑀸𑀬𑀓𑁄’’𑀢𑀺. 𑀫𑁂𑀢𑁆𑀢𑀸𑀲𑀫𑁆𑀧𑀢𑁆𑀢𑀺𑀬𑀸 𑀳𑀺𑀢𑀽𑀧𑀲𑀁𑀳𑀸𑀭𑁂𑀦 𑀭𑀓𑁆𑀔𑀺𑀢𑀸. 𑀓𑀭𑀼𑀡𑀸𑀲𑀫𑁆𑀧𑀢𑁆𑀢𑀺𑀬𑀸 𑀤𑀼𑀓𑁆𑀔𑀸𑀧𑀦𑀬𑀦𑁂𑀦 𑀕𑁄𑀧𑀸𑀬𑀺𑀢𑀸. 𑀦𑀦𑀼 𑀘 𑀧𑀼𑀩𑁆𑀩𑁂𑀧𑀺 𑀯𑀼𑀢𑁆𑀢𑀁 ‘‘𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺, 𑀅𑀣 𑀓𑀲𑁆𑀫𑀸 𑀧𑀼𑀦 𑀢𑀁 𑀕𑀳𑀺𑀢𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀇𑀥 𑀤𑁂𑀯𑀫𑀦𑀼𑀲𑁆𑀲𑀕𑁆𑀕𑀳𑀡𑁂𑀦𑀸’’𑀢𑀺𑀆𑀤𑀺. 𑀢𑁂𑀦 𑀧𑀼𑀩𑁆𑀩𑁂 𑀅𑀯𑀺𑀲𑁂𑀲𑀢𑁄 𑀳𑀺𑀢𑀸𑀤𑀻𑀦𑀺 𑀤𑀲𑁆𑀲𑀺𑀢𑀸𑀦𑀺, 𑀇𑀤𑀸𑀦𑀺 𑀯𑀺𑀲𑁂𑀲𑀢𑁄 𑀲𑀳 𑀧𑀬𑁄𑀚𑀦𑁂𑀦 𑀢𑀸𑀦𑀺 𑀤𑀲𑁆𑀲𑀺𑀢𑀸𑀦𑀻𑀢𑀺 𑀤𑀻𑀧𑁂𑀢𑀺. 𑀦𑀺𑀩𑁆𑀩𑀸𑀦𑀢𑁄 𑀧𑀭𑁄 𑀧𑀭𑀫𑁄 𑀅𑀢𑁆𑀣𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀆𑀳 ‘‘𑀧𑀭𑀫𑀢𑁆𑀣𑀢𑁆𑀢𑀸𑀬𑀸’’𑀢𑀺. 𑀳𑀺𑀦𑁄𑀢𑀺 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀢𑀻𑀢𑀺 𑀳𑀺𑀢𑀁, 𑀫𑀕𑁆𑀕𑁄. 𑀉𑀓𑁆𑀓𑀁𑀲𑀢𑁄 𑀲𑀼𑀔𑀢𑁆𑀣𑀁 𑀅𑀭𑀺𑀬𑀨𑀮𑀦𑁆𑀢𑀺 𑀆𑀳 ‘‘𑀢𑀢𑁄 𑀉𑀢𑁆𑀢𑀭𑀺 𑀲𑀼𑀔𑀸𑀪𑀸𑀯𑀢𑁄’’𑀢𑀺.

𑀅𑀲𑀫𑁆𑀫𑁄𑀳𑀯𑀺𑀳𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀤𑀺𑀯𑀡𑁆𑀡𑀦𑀸

𑁫𑁧. 𑀅𑀲𑀫𑁆𑀫𑁄𑀳𑀯𑀺𑀳𑀸𑀭𑀦𑁆𑀢𑀺 𑀅𑀲𑀫𑁆𑀫𑁄𑀳𑀯𑀼𑀢𑁆𑀢𑀺𑀁, 𑀅𑀲𑀫𑁆𑀫𑁄𑀳𑀲𑀫𑁆𑀩𑁄𑀥𑀺𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀢𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀲𑀗𑁆𑀔𑀸𑀢𑀁 𑀧𑀝𑀺𑀧𑀤𑀁. 𑀧𑀼𑀩𑁆𑀩𑀪𑀸𑀕𑀢𑁄 𑀧𑀪𑀼𑀢𑀻𑀢𑀺 𑀪𑀸𑀯𑀦𑀸𑀬 𑀧𑀼𑀩𑁆𑀩𑀪𑀸𑀕𑀯𑀻𑀭𑀺𑀬𑀸𑀭𑀫𑁆𑀪𑀸𑀤𑀺𑀢𑁄 𑀧𑀝𑁆𑀞𑀸𑀬. 𑀓𑁂𑀘𑀻𑀢𑀺 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄.

𑀩𑁄𑀥𑀺𑀫𑀡𑁆𑀟𑁂𑀢𑀺 ¶ (𑀲𑀸𑀭𑀢𑁆𑀣. 𑀝𑀻. 𑁧.𑁧𑁧.𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸; 𑀅. 𑀦𑀺. 𑀝𑀻. 𑁩.𑁮.𑁧𑁧) 𑀩𑁄𑀥𑀺𑀲𑀗𑁆𑀔𑀸𑀢𑀲𑁆𑀲 𑀜𑀸𑀡𑀲𑁆𑀲 𑀫𑀡𑁆𑀟𑀪𑀸𑀯𑀧𑁆𑀧𑀢𑁆𑀢𑁂 𑀞𑀸𑀦𑁂. 𑀘𑀢𑀼𑀭𑀗𑁆𑀕𑀦𑁆𑀢𑀺 ‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘, 𑀅𑀝𑁆𑀞𑀺 𑀘 𑀅𑀯𑀲𑀺𑀲𑁆𑀲𑀢𑀽’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁨.𑁧𑁮𑁪; 𑀲𑀁. 𑀦𑀺. 𑁨.𑁨𑁩𑁭; 𑀅. 𑀦𑀺. 𑁨.𑁫; 𑁮.𑁧𑁩; 𑀫𑀳𑀸𑀦𑀺. 𑁧𑁭, 𑁧𑁯𑁬) 𑀯𑀼𑀢𑁆𑀢𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁. 𑀧𑀕𑁆𑀕𑀳𑀺𑀢𑀦𑁆𑀢𑀺 𑀆𑀭𑀫𑁆𑀪𑀁 𑀲𑀺𑀣𑀺𑀮𑀁 𑀅𑀓𑀢𑁆𑀯𑀸 𑀤𑀴𑁆𑀳𑀧𑀭𑀓𑁆𑀓𑀫𑀲𑀗𑁆𑀔𑀸𑀢𑀼𑀲𑁆𑀲𑀳𑀦𑀪𑀸𑀯𑁂𑀦 𑀕𑀳𑀺𑀢𑀁. 𑀢𑁂𑀦𑀸𑀳 ‘‘𑀅𑀲𑀺𑀣𑀺𑀮𑀧𑁆𑀧𑀯𑀢𑁆𑀢𑀺𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀅𑀲𑀮𑁆𑀮𑀻𑀦𑀦𑁆𑀢𑀺 𑀅𑀲𑀗𑁆𑀓𑀼𑀘𑀺𑀢𑀁 𑀓𑁄𑀲𑀚𑁆𑀚𑀯𑀲𑁂𑀦 𑀲𑀗𑁆𑀓𑁄𑀘𑀁 𑀅𑀦𑀸𑀧𑀦𑁆𑀦𑀁.

𑀉𑀧𑀝𑁆𑀞𑀺𑀢𑀸𑀢𑀺 𑀑𑀕𑀸𑀳𑀦𑀲𑀗𑁆𑀔𑀸𑀢𑁂𑀦 𑀅𑀧𑀺𑀮𑀸𑀧𑀦𑀪𑀸𑀯𑁂𑀦 𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀞𑀺𑀢𑀸. 𑀢𑁂𑀦𑀸𑀳 ‘‘𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀻𑀪𑀸𑀯𑁂𑀦𑀸’’𑀢𑀺. 𑀲𑀫𑁆𑀫𑁄𑀲𑀲𑁆𑀲 𑀯𑀺𑀤𑁆𑀥𑀁𑀲𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀦 𑀲𑀫𑁆𑀫𑀼𑀝𑁆𑀞𑀸𑀢𑀺 𑀅𑀲𑀫𑁆𑀫𑀼𑀝𑁆𑀞𑀸. 𑀓𑀺𑀜𑁆𑀘𑀸𑀧𑀺 𑀘𑀺𑀢𑁆𑀢𑀫𑀺𑀯 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀓𑀸𑀬𑀧𑀲𑁆𑀲𑀤𑁆𑀥𑀺𑀯𑀲𑁂𑀦𑁂𑀯 𑀓𑀸𑀬𑁄 𑀧𑀲𑁆𑀲𑀤𑁆𑀥𑁄 𑀳𑁄𑀢𑀺, 𑀢𑀣𑀸𑀧𑀺 𑀬𑀲𑁆𑀫𑀸 𑀓𑀸𑀬𑀧𑀲𑁆𑀲𑀤𑁆𑀥𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺𑀬𑀸 𑀲𑀳𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀯𑀺𑀦𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀓𑀸𑀬𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺𑀲𑀫𑁆𑀪𑀯𑁂𑀦𑀸’’𑀢𑀺 ¶ . 𑀭𑀽𑀧𑀓𑀸𑀬𑁄𑀧𑀺 𑀧𑀲𑁆𑀲𑀤𑁆𑀥𑁄𑀬𑁂𑀯 𑀳𑁄𑀢𑀺 𑀓𑀸𑀬𑀧𑀲𑁆𑀲𑀤𑁆𑀥𑀺𑀬𑀸 𑀉𑀪𑀬𑁂𑀲𑀫𑁆𑀧𑀺 𑀓𑀸𑀬𑀸𑀦𑀁 𑀧𑀲𑁆𑀲𑀫𑁆𑀪𑀦𑀸𑀯𑀳𑀢𑁆𑀢𑀸. 𑀲𑁄 𑀘 𑀔𑁄 𑀓𑀸𑀬𑁄. 𑀯𑀺𑀕𑀢𑀤𑀭𑀣𑁄𑀢𑀺 𑀯𑀺𑀕𑀢𑀓𑀺𑀮𑁂𑀲𑀤𑀭𑀣𑁄. 𑀦𑀸𑀫𑀓𑀸𑀬𑁂 𑀳𑀺 𑀯𑀺𑀕𑀢𑀤𑀭𑀣𑁂 𑀭𑀽𑀧𑀓𑀸𑀬𑁄𑀧𑀺 𑀯𑀽𑀧𑀲𑀦𑁆𑀢𑀤𑀭𑀣𑀧𑀭𑀺𑀴𑀸𑀳𑁄 𑀳𑁄𑀢𑀺. 𑀲𑀫𑁆𑀫𑀸 𑀆𑀳𑀺𑀢𑀦𑁆𑀢𑀺 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀯𑀺𑀥𑀸𑀯𑀦𑀲𑀗𑁆𑀔𑀸𑀢𑀯𑀺𑀓𑁆𑀔𑁂𑀧𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀏𑀓𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂 𑀅𑀯𑀺𑀓𑁆𑀔𑀺𑀢𑁆𑀢𑀪𑀸𑀯𑀸𑀧𑀸𑀤𑀸𑀦𑁂𑀦 𑀲𑀫𑁆𑀫𑀤𑁂𑀯 𑀆𑀳𑀺𑀢𑀁. 𑀢𑁂𑀦𑀸𑀳 ‘‘𑀲𑀼𑀝𑁆𑀞𑀼 𑀞𑀧𑀺𑀢’’𑀦𑁆𑀢𑀺𑀆𑀤𑀺. 𑀘𑀺𑀢𑁆𑀢𑀲𑁆𑀲 𑀅𑀦𑁂𑀓𑀕𑁆𑀕𑀪𑀸𑀯𑁄 𑀯𑀺𑀓𑁆𑀔𑁂𑀧𑀯𑀲𑁂𑀦 𑀘𑀜𑁆𑀘𑀮𑀢𑀸, 𑀲𑀸 𑀲𑀢𑀺 𑀏𑀓𑀕𑁆𑀕𑀢𑀸𑀬 𑀦 𑀳𑁄𑀢𑀻𑀢𑀺 𑀆𑀳 ‘‘𑀏𑀓𑀕𑁆𑀕𑀁 𑀅𑀘𑀮𑀁 𑀦𑀺𑀧𑁆𑀨𑀦𑁆𑀤𑀦’’𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸𑀢𑀺 ‘‘𑀆𑀭𑀤𑁆𑀥𑀁 𑀔𑁄 𑀧𑀦𑀸’’𑀢𑀺𑀆𑀤𑀺𑀦𑀸 𑀯𑀻𑀭𑀺𑀬𑀲𑀢𑀺𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀻𑀦𑀁 𑀓𑀺𑀘𑁆𑀘𑀲𑀺𑀤𑁆𑀥𑀺𑀤𑀲𑁆𑀲𑀦𑁂𑀦. 𑀦𑀦𑀼 𑀘 𑀲𑀤𑁆𑀥𑀸𑀧𑀜𑁆𑀜𑀸𑀦𑀫𑁆𑀧𑀺 𑀓𑀺𑀘𑁆𑀘𑀲𑀺𑀤𑁆𑀥𑀺 𑀛𑀸𑀦𑀲𑁆𑀲 𑀧𑀼𑀩𑁆𑀩𑀧𑀝𑀺𑀧𑀤𑀸𑀬 𑀇𑀘𑁆𑀙𑀺𑀢𑀩𑁆𑀩𑀸𑀢𑀺? 𑀲𑀘𑁆𑀘𑀁 𑀇𑀘𑁆𑀙𑀺𑀢𑀩𑁆𑀩𑀸, 𑀲𑀸 𑀧𑀦 𑀦𑀸𑀦𑀦𑁆𑀢𑀭𑀺𑀬𑀪𑀸𑀯𑁂𑀦 𑀅𑀯𑀼𑀢𑁆𑀢𑀲𑀺𑀤𑁆𑀥𑀸𑀢𑀺 𑀦 𑀕𑀳𑀺𑀢𑀸. 𑀅𑀲𑀢𑀺 𑀳𑀺 𑀲𑀤𑁆𑀥𑀸𑀬 𑀯𑀻𑀭𑀺𑀬𑀸𑀭𑀫𑁆𑀪𑀸𑀤𑀻𑀦𑀁 𑀅𑀲𑀫𑁆𑀪𑀯𑁄𑀬𑁂𑀯, 𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑁂 𑀘 𑀦𑁂𑀲𑀁 𑀅𑀲𑀢𑀺 𑀧𑀜𑁆𑀜𑀸𑀬𑀸𑀭𑀫𑁆𑀪𑀸𑀤𑀺𑀪𑀸𑀯𑁄 𑀦 𑀲𑀺𑀬𑀸. 𑀢𑀣𑀸 𑀅𑀲𑀮𑁆𑀮𑀻𑀦𑀸𑀲𑀫𑁆𑀫𑁄𑀲𑀢𑀸𑀤𑀬𑁄 𑀯𑀻𑀭𑀺𑀬𑀸𑀤𑀻𑀦𑀦𑁆𑀢𑀺 𑀅𑀲𑀮𑁆𑀮𑀻𑀦𑀢𑀸𑀤𑀺𑀕𑁆𑀕𑀳𑀡𑁂𑀦𑁂𑀯𑁂𑀢𑁆𑀣 𑀧𑀜𑁆𑀜𑀸𑀓𑀺𑀘𑁆𑀘𑀲𑀺𑀤𑁆𑀥𑀺 𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀛𑀸𑀦𑀪𑀸𑀯𑀦𑀸𑀬𑀁 𑀯𑀸 𑀲𑀫𑀸𑀥𑀺𑀓𑀺𑀘𑁆𑀘𑀁 𑀅𑀥𑀺𑀓𑀁 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀲𑀫𑀸𑀥𑀺𑀧𑀭𑀺𑀬𑁄𑀲𑀸𑀦𑀸𑀯 𑀛𑀸𑀦𑀲𑁆𑀲 𑀧𑀼𑀩𑁆𑀩𑀧𑀝𑀺𑀧𑀤𑀸 𑀓𑀣𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀇𑀥 𑀦 𑀯𑀢𑁆𑀢𑀩𑁆𑀩𑀁. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀳𑀺 𑀇𑀫𑀺𑀲𑁆𑀲𑀸 𑀲𑀁𑀯𑀡𑁆𑀡𑀦𑀸𑀬 𑀏𑀓𑀤𑁂𑀲𑀪𑀽𑀢𑁄𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄𑀢𑀺. 𑀯𑀺𑀳𑀭𑀢𑀻𑀢𑀺 𑀆𑀕𑀢𑀁 𑀧𑀭𑀼𑀤𑁆𑀤𑁂𑀲𑀺𑀓𑀢𑁆𑀢𑀸 ¶ 𑀯𑀺𑀳𑀸𑀭𑀲𑁆𑀲. 𑀇𑀥 𑀯𑀺𑀳𑀸𑀲𑀺𑀦𑁆𑀢𑀺 𑀆𑀕𑀢𑀁 𑀅𑀢𑁆𑀣𑀼𑀤𑁆𑀤𑁂𑀲𑀺𑀓𑀢𑁆𑀢𑀸. 𑀇𑀤𑀁 𑀓𑀺𑀭 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀅𑀯𑀺𑀚𑀳𑀺𑀢𑀦𑁆𑀢𑀺 𑀆𑀳 ‘‘𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺. 𑀭𑀽𑀧𑀯𑀺𑀭𑀸𑀕𑀪𑀸𑀯𑀦𑀸𑀯𑀲𑁂𑀦 (𑀲𑀸𑀭𑀢𑁆𑀣. 𑀝𑀻. 𑁧.𑁧𑁨.𑀦𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸) 𑀧𑀯𑀢𑁆𑀢𑁄 𑀘𑀢𑀼𑀩𑁆𑀩𑀺𑀥𑁄𑀧𑀺 𑀅𑀭𑀽𑀧𑀚𑁆𑀛𑀸𑀦𑀯𑀺𑀲𑁂𑀲𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀗𑁆𑀕𑀳𑁄 𑀏𑀯𑀸𑀢𑀺 𑀆𑀳 ‘‘𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀻’’𑀢𑀺. 𑀬𑀼𑀢𑁆𑀢𑀁 𑀢𑀸𑀯 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀪𑀯𑁄𑀓𑁆𑀓𑀫𑀦𑀢𑁆𑀣𑀢𑀸 𑀯𑀺𑀬 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀢𑀸𑀧𑀺 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀲𑀸𑀥𑀸𑀭𑀡𑀸𑀢𑀺 𑀢𑁂𑀲𑀁 𑀯𑀲𑁂𑀦 ‘‘𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀻’’𑀢𑀺 𑀯𑀘𑀦𑀁, 𑀅𑀪𑀺𑀜𑁆𑀜𑀸𑀧𑀸𑀤𑀓𑀢𑀸 𑀧𑀦 𑀦𑀺𑀭𑁄𑀥𑀧𑀸𑀤𑀓𑀢𑀸 𑀘 𑀘𑀢𑀼𑀢𑁆𑀣𑀲𑁆𑀲𑁂𑀯 𑀛𑀸𑀦𑀲𑁆𑀲 𑀆𑀯𑁂𑀡𑀺𑀓𑀸, 𑀲𑀸 𑀓𑀣𑀁 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀲𑀸𑀥𑀸𑀭𑀡𑀸 𑀯𑀼𑀢𑁆𑀢𑀸𑀢𑀺? 𑀧𑀭𑀫𑁆𑀧𑀭𑀸𑀥𑀺𑀝𑁆𑀞𑀸𑀦𑀪𑀸𑀯𑀢𑁄. 𑀧𑀤𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀫𑁆𑀧𑀺 𑀳𑀺 𑀧𑀤𑀝𑁆𑀞𑀸𑀦𑀦𑁆𑀢𑁂𑀯 𑀯𑀼𑀘𑁆𑀘𑀢𑀺, 𑀓𑀸𑀭𑀡𑀓𑀸𑀭𑀡𑀫𑁆𑀧𑀺 𑀓𑀸𑀭𑀡𑀦𑁆𑀢𑀺 𑀬𑀣𑀸 ‘‘𑀢𑀺𑀡𑁂𑀳𑀺 𑀲𑀢𑁆𑀢𑀁 𑀲𑀺𑀤𑁆𑀥’’𑀦𑁆𑀢𑀺, 𑀏𑀯𑀜𑁆𑀘 𑀓𑀢𑁆𑀯𑀸 𑀧𑀬𑁄𑀚𑀦𑀦𑀺𑀤𑁆𑀤𑁂𑀲𑁂 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀕𑁆𑀕𑀳𑀡𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀘𑀺𑀢𑁆𑀢𑁂𑀓𑀕𑁆𑀕𑀢𑀢𑁆𑀣𑀸𑀦𑀻𑀢𑀺 𑀘𑀺𑀢𑁆𑀢𑀲𑀫𑀸𑀥𑀸𑀦𑀢𑁆𑀣𑀸𑀦𑀺, 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀸𑀦𑀻𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀻𑀲𑁂𑀦 𑀳𑀺 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁄 𑀯𑀼𑀢𑁆𑀢𑁄, 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀏𑀓𑀕𑁆𑀕𑀘𑀺𑀢𑁆𑀢𑀸 𑀲𑀼𑀔𑀁 𑀤𑀺𑀯𑀲𑀁 𑀯𑀺𑀳𑀭𑀺𑀲𑁆𑀲𑀸𑀫𑀸’’𑀢𑀺. 𑀪𑀯𑁄𑀓𑁆𑀓𑀫𑀦𑀢𑁆𑀣𑀸𑀦𑀻𑀢𑀺 𑀪𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀅𑀢𑁆𑀣𑀸𑀦𑀺.

𑀬𑀲𑁆𑀫𑀸 (𑀲𑀸𑀭𑀢𑁆𑀣. 𑀝𑀻. 𑁧.𑁧𑁨.𑀦𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸) 𑀩𑁄𑀥𑀺𑀲𑀢𑁆𑀢𑁂𑀦 𑀩𑁄𑀥𑀺𑀫𑀡𑁆𑀟𑀽𑀧𑀲𑀗𑁆𑀓𑀫𑀦𑀢𑁄 𑀧𑀼𑀩𑁆𑀩𑁂𑀧𑀺 𑀘𑀭𑀺𑀫𑀪𑀯𑁂 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀢𑀧𑀼𑀩𑁆𑀩𑀁, 𑀢𑀤𑀸 𑀧𑀦 𑀢𑀁 𑀦𑀺𑀩𑁆𑀩𑀢𑁆𑀢𑀺𑀢𑀫𑀢𑁆𑀢𑀫𑁂𑀯 𑀅𑀳𑁄𑀲𑀺, 𑀦 𑀯𑀺𑀧𑀲𑁆𑀲𑀦𑀸𑀤𑀺𑀧𑀸𑀤𑀓𑀁 ¶ , 𑀢𑀲𑁆𑀫𑀸 ‘‘𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀦𑀺𑀩𑁆𑀩𑀢𑁆𑀢𑀺𑀢’’𑀦𑁆𑀢𑀺 𑀢𑀢𑁄 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀭𑀫𑁆𑀪𑁂 𑀯𑀺𑀧𑀲𑁆𑀲𑀦𑀸𑀬 𑀧𑀸𑀤𑀓𑀁. 𑀅𑀪𑀺𑀜𑁆𑀜𑀸𑀧𑀸𑀤𑀓𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀧𑀞𑀫𑀸𑀭𑀫𑁆𑀪𑁂 𑀏𑀯 𑀧𑀸𑀤𑀓𑀚𑁆𑀛𑀸𑀦𑁂𑀦 𑀧𑀬𑁄𑀚𑀦𑀁 𑀅𑀳𑁄𑀲𑀺, 𑀦 𑀢𑀢𑁄 𑀧𑀭𑀁 𑀉𑀧𑀭𑀺𑀫𑀕𑁆𑀕𑀸𑀥𑀺𑀕𑀫𑀨𑀮𑀲𑀫𑀸𑀧𑀢𑁆𑀢𑀺𑀅𑀪𑀺𑀜𑁆𑀜𑀸𑀯𑀴𑀜𑁆𑀚𑀦𑀸𑀤𑀺𑀅𑀢𑁆𑀣𑀁. 𑀅𑀪𑀺𑀲𑀫𑁆𑀩𑁄𑀥𑀺𑀲𑀫𑀥𑀺𑀕𑀫𑀢𑁄 𑀧𑀝𑁆𑀞𑀸𑀬 𑀳𑀺 𑀲𑀩𑁆𑀩𑀁 𑀜𑀸𑀡𑀲𑀫𑀸𑀥𑀺𑀓𑀺𑀘𑁆𑀘𑀁 𑀆𑀓𑀗𑁆𑀔𑀫𑀢𑁆𑀢𑀧𑀝𑀺𑀩𑀤𑁆𑀥𑀫𑁂𑀯𑀸𑀢𑀺. 𑀲𑀩𑁆𑀩𑀓𑀺𑀘𑁆𑀘𑀲𑀸𑀥𑀓𑀦𑁆𑀢𑀺 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀸𑀤𑀺𑀲𑀩𑁆𑀩𑀓𑀺𑀘𑁆𑀘𑀲𑀸𑀥𑀓𑀁. 𑀲𑀩𑁆𑀩𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀤𑀸𑀬𑀓𑀦𑁆𑀢𑀺 𑀏𑀢𑁆𑀣 𑀯𑀺𑀧𑀲𑁆𑀲𑀦𑀸𑀪𑀺𑀜𑁆𑀜𑀸𑀧𑀸𑀤𑀓𑀢𑁆𑀢𑀸 𑀏𑀯 𑀘𑀢𑀼𑀢𑁆𑀣𑀲𑁆𑀲 𑀛𑀸𑀦𑀲𑁆𑀲 𑀪𑀕𑀯𑀢𑁄 𑀲𑀩𑁆𑀩𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀤𑀸𑀬𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀳𑀺 𑀫𑀕𑁆𑀕𑀜𑀸𑀡𑀁, 𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀅𑀪𑀺𑀲𑀫𑁆𑀩𑁄𑀥𑀺, 𑀢𑀤𑀥𑀺𑀕𑀫𑀲𑀫𑀓𑀸𑀮𑀫𑁂𑀯 𑀪𑀕𑀯𑀢𑁄 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸 𑀳𑀢𑁆𑀣𑀕𑀢𑀸 𑀅𑀳𑁂𑀲𑀼𑀁, 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀦𑁆𑀦𑀺𑀲𑁆𑀲𑀬𑁄 𑀘 𑀫𑀕𑁆𑀕𑀸𑀥𑀺𑀕𑀫𑁄𑀢𑀺.

𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀩𑁆𑀩𑁂𑀦𑀺𑀯𑀸𑀲𑀓𑀣𑀸𑀯𑀡𑁆𑀡𑀦𑀸

𑁫𑁨. 𑀤𑁆𑀯𑀺𑀦𑁆𑀦𑀁 ¶ 𑀯𑀺𑀚𑁆𑀚𑀸𑀦𑀦𑁆𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀲𑀗𑁆𑀔𑀸𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀯𑀺𑀚𑁆𑀚𑀸𑀦𑀁. 𑀅𑀦𑀼𑀧𑀤𑀯𑀡𑁆𑀡𑀦𑀸𑀢𑀺 𑀢𑀸𑀲𑀁 𑀯𑀺𑀚𑁆𑀚𑀸𑀦𑀁 𑀦𑀺𑀤𑁆𑀤𑁂𑀲𑀧𑀸𑀴𑀺𑀬𑀸 𑀅𑀦𑀼𑀧𑀤𑀯𑀡𑁆𑀡𑀦𑀸. 𑀪𑀸𑀯𑀦𑀸𑀦𑀬𑁄𑀢𑀺 𑀉𑀧𑁆𑀧𑀸𑀤𑀦𑀯𑀺𑀥𑀺. ‘‘𑀲𑁄’’𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀲𑁆𑀲 𑀅𑀳𑀁-𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀸𑀴𑀺𑀬𑀁 𑀯𑀸 ‘‘𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺’’𑀦𑁆𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑀲𑁆𑀲 𑀬𑁄𑀕𑁄𑀢𑀺 𑀅𑀳𑀁-𑀲𑀤𑁆𑀤𑁂𑀦 𑀆𑀦𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑁂 𑀢𑀤𑀢𑁆𑀣𑁄 𑀧𑀸𑀓𑀝𑁄 𑀳𑁄𑀢𑀻𑀢𑀺 ‘‘𑀲𑁄 𑀅𑀳’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀪𑀺𑀦𑀻𑀳𑀭𑀺𑀦𑁆𑀢𑀺 𑀘𑀺𑀢𑁆𑀢𑀁 𑀛𑀸𑀦𑀸𑀭𑀫𑁆𑀫𑀡𑀢𑁄 𑀅𑀧𑀦𑁂𑀢𑁆𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀪𑀺𑀫𑀼𑀔𑀁 𑀧𑁂𑀲𑁂𑀲𑀺𑀁, 𑀧𑀼𑀩𑁆𑀩𑁂𑀦𑀺𑀯𑀸𑀲𑀦𑀺𑀦𑁆𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑁄𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀧𑀩𑁆𑀪𑀸𑀭𑀁 𑀅𑀓𑀸𑀲𑀺𑀦𑁆𑀢𑀺 𑀅𑀢𑁆𑀣𑁄.

𑀧𑀼𑀩𑁆𑀩𑁂𑀅𑀢𑀻𑀢𑀚𑀸𑀢𑀻𑀲𑀼 𑀦𑀺𑀯𑀼𑀢𑁆𑀣𑀓𑁆𑀔𑀦𑁆𑀥𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑁄. 𑀦𑀺𑀯𑀼𑀢𑁆𑀣𑀸𑀢𑀺 𑀘 𑀅𑀚𑁆𑀛𑀸𑀯𑀼𑀢𑁆𑀣𑀸 𑀅𑀦𑀼𑀪𑀽𑀢𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸, 𑀕𑁄𑀘𑀭𑀦𑀺𑀯𑀸𑀲𑁂𑀦 𑀦𑀺𑀯𑀼𑀢𑁆𑀣𑀥𑀫𑁆𑀫𑀸 𑀯𑀸 𑀅𑀢𑁆𑀢𑀦𑁄 𑀯𑀺𑀜𑁆𑀜𑀸𑀡𑁂𑀦𑀯𑀺𑀜𑁆𑀜𑀸𑀢𑀸, 𑀧𑀭𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀸𑀧𑀺 𑀯𑀸 𑀙𑀺𑀦𑁆𑀦𑀯𑀝𑀼𑀫𑀓𑀸𑀦𑀼𑀲𑁆𑀲𑀭𑀡𑀸𑀤𑀻𑀲𑀼, 𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀬𑀸𑀬 𑀲𑀢𑀺𑀬𑀸 𑀅𑀦𑀼𑀲𑁆𑀲𑀭𑀢𑀺, 𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀜𑀸𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑁆𑀜𑀸𑀡𑀁. 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑀲𑁆𑀲𑀸𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀡𑀯𑀲𑁂𑀦 𑀬𑀸𑀯𑀤𑀺𑀘𑁆𑀙𑀓𑀁 𑀕𑀦𑁆𑀢𑁆𑀯𑀸 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑀲𑁆𑀲. 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀓𑀸𑀭𑀡𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀦𑀁, 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀥𑀽𑀧𑀧𑀢𑁆𑀢𑀺𑀬𑀸𑀢𑀺 𑀇𑀥 ¶ 𑀘𑀭𑀺𑀫𑀪𑀯𑁂 𑀉𑀧𑀧𑀢𑁆𑀢𑀺𑀬𑀸. 𑀅𑀦𑀦𑁆𑀢𑀭𑀦𑁆𑀢𑀺 𑀅𑀢𑀻𑀢𑀸𑀦𑀦𑁆𑀢𑀭𑀫𑀸𑀳. 𑀅𑀫𑀼𑀢𑁆𑀭𑀸𑀢𑀺 𑀅𑀫𑀼𑀓𑀲𑁆𑀫𑀺𑀁 𑀪𑀯𑁂𑀢𑀺 𑀅𑀢𑁆𑀣𑁄. 𑀉𑀤𑀧𑀸𑀤𑀺𑀦𑁆𑀢𑀺 𑀉𑀧𑁆𑀧𑀚𑁆𑀚𑀺𑀁. 𑀢𑀸𑀳𑀺 𑀤𑁂𑀯𑀢𑀸𑀳𑀻𑀢𑀺 𑀢𑀼𑀲𑀺𑀢𑀸𑀤𑁂𑀯𑀢𑀸𑀳𑀺. 𑀏𑀓𑀕𑁄𑀢𑁆𑀢𑁄𑀢𑀺 𑀢𑀼𑀲𑀺𑀢𑀕𑁄𑀢𑁆𑀢𑁂𑀦 𑀏𑀓𑀕𑁄𑀢𑁆𑀢𑁄. 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀲𑀦𑁆𑀢𑀸𑀦𑀲𑁆𑀲 𑀧𑀭𑀺𑀬𑁄𑀲𑀸𑀦𑀸𑀯𑀢𑁆𑀣𑀸𑀬 𑀤𑁂𑀯𑀮𑁄𑀓𑀽𑀧𑀧𑀢𑁆𑀢𑀺𑀚𑀦𑀓𑀁 𑀦𑀸𑀫 𑀅𑀓𑀼𑀲𑀮𑁂𑀦 𑀓𑀫𑁆𑀫𑀼𑀦𑀸 𑀅𑀦𑀼𑀧𑀤𑁆𑀤𑀼𑀢𑀫𑁂𑀯 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀤𑀼𑀓𑁆𑀔𑀁 𑀧𑀦 𑀲𑀗𑁆𑀔𑀸𑀭𑀤𑀼𑀓𑁆𑀔𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀧𑀼𑀜𑁆𑀜𑀸𑀦𑀫𑁆𑀧𑀺 𑀧𑀦 𑀤𑁂𑀯𑀧𑀼𑀢𑁆𑀢𑀸𑀦𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀓𑀸𑀮𑀸𑀤𑀻𑀲𑀼 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀲𑀫𑀸𑀬𑁄𑀕𑁄 𑀳𑁄𑀢𑀺𑀬𑁂𑀯𑀸𑀢𑀺 ‘‘𑀓𑀤𑀸𑀘𑀺 𑀤𑀼𑀓𑁆𑀔𑀤𑀼𑀓𑁆𑀔𑀲𑁆𑀲𑀧𑀺 𑀲𑀫𑁆𑀪𑀯𑁄 𑀦𑀢𑁆𑀣𑀻’’𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀲𑀢𑁆𑀢𑀧𑀜𑁆𑀜𑀸𑀲…𑀧𑁂… 𑀧𑀭𑀺𑀬𑀦𑁆𑀢𑁄𑀢𑀺 𑀇𑀤𑀁 𑀫𑀦𑀼𑀲𑁆𑀲𑀸𑀦𑀁 𑀯𑀲𑁆𑀲𑀕𑀡𑀦𑀸𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑁂𑀯𑀸𑀦𑀁 𑀯𑀲𑁆𑀲𑀕𑀡𑀦𑀸𑀬 𑀧𑀦 𑀘𑀢𑀼𑀲𑀳𑀲𑁆𑀲𑀫𑁂𑀯.

𑀅𑀢𑀻𑀢𑀪𑀯𑁂 (𑀲𑀸𑀭𑀢𑁆𑀣. 𑀝𑀻. 𑁧.𑁧𑁨.𑀧𑀼𑀩𑁆𑀩𑁂𑀦𑀺𑀯𑀸𑀲𑀓𑀣𑀸𑀬𑀁) 𑀔𑀦𑁆𑀥𑀸 𑀢𑀧𑁆𑀧𑀝𑀺𑀩𑀤𑁆𑀥𑀦𑀸𑀫𑀕𑁄𑀢𑁆𑀢𑀸𑀦𑀺 𑀘 𑀲𑀩𑁆𑀩𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀦𑁆𑀢𑁂𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀓𑀺𑀁 𑀯𑀺𑀤𑀺𑀢𑀁 𑀓𑀭𑁄𑀢𑀺? 𑀧𑀼𑀩𑁆𑀩𑁂𑀦𑀺𑀯𑀸𑀲’’𑀦𑁆𑀢𑀺. 𑀫𑁄𑀳𑁄 𑀧𑀝𑀺𑀘𑁆𑀙𑀸𑀤𑀓𑀝𑁆𑀞𑁂𑀦 ‘‘𑀢𑀫𑁄’’𑀢𑀺 𑀯𑀼𑀘𑁆𑀘𑀢𑀺 ‘‘𑀢𑀫𑁄 𑀯𑀺𑀬𑀸’’𑀢𑀺 𑀓𑀢𑁆𑀯𑀸. 𑀑𑀪𑀸𑀲𑀓𑀭𑀡𑀝𑁆𑀞𑁂𑀦𑀸𑀢𑀺 ¶ 𑀓𑀸𑀢𑀩𑁆𑀩𑀢𑁄 𑀓𑀭𑀡𑀁, 𑀑𑀪𑀸𑀲𑁄𑀯 𑀓𑀭𑀡𑀁, 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀦 𑀑𑀪𑀸𑀲𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀝𑁆𑀞𑁂𑀦𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀧𑀲𑀁𑀲𑀸𑀯𑀘𑀦𑀦𑁆𑀢𑀺 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀧𑀯𑀢𑁆𑀢𑀺𑀯𑀺𑀲𑁂𑀲𑀸𑀦𑀁 𑀩𑁄𑀥𑀦𑀢𑁄 𑀯𑀼𑀢𑁆𑀢𑀁. 𑀅𑀯𑀺𑀚𑁆𑀚𑀸 𑀯𑀺𑀳𑀢𑀸𑀢𑀺 𑀏𑀢𑁂𑀦 𑀯𑀺𑀚𑁆𑀚𑀦𑀝𑁆𑀞𑁂𑀦 𑀯𑀺𑀚𑁆𑀚𑀸𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀤𑀻𑀧𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀲𑁆𑀫𑀸 𑀯𑀺𑀚𑁆𑀚𑀸 𑀉𑀧𑁆𑀧𑀦𑁆𑀦𑀸𑀢𑀺 𑀏𑀢𑁂𑀦 𑀯𑀺𑀚𑁆𑀚𑀸𑀧𑀝𑀺𑀧𑀓𑁆𑀔𑀸 𑀅𑀯𑀺𑀚𑁆𑀚𑀸, 𑀧𑀝𑀺𑀧𑀓𑁆𑀔𑀢𑀸 𑀘𑀲𑁆𑀲𑀸 𑀧𑀳𑀸𑀢𑀩𑁆𑀩𑀪𑀸𑀯𑁂𑀦 𑀯𑀺𑀚𑁆𑀚𑀸𑀬 𑀘 𑀧𑀳𑀸𑀬𑀓𑀪𑀸𑀯𑁂𑀦𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄 𑀇𑀢𑀭𑀲𑁆𑀫𑀺𑀫𑁆𑀧𑀺 𑀧𑀤𑀤𑁆𑀯𑀬𑁂𑀢𑀺 𑀇𑀫𑀺𑀦𑀸 𑀢𑀫𑁄 𑀯𑀺𑀳𑀢𑁄 𑀯𑀺𑀦𑀝𑁆𑀞𑁄. 𑀓𑀲𑁆𑀫𑀸? 𑀬𑀲𑁆𑀫𑀸 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀧𑁂𑀲𑀺𑀢𑀢𑁆𑀢𑀲𑁆𑀲𑀸𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀲𑀺𑀤𑁆𑀥𑀺𑀁 𑀧𑀢𑀺 𑀯𑀺𑀲𑁆𑀲𑀝𑁆𑀞𑀘𑀺𑀢𑁆𑀢𑀲𑁆𑀲. 𑀬𑀣𑀸 𑀅𑀧𑁆𑀧𑀫𑀢𑁆𑀢𑀲𑁆𑀲𑀸𑀢𑀺 𑀅𑀜𑁆𑀜𑀲𑁆𑀲𑀧𑀺 𑀓𑀲𑁆𑀲𑀘𑀺 𑀫𑀸𑀤𑀺𑀲𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀼𑀩𑁆𑀩𑁂𑀦𑀺𑀯𑀸𑀲𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁫𑁩. 𑀇𑀥𑀸𑀢𑀺 𑀪𑀬𑀪𑁂𑀭𑀯𑀲𑀼𑀢𑁆𑀢𑁂 𑀯𑀼𑀢𑁆𑀢𑀁. 𑀇𑀥 𑀅𑀬𑀁 𑀯𑀺𑀲𑁂𑀲𑁄𑀢𑀺 𑀬𑁄𑀚𑀦𑀸. 𑀯𑀼𑀢𑁆𑀢𑀲𑀤𑀺𑀲𑀫𑁂𑀯 ‘‘𑀫𑁂𑀢𑀺 𑀫𑀬𑀸’’𑀢𑀺𑀆𑀤𑀺𑀦𑀸. 𑀧𑀭𑀺𑀓𑀫𑁆𑀫𑀓𑀺𑀘𑁆𑀘𑀦𑁆𑀢𑀺 ‘‘𑀅𑀪𑀺𑀜𑁆𑀜𑀸𑀧𑀸𑀤𑀓𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀲𑀩𑁆𑀩𑀧𑀘𑁆𑀙𑀺𑀫𑀸 𑀦𑀺𑀲𑀚𑁆𑀚𑀸 𑀆𑀯𑀚𑁆𑀚𑀺𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸, 𑀓𑀲𑀺𑀡𑀸𑀭𑀫𑁆𑀫𑀡𑀁 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀲𑀩𑁆𑀩𑀸𑀓𑀸𑀭𑁂𑀦 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀓𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀘 𑀯𑀼𑀢𑁆𑀢𑁂𑀦 𑀧𑀭𑀺𑀓𑀫𑁆𑀫𑁂𑀦 𑀓𑀺𑀘𑁆𑀘𑀁 𑀧𑀬𑁄𑀚𑀦𑀁 𑀦𑀢𑁆𑀣𑀺. 𑀦 ¶ 𑀢𑁂𑀦 𑀇𑀥 𑀅𑀢𑁆𑀣𑁄𑀢𑀺 𑀢𑁂𑀦 𑀪𑀸𑀯𑀦𑀸𑀦𑀬𑁂𑀦 𑀇𑀥 𑀧𑀸𑀴𑀺𑀬𑀸 𑀅𑀢𑁆𑀣𑀯𑀡𑁆𑀡𑀦𑀸𑀬𑀁 𑀅𑀢𑁆𑀣𑁄 𑀦𑀢𑁆𑀣𑀺 𑀢𑀣𑀸𑀪𑀸𑀯𑀦𑀸𑀬 𑀇𑀥 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀲𑀯𑀓𑁆𑀔𑀬𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁫𑁪. 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀦𑁆𑀢𑀺 (𑀲𑀸𑀭𑀢𑁆𑀣. 𑀝𑀻. 𑁧.𑁧𑁪.𑀆𑀲𑀯𑀓𑁆𑀔𑀬𑀜𑀸𑀡𑀓𑀣𑀸𑀬𑀁; 𑀤𑀻. 𑀦𑀺. 𑀝𑀻. 𑁧.𑁨𑁪𑁮; 𑀅. 𑀦𑀺. 𑀝𑀻. 𑁨.𑁩.𑁫𑁯) 𑀯𑀺𑀧𑀲𑁆𑀲𑀦𑀸𑀬 𑀧𑀤𑀝𑁆𑀞𑀸𑀦𑀪𑀽𑀢𑀁. 𑀯𑀺𑀧𑀲𑁆𑀲𑀦𑀸 𑀘 𑀢𑀺𑀯𑀺𑀥𑀸 𑀯𑀺𑀧𑀲𑁆𑀲𑀦𑀓𑀧𑀼𑀕𑁆𑀕𑀮𑀪𑁂𑀤𑁂𑀦. 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀳𑀺 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀘 𑀯𑀺𑀧𑀲𑁆𑀲𑀦𑀸 𑀘𑀺𑀦𑁆𑀢𑀸𑀫𑀬𑀜𑀸𑀡𑀲𑀁𑀯𑀤𑁆𑀥𑀺𑀢𑀢𑁆𑀢𑀸 𑀲𑀬𑀫𑁆𑀪𑀼𑀜𑀸𑀡𑀪𑀽𑀢𑀸, 𑀇𑀢𑀭𑁂𑀲𑀁 ¶ 𑀲𑀼𑀢𑀫𑀬𑀜𑀸𑀡𑀲𑀁𑀯𑀤𑁆𑀥𑀺𑀢𑀢𑁆𑀢𑀸 𑀧𑀭𑁄𑀧𑀤𑁂𑀲𑀲𑀫𑁆𑀪𑀽𑀢𑀸, 𑀲𑀸 ‘‘𑀞𑀧𑁂𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀅𑀯𑀲𑁂𑀲𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑀸𑀦𑀁 𑀅𑀜𑁆𑀜𑀢𑀭𑀢𑁄 𑀯𑀼𑀝𑁆𑀞𑀸𑀬𑀸’’𑀢𑀺𑀆𑀤𑀺𑀦𑀸 𑀅𑀦𑁂𑀓𑀥𑀸 𑀅𑀭𑀽𑀧𑀫𑀼𑀔𑀯𑀲𑁂𑀦 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑁂 𑀯𑀼𑀢𑁆𑀢𑀸𑀦𑀁 𑀢𑁂𑀲𑀁 𑀢𑁂𑀲𑀁 𑀥𑀸𑀢𑀼𑀧𑀭𑀺𑀕𑁆𑀕𑀳𑀫𑀼𑀔𑀸𑀦𑀁 𑀅𑀜𑁆𑀜𑀢𑀭𑀫𑀼𑀔𑀯𑀲𑁂𑀦 𑀅𑀦𑁂𑀓𑀥𑀸𑀯 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁩𑁦𑁬) 𑀦𑀸𑀦𑀸𑀦𑀬𑀢𑁄 𑀯𑀺𑀪𑀸𑀯𑀺𑀢𑀸. 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀦 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀼𑀔𑁂𑀦 𑀧𑀪𑁂𑀤𑀕𑀫𑀦𑀢𑁄 𑀦𑀸𑀦𑀸𑀦𑀬𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀦𑁆𑀦𑀺𑀲𑁆𑀲𑀬𑀲𑁆𑀲 𑀅𑀭𑀺𑀬𑀫𑀕𑁆𑀕𑀜𑀸𑀡𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀽𑀢𑀁 𑀧𑀼𑀩𑁆𑀩𑀪𑀸𑀕𑀜𑀸𑀡𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀦𑁆𑀢𑀁 𑀧𑀭𑀺𑀧𑀸𑀓𑀁 𑀕𑀘𑁆𑀙𑀦𑁆𑀢𑀁 𑀧𑀭𑀫𑀕𑀫𑁆𑀪𑀻𑀭𑀲𑀡𑁆𑀳𑀲𑀼𑀔𑀼𑀫𑀢𑀭𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀳𑁄𑀢𑀺, 𑀬𑀁 𑀅𑀝𑁆𑀞𑀓𑀣𑀸𑀲𑀼 𑀫𑀳𑀸𑀯𑀚𑀺𑀭𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀲 𑀘 𑀧𑀯𑀢𑁆𑀢𑀺𑀯𑀺𑀪𑀸𑀕𑁂𑀦 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀧𑁆𑀧𑀪𑁂𑀤𑀲𑁆𑀲 𑀧𑀸𑀤𑀓𑀪𑀸𑀯𑁂𑀦 𑀲𑀫𑀸𑀧𑀚𑁆𑀚𑀺𑀬𑀫𑀸𑀦𑀸 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸 𑀤𑁂𑀯𑀲𑀺𑀓𑀁 𑀲𑀢𑁆𑀣𑀼 𑀯𑀴𑀜𑁆𑀚𑀦𑀓𑀲𑀫𑀸𑀧𑀢𑁆𑀢𑀺𑀬𑁄 𑀯𑀼𑀘𑁆𑀘𑀦𑁆𑀢𑀺, 𑀲𑁆𑀯𑀸𑀬𑀁 𑀩𑀼𑀤𑁆𑀥𑀸𑀦𑀁 𑀯𑀺𑀧𑀲𑁆𑀲𑀦𑀸𑀘𑀸𑀭𑁄 𑀧𑀭𑀫𑀢𑁆𑀣𑀫𑀜𑁆𑀚𑀽𑀲𑀸𑀬 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀬 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁧𑁪𑁪) 𑀉𑀤𑁆𑀤𑁂𑀲𑀢𑁄 𑀤𑀲𑁆𑀲𑀺𑀢𑁄, 𑀅𑀢𑁆𑀣𑀺𑀓𑁂𑀳𑀺 𑀢𑀢𑁄 𑀕𑀳𑁂𑀢𑀩𑁆𑀩𑁄𑀢𑀺.

𑀆𑀲𑀯𑀸𑀦𑀁 𑀔𑁂𑀧𑀦𑀢𑁄 𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄 𑀆𑀲𑀯𑀓𑁆𑀔𑀬𑁄, 𑀅𑀭𑀺𑀬𑀫𑀕𑁆𑀕𑁄, 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑀯𑀲𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑀕𑁆𑀕𑀳𑀡𑀁. 𑀆𑀲𑀯𑀸𑀦𑀁 𑀔𑀬𑁂 𑀜𑀸𑀡𑀁 𑀆𑀲𑀯𑀓𑁆𑀔𑀬𑀜𑀸𑀡𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀭 𑀘𑁂𑀢𑀁 𑀜𑀸𑀡’’𑀦𑁆𑀢𑀺 𑀯𑀢𑁆𑀯𑀸 𑀔𑀬𑁂𑀢𑀺 𑀘 𑀆𑀥𑀸𑀭𑁂 𑀪𑀼𑀫𑁆𑀫𑀁, 𑀦 𑀯𑀺𑀲𑀬𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀧𑁆𑀧𑀭𑀺𑀬𑀸 𑀧𑀦𑁆𑀦𑀢𑁆𑀢𑀸’’𑀢𑀺 𑀆𑀳. 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀤𑀼𑀓𑁆𑀔𑀲𑁆𑀲 𑀅𑀭𑀺𑀬𑀲𑀘𑁆𑀘𑀲𑁆𑀲 𑀢𑀤𑀸 𑀧𑀘𑁆𑀘𑀓𑁆𑀔𑀢𑁄 𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑀁. 𑀏𑀢𑁆𑀢𑀓𑀁 𑀤𑀼𑀓𑁆𑀔𑀦𑁆𑀢𑀺 𑀤𑀼𑀓𑁆𑀔𑀲𑁆𑀲 𑀅𑀭𑀺𑀬𑀲𑀘𑁆𑀘𑀲𑁆𑀲 𑀢𑀤𑀸 𑀧𑀘𑁆𑀘𑀓𑁆𑀔𑀢𑁄 𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑀁. 𑀏𑀢𑁆𑀢𑀓𑀁 𑀤𑀼𑀓𑁆𑀔𑀦𑁆𑀢𑀺 𑀢𑀲𑁆𑀲 𑀧𑀭𑀺𑀘𑁆𑀙𑀺𑀚𑁆𑀚 𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑀁. 𑀦 𑀇𑀢𑁄 𑀪𑀺𑀬𑁆𑀬𑁄𑀢𑀺 𑀅𑀦𑀯𑀲𑁂𑀲𑁂𑀢𑁆𑀯𑀸 𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑀁. 𑀢𑁂𑀦𑀸𑀳 ‘‘𑀲𑀩𑁆𑀩𑀫𑁆𑀧𑀺 ¶ 𑀤𑀼𑀓𑁆𑀔𑀲𑀘𑁆𑀘’’𑀦𑁆𑀢𑀺𑀆𑀤𑀺. 𑀲𑀭𑀲𑀮𑀓𑁆𑀔𑀡𑀧𑀝𑀺𑀯𑁂𑀥𑁂𑀦𑀸𑀢𑀺 𑀲𑀪𑀸𑀯𑀲𑀗𑁆𑀔𑀸𑀢𑀲𑁆𑀲 𑀮𑀓𑁆𑀔𑀡𑀲𑁆𑀲 𑀅𑀲𑀫𑁆𑀫𑁄𑀳𑀢𑁄 𑀧𑀝𑀺𑀯𑀺𑀚𑁆𑀛𑀦𑁂𑀦. 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑁄𑀢𑀺 𑀘 𑀬𑀣𑀸 𑀢𑀲𑁆𑀫𑀺𑀁 𑀜𑀸𑀡𑁂 𑀧𑀯𑀢𑁆𑀢𑁂 𑀧𑀘𑁆𑀙𑀸 𑀤𑀼𑀓𑁆𑀔𑀲𑁆𑀲 𑀲𑀭𑀽𑀧𑀸𑀤𑀺𑀧𑀭𑀺𑀘𑁆𑀙𑁂𑀤𑁂 𑀲𑀫𑁆𑀫𑁄𑀳𑁄 𑀦 𑀳𑁄𑀢𑀺, 𑀢𑀣𑀸 𑀧𑀯𑀢𑁆𑀢𑀺. 𑀢𑁂𑀦𑀸𑀳 ‘‘𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺’’𑀦𑁆𑀢𑀺. 𑀬𑀁 𑀞𑀸𑀦𑀁 𑀧𑀢𑁆𑀯𑀸𑀢𑀺 𑀬𑀁 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀝𑁆𑀞𑁂𑀦 𑀓𑀸𑀭𑀡𑀪𑀽𑀢𑀁 𑀆𑀕𑀫𑁆𑀫. 𑀢𑀤𑀼𑀪𑀬𑀯𑀢𑁄 𑀳𑀺 𑀧𑀼𑀕𑁆𑀕𑀮𑀲𑁆𑀲 𑀧𑀢𑁆𑀢𑀺 𑀢𑀤𑀼𑀪𑀬𑀲𑁆𑀲 𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀧𑀢𑁆𑀯𑀸𑀢𑀺 𑀯𑀸 𑀧𑀸𑀧𑀼𑀡𑀦𑀳𑁂𑀢𑀼. 𑀅𑀧𑁆𑀧𑀯𑀢𑁆𑀢𑀺𑀦𑁆𑀢𑀺 𑀅𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁. 𑀢𑁂 𑀯𑀸 𑀦𑀧𑁆𑀧𑀯𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀅𑀧𑁆𑀧𑀯𑀢𑁆𑀢𑀺, 𑀦𑀺𑀩𑁆𑀩𑀸𑀦𑀁. 𑀢𑀲𑁆𑀲𑀸𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑀲𑁆𑀲. 𑀲𑀫𑁆𑀧𑀸𑀧𑀓𑀦𑁆𑀢𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀯𑀲𑁂𑀦 𑀲𑀫𑁆𑀫𑀤𑁂𑀯 𑀧𑀸𑀧𑀓𑀁.

𑀓𑀺𑀮𑁂𑀲𑀯𑀲𑁂𑀦𑀸𑀢𑀺 ¶ 𑀆𑀲𑀯𑀲𑀗𑁆𑀔𑀸𑀢𑀓𑀺𑀮𑁂𑀲𑀯𑀲𑁂𑀦. 𑀬𑀲𑁆𑀫𑀸 𑀆𑀲𑀯𑀸𑀦𑀁 𑀤𑀼𑀓𑁆𑀔𑀲𑀘𑁆𑀘𑀧𑀭𑀺𑀬𑀸𑀬𑁄 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸, 𑀲𑁂𑀲𑀲𑀘𑁆𑀘𑀸𑀦𑀜𑁆𑀘 𑀢𑀁𑀲𑀫𑀼𑀤𑀬𑀸𑀤𑀺𑀧𑀭𑀺𑀬𑀸𑀬𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁. ‘‘𑀧𑀭𑀺𑀬𑀸𑀬𑀢𑁄’’𑀢𑀺. 𑀤𑀲𑁆𑀲𑁂𑀦𑁆𑀢𑁄 𑀲𑀘𑁆𑀘𑀸𑀦𑀻𑀢𑀺 𑀬𑁄𑀚𑀦𑀸. 𑀆𑀲𑀯𑀸𑀦𑀁𑀬𑁂𑀯 𑀘𑁂𑀢𑁆𑀣 𑀕𑀳𑀡𑀁 ‘‘𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬𑀸’’𑀢𑀺 𑀆𑀭𑀤𑁆𑀥𑀢𑁆𑀢𑀸. 𑀢𑀣𑀸 𑀳𑀺 𑀆𑀲𑀯𑀯𑀺𑀫𑀼𑀢𑁆𑀢𑀺 𑀲𑀻𑀲𑁂𑀦𑁂𑀯 𑀲𑀩𑁆𑀩𑀲𑀁𑀓𑀺𑀮𑁂𑀲𑀯𑀺𑀫𑀼𑀢𑁆𑀢𑀺 𑀯𑀼𑀢𑁆𑀢𑀸. ‘‘𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺’’𑀦𑁆𑀢𑀺𑀆𑀤𑀺𑀦𑀸 𑀫𑀺𑀲𑁆𑀲𑀓𑀫𑀕𑁆𑀕𑁄 𑀇𑀥 𑀓𑀣𑀺𑀢𑁄𑀢𑀺 ‘‘𑀲𑀳 𑀯𑀺𑀧𑀲𑁆𑀲𑀦𑀸𑀬 𑀓𑁄𑀝𑀺𑀧𑁆𑀧𑀢𑁆𑀢𑀁 𑀫𑀕𑁆𑀕𑀁 𑀓𑀣𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀲𑀘𑁆𑀘𑀧𑀝𑀺𑀯𑁂𑀥𑀲𑁆𑀲 𑀢𑀤𑀸 𑀅𑀢𑀻𑀢𑀓𑀸𑀮𑀺𑀓𑀢𑁆𑀢𑀸 ‘‘𑀬𑀣𑀸𑀪𑀽𑀢𑀁 𑀅𑀩𑁆𑀪𑀜𑁆𑀜𑀸𑀲𑀺’’𑀦𑁆𑀢𑀺 𑀯𑀢𑁆𑀯𑀸𑀧𑀺 𑀅𑀪𑀺𑀲𑀫𑀬𑀓𑀸𑀮𑁂 𑀢𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀁 𑀉𑀧𑀸𑀤𑀸𑀬 ‘‘𑀏𑀯𑀁 𑀚𑀸𑀦𑀢𑁄 𑀏𑀯𑀁 𑀧𑀲𑁆𑀲𑀢𑁄’’𑀢𑀺 𑀯𑀢𑁆𑀢𑀫𑀸𑀦𑀓𑀸𑀮𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀲𑁄 𑀘 𑀓𑀸𑀫𑀁 𑀫𑀕𑁆𑀕𑀓𑁆𑀔𑀡𑀢𑁄 𑀧𑀭𑀁 𑀬𑀸𑀯𑀚𑁆𑀚𑀢𑀦𑀸 𑀅𑀢𑀻𑀢𑀓𑀸𑀮𑀺𑀓𑁄 𑀏𑀯, 𑀲𑀩𑁆𑀩𑀧𑀞𑀫𑀁 𑀧𑀦𑀲𑁆𑀲 𑀅𑀢𑀻𑀢𑀓𑀸𑀮𑀺𑀓𑀢𑁆𑀢𑀁 𑀨𑀮𑀓𑁆𑀔𑀡𑁂𑀦 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀯𑀺𑀫𑀼𑀘𑁆𑀘𑀺𑀢𑁆𑀣𑀸𑀢𑀺 𑀇𑀫𑀺𑀦𑀸 𑀨𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀻’’𑀢𑀺. 𑀚𑀸𑀦𑀢𑁄 𑀧𑀲𑁆𑀲𑀢𑁄𑀢𑀺 𑀯𑀸 𑀳𑁂𑀢𑀼𑀦𑀺𑀤𑁆𑀤𑁂𑀲𑁄𑀬𑀁. 𑀚𑀸𑀦𑀦𑀳𑁂𑀢𑀼 𑀤𑀲𑁆𑀲𑀦𑀳𑁂𑀢𑀼 𑀓𑀸𑀫𑀸𑀲𑀯𑀸 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀢𑁆𑀣𑀸𑀢𑀺 𑀬𑁄𑀚𑀦𑀸. 𑀪𑀯𑀸𑀲𑀯𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀪𑀯𑀭𑀸𑀕𑀲𑁆𑀲 𑀯𑀺𑀬 𑀪𑀯𑀤𑀺𑀝𑁆𑀞𑀺𑀬𑀸𑀧𑀺 𑀲𑀫𑀯𑀭𑁄𑀥𑁄𑀢𑀺 𑀤𑀺𑀝𑁆𑀞𑀸𑀲𑀯𑀲𑁆𑀲𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀔𑀻𑀡𑀸𑀚𑀸𑀢𑀻𑀢𑀺𑀆𑀤𑀻𑀳𑀺 𑀧𑀤𑁂𑀳𑀺. 𑀢𑀲𑁆𑀲𑀸𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲. 𑀪𑀽𑀫𑀻𑀦𑁆𑀢𑀺 𑀧𑀯𑀢𑁆𑀢𑀺𑀝𑁆𑀞𑀸𑀦𑀁. 𑀦 𑀢𑀸𑀯𑀲𑁆𑀲 𑀅𑀢𑀻𑀢𑀸 𑀚𑀸𑀢𑀺 𑀔𑀻𑀡𑀸 𑀫𑀕𑁆𑀕𑀪𑀸𑀯𑀦𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀧𑀼𑀩𑁆𑀩𑁂𑀯 𑀔𑀻𑀡𑀢𑁆𑀢𑀸’’𑀢𑀺. 𑀦 𑀅𑀦𑀸𑀕𑀢𑀸 𑀅𑀲𑁆𑀲𑀚𑀸𑀢𑀺 𑀔𑀻𑀡𑀸𑀢𑀺 𑀬𑁄𑀚𑀦𑀸. 𑀦 𑀅𑀦𑀸𑀕𑀢𑀸𑀢𑀺 𑀘 𑀅𑀦𑀸𑀕𑀢𑀢𑁆𑀢𑀲𑀸𑀫𑀜𑁆𑀜𑀁 𑀕𑀳𑁂𑀢𑁆𑀯𑀸 𑀮𑁂𑀲𑁂𑀦 𑀘𑁄𑀤𑁂𑀢𑀺. 𑀢𑁂𑀦𑀸𑀳 ‘‘𑀅𑀦𑀸𑀕𑀢𑁂 𑀯𑀸𑀬𑀸𑀫𑀸𑀪𑀸𑀯𑀢𑁄’’𑀢𑀺, 𑀅𑀦𑀸𑀕𑀢𑀯𑀺𑀲𑁂𑀲𑁄 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀲 𑀘 𑀔𑁂𑀧𑀦𑁂 𑀯𑀸𑀬𑀸𑀫𑁄𑀧𑀺 𑀮𑀩𑁆𑀪𑀢𑁂𑀯. 𑀢𑁂𑀦𑀸𑀳 ‘‘𑀬𑀸 𑀧𑀦 𑀫𑀕𑁆𑀕𑀲𑁆𑀲𑀸’’𑀢𑀺𑀆𑀤𑀺. 𑀏𑀓𑀘𑀢𑀼𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀲𑀽𑀢𑀺 𑀪𑀯𑀢𑁆𑀢𑀬𑀕𑁆𑀕𑀳𑀡𑀁 𑀯𑀼𑀢𑁆𑀢𑀦𑀬𑁂𑀦 𑀅𑀦𑀯𑀲𑁂𑀲𑀢𑁄 𑀚𑀸𑀢𑀺𑀬𑀸 𑀔𑀻𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀚𑀸𑀢𑀺𑀁. 𑀲𑁄𑀢𑀺 𑀪𑀕𑀯𑀸.

𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦𑀸𑀫 𑀇𑀥 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀫𑁂𑀯𑀸𑀢𑀺 𑀆𑀳 ‘‘𑀦𑀺𑀝𑁆𑀞𑀺𑀢’’𑀦𑁆𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 ¶ 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸𑀬 𑀲𑀫𑁆𑀫𑀸 𑀲𑀗𑁆𑀓𑀧𑁆𑀧𑀸𑀤𑀻𑀦𑀫𑁆𑀧𑀺 𑀤𑀼𑀓𑁆𑀔𑀲𑀘𑁆𑀘𑁂 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀦𑀼𑀕𑀼𑀡𑀸 𑀧𑀯𑀢𑁆𑀢𑀺, 𑀇𑀢𑀭𑀲𑀘𑁆𑀘𑁂𑀲𑀼 𑀘 𑀦𑁂𑀲𑀁 𑀧𑀳𑀸𑀦𑀸𑀪𑀺𑀲𑀫𑀬𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺 𑀧𑀸𑀓𑀝𑀸 𑀏𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸𑀯𑀲𑁂𑀦𑀸’’𑀢𑀺. 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀇𑀫𑁂 𑀧𑀓𑀸𑀭𑀸 𑀇𑀢𑁆𑀣𑀁, 𑀢𑀩𑁆𑀪𑀸𑀯𑁄 𑀇𑀢𑁆𑀣𑀢𑁆𑀢𑀁, 𑀢𑀤𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁 ¶ 𑀳𑁄𑀢𑀺. 𑀢𑁂 𑀧𑀦 𑀧𑀓𑀸𑀭𑀸 𑀅𑀭𑀺𑀬𑀫𑀕𑁆𑀕𑀩𑁆𑀬𑀸𑀧𑀸𑀭𑀪𑀽𑀢𑀸 𑀧𑀭𑀺𑀜𑁆𑀜𑀸𑀤𑀬𑁄 𑀇𑀥𑀸𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀏𑀯𑀁𑀲𑁄𑀴𑀲𑀓𑀺𑀘𑁆𑀘𑀪𑀸𑀯𑀸𑀬𑀸’’𑀢𑀺. 𑀢𑁂 𑀳𑀺 𑀫𑀕𑁆𑀕𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀫𑀕𑁆𑀕𑀸𑀦𑀼𑀪𑀸𑀯𑁂𑀦 𑀧𑀸𑀓𑀝𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀧𑀭𑀺𑀜𑁆𑀜𑀸𑀤𑀻𑀲𑀼 𑀘 𑀧𑀳𑀸𑀦𑀫𑁂𑀯 𑀧𑀥𑀸𑀦𑀁 𑀢𑀤𑀢𑁆𑀣𑀢𑁆𑀢𑀸 𑀇𑀢𑀭𑁂𑀲𑀦𑁆𑀢𑀺 𑀆𑀳 ‘‘𑀓𑀺𑀮𑁂𑀲𑀓𑁆𑀔𑀬𑀸𑀬𑀯𑀸’’𑀢𑀺. 𑀧𑀳𑀻𑀦𑀓𑀺𑀮𑁂𑀲𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀯𑀸 𑀏𑀢𑀁 𑀯𑀼𑀢𑁆𑀢𑀁. 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀦𑀺𑀲𑁆𑀲𑀓𑁆𑀓𑁂 𑀲𑀫𑁆𑀧𑀤𑀸𑀦𑀯𑀘𑀦𑀦𑁆𑀢𑀺 𑀆𑀳 ‘‘𑀇𑀢𑁆𑀣𑀪𑀸𑀯𑀢𑁄’’𑀢𑀺. 𑀅𑀧𑀭𑀁 𑀅𑀦𑀸𑀕𑀢𑀁. 𑀇𑀫𑁂 𑀧𑀦 𑀘𑀭𑀺𑀫𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀧𑀭𑀺𑀜𑁆𑀜𑀸𑀢𑀸 𑀢𑀺𑀝𑁆𑀞𑀦𑁆𑀢𑀻𑀢𑀺 𑀏𑀢𑁂𑀦 𑀢𑁂𑀲𑀁 𑀅𑀧𑁆𑀧𑀢𑀺𑀝𑁆𑀞𑀢𑀁 𑀤𑀲𑁆𑀲𑁂𑀢𑀺. 𑀅𑀧𑀭𑀺𑀜𑁆𑀜𑀸𑀫𑀽𑀮𑀓𑀸 𑀳𑀺 𑀧𑀢𑀺𑀝𑁆𑀞𑀸. 𑀬𑀣𑀸𑀳 ‘‘𑀓𑀩𑀴𑀻𑀓𑀸𑀭𑁂 𑀘𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀅𑀢𑁆𑀣𑀺 𑀭𑀸𑀕𑁄 𑀅𑀢𑁆𑀣𑀺 𑀦𑀦𑁆𑀤𑀻 𑀅𑀢𑁆𑀣𑀺 𑀢𑀡𑁆𑀳𑀸, 𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀯𑀺𑀭𑀽𑀴𑁆𑀳’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁨.𑁬𑁪; 𑀫𑀳𑀸𑀦𑀺. 𑁭; 𑀓𑀣𑀸. 𑁨𑁯𑁬). 𑀢𑁂𑀦𑁂𑀯𑀸𑀳 ‘‘𑀙𑀺𑀦𑁆𑀦𑀫𑀽𑀮𑀓𑀸 𑀭𑀼𑀓𑁆𑀔𑀸 𑀯𑀺𑀬𑀸’’𑀢𑀺𑀆𑀤𑀺.

𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀧𑀭𑀺𑀕𑁆𑀕𑀳𑀺𑀢𑀁, 𑀦 𑀧𑀞𑀫𑀤𑀼𑀢𑀺𑀬𑀜𑀸𑀡𑀤𑁆𑀯𑀬𑀸𑀥𑀺𑀕𑀫𑀁 𑀯𑀺𑀬 𑀓𑁂𑀯𑀮𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀲𑁆𑀲𑁂𑀦𑁆𑀢𑁄 𑀦𑀺𑀕𑀫𑀦𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀭𑀽𑀧𑀢𑁄 𑀳𑀺 𑀢𑀁 𑀧𑀼𑀩𑁆𑀩𑁂 𑀤𑀲𑁆𑀲𑀺𑀢𑀫𑁂𑀯𑀸𑀢𑀺. 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀅𑀢𑀻𑀢𑀸𑀭𑀫𑁆𑀫𑀡𑀲𑀪𑀸𑀕𑀢𑀸𑀬 𑀢𑀩𑁆𑀪𑀸𑀯𑀻𑀪𑀸𑀯𑀢𑁄 𑀘 𑀅𑀢𑀻𑀢𑀁𑀲𑀜𑀸𑀡𑀁 𑀲𑀗𑁆𑀕𑀳𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀢𑀢𑁆𑀣 𑀅𑀢𑀻𑀢𑀁𑀲𑀜𑀸𑀡𑀦𑁆𑀢𑀺 𑀅𑀢𑀻𑀢𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀲𑀗𑁆𑀔𑀸𑀢𑁂 𑀅𑀢𑀻𑀢𑀓𑁄𑀝𑁆𑀞𑀸𑀲𑁂 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁. 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀢𑀺 𑀲𑀧𑀭𑀺𑀪𑀡𑁆𑀟𑁂𑀦 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂𑀦. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁𑀲𑁄 𑀘 𑀅𑀦𑀸𑀕𑀢𑀁𑀲𑁄 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀁𑀲𑀁, 𑀢𑀢𑁆𑀣 𑀜𑀸𑀡𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀁𑀲𑀜𑀸𑀡𑀁. 𑀲𑀓𑀮𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀦𑁆𑀢𑀺 𑀏𑀢𑁂𑀦 𑀲𑀩𑁆𑀩𑀁 𑀮𑁄𑀓𑀁 𑀉𑀢𑁆𑀢𑀭𑀺𑀢𑁆𑀯𑀸 𑀅𑀪𑀺𑀪𑀼𑀬𑁆𑀬 𑀞𑀺𑀢𑀢𑁆𑀢𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀯𑀺𑀬 𑀲𑁂𑀲𑀸𑀲𑀸𑀥𑀸𑀭𑀡𑀜𑀸𑀡𑀲𑁆𑀲 𑀩𑀮𑀜𑀸𑀡𑀆𑀯𑁂𑀡𑀺𑀓𑀩𑀼𑀤𑁆𑀥𑀥𑀫𑁆𑀫𑀸𑀤𑀻𑀦𑀫𑁆𑀧𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀸𑀦𑀁 𑀩𑀼𑀤𑁆𑀥𑀕𑀼𑀡𑀸𑀦𑀁 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀲𑀩𑁆𑀩𑁂𑀧𑀺 𑀲𑀩𑁆𑀩𑀜𑁆𑀜𑀼𑀕𑀼𑀡𑁂 𑀲𑀗𑁆𑀕𑀳𑁂𑀢𑁆𑀯𑀸’’𑀢𑀺.

𑀆𑀲𑀯𑀓𑁆𑀔𑀬𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀭𑀜𑁆𑀜𑀯𑀸𑀲𑀓𑀸𑀭𑀡𑀯𑀡𑁆𑀡𑀦𑀸

𑁫𑁫. 𑀲𑀺𑀬𑀸 𑀔𑁄 𑀧𑀦 𑀢𑁂 𑀩𑁆𑀭𑀸𑀳𑁆𑀫𑀡𑀸𑀢𑀺 𑀏𑀢𑁆𑀣 𑀲𑀺𑀬𑀸𑀢𑀺 ‘‘𑀅𑀧𑁆𑀧𑁂𑀯𑀸’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑁄 𑀦𑀺𑀧𑀸𑀢𑁄 ¶ , 𑀢𑀲𑁆𑀫𑀸 ‘𑀩𑁆𑀭𑀸𑀳𑁆𑀫𑀡, 𑀅𑀧𑁆𑀧𑁂𑀯 𑀔𑁄 𑀧𑀦 𑀢𑁂 𑀏𑀯𑀫𑀲𑁆𑀲𑀸’𑀢𑀺 ¶ 𑀅𑀢𑁆𑀣𑁄. 𑀬𑀁 𑀧𑀦 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀤𑀸𑀘𑀻’’𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀇𑀫𑀫𑁂𑀯𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀅𑀓𑀸𑀭𑀡𑀁 𑀩𑁆𑀭𑀸𑀳𑁆𑀫𑀡𑁂𑀦 𑀧𑀭𑀺𑀓𑀧𑁆𑀧𑀺𑀢𑀫𑀢𑁆𑀣𑀁 𑀧𑀝𑀺𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑁂𑀢𑀁 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄. 𑀅𑀢𑁆𑀣𑁄𑀯 𑀨𑀮𑀁 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀯𑀲𑁄 𑀏𑀢𑀲𑁆𑀲𑀸𑀢𑀺 𑀅𑀢𑁆𑀣𑀯𑀲𑁄, 𑀳𑁂𑀢𑀽𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀢𑁆𑀢𑀦𑁄 𑀘 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀦𑁆𑀢𑀺 𑀏𑀢𑁂𑀦 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀯𑀺𑀯𑁂𑀓𑀸𑀪𑀺𑀭𑀢𑀺𑀁 𑀧𑀓𑀸𑀲𑁂𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀺𑀝𑁆𑀞𑀥𑀫𑁆𑀫𑁄 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑀸𑀦𑀦𑁆𑀢𑀺 𑀇𑀭𑀺𑀬𑀸𑀧𑀣𑀧𑀯𑀢𑁆𑀢𑀻𑀦𑀁. 𑀢𑀧𑁆𑀧𑀯𑀢𑁆𑀢𑀺𑀬𑁄 𑀳𑀺 𑀏𑀓𑀲𑁆𑀫𑀺𑀁 𑀇𑀭𑀺𑀬𑀸𑀧𑀣𑁂 𑀉𑀧𑁆𑀧𑀦𑁆𑀦𑀤𑀼𑀓𑁆𑀔𑀁 𑀅𑀜𑁆𑀜𑁂𑀦 𑀇𑀭𑀺𑀬𑀸𑀧𑀣𑁂𑀦 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀳𑀭𑀡𑀢𑁄 𑀯𑀺𑀳𑀸𑀭𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀘𑁆𑀙𑀺𑀫𑀜𑁆𑀘 𑀚𑀦𑀢𑀁 𑀅𑀦𑀼𑀓𑀫𑁆𑀧𑀫𑀸𑀦𑁄𑀢𑀺 𑀏𑀢𑁂𑀦 𑀬𑁄 𑀆𑀤𑀺𑀢𑁄 𑀩𑁆𑀭𑀸𑀳𑁆𑀫𑀡𑁂𑀦 ‘‘𑀪𑀯𑀁 𑀢𑁂𑀲𑀁 𑀕𑁄𑀢𑀫𑁄 𑀧𑀼𑀩𑁆𑀩𑀗𑁆𑀕𑀫𑁄…𑀧𑁂… 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑁄, 𑀬𑁄 𑀘 𑀢𑀣𑀸 ‘‘𑀏𑀯𑀫𑁂𑀢𑀁 𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑁄, 𑀢𑀫𑁂𑀯 𑀅𑀢𑁆𑀣𑀁 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀲𑀢𑁆𑀣𑀸 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑀅𑀭𑀜𑁆𑀜𑀯𑀸𑀲𑀓𑀸𑀭𑀡𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁂𑀲𑀦𑀸𑀦𑀼𑀫𑁄𑀤𑀦𑀸𑀯𑀡𑁆𑀡𑀦𑀸

𑁫𑁬. 𑀏𑀯𑀁 𑀦𑀺𑀝𑁆𑀞𑀸𑀧𑀺𑀢𑀸𑀬 𑀤𑁂𑀲𑀦𑀸𑀬 𑀩𑁆𑀭𑀸𑀳𑁆𑀫𑀡𑁄 𑀢𑀢𑁆𑀣 𑀪𑀕𑀯𑀢𑀺 𑀧𑀲𑀸𑀤𑀁 𑀧𑀯𑁂𑀤𑁂𑀦𑁆𑀢𑁄 ‘‘𑀅𑀪𑀺𑀓𑁆𑀓𑀦𑁆𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀪𑀺𑀓𑁆𑀓𑀦𑁆𑀢𑀸𑀢𑀺 (𑀲𑀸𑀭𑀢𑁆𑀣. 𑀝𑀻. 𑁧.𑁧𑁫.𑀤𑁂𑀲𑀦𑀸𑀦𑀼𑀫𑁄𑀤𑀦𑀓𑀣𑀸; 𑀤𑀻. 𑀦𑀺. 𑀝𑀻. 𑁧.𑁨𑁫𑁦; 𑀲𑀁. 𑀦𑀺. 𑀝𑀻. 𑁧.𑁧.𑁧; 𑀅. 𑀦𑀺. 𑀝𑀻. 𑁨.𑁨.𑁧𑁬) 𑀅𑀢𑀺𑀓𑁆𑀓𑀦𑁆𑀢𑀸, 𑀯𑀺𑀕𑀢𑀸𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀔𑀬𑁂 𑀤𑀺𑀲𑁆𑀲𑀢𑀻’’𑀢𑀺. 𑀢𑁂𑀦𑁂𑀯 𑀳𑀺 ‘‘𑀦𑀺𑀓𑁆𑀔𑀦𑁆𑀢𑁄 𑀧𑀞𑀫𑁄 𑀬𑀸𑀫𑁄’’𑀢𑀺 𑀯𑀼𑀢𑁆𑀢𑀁. 𑀅𑀪𑀺𑀓𑁆𑀓𑀦𑁆𑀢𑀢𑀭𑁄𑀢𑀺 𑀅𑀢𑀺𑀯𑀺𑀬 𑀓𑀦𑁆𑀢𑀢𑀭𑁄 𑀫𑀦𑁄𑀭𑀫𑁄. 𑀢𑀸𑀤𑀺𑀲𑁄 𑀘 𑀲𑀼𑀦𑁆𑀤𑀭𑁄 𑀪𑀤𑁆𑀤𑀓𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀲𑀼𑀦𑁆𑀤𑀭𑁂 𑀤𑀺𑀲𑁆𑀲𑀢𑀻’’𑀢𑀺.

𑀓𑁄𑀢𑀺 𑀤𑁂𑀯𑀦𑀸𑀕𑀬𑀓𑁆𑀔𑀕𑀦𑁆𑀥𑀩𑁆𑀩𑀸𑀤𑀻𑀲𑀼 𑀓𑁄 𑀓𑀢𑀫𑁄. 𑀫𑁂𑀢𑀺 𑀫𑀫. 𑀧𑀸𑀤𑀸𑀦𑀻𑀢𑀺 𑀧𑀸𑀤𑁂. 𑀇𑀤𑁆𑀥𑀺𑀬𑀸𑀢𑀺 𑀇𑀫𑀸𑀬 𑀏𑀯𑀭𑀽𑀧𑀸𑀬 𑀤𑁂𑀯𑀺𑀤𑁆𑀥𑀺𑀬𑀸. 𑀬𑀲𑀲𑀸𑀢𑀺 𑀇𑀫𑀺𑀦𑀸 𑀏𑀤𑀺𑀲𑁂𑀦 𑀧𑀭𑀺𑀯𑀸𑀭𑁂𑀦 𑀧𑀭𑀺𑀚𑀦𑁂𑀦. 𑀚𑀮𑀦𑁆𑀢𑀺 𑀯𑀺𑀚𑁆𑀚𑁄𑀢𑀫𑀸𑀦𑁄. 𑀅𑀪𑀺𑀓𑁆𑀓𑀦𑁆𑀢𑁂𑀦𑀸𑀢𑀺 𑀅𑀢𑀺𑀯𑀺𑀬 𑀓𑀦𑁆𑀢𑁂𑀦 𑀓𑀫𑀦𑀻𑀬𑁂𑀦 𑀅𑀪𑀺𑀭𑀽𑀧𑁂𑀦. 𑀯𑀡𑁆𑀡𑁂𑀦𑀸𑀢𑀺 𑀙𑀯𑀺𑀯𑀡𑁆𑀡𑁂𑀦 𑀲𑀭𑀻𑀭𑀯𑀡𑁆𑀡𑀦𑀺𑀪𑀸𑀬. 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸𑀢𑀺 𑀤𑀲𑀧𑀺 𑀤𑀺𑀲𑀸 𑀑𑀪𑀸𑀲𑁂𑀦𑁆𑀢𑁄 𑀧𑀪𑀸𑀲𑁂𑀦𑁆𑀢𑁄, 𑀘𑀦𑁆𑀤𑁄 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀘 𑀏𑀓𑁄𑀪𑀸𑀲𑀁 𑀏𑀓𑀸𑀮𑁄𑀓𑀁 ¶ 𑀓𑀭𑁄𑀦𑁆𑀢𑁄𑀢𑀺 𑀕𑀸𑀣𑀸𑀬 𑀅𑀢𑁆𑀣𑁄. 𑀅𑀪𑀺𑀭𑀽𑀧𑁂𑀢𑀺 𑀉𑀴𑀸𑀭𑀭𑀽𑀧𑁂 𑀲𑀫𑁆𑀧𑀦𑁆𑀦𑀭𑀽𑀧𑁂.

‘‘𑀘𑁄𑀭𑁄 ¶ 𑀘𑁄𑀭𑁄, 𑀲𑀧𑁆𑀧𑁄 𑀲𑀧𑁆𑀧𑁄’’𑀢𑀺𑀆𑀤𑀻𑀲𑀼 𑀪𑀬𑁂 𑀆𑀫𑁂𑀟𑀺𑀢𑀁. ‘‘𑀯𑀺𑀚𑁆𑀛 𑀯𑀺𑀚𑁆𑀛, 𑀧𑀳𑀭 𑀧𑀳𑀭𑀸’’𑀢𑀺𑀆𑀤𑀻𑀲𑀼 𑀓𑁄𑀥𑁂, ‘‘𑀲𑀸𑀥𑀼 𑀲𑀸𑀥𑀽𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁨𑁭; 𑀲𑀁. 𑀦𑀺. 𑁨.𑁧𑁨𑁭; 𑁩.𑁩𑁫; 𑁫.𑁧𑁦𑁮𑁫) 𑀧𑀲𑀁𑀲𑀸𑀬𑀁, ‘‘𑀕𑀘𑁆𑀙 𑀕𑀘𑁆𑀙, 𑀮𑀼𑀦𑀸𑀳𑀺 𑀮𑀼𑀦𑀸𑀳𑀻’’𑀢𑀺𑀆𑀤𑀻𑀲𑀼 𑀢𑀼𑀭𑀺𑀢𑁂, ‘‘𑀆𑀕𑀘𑁆𑀙 𑀆𑀕𑀘𑁆𑀙𑀸’’𑀢𑀺𑀆𑀤𑀻𑀲𑀼 𑀓𑁄𑀢𑀽𑀳𑀮𑁂, ‘‘𑀩𑀼𑀤𑁆𑀥𑁄 𑀩𑀼𑀤𑁆𑀥𑁄𑀢𑀺 𑀘𑀺𑀦𑁆𑀢𑁂𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀩𑀼. 𑀯𑀁. 𑁨.𑁪𑁪) 𑀅𑀘𑁆𑀙𑀭𑁂, ‘‘𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄, 𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁨𑁦; 𑀅. 𑀦𑀺. 𑁯.𑁧𑁧) 𑀳𑀸𑀲𑁂, ‘‘𑀓𑀳𑀁 𑀏𑀓𑀧𑀼𑀢𑁆𑀢𑀓, 𑀓𑀳𑀁 𑀏𑀓𑀧𑀼𑀢𑁆𑀢𑀓𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁩𑁫𑁩; 𑀲𑀁. 𑀦𑀺. 𑁨.𑁬𑁩) 𑀲𑁄𑀓𑁂, ‘‘𑀅𑀳𑁄 𑀲𑀼𑀔𑀁 𑀅𑀳𑁄 𑀲𑀼𑀔’’𑀦𑁆𑀢𑀺𑀆𑀤𑀻𑀲𑀼 (𑀉𑀤𑀸. 𑁨𑁦; 𑀤𑀻. 𑀦𑀺. 𑁩.𑁩𑁦𑁫; 𑀘𑀽𑀴𑀯. 𑁩𑁩𑁨) 𑀧𑀲𑀸𑀤𑁂. 𑀘-𑀲𑀤𑁆𑀤𑁄 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄. 𑀢𑁂𑀦 𑀕𑀭𑀳𑀸𑀅𑀲𑀫𑁆𑀫𑀸𑀦𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣 ‘‘𑀧𑀸𑀧𑁄 𑀧𑀸𑀧𑁄’’𑀢𑀺𑀆𑀤𑀻𑀲𑀼 𑀕𑀭𑀳𑀸𑀬𑀁. ‘‘𑀅𑀪𑀺𑀭𑀽𑀧𑀓 𑀅𑀪𑀺𑀭𑀽𑀧𑀓𑀸’’𑀢𑀺𑀆𑀤𑀻𑀲𑀼 𑀅𑀲𑀫𑁆𑀫𑀸𑀦𑁂 𑀤𑀝𑁆𑀞𑀩𑁆𑀩𑀁.

𑀦𑀬𑀺𑀤𑀁 𑀆𑀫𑁂𑀟𑀺𑀢𑀯𑀲𑁂𑀦 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑀁, 𑀅𑀣 𑀔𑁄 𑀅𑀢𑁆𑀣𑀤𑁆𑀯𑀬𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀅𑀪𑀺𑀓𑁆𑀓𑀦𑁆𑀢𑀦𑁆𑀢𑀺 𑀯𑀘𑀦𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀁 𑀧𑀦 𑀪𑀕𑀯𑀢𑁄 𑀯𑀘𑀦𑀁 𑀥𑀫𑁆𑀫𑀲𑁆𑀲 𑀤𑁂𑀲𑀦𑀸𑀢𑀺 𑀓𑀢𑁆𑀯𑀸 𑀢𑀣𑀸 𑀯𑀼𑀢𑁆𑀢𑀁. 𑀅𑀢𑁆𑀣𑀫𑀢𑁆𑀢𑀤𑀲𑁆𑀲𑀦𑀁 𑀯𑀸 𑀏𑀢𑀁, 𑀢𑀲𑁆𑀫𑀸 𑀅𑀢𑁆𑀣𑀯𑀲𑁂𑀦 𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀤𑁄𑀲𑀦𑀸𑀲𑀦𑀢𑁄𑀢𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀤𑁄𑀲𑀯𑀺𑀥𑀫𑀦𑀢𑁄, 𑀕𑀼𑀡𑀸𑀥𑀺𑀕𑀫𑀦𑀢𑁄𑀢𑀺 𑀲𑀻𑀮𑀸𑀤𑀺𑀕𑀼𑀡𑀸𑀦𑀁 𑀲𑀫𑁆𑀧𑀸𑀧𑀦𑀢𑁄. 𑀬𑁂 𑀕𑀼𑀡𑁂 𑀤𑁂𑀲𑀦𑀸 𑀅𑀥𑀺𑀕𑀫𑁂𑀢𑀺, 𑀢𑁂𑀲𑀼 𑀧𑀥𑀸𑀦𑀪𑀽𑀢𑀸 𑀤𑀲𑁆𑀲𑁂𑀢𑀩𑁆𑀩𑀸𑀢𑀺 𑀢𑁂 𑀧𑀥𑀸𑀦𑀪𑀽𑀢𑁂 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀲𑀤𑁆𑀥𑀸𑀚𑀦𑀦𑀢𑁄 𑀧𑀜𑁆𑀜𑀸𑀚𑀦𑀦𑀢𑁄’’𑀢𑀺 𑀯𑀼𑀢𑁆𑀢𑀁. 𑀲𑀤𑁆𑀥𑀸𑀧𑀫𑀼𑀔𑀸 𑀳𑀺 𑀮𑁄𑀓𑀺𑀬𑀸 𑀕𑀼𑀡𑀸, 𑀧𑀜𑁆𑀜𑀸𑀧𑀫𑀼𑀔𑀸 𑀮𑁄𑀓𑀼𑀢𑁆𑀢𑀭𑀸. 𑀲𑀻𑀮𑀸𑀤𑀺𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀲𑀸𑀢𑁆𑀣𑀢𑁄, 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀬𑀜𑁆𑀚𑀦𑀢𑁄. 𑀲𑀼𑀯𑀺𑀜𑁆𑀜𑁂𑀬𑁆𑀬𑀲𑀤𑁆𑀤𑀧𑀬𑁄𑀕𑀢𑀸𑀬 𑀉𑀢𑁆𑀢𑀸𑀦𑀧𑀤𑀢𑁄, 𑀲𑀡𑁆𑀳𑀲𑀼𑀔𑀼𑀫𑀪𑀸𑀯𑁂𑀦 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀢𑁆𑀣𑀢𑀸𑀬 𑀕𑀫𑁆𑀪𑀻𑀭𑀢𑁆𑀣𑀢𑁄. 𑀲𑀺𑀦𑀺𑀤𑁆𑀥𑀫𑀼𑀤𑀼𑀫𑀥𑀼𑀭𑀲𑀤𑁆𑀤𑀧𑀬𑁄𑀕𑀢𑀸𑀬 𑀓𑀡𑁆𑀡𑀲𑀼𑀔𑀢𑁄, 𑀯𑀺𑀧𑀼𑀮𑀯𑀺𑀲𑀼𑀤𑁆𑀥𑀧𑁂𑀫𑀦𑀻𑀬𑀢𑁆𑀣𑀢𑀸𑀬 𑀳𑀤𑀬𑀗𑁆𑀕𑀫𑀢𑁄. 𑀫𑀸𑀦𑀸𑀢𑀺𑀫𑀸𑀦𑀯𑀺𑀥𑀫𑀦𑁂𑀦 𑀅𑀦𑀢𑁆𑀢𑀼𑀓𑁆𑀓𑀁𑀲𑀦𑀢𑁄, 𑀣𑀫𑁆𑀪𑀲𑀸𑀭𑀫𑁆𑀪𑀫𑀤𑁆𑀤𑀦𑁂𑀦 𑀅𑀧𑀭𑀯𑀫𑁆𑀪𑀦𑀢𑁄. 𑀳𑀺𑀢𑀸𑀥𑀺𑀧𑁆𑀧𑀸𑀬𑀧𑀯𑀢𑁆𑀢𑀺𑀬𑀸 𑀧𑀭𑁂𑀲𑀁 𑀭𑀸𑀕𑀧𑀭𑀺𑀴𑀸𑀳𑀸𑀤𑀺𑀯𑀽𑀧𑀲𑀫𑀦𑁂𑀦 𑀘 𑀓𑀭𑀼𑀡𑀸𑀲𑀻𑀢𑀮𑀢𑁄, 𑀓𑀺𑀮𑁂𑀲𑀦𑁆𑀥𑀓𑀸𑀭𑀯𑀺𑀥𑀫𑀦𑁂𑀦 ¶ 𑀧𑀜𑁆𑀜𑀸𑀯𑀤𑀸𑀢𑀢𑁄. 𑀓𑀭𑀯𑀻𑀓𑀭𑀼𑀢𑀫𑀜𑁆𑀚𑀼𑀢𑀸𑀬 𑀆𑀧𑀸𑀣𑀭𑀫𑀡𑀻𑀬𑀢𑁄, 𑀧𑀼𑀩𑁆𑀩𑀸𑀧𑀭𑀸𑀯𑀺𑀭𑀼𑀤𑁆𑀥𑀲𑀼𑀯𑀺𑀲𑀼𑀤𑁆𑀥𑀢𑁆𑀣𑀢𑀸𑀬 𑀯𑀺𑀫𑀤𑁆𑀤𑀓𑁆𑀔𑀫𑀢𑁄. 𑀆𑀧𑀸𑀣𑀭𑀫𑀡𑀻𑀬𑀢𑀸𑀬 𑀏𑀯 𑀲𑀼𑀬𑁆𑀬𑀫𑀸𑀦𑀲𑀼𑀔𑀢𑁄, 𑀯𑀺𑀫𑀤𑁆𑀤𑀓𑁆𑀔𑀫𑀢𑀸𑀬 𑀳𑀺𑀢𑀚𑁆𑀛𑀸𑀲𑀬𑀧𑁆𑀧𑀯𑀢𑁆𑀢𑀺𑀢𑀢𑀸𑀬 𑀘 𑀯𑀻𑀫𑀁𑀲𑀺𑀬𑀫𑀸𑀦𑀳𑀺𑀢𑀢𑁄. 𑀏𑀯𑀫𑀸𑀤𑀻𑀳𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀲𑀁𑀲𑀸𑀭𑀘𑀓𑁆𑀓𑀦𑀺𑀯𑀢𑁆𑀢𑀦𑀢𑁄, 𑀲𑀤𑁆𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀢𑁄, 𑀫𑀺𑀘𑁆𑀙𑀸𑀯𑀸𑀤𑀯𑀺𑀥𑀫𑀦𑀢𑁄, 𑀲𑀫𑁆𑀫𑀸𑀯𑀸𑀤𑀧𑀢𑀺𑀝𑁆𑀞𑀸𑀧𑀦𑀢𑁄, 𑀅𑀓𑀼𑀲𑀮𑀫𑀽𑀮𑀲𑀫𑀼𑀤𑁆𑀥𑀭𑀡𑀢𑁄, 𑀓𑀼𑀲𑀮𑀫𑀽𑀮𑀲𑀁𑀭𑁄𑀧𑀦𑀢𑁄, 𑀅𑀧𑀸𑀬𑀤𑁆𑀯𑀸𑀭𑀧𑀺𑀥𑀸𑀦𑀢𑁄, 𑀲𑀕𑁆𑀕𑀫𑀕𑁆𑀕𑀤𑁆𑀯𑀸𑀭𑀯𑀺𑀯𑀭𑀡𑀢𑁄, 𑀧𑀭𑀺𑀬𑀼𑀝𑁆𑀞𑀸𑀦𑀯𑀽𑀧𑀲𑀫𑀦𑀢𑁄, 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑀦𑀢𑁄𑀢𑀺 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀅𑀥𑁄𑀫𑀼𑀔𑀝𑁆𑀞𑀧𑀺𑀢𑀦𑁆𑀢𑀺 ¶ 𑀓𑁂𑀦𑀘𑀺 𑀅𑀥𑁄𑀫𑀼𑀔𑀁 𑀞𑀧𑀺𑀢𑀁. 𑀳𑁂𑀝𑁆𑀞𑀸𑀫𑀼𑀔𑀚𑀸𑀢𑀦𑁆𑀢𑀺 𑀲𑀪𑀸𑀯𑁂𑀦𑁂𑀯 𑀳𑁂𑀝𑁆𑀞𑀸𑀫𑀼𑀔𑀚𑀸𑀢𑀁. 𑀉𑀕𑁆𑀖𑀸𑀝𑁂𑀬𑁆𑀬𑀸𑀢𑀺 𑀯𑀺𑀯𑀝𑀁 𑀓𑀭𑁂𑀬𑁆𑀬. 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸𑀢𑀺 ‘‘𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄, 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀯𑀸 𑀕𑀘𑁆𑀙𑀸’’𑀢𑀺𑀆𑀤𑀻𑀦𑀺 𑀅𑀯𑀢𑁆𑀯𑀸 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 ‘‘𑀦𑀺𑀲𑁆𑀲𑀦𑁆𑀤𑁂𑀳𑀁 𑀏𑀲 𑀫𑀕𑁆𑀕𑁄, 𑀏𑀯𑀁 𑀕𑀘𑁆𑀙𑀸’’𑀢𑀺 𑀯𑀤𑁂𑀬𑁆𑀬. 𑀓𑀸𑀴𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀻𑀢𑀺 𑀓𑀸𑀴𑀧𑀓𑁆𑀔𑁂 𑀘𑀸𑀢𑀼𑀤𑁆𑀤𑀲𑀻.

𑀦𑀺𑀓𑀼𑀚𑁆𑀚𑀺𑀢𑀁 𑀆𑀥𑁂𑀬𑁆𑀬𑀲𑁆𑀲 𑀅𑀦𑀸𑀥𑀸𑀭𑀪𑀽𑀢𑀁 𑀪𑀸𑀚𑀦𑀁 𑀆𑀥𑀸𑀭𑀪𑀸𑀯𑀸𑀧𑀸𑀤𑀦𑀯𑀲𑁂𑀦 𑀉𑀓𑁆𑀓𑀼𑀚𑁆𑀚𑁂𑀬𑁆𑀬. 𑀳𑁂𑀝𑁆𑀞𑀸𑀫𑀼𑀔𑀚𑀸𑀢𑀢𑀸𑀬 𑀲𑀤𑁆𑀥𑀫𑁆𑀫𑀯𑀺𑀫𑀼𑀔𑀁, 𑀅𑀥𑁄𑀫𑀼𑀔𑀝𑁆𑀞𑀧𑀺𑀢𑀢𑀸𑀬 𑀅𑀲𑀤𑁆𑀥𑀫𑁆𑀫𑁂 𑀧𑀢𑀺𑀢𑀦𑁆𑀢𑀺 𑀏𑀯𑀁 𑀧𑀤𑀤𑁆𑀯𑀬𑀁 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀁, 𑀦 𑀬𑀣𑀸𑀲𑀗𑁆𑀔𑁆𑀬𑀁. 𑀓𑀸𑀫𑀁 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄𑀧𑀺 𑀧𑀝𑀺𑀘𑁆𑀙𑀸𑀤𑀓𑀸, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀦 𑀲𑀯𑀺𑀲𑁂𑀲𑀁 𑀧𑀝𑀺𑀘𑁆𑀙𑀸𑀤𑀺𑀓𑀸𑀢𑀺 𑀆𑀳 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑀳𑀦𑀧𑀝𑀺𑀘𑁆𑀙𑀦𑁆𑀦’’𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀯𑀚𑁆𑀚𑀁 𑀯𑀤𑀸𑀫𑀻’’𑀢𑀺 (𑀅. 𑀦𑀺. 𑁧.𑁩𑁧𑁦). 𑀲𑀩𑁆𑀩𑁄 𑀅𑀧𑀸𑀬𑀕𑀸𑀫𑀺𑀫𑀕𑁆𑀕𑁄 𑀓𑀼𑀫𑁆𑀫𑀕𑁆𑀕𑁄 ‘‘𑀓𑀼𑀘𑁆𑀙𑀺𑀢𑁄 𑀫𑀕𑁆𑀕𑁄’’𑀢𑀺 𑀓𑀢𑁆𑀯𑀸. 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀉𑀚𑀼𑀧𑀝𑀺𑀧𑀓𑁆𑀔𑀢𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀬𑁄 𑀅𑀝𑁆𑀞 𑀫𑀺𑀘𑁆𑀙𑀢𑁆𑀢𑀥𑀫𑁆𑀫𑀸 𑀫𑀺𑀘𑁆𑀙𑀸𑀫𑀕𑁆𑀕𑁄. 𑀢𑁂𑀦𑁂𑀯 𑀳𑀺 𑀢𑀤𑀼𑀪𑀬𑀧𑀝𑀺𑀧𑀓𑁆𑀔𑀢𑀁 𑀲𑀦𑁆𑀥𑀸𑀬 ‘‘𑀲𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑀁 𑀆𑀘𑀺𑀓𑁆𑀔𑀦𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑀧𑁆𑀧𑀺𑀆𑀤𑀺𑀲𑀦𑁆𑀦𑀺𑀲𑁆𑀲𑀬𑁄 𑀧𑀤𑀻𑀧𑁄 𑀦 𑀢𑀣𑀸 𑀉𑀚𑁆𑀚𑀮𑁄, 𑀬𑀣𑀸 𑀢𑁂𑀮𑀲𑀦𑁆𑀦𑀺𑀲𑁆𑀲𑀬𑁄𑀢𑀺 𑀢𑁂𑀮𑀧𑀚𑁆𑀚𑁄𑀢𑀕𑁆𑀕𑀳𑀡𑀁. 𑀏𑀢𑁂𑀳𑀺 𑀧𑀭𑀺𑀬𑀸𑀬𑁂𑀳𑀻𑀢𑀺 𑀏𑀢𑁂𑀳𑀺 𑀦𑀺𑀓𑀼𑀚𑁆𑀚𑀺𑀢𑀼𑀓𑁆𑀓𑀼𑀚𑁆𑀚𑀦𑀧𑀝𑀺𑀘𑁆𑀙𑀦𑁆𑀦𑀯𑀺𑀯𑀭𑀡𑀸𑀤𑀺𑀉𑀧𑀫𑁄𑀧𑀫𑀺𑀢𑀩𑁆𑀩𑀧𑀓𑀸𑀭𑁂𑀳𑀺, 𑀏𑀢𑁂𑀳𑀺 𑀯𑀸 𑀬𑀣𑀸𑀯𑀼𑀢𑁆𑀢𑁂𑀳𑀺 𑀲𑁄𑀴𑀲𑀸𑀭𑀫𑁆𑀫𑀡𑀧𑀭𑀺𑀕𑁆𑀕𑀳𑀅𑀲𑀫𑁆𑀫𑁄𑀳𑀯𑀺𑀳𑀸𑀭𑀤𑀺𑀩𑁆𑀩𑀯𑀺𑀳𑀸𑀭𑀯𑀺𑀪𑀸𑀯𑀦𑀧𑀭𑀺𑀬𑀸𑀬𑁂𑀳𑀺 𑀯𑀺𑀚𑁆𑀚𑀸𑀢𑁆𑀢𑀬𑀯𑀺𑀪𑀸𑀯𑀦𑀸𑀧𑀤𑁂𑀲𑁂𑀦 𑀅𑀢𑁆𑀢𑀦𑁄 𑀲𑀩𑁆𑀩𑀜𑁆𑀜𑀼𑀕𑀼𑀡𑀯𑀺𑀪𑀸𑀯𑀦𑀧𑀭𑀺𑀬𑀸𑀬𑁂𑀳𑀺 𑀘. 𑀢𑁂𑀦𑀸𑀳 ‘‘𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄’’𑀢𑀺.

𑀤𑁂𑀲𑀦𑀸𑀦𑀼𑀫𑁄𑀤𑀦𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀲𑀦𑁆𑀦𑀓𑀸𑀭𑀯𑀡𑁆𑀡𑀦𑀸

𑀧𑀲𑀦𑁆𑀦𑀓𑀸𑀭𑀦𑁆𑀢𑀺 ¶ 𑀧𑀲𑀦𑁆𑀦𑁂𑀳𑀺 𑀓𑀸𑀢𑀩𑁆𑀩𑀁 𑀲𑀓𑁆𑀓𑀸𑀭𑀁. 𑀲𑀭𑀡𑀦𑁆𑀢𑀺 𑀧𑀝𑀺𑀲𑀭𑀡𑀁. 𑀢𑁂𑀦𑀸𑀳 ‘‘𑀧𑀭𑀸𑀬𑀡’’𑀦𑁆𑀢𑀺. 𑀧𑀭𑀸𑀬𑀡𑀪𑀸𑀯𑁄 𑀘 𑀅𑀦𑀢𑁆𑀣𑀦𑀺𑀲𑁂𑀥𑀦𑁂𑀦 𑀅𑀢𑁆𑀣𑀲𑀫𑁆𑀧𑀝𑀺𑀧𑀸𑀤𑀦𑁂𑀦 𑀘 𑀳𑁄𑀢𑀻𑀢𑀺 𑀆𑀳 ‘‘𑀅𑀖𑀲𑁆𑀲 𑀢𑀸𑀢𑀸 𑀳𑀺𑀢𑀲𑁆𑀲 𑀘 𑀯𑀺𑀥𑀸𑀢𑀸’’𑀢𑀺. 𑀅𑀖𑀲𑁆𑀲𑀸𑀢𑀺 𑀤𑀼𑀓𑁆𑀔𑀢𑁄𑀢𑀺 𑀯𑀤𑀦𑁆𑀢𑀺, 𑀧𑀸𑀧𑀢𑁄𑀢𑀺 𑀧𑀦 𑀬𑀼𑀢𑁆𑀢𑀁. 𑀦𑀺𑀲𑁆𑀲𑀓𑁆𑀓𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀏𑀢𑁆𑀣 𑀘 𑀦𑀸𑀬𑀁 𑀕𑀫𑀺-𑀲𑀤𑁆𑀤𑁄 𑀦𑀻-𑀲𑀤𑁆𑀤𑀸𑀤𑀬𑁄 𑀯𑀺𑀬 𑀤𑁆𑀯𑀺𑀓𑀫𑁆𑀫𑀓𑁄, 𑀢𑀲𑁆𑀫𑀸 𑀬𑀣𑀸 ‘‘𑀅𑀚𑀁 𑀕𑀸𑀫𑀁 𑀦𑁂𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 ‘‘𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑀸𑀫𑀻’’𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸, ‘‘𑀲𑀭𑀡𑀦𑁆𑀢𑀺 𑀕𑀘𑁆𑀙𑀸𑀫𑀻’’𑀢𑀺 𑀧𑀦 𑀯𑀢𑁆𑀢𑀩𑁆𑀩𑀁. 𑀇𑀢𑀺-𑀲𑀤𑁆𑀤𑁄 𑀘𑁂𑀢𑁆𑀣 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄, 𑀢𑀲𑁆𑀲 𑀘𑀸𑀬𑀫𑀢𑁆𑀣𑁄 𑁋 𑀕𑀫𑀦𑀜𑁆𑀘 𑀢𑀤𑀥𑀺𑀧𑁆𑀧𑀸𑀬𑁂𑀦 𑀪𑀚𑀦𑀁, 𑀢𑀣𑀸 𑀚𑀸𑀦𑀦𑀁 𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦𑀸’’𑀢𑀺𑀆𑀤𑀺𑀫𑀸𑀳 ¶ . 𑀢𑀢𑁆𑀣 𑀪𑀚𑀸𑀫𑀻𑀢𑀺𑀆𑀤𑀻𑀲𑀼 𑀧𑀼𑀭𑀺𑀫𑀲𑁆𑀲 𑀧𑀼𑀭𑀺𑀫𑀲𑁆𑀲 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀁 𑀅𑀢𑁆𑀣𑀯𑀘𑀦𑀁. 𑀪𑀚𑀦𑀁 𑀯𑀸 𑀲𑀭𑀡𑀸𑀥𑀺𑀧𑁆𑀧𑀸𑀬𑁂𑀦 𑀉𑀧𑀲𑀗𑁆𑀓𑀫𑀦𑀁, 𑀲𑁂𑀯𑀦𑀁 𑀲𑀦𑁆𑀢𑀺𑀓𑀸𑀯𑀘𑀭𑀢𑀸, 𑀧𑀬𑀺𑀭𑀼𑀧𑀸𑀲𑀦𑀁 𑀯𑀢𑁆𑀢𑀧𑀝𑀺𑀯𑀢𑁆𑀢𑀓𑀭𑀡𑁂𑀦 𑀉𑀧𑀝𑁆𑀞𑀸𑀦𑀦𑁆𑀢𑀺 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀅𑀦𑀜𑁆𑀜𑀲𑀭𑀡𑀢𑀁𑀬𑁂𑀯 𑀤𑀻𑀧𑁂𑀢𑀺. ‘‘𑀕𑀘𑁆𑀙𑀸𑀫𑀻’’𑀢𑀺 𑀧𑀤𑀲𑁆𑀲 𑀓𑀣𑀁 ‘‘𑀩𑀼𑀚𑁆𑀛𑀸𑀫𑀻’’𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀬𑁂𑀲𑀜𑁆𑀳𑀻’’𑀢𑀺𑀆𑀤𑀺.

𑀅𑀥𑀺𑀕𑀢𑀫𑀕𑁆𑀕𑁂, 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁂𑀢𑀺 𑀧𑀤𑀤𑁆𑀯𑀬𑁂𑀦𑀧𑀺 𑀨𑀮𑀝𑁆𑀞𑀸 𑀏𑀯 𑀤𑀲𑁆𑀲𑀺𑀢𑀸, 𑀦 𑀫𑀕𑁆𑀕𑀝𑁆𑀞𑀸𑀢𑀺 𑀢𑁂 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀘𑀸’’𑀢𑀺 𑀆𑀳. 𑀦𑀦𑀼 𑀘 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁄𑀧𑀺 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀢𑀻𑀢𑀺 𑀯𑀼𑀘𑁆𑀘𑀢𑀻𑀢𑀺? 𑀓𑀺𑀜𑁆𑀘𑀸𑀧𑀺 𑀯𑀼𑀘𑁆𑀘𑀢𑀺, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀫𑀕𑁆𑀕𑀝𑁆𑀞𑀸 𑀏𑀯 𑀢𑀣𑀸 𑀯𑀢𑁆𑀢𑀩𑁆𑀩𑀸, 𑀦 𑀇𑀢𑀭𑁂 𑀦𑀺𑀬𑀸𑀫𑁄𑀓𑁆𑀓𑀫𑀦𑀸𑀪𑀸𑀯𑀢𑁄. 𑀢𑀣𑀸 𑀳𑀺 𑀢𑁂 𑀏𑀯 ‘‘𑀅𑀧𑀸𑀬𑁂𑀲𑀼 𑀅𑀧𑀢𑀫𑀸𑀦𑁂 𑀥𑀸𑀭𑁂𑀢𑀻’’𑀢𑀺 𑀯𑀼𑀢𑁆𑀢𑀸. 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄𑀓𑁆𑀓𑀫𑀦𑁂𑀦 𑀳𑀺 𑀅𑀧𑀸𑀬𑀯𑀺𑀦𑀺𑀫𑀼𑀢𑁆𑀢𑀺𑀲𑀫𑁆𑀪𑀯𑁄. 𑀅𑀓𑁆𑀔𑀸𑀬𑀢𑀻𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀧𑀓𑀸𑀭𑀢𑁆𑀣𑁄 𑀯𑀸. 𑀢𑁂𑀦 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸 𑀯𑀸 𑀅𑀲𑀗𑁆𑀔𑀢𑀸 𑀯𑀸, 𑀯𑀺𑀭𑀸𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 𑀲𑀼𑀢𑁆𑀢𑀧𑀤𑀁 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦) 𑀲𑀗𑁆𑀕𑀡𑁆𑀳𑀸𑀢𑀺, 𑀯𑀺𑀢𑁆𑀣𑀸𑀭𑁄𑀢𑀺 𑀯𑀸 𑀇𑀫𑀺𑀦𑀸. 𑀏𑀢𑁆𑀣 𑀘 𑀅𑀭𑀺𑀬𑀫𑀕𑁆𑀕𑁄 𑀦𑀺𑀬𑁆𑀬𑀸𑀦𑀺𑀓𑀢𑀸𑀬, 𑀦𑀺𑀩𑁆𑀩𑀸𑀦𑀁 𑀢𑀲𑁆𑀲 𑀢𑀤𑀢𑁆𑀣𑀲𑀺𑀤𑁆𑀥𑀺𑀳𑁂𑀢𑀼𑀢𑀸𑀬𑀸𑀢𑀺 𑀉𑀪𑀬𑀫𑁂𑀯𑁂𑀢𑁆𑀣 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄𑀢𑀺 𑀯𑀼𑀢𑁆𑀢𑁄. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀁 𑀮𑀪𑀺𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀲𑁆𑀲 𑀢𑀤𑀢𑁆𑀣𑀲𑀺𑀤𑁆𑀥𑀺, 𑀅𑀭𑀺𑀬𑀨𑀮𑀸𑀦𑀁 ‘‘𑀬𑀲𑁆𑀫𑀸 𑀢𑀸𑀬 𑀲𑀤𑁆𑀥𑀸𑀬 𑀅𑀯𑀽𑀧𑀲𑀦𑁆𑀢𑀸𑀬𑀸’’𑀢𑀺𑀆𑀤𑀺𑀯𑀘𑀦𑀢𑁄 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑀳𑀸𑀦𑀓𑀺𑀘𑁆𑀘𑀢𑀸𑀬 𑀦𑀺𑀬𑁆𑀬𑀸𑀦𑀸𑀦𑀼𑀕𑀼𑀡𑀢𑀸𑀬 𑀦𑀺𑀬𑁆𑀬𑀸𑀦𑀧𑀭𑀺𑀬𑁄𑀲𑀸𑀦𑀢𑀸𑀬 𑀘. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲 𑀧𑀦 𑀦𑀺𑀬𑁆𑀬𑀸𑀦𑀥𑀫𑁆𑀫𑀲𑀫𑀥𑀺𑀕𑀫𑀳𑁂𑀢𑀼𑀢𑀸𑀬𑀸𑀢𑀺 𑀇𑀫𑀺𑀦𑀸 ¶ 𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑀪𑀸𑀯𑁄 𑀮𑀩𑁆𑀪𑀢𑀺 𑀏𑀯, 𑀲𑁆𑀯𑀸𑀬𑀫𑀢𑁆𑀣𑁄 𑀧𑀸𑀞𑀸𑀭𑀼𑀴𑁆𑀳𑁄 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺𑀫𑀸𑀳.

𑀓𑀸𑀫𑀭𑀸𑀕𑁄 𑀪𑀯𑀭𑀸𑀕𑁄𑀢𑀺 𑀏𑀯𑀫𑀸𑀤𑀺𑀪𑁂𑀤𑁄 𑀲𑀩𑁆𑀩𑁄𑀧𑀺 𑀭𑀸𑀕𑁄 𑀯𑀺𑀭𑀚𑁆𑀚𑀢𑀺 𑀧𑀳𑀻𑀬𑀢𑀺 𑀏𑀢𑁂𑀦𑀸𑀢𑀺 𑀭𑀸𑀕𑀯𑀺𑀭𑀸𑀕𑁄𑀢𑀺 𑀫𑀕𑁆𑀕𑁄 𑀓𑀣𑀺𑀢𑁄. 𑀏𑀚𑀸𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 𑀅𑀦𑁆𑀢𑁄𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑀲𑁆𑀲 𑀲𑁄𑀓𑀲𑁆𑀲 𑀘 𑀢𑀤𑀼𑀧𑁆𑀧𑀢𑁆𑀢𑀺𑀬𑀁 𑀲𑀩𑁆𑀩𑀲𑁄 𑀧𑀭𑀺𑀓𑁆𑀔𑀻𑀡𑀢𑁆𑀢𑀸 𑀅𑀦𑁂𑀚𑀫𑀲𑁄𑀓𑀦𑁆𑀢𑀺 𑀨𑀮𑀁 𑀓𑀣𑀺𑀢𑀁. 𑀅𑀧𑁆𑀧𑀝𑀺𑀓𑀽𑀮𑀦𑁆𑀢𑀺 𑀅𑀯𑀺𑀭𑁄𑀥𑀤𑀻𑀧𑀦𑀢𑁄 𑀓𑁂𑀦𑀘𑀺 𑀅𑀯𑀺𑀭𑀼𑀤𑁆𑀥𑀁, 𑀇𑀝𑁆𑀞𑀁 𑀧𑀡𑀻𑀢𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀧𑀕𑀼𑀡𑀭𑀽𑀧𑁂𑀦 𑀧𑀯𑀢𑁆𑀢𑀺𑀢𑀢𑁆𑀢𑀸, 𑀧𑀓𑀝𑁆𑀞𑀕𑀼𑀡𑀯𑀺𑀪𑀸𑀯𑀦𑀢𑁄 𑀯𑀸 𑀧𑀕𑀼𑀡𑀁. 𑀬𑀣𑀸𑀳 ‘‘𑀯𑀺𑀳𑀺𑀁𑀲𑀲𑀜𑁆𑀜𑀻 𑀧𑀕𑀼𑀡𑀁 𑀦 𑀪𑀸𑀲𑀺𑀁, 𑀥𑀫𑁆𑀫𑀁 𑀧𑀡𑀻𑀢𑀁 𑀫𑀦𑀼𑀚𑁂𑀲𑀼 𑀩𑁆𑀭𑀳𑁆𑀫𑁂’’𑀢𑀺. 𑀲𑀩𑁆𑀩𑀥𑀫𑁆𑀫𑀓𑁆𑀔𑀦𑁆𑀥𑀸 𑀓𑀣𑀺𑀢𑀸𑀢𑀺 𑀬𑁄𑀚𑀦𑀸.

𑀤𑀺𑀝𑁆𑀞𑀺𑀲𑀻𑀮𑀲𑀗𑁆𑀖𑀸𑀢𑁂𑀦𑀸𑀢𑀺 ‘‘𑀬𑀸𑀬𑀁 𑀤𑀺𑀝𑁆𑀞𑀺 𑀅𑀭𑀺𑀬𑀸 𑀦𑀺𑀬𑁆𑀬𑀸𑀦𑀺𑀓𑀸 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬, 𑀢𑀣𑀸𑀭𑀽𑀧𑀸𑀬 𑀤𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁪, 𑁩𑁫𑁬; 𑀫. 𑀦𑀺. 𑁧.𑁪𑁯𑁨; 𑁩.𑁫𑁪) 𑀏𑀯𑀁 𑀯𑀼𑀢𑁆𑀢𑀸𑀬 𑀤𑀺𑀝𑁆𑀞𑀺𑀬𑀸, ‘‘𑀬𑀸𑀦𑀺 𑀢𑀸𑀦𑀺 𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺 𑀅𑀘𑁆𑀙𑀺𑀤𑁆𑀤𑀸𑀦𑀺 𑀅𑀲𑀩𑀮𑀸𑀦𑀺 𑀅𑀓𑀫𑁆𑀫𑀸𑀲𑀸𑀦𑀺 𑀪𑀼𑀚𑀺𑀲𑁆𑀲𑀸𑀦𑀺 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀺 𑀅𑀧𑀭𑀸𑀫𑀝𑁆𑀞𑀸𑀦𑀺 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺 ¶ , 𑀢𑀣𑀸𑀭𑀽𑀧𑁂𑀳𑀺 𑀲𑀻𑀮𑁂𑀳𑀺 𑀲𑀻𑀮𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁨𑁪; 𑀫. 𑀦𑀺. 𑁧.𑁪𑁯𑁨; 𑁩.𑁫𑁪; 𑀅. 𑀦𑀺. 𑁬.𑁧𑁨; 𑀧𑀭𑀺. 𑁨𑁭𑁪) 𑀏𑀯𑀁 𑀯𑀼𑀢𑁆𑀢𑀸𑀦𑀁 𑀲𑀻𑀮𑀸𑀦𑀜𑁆𑀘 𑀲𑀁𑀳𑀢𑀪𑀸𑀯𑁂𑀦, 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀁𑀳𑀢𑁄𑀢𑀺 𑀖𑀝𑀺𑀢𑁄. 𑀅𑀭𑀺𑀬𑀧𑀼𑀕𑁆𑀕𑀮𑀸 𑀳𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀤𑀽𑀭𑁂 𑀞𑀺𑀢𑀸𑀧𑀺 𑀅𑀢𑁆𑀢𑀦𑁄 𑀕𑀼𑀡𑀲𑀸𑀫𑀕𑁆𑀕𑀺𑀬𑀸 𑀲𑀁𑀳𑀢𑀸 𑀏𑀯. 𑀅𑀝𑁆𑀞 𑀘 𑀧𑀼𑀕𑁆𑀕𑀮 𑀥𑀫𑁆𑀫𑀤𑀲𑀸 𑀢𑁂𑀢𑀺 𑀢𑁂 𑀧𑀼𑀭𑀺𑀲𑀬𑀼𑀕𑀯𑀲𑁂𑀦 𑀘𑀢𑁆𑀢𑀸𑀭𑁄𑀧𑀺 𑀧𑀼𑀕𑁆𑀕𑀮𑀯𑀲𑁂𑀦 𑀅𑀝𑁆𑀞𑁂𑀯 𑀅𑀭𑀺𑀬𑀥𑀫𑁆𑀫𑀲𑁆𑀲 𑀧𑀘𑁆𑀘𑀓𑁆𑀔𑀤𑀲𑁆𑀲𑀸𑀯𑀺𑀢𑀸𑀬 𑀥𑀫𑁆𑀫𑀤𑀲𑀸. 𑀢𑀻𑀡𑀺 𑀯𑀢𑁆𑀣𑀽𑀦𑀺 𑀲𑀭𑀡𑀦𑁆𑀢𑀺 𑀕𑀫𑀦𑁂𑀦 𑀢𑀺𑀓𑁆𑀔𑀢𑁆𑀢𑀼𑀁 𑀕𑀫𑀦𑁂𑀦 𑀘 𑀢𑀻𑀡𑀺 𑀲𑀭𑀡𑀕𑀫𑀦𑀸𑀦𑀺. 𑀧𑀝𑀺𑀯𑁂𑀤𑁂𑀲𑀻𑀢𑀺 𑀅𑀢𑁆𑀢𑀦𑁄 𑀳𑀤𑀬𑀕𑀢𑀁 𑀯𑀸𑀘𑀸𑀬 𑀧𑀯𑁂𑀤𑁂𑀲𑀺.

𑀧𑀲𑀦𑁆𑀦𑀓𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀭𑀡𑀕𑀫𑀦𑀓𑀣𑀸𑀯𑀡𑁆𑀡𑀦𑀸

𑀲𑀭𑀡𑀕𑀫𑀦𑀲𑁆𑀲 𑀯𑀺𑀲𑀬𑀧𑀪𑁂𑀤𑀨𑀮𑀲𑀁𑀓𑀺𑀮𑁂𑀲𑀪𑁂𑀤𑀸𑀦𑀁 𑀯𑀺𑀬 𑀓𑀢𑁆𑀢𑀼 𑀘 𑀯𑀺𑀪𑀸𑀯𑀦𑀸 𑀢𑀢𑁆𑀣 𑀓𑁄𑀲𑀮𑁆𑀮𑀸𑀬 𑀳𑁄𑀢𑀻𑀢𑀺 ‘‘𑀲𑀭𑀡𑀕𑀫𑀦𑁂𑀲𑀼 𑀓𑁄𑀲𑀮𑁆𑀮𑀢𑁆𑀣𑀁 ¶ 𑀲𑀭𑀡𑀁…𑀧𑁂… 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁 𑀢𑁂𑀦 𑀯𑀺𑀦𑀸 𑀲𑀭𑀡𑀕𑀫𑀦𑀲𑁆𑀲𑁂𑀯 𑀅𑀲𑀫𑁆𑀪𑀯𑀢𑁄. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀯𑁄𑀤𑀸𑀦𑀁 𑀦 𑀕𑀳𑀺𑀢𑀁, 𑀦𑀦𑀼 𑀯𑁄𑀤𑀸𑀦𑀯𑀺𑀪𑀸𑀯𑀦𑀸𑀧𑀺 𑀢𑀢𑁆𑀣 𑀓𑁄𑀲𑀮𑁆𑀮𑀸𑀯𑀳𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑀁 𑀧𑀦 𑀲𑀁𑀓𑀺𑀮𑁂𑀲𑀕𑁆𑀕𑀳𑀡𑁂𑀦𑁂𑀯 𑀅𑀢𑁆𑀣𑀢𑁄 𑀤𑀻𑀧𑀺𑀢𑀁 𑀳𑁄𑀢𑀻𑀢𑀺 𑀦 𑀕𑀳𑀺𑀢𑀁. 𑀬𑀸𑀦𑀺 𑀳𑀺 𑀢𑁂𑀲𑀁 𑀲𑀁𑀓𑀺𑀮𑁂𑀲𑀓𑀸𑀭𑀡𑀸𑀦𑀺 𑀅𑀜𑁆𑀜𑀸𑀡𑀸𑀤𑀻𑀦𑀺, 𑀢𑁂𑀲𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑁂𑀦, 𑀉𑀧𑁆𑀧𑀦𑁆𑀦𑀸𑀦𑀜𑁆𑀘 𑀧𑀳𑀸𑀦𑁂𑀦 𑀯𑁄𑀤𑀸𑀦𑀁 𑀳𑁄𑀢𑀻𑀢𑀺. 𑀳𑀺𑀁𑀲𑀢𑁆𑀣𑀲𑁆𑀲 𑀲𑀭-𑀲𑀤𑁆𑀤𑀲𑁆𑀲 𑀯𑀲𑁂𑀦𑁂𑀢𑀁 𑀧𑀤𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 ‘‘𑀳𑀺𑀁𑀲𑀢𑀻𑀢𑀺 𑀲𑀭𑀡’’𑀦𑁆𑀢𑀺 𑀯𑀢𑁆𑀯𑀸 𑀢𑀁 𑀧𑀦 𑀳𑀺𑀁𑀲𑀦𑀁 𑀓𑁂𑀲𑀁, 𑀓𑀣𑀁, 𑀓𑀲𑁆𑀲 𑀯𑀸𑀢𑀺 𑀘𑁄𑀤𑀦𑀁 𑀲𑁄𑀥𑁂𑀦𑁆𑀢𑁄 ‘‘𑀲𑀭𑀡𑀕𑀢𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀬𑀦𑁆𑀢𑀺 𑀯𑀝𑁆𑀝𑀪𑀬𑀁. 𑀲𑀦𑁆𑀢𑀸𑀲𑀦𑁆𑀢𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑀁. 𑀢𑁂𑀦𑁂𑀯 𑀘𑁂𑀢𑀲𑀺𑀓𑀤𑀼𑀓𑁆𑀔𑀲𑁆𑀲 𑀕𑀳𑀺𑀢𑀢𑁆𑀢𑀸 𑀤𑀼𑀓𑁆𑀔𑀦𑁆𑀢𑀺 𑀇𑀥 𑀓𑀸𑀬𑀺𑀓𑀁 𑀤𑀼𑀓𑁆𑀔𑀁. 𑀤𑀼𑀕𑁆𑀕𑀢𑀺𑀧𑀭𑀺𑀓𑀺𑀮𑁂𑀲𑀦𑁆𑀢𑀺 𑀤𑀼𑀕𑁆𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀁 𑀲𑀩𑁆𑀩𑀁 𑀤𑀼𑀓𑁆𑀔𑀁. 𑀢𑀬𑀺𑀤𑀁 𑀲𑀩𑁆𑀩𑀁 𑀧𑀭𑀢𑁄 𑀨𑀮𑀓𑀣𑀸𑀬𑀁 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀏𑀢𑀦𑁆𑀢𑀺 ‘‘𑀲𑀭𑀡’’𑀦𑁆𑀢𑀺 𑀧𑀤𑀁.

𑀏𑀯𑀁 𑀅𑀯𑀺𑀲𑁂𑀲𑀢𑁄 𑀲𑀭𑀡𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀲𑁂𑀲𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀳𑀺𑀢𑁂 𑀧𑀯𑀢𑁆𑀢𑀫𑀸𑀦𑁂𑀦𑀸𑀢𑀺 ‘‘𑀲𑀫𑁆𑀧𑀦𑁆𑀦𑀲𑀻𑀮𑀸, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀣𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁬𑁪, 𑁬𑁯) 𑀅𑀢𑁆𑀣𑁂 𑀦𑀺𑀬𑁄𑀚𑀦𑁂𑀦. 𑀅𑀳𑀺𑀢𑀸 𑀘 𑀦𑀺𑀯𑀢𑁆𑀢𑀦𑁂𑀦𑀸𑀢𑀺 ‘‘𑀧𑀸𑀡𑀸𑀢𑀺𑀧𑀸𑀢𑀲𑁆𑀲 𑀔𑁄 𑀧𑀸𑀧𑀓𑁄 𑀯𑀺𑀧𑀸𑀓𑁄 𑀧𑀸𑀧𑀓𑀁 𑀅𑀪𑀺𑀲𑀫𑁆𑀧𑀭𑀸𑀬’’𑀦𑁆𑀢𑀺𑀆𑀤𑀺𑀦𑀸 𑀆𑀤𑀻𑀦𑀯𑀤𑀲𑁆𑀲𑀦𑀸𑀤𑀺𑀫𑀼𑀔𑁂𑀦 𑀅𑀦𑀢𑁆𑀣𑀢𑁄 𑀯𑀺𑀦𑀺𑀯𑀢𑁆𑀢𑀦𑁂𑀦. 𑀪𑀬𑀁 𑀳𑀺𑀁𑀲𑀢𑀻𑀢𑀺 𑀳𑀺𑀢𑀸𑀳𑀺𑀢𑁂𑀲𑀼 𑀅𑀧𑁆𑀧𑀯𑀢𑁆𑀢𑀺𑀧𑀯𑀢𑁆𑀢𑀺𑀳𑁂𑀢𑀼𑀓𑀁 𑀩𑁆𑀬𑀲𑀦𑀁 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀯𑀺𑀦𑀸𑀲𑁂𑀢𑀺 ¶ . 𑀪𑀯𑀓𑀦𑁆𑀢𑀸𑀭𑀸 𑀉𑀢𑁆𑀢𑀸𑀭𑀡𑁂𑀦 𑀫𑀕𑁆𑀕𑀲𑀗𑁆𑀔𑀸𑀢𑁄 𑀥𑀫𑁆𑀫𑁄, 𑀇𑀢𑀭𑁄 𑀅𑀲𑁆𑀲𑀸𑀲𑀤𑀸𑀦𑁂𑀦 𑀲𑀢𑁆𑀢𑀸𑀦𑀁 𑀪𑀬𑀁 𑀳𑀺𑀁𑀲𑀢𑀻𑀢𑀺 𑀬𑁄𑀚𑀦𑀸. 𑀓𑀸𑀭𑀸𑀦𑀦𑁆𑀢𑀺 𑀤𑀸𑀦𑀯𑀲𑁂𑀦 𑀧𑀽𑀚𑀸𑀯𑀲𑁂𑀦 𑀘 𑀉𑀧𑀦𑀻𑀢𑀸𑀦𑀁 𑀲𑀓𑁆𑀓𑀸𑀭𑀸𑀦𑀁. 𑀯𑀺𑀧𑀼𑀮𑀨𑀮𑀧𑀝𑀺𑀮𑀸𑀪𑀓𑀭𑀡𑁂𑀦 𑀲𑀢𑁆𑀢𑀸𑀦𑀁 𑀪𑀬𑀁 𑀳𑀺𑀁𑀲𑀢𑀺 𑀅𑀦𑀼𑀢𑁆𑀢𑀭𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀫𑀺𑀦𑀸𑀧𑀺 𑀧𑀭𑀺𑀬𑀸𑀬𑁂𑀦𑀸𑀢𑀺 𑀇𑀫𑀺𑀦𑀸𑀧𑀺 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑁂𑀦 𑀓𑀸𑀭𑀡𑁂𑀦.

‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸, 𑀲𑁆𑀯𑀸𑀓𑁆𑀔𑀸𑀢𑁄 𑀥𑀫𑁆𑀫𑁄, 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀗𑁆𑀖𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑁄 𑀢𑀢𑁆𑀣 𑀭𑀢𑀦𑀢𑁆𑀢𑀬𑁂 𑀧𑀲𑀸𑀤𑁄 𑀢𑀧𑁆𑀧𑀲𑀸𑀤𑁄, 𑀢𑀤𑁂𑀯 𑀭𑀢𑀦𑀢𑁆𑀢𑀬𑀁 𑀕𑀭𑀼 𑀏𑀢𑀲𑁆𑀲𑀸𑀢𑀺 𑀢𑀕𑁆𑀕𑀭𑀼, 𑀢𑀲𑁆𑀲 𑀪𑀸𑀯𑁄 𑀢𑀕𑁆𑀕𑀭𑀼𑀢𑀸, 𑀢𑀧𑁆𑀧𑀲𑀸𑀤𑁄 𑀘 𑀢𑀕𑁆𑀕𑀭𑀼𑀢𑀸 𑀘 𑀢𑀧𑁆𑀧𑀲𑀸𑀤𑀢𑀕𑁆𑀕𑀭𑀼𑀢𑀸, 𑀢𑀸𑀳𑀺. 𑀯𑀺𑀥𑀼𑀢𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀲𑀫𑁆𑀫𑁄𑀳𑀅𑀲𑁆𑀲𑀤𑁆𑀥𑀺𑀬𑀸𑀤𑀺𑀢𑀸𑀬 𑀯𑀺𑀳𑀢𑀓𑀺𑀮𑁂𑀲𑁄. ‘‘𑀢𑀤𑁂𑀯 𑀭𑀢𑀦𑀢𑁆𑀢𑀬𑀁 𑀧𑀭𑀸𑀬𑀡𑀁 𑀕𑀢𑀺 ¶ 𑀢𑀸𑀡𑀁 𑀮𑁂𑀡’’𑀦𑁆𑀢𑀺 𑀏𑀯𑀁 𑀆𑀓𑀸𑀭𑁂𑀦 𑀧𑀯𑀢𑁆𑀢𑀺𑀬𑀸 𑀢𑀧𑁆𑀧𑀭𑀸𑀬𑀡𑀢𑀸𑀓𑀸𑀭𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀭𑀡𑀕𑀫𑀦𑀁 ‘‘𑀲𑀭𑀡𑀦𑁆𑀢𑀺 𑀕𑀘𑁆𑀙𑀢𑀺 𑀏𑀢𑁂𑀦𑀸’’𑀢𑀺. 𑀢𑀁𑀲𑀫𑀗𑁆𑀕𑀻𑀢𑀺 𑀢𑁂𑀦 𑀬𑀣𑀸𑀯𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀏𑀯𑀁 𑀉𑀧𑁂𑀢𑀻𑀢𑀺 𑀏𑀯𑀁 𑀪𑀚𑀢𑀺 𑀲𑁂𑀯𑀢𑀺 𑀧𑀬𑀺𑀭𑀼𑀧𑀸𑀲𑀢𑀺, 𑀏𑀯𑀁 𑀯𑀸 𑀚𑀸𑀦𑀸𑀢𑀺 𑀩𑀼𑀚𑁆𑀛𑀢𑀻𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀧𑀲𑀸𑀤𑀕𑁆𑀕𑀳𑀡𑁂𑀦 𑀮𑁄𑀓𑀺𑀬𑀲𑀭𑀡𑀕𑀫𑀦𑀫𑀸𑀳. 𑀢𑀜𑁆𑀳𑀺 𑀧𑀲𑀸𑀤𑀧𑁆𑀧𑀥𑀸𑀦𑀁, 𑀦 𑀜𑀸𑀡𑀧𑁆𑀧𑀥𑀸𑀦𑀁. 𑀕𑀭𑀼𑀢𑀸𑀕𑀳𑀡𑁂𑀦 𑀮𑁄𑀓𑀼𑀢𑁆𑀢𑀭𑀁. 𑀅𑀭𑀺𑀬𑀸 𑀳𑀺 𑀭𑀢𑀦𑀢𑁆𑀢𑀬𑀁 𑀕𑀼𑀡𑀸𑀪𑀺𑀜𑁆𑀜𑀸𑀢𑀸𑀬 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀕𑀭𑀼𑀁 𑀓𑀢𑁆𑀯𑀸 𑀧𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀢𑀧𑁆𑀧𑀲𑀸𑀤𑁂𑀦 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀯𑀺𑀳𑀢𑀓𑀺𑀮𑁂𑀲𑁄 𑀢𑀕𑁆𑀕𑀭𑀼𑀢𑀸𑀬 𑀲𑀫𑀼𑀘𑁆𑀙𑁂𑀤𑀯𑀲𑁂𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀧𑁆𑀧𑀭𑀸𑀬𑀡𑀢𑀸 𑀧𑀦𑁂𑀢𑁆𑀣 𑀢𑀕𑁆𑀕𑀢𑀺𑀓𑀢𑀸𑀢𑀺 𑀢𑀸𑀬 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀯𑀓𑁆𑀔𑀫𑀸𑀦𑀁 𑀲𑀭𑀡𑀕𑀫𑀦𑀁 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀯𑀺𑀲𑁂𑀲𑁂𑀦 𑀯𑀸 𑀧𑀲𑀸𑀤𑀕𑀭𑀼𑀢𑀸 𑀚𑁄𑀢𑀺𑀢𑀸𑀢𑀺 𑀧𑀲𑀸𑀤𑀕𑁆𑀕𑀳𑀡𑁂𑀦 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀲𑁆𑀲 𑀇𑀢𑀭𑀲𑁆𑀲 𑀘 𑀕𑀳𑀡𑀁, 𑀢𑀣𑀸 𑀕𑀭𑀼𑀢𑀸𑀕𑀳𑀡𑁂𑀦𑀸𑀢𑀺 𑀉𑀪𑀬𑁂𑀦𑀧𑀺 𑀉𑀪𑀬𑀁 𑀲𑀭𑀡𑀕𑀫𑀦𑀁 𑀬𑁄𑀚𑁂𑀢𑀩𑁆𑀩𑀁.

𑀫𑀕𑁆𑀕𑀓𑁆𑀔𑀡𑁂 𑀇𑀚𑁆𑀛𑀢𑀻𑀢𑀺 𑀬𑁄𑀚𑀦𑀸. 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸𑀢𑀺 𑀏𑀢𑁂𑀦 𑀅𑀢𑁆𑀣𑀢𑁄 𑀘𑀢𑀼𑀲𑀘𑁆𑀘𑀸𑀥𑀺𑀕𑀫𑁄𑀬𑁂𑀯 𑀮𑁄𑀓𑀼𑀢𑁆𑀢𑀭𑀁 𑀲𑀭𑀡𑀕𑀫𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀳𑀺 𑀦𑀺𑀩𑁆𑀩𑀸𑀦𑀥𑀫𑁆𑀫𑁄 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦, 𑀫𑀕𑁆𑀕𑀥𑀫𑁆𑀫𑁄 𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀧𑀝𑀺𑀯𑀺𑀚𑁆𑀛𑀺𑀬𑀫𑀸𑀦𑁄𑀬𑁂𑀯 𑀲𑀭𑀡𑀕𑀫𑀦𑀢𑁆𑀢𑀁 𑀲𑀸𑀥𑁂𑀢𑀺, 𑀩𑀼𑀤𑁆𑀥𑀕𑀼𑀡𑀸 𑀧𑀦 𑀲𑀸𑀯𑀓𑀕𑁄𑀘𑀭𑀪𑀽𑀢𑀸 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦, 𑀢𑀣𑀸 𑀅𑀭𑀺𑀬𑀲𑀗𑁆𑀖𑀕𑀼𑀡𑀸. 𑀢𑁂𑀦𑀸𑀳 ‘‘𑀓𑀺𑀘𑁆𑀘𑀢𑁄 𑀲𑀓𑀮𑁂𑀧𑀺 𑀭𑀢𑀦𑀢𑁆𑀢𑀬𑁂 𑀇𑀚𑁆𑀛𑀢𑀻’’𑀢𑀺, 𑀇𑀚𑁆𑀛𑀦𑁆𑀢𑀜𑁆𑀘 𑀲𑀳𑁂𑀯 𑀇𑀚𑁆𑀛𑀢𑀺, 𑀦 𑀮𑁄𑀓𑀺𑀬𑀁 𑀯𑀺𑀬 𑀧𑀝𑀺𑀧𑀸𑀝𑀺𑀬𑀸 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀤𑁆𑀥𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑁂 𑀧𑀦 𑀯𑀤𑀦𑁆𑀢𑀺 ‘‘𑀦 𑀲𑀭𑀡𑀕𑀫𑀦𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀫𑀕𑁆𑀕𑀲𑁆𑀲 𑀅𑀥𑀺𑀕𑀢𑀢𑁆𑀢𑀸 𑀧𑀦 𑀅𑀥𑀺𑀕𑀢𑀫𑁂𑀯 𑀳𑁄𑀢𑀺 𑀏𑀓𑀘𑁆𑀘𑀸𑀦𑀁 𑀢𑁂𑀯𑀺𑀚𑁆𑀚𑀸𑀤𑀻𑀦𑀁 𑀮𑁄𑀓𑀺𑀬𑀯𑀺𑀚𑁆𑀚𑀸𑀤𑀬𑁄 𑀯𑀺𑀬𑀸’’𑀢𑀺, 𑀢𑁂𑀲𑀁 𑀮𑁄𑀓𑀺𑀬𑀫𑁂𑀯 𑀲𑀭𑀡𑀕𑀫𑀦𑀁 𑀲𑀺𑀬𑀸, 𑀦 𑀮𑁄𑀓𑀼𑀢𑁆𑀢𑀭𑀁, 𑀢𑀜𑁆𑀘 𑀅𑀬𑀼𑀢𑁆𑀢𑀁 𑀤𑀼𑀯𑀺𑀥𑀲𑁆𑀲𑀧𑀺 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸. 𑀢𑀦𑁆𑀢𑀺 𑀮𑁄𑀓𑀺𑀬𑀲𑀭𑀡𑀕𑀫𑀦𑀁. 𑀲𑀤𑁆𑀥𑀸𑀧𑀝𑀺𑀮𑀸𑀪𑁄 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸. 𑀲𑀤𑁆𑀥𑀸𑀫𑀽𑀮𑀺𑀓𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑀤𑁆𑀥𑀸𑀧𑀼𑀩𑁆𑀩𑀗𑁆𑀕𑀫𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀁 𑀥𑀫𑁆𑀫𑀲𑀼𑀥𑀫𑁆𑀫𑀢𑀁 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑀺𑀜𑁆𑀘 𑀮𑁄𑀓𑀺𑀬𑀸𑀯𑀩𑁄𑀥𑀯𑀲𑁂𑀦𑁂𑀯 ¶ 𑀲𑀫𑁆𑀫𑀸 𑀜𑀸𑀬𑁂𑀦 𑀤𑀲𑁆𑀲𑀦𑀢𑁄. ‘‘𑀲𑀤𑁆𑀥𑀸𑀫𑀽𑀮𑀺𑀓𑀸 𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺 𑀏𑀢𑁂𑀦 𑀲𑀤𑁆𑀥𑀽𑀧𑀦𑀺𑀲𑁆𑀲𑀬𑀸 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀸 𑀧𑀜𑁆𑀜𑀸 𑀮𑁄𑀓𑀺𑀬𑀲𑀭𑀡𑀕𑀫𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺 ‘‘𑀤𑀺𑀝𑁆𑀞𑀺 𑀏𑀯 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀉𑀚𑀼𑀁 𑀓𑀭𑀻𑀬𑀢𑀻’’𑀢𑀺 𑀓𑀢𑁆𑀯𑀸. 𑀤𑀺𑀝𑁆𑀞𑀺 𑀯𑀸 𑀉𑀚𑀼𑀁 𑀓𑀭𑀻𑀬𑀢𑀺 𑀏𑀢𑁂𑀦𑀸𑀢𑀺 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀁, 𑀢𑀣𑀸 𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 ¶ . 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀢𑀧𑁆𑀧𑀭𑀸𑀬𑀡𑀢𑀸𑀓𑀸𑀭𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄’’𑀢𑀺 𑀇𑀤𑀜𑁆𑀘 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀲𑀤𑁆𑀥𑀸𑀧𑀼𑀩𑁆𑀩𑀗𑁆𑀕𑀫𑀲𑀫𑁆𑀫𑀸𑀤𑀺𑀝𑁆𑀞𑀺𑀕𑁆𑀕𑀳𑀡𑀁 𑀧𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀢𑀧𑁆𑀧𑀥𑀸𑀦𑀢𑀸𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀲𑀤𑁆𑀥𑀸𑀧𑀝𑀺𑀮𑀸𑀪𑁄’’𑀢𑀺 𑀇𑀫𑀺𑀦𑀸 𑀫𑀸𑀢𑀸𑀤𑀻𑀳𑀺 𑀉𑀲𑁆𑀲𑀸𑀳𑀺𑀢𑀤𑀸𑀭𑀓𑀸𑀤𑀻𑀦𑀁 𑀯𑀺𑀬 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀲𑀭𑀡𑀕𑀫𑀦𑀁 𑀤𑀲𑁆𑀲𑁂𑀢𑀺, ‘‘𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺 𑀇𑀫𑀺𑀦𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀲𑀭𑀡𑀕𑀫𑀦𑀁.

𑀢𑀬𑀺𑀤𑀁 𑀮𑁄𑀓𑀺𑀬𑀁 𑀲𑀭𑀡𑀕𑀫𑀦𑀁. 𑀅𑀢𑁆𑀢𑀸 𑀲𑀦𑁆𑀦𑀺𑀬𑁆𑀬𑀸𑀢𑀻𑀬𑀢𑀺 𑀅𑀧𑁆𑀧𑀻𑀬𑀢𑀺 𑀧𑀭𑀺𑀘𑁆𑀘𑀚𑀻𑀬𑀢𑀺 𑀏𑀢𑁂𑀦𑀸𑀢𑀺 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀁, 𑀬𑀣𑀸𑀯𑀼𑀢𑁆𑀢𑀁 𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀁. 𑀢𑀁 𑀭𑀢𑀦𑀢𑁆𑀢𑀬𑀁 𑀧𑀭𑀸𑀬𑀡𑀁 𑀧𑀝𑀺𑀲𑀭𑀡𑀁 𑀏𑀢𑀲𑁆𑀲𑀸𑀢𑀺 𑀢𑀧𑁆𑀧𑀭𑀸𑀬𑀡𑁄, 𑀧𑀼𑀕𑁆𑀕𑀮𑁄, 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀯𑀸, 𑀢𑀲𑁆𑀲 𑀪𑀸𑀯𑁄 𑀢𑀧𑁆𑀧𑀭𑀸𑀬𑀡𑀢𑀸, 𑀬𑀣𑀸𑀯𑀼𑀢𑁆𑀢𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀫𑁂𑀯. 𑀲𑀭𑀡𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀲𑀺𑀲𑁆𑀲𑀪𑀸𑀯𑀁 𑀅𑀦𑁆𑀢𑁂𑀯𑀸𑀲𑀺𑀓𑀪𑀸𑀯𑀁 𑀉𑀧𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀲𑀺𑀲𑁆𑀲𑀪𑀸𑀯𑀽𑀧𑀕𑀫𑀦𑀁. 𑀲𑀭𑀡𑀕𑀫𑀦𑀸𑀥𑀺𑀧𑁆𑀧𑀸𑀬𑁂𑀦𑁂𑀯 𑀧𑀡𑀺𑀧𑀢𑀢𑀺 𑀏𑀢𑁂𑀦𑀸𑀢𑀺 𑀧𑀡𑀺𑀧𑀸𑀢𑁄. 𑀲𑀩𑁆𑀩𑀢𑁆𑀣 𑀬𑀣𑀸𑀯𑀼𑀢𑁆𑀢𑀤𑀺𑀝𑁆𑀞𑀺𑀚𑀼𑀓𑀫𑁆𑀫𑀯𑀲𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀢𑀧𑀭𑀺𑀘𑁆𑀘𑀚𑀦𑀦𑁆𑀢𑀺 𑀲𑀁𑀲𑀸𑀭𑀤𑀼𑀓𑁆𑀔𑀦𑀺𑀢𑁆𑀣𑀭𑀡𑀢𑁆𑀣𑀁 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑀲𑁆𑀲 𑀧𑀭𑀺𑀘𑁆𑀘𑀚𑀦𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀩𑀼𑀤𑁆𑀥𑀸𑀤𑀻𑀦𑀁𑀬𑁂𑀯𑀸𑀢𑀺 𑀅𑀯𑀥𑀸𑀭𑀡𑀁 𑀇𑀢𑀭𑁂𑀲𑀼𑀧𑀺 𑀲𑀭𑀡𑀕𑀫𑀦𑀯𑀺𑀲𑁂𑀲𑁂𑀲𑀼 𑀬𑀣𑀸𑀭𑀳𑀁 𑀯𑀢𑁆𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀢𑀤𑀜𑁆𑀜𑀦𑀺𑀯𑀢𑁆𑀢𑀦𑀁 𑀓𑀢𑀁 𑀳𑁄𑀢𑀺.

𑀏𑀯𑀁 𑀅𑀢𑁆𑀢𑀲𑀦𑁆𑀦𑀺𑀬𑀸𑀢𑀦𑀸𑀤𑀻𑀦𑀺 𑀏𑀓𑁂𑀦 𑀧𑀓𑀸𑀭𑁂𑀦 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀧𑀭𑁂𑀳𑀺𑀧𑀺 𑀧𑀓𑀸𑀭𑁂𑀳𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑁂𑀦 𑀧𑀭𑀺𑀬𑀸𑀬𑀦𑁆𑀢𑀭𑁂𑀳𑀺𑀧𑀺 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀸𑀤𑀺 𑀓𑀢𑀫𑁂𑀯 𑀳𑁄𑀢𑀺 𑀅𑀢𑁆𑀣𑀲𑁆𑀲 𑀅𑀪𑀺𑀦𑁆𑀦𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀆𑀴𑀯𑀓𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀸𑀢𑀸𑀕𑀺𑀭𑀺𑀳𑁂𑀫𑀯𑀢𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀦𑀦𑀼 𑀘𑁂𑀢𑁂 𑀆𑀴𑀯𑀓𑀸𑀤𑀬𑁄 𑀫𑀕𑁆𑀕𑁂𑀦𑁂𑀯 𑀆𑀕𑀢𑀲𑀭𑀡𑀕𑀫𑀦𑀸, 𑀓𑀣𑀁 𑀢𑁂𑀲𑀁 𑀢𑀧𑁆𑀧𑀭𑀸𑀬𑀡𑀢𑀸𑀲𑀭𑀡𑀕𑀫𑀦𑀁 𑀯𑀼𑀢𑁆𑀢𑀦𑁆𑀢𑀺? 𑀫𑀕𑁆𑀕𑁂𑀦𑀸𑀕𑀢𑀲𑀭𑀡𑀕𑀫𑀦𑁂𑀳𑀺𑀧𑀺 ‘‘𑀲𑁄 𑀅𑀳𑀁 𑀯𑀺𑀘𑀭𑀺𑀲𑁆𑀲𑀸𑀫𑀺 𑀕𑀸𑀫𑀸 𑀕𑀸𑀫’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁧.𑁨𑁪𑁬) 𑀢𑁂𑀳𑀺 𑀢𑀧𑁆𑀧𑀭𑀸𑀬𑀡𑀢𑀸𑀓𑀸𑀭𑀲𑁆𑀲 𑀧𑀯𑁂𑀤𑀺𑀢𑀢𑁆𑀢𑀸 𑀢𑀣𑀸 𑀯𑀼𑀢𑁆𑀢𑀁.

𑀜𑀸𑀢𑀺…𑀧𑁂… 𑀯𑀲𑁂𑀦𑀸𑀢𑀺 𑀏𑀢𑁆𑀣 𑀜𑀸𑀢𑀺𑀯𑀲𑁂𑀦 𑀪𑀬𑀯𑀲𑁂𑀦 𑀆𑀘𑀭𑀺𑀬𑀯𑀲𑁂𑀦 𑀤𑀓𑁆𑀔𑀺𑀡𑁂𑀬𑁆𑀬𑀯𑀲𑁂𑀦𑀸𑀢𑀺 𑀧𑀘𑁆𑀘𑁂𑀓𑀁 ‘‘𑀯𑀲𑁂𑀦𑀸’’𑀢𑀺 𑀧𑀤𑀁 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀜𑀸𑀢𑀺𑀯𑀲𑁂𑀦𑀸𑀢𑀺 𑀜𑀸𑀢𑀺𑀪𑀸𑀯𑀯𑀲𑁂𑀦. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀤𑀓𑁆𑀔𑀺𑀡𑁂𑀬𑁆𑀬𑀧𑀡𑀺𑀧𑀸𑀢𑁂𑀦𑀸𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑀢𑀸𑀳𑁂𑀢𑀼𑀓𑁂𑀦 𑀧𑀡𑀺𑀧𑀸𑀢𑁂𑀦. 𑀇𑀢𑀭𑁂𑀳𑀻𑀢𑀺 𑀜𑀸𑀢𑀺𑀪𑀸𑀯𑀸𑀤𑀺𑀯𑀲𑀧𑁆𑀧𑀯𑀢𑁆𑀢𑁂𑀳𑀺 𑀢𑀻𑀳𑀺 𑀧𑀡𑀺𑀧𑀸𑀢𑁂𑀳𑀺. 𑀇𑀢𑀭𑁂𑀳𑀻𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑀢𑁄 ¶ 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀦𑁆𑀤𑀢𑀻𑀢𑀺 𑀧𑀡𑀺𑀧𑀸𑀢𑀲𑁆𑀲 𑀮𑀓𑁆𑀔𑀡𑀯𑀘𑀦𑀁. 𑀏𑀯𑀭𑀽𑀧𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 ¶ 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀫𑁆𑀧𑀭𑀸𑀬𑀺𑀓𑀜𑁆𑀳𑀺 𑀦𑀺𑀬𑁆𑀬𑀸𑀦𑀺𑀓𑀁 𑀯𑀸 𑀅𑀦𑀼𑀲𑀸𑀲𑀦𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑁄 𑀤𑀓𑁆𑀔𑀺𑀡𑁂𑀬𑁆𑀬𑀧𑀡𑀺𑀧𑀸𑀢𑀫𑁂𑀯 𑀓𑀭𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀭𑀡𑀕𑀫𑀦𑀧𑁆𑀧𑀪𑁂𑀤𑁄𑀢𑀺 𑀲𑀭𑀡𑀕𑀫𑀦𑀯𑀺𑀪𑀸𑀕𑁄.

𑀅𑀭𑀺𑀬𑀫𑀕𑁆𑀕𑁄𑀬𑁂𑀯 𑀮𑁄𑀓𑀼𑀢𑁆𑀢𑀭𑀲𑀭𑀡𑀕𑀫𑀦𑀦𑁆𑀢𑀺 𑀆𑀳 ‘‘𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀯𑀺𑀧𑀸𑀓𑀨𑀮’’𑀦𑁆𑀢𑀺. 𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑁄𑀢𑀺 𑀲𑀓𑀮𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄. 𑀏𑀢𑀦𑁆𑀢𑀺 ‘‘𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀻’’𑀢𑀺 (𑀥. 𑀧. 𑁧𑁯𑁦) 𑀏𑀯𑀁 𑀯𑀼𑀢𑁆𑀢𑀁 𑀅𑀭𑀺𑀬𑀲𑀘𑁆𑀘𑀤𑀲𑁆𑀲𑀦𑀁.

𑀦𑀺𑀘𑁆𑀘𑀢𑁄 𑀅𑀦𑀼𑀧𑀕𑀫𑀦𑀸𑀤𑀺𑀯𑀲𑁂𑀦𑀸𑀢𑀺 𑀦𑀺𑀘𑁆𑀘𑀦𑁆𑀢𑀺 𑀅𑀕𑁆𑀕𑀳𑀡𑀸𑀤𑀺𑀯𑀲𑁂𑀦. 𑀅𑀝𑁆𑀞𑀸𑀦𑀦𑁆𑀢𑀺 𑀳𑁂𑀢𑀼𑀧𑀝𑀺𑀓𑁆𑀔𑁂𑀧𑁄. 𑀅𑀦𑀯𑀓𑀸𑀲𑁄𑀢𑀺 𑀧𑀘𑁆𑀘𑀬𑀧𑀝𑀺𑀓𑁆𑀔𑁂𑀧𑁄. 𑀉𑀪𑀬𑁂𑀦𑀧𑀺 𑀓𑀸𑀭𑀡𑀫𑁂𑀯 𑀧𑀝𑀺𑀓𑁆𑀔𑀺𑀧𑀢𑀺. 𑀬𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦. 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄𑀢𑀺 𑀫𑀕𑁆𑀕𑀤𑀺𑀝𑁆𑀞𑀺𑀬𑀸 𑀲𑀫𑁆𑀧𑀦𑁆𑀦𑁄 𑀲𑁄𑀢𑀸𑀧𑀦𑁆𑀦𑁄. 𑀓𑀜𑁆𑀘𑀺 𑀲𑀗𑁆𑀔𑀸𑀭𑀦𑁆𑀢𑀺 𑀘𑀢𑀼𑀪𑀽𑀫𑀓𑁂𑀲𑀼 𑀲𑀗𑁆𑀔𑀢𑀲𑀗𑁆𑀔𑀸𑀭𑁂𑀲𑀼 𑀏𑀓𑀲𑀗𑁆𑀔𑀸𑀭𑀫𑁆𑀧𑀺. 𑀦𑀺𑀘𑁆𑀘𑀢𑁄 𑀉𑀧𑀕𑀘𑁆𑀙𑁂𑀬𑁆𑀬𑀸𑀢𑀺 ‘‘𑀦𑀺𑀘𑁆𑀘𑁄’’𑀢𑀺 𑀕𑀡𑁆𑀳𑁂𑀬𑁆𑀬. 𑀲𑀼𑀔𑀢𑁄 𑀉𑀧𑀕𑀘𑁆𑀙𑁂𑀬𑁆𑀬𑀸𑀢𑀺 ‘‘𑀏𑀓𑀦𑁆𑀢𑀲𑀼𑀔𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸’’𑀢𑀺 (𑀤𑀻. 𑀦𑀺. 𑁧.𑁭𑁬) 𑀏𑀯𑀁 𑀅𑀢𑁆𑀢𑀤𑀺𑀝𑁆𑀞𑀺𑀯𑀲𑁂𑀦 𑀲𑀼𑀔𑀢𑁄 𑀕𑀸𑀳𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀧𑀦 𑀅𑀭𑀺𑀬𑀲𑀸𑀯𑀓𑁄 𑀧𑀭𑀺𑀴𑀸𑀳𑀯𑀽𑀧𑀲𑀫𑀦𑀢𑁆𑀣𑀁 𑀫𑀢𑁆𑀢𑀳𑀢𑁆𑀣𑀺𑀧𑀭𑀺𑀢𑁆𑀢𑀸𑀲𑀺𑀢𑁄 𑀯𑀺𑀬 𑀘𑁄𑀓𑁆𑀔𑀩𑁆𑀭𑀸𑀳𑁆𑀫𑀡𑁄 𑀉𑀓𑁆𑀓𑀸𑀭𑀪𑀽𑀫𑀺𑀁 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀲𑀼𑀔𑀢𑁄 𑀉𑀧𑀕𑀘𑁆𑀙𑀢𑀺. 𑀅𑀢𑁆𑀢𑀯𑀸𑀭𑁂 𑀓𑀲𑀺𑀡𑀸𑀤𑀺𑀧𑀜𑁆𑀜𑀢𑁆𑀢𑀺𑀲𑀗𑁆𑀕𑀳𑀡𑀢𑁆𑀣𑀁 ‘‘𑀲𑀗𑁆𑀔𑀸𑀭’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀓𑀜𑁆𑀘𑀺 𑀥𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀫𑁂𑀲𑀼𑀧𑀺 𑀯𑀸𑀭𑁂𑀲𑀼 𑀘𑀢𑀼𑀪𑀽𑀫𑀓𑀯𑀲𑁂𑀦𑁂𑀯 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄 𑀢𑁂𑀪𑀽𑀫𑀓𑀯𑀲𑁂𑀦𑁂𑀯 𑀯𑀸. 𑀬𑀁 𑀬𑀜𑁆𑀳𑀺 𑀧𑀼𑀣𑀼𑀚𑁆𑀚𑀦𑁄 𑀕𑀸𑀳𑀯𑀲𑁂𑀦 𑀕𑀡𑁆𑀳𑀸𑀢𑀺, 𑀢𑀢𑁄 𑀢𑀢𑁄 𑀅𑀭𑀺𑀬𑀲𑀸𑀯𑀓𑁄 𑀕𑀸𑀳𑀁 𑀯𑀺𑀦𑀺𑀯𑁂𑀞𑁂𑀢𑀺. 𑀫𑀸𑀢𑀭𑀦𑁆𑀢𑀺𑀆𑀤𑀻𑀲𑀼 𑀚𑀦𑀺𑀓𑀸 𑀫𑀸𑀢𑀸, 𑀚𑀦𑀓𑁄 𑀧𑀺𑀢𑀸, 𑀫𑀦𑀼𑀲𑁆𑀲𑀪𑀽𑀢𑁄 𑀔𑀻𑀡𑀸𑀲𑀯𑁄 𑀅𑀭𑀳𑀸𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀓𑀺𑀁 𑀧𑀦 𑀅𑀭𑀺𑀬𑀲𑀸𑀯𑀓𑁄 𑀅𑀜𑁆𑀜𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸𑀢𑀺? 𑀏𑀢𑀫𑁆𑀧𑀺 𑀅𑀝𑁆𑀞𑀸𑀦𑀁, 𑀧𑀼𑀣𑀼𑀚𑁆𑀚𑀦𑀪𑀸𑀯𑀲𑁆𑀲 𑀧𑀦 𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀅𑀭𑀺𑀬𑀲𑀸𑀯𑀓𑀲𑁆𑀲 𑀨𑀮𑀤𑀻𑀧𑀦𑀢𑁆𑀣𑀜𑁆𑀘𑁂𑀯𑀁 𑀯𑀼𑀢𑁆𑀢𑀁. 𑀤𑀼𑀝𑁆𑀞𑀘𑀺𑀢𑁆𑀢𑁄 𑀯𑀥𑀓𑀘𑀺𑀢𑁆𑀢𑁂𑀦 𑀧𑀤𑀼𑀝𑁆𑀞𑀘𑀺𑀢𑁆𑀢𑁄. 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀬𑁆𑀬𑀸𑀢𑀺 𑀚𑀻𑀯𑀫𑀸𑀦𑀓𑀲𑀭𑀻𑀭𑁂 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀬 𑀧𑀺𑀯𑀦𑀫𑀢𑁆𑀢𑀫𑁆𑀧𑀺 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀬𑁆𑀬. 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬𑀸𑀢𑀺 𑀲𑀫𑀸𑀦𑀲𑀁𑀯𑀸𑀲𑀓𑀁 𑀲𑀫𑀸𑀦𑀲𑀻𑀫𑀸𑀬𑀁 𑀞𑀺𑀢𑀁 𑀲𑀗𑁆𑀖𑀁 ‘𑀓𑀫𑁆𑀫𑁂𑀦 𑀉𑀤𑁆𑀤𑁂𑀲𑁂𑀦 𑀯𑁄𑀳𑀭𑀦𑁆𑀢𑁄 𑀅𑀦𑀼𑀲𑁆𑀲𑀸𑀯𑀦𑁂𑀦 𑀲𑀮𑀸𑀓𑀕𑁆𑀕𑀸𑀳𑁂𑀦𑀸’’𑀢𑀺 (𑀧𑀭𑀺. 𑁪𑁫𑁮) 𑀏𑀯𑀁 𑀯𑀼𑀢𑁆𑀢𑁂𑀳𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀪𑀺𑀦𑁆𑀤𑁂𑀬𑁆𑀬 ¶ . 𑀅𑀜𑁆𑀜𑀁 𑀲𑀢𑁆𑀣𑀸𑀭𑀦𑁆𑀢𑀺 𑀅𑀜𑁆𑀜𑀁 𑀢𑀺𑀢𑁆𑀣𑀓𑀭𑀁 ‘‘𑀅𑀬𑀁 𑀫𑁂 𑀲𑀢𑁆𑀣𑀸’’𑀢𑀺 𑀏𑀯𑀁 𑀕𑀡𑁆𑀳𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑀦 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺 𑀅𑀧𑀸𑀬𑀪𑀽𑀫𑀺𑀦𑁆𑀢𑀺 𑀢𑁂 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸 𑀢𑀦𑁆𑀦𑀺𑀫𑀺𑀢𑁆𑀢𑀁 𑀅𑀧𑀸𑀬𑀪𑀽𑀫𑀺𑀁 𑀦 𑀕𑀫𑀺𑀲𑁆𑀲𑀦𑁆𑀢𑀺, 𑀤𑁂𑀯𑀓𑀸𑀬𑀁 𑀧𑀦 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀤𑀲𑀳𑀺 ¶ 𑀞𑀸𑀦𑁂𑀳𑀻𑀢𑀺 𑀤𑀲𑀳𑀺 𑀓𑀸𑀭𑀡𑁂𑀳𑀺. 𑀅𑀥𑀺𑀕𑁆𑀕𑀡𑁆𑀳𑀦𑁆𑀢𑀻𑀢𑀺 𑀅𑀥𑀺𑀪𑀯𑀦𑁆𑀢𑀺. 𑀯𑁂𑀮𑀸𑀫𑀲𑀼𑀢𑁆𑀢𑀸𑀤𑀺𑀯𑀲𑁂𑀦𑀸𑀧𑀻𑀢𑀺 𑀏𑀢𑁆𑀣 ‘‘𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀲𑀗𑁆𑀔𑀸𑀦𑀁 𑀲𑀼𑀯𑀡𑁆𑀡𑀧𑀸𑀢𑀺𑀭𑀽𑀧𑀺𑀬𑀧𑀸𑀢𑀺𑀓𑀁𑀲𑀧𑀸𑀢𑀻𑀦𑀁 𑀬𑀣𑀸𑀓𑁆𑀓𑀫𑀁 𑀭𑀽𑀧𑀺𑀬𑀲𑀼𑀯𑀡𑁆𑀡𑀳𑀺𑀭𑀜𑁆𑀜𑀧𑀽𑀭𑀸𑀦𑀁 𑀓𑀭𑀻𑀲𑀲𑁆𑀲 𑀘𑀢𑀼𑀢𑁆𑀣𑀪𑀸𑀯𑀧𑁆𑀧𑀫𑀸𑀡𑀸𑀦𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀬𑀸 𑀳𑀢𑁆𑀣𑀺𑀲𑀳𑀲𑁆𑀲𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀬𑀸 𑀅𑀲𑁆𑀲𑀲𑀳𑀲𑁆𑀲𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀬𑀸 𑀭𑀣𑀲𑀳𑀲𑁆𑀲𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀬𑀸 𑀥𑁂𑀦𑀼𑀲𑀳𑀲𑁆𑀲𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀬𑀸 𑀓𑀜𑁆𑀜𑀸𑀲𑀳𑀲𑁆𑀲𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀮𑁆𑀮𑀗𑁆𑀓𑀲𑀳𑀲𑁆𑀲𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀬𑀸 𑀯𑀢𑁆𑀣𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀅𑀧𑀭𑀺𑀫𑀸𑀡𑀲𑁆𑀲 𑀘 𑀔𑀚𑁆𑀚𑀪𑁄𑀚𑁆𑀚𑀸𑀤𑀺𑀪𑁂𑀤𑀲𑁆𑀲 𑀆𑀳𑀸𑀭𑀲𑁆𑀲 𑀧𑀭𑀺𑀘𑁆𑀘𑀚𑀦𑀯𑀲𑁂𑀦 𑀲𑀢𑁆𑀢𑀫𑀸𑀲𑀸𑀥𑀺𑀓𑀸𑀦𑀺 𑀲𑀢𑁆𑀢 𑀲𑀁𑀯𑀘𑁆𑀙𑀭𑀸𑀦𑀺 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑀯𑁂𑀮𑀸𑀫𑀫𑀳𑀸𑀤𑀸𑀦𑀢𑁄 𑀏𑀓𑀲𑁆𑀲 𑀲𑁄𑀢𑀸𑀧𑀦𑁆𑀦𑀲𑁆𑀲 𑀤𑀺𑀦𑁆𑀦𑀤𑀸𑀦𑀁 𑀫𑀳𑀧𑁆𑀨𑀮𑀢𑀭𑀁, 𑀢𑀢𑁄 𑀲𑀢𑀁 𑀲𑁄𑀢𑀸𑀧𑀦𑁆𑀦𑀸𑀦𑀁 𑀤𑀺𑀦𑁆𑀦𑀤𑀸𑀦𑀢𑁄 𑀏𑀓𑀲𑁆𑀲 𑀲𑀓𑀤𑀸𑀕𑀸𑀫𑀺𑀲𑁆𑀲, 𑀢𑀢𑁄 𑀏𑀓𑀲𑁆𑀲 𑀅𑀦𑀸𑀕𑀸𑀫𑀺𑀲𑁆𑀲, 𑀢𑀢𑁄 𑀏𑀓𑀲𑁆𑀲 𑀅𑀭𑀳𑀢𑁄, 𑀢𑀢𑁄 𑀏𑀓𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲, 𑀢𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲, 𑀢𑀢𑁄 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀤𑀸𑀦𑀁 𑀫𑀳𑀧𑁆𑀨𑀮𑀢𑀭𑀁, 𑀢𑀢𑁄 𑀘𑀸𑀢𑀼𑀤𑁆𑀤𑀺𑀲𑀁 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀸𑀭𑀓𑀭𑀡𑀁, 𑀢𑀢𑁄 𑀲𑀭𑀡𑀕𑀫𑀦𑀁 𑀫𑀳𑀧𑁆𑀨𑀮𑀢𑀭’’𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑀲𑁆𑀲 𑀯𑁂𑀮𑀸𑀫𑀲𑀼𑀢𑁆𑀢𑀲𑁆𑀲 (𑀅. 𑀦𑀺. 𑁯.𑁨𑁦) 𑀯𑀲𑁂𑀦. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑀁 𑀕𑀳𑀧𑀢𑀺, 𑀯𑁂𑀮𑀸𑀫𑁄 𑀩𑁆𑀭𑀸𑀳𑁆𑀫𑀡𑁄 𑀤𑀸𑀦𑀁 𑀅𑀤𑀸𑀲𑀺 𑀫𑀳𑀸𑀤𑀸𑀦𑀁, 𑀬𑁄 𑀏𑀓𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀁 𑀪𑁄𑀚𑁂𑀬𑁆𑀬, 𑀇𑀤𑀁 𑀢𑀢𑁄 𑀫𑀳𑀧𑁆𑀨𑀮𑀢𑀭’’𑀦𑁆𑀢𑀺𑀆𑀤𑀺 (𑀅. 𑀦𑀺. 𑁯.𑁨𑁦). 𑀯𑁂𑀮𑀸𑀫𑀲𑀼𑀢𑁆𑀢𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀕𑁆𑀕𑀧𑁆𑀧𑀲𑀸𑀤𑀲𑀼𑀢𑁆𑀢𑀸𑀤𑀻𑀦𑀁 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦) 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀅𑀜𑁆𑀜𑀸𑀡𑀁 𑀯𑀢𑁆𑀣𑀼𑀢𑁆𑀢𑀬𑀲𑁆𑀲 𑀕𑀼𑀡𑀸𑀦𑀁 𑀅𑀚𑀸𑀦𑀦𑀁 𑀢𑀢𑁆𑀣 𑀲𑀫𑁆𑀫𑁄𑀳𑁄, ‘‘𑀩𑀼𑀤𑁆𑀥𑁄 𑀦𑀼 𑀔𑁄, 𑀦 𑀦𑀼 𑀔𑁄 𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 𑀯𑀺𑀘𑀺𑀓𑀺𑀘𑁆𑀙𑀸 𑀲𑀁𑀲𑀬𑁄, 𑀫𑀺𑀘𑁆𑀙𑀸𑀜𑀸𑀡𑀁 𑀢𑀲𑁆𑀲 𑀕𑀼𑀡𑀸𑀦𑀁 𑀅𑀕𑀼𑀡𑀪𑀸𑀯𑀧𑀭𑀺𑀓𑀧𑁆𑀧𑀦𑁂𑀦 𑀯𑀺𑀧𑀭𑀻𑀢𑀕𑁆𑀕𑀸𑀳𑁄. 𑀆𑀤𑀺-𑀲𑀤𑁆𑀤𑁂𑀦 𑀅𑀦𑀸𑀤𑀭𑀸𑀕𑀸𑀭𑀯𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀦 𑀫𑀳𑀸𑀚𑀼𑀢𑀺𑀓𑀦𑁆𑀢𑀺 𑀦 𑀉𑀚𑁆𑀚𑀮𑀁, 𑀅𑀧𑀭𑀺𑀲𑀼𑀤𑁆𑀥𑀁 𑀅𑀧𑀭𑀺𑀬𑁄𑀤𑀸𑀢𑀦𑁆𑀢𑀺 𑀅𑀢𑁆𑀣𑁄. 𑀦 𑀫𑀳𑀸𑀯𑀺𑀧𑁆𑀨𑀸𑀭𑀦𑁆𑀢𑀺 𑀅𑀦𑀼𑀴𑀸𑀭𑀁. 𑀲𑀸𑀯𑀚𑁆𑀚𑁄𑀢𑀺 𑀤𑀺𑀝𑁆𑀞𑀺𑀢𑀡𑁆𑀳𑀸𑀤𑀺𑀯𑀲𑁂𑀦 𑀲𑀤𑁄𑀲𑁄. 𑀮𑁄𑀓𑀺𑀬𑀁 𑀲𑀭𑀡𑀕𑀫𑀦𑀁 𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑀁 𑀯𑀺𑀬 ¶ 𑀅𑀕𑁆𑀕𑀳𑀺𑀢𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀔𑀦𑁆𑀥𑀪𑁂𑀤𑁂𑀦 𑀪𑁂𑀤𑁄𑀢𑀺 𑀆𑀳 ‘‘𑀅𑀦𑀯𑀚𑁆𑀚𑁄 𑀓𑀸𑀮𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑁄𑀢𑀺 𑀅𑀦𑀯𑀚𑁆𑀚𑁄 𑀲𑀭𑀡𑀕𑀫𑀦𑀪𑁂𑀤𑁄. 𑀲𑀢𑀺𑀧𑀺 𑀅𑀦𑀯𑀚𑁆𑀚𑀢𑁆𑀢𑁂 𑀇𑀝𑁆𑀞𑀨𑀮𑁄𑀧𑀺 𑀦 𑀳𑁄𑀢𑀻𑀢𑀺 𑀆𑀳 ‘‘𑀅𑀨𑀮𑁄’’𑀢𑀺.

𑀲𑀭𑀡𑀕𑀫𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀸𑀲𑀓𑀯𑀺𑀥𑀺𑀓𑀣𑀸𑀯𑀡𑁆𑀡𑀦𑀸

𑀓𑁄 ¶ 𑀉𑀧𑀸𑀲𑀓𑁄𑀢𑀺 𑀲𑀭𑀽𑀧𑀧𑀼𑀘𑁆𑀙𑀸, 𑀢𑀲𑁆𑀫𑀸 𑀓𑀺𑀁𑀮𑀓𑁆𑀔𑀡𑁄 𑀉𑀧𑀸𑀲𑀓𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀲𑁆𑀫𑀸𑀢𑀺 𑀳𑁂𑀢𑀼𑀧𑀼𑀘𑁆𑀙𑀸. 𑀢𑁂𑀦 𑀓𑁂𑀦 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑁂𑀦 𑀉𑀧𑀸𑀲𑀓𑀲𑀤𑁆𑀤𑁄 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀦𑀺𑀭𑀼𑀴𑁆𑀳𑁄𑀢𑀺 𑀤𑀲𑁆𑀲𑁂𑀢𑀺. 𑀓𑀺𑀫𑀲𑁆𑀲 𑀲𑀻𑀮𑀦𑁆𑀢𑀺 𑀓𑀻𑀤𑀺𑀲𑀁 𑀅𑀲𑁆𑀲 𑀉𑀧𑀸𑀲𑀓𑀲𑁆𑀲 𑀲𑀻𑀮𑀁, 𑀓𑀺𑀢𑁆𑀢𑀓𑁂𑀦 𑀲𑀻𑀮𑁂𑀦𑀸𑀬𑀁 𑀲𑀻𑀮𑀲𑀫𑁆𑀧𑀦𑁆𑀦𑁄 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑁄 𑀆𑀚𑀻𑀯𑁄𑀢𑀺 𑀓𑁄 𑀅𑀲𑁆𑀲 𑀲𑀫𑁆𑀫𑀸𑀆𑀚𑀻𑀯𑁄, 𑀲𑁄 𑀧𑀦 𑀫𑀺𑀘𑁆𑀙𑀸𑀚𑀻𑀯𑀲𑁆𑀲 𑀧𑀭𑀺𑀯𑀚𑁆𑀚𑀦𑁂𑀦 𑀳𑁄𑀢𑀻𑀢𑀺 𑀲𑁄𑀧𑀺 𑀯𑀺𑀪𑀚𑀻𑀬𑀢𑀻𑀢𑀺. 𑀓𑀸 𑀯𑀺𑀧𑀢𑁆𑀢𑀻𑀢𑀺 𑀓𑀸 𑀅𑀲𑁆𑀲 𑀲𑀻𑀮𑀲𑁆𑀲, 𑀆𑀚𑀻𑀯𑀲𑁆𑀲 𑀯𑀸 𑀯𑀺𑀧𑀢𑁆𑀢𑀺. 𑀅𑀦𑀦𑁆𑀢𑀭𑀲𑁆𑀲 𑀳𑀺 𑀯𑀺𑀥𑀺 𑀯𑀸 𑀧𑀝𑀺𑀲𑁂𑀥𑁄 𑀯𑀸. 𑀓𑀸 𑀲𑀫𑁆𑀧𑀢𑁆𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀬𑁄 𑀓𑁄𑀘𑀻𑀢𑀺 𑀔𑀢𑁆𑀢𑀺𑀬𑀸𑀤𑀻𑀲𑀼 𑀬𑁄 𑀓𑁄𑀘𑀺. 𑀢𑁂𑀦 𑀲𑀭𑀡𑀕𑀫𑀦𑀫𑁂𑀯𑁂𑀢𑁆𑀣 𑀓𑀸𑀭𑀡𑀁, 𑀦 𑀚𑀸𑀢𑀺𑀆𑀤𑀺𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀉𑀧𑀸𑀲𑀦𑀢𑁄𑀢𑀺 𑀢𑁂𑀦𑁂𑀯 𑀲𑀭𑀡𑀕𑀫𑀦𑁂𑀦 𑀢𑀢𑁆𑀣 𑀘 𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸𑀬 𑀆𑀤𑀭𑀕𑀸𑀭𑀯𑀩𑀳𑀼𑀫𑀸𑀦𑀸𑀤𑀺𑀬𑁄𑀕𑁂𑀦 𑀧𑀬𑀺𑀭𑀼𑀧𑀸𑀲𑀦𑀢𑁄. 𑀯𑁂𑀭𑀫𑀡𑀺𑀬𑁄𑀢𑀺 𑀯𑁂𑀭𑀁 𑀯𑀼𑀘𑁆𑀘𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀤𑀼𑀲𑁆𑀲𑀻𑀮𑁆𑀬𑀁, 𑀢𑀲𑁆𑀲 𑀫𑀡𑀦𑀢𑁄 𑀳𑀦𑀦𑀢𑁄 𑀯𑀺𑀦𑀸𑀲𑀦𑀢𑁄 𑀯𑁂𑀭𑀫𑀡𑀺𑀬𑁄, 𑀧𑀜𑁆𑀘 𑀯𑀺𑀭𑀢𑀺𑀬𑁄 𑀯𑀺𑀭𑀢𑀺𑀧𑁆𑀧𑀥𑀸𑀦𑀢𑁆𑀢𑀸 𑀢𑀲𑁆𑀲 𑀲𑀻𑀮𑀲𑁆𑀲. 𑀢𑁂𑀦𑁂𑀯𑀸𑀳 𑀢𑀢𑁆𑀣 𑀢𑀢𑁆𑀣 ‘‘𑀧𑀝𑀺𑀯𑀺𑀭𑀢𑁄 𑀳𑁄𑀢𑀻’’𑀢𑀺.

𑀫𑀺𑀘𑁆𑀙𑀸𑀯𑀡𑀺𑀚𑁆𑀚𑀸𑀢𑀺 𑀦 𑀲𑀫𑁆𑀫𑀸𑀯𑀡𑀺𑀚𑁆𑀚𑀸 𑀅𑀬𑀼𑀢𑁆𑀢𑀯𑀡𑀺𑀚𑁆𑀚𑀸 𑀅𑀲𑀸𑀭𑀼𑀧𑁆𑀧𑀯𑀡𑀺𑀚𑁆𑀚𑀸. 𑀧𑀳𑀸𑀬𑀸𑀢𑀺 𑀅𑀓𑀭𑀡𑁂𑀦𑁂𑀯 𑀧𑀚𑀳𑀺𑀢𑁆𑀯𑀸. 𑀥𑀫𑁆𑀫𑁂𑀦𑀸𑀢𑀺 𑀥𑀫𑁆𑀫𑀢𑁄 𑀅𑀦𑀧𑁂𑀢𑁂𑀦. 𑀢𑁂𑀦 𑀅𑀜𑁆𑀜𑀫𑁆𑀧𑀺 𑀅𑀥𑀫𑁆𑀫𑀺𑀓𑀁 𑀚𑀻𑀯𑀺𑀓𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀲𑀫𑁂𑀦𑀸𑀢𑀺 𑀅𑀯𑀺𑀲𑀫𑁂𑀦. 𑀢𑁂𑀦 𑀓𑀸𑀬𑀯𑀺𑀲𑀫𑀸𑀤𑀺𑀤𑀼𑀘𑁆𑀘𑀭𑀺𑀢𑀁 𑀯𑀚𑁆𑀚𑁂𑀢𑁆𑀯𑀸 𑀓𑀸𑀬𑀲𑀫𑀸𑀤𑀺𑀦𑀸 𑀲𑀼𑀘𑀭𑀺𑀢𑁂𑀦 𑀚𑀻𑀯𑀦𑀁 𑀤𑀲𑁆𑀲𑁂𑀢𑀺. 𑀲𑀢𑁆𑀣𑀯𑀡𑀺𑀚𑁆𑀚𑀸𑀢𑀺 𑀆𑀯𑀼𑀥𑀪𑀡𑁆𑀟𑀁 𑀓𑀢𑁆𑀯𑀸 𑀯𑀸 𑀓𑀸𑀭𑁂𑀢𑁆𑀯𑀸 𑀯𑀸 𑀬𑀣𑀸𑀓𑀢𑀁 𑀯𑀸 𑀧𑀝𑀺𑀮𑀪𑀺𑀢𑁆𑀯𑀸 𑀢𑀲𑁆𑀲 𑀯𑀺𑀓𑁆𑀓𑀬𑁄. 𑀲𑀢𑁆𑀣𑀯𑀡𑀺𑀚𑁆𑀚𑀸𑀢𑀺 𑀫𑀦𑀼𑀲𑁆𑀲𑀯𑀺𑀓𑁆𑀓𑀬𑁄 ¶ . 𑀫𑀁𑀲𑀯𑀡𑀺𑀚𑁆𑀚𑀸𑀢𑀺 𑀲𑀽𑀦𑀓𑀸𑀭𑀸𑀤𑀬𑁄 𑀯𑀺𑀬 𑀫𑀺𑀕𑀲𑀽𑀓𑀭𑀸𑀤𑀺𑀓𑁂 𑀧𑁄𑀲𑁂𑀢𑁆𑀯𑀸 𑀫𑀁𑀲𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀺𑀓𑁆𑀓𑀬𑁄. 𑀫𑀚𑁆𑀚𑀯𑀡𑀺𑀚𑁆𑀚𑀸𑀢𑀺 𑀬𑀁 𑀓𑀺𑀜𑁆𑀘𑀺 𑀫𑀚𑁆𑀚𑀁 𑀬𑁄𑀚𑁂𑀢𑁆𑀯𑀸 𑀢𑀲𑁆𑀲 𑀯𑀺𑀓𑁆𑀓𑀬𑁄. 𑀯𑀺𑀲𑀯𑀡𑀺𑀚𑁆𑀚𑀸𑀢𑀺 𑀯𑀺𑀲𑀁 𑀬𑁄𑀚𑁂𑀢𑁆𑀯𑀸, 𑀯𑀺𑀲𑀁 𑀕𑀳𑁂𑀢𑁆𑀯𑀸 𑀯𑀸 𑀢𑀲𑁆𑀲 𑀯𑀺𑀓𑁆𑀓𑀬𑁄. 𑀢𑀢𑁆𑀣 𑀲𑀢𑁆𑀣𑀯𑀡𑀺𑀚𑁆𑀚𑀸 𑀧𑀭𑁄𑀧𑀭𑁄𑀥𑀦𑀺𑀫𑀺𑀢𑁆𑀢𑀢𑀸𑀬 𑀅𑀓𑀭𑀡𑀻𑀬𑀸 𑀯𑀼𑀢𑁆𑀢𑀸, 𑀲𑀢𑁆𑀢𑀯𑀡𑀺𑀚𑁆𑀚𑀸 𑀅𑀪𑀼𑀚𑀺𑀲𑁆𑀲𑀪𑀸𑀯𑀓𑀭𑀡𑀢𑁄, 𑀫𑀁𑀲𑀯𑀺𑀲𑀯𑀡𑀺𑀚𑁆𑀚𑀸 𑀯𑀥𑀳𑁂𑀢𑀼𑀢𑁄, 𑀫𑀚𑁆𑀚𑀯𑀡𑀺𑀚𑁆𑀚𑀸 𑀧𑀫𑀸𑀤𑀝𑁆𑀞𑀸𑀦𑀢𑁄.

𑀢𑀲𑁆𑀲𑁂𑀯𑀸𑀢𑀺 𑀧𑀜𑁆𑀘𑀯𑁂𑀭𑀫𑀡𑀺𑀮𑀓𑁆𑀔𑀡𑀲𑁆𑀲 𑀲𑀻𑀮𑀲𑁆𑀲 𑀘𑁂𑀯 𑀧𑀜𑁆𑀘𑀫𑀺𑀘𑁆𑀙𑀸𑀯𑀡𑀺𑀚𑁆𑀚𑀸𑀮𑀓𑁆𑀔𑀡𑀲𑁆𑀲 𑀆𑀚𑀻𑀯𑀲𑁆𑀲 𑀘. 𑀯𑀺𑀧𑀢𑁆𑀢𑀻𑀢𑀺 𑀪𑁂𑀤𑁄 𑀧𑀓𑁄𑀧𑁄 𑀘. 𑀬𑀸𑀬𑀸𑀢𑀺 𑀬𑀸𑀬 𑀧𑀝𑀺𑀧𑀢𑁆𑀢𑀺𑀬𑀸. 𑀘𑀡𑁆𑀟𑀸𑀮𑁄𑀢𑀺 𑀉𑀧𑀸𑀲𑀓𑀘𑀡𑁆𑀟𑀸𑀮𑁄. 𑀫𑀮𑀦𑁆𑀢𑀺 𑀉𑀧𑀸𑀲𑀓𑀫𑀮𑀁. 𑀧𑀢𑀺𑀓𑀺𑀝𑁆𑀞𑁄𑀢𑀺 𑀉𑀧𑀸𑀲𑀓𑀦𑀺𑀳𑀻𑀦𑁄. 𑀩𑀼𑀤𑁆𑀥𑀸𑀤𑀻𑀲𑀼 𑀓𑀫𑁆𑀫𑀓𑀫𑁆𑀫𑀨𑀮𑁂𑀲𑀼 𑀘 𑀲𑀤𑁆𑀥𑀸𑀯𑀺𑀧𑀭𑀺𑀬𑀸𑀬𑁄 𑀅𑀲𑁆𑀲𑀤𑁆𑀥𑀺𑀬𑀁 𑀫𑀺𑀘𑁆𑀙𑀸𑀥𑀺𑀫𑁄𑀓𑁆𑀔𑁄. 𑀬𑀣𑀸𑀯𑀼𑀢𑁆𑀢𑁂𑀦 𑀅𑀲𑁆𑀲𑀤𑁆𑀥𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀲𑁆𑀲𑀤𑁆𑀥𑁄. 𑀬𑀣𑀸𑀯𑀼𑀢𑁆𑀢 𑀲𑀻𑀮𑀯𑀺𑀧𑀢𑁆𑀢𑀺 𑀆𑀚𑀻𑀯𑀯𑀺𑀧𑀢𑁆𑀢𑀺𑀯𑀲𑁂𑀦 𑀤𑀼𑀲𑁆𑀲𑀻𑀮𑁄. ‘‘𑀇𑀫𑀺𑀦𑀸 𑀤𑀺𑀝𑁆𑀞𑀸𑀤𑀺𑀦𑀸 ¶ 𑀇𑀤𑀁 𑀦𑀸𑀫 𑀫𑀗𑁆𑀕𑀮𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀩𑀸𑀮𑀚𑀦𑀧𑀭𑀺𑀓𑀧𑁆𑀧𑀺𑀢𑀓𑁄𑀢𑀽𑀳𑀮𑀲𑀗𑁆𑀔𑀸𑀢𑁂𑀦 𑀤𑀺𑀝𑁆𑀞𑀲𑀼𑀢𑀫𑀼𑀢𑀫𑀗𑁆𑀕𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀓𑁄𑀢𑀽𑀳𑀮𑀫𑀗𑁆𑀕𑀮𑀺𑀓𑁄. 𑀫𑀗𑁆𑀕𑀮𑀁 𑀧𑀘𑁆𑀘𑁂𑀢𑀻𑀢𑀺 𑀤𑀺𑀝𑁆𑀞𑀫𑀗𑁆𑀕𑀮𑀸𑀤𑀺𑀪𑁂𑀤𑀁 𑀫𑀗𑁆𑀕𑀮𑀫𑁂𑀯 𑀧𑀢𑁆𑀢𑀺𑀬𑀸𑀬𑀢𑀺. 𑀦𑁄 𑀓𑀫𑁆𑀫𑀦𑁆𑀢𑀺 𑀓𑀫𑁆𑀫𑀲𑁆𑀲𑀓𑀢𑀁 𑀦𑁄 𑀧𑀢𑁆𑀢𑀺𑀬𑀸𑀬𑀢𑀺. 𑀇𑀢𑁄 𑀩𑀳𑀺𑀤𑁆𑀥𑀸𑀢𑀺 𑀇𑀢𑁄 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑀸𑀲𑀦𑀢𑁄 𑀩𑀳𑀺𑀤𑁆𑀥𑀸 𑀩𑀸𑀳𑀺𑀭𑀓𑀲𑀫𑀬𑁂. 𑀤𑀓𑁆𑀔𑀺𑀡𑁂𑀬𑁆𑀬𑀁 𑀧𑀭𑀺𑀬𑁂𑀲𑀢𑀻𑀢𑀺 𑀤𑀼𑀧𑁆𑀧𑀝𑀺𑀧𑀦𑁆𑀦𑀁 𑀤𑀓𑁆𑀔𑀺𑀡𑀸𑀭𑀳𑀲𑀜𑁆𑀜𑀻 𑀕𑀯𑁂𑀲𑀢𑀺. 𑀧𑀼𑀩𑁆𑀩𑀓𑀸𑀭𑀁 𑀓𑀭𑁄𑀢𑀻𑀢𑀺 𑀤𑀸𑀦𑀫𑀸𑀦𑀦𑀸𑀤𑀺𑀓𑀁 𑀓𑀼𑀲𑀮𑀓𑀺𑀭𑀺𑀬𑀁 𑀧𑀞𑀫𑀁 𑀓𑀭𑁄𑀢𑀺. 𑀏𑀢𑁆𑀣 𑀘 𑀤𑀓𑁆𑀔𑀺𑀡𑁂𑀬𑁆𑀬𑀧𑀭𑀺𑀬𑁂𑀲𑀦𑀧𑀼𑀩𑁆𑀩𑀓𑀸𑀭𑁂 𑀏𑀓𑀁 𑀓𑀢𑁆𑀯𑀸 𑀧𑀜𑁆𑀘 𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸.

𑀯𑀺𑀧𑀢𑁆𑀢𑀺𑀬𑀁 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀲𑀫𑁆𑀧𑀢𑁆𑀢𑀺 𑀜𑀸𑀢𑀩𑁆𑀩𑀸. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀘𑀢𑀼𑀦𑁆𑀦𑀫𑁆𑀧𑀺 𑀧𑀭𑀺𑀲𑀸𑀦𑀁 𑀭𑀢𑀺𑀚𑀦𑀦𑀝𑁆𑀞𑁂𑀦 𑀉𑀧𑀸𑀲𑀓𑁄𑀯 𑀭𑀢𑀦𑀁 𑀉𑀧𑀸𑀲𑀓𑀭𑀢𑀦𑀁. 𑀕𑀼𑀡𑀲𑁄𑀪𑀸𑀓𑀺𑀢𑁆𑀢𑀺𑀲𑀤𑁆𑀤𑀲𑀼𑀕𑀦𑁆𑀥𑀢𑀸𑀳𑀺 𑀉𑀧𑀸𑀲𑀓𑁄𑀯 𑀧𑀤𑀼𑀫𑀁 𑀉𑀧𑀸𑀲𑀓𑀧𑀤𑀼𑀫𑀁. 𑀢𑀣𑀸 𑀉𑀧𑀸𑀲𑀓𑀧𑀼𑀡𑁆𑀟𑀭𑀻𑀓𑁄.

𑀆𑀤𑀺𑀫𑁆𑀳𑀻𑀢𑀺 𑀆𑀤𑀺𑀅𑀢𑁆𑀣𑁂. 𑀓𑁄𑀝𑀺𑀬𑀦𑁆𑀢𑀺 𑀧𑀭𑀺𑀬𑀦𑁆𑀢𑀓𑁄𑀝𑀺𑀬𑀁. 𑀯𑀺𑀳𑀸𑀭𑀕𑁆𑀕𑁂𑀦𑀸𑀢𑀺 𑀑𑀯𑀭𑀓𑀓𑁄𑀝𑁆𑀞𑀸𑀲𑁂𑀦, ‘‘𑀇𑀫𑀲𑁆𑀫𑀺𑀁 𑀕𑀩𑁆𑀪𑁂 𑀯𑀲𑀦𑁆𑀢𑀸𑀦𑀁 𑀇𑀤𑀁 𑀦𑀸𑀫 𑀧𑀦𑀲𑀨𑀮𑀁 𑀧𑀸𑀧𑀼𑀡𑀸𑀢𑀻’’𑀢𑀺𑀆𑀤𑀺𑀦𑀸 𑀢𑀁𑀢𑀁𑀯𑀲𑀦𑀝𑁆𑀞𑀸𑀦𑀓𑁄𑀝𑁆𑀞𑀸𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀚𑁆𑀚𑀢𑀦𑁆𑀢𑀺 𑀅𑀚𑁆𑀚𑀇𑀘𑁆𑀘𑁂𑀯 𑀅𑀢𑁆𑀣𑁄.

𑀧𑀸𑀡𑁂𑀳𑀺 ¶ 𑀉𑀧𑁂𑀢𑀦𑁆𑀢𑀺 𑀇𑀫𑀺𑀦𑀸 𑀢𑀲𑁆𑀲 𑀲𑀭𑀡𑀕𑀫𑀦𑀲𑁆𑀲 𑀆𑀧𑀸𑀡𑀓𑁄𑀝𑀺𑀓𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀸𑀯 𑀫𑁂 𑀚𑀻𑀯𑀺𑀢𑀁 𑀧𑀯𑀢𑁆𑀢𑀢𑀻’’𑀢𑀺𑀆𑀤𑀺𑀦𑀸 𑀯𑀢𑁆𑀯𑀸 𑀧𑀼𑀦 𑀚𑀻𑀯𑀺𑀢𑁂𑀦 𑀢𑀁 𑀯𑀢𑁆𑀣𑀼𑀢𑁆𑀢𑀬𑀁 𑀧𑀝𑀺𑀧𑀽𑀚𑁂𑀦𑁆𑀢𑁄 ‘‘𑀲𑀭𑀡𑀕𑀫𑀦𑀁 𑀭𑀓𑁆𑀔𑀸𑀫𑀻’’𑀢𑀺 𑀉𑀧𑁆𑀧𑀦𑁆𑀦𑀁 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀅𑀳𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀧𑀸𑀡𑁂𑀳𑀺 𑀉𑀧𑁂𑀢𑀦𑁆𑀢𑀺 𑀳𑀺 𑀬𑀸𑀯 𑀫𑁂 𑀧𑀸𑀡𑀸 𑀥𑀭𑀦𑁆𑀢𑀺, 𑀢𑀸𑀯 𑀲𑀭𑀡𑀁 𑀉𑀧𑁂𑀢𑀁, 𑀉𑀧𑁂𑀦𑁆𑀢𑁄 𑀘 𑀦 𑀯𑀸𑀘𑀸𑀫𑀢𑁆𑀢𑁂𑀦, 𑀦 𑀏𑀓𑀯𑀸𑀭𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀦𑀫𑀢𑁆𑀢𑁂𑀦, 𑀅𑀣 𑀔𑁄 𑀧𑀸𑀡𑁂 𑀧𑀭𑀺𑀘𑁆𑀘𑀚𑀺𑀢𑁆𑀯𑀸𑀧𑀺 𑀬𑀸𑀯𑀚𑀻𑀯𑀁 𑀉𑀧𑁂𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀉𑀧𑀸𑀲𑀓𑀯𑀺𑀥𑀺𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀬𑀪𑁂𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁫. 𑀅𑀦𑀗𑁆𑀕𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁭. 𑀆𑀬𑀲𑁆𑀫𑀸 ¶ 𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀏𑀯𑀫𑀸𑀤𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦 ‘‘𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻’’𑀢𑀺𑀆𑀤𑀺𑀓𑀁 𑀲𑀩𑁆𑀩𑀁 𑀲𑀼𑀢𑁆𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀦𑀸𑀳 ‘‘𑀅𑀦𑀗𑁆𑀕𑀡𑀲𑀼𑀢𑁆𑀢’’𑀦𑁆𑀢𑀺. 𑀢𑀲𑁆𑀲 𑀓𑁄 𑀦𑀺𑀓𑁆𑀔𑁂𑀧𑁄? 𑀅𑀢𑁆𑀢𑀚𑁆𑀛𑀸𑀲𑀬𑁄. 𑀧𑀭𑁂𑀳𑀺 𑀅𑀦𑀚𑁆𑀛𑀺𑀝𑁆𑀞𑁄𑀬𑁂𑀯 𑀳𑀺 𑀫𑀳𑀸𑀣𑁂𑀭𑁄 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀓𑁂𑀘𑀺 𑀧𑀦𑀸𑀳𑀼 ‘‘𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁂 𑀤𑀺𑀲𑁆𑀯𑀸 𑀢𑁂𑀲𑀁 𑀘𑀺𑀢𑁆𑀢𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀸𑀬 𑀘𑁂𑀯 𑀏𑀓𑀘𑁆𑀘𑀸𑀦𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀦𑀸𑀬 𑀘 𑀅𑀬𑀁 𑀤𑁂𑀲𑀦𑀸 𑀆𑀭𑀤𑁆𑀥𑀸’’𑀢𑀺. 𑀏𑀯𑀁 𑀲𑀩𑁆𑀩𑀲𑀼𑀢𑁆𑀢𑁂𑀲𑀽𑀢𑀺 𑀬𑀣𑀸 𑀏𑀢𑁆𑀣 𑀅𑀦𑀗𑁆𑀕𑀡𑀲𑀼𑀢𑁆𑀢𑁂, 𑀏𑀯𑀁 𑀇𑀢𑁄 𑀧𑀭𑁂𑀲𑀽𑀢𑀺 𑀲𑀩𑁆𑀩𑁂𑀲𑀼𑀧𑀺 𑀲𑀼𑀢𑁆𑀢𑁂𑀲𑀼 𑀅𑀦𑀼𑀢𑁆𑀢𑀸𑀦𑀅𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸 𑀏𑀯 𑀓𑀭𑀻𑀬𑀢𑀺. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀕𑀡𑀦𑀧𑀭𑀺𑀘𑁆𑀙𑁂𑀤𑁄𑀢𑀺 𑀕𑀡𑀦𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀦𑀁. 𑀇𑀤𑀜𑁆𑀳𑀺 𑀅𑀧𑁆𑀧𑀭𑀚𑀓𑁆𑀔𑀫𑀳𑀸𑀭𑀚𑀓𑁆𑀔𑀢𑀸𑀯𑀲𑁂𑀦 𑀤𑀼𑀯𑀺𑀥𑁂 𑀲𑀢𑁆𑀢𑁂 𑀧𑀘𑁆𑀘𑁂𑀓𑀁 𑀅𑀢𑁆𑀣𑀜𑁆𑀜𑀼𑀢𑀸𑀦𑀢𑁆𑀣𑀜𑁆𑀜𑀼𑀢𑀸𑀯𑀲𑁂𑀦 𑀤𑁆𑀯𑀺𑀥𑀸 𑀓𑀢𑁆𑀯𑀸 ‘‘𑀘𑀢𑁆𑀢𑀸𑀭𑁄’’𑀢𑀺 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀁. 𑀯𑀚𑁆𑀚𑀻𑀧𑀼𑀢𑁆𑀢𑀓𑀸𑀤𑀬𑁄 𑀯𑀺𑀬 𑀧𑀼𑀕𑁆𑀕𑀮𑀯𑀸𑀤𑀻𑀢𑀺 𑀦 𑀕𑀳𑁂𑀢𑀩𑁆𑀩𑀁 𑀮𑁄𑀓𑀲𑀫𑀜𑁆𑀜𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑀸𑀦𑀁 𑀯𑀲𑁂𑀦 𑀤𑁂𑀲𑀦𑀸𑀬 𑀆𑀭𑀤𑁆𑀥𑀢𑁆𑀢𑀸, 𑀅𑀬𑀜𑁆𑀘 𑀤𑁂𑀲𑀦𑀸𑀦𑀬𑁄 𑀲𑀢𑁆𑀣𑀼 𑀦𑀺𑀲𑁆𑀲𑀸𑀬 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳.

𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀤𑁂𑀲𑀦𑀸𑀓𑀣𑀸𑀯𑀡𑁆𑀡𑀦𑀸

𑀢𑀢𑁆𑀣 (𑀅. 𑀦𑀺. 𑀝𑀻. 𑁧.𑁧.𑁧𑁭𑁦) 𑀲𑀫𑁆𑀫𑀼𑀢𑀺𑀬𑀸 𑀤𑁂𑀲𑀦𑀸 𑀲𑀫𑁆𑀫𑀼𑀢𑀺𑀤𑁂𑀲𑀦𑀸, 𑀧𑀭𑀫𑀢𑁆𑀣𑀲𑁆𑀲 𑀤𑁂𑀲𑀦𑀸 𑀧𑀭𑀫𑀢𑁆𑀣𑀤𑁂𑀲𑀦𑀸. 𑀢𑀢𑁆𑀣𑀸𑀢𑀺 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀤𑁂𑀲𑀦𑀸𑀲𑀼, 𑀦 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑁂𑀲𑀼. 𑀢𑁂𑀦𑀸𑀳 ¶ ‘‘𑀏𑀯𑀭𑀽𑀧𑀸 𑀲𑀫𑁆𑀫𑀼𑀢𑀺𑀤𑁂𑀲𑀦𑀸, 𑀏𑀯𑀭𑀽𑀧𑀸 𑀧𑀭𑀫𑀢𑁆𑀣𑀤𑁂𑀲𑀦𑀸’’𑀢𑀺. 𑀢𑀢𑁆𑀭𑀺𑀤𑀁 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀸𑀦𑀁 𑀮𑀓𑁆𑀔𑀡𑀁 𑁋 𑀬𑀲𑁆𑀫𑀺𑀁 𑀪𑀺𑀦𑁆𑀦𑁂, 𑀩𑀼𑀤𑁆𑀥𑀺𑀬𑀸 𑀅𑀯𑀬𑀯𑀯𑀺𑀦𑀺𑀩𑁆𑀪𑁄𑀕𑁂 𑀯𑀸 𑀓𑀢𑁂 𑀦 𑀢𑀁𑀲𑀫𑀜𑁆𑀜𑀸, 𑀲𑀸 𑀖𑀝𑀧𑀝𑀸𑀤𑀺𑀧𑁆𑀧𑀪𑁂𑀤𑀸 𑀲𑀫𑁆𑀫𑀼𑀢𑀺, 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀧𑀭𑀫𑀢𑁆𑀣𑁄. 𑀦 𑀳𑀺 𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀲𑀪𑀸𑀯𑁂 𑀅𑀬𑀁 𑀦𑀬𑁄 𑀮𑀩𑁆𑀪𑀢𑀺, 𑀢𑀢𑁆𑀣 𑀭𑀽𑀧𑀸𑀤𑀺𑀥𑀫𑁆𑀫𑀁 𑀲𑀫𑀽𑀳𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀉𑀧𑀸𑀤𑀸𑀬 𑀧𑀼𑀕𑁆𑀕𑀮𑀯𑁄𑀳𑀸𑀭𑁄𑀢𑀺 𑀆𑀳 ‘‘𑀧𑀼𑀕𑁆𑀕𑀮𑁄𑀢𑀺 𑀲𑀫𑁆𑀫𑀼𑀢𑀺𑀤𑁂𑀲𑀦𑀸’’𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀉𑀧𑁆𑀧𑀸𑀤𑀯𑀬𑀯𑀦𑁆𑀢𑁄 𑀲𑀪𑀸𑀯𑀥𑀫𑁆𑀫𑀸 𑀦 𑀦𑀺𑀘𑁆𑀘𑀸𑀢𑀺 𑀆𑀳 ‘‘𑀅𑀦𑀺𑀘𑁆𑀘𑀦𑁆𑀢𑀺 𑀧𑀭𑀫𑀢𑁆𑀣𑀤𑁂𑀲𑀦𑀸’’𑀢𑀺. 𑀏𑀲 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺. 𑀦𑀦𑀼 𑀔𑀦𑁆𑀥𑀤𑁂𑀲𑀦𑀸𑀧𑀺 𑀲𑀫𑁆𑀫𑀼𑀢𑀺𑀤𑁂𑀲𑀦𑀸𑀯. 𑀔𑀦𑁆𑀥𑀝𑁆𑀞𑁄 𑀳𑀺 𑀭𑀸𑀲𑀝𑁆𑀞𑁄, 𑀓𑁄𑀝𑁆𑀞𑀸𑀲𑀝𑁆𑀞𑁄 𑀯𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀅𑀬𑀁 𑀧𑀦 𑀔𑀦𑁆𑀥𑀲𑀫𑀜𑁆𑀜𑀸 𑀨𑀲𑁆𑀲𑀸𑀤𑀻𑀲𑀼 𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺 𑀯𑀺𑀬 𑀧𑀭𑀫𑀢𑁆𑀣𑀲𑀦𑁆𑀦𑀺𑀲𑁆𑀲𑀬𑀸 𑀢𑀲𑁆𑀲 𑀆𑀲𑀦𑁆𑀦𑀢𑀭𑀸, 𑀧𑀼𑀕𑁆𑀕𑀮𑀲𑀫𑀜𑁆𑀜𑀸𑀤𑀬𑁄 𑀯𑀺𑀬 𑀦 𑀤𑀽𑀭𑁂𑀢𑀺 𑀧𑀭𑀫𑀢𑁆𑀣𑀲𑀗𑁆𑀕𑀳𑀢𑀸 𑀯𑀼𑀢𑁆𑀢𑀸, 𑀔𑀦𑁆𑀥𑀲𑀻𑀲𑁂𑀦 𑀯𑀸 𑀢𑀤𑀼𑀧𑀸𑀤𑀸𑀦𑀸 𑀲𑀪𑀸𑀯𑀥𑀫𑁆𑀫𑀸 𑀏𑀯 𑀕𑀳𑀺𑀢𑀸. 𑀦𑀦𑀼 𑀘 𑀲𑀪𑀸𑀯𑀥𑀫𑁆𑀫𑀸 𑀲𑀩𑁆𑀩𑁂𑀧𑀺 𑀲𑀫𑁆𑀫𑀼𑀢𑀺𑀫𑀼𑀔𑁂𑀦𑁂𑀯 𑀤𑁂𑀲𑀦𑀁 𑀆𑀭𑁄𑀳𑀦𑁆𑀢𑀺, 𑀦 𑀲𑀫𑀼𑀔𑁂𑀦𑀸𑀢𑀺 𑀲𑀩𑁆𑀩𑀸𑀧𑀺 𑀤𑁂𑀲𑀦𑀸 𑀲𑀫𑁆𑀫𑀼𑀢𑀺𑀤𑁂𑀲𑀦𑀸𑀯 ¶ 𑀲𑀺𑀬𑀸𑀢𑀺? 𑀦𑀬𑀺𑀤𑀫𑁂𑀯𑀁 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀯𑀺𑀪𑀸𑀕𑁂𑀦 𑀤𑁂𑀲𑀦𑀸𑀯𑀺𑀪𑀸𑀕𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀦 𑀘 𑀲𑀤𑁆𑀤𑁄 𑀓𑁂𑀦𑀘𑀺 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑁂𑀦 𑀯𑀺𑀦𑀸 𑀅𑀢𑁆𑀣𑀁 𑀧𑀓𑀸𑀲𑁂𑀢𑀻𑀢𑀺.

𑀲𑀫𑁆𑀫𑀼𑀢𑀺𑀯𑀲𑁂𑀦 𑀤𑁂𑀲𑀦𑀁 𑀲𑀼𑀢𑁆𑀯𑀸𑀢𑀺 ‘‘𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁆𑀢𑀧𑁄 𑀳𑁄𑀢𑀺 𑀅𑀢𑁆𑀢𑀧𑀭𑀺𑀢𑀸𑀧𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁨.𑁪𑁧𑁩; 𑀧𑀼. 𑀧. 𑁧𑁦.𑁨𑁫 𑀫𑀸𑀢𑀺𑀓𑀸) 𑀲𑀫𑁆𑀫𑀼𑀢𑀺𑀫𑀼𑀔𑁂𑀦 𑀧𑀯𑀢𑁆𑀢𑀺𑀢𑀁 𑀤𑁂𑀲𑀦𑀁 𑀲𑀼𑀢𑀫𑀬𑀜𑀸𑀡𑀼𑀧𑁆𑀧𑀸𑀤𑀦𑀯𑀲𑁂𑀦 𑀲𑀼𑀢𑁆𑀯𑀸. 𑀅𑀢𑁆𑀣𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀢𑀤𑀦𑀼𑀲𑀸𑀭𑁂𑀦 𑀘𑀢𑀼𑀲𑀘𑁆𑀘𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁂𑀦 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸. 𑀫𑁄𑀳𑀁 𑀧𑀳𑀸𑀬𑀸𑀢𑀺 𑀢𑀤𑁂𑀓𑀝𑁆𑀞𑁂𑀳𑀺 𑀓𑀺𑀮𑁂𑀲𑁂𑀳𑀺 𑀲𑀤𑁆𑀥𑀺𑀁 𑀅𑀦𑀯𑀲𑁂𑀲𑀁 𑀫𑁄𑀳𑀁 𑀧𑀚𑀳𑀺𑀢𑁆𑀯𑀸. 𑀯𑀺𑀲𑁂𑀲𑀦𑁆𑀢𑀺 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀅𑀭𑀳𑀢𑁆𑀢𑀲𑀗𑁆𑀔𑀸𑀢𑀜𑁆𑀘 𑀯𑀺𑀲𑁂𑀲𑀁. 𑀢𑁂𑀲𑀦𑁆𑀢𑀺 𑀢𑀸𑀤𑀺𑀲𑀸𑀦𑀁 𑀯𑀺𑀦𑁂𑀬𑁆𑀬𑀸𑀦𑀁. 𑀧𑀭𑀫𑀢𑁆𑀣𑀯𑀲𑁂𑀦𑀸𑀢𑀺 ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁪𑁭𑁨-𑁪𑁭𑁪) 𑀧𑀭𑀫𑀢𑁆𑀣𑀥𑀫𑁆𑀫𑀯𑀲𑁂𑀦. 𑀲𑁂𑀲𑀁 𑀅𑀦𑀦𑁆𑀢𑀭𑀦𑀬𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 𑀲𑀫𑁆𑀫𑀼𑀢𑀺𑀯𑀲𑁂𑀦 𑀧𑀭𑀫𑀢𑁆𑀣𑀯𑀲𑁂𑀦 𑀘 𑀤𑁂𑀲𑀦𑀸𑀬𑀁. 𑀤𑁂𑀲𑀪𑀸𑀲𑀸𑀓𑀼𑀲𑀮𑁄𑀢𑀺 𑀦𑀸𑀦𑀸𑀤𑁂𑀲𑀪𑀸𑀲𑀸𑀲𑀼 𑀓𑀼𑀲𑀮𑁄. 𑀢𑀺𑀡𑁆𑀡𑀁 𑀯𑁂𑀤𑀸𑀦𑀦𑁆𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀲𑀺𑀧𑁆𑀧𑀕𑀦𑁆𑀣𑀸𑀦𑀫𑁆𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑀲𑀺𑀧𑁆𑀧𑀼𑀕𑁆𑀕𑀳𑀡𑀜𑁆𑀳𑀺 𑀧𑀭𑀢𑁄 𑀯𑀓𑁆𑀔𑀢𑀺. 𑀲𑀺𑀧𑁆𑀧𑀸𑀦𑀺 𑀯𑀸 𑀯𑁂𑀤𑀦𑁆𑀢𑁄𑀕𑀥𑁂 𑀓𑀢𑁆𑀯𑀸 ‘‘𑀢𑀺𑀡𑁆𑀡𑀁 𑀯𑁂𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀣𑁂𑀢𑀩𑁆𑀩𑀪𑀸𑀯𑁂𑀦 𑀞𑀺𑀢𑀸𑀦𑀺, 𑀦 𑀓𑀢𑁆𑀣𑀘𑀺 𑀲𑀦𑁆𑀦𑀺𑀳𑀺𑀢𑀪𑀸𑀯𑁂𑀦𑀸𑀢𑀺 𑀯𑁂𑀤𑀸𑀦𑀫𑁆𑀧𑀺 𑀓𑀣𑁂𑀢𑀩𑁆𑀩𑀪𑀸𑀯𑁂𑀦𑁂𑀯 𑀅𑀯𑀝𑁆𑀞𑀸𑀦𑀁 𑀤𑀻𑀧𑁂𑀦𑁆𑀢𑁄 ‘‘𑀕𑀼𑀬𑁆𑀳𑀸 𑀢𑀬𑀻 ¶ 𑀦𑀺𑀳𑀺𑀢𑀸 𑀕𑀬𑁆𑀳𑀢𑀻’’𑀢𑀺 𑀫𑀺𑀘𑁆𑀙𑀸𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀦𑀸𑀦𑀸𑀯𑀺𑀥𑀸 𑀤𑁂𑀲𑀪𑀸𑀲𑀸 𑀏𑀢𑁂𑀲𑀦𑁆𑀢𑀺 𑀦𑀸𑀦𑀸𑀤𑁂𑀲𑀪𑀸𑀲𑀸.

𑀧𑀭𑀫𑁄 𑀉𑀢𑁆𑀢𑀫𑁄 𑀅𑀢𑁆𑀣𑁄 𑀧𑀭𑀫𑀢𑁆𑀣𑁄, 𑀥𑀫𑁆𑀫𑀸𑀦𑀁 𑀬𑀣𑀸𑀪𑀽𑀢𑀲𑀪𑀸𑀯𑁄. 𑀮𑁄𑀓𑀲𑀗𑁆𑀓𑁂𑀢𑀫𑀢𑁆𑀢𑀲𑀺𑀤𑁆𑀥𑀸 𑀲𑀫𑁆𑀫𑀼𑀢𑀺. 𑀬𑀤𑀺 𑀏𑀯𑀁 𑀓𑀣𑀁 𑀲𑀫𑁆𑀫𑀼𑀢𑀺𑀓𑀣𑀸𑀬 𑀲𑀘𑁆𑀘𑀢𑀸𑀢𑀺𑀆𑀳 ‘‘𑀮𑁄𑀓𑀲𑀫𑁆𑀫𑀼𑀢𑀺𑀓𑀸𑀭𑀡𑀸’’𑀢𑀺, 𑀮𑁄𑀓𑀲𑀫𑀜𑁆𑀜𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀦𑀢𑁄. 𑀮𑁄𑀓𑀲𑀫𑀜𑁆𑀜𑀸𑀬 𑀳𑀺 𑀅𑀪𑀺𑀦𑀺𑀯𑁂𑀲𑁂𑀦 𑀯𑀺𑀦𑀸 𑀜𑀸𑀧𑀦𑀸 𑀏𑀓𑀘𑁆𑀘𑀲𑁆𑀲 𑀲𑀼𑀢𑀲𑁆𑀲 𑀲𑀸𑀯𑀦𑀸 𑀯𑀺𑀬 𑀦 𑀫𑀼𑀲𑀸 𑀅𑀦𑀢𑀺𑀥𑀸𑀯𑀺𑀢𑀩𑁆𑀩𑀢𑁄 𑀢𑀲𑁆𑀲𑀸. 𑀢𑁂𑀦𑀸𑀳 𑀪𑀕𑀯𑀸 ‘‘𑀚𑀦𑀧𑀤𑀦𑀺𑀭𑀼𑀢𑁆𑀢𑀺𑀁 𑀦𑀸𑀪𑀺𑀦𑀺𑀯𑁂𑀲𑁂𑀬𑁆𑀬, 𑀲𑀫𑀜𑁆𑀜𑀁 𑀦𑀸𑀢𑀺𑀥𑀸𑀯𑁂𑀬𑁆𑀬𑀸’’𑀢𑀺 (𑀫. 𑀦𑀺. 𑁩.𑁩𑁩𑁨). 𑀥𑀫𑁆𑀫𑀸𑀦𑀦𑁆𑀢𑀺 𑀲𑀪𑀸𑀯𑀥𑀫𑁆𑀫𑀸𑀦𑀁. 𑀪𑀽𑀢𑀓𑀸𑀭𑀡𑀸𑀢𑀺 𑀬𑀣𑀸𑀪𑀽𑀢𑀲𑀪𑀸𑀯𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀦𑀢𑁄. 𑀲𑀫𑁆𑀫𑀼𑀢𑀺𑀁 𑀯𑁄𑀳𑀭𑀦𑁆𑀢𑀲𑁆𑀲𑀸𑀢𑀺 ‘‘𑀧𑀼𑀕𑁆𑀕𑀮𑁄 𑀲𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀮𑁄𑀓𑀲𑀫𑀜𑁆𑀜𑀁 𑀓𑀣𑁂𑀦𑁆𑀢𑀲𑁆𑀲.

𑀳𑀺𑀭𑁄𑀢𑁆𑀢𑀧𑁆𑀧𑀤𑀻𑀧𑀦𑀢𑁆𑀣𑀦𑁆𑀢𑀺 𑀮𑁄𑀓𑀧𑀸𑀮𑀦𑀓𑀺𑀘𑁆𑀘𑁂 𑀳𑀺𑀭𑁄𑀢𑁆𑀢𑀧𑁆𑀧𑀥𑀫𑁆𑀫𑁂 𑀓𑀺𑀘𑁆𑀘𑀢𑁄 𑀧𑀓𑀸𑀲𑁂𑀢𑀼𑀁. 𑀢𑁂𑀲𑀜𑁆𑀳𑀺 𑀓𑀺𑀘𑁆𑀘𑀁 𑀲𑀢𑁆𑀢𑀲𑀦𑁆𑀢𑀸𑀦𑁂𑀬𑁂𑀯 𑀧𑀸𑀓𑀝𑀁 𑀳𑁄𑀢𑀻𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀓𑀣𑀸𑀬 𑀢𑀁 𑀯𑀢𑁆𑀢𑀩𑁆𑀩𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀬𑀲𑁆𑀫𑀺𑀜𑁆𑀳𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀓𑀫𑁆𑀫𑀁 𑀉𑀧𑁆𑀧𑀦𑁆𑀦𑀁, 𑀢𑀁𑀲𑀦𑁆𑀢𑀸𑀦𑁂 𑀏𑀯 𑀢𑀲𑁆𑀲 𑀨𑀮𑀲𑁆𑀲 𑀉𑀧𑁆𑀧𑀢𑁆𑀢𑀺 𑀓𑀫𑁆𑀫𑀲𑁆𑀲𑀓𑀢𑀸. 𑀏𑀯𑀜𑁆𑀳𑀺 𑀓𑀢𑀯𑀺𑀜𑁆𑀜𑀸𑀡𑀦𑀸𑀲𑁄 𑀅𑀓𑀢𑀸𑀕𑀫𑁄 𑀯𑀸 𑀦𑀢𑁆𑀣𑀻𑀢𑀺 𑀲𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀏𑀯 𑀓𑀣𑀸𑀬 ¶ 𑀤𑀻𑀧𑁂𑀢𑀩𑁆𑀩𑀸. 𑀢𑁂𑀳𑀺 𑀲𑀢𑁆𑀢𑁂𑀳𑀺 𑀓𑀸𑀢𑀩𑁆𑀩𑀸 𑀧𑀼𑀜𑁆𑀜𑀸𑀤𑀺𑀓𑀺𑀭𑀺𑀬𑀸 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁄𑀧𑀺 𑀲𑀦𑁆𑀢𑀸𑀦𑀯𑀲𑁂𑀦 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀢𑁄 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀏𑀯 𑀓𑀣𑀸𑀬 𑀤𑀻𑀧𑁂𑀢𑀩𑁆𑀩𑁄.

𑀆𑀦𑀦𑁆𑀢𑀭𑀺𑀬𑀤𑀻𑀧𑀦𑀢𑁆𑀣𑀦𑁆𑀢𑀺 𑀘𑀼𑀢𑀺𑀅𑀦𑀦𑁆𑀢𑀭𑀁 𑀨𑀮𑀁 𑀅𑀦𑀦𑁆𑀢𑀭𑀁 𑀦𑀸𑀫, 𑀢𑀲𑁆𑀫𑀺𑀁 𑀅𑀦𑀦𑁆𑀢𑀭𑁂 𑀦𑀺𑀬𑀼𑀢𑁆𑀢𑀸𑀦𑀺, 𑀢𑀦𑁆𑀦𑀺𑀩𑁆𑀩𑀢𑁆𑀢𑀦𑁂𑀦 𑀅𑀦𑀦𑁆𑀢𑀭𑀓𑀭𑀡𑀲𑀻𑀮𑀸𑀦𑀺, 𑀅𑀦𑀦𑁆𑀢𑀭𑀧𑀬𑁄𑀚𑀦𑀸𑀦𑀺 𑀯𑀸𑀢𑀺 𑀆𑀦𑀦𑁆𑀢𑀭𑀺𑀬𑀸𑀦𑀺, 𑀫𑀸𑀢𑀼𑀖𑀸𑀢𑀸𑀤𑀻𑀦𑀺, 𑀢𑁂𑀲𑀁 𑀤𑀻𑀧𑀦𑀢𑁆𑀣𑀁. 𑀢𑀸𑀦𑀺𑀧𑀺 𑀳𑀺 𑀲𑀦𑁆𑀢𑀸𑀦𑀯𑀲𑁂𑀦 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀢𑁄 ‘‘𑀫𑀸𑀢𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀻’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁪𑁨𑁩) 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀏𑀯 𑀓𑀣𑀸𑀬 𑀤𑀻𑀧𑁂𑀢𑀩𑁆𑀩𑀸𑀦𑀺, 𑀢𑀣𑀸 ‘‘𑀲𑁄 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁫𑁫𑁬; 𑁩.𑁩𑁦𑁮; 𑀫. 𑀦𑀺. 𑁧.𑁭𑁭; 𑁨.𑁩𑁦𑁯; 𑁩.𑁨𑁩𑁦; 𑀯𑀺𑀪. 𑁬𑁪𑁨, 𑁬𑁪𑁩) ‘‘𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺 𑀏𑀓𑀫𑁆𑀧𑀺 𑀚𑀸𑀢𑀺’’𑀦𑁆𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁪𑁪, 𑁨𑁪𑁫; 𑀫. 𑀦𑀺. 𑁧.𑁧𑁪𑁮, 𑁩𑁮𑁪, 𑁪𑁩𑁧; 𑀧𑀸𑀭𑀸. 𑁧𑁨) ‘‘𑀅𑀢𑁆𑀣𑀺 𑀤𑀓𑁆𑀔𑀺𑀡𑀸 𑀤𑀸𑀬𑀓𑀢𑁄 𑀯𑀺𑀲𑀼𑀚𑁆𑀛𑀢𑀺, 𑀦𑁄 𑀧𑀝𑀺𑀕𑁆𑀕𑀸𑀳𑀓𑀢𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁩𑁮𑁧) 𑀘 𑀧𑀯𑀢𑁆𑀢𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀓𑀣𑀸 ¶ 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀏𑀯 𑀓𑀣𑀸𑀬 𑀤𑀻𑀧𑁂𑀢𑀩𑁆𑀩𑀸 𑀲𑀢𑁆𑀢𑀲𑀦𑁆𑀢𑀸𑀦𑀯𑀺𑀲𑀬𑀢𑁆𑀢𑀸. ‘‘𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸 (𑀲𑀁. 𑀦𑀺. 𑁧.𑁨𑁪𑁯), 𑀦 𑀲𑀫𑀬𑀯𑀺𑀫𑀼𑀢𑁆𑀢𑁄 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺𑀦𑀸 (𑀧𑀼. 𑀧. 𑁧) 𑀘 𑀧𑀭𑀫𑀢𑁆𑀣𑀁 𑀓𑀣𑁂𑀦𑁆𑀢𑁄𑀧𑀺 𑀮𑁄𑀓𑀲𑀫𑁆𑀫𑀼𑀢𑀺𑀬𑀸 𑀅𑀧𑁆𑀧𑀳𑀸𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀲𑀺. 𑀏𑀢𑁂𑀦 𑀯𑀼𑀢𑁆𑀢𑀸𑀯𑀲𑁂𑀲𑀸𑀬 𑀓𑀣𑀸𑀬 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀪𑀸𑀯𑁂 𑀧𑀬𑁄𑀚𑀦𑀁 𑀲𑀸𑀫𑀜𑁆𑀜𑀯𑀲𑁂𑀦 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀸𑀫𑀜𑁆𑀘𑁂𑀢𑀁 𑀲𑀩𑁆𑀩𑀁 𑀅𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀸𑀦𑀫𑁆𑀧𑀺 𑀧𑀦 𑀏𑀯𑀁 𑀤𑁂𑀲𑀦𑀸 𑀲𑀼𑀔𑀸𑀯𑀳𑀸 𑀳𑁄𑀢𑀺.

𑀫𑀳𑀸𑀚𑀦𑁄𑀢𑀺 𑀮𑁄𑀓𑀺𑀬𑀫𑀳𑀸𑀚𑀦𑁄. 𑀦 𑀚𑀸𑀦𑀸𑀢𑀺 𑀖𑀦𑀯𑀺𑀦𑀺𑀩𑁆𑀪𑁄𑀕𑀸𑀪𑀸𑀯𑁂𑀦 𑀥𑀫𑁆𑀫𑀓𑀺𑀘𑁆𑀘𑀲𑁆𑀲 𑀅𑀲𑀮𑁆𑀮𑀓𑁆𑀔𑀡𑁂𑀦. 𑀢𑀢𑁆𑀣 ‘‘𑀓𑀺𑀁 𑀦𑀸𑀫𑁂𑀢𑀁, 𑀓𑀣𑀁 𑀦𑀸𑀫𑁂𑀢’’𑀦𑁆𑀢𑀺 𑀲𑀁𑀲𑀬𑀧𑀓𑁆𑀔𑀦𑁆𑀤𑀢𑀸𑀬 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑀢𑀺. 𑀯𑀺𑀭𑀼𑀤𑁆𑀥𑀸𑀪𑀺𑀦𑀺𑀯𑁂𑀲𑀺𑀢𑀸𑀬 𑀧𑀝𑀺𑀲𑀢𑁆𑀢𑀼 𑀳𑁄𑀢𑀺. 𑀚𑀸𑀦𑀸𑀢𑀺 𑀘𑀺𑀭𑀧𑀭𑀺𑀘𑀺𑀢𑀢𑁆𑀣𑀸 𑀯𑁄𑀳𑀸𑀭𑀓𑀣𑀸𑀬. 𑀢𑀢𑁄 𑀏𑀯 𑀦 𑀲𑀫𑁆𑀫𑁄𑀳𑀫𑀸𑀧𑀚𑁆𑀚𑀢𑀺, 𑀦 𑀧𑀝𑀺𑀲𑀢𑁆𑀢𑀼 𑀳𑁄𑀢𑀺.

𑀦𑀧𑁆𑀧𑀚𑀳𑀦𑁆𑀢𑀺 𑀯𑁄𑀳𑀸𑀭𑀫𑀼𑀔𑁂𑀦 𑀧𑀭𑀫𑀢𑁆𑀣𑀲𑁆𑀲 𑀤𑀻𑀧𑀦𑀢𑁄. 𑀲𑀫𑀜𑁆𑀜𑀸𑀕𑀳𑀡𑀯𑀲𑁂𑀦 𑀮𑁄𑀓𑁂𑀦 𑀜𑀸𑀬𑀢𑀺 𑀲𑀫𑀜𑁆𑀜𑀸𑀬𑀢𑀺 𑀯𑁄𑀳𑀭𑀻𑀬𑀢𑀻𑀢𑀺 𑀮𑁄𑀓𑀲𑀫𑀜𑁆𑀜𑀸, 𑀢𑀸𑀬 𑀮𑁄𑀓𑀲𑀫𑀜𑁆𑀜𑀸𑀬. 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀪𑀸𑀯𑀦𑁂 𑀮𑁄𑀓𑁂𑀦 𑀦𑀺𑀘𑁆𑀙𑀺𑀢𑀁, 𑀦𑀺𑀬𑀢𑀁 𑀯𑀸 𑀯𑀼𑀘𑁆𑀘𑀢𑀺 𑀯𑁄𑀳𑀭𑀻𑀬𑀢𑀻𑀢𑀺 𑀮𑁄𑀓𑀦𑀺𑀭𑀼𑀢𑁆𑀢𑀺, 𑀢𑀲𑁆𑀲𑀁 𑀮𑁄𑀓𑀦𑀺𑀭𑀼𑀢𑁆𑀢𑀺𑀬𑀁. 𑀢𑀣𑀸 𑀮𑁄𑀓𑁂𑀦 𑀅𑀪𑀺𑀮𑀧𑀻𑀬𑀢𑀻𑀢𑀺 𑀮𑁄𑀓𑀲𑀫𑀜𑁆𑀜𑀢𑀸𑀬 𑀮𑁄𑀓𑀸𑀪𑀺𑀮𑀸𑀧𑁄, 𑀢𑀲𑁆𑀫𑀺𑀁 𑀮𑁄𑀓𑀸𑀪𑀺𑀮𑀸𑀧𑁂 𑀞𑀺𑀢𑀸𑀬𑁂𑀯 𑀅𑀧𑁆𑀧𑀳𑀸𑀦𑀢𑁄. 𑀧𑀼𑀕𑁆𑀕𑀮𑀯𑀸𑀤𑀺𑀦𑁄 𑀯𑀺𑀬 𑀧𑀭𑀫𑀢𑁆𑀣𑀯𑀲𑁂𑀦 𑀅𑀕𑁆𑀕𑀳𑁂𑀢𑁆𑀯𑀸.

𑀲𑀦𑁆𑀢𑁄𑀢𑀺 ¶ 𑀏𑀢𑁆𑀣 𑀲𑀦𑁆𑀢𑀲𑀤𑁆𑀤𑁄 ‘‘𑀤𑀻𑀖𑀁 𑀲𑀦𑁆𑀢𑀲𑁆𑀲 𑀬𑁄𑀚𑀦’’𑀦𑁆𑀢𑀺𑀆𑀤𑀻𑀲𑀼 (𑀥. 𑀧. 𑁭𑁦) 𑀓𑀺𑀮𑀦𑁆𑀢𑀪𑀸𑀯𑁂 𑀆𑀕𑀢𑁄, ‘‘𑀅𑀬𑀜𑁆𑀘 𑀯𑀺𑀢𑀓𑁆𑀓𑁄 𑀅𑀬𑀜𑁆𑀘 𑀯𑀺𑀘𑀸𑀭𑁄 𑀲𑀦𑁆𑀢𑀸 𑀳𑁄𑀦𑁆𑀢𑀺 𑀲𑀫𑀺𑀢𑀸’’𑀢𑀺𑀆𑀤𑀻𑀲𑀼 (𑀯𑀺𑀪. 𑁫𑁭𑁬) 𑀦𑀺𑀭𑀼𑀤𑁆𑀥𑀪𑀸𑀯𑁂 𑀆𑀕𑀢𑁄, ‘‘𑀅𑀥𑀺𑀕𑀢𑁄 𑀔𑁄 𑀫𑁆𑀬𑀸𑀬𑀁 𑀥𑀫𑁆𑀫𑁄 𑀕𑀫𑁆𑀪𑀻𑀭𑁄 𑀤𑀼𑀤𑁆𑀤𑀲𑁄 𑀤𑀼𑀭𑀦𑀼𑀩𑁄𑀥𑁄 𑀲𑀦𑁆𑀢𑁄 𑀧𑀡𑀻𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁬𑁭; 𑀫. 𑀦𑀺. 𑁧.𑁨𑁮𑁧; 𑁨.𑁩𑁩𑁭; 𑀲𑀁. 𑀦𑀺. 𑁨.𑁧𑁭𑁨; 𑀫𑀳𑀸𑀯. 𑁭) 𑀲𑀦𑁆𑀢𑀜𑀸𑀡𑀕𑁄𑀘𑀭𑀢𑀸𑀬, ‘‘𑀉𑀧𑀲𑀦𑁆𑀢𑀲𑁆𑀲 𑀲𑀤𑀸 𑀲𑀢𑀺𑀫𑀢𑁄’’𑀢𑀺𑀆𑀤𑀻𑀲𑀼 (𑀉𑀤𑀸. 𑁨𑁭) 𑀓𑀺𑀮𑁂𑀲𑀯𑀽𑀧𑀲𑀫𑁂, ‘‘𑀲𑀦𑁆𑀢𑁄 𑀳𑀯𑁂 𑀲𑀩𑁆𑀪𑀺 𑀧𑀯𑁂𑀤𑀬𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀥. 𑀧. 𑁧𑁫) 𑀲𑀸𑀥𑀽𑀲𑀼, ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀫𑀳𑀸𑀘𑁄𑀭𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧𑁯𑁫) 𑀅𑀢𑁆𑀣𑀺𑀪𑀸𑀯𑁂, 𑀇𑀥𑀸𑀧𑀺 𑀅𑀢𑁆𑀣𑀺𑀪𑀸𑀯𑁂𑀬𑁂𑀯. 𑀲𑁄 𑀘 𑀧𑀼𑀕𑁆𑀕𑀮𑀲𑀫𑁆𑀩𑀦𑁆𑀥𑁂𑀦 𑀯𑀼𑀢𑁆𑀢𑀢𑁆𑀢𑀸 𑀮𑁄𑀓𑀲𑀫𑀜𑁆𑀜𑀸𑀯𑀲𑁂𑀦𑀸𑀢𑀺 ¶ 𑀤𑀲𑁆𑀲𑁂𑀦𑁆𑀢𑁄 ‘‘𑀮𑁄𑀓𑀲𑀗𑁆𑀓𑁂𑀢𑀯𑀲𑁂𑀦 𑀅𑀢𑁆𑀣𑀻’’𑀢𑀺 𑀆𑀳. 𑀅𑀢𑁆𑀣𑀻𑀢𑀺 𑀘𑁂𑀢𑀁 𑀦𑀺𑀧𑀸𑀢𑀧𑀤𑀁 𑀤𑀝𑁆𑀞𑀩𑁆𑀩𑀁 ‘‘𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁭𑁩-𑁩𑁭𑁪; 𑀫. 𑀦𑀺. 𑁧.𑁧𑁧𑁦; 𑁩.𑁧𑁫𑁪; 𑀅. 𑀦𑀺. 𑁬.𑁨𑁯; 𑁧𑁦.𑁬𑁦) 𑀯𑀺𑀬. 𑀲𑀁𑀯𑀺𑀚𑁆𑀚𑀫𑀸𑀦𑀸𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀧𑀮𑀩𑁆𑀪𑀫𑀸𑀦𑀸’’𑀢𑀺 𑀆𑀳. 𑀬𑀜𑁆𑀳𑀺 𑀲𑀁𑀯𑀺𑀚𑁆𑀚𑀢𑀺, 𑀢𑀁 𑀉𑀧𑀮𑀩𑁆𑀪𑀢𑀻𑀢𑀺. 𑀅𑀗𑁆𑀕𑀦𑁆𑀢𑀺 𑀏𑀢𑁂𑀳𑀺 𑀢𑀁𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀸 𑀦𑀺𑀳𑀻𑀦𑀪𑀸𑀯𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀗𑁆𑀕𑀡𑀸𑀦𑀺, 𑀭𑀸𑀕𑀸𑀤𑀬𑁄. 𑀅𑀜𑁆𑀚𑀢𑀺 𑀫𑀓𑁆𑀔𑁂𑀢𑀻𑀢𑀺 𑀅𑀗𑁆𑀕𑀡𑀁, 𑀫𑀮𑀸𑀤𑀺. 𑀅𑀜𑁆𑀚𑁂𑀢𑀺 𑀢𑀢𑁆𑀣 𑀞𑀺𑀢𑀁 𑀅𑀳𑀼𑀦𑁆𑀤𑀭𑀢𑀸𑀬 𑀅𑀪𑀺𑀩𑁆𑀬𑀜𑁆𑀚𑁂𑀢𑀻𑀢𑀺 𑀅𑀗𑁆𑀕𑀡𑀁, 𑀯𑀺𑀯𑀝𑁄 𑀪𑀽𑀫𑀺𑀧𑀤𑁂𑀲𑁄. 𑀤𑁄𑀲𑀸𑀤𑀻𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑀢𑀸𑀬 𑀦𑀸𑀦𑀧𑁆𑀧𑀓𑀸𑀭𑀸 𑀩𑀳𑀼𑀮𑀧𑁆𑀧𑀯𑀢𑁆𑀢𑀺𑀬𑀸 𑀢𑀺𑀩𑁆𑀩𑀓𑀺𑀮𑁂𑀲𑀸. 𑀧𑀸𑀧𑀓𑀸𑀦𑀦𑁆𑀢𑀺 𑀮𑀸𑀫𑀓𑀸𑀦𑀁. 𑀅𑀓𑀼𑀲𑀮𑀸𑀦𑀦𑁆𑀢𑀺 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀸𑀦𑀁. 𑀇𑀘𑁆𑀙𑀸𑀯𑀘𑀭𑀸𑀦𑀦𑁆𑀢𑀺 𑀇𑀘𑁆𑀙𑀸𑀯𑀲𑁂𑀦 𑀧𑀯𑀢𑁆𑀢𑀸𑀦𑀁. 𑀲𑀳 𑀅𑀗𑁆𑀕𑀡𑁂𑀦𑀸𑀢𑀺 𑀅𑀗𑁆𑀕𑀡𑀦𑁆𑀢𑀺 𑀮𑀤𑁆𑀥𑀦𑀸𑀫𑁂𑀦 𑀬𑀣𑀸𑀯𑀼𑀢𑁆𑀢𑀓𑀺𑀮𑁂𑀲𑁂𑀦 𑀲𑀳 𑀯𑀢𑁆𑀢𑀢𑀺.

𑀅𑀢𑁆𑀣𑀻𑀢𑀺𑀧𑀺 𑀦 𑀚𑀸𑀦𑀸𑀢𑀺 𑀢𑀸𑀤𑀺𑀲𑀲𑁆𑀲 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲 𑀅𑀪𑀸𑀯𑀸. 𑀬𑁂𑀲𑀁 𑀓𑀺𑀮𑁂𑀲𑀸𑀦𑀁 𑀅𑀢𑁆𑀣𑀺𑀢𑀸, 𑀢𑁂𑀲𑀁 𑀲𑀧𑁆𑀧𑀝𑀺𑀪𑀬𑀢𑀸 𑀯𑀺𑀲𑁂𑀲𑀢𑁄 𑀚𑀸𑀦𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀇𑀫𑁂 𑀓𑀺𑀮𑁂𑀲𑀸 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀓𑁆𑀔𑀴𑀸𑀢𑀺 𑀨𑀭𑀼𑀲𑀸. 𑀯𑀸𑀴𑀸𑀢𑀺 𑀓𑀼𑀭𑀼𑀭𑀸. 𑀦 𑀕𑀳𑀺𑀢𑀩𑁆𑀩𑀸𑀢𑀺 𑀦 𑀉𑀧𑁆𑀧𑀸𑀤𑁂𑀢𑀩𑁆𑀩𑀸. 𑀬𑀸𑀣𑀸𑀯𑀲𑀭𑀲𑀢𑁄𑀢𑀺 𑀬𑀣𑀸𑀪𑀽𑀢𑀲𑀪𑀸𑀯𑀢𑁄. 𑀏𑀯𑀜𑁆𑀘𑀸𑀢𑀺 ‘‘𑀇𑀫𑁂 𑀓𑀺𑀮𑁂𑀲𑀸 𑀦𑀸𑀫𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀬𑁂𑀦 𑀯𑀸 𑀢𑁂𑀦 𑀯𑀸𑀢𑀺 𑀦𑀯𑀓𑀫𑁆𑀫𑁂𑀲𑀼 𑀯𑀸 𑀧𑀭𑀺𑀬𑀢𑁆𑀢𑀺𑀥𑀼𑀢𑀗𑁆𑀕𑀸𑀤𑀻𑀲𑀼 𑀯𑀸 𑀬𑁂𑀦 𑀯𑀸 𑀢𑁂𑀦 𑀯𑀸. 𑀢𑀢𑁆𑀭𑀸𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀁. 𑀢𑀁 𑀧𑀦 𑀦𑀺𑀤𑁆𑀥𑀸𑀭𑀡𑀁 𑀲𑀗𑁆𑀕𑀡𑀸𑀦𑀗𑁆𑀕𑀡𑀲𑀫𑀼𑀤𑀸𑀬𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀢𑀽𑀲𑀼 𑀧𑀼𑀕𑁆𑀕𑀮𑁂𑀲𑀽’’𑀢𑀺 𑀯𑀢𑁆𑀯𑀸 𑀧𑀼𑀦 𑀢𑀤𑁂𑀓𑀤𑁂𑀲𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀲𑀼 𑀯𑀸 𑀤𑁆𑀯𑀻𑀲𑀼 𑀲𑀸𑀗𑁆𑀕𑀡𑁂𑀲𑀽’’𑀢𑀺 𑀆𑀳. 𑀢𑀜𑁆𑀳𑀺 𑀤𑁆𑀯𑀬𑀁 𑀧𑀞𑀫𑀁 𑀳𑀻𑀦𑀲𑁂𑀝𑁆𑀞𑀪𑀸𑀯𑁂𑀦 𑀦𑀺𑀤𑁆𑀥𑀸𑀭𑀻𑀬𑀢𑀺 𑀧𑀞𑀫𑀁 𑀉𑀤𑁆𑀤𑀺𑀝𑁆𑀞𑀢𑁆𑀢𑀸. 𑀦𑀺𑀤𑁆𑀥𑀸𑀭𑀡𑀜𑁆𑀳𑀺 𑀓𑁆𑀯𑀘𑀺 𑀓𑀼𑀢𑁄𑀘𑀺 𑀓𑁂𑀦𑀘𑀺 𑀳𑁄𑀢𑀻𑀢𑀺.

𑁫𑁮. 𑀓𑀺𑀜𑁆𑀘𑀸𑀧𑀺 𑀅𑀜𑁆𑀜𑀢𑁆𑀣 ‘‘𑀚𑀦𑀓𑁄 𑀳𑁂𑀢𑀼, 𑀧𑀭𑀺𑀕𑁆𑀕𑀸𑀳𑀢𑁄 𑀧𑀘𑁆𑀘𑀬𑁄, 𑀅𑀲𑀸𑀥𑀸𑀭𑀡𑁄 𑀳𑁂𑀢𑀼, 𑀲𑀸𑀥𑀸𑀭𑀡𑁄 𑀧𑀘𑁆𑀘𑀬𑁄, 𑀲𑀪𑀸𑀕𑁄 𑀳𑁂𑀢𑀼, 𑀅𑀲𑀪𑀸𑀕𑁄 𑀧𑀘𑁆𑀘𑀬𑁄, 𑀧𑀼𑀩𑁆𑀩𑀓𑀸𑀮𑀺𑀓𑁄 𑀳𑁂𑀢𑀼, 𑀲𑀳𑀧𑁆𑀧𑀯𑀢𑁆𑀢𑁄 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 ¶ 𑀳𑁂𑀢𑀼𑀧𑀘𑁆𑀘𑀬𑀸 𑀯𑀺𑀪𑀚𑁆𑀚 𑀯𑀼𑀘𑁆𑀘𑀦𑁆𑀢𑀺, 𑀇𑀥 𑀧𑀦 ‘‘𑀘𑀢𑁆𑀢𑀸𑀭𑁄 𑀔𑁄, 𑀪𑀺𑀓𑁆𑀔𑀯𑁂, 𑀫𑀳𑀸𑀪𑀽𑀢𑀸 𑀳𑁂𑀢𑀽, 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀧𑀘𑁆𑀘𑀬𑀸 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀧𑀜𑁆𑀜𑀸𑀧𑀦𑀸𑀬𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁮𑁫) 𑀯𑀺𑀬 𑀳𑁂𑀢𑀼𑀧𑀘𑁆𑀘𑀬𑀲𑀤𑁆𑀤𑀸 𑀲𑀫𑀸𑀦𑀢𑁆𑀣𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀉𑀪𑀬𑁂𑀦𑀧𑀺 𑀓𑀸𑀭𑀡𑀫𑁂𑀯 ¶ 𑀧𑀼𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀪𑀬𑁂𑀦𑀸𑀢𑀺 𑀳𑁂𑀢𑀼𑀧𑀘𑁆𑀘𑀬𑀯𑀘𑀦𑀤𑁆𑀯𑀬𑁂𑀦. 𑀧𑀼𑀘𑁆𑀙𑀢𑀺 𑀆𑀬𑀲𑁆𑀫𑀸 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀤𑁂𑀲𑀦𑀁 𑀯𑀟𑁆𑀠𑁂𑀢𑀼𑀓𑀸𑀫𑁄. 𑀓𑀺𑀜𑁆𑀘𑀸𑀧𑀻𑀢𑀺 𑀅𑀦𑀼𑀚𑀸𑀦𑀦𑀲𑀫𑁆𑀪𑀸𑀯𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀓𑀺𑀁 𑀅𑀦𑀼𑀚𑀸𑀦𑀸𑀢𑀺? 𑀲𑀫𑀸𑀦𑁂𑀧𑀺 𑀤𑁆𑀯𑀺𑀦𑁆𑀦𑀁 𑀲𑀸𑀗𑁆𑀕𑀡𑀪𑀸𑀯𑁂 𑀢𑀲𑁆𑀲𑀸 𑀧𑀚𑀸𑀦𑀦𑀸𑀧𑁆𑀧𑀚𑀸𑀦𑀦𑀳𑁂𑀢𑀼𑀓𑀢𑀁 𑀢𑁂𑀲𑀁 𑀲𑁂𑀝𑁆𑀞𑀳𑀻𑀦𑀢𑀁. 𑀓𑀺𑀁 𑀲𑀫𑁆𑀪𑀸𑀯𑁂𑀢𑀺? 𑀣𑁂𑀭𑀲𑁆𑀲 𑀯𑀺𑀘𑀺𑀢𑁆𑀢𑀧𑀝𑀺𑀪𑀸𑀦𑀢𑀸𑀬 𑀦𑀸𑀦𑀸𑀳𑁂𑀢𑀽𑀧𑀫𑀸𑀳𑀺 𑀅𑀮𑀗𑁆𑀓𑀢𑁆𑀯𑀸 𑀬𑀣𑀸𑀧𑀼𑀘𑁆𑀙𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀸𑀓𑀝𑀓𑀭𑀡𑀁. 𑀢𑁂𑀦𑀸𑀳 ‘‘𑀦𑀧𑁆𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺. 𑀳𑁂𑀢𑀼 𑀘𑁂𑀯 𑀧𑀘𑁆𑀘𑀬𑁄 𑀘 𑀲𑁂𑀝𑁆𑀞𑀳𑀻𑀦𑀪𑀸𑀯𑁂. 𑀢𑀣𑀸𑀅𑀓𑁆𑀔𑀸𑀢𑀩𑁆𑀩𑀢𑀸𑀧𑀺 𑀳𑀺 𑀢𑁂𑀲𑀁 𑀢𑀦𑁆𑀦𑀺𑀫𑀺𑀢𑁆𑀢𑀸 𑀏𑀯𑀸𑀢𑀺.

𑁫𑁯. 𑀢𑀦𑁆𑀢𑀺 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀳𑀻𑀦𑀲𑁂𑀝𑁆𑀞𑀢𑀸𑀬 𑀓𑀸𑀭𑀡𑀁. 𑀑𑀧𑀫𑁆𑀫𑁂𑀳𑀺 𑀧𑀸𑀓𑀝𑀢𑀭𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁. 𑀏𑀢𑀦𑁆𑀢𑀺 𑀲𑀼𑀢𑁆𑀢𑁂 𑀅𑀦𑀦𑁆𑀢𑀭𑀁 𑀯𑀼𑀘𑁆𑀘𑀫𑀸𑀦𑀁 𑀯𑀻𑀭𑀺𑀬𑀸𑀭𑀫𑁆𑀪𑀸𑀪𑀸𑀯𑁂𑀦 𑀅𑀗𑁆𑀕𑀡𑀲𑁆𑀲 𑀅𑀧𑁆𑀧𑀳𑀸𑀦𑀁. 𑀢𑁂𑀦𑀸𑀳 ‘‘𑀦 𑀙𑀦𑁆𑀤𑀁…𑀧𑁂… 𑀲𑀦𑁆𑀥𑀸𑀬𑀸𑀳𑀸’’𑀢𑀺. 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀥𑀦𑁆𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀲𑀗𑁆𑀔𑀸𑀢𑀁 𑀅𑀗𑁆𑀕𑀡𑀲𑁆𑀲 𑀧𑀳𑀸𑀢𑀼𑀓𑀫𑁆𑀬𑀢𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀓𑀼𑀲𑀮𑀥𑀫𑁆𑀫𑀘𑁆𑀙𑀦𑁆𑀤𑀁. 𑀦 𑀚𑀦𑁂𑀲𑁆𑀲𑀢𑀻𑀢𑀺 𑀦 𑀉𑀧𑁆𑀧𑀸𑀤𑁂𑀲𑁆𑀲𑀢𑀺. 𑀓𑀼𑀲𑀮𑁄 𑀯𑀸𑀬𑀸𑀫𑁄 𑀦𑀸𑀫 𑀙𑀦𑁆𑀤𑀢𑁄 𑀩𑀮𑀯𑀸𑀢𑀺 𑀆𑀳 ‘‘𑀢𑀢𑁄 𑀩𑀮𑀯𑀢𑀭𑀁 𑀯𑀸𑀬𑀸𑀫𑀁 𑀦 𑀓𑀭𑀺𑀲𑁆𑀲𑀢𑀻’’𑀢𑀺, 𑀙𑀦𑁆𑀤𑀫𑁆𑀧𑀺 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁄 𑀓𑀣𑀁 𑀢𑀚𑁆𑀚𑀁 𑀯𑀸𑀬𑀸𑀫𑀁 𑀓𑀭𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀣𑀸𑀫𑀕𑀢𑀯𑀻𑀭𑀺𑀬𑀁 𑀉𑀲𑁆𑀲𑁄𑀴𑁆𑀳𑀻𑀪𑀸𑀯𑀧𑁆𑀧𑀢𑁆𑀢𑀁 𑀤𑀴𑁆𑀳𑀁 𑀯𑀻𑀭𑀺𑀬𑀁. 𑀲𑀸𑀗𑁆𑀕𑀡𑀕𑁆𑀕𑀳𑀡𑁂𑀦𑁂𑀯 𑀅𑀗𑁆𑀕𑀡𑀸𑀦𑀁 𑀓𑀺𑀮𑁂𑀲𑀯𑀢𑁆𑀣𑀼𑀢𑀸𑀬 𑀘𑀺𑀢𑁆𑀢𑀲𑁆𑀲 𑀲𑀁𑀓𑀺𑀮𑀺𑀝𑁆𑀞𑀢𑀸𑀬 𑀲𑀤𑁆𑀥𑀸𑀬 𑀧𑀼𑀦 𑀲𑀁𑀓𑀺𑀮𑀺𑀝𑁆𑀞𑀕𑁆𑀕𑀳𑀡𑀁 𑀲𑀯𑀺𑀲𑁂𑀲𑀁 𑀓𑀺𑀮𑀺𑀝𑁆𑀞𑀪𑀸𑀯𑀯𑀺𑀪𑀸𑀯𑀦𑀦𑁆𑀢𑀺 𑀆𑀳 ‘‘𑀲𑀼𑀝𑁆𑀞𑀼𑀢𑀭𑀁 𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄’’𑀢𑀺. 𑀫𑀮𑀺𑀦𑀘𑀺𑀢𑁆𑀢𑁄𑀢𑀺𑀆𑀤𑀻𑀲𑀼𑀧𑀺 ‘‘𑀢𑁂𑀳𑀺𑀬𑁂𑀯𑀸’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀉𑀓𑁆𑀔𑀮𑀺𑀧𑀼𑀘𑁆𑀙𑀦𑀘𑁄𑀴𑀓𑀲𑁆𑀲 𑀯𑀺𑀬 𑀯𑀲𑀸𑀧𑀻𑀢𑀧𑀺𑀮𑁄𑀢𑀺𑀓𑀸 𑀯𑀺𑀬 𑀘 𑀤𑀼𑀫𑁆𑀫𑁄𑀘𑀦𑀻𑀬𑀪𑀸𑀯𑁂𑀦 𑀫𑀮𑀕𑁆𑀕𑀳𑀡𑀁 𑀫𑀮𑀻𑀦𑀢𑀸, 𑀧𑀻𑀴𑀦𑀁 𑀳𑀺𑀁𑀲𑀦𑀁 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀓𑀭𑀡𑀁 𑀯𑀺𑀩𑀸𑀥𑀦𑀁 𑀤𑀭𑀣𑀧𑀭𑀺𑀴𑀸𑀳𑀼𑀧𑁆𑀧𑀸𑀤𑀦𑁂𑀦 𑀧𑀭𑀺𑀤𑀳𑀦𑀁 𑀉𑀧𑀢𑀸𑀧𑀦𑀁, 𑀓𑀸𑀮𑀦𑁆𑀢𑀺 𑀓𑀸𑀮𑀦𑀁, 𑀬𑀣𑀸𑀕𑀳𑀺𑀢𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀔𑁂𑀧𑀦𑀁 𑀆𑀬𑀼𑀓𑁆𑀔𑀬𑀦𑁆𑀢𑀺 𑀅𑀢𑁆𑀣𑁄. 𑀓𑀭𑀺𑀲𑁆𑀲𑀢𑀻𑀢𑀺 𑀧𑀯𑀢𑁆𑀢𑁂𑀲𑁆𑀲𑀢𑀺, 𑀧𑀸𑀧𑀼𑀡𑀺𑀲𑁆𑀲𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸𑀪𑀽𑀢𑁄 𑀘 𑀧𑀸𑀡𑀁 𑀘𑀚𑀺𑀲𑁆𑀲𑀢𑀺 𑀦𑀸𑀫𑀸𑀢𑀺 𑀆𑀳 ‘‘𑀫𑀭𑀺𑀲𑁆𑀲𑀢𑀻’’𑀢𑀺.

𑀲𑁂𑀬𑁆𑀬𑀣𑀸𑀧𑀻𑀢𑀺 𑀉𑀧𑀫𑀸𑀦𑀺𑀤𑀲𑁆𑀲𑀦𑁂 𑀦𑀺𑀧𑀸𑀢𑁄. 𑀢𑀤𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀦𑀸𑀫𑀸’’𑀢𑀺 𑀆𑀳. 𑀧𑀁𑀲𑀼𑀆𑀤𑀺𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀚𑀮𑁆𑀮𑀸𑀤𑀻𑀦𑀁 𑀲𑀗𑁆𑀕𑀳𑁄, 𑀖𑀁𑀲𑀦𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀙𑀸𑀭𑀺𑀓𑀸𑀧𑀭𑀺𑀫𑀚𑁆𑀚𑀦𑀸𑀤𑀻𑀦𑀁 𑀲𑀗𑁆𑀕𑀳𑁄𑀢𑀺. ‘‘𑀅𑀪𑀺𑀭𑀽𑀧𑀸𑀬 𑀓𑀜𑁆𑀜𑀸 𑀤𑀸𑀢𑀩𑁆𑀩𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀅𑀦𑁆𑀢𑀭𑁂𑀦𑀧𑀺 𑀅𑀢𑀺𑀲𑀬𑀢𑁆𑀣𑀩𑁄𑀥𑀓𑀲𑀤𑁆𑀤𑁂𑀦 𑀅𑀢𑀺𑀲𑀬𑀢𑁆𑀣𑁄 𑀜𑀸𑀬𑀢𑀻𑀢𑀺 𑀆𑀳 ‘‘𑀫𑀮𑀕𑁆𑀕𑀳𑀺𑀢𑀢𑀭𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀧𑀝𑀺𑀧𑀼𑀘𑁆𑀙𑀸𑀯𑀘𑀦𑀦𑁆𑀢𑀺 𑀅𑀦𑀼𑀫𑀢𑀺𑀧𑀼𑀘𑁆𑀙𑀸𑀯𑀺𑀲𑁂𑀲𑁄. 𑀏𑀯𑀁 ¶ 𑀓𑀭𑀺𑀬𑀫𑀸𑀦𑀸𑀢𑀺 𑀅𑀧𑀭𑀺𑀪𑁄𑀕-𑀅𑀧𑀭𑀺𑀬𑁄𑀤𑀧𑀦𑀭𑀚𑁄𑀧𑀣𑀦𑀺𑀓𑁆𑀔𑀺𑀧𑀦𑁂𑀳𑀺 𑀓𑀺𑀮𑀺𑀝𑁆𑀞𑀪𑀸𑀯𑀁 𑀆𑀧𑀸𑀤𑀺𑀬𑀫𑀸𑀦𑀸. 𑀑𑀧𑀫𑁆𑀫𑀁 𑀲𑀫𑁆𑀧𑀝𑀺𑀧𑀸𑀤𑁂𑀦𑁆𑀢𑁄𑀢𑀺 𑀬𑀣𑀽𑀧𑀦𑀻𑀢𑀁 𑀉𑀧𑀫𑀁 𑀉𑀧𑀫𑁂𑀬𑁆𑀬𑀢𑁆𑀣𑁂𑀦 ¶ 𑀲𑀫𑀁 𑀓𑀢𑁆𑀯𑀸 𑀧𑀝𑀺𑀧𑀸𑀤𑁂𑀦𑁆𑀢𑁄, 𑀲𑀁𑀲𑀦𑁆𑀤𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀲𑀸𑀗𑁆𑀕𑀡𑁄 𑀧𑀼𑀕𑁆𑀕𑀮𑁄𑀢𑀺 𑀲𑀸𑀗𑁆𑀕𑀡𑁄 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀅𑀲𑀼𑀚𑁆𑀛𑀦𑀓𑀧𑀼𑀕𑁆𑀕𑀮𑁄. 𑀆𑀧𑀡𑀸𑀤𑀺𑀢𑁄 𑀓𑀼𑀮𑀖𑀭𑀁 𑀆𑀦𑀻𑀢𑀲𑁆𑀲 𑀫𑀮𑀕𑁆𑀕𑀳𑀺𑀢𑀓𑀁𑀲𑀪𑀸𑀚𑀦𑀲𑁆𑀲 𑀢𑀢𑁆𑀣 𑀮𑀤𑁆𑀥𑀩𑁆𑀩𑀸𑀬 𑀯𑀺𑀲𑀼𑀤𑁆𑀥𑀺𑀬𑀸 𑀅𑀮𑀸𑀪𑀢𑁄 𑀬𑀣𑀸 𑀅𑀦𑀼𑀓𑁆𑀓𑀫𑁂𑀦 𑀲𑀁𑀓𑀺𑀮𑀺𑀝𑁆𑀞𑀢𑀭𑀪𑀸𑀯𑁄, 𑀏𑀯𑀁 𑀖𑀭𑀢𑁄 𑀦𑀺𑀓𑁆𑀔𑀦𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀧𑀩𑁆𑀩𑀚𑁆𑀚𑀸𑀬 𑀮𑀤𑁆𑀥𑀩𑁆𑀩𑀸𑀬 𑀯𑀺𑀲𑀼𑀤𑁆𑀥𑀺𑀬𑀸 𑀅𑀮𑀸𑀪𑀢𑁄 𑀅𑀦𑀼𑀓𑁆𑀓𑀫𑁂𑀦 𑀲𑀁𑀓𑀺𑀮𑀺𑀝𑁆𑀞𑀢𑀭𑀪𑀸𑀯𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀁𑀓𑀺𑀮𑀺𑀝𑁆𑀞𑀓𑀁𑀲𑀧𑀸𑀢𑀺𑀬𑀸’’𑀢𑀺𑀆𑀤𑀺𑀫𑀸𑀳. 𑀲𑀁𑀓𑀺𑀮𑀺𑀝𑁆𑀞𑀢𑀭𑀪𑀸𑀯𑁄 𑀘 𑀦𑀸𑀫 𑀧𑀩𑁆𑀩𑀚𑀺𑀢𑀲𑁆𑀲 𑀆𑀚𑀻𑀯𑀯𑀺𑀧𑀢𑁆𑀢𑀺𑀯𑀲𑁂𑀦 𑀯𑀸 𑀲𑀺𑀬𑀸 𑀆𑀘𑀸𑀭𑀤𑀺𑀝𑁆𑀞𑀺𑀲𑀻𑀮𑀯𑀺𑀧𑀢𑁆𑀢𑀻𑀲𑀼 𑀅𑀜𑁆𑀜𑀢𑀭𑀯𑀲𑁂𑀦 𑀯𑀸𑀢𑀺 𑀢𑀁 𑀲𑀩𑁆𑀩𑀁 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀸𑀘𑀺𑀢𑁆𑀢𑀺𑀬𑀯𑀻𑀢𑀺𑀓𑁆𑀓𑀫𑀦𑀕𑁆𑀕𑀳𑀡𑁂𑀦 𑀳𑀺 𑀏𑀓𑀘𑁆𑀘𑀤𑀺𑀝𑁆𑀞𑀺𑀯𑀺𑀧𑀢𑁆𑀢𑀺𑀬𑀸𑀧𑀺 𑀲𑀗𑁆𑀕𑀳𑁄 𑀳𑁄𑀢𑀻𑀢𑀺. 𑀏𑀢𑁆𑀣 𑀞𑀺𑀢𑀲𑁆𑀲𑀸𑀢𑀺 𑀏𑀢𑀺𑀲𑁆𑀲𑀁 𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑁂𑀲𑀼𑀧𑀺 𑀬𑀣𑀸𑀭𑀳𑀁 𑀯𑀢𑁆𑀢𑀩𑁆𑀩𑀁. 𑀲𑀩𑁆𑀩𑀧𑀭𑀺𑀲𑀲𑀸𑀥𑀸𑀭𑀡𑀸 𑀫𑀳𑀸𑀣𑁂𑀭𑀲𑁆𑀲 𑀤𑁂𑀲𑀦𑀸, 𑀢𑀲𑁆𑀫𑀸 𑀕𑀳𑀧𑀢𑀺𑀯𑀲𑁂𑀦𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀉𑀓𑁆𑀓𑀁𑀲𑀕𑀢𑀲𑀁𑀓𑀺𑀮𑀺𑀝𑁆𑀞𑀢𑀭𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀸𑀢𑀼𑀖𑀸𑀢𑀸𑀤𑀺𑀆𑀦𑀦𑁆𑀢𑀭𑀺𑀬𑀓𑀭𑀡’’𑀦𑁆𑀢𑀺 𑀆𑀳. 𑀅𑀯𑀺𑀲𑁄𑀥𑁂𑀢𑁆𑀯𑀸𑀢𑀺 𑀬𑀣𑀸 𑀅𑀢𑁆𑀢𑀦𑁄 𑀲𑀻𑀮𑁂 𑀯𑀸 𑀤𑀺𑀝𑁆𑀞𑀺𑀬𑀸 𑀯𑀸 𑀯𑀺𑀲𑀼𑀤𑁆𑀥𑀺 𑀳𑁄𑀢𑀺, 𑀏𑀯𑀁 𑀓𑀺𑀮𑁂𑀲𑀫𑀮𑀺𑀦𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀅𑀯𑀺𑀲𑁄𑀥𑁂𑀢𑁆𑀯𑀸.

𑀪𑀩𑁆𑀩𑀧𑀼𑀕𑁆𑀕𑀮𑁄𑀢𑀺 𑀉𑀧𑀦𑀺𑀲𑁆𑀲𑀬𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀯𑀺𑀲𑀼𑀤𑁆𑀥𑀧𑀼𑀕𑁆𑀕𑀮𑁄. 𑀆𑀤𑀺𑀁 𑀓𑀢𑁆𑀯𑀸𑀢𑀺 𑀇𑀫𑀺𑀦𑀸 𑀥𑁄𑀯𑀦𑀖𑀁𑀲𑀦𑀸𑀤𑀻𑀳𑀺 𑀧𑀭𑀺𑀬𑁄𑀤𑀧𑀦𑀁 𑀆𑀤𑀺𑀫𑀦𑁆𑀢𑀁 𑀓𑀢𑁆𑀯𑀸 𑀯𑀤𑀢𑀺. 𑀲𑀼𑀤𑁆𑀥𑀝𑁆𑀞𑀸𑀦𑀁 𑀬𑀢𑁆𑀣 𑀯𑀸 𑀦 𑀭𑀚𑁂𑀦 𑀑𑀓𑀺𑀭𑀻𑀬𑀢𑀺. 𑀤𑀡𑁆𑀟𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 ‘‘𑀏𑀢𑁆𑀢𑀓𑀸 𑀉𑀤𑀓𑀸, 𑀯𑀸𑀮𑀼𑀓𑀸 𑀯𑀸 𑀆𑀦𑁂𑀢𑀩𑁆𑀩𑀸’’𑀢𑀺 𑀤𑀡𑁆𑀟𑀓𑀫𑁆𑀫𑀁 𑀓𑀢𑁆𑀯𑀸. 𑀏𑀢𑁆𑀣 𑀞𑀺𑀢𑀲𑁆𑀲𑀸𑀢𑀺 𑀧𑀭𑀺𑀲𑀼𑀤𑁆𑀥𑁂 𑀲𑀻𑀮𑁂 𑀞𑀺𑀢𑀲𑁆𑀲. 𑀲𑀫𑁆𑀫𑀸𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀲𑀻𑀮𑁂𑀳𑀺 𑀲𑀻𑀮𑀯𑀺𑀲𑀼𑀤𑁆𑀥𑀺 𑀤𑀲𑁆𑀲𑀺𑀢𑀸. 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸𑀧𑀺 𑀳𑀺 𑀅𑀗𑁆𑀕𑀡𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀁 𑀲𑀺𑀬𑀸. 𑀢𑀣𑀸 𑀳𑀺𑀲𑁆𑀲𑀸 𑀲𑀁𑀓𑀺𑀮𑀺𑀝𑁆𑀞𑀓𑀁𑀲𑀧𑀸𑀢𑀺𑀬𑀸 𑀧𑀭𑀺𑀲𑀼𑀤𑁆𑀥𑀧𑀭𑀺𑀬𑁄𑀤𑀸𑀢𑀪𑀸𑀯𑁄 𑀉𑀧𑀫𑀸𑀪𑀸𑀯𑁂𑀦 𑀯𑀼𑀢𑁆𑀢𑁄. 𑀧𑀦𑁆𑀢𑀲𑁂𑀦𑀸𑀲𑀦𑀯𑀸𑀲𑁄 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀁 𑀓𑀺𑀮𑁂𑀲𑀸𑀦𑀁 𑀢𑀤𑀗𑁆𑀕𑀦𑀺𑀯𑀸𑀭𑀡𑀁. 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀥𑀺𑀕𑀫𑁄…𑀧𑁂… 𑀅𑀭𑀳𑀢𑁆𑀢𑀲𑀘𑁆𑀙𑀺𑀓𑀺𑀭𑀺𑀬𑀸𑀢𑀺 𑀲𑀢𑁆𑀢𑀲𑀼𑀧𑀺 𑀞𑀸𑀦𑁂𑀲𑀼 ‘‘𑀧𑀭𑀺𑀲𑀼𑀤𑁆𑀥𑀧𑀭𑀺𑀬𑁄𑀤𑀸𑀢𑀪𑀸𑀯𑁄 𑀯𑀺𑀬𑀸’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀧𑀩𑁆𑀩𑀚𑀺𑀢𑀲𑁆𑀲 𑀳𑀺 𑀯𑀺𑀲𑀼𑀤𑁆𑀥𑀺 𑀦𑀸𑀫 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀲𑀻𑀮𑀯𑀺𑀲𑀼𑀤𑁆𑀥𑀺𑀬𑀸 𑀯𑀸 𑀲𑀺𑀬𑀸 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀯𑀲𑁂𑀦 𑀯𑀺𑀯𑁂𑀓𑀯𑀸𑀲𑁂𑀦 𑀛𑀸𑀦𑀲𑁆𑀲𑀸𑀥𑀺𑀕𑀫𑁂𑀦 𑀯𑀸 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀬 𑀯𑀸 𑀲𑀸𑀫𑀜𑁆𑀜𑀨𑀮𑀸𑀥𑀺𑀕𑀫𑁂𑀦 𑀯𑀸𑀢𑀺.

𑀭𑀸𑀕𑀝𑁆𑀞𑀸𑀦𑀺𑀬𑀦𑁆𑀢𑀺 ¶ 𑀭𑀸𑀕𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀁. 𑀯𑀺𑀲𑀪𑀸𑀕𑀸𑀭𑀫𑁆𑀫𑀡𑀁 𑀲𑀦𑁆𑀥𑀸𑀬 𑀯𑀤𑀢𑀺 ‘‘𑀇𑀝𑁆𑀞𑀸𑀭𑀫𑁆𑀫𑀡’’𑀦𑁆𑀢𑀺. 𑀢𑀲𑁆𑀫𑀺𑀦𑁆𑀢𑀺 𑀇𑀝𑁆𑀞𑀸𑀭𑀫𑁆𑀫𑀡𑁂. 𑀯𑀺𑀧𑀦𑁆𑀦𑀲𑁆𑀲𑀢𑀻𑀢𑀺 𑀫𑀼𑀝𑁆𑀞𑀲𑁆𑀲𑀢𑀺. 𑀢𑀁 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀼𑀪𑀦𑀺𑀫𑀺𑀢𑁆𑀢𑀁. 𑀆𑀯𑀚𑁆𑀚𑀺𑀲𑁆𑀲𑀢𑀻𑀢𑀺 𑀅𑀬𑁄𑀦𑀺𑀲𑁄 𑀆𑀯𑀚𑁆𑀚𑀺𑀲𑁆𑀲𑀢𑀺. 𑀲𑀬𑀫𑁂𑀯 𑀅𑀜𑁆𑀜𑁂𑀦 𑀅𑀯𑁄𑀫𑀺𑀲𑁆𑀲𑁄. 𑀓𑀼𑀲𑀮𑀯𑀸𑀭𑀧𑀘𑁆𑀙𑀺𑀦𑁆𑀤𑀦𑀫𑁂𑀯 𑀘𑁂𑀢𑁆𑀣 𑀅𑀦𑀼𑀤𑁆𑀥𑀁𑀲𑀦𑀁 𑀤𑀝𑁆𑀞𑀩𑁆𑀩𑀁. 𑀲𑁂𑀲𑀦𑁆𑀢𑀺 ‘‘𑀲𑀸𑀗𑁆𑀕𑀡𑁄 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄’’𑀢𑀺𑀆𑀤𑀺. 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑀸𑀢𑀺 𑀧𑀞𑀫𑀯𑀸𑀭𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦. 𑀲𑀩𑁆𑀩𑀦𑁆𑀢𑀺 𑀫𑀸𑀢𑀼𑀖𑀸𑀢𑀸𑀤𑀺𑀆𑀦𑀦𑁆𑀢𑀭𑀺𑀬𑀓𑀭𑀡𑀧𑀭𑀺𑀬𑁄𑀲𑀸𑀦𑀁 𑀲𑀩𑁆𑀩𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑀯𑀘𑀦𑀁.

𑀅𑀢𑀺𑀯𑀺𑀭𑀳𑀸𑀪𑀸𑀯𑀢𑁄𑀢𑀺 ¶ 𑀲𑀢𑀺𑀲𑀫𑁆𑀫𑁄𑀲𑀸𑀪𑀸𑀯𑀢𑁄, 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀦𑁆𑀢𑀺 ‘‘𑀲𑁄 𑀅𑀭𑀸𑀕𑁄’’𑀢𑀺𑀆𑀤𑀺. ‘‘𑀥𑁄𑀯𑀦𑀖𑀁𑀲𑀦𑀲𑀡𑁆𑀳𑀙𑀸𑀭𑀺𑀓𑀸𑀧𑀭𑀺𑀫𑀚𑁆𑀚𑀦𑀸𑀤𑀻𑀳𑀻’’𑀢𑀺𑀆𑀤𑀺𑀦𑀸 𑀤𑀼𑀢𑀺𑀬𑀯𑀸𑀭𑀸𑀦𑀼𑀲𑀸𑀭𑁂𑀦. ‘‘𑀓𑁄 𑀦𑀼 𑀔𑁄’’𑀢𑀺𑀆𑀤𑀺 𑀧𑀼𑀘𑁆𑀙𑀸𑀯𑀲𑁂𑀦 𑀆𑀕𑀢𑀁, 𑀇𑀤𑀁 𑀦𑀺𑀕𑀫𑀦𑀯𑀲𑁂𑀦𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄.

𑁬𑁦. 𑀅𑀗𑁆𑀕𑀡𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀦𑀸𑀫𑀢𑁄 𑀏𑀯 𑀯𑀺𑀪𑀸𑀯𑀺𑀢𑀁, 𑀦 𑀧𑀦 𑀲𑀪𑀸𑀯𑀢𑁄, 𑀧𑀪𑁂𑀤𑀢𑁄 𑀯𑀸𑀢𑀺 𑀲𑀪𑀸𑀯𑀸𑀤𑀺𑀢𑁄 𑀯𑀺𑀪𑀸𑀯𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀦𑀸𑀦𑀧𑁆𑀧𑀓𑀸𑀭𑀢𑁄 𑀧𑀸𑀓𑀝𑀁 𑀓𑀸𑀭𑀸𑀧𑁂𑀢𑀼𑀓𑀸𑀫𑁂𑀦𑀸’’𑀢𑀺. 𑀇𑀘𑁆𑀙𑀸𑀬 𑀅𑀯𑀘𑀭𑀸𑀦𑀦𑁆𑀢𑀺 𑀇𑀘𑁆𑀙𑀸𑀯𑀲𑁂𑀦 𑀅𑀯𑀘𑀭𑀡𑀸𑀦𑀁. 𑀑𑀢𑀺𑀡𑁆𑀡𑀸𑀦𑀦𑁆𑀢𑀺 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀸𑀦𑀁. 𑀢𑁂 𑀧𑀦 𑀢𑀢𑁆𑀣 𑀧𑀘𑁆𑀘𑀬𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀧𑀯𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀧𑀯𑀢𑁆𑀢𑀸𑀦’’𑀦𑁆𑀢𑀺. 𑀦𑀸𑀦𑀧𑁆𑀧𑀓𑀸𑀭𑀸𑀦𑀦𑁆𑀢𑀺 𑀯𑀺𑀲𑀬𑀪𑁂𑀤𑁂𑀦 𑀧𑀯𑀢𑁆𑀢𑀺𑀆𑀓𑀸𑀭𑀪𑁂𑀤𑁂𑀦 𑀘 𑀦𑀸𑀦𑀸𑀯𑀺𑀥𑀸𑀦𑀁. 𑀬𑁂𑀦𑀓𑀸𑀭𑀡𑁂𑀦. 𑀦 𑀓𑁂𑀯𑀮𑀁 𑀮𑀸𑀪𑀢𑁆𑀣𑀺𑀓𑀢𑀸 𑀏𑀯, 𑀅𑀣 𑀔𑁄 𑀧𑀼𑀜𑁆𑀜𑀯𑀦𑁆𑀢𑀢𑀸 𑀲𑀓𑁆𑀓𑀢𑀕𑀭𑀼𑀓𑀢𑀸 𑀘 𑀏𑀢𑁆𑀣 𑀓𑀸𑀭𑀡𑀪𑀸𑀯𑁂𑀦 𑀕𑀳𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀓𑀢𑀺𑀬𑀸𑀧𑀺 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀮𑀸𑀪𑀢𑁆𑀣𑀺𑀓𑁄𑀧𑀺 𑀦 𑀬𑁄 𑀓𑁄𑀘𑀺 𑀏𑀯𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀺 𑀧𑀼𑀜𑁆𑀜𑀯𑀸 𑀲𑀫𑁆𑀪𑀸𑀯𑀦𑀻𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀣𑁂𑀭𑀸 𑀅𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀦𑀪𑀬𑁂𑀦 𑀫𑀚𑁆𑀛𑀺𑀫𑀸𑀦𑀁 𑀆𑀭𑁄𑀘𑁂𑀦𑁆𑀢𑀺, 𑀢𑀣𑀸 𑀫𑀚𑁆𑀛𑀺𑀫𑀸 𑀦𑀯𑀓𑀸𑀦𑀁, 𑀦𑀯𑀓𑀸 𑀧𑀦 𑀅𑀢𑁆𑀢𑀦𑁄 𑀦𑀯𑀓𑀪𑀸𑀯𑁂𑀦 𑀯𑀺𑀖𑀸𑀲𑀸𑀤𑀸𑀤𑀻𑀦𑀁 𑀆𑀭𑁄𑀘𑁂𑀦𑁆𑀢𑀺 ‘‘𑀧𑀲𑁆𑀲𑀣 𑀢𑀼𑀫𑁆𑀳𑀸𑀓𑀁 𑀣𑁂𑀭𑀲𑁆𑀲 𑀓𑀫𑁆𑀫’’𑀦𑁆𑀢𑀺. 𑀯𑀺𑀖𑀸𑀲𑀸𑀤𑀸𑀤𑀬𑁄 𑀦𑀸𑀫 ‘‘𑀈𑀤𑀺𑀲𑀲𑁆𑀲 𑀲𑀦𑁆𑀢𑀺𑀓𑁂 𑀑𑀯𑀸𑀤𑀢𑁆𑀣𑀁 𑀢𑀼𑀫𑁆𑀳𑁂 𑀆𑀕𑀢𑀸’’𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀆𑀭𑁄𑀘𑁂𑀦𑁆𑀢𑀺. 𑀦 𑀘 𑀫𑀁 𑀪𑀺𑀓𑁆𑀔𑀽 𑀚𑀸𑀦𑁂𑀬𑁆𑀬𑀼𑀦𑁆𑀢𑀺 𑀦 𑀘 𑀯𑀢 𑀫𑀁 𑀪𑀺𑀓𑁆𑀔𑀽 𑀚𑀸𑀦𑁂𑀬𑁆𑀬𑀼𑀁, 𑀅𑀳𑁄 𑀯𑀢 𑀫𑀁 𑀪𑀺𑀓𑁆𑀔𑀽 𑀦 𑀚𑀸𑀦𑁂𑀬𑁆𑀬𑀼𑀦𑁆𑀢𑀺 𑀬𑁄𑀚𑀦𑀸. 𑀞𑀸𑀦𑀁 𑀔𑁄 𑀧𑀦𑁂𑀢𑀦𑁆𑀢𑀺 𑀏𑀢𑁆𑀣 𑀔𑁄-𑀲𑀤𑁆𑀤𑁄 𑀅𑀯𑀥𑀸𑀭𑀡𑀢𑁆𑀣𑁄, 𑀧𑀦-𑀲𑀤𑁆𑀤𑁄 𑀯𑀘𑀦𑀸𑀮𑀗𑁆𑀓𑀸𑀭𑁄𑀢𑀺 𑀆𑀳 ‘‘𑀅𑀢𑁆𑀣𑀺𑀬𑁂𑀯𑀸’’𑀢𑀺. 𑀧𑀼𑀩𑁆𑀩𑁂 𑀇𑀘𑁆𑀙𑀼𑀧𑁆𑀧𑀸𑀤𑀯𑀸𑀭𑀯𑀡𑁆𑀡𑀦𑀸𑀬 𑀯𑀼𑀢𑁆𑀢𑀦𑀬𑁂𑀦. 𑀇𑀢𑀺-𑀲𑀤𑁆𑀤𑁄 𑀇𑀥 𑀆𑀲𑀦𑁆𑀦𑀓𑀸𑀭𑀡𑀢𑁆𑀣𑁄𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀺𑀦𑀸 𑀓𑀸𑀭𑀡𑁂𑀦𑀸’’𑀢𑀺 𑀆𑀳 ¶ . 𑀇𑀤𑀜𑁆𑀘 𑀓𑁄𑀧𑀅𑀧𑁆𑀧𑀘𑁆𑀘𑀬𑀸𑀦𑀫𑁂𑀯 𑀕𑀳𑀡𑀁. 𑀢𑀸𑀤𑀺𑀲𑀸𑀦𑀦𑁆𑀢𑀺 𑀓𑁄𑀧𑀅𑀧𑁆𑀧𑀘𑁆𑀘𑀬𑀸𑀥𑀺𑀪𑀽𑀢𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀦𑀼𑀭𑀳𑁄𑀢𑀺 𑀅𑀦𑀼𑀭𑀽𑀧𑁂 𑀭𑀳𑀲𑀺. 𑀏𑀯𑀫𑁂𑀯 𑀳𑀺 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺 ‘‘𑀮𑀸𑀪𑀢𑁆𑀣𑀺𑀓𑁄 𑀳𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀧𑀼𑀭𑀺𑀫𑁂𑀦 𑀬𑁄𑀚𑀦𑀸𑀦𑀬𑁂𑀦 𑀲𑀤𑀺𑀲𑀫𑁂𑀯.

𑀘𑁄𑀤𑀦𑀸𑀬 𑀧𑀝𑀺𑀧𑀼𑀕𑁆𑀕𑀮𑀪𑀸𑀯𑁄, 𑀘𑁄𑀤𑀦𑀸 𑀘 𑀆𑀧𑀢𑁆𑀢𑀺𑀬𑀸𑀢𑀺 𑀘𑀼𑀤𑀺𑀢𑀓𑁂𑀦 𑀘𑁄𑀤𑀓𑀲𑁆𑀲 𑀲𑀫𑀸𑀦𑀪𑀸𑀯𑁄 𑀆𑀧𑀢𑁆𑀢𑀺𑀆𑀧𑀦𑁆𑀦𑀢𑀸𑀬𑀸𑀢𑀺 𑀆𑀳 ‘‘𑀲𑀫𑀸𑀦𑁄𑀢𑀺 𑀲𑀸𑀧𑀢𑁆𑀢𑀺𑀓𑁄’’𑀢𑀺. 𑀲𑀧𑁆𑀧𑀝𑀺𑀧𑀼𑀕𑁆𑀕𑀮𑁂𑀦𑁂𑀯𑀲𑁆𑀲 𑀘𑁄𑀤𑀦𑀺𑀘𑁆𑀙𑀸𑀬 𑀓𑀸𑀭𑀡𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀅𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀘𑀸𑀬𑀁 𑀲𑀸𑀧𑀢𑁆𑀢𑀺𑀓𑀢𑀸𑀬 𑀏𑀯 𑀲𑀫𑀸𑀦𑀢𑀁 𑀇𑀘𑁆𑀙𑀢𑀺, 𑀅𑀣 𑀔𑁄 𑀅𑀜𑁆𑀜𑀣𑀸𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀅𑀜𑁆𑀜𑁂𑀦 𑀯𑀸 𑀧𑀝𑀺𑀧𑀼𑀕𑁆𑀕𑀮𑁂𑀦 𑀲𑀧𑁆𑀧𑀝𑀺𑀧𑀼𑀕𑁆𑀕𑀮𑁄. 𑀅𑀬𑀜𑁆𑀳𑀺 ‘‘𑀲𑀧𑁆𑀧𑀝𑀺𑀧𑀼𑀕𑁆𑀕𑀮𑁄𑀯 𑀫𑀁 𑀘𑁄𑀤𑁂𑀬𑁆𑀬𑀸’’𑀢𑀺 𑀇𑀘𑁆𑀙𑀢𑀺 ‘‘𑀏𑀯𑀸𑀳𑀁 𑀢𑀲𑁆𑀲 𑀧𑀝𑀺𑀧𑀼𑀕𑁆𑀕𑀮𑁂𑀳𑀺 𑀲𑀤𑁆𑀥𑀺𑀁 𑀏𑀓𑀚𑁆𑀛𑀸𑀲𑀬𑁄 𑀳𑀼𑀢𑁆𑀯𑀸 𑀢𑀲𑁆𑀲 𑀉𑀧𑀭𑀺 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀓𑀸𑀢𑀼𑀁 𑀯𑀸 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀫𑀜𑁆𑀜𑀫𑀸𑀦𑁄 ¶ . 𑀇𑀫𑀲𑁆𑀫𑀺𑀁 𑀧𑀦 𑀧𑀓𑁆𑀔𑁂 𑀦𑁄 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀦𑀢𑁆𑀣𑀺 𑀏𑀢𑀲𑁆𑀲 𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

‘‘𑀅𑀳𑁄 𑀯𑀢𑀸’’𑀢𑀺 𑀇𑀤𑀁 𑀧𑀤𑀁 𑀤𑀺𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀇𑀘𑁆𑀙𑀸𑀘𑀸𑀭𑁂 𑀞𑀺𑀢𑀢𑁆𑀢𑀸 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀸𑀢𑀺 𑀯𑀘𑀦𑀢𑁄 ‘‘𑀢𑀜𑁆𑀘 𑀔𑁄 𑀅𑀦𑀼𑀫𑀢𑀺𑀧𑀼𑀘𑁆𑀙𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀦 𑀳𑁂𑀲 ‘‘𑀲𑀘𑁆𑀘𑀁 𑀓𑀺𑀭 𑀢𑁆𑀯𑀁 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸 𑀓𑀺𑀜𑁆𑀘𑀺 𑀯𑀻𑀢𑀺𑀓𑁆𑀓𑀫𑀁 𑀉𑀤𑁆𑀤𑀺𑀲𑁆𑀲 𑀪𑀕𑀯𑀢𑀸 𑀧𑀼𑀘𑁆𑀙𑀺𑀢𑀩𑁆𑀩𑀢𑀁 𑀇𑀘𑁆𑀙𑀢𑀺. 𑀦𑁄 𑀫𑀕𑁆𑀕𑀁 𑀯𑀸 𑀨𑀮𑀁 𑀯𑀸 𑀯𑀺𑀧𑀲𑁆𑀲𑀦𑀁 𑀯𑀸 𑀅𑀦𑁆𑀢𑀭𑀁 𑀓𑀢𑁆𑀯𑀸𑀢𑀺 𑀫𑀕𑁆𑀕𑀪𑀸𑀯𑀦𑀁 𑀯𑀸 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀁 𑀯𑀸 𑀲𑀺𑀔𑀸𑀧𑁆𑀧𑀢𑁆𑀢𑀯𑀺𑀧𑀲𑁆𑀲𑀦𑀸𑀦𑀼𑀬𑁄𑀕𑀁 𑀯𑀸 𑀦𑀺𑀭𑁄𑀥𑀲𑀫𑀸𑀧𑀚𑁆𑀚𑀦𑀁 𑀯𑀸 𑀛𑀸𑀦𑀲𑀫𑀸𑀧𑀚𑁆𑀚𑀦𑀫𑁂𑀯 𑀯𑀸 𑀅𑀦𑁆𑀢𑀭𑀁 𑀓𑀸𑀭𑀡𑀁 𑀓𑀢𑁆𑀯𑀸 𑀪𑀕𑀯𑀢𑀸 𑀅𑀢𑁆𑀢𑀸𑀦𑀁 𑀧𑀝𑀺𑀧𑀼𑀘𑁆𑀙𑀺𑀢𑀩𑁆𑀩𑀁 𑀦𑁄 𑀇𑀘𑁆𑀙𑀢𑀺. 𑀦𑀺𑀘𑁆𑀘𑀁 𑀅𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀅𑀦𑀼𑀫𑀢𑀺𑀕𑁆𑀕𑀳𑀡𑀯𑀲𑁂𑀦 𑀧𑀼𑀘𑁆𑀙𑀺𑀢𑀩𑁆𑀩𑀁 𑀇𑀘𑁆𑀙𑀢𑀺, 𑀉𑀢𑁆𑀢𑀸𑀦𑀫𑁂𑀯 𑀓𑀢𑁆𑀯𑀸 𑀧𑀼𑀘𑁆𑀙𑀺𑀢𑀩𑁆𑀩𑀁 𑀇𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀳𑀭𑀦𑁆𑀢𑁂 𑀧𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀪𑀩𑁆𑀩𑀝𑁆𑀞𑀸𑀦𑀪𑀺𑀓𑁆𑀔𑀼𑀢𑀸𑀬 𑀦𑀺𑀳𑀭𑀺𑀲𑁆𑀲𑀦𑁆𑀢𑀺 𑀲𑀸𑀲𑀦𑀢𑁄.

𑀢𑀁 𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀜𑁆𑀘𑁂𑀯 𑀪𑀺𑀓𑁆𑀔𑀽𑀳𑀺 𑀓𑀭𑀺𑀬𑀫𑀸𑀦𑀁 𑀲𑀓𑁆𑀓𑀸𑀭𑀕𑀭𑀼𑀓𑀸𑀭𑀲𑀫𑁆𑀧𑀢𑁆𑀢𑀺𑀜𑁆𑀘. 𑀕𑀳𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺 𑀫𑀬𑀸 𑀲𑀁𑀯𑀺𑀪𑀸𑀕𑁂 𑀓𑀭𑀺𑀬𑀫𑀸𑀦𑁂. 𑀲𑀬𑀫𑁂𑀯 𑀧𑀜𑁆𑀜𑀸𑀬𑀢𑀻𑀢𑀺 𑀲𑀬𑀫𑁂𑀯 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀧𑀼𑀭𑀢𑁄 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀺, 𑀧𑀼𑀭𑀢𑁄 𑀯𑀲𑀦𑁆𑀢𑀁 𑀧𑀦 𑀪𑀺𑀓𑁆𑀔𑀼 𑀧𑀼𑀭𑀓𑁆𑀔𑀢𑁆𑀯𑀸 𑀕𑀘𑁆𑀙𑀦𑁆𑀢𑀺𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀤𑀓𑁆𑀔𑀺𑀡𑁄𑀤𑀓𑀦𑁆𑀢𑀺 ¶ 𑀅𑀕𑁆𑀕𑀢𑁄 𑀉𑀧𑀦𑀻𑀬𑀫𑀸𑀦𑀁 𑀤𑀓𑁆𑀔𑀺𑀡𑁄𑀤𑀓𑀁. 𑀬𑀢𑁄 𑀏𑀯-𑀓𑀸𑀭𑁄, 𑀢𑀢𑁄 𑀅𑀜𑁆𑀜𑀢𑁆𑀣 𑀦𑀺𑀬𑀫𑁄 𑀇𑀘𑁆𑀙𑀺𑀢𑁄. 𑀅𑀯𑀥𑀸𑀭𑀡𑀢𑁆𑀣𑀁 𑀯𑀸 𑀏𑀯-𑀓𑀸𑀭𑀕𑁆𑀕𑀳𑀡𑀦𑁆𑀢𑀺 𑀓𑀢𑁆𑀯𑀸 𑀅𑀳𑀫𑁂𑀯 𑀮𑀪𑁂𑀬𑁆𑀬𑀦𑁆𑀢𑀺 𑀅𑀳𑀁 𑀮𑀪𑁂𑀬𑁆𑀬𑀫𑁂𑀯𑀸𑀢𑀺 𑀏𑀯𑀫𑁂𑀢𑀁 𑀅𑀯𑀥𑀸𑀭𑀡𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀅𑀳𑀫𑁂𑀯 𑀮𑀪𑁂𑀬𑁆𑀬𑀦𑁆𑀢𑀺 𑀇𑀘𑁆𑀙𑀸 𑀦𑀸𑀢𑀺𑀫𑀳𑀸𑀲𑀸𑀯𑀚𑁆𑀚𑀸’’𑀢𑀺, 𑀅𑀜𑁆𑀜𑀣𑀸 𑀬𑀣𑀸𑀭𑀼𑀢𑀯𑀲𑁂𑀦 𑀅𑀯𑀥𑀸𑀭𑀡𑁂 𑀕𑀬𑁆𑀳𑀫𑀸𑀦𑁂 ‘‘𑀦 𑀅𑀜𑁆𑀜𑁂 𑀮𑀪𑁂𑀬𑁆𑀬𑀼’’𑀦𑁆𑀢𑀺 𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄 𑀲𑀺𑀬𑀸𑀢𑀺. 𑀧𑀸𑀲𑀸𑀤𑀺𑀓𑁄 𑀳𑁄𑀢𑀻𑀢𑀺 𑀇𑀤𑀁 𑀢𑀲𑁆𑀲 𑀅𑀕𑁆𑀕𑀸𑀲𑀦𑀸𑀤𑀺𑀧𑀘𑁆𑀘𑀸𑀲𑀻𑀲𑀦𑀸𑀬 𑀓𑀸𑀭𑀡𑀤𑀲𑁆𑀲𑀦𑀁.

𑀅𑀦𑀼𑀫𑁄𑀤𑀦𑀦𑁆𑀢𑀺 𑀫𑀗𑁆𑀕𑀮𑀸𑀫𑀗𑁆𑀕𑀮𑁂𑀲𑀼 𑀅𑀦𑀼𑀫𑁄𑀤𑀦𑀸𑀯𑀲𑁂𑀦 𑀧𑀯𑀢𑁆𑀢𑁂𑀢𑀩𑁆𑀩𑀥𑀫𑁆𑀫𑀓𑀣𑀁. 𑀔𑀡𑁆𑀟𑀸𑀦𑀼𑀫𑁄𑀤𑀦𑀦𑁆𑀢𑀺 𑀅𑀦𑀼𑀫𑁄𑀤𑀦𑁂𑀓𑀤𑁂𑀲𑀁. ‘‘𑀧𑀼𑀩𑁆𑀩𑁂 𑀅𑀦𑀼𑀫𑁄𑀤𑀺𑀢𑀧𑀼𑀩𑁆𑀩𑁄 𑀅𑀦𑀼𑀫𑁄𑀤𑀢𑀽’’𑀢𑀺 𑀅𑀯𑀢𑁆𑀯𑀸 𑀣𑁂𑀭𑁂𑀦 𑀯𑀼𑀢𑁆𑀢𑀫𑀢𑁆𑀢𑁂𑀬𑁂𑀯.

𑀢𑀸𑀤𑀺𑀲𑁂𑀲𑀼 𑀞𑀸𑀦𑁂𑀲𑀽𑀢𑀺 𑀢𑀸𑀤𑀺𑀲𑁂𑀲𑀼 𑀧𑁂𑀲𑀮𑀸𑀦𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀯𑀲𑀦𑀝𑁆𑀞𑀸𑀦𑁂𑀲𑀼. 𑀲𑀩𑁆𑀩𑀫𑁆𑀧𑀺 𑀭𑀢𑀺𑀁 𑀧𑀯𑀢𑁆𑀢𑀦𑀢𑁄 𑀲𑀩𑁆𑀩𑀭𑀢𑁆𑀢𑀺𑀓𑀸𑀦𑀺. 𑀯𑀺𑀦𑀺𑀘𑁆𑀙𑀬𑀓𑀼𑀲𑀮𑀸𑀦𑀦𑁆𑀢𑀺 𑀅𑀦𑁂𑀓𑀯𑀺𑀳𑀺𑀢𑁂𑀲𑀼 𑀓𑀗𑁆𑀔𑀝𑁆𑀞𑀸𑀦𑀺𑀬𑁂𑀲𑀼 𑀓𑀗𑁆𑀔𑀸𑀯𑀺𑀦𑀬𑀦𑀸𑀬 𑀢𑀁 𑀢𑀁 𑀧𑀜𑁆𑀳𑀸𑀦𑀁 𑀯𑀺𑀦𑀺𑀘𑁆𑀙𑀬𑁂 𑀓𑀼𑀲𑀮𑀸𑀦𑀁 𑀙𑁂𑀓𑀸𑀦𑀁. 𑀢𑁂𑀲𑀼 𑀢𑁂𑀲𑀼 𑀥𑀫𑁆𑀫𑀓𑀣𑀺𑀓𑁂𑀲𑀼 𑀅𑀚𑁆𑀛𑀺𑀝𑁆𑀞𑁂𑀲𑀼 𑀯𑀸𑀭𑁂𑀦 𑀥𑀫𑁆𑀫𑀁 𑀓𑀣𑁂𑀦𑁆𑀢𑁂𑀲𑀼 ‘‘𑀅𑀬𑀁 𑀩𑁆𑀬𑀢𑁆𑀢𑁄’’𑀢𑀺 𑀥𑀫𑁆𑀫𑀚𑁆𑀛𑁂𑀲𑀓𑁂𑀦 𑀅𑀚𑁆𑀛𑀺𑀝𑁆𑀞𑀢𑁆𑀢𑀸 𑀑𑀓𑀸𑀲𑀁 𑀅𑀮𑀪𑀫𑀸𑀦𑁄.

𑀲𑀓𑁆𑀓𑀘𑁆𑀘𑀜𑁆𑀘 ¶ 𑀓𑀭𑁂𑀬𑁆𑀬𑀼𑀦𑁆𑀢𑀺 𑀪𑀺𑀓𑁆𑀔𑀽 𑀬𑀁 𑀫𑀫 𑀅𑀪𑀺𑀯𑀸𑀤𑀦𑀧𑀘𑁆𑀘𑀼𑀝𑁆𑀞𑀸𑀦𑀜𑁆𑀚𑀮𑀺𑀓𑀫𑁆𑀫𑀲𑀸𑀫𑀻𑀘𑀺𑀓𑀫𑁆𑀫𑀸𑀤𑀺𑀁 𑀓𑀭𑁄𑀦𑁆𑀢𑀺. 𑀢𑀁 𑀆𑀤𑀭𑁂𑀦𑁂𑀯 𑀓𑀭𑁂𑀬𑁆𑀬𑀼𑀁, 𑀬𑀜𑁆𑀘 𑀫𑁂 𑀧𑀭𑀺𑀓𑁆𑀔𑀸𑀭𑀚𑀸𑀢𑀁 𑀧𑀝𑀺𑀬𑀸𑀤𑁂𑀦𑁆𑀢𑀺, 𑀢𑀫𑁆𑀧𑀺 𑀲𑀼𑀦𑁆𑀤𑀭𑀁 𑀲𑀫𑁆𑀫𑀤𑁂𑀯 𑀅𑀪𑀺𑀲𑀗𑁆𑀔𑀢𑀁 𑀓𑀭𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀪𑀸𑀭𑀺𑀬𑀦𑁆𑀢𑀺 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀕𑀭𑀼𑀓𑀸𑀢𑀩𑁆𑀩𑀁. 𑀏𑀢𑀁 𑀯𑀺𑀥𑀺𑀦𑁆𑀢𑀺 𑀏𑀢𑀁 ‘‘𑀲𑀓𑁆𑀓𑀭𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑀓𑁆𑀓𑀸𑀭𑀸𑀤𑀺𑀯𑀺𑀥𑀺𑀁. 𑀢𑁂𑀦𑀸𑀢𑀺 𑀢𑁂𑀦 𑀓𑀸𑀭𑀡𑁂𑀦, 𑀩𑀸𑀳𑀼𑀲𑀘𑁆𑀘𑀸𑀤𑀺𑀕𑀼𑀡𑀯𑀺𑀲𑁂𑀲𑀯𑀢𑁄 𑀏𑀯 𑀲𑀓𑁆𑀓𑀸𑀭𑀸𑀤𑀻𑀦𑀁 𑀅𑀭𑀳𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀏𑀯𑀭𑀽𑀧𑀦𑁆𑀢𑀺 𑀈𑀤𑀺𑀲𑀁 ‘‘𑀧𑀺𑀬𑁄 𑀕𑀭𑀽’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁭.𑁩𑁭) 𑀯𑀼𑀢𑁆𑀢𑀧𑁆𑀧𑀓𑀸𑀭𑀁. 𑀏𑀯𑀁 𑀓𑀭𑁂𑀬𑁆𑀬𑀼𑀦𑁆𑀢𑀺 𑀏𑀯𑀁 ‘‘𑀲𑀓𑁆𑀓𑀭𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀲𑀓𑁆𑀓𑀸𑀭𑀸𑀤𑀺𑀁 𑀓𑀭𑁂𑀬𑁆𑀬𑀼𑀁. 𑀏𑀲 𑀦𑀬𑁄𑀢𑀺 𑀬𑁄𑀬𑀁 𑀪𑀺𑀓𑁆𑀔𑀼𑀯𑀸𑀭𑁂 𑀯𑀼𑀢𑁆𑀢𑀯𑀺𑀥𑀺, 𑀏𑀲𑁂𑀯 𑀦𑀬𑁄. 𑀇𑀢𑁄 𑀧𑀭𑁂𑀲𑀼 𑀪𑀺𑀓𑁆𑀔𑀼𑀦𑀻𑀯𑀸𑀭𑀸𑀤𑀻𑀲𑀼 𑀯𑀸𑀭𑁂𑀲𑀼.

𑀅𑀳𑀫𑁂𑀯 𑀮𑀸𑀪𑀻 𑀅𑀲𑁆𑀲𑀦𑁆𑀢𑀺 𑀏𑀢𑁆𑀣𑀸𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀯𑀥𑀸𑀭𑀡𑀁 𑀕𑀳𑁂𑀢𑀩𑁆𑀩𑀁. 𑀧𑀺𑀡𑁆𑀟𑀧𑀸𑀢𑀲𑁆𑀲 𑀧𑀡𑀻𑀢𑀢𑀸 𑀉𑀧𑀲𑁂𑀘𑀦𑀸𑀤𑀺𑀯𑀲𑁂𑀦𑀸𑀢𑀺 𑀆𑀳 ‘‘𑀲𑀧𑁆𑀧𑀺𑀢𑁂𑀮𑀫𑀥𑀼𑀲𑀓𑁆𑀔𑀭𑀸𑀤𑀺𑀧𑀽𑀭𑀺𑀢𑀸𑀦’’𑀦𑁆𑀢𑀺 ¶ . 𑀫𑀜𑁆𑀘𑀧𑀻𑀞𑀸𑀤𑀻𑀦𑀦𑁆𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀉𑀢𑀼𑀲𑀧𑁆𑀧𑀸𑀬𑀸𑀦𑀁 𑀦𑀺𑀯𑀸𑀢𑀸𑀦𑀁 𑀨𑀲𑁆𑀲𑀺𑀢𑀢𑀮𑀸𑀦𑀁 𑀧𑀺𑀳𑀺𑀢𑀤𑁆𑀯𑀸𑀭𑀓𑀯𑀸𑀴𑀯𑀸𑀢𑀧𑀸𑀦𑀸𑀤𑀻𑀦𑀫𑁆𑀧𑀺 𑀧𑀡𑀻𑀢𑀲𑁂𑀦𑀸𑀲𑀦𑀪𑀸𑀯𑀢𑁄. 𑀆𑀤𑀺-𑀲𑀤𑁆𑀤𑁂𑀦 𑀯𑀸 𑀢𑁂𑀲𑀫𑁆𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑀢𑁆𑀣𑀸𑀧𑀻𑀢𑀺 𑀲𑀩𑁆𑀩𑁂𑀲𑀼 𑀢𑁂𑀲𑀼 𑀘𑀢𑀽𑀲𑀼𑀧𑀺 𑀧𑀘𑁆𑀘𑀬𑀯𑀸𑀭𑁂𑀲𑀼.

𑁬𑁧. 𑀓𑀸𑀬𑀓𑀫𑁆𑀫𑀁 𑀤𑀺𑀲𑁆𑀯𑀸𑀢𑀺 𑀇𑀤𑀁 𑀦 𑀓𑀸𑀬𑀓𑀫𑁆𑀫𑀁 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀁, 𑀓𑀸𑀬𑀓𑀫𑁆𑀫𑀼𑀦𑀸 𑀧𑀦 𑀲𑀳 𑀧𑀯𑀢𑁆𑀢𑀁 𑀑𑀝𑁆𑀞𑀧𑀭𑀺𑀧𑁆𑀨𑀦𑁆𑀤𑀦𑀁 𑀪𑀸𑀓𑀼𑀝𑀺𑀓𑀭𑀡𑀁 𑀓𑀸𑀬𑀗𑁆𑀕𑀸𑀤𑀺𑀤𑀲𑁆𑀲𑀦𑀁 𑀓𑀸𑀬𑀓𑀫𑁆𑀫𑀤𑀲𑁆𑀲𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀘𑀻𑀓𑀫𑁆𑀫𑀁 𑀲𑀼𑀢𑁆𑀯𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄, 𑀢𑀲𑁆𑀫𑀸 𑀓𑀸𑀬𑀯𑀺𑀓𑀸𑀭𑀚𑀦𑀓𑀸 𑀥𑀫𑁆𑀫𑀸 ‘‘𑀤𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀸, 𑀯𑀘𑀻𑀯𑀺𑀓𑀸𑀭𑀚𑀦𑀓𑀸 ‘‘𑀲𑀽𑀬𑀦𑁆𑀢𑀻’’𑀢𑀺. 𑀢𑀢𑁄 𑀏𑀯 𑀘 𑀢𑁂 𑀧𑀘𑁆𑀘𑀓𑁆𑀔𑀓𑀸𑀮𑁂 𑀲𑀫𑁆𑀫𑀼𑀔𑀓𑀸𑀮𑁂 𑀤𑀺𑀲𑁆𑀲𑀦𑁆𑀢𑀺 𑀦𑀸𑀫. 𑀢𑀺𑀭𑁄𑀓𑁆𑀔𑀓𑀸𑀮𑁂 𑀅𑀲𑀫𑁆𑀫𑀼𑀔𑀓𑀸𑀮𑁂 𑀲𑀽𑀬𑀦𑁆𑀢𑀺 𑀦𑀸𑀫. 𑀅𑀦𑀼𑀭𑀽𑀧𑀢𑁄 𑀕𑀳𑀡𑀁 𑀅𑀦𑀼𑀕𑁆𑀕𑀳𑁄. 𑀆𑀭𑀜𑁆𑀜𑀺𑀓𑀢𑁆𑀢𑀦𑁆𑀢𑀺 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀥𑀼𑀢𑀕𑀼𑀡𑀢𑁆𑀢𑀸𑀦𑀼𑀭𑀽𑀧𑀢𑁄 𑀕𑀡𑁆𑀳𑀸𑀢𑀺. 𑀢𑁂𑀦𑀸𑀳 ‘‘𑀆𑀭𑀜𑁆𑀜𑀺𑀓𑀢𑁆𑀢𑀁 𑀅𑀦𑀼𑀕𑁆𑀕𑀡𑁆𑀳𑀸𑀢𑀻’’𑀢𑀺. 𑀅𑀭𑀜𑁆𑀜𑁂 𑀦𑀺𑀯𑀸𑀲𑁄 𑀅𑀲𑁆𑀲𑀸𑀢𑀺 𑀆𑀭𑀜𑁆𑀜𑀺𑀓𑁄. 𑀧𑀦𑁆𑀢𑀁 𑀧𑀭𑀺𑀬𑀦𑁆𑀢𑀁 𑀤𑀽𑀭𑀢𑀭𑀁 𑀲𑁂𑀦𑀸𑀲𑀦𑀁 𑀅𑀲𑁆𑀲𑀸𑀢𑀺 𑀧𑀦𑁆𑀢𑀲𑁂𑀦𑀸𑀲𑀦𑁄. 𑀢𑀁 𑀧𑀦 𑀅𑀢𑁆𑀣𑀫𑀢𑁆𑀢𑁂𑀦 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀧𑀦𑁆𑀢𑀲𑁂𑀦𑀸𑀲𑀦𑁂 𑀯𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀸𑀲𑀗𑁆𑀔𑀸𑀢𑀸𑀦𑀁 𑀧𑀺𑀡𑁆𑀟𑀸𑀦𑀁 𑀧𑀸𑀢𑁄 𑀧𑀺𑀡𑁆𑀟𑀸𑀧𑀸𑀢𑁄, 𑀢𑀁 𑀧𑀺𑀡𑁆𑀟𑀧𑀸𑀢𑀁 𑀉𑀜𑁆𑀙𑀢𑀺 𑀕𑀯𑁂𑀲𑀢𑀻𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑁄. 𑀧𑀺𑀡𑁆𑀟𑀸𑀬 𑀧𑀢𑀺𑀢𑀼𑀁 𑀘𑀭𑀺𑀢𑀼𑀁 𑀯𑀢𑀫𑁂𑀢𑀲𑁆𑀲𑀸𑀢𑀺 𑀯𑀸 𑀧𑀺𑀡𑁆𑀟𑀧𑀸𑀢𑀺, 𑀲𑁄 𑀏𑀯 𑀧𑀺𑀡𑁆𑀟𑀧𑀸𑀢𑀺𑀓𑁄. 𑀤𑀸𑀦𑀢𑁄 𑀅𑀯𑀔𑀡𑁆𑀟𑀦𑀢𑁄 𑀅𑀧𑁂𑀢𑀁 𑀅𑀧𑀤𑀸𑀦𑀁, 𑀲𑀳 𑀅𑀧𑀤𑀸𑀦𑁂𑀦 𑀲𑀧𑀤𑀸𑀦𑀁, 𑀅𑀦𑀯𑀔𑀡𑁆𑀟𑀦𑀁. 𑀅𑀦𑀼𑀖𑀭𑀁 𑀘𑀭𑀡𑀲𑀻𑀮𑁄 𑀲𑀧𑀤𑀸𑀦𑀘𑀸𑀭𑀻. 𑀉𑀦𑁆𑀦𑀢𑀪𑀸𑀯𑁂𑀦 𑀧𑀁𑀲𑀼𑀓𑀽𑀮𑀁 𑀯𑀺𑀬 𑀧𑀁𑀲𑀼𑀓𑀽𑀮𑀁, 𑀧𑀁𑀲𑀼 𑀯𑀺𑀬 𑀯𑀸 𑀓𑀼𑀘𑁆𑀙𑀺𑀢𑀪𑀸𑀯𑀁 𑀉𑀮𑀢𑀺 𑀕𑀘𑁆𑀙𑀢𑀻𑀢𑀺 𑀧𑀁𑀲𑀼𑀓𑀽𑀮𑀁, 𑀢𑀲𑁆𑀲 𑀥𑀸𑀭𑀡𑀁 𑀇𑀥 𑀧𑀁𑀲𑀼𑀓𑀽𑀮𑀁, 𑀢𑀁 𑀲𑀻𑀮𑀫𑀲𑁆𑀲𑀸𑀢𑀺 𑀧𑀁𑀲𑀼𑀓𑀽𑀮𑀺𑀓𑁄.

𑀢𑀻𑀳𑀺 ¶ 𑀓𑀸𑀭𑀡𑁂𑀳𑀺 𑀮𑀽𑀔𑀁 𑀯𑁂𑀤𑀺𑀢𑀩𑁆𑀩𑀁 𑀅𑀕𑁆𑀖𑀨𑀲𑁆𑀲𑀯𑀡𑁆𑀡𑀧𑀭𑀺𑀳𑀸𑀦𑀺𑀢𑁄 𑀅𑀧𑀁𑀲𑀼𑀓𑀽𑀮𑀫𑁆𑀧𑀺, 𑀓𑁄 𑀧𑀦 𑀯𑀸𑀤𑁄 𑀧𑀁𑀲𑀼𑀓𑀽𑀮𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀣𑀽𑀮𑀤𑀻𑀖𑀲𑀼𑀢𑁆𑀢𑀓𑁂𑀦𑀸𑀢𑀺 𑀣𑀽𑀮𑁂𑀦 𑀑𑀮𑀫𑁆𑀩𑀫𑀸𑀦𑁂𑀦 𑀤𑀻𑀖𑀲𑀼𑀢𑁆𑀢𑀓𑁂𑀦. 𑀯𑀡𑁆𑀡𑁂𑀦𑀸𑀢𑀺 𑀏𑀢𑁆𑀣 𑀨𑀲𑁆𑀲𑁂𑀦𑀧𑀺 𑀧𑀭𑀺𑀳𑀸𑀬𑀢𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀢𑀜𑁆𑀳𑀺 𑀢𑀢𑁆𑀣 𑀔𑀭𑀨𑀲𑁆𑀲𑀫𑁆𑀧𑀺 𑀳𑁄𑀢𑀺𑀬𑁂𑀯𑀸𑀢𑀺. 𑀓𑀲𑁆𑀫𑀸 𑀧𑀦 𑀧𑀸𑀴𑀺𑀬𑀁 𑀆𑀭𑀜𑁆𑀜𑀺𑀓𑀸𑀤𑀺𑀕𑁆𑀕𑀳𑀡𑁂𑀦 𑀘𑀢𑁆𑀢𑀸𑀭𑁄𑀯 𑀥𑀼𑀢𑀕𑀼𑀡𑀸 𑀯𑀼𑀢𑁆𑀢𑀸𑀢𑀺? 𑀧𑀥𑀸𑀦𑀢𑁆𑀢𑀸, 𑀢𑀕𑁆𑀕𑀳𑀡𑁂𑀦𑁂𑀯 𑀘 𑀇𑀢𑁄 𑀧𑀭𑁂𑀲𑀫𑁆𑀧𑀺 𑀲𑀼𑀔𑀧𑀭𑀺𑀪𑁄𑀕𑀢𑀸𑀬 𑀕𑀳𑀡𑀲𑀫𑁆𑀪𑀯𑀢𑁄. 𑀬𑁄 𑀳𑀺 𑀆𑀭𑀜𑁆𑀜𑀺𑀓𑁄 𑀧𑀦𑁆𑀢𑀲𑁂𑀦𑀸𑀲𑀦𑁄, 𑀢𑀲𑁆𑀲 𑀅𑀩𑁆𑀪𑁄𑀓𑀸𑀲𑀺𑀓-𑀭𑀼𑀓𑁆𑀔𑀫𑀽𑀮𑀺𑀓-𑀦𑁂𑀲𑀚𑁆𑀚𑀺𑀓-𑀬𑀣𑀸𑀲𑀦𑁆𑀣𑀢𑀺𑀓-𑀲𑁄𑀲𑀸𑀦𑀺𑀓𑀗𑁆𑀕𑀸𑀦𑀺 𑀲𑀼𑀧𑀭𑀺𑀧𑀽𑀭𑀸𑀦𑀺. 𑀬𑁄 𑀘 𑀧𑀺𑀡𑁆𑀟𑀧𑀸𑀢𑀺𑀓𑁄 𑀲𑀧𑀤𑀸𑀦𑀘𑀸𑀭𑀻 𑀘, 𑀢𑀲𑁆𑀲 𑀧𑀢𑁆𑀢𑀧𑀺𑀡𑁆𑀟𑀺𑀓𑀔𑀮𑀼𑀧𑀘𑁆𑀙𑀸𑀪𑀢𑁆𑀢𑀺𑀓𑀏𑀓𑀸𑀲𑀦𑀺𑀓𑀗𑁆𑀕𑀸𑀦𑀺. 𑀬𑁄 𑀧𑀦 𑀧𑀁𑀲𑀼𑀓𑀽𑀮𑀺𑀓𑁄, 𑀢𑀲𑁆𑀲 ¶ 𑀢𑁂𑀘𑀻𑀯𑀭𑀺𑀓𑀗𑁆𑀕𑀁 𑀲𑀼𑀧𑀭𑀺𑀳𑀭𑀫𑁂𑀯𑀸𑀢𑀺. 𑀧𑀥𑀸𑀦𑀢𑁆𑀢𑀸 𑀳𑀺 𑀪𑀕𑀯𑀢𑀸𑀧𑀺 ‘‘𑀓𑀤𑀸𑀳𑀁 𑀦𑀦𑁆𑀤𑀁 𑀧𑀲𑁆𑀲𑁂𑀬𑁆𑀬𑀁, 𑀆𑀭𑀜𑁆𑀜𑀁 𑀧𑀁𑀲𑀼𑀓𑀽𑀮𑀺𑀓’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁨.𑁨𑁪𑁨; 𑀦𑁂𑀢𑁆𑀢𑀺. 𑁧𑁦𑁦) 𑀢𑀢𑁆𑀣 𑀢𑀢𑁆𑀣 𑀆𑀭𑀜𑁆𑀜𑀺𑀓𑀸𑀤𑀬𑁄 𑀏𑀯 𑀕𑀬𑁆𑀳𑀦𑁆𑀢𑀺. 𑀏𑀢𑁆𑀢𑀓𑀸𑀢𑀺 𑀧𑀸𑀴𑀺𑀬𑀁 𑀆𑀕𑀢𑀸𑀦𑀁 𑀧𑀭𑀺𑀘𑁆𑀙𑀺𑀚𑁆𑀚 𑀕𑀳𑀡𑀫𑁂𑀢𑀁, 𑀦 𑀏𑀢𑁆𑀢𑀓𑀸 𑀲𑀩𑁆𑀩𑁂𑀧𑀺 𑀏𑀓𑀲𑁆𑀲 𑀏𑀓𑀁𑀲𑀢𑁄 𑀲𑀫𑁆𑀪𑀯𑀦𑁆𑀢𑀺, 𑀦𑀸𑀧𑀺 𑀏𑀢𑁆𑀢𑀓𑀸𑀬𑁂𑀯 𑀧𑀸𑀧𑀥𑀫𑁆𑀫𑀸 𑀧𑀳𑀸𑀢𑀩𑁆𑀩𑀸. 𑀦 𑀳𑀺 𑀫𑀓𑁆𑀔𑀧𑀴𑀸𑀲𑀸𑀤𑀻𑀦𑀁 𑀅𑀧𑁆𑀧𑀳𑀻𑀦𑀪𑀸𑀯𑁂𑀧𑀺 𑀲𑀩𑁆𑀭𑀳𑁆𑀫𑀘𑀸𑀭𑀻 𑀦𑁂𑀯 𑀲𑀓𑁆𑀓𑀭𑁄𑀦𑁆𑀢𑀺…𑀧𑁂… 𑀦 𑀧𑀽𑀚𑁂𑀦𑁆𑀢𑀻𑀢𑀺.

𑀢𑀫𑀢𑁆𑀣𑀦𑁆𑀢𑀺 ‘‘𑀬𑀲𑁆𑀲 𑀓𑀲𑁆𑀲𑀘𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑀢𑁆𑀣𑀁. 𑀉𑀧𑀫𑀸𑀬 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄𑀢𑀺 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀉𑀤𑀸𑀳𑀭𑀡𑁂𑀦 𑀯𑀺𑀪𑀸𑀯𑁂𑀦𑁆𑀢𑁄. 𑀅𑀳𑀺𑀓𑀼𑀡𑀧𑀸𑀤𑀻𑀦𑀁 𑀅𑀢𑀺𑀧𑀝𑀺𑀓𑀽𑀮𑀚𑀺𑀕𑀼𑀘𑁆𑀙𑀦𑀻𑀬𑀢𑀸 𑀅𑀢𑀺𑀯𑀺𑀬 𑀤𑀼𑀕𑁆𑀕𑀦𑁆𑀥𑀢𑀸𑀬. 𑀲𑀸 𑀘 𑀅𑀳𑀻𑀦𑀁 𑀢𑀺𑀔𑀺𑀡𑀓𑁄𑀧𑀢𑀸𑀬, 𑀓𑀼𑀓𑁆𑀓𑀼𑀭𑀫𑀦𑀼𑀲𑁆𑀲𑀸𑀦𑀁 𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑀢𑀸𑀬 𑀲𑀭𑀻𑀭𑀲𑁆𑀲 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺. 𑀇𑀫𑁂𑀲𑀦𑁆𑀢𑀺 𑀅𑀳𑀺𑀆𑀤𑀻𑀦𑀁. 𑀯𑀟𑁆𑀠𑁂𑀢𑁆𑀯𑀸𑀢𑀺 𑀉𑀧𑀭𑀽𑀧𑀭𑀺 𑀔𑀺𑀧𑀦𑁂𑀦 𑀭𑀘𑀺𑀢𑀁 𑀓𑀢𑁆𑀯𑀸. 𑀢𑀁 𑀧𑀦 𑀯𑀟𑁆𑀠𑀺𑀢𑀁 𑀢𑁂𑀦 𑀘 𑀪𑀸𑀚𑀦𑀁 𑀧𑀽𑀭𑀺𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀯𑀟𑁆𑀠𑁂𑀢𑁆𑀯𑀸 𑀧𑀭𑀺𑀧𑀽𑀭𑁂𑀢𑁆𑀯𑀸’’𑀢𑀺. 𑀚𑀦𑀲𑁆𑀲 𑀤𑀲𑁆𑀲𑀦𑀬𑁄𑀕𑁆𑀬𑀁 𑀤𑀲𑁆𑀲𑀦𑀻𑀬𑀁 𑀚𑀜𑁆𑀜𑀁, 𑀢𑀁 𑀧𑀭𑀫𑀧𑀭𑀺𑀲𑀼𑀤𑁆𑀥𑀁 𑀫𑀦𑁄𑀳𑀭𑀜𑁆𑀘 𑀳𑁄𑀢𑀻𑀢𑀺 𑀆𑀳 ‘‘𑀘𑁄𑀓𑁆𑀔𑀘𑁄𑀓𑁆𑀔’’𑀦𑁆𑀢𑀺. 𑀅𑀪𑀺𑀦𑀯𑀦𑀺𑀯𑀺𑀝𑁆𑀞𑀸 𑀫𑀳𑀸𑀫𑀸𑀢𑀸 𑀯𑀥𑀼𑀓𑀸. 𑀲𑀸 𑀧𑀦 𑀧𑀼𑀢𑁆𑀢𑀮𑀸𑀪𑀬𑁄𑀕𑁆𑀬𑀢𑀁 𑀉𑀧𑀸𑀤𑀸𑀬 𑀫𑀗𑁆𑀕𑀮𑀯𑀘𑀦𑁂𑀦 ‘‘𑀚𑀦𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲𑀸 𑀦𑀺𑀬𑁆𑀬𑀫𑀸𑀦𑀁 𑀧𑀡𑁆𑀡𑀸𑀓𑀸𑀭𑀁 𑀚𑀦𑀺𑀬𑀸 𑀳𑀭𑀢𑀻𑀢𑀺 𑀚𑀜𑁆𑀜𑀁. 𑀉𑀪𑀬𑀢𑁆𑀣𑀸𑀢𑀺 𑀅𑀢𑁆𑀣𑀤𑁆𑀯𑀬𑁂. 𑀧𑀼𑀦𑀭𑀼𑀢𑁆𑀢𑀦𑁆𑀢𑀺 𑀆𑀫𑁂𑀟𑀺𑀢𑀯𑀘𑀦𑀫𑀸𑀳. 𑀦 𑀫𑀦𑀸𑀧𑀁 𑀏𑀢𑀲𑁆𑀲𑀸𑀢𑀺 𑀅𑀫𑀦𑀸𑀧𑁄, 𑀢𑀲𑁆𑀲 𑀪𑀸𑀯𑁄 𑀅𑀫𑀦𑀸𑀧𑀢𑀸, 𑀢𑀣𑀸𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀢𑀺 𑀆𑀳 ‘‘𑀅𑀫𑀦𑀸𑀧𑀁 𑀇𑀤𑀦𑁆𑀢𑀺…𑀧𑁂… 𑀅𑀥𑀺𑀯𑀘𑀦’’𑀦𑁆𑀢𑀺. 𑀩𑀼𑀤𑁆𑀥𑀯𑁂𑀲𑀢𑁆𑀢𑀸 𑀮𑀺𑀗𑁆𑀕𑀲𑁆𑀲 𑀧𑀭𑀺𑀲𑀼𑀤𑁆𑀥𑀓𑀁𑀲𑀧𑀸𑀢𑀺𑀲𑀤𑀺𑀲𑀓𑀸. 𑀓𑀼𑀡𑀧𑀭𑀘𑀦𑀁 𑀯𑀺𑀬 𑀇𑀘𑁆𑀙𑀸𑀯𑀘𑀭𑁂𑀳𑀺 𑀲𑀦𑁆𑀢𑀸𑀦𑀲𑁆𑀲 𑀪𑀭𑀺𑀢𑀪𑀸𑀯𑁄. 𑀲𑁄 𑀧𑀦 𑀢𑁂𑀲𑀁 𑀅𑀧𑁆𑀧𑀳𑀻𑀦𑀢𑀸𑀬𑀸𑀢𑀺 𑀆𑀳 ‘‘𑀇𑀘𑁆𑀙𑀸𑀯𑀘𑀭𑀸𑀦𑀁 𑀅𑀧𑁆𑀧𑀳𑀸𑀦’’𑀦𑁆𑀢𑀺.

𑁬𑁨. ‘‘𑀢𑁂𑀦 𑀕𑀸𑀫𑀦𑁆𑀢𑀯𑀺𑀳𑀸𑀭𑀁 𑀅𑀦𑀼𑀕𑁆𑀕𑀡𑁆𑀳𑀸𑀢𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀆𑀭𑀜𑁆𑀜𑀺𑀓𑀢𑁆𑀢’’𑀦𑁆𑀢𑀺 𑀧𑀦 𑀧𑁄𑀢𑁆𑀣𑀓𑁂 𑀮𑀺𑀔𑀺𑀢𑀁. 𑀦 𑀳𑀺 𑀲𑀼𑀓𑁆𑀓𑀧𑀓𑁆𑀔𑁂 𑀧𑀸𑀴𑀺𑀬𑀁 𑀆𑀭𑀜𑁆𑀜𑀺𑀓𑀕𑁆𑀕𑀳𑀡𑀁 𑀅𑀢𑁆𑀣𑀺, 𑀲𑀢𑀺 𑀘 𑀇𑀘𑁆𑀙𑀸𑀯𑀘𑀭𑀧𑁆𑀧𑀳𑀸𑀦𑁂 𑀕𑀸𑀫𑀦𑁆𑀢𑀯𑀺𑀳𑀸𑀭𑁄 𑀏𑀓𑀦𑁆𑀢𑁂𑀦 𑀦 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑁄, 𑀇𑀘𑁆𑀙𑀺𑀢𑀩𑁆𑀩𑁄𑀯 𑀢𑀸𑀤𑀺𑀲𑀸𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑀝𑀺𑀘𑁆𑀙𑀸𑀤𑀦𑀢𑁄 ¶ . 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀅𑀧𑁆𑀧𑀺𑀘𑁆𑀙𑀢𑀸𑀲𑀫𑀼𑀝𑁆𑀞𑀸𑀦𑁂𑀳𑀻’’𑀢𑀺𑀆𑀤𑀺. 𑀲𑀸𑀮𑀺𑀯𑀭𑀪𑀢𑁆𑀢𑀭𑀘𑀦𑀁 𑀯𑀺𑀬 𑀇𑀘𑁆𑀙𑀸𑀯𑀘𑀭𑀧𑁆𑀧𑀳𑀸𑀦𑀁 𑀫𑀦𑀼𑀜𑁆𑀜𑀪𑀸𑀯𑀢𑁄 𑀢𑀺𑀢𑁆𑀢𑀺𑀳𑁂𑀢𑀼𑀢𑁄 𑀘.

𑁬𑁩. 𑀫𑀁 ¶ 𑀢𑀦𑁆𑀢𑀺 𑀘 𑀉𑀧𑀬𑁄𑀕𑀯𑀘𑀦𑀁 𑀧𑀝𑀺-𑀲𑀤𑁆𑀤𑀬𑁄𑀕𑁂𑀦, 𑀅𑀢𑁆𑀣𑁄 𑀧𑀦 𑀲𑀫𑁆𑀧𑀤𑀸𑀦𑀫𑁂𑀯𑀸𑀢𑀺 𑀆𑀳 ‘‘𑀫𑀬𑁆𑀳𑀁 𑀢𑀼𑀬𑁆𑀳’’𑀦𑁆𑀢𑀺 𑀘. ‘‘𑀲𑀫𑀬𑁂’’𑀢𑀺 𑀪𑀼𑀫𑁆𑀫𑀢𑁆𑀣𑁂 ‘‘𑀲𑀫𑀬’’𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑀁. 𑀕𑀺𑀚𑁆𑀛𑀓𑀽𑀝𑀧𑀡𑁆𑀟𑀯𑀇𑀲𑀺𑀕𑀺𑀮𑀺𑀯𑁂𑀪𑀸𑀭𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑀸𑀦𑀁 𑀯𑀲𑁂𑀦 𑀲𑀫𑀦𑁆𑀢𑀢𑁄 𑀕𑀺𑀭𑀺𑀧𑀭𑀺𑀓𑁆𑀔𑁂𑀧𑁂𑀦. 𑀭𑀸𑀚𑀕𑀳𑁂𑀢𑀺 𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀦𑁆𑀢𑀺 𑀆𑀳 ‘‘𑀢𑀁 𑀦𑀺𑀲𑁆𑀲𑀸𑀬 𑀯𑀺𑀳𑀭𑀸𑀫𑀻’’𑀢𑀺.

𑀧𑀼𑀭𑀸𑀡𑀬𑀸𑀦𑀓𑀸𑀭𑀧𑀼𑀢𑁆𑀢𑁄𑀢𑀺 𑀧𑀼𑀭𑀸𑀡𑁂 𑀧𑀩𑁆𑀩𑀚𑀺𑀢𑀢𑁄 𑀧𑀼𑀩𑁆𑀩𑁂 𑀬𑀸𑀦𑀓𑀸𑀭𑀧𑀼𑀢𑁆𑀢𑁄 𑀢𑀣𑀸𑀧𑀜𑁆𑀜𑀸𑀢𑁄. 𑀚𑀺𑀫𑁆𑀳𑀦𑁆𑀢𑀺 𑀕𑁄𑀫𑀼𑀢𑁆𑀢𑀓𑀼𑀝𑀺𑀮𑀁. 𑀢𑁂𑀦𑀸𑀳 ‘‘𑀲𑀧𑁆𑀧𑀕𑀢𑀫𑀕𑁆𑀕𑀲𑀤𑀺𑀲’’𑀦𑁆𑀢𑀺. 𑀲𑁄𑀢𑀺 𑀧𑀡𑁆𑀟𑀼𑀧𑀼𑀢𑁆𑀢𑁄. 𑀇𑀢𑀭𑁄𑀢𑀺 𑀲𑀫𑀺𑀢𑀺. 𑀘𑀺𑀦𑁆𑀢𑀺𑀢𑀝𑁆𑀞𑀸𑀦𑀫𑁂𑀯𑀸𑀢𑀺 𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀺𑀢𑀝𑁆𑀞𑀸𑀦𑀫𑁂𑀯 𑀢𑀘𑁆𑀙𑀢𑀺, 𑀢𑀜𑁆𑀘 𑀔𑁄 𑀦 𑀢𑀲𑁆𑀲 𑀘𑀺𑀢𑁆𑀢𑀸𑀦𑀼𑀲𑀸𑀭𑁂𑀦, 𑀅𑀣 𑀔𑁄 𑀅𑀢𑁆𑀢𑀦𑁄 𑀲𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀢𑀘𑁆𑀙𑀦𑁆𑀢𑁄 𑀬𑀸𑀦𑀓𑀸𑀭𑀧𑀼𑀢𑁆𑀢𑁄. 𑀘𑀺𑀢𑁆𑀢𑀦𑁆𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂𑀦 𑀫𑀫 𑀘𑀺𑀢𑁆𑀢𑀁 𑀚𑀸𑀦𑀺𑀢𑁆𑀯𑀸 𑀯𑀺𑀬.

‘‘𑀦 𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁄’’𑀢𑀺 𑀇𑀫𑀺𑀦𑀸𑀯 𑀓𑀫𑁆𑀫𑀨𑀮𑀲𑀤𑁆𑀥𑀸𑀬 𑀅𑀪𑀸𑀯𑁄 𑀦𑁂𑀲𑀁 𑀧𑀓𑀸𑀲𑀺𑀢𑁄𑀢𑀺 𑀆𑀳 ‘‘𑀅𑀲𑁆𑀲𑀤𑁆𑀥𑀸𑀢𑀺 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑁂𑀲𑀼 𑀲𑀤𑁆𑀥𑀸𑀯𑀺𑀭𑀳𑀺𑀢𑀸’’𑀢𑀺. 𑀧𑀩𑁆𑀩𑀚𑀺𑀢𑀸𑀦𑀁 𑀚𑀻𑀯𑀺𑀓𑀸 𑀅𑀢𑁆𑀣𑁄 𑀏𑀢𑁂𑀲𑀦𑁆𑀢𑀺 𑀚𑀻𑀯𑀺𑀓𑀢𑁆𑀣𑀸. 𑀢𑁂𑀦𑀸𑀳 ‘‘𑀇𑀡𑀪𑀬𑀸𑀤𑀻𑀳𑀻’’𑀢𑀺𑀆𑀤𑀺. 𑀓𑁂𑀭𑀸𑀝𑀺𑀓𑀁 𑀯𑀼𑀘𑁆𑀘𑀢𑀺 𑀲𑀸𑀞𑁂𑀬𑁆𑀬𑀁. 𑀲𑀞𑀸𑀦𑀁 𑀕𑀼𑀡𑀯𑀸𑀡𑀺𑀚𑀓𑀸𑀦𑀁 𑀓𑀫𑁆𑀫𑀁 𑀲𑀸𑀞𑁂𑀬𑁆𑀬𑀦𑁆𑀢𑀺 𑀆𑀳 ‘‘𑀲𑀸𑀞𑁂𑀬𑁆𑀬𑀜𑁆𑀳𑀻’’𑀢𑀺𑀆𑀤𑀺. 𑀢𑀼𑀘𑁆𑀙𑀲𑀪𑀸𑀯𑁂𑀦 𑀫𑀸𑀦𑁄 𑀦𑀴𑁄 𑀯𑀺𑀬𑀸𑀢𑀺 𑀦𑀴𑁄, 𑀫𑀸𑀦𑀲𑀗𑁆𑀔𑀸𑀢𑁄 𑀉𑀕𑁆𑀕𑀢𑁄 𑀦𑀴𑁄 𑀏𑀢𑁂𑀲𑀦𑁆𑀢𑀺 𑀉𑀦𑁆𑀦𑀴𑀸. 𑀢𑁂𑀦𑀸𑀳 ‘‘𑀉𑀝𑁆𑀞𑀺𑀢𑀢𑀼𑀘𑁆𑀙𑀫𑀸𑀦𑀸’’𑀢𑀺. 𑀮𑀳𑀼𑀓𑀢𑀸𑀬 𑀯𑀸 𑀘𑀧𑀮𑀸. 𑀨𑀭𑀼𑀲𑀯𑀘𑀦𑀢𑀸𑀬 𑀔𑀭𑀯𑀘𑀦𑀸. 𑀢𑀺𑀭𑀘𑁆𑀙𑀸𑀦𑀓𑀣𑀸𑀩𑀳𑀼𑀮𑀢𑀸𑀬 𑀦𑀺𑀭𑀢𑁆𑀣𑀓𑀯𑀘𑀦𑀧𑀮𑀸𑀧𑀺𑀦𑁄. 𑀅𑀲𑀁𑀯𑀼𑀢𑀓𑀫𑁆𑀫𑀤𑁆𑀯𑀸𑀭𑀸𑀢𑀺 𑀇𑀤𑀁 𑀓𑀫𑁆𑀫𑀤𑁆𑀯𑀸𑀭𑀸𑀤𑀻𑀦𑀁 𑀅𑀲𑀁𑀯𑀼𑀢𑀪𑀸𑀯𑁄 𑀉𑀧𑁆𑀧𑀢𑁆𑀢𑀺𑀤𑁆𑀯𑀸𑀭𑀸𑀦𑀁 𑀅𑀲𑀁𑀯𑀼𑀢𑀢𑀸𑀬 𑀏𑀯 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀣 𑀯𑀸 𑀙𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀽𑀢𑀺 𑀦𑀺𑀫𑀺𑀢𑁆𑀢𑁂 𑀪𑀼𑀫𑁆𑀫𑀁, 𑀙𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀦𑀺𑀫𑀺𑀢𑁆𑀢𑀪𑀽𑀢𑁂𑀲𑀼 𑀅𑀲𑀁𑀯𑀼𑀢𑀓𑀫𑁆𑀫𑀤𑁆𑀯𑀸𑀭𑀸𑀢𑀺 𑀅𑀢𑁆𑀣𑁄. 𑀬𑀸 𑀫𑀢𑁆𑀢𑀸𑀢𑀺 𑀪𑁄𑀚𑀦𑁂 𑀅𑀬𑀼𑀢𑁆𑀢𑀧𑀭𑀺𑀬𑁂𑀲𑀦-𑀅𑀬𑀼𑀢𑁆𑀢𑀧𑀝𑀺𑀕𑁆𑀕𑀳𑀡-𑀅𑀬𑀼𑀢𑁆𑀢𑀧𑀭𑀺𑀪𑁄𑀕𑁂 𑀯𑀚𑁆𑀚𑁂𑀢𑁆𑀯𑀸 𑀬𑀼𑀢𑁆𑀢𑀧𑀭𑀺𑀬𑁂𑀲𑀦-𑀬𑀼𑀢𑁆𑀢𑀧𑀝𑀺𑀕𑁆𑀕𑀳𑀡-𑀬𑀼𑀢𑁆𑀢𑀧𑀭𑀺𑀪𑁄𑀕𑀲𑀗𑁆𑀔𑀸𑀢𑀸 𑀬𑀸 𑀫𑀢𑁆𑀢𑀸 𑀅𑀧𑁆𑀧𑀫𑀢𑁆𑀢𑁂𑀳𑀺 𑀚𑀸𑀦𑀺𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀬𑀼𑀢𑁆𑀢𑀢𑀸’’𑀢𑀺. 𑀚𑀸𑀕𑀭𑁂𑀢𑀺 𑀭𑀢𑁆𑀢𑀺𑀦𑁆𑀤𑀺𑀯𑀁 𑀆𑀯𑀭𑀡𑀺𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀧𑀭𑀺𑀲𑁄𑀥𑀦𑀲𑀗𑁆𑀔𑀸𑀢𑁂 𑀚𑀸𑀕𑀭𑁂. 𑀢𑁂𑀲𑀁 𑀚𑀸𑀕𑀭𑀺𑀢𑀸𑀬 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬 𑀕𑀸𑀭𑀯𑀭𑀳𑀺𑀢𑀸𑀦𑀁 𑀇𑀢𑀭𑀲𑀺𑀓𑁆𑀔𑀸𑀲𑀼 𑀧𑀢𑀺𑀝𑁆𑀞𑀸 𑀏𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀺𑀓𑁆𑀔𑀸𑀧𑀤𑁂𑀲𑀼 𑀩𑀳𑀼𑀮𑀕𑀸𑀭𑀯𑀸 𑀦 𑀳𑁄𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀢𑀫𑁂𑀯 𑀕𑀸𑀭𑀯𑀸𑀪𑀸𑀯𑀁 𑀲𑀭𑀽𑀧𑁂𑀦 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀆𑀧𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀩𑀳𑀼𑀮𑀸’’𑀢𑀺 𑀆𑀳.

𑀧𑀓𑀢𑀺𑀬𑀸𑀧𑀺 ¶ ¶ 𑀲𑀺𑀤𑁆𑀥𑀸𑀬 𑀭𑀢𑀦𑀢𑁆𑀢𑀬𑀲𑀤𑁆𑀥𑀸𑀬 𑀓𑀫𑁆𑀫𑀨𑀮𑀲𑀤𑁆𑀥𑀸𑀬 𑀘 𑀲𑀤𑁆𑀥𑀸. 𑀧𑀺𑀯𑀦𑁆𑀢𑀺 𑀫𑀜𑁆𑀜𑁂 𑀬𑀣𑀸 𑀢𑀁 𑀤𑁆𑀭𑀯𑀪𑀽𑀢𑀁 𑀅𑀫𑀢𑀁 𑀮𑀤𑁆𑀥𑀸. 𑀖𑀲𑀦𑁆𑀢𑀺 𑀫𑀜𑁆𑀜𑁂 𑀬𑀣𑀸 𑀢𑀁 𑀩𑀳𑀮𑀧𑀺𑀡𑁆𑀟𑀺𑀓𑀲𑀼𑀥𑀸𑀪𑁄𑀚𑀦𑀁 𑀮𑀤𑁆𑀥𑀸. 𑀅𑀢𑁆𑀢𑀫𑀦𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑀸 ‘‘𑀲𑀸𑀥𑀼 𑀲𑀸𑀥𑀽’’𑀢𑀺. 𑀢𑀫𑁂𑀯 𑀧𑀦 𑀲𑀸𑀥𑀼𑀓𑀸𑀭𑀁 𑀳𑀤𑀬𑁂 𑀞𑀧𑁂𑀢𑁆𑀯𑀸 𑀅𑀩𑁆𑀪𑀦𑀼𑀫𑁄𑀤𑀦𑁆𑀢𑀸. 𑀏𑀢𑁆𑀣 𑀘 𑀅𑀢𑁆𑀢𑀫𑀦𑀯𑀸𑀘𑀸𑀦𑀺𑀘𑁆𑀙𑀸𑀭𑀡𑀁 𑀧𑀺𑀯𑀦𑀲𑀤𑀺𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁 𑀩𑀳𑀺𑀤𑁆𑀥𑀸𑀪𑀸𑀯𑀢𑁄, 𑀫𑀦𑀲𑀸 𑀅𑀩𑁆𑀪𑀦𑀼𑀫𑁄𑀤𑀦𑀁 𑀧𑀦 𑀅𑀩𑁆𑀪𑀦𑁆𑀢𑀭𑀪𑀸𑀯𑀢𑁄 𑀖𑀲𑀦𑀲𑀤𑀺𑀲𑀁 𑀯𑀼𑀢𑁆𑀢𑀁. 𑀲𑀗𑁆𑀔𑀸𑀤𑀦𑀚𑁆𑀛𑁄𑀳𑀭𑀡𑀜𑁆𑀳𑀺 𑀖𑀲𑀦𑀦𑁆𑀢𑀺. 𑀭𑀲𑁆𑀲𑀜𑁆𑀘 𑀏𑀓𑀯𑀘𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀭𑀲𑁆𑀲𑁂 𑀲𑀢𑀺 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀉𑀧𑀭𑀺 𑀳𑁄𑀢𑀻’’𑀢𑀺. 𑀤𑀻𑀖𑀜𑁆𑀘 𑀩𑀳𑀼𑀯𑀘𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀤𑀻𑀖𑁂 𑀲𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀦’’𑀦𑁆𑀢𑀺. ‘‘𑀉𑀧𑀭𑀺 𑀳𑁄𑀢𑀻’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀆𑀮𑀲𑀺𑀬𑀩𑁆𑀬𑀲𑀦𑀸𑀤𑀻𑀳𑀻𑀢𑀺 𑀆𑀮𑀲𑀺𑀬𑁂𑀦 𑀯𑀸 𑀜𑀸𑀢𑀺𑀩𑁆𑀬𑀲𑀦𑀸𑀤𑀻𑀳𑀺 𑀯𑀸. ‘‘𑀫𑀳𑀸𑀦𑀸𑀕𑀸𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀓𑀸𑀭𑀡𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀢𑀢𑁆𑀭𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀦 𑀕𑀘𑁆𑀙𑀦𑁆𑀢𑀻𑀢𑀺 𑀦𑀸𑀕𑀸, 𑀦 𑀆𑀕𑀘𑁆𑀙𑀦𑁆𑀢𑀻𑀢𑀺 𑀦𑀸𑀕𑀸, 𑀦 𑀆𑀕𑀼𑀁 𑀓𑀭𑁄𑀦𑁆𑀢𑀻𑀢𑀺 𑀦𑀸𑀕𑀸’’𑀢𑀺 𑀬𑁄 𑀯𑀺𑀯𑀺𑀥𑁄 𑀯𑀘𑀦𑀢𑁆𑀣𑁄 𑀇𑀘𑁆𑀙𑀺𑀢𑁄, 𑀢𑀁 𑀯𑀺𑀘𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀙𑀦𑁆𑀤𑀸𑀤𑀻𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀧𑀦 𑀜𑁂𑀬𑁆𑀬𑀸𑀯𑀩𑁄𑀥𑀸𑀬 𑀯𑀘𑀦𑀢𑁄 𑀅𑀧𑁆𑀧𑀫𑀢𑁆𑀢𑀓𑀸𑀭𑀡𑀁.

𑀲𑀬𑀫𑁂𑀯 𑀆𑀕𑀼𑀁 𑀦 𑀓𑀭𑁄𑀢𑀺 𑀲𑀩𑁆𑀩𑀣𑀸 𑀫𑀕𑁆𑀕𑁂𑀦 𑀧𑀳𑀻𑀦𑀆𑀕𑀼𑀢𑁆𑀢𑀸. 𑀲𑁄 𑀓𑀸𑀫𑀬𑁄𑀕𑀸𑀤𑀺𑀓𑁂 𑀲𑀩𑁆𑀩𑀲𑀁𑀬𑁄𑀕𑁂 𑀤𑀲𑀯𑀺𑀥𑀲𑀁𑀬𑁄𑀚𑀦𑀧𑁆𑀧𑀪𑁂𑀤𑀸𑀦𑀺 𑀘 𑀲𑀩𑁆𑀩𑀩𑀦𑁆𑀥𑀦𑀸𑀦𑀺 𑀯𑀺𑀲𑀚𑁆𑀚 𑀚𑀳𑀺𑀢𑁆𑀯𑀸 𑀲𑀩𑁆𑀩𑀢𑁆𑀣 𑀬𑀓𑁆𑀔𑀸𑀤𑀻𑀲𑀼, 𑀲𑀩𑁆𑀩𑁂𑀲𑀼 𑀯𑀸 𑀪𑀯𑁂𑀲𑀼 𑀓𑁂𑀦𑀘𑀺 𑀲𑀗𑁆𑀕𑁂𑀦 𑀦 𑀲𑀚𑁆𑀚𑀢𑀺 𑀢𑀻𑀳𑀺 𑀘 𑀯𑀺𑀫𑀼𑀢𑁆𑀢𑀻𑀳𑀺 𑀯𑀺𑀫𑀼𑀢𑁆𑀢𑁄, 𑀢𑀢𑁄 𑀏𑀯 𑀇𑀝𑁆𑀞𑀸𑀤𑀻𑀲𑀼 𑀢𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀢𑀸𑀤𑀺, 𑀲𑁄 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀢𑀣𑀢𑁆𑀢𑀸 𑀢𑀁𑀲𑀪𑀸𑀯𑀢𑁆𑀢𑀸 𑀦𑀸𑀕𑁄 𑀧𑀯𑀼𑀘𑁆𑀘𑀢𑁂𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀅𑀜𑁆𑀜𑁂𑀳𑀺 𑀔𑀻𑀡𑀸𑀲𑀯𑀦𑀸𑀕𑁂𑀳𑀺 𑀅𑀕𑁆𑀕𑀲𑀸𑀯𑀓𑀢𑁆𑀢𑀸 𑀕𑀼𑀡𑀯𑀺𑀲𑁂𑀲𑀬𑁄𑀕𑀢𑁄 𑀧𑀼𑀚𑁆𑀚𑀢𑀭𑀸 𑀘 𑀧𑀸𑀲𑀁𑀲𑀢𑀭𑀸 𑀘. 𑀲𑀫𑀁 𑀅𑀦𑀼𑀫𑁄𑀤𑀺𑀲𑀼𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀼𑀪𑀸𑀲𑀺𑀢𑀢𑁄 𑀲𑀫𑁆𑀧𑀝𑀺𑀘𑁆𑀙𑀦𑁂𑀦 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑀢𑀸𑀬 𑀲𑀫𑀁 𑀲𑀤𑀺𑀲𑀁 𑀅𑀩𑁆𑀪𑀦𑀼𑀫𑁄𑀤𑀺𑀁𑀲𑀼. 𑀢𑀁 𑀧𑀦 𑀲𑀫𑀦𑀼𑀫𑁄𑀤𑀦𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀧𑀸𑀴𑀺𑀯𑀲𑁂𑀦𑁂𑀯 𑀤𑀲𑁆𑀲𑁂𑀢𑀺.

𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀤𑁂𑀲𑀦𑀸𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀗𑁆𑀕𑀡𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁬. 𑀆𑀓𑀗𑁆𑀔𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁪. 𑀲𑀫𑁆𑀧𑀦𑁆𑀦𑀦𑁆𑀢𑀺 ¶ ¶ 𑀧𑀭𑀺𑀧𑀼𑀡𑁆𑀡𑀁, 𑀲𑀫𑀦𑁆𑀢𑀢𑁄 𑀧𑀦𑁆𑀦𑀁 𑀧𑀢𑁆𑀢𑀦𑁆𑀢𑀺 𑀲𑀫𑁆𑀧𑀦𑁆𑀦𑀁. 𑀢𑁂𑀦𑀸𑀳 ‘‘𑀇𑀤𑀁 𑀧𑀭𑀺𑀧𑀼𑀡𑁆𑀡𑀲𑀫𑁆𑀧𑀦𑁆𑀦𑀁 𑀦𑀸𑀫𑀸’’𑀢𑀺. 𑀦𑀦𑁆𑀢𑀺 ‘‘𑀲𑀼𑀯𑀸’’𑀢𑀺 𑀯𑀼𑀢𑁆𑀢𑀁 𑀲𑀼𑀯𑀕𑀡𑀁. 𑀲𑀫𑁆𑀧𑀦𑁆𑀦𑁄𑀢𑀺 𑀲𑀫𑁆𑀫𑀤𑁂𑀯 𑀧𑀦𑁆𑀦𑁄 𑀕𑀢𑁄 𑀉𑀧𑀕𑀢𑁄. 𑀢𑁂𑀦𑀸𑀳 ‘‘𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀲𑀫𑁆𑀧𑀦𑁆𑀦𑀦𑁆𑀢𑀺 𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀁. 𑀲𑀸 𑀧𑀦𑁂𑀢𑁆𑀣 𑀭𑀲𑀲𑀫𑁆𑀧𑀢𑁆𑀢𑀺 𑀅𑀥𑀺𑀧𑁆𑀧𑁂𑀢𑀸 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 𑀯𑀺𑀲𑁂𑀲𑁂 𑀅𑀯𑀝𑁆𑀞𑀸𑀦𑀢𑁄. 𑀢𑁂𑀦𑀸𑀳 ‘‘𑀲𑁂𑀬𑁆𑀬𑀣𑀸𑀧𑀺 𑀔𑀼𑀤𑁆𑀤𑀫𑀥𑀼𑀁 𑀅𑀦𑁂𑀴𑀓’’𑀦𑁆𑀢𑀺, 𑀦𑀺𑀤𑁆𑀤𑁄𑀲𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀤𑀁 𑀫𑀥𑀼𑀭𑀲𑀫𑁆𑀧𑀦𑁆𑀦𑀁 𑀦𑀸𑀫𑀸’’𑀢𑀺. 𑀲𑀻𑀮𑀲𑁆𑀲 𑀅𑀦𑀯𑀲𑁂𑀲𑀲𑀫𑀸𑀤𑀸𑀦𑁂𑀦 𑀅𑀔𑀡𑁆𑀟𑀸𑀤𑀺𑀪𑀸𑀯𑀸𑀧𑀢𑁆𑀢𑀺𑀬𑀸 𑀘 𑀧𑀭𑀺𑀧𑀼𑀡𑁆𑀡𑀲𑀻𑀮𑀸. 𑀲𑀫𑀸𑀤𑀸𑀦𑀢𑁄 𑀧𑀝𑁆𑀞𑀸𑀬 𑀅𑀘𑁆𑀙𑀺𑀦𑁆𑀤𑀦𑀢𑁄 𑀲𑀻𑀮𑀲𑀫𑀗𑁆𑀕𑀺𑀦𑁄. 𑀲𑀫𑀸𑀤𑀸𑀦𑀢𑁄 𑀳𑀺 𑀅𑀘𑁆𑀘𑀦𑁆𑀢𑀯𑀺𑀭𑁄𑀥𑀺𑀥𑀫𑁆𑀫𑀸𑀦𑀼𑀧𑁆𑀧𑀢𑁆𑀢𑀺𑀬𑀸 𑀲𑀻𑀮𑀲𑀫𑀗𑁆𑀕𑀺𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀘𑁂𑀢𑀦𑀸𑀤𑀻𑀦𑀁 𑀧𑀦 𑀲𑀻𑀮𑀦𑀮𑀓𑁆𑀔𑀡𑀸𑀦𑀁 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀓𑁆𑀔𑀡𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁯) 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑀓𑀣𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀔𑁂𑀢𑁆𑀢𑀧𑀸𑀭𑀺𑀧𑀽𑀭𑀻𑀢𑀺 𑀦𑀺𑀲𑁆𑀲𑀺𑀢𑀧𑀸𑀭𑀺𑀧𑀽𑀭𑀺𑀬𑀸 𑀦𑀺𑀲𑁆𑀲𑀬𑀧𑀸𑀭𑀺𑀧𑀽𑀭𑀺𑀫𑀸𑀳 𑀦𑀺𑀲𑁆𑀲𑀺𑀢𑀓𑀫𑁆𑀫𑀯𑀺𑀧𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀯𑀺𑀲𑀬𑀢𑁆𑀢𑀸 𑀬𑀣𑀸 ‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻’’𑀢𑀺. 𑀢𑀣𑀸 𑀳𑀺 𑀔𑁂𑀢𑁆𑀢𑁂𑀦 𑀔𑀡𑁆𑀟𑀧𑀽𑀢𑀺𑀆𑀤𑀺𑀤𑁄𑀲𑁄 𑀯𑀼𑀢𑁆𑀢𑁄. 𑀔𑁂𑀢𑁆𑀢𑀁 𑀔𑀡𑁆𑀟𑀁 𑀳𑁄𑀢𑀻𑀢𑀺 𑀅𑀧𑀭𑀺𑀧𑀽𑀭𑀁 𑀳𑁄𑀢𑀺 𑀲𑀲𑁆𑀲𑀧𑀸𑀭𑀺𑀧𑀽𑀭𑀺𑀬𑀸 𑀅𑀪𑀸𑀯𑀢𑁄. 𑀢𑁂𑀦𑁂𑀯𑀸𑀳 ‘‘𑀲𑀲𑁆𑀲𑀁 𑀦 𑀉𑀝𑁆𑀞𑁂𑀢𑀻’’𑀢𑀺. 𑀧𑀸𑀤𑀫𑀢𑁆𑀢𑀲𑁆𑀲𑀧𑀺 𑀅𑀦𑁂𑀓𑀫𑁆𑀩𑀡𑀨𑀮𑀦𑀢𑁄 𑀫𑀳𑀧𑁆𑀨𑀮𑀁 𑀳𑁄𑀢𑀺. 𑀓𑀺𑀲𑀮𑀬𑀧𑀮𑀸𑀮𑀸𑀤𑀺𑀩𑀳𑀼𑀢𑀸𑀬 𑀫𑀳𑀸𑀦𑀺𑀲𑀁𑀲𑀁. 𑀏𑀯𑀫𑁂𑀯𑀦𑁆𑀢𑀺 𑀬𑀣𑀸 𑀔𑀺𑀢𑁆𑀢𑀁 𑀩𑀻𑀚𑀁 𑀔𑀡𑁆𑀟𑀸𑀤𑀺𑀘𑀢𑀼𑀤𑁄𑀲𑀯𑀲𑁂𑀦 𑀅𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺, 𑀢𑀤𑀪𑀸𑀯𑁂𑀦 𑀘 𑀧𑀭𑀺𑀧𑀼𑀡𑁆𑀡𑀁, 𑀏𑀯𑀁 𑀲𑀻𑀮𑀁 𑀔𑀡𑁆𑀟𑀸𑀤𑀺𑀘𑀢𑀼𑀤𑁄𑀲𑀯𑀲𑁂𑀦 𑀅𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺, 𑀢𑀤𑀪𑀸𑀯𑁂𑀦 𑀘 𑀧𑀭𑀺𑀧𑀼𑀡𑁆𑀡𑀦𑁆𑀢𑀺, 𑀘𑀢𑀼𑀤𑁄𑀲𑀢𑀤𑀪𑀸𑀯𑀲𑀸𑀫𑀜𑁆𑀜𑀫𑁂𑀯 𑀦𑀺𑀤𑀲𑁆𑀲𑀦𑀦𑀺𑀤𑀲𑁆𑀲𑀺𑀢𑀩𑁆𑀩𑀯𑀺𑀧𑀢𑁆𑀢𑀺𑀲𑀫𑁆𑀧𑀢𑁆𑀢𑀻𑀲𑀼 𑀤𑀲𑁆𑀲𑁂𑀢𑀺. 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀯𑀺𑀧𑀸𑀓𑀨𑀮𑁂𑀦. 𑀫𑀳𑀸𑀦𑀺𑀲𑀁𑀲𑀦𑁆𑀢𑀺 𑀯𑀺𑀧𑀼𑀮𑀸𑀦𑀺𑀲𑀁𑀲𑀁. 𑀲𑁆𑀯𑀸𑀬𑀁 𑀆𑀦𑀺𑀲𑀁𑀲𑁄 𑀇𑀥 𑀧𑀸𑀴𑀺𑀬𑀁 𑀦𑀸𑀦𑀧𑁆𑀧𑀓𑀸𑀭𑁂𑀦 𑀯𑀺𑀢𑁆𑀣𑀸𑀭𑀻𑀬𑀢𑀺.

𑀏𑀢𑁆𑀢𑀸𑀯𑀢𑀸 𑀓𑀺𑀭𑀸𑀢𑀺 (𑀅. 𑀦𑀺. 𑀝𑀻. 𑁨.𑁨.𑁩𑁭; 𑀅. 𑀦𑀺. 𑀝𑀻. 𑁩.𑁧𑁦.𑁭𑁧-𑁭𑁪) 𑀓𑀺𑀭-𑀲𑀤𑁆𑀤𑁄 𑀅𑀭𑀼𑀘𑀺𑀲𑀽𑀘𑀦𑀢𑁆𑀣𑁄. 𑀢𑁂𑀦𑁂𑀢𑁆𑀣 𑀆𑀘𑀭𑀺𑀬𑀯𑀸𑀤𑀲𑁆𑀲 𑀅𑀢𑁆𑀢𑀦𑁄 𑀅𑀭𑀼𑀘𑁆𑀘𑀦𑀪𑀸𑀯𑀁 𑀤𑀻𑀧𑁂𑀢𑀺. 𑀲𑀫𑁆𑀧𑀦𑁆𑀦𑀲𑀻𑀮𑀸𑀢𑀺 𑀅𑀦𑀸𑀫𑀝𑁆𑀞𑀯𑀺𑀲𑁂𑀲𑀁 𑀲𑀸𑀫𑀜𑁆𑀜𑀢𑁄 𑀲𑀻𑀮𑀲𑀗𑁆𑀔𑁂𑀧𑁂𑀦 𑀕𑀳𑀺𑀢𑀁. 𑀢𑀜𑁆𑀘 𑀘𑀢𑀼𑀩𑁆𑀩𑀺𑀥𑀦𑁆𑀢𑀺 𑀆𑀘𑀭𑀺𑀬𑀢𑁆𑀣𑁂𑀭𑁄 ‘‘𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀉𑀤𑁆𑀤𑀺𑀲𑀺𑀢𑁆𑀯𑀸’’𑀢𑀺 𑀆𑀳. 𑀢𑀢𑁆𑀣𑀸𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂. 𑀚𑁂𑀝𑁆𑀞𑀓𑀲𑀻𑀮𑀦𑁆𑀢𑀺 (𑀲𑀁. 𑀦𑀺. 𑀝𑀻. 𑁩.𑁫.𑁪𑁧𑁨) 𑀧𑀥𑀸𑀦𑀲𑀻𑀮𑀁. 𑀉𑀪𑀬𑀢𑁆𑀣𑀸𑀢𑀺 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑁂. 𑀇𑀥 ¶ 𑀦𑀺𑀤𑁆𑀤𑁂𑀲𑁂 𑀯𑀺𑀬 𑀉𑀤𑁆𑀤𑁂𑀲𑁂𑀧𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄 𑀪𑀕𑀯𑀢𑀸 𑀯𑀼𑀢𑁆𑀢𑁄 ‘‘𑀲𑀫𑁆𑀧𑀦𑁆𑀦𑀲𑀻𑀮𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄 ¶ . 𑀲𑀻𑀮𑀕𑁆𑀕𑀳𑀡𑀜𑁆𑀳𑀺 𑀧𑀸𑀴𑀺𑀬𑀁 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀯𑀲𑁂𑀦 𑀆𑀕𑀢𑀁. 𑀢𑁂𑀦𑀸𑀳 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄𑀬𑁂𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀯𑀥𑀸𑀭𑀡𑁂𑀦 𑀇𑀢𑀭𑁂𑀲𑀁 𑀢𑀺𑀡𑁆𑀡𑀁 𑀏𑀓𑀤𑁂𑀲𑁂𑀦 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑁄𑀕𑀥𑀪𑀸𑀯𑀁 𑀤𑀻𑀧𑁂𑀢𑀺. 𑀢𑀣𑀸 𑀳𑀺 𑀅𑀦𑁄𑀮𑁄𑀓𑀺𑀬𑁄𑀮𑁄𑀓𑀦𑁂 𑀆𑀚𑀻𑀯𑀳𑁂𑀢𑀼 𑀙𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑁂 𑀕𑀺𑀮𑀸𑀦𑀧𑀘𑁆𑀘𑀬𑀲𑁆𑀲 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁂 𑀘 𑀆𑀧𑀢𑁆𑀢𑀺 𑀯𑀺𑀳𑀺𑀢𑀸𑀢𑀺. 𑀢𑀻𑀡𑀻𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀸𑀤𑀻𑀦𑀺. 𑀲𑀻𑀮𑀦𑁆𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀁 𑀦𑀸𑀫 𑀅𑀢𑁆𑀣𑀻𑀢𑀺 𑀲𑀻𑀮𑀧𑀭𑀺𑀬𑀸𑀬𑁂𑀦 𑀢𑁂𑀲𑀁 𑀓𑀢𑁆𑀣𑀘𑀺 𑀲𑀼𑀢𑁆𑀢𑁂 𑀕𑀳𑀺𑀢𑀝𑁆𑀞𑀸𑀦𑀁 𑀦𑀸𑀫 𑀓𑀺𑀁 𑀅𑀢𑁆𑀣𑀺 𑀬𑀣𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄𑀢𑀺 𑀆𑀘𑀭𑀺𑀬𑀲𑁆𑀲 𑀲𑀫𑁆𑀫𑀼𑀔𑀢𑁆𑀢𑀸 𑀅𑀧𑀝𑀺𑀓𑁆𑀔𑀺𑀧𑀦𑁆𑀢𑁄𑀯 𑀉𑀧𑀘𑀸𑀭𑁂𑀦 𑀧𑀼𑀘𑁆𑀙𑀦𑁆𑀢𑁄 𑀯𑀺𑀬 𑀯𑀤𑀢𑀺. 𑀢𑁂𑀦𑀸𑀳 ‘‘𑀅𑀦𑀦𑀼𑀚𑀸𑀦𑀦𑁆𑀢𑁄’’𑀢𑀺. 𑀙𑀤𑁆𑀯𑀸𑀭𑀭𑀓𑁆𑀔𑀸𑀫𑀢𑁆𑀢𑀓𑀫𑁂𑀯𑀸𑀢𑀺 𑀢𑀲𑁆𑀲 𑀲𑀮𑁆𑀮𑀳𑀼𑀓𑀪𑀸𑀯𑀫𑀸𑀳 𑀘𑀺𑀢𑁆𑀢𑀸𑀥𑀺𑀝𑁆𑀞𑀸𑀦𑀫𑀢𑁆𑀢𑁂𑀦 𑀧𑀝𑀺𑀧𑀸𑀓𑀢𑀺𑀓𑀪𑀸𑀯𑀸𑀧𑀢𑁆𑀢𑀺𑀢𑁄. 𑀇𑀢𑀭𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀘𑁆𑀘𑀬𑀼𑀧𑁆𑀧𑀢𑁆𑀢𑀺𑀫𑀢𑁆𑀢𑀓𑀦𑁆𑀢𑀺 𑀨𑀮𑁂𑀦 𑀳𑁂𑀢𑀼𑀁 𑀤𑀲𑁆𑀲𑁂𑀢𑀺. 𑀉𑀧𑁆𑀧𑀸𑀤𑀦𑀳𑁂𑀢𑀼𑀓𑀸 𑀳𑀺 𑀧𑀘𑁆𑀘𑀬𑀸𑀦𑀁 𑀉𑀧𑁆𑀧𑀢𑁆𑀢𑀺. 𑀇𑀤𑀫𑀢𑁆𑀣𑀦𑁆𑀢𑀺 𑀇𑀤𑀁 𑀧𑀬𑁄𑀚𑀦𑀁 𑀇𑀫𑀲𑁆𑀲 𑀧𑀘𑁆𑀘𑀬𑀲𑁆𑀲 𑀧𑀭𑀺𑀪𑀼𑀜𑁆𑀚𑀦𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑀸𑀢𑀺 𑀇𑀫𑀺𑀦𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀻𑀦𑀺 𑀢𑀻𑀡𑀺 𑀧𑀥𑀸𑀦𑀲𑁆𑀲 𑀲𑀻𑀮𑀲𑁆𑀲 𑀧𑀭𑀺𑀯𑀸𑀭𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀧𑀭𑀺𑀬𑀸𑀬𑀲𑀻𑀮𑀸𑀦𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑁆𑀲𑁂𑀯 𑀧𑀥𑀸𑀦𑀪𑀸𑀯𑀁 𑀩𑁆𑀬𑀢𑀺𑀭𑁂𑀓𑀢𑁄 𑀅𑀦𑁆𑀯𑀬𑀢𑁄 𑀘 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄. 𑀲𑁂𑀲𑀸𑀦𑀻𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀻𑀦𑀺. 𑀢𑀲𑁆𑀲𑁂𑀯𑀸𑀢𑀺 ‘‘𑀲𑀫𑁆𑀧𑀦𑁆𑀦𑀲𑀻𑀮𑀸’’𑀢𑀺 𑀏𑀢𑁆𑀣 𑀬𑀁 𑀲𑀻𑀮𑀁 𑀯𑀼𑀢𑁆𑀢𑀁, 𑀢𑀲𑁆𑀲𑁂𑀯. 𑀲𑀫𑁆𑀧𑀦𑁆𑀦𑀧𑀸𑀢𑀺𑀫𑁄𑀓𑁆𑀔𑀸𑀢𑀺 𑀏𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑀕𑁆𑀕𑀳𑀡𑁂𑀦 𑀯𑁂𑀯𑀘𑀦𑀁 𑀯𑀢𑁆𑀯𑀸 𑀢𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸…𑀧𑁂… 𑀆𑀤𑀺𑀫𑀸𑀳. 𑀬𑀣𑀸 𑀅𑀜𑁆𑀜𑀣𑀸𑀧𑀺 ‘‘𑀇𑀥 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀻’’𑀢𑀺 (𑀫𑀳𑀸𑀦𑀺. 𑁧𑁯𑁯) 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀬 𑀉𑀤𑁆𑀤𑀺𑀝𑁆𑀞𑀁 𑀲𑀻𑀮𑀁 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀻’’𑀢𑀺 (𑀯𑀺𑀪. 𑁫𑁦𑁮; 𑀫𑀳𑀸𑀦𑀺. 𑁧𑁯𑁯) 𑀦𑀺𑀤𑁆𑀤𑀺𑀝𑁆𑀞𑀁.

𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑀸𑀢𑀺 𑀬𑁄 𑀦𑀁 𑀧𑀸𑀢𑀺 𑀭𑀓𑁆𑀔𑀢𑀺, 𑀢𑀁 𑀫𑁄𑀓𑁆𑀔𑁂𑀢𑀺 𑀫𑁄𑀘𑁂𑀢𑀺 𑀆𑀧𑀸𑀬𑀺𑀓𑀸𑀤𑀻𑀳𑀺 𑀤𑀼𑀓𑁆𑀔𑁂𑀳𑀻𑀢𑀺 ‘‘𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀮𑀤𑁆𑀥𑀦𑀸𑀫𑁂𑀦 𑀲𑀺𑀓𑁆𑀔𑀸𑀧𑀤𑀲𑀻𑀮𑁂𑀦 𑀧𑀺𑀳𑀺𑀢𑀓𑀸𑀬𑀯𑀘𑀻𑀤𑁆𑀯𑀸𑀭𑀸. 𑀢𑁂 𑀧𑀦 𑀬𑀲𑁆𑀫𑀸 𑀏𑀯𑀁𑀪𑀽𑀢𑀸 𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀲𑀫𑀦𑁆𑀦𑀸𑀕𑀢𑀸’’𑀢𑀺.

𑀅𑀧𑀭𑁄 ¶ 𑀦𑀬𑁄 (𑀉𑀤𑀸. 𑀅𑀝𑁆𑀞. 𑁩𑁧; 𑀇𑀢𑀺𑀯𑀼. 𑀅𑀝𑁆𑀞. 𑁯𑁭) 𑁋 𑀓𑀺𑀮𑁂𑀲𑀸𑀦𑀁 𑀩𑀮𑀯𑀪𑀸𑀯𑀢𑁄, 𑀧𑀸𑀧𑀓𑀺𑀭𑀺𑀬𑀸𑀬 𑀲𑀼𑀓𑀭𑀪𑀸𑀯𑀢𑁄, 𑀧𑀼𑀜𑁆𑀜𑀓𑀺𑀭𑀺𑀬𑀸𑀬 𑀘 𑀤𑀼𑀓𑁆𑀓𑀭𑀪𑀸𑀯𑀢𑁄 𑀩𑀳𑀼𑀓𑁆𑀔𑀢𑁆𑀢𑀼𑀁 𑀅𑀧𑀸𑀬𑁂𑀲𑀼 𑀧𑀢𑀦𑀲𑀻𑀮𑁄𑀢𑀺 𑀧𑀸𑀢𑀻, 𑀧𑀼𑀣𑀼𑀚𑁆𑀚𑀦𑁄. 𑀅𑀦𑀺𑀘𑁆𑀘𑀢𑀸𑀬 𑀯𑀸 𑀪𑀯𑀸𑀤𑀻𑀲𑀼 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑁄 𑀖𑀝𑀻𑀬𑀦𑁆𑀢𑀁 𑀯𑀺𑀬 𑀅𑀦𑀯𑀝𑁆𑀞𑀸𑀦𑁂𑀦 𑀧𑀭𑀺𑀩𑁆𑀪𑀫𑀦𑀢𑁄 𑀕𑀫𑀦𑀲𑀻𑀮𑁄𑀢𑀺 𑀧𑀸𑀢𑀻, 𑀫𑀭𑀡𑀯𑀲𑁂𑀦 𑀯𑀸 𑀢𑀫𑁆𑀳𑀺 𑀢𑀫𑁆𑀳𑀺 𑀲𑀢𑁆𑀢𑀦𑀺𑀓𑀸𑀬𑁂 𑀅𑀢𑁆𑀢𑀪𑀸𑀯𑀲𑁆𑀲 𑀧𑀸𑀢𑀦𑀲𑀻𑀮𑁄𑀢𑀺 𑀧𑀸𑀢𑀻, 𑀲𑀢𑁆𑀢𑀲𑀦𑁆𑀢𑀸𑀦𑁄, 𑀘𑀺𑀢𑁆𑀢𑀫𑁂𑀯 𑀯𑀸, 𑀢𑀁 𑀧𑀸𑀢𑀺𑀁 𑀲𑀁𑀲𑀸𑀭𑀤𑀼𑀓𑁆𑀔𑀢𑁄 𑀫𑁄𑀓𑁆𑀔𑁂𑀢𑀻𑀢𑀺 ¶ 𑀧𑀸𑀢𑀺𑀫𑁄𑀓𑁆𑀔𑀁. 𑀘𑀺𑀢𑁆𑀢𑀲𑁆𑀲 𑀳𑀺 𑀯𑀺𑀫𑁄𑀓𑁆𑀔𑁂𑀦 𑀲𑀢𑁆𑀢𑁄 𑀯𑀺𑀫𑀼𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀘𑀺𑀢𑁆𑀢𑀯𑁄𑀤𑀸𑀦𑀸 𑀯𑀺𑀲𑀼𑀚𑁆𑀛𑀦𑁆𑀢𑀻’’𑀢𑀺, ‘‘𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢’’𑀦𑁆𑀢𑀺 (𑀫𑀳𑀸𑀯. 𑁨𑁮) 𑀘.

𑀅𑀣 𑀯𑀸 𑀅𑀯𑀺𑀚𑁆𑀚𑀸𑀤𑀺𑀦𑀸 𑀳𑁂𑀢𑀼𑀦𑀸 𑀲𑀁𑀲𑀸𑀭𑁂 𑀧𑀢𑀢𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀸𑀢𑀻. ‘‘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦𑀁 𑀢𑀡𑁆𑀳𑀸𑀲𑀁𑀬𑁄𑀚𑀦𑀸𑀦𑀁 𑀲𑀦𑁆𑀥𑀸𑀯𑀢𑀁 𑀲𑀁𑀲𑀭𑀢’’𑀦𑁆𑀢𑀺 (𑀲𑀁. 𑀦𑀺. 𑁨.𑁧𑁨𑁫) 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀧𑀸𑀢𑀺𑀦𑁄 𑀲𑀢𑁆𑀢𑀲𑁆𑀲 𑀢𑀡𑁆𑀳𑀸𑀤𑀺𑀲𑀁𑀓𑀺𑀮𑁂𑀲𑀢𑁆𑀢𑀬𑀢𑁄 𑀫𑁄𑀓𑁆𑀔𑁄 𑀏𑀢𑁂𑀦𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑁄. ‘‘𑀓𑀡𑁆𑀞𑁂𑀓𑀸𑀮𑁄’’𑀢𑀺𑀆𑀤𑀻𑀦𑀁 𑀯𑀺𑀬 𑀲𑀫𑀸𑀲𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀣 𑀯𑀸 𑀧𑀸𑀢𑁂𑀢𑀺 𑀯𑀺𑀦𑀺𑀧𑀸𑀢𑁂𑀢𑀺 𑀤𑀼𑀓𑁆𑀔𑁂𑀢𑀺 𑀧𑀸𑀢𑀺, 𑀘𑀺𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑀺 ‘‘𑀘𑀺𑀢𑁆𑀢𑁂𑀦 𑀦𑀻𑀬𑀢𑀺 𑀮𑁄𑀓𑁄, 𑀘𑀺𑀢𑁆𑀢𑁂𑀦 𑀧𑀭𑀺𑀓𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁧.𑁬𑁨). 𑀢𑀲𑁆𑀲 𑀧𑀸𑀢𑀺𑀦𑁄 𑀫𑁄𑀓𑁆𑀔𑁄 𑀏𑀢𑁂𑀦𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑁄. 𑀧𑀢𑀢𑀺 𑀯𑀸 𑀏𑀢𑁂𑀦 𑀅𑀧𑀸𑀬𑀤𑀼𑀓𑁆𑀔𑁂 𑀲𑀁𑀲𑀸𑀭𑀤𑀼𑀓𑁆𑀔𑁂 𑀘𑀸𑀢𑀺 𑀧𑀸𑀢𑀻, 𑀢𑀡𑁆𑀳𑀸𑀤𑀺𑀲𑀁𑀓𑀺𑀮𑁂𑀲𑁄. 𑀯𑀼𑀢𑁆𑀢𑀜𑁆𑀳𑀺 ‘‘𑀢𑀡𑁆𑀳𑀸 𑀚𑀦𑁂𑀢𑀺 𑀧𑀼𑀭𑀺𑀲𑀁 (𑀲𑀁. 𑀦𑀺. 𑁧.𑁫𑁭), 𑀢𑀡𑁆𑀳𑀸𑀤𑀼𑀢𑀺𑀬𑁄 𑀧𑀼𑀭𑀺𑀲𑁄’’𑀢𑀺 (𑀇𑀢𑀺𑀯𑀼. 𑁧𑁫, 𑁧𑁦𑁫; 𑀅. 𑀦𑀺. 𑁪.𑁯) 𑀘 𑀆𑀤𑀺. 𑀢𑀢𑁄 𑀧𑀸𑀢𑀺𑀢𑁄 𑀫𑁄𑀓𑁆𑀔𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑁄.

𑀅𑀣 𑀯𑀸 𑀧𑀢𑀢𑀺 𑀏𑀢𑁆𑀣𑀸𑀢𑀺 𑀧𑀸𑀢𑀻, 𑀙 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺. 𑀯𑀼𑀢𑁆𑀢𑀜𑁆𑀳𑀺 ‘‘𑀙𑀲𑀼 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄, 𑀙𑀲𑀼 𑀓𑀼𑀩𑁆𑀩𑀢𑀺 𑀲𑀦𑁆𑀣𑀯’’𑀦𑁆𑀢𑀺 (𑀲𑀁. 𑀦𑀺. 𑁧.𑁭𑁦; 𑀲𑀼. 𑀦𑀺. 𑁧𑁭𑁧). 𑀢𑀢𑁄 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀬𑀢𑀦𑀲𑀗𑁆𑀔𑀸𑀢𑀢𑁄 𑀧𑀸𑀢𑀺𑀢𑁄 𑀫𑁄𑀓𑁆𑀔𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑁄. 𑀅𑀣 𑀯𑀸 𑀧𑀸𑀢𑁄 𑀯𑀺𑀦𑀺𑀧𑀸𑀢𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀧𑀸𑀢𑀻, 𑀲𑀁𑀲𑀸𑀭𑁄. 𑀢𑀢𑁄 𑀫𑁄𑀓𑁆𑀔𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑁄. 𑀅𑀣 𑀯𑀸 𑀲𑀩𑁆𑀩𑀮𑁄𑀓𑀸𑀥𑀺𑀧𑀢𑀺𑀪𑀸𑀯𑀢𑁄 𑀥𑀫𑁆𑀫𑀺𑀲𑁆𑀲𑀭𑁄 𑀪𑀕𑀯𑀸 ‘‘𑀧𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀫𑀼𑀘𑁆𑀘𑀢𑀺 𑀏𑀢𑁂𑀦𑀸𑀢𑀺 𑀫𑁄𑀓𑁆𑀔𑁄, 𑀧𑀢𑀺𑀦𑁄 𑀫𑁄𑀓𑁆𑀔𑁄 𑀢𑁂𑀦 𑀧𑀜𑁆𑀜𑀢𑁆𑀢𑀢𑁆𑀢𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑁄 ¶ . 𑀧𑀸𑀢𑀺𑀫𑁄𑀓𑁆𑀔𑁄 𑀏𑀯 𑀧𑀸𑀢𑀺𑀫𑁄𑀓𑁆𑀔𑁄. 𑀲𑀩𑁆𑀩𑀕𑀼𑀡𑀸𑀦𑀁 𑀯𑀸 𑀫𑀽𑀮𑀪𑀸𑀯𑀢𑁄 𑀉𑀢𑁆𑀢𑀫𑀝𑁆𑀞𑁂𑀦 𑀧𑀢𑀺 𑀘 𑀲𑁄 𑀬𑀣𑀸𑀯𑀼𑀢𑁆𑀢𑀢𑁆𑀣𑁂𑀦 𑀫𑁄𑀓𑁆𑀔𑁄 𑀘𑀸𑀢𑀺 𑀧𑀸𑀢𑀺𑀫𑁄𑀓𑁆𑀔𑁄. 𑀧𑀸𑀢𑀺𑀫𑁄𑀓𑁆𑀔𑁄 𑀏𑀯 𑀧𑀸𑀢𑀺𑀫𑁄𑀓𑁆𑀔𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺𑀆𑀤𑀺𑀫𑁂𑀢𑀁 𑀫𑀼𑀔𑀫𑁂𑀢𑀁 𑀧𑀫𑀼𑀔𑀫𑁂𑀢’’𑀦𑁆𑀢𑀺 (𑀫𑀳𑀸𑀯. 𑁧𑁩𑁫) 𑀯𑀺𑀢𑁆𑀣𑀸𑀭𑁄.

𑀅𑀣 𑀯𑀸 𑀧-𑀇𑀢𑀺 𑀧𑀓𑀸𑀭𑁂, 𑀅𑀢𑀻𑀢𑀺 𑀅𑀘𑁆𑀘𑀦𑁆𑀢𑀢𑁆𑀣𑁂 𑀦𑀺𑀧𑀸𑀢𑁄, 𑀢𑀲𑁆𑀫𑀸 𑀧𑀓𑀸𑀭𑁂𑀳𑀺 𑀅𑀘𑁆𑀘𑀦𑁆𑀢𑀁 𑀫𑁄𑀓𑁆𑀔𑁂𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑁄. 𑀇𑀤𑀜𑁆𑀳𑀺 𑀲𑀻𑀮𑀁 𑀲𑀬𑀁 𑀢𑀤𑀗𑁆𑀕𑀯𑀲𑁂𑀦, 𑀲𑀫𑀸𑀥𑀺𑀲𑀳𑀺𑀢𑀁 𑀧𑀜𑁆𑀜𑀸𑀲𑀳𑀺𑀢𑀜𑁆𑀘 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦, 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀘 𑀅𑀘𑁆𑀘𑀦𑁆𑀢𑀁 𑀫𑁄𑀓𑁆𑀔𑁂𑀢𑀺 𑀫𑁄𑀘𑁂𑀢𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑁄. 𑀧𑀢𑀺 𑀧𑀢𑀺 𑀫𑁄𑀓𑁆𑀔𑁄𑀢𑀺 𑀯𑀸 𑀧𑀸𑀢𑀺𑀫𑁄𑀓𑁆𑀔𑁄, 𑀢𑀫𑁆𑀳𑀸 𑀢𑀫𑁆𑀳𑀸 𑀯𑀻𑀢𑀺𑀓𑁆𑀓𑀫𑀤𑁄𑀲𑀢𑁄 𑀧𑀘𑁆𑀘𑁂𑀓𑀁 𑀫𑁄𑀓𑁆𑀔𑁄𑀢𑀺 𑀅𑀢𑁆𑀣𑁄. 𑀧𑀸𑀢𑀺𑀫𑁄𑀓𑁆𑀔𑁄 𑀏𑀯 𑀧𑀸𑀢𑀺𑀫𑁄𑀓𑁆𑀔𑁄. 𑀫𑁄𑀓𑁆𑀔𑁄 𑀯𑀸 𑀦𑀺𑀩𑁆𑀩𑀸𑀦𑀁, 𑀢𑀲𑁆𑀲 𑀫𑁄𑀓𑁆𑀔𑀲𑁆𑀲 𑀧𑀢𑀺𑀩𑀺𑀫𑁆𑀩𑀪𑀽𑀢𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑁄 ¶ . 𑀲𑀻𑀮𑀲𑀁𑀯𑀭𑁄 𑀳𑀺 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁄 𑀲𑀽𑀭𑀺𑀬𑀲𑁆𑀲 𑀅𑀭𑀼𑀡𑀼𑀕𑁆𑀕𑀫𑀦𑀁 𑀯𑀺𑀬 𑀦𑀺𑀩𑁆𑀩𑀸𑀦𑀲𑁆𑀲 𑀉𑀤𑀬𑀪𑀽𑀢𑁄 𑀢𑀧𑁆𑀧𑀝𑀺𑀪𑀸𑀕𑁄 𑀯𑀺𑀬 𑀳𑁄𑀢𑀺 𑀬𑀣𑀸𑀭𑀳𑀁 𑀓𑀺𑀮𑁂𑀲𑀦𑀺𑀩𑁆𑀩𑀸𑀧𑀦𑀢𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑁄. 𑀧𑀸𑀢𑀺𑀫𑁄𑀓𑁆𑀔𑁄𑀬𑁂𑀯 𑀧𑀸𑀢𑀺𑀫𑁄𑀓𑁆𑀔𑁄. 𑀅𑀣 𑀯𑀸 𑀫𑁄𑀓𑁆𑀔𑀁 𑀧𑀢𑀺 𑀯𑀢𑁆𑀢𑀢𑀺 𑀫𑁄𑀓𑁆𑀔𑀸𑀪𑀺𑀫𑀼𑀔𑀦𑁆𑀢𑀺 𑀯𑀸 𑀧𑀸𑀢𑀺𑀫𑁄𑀓𑁆𑀔𑀁. 𑀧𑀸𑀢𑀺𑀫𑁄𑀓𑁆𑀔𑀫𑁂𑀯 𑀧𑀸𑀢𑀺𑀫𑁄𑀓𑁆𑀔𑀦𑁆𑀢𑀺 𑀏𑀯𑀫𑁂𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑀸𑀢𑀺 𑀓𑀸𑀬𑀺𑀓𑀯𑀸𑀘𑀲𑀺𑀓𑀅𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑁂𑀦 𑀆𑀘𑀸𑀭𑁂𑀦 𑀘𑁂𑀯 𑀦𑀯𑁂𑀲𑀺𑀬𑀕𑁄𑀘𑀭𑀢𑀸𑀤𑀺𑀲𑀗𑁆𑀔𑀸𑀢𑁂𑀦 𑀕𑁄𑀘𑀭𑁂𑀦 𑀘 𑀲𑀫𑁆𑀧𑀦𑁆𑀦𑀸, 𑀲𑀫𑁆𑀧𑀦𑁆𑀦𑀆𑀘𑀸𑀭𑀕𑁄𑀘𑀭𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀫𑀢𑁆𑀢𑁂𑀲𑀽𑀢𑀺 𑀅𑀢𑀺𑀧𑀭𑀺𑀢𑁆𑀢𑀓𑁂𑀲𑀼 𑀅𑀦𑀸𑀧𑀢𑁆𑀢𑀺𑀕𑀫𑀦𑀻𑀬𑁂𑀲𑀼, 𑀤𑀼𑀓𑁆𑀓𑀝𑀤𑀼𑀩𑁆𑀪𑀸𑀲𑀺𑀢𑀫𑀢𑁆𑀢𑁂𑀲𑀽𑀢𑀺 𑀅𑀧𑀭𑁂. 𑀯𑀚𑁆𑀚𑁂𑀲𑀽𑀢𑀺 𑀕𑀸𑀭𑀬𑁆𑀳𑁂𑀲𑀼. 𑀢𑁂 𑀧𑀦 𑀏𑀓𑀦𑁆𑀢𑀢𑁄 𑀅𑀓𑀼𑀲𑀮𑀲𑀪𑀸𑀯𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀅𑀓𑀼𑀲𑀮𑀥𑀫𑁆𑀫𑁂𑀲𑀽’’𑀢𑀺. 𑀪𑀬𑀤𑀲𑁆𑀲𑀺𑀦𑁄𑀢𑀺 𑀪𑀬𑀢𑁄 𑀤𑀲𑁆𑀲𑀦𑀲𑀻𑀮𑀸, 𑀧𑀭𑀫𑀸𑀡𑀼𑀫𑀢𑁆𑀢𑀫𑁆𑀧𑀺 𑀯𑀚𑁆𑀚𑀁 𑀲𑀺𑀦𑁂𑀭𑀼𑀧𑁆𑀧𑀫𑀸𑀡𑀁 𑀯𑀺𑀬 𑀓𑀢𑁆𑀯𑀸 𑀪𑀸𑀬𑀦𑀲𑀻𑀮𑀸. 𑀲𑀫𑁆𑀫𑀸 𑀆𑀤𑀺𑀬𑀺𑀢𑁆𑀯𑀸𑀢𑀺 𑀲𑀫𑁆𑀫𑀤𑁂𑀯 𑀲𑀓𑁆𑀓𑀘𑁆𑀘𑀁 𑀲𑀩𑁆𑀩𑀲𑁄 𑀘 𑀆𑀤𑀺𑀬𑀺𑀢𑁆𑀯𑀸. 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀦𑁆𑀢𑀺 𑀲𑀫𑀼𑀤𑀸𑀬𑀢𑁄 𑀅𑀯𑀬𑀯𑀦𑀺𑀤𑁆𑀥𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀺𑀓𑁆𑀔𑀸𑀧𑀤𑁂𑀲𑀼 𑀢𑀁 𑀢𑀁 𑀲𑀺𑀓𑁆𑀔𑀸𑀧𑀤𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀺𑀓𑁆𑀔𑀣𑀸’’𑀢𑀺 𑀅𑀢𑁆𑀣𑀫𑀸𑀳. 𑀲𑀺𑀓𑁆𑀔𑀸𑀧𑀤𑀫𑁂𑀯 𑀳𑀺 𑀲𑀫𑀸𑀤𑀸𑀢𑀩𑁆𑀩𑀁 𑀲𑀺𑀓𑁆𑀔𑀺𑀢𑀩𑁆𑀩𑀜𑁆𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀁 𑀓𑀺𑀜𑁆𑀘𑀺 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑁂𑀲𑀽𑀢𑀺 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑁂𑀲𑀼 𑀫𑀽𑀮𑀧𑀜𑁆𑀜𑀢𑁆𑀢𑀺𑀅𑀦𑀼𑀧𑀜𑁆𑀜𑀢𑀺𑀲𑀩𑁆𑀩𑀢𑁆𑀣𑀧𑀜𑁆𑀜𑀢𑁆𑀢𑀺𑀧𑀤𑁂𑀲𑀧𑀜𑁆𑀜𑀢𑁆𑀢𑀺𑀆𑀤𑀺𑀪𑁂𑀤𑀁 𑀬𑀁 𑀓𑀺𑀜𑁆𑀘𑀺 𑀲𑀺𑀓𑁆𑀔𑀺𑀢𑀩𑁆𑀩𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁 𑀧𑀽𑀭𑁂𑀢𑀩𑁆𑀩𑀁 𑀲𑀻𑀮𑀁. 𑀢𑀁 𑀧𑀦 𑀤𑁆𑀯𑀸𑀭𑀯𑀲𑁂𑀦 𑀤𑀼𑀯𑀺𑀥𑀫𑁂𑀯𑀸𑀢𑀺 𑀆𑀳 ¶ ‘‘𑀓𑀸𑀬𑀺𑀓𑀁 𑀯𑀸𑀘𑀲𑀺𑀓𑀜𑁆𑀘𑀸’’𑀢𑀺. 𑀇𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀆𑀥𑀸𑀭𑁂 𑀪𑀼𑀫𑁆𑀫𑀁 𑀲𑀺𑀓𑁆𑀔𑀸𑀪𑀸𑀕𑁂𑀲𑀼 𑀓𑀲𑁆𑀲𑀘𑀺 𑀯𑀺𑀲𑀼𑀁 𑀅𑀕𑁆𑀕𑀳𑀡𑀢𑁄. 𑀢𑁂𑀦𑀸𑀳 ‘‘𑀢𑀁 𑀲𑀩𑁆𑀩’’𑀦𑁆𑀢𑀺.

𑁬𑁫. 𑀓𑀲𑁆𑀫𑀸 𑀆𑀭𑀤𑁆𑀥𑀦𑁆𑀢𑀺 (𑀅. 𑀦𑀺. 𑀝𑀻. 𑁩.𑁧𑁦.𑁭𑁧-𑁭𑁪) 𑀤𑁂𑀲𑀦𑀸𑀬 𑀓𑀸𑀭𑀡𑀧𑀼𑀘𑁆𑀙𑀸. 𑀲𑀻𑀮𑀸𑀦𑀺𑀲𑀁𑀲𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀧𑀬𑁄𑀚𑀦𑀦𑀺𑀤𑁆𑀤𑁂𑀲𑁄. 𑀓𑁄 𑀅𑀢𑁆𑀣𑁄 𑀓𑁆𑀯 𑀅𑀢𑁆𑀣𑁄 𑀓𑁆𑀯 𑀦𑀺𑀧𑀸𑀢𑀺𑀢𑀸𑀢𑀺? 𑀦𑀬𑀺𑀤𑀫𑁂𑀯𑀁 𑀤𑀝𑁆𑀞𑀩𑁆𑀩𑀁. 𑀲𑀻𑀮𑀸𑀦𑀺𑀲𑀁𑀲𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀳𑀺 𑀏𑀢𑁆𑀣 𑀩𑁆𑀬𑀢𑀺𑀭𑁂𑀓𑀢𑁄 𑀬𑀁 𑀲𑀻𑀮𑀸𑀦𑀺𑀲𑀁𑀲𑀲𑁆𑀲 𑀅𑀤𑀲𑁆𑀲𑀦𑀁, 𑀢𑀁 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀓𑀸𑀭𑀡𑀦𑁆𑀢𑀺 𑀓𑀲𑁆𑀫𑀸 𑀆𑀭𑀤𑁆𑀥𑀦𑁆𑀢𑀺 𑀯𑀺𑀦𑁂𑀬𑁆𑀬𑀸𑀦𑀁 𑀲𑀻𑀮𑀸𑀦𑀺𑀲𑀁𑀲𑀲𑁆𑀲 𑀅𑀤𑀲𑁆𑀲𑀦𑀢𑁄𑀢𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑁄 𑀏𑀯 𑀳𑁄𑀢𑀻𑀢𑀺. 𑀢𑁂𑀦𑀸𑀳 ‘‘𑀲𑀘𑁂𑀧𑀻’’𑀢𑀺𑀆𑀤𑀺. 𑀲𑀻𑀮𑀸𑀦𑀺𑀲𑀁𑀲𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀧𑀦 𑀇𑀫𑀲𑁆𑀲 𑀅𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀢𑁂𑀲’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀦𑀺𑀲𑀁𑀲𑁄𑀢𑀺 𑀉𑀤𑀬𑁄. ‘‘𑀲𑀻𑀮𑀯𑀸 𑀲𑀻𑀮𑀲𑀫𑁆𑀧𑀦𑁆𑀦𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀲𑀼𑀕𑀢𑀺𑀁 𑀲𑀕𑁆𑀕𑀮𑁄𑀓𑀁 𑀉𑀧𑀧𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁧𑁫𑁦; 𑁩.𑁩𑁧𑁬; 𑀅. 𑀦𑀺. 𑁫.𑁨𑁧𑁩; 𑀫𑀳𑀸𑀯. 𑁨𑁮𑁫) 𑀧𑀦 𑀯𑀺𑀧𑀸𑀓𑀨𑀮𑀫𑁆𑀧𑀺 ‘‘𑀆𑀦𑀺𑀲𑀁𑀲𑁄’’𑀢𑀺 𑀯𑀼𑀢𑁆𑀢𑀁. 𑀓𑁄 𑀯𑀺𑀲𑁂𑀲𑁄𑀢𑀺 𑀓𑁄 𑀨𑀮𑀯𑀺𑀲𑁂𑀲𑁄. 𑀓𑀸 𑀯𑀟𑁆𑀠𑀻𑀢𑀺 𑀓𑁄 𑀅𑀩𑁆𑀪𑀼𑀤𑀬𑁄. 𑀯𑀺𑀚𑁆𑀚𑀫𑀸𑀦𑁄𑀧𑀺 𑀕𑀼𑀡𑁄 𑀬𑀸𑀣𑀸𑀯𑀢𑁄 𑀯𑀺𑀪𑀸𑀯𑀺𑀢𑁄 𑀏𑀯 𑀅𑀪𑀺𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀢𑀺, 𑀦 𑀅𑀯𑀺𑀪𑀸𑀯𑀺𑀢𑁄, 𑀢𑀲𑁆𑀫𑀸 𑀏𑀓𑀦𑁆𑀢𑀢𑁄 𑀆𑀦𑀺𑀲𑀁𑀲𑀓𑀺𑀢𑁆𑀢𑀦𑀁 𑀇𑀘𑁆𑀙𑀺𑀢𑀩𑁆𑀩𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 𑀯𑀺𑀲𑀓𑀡𑁆𑀝𑀓𑀯𑀸𑀡𑀺𑀚𑁄 𑀉𑀤𑀸𑀳𑀝𑁄.

𑀢𑀢𑁆𑀣 ¶ 𑀕𑀼𑀴𑁄 𑀦𑀸𑀫 𑀉𑀘𑁆𑀙𑀼𑀭𑀲𑀁 𑀧𑀘𑀺𑀢𑁆𑀯𑀸 𑀘𑀼𑀡𑁆𑀡𑀸𑀤𑀻𑀳𑀺 𑀫𑀺𑀲𑁆𑀲𑀺𑀢𑁆𑀯𑀸 𑀲𑀫𑁆𑀧𑀺𑀡𑁆𑀟𑀦𑁂 𑀧𑀺𑀡𑁆𑀟𑀻𑀪𑀽𑀢𑀁. 𑀨𑀸𑀡𑀺𑀢𑀁 𑀅𑀧𑀺𑀡𑁆𑀟𑀺𑀢𑀁 𑀤𑁆𑀭𑀯𑀻𑀪𑀽𑀢𑀁. 𑀔𑀡𑁆𑀟𑀁 𑀪𑀺𑀚𑁆𑀚𑀦𑀓𑁆𑀔𑀫𑀁. 𑀲𑀓𑁆𑀔𑀭𑀸 𑀦𑀸𑀫 𑀨𑀮𑀺𑀓𑀲𑀤𑀺𑀲𑀸. 𑀲𑀓𑁆𑀔𑀭𑀸𑀤𑀻𑀦𑀺𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀘𑁆𑀙𑀡𑁆𑀟𑀺𑀓𑀸𑀦𑀁 𑀲𑀗𑁆𑀕𑀳𑁄. 𑀢𑀲𑁆𑀫𑀺𑀁 𑀓𑀸𑀮𑁂 𑀕𑀼𑀴𑀸𑀤𑀻𑀲𑀼 𑀯𑀺𑀲𑀓𑀡𑁆𑀝𑀓𑀯𑁄𑀳𑀸𑀭𑁄 𑀅𑀧𑀘𑁆𑀘𑀦𑁆𑀢𑀤𑁂𑀲𑁂 𑀧𑀘𑀼𑀭𑁄𑀢𑀺 ‘‘𑀧𑀘𑁆𑀘𑀦𑁆𑀢𑀕𑀸𑀫𑀁 𑀕𑀦𑁆𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀤𑀸𑀭𑀓𑁂 𑀘 𑀧𑀮𑀸𑀧𑁂𑀲𑀼𑀁 ‘‘𑀯𑀺𑀲𑀓𑀡𑁆𑀝𑀓𑀁 𑀫𑀸 𑀕𑀡𑁆𑀳𑀦𑁆𑀢𑀽’’𑀢𑀺.

𑀧𑀺𑀬𑁄𑀢𑀺 𑀧𑀺𑀬𑀸𑀬𑀺𑀢𑀩𑁆𑀩𑁄. 𑀧𑀺𑀬𑀲𑁆𑀲 𑀦𑀸𑀫 𑀤𑀲𑁆𑀲𑀦𑀁 𑀏𑀓𑀦𑁆𑀢𑀢𑁄 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀬𑀘𑀓𑁆𑀔𑀽𑀳𑀺 𑀲𑀫𑁆𑀧𑀲𑁆𑀲𑀺𑀢𑀩𑁆𑀩𑁄’’𑀢𑀺. 𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑀧𑀲𑀦𑁆𑀦𑀲𑁄𑀫𑁆𑀫𑀭𑀽𑀧𑀧𑀭𑀺𑀕𑁆𑀕𑀳𑀜𑁆𑀳𑀺 𑀘𑀓𑁆𑀔𑀼 ‘‘𑀧𑀺𑀬𑀘𑀓𑁆𑀔𑀽’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀲𑀦𑁆𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁. 𑀫𑀦𑀯𑀟𑁆𑀠𑀦𑀓𑁄𑀢𑀺 𑀧𑀻𑀢𑀺𑀫𑀦𑀲𑁆𑀲 𑀧𑀭𑀺𑀩𑁆𑀭𑀽𑀳𑀦𑀢𑁄 𑀉𑀧𑀭𑀽𑀧𑀭𑀺 𑀧𑀻𑀢𑀺𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁄. 𑀕𑀭𑀼𑀝𑁆𑀞𑀸𑀦𑀺𑀬𑁄𑀢𑀺 𑀕𑀭𑀼𑀓𑀭𑀡𑀲𑁆𑀲 𑀞𑀸𑀦𑀪𑀽𑀢𑁄. 𑀚𑀸𑀦𑀁 𑀚𑀸𑀦𑀸𑀢𑀻𑀢𑀺 𑀜𑀸𑀡𑁂𑀦 𑀚𑀸𑀦𑀺𑀢𑀩𑁆𑀩𑀁 𑀚𑀸𑀦𑀸𑀢𑀺. 𑀬𑀣𑀸 𑀯𑀸 𑀅𑀜𑁆𑀜𑁂 𑀅𑀚𑀸𑀦𑀦𑁆𑀢𑀸𑀧𑀺 𑀚𑀸𑀦𑀦𑁆𑀢𑀸 𑀯𑀺𑀬 𑀧𑀯𑀢𑁆𑀢𑀦𑁆𑀢𑀺, 𑀦 𑀏𑀯𑀫𑀬𑀁, 𑀅𑀬𑀁 𑀧𑀦 𑀚𑀸𑀦𑀦𑁆𑀢𑁄 𑀏𑀯 𑀚𑀸𑀦𑀸𑀢𑀺 ¶ . 𑀧𑀲𑁆𑀲𑀁 𑀧𑀲𑁆𑀲𑀢𑀻𑀢𑀺 𑀤𑀲𑁆𑀲𑀦𑀪𑀽𑀢𑁂𑀦 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀧𑀲𑁆𑀲𑀺𑀢𑀩𑁆𑀩𑀁 𑀧𑀲𑁆𑀲𑀢𑀺, 𑀧𑀲𑁆𑀲𑀦𑁆𑀢𑁄 𑀏𑀯 𑀯𑀸 𑀧𑀲𑁆𑀲𑀢𑀺. 𑀏𑀯𑀁 𑀲𑀫𑁆𑀪𑀸𑀯𑀦𑀻𑀬𑁄𑀢𑀺 𑀏𑀯𑀁 𑀯𑀺𑀜𑁆𑀜𑀼𑀢𑀸𑀬 𑀧𑀡𑁆𑀟𑀺𑀢𑀪𑀸𑀯𑁂𑀦 𑀲𑀫𑁆𑀪𑀸𑀯𑁂𑀢𑀩𑁆𑀩𑁄.

𑀲𑀻𑀮𑁂𑀲𑁆𑀯𑁂𑀯𑀲𑁆𑀲 𑀧𑀭𑀺𑀧𑀽𑀭𑀓𑀸𑀭𑀻𑀢𑀺 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀏𑀯 𑀪𑀯𑁂𑀬𑁆𑀬𑀸𑀢𑀺 𑀏𑀯𑀁 𑀉𑀢𑁆𑀢𑀭𑀧𑀤𑀸𑀯𑀥𑀸𑀭𑀡𑀁 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀳𑀺 𑀇𑀫𑀺𑀦𑀸 𑀧𑀤𑁂𑀦 𑀉𑀧𑀭𑀺𑀲𑀺𑀓𑁆𑀔𑀸𑀤𑁆𑀯𑀬𑀁 𑀅𑀦𑀺𑀯𑀢𑁆𑀢𑀺𑀢𑀫𑁂𑀯 𑀳𑁄𑀢𑀺. 𑀬𑀣𑀸 𑀧𑀦 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀦𑀸𑀫 𑀳𑁄𑀢𑀺, 𑀢𑀁 𑀨𑀮𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀚𑁆𑀛𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀧𑀲𑁆𑀲𑀦𑀸𑀥𑀺𑀝𑁆𑀞𑀸𑀦𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀢𑀸𑀬 𑀳𑀺 𑀇𑀥 𑀲𑀻𑀮𑀲𑁆𑀲 𑀧𑀸𑀭𑀺𑀧𑀽𑀭𑀻, 𑀦 𑀓𑁂𑀯𑀮𑀁 𑀅𑀔𑀡𑁆𑀟𑀸𑀤𑀺𑀪𑀸𑀯𑀫𑀢𑁆𑀢𑀁. 𑀢𑁂𑀦𑀸𑀳 ‘‘𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 𑀅𑀔𑀡𑁆𑀟𑀸𑀦𑀺…𑀧𑁂… 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀻’’𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀉𑀧𑀭𑀺 𑀲𑀺𑀓𑁆𑀔𑀸𑀤𑁆𑀯𑀬𑀁 𑀲𑀻𑀮𑀲𑁆𑀲 𑀲𑀫𑁆𑀪𑀸𑀭𑀪𑀸𑀯𑁂𑀦 𑀕𑀳𑀺𑀢𑀦𑁆𑀢𑀺 𑀲𑀻𑀮𑀲𑁆𑀲𑁂𑀯𑁂𑀢𑁆𑀣 𑀧𑀥𑀸𑀦𑀕𑁆𑀕𑀳𑀡𑀁 𑀲𑀺𑀤𑁆𑀥𑀁 𑀳𑁄𑀢𑀺. 𑀢𑀣𑀸 𑀳𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀗𑁆𑀔𑀸𑀭𑀧𑀭𑀺𑀕𑁆𑀕𑀳𑀸𑀦𑀁 𑀲𑀻𑀮𑀲𑁆𑀲𑀸𑀦𑀼𑀭𑀓𑁆𑀔𑀡𑀪𑀸𑀯𑀁 𑀯𑀓𑁆𑀔𑀢𑀺. 𑀬𑀁 𑀧𑀦 𑀯𑀓𑁆𑀔𑀢𑀺 ‘‘𑀲𑀺𑀓𑁆𑀔𑀢𑁆𑀢𑀬𑀤𑁂𑀲𑀦𑀸 𑀚𑀸𑀢𑀸’’𑀢𑀺 (𑀫. 𑀦𑀺. 𑀅𑀝𑁆𑀞. 𑁧.𑁬𑁫), 𑀢𑀁 𑀇𑀢𑀭𑀸𑀲𑀫𑁆𑀧𑀺 𑀲𑀺𑀓𑁆𑀔𑀸𑀦𑀁 𑀇𑀥 𑀕𑀳𑀺𑀢𑀢𑀸𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀧𑀥𑀸𑀦𑀪𑀸𑀯𑁂𑀦 𑀕𑀳𑀺𑀢𑀢𑀁. 𑀬𑀤𑀺 𑀏𑀯𑀁 𑀓𑀣𑀁 𑀲𑀻𑀮𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑀢𑀸𑀯𑀘𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀅𑀧𑁆𑀧𑀫𑀢𑁆𑀢𑀓𑀁 𑀔𑁄 𑀧𑀦𑁂𑀢𑀁, 𑀪𑀺𑀓𑁆𑀔𑀯𑁂, 𑀑𑀭𑀫𑀢𑁆𑀢𑀓’’𑀦𑁆𑀢𑀺 (𑀤𑀻. 𑀦𑀺. 𑁧.𑁭). 𑀢𑀁 𑀧𑀼𑀣𑀼𑀚𑁆𑀚𑀦𑀕𑁄𑀘𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀢𑀢𑁆𑀣 𑀦 𑀦𑀺𑀧𑁆𑀧𑀤𑁂𑀲𑀢𑁄 𑀲𑀻𑀮𑀁 𑀯𑀺𑀪𑀢𑁆𑀢𑀁, 𑀏𑀯𑀁 𑀓𑀢𑁆𑀯𑀸 𑀢𑀢𑁆𑀣 𑀲𑀻𑀮𑀫𑀢𑁆𑀢𑀓𑀦𑁆𑀢𑀺 𑀫𑀢𑁆𑀢𑀕𑁆𑀕𑀳𑀡𑀁 𑀲𑀫𑀢𑁆𑀣𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀦𑀽𑀦𑁂𑀦𑀸𑀢𑀺 𑀅𑀔𑀡𑁆𑀟𑀸𑀤𑀺𑀪𑀸𑀯𑁂𑀦, 𑀓𑀲𑁆𑀲𑀘𑀺 𑀯𑀸 𑀅𑀳𑀸𑀧𑀦𑁂𑀦 𑀉𑀧𑀧𑀦𑁆𑀦𑁂𑀦. 𑀆𑀓𑀸𑀭𑁂𑀦𑀸𑀢𑀺 𑀓𑀭𑀡𑁂𑀦 𑀲𑀫𑁆𑀧𑀸𑀤𑀦𑁂𑀦. 𑀘𑀺𑀢𑁆𑀢𑀲𑀫𑀣𑁂𑀢𑀺 𑀘𑀺𑀢𑁆𑀢𑀲𑀫𑀸𑀥𑀸𑀦𑁂. 𑀬𑀼𑀢𑁆𑀢𑁄𑀢𑀺 𑀅𑀯𑀺𑀬𑀼𑀢𑁆𑀢𑁄 𑀧𑀲𑀼𑀢𑁄. 𑀬𑁄 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀛𑀸𑀦𑀪𑀸𑀯𑀦𑀁 𑀅𑀦𑀦𑀼𑀬𑀼𑀢𑁆𑀢𑁄, 𑀲𑁄 𑀢𑀁 𑀩𑀳𑀺 𑀦𑀻𑀳𑀭𑀢𑀺 𑀦𑀸𑀫. 𑀬𑁄 𑀆𑀭𑀪𑀺𑀢𑁆𑀯𑀸 𑀅𑀦𑁆𑀢𑀭𑀸 𑀲𑀗𑁆𑀓𑁄𑀘𑀁 𑀆𑀧𑀚𑁆𑀚𑀢𑀺 ¶ , 𑀲𑁄 𑀢𑀁 𑀯𑀺𑀦𑀸𑀲𑁂𑀢𑀺 𑀦𑀸𑀫. 𑀬𑁄 𑀧𑀦 𑀈𑀤𑀺𑀲𑁄 𑀅𑀳𑀼𑀢𑁆𑀯𑀸 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀲𑁄 𑀅𑀦𑀺𑀭𑀸𑀓𑀢𑀚𑁆𑀛𑀸𑀦𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀩𑀳𑀺 𑀅𑀦𑀻𑀳𑀝𑀚𑁆𑀛𑀸𑀦𑁄’’𑀢𑀺𑀆𑀤𑀺𑀫𑀸𑀳.

𑀅𑀦𑀺𑀘𑁆𑀘𑀲𑁆𑀲 𑀢𑁂𑀪𑀽𑀫𑀓𑀥𑀫𑁆𑀫𑀲𑁆𑀲, 𑀅𑀦𑀺𑀘𑁆𑀘𑀦𑁆𑀢𑀺 𑀯𑀸 𑀅𑀦𑀼𑀧𑀲𑁆𑀲𑀦𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸. 𑀢𑀣𑀸 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀘. 𑀢𑀲𑁆𑀲𑁂𑀯 𑀦𑀺𑀩𑁆𑀩𑀺𑀦𑁆𑀤𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀅𑀦𑀼𑀧𑀲𑁆𑀲𑀦𑀸 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸. 𑀯𑀺𑀭𑀚𑁆𑀚𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀅𑀦𑀼𑀧𑀲𑁆𑀲𑀦𑀸 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸. 𑀦𑀺𑀭𑁄𑀥𑀲𑁆𑀲 𑀅𑀦𑀼𑀧𑀲𑁆𑀲𑀦𑀸 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸. 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀸 𑀅𑀦𑀼𑀧𑀲𑁆𑀲𑀦𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸. 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀪𑀺𑀓𑁆𑀔𑀼 𑀢𑀢𑁆𑀣 𑀮𑀤𑁆𑀥𑀓𑀸𑀬𑀯𑀺𑀯𑁂𑀓𑀢𑀸𑀬 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀘𑀺𑀢𑁆𑀢𑀯𑀺𑀯𑁂𑀓𑀁 ¶ 𑀧𑀭𑀺𑀩𑁆𑀭𑀽𑀳𑁂𑀦𑁆𑀢𑁄 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀢𑁆𑀢𑀺𑀬𑀸 𑀮𑁄𑀓𑀁 𑀲𑀸𑀲𑀦𑀜𑁆𑀘 𑀅𑀢𑁆𑀢𑀦𑁄 𑀯𑀺𑀲𑁂𑀲𑀸𑀥𑀺𑀕𑀫𑀝𑁆𑀞𑀸𑀦𑀪𑀽𑀢𑀁 𑀲𑀼𑀜𑁆𑀜𑀸𑀕𑀸𑀭𑀜𑁆𑀘 𑀉𑀧𑀲𑁄𑀪𑀬𑀫𑀸𑀦𑁄 𑀕𑀼𑀡𑀯𑀺𑀲𑁂𑀲𑀸𑀥𑀺𑀝𑁆𑀞𑀸𑀦𑀪𑀸𑀯𑀸𑀧𑀸𑀤𑀦𑁂𑀦 𑀯𑀺𑀜𑁆𑀜𑀽𑀦𑀁 𑀅𑀢𑁆𑀣𑀢𑁄 𑀢𑀁 𑀩𑁆𑀭𑀽𑀳𑁂𑀦𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀩𑁆𑀭𑀽𑀳𑁂𑀢𑀸 𑀲𑀼𑀜𑁆𑀜𑀸𑀕𑀸𑀭𑀸𑀦’’𑀦𑁆𑀢𑀺. 𑀢𑁂𑀦𑀸𑀳 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺. 𑀅𑀬𑀫𑁂𑀯 𑀲𑀼𑀜𑁆𑀜𑀸𑀕𑀸𑀭𑀸𑀦𑀼𑀩𑁆𑀭𑀽𑀳𑀦𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸𑀦𑀁 𑀪𑀸𑀚𑀦𑀁, 𑀦 𑀲𑁂𑀦𑀸𑀲𑀦𑀧𑀢𑀺𑀝𑁆𑀞𑀸𑀧𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑀪𑀽𑀫𑀓𑀸𑀤𑀺…𑀧𑁂… 𑀤𑀝𑁆𑀞𑀩𑁆𑀩𑁄’’𑀢𑀺. 𑀲𑀼𑀜𑁆𑀜𑀸𑀕𑀸𑀭𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀅𑀭𑀜𑁆𑀜𑀭𑀼𑀓𑁆𑀔𑀫𑀽𑀮𑀸𑀤𑀺 𑀲𑀩𑁆𑀩𑀁 𑀧𑀥𑀸𑀦𑀸𑀦𑀼𑀬𑁄𑀕𑀓𑁆𑀔𑀫𑀁 𑀲𑁂𑀦𑀸𑀲𑀦𑀁 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀡𑁆𑀳𑀸𑀯𑀺𑀘𑀭𑀺𑀢𑀤𑁂𑀲𑀦𑀸𑀢𑀺 ‘‘𑀅𑀚𑁆𑀛𑀢𑁆𑀢𑀺𑀓𑀲𑁆𑀲 𑀉𑀧𑀸𑀤𑀸𑀬𑀸’’𑀢𑀺 (𑀯𑀺𑀪. 𑁯𑁩𑁭) 𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀢𑀡𑁆𑀳𑀸𑀯𑀺𑀘𑀭𑀺𑀢𑀲𑀼𑀢𑁆𑀢𑀁. 𑀢𑀡𑁆𑀳𑀸𑀧𑀤𑀝𑁆𑀞𑀸𑀦𑀢𑁆𑀢𑀸𑀢𑀺 𑀢𑀡𑁆𑀳𑀸𑀲𑀦𑁆𑀦𑀺𑀲𑁆𑀲𑀬𑀢𑁆𑀢𑀸. 𑀦 𑀳𑀺 𑀢𑀡𑁆𑀳𑀸𑀯𑀺𑀭𑀳𑀺𑀢𑀸 𑀫𑀸𑀦𑀤𑀺𑀝𑁆𑀞𑀺𑀧𑀯𑀢𑁆𑀢𑀺 𑀅𑀢𑁆𑀣𑀺. 𑀫𑀸𑀦𑀤𑀺𑀝𑁆𑀞𑀺𑀬𑁄 𑀑𑀲𑀭𑀺𑀢𑁆𑀯𑀸𑀢𑀺 𑀤𑀲𑁆𑀲𑁂𑀢𑀩𑁆𑀩𑀢𑀸𑀬 𑀫𑀸𑀦𑀤𑀺𑀝𑁆𑀞𑀺𑀬𑁄 𑀑𑀕𑀸𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀕𑀳𑀡𑀢𑁆𑀣𑀫𑁂𑀯 𑀳𑀺 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀲𑁆𑀲 𑀤𑁂𑀲𑀦𑀸𑀬 𑀑𑀲𑀭𑀡𑀁. 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀬𑁄 𑀧𑀧𑀜𑁆𑀘𑀢𑁆𑀢𑀬𑀁 𑀲𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀲𑀁𑀲𑀸𑀭𑁂 𑀧𑀧𑀜𑁆𑀘𑀦𑀢𑁄 𑀅𑀦𑀼𑀧𑁆𑀧𑀩𑀦𑁆𑀥𑀦𑀯𑀲𑁂𑀦 𑀯𑀺𑀢𑁆𑀣𑀸𑀭𑀡𑀢𑁄. 𑀲𑀻𑀮𑀧𑀤𑀝𑁆𑀞𑀸𑀦𑀢𑁆𑀢𑀸𑀢𑀺 𑀲𑀻𑀮𑀸𑀥𑀺𑀝𑁆𑀞𑀸𑀦𑀢𑁆𑀢𑀸.

𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸 𑀯𑀼𑀢𑁆𑀢𑀸𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀲𑀼𑀜𑁆𑀜𑀸𑀕𑀸𑀭𑀯𑀟𑁆𑀠𑀦𑁂𑀢𑀺 𑀬𑁄𑀚𑀦𑀸. 𑀤𑁆𑀯𑁂𑀧𑀺 𑀲𑀺𑀓𑁆𑀔𑀸𑀢𑀺 𑀅𑀥𑀺𑀘𑀺𑀢𑁆𑀢𑀸𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸. 𑀲𑀗𑁆𑀕𑀳𑁂𑀢𑁆𑀯𑀸𑀢𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬 𑀲𑀤𑁆𑀥𑀺𑀁 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀸. 𑀬𑀤𑀺 𑀏𑀯𑀫𑀬𑀁 𑀲𑀺𑀓𑁆𑀔𑀢𑁆𑀢𑀬𑀤𑁂𑀲𑀦𑀸 𑀚𑀸𑀢𑀸𑀢𑀺 𑀲𑀺𑀓𑁆𑀔𑀢𑁆𑀢𑀬𑀸𑀦𑀺𑀲𑀁𑀲𑀧𑁆𑀧𑀓𑀸𑀲𑀦𑀻 𑀲𑀺𑀬𑀸𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬𑀸𑀳 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀯𑀺𑀬 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑁆𑀲 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀲𑁆𑀲 𑀆𑀭𑀓𑁆𑀔𑀪𑀽𑀢𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀯𑀺𑀧𑀲𑁆𑀲𑀦𑀸 𑀘 𑀇𑀥 𑀕𑀳𑀺𑀢𑀸𑀢𑀺 𑀢𑀤𑀼𑀪𑀬𑀁 𑀅𑀧𑁆𑀧𑀥𑀸𑀦𑀁, 𑀲𑀻𑀮𑀫𑁂𑀯 𑀧𑀦 𑀧𑀥𑀸𑀦𑀪𑀸𑀯𑁂𑀦 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀲𑀻𑀮𑀸𑀦𑀼𑀭𑀓𑁆𑀔𑀺𑀓𑀸 𑀏𑀯𑀸’’𑀢𑀺𑀆𑀤𑀺.

𑀩𑀮𑀯𑀢𑀭𑀲𑀼𑀔𑀦𑁆𑀢𑀺 ¶ 𑀲𑀫𑀼𑀧𑁆𑀧𑀦𑁆𑀦𑀩𑁆𑀬𑀸𑀥𑀺𑀤𑀼𑀓𑁆𑀔𑀢𑁄 𑀩𑀮𑀯𑀢𑀭𑀁, 𑀢𑀁 𑀅𑀪𑀺𑀪𑀯𑀺𑀢𑀼𑀁 𑀲𑀫𑀢𑁆𑀣𑀁 𑀛𑀸𑀦𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺. 𑀩𑀮𑀯𑀫𑀫𑀢𑁆𑀢𑀁 𑀳𑁄𑀢𑀺, 𑀢𑁂𑀦 𑀤𑀴𑁆𑀳𑀅𑀢𑁆𑀢𑀲𑀺𑀦𑁂𑀳𑁂𑀦 𑀯𑀺𑀮𑀼𑀢𑁆𑀢𑀳𑀤𑀬𑁄 𑀓𑀼𑀲𑀮𑀥𑀫𑁆𑀫𑁂 𑀙𑀟𑁆𑀟𑁂𑀦𑁆𑀢𑁄 𑀲𑁄 𑀢𑀣𑀸𑀭𑀽𑀧𑁂𑀲𑀼…𑀧𑁂… 𑀧𑁄𑀲𑁂𑀢𑀸 𑀳𑁄𑀢𑀺. 𑀩𑀮𑀯𑀫𑀫𑀢𑁆𑀢𑀁 𑀯𑀸 𑀲𑀺𑀦𑁂𑀳𑁄 𑀦 𑀳𑁄𑀢𑀺 ‘‘𑀲𑀼𑀤𑁆𑀥𑁄 𑀲𑀗𑁆𑀔𑀸𑀭𑀧𑀼𑀜𑁆𑀚𑁄’’𑀢𑀺 𑀬𑀸𑀣𑀸𑀯𑀤𑀲𑁆𑀲𑀦𑁂𑀦 ¶ 𑀅𑀳𑀁𑀓𑀸𑀭𑀫𑀫𑀁𑀓𑀸𑀭𑀸𑀪𑀸𑀯𑀢𑁄. 𑀤𑀼𑀩𑁆𑀪𑀺𑀓𑁆𑀔𑀪𑀬𑁂 𑀔𑀼𑀤𑀸𑀪𑀺𑀪𑀯𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀘𑁂𑀧𑀺𑀲𑁆𑀲 𑀅𑀦𑁆𑀢𑀸𑀦𑀺 𑀩𑀳𑀺 𑀦𑀺𑀓𑁆𑀔𑀫𑀦𑁆𑀢𑀻’’𑀢𑀺. 𑀩𑁆𑀬𑀸𑀥𑀺𑀪𑀬𑀁 𑀲𑀦𑁆𑀥𑀸𑀬𑀸𑀳 ‘‘𑀉𑀲𑁆𑀲𑀼𑀲𑁆𑀲𑀢𑀺 𑀯𑀺𑀲𑀼𑀲𑁆𑀲𑀦𑀻’’𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀕𑀳𑀺𑀢𑀁 𑀘𑁄𑀭𑀪𑀬𑀁 𑀲𑀦𑁆𑀥𑀸𑀬𑀸𑀳 ‘‘𑀔𑀡𑁆𑀟𑀸𑀔𑀡𑁆𑀟𑀺𑀓𑁄 𑀯𑀸’’𑀢𑀺. 𑀉𑀪𑀬𑀲𑁆𑀲𑀸𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑁆𑀯𑀬𑀲𑁆𑀲. 𑀏𑀢𑁆𑀣 𑀘 ‘‘𑀅𑀚𑁆𑀛𑀢𑁆𑀢𑀁 𑀘𑁂𑀢𑁄…𑀧𑁂… 𑀲𑀼𑀜𑁆𑀜𑀸𑀕𑀸𑀭𑀸𑀦’’𑀦𑁆𑀢𑀺 𑀇𑀫𑁂𑀳𑀺 𑀯𑀺𑀲𑁂𑀲𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀪𑀸𑀯𑀸𑀧𑀸𑀤𑀦𑁂𑀦 𑀲𑀻𑀮𑀁 𑀭𑀓𑁆𑀔𑀺𑀢𑀼𑀁 𑀲𑀫𑀢𑁆𑀣𑀸 𑀏𑀯 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀯𑀺𑀧𑀲𑁆𑀲𑀦𑀸 𑀕𑀳𑀺𑀢𑀸. 𑀬𑀲𑁆𑀫𑀸 𑀧𑀭𑀢𑁄 𑀛𑀸𑀦𑀯𑀺𑀫𑁄𑀓𑁆𑀔𑀨𑀮𑀸𑀪𑀺𑀜𑁆𑀜𑀸𑀡𑀅𑀥𑀺𑀝𑁆𑀞𑀸𑀦𑀪𑀸𑀯𑁄 𑀲𑀻𑀮𑀲𑁆𑀲 𑀉𑀤𑁆𑀥𑀝𑁄, 𑀢𑀲𑁆𑀫𑀸 𑀢𑀲𑁆𑀲 𑀪𑀺𑀬𑁆𑀬𑁄𑀧𑀺 𑀲𑀫𑁆𑀪𑀸𑀭𑀪𑀽𑀢𑀸 𑀏𑀯 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀯𑀺𑀧𑀲𑁆𑀲𑀦𑀸 𑀢𑀢𑁆𑀣 𑀢𑀢𑁆𑀣 𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀻𑀮𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀬𑀣𑀸𑀯𑀼𑀢𑁆𑀢𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀯𑀺𑀧𑀲𑁆𑀲𑀦𑀸 𑀲𑀗𑁆𑀕𑀡𑁆𑀳𑀸𑀢𑀺, 𑀲𑀻𑀮𑀲𑁆𑀲 𑀯𑀸 𑀫𑀽𑀮𑀓𑀸𑀭𑀡𑀪𑀽𑀢𑀁 𑀲𑀩𑁆𑀩𑀁 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺 𑀓𑀫𑁆𑀫𑀧𑀣𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀯𑀸. 𑀲𑀻𑀮𑀜𑁆𑀳𑀺 𑀢𑀤𑀜𑁆𑀜𑀫𑁆𑀧𑀺 𑀧𑀼𑀜𑁆𑀜𑀓𑀺𑀭𑀺𑀬𑀸𑀯𑀢𑁆𑀣𑀼 𑀢𑁂𑀦𑁂𑀯 𑀧𑀭𑀺𑀲𑁄𑀥𑀺𑀢𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀦𑁆𑀢𑀺. 𑀮𑀸𑀪𑀻 𑀅𑀲𑁆𑀲𑀦𑁆𑀢𑀺 𑀮𑀸𑀪𑀸 𑀲𑀸𑀬 𑀲𑀁𑀯𑀭𑀡𑀲𑀻𑀮𑀧𑀭𑀺𑀧𑀽𑀭𑀡𑀁 𑀧𑀸𑀴𑀺𑀬𑀁 𑀆𑀕𑀢𑀁 𑀓𑀺𑀫𑀻𑀤𑀺𑀲𑀁 𑀪𑀕𑀯𑀸 𑀅𑀦𑀼𑀚𑀸𑀦𑀸𑀢𑀻𑀢𑀺? 𑀦 𑀪𑀕𑀯𑀸 𑀲𑀪𑀸𑀯𑁂𑀦 𑀈𑀤𑀺𑀲𑀁 𑀅𑀦𑀼𑀚𑀸𑀦𑀸𑀢𑀺, 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀧𑀦 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁂𑀦 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀘𑁂𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀖𑀸𑀲𑁂𑀲𑀦𑀁 𑀙𑀺𑀦𑁆𑀦𑀓𑀣𑁄 𑀦 𑀯𑀸𑀘𑀁 𑀧𑀬𑀼𑀢𑁆𑀢𑀁 𑀪𑀡𑁂𑀢𑀺 𑀙𑀺𑀦𑁆𑀦𑀓𑀣𑁄 𑀫𑀽𑀕𑁄 𑀯𑀺𑀬 𑀳𑀼𑀢𑁆𑀯𑀸 𑀑𑀪𑀸𑀲𑀧𑀭𑀺𑀓𑀣𑀸𑀦𑀺𑀫𑀺𑀢𑁆𑀢𑀯𑀺𑀜𑁆𑀜𑀢𑁆𑀢𑀺𑀧𑀬𑀼𑀢𑁆𑀢𑀁 𑀖𑀸𑀲𑁂𑀲𑀦𑀁 𑀯𑀸𑀘𑀁 𑀦 𑀪𑀡𑁂 𑀦 𑀓𑀣𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦𑀸𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀬𑁂𑀲𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀭𑀲𑁄 𑀲𑀪𑀸𑀯𑀪𑀽𑀢𑁄 𑀆𑀦𑀺𑀲𑀁𑀲𑁄 𑀭𑀲𑀸𑀦𑀺𑀲𑀁𑀲𑁄.

𑀧𑀘𑁆𑀘𑀬𑀤𑀸𑀦𑀓𑀸𑀭𑀸𑀢𑀺 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀤𑀸𑀦𑀓𑀸𑀭𑀸. ‘‘𑀤𑁂𑀯𑀸𑀦𑀁 𑀯𑀸’’𑀢𑀺 𑀯𑀼𑀢𑁆𑀢𑀯𑀘𑀦𑀁 𑀧𑀸𑀓𑀝𑀻𑀓𑀸𑀢𑀼𑀫𑀸𑀳 ‘‘𑀤𑁂𑀯𑀸𑀧𑀻’’𑀢𑀺𑀆𑀤𑀺. ‘‘𑀧𑀜𑁆𑀘𑀺𑀫𑁂 𑀕𑀳𑀧𑀢𑀬𑁄 𑀆𑀦𑀺𑀲𑀁𑀲𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁧𑁫𑁦) 𑀅𑀦𑀺𑀲𑀁𑀲𑀲𑀤𑁆𑀤𑁄 𑀨𑀮𑀧𑀭𑀺𑀬𑀸𑀬𑁄𑀧𑀺 𑀳𑁄𑀢𑀻𑀢𑀺 𑀆𑀳 ‘‘𑀉𑀪𑀬𑀫𑁂𑀢𑀁 𑀅𑀢𑁆𑀣𑀢𑁄 𑀏𑀓’’𑀦𑁆𑀢𑀺.

𑀲𑀲𑁆𑀲𑀼𑀲𑀲𑀼𑀭𑀸 𑀘 𑀢𑀧𑁆𑀧𑀓𑁆𑀔𑀺𑀓𑀸 𑀘 𑀲𑀲𑁆𑀲𑀼𑀲𑀲𑀼𑀭𑀧𑀓𑁆𑀔𑀺𑀓𑀸. 𑀢𑁂 𑀜𑀸𑀢𑀺𑀬𑁄𑀦𑀺𑀲𑀫𑁆𑀩𑀦𑁆𑀥𑁂𑀦 𑀆𑀯𑀸𑀳𑀯𑀺𑀯𑀸𑀳𑀲𑀫𑁆𑀩𑀦𑁆𑀥𑀯𑀲𑁂𑀦 𑀲𑀫𑁆𑀩𑀦𑁆𑀥𑀸 𑀜𑀸𑀢𑀻. 𑀲𑀸𑀮𑁄𑀳𑀺𑀢𑀸𑀢𑀺 𑀬𑁄𑀦𑀺𑀲𑀫𑁆𑀩𑀦𑁆𑀥𑀯𑀲𑁂𑀦. 𑀏𑀓𑀮𑁄𑀳𑀺𑀢𑀲𑀫𑁆𑀩𑀤𑁆𑀥𑀸𑀢𑀺 𑀏𑀓𑁂𑀦 𑀲𑀫𑀸𑀦𑁂𑀦 𑀮𑁄𑀳𑀺𑀢𑀲𑀫𑁆𑀩𑀦𑁆𑀥𑁂𑀦 𑀲𑀫𑁆𑀩𑀤𑁆𑀥𑀸. 𑀧𑁂𑀘𑁆𑀘𑀪𑀸𑀯𑀁 𑀕𑀢𑀸𑀢𑀺 𑀧𑁂𑀢𑀽𑀧𑀧𑀢𑁆𑀢𑀺𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀺𑀁 ¶ 𑀉𑀧𑀕𑀢𑀸. 𑀢𑁂 𑀧𑀦 𑀬𑀲𑁆𑀫𑀸 𑀇𑀥 𑀓𑀢𑀓𑀸𑀮𑀓𑀺𑀭𑀺𑀬𑀸 𑀓𑀸𑀮𑁂𑀦 𑀓𑀢𑀚𑀻𑀯𑀺𑀢𑀼𑀧𑀘𑁆𑀙𑁂𑀤𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀓𑀸𑀮𑀓𑀢𑀸’’𑀢𑀺. 𑀧𑀲𑀦𑁆𑀦𑀘𑀺𑀢𑁆𑀢𑁄𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑀓𑁄. 𑀓𑀸𑀮𑀓𑀢𑁄 ¶ 𑀧𑀺𑀢𑀸 𑀯𑀸 𑀫𑀸𑀢𑀸 𑀯𑀸 𑀧𑁂𑀢𑀬𑁄𑀦𑀺𑀁 𑀉𑀧𑀧𑀦𑁆𑀦𑁄𑀢𑀺 𑀅𑀥𑀺𑀓𑀸𑀭𑀢𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀫𑀳𑀸𑀦𑀺𑀲𑀁𑀲𑀫𑁂𑀯 𑀳𑁄𑀢𑀻’’𑀢𑀺, 𑀢𑀲𑁆𑀲 𑀢𑀣𑀸 𑀲𑀻𑀮𑀲𑀫𑁆𑀧𑀦𑁆𑀦𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀭𑀺𑀬𑀪𑀸𑀯𑁂 𑀧𑀦 𑀲𑀢𑀺 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑁂𑀦𑀸𑀳 ‘‘𑀅𑀦𑁂𑀓𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀻’’𑀢𑀺𑀆𑀤𑀺. 𑀩𑀳𑀼𑀓𑀸𑀭𑀦𑁆𑀢𑀺 𑀩𑀳𑀼𑀧𑀓𑀸𑀭𑀁. 𑀉𑀧𑀲𑀗𑁆𑀓𑀫𑀦𑀦𑁆𑀢𑀺 𑀅𑀪𑀺𑀯𑀸𑀤𑀦𑀸𑀤𑀺𑀯𑀲𑁂𑀦 𑀉𑀧𑀕𑀫𑀦𑀁. 𑀧𑀬𑀺𑀭𑀼𑀧𑀸𑀲𑀦𑀦𑁆𑀢𑀺 𑀉𑀧𑀝𑁆𑀞𑀸𑀦𑀦𑁆𑀢𑀺.

𑁬𑁬. 𑀅𑀚𑁆𑀛𑁄𑀢𑁆𑀣𑀭𑀺𑀢𑀸𑀢𑀺 𑀫𑀤𑁆𑀤𑀺𑀢𑀸. 𑀉𑀓𑁆𑀓𑀡𑁆𑀞𑀸𑀢𑀺 𑀭𑀺𑀜𑁆𑀘𑀦𑀸 𑀅𑀦𑀪𑀺𑀭𑀢𑀺 𑀅𑀦𑀦𑀼𑀬𑁄𑀕𑁄. 𑀲𑀻𑀮𑀯𑀸 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀲𑀻𑀮𑀔𑀡𑁆𑀟𑀪𑀬𑁂𑀦 𑀲𑀫𑀸𑀳𑀺𑀢𑁄 𑀯𑀺𑀧𑀲𑁆𑀲𑀓𑁄 𑀘 𑀧𑀘𑁆𑀘𑀬𑀖𑀸𑀢𑁂𑀦 𑀅𑀭𑀢𑀺𑀬𑀸 𑀭𑀢𑀺𑀬𑀸 𑀘 𑀲𑀳𑀺𑀢𑀸 𑀅𑀪𑀺𑀪𑀯𑀺𑀢𑀸𑀯 𑀳𑁄𑀢𑀻𑀢𑀺 𑀆𑀳 ‘‘𑀲𑀻𑀮𑀸𑀤𑀺𑀕𑀼𑀡𑀬𑀼𑀢𑁆𑀢𑁂𑀦𑁂𑀯𑀸’’𑀢𑀺𑀆𑀤𑀺.

𑀘𑀺𑀢𑁆𑀢𑀼𑀢𑁆𑀭𑀸𑀲𑁄 𑀪𑀸𑀬𑀢𑀻𑀢𑀺 𑀪𑀬𑀁. 𑀆𑀭𑀫𑁆𑀫𑀡𑀁 𑀪𑀸𑀬𑀢𑀺 𑀏𑀢𑀲𑁆𑀫𑀸𑀢𑀺 𑀪𑀬𑀁. 𑀧𑀼𑀭𑀺𑀫𑀯𑀸𑀭𑀲𑀤𑀺𑀲𑀢𑁆𑀢𑀸 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 𑀅𑀢𑀺𑀤𑀺𑀲𑀺𑀢𑁆𑀯𑀸𑀧𑀺 𑀧𑀼𑀦 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀮𑀸𑀤𑀺𑀕𑀼𑀡𑀬𑀼𑀢𑁆𑀢𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀣𑁂𑀭𑀲𑁆𑀲 𑀳𑁂𑀝𑁆𑀞𑀸 𑀦𑀺𑀲𑀺𑀦𑁆𑀦𑀢𑁆𑀢𑀸 𑀤𑁂𑀯𑀢𑀸𑀬 𑀤𑀸𑀭𑀓𑀸 𑀲𑀓𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀲𑀼𑀔𑁂𑀦 𑀯𑀢𑁆𑀢𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀅𑀲𑀫𑀢𑁆𑀣𑀸.

𑀅𑀥𑀺𑀓𑀁 𑀘𑁂𑀢𑁄𑀢𑀺 𑀅𑀪𑀺𑀘𑁂𑀢𑁄, 𑀉𑀧𑀘𑀸𑀭𑀚𑁆𑀛𑀸𑀦𑀘𑀺𑀢𑁆𑀢𑀁. 𑀢𑀲𑁆𑀲 𑀧𑀦 𑀅𑀥𑀺𑀓𑀢𑀸 𑀧𑀸𑀓𑀢𑀺𑀓𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀳𑀺 𑀲𑀼𑀦𑁆𑀤𑀭𑀢𑀸𑀬 𑀲𑀧𑀝𑀺𑀧𑀓𑁆𑀔𑀢𑁄 𑀯𑀺𑀲𑀼𑀤𑁆𑀥𑀺𑀬𑀸 𑀘𑀸𑀢𑀺 𑀆𑀳 ‘‘𑀅𑀪𑀺𑀓𑁆𑀓𑀦𑁆𑀢𑀁 𑀯𑀺𑀲𑀼𑀤𑁆𑀥𑀺𑀘𑀺𑀢𑁆𑀢’’𑀦𑁆𑀢𑀺. 𑀅𑀥𑀺𑀘𑀺𑀢𑁆𑀢𑀦𑁆𑀢𑀺 𑀲𑀫𑀸𑀥𑀺𑀫𑀸𑀳, 𑀲𑁄 𑀘 𑀉𑀧𑀘𑀸𑀭𑀲𑀫𑀸𑀥𑀺 𑀤𑀝𑁆𑀞𑀩𑁆𑀩𑁄. 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁, 𑀲𑀫𑀸𑀥𑀺𑀚𑀁 𑀧𑀻𑀢𑀺𑀲𑀼𑀔𑀁, 𑀅𑀧𑀻𑀢𑀺𑀚𑀁 𑀛𑀸𑀦𑀲𑀼𑀔𑀁, 𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀚𑀁 𑀛𑀸𑀦𑀲𑀼𑀔𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀛𑀸𑀦𑀲𑀼𑀔𑀁 𑀧𑀝𑀺𑀧𑀓𑁆𑀔𑀢𑁄 𑀦𑀺𑀓𑁆𑀔𑀦𑁆𑀢𑀢𑀁 𑀉𑀧𑀸𑀤𑀸𑀬 ‘‘𑀦𑁂𑀓𑁆𑀔𑀫𑁆𑀫𑀲𑀼𑀔’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀦𑁂𑀓𑁆𑀔𑀫𑁆𑀫𑀲𑀼𑀔𑀁 𑀯𑀺𑀦𑁆𑀤𑀦𑁆𑀢𑀻’’𑀢𑀺. 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀫𑀢𑁆𑀣𑁄𑀢𑀺 𑀇𑀫𑀺𑀦𑀸 𑀢𑁂𑀲𑀼 𑀛𑀸𑀦𑁂𑀲𑀼 𑀲𑀫𑀸𑀧𑀚𑁆𑀚𑀦𑀯𑀲𑀻𑀪𑀸𑀯𑀫𑀸𑀳, ‘‘𑀦𑀺𑀓𑀸𑀫𑀮𑀸𑀪𑀻’’𑀢𑀺 𑀧𑀦 𑀯𑀘𑀦𑀢𑁄 𑀆𑀯𑀚𑁆𑀚𑀦𑀸𑀥𑀺𑀝𑁆𑀞𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀺𑀬𑁄𑀧𑀺 𑀯𑀼𑀢𑁆𑀢𑀸 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀔𑁂𑀦𑁂𑀯 𑀧𑀘𑁆𑀘𑀦𑀻𑀓𑀥𑀫𑁆𑀫𑁂 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸𑀢𑀺 𑀏𑀢𑁂𑀦 𑀢𑁂𑀲𑀁 𑀛𑀸𑀦𑀲𑀼𑀔𑀔𑀺𑀧𑁆𑀧𑀸𑀪𑀺𑀜𑁆𑀜𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀯𑀺𑀧𑀼𑀮𑀸𑀦𑀦𑁆𑀢𑀺 𑀯𑁂𑀧𑀼𑀮𑁆𑀮𑀁 𑀧𑀸𑀧𑀺𑀢𑀸𑀦𑀁. 𑀛𑀸𑀦𑀸𑀦𑀁 𑀯𑀺𑀧𑀼𑀮𑀢𑀸 𑀦𑀸𑀫 𑀲𑀼𑀪𑀸𑀯𑀺𑀢𑀪𑀸𑀯𑁂𑀦 𑀘𑀺𑀭𑀢𑀭𑀧𑁆𑀧𑀢𑁆𑀢𑀺, 𑀲𑀸 𑀘 𑀧𑀭𑀺𑀘𑁆𑀙𑁂𑀤𑀸𑀦𑀼𑀭𑀽𑀧𑀸𑀯 𑀇𑀘𑁆𑀙𑀺𑀢𑀩𑁆𑀩𑁆𑀩𑀸𑀢𑀺 ‘‘𑀯𑀺𑀧𑀼𑀮𑀸𑀦’’𑀦𑁆𑀢𑀺 𑀯𑀢𑁆𑀯𑀸 ‘‘𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀬𑁂𑀯 𑀯𑀼𑀝𑁆𑀞𑀸𑀢𑀼𑀁 𑀲𑀫𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 ¶ 𑀆𑀳. 𑀧𑀭𑀺𑀘𑁆𑀙𑁂𑀤𑀓𑀸𑀮𑀜𑁆𑀳𑀺 𑀅𑀧𑁆𑀧𑀢𑁆𑀯𑀸𑀯 𑀯𑀼𑀝𑁆𑀞𑀳𑀦𑁆𑀢𑁄 𑀅𑀓𑀲𑀺𑀭𑀮𑀸𑀪𑀻 𑀦 𑀳𑁄𑀢𑀺 𑀬𑀸𑀯𑀤𑀺𑀘𑁆𑀙𑀓𑀁 𑀧𑀯𑀢𑁆𑀢𑁂𑀢𑀼𑀁 𑀅𑀲𑀫𑀢𑁆𑀣𑀢𑁆𑀢𑀸. 𑀇𑀤𑀸𑀦𑀺 𑀢𑁂𑀬𑁂𑀯 𑀬𑀣𑀸𑀯𑀼𑀢𑁆𑀢𑁂 𑀲𑀫𑀸𑀧𑀚𑁆𑀚𑀦𑀸𑀤𑀺𑀯𑀲𑀻𑀪𑀸𑀯𑁂 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀏𑀓𑀘𑁆𑀘𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀮𑀸𑀪𑀻𑀬𑁂𑀯 𑀳𑁄𑀢𑀻𑀢𑀺 𑀇𑀤𑀁 𑀧𑀝𑀺𑀮𑀤𑁆𑀥𑀫𑀢𑁆𑀢𑀲𑁆𑀲 𑀛𑀸𑀦𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀣𑀸𑀢𑀺 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂. 𑀧𑀸𑀭𑀺𑀩𑀦𑁆𑀥𑀺𑀓𑁂𑀢𑀺 𑀯𑀲𑀻𑀪𑀸𑀯𑀲𑁆𑀲 𑀧𑀘𑁆𑀘𑀦𑀻𑀓𑀥𑀫𑁆𑀫𑁂. 𑀛𑀸𑀦𑀸𑀥𑀺𑀕𑀫𑀲𑁆𑀲 𑀧𑀦 𑀧𑀘𑁆𑀘𑀦𑀻𑀓𑀥𑀫𑁆𑀫𑀸 𑀧𑀕𑁂𑀯 𑀯𑀺𑀓𑁆𑀔𑀫𑁆𑀪𑀺𑀢𑀸, 𑀅𑀜𑁆𑀜𑀣𑀸 𑀛𑀸𑀦𑀸𑀥𑀺𑀕𑀫𑁄 𑀏𑀯 𑀦 𑀲𑀺𑀬𑀸. 𑀓𑀺𑀘𑁆𑀙𑁂𑀦 𑀯𑀺𑀓𑁆𑀔𑀫𑁆𑀪𑁂𑀢𑀻𑀢𑀺 𑀓𑀺𑀘𑁆𑀙𑁂𑀦 𑀯𑀺𑀲𑁄𑀥𑁂𑀢𑀺. 𑀓𑀸𑀫𑀸𑀤𑀻𑀦𑀯𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀻𑀳𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁 𑀯𑀺𑀬 ¶ 𑀅𑀜𑁆𑀜𑁂𑀲𑀫𑁆𑀧𑀺 𑀲𑀫𑀸𑀥𑀺𑀧𑀸𑀭𑀺𑀩𑀦𑁆𑀥𑀺𑀓𑀸𑀦𑀁 𑀤𑀽𑀭𑀲𑀫𑀼𑀲𑁆𑀲𑀸𑀭𑀡𑀁 𑀇𑀥 𑀯𑀺𑀓𑁆𑀔𑀫𑁆𑀪𑀦𑀁 𑀯𑀺𑀲𑁄𑀥𑀦𑀜𑁆𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦𑀸𑀴𑀺𑀓𑀸𑀬𑀦𑁆𑀢𑀦𑁆𑀢𑀺 𑀓𑀸𑀮𑀫𑀸𑀦𑀦𑀸𑀴𑀺𑀓𑀸𑀬𑀦𑁆𑀢𑀁 𑀆𑀳.

𑀯𑀺𑀲𑁂𑀲𑁂𑀦 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀩𑁆𑀩𑀲𑁄 𑀯𑀲𑀻𑀪𑀸𑀯𑀸𑀧𑀸𑀤𑀺𑀢𑀁 𑀅𑀪𑀺𑀜𑁆𑀜𑀸𑀧𑀸𑀤𑀓𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀅𑀪𑀺𑀜𑁆𑀜𑀸𑀧𑀸𑀤𑀓𑁂 𑀛𑀸𑀦𑁂 𑀯𑀼𑀢𑁆𑀢𑁂’’𑀢𑀺. 𑀅𑀭𑀽𑀧𑀚𑁆𑀛𑀸𑀦𑀫𑁆𑀧𑀺 𑀧𑀦 𑀅𑀥𑀺𑀝𑁆𑀞𑀸𑀦𑀢𑀸𑀬 𑀧𑀸𑀤𑀓𑀫𑁂𑀯 𑀘𑀼𑀤𑁆𑀤𑀲𑀥𑀸 𑀘𑀺𑀢𑁆𑀢𑀧𑀭𑀺𑀤𑀫𑀦𑁂𑀦 𑀯𑀺𑀦𑀸 𑀢𑀤𑀪𑀸𑀯𑀢𑁄. ‘‘𑀏𑀯𑀫𑀪𑀺𑀜𑁆𑀜𑀸𑀧𑀸𑀤𑀓𑁂 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂 𑀯𑀼𑀢𑁆𑀢𑁂 𑀭𑀽𑀧𑀸𑀯𑀘𑀭𑀢𑀸𑀬 𑀓𑀺𑀜𑁆𑀘𑀸𑀧𑀺 𑀅𑀪𑀺𑀜𑁆𑀜𑀸𑀦𑀁 𑀮𑁄𑀓𑀺𑀬𑀯𑀸𑀭𑁄 𑀆𑀕𑀢𑁄’’𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀦𑀦𑁆𑀢𑀺 𑀅𑀪𑀺𑀜𑁆𑀜𑀸𑀯𑀸𑀭𑀁. 𑀘𑀢𑁆𑀢𑀸𑀭𑀺…𑀧𑁂… 𑀅𑀭𑀺𑀬𑀫𑀕𑁆𑀕𑀸 𑀲𑀻𑀮𑀸𑀦𑀁 𑀆𑀦𑀺𑀲𑀁𑀲𑁄 𑀲𑀫𑁆𑀧𑀦𑁆𑀦𑀲𑀻𑀮𑀲𑁆𑀲𑁂𑀯 𑀮𑀸𑀪𑀢𑁄. 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸𑀢𑀺 𑀕𑀳𑁂𑀢𑁆𑀯𑀸.

𑀅𑀗𑁆𑀕𑀲𑀦𑁆𑀢𑀢𑀸𑀬𑀸𑀢𑀺 𑀦𑀻𑀯𑀭𑀡𑀸𑀤𑀻𑀦𑀁 𑀧𑀘𑁆𑀘𑀦𑀻𑀓𑀥𑀫𑁆𑀫𑀸𑀦𑀁 𑀲𑀼𑀤𑀽𑀭𑀢𑀭𑀪𑀸𑀯𑁂𑀦 𑀛𑀸𑀦𑀗𑁆𑀕𑀸𑀦𑀁 𑀯𑀽𑀧𑀲𑀦𑁆𑀢𑀢𑀸𑀬, 𑀦𑀺𑀩𑁆𑀩𑀼𑀢𑀲𑀩𑁆𑀩𑀤𑀭𑀣𑀧𑀭𑀺𑀴𑀸𑀳𑀢𑀸𑀬𑀸𑀢𑀺 𑀅𑀢𑁆𑀣𑁄, 𑀬𑀢𑁄 𑀢𑁂𑀲𑀁 𑀛𑀸𑀦𑀸𑀦𑀁 𑀧𑀡𑀻𑀢𑀢𑀭𑀸𑀤𑀺𑀪𑀸𑀯𑁄. 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬𑀸𑀢𑀺 𑀭𑀽𑀧𑀧𑀝𑀺𑀖𑀸𑀤𑀺𑀯𑀺𑀕𑀫𑀦𑁂𑀦 𑀲𑀡𑁆𑀳𑀲𑀼𑀔𑀼𑀫𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀲𑀦𑁆𑀢𑀪𑀸𑀯𑁂𑀦. 𑀬𑀤𑀕𑁆𑀕𑁂𑀦 𑀳𑀺 𑀦𑁂𑀲𑀁 𑀪𑀸𑀯𑀦𑀸𑀪𑀺𑀲𑀫𑀬𑀲𑀩𑁆𑀪𑀸𑀯𑀺𑀢𑀲𑀡𑁆𑀳𑀲𑀼𑀔𑀼𑀫𑀸𑀓𑀸𑀭𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀲𑀦𑁆𑀢𑀸𑀦𑀺, 𑀢𑀤𑀕𑁆𑀕𑁂𑀦 𑀛𑀸𑀦𑀗𑁆𑀕𑀸𑀦𑀁 𑀲𑀦𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬 𑀲𑀦𑁆𑀢𑀢𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀭𑀫𑁆𑀫𑀡𑀸𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀳𑀺 𑀤𑀻𑀧𑁂𑀢𑀩𑁆𑀩𑀸. 𑀯𑀺𑀫𑀼𑀢𑁆𑀢𑀸 𑀯𑀺𑀲𑁂𑀲𑁂𑀦 𑀫𑀼𑀢𑁆𑀢𑀸. 𑀬𑁂 𑀳𑀺 𑀛𑀸𑀦𑀥𑀫𑁆𑀫𑀸 𑀢𑀣𑀸𑀧𑀯𑀢𑁆𑀢𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀳𑀺 𑀢𑀩𑁆𑀩𑀺𑀲𑁂𑀲𑀢𑀸𑀬 𑀲𑀸𑀢𑀺𑀲𑀬𑀁 𑀧𑀝𑀺𑀧𑀓𑁆𑀔𑀥𑀫𑁆𑀫𑁂𑀳𑀺 𑀯𑀺𑀫𑀼𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀺, 𑀢𑀢𑁄 𑀏𑀯 𑀢𑀣𑀸𑀯𑀺𑀫𑀼𑀢𑁆𑀢𑀢𑀸𑀬 𑀧𑀺𑀢𑀼 𑀅𑀗𑁆𑀓𑁂 𑀯𑀺𑀲𑁆𑀲𑀝𑁆𑀞𑀅𑀗𑁆𑀕𑀧𑀘𑁆𑀘𑀗𑁆𑀕𑁄 𑀯𑀺𑀬 𑀓𑀼𑀫𑀸𑀭𑁄 𑀦𑀺𑀭𑀸𑀲𑀗𑁆𑀓𑀪𑀸𑀯𑁂𑀦 𑀆𑀭𑀫𑁆𑀫𑀡𑁂 𑀅𑀥𑀺𑀫𑀼𑀢𑁆𑀢𑀸 𑀘 𑀧𑀯𑀢𑁆𑀢𑀦𑁆𑀢𑀺, 𑀢𑁂 𑀯𑀺𑀫𑁄𑀓𑁆𑀔𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀦𑀸𑀳 ‘‘𑀯𑀺𑀫𑁄𑀓𑁆𑀔𑀸𑀢𑀺 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀆𑀭𑀫𑁆𑀫𑀡𑁂 𑀘 𑀅𑀥𑀺𑀫𑀼𑀢𑁆𑀢𑀢𑁆𑀢𑀸’’𑀢𑀺 ¶ . 𑀬𑀤𑀺𑀧𑀺 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑀯𑀲𑁂𑀦 𑀧𑀢𑁆𑀢𑀩𑁆𑀩𑀸𑀦𑀺 𑀆𑀭𑀼𑀧𑁆𑀧𑀸𑀦𑀺, 𑀦 𑀅𑀗𑁆𑀕𑀸𑀢𑀺𑀓𑁆𑀓𑀫𑀯𑀲𑁂𑀦, 𑀢𑀣𑀸𑀧𑀺 𑀬𑀲𑁆𑀫𑀸 𑀆𑀭𑀫𑁆𑀫𑀡𑁂 𑀅𑀯𑀺𑀭𑀢𑁆𑀢𑀲𑁆𑀲 𑀛𑀸𑀦𑀲𑀫𑀢𑀺𑀓𑁆𑀓𑀫𑁄 𑀦 𑀳𑁄𑀢𑀺, 𑀲𑀫𑀢𑀺𑀓𑁆𑀓𑀦𑁆𑀢𑁂𑀲𑀼 𑀘 𑀛𑀸𑀦𑁂𑀲𑀼 𑀆𑀭𑀫𑁆𑀫𑀡𑀁 𑀲𑀫𑀢𑀺𑀓𑁆𑀓𑀦𑁆𑀢𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀆𑀭𑀫𑁆𑀫𑀡𑀲𑀫𑀢𑀺𑀓𑁆𑀓𑀫𑀁 𑀅𑀯𑀢𑁆𑀯𑀸 ‘‘𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸’’𑀢𑀺 𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀅𑀢𑀺𑀓𑁆𑀓𑀫𑁆𑀫 𑀭𑀽𑀧𑁂𑀢𑀺 𑀧𑀸𑀴𑀺𑀬𑀁 ‘‘𑀲𑀫𑁆𑀧𑀸𑀤𑁂𑀢𑀩𑁆𑀩𑀸, 𑀧𑀲𑁆𑀲𑀺𑀢𑀩𑁆𑀩𑀸’’𑀢𑀺 𑀯𑀸 𑀓𑀺𑀜𑁆𑀘𑀺 𑀧𑀤𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀅𑀲𑀼𑀢𑀧𑀭𑀺𑀓𑀧𑁆𑀧𑀦𑁂𑀦 𑀧𑀦 𑀧𑀬𑁄𑀚𑀦𑀁 𑀦𑀢𑁆𑀣𑀻𑀢𑀺 ‘‘𑀲𑀦𑁆𑀢𑀸𑀢𑀺 𑀧𑀤𑀲𑀫𑁆𑀩𑀦𑁆𑀥𑁄’’𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀢𑁂𑀦 𑀯𑀺𑀭𑀸𑀕𑀪𑀸𑀯𑁂𑀦 𑀢𑁂𑀲𑀁 𑀲𑀦𑁆𑀢𑀢𑀸𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀺𑀪𑀸𑀯𑀺𑀢𑁄 𑀳𑁄𑀢𑀺. 𑀭𑀽𑀧𑀚𑁆𑀛𑀸𑀦𑀸𑀤𑀻𑀦𑀁 𑀯𑀺𑀬 𑀦𑀢𑁆𑀣𑀺 𑀏𑀢𑁂𑀲𑀁 𑀆𑀭𑀫𑁆𑀫𑀡𑀪𑀽𑀢𑀁 𑀯𑀸 𑀨𑀮𑀪𑀽𑀢𑀁 𑀯𑀸 𑀭𑀽𑀧𑀦𑁆𑀢𑀺 𑀅𑀭𑀽𑀧𑀸. 𑀅𑀭𑀽𑀧𑀸 𑀏𑀯 𑀆𑀭𑀼𑀧𑁆𑀧𑀸. 𑀢𑁂𑀦𑀸𑀳 ‘‘𑀆𑀭𑀫𑁆𑀫𑀡𑀢𑁄 𑀘 𑀯𑀺𑀧𑀸𑀓𑀢𑁄 𑀘 𑀭𑀽𑀧𑀯𑀺𑀭𑀳𑀺𑀢𑀸’’𑀢𑀺. 𑀦𑀸𑀫𑀓𑀸𑀬𑁂𑀦𑀸𑀢𑀺 𑀲𑀳𑀚𑀸𑀢𑀦𑀸𑀫𑀲𑀫𑀽𑀳𑁂𑀦.

𑁬𑁭. 𑀲𑀁𑀬𑁄𑀚𑁂𑀦𑁆𑀢𑀻𑀢𑀺 𑀩𑀦𑁆𑀥𑀦𑁆𑀢𑀺. 𑀓𑁂𑀳𑀻𑀢𑀺 𑀆𑀳 ‘‘𑀔𑀦𑁆𑀥𑀕𑀢𑀻’’𑀢𑀺𑀆𑀤𑀺. 𑀅𑀲𑀫𑀼𑀘𑁆𑀙𑀺𑀦𑁆𑀦𑀭𑀸𑀕𑀸𑀤𑀺𑀓𑀲𑁆𑀲 ¶ 𑀳𑀺 𑀔𑀦𑁆𑀥𑀸𑀤𑀻𑀦𑀁 𑀆𑀬𑀢𑀺𑀁 𑀔𑀦𑁆𑀥𑀸𑀤𑀻𑀳𑀺 𑀲𑀫𑁆𑀩𑀦𑁆𑀥𑁄, 𑀲𑀫𑀼𑀘𑁆𑀙𑀺𑀦𑁆𑀦𑀭𑀸𑀕𑀸𑀤𑀺𑀓𑀲𑁆𑀲 𑀧𑀦 𑀢𑀁 𑀦𑀢𑁆𑀣𑀺 𑀓𑀢𑀸𑀦𑀫𑁆𑀧𑀺 𑀓𑀫𑁆𑀫𑀸𑀦𑀁 𑀅𑀲𑀫𑀢𑁆𑀣𑀪𑀸𑀯𑀸𑀧𑀢𑁆𑀢𑀺𑀢𑁄𑀢𑀺. 𑀭𑀸𑀕𑀸𑀤𑀻𑀦𑀁 𑀅𑀦𑁆𑀯𑀬𑀢𑁄 𑀘 𑀲𑀁𑀬𑁄𑀚𑀦𑀝𑁆𑀞𑁄 𑀲𑀺𑀤𑁆𑀥𑁄𑀢𑀺 𑀆𑀳 ‘‘𑀔𑀦𑁆𑀥𑀕𑀢𑀺…𑀧𑁂… 𑀯𑀼𑀘𑁆𑀘𑀦𑁆𑀢𑀻’’𑀢𑀺. 𑀧𑀭𑀺𑀓𑁆𑀔𑀬𑁂𑀦𑀸𑀢𑀺 𑀲𑀫𑀼𑀘𑁆𑀙𑁂𑀤𑁂𑀦 𑀲𑀩𑁆𑀩𑀲𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀚𑁆𑀚𑀦𑁂𑀦. 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀅𑀦𑀯𑀲𑁂𑀲𑀢𑁄 𑀲𑀯𑀦𑀢𑁄 𑀧𑀻𑀴𑀦𑀢𑁄 𑀲𑁄𑀢𑁄, 𑀅𑀭𑀺𑀬𑀫𑀕𑁆𑀕𑁄𑀢𑀺 𑀆𑀳 ‘‘𑀲𑁄𑀢𑁄𑀢𑀺 𑀘 𑀫𑀕𑁆𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀢𑀁 𑀲𑁄𑀢𑀁 𑀆𑀤𑀺𑀢𑁄 𑀧𑀦𑁆𑀦𑁄 𑀅𑀥𑀺𑀕𑀘𑁆𑀙𑀻𑀢𑀺 𑀲𑁄𑀢𑀸𑀧𑀦𑁆𑀦𑁄, 𑀅𑀝𑁆𑀞𑀫𑀓𑁄. 𑀢𑁂𑀦𑀸𑀳 ‘‘𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑀲𑁆𑀲𑀸’’𑀢𑀺, 𑀧𑀞𑀫𑀫𑀕𑁆𑀕𑀓𑁆𑀔𑀡𑁂 𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀥 𑀧𑀦 𑀧𑀦𑁆𑀦-𑀲𑀤𑁆𑀤𑁄 ‘‘𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁫𑁯) 𑀯𑀺𑀬 𑀯𑀢𑁆𑀢𑀫𑀸𑀦𑀓𑀸𑀮𑀺𑀓𑁄𑀢𑀺 𑀆𑀳 ‘‘𑀫𑀕𑁆𑀕𑁂𑀦 𑀨𑀮𑀲𑁆𑀲 𑀦𑀸𑀫𑀁 𑀤𑀺𑀦𑁆𑀦’’𑀦𑁆𑀢𑀺. 𑀅𑀪𑀻𑀢𑀓𑀸𑀮𑀺𑀓𑀢𑁆𑀢𑁂 𑀧𑀦 𑀲𑀭𑀲𑀢𑁄𑀯 𑀦𑀸𑀫𑀮𑀸𑀪𑁄 𑀲𑀺𑀬𑀸. 𑀯𑀺𑀭𑀽𑀧𑀁 𑀲𑀤𑀼𑀓𑁆𑀔𑀁 𑀲𑀉𑀧𑀸𑀬𑀸𑀲𑀁 𑀦𑀺𑀧𑀸𑀢𑁂𑀢𑀻𑀢𑀺 𑀯𑀺𑀦𑀺𑀧𑀸𑀢𑁄, 𑀅𑀧𑀸𑀬𑀤𑀼𑀓𑁆𑀔𑁂 𑀔𑀺𑀧𑀦𑀓𑁄. 𑀥𑀫𑁆𑀫𑁄𑀢𑀺 𑀲𑀪𑀸𑀯𑁄. 𑀢𑁂𑀦𑀸𑀳 ‘‘𑀅𑀢𑁆𑀢𑀸𑀦’’𑀦𑁆𑀢𑀺𑀆𑀤𑀺. 𑀓𑀲𑁆𑀫𑀸𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑀢𑀸𑀬 𑀓𑀸𑀭𑀡𑀁 𑀧𑀼𑀘𑁆𑀙𑀢𑀺. 𑀅𑀧𑀸𑀬𑀁 𑀕𑀫𑁂𑀦𑁆𑀢𑀻𑀢𑀺 𑀅𑀧𑀸𑀬𑀕𑀫𑀦𑀻𑀬𑀸. 𑀲𑀫𑁆𑀩𑀼𑀚𑁆𑀛𑀢𑀻𑀢𑀺 𑀲𑀫𑁆𑀩𑁄𑀥𑀺, 𑀅𑀭𑀺𑀬𑀫𑀕𑁆𑀕𑁄. 𑀲𑁄 𑀧𑀦 𑀧𑀞𑀫𑀫𑀕𑁆𑀕𑀲𑁆𑀲 𑀅𑀥𑀺𑀕𑀢𑀢𑁆𑀢𑀸 𑀅𑀯𑀲𑀺𑀝𑁆𑀞𑁄 𑀏𑀯 𑀅𑀥𑀺𑀕𑀦𑁆𑀥𑀩𑁆𑀩𑀪𑀸𑀯𑁂𑀦 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀆𑀳 ‘‘𑀉𑀧𑀭𑀺𑀫𑀕𑁆𑀕𑀢𑁆𑀢𑀬’’𑀦𑁆𑀢𑀺.

𑀯𑀡𑁆𑀡𑀪𑀡𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺,𑀦 𑀧𑀳𑀸𑀢𑀩𑁆𑀩𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀑𑀴𑀸𑀭𑀺𑀓𑀸𑀦𑀁 𑀭𑀸𑀕𑀸𑀤𑀻𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁄 𑀤𑀼𑀢𑀺𑀬𑀫𑀕𑁆𑀕𑁄 𑀅𑀯𑀲𑀺𑀝𑁆𑀞𑀸𑀦𑀁 𑀢𑁂𑀲𑀁 𑀢𑀦𑀼𑀪𑀸𑀯𑀸𑀧𑀢𑁆𑀢𑀺𑀬𑀸 ¶ 𑀉𑀧𑁆𑀧𑀦𑁆𑀦𑁄 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸’’𑀢𑀺. 𑀅𑀥𑀺𑀘𑁆𑀘𑀼𑀧𑁆𑀧𑀢𑁆𑀢𑀺𑀬𑀸𑀢𑀺 𑀓𑀤𑀸𑀘𑀺 𑀓𑀭𑀳𑀘𑀺 𑀉𑀧𑁆𑀧𑀚𑁆𑀚𑀦𑁂𑀦. 𑀧𑀭𑀺𑀬𑀼𑀝𑁆𑀞𑀸𑀦𑀫𑀦𑁆𑀤𑀢𑀸𑀬𑀸𑀢𑀺 𑀲𑀫𑀼𑀤𑀸𑀘𑀸𑀭𑀫𑀼𑀤𑀼𑀢𑀸𑀬. 𑀅𑀪𑀺𑀡𑁆𑀳𑀁 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺 𑀢𑀚𑁆𑀚𑀲𑁆𑀲 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲 𑀅𑀦𑀺𑀩𑀤𑁆𑀥𑀪𑀸𑀯𑀢𑁄. 𑀫𑀦𑁆𑀤𑀫𑀦𑁆𑀤𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀸𑀦𑀁 𑀢𑀧𑁆𑀧𑀘𑁆𑀘𑀬𑀸𑀦𑀜𑁆𑀘 𑀫𑁄𑀳𑀫𑀸𑀦𑀸𑀤𑀻𑀦𑀁 𑀫𑀼𑀤𑀼𑀢𑀭𑀪𑀸𑀯𑀢𑁄. 𑀩𑀳𑀮𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀺 𑀯𑀢𑁆𑀣𑀼𑀧𑀝𑀺𑀲𑁂𑀯𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀢𑀣𑀸 𑀳𑀻’’𑀢𑀺𑀆𑀤𑀺.

𑀲𑀓𑀺𑀁 𑀆𑀕𑀫𑀦𑀥𑀫𑁆𑀫𑁄𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀲𑀓𑀺𑀁𑀬𑁂𑀯 𑀆𑀕𑀫𑀦𑀲𑀪𑀸𑀯𑁄. 𑀏𑀓𑀯𑀸𑀭𑀁𑀬𑁂𑀯…𑀧𑁂… 𑀆𑀕𑀦𑁆𑀢𑁆𑀯𑀸𑀢𑀺 𑀇𑀫𑀺𑀦𑀸 𑀧𑀜𑁆𑀘𑀲𑀼 𑀲𑀓𑀤𑀸𑀕𑀸𑀫𑀻𑀲𑀼 𑀘𑀢𑁆𑀢𑀸𑀭𑁄 𑀯𑀚𑁆𑀚𑁂𑀢𑁆𑀯𑀸 𑀏𑀓𑁄𑀬𑁂𑀯 𑀕𑀳𑀺𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄𑀧𑀺 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑁆𑀯𑀸𑀬𑀁 𑀧𑀜𑁆𑀘𑀫𑀓𑁄 𑀲𑀓𑀤𑀸𑀕𑀸𑀫𑀻 ‘‘𑀇𑀥 𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄, 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀧𑀼𑀦 𑀇𑀥𑀽𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀻’’𑀢𑀺 𑀯𑀼𑀢𑁆𑀢𑁄, 𑀢𑀲𑁆𑀲 𑀏𑀓𑀩𑀻𑀚𑀺𑀦𑀸 𑀲𑀤𑁆𑀥𑀺𑀁 𑀓𑀺𑀁 𑀦𑀸𑀦𑀸𑀓𑀭𑀡𑀦𑁆𑀢𑀺? 𑀏𑀓𑀩𑀻𑀚𑀺𑀲𑁆𑀲 𑀏𑀓𑀸 𑀧𑀝𑀺𑀲𑀦𑁆𑀥𑀺, 𑀲𑀓𑀤𑀸𑀕𑀸𑀫𑀺𑀲𑁆𑀲 𑀤𑁆𑀯𑁂 𑀧𑀝𑀺𑀲𑀦𑁆𑀥𑀺𑀬𑁄𑀢𑀺 𑀇𑀤𑀁 𑀢𑁂𑀲𑀁 𑀦𑀸𑀦𑀸𑀓𑀭𑀡𑀁. 𑀬𑀲𑁆𑀲 𑀳𑀺 𑀲𑁄𑀢𑀸𑀧𑀦𑁆𑀦𑀲𑁆𑀲 𑀏𑀓𑀁𑀬𑁂𑀯 𑀔𑀦𑁆𑀥𑀩𑀻𑀚𑀁, 𑀦 𑀏𑀓𑀁 𑀅𑀢𑁆𑀢𑀪𑀸𑀯𑀕𑁆𑀕𑀳𑀡𑀁, 𑀲𑁄 𑀏𑀓𑀩𑀻𑀚𑀻𑀢𑀺.

𑀳𑁂𑀝𑁆𑀞𑀸𑀢𑀺 ¶ ‘‘𑀅𑀫𑀳𑀕𑁆𑀕𑀢𑀪𑀽𑀫𑀺𑀬’’𑀦𑁆𑀢𑀺 𑀳𑁂𑀝𑁆𑀞𑀸 𑀲𑀫𑁆𑀩𑀦𑁆𑀥𑀦𑁂𑀦. 𑀳𑁂𑀝𑁆𑀞𑀸𑀪𑀸𑀕𑀲𑁆𑀲 𑀳𑀺𑀢𑀸𑀢𑀺 𑀳𑁂𑀝𑁆𑀞𑀸𑀪𑀸𑀕𑀺𑀬𑀸, 𑀢𑁂𑀲𑀁. 𑀢𑀸𑀦𑀻𑀢𑀺 𑀑𑀭𑀩𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺. 𑀓𑀸𑀫𑀸𑀯𑀘𑀭𑁂 𑀦𑀺𑀩𑁆𑀩𑀢𑁆𑀢𑀢𑀺𑀬𑁂𑀯 𑀅𑀚𑁆𑀛𑀢𑁆𑀢𑀁 𑀲𑀁𑀬𑁄𑀚𑀦𑀢𑁆𑀢𑀸. 𑀢𑀣𑀸 𑀳𑁂𑀲 𑀤𑀽𑀭𑀢𑁄𑀧𑀺 𑀆𑀯𑀢𑁆𑀢𑀺𑀥𑀫𑁆𑀫𑁄 𑀏𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 𑀕𑀺𑀮𑀩𑀴𑀺𑀲𑀫𑀘𑁆𑀙𑀸𑀤𑀬𑁄 𑀉𑀧𑀫𑀸𑀪𑀸𑀯𑁂𑀦 𑀯𑀼𑀢𑁆𑀢𑀸. 𑀑𑀧𑀧𑀸𑀢𑀺𑀓𑁄𑀢𑀺 𑀇𑀫𑀺𑀦𑀸 𑀕𑀩𑁆𑀪𑀯𑀸𑀲𑀤𑀼𑀓𑁆𑀔𑀸𑀪𑀸𑀯𑀫𑀸𑀳. 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀇𑀫𑀺𑀦𑀸 𑀲𑁂𑀲𑀤𑀼𑀓𑁆𑀔𑀸𑀪𑀸𑀯𑀁. 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀦𑀢𑀸 𑀘𑀲𑁆𑀲 𑀓𑀸𑀫𑀮𑁄𑀓𑁂 𑀔𑀦𑁆𑀥𑀩𑀻𑀚𑀲𑁆𑀲 𑀅𑀧𑀼𑀦𑀸𑀭𑁄𑀳𑀯𑀲𑁂𑀦𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄’’𑀢𑀺 𑀯𑀼𑀢𑁆𑀢𑀁.

𑁬𑁮. 𑀓𑁂𑀯𑀮𑀸𑀢𑀺 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀳𑀺 𑀅𑀲𑀫𑁆𑀫𑀺𑀲𑁆𑀲𑀸. 𑀮𑁄𑀓𑀺𑀬𑀧𑀜𑁆𑀘𑀸𑀪𑀺𑀜𑁆𑀜𑀸𑀬𑁄𑀧𑀺 𑀲𑀻𑀮𑀸𑀦𑀁 𑀆𑀦𑀺𑀲𑀁𑀲𑁄 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀢𑀸𑀧𑀺 𑀤𑀲𑁆𑀲𑁂𑀢𑀼𑀁 𑀆𑀓𑀗𑁆𑀔𑁂𑀬𑁆𑀬 𑀘𑁂…𑀧𑁂… 𑀏𑀯𑀫𑀸𑀤𑀺𑀫𑀸𑀳𑀸𑀢𑀺 𑀬𑁄𑀚𑀦𑀸. 𑀆𑀲𑀯𑀸𑀦𑀁 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑁄𑀬𑁂𑀯 𑀯𑀺𑀲𑁂𑀲𑀢𑁄 ‘‘𑀆𑀲𑀯𑀓𑁆𑀔𑀬𑁄’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀆𑀲𑀯𑀓𑁆𑀔𑀬𑁂 𑀓𑀣𑀺𑀢𑁂’’𑀢𑀺, 𑀅𑀜𑁆𑀜𑀣𑀸 𑀲𑀩𑁆𑀩𑀸𑀧𑀺 𑀙𑀴𑀪𑀺𑀜𑁆𑀜𑀸 𑀆𑀲𑀯𑀓𑁆𑀔𑀬𑁄 𑀏𑀯𑀸𑀢𑀺. 𑀇𑀫𑁂𑀲𑀁 𑀕𑀼𑀡𑀸𑀦𑀦𑁆𑀢𑀺 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀦𑀁 ¶ . 𑀬𑀣𑀸 𑀧𑀼𑀭𑀺𑀲𑀲𑁆𑀲 𑀫𑀼𑀡𑁆𑀟𑀺𑀢𑀁 𑀲𑀻𑀲𑀁 𑀲𑀺𑀔𑀸𑀯𑀺𑀭𑀳𑀺𑀢𑀢𑁆𑀢𑀸 𑀦 𑀲𑁄𑀪𑀢𑀺, 𑀏𑀯𑀁 𑀤𑁂𑀲𑀦𑀸𑀬 𑀲𑀻𑀲𑀪𑀽𑀢𑀸𑀧𑀺 𑀅𑀕𑁆𑀕𑀫𑀕𑁆𑀕𑀓𑀣𑀸 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀭𑀳𑀺𑀢𑀸 𑀦 𑀲𑁄𑀪𑀢𑀻𑀢𑀺 𑀆𑀳 ‘‘𑀅𑀬𑀁 𑀓𑀣𑀸 𑀫𑀼𑀡𑁆𑀟𑀸𑀪𑀺𑀜𑁆𑀜𑀸𑀓𑀣𑀸 𑀦𑀸𑀫 𑀪𑀯𑁂𑀬𑁆𑀬𑀸’’𑀢𑀺. 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀸𑀢𑀺 𑀇𑀤𑁆𑀥𑀺 𑀘 𑀯𑀺𑀓𑀼𑀩𑁆𑀩𑀦𑀸 𑀘. 𑀯𑀺𑀓𑀼𑀩𑁆𑀩𑀦𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺𑀫𑀸𑀳, 𑀇𑀤𑁆𑀥𑀺𑀕𑁆𑀕𑀳𑀡𑁂𑀦 𑀢𑀤𑀜𑁆𑀜𑀁 𑀲𑀩𑁆𑀩𑀜𑁆𑀘 𑀅𑀪𑀺𑀜𑁆𑀜𑀸𑀓𑀺𑀘𑁆𑀘𑀁. 𑀬𑀼𑀢𑁆𑀢𑀝𑁆𑀞𑀸𑀦𑁂𑀬𑁂𑀯𑀸𑀢𑀺 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀦𑀁 𑀦𑀺𑀩𑁆𑀩𑀢𑁆𑀢𑀦𑀲𑁆𑀲 𑀯𑀺𑀬 𑀤𑁂𑀲𑀦𑀸𑀬 𑀬𑀼𑀢𑁆𑀢𑀝𑁆𑀞𑀸𑀦𑁂𑀬𑁂𑀯. 𑀏𑀢𑁂𑀦 𑀦 𑀓𑁂𑀯𑀮𑀁 𑀤𑁂𑀲𑀦𑀓𑁆𑀓𑀫𑁂𑀦𑁂𑀯𑀸𑀬𑀁 𑀤𑁂𑀲𑀦𑀸, 𑀅𑀣 𑀔𑁄 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁂𑀦𑀧𑀻𑀢𑀺 𑀤𑀲𑁆𑀲𑁂𑀢𑀺. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁩𑁬𑁯) 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁯. 𑀆𑀲𑀯𑀸𑀦𑀁 𑀔𑀬𑀸𑀢𑀺 𑀳𑁂𑀝𑁆𑀞𑀺𑀫𑀫𑀕𑁆𑀕𑁂𑀦 𑀔𑁂𑀧𑀺𑀢𑀸𑀯𑀲𑀺𑀝𑁆𑀞𑀸𑀦𑀁 𑀆𑀲𑀯𑀸𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀦𑀢𑁄. 𑀬𑀲𑁆𑀫𑀸 𑀅𑀭𑀳𑀢𑁆𑀢𑀫𑀕𑁆𑀕𑁄 𑀦 𑀓𑁂𑀯𑀮𑀁 𑀆𑀲𑀯𑁂𑀬𑁂𑀯 𑀔𑁂𑀧𑁂𑀢𑀺, 𑀅𑀣 𑀔𑁄 𑀅𑀯𑀲𑀺𑀝𑁆𑀞𑁂 𑀲𑀩𑁆𑀩𑀓𑀺𑀮𑁂𑀲𑁂𑀧𑀺, 𑀢𑀲𑁆𑀫𑀸 𑀆𑀳 ‘‘𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀔𑀬𑀸’’𑀢𑀺. 𑀮𑀓𑁆𑀔𑀡𑀫𑀢𑁆𑀢𑀜𑁆𑀳𑁂𑀢𑁆𑀣 𑀆𑀲𑀯𑀕𑁆𑀕𑀳𑀡𑀁, 𑀆𑀲𑀯𑀸𑀦𑀁 𑀆𑀭𑀫𑁆𑀫𑀡𑀪𑀸𑀯𑀲𑁆𑀲𑀧𑀺 𑀅𑀦𑀼𑀧𑀕𑀫𑀦𑀢𑁄 𑀅𑀦𑀸𑀲𑀯𑀁. 𑀬𑀲𑁆𑀫𑀸 𑀧𑀦 𑀢𑀢𑁆𑀣 𑀆𑀲𑀯𑀸𑀦𑀁 𑀮𑁂𑀲𑁄𑀧𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀆𑀲𑀯𑀯𑀺𑀭𑀳𑀺𑀢’’𑀦𑁆𑀢𑀺. 𑀲𑀫𑀸𑀥𑀺 𑀯𑀼𑀢𑁆𑀢𑁄 𑀘𑁂𑀢𑁄𑀲𑀻𑀲𑁂𑀦 𑀬𑀣𑀸 ‘‘𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁩, 𑁧𑁯𑁨; 𑀧𑁂𑀝𑀓𑁄. 𑁨𑁨; 𑀫𑀺. 𑀧. 𑁨.𑁧.𑁯) 𑀅𑀥𑀺𑀧𑁆𑀧𑀸𑀬𑁄. 𑀭𑀸𑀕𑀢𑁄 𑀯𑀺𑀫𑀼𑀢𑁆𑀢𑀢𑁆𑀢𑀸 𑀅𑀯𑀺𑀚𑁆𑀚𑀸𑀬 𑀯𑀺𑀫𑀼𑀢𑁆𑀢𑀢𑁆𑀢𑀸𑀢𑀺 𑀇𑀤𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀤𑀲𑁆𑀲𑀦𑀁 𑀤𑀝𑁆𑀞𑀩𑁆𑀩𑀁, 𑀦 𑀢𑀤𑀜𑁆𑀜𑁂𑀲𑀁 𑀧𑀸𑀧𑀥𑀫𑁆𑀫𑀸𑀦𑀁 𑀅𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀸. 𑀇𑀤𑀸𑀦𑀺 𑀢𑀫𑁂𑀯 𑀲𑀫𑀸𑀥𑀺𑀧𑀜𑁆𑀜𑀸𑀦𑀁 𑀭𑀸𑀕𑀸𑀯𑀺𑀚𑁆𑀚𑀸𑀧𑀝𑀺𑀧𑀓𑁆𑀔𑀢𑀁 𑀆𑀕𑀫𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀯𑀼𑀢𑁆𑀢𑀁 𑀘𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑀣𑀨𑀮𑀦𑁆𑀢𑀺 𑀲𑀫𑀣𑀲𑁆𑀲 𑀨𑀮𑀁 𑀮𑁄𑀓𑀺𑀬𑀲𑀫𑀣𑀪𑀸𑀯𑀦𑀸𑀬 𑀳𑀺 𑀯𑀺𑀧𑀲𑁆𑀲𑀦𑀸𑀕𑀢𑀸𑀬 𑀆𑀳𑀺𑀢𑀨𑀮𑀲𑁆𑀲 𑀮𑁄𑀓𑀼𑀢𑁆𑀢𑀭𑀲𑀫𑀣𑀲𑁆𑀲 𑀲𑀭𑀺𑀓𑁆𑀔𑀓𑀨𑀮𑁄 𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀯𑀺𑀧𑀲𑁆𑀲𑀦𑀸𑀨𑀮𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀢𑁆𑀢𑀦𑁄𑀬𑁂𑀯𑀸𑀢𑀺 𑀲𑀼𑀢𑀫𑀬𑀜𑀸𑀡𑀸𑀤𑀺𑀦𑀸 𑀯𑀺𑀬 𑀧𑀭𑀧𑀘𑁆𑀘𑀬𑀢𑀁 ¶ 𑀦𑀬𑀕𑁆𑀕𑀸𑀳𑀜𑁆𑀘 𑀫𑀼𑀜𑁆𑀘𑀺𑀢𑁆𑀯𑀸 𑀧𑀭𑀢𑁄𑀖𑁄𑀲𑀸𑀦𑀼𑀕𑀢𑀪𑀸𑀯𑀦𑀸𑀥𑀺𑀕𑀫𑀪𑀽𑀢𑀢𑀸𑀬 𑀅𑀢𑁆𑀢𑀦𑁄𑀬𑁂𑀯 𑀧𑀜𑁆𑀜𑀸𑀬 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀲𑀬𑀫𑁆𑀪𑀼𑀜𑀸𑀡𑀪𑀽𑀢𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀅𑀧𑀭𑀧𑁆𑀧𑀘𑁆𑀘𑀬𑁂𑀦 𑀜𑀢𑁆𑀯𑀸’’𑀢𑀺.

𑀲𑀩𑁆𑀩𑀫𑁆𑀧𑀺 𑀢𑀦𑁆𑀢𑀺 𑀲𑀩𑁆𑀩𑀫𑁆𑀧𑀺 𑀲𑀢𑁆𑀢𑀭𑀲𑀯𑀺𑀥𑀁 𑀢𑀁 𑀬𑀣𑀸𑀯𑀼𑀢𑁆𑀢𑀁 𑀲𑀻𑀮𑀸𑀦𑀺𑀲𑀁𑀲𑀁. 𑀬𑀣𑀸 𑀆𑀦𑀺𑀲𑀁𑀲𑀯𑀦𑁆𑀢𑁂 𑀲𑀫𑁆𑀫𑀤𑁂𑀯 𑀲𑀫𑁆𑀧𑀸𑀤𑀺𑀢𑁂 𑀢𑀤𑀸𑀦𑀺𑀲𑀁𑀲𑀸 𑀤𑀲𑁆𑀲𑀺𑀢𑀸 𑀏𑀯 𑀳𑁄𑀦𑁆𑀢𑀺 𑀢𑀤𑀸𑀬𑀢𑁆𑀢𑀪𑀸𑀯𑀢𑁄, 𑀏𑀯𑀁 𑀆𑀦𑀺𑀲𑀁𑀲𑀧𑀥𑀸𑀦𑀬𑁄𑀕𑁆𑀬𑀪𑀸𑀯𑁂𑀦 𑀤𑀲𑁆𑀲𑀺𑀢𑁂 ¶ 𑀢𑀤𑀸𑀦𑀺𑀲𑀁𑀲𑀸 𑀤𑀲𑁆𑀲𑀺𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄’’𑀢𑀺. 𑀯𑀼𑀢𑁆𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀧𑀼𑀦𑀯𑀘𑀦𑀁 𑀦𑀺𑀕𑀫𑀦𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀦𑀺𑀕𑀫𑀦𑀁 𑀆𑀳𑀸’’𑀢𑀺. 𑀧𑀼𑀩𑁆𑀩𑁂𑀢𑀺 𑀤𑁂𑀲𑀦𑀸𑀭𑀫𑁆𑀪𑁂. 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 ‘‘𑀲𑀫𑁆𑀧𑀦𑁆𑀦𑀲𑀻𑀮𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀆𑀓𑀸𑀭𑁂𑀦 𑀯𑀼𑀢𑁆𑀢𑀁. 𑀇𑀤𑀁 𑀲𑀩𑁆𑀩𑀫𑁆𑀧𑀻𑀢𑀺 𑀇𑀤𑀁 ‘‘𑀲𑀫𑁆𑀧𑀦𑁆𑀦𑀲𑀻𑀮𑀸’’𑀢𑀺𑀆𑀤𑀺𑀓𑀁 𑀲𑀩𑁆𑀩𑀫𑁆𑀧𑀺 𑀯𑀘𑀦𑀁. 𑀏𑀢𑀁 𑀧𑀝𑀺𑀘𑁆𑀘𑀸𑀢𑀺 𑀏𑀢𑀁 𑀲𑀫𑁆𑀧𑀦𑁆𑀦𑀲𑀻𑀮𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀣𑀸𑀯𑀼𑀢𑁆𑀢𑀲𑀢𑁆𑀢𑀭𑀲𑀯𑀺𑀥𑀸𑀦𑀺𑀲𑀁𑀲𑀪𑀸𑀕𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀤𑀫𑁂𑀯 𑀳𑀺 ‘‘𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺 𑀯𑀘𑀦𑀁 𑀲𑀦𑁆𑀥𑀸𑀬 ‘‘𑀲𑀩𑁆𑀩𑀫𑁆𑀧𑀺 𑀢𑀁 𑀲𑀻𑀮𑀸𑀦𑀺𑀲𑀁𑀲𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣𑀆𑀤𑀺𑀢𑁄 𑀙𑀳𑀺 𑀆𑀦𑀺𑀲𑀁𑀲𑁂𑀳𑀺 𑀧𑀭𑀺𑀢𑁆𑀢𑀪𑀽𑀫𑀺𑀓𑀸 𑀲𑀫𑁆𑀧𑀢𑁆𑀢𑀺 𑀕𑀳𑀺𑀢𑀸, 𑀢𑀤𑀦𑁆𑀢𑀭𑀁 𑀧𑀜𑁆𑀘𑀳𑀺 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀳𑀺 𑀘 𑀫𑀳𑀕𑁆𑀕𑀢𑀪𑀽𑀫𑀺𑀓𑀸, 𑀇𑀢𑀭𑁂𑀳𑀺 𑀮𑁄𑀓𑀼𑀢𑁆𑀢𑀭𑀪𑀽𑀫𑀺𑀓𑀸𑀢𑀺 𑀏𑀯𑀁 𑀘𑀢𑀼𑀪𑀽𑀫𑀺𑀓𑀲𑀫𑁆𑀧𑀤𑀸𑀦𑀺𑀲𑀁𑀲𑀲𑀻𑀮𑀁 𑀦𑀸𑀫𑁂𑀢𑀁 𑀫𑀳𑀦𑁆𑀢𑀁 𑀫𑀳𑀸𑀦𑀼𑀪𑀸𑀯𑀁, 𑀢𑀲𑁆𑀫𑀸 𑀢𑀁𑀲𑀫𑁆𑀧𑀸𑀤𑀦𑁂 𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸 𑀅𑀧𑁆𑀧𑀫𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀁.

𑀆𑀓𑀗𑁆𑀔𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁭. 𑀯𑀢𑁆𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁦. 𑀙𑀸𑀤𑁂𑀢𑀩𑁆𑀩𑀁 ¶ 𑀞𑀸𑀦𑀁 𑀯𑀲𑀢𑀺 𑀧𑀝𑀺𑀘𑁆𑀙𑀸𑀤𑁂𑀢𑀻𑀢𑀺 𑀯𑀢𑁆𑀣𑀁. 𑀬𑀁 𑀲𑀫𑀸𑀦𑀁 𑀯𑀺𑀬 𑀦 𑀲𑀩𑁆𑀩𑀲𑁄 𑀫𑀺𑀦𑁄𑀢𑀺, 𑀫𑀸𑀦𑀲𑁆𑀲 𑀧𑀦 𑀲𑀫𑀻𑀧𑁂, 𑀢𑀁 𑀉𑀧𑀫𑀸𑀦𑀁. 𑀉𑀧𑀫𑀻𑀬𑀢𑀺 𑀏𑀢𑀸𑀬𑀸𑀢𑀺 𑀉𑀧𑀫𑀸, 𑀉𑀧𑀫𑀸𑀬 𑀩𑁄𑀥𑀓𑀯𑀘𑀦𑀁 𑀉𑀧𑀫𑀸𑀯𑀘𑀦𑀁. 𑀓𑀢𑁆𑀣𑀘𑀺 𑀲𑀼𑀢𑁆𑀢𑁂. 𑀅𑀢𑁆𑀣𑀦𑁆𑀢𑀺 𑀉𑀧𑀫𑀺𑀬𑀢𑁆𑀣𑀁. 𑀧𑀞𑀫𑀁 𑀉𑀧𑀫𑀁 𑀯𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀅𑀢𑁆𑀣𑀁 𑀯𑀢𑁆𑀯𑀸 𑀧𑀼𑀦 𑀉𑀧𑀫𑀁 𑀯𑀤𑀦𑁆𑀢𑁄 ‘‘𑀉𑀧𑀫𑀸𑀬 𑀅𑀢𑁆𑀣𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀻’’𑀢𑀺 𑀯𑀼𑀢𑁆𑀢𑁄. 𑀅𑀢𑁆𑀣𑁂𑀦 𑀉𑀧𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀇𑀤𑀸𑀦𑀺 𑀢𑁂 𑀘𑀢𑁆𑀢𑀸𑀭𑁄𑀧𑀺 𑀧𑀓𑀸𑀭𑁂 𑀲𑀼𑀢𑁆𑀢𑁂 𑀆𑀕𑀢𑀦𑀬𑁂𑀦𑁂𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁂𑀬𑁆𑀬𑀣𑀸𑀧𑀺𑀲𑁆𑀲𑀼, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑁆𑀯𑁂 𑀅𑀕𑀸𑀭𑀸𑀢𑀺 𑀤𑁆𑀯𑁂 𑀧𑀝𑀺𑀯𑀺𑀲𑁆𑀲𑀓𑀖𑀭𑀸. 𑀲𑀤𑁆𑀯𑀸𑀭𑀸𑀢𑀺 𑀲𑀫𑁆𑀫𑀼𑀔𑀤𑁆𑀯𑀸𑀭𑀸.

𑀲𑁆𑀯𑀸𑀬𑀦𑁆𑀢𑀺 𑀲𑁄 𑀅𑀬𑀁 𑀏𑀯𑀁 𑀉𑀧𑀫𑀸𑀤𑀲𑁆𑀲𑀦𑀯𑀲𑁂𑀦𑀧𑀺 𑀦𑀸𑀦𑀸𑀦𑀬𑁂𑀦𑀧𑀺 𑀥𑀫𑁆𑀫𑀤𑁂𑀲𑀓𑁄 𑀪𑀕𑀯𑀸. 𑀏𑀓𑀘𑁆𑀘𑀸𑀦𑀁 𑀯𑁂𑀦𑁂𑀬𑁆𑀬𑀸𑀦𑀁 𑀅𑀢𑁆𑀣𑀲𑁆𑀲 𑀲𑀼𑀔𑀸𑀯𑀩𑁄𑀥𑁄 𑀧𑀞𑀫𑀁 𑀉𑀧𑀫𑀸𑀤𑀲𑁆𑀲𑀦𑁂 𑀳𑁂𑀢𑀼, 𑀏𑀯𑀁 𑀧𑀞𑀫𑀁 𑀅𑀢𑁆𑀣𑀤𑀲𑁆𑀲𑀦𑁂, 𑀉𑀧𑀫𑀸𑀬 𑀅𑀢𑁆𑀣𑀧𑀭𑀺𑀯𑀸𑀭𑀡𑁂, 𑀅𑀢𑁆𑀣𑁂𑀦 𑀉𑀧𑀫𑀸𑀧𑀭𑀺𑀯𑀸𑀭𑀡𑁂 𑀘𑀸’’𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣𑀸’’𑀢𑀺 ¶ 𑀇𑀫𑀺𑀦𑀸. 𑀥𑀫𑁆𑀫𑀥𑀸𑀢𑀼𑀬𑀸𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲. 𑀢𑀜𑁆𑀳𑀺 𑀥𑀫𑁆𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑁂 𑀘 𑀲𑀩𑁆𑀩𑁂𑀧𑀺 𑀜𑁂𑀬𑁆𑀬𑀥𑀫𑁆𑀫𑁂 𑀘 𑀧𑀤𑀳𑀢𑀺 𑀬𑀣𑀸𑀲𑀪𑀸𑀯𑀢𑁄 𑀩𑀼𑀚𑁆𑀛𑀢𑀺 𑀩𑁄𑀥𑁂𑀢𑀺 𑀘𑀸𑀢𑀺 𑀥𑀸𑀢𑀼, 𑀥𑀻𑀬𑀦𑁆𑀢𑀺 𑀯𑀸 𑀥𑀫𑁆𑀫𑀸 𑀏𑀢𑀸𑀬 𑀲𑀩𑁆𑀩𑀸𑀓𑀸𑀭𑀢𑁄 𑀜𑀸𑀬𑀦𑁆𑀢𑀺 𑀜𑀸𑀧𑀺𑀬𑀦𑁆𑀢𑀺 𑀘𑀸𑀢𑀺 𑀥𑀫𑁆𑀫𑀥𑀸𑀢𑀼. 𑀢𑀲𑁆𑀲𑀸 𑀧𑀦 𑀲𑀼𑀝𑁆𑀞𑀼 𑀲𑀘𑁆𑀘𑀲𑀫𑁆𑀧𑀝𑀺𑀯𑁂𑀥𑀯𑀲𑁂𑀦 𑀮𑀤𑁆𑀥𑀢𑁆𑀢𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸𑀢𑀺, 𑀬𑀤𑀕𑁆𑀕𑁂𑀦 𑀯𑀸 𑀜𑁂𑀬𑁆𑀬𑀁 𑀢𑀸𑀬 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀁, 𑀢𑀤𑀕𑁆𑀕𑁂𑀦 𑀲𑀸𑀧𑀺𑀲𑁆𑀲 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸 𑀏𑀯𑀸𑀢𑀺 𑀆𑀳 ‘‘𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸’’𑀢𑀺.

𑀧𑀓𑀢𑀺𑀧𑀭𑀺𑀬𑁄𑀤𑀸𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀆𑀕𑀦𑁆𑀢𑀼𑀓𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀲𑀁𑀓𑀺𑀮𑀺𑀝𑁆𑀞𑀯𑀢𑁆𑀣𑀤𑀲𑁆𑀲𑀦𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀧𑀓𑀢𑀺𑀧𑀭𑀺𑀲𑀼𑀤𑁆𑀥𑀁 𑀯𑀢𑁆𑀣’’𑀦𑁆𑀢𑀺. 𑀭𑀚𑀸𑀤𑀺𑀦𑀸𑀢𑀺 𑀏𑀢𑁆𑀣𑀭𑀚𑁄 𑀦𑀸𑀫 𑀭𑁂𑀡𑀼. 𑀆𑀤𑀺-𑀲𑀤𑁆𑀤𑁂𑀦 𑀅𑀡𑀼𑀢𑀚𑁆𑀚𑀸𑀭𑀺𑀥𑀽𑀫𑀸𑀤𑀺𑀓𑀁 𑀯𑀢𑁆𑀣𑀲𑁆𑀲 𑀅𑀧𑀭𑀺𑀲𑀼𑀤𑁆𑀥𑀺𑀓𑀸𑀭𑀡𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀩𑁆𑀩𑀲𑁄 𑀓𑀺𑀮𑀺𑀲𑁆𑀲𑀢𑀺 𑀯𑀺𑀦𑀲𑁆𑀲𑀢𑀺 𑀯𑀺𑀲𑀼𑀤𑁆𑀥𑀺 𑀏𑀢𑁂𑀦𑀸𑀢𑀺 𑀲𑀁𑀓𑀺𑀮𑁂𑀲𑁄, 𑀢𑁂𑀦 𑀲𑀁𑀓𑀺𑀮𑁂𑀲𑁂𑀦 𑀧𑀁𑀲𑀼𑀭𑀚𑀸𑀤𑀺𑀦𑀸 𑀲𑀁𑀓𑀺𑀮𑀺𑀝𑁆𑀞𑀁 𑀯𑀡𑁆𑀡𑀯𑀺𑀦𑀸𑀲𑀦𑁂𑀦 𑀯𑀺𑀤𑀽𑀲𑀺𑀢𑀁. 𑀫𑀮𑀁 𑀫𑀲𑀺. 𑀚𑀮𑁆𑀮𑀺𑀓𑀸 𑀯𑀼𑀘𑁆𑀘𑀢𑀺 𑀮𑁄𑀡𑀧𑀝𑀮𑀸𑀤𑀺 𑀙𑀯𑀺𑀬𑀸 𑀉𑀧𑀭𑀺 𑀞𑀺𑀢𑀁 𑀲𑀭𑀻𑀭𑀫𑀮𑀁. 𑀆𑀤𑀺𑀲𑀤𑁆𑀤𑁂𑀦 𑀲𑀭𑀻𑀭𑀚𑀮𑁆𑀮𑀫𑁂𑀯 𑀅𑀲𑁆𑀲𑀼𑀔𑁂𑀴𑀲𑀺𑀗𑁆𑀖𑀸𑀡𑀺𑀓𑀸𑀤𑀺𑀓𑀁 𑀢𑀤𑀜𑁆𑀜𑀫𑀮𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀕𑀳𑀺𑀢𑀢𑁆𑀢𑀸𑀢𑀺 𑀧𑀭𑀺𑀬𑁄𑀦𑀦𑁆𑀥𑀦𑀯𑀲𑁂𑀦 𑀕𑀳𑀺𑀢𑀢𑁆𑀢𑀸. 𑀭𑀚𑀦𑁆𑀢𑀺 𑀲𑀢𑁆𑀢𑀸 𑀢𑁂𑀦𑀸𑀢𑀺 𑀭𑀗𑁆𑀕𑀁, 𑀭𑀗𑁆𑀕𑀫𑁂𑀯 𑀭𑀗𑁆𑀕𑀚𑀸𑀢𑀁 𑀬𑀣𑀸 𑀓𑁄𑀧𑀫𑁂𑀯 𑀓𑁄𑀧𑀚𑀸𑀢𑀁. 𑀉𑀧𑀦𑀸𑀫𑁂𑀬𑁆𑀬𑀸𑀢𑀺 𑀧𑀓𑁆𑀔𑀺𑀧𑁂𑀬𑁆𑀬. 𑀦𑀻𑀮𑀓𑀢𑁆𑀣𑀸𑀬𑀸𑀢𑀺 𑀦𑀻𑀮𑀯𑀡𑁆𑀡𑀢𑁆𑀣𑀸𑀬. 𑀧𑀮𑀸𑀲𑀦𑀻𑀮𑀸𑀤𑀺𑀓𑁂𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀸𑀴𑀲𑀸𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀳𑀮𑀺𑀤𑁆𑀤𑀺𑀓𑀓𑀼𑀥𑀲𑁂𑀮𑀸𑀤𑀺𑀓𑁂 𑀧𑀻𑀢𑀓𑀭𑀗𑁆𑀕𑁂. 𑀮𑀸𑀔𑀸𑀧𑀢𑁆𑀢𑀗𑁆𑀕𑀭𑀲𑀸𑀤𑀺𑀓𑁂 ¶ 𑀮𑁄𑀳𑀺𑀢𑀓𑀭𑀗𑁆𑀕𑁂. 𑀫𑀳𑀸𑀭𑀚𑀦𑀮𑁄𑀤𑁆𑀤𑀓𑀦𑁆𑀤𑀼𑀮𑀸𑀤𑀺𑀓𑁂 𑀫𑀦𑁆𑀤𑀭𑀢𑁆𑀢𑀭𑀗𑁆𑀕𑁂. 𑀤𑀼𑀝𑁆𑀞𑀼 𑀭𑀚𑀺𑀢𑀯𑀡𑁆𑀡𑀁 𑀅𑀧𑀪𑀲𑁆𑀲𑀭𑀁. 𑀢𑁂𑀦𑀸𑀳 ‘‘𑀅𑀧𑀭𑀺𑀲𑀼𑀤𑁆𑀥𑀯𑀡𑁆𑀡𑀫𑁂𑀯𑀲𑁆𑀲𑀸’’𑀢𑀺. 𑀈𑀤𑀺𑀲𑀦𑁆𑀢𑀺 𑀤𑀼𑀭𑀢𑁆𑀢𑀯𑀡𑁆𑀡𑀁. 𑀢𑀲𑁆𑀫𑀺𑀁 𑀯𑀢𑁆𑀣𑁂 𑀭𑀗𑁆𑀕𑀚𑀸𑀢𑀁 𑀲𑀬𑀁 𑀲𑀼𑀧𑀭𑀺𑀲𑀼𑀤𑁆𑀥𑀁 𑀲𑀫𑀸𑀦𑀁 𑀓𑀺𑀲𑁆𑀲 𑀳𑁂𑀢𑀼 𑀓𑁂𑀦 𑀭𑀢𑁆𑀢𑀯𑀡𑁆𑀡𑀁 𑀅𑀧𑀭𑀺𑀲𑀼𑀤𑁆𑀥𑀁 𑀳𑁄𑀢𑀻𑀢𑀺 𑀭𑀗𑁆𑀕𑀚𑀸𑀢𑀲𑁆𑀲 𑀦𑀺𑀤𑁆𑀤𑁄𑀲𑀢𑀁 𑀯𑀤𑀢𑀺. 𑀢𑁂𑀦𑀸𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺.

𑀲𑀁𑀓𑀺𑀮𑁂𑀲𑀧𑀓𑁆𑀔𑀁 𑀤𑀲𑁆𑀲𑁂𑀦𑁆𑀢𑁂𑀦 𑀅𑀲𑀁𑀓𑀺𑀮𑀺𑀝𑁆𑀞𑀫𑁂𑀯 𑀯𑀢𑁆𑀣𑀁 𑀉𑀤𑀸𑀳𑀭𑀺𑀢𑀩𑁆𑀩𑀦𑁆𑀢𑀺 𑀧𑀸𑀓𑀝𑁄𑀬𑀫𑀢𑁆𑀣𑁄, 𑀲𑀁𑀓𑀺𑀮𑀺𑀝𑁆𑀞𑀯𑀢𑁆𑀣𑀦𑀺𑀤𑀲𑁆𑀲𑀦𑁂𑀦 𑀧𑀦 ‘‘𑀲𑀺𑀬𑀸 𑀦𑀼 𑀔𑁄 𑀅𑀜𑁆𑀜𑁄𑀧𑀺 𑀓𑁄𑀘𑀺 𑀯𑀺𑀲𑁂𑀲𑁄’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀧𑀼𑀘𑁆𑀙𑀢𑀺 ‘‘𑀓𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺𑀦𑀸. 𑀇𑀢𑀭𑁄 𑀅𑀢𑁆𑀣𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀸𑀬𑀸𑀫𑀫𑀳𑀧𑁆𑀨𑀮𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀯𑀺𑀲𑁄𑀥𑀦𑀯𑀺𑀥𑀸𑀦𑁂 𑀲𑀁𑀓𑀺𑀮𑀺𑀝𑁆𑀞𑀯𑀢𑁆𑀣𑀁 𑀦𑀺𑀤𑀲𑁆𑀲𑀢𑀩𑁆𑀩𑀦𑁆𑀢𑀺 𑀧𑀝𑀺𑀜𑁆𑀜𑀸, 𑀯𑀸𑀬𑀸𑀫𑀫𑀳𑀧𑁆𑀨𑀮𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀳𑁂𑀢𑀼𑀅𑀢𑁆𑀣𑁄. 𑀬𑀣𑀸 𑀳𑀻𑀢𑀺𑀆𑀤𑀺 𑀅𑀦𑁆𑀯𑀬𑀢𑁆𑀣𑁄. 𑀦 𑀢𑀢𑁆𑀣 𑀚𑀸𑀢𑀺𑀓𑀸𑀴𑀓𑁂 𑀯𑀺𑀬𑀸𑀢𑀺𑀆𑀤𑀺 𑀩𑁆𑀬𑀢𑀺𑀭𑁂𑀓𑀢𑁆𑀣𑁄. 𑀲𑀤𑀺𑀲𑀽𑀤𑀸𑀳𑀭𑀡𑀁 𑀧𑀦 𑀫𑀮𑀕𑁆𑀕𑀳𑀺𑀢𑀓𑀁𑀲𑀧𑀸𑀢𑀺𑀆𑀤𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀘𑀺𑀢𑁆𑀢𑀫𑁆𑀧𑀻𑀢𑀺𑀆𑀤𑀺 ¶ 𑀑𑀧𑀫𑁆𑀫𑀢𑁆𑀣𑀲𑁆𑀲 𑀉𑀧𑀫𑁂𑀬𑁆𑀬𑀉𑀧𑀦𑀬𑀦𑀁. 𑀢𑀢𑁆𑀣 𑀧𑀓𑀢𑀺𑀬𑀸𑀢𑀺 𑀅𑀓𑀺𑀢𑁆𑀢𑀺𑀫𑁂𑀦 𑀲𑀪𑀸𑀯𑁂𑀦. 𑀢𑀦𑁆𑀢𑀺 𑀘𑀺𑀢𑁆𑀢𑀁. 𑀲𑀸𑀫𑀜𑁆𑀜𑀕𑁆𑀕𑀳𑀡𑀜𑁆𑀘𑁂𑀢𑀁 𑀘𑀺𑀢𑁆𑀢𑀪𑀸𑀯𑀸𑀯𑀺𑀲𑁂𑀲𑀢𑁄. 𑀢𑁂𑀦𑀸𑀳 ‘‘𑀲𑀓𑀮𑁂𑀧𑀻’’𑀢𑀺. 𑀧𑀡𑁆𑀟𑀭𑀫𑁂𑀯 𑀦 𑀲𑀁𑀓𑀺𑀮𑀺𑀝𑁆𑀞𑀁 𑀲𑀁𑀓𑀺𑀮𑁂𑀲𑁂𑀳𑀺 𑀅𑀲𑀫𑀦𑁆𑀦𑀸𑀕𑀢𑀪𑀸𑀯𑀢𑁄. 𑀦𑀦𑀼 𑀓𑀺𑀭𑀺𑀬𑀸𑀫𑀬𑀘𑀺𑀢𑁆𑀢𑁂𑀳𑀺 𑀯𑀺𑀧𑀸𑀓𑀲𑀦𑁆𑀢𑀸𑀦𑁂 𑀯𑀺𑀲𑁂𑀲𑀸𑀥𑀸𑀦𑀁 𑀮𑀩𑁆𑀪𑀢𑀺, 𑀅𑀜𑁆𑀜𑀣𑀸 𑀓𑀢𑀯𑀺𑀦𑀸𑀲𑀸 𑀓𑀢𑀩𑁆𑀪𑀸𑀕𑀫𑀸 𑀆𑀧𑀚𑁆𑀚𑁂𑀬𑁆𑀬𑀼𑀁? 𑀓𑀺𑀜𑁆𑀘𑀸𑀧𑀺 𑀮𑀩𑁆𑀪𑀢𑀺, 𑀢𑀲𑁆𑀲 𑀲𑀁𑀓𑀺𑀮𑁂𑀲𑁄 𑀯𑀝𑁆𑀝𑀼𑀧𑀦𑀺𑀲𑁆𑀲𑀬𑁄, 𑀅𑀲𑀼𑀤𑁆𑀥𑀺 𑀯𑀸 𑀦 𑀳𑁄𑀢𑀺, 𑀅𑀲𑀁𑀓𑀺𑀮𑁂𑀲𑁄 𑀯𑀺𑀯𑀝𑁆𑀝𑀼𑀧𑀦𑀺𑀲𑁆𑀲𑀬𑁄, 𑀯𑀺𑀲𑀼𑀤𑁆𑀥𑀺 𑀯𑀸 𑀦 𑀳𑁄𑀢𑀺 𑀏𑀯. 𑀉𑀧𑀓𑁆𑀓𑀺𑀮𑀺𑀝𑁆𑀞𑀦𑁆𑀢𑀺 𑀧𑀦𑁂𑀢𑀁 𑀉𑀧𑀓𑁆𑀓𑀺𑀮𑁂𑀲𑀦𑀸𑀭𑀳𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀯𑀺𑀧𑀸𑀓𑀧𑀩𑀦𑁆𑀥𑀲𑁆𑀲. 𑀢𑁂𑀦𑀸𑀳 ‘‘𑀧𑀪𑀲𑁆𑀲𑀭𑀫𑀺𑀤𑀁 𑀪𑀺𑀓𑁆𑀔𑀯𑁂 𑀘𑀺𑀢𑁆𑀢’’𑀦𑁆𑀢𑀺, ‘‘𑀧𑀡𑁆𑀟𑀭𑀫𑁂𑀯𑀸’’𑀢𑀺 𑀘. 𑀢𑀜𑁆𑀘 𑀔𑁄𑀢𑀺 𑀧𑀦 𑀲𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀦𑁂𑀲𑀁 𑀓𑁂𑀯𑀮𑀁 𑀏𑀓𑀢𑁆𑀢𑀦𑀬𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀯𑀺𑀧𑀸𑀓𑀥𑀫𑁆𑀫𑀸𑀦𑀁 𑀓𑀺𑀮𑁂𑀲𑀸𑀲𑀫𑀗𑁆𑀕𑀺𑀪𑀸𑀯𑀢𑁄. 𑀅𑀣 𑀯𑀸 𑀉𑀧𑀓𑁆𑀓𑀺𑀮𑀺𑀝𑁆𑀞𑀦𑁆𑀢𑀺 𑀇𑀫𑀺𑀦𑀸 𑀉𑀧𑀓𑁆𑀓𑀺𑀮𑁂𑀲𑀳𑁂𑀢𑀼 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀁 𑀯𑀺𑀲𑁂𑀲𑀸𑀥𑀸𑀦𑀫𑀸𑀳, 𑀦 ‘‘𑀲𑀁𑀓𑀺𑀮𑀺𑀝𑁆𑀞𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁭𑁭.𑀤𑀼𑀓𑀫𑀸𑀢𑀺𑀓𑀸) 𑀯𑀺𑀬 𑀢𑀁𑀲𑀫𑀗𑁆𑀕𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀲𑁄𑀥𑀺𑀬𑀫𑀸𑀦𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀅𑀦𑀼𑀓𑁆𑀓𑀫𑁂𑀦 𑀲𑀩𑁆𑀩𑀼𑀧𑀓𑁆𑀓𑀺𑀮𑁂𑀲𑁂𑀳𑀺 𑀯𑀺𑀫𑁄𑀘𑀺𑀬𑀫𑀸𑀦𑀁. 𑀲𑀓𑁆𑀓𑀸 𑀅𑀕𑁆𑀕𑀫𑀕𑁆𑀕𑀓𑁆𑀔𑀡𑁂 𑀧𑀪𑀲𑁆𑀲𑀭𑀢𑀭𑀁 𑀓𑀸𑀢𑀼𑀁, 𑀬𑀢𑁄 𑀦 𑀧𑀼𑀦 𑀉𑀧𑀓𑁆𑀓𑀺𑀮𑀺𑀲𑁆𑀲𑀢𑀺. 𑀏𑀯𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀦𑀺𑀕𑀫𑀦𑀁.

𑀤𑀼𑀝𑁆𑀞𑀕𑀢𑀺𑀧𑀭𑀺𑀧𑀽𑀭𑀡𑀯𑀲𑁂𑀦 𑀧𑀝𑀺𑀧𑀚𑁆𑀚𑀦𑀁 𑀧𑀝𑀺𑀧𑀢𑁆𑀢𑀺. 𑀲𑀸 𑀏𑀯 𑀓𑀺𑀮𑁂𑀲𑀤𑀭𑀣𑀧𑀭𑀺𑀴𑀸𑀳𑀸𑀤𑀺𑀯𑀲𑁂𑀦 𑀉𑀧𑀸𑀬𑀸𑀲𑀤𑀼𑀓𑁆𑀔𑀸, 𑀓𑀼𑀘𑁆𑀙𑀺𑀢𑀸 𑀯𑀸 𑀕𑀢𑀺 𑀧𑀯𑀢𑁆𑀢𑀺, 𑀤𑀼𑀕𑁆𑀕𑀢𑀺𑀳𑁂𑀢𑀽𑀢𑀺 𑀯𑀸 𑀤𑀼𑀕𑁆𑀕𑀢𑀺, 𑀤𑀼𑀕𑁆𑀕𑀢𑀺𑀬𑀸 𑀧𑀦 𑀧𑀝𑀺𑀧𑀢𑁆𑀢𑀺𑀬𑀸 𑀕𑀦𑁆𑀥𑀩𑁆𑀩𑀢𑁄, 𑀢𑀲𑁆𑀲𑀸 𑀯𑀸 𑀦𑀺𑀧𑁆𑀨𑀦𑁆𑀦𑀪𑀸𑀯𑀢𑁄 𑀓𑀼𑀘𑁆𑀙𑀺𑀢𑁄, 𑀤𑀼𑀓𑁆𑀔𑀸 𑀘 𑀕𑀢𑀻𑀢𑀺 𑀤𑀼𑀕𑁆𑀕𑀢𑀺. 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄𑀢𑀺 𑀇𑀤𑀁 𑀢𑀲𑁆𑀲𑀸 𑀧𑀝𑀺𑀧𑀢𑁆𑀢𑀺𑀬𑀸 𑀤𑀼𑀕𑁆𑀕𑀢𑀺𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀦 𑀯𑀺𑀲𑁂𑀲𑀦𑀢𑁆𑀣𑀁. 𑀦 𑀳𑀺 𑀅𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀲𑁆𑀲 𑀧𑀸𑀡𑀖𑀸𑀢𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺. 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄𑀢𑀺 𑀮𑀸𑀪𑀸𑀲𑀸𑀬 𑀲𑀩𑁆𑀩𑀲𑁄 𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 ¶ . 𑀤𑀽𑀢𑁂𑀬𑁆𑀬𑀧𑀳𑀺𑀡𑀕𑀫𑀦𑀦𑁆𑀢𑀺 𑀤𑀽𑀢𑁂𑀬𑁆𑀬𑀁 𑀯𑀼𑀘𑁆𑀘𑀢𑀺 𑀤𑀼𑀢𑀓𑀫𑁆𑀫𑀁, 𑀕𑀺𑀳𑀻𑀦𑀁 𑀧𑀡𑁆𑀡𑀁 𑀯𑀸 𑀲𑀸𑀲𑀦𑀁 𑀯𑀸 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀕𑀫𑀦𑀁, 𑀧𑀳𑀺𑀡𑀕𑀫𑀦𑀁 𑀖𑀭𑀸𑀖𑀭𑀁 𑀧𑁂𑀲𑀺𑀢𑀲𑁆𑀲 𑀔𑀼𑀤𑁆𑀤𑀓𑀕𑀫𑀦𑀁, 𑀤𑀽𑀢𑁂𑀬𑁆𑀬𑀕𑀫𑀦𑀁 𑀧𑀳𑀺𑀡𑀕𑀫𑀦𑀜𑁆𑀘 𑀕𑀘𑁆𑀙𑀢𑀺. 𑀯𑁂𑀚𑁆𑀚𑀓𑀫𑁆𑀫𑀦𑁆𑀢𑀺 𑀅𑀦𑀦𑀼𑀜𑁆𑀜𑀸𑀢𑁂 𑀞𑀸𑀦𑁂 𑀮𑀸𑀪𑀸𑀲𑀸𑀬 𑀕𑀳𑀝𑁆𑀞𑀸𑀦𑀁 𑀪𑁂𑀲𑀚𑁆𑀚𑀁 𑀓𑀭𑁄𑀢𑀺. 𑀲𑀗𑁆𑀖𑀪𑁂𑀤𑀓𑀣𑀸 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺. 𑀯𑁂𑀴𑀼𑀤𑀸𑀦𑀸𑀤𑀻𑀳𑀻𑀢𑀺 𑀯𑁂𑀴𑀼𑀤𑀸𑀦𑀧𑀢𑁆𑀢𑀤𑀸𑀦𑀧𑀼𑀧𑁆𑀨𑀤𑀸𑀦𑀸𑀤𑀻𑀳𑀺 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺. 𑀲𑀓𑀮𑀫𑁆𑀧𑀻𑀢𑀺 ‘‘𑀅𑀢𑁆𑀣𑀺 𑀅𑀦𑀸𑀘𑀸𑀭𑁄, 𑀅𑀢𑁆𑀣𑀺 𑀅𑀕𑁄𑀘𑀭𑁄’’𑀢𑀺𑀆𑀤𑀺𑀦𑀸 𑀯𑀺𑀪𑀗𑁆𑀕𑁂 (𑀯𑀺𑀪. 𑁫𑁧𑁩, 𑁫𑁧𑁪) 𑀆𑀕𑀢𑀁 𑀲𑀩𑁆𑀩𑀫𑁆𑀧𑀺 𑀅𑀦𑀸𑀘𑀸𑀭𑀁 𑀅𑀕𑁄𑀘𑀭𑀜𑁆𑀘 𑀘𑀭𑀡𑀯𑀲𑁂𑀦 𑀧𑀭𑀺𑀧𑀽𑀭𑁂𑀢𑀺.

‘‘𑀦𑀺𑀭𑀬𑀫𑁆𑀧𑀺 ¶ …𑀧𑁂… 𑀧𑁂𑀢𑁆𑀢𑀺𑀯𑀺𑀲𑀬𑀫𑁆𑀧𑀺 𑀕𑀘𑁆𑀙𑀢𑀻’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀧𑁂𑀢𑁆𑀢𑀺𑀯𑀺𑀲𑀬𑀕𑀫𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑀡𑀬𑀓𑁆𑀔𑁄 𑀦𑀸𑀫 𑀳𑁄𑀢𑀻’’𑀢𑀺𑀆𑀤𑀺𑀫𑀸𑀳.

𑀲𑀼𑀓𑁆𑀓𑀧𑀓𑁆𑀔𑁂 𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀲𑀩𑁆𑀩𑀲𑁄 𑀯𑀺𑀲𑀼𑀤𑁆𑀥𑀁 𑀅𑀲𑀁𑀓𑀺𑀮𑀺𑀝𑁆𑀞𑀁. 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀏𑀯 𑀧𑀭𑀺𑀬𑁄𑀤𑀸𑀢𑀁, 𑀧𑀪𑀲𑁆𑀲𑀭𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀭𑀢𑁆𑀢𑀯𑀡𑁆𑀡𑀫𑁂𑀯𑀲𑁆𑀲𑀸𑀢𑀺 𑀲𑀼𑀝𑁆𑀞𑀼 𑀭𑀢𑁆𑀢𑀯𑀡𑁆𑀡𑀫𑁂𑀯 𑀅𑀲𑁆𑀲. 𑀧𑀭𑀺𑀲𑀼𑀤𑁆𑀥𑀯𑀡𑁆𑀡𑀫𑁂𑀯𑀲𑁆𑀲𑀸𑀢𑀺 𑀦𑀻𑀮𑀯𑀡𑁆𑀡𑁄𑀧𑀺𑀲𑁆𑀲 𑀧𑀭𑀺𑀲𑀼𑀤𑁆𑀥𑁄 𑀘 𑀪𑀯𑁂𑀬𑁆𑀬𑀸𑀢𑀺 𑀏𑀯𑀫𑀸𑀤𑀺𑀁 𑀲𑀦𑁆𑀥𑀸𑀬𑀸𑀳 ‘‘𑀓𑀡𑁆𑀳𑀧𑀓𑁆𑀔𑁂 𑀯𑀼𑀢𑁆𑀢𑀧𑀘𑁆𑀘𑀦𑀻𑀓𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀭𑀗𑁆𑀕𑀚𑀸𑀢𑀦𑁆𑀢𑀺𑀆𑀤𑀺 𑀧𑀦 𑀢𑀢𑁆𑀣 𑀯𑀼𑀢𑁆𑀢𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀧𑀝𑀺𑀧𑀢𑁆𑀢𑀺𑀲𑀼𑀕𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀝𑀺𑀧𑀢𑁆𑀢𑀺𑀤𑀼𑀕𑁆𑀕𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑁄𑀢𑀺 𑀲𑀼𑀤𑁆𑀥𑀸𑀲𑀬𑁄. 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑁂 𑀧𑀭𑀺𑀧𑀽𑀭𑁂𑀢𑀻𑀢𑀺 𑀇𑀤𑀁 𑀓𑀡𑁆𑀳𑀧𑀓𑁆𑀔𑁂 ‘‘𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑁂 𑀧𑀭𑀺𑀧𑀽𑀭𑁂𑀢𑀻’’𑀢𑀺 𑀯𑀼𑀢𑁆𑀢𑀲𑁆𑀲 𑀧𑀝𑀺𑀧𑀓𑁆𑀔𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀢𑀢𑁆𑀣 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑁆𑀕𑀳𑀡𑁂𑀦 𑀓𑀫𑁆𑀫𑀧𑀣𑀲𑀁𑀲𑀦𑁆𑀤𑀦𑀦𑀬𑁂𑀦 𑀓𑀫𑁆𑀫𑀧𑀣𑀁 𑀅𑀧𑁆𑀧𑀢𑁆𑀢𑀸𑀬 𑀘 𑀅𑀕𑀸𑀭𑀺𑀬𑀲𑁆𑀲 𑀢𑀣𑀸𑀭𑀽𑀧𑀸𑀬 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀬𑀸 𑀲𑀗𑁆𑀕𑀳𑁄 𑀇𑀘𑁆𑀙𑀺𑀢𑁄, 𑀏𑀯𑀁 𑀇𑀥𑀸𑀧𑀺 𑀅𑀦𑀪𑀺𑀚𑁆𑀛𑀸𑀅𑀩𑁆𑀬𑀸𑀧𑀸𑀤𑀲𑀫𑁆𑀫𑀸𑀤𑀺𑀝𑁆𑀞𑀺𑀕𑁆𑀕𑀳𑀡𑁂𑀦 𑀅𑀮𑁄𑀪𑀸𑀤𑁄𑀲𑀸𑀫𑁄𑀳𑀯𑀲𑁂𑀦 𑀧𑀯𑀢𑁆𑀢𑀸 𑀅𑀕𑀸𑀭𑀺𑀬𑀲𑁆𑀲 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁, 𑀦 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸𑀯𑀸𑀢𑀺. 𑀫𑀦𑀼𑀲𑁆𑀲𑀫𑀳𑀦𑁆𑀢𑀢𑀦𑁆𑀢𑀺 𑀚𑀸𑀢𑀺𑀭𑀽𑀧𑀪𑁄𑀕𑀸𑀥𑀺𑀧𑀢𑁂𑀬𑁆𑀬𑀸𑀤𑀺𑀯𑀲𑁂𑀦 𑀫𑀦𑀼𑀲𑁆𑀲𑁂𑀲𑀼 𑀫𑀳𑀦𑁆𑀢𑀪𑀸𑀯𑀁. 𑀤𑀲𑀳𑀺 𑀞𑀸𑀦𑁂𑀳𑀺 𑀅𑀜𑁆𑀜𑁂𑀲𑀁 𑀤𑁂𑀯𑀸𑀦𑀁 𑀅𑀪𑀺𑀪𑀯𑁄 𑀤𑁂𑀯𑀫𑀳𑀦𑁆𑀢𑀢𑀸. 𑀧𑀝𑀺𑀧𑀢𑁆𑀢𑀺 𑀲𑀼𑀕𑀢𑀺𑀬𑀸 𑀪𑀸𑀚𑀺𑀬𑀫𑀸𑀦𑀢𑁆𑀢𑀸 ‘‘𑀅𑀦𑀸𑀕𑀸𑀫𑀺𑀫𑀕𑁆𑀕𑀁 𑀪𑀸𑀯𑁂𑀢𑀻’’𑀢𑀺 𑀢𑀣𑀸 𑀅𑀦𑀸𑀕𑀸𑀫𑀺𑀪𑀸𑀯𑀦𑀁 𑀧𑀸𑀧𑁂𑀢𑁆𑀯𑀸 𑀞𑀧𑀺𑀢𑀸. 𑀕𑀳𑀺𑀢𑀕𑁆𑀕𑀳𑀡𑁂𑀦 𑀲𑀼𑀔𑀸𑀦𑀼𑀪𑀯𑀝𑁆𑀞𑀸𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀢𑀤𑀪𑀸𑀯𑀢𑁄 𑀅𑀲𑀜𑁆𑀜𑀺𑀪𑀯𑀁 𑀅𑀦𑀸𑀤𑀺𑀬𑀦𑁆𑀢𑁄 ‘‘𑀤𑀲𑀲𑀼 𑀯𑀸 𑀩𑁆𑀭𑀳𑁆𑀫𑀪𑀯𑀦𑁂𑀲𑀽’’𑀢𑀺𑀆𑀤𑀺𑀫𑀸𑀳.

𑁭𑁧. 𑀲𑀓𑀪𑀡𑁆𑀟𑁂 𑀙𑀦𑁆𑀤𑀭𑀸𑀕𑁄 𑀅𑀪𑀺𑀚𑁆𑀛𑀸𑀬𑀦𑀝𑁆𑀞𑁂𑀦 𑀅𑀪𑀺𑀚𑁆𑀛𑀸, 𑀅𑀪𑀺𑀚𑁆𑀛𑀸𑀬𑀦𑀸𑀢𑀺 𑀅𑀢𑁆𑀣𑁄. 𑀧𑀭𑀪𑀡𑁆𑀟𑁂 𑀙𑀦𑁆𑀤𑀭𑀸𑀕𑁄 𑀯𑀺𑀲𑀫𑀁 𑀮𑀼𑀩𑁆𑀪𑀢𑀻𑀢𑀺 𑀯𑀺𑀲𑀫𑀮𑁄𑀪𑁄. 𑀏𑀯𑀫𑁆𑀧𑀺 𑀅𑀪𑀺𑀚𑁆𑀛𑀸𑀯𑀺𑀲𑀫𑀮𑁄𑀪𑀸𑀦𑀁 𑀯𑀺𑀲𑁂𑀲𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀢𑀁𑀲𑀤𑀺𑀲𑀜𑁆𑀘 𑀬𑀼𑀢𑁆𑀢𑀝𑁆𑀞𑀸𑀦𑀁. 𑀬𑀁 𑀬𑀸𑀘𑀺𑀢𑀁, 𑀅𑀧𑁆𑀧𑀓𑀲𑀺𑀭𑁂𑀦 𑀯𑀸 𑀲𑀓𑁆𑀓𑀸 𑀮𑀤𑁆𑀥𑀼𑀁, 𑀢𑀁 𑀧𑀢𑁆𑀢𑀝𑁆𑀞𑀸𑀦𑀁. 𑀧𑀭𑀤𑀸𑀭𑀕𑀭𑀼𑀤𑀸𑀭𑀸𑀢𑀺 𑀅𑀬𑀼𑀢𑁆𑀢𑀝𑁆𑀞𑀸𑀦𑀁. 𑀬𑀁 𑀅𑀧𑀢𑁆𑀣𑀦𑀺𑀬𑀁, 𑀬𑀲𑁆𑀲 ¶ 𑀯𑀸 𑀧𑀢𑁆𑀣𑀦𑀸𑀬 𑀩𑁆𑀬𑀲𑀦𑀁 𑀆𑀧𑀚𑁆𑀚𑀢𑀺, 𑀢𑀁 𑀅𑀧𑁆𑀧𑀢𑁆𑀢𑀝𑁆𑀞𑀸𑀦𑀁. 𑀣𑁂𑀭𑁄𑀢𑀺 𑀫𑀳𑀸𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑁄, 𑀬𑁂𑀦 𑀅𑀝𑁆𑀞𑀓𑀣𑀸 𑀧𑁄𑀢𑁆𑀣𑀓𑀁 𑀆𑀭𑁄𑀧𑀺𑀢𑀸. 𑀲𑁄 𑀳𑀺 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀲𑀸𑀓𑀘𑁆𑀙𑀦𑁆𑀢𑁂𑀲𑀼 𑀏𑀯𑀫𑀸𑀳. 𑀲𑁄𑀧𑀺 𑀇𑀫𑀲𑁆𑀫𑀺𑀁𑀬𑁂𑀯 𑀲𑀼𑀢𑁆𑀢𑁂 𑀯𑀺𑀦𑀺𑀩𑁆𑀪𑁄𑀕𑁄 𑀦 𑀮𑀩𑁆𑀪𑀢𑀺 𑀘𑀺𑀢𑁆𑀢𑀲𑀁𑀓𑀺𑀮𑁂𑀲𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀬𑀼𑀢𑁆𑀢𑁂 𑀯𑀸’’𑀢𑀺𑀆𑀤𑀺. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀲𑁂𑀦 ¶ 𑀉𑀧𑁆𑀧𑀚𑁆𑀚𑀦𑀢𑁄 𑀲𑀫𑁆𑀧𑀢𑁆𑀢𑀺 𑀆𑀬𑀢𑀺𑀜𑁆𑀘 𑀤𑀼𑀓𑁆𑀔𑀲𑁆𑀲𑁂𑀯 𑀉𑀧𑁆𑀧𑀸𑀤𑀦𑀢𑁄 𑀦 𑀓𑁄𑀘𑀺 𑀮𑁄𑀪𑁄 𑀅𑀯𑀺𑀲𑀫𑁄 𑀦𑀸𑀫. 𑀅𑀪𑀺𑀚𑁆𑀛𑀸𑀬𑀦𑀝𑁆𑀞𑁂𑀦𑀸𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀆𑀭𑀫𑁆𑀫𑀡𑀲𑁆𑀲 𑀬𑀼𑀢𑁆𑀢𑀲𑁆𑀲 𑀅𑀬𑀼𑀢𑁆𑀢𑀲𑁆𑀲 𑀅𑀧𑁆𑀧𑀢𑁆𑀢𑀲𑁆𑀲 𑀘 𑀅𑀪𑀺𑀚𑁆𑀚𑀸𑀬𑀦𑀯𑀲𑁂𑀦 𑀅𑀪𑀺𑀧𑀢𑁆𑀣𑀦𑀸𑀯𑀲𑁂𑀦 𑀘 𑀧𑀯𑀢𑁆𑀢𑀸 𑀢𑀡𑁆𑀳𑀸 𑀅𑀪𑀺𑀚𑁆𑀛𑀸𑀢𑀺 𑀮𑁄𑀪𑀢𑁄 𑀦𑀺𑀩𑁆𑀩𑀺𑀲𑁂𑀲𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀏𑀓𑀢𑁆𑀣𑀫𑁂𑀢𑀁 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦’’𑀦𑁆𑀢𑀺. 𑀤𑀽𑀲𑁂𑀢𑀻𑀢𑀺 𑀲𑀪𑀸𑀯𑀲𑀦𑁆𑀢𑀁 𑀅𑀲𑀁𑀓𑀺𑀮𑁂𑀲𑀁 𑀯𑀺𑀦𑀸𑀲𑁂𑀢𑀺 𑀅𑀯𑀺𑀲𑀼𑀤𑁆𑀥𑀁 𑀓𑀭𑁄𑀢𑀺. 𑀢𑁂𑀦𑀸𑀳 ‘‘𑀑𑀪𑀸𑀲𑀺𑀢𑀼𑀁 𑀦 𑀤𑁂𑀢𑀻’’𑀢𑀺. ‘‘𑀇𑀫𑁂 𑀲𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀦𑁆𑀢𑀼 𑀯𑀺𑀦𑀲𑁆𑀲𑀦𑁆𑀢𑀽’’𑀢𑀺 𑀲𑀢𑁆𑀢𑁂𑀲𑀼 𑀩𑁆𑀬𑀸𑀧𑀚𑁆𑀚𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀩𑁆𑀬𑀸𑀧𑀸𑀤𑁄 𑀦𑀯𑀯𑀺𑀥𑀆𑀖𑀸𑀢𑀯𑀢𑁆𑀣𑀼𑀲𑀫𑁆𑀪𑀯𑁄 𑀯𑀼𑀢𑁆𑀢𑁄. 𑀓𑁄𑀥𑁄 𑀧𑀦 𑀲𑀗𑁆𑀔𑀸𑀭𑁂𑀲𑀼𑀧𑀺 𑀧𑀯𑀢𑁆𑀢𑀦𑀢𑁄 𑀤𑀲𑀯𑀺𑀥𑀆𑀖𑀸𑀢𑀯𑀢𑁆𑀣𑀼𑀲𑀫𑁆𑀪𑀯𑁄 𑀯𑀼𑀢𑁆𑀢𑁄. 𑀉𑀪𑀬𑀫𑁆𑀧𑀺 𑀧𑀝𑀺𑀖𑀫𑁂𑀯, 𑀧𑀯𑀢𑁆𑀢𑀦𑀸𑀦𑀢𑁆𑀢𑀢𑁄 𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑁄. 𑀓𑀼𑀚𑁆𑀛𑀦𑀯𑀲𑁂𑀦𑁂𑀯 𑀘𑀺𑀢𑁆𑀢𑀧𑀭𑀺𑀬𑁄𑀦𑀦𑁆𑀥𑀦𑁄 ‘‘𑀅𑀓𑁆𑀓𑁄𑀘𑁆𑀙𑀺 𑀫𑀁 𑀅𑀯𑀥𑀺 𑀫’’𑀦𑁆𑀢𑀺𑀆𑀤𑀺𑀦𑀸.

𑀲𑀼𑀝𑁆𑀞𑀼 𑀓𑀢𑀁 𑀓𑀭𑀡𑀁 𑀲𑀼𑀓𑀢𑀁, 𑀢𑀲𑁆𑀲 𑀧𑀼𑀩𑁆𑀩𑀓𑀸𑀭𑀺𑀢𑀸𑀮𑀓𑁆𑀔𑀡𑀲𑁆𑀲 𑀕𑀼𑀡𑀲𑁆𑀲 𑀯𑀺𑀦𑀸𑀲𑀦𑁄 𑀉𑀤𑀓𑀧𑀼𑀜𑁆𑀙𑀦𑀺𑀬𑀸 𑀯𑀺𑀬 𑀲𑀭𑀻𑀭𑀸𑀦𑀼𑀕𑀢𑀁 𑀉𑀤𑀓𑀁 𑀧𑀼𑀜𑁆𑀙𑀦𑁆𑀢𑁄 𑀫𑀓𑁆𑀔𑁄. 𑀢𑀣𑀸 𑀳𑀺 𑀲𑁄 𑀧𑀭𑁂𑀲𑀁 𑀕𑀼𑀡𑀸𑀦𑀁 𑀫𑀓𑁆𑀔𑀦𑀝𑁆𑀞𑁂𑀦 ‘‘𑀫𑀓𑁆𑀔𑁄’’𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀸𑀦𑀺 𑀅𑀦𑀕𑀸𑀭𑀺𑀬𑀲𑁆𑀲 𑀯𑀸𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀕𑀸𑀭𑀺𑀬𑁄𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀺𑀲𑀺𑀦𑁆𑀦𑀓𑀣𑀸𑀧𑀭𑀺𑀓𑀣𑀸𑀤𑀺𑀯𑀲𑁂𑀦 𑀥𑀫𑁆𑀫𑀲𑁆𑀲 𑀓𑀣𑀸 𑀥𑀫𑁆𑀫𑀓𑀣𑀸𑀦𑀬𑁄, 𑀏𑀓𑀢𑁆𑀢𑀸𑀤𑀺𑀥𑀫𑁆𑀫𑀦𑀻𑀢𑀺 𑀏𑀯 𑀯𑀸. 𑀧𑀓𑀭𑀡𑀁 𑀲𑀢𑁆𑀢 𑀧𑀓𑀭𑀡𑀸𑀦𑀺, 𑀢𑀢𑁆𑀣 𑀓𑁄𑀲𑀮𑁆𑀮𑀁 𑀥𑀫𑁆𑀫𑀓𑀣𑀸𑀦𑀬𑀧𑀓𑀭𑀡𑀓𑁄𑀲𑀮𑁆𑀮𑀁. 𑀆𑀤𑀺-𑀲𑀤𑁆𑀤𑁂𑀦 𑀯𑀺𑀦𑀬𑀓𑁆𑀓𑀫𑁂 𑀘𑀢𑀽𑀲𑀼 𑀫𑀳𑀸𑀦𑀺𑀓𑀸𑀬𑁂𑀲𑀼 𑀘 𑀓𑁄𑀲𑀮𑁆𑀮𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀘𑀺𑀢𑁆𑀢𑀻𑀓𑀢𑁄𑀢𑀺 𑀘𑀺𑀢𑁆𑀢𑀻𑀓𑀸𑀭𑀭𑀳𑀺𑀢𑁄. 𑀬𑀣𑀸 𑀘𑀸𑀬𑀦𑁆𑀢𑀺 𑀇𑀫𑀺𑀦𑀸 𑀬𑀣𑀸𑀬𑀁 𑀫𑀓𑁆𑀔𑁄 𑀘𑀺𑀢𑁆𑀢𑀁 𑀤𑀽𑀲𑁂𑀢𑀺, 𑀏𑀯𑀁 𑀧𑀴𑀸𑀲𑁄𑀧𑀺 𑀘𑀺𑀢𑁆𑀢𑀁 𑀤𑀽𑀲𑁂𑀢𑀺, 𑀢𑀲𑁆𑀫𑀸 𑀉𑀧𑀓𑁆𑀓𑀺𑀮𑁂𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀦𑀺𑀬𑀢𑀸 𑀕𑀢𑀺 𑀦𑀺𑀬𑀸𑀫𑁄𑀓𑁆𑀓𑀫𑀦𑀸𑀪𑀸𑀯𑀢𑁄. 𑀆𑀤𑀺-𑀲𑀤𑁆𑀤𑁂𑀦 ‘‘𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑁂 𑀧𑀼𑀕𑁆𑀕𑀮𑁂 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 ‘𑀢𑁆𑀯𑀫𑁆𑀧𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄, 𑀅𑀳𑀫𑁆𑀧𑀺 𑀧𑀩𑁆𑀩𑀚𑀺𑀢𑁄, 𑀢𑁆𑀯𑀫𑁆𑀧𑀺 𑀲𑀻𑀮𑀫𑀢𑁆𑀢𑁂 𑀞𑀺𑀢𑁄 𑀅𑀳𑀫𑁆𑀧𑀻’𑀢𑀺’’ 𑀏𑀯𑀫𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀬𑀼𑀕𑀕𑁆𑀕𑀸𑀳𑀕𑀸𑀳𑀻𑀢𑀺 ‘‘𑀢𑀯 𑀯𑀸 𑀫𑀫 𑀯𑀸 𑀓𑁄 𑀯𑀺𑀲𑁂𑀲𑁄’’𑀢𑀺 𑀅𑀲𑀫𑀫𑁆𑀧𑀺 𑀲𑀫𑀁 𑀓𑀢𑁆𑀯𑀸 𑀲𑀫𑀥𑀼𑀭𑀕𑁆𑀕𑀸𑀳𑀕𑀡𑁆𑀳𑀦𑀓𑁄. 𑀔𑀻𑀬𑀦𑀸 𑀉𑀲𑀽𑀬𑀦𑀸. 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀬𑀸 𑀦𑀺𑀕𑀽𑀳𑀦𑀁 𑀢𑀲𑁆𑀲 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀸𑀲𑀳𑀦𑁂𑀦 𑀳𑁄𑀢𑀻𑀢𑀺 ‘‘𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑀸𑀯𑀁 𑀅𑀲𑀳𑀫𑀸𑀦𑀁’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀓𑀸𑀭𑀡𑁂 𑀳𑀺 𑀕𑀳𑀺𑀢𑁂 𑀨𑀮𑀫𑁆𑀧𑀺 𑀕𑀳𑀺𑀢𑀫𑁂𑀯 𑀳𑁄𑀢𑀻𑀢𑀺. 𑀅𑀜𑁆𑀜𑀣𑀸 𑀅𑀢𑁆𑀢𑀦𑁄 𑀧𑀯𑁂𑀤𑀦𑀓𑀧𑀼𑀕𑁆𑀕𑀮𑁄 𑀓𑁂𑀭𑀸𑀝𑀺𑀓𑁄, ‘‘𑀦𑁂𑀓𑀢𑀺𑀓𑀯𑀸𑀡𑀺𑀚𑁄’’𑀢𑀺𑀧𑀺 𑀯𑀤𑀦𑁆𑀢𑀺. 𑀲𑀧𑁆𑀧𑀫𑀼𑀔𑀸 ¶ 𑀫𑀘𑁆𑀙𑀯𑀸𑀮𑀸 𑀏𑀓𑀸 𑀫𑀘𑁆𑀙𑀚𑀸𑀢𑀺 𑀆𑀬𑀢𑀦𑀫𑀘𑁆𑀙𑁄. 𑀢𑁂𑀦𑀸𑀳 ‘‘𑀆𑀬𑀢𑀦𑀫𑀘𑁆𑀙𑁄 𑀦𑀸𑀫𑀸’’𑀢𑀺𑀆𑀤𑀺. 𑀩𑀤𑁆𑀥𑀘𑀭𑁄𑀢𑀺 𑀅𑀦𑁆𑀢𑁂𑀯𑀸𑀲𑀻.

𑀲𑀩𑁆𑀩𑀲𑁄 ¶ 𑀅𑀫𑀤𑁆𑀤𑀺𑀢𑀲𑀪𑀸𑀯𑁂𑀦 𑀯𑀸 𑀢𑀪𑀭𑀺𑀢𑀪𑀢𑁆𑀢𑀲𑀤𑀺𑀲𑀲𑁆𑀲 𑀣𑀤𑁆𑀥𑀪𑀸𑀯𑀲𑁆𑀲 𑀅𑀦𑁄𑀦𑀫𑀺𑀢𑀤𑀡𑁆𑀟𑀲𑀤𑀺𑀲𑀢𑀸𑀬 𑀧𑀕𑁆𑀕𑀳𑀺𑀢𑀲𑀺𑀭𑀅𑀦𑀺𑀯𑀸𑀢𑀯𑀼𑀢𑁆𑀢𑀺𑀓𑀸𑀭𑀲𑁆𑀲 𑀘 𑀓𑀭𑀡𑀢𑁄 𑀯𑀸 𑀢𑀪𑀭𑀺𑀢…𑀧𑁂… 𑀓𑀭𑀡𑁄. 𑀢𑀤𑀼𑀢𑁆𑀢𑀭𑀺𑀓𑀭𑀡𑁄𑀢𑀺 𑀬𑀁 𑀬𑁂𑀦 𑀓𑀢𑀁 𑀤𑀼𑀘𑁆𑀘𑀭𑀺𑀢𑀁 𑀯𑀸 𑀲𑀼𑀘𑀭𑀺𑀢𑀁 𑀯𑀸, 𑀢𑀤𑀼𑀢𑁆𑀢𑀭𑀺, 𑀢𑀲𑁆𑀲 𑀤𑁆𑀯𑀺𑀕𑀼𑀡𑀁 𑀯𑀸 𑀓𑀭𑀡𑁄. 𑀅𑀢𑁆𑀢𑀦𑁄 𑀫𑀡𑁆𑀟𑀦𑀸𑀤𑀺𑀅𑀢𑁆𑀣𑀁 𑀧𑀭𑁂𑀦 𑀓𑀢𑀁 𑀅𑀮𑀗𑁆𑀓𑀸𑀭𑀸𑀤𑀺𑀁. 𑀧𑀭𑀺𑀬𑀸𑀧𑀼𑀡𑀸𑀢𑀺 𑀯𑀸 𑀓𑀣𑁂𑀢𑀺 𑀯𑀸 𑀅𑀢𑁆𑀢𑀦𑁄 𑀩𑀮𑀸𑀦𑀼𑀭𑀽𑀧𑀁. 𑀓𑀸𑀫𑀁 𑀦𑀺𑀓𑀸𑀬𑀤𑁆𑀯𑀬𑀕𑁆𑀕𑀳𑀡𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑁄 𑀲𑁂𑀯𑀺𑀢𑀩𑁆𑀩𑀫𑀸𑀦𑁄 𑀏𑀯, 𑀢𑀣𑀸𑀧𑀺𑀲𑁆𑀲 𑀲𑀁𑀓𑀺𑀮𑁂𑀲𑀧𑀓𑁆𑀔𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀫𑀸𑀦𑀁 𑀅𑀦𑀺𑀲𑁆𑀲𑀸𑀬𑀸’’𑀢𑀺.

𑀉𑀡𑁆𑀡𑀢𑀺𑀯𑀲𑁂𑀦𑀸𑀢𑀺 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀳𑀡𑀯𑀲𑁂𑀦. 𑀧𑀼𑀩𑁆𑀩𑁂 𑀓𑁂𑀦𑀘𑀺 𑀅𑀢𑁆𑀢𑀸𑀦𑀁 𑀲𑀤𑀺𑀲𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀢𑀢𑁄 𑀅𑀥𑀺𑀓𑀢𑁄 𑀤𑀳𑀦𑀢𑁄 𑀉𑀧𑁆𑀧𑀚𑁆𑀚𑀦𑀓𑁄 𑀅𑀢𑀺𑀫𑀸𑀦𑁄. 𑀫𑀤𑀕𑁆𑀕𑀳𑀡𑀸𑀓𑀸𑀭𑁄 𑀚𑀸𑀢𑀺𑀆𑀤𑀺𑀁 𑀧𑀝𑀺𑀘𑁆𑀘 𑀫𑀚𑁆𑀚𑀦𑀸𑀓𑀸𑀭𑁄, 𑀲𑁄𑀧𑀺 𑀅𑀢𑁆𑀣𑀢𑁄 𑀫𑀸𑀦𑁄 𑀏𑀯. 𑀧𑀫𑀸𑀤𑁄 𑀢𑀣𑀸𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄.

𑀢𑀲𑁆𑀫𑀸 𑀮𑁄𑀪𑀫𑀸𑀤𑀺𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀻𑀢𑀺 𑀮𑁄𑀪𑀲𑁆𑀲 𑀆𑀤𑀺𑀢𑁄 𑀕𑀳𑀡𑁂 𑀓𑀸𑀭𑀡𑀁 𑀯𑀺𑀪𑀸𑀯𑁂𑀢𑀼𑀓𑀸𑀫𑁄 𑀧𑀼𑀘𑁆𑀙𑀢𑀺. 𑀧𑀞𑀫𑀼𑀧𑁆𑀧𑀢𑁆𑀢𑀺𑀢𑁄𑀢𑀺 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀲𑀩𑁆𑀩𑀧𑀞𑀫𑀁 𑀉𑀧𑁆𑀧𑀚𑁆𑀚𑀦𑀢𑁄. 𑀲𑀢𑁆𑀢𑀸𑀦𑀜𑁆𑀳𑀺 𑀬𑀣𑀸𑀥𑀺𑀕𑀢𑀁 𑀛𑀸𑀦𑀸𑀤𑀺𑀯𑀺𑀲𑁂𑀲𑀁 𑀆𑀭𑀩𑁆𑀪 𑀧𑀘𑁆𑀘𑀯𑁂𑀓𑁆𑀔𑀡𑀸 𑀯𑀺𑀬 𑀬𑀣𑀸𑀮𑀤𑁆𑀥𑀁 𑀉𑀧𑀧𑀢𑀺𑀪𑀯𑀁 𑀆𑀭𑀩𑁆𑀪 𑀦𑀺𑀓𑀦𑁆𑀢𑀺 𑀏𑀯. 𑀢𑁂𑀦𑀸𑀳 ‘‘𑀲𑀩𑁆𑀩𑀲𑀢𑁆𑀢𑀸𑀦’’𑀦𑁆𑀢𑀺𑀆𑀤𑀺. 𑀬𑀣𑀸𑀲𑀫𑁆𑀪𑀯𑀁 𑀇𑀢𑀭𑁂𑀢𑀺 𑀇𑀢𑀭𑁂 𑀩𑁆𑀬𑀸𑀧𑀸𑀤𑀸𑀤𑀬𑁄 𑀬𑀣𑀸𑀧𑀘𑁆𑀘𑀬𑀁 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀮𑁄𑀪𑀲𑁆𑀲 𑀯𑀺𑀬 𑀆𑀤𑀺𑀢𑁄 𑀅𑀲𑀼𑀓𑀲𑁆𑀲 𑀅𑀦𑀦𑁆𑀢𑀭𑀁 𑀅𑀲𑀼𑀓𑁄𑀢𑀺 𑀯𑀸 𑀦 𑀦𑁂𑀲𑀁 𑀦𑀺𑀬𑀫𑁄 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀦 𑀏𑀢𑁂 𑀲𑁄𑀴𑀲𑁂𑀯 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀸, 𑀉𑀤𑀸𑀳𑀼 𑀅𑀜𑁆𑀜𑁂𑀧𑀺 𑀲𑀦𑁆𑀢𑀻𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬 𑀅𑀜𑁆𑀜𑁂𑀧𑀺 𑀲𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀘 𑀏𑀢𑁂’’𑀢𑀺𑀆𑀤𑀺𑀫𑀸𑀳. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀏𑀢𑁆𑀢𑀓𑀸 𑀏𑀯 𑀇𑀥 𑀯𑀼𑀢𑁆𑀢𑀸𑀢𑀺. 𑀦𑀬𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀢𑁂𑀦 𑀧𑀦…𑀧𑁂… 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀢𑁂𑀦 𑀣𑀺𑀦𑀫𑀺𑀤𑁆𑀥𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘-𑀯𑀺𑀘𑀺𑀓𑀺𑀘𑁆𑀙𑀸-𑀅𑀢𑁆𑀢𑀼𑀓𑁆𑀓𑀁𑀲𑀦-𑀧𑀭𑀯𑀩𑁆𑀪𑀦𑀙𑀫𑁆𑀪𑀺𑀢𑀢𑁆𑀢𑀸- 𑀪𑀻𑀭𑀼𑀓𑀢𑀸-𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧-𑀅𑀢𑁆𑀢𑀺𑀘𑁆𑀙𑀢𑀸-𑀧𑀸𑀧𑀺𑀘𑁆𑀙𑀢𑀸-𑀫𑀳𑀺𑀘𑁆𑀙𑀢𑀸𑀤𑀬𑁄 𑀲𑀗𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁭𑁨. 𑀲𑀁𑀓𑀺𑀮𑁂𑀲𑀁 ¶ 𑀤𑀲𑁆𑀲𑁂𑀢𑁆𑀯𑀸𑀢𑀺 𑀲𑀁𑀓𑀺𑀮𑀺𑀝𑁆𑀞𑀯𑀢𑁆𑀢𑀦𑀺𑀤𑀲𑁆𑀲𑀦𑁂𑀦 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀁 𑀲𑀁𑀓𑀺𑀮𑁂𑀲𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑁆𑀯𑀸. 𑀯𑁄𑀤𑀸𑀦𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀚𑀸𑀦𑀺𑀢𑁆𑀯𑀸𑀢𑀺 ‘‘𑀅𑀪𑀺𑀚𑁆𑀛𑀸 𑀯𑀺𑀲𑀫𑀮𑁄𑀪𑁄 𑀏𑀓𑀦𑁆𑀢𑁂𑀦𑁂𑀯 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀓𑁆𑀓𑀺𑀮𑁂𑀲𑁄’’𑀢𑀺 𑀲𑀪𑀸𑀯𑀢𑁄 𑀲𑀫𑀼𑀤𑀬𑀢𑁄 𑀦𑀺𑀭𑁄𑀥𑀢𑁄 𑀦𑀺𑀭𑁄𑀥𑀽𑀧𑀸𑀬𑀢𑁄 𑀘 𑀧𑀼𑀩𑁆𑀩𑀪𑀸𑀕𑀧𑀜𑁆𑀜𑀸𑀬 𑀘𑁂𑀯 𑀳𑁂𑀝𑁆𑀞𑀺𑀫𑀫𑀕𑁆𑀕𑀤𑁆𑀯𑀬𑀧𑀜𑁆𑀜𑀸𑀬 𑀘 𑀚𑀸𑀦𑀺𑀢𑁆𑀯𑀸. 𑀧𑀚𑀳𑀢𑀻𑀢𑀺 𑀏𑀢𑁆𑀣 𑀅𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀫𑁂𑀯 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀯𑀲𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀧𑀚𑀳𑀢𑀻’’𑀢𑀺 𑀆𑀳. 𑀅𑀭𑀺𑀬𑀫𑀕𑁆𑀕𑁂𑀦𑀸𑀢𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦. 𑀢𑁂𑀦 𑀳𑀺 𑀧𑀳𑀸𑀦𑀁 𑀇𑀥 𑀲𑀩𑁆𑀩𑀯𑀸𑀭𑁂𑀲𑀼 𑀅𑀥𑀺𑀧𑁆𑀧𑁂𑀢𑀁. 𑀓𑀺𑀮𑁂𑀲𑀧𑀝𑀺𑀧𑀸𑀝𑀺 𑀇𑀥 𑀓𑀺𑀮𑁂𑀲𑀸𑀦𑀁 𑀤𑁂𑀲𑀦𑀸𑀓𑁆𑀓𑀫𑁄. 𑀫𑀕𑁆𑀕𑀧𑀝𑀺𑀧𑀸𑀝𑀺𑀧𑀦 𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀸𑀦𑀁 𑀤𑁂𑀲𑀦𑀸𑀓𑁆𑀓𑀫𑁄𑀧𑀺 𑀢𑀸𑀬 𑀤𑁂𑀲𑀦𑀸𑀬 𑀧𑀝𑀺𑀧𑀚𑁆𑀚𑀦𑀓𑁆𑀓𑀫𑁄𑀧𑀺 ¶ 𑀢𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄𑀧𑀺. 𑀢𑀢𑁆𑀣 𑀬𑁂 𑀬𑁂 𑀓𑀺𑀮𑁂𑀲𑀸 𑀬𑁂𑀦 𑀬𑁂𑀦 𑀫𑀕𑁆𑀕𑁂𑀦 𑀧𑀳𑀻𑀬𑀦𑁆𑀢𑀺, 𑀫𑀕𑁆𑀕𑀧𑀝𑀺𑀧𑀸𑀝𑀺𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀢𑁂𑀲𑀁 𑀢𑁂𑀲𑀁 𑀓𑀺𑀮𑁂𑀲𑀸𑀦𑀁 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀧𑀳𑀸𑀦𑀤𑀲𑁆𑀲𑀦𑀁 𑀓𑀺𑀮𑁂𑀲𑀧𑀝𑀺𑀧𑀸𑀝𑀺 𑀦 𑀓𑀺𑀮𑁂𑀲𑀸𑀦𑀁 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄 𑀇𑀥 𑀤𑁂𑀲𑀦𑀸𑀓𑁆𑀓𑀫𑁄 𑀘𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀪𑀺𑀚𑁆𑀛𑀸 𑀯𑀺𑀲𑀫𑀮𑁄𑀪𑁄’’𑀢𑀺𑀆𑀤𑀺𑀫𑀸𑀳. 𑀬𑁂𑀦 𑀬𑁂𑀦 𑀧𑀦 𑀫𑀕𑁆𑀕𑁂𑀦 𑀬𑁂 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀺 𑀫𑀕𑁆𑀕𑀸𑀦𑀼𑀧𑀼𑀩𑁆𑀩𑀺𑀬𑀸, 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀢𑁂𑀲𑀁 𑀢𑁂𑀲𑀁 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀤𑀲𑁆𑀲𑀦𑀁 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀧𑀳𑀸𑀦𑀤𑀲𑁆𑀲𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦𑀸’’𑀢𑀺𑀆𑀤𑀺𑀫𑀸𑀳.

𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂𑀢𑀺 ‘‘𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸 𑀆𑀕𑀢𑁄 𑀇𑀫𑀲𑁆𑀫𑀺𑀁 𑀧𑀳𑀸𑀦𑀯𑀸𑀭𑁂. 𑀇𑀫𑁂 𑀓𑀺𑀮𑁂𑀲𑀸𑀢𑀺 𑀇𑀫𑁂 𑀬𑀣𑀸𑀯𑀼𑀢𑁆𑀢𑀸 𑀓𑀺𑀮𑁂𑀲𑀸. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀯𑀚𑁆𑀛𑀸 𑀯𑀸 𑀳𑁄𑀦𑁆𑀢𑀼 𑀲𑁂𑀲𑀫𑀕𑁆𑀕𑀯𑀚𑁆𑀛𑀸 𑀯𑀸𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀫𑀕𑁆𑀕𑀧𑀝𑀺𑀧𑀸𑀝𑀺𑀯𑀲𑁂𑀦. 𑀢𑀢𑁆𑀣 𑀧𑀦 𑀬𑁂 𑀢𑀢𑀺𑀬𑀫𑀕𑁆𑀕𑀯𑀚𑁆𑀛𑀸, 𑀢𑁂𑀲𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦𑁂𑀯 𑀧𑀳𑀸𑀦𑁂 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺, 𑀬𑁂𑀲𑀁 𑀧𑀦𑁂𑀢𑁆𑀣 𑀳𑁂𑀝𑁆𑀞𑀺𑀫𑀫𑀕𑁆𑀕𑀯𑀚𑁆𑀛𑀸𑀦𑀁 𑀇𑀥 𑀲𑀗𑁆𑀕𑀳𑁂 𑀓𑀸𑀭𑀡𑀁 𑀧𑀘𑁆𑀙𑀸 𑀯𑀢𑁆𑀢𑀼𑀓𑀸𑀫𑁂𑀦 𑀅𑀕𑁆𑀕𑀫𑀕𑁆𑀕𑀯𑀚𑁆𑀛𑀸𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀓𑀲𑁆𑀫𑀸 𑀢𑀢𑀺𑀬𑀫𑀕𑁆𑀕𑀯𑀚𑁆𑀛𑀸𑀦𑀫𑁂𑀯 𑀕𑀳𑀡𑀁 𑀓𑀢𑀦𑁆𑀢𑀺 𑀆𑀳 ‘‘𑀅𑀬𑀫𑁂𑀢𑁆𑀣 𑀧𑀯𑁂𑀡𑀺𑀫𑀕𑁆𑀕𑀸𑀕𑀢𑁄 𑀲𑀫𑁆𑀪𑀯𑁄’’𑀢𑀺, 𑀅𑀬𑀁 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀏𑀢𑀲𑁆𑀫𑀺𑀁 𑀞𑀸𑀦𑁂 𑀆𑀘𑀭𑀺𑀬𑀧𑀯𑁂𑀡𑀺𑀬𑀸 𑀓𑀣𑀸𑀫𑀕𑁆𑀕𑁄 𑀢𑀢𑁄 𑀆𑀕𑀢𑁄 𑀅𑀢𑁆𑀣𑀲𑀫𑁆𑀪𑀯𑁄 𑀅𑀢𑁆𑀣𑀢𑀢𑁆𑀯𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀳𑁂𑀝𑁆𑀞𑀺𑀫𑀫𑀕𑁆𑀕𑀯𑀚𑁆𑀛𑀸𑀦𑀁 𑀇𑀥 𑀲𑀗𑁆𑀕𑀳𑁂 𑀓𑀸𑀭𑀡𑀁 𑀧𑀘𑁆𑀙𑀸 𑀯𑀢𑁆𑀢𑀼𑀓𑀸𑀫𑁄 𑀅𑀕𑁆𑀕𑀫𑀕𑁆𑀕𑀯𑀚𑁆𑀛𑀸𑀦𑀁 𑀅𑀕𑁆𑀕𑀳𑀡𑁂 𑀬𑀼𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀦𑀸𑀢𑀺 𑀘𑀢𑀼𑀢𑁆𑀣𑀫𑀕𑁆𑀕𑁂𑀦. 𑀲𑁂𑀲𑀸𑀦𑀦𑁆𑀢𑀺 𑀩𑁆𑀬𑀸𑀧𑀸𑀤𑀸𑀤𑀻𑀦𑀁 ¶ . 𑀬𑁂𑀧𑀻𑀢𑀺 𑀫𑀓𑁆𑀔𑀸𑀤𑀺𑀓𑁂 𑀲𑀦𑁆𑀥𑀸𑀬𑀸𑀳. 𑀢𑀁𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀸𑀦𑀦𑁆𑀢𑀺 𑀢𑁂𑀲𑀁 𑀫𑀓𑁆𑀔𑀸𑀤𑀻𑀦𑀁 𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁. 𑀢𑀢𑁆𑀣 𑀫𑀓𑁆𑀔-𑀧𑀴𑀸𑀲-𑀇𑀲𑁆𑀲𑀸-𑀫𑀘𑁆𑀙𑀭𑀺𑀬-𑀲𑀫𑀼𑀝𑁆𑀞𑀸𑀧𑀓𑀁 𑀧𑀝𑀺𑀖𑀤𑁆𑀯𑀬𑀘𑀺𑀢𑁆𑀢𑀁, 𑀯𑀺𑀲𑁂𑀲𑀢𑁄 𑀧𑀜𑁆𑀘𑀓𑀸𑀫𑀕𑀼𑀡𑀮𑁄𑀪𑁂𑀦 𑀲𑀞𑁄 𑀫𑀸𑀬𑀸𑀯𑀻 𑀘 𑀳𑁄𑀢𑀺, 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑁄 𑀘 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦𑁂𑀯 𑀦𑀺𑀭𑀯𑀲𑁂𑀲𑀢𑁄 𑀧𑀳𑀻𑀬𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑀁𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀸𑀦𑀁 𑀅𑀧𑁆𑀧𑀳𑀻𑀦𑀢𑁆𑀢𑀸’’𑀢𑀺. 𑀢𑁂𑀧𑀺 𑀲𑀼𑀧𑁆𑀧𑀳𑀻𑀦𑀸 𑀳𑁄𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀦𑁆𑀢𑀺 𑀧𑀞𑀫𑀫𑀕𑁆𑀕𑁂𑀦𑁂𑀯 𑀧𑀳𑀸𑀦𑀁 𑀧𑀼𑀩𑁆𑀩𑀸𑀧𑀭𑁂𑀦 𑀦 𑀲𑀦𑁆𑀥𑀺𑀬𑀢𑀺 ‘‘𑀬𑀣𑁄𑀥𑀺 𑀔𑁄’’𑀢𑀺 𑀏𑀢𑁆𑀣 𑀑𑀥𑀺𑀯𑀘𑀦𑀲𑁆𑀲 𑀫𑀕𑁆𑀕𑀢𑁆𑀢𑀬𑀯𑀸𑀘𑀓𑀢𑁆𑀢𑀸. 𑀭𑀢𑀦𑀢𑁆𑀢𑀬𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁄 𑀦𑀸𑀫 𑀅𑀭𑀺𑀬𑀓𑀦𑁆𑀢𑀲𑀻𑀮𑀁 𑀯𑀺𑀬 𑀲𑁄𑀢𑀸𑀧𑀦𑁆𑀦𑀲𑁆𑀲 𑀅𑀗𑁆𑀕𑀸𑀦𑀺, 𑀢𑁂 𑀘 𑀧𑀳𑀸𑀦𑀢𑁄 𑀧𑀘𑁆𑀙𑀸 𑀦𑀺𑀤𑁆𑀤𑀺𑀝𑁆𑀞𑀸, 𑀢𑀲𑁆𑀫𑀸 𑀇𑀥 𑀯𑀼𑀢𑁆𑀢𑀧𑁆𑀧𑀳𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀧𑀳𑀸𑀦𑀫𑁂𑀯𑀸𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀢𑁂𑀲𑀁 𑀇𑀘𑁆𑀙𑀸𑀫𑀢𑁆𑀢𑀫𑁂𑀯 𑀬𑀣𑀸𑀯𑀼𑀢𑁆𑀢𑀧𑀳𑀸𑀦𑀲𑁆𑀲𑁂𑀯 𑀯𑀲𑁂𑀦 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀸𑀦𑀁 𑀑𑀥𑀺𑀲𑁄 𑀧𑀳𑀸𑀦𑀲𑁆𑀲 𑀯𑀺𑀪𑀸𑀯𑀺𑀢𑀢𑁆𑀢𑀸, 𑀲𑁆𑀯𑀸𑀬𑀫𑀢𑁆𑀣𑁄 𑀳𑁂𑀝𑁆𑀞𑀸 𑀬𑀼𑀢𑁆𑀢𑀺𑀢𑁄𑀧𑀺 𑀧𑀓𑀸𑀲𑀺𑀢𑁄𑀬𑁂𑀯.

𑁭𑁪. 𑀏𑀓𑀫𑁂𑀓𑁂𑀦 𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑀁, 𑀬𑀢𑁄 𑀏𑀓𑀫𑁂𑀓𑀲𑁆𑀲𑀧𑀺 𑀉𑀧𑀓𑁆𑀓𑀺𑀮𑁂𑀲𑀲𑁆𑀲 𑀲𑀪𑀸𑀯𑀸𑀤𑀺𑀢𑁄 𑀤𑀲𑁆𑀲𑀦𑀁 𑀦𑀺𑀬𑁆𑀬𑀸𑀦𑀫𑀼𑀔𑀁 𑀳𑁄𑀢𑀺, 𑀢𑀣𑀸 𑀘𑁂𑀯 𑀳𑁂𑀝𑁆𑀞𑀸 𑀲𑀁𑀯𑀡𑁆𑀡𑀺𑀢𑀁. 𑀅𑀦𑀸𑀕𑀸𑀫𑀺𑀫𑀕𑁆𑀕𑀯𑀲𑁂𑀦 𑀧𑀳𑀸𑀦𑀁 𑀯𑀢𑁆𑀯𑀸 𑀧𑀲𑀸𑀤𑀲𑁆𑀲 𑀉𑀤𑁆𑀥𑀝𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀮𑁄𑀓𑀼𑀢𑁆𑀢𑀭𑀧𑁆𑀧𑀲𑀸𑀤𑁄 𑀆𑀕𑀢𑁄’’𑀢𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 ‘‘𑀮𑁄𑀓𑀺𑀬𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺? ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀲𑁆𑀲 𑀮𑁄𑀓𑀺𑀬𑀢𑁆𑀢𑀸. 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁄 ¶ 𑀏𑀯 𑀳𑀺 𑀮𑁄𑀓𑀼𑀢𑁆𑀢𑀭𑁄 𑀧𑀲𑀸𑀤𑁄. ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀯𑀘𑀦𑁂𑀦 𑀮𑁄𑀓𑀺𑀬𑀁, 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀯𑀘𑀦𑁂𑀦 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀁 𑀧𑀲𑀸𑀤𑀁 𑀤𑀲𑁆𑀲𑁂𑀦𑁆𑀢𑁄. 𑀅𑀯𑁂𑀘𑁆𑀘 𑀭𑀢𑀦𑀢𑁆𑀢𑀬𑀕𑀼𑀡𑁂 𑀬𑀸𑀣𑀸𑀯𑀢𑁄 𑀜𑀢𑁆𑀯𑀸 𑀧𑀲𑀸𑀤𑁄 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁄. 𑀲𑁄 𑀧𑀦 𑀬𑀲𑁆𑀫𑀸 𑀫𑀕𑁆𑀕𑁂𑀦𑀸𑀕𑀢𑀢𑁆𑀢𑀸 𑀓𑁂𑀦𑀘𑀺 𑀅𑀓𑀫𑁆𑀧𑀦𑀺𑀬𑁄 𑀅𑀧𑁆𑀧𑀥𑀁𑀲𑀺𑀬𑁄 𑀘 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀘𑀮𑁂𑀦 𑀅𑀘𑁆𑀘𑀼𑀢𑁂𑀦𑀸’’𑀢𑀺. 𑀢𑀢𑁆𑀣 𑀮𑁄𑀓𑀼𑀢𑁆𑀢𑀭𑁄 𑀲𑀩𑁆𑀩𑀲𑁄 𑀩𑀼𑀤𑁆𑀥𑀕𑀼𑀡𑀸𑀤𑀻𑀲𑀼 𑀲𑀫𑁆𑀫𑁄𑀳𑀁 𑀯𑀺𑀤𑁆𑀥𑀁𑀲𑁂𑀦𑁆𑀢𑁄 𑀢𑀢𑁆𑀣 𑀓𑀺𑀘𑁆𑀘𑀢𑁄 𑀧𑀯𑀢𑁆𑀢𑀢𑀺, 𑀇𑀢𑀭𑁄 𑀆𑀭𑀫𑁆𑀫𑀡𑀯𑀲𑁂𑀦 𑀢𑁂 𑀆𑀭𑀩𑁆𑀪. 𑀢𑀁 𑀯𑀺𑀥𑀺𑀦𑁆𑀢𑀺 𑀢𑀁 𑀢𑀲𑁆𑀲 𑀉𑀧𑁆𑀧𑀦𑁆𑀦𑀧𑁆𑀧𑀓𑀸𑀭𑀁. 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀻𑀢𑀺 𑀅𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀸𑀦𑀺.

𑁭𑁫. 𑀲𑁄𑀫𑀦𑀲𑁆𑀲𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀜𑀸𑀡𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀘𑁄𑀭𑀸𑀦𑀁 𑀅𑀪𑀺𑀡𑁆𑀳𑀁 𑀲𑀜𑁆𑀘𑀭𑀡𑀝𑁆𑀞𑀸𑀦𑀢𑀸𑀬 𑀧𑀘𑁆𑀘𑀦𑁆𑀢𑀕𑁆𑀕𑀳𑀡𑀁. 𑀧𑀘𑁆𑀘𑀯𑁂𑀓𑁆𑀔𑀢𑁄𑀢𑀺 ‘‘𑀅𑀲𑀼𑀓𑀲𑁆𑀫𑀺𑀜𑁆𑀘 𑀞𑀸𑀦𑁂 𑀇𑀫𑁂 𑀘𑀺𑀫𑁂 𑀘𑁄𑀭𑀸 𑀏𑀯𑀜𑁆𑀘 𑀏𑀯𑀜𑁆𑀘 𑀯𑀺𑀦𑀸𑀲𑀺𑀢𑀸’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀢𑁄 𑀭𑀜𑁆𑀜𑁄 𑀯𑀺𑀬.

𑀬𑁄 ¶ 𑀬𑁄 𑀑𑀥𑀺 𑀬𑀣𑁄𑀥𑀺. 𑀬𑀣𑀸-𑀲𑀤𑁆𑀤𑁄 𑀩𑁆𑀬𑀸𑀧𑀦𑀺𑀘𑁆𑀙𑀸𑀬𑀁, 𑀔𑁄 𑀲𑀤𑁆𑀤𑁄 𑀅𑀯𑀥𑀸𑀭𑀡𑁂𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀓𑀲𑀓𑀑𑀥𑀺𑀯𑀲𑁂𑀦 𑀘𑀢𑁆𑀢𑀫𑁂𑀯 𑀳𑁄𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑁂𑀦 ‘‘𑀯𑀦𑁆𑀢’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀅𑀯𑀥𑀸𑀭𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀓𑀲𑀓𑀑𑀥𑀺𑀯𑀲𑁂𑀦𑀸𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀤𑁆𑀯𑁂 𑀑𑀥𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀁𑀫𑀕𑁆𑀕𑀯𑀚𑁆𑀛𑀸𑀢𑀺 𑀬𑁂𑀦 𑀫𑀕𑁆𑀕𑁂𑀦 𑀅𑀦𑀯𑀲𑁂𑀲𑀢𑁄 𑀧𑀳𑀸𑀢𑀩𑁆𑀩𑀸. 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀯𑀲𑁂𑀦 𑀳𑀺 𑀢𑀁𑀢𑀁𑀫𑀕𑁆𑀕𑀯𑀚𑁆𑀛𑀸𑀦𑀁 𑀓𑀺𑀮𑁂𑀲𑀸𑀦𑀁 𑀢𑀤𑀜𑁆𑀜𑀫𑀕𑁆𑀕𑀯𑀚𑁆𑀛𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑀢𑀸, 𑀅𑀜𑁆𑀜𑀣𑀸 𑀬𑁂 𑀲𑀓𑀲𑀓𑀑𑀥𑀺𑀯𑀲𑁂𑀦 𑀉𑀧𑀭𑀺𑀫𑀕𑁆𑀕𑀯𑀚𑁆𑀛𑀸, 𑀢𑁂 𑀳𑁂𑀝𑁆𑀞𑀺𑀫𑀫𑀕𑁆𑀕𑁂𑀳𑀺 𑀧𑀳𑀻𑀦𑀸𑀧𑀸𑀬𑀕𑀫𑀦𑀻𑀬𑀸𑀤𑀺𑀲𑀪𑀸𑀯𑀸 𑀏𑀯 𑀢𑁂𑀳𑀺 𑀧𑀳𑀻𑀬𑀦𑁆𑀢𑀻𑀢𑀺 𑀧𑀳𑀸𑀦𑀯𑀲𑁂𑀦 𑀲𑀫𑁆𑀫𑀺𑀲𑁆𑀲𑀸 𑀲𑀺𑀬𑀼𑀁. 𑀢𑁂𑀦 𑀢𑁂𑀬𑁂𑀯 𑀧𑀳𑀻𑀦𑀸 𑀳𑁄𑀦𑁆𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑀼𑀢𑁆𑀢𑀭𑀺𑀧𑀻𑀢𑀺 𑀢𑀢𑁄 𑀧𑀳𑀸𑀦𑀦𑀺𑀫𑀺𑀢𑁆𑀢𑀲𑁄𑀫𑀦𑀲𑁆𑀲𑀼𑀧𑁆𑀧𑀢𑁆𑀢𑀺𑀢𑁄 𑀉𑀤𑁆𑀥𑀫𑁆𑀧𑀺. 𑀧𑀝𑀺𑀧𑀓𑁆𑀔𑁂𑀲𑀼 𑀑𑀥𑀺𑀲𑁄 𑀧𑀯𑀢𑁆𑀢𑀺𑀓𑀺𑀘𑁆𑀘𑀢𑁆𑀢𑀸 𑀑𑀥𑀻𑀢𑀺 𑀳𑁂𑀝𑁆𑀞𑀸 𑀢𑀬𑁄 𑀫𑀕𑁆𑀕𑀸 𑀯𑀼𑀘𑁆𑀘𑀦𑁆𑀢𑀺. 𑀢𑁂 𑀳𑀻𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀯𑀺𑀯𑀭𑀡𑀁. 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀅𑀦𑀸𑀕𑀸𑀫𑀺𑀁 𑀲𑀦𑁆𑀥𑀸𑀬𑀸𑀳. 𑀢𑁂𑀦 𑀯𑀼𑀢𑁆𑀢𑀁 ‘‘𑀳𑁂𑀝𑁆𑀞𑀸𑀫𑀕𑁆𑀕𑀢𑁆𑀢𑀬𑁂𑀦 𑀘𑀢𑁆𑀢’’𑀦𑁆𑀢𑀺.

𑀓𑁂𑀘𑀺 𑀘𑀢𑁆𑀢𑀫𑁆𑀧𑀺 𑀕𑀡𑁆𑀳𑀦𑁆𑀢𑀺, 𑀦𑀬𑀺𑀤𑀫𑁂𑀯𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀯𑀦𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀬𑀁 𑀬𑁂𑀦 𑀯𑀦𑁆𑀢𑀁, 𑀲𑁄 𑀧𑀼𑀦 𑀢𑀁 𑀆𑀤𑀺𑀬𑀢𑀺. 𑀢𑁂𑀦𑀸𑀳 ‘‘𑀅𑀦𑀸𑀤𑀺𑀬𑀦𑀪𑀸𑀯𑀤𑀲𑁆𑀲𑀦𑀯𑀲𑁂𑀦𑀸’’𑀢𑀺. 𑀯𑀦𑁆𑀢𑀫𑁆𑀧𑀺 𑀓𑀺𑀜𑁆𑀘𑀺 𑀲𑀲𑀦𑁆𑀢𑀢𑀺𑀮𑀕𑁆𑀕𑀁 𑀲𑀺𑀬𑀸, 𑀦𑀬𑀺𑀤𑀫𑁂𑀯𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀫𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀲𑀦𑁆𑀢𑀢𑀺𑀢𑁄 𑀯𑀺𑀦𑀺𑀫𑁄𑀘𑀦𑀯𑀲𑁂𑀦𑀸’’𑀢𑀺. 𑀫𑀼𑀢𑁆𑀢𑀫𑁆𑀧𑀺 𑀓𑀺𑀜𑁆𑀘𑀺 𑀫𑀼𑀢𑁆𑀢𑀩𑀦𑁆𑀥𑀦𑀸 𑀯𑀺𑀬 𑀨𑀮𑀁 𑀓𑀼𑀳𑀺𑀜𑁆𑀘𑀺 𑀢𑀺𑀝𑁆𑀞𑀢𑀺, 𑀦 𑀏𑀯𑀫𑀺𑀤𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀧𑀳𑀻𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀓𑁆𑀯𑀘𑀺 𑀅𑀦𑀯𑀝𑁆𑀞𑀸𑀦𑀤𑀲𑁆𑀲𑀦𑀯𑀲𑁂𑀦𑀸’’𑀢𑀺. 𑀬𑀣𑀸 𑀓𑀺𑀜𑁆𑀘𑀺 𑀤𑀼𑀦𑁆𑀦𑀺𑀲𑁆𑀲𑀝𑁆𑀞𑀁 𑀧𑀼𑀦 𑀆𑀤𑀸𑀬 𑀲𑀫𑁆𑀫𑀤𑁂𑀯 𑀦𑀺𑀲𑁆𑀲𑀝𑁆𑀞𑀁 𑀧𑀝𑀺𑀦𑀺𑀲𑁆𑀲𑀝𑁆𑀞𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀯𑀺𑀧𑀲𑁆𑀲𑀦𑀸𑀬 𑀦𑀺𑀲𑁆𑀲𑀝𑁆𑀞𑀁 𑀆𑀤𑀺𑀦𑁆𑀦𑀲𑀤𑀺𑀲𑀁 𑀫𑀕𑁆𑀕𑁂𑀦 𑀧𑀳𑀻𑀦𑀁 𑀧𑀝𑀺𑀦𑀺𑀲𑁆𑀲𑀝𑁆𑀞𑀁 𑀦𑀸𑀫 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀧𑀝𑀺𑀦𑀺𑀲𑁆𑀲𑀝𑁆𑀞’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀆𑀤𑀺𑀦𑁆𑀦𑀧𑀼𑀩𑁆𑀩𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀤𑀲𑁆𑀲𑀦𑀯𑀲𑁂𑀦𑀸’’𑀢𑀺. 𑀦 𑀓𑀸𑀧𑀼𑀭𑀺𑀲𑁂𑀦 𑀯𑀺𑀬 𑀧𑀭𑀫𑁆𑀫𑀼𑀔𑁂𑀦 𑀦𑀺𑀲𑁆𑀲𑀝𑁆𑀞𑀁 ¶ , 𑀅𑀣 𑀔𑁄 𑀅𑀪𑀺𑀫𑀼𑀔𑁂𑀦𑁂𑀯 𑀦𑀺𑀲𑁆𑀲𑀝𑁆𑀞𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀧𑀝𑀺𑀦𑀺𑀲𑁆𑀲𑀝𑁆𑀞’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀧𑀝𑀺𑀫𑀼𑀔𑀁 𑀯𑀸’’𑀢𑀺𑀆𑀤𑀺. 𑀉𑀧𑀕𑀦𑁆𑀢𑀩𑁆𑀩𑀢𑁄𑀢𑀺 𑀅𑀢𑁆𑀢𑀦𑁄 𑀳𑀺𑀢𑀲𑀼𑀔𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦 𑀏𑀓𑀦𑁆𑀢𑁂𑀦 𑀅𑀥𑀺𑀕𑀦𑁆𑀢𑀩𑁆𑀩𑀢𑁄. 𑀥𑀸𑀭𑀡𑀢𑁄𑀢𑀺 𑀢𑀁𑀲𑀫𑀗𑁆𑀕𑀻𑀦𑀁 𑀅𑀧𑀸𑀬𑀧𑀸𑀢𑀢𑁄 𑀲𑀦𑁆𑀥𑀸𑀭𑀡𑁂𑀦. 𑀕𑀦𑁆𑀣𑁄 ‘‘𑀯𑁂𑀤𑁄’’𑀢𑀺 𑀯𑀼𑀘𑁆𑀘𑀢𑀺 ‘‘𑀯𑀺𑀤𑀦𑁆𑀢𑀺 𑀏𑀢𑁂𑀦𑀸’’𑀢𑀺, 𑀯𑁂𑀤𑁂𑀳𑀺 𑀜𑀸𑀡𑁂𑀳𑀺 𑀕𑀢𑁄 𑀧𑀝𑀺𑀧𑀦𑁆𑀦𑁄𑀢𑀺 𑀯𑁂𑀤𑀕𑀽. 𑀅𑀪𑀺𑀚𑀜𑁆𑀜𑀸𑀢𑀺 𑀚𑀸𑀦𑁂𑀬𑁆𑀬. 𑀯𑁂𑀤𑀚𑀸𑀢𑀸𑀢𑀺 𑀉𑀧𑁆𑀧𑀦𑁆𑀦𑀲𑁄𑀫𑀦𑀲𑁆𑀲𑀸. 𑀜𑀸𑀡𑀁 ‘‘𑀯𑁂𑀤𑁄’’𑀢𑀺 𑀯𑀼𑀘𑁆𑀘𑀢𑀺 ‘‘𑀯𑁂𑀤𑀺𑀢𑀩𑁆𑀩𑀁 𑀯𑁂𑀤𑁂𑀢𑀻’’𑀢𑀺. 𑀲𑁄𑀫𑀦𑀲𑁆𑀲𑀁 ‘‘𑀯𑁂𑀤𑁄’’𑀢𑀺 𑀯𑀼𑀘𑁆𑀘𑀢𑀺 𑀆𑀭𑀫𑁆𑀫𑀡𑀭𑀲𑀁 𑀯𑀺𑀦𑁆𑀤𑀢𑀺 𑀅𑀦𑀼𑀪𑀯𑀢𑀻𑀢𑀺.

𑀉𑀧𑁆𑀧𑀦𑁆𑀦𑀦𑁆𑀢𑀺 ¶ 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀁. 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯 𑀯𑁂𑀤𑀦𑁆𑀢𑀺 ‘‘𑀲𑁄𑀫𑀦𑀲𑁆𑀲𑀁 𑀲𑁄𑀫𑀦𑀲𑁆𑀲𑀫𑀬𑀜𑀸𑀡𑀜𑁆𑀘𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀫𑁂𑀯. 𑀅𑀢𑁆𑀣𑀯𑁂𑀤𑀦𑁆𑀢𑀺 𑀅𑀢𑁆𑀣𑁂 𑀳𑁂𑀢𑀼𑀨𑀮𑁂 𑀯𑁂𑀤𑀁. 𑀥𑀫𑁆𑀫𑀯𑁂𑀤𑀦𑁆𑀢𑀺 𑀥𑀫𑁆𑀫𑁂 𑀳𑁂𑀢𑀼𑀫𑁆𑀳𑀺 𑀯𑁂𑀤𑀁. 𑀢𑁂𑀦𑀸𑀳 ‘‘𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀲𑁆𑀲 𑀳𑁂𑀢𑀼’’𑀦𑁆𑀢𑀺𑀆𑀤𑀺. 𑀇𑀥 𑀥𑀫𑁆𑀫𑀢𑁆𑀣𑀲𑀤𑁆𑀤𑀸 𑀳𑁂𑀢𑀼𑀨𑀮𑀧𑀭𑀺𑀬𑀸𑀬𑀸𑀢𑀺 𑀇𑀫𑀫𑀢𑁆𑀣𑀁 𑀧𑀸𑀴𑀺𑀬𑀸 𑀏𑀯 𑀤𑀲𑁆𑀲𑁂𑀢𑀼𑀁 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀫𑁂𑀯 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘𑀸𑀢𑀺 𑀅𑀢𑁆𑀣𑁄 𑀥𑀫𑁆𑀫𑁄𑀢𑀺 𑀘 𑀯𑀼𑀢𑁆𑀢𑀁 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀦𑀺𑀫𑀺𑀢𑁆𑀢𑀁 𑀬𑀣𑀸𑀯𑀼𑀢𑁆𑀢𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑀜𑁆𑀘. 𑀅𑀢𑁆𑀣𑀥𑀫𑁆𑀫𑀸𑀦𑀺𑀲𑀁𑀲𑀪𑀽𑀢𑀁 𑀯𑁂𑀤𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀅𑀢𑁆𑀣𑀥𑀫𑁆𑀫𑀸𑀦𑀺𑀲𑀁𑀲𑀪𑀽𑀢𑀁 𑀲𑁄𑀫𑀦𑀲𑁆𑀲𑀫𑀬𑀜𑀸𑀡𑀲𑀗𑁆𑀔𑀸𑀢𑀁 𑀯𑁂𑀤𑀜𑁆𑀘. 𑀧𑀸𑀫𑁄𑀚𑁆𑀚𑀦𑁆𑀢𑀺 𑀢𑀭𑀼𑀡𑀧𑀻𑀢𑀺𑀁 𑀆𑀳. 𑀧𑀘𑁆𑀘𑀯𑁂𑀓𑁆𑀔𑀡𑀸𑀓𑀸𑀭𑀧𑁆𑀧𑀯𑀢𑁆𑀢𑁂𑀦𑀸𑀢𑀺 𑀏𑀢𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀸 𑀏𑀯𑁂𑀢𑁆𑀣 𑀅𑀦𑀯𑀚𑁆𑀚𑀲𑀪𑀸𑀯𑀢𑀸𑀬 𑀥𑀫𑁆𑀫𑁄𑀢𑀺 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀻𑀢𑀺 𑀚𑀸𑀬𑀢𑀻𑀢𑀺 𑀧𑀭𑀧𑁆𑀧𑀘𑁆𑀘𑀬𑀁 𑀩𑀮𑀯𑀧𑀻𑀢𑀺𑀫𑀸𑀳. 𑀧𑀻𑀡𑀺𑀢𑀫𑀦𑀲𑁆𑀲𑀸𑀢𑀺 𑀧𑀲𑁆𑀲𑀤𑁆𑀥𑀺𑀆𑀯𑀳𑁂𑀳𑀺 𑀉𑀴𑀸𑀭𑁂𑀳𑀺 𑀧𑀻𑀢𑀺𑀯𑁂𑀕𑁂𑀳𑀺 𑀢𑀺𑀢𑁆𑀢𑀘𑀺𑀢𑁆𑀢𑀲𑁆𑀲. 𑀓𑀸𑀬𑁄𑀢𑀺 𑀦𑀸𑀫𑀓𑀸𑀬𑁄. 𑀯𑀽𑀧𑀲𑀦𑁆𑀢𑀤𑀭𑀣𑁄𑀢𑀺 𑀓𑀺𑀮𑁂𑀲𑀧𑀭𑀺𑀴𑀸𑀳𑀸𑀦𑀁 𑀤𑀽𑀭𑀻𑀪𑀸𑀯𑁂𑀦 𑀲𑀼𑀝𑁆𑀞𑀼 𑀉𑀧𑀲𑀦𑁆𑀢𑀤𑀭𑀣𑁄. 𑀧𑀘𑁆𑀘𑀯𑁂𑀓𑁆𑀔𑀡𑀳𑁂𑀢𑀼𑀓𑀁 𑀘𑀺𑀢𑁆𑀢𑀲𑁆𑀲 𑀲𑀫𑀸𑀥𑀸𑀦𑀁 𑀇𑀥 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀅𑀧𑁆𑀧𑀺𑀢𑀁 𑀯𑀺𑀬 𑀅𑀘𑀮𑀁 𑀢𑀺𑀝𑁆𑀞𑀢𑀻’’𑀢𑀺.

𑁭𑁬. 𑀓𑀸𑀫𑀁 ‘‘𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄𑀫𑁆𑀳𑀺, 𑀥𑀫𑁆𑀫𑁂 𑀲𑀗𑁆𑀖𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑁄𑀫𑁆𑀳𑀻’’𑀢𑀺 𑀇𑀤𑀫𑁆𑀧𑀺 𑀢𑀲𑁆𑀲𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀧𑀯𑀢𑁆𑀢𑀺𑀆𑀓𑀸𑀭𑀧𑀓𑀸𑀲𑀦𑀫𑁂𑀯, 𑀇𑀤𑀁 𑀧𑀦 𑀯𑀺𑀲𑁂𑀲𑀢𑁄 𑀭𑀢𑀦𑀢𑁆𑀢𑀬𑁂 𑀉𑀧𑁆𑀧𑀦𑁆𑀦𑀲𑁄𑀫𑀦𑀲𑁆𑀲𑀸𑀤𑀺𑀧𑁆𑀧𑀓𑀸𑀲𑀦𑀧𑀤𑀁. ‘‘𑀬𑀣𑁄𑀥𑀺 𑀔𑁄 𑀧𑀦𑀸’’𑀢𑀺 𑀇𑀤𑀫𑁆𑀧𑀺 𑀲𑀯𑀺𑀲𑁂𑀲𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀓𑀸𑀭𑀧𑁆𑀧𑀓𑀸𑀲𑀦𑀧𑀤𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀇𑀤𑀸𑀦𑀺 𑀬𑀣𑁄𑀥𑀺…𑀧𑁂… 𑀧𑀓𑀸𑀲𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀘𑀢𑁆𑀢𑀸𑀭𑁄𑀧𑀺 𑀧𑀦 𑀯𑀸𑀭𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀓𑀸𑀭𑀧𑁆𑀧𑀓𑀸𑀲𑀦𑀯𑀲𑁂𑀦 𑀘𑁂𑀯 𑀲𑁄𑀫𑀦𑀲𑁆𑀲𑀸𑀤𑀺𑀆𑀦𑀺𑀲𑀁𑀲𑀤𑀲𑁆𑀲𑀦𑀯𑀲𑁂𑀦 𑀘 𑀯𑀼𑀢𑁆𑀢𑀸𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁 𑀉𑀪𑀬𑀢𑁆𑀣𑀸𑀧𑀺 𑀉𑀪𑀬𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀬𑀤𑀺𑀧𑀺 𑀅𑀭𑀺𑀬𑀫𑀕𑁆𑀕𑁄 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑁄 𑀦 𑀧𑀼𑀦 𑀉𑀧𑁆𑀧𑀚𑁆𑀚𑀢𑀺, 𑀧𑀝𑀺𑀧𑀓𑁆𑀔𑀲𑁆𑀲 𑀧𑀦 𑀢𑁂𑀦 𑀲𑀼𑀧𑁆𑀧𑀳𑀻𑀦𑀢𑁆𑀢𑀸 𑀢𑀁𑀲𑀫𑀗𑁆𑀕𑀻 𑀅𑀧𑀭𑀺𑀳𑀸𑀦𑀥𑀫𑁆𑀫𑁄 𑀢𑀁𑀲𑀻𑀮𑀸𑀤𑀺𑀪𑀸𑀯𑁂𑀦𑁂𑀯 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀢𑀲𑁆𑀲 𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀲𑀻𑀮𑀓𑁆𑀔𑀦𑁆𑀥𑀁 𑀤𑀲𑁆𑀲𑁂𑀢𑀻’’𑀢𑀺𑀆𑀤𑀺. ‘‘𑀏𑀯𑀁𑀥𑀫𑁆𑀫𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁧𑁩; 𑀫. 𑀦𑀺. 𑁩.𑁧𑁯𑁭-𑁧𑁯𑁮; 𑀲𑀁. 𑀦𑀺. 𑁫.𑁩𑁭𑁮) 𑀯𑀺𑀬 𑀇𑀥 𑀥𑀫𑁆𑀫-𑀲𑀤𑁆𑀤𑁄 𑀲𑀫𑀸𑀥𑀺𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀲𑀫𑀸𑀥𑀺𑀓𑁆𑀔𑀦𑁆𑀥𑀁 𑀧𑀜𑁆𑀜𑀸𑀓𑁆𑀔𑀦𑁆𑀥𑀜𑁆𑀘 𑀤𑀲𑁆𑀲𑁂𑀢𑀻’’𑀢𑀺. 𑀢𑀣𑀸 𑀳𑀺 𑀲𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀏𑀓𑀸𑀭𑀫𑁆𑀫𑀡𑁂 𑀅𑀯𑀺𑀓𑁆𑀔𑀺𑀧𑀫𑀸𑀦𑁂 ¶ 𑀅𑀯𑀺𑀧𑁆𑀧𑀓𑀺𑀡𑁆𑀡𑁂 𑀅𑀯𑀺𑀲𑀝𑁂 𑀓𑀢𑁆𑀯𑀸 𑀲𑀫𑀁, 𑀲𑀫𑁆𑀫𑀸 𑀘 𑀆𑀤𑀳𑀦𑁆𑀢𑁄 𑀢𑀣𑀸 𑀢𑁂 𑀥𑀸𑀭𑁂𑀢𑀻𑀢𑀺 𑀘 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻𑀢𑀺 ¶ 𑀥𑀫𑁆𑀫𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀅𑀦𑁂𑀓𑀭𑀽𑀧𑀸𑀦𑀦𑁆𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑀸𑀦𑀁. 𑀅𑀦𑁆𑀢𑀭𑀸𑀬𑁄 𑀦𑀸𑀫 𑀅𑀧𑁆𑀧𑀝𑀺𑀮𑀤𑁆𑀥𑀲𑁆𑀲 𑀯𑀸 𑀅𑀮𑀩𑁆𑀪𑀦𑀯𑀲𑁂𑀦, 𑀧𑀝𑀺𑀮𑀤𑁆𑀥𑀲𑁆𑀲 𑀯𑀸 𑀧𑀭𑀺𑀳𑀸𑀦𑀯𑀲𑁂𑀦, 𑀢𑀤𑀼𑀪𑀬𑀫𑁆𑀧𑀺 𑀇𑀥 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀕𑁆𑀕𑀲𑁆𑀲 𑀯𑀸’’𑀢𑀺𑀆𑀤𑀺𑀫𑀸𑀳. 𑀦𑁂𑀯𑀲𑁆𑀲 𑀢𑀁 𑀳𑁄𑀢𑀺 𑀅𑀦𑁆𑀢𑀭𑀸𑀬𑀸𑀬𑀸𑀢𑀺 𑀢𑀲𑁆𑀲 𑀅𑀦𑀸𑀕𑀸𑀫𑀺𑀦𑁄 𑀧𑀺𑀡𑁆𑀟𑀧𑀸𑀢𑀪𑁄𑀚𑀦𑀁 𑀦𑁂𑀯 𑀳𑁄𑀢𑀺 𑀅𑀦𑁆𑀢𑀭𑀸𑀬𑀸𑀬 𑀉𑀓𑁆𑀓𑀁𑀲𑀕𑀢𑀸𑀬 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀢𑁄. 𑀢𑀜𑁆𑀘𑀲𑁆𑀲𑀸 𑀉𑀓𑁆𑀓𑀁𑀲𑀕𑀫𑀦𑀁 𑀳𑀢𑀧𑀝𑀺𑀧𑀓𑁆𑀔𑀢𑁆𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀕𑁆𑀕𑁂𑀦 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀢𑁆𑀢𑀸’’𑀢𑀺 𑀆𑀳.

𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑀸𑀬𑀸𑀪𑀸𑀯𑁂. 𑀏𑀢𑀤𑁂𑀯 𑀯𑀺𑀲𑀼𑀤𑁆𑀥𑀘𑀺𑀢𑁆𑀢𑀢𑁆𑀢𑀫𑁂𑀯 𑀓𑀸𑀭𑀡𑀁. 𑀏𑀢𑁆𑀣 𑀘 ‘‘𑀦𑁂𑀯𑀲𑁆𑀲 𑀢𑀁 𑀳𑁄𑀢𑀺 𑀅𑀦𑁆𑀢𑀭𑀸𑀬𑀸𑀬𑀸’’𑀢𑀺 𑀇𑀫𑀺𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀳𑀸𑀦𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦𑁂𑀯𑀸𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀅𑀦𑀸𑀕𑀸𑀫𑀺𑀦𑁄 𑀳𑀺 𑀲𑀩𑁆𑀩𑀲𑁄 𑀓𑀸𑀫𑀭𑀸𑀕𑁄 𑀧𑀳𑀻𑀦𑁄 𑀳𑁄𑀢𑀺, 𑀭𑀲𑀢𑀡𑁆𑀳𑀸𑀬 𑀅𑀪𑀸𑀯𑀢𑁄 𑀢𑀸𑀤𑀺𑀲𑀧𑀺𑀡𑁆𑀟𑀧𑀸𑀢𑀧𑀭𑀺𑀪𑁄𑀕𑁄 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑁂 𑀓𑀣𑀜𑁆𑀘𑀺𑀧𑀺 𑀅𑀦𑁆𑀢𑀭𑀸𑀬𑀸𑀬 𑀦 𑀳𑁄𑀢𑀻𑀢𑀺. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀯𑀢𑁆𑀣’’𑀦𑁆𑀢𑀺 𑀯𑀤𑀦𑁆𑀢𑁄 𑀪𑀕𑀯𑀸𑀆𑀤𑀺𑀫𑁆𑀳𑀺 𑀅𑀢𑁆𑀢𑀦𑀸 𑀉𑀧𑀦𑀻𑀢𑀯𑀢𑁆𑀣𑀽𑀧𑀫𑀁 𑀅𑀦𑀼𑀲𑀦𑁆𑀥𑁂𑀢𑀺. 𑀉𑀤𑀓𑀲𑁆𑀲 𑀅𑀘𑁆𑀙𑀪𑀸𑀯𑁄 𑀧𑀗𑁆𑀓𑀲𑁂𑀯𑀸𑀮𑀧𑀡𑀓𑀸𑀤𑀺𑀫𑀮𑀸𑀪𑀸𑀯𑁂𑀦 𑀧𑀲𑀦𑁆𑀦𑀢𑀸𑀬, 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀩𑀳𑀮𑀢𑀸𑀢𑀺 𑀆𑀳 ‘‘𑀅𑀘𑁆𑀙𑀦𑁆𑀢𑀺 𑀯𑀺𑀧𑁆𑀧𑀲𑀦𑁆𑀦’’𑀦𑁆𑀢𑀺. 𑀯𑀡𑁆𑀡𑀦𑀺𑀪𑀸𑀬 𑀯𑀺𑀕𑀢𑀲𑀁𑀓𑀺𑀮𑁂𑀲𑀢𑀸𑀬 𑀲𑀫𑀼𑀚𑁆𑀚𑀮𑀦𑀁 𑀧𑀪𑀲𑁆𑀲𑀭𑀢𑀸𑀬 𑀯𑀢𑁆𑀣𑀲𑁆𑀲, 𑀢𑀁 𑀧𑀭𑀺𑀬𑁄𑀤𑀸𑀢𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀻𑀢𑀺 𑀆𑀳 ‘‘𑀧𑀭𑀺𑀬𑁄𑀤𑀸𑀢𑀁 𑀧𑀪𑀲𑁆𑀲𑀭𑀢𑀸𑀬𑀸’’𑀢𑀺. 𑀉𑀓𑁆𑀓𑀁 𑀩𑀦𑁆𑀥𑁂𑀬𑁆𑀬𑀸𑀢𑀺 𑀅𑀗𑁆𑀕𑀸𑀭𑀓𑀧𑀮𑁆𑀮𑀁 𑀬𑀣𑀸 𑀤𑀸𑀭𑀼𑀖𑀝𑀺𑀓𑀗𑁆𑀕𑀸𑀭𑀸𑀤𑀺𑀓𑁂𑀦 𑀦 𑀪𑀺𑀚𑁆𑀚𑀢𑀺, 𑀏𑀯𑀁 𑀢𑀦𑀼𑀫𑀢𑁆𑀢𑀺𑀓𑀸𑀮𑁂𑀧𑀸𑀤𑀺𑀦𑀸 𑀩𑀦𑁆𑀥𑁂𑀬𑁆𑀬. 𑀫𑁂𑀖𑀧𑀝𑀮𑀢𑁄 𑀯𑁂𑀭𑀫𑁆𑀪𑀯𑀸𑀢𑀥𑀸𑀭𑀸𑀲𑀗𑁆𑀖𑀝𑁆𑀝𑀦𑀢𑁄 𑀯𑀺𑀚𑁆𑀚𑀼𑀢𑀸 𑀯𑀺𑀬 𑀓𑁂𑀯𑀮𑀁 𑀯𑀸𑀢𑀥𑀸𑀭𑀸𑀲𑀗𑁆𑀖𑀝𑁆𑀝𑀦𑀚𑀦𑀺𑀢𑀸 𑀧𑀪𑀸 𑀉𑀓𑁆𑀓𑀸𑀧𑀪𑀸, 𑀲𑀸 𑀧𑀦 𑀬𑀲𑁆𑀫𑀸 𑀤𑁆𑀯𑀺𑀦𑁆𑀦𑀁 𑀯𑀸𑀢𑀥𑀸𑀭𑀸𑀦𑀁 𑀯𑁂𑀕𑀲𑀫𑁆𑀪𑀽𑀢𑀲𑀗𑁆𑀖𑀝𑁆𑀝𑀦𑀳𑁂𑀢𑀼𑀓𑀸, 𑀢𑀲𑁆𑀫𑀸 𑀓𑀸𑀭𑀡𑀯𑀲𑁂𑀦 ‘‘𑀯𑀸𑀢𑀯𑁂𑀕𑁄 𑀉𑀓𑁆𑀓𑀸’’𑀢𑀺 𑀯𑀼𑀢𑁆𑀢𑀁.

𑁭𑁭. 𑀬𑀣𑀸𑀦𑀼𑀲𑀦𑁆𑀥𑀺𑀯𑀲𑁂𑀦𑀸𑀢𑀺𑀆𑀤𑀺𑀫𑁆𑀳𑀺 𑀉𑀝𑁆𑀞𑀺𑀢𑀤𑁂𑀲𑀦𑀸𑀬 𑀅𑀦𑀼𑀭𑀽𑀧𑀸 𑀅𑀦𑀼𑀲𑀦𑁆𑀥𑀺 𑀬𑀣𑀸𑀦𑀼𑀲𑀦𑁆𑀥𑀺, 𑀢𑀲𑁆𑀲𑀸 𑀯𑀲𑁂𑀦. 𑀩𑁆𑀬𑀢𑀺𑀭𑁂𑀓𑀤𑀲𑁆𑀲𑀦𑀁 𑀯𑀺𑀬 𑀳𑀺 𑀲𑀸𑀥𑁂𑀢𑀩𑁆𑀩𑀲𑁆𑀲 𑀆𑀤𑀺𑀫𑁆𑀳𑀺 𑀉𑀝𑁆𑀞𑀺𑀢𑀤𑁂𑀲𑀦𑀸𑀬 𑀧𑀝𑀺𑀧𑀓𑁆𑀔𑀤𑀲𑁆𑀲𑀦𑀫𑁆𑀧𑀺 𑀅𑀦𑀼𑀭𑀽𑀧𑀤𑁂𑀲𑀦𑀸𑀯 𑀲𑀫𑁆𑀫𑀤𑁂𑀯 𑀧𑀢𑀺𑀝𑁆𑀞𑀸𑀧𑀦𑀪𑀸𑀯𑀢𑁄, 𑀬𑀣𑀸 𑀢𑀁 𑀆𑀯𑀢𑁆𑀢𑀳𑀸𑀭𑀬𑁄𑀚𑀦𑀸𑀬𑀁 𑀯𑀺𑀲𑀪𑀸𑀕𑀥𑀫𑁆𑀫𑀸𑀯𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀬𑀣𑀸𑀦𑀼𑀲𑀦𑁆𑀥𑀺𑀯𑀲𑁂𑀦 𑀤𑁂𑀲𑀦𑀸 𑀆𑀕𑀢𑀸’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀢𑀧𑁆𑀧𑀲𑀗𑁆𑀕𑁂𑀦 𑀇𑀢𑀭𑁂𑀧𑀺 𑀅𑀦𑀼𑀲𑀦𑁆𑀥𑀻 𑀤𑀲𑁆𑀲𑁂𑀢𑀼𑀁 ‘‘𑀢𑀬𑁄 𑀳𑀻’’𑀢𑀺𑀆𑀤𑀺𑀫𑀸𑀳. 𑀩𑀳𑀺𑀤𑁆𑀥𑀸𑀢𑀺 𑀩𑀸𑀳𑀺𑀭𑁂𑀲𑀼 𑀯𑀢𑁆𑀣𑀽𑀲𑀼. 𑀅𑀲𑀢𑀺 𑀧𑀭𑀺𑀢𑀲𑁆𑀲𑀦𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀧𑀭𑀺𑀢𑀲𑁆𑀲𑀦𑀸𑀪𑀸𑀯𑁄. 𑀯𑀺𑀲𑁆𑀲𑀚𑁆𑀚𑀺𑀢𑀲𑀼𑀢𑁆𑀢𑀯𑀲𑁂𑀦𑀸𑀢𑀺 ‘‘𑀇𑀥 𑀪𑀺𑀓𑁆𑀔𑀼 𑀏𑀓𑀘𑁆𑀘𑀲𑁆𑀲𑀸’’𑀢𑀺𑀆𑀤𑀺𑀦𑀸 ¶ (𑀫. 𑀦𑀺. 𑁧.𑁨𑁪𑁨) 𑀯𑀺𑀲𑁆𑀲𑀚𑁆𑀚𑀺𑀢𑀲𑀼𑀢𑁆𑀢𑀯𑀲𑁂𑀦. 𑀬𑁂𑀦 𑀥𑀫𑁆𑀫𑁂𑀦𑀸𑀢𑀺 𑀲𑀻𑀮𑀸𑀤𑀺𑀯𑁄𑀤𑀸𑀦𑀥𑀫𑁆𑀫𑁂𑀲𑀼 𑀅𑀓𑁆𑀔𑀦𑁆𑀢𑀺𑀬𑀸𑀤𑀺𑀲𑀁𑀓𑀺𑀮𑁂𑀲𑀥𑀫𑁆𑀫𑁂𑀲𑀼 𑀘 𑀬𑁂𑀦 𑀬𑁂𑀦 𑀥𑀫𑁆𑀫𑁂𑀦. 𑀙 𑀅𑀪𑀺𑀜𑁆𑀜𑀸 𑀆𑀕𑀢𑀸𑀢𑀺 𑀇𑀫𑀺𑀦𑀸 ‘‘𑀅𑀦𑀼𑀭𑀽𑀧𑀥𑀫𑁆𑀫𑀯𑀲𑁂𑀦 𑀯𑀸’’𑀢𑀺 𑀯𑀼𑀢𑁆𑀢𑀯𑀺𑀓𑀧𑁆𑀧𑀁 𑀤𑀲𑁆𑀲𑁂𑀢𑀺, 𑀲𑁂𑀲𑁂𑀳𑀺 ‘‘𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑀸’’𑀢𑀺 ¶ 𑀯𑀼𑀢𑁆𑀢𑀯𑀺𑀓𑀧𑁆𑀧𑀁. 𑀅𑀓𑁆𑀔𑀦𑁆𑀢𑀺𑀬𑀸 𑀳𑀺 𑀓𑀓𑀘𑀽𑀧𑀫𑁄𑀯𑀸𑀤𑁄 (𑀫. 𑀦𑀺. 𑁧.𑁨𑁨𑁨) 𑀧𑀝𑀺𑀧𑀓𑁆𑀔𑁄, 𑀢𑀣𑀸 𑀤𑀺𑀝𑁆𑀞𑀺𑀬𑀸 ‘‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’’𑀢𑀺 𑀏𑀯𑀁 𑀧𑀝𑀺𑀪𑀸𑀕𑀸 𑀲𑀼𑀜𑁆𑀜𑀢𑀸𑀓𑀸𑀭𑁂𑀦. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. ‘‘𑀘𑀺𑀢𑁆𑀢𑁂 𑀲𑀁𑀓𑀺𑀮𑀺𑀝𑁆𑀞𑁂 𑀤𑀼𑀕𑁆𑀕𑀢𑀺 𑀧𑀸𑀝𑀺𑀓𑀗𑁆𑀔𑀸’’𑀢𑀺 (𑀫. 𑀦𑀺. 𑁧.𑁭𑁦) 𑀳𑁂𑀝𑁆𑀞𑀸 𑀓𑀺𑀮𑁂𑀲𑀤𑁂𑀲𑀦𑀸 𑀆𑀕𑀢𑀸. 𑀲𑀩𑁆𑀩𑁄𑀢𑀺 𑀅𑀦𑀯𑀲𑁂𑀲𑁄. 𑀲𑀩𑁆𑀩𑀸𑀓𑀸𑀭𑁂𑀦𑀸𑀢𑀺 𑀆𑀤𑀻𑀦𑀯𑀸𑀦𑀺𑀲𑀁𑀲𑀧𑀘𑁆𑀘𑀯𑁂𑀓𑁆𑀔𑀡𑀧𑀼𑀕𑁆𑀕𑀮𑀤𑁄𑀲𑀚𑀸𑀦𑀦𑀸𑀤𑀺𑀦𑀸 𑀲𑀩𑁆𑀩𑀧𑁆𑀧𑀓𑀸𑀭𑁂𑀦.

𑁭𑁮. ‘‘𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀸𑀬𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀅. 𑀦𑀺. 𑁯.𑁧) 𑀫𑁂𑀢𑁆𑀢𑀸𑀤𑀬𑁄 𑀩𑁆𑀬𑀸𑀧𑀸𑀤𑀯𑀺𑀳𑁂𑀲𑀸𑀭𑀢𑀺𑀭𑀸𑀕𑀸𑀦𑀁 𑀧𑀝𑀺𑀧𑀓𑁆𑀔𑀸. 𑀬𑀲𑁆𑀫𑀸 ‘‘𑀲𑁄 𑀅𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀪𑀕𑀯𑀢𑀸 𑀅𑀦𑀸𑀕𑀸𑀫𑀺𑀦𑁄 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑀦𑀁 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀓𑀣𑀺𑀢𑀁, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀸𑀦𑀺𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳.

𑀩𑁆𑀭𑀳𑁆𑀫𑀯𑀺𑀳𑀸𑀭𑀥𑀫𑁆𑀫𑁂𑀢𑀺 𑀩𑁆𑀭𑀳𑁆𑀫𑀯𑀺𑀳𑀸𑀭𑁂 𑀘𑁂𑀯 𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑀳𑀕𑀢𑀥𑀫𑁆𑀫𑁂 𑀘. 𑀢𑁂𑀦𑀸𑀳 ‘‘𑀦𑀸𑀫𑀯𑀲𑁂𑀦𑀸’’𑀢𑀺. 𑀯𑀯𑀢𑁆𑀣𑀧𑁂𑀢𑁆𑀯𑀸𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀦𑀸𑀫𑀦𑁆𑀢𑀺𑀧𑀺 𑀳𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀯𑀼𑀘𑁆𑀘𑀦𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦𑀸𑀢𑀺 𑀏𑀢𑁂𑀦 𑀪𑀽𑀢𑀦𑀺𑀲𑁆𑀲𑀺𑀢𑀸𑀦𑀁 𑀲𑁂𑀲𑀼𑀧𑀸𑀤𑀸𑀬𑀥𑀫𑁆𑀫𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀧𑀳𑀸𑀢𑀩𑁆𑀩𑀢𑀡𑁆𑀳𑀸𑀯𑀚𑁆𑀚𑀸𑀦𑀁 𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀁 𑀧𑀭𑀺𑀕𑁆𑀕𑀳𑀯𑀺𑀥𑀺𑀁 𑀉𑀮𑁆𑀮𑀺𑀗𑁆𑀕𑁂𑀢𑀺. 𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀁 𑀢𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀜𑀸𑀡𑁂𑀦 𑀬𑀸𑀣𑀸𑀯𑀢𑁄 𑀧𑀝𑀺𑀯𑀺𑀚𑁆𑀛𑀺𑀬𑀫𑀸𑀦𑀢𑀁 𑀉𑀧𑀸𑀤𑀸𑀬 ‘‘𑀅𑀢𑁆𑀣𑀺 𑀇𑀤’’𑀦𑁆𑀢𑀺 𑀬𑀣𑀸𑀯𑀯𑀢𑁆𑀣𑀸𑀧𑀺𑀢𑀁 𑀦𑀸𑀫𑀭𑀽𑀧𑀁. 𑀢𑁂𑀦𑁂𑀯𑀸𑀳 ‘‘𑀏𑀢𑁆𑀢𑀸𑀯𑀢𑀸𑀦𑁂𑀦 𑀤𑀼𑀓𑁆𑀔𑀲𑀘𑁆𑀘𑀯𑀯𑀢𑁆𑀣𑀸𑀦𑀁 𑀓𑀢𑀁 𑀳𑁄𑀢𑀻’’𑀢𑀺. 𑀲𑀸𑀯𑀥𑀸𑀭𑀡𑀜𑁆𑀘𑁂𑀢𑀁 𑀯𑀘𑀦𑀁, 𑀮𑁄𑀓𑀲𑀫𑀜𑁆𑀜𑀸𑀲𑀺𑀤𑁆𑀥𑀁 𑀲𑀢𑁆𑀢𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺 𑀯𑀺𑀬, 𑀇𑀢𑁄 𑀩𑀸𑀳𑀺𑀭𑀓𑀧𑀭𑀺𑀓𑀧𑁆𑀧𑀺𑀢𑀁 𑀧𑀓𑀢𑀺𑀆𑀤𑀺 𑀤𑁆𑀭𑀩𑁆𑀬𑀸𑀤𑀺 𑀚𑀻𑀯𑀸𑀤𑀺 𑀓𑀸𑀬𑀸𑀤𑀺 𑀯𑀺𑀬 𑀘 𑀦 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑀺, 𑀅𑀢𑁆𑀣𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀚𑀸𑀦𑀸𑀢𑀻𑀢𑀺 𑀧𑀼𑀩𑁆𑀩𑀪𑀸𑀕𑁂 𑀢𑀸𑀯 𑀮𑀓𑁆𑀔𑀡𑀭𑀲𑀸𑀤𑀺𑀯𑀲𑁂𑀦 𑀘𑁂𑀯 𑀧𑀝𑀺𑀕𑁆𑀕𑀳𑀯𑀺𑀪𑀸𑀕𑀯𑀲𑁂𑀦 𑀘 𑀧𑀓𑀸𑀭𑀢𑁄 𑀚𑀸𑀦𑀸𑀢𑀺, 𑀅𑀧𑀭𑀪𑀸𑀕𑁂 𑀧𑀦 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀚𑀸𑀦𑀸𑀢𑀺. 𑀏𑀓𑀦𑁆𑀢𑀳𑀻𑀦𑀸 𑀦𑀸𑀫 𑀅𑀓𑀼𑀲𑀮𑀥𑀫𑁆𑀫𑀸 𑀲𑀫𑁆𑀧𑀢𑀺 𑀆𑀬𑀢𑀺𑀜𑁆𑀘 𑀤𑀼𑀓𑁆𑀔𑀫𑀽𑀮𑀢𑁆𑀢𑀸, 𑀢𑀢𑁆𑀣𑀸𑀧𑀺 𑀯𑀺𑀲𑁂𑀲𑀢𑁄 𑀢𑀡𑁆𑀳𑀸𑀢𑀺 𑀆𑀳 ‘‘𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀅𑀢𑁆𑀣𑀺 𑀳𑀻𑀦𑀦𑁆𑀢𑀺 ¶ 𑀧𑀚𑀸𑀦𑀸𑀢𑀻’’𑀢𑀺. 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀧𑀥𑀸𑀦𑀪𑀸𑀯𑀁 𑀦𑀻𑀢𑀢𑁆𑀢𑀸 𑀧𑀡𑀻𑀢𑀦𑁆𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀅𑀭𑀺𑀬𑀫𑀕𑁆𑀕𑁄𑀯 ‘‘𑀧𑀡𑀻𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀧𑀳𑀸𑀦𑀼𑀧𑀸𑀬𑀁 𑀯𑀺𑀘𑀺𑀦𑀦𑁆𑀢𑁄 𑀅𑀢𑁆𑀣𑀺 𑀧𑀡𑀻𑀢𑀦𑁆𑀢𑀺 𑀧𑀚𑀸𑀦𑀸𑀢𑀻’’𑀢𑀺. ‘‘𑀉𑀢𑁆𑀢𑀫𑀝𑁆𑀞𑁂𑀦 𑀘 𑀧𑀡𑀻𑀢’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁂 𑀦𑀺𑀭𑁄𑀥𑀲𑀘𑁆𑀘𑀲𑁆𑀲𑀧𑀺 𑀲𑀗𑁆𑀕𑀳𑁄 𑀲𑀺𑀬𑀸, 𑀢𑀲𑁆𑀲 𑀧𑀦 𑀧𑀤𑀦𑁆𑀢𑀭𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀧𑁆𑀧𑀫𑀜𑁆𑀜𑀸𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀲𑁆𑀲𑁂𑀯 𑀓𑀢𑀢𑁆𑀢𑀸 ‘‘𑀩𑁆𑀭𑀳𑁆𑀫𑀯𑀺𑀳𑀸𑀭𑀲𑀜𑁆𑀜𑀸𑀕𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. ‘‘𑀲𑀩𑁆𑀩𑀲𑁆𑀲𑀧𑀺 𑀢𑁂𑀪𑀽𑀫𑀓𑀲𑁆𑀲 𑀲𑀜𑁆𑀜𑀸𑀕𑀢𑀲𑁆𑀲𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀦 𑀘𑁂𑀢𑁆𑀣 𑀅𑀲𑀗𑁆𑀕𑀳𑁄 𑀢𑀲𑁆𑀲𑀸𑀧𑀺 𑀲𑀜𑁆𑀜𑀸𑀬 𑀆𑀕𑀢𑀪𑀸𑀯𑀢𑁄. 𑀮𑁄𑀓𑀁 𑀉𑀢𑁆𑀢𑀭𑀺𑀢𑁆𑀯𑀸 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀺𑀲𑁆𑀲𑀭𑀺𑀢𑁆𑀯𑀸 𑀯𑀺𑀲𑀁𑀬𑀼𑀢𑁆𑀢𑀁 𑀳𑀼𑀢𑁆𑀯𑀸 𑀞𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺.

𑀘𑀢𑀽𑀳𑀺 ¶ 𑀆𑀓𑀸𑀭𑁂𑀳𑀻𑀢𑀺 ‘‘𑀅𑀢𑁆𑀣𑀺 𑀳𑀻𑀦’’𑀦𑁆𑀢𑀺𑀆𑀤𑀻𑀳𑀺 𑀘𑀢𑀽𑀳𑀺 𑀧𑀓𑀸𑀭𑁂𑀳𑀺. 𑀅𑀦𑁆𑀯𑀬𑀜𑀸𑀡𑀢𑀸𑀬 𑀅𑀦𑀼𑀩𑁄𑀥𑀪𑀽𑀢𑀸𑀬 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀚𑀸𑀦𑀦𑀢𑁆𑀣𑁄 𑀥𑀫𑁆𑀫𑀜𑀸𑀡𑀢𑀸𑀬 𑀧𑀝𑀺𑀯𑁂𑀥𑀪𑀽𑀢𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀤𑀲𑁆𑀲𑀦𑀢𑁆𑀣𑁄 𑀲𑀪𑀸𑀯𑀲𑀺𑀤𑁆𑀥𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀚𑀸𑀦𑀦𑀢𑁄 𑀫𑀕𑁆𑀕𑀧𑀜𑁆𑀜𑀸𑀬 𑀧𑀲𑁆𑀲𑀢𑁄’’𑀢𑀺 𑀯𑀼𑀢𑁆𑀢𑀁. 𑀪𑀬𑀪𑁂𑀭𑀯𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀪𑀬𑀪𑁂𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀅𑀢𑁆𑀢𑀦𑀸 𑀯𑀼𑀢𑁆𑀢𑀅𑀢𑁆𑀣𑀯𑀘𑀦𑀢𑁆𑀣𑀧𑀸𑀞𑁂𑀦 𑀇𑀥 𑀧𑀸𑀞𑀲𑁆𑀲 𑀲𑀤𑀺𑀲𑀢𑁆𑀢𑀸 𑀅𑀢𑀺𑀤𑀺𑀲𑀦𑁆𑀢𑁄 ‘‘𑀓𑀸𑀫𑀸𑀲𑀯𑀸𑀧𑀺…𑀧𑁂… 𑀧𑀚𑀸𑀦𑀸𑀢𑀻’’𑀢𑀺 𑀆𑀳. 𑀏𑀢𑁆𑀣 𑀘 𑀬𑀲𑁆𑀫𑀸 ‘‘𑀓𑀸𑀫𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺…𑀧𑁂… 𑀅𑀯𑀺𑀚𑁆𑀚𑀸𑀲𑀯𑀸𑀧𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀻’’𑀢𑀺 ‘‘𑀔𑀻𑀡𑀸 𑀚𑀸𑀢𑀻’’𑀢𑀺𑀆𑀤𑀻𑀦𑀺 𑀯𑀤𑀢𑀸 𑀪𑀕𑀯𑀢𑀸 𑀘𑀢𑀼𑀢𑁆𑀣𑀫𑀕𑁆𑀕𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀢𑀲𑁆𑀫𑀸 𑀬𑀁 𑀳𑁂𑀝𑁆𑀞𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀲𑁄 𑀘 𑀉𑀧𑀭𑀺 𑀘𑀢𑀼𑀢𑁆𑀣𑀫𑀕𑁆𑀕𑀲𑁆𑀲𑁂𑀯 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀬𑀼𑀚𑁆𑀚𑀢𑀻’’𑀢𑀺, 𑀢𑀁 𑀲𑀼𑀯𑀼𑀢𑁆𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀲𑁆𑀲 𑀘𑁄𑀤𑀦𑀢𑁆𑀣𑀸𑀬𑀸𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀪𑀕𑀯𑀸 𑀅𑀢𑁆𑀢𑀦𑁄 𑀘𑁄𑀤𑀦𑀢𑁆𑀣𑀸𑀬 ‘‘𑀧𑀼𑀘𑁆𑀙 𑀫𑀁 𑀢𑁆𑀯𑀁 𑀩𑁆𑀭𑀸𑀳𑁆𑀫𑀡 𑀬𑀤𑁂𑀢𑁆𑀣 𑀢𑀬𑀸 𑀫𑀦𑀲𑀸𑀪𑀺𑀲𑀫𑀻𑀳𑀺𑀢’’𑀦𑁆𑀢𑀺 𑀘𑁄𑀤𑀦𑀸𑀬, 𑀑𑀓𑀸𑀲𑀤𑀸𑀦𑀢𑁆𑀣𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑁂𑀲𑀦𑀸𑀲𑀦𑁆𑀦𑀺𑀲𑁆𑀲𑀬𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀢𑀣𑀸𑀭𑀽𑀧𑁄 𑀏𑀢𑁆𑀣 𑀅𑀚𑁆𑀛𑀸𑀲𑀬𑁄𑀧𑀺 𑀦𑀢𑁆𑀣𑀻𑀢𑀺 𑀬𑀣𑀸𑀯𑀼𑀢𑁆𑀢𑀅𑀦𑀼𑀲𑀦𑁆𑀥𑀺𑀢𑁆𑀢𑀬𑀯𑀺𑀦𑀺𑀫𑀼𑀢𑁆𑀢𑀢𑁆𑀢𑀸 ‘‘𑀧𑀸𑀝𑀺𑀬𑁂𑀓𑁆𑀓𑀁 𑀅𑀦𑀼𑀲𑀦𑁆𑀥𑀺𑀁 𑀆𑀳𑀸’’𑀢𑀺 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀕𑀢𑀢𑁆𑀢𑀸 𑀅𑀩𑁆𑀪𑀦𑁆𑀢𑀭𑁂𑀦. 𑀓𑀺𑀮𑁂𑀲𑀯𑀼𑀝𑁆𑀞𑀸𑀦𑀲𑀺𑀦𑀸𑀦𑁂𑀦𑀸𑀢𑀺 𑀓𑀺𑀮𑁂𑀲𑀫𑀮𑀧𑀯𑀸𑀳𑀦𑁂𑀦 𑀭𑀸𑀕𑀧𑀭𑀺𑀴𑀸𑀳𑀸𑀤𑀺𑀯𑀽𑀧𑀲𑀫𑀓𑀭𑁂𑀦 𑀘 𑀅𑀝𑁆𑀞𑀗𑁆𑀕𑀺𑀓𑀅𑀭𑀺𑀬𑀫𑀕𑁆𑀕𑀲𑀮𑀺𑀮𑀲𑀺𑀦𑀸𑀦𑁂𑀦.

𑁭𑁯. 𑀥𑀫𑁆𑀫𑀲𑀪𑀸𑀫𑀡𑁆𑀟𑀧𑀁 𑀢𑀸𑀯𑀤𑁂𑀯 𑀉𑀧𑀕𑀢𑀢𑁆𑀢𑀸 𑀩𑀸𑀳𑀼𑀓𑀸 𑀦𑀤𑀺𑀢𑁄 𑀆𑀕𑀢𑀁 𑀯𑀺𑀬 𑀫𑀜𑁆𑀜𑀫𑀸𑀦𑁄. 𑀅𑀭𑀺𑀬𑀨𑀮𑀫𑀤𑁆𑀤𑀦𑀘𑀼𑀡𑁆𑀡𑀸𑀤𑀬𑁄 𑀢𑁂𑀮𑀲𑀺𑀦𑁂𑀳𑀲𑁆𑀲 𑀯𑀺𑀯𑁂𑀘𑀦𑁂𑀦 ¶ . 𑀮𑀽𑀔𑀪𑀸𑀯𑁄 𑀮𑁄𑀓𑀁, 𑀢𑀁 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀮𑁄𑀓𑀸𑀢𑀺 𑀲𑀫𑁆𑀫𑀢𑀸. 𑀮𑁄𑀓𑁆𑀔𑀲𑀫𑁆𑀫𑀢𑀕𑁆𑀕𑀳𑀡𑁂𑀦 ‘‘𑀢𑀣𑀸 𑀲𑀸 𑀦𑀤𑀻 𑀮𑁄𑀓𑁂 𑀧𑀸𑀓𑀝𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀅𑀢𑁆𑀢𑀦𑁄 𑀫𑀺𑀘𑁆𑀙𑀸𑀕𑀸𑀳𑀁 𑀤𑀻𑀧𑁂𑀢𑀺. 𑀢𑁂𑀦𑀸𑀳 ‘‘𑀯𑀺𑀲𑀼𑀤𑁆𑀥𑀪𑀸𑀯𑀁 𑀤𑁂𑀢𑀻𑀢𑀺 𑀏𑀯𑀁 𑀲𑀫𑁆𑀫𑀢𑀸’’𑀢𑀺. 𑀧𑀸𑀧𑀧𑀯𑀸𑀳𑀦𑁂𑀦 𑀲𑀫𑁆𑀧𑀭𑀸𑀬𑀺𑀓𑀸𑀤𑀺𑀲𑀫𑁆𑀧𑀢𑁆𑀢𑀺𑀆𑀯𑀳𑀢𑁄 𑀮𑁄𑀓𑀲𑁆𑀲 𑀳𑀺𑀢𑀸 𑀮𑁄𑀓𑁆𑀬𑀸. 𑀮𑁄𑀓𑁆𑀬𑀸𑀢𑀺 𑀲𑀫𑁆𑀫𑀢𑀸𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀁. 𑀢𑁂𑀦𑀸𑀳 ‘‘𑀲𑁂𑀝𑁆𑀞𑀁 𑀮𑁄𑀓𑀁 𑀕𑀫𑀬𑀢𑀻𑀢𑀺 𑀏𑀯𑀁 𑀲𑀫𑁆𑀫𑀢𑀸’’𑀢𑀺. 𑀧𑀼𑀜𑁆𑀜𑀲𑀫𑁆𑀫𑀢𑀸𑀢𑀺 𑀧𑀼𑀚𑁆𑀚𑀪𑀯𑀨𑀮𑀦𑀺𑀩𑁆𑀩𑀢𑁆𑀢𑀦𑁂𑀦 𑀲𑀢𑁆𑀢𑀸𑀦𑀁 𑀧𑀼𑀦𑀦𑁂𑀦 𑀯𑀺𑀲𑁄𑀥𑀦𑁂𑀦 𑀧𑀼𑀜𑁆𑀜𑀸𑀢𑀺 𑀲𑀫𑁆𑀫𑀢𑀸. 𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀫𑁂𑀯𑀸𑀢𑀺 𑀢𑀲𑁆𑀲𑀸 𑀧𑀼𑀩𑁆𑀩𑁂 𑀆𑀕𑀢𑀤𑁂𑀲𑀦𑀸𑀬 𑀅𑀢𑁆𑀣𑀤𑀻𑀧𑀦𑀢𑁆𑀣𑀫𑁂𑀯. 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀼𑀦 𑀤𑀻𑀧𑀦𑀁 𑀓𑀺𑀫𑀢𑁆𑀣𑀺𑀬𑀦𑁆𑀢𑀺 𑀆𑀳 ‘‘𑀕𑀸𑀣𑀸𑀭𑀼𑀘𑀺𑀓𑀸𑀦’’𑀦𑁆𑀢𑀺. 𑀘𑀼𑀡𑁆𑀡𑀺𑀓𑀯𑀘𑀦𑀁 𑀅𑀲𑀫𑁆𑀪𑀸𑀯𑁂𑀦𑁆𑀢𑀸 𑀢𑀣𑀸 𑀘 𑀯𑀼𑀢𑁆𑀢𑁂 𑀅𑀢𑁆𑀣𑀫𑀩𑀼𑀚𑁆𑀛𑀦𑀓𑀸 𑀧𑀚𑁆𑀚𑀯𑀘𑀦𑀁 𑀲𑀫𑁆𑀪𑀸𑀯𑁂𑀦𑁆𑀢𑀸 𑀢𑀣𑀸 𑀘 𑀯𑀼𑀢𑁆𑀢𑁂 𑀩𑀼𑀚𑁆𑀛𑀦𑀓𑀸 𑀕𑀸𑀣𑀸𑀭𑀼𑀘𑀺𑀓𑀸. 𑀯𑀺𑀲𑁂𑀲𑀢𑁆𑀣𑀤𑀻𑀧𑀦𑀢𑁆𑀣𑀦𑁆𑀢𑀺 𑀯𑀺𑀲𑀺𑀝𑁆𑀞𑀤𑀻𑀧𑀦𑀢𑁆𑀣𑀁, 𑀧𑀼𑀭𑀺𑀫𑀤𑁂𑀲𑀦𑀸𑀬 𑀅𑀜𑁆𑀜𑀤𑀻𑀧𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄.

‘‘𑀕𑀘𑁆𑀙𑀢𑀺 𑀧𑀦 𑀪𑀯𑀁 𑀕𑁄𑀢𑀫𑁄 𑀩𑀸𑀳𑀼𑀓𑀁 𑀦𑀤𑀺𑀁 𑀲𑀺𑀦𑀸𑀬𑀺𑀢𑀼’’𑀦𑁆𑀢𑀺 (𑀫. 𑀦𑀺. 𑁧.𑁭𑁮) 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀢𑀸 ¶ 𑀩𑀸𑀳𑀼𑀓𑀦𑁆𑀢𑀺 𑀇𑀤𑀫𑁂𑀯 𑀏𑀢𑁆𑀣 𑀢𑀤𑀢𑁆𑀣𑀤𑀻𑀧𑀓𑀁. 𑀲𑁂𑀲𑀸𑀦𑀺 𑀅𑀥𑀺𑀓𑀓𑁆𑀓𑀸𑀤𑀺𑀯𑀘𑀦𑀸𑀦𑀺 𑀢𑀢𑁄 𑀯𑀺𑀲𑀺𑀝𑁆𑀞𑀲𑁆𑀲 𑀅𑀢𑁆𑀣𑀲𑁆𑀲 𑀩𑁄𑀥𑀦𑀢𑁄 𑀯𑀺𑀲𑁂𑀲𑀢𑁆𑀣𑀤𑀻𑀧𑀓𑀸𑀦𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀪𑀕𑀯𑀢𑀸 𑀩𑁆𑀭𑀸𑀳𑁆𑀫𑀡𑁂𑀦 𑀅𑀯𑀼𑀢𑁆𑀢𑀸𑀦𑀺 𑀅𑀥𑀺𑀓𑀓𑁆𑀓𑀸𑀤𑀻𑀦𑀺 𑀕𑀳𑀺𑀢𑀸𑀦𑀻𑀢𑀺 𑀆𑀳 ‘‘𑀬𑀣𑁂𑀯 𑀳𑀻’’𑀢𑀺𑀆𑀤𑀺. 𑀓𑀓𑁆𑀓𑀦𑁆𑀢𑀺 𑀦𑁆𑀳𑀸𑀦𑀧𑀺𑀡𑁆𑀟𑀁 𑀅𑀥𑀺𑀧𑁆𑀧𑁂𑀢𑀁, 𑀦𑁆𑀳𑀸𑀬𑀺𑀢𑁆𑀯𑀸 𑀅𑀥𑀺𑀓𑀁 𑀓𑀓𑁆𑀓𑀁 𑀏𑀢𑁆𑀣 𑀕𑀡𑁆𑀳𑀦𑁆𑀢𑀻𑀢𑀺 𑀅𑀥𑀺𑀓𑀓𑁆𑀓𑀁. 𑀢𑁂𑀦𑀸𑀳 ‘‘𑀦𑁆𑀳𑀸𑀦𑀲𑀫𑁆𑀪𑀸𑀭𑀯𑀲𑁂𑀦𑀸’’𑀢𑀺𑀆𑀤𑀺. 𑀫𑀡𑁆𑀟𑀮𑀯𑀸𑀧𑀺𑀲𑀡𑁆𑀞𑀸𑀦𑀦𑁆𑀢𑀺 𑀯𑀝𑁆𑀝𑀧𑁄𑀓𑁆𑀔𑀭𑀡𑀻𑀲𑀡𑁆𑀞𑀸𑀦𑀁. 𑀦𑀤𑀺𑀬𑁄𑀢𑀺 𑀯𑀺𑀲𑀼𑀁 𑀦𑀤𑀺𑀬𑁄, 𑀦 𑀅𑀥𑀺𑀓𑀓𑁆𑀓𑀸𑀤𑀻𑀦𑀺 𑀯𑀺𑀬 𑀢𑀺𑀢𑁆𑀣𑀫𑀢𑁆𑀢𑀁.

𑀢𑀻𑀳𑀺 𑀧𑀤𑁂𑀳𑀻𑀢𑀺 𑀲𑀼𑀦𑁆𑀤𑀭𑀺𑀓𑀸𑀧𑀬𑀸𑀕𑀩𑀸𑀳𑀼𑀓𑀸𑀧𑀤𑁂𑀳𑀺. 𑀘𑀢𑁆𑀢𑀸𑀭𑀻𑀢𑀺 𑀅𑀥𑀺𑀓𑀓𑁆𑀓𑀸𑀤𑀻𑀦𑀺 𑀘𑀢𑁆𑀢𑀸𑀭𑀺. 𑀯𑀼𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀮𑁄𑀓𑀲𑀫𑁆𑀫𑀢𑀸𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀥𑀺𑀧𑁆𑀧𑀸𑀬𑁂𑀦, 𑀧𑀭𑀫𑀢𑁆𑀣𑀢𑁄 𑀧𑀦 𑀧𑀸𑀧𑀧𑀯𑀸𑀳𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀓𑀺𑀜𑁆𑀘𑀺 𑀧𑀸𑀧𑀲𑀼𑀤𑁆𑀥𑀺𑀁 𑀦 𑀓𑀭𑁄𑀦𑁆𑀢𑀺𑀬𑁂𑀯. 𑀦 𑀳𑀺 𑀦𑀁 𑀲𑁄𑀥𑀬𑁂𑀢𑀺 𑀦𑀁 𑀧𑀼𑀕𑁆𑀕𑀮𑀁 𑀦 𑀲𑁄𑀥𑀬𑁂. 𑀯𑁂𑀭𑀓𑀺𑀩𑁆𑀩𑀺𑀲𑀪𑀸𑀯𑀁 𑀅𑀧𑁆𑀧𑀢𑁆𑀢𑀸 𑀦𑀸𑀫 𑀓𑀫𑁆𑀫𑀧𑀣𑀪𑀸𑀯𑀁 𑀅𑀧𑁆𑀧𑀢𑁆𑀢𑀸. 𑀢𑁂𑀦𑀸𑀳 ‘‘𑀔𑀼𑀤𑁆𑀤𑀓𑁂𑀳𑀻’’𑀢𑀺.

𑀧𑀝𑀺𑀳𑀦𑀦𑁆𑀢𑁄𑀢𑀺 𑀅𑀬𑀼𑀢𑁆𑀢𑀪𑀸𑀯𑀤𑀲𑁆𑀲𑀦𑁂𑀦 𑀢𑀁 𑀤𑀺𑀝𑁆𑀞𑀺𑀁 𑀧𑀝𑀺𑀩𑀸𑀳𑀦𑁆𑀢𑁄. 𑀢𑀢𑁆𑀣𑀸𑀬𑀁 𑀧𑀝𑀺𑀩𑀸𑀳𑀦𑀯𑀺𑀥𑀺 𑀬𑀣𑀸 𑀬𑀁 𑀓𑀺𑀜𑁆𑀘𑀺 𑀉𑀤𑀓𑁄𑀭𑁄𑀳𑀦𑀁 𑀦 𑀧𑀸𑀧𑀧𑀯𑀸𑀳𑀦𑀁, 𑀏𑀯𑀁 ¶ 𑀬𑁄 𑀓𑁄𑀘𑀺 𑀦𑀓𑁆𑀔𑀢𑁆𑀢𑀬𑁄𑀕𑁄 𑀧𑀸𑀧𑀳𑁂𑀢𑀽𑀦𑀁 𑀧𑀝𑀺𑀧𑀓𑁆𑀔𑀸𑀪𑀸𑀯𑀢𑁄. 𑀬𑀜𑁆𑀳𑀺 𑀯𑀺𑀦𑀸𑀲𑁂𑀢𑀺, 𑀲𑁄 𑀢𑀲𑁆𑀲 𑀧𑀝𑀺𑀧𑀓𑁆𑀔𑁄. 𑀬𑀣𑀸 𑀆𑀮𑁄𑀓𑁄 𑀅𑀦𑁆𑀥𑀓𑀸𑀭𑀲𑁆𑀲 𑀯𑀺𑀚𑁆𑀚𑀸 𑀘 𑀅𑀯𑀺𑀚𑁆𑀚𑀸𑀬, 𑀦 𑀏𑀯𑀁 𑀉𑀤𑀓𑁄𑀭𑁄𑀳𑀦𑀁 𑀦𑀓𑁆𑀔𑀢𑁆𑀢𑀬𑁄𑀕𑁄 𑀯𑀸 𑀧𑀸𑀧𑀳𑁂𑀢𑀽𑀦𑀁 𑀮𑁄𑀪𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑁄, 𑀢𑀲𑁆𑀫𑀸 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁 ‘‘𑀦 𑀉𑀤𑀓𑁄𑀭𑁄𑀳𑀦𑀸𑀤𑀺 𑀧𑀸𑀧𑀧𑀯𑀸𑀳𑀦’’𑀦𑁆𑀢𑀺. 𑀦𑀺𑀘𑁆𑀘𑀁 𑀨𑀕𑁆𑀕𑀼𑀦𑀻𑀦𑀓𑁆𑀔𑀢𑁆𑀢𑀦𑁆𑀢𑀺 𑀲𑀼𑀤𑁆𑀥𑀲𑀻𑀮𑀸𑀤𑀺𑀓𑀲𑁆𑀲 𑀲𑀩𑁆𑀩𑀓𑀸𑀮𑀁 𑀫𑀗𑁆𑀕𑀮𑀤𑀺𑀯𑀲𑁄 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀭𑁄𑀢𑀺 𑀲𑀻𑀮𑀸𑀤𑀺𑀯𑀲𑁂𑀦 𑀅𑀲𑀼𑀤𑁆𑀥𑁄. 𑀦𑀺𑀘𑁆𑀘𑀫𑁂𑀯 𑀉𑀧𑁄𑀲𑀣𑁄 𑀅𑀭𑀺𑀬𑀼𑀧𑁄𑀲𑀣𑁂𑀦 𑀉𑀧𑀯𑀼𑀢𑁆𑀣𑀪𑀸𑀯𑀢𑁄. 𑀲𑀼𑀤𑁆𑀥𑀲𑁆𑀲𑀸𑀢𑀺 𑀧𑀭𑀺𑀲𑀼𑀤𑁆𑀥𑀫𑀦𑁄𑀲𑀫𑀸𑀘𑀸𑀭𑀲𑁆𑀲. 𑀲𑀼𑀘𑀺𑀓𑀫𑁆𑀫𑀲𑁆𑀲𑀸𑀢𑀺 𑀧𑀭𑀺𑀲𑀼𑀤𑁆𑀥𑀓𑀸𑀬𑀯𑀘𑀻𑀲𑀫𑀸𑀘𑀸𑀭𑀲𑁆𑀲. 𑀢𑁂𑀦𑀸𑀳 ‘‘𑀦𑀺𑀓𑁆𑀓𑀺𑀮𑁂𑀲𑀢𑀸𑀬𑀸’’𑀢𑀺𑀆𑀤𑀺. 𑀓𑀼𑀲𑀮𑀽𑀧𑀲𑀜𑁆𑀳𑀺𑀢𑀦𑁆𑀢𑀺 𑀅𑀦𑀯𑀚𑁆𑀚𑀪𑀸𑀯𑀽𑀧𑀕𑀢𑀁. 𑀯𑀢𑀲𑀫𑀸𑀤𑀸𑀦𑀦𑁆𑀢𑀺 𑀥𑀼𑀢𑀥𑀫𑁆𑀫𑀲𑀫𑀸𑀤𑀸𑀦𑀸𑀤𑀺 𑀲𑀫𑁆𑀧𑀦𑁆𑀦𑀫𑁂𑀯 𑀳𑁄𑀢𑀺, 𑀦𑀸𑀲𑁆𑀲 𑀯𑀺𑀧𑀢𑁆𑀢𑀺 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀫𑀫 𑀲𑀸𑀲𑀦𑁂𑀬𑁂𑀯 𑀲𑀺𑀦𑀸𑀳𑀺, 𑀬𑀤𑀺 𑀅𑀘𑁆𑀘𑀦𑁆𑀢𑀫𑁂𑀯 𑀲𑀼𑀤𑁆𑀥𑀺𑀁 𑀇𑀘𑁆𑀙𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀲𑀘𑁂’’𑀢𑀺𑀆𑀤𑀺. 𑀔𑁂𑀫𑀢𑀦𑁆𑀢𑀺 𑀔𑁂𑀫𑀪𑀸𑀯𑀁. 𑀬𑀣𑀸 𑀲𑀩𑁆𑀩𑀪𑀽𑀢𑀸𑀦𑀺 𑀢𑀧𑀯𑀲𑁂𑀦 𑀔𑁂𑀫𑀧𑁆𑀧𑀢𑁆𑀢𑀸𑀦𑀺 𑀅𑀪𑀬𑀧𑁆𑀧𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀏𑀯𑀁 𑀓𑀭𑁄𑀳𑀻𑀢𑀺 𑀢𑀁 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀁 𑀫𑁂𑀢𑁆𑀢𑀸𑀤𑀺𑀪𑀸𑀯𑀦𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀗𑁆𑀔𑁂𑀧𑁂𑀦 𑀉𑀧𑀤𑀺𑀲𑀦𑁆𑀢𑁂𑀦𑀲𑁆𑀲 𑀏𑀓𑀘𑁆𑀘𑀲𑀫𑀸𑀥𑀺𑀲𑀫𑁆𑀧𑀤𑀸 𑀢𑀤𑀯𑀺𑀦𑀸𑀪𑀸𑀯𑀺𑀦𑀻 𑀧𑀜𑁆𑀜𑀸𑀲𑀫𑁆𑀧𑀤𑀸 𑀘 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 ‘‘𑀫𑀦𑁄𑀤𑁆𑀯𑀸𑀭𑀲𑀼𑀤𑁆𑀥𑀺 𑀤𑀲𑁆𑀲𑀺𑀢𑀸’’𑀢𑀺.

𑀢𑀲𑁆𑀲 𑀧𑀦 𑀲𑀫𑁆𑀧𑀤𑀸𑀤𑁆𑀯𑀬𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀁 𑀲𑀻𑀮𑀲𑀫𑁆𑀧𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂 𑀫𑀼𑀲𑀸 𑀦 𑀪𑀡𑀲𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀬𑀣𑀸 ‘‘𑀲𑀘𑁂 𑀫𑀼𑀲𑀸 𑀦 𑀪𑀡𑀲𑀻’’𑀢𑀺𑀆𑀤𑀺𑀦𑀸 𑀫𑀼𑀲𑀸𑀯𑀸𑀤-𑀧𑀸𑀡𑀸𑀢𑀺𑀧𑀸𑀢-𑀅𑀤𑀺𑀦𑁆𑀦𑀸𑀤𑀸𑀦-𑀧𑀝𑀺𑀯𑀺𑀭𑀢𑀺𑀯𑀘𑀦𑁂𑀦 ¶ 𑀅𑀯𑀲𑁂𑀲𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀻𑀧𑀺 𑀯𑀼𑀢𑁆𑀢𑀸 𑀏𑀯 𑀳𑁄𑀢𑀺 𑀮𑀓𑁆𑀔𑀡𑀳𑀸𑀭𑀦𑀬𑁂𑀦, 𑀏𑀯𑀁 ‘‘𑀲𑀤𑁆𑀤𑀳𑀸𑀦𑁄 𑀅𑀫𑀘𑁆𑀙𑀭𑀻’’𑀢𑀺 𑀲𑀤𑁆𑀥𑀸𑀤𑀺𑀥𑀦𑀲𑀫𑁆𑀧𑀤𑀸𑀦𑀺𑀬𑁄𑀚𑀦𑁂𑀦𑁂𑀯 𑀅𑀯𑀲𑁂𑀲𑀅𑀭𑀺𑀬𑀥𑀦𑀲𑀫𑁆𑀧𑀤𑀸𑀦𑀺𑀬𑁄𑀚𑀦𑀫𑁆𑀧𑀺 𑀲𑀺𑀤𑁆𑀥𑀫𑁂𑀯 𑀳𑁄𑀢𑀻𑀢𑀺 𑀲𑀤𑁆𑀥𑀸𑀤𑀬𑁄 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀥𑀫𑁆𑀫𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀓𑀸𑀲𑀺𑀢𑀸 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑁂𑀯𑀸𑀳 ‘‘𑀇𑀫𑀸𑀬 𑀏𑀯 𑀧𑀝𑀺𑀧𑀢𑁆𑀢𑀺𑀬𑀸 𑀓𑀺𑀮𑁂𑀲𑀲𑀼𑀤𑁆𑀥𑀻’’𑀢𑀺. 𑀕𑀬𑀸 𑀲𑀫𑁆𑀫𑀢𑀢𑀭𑀸 𑀩𑀸𑀳𑀼𑀓𑀸𑀤𑀻𑀳𑀺𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁮𑁦. 𑀏𑀓𑁄𑀢𑀺 𑀅𑀲𑀳𑀸𑀬𑁄, 𑀏𑀲𑀸 𑀧𑀦𑀲𑁆𑀲 𑀅𑀲𑀳𑀸𑀬𑀢𑀸 𑀏𑀓𑀻𑀪𑀸𑀯𑁂𑀦𑀸𑀢𑀺. 𑀦 𑀳𑀺𑀲𑁆𑀲 𑀢𑀸𑀯 𑀢𑀡𑁆𑀳𑀸𑀤𑀼𑀢𑀺𑀬𑀢𑀸 𑀯𑀺𑀕𑀢𑀸. 𑀢𑁂𑀦𑁂𑀯𑀸𑀳 ‘‘𑀦 𑀘𑀺𑀭𑀲𑁆𑀲𑁂𑀯𑀸’’𑀢𑀺𑀆𑀤𑀺. 𑀏𑀓𑀕𑁆𑀕𑀳𑀡𑁂𑀦𑁂𑀯 𑀓𑀸𑀬𑁂𑀦 𑀯𑀽𑀧𑀓𑀝𑁆𑀞𑀢𑀸 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀯𑀼𑀧𑀓𑀝𑁆𑀞𑁄 𑀘𑀺𑀢𑁆𑀢𑀯𑀺𑀯𑁂𑀓𑁂𑀦𑀸’’𑀢𑀺. 𑀢𑁂𑀦 ‘‘𑀤𑀺𑀯𑀸 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁪𑁨𑁩; 𑁩.𑁭𑁫; 𑀯𑀺𑀪. 𑁫𑁧𑁯; 𑀫𑀳𑀸𑀦𑀺. 𑁧𑁬𑁧) 𑀆𑀕𑀢𑀁 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀫𑀸𑀳. 𑀢𑀣𑀸𑀪𑀽𑀢𑀲𑁆𑀲 𑀘𑀲𑁆𑀲 ¶ 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺 𑀆𑀤𑀺𑀢𑁆𑀢𑁂 𑀢𑀬𑁄 𑀪𑀯𑁂 𑀧𑀲𑁆𑀲𑀢𑁄 𑀬𑀣𑀸 𑀧𑀫𑀸𑀤𑀲𑁆𑀲 𑀮𑁂𑀲𑁄𑀧𑀺 𑀦𑀸𑀳𑁄𑀲𑀺, 𑀏𑀯𑀁 𑀓𑀫𑁆𑀫𑀝𑁆𑀞𑀸𑀦𑀁 𑀩𑁆𑀭𑀽𑀳𑁂𑀦𑁆𑀢𑁄 𑀲𑀫𑁆𑀫𑀤𑁂𑀯 𑀧𑀤𑀳𑀢𑀺. 𑀓𑀢𑁆𑀣𑀘𑀺 𑀲𑀗𑁆𑀔𑀸𑀭𑀕𑀢𑁂 𑀅𑀦𑀧𑁂𑀓𑁆𑀔𑀘𑀺𑀢𑁆𑀢𑁄 𑀦𑀺𑀩𑁆𑀩𑀸𑀦𑀸𑀥𑀺𑀫𑀼𑀢𑁆𑀢𑁄 𑀏𑀯 𑀯𑀺𑀳𑀸𑀲𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀧𑁆𑀧𑀫𑀢𑁆𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀔𑀻𑀡𑀸 𑀚𑀸𑀢𑀻𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀯𑀢𑁆𑀣𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁮. 𑀲𑀮𑁆𑀮𑁂𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁧. ‘‘𑀘𑀼𑀦𑁆𑀤𑁄’’𑀢𑀺 ¶ 𑀢𑀲𑁆𑀲 𑀫𑀳𑀸𑀣𑁂𑀭𑀲𑁆𑀲 𑀦𑀸𑀫𑀁, 𑀧𑀽𑀚𑀸𑀯𑀲𑁂𑀦 𑀧𑀦 𑀫𑀳𑀸𑀘𑀼𑀦𑁆𑀤𑁄𑀢𑀺 𑀯𑀼𑀘𑁆𑀘𑀢𑀺 𑀬𑀣𑀸 ‘‘𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄’’𑀢𑀺. 𑀅𑀢𑁆𑀢𑀦𑁄 𑀯𑀸 𑀘𑀼𑀦𑁆𑀤𑀁 𑀦𑀸𑀫 𑀪𑀸𑀕𑀺𑀦𑁂𑀬𑁆𑀬𑀢𑁆𑀣𑁂𑀭𑀁 𑀉𑀧𑀸𑀤𑀸𑀬 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀪𑀸𑀢𑀸 𑀅𑀬𑀁 𑀫𑀳𑀸𑀣𑁂𑀭𑁄 ‘‘𑀫𑀳𑀸𑀘𑀼𑀦𑁆𑀤𑁄’’𑀢𑀺 𑀧𑀜𑁆𑀜𑀸𑀬𑀺𑀢𑁆𑀣 𑀬𑀣𑀸 ‘‘𑀫𑀳𑀸𑀧𑀦𑁆𑀣𑀓𑁄’’𑀢𑀺. 𑀲𑀸𑀬𑀦𑁆𑀳𑀲𑀫𑀬𑀦𑁆𑀢𑀺 𑀪𑀼𑀫𑁆𑀫𑀢𑁆𑀣𑁂 𑀏𑀓𑀁 𑀉𑀧𑀬𑁄𑀕𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀸𑀬𑀦𑁆𑀳𑀓𑀸𑀮𑁂’’𑀢𑀺. 𑀦 𑀳𑁂𑀢𑁆𑀣 𑀅𑀘𑁆𑀘𑀦𑁆𑀢 𑀲𑀁𑀬𑁄𑀕𑁄 𑀲𑀫𑁆𑀪𑀯𑀢𑀻𑀢𑀺. 𑀲𑀢𑁆𑀢𑀲𑀗𑁆𑀔𑀸𑀭𑁂𑀳𑀻𑀢𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀅𑀦𑁆𑀢𑁂𑀯𑀸𑀲𑀺𑀓𑀉𑀧𑀸𑀲𑀓𑀸𑀤𑀺𑀲𑀢𑁆𑀢𑁂𑀳𑀺 𑀘𑁂𑀯 𑀭𑀽𑀧𑀸𑀭𑀫𑁆𑀫𑀡𑀸𑀤𑀺𑀲𑀗𑁆𑀔𑀸𑀭𑁂𑀳𑀺 𑀘. 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸𑀢𑀺 𑀅𑀧𑀲𑀓𑁆𑀓𑀺𑀢𑁆𑀯𑀸. 𑀦𑀺𑀮𑀻𑀬𑀦𑀦𑁆𑀢𑀺 𑀯𑀺𑀯𑁂𑀘𑀦𑀁 𑀓𑀸𑀬𑀘𑀺𑀢𑁆𑀢𑁂𑀳𑀺 𑀢𑀢𑁄 𑀯𑀺𑀯𑀺𑀢𑁆𑀢𑀢𑀸. 𑀏𑀓𑀻𑀪𑀸𑀯𑁄𑀢𑀺 𑀳𑀺 𑀓𑀸𑀬𑀯𑀺𑀯𑁂𑀓𑀫𑀸𑀳, 𑀧𑀯𑀺𑀯𑁂𑀓𑁄𑀢𑀺 𑀘𑀺𑀢𑁆𑀢𑀯𑀺𑀯𑁂𑀓𑀁. 𑀢𑀢𑁄 𑀯𑀼𑀝𑁆𑀞𑀺𑀢𑁄𑀢𑀺 𑀢𑀢𑁄 𑀤𑀼𑀯𑀺𑀥𑀯𑀺𑀯𑁂𑀓𑀢𑁄 𑀪𑀯𑀗𑁆𑀕𑀼𑀧𑁆𑀧𑀢𑁆𑀢𑀺𑀬𑀸, 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀫𑀸𑀕𑀫𑁂𑀦 𑀘 𑀅𑀧𑁂𑀢𑁄. 𑀅𑀪𑀺𑀯𑀸𑀤𑀸𑀧𑁂𑀢𑁆𑀯𑀸𑀢𑀺 𑀅𑀪𑀺𑀯𑀸𑀤𑀁 𑀓𑀸𑀭𑁂𑀢𑁆𑀯𑀸. 𑀏𑀯𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀅𑀪𑀺𑀯𑀸𑀤𑀯𑀲𑁂𑀦. 𑀧𑀕𑁆𑀕𑀬𑁆𑀳𑀸𑀢𑀺 𑀉𑀦𑁆𑀦𑀸𑀫𑁂𑀢𑁆𑀯𑀸. 𑀅𑀦𑀼𑀧𑀘𑁆𑀙𑀺𑀦𑁆𑀦𑀪𑀯𑀫𑀽𑀮𑀸𑀦𑀁 𑀢𑀸𑀯 𑀏𑀯𑀁 𑀅𑀪𑀺𑀯𑀸𑀤𑁄 𑀳𑁄𑀢𑀼, 𑀉𑀘𑁆𑀙𑀺𑀦𑁆𑀦𑀪𑀯𑀫𑀽𑀮𑀸𑀦𑀁 𑀓𑀺𑀫𑀢𑁆𑀣𑀺𑀬𑁄𑀢𑀺 𑀆𑀳 ‘‘𑀏𑀢𑀁 𑀆𑀘𑀺𑀡𑁆𑀡𑀁 𑀢𑀣𑀸𑀕𑀢𑀸𑀦’’𑀦𑁆𑀢𑀺. 𑀢𑁂𑀦 𑀦 𑀢𑀣𑀸𑀕𑀢𑀸 𑀲𑀫𑁆𑀧𑀭𑀸𑀬𑀺𑀓𑀁𑀬𑁂𑀯 𑀲𑀢𑁆𑀢𑀸𑀦𑀁 𑀲𑀼𑀔𑀁 𑀆𑀲𑀻𑀲𑀦𑁆𑀢𑀺, 𑀅𑀣 𑀔𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑁆𑀧𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀲𑁆𑀫𑀸 𑀏𑀯𑀁 𑀢𑀣𑀸𑀕𑀢𑀸 𑀅𑀪𑀺𑀯𑀤𑀦𑁆𑀢𑀻𑀢𑀺 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀲𑀼𑀔𑀓𑀸𑀫𑀸 𑀳𑀻’’𑀢𑀺𑀆𑀤𑀺. 𑀧𑀼𑀣𑀼𑀓𑀸𑀬𑀸𑀢𑀺 𑀩𑀳𑀽 𑀲𑀢𑁆𑀢𑀓𑀸𑀬𑀸. 𑀬𑀓𑁆𑀔𑀸𑀢𑀺 𑀤𑁂𑀯𑀸. 𑀢𑁂 𑀳𑀺 𑀧𑀽𑀚𑀦𑀻𑀬𑀢𑀸𑀬 ‘‘𑀬𑀓𑁆𑀔𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀪𑀺𑀯𑀤𑀦𑁆𑀢𑀻𑀢𑀺 𑀆𑀲𑀻𑀲𑀺𑀢𑀫𑁂𑀯𑀢𑁆𑀣𑀁 𑀜𑀸𑀡𑀓𑀭𑀼𑀡𑀸𑀳𑀺 𑀅𑀪𑀺𑀫𑀼𑀔𑀁 𑀓𑀢𑁆𑀯𑀸 𑀯𑀤𑀦𑁆𑀢𑀺.

𑀬𑀸𑀢𑀺 𑀅𑀦𑀺𑀬𑀫𑀢𑁄 𑀕𑀳𑀺𑀢𑀸 𑀦𑀺𑀬𑀫𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀫𑀸’’𑀢𑀺 𑀆𑀳. 𑀇𑀫𑀸𑀢𑀺 𑀘 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀪𑀺𑀫𑀼𑀔𑀁 𑀓𑀭𑁄𑀦𑁆𑀢𑁄 𑀯𑀺𑀬𑀸’’𑀢𑀺 ¶ , 𑀢𑀁 𑀢𑀁 𑀤𑀺𑀝𑁆𑀞𑀺𑀕𑀢𑀺𑀓𑀁 𑀘𑀺𑀢𑁆𑀢𑀕𑀢𑀁 𑀲𑀫𑁆𑀫𑀼𑀔𑀸 𑀯𑀺𑀬 𑀓𑀭𑁄𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀺𑀬𑁄𑀢𑀺 𑀧𑀼𑀭𑀺𑀫𑀧𑀤𑀮𑁄𑀧𑁂𑀦 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑁄’’𑀢𑀺 𑀆𑀳. 𑀲𑀢𑁆𑀢𑁂𑀲𑀼 𑀤𑀺𑀝𑁆𑀞𑀺𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀸, 𑀲𑀢𑁆𑀢𑁂𑀲𑀼 𑀯𑀸 𑀯𑀺𑀲𑀬𑀪𑀽𑀢𑁂𑀲𑀼 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀫𑀸𑀦𑀸 ‘‘𑀲𑀢𑁆𑀢𑁂𑀲𑀼 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀸. 𑀅𑀢𑁆𑀢𑀯𑀸𑀤𑁂𑀦𑀸𑀢𑀺 𑀅𑀢𑁆𑀢𑀸𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑁂𑀦 𑀯𑀘𑀦𑁂𑀦. 𑀧𑀝𑀺𑀲𑀁𑀬𑀼𑀢𑁆𑀢𑀸𑀢𑀺 ‘‘𑀅𑀢𑁆𑀣𑀺 𑀅𑀢𑁆𑀢𑀸’’𑀢𑀺 𑀕𑀸𑀳𑁂 𑀕𑀸𑀳𑀡𑁂 𑀘 𑀯𑀺𑀲𑀬𑀪𑀸𑀯𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑀸. 𑀤𑀺𑀝𑁆𑀞𑀺𑀕𑀢𑀺𑀓𑁂𑀦 𑀤𑀺𑀝𑁆𑀞𑀺𑀁 𑀕𑀸𑀳𑀦𑁆𑀢𑁂𑀳𑀺 𑀕𑀳𑀡𑁂 𑀕𑀸𑀳𑀸𑀧𑀡𑁂 𑀘 𑀤𑀺𑀝𑁆𑀞𑀺 𑀤𑀺𑀝𑁆𑀞𑀺𑀯𑀸𑀤𑀲𑁆𑀲 𑀯𑀺𑀲𑀬𑁄𑀢𑀺 𑀢𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑀸 𑀦𑀸𑀫 𑀳𑁄𑀢𑀺. ‘‘𑀅𑀢𑁆𑀣𑀺 𑀅𑀢𑁆𑀢𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀇𑀥 𑀅𑀢𑁆𑀢𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸, 𑀦 𑀢𑀲𑁆𑀲𑀸 𑀯𑀺𑀲𑀬𑀪𑀽𑀢𑁄 𑀅𑀢𑁆𑀢𑀸. 𑀲𑀸 𑀘 𑀯𑀺𑀲𑀬𑀪𑀸𑀯𑀢𑁄 𑀢𑀣𑀸𑀧𑀯𑀢𑁆𑀢𑁂𑀦 𑀯𑀸𑀤𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑀸. 𑀮𑁄𑀓𑀯𑀸𑀤𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀯𑀻𑀲𑀢𑀺 𑀪𑀯𑀦𑁆𑀢𑀺 𑀢𑀢𑁄 𑀧𑀭𑀁 𑀅𑀢𑁆𑀢𑀯𑀸𑀤𑀯𑀢𑁆𑀣𑀼𑀦𑁄 𑀅𑀪𑀸𑀯𑀸 ¶ . 𑀧𑀜𑁆𑀘𑀧𑀺 𑀳𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀧𑀘𑁆𑀘𑁂𑀓𑀁 ‘‘𑀅𑀢𑁆𑀢𑀸’’𑀢𑀺 𑀢𑁂 𑀘 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀪𑀸𑀯𑁂𑀦 𑀕𑀡𑁆𑀳𑀢𑁄 𑀏𑀢𑀸𑀲𑀁 𑀤𑀺𑀝𑁆𑀞𑀻𑀦𑀁 𑀲𑀫𑁆𑀪𑀯𑁄, 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑁄 𑀧𑀦𑀸𑀬𑀁 𑀯𑀺𑀲𑀬𑁄 𑀅𑀢𑁆𑀢𑀕𑁆𑀕𑀳𑀡𑀸𑀓𑀸𑀭𑁄 𑀘 𑀦𑀢𑁆𑀣𑀻𑀢𑀺. 𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺 𑀭𑀽𑀧𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 ‘‘𑀅𑀢𑁆𑀢𑀸’’𑀢𑀺, ‘‘𑀮𑁄𑀓𑁄’’𑀢𑀺 𑀯𑀸 𑀕𑀳𑁂𑀢𑁆𑀯𑀸 𑀢𑀁 𑀲𑀲𑁆𑀲𑀢𑁄 𑀲𑀩𑁆𑀩𑀓𑀸𑀮𑀪𑀸𑀯𑀻 𑀦𑀺𑀘𑁆𑀘𑁄 𑀥𑀼𑀯𑁄𑀢𑀺. 𑀬𑀣𑀸𑀳 ‘‘𑀭𑀽𑀧𑀻 𑀅𑀢𑁆𑀢𑀸 𑀘𑁂𑀯 𑀮𑁄𑀓𑁄 𑀘 𑀲𑀲𑁆𑀲𑀢𑁄 𑀘𑀸𑀢𑀺 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀢𑀻’’𑀢𑀺𑀆𑀤𑀺. 𑀲𑀲𑁆𑀲𑀢𑁄𑀢𑀺𑀆𑀤𑀻𑀲𑀼 𑀧𑀞𑀫𑁄 𑀲𑀲𑁆𑀲𑀢𑀯𑀸𑀤𑀯𑀲𑁂𑀦 𑀅𑀢𑁆𑀢𑀕𑁆𑀕𑀸𑀳𑁄, 𑀤𑀼𑀢𑀺𑀬𑁄 𑀉𑀘𑁆𑀙𑁂𑀤𑀯𑀸𑀤𑀯𑀲𑁂𑀦, 𑀢𑀢𑀺𑀬𑁄 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀯𑀲𑁂𑀦, 𑀘𑀢𑀼𑀢𑁆𑀣𑁄 𑀢𑀓𑁆𑀓𑀻𑀯𑀸𑀤𑀯𑀲𑁂𑀦 𑀧𑀯𑀢𑁆𑀢𑁄, 𑀅𑀫𑀭𑀸𑀯𑀺𑀓𑁆𑀔𑁂𑀧𑀯𑀲𑁂𑀦 𑀯𑀸 𑀧𑀯𑀢𑁆𑀢𑁄 𑀅𑀢𑁆𑀢𑀕𑁆𑀕𑀸𑀳𑁄. 𑀅𑀦𑁆𑀢𑀯𑀸𑀢𑀺 𑀅𑀢𑁆𑀢𑀦𑁄 𑀧𑀭𑀺𑀘𑁆𑀙𑁂𑀤𑀢𑀸𑀯𑀲𑁂𑀦. 𑀅𑀦𑀦𑁆𑀢𑀯𑀸𑀢𑀺 𑀅𑀧𑀭𑀺𑀘𑁆𑀙𑁂𑀤𑀢𑀸𑀯𑀲𑁂𑀦. 𑀅𑀦𑁆𑀢𑀯𑀸 𑀘 𑀅𑀦𑀦𑁆𑀢𑀯𑀸 𑀘𑀸𑀢𑀺 𑀢𑀤𑀼𑀪𑀬𑀯𑀲𑁂𑀦, 𑀇𑀢𑀭𑁄 𑀢𑀓𑁆𑀓𑀻𑀯𑀸𑀤𑀯𑀲𑁂𑀦 𑀧𑀯𑀢𑁆𑀢𑁄 𑀅𑀢𑁆𑀢𑀕𑁆𑀕𑀸𑀳𑁄. 𑀏𑀯𑀁 𑀧𑀯𑀢𑁆𑀢𑀢𑁆𑀢𑀸 𑀅𑀝𑁆𑀞 𑀳𑁄𑀦𑁆𑀢𑀻𑀢𑀺 𑀬𑁄𑀚𑀦𑀸.

𑀆𑀤𑀺𑀫𑁂𑀯𑀸𑀢𑀺 𑀆𑀤𑀺𑀫𑀦𑀲𑀺𑀓𑀸𑀭𑀫𑁂𑀯. 𑀢𑀁 𑀧𑀦 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀧𑀲𑁆𑀲𑀦𑀸𑀫𑀺𑀲𑁆𑀲𑀓𑀧𑀞𑀫𑀫𑀦𑀲𑀺𑀓𑀸𑀭𑀫𑁂𑀯𑀸’’𑀢𑀺 𑀆𑀳. 𑀅𑀧𑁆𑀧𑀢𑁆𑀯𑀸𑀧𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀦𑁆𑀢𑀺 𑀇𑀫𑀺𑀦𑀸 𑀅𑀯𑀥𑀸𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀁 𑀤𑀲𑁆𑀲𑁂𑀢𑀺. 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀢𑁄 𑀧𑀪𑀼𑀢𑀺 𑀬𑀸𑀯 𑀉𑀤𑀬𑀩𑁆𑀩𑀬𑀤𑀲𑁆𑀲𑀦𑀁, 𑀅𑀬𑀁 𑀇𑀥 𑀆𑀤𑀺𑀫𑀦𑀲𑀺𑀓𑀸𑀭𑁄𑀢𑀺 𑀅𑀥𑀺𑀧𑁆𑀧𑁂𑀢𑁄 𑀧𑀜𑁆𑀜𑀸𑀪𑀸𑀯𑀦𑀸𑀬 𑀆𑀭𑀫𑁆𑀪𑀪𑀸𑀯𑀢𑁄. 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀲𑀳𑀺𑀢𑀢𑀸𑀬 𑀘𑀲𑁆𑀲 𑀯𑀺𑀧𑀲𑁆𑀲𑀦𑀸𑀫𑀺𑀲𑁆𑀲𑀓𑀢𑀸 𑀯𑀘𑀦𑀁. 𑀏𑀯𑀦𑁆𑀢𑀺 𑀇𑀫𑀲𑁆𑀲 𑀅𑀢𑁆𑀣𑀯𑀘𑀦𑀁 ‘‘𑀏𑀢𑁆𑀢𑀓𑁂𑀦𑁂𑀯 𑀉𑀧𑀸𑀬𑁂𑀦𑀸’’𑀢𑀺 ¶ , 𑀬𑀣𑀸𑀯𑀼𑀢𑁆𑀢𑀆𑀤𑀺𑀫𑀦𑀲𑀺𑀓𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀢𑀸𑀲𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀅𑀢𑁆𑀢𑀯𑀸𑀤𑀮𑁄𑀓𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁 𑀤𑀺𑀝𑁆𑀞𑀻𑀦𑀁. 𑀓𑀸𑀫𑀜𑁆𑀘 𑀢𑀸𑀲𑀁 𑀢𑁂𑀦 𑀢𑀤𑀗𑁆𑀕𑀯𑀲𑁂𑀦 𑀧𑀳𑀸𑀦𑀁 𑀳𑁄𑀢𑀺𑀬𑁂𑀯, 𑀢𑀁 𑀧𑀦 𑀦𑀸𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀳𑀸𑀦𑀁 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀘 𑀳𑁄𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀦𑁆𑀦𑀲𑀁𑀬𑁄𑀚𑀦𑀢𑀸𑀬 𑀅𑀦𑀥𑀺𑀫𑀸𑀦𑀺𑀓𑁄𑀧𑀺 𑀲𑀫𑀸𑀦𑁄. ‘‘𑀅𑀭𑀺𑀬𑀥𑀫𑁆𑀫𑁄 𑀅𑀥𑀺𑀕𑀢𑁄’’𑀢𑀺 𑀫𑀸𑀦𑁄 𑀅𑀥𑀺𑀫𑀸𑀦𑁄, 𑀲𑁄 𑀬𑁂𑀲𑀁 𑀅𑀢𑁆𑀣𑀺 𑀢𑁂 𑀅𑀥𑀺𑀫𑀸𑀦𑀺𑀓𑀸, 𑀢𑁂𑀲𑀁 𑀉𑀤𑀬𑀩𑁆𑀩𑀬𑀜𑀸𑀡𑀸𑀥𑀺𑀕𑀫𑁂𑀦 𑀅𑀥𑀺𑀫𑀸𑀦𑀼𑀧𑁆𑀧𑀢𑁆𑀢𑀺 𑀢𑀤𑀯𑀲𑀸𑀦𑁄 𑀘 𑀫𑀦𑀲𑀺𑀓𑀸𑀭𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑁂𑀦 𑀤𑀺𑀝𑁆𑀞𑀻𑀦𑀁 𑀧𑀳𑀸𑀦𑀁 𑀦 𑀳𑁄𑀢𑀻𑀢𑀺 𑀓𑀣𑀸𑀧𑀦𑀢𑁆𑀣𑀁 𑀅𑀬𑀁 𑀧𑀼𑀘𑁆𑀙𑀸𑀢𑀺 𑀆𑀳 ‘‘𑀅𑀥𑀺𑀫𑀸𑀦𑀧𑁆𑀧𑀳𑀸𑀦𑀢𑁆𑀣𑀁 𑀧𑀼𑀘𑁆𑀙𑀢𑀻’’𑀢𑀺. ‘‘𑀆𑀤𑀺𑀫𑁂𑀯 𑀦𑀼 𑀔𑁄…𑀧𑁂… 𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀳𑁄𑀢𑀻’’𑀢𑀺 𑀅𑀦𑀪𑀺𑀲𑀫𑁂𑀢𑀸𑀯𑀻 𑀯𑀺𑀬 𑀯𑀤𑀦𑁆𑀢𑁄 𑀅𑀥𑀺𑀫𑀸𑀦𑁂 𑀞𑀺𑀢𑁄 𑀯𑀺𑀬 𑀳𑁄𑀢𑀻𑀢𑀺 𑀆𑀳 ‘‘𑀅𑀥𑀺𑀫𑀸𑀦𑀺𑀓𑁄 𑀯𑀺𑀬 𑀳𑀼𑀢𑁆𑀯𑀸’’𑀢𑀺. 𑀲𑁄𑀢𑀺 𑀣𑁂𑀭𑁄. 𑀢𑁂𑀲𑀁 𑀅𑀢𑁆𑀣𑀸𑀬𑀸𑀢𑀺 𑀢𑁂𑀲𑀁 𑀅𑀢𑁆𑀢𑀦𑁄 𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀪𑀕𑀯𑀢𑀸 𑀏𑀢𑀲𑁆𑀲 𑀫𑀺𑀘𑁆𑀙𑀸𑀕𑀸𑀳𑀲𑁆𑀲 𑀯𑀺𑀯𑁂𑀘𑀦𑀢𑁆𑀣𑀸𑀬. 𑀣𑁂𑀭𑁄 𑀓𑀺𑀭 𑀥𑀫𑁆𑀫𑀲𑁂𑀦𑀸𑀧𑀢𑀺 𑀯𑀺𑀬 𑀲𑀤𑁆𑀥𑀺𑀁 𑀅𑀢𑁆𑀢𑀦𑁄 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺.

𑁮𑁨. 𑀬𑀢𑁆𑀣𑀸𑀢𑀺 𑀯𑀺𑀲𑀬𑁂 𑀪𑀼𑀫𑁆𑀫𑀁. 𑀤𑀺𑀝𑁆𑀞𑀻𑀦𑀜𑁆𑀳𑀺 𑀆𑀭𑀫𑁆𑀫𑀡𑀦𑀺𑀤𑀲𑁆𑀲𑀦𑀫𑁂𑀢𑀦𑁆𑀢𑀺. 𑀬𑀲𑁆𑀫𑀸 𑀤𑀺𑀝𑁆𑀞𑀻𑀦𑀁 𑀅𑀦𑀼𑀲𑀬𑀦𑀪𑀽𑀫𑀺𑀧𑀺 𑀲𑀫𑀼𑀤𑀸𑀘𑀭𑀡𑀝𑁆𑀞𑀸𑀦𑀫𑁆𑀧𑀺 𑀔𑀦𑁆𑀥𑀸 𑀏𑀯, 𑀢𑀲𑁆𑀫𑀸 𑀆𑀳 ‘‘𑀬𑀢𑁆𑀣 𑀘𑁂𑀢𑀸 𑀤𑀺𑀝𑁆𑀞𑀺𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀻 𑀢𑀺𑀆𑀤𑀺 𑀧𑀜𑁆𑀘𑀓𑁆𑀔𑀦𑁆𑀥𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀭𑀽𑀧𑀁 𑀅𑀪𑀺𑀦𑀺𑀯𑀺𑀲𑁆𑀲𑀸𑀢𑀺 ‘‘𑀇𑀤𑀁 𑀭𑀽𑀧𑀁 𑀫𑀫 𑀅𑀢𑁆𑀢𑀸’’𑀢𑀺 ¶ 𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀆𑀭𑀩𑁆𑀪. 𑀅𑀪𑀺𑀦𑀺𑀯𑀺𑀲𑀫𑀸𑀦𑀸 𑀏𑀯 𑀳𑀺 𑀤𑀺𑀝𑁆𑀞𑀺 𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. ‘‘𑀲𑁄 𑀅𑀢𑁆𑀢𑀸’’𑀢𑀺𑀆𑀤𑀻𑀲𑀼 𑀬𑀤𑀺𑀤𑀁 𑀘𑀓𑁆𑀔𑀸𑀤𑀺𑀲𑀗𑁆𑀕𑀳𑀁 𑀭𑀽𑀧𑀁, 𑀲𑀳𑀩𑀼𑀤𑁆𑀥𑀺𑀦𑀺𑀩𑀦𑁆𑀥𑀦𑀢𑀸𑀬 𑀲𑁄 𑀫𑁂 𑀅𑀢𑁆𑀢𑀸, 𑀲𑀼𑀔𑀸𑀲𑀼𑀔𑀁 𑀏𑀢𑁆𑀣 𑀮𑁄𑀓𑀺𑀬𑀢𑀻𑀢𑀺 𑀲𑁄 𑀮𑁄𑀓𑁄. ‘‘𑀲𑁄𑀏𑀯𑀸𑀳𑀁 𑀧𑁂𑀘𑁆𑀘 𑀧𑀭𑀮𑁄𑀓𑁂 𑀪𑀯𑀺𑀲𑁆𑀲𑀸𑀫𑀻𑀢𑀺 𑀢𑀣𑀸𑀪𑀸𑀯𑁂𑀦 𑀦𑀺𑀘𑁆𑀘𑁄, 𑀣𑀺𑀭𑀪𑀸𑀯𑁂𑀦 𑀥𑀼𑀯𑁄, 𑀲𑀩𑁆𑀩𑀤𑀸𑀪𑀸𑀯𑀺𑀢𑀸𑀬 𑀲𑀲𑁆𑀲𑀢𑁄, 𑀦𑀺𑀩𑁆𑀩𑀺𑀓𑀸𑀭𑀢𑀸𑀬 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑁄𑀢𑀺 𑀅𑀢𑁆𑀣𑁄. 𑀬𑀤𑀺 𑀧𑀜𑁆𑀘𑀓𑁆𑀔𑀦𑁆𑀥𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀓𑀣𑀫𑁂𑀓𑀯𑀘𑀦𑀦𑁆𑀢𑀺 𑀆𑀳 ‘‘𑀆𑀭𑀫𑁆𑀫𑀡𑀯𑀲𑁂𑀦𑀸’’𑀢𑀺𑀆𑀤𑀺. 𑀦𑀸𑀦𑀸 𑀓𑀭𑀻𑀬𑀢𑀺 𑀏𑀢𑁂𑀦𑀸𑀢𑀺 𑀦𑀸𑀦𑀸𑀓𑀭𑀡𑀁, 𑀯𑀺𑀲𑁂𑀲𑁄. 𑀚𑀸𑀢𑀺𑀯𑀲𑁂𑀦𑀸𑀢𑀺 𑀉𑀧𑁆𑀧𑀢𑁆𑀢𑀺𑀯𑀲𑁂𑀦. 𑀬𑁂 𑀳𑀺 𑀅𑀦𑀺𑀩𑁆𑀩𑀢𑁆𑀢𑀧𑀼𑀩𑁆𑀩𑀸 𑀲𑀫𑀸𑀦𑀸𑀯𑀢𑁆𑀣𑀸, 𑀢𑁂 𑀉𑀧𑁆𑀧𑀸𑀤𑀲𑀗𑁆𑀔𑀸𑀢𑀯𑀺𑀓𑀸𑀭𑀲𑀫𑀗𑁆𑀕𑀺𑀢𑀸𑀬 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀫𑀜𑁆𑀜𑀁 𑀮𑀪𑀦𑁆𑀢𑀺. 𑀢𑁂𑀦𑀸𑀳 ‘‘𑀚𑀸𑀢𑀺𑀯𑀲𑁂𑀦𑀸’’𑀢𑀺𑀆𑀤𑀺. 𑀧𑀼𑀦𑀧𑁆𑀧𑀼𑀦𑀁 𑀆𑀲𑁂𑀯𑀺𑀢𑀸𑀢𑀺 𑀅𑀦𑀸𑀤𑀺𑀫𑀢𑀺 𑀲𑀁𑀲𑀸𑀭𑁂 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀬𑀸 𑀮𑀤𑁆𑀥𑀸𑀲𑁂𑀯𑀦𑀸. 𑀏𑀢𑁂𑀦 𑀓𑀺𑀮𑁂𑀲𑀸𑀦𑀁 𑀪𑀸𑀯𑀦𑀝𑁆𑀞𑁂𑀦 𑀅𑀦𑀼𑀲𑀬𑀢𑁆𑀣𑀁 𑀯𑀺𑀲𑁂𑀲𑁂𑀢𑀺 ¶ . 𑀣𑀸𑀫𑀕𑀢𑀸𑀢𑀺 𑀣𑀸𑀫𑀪𑀸𑀯𑀁 𑀉𑀧𑀕𑀢𑀸. 𑀏𑀢𑁂𑀦 𑀅𑀦𑀼𑀲𑀬𑁂 𑀲𑀪𑀸𑀯𑀢𑁄 𑀤𑀲𑁆𑀲𑁂𑀢𑀺. 𑀣𑀸𑀫𑀕𑀫𑀦𑀦𑁆𑀢𑀺 𑀘 𑀓𑀸𑀫𑀭𑀸𑀕𑀸𑀤𑀻𑀦𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀲𑀪𑀸𑀯𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀣𑀸𑀫𑀕𑀢𑁄 𑀅𑀦𑀼𑀲𑀬𑁂 𑀧𑀚𑀳𑀢𑀻’’𑀢𑀺 (𑀧𑀝𑀺. 𑀫. 𑁩.𑁨𑁧). 𑀅𑀧𑁆𑀧𑀝𑀺𑀯𑀺𑀦𑀻𑀢𑀸𑀢𑀺 𑀲𑀫𑀼𑀘𑁆𑀙𑁂𑀤𑀯𑀺𑀦𑀬𑀯𑀲𑁂𑀦 𑀦 𑀧𑀝𑀺𑀯𑀺𑀦𑀻𑀢𑀸. 𑀅𑀧𑁆𑀧𑀳𑀻𑀦𑀸 𑀳𑀺 𑀣𑀸𑀫𑀕𑀢𑀸 𑀓𑀺𑀮𑁂𑀲𑀸 𑀅𑀦𑀼𑀲𑁂𑀦𑁆𑀢𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀏𑀢𑁂𑀦 𑀢𑁂𑀲𑀁 𑀓𑀸𑀭𑀡𑀮𑀸𑀪𑁂 𑀲𑀢𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑀢𑀁 𑀤𑀲𑁆𑀲𑁂𑀢𑀺. 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀅𑀪𑀺𑀪𑀯𑀦𑁆𑀢𑀺. 𑀏𑀢𑁂𑀦 𑀢𑁂𑀲𑀁 𑀯𑀻𑀢𑀺𑀓𑁆𑀓𑀫𑀧𑁆𑀧𑀢𑁆𑀢𑀢𑀁 𑀤𑀲𑁆𑀲𑁂𑀢𑀺. 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀦 𑀇𑀫𑀺𑀦𑀸𑀯 𑀧𑀭𑀺𑀬𑀼𑀝𑁆𑀞𑀸𑀦𑀸𑀯𑀢𑁆𑀣𑀸 𑀤𑀲𑁆𑀲𑀺𑀢𑀸.

𑀢𑀁 𑀧𑀜𑁆𑀘𑀓𑁆𑀔𑀦𑁆𑀥𑀧𑁆𑀧𑀪𑁂𑀤𑀁 𑀆𑀭𑀫𑁆𑀫𑀡𑀦𑁆𑀢𑀺 𑀬𑀁 𑀢𑀁 ‘‘𑀬𑀢𑁆𑀣 𑀘𑁂𑀢𑀸 𑀤𑀺𑀝𑁆𑀞𑀺𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀤𑀺𑀧𑀜𑁆𑀘𑀓𑁆𑀔𑀦𑁆𑀥𑀧𑀪𑁂𑀤𑀁 𑀤𑀺𑀝𑁆𑀞𑀻𑀦𑀁 𑀆𑀭𑀫𑁆𑀫𑀡𑀁. 𑀏𑀢𑀁 𑀫𑀬𑁆𑀳𑀁 𑀦 𑀳𑁄𑀢𑀻𑀢𑀺 𑀏𑀢𑀁 𑀔𑀦𑁆𑀥𑀧𑀜𑁆𑀘𑀓𑀁 𑀫𑀬𑁆𑀳𑀁 𑀲𑀦𑁆𑀢𑀓𑀁 𑀦 𑀳𑁄𑀢𑀺 𑀫𑀫 𑀓𑀺𑀜𑁆𑀘𑀦𑀧𑀮𑀺𑀩𑁄𑀥𑀪𑀸𑀯𑁂𑀦 𑀕𑀳𑁂𑀢𑀩𑁆𑀩𑀢𑀸𑀬 𑀅𑀪𑀸𑀯𑀢𑁄. 𑀢𑁂𑀦𑀲𑁆𑀲 𑀧𑀭𑀫𑀢𑁆𑀣𑀢𑁄 𑀢𑀡𑁆𑀳𑀸𑀯𑀢𑁆𑀣𑀼𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺 𑀢𑀸𑀯𑀓𑀸𑀮𑀺𑀓𑀸𑀤𑀺𑀪𑀸𑀯𑀢𑁄. 𑀅𑀳𑀫𑁆𑀧𑀺 𑀏𑀲𑁄 𑀦 𑀅𑀲𑁆𑀫𑀻𑀢𑀺 𑀏𑀲𑁄 𑀧𑀜𑁆𑀘𑀓𑁆𑀔𑀦𑁆𑀥𑀧𑀪𑁂𑀤𑁄 𑀅𑀳𑀫𑁆𑀧𑀺 𑀦 𑀅𑀲𑁆𑀫𑀺, 𑀅𑀳𑀦𑁆𑀢𑀺 𑀲𑁄 𑀕𑀳𑁂𑀢𑀩𑁆𑀩𑁄 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀦𑀲𑁆𑀲 𑀫𑀸𑀦𑀯𑀢𑁆𑀣𑀼𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺 𑀅𑀦𑀺𑀘𑁆𑀘𑀤𑀼𑀓𑁆𑀔𑀚𑁂𑀕𑀼𑀘𑁆𑀙𑀸𑀤𑀺𑀪𑀸𑀯𑀢𑁄. 𑀏𑀲𑁄 𑀫𑁂 𑀅𑀢𑁆𑀢𑀸𑀧𑀺 𑀦 𑀳𑁄𑀢𑀺 𑀅𑀢𑁆𑀢𑀲𑀪𑀸𑀯𑀲𑁆𑀲 𑀢𑀢𑁆𑀣 𑀅𑀪𑀸𑀯𑀢𑁄 𑀫𑀫𑀜𑁆𑀘𑀲𑁆𑀲 𑀓𑀺𑀜𑁆𑀘𑀦𑀧𑀮𑀺𑀩𑁄𑀥𑀪𑀸𑀯𑁂𑀦 𑀕𑀳𑁂𑀢𑀩𑁆𑀩𑀢𑀸𑀬 𑀅𑀪𑀸𑀯𑀢𑁄.

𑀢𑀡𑁆𑀳𑀸𑀯 𑀫𑀫𑀦𑁆𑀢𑀺 𑀕𑀡𑁆𑀳𑀸𑀢𑀺 𑀏𑀢𑁂𑀦𑀸𑀢𑀺 𑀢𑀡𑁆𑀳𑀸𑀕𑀸𑀳𑁄. 𑀢𑀁 𑀕𑀡𑁆𑀳𑀦𑁆𑀢𑁄𑀢𑀺 𑀢𑀁 𑀉𑀧𑁆𑀧𑀸𑀤𑁂𑀦𑁆𑀢𑁄. 𑀢𑁂𑀦𑀸𑀳 ‘‘𑀢𑀡𑁆𑀳𑀸𑀧𑀧𑀜𑁆𑀘𑀁 𑀕𑀡𑁆𑀳𑀸𑀢𑀻’’𑀢𑀺. 𑀧𑀧𑀜𑁆𑀘𑁂𑀢𑀺 𑀲𑀦𑁆𑀢𑀸𑀦𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀲𑀢𑁆𑀢𑁂 𑀲𑀁𑀲𑀸𑀭𑁂 𑀘𑀺𑀭𑀸𑀬𑀢𑀻𑀢𑀺 𑀧𑀧𑀜𑁆𑀘𑁄. 𑀬𑀣𑀸 𑀯𑀼𑀢𑁆𑀢𑀧𑀪𑁂𑀤𑀦𑁆𑀢𑀺 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀧𑀪𑁂𑀤𑀁. 𑀢𑀡𑁆𑀳𑀸𑀧𑀧𑀜𑁆𑀘𑀁 𑀧𑀝𑀺𑀓𑁆𑀔𑀺𑀧𑀢𑀺 𑀔𑀦𑁆𑀥𑀧𑀜𑁆𑀘𑀓𑀲𑁆𑀲 𑀢𑀡𑁆𑀳𑀸𑀯𑀢𑁆𑀣𑀼𑀓𑀸𑀪𑀸𑀯𑀯𑀺𑀪𑀸𑀯𑀦𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀢𑁄 𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀤𑀺𑀝𑁆𑀞𑁂𑀓𑀝𑁆𑀞𑀸𑀢𑀺 𑀤𑀺𑀝𑁆𑀞𑀺𑀬𑀸 ¶ 𑀧𑀳𑀸𑀦𑁂𑀓𑀝𑁆𑀞𑀸. 𑀢𑁂𑀦 𑀢𑁂𑀲𑀁 𑀧𑀞𑀫𑀫𑀕𑁆𑀕𑀯𑀚𑁆𑀛𑀢𑀁 𑀤𑀲𑁆𑀲𑁂𑀢𑀺. 𑀲𑀳𑀚𑁂𑀓𑀝𑁆𑀞𑀸 𑀧𑀦 𑀤𑀺𑀝𑁆𑀞𑀺𑀬𑀸 𑀢𑀡𑁆𑀳𑀸 𑀏𑀯, 𑀦 𑀫𑀸𑀦𑁄, 𑀲𑀸 𑀘 𑀔𑁄 𑀅𑀧𑀸𑀬𑀕𑀫𑀦𑀻𑀬𑀸. 𑀬𑀣𑀸 𑀅𑀢𑁆𑀣𑀻𑀢𑀺 𑀬𑁂𑀦 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀲𑀼𑀪𑀸𑀦𑀢𑁆𑀢𑀸𑀓𑀸𑀭𑁂𑀦 𑀅𑀢𑁆𑀣𑀺, 𑀢𑀣𑀸 𑀧𑀲𑁆𑀲𑀦𑁆𑀢𑁄 𑀬𑀣𑀸𑀪𑀽𑀢𑀁 𑀧𑀲𑁆𑀲𑀢𑀺 𑀦𑀸𑀫. 𑀢𑁂𑀦𑀸𑀳 ‘‘𑀔𑀦𑁆𑀥𑀧𑀜𑁆𑀘𑀓𑀜𑁆𑀳𑀻’’𑀢𑀺𑀆𑀤𑀺. 𑀏𑀢𑁂𑀦𑁂𑀯 𑀆𑀓𑀸𑀭𑁂𑀦𑀸𑀢𑀺 𑀭𑀼𑀧𑁆𑀧𑀦𑀸𑀤𑀺𑀅𑀦𑀺𑀘𑁆𑀘𑀸𑀤𑀺𑀆𑀓𑀸𑀭𑁂𑀦𑁂𑀯. 𑀕𑀬𑁆𑀳𑀫𑀸𑀦𑀫𑁆𑀧𑀺 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑁂𑀳𑀺. 𑀢𑁂𑀦𑀸𑀓𑀸𑀭𑁂𑀦𑀸𑀢𑀺 ‘‘𑀏𑀢𑀁 𑀫𑀫’’𑀦𑁆𑀢𑀺𑀆𑀤𑀺𑀆𑀓𑀸𑀭𑁂𑀦. 𑀦𑁂𑀯𑀢𑁆𑀣𑀺 𑀬𑀣𑀸𑀪𑀽𑀢𑀤𑀲𑁆𑀲𑀦𑀯𑀺𑀧𑀮𑁆𑀮𑀸𑀲𑀸𑀦𑀁 ¶ 𑀢𑀤𑀪𑀸𑀯𑀢𑁄. 𑀲𑀼𑀝𑁆𑀞𑀼 𑀧𑀲𑁆𑀲𑀦𑁆𑀢𑀲𑁆𑀲𑀸𑀢𑀺 𑀬𑀣𑀸 𑀧𑀼𑀦 𑀢𑀣𑀸 𑀦 𑀧𑀲𑁆𑀲𑀺𑀢𑀩𑁆𑀩𑀁, 𑀏𑀯𑀁 𑀲𑀼𑀝𑁆𑀞𑀼 𑀲𑀸𑀢𑀺𑀲𑀬𑀁 𑀧𑀲𑁆𑀲𑀦𑁆𑀢𑀲𑁆𑀲.

𑀦 𑀆𑀤𑀺𑀫𑀦𑀲𑀺𑀓𑀸𑀭𑁂𑀦𑁂𑀯 𑀤𑀺𑀝𑁆𑀞𑀺𑀧𑁆𑀧𑀳𑀸𑀦𑀁 𑀳𑁄𑀢𑀺, 𑀅𑀥𑀺𑀫𑀸𑀦𑀺𑀓𑀸𑀦𑀁 𑀧𑀦 𑀅𑀥𑀺𑀫𑀸𑀦𑀫𑀢𑁆𑀢𑀫𑁂𑀢𑀁 𑀤𑀲𑁆𑀲𑀦𑀁. 𑀫𑀕𑁆𑀕𑁂𑀦𑁂𑀯 𑀢𑀁 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀤𑀺𑀝𑁆𑀞𑀺𑀧𑁆𑀧𑀳𑀸𑀦𑀁 𑀤𑀲𑁆𑀲𑁂𑀢𑁆𑀯𑀸’’𑀢𑀺 𑀆𑀳. 𑀯𑀺𑀪𑀚𑀦𑁆𑀢𑁄𑀢𑀺 𑀅𑀥𑀺𑀫𑀸𑀦𑀺𑀓𑀸𑀦𑀁 𑀛𑀸𑀦𑀸𑀦𑀺 𑀅𑀲𑀮𑁆𑀮𑁂𑀔𑀪𑀸𑀯𑁂𑀦 𑀯𑀺𑀪𑀚𑀦𑁆𑀢𑁄. 𑀩𑀸𑀮𑀧𑀼𑀣𑀼𑀚𑁆𑀚𑀦𑀸𑀦𑀁 𑀦𑁂𑀯 𑀉𑀧𑁆𑀧𑀚𑁆𑀚𑀢𑀺 𑀅𑀓𑀸𑀭𑀓𑀪𑀸𑀯𑀢𑁄. 𑀦 𑀅𑀭𑀺𑀬𑀲𑀸𑀯𑀓𑀸𑀦𑀁 𑀧𑀳𑀻𑀦𑀸𑀥𑀺𑀫𑀸𑀦𑀧𑀘𑁆𑀘𑀬𑀢𑁆𑀢𑀸. 𑀦 𑀅𑀝𑁆𑀞𑀸𑀦𑀦𑀺𑀬𑁄𑀚𑀓𑁄 𑀲𑀧𑁆𑀧𑀸𑀬𑀓𑀫𑁆𑀫𑀝𑁆𑀞𑀸𑀦𑁂𑀬𑁂𑀯 𑀦𑀺𑀬𑁄𑀚𑀦𑀢𑁄.

𑀣𑁂𑀭𑁄 ‘‘𑀬𑀤𑀢𑁆𑀣𑀁 𑀲𑀗𑁆𑀖𑁄 𑀧𑀓𑁆𑀓𑁄𑀲𑀢𑀺, 𑀲𑁄 𑀅𑀢𑁆𑀣𑁄 𑀢𑀢𑁆𑀣 𑀯𑀸𑀲𑀻𑀦𑀁 𑀆𑀕𑀢𑀸𑀕𑀢𑀸𑀦𑀁 𑀇𑀥 𑀇𑀚𑁆𑀛𑀢𑀻’’𑀢𑀺 𑀢𑀁 𑀉𑀤𑀺𑀓𑁆𑀔𑀦𑁆𑀢𑁄 𑀲𑀗𑁆𑀖𑁂𑀦 𑀬𑀸𑀯𑀢𑀢𑀺𑀬𑀁 𑀧𑀳𑀺𑀢𑁄𑀧𑀺 𑀦 𑀕𑀢𑁄 𑀦 𑀅𑀕𑀸𑀭𑀯𑁂𑀦. 𑀢𑁂𑀦𑀸𑀳 ‘‘𑀓𑀺𑀫𑁂𑀢’’𑀦𑁆𑀢𑀺𑀆𑀤𑀺. 𑀧𑀡𑁆𑀟𑀺𑀢𑁄 𑀳𑀺 𑀢𑀢𑁆𑀣 𑀅𑀢𑁆𑀢𑀦𑁄 𑀓𑀺𑀘𑁆𑀘𑀫𑁂𑀯 𑀓𑀭𑁄𑀢𑀻𑀢𑀺 𑀅𑀜𑁆𑀜𑀢𑀭𑀁 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀁 𑀧𑀸𑀳𑁂𑀲𑀺. 𑀓𑀺𑀫𑁂𑀢𑀦𑁆𑀢𑀺 𑀲𑀗𑁆𑀖𑀲𑁆𑀲 𑀆𑀡𑀸𑀬 𑀅𑀓𑀭𑀡𑀁 𑀦𑀸𑀫 𑀓𑀺𑀫𑁂𑀢𑀦𑁆𑀢𑀺 𑀓𑀭𑀡𑁂 𑀆𑀤𑀭𑀁 𑀤𑀻𑀧𑁂𑀦𑁆𑀢𑁄 𑀏𑀯𑀫𑀸𑀳. 𑀲𑀝𑁆𑀞𑀺𑀯𑀲𑁆𑀲𑀸𑀢𑀻𑀢𑁄𑀢𑀺 𑀅𑀧𑁆𑀧𑀢𑁆𑀢𑁂 𑀧𑀢𑁆𑀢𑀲𑀜𑁆𑀜𑀻 𑀏𑀯 𑀲𑀝𑁆𑀞𑀺𑀯𑀲𑁆𑀲𑀸𑀢𑀻𑀢𑁄. 𑀬𑀲𑁆𑀫𑀸 𑀧𑁂𑀲𑀮𑀸 𑀧𑁂𑀲𑀮𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑀸𑀦𑀸𑀥𑀺𑀫𑀼𑀢𑁆𑀢𑀺𑀢𑀸𑀬, 𑀢𑀲𑁆𑀫𑀸 𑀣𑁂𑀭𑁄 ‘‘𑀲𑀸𑀥𑀸𑀯𑀼𑀲𑁄’’𑀢𑀺 𑀯𑀢𑁆𑀯𑀸 𑀳𑀢𑁆𑀣𑀺𑀫𑀸𑀧𑀦𑀸𑀤𑀺𑀁 𑀲𑀩𑁆𑀩𑀁 𑀅𑀓𑀸𑀲𑀺.

𑀢𑀸𑀤𑀺𑀲𑁄𑀯𑀸𑀢𑀺 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀢𑁆𑀣𑁂𑀭𑀲𑀤𑀺𑀲𑁄𑀯 𑀅𑀧𑁆𑀧𑀢𑁆𑀢𑁂 𑀧𑀢𑁆𑀢𑀲𑀜𑁆𑀜𑀻 𑀏𑀯 𑀲𑀝𑁆𑀞𑀺𑀯𑀲𑁆𑀲𑀸𑀢𑀻𑀢𑁄𑀢𑀺 𑀅𑀢𑁆𑀣𑁄. 𑀧𑀤𑀼𑀫𑀕𑀼𑀫𑁆𑀩𑀦𑁆𑀢𑀺 𑀓𑀫𑀮𑀲𑀡𑁆𑀟𑀁. 𑀧𑀸𑀲𑀸𑀤𑀁 𑀧𑀸𑀯𑀺𑀲𑀺 𑀯𑀺𑀲𑁆𑀲𑀝𑁆𑀞𑀁 𑀑𑀮𑁄𑀓𑀦𑁂𑀦𑀲𑁆𑀲 𑀧𑀼𑀣𑀼𑀚𑁆𑀚𑀦𑀪𑀸𑀯𑁄 𑀅𑀢𑁆𑀢𑀦𑀸𑀯 𑀧𑀜𑁆𑀜𑀸𑀬𑀺𑀲𑁆𑀲𑀢𑀻𑀢𑀺. 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑁂 𑀓𑀺𑀭 𑀣𑁂𑀭𑀸 𑀪𑀺𑀓𑁆𑀔𑀽 𑀢𑀤𑀸 ‘‘𑀲𑀓𑀘𑀺𑀢𑁆𑀢𑀁 𑀧𑀲𑀻𑀤𑀢𑀻’’𑀢𑀺 𑀯𑀘𑀦𑀁 𑀧𑀽𑀚𑁂𑀦𑁆𑀢𑀸 𑀓𑀸𑀮𑀲𑁆𑀲𑁂𑀯 𑀘𑁂𑀢𑀺𑀬𑀗𑁆𑀕𑀡𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀏𑀢𑁆𑀢𑀓𑀸𑀭𑀫𑁆𑀫𑀡𑀫𑁂𑀯 𑀩𑀼𑀤𑁆𑀥𑀸𑀭𑀫𑁆𑀫𑀡𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀢𑀣𑀸 𑀓𑀭𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀲𑁆𑀫𑀺𑀜𑁆𑀘 𑀲𑀫𑀬𑁂’’𑀢𑀺𑀆𑀤𑀺. ‘‘𑀥𑀫𑁆𑀫𑀤𑀺𑀦𑁆𑀦, 𑀇𑀥 𑀧𑀢𑁆𑀢𑀘𑀻𑀯𑀭𑀁 𑀞𑀧𑁂𑀢𑀻’’𑀢𑀺 𑀯𑀢𑁆𑀢𑀸𑀧𑀺 𑀧𑀝𑀺𑀲𑀦𑁆𑀣𑀸𑀭𑀯𑀲𑁂𑀦 𑀓𑀺𑀜𑁆𑀘𑀺 𑀧𑀼𑀘𑁆𑀙𑀺𑀢𑀸𑀧𑀺 𑀦𑀸𑀳𑁄𑀲𑀺. 𑀕𑀼𑀡𑀁 𑀚𑀸𑀦𑀸𑀢𑀻𑀢𑀺 𑀦𑀺𑀫𑀼𑀚𑁆𑀚𑀦𑀸𑀤𑀻𑀲𑀼 𑀯𑀺𑀯𑀭𑀤𑀸𑀦𑀸𑀤𑀺𑀦𑀸 𑀕𑀼𑀡𑀁 𑀚𑀸𑀦𑀸𑀢𑀺 𑀯𑀺𑀬. 𑀢𑀼𑀫𑁆𑀳𑁂 𑀧𑀦 𑀦 𑀚𑀸𑀦𑀺𑀢𑁆𑀣 𑀆𑀕𑀦𑁆𑀢𑀼𑀓𑀯𑀢𑁆𑀢𑀲𑁆𑀲𑀧𑀺 𑀅𑀓𑀭𑀡𑀢𑁄. 𑀲𑀢𑁆𑀣𑀼𑀆𑀡𑀸𑀯𑀺𑀮𑀗𑁆𑀖𑀺𑀦𑀻 𑀓𑀻𑀤𑀺𑀲𑀻 𑀲𑀸 𑀲𑀗𑁆𑀖𑀲𑁆𑀲 ¶ 𑀓𑀢𑀺𑀓𑀸? 𑀓𑀢𑀺𑀓𑀸 𑀘 𑀦𑀸𑀫 𑀲𑀺𑀓𑁆𑀔𑀸𑀧𑀤𑀸𑀯𑀺𑀭𑁄𑀥𑁂𑀦 𑀅𑀦𑀼𑀯𑀢𑁆𑀢𑁂𑀢𑀩𑁆𑀩𑀸, 𑀏𑀢𑁆𑀢𑀓𑀫𑁆𑀧𑀺 𑀅𑀚𑀸𑀦𑀦𑁆𑀢𑁂𑀳𑀺 𑀫𑁂 𑀲𑀁𑀯𑀸𑀲𑁄 𑀦𑀢𑁆𑀣𑀻𑀢𑀺 𑀆𑀓𑀸𑀲𑁂 𑀅𑀩𑁆𑀪𑀼𑀓𑁆𑀓𑀫𑀺.

𑀬𑀁 ¶ 𑀢𑀲𑁆𑀲 𑀏𑀯𑀫𑀲𑁆𑀲 𑀲𑀮𑁆𑀮𑁂𑀔𑁂𑀦 𑀯𑀺𑀳𑀭𑀸𑀫𑀻𑀢𑀺 𑀬𑁄 ‘‘𑀧𑀞𑀫𑀚𑁆𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑁄, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀁 ‘‘𑀧𑀞𑀫𑀚𑁆𑀛𑀸𑀦𑀲𑀗𑁆𑀔𑀸𑀢𑀁 𑀧𑀝𑀺𑀧𑀢𑁆𑀢𑀺𑀯𑀺𑀥𑀸𑀦𑀁 𑀓𑀺𑀮𑁂𑀲𑁂 𑀲𑀮𑁆𑀮𑁂𑀔𑀢𑀺, 𑀢𑁂𑀦 𑀲𑀮𑁆𑀮𑁂𑀔𑁂𑀦 𑀅𑀳𑀁 𑀯𑀺𑀳𑀭𑀸𑀫𑀻’’𑀢𑀺 𑀅𑀥𑀺𑀫𑀸𑀦𑀯𑀲𑁂𑀦 𑀏𑀯𑀫𑀲𑁆𑀲 𑀏𑀯𑀁 𑀪𑀯𑁂𑀬𑁆𑀬 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀻𑀢𑀺 𑀏𑀯𑀫𑁂𑀢𑁆𑀣 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀁 𑀦 𑀬𑀼𑀚𑁆𑀚𑀢𑀻𑀢𑀺 𑀢𑀁 𑀅𑀥𑀺𑀫𑀸𑀦𑀺𑀓𑀲𑁆𑀲 ‘‘𑀬𑀣𑀸𑀯𑀺𑀪𑀗𑁆𑀕𑀁 𑀧𑀞𑀫𑀚𑁆𑀛𑀸𑀦𑀁 𑀲𑀮𑁆𑀮𑁂𑀔𑁄’’𑀢𑀺 𑀧𑀭𑀺𑀯𑀺𑀢𑀓𑁆𑀓𑀺𑀢𑀁 𑀦 𑀬𑀼𑀚𑁆𑀚𑀢𑀺 𑀬𑀼𑀢𑁆𑀢𑀁 𑀦 𑀳𑁄𑀢𑀺. 𑀢𑁂𑀦𑀸𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀲𑀫𑁆𑀫𑀸 𑀲𑀩𑁆𑀩𑀲𑁄 𑀘 𑀓𑀺𑀮𑁂𑀲𑁂 𑀮𑀺𑀔𑀢𑀻𑀢𑀺 𑀲𑀮𑁆𑀮𑁂𑀔𑁄, 𑀅𑀭𑀺𑀬𑀫𑀕𑁆𑀕𑁄. 𑀢𑀤𑀼𑀧𑀸𑀬𑀯𑀺𑀧𑀲𑁆𑀲𑀦𑀸 𑀲𑀮𑁆𑀮𑁂𑀔𑀧𑀝𑀺𑀧𑀤𑀸. 𑀬𑀁 𑀧𑀦 𑀛𑀸𑀦𑀁 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀁, 𑀢𑀫𑁆𑀧𑀺 𑀛𑀸𑀦𑀁 𑀧𑀭𑀺𑀬𑀸𑀬𑁂𑀦 𑀫𑀕𑁆𑀕𑀧𑀸𑀤𑀓𑀁 𑀳𑁄𑀢𑀺𑀬𑁂𑀯. 𑀢𑁂𑀦𑀸𑀳 ‘‘𑀅𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀢𑁆𑀢𑀸’’𑀢𑀺𑀆𑀤𑀺.

𑀛𑀸𑀦𑀥𑀫𑁆𑀫𑀯𑀲𑁂𑀦𑀸𑀢𑀺 𑀯𑀺𑀢𑀓𑁆𑀓𑀸𑀤𑀺𑀧𑀜𑁆𑀘𑀓𑀚𑁆𑀛𑀸𑀦𑀥𑀫𑁆𑀫𑀯𑀲𑁂𑀦. 𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀅𑀦𑁂𑀓𑀯𑀸𑀭𑀁 𑀧𑀯𑀢𑁆𑀢𑀫𑀸𑀦𑀫𑁆𑀧𑀺 𑀛𑀸𑀦𑀁 𑀏𑀓𑀸𑀯𑀚𑁆𑀚𑀦𑀢𑀸𑀬 𑀏𑀓𑀯𑀻𑀣𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀏𑀓𑀸 𑀲𑀫𑀸𑀧𑀢𑁆𑀢𑀺 𑀏𑀯𑀸𑀢𑀺 ‘‘𑀧𑀼𑀦𑀧𑁆𑀧𑀼𑀦𑀁 𑀲𑀫𑀸𑀧𑀢𑁆𑀢𑀺𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀘𑀢𑁆𑀢𑀸𑀭𑀺 𑀅𑀭𑀽𑀧𑀚𑁆𑀛𑀸𑀦𑀸𑀦𑀺 𑀬𑀣𑀸𑀲𑀓𑀁 𑀏𑀓𑁂𑀓𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀦𑁆𑀢𑀻𑀢𑀺 𑀆𑀳 ‘‘𑀆𑀭𑀫𑁆𑀫𑀡𑀪𑁂𑀤𑀸𑀪𑀸𑀯𑀢𑁄’’𑀢𑀺. 𑀧𑀼𑀭𑀺𑀫𑀓𑀸𑀭𑀡𑀤𑁆𑀯𑀬𑀯𑀲𑁂𑀦𑁂𑀯𑀸𑀢𑀺 ‘‘𑀛𑀸𑀦𑀥𑀫𑁆𑀫𑀯𑀲𑁂𑀦, 𑀧𑀼𑀦𑀧𑁆𑀧𑀼𑀦𑀁 𑀲𑀫𑀸𑀧𑀢𑁆𑀢𑀺𑀯𑀲𑁂𑀦𑀸’’𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀓𑀸𑀭𑀡𑀤𑁆𑀯𑀬𑀯𑀲𑁂𑀦𑁂𑀯.

𑀢𑁂𑀲𑀁 𑀅𑀭𑀽𑀧𑀚𑁆𑀛𑀸𑀦𑀸𑀦𑀁 𑀓𑀺𑀮𑁂𑀲𑀧𑀭𑀺𑀴𑀸𑀳𑀸𑀪𑀸𑀯𑁂𑀦 𑀦𑀺𑀩𑁆𑀩𑀼𑀢𑀸𑀦𑀺 𑀅𑀗𑁆𑀕𑀸𑀦𑀺, 𑀪𑀸𑀯𑀦𑀸𑀯𑀺𑀲𑁂𑀲𑀯𑀲𑁂𑀦 𑀲𑀼𑀔𑀼𑀫𑀸𑀦𑀺 𑀆𑀭𑀫𑁆𑀫𑀡𑀸𑀦𑀺. 𑀢𑀲𑁆𑀫𑀸 𑀢𑀸𑀦𑀻𑀢𑀺 𑀢𑁂𑀲𑀁 𑀯𑀲𑁂𑀦 𑀢𑀸𑀦𑀺 𑀛𑀸𑀦𑀸𑀦𑀺 𑀲𑀦𑁆𑀢𑀸𑀦𑀺, 𑀢𑀲𑁆𑀫𑀸 ‘‘𑀲𑀦𑁆𑀢𑀸 𑀏𑀢𑁂 𑀯𑀺𑀳𑀸𑀭𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀁 𑀘𑀢𑀼𑀦𑁆𑀦𑀫𑁆𑀧𑀻𑀢𑀺 𑀘𑀢𑀼𑀦𑁆𑀦𑀫𑁆𑀧𑀺 𑀢𑁂𑀲𑀁 𑀅𑀭𑀽𑀧𑀚𑁆𑀛𑀸𑀦𑀸𑀦𑀁.

𑁮𑁩. 𑀲𑁄𑀢𑀺 𑀅𑀥𑀺𑀫𑀸𑀦𑀺𑀓𑁄 𑀪𑀺𑀓𑁆𑀔𑀼, 𑀅𑀜𑁆𑀜𑁄 𑀯𑀸 𑀇𑀢𑁄 𑀩𑀸𑀳𑀺𑀭𑀓𑁄 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀸𑀤𑀺𑀓𑁄 𑀦 𑀳𑀺 𑀲𑀫𑁆𑀫𑀲𑀢𑀺. 𑀢𑀢𑁆𑀣 𑀅𑀥𑀺𑀫𑀸𑀦𑀺𑀓𑁄 𑀅𑀧𑁆𑀧𑀢𑁆𑀢𑁂 𑀧𑀢𑁆𑀢𑀲𑀜𑁆𑀜𑀺𑀢𑀸𑀬 𑀦 𑀲𑀫𑁆𑀫𑀲𑀢𑀺, 𑀇𑀢𑀭𑁄 𑀅𑀯𑀺𑀲𑀬𑀢𑀸𑀬. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀲𑀮𑁆𑀮𑁂𑀔𑀯𑀢𑁆𑀣𑀼𑀲𑁆𑀫𑀺𑀁, 𑀅𑀯𑀺𑀳𑀺𑀁𑀲𑀓𑀢𑀸𑀤𑀻𑀳𑀺 𑀘𑀢𑀼𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺.

𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀸𑀫 𑀓𑀺𑀮𑁂𑀲𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀯𑀢𑁆𑀢𑀸 𑀉𑀢𑁆𑀢𑀭𑀼𑀢𑁆𑀢𑀭𑀺 𑀲𑀦𑁆𑀢𑀧𑀡𑀻𑀢𑀸 𑀥𑀫𑁆𑀫𑀸, 𑀦 𑀢𑀣𑀸 𑀮𑁄𑀓𑀺𑀬𑀸 𑀅𑀯𑀺𑀳𑀺𑀁𑀲𑀸𑀤𑀬𑁄. 𑀢𑀢𑁆𑀣 𑀓𑀣𑀁 𑀅𑀯𑀺𑀳𑀺𑀁𑀲𑀸𑀤𑀬𑁄 𑀏𑀯 𑀲𑀮𑁆𑀮𑁂𑀔𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀦 𑀇𑀢𑀭𑀸𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 𑀘𑁄𑀤𑀓𑁄 ‘‘𑀓𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 𑀓𑀸𑀫𑀁 𑀲𑀫𑀸𑀧𑀢𑁆𑀢𑀺𑀬𑁄 ¶ ¶ 𑀲𑀦𑁆𑀢𑀧𑀡𑀻𑀢𑀲𑀪𑀸𑀯𑀸, 𑀯𑀝𑁆𑀝𑀧𑀸𑀤𑀓𑀢𑀸𑀬 𑀧𑀦 𑀓𑀺𑀮𑁂𑀲𑀸𑀦𑀁 𑀲𑀮𑁆𑀮𑁂𑀔𑀧𑀝𑀺𑀧𑀤𑀸 𑀦 𑀳𑁄𑀦𑁆𑀢𑀺, 𑀅𑀯𑀺𑀳𑀺𑀁𑀲𑀸𑀤𑀬𑁄 𑀧𑀦 𑀯𑀺𑀯𑀝𑁆𑀝𑀧𑀸𑀤𑀓𑀸 𑀲𑀮𑁆𑀮𑁂𑀔𑀧𑀝𑀺𑀧𑀤𑀸𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀮𑁄𑀓𑀼𑀢𑁆𑀢𑀭𑀧𑀸𑀤𑀓𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳. 𑀇𑀫𑀺𑀦𑀸𑀬𑁂𑀯 𑀅𑀝𑁆𑀞𑀲𑀫𑀸𑀧𑀢𑁆𑀢𑀻𑀳𑀺 𑀅𑀯𑀺𑀳𑀺𑀁𑀲𑀸𑀤𑀻𑀦𑀁 𑀯𑀺𑀲𑁂𑀲𑀤𑀻𑀧𑀓𑁂𑀦 𑀲𑀼𑀢𑁆𑀢𑁂𑀦 𑀬𑀣𑀸 𑀫𑀳𑀧𑁆𑀨𑀮𑀢𑀭𑀁 𑀳𑁄𑀢𑀺, 𑀢𑀁 𑀧𑀓𑀸𑀭𑀚𑀸𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀜𑁆𑀳𑀺 𑀤𑀓𑁆𑀔𑀺𑀡𑁂𑀬𑁆𑀬𑀢𑀭𑀢𑀸𑀬 𑀤𑀓𑁆𑀔𑀺𑀡𑀸𑀬 𑀫𑀳𑀧𑁆𑀨𑀮𑀢𑀭𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀦𑀼 𑀢𑀢𑁆𑀣 ‘‘𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄’’𑀢𑀺 𑀆𑀕𑀢𑀁, 𑀦 ‘‘𑀲𑀭𑀡𑀕𑀢𑁄’’𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀲𑀭𑀡𑀕𑀫𑀦𑀢𑁄 𑀧𑀝𑁆𑀞𑀸𑀬𑀸’’𑀢𑀺𑀆𑀤𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁩.𑁩𑁭𑁯) ‘‘𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀢𑀺𑀲𑀭𑀡𑀁 𑀕𑀢𑁄 𑀉𑀧𑀸𑀲𑀓𑁄𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄 𑀦𑀸𑀫𑀸’’𑀢𑀺. 𑀬𑁄 𑀳𑀺 𑀯𑀝𑁆𑀝𑀤𑀼𑀓𑁆𑀔𑀁 𑀲𑀫𑀢𑀺𑀓𑁆𑀓𑀫𑀺𑀢𑀼𑀓𑀸𑀫𑁄 𑀧𑀲𑀦𑁆𑀦𑀘𑀺𑀢𑁆𑀢𑁄 𑀭𑀢𑀦𑀢𑁆𑀢𑀬𑀁 𑀲𑀭𑀡𑀁 𑀕𑀘𑁆𑀙𑀢𑀺, 𑀢𑀲𑁆𑀲 𑀢𑀁 𑀅𑀥𑀺𑀲𑀻𑀮𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑁄 𑀳𑀼𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀤𑀲𑁆𑀲𑀦𑀫𑀕𑁆𑀕𑀸𑀥𑀺𑀕𑀫𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀸𑀢𑀺.

𑀯𑀺𑀳𑀺𑀁𑀲𑀸𑀤𑀺𑀯𑀢𑁆𑀣𑀼𑀦𑁆𑀢𑀺 𑀬𑀤𑁂𑀢𑀁 𑀯𑀺𑀳𑀺𑀁𑀲𑀸𑀤𑀻𑀦𑀁 𑀯𑀢𑁆𑀣𑀼𑀁 𑀯𑀤𑀸𑀫, 𑀇𑀫𑀲𑁆𑀫𑀺𑀁 𑀯𑀺𑀳𑀺𑀁𑀲𑀸𑀤𑀺𑀯𑀢𑁆𑀣𑀼𑀲𑁆𑀫𑀺𑀁. 𑀅𑀦𑁆𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀜𑁆𑀘 𑀫𑀺𑀘𑁆𑀙𑀢𑁆𑀢𑀸𑀦𑀁 𑀆𑀤𑀺𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀜𑁆𑀘𑀸𑀢𑀺 𑀇𑀤𑀁 𑀤𑁂𑀲𑀦𑀸𑀓𑁆𑀓𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀫𑀺𑀲𑁆𑀲𑁂𑀢𑁆𑀯𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀪𑀸𑀯𑀲𑀸𑀫𑀜𑁆𑀜𑁂𑀦 𑀏𑀓𑀚𑁆𑀛𑀁 𑀓𑀢𑁆𑀯𑀸. 𑀢𑀣𑀸𑀢𑀺 𑀇𑀫𑀺𑀦𑀸 𑀬𑀣𑀸 𑀓𑀫𑁆𑀫𑀧𑀣𑀫𑀺𑀘𑁆𑀙𑀢𑁆𑀢𑀸𑀦𑀁 𑀅𑀦𑁆𑀢𑁂 𑀆𑀤𑀺𑀫𑁆𑀳𑀺 𑀘 𑀯𑀼𑀢𑁆𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀫𑀺𑀲𑁆𑀲𑁂𑀢𑁆𑀯𑀸 𑀏𑀓𑀚𑁆𑀛𑀁 𑀯𑀼𑀢𑁆𑀢𑀁, 𑀢𑀣𑀸 𑀢𑁂𑀲𑀁 𑀅𑀦𑁆𑀢𑁂 𑀯𑀼𑀢𑁆𑀢𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀇𑀫𑀫𑀢𑁆𑀣𑀁 𑀉𑀧𑀲𑀁𑀳𑀭𑀢𑀺.

𑀧𑀸𑀡𑀦𑁆𑀢𑀺 𑀯𑁄𑀳𑀸𑀭𑀢𑁄 𑀲𑀢𑁆𑀢𑀁, 𑀧𑀭𑀫𑀢𑁆𑀣𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀅𑀢𑀺𑀧𑀸𑀢𑁂𑀦𑁆𑀢𑀺 𑀲𑀭𑀲𑁂𑀦𑁂𑀯 𑀧𑀢𑀦𑀲𑀪𑀸𑀯𑀁 𑀅𑀢𑀺𑀘𑁆𑀘 𑀅𑀦𑁆𑀢𑀭𑀸 𑀏𑀯 𑀧𑀸𑀢𑁂𑀦𑁆𑀢𑀺, 𑀅𑀢𑀺𑀓𑁆𑀓𑀫𑁆𑀫 𑀯𑀸 𑀲𑀢𑁆𑀣𑀸𑀤𑀻𑀳𑀺 𑀅𑀪𑀺𑀪𑀯𑀺𑀢𑁆𑀯𑀸 𑀧𑀸𑀢𑁂𑀦𑁆𑀢𑀺. 𑀅𑀤𑀺𑀦𑁆𑀦𑀦𑁆𑀢𑀺 𑀧𑀭𑀲𑀦𑁆𑀢𑀓𑀁. 𑀆𑀤𑀺𑀬𑀦𑁆𑀢𑀻𑀢𑀺 𑀕𑀡𑁆𑀳𑀦𑁆𑀢𑀺. 𑀲𑀮𑁆𑀮𑁂𑀔𑀢𑀻𑀢𑀺 𑀲𑀫𑀁 𑀮𑁂𑀔𑀢𑀺, 𑀧𑀚𑀳𑀢𑀻𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀧𑀣𑀓𑀣𑀸 𑀏𑀲𑀸𑀢𑀺 ‘‘𑀅𑀢𑁆𑀣𑀪𑀜𑁆𑀚𑀦𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀺𑀬𑀲𑀼𑀜𑁆𑀜𑀓𑀭𑀡𑀢𑁄 𑀧𑀺𑀲𑀼𑀡𑀸, 𑀧𑀺𑀲𑀢𑀺 𑀧𑀭𑁂 𑀲𑀢𑁆𑀢𑁂 𑀳𑀺𑀁𑀲𑀢𑀻𑀢𑀺 𑀯𑀸 𑀧𑀺𑀲𑀼𑀡𑀸. 𑀨𑀭𑀼𑀲𑀸𑀢𑀺 𑀮𑀽𑀔𑀸, 𑀦𑀺𑀝𑁆𑀞𑀼𑀭𑀸𑀢𑀺 𑀅𑀢𑁆𑀣𑁄. 𑀦𑀺𑀭𑀢𑁆𑀣𑀓𑀦𑁆𑀢𑀺 𑀅𑀢𑁆𑀣𑀭𑀳𑀺𑀢𑀁 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀳𑀺𑀢𑀯𑀺𑀦𑀺𑀫𑀼𑀢𑁆𑀢𑀁. 𑀫𑀺𑀘𑁆𑀙𑀸𑀢𑀺 𑀯𑀺𑀧𑀭𑀻𑀢𑀸 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀸. 𑀧𑀸𑀧𑀺𑀓𑀸𑀢𑀺 𑀮𑀸𑀫𑀺𑀓𑀸. 𑀏𑀓𑀦𑁆𑀢𑀸𑀓𑀼𑀲𑀮𑀢𑀸𑀬 𑀯𑀺𑀜𑁆𑀜𑀽𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀕𑀭𑀳𑀺𑀢𑀸. 𑀦𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺 𑀆𑀤𑀺𑀯𑀢𑁆𑀣𑀼𑀓𑀸𑀬𑀸𑀢𑀺 𑀤𑀲𑀯𑀢𑁆𑀣𑀼𑀓𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀫𑀸𑀳. 𑀦𑀢𑁆𑀣𑀺𑀓𑀪𑀸𑀯𑀸𑀪𑀺𑀦𑀺𑀯𑁂𑀲𑀦𑀯𑀲𑁂𑀦 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀺𑀬𑁂𑀯𑀲𑁆𑀲𑀸 𑀓𑀫𑁆𑀫𑀧𑀣𑀧𑀭𑀺𑀬𑀸𑀧𑀦𑁆𑀦𑀢𑀸. ‘‘𑀭𑀽𑀧𑀁 𑀅𑀢𑁆𑀢𑀸’’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀅𑀢𑁆𑀢𑀤𑀺𑀝𑁆𑀞𑀺 ¶ 𑀫𑀕𑁆𑀕𑀦𑁆𑀢𑀭𑀸𑀬𑀓𑀭𑀢𑁆𑀢𑀸 𑀅𑀦𑀺𑀬𑁆𑀬𑀸𑀦𑀺𑀓𑀤𑀺𑀝𑁆𑀞𑀺. 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸 𑀏𑀯 𑀳𑀺𑀲𑁆𑀲𑀸 𑀫𑀺𑀘𑁆𑀙𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀢𑀸. 𑀲𑀫𑁆𑀫𑀸𑀢𑀺 𑀅𑀯𑀺𑀧𑀭𑀻𑀢𑀸, 𑀢𑀢𑁄 𑀏𑀯 𑀲𑁄𑀪𑀦𑀸 𑀲𑀼𑀦𑁆𑀤𑀭𑀸, 𑀩𑀼𑀤𑁆𑀥𑀸𑀤𑀻𑀳𑀺 𑀧𑀲𑀢𑁆𑀣𑀢𑁆𑀢𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸. 𑀲𑁂𑀲𑀫𑁂𑀢𑁆𑀣 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀁 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀅𑀲𑀼𑀪𑀸𑀤𑀻𑀲𑀼 ¶ 𑀲𑀼𑀪𑀸𑀤𑀺𑀆𑀓𑀸𑀭𑀕𑁆𑀕𑀳𑀡𑀢𑁄 𑀅𑀬𑀸𑀣𑀸𑀯𑀅𑀦𑀺𑀬𑁆𑀬𑀸𑀦𑀺𑀓𑀸 𑀅𑀬𑁄𑀦𑀺𑀲𑁄 𑀉𑀧𑁆𑀧𑀢𑁆𑀢𑀺𑀬𑀸. 𑀅𑀓𑀼𑀲𑀮𑀸𑀢𑀺 𑀅𑀬𑀸𑀣𑀸𑀯𑀸𑀅𑀦𑀺𑀬𑁆𑀬𑀸𑀦𑀺𑀓𑀸 𑀅𑀓𑀼𑀲𑀮𑀸 𑀲𑀗𑁆𑀓𑀧𑁆𑀧𑀸. 𑀏𑀲 𑀦𑀬𑁄𑀢𑀺 𑀇𑀫𑀺𑀦𑀸 ‘‘𑀅𑀬𑀸𑀣𑀸𑀯𑀸 𑀅𑀦𑀺𑀬𑁆𑀬𑀸𑀦𑀺𑀓𑀸 𑀅𑀓𑀼𑀲𑀮𑀸 𑀯𑀸𑀘𑀸’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀢𑀢𑁆𑀣 𑀅𑀬𑀸𑀣𑀸𑀯𑀸𑀤𑀺𑀅𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀯𑀸𑀘𑀸𑀢𑀺 𑀘𑁂𑀢𑀦𑀸 𑀅𑀥𑀺𑀧𑁆𑀧𑁂𑀢𑀸, 𑀢𑀣𑀸 𑀓𑀫𑁆𑀫𑀦𑁆𑀢𑀸𑀚𑀻𑀯𑀸𑀲𑀢𑀺 𑀘. 𑀬𑁂𑀪𑀼𑀬𑁆𑀬𑁂𑀦 𑀅𑀢𑀻𑀢𑀸𑀦𑀼𑀲𑁆𑀲𑀭𑀡𑀯𑀲𑁂𑀦 𑀧𑀯𑀢𑁆𑀢𑀺𑀢𑁄 ‘‘𑀅𑀢𑀻𑀢𑀁 𑀘𑀺𑀦𑁆𑀢𑀬𑀢𑁄’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀮𑁄𑀓𑁂 𑀏𑀯𑀁 𑀯𑀤𑀦𑁆𑀢𑀺 ‘‘𑀬𑀁 𑀫𑁂 𑀧𑀳𑀽𑀢𑀁 𑀥𑀦𑀁 𑀅𑀳𑁄𑀲𑀺, 𑀢𑀁 𑀧𑀫𑀸𑀤𑀯𑀲𑁂𑀦 𑀧𑀦 𑀩𑀳𑀼𑀁 𑀔𑀻𑀡’’𑀦𑁆𑀢𑀺. 𑀲𑀢𑀺𑀧𑀢𑀺𑀭𑀽𑀧𑀓𑁂𑀦𑀸𑀢𑀺 ‘‘𑀘𑀺𑀭𑀓𑀢𑀫𑁆𑀧𑀺 𑀘𑀺𑀭𑀪𑀸𑀲𑀺𑀢𑀫𑁆𑀧𑀺 𑀲𑀭𑀺𑀢𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀲𑀢𑀼𑀧𑁆𑀧𑀢𑁆𑀢𑀺𑀧𑀢𑀺𑀭𑀽𑀧𑀓𑁂𑀦. 𑀉𑀧𑁆𑀧𑀢𑁆𑀢𑀺𑀦𑁆𑀢𑀺 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀁. 𑀢𑀣𑀸𑀧𑀯𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀳𑀺 𑀫𑀺𑀘𑁆𑀙𑀸𑀲𑀢𑀺. 𑀲𑀸 𑀧𑀦 𑀓𑁄𑀥𑀯𑀲𑁂𑀦 𑀯𑀸 ‘‘𑀅𑀓𑁆𑀓𑁄𑀘𑁆𑀙𑀺 𑀫𑀁 𑀅𑀯𑀥𑀺 𑀫’’𑀦𑁆𑀢𑀺𑀆𑀤𑀺𑀦𑀸 (𑀥. 𑀧. 𑁩) 𑀉𑀧𑀦𑀬𑁆𑀳𑀦𑁆𑀢𑀲𑁆𑀲, 𑀭𑀸𑀕𑀯𑀲𑁂𑀦 𑀯𑀸 ‘‘𑀬𑀸𑀦𑀺𑀲𑁆𑀲 𑀢𑀸𑀦𑀺 𑀧𑀼𑀩𑁆𑀩𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀳𑀲𑀺𑀢𑀮𑀧𑀺𑀢𑀓𑀻𑀴𑀺𑀢𑀸𑀦𑀺 𑀅𑀦𑀼𑀲𑁆𑀲𑀭𑀢𑀻’’𑀢𑀺 (𑀅. 𑀦𑀺. 𑁭.𑁫𑁦) 𑀯𑀼𑀢𑁆𑀢𑀦𑀬𑁂𑀦 𑀲𑀼𑀪𑀢𑁄 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲, 𑀤𑀺𑀝𑁆𑀞𑀺𑀯𑀲𑁂𑀦 𑀯𑀸 ‘‘𑀲𑁄 𑀔𑁄 𑀧𑀦 𑀫𑁂 𑀅𑀢𑁆𑀢𑁄 𑀦𑀺𑀘𑁆𑀘𑁄 𑀥𑀼𑀯𑁄’’𑀢𑀺𑀆𑀤𑀺𑀦𑀸 𑀫𑀺𑀘𑁆𑀙𑀸𑀅𑀪𑀺𑀦𑀺𑀯𑀺𑀲𑀦𑁆𑀢𑀲𑁆𑀲𑀸𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀉𑀧𑀸𑀬𑀘𑀺𑀦𑁆𑀢𑀸𑀯𑀲𑁂𑀦𑀸𑀢𑀺 𑀔𑀺𑀧𑁆𑀧𑀚𑀸𑀮𑀓𑀼𑀫𑀺𑀦𑀸𑀤𑀼𑀳𑀮𑀸𑀤𑀺𑀉𑀧𑀓𑀭𑀡𑀲𑀁𑀯𑀺𑀥𑀸𑀦𑀸𑀤𑀻𑀲𑀼 𑀬𑀼𑀢𑁆𑀢𑀺𑀘𑀺𑀦𑁆𑀢𑀦𑀸𑀤𑀺𑀯𑀲𑁂𑀦 𑀧𑀸𑀧𑀁 𑀓𑀢𑁆𑀯𑀸 𑀯𑀺𑀧𑁆𑀧𑀝𑀺𑀲𑀸𑀭𑀦𑀺𑀫𑀺𑀢𑁆𑀢𑀁, ‘‘𑀲𑀼𑀓𑀢𑀁 𑀫𑀬𑀸’’𑀢𑀺 𑀧𑀸𑀫𑁄𑀚𑁆𑀚𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀓𑀸𑀭𑁂𑀦 𑀫𑁄𑀳𑁄 𑀅𑀜𑁆𑀜𑀸𑀡𑀁. 𑀢𑀢𑁆𑀣 𑀧𑀦 ‘‘𑀅𑀲𑀺𑀯𑁂 𑀲𑀺𑀯𑀸’’𑀢𑀺 𑀯𑁄𑀳𑀸𑀭𑁄 𑀯𑀺𑀬 𑀜𑀸𑀡𑀯𑁄𑀳𑀸𑀭𑁄. 𑀫𑀺𑀘𑁆𑀙𑀸𑀲𑀪𑀸𑀯𑀢𑁆𑀢𑀸 𑀧𑀦 𑀫𑀺𑀘𑁆𑀙𑀸𑀜𑀸𑀡𑀁𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀏𑀓𑀽𑀦𑀯𑀻𑀲𑀢𑀺𑀪𑁂𑀤𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀲𑀫𑁆𑀫𑀸 𑀧𑁂𑀓𑁆𑀔𑀺𑀢𑀢𑁆𑀢𑀸 𑀲𑀫𑁆𑀫𑀸𑀜𑀸𑀡𑀁 𑀯𑀼𑀘𑁆𑀘𑀢𑀺, 𑀇𑀢𑀭𑀁 𑀧𑀦 𑀛𑀸𑀦𑀸𑀤𑀺𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸𑀯 𑀲𑀗𑁆𑀕𑀬𑁆𑀳𑀢𑀺. 𑀭𑀽𑀧𑀸𑀭𑀽𑀧𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀢𑀸𑀫𑀢𑁆𑀢𑁂𑀦 𑀯𑀝𑁆𑀝𑀢𑁄 𑀅𑀯𑀺𑀫𑀼𑀢𑁆𑀢𑀸𑀬𑁂𑀯 𑀲𑀫𑀸𑀦𑀸 ‘‘𑀯𑀺𑀫𑀼𑀢𑁆𑀢𑀸 𑀫𑀬’’𑀦𑁆𑀢𑀺 𑀏𑀯𑀁𑀲𑀜𑁆𑀜𑀺𑀦𑁄. 𑀧𑀓𑀢𑀺𑀧𑀼𑀭𑀺𑀲𑀦𑁆𑀢𑀭𑀜𑀸𑀡𑀲𑀗𑁆𑀔𑀸𑀢𑀸𑀬𑀁, 𑀕𑀼𑀡𑀯𑀺𑀬𑀼𑀢𑁆𑀢𑀲𑁆𑀲 𑀅𑀢𑁆𑀢𑀦𑁄 𑀲𑀓𑀢𑁆𑀢𑀦𑀺 𑀅𑀯𑀝𑁆𑀞𑀸𑀦𑀲𑀗𑁆𑀔𑀸𑀢𑀸𑀬𑀁, 𑀅𑀢𑁆𑀢𑀦𑁄 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀲𑀮𑁄𑀓𑀢𑀸 𑀢𑀲𑁆𑀲 𑀲𑀫𑀻𑀧𑀢𑀸𑀲𑀁𑀬𑀼𑀚𑁆𑀚𑀦𑀲𑀗𑁆𑀔𑀸𑀢𑀸𑀬𑀁 ¶ 𑀯𑀸 𑀅𑀯𑀺𑀫𑀼𑀢𑁆𑀢𑀺𑀬𑀁 𑀯𑀺𑀫𑀼𑀢𑁆𑀢𑀺𑀲𑀜𑁆𑀜𑀺𑀦𑁄. 𑀏𑀓𑀦𑁆𑀢𑀸𑀓𑀼𑀲𑀮𑀢𑀸𑀬 𑀳𑀻𑀦𑀢𑁆𑀢𑀸 𑀧𑀸𑀧𑀺𑀓𑀸. 𑀅𑀬𑀸𑀣𑀸𑀯𑀢𑀸𑀬 𑀯𑀺𑀧𑀭𑀻𑀢𑀸. 𑀬𑀣𑀸𑀯𑀼𑀢𑁆𑀢𑁂𑀦𑀸𑀢𑀺 ‘‘𑀅𑀯𑀺𑀫𑀼𑀢𑁆𑀢𑀸𑀬𑁂𑀯 𑀲𑀫𑀸𑀦𑀸’’𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. ‘‘𑀫𑀬𑀫𑁂𑀢𑁆𑀣 𑀲𑀫𑁆𑀫𑀸𑀤𑀺𑀝𑁆𑀞𑀺 𑀪𑀯𑀺𑀲𑁆𑀲𑀸𑀫𑀸’’𑀢𑀺𑀆𑀤𑀻𑀲𑀼 𑀨𑀮𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀺𑀧𑀺 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀧𑀓𑁆𑀔𑀺𑀓𑀸𑀦𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀨𑀮𑀲𑀫𑁆𑀧𑀬𑀼𑀢𑁆𑀢𑀸𑀦𑀺…𑀧𑁂… 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑁂𑀧𑀺 𑀧𑀦 𑀨𑀮𑀥𑀫𑁆𑀫𑁂 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀲𑀗𑁆𑀕𑀳𑀢𑁄 ‘‘𑀯𑀺𑀫𑀼𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁂 𑀦 𑀓𑁄𑀘𑀺 𑀯𑀺𑀭𑁄𑀥𑁄. 𑀏𑀢𑁆𑀣 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀲𑀗𑁆𑀔𑀸𑀢𑁂 𑀲𑀮𑁆𑀮𑁂𑀔𑀯𑀢𑁆𑀣𑀼𑀫𑁆𑀳𑀺.

𑀬𑀤𑀺 𑀦𑀻𑀯𑀭𑀡𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀢𑀲𑁆𑀫𑀸 𑀢𑀻𑀡𑁂𑀯 𑀯𑀼𑀢𑁆𑀢𑀸𑀦𑀻𑀢𑀺 𑀆𑀳 ‘‘𑀅𑀪𑀺𑀚𑁆𑀛𑀸𑀮𑀽’’𑀢𑀺𑀆𑀤𑀺. 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀢𑁆𑀢𑀸 𑀣𑀺𑀦𑀫𑀺𑀤𑁆𑀥𑀧𑀭𑀺𑀬𑀼𑀝𑁆𑀞𑀺𑀢𑀸. 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀅𑀢𑁆𑀣𑀺𑀢𑀸𑀬 𑀉𑀤𑁆𑀥𑀢𑀸 𑀦𑀸𑀫 𑀳𑁄𑀦𑁆𑀢𑀺, 𑀲𑁄 𑀥𑀫𑁆𑀫𑁄 𑀉𑀤𑁆𑀥𑀘𑁆𑀘𑀦𑁆𑀢𑀺 𑀆𑀳 ‘‘𑀉𑀤𑁆𑀤𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀉𑀤𑁆𑀥𑀢𑀸’’𑀢𑀺. 𑀯𑀺𑀘𑀺𑀦𑀦𑁆𑀢𑀸𑀢𑀺 𑀥𑀫𑁆𑀫𑁄𑀢𑀺 𑀯𑀸 𑀅𑀥𑀫𑁆𑀫𑁄𑀢𑀺 𑀯𑀸 ¶ 𑀆𑀤𑀺𑀦𑀸 𑀬𑀁 𑀓𑀺𑀜𑁆𑀘𑀺 𑀲𑀪𑀸𑀯𑀁 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑀸. 𑀉𑀧𑀦𑀸𑀳𑀦𑀲𑀻𑀮𑀸𑀢𑀺 𑀧𑀭𑀲𑁆𑀲 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀅𑀦𑀼𑀩𑀦𑁆𑀥𑀦𑀲𑀻𑀮𑀸. 𑀇𑀲𑁆𑀲𑀦𑁆𑀢𑀻𑀢𑀺 𑀉𑀲𑀽𑀬𑀦𑁆𑀢𑀺. 𑀲𑀞𑀬𑀦𑁆𑀢𑀻𑀢𑀺 𑀲𑀞𑀸 𑀅𑀜𑁆𑀜𑀣𑀸 𑀅𑀢𑁆𑀢𑀸𑀦𑀁 𑀅𑀜𑁆𑀜𑀣𑀸 𑀧𑀯𑁂𑀤𑀦𑀓𑀸. 𑀢𑁂 𑀧𑀦 𑀬𑀲𑁆𑀫𑀸 𑀦 𑀬𑀣𑀸𑀪𑀽𑀢𑀯𑀸𑀤𑀺𑀦𑁄, 𑀢𑀲𑁆𑀫𑀸 𑀆𑀳 ‘‘𑀦 𑀲𑀫𑁆𑀫𑀸 𑀪𑀸𑀲𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀯𑀼𑀢𑁆𑀢𑀧𑀘𑁆𑀘𑀦𑀻𑀓𑀦𑀬𑁂𑀦𑀸𑀢𑀺 ‘‘𑀦 𑀓𑁄𑀥𑀦𑀸 𑀅𑀓𑁆𑀓𑁄𑀥𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀅𑀢𑁆𑀣𑀧𑀝𑀺𑀧𑀓𑁆𑀔𑀦𑀬𑁂𑀦.

𑀤𑀼𑀓𑁆𑀔𑀁 𑀯𑀘𑁄 𑀏𑀢𑁂𑀲𑀼 𑀯𑀺𑀧𑁆𑀧𑀝𑀺𑀓𑀽𑀮𑀕𑁆𑀕𑀸𑀳𑀺𑀢𑀸𑀬 𑀯𑀺𑀧𑀘𑁆𑀘𑀦𑀻𑀓𑀕𑀸𑀳𑁂𑀲𑀽𑀢𑀺 𑀤𑀼𑀩𑁆𑀩𑀘𑀸. 𑀢𑁂 𑀧𑀦 𑀯𑀘𑀦𑀓𑁆𑀔𑀫𑀸 𑀦 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀯𑀢𑁆𑀢𑀼𑀁 𑀤𑀼𑀓𑁆𑀔𑀸’’𑀢𑀺𑀆𑀤𑀺. 𑀳𑀻𑀦𑀸𑀘𑀸𑀭𑀢𑀸𑀬 𑀤𑀼𑀓𑁆𑀔𑀲𑁆𑀲 𑀯𑀸 𑀲𑀫𑁆𑀧𑀸𑀧𑀓𑀢𑀸𑀬 𑀧𑀸𑀧𑀓𑀸. 𑀅𑀲𑀤𑁆𑀥𑀫𑁆𑀫𑀯𑀲𑁂𑀦𑀸𑀢𑀺 𑀅𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀯𑀲𑁂𑀦. 𑀅𑀢𑁆𑀢𑀦𑀸 𑀯𑀺𑀲𑁂𑀲𑀺𑀢𑀩𑁆𑀩𑀯𑀲𑁂𑀦 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀆𑀤𑀻𑀦𑀁 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀸𑀤𑀺𑀪𑀸𑀯𑁄 𑀯𑀺𑀬 𑀅𑀲𑁆𑀲𑀤𑁆𑀥𑀺𑀬𑀸𑀤𑀺𑀅𑀲𑀤𑁆𑀥𑀫𑁆𑀫𑀲𑀫𑀦𑁆𑀦𑀸𑀕𑀫𑁂𑀦𑀅𑀲𑀢𑀁 𑀅𑀲𑀧𑁆𑀧𑀼𑀭𑀺𑀲𑀸𑀦𑀁 𑀥𑀫𑁆𑀫𑀸𑀦𑀦𑁆𑀢𑀺 𑀢𑀸𑀦𑀺𑀬𑁂𑀯 𑀅𑀲𑁆𑀲𑀤𑁆𑀥𑀺𑀬𑀸𑀤𑀻𑀦𑀺 𑀅𑀲𑀤𑁆𑀥𑀫𑁆𑀫𑀸 𑀦𑀸𑀫, 𑀢𑁂𑀲𑀁 𑀯𑀲𑁂𑀦𑀸𑀳 ‘‘𑀲𑀤𑁆𑀥𑀸 𑀏𑀢𑁂𑀲𑀁 𑀦𑀢𑁆𑀣𑀻’’𑀢𑀺 𑀬𑀣𑀸 𑀢𑀁 ‘‘𑀤𑀼𑀧𑁆𑀧𑀜𑁆𑀜𑀸’’𑀢𑀺. 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺 𑀅𑀧𑁆𑀧𑀁 𑀲𑀼𑀢𑀁 𑀏𑀢𑁂𑀲𑀦𑁆𑀢𑀺 𑀅𑀧𑁆𑀧𑀲𑁆𑀲𑀼𑀢𑀸, 𑀲𑀼𑀢𑁂𑀦 𑀅𑀦𑀼𑀧𑀧𑀦𑁆𑀦𑀸. 𑀦𑀢𑁆𑀣𑀻𑀢𑀺 𑀕𑀳𑁂𑀢𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀅𑀪𑀸𑀯𑀢𑁆𑀣𑁄 𑀅𑀬𑀁 𑀅𑀧𑁆𑀧-𑀲𑀤𑁆𑀤𑁄 ‘‘𑀅𑀧𑁆𑀧𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁧𑁦.𑁧𑁧) 𑀯𑀺𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀸𑀭𑀫𑁆𑀪𑀦𑀢𑁄 𑀓𑀼𑀘𑁆𑀙𑀺𑀢𑀸 𑀕𑀸𑀭𑀬𑁆𑀳𑀸 𑀲𑀻𑀤𑀦𑁆𑀢𑀺 𑀑𑀲𑀻𑀤𑀦𑁆𑀢𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑁂𑀢𑀺 𑀓𑀼𑀲𑀻𑀢𑀸 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸. 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬 𑀆𑀭𑀤𑁆𑀥𑀁 𑀧𑀕𑁆𑀕𑀳𑀺𑀢𑀁 𑀯𑀻𑀭𑀺𑀬𑀁 𑀏𑀢𑁂𑀲𑀦𑁆𑀢𑀺 𑀆𑀭𑀤𑁆𑀥𑀯𑀻𑀭𑀺𑀬𑀸. 𑀅𑀦𑀼𑀧𑁆𑀧𑀸𑀤𑀦𑁂𑀦 ¶ 𑀫𑀼𑀝𑁆𑀞𑀸 𑀦𑀝𑁆𑀞𑀸 𑀲𑀢𑀺 𑀏𑀢𑁂𑀲𑀦𑁆𑀢𑀺 𑀫𑀼𑀝𑁆𑀞𑀲𑁆𑀲𑀢𑀻. 𑀤𑀼𑀝𑁆𑀞𑀸𑀢𑀺 𑀤𑀽𑀲𑀺𑀢𑀸. 𑀤𑀼𑀧𑁆𑀧𑀜𑁆𑀜𑀸 𑀦𑀸𑀫 𑀤𑀽𑀲𑀺𑀢𑀪𑀸𑀯𑁄 𑀧𑀝𑀺𑀧𑀓𑁆𑀔𑁂𑀦 𑀯𑀺𑀦𑀸𑀲𑀺𑀢𑀪𑀸𑀯𑁄𑀢𑀺 𑀆𑀳 ‘‘𑀦𑀝𑁆𑀞𑀧𑀜𑁆𑀜𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀳𑁂𑀝𑁆𑀞𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀕𑁆𑀕𑀳𑀡𑁂𑀦 𑀓𑀫𑁆𑀫𑀲𑁆𑀲𑀓𑀢𑀸𑀧𑀜𑁆𑀜𑀸𑀬 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀘 𑀕𑀳𑀺𑀢𑀢𑁆𑀢𑀸 𑀲𑀼𑀩𑁆𑀩𑀘𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀧𑀭𑀺𑀯𑀸𑀭𑀸𑀳𑀺 𑀇𑀥 𑀲𑀤𑁆𑀥𑀸𑀤𑀻𑀳𑀺 𑀯𑀺𑀧𑀲𑁆𑀲𑀦𑀸𑀲𑀫𑁆𑀪𑀸𑀭𑀲𑁆𑀲 𑀉𑀤𑁆𑀥𑀝𑀢𑁆𑀢𑀸 𑀘 𑀯𑀼𑀢𑁆𑀢𑀁 ‘‘𑀇𑀥 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺. 𑀢𑁂𑀦𑀸𑀳 ‘‘𑀯𑀺𑀧𑀲𑁆𑀲𑀦𑀸𑀲𑀫𑁆𑀪𑀸𑀭𑁄 𑀳𑀻’’𑀢𑀺𑀆𑀤𑀺. 𑀬𑀼𑀢𑁆𑀢𑀺𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸𑀧𑀺 𑀅𑀬𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑁄𑀭𑀸𑀡𑀸𑀦𑀁 𑀆𑀡𑀸’’𑀢𑀺.

𑀮𑁄𑀓𑀼𑀢𑁆𑀢𑀭𑀕𑀼𑀡𑀸𑀦𑀁 𑀅𑀦𑁆𑀢𑀭𑀸𑀬𑀓𑀭𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀕𑀼𑀡𑀸𑀦𑀁 𑀅𑀥𑀺𑀕𑀫𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑀁. 𑀲𑀦𑁆𑀤𑀺𑀝𑁆𑀞𑀺𑀦𑁆𑀢𑀺 𑀲𑀁 𑀅𑀢𑁆𑀢𑀦𑁄 𑀤𑀺𑀝𑁆𑀞𑀺𑀁, 𑀬𑀁 𑀯𑀸 𑀢𑀁 𑀯𑀸 𑀅𑀢𑁆𑀢𑀦𑀸 𑀬𑀣𑀸𑀕𑀳𑀺𑀢𑀤𑀺𑀝𑁆𑀞𑀺𑀦𑁆𑀢𑀺 𑀅𑀢𑁆𑀣𑁄. 𑀲𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀢𑁄 𑀆𑀫𑀲𑀦𑀢𑁄 𑀧𑀭𑀸𑀫𑀸𑀲𑀻. 𑀤𑀴𑁆𑀳𑀕𑁆𑀕𑀸𑀳𑀻𑀢𑀺 ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀣𑀺𑀭𑀕𑁆𑀕𑀸𑀳𑀕𑁆𑀕𑀸𑀳𑀻. 𑀧𑀝𑀺𑀦𑀺𑀲𑁆𑀲𑀕𑁆𑀕𑀻𑀢𑀺 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀓𑁄. 𑀓𑀼𑀫𑁆𑀫𑁄𑀯𑀸𑀢𑀺 𑀬𑀣𑀸 𑀓𑀘𑁆𑀙𑀧𑁄 𑀅𑀢𑁆𑀢𑀦𑁄 𑀧𑀸𑀤𑀸𑀤𑀺𑀓𑁂 𑀅𑀗𑁆𑀕𑁂 𑀓𑁂𑀦𑀘𑀺 𑀖𑀝𑁆𑀝𑀺𑀢𑁄 𑀲𑀩𑁆𑀩𑀸𑀦𑀺 𑀅𑀗𑁆𑀕𑀸𑀦𑀺 𑀅𑀢𑁆𑀢𑀦𑁄 𑀓𑀧𑀸𑀮𑁂𑀬𑁂𑀯 𑀲𑀫𑁄𑀤𑀳𑀢𑀺, 𑀦 𑀩𑀳𑀺 𑀦𑀻𑀳𑀭𑀢𑀺, 𑀏𑀯𑀫𑀬𑀫𑁆𑀧𑀺 ‘‘𑀦 𑀲𑀼𑀦𑁆𑀤𑀭𑁄 𑀢𑀯 𑀕𑀸𑀳𑁄, 𑀙𑀟𑁆𑀟𑁂𑀳𑀺 𑀦’’𑀦𑁆𑀢𑀺 𑀯𑀼𑀢𑁆𑀢𑁄 𑀢𑀁 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀅𑀦𑁆𑀢𑁄𑀬𑁂𑀯 𑀅𑀢𑁆𑀢𑀦𑁄 𑀳𑀤𑀬𑁂 𑀏𑀯 𑀞𑀧𑁂𑀢𑁆𑀯𑀸 𑀢𑀁 𑀯𑀤𑀢𑀺. 𑀓𑀼𑀫𑁆𑀪𑀻𑀮𑀕𑁆𑀕𑀸𑀳𑀦𑁆𑀢𑀺 𑀲𑀁𑀲𑀼𑀫𑀸𑀭𑀕𑁆𑀕𑀸𑀳𑀁. 𑀕𑀡𑁆𑀳𑀦𑁆𑀢𑀻𑀢𑀺 𑀬𑀣𑀸 𑀲𑀁𑀲𑀼𑀫𑀸𑀭𑀸 𑀕𑀳𑀺𑀢𑀁 𑀦 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, 𑀏𑀯𑀁 𑀕𑀡𑁆𑀳𑀦𑁆𑀢𑀺.

𑁮𑁪. 𑀏𑀯𑀁 ¶ 𑀘𑀢𑀼𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀻𑀢𑀺 𑀅𑀯𑀺𑀳𑀺𑀁𑀲𑀦𑀸𑀤𑀻𑀳𑀺 𑀘𑀢𑀼𑀅𑀥𑀺𑀓𑀘𑀢𑁆𑀢𑀸𑀮𑀻𑀲𑀧𑁆𑀧𑀓𑀸𑀭𑁂𑀳𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀅𑀯𑀺𑀳𑀺𑀁𑀲𑀸 𑀆𑀤𑀺𑀢𑁄 𑀯𑀼𑀢𑁆𑀢𑀸? 𑀲𑀩𑁆𑀩𑀕𑀼𑀡𑀸𑀦𑀁 𑀫𑀽𑀮𑀪𑀸𑀯𑀢𑁄. 𑀅𑀯𑀺𑀳𑀺𑀁𑀲𑀸𑀢𑀺 𑀳𑀺 𑀓𑀭𑀼𑀡𑀸𑀬𑁂𑀢𑀁 𑀅𑀥𑀺𑀯𑀘𑀦𑀁, 𑀲𑀸 𑀘 𑀯𑀺𑀲𑁂𑀲𑀢𑁄 𑀲𑀻𑀮𑀲𑁆𑀲 𑀫𑀽𑀮𑀓𑀸𑀭𑀡𑀁 𑀧𑀭𑀽𑀧𑀖𑀸𑀢𑀮𑀓𑁆𑀔𑀡𑀸 𑀤𑀼𑀲𑁆𑀲𑀻𑀮𑁆𑀬𑀸 𑀑𑀭𑀫𑀸𑀧𑀦𑀢𑁄. 𑀬𑀣𑀸 𑀳𑀺 𑀧𑀸𑀡𑀸𑀢𑀺𑀧𑀸𑀢𑁄 𑀧𑀭𑀽𑀧𑀖𑀸𑀢𑀮𑀓𑁆𑀔𑀡𑁄, 𑀢𑀣𑀸 𑀧𑀭𑁂𑀲𑀁 𑀲𑀸𑀧𑀢𑁂𑀬𑁆𑀬𑀸𑀯𑀳𑀭𑀡𑀁, 𑀲𑀢𑁆𑀢𑀺𑀧𑁆𑀧𑀳𑀸𑀭𑀢𑁄𑀧𑀺 𑀥𑀦𑀲𑁆𑀲𑀸𑀯𑀳𑀸𑀭𑁄 𑀕𑀭𑀼𑀢𑀭𑁄𑀢𑀺. 𑀢𑀣𑀸 𑀅𑀩𑁆𑀭𑀳𑁆𑀫𑀘𑀭𑀺𑀬𑀁 𑀕𑀩𑁆𑀪𑀥𑀸𑀭𑀡𑀸𑀤𑀺𑀤𑀼𑀓𑁆𑀔𑀸𑀯𑀳𑀦𑀢𑁄, 𑀧𑀭𑀤𑀸𑀭𑀸𑀢𑀺𑀓𑁆𑀓𑀫𑁂 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀧𑀭𑁂𑀲𑀁 𑀯𑀺𑀲𑀁𑀯𑀸𑀤𑀦𑀪𑁂𑀤𑀦𑀫𑀫𑁆𑀫𑀖𑀝𑁆𑀝𑀦𑀸𑀦𑀁 𑀧𑀭𑀽𑀧𑀖𑀸𑀢𑀪𑀸𑀯𑁄 𑀧𑀸𑀓𑀝𑁄 𑀏𑀯, 𑀲𑀫𑁆𑀨𑀧𑁆𑀧𑀮𑀸𑀧𑁄 𑀅𑀢𑁆𑀣𑀕𑁆𑀕𑀸𑀳𑀸𑀧𑀦𑀢𑁄 𑀅𑀦𑀢𑁆𑀣𑀼𑀧𑁆𑀧𑀸𑀤𑀦𑀢𑁄, 𑀅𑀪𑀺𑀚𑁆𑀛𑀸 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀺𑀳𑁂𑀢𑀼𑀢𑁄, 𑀩𑁆𑀬𑀸𑀧𑀸𑀤𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀳𑁂𑀢𑀼𑀢𑁄, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀲𑀩𑁆𑀩𑀸𑀦𑀢𑁆𑀣𑀳𑁂𑀢𑀼𑀢𑁄 ¶ 𑀧𑀭𑀽𑀧𑀖𑀸𑀢𑀮𑀓𑁆𑀔𑀡𑀸, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀥𑀫𑁆𑀫𑀺𑀓𑀧𑀝𑀺𑀜𑁆𑀜𑁄𑀧𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀓𑀭𑁄𑀢𑀺, 𑀧𑀭𑁂 𑀘 𑀢𑀢𑁆𑀣 𑀦𑀺𑀬𑁄𑀚𑁂𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀇𑀢𑀭𑁂. 𑀯𑀺𑀳𑀺𑀁𑀲𑀮𑀓𑁆𑀔𑀡𑀸 𑀤𑀼𑀲𑁆𑀲𑀻𑀮𑁆𑀬𑀸 𑀑𑀭𑀫𑀸 𑀅𑀯𑀺𑀳𑀺𑀁𑀲𑀮𑀓𑁆𑀔𑀡𑀸 𑀯𑀺𑀲𑁂𑀲𑀢𑁄 𑀲𑀻𑀮𑀲𑁆𑀲 𑀩𑀮𑀯𑀓𑀸𑀭𑀡𑀁. 𑀲𑀻𑀮𑀧𑀤𑀝𑁆𑀞𑀸𑀦𑁄 𑀘 𑀲𑀫𑀸𑀥𑀺, 𑀲𑀫𑀸𑀥𑀺𑀧𑀤𑀝𑁆𑀞𑀸𑀦𑀸 𑀘 𑀧𑀜𑁆𑀜𑀸𑀢𑀺 𑀲𑀩𑁆𑀩𑀕𑀼𑀡𑀸𑀦𑀁 𑀫𑀽𑀮𑀪𑀽𑀢𑀸 𑀅𑀯𑀺𑀳𑀺𑀁𑀲𑀸. 𑀅𑀧𑀺𑀘 𑀉𑀴𑀸𑀭𑀚𑁆𑀛𑀸𑀲𑀬𑀸𑀦𑀁 𑀦𑀺𑀲𑀫𑁆𑀫𑀓𑀸𑀭𑀻𑀦𑀁 𑀥𑀻𑀭𑀸𑀦𑀁 𑀉𑀢𑁆𑀢𑀫𑀧𑀼𑀭𑀺𑀲𑀸𑀦𑀁 𑀲𑀻𑀮𑀁 𑀯𑀺𑀬 𑀲𑀫𑀸𑀥𑀺𑀧𑀜𑁆𑀜𑀸𑀧𑀺 𑀧𑀭𑁂𑀲𑀁 𑀳𑀺𑀢𑀲𑀼𑀔𑀸𑀯𑀳𑀸𑀯 𑀲𑀫𑁆𑀧𑀚𑁆𑀚𑀦𑁆𑀢𑀻𑀢𑀺 𑀏𑀯𑀫𑁆𑀧𑀺 𑀓𑀭𑀼𑀡𑀸 𑀲𑀩𑁆𑀩𑀕𑀼𑀡𑀸𑀦𑀁 𑀫𑀽𑀮𑀦𑁆𑀢𑀺 𑀲𑀸 𑀆𑀤𑀺𑀢𑁄 𑀯𑀼𑀢𑁆𑀢𑀸.

𑀢𑀢𑁄 𑀧𑀭𑀁 𑀯𑀺𑀲𑁂𑀲𑀢𑁄 ‘‘𑀅𑀯𑀺𑀳𑀺𑀁𑀲𑀸𑀲𑀫𑀼𑀝𑁆𑀞𑀸𑀦𑀸 𑀇𑀫𑁂 𑀥𑀫𑁆𑀫𑀸’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀸 𑀕𑀳𑀺𑀢𑀸. 𑀢𑀢𑁄 𑀇𑀤𑀁 𑀕𑀼𑀡𑀸𑀦𑀁 𑀫𑀽𑀮𑀪𑀽𑀢𑀁 𑀲𑀻𑀮𑀁, 𑀏𑀢𑁆𑀣 𑀧𑀢𑀺𑀝𑁆𑀞𑀺𑀢𑁂𑀦 𑀇𑀫𑁂 𑀥𑀫𑁆𑀫𑀸 𑀉𑀧𑁆𑀧𑀸𑀤𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀅𑀝𑁆𑀞 𑀲𑀫𑁆𑀫𑀢𑁆𑀢𑀸 𑀕𑀳𑀺𑀢𑀸. 𑀢𑁂𑀲𑀁 𑀯𑀺𑀲𑁄𑀥𑀦𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀆𑀤𑀺𑀢𑁄 𑀏𑀯𑀁 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀦𑀻𑀯𑀭𑀡𑀯𑀺𑀯𑁂𑀓𑁄 𑀕𑀳𑀺𑀢𑁄, 𑀆𑀤𑀺𑀢𑁄 𑀦𑀻𑀯𑀭𑀡𑀤𑁆𑀯𑀬𑀲𑁆𑀲 𑀅𑀕𑁆𑀕𑀳𑀡𑁂 𑀕𑀳𑀺𑀢𑀸𑀕𑀳𑀺𑀢𑀓𑀸𑀭𑀡𑀁 𑀅𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀫𑁂𑀯. 𑀓𑁄𑀥𑀲𑁆𑀲 𑀧𑀦 𑀩𑁆𑀬𑀸𑀧𑀸𑀤𑀢𑁄 𑀪𑁂𑀤𑁄 𑀯𑀢𑁆𑀣𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁧.𑁭𑁧) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀓𑁄𑀥𑀸𑀤𑀺𑀧𑁆𑀧𑀳𑀸𑀦𑁂𑀦 𑀘𑁂𑀢𑁆𑀣 𑀲𑀮𑁆𑀮𑁂𑀔𑀲𑀺𑀤𑁆𑀥𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀢𑁄 𑀉𑀧𑀓𑁆𑀓𑀺𑀮𑁂𑀲𑀯𑀺𑀲𑀼𑀤𑁆𑀥𑀺 𑀕𑀳𑀺𑀢𑀸. 𑀲𑀸 𑀘 𑀲𑀼𑀩𑁆𑀩𑀘𑀓𑀮𑁆𑀬𑀸𑀡𑀫𑀺𑀢𑁆𑀢𑀅𑀧𑁆𑀧𑀫𑀢𑁆𑀢𑀢𑀸𑀳𑀺 𑀲𑀺𑀚𑁆𑀛𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀧𑀓𑀺𑀡𑁆𑀡𑀓𑀸 𑀕𑀳𑀺𑀢𑀸. 𑀲𑀫𑁆𑀧𑀦𑁆𑀦𑀲𑁄𑀯𑀘𑀲𑁆𑀲𑀢𑀸𑀤𑀺𑀕𑀼𑀡𑀲𑁆𑀲 𑀇𑀫𑁂 𑀥𑀫𑁆𑀫𑀸 𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺, 𑀯𑀺𑀧𑀲𑁆𑀲𑀦𑀁 𑀧𑀭𑀺𑀩𑁆𑀭𑀽𑀳𑁂𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀲𑀤𑁆𑀥𑀫𑁆𑀫𑀸 𑀕𑀳𑀺𑀢𑀸. 𑀏𑀯𑀁𑀪𑀽𑀢𑀲𑁆𑀲 𑀅𑀬𑀁 𑀫𑀺𑀘𑁆𑀙𑀸𑀕𑀸𑀳𑁄 𑀮𑁄𑀓𑀼𑀢𑁆𑀢𑀭𑀕𑀼𑀡𑀸𑀥𑀺𑀕𑀫𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑁄, 𑀢𑀲𑁆𑀫𑀸 𑀲𑁄 𑀤𑀽𑀭𑀢𑁄 𑀯𑀚𑁆𑀚𑁂𑀢𑀩𑁆𑀩𑁄, 𑀏𑀯𑀁 𑀬𑀣𑀸𑀯𑀼𑀢𑁆𑀢𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀭𑀺𑀬𑀫𑀕𑁆𑀕𑀁 𑀅𑀥𑀺𑀕𑀘𑁆𑀙𑀦𑁆𑀢𑁄 𑀲𑀮𑁆𑀮𑁂𑀔𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀏𑀯𑀫𑁂𑀢𑁂𑀲𑀁 𑀘𑀢𑀼𑀘𑀢𑁆𑀢𑀸𑀮𑀻𑀲𑀸𑀬 𑀲𑀮𑁆𑀮𑁂𑀔𑀸𑀓𑀸𑀭𑀸𑀦𑀁 𑀕𑀳𑀡𑀧𑀬𑁄𑀚𑀦𑀁 𑀅𑀦𑀼𑀧𑀼𑀩𑁆𑀩𑀻 𑀘 𑀯𑁂𑀤𑀺𑀢𑀩𑁆𑀩𑀸. 𑀧𑀬𑁄𑀕𑀢𑁄 𑀲𑀮𑁆𑀮𑁂𑀔𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀧𑀺 𑀩𑀳𑀽𑀧𑀓𑀸𑀭𑁄𑀢𑀺 𑀆𑀳 ‘‘𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲𑀧𑀺 𑀩𑀳𑀽𑀧𑀓𑀸𑀭𑀢𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺.

𑀓𑀼𑀲𑀮𑁂𑀲𑀼 ¶ 𑀥𑀫𑁆𑀫𑁂𑀲𑀽𑀢𑀺 𑀅𑀯𑀺𑀳𑀺𑀁𑀲𑀸𑀤𑀻𑀲𑀼 𑀬𑀣𑀸𑀯𑀼𑀢𑁆𑀢𑀅𑀦𑀯𑀚𑁆𑀚𑀥𑀫𑁆𑀫𑁂𑀲𑀼. 𑀅𑀦𑀼𑀯𑀺𑀥𑀺𑀬𑀦𑀸𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀓𑀸𑀬𑀯𑀸𑀘𑀸𑀳𑀺 𑀅𑀦𑀼𑀯𑀺𑀥𑀸𑀦𑀸. 𑀢𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀅𑀯𑀺𑀳𑀺𑀁𑀲𑀸𑀤𑀺𑀥𑀫𑁆𑀫𑀸𑀦𑀁, 𑀢𑁂𑀲𑀁 𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀧𑀯𑀢𑁆𑀢𑀥𑀫𑁆𑀫𑀸𑀦𑀁. 𑀇𑀤𑀸𑀦𑀺 ¶ 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀓𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀲𑀭𑀡𑀕𑀫𑀦𑀁 𑀯𑀸𑀘𑀸𑀬 𑀯𑀺𑀜𑁆𑀜𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁 ‘‘𑀓𑀸𑀬𑁂𑀦 𑀯𑀸’’𑀢𑀺. ‘‘𑀲𑀻𑀮𑀁 𑀓𑀸𑀬𑁂𑀦 𑀲𑀫𑀸𑀤𑀺𑀬𑀢𑀻’’𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀢𑀣𑀸 𑀢𑀣𑀸 𑀧𑀯𑀢𑁆𑀢𑀲𑀮𑁆𑀮𑀳𑀼𑀓𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀁 𑀉𑀧𑀸𑀤𑀸𑀬 𑀢𑀣𑀸𑀭𑀽𑀧𑀓𑀼𑀲𑀮𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀁 𑀩𑀳𑀽𑀧𑀓𑀸𑀭𑀢𑀸 𑀯𑀼𑀢𑁆𑀢𑀸𑀢𑀺 𑀦 𑀲𑀪𑀸𑀯𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀩𑀳𑀽𑀧𑀓𑀸𑀭𑀢𑀁 𑀜𑀸𑀬𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑁮𑁫. 𑀳𑀺𑀢𑀸𑀥𑀺𑀕𑀫𑀸𑀬𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀳𑀺𑀢𑀲𑀫𑁆𑀧𑀢𑁆𑀢𑀺𑀬𑀸, 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀸𑀬 𑀏𑀯 𑀯𑀸. 𑀅𑀭𑀺𑀬𑀫𑀕𑁆𑀕𑁄 𑀳𑀺 𑀏𑀓𑀦𑁆𑀢𑀳𑀺𑀢𑀢𑁆𑀢𑀸 𑀳𑀺𑀢𑁄 𑀦𑀸𑀫. 𑀧𑀭𑀺𑀯𑀚𑁆𑀚𑀦𑀯𑀲𑁂𑀦 𑀓𑀫𑀦𑀁 𑀧𑀯𑀢𑁆𑀢𑀺 𑀧𑀭𑀺𑀓𑁆𑀓𑀫𑀦𑀦𑁆𑀢𑀺 𑀆𑀳 ‘‘𑀧𑀭𑀺𑀓𑁆𑀓𑀫𑀦𑀸𑀬 𑀧𑀭𑀺𑀯𑀚𑁆𑀚𑀦𑀢𑁆𑀣𑀸𑀬𑀸’’𑀢𑀺. 𑀲𑀫𑁆𑀫𑀸𑀤𑀲𑁆𑀲𑀦𑀼𑀧𑀸𑀬𑀲𑀁𑀯𑀺𑀥𑀸𑀦𑁂𑀦 𑀅𑀯𑀺𑀳𑀺𑀁𑀲𑀸 𑀧𑀝𑀺𑀬𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦. 𑀲𑀼𑀔𑁂𑀦𑁂𑀯𑀸𑀢𑀺 𑀅𑀓𑀺𑀘𑁆𑀙𑁂𑀦𑁂𑀯. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦𑀸𑀢𑀺 𑀏𑀢𑁂𑀦𑁂𑀯 𑀅𑀯𑀺𑀳𑀺𑀁𑀲𑀸𑀧𑀤𑁂 𑀯𑀼𑀢𑁆𑀢𑁂𑀦 𑀯𑀺𑀥𑀺𑀦𑀸. 𑀲𑀩𑁆𑀩𑀧𑀤𑀸𑀦𑀻𑀢𑀺 𑀲𑁂𑀲𑀸𑀦𑀺 𑀢𑁂𑀘𑀢𑁆𑀢𑀸𑀮𑀻𑀲 𑀧𑀤𑀸𑀦𑀺.

𑁮𑁬. 𑀅𑀓𑀼𑀲𑀮𑀸 𑀧𑀝𑀺𑀲𑀦𑁆𑀥𑀺𑀅𑀚𑀦𑀓𑀸 𑀦𑀸𑀫 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀥𑀫𑁆𑀫𑀸 𑀅𑀜𑁆𑀜𑁂𑀧𑀺 𑀧𑀯𑀢𑁆𑀢𑀺𑀯𑀺𑀧𑀸𑀓𑀫𑀢𑁆𑀢𑀤𑀸𑀬𑀺𑀦𑁄, 𑀤𑀺𑀦𑁆𑀦𑀸𑀬 𑀧𑀝𑀺𑀲𑀦𑁆𑀥𑀺𑀬𑀸 𑀯𑀺𑀧𑀸𑀓𑀚𑀦𑀓𑀸, 𑀧𑀘𑁆𑀘𑀬𑀯𑁂𑀓𑀮𑁆𑀮𑁂𑀦 𑀯𑀺𑀧𑀘𑁆𑀘𑀺𑀢𑀼𑀁 𑀅𑀮𑀤𑁆𑀥𑁄𑀓𑀸𑀲𑀸 𑀅𑀳𑁄𑀲𑀺𑀓𑀫𑁆𑀫𑀸𑀤𑀬𑁄 𑀯𑀸 𑀅𑀚𑀦𑀓𑀸. 𑀚𑀸𑀢𑀺𑀯𑀲𑁂𑀦𑀸𑀢𑀺 𑀅𑀓𑀼𑀲𑀮𑀚𑀸𑀢𑀺𑀯𑀲𑁂𑀦. 𑀅𑀥𑁄𑀪𑀸𑀕𑀗𑁆𑀕𑀫𑀦𑀻𑀬𑀸𑀢𑀺 𑀅𑀧𑀸𑀬𑀕𑀫𑀦𑀻𑀬𑀸. 𑀏𑀯𑀁𑀦𑀸𑀫𑀸𑀢𑀺 𑀦𑀸𑀫𑀕𑁆𑀕𑀳𑀡𑁂𑀦 𑀲𑀪𑀸𑀯𑀁 𑀉𑀧𑀮𑀓𑁆𑀔𑁂𑀢𑀺 𑀲𑀢𑀺 𑀧𑀘𑁆𑀘𑀬𑀲𑀫𑀯𑀸𑀬𑁂 𑀢𑀁𑀲𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄. 𑀢𑁂𑀦𑀸𑀳 ‘‘𑀯𑀺𑀧𑀸𑀓𑀓𑀸𑀮𑁂 𑀅𑀦𑀺𑀝𑁆𑀞𑀸𑀓𑀦𑁆𑀢𑀯𑀺𑀧𑀸𑀓𑀢𑁆𑀢𑀸’’𑀢𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀼𑀲𑀮𑀧𑀓𑁆𑀔𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄, 𑀇𑀥 𑀧𑀝𑀺𑀲𑀦𑁆𑀥𑀺𑀅𑀚𑀦𑀓𑀸 𑀅𑀪𑀺𑀜𑁆𑀜𑀸𑀲𑀳𑀕𑀢𑀥𑀫𑁆𑀫𑀸, 𑀲𑁂𑀲𑀁 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀲𑀩𑁆𑀩𑁂 𑀅𑀓𑀼𑀲𑀮𑀸𑀢𑀺 𑀏𑀢𑁆𑀣 𑀯𑀺𑀳𑀺𑀁𑀲𑀫𑁂𑀓𑀁 𑀞𑀧𑁂𑀢𑁆𑀯𑀸 𑀇𑀢𑀭𑁂 𑀲𑀩𑁆𑀩𑁂 𑀅𑀓𑀼𑀲𑀮𑀸 𑀉𑀧𑀫𑀸𑀪𑀽𑀢𑀸. 𑀯𑀺𑀳𑀺𑀁𑀲𑀸 𑀳𑀺 𑀉𑀧𑀫𑁂𑀬𑁆𑀬𑀁. 𑀲𑀩𑁆𑀩𑁂 𑀓𑀼𑀲𑀮𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦𑀸𑀢𑀺 𑀬𑀣𑀸 𑀯𑀺𑀳𑀺𑀁𑀲𑀸𑀦𑀁 𑀉𑀧𑀫𑁂𑀬𑁆𑀬𑀢𑀸, 𑀢𑀤𑀯𑀲𑁂𑀲𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀉𑀧𑀫𑀸𑀪𑀸𑀯𑁄 𑀯𑀼𑀢𑁆𑀢𑁄, 𑀇𑀫𑀺𑀦𑀸 𑀦𑀬𑁂𑀦 𑀅𑀓𑀼𑀲𑀮𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀓𑀼𑀲𑀮𑁂𑀦 𑀇𑀢𑀭𑁂𑀦, 𑀓𑀼𑀲𑀮𑀜𑁆𑀘 𑀧𑀸𑀡𑀸𑀢𑀺𑀧𑀸𑀢𑀸𑀧𑀝𑀺𑀯𑀺𑀭𑀢𑀺𑀆𑀤𑀺𑀓𑀼𑀲𑀮𑁂𑀦 𑀇𑀢𑀭𑁂𑀦 𑀉𑀧𑀫𑁂𑀢𑀩𑁆𑀩𑀁.

𑁮𑁭. 𑀧𑀭𑀺𑀦𑀺𑀩𑁆𑀩𑀸𑀧𑀦𑁂𑀢𑀺 𑀓𑀺𑀮𑁂𑀲𑀧𑀭𑀺𑀴𑀸𑀳𑀯𑀽𑀧𑀲𑀫𑀦𑁂. 𑀧𑀭𑀺𑀢𑁄 𑀮𑀺𑀫𑁆𑀧𑀦𑀝𑁆𑀞𑁂𑀦 𑀧𑀮𑀺𑀧𑀁 𑀯𑀼𑀘𑁆𑀘𑀢𑀺 𑀫𑀳𑀸𑀓𑀤𑁆𑀤𑀫𑀁, 𑀢𑀁 𑀧𑀦 𑀏𑀓𑀦𑁆𑀢𑀢𑁄 𑀕𑀫𑁆𑀪𑀻𑀭𑀫𑁆𑀧𑀺 𑀳𑁄𑀢𑀻𑀢𑀺 ‘‘𑀕𑀫𑁆𑀪𑀻𑀭𑀓𑀤𑁆𑀤𑀫𑁂 ¶ 𑀦𑀺𑀫𑀼𑀕𑁆𑀕𑁄’’𑀢𑀺 𑀯𑀼𑀢𑁆𑀢𑀁. 𑀧𑀮𑀺𑀧𑀁 𑀯𑀺𑀬 ¶ 𑀧𑀮𑀺𑀧𑀦𑁆𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀯𑀼𑀘𑁆𑀘𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑁂𑀦 𑀉𑀧𑀫𑁄𑀧𑀫𑁂𑀬𑁆𑀬𑀲𑀁𑀲𑀦𑁆𑀤𑀦𑀦𑀬𑁂𑀦 𑀏𑀢𑁆𑀣 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀅𑀢𑁆𑀣𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀦 𑀳𑀺 𑀢𑀁 𑀓𑀸𑀭𑀡𑀦𑁆𑀢𑀺 𑀏𑀢𑁆𑀣 𑀓𑀸𑀭𑀡𑀁 𑀦𑀸𑀫 𑀳𑀢𑁆𑀣𑀲𑁆𑀲 𑀯𑀸 𑀧𑀸𑀤𑀲𑁆𑀲 𑀯𑀸 𑀅𑀧𑀮𑀺𑀧𑀦𑁆𑀦𑀪𑀸𑀯𑁄, 𑀲𑁄 𑀧𑀦 𑀦𑀢𑁆𑀣𑀺. 𑀏𑀲 𑀦𑀬𑁄 𑀉𑀧𑀫𑁂𑀬𑁆𑀬𑁂𑀧𑀺.

𑀢𑀢𑁆𑀣 𑀲𑀺𑀬𑀸 𑀓𑀲𑁆𑀲𑀘𑀺 𑀧𑀭𑀺𑀯𑀺𑀢𑀓𑁆𑀓𑁄 ‘‘𑀪𑀕𑀯𑀢𑁄 𑀤𑁂𑀲𑀦𑀸𑀦𑀼𑀪𑀸𑀯𑁂𑀦 𑀪𑀺𑀓𑁆𑀔𑀼𑀆𑀤𑀬𑁄 𑀓𑀣𑁂𑀦𑁆𑀢𑀻’’𑀢𑀺. ‘‘𑀪𑀕𑀯𑀸𑀬𑁂𑀯 𑀳𑀺 𑀢𑀢𑁆𑀣 𑀉𑀤𑁆𑀥𑀭𑀢𑀻’’𑀢𑀺 𑀯𑀢𑁆𑀯𑀸 𑀉𑀧𑀫𑀸𑀬 𑀢𑀤𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀭𑀜𑁆𑀜𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀼𑀣𑀼𑀚𑁆𑀚𑀦𑀸 𑀢𑀸𑀯𑀢𑀺𑀝𑁆𑀞𑀦𑁆𑀢𑀼, 𑀲𑀸𑀯𑀓𑀲𑀺𑀔𑀸𑀧𑁆𑀧𑀢𑁆𑀢𑀯𑀺𑀲𑁂𑀲𑀸𑀦𑀫𑁆𑀧𑀺 𑀅𑀭𑀺𑀬𑀸𑀦𑀁 𑀤𑁂𑀲𑀦𑀸 𑀲𑀢𑁆𑀣𑀼𑀬𑁂𑀯 𑀤𑁂𑀲𑀦𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀣𑀸 𑀳𑀺 𑀢𑁂𑀳𑀺 𑀤𑁂𑀲𑀺𑀢𑀲𑀼𑀢𑁆𑀢𑀸𑀦𑀺 𑀩𑀼𑀤𑁆𑀥𑀯𑀘𑀦𑀫𑁂𑀯, 𑀢𑁂𑀲𑀁 𑀤𑁂𑀲𑀦𑀸𑀬 𑀮𑀤𑁆𑀥𑀯𑀺𑀲𑁂𑀲𑀸𑀧𑀺 𑀅𑀭𑀺𑀬𑀸 𑀩𑀼𑀤𑁆𑀥𑀧𑀼𑀢𑁆𑀢𑀸𑀬𑁂𑀯𑀸𑀢𑀺.

𑀅𑀦𑀺𑀩𑁆𑀩𑀺𑀲𑀢𑀸𑀬𑀸𑀢𑀺 𑀅𑀦𑀺𑀩𑁆𑀩𑀺𑀲𑁂𑀯𑀦𑀢𑀸𑀬. 𑀅𑀲𑀺𑀓𑁆𑀔𑀺𑀢𑀯𑀺𑀦𑀬𑀢𑀸𑀬𑀸𑀢𑀺 𑀧𑀜𑁆𑀘𑀦𑁆𑀦𑀁 𑀯𑀺𑀦𑀬𑀸𑀦𑀁 𑀲𑀸𑀤𑀭𑀁 𑀅𑀲𑀺𑀓𑁆𑀔𑀺𑀢𑀪𑀸𑀯𑁂𑀦. 𑀢𑁂 𑀧𑀦 𑀯𑀺𑀦𑀬𑀸 𑀢𑀺𑀲𑁆𑀲𑀦𑁆𑀦𑀁 𑀲𑀺𑀓𑁆𑀔𑀸𑀦𑀁 𑀲𑀺𑀓𑁆𑀔𑀸𑀧𑀦𑁂𑀦 𑀳𑁄𑀢𑀻𑀢𑀺 𑀆𑀳 ‘‘𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑀸𑀧𑁂𑀲𑁆𑀲𑀢𑀻’’𑀢𑀺. 𑀓𑀺𑀁 𑀧𑀦 𑀢𑀦𑁆𑀢𑀺? ‘‘𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀻’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀓𑀺𑀁 𑀧𑀦 𑀞𑀸𑀦𑀦𑁆𑀢𑀺 𑀆𑀳 ‘‘𑀅𑀧𑀮𑀺𑀧𑀧𑀮𑀺𑀧𑀦𑁆𑀦𑀢𑁆𑀢’’𑀦𑁆𑀢𑀺𑀆𑀤𑀺. 𑀬𑀲𑁆𑀫𑀸 𑀧𑀸𑀴𑀺𑀬𑀁 ‘‘𑀲𑁄 𑀯𑀢 𑀘𑀼𑀦𑁆𑀤𑀸’’𑀢𑀺𑀆𑀤𑀺𑀦𑀸 𑀲𑀸𑀫𑀜𑁆𑀜𑀢𑁆𑀣𑀁 𑀉𑀧𑀫𑀸𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀯𑀺𑀲𑁂𑀲𑀢𑁆𑀣𑁄 𑀉𑀧𑀫𑁂𑀬𑁆𑀬𑀪𑀸𑀯𑁂𑀦 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀢𑀫𑀢𑁆𑀣𑀁 ‘‘𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀲𑀸𑀥𑀸𑀭𑀡𑀢𑁄 𑀯𑀢𑁆𑀯𑀸 𑀧𑀼𑀦 𑀅𑀲𑀸𑀥𑀸𑀭𑀡𑀢𑁄 𑀯𑀺𑀯𑀭𑀦𑁆𑀢𑁄 ‘‘𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺𑀫𑀸𑀳. 𑀧𑀭𑀲𑁆𑀲 𑀯𑀺𑀳𑀺𑀁𑀲𑀸𑀘𑁂𑀢𑀦𑀁 𑀦𑀺𑀩𑁆𑀩𑀸𑀧𑁂𑀲𑁆𑀲𑀢𑀻𑀢𑀺 𑀇𑀤𑀁 𑀬𑁄 𑀅𑀯𑀺𑀳𑀺𑀁𑀲𑀸𑀲𑀗𑁆𑀔𑀸𑀢𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀦𑁆𑀢𑁄 𑀥𑀫𑁆𑀫𑀤𑁂𑀲𑀦𑀸𑀬 𑀧𑀭𑁄 𑀅𑀯𑀺𑀳𑀺𑀁𑀲𑀓𑁄 𑀳𑁄𑀢𑀺, 𑀢𑀸𑀤𑀺𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀆𑀤𑁂𑀲𑀦𑀜𑁆𑀳𑀺 𑀢𑀲𑁆𑀲 𑀯𑀘𑀦𑀦𑁆𑀢𑀺. 𑀢𑁂𑀦𑀸𑀳 ‘‘𑀅𑀬𑀁 𑀬𑀸 𑀏𑀲𑀸 𑀯𑀺𑀳𑀺𑀁𑀲𑀓𑀲𑁆𑀲𑀸’’𑀢𑀺. 𑀧𑀼𑀩𑁆𑀩𑁂 𑀯𑀺𑀳𑀺𑀁𑀲𑀓𑀲𑁆𑀲 𑀫𑀺𑀘𑁆𑀙𑀸𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲. 𑀯𑀺𑀳𑀺𑀁𑀲𑀸𑀧𑀳𑀸𑀦𑀸𑀬 𑀫𑀕𑁆𑀕𑀁 𑀪𑀸𑀯𑀬𑀢𑁄𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀏𑀯 𑀅𑀯𑀺𑀳𑀺𑀁𑀲𑀸𑀬 𑀯𑀺𑀳𑀺𑀁𑀲𑀸𑀧𑀭𑀺𑀦𑀺𑀩𑁆𑀩𑀸𑀦𑀸𑀬 𑀲𑀁𑀯𑀢𑁆𑀢𑀦𑀫𑀸𑀳. 𑀢𑁂𑀦𑀸𑀳 ‘‘𑀧𑀭𑀺𑀦𑀺𑀩𑁆𑀩𑀼𑀢𑁄 𑀯𑀺𑀬𑀸’’𑀢𑀺𑀆𑀤𑀺. 𑀲𑀩𑁆𑀩𑀧𑀤𑁂𑀲𑀽𑀢𑀺 ‘‘𑀧𑀸𑀡𑀸𑀢𑀺𑀧𑀸𑀢𑀺𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀆𑀕𑀢𑁂𑀲𑀼 𑀢𑁂𑀘𑀢𑁆𑀢𑀸𑀮𑀻𑀲𑀸𑀬 𑀧𑀤𑁂𑀲𑀼.

𑁮𑁮. 𑀏𑀯𑀦𑁆𑀢𑀺 𑀤𑁂𑀲𑀺𑀢𑀸𑀓𑀸𑀭𑀧𑀭𑀸𑀫𑀲𑀦𑀁. 𑀢𑀲𑁆𑀲𑀸𑀢𑀺 𑀲𑀮𑁆𑀮𑁂𑀔𑀲𑁆𑀲. ‘‘𑀅𑀢𑁆𑀣𑀺 𑀔𑁆𑀯𑁂𑀲 𑀩𑁆𑀭𑀸𑀳𑁆𑀫𑀡, 𑀧𑀭𑀺𑀬𑀸𑀬𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁧𑁧; 𑀧𑀸𑀭𑀸. 𑁩-𑁧𑁦) 𑀯𑀺𑀬 𑀧𑀭𑀺𑀬𑀸𑀬-𑀲𑀤𑁆𑀤𑁄 𑀓𑀸𑀭𑀡𑀢𑁆𑀣𑁄𑀢𑀺 ¶ 𑀆𑀳 ‘‘𑀲𑀮𑁆𑀮𑁂𑀔𑀓𑀸𑀭𑀡’’𑀦𑁆𑀢𑀺. 𑀢𑁂𑀲𑀁 𑀯𑀲𑁂𑀦𑀸𑀢𑀺 𑀲𑀮𑁆𑀮𑁂𑀔𑀸𑀦𑀁 𑀯𑀲𑁂𑀦. 𑀫𑁂𑀢𑁆𑀢𑀸𑀬 𑀉𑀧𑀲𑀁𑀳𑀭𑀡𑀯𑀲𑁂𑀦 𑀳𑀺𑀢𑀁 𑀏𑀲𑀦𑁆𑀢𑁂𑀦. 𑀓𑀭𑀼𑀡𑀸𑀬 𑀯𑀲𑁂𑀦 𑀅𑀦𑀼𑀓𑀫𑁆𑀧𑀫𑀸𑀦𑁂𑀦. 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀧𑀭𑀺𑀢𑁄 𑀕𑀳𑁂𑀢𑁆𑀯𑀸, 𑀧𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀘𑁆𑀘𑀸𑀢𑀺 𑀧𑀭𑀺𑀢𑁄 𑀇𑀢𑁆𑀯𑀸, 𑀲𑀫𑀦𑁆𑀢𑀢𑁄 𑀨𑀭𑀺𑀢𑁆𑀯𑀸 𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀫𑀸 𑀧𑀫𑀚𑁆𑀚𑀺𑀢𑁆𑀣𑀸𑀢𑀺 ‘‘𑀛𑀸𑀬𑀣𑀸’’𑀢𑀺 𑀯𑀼𑀢𑁆𑀢𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀅𑀜𑁆𑀜𑀸𑀡𑁂𑀦, 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀧𑀫𑀸𑀤𑀓𑀸𑀭𑀡𑁂𑀦 ¶ 𑀫𑀸 𑀧𑀫𑀸𑀤𑀁 𑀆𑀧𑀚𑁆𑀚𑀺𑀢𑁆𑀣. 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀳𑀺 𑀅𑀓𑀢𑁆𑀢𑀩𑁆𑀩𑀓𑀭𑀡𑀫𑁆𑀧𑀺 𑀧𑀫𑀸𑀤𑁄𑀢𑀺. 𑀯𑀺𑀧𑀢𑁆𑀢𑀺𑀓𑀸𑀮𑁂𑀢𑀺 𑀲𑀢𑁆𑀢𑀅𑀲𑀧𑁆𑀧𑀸𑀬𑀸𑀤𑀺𑀯𑀺𑀧𑀢𑁆𑀢𑀺𑀬𑀼𑀢𑁆𑀢𑀓𑀸𑀮𑁂. 𑀬𑀣𑀸𑀯𑀼𑀢𑁆𑀢𑀸 𑀧𑀜𑁆𑀘 𑀧𑀭𑀺𑀬𑀸𑀬𑀸 𑀅𑀜𑁆𑀜𑁂𑀧𑀺 𑀲𑀩𑁆𑀩𑁂 𑀲𑀸𑀲𑀦𑀕𑀼𑀡𑀸 𑀇𑀥𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀻𑀢𑀺 𑀆𑀳 ‘‘𑀛𑀸𑀬𑀣, 𑀫𑀸 𑀧𑀫𑀸𑀤𑀢𑁆𑀣𑀸𑀢𑀺 𑀢𑀼𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻’’𑀢𑀺.

𑀲𑀮𑁆𑀮𑁂𑀔𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁯. 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁯. 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸 ¶ 𑀏𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀇𑀢𑀭𑀸 𑀘𑀢𑀲𑁆𑀲𑁄 𑀧𑀼𑀘𑁆𑀙𑀸 𑀦𑀺𑀯𑀢𑁆𑀢𑁂𑀢𑀺 𑀇𑀢𑀭𑀸𑀲𑀁 𑀅𑀲𑀫𑁆𑀪𑀯𑀢𑁄, 𑀢𑀢𑁆𑀣 𑀬𑀣𑀸𑀧𑀼𑀘𑁆𑀙𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀢𑁄 𑀘 ‘‘𑀅𑀬𑀁 𑀲𑀫𑁆𑀫𑀸𑀤𑀺𑀝𑁆𑀞𑀻’’𑀢𑀺 𑀬𑀸𑀣𑀸𑀯𑀢𑁄 𑀅𑀚𑀸𑀦𑀦𑁆𑀢𑀸𑀧𑀺 𑀧𑀼𑀣𑀼𑀚𑁆𑀚𑀦𑀸 𑀩𑀸𑀳𑀺𑀭𑀓𑀢𑀸𑀧𑀲𑀸𑀤𑀬𑁄 𑀅𑀢𑁆𑀢𑀦𑁄 𑀲𑀫𑀸𑀦𑀲𑀻𑀮𑁂 𑀞𑀺𑀢𑀁 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀯𑀤𑀦𑁆𑀢𑀺. 𑀅𑀦𑀼𑀲𑁆𑀲𑀯𑀸𑀤𑀺𑀯𑀲𑁂𑀦𑀸𑀧𑀻𑀢𑀺 𑀅𑀦𑀼𑀲𑁆𑀲𑀯𑀸𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀯𑀲𑁂𑀦𑀧𑀺. 𑀬𑀣𑀸𑀲𑀫𑀗𑁆𑀕𑀺𑀢𑀸𑀓𑀸𑀭𑀲𑁆𑀲 𑀅𑀢𑁆𑀣𑀲𑁆𑀲 𑀏𑀯𑀫𑁂𑀢𑀦𑁆𑀢𑀺 𑀦𑀺𑀚𑁆𑀛𑀸𑀦𑀓𑁆𑀔𑀫𑀸𑀧𑀦𑀢𑁄 𑀏𑀓𑀦𑁆𑀢𑀢𑁄 𑀬𑀸𑀣𑀸𑀯𑀕𑁆𑀕𑀸𑀳𑁄 𑀳𑁄𑀢𑀻𑀢𑀺 𑀆𑀳 ‘‘𑀅𑀢𑁆𑀢𑀧𑀘𑁆𑀘𑀓𑁆𑀔𑁂𑀦𑀧𑀻’’𑀢𑀺, 𑀬𑀸𑀣𑀸𑀯𑀢𑁄 𑀮𑀓𑁆𑀔𑀡𑀲𑁆𑀲 𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀅𑀢𑁆𑀢𑀦𑁄 𑀧𑀘𑁆𑀘𑀓𑁆𑀔𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄. 𑀩𑀳𑀼𑀦𑁆𑀦𑀁 𑀯𑀘𑀦𑀁 𑀉𑀧𑀸𑀤𑀸𑀬𑀸𑀢𑀺 𑀇𑀫𑀺𑀦𑀸 𑀲𑀸𑀲𑀦𑁂 𑀮𑁄𑀓𑁂 𑀘 𑀦𑀺𑀭𑀼𑀴𑁆𑀳𑀢𑀸𑀬 𑀅𑀬𑀁 𑀆𑀫𑁂𑀟𑀺𑀢𑀧𑀬𑁄𑀕𑁄𑀢𑀺 𑀲𑀸𑀲𑀦𑀲𑁆𑀲 𑀦𑀺𑀭𑀼𑀴𑁆𑀳𑀢𑀸𑀬 𑀘 𑀲𑀫𑁆𑀧𑀲𑀸𑀤𑀁 𑀉𑀧𑀸𑀤𑀸𑀬𑀧𑀺 𑀢𑀤𑀼𑀪𑀬𑀺𑀓𑁄 𑀆𑀫𑁂𑀟𑀺𑀢𑀧𑀬𑁄𑀕𑁄 𑀤𑀝𑁆𑀞𑀩𑁆𑀩𑁄. 𑀅𑀢𑁆𑀣𑀦𑁆𑀢𑀺 𑀯𑀘𑀦𑀢𑁆𑀣𑀁. 𑀮𑀓𑁆𑀔𑀡𑀦𑁆𑀢𑀺 𑀲𑀪𑀸𑀯𑀁. 𑀉𑀧𑀸𑀤𑀸𑀬𑀸𑀢𑀺 𑀕𑀳𑁂𑀢𑁆𑀯𑀸. 𑀲𑁄𑀪𑀦𑀸𑀬𑀸𑀢𑀺 𑀲𑀼𑀦𑁆𑀤𑀭𑀸𑀬. 𑀧𑀲𑀢𑁆𑀣𑀸𑀬𑀸𑀢𑀺 𑀧𑀲𑀁𑀲𑀸𑀬. 𑀢𑁂𑀲𑀼 𑀧𑀼𑀭𑀺𑀫𑁂𑀦 𑀥𑀫𑁆𑀫𑀸𑀦𑀁 𑀬𑀣𑀸𑀲𑀪𑀸𑀯𑀸𑀯𑀩𑁄𑀥𑀲𑀗𑁆𑀔𑀸𑀢𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦 𑀳𑀺 𑀲𑀸 𑀲𑀩𑁆𑀩𑀥𑀫𑁆𑀫𑁂 𑀅𑀪𑀺𑀪𑀯𑀺𑀢𑁆𑀯𑀸 𑀲𑁄𑀪𑀢𑀺. 𑀤𑀼𑀢𑀺𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀧𑀭𑀺𑀡𑀸𑀬𑀺𑀓𑀪𑀸𑀯𑀁. 𑀢𑁂𑀦 𑀳𑀺 𑀲𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀜𑀸𑀡𑀫𑀬𑁂 𑀯𑀺𑀬 𑀢𑀁𑀲𑀫𑀗𑁆𑀕𑀺𑀦𑀜𑁆𑀘 𑀧𑀼𑀕𑁆𑀕𑀮𑀁 𑀜𑀸𑀡𑀧𑀺𑀡𑁆𑀟𑀁 𑀯𑀺𑀬 𑀓𑀭𑁄𑀢𑀺, 𑀢𑀲𑁆𑀲 ‘‘𑀧𑀡𑁆𑀟𑀺𑀢𑁄 𑀦𑀺𑀧𑀼𑀡𑁄 𑀙𑁂𑀓𑁄 𑀯𑀺𑀜𑁆𑀜𑀽 𑀯𑀺𑀪𑀸𑀯𑀻’’𑀢𑀺𑀆𑀤𑀺𑀦𑀸 𑀤𑀺𑀲𑀸𑀲𑀼 𑀧𑀲𑀁𑀲𑀸 𑀧𑀢𑁆𑀣𑀭𑀢𑀺.

𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀦𑁆𑀢𑀺 ¶ 𑀓𑀫𑁆𑀫𑀁 𑀲𑀓𑁄 𑀏𑀢𑀲𑁆𑀲𑀸𑀢𑀺 𑀓𑀫𑁆𑀫𑀲𑁆𑀲𑀓𑁄, 𑀢𑀲𑁆𑀲 𑀪𑀸𑀯𑁄 𑀓𑀫𑁆𑀫𑀲𑁆𑀲𑀓𑀢𑀸, 𑀢𑀢𑁆𑀣 𑀜𑀸𑀡𑀁 ‘‘𑀇𑀤𑀁 𑀓𑀫𑁆𑀫𑀁 𑀲𑀢𑁆𑀢𑀸𑀦𑀁 𑀲𑀓𑀁, 𑀇𑀤𑀁 𑀦𑁄 𑀲𑀓’’𑀦𑁆𑀢𑀺 𑀏𑀯𑀁 𑀚𑀸𑀦𑀦𑀜𑀸𑀡𑀁. 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀜𑀸𑀡𑀦𑁆𑀢𑀺 𑀅𑀭𑀺𑀬𑀲𑀘𑁆𑀘𑀸𑀦𑀁 𑀧𑀝𑀺𑀯𑁂𑀥𑀲𑁆𑀲 𑀅𑀦𑀼𑀮𑁄𑀫𑀢𑁄 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀁 𑀜𑀸𑀡𑀁, 𑀯𑀺𑀧𑀲𑁆𑀲𑀦𑀸𑀜𑀸𑀡𑀁. 𑀦𑁄 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀸𑀬𑀸𑀢𑀺 𑀩𑀸𑀳𑀺𑀭𑀓𑁄 𑀲𑀘𑁆𑀘𑀸𑀦𑀼𑀮𑁄𑀫𑀺𑀓𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀦𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀢𑀲𑁆𑀲 𑀅𑀪𑀸𑀯𑀢𑁄. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀅𑀢𑁆𑀢𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀓𑀢𑁆𑀢𑀸’’𑀢𑀺. 𑀓𑀫𑁆𑀫𑀲𑁆𑀲 𑀓𑀢𑀸𑀤𑀺𑀝𑁆𑀞𑀺 𑀧𑀦 𑀩𑀸𑀳𑀺𑀭𑀓𑀲𑁆𑀲 𑀅𑀢𑁆𑀢𑀤𑀺𑀝𑁆𑀞𑀺𑀁 𑀅𑀦𑀼𑀭𑀼𑀚𑁆𑀛𑀦𑁆𑀢𑀻 𑀧𑀯𑀢𑁆𑀢𑀢𑀺 ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀺𑀢𑁄. 𑀲𑀸𑀲𑀦𑀺𑀓𑁄 𑀤𑁆𑀯𑀻𑀳𑀺𑀧𑀻𑀢𑀺 𑀲𑀸𑀲𑀦𑀺𑀓𑁄 𑀧𑀼𑀣𑀼𑀚𑁆𑀚𑀦𑁄 𑀓𑀫𑁆𑀫𑀲𑁆𑀲𑀓𑀢𑀸𑀜𑀸𑀡𑀸𑀤𑀻𑀳𑀺 𑀤𑁆𑀯𑀻𑀳𑀺𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀑𑀓𑁆𑀓𑀦𑁆𑀢𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀢𑁆𑀢𑀸 ‘‘𑀲𑁂𑀓𑁆𑀔𑁄 𑀦𑀺𑀬𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀅𑀲𑁂𑀓𑁆𑀔𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀢𑀻𑀲𑀼𑀧𑀺 𑀧𑀼𑀕𑁆𑀕𑀮𑁂𑀲𑀼 𑀲𑁂𑀓𑁆𑀔𑁄 𑀇𑀥 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀺𑀬𑀢𑀸𑀬 𑀦𑀺𑀬𑁆𑀬𑀸𑀦𑀺𑀓𑀸𑀬𑀸’’𑀢𑀺𑀆𑀤𑀺𑀫𑀸𑀳.

𑀇𑀤𑀸𑀦𑀺 ¶ 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀴𑀺𑀬𑀸 𑀯𑀺𑀪𑀸𑀯𑁂𑀢𑀼𑀁 ‘‘𑀢𑁂𑀦𑁂𑀯𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑁆𑀢𑀤𑁆𑀯𑀬𑀦𑁆𑀢𑀺 ‘‘𑀲𑀲𑁆𑀲𑀢𑀁, 𑀉𑀘𑁆𑀙𑁂𑀤𑀁, 𑀓𑀸𑀫𑀲𑀼𑀔𑀁, 𑀅𑀢𑁆𑀢𑀓𑀺𑀮𑀫𑀣’’𑀦𑁆𑀢𑀺 𑀏𑀢𑀁 𑀅𑀦𑁆𑀢𑀤𑁆𑀯𑀬𑀁. 𑀮𑀻𑀦𑀼𑀤𑁆𑀥𑀘𑁆𑀘𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀦𑁆𑀢𑀤𑁆𑀯𑀬𑀲𑁆𑀲 𑀅𑀦𑀼𑀧𑀕𑀫𑀦𑀁 𑀅𑀢𑁆𑀣𑀲𑀺𑀤𑁆𑀥𑀫𑁂𑀯. 𑀉𑀚𑀼𑀪𑀸𑀯𑁂𑀦𑀸𑀢𑀺 𑀉𑀚𑀼𑀲𑀪𑀸𑀯𑁂𑀦 𑀫𑀕𑁆𑀕𑁂𑀦, 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁂 𑀧𑀲𑀸𑀤𑀕𑁆𑀕𑀳𑀡𑁂𑀦 𑀲𑀢𑁆𑀣𑀭𑀺 𑀲𑀗𑁆𑀖𑁂 𑀘 𑀧𑀲𑀸𑀤𑁄𑀧𑀺 𑀕𑀳𑀺𑀢𑁄𑀬𑁂𑀯 𑀳𑁄𑀢𑀻𑀢𑀺 ‘‘𑀥𑀫𑁆𑀫𑁂’’𑀇𑀘𑁆𑀘𑁂𑀯 𑀯𑀼𑀢𑁆𑀢𑁄 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀬𑀲𑁆𑀫𑀸 𑀏𑀲 𑀦𑀺𑀬𑀢𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀢𑀜𑁆𑀘 𑀯𑀝𑁆𑀝𑀢𑁄 𑀦𑀺𑀬𑁆𑀬𑀸𑀦𑀁 𑀯𑀺𑀯𑀝𑁆𑀝𑀸𑀥𑀺𑀕𑀫𑁂𑀦 𑀳𑁄𑀢𑀻𑀢𑀺 𑀆𑀳 ‘‘𑀆𑀕𑀢𑁄 𑀇𑀫𑀁 𑀲𑀤𑁆𑀥𑀫𑁆𑀫’’𑀦𑁆𑀢𑀺. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀲𑀦𑁆𑀢𑁄 𑀲𑀤𑀸 𑀯𑀺𑀚𑁆𑀚𑀫𑀸𑀦𑁄 𑀥𑀫𑁆𑀫𑁄𑀢𑀺 𑀓𑀢𑁆𑀯𑀸 𑀲𑀤𑁆𑀥𑀫𑁆𑀫𑁄𑀢𑀺 𑀇𑀫𑀁 𑀨𑀮𑁂𑀳𑀺 𑀅𑀲𑀸𑀥𑀸𑀭𑀡𑁂𑀦 𑀧𑀭𑀺𑀬𑀸𑀬𑁂𑀦 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺. 𑀢𑀬𑀺𑀤𑀫𑀲𑁆𑀲 𑀆𑀕𑀫𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑁄, 𑀲𑁄 𑀘 𑀧𑀳𑀸𑀦𑀸𑀪𑀺𑀲𑀫𑀬𑀸𑀤𑀻𑀳𑀺 𑀲𑀳𑁂𑀯 𑀇𑀥 𑀇𑀚𑁆𑀛𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀩𑁆𑀩𑀤𑀺𑀝𑁆𑀞𑀺𑀕𑀳𑀦𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀩𑁆𑀩𑀤𑀺𑀝𑁆𑀞𑀺𑀕𑀳𑀦𑀸𑀦𑀺 𑀯𑀺𑀦𑀺𑀩𑁆𑀩𑁂𑀞𑁂𑀦𑁆𑀢𑁄 𑀲𑀩𑁆𑀩𑀓𑀺𑀮𑁂𑀲𑁂 𑀧𑀚𑀳𑀦𑁆𑀢𑁄𑀢𑀺 𑀧𑀤𑀤𑁆𑀯𑀬𑁂𑀦 𑀧𑀦 𑀧𑀳𑀸𑀦𑀸𑀪𑀺𑀲𑀫𑀬𑀫𑀸𑀳, 𑀚𑀸𑀢𑀺𑀲𑀁𑀲𑀸𑀭𑀸 𑀦𑀺𑀓𑁆𑀔𑀫𑀦𑁆𑀢𑁄𑀢𑀺 𑀇𑀫𑀺𑀦𑀸 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀁. 𑀲𑀫𑀢𑀺𑀓𑁆𑀓𑀫𑀢𑁆𑀣𑁄 𑀳𑀺 𑀧𑀭𑀺𑀜𑁆𑀜𑀢𑁆𑀣𑁄. 𑀧𑀝𑀺𑀧𑀢𑁆𑀢𑀺𑀁 𑀧𑀭𑀺𑀦𑀺𑀝𑁆𑀞𑀧𑁂𑀦𑁆𑀢𑁄𑀢𑀺 𑀇𑀫𑀺𑀦𑀸 𑀪𑀸𑀯𑀦𑀸𑀪𑀺𑀲𑀫𑀬𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀓𑀸𑀮𑀧𑀭𑀺𑀘𑁆𑀙𑁂𑀤𑀯𑀘𑀦𑀦𑁆𑀢𑀺 𑀧𑀭𑀺𑀘𑁆𑀙𑀺𑀚𑁆𑀚𑀢𑀻𑀢𑀺 𑀧𑀭𑀺𑀘𑁆𑀙𑁂𑀤𑁄, 𑀓𑀸𑀮𑁄 𑀏𑀯 𑀧𑀭𑀺𑀘𑁆𑀙𑁂𑀤𑁄 𑀓𑀸𑀮𑀧𑀭𑀺𑀘𑁆𑀙𑁂𑀤𑁄, 𑀬𑁄 𑀲𑁄 𑀅𑀓𑀼𑀲𑀮𑀧𑀚𑀸𑀦𑀦𑀸𑀤𑀺𑀦𑀸 𑀧𑀭𑀺𑀘𑁆𑀙𑀺𑀦𑁆𑀦𑁄 ¶ 𑀫𑀕𑁆𑀕𑀯𑀼𑀝𑁆𑀞𑀸𑀦𑀓𑀸𑀮𑁄 𑀫𑀕𑁆𑀕𑀓𑁆𑀔𑀡𑁄, 𑀢𑀲𑁆𑀲 𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀬𑀲𑁆𑀫𑀺𑀁 𑀓𑀸𑀮𑁂’’𑀢𑀺. 𑀅𑀓𑀼𑀲𑀮𑀜𑁆𑀘𑀸𑀢𑀺 𑀘-𑀲𑀤𑁆𑀤𑁄 𑀲𑀫𑀼𑀘𑁆𑀘𑀬𑀢𑁆𑀣𑁄. 𑀢𑁂𑀦 𑀯𑀓𑁆𑀔𑀫𑀸𑀦𑀁 𑀅𑀓𑀼𑀲𑀮𑀫𑀽𑀮𑀸𑀤𑀺𑀁 𑀲𑀫𑀼𑀘𑁆𑀘𑀺𑀦𑁄𑀢𑀺. 𑀤𑀲𑀸𑀓𑀼𑀲𑀮𑀓𑀫𑁆𑀫𑀧𑀣𑀦𑁆𑀢𑀺 𑀓𑀼𑀢𑁄𑀬𑀁 𑀯𑀺𑀲𑁂𑀲𑁄, 𑀬𑀸𑀯𑀢𑀸 𑀅𑀦𑀺𑀤𑁆𑀥𑀸𑀭𑀺𑀢𑀯𑀺𑀲𑁂𑀲𑀁 𑀅𑀓𑀼𑀲𑀮𑀁 𑀕𑀳𑀺𑀢𑀦𑁆𑀢𑀺? 𑀦 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 𑀯𑀺𑀲𑁂𑀲𑁂 𑀅𑀯𑀝𑁆𑀞𑀸𑀦𑀢𑁄. 𑀓𑀺𑀁 𑀯𑀸 𑀇𑀫𑀸𑀬 𑀬𑀼𑀢𑁆𑀢𑀺𑀘𑀺𑀦𑁆𑀢𑀸𑀬, 𑀬𑀲𑁆𑀫𑀸 𑀧𑀞𑀫𑀯𑀸𑀭𑁂𑀦 𑀉𑀤𑁆𑀤𑁂𑀲𑀯𑀲𑁂𑀦 𑀤𑁂𑀲𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀢𑁆𑀣𑀸𑀭𑀤𑁂𑀲𑀦𑀸 𑀤𑀼𑀢𑀺𑀬𑀯𑀸𑀭𑁄. 𑀢𑁂𑀦𑁂𑀯𑀸𑀳 ‘‘𑀓𑀢𑀫𑀁 𑀧𑀦𑀸𑀯𑀼𑀲𑁄’’𑀢𑀺𑀆𑀤𑀺. 𑀬𑀲𑁆𑀫𑀸 𑀮𑁄𑀓𑀼𑀢𑁆𑀢𑀭𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀇𑀥 𑀅𑀥𑀺𑀧𑁆𑀧𑁂𑀢𑀸, 𑀢𑀲𑁆𑀫𑀸 𑀦𑀺𑀭𑁄𑀥𑀸𑀭𑀫𑁆𑀫𑀡𑀸𑀬 𑀧𑀚𑀸𑀦𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀓𑀺𑀘𑁆𑀘𑀯𑀲𑁂𑀦 𑀲𑀫𑁆𑀫𑁄𑀳𑀢𑁄 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀤𑀲𑀅𑀓𑀼𑀲𑀮𑀓𑀫𑁆𑀫𑀧𑀣𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 ‘‘𑀅𑀓𑀼𑀲𑀮𑀁 𑀧𑀚𑀸𑀦𑀸𑀢𑀻’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲𑀸𑀢𑀺 𑀅𑀓𑀼𑀲𑀮𑀓𑀫𑁆𑀫𑀧𑀣𑀲𑀗𑁆𑀔𑀸𑀢𑀲𑁆𑀲 𑀤𑀼𑀓𑁆𑀔𑀲𑁆𑀲. 𑀢𑁂𑀦𑁂𑀯 𑀧𑀓𑀸𑀭𑁂𑀦𑀸𑀢𑀺 ‘‘𑀦𑀺𑀭𑁄𑀥𑀸𑀭𑀫𑁆𑀫𑀡𑀸𑀬 𑀧𑀚𑀸𑀦𑀦𑀸𑀬 𑀓𑀺𑀘𑁆𑀘𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦.

𑀓𑀼𑀲𑀮𑀦𑁆𑀢𑀺 𑀏𑀢𑁆𑀣𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀓𑀼𑀘𑁆𑀙𑀺𑀢𑁂 𑀧𑀸𑀧𑀥𑀫𑁆𑀫𑁂 𑀲𑀮𑀬𑀢𑀺 𑀘𑀮𑀬𑀢𑀺 𑀓𑀫𑁆𑀧𑁂𑀢𑀻𑀢𑀺 𑀓𑀼𑀲𑀮𑀁, 𑀓𑀼𑀘𑁆𑀙𑀺𑀢𑁂𑀦 𑀯𑀸 𑀆𑀓𑀸𑀭𑁂𑀦 𑀲𑀬𑀦𑁆𑀢𑀻𑀢𑀺 𑀓𑀼𑀲𑀸, 𑀧𑀸𑀧𑀓𑀸 𑀥𑀫𑁆𑀫𑀸. 𑀢𑁂 𑀓𑀼𑀲𑁂 𑀮𑀼𑀦𑀸𑀢𑀺 𑀙𑀺𑀦𑁆𑀤𑀢𑀻𑀢𑀺 𑀓𑀼𑀲𑀮𑀁. 𑀓𑀼𑀘𑁆𑀙𑀺𑀢𑀸𑀦𑀁 𑀯𑀸 𑀲𑀸𑀦𑀢𑁄 𑀢𑀦𑀼𑀓𑀭𑀡𑀢𑁄 𑀜𑀸𑀡𑀁 𑀓𑀼𑀲𑀁 𑀦𑀸𑀫, 𑀢𑁂𑀦 𑀮𑀸𑀢𑀩𑁆𑀩𑀁 𑀕𑀳𑁂𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀓𑀼𑀲𑀮𑀁. 𑀬𑀣𑀸 𑀯𑀸 𑀓𑀼𑀲𑁄 𑀉𑀪𑀬𑀪𑀸𑀕𑀕𑀢𑀁 𑀳𑀢𑁆𑀣𑀧𑀤𑁂𑀲𑀁 𑀮𑀼𑀦𑀸𑀢𑀺, 𑀏𑀯𑀫𑀺𑀤𑀁 𑀉𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀦𑁆𑀦𑀯𑀲𑁂𑀦 𑀉𑀪𑀬𑀪𑀸𑀕𑀕𑀢𑀁 𑀲𑀁𑀓𑀺𑀮𑁂𑀲𑀧𑀓𑁆𑀔𑀁 𑀮𑀼𑀦𑀸𑀢𑀺 𑀙𑀺𑀦𑁆𑀤𑀢𑀺, 𑀢𑀲𑁆𑀫𑀸 𑀓𑀼𑀲𑁄 𑀯𑀺𑀬 𑀮𑀼𑀦𑀸𑀢𑀻𑀢𑀺 ¶ 𑀓𑀼𑀲𑀮𑀁. 𑀓𑀼𑀘𑁆𑀙𑀺𑀢𑀸𑀦𑀁 𑀯𑀸 𑀲𑀸𑀯𑀚𑁆𑀚𑀥𑀫𑁆𑀫𑀸𑀦𑀁 𑀲𑀮𑀦𑀢𑁄 𑀲𑀁𑀯𑀭𑀡𑀢𑁄 𑀓𑀼𑀲𑀮𑀁. 𑀓𑀼𑀲𑀮𑀥𑀫𑁆𑀫𑀯𑀲𑁂𑀦 𑀳𑀺 𑀅𑀓𑀼𑀲𑀮𑀸 𑀫𑀦𑀘𑁆𑀙𑀝𑁆𑀞𑁂𑀲𑀼 𑀤𑁆𑀯𑀸𑀭𑁂𑀲𑀼 𑀅𑀧𑁆𑀧𑀯𑀢𑁆𑀢𑀺𑀬𑀸 𑀲𑀁𑀯𑀼𑀢𑀸 𑀳𑁄𑀦𑁆𑀢𑀺. 𑀓𑀼𑀘𑁆𑀙𑀺𑀢𑁂 𑀯𑀸 𑀧𑀸𑀧𑀥𑀫𑁆𑀫𑁂 𑀲𑀮𑀬𑀢𑀺 𑀕𑀫𑁂𑀢𑀺 𑀅𑀧𑀦𑁂𑀢𑀻𑀢𑀺 𑀓𑀼𑀲𑀮𑀁. 𑀓𑀼𑀘𑁆𑀙𑀺𑀢𑀸𑀦𑀁 𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀲𑀸𑀦𑀢𑁄 𑀦𑀺𑀲𑀸𑀦𑀢𑁄 𑀢𑁂𑀚𑀦𑀢𑁄 𑀓𑀼𑀲𑀸, 𑀤𑁄𑀲𑀮𑁄𑀪𑀸𑀤𑀬𑁄. 𑀲𑀸𑀤𑀻𑀦𑀯𑀯𑀲𑁂𑀦 𑀘𑁂𑀢𑀦𑀸𑀬 𑀢𑀺𑀓𑁆𑀔𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀫𑀳𑀸𑀲𑀸𑀯𑀚𑁆𑀚𑀢𑀸. 𑀢𑁂 𑀓𑀼𑀲𑁂 𑀮𑀼𑀦𑀸𑀢𑀺 𑀙𑀺𑀦𑁆𑀤𑀢𑀻𑀢𑀺 𑀓𑀼𑀲𑀮𑀁. 𑀓𑀼𑀘𑁆𑀙𑀺𑀢𑀸𑀦𑀁 𑀯𑀸 𑀲𑀸𑀦𑀢𑁄 𑀅𑀦𑁆𑀢𑀓𑀭𑀡𑀢𑁄 𑀯𑀺𑀦𑀸𑀲𑀦𑀢𑁄 𑀓𑀼𑀲𑀸𑀦𑀺, 𑀧𑀼𑀜𑁆𑀜𑀓𑀺𑀭𑀺𑀬𑀯𑀲𑁂𑀦 𑀧𑀯𑀢𑁆𑀢𑀸𑀦𑀺 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀢𑁂𑀳𑀺 𑀮𑀸𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀓𑀼𑀲𑀮𑀁. ‘‘𑀓𑀼’’𑀇𑀢𑀺 𑀯𑀸 𑀪𑀽𑀫𑀺 𑀯𑀼𑀘𑁆𑀘𑀢𑀺, 𑀅𑀥𑀺𑀝𑁆𑀞𑀸𑀦𑀪𑀸𑀯𑁂𑀦 𑀢𑀁𑀲𑀤𑀺𑀲𑀲𑁆𑀲 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀪𑀽𑀢𑀲𑁆𑀲 𑀭𑀽𑀧𑀸𑀭𑀽𑀧𑀧𑀩𑀦𑁆𑀥𑀲𑁆𑀲 𑀲𑀫𑁆𑀧𑀢𑀺 𑀆𑀬𑀢𑀺𑀜𑁆𑀘 𑀅𑀦𑀼𑀤𑀳𑁂𑀦 𑀯𑀺𑀦𑀸𑀲𑀦𑀢𑁄 𑀓𑀼𑀁 𑀲𑀲𑀦𑁆𑀢𑀻𑀢𑀺 𑀓𑀼𑀲𑀸, 𑀭𑀸𑀕𑀸𑀤𑀬𑁄. 𑀢𑁂 𑀯𑀺𑀬 𑀅𑀢𑁆𑀢𑀦𑁄 ¶ 𑀦𑀺𑀲𑁆𑀲𑀬𑀲𑁆𑀲 𑀮𑀯𑀦𑀢𑁄 𑀙𑀺𑀦𑁆𑀤𑀦𑀢𑁄 𑀓𑀼𑀲𑀮𑀁. 𑀧𑀬𑁄𑀕𑀲𑀫𑁆𑀧𑀸𑀤𑀺𑀢𑀸 𑀳𑀺 𑀓𑀼𑀲𑀮𑀥𑀫𑁆𑀫𑀸 𑀅𑀘𑁆𑀘𑀦𑁆𑀢𑀫𑁂𑀯 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺. 𑀓𑀼𑀲𑀮𑀲𑁆𑀲 𑀫𑀽𑀮𑀦𑁆𑀢𑀺 𑀓𑀼𑀲𑀮𑀫𑀽𑀮𑀁, 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑁂𑀦 𑀓𑀼𑀲𑀮𑀲𑁆𑀲 𑀧𑀢𑀺𑀝𑁆𑀞𑀸 𑀦𑀺𑀤𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀓𑀼𑀲𑀮𑀫𑀽𑀮𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀅𑀓𑀼𑀲𑀮𑀦𑁆𑀢𑀺 𑀧𑀦 𑀦 𑀓𑀼𑀲𑀮𑀁 𑀅𑀓𑀼𑀲𑀮𑀁, 𑀓𑀼𑀲𑀮𑀥𑀫𑁆𑀫𑀸𑀦𑀁 𑀧𑀝𑀺𑀧𑀓𑁆𑀔𑀯𑀲𑁂𑀦 𑀅𑀓𑀼𑀲𑀮𑀦𑁆𑀢𑀺 𑀧𑀤𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀆𑀭𑁄𑀕𑁆𑀬𑀸𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀝𑁆𑀞𑁂𑀦 𑀓𑀼𑀲𑀮𑀁 𑀯𑀼𑀘𑁆𑀘𑀢𑀻𑀢𑀺. 𑀬𑀣𑀸 𑀬𑀁 𑀥𑀫𑁆𑀫𑀚𑀸𑀢𑀁 𑀦 𑀅𑀭𑁄𑀕𑀁 𑀦 𑀅𑀯𑀚𑁆𑀚𑀁 𑀦 𑀲𑀼𑀔𑀯𑀺𑀧𑀸𑀓𑀁 𑀦 𑀘 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀁, 𑀢𑀁 𑀅𑀓𑀼𑀲𑀮𑀦𑁆𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀏𑀯𑀁 𑀬𑀁 𑀦 𑀓𑀼𑀘𑁆𑀙𑀺𑀢𑀸𑀦𑀁 𑀲𑀮𑀦𑀲𑀪𑀸𑀯𑀁, 𑀦 𑀓𑀼𑀲𑁂𑀦, 𑀓𑀼𑀲𑁂𑀳𑀺 𑀯𑀸 𑀧𑀯𑀢𑁆𑀢𑁂𑀢𑀩𑁆𑀩𑀁, 𑀦 𑀘 𑀓𑀼𑀲𑁄 𑀯𑀺𑀬 𑀮𑀯𑀦𑀓𑀁, 𑀢𑀁 𑀅𑀓𑀼𑀲𑀮𑀁 𑀦𑀸𑀫𑀸𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀢𑁆𑀣𑀼𑀧𑀚𑀸𑀦𑀦𑀸𑀢𑀺 𑀤𑀼𑀓𑁆𑀔𑀸𑀤𑀺𑀯𑀢𑁆𑀣𑀼𑀦𑁄 𑀧𑀚𑀸𑀦𑀦𑀸 𑀧𑀝𑀺𑀯𑁂𑀥𑁄. 𑀢𑀣𑀸 𑀩𑀼𑀚𑁆𑀛𑀦𑀓𑀧𑀼𑀕𑁆𑀕𑀮𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀤𑁂𑀲𑀦𑀸 𑀧𑀯𑀢𑁆𑀢𑀸𑀢𑀺 𑀆𑀳 ‘‘𑀅𑀓𑀼𑀲𑀮𑀸𑀤𑀺𑀧𑀚𑀸𑀦𑀦𑁂𑀦𑀸𑀧𑀻’’𑀢𑀺. 𑀢𑁂𑀦𑁂𑀯 𑀘 𑀲𑀁𑀔𑀺𑀢𑁆𑀢𑁂𑀦 𑀤𑁂𑀲𑀦𑀸 𑀧𑀯𑀢𑁆𑀢𑀸. 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑁄 𑀧𑀦 ‘‘𑀲𑀩𑁆𑀩𑀁 𑀪𑀺𑀓𑁆𑀔𑀯𑁂 𑀅𑀪𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 (𑀲𑀁. 𑀦𑀺. 𑁪.𑁪𑁬; 𑀧𑀝𑀺. 𑀫. 𑁧.𑁩) 𑀯𑀘𑀦𑀢𑁄 𑀅𑀦𑀯𑀲𑁂𑀲𑀢𑁄 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀧𑀭𑀺𑀕𑁆𑀕𑀳𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀺. 𑀢𑁂𑀦𑀸𑀳 ‘‘𑀤𑁂𑀲𑀦𑀸𑀬𑁂𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀫𑀦𑀲𑀺𑀓𑀸𑀭𑀧𑀝𑀺𑀯𑁂𑀥𑁄𑀢𑀺 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑀯𑀺𑀧𑀲𑁆𑀲𑀦𑀸𑀫𑀦𑀲𑀺𑀓𑀸𑀭𑁄 𑀅𑀭𑀺𑀬𑀫𑀕𑁆𑀕𑀧𑀝𑀺𑀯𑁂𑀥𑁄 𑀘. 𑀓𑀲𑁆𑀲𑀘𑀺 𑀅𑀓𑁄𑀧𑀦𑀢𑁄 𑀯𑀺𑀢𑁆𑀣𑀸𑀭𑀯𑀲𑁂𑀦𑁂𑀯 𑀯𑀼𑀢𑁆𑀢𑀁 𑀯𑀺𑀧𑀲𑁆𑀲𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀸 𑀫𑀕𑁆𑀕𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀸𑀧𑀺 𑀯𑀺𑀢𑁆𑀣𑀸𑀭𑀦𑀬𑁂𑀦𑁂𑀯 𑀧𑀝𑀺𑀯𑀺𑀚𑁆𑀛𑀦𑁆𑀢𑀻𑀢𑀺 𑀅𑀢𑁆𑀣𑁄 𑀯𑀺𑀲𑀼𑀤𑁆𑀥𑀺𑀓𑁆𑀓𑀫𑀲𑁆𑀲 𑀅𑀪𑀸𑀯𑀢𑁄.

𑀪𑀺𑀓𑁆𑀔𑀽𑀢𑀺 𑀫𑀳𑀸𑀯𑀺𑀳𑀸𑀭𑁂 𑀥𑀫𑁆𑀫𑀲𑀗𑁆𑀕𑀻𑀢𑀺𑀯𑀲𑁂𑀦 𑀧𑀜𑁆𑀘𑀦𑀺𑀓𑀸𑀬𑀫𑀡𑁆𑀟𑀮𑁂 𑀦𑀺𑀲𑀺𑀦𑁆𑀦𑀪𑀺𑀓𑁆𑀔𑀽. 𑀣𑁂𑀭𑁄𑀢𑀺 𑀢𑀢𑁆𑀣 𑀲𑀗𑁆𑀖𑀢𑁆𑀣𑁂𑀭𑁄𑀢𑀺 𑀯𑀤𑀦𑁆𑀢𑀺. 𑀯𑀢𑁆𑀣𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀧𑀦 𑀫𑀳𑀸𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀪𑀺𑀓𑁆𑀔𑀽 ¶ 𑀲𑀦𑁆𑀥𑀸𑀬 ‘‘𑀆𑀳𑀁𑀲𑀽’’𑀢𑀺 𑀯𑀼𑀢𑁆𑀢𑀁. 𑀣𑁂𑀭𑁄𑀢𑀺 𑀧𑀦 𑀫𑀳𑀸𑀲𑀗𑁆𑀖𑀭𑀓𑁆𑀔𑀺𑀢𑀢𑁆𑀣𑁂𑀭𑁄. 𑀲𑁄 𑀳𑀺 𑀇𑀫𑀲𑁆𑀫𑀺𑀁 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀢𑀁 𑀢𑀁 𑀯𑀺𑀦𑀺𑀘𑁆𑀙𑀬𑀁 𑀓𑀣𑁂𑀲𑀺. 𑀭𑀸𑀲𑀺𑀢𑁄𑀢𑀺 𑀧𑀺𑀡𑁆𑀟𑀢𑁄, 𑀏𑀓𑀚𑁆𑀛𑀦𑁆𑀢𑀺 𑀅𑀢𑁆𑀣𑁄.

𑀅𑀓𑀼𑀲𑀮𑀓𑀫𑁆𑀫𑀧𑀣𑀯𑀡𑁆𑀡𑀦𑀸

𑀅𑀓𑁄𑀲𑀮𑁆𑀮𑀧𑁆𑀧𑀯𑀢𑁆𑀢𑀺𑀬𑀸𑀢𑀺 𑀓𑁄𑀲𑀮𑁆𑀮𑀧𑀝𑀺𑀧𑀓𑁆𑀔𑀢𑁄 𑀅𑀓𑁄𑀲𑀮𑁆𑀮𑀁 𑀯𑀼𑀘𑁆𑀘𑀢𑀺 𑀅𑀜𑁆𑀜𑀸𑀡𑀁, 𑀢𑀢𑁄 𑀧𑀯𑀢𑁆𑀢𑀦𑀢𑁄, 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀜𑀸𑀡𑀧𑀝𑀺𑀧𑀓𑁆𑀔𑁄 ¶ 𑀅𑀜𑁆𑀜𑀸𑀡𑀁 𑀫𑀺𑀢𑁆𑀢𑀧𑀝𑀺𑀧𑀓𑁆𑀔𑁄 𑀅𑀫𑀺𑀢𑁆𑀢𑁄 𑀯𑀺𑀬 𑀓𑀼𑀲𑀮𑀧𑀝𑀺𑀧𑀓𑁆𑀔𑁄 𑀅𑀓𑀼𑀲𑀮𑀁 𑀓𑀼𑀲𑀮𑁂𑀦 𑀧𑀳𑀸𑀢𑀩𑁆𑀩𑀢𑁆𑀢𑀸, 𑀦 𑀧𑀦 𑀓𑀼𑀲𑀮𑀸𑀦𑀁 𑀧𑀳𑀸𑀬𑀢𑀢𑁆𑀢𑀸. 𑀓𑀼𑀲𑀮𑀫𑁂𑀯 𑀳𑀺 𑀧𑀬𑁄𑀕𑀲𑀫𑁆𑀧𑀸𑀤𑀺𑀢𑀁 𑀅𑀓𑀼𑀲𑀮𑀁 𑀧𑀚𑀳𑀢𑀺. 𑀲𑀳 𑀅𑀯𑀚𑁆𑀚𑁂𑀳𑀺 𑀮𑁄𑀪𑀸𑀤𑀻𑀳𑀺 𑀯𑀢𑁆𑀢𑀢𑀻𑀢𑀺 𑀲𑀸𑀯𑀚𑁆𑀚𑀁. 𑀤𑀼𑀓𑁆𑀔𑁄 𑀅𑀦𑀺𑀝𑁆𑀞𑁄 𑀘𑀢𑀼𑀓𑁆𑀔𑀦𑁆𑀥-𑀲𑀗𑁆𑀔𑀸𑀢𑁄 𑀯𑀺𑀧𑀸𑀓𑁄 𑀏𑀢𑀲𑁆𑀲𑀸𑀢𑀺 𑀤𑀼𑀓𑁆𑀔𑀯𑀺𑀧𑀸𑀓𑀁. 𑀢𑀢𑁆𑀣 𑀲𑀸𑀯𑀚𑁆𑀚𑀯𑀘𑀦𑁂𑀦 𑀅𑀓𑀼𑀲𑀮𑀸𑀦𑀁 𑀧𑀯𑀢𑁆𑀢𑀺𑀤𑀼𑀓𑁆𑀔𑀢𑀁 𑀤𑀲𑁆𑀲𑁂𑀢𑀺, 𑀤𑀼𑀓𑁆𑀔𑀯𑀺𑀧𑀸𑀓𑀯𑀘𑀦𑁂𑀦 𑀯𑀺𑀧𑀸𑀓𑀤𑀼𑀓𑁆𑀔𑀢𑀁. 𑀧𑀼𑀭𑀺𑀫𑀜𑁆𑀳𑀺 𑀧𑀯𑀢𑁆𑀢𑀺𑀲𑀫𑁆𑀪𑀯𑀯𑀲𑁂𑀦 𑀅𑀓𑀼𑀲𑀮𑀲𑁆𑀲 𑀮𑀓𑁆𑀔𑀡𑀯𑀘𑀦𑀁, 𑀧𑀘𑁆𑀙𑀺𑀫𑀁 𑀢𑀸𑀮𑀦𑁆𑀢𑀭𑁂 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀯𑀲𑁂𑀦. 𑀢𑀣𑀸 𑀧𑀼𑀭𑀺𑀫𑁂𑀦 𑀅𑀓𑀼𑀲𑀮𑀲𑁆𑀲 𑀅𑀯𑀺𑀲𑀼𑀤𑁆𑀥𑀲𑀪𑀸𑀯𑀢𑀁 𑀤𑀲𑁆𑀲𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀅𑀯𑀺𑀲𑀼𑀤𑁆𑀥𑀯𑀺𑀧𑀸𑀓𑀢𑀁. 𑀧𑀼𑀭𑀺𑀫𑁂𑀦 𑀅𑀓𑀼𑀲𑀮𑀁 𑀓𑀼𑀲𑀮𑀲𑀪𑀸𑀯𑀢𑁄 𑀦𑀺𑀯𑀢𑁆𑀢𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀅𑀩𑁆𑀬𑀸𑀓𑀢𑀲𑀪𑀸𑀯𑀢𑁄 𑀲𑀯𑀺𑀧𑀸𑀓𑀢𑁆𑀢𑀤𑀻𑀧𑀓𑀢𑁆𑀢𑀸 𑀧𑀘𑁆𑀙𑀺𑀫𑀲𑁆𑀲. 𑀧𑀼𑀭𑀺𑀫𑁂𑀦 𑀯𑀸 𑀅𑀯𑀚𑁆𑀚𑀯𑀦𑁆𑀢𑀢𑀸𑀤𑀲𑁆𑀲𑀦𑀢𑁄 𑀓𑀺𑀘𑁆𑀘𑀝𑁆𑀞𑁂𑀦 𑀭𑀲𑁂𑀦 𑀅𑀦𑀢𑁆𑀣𑀚𑀦𑀦𑀭𑀲𑀢𑀁 𑀤𑀲𑁆𑀲𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑁂𑀦 𑀅𑀦𑀺𑀝𑁆𑀞𑀯𑀺𑀧𑀸𑀓𑀭𑀲𑀢𑀁. 𑀧𑀼𑀭𑀺𑀫𑁂𑀦 𑀘 𑀉𑀧𑀝𑁆𑀞𑀸𑀦𑀸𑀓𑀸𑀭𑀝𑁆𑀞𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀦𑁂𑀦 𑀲𑀁𑀓𑀺𑀮𑁂𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀁, 𑀧𑀘𑁆𑀙𑀺𑀫𑁂𑀦 𑀨𑀮𑀝𑁆𑀞𑁂𑀦 𑀤𑀼𑀓𑁆𑀔𑀯𑀺𑀧𑀸𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀁. 𑀧𑀼𑀭𑀺𑀫𑁂𑀦 𑀘 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀅𑀓𑀼𑀲𑀮𑀲𑁆𑀲 𑀧𑀤𑀝𑁆𑀞𑀸𑀦𑀁 𑀧𑀓𑀸𑀲𑁂𑀢𑀺. 𑀢𑀢𑁄 𑀳𑀺 𑀢𑀁 𑀲𑀸𑀯𑀚𑁆𑀚𑀁 𑀚𑀸𑀢𑀁, 𑀧𑀘𑁆𑀙𑀺𑀫𑁂𑀦 𑀅𑀓𑀼𑀲𑀮𑀲𑁆𑀲 𑀅𑀜𑁆𑀜𑁂𑀲𑀁 𑀧𑀤𑀝𑁆𑀞𑀸𑀦𑀪𑀸𑀯𑀁 𑀯𑀺𑀪𑀸𑀯𑁂𑀢𑀺. 𑀢𑀜𑁆𑀳𑀺 𑀤𑀼𑀓𑁆𑀔𑀯𑀺𑀧𑀸𑀓𑀲𑁆𑀲 𑀓𑀸𑀭𑀡𑀦𑁆𑀢𑀺. 𑀲𑀁𑀓𑀺𑀮𑀺𑀝𑁆𑀞𑀦𑁆𑀢𑀺 𑀲𑀁𑀓𑀺𑀮𑁂𑀲𑁂𑀳𑀺 𑀲𑀫𑀦𑁆𑀦𑀸𑀕𑀢𑀁, 𑀤𑀲𑀳𑀺 𑀓𑀺𑀮𑁂𑀲𑀯𑀢𑁆𑀣𑀽𑀳𑀺 𑀯𑀺𑀩𑀸𑀥𑀺𑀢𑀁, 𑀉𑀧𑀢𑀸𑀧𑀺𑀢𑀁 𑀯𑀸 𑀢𑁂𑀳𑀺 𑀯𑀺𑀤𑀽𑀲𑀺𑀢𑀁 𑀫𑀮𑀻𑀦𑀓𑀢𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘𑀲𑁆𑀲 𑀤𑀼𑀓𑁆𑀔𑀯𑀺𑀧𑀸𑀓𑀢𑀜𑁆𑀘𑀸𑀢𑀺 𑀅𑀢𑁆𑀣𑁂 𑀇𑀤𑀜𑁆𑀘 𑀤𑀼𑀓𑁆𑀔𑀯𑀺𑀧𑀸𑀓𑀢𑀁 𑀅𑀧𑀘𑁆𑀘𑀓𑁆𑀔𑀢𑀸𑀬 𑀅𑀲𑀤𑁆𑀤𑀳𑀦𑁆𑀢𑀸𑀦𑀁 𑀧𑀘𑁆𑀘𑀓𑁆𑀔𑀢𑁄 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀲𑀁𑀯𑁂𑀚𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑀸𑀥𑀸𑀭𑀡𑀸 𑀲𑀩𑁆𑀩𑀲𑁆𑀲𑀧𑀺 𑀅𑀓𑀼𑀲𑀮𑀲𑁆𑀲.

𑀲𑀭𑀲𑁂𑀦𑁂𑀯 (𑀥. 𑀲. 𑀫𑀽𑀮𑀝𑀻. 𑁧) 𑀧𑀢𑀦𑀲𑀪𑀸𑀯𑀲𑁆𑀲 𑀅𑀦𑁆𑀢𑀭𑀸 𑀏𑀯 𑀅𑀢𑀻𑀯 𑀧𑀸𑀢𑀦𑀁 𑀅𑀢𑀺𑀧𑀸𑀢𑁄, 𑀲𑀡𑀺𑀓𑀁 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀲𑀻𑀖𑀁 𑀧𑀸𑀢𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀢𑀺𑀓𑁆𑀓𑀫𑁆𑀫𑀯𑀸 𑀲𑀢𑁆𑀣𑀸𑀤𑀻𑀳𑀺 𑀅𑀪𑀺𑀪𑀯𑀺𑀢𑁆𑀯𑀸 𑀧𑀸𑀢𑀦𑀁 𑀅𑀢𑀺𑀧𑀸𑀢𑁄. 𑀧𑀬𑁄𑀕𑀯𑀢𑁆𑀣𑀼𑀫𑀳𑀦𑁆𑀢𑀢𑀸𑀤𑀻𑀳𑀺 𑀫𑀳𑀸𑀲𑀸𑀯𑀚𑁆𑀚𑀢𑀸 𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀘𑁂𑀢𑀦𑀸𑀬 𑀩𑀮𑀯𑀪𑀸𑀯𑀢𑁄. 𑀏𑀓𑀲𑁆𑀲 𑀳𑀺 𑀧𑀬𑁄𑀕𑀲𑁆𑀲 𑀲𑀳𑀲𑀸 𑀦𑀺𑀧𑁆𑀨𑀸𑀤𑀦𑀯𑀲𑁂𑀦 𑀲𑀓𑀺𑀘𑁆𑀘𑀲𑀸𑀥𑀺𑀓𑀸𑀬 𑀩𑀳𑀼𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀚𑀯𑀦𑁂𑀳𑀺 𑀮𑀤𑁆𑀥𑀸𑀲𑁂𑀯𑀦𑀸𑀬 𑀘 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀬 𑀯𑀲𑁂𑀦 𑀧𑀬𑁄𑀕𑀲𑁆𑀲 𑀫𑀳𑀦𑁆𑀢𑀪𑀸𑀯𑁄. 𑀲𑀢𑀺𑀧𑀺 𑀓𑀤𑀸𑀘𑀺 𑀔𑀼𑀤𑁆𑀤𑀓𑁂 𑀘𑁂𑀯 𑀫𑀳𑀦𑁆𑀢𑁂 𑀘 𑀧𑀸𑀡𑁂 𑀧𑀬𑁄𑀕𑀲𑁆𑀲 𑀲𑀫𑀪𑀸𑀯𑁂 𑀫𑀳𑀦𑁆𑀢𑀁 ¶ 𑀳𑀦𑀦𑁆𑀢𑀲𑁆𑀲 𑀘𑁂𑀢𑀦𑀸 𑀢𑀺𑀩𑁆𑀩𑀸𑀓𑀸𑀭𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀢𑁆𑀣𑀼𑀲𑁆𑀲 𑀫𑀳𑀦𑁆𑀢𑀪𑀸𑀯𑁄. 𑀇𑀢𑀺 𑀉𑀪𑀬𑀫𑁆𑀧𑁂𑀢𑀁 𑀘𑁂𑀢𑀦𑀸𑀬 ¶ 𑀩𑀮𑀯𑀪𑀸𑀯𑁂𑀦𑁂𑀯 𑀳𑁄𑀢𑀻𑀢𑀺. 𑀬𑀣𑀸𑀯𑀼𑀢𑁆𑀢𑀧𑀘𑁆𑀘𑀬𑀧𑀭𑀺𑀬𑀸𑀬𑁂𑀧𑀺 𑀢𑀁𑀢𑀁𑀧𑀘𑁆𑀘𑀬𑁂𑀳𑀺 𑀘𑁂𑀢𑀦𑀸𑀬 𑀩𑀮𑀯𑀢𑀸𑀬 𑀏𑀯 𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀬𑁄𑀕𑀯𑀢𑁆𑀣𑀼𑀆𑀤𑀺𑀧𑀘𑁆𑀘𑀬𑀸𑀦𑀜𑁆𑀳𑀺 𑀅𑀫𑀳𑀢𑁆𑀢𑁂𑀧𑀺 𑀳𑀦𑁆𑀢𑀩𑁆𑀩𑀲𑁆𑀲 𑀕𑀼𑀡𑀯𑀦𑁆𑀢𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑀢𑀸, 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀅𑀧𑁆𑀧𑀲𑀸𑀯𑀚𑁆𑀚𑀢𑀸 𑀘 𑀯𑀢𑁆𑀣𑀼𑀲𑁆𑀲 𑀫𑀳𑀢𑁆𑀢𑀸𑀫𑀳𑀢𑁆𑀢𑁂𑀲𑀼 𑀯𑀺𑀬 𑀤𑀝𑁆𑀞𑀩𑁆𑀩𑀸. 𑀓𑀺𑀮𑁂𑀲𑀸𑀦𑀁 𑀉𑀧𑀓𑁆𑀓𑀫𑀸𑀦𑀁 𑀤𑁆𑀯𑀺𑀦𑁆𑀦𑀜𑁆𑀘 𑀫𑀼𑀤𑀼𑀢𑀸𑀬 𑀢𑀺𑀩𑁆𑀩𑀢𑀸𑀬 𑀘 𑀅𑀧𑁆𑀧𑀲𑀸𑀯𑀚𑁆𑀚𑀢𑀸 𑀫𑀳𑀸𑀲𑀸𑀯𑀚𑁆𑀚𑀢𑀸𑀧𑀺 𑀬𑁄𑀚𑁂𑀢𑀩𑁆𑀩𑀸. 𑀧𑀸𑀡𑁄 𑀧𑀸𑀡𑀲𑀜𑁆𑀜𑀺𑀢𑀸 𑀯𑀥𑀓𑀘𑀺𑀢𑁆𑀢𑀜𑁆𑀘 𑀧𑀼𑀩𑁆𑀩𑀪𑀸𑀕𑀺𑀬𑀸𑀧𑀺 𑀳𑁄𑀦𑁆𑀢𑀺, 𑀉𑀧𑀓𑁆𑀓𑀫𑁄 𑀯𑀥𑀓𑀘𑁂𑀢𑀦𑀸𑀲𑀫𑀼𑀝𑁆𑀞𑀸𑀧𑀺𑀢𑁄. 𑀧𑀜𑁆𑀘 𑀲𑀫𑁆𑀪𑀸𑀭𑀸 𑀳𑀺 𑀧𑀸𑀡𑀸𑀢𑀺𑀧𑀸𑀢𑀘𑁂𑀢𑀦𑀸𑀢𑀺 𑀲𑀸 𑀧𑀜𑁆𑀘𑀲𑀫𑁆𑀪𑀸𑀭𑀯𑀺𑀦𑀺𑀫𑀼𑀢𑁆𑀢𑀸 𑀤𑀝𑁆𑀞𑀩𑁆𑀩𑀸. 𑀅𑀬𑀜𑁆𑀘 𑀯𑀺𑀘𑀸𑀭𑁄 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼𑀧𑀺 𑀬𑀣𑀸𑀭𑀳𑀁 𑀯𑀢𑁆𑀢𑀩𑁆𑀩𑁄. 𑀯𑀺𑀚𑁆𑀛𑀦𑀧𑀳𑀭𑀡𑀸𑀤𑀺𑀯𑀲𑁂𑀦 𑀲𑀳𑀢𑁆𑀣𑁂𑀦𑀦𑀺𑀩𑁆𑀩𑀢𑁆𑀢𑁄 𑀲𑀸𑀳𑀢𑁆𑀣𑀺𑀓𑁄, 𑀆𑀡𑀸𑀧𑀦𑀯𑀲𑁂𑀦 𑀧𑀯𑀢𑁆𑀢𑁄 𑀆𑀡𑀢𑁆𑀢𑀺𑀓𑁄, 𑀉𑀲𑀼𑀲𑀢𑁆𑀢𑀺𑀬𑀦𑁆𑀢𑀧𑀸𑀲𑀸𑀡𑀸𑀤𑀺𑀦𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑁄, 𑀅𑀤𑀼𑀳𑀮𑀲𑀚𑁆𑀚𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑁄 𑀣𑀸𑀯𑀭𑁄, 𑀆𑀣𑀩𑁆𑀩𑀡𑀺𑀓𑀸𑀤𑀻𑀦𑀁 𑀯𑀺𑀬 𑀫𑀦𑁆𑀢𑀧𑀭𑀺𑀚𑀧𑁆𑀧𑀦𑀯𑀲𑁂𑀦 𑀧𑀯𑀢𑁆𑀢𑁄 𑀯𑀺𑀚𑁆𑀚𑀸𑀫𑀬𑁄, 𑀓𑀫𑁆𑀫𑀯𑀺𑀧𑀸𑀓𑀚𑀺𑀤𑁆𑀥𑀺𑀫𑀬𑁄 𑀇𑀤𑁆𑀥𑀺𑀫𑀬𑁄 𑀤𑀸𑀞𑀸𑀓𑁄𑀝𑀦𑀸𑀤𑀻𑀦𑀺 𑀯𑀺𑀬.

𑀬𑀤𑀺 ‘‘𑀫𑀫 𑀇𑀤’’𑀦𑁆𑀢𑀺 𑀧𑀭𑁂𑀦 𑀧𑀭𑀺𑀕𑁆𑀕𑀳𑀺𑀢𑀁 𑀅𑀤𑀺𑀦𑁆𑀦𑀁, 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑀤𑀸𑀭𑀓𑀲𑀦𑁆𑀢𑀓𑁂 𑀓𑀣𑀁 𑀢𑀲𑁆𑀲 𑀧𑀭𑀺𑀕𑁆𑀕𑀳𑀲𑀜𑁆𑀜𑀸𑀬 𑀏𑀯 𑀅𑀪𑀸𑀯𑀢𑁄𑀢𑀺 𑀆𑀳 ‘‘𑀬𑀢𑁆𑀣 𑀧𑀭𑁄’’𑀢𑀺𑀆𑀤𑀺. 𑀧𑀭𑁄 𑀦𑀸𑀫 𑀯𑀺𑀜𑁆𑀜𑀽 𑀯𑀸 𑀅𑀯𑀺𑀜𑁆𑀜𑀽 𑀯𑀸 𑀅𑀢𑁆𑀣𑀺 𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀲𑀸𑀫𑀺𑀓𑁄. 𑀅𑀯𑀺𑀜𑁆𑀜𑀽𑀧𑀺 𑀳𑀺 𑀯𑀺𑀜𑁆𑀜𑀼𑀓𑀸𑀮𑁂 𑀬𑀣𑀸𑀓𑀸𑀫𑀁 𑀓𑀭𑁄𑀦𑁆𑀢𑁄 𑀅𑀤𑀡𑁆𑀟𑀸𑀭𑀳𑁄𑀢𑀺. 𑀫𑀦𑁆𑀢𑀧𑀭𑀺𑀚𑀧𑁆𑀧𑀦𑁂𑀦 𑀧𑀭𑀲𑀦𑁆𑀢𑀓𑀳𑀭𑀡𑀁 𑀯𑀺𑀚𑁆𑀚𑀸𑀫𑀬𑁄, 𑀯𑀺𑀦𑀸 𑀫𑀦𑁆𑀢𑁂𑀦 𑀧𑀭𑀲𑀦𑁆𑀢𑀓𑀲𑁆𑀲 𑀓𑀸𑀬𑀯𑀘𑀻𑀧𑀬𑁄𑀕𑁂𑀳𑀺 𑀧𑀭𑀺𑀓𑀟𑁆𑀠𑀦𑀁 𑀢𑀸𑀤𑀺𑀲𑁂𑀦𑀺𑀤𑁆𑀥𑀺𑀯𑀲𑁂𑀦 𑀇𑀤𑁆𑀥𑀺𑀫𑀬𑁄 𑀧𑀬𑁄𑀕𑁄𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑁂 𑀙 𑀧𑀬𑁄𑀕𑀸 𑀲𑀸𑀳𑀢𑁆𑀣𑀺𑀓𑀸𑀤𑀬𑁄 𑀯𑀼𑀢𑁆𑀢𑀸. 𑀬𑀣𑀸𑀦𑀼𑀭𑀽𑀧𑀦𑁆𑀢𑀺 𑀏𑀢𑁆𑀣 𑀲𑀸𑀳𑀢𑁆𑀣𑀺𑀓𑁄 𑀢𑀸𑀯 𑀧𑀜𑁆𑀘𑀦𑁆𑀦𑀫𑁆𑀧𑀺 𑀅𑀯𑀳𑀸𑀭𑀸𑀦𑀁 𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀢𑀣𑀸 𑀆𑀡𑀢𑁆𑀢𑀺𑀬𑁄 𑀦𑀺𑀲𑁆𑀲𑀕𑁆𑀕𑀺𑀬𑁄 𑀘. 𑀣𑀸𑀯𑀭𑁄 𑀣𑁂𑀬𑁆𑀬𑀸𑀯𑀳𑀸𑀭𑀧𑀲𑀬𑁆𑀳𑀸𑀯𑀳𑀸𑀭𑀧𑀝𑀺𑀘𑁆𑀙𑀦𑁆𑀦𑀸𑀯𑀳𑀸𑀭𑀯𑀲𑁂𑀦. 𑀢𑀣𑀸 𑀲𑁂𑀲𑀸𑀧𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀫𑁂𑀣𑀼𑀦𑀲𑀫𑀸𑀘𑀸𑀭𑁂𑀲𑀽𑀢𑀺 𑀲𑀤𑀸𑀭𑀸𑀲𑀦𑁆𑀢𑁄𑀲-𑀧𑀭𑀤𑀸𑀭𑀕𑀫𑀦𑀯𑀲𑁂𑀦 𑀤𑀼𑀯𑀺𑀥𑁂𑀲𑀼 𑀫𑁂𑀣𑀼𑀦𑀲𑀫𑀸𑀘𑀸𑀭𑁂𑀲𑀼. 𑀅𑀬𑀫𑁂𑀯𑀳𑀺 𑀪𑁂𑀤𑁄 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀕𑁄𑀢𑁆𑀢𑀭𑀓𑁆𑀔𑀺𑀢𑀸 𑀲𑀕𑁄𑀢𑁆𑀢𑁂𑀳𑀺 𑀭𑀓𑁆𑀔𑀺𑀢𑀸. 𑀥𑀫𑁆𑀫𑀭𑀓𑁆𑀔𑀺𑀢𑀸 𑀲𑀳𑀥𑀫𑁆𑀫𑀺𑀓𑁂𑀳𑀺 𑀭𑀓𑁆𑀔𑀺𑀢𑀸. 𑀲𑀸𑀭𑀓𑁆𑀔𑀸 𑀲𑀲𑀸𑀫𑀺𑀓𑀸. 𑀬𑀲𑁆𑀲𑀸 𑀕𑀫𑀦𑁂 𑀭𑀜𑁆𑀜𑀸 𑀤𑀡𑁆𑀟𑁄 𑀞𑀧𑀺𑀢𑁄, 𑀲𑀸 𑀲𑀧𑀭𑀺𑀤𑀡𑁆𑀟𑀸. 𑀪𑀭𑀺𑀬𑀪𑀸𑀯𑀢𑁆𑀣𑀁 𑀥𑀦𑁂𑀦 𑀓𑀻𑀢𑀸 𑀥𑀦𑀓𑁆𑀓𑀻𑀢𑀸. 𑀙𑀦𑁆𑀤𑁂𑀦 𑀯𑀲𑀦𑁆𑀢𑀻 𑀙𑀦𑁆𑀤𑀯𑀸𑀲𑀺𑀦𑀻. 𑀪𑁄𑀕𑀢𑁆𑀣𑀁 𑀯𑀲𑀦𑁆𑀢𑀻 𑀪𑁄𑀕𑀯𑀸𑀲𑀺𑀦𑀻. 𑀧𑀝𑀢𑁆𑀣𑀁 𑀯𑀲𑀦𑁆𑀢𑀻 𑀧𑀝𑀯𑀸𑀲𑀺𑀦𑀻. 𑀉𑀤𑀓𑀧𑀢𑁆𑀢𑀁 𑀆𑀫𑀲𑀺𑀢𑁆𑀯𑀸 𑀕𑀳𑀺𑀢𑀸 𑀑𑀤𑀧𑀢𑁆𑀢𑀓𑀺𑀦𑀻. 𑀘𑀼𑀫𑁆𑀩𑀝𑀓𑀁 𑀅𑀧𑀦𑁂𑀢𑁆𑀯𑀸 𑀕𑀳𑀺𑀢𑀸 ¶ 𑀑𑀪𑀝𑀘𑀼𑀫𑁆𑀩𑀝𑀸. 𑀓𑀭𑀫𑀭𑀸𑀦𑀻𑀢𑀸 𑀥𑀚𑀸𑀳𑀢𑀸. 𑀢𑀗𑁆𑀔𑀡𑀺𑀓𑀸 𑀫𑀼𑀳𑀼𑀢𑁆𑀢𑀺𑀓𑀸. 𑀅𑀪𑀺𑀪𑀯𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑁂 𑀫𑀺𑀘𑁆𑀙𑀸𑀘𑀸𑀭𑁄 𑀫𑀳𑀸𑀲𑀸𑀯𑀚𑁆𑀚𑁄, 𑀦 𑀢𑀣𑀸 𑀤𑁆𑀯𑀺𑀦𑁆𑀦𑀁 𑀲𑀫𑀸𑀦𑀙𑀦𑁆𑀤𑀢𑀸𑀬. 𑀅𑀪𑀺𑀪𑀯𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀦𑁂 𑀲𑀢𑀺𑀧𑀺 𑀫𑀕𑁆𑀕𑁂𑀦𑀫𑀕𑁆𑀕𑀧𑀝𑀺𑀧𑀢𑁆𑀢𑀺𑀅𑀥𑀺𑀯𑀸𑀲𑀦𑁂 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀲𑁂𑀯𑀦𑀸𑀪𑀺𑀲𑀦𑁆𑀥𑀺𑀧𑀬𑁄𑀕𑀸𑀪𑀸𑀯𑀢𑁄 𑀫𑀺𑀘𑁆𑀙𑀸𑀘𑀸𑀭𑁄 ¶ 𑀦 𑀳𑁄𑀢𑀺 𑀅𑀪𑀺𑀪𑀼𑀬𑁆𑀬𑀫𑀸𑀦𑀲𑁆𑀲𑀸𑀢𑀺 𑀯𑀤𑀦𑁆𑀢𑀺. 𑀲𑁂𑀯𑀦𑀸𑀘𑀺𑀢𑁆𑀢𑁂 𑀲𑀢𑀺 𑀧𑀬𑁄𑀕𑀸𑀪𑀸𑀯𑁄 𑀅𑀧𑁆𑀧𑀫𑀸𑀡𑀁 𑀬𑁂𑀪𑀼𑀬𑁆𑀬𑁂𑀦 𑀇𑀢𑁆𑀣𑀺𑀬𑀸 𑀲𑁂𑀯𑀦𑀸𑀧𑀬𑁄𑀕𑀲𑁆𑀲 𑀅𑀪𑀸𑀯𑀢𑁄. 𑀢𑀣𑀸 𑀲𑀢𑀺 𑀧𑀼𑀭𑁂𑀢𑀭𑀁 𑀲𑁂𑀯𑀦𑀸𑀘𑀺𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀦𑁂𑀧𑀺 𑀢𑀲𑁆𑀲𑀸 𑀫𑀺𑀘𑁆𑀙𑀸𑀘𑀸𑀭𑁄 𑀦 𑀲𑀺𑀬𑀸, 𑀢𑀣𑀸 𑀧𑀼𑀭𑀺𑀲𑀲𑁆𑀲𑀧𑀺 𑀲𑁂𑀯𑀦𑀸𑀧𑀬𑁄𑀕𑀸𑀪𑀸𑀯𑁂𑀢𑀺, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀧𑀯𑀢𑁆𑀢𑀺𑀢𑀲𑁆𑀲 𑀯𑀲𑁂𑀦 𑀢𑀬𑁄, 𑀩𑀮𑀓𑁆𑀓𑀸𑀭𑁂𑀦 𑀧𑀯𑀢𑁆𑀢𑀺𑀢𑀲𑁆𑀲 𑀯𑀲𑁂𑀦 𑀢𑀬𑁄𑀢𑀺 𑀲𑀩𑁆𑀩𑁂𑀧𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀢𑁆𑀣𑀪𑀜𑁆𑀚𑀓𑁄𑀢𑀺 𑀓𑀫𑁆𑀫𑀧𑀣𑀯𑀲𑁂𑀦 𑀯𑀼𑀢𑁆𑀢𑀁. 𑀓𑀫𑁆𑀫𑀧𑀣𑀓𑀣𑀸 𑀳𑁂𑀲𑀸𑀢𑀺. 𑀅𑀲𑁆𑀲𑀸𑀢𑀺 𑀯𑀺𑀲𑀁𑀯𑀸𑀤𑀓𑀲𑁆𑀲. 𑀫𑀼𑀲𑀸 𑀯𑀤𑀢𑀺 𑀏𑀢𑁂𑀦𑀸𑀢𑀺 𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑁄, 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀅𑀢𑀣𑀸𑀓𑀸𑀭𑁂𑀦 𑀯𑀢𑁆𑀣𑀼𑀦𑁄 𑀯𑀺𑀜𑁆𑀜𑀸𑀧𑀦𑀧𑀬𑁄𑀕𑁄 𑀫𑀼𑀲𑀸, 𑀢𑀁𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸𑀫𑀼𑀲𑀸𑀯𑀸𑀤𑁄𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀢𑁄 𑀅𑀜𑁆𑀜𑀣𑀸 𑀯𑀢𑁆𑀢𑀼𑀁 ‘‘𑀅𑀧𑀭𑁄 𑀦𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀅𑀤𑀸𑀢𑀼𑀓𑀸𑀫𑀢𑀸𑀬𑀸𑀢𑀺𑀆𑀤𑀺 𑀫𑀼𑀲𑀸𑀯𑀸𑀤𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀁. 𑀳𑀲𑀸𑀥𑀺𑀧𑁆𑀧𑀸𑀬𑁂𑀦𑀧𑀺 𑀯𑀺𑀲𑀁𑀯𑀸𑀤𑀦𑀧𑀼𑀭𑀓𑁆𑀔𑀸𑀭𑀲𑁆𑀲 𑀫𑀼𑀲𑀸𑀯𑀸𑀤𑁄. 𑀧𑀭𑀲𑁆𑀲𑀸𑀢𑀺 𑀯𑀺𑀲𑀁𑀯𑀸𑀤𑀦𑀯𑀲𑁂𑀦 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑀲𑁆𑀲. 𑀲𑁄𑀢𑀺 𑀫𑀼𑀲𑀸𑀯𑀸𑀤𑀧𑀬𑁄𑀕𑁄.

𑀲𑀼𑀜𑁆𑀜𑀪𑀸𑀯𑀦𑁆𑀢𑀺 𑀧𑀻𑀢𑀺𑀯𑀺𑀭𑀳𑀺𑀢𑀢𑀸𑀬 𑀭𑀺𑀢𑁆𑀢𑀪𑀸𑀯𑀁. 𑀨𑀭𑀼𑀲𑀲𑀤𑁆𑀤𑀢𑀸𑀬 𑀦𑁂𑀯 𑀓𑀡𑁆𑀡𑀲𑀼𑀔𑀸. 𑀅𑀢𑁆𑀣𑀯𑀺𑀧𑀦𑁆𑀦𑀢𑀸𑀬 𑀦 𑀳𑀤𑀬𑀲𑀼𑀔𑀸. 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀲𑁆𑀲𑀸𑀢𑀺 𑀤𑁄𑀲𑁂𑀦, 𑀮𑁄𑀪𑁂𑀦 𑀯𑀸 𑀤𑀽𑀲𑀺𑀢𑀘𑀺𑀢𑁆𑀢𑀲𑁆𑀲.

𑀏𑀓𑀦𑁆𑀢𑀨𑀭𑀼𑀲𑀸 𑀘𑁂𑀢𑀦𑀸𑀢𑀺 𑀏𑀢𑁂𑀦 𑀤𑀼𑀝𑁆𑀞𑀘𑀺𑀢𑁆𑀢𑀢𑀁𑀬𑁂𑀯 𑀯𑀺𑀪𑀸𑀯𑁂𑀢𑀺, 𑀤𑀼𑀝𑁆𑀞𑀘𑀺𑀢𑁆𑀢𑀢𑀸 𑀘𑀲𑁆𑀲 𑀅𑀫𑀭𑀡𑀸𑀥𑀺𑀧𑁆𑀧𑀸𑀬𑀯𑀲𑁂𑀦 𑀤𑀝𑁆𑀞𑀩𑁆𑀩𑀸. 𑀲𑀢𑀺 𑀳𑀺 𑀫𑀭𑀡𑀸𑀥𑀺𑀧𑁆𑀧𑀸𑀬𑁂 𑀅𑀢𑁆𑀣𑀲𑀺𑀤𑁆𑀥𑀺, 𑀢𑀤𑀪𑀸𑀯𑁂 𑀧𑀸𑀡𑀸𑀢𑀺𑀧𑀸𑀢𑀩𑁆𑀬𑀸𑀧𑀸𑀤𑀸 𑀲𑀺𑀬𑀼𑀦𑁆𑀢𑀺. 𑀬𑀁 𑀧𑀝𑀺𑀘𑁆𑀘 𑀨𑀭𑀼𑀲𑀯𑀸𑀘𑀸 𑀧𑀬𑀼𑀚𑁆𑀚𑀢𑀺, 𑀢𑀲𑁆𑀲 𑀲𑀫𑁆𑀫𑀼𑀔𑀸𑀯 𑀲𑀻𑀲𑀁 𑀏𑀢𑀺. 𑀧𑀭𑀫𑁆𑀫𑀼𑀔𑀸𑀧𑀺 𑀲𑀻𑀲𑀁 𑀏𑀢𑀺 𑀏𑀯𑀸𑀢𑀺 𑀅𑀧𑀭𑁂. 𑀢𑀢𑁆𑀣𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑀬𑀼𑀢𑁆𑀢𑁄 𑀲𑀺𑀬𑀸 𑁋 𑀲𑀫𑁆𑀫𑀼𑀔𑀸 𑀧𑀬𑁄𑀕𑁂 𑀅𑀕𑀸𑀭𑀯𑀸𑀤𑀻𑀦𑀁 𑀩𑀮𑀯𑀪𑀸𑀯𑀢𑁄 𑀲𑀺𑀬𑀸 𑀘𑁂𑀢𑀦𑀸 𑀩𑀮𑀯𑀢𑀻, 𑀧𑀭𑀲𑁆𑀲 𑀘 𑀢𑀤𑀢𑁆𑀣𑀯𑀺𑀜𑁆𑀜𑀸𑀧𑀦𑀁, 𑀦 𑀢𑀣𑀸 𑀅𑀲𑀫𑁆𑀫𑀼𑀔𑀸𑀢𑀺. 𑀬𑀣𑀸 𑀘 𑀅𑀓𑁆𑀓𑁄𑀲𑀺𑀢𑁂 𑀫𑀢𑁂 𑀆𑀴𑀳𑀦𑁂 𑀓𑀢𑀸 𑀔𑀫𑀸𑀧𑀦𑀸 𑀉𑀧𑀯𑀸𑀤𑀦𑁆𑀢𑀭𑀸𑀬𑀁 𑀦𑀺𑀯𑀢𑁆𑀢𑁂𑀢𑀺, 𑀏𑀯𑀁 𑀧𑀭𑀫𑁆𑀫𑀼𑀔𑀸 𑀧𑀬𑀼𑀢𑁆𑀢𑀸 𑀨𑀭𑀼𑀲𑀯𑀸𑀘𑀸 𑀳𑁄𑀢𑀺𑀬𑁂𑀯𑀸𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀢𑀲𑁆𑀲𑀸𑀢𑀺 𑀏𑀓𑀦𑁆𑀢𑀨𑀭𑀼𑀲𑀘𑁂𑀢𑀦𑀸𑀬 𑀏𑀯 ¶ 𑀨𑀭𑀼𑀲𑀯𑀸𑀘𑀸𑀪𑀸𑀯𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁. 𑀫𑀫𑁆𑀫𑀘𑁆𑀙𑁂𑀤𑀓𑁄 𑀲𑀯𑀦𑀨𑀭𑀼𑀲𑀢𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀺𑀢𑁆𑀢𑀲𑀡𑁆𑀳𑀸𑀢𑀸𑀬 𑀨𑀭𑀼𑀲𑀯𑀸𑀘𑀸 𑀦 𑀳𑁄𑀢𑀺 𑀓𑀫𑁆𑀫𑀧𑀣𑀸’𑀧𑁆𑀧𑀢𑁆𑀢𑀢𑁆𑀢𑀸, 𑀓𑀫𑁆𑀫𑀪𑀸𑀯𑀁 𑀧𑀦 𑀦 𑀲𑀓𑁆𑀓𑀸 𑀯𑀸𑀭𑁂𑀢𑀼𑀁. 𑀏𑀯𑀁 𑀅𑀦𑁆𑀯𑀬𑀯𑀲𑁂𑀦 𑀘𑁂𑀢𑀦𑀸𑀨𑀭𑀼𑀲𑀢𑀸𑀬 𑀨𑀭𑀼𑀲𑀯𑀸𑀘𑀁 𑀲𑀸𑀥𑁂𑀢𑁆𑀯𑀸 𑀇𑀤𑀸𑀦𑀺 𑀢𑀫𑁂𑀯 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀲𑀸𑀥𑁂𑀢𑀼𑀁 ‘‘𑀯𑀘𑀦𑀲𑀡𑁆𑀳𑀢𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀲𑀸𑀢𑀺 𑀨𑀭𑀼𑀲𑀯𑀸𑀘𑀸. 𑀓𑀫𑁆𑀫𑀧𑀣𑀪𑀸𑀯𑀁 𑀅𑀧𑁆𑀧𑀢𑁆𑀢𑀸 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀇𑀢𑀭𑀸 𑀫𑀳𑀸𑀲𑀸𑀯𑀚𑁆𑀚𑀸. 𑀢𑀣𑀸 𑀓𑀺𑀮𑁂𑀲𑀸𑀦𑀁 𑀫𑀼𑀤𑀼𑀢𑀺𑀩𑁆𑀩𑀢𑀸𑀪𑁂𑀤𑁂𑀳𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀁.

𑀆𑀲𑁂𑀯𑀦𑀁 𑀩𑀳𑀼𑀮𑀻𑀓𑀭𑀡𑀁. 𑀬𑀁 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀺𑀢𑁄, 𑀢𑁂𑀦 𑀅𑀕𑁆𑀕𑀳𑀺𑀢𑁂 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀕𑀳𑀺𑀢𑁂 𑀫𑀳𑀸𑀲𑀸𑀯𑀚𑁆𑀚𑁄 ¶ 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀺𑀢𑁄. 𑀬𑁄 𑀓𑁄𑀘𑀺 𑀧𑀦 𑀲𑀫𑁆𑀨𑀧𑁆𑀧𑀮𑀸𑀧𑁄 𑀤𑁆𑀯𑀻𑀳𑀺 𑀲𑀫𑁆𑀪𑀸𑀭𑁂𑀳𑀺 𑀲𑀺𑀚𑁆𑀛𑀢𑀺. 𑀓𑀺𑀮𑁂𑀲𑀸𑀦𑀁 𑀫𑀼𑀤𑀼𑀢𑀺𑀩𑁆𑀩𑀢𑀸𑀯𑀲𑁂𑀦𑀧𑀺 𑀅𑀧𑁆𑀧𑀲𑀸𑀯𑀚𑁆𑀚𑀫𑀳𑀸𑀲𑀸𑀯𑀚𑁆𑀚𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀁 𑀘𑀺𑀢𑁆𑀢𑁂𑀦𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀳𑀺𑀢𑀲𑀼𑀔𑀁 𑀩𑁆𑀬𑀸𑀧𑀸𑀤𑀬𑀢𑀻𑀢𑀺 𑀬𑁄 𑀢𑀁 𑀉𑀧𑁆𑀧𑀸𑀤𑁂𑀢𑀺, 𑀢𑀲𑁆𑀲 𑀳𑀺𑀢𑀲𑀼𑀔𑀁 𑀯𑀺𑀦𑀸𑀲𑁂𑀢𑀺. 𑀅𑀳𑁄 𑀯𑀢𑀸𑀢𑀺 𑀇𑀫𑀺𑀦𑀸 𑀅𑀘𑁆𑀘𑀦𑁆𑀢𑀯𑀺𑀦𑀸𑀲𑀘𑀺𑀦𑁆𑀢𑀦𑀁 𑀤𑀻𑀧𑁂𑀢𑀺. 𑀏𑀯𑀁 𑀳𑀺𑀲𑁆𑀲 𑀤𑀸𑀭𑀼𑀡𑀧𑀯𑀢𑁆𑀢𑀺𑀬𑀸 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀺. 𑀬𑀣𑀸𑀪𑀼𑀘𑁆𑀘𑀕𑀳𑀡𑀸𑀪𑀸𑀯𑁂𑀦𑀸𑀢𑀺 𑀬𑀸𑀣𑀸𑀯𑀕𑁆𑀕𑀸𑀳𑀲𑁆𑀲 𑀅𑀪𑀸𑀯𑁂𑀦 𑀅𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑀲𑁆𑀲 𑀦𑀺𑀘𑁆𑀘𑀸𑀤𑀺𑀢𑁄 𑀕𑀳𑀡𑁂𑀦. 𑀫𑀺𑀘𑁆𑀙𑀸 𑀧𑀲𑁆𑀲𑀢𑀻𑀢𑀺 𑀯𑀺𑀢𑀣𑀁 𑀧𑀲𑁆𑀲𑀢𑀺. 𑀲𑀫𑁆𑀨𑀧𑁆𑀧𑀮𑀸𑀧𑁄 𑀯𑀺𑀬𑀸𑀢𑀺 𑀇𑀫𑀺𑀦𑀸 𑀆𑀲𑁂𑀯𑀦𑀲𑁆𑀲 𑀫𑀦𑁆𑀤𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑀢𑀁, 𑀫𑀳𑀦𑁆𑀢𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑀢𑀁 𑀤𑀲𑁆𑀲𑁂𑀢𑀺. 𑀕𑀳𑀺𑀢𑀸𑀓𑀸𑀭𑀯𑀺𑀧𑀭𑀻𑀢𑀢𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀕𑀳𑀺𑀢𑀸𑀓𑀸𑀭𑀲𑁆𑀲 𑀯𑀺𑀧𑀭𑀻𑀢𑀪𑀸𑀯𑁄. 𑀯𑀢𑁆𑀣𑀼𑀦𑁄𑀢𑀺 𑀢𑀲𑁆𑀲𑀸 𑀅𑀬𑀣𑀸𑀪𑀽𑀢𑀲𑀪𑀸𑀯𑀫𑀸𑀳. 𑀢𑀣𑀸𑀪𑀸𑀯𑁂𑀦𑀸𑀢𑀺 𑀕𑀳𑀺𑀢𑀸𑀓𑀸𑀭𑁂𑀦𑁂𑀯 𑀢𑀲𑁆𑀲 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲, 𑀢𑀲𑁆𑀲 𑀯𑀸 𑀯𑀢𑁆𑀣𑀼𑀦𑁄 𑀉𑀧𑀝𑁆𑀞𑀸𑀦𑀁 𑀏𑀯𑀫𑁂𑀢𑀁, 𑀦 𑀇𑀢𑁄 𑀅𑀜𑁆𑀜𑀣𑀸𑀢𑀺.

𑀥𑀫𑁆𑀫𑀢𑁄𑀢𑀺 𑀲𑀪𑀸𑀯𑀢𑁄. 𑀓𑁄𑀝𑁆𑀞𑀸𑀲𑀢𑁄𑀢𑀺 𑀨𑀲𑁆𑀲𑀧𑀜𑁆𑀘𑀫𑀓𑀸𑀤𑀻𑀲𑀼 𑀘𑀺𑀢𑁆𑀢𑀗𑁆𑀕𑀓𑁄𑀝𑁆𑀞𑀸𑀲𑁂𑀲𑀼 𑀬𑀁 𑀓𑁄𑀝𑁆𑀞𑀸𑀲𑀸 𑀳𑁄𑀦𑁆𑀢𑀺, 𑀢𑀢𑁄𑀢𑀺 𑀅𑀢𑁆𑀣𑁄. 𑀘𑁂𑀢𑀦𑀸𑀥𑀫𑁆𑀫𑀸𑀢𑀺 𑀘𑁂𑀢𑀦𑀸𑀲𑀪𑀸𑀯𑀸.

𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢𑀸𑀢𑀺 𑀏𑀢𑁆𑀣 𑀦𑀦𑀼 𑀘𑁂𑀢𑀦𑀸 𑀅𑀪𑀺𑀥𑀫𑁆𑀫𑁂 𑀓𑀫𑁆𑀫𑀧𑀣𑁂𑀲𑀼 𑀦 𑀯𑀼𑀢𑁆𑀢𑀸𑀢𑀺 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢𑀦𑁆𑀦𑀁 𑀓𑀫𑁆𑀫𑀧𑀣𑀪𑀸𑀯𑁄 𑀦 𑀬𑀼𑀢𑁆𑀢𑁄𑀢𑀺? 𑀦, 𑀅𑀯𑀘𑀦𑀲𑁆𑀲 𑀅𑀜𑁆𑀜𑀳𑁂𑀢𑀼𑀓𑀢𑁆𑀢𑀸. 𑀦 𑀳𑀺 𑀢𑀢𑁆𑀣 𑀘𑁂𑀢𑀦𑀸𑀬 𑀅𑀓𑀫𑁆𑀫𑀧𑀣𑀢𑁆𑀢𑀸 𑀓𑀫𑁆𑀫𑀧𑀣𑀭𑀸𑀲𑀺𑀫𑁆𑀳𑀺 𑀅𑀯𑀘𑀦𑀁, 𑀓𑀤𑀸𑀘𑀺 𑀧𑀦 𑀓𑀫𑁆𑀫𑀧𑀣𑁄 𑀳𑁄𑀢𑀺, 𑀦 𑀲𑀩𑁆𑀩𑀤𑀸𑀢𑀺 𑀓𑀫𑁆𑀫𑀧𑀣𑀪𑀸𑀯𑀲𑁆𑀲 𑀅𑀦𑀺𑀬𑀢𑀢𑁆𑀢𑀸 ¶ 𑀅𑀯𑀘𑀦𑀁. 𑀬𑀤𑀸 𑀧𑀦 𑀓𑀫𑁆𑀫𑀧𑀣𑁄 𑀳𑁄𑀢𑀺, 𑀢𑀤𑀸 𑀓𑀫𑁆𑀫𑀧𑀣𑀭𑀸𑀲𑀺𑀲𑀗𑁆𑀕𑀳𑁄 𑀦 𑀦𑀺𑀯𑀸𑀭𑀺𑀢𑁄. 𑀏𑀢𑁆𑀣𑀸𑀳 𑁋 𑀬𑀤𑀺 𑀘𑁂𑀢𑀦𑀸𑀬 𑀲𑀩𑁆𑀩𑀤𑀸 𑀓𑀫𑁆𑀫𑀧𑀣𑀪𑀸𑀯𑀸𑀪𑀸𑀯𑀢𑁄 𑀅𑀦𑀺𑀬𑀢𑁄 𑀓𑀫𑁆𑀫𑀧𑀣𑀪𑀸𑀯𑁄𑀢𑀺 𑀓𑀫𑁆𑀫𑀧𑀣𑀭𑀸𑀲𑀺𑀫𑁆𑀳𑀺 𑀅𑀯𑀘𑀦𑀁, 𑀦𑀦𑀼 𑀅𑀪𑀺𑀚𑁆𑀛𑀸𑀤𑀻𑀦𑀁 𑀓𑀫𑁆𑀫𑀧𑀣𑀪𑀸𑀯𑀁 𑀅𑀧𑁆𑀧𑀢𑁆𑀢𑀸𑀦𑀁 𑀅𑀢𑁆𑀣𑀺𑀢𑀸𑀬 𑀅𑀦𑀺𑀬𑀢𑁄 𑀓𑀫𑁆𑀫𑀧𑀣𑀪𑀸𑀯𑁄𑀢𑀺 𑀢𑁂𑀲𑀫𑁆𑀧𑀺 𑀓𑀫𑁆𑀫𑀧𑀣𑀭𑀸𑀲𑀺𑀫𑁆𑀳𑀺 𑀅𑀯𑀘𑀦𑀁 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀓𑀫𑁆𑀫𑀧𑀣𑀢𑀸𑀢𑀁𑀲𑀪𑀸𑀕𑀢𑀸𑀳𑀺 𑀢𑁂𑀲𑀁 𑀢𑀢𑁆𑀣 𑀯𑀼𑀢𑁆𑀢𑀢𑁆𑀢𑀸. 𑀬𑀤𑀺 𑀏𑀯𑀁 𑀘𑁂𑀢𑀦𑀸𑀧𑀺 𑀢𑀢𑁆𑀣 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸? 𑀲𑀘𑁆𑀘𑀫𑁂𑀢𑀁, 𑀲𑀸 𑀧𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀸𑀢𑀺 𑀧𑀸𑀓𑀝𑁄, 𑀢𑀲𑁆𑀲𑀸 𑀓𑀫𑁆𑀫𑀧𑀣𑀪𑀸𑀯𑁄𑀢𑀺 𑀦 𑀯𑀼𑀢𑁆𑀢𑀸 𑀲𑀺𑀬𑀸. 𑀘𑁂𑀢𑀦𑀸𑀬 𑀳𑀺 𑁋 ‘‘𑀘𑁂𑀢𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀯𑀤𑀸𑀫𑀺 (𑀅. 𑀦𑀺. 𑁬.𑁬𑁩; 𑀓𑀣𑀸. 𑁫𑁩𑁯), 𑀢𑀺𑀯𑀺𑀥𑀸, 𑀪𑀺𑀓𑁆𑀔𑀯𑁂, 𑀓𑀸𑀬𑀲𑀜𑁆𑀘𑁂𑀢𑀦𑀸 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀓𑀣𑀸. 𑁫𑁩𑁯) 𑀓𑀫𑁆𑀫𑀪𑀸𑀯𑁄 𑀧𑀸𑀓𑀝𑁄, 𑀓𑀫𑁆𑀫𑀁𑀬𑁂𑀯 𑀘 𑀲𑀼𑀕𑀢𑀺𑀤𑀼𑀕𑁆𑀕𑀢𑀻𑀦𑀁 𑀢𑀢𑁆𑀣 𑀉𑀧𑁆𑀧𑀚𑁆𑀚𑀦𑀓𑀲𑀼𑀔𑀤𑀼𑀓𑁆𑀔𑀸𑀦𑀜𑁆𑀘 𑀧𑀣𑀪𑀸𑀯𑁂𑀦 𑀧𑀯𑀢𑁆𑀢𑀁 𑀓𑀫𑁆𑀫𑀧𑀣𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀧𑀸𑀓𑀝𑁄 𑀢𑀲𑁆𑀲𑀸 𑀓𑀫𑁆𑀫𑀧𑀣𑀪𑀸𑀯𑁄, 𑀅𑀪𑀺𑀚𑁆𑀛𑀸𑀤𑀻𑀦𑀁 𑀧𑀦 𑀘𑁂𑀢𑀦𑀸𑀲𑀫𑀻𑀳𑀦𑀪𑀸𑀯𑁂𑀦 𑀲𑀼𑀘𑀭𑀺𑀢𑀤𑀼𑀘𑁆𑀘𑀭𑀺𑀢𑀪𑀸𑀯𑁄 𑀘𑁂𑀢𑀦𑀸𑀚𑀦𑀺𑀢𑀧𑀺𑀝𑁆𑀞𑀺𑀯𑀝𑁆𑀝𑀓𑀪𑀸𑀯𑁂𑀦 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀢𑀤𑀼𑀧𑁆𑀧𑀚𑁆𑀚𑀦𑀓𑀲𑀼𑀔𑀤𑀼𑀓𑁆𑀔𑀸𑀦𑀁 𑀧𑀣𑀪𑀸𑀯𑁄 𑀘𑀸𑀢𑀺 𑀦 𑀢𑀣𑀸 𑀧𑀸𑀓𑀝𑁄 𑀓𑀫𑁆𑀫𑀧𑀣𑀪𑀸𑀯𑁄𑀢𑀺 𑀢𑁂𑀬𑁂𑀯 𑀢𑁂𑀦 𑀲𑀪𑀸𑀯𑁂𑀦 𑀤𑀲𑁆𑀲𑁂𑀢𑀼𑀁 𑀅𑀪𑀺𑀥𑀫𑁆𑀫𑁂 𑀘𑁂𑀢𑀦𑀸 𑀓𑀫𑁆𑀫𑀧𑀣𑀭𑀸𑀲𑀺𑀪𑀸𑀯𑁂𑀦 𑀦 𑀯𑀼𑀢𑁆𑀢𑀸 ¶ , 𑀅𑀢𑀣𑀸𑀚𑀸𑀢𑀺𑀬𑀓𑀢𑁆𑀢𑀸 𑀯𑀸 𑀘𑁂𑀢𑀦𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀦 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀫𑀽𑀮𑀁 𑀧𑀢𑁆𑀯𑀸𑀢𑀺 𑀫𑀽𑀮𑀤𑁂𑀲𑀦𑀁 𑀧𑀢𑁆𑀯𑀸, 𑀫𑀽𑀮𑀲𑀪𑀸𑀯𑁂𑀲𑀼 𑀥𑀫𑁆𑀫𑁂𑀲𑀼 𑀯𑀼𑀘𑁆𑀘𑀫𑀸𑀦𑁂𑀲𑀽𑀢𑀺 𑀅𑀢𑁆𑀣𑁄.

𑀅𑀤𑀺𑀦𑁆𑀦𑀸𑀤𑀸𑀦𑀁 𑀲𑀢𑁆𑀢𑀸𑀭𑀫𑁆𑀫𑀡𑀦𑁆𑀢𑀺 𑀇𑀤𑀁 ‘‘𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸 𑀏𑀯 𑀯𑀸’’𑀢𑀺 𑀇𑀫𑀸𑀬 𑀧𑀜𑁆𑀳𑀧𑀼𑀘𑁆𑀙𑀓𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀢𑀺. 𑀬𑀜𑁆𑀳𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀤𑀼𑀲𑁆𑀲𑀻𑀮𑁆𑀬𑀲𑁆𑀲 𑀆𑀭𑀫𑁆𑀫𑀡𑀁, 𑀢𑀤𑁂𑀯 𑀢𑀁 𑀯𑁂𑀭𑀫𑀡𑀺𑀬𑀸 𑀆𑀭𑀫𑁆𑀫𑀡𑀁. 𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀯𑀢𑁆𑀣𑀼𑀢𑁄 𑀏𑀯 𑀳𑀺 𑀯𑀺𑀭𑀢𑀻𑀢𑀺. 𑀲𑀢𑁆𑀢𑀸𑀭𑀫𑁆𑀫𑀡𑀦𑁆𑀢𑀺 𑀯𑀸 𑀲𑀢𑁆𑀢𑀲𑀗𑁆𑀔𑀸𑀢𑀁 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀫𑁂𑀯 𑀉𑀧𑀸𑀤𑀸𑀬 𑀯𑀼𑀢𑁆𑀢𑀦𑁆𑀢𑀺 𑀦𑀸𑀬𑀁 𑀯𑀺𑀭𑁄𑀥𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 (𑀯𑀺𑀪. 𑀅𑀝𑁆𑀞. 𑁭𑁧𑁪) ‘‘𑀬𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀏𑀢𑁆𑀣 𑀲𑀢𑁆𑀢𑀸𑀭𑀫𑁆𑀫𑀡𑀸𑀦𑀻𑀢𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀬𑀲𑁆𑀫𑀸 𑀲𑀢𑁆𑀢𑁄𑀢𑀺 𑀲𑀗𑁆𑀔𑁆𑀬𑀁 𑀕𑀢𑀁 𑀲𑀗𑁆𑀔𑀸𑀭𑀫𑁂𑀯 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑀻’’𑀢𑀺. 𑀯𑀺𑀲𑀪𑀸𑀕𑀯𑀢𑁆𑀣𑀼𑀦𑁄 ‘‘𑀇𑀢𑁆𑀣𑀻, 𑀧𑀼𑀭𑀺𑀲𑁄’’𑀢𑀺 𑀕𑀳𑁂𑀢𑀩𑁆𑀩𑀢𑁄 𑀲𑀢𑁆𑀢𑀸𑀭𑀫𑁆𑀫𑀡𑁄𑀢𑀺 𑀏𑀓𑁂. ‘‘𑀏𑀓𑁄 𑀤𑀺𑀝𑁆𑀞𑁄, 𑀤𑁆𑀯𑁂 𑀲𑀼𑀢𑀸’’𑀢𑀺𑀆𑀤𑀺𑀦𑀸 𑀲𑀫𑁆𑀨𑀧𑁆𑀧𑀮𑀧𑀦𑁂 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀯𑀲𑁂𑀦. 𑀢𑀣𑀸 𑀅𑀪𑀺𑀚𑁆𑀛𑀸𑀢𑀺 𑀏𑀢𑁆𑀣 𑀢𑀣𑀸-𑀲𑀤𑁆𑀤𑁄 ‘‘𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀯𑀲𑁂𑀦𑀸’’𑀢𑀺 𑀇𑀤𑀫𑁆𑀧𑀺 𑀉𑀧𑀲𑀁𑀳𑀭𑀢𑀺, 𑀦 𑀲𑀢𑁆𑀢𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀢𑀁 𑀏𑀯 𑀤𑀲𑁆𑀲𑀦𑀸𑀤𑀺𑀯𑀲𑁂𑀦 𑀅𑀪𑀺𑀚𑁆𑀛𑀸𑀬𑀦𑀢𑁄. ‘‘𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸’’𑀢𑀺 𑀧𑀯𑀢𑁆𑀢𑀫𑀸𑀦𑀸𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 ¶ 𑀢𑁂𑀪𑀽𑀫𑀓𑀥𑀫𑁆𑀫𑀯𑀺𑀲𑀬𑀸𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀲𑁆𑀲𑀸 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀢𑀸 𑀯𑀼𑀢𑁆𑀢𑀸. 𑀓𑀣𑀁 𑀧𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀩𑁆𑀩𑁂 𑀢𑁂𑀪𑀽𑀫𑀓𑀥𑀫𑁆𑀫𑀸 𑀆𑀭𑀫𑁆𑀫𑀡𑀁 𑀳𑁄𑀦𑁆𑀢𑀻𑀢𑀺? 𑀲𑀸𑀥𑀸𑀭𑀡𑀢𑁄. ‘‘𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’𑀢𑀺 𑀳𑀺 𑀧𑀯𑀢𑁆𑀢𑀫𑀸𑀦𑀸𑀬 𑀅𑀢𑁆𑀣𑀢𑁄 𑀭𑀽𑀧𑀸𑀭𑀼𑀧𑀸𑀯𑀘𑀭𑀥𑀫𑁆𑀫𑀸𑀧𑀺 𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺.

𑀲𑀼𑀔𑀩𑀳𑀼𑀮𑀢𑀸𑀬 𑀭𑀸𑀚𑀸𑀦𑁄 𑀳𑀲𑀫𑀸𑀦𑀸𑀧𑀺 ‘‘𑀘𑁄𑀭𑀁 𑀖𑀸𑀢𑁂𑀣𑀸’’𑀢𑀺 𑀯𑀤𑀦𑁆𑀢𑀺, 𑀳𑀸𑀲𑁄 𑀧𑀦 𑀢𑁂𑀲𑀁 𑀅𑀜𑁆𑀜𑀯𑀺𑀲𑀬𑁄𑀢𑀺 𑀆𑀳 ‘‘𑀲𑀦𑁆𑀦𑀺𑀝𑁆𑀞𑀸𑀧𑀓…𑀧𑁂… 𑀳𑁄𑀢𑀻’’𑀢𑀺.

𑀓𑁂𑀲𑀜𑁆𑀘𑀻𑀢𑀺 𑀲𑀳𑀚𑀸𑀢𑀸𑀦𑀁 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀦𑀁. 𑀲𑀫𑁆𑀧𑀬𑀼𑀢𑁆𑀢𑀧𑀪𑀸𑀯𑀓𑀝𑁆𑀞𑁂𑀦𑀸𑀢𑀺 𑀲𑀫𑁆𑀧𑀬𑀼𑀢𑁆𑀢𑁄 𑀳𑀼𑀢𑁆𑀯𑀸 𑀉𑀧𑁆𑀧𑀸𑀤𑀓𑀝𑁆𑀞𑁂𑀦. 𑀓𑁂𑀲𑀜𑁆𑀘𑀻𑀢𑀺 𑀅𑀲𑀳𑀚𑀸𑀢𑀸𑀦𑀁. 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀝𑁆𑀞𑁂𑀦𑀸𑀢𑀺 𑀏𑀢𑁂𑀦 𑀫𑀽𑀮𑀝𑁆𑀞𑁂𑀦 𑀮𑁄𑀪𑀲𑁆𑀲 𑀉𑀧𑀓𑀸𑀭𑀢𑀁 𑀦𑀺𑀯𑀢𑁆𑀢𑁂𑀢𑀺. 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑀝𑁆𑀞𑁄 𑀳𑀺 𑀫𑀽𑀮𑀝𑁆𑀞𑁄, 𑀲𑁄 𑀘 𑀳𑁂𑀢𑀼𑀧𑀘𑁆𑀘𑀬𑀢𑀸𑀅𑀯𑀺𑀦𑀸𑀪𑀸𑀯𑀻, 𑀢𑁂𑀦 𑀘𑁂𑀢𑁆𑀣 𑀫𑀽𑀮𑀫𑀺𑀯 𑀫𑀽𑀮𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀧𑀦 𑀧𑀼𑀩𑁆𑀩𑁂 ‘‘𑀓𑁂𑀲𑀜𑁆𑀘𑀻’’𑀢𑀺 𑀯𑀼𑀢𑁆𑀢𑀸𑀦𑀁 𑀲𑀳𑀚𑀸𑀢𑀸𑀦𑀁 𑀫𑀽𑀮𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀭𑀢𑁆𑀢𑁄 𑀔𑁄𑀢𑀺𑀆𑀤𑀺𑀦𑀸 𑀲𑀼𑀢𑁆𑀢𑀧𑀤𑁂𑀦𑀧𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀅𑀓𑀼𑀲𑀮𑀸𑀦𑀁 𑀮𑁄𑀪𑀲𑁆𑀲 𑀫𑀽𑀮𑀓𑀸𑀭𑀡𑀢𑀁 𑀯𑀺𑀪𑀸𑀯𑁂𑀢𑀺, 𑀦 𑀫𑀽𑀮𑀝𑁆𑀞𑁂𑀦𑀼𑀧𑀓𑀸𑀭𑀢𑁆𑀣𑀁 𑀅𑀯𑀺𑀲𑁂𑀲𑀢𑁄 𑀢𑁂𑀲𑀁 𑀳𑁂𑀢𑀼𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀢𑁄.

𑀅𑀓𑀼𑀲𑀮𑀓𑀫𑁆𑀫𑀧𑀣𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀼𑀲𑀮𑀓𑀫𑁆𑀫𑀧𑀣𑀯𑀡𑁆𑀡𑀦𑀸

𑀯𑁂𑀭𑀦𑁆𑀢𑀺 ¶ 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀸𑀧𑀥𑀫𑁆𑀫𑀁. 𑀲𑁄 𑀳𑀺 𑀯𑁂𑀭𑀳𑁂𑀢𑀼𑀢𑀸𑀬 ‘‘𑀯𑁂𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀫𑀡𑀢𑀺 ‘‘𑀫𑀬𑀺 𑀇𑀥 𑀞𑀺𑀢𑀸𑀬 𑀓𑀣𑀫𑀸𑀕𑀘𑁆𑀙𑀲𑀻’’𑀢𑀺 𑀢𑀚𑁆𑀚𑁂𑀦𑁆𑀢𑀻 𑀯𑀺𑀬 𑀦𑀺𑀯𑀸𑀭𑁂𑀢𑀻𑀢𑀺 𑀯𑁂𑀭𑀫𑀡𑀻. 𑀢𑁂𑀦𑀸𑀳 ‘‘𑀧𑀚𑀳𑀢𑀻’’𑀢𑀺. ‘‘𑀯𑀺𑀭𑀫𑀡𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀏𑀯-𑀓𑀸𑀭𑀁 𑀓𑀢𑁆𑀯𑀸 𑀏𑀯𑀁 𑀯𑀼𑀢𑁆𑀢𑀁. 𑀯𑀺𑀪𑀗𑁆𑀕𑁂 (𑀯𑀺𑀪. 𑁭𑁦𑁩, 𑁭𑁦𑁪) 𑀏𑀯 𑀦𑀺𑀤𑁆𑀤𑀺𑀲𑀦𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑀸. 𑀅𑀲𑀫𑀸𑀤𑀺𑀦𑁆𑀦𑀲𑀻𑀮𑀲𑁆𑀲 𑀲𑀫𑁆𑀧𑀢𑁆𑀢𑀢𑁄 𑀬𑀣𑀸𑀉𑀧𑀝𑁆𑀞𑀺𑀢𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀯𑀢𑁆𑀣𑀼𑀢𑁄 𑀯𑀺𑀭𑀢𑀺 𑀲𑀫𑁆𑀧𑀢𑁆𑀢𑀯𑀺𑀭𑀢𑀺, 𑀲𑀫𑀸𑀤𑀸𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀯𑀺𑀭𑀢𑀺 𑀲𑀫𑀸𑀤𑀸𑀦𑀯𑀺𑀭𑀢𑀺, 𑀲𑀫𑀸𑀤𑀸𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀯𑀺𑀭𑀢𑀺 𑀲𑀫𑀸𑀤𑀸𑀦𑀯𑀺𑀭𑀢𑀺, 𑀓𑀺𑀮𑁂𑀲𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑀯𑀲𑁂𑀦 𑀧𑀯𑀢𑁆𑀢𑀸𑀯𑀺𑀭𑀢𑀺 𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀺.

𑀚𑀻𑀯𑀫𑀸𑀦𑀲𑀲𑀲𑁆𑀲 ¶ 𑀫𑀁𑀲𑀭𑀼𑀥𑀺𑀭𑀲𑀫𑁆𑀫𑀺𑀲𑁆𑀲𑀢𑀸𑀬 𑀅𑀮𑁆𑀮𑀲𑀲𑀫𑀁𑀲𑀁. 𑀫𑀼𑀜𑁆𑀘𑀺 𑀲𑀩𑁆𑀩𑀢𑁆𑀣 𑀲𑀫𑀓𑀭𑀼𑀡𑀢𑀸𑀬. 𑀲𑀘𑁆𑀘𑀁 𑀯𑀢𑁆𑀯𑀸 ‘‘𑀏𑀢𑁂𑀦 𑀲𑀘𑁆𑀘𑀯𑀚𑁆𑀚𑁂𑀦 𑀫𑀬𑁆𑀳𑀁 𑀫𑀸𑀢𑀼 𑀭𑁄𑀕𑁄 𑀲𑀫𑁆𑀫𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺.

𑀫𑀳𑀸𑀲𑀧𑁆𑀧𑁄𑀢𑀺 𑀅𑀚𑀕𑀭𑁄. 𑀫𑀼𑀜𑁆𑀘𑀺𑀢𑁆𑀯𑀸 𑀅𑀕𑀫𑀸𑀲𑀺 𑀲𑀻𑀮𑀢𑁂𑀚𑁂𑀦.

𑀓𑁄𑀲𑀮𑁆𑀮𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁, 𑀓𑁄𑀲𑀮𑁆𑀮𑁂𑀦, 𑀓𑁄𑀲𑀮𑁆𑀮𑀢𑁄 𑀯𑀸 𑀧𑀯𑀢𑁆𑀢𑀺𑀬𑀸 𑀉𑀧𑀕𑀫𑀦𑀢𑁄. 𑀓𑀼𑀘𑁆𑀙𑀺𑀢𑀲𑀬𑀦𑀢𑁄𑀢𑀺 𑀓𑀼𑀘𑁆𑀙𑀺𑀢𑁂𑀦𑀸𑀓𑀸𑀭𑁂𑀦 𑀲𑀬𑀦𑀢𑁄 𑀅𑀦𑀼𑀲𑀬𑀦𑀢𑁄, 𑀧𑀯𑀢𑁆𑀢𑀦𑀢𑁄 𑀯𑀸. ‘‘𑀯𑁂𑀭𑀫𑀡𑀺𑀓𑀼𑀲𑀮𑀸’’𑀢𑀺 𑀯𑀢𑁆𑀢𑀩𑁆𑀩𑀸𑀧𑀺 𑀧𑀼𑀘𑁆𑀙𑀸𑀦𑀼𑀭𑀽𑀧𑀁 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 ‘‘𑀓𑀼𑀲𑀮𑀸’’𑀢𑀺 𑀦 𑀯𑀼𑀢𑁆𑀢𑀸, ‘‘𑀓𑀼𑀲𑀮’’𑀦𑁆𑀢𑁆𑀯𑁂𑀯 𑀯𑀼𑀢𑁆𑀢𑀸.

𑀓𑀸𑀫𑀜𑁆𑀘𑁂𑀢𑁆𑀣 𑀧𑀸𑀴𑀺𑀬𑀁 𑀯𑀺𑀭𑀢𑀺𑀬𑁄𑀯 𑀆𑀕𑀢𑀸, 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 (𑀯𑀺𑀪. 𑁭𑁦𑁪) 𑀧𑀦 𑀘𑁂𑀢𑀦𑀸𑀧𑀺 𑀆𑀳𑀭𑀺𑀢𑁆𑀯𑀸 𑀤𑀻𑀧𑀺𑀢𑀸𑀢𑀺 𑀢𑀤𑀼𑀪𑀬𑀫𑁆𑀧𑀺 𑀕𑀡𑁆𑀳𑀦𑁆𑀢𑁄 ‘‘𑀘𑁂𑀢𑀦𑀸𑀧𑀺 𑀯𑀝𑁆𑀝𑀦𑁆𑀢𑀺 𑀯𑀺𑀭𑀢𑀺𑀬𑁄𑀧𑀻’’𑀢𑀺 𑀆𑀳.

𑀅𑀦𑀪𑀺𑀚𑁆𑀛𑀸 𑀳𑀺 𑀫𑀽𑀮𑀁 𑀧𑀢𑁆𑀯𑀸 𑀓𑀫𑁆𑀫𑀧𑀣𑀓𑁄𑀝𑁆𑀞𑀸𑀲𑀁 𑀧𑀢𑁆𑀯𑀸 𑀅𑀦𑀪𑀺𑀚𑁆𑀛𑀸𑀢𑀺 𑀯𑀼𑀢𑁆𑀢𑀥𑀫𑁆𑀫𑁄 𑀫𑀽𑀮𑀢𑁄 𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀁 𑀳𑁄𑀢𑀻𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑀤𑀼𑀲𑁆𑀲𑀻𑀮𑁆𑀬𑀸𑀭𑀫𑁆𑀫𑀡𑀸 𑀢𑀤𑀸𑀭𑀫𑁆𑀫𑀡𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀺𑀆𑀭𑀫𑁆𑀫𑀡𑀸 𑀓𑀣𑀁 𑀤𑀼𑀲𑁆𑀲𑀻𑀮𑁆𑀬𑀸𑀦𑀺 𑀧𑀚𑀳𑀦𑁆𑀢𑀻𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀦𑀪𑀺𑀚𑁆𑀛𑀸 ¶ …𑀧𑁂… 𑀯𑀺𑀭𑀫𑀦𑁆𑀢𑀲𑁆𑀲𑀸𑀢𑀺 𑀅𑀪𑀺𑀚𑁆𑀛𑀁 𑀧𑀚𑀳𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀦 𑀳𑀺 𑀫𑀦𑁄𑀤𑀼𑀘𑁆𑀘𑀭𑀺𑀢𑀢𑁄 𑀯𑀺𑀭𑀢𑀺 𑀅𑀢𑁆𑀣𑀺 𑀅𑀦𑀪𑀺𑀚𑁆𑀛𑀸𑀤𑀻𑀳𑁂𑀯 𑀢𑀧𑁆𑀧𑀳𑀸𑀦𑀲𑀺𑀤𑁆𑀥𑀺𑀢𑁄. 𑀢𑁂𑀲𑀼 𑀅𑀮𑁄𑀪𑁄𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀅𑀓𑀼𑀲𑀮𑀫𑀽𑀮𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀅𑀧𑁆𑀧𑀦𑀸𑀯𑀸𑀭𑀦𑁆𑀢𑀺 𑀦𑀺𑀕𑀫𑀦𑀯𑀸𑀭𑀁. 𑀏𑀓𑁂𑀦 𑀦𑀬𑁂𑀦𑀸𑀢𑀺 𑀯𑁂𑀤𑀦𑀸𑀤𑀺𑀯𑀲𑁂𑀦 𑀅𑀭𑀽𑀧𑀫𑀼𑀔𑁂𑀦𑁂𑀯 𑀅𑀦𑁂𑀓𑀯𑀺𑀥𑁂𑀲𑀼 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀏𑀓𑁂𑀦 𑀓𑀫𑁆𑀫𑀝𑁆𑀞𑀸𑀦𑀦𑀬𑁂𑀦. ‘‘𑀞𑀧𑁂𑀢𑁆𑀯𑀸 𑀅𑀪𑀺𑀚𑁆𑀛𑀁 𑀦𑀯 𑀅𑀓𑀼𑀲𑀮𑀓𑀫𑁆𑀫𑀧𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀤𑀲𑀸𑀢𑀺 𑀯𑀸 𑀇𑀤𑀁 ‘‘𑀓𑀼𑀲𑀮𑀓𑀫𑁆𑀫𑀧𑀣𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁 ‘‘𑀅𑀓𑀼𑀲𑀮𑀓𑀫𑁆𑀫𑀧𑀣𑀸 𑀘 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸 𑀘𑀸’’𑀢𑀺. ‘‘𑀞𑀧𑁂𑀢𑁆𑀯𑀸 𑀅𑀪𑀺𑀚𑁆𑀛’’𑀦𑁆𑀢𑀺 𑀳𑀺 𑀇𑀫𑀺𑀦𑀸𑀯 𑀅𑀓𑀼𑀲𑀮𑀓𑀫𑁆𑀫𑀧𑀣𑀸𑀦𑀁 𑀦𑀯𑀪𑀸𑀯𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀅𑀣 𑀯𑀸 𑀤𑀲𑀸𑀢𑀺 𑀇𑀤𑀁 𑀉𑀪𑀬𑀣𑀸𑀧𑀺 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀅𑀪𑀺𑀚𑁆𑀛𑀸 𑀳𑀺 𑀧𑀳𑀸𑀢𑀩𑁆𑀩𑀸𑀧𑀺 𑀲𑀢𑀺 𑀧𑀭𑀺𑀜𑁆𑀜𑁂𑀬𑁆𑀬𑀢𑀁 𑀦𑀸𑀢𑀺𑀯𑀢𑁆𑀢𑀢𑀻𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀭𑀽𑀧𑀢𑀡𑁆𑀳𑀸 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧’’𑀦𑁆𑀢𑀺𑀆𑀤𑀺, 𑀢𑀲𑁆𑀫𑀸 ¶ 𑀲𑀸 𑀢𑀸𑀬 𑀧𑀭𑀺𑀜𑁆𑀜𑁂𑀬𑁆𑀬𑀢𑀸𑀬 𑀤𑀼𑀓𑁆𑀔𑀲𑀘𑁆𑀘𑁂𑀧𑀺 𑀲𑀗𑁆𑀕𑀳𑀁 𑀮𑀪𑀢𑁂𑀯, 𑀧𑀳𑀸𑀢𑀩𑁆𑀩𑀁 𑀧𑀦 𑀉𑀧𑀸𑀤𑀸𑀬 ‘‘𑀞𑀧𑁂𑀢𑁆𑀯𑀸 𑀅𑀪𑀺𑀚𑁆𑀛’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀧𑀭𑀺𑀬𑀸𑀬𑁂𑀦 𑀧𑀦 𑀲𑀩𑁆𑀩𑁂𑀧𑀺 𑀓𑀫𑁆𑀫𑀧𑀣𑀸 𑀤𑀼𑀓𑁆𑀔𑀲𑀘𑁆𑀘’’𑀦𑁆𑀢𑀺. 𑀅𑀪𑀺𑀚𑁆𑀛𑀸𑀮𑁄𑀪𑀸𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑀲𑀺𑀤𑁆𑀥𑀪𑁂𑀤𑀁 𑀉𑀧𑀸𑀤𑀸𑀬 ‘‘𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀁. 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀢𑀡𑁆𑀳𑀸 ‘‘𑀲𑀫𑀼𑀤𑀬𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀲𑀫𑀼𑀤𑀬𑀲𑀘𑁆𑀘’’𑀦𑁆𑀢𑀺. 𑀅𑀧𑁆𑀧𑀯𑀢𑁆𑀢𑀻𑀢𑀺 𑀅𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀫𑀸𑀳 𑀬𑀣𑀸 ‘‘𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄’’𑀢𑀺 (𑀲𑀁. 𑀦𑀺. 𑁪.𑁩𑁧𑁪). 𑀲𑀧𑁆𑀧𑀘𑁆𑀘𑀬𑀢𑀸𑀬 𑀲𑀗𑁆𑀔𑀢𑀲𑀪𑀸𑀯𑁂 𑀤𑀼𑀓𑁆𑀔𑀲𑀘𑁆𑀘𑁂 𑀕𑀳𑀺𑀢𑁂 𑀅𑀧𑁆𑀧𑀘𑁆𑀘𑀬𑀢𑀸𑀬 𑀅𑀲𑀗𑁆𑀔𑀢𑀁 𑀦𑀺𑀭𑁄𑀥𑀲𑀘𑁆𑀘𑀁 𑀧𑀝𑀺𑀧𑀓𑁆𑀔𑀢𑁄 𑀆𑀯𑀢𑁆𑀢𑀢𑀺, 𑀏𑀓𑀦𑁆𑀢𑀲𑀸𑀯𑀚𑁆𑀚𑁂 𑀆𑀘𑀬𑀕𑀸𑀫𑀺𑀮𑀓𑁆𑀔𑀡𑁂 𑀲𑀫𑀼𑀤𑀬𑀲𑀘𑁆𑀘𑁂 𑀕𑀳𑀺𑀢𑁂 𑀲𑀸𑀯𑀚𑁆𑀚𑀸 𑀯𑀺𑀕𑀫𑀦𑀁 𑀅𑀧𑀘𑀬𑀕𑀸𑀫𑀺𑀮𑀓𑁆𑀔𑀡𑀁 𑀫𑀕𑁆𑀕𑀲𑀘𑁆𑀘𑀁𑀧𑀝𑀺𑀧𑀓𑁆𑀔𑀢𑁄 𑀆𑀯𑀢𑁆𑀢𑀢𑀻𑀢𑀺 𑀤𑁆𑀯𑁂 𑀆𑀯𑀢𑁆𑀢𑀳𑀸𑀭𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 𑀦𑁂𑀢𑁆𑀢𑀺𑀬𑀁 (𑀦𑁂𑀢𑁆𑀢𑀺. 𑁪.𑀦𑀺𑀤𑁆𑀤𑁂𑀲𑀯𑀸𑀭) 𑁋

‘‘𑀏𑀓𑀫𑁆𑀳𑀺 𑀧𑀤𑀝𑁆𑀞𑀸𑀦𑁂, 𑀧𑀭𑀺𑀬𑁂𑀲𑀢𑀺 𑀲𑁂𑀲𑀓𑀁 𑀧𑀤𑀝𑁆𑀞𑀸𑀦𑀁;

𑀆𑀯𑀢𑁆𑀢𑀢𑀺 𑀧𑀝𑀺𑀧𑀓𑁆𑀔𑁂, 𑀆𑀯𑀢𑁆𑀢𑁄 𑀦𑀸𑀫 𑀲𑁄 𑀳𑀸𑀭𑁄’’𑀢𑀺.

𑀲𑀩𑁆𑀩𑀸𑀓𑀸𑀭𑁂𑀦𑀸𑀢𑀺 𑀓𑀸𑀫𑀭𑀸𑀕𑀭𑀽𑀧𑀭𑀸𑀕𑀸𑀤𑀺𑀲𑀩𑁆𑀩𑀧𑁆𑀧𑀓𑀸𑀭𑁂𑀳𑀺, 𑀲𑀩𑁆𑀩𑀢𑁄 𑀯𑀸 𑀅𑀧𑀸𑀬𑀕𑀫𑀦𑀻𑀬𑀸𑀤𑀺𑀆𑀓𑀸𑀭𑀢𑁄, 𑀢𑀢𑁆𑀣 𑀓𑀺𑀜𑁆𑀘𑀺𑀧𑀺 𑀅𑀦𑀯𑀲𑁂𑀲𑁂𑀢𑁆𑀯𑀸 𑀯𑀸. 𑀲𑀩𑁆𑀩𑀸𑀓𑀸𑀭𑁂𑀦𑁂𑀯𑀸𑀢𑀺 𑀲𑀩𑁆𑀩𑀸𑀓𑀸𑀭𑀢𑁄. 𑀦𑀻𑀳𑀭𑀺𑀢𑁆𑀯𑀸𑀢𑀺 𑀅𑀧𑀦𑁂𑀢𑁆𑀯𑀸, 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀦𑀯𑀓𑀸𑀭𑀻𑀓𑀭𑀺𑀢𑁆𑀯𑀸𑀢𑀺 𑀭𑀽𑀧𑀯𑁂𑀤𑀦𑀸𑀤𑀻𑀲𑀼 𑀓𑀜𑁆𑀘𑀺 𑀏𑀓𑀥𑀫𑁆𑀫𑀫𑁆𑀧𑀺 𑀅𑀯𑀺𑀦𑀺𑀩𑁆𑀪𑁄𑀕𑀁 𑀓𑀢𑁆𑀯𑀸, 𑀏𑀓𑁂𑀓𑀢𑁄 𑀅𑀕𑁆𑀕𑀳𑁂𑀢𑁆𑀯𑀸 𑀲𑀫𑀽𑀳𑀢𑁄𑀯 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀲𑁆𑀫𑀻𑀢𑀺 𑀅𑀳𑀫𑀲𑁆𑀫𑀻𑀢𑀺 𑀫𑀸𑀦𑀕𑁆𑀕𑀸𑀳𑀯𑀲𑁂𑀦. 𑀲𑁄 𑀧𑀦 𑀬𑀲𑁆𑀫𑀸 𑀧𑀜𑁆𑀘𑀓𑁆𑀔𑀦𑁆𑀥𑁂 𑀦𑀺𑀭𑀯𑀲𑁂𑀲𑀢𑁄 𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀫𑀽𑀳𑀕𑁆𑀕𑀳𑀡𑀸𑀓𑀸𑀭𑁂𑀦𑀸’’𑀢𑀺. 𑀬𑀲𑁆𑀫𑀸 𑀘𑁂𑀢𑁆𑀣 𑀅𑀕𑁆𑀕𑀫𑀕𑁆𑀕𑀘𑀺𑀢𑁆𑀢𑀁 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀆𑀳 ‘‘𑀤𑀺𑀝𑁆𑀞𑀺𑀲𑀤𑀺𑀲𑀁 𑀫𑀸𑀦𑀸𑀦𑀼𑀲𑀬’’𑀦𑁆𑀢𑀺. ‘‘𑀬𑀁 𑀭𑀽𑀧𑀁 𑀢𑀁 𑀅𑀳’’𑀦𑁆𑀢𑀺𑀆𑀤𑀺𑀦𑀸 ¶ 𑀬𑀣𑀸 𑀤𑀺𑀝𑁆𑀞𑀺 𑀭𑀽𑀧𑀸𑀤𑀺𑀁 ‘‘𑀅𑀳𑀫𑀲𑁆𑀫𑀻’’𑀢𑀺 𑀕𑀡𑁆𑀳𑀦𑁆𑀢𑀻 𑀧𑀯𑀢𑁆𑀢𑀢𑀺, 𑀏𑀯𑀁 𑀫𑀸𑀦𑁄𑀧𑀺 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸𑀢𑀺 𑀆𑀳 ‘‘𑀫𑀸𑀦𑀸𑀦𑀼𑀲𑀬𑁄 𑀅𑀲𑁆𑀫𑀻𑀢𑀺 𑀧𑀯𑀢𑁆𑀢𑀢𑁆𑀢𑀸 𑀤𑀺𑀝𑁆𑀞𑀺𑀲𑀤𑀺𑀲𑁄’’𑀢𑀺. 𑀧𑀭𑀺𑀘𑁆𑀙𑁂𑀤𑀓𑀭𑁄𑀢𑀺 𑀑𑀲𑀸𑀦𑀧𑀭𑀺𑀘𑁆𑀙𑁂𑀤𑀓𑀭𑁄 𑀇𑀢𑁄 𑀧𑀭𑀁 𑀤𑀼𑀓𑁆𑀔𑀲𑁆𑀲𑀸𑀪𑀸𑀯𑀓𑀭𑀡𑀢𑁄. 𑀓𑀫𑁆𑀫𑀧𑀣𑀤𑁂𑀲𑀦𑀸𑀬𑀸𑀢𑀺 𑀓𑀫𑁆𑀫𑀧𑀣𑀫𑀼𑀔𑁂𑀦 𑀧𑀯𑀢𑁆𑀢𑀘𑀢𑀼𑀲𑀘𑁆𑀘𑀤𑁂𑀲𑀦𑀸𑀬. 𑀫𑀦𑀲𑀺𑀓𑀸𑀭𑀧𑁆𑀧𑀝𑀺𑀯𑁂𑀥𑀯𑀲𑁂𑀦𑀸𑀢𑀺 𑀯𑀺𑀧𑀲𑁆𑀲𑀦𑀸𑀫𑀦𑀲𑀺𑀓𑀸𑀭𑀫𑀕𑁆𑀕𑀧𑁆𑀧𑀝𑀺𑀯𑁂𑀥𑀯𑀲𑁂𑀦.

𑀓𑀼𑀲𑀮𑀓𑀫𑁆𑀫𑀧𑀣𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀳𑀸𑀭𑀯𑀸𑀭𑀯𑀡𑁆𑀡𑀦𑀸

𑁯𑁦. 𑀆𑀳𑀭𑀢𑀻𑀢𑀺 ¶ (𑀲𑀁. 𑀦𑀺. 𑀝𑀻. 𑁨.𑁨.𑁧𑁧) 𑀆𑀦𑁂𑀢𑀺, 𑀉𑀧𑁆𑀧𑀸𑀤𑁂𑀢𑀺 𑀉𑀧𑀢𑁆𑀣𑀫𑁆𑀪𑁂𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀢𑁆𑀢𑀸𑀢𑀺 𑀧𑀲𑀼𑀢𑀸. 𑀢𑀢𑁄 𑀧𑀝𑁆𑀞𑀸𑀬 𑀳𑀺 𑀮𑁄𑀓𑁂 𑀚𑀸𑀢𑀯𑁄𑀳𑀸𑀭𑁄. 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀦 𑀧𑀝𑁆𑀞𑀸𑀬 𑀬𑀸𑀯 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑀁, 𑀢𑀸𑀯 𑀲𑀫𑁆𑀪𑀯𑁂𑀲𑀺𑀦𑁄. 𑀏𑀲 𑀢𑀸𑀯 𑀕𑀩𑁆𑀪𑀲𑁂𑀬𑁆𑀬𑀓𑁂𑀲𑀼 𑀪𑀽𑀢𑀲𑀫𑁆𑀪𑀯𑁂𑀲𑀺𑀯𑀺𑀪𑀸𑀕𑁄, 𑀇𑀢𑀭𑁂𑀲𑀼 𑀧𑀦 𑀧𑀞𑀫𑀘𑀺𑀢𑁆𑀢𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑁄. 𑀲𑀫𑁆𑀪𑀯-𑀲𑀤𑁆𑀤𑁄 𑀘𑁂𑀢𑁆𑀣 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀯𑀲𑁂𑀦 𑀧𑀲𑀽𑀢𑀺𑀧𑀭𑀺𑀬𑀸𑀬𑁄, 𑀇𑀢𑀭𑁂𑀲𑀁 𑀯𑀲𑁂𑀦 𑀉𑀧𑁆𑀧𑀢𑁆𑀢𑀺𑀧𑀭𑀺𑀬𑀸𑀬𑁄. 𑀧𑀞𑀫𑀘𑀺𑀢𑁆𑀢𑀧𑀞𑀫𑀇𑀭𑀺𑀬𑀸𑀧𑀣𑀓𑁆𑀔𑀡𑁂𑀲𑀼 𑀳𑀺 𑀢𑁂 𑀲𑀫𑁆𑀪𑀯𑀁 𑀉𑀧𑁆𑀧𑀢𑁆𑀢𑀺𑀁 𑀏𑀲𑀦𑁆𑀢𑀺 𑀉𑀧𑀕𑀘𑁆𑀙𑀦𑁆𑀢𑀺 𑀦𑀸𑀫, 𑀦 𑀢𑀸𑀯 𑀪𑀽𑀢𑀸 𑀉𑀧𑁆𑀧𑀢𑁆𑀢𑀺𑀬𑀸 𑀦 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀢𑁆𑀢𑀸. 𑀪𑀽𑀢𑀸𑀬𑁂𑀯 𑀲𑀩𑁆𑀩𑀲𑁄 𑀪𑀯𑁂𑀲𑀦𑀸𑀬 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸. 𑀦 𑀧𑀼𑀦 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀅𑀯𑀥𑀸𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀺, ‘‘𑀬𑁄 𑀘 𑀓𑀸𑀮𑀖𑀲𑁄 𑀪𑀽𑀢𑁄’’𑀢𑀺𑀆𑀤𑀻𑀲𑀼 (𑀚𑀸. 𑁧.𑁨.𑁧𑁯𑁦) 𑀪𑀽𑀢-𑀲𑀤𑁆𑀤𑀲𑁆𑀲 𑀔𑀻𑀡𑀸𑀲𑀯𑀯𑀸𑀘𑀺𑀢𑀸 𑀤𑀝𑁆𑀞𑀩𑁆𑀩𑀸. 𑀯𑀸-𑀲𑀤𑁆𑀤𑁄 𑀘𑁂𑀢𑁆𑀣 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 ‘‘𑀅𑀕𑁆𑀕𑀺𑀦𑀸 𑀯𑀸 𑀉𑀤𑀓𑁂𑀦 𑀯𑀸’’𑀢𑀺𑀆𑀤𑀻𑀲𑀼 (𑀉𑀤𑀸. 𑁭𑁬) 𑀯𑀺𑀬.

𑀬𑀣𑀸𑀲𑀓𑀁 𑀧𑀘𑁆𑀘𑀬𑀪𑀸𑀯𑁂𑀦 𑀅𑀢𑁆𑀢𑀪𑀸𑀯𑀲𑁆𑀲 𑀧𑀝𑁆𑀞𑀧𑀦𑀫𑁂𑀯𑁂𑀢𑁆𑀣𑀆𑀳𑀸𑀭𑁂𑀳𑀺 𑀓𑀸𑀢𑀩𑁆𑀩𑀅𑀦𑀼𑀕𑁆𑀕𑀳𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀯𑀘𑀦𑀪𑁂𑀤𑁄…𑀧𑁂… 𑀏𑀓𑁄𑀬𑁂𑀯𑀸’’𑀢𑀺. 𑀲𑀢𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀦𑁆𑀢𑀺 𑀲𑀢𑁆𑀢𑀲𑁆𑀲𑀲𑀦𑁆𑀢𑀸𑀦𑁂 𑀉𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁. 𑀬𑀣𑀸 ‘‘𑀯𑀲𑁆𑀲𑀲𑀢𑀁 𑀢𑀺𑀝𑁆𑀞𑀢𑀻’’𑀢𑀺 𑀯𑀼𑀢𑁆𑀢𑁂 𑀅𑀦𑀼𑀧𑁆𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀏𑀯𑀁 𑀞𑀺𑀢𑀺𑀬𑀸𑀢𑀺 𑀅𑀦𑀼𑀧𑁆𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄, 𑀲𑀸 𑀧𑀦 𑀅𑀯𑀺𑀘𑁆𑀙𑁂𑀤𑁄𑀢𑀺 𑀆𑀳 ‘‘𑀅𑀯𑀺𑀘𑁆𑀙𑁂𑀤𑀸𑀬𑀸’’𑀢𑀺. 𑀅𑀦𑀼𑀧𑁆𑀧𑀩𑀦𑁆𑀥𑀥𑀫𑁆𑀫𑀼𑀧𑁆𑀧𑀢𑁆𑀢𑀺𑀬𑀸 𑀲𑀢𑁆𑀢𑀲𑀦𑁆𑀢𑀸𑀦𑁄 𑀅𑀦𑀼𑀕𑁆𑀕𑀳𑀺𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀉𑀧𑁆𑀧𑀸𑀤𑀸𑀬𑀸’’𑀢𑀺. 𑀏𑀢𑀸𑀦𑀻𑀢𑀺 𑀞𑀺𑀢𑀺𑀅𑀦𑀼𑀕𑁆𑀕𑀳𑀧𑀤𑀸𑀦𑀺. 𑀉𑀪𑀬𑀢𑁆𑀣 𑀤𑀝𑁆𑀞𑀩𑁆𑀩𑀸𑀦𑀺, 𑀦 𑀬𑀣𑀸𑀲𑀗𑁆𑀔𑁆𑀬𑀁.

𑀯𑀢𑁆𑀣𑀼𑀕𑀢𑀸 ¶ 𑀑𑀚𑀸 𑀯𑀢𑁆𑀣𑀼 𑀯𑀺𑀬 𑀢𑁂𑀦 𑀲𑀤𑁆𑀥𑀺𑀁 𑀆𑀳𑀭𑀺𑀢𑀩𑁆𑀩𑀢𑀁 𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑀢𑁄 𑀆𑀳𑀸𑀭𑁄’’𑀢𑀺. 𑀦𑀺𑀩𑁆𑀩𑀢𑁆𑀢𑀺𑀢𑀑𑀚𑀁 𑀧𑀦 𑀲𑀦𑁆𑀥𑀸𑀬 ‘‘𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀑𑀚𑀝𑁆𑀞𑀫𑀓𑀭𑀽𑀧𑀸𑀦𑀺 𑀆𑀳𑀭𑀢𑀻’’𑀢𑀺 𑀯𑀓𑁆𑀔𑀢𑀺. 𑀑𑀴𑀸𑀭𑀺𑀓𑀢𑀸 𑀅𑀧𑁆𑀧𑁄𑀚𑀢𑀸𑀬, 𑀦 𑀯𑀢𑁆𑀣𑀼𑀦𑁄 𑀣𑀽𑀮𑀢𑀸𑀬, 𑀓𑀣𑀺𑀦𑀢𑀸𑀬 𑀯𑀸, 𑀢𑀲𑁆𑀫𑀸 𑀬𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀭𑀺𑀢𑁆𑀢𑀸 𑀑𑀚𑀸 𑀳𑁄𑀢𑀺, 𑀢𑀁 𑀑𑀴𑀸𑀭𑀺𑀓𑀁. 𑀲𑀧𑁆𑀧𑀸𑀤𑀬𑁄 𑀤𑀼𑀓𑁆𑀔𑀼𑀧𑁆𑀧𑀸𑀤𑀓𑀢𑀸𑀬 𑀑𑀴𑀸𑀭𑀺𑀓𑀸𑀯𑁂𑀤𑀺𑀢𑀩𑁆𑀩𑀸. 𑀯𑀺𑀲𑀸𑀡𑀸𑀤𑀻𑀦𑀁 𑀢𑀺𑀯𑀲𑁆𑀲𑀙𑀟𑁆𑀟𑀺𑀢𑀸𑀦𑀁 𑀧𑀽𑀢𑀺𑀪𑀽𑀢𑁆𑀢𑀢𑀸 𑀫𑀼𑀤𑀼𑀓𑀢𑀸𑀢𑀺 𑀯𑀤𑀦𑁆𑀢𑀺, 𑀢𑀭𑀘𑁆𑀙𑀔𑁂𑀴𑀢𑁂𑀫𑀺𑀓𑀢𑀸𑀬 𑀧𑀦 𑀢𑀣𑀸𑀪𑀽𑀢𑀸𑀦𑀁 𑀢𑁂𑀲𑀁 𑀫𑀼𑀤𑀼𑀓𑀢𑀸. 𑀥𑀫𑁆𑀫𑀲𑀪𑀸𑀯𑁄 𑀳𑁂𑀲. 𑀲𑀲𑀸𑀦𑀁 ¶ 𑀆𑀳𑀸𑀭𑁄 𑀲𑀼𑀔𑀼𑀫𑁄 𑀢𑀭𑀼𑀡𑀢𑀺𑀡𑀲𑀲𑁆𑀲𑀔𑀸𑀤𑀦𑀢𑁄. 𑀲𑀓𑀼𑀡𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄 𑀢𑀺𑀡𑀩𑀻𑀚𑀸𑀤𑀺𑀔𑀸𑀤𑀦𑀢𑁄. 𑀧𑀘𑁆𑀘𑀦𑁆𑀢𑀯𑀸𑀲𑀻𑀦𑀁 𑀲𑀼𑀔𑀼𑀫𑁄, 𑀢𑁂𑀲𑀜𑁆𑀳𑀺 𑀲𑀸𑀓𑀧𑀡𑁆𑀡𑀲𑀼𑀓𑁆𑀔𑀓𑀼𑀭𑀧𑀤𑀼𑀫𑀧𑀢𑁆𑀢𑀫𑁆𑀧𑀺 𑀆𑀳𑀸𑀭𑁄𑀢𑀺. 𑀢𑁂𑀲𑀁 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁. 𑀲𑀼𑀔𑀼𑀫𑁄𑀢𑁆𑀯𑁂𑀯𑀸𑀢𑀺 𑀦 𑀓𑀺𑀜𑁆𑀘𑀺 𑀉𑀧𑀸𑀤𑀸𑀬, 𑀅𑀣 𑀔𑁄 𑀲𑀼𑀔𑀼𑀫𑁄 𑀇𑀘𑁆𑀘𑁂𑀯 𑀦𑀺𑀝𑁆𑀞𑀁 𑀧𑀢𑁆𑀢𑁄 𑀢𑀢𑁄 𑀧𑀭𑀁 𑀲𑀼𑀔𑀼𑀫𑀲𑁆𑀲 𑀅𑀪𑀸𑀯𑀢𑁄.

𑀯𑀢𑁆𑀣𑀼𑀯𑀲𑁂𑀦 𑀧𑀦𑁂𑀢𑁆𑀣 𑀆𑀳𑀸𑀭𑀲𑁆𑀲 𑀑𑀴𑀸𑀭𑀺𑀓𑀲𑀼𑀔𑀼𑀫𑀢𑀸 𑀯𑀼𑀢𑁆𑀢𑀸, 𑀲𑀸 𑀘𑀲𑁆𑀲 𑀅𑀧𑁆𑀧𑁄𑀚𑀫𑀳𑁄𑀚𑀢𑀸𑀳𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀲𑁆𑀲𑀫𑀦𑁆𑀢𑀺 𑀔𑀼𑀤𑀸𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀲𑀭𑀻𑀭𑀔𑁂𑀤𑀁. 𑀯𑀺𑀦𑁄𑀤𑁂𑀢𑀻𑀢𑀺 𑀯𑀢𑁆𑀣𑀼 𑀢𑀲𑁆𑀲 𑀯𑀺𑀦𑁄𑀤𑀦𑀫𑀢𑁆𑀢𑀁 𑀓𑀭𑁄𑀢𑀺. 𑀦 𑀧𑀦 𑀲𑀓𑁆𑀓𑁄𑀢𑀺 𑀧𑀸𑀮𑁂𑀢𑀼𑀦𑁆𑀢𑀺 𑀲𑀭𑀻𑀭𑀁 𑀬𑀸𑀧𑁂𑀢𑀼𑀁 𑀦𑀧𑁆𑀧𑀳𑁄𑀢𑀺 𑀦𑀺𑀲𑁆𑀲𑀸𑀭𑀢𑁆𑀢𑀸. 𑀦 𑀲𑀓𑁆𑀓𑁄𑀢𑀺 𑀧𑀭𑀺𑀲𑁆𑀲𑀫𑀁 𑀯𑀺𑀦𑁄𑀤𑁂𑀢𑀼𑀁 𑀆𑀫𑀸𑀲𑀬𑀲𑁆𑀲 𑀅𑀧𑀽𑀭𑀡𑀢𑁄.

𑀙𑀩𑁆𑀩𑀺𑀥𑁄𑀧𑀻𑀢𑀺 𑀇𑀫𑀺𑀦𑀸 𑀓𑀲𑁆𑀲𑀘𑀺𑀧𑀺 𑀨𑀲𑁆𑀲𑀲𑁆𑀲 𑀅𑀦𑀯𑀲𑁂𑀲𑀺𑀢𑀩𑁆𑀩𑀢𑀫𑀸𑀳. 𑀆𑀳𑀸𑀭𑀲𑁆𑀲𑀤𑁂𑀲𑀦𑀸𑀓𑁆𑀓𑀫𑁂𑀦𑁂𑀯𑁂𑀢𑁆𑀣 𑀨𑀲𑁆𑀲𑀸𑀤𑀻𑀦𑀁 𑀤𑀼𑀢𑀺𑀬𑀸𑀤𑀺𑀢𑀸, 𑀦 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦𑀸𑀢𑀺 𑀆𑀳 ‘‘𑀤𑁂𑀲𑀦𑀸𑀦𑀬𑁄 𑀏𑀯𑀸’’𑀢𑀺𑀆𑀤𑀺. 𑀫𑀦𑀲𑁄 𑀲𑀜𑁆𑀘𑁂𑀢𑀦𑀸, 𑀦 𑀲𑀢𑁆𑀢𑀲𑁆𑀲𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀫𑀦𑁄𑀕𑀳𑀡𑀁 𑀬𑀣𑀸 ‘‘𑀘𑀺𑀢𑁆𑀢𑀲𑁆𑀲 𑀞𑀺𑀢𑀺 (𑀥. 𑀲. 𑁧𑁧), 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀘𑀸’’𑀢𑀺 (𑀫. 𑀦𑀺. 𑁧.𑁬𑁯) 𑀆𑀳 ‘‘𑀫𑀦𑁄𑀲𑀜𑁆𑀘𑁂𑀢𑀦𑀸𑀢𑀺 𑀘𑁂𑀢𑀦𑀸 𑀏𑀯𑀸’’𑀢𑀺. 𑀘𑀺𑀢𑁆𑀢𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀘𑀺𑀢𑁆𑀢𑀁, 𑀦 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀫𑁂𑀯.

𑀧𑀼𑀩𑁆𑀩𑁂 ‘‘𑀆𑀳𑀸𑀭𑀦𑁆𑀢𑀺 𑀧𑀘𑁆𑀘𑀬’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀬𑀤𑀺 𑀧𑀘𑁆𑀘𑀬𑀝𑁆𑀞𑁄 𑀆𑀳𑀸𑀭𑀝𑁆𑀞𑁄’’𑀢𑀺𑀆𑀤𑀺𑀦𑀸 𑀘𑁄𑀤𑁂𑀢𑀺. 𑀅𑀣 𑀓𑀲𑁆𑀫𑀸 𑀇𑀫𑁂𑀬𑁂𑀯 𑀘𑀢𑁆𑀢𑀸𑀭𑁄 𑀯𑀼𑀢𑁆𑀢𑀸𑀢𑀺 𑀅𑀣 𑀓𑀲𑁆𑀫𑀸 𑀘𑀢𑁆𑀢𑀸𑀭𑁄𑀯 𑀯𑀼𑀢𑁆𑀢𑀸, 𑀇𑀫𑁂 𑀏𑀯 𑀘 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀯𑀺𑀲𑁂𑀲𑀧𑀘𑁆𑀘𑀬𑀢𑁆𑀢𑀸𑀢𑀺 𑀏𑀢𑁂𑀦 𑀬𑀣𑀸 𑀅𑀜𑁆𑀜𑁂 𑀧𑀘𑁆𑀘𑀬𑀥𑀫𑁆𑀫𑀸 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀧𑀘𑁆𑀘𑀬𑀸𑀯 𑀳𑁄𑀦𑁆𑀢𑀺, 𑀇𑀫𑁂 𑀧𑀦 𑀢𑀣𑀸 𑀘 𑀳𑁄𑀦𑁆𑀢𑀺 𑀅𑀜𑁆𑀜𑀣𑀸 𑀘𑀸𑀢𑀺 𑀲𑀫𑀸𑀦𑁂𑀧𑀺 𑀧𑀘𑁆𑀘𑀬𑀢𑁆𑀢𑁂 𑀅𑀢𑀺𑀭𑁂𑀓𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀆𑀳𑀸𑀭𑀸𑀢𑀺 𑀯𑀼𑀢𑁆𑀢𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺 𑀢𑀁 𑀅𑀢𑀺𑀭𑁂𑀓𑀧𑀘𑁆𑀘𑀬𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀲𑁂𑀲𑀧𑀘𑁆𑀘𑀬𑁄 𑀳𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀯𑀺𑀲𑁂𑀲𑀧𑀘𑁆𑀘𑀬𑁄 𑀭𑀽𑀧𑀓𑀸𑀬𑀲𑁆𑀲 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀉𑀧𑀢𑁆𑀣𑀫𑁆𑀪𑀓𑀪𑀸𑀯𑀢𑁄. 𑀢𑁂𑀦𑀸𑀳 𑀅𑀝𑁆𑀞𑀓𑀣𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑁨.𑁭𑁦𑁮; 𑀧𑀝𑁆𑀞𑀸. 𑀅𑀝𑁆𑀞. 𑀧𑀘𑁆𑀘𑀬𑀼𑀤𑁆𑀤𑁂𑀲𑀯𑀡𑁆𑀡𑀦𑀸) ‘‘𑀭𑀽𑀧𑀸𑀭𑀽𑀧𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂𑀦 𑀉𑀧𑀓𑀸𑀭𑀓𑀸 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀆𑀳𑀸𑀭𑀧𑀘𑁆𑀘𑀬𑁄’’𑀢𑀺. 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀜𑁆𑀳𑀺 ¶ 𑀲𑀢𑀺𑀧𑀺 𑀚𑀦𑀓𑀢𑁆𑀢𑁂 𑀅𑀭𑀽𑀧𑀻𑀦𑀁 𑀆𑀳𑀸𑀭𑀸𑀦𑀁 𑀆𑀳𑀸𑀭𑀚𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑀭𑀽𑀧𑀸𑀳𑀸𑀭𑀲𑁆𑀲 ¶ 𑀘 𑀳𑁄𑀢𑀺, 𑀅𑀲𑀢𑀺 𑀧𑀦 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂 𑀆𑀳𑀸𑀭𑀸𑀦𑀁 𑀚𑀦𑀓𑀢𑁆𑀢𑀁 𑀦𑀢𑁆𑀣𑀻𑀢𑀺 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑀁 𑀧𑀥𑀸𑀦𑀁. 𑀚𑀦𑀬𑀫𑀸𑀦𑁄𑀧𑀺 𑀳𑀺 𑀆𑀳𑀸𑀭𑁄 𑀅𑀯𑀺𑀘𑁆𑀙𑁂𑀤𑀯𑀲𑁂𑀦 𑀉𑀧𑀢𑁆𑀣𑀫𑁆𑀪𑀬𑀫𑀸𑀦𑁄 𑀏𑀯 𑀚𑀦𑁂𑀢𑀻𑀢𑀺 𑀉𑀧𑀢𑁆𑀢𑀫𑁆𑀪𑀓𑀪𑀸𑀯𑁄 𑀏𑀯 𑀆𑀳𑀸𑀭𑀪𑀸𑀯𑁄. 𑀯𑁂𑀤𑀦𑀸𑀬 𑀨𑀲𑁆𑀲𑁄 𑀯𑀺𑀲𑁂𑀲𑀧𑀘𑁆𑀘𑀬𑁄. ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺 𑀳𑀺 𑀯𑀼𑀢𑁆𑀢𑀁. ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 (𑀉𑀤𑀸. 𑁧; 𑀫. 𑀦𑀺. 𑁩.𑁧𑁨𑁬) 𑀯𑀘𑀦𑀢𑁄 𑀯𑀺𑀜𑁆𑀜𑀸𑀡𑀲𑁆𑀲𑀫𑀦𑁄𑀲𑀜𑁆𑀘𑁂𑀢𑀦𑀸. ‘‘𑀘𑁂𑀢𑀦𑀸 𑀢𑀺𑀯𑀺𑀥𑀁 𑀪𑀯𑀁 𑀚𑀦𑁂𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁. ‘‘𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 𑀧𑀦 𑀯𑀘𑀦𑀢𑁄 𑀦𑀸𑀫𑀭𑀽𑀧𑀲𑁆𑀲 𑀯𑀺𑀜𑁆𑀜𑀸𑀡𑀁 𑀯𑀺𑀲𑁂𑀲𑀧𑀘𑁆𑀘𑀬𑀸. 𑀦 𑀳𑀺 𑀑𑀓𑁆𑀓𑀦𑁆𑀢𑀺𑀯𑀺𑀜𑁆𑀜𑀸𑀡𑀸𑀪𑀸𑀯𑁂 𑀦𑀸𑀫𑀭𑀽𑀧𑀲𑁆𑀲 𑀅𑀢𑁆𑀢𑀲𑀫𑁆𑀪𑀯𑁄. 𑀬𑀣𑀸𑀳 ‘‘𑀯𑀺𑀜𑁆𑀜𑀸𑀡𑀜𑁆𑀘 𑀳𑀺, 𑀆𑀦𑀦𑁆𑀤, 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀦 𑀑𑀓𑁆𑀓𑀫𑀺𑀲𑁆𑀲𑀣, 𑀅𑀧𑀺 𑀦𑀼 𑀔𑁄 𑀦𑀸𑀫𑀭𑀽𑀧𑀁 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀲𑀫𑀼𑀘𑁆𑀘𑀺𑀲𑁆𑀲𑀣𑀸’’𑀢𑀺𑀆𑀤𑀺 (𑀤𑀻. 𑀦𑀺. 𑁨.𑁧𑁧𑁫). 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀼𑀢𑁆𑀢𑁂𑀦 𑀲𑀸𑀥𑁂𑀢𑀼𑀁 ‘‘𑀬𑀣𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀏𑀯𑀁 𑀬𑀤𑀺𑀧𑀺 𑀧𑀘𑁆𑀘𑀬𑀝𑁆𑀞𑁄 𑀆𑀳𑀸𑀭𑀝𑁆𑀞𑁄, 𑀯𑀺𑀲𑁂𑀲𑀧𑀘𑁆𑀘𑀬𑀢𑀸𑀬 𑀧𑀦 𑀇𑀫𑁂 𑀏𑀯 𑀆𑀳𑀸𑀭𑀸𑀢𑀺 𑀯𑀼𑀢𑁆𑀢𑀸𑀢𑀺 𑀢𑀁 𑀦𑁂𑀲𑀁 𑀯𑀺𑀲𑁂𑀲𑀧𑀘𑁆𑀘𑀬𑀢𑀁 𑀅𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀓𑁄 𑀧𑀦𑁂𑀢𑁆𑀣𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀫𑀼𑀔𑁂 𑀞𑀧𑀺𑀢𑀫𑀢𑁆𑀢𑁄𑀬𑁂𑀯 𑀅𑀲𑀗𑁆𑀔𑀸𑀤𑀺𑀢𑁄, 𑀢𑀢𑁆𑀢𑀓𑁂𑀦𑀧𑀺 𑀅𑀩𑁆𑀪𑀦𑁆𑀢𑀭𑀲𑁆𑀲 𑀆𑀳𑀸𑀭𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺 𑀏𑀯. 𑀢𑁂𑀦𑀸𑀳 ‘‘𑀅𑀝𑁆𑀞 𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀢𑀻’’𑀢𑀺. 𑀲𑀼𑀔𑀯𑁂𑀤𑀦𑀸𑀬 𑀳𑀺𑀢𑁄 𑀲𑀼𑀔𑀯𑁂𑀤𑀦𑀺𑀬𑁄. 𑀲𑀩𑁆𑀩𑀣𑀸𑀧𑀻𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀯𑀲𑁂𑀦. 𑀬𑀢𑁆𑀢𑀓𑀸 𑀨𑀲𑁆𑀲𑀲𑁆𑀲 𑀧𑀓𑀸𑀭𑀪𑁂𑀤𑀸, 𑀢𑁂𑀲𑀁 𑀯𑀲𑁂𑀦 𑀲𑀩𑁆𑀩𑀧𑁆𑀧𑀓𑀸𑀭𑁄𑀧𑀺 𑀨𑀲𑁆𑀲𑀸𑀳𑀸𑀭𑁄. 𑀬𑀣𑀸𑀭𑀳𑀁 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀆𑀳𑀭𑀢𑀺, 𑀅𑀦𑀸𑀳𑀸𑀭𑀓𑁄 𑀦𑀢𑁆𑀣𑀺.

𑀲𑀩𑁆𑀩𑀣𑀸𑀧𑀻𑀢𑀺 𑀇𑀥𑀸𑀧𑀺 𑀨𑀲𑁆𑀲𑀸𑀳𑀸𑀭𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀺𑀲𑀦𑁆𑀢𑀢𑀺𑀯𑀲𑁂𑀦𑀸𑀢𑀺 𑀓𑀸𑀬𑀤𑀲𑀓𑀁 𑀪𑀸𑀯𑀤𑀲𑀓𑀁 𑀯𑀢𑁆𑀣𑀼𑀤𑀲𑀓𑀦𑁆𑀢𑀺 𑀢𑀺𑀯𑀺𑀥𑀲𑀦𑁆𑀢𑀢𑀺𑀯𑀲𑁂𑀦. 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀦𑀬𑁂𑀦𑀸𑀢𑀺 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀺𑀥𑀺𑀦𑀸. 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀜𑁆𑀳𑀺 𑀅𑀢𑁆𑀢𑀦𑀸 𑀲𑀳𑀚𑀸𑀢𑀦𑀸𑀫𑀲𑁆𑀲 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀯𑀺𑀧𑀸𑀓𑀺𑀦𑁆𑀤𑁆𑀭𑀺𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂𑀳𑀺 𑀧𑀘𑁆𑀘𑀬𑁄 𑀳𑁄𑀦𑁆𑀢𑁄𑀬𑁂𑀯 𑀆𑀳𑀸𑀭𑀧𑀘𑁆𑀘𑀬𑀢𑀸𑀬 𑀢𑀁 𑀆𑀳𑀸𑀭𑁂𑀢𑀻 𑀯𑀼𑀢𑁆𑀢𑀁, 𑀲𑀳𑀚𑀸𑀢𑀭𑀽𑀧𑁂𑀲𑀼 𑀧𑀦 𑀯𑀢𑁆𑀣𑀼𑀦𑁄 𑀲𑀫𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑀁 𑀞𑀧𑁂𑀢𑁆𑀯𑀸 𑀯𑀺𑀧𑁆𑀧𑀬𑀼𑀢𑁆𑀢𑀧𑀘𑁆𑀘𑀬𑁂𑀦, 𑀲𑁂𑀲𑀭𑀽𑀧𑀲𑁆𑀲 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀜𑁆𑀘 𑀞𑀧𑁂𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀢𑀸𑀦𑀻𑀢𑀺 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 𑀅𑀦𑀧𑀼𑀁𑀲𑀓𑀸𑀦𑀫𑁆𑀧𑀺 𑀦𑀧𑀼𑀁𑀲𑀓𑁂𑀳𑀺 𑀲𑀳 𑀯𑀘𑀦𑀢𑁄.

𑀲𑀸𑀲𑀯𑀸 ¶ 𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀯 𑀯𑀼𑀢𑁆𑀢𑀸. 𑀯𑀺𑀲𑁂𑀲𑀧𑀘𑁆𑀘𑀬𑀪𑀸𑀯𑀤𑀲𑁆𑀲𑀦𑀁 𑀳𑁂𑀢𑀦𑁆𑀢𑀺. 𑀢𑁂𑀦𑀸𑀳 ‘‘𑀅𑀯𑀺𑀲𑁂𑀲𑁂𑀦 𑀧𑀦𑀸’’𑀢𑀺𑀆𑀤𑀺. 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸 𑀢𑀲𑁆𑀲 𑀢𑀲𑁆𑀲 𑀨𑀮𑀲𑁆𑀲 𑀯𑀺𑀲𑁂𑀲𑀢𑁄 𑀧𑀘𑁆𑀘𑀬𑀢𑀸𑀬 𑀏𑀢𑁂𑀲𑀁 𑀆𑀳𑀸𑀭𑀝𑁆𑀞𑁄, 𑀏𑀯𑀁 𑀅𑀯𑀺𑀲𑁂𑀲𑀢𑁄𑀧𑀻𑀢𑀺 𑀤𑀲𑁆𑀲𑀦𑁆𑀢𑁂𑀦 ‘‘𑀅𑀯𑀺𑀲𑁂𑀲𑁂𑀦 𑀧𑀦𑀸’’𑀢𑀺𑀆𑀤𑀺 ¶ 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀁𑀲𑀫𑁆𑀧𑀬𑀼𑀢𑁆𑀢𑀢𑀁𑀲𑀫𑀼𑀝𑁆𑀞𑀸𑀦𑀥𑀫𑁆𑀫𑀸𑀦𑀦𑁆𑀢𑀺 𑀢𑁂𑀳𑀺 𑀨𑀲𑁆𑀲𑀸𑀤𑀻𑀳𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀜𑁆𑀘𑁂𑀯 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀥𑀫𑁆𑀫𑀸𑀦𑀜𑁆𑀘. 𑀢𑀢𑁆𑀣 𑀲𑀫𑁆𑀧𑀬𑀼𑀢𑁆𑀢𑀕𑁆𑀕𑀳𑀡𑀁 𑀬𑀣𑀸𑀭𑀳𑀢𑁄 𑀤𑀝𑁆𑀞𑀩𑁆𑀩𑀁, 𑀲𑀫𑀼𑀝𑁆𑀞𑀸𑀦𑀕𑁆𑀕𑀳𑀡𑀁 𑀧𑀦 𑀅𑀯𑀺𑀲𑁂𑀲𑀢𑁄.

𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑁄 𑀆𑀳𑀸𑀭𑀓𑀺𑀘𑁆𑀘𑀁 𑀲𑀸𑀥𑁂𑀢𑀻𑀢𑀺 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑁄𑀬𑁂𑀯 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀑𑀚𑀝𑁆𑀞𑀫𑀓𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑁂𑀦𑁂𑀯 𑀧𑀦𑀲𑁆𑀲 𑀉𑀧𑀢𑁆𑀣𑀫𑁆𑀪𑀦𑀓𑀺𑀘𑁆𑀘𑀲𑀺𑀤𑁆𑀥𑀺. 𑀨𑀼𑀲𑀦𑁆𑀢𑁄𑀬𑁂𑀯𑀸𑀢𑀺 𑀨𑀼𑀲𑀦𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑁄 𑀏𑀯. 𑀆𑀬𑀽𑀳𑀫𑀸𑀦𑀸𑀯𑀸𑀢𑀺 𑀘𑁂𑀢𑀬𑀫𑀸𑀦𑀸 𑀏𑀯 𑀅𑀪𑀺𑀲𑀦𑁆𑀤𑀳𑀦𑁆𑀢𑀻 𑀏𑀯. 𑀯𑀺𑀚𑀸𑀦𑀦𑁆𑀢𑀫𑁂𑀯𑀸𑀢𑀺 𑀉𑀧𑀧𑀢𑁆𑀢𑀺𑀧𑀭𑀺𑀓𑀧𑁆𑀧𑀦𑀯𑀲𑁂𑀦 𑀯𑀺𑀚𑀸𑀦𑀦𑁆𑀢𑀫𑁂𑀯 𑀆𑀳𑀸𑀭𑀓𑀺𑀘𑁆𑀘𑀁 𑀲𑀸𑀥𑁂𑀢𑀻𑀢𑀺 𑀬𑁄𑀚𑀦𑀸. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀆𑀳𑀸𑀭𑀓𑀺𑀘𑁆𑀘𑀲𑀸𑀥𑀦𑀜𑁆𑀘 𑀢𑁂𑀲𑀁 𑀯𑁂𑀤𑀦𑀸𑀤𑀺𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑀸𑀬 𑀅𑀢𑁆𑀢𑀪𑀸𑀯𑀲𑁆𑀲 𑀧𑀯𑀢𑁆𑀢𑀦𑀫𑁂𑀯.

𑀓𑀸𑀬𑀝𑁆𑀞𑀧𑀦𑁂𑀦𑀸𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁? 𑀦𑀦𑀼 𑀓𑀫𑁆𑀫𑀚𑀸𑀤𑀺𑀭𑀽𑀧𑀁 𑀓𑀫𑁆𑀫𑀸𑀤𑀺𑀦𑀸𑀯 𑀧𑀯𑀢𑁆𑀢𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀓𑀫𑁆𑀫𑀚𑀦𑀺𑀢𑁄𑀧𑀻’’𑀢𑀺𑀆𑀤𑀺. 𑀉𑀧𑀸𑀤𑀺𑀦𑁆𑀦𑀭𑀽𑀧𑀲𑀦𑁆𑀢𑀢𑀺𑀬𑀸 𑀉𑀧𑀢𑁆𑀣𑀫𑁆𑀪𑀦𑁂𑀦𑁂𑀯 𑀉𑀢𑀼𑀘𑀺𑀢𑁆𑀢𑀚𑀭𑀽𑀧𑀲𑀦𑁆𑀢𑀢𑀻𑀦𑀫𑁆𑀧𑀺 𑀉𑀧𑀢𑁆𑀣𑀫𑁆𑀪𑀦𑀲𑀺𑀤𑁆𑀥𑀺 𑀳𑁄𑀢𑀻𑀢𑀺 ‘‘𑀤𑁆𑀯𑀺𑀦𑁆𑀦𑀁 𑀭𑀽𑀧𑀲𑀦𑁆𑀢𑀢𑀻𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀧𑀢𑁆𑀣𑀫𑁆𑀪𑀦𑀫𑁂𑀯 𑀲𑀦𑁆𑀥𑀸𑀬 ‘‘𑀅𑀦𑀼𑀧𑀸𑀮𑀓𑁄 𑀳𑀼𑀢𑁆𑀯𑀸’’𑀢𑀺 𑀘 𑀯𑀼𑀢𑁆𑀢𑀁. 𑀭𑀽𑀧𑀓𑀸𑀬𑀲𑁆𑀲 𑀞𑀺𑀢𑀺𑀳𑁂𑀢𑀼𑀢𑀸 𑀳𑀺 𑀬𑀸𑀧𑀦𑀸 𑀅𑀦𑀼𑀧𑀸𑀮𑀦𑀸.

𑀲𑀼𑀔𑀸𑀤𑀺𑀯𑀢𑁆𑀣𑀼𑀪𑀽𑀢𑀦𑁆𑀢𑀺 𑀲𑀼𑀔𑀸𑀤𑀻𑀦𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀁. 𑀆𑀭𑀫𑁆𑀫𑀡𑀫𑁆𑀧𑀺 𑀳𑀺 𑀯𑀲𑀢𑀺 𑀏𑀢𑁆𑀣 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀢𑀤𑀸𑀭𑀫𑁆𑀫𑀡𑀸 𑀥𑀫𑁆𑀫𑀸𑀢𑀺 𑀯𑀢𑁆𑀣𑀽𑀢𑀺 𑀯𑀼𑀘𑁆𑀘𑀢𑀺. 𑀨𑀼𑀲𑀦𑁆𑀢𑁄𑀬𑁂𑀯𑀸𑀢𑀺 𑀇𑀤𑀁 𑀨𑀲𑁆𑀲𑀲𑁆𑀲 𑀨𑀼𑀲𑀦𑀲𑀪𑀸𑀯𑀢𑁆𑀢𑀸 𑀯𑀼𑀢𑁆𑀢𑀁. 𑀦 𑀳𑀺 𑀥𑀫𑁆𑀫𑀸𑀦𑀁 𑀲𑀪𑀸𑀯𑁂𑀦 𑀯𑀺𑀦𑀸 𑀧𑀯𑀢𑁆𑀢𑀺 𑀅𑀢𑁆𑀣𑀺. 𑀯𑁂𑀤𑀦𑀸𑀧𑀯𑀢𑁆𑀢𑀺𑀬𑀸 𑀯𑀺𑀦𑀸 𑀲𑀢𑁆𑀢𑀸𑀦𑀁 𑀲𑀦𑁆𑀥𑀸𑀯𑀦𑀢𑀸 𑀦𑀢𑁆𑀣𑀻𑀢𑀺 𑀆𑀳 ‘‘𑀲𑀼𑀔𑀸𑀤𑀺…𑀧𑁂… 𑀳𑁄𑀢𑀻’’𑀢𑀺, 𑀦 𑀘𑁂𑀢𑁆𑀣 𑀲𑀜𑁆𑀜𑀻𑀪𑀯𑀓𑀣𑀸𑀬𑀁 𑀅𑀲𑀜𑁆𑀜𑀻𑀪𑀯𑁄 𑀤𑀲𑁆𑀲𑁂𑀢𑀩𑁆𑀩𑁄, 𑀢𑀲𑁆𑀲𑀸𑀧𑀺 𑀯𑀸 𑀓𑀸𑀭𑀡𑀪𑀽𑀢𑀯𑁂𑀤𑀦𑀸𑀧𑀯𑀢𑁆𑀢𑀺𑀯𑀲𑁂𑀦𑁂𑀯 𑀞𑀺𑀢𑀺𑀬𑀸 𑀳𑁂𑀢𑀼𑀦𑁄 𑀅𑀩𑁆𑀬𑀸𑀧𑀺𑀢𑀸. 𑀢𑀣𑀸 𑀳𑀺 ‘‘𑀫𑀦𑁄𑀲𑀜𑁆𑀘𑁂𑀢𑀦𑀸…𑀧𑁂… 𑀪𑀯𑀫𑀽𑀮𑀦𑀺𑀧𑁆𑀨𑀸𑀤𑀦𑀢𑁄 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀸, 𑀢𑀢𑁄 𑀏𑀯 ‘‘𑀯𑀺𑀜𑁆𑀜𑀸𑀡𑀁 𑀯𑀺𑀚𑀸𑀦𑀦𑁆𑀢𑀫𑁂𑀯𑀸𑀢𑀺 𑀉𑀧𑀧𑀢𑁆𑀢𑀺𑀧𑀭𑀺𑀓𑀧𑁆𑀧𑀦𑀯𑀲𑁂𑀦 𑀯𑀺𑀚𑀸𑀦𑀦𑁆𑀢𑀫𑁂𑀯𑀸’’𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄𑀢𑀺.

𑀘𑀢𑁆𑀢𑀸𑀭𑀺 ¶ 𑀪𑀬𑀸𑀦𑀺 𑀤𑀝𑁆𑀞𑀩𑁆𑀩𑀸𑀦𑀺 𑀆𑀤𑀻𑀦𑀯𑀯𑀺𑀪𑀸𑀯𑀦𑀢𑁄. 𑀦𑀺𑀓𑀦𑁆𑀢𑀻𑀢𑀺 𑀦𑀺𑀓𑀸𑀫𑀦𑀸. 𑀭𑀲𑀢𑀡𑁆𑀳𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀸 𑀳𑀺 𑀓𑀩𑀴𑀻𑀓𑀸𑀭𑁂 𑀆𑀳𑀸𑀭𑁂 𑀩𑀮𑀯𑀢𑀻. 𑀢𑁂𑀦𑁂𑀯 𑀢𑀢𑁆𑀣 𑀅𑀯𑀥𑀸𑀭𑀡𑀁 𑀓𑀢𑀁. 𑀪𑀸𑀬𑀢𑀺 𑀏𑀢𑀲𑁆𑀫𑀸𑀢𑀺 𑀪𑀬𑀁, 𑀦𑀺𑀓𑀦𑁆𑀢𑀺𑀬𑁂𑀯𑀪𑀬𑀁 𑀫𑀳𑀸𑀦𑀢𑁆𑀣𑀳𑁂𑀢𑀼𑀢𑁄. 𑀉𑀧𑀕𑀫𑀦𑀁 𑀯𑀺𑀲𑀬𑀺𑀦𑁆𑀤𑁆𑀭𑀺𑀬𑀯𑀺𑀜𑁆𑀜𑀸𑀡𑁂𑀲𑀼 𑀯𑀺𑀲𑀬𑀯𑀺𑀜𑁆𑀜𑀸𑀡𑁂𑀲𑀼 𑀏𑀯 𑀘 𑀲𑀗𑁆𑀕𑀢𑀺𑀯𑀲𑁂𑀦 𑀧𑀯𑀢𑁆𑀢𑀺, 𑀢𑀁 𑀯𑁂𑀤𑀦𑀸𑀤𑀺𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑀸𑀬 ‘‘𑀪𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀯𑀥𑀸𑀭𑀡𑁂 𑀧𑀬𑁄𑀚𑀦𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯𑀦𑀬𑁄. 𑀆𑀬𑀽𑀳𑀦𑀁 𑀅𑀪𑀺𑀲𑀦𑁆𑀤𑀳𑀦𑀁, 𑀲𑀁𑀯𑀺𑀥𑀸𑀦𑀦𑁆𑀢𑀺𑀧𑀺 ¶ 𑀯𑀤𑀦𑁆𑀢𑀺. 𑀢𑀁 𑀪𑀯𑀽𑀧𑀧𑀢𑁆𑀢𑀺𑀳𑁂𑀢𑀼𑀢𑀸𑀬 ‘‘𑀪𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀪𑀺𑀦𑀺𑀧𑀸𑀢𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀪𑀯𑀽𑀧𑀧𑀢𑁆𑀢𑀺𑀳𑁂𑀢𑀼𑀓𑀸𑀦𑀁 𑀲𑀩𑁆𑀩𑁂𑀲𑀁 𑀅𑀦𑀢𑁆𑀣𑀸𑀦𑀁 𑀫𑀽𑀮𑀓𑀸𑀭𑀡𑀢𑁆𑀢𑀸 ‘‘𑀪𑀬’’𑀦𑁆𑀢𑀺 𑀯𑀼𑀢𑁆𑀢𑁄. 𑀇𑀤𑀸𑀦𑀺 𑀦𑀺𑀓𑀦𑁆𑀢𑀺𑀆𑀤𑀻𑀦𑀁 𑀲𑀧𑁆𑀧𑀝𑀺𑀪𑀬𑀢𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀁𑀓𑀸𑀭𑀡𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀦𑀺𑀓𑀦𑁆𑀢𑀺𑀁 𑀓𑀢𑁆𑀯𑀸𑀢𑀺 𑀆𑀮𑀬𑀁 𑀚𑀦𑁂𑀢𑁆𑀯𑀸, 𑀢𑀡𑁆𑀳𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀨𑀲𑁆𑀲 𑀉𑀧𑀕𑀘𑁆𑀙𑀦𑁆𑀢𑀸𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀪𑁂𑀤𑀁 𑀨𑀲𑁆𑀲𑀁 𑀧𑀯𑀢𑁆𑀢𑁂𑀦𑁆𑀢𑀸. 𑀨𑀲𑁆𑀲𑀲𑁆𑀲𑀸𑀤𑀺𑀦𑁄𑀢𑀺 𑀓𑀸𑀬𑀲𑀫𑁆𑀨𑀲𑁆𑀲𑀯𑀲𑁂𑀦 𑀨𑁄𑀝𑁆𑀝𑀩𑁆𑀩𑀲𑀗𑁆𑀔𑀸𑀢𑀲𑁆𑀲 𑀨𑀲𑁆𑀲𑀲𑁆𑀲 𑀅𑀲𑁆𑀲𑀸𑀤𑀦𑀲𑀻𑀮𑀸. 𑀓𑀸𑀬𑀲𑀫𑁆𑀨𑀲𑁆𑀲𑀯𑀲𑁂𑀦 𑀳𑀺 𑀲𑀢𑁆𑀢𑀸𑀦𑀁 𑀨𑁄𑀝𑁆𑀞𑀩𑁆𑀩𑀢𑀡𑁆𑀳𑀸 𑀧𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀨𑀲𑁆𑀲𑀸𑀳𑀸𑀭𑀸𑀤𑀻𑀦𑀯𑀤𑀲𑁆𑀲𑀦𑁂 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀉𑀤𑁆𑀥𑀝𑀁 ‘‘𑀧𑀭𑁂𑀲𑀁 𑀭𑀓𑁆𑀔𑀺𑀢𑀕𑁄𑀧𑀺𑀢𑁂𑀲𑀽’’𑀢𑀺𑀆𑀤𑀺𑀦𑀸. 𑀨𑀲𑁆𑀲𑀲𑁆𑀲𑀸𑀤𑀺𑀦𑁄𑀢𑀺 𑀯𑀸 𑀨𑀲𑁆𑀲𑀸𑀳𑀸𑀭𑀲𑁆𑀲𑀸𑀤𑀺𑀦𑁄𑀢𑀺 𑀅𑀢𑁆𑀣𑁄. 𑀲𑀢𑀺 𑀳𑀺 𑀨𑀲𑁆𑀲𑀸𑀳𑀸𑀭𑁂 𑀲𑀢𑁆𑀢𑀸𑀦𑀁 𑀨𑀲𑁆𑀲𑀸𑀭𑀫𑁆𑀫𑀡𑁂 𑀅𑀲𑁆𑀲𑀸𑀤𑁄, 𑀦𑀸𑀲𑀢𑀻𑀢𑀺. 𑀢𑁂𑀦𑀸𑀳 ‘‘𑀨𑀲𑁆𑀲𑀲𑁆𑀲𑀸𑀤𑀫𑀽𑀮𑀓’’𑀦𑁆𑀢𑀺𑀆𑀤𑀺.

𑀚𑀸𑀢𑀺𑀦𑀺𑀫𑀺𑀢𑁆𑀢𑀲𑁆𑀲 𑀪𑀬𑀲𑁆𑀲 𑀅𑀪𑀺𑀦𑀺𑀧𑀸𑀢𑀲𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 ‘‘𑀢𑀫𑁆𑀫𑀽𑀮𑀓’’𑀦𑁆𑀢𑀺 𑀯𑀼𑀢𑁆𑀢𑀁, 𑀓𑀫𑁆𑀫𑀸𑀬𑀽𑀳𑀦𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀅𑀪𑀺𑀦𑀺𑀧𑀢𑀢𑀻𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀢𑀺. 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀳𑀺 𑀲𑀢𑁆𑀢𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀅𑀗𑁆𑀕𑀸𑀭𑀓𑀸𑀲𑀼𑀲𑀤𑀺𑀲𑁂 𑀪𑀯𑁂 𑀅𑀪𑀺𑀦𑀺𑀧𑀸𑀢𑀲𑀤𑀺𑀲𑀻𑀢𑀺. 𑀢𑀫𑁆𑀫𑀽𑀮𑀓𑀢𑁆𑀢𑀸𑀢𑀺 𑀦𑀸𑀫𑀭𑀽𑀧𑀦𑀺𑀩𑁆𑀩𑀢𑁆𑀢𑀺𑀫𑀽𑀮𑀓𑀢𑁆𑀢𑀸.

𑀢𑀢𑁆𑀭𑀸𑀢𑀺 𑀢𑀸𑀲𑀼 𑀉𑀧𑀫𑀸𑀲𑀼. 𑀪𑀽𑀢𑀫𑀢𑁆𑀣𑀁 𑀓𑀢𑁆𑀯𑀸𑀢𑀺 𑀦 𑀧𑀭𑀺𑀓𑀧𑁆𑀧𑀺𑀢𑀫𑀢𑁆𑀣𑀁, 𑀅𑀣 𑀔𑁄 𑀪𑀽𑀢𑀁 𑀪𑀽𑀢𑀧𑀼𑀩𑁆𑀩𑀁 𑀅𑀢𑁆𑀣𑀁 𑀓𑀢𑁆𑀯𑀸. 𑀧𑀸𑀣𑁂𑀬𑁆𑀬𑀳𑀢𑁆𑀣𑁂𑀲𑀼 𑀕𑀘𑁆𑀙𑀦𑁆𑀢𑁂𑀲𑀼 𑀧𑀸𑀣𑁂𑀬𑁆𑀬𑀁, 𑀕𑀘𑁆𑀙𑀦𑁆𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀕𑀦𑁆𑀢𑁆𑀯𑀸 𑀧𑀸𑀣𑁂𑀬𑁆𑀬𑀁 𑀦𑀺𑀝𑁆𑀞𑀸𑀲𑀻’’𑀢𑀺. 𑀕𑀦𑁆𑀢𑁆𑀯𑀸𑀢𑀺 𑀯𑀸𑀕𑀫𑀦𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀔𑀼𑀧𑁆𑀧𑀺𑀧𑀸𑀲𑀸𑀢𑀼𑀭𑀢𑀸𑀬 𑀖𑀦𑀘𑁆𑀙𑀸𑀬𑀁 𑀭𑀼𑀓𑁆𑀔𑀁 𑀉𑀧𑀕𑀦𑁆𑀢𑀼𑀁 𑀅𑀲𑀫𑀢𑁆𑀣𑀸 𑀯𑀺𑀭𑀴𑁆𑀳𑀘𑁆𑀙𑀸𑀬𑀸𑀬𑀁 𑀦𑀺𑀲𑀻𑀤𑀺𑀁𑀲𑀼. 𑀦 𑀤𑀸𑀦𑀺 𑀲𑀓𑁆𑀓𑀸 𑀢𑀁 𑀫𑀬𑀸 𑀓𑀸𑀢𑀼𑀁 ¶ 𑀅𑀢𑀺𑀤𑀼𑀩𑁆𑀩𑀮𑀪𑀸𑀯𑀢𑁄. 𑀧𑀭𑀺𑀓𑁆𑀔𑀮𑀺𑀢𑀕𑀢𑀺𑀢𑀭𑀼𑀡𑀤𑀸𑀭𑀓𑁄 𑀔𑀼𑀧𑁆𑀧𑀺𑀧𑀸𑀲𑀸𑀪𑀺𑀪𑀽𑀢𑁄 𑀘, 𑀢𑀲𑁆𑀫𑀸 𑀕𑀘𑁆𑀙𑀦𑁆𑀢𑁄𑀬𑁂𑀯 𑀫𑀢𑁄.

𑀲𑀚𑀸𑀢𑀺𑀫𑀁𑀲𑀢𑀸𑀬𑀸𑀢𑀺 (𑀲𑀁. 𑀦𑀺. 𑀝𑀻. 𑁨.𑁨.𑁬𑁩) 𑀲𑀫𑀸𑀦𑀚𑀸𑀢𑀺𑀫𑀁𑀲𑀢𑀸𑀬, 𑀫𑀦𑀼𑀲𑁆𑀲𑀫𑀁𑀲𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀬𑀁 𑀫𑀦𑀼𑀲𑁆𑀲𑀫𑀁𑀲𑀁, 𑀢𑀜𑁆𑀳𑀺 𑀮𑁄𑀓𑁂 𑀚𑀺𑀕𑀼𑀘𑁆𑀙𑀦𑀻𑀬𑀢𑁆𑀢𑀸 𑀧𑀝𑀺𑀓𑀼𑀮𑀁. 𑀢𑀣𑀸 𑀳𑀺 𑀢𑀁 𑀯𑀺𑀜𑁆𑀜𑀽𑀳𑀺 𑀯𑀚𑁆𑀚𑀺𑀢𑀁, 𑀫𑀦𑀼𑀲𑁆𑀲𑀫𑀁𑀲𑁂𑀲𑀼𑀧𑀺 𑀜𑀸𑀢𑀺𑀫𑀁𑀲𑀁 𑀅𑀬𑀼𑀢𑁆𑀢𑀧𑀭𑀺𑀪𑁄𑀕𑀢𑀸𑀬 𑀧𑀝𑀺𑀓𑀽𑀮𑀁, 𑀢𑀢𑁆𑀣𑀸𑀧𑀺 𑀧𑀼𑀢𑁆𑀢𑀫𑀁𑀲𑀁, 𑀢𑀢𑁆𑀣𑀸𑀧𑀺 𑀧𑀺𑀬𑀧𑀼𑀢𑁆𑀢𑀫𑀁𑀲𑀁, 𑀢𑀢𑁆𑀣𑀸𑀧𑀺 𑀢𑀭𑀼𑀡𑀫𑀁𑀲𑀁, 𑀢𑀢𑁆𑀣𑀸𑀧𑀺 𑀆𑀫𑀓𑀫𑀁𑀲𑀁, 𑀢𑀢𑁆𑀣𑀸𑀧𑀺 𑀅𑀕𑁄𑀭𑀲𑀸𑀪𑀺𑀲𑀗𑁆𑀔𑀢𑀁, 𑀢𑀢𑁆𑀣𑀸𑀧𑀺 𑀅𑀮𑁄𑀡𑀁, 𑀢𑀢𑁆𑀣𑀸𑀧𑀺 𑀅𑀥𑀽𑀧𑀺𑀢𑀦𑁆𑀢𑀺 𑀏𑀯𑀁 𑀳𑁂𑀝𑁆𑀞𑀺𑀫𑀢𑁄 𑀉𑀢𑁆𑀢𑀭𑀼𑀢𑁆𑀢𑀭𑀲𑁆𑀲 𑀧𑀝𑀺𑀓𑀽𑀮𑀢𑀭𑀪𑀸𑀯𑀓𑀸𑀭𑀡𑀢𑀸 ¶ 𑀤𑀝𑁆𑀞𑀩𑁆𑀩𑀸. 𑀧𑀼𑀢𑁆𑀢𑀫𑀁𑀲𑀲𑀤𑀺𑀲𑀦𑁆𑀢𑀺 𑀧𑀝𑀺𑀓𑀽𑀮𑀢𑀸𑀉𑀧𑀝𑁆𑀞𑀸𑀧𑀦𑁂𑀦 𑀧𑀼𑀢𑁆𑀢𑀫𑀁𑀲𑀲𑀤𑀺𑀲𑀁 𑀓𑀢𑁆𑀯𑀸 𑀧𑀲𑁆𑀲𑀢𑀺. 𑀢𑀢𑁆𑀣 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀺𑀬𑀢𑀻𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀆𑀳𑀸𑀭𑁂 𑀲𑀸𑀧𑁂𑀓𑁆𑀔𑀁 𑀔𑁂𑀧𑁂𑀢𑀺.

𑀲𑀸 𑀕𑀸𑀯𑀻𑀢𑀺 ‘‘𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂 𑀕𑀸𑀯𑀻’’𑀢𑀺 (𑀲𑀁. 𑀦𑀺. 𑁨.𑁬𑁩) 𑀏𑀯𑀁 𑀲𑀼𑀢𑁆𑀢𑁂 𑀯𑀼𑀢𑁆𑀢𑀕𑀸𑀯𑀻. 𑀉𑀤𑁆𑀤𑀸𑀮𑁂𑀢𑁆𑀯𑀸𑀢𑀺 𑀉𑀧𑁆𑀧𑀸𑀝𑁂𑀢𑁆𑀯𑀸. 𑀦𑀺𑀲𑁆𑀲𑀸𑀬 𑀢𑀺𑀝𑁆𑀞𑀢𑀻𑀢𑀺 𑀧𑀝𑀺𑀘𑁆𑀘𑀧𑀘𑁆𑀘𑀬𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀤𑀺𑀯𑀲𑁂𑀦 𑀢𑀺𑀡𑁆𑀡𑀫𑁆𑀧𑀺 𑀯𑁂𑀤𑀬𑀺𑀢𑀸𑀦𑀁 𑀤𑀼𑀓𑁆𑀔𑀪𑀸𑀯𑀁 𑀲𑀦𑁆𑀥𑀸𑀬𑀸𑀳 ‘‘𑀯𑁂𑀤𑀬𑀺𑀢𑀤𑀼𑀓𑁆𑀔𑀲𑁆𑀲𑀸’’𑀢𑀺.

𑀲𑀸𑀥𑀼𑀲𑀫𑁆𑀫𑀢𑀸𑀧𑀺 𑀕𑀢𑀺 𑀯𑀺𑀧𑀭𑀺𑀡𑀸𑀫𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀯𑀲𑁂𑀦 𑀓𑀺𑀮𑁂𑀲𑀤𑀼𑀓𑁆𑀔𑀯𑀲𑁂𑀦 𑀘 𑀫𑀳𑀸𑀧𑀭𑀺𑀴𑀸𑀳𑀸𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀫𑀳𑀸𑀧𑀭𑀺𑀴𑀸𑀳𑀝𑁆𑀞𑁂𑀦 𑀢𑀬𑁄 𑀪𑀯𑀸’’𑀢𑀺. 𑀬𑀣𑀸 𑀉𑀧𑀓𑀟𑁆𑀠𑀓𑀸 𑀤𑁆𑀯𑁂 𑀧𑀼𑀭𑀺𑀲𑀸, 𑀏𑀯𑀁 𑀓𑀼𑀲𑀮𑀸𑀓𑀼𑀲𑀮𑀯𑀲𑁂𑀦 𑀤𑁆𑀯𑁂 𑀫𑀦𑁄𑀲𑀜𑁆𑀘𑁂𑀢𑀦𑀸. 𑀬𑀣𑀸 𑀫𑀦𑁄𑀲𑀜𑁆𑀘𑁂𑀢𑀦𑀸 𑀦 𑀧𑀯𑀢𑁆𑀢𑀢𑀺, 𑀢𑀣𑀸 𑀧𑀝𑀺𑀧𑀚𑁆𑀚𑀦𑁆𑀢𑁄 𑀢𑀢𑁆𑀣 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀺𑀬𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀢𑁆𑀢𑀺𑀲𑀢𑁂𑀦 𑀳𑀢𑀸 𑀏𑀯 𑀉𑀧𑀫𑀸 𑀲𑀢𑁆𑀢𑀺𑀲𑀢𑀳𑀢𑀽𑀧𑀫𑀸, 𑀢𑀲𑁆𑀲𑀁 𑀲𑀢𑁆𑀢𑀺𑀲𑀢𑀳𑀢𑀽𑀧𑀫𑀸𑀬𑀁. 𑀢𑀁 𑀲𑀢𑁆𑀢𑀺𑀲𑀢𑀁. 𑀅𑀲𑁆𑀲 𑀧𑀼𑀭𑀺𑀲𑀲𑁆𑀲. 𑀧𑀢𑀺𑀢𑁄𑀓𑀸𑀲𑁂𑀢𑀺 𑀧𑀼𑀭𑀺𑀫𑀲𑀢𑁆𑀢𑀻𑀳𑀺 𑀧𑀢𑀺𑀢𑀧𑁆𑀧𑀤𑁂𑀲𑁂. 𑀤𑀼𑀓𑁆𑀔𑀲𑁆𑀲 𑀧𑀫𑀸𑀡𑀁 𑀦𑀢𑁆𑀣𑀺 𑀅𑀦𑁂𑀓𑀲𑁆𑀲 𑀅𑀧𑀭𑀸𑀧𑀭𑀁 𑀉𑀧𑁆𑀧𑀚𑁆𑀚𑀦𑀢𑁄. 𑀔𑀦𑁆𑀥𑀚𑀦𑀦𑀦𑁆𑀢𑀺 𑀔𑀦𑁆𑀥𑀸𑀦𑀁 𑀅𑀧𑀭𑀸𑀧𑀭𑀼𑀧𑁆𑀧𑀸𑀤𑁄, 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀧𑀦 𑀧𑀝𑀺𑀲𑀦𑁆𑀥𑀺 𑀏𑀯. 𑀆𑀕𑀼𑀘𑀸𑀭𑀻 𑀧𑀼𑀭𑀺𑀲𑁄 𑀯𑀺𑀬 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀦𑀸𑀦𑀧𑁆𑀧𑀓𑀸𑀭𑀤𑀼𑀓𑁆𑀔𑀼𑀧𑁆𑀧𑀸𑀤𑀲𑀦𑁆𑀦𑀺𑀲𑁆𑀲𑀬𑀢𑁄, 𑀢𑁂𑀳𑀺 𑀘 𑀤𑀼𑀓𑁆𑀔𑁂𑀳𑀺 𑀉𑀧𑀕𑀦𑁆𑀢𑀩𑁆𑀩𑀢𑁄. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀫𑀼𑀔𑀪𑀸𑀯𑁂𑀦 𑀧𑀯𑀢𑁆𑀢𑀺𑀬𑀸 ‘‘𑀯𑀺𑀜𑁆𑀜𑀸𑀡𑀲𑁆𑀲 𑀤𑀼𑀓𑁆𑀔𑀼𑀧𑁆𑀧𑀸𑀤𑁄𑀢𑀺 𑀯𑀼𑀢𑁆𑀢𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺 (𑀥. 𑀧. 𑁧, 𑁨) 𑀬𑀣𑀸 𑀯𑀺𑀜𑁆𑀜𑀸𑀡𑀁 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀦 𑀧𑀯𑀢𑁆𑀢𑀢𑀺, 𑀏𑀯𑀁 𑀓𑀭𑀡𑀁 𑀢𑀢𑁆𑀣 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀁 𑀤𑀝𑁆𑀞𑀩𑁆𑀩𑀁.

𑀧𑀭𑀺𑀜𑁆𑀜𑀸𑀢𑀁 ¶ 𑀯𑀢𑁆𑀣𑀽𑀢𑀺 𑀤𑀼𑀓𑁆𑀔𑀲𑀘𑁆𑀘𑀫𑀸𑀳. 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀸𑀭𑀫𑁆𑀫𑀡𑁄 𑀭𑀸𑀕𑁄. 𑀧𑀭𑀺𑀜𑁆𑀜𑀸𑀢𑁄 𑀳𑁄𑀢𑀻𑀢𑀺 𑀧𑀭𑀺𑀘𑁆𑀙𑀺𑀚𑁆𑀚 𑀚𑀸𑀦𑀦𑁂𑀦 𑀲𑀫𑀢𑀺𑀓𑁆𑀓𑀦𑁆𑀢𑁄 𑀳𑁄𑀢𑀺. 𑀭𑀲𑀢𑀡𑁆𑀳𑀸𑀬 𑀳𑀺 𑀲𑀫𑁆𑀫𑀤𑁂𑀯 𑀯𑀺𑀕𑀢𑀸𑀬 𑀭𑀽𑀧𑀢𑀡𑁆𑀳𑀸𑀤𑀬𑁄𑀧𑀺 𑀯𑀺𑀕𑀢𑀸𑀬𑁂𑀯 𑀳𑁄𑀦𑁆𑀢𑀺. 𑀢𑀣𑀸 𑀘 𑀲𑀢𑀺 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀫𑁂𑀯 𑀳𑁄𑀢𑀺, 𑀏𑀯𑀁 𑀓𑀭𑀡𑀁 𑀢𑀢𑁆𑀣 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀁 𑀤𑀝𑁆𑀞𑀩𑁆𑀩𑀁. 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂 𑀳𑀺 𑀲𑀺𑀤𑁆𑀥𑁂 𑀧𑀳𑀸𑀦𑀸𑀪𑀺𑀲𑀫𑀬𑁄 𑀲𑀺𑀤𑁆𑀥𑁄 𑀏𑀯𑀸𑀢𑀺. 𑀧𑀳𑀻𑀦𑁂 𑀘 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑁂 𑀑𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀁 𑀮𑁂𑀲𑁄𑀧𑀺 𑀦𑀸𑀯𑀲𑀺𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀦𑀢𑁆𑀣𑀺 𑀢𑀁 𑀲𑀁𑀬𑁄𑀚𑀦’’𑀦𑁆𑀢𑀺𑀆𑀤𑀺. 𑀢𑁂𑀦 𑀓𑀩𑀴𑀻𑀓𑀸𑀭𑀸𑀳𑀸𑀭𑀧𑀭𑀺𑀜𑁆𑀜𑀸 𑀅𑀦𑀸𑀕𑀸𑀫𑀺𑀢𑀁 𑀧𑀸𑀧𑁂𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑁂𑀲𑀸𑀳𑀸𑀭𑀧𑀭𑀺𑀜𑁆𑀜𑀸 𑀧𑀦 𑀅𑀭𑀳𑀢𑁆𑀢𑀦𑀺𑀝𑁆𑀞𑀸 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀨𑀲𑁆𑀲𑁂 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀺𑀲𑁆𑀲𑁄 𑀢𑀡𑁆𑀳𑀸𑀢𑀺 𑀓𑀸𑀫𑀢𑀡𑁆𑀳𑀸 𑀭𑀽𑀧𑀢𑀡𑁆𑀳𑀸 𑀅𑀭𑀽𑀧𑀢𑀡𑁆𑀳𑀸𑀢𑀺 𑀇𑀫𑀸 𑀢𑀺𑀲𑁆𑀲𑁄 𑀢𑀡𑁆𑀳𑀸.

‘‘𑀧𑀼𑀭𑀺𑀫𑀢𑀡𑁆𑀳𑀸𑀲𑀫𑀼𑀤𑀬𑀸’’𑀢𑀺 ¶ 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀓𑀣’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀢𑀡𑁆𑀳𑀸𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑀸𑀢𑀺 𑀢𑀡𑁆𑀳𑀸𑀧𑀘𑁆𑀘𑀬𑀸 𑀦𑀺𑀩𑁆𑀩𑀢𑁆𑀢𑀸. 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀧𑀼𑀭𑀺𑀫𑀢𑀡𑁆𑀳𑀸𑀲𑀫𑀼𑀤𑀬𑀸 𑀆𑀳𑀸𑀭𑀸𑀦𑀁 𑀲𑀫𑀼𑀤𑀬𑀤𑀲𑁆𑀲𑀦𑁂𑀦𑁂𑀯 𑀧𑀯𑀢𑁆𑀢𑀺𑀓𑁆𑀔𑀡𑁂𑀧𑀺 𑀉𑀧𑀸𑀤𑀺𑀦𑁆𑀦𑀓𑀆𑀳𑀸𑀭𑀲𑀫𑀼𑀤𑀬𑁄 𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺 𑀢𑀁 𑀅𑀦𑀸𑀫𑀲𑀺𑀢𑁆𑀯𑀸 𑀅𑀦𑀼𑀧𑀸𑀤𑀺𑀦𑁆𑀦𑀓𑀸𑀦𑀁 𑀢𑀡𑁆𑀳𑀸𑀲𑀫𑀼𑀤𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀫𑀺𑀲𑁆𑀲𑀺𑀢𑁆𑀯𑀸 𑀓𑀣𑀺𑀢𑀸 𑀅𑀯𑀺𑀲𑁂𑀲𑀺𑀢𑀢𑁆𑀢𑀸. 𑀲𑀳𑀚𑀸𑀢𑀢𑀡𑁆𑀳𑀸𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑁄𑀢𑀺 𑀏𑀢𑁆𑀣 𑀲𑀳𑀚𑀸𑀢𑀕𑁆𑀕𑀳𑀡𑀁 𑀅𑀲𑀳𑀚𑀸𑀢𑀢𑀡𑁆𑀳𑀸𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑁄𑀧𑀺 𑀅𑀦𑀼𑀧𑀸𑀤𑀺𑀦𑁆𑀦𑀓𑀆𑀳𑀸𑀭𑁄 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀲𑁄 𑀧𑀦 𑀅𑀲𑀳𑀚𑀸𑀢𑀢𑀡𑁆𑀳𑀸𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑀢𑀸𑀲𑀸𑀫𑀜𑁆𑀜𑁂𑀦𑀧𑀺 𑀬𑀣𑀸𑀯𑀼𑀢𑁆𑀢𑀉𑀧𑀸𑀤𑀺𑀦𑁆𑀦𑀓𑀸𑀳𑀸𑀭𑁂𑀦 𑀲𑀁𑀲𑀬𑀁 𑀚𑀦𑁂𑀬𑁆𑀬𑀸𑀢𑀺 𑀦 𑀉𑀤𑁆𑀥𑀝𑁄, 𑀦 𑀘 𑀏𑀢𑀁 𑀓𑀸𑀭𑀡𑀁 ‘‘𑀭𑀸𑀕𑀁 𑀉𑀧𑀦𑀺𑀲𑁆𑀲𑀸𑀬 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀘𑀦𑀢𑁄, 𑀢𑀡𑁆𑀳𑁄𑀧𑀦𑀺𑀲𑁆𑀲𑀬𑀧𑀝𑀺𑀖𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀬 𑀘 𑀑𑀚𑀸𑀬 𑀯𑀲𑁂𑀦 𑀅𑀦𑀼𑀧𑀸𑀤𑀺𑀦𑁆𑀦𑀓𑀆𑀳𑀸𑀭𑀲𑁆𑀲 𑀮𑀩𑁆𑀪𑀦𑀢𑁄. 𑀓𑀣𑀁 𑀧𑀦 𑀢𑀡𑁆𑀳𑀸 𑀑𑀚𑀸𑀬 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄; 𑀦 𑀳𑀺 𑀧𑀝𑁆𑀞𑀸𑀦𑁂 𑀓𑀢𑁆𑀣𑀘𑀺 𑀭𑀽𑀧𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀯𑀼𑀢𑁆𑀢𑁄 𑀅𑀢𑁆𑀣𑀻𑀢𑀺. 𑀦𑀸𑀬𑀁 𑀯𑀺𑀭𑁄𑀥𑁄 ‘‘𑀬𑀲𑁆𑀫𑀺𑀁 𑀲𑀢𑀺 𑀬𑀁 𑀳𑁄𑀢𑀺, 𑀲𑁄 𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑁄’’𑀢𑀺 𑀲𑀼𑀢𑁆𑀢𑀦𑁆𑀢𑀦𑀬𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀢𑁆𑀣𑀲𑀫𑁆𑀪𑀯𑀢𑁄. 𑀢𑁂𑀦𑁂𑀯𑀸𑀳 ‘‘𑀇𑀫𑀺𑀲𑁆𑀲𑀸…𑀧𑁂… 𑀢𑀡𑁆𑀳𑀸𑀬 𑀦𑀺𑀭𑁄𑀥𑁂𑀦𑀸’’𑀢𑀺.

𑀓𑀸𑀭𑀡𑁂 𑀲𑀩𑁆𑀩𑀲𑁄 𑀦𑀺𑀭𑀼𑀤𑁆𑀥𑁂 𑀨𑀮𑀫𑁆𑀧𑀺 𑀲𑀩𑁆𑀩𑀲𑁄 𑀦𑀺𑀭𑀼𑀚𑁆𑀛𑀢𑀻𑀢𑀺 𑀆𑀳 ‘‘𑀆𑀳𑀸𑀭𑀦𑀺𑀭𑁄𑀥𑁄 𑀧𑀜𑁆𑀜𑀸𑀬𑀢𑀻’’𑀢𑀺. 𑀆𑀳𑀸𑀭𑀸𑀦𑀁 𑀤𑀼𑀓𑁆𑀔𑀲𑀘𑁆𑀘𑁂𑀓𑀤𑁂𑀲𑀢𑁆𑀢𑀸 𑀆𑀳𑀸𑀭𑀕𑁆𑀕𑀳𑀡𑀁 ¶ 𑀤𑀼𑀓𑁆𑀔𑀲𑀘𑁆𑀘𑀕𑁆𑀕𑀳𑀡𑀫𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀇𑀥 𑀘𑀢𑁆𑀢𑀸𑀭𑀺𑀧𑀺 𑀲𑀘𑁆𑀘𑀸𑀦𑀺 𑀲𑀭𑀽𑀧𑁂𑀦𑁂𑀯 𑀯𑀼𑀢𑁆𑀢𑀸𑀦𑀻’’𑀢𑀺. 𑀲𑀘𑁆𑀘𑀤𑁂𑀲𑀦𑀸 𑀤𑀼𑀓𑁆𑀔𑀸𑀤𑀻𑀦𑀁 𑀬𑀸𑀯𑀤𑁂𑀯 𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀺𑀪𑀸𑀯𑀲𑀦𑁆𑀤𑀲𑁆𑀲𑀦𑀢𑁆𑀣𑀸, 𑀢𑀲𑁆𑀫𑀸 𑀚𑀭𑀸𑀫𑀭𑀡𑀸𑀤𑀻𑀲𑀼 𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀺𑀪𑀸𑀯𑁄 𑀅𑀲𑀫𑁆𑀫𑁄𑀳𑀢𑁄 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀩𑁆𑀩𑀢𑁆𑀣 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁂𑀦 𑀲𑀘𑁆𑀘𑀸𑀦𑀺 𑀉𑀤𑁆𑀥𑀭𑀺𑀢𑀩𑁆𑀩𑀸𑀦𑀻’’𑀢𑀺 𑀆𑀳.

𑀆𑀳𑀸𑀭𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀘𑁆𑀘𑀯𑀸𑀭𑀯𑀡𑁆𑀡𑀦𑀸

𑁯𑁧. 𑀬𑁂𑀦 𑀬𑁂𑀦 𑀧𑀭𑀺𑀬𑀸𑀬𑁂𑀦 𑀩𑁆𑀬𑀸𑀓𑀭𑁄𑀢𑀻𑀢𑀺 𑀬𑁂𑀦 𑀬𑁂𑀦 𑀤𑀼𑀓𑁆𑀔𑀸𑀤𑀺𑀚𑀭𑀸𑀫𑀭𑀡𑀸𑀤𑀺𑀧𑀭𑀺𑀬𑀸𑀬𑁂𑀦 𑀅𑀭𑀺𑀬𑀲𑀘𑁆𑀘𑀸𑀦𑀺 𑀲𑀗𑁆𑀔𑁂𑀧𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀓𑀣𑁂𑀢𑀺. 𑀤𑀼𑀓𑁆𑀔𑀦𑁆𑀢𑀺 𑀤𑀼𑀓𑁆𑀔𑀲𑀘𑁆𑀘𑀁 𑀤𑀼𑀓𑁆𑀔𑀁, 𑀦 𑀤𑀼𑀓𑁆𑀔𑀫𑀢𑁆𑀢𑀁.

𑀲𑀘𑁆𑀘𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀚𑀭𑀸𑀫𑀭𑀡𑀯𑀸𑀭𑀯𑀡𑁆𑀡𑀦𑀸

𑁯𑁨. 𑀢𑁂𑀲𑀁 ¶ 𑀢𑁂𑀲𑀦𑁆𑀢𑀺 𑀩𑁆𑀬𑀸𑀧𑀦𑀺𑀘𑁆𑀙𑀸𑀯𑀲𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀢𑀲𑁆𑀫𑀸 𑀬𑀣𑀸 ‘‘𑀕𑀸𑀫𑁄 𑀕𑀸𑀫𑁄 𑀭𑀫𑀡𑀻𑀬𑁄’’𑀢𑀺 𑀯𑀼𑀢𑁆𑀢𑁂 𑀭𑀫𑀡𑀻𑀬𑀢𑀸𑀬 𑀢𑀸𑀤𑀺𑀲𑀸 𑀲𑀩𑁆𑀩𑁂𑀧𑀺 𑀕𑀸𑀫𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺, 𑀏𑀯𑀁 ‘‘𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀚𑀸𑀢𑀻’’𑀢𑀺 𑀯𑀼𑀢𑁆𑀢𑁂 𑀚𑀸𑀢𑀺𑀲𑀗𑁆𑀔𑀸𑀢𑀯𑀺𑀓𑀸𑀭𑀯𑀲𑁂𑀦 𑀲𑀩𑁆𑀩𑁂𑀧𑀺 𑀲𑀢𑁆𑀢𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀦𑀸𑀳 ‘‘𑀲𑀗𑁆𑀔𑁂𑀧𑀢𑁄 𑀅𑀦𑁂𑀓𑁂𑀲𑀁 𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀦𑀺𑀤𑁆𑀤𑁂𑀲𑁄’’𑀢𑀺.

𑀕𑀢𑀺𑀚𑀸𑀢𑀺𑀯𑀲𑁂𑀦𑀸𑀢𑀺 (𑀲𑀁. 𑀦𑀺. 𑀝𑀻. 𑁨.𑁧.𑁨) 𑀧𑀜𑁆𑀘𑀕𑀢𑀺𑀯𑀲𑁂𑀦, 𑀢𑀢𑁆𑀣𑀸𑀧𑀺 𑀏𑀓𑁂𑀓𑀸𑀬 𑀕𑀢𑀺𑀬𑀸 𑀔𑀢𑁆𑀢𑀺𑀬𑀸𑀤𑀺𑀪𑀼𑀫𑁆𑀫𑀤𑁂𑀯𑀸𑀤𑀺𑀳𑀢𑁆𑀣𑀺𑀆𑀤𑀺𑀚𑀸𑀢𑀺𑀯𑀲𑁂𑀦 𑀘. 𑀦𑀺𑀓𑀺𑀬𑁆𑀬𑀦𑁆𑀢𑀺 𑀲𑀢𑁆𑀢𑀸 𑀏𑀢𑁆𑀣, 𑀏𑀢𑁂𑀦 𑀯𑀸𑀢𑀺 𑀦𑀺𑀓𑀸𑀬𑁄, 𑀕𑁄𑀢𑁆𑀢𑀘𑀭𑀡𑀸𑀤𑀺𑀯𑀺𑀪𑀸𑀕𑁄. 𑀚𑀭𑀸𑀬 𑀲𑀪𑀸𑀯𑁄 𑀦𑀸𑀫 𑀯𑀬𑁄𑀳𑀸𑀦𑀺, 𑀢𑀲𑁆𑀫𑀸 𑀚𑀭𑀸𑀢𑀺 𑀯𑀬𑁄𑀳𑀸𑀦𑀺𑀲𑀗𑁆𑀔𑀸𑀢𑀲𑁆𑀲 𑀲𑀪𑀸𑀯𑀲𑁆𑀲 𑀦𑀺𑀤𑁆𑀤𑁂𑀲𑁄, 𑀧𑀸𑀓𑀝𑀚𑀭𑀸𑀯𑀲𑁂𑀦 𑀦𑀺𑀤𑁆𑀤𑁂𑀲𑁄 𑀔𑀡𑁆𑀟𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀳𑀡𑀢𑁄. 𑀚𑀻𑀭𑀡𑀫𑁂𑀯 𑀚𑀻𑀭𑀡𑀢𑀸, 𑀚𑀻𑀭𑀦𑁆𑀢𑀲𑁆𑀲 𑀯𑀸 𑀆𑀓𑀸𑀭𑁄 𑀢𑀸-𑀲𑀤𑁆𑀤𑁂𑀦 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀅𑀬𑀁 𑀆𑀓𑀸𑀭𑀦𑀺𑀤𑁆𑀤𑁂𑀲𑁄’’𑀢𑀺. 𑀤𑀦𑁆𑀢𑀸𑀤𑀻𑀦𑀁 𑀯𑀲𑁂𑀦 𑀔𑀡𑁆𑀟𑀁 𑀚𑀸𑀢𑀁 𑀏𑀢𑀲𑁆𑀲𑀸𑀢𑀺 ¶ 𑀔𑀡𑁆𑀟𑀺𑀢𑁄, 𑀧𑀼𑀕𑁆𑀕𑀮𑁄. 𑀢𑀲𑁆𑀲 𑀪𑀸𑀯𑁄 𑀔𑀡𑁆𑀟𑀺𑀘𑁆𑀘𑀁. 𑀧𑀮𑀺𑀢𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀧𑀮𑀺𑀢𑁄, 𑀢𑀲𑁆𑀲 𑀪𑀸𑀯𑁄 𑀧𑀸𑀮𑀺𑀘𑁆𑀘𑀁. 𑀯𑀮𑀺 𑀢𑀘𑁄 𑀏𑀢𑀲𑁆𑀲𑀸𑀢𑀺 𑀯𑀮𑀺𑀢𑁆𑀢𑀘𑁄, 𑀢𑀲𑁆𑀲 𑀪𑀸𑀯𑁄 𑀯𑀮𑀺𑀢𑁆𑀢𑀘𑀢𑀸. 𑀇𑀫𑁂 𑀔𑀡𑁆𑀟𑀺𑀘𑁆𑀘𑀸𑀤𑀬𑁄 𑀚𑀭𑀸. 𑀯𑀺𑀓𑀸𑀭𑀸𑀦𑀁 𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀯𑀺𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦. 𑀯𑀸𑀢𑀲𑁆𑀲𑀸𑀢𑀺 𑀫𑀳𑀢𑁄 𑀯𑀸𑀢𑀓𑁆𑀔𑀦𑁆𑀥𑀲𑁆𑀲. 𑀔𑀡𑁆𑀟𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀢𑀫𑀕𑁆𑀕𑁄 𑀧𑀸𑀓𑀝𑁄, 𑀢𑀲𑁆𑀫𑀸 𑀔𑀡𑁆𑀟𑀺𑀘𑁆𑀘𑀸𑀤𑀺𑀕𑁆𑀕𑀳𑀡𑀁 𑀚𑀭𑀸𑀬 𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀦 𑀘 𑀔𑀡𑁆𑀟𑀺𑀘𑁆𑀘𑀸𑀤𑀻𑀦𑁂𑀯 𑀚𑀭𑀸𑀢𑀺 𑀓𑀮𑀮𑀓𑀸𑀮𑀢𑁄 𑀧𑀪𑀼𑀢𑀺 𑀧𑀼𑀭𑀺𑀫𑀭𑀽𑀧𑀸𑀦𑀁 𑀚𑀭𑀸𑀧𑀢𑁆𑀢𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀧𑀘𑁆𑀙𑀺𑀫𑀭𑀽𑀧𑀸𑀦𑀺 𑀧𑀭𑀺𑀧𑀓𑁆𑀓𑀭𑀽𑀧𑀸𑀦𑀼𑀭𑀽𑀧𑀸𑀦𑀺 𑀧𑀭𑀺𑀡𑀢𑀧𑀭𑀺𑀡𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀦𑀼𑀓𑁆𑀓𑀫𑁂𑀦 𑀲𑀼𑀧𑀭𑀺𑀡𑀢𑀭𑀽𑀧𑀸𑀦𑀁 𑀧𑀭𑀺𑀧𑀸𑀓𑀓𑀸𑀮𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀔𑀡𑁆𑀟𑀺𑀘𑁆𑀘𑀸𑀤𑀺𑀲𑀪𑀸𑀯𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀸𑀦𑀺 𑀉𑀤𑀓𑀸𑀤𑀺𑀫𑀕𑁆𑀕𑁂𑀲𑀼 𑀢𑀺𑀡𑀭𑀼𑀓𑁆𑀔𑀲𑀁𑀪𑀕𑁆𑀕𑀢𑀸𑀤𑀬𑁄 𑀯𑀺𑀬 𑀧𑀭𑀺𑀧𑀸𑀓𑀕𑀢𑀫𑀕𑁆𑀕𑀲𑀗𑁆𑀔𑀸𑀢𑁂𑀲𑀼 𑀧𑀭𑀺𑀧𑀓𑁆𑀓𑀭𑀽𑀧𑁂𑀲𑀼 𑀉𑀧𑁆𑀧𑀦𑁆𑀦𑀸𑀦𑀺 ‘‘𑀚𑀭𑀸𑀬 𑀕𑀢𑁄 𑀫𑀕𑁆𑀕𑁄’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀸𑀦𑀺, 𑀦 𑀚𑀭𑀸𑀢𑀺.

𑀧𑀓𑀢𑀺𑀬𑀸𑀢𑀺 𑀨𑀮𑀯𑀺𑀧𑀘𑁆𑀘𑀦𑀧𑀓𑀢𑀺𑀬𑀸, 𑀚𑀭𑀸𑀬 𑀯𑀸 𑀧𑀸𑀧𑀼𑀡𑀺𑀢𑀩𑁆𑀩𑀁 𑀨𑀮𑀫𑁂𑀯𑀧𑀓𑀢𑀺, 𑀢𑀸𑀬 𑀚𑀭𑀸 𑀤𑀻𑀧𑀺𑀢𑀸. 𑀲𑀼𑀧𑁆𑀧𑀲𑀦𑁆𑀦𑀸𑀦𑀻𑀢𑀺 𑀲𑀼𑀝𑁆𑀞𑀼 𑀧𑀲𑀦𑁆𑀦𑀸𑀦𑀺. 𑀢𑀫𑁂𑀯 𑀲𑀼𑀧𑁆𑀧𑀲𑀦𑁆𑀦𑀢𑀁 𑀓𑀺𑀘𑁆𑀘𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀔𑀼𑀫𑀫𑁆𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀺𑀓𑁆𑀔𑀯𑀺𑀲𑀤𑀢𑀸 𑀳𑀺 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀼𑀧𑁆𑀧𑀲𑀦𑁆𑀦𑀢𑀸. 𑀆𑀮𑀼𑀴𑀺𑀢𑀸𑀦𑀻𑀢𑀺 𑀆𑀓𑀼𑀮𑀸𑀦𑀺. 𑀅𑀯𑀺𑀲𑀤𑀸𑀦𑀻𑀢𑀺 𑀅𑀩𑁆𑀬𑀢𑁆𑀢𑀸𑀦𑀺.

𑀓𑀸𑀫𑀁 𑀭𑀽𑀧𑀥𑀫𑁆𑀫𑁂𑀲𑀼𑀧𑀺 𑀔𑀡𑀺𑀓𑀚𑀭𑀸 𑀤𑀼𑀭𑀼𑀧𑀮𑀓𑁆𑀔𑀺𑀢𑀸 𑀧𑀝𑀺𑀘𑁆𑀙𑀦𑁆𑀦𑀸𑀯, 𑀲𑀸 𑀧𑀦 𑀬𑀲𑁆𑀫𑀸 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀧𑀭𑀺𑀩𑁆𑀬𑀢𑁆𑀢𑀸𑀯 𑀳𑁄𑀢𑀻𑀢𑀺 ‘‘𑀧𑀸𑀓𑀝𑀚𑀭𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀸. 𑀅𑀯𑀻𑀘𑀺 𑀦𑀺𑀭𑀦𑁆𑀢𑀭𑀸 𑀚𑀭𑀸 ¶ 𑀅𑀯𑀻𑀘𑀺𑀚𑀭𑀸 𑀲𑀢𑀺 𑀲𑀦𑁆𑀢𑀸𑀦𑁂 𑀲𑀢𑁆𑀢𑀸𑀦𑀁 𑀅𑀦𑀼𑀧𑁆𑀧𑀩𑀦𑁆𑀥𑀢𑁄. 𑀢𑀢𑁄 𑀅𑀜𑁆𑀜𑁂𑀲𑀽𑀢𑀺 𑀫𑀦𑁆𑀤𑀤𑀲𑀓𑀸𑀤𑀻𑀲𑀼 𑀧𑀼𑀩𑁆𑀩𑀤𑀲𑀓𑀸𑀤𑀺𑀧𑀭𑀺𑀘𑁆𑀙𑁂𑀤𑀢𑁄 𑀅𑀜𑁆𑀜𑁂𑀲𑀼 𑀬𑀣𑀸𑀯𑀼𑀢𑁆𑀢𑁂𑀲𑀼. 𑀅𑀦𑁆𑀢𑀭𑀦𑁆𑀢𑀭𑀸𑀢𑀺 𑀢𑁂𑀲𑀼 𑀏𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀲𑀼 𑀧𑀼𑀭𑀺𑀫𑀤𑀲𑀓𑀸𑀤𑀺𑀢𑁄 𑀧𑀘𑁆𑀙𑀺𑀫𑀤𑀲𑀓𑀸𑀤𑀻𑀦𑀁 𑀅𑀦𑁆𑀢𑀭𑀦𑁆𑀢𑀭𑀸. 𑀯𑀡𑁆𑀡𑀯𑀺𑀲𑁂𑀲𑀸𑀤𑀻𑀦𑀦𑁆𑀢𑀺 𑀯𑀡𑁆𑀡𑀯𑀺𑀲𑁂𑀲𑀲𑀡𑁆𑀞𑀸𑀦𑀯𑀺𑀲𑁂𑀲𑀲𑀫𑁆𑀨𑀲𑁆𑀲𑀯𑀺𑀲𑁂𑀲𑀸𑀤𑀻𑀦𑀁.

𑀯𑀘𑀦𑀓𑀯𑀲𑁂𑀦𑀸𑀢𑀺 𑀓-𑀓𑀸𑀭𑁂𑀦 𑀳𑀺 𑀧𑀤𑀁 𑀯𑀟𑁆𑀠𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀘𑀯𑀦𑀁 𑀘𑀼𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀧𑀦 𑀏𑀓𑀘𑀢𑀼𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀲𑀼 𑀘𑀼𑀢𑀺𑀬𑀸 𑀅𑀯𑀺𑀲𑁂𑀲𑀢𑁄 𑀕𑀳𑀡𑀦𑁆𑀢𑀺 𑀆𑀳 ‘‘𑀏𑀓𑀘𑀢𑀼𑀧𑀜𑁆𑀘𑀓𑁆𑀔𑀦𑁆𑀥𑀸𑀦𑀁 𑀲𑀸𑀫𑀜𑁆𑀜𑀯𑀘𑀦’’𑀦𑁆𑀢𑀺. 𑀘𑀯𑀦𑀓𑀯𑀲𑁂𑀦𑀸𑀢𑀺 𑀯𑀸 𑀘𑀯𑀦𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀘𑀯𑀦𑀫𑁂𑀯 𑀘𑀯𑀦𑀢𑀸𑀢𑀺 𑀆𑀳 ‘‘𑀪𑀸𑀯𑀯𑀘𑀦𑁂𑀦𑀸’’𑀢𑀺. 𑀮𑀓𑁆𑀔𑀡𑀦𑀺𑀤𑀲𑁆𑀲𑀦𑀦𑁆𑀢𑀺 𑀯𑀬𑀲𑀗𑁆𑀔𑀸𑀢𑀲𑁆𑀲 𑀮𑀓𑁆𑀔𑀡𑀲𑁆𑀲 𑀦𑀺𑀤𑀲𑁆𑀲𑀦𑀁. 𑀘𑀯𑀦𑁆𑀢𑀲𑁆𑀲 𑀯𑀸 𑀆𑀓𑀸𑀭𑁄 𑀢𑀸-𑀲𑀤𑁆𑀤𑁂𑀦 𑀯𑀼𑀢𑁆𑀢𑁄 ¶ ‘‘𑀘𑀯𑀦𑀢𑀸’’𑀢𑀺. 𑀪𑀺𑀚𑁆𑀚𑀦𑀁 𑀪𑁂𑀤𑁄𑀢𑀺 𑀯𑀼𑀢𑁆𑀢𑀁 ‘‘𑀘𑀼𑀢𑀺𑀓𑁆𑀔𑀦𑁆𑀥𑀸𑀦𑀁 𑀪𑀗𑁆𑀕𑀼𑀧𑁆𑀧𑀢𑁆𑀢𑀺𑀧𑀭𑀺𑀤𑀻𑀧𑀦’’𑀦𑁆𑀢𑀺. 𑀬𑀣𑀸 𑀪𑀺𑀦𑁆𑀦𑀲𑁆𑀲 𑀖𑀝𑀲𑁆𑀲 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀖𑀦𑀖𑀝𑀪𑀸𑀯𑁂𑀦 𑀞𑀸𑀦𑀁 𑀦𑀢𑁆𑀣𑀺, 𑀏𑀯𑀁 𑀪𑀺𑀦𑁆𑀦𑀸𑀦𑀁 𑀔𑀦𑁆𑀥𑀸𑀦𑀦𑁆𑀢𑀺 𑀘𑀯𑀦𑀁 𑀅𑀦𑁆𑀢𑀭𑀳𑀺𑀢𑀁 𑀦𑀸𑀫𑀸𑀢𑀺 𑀆𑀳 ‘‘𑀅𑀦𑁆𑀢𑀭𑀥𑀸𑀦𑀦𑁆𑀢𑀺…𑀧𑁂… 𑀧𑀭𑀺𑀤𑀻𑀧𑀦’’𑀦𑁆𑀢𑀺. 𑀬𑁄 𑀫𑀘𑁆𑀘𑀽𑀢𑀺 𑀯𑀼𑀘𑁆𑀘𑀢𑀺 𑀪𑁂𑀤𑁄, 𑀬𑀜𑁆𑀘 𑀫𑀭𑀡𑀁 𑀧𑀸𑀡𑀘𑀸𑀕𑁄, 𑀢𑀤𑀼𑀪𑀬𑀁 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀫𑀘𑁆𑀘𑀼 𑀫𑀭𑀡’’𑀦𑁆𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀓𑀸𑀮𑀲𑁆𑀲 𑀅𑀦𑁆𑀢𑀓𑀲𑁆𑀲 𑀓𑀺𑀭𑀺𑀬𑀸𑀢𑀺 𑀬𑀸 𑀮𑁄𑀓𑁂 𑀯𑀼𑀘𑁆𑀘𑀢𑀺, 𑀲𑀸 𑀘𑀼𑀢𑀺, 𑀫𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀘𑀯𑀦𑀓𑀸𑀮𑁄 𑀏𑀯 𑀯𑀸 𑀅𑀦𑀢𑀺𑀓𑁆𑀓𑀫𑀦𑀻𑀬𑀢𑁆𑀢𑀸 𑀯𑀺𑀲𑁂𑀲𑁂𑀦 𑀓𑀸𑀮𑁄𑀢𑀺 𑀯𑀼𑀢𑁆𑀢𑁄𑀢𑀺 𑀢𑀲𑁆𑀲 𑀓𑀺𑀭𑀺𑀬𑀸 𑀅𑀢𑁆𑀣𑀢𑁄 𑀘𑀼𑀢𑀺𑀓𑁆𑀔𑀦𑁆𑀥𑀸𑀦𑀁 𑀪𑁂𑀤𑀧𑁆𑀧𑀢𑁆𑀢𑀺𑀬𑁂𑀯. ‘‘𑀘𑀼𑀢𑀺 𑀘𑀯𑀦𑀢𑀸’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀯𑁄𑀳𑀸𑀭𑀫𑀺𑀲𑁆𑀲𑀓𑁂𑀦 𑀦𑀺𑀤𑁆𑀤𑀺𑀝𑁆𑀞𑀁.

𑀇𑀤𑀸𑀦𑀺 𑀦𑀺𑀩𑁆𑀩𑀢𑁆𑀢𑀺𑀢𑀧𑀭𑀫𑀢𑁆𑀣𑀦𑀬𑁂𑀦𑁂𑀯 𑀦𑀺𑀤𑁆𑀤𑁂𑀲𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀫𑀢𑁆𑀣𑁂𑀦 𑀤𑀻𑀧𑁂𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀘𑀯𑀦𑀓𑀯𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀳𑀺 𑀧𑀼𑀕𑁆𑀕𑀮𑀯𑀲𑁂𑀦 𑀘 𑀯𑁄𑀳𑀸𑀭𑀸𑀥𑀺𑀝𑁆𑀞𑀸𑀦𑀸 𑀲𑀁𑀯𑀡𑁆𑀡𑀦𑀸 𑀓𑀢𑀸. 𑀦 𑀓𑀺𑀜𑁆𑀘𑀺 𑀓𑀴𑁂𑀯𑀭𑀁 𑀦𑀺𑀓𑁆𑀔𑀺𑀧𑀓𑀺 𑀑𑀧𑀧𑀸𑀢𑀺𑀓𑀸𑀦𑀁 𑀘𑀼𑀢𑀺𑀓𑁆𑀔𑀦𑁆𑀥𑀸𑀦𑀁 𑀅𑀦𑁆𑀢𑀭𑀥𑀸𑀦𑀫𑁂𑀯𑀳𑁄𑀢𑀺, 𑀢𑀢𑁄 𑀧𑀭𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑀦𑁆𑀢𑀢𑀺 𑀦 𑀧𑀯𑀢𑁆𑀢𑀢𑀺. ‘‘𑀚𑀸𑀢𑀺𑀲𑀫𑀼𑀤𑀬𑀸’’𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 ‘‘𑀢𑀡𑁆𑀳𑀸𑀲𑀫𑀼𑀤𑀬𑀸’’𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀦𑀬𑀦𑁂𑀯 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀦 𑀯𑀼𑀢𑁆𑀢𑀁.

𑀚𑀭𑀸𑀫𑀭𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀚𑀸𑀢𑀺𑀯𑀸𑀭𑀯𑀡𑁆𑀡𑀦𑀸

𑁯𑁩. 𑀚𑀸𑀬𑀦𑀝𑁆𑀞𑁂𑀦𑀸𑀢𑀺𑀆𑀤𑀺 𑀆𑀬𑀢𑀦𑀯𑀲𑁂𑀦 𑀬𑁄𑀦𑀺𑀯𑀲𑁂𑀦 𑀘 𑀤𑁆𑀯𑀻𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀩𑁆𑀩𑀲𑀢𑁆𑀢𑁂 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀚𑀸𑀢𑀺𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 (𑀯𑀺𑀪. 𑀅𑀝𑁆𑀞. 𑁧𑁯𑁧) 𑀧𑀦 ‘‘𑀚𑀸𑀬𑀫𑀸𑀦𑀓𑀯𑀲𑁂𑀦 ¶ 𑀚𑀸𑀢𑀺, 𑀲𑀜𑁆𑀚𑀸𑀬𑀦𑀯𑀲𑁂𑀦 𑀲𑀜𑁆𑀚𑀸𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀢𑁆𑀣 𑀏𑀓𑁂𑀓𑁂𑀦𑁂𑀯 𑀧𑀤𑁂𑀦 𑀲𑀩𑁆𑀩𑀲𑀢𑁆𑀢𑁂 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀚𑀸𑀢𑀺𑀁 𑀤𑀲𑁆𑀲𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀫𑁆𑀧𑀼𑀡𑁆𑀡𑀸 𑀚𑀸𑀢𑀺 𑀲𑀜𑁆𑀚𑀸𑀢𑀻𑀢𑀺 𑀓𑀢𑁆𑀯𑀸 ‘‘𑀲𑀸 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀯𑀲𑁂𑀦 𑀬𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀦𑁂𑀯 𑀓𑁂𑀯𑀮𑀁 𑀚𑀸𑀢𑀺𑀲𑀤𑁆𑀤𑁂𑀦 𑀯𑀼𑀢𑁆𑀢𑀸𑀬 𑀚𑀸𑀢𑀺𑀬𑀸 𑀅𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀢𑀸 𑀤𑀝𑁆𑀞𑀩𑁆𑀩𑀸. 𑀅𑀪𑀺𑀩𑁆𑀬𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀺 𑀅𑀪𑀺𑀦𑀺𑀩𑁆𑀩𑀢𑁆𑀢𑀺, 𑀧𑀸𑀓𑀝𑀸 𑀦𑀺𑀩𑁆𑀩𑀢𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁…𑀧𑁂… 𑀅𑀪𑀺𑀦𑀺𑀩𑁆𑀩𑀢𑁆𑀢𑀻’’𑀢𑀺 𑀲𑀢𑁆𑀢𑀯𑀲𑁂𑀦 𑀧𑀯𑀢𑁆𑀢𑀢𑁆𑀢𑀸 𑀯𑁄𑀳𑀸𑀭𑀤𑁂𑀲𑀦𑀸.

𑀢𑀢𑁆𑀭 ¶ 𑀢𑀢𑁆𑀭𑀸𑀢𑀺 𑀏𑀢𑁆𑀣 𑀘𑀢𑀼𑀯𑁄𑀓𑀸𑀭𑀪𑀯𑁂 𑀤𑁆𑀯𑀺𑀦𑁆𑀦𑀁, 𑀏𑀓𑀯𑁄𑀓𑀸𑀭𑀪𑀯𑁂 𑀤𑁆𑀯𑀺𑀦𑁆𑀦𑀁, 𑀲𑁂𑀲𑀭𑀽𑀧𑀥𑀸𑀢𑀼𑀬𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀧𑀜𑁆𑀘𑀦𑁆𑀦𑀁, 𑀓𑀸𑀫𑀥𑀸𑀢𑀼𑀬𑀁 𑀯𑀺𑀓𑀮𑀸𑀯𑀺𑀓𑀮𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀲𑀢𑁆𑀢𑀦𑁆𑀦𑀁 𑀦𑀯𑀦𑁆𑀦𑀁 𑀤𑀲𑀦𑁆𑀦𑀁, 𑀧𑀼𑀦 𑀤𑀲𑀦𑁆𑀦𑀁, 𑀏𑀓𑀸𑀤𑀲𑀦𑁆𑀦𑀜𑁆𑀘 𑀆𑀬𑀢𑀦𑀸𑀦𑀁 𑀯𑀲𑁂𑀦 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀤𑀺𑀧𑀺 𑀘𑀼𑀢𑀺𑀓𑁆𑀔𑀦𑁆𑀥𑀸 𑀅𑀦𑀦𑁆𑀢𑀭𑀸𑀦𑀁 𑀧𑀝𑀺𑀲𑀦𑁆𑀥𑀺𑀓𑀥𑀫𑁆𑀫𑀸𑀦𑀁 𑀅𑀦𑀦𑁆𑀢𑀭𑀸𑀤𑀺𑀦𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀬𑁂 𑀧𑀦 𑀲𑀫𑀼𑀤𑀬𑀸 𑀅𑀚𑀦𑀓𑀸, 𑀢𑁂 𑀏𑀢𑁆𑀣 𑀉𑀧𑀧𑀢𑁆𑀢𑀺𑀪𑀯𑁄𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀚𑀦𑀓𑁄 𑀏𑀯 𑀪𑀯𑁄𑀢𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀚𑀸𑀢𑀺𑀬𑀸 𑀧𑀘𑁆𑀘𑀬𑀪𑀽𑀢𑁄 𑀓𑀫𑁆𑀫𑀪𑀯𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀆𑀳.

𑀚𑀸𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀯𑀯𑀸𑀭𑀯𑀡𑁆𑀡𑀦𑀸

𑁯𑁪. 𑀪𑀸𑀯𑀦𑀪𑀯𑀦𑀝𑁆𑀞𑁂𑀦 𑀪𑀯𑁄 𑀤𑀼𑀯𑀺𑀥𑁄. 𑀢𑀢𑁆𑀣 𑀓𑀫𑁆𑀫𑀪𑀯𑁄 ‘‘𑀪𑀯𑀢𑀺 𑀏𑀢𑀲𑁆𑀫𑀸 𑀉𑀧𑀧𑀢𑁆𑀢𑀺𑀪𑀯𑁄’’𑀢𑀺 𑀪𑀸𑀯𑀦𑀝𑁆𑀞𑁂𑀦 𑀪𑀯𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀉𑀧𑀧𑀢𑁆𑀢𑀺𑀪𑀯𑀁 ‘‘𑀪𑀯𑀢𑀻𑀢𑀺 𑀪𑀯𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀓𑀸𑀭𑀡𑀢𑁆𑀢𑀸 𑀓𑀫𑁆𑀫𑀁 𑀨𑀮𑀽𑀧𑀘𑀸𑀭𑁂𑀦 𑀪𑀯𑁄𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄, 𑀉𑀪𑀬𑀢𑁆𑀣𑀸𑀧𑀺 𑀉𑀧𑀧𑀢𑁆𑀢𑀺𑀪𑀯𑀳𑁂𑀢𑀼𑀪𑀸𑀯𑀦𑁂𑀢𑁆𑀣 𑀓𑀫𑁆𑀫𑀲𑁆𑀲 𑀓𑀫𑁆𑀫𑀪𑀯𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀲𑀩𑁆𑀩𑀣𑀸𑀧𑀻𑀢𑀺 𑀪𑀸𑀯𑀦𑀪𑀯𑀦𑀓𑀼𑀲𑀮𑀸𑀓𑀼𑀲𑀮𑀉𑀧𑀧𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀪𑀯𑀳𑀻𑀦𑀧𑀡𑀻𑀢𑀸𑀤𑀺𑀦𑀸 𑀲𑀩𑁆𑀩𑀧𑁆𑀧𑀓𑀸𑀭𑁂𑀦𑀧𑀺. 𑀓𑀸𑀫𑀪𑀯𑁄𑀢𑀺 𑀯𑀼𑀢𑁆𑀢𑀁 𑀓𑀸𑀫𑀢𑀡𑁆𑀳𑀸𑀳𑁂𑀢𑀼𑀓𑀢𑁄 𑀓𑀸𑀫𑀢𑀡𑁆𑀳𑀸𑀬 𑀆𑀭𑀫𑁆𑀫𑀡𑀪𑀸𑀯𑀢𑁄 𑀘. 𑀭𑀽𑀧𑀪𑀯𑀽𑀧𑀕𑀓𑀫𑁆𑀫𑀁 𑀭𑀽𑀧𑀪𑀯𑁄, 𑀢𑀣𑀸 𑀅𑀭𑀽𑀧𑀪𑀯𑀽𑀧𑀕𑀓𑀫𑁆𑀫𑀁 𑀅𑀭𑀽𑀧𑀪𑀯𑁄, 𑀢𑀁𑀢𑀁𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑀸 𑀭𑀽𑀧𑀸𑀭𑀽𑀧𑀼𑀧𑀢𑁆𑀢𑀺𑀪𑀯𑀸, 𑀭𑀽𑀧𑀸𑀭𑀽𑀧𑀪𑀯𑀪𑀸𑀯𑁄 𑀧𑀦 𑀢𑁂𑀲𑀁 ‘‘𑀓𑀸𑀫𑀪𑀯𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀪𑀯𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀸𑀤𑀸𑀦𑀯𑀸𑀭𑀯𑀡𑁆𑀡𑀦𑀸

𑁯𑁫. 𑀉𑀧𑀸𑀤𑀸𑀦𑀦𑁆𑀢𑀺 ¶ 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀉𑀧𑀸𑀤𑀸𑀦𑀁. 𑀬𑀣𑀸 𑀳𑀺 𑀓𑀸𑀫𑀲𑁆𑀲𑀸𑀤𑀯𑀲𑁂𑀦, 𑀪𑀯𑀲𑁆𑀲𑀸𑀤𑀯𑀲𑁂𑀦 𑀯𑀸 𑀢𑀁𑀢𑀁𑀲𑀼𑀕𑀢𑀺𑀪𑀯𑀽𑀧𑀕𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀓𑀸𑀫𑀼𑀧𑀸𑀤𑀸𑀦𑀁, 𑀏𑀯𑀁 𑀉𑀘𑁆𑀙𑁂𑀤𑀸𑀤𑀺𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀯𑀲𑁂𑀦𑀸𑀢𑀺 𑀘𑀢𑁆𑀢𑀸𑀭𑀺𑀧𑀺 𑀉𑀧𑀸𑀤𑀸𑀦𑀸𑀦𑀺 𑀬𑀣𑀸𑀭𑀳𑀁 𑀢𑀲𑁆𑀲 𑀢𑀲𑁆𑀲 𑀓𑀼𑀲𑀮𑀓𑀫𑁆𑀫𑀪𑀯𑀲𑁆𑀲 𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑁂𑀯 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀓𑀼𑀲𑀮𑀓𑀫𑁆𑀫𑀪𑀯𑀲𑁆𑀲 𑀅𑀲𑀳𑀚𑀸𑀢𑀲𑁆𑀲 𑀅𑀦𑀦𑁆𑀢𑀭𑀲𑁆𑀲 𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑀧𑀺 𑀆𑀭𑀫𑁆𑀫𑀡𑀯𑀲𑁂𑀦𑀧𑀺 ¶ . 𑀲𑀳𑀚𑀸𑀢𑀲𑁆𑀲 𑀓𑀸𑀫𑀼𑀧𑀸𑀤𑀸𑀦𑀁 𑀲𑀳𑀚𑀸𑀢-𑀅𑀜𑁆𑀜𑀫𑀜𑁆𑀜-𑀦𑀺𑀲𑁆𑀲𑀬-𑀲𑀫𑁆𑀧𑀬𑀼𑀢𑁆𑀢-𑀅𑀢𑁆𑀣𑀺-𑀅𑀯𑀺𑀕𑀢-𑀳𑁂𑀢𑀼-𑀯𑀲𑁂𑀦 𑀲𑀢𑁆𑀢𑀥𑀸, 𑀲𑁂𑀲𑀉𑀧𑀸𑀤𑀸𑀦𑀸𑀦𑀺 𑀢𑀢𑁆𑀣 𑀳𑁂𑀢𑀼𑀧𑀘𑁆𑀘𑀬𑀪𑀸𑀯𑀁 𑀧𑀳𑀸𑀬 𑀫𑀕𑁆𑀕𑀧𑀘𑁆𑀘𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀢𑁆𑀢𑀥𑀸𑀯 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀅𑀦𑀦𑁆𑀢𑀭𑀲𑁆𑀲 𑀧𑀦 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀦𑀢𑁆𑀣𑀺𑀯𑀺𑀕𑀢𑀸𑀲𑁂𑀯𑀦𑀯𑀲𑁂𑀦 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀢𑀲𑁆𑀲𑀺𑀤𑀫𑁆𑀧𑀺 𑀲𑀳𑀚𑀸𑀢𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀢𑁆𑀣𑀼𑀓𑀸𑀫𑀁 𑀉𑀧𑀸𑀤𑀺𑀬𑀢𑀺 𑀘𑀺𑀢𑁆𑀢𑀁, 𑀧𑀼𑀕𑁆𑀕𑀮𑁄 𑀯𑀸 𑀏𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀺 𑀯𑀢𑁆𑀣𑀼𑀓𑀸𑀫𑀁. 𑀓𑀸𑀫𑁂𑀢𑀻𑀢𑀺 𑀓𑀸𑀫𑁄 𑀘 𑀲𑁄 𑀉𑀧𑀸𑀤𑀺𑀬𑀢𑀻𑀢𑀺 𑀉𑀧𑀸𑀤𑀸𑀦𑀜𑁆𑀘𑀸𑀢𑀺 𑀬𑁄𑀚𑀦𑀸. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀅𑀪𑀺𑀥𑀫𑁆𑀫𑁂 𑀯𑀼𑀢𑁆𑀢𑀦𑀬𑁂𑀦.

𑀲𑀲𑁆𑀲𑀢𑁄 𑀅𑀢𑁆𑀢𑀸𑀢𑀺 𑀇𑀤𑀁 𑀧𑀼𑀭𑀺𑀫𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀫𑀸𑀦𑀁 𑀉𑀢𑁆𑀢𑀭𑀤𑀺𑀝𑁆𑀞𑀺𑀁 𑀦𑀺𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀬𑀣𑀸 𑀏𑀲𑀸 𑀤𑀺𑀝𑁆𑀞𑀺 𑀤𑀴𑁆𑀳𑀻𑀓𑀭𑀡𑀯𑀲𑁂𑀦 𑀧𑀼𑀭𑀺𑀫𑀁 𑀧𑀼𑀭𑀺𑀫𑀁 𑀉𑀢𑁆𑀢𑀭𑀸 𑀉𑀢𑁆𑀢𑀭𑀸 𑀉𑀧𑀸𑀤𑀺𑀬𑀢𑀺, 𑀏𑀯𑀁 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀓𑀸𑀧𑀻𑀢𑀺. 𑀅𑀢𑁆𑀢𑀕𑁆𑀕𑀳𑀡𑀁 𑀧𑀦 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀦𑁆𑀢𑀺 𑀦𑀬𑀺𑀤𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀤𑀲𑁆𑀲𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀮𑁄𑀓𑁄 𑀘𑀸𑀢𑀺 𑀅𑀢𑁆𑀢𑀕𑁆𑀕𑀳𑀡𑀯𑀺𑀦𑀺𑀫𑀼𑀢𑁆𑀢𑀕𑀳𑀡𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀪𑀽𑀢𑀁 𑀇𑀥 𑀧𑀼𑀭𑀺𑀫𑀤𑀺𑀝𑁆𑀞𑀺𑀉𑀢𑁆𑀢𑀭𑀤𑀺𑀝𑁆𑀞𑀺𑀯𑀘𑀦𑁂𑀳𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑀤𑀺𑀝𑁆𑀞𑀺𑀕𑀢𑀲𑁆𑀲 ‘‘𑀤𑀺𑀝𑁆𑀞𑀼𑀧𑀸𑀤𑀸𑀦’’𑀦𑁆𑀢𑀺 𑀏𑀢𑀁 𑀅𑀥𑀺𑀯𑀘𑀦𑀁 ‘‘𑀲𑀩𑁆𑀩𑀸𑀧𑀺 𑀤𑀺𑀝𑁆𑀞𑀺 𑀤𑀺𑀝𑁆𑀞𑀼𑀧𑀸𑀤𑀸𑀦’’𑀦𑁆𑀢𑀺 𑀯𑀘𑀦𑀢𑁄.

𑀲𑀻𑀮𑀩𑁆𑀩𑀢𑀁 𑀉𑀧𑀸𑀤𑀺𑀬𑀦𑁆𑀢𑀻𑀢𑀺 𑀲𑀻𑀮𑀩𑁆𑀩𑀢𑀁 ‘‘𑀲𑀼𑀤𑁆𑀥𑀺𑀫𑀕𑁆𑀕𑁄’’𑀢𑀺 𑀉𑀧𑀸𑀤𑀺𑀬𑀦𑁆𑀢𑀺. 𑀏𑀢𑁂𑀦 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁂𑀦. 𑀲𑀬𑀁 𑀯𑀸 𑀢𑀁 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀲𑀳𑀕𑀢𑀁. 𑀲𑀻𑀮𑀩𑁆𑀩𑀢𑀲𑀳𑀘𑀭𑀡𑀢𑁄 𑀲𑀻𑀮𑀩𑁆𑀩𑀢𑀜𑁆𑀘 𑀢𑀁 𑀤𑀴𑁆𑀳𑀕𑁆𑀕𑀸𑀳𑀪𑀸𑀯𑀢𑁄 𑀉𑀧𑀸𑀤𑀸𑀦𑀜𑁆𑀘𑀸𑀢𑀺 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁. 𑀏𑀯𑀁 𑀲𑀼𑀤𑁆𑀥𑀻𑀢𑀺 𑀅𑀪𑀺𑀦𑀺𑀯𑁂𑀲𑀢𑁄𑀢𑀺 𑀏𑀯𑀁 𑀕𑁄𑀲𑀻𑀮𑀕𑁄𑀯𑀢𑀸𑀤𑀺𑀘𑀭𑀡𑁂𑀦 𑀲𑀁𑀲𑀸𑀭𑀲𑀼𑀤𑁆𑀥𑀻𑀢𑀺 𑀅𑀪𑀺𑀦𑀺𑀯𑁂𑀲𑀪𑀸𑀯𑀢𑁄. 𑀏𑀢𑁂𑀦 𑀢𑀁 𑀲𑀳𑀘𑀭𑀡𑀢𑁄 𑀅𑀪𑀺𑀦𑀺𑀯𑁂𑀲𑀲𑁆𑀲 𑀢𑀁𑀲𑀤𑁆𑀤𑀸𑀭𑀳𑀢𑀁 𑀤𑀲𑁆𑀲𑁂𑀢𑀺.

𑀯𑀤𑀦𑁆𑀢𑀻𑀢𑀺 ‘‘𑀅𑀢𑁆𑀣𑀺 𑀫𑁂 𑀅𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀯𑁄𑀳𑀭𑀦𑁆𑀢𑀺. 𑀏𑀢𑁂𑀦 𑀤𑀺𑀝𑁆𑀞𑀺𑀕𑀢𑁂𑀦. 𑀅𑀢𑁆𑀢𑀯𑀸𑀤𑀫𑀢𑁆𑀢𑀫𑁂𑀯𑀸𑀢𑀺 𑀅𑀢𑁆𑀢𑀸𑀢𑀺 𑀯𑀸𑀘𑀸𑀫𑀢𑁆𑀢𑀫𑁂𑀯. 𑀏𑀢𑁂𑀦 𑀯𑀸𑀘𑀸𑀯𑀢𑁆𑀣𑀼𑀫𑀢𑁆𑀢𑀫𑁂𑀢𑀁, 𑀬𑀤𑀺𑀤𑀁 𑀩𑀸𑀳𑀺𑀭𑀓𑀧𑀭𑀺𑀓𑀧𑁆𑀧𑀺𑀢𑁄 𑀅𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺.

𑀢𑀡𑁆𑀳𑀸 ¶ 𑀓𑀸𑀫𑀼𑀧𑀸𑀤𑀸𑀦𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀢𑀢𑁆𑀣 𑀓𑀢𑀫𑀁 𑀓𑀸𑀫𑀼𑀧𑀸𑀤𑀸𑀦𑀁? 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄 𑀓𑀸𑀫𑀭𑀸𑀕𑁄 𑀓𑀸𑀫𑀦𑀦𑁆𑀤𑀻 𑀓𑀸𑀫𑀢𑀡𑁆𑀳𑀸 𑀓𑀸𑀫𑀲𑁆𑀦𑁂𑀳𑁄 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦𑀁. 𑀇𑀤𑀁 𑀯𑀼𑀘𑁆𑀘𑀢𑀺 𑀓𑀸𑀫𑀼𑀧𑀸𑀤𑀸𑀦’’𑀦𑁆𑀢𑀺 𑀯𑀘𑀦𑀢𑁄 𑀢𑀡𑁆𑀳𑀸𑀤𑀴𑁆𑀳𑀢𑁆𑀢𑀁 𑀓𑀸𑀫𑀼𑀧𑀸𑀤𑀸𑀦𑀁. 𑀢𑀡𑁆𑀳𑀸𑀤𑀴𑁆𑀳𑀢𑁆𑀢𑀦𑁆𑀢𑀺 𑀘 𑀧𑀼𑀭𑀺𑀫𑀢𑀡𑁆𑀳𑀸𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑁄 𑀤𑀴𑁆𑀳𑀪𑀽𑀢𑀸 𑀉𑀢𑁆𑀢𑀭𑀢𑀡𑁆𑀳𑀸 𑀏𑀯. 𑀓𑁂𑀘𑀺 𑀧𑀦𑀸𑀳𑀼 𑁋

‘‘𑀅𑀧𑁆𑀧𑀢𑁆𑀢𑀯𑀺𑀲𑀬𑀧𑀢𑁆𑀣𑀦𑀸 ¶ 𑀢𑀡𑁆𑀳𑀸 𑀅𑀦𑁆𑀥𑀓𑀸𑀭𑁂 𑀘𑁄𑀭𑀲𑁆𑀲𑀳𑀢𑁆𑀣𑀧𑁆𑀧𑀲𑀸𑀭𑀡𑀁 𑀯𑀺𑀬, 𑀲𑀫𑁆𑀧𑀢𑁆𑀢𑀯𑀺𑀲𑀬𑀕𑁆𑀕𑀳𑀡𑀁 𑀉𑀧𑀸𑀤𑀸𑀦𑀁 𑀢𑀲𑁆𑀲𑁂𑀯 𑀪𑀡𑁆𑀟𑀕𑁆𑀕𑀳𑀡𑀁 𑀯𑀺𑀬𑀸’’𑀢𑀺. 𑀅𑀧𑁆𑀧𑀺𑀘𑁆𑀙𑀲𑀦𑁆𑀢𑀼𑀝𑁆𑀞𑀺𑀧𑀝𑀺𑀧𑀓𑁆𑀔𑀸 𑀏𑀢𑁂 𑀥𑀫𑁆𑀫𑀸 𑀧𑀭𑀺𑀬𑁂𑀲𑀦𑀸𑀭𑀓𑁆𑀔𑀤𑀼𑀓𑁆𑀔𑀫𑀽𑀮𑀸𑀦𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀮𑀓𑁆𑀔𑀡𑀸 𑀢𑀡𑁆𑀳𑀸 𑀯𑀼𑀢𑁆𑀢𑀮𑀓𑁆𑀔𑀡𑀲𑁆𑀲𑁂𑀯 𑀉𑀧𑀸𑀤𑀸𑀦𑀲𑁆𑀲 𑀅𑀦𑀸𑀦𑀦𑁆𑀢𑀭𑀲𑁆𑀲 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀧𑀘𑁆𑀘𑀬𑁄, 𑀆𑀭𑀫𑁆𑀫𑀡𑀸𑀤𑀺𑀯𑀲𑁂𑀦𑀧𑀺 𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯, 𑀅𑀦𑀦𑁆𑀢𑀭𑀸𑀤𑀻𑀦𑀁 𑀧𑀦 𑀅𑀦𑀦𑁆𑀢𑀭𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑁄. 𑀲𑀩𑁆𑀩𑀲𑁆𑀲𑀧𑀺 𑀳𑀺 𑀮𑁄𑀪𑀲𑁆𑀲 𑀢𑀡𑁆𑀳𑀸𑀧𑀭𑀺𑀬𑀸𑀬𑁄𑀧𑀺 𑀓𑀸𑀫𑀼𑀧𑀸𑀤𑀸𑀦𑀧𑀭𑀺𑀬𑀸𑀬𑁄𑀧𑀺 𑀮𑀩𑁆𑀪𑀢𑁂𑀯𑀸𑀢𑀺. 𑀅𑀯𑀲𑁂𑀲𑀸𑀦𑀦𑁆𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀸𑀤𑀻𑀦𑀁. 𑀲𑀳𑀚𑀸𑀢𑀸𑀤𑀺𑀯𑀲𑁂𑀦𑀸𑀢𑀺 𑀲𑀳𑀚𑀸𑀢𑀸𑀦𑀁 𑀲𑀳𑀚𑀸𑀢𑀸𑀤𑀺𑀯𑀲𑁂𑀦, 𑀅𑀲𑀳𑀚𑀸𑀢𑀸𑀦𑀁 𑀅𑀦𑀦𑁆𑀢𑀭𑀉𑀧𑀦𑀺𑀲𑁆𑀲𑀬𑀸𑀤𑀺𑀯𑀲𑁂𑀦𑀸𑀢𑀺 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀉𑀧𑀸𑀤𑀸𑀦𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀡𑁆𑀳𑀸𑀯𑀸𑀭𑀯𑀡𑁆𑀡𑀦𑀸

𑁯𑁬. ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄’’𑀢𑀺𑀆𑀤𑀺 𑀨𑀲𑁆𑀲𑀲𑁆𑀲 𑀫𑀸𑀢𑀺𑀢𑁄 𑀦𑀸𑀫𑀁 𑀯𑀺𑀬 𑀧𑀼𑀢𑁆𑀢𑀲𑁆𑀲 𑀯𑀢𑁆𑀣𑀼𑀢𑁄 𑀢𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑁂𑀦 𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑁆𑀢𑀸, 𑀆𑀭𑀫𑁆𑀫𑀡𑀁 𑀧𑀦 𑀓𑁂𑀯𑀮𑀁 𑀉𑀧𑁆𑀧𑀢𑁆𑀢𑀺𑀳𑁂𑀢𑀽𑀢𑀺 𑀯𑀼𑀢𑁆𑀢𑀁 ‘‘𑀲𑁂𑀝𑁆𑀞𑀺…𑀧𑁂… 𑀦𑀸𑀫’’𑀦𑁆𑀢𑀺. 𑀓𑀸𑀫𑀭𑀸𑀕𑀪𑀸𑀯𑁂𑀦𑀸𑀢𑀺 𑀯𑀢𑁆𑀣𑀼𑀓𑀸𑀫𑀲𑁆𑀲 𑀭𑀚𑁆𑀚𑀦𑀯𑀲𑁂𑀦. 𑀭𑀽𑀧𑀁 𑀅𑀲𑁆𑀲𑀸𑀤𑁂𑀦𑁆𑀢𑀻𑀢𑀺 𑀭𑀼𑀧𑀸𑀭𑀫𑁆𑀫𑀡𑀁 𑀢𑀡𑁆𑀳𑀸𑀪𑀺𑀦𑀦𑁆𑀤𑀦𑀸𑀯𑀲𑁂𑀦 𑀅𑀪𑀺𑀭𑀫𑀫𑀸𑀦𑀸 𑀏𑀯 𑀅𑀲𑁆𑀲𑀸𑀤𑁂𑀦𑁆𑀢𑀻. 𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀸𑀫𑀼𑀔𑁂𑀦 𑀭𑀽𑀧𑀁 𑀅𑀪𑀺𑀭𑀫𑀦𑁆𑀢𑀻. 𑀧𑁂𑀘𑁆𑀘 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀪𑀺𑀚𑁆𑀚𑀺𑀢𑁆𑀯𑀸 𑀦 𑀳𑁄𑀢𑀺 𑀧𑀼𑀦 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀢𑀣𑀸 𑀲𑀤𑁆𑀤𑀓𑀡𑁆𑀳𑀸𑀤𑀬𑁄𑀧𑀻𑀢𑀺 𑀬𑀣𑀸 𑀭𑀽𑀧𑀢𑀡𑁆𑀳𑀸 𑀓𑀸𑀫𑀭𑀸𑀕𑀪𑀸𑀯𑁂𑀦 𑀲𑀲𑁆𑀲𑀢𑀭𑀸𑀕𑀯𑀲𑁂𑀦 𑀉𑀘𑁆𑀙𑁂𑀤𑀭𑀸𑀕𑀯𑀲𑁂𑀦𑀸𑀢𑀺 𑀘 𑀧𑀯𑀢𑁆𑀢𑀺𑀬𑀸 𑀢𑀺𑀲𑁆𑀲𑁄 𑀢𑀡𑁆𑀳𑀸, 𑀢𑀣𑀸 𑀲𑀤𑁆𑀤𑀢𑀡𑁆𑀳𑀸 𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀥𑀫𑁆𑀫𑀢𑀡𑁆𑀳𑀸𑀧𑀺. 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀻𑀢𑀺 𑀢𑀡𑁆𑀳𑀸𑀲𑀫𑀼𑀤𑀸𑀘𑀸𑀭𑀸, 𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀧𑀯𑀢𑁆𑀢𑀢𑀡𑁆𑀳𑀸𑀢𑀺 𑀅𑀢𑁆𑀣𑁄.

𑀅𑀚𑁆𑀛𑀢𑁆𑀢𑀺𑀓𑀲𑁆𑀲𑀼𑀧𑀸𑀤𑀸𑀬𑀸𑀢𑀺 (𑀯𑀺𑀪. 𑀅𑀝𑁆𑀞. 𑁯𑁭𑁩; 𑀲𑀁. 𑀦𑀺. 𑀝𑀻. 𑁨.𑁨.𑁨) 𑀅𑀚𑁆𑀛𑀢𑁆𑀢𑀺𑀓𑀁 𑀔𑀦𑁆𑀥𑀧𑀜𑁆𑀘𑀓𑀁 𑀉𑀧𑀸𑀤𑀸𑀬. 𑀉𑀧𑀬𑁄𑀕𑀢𑁆𑀣𑁂 𑀳𑀺 𑀇𑀤𑀁 𑀲𑀸𑀫𑀺𑀯𑀘𑀦𑀁. 𑀅𑀲𑁆𑀫𑀻𑀢𑀺 𑀳𑁄𑀢𑀻𑀢𑀺 𑀬𑀤𑁂𑀢𑀁 𑀅𑀚𑁆𑀛𑀢𑁆𑀢𑀁 𑀔𑀦𑁆𑀥𑀧𑀜𑁆𑀘𑀓𑀁 ¶ 𑀉𑀧𑀸𑀤𑀸𑀬 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀲𑀫𑀽𑀳𑀕𑀸𑀳𑀢𑁄 𑀅𑀲𑁆𑀫𑀻𑀢𑀺 𑀏𑀯𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀲𑀢𑀻𑀢𑀺 𑀅𑀢𑁆𑀣𑁄. 𑀇𑀢𑁆𑀣𑀲𑁆𑀫𑀻𑀢𑀺 𑀳𑁄𑀢𑀻𑀢𑀺 𑀔𑀢𑁆𑀢𑀺𑀬𑀸𑀤𑀻𑀲𑀼 ‘‘𑀇𑀤𑀁𑀧𑀓𑀸𑀭𑁄 𑀅𑀳’’𑀦𑁆𑀢𑀺 𑀏𑀯𑀁 ¶ 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀳𑁄𑀢𑀻𑀢𑀺 𑀇𑀤𑀫𑁂𑀢𑁆𑀣 𑀅𑀦𑀼𑀧𑀦𑀺𑀥𑀸𑀬 𑀕𑀳𑀡𑀁. 𑀏𑀯𑀫𑀸𑀤𑀺𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀏𑀯𑀁𑀲𑁆𑀫𑀻𑀢𑀺, 𑀅𑀜𑁆𑀜𑀣𑀸𑀲𑁆𑀫𑀻𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺, 𑀇𑀢𑁆𑀣𑀁 𑀪𑀯𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀪𑀯𑀺𑀲𑁆𑀲𑀦𑁆𑀢𑀺, 𑀅𑀜𑁆𑀜𑀣𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀅𑀲𑀲𑁆𑀫𑀻𑀢𑀺, 𑀲𑀢𑀲𑁆𑀫𑀻𑀢𑀺, 𑀲𑀺𑀬𑀦𑁆𑀢𑀺, 𑀇𑀢𑁆𑀣𑀁 𑀲𑀺𑀬𑀦𑁆𑀢𑀺, 𑀏𑀯𑀁 𑀲𑀺𑀬𑀦𑁆𑀢𑀺, 𑀅𑀜𑁆𑀜𑀣𑀸 𑀲𑀺𑀬𑀦𑁆𑀢𑀺, 𑀅𑀧𑀸𑀳𑀁 𑀲𑀺𑀬𑀦𑁆𑀢𑀺, 𑀅𑀧𑀸𑀳𑀁 𑀇𑀢𑁆𑀣𑀁 𑀲𑀺𑀬𑀦𑁆𑀢𑀺, 𑀅𑀧𑀸𑀳𑀁 𑀏𑀯𑀁 𑀲𑀺𑀬𑀦𑁆𑀢𑀺, 𑀅𑀧𑀸𑀳𑀁 𑀅𑀜𑁆𑀜𑀣𑀸 𑀲𑀺𑀬’’𑀦𑁆𑀢𑀺 (𑀯𑀺𑀪. 𑁯𑁭𑁩) 𑀇𑀫𑁂𑀲𑀁 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀁 𑀕𑀳𑀡𑀁. 𑀢𑀢𑁆𑀣 𑀏𑀯𑀁𑀲𑁆𑀫𑀻𑀢𑀺 𑀇𑀤𑀁 𑀲𑀫𑀢𑁄 𑀉𑀧𑀦𑀺𑀥𑀸𑀬 𑀕𑀳𑀡𑀁, 𑀬𑀣𑀸 𑀅𑀬𑀁 𑀔𑀢𑁆𑀢𑀺𑀬𑁄, 𑀬𑀣𑀸 𑀅𑀬𑀁 𑀩𑁆𑀭𑀸𑀳𑁆𑀫𑀡𑁄, 𑀏𑀯𑀁 𑀅𑀳𑀫𑁆𑀧𑀻𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀣𑀸𑀲𑁆𑀫𑀻𑀢𑀺 𑀇𑀤𑀁 𑀅𑀲𑀫𑀡𑁄 𑀉𑀧𑀦𑀺𑀥𑀸𑀬 𑀕𑀳𑀡𑀁, 𑀬𑀣𑀸 𑀅𑀬𑀁 𑀔𑀢𑁆𑀢𑀺𑀬𑁄, 𑀬𑀣𑀸 𑀅𑀬𑀁 𑀩𑁆𑀭𑀸𑀳𑁆𑀫𑀡𑁄, 𑀢𑀢𑁄 𑀅𑀜𑁆𑀜𑀣𑀸 𑀅𑀳𑀁 𑀳𑀻𑀦𑁄 𑀯𑀸 𑀅𑀥𑀺𑀓𑁄 𑀯𑀸𑀢𑀺 𑀅𑀢𑁆𑀣𑁄. 𑀇𑀢𑀺 𑀇𑀫𑀸𑀦𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑀺 𑀤𑁆𑀯𑁂𑀢𑀺 𑀏𑀢𑀸𑀦𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀘𑀢𑁆𑀢𑀸𑀭𑀺 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺. 𑀪𑀯𑀺𑀲𑁆𑀲𑀦𑁆𑀢𑀺𑀆𑀤𑀻𑀦𑀺 𑀧𑀦 𑀘𑀢𑁆𑀢𑀸𑀭𑀺 𑀅𑀦𑀸𑀕𑀢𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀁 𑀧𑀼𑀭𑀺𑀫𑀘𑀢𑀼𑀓𑁆𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀲𑀲𑁆𑀫𑀻𑀢𑀺 𑀅𑀲𑀢𑀻𑀢𑀺 𑀅𑀲𑀁. 𑀦𑀺𑀘𑁆𑀘𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀲𑁆𑀫𑀸 𑀲𑀲𑁆𑀲𑀢𑁄 𑀅𑀲𑁆𑀫𑀻𑀢𑀺 𑀅𑀢𑁆𑀣𑁄. 𑀲𑀢𑀲𑁆𑀫𑀻𑀢𑀺 𑀲𑀻𑀤𑀢𑀻𑀢𑀺 𑀲𑀢𑀁. 𑀅𑀦𑀺𑀘𑁆𑀘𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀲𑁆𑀫𑀸 𑀅𑀲𑀲𑁆𑀲𑀢𑁄 𑀅𑀲𑁆𑀫𑀻𑀢𑀺 𑀅𑀢𑁆𑀣𑁄. 𑀇𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀲𑀲𑁆𑀲𑀢𑀼𑀘𑁆𑀙𑁂𑀤𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀇𑀢𑁄 𑀧𑀭𑀸𑀦𑀺 𑀲𑀺𑀬𑀦𑁆𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀲𑀁𑀲𑀬𑀧𑀭𑀺𑀯𑀺𑀢𑀓𑁆𑀓𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀧𑀼𑀭𑀺𑀫𑀘𑀢𑀼𑀓𑁆𑀓𑁂 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀧𑀸𑀳𑀁 𑀲𑀺𑀬𑀦𑁆𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 ‘‘𑀅𑀧𑀺 𑀦𑀸𑀫𑀸𑀳𑀁 𑀪𑀯𑁂𑀬𑁆𑀬’’𑀦𑁆𑀢𑀺 𑀏𑀯𑀁 𑀧𑀢𑁆𑀣𑀦𑀸𑀓𑀧𑁆𑀧𑀦𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀧𑀼𑀭𑀺𑀫𑀘𑀢𑀼𑀓𑁆𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀏𑀢𑁆𑀣 𑀘 𑀲𑀲𑁆𑀲𑀢𑀼𑀘𑁆𑀙𑁂𑀤𑀯𑀲𑁂𑀦 𑀯𑀼𑀢𑁆𑀢𑀸 𑀤𑁆𑀯𑁂 𑀤𑀺𑀝𑁆𑀞𑀺𑀲𑀻𑀲𑀸 𑀦𑀸𑀫, 𑀅𑀲𑁆𑀫𑀺, 𑀪𑀯𑀺𑀲𑁆𑀲𑀁, 𑀲𑀺𑀬𑀁, 𑀅𑀧𑀸𑀳𑀁 𑀲𑀺𑀬𑀦𑁆𑀢𑀺 𑀏𑀢𑁂 𑀧𑀦 𑀘𑀢𑁆𑀢𑀸𑀭𑁄 𑀲𑀼𑀤𑁆𑀥𑀲𑀻𑀲𑀸 𑀏𑀯, ‘‘𑀇𑀢𑁆𑀣𑀲𑁆𑀫𑀻’’𑀢𑀺𑀆𑀤𑀬𑁄 𑀢𑀬𑁄 𑀢𑀬𑁄𑀢𑀺 𑀤𑁆𑀯𑀸𑀤𑀲 𑀲𑀻𑀲𑀫𑀽𑀮𑀓𑀸 𑀦𑀸𑀫. 𑀏𑀯𑀫𑁂𑀢𑀸𑀦𑀺 𑀤𑁆𑀯𑁂 𑀤𑀺𑀝𑁆𑀞𑀺𑀲𑀻𑀲𑀸, 𑀘𑀢𑁆𑀢𑀸𑀭𑁄 𑀲𑀼𑀤𑁆𑀥𑀲𑀻𑀲𑀸, 𑀤𑁆𑀯𑀸𑀤𑀲 𑀲𑀻𑀲𑀫𑀽𑀮𑀓𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑀲𑁆𑀲𑀼𑀧𑀸𑀤𑀸𑀬 𑀅𑀝𑁆𑀞𑀸𑀭𑀲𑁆𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀩𑀸𑀳𑀺𑀭𑀲𑁆𑀲𑀼𑀧𑀸𑀤𑀸𑀬𑀸𑀢𑀺 𑀩𑀸𑀳𑀺𑀭𑀁 𑀔𑀦𑁆𑀥𑀧𑀜𑁆𑀘𑀓𑀁 𑀉𑀧𑀸𑀤𑀸𑀬. 𑀇𑀤𑀫𑁆𑀧𑀺 𑀳𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀇𑀫𑀺𑀦𑀸𑀢𑀺 𑀇𑀫𑀺𑀦𑀸 𑀭𑀼𑀧𑁂𑀦 𑀯𑀸…𑀧𑁂… 𑀯𑀺𑀜𑁆𑀜𑀸𑀡𑁂𑀦 𑀯𑀸𑀢𑀺 𑀏𑀯𑀁 𑀭𑀽𑀧𑀸𑀤𑀻𑀲𑀼 𑀏𑀓𑀫𑁂𑀯 ‘‘𑀅𑀳’’𑀦𑁆𑀢𑀺, 𑀇𑀢𑀭𑀁 𑀓𑀺𑀜𑁆𑀘𑀦𑀧𑀮𑀺𑀩𑁄𑀥𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀢𑀡𑁆𑀳𑀸𑀤𑀺𑀯𑀲𑁂𑀦 ‘‘𑀅𑀲𑁆𑀫𑀻’’𑀢𑀺 𑀅𑀪𑀺𑀦𑀺𑀯𑀺𑀲𑀢𑀺, ‘‘𑀇𑀫𑀺𑀦𑀸’’𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀅𑀲𑁆𑀫𑀻𑀢𑀺 𑀇𑀫𑀺𑀦𑀸 𑀔𑀕𑁆𑀕𑁂𑀦 𑀯𑀸 𑀙𑀢𑁆𑀢𑁂𑀦 𑀯𑀸 𑀅𑀪𑀺𑀲𑁂𑀓𑁂𑀦 𑀯𑀸 ‘‘𑀔𑀢𑁆𑀢𑀺𑀬𑁄𑀳𑀫𑀲𑁆𑀫𑀻’’𑀢𑀺 ¶ 𑀅𑀪𑀺𑀦𑀺𑀯𑀺𑀲𑀢𑀺. 𑀩𑀸𑀳𑀺𑀭𑀭𑀽𑀧𑀸𑀤𑀺𑀦𑀺𑀲𑁆𑀲𑀺𑀢𑀸𑀦𑀻𑀢𑀺 𑀩𑀸𑀳𑀺𑀭𑀸𑀦𑀺 𑀧𑀭𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀭𑀽𑀧𑀯𑁂𑀤𑀦𑀸𑀤𑀻𑀦𑀺 𑀦𑀺𑀲𑁆𑀲𑀺𑀢𑀸𑀦𑀺. 𑀅𑀝𑁆𑀞𑀸𑀭𑀲𑀸𑀢𑀺 𑀇𑀫𑀺𑀦𑀸 ‘‘𑀅𑀲𑁆𑀫𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀦𑀺 𑀅𑀝𑁆𑀞𑀸𑀭𑀲, 𑀢𑀸𑀦𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. ‘‘𑀇𑀫𑀺𑀦𑀸’’𑀢𑀺 𑀳𑀺 ¶ 𑀅𑀬𑀫𑁂𑀯𑁂𑀢𑁆𑀣 𑀯𑀺𑀲𑁂𑀲𑁄, 𑀢𑀲𑁆𑀫𑀸 ‘‘𑀤𑁆𑀯𑁂 𑀤𑀺𑀝𑁆𑀞𑀺𑀲𑀻𑀲𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸. 𑀉𑀪𑀬𑀁 𑀧𑀦 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀆𑀳 ‘‘𑀙𑀢𑁆𑀢𑀺𑀁𑀲𑀸’’𑀢𑀺.

𑀦𑀺𑀤𑁆𑀤𑁂𑀲𑀢𑁆𑀣𑁂𑀦𑀸𑀢𑀺 ‘‘𑀙𑀬𑀺𑀫𑁂 𑀆𑀯𑀼𑀲𑁄 𑀢𑀡𑁆𑀳𑀸𑀓𑀸𑀬𑀸’’𑀢𑀺𑀆𑀤𑀺𑀦𑀺𑀤𑁆𑀤𑁂𑀲𑀧𑀸𑀴𑀺𑀬𑀸 𑀅𑀢𑁆𑀣𑀯𑀘𑀦𑁂𑀦. 𑀦𑀺𑀤𑁆𑀤𑁂𑀲𑀯𑀺𑀢𑁆𑀣𑀸𑀭𑀸𑀢𑀺 𑀢𑀲𑁆𑀲 𑀘 𑀦𑀺𑀤𑁆𑀤𑁂𑀲𑀲𑁆𑀲 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀯𑀲𑁂𑀦 𑀯𑀺𑀢𑁆𑀣𑀸𑀭𑁂𑀦. 𑀯𑀺𑀢𑁆𑀣𑀸𑀭𑀲𑁆𑀲 𑀘 𑀧𑀼𑀦 𑀲𑀗𑁆𑀕𑀳𑀢𑁄𑀢𑀺 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀯𑀺𑀢𑁆𑀣𑀸𑀭𑀺𑀢𑀲𑁆𑀲 𑀅𑀝𑁆𑀞𑀸𑀭𑀲𑀢𑀡𑁆𑀳𑀸𑀯𑀺𑀘𑀭𑀺𑀢𑀧𑀪𑁂𑀤𑀲𑁆𑀲 𑀙𑀴𑁂𑀯 𑀢𑀺𑀲𑁆𑀲𑁄𑀬𑁂𑀯𑀸𑀢𑀺 𑀘 𑀧𑀼𑀦 𑀲𑀗𑁆𑀕𑀳𑀡𑀢𑁄 𑀘.

𑀯𑀺𑀧𑀸𑀓𑀯𑁂𑀤𑀦𑀸 𑀅𑀥𑀺𑀧𑁆𑀧𑁂𑀢𑀸 𑀯𑀺𑀲𑁂𑀲𑀢𑁄 𑀅𑀢𑁆𑀢𑀸𑀦𑀁 𑀅𑀲𑁆𑀲𑀸𑀤𑁂𑀢𑀩𑁆𑀩𑀢𑁄. 𑀢𑀫𑁂𑀯 𑀳𑀺𑀲𑁆𑀲𑀸 𑀅𑀲𑁆𑀲𑀸𑀤𑁂𑀢𑀩𑁆𑀩𑀢𑀁 𑀧𑀓𑀸𑀲𑁂𑀢𑀼𑀁 ‘‘𑀓𑀣’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀲𑁆𑀲𑀸𑀤𑀦𑁂𑀦𑀸𑀢𑀺 𑀅𑀪𑀺𑀭𑀢𑀺𑀬𑀸. 𑀫𑀫𑀸𑀬𑀦𑁆𑀢𑀸𑀢𑀺 𑀥𑀦𑀸𑀬𑀦𑁆𑀢𑀸. 𑀘𑀺𑀢𑁆𑀢𑀓𑀸𑀭𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀇𑀝𑁆𑀞𑀯𑀡𑁆𑀡𑀸𑀭𑀫𑁆𑀫𑀡𑀤𑀸𑀬𑀓𑀸𑀦𑀁 𑀲𑀗𑁆𑀕𑀳𑁄. 𑀲𑀺𑀧𑁆𑀧𑀲𑀦𑁆𑀤𑀲𑁆𑀲𑀦𑀓𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑁂𑀚𑁆𑀚𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀯𑁂𑀚𑁆𑀚𑀸 𑀳𑀺 𑀭𑀲𑀸𑀬𑀢𑀦𑁄𑀚𑀸𑀯𑀲𑁂𑀦 𑀢𑀤𑀼𑀧𑀢𑁆𑀣𑀫𑁆𑀪𑀺𑀢𑀯𑀲𑁂𑀦 𑀘 𑀥𑀫𑁆𑀫𑀸𑀭𑀫𑁆𑀫𑀡𑀲𑁆𑀲 𑀤𑀸𑀬𑀓𑀸. 𑀲𑁆𑀯𑀸𑀬𑀁 𑀆𑀤𑀺-𑀲𑀤𑁆𑀤𑁄 ‘‘𑀯𑀻𑀡𑀸𑀯𑀸𑀤𑀓𑀸𑀤𑀻’’𑀢𑀺𑀆𑀤𑀺𑀦𑀸 𑀧𑀘𑁆𑀘𑁂𑀓𑀜𑁆𑀘 𑀬𑁄𑀚𑁂𑀢𑀩𑁆𑀩𑁄, 𑀧𑀼𑀢𑁆𑀢𑀁 𑀫𑀫𑀸𑀬𑀦𑁆𑀢𑀸𑀢𑀺 𑀧𑀼𑀢𑁆𑀢𑀁 𑀲𑀫𑁆𑀧𑀺𑀬𑀸𑀬𑀦𑁆𑀢𑀸. 𑀧𑀼𑀢𑁆𑀢𑁄 𑀯𑀺𑀬 𑀘𑁂𑀢𑁆𑀣 𑀯𑁂𑀤𑀦𑀸 𑀤𑀝𑁆𑀞𑀩𑁆𑀩𑀸, 𑀲𑀧𑁆𑀧𑀸𑀬𑀲𑀧𑁆𑀧𑀺𑀔𑀻𑀭𑀸𑀤𑀻𑀦𑀺 𑀯𑀺𑀬 𑀯𑁂𑀤𑀦𑀸𑀬 𑀧𑀘𑁆𑀘𑀬𑀪𑀽𑀢𑀸𑀦𑀺 𑀇𑀝𑁆𑀞𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸𑀦𑀺, 𑀥𑀸𑀢𑀺 𑀯𑀺𑀬 𑀭𑀽𑀧𑀸𑀤𑀺𑀙𑀴𑀸𑀭𑀫𑁆𑀫𑀡𑀤𑀸𑀬𑀓𑀸 𑀘𑀺𑀢𑁆𑀢𑀓𑀸𑀭𑀸𑀤𑀬𑁄 𑀤𑀝𑁆𑀞𑀩𑁆𑀩𑀸.

𑀢𑀡𑁆𑀳𑀸𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑁂𑀤𑀦𑀸𑀯𑀸𑀭𑀯𑀡𑁆𑀡𑀦𑀸

𑁯𑁭. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀏𑀯 𑀯𑁂𑀤𑀦𑀸 𑀅𑀢𑀻𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀸 𑀭𑀸𑀲𑀺𑀯𑀲𑁂𑀦 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀏𑀓𑁄 𑀯𑁂𑀤𑀦𑀸𑀓𑀸𑀬𑁄 𑀬𑀣𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀏𑀯𑀁 𑀲𑁄𑀢𑀲𑀫𑁆𑀨𑀲𑁆𑀲𑀚𑀸𑀤𑀺𑀓𑀸𑀢𑀺 𑀧𑀸𑀴𑀺𑀬𑀁 ‘‘𑀙𑀬𑀺𑀫𑁂 𑀆𑀯𑀼𑀲𑁄 𑀯𑁂𑀤𑀦𑀸𑀓𑀸𑀬𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀯𑁂𑀤𑀦𑀸𑀓𑀸𑀬𑀸𑀢𑀺 𑀯𑁂𑀤𑀦𑀸𑀲𑀫𑀽𑀳𑀸’’𑀢𑀺. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀢𑁄 𑀚𑀸𑀢𑀸 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸. 𑀲𑀸 𑀧𑀦 𑀉𑀧𑀸𑀤𑀺𑀦𑁆𑀦𑀸𑀧𑀺 𑀅𑀦𑀼𑀧𑀸𑀤𑀺𑀦𑁆𑀦𑀸𑀧𑀺, 𑀢𑀤𑀼𑀪𑀬𑀲𑁆𑀲𑀧𑀺 𑀲𑀗𑁆𑀕𑀡𑁆𑀳𑀦𑁆𑀢𑁂𑀦 𑀅𑀢𑁆𑀣𑀯𑀡𑁆𑀡𑀦𑀸𑀬 𑀓𑀢𑀢𑁆𑀢𑀸 𑀆𑀳 ‘‘𑀅𑀬𑀁 𑀢𑀸𑀯𑁂𑀢𑁆𑀣 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀓𑀣𑀸’’𑀢𑀺. 𑀇𑀤𑀸𑀦𑀺 ‘‘𑀯𑀺𑀧𑀸𑀓𑀯𑀺𑀥𑀺 𑀅𑀬’’𑀦𑁆𑀢𑀺 𑀉𑀧𑀸𑀤𑀺𑀦𑁆𑀦𑀬𑁂𑀯 ¶ 𑀕𑀡𑁆𑀳𑀦𑁆𑀢𑁄 ‘‘𑀯𑀺𑀧𑀸𑀓𑀯𑀲𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀫𑀦𑁄𑀤𑁆𑀯𑀸𑀭𑁂 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀧𑀬𑀼𑀢𑁆𑀢𑀸𑀢𑀺 𑀢𑀤𑀸𑀭𑀫𑁆𑀫𑀡𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀧𑀬𑀼𑀢𑁆𑀢𑀸.

𑀅𑀯𑀲𑁂𑀲𑀸𑀦𑀦𑁆𑀢𑀺 ¶ 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀺𑀯𑁂𑀤𑀦𑀸𑀦𑀁. 𑀉𑀧𑀦𑀺𑀲𑁆𑀲𑀬𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀦𑀦𑁆𑀢𑀭𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀦𑀦𑁆𑀢𑀭𑀸𑀦𑀜𑁆𑀳𑀺 𑀅𑀦𑀦𑁆𑀢𑀭𑀸𑀤𑀺𑀯𑀲𑁂𑀦, 𑀇𑀢𑀭𑁂𑀲𑀁 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀨𑀲𑁆𑀲𑁄 𑀧𑀘𑁆𑀘𑀬𑁄 𑀳𑁄𑀢𑀺, 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀢𑀤𑀸𑀭𑀫𑁆𑀫𑀡𑀯𑁂𑀤𑀦𑀸𑀦𑀁 𑀫𑀦𑁄𑀲𑀫𑁆𑀨𑀲𑁆𑀲𑁄 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀧𑀘𑁆𑀘𑀬𑁄. 𑀅𑀤𑁆𑀯𑀸𑀭𑀺𑀓𑀸𑀦𑀦𑁆𑀢𑀺 𑀤𑁆𑀯𑀸𑀭𑀭𑀳𑀺𑀢𑀸𑀦𑀁. 𑀦 𑀳𑀺 𑀧𑀝𑀺𑀲𑀦𑁆𑀥𑀺𑀆𑀤𑀺𑀯𑁂𑀤𑀦𑀸𑀦𑀁 𑀓𑀺𑀜𑁆𑀘𑀺 𑀤𑁆𑀯𑀸𑀭𑀁 𑀅𑀢𑁆𑀣𑀺. 𑀲𑀳𑀚𑀸𑀢𑀫𑀦𑁄𑀲𑀫𑁆𑀨𑀲𑁆𑀲𑀲𑀫𑀼𑀤𑀬𑀸𑀢𑀺 𑀏𑀢𑁂𑀦𑀲𑁆𑀲 𑀢𑀸𑀲𑀁 𑀲𑀳𑀚𑀸𑀢𑀓𑁄𑀝𑀺𑀬𑀸 𑀧𑀘𑁆𑀘𑀬𑀪𑀸𑀯𑀫𑀸𑀳.

𑀯𑁂𑀤𑀦𑀸𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀨𑀲𑁆𑀲𑀯𑀸𑀭𑀯𑀡𑁆𑀡𑀦𑀸

𑁯𑁮. 𑀘𑀓𑁆𑀔𑀼𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁄 𑀲𑀫𑁆𑀨𑀲𑁆𑀲𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄. 𑀧𑀜𑁆𑀘𑀯𑀢𑁆𑀣𑀼𑀓𑀸𑀢𑀺 𑀘𑀓𑁆𑀔𑀸𑀤𑀺𑀧𑀜𑁆𑀘𑀯𑀢𑁆𑀣𑀼𑀓𑀸 𑀘𑀓𑁆𑀔𑀸𑀤𑀺𑀧𑀜𑁆𑀘𑀯𑀢𑁆𑀣𑀼𑀲𑀦𑁆𑀦𑀺𑀲𑁆𑀲𑀬𑀸. ‘‘𑀉𑀧𑀸𑀤𑀺𑀦𑁆𑀦𑀓𑀓𑀣𑀸 𑀏𑀲𑀸’’𑀢𑀺 𑀩𑀸𑀯𑀻𑀲𑀢𑀺𑀕𑁆𑀕𑀳𑀡𑀁, 𑀧𑀯𑀢𑁆𑀢𑀺𑀓𑀣𑀸𑀪𑀸𑀯𑀢𑁄 𑀮𑁄𑀓𑀺𑀬𑀕𑁆𑀕𑀳𑀡𑀁. 𑀯𑀺𑀧𑀸𑀓𑀫𑀦𑀲𑀫𑁆𑀧𑀬𑀼𑀢𑁆𑀢𑀨𑀲𑁆𑀲𑀸𑀢𑀺 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀨𑀲𑁆𑀲𑀸. 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁂𑀦 𑀯𑀺𑀬 𑀧𑀘𑁆𑀘𑀬𑁂𑀦𑀧𑀺 𑀉𑀧𑀸𑀤𑀺𑀦𑁆𑀦𑀓𑁂𑀦𑁂𑀯 𑀪𑀯𑀺𑀢𑀩𑁆𑀩𑀦𑁆𑀢𑀺 ‘‘𑀙𑀦𑁆𑀦𑀁 𑀘𑀓𑁆𑀔𑀸𑀤𑀻𑀦𑀁 𑀆𑀬𑀢𑀦𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀨𑀲𑁆𑀲𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀴𑀸𑀬𑀢𑀦𑀯𑀸𑀭𑀯𑀡𑁆𑀡𑀦𑀸

𑁯𑁯. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁, 𑀢𑀲𑁆𑀫𑀸 𑀬𑀣𑀸 𑀏𑀢𑁆𑀣 𑀅𑀭𑀽𑀧𑀮𑁄𑀓𑀸𑀧𑁂𑀓𑁆𑀔𑀸𑀬 𑀙𑀝𑁆𑀞𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀦𑁆𑀢𑀺 𑀏𑀓𑀲𑁂𑀲𑁄 𑀇𑀘𑁆𑀙𑀺𑀢𑀩𑁆𑀩𑁄, 𑀏𑀯𑀁 𑀬𑁂𑀲𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑁄 𑀉𑀧𑀸𑀤𑀺𑀦𑁆𑀦𑁄, 𑀧𑀘𑁆𑀘𑀬𑁄 𑀧𑀦 𑀅𑀦𑀼𑀧𑀸𑀤𑀺𑀦𑁆𑀦𑁄𑀢𑀺𑀧𑀺 𑀇𑀘𑁆𑀙𑀺𑀢𑀩𑁆𑀩𑁄. 𑀢𑁂𑀲𑀁 𑀫𑀢𑁂𑀦 𑀩𑀸𑀳𑀺𑀭𑀸𑀬𑀢𑀦𑀯𑀲𑁂𑀦𑀧𑀺 𑀏𑀓𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄 ‘‘𑀙𑀝𑁆𑀞𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦𑀜𑁆𑀘 𑀲𑀴𑀸𑀬𑀢𑀦’’𑀦𑁆𑀢𑀺. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄𑀧𑀺 𑀇𑀫𑀲𑁆𑀲 𑀆𑀕𑀫𑀲𑁆𑀲 ¶ 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀢𑀺 𑀆𑀳 ‘‘𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂…𑀧𑁂… 𑀯𑀼𑀢𑁆𑀢𑀦𑀬𑀫𑁂𑀯𑀸’’𑀢𑀺. 𑀏𑀲 𑀦𑀬𑁄 𑀅𑀜𑁆𑀜𑀢𑁆𑀣𑀸𑀧𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀕𑁆𑀕𑀳𑀡𑁂.

𑀲𑀴𑀸𑀬𑀢𑀦𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀸𑀫𑀭𑀽𑀧𑀯𑀸𑀭𑀯𑀡𑁆𑀡𑀦𑀸

𑁧𑁦𑁦. 𑀦𑀫𑀦𑀮𑀓𑁆𑀔𑀡𑀦𑁆𑀢𑀺 ¶ 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀁 𑀦𑀫𑀦𑀲𑀪𑀸𑀯𑀁 𑀢𑁂𑀦 𑀯𑀺𑀦𑀸 𑀅𑀧𑀯𑀢𑁆𑀢𑀦𑀢𑁄. 𑀭𑀼𑀧𑁆𑀧𑀦𑀁 𑀲𑀻𑀢𑀸𑀤𑀺𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀦𑁆𑀦𑀺𑀧𑀸𑀢𑁂 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺. 𑀇𑀫𑁂 𑀧𑀦 𑀢𑀬𑁄𑀢𑀺𑀆𑀤𑀺𑀦𑀸 𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀸𑀥𑀸𑀭𑀡𑀯𑀲𑁂𑀦𑁂𑀯 𑀢𑀁𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀕𑁆𑀕𑀳𑀡𑀁, 𑀢𑀲𑁆𑀫𑀸 𑀬𑁂 𑀬𑀢𑁆𑀣 𑀅𑀲𑀸𑀥𑀸𑀭𑀡𑀸, 𑀢𑁂𑀧𑀺 𑀅𑀢𑁆𑀣𑀢𑁄 𑀕𑀳𑀺𑀢𑀸𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀉𑀧𑀸𑀤𑀺𑀬𑀺𑀢𑁆𑀯𑀸𑀢𑀺 𑀧𑀘𑁆𑀘𑀬𑁂 𑀓𑀢𑁆𑀯𑀸. 𑀧𑀘𑁆𑀘𑀬𑀓𑀭𑀡𑀫𑁂𑀯 𑀳𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀧𑀘𑁆𑀘𑀬𑀪𑀽𑀢𑀥𑀫𑁆𑀫𑀸𑀦𑀁 𑀉𑀧𑀸𑀤𑀺𑀬𑀦𑀁. 𑀲𑀫𑀽𑀳𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀁 𑀏𑀢𑀦𑁆𑀢𑀺 ‘‘𑀲𑀫𑀽𑀳𑀢𑁆𑀣𑁂 𑀏𑀢𑀁 𑀲𑀸𑀫𑀺𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁 𑀢𑁂𑀦 𑀯𑀺𑀦𑀸 𑀲𑀫𑁆𑀩𑀦𑁆𑀥𑀲𑁆𑀲 𑀅𑀪𑀸𑀯𑀢𑁄. 𑀢𑁂𑀦𑀸𑀢𑀺 𑀢𑀲𑁆𑀫𑀸. 𑀢𑀁 𑀲𑀩𑁆𑀩𑀫𑁆𑀧𑀻𑀢𑀺 𑀢𑀁 𑀪𑀽𑀢𑀼𑀧𑀸𑀤𑀸𑀬𑀧𑀪𑁂𑀤𑀁 𑀲𑀩𑁆𑀩𑀫𑁆𑀧𑀺 𑀲𑀢𑁆𑀢𑀯𑀻𑀲𑀢𑀺𑀯𑀺𑀥𑀁. 𑀬𑀲𑁆𑀲 𑀦𑀸𑀫𑀲𑁆𑀲𑀸𑀢𑀺 𑀘𑀢𑀼𑀯𑁄𑀓𑀸𑀭𑀪𑀯𑁂 𑀦𑀸𑀫𑀲𑁆𑀲. 𑀯𑀺𑀜𑁆𑀜𑀸𑀡𑀫𑁆𑀧𑀺 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀫𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀭𑀽𑀧𑀲𑁆𑀲𑀸𑀢𑀺 𑀏𑀓𑀯𑁄𑀓𑀸𑀭𑀪𑀯𑁂 𑀭𑀽𑀧𑀲𑁆𑀲. 𑀯𑀺𑀜𑁆𑀜𑀸𑀡𑀁 𑀧𑀦 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀫𑁂𑀯. 𑀬𑀲𑁆𑀲 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀦𑀸𑀫𑀭𑀽𑀧𑀲𑁆𑀲. 𑀢𑀲𑁆𑀲 𑀯𑀲𑁂𑀦𑀸𑀢𑀺 𑀲𑀳𑀚𑀸𑀢𑀲𑁆𑀲 𑀲𑀳𑀚𑀸𑀢𑀸𑀤𑀺𑀯𑀲𑁂𑀦, 𑀅𑀦𑀦𑁆𑀢𑀭𑀲𑁆𑀲 𑀅𑀦𑀦𑁆𑀢𑀭𑀸𑀤𑀺𑀯𑀲𑁂𑀦, 𑀇𑀢𑀭𑀲𑁆𑀲 𑀉𑀧𑀦𑀺𑀲𑁆𑀲𑀬𑀸𑀤𑀺𑀯𑀲𑁂𑀦 𑀢𑀲𑁆𑀲 𑀦𑀸𑀫𑀲𑁆𑀲 𑀬𑀣𑀸𑀭𑀳𑀁 𑀢𑀲𑁆𑀲 𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀦𑀸𑀫𑀭𑀽𑀧𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀜𑁆𑀜𑀸𑀡𑀯𑀸𑀭𑀯𑀡𑁆𑀡𑀦𑀸

𑁧𑁦𑁧. 𑀢𑁂𑀪𑀽𑀫𑀓𑀯𑀺𑀧𑀸𑀓𑀕𑁆𑀕𑀳𑀡𑁂 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀲𑀗𑁆𑀔𑀸𑀭𑁄 𑀬𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲𑀸𑀢𑀺 𑀏𑀢𑁆𑀣 𑀅𑀝𑁆𑀞𑀯𑀺𑀥𑁄𑀧𑀺 𑀓𑀸𑀫𑀸𑀯𑀘𑀭𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀲𑁄𑀴𑀲𑀯𑀺𑀥𑀲𑁆𑀲 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑁆𑀲, 𑀧𑀜𑁆𑀘𑀯𑀺𑀥𑁄𑀧𑀺 𑀭𑀽𑀧𑀸𑀯𑀘𑀭𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀧𑀜𑁆𑀘𑀯𑀺𑀥𑀲𑁆𑀲 𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑁆𑀲, 𑀤𑁆𑀯𑀸𑀤𑀲𑀯𑀺𑀥𑁄𑀧𑀺 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄 𑀲𑀢𑁆𑀢𑀯𑀺𑀥𑀲𑁆𑀲 𑀅𑀓𑀼𑀲𑀮𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑁆𑀲, 𑀘𑀢𑀼𑀩𑁆𑀩𑀺𑀥𑁄𑀧𑀺 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀓𑀸𑀭𑁄 ¶ 𑀘𑀢𑀼𑀩𑁆𑀩𑀺𑀥𑀲𑁆𑀲 𑀅𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑁆𑀲 𑀬𑀣𑀸𑀭𑀳𑀁 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀻𑀲𑀼 𑀓𑀫𑁆𑀫𑀧𑀘𑁆𑀘𑀬𑁂𑀦 𑀘𑁂𑀯 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀘 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁬𑁨𑁦) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀜𑁆𑀜𑀸𑀡𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀔𑀸𑀭𑀯𑀸𑀭𑀯𑀡𑁆𑀡𑀦𑀸

𑁧𑁦𑁨. 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡𑁄𑀢𑀺 ¶ 𑀅𑀪𑀺𑀲𑀜𑁆𑀘𑁂𑀢𑀬𑀺𑀢𑀲𑀪𑀸𑀯𑁄, 𑀆𑀬𑀽𑀳𑀦𑀮𑀓𑁆𑀔𑀡𑁄𑀢𑀺 𑀅𑀢𑁆𑀣𑁄. 𑀘𑁄𑀧𑀦𑀯𑀲𑁂𑀦𑀸𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀘𑁄𑀧𑀦𑀯𑀲𑁂𑀦. 𑀢𑁂𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑀘𑁂𑀢𑀦𑀸 𑀧𑀝𑀺𑀓𑁆𑀔𑀺𑀧𑀢𑀺. 𑀯𑀘𑀦𑀪𑁂𑀤𑀯𑀲𑁂𑀦𑀸𑀢𑀺 𑀯𑀸𑀘𑀸𑀦𑀺𑀘𑁆𑀙𑀸𑀭𑀡𑀯𑀲𑁂𑀦. 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀯𑀼𑀢𑁆𑀢𑀸 𑀯𑀻𑀲𑀢𑀺, 𑀦𑀯 𑀫𑀳𑀕𑁆𑀕𑀢𑀓𑀼𑀲𑀮𑀘𑁂𑀢𑀦𑀸 𑀘𑀸𑀢𑀺 𑀏𑀓𑀽𑀦𑀢𑀺𑀁𑀲 𑀫𑀦𑁄𑀲𑀜𑁆𑀘𑁂𑀢𑀦𑀸. ‘‘𑀓𑀼𑀲𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀏𑀓𑀘𑁆𑀘𑀸𑀦𑀁 𑀆𑀭𑀫𑁆𑀫𑀡𑀯𑀲𑁂𑀦𑀧𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀲𑀳𑀚𑀸𑀢𑀸𑀤𑀺𑀯𑀲𑁂𑀦𑀸𑀢𑀺 𑀲𑀳𑀚𑀸𑀢-𑀅𑀜𑁆𑀜𑀫𑀜𑁆𑀜-𑀦𑀺𑀲𑁆𑀲𑀬-𑀲𑀫𑁆𑀧𑀬𑀼𑀢𑁆𑀢-𑀅𑀢𑁆𑀣𑀺-𑀅𑀯𑀺𑀕𑀢𑀳𑁂𑀢𑀼𑀯𑀲𑁂𑀦, 𑀅𑀦𑀦𑁆𑀢𑀭𑀸𑀦𑀁 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀅𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀦𑀢𑁆𑀣𑀺𑀯𑀺𑀕𑀢𑀸𑀲𑁂𑀯𑀦𑀲𑁂𑀦 𑀧𑀘𑁆𑀘𑀬𑁄. 𑀅𑀧𑀺-𑀲𑀤𑁆𑀤𑁂𑀦 𑀉𑀧𑀦𑀺𑀲𑁆𑀲𑀬𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀲𑀗𑁆𑀔𑀸𑀭𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀯𑀺𑀚𑁆𑀚𑀸𑀯𑀸𑀭𑀯𑀡𑁆𑀡𑀦𑀸

𑁧𑁦𑁩. ‘‘𑀤𑀼𑀓𑁆𑀔𑀲𑀘𑁆𑀘𑁂𑀅𑀜𑁆𑀜𑀸𑀡’’𑀦𑁆𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀦𑁆𑀢𑀺 𑀅𑀜𑁆𑀜𑀸𑀡𑀁. 𑀲𑀢𑀺𑀧𑀺 𑀧𑀳𑀸𑀢𑀩𑁆𑀩𑀢𑁆𑀢𑁂 𑀧𑀭𑀺𑀜𑁆𑀜𑁂𑀬𑁆𑀬𑀢𑁆𑀢𑀯𑀲𑁂𑀦 𑀅𑀦𑁆𑀢𑁄𑀕𑀥𑀁. 𑀤𑀼𑀓𑁆𑀔𑀲𑀘𑁆𑀘𑀜𑁆𑀘𑀲𑁆𑀲𑀸𑀢𑀺 𑀯𑀢𑁆𑀣𑀼𑀲𑀗𑁆𑀔𑀸𑀢𑀁 𑀲𑀫𑁆𑀧𑀬𑀼𑀢𑁆𑀢𑀔𑀦𑁆𑀥𑀲𑀗𑁆𑀔𑀸𑀢𑀜𑁆𑀘 𑀤𑀼𑀓𑁆𑀔𑀲𑀘𑁆𑀘𑀁 𑀅𑀲𑁆𑀲 𑀅𑀜𑁆𑀜𑀸𑀡𑀲𑁆𑀲. 𑀢𑀁 𑀳𑀺𑀲𑁆𑀲 𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀲𑁆𑀲𑀸𑀢𑀺 𑀤𑀼𑀓𑁆𑀔𑀲𑀘𑁆𑀘𑀲𑁆𑀲. 𑀬𑀸𑀣𑀸𑀯𑀮𑀓𑁆𑀔𑀡𑀧𑀝𑀺𑀯𑁂𑀥𑀦𑀺𑀯𑀸𑀭𑀡𑁂𑀦𑀸𑀢𑀺 𑀲𑀗𑁆𑀔𑀢𑀅𑀯𑀺𑀧𑀭𑀻𑀢𑀲𑀪𑀸𑀯𑀧𑀝𑀺𑀯𑀺𑀚𑁆𑀛𑀦𑀲𑁆𑀲 𑀦𑀺𑀯𑀸𑀭𑀡𑁂𑀦. 𑀏𑀢𑁂𑀦𑀲𑁆𑀲 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀲𑀗𑁆𑀔𑀸𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀧𑀝𑀺𑀯𑁂𑀥𑀲𑁆𑀲 𑀯𑀺𑀩𑀦𑁆𑀥𑀓𑀪𑀸𑀯𑀫𑀸𑀳. 𑀜𑀸𑀡𑀧𑁆𑀧𑀯𑀢𑁆𑀢𑀺𑀬𑀸𑀢𑀺 ‘‘𑀇𑀤𑀁 𑀤𑀼𑀓𑁆𑀔𑀁, 𑀏𑀢𑁆𑀢𑀓𑀁 𑀤𑀼𑀓𑁆𑀔’’𑀦𑁆𑀢𑀺 ¶ 𑀅𑀦𑀼𑀩𑀼𑀚𑁆𑀛𑀦𑀸𑀓𑀸𑀭𑀸𑀬 𑀧𑀼𑀩𑁆𑀩𑀪𑀸𑀕𑀜𑀸𑀡𑀧𑁆𑀧𑀯𑀢𑁆𑀢𑀺𑀬𑀸. 𑀏𑀢𑁆𑀣𑀸𑀢𑀺 𑀤𑀼𑀓𑁆𑀔𑀲𑀘𑁆𑀘𑁂. 𑀅𑀧𑁆𑀧𑀤𑀸𑀦𑁂𑀦𑀸𑀢𑀺 𑀅𑀯𑀺𑀲𑁆𑀲𑀚𑁆𑀚𑀦𑁂𑀦. 𑀏𑀢𑁂𑀦𑀲𑁆𑀲𑀸 𑀅𑀦𑀼𑀩𑁄𑀥𑀜𑀸𑀡𑀲𑁆𑀲𑀧𑀺 𑀯𑀺𑀩𑀦𑁆𑀥𑀓𑀢𑀫𑀸𑀳.

𑀢𑀻𑀳𑀺 𑀓𑀸𑀭𑀡𑁂𑀳𑀺 𑀯𑁂𑀤𑀺𑀢𑀩𑁆𑀩𑀁 𑀅𑀦𑁆𑀢𑁄𑀕𑀥𑀸𑀪𑀸𑀯𑀢𑁄. 𑀇𑀥 𑀲𑀫𑁆𑀧𑀬𑀼𑀢𑁆𑀢𑀔𑀦𑁆𑀥𑀯𑀲𑁂𑀦𑁂𑀯 𑀯𑀢𑁆𑀣𑀼𑀢𑁄 𑀲𑀫𑀼𑀤𑀬𑁂 𑀅𑀜𑁆𑀜𑀸𑀡𑀁 𑀤𑀝𑁆𑀞𑀩𑁆𑀩𑀁. 𑀏𑀓𑁂𑀦𑁂𑀯𑀸𑀢𑀺 𑀇𑀢𑀭𑀁 𑀓𑀸𑀭𑀡𑀢𑁆𑀢𑀬𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀬𑀤𑀺𑀧𑀺 𑀅𑀜𑁆𑀜𑀸𑀡𑀁 𑀦𑀺𑀭𑁄𑀥𑀫𑀕𑁆𑀕𑁂 𑀆𑀭𑀫𑁆𑀫𑀡𑀁 𑀦 𑀓𑀭𑁄𑀢𑀺, 𑀓𑀼𑀢𑁄 𑀢𑀤𑀦𑁆𑀢𑁄𑀕𑀥𑀢𑀩𑁆𑀩𑀢𑁆𑀣𑀼𑀢𑀸, 𑀢𑁂 𑀧𑀦 𑀚𑀸𑀦𑀺𑀢𑀼𑀓𑀸𑀫𑀲𑁆𑀲 𑀢𑀧𑁆𑀧𑀝𑀺𑀘𑁆𑀙𑀸𑀤𑀦𑀯𑀲𑁂𑀦 𑀅𑀦𑀺𑀭𑁄𑀥𑀫𑀕𑁆𑀕𑁂𑀲𑀼 𑀦𑀺𑀭𑁄𑀥𑀫𑀕𑁆𑀕𑀕𑁆𑀕𑀸𑀳𑀳𑁂𑀢𑀼𑀢𑀸𑀯𑀲𑁂𑀦 𑀘 𑀧𑀯𑀢𑁆𑀢𑀫𑀸𑀦𑀁 ‘‘𑀦𑀺𑀭𑁄𑀥𑁂 𑀧𑀝𑀺𑀧𑀤𑀸𑀬𑀜𑁆𑀘 𑀅𑀜𑁆𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀧𑀝𑀺𑀘𑁆𑀙𑀸𑀤𑀦𑀢𑁄’’𑀢𑀺𑀆𑀤𑀺. 𑀢𑀲𑁆𑀲𑀢𑁆𑀣𑁄 𑀯𑀼𑀢𑁆𑀢𑁄𑀬𑁂𑀯. 𑀕𑀫𑁆𑀪𑀻𑀭𑀢𑁆𑀢𑀸𑀢𑀺 𑀲𑀪𑀸𑀯𑁂𑀦𑁂𑀯 𑀕𑀫𑁆𑀪𑀻𑀭𑀢𑁆𑀢𑀸. 𑀅𑀕𑀸𑀥𑀅𑀧𑀢𑀺𑀝𑁆𑀞𑀸𑀪𑀸𑀯𑁂𑀦 𑀢𑀁𑀯𑀺𑀲𑀬𑀲𑁆𑀲 𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀤𑀼𑀤𑁆𑀤𑀲𑀁. 𑀧𑀼𑀭𑀺𑀫𑀁 ¶ 𑀧𑀦 𑀲𑀘𑁆𑀘𑀤𑁆𑀯𑀬𑀁. 𑀯𑀜𑁆𑀘𑀦𑀻𑀬𑀝𑁆𑀞𑁂𑀦𑀸𑀢𑀺 𑀯𑀜𑁆𑀘𑀓𑀪𑀸𑀯𑁂𑀦 𑀅𑀬𑀸𑀣𑀸𑀯𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀢𑁄 𑀤𑀼𑀤𑁆𑀤𑀲𑀢𑁆𑀢𑀸 𑀕𑀫𑁆𑀪𑀻𑀭𑀁, 𑀦 𑀲𑀪𑀸𑀯𑀢𑁄, 𑀢𑀲𑁆𑀫𑀸 𑀢𑀁𑀯𑀺𑀲𑀬𑀁 𑀅𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀧𑀼𑀭𑀺𑀫𑀲𑀘𑁆𑀘𑀤𑁆𑀯𑀬𑁂 𑀅𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑀮𑀓𑁆𑀔𑀡𑀲𑁆𑀲 𑀤𑀼𑀤𑁆𑀤𑀲𑀢𑁆𑀢𑀸 𑀏𑀯 𑀦𑀺𑀘𑁆𑀘𑀸𑀤𑀺𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀧𑀯𑀢𑁆𑀢𑀢𑀺 𑀅𑀜𑁆𑀜𑀸𑀡𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀦𑀺𑀤𑁆𑀤𑁂𑀲𑀯𑀺𑀪𑀸𑀕𑁂𑀦𑀧𑀺 𑀅𑀯𑀺𑀚𑁆𑀚𑀸𑀬 𑀲𑀘𑁆𑀘𑁂𑀲𑀼 𑀧𑀯𑀢𑁆𑀢𑀺𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀼𑀓𑁆𑀔𑁂𑀢𑀺 𑀏𑀢𑁆𑀢𑀓𑁂𑀦 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁂𑀦. 𑀲𑀗𑁆𑀕𑀳𑀢𑁄𑀢𑀺 𑀧𑀭𑀺𑀜𑁆𑀜𑁂𑀬𑁆𑀬𑀢𑀸𑀬 𑀤𑀼𑀓𑁆𑀔𑁂𑀦 𑀲𑀗𑁆𑀕𑀳𑁂𑀢𑀩𑁆𑀩𑀢𑁄. 𑀢𑁂𑀦 𑀦𑀺𑀤𑁆𑀥𑀸𑀭𑀡𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀤𑀼𑀓𑁆𑀔𑀲𑁆𑀫𑀺𑀜𑁆𑀳𑀺 𑀅𑀯𑀺𑀚𑁆𑀚𑀸 𑀦𑀺𑀤𑁆𑀥𑀸𑀭𑀻𑀬𑀢𑀺, 𑀦 𑀅𑀜𑁆𑀜𑀲𑁆𑀫𑀺𑀁. 𑀯𑀢𑁆𑀣𑀼𑀢𑁄𑀢𑀺 𑀆𑀥𑀸𑀭𑀢𑁆𑀣𑀁. 𑀤𑀼𑀓𑁆𑀔𑀲𑀦𑁆𑀦𑀺𑀲𑁆𑀲𑀬𑀸 𑀳𑀺 𑀅𑀯𑀺𑀚𑁆𑀚𑀸. 𑀆𑀭𑀫𑁆𑀫𑀡𑀢𑁄𑀢𑀺 𑀯𑀺𑀲𑀬𑀢𑁆𑀣𑀁 𑀢𑀁 𑀆𑀭𑀩𑁆𑀪 𑀧𑀯𑀢𑁆𑀢𑀦𑀢𑁄. 𑀓𑀺𑀘𑁆𑀘𑀢𑁄𑀢𑀺 𑀩𑁆𑀬𑀸𑀧𑀦𑀢𑁆𑀣𑀁 𑀙𑀸𑀤𑀦𑀯𑀲𑁂𑀦 𑀢𑀁 𑀩𑁆𑀬𑀸𑀧𑁂𑀢𑁆𑀯𑀸 𑀧𑀯𑀢𑁆𑀢𑀦𑀢𑁄. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑁂𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀯𑀺𑀲𑁂𑀲𑀢𑁄𑀢𑀺 𑀯𑀺𑀲𑁂𑀲𑀸𑀪𑀸𑀯𑀢𑁄, 𑀯𑀼𑀢𑁆𑀢𑀦𑀬𑁂𑀦 𑀤𑀼𑀓𑁆𑀔𑀸𑀤𑀻𑀲𑀼 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑀁 𑀅𑀕𑁆𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀪𑀸𑀯𑀢𑁄𑀢𑀺 𑀲𑀭𑀲𑀮𑀓𑁆𑀔𑀡𑀢𑁄. 𑀘𑀢𑀼𑀦𑁆𑀦𑀫𑁆𑀧𑀺 𑀲𑀘𑁆𑀘𑀸𑀦𑀁 𑀅𑀚𑀸𑀦𑀦𑀲𑀪𑀸𑀯𑀸 𑀳𑀺 𑀅𑀯𑀺𑀚𑁆𑀚𑀸. 𑀓𑀸𑀫𑀭𑀸𑀕𑀪𑀯𑀭𑀸𑀕𑀸 𑀓𑀸𑀫𑀸𑀲𑀯𑀪𑀯𑀸𑀲𑀯𑀸𑀢𑀺 𑀆𑀳 ‘‘𑀲𑀳𑀚𑀸𑀢𑀸𑀤𑀺𑀯𑀲𑁂𑀦𑀸’’𑀢𑀺. 𑀦𑀦𑀼 𑀅𑀯𑀺𑀚𑁆𑀚𑀸 𑀏𑀯 𑀅𑀯𑀺𑀚𑁆𑀚𑀸𑀲𑀯𑁄, 𑀲𑁄 𑀓𑀣𑀁 𑀅𑀯𑀺𑀚𑁆𑀚𑀸𑀬 𑀧𑀘𑁆𑀘𑀬𑁄𑀢𑀺 𑀆𑀳 ‘‘𑀧𑀼𑀩𑁆𑀩𑀼𑀧𑁆𑀧𑀦𑁆𑀦𑀸’’𑀢𑀺𑀆𑀤𑀺.

𑀅𑀯𑀺𑀚𑁆𑀚𑀸𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀲𑀯𑀯𑀸𑀭𑀯𑀡𑁆𑀡𑀦𑀸

𑁧𑁦𑁪. 𑀆𑀲𑀯𑀯𑀸𑀭𑁂 ¶ 𑀆𑀲𑀯-𑀲𑀤𑁆𑀤𑀢𑁆𑀣𑁄 𑀆𑀲𑀯𑀯𑀺𑀘𑀸𑀭𑁄 𑀘 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄𑀬𑁂𑀯. 𑀓𑀲𑁆𑀫𑀸 𑀧𑀦𑀸𑀬𑀁 𑀯𑀸𑀭𑁄 𑀯𑀼𑀢𑁆𑀢𑁄, 𑀦𑀦𑀼 𑀅𑀯𑀺𑀚𑁆𑀚𑀸𑀤𑀺𑀓𑀸𑀯 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬 ‘‘𑀅𑀬𑀁 𑀯𑀸𑀭𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀤𑁂𑀲𑀽𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑁄𑀝𑁆𑀞𑀸𑀲𑁂𑀲𑀼. 𑀤𑁆𑀯𑀸𑀤𑀲𑀓𑁄𑀝𑁆𑀞𑀸𑀲𑀸 𑀳𑀺 𑀲𑀢𑁆𑀣𑀼 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀤𑁂𑀲𑀦𑀸. 𑀢𑀲𑁆𑀲𑀸𑀧𑀺 𑀧𑀘𑁆𑀘𑀬𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀦𑀸𑀬𑀁 𑀓𑀸𑀧𑀺𑀮𑀸𑀦𑀁 𑀫𑀽𑀮𑀧𑀓𑀢𑀺 𑀯𑀺𑀬 𑀅𑀧𑁆𑀧𑀘𑁆𑀘𑀬𑀸, 𑀅𑀣 𑀔𑁄 𑀲𑀧𑁆𑀧𑀘𑁆𑀘𑀬𑀸𑀢𑀺 𑀅𑀯𑀺𑀚𑁆𑀚𑀸𑀬𑀧𑀺 𑀧𑀘𑁆𑀘𑀬𑀤𑀲𑁆𑀲𑀦𑀯𑀲𑁂𑀦. 𑀆𑀲𑀯𑀲𑀫𑀼𑀤𑀬𑁂𑀦𑀸𑀢𑀺 𑀅𑀢𑀻𑀢𑀪𑀯𑁂 𑀆𑀲𑀯𑀸𑀦𑀁 𑀲𑀫𑀼𑀤𑀬𑁂𑀦 𑀏𑀢𑀭𑀳𑀺 𑀅𑀯𑀺𑀚𑁆𑀚𑀸𑀬 𑀲𑀫𑀼𑀤𑀬𑁄, 𑀏𑀢𑀭𑀳𑀺 𑀅𑀯𑀺𑀚𑁆𑀚𑀸𑀬 𑀲𑀫𑀼𑀤𑀬𑁂𑀦 𑀅𑀦𑀸𑀕𑀢𑁂 𑀆𑀲𑀯𑀲𑀫𑀼𑀤𑀬𑁄𑀢𑀺 𑀏𑀯𑀁 𑀆𑀲𑀯𑀸𑀯𑀺𑀚𑁆𑀚𑀸𑀦𑀁 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀓𑀪𑀸𑀯𑁂𑀦 𑀅𑀧𑀭𑀸𑀧𑀭𑀁 𑀧𑀯𑀢𑁆𑀢𑀫𑀸𑀦𑀁 𑀆𑀤𑀺𑀓𑁄𑀝𑀺𑀅𑀪𑀸𑀯𑁂𑀦𑁂𑀯 𑀢𑀦𑁆𑀦𑀺𑀫𑀺𑀢𑁆𑀢𑀲𑁆𑀲 𑀲𑀁𑀲𑀸𑀭𑀲𑁆𑀲 𑀆𑀤𑀺𑀓𑁄𑀝𑀺𑀅𑀪𑀸𑀯𑀢𑁄 𑀅𑀦𑀫𑀢𑀕𑁆𑀕𑀢𑀸𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸.

𑀤𑁆𑀯𑀢𑁆𑀢𑀺𑀁𑀲 ¶ 𑀞𑀸𑀦𑀸𑀦𑀻𑀢𑀺 𑀤𑁆𑀯𑀢𑁆𑀢𑀺𑀁𑀲 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀓𑀸𑀭𑀡𑀸𑀦𑀺, 𑀤𑁆𑀯𑀢𑁆𑀢𑀺𑀁𑀲 𑀯𑀸 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀸𑀦𑀺. 𑀇𑀫𑀫𑁆𑀳𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑀸𑀢𑀺 𑀬𑀸𑀬 𑀅𑀭𑀺𑀬𑀲𑀸𑀯𑀓𑁄 𑀲𑀫𑁆𑀫𑀸𑀤𑀺𑀝𑁆𑀞𑀺 𑀦𑀸𑀫 𑀳𑁄𑀢𑀺, 𑀲𑀸 𑀅𑀭𑀺𑀬𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀏𑀢𑁆𑀣 𑀯𑀼𑀢𑁆𑀢𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑀁, 𑀇𑀢𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑀢𑁄.

𑀘𑀢𑀼𑀲𑀘𑁆𑀘𑀧𑀭𑀺𑀬𑀸𑀬𑁂𑀳𑀻𑀢𑀺 𑀘𑀢𑀼𑀲𑀘𑁆𑀘𑀸𑀥𑀺𑀕𑀫𑀓𑀸𑀭𑀡𑁂𑀳𑀺. 𑀅𑀭𑀳𑀢𑁆𑀢𑀧𑀭𑀺𑀬𑀸𑀬𑁂𑀳𑀻𑀢𑀺 ‘‘𑀲𑁄 𑀲𑀩𑁆𑀩𑀲𑁄 𑀭𑀸𑀕𑀸𑀦𑀼𑀲𑀬𑀁 𑀧𑀳𑀸𑀬𑀸’’𑀢𑀺𑀆𑀤𑀺𑀦𑀸 𑀅𑀭𑀳𑀢𑁆𑀢𑀸𑀥𑀺𑀕𑀫𑀓𑀸𑀭𑀡𑁂𑀳𑀺. 𑀢𑁂𑀦𑀸𑀳 ‘‘𑀘𑀢𑀼𑀲𑀝𑁆𑀞𑀺𑀬𑀸 𑀓𑀸𑀭𑀡𑁂𑀳𑀻’’𑀢𑀺.

𑀆𑀲𑀯𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁧𑁦. 𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁫. 𑀚𑀸𑀦𑀧𑀤𑀺𑀦𑁄𑀢𑀺 ¶ (𑀤𑀻. 𑀦𑀺. 𑀝𑀻. 𑁨.𑁯𑁫) 𑀚𑀦𑀧𑀤𑀯𑀦𑁆𑀢𑁄, 𑀚𑀦𑀧𑀤𑀲𑁆𑀲 𑀯𑀸 𑀇𑀲𑁆𑀲𑀭𑀸 𑀭𑀸𑀚𑀓𑀼𑀫𑀸𑀭𑀸. 𑀕𑁄𑀢𑁆𑀢𑀯𑀲𑁂𑀦 𑀓𑀼𑀭𑀽 𑀦𑀸𑀫. 𑀢𑁂𑀲𑀁 𑀦𑀺𑀯𑀸𑀲𑁄 𑀬𑀤𑀺 𑀏𑀓𑁄 𑀚𑀦𑀧𑀤𑁄, 𑀓𑀣𑀁 𑀩𑀳𑀼𑀯𑀘𑀦𑀦𑁆𑀢𑀺 𑀆𑀳 ‘‘𑀭𑀼𑀴𑁆𑀳𑀻𑀲𑀤𑁆𑀤𑁂𑀦𑀸’’𑀢𑀺. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀳𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀬𑀼𑀢𑁆𑀢𑁂 𑀯𑀺𑀬 𑀲𑀮𑀺𑀗𑁆𑀕𑀯𑀘𑀦𑀸𑀦𑀺 (𑀧𑀸𑀡𑀺𑀦𑀺 𑁧.𑁨𑁫𑁧) 𑀇𑀘𑁆𑀙𑀦𑁆𑀢𑀺, 𑀅𑀬𑀫𑁂𑀢𑁆𑀣 𑀭𑀼𑀴𑁆𑀳𑀻 𑀬𑀣𑀸 ¶ 𑀅𑀜𑁆𑀜𑀢𑁆𑀣𑀸𑀧𑀺 ‘‘𑀅𑀗𑁆𑀕𑁂𑀲𑀼 𑀯𑀺𑀳𑀭𑀢𑀺, 𑀫𑀮𑁆𑀮𑁂𑀲𑀼 𑀯𑀺𑀳𑀭𑀢𑀻’’𑀢𑀺 𑀘. 𑀢𑀩𑁆𑀩𑀺𑀲𑁂𑀲𑀦𑁂 𑀧𑀦 𑀚𑀦𑀧𑀤-𑀲𑀤𑁆𑀤𑁂 𑀚𑀸𑀢𑀺-𑀲𑀤𑁆𑀤𑁂 𑀏𑀓𑀯𑀘𑀦𑀫𑁂𑀯. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀧𑀦𑀸𑀢𑀺 𑀧𑀦-𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀚𑁄𑀢𑀦𑁄. 𑀢𑁂𑀦 𑀧𑀼𑀣𑀼𑀅𑀢𑁆𑀣𑀯𑀺𑀲𑀬𑀢𑀸𑀬 𑀏𑀯𑀁 𑀢𑀁 𑀩𑀳𑀼𑀯𑀘𑀦𑀦𑁆𑀢𑀺 ‘‘𑀩𑀳𑀼𑀓𑁂 𑀧𑀦𑀸’’𑀢𑀺𑀆𑀤𑀺𑀦𑀸 𑀯𑀓𑁆𑀔𑀫𑀸𑀦𑀁 𑀯𑀺𑀲𑁂𑀲𑀁 𑀤𑀻𑀧𑁂𑀢𑀺. 𑀲𑀼𑀢𑁆𑀯𑀸𑀢𑀺 𑀫𑀦𑁆𑀥𑀸𑀢𑀼𑀫𑀳𑀸𑀭𑀸𑀚𑀲𑁆𑀲 𑀆𑀦𑀼𑀪𑀸𑀯𑀤𑀲𑁆𑀲𑀦𑀸𑀦𑀼𑀲𑀸𑀭𑁂𑀦 𑀧𑀭𑀫𑁆𑀧𑀭𑀸𑀕𑀢𑀁 𑀓𑀣𑀁 𑀲𑀼𑀢𑁆𑀯𑀸. 𑀅𑀦𑀼𑀲𑀁𑀬𑀸𑀬𑀦𑁆𑀢𑁂𑀦𑀸𑀢𑀺 𑀅𑀦𑀼𑀯𑀺𑀘𑀭𑀦𑁆𑀢𑁂𑀦. 𑀏𑀢𑁂𑀲𑀁 𑀞𑀸𑀦𑀦𑁆𑀢𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀫𑀼𑀔𑁂𑀦 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀪𑀯𑀦𑀫𑀸𑀳. 𑀢𑁂𑀦𑀸𑀳 ‘‘𑀢𑀢𑁆𑀣 𑀅𑀕𑀫𑀸𑀲𑀻’’𑀢𑀺𑀆𑀤𑀺. 𑀲𑁄𑀢𑀺 𑀫𑀦𑁆𑀥𑀸𑀢𑀼𑀫𑀳𑀸𑀭𑀸𑀚𑀸. 𑀢𑀦𑁆𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀭𑀚𑁆𑀚𑀁. 𑀕𑀳𑁂𑀢𑁆𑀯𑀸𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸. 𑀧𑀼𑀦 𑀧𑀼𑀘𑁆𑀙𑀺 𑀧𑀭𑀺𑀡𑀸𑀬𑀓𑀭𑀢𑀦𑀁. 𑀤𑁄𑀯𑀸𑀭𑀺𑀓𑀪𑀽𑀫𑀺𑀬𑀁 𑀢𑀺𑀝𑁆𑀞𑀦𑁆𑀢𑀺 𑀲𑀼𑀥𑀫𑁆𑀫𑀸𑀬 𑀤𑁂𑀯𑀲𑀪𑀸𑀬 𑀤𑁂𑀯𑀧𑀼𑀭𑀲𑁆𑀲 𑀘 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀆𑀭𑀓𑁆𑀔𑀸𑀬 𑀅𑀥𑀺𑀓𑀢𑀢𑁆𑀢𑀸. 𑀤𑀺𑀩𑁆𑀩𑀭𑀼𑀓𑁆𑀔𑀲𑀳𑀲𑁆𑀲𑀧𑀝𑀺𑀫𑀡𑁆𑀟𑀺𑀢𑀦𑁆𑀢𑀺 𑀇𑀤𑀁 ‘‘𑀘𑀺𑀢𑁆𑀢𑀮𑀢𑀸𑀯𑀦’’𑀦𑁆𑀢𑀺𑀆𑀤𑀻𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑀁.

𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀲𑀻𑀢𑀺 𑀪𑀲𑁆𑀲𑀺𑀢𑁆𑀯𑀸 𑀧𑀣𑀯𑀺𑀬𑀸 𑀆𑀲𑀦𑁆𑀦𑁂 𑀞𑀸𑀦𑁂 𑀅𑀝𑁆𑀞𑀸𑀲𑀺, 𑀞𑀢𑁆𑀯𑀸 𑀘 𑀦𑀘𑀺𑀭𑀲𑁆𑀲𑁂𑀯 𑀅𑀦𑁆𑀢𑀭𑀥𑀸𑀬𑀺 𑀢𑁂𑀦𑀢𑁆𑀢𑀪𑀸𑀯𑁂𑀦 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲𑀭𑀺𑀬𑀲𑁆𑀲 𑀅𑀪𑀸𑀯𑀢𑁄. ‘‘𑀘𑀺𑀭𑀢𑀭𑀁 𑀓𑀸𑀮𑀁 𑀞𑀢𑁆𑀯𑀸’’𑀢𑀺 𑀅𑀧𑀭𑁂. 𑀤𑁂𑀯𑀪𑀸𑀯𑁄 𑀧𑀸𑀢𑀼𑀭𑀳𑁄𑀲𑀺 𑀤𑁂𑀯𑀮𑁄𑀓𑁂 𑀧𑀯𑀢𑁆𑀢𑀺𑀯𑀺𑀧𑀸𑀓𑀤𑀸𑀬𑀺𑀦𑁄 𑀅𑀧𑀭𑀸𑀧𑀭𑀺𑀬𑀸𑀬𑀯𑁂𑀤𑀦𑀻𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑁄𑀓𑀸𑀲𑀢𑁆𑀢𑀸. 𑀅𑀯𑀬𑀯𑁂 𑀲𑀺𑀤𑁆𑀥𑁄 𑀯𑀺𑀲𑁂𑀲𑁄 𑀲𑀫𑀼𑀤𑀸𑀬𑀲𑁆𑀲 𑀯𑀺𑀲𑁂𑀲𑀓𑁄 𑀳𑁄𑀢𑀻𑀢𑀺 𑀏𑀓𑀫𑁆𑀧𑀺 𑀭𑀝𑁆𑀞𑀁 𑀩𑀳𑀼𑀯𑀘𑀦𑁂𑀦 𑀯𑁄𑀳𑀭𑀻𑀬𑀢𑀺.

𑀤-𑀓𑀸𑀭𑁂𑀦 𑀅𑀢𑁆𑀣𑀁 𑀯𑀡𑁆𑀡𑀬𑀦𑁆𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀓𑀫𑁆𑀫𑀸𑀲𑁄𑀢𑀺 𑀓𑀫𑁆𑀫𑀸𑀲𑀧𑀸𑀤𑁄 𑀯𑀼𑀘𑁆𑀘𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀬𑀣𑀸 ‘‘𑀭𑀽𑀧𑀪𑀯𑁄 𑀭𑀽𑀧’’𑀦𑁆𑀢𑀺. 𑀓𑀣𑀁 𑀧𑀦 𑀲𑁄 𑀓𑀫𑁆𑀫𑀸𑀲𑀧𑀸𑀤𑁄𑀢𑀺 𑀆𑀳 ‘‘𑀢𑀲𑁆𑀲 𑀓𑀺𑀭𑀸’’𑀢𑀺𑀆𑀤𑀺. 𑀤𑀫𑀺𑀢𑁄𑀢𑀺 𑀏𑀢𑁆𑀣 𑀓𑀻𑀤𑀺𑀲𑀁 𑀤𑀫𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀧𑁄𑀭𑀺𑀲𑀸𑀤𑀪𑀸𑀯𑀢𑁄 𑀧𑀝𑀺𑀲𑁂𑀥𑀺𑀢𑁄’’𑀢𑀺. 𑀇𑀫𑁂 𑀧𑀦 𑀣𑁂𑀭𑀸𑀢𑀺 𑀫𑀚𑁆𑀛𑀺𑀫𑀪𑀸𑀡𑀓𑁂 𑀯𑀤𑀢𑀺, 𑀢𑁂 𑀧𑀦 𑀘𑀽𑀴𑀓𑀫𑁆𑀫𑀸𑀲𑀤𑀫𑁆𑀫𑀁 𑀲𑀦𑁆𑀥𑀸𑀬 𑀢𑀣𑀸 𑀯𑀤𑀦𑁆𑀢𑀺. 𑀬𑀓𑁆𑀔𑀺𑀦𑀺𑀧𑀼𑀢𑁆𑀢𑁄 𑀳𑀺 𑀓𑀫𑁆𑀫𑀸𑀲𑀧𑀸𑀤𑁄 𑀅𑀮𑀻𑀦𑀲𑀢𑁆𑀢𑀼𑀓𑀼𑀫𑀸𑀭𑀓𑀸𑀮𑁂 𑀩𑁄𑀥𑀺𑀲𑀢𑁆𑀢𑁂𑀦 𑀢𑀢𑁆𑀣 𑀤𑀫𑀺𑀢𑁄, 𑀲𑀼𑀢𑀲𑁄𑀫𑀓𑀸𑀮𑁂 ¶ 𑀧𑀦 𑀩𑀸𑀭𑀸𑀡𑀲𑀺𑀭𑀸𑀚𑀸 𑀧𑁄𑀭𑀺𑀲𑀸𑀤𑀪𑀸𑀯𑀧𑀝𑀺𑀲𑁂𑀥𑀦𑁂𑀦 𑀬𑀢𑁆𑀣 𑀤𑀫𑀺𑀢𑁄, 𑀢𑀁 𑀫𑀳𑀸𑀓𑀫𑁆𑀫𑀸𑀲𑀤𑀫𑁆𑀫𑀁 𑀦𑀸𑀫. 𑀧𑀼𑀢𑁆𑀢𑁄𑀢𑀺 𑀯𑀢𑁆𑀯𑀸 𑀅𑀢𑁆𑀭𑀚𑁄𑀢𑀺 𑀯𑀘𑀦𑀁 𑀑𑀭𑀲𑀧𑀼𑀢𑁆𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁.

𑀬𑁂𑀳𑀺 𑀆𑀯𑀲𑀺𑀢𑀧𑀤𑁂𑀲𑁄 𑀓𑀼𑀭𑀼𑀭𑀝𑁆𑀞𑀦𑁆𑀢𑀺 𑀦𑀸𑀫𑀁 𑀮𑀪𑀺, 𑀢𑁂 𑀉𑀢𑁆𑀢𑀭𑀓𑀼𑀭𑀼𑀢𑁄 𑀆𑀕𑀢𑀸 𑀫𑀦𑀼𑀲𑁆𑀲𑀸 𑀢𑀢𑁆𑀣 𑀭𑀓𑁆𑀔𑀺𑀢𑀦𑀺𑀬𑀸𑀫𑁂𑀦𑁂𑀯 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀺𑀁𑀲𑀼, 𑀢𑁂𑀲𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀬𑀸 ¶ 𑀧𑀘𑁆𑀙𑀺𑀫𑀸 𑀚𑀦𑀢𑀸𑀢𑀺, 𑀲𑁄 𑀤𑁂𑀲𑀥𑀫𑁆𑀫𑀯𑀲𑁂𑀦 𑀅𑀯𑀺𑀘𑁆𑀙𑁂𑀤𑀢𑁄 𑀯𑀢𑁆𑀢𑀫𑀸𑀦𑁄 𑀓𑀼𑀭𑀼𑀯𑀢𑁆𑀢𑀥𑀫𑁆𑀫𑁄𑀢𑀺 𑀧𑀜𑁆𑀜𑀸𑀬𑀺𑀢𑁆𑀣, 𑀅𑀬𑀜𑁆𑀘 𑀅𑀢𑁆𑀣𑁄 𑀓𑀼𑀭𑀼𑀥𑀫𑁆𑀫𑀚𑀸𑀢𑀓𑁂𑀦 (𑀚𑀸. 𑁧.𑁩.𑁭𑁬-𑁭𑁮) 𑀤𑀻𑀧𑁂𑀢𑀩𑁆𑀩𑁄. 𑀲𑁄 𑀅𑀧𑀭𑀪𑀸𑀕𑁂 𑀬𑀢𑁆𑀣 𑀧𑀞𑀫𑀁 𑀲𑀁𑀓𑀺𑀮𑀺𑀝𑁆𑀞𑁄 𑀚𑀸𑀢𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀼𑀭𑀼𑀭𑀝𑁆𑀞𑀯𑀸𑀲𑀻𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀢𑁆𑀣 𑀪𑀕𑀯𑀢𑁄 𑀯𑀲𑀦𑁄𑀓𑀸𑀲𑁄 𑀓𑁄𑀘𑀺 𑀯𑀺𑀳𑀸𑀭𑁄 𑀦 𑀳𑁄𑀢𑀺, 𑀢𑀢𑁆𑀣 𑀓𑁂𑀯𑀮𑀁 𑀕𑁄𑀘𑀭𑀕𑀸𑀫𑀓𑀺𑀢𑁆𑀢𑀦𑀁 𑀦𑀺𑀤𑀸𑀦𑀓𑀣𑀸𑀬 𑀧𑀓𑀢𑀺, 𑀬𑀣𑀸 𑀢𑀁𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀤𑁂𑀯𑀤𑀳𑀁 𑀦𑀸𑀫 𑀲𑀓𑁆𑀓𑀸𑀦𑀁 𑀦𑀺𑀕𑀫𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀯𑀲𑀦𑁄𑀓𑀸𑀲𑀢𑁄’’𑀢𑀺𑀆𑀤𑀺𑀫𑀸𑀳.

𑀉𑀤𑁆𑀤𑁂𑀲𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁧𑁦𑁬. 𑀓𑀲𑁆𑀫𑀸 𑀪𑀕𑀯𑀸 𑀇𑀫𑀁 𑀲𑀼𑀢𑁆𑀢𑀫𑀪𑀸𑀲𑀻𑀢𑀺 𑀅𑀲𑀸𑀥𑀸𑀭𑀡𑀲𑀫𑀼𑀝𑁆𑀞𑀸𑀦𑀁 𑀧𑀼𑀘𑁆𑀙𑀢𑀺, 𑀲𑀸𑀥𑀸𑀭𑀡𑀁 𑀧𑀦 𑀧𑀸𑀓𑀝𑀦𑁆𑀢𑀺 𑀅𑀦𑀸𑀫𑀝𑁆𑀞𑀁, 𑀢𑁂𑀦 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄 𑀧𑀼𑀘𑁆𑀙𑀺𑀢𑁄𑀢𑀺 𑀓𑀢𑁆𑀯𑀸 𑀇𑀢𑀭𑁄 ‘‘𑀓𑀼𑀭𑀼𑀭𑀝𑁆𑀞𑀯𑀸𑀲𑀻𑀦’’𑀦𑁆𑀢𑀺𑀆𑀤𑀺𑀦𑀸 𑀅𑀧𑀭𑀚𑁆𑀛𑀸𑀲𑀬𑁄𑀬𑀁 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁂𑀦 𑀩𑀸𑀳𑀺𑀭𑀲𑀫𑀼𑀝𑁆𑀞𑀸𑀦𑀁 𑀯𑀺𑀪𑀸𑀯𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀚𑁆𑀛𑀢𑁆𑀢𑀺𑀓𑀁 𑀧𑀦 𑀅𑀲𑀸𑀥𑀸𑀭𑀡𑀜𑁆𑀘 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀸𑀤𑀺𑀝𑀻𑀓𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀓𑀼𑀭𑀼𑀭𑀝𑁆𑀞𑀁 𑀓𑀺𑀭 (𑀤𑀻. 𑀦𑀺. 𑀝𑀻. 𑁨.𑁩𑁭𑁩) 𑀢𑀤𑀸 𑀢𑀦𑁆𑀦𑀺𑀯𑀸𑀲𑀻𑀦𑀁 𑀲𑀢𑁆𑀢𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀦𑁆𑀢𑀢𑀸𑀬 𑀧𑀼𑀩𑁆𑀩𑁂 𑀘 𑀓𑀢𑀧𑀼𑀜𑁆𑀜𑀢𑀸𑀩𑀮𑁂𑀦 𑀉𑀢𑀼𑀆𑀤𑀺𑀲𑀫𑁆𑀧𑀦𑁆𑀦𑀫𑁂𑀯 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀢𑀼𑀧𑀘𑁆𑀘𑀬𑀸𑀤𑀺𑀲𑀫𑁆𑀧𑀦𑁆𑀦𑀢𑁆𑀢𑀸’’𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀪𑁄𑀚𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀓𑁂𑀘𑀺 𑀧𑀦 ‘‘𑀧𑀼𑀩𑁆𑀩𑁂 𑀓𑀼𑀭𑀼𑀯𑀢𑁆𑀢𑀥𑀫𑁆𑀫𑀸𑀦𑀼𑀝𑁆𑀞𑀸𑀦𑀯𑀸𑀲𑀦𑀸𑀬 𑀉𑀢𑁆𑀢𑀭𑀓𑀼𑀭𑀼 𑀯𑀺𑀬 𑀬𑁂𑀪𑀼𑀬𑁆𑀬𑁂𑀦 𑀉𑀢𑀼𑀆𑀤𑀺𑀲𑀫𑁆𑀧𑀦𑁆𑀦𑀫𑁂𑀯 𑀳𑁄𑀦𑁆𑀢𑀁 𑀪𑀕𑀯𑀢𑁄 𑀓𑀸𑀮𑁂 𑀲𑀸𑀢𑀺𑀲𑀬𑀁 𑀉𑀢𑀼𑀲𑀧𑁆𑀧𑀸𑀬𑀸𑀤𑀺𑀬𑀼𑀢𑁆𑀢𑀁 𑀢𑀁 𑀭𑀝𑁆𑀞𑀁 𑀅𑀳𑁄𑀲𑀻’’𑀢𑀺 𑀯𑀤𑀦𑁆𑀢𑀺. 𑀘𑀺𑀢𑁆𑀢𑀲𑀭𑀻𑀭𑀓𑀮𑁆𑀮𑀢𑀸𑀬𑀸𑀢𑀺 𑀘𑀺𑀢𑁆𑀢𑀲𑁆𑀲 𑀲𑀭𑀻𑀭𑀲𑁆𑀲 𑀘 𑀅𑀭𑁄𑀕𑀢𑀸𑀬. 𑀅𑀦𑀼𑀕𑁆𑀕𑀳𑀺𑀢𑀧𑀜𑁆𑀜𑀸𑀩𑀮𑀸𑀢𑀺 𑀮𑀤𑁆𑀥𑀼𑀧𑀓𑀸𑀭𑀜𑀸𑀡𑀸𑀦𑀼𑀪𑀸𑀯𑀸, 𑀅𑀦𑀼 𑀅𑀦𑀼 𑀯𑀸 𑀆𑀘𑀺𑀡𑁆𑀡𑀧𑀜𑁆𑀜𑀸𑀢𑁂𑀚𑀸. 𑀏𑀓𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀽𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀘𑀼𑀤𑁆𑀤𑀲𑀲𑀼𑀞𑀸𑀦𑁂𑀲𑀼, 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀏𑀓𑀲𑁆𑀫𑀺𑀁 𑀞𑀸𑀦𑁂, 𑀢𑀣𑀸 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦, 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀧𑀜𑁆𑀘𑀲𑀼 𑀞𑀸𑀦𑁂𑀲𑀽𑀢𑀺 𑀏𑀯𑀁 𑀏𑀓𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼. 𑀓𑀫𑁆𑀫𑀝𑁆𑀞𑀸𑀦𑀁 𑀅𑀭𑀳𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀁 𑀬𑀣𑀸 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑀺, 𑀏𑀯𑀁 𑀤𑁂𑀲𑀦𑀸𑀯𑀲𑁂𑀦 𑀅𑀭𑀳𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸. 𑀲𑀼𑀯𑀡𑁆𑀡𑀘𑀗𑁆𑀓𑁄𑀝𑀓𑀲𑀼𑀯𑀡𑁆𑀡𑀫𑀜𑁆𑀚𑀽𑀲𑀸𑀲𑀼 𑀧𑀓𑁆𑀔𑀺𑀢𑁆𑀢𑀸𑀦𑀺 𑀲𑀼𑀫𑀦𑀘𑀫𑁆𑀧𑀓𑀸𑀤𑀺𑀦𑀸𑀦𑀸𑀧𑀼𑀧𑁆𑀨𑀸𑀦𑀺 𑀫𑀡𑀺𑀧𑀼𑀢𑁆𑀢𑀸𑀤𑀺𑀲𑀢𑁆𑀢𑀭𑀢𑀦𑀸𑀦𑀺 𑀘 𑀬𑀣𑀸 𑀪𑀸𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀲𑀯𑀺𑀲𑁂𑀲𑀁 𑀲𑁄𑀪𑀦𑁆𑀢𑀺, 𑀓𑀺𑀘𑁆𑀘𑀓𑀭𑀸𑀦𑀺 ¶ 𑀘 𑀳𑁄𑀦𑁆𑀢𑀺 𑀫𑀦𑀼𑀜𑁆𑀜𑀸𑀪𑀸𑀯𑀢𑁄, 𑀏𑀯𑀁 𑀲𑀻𑀮𑀤𑀲𑁆𑀲𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀪𑀸𑀚𑀦𑀯𑀺𑀲𑁂𑀲𑀪𑀽𑀢𑀸𑀬 𑀓𑀼𑀭𑀼𑀭𑀝𑁆𑀞𑀯𑀸𑀲𑀺𑀧𑀭𑀺𑀲𑀸𑀬 𑀤𑁂𑀲𑀺𑀢𑀸 ¶ 𑀘 𑀪𑀕𑀯𑀢𑁄 𑀅𑀬𑀁 𑀤𑁂𑀲𑀦𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀲𑁄𑀪𑀢𑀺, 𑀓𑀺𑀘𑁆𑀘𑀓𑀸𑀭𑀻 𑀘 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀬𑀣𑀸 𑀳𑀺 𑀧𑀼𑀭𑀺𑀲𑁄’’𑀢𑀺𑀆𑀤𑀺𑀦𑀸. 𑀏𑀢𑁆𑀣𑀸𑀢𑀺 𑀓𑀼𑀭𑀼𑀭𑀝𑁆𑀞𑁂.

𑀧𑀓𑀢𑀺𑀬𑀸𑀢𑀺 𑀲𑀭𑀲𑀢𑁄, 𑀇𑀫𑀺𑀲𑁆𑀲𑀸 𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀤𑁂𑀲𑀦𑀸𑀬 𑀧𑀼𑀩𑁆𑀩𑁂𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺 𑀲𑀢𑁆𑀣𑀼 𑀤𑁂𑀲𑀦𑀸𑀦𑀼𑀲𑀸𑀭𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀲𑁆𑀲𑀝𑁆𑀞𑀅𑀢𑁆𑀢𑀪𑀸𑀯𑀦𑀸𑀢𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀓𑀺𑀲𑁆𑀫𑀺𑀜𑁆𑀘𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂 𑀘𑀺𑀢𑁆𑀢𑀁 𑀅𑀦𑀺𑀬𑁄𑀚𑁂𑀢𑁆𑀯𑀸 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑁂 𑀅𑀪𑀺𑀭𑀢𑀺𑀯𑀲𑁂𑀦 𑀯𑀺𑀲𑁆𑀲𑀝𑁆𑀞𑀘𑀺𑀢𑁆𑀢𑁂𑀦 𑀪𑀯𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀧𑀫𑀸𑀤𑀯𑀺𑀳𑀸𑀭𑀁 𑀧𑀳𑀸𑀬 𑀅𑀧𑁆𑀧𑀫𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀓𑀸𑀬𑀦𑁄𑀢𑀺 𑀏𑀢𑁆𑀣 𑀅𑀬𑀦-𑀲𑀤𑁆𑀤𑁄 𑀫𑀕𑁆𑀕𑀧𑀭𑀺𑀬𑀸𑀬𑁄. 𑀦 𑀓𑁂𑀯𑀮𑀫𑀬𑀦𑀫𑁂𑀯, 𑀅𑀣 𑀔𑁄 𑀅𑀜𑁆𑀜𑁂𑀧𑀺 𑀩𑀳𑀽 𑀫𑀕𑁆𑀕𑀧𑀭𑀺𑀬𑀸𑀬𑀸𑀢𑀺 𑀧𑀤𑀼𑀤𑁆𑀥𑀸𑀭𑀁 𑀓𑀭𑁄𑀦𑁆𑀢𑁄 ‘‘𑀫𑀕𑁆𑀕𑀲𑁆𑀲 𑀳𑀻’’𑀢𑀺𑀆𑀤𑀺 𑀯𑀢𑁆𑀯𑀸 𑀬𑀤𑀺 𑀫𑀕𑁆𑀕𑀧𑀭𑀺𑀬𑀸𑀬𑁄 𑀅𑀬𑀦-𑀲𑀤𑁆𑀤𑁄, 𑀓𑀲𑁆𑀫𑀸 𑀧𑀼𑀦 𑀫𑀕𑁆𑀕𑁄𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀢𑀢𑁆𑀣 𑀏𑀓𑀫𑀕𑁆𑀕𑁄𑀢𑀺 𑀏𑀓𑁄 𑀏𑀯 𑀫𑀕𑁆𑀕𑁄. 𑀦 𑀳𑀺 𑀦𑀺𑀩𑁆𑀩𑀸𑀦𑀕𑀸𑀫𑀻 𑀫𑀕𑁆𑀕𑁄 𑀅𑀜𑁆𑀜𑁄 𑀅𑀢𑁆𑀣𑀻𑀢𑀺. 𑀦𑀦𑀼 𑀲𑀢𑀺𑀧𑀝𑁆𑀞𑀸𑀦𑀁 𑀇𑀥 ‘‘𑀫𑀕𑁆𑀕𑁄’’𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀢𑀤𑀜𑁆𑀜𑁂 𑀘 𑀩𑀳𑀽 𑀫𑀕𑁆𑀕𑀥𑀫𑁆𑀫𑀸 𑀅𑀢𑁆𑀣𑀻𑀢𑀺? 𑀲𑀘𑁆𑀘𑀁 𑀅𑀢𑁆𑀣𑀺, 𑀢𑁂 𑀧𑀦 𑀲𑀢𑀺𑀧𑀝𑁆𑀞𑀸𑀦𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀸 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀢𑀣𑀸 𑀳𑀺 𑀜𑀸𑀡𑀯𑀻𑀭𑀺𑀬𑀸𑀤𑀬𑁄 𑀦𑀺𑀤𑁆𑀤𑁂𑀲𑁂 𑀕𑀳𑀺𑀢𑀸. 𑀉𑀤𑁆𑀤𑁂𑀲𑁂 𑀧𑀦 𑀲𑀢𑀺𑀬𑀸 𑀏𑀯 𑀕𑀳𑀡𑀁 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀤𑁆𑀯𑁂𑀥𑀸𑀧𑀣𑀪𑀽𑀢𑁄𑀢𑀺 𑀇𑀫𑀺𑀦𑀸 𑀇𑀫𑀲𑁆𑀲 𑀫𑀕𑁆𑀕𑀲𑁆𑀲 𑀅𑀦𑁂𑀓𑀫𑀕𑁆𑀕𑀢𑀸𑀪𑀸𑀯𑀁 𑀯𑀺𑀬 𑀅𑀦𑀺𑀩𑁆𑀩𑀸𑀦𑀕𑀸𑀫𑀺𑀪𑀸𑀯𑀸𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀺. 𑀏𑀓𑁂𑀦𑀸𑀢𑀺 𑀅𑀲𑀳𑀸𑀬𑁂𑀦. 𑀅𑀲𑀳𑀸𑀬𑀢𑀸 𑀘 𑀤𑀼𑀯𑀺𑀥𑀸 𑀅𑀢𑁆𑀢𑀤𑀼𑀢𑀺𑀬𑀢𑀸𑀪𑀸𑀯𑁂𑀦 𑀯𑀸, 𑀬𑀸 ‘‘𑀯𑀽𑀧𑀓𑀝𑁆𑀞𑀓𑀸𑀬𑀢𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀡𑁆𑀳𑀸𑀤𑀼𑀢𑀺𑀬𑀢𑀸𑀪𑀸𑀯𑁂𑀦 𑀯𑀸, 𑀬𑀸 ‘‘𑀧𑀯𑀺𑀯𑀺𑀢𑁆𑀢𑀘𑀺𑀢𑁆𑀢𑀢𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀯𑀽𑀧𑀓𑀝𑁆𑀞𑁂𑀦 𑀧𑀯𑀺𑀯𑀺𑀢𑁆𑀢𑀘𑀺𑀢𑁆𑀢𑁂𑀦𑀸’’𑀢𑀺. 𑀲𑁂𑀝𑁆𑀞𑁄𑀧𑀺 𑀮𑁄𑀓𑁂 ‘‘𑀏𑀓𑁄’’𑀢𑀺 𑀯𑀼𑀘𑁆𑀘𑀢𑀺 ‘‘𑀬𑀸𑀯 𑀧𑀭𑁂 𑀏𑀓𑀢𑁄 𑀓𑀭𑁄𑀲𑀻’’𑀢𑀺𑀆𑀤𑀻𑀲𑀽𑀢𑀺 𑀆𑀳 ‘‘𑀏𑀓𑀲𑁆𑀲𑀸𑀢𑀺 𑀲𑁂𑀝𑁆𑀞𑀲𑁆𑀲𑀸’’𑀢𑀺. 𑀬𑀤𑀺 𑀲𑀁𑀲𑀸𑀭𑀢𑁄 𑀦𑀺𑀲𑁆𑀲𑀭𑀡𑀝𑁆𑀞𑁄 𑀅𑀬𑀦𑀝𑁆𑀞𑁄 𑀅𑀜𑁆𑀜𑁂𑀲𑀫𑁆𑀧𑀺 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀸𑀦𑀁 𑀲𑀸𑀥𑀸𑀭𑀡𑁄 𑀓𑀣𑀁 𑀪𑀕𑀯𑀢𑁄𑀢𑀺 𑀆𑀳 ‘‘𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀇𑀫𑀲𑁆𑀫𑀺𑀁 𑀔𑁄𑀢𑀺 𑀏𑀢𑁆𑀣 𑀔𑁄-𑀲𑀤𑁆𑀤𑁄 𑀅𑀯𑀥𑀸𑀭𑀡𑁂, 𑀢𑀲𑁆𑀫𑀸 𑀇𑀫𑀲𑁆𑀫𑀺𑀁 𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀤𑁂𑀲𑀦𑀸𑀪𑁂𑀤𑁄𑀬𑁂𑀯 𑀳𑁂𑀲𑁄, 𑀬𑀤𑀺𑀤𑀁 𑀫𑀕𑁆𑀕𑁄𑀢𑀺 𑀯𑀸 𑀅𑀬𑀦𑁄𑀢𑀺 𑀯𑀸. 𑀢𑁂𑀦𑀸𑀳 ‘‘𑀅𑀢𑁆𑀣𑁄 𑀧𑀦𑁂𑀓𑁄’’𑀢𑀺.

𑀦𑀸𑀦𑀸𑀫𑀼𑀔𑀪𑀸𑀯𑀦𑀸𑀦𑀬𑀧𑁆𑀧𑀯𑀢𑁆𑀢𑁄𑀢𑀺 ¶ 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀫𑀼𑀔𑁂𑀦 𑀢𑀢𑁆𑀣𑀸𑀧𑀺 𑀆𑀦𑀸𑀧𑀸𑀦𑀸𑀤𑀺𑀫𑀼𑀔𑁂𑀦 𑀪𑀸𑀯𑀦𑀸𑀦𑀬𑁂𑀦 𑀧𑀯𑀢𑁆𑀢𑁄. 𑀏𑀓𑀸𑀬𑀦𑀦𑁆𑀢𑀺 𑀏𑀓𑀕𑀸𑀫𑀺𑀦𑀁, 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀅𑀤𑀼𑀢𑀺𑀬𑀢𑁆𑀢𑀸 𑀲𑁂𑀝𑁆𑀞𑀢𑁆𑀢𑀸 𑀘 ‘‘𑀏𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 ‘‘𑀏𑀓𑀜𑁆𑀳𑀺 𑀲𑀘𑁆𑀘𑀁 𑀦 𑀤𑀼𑀢𑀻𑀬𑀫𑀢𑁆𑀣𑀻’’𑀢𑀺 (𑀲𑀼. 𑀦𑀺. 𑁮𑁯𑁦) ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸 𑀯𑀸 𑀅𑀲𑀗𑁆𑀔𑀢𑀸 𑀯𑀸, 𑀯𑀺𑀭𑀸𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 (𑀅. 𑀦𑀺. 𑁪.𑁩𑁪; 𑀇𑀢𑀺𑀯𑀼. 𑁯𑁦) 𑀘. 𑀔𑀬𑁄 𑀏𑀯 𑀅𑀦𑁆𑀢𑁄𑀢𑀺 𑀔𑀬𑀦𑁆𑀢𑁄 ¶ , 𑀚𑀸𑀢𑀺𑀬𑀸 𑀔𑀬𑀦𑁆𑀢𑀁 𑀤𑀺𑀝𑁆𑀞𑀯𑀸𑀢𑀺 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻. 𑀅𑀯𑀺𑀪𑀸𑀕𑁂𑀦 𑀲𑀩𑁆𑀩𑁂𑀧𑀺 𑀲𑀢𑁆𑀢𑁂 𑀳𑀺𑀢𑁂𑀦 𑀅𑀦𑀼𑀓𑀫𑁆𑀧𑀢𑀻𑀢𑀺 𑀳𑀺𑀢𑀸𑀦𑀼𑀓𑀫𑁆𑀧𑀻. 𑀅𑀢𑀭𑀺𑀁𑀲𑀽𑀢𑀺 𑀢𑀭𑀺𑀁𑀲𑀼. 𑀧𑀼𑀩𑁆𑀩𑁂𑀢𑀺 𑀧𑀼𑀭𑀺𑀫𑀓𑀸 𑀩𑀼𑀤𑁆𑀥𑀸, 𑀧𑀼𑀩𑁆𑀩𑁂 𑀯𑀸 𑀅𑀢𑀻𑀢𑀓𑀸𑀮𑁂.

𑀢𑀦𑁆𑀢𑀺 𑀢𑀁 𑀢𑁂𑀲𑀁 𑀯𑀘𑀦𑀁, 𑀢𑀁 𑀯𑀸 𑀓𑀺𑀭𑀺𑀬𑀸𑀯𑀼𑀢𑁆𑀢𑀺𑀯𑀸𑀘𑀓𑀢𑁆𑀢𑀁 𑀦 𑀬𑀼𑀚𑁆𑀚𑀢𑀺. 𑀦 𑀳𑀺 𑀲𑀗𑁆𑀔𑁂𑀬𑁆𑀬𑀧𑁆𑀧𑀥𑀸𑀦𑀢𑀸𑀬 𑀲𑀢𑁆𑀢𑀯𑀸𑀘𑀺𑀦𑁄 𑀏𑀓-𑀲𑀤𑁆𑀤𑀲𑁆𑀲 𑀓𑀺𑀭𑀺𑀬𑀸𑀯𑀼𑀢𑁆𑀢𑀺𑀯𑀸𑀘𑀓𑀢𑀸 𑀅𑀢𑁆𑀣𑀺. ‘‘𑀲𑀓𑀺𑀫𑁆𑀧𑀺 𑀉𑀤𑁆𑀥𑀁 𑀕𑀘𑁆𑀙𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁭.𑁭𑁨) 𑀯𑀺𑀬 ‘‘𑀲𑀓𑀺𑀁 𑀅𑀬𑀦𑁄’’𑀢𑀺 𑀇𑀫𑀺𑀦𑀸 𑀩𑁆𑀬𑀜𑁆𑀚𑀦𑁂𑀦 𑀪𑀯𑀺𑀢𑀩𑁆𑀩𑀁. 𑀏𑀯𑀁 𑀅𑀢𑁆𑀣𑀁 𑀬𑁄𑀚𑁂𑀢𑁆𑀯𑀸𑀢𑀺 𑀏𑀯𑀁 𑀧𑀤𑀢𑁆𑀣𑀁 𑀬𑁄𑀚𑁂𑀢𑁆𑀯𑀸. 𑀉𑀪𑀬𑀣𑀸𑀧𑀻𑀢𑀺 𑀧𑀼𑀭𑀺𑀫𑀦𑀬𑁂𑀦 𑀧𑀘𑁆𑀙𑀺𑀫𑀦𑀬𑁂𑀦 𑀘. 𑀦 𑀬𑀼𑀚𑁆𑀚𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀫𑀕𑁆𑀕𑀲𑁆𑀲 𑀅𑀦𑁂𑀓𑀯𑀸𑀭𑀁 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀓𑀲𑁆𑀫𑀸’’𑀢𑀺𑀆𑀤𑀺. 𑀅𑀦𑁂𑀓𑀯𑀸𑀭𑀫𑁆𑀧𑀺 𑀅𑀬𑀢𑀻𑀢𑀺 𑀧𑀼𑀭𑀺𑀫𑀦𑀬𑀲𑁆𑀲, 𑀅𑀦𑁂𑀓𑀜𑁆𑀘𑀲𑁆𑀲 𑀅𑀬𑀦𑀁 𑀳𑁄𑀢𑀻𑀢𑀺 𑀧𑀘𑁆𑀙𑀺𑀫𑀦𑀬𑀲𑁆𑀲 𑀘 𑀧𑀝𑀺𑀓𑁆𑀔𑁂𑀧𑁄.

𑀇𑀫𑀲𑁆𑀫𑀺𑀁 𑀧𑀤𑁂𑀢𑀺 ‘‘𑀏𑀓𑀸𑀬𑀦𑁄 𑀅𑀬𑀁 𑀪𑀺𑀓𑁆𑀔𑀯𑁂 𑀫𑀕𑁆𑀕𑁄’’𑀢𑀺 𑀇𑀫𑀲𑁆𑀫𑀺𑀁 𑀯𑀸𑀓𑁆𑀬𑁂, 𑀇𑀫𑀲𑁆𑀫𑀺𑀁 𑀯𑀸 ‘‘𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄’’𑀢𑀺 𑀲𑀁𑀲𑀬𑀝𑁆𑀞𑀸𑀦𑁂. 𑀫𑀺𑀲𑁆𑀲𑀓𑀫𑀕𑁆𑀕𑁄𑀢𑀺 𑀮𑁄𑀓𑀺𑀬𑁂𑀦 𑀫𑀺𑀲𑁆𑀲𑀓𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄. 𑀯𑀺𑀲𑀼𑀤𑁆𑀥𑀺𑀆𑀤𑀻𑀦𑀁 𑀦𑀺𑀧𑁆𑀧𑀭𑀺𑀬𑀸𑀬𑀳𑁂𑀢𑀼𑀁 𑀲𑀗𑁆𑀕𑀡𑁆𑀳𑀦𑁆𑀢𑁄 𑀆𑀘𑀭𑀺𑀬𑀢𑁆𑀣𑁂𑀭𑁄 ‘‘𑀫𑀺𑀲𑁆𑀲𑀓𑀫𑀕𑁆𑀕𑁄’’𑀢𑀺 𑀆𑀳, 𑀇𑀢𑀭𑁄 𑀧𑀭𑀺𑀬𑀸𑀬𑀳𑁂𑀢𑀼 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 ‘‘𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑁄’’𑀢𑀺.

𑀲𑀤𑁆𑀤𑀁 𑀲𑀼𑀢𑁆𑀯𑀸𑀯𑀸𑀢𑀺 ‘‘𑀓𑀸𑀮𑁄, 𑀪𑀦𑁆𑀢𑁂, 𑀥𑀫𑁆𑀫𑀲𑁆𑀲𑀯𑀦𑀸𑀬𑀸’’𑀢𑀺 𑀓𑀸𑀮𑀸𑀭𑁄𑀘𑀦𑀲𑀤𑁆𑀤𑀁 𑀲𑀼𑀢𑁆𑀯𑀸. 𑀏𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸𑀢𑀺. 𑀏𑀯𑀁 ‘‘𑀫𑀥𑀼𑀭𑀁 𑀇𑀫𑀁 𑀓𑀼𑀳𑀺𑀁 𑀙𑀟𑁆𑀟𑁂𑀫𑀸’’𑀢𑀺 𑀅𑀙𑀟𑁆𑀟𑁂𑀦𑁆𑀢𑀸 𑀉𑀘𑁆𑀙𑀼𑀪𑀸𑀭𑀁 𑀯𑀺𑀬 𑀧𑀕𑁆𑀕𑀳𑁂𑀢𑁆𑀯𑀸 𑀦 𑀯𑀺𑀘𑀭𑀦𑁆𑀢𑀺. 𑀆𑀮𑀼𑀴𑁂𑀢𑀻𑀢𑀺 𑀯𑀺𑀮𑀼𑀴𑀺𑀢𑁄 𑀆𑀓𑀼𑀮𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀸𑀬𑀦𑀫𑀕𑁆𑀕𑁄 𑀯𑀼𑀘𑁆𑀘𑀢𑀺 𑀧𑀼𑀩𑁆𑀩𑀪𑀸𑀕𑀲𑀢𑀺𑀧𑀝𑁆𑀞𑀸𑀦𑀫𑀕𑁆𑀕𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀣𑁂 𑀲𑀺𑀤𑁆𑀥𑁂 𑀢𑀲𑁆𑀲𑁂𑀯 𑀅𑀮𑀗𑁆𑀓𑀸𑀭𑀢𑁆𑀣𑀁 𑀲𑁄 𑀧𑀦 𑀬𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀕𑁆𑀕𑀸𑀦𑀝𑁆𑀞𑀗𑁆𑀕𑀺𑀓𑁄’’𑀢𑀺𑀆𑀤𑀺𑀓𑀸 ¶ 𑀕𑀸𑀣𑀸𑀧𑀺 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀢𑁄𑀯 𑀆𑀦𑁂𑀢𑁆𑀯𑀸 𑀞𑀧𑀺𑀢𑀸.

𑀦𑀺𑀩𑁆𑀩𑀸𑀦𑀕𑀫𑀦𑀝𑁆𑀞𑁂𑀦𑀸𑀢𑀺 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀢𑀺 𑀅𑀥𑀺𑀕𑀘𑁆𑀙𑀢𑀺 𑀏𑀢𑁂𑀦𑀸𑀢𑀺 𑀦𑀺𑀩𑁆𑀩𑀸𑀦𑀕𑀫𑀦𑀁, 𑀲𑁄 𑀏𑀯 𑀅𑀯𑀺𑀧𑀭𑀻𑀢𑀲𑀪𑀸𑀯𑀢𑀸𑀬 𑀅𑀢𑁆𑀣𑁄, 𑀢𑁂𑀦 𑀦𑀺𑀩𑁆𑀩𑀸𑀦𑀕𑀫𑀦𑀝𑁆𑀞𑁂𑀦, 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀼𑀧𑀸𑀬𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀫𑀕𑁆𑀕𑀦𑀻𑀬𑀝𑁆𑀞𑁂𑀦𑀸𑀢𑀺 𑀕𑀯𑁂𑀲𑀺𑀢𑀩𑁆𑀩𑀢𑀸𑀬, ‘‘𑀕𑀫𑀦𑀻𑀬𑀝𑁆𑀞𑁂𑀦𑀸’’𑀢𑀺 𑀯𑀸 𑀧𑀸𑀞𑁄, 𑀉𑀧𑀕𑀦𑁆𑀢𑀩𑁆𑀩𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀭𑀸𑀕𑀸𑀤𑀻𑀳𑀻𑀢𑀺. 𑀇𑀫𑀺𑀦𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁𑀬𑁂𑀯 𑀕𑀳𑀡𑀁 ‘‘𑀭𑀸𑀕𑁄 𑀫𑀮𑀁, 𑀤𑁄𑀲𑁄 𑀫𑀮𑀁, 𑀫𑁄𑀳𑁄 𑀫𑀮’’𑀦𑁆𑀢𑀺 (𑀯𑀺𑀪. 𑁯𑁨𑁪) 𑀯𑀘𑀦𑀢𑁄. ‘‘𑀅𑀪𑀺𑀚𑁆𑀛𑀸𑀯𑀺𑀲𑀫𑀮𑁄𑀪𑀸𑀤𑀻𑀳𑀻’’𑀢𑀺 𑀧𑀦 𑀇𑀫𑀺𑀦𑀸 𑀲𑀩𑁆𑀩𑁂𑀲𑀫𑁆𑀧𑀺 𑀉𑀧𑀓𑁆𑀓𑀺𑀮𑁂𑀲𑀸𑀦𑀁 𑀲𑀗𑁆𑀕𑀡𑁆𑀳𑀦𑀢𑁆𑀣𑀁 𑀢𑁂 𑀯𑀺𑀲𑀼𑀁 𑀉𑀤𑁆𑀥𑀝𑀸. 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀏𑀓𑀦𑁆𑀢𑀺𑀓𑀢𑀁 ¶ 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀓𑀸𑀫𑀁 ‘‘𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺 𑀲𑀸𑀫𑀜𑁆𑀜𑀚𑁄𑀢𑀦𑀸, 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀏𑀯 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀫𑀮𑀯𑀲𑁂𑀦 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀓𑁂𑀯𑀮𑀁 𑀅𑀝𑁆𑀞𑀓𑀣𑀸𑀯𑀘𑀦𑀫𑁂𑀯, 𑀅𑀣 𑀔𑁄 𑀇𑀤𑀫𑁂𑀢𑁆𑀣 𑀆𑀳𑀘𑁆𑀘𑀪𑀸𑀲𑀺𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳.

𑀲𑀸 𑀧𑀦𑀸𑀬𑀁 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀲𑀺𑀚𑁆𑀛𑀫𑀸𑀦𑀸 𑀬𑀲𑁆𑀫𑀸 𑀲𑁄𑀓𑀸𑀤𑀻𑀦𑀁 𑀅𑀦𑀼𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑁄𑀘𑀦𑀁 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀦𑀺𑀫𑀺𑀢𑁆𑀢𑀁 𑀘𑁂𑀢𑀲𑁄 𑀲𑀦𑁆𑀢𑀸𑀧𑁄 𑀅𑀦𑁆𑀢𑁄𑀦𑀺𑀚𑁆𑀛𑀸𑀦𑀁 𑀲𑁄𑀓𑁄. 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀦𑀺𑀫𑀺𑀢𑁆𑀢𑀫𑁂𑀯 𑀲𑁄𑀓𑀸𑀥𑀺𑀓𑀢𑀸𑀬 ‘‘𑀓𑀳𑀁, 𑀏𑀓𑀧𑀼𑀢𑁆𑀢𑀓, 𑀓𑀳𑀁, 𑀏𑀓𑀧𑀼𑀢𑁆𑀢𑀓𑀸’’𑀢𑀺 𑀧𑀭𑀺𑀤𑁂𑀯𑀯𑀲𑁂𑀦 𑀮𑀧𑀦𑀁 𑀧𑀭𑀺𑀤𑁂𑀯𑁄, 𑀆𑀬𑀢𑀺𑀁 𑀅𑀦𑀼𑀧𑁆𑀧𑀚𑁆𑀚𑀦𑀁 𑀇𑀥 𑀲𑀫𑀢𑀺𑀓𑁆𑀓𑀫𑁄𑀢𑀺 𑀆𑀳 ‘‘𑀧𑀳𑀸𑀦𑀸𑀬𑀸’’𑀢𑀺. 𑀢𑀁 𑀧𑀦𑀲𑁆𑀲 𑀲𑀫𑀢𑀺𑀓𑁆𑀓𑀫𑀸𑀯𑀳𑀢𑀁 𑀦𑀺𑀤𑀲𑁆𑀲𑀦𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀬𑀁 𑀳𑀻’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀬𑀁 𑀧𑀼𑀩𑁆𑀩𑁂 𑀢𑀁 𑀯𑀺𑀲𑁄𑀥𑁂𑀳𑀻𑀢𑀺 𑀅𑀢𑀻𑀢𑁂𑀲𑀼 𑀔𑀦𑁆𑀥𑁂𑀲𑀼 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀯𑀺𑀲𑁄𑀥𑀦𑀁 𑀯𑀼𑀢𑁆𑀢𑀁. 𑀧𑀘𑁆𑀙𑀸𑀢𑀺 𑀧𑀭𑀢𑁄. 𑀢𑁂𑀢𑀺 𑀢𑀼𑀬𑁆𑀳𑀁. 𑀫𑀸𑀳𑀽𑀢𑀺 𑀫𑀸 𑀅𑀳𑀼. 𑀓𑀺𑀜𑁆𑀘𑀦𑀦𑁆𑀢𑀺 𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑀁. 𑀏𑀢𑁂𑀦 𑀅𑀦𑀸𑀕𑀢𑁂𑀲𑀼 𑀔𑀦𑁆𑀥𑁂𑀲𑀼 𑀲𑀁𑀓𑀺𑀮𑁂𑀲𑀯𑀺𑀲𑁄𑀥𑀦𑀁 𑀯𑀼𑀢𑁆𑀢𑀁. 𑀫𑀚𑁆𑀛𑁂𑀢𑀺 𑀢𑀤𑀼𑀪𑀬𑀯𑁂𑀫𑀚𑁆𑀛𑁂. 𑀦𑁄 𑀘𑁂 𑀕𑀳𑁂𑀲𑁆𑀲𑀲𑀻𑀢𑀺 𑀦 𑀉𑀧𑀸𑀤𑀺𑀬𑀺𑀲𑁆𑀲𑀲𑀺 𑀘𑁂. 𑀏𑀢𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀔𑀦𑁆𑀥𑀧𑀩𑀦𑁆𑀥𑁂 𑀉𑀧𑀸𑀤𑀸𑀦𑀧𑁆𑀧𑀯𑀢𑁆𑀢𑀺 𑀯𑀼𑀢𑁆𑀢𑀸. 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀲𑀻𑀢𑀺 𑀏𑀯𑀁 𑀅𑀤𑁆𑀥𑀢𑁆𑀢𑀬𑀕𑀢𑀲𑀁𑀓𑀺𑀮𑁂𑀲𑀯𑀺𑀲𑁄𑀥𑀦𑁂 𑀲𑀢𑀺 𑀦𑀺𑀩𑁆𑀩𑀼𑀢𑀲𑀩𑁆𑀩𑀧𑀭𑀺𑀴𑀸𑀳𑀢𑀸𑀬 𑀉𑀧𑀲𑀦𑁆𑀢𑁄 𑀳𑀼𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀲𑀻𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀕𑀸𑀣𑀁 𑀦𑀺𑀝𑁆𑀞𑀧𑁂𑀲𑀺. 𑀢𑁂𑀦𑀸𑀳 ‘‘𑀇𑀫𑀁 𑀕𑀸𑀣’’𑀦𑁆𑀢𑀺𑀆𑀤𑀺.

𑀧𑀼𑀢𑁆𑀢𑀸𑀢𑀺 ¶ 𑀑𑀭𑀲𑀸, 𑀅𑀜𑁆𑀜𑁂𑀧𑀺 𑀯𑀸 𑀬𑁂 𑀓𑁂𑀘𑀺. 𑀧𑀺𑀢𑀸𑀢𑀺 𑀚𑀦𑀓𑁄. 𑀩𑀦𑁆𑀥𑀯𑀸𑀢𑀺 𑀜𑀸𑀢𑀓𑀸. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀧𑀼𑀢𑁆𑀢𑀸 𑀯𑀸 𑀧𑀺𑀢𑀸 𑀯𑀸 𑀩𑀦𑁆𑀥𑀯𑀸 𑀯𑀸 𑀅𑀦𑁆𑀢𑀓𑁂𑀦 𑀫𑀘𑁆𑀘𑀼𑀦𑀸 𑀅𑀥𑀺𑀧𑀦𑁆𑀦𑀲𑁆𑀲 𑀅𑀪𑀺𑀪𑀽𑀢𑀲𑁆𑀲 𑀫𑀭𑀡𑀢𑁄 𑀢𑀸𑀡𑀸𑀬 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀦𑀢𑁆𑀣𑀺 𑀜𑀸𑀢𑀻𑀲𑀼 𑀢𑀸𑀡𑀢𑀸𑀢𑀺. 𑀦 𑀳𑀺 𑀜𑀸𑀢𑀻𑀦𑀁 𑀯𑀲𑁂𑀦 𑀫𑀭𑀡𑀢𑁄 𑀆𑀭𑀓𑁆𑀔𑀸 𑀅𑀢𑁆𑀣𑀺, 𑀢𑀲𑁆𑀫𑀸 𑀧𑀝𑀸𑀘𑀸𑀭𑁂 ‘‘𑀉𑀪𑁄 𑀧𑀼𑀢𑁆𑀢𑀸 𑀓𑀸𑀮𑀓𑀢𑀸’’𑀢𑀺𑀆𑀤𑀺𑀦𑀸 (𑀅𑀧. 𑀣𑁂𑀭𑀻 𑁨.𑁨.𑁪𑁯𑁮) 𑀫𑀸 𑀦𑀺𑀭𑀢𑁆𑀣𑀓𑀁 𑀧𑀭𑀺𑀤𑁂𑀯𑀺, 𑀥𑀫𑁆𑀫𑀁𑀬𑁂𑀯 𑀧𑀦 𑀬𑀸𑀣𑀸𑀯𑀢𑁄 𑀧𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑀸𑀢𑀺 𑀬𑀣𑀸𑀦𑀼𑀮𑁄𑀫𑀁 𑀧𑀯𑀢𑁆𑀢𑀺𑀢𑀸𑀬 𑀲𑀸𑀫𑀼𑀓𑁆𑀓𑀁𑀲𑀺𑀓𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀧𑀭𑀺𑀬𑁄𑀲𑀸𑀦𑁂 𑀲𑀳𑀲𑁆𑀲𑀦𑀬𑀧𑀝𑀺𑀫𑀡𑁆𑀟𑀺𑀢𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀓𑀣𑀁 𑀧𑀦𑀸𑀬𑀁 𑀲𑀢𑀺𑀧𑀝𑁆𑀞𑀸𑀦𑀫𑀕𑁆𑀕𑀯𑀲𑁂𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀻𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀦 𑀳𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀓𑀣𑀸𑀬 𑀯𑀺𑀦𑀸 𑀲𑀸𑀯𑀓𑀸𑀦𑀁 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑁄 𑀅𑀢𑁆𑀣𑀺. ‘‘𑀇𑀫𑀁 𑀕𑀸𑀣𑀁 𑀲𑀼𑀢𑁆𑀯𑀸’’𑀢𑀺 𑀧𑀦 𑀇𑀤𑀁 𑀲𑁄𑀓𑀯𑀺𑀦𑁄𑀤𑀦𑀯𑀲𑁂𑀦 𑀧𑀯𑀢𑁆𑀢𑀺𑀢𑀸𑀬 𑀕𑀸𑀣𑀸𑀬 𑀧𑀞𑀫𑀁 𑀲𑀼𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀇𑀢𑀭𑀕𑀸𑀣𑀸𑀬𑀧𑀺. 𑀪𑀸𑀯𑀦𑀸𑀢𑀺 ¶ 𑀧𑀜𑁆𑀜𑀸𑀪𑀸𑀯𑀦𑀸. 𑀲𑀸 𑀳𑀺 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀭𑀽𑀧𑀸𑀤𑀻𑀦𑀁 𑀅𑀦𑀺𑀘𑁆𑀘𑀸𑀤𑀺𑀢𑁄 𑀅𑀦𑀼𑀧𑀲𑁆𑀲𑀦𑀸𑀧𑀺 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸, 𑀢𑀲𑁆𑀫𑀸. 𑀢𑁂𑀧𑀻𑀢𑀺 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑀧𑀝𑀸𑀘𑀸𑀭𑀸.

𑀧𑀜𑁆𑀘𑀲𑀢𑁂 𑀘𑁄𑀭𑁂𑀢𑀺 𑀲𑀢𑀲𑀢𑀘𑁄𑀭𑀧𑀭𑀺𑀯𑀸𑀭𑁂 𑀧𑀜𑁆𑀘 𑀘𑁄𑀭𑁂 𑀧𑀝𑀺𑀧𑀸𑀝𑀺𑀬𑀸 𑀧𑁂𑀲𑁂𑀲𑀺. 𑀢𑁂 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀣𑁂𑀭𑀁 𑀧𑀭𑀺𑀬𑁂𑀲𑀦𑁆𑀢𑀸 𑀅𑀦𑀼𑀓𑁆𑀓𑀫𑁂𑀦 𑀣𑁂𑀭𑀲𑁆𑀲 𑀲𑀫𑀻𑀧𑁂 𑀲𑀫𑀸𑀕𑀘𑁆𑀙𑀺𑀁𑀲𑀼. 𑀢𑁂𑀦𑀸𑀳 ‘‘𑀢𑁂 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀽’’𑀢𑀺. 𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀣𑁂𑀭𑀲𑁆𑀲 𑀳𑀺 𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀲𑀼𑀧𑀭𑀺𑀲𑀼𑀤𑁆𑀥𑀁 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀉𑀴𑀸𑀭𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀊𑀭𑀼𑀝𑁆𑀞𑀺𑀪𑁂𑀤𑀚𑀦𑀺𑀢𑀁 𑀤𑀼𑀓𑁆𑀔𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀲𑀺. 𑀧𑀸𑀤𑀸𑀦𑀻𑀢𑀺 𑀧𑀸𑀤𑁂. 𑀲𑀜𑁆𑀜𑀧𑁂𑀲𑁆𑀲𑀸𑀫𑀻𑀢𑀺 𑀲𑀜𑁆𑀜𑀢𑁆𑀢𑀺𑀁 𑀓𑀭𑀺𑀲𑁆𑀲𑀸𑀫𑀺. 𑀅𑀟𑁆𑀟𑀺𑀬𑀸𑀫𑀻𑀢𑀺 𑀚𑀺𑀕𑀼𑀘𑁆𑀙𑀸𑀫𑀺. 𑀳𑀭𑀸𑀬𑀸𑀫𑀻𑀢𑀺 𑀮𑀚𑁆𑀚𑀸𑀫𑀺. 𑀯𑀺𑀧𑀲𑁆𑀲𑀺𑀲𑀦𑁆𑀢𑀺 𑀲𑀫𑁆𑀫𑀲𑀺𑀁.

𑀧𑀘𑀮𑀸𑀬𑀦𑁆𑀢𑀸𑀦𑀦𑁆𑀢𑀺 𑀧𑀘𑀮𑀸𑀬𑀦𑀁 𑀦𑀺𑀤𑁆𑀤𑀁 𑀉𑀧𑀕𑀢𑀸𑀦𑀁. 𑀯𑀢𑀲𑀫𑁆𑀧𑀦𑁆𑀦𑁄𑀢𑀺 𑀥𑀼𑀢𑀘𑀭𑀡𑀲𑀫𑁆𑀧𑀦𑁆𑀦𑁄. 𑀧𑀫𑀸𑀤𑀦𑁆𑀢𑀺 𑀧𑀘𑀮𑀸𑀬𑀦𑀁 𑀲𑀦𑁆𑀥𑀸𑀬𑀸𑀳. 𑀑𑀭𑀼𑀤𑁆𑀥𑀫𑀸𑀦𑀲𑁄𑀢𑀺 𑀉𑀧𑀭𑀼𑀤𑁆𑀥𑀅𑀥𑀺𑀘𑀺𑀢𑁆𑀢𑁄. 𑀧𑀜𑁆𑀚𑀭𑀲𑁆𑀫𑀺𑀦𑁆𑀢𑀺 𑀲𑀭𑀻𑀭𑁂. 𑀲𑀭𑀻𑀭𑀜𑁆𑀳𑀺 𑀦𑁆𑀳𑀸𑀭𑀼𑀲𑀫𑁆𑀩𑀦𑁆𑀥𑀅𑀝𑁆𑀞𑀺𑀲𑀗𑁆𑀖𑀸𑀢𑀢𑀸𑀬 𑀇𑀥 ‘‘𑀧𑀜𑁆𑀚𑀭’’𑀦𑁆𑀢𑀺 𑀯𑀼𑀢𑁆𑀢𑀁.

𑀧𑀻𑀢𑀯𑀡𑁆𑀡𑀸𑀬 𑀧𑀝𑀸𑀓𑀸𑀬 𑀧𑀭𑀺𑀳𑀭𑀡𑀢𑁄 𑀫𑀮𑁆𑀮𑀬𑀼𑀤𑁆𑀥𑀘𑀺𑀢𑁆𑀢𑀓𑀢𑀸𑀬 𑀘 𑀧𑀻𑀢𑀫𑀮𑁆𑀮𑁄. 𑀢𑀻𑀲𑀼 𑀭𑀚𑁆𑀚𑁂𑀲𑀽𑀢𑀺 𑀧𑀡𑁆𑀟𑀼𑀘𑁄𑀴𑀕𑁄𑀴𑀭𑀚𑁆𑀚𑁂𑀲𑀼. 𑀫𑀮𑁆𑀮𑀸 𑀲𑀻𑀳𑀴𑀤𑀻𑀧𑁂 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 ¶ 𑀮𑀪𑀦𑁆𑀢𑀻𑀢𑀺 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀆𑀕𑀫𑁆𑀫. 𑀢𑀁𑀬𑁂𑀯 𑀅𑀗𑁆𑀓𑀼𑀲𑀁 𑀓𑀢𑁆𑀯𑀸𑀢𑀺 ‘‘𑀭𑀽𑀧𑀸𑀤𑀬𑁄 ‘𑀫𑀫𑀸’𑀢𑀺 𑀦 𑀕𑀳𑁂𑀢𑀩𑁆𑀩𑀸’’𑀢𑀺 𑀦 𑀢𑀼𑀫𑁆𑀳𑀸𑀓𑀯𑀕𑁆𑀕𑁂𑀦 (𑀲𑀁. 𑀦𑀺. 𑁩.𑁩𑁩-𑁩𑁪) 𑀧𑀓𑀸𑀲𑀺𑀢𑀫𑀢𑁆𑀣𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀫𑀢𑁆𑀢𑀳𑀢𑁆𑀣𑀺𑀦𑁄 𑀅𑀗𑁆𑀓𑀼𑀲𑀁 𑀓𑀢𑁆𑀯𑀸. 𑀚𑀡𑁆𑀡𑀼𑀓𑁂𑀳𑀺 𑀘𑀗𑁆𑀓𑀫𑀢𑀺 ‘‘𑀦𑀺𑀲𑀺𑀦𑁆𑀦𑁂 𑀦𑀺𑀤𑁆𑀤𑀸𑀬 𑀅𑀯𑀲𑀭𑁄 𑀳𑁄𑀢𑀻’’𑀢𑀺. 𑀩𑁆𑀬𑀸𑀓𑀭𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀲𑀨𑀮𑀢𑀸𑀧𑀯𑁂𑀤𑀦𑀫𑀼𑀔𑁂𑀦 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑁄 𑀅𑀜𑁆𑀜𑀁 𑀩𑁆𑀬𑀸𑀓𑀭𑀺𑀢𑁆𑀯𑀸. 𑀪𑀸𑀲𑀺𑀢𑀦𑁆𑀢𑀺 𑀯𑀘𑀦𑀁. 𑀓𑀲𑁆𑀲 𑀧𑀦 𑀢𑀦𑁆𑀢𑀺 𑀆𑀳 ‘‘𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲, 𑀲𑀩𑁆𑀩𑀮𑁄𑀓𑀕𑁆𑀕𑀯𑀸𑀤𑀺𑀦𑁄’’𑀢𑀺. 𑀦 𑀢𑀼𑀫𑁆𑀳𑀸𑀓𑀦𑁆𑀢𑀺𑀆𑀤𑀺 𑀢𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀁. 𑀢𑀬𑀺𑀤𑀁 𑀫𑁂 𑀲𑀗𑁆𑀔𑀸𑀭𑀸𑀦𑀁 𑀅𑀘𑁆𑀘𑀦𑁆𑀢𑀯𑀽𑀧𑀲𑀫𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀺𑀘𑁆𑀘𑀸 𑀯𑀢𑀸’’𑀢𑀺 𑀕𑀸𑀣𑀁 𑀆𑀳𑀭𑀺. 𑀢𑁂𑀦 𑀇𑀤𑀸𑀦𑀸𑀳𑀁 𑀲𑀗𑁆𑀔𑀸𑀭𑀸𑀦𑀁 𑀔𑀡𑁂 𑀔𑀡𑁂 𑀪𑀗𑁆𑀕𑀲𑀗𑁆𑀔𑀸𑀢𑀲𑁆𑀲 𑀭𑁄𑀕𑀲𑁆𑀲 𑀅𑀪𑀸𑀯𑁂𑀦 𑀅𑀭𑁄𑀕𑁄 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀤𑀲𑁆𑀲𑁂𑀢𑀺.

𑀅𑀲𑁆𑀲𑀸𑀢𑀺 𑀲𑀓𑁆𑀓𑀲𑁆𑀲. 𑀉𑀧𑀧𑀢𑁆𑀢𑀻𑀢𑀺 𑀤𑁂𑀯𑀽𑀧𑀧𑀢𑁆𑀢𑀺. 𑀧𑀼𑀦𑀧𑀸𑀓𑀢𑀺𑀓𑀸𑀯 𑀅𑀳𑁄𑀲𑀺 𑀲𑀓𑁆𑀓𑀪𑀸𑀯𑁂𑀦𑁂𑀯 𑀉𑀧𑀧𑀦𑁆𑀦𑀢𑁆𑀢𑀸. 𑀲𑀼𑀩𑁆𑀭𑀳𑁆𑀫𑀸𑀢𑀺 𑀏𑀯𑀁 𑀦𑀸𑀫𑁄. 𑀅𑀘𑁆𑀙𑀭𑀸𑀦𑀁 𑀦𑀺𑀭𑀬𑀽𑀧𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀢𑀢𑁄 𑀧𑀪𑀼𑀢𑀺 𑀲𑀢𑀢𑀁 𑀧𑀯𑀢𑁆𑀢𑀫𑀸𑀦𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀼𑀢𑁆𑀭𑀸𑀲𑀁 𑀲𑀦𑁆𑀥𑀸𑀬𑀸𑀳 ‘‘𑀦𑀺𑀘𑁆𑀘𑀁 𑀉𑀢𑁆𑀭𑀲𑁆𑀢𑀫𑀺𑀤𑀁 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀉𑀢𑁆𑀭𑀲𑁆𑀢𑀦𑁆𑀢𑀺 𑀲𑀦𑁆𑀢𑀲𑁆𑀢𑀁 𑀪𑀻𑀢𑀁. 𑀉𑀩𑁆𑀩𑀺𑀕𑁆𑀕𑀦𑁆𑀢𑀺 𑀲𑀁𑀯𑀺𑀕𑁆𑀕𑀁. 𑀉𑀢𑁆𑀭𑀲𑁆𑀢𑀦𑁆𑀢𑀺 𑀯𑀸 𑀲𑀁𑀯𑀺𑀕𑁆𑀕𑀁. 𑀉𑀩𑁆𑀩𑀺𑀕𑁆𑀕𑀦𑁆𑀢𑀺 𑀪𑀬𑀯𑀲𑁂𑀦 𑀲𑀳 𑀓𑀸𑀬𑁂𑀦 𑀲𑀜𑁆𑀘𑀮𑀺𑀢𑀁. 𑀅𑀦𑀼𑀧𑁆𑀧𑀦𑁆𑀦𑁂𑀲𑀽𑀢𑀺 𑀅𑀦𑀸𑀕𑀢𑁂𑀲𑀼. 𑀓𑀺𑀘𑁆𑀙𑁂𑀲𑀽𑀢𑀺 𑀤𑀼𑀓𑁆𑀔𑁂𑀲𑀼. 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁, 𑀪𑀸𑀯𑀻𑀤𑀼𑀓𑁆𑀔𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀦𑁆𑀢𑀺 ¶ 𑀅𑀢𑁆𑀣𑁄. 𑀉𑀧𑁆𑀧𑀢𑀺𑀢𑁂𑀲𑀽𑀢𑀺 𑀉𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀙𑁂𑀲𑀽𑀢𑀺 𑀬𑁄𑀚𑀦𑀸, 𑀢𑀤𑀸 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑀲𑁆𑀲 𑀉𑀧𑁆𑀧𑀦𑁆𑀦𑀤𑀼𑀓𑁆𑀔𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀩𑁄𑀚𑁆𑀛𑀸𑀢𑀺 𑀩𑁄𑀥𑀺𑀢𑁄, 𑀅𑀭𑀺𑀬𑀫𑀕𑁆𑀕𑀢𑁄𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀢𑁆𑀭𑀸𑀢𑀺 𑀘 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀦𑀺𑀲𑁆𑀲𑀓𑁆𑀓𑀯𑀘𑀦𑀁, 𑀢𑀲𑁆𑀫𑀸 𑀩𑁄𑀥𑀺𑀁 𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀢𑀧𑀲𑀸𑀢𑀺 𑀢𑀧𑁄𑀓𑀫𑁆𑀫𑀢𑁄. 𑀢𑁂𑀦 𑀫𑀕𑁆𑀕𑀸𑀥𑀺𑀕𑀫𑀲𑁆𑀲 𑀉𑀧𑀸𑀬𑀪𑀽𑀢𑀁 𑀥𑀼𑀢𑀗𑁆𑀕𑀲𑁂𑀯𑀦𑀸𑀤𑀺𑀲𑀮𑁆𑀮𑁂𑀔𑀧𑀝𑀺𑀧𑀤𑀁 𑀤𑀲𑁆𑀲𑁂𑀢𑀺. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀢𑀺 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀁𑀯𑀭𑀡𑀢𑁄. 𑀏𑀢𑁂𑀦 𑀲𑀢𑀺𑀲𑀁𑀯𑀭𑀲𑀻𑀲𑁂𑀦 𑀲𑀩𑁆𑀩𑀫𑁆𑀧𑀺 𑀲𑀁𑀯𑀭𑀲𑀻𑀮𑀁, 𑀮𑀓𑁆𑀔𑀡𑀳𑀸𑀭𑀦𑀬𑁂𑀦 𑀯𑀸 𑀲𑀩𑁆𑀩𑀫𑁆𑀧𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀦𑀺𑀲𑁆𑀲𑀕𑁆𑀕𑀸𑀢𑀺 𑀲𑀩𑁆𑀩𑀼𑀧𑀥𑀺𑀦𑀺𑀲𑁆𑀲𑀚𑁆𑀚𑀦𑀢𑁄 𑀲𑀩𑁆𑀩𑀓𑀺𑀮𑁂𑀲𑀧𑁆𑀧𑀳𑀸𑀦𑀢𑁄. 𑀓𑀺𑀮𑁂𑀲𑁂𑀲𑀼 𑀳𑀺 𑀦𑀺𑀲𑁆𑀲𑀝𑁆𑀞𑁂𑀲𑀼 𑀓𑀫𑁆𑀫𑀯𑀝𑁆𑀝𑀁 𑀯𑀺𑀧𑀸𑀓𑀯𑀝𑁆𑀝𑀜𑁆𑀘 𑀦𑀺𑀲𑁆𑀲𑀝𑁆𑀞𑀫𑁂𑀯 𑀳𑁄𑀢𑀻𑀢𑀺. 𑀲𑁄𑀢𑁆𑀣𑀺𑀦𑁆𑀢𑀺 𑀔𑁂𑀫𑀁 𑀅𑀦𑀼𑀧𑀤𑁆𑀤𑀯𑀢𑀁.

𑀜𑀸𑀬𑀢𑀺 𑀦𑀺𑀘𑁆𑀙𑀬𑁂𑀦 𑀓𑀫𑀢𑀺 𑀦𑀺𑀩𑁆𑀩𑀸𑀦𑀁, 𑀢𑀁 𑀯𑀸 𑀜𑀸𑀬𑀢𑀺 𑀧𑀝𑀺𑀯𑀺𑀚𑁆𑀛𑀻𑀬𑀢𑀺 𑀏𑀢𑁂𑀦𑀸𑀢𑀺 𑀜𑀸𑀬𑁄, 𑀅𑀭𑀺𑀬𑀫𑀕𑁆𑀕𑁄𑀢𑀺 𑀆𑀳 ‘‘𑀜𑀸𑀬𑁄 𑀯𑀼𑀘𑁆𑀘𑀢𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺 ¶ . 𑀢𑀡𑁆𑀳𑀸𑀯𑀸𑀦𑀯𑀺𑀭𑀳𑀺𑀢𑀢𑁆𑀢𑀸𑀢𑀺 𑀢𑀡𑁆𑀳𑀸𑀲𑀗𑁆𑀔𑀸𑀢𑀯𑀸𑀦𑀯𑀺𑀯𑀺𑀢𑁆𑀢𑀢𑁆𑀢𑀸. 𑀢𑀡𑁆𑀳𑀸 𑀳𑀺 𑀔𑀦𑁆𑀥𑁂𑀳𑀺 𑀔𑀦𑁆𑀥𑀁, 𑀓𑀫𑁆𑀫𑀼𑀦𑀸 𑀯𑀸 𑀨𑀮𑀁, 𑀲𑀢𑁆𑀢𑁂𑀳𑀺 𑀯𑀸 𑀤𑀼𑀓𑁆𑀔𑀁 𑀯𑀺𑀦𑀢𑀺 𑀲𑀁𑀲𑀺𑀩𑁆𑀩𑀢𑀻𑀢𑀺 𑀯𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀬𑀺𑀤𑀁 𑀦𑀢𑁆𑀣𑀺 𑀏𑀢𑁆𑀣 𑀯𑀸𑀦𑀁, 𑀦 𑀯𑀸 𑀏𑀢𑀲𑁆𑀫𑀺𑀁 𑀅𑀥𑀺𑀕𑀢𑁂 𑀧𑀼𑀕𑁆𑀕𑀮𑀲𑁆𑀲 𑀯𑀸𑀦𑀦𑁆𑀢𑀺 𑀦𑀺𑀩𑁆𑀩𑀸𑀦𑀁, 𑀅𑀲𑀗𑁆𑀔𑀢𑀸 𑀥𑀸𑀢𑀼. 𑀧𑀭𑀧𑀘𑁆𑀘𑀬𑁂𑀦 𑀯𑀺𑀦𑀸 𑀧𑀘𑁆𑀘𑀓𑁆𑀔𑀓𑀭𑀡𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀢𑀺 𑀆𑀳 ‘‘𑀅𑀢𑁆𑀢𑀧𑀘𑁆𑀘𑀓𑁆𑀔𑀢𑀸𑀬𑀸’’𑀢𑀺.

𑀦𑀦𑀼 ‘‘𑀯𑀺𑀲𑀼𑀤𑁆𑀥𑀺𑀬𑀸’’𑀢𑀺 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀬𑀸 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀯𑀺𑀲𑀼𑀤𑁆𑀥𑀺𑀕𑁆𑀕𑀳𑀡𑁂𑀦𑁂𑀯𑁂𑀢𑁆𑀣 𑀲𑁄𑀓𑀲𑀫𑀢𑀺𑀓𑁆𑀓𑀫𑀸𑀤𑀬𑁄𑀧𑀺 𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀺, 𑀢𑁂 𑀧𑀼𑀦 𑀓𑀲𑁆𑀫𑀸 𑀕𑀳𑀺𑀢𑀸𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬 ‘‘𑀢𑀢𑁆𑀣 𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀸𑀲𑀦𑀬𑀼𑀢𑁆𑀢𑀺𑀓𑁄𑀯𑀺𑀤𑁂𑀢𑀺 𑀲𑀘𑁆𑀘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀮𑀓𑁆𑀔𑀡𑀸𑀬𑀁 𑀥𑀫𑁆𑀫𑀦𑀻𑀢𑀺𑀬𑀁 𑀙𑁂𑀓𑁂. 𑀢𑀁 𑀢𑀁 𑀅𑀢𑁆𑀣𑀁 𑀜𑀸𑀧𑁂𑀢𑀻𑀢𑀺 𑀬𑁂 𑀬𑁂 𑀩𑁄𑀥𑀦𑁂𑀬𑁆𑀬𑀧𑀼𑀕𑁆𑀕𑀮𑀸 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀸𑀤𑀺𑀯𑀲𑁂𑀦 𑀬𑀣𑀸 𑀬𑀣𑀸 𑀩𑁄𑀥𑁂𑀢𑀩𑁆𑀩𑀸, 𑀅𑀢𑁆𑀢𑀦𑁄 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀪𑀕𑀯𑀸 𑀢𑁂 𑀢𑁂 𑀢𑀣𑀸 𑀢𑀣𑀸 𑀩𑁄𑀥𑁂𑀦𑁆𑀢𑁄 𑀢𑀁 𑀢𑀫𑀢𑁆𑀣𑀁 𑀜𑀸𑀧𑁂𑀢𑀺. 𑀢𑀁 𑀢𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄𑀢𑀺 𑀅𑀢𑁆𑀣𑀸𑀧𑀢𑁆𑀢𑀺𑀁 𑀅𑀕𑀡𑁂𑀦𑁆𑀢𑁄 𑀢𑀁 𑀢𑀁 𑀅𑀢𑁆𑀣𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄. 𑀦 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀅𑀢𑁆𑀣𑀸𑀧𑀢𑁆𑀢𑀺𑀜𑀸𑀧𑀓𑀸𑀤𑀺𑀲𑀸𑀥𑀦𑀻𑀬𑀯𑀘𑀦𑀸𑀢𑀺. 𑀲𑀁𑀯𑀢𑁆𑀢𑀢𑀻𑀢𑀺 𑀚𑀸𑀬𑀢𑀺, 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀅𑀦𑀢𑀺𑀓𑁆𑀓𑀦𑁆𑀢𑀲𑁄𑀓𑀧𑀭𑀺𑀤𑁂𑀯𑀲𑁆𑀲 𑀦 𑀓𑀤𑀸𑀘𑀺 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺 𑀅𑀢𑁆𑀣𑀺 𑀲𑁄𑀓𑀧𑀭𑀺𑀤𑁂𑀯𑀲𑀫𑀢𑀺𑀓𑁆𑀓𑀫𑀫𑀼𑀔𑁂𑀦𑁂𑀯 𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀺𑀬𑀸 𑀇𑀚𑁆𑀛𑀦𑀢𑁄, 𑀢𑀲𑁆𑀫𑀸 𑀆𑀳 ‘‘𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑁂𑀦 𑀳𑁄𑀢𑀻’’𑀢𑀺. 𑀬𑀲𑁆𑀫𑀸 𑀧𑀦 𑀤𑁄𑀫𑀦𑀲𑁆𑀲𑀧𑀘𑁆𑀘𑀬𑁂𑀳𑀺 𑀤𑀼𑀓𑁆𑀔𑀥𑀫𑁆𑀫𑁂𑀳𑀺 𑀧𑀼𑀝𑁆𑀞𑀁 𑀧𑀼𑀣𑀼𑀚𑁆𑀚𑀦𑀁 𑀲𑁄𑀓𑀸𑀤𑀬𑁄 𑀅𑀪𑀺𑀪𑀯𑀦𑁆𑀢𑀺, 𑀧𑀭𑀺𑀜𑁆𑀜𑀸𑀢𑁂𑀲𑀼 𑀘 𑀢𑁂𑀲𑀼 𑀢𑁂 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑁄 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑁂𑀦𑀸’’𑀢𑀺. 𑀜𑀸𑀬𑀲𑁆𑀲𑀸𑀢𑀺 𑀅𑀕𑁆𑀕𑀫𑀕𑁆𑀕𑀲𑁆𑀲 𑀢𑀢𑀺𑀬𑀫𑀕𑁆𑀕𑀲𑁆𑀲 𑀘. 𑀢𑀤𑀥𑀺𑀕𑀫𑁂𑀦 𑀳𑀺 𑀬𑀣𑀸𑀓𑁆𑀓𑀫𑀁 ¶ 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑁄. 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀲𑀳𑀪𑀸𑀯𑀻𑀧𑀺 𑀇𑀢𑀭𑀸𑀪𑀺𑀲𑀫𑀬𑁄 𑀢𑀤𑀯𑀺𑀦𑀸𑀪𑀸𑀯𑀢𑁄 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀳𑁂𑀢𑀼𑀓𑁄 𑀯𑀺𑀬 𑀯𑀼𑀢𑁆𑀢𑁄 ‘‘𑀜𑀸𑀬𑀲𑁆𑀲𑀸𑀥𑀺𑀕𑀫𑁄 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’’𑀢𑀺. 𑀨𑀮𑀜𑀸𑀡𑁂𑀦 𑀯𑀸 𑀧𑀘𑁆𑀘𑀓𑁆𑀔𑀓𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’’𑀢𑀺. 𑀲𑀫𑁆𑀧𑀤𑀸𑀦𑀯𑀘𑀦𑀜𑁆𑀘𑁂𑀢𑀁 𑀤𑀝𑁆𑀞𑀩𑁆𑀩𑀁.

𑀯𑀡𑁆𑀡𑀪𑀡𑀦𑀦𑁆𑀢𑀺 𑀧𑀲𑀁𑀲𑀸𑀯𑀘𑀦𑀁. 𑀢𑀬𑀺𑀤𑀁 𑀦 𑀇𑀥𑁂𑀯, 𑀅𑀣 𑀔𑁄 𑀅𑀜𑁆𑀜𑀢𑁆𑀣𑀸𑀧𑀺 𑀲𑀢𑁆𑀣𑀸 𑀅𑀓𑀸𑀲𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑁂𑀯 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣𑀆𑀤𑀺𑀫𑁆𑀳𑀺 𑀓𑀮𑁆𑀬𑀸𑀡𑀁, 𑀆𑀤𑀺 𑀯𑀸 𑀓𑀮𑁆𑀬𑀸𑀡𑀁 𑀏𑀢𑀲𑁆𑀲𑀸𑀢𑀺 𑀆𑀤𑀺𑀓𑀮𑁆𑀬𑀸𑀡𑀁. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀲𑀸𑀢𑁆𑀣𑀁. 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀬𑀜𑁆𑀚𑀦𑀁. 𑀲𑀻𑀮𑀸𑀤𑀺𑀧𑀜𑁆𑀘𑀥𑀫𑁆𑀫𑀓𑁆𑀔𑀦𑁆𑀥𑀧𑀸𑀭𑀺𑀧𑀽𑀭𑀺𑀢𑁄 𑀉𑀧𑀦𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀸 𑀘 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁. 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑁄 𑀅𑀧𑀦𑁂𑀢𑀩𑁆𑀩𑀲𑁆𑀲 𑀅𑀪𑀸𑀯𑀸 ¶ 𑀘 𑀧𑀭𑀺𑀲𑀼𑀤𑁆𑀥𑀁. 𑀲𑁂𑀝𑁆𑀞𑀘𑀭𑀺𑀬𑀪𑀸𑀯𑀢𑁄 𑀲𑀸𑀲𑀦 𑀩𑁆𑀭𑀳𑁆𑀫𑀘𑀭𑀺𑀬𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀜𑁆𑀘 𑀯𑁄 𑀧𑀓𑀸𑀲𑁂𑀲𑁆𑀲𑀸𑀫𑀻𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁪𑁭) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀭𑀺𑀬𑀯𑀁𑀲𑀸𑀢𑀺 𑀅𑀭𑀺𑀬𑀸𑀦𑀁 𑀩𑀼𑀤𑁆𑀥𑀸𑀤𑀻𑀦𑀁 𑀯𑀁𑀲𑀸 𑀧𑀯𑁂𑀡𑀺𑀬𑁄. 𑀅𑀕𑁆𑀕𑀜𑁆𑀜𑀸𑀢𑀺 ‘‘𑀅𑀕𑁆𑀕𑀸’’𑀢𑀺 𑀚𑀸𑀦𑀺𑀢𑀩𑁆𑀩𑀸 𑀲𑀩𑁆𑀩𑀯𑀁𑀲𑁂𑀳𑀺 𑀲𑁂𑀝𑁆𑀞𑀪𑀸𑀯𑀢𑁄. 𑀭𑀢𑁆𑀢𑀜𑁆𑀜𑀸𑀢𑀺 ‘‘𑀘𑀺𑀭𑀭𑀢𑁆𑀢𑀸’’𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀯𑀁𑀲𑀜𑁆𑀜𑀸𑀢𑀺 ‘‘𑀩𑀼𑀤𑁆𑀥𑀸𑀤𑀻𑀦𑀁 𑀯𑀁𑀲𑀸’’𑀢𑀺 𑀚𑀸𑀦𑀺𑀢𑀩𑁆𑀩𑀸. 𑀧𑁄𑀭𑀸𑀡𑀸𑀢𑀺 𑀧𑀼𑀭𑀸𑀢𑀦𑀸 𑀅𑀦𑀥𑀼𑀦𑀸𑀢𑀦𑀢𑁆𑀢𑀸. 𑀅𑀲𑀁𑀓𑀺𑀡𑁆𑀡𑀸𑀢𑀺 𑀅𑀯𑀺𑀓𑀺𑀡𑁆𑀡𑀸 𑀅𑀦𑀧𑀦𑀻𑀢𑀸. 𑀅𑀲𑀁𑀓𑀺𑀡𑁆𑀡𑀧𑀼𑀩𑁆𑀩𑀸𑀢𑀺 ‘‘𑀓𑀺𑀁 𑀇𑀫𑁂𑀳𑀻’’𑀢𑀺 𑀅𑀭𑀺𑀬𑁂𑀳𑀺 𑀦 𑀅𑀧𑀦𑀻𑀢𑀧𑀼𑀩𑁆𑀩𑀸. 𑀦 𑀲𑀁𑀓𑀻𑀬𑀦𑁆𑀢𑀻𑀢𑀺 𑀇𑀤𑀸𑀦𑀺𑀧𑀺 𑀢𑁂𑀳𑀺 𑀦 𑀅𑀧𑀦𑀻𑀬𑀦𑁆𑀢𑀺. 𑀦 𑀲𑀁𑀓𑀻𑀬𑀺𑀲𑁆𑀲𑀦𑁆𑀢𑀻𑀢𑀺 𑀅𑀦𑀸𑀕𑀢𑁂𑀧𑀺 𑀢𑁂𑀳𑀺 𑀦 𑀅𑀧𑀦𑀻𑀬𑀺𑀲𑁆𑀲𑀦𑁆𑀢𑀺. 𑀅𑀧𑁆𑀧𑀝𑀺𑀓𑀼𑀝𑁆𑀞𑀸…𑀧𑁂… 𑀯𑀺𑀜𑁆𑀜𑀽𑀳𑀻𑀢𑀺 𑀬𑁂 𑀮𑁄𑀓𑁂 𑀯𑀺𑀜𑁆𑀜𑀽 𑀲𑀫𑀡𑀩𑁆𑀭𑀸𑀳𑁆𑀫𑀡𑀸, 𑀢𑁂𑀳𑀺 𑀅𑀧𑀘𑁆𑀘𑀓𑁆𑀔𑀢𑀸 𑀅𑀦𑀺𑀦𑁆𑀤𑀺𑀢𑀸, 𑀅𑀕𑀭𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀯𑀺𑀲𑀼𑀤𑁆𑀥𑀺𑀬𑀸𑀢𑀺𑀆𑀤𑀻𑀳𑀻𑀢𑀺 𑀯𑀺𑀲𑀼𑀤𑁆𑀥𑀺𑀆𑀤𑀺𑀤𑀻𑀧𑀦𑁂𑀳𑀺. 𑀧𑀤𑁂𑀳𑀻𑀢𑀺 𑀯𑀸𑀓𑁆𑀬𑁂𑀳𑀺, 𑀯𑀺𑀲𑀼𑀤𑁆𑀥𑀺𑀅𑀢𑁆𑀣𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑁂𑀳𑀺 𑀯𑀸 𑀥𑀫𑁆𑀫𑀓𑁄𑀝𑁆𑀞𑀸𑀲𑁂𑀳𑀺.

𑀉𑀧𑀤𑁆𑀤𑀯𑁂𑀢𑀺 𑀅𑀦𑀢𑁆𑀣𑁂. 𑀯𑀺𑀲𑀼𑀤𑁆𑀥𑀺𑀦𑁆𑀢𑀺 𑀯𑀺𑀲𑀼𑀚𑁆𑀛𑀦𑀁 𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀁. 𑀯𑀸𑀘𑀼𑀕𑁆𑀕𑀢𑀓𑀭𑀡𑀁 𑀉𑀕𑁆𑀕𑀳𑁄. 𑀧𑀭𑀺𑀬𑀸𑀧𑀼𑀡𑀦𑀁 𑀧𑀭𑀺𑀘𑀬𑁄. 𑀅𑀢𑁆𑀣𑀲𑁆𑀲 𑀳𑀤𑀬𑁂 𑀞𑀧𑀦𑀁 𑀥𑀸𑀭𑀡𑀁. 𑀧𑀭𑀺𑀯𑀢𑁆𑀢𑀦𑀁 𑀯𑀸𑀘𑀦𑀁. 𑀕𑀦𑁆𑀥𑀸𑀭𑀓𑁄𑀢𑀺 𑀕𑀦𑁆𑀥𑀸𑀭𑀤𑁂𑀲𑁂 𑀉𑀧𑁆𑀧𑀦𑁆𑀦𑁄. 𑀧𑀳𑁄𑀦𑁆𑀢𑀻𑀢𑀺 𑀲𑀓𑁆𑀓𑁄𑀦𑁆𑀢𑀺 𑀅𑀦𑀺𑀬𑁆𑀬𑀸𑀦𑀫𑀕𑁆𑀕𑀸𑀢𑀺 𑀫𑀺𑀘𑁆𑀙𑀸𑀫𑀕𑁆𑀕𑀸, 𑀫𑀺𑀘𑁆𑀙𑀢𑁆𑀢𑀦𑀺𑀬𑀢𑀸𑀦𑀺𑀬𑀢𑀫𑀕𑁆𑀕𑀸𑀧𑀺 𑀯𑀸. 𑀲𑀼𑀯𑀡𑁆𑀡𑀦𑁆𑀢𑀺 𑀓𑀽𑀝𑀲𑀼𑀯𑀡𑁆𑀡𑀫𑁆𑀧𑀺 𑀯𑀼𑀘𑁆𑀘𑀢𑀺. 𑀧𑀡𑀻𑀢𑀺 𑀓𑀸𑀘𑀫𑀡𑀺𑀧𑀺. 𑀫𑀼𑀢𑁆𑀢𑀸𑀢𑀺 𑀯𑁂𑀴𑀼𑀚𑀸𑀧𑀺. 𑀧𑀯𑀸𑀴𑀦𑁆𑀢𑀺 𑀧𑀮𑁆𑀮𑀯𑁄𑀧𑀺 𑀯𑀼𑀘𑁆𑀘𑀢𑀻𑀢𑀺 𑀭𑀢𑁆𑀢𑀚𑀫𑁆𑀩𑀼𑀦𑀤𑀸𑀤𑀺𑀧𑀤𑁂𑀳𑀺 𑀢𑁂 𑀯𑀺𑀲𑁂𑀲𑀺𑀢𑀸.

𑀦 𑀢𑀢𑁄 𑀳𑁂𑀝𑁆𑀞𑀸𑀢𑀺 (𑀲𑀁. 𑀦𑀺. 𑀝𑀻. 𑁨.𑁫.𑁩𑁬𑁭; 𑀤𑀻. 𑀦𑀺. 𑀝𑀻. 𑁨.𑁩𑁭𑁩) 𑀇𑀥𑀸𑀥𑀺𑀧𑁆𑀧𑁂𑀢𑀓𑀸𑀬𑀸𑀤𑀻𑀦𑀁 𑀯𑁂𑀤𑀦𑀸𑀤𑀺𑀲𑀪𑀸𑀯𑀢𑁆𑀢𑀸𑀪𑀸𑀯𑀸, 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀯𑀺𑀫𑀼𑀢𑁆𑀢𑀲𑁆𑀲 𑀢𑁂𑀪𑀽𑀫𑀓𑀥𑀫𑁆𑀫𑀲𑁆𑀲 𑀯𑀺𑀲𑀼𑀁 𑀯𑀺𑀧𑀮𑁆𑀮𑀸𑀲𑀯𑀢𑁆𑀣𑀦𑁆𑀢𑀭𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 𑀘 𑀳𑁂𑀝𑁆𑀞𑀸𑀕𑀳𑀡𑁂𑀲𑀼 𑀯𑀺𑀧𑀮𑁆𑀮𑀸𑀲𑀯𑀢𑁆𑀣𑀽𑀦𑀁 𑀅𑀦𑀺𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀧𑀜𑁆𑀘𑀫𑀲𑁆𑀲 ¶ 𑀧𑀦 𑀯𑀺𑀧𑀮𑁆𑀮𑀸𑀲𑀯𑀢𑁆𑀣𑀼𑀦𑁄 𑀅𑀪𑀸𑀯𑀸 ‘‘𑀦 𑀉𑀤𑁆𑀥’’𑀦𑁆𑀢𑀺 𑀆𑀳. 𑀆𑀭𑀫𑁆𑀫𑀡𑀯𑀺𑀪𑀸𑀕𑁂𑀦 𑀳𑁂𑀢𑁆𑀣 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀸𑀕𑁄𑀢𑀺. 𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀲𑀢𑀺𑀧𑀝𑁆𑀞𑀸𑀦𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑀤𑀲𑁆𑀲𑀦𑀁, 𑀦 𑀇𑀥 𑀧𑀸𑀴𑀺𑀬𑀁 𑀯𑀼𑀢𑁆𑀢𑀲𑁆𑀲 𑀲𑀢𑀺𑀧𑀝𑁆𑀞𑀸𑀦𑀲𑀤𑁆𑀤𑀲𑁆𑀲 𑀅𑀢𑁆𑀣𑀤𑀲𑁆𑀲𑀦𑀦𑁆𑀢𑀺. 𑀆𑀤𑀻𑀲𑀼 𑀳𑀺 𑀲𑀢𑀺𑀕𑁄𑀘𑀭𑁄𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 ‘‘𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀦𑀁 𑀲𑀫𑀼𑀤𑀬𑁄, 𑀦𑀸𑀫𑀭𑀽𑀧𑀲𑀫𑀼𑀤𑀬𑀸 𑀘𑀺𑀢𑁆𑀢𑀲𑁆𑀲 𑀲𑀫𑀼𑀤𑀬𑁄, 𑀫𑀦𑀲𑀺𑀓𑀸𑀭𑀲𑀫𑀼𑀤𑀬𑀸 𑀥𑀫𑁆𑀫𑀸𑀦𑀁 𑀲𑀫𑀼𑀤𑀬𑁄’’𑀢𑀺 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀯𑀼𑀢𑁆𑀢𑀸𑀦𑀁 ¶ 𑀲𑀢𑀺𑀕𑁄𑀘𑀭𑀸𑀦𑀁 𑀧𑀓𑀸𑀲𑀓𑁂 𑀲𑀼𑀢𑁆𑀢𑀧𑀤𑁂𑀲𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀯𑀁 𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀴𑀺𑀬𑀫𑁆𑀧𑀺 (𑀧𑀝𑀺. 𑀫. 𑁩.𑁩𑁪) 𑀅𑀯𑀲𑁂𑀲𑀧𑀸𑀴𑀺𑀧𑁆𑀧𑀤𑁂𑀲𑀤𑀲𑁆𑀲𑀦𑀢𑁆𑀣𑁄 𑀆𑀤𑀺-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀲𑀢𑀺𑀬𑀸 𑀧𑀝𑁆𑀞𑀸𑀦𑀦𑁆𑀢𑀺 𑀲𑀢𑀺𑀬𑀸 𑀧𑀢𑀺𑀝𑁆𑀞𑀸𑀢𑀩𑁆𑀩𑀝𑁆𑀞𑀸𑀦𑀁. 𑀤𑀸𑀦𑀸𑀤𑀻𑀦𑀺 𑀲𑀢𑀺𑀬𑀸 𑀓𑀭𑁄𑀦𑁆𑀢𑀲𑁆𑀲 𑀭𑀽𑀧𑀸𑀤𑀻𑀦𑀺 𑀓𑀲𑀺𑀡𑀸𑀤𑀻𑀦𑀺 𑀘 𑀲𑀢𑀺𑀬𑀸 𑀞𑀸𑀦𑀁 𑀳𑁄𑀦𑁆𑀢𑀻𑀢𑀺 𑀢𑀁𑀦𑀺𑀯𑀸𑀭𑀡𑀢𑁆𑀣𑀫𑀸𑀳 ‘‘𑀧𑀥𑀸𑀦𑀁 𑀞𑀸𑀦’’𑀦𑁆𑀢𑀺. 𑀧-𑀲𑀤𑁆𑀤𑁄 𑀳𑀺 𑀇𑀥 ‘‘𑀧𑀡𑀻𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁪 𑀢𑀺𑀓𑀫𑀸𑀢𑀺𑀓𑀸) 𑀯𑀺𑀬 𑀧𑀥𑀸𑀦𑀢𑁆𑀣𑀤𑀻𑀧𑀓𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀭𑀺𑀬𑁄𑀢𑀺 𑀅𑀭𑀺𑀬𑀁 𑀲𑀩𑁆𑀩𑀲𑀢𑁆𑀢𑀲𑁂𑀝𑁆𑀞𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀫𑀸𑀳. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀲𑀴𑀸𑀬𑀢𑀦𑀯𑀺𑀪𑀗𑁆𑀕𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁩𑁧𑁧). 𑀲𑀼𑀢𑁆𑀢𑁂𑀓𑀤𑁂𑀲𑁂𑀦 𑀳𑀺 𑀲𑀼𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀳𑀺 𑁋

‘‘𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸 𑀬𑀤𑀭𑀺𑀬𑁄…𑀧𑁂… 𑀫𑀭𑀳𑀢𑀻𑀢𑀺 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁. 𑀇𑀥, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀅𑀦𑀼𑀓𑀫𑁆𑀧𑀓𑁄 𑀳𑀺𑀢𑁂𑀲𑀻 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬 ‘‘𑀇𑀤𑀁 𑀯𑁄 𑀳𑀺𑀢𑀸𑀬 𑀇𑀤𑀁 𑀯𑁄 𑀲𑀼𑀔𑀸𑀬𑀸’𑀢𑀺. 𑀢𑀲𑁆𑀲 𑀲𑀸𑀯𑀓𑀸 𑀦 𑀲𑀼𑀲𑁆𑀲𑀽𑀲𑀦𑁆𑀢𑀺, 𑀦 𑀲𑁄𑀢𑀁 𑀑𑀤𑀳𑀦𑁆𑀢𑀺, 𑀦 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀯𑁄𑀓𑁆𑀓𑀫𑁆𑀫 𑀘 𑀲𑀢𑁆𑀣𑀼𑀲𑀸𑀲𑀦𑀸 𑀯𑀢𑁆𑀢𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀦 𑀘𑁂𑀯 𑀅𑀦𑀢𑁆𑀢𑀫𑀦𑁄 𑀳𑁄𑀢𑀺, 𑀦 𑀘 𑀅𑀦𑀢𑁆𑀢𑀫𑀦𑀢𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀅𑀦𑀯𑀲𑁆𑀲𑀼𑀢𑁄 𑀘 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀇𑀤𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀁 𑀲𑀢𑀺𑀧𑀝𑁆𑀞𑀸𑀦𑀁, 𑀬𑀤𑀭𑀺𑀬𑁄…𑀧𑁂… 𑀅𑀭𑀳𑀢𑀺.

𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀸…𑀧𑁂… 𑀇𑀤𑀁 𑀯𑁄 𑀲𑀼𑀔𑀸𑀬𑀸𑀢𑀺. 𑀢𑀲𑁆𑀲 𑀏𑀓𑀘𑁆𑀘𑁂 𑀲𑀸𑀯𑀓𑀸 𑀦 𑀲𑀼𑀲𑁆𑀲𑀽𑀲𑀦𑁆𑀢𑀺…𑀧𑁂… 𑀯𑀢𑁆𑀢𑀦𑁆𑀢𑀺. 𑀏𑀓𑀘𑁆𑀘𑁂 𑀲𑀸𑀯𑀓𑀸 𑀲𑀼𑀲𑁆𑀲𑀽𑀲𑀦𑁆𑀢𑀺…𑀧𑁂… 𑀦 𑀘 𑀯𑁄𑀓𑁆𑀓𑀫𑁆𑀫 𑀲𑀢𑁆𑀣𑀼𑀲𑀸𑀲𑀦𑀸 𑀯𑀢𑁆𑀢𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀦 𑀘𑁂𑀯 𑀅𑀦𑀢𑁆𑀢𑀫𑀦𑁄 𑀳𑁄𑀢𑀺, 𑀦 𑀘 𑀅𑀦𑀢𑁆𑀢𑀫𑀦𑀢𑀁 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀦 𑀘𑁂𑀯 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀦 𑀘 𑀅𑀢𑁆𑀢𑀫𑀦𑀢𑀁 𑀧𑀝𑀺𑀲𑀁𑀯𑁂𑀤𑁂𑀢𑀺. 𑀅𑀦𑀢𑁆𑀢𑀫𑀦𑀢𑀜𑁆𑀘 𑀅𑀢𑁆𑀢𑀫𑀦𑀢𑀜𑁆𑀘 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀢𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑀁 𑀲𑀢𑀺𑀧𑀝𑁆𑀞𑀸𑀦𑀁…𑀧𑁂… 𑀅𑀭𑀳𑀢𑀺.

𑀧𑀼𑀦 𑀘𑀧𑀭𑀁…𑀧𑁂… 𑀲𑀼𑀔𑀸𑀬𑀸𑀢𑀺. 𑀢𑀲𑁆𑀲 𑀲𑀸𑀯𑀓𑀸 𑀲𑀼𑀲𑁆𑀲𑀽𑀲𑀦𑁆𑀢𑀺…𑀧𑁂… 𑀯𑀢𑁆𑀢𑀦𑁆𑀢𑀺. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑁄 𑀅𑀢𑁆𑀢𑀫𑀦𑁄 𑀘𑁂𑀯 𑀳𑁄𑀢𑀺, 𑀅𑀢𑁆𑀢𑀫𑀦𑀢𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀢𑀺, 𑀅𑀦𑀯𑀲𑁆𑀲𑀼𑀢𑁄 𑀘 𑀯𑀺𑀳𑀭𑀢𑀺 ¶ 𑀲𑀢𑁄 𑀲𑀫𑁆𑀧𑀚𑀸𑀦𑁄 ¶ . 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀢𑀢𑀺𑀬𑀁 𑀲𑀢𑀺𑀧𑀝𑁆𑀞𑀸𑀦𑀁…𑀧𑁂… 𑀅𑀭𑀳𑀢𑀻’’𑀢𑀺 (𑀫. 𑀦𑀺. 𑁩.𑁩𑁧𑁧) 𑁋

𑀏𑀯𑀁 𑀧𑀝𑀺𑀖𑀸𑀦𑀼𑀦𑀬𑁂𑀳𑀺 𑀅𑀦𑀯𑀲𑁆𑀲𑀼𑀢𑀢𑀸, 𑀦𑀺𑀘𑁆𑀘𑀁 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀢𑀸𑀬 𑀢𑀤𑀼𑀪𑀬𑀯𑀻𑀢𑀺𑀯𑀢𑁆𑀢𑀢𑀸 ‘‘𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀸. 𑀩𑀼𑀤𑁆𑀥𑀸𑀦𑀁𑀬𑁂𑀯 𑀳𑀺 𑀦𑀺𑀘𑁆𑀘𑀁 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀢𑀸 𑀳𑁄𑀢𑀺 𑀆𑀯𑁂𑀡𑀺𑀓𑀥𑀫𑁆𑀫𑀪𑀸𑀯𑀢𑁄, 𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀤𑀻𑀦𑀁. 𑀧-𑀲𑀤𑁆𑀤𑁄 𑀆𑀭𑀫𑁆𑀪𑀁 𑀚𑁄𑀢𑁂𑀢𑀺, 𑀆𑀭𑀫𑁆𑀪𑁄 𑀘 𑀧𑀯𑀢𑁆𑀢𑀻𑀢𑀺 𑀓𑀢𑁆𑀯𑀸 𑀆𑀳 ‘‘𑀧𑀯𑀢𑁆𑀢𑀬𑀺𑀢𑀩𑁆𑀩𑀢𑁄𑀢𑀺 𑀅𑀢𑁆𑀣𑁄’’𑀢𑀺. 𑀲𑀢𑀺𑀬𑀸 𑀓𑀭𑀡𑀪𑀽𑀢𑀸𑀬 𑀧𑀝𑁆𑀞𑀸𑀦𑀁 𑀧𑀝𑁆𑀞𑀧𑁂𑀢𑀩𑁆𑀩𑀁 𑀲𑀢𑀺𑀧𑀝𑁆𑀞𑀸𑀦𑀁. 𑀅𑀦-𑀲𑀤𑁆𑀤𑁄 𑀳𑀺 𑀩𑀳𑀼𑀮𑀯𑀘𑀦𑁂𑀦 𑀓𑀫𑁆𑀫𑀢𑁆𑀣𑁄𑀧𑀺 𑀳𑁄𑀢𑀻𑀢𑀺.

𑀢𑀣𑀸𑀲𑁆𑀲 𑀓𑀢𑁆𑀢𑀼𑀅𑀢𑁆𑀣𑁄𑀧𑀺 𑀮𑀩𑁆𑀪𑀢𑀻𑀢𑀺 ‘‘𑀧𑀢𑀺𑀝𑁆𑀞𑀸𑀢𑀻𑀢𑀺 𑀧𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧-𑀲𑀤𑁆𑀤𑁄 𑀪𑀽𑀲𑀢𑁆𑀣𑀯𑀺𑀲𑀺𑀝𑁆𑀞𑀁 𑀧𑀓𑁆𑀔𑀦𑁆𑀥𑀦𑀁 𑀤𑀻𑀧𑁂𑀢𑀻𑀢𑀺 ‘‘𑀑𑀓𑁆𑀓𑀦𑁆𑀢𑀺𑀢𑁆𑀯𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄’’𑀢𑀺 𑀆𑀳. 𑀧𑀼𑀦 𑀪𑀸𑀯𑀢𑁆𑀣𑀁 𑀲𑀢𑀺-𑀲𑀤𑁆𑀤𑀁 𑀧𑀝𑁆𑀞𑀸𑀦-𑀲𑀤𑁆𑀤𑀜𑁆𑀘 𑀯𑀡𑁆𑀡𑁂𑀦𑁆𑀢𑁄 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀧𑀼𑀭𑀺𑀫𑀯𑀺𑀓𑀧𑁆𑀧𑁂 𑀲𑀢𑀺-𑀲𑀤𑁆𑀤𑁄 𑀧𑀝𑁆𑀞𑀸𑀦-𑀲𑀤𑁆𑀤𑁄 𑀘 𑀓𑀢𑁆𑀣𑀼𑀅𑀢𑁆𑀣𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀲𑀭𑀡𑀝𑁆𑀞𑁂𑀦𑀸𑀢𑀺 𑀘𑀺𑀭𑀓𑀢𑀲𑁆𑀲 𑀘𑀺𑀭𑀪𑀸𑀲𑀺𑀢𑀲𑁆𑀲 𑀘 𑀅𑀦𑀼𑀲𑁆𑀲𑀭𑀡𑀝𑁆𑀞𑁂𑀦. 𑀇𑀤𑀦𑁆𑀢𑀺 𑀬𑀁 ‘‘𑀲𑀢𑀺𑀬𑁂𑀯 𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀤𑀁 𑀇𑀥 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑀧𑀤𑁂𑀲𑁂 𑀅𑀥𑀺𑀧𑁆𑀧𑁂𑀢𑀁.

𑀬𑀤𑀺 𑀏𑀯𑀦𑁆𑀢𑀺 𑀬𑀤𑀺 𑀲𑀢𑀺 𑀏𑀯 𑀲𑀢𑀺𑀧𑀝𑁆𑀞𑀸𑀦𑀁, 𑀲𑀢𑀺 𑀦𑀸𑀫 𑀏𑀓𑁄 𑀥𑀫𑁆𑀫𑁄, 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 ‘‘𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀩𑀳𑀼𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀢𑀺𑀩𑀳𑀼𑀢𑁆𑀢𑀸’’𑀢𑀺𑀆𑀤𑀺. 𑀬𑀤𑀺 𑀩𑀳𑀼𑀓𑀸 𑀏𑀢𑀸 𑀲𑀢𑀺𑀬𑁄, 𑀅𑀣 𑀓𑀲𑁆𑀫𑀸 ‘‘𑀫𑀕𑁆𑀕𑁄’’𑀢𑀺 𑀏𑀓𑀯𑀘𑀦𑀦𑁆𑀢𑀺 𑀬𑁄𑀚𑀦𑀸. 𑀫𑀕𑁆𑀕𑀝𑁆𑀞𑁂𑀦𑀸𑀢𑀺 𑀦𑀺𑀬𑁆𑀬𑀸𑀦𑀝𑁆𑀞𑁂𑀦. 𑀦𑀺𑀬𑁆𑀬𑀸𑀦𑀺𑀓𑁄 𑀳𑀺 𑀫𑀕𑁆𑀕𑀥𑀫𑁆𑀫𑁄, 𑀢𑁂𑀦𑁂𑀯 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑁂𑀦 𑀏𑀓𑀢𑁆𑀢𑀼𑀧𑀕𑀢𑁄 𑀏𑀓𑀦𑁆𑀢𑀢𑁄 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀢𑀺, 𑀅𑀢𑁆𑀣𑀺𑀓𑁂𑀳𑀺 𑀘 𑀢𑀤𑀢𑁆𑀣𑀁 𑀫𑀕𑁆𑀕𑀻𑀬𑀢𑀻𑀢𑀺 𑀅𑀢𑁆𑀢𑀦𑀸𑀯 𑀧𑀼𑀩𑁆𑀩𑁂 𑀯𑀼𑀢𑁆𑀢𑀁 𑀧𑀘𑁆𑀘𑀸𑀳𑀭𑀢𑀺 ‘‘𑀯𑀼𑀢𑁆𑀢𑀜𑁆𑀘𑁂𑀢’’𑀦𑁆𑀢𑀺. 𑀢𑀢𑁆𑀣 𑀘𑀢𑀲𑁆𑀲𑁄𑀧𑀺 𑀘𑁂𑀢𑀸𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀸𑀧𑀺 𑀘 𑀏𑀢𑀸 𑀲𑀢𑀺𑀬𑁄. 𑀅𑀧𑀭𑀪𑀸𑀕𑁂𑀢𑀺 𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑁂. 𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸𑀢𑀺 𑀧𑀼𑀩𑁆𑀩𑀪𑀸𑀕𑁂 𑀓𑀸𑀬𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀲𑀼𑀪𑀲𑀜𑁆𑀜𑀸𑀤𑀺𑀯𑀺𑀥𑀫𑀦𑁂𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀯𑀢𑁆𑀢𑀺𑀢𑁆𑀯𑀸 𑀫𑀕𑁆𑀕𑀓𑁆𑀔𑀡𑁂 𑀲𑀓𑀺𑀁𑀬𑁂𑀯 𑀢𑀢𑁆𑀣 𑀘𑀢𑀼𑀩𑁆𑀩𑀺𑀥𑀲𑁆𑀲𑀧𑀺 𑀯𑀺𑀧𑀮𑁆𑀮𑀸𑀲𑀲𑁆𑀲 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀳𑀸𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀘𑀢𑀼𑀩𑁆𑀩𑀺𑀥𑀓𑀺𑀘𑁆𑀘𑀲𑀸𑀥𑀦𑁂𑀦𑁂𑀯 𑀳𑁂𑀢𑁆𑀣 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄. 𑀏𑀯𑀜𑁆𑀘 𑀲𑀢𑀻𑀢𑀺 𑀫𑀕𑁆𑀕𑀝𑁆𑀞𑁂𑀦 𑀏𑀓𑀢𑁆𑀢𑀁 𑀉𑀧𑀸𑀤𑀸𑀬 ‘‘𑀫𑀕𑁆𑀕𑁄’’𑀢𑀺 𑀏𑀓𑀯𑀘𑀦𑁂𑀦 𑀆𑀭𑀫𑁆𑀫𑀡𑀪𑁂𑀤𑁂𑀦 ¶ 𑀘𑀢𑀼𑀩𑁆𑀩𑀺𑀥𑀢𑀁 𑀉𑀧𑀸𑀤𑀸𑀬 ‘‘𑀘𑀢𑁆𑀢𑀸𑀭𑁄’’𑀢𑀺 𑀘 𑀯𑀢𑁆𑀢𑀩𑁆𑀩𑀢𑀸𑀬 𑀲𑀢𑀺𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀯𑀘𑀦𑀸𑀦𑀼𑀲𑀦𑁆𑀥𑀺𑀦𑀸 ‘‘𑀏𑀓𑀸𑀬𑀦𑁄 𑀅𑀬’’𑀦𑁆𑀢𑀺𑀆𑀤𑀺𑀓𑀸 𑀤𑁂𑀲𑀦𑀸 𑀲𑀸𑀦𑀼𑀲𑀦𑁆𑀥𑀺𑀓𑀸𑀯, 𑀦 𑀅𑀦𑀦𑀼𑀲𑀦𑁆𑀥𑀺𑀓𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀦𑀺𑀤𑀲𑁆𑀲𑀦𑁂𑀦 𑀧𑀝𑀺𑀧𑀸𑀤𑁂𑀢𑀼𑀁 ‘‘𑀫𑀸𑀭𑀲𑁂𑀦𑀧𑁆𑀧𑀫𑀤𑁆𑀤𑀦’’𑀦𑁆𑀢𑀺 𑀲𑀼𑀢𑁆𑀢𑀧𑀤𑀁 (𑀲𑀁. 𑀦𑀺. 𑁫.𑁨𑁨𑁪) 𑀆𑀦𑁂𑀢𑁆𑀯𑀸 ¶ ‘‘𑀬𑀣𑀸’’𑀢𑀺𑀆𑀤𑀺𑀦𑀸 𑀦𑀺𑀤𑀲𑁆𑀲𑀦𑀁 𑀲𑀁𑀲𑀦𑁆𑀤𑁂𑀢𑀺. 𑀢𑀲𑁆𑀫𑀸𑀢𑀺𑀆𑀤𑀺 𑀦𑀺𑀕𑀫𑀦𑀁.

𑀯𑀺𑀲𑁂𑀲𑀢𑁄 𑀓𑀸𑀬𑁄 𑀘 𑀯𑁂𑀤𑀦𑀸 𑀘 𑀅𑀲𑁆𑀲𑀸𑀤𑀲𑁆𑀲𑀓𑀸𑀭𑀡𑀦𑁆𑀢𑀺 𑀢𑀧𑁆𑀧𑀳𑀸𑀦𑀢𑁆𑀣𑀁 𑀢𑁂𑀲𑀼 𑀢𑀡𑁆𑀳𑀸𑀯𑀢𑁆𑀣𑀽𑀲𑀼 𑀑𑀴𑀸𑀭𑀺𑀓𑀲𑀼𑀔𑀼𑀫𑁂𑀲𑀼 𑀅𑀲𑀼𑀪𑀤𑀼𑀓𑁆𑀔𑀪𑀸𑀯𑀤𑀲𑁆𑀲𑀦𑀸𑀦𑀺 𑀫𑀦𑁆𑀤𑀢𑀺𑀓𑁆𑀔𑀧𑀜𑁆𑀜𑁂𑀳𑀺 𑀢𑀡𑁆𑀳𑀸𑀘𑀭𑀺𑀢𑁂𑀳𑀺 𑀲𑀼𑀓𑀭𑀸𑀦𑀻𑀢𑀺 𑀢𑀸𑀦𑀺 𑀢𑁂𑀲𑀁 ‘‘𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄’’𑀢𑀺 𑀯𑀼𑀢𑁆𑀢𑀸𑀦𑀺 𑀢𑀣𑀸 ‘‘𑀦𑀺𑀘𑁆𑀘𑀁 𑀅𑀢𑁆𑀢𑀸’’𑀢𑀺 𑀅𑀪𑀺𑀦𑀺𑀯𑁂𑀲𑀯𑀢𑁆𑀣𑀼𑀢𑀸𑀬 𑀤𑀺𑀝𑁆𑀞𑀺𑀬𑀸 𑀯𑀺𑀲𑁂𑀲𑀓𑀸𑀭𑀡𑁂𑀲𑀼 𑀘𑀺𑀢𑁆𑀢𑀥𑀫𑁆𑀫𑁂𑀲𑀼 𑀅𑀦𑀺𑀘𑁆𑀘𑀸𑀦𑀢𑁆𑀢𑀢𑀸𑀤𑀲𑁆𑀲𑀦𑀸𑀦𑀺 𑀲𑀭𑀸𑀕𑀸𑀤𑀺𑀯𑀲𑁂𑀦 𑀲𑀜𑁆𑀜𑀸𑀨𑀲𑁆𑀲𑀸𑀤𑀺𑀯𑀲𑁂𑀦 𑀦𑀻𑀯𑀭𑀡𑀸𑀤𑀺𑀯𑀲𑁂𑀦 𑀘 𑀦𑀸𑀢𑀺𑀧𑁆𑀧𑀪𑁂𑀤𑀅𑀢𑀺𑀧𑁆𑀧𑀪𑁂𑀤𑀕𑀢𑁂𑀲𑀼 𑀢𑁂𑀲𑀼 𑀢𑀧𑁆𑀧𑀳𑀸𑀦𑀢𑁆𑀣𑀁 𑀫𑀦𑁆𑀤𑀢𑀺𑀓𑁆𑀔𑀧𑀜𑁆𑀜𑀸𑀦𑀁 𑀤𑀺𑀝𑁆𑀞𑀺𑀘𑀭𑀺𑀢𑀸𑀦𑀁 𑀲𑀼𑀓𑀭𑀸𑀦𑀻𑀢𑀺 𑀢𑁂𑀲𑀁 𑀢𑀸𑀦𑀺 ‘‘𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄’’𑀢𑀺 𑀯𑀼𑀢𑁆𑀢𑀸𑀦𑀺. 𑀏𑀢𑁆𑀣 𑀘 𑀬𑀣𑀸 𑀘𑀺𑀢𑁆𑀢𑀥𑀫𑁆𑀫𑀸𑀦𑀫𑁆𑀧𑀺 𑀢𑀡𑁆𑀳𑀸𑀬 𑀯𑀢𑁆𑀣𑀼𑀪𑀸𑀯𑁄 𑀲𑀫𑁆𑀪𑀯𑀢𑀺, 𑀢𑀣𑀸 𑀓𑀸𑀬𑀯𑁂𑀤𑀦𑀸𑀦𑀫𑁆𑀧𑀺 𑀤𑀺𑀝𑁆𑀞𑀺𑀬𑀸𑀢𑀺 𑀲𑀢𑀺𑀧𑀺 𑀦𑁂𑀲𑀁 𑀘𑀢𑀼𑀦𑁆𑀦𑀫𑁆𑀧𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑀸 𑀯𑀢𑁆𑀣𑀼𑀪𑀸𑀯𑁂 𑀬𑁄 𑀬𑀲𑁆𑀲 𑀲𑀸𑀢𑀺𑀲𑀬𑀧𑀘𑁆𑀘𑀬𑁄, 𑀢𑀁𑀤𑀲𑁆𑀲𑀦𑀢𑁆𑀣𑀁 𑀯𑀺𑀲𑁂𑀲𑀕𑁆𑀕𑀳𑀡𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀺𑀓𑁆𑀔𑀧𑀜𑁆𑀜𑀲𑀫𑀣𑀬𑀸𑀦𑀺𑀓𑁄 𑀑𑀴𑀸𑀭𑀺𑀓𑀸𑀭𑀫𑁆𑀫𑀡𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑀢𑁆𑀣 𑀅𑀝𑁆𑀞𑀢𑁆𑀯𑀸 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀯𑁂𑀤𑀦𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀯𑀼𑀢𑁆𑀢𑀁. ‘‘𑀑𑀴𑀸𑀭𑀺𑀓𑀸𑀭𑀫𑁆𑀫𑀡𑁂 𑀅𑀲𑀡𑁆𑀞𑀳𑀦𑀢𑁄’’𑀢𑀺. 𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑀲𑁆𑀲 𑀧𑀦 𑀲𑀼𑀔𑀼𑀫𑁂 𑀘𑀺𑀢𑁆𑀢𑁂 𑀥𑀫𑁆𑀫𑁂𑀲𑀼 𑀘 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑀘𑀺𑀢𑁆𑀢𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀦𑀁 𑀫𑀦𑁆𑀤𑀢𑀺𑀓𑁆𑀔𑀧𑀜𑁆𑀜𑀸𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀓𑀸𑀦𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑀸 𑀯𑀼𑀢𑁆𑀢𑀸.

𑀢𑁂𑀲𑀁 𑀢𑀢𑁆𑀣𑀸𑀢𑀺 𑀏𑀢𑁆𑀣 𑀢𑀢𑁆𑀣-𑀲𑀤𑁆𑀤𑀲𑁆𑀲 ‘‘𑀧𑀳𑀸𑀦𑀢𑁆𑀣’’𑀦𑁆𑀢𑀺 𑀏𑀢𑁂𑀦 𑀬𑁄𑀚𑀦𑀸. 𑀧𑀭𑀢𑁄 𑀢𑁂𑀲𑀁 𑀢𑀢𑁆𑀣𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯𑀦𑀬𑁄. 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀲𑀯𑀺𑀲𑁂𑀲𑀸 𑀓𑀸𑀬𑁂 𑀮𑀩𑁆𑀪𑀦𑁆𑀢𑀻𑀢𑀺 𑀯𑀺𑀲𑁂𑀲𑁂𑀦 𑀓𑀸𑀬𑁄 𑀓𑀸𑀫𑁄𑀖𑀲𑁆𑀲 𑀯𑀢𑁆𑀣𑀼, 𑀪𑀯𑁂𑀲𑀼 𑀲𑀼𑀔𑀕𑁆𑀕𑀳𑀡𑀯𑀲𑁂𑀦 𑀪𑀯𑀲𑁆𑀲𑀸𑀤𑁄 𑀳𑁄𑀢𑀺 𑀪𑀯𑁄𑀖𑀲𑁆𑀲 𑀯𑁂𑀤𑀦𑀸 𑀯𑀢𑁆𑀣𑀼, 𑀲𑀦𑁆𑀢𑀢𑀺𑀖𑀦𑀕𑀳𑀡𑀯𑀲𑁂𑀦 𑀯𑀺𑀲𑁂𑀲𑀢𑁄 𑀘𑀺𑀢𑁆𑀢𑁂 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀻𑀢𑀺 𑀤𑀺𑀝𑁆𑀞𑁄𑀖𑀲𑁆𑀲 𑀘𑀺𑀢𑁆𑀢𑀁 𑀯𑀢𑁆𑀣𑀼, 𑀥𑀫𑁆𑀫𑁂𑀲𑀼 𑀯𑀺𑀦𑀺𑀩𑁆𑀪𑁄𑀕𑀲𑁆𑀲 𑀤𑀼𑀓𑁆𑀓𑀭𑀢𑁆𑀢𑀸 𑀥𑀫𑁆𑀫𑀸𑀦𑀁 𑀥𑀫𑁆𑀫𑀫𑀢𑁆𑀢𑀢𑀸𑀬 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀢𑁆𑀢𑀸 𑀲𑀫𑁆𑀫𑁄𑀳𑁄 𑀳𑁄𑀢𑀻𑀢𑀺 𑀅𑀯𑀺𑀚𑁆𑀚𑁄𑀖𑀲𑁆𑀲 𑀥𑀫𑁆𑀫𑀸 𑀯𑀢𑁆𑀣𑀼, 𑀢𑀲𑁆𑀫𑀸 𑀢𑁂𑀲𑀁 𑀧𑀳𑀸𑀦𑀢𑁆𑀣𑀁 𑀘𑀢𑁆𑀢𑀸𑀭𑁄𑀯 𑀯𑀼𑀢𑁆𑀢𑀸.

𑀬𑀤𑀕𑁆𑀕𑁂𑀦 ¶ 𑀘 𑀓𑀸𑀬𑁄 𑀓𑀸𑀫𑁄𑀖𑀲𑁆𑀲 𑀯𑀢𑁆𑀣𑀼, 𑀢𑀤𑀕𑁆𑀕𑁂𑀦 𑀅𑀪𑀺𑀚𑁆𑀛𑀸𑀓𑀸𑀬𑀕𑀦𑁆𑀣𑀲𑁆𑀲 𑀯𑀢𑁆𑀣𑀼, 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀧𑀝𑀺𑀖𑀸𑀦𑀼𑀲𑀬𑁄 𑀅𑀦𑀼𑀲𑁂𑀢𑀻𑀢𑀺 𑀤𑀼𑀓𑁆𑀔𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀲𑀗𑁆𑀔𑀸𑀭𑀤𑀼𑀓𑁆𑀔𑀪𑀽𑀢𑀸 𑀯𑁂𑀤𑀦𑀸 𑀯𑀺𑀲𑁂𑀲𑁂𑀦 𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑀲𑁆𑀲 𑀯𑀢𑁆𑀣𑀼, 𑀘𑀺𑀢𑁆𑀢𑁂 𑀦𑀺𑀘𑁆𑀘𑀕𑁆𑀕𑀳𑀡𑀯𑀲𑁂𑀦 𑀲𑀲𑁆𑀲𑀢𑀲𑁆𑀲 𑀅𑀢𑁆𑀢𑀦𑁄 𑀲𑀻𑀮𑁂𑀦 𑀲𑀼𑀤𑁆𑀥𑀻𑀢𑀺𑀆𑀤𑀺 𑀧𑀭𑀸𑀫𑀲𑀦𑀁 𑀳𑁄𑀢𑀻𑀢𑀺 𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲𑀲𑁆𑀲 𑀘𑀺𑀢𑁆𑀢𑀁 𑀯𑀢𑁆𑀣𑀼, 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁂𑀦 𑀪𑀽𑀢𑀁 𑀪𑀽𑀢𑀢𑁄 𑀅𑀧𑀲𑁆𑀲𑀦𑁆𑀢𑀲𑁆𑀲 𑀪𑀯𑀯𑀺𑀪𑀯𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁄 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀻𑀢𑀺 𑀢𑀲𑁆𑀲 𑀥𑀫𑁆𑀫𑀸 𑀯𑀢𑁆𑀣𑀼, 𑀲𑀼𑀔𑀯𑁂𑀤𑀦𑀸𑀲𑁆𑀲𑀸𑀤𑀯𑀲𑁂𑀦 𑀧𑀭𑀮𑁄𑀓𑀦𑀺𑀭𑀧𑁂𑀓𑁆𑀔𑁄 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀓𑀁 𑀧𑀭𑀸𑀫𑀸𑀲𑀁 𑀉𑀧𑁆𑀧𑀸𑀤𑁂𑀢𑀻𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀲𑁆𑀲 𑀯𑁂𑀤𑀦𑀸 𑀯𑀢𑁆𑀣𑀼 𑀲𑀦𑁆𑀢𑀢𑀺𑀖𑀦𑀕𑀳𑀡𑀯𑀲𑁂𑀦 𑀲𑀭𑀸𑀕𑀸𑀤𑀺𑀘𑀺𑀢𑁆𑀢𑁂 𑀲𑀫𑁆𑀫𑁄𑀳𑁄 𑀳𑁄𑀢𑀻𑀢𑀺 𑀫𑁄𑀳𑀸𑀕𑀢𑀺𑀬𑀸 𑀘𑀺𑀢𑁆𑀢𑀁 ¶ 𑀯𑀢𑁆𑀣𑀼, 𑀥𑀫𑁆𑀫𑀲𑀪𑀸𑀯𑀸𑀦𑀯𑀩𑁄𑀥𑁂𑀦 𑀪𑀬𑀁 𑀳𑁄𑀢𑀻𑀢𑀺 𑀪𑀬𑀸𑀕𑀢𑀺𑀬𑀸 𑀥𑀫𑁆𑀫𑀸 𑀯𑀢𑁆𑀣𑀼. 𑀬𑁂 𑀧𑀦𑁂𑀢𑁆𑀣 𑀅𑀯𑀼𑀢𑁆𑀢𑀸, 𑀢𑁂𑀲𑀁 𑀯𑀼𑀢𑁆𑀢𑀦𑀬𑁂𑀦 𑀯𑀢𑁆𑀣𑀼𑀪𑀸𑀯𑁄 𑀬𑁄𑀚𑁂𑀢𑀩𑁆𑀩𑁄. 𑀢𑀣𑀸 𑀳𑀺 𑀑𑀖𑁂𑀲𑀼 𑀯𑀼𑀢𑁆𑀢𑀦𑀬𑀸 𑀏𑀯 𑀬𑁄𑀕𑀸𑀲𑀯𑁂𑀲𑀼𑀧𑀺 𑀬𑁄𑀚𑀦𑀸 𑀅𑀢𑁆𑀣𑀢𑁄 𑀅𑀪𑀺𑀦𑁆𑀦𑀢𑁆𑀢𑀸. 𑀢𑀣𑀸 𑀧𑀞𑀫𑁄𑀖𑀢𑀢𑀺𑀬𑀘𑀢𑀼𑀢𑁆𑀣𑀕𑀦𑁆𑀣𑀬𑁄𑀚𑀦𑀸𑀬 𑀯𑀼𑀢𑁆𑀢𑀦𑀬𑀸 𑀏𑀯 𑀓𑀸𑀬𑀘𑀺𑀢𑁆𑀢𑀥𑀫𑁆𑀫𑀸𑀦𑀁 𑀇𑀢𑀭𑀽𑀧𑀸𑀤𑀸𑀦𑀯𑀢𑁆𑀣𑀼𑀢𑀸 𑀬𑁄𑀚𑀦𑀸, 𑀢𑀣𑀸 𑀓𑀸𑀫𑁄𑀖𑀩𑁆𑀬𑀸𑀧𑀸𑀤𑀓𑀸𑀬𑀕𑀦𑁆𑀣𑀬𑁄𑀚𑀦𑀸𑀬 𑀯𑀼𑀢𑁆𑀢𑀦𑀬𑀸 𑀏𑀯 𑀓𑀸𑀬𑀯𑁂𑀤𑀦𑀸𑀦𑀁 𑀙𑀦𑁆𑀤𑀤𑁄𑀲𑀸𑀕𑀢𑀺 𑀯𑀢𑁆𑀣𑀼𑀢𑀸 𑀬𑁄𑀚𑀦𑀸 𑀯𑀸.

‘‘𑀆𑀳𑀸𑀭𑀲𑀫𑀼𑀤𑀬𑀸 𑀓𑀸𑀬𑀲𑀫𑀼𑀤𑀬𑁄, 𑀨𑀲𑁆𑀲𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄, (𑀲𑀁. 𑀦𑀺. 𑁫.𑁪𑁦𑁮) 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 (𑀫. 𑀦𑀺. 𑁩.𑁧𑁨𑁬; 𑀉𑀤𑀸. 𑁧; 𑀯𑀺𑀪. 𑁨𑁨𑁫) 𑀯𑀘𑀦𑀢𑁄 𑀓𑀸𑀬𑀸𑀤𑀻𑀦𑀁 𑀲𑀫𑀼𑀤𑀬𑀪𑀽𑀢𑀸 𑀓𑀩𑀴𑀻𑀓𑀸𑀭𑀸𑀳𑀸𑀭𑀨𑀲𑁆𑀲𑀫𑀦𑁄𑀲𑀜𑁆𑀘𑁂𑀢𑀦𑀸𑀯𑀺𑀜𑁆𑀜𑀸𑀡𑀸𑀳𑀸𑀭𑀸 𑀓𑀸𑀬𑀸𑀤𑀺𑀧𑀭𑀺𑀚𑀸𑀦𑀦𑁂𑀦 𑀧𑀭𑀺𑀜𑁆𑀜𑀸𑀢𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀘𑀢𑀼𑀩𑁆𑀩𑀺𑀥𑀸𑀳𑀸𑀭𑀧𑀭𑀺𑀜𑁆𑀜𑀢𑁆𑀣’’𑀦𑁆𑀢𑀺 𑀧𑀓𑀭𑀡𑀦𑀬𑁄𑀢𑀺 𑀦𑁂𑀢𑁆𑀢𑀺𑀧𑀓𑀭𑀡𑀯𑀲𑁂𑀦 𑀲𑀼𑀢𑁆𑀢𑀦𑁆𑀢𑀲𑀁𑀯𑀡𑁆𑀡𑀦𑀸𑀦𑀬𑁄.

𑀲𑀭𑀡𑀯𑀲𑁂𑀦𑀸𑀢𑀺 𑀓𑀸𑀬𑀸𑀤𑀻𑀦𑀁 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀜𑁆𑀘 𑀉𑀧𑀥𑀸𑀭𑀡𑀯𑀲𑁂𑀦. 𑀲𑀭𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀏𑀢𑀸𑀬𑀸𑀢𑀺 𑀲𑀢𑀻𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀏𑀓𑀢𑁆𑀢𑁂 𑀏𑀓𑀲𑀪𑀸𑀯𑁂 𑀦𑀺𑀩𑁆𑀩𑀸𑀦𑁂 𑀲𑀫𑁄𑀲𑀭𑀡𑀁 𑀲𑀫𑀸𑀕𑀫𑁄 𑀏𑀓𑀢𑁆𑀢𑀲𑀫𑁄𑀲𑀭𑀡𑀁. 𑀏𑀢𑀤𑁂𑀯 𑀳𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀓𑀦𑀺𑀩𑁆𑀩𑀸𑀦𑀧𑀯𑁂𑀲𑀳𑁂𑀢𑀼𑀪𑀽𑀢𑀸 𑀯𑀸 𑀲𑀫𑀸𑀦𑀢𑀸 𑀏𑀓𑁄 𑀲𑀢𑀺𑀧𑀝𑁆𑀞𑀸𑀦𑀲𑁆𑀲 𑀪𑀸𑀯𑁄 𑀏𑀓𑀢𑁆𑀢𑀁, 𑀢𑀢𑁆𑀣 𑀲𑀫𑁄𑀲𑀭𑀡𑀁 ¶ 𑀢𑀁𑀲𑀪𑀸𑀕𑀢𑀸 𑀏𑀓𑀢𑁆𑀢𑀲𑀫𑁄𑀲𑀭𑀡𑀁. 𑀏𑀓𑀦𑀺𑀩𑁆𑀩𑀸𑀦𑀧𑀯𑁂𑀲𑀳𑁂𑀢𑀼𑀪𑀸𑀯𑀁 𑀧𑀦 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀭𑀡𑁂𑀓𑀢𑁆𑀢𑀲𑀫𑁄𑀲𑀭𑀡𑀸𑀦𑀺 𑀲𑀳𑁂𑀯 𑀲𑀢𑀺𑀧𑀝𑁆𑀞𑀸𑀦𑁂𑀓𑀪𑀸𑀯𑀲𑁆𑀲 𑀓𑀸𑀭𑀡𑀢𑁆𑀣𑁂𑀦 𑀯𑀼𑀢𑁆𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺, 𑀧𑀼𑀭𑀺𑀫𑀲𑁆𑀫𑀺𑀁 𑀯𑀺𑀲𑀼𑀁. 𑀲𑀭𑀡𑀯𑀲𑁂𑀦𑀸𑀢𑀺 𑀯𑀸 ‘‘𑀕𑀫𑀦𑀯𑀲𑁂𑀦𑀸’’𑀢𑀺 𑀅𑀢𑁆𑀣𑁂 𑀲𑀢𑀺 𑀢𑀤𑁂𑀯 𑀕𑀫𑀦𑀁 𑀲𑀫𑁄𑀲𑀭𑀡𑀦𑁆𑀢𑀺, 𑀲𑀫𑁄𑀲𑀭𑀡𑁂 𑀯𑀸 𑀲𑀢𑀺𑀲𑀤𑁆𑀤𑀢𑁆𑀣𑀯𑀲𑁂𑀦 𑀅𑀯𑀼𑀘𑁆𑀘𑀫𑀸𑀦𑁂 𑀥𑀸𑀭𑀡𑀢𑀸𑀯 𑀲𑀢𑀻𑀢𑀺 𑀲𑀢𑀺𑀲𑀤𑁆𑀤𑀢𑁆𑀣𑀦𑁆𑀢𑀭𑀸𑀪𑀸𑀯𑀸 𑀧𑀼𑀭𑀺𑀫𑀁 𑀲𑀢𑀺𑀪𑀸𑀯𑀲𑁆𑀲 𑀓𑀸𑀭𑀡𑀁, 𑀧𑀘𑁆𑀙𑀺𑀫𑀁 𑀏𑀓𑀪𑀸𑀯𑀲𑁆𑀲𑀸𑀢𑀺 𑀦𑀺𑀩𑁆𑀩𑀸𑀦𑀲𑀫𑁄𑀲𑀭𑀡𑁂𑀧𑀺 𑀲𑀳𑀺𑀢𑀸𑀦𑁂𑀯 𑀢𑀸𑀦𑀺 𑀲𑀢𑀺𑀧𑀝𑁆𑀞𑀸𑀦𑁂𑀓𑀪𑀸𑀯𑀲𑁆𑀲 𑀓𑀸𑀭𑀡𑀸𑀦𑀺 𑀯𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀺. 𑀘𑀼𑀤𑁆𑀤𑀲𑀯𑀺𑀥𑁂𑀦, 𑀦𑀯𑀯𑀺𑀥𑁂𑀦, 𑀲𑁄𑀴𑀲𑀯𑀺𑀥𑁂𑀦, 𑀧𑀜𑁆𑀘𑀯𑀺𑀥𑁂𑀦𑀸𑀢𑀺 𑀇𑀤𑀁 𑀉𑀧𑀭𑀺 𑀧𑀸𑀴𑀺𑀬𑀁 (𑀫. 𑀦𑀺. 𑁧.𑁧𑁦𑁭) 𑀆𑀕𑀢𑀸𑀦𑀁 𑀆𑀦𑀸𑀧𑀸𑀦𑀧𑀩𑁆𑀩𑀸𑀤𑀻𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀢𑁂𑀲𑀁 𑀧𑀦 𑀅𑀦𑁆𑀢𑀭𑀪𑁂𑀤𑀯𑀲𑁂𑀦 𑀢𑀤𑀦𑀼𑀕𑀢𑀪𑁂𑀤𑀯𑀲𑁂𑀦 𑀘 𑀪𑀸𑀯𑀦𑀸𑀬 𑀅𑀦𑁂𑀓𑀯𑀺𑀥𑀢𑀸 𑀮𑀩𑁆𑀪𑀢𑀺𑀬𑁂𑀯. 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀉𑀝𑁆𑀞𑀸𑀦𑀓𑀪𑀡𑁆𑀟𑀲𑀤𑀺𑀲𑀢𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀢𑀁𑀢𑀁𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀦𑀼𑀪𑀸𑀯𑀲𑁆𑀲 𑀤𑀝𑁆𑀞𑀩𑁆𑀩𑀸.

‘‘𑀕𑁄𑀘𑀭𑁂, 𑀪𑀺𑀓𑁆𑀔𑀯𑁂, 𑀘𑀭𑀣 𑀲𑀓𑁂 𑀧𑁂𑀢𑁆𑀢𑀺𑀓𑁂 𑀯𑀺𑀲𑀬𑁂’’𑀢𑀺𑀆𑀤𑀺𑀯𑀘𑀦𑀢𑁄 (𑀤𑀻. 𑀦𑀺. 𑁩.𑁮𑁦; 𑀲𑀁. 𑀦𑀺. 𑁫.𑁩𑁭𑁨) 𑀪𑀺𑀓𑁆𑀔𑀼𑀕𑁄𑀘𑀭𑀸 𑀏𑀢𑁂 𑀥𑀫𑁆𑀫𑀸, 𑀬𑀤𑀺𑀤𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀬𑁄. 𑀢𑀢𑁆𑀣 𑀬𑀲𑁆𑀫𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀧𑀝𑀺𑀧𑀢𑁆𑀢𑀺𑀬𑀸 𑀪𑀺𑀓𑁆𑀔𑀼 𑀳𑁄𑀢𑀺, 𑀢𑀲𑁆𑀫𑀸 ‘‘𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 𑀪𑀺𑀓𑁆𑀔𑀼𑀁 𑀤𑀲𑁆𑀲𑁂𑀢𑀺, 𑀪𑀺𑀓𑁆𑀔𑀼𑀫𑁆𑀳𑀺 𑀢𑀁 𑀦𑀺𑀬𑀫𑀢𑁄𑀢𑀺 𑀆𑀳 ‘‘𑀧𑀝𑀺𑀧𑀢𑁆𑀢𑀺𑀬𑀸 𑀪𑀺𑀓𑁆𑀔𑀼𑀪𑀸𑀯𑀤𑀲𑁆𑀲𑀦𑀢𑁄’’𑀢𑀺. 𑀲𑀢𑁆𑀣𑀼 𑀘𑀭𑀺𑀬𑀸𑀦𑀼𑀯𑀺𑀥𑀸𑀬𑀓𑀢𑁆𑀢𑀸 ¶ 𑀲𑀓𑀮𑀲𑀸𑀲𑀦𑀲𑀫𑁆𑀧𑀝𑀺𑀕𑁆𑀕𑀸𑀳𑀓𑀢𑁆𑀢𑀸 𑀘 𑀲𑀩𑁆𑀩𑀧𑁆𑀧𑀓𑀸𑀭𑀸𑀬 𑀅𑀦𑀼𑀲𑀸𑀲𑀦𑀺𑀬𑀸 𑀪𑀸𑀚𑀦𑀪𑀸𑀯𑁄.

𑀲𑀫𑀁 𑀘𑀭𑁂𑀬𑁆𑀬𑀸𑀢𑀺 𑀓𑀸𑀬𑀸𑀤𑀺𑀯𑀺𑀲𑀫𑀘𑀭𑀺𑀬𑀁 𑀧𑀳𑀸𑀬 𑀓𑀸𑀬𑀸𑀤𑀻𑀳𑀺 𑀲𑀫𑀁 𑀘𑀭𑁂𑀬𑁆𑀬. 𑀭𑀸𑀕𑀸𑀤𑀺𑀯𑀽𑀧𑀲𑀫𑁂𑀦 𑀲𑀦𑁆𑀢𑁄. 𑀇𑀦𑁆𑀤𑁆𑀭𑀺𑀬𑀤𑀫𑁂𑀦 𑀤𑀦𑁆𑀢𑁄. 𑀘𑀢𑀼𑀫𑀕𑁆𑀕𑀦𑀺𑀬𑀸𑀫𑁂𑀦 𑀦𑀺𑀬𑀢𑁄. 𑀲𑁂𑀝𑁆𑀞𑀘𑀭𑀺𑀢𑀸𑀬 𑀩𑁆𑀭𑀳𑁆𑀫𑀘𑀸𑀭𑀻. 𑀓𑀸𑀬𑀤𑀡𑁆𑀟𑀸𑀤𑀺𑀑𑀭𑁄𑀧𑀦𑁂𑀦 𑀦𑀺𑀥𑀸𑀬 𑀤𑀡𑁆𑀟𑀁. 𑀅𑀭𑀺𑀬𑀪𑀸𑀯𑁂 𑀞𑀺𑀢𑁄 𑀲𑁄 𑀏𑀯𑀭𑀽𑀧𑁄 𑀩𑀸𑀳𑀺𑀢𑀧𑀸𑀧𑀲𑀫𑀺𑀢𑀧𑀸𑀧𑀪𑀺𑀦𑁆𑀦𑀓𑀺𑀮𑁂𑀲𑀢𑀸𑀳𑀺 𑀩𑁆𑀭𑀸𑀳𑁆𑀫𑀡𑁄 𑀲𑀫𑀡𑁄 𑀪𑀺𑀓𑁆𑀔𑀽𑀢𑀺 𑀯𑁂𑀤𑀺𑀢𑀩𑁆𑀩𑁄.

‘‘𑀅𑀬𑀜𑁆𑀘𑁂𑀯 𑀓𑀸𑀬𑁄 𑀩𑀳𑀺𑀤𑁆𑀥𑁄 𑀘 𑀦𑀸𑀫𑀭𑀽𑀧’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑀝𑀻. 𑁨.𑁩𑁭𑁩) 𑀔𑀦𑁆𑀥𑀧𑀜𑁆𑀘𑀓𑀁, ‘‘𑀲𑀼𑀔𑀜𑁆𑀘 𑀓𑀸𑀬𑁂𑀦 𑀧𑀝𑀺𑀲𑀁𑀯𑁂𑀤𑁂𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁭𑁧, 𑁨𑁮𑁭; 𑀧𑀸𑀭𑀸. 𑁧𑁧) 𑀦𑀸𑀫𑀓𑀸𑀬𑁄 𑀓𑀸𑀬𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀓𑀸𑀬𑁂𑀢𑀺 𑀭𑀽𑀧𑀓𑀸𑀬𑁂’’𑀢𑀺 𑀆𑀳.

𑀅𑀲𑀫𑁆𑀫𑀺𑀲𑁆𑀲𑀢𑁄𑀢𑀺 ¶ ‘‘𑀯𑁂𑀤𑀦𑀸𑀤𑀬𑁄𑀧𑀺 𑀏𑀢𑁆𑀣 𑀲𑀺𑀢𑀸 𑀏𑀢𑁆𑀣 𑀧𑀝𑀺𑀩𑀤𑁆𑀥𑀸’’𑀢𑀺 𑀓𑀸𑀬𑁂 𑀯𑁂𑀤𑀦𑀸𑀤𑀺𑀅𑀦𑀼𑀧𑀲𑁆𑀲𑀦𑀸𑀧𑀲𑀗𑁆𑀕𑁂𑀧𑀺 𑀆𑀧𑀦𑁆𑀦𑁂 𑀢𑀢𑁄 𑀅𑀲𑀫𑁆𑀫𑀺𑀲𑁆𑀲𑀢𑁄𑀢𑀺 𑀅𑀢𑁆𑀣𑁄. 𑀲𑀫𑀽𑀳𑀯𑀺𑀲𑀬𑀢𑀸𑀬 𑀘𑀲𑁆𑀲 𑀓𑀸𑀬-𑀲𑀤𑁆𑀤𑀲𑁆𑀲 𑀲𑀫𑀼𑀤𑀸𑀬𑀼𑀧𑀸𑀤𑀸𑀦𑀢𑀸𑀬 𑀘 𑀅𑀲𑀼𑀪𑀸𑀓𑀸𑀭𑀲𑁆𑀲 ‘‘𑀓𑀸𑀬𑁂’’𑀢𑀺 𑀏𑀓𑀯𑀘𑀦𑀁, 𑀢𑀣𑀸 𑀆𑀭𑀫𑁆𑀫𑀡𑀸𑀤𑀺𑀯𑀺𑀪𑀸𑀕𑁂𑀦 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀫𑁆𑀧𑀺 𑀘𑀺𑀢𑁆𑀢𑀁 𑀘𑀺𑀢𑁆𑀢𑀪𑀸𑀯𑀲𑀸𑀫𑀜𑁆𑀜𑁂𑀦 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 ‘‘𑀘𑀺𑀢𑁆𑀢𑁂’’𑀢𑀺 𑀏𑀓𑀯𑀘𑀦𑀁, 𑀯𑁂𑀤𑀦𑀸 𑀧𑀦 𑀲𑀼𑀔𑀸𑀤𑀺𑀪𑁂𑀤𑀪𑀺𑀦𑁆𑀦𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀯𑁂𑀤𑀦𑀸𑀲𑀽’’𑀢𑀺 𑀩𑀳𑀼𑀯𑀘𑀦𑁂𑀦 𑀯𑀼𑀢𑁆𑀢𑀸, 𑀢𑀣𑁂𑀯 𑀘 𑀦𑀺𑀤𑁆𑀤𑁂𑀲𑁄 𑀧𑀯𑀢𑁆𑀢𑀺𑀢𑁄, 𑀥𑀫𑁆𑀫𑀸 𑀘 𑀧𑀭𑁄𑀧𑀡𑁆𑀡𑀸𑀲𑀪𑁂𑀤𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸𑀓𑀸𑀭𑁂𑀦 𑀘 𑀅𑀦𑁂𑀓𑀪𑁂𑀤𑀸 𑀏𑀯𑀸𑀢𑀺 𑀢𑁂𑀧𑀺 𑀩𑀳𑀼𑀯𑀘𑀦𑀯𑀲𑁂𑀦𑁂𑀯 𑀯𑀼𑀢𑁆𑀢𑀸. 𑀅𑀯𑀬𑀯𑀻𑀕𑀸𑀳-𑀲𑀫𑀜𑁆𑀜𑀸𑀢𑀺𑀥𑀸𑀯𑀦-𑀲𑀸𑀭𑀸𑀤𑀸𑀦𑀸𑀪𑀺𑀦𑀺𑀯𑁂𑀲𑀦𑀺𑀲𑁂𑀥𑀦𑀢𑁆𑀣𑀁 𑀓𑀸𑀬𑀁 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀳𑀺, 𑀢𑀸𑀦𑀺 𑀘 𑀓𑁂𑀲𑀸𑀤𑀻𑀳𑀺, 𑀓𑁂𑀲𑀸𑀤𑀺𑀓𑁂 𑀘 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑁂𑀳𑀺 𑀯𑀺𑀦𑀺𑀩𑁆𑀪𑀼𑀚𑁆𑀚𑀦𑁆𑀢𑁄 ‘‘𑀢𑀣𑀸 𑀦 𑀓𑀸𑀬𑁂’’𑀢𑀺𑀆𑀤𑀺𑀫𑀸𑀳. 𑀧𑀸𑀲𑀸𑀤𑀸𑀤𑀺𑀦𑀕𑀭𑀸𑀯𑀬𑀯𑀲𑀫𑀽𑀳𑁂 𑀅𑀯𑀬𑀯𑀻𑀯𑀸𑀤𑀺𑀦𑁄𑀧𑀺 𑀅𑀯𑀬𑀯𑀻𑀕𑀸𑀳𑀁 𑀦 𑀓𑀭𑁄𑀦𑁆𑀢𑀺, 𑀦𑀕𑀭𑀁 𑀦𑀸𑀫 𑀓𑁄𑀘𑀺 𑀅𑀢𑁆𑀣𑁄 𑀅𑀢𑁆𑀣𑀻𑀢𑀺 𑀧𑀦 𑀓𑁂𑀲𑀜𑁆𑀘𑀺 𑀲𑀫𑀜𑁆𑀜𑀸𑀢𑀺𑀥𑀸𑀯𑀦𑀁 𑀲𑀺𑀬𑀸𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀲𑀫𑀜𑁆𑀜𑀸𑀢𑀺𑀥𑀸𑀯𑀦𑁂 𑀦𑀕𑀭𑀦𑀺𑀤𑀲𑁆𑀲𑀦𑀁 𑀯𑀼𑀢𑁆𑀢𑀁. 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀫𑀽𑀳𑁄, 𑀓𑁂𑀲𑀮𑁄𑀫𑀸𑀤𑀺𑀲𑀫𑀽𑀳𑁄 𑀪𑀽𑀢𑀼𑀧𑀸𑀤𑀸𑀬𑀲𑀫𑀽𑀳𑁄 𑀘 𑀬𑀣𑀸𑀯𑀼𑀢𑁆𑀢𑀲𑀫𑀽𑀳𑁂 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑁄 𑀓𑀸𑀬𑁄𑀧𑀺 𑀦𑀸𑀫 𑀓𑁄𑀘𑀺 𑀦𑀢𑁆𑀣𑀺, 𑀧𑀕𑁂𑀯 𑀇𑀢𑁆𑀣𑀺𑀆𑀤𑀬𑁄𑀢𑀺 𑀆𑀳 ‘‘𑀓𑀸𑀬𑁄 𑀯𑀸…𑀧𑁂… 𑀤𑀺𑀲𑁆𑀲𑀢𑀻’’𑀢𑀺. 𑀓𑁄𑀘𑀺 𑀥𑀫𑁆𑀫𑁄𑀢𑀺 𑀇𑀫𑀺𑀦𑀸 𑀲𑀢𑁆𑀢𑀚𑀻𑀯𑀸𑀤𑀺𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀅𑀯𑀬𑀯𑀻 𑀧𑀦 𑀓𑀸𑀬𑀧𑀝𑀺𑀓𑁆𑀔𑁂𑀧𑁂𑀦𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺. 𑀬𑀤𑀺 𑀏𑀯𑀁 𑀓𑀣𑀁 𑀓𑀸𑀬𑀸𑀤𑀺𑀲𑀜𑁆𑀜𑀸𑀪𑀺𑀥𑀸𑀦𑀸𑀦𑀻𑀢𑀺𑀆𑀳 ‘‘𑀬𑀣𑀸𑀯𑀼𑀢𑁆𑀢…𑀧𑁂… 𑀓𑀭𑁄𑀦𑁆𑀢𑀻’’𑀢𑀺.

𑀬𑀁 𑀧𑀲𑁆𑀲𑀢𑀺 𑀇𑀢𑁆𑀣𑀺𑀁 𑀧𑀼𑀭𑀺𑀲𑀁 𑀯𑀸. 𑀦𑀦𑀼 𑀘𑀓𑁆𑀔𑀼𑀦𑀸 𑀇𑀢𑁆𑀣𑀺𑀧𑀼𑀭𑀺𑀲𑀤𑀲𑁆𑀲𑀦𑀁 𑀦𑀢𑁆𑀣𑀻𑀢𑀺? 𑀲𑀘𑁆𑀘𑀫𑁂𑀢𑀁, ‘‘𑀇𑀢𑁆𑀣𑀺𑀁 ¶ 𑀧𑀲𑁆𑀲𑀸𑀫𑀺, 𑀧𑀼𑀭𑀺𑀲𑀁 𑀧𑀲𑁆𑀲𑀸𑀫𑀻’’𑀢𑀺 𑀧𑀦 𑀧𑀯𑀢𑁆𑀢𑀲𑀜𑁆𑀜𑀸𑀬 𑀯𑀲𑁂𑀦 ‘‘𑀬𑀁 𑀧𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀫𑀺𑀘𑁆𑀙𑀸𑀤𑀲𑁆𑀲𑀦𑁂𑀦 𑀯𑀸 𑀤𑀺𑀝𑁆𑀞𑀺𑀬𑀸 𑀬𑀁 𑀧𑀲𑁆𑀲𑀢𑀺, 𑀦 𑀢𑀁 𑀤𑀺𑀝𑁆𑀞𑀁, 𑀢𑀁 𑀭𑀽𑀧𑀸𑀬𑀢𑀦𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄 𑀯𑀺𑀧𑀭𑀻𑀢𑀕𑁆𑀕𑀸𑀳𑀯𑀲𑁂𑀦 𑀫𑀺𑀘𑁆𑀙𑀸𑀧𑀭𑀺𑀓𑀧𑁆𑀧𑀺𑀢𑀭𑀽𑀧𑀢𑁆𑀢𑀸. 𑀅𑀣 𑀯𑀸 𑀢𑀁 𑀓𑁂𑀲𑀸𑀤𑀺𑀪𑀽𑀢𑀼𑀧𑀸𑀤𑀸𑀬𑀲𑀫𑀽𑀳𑀲𑀗𑁆𑀔𑀸𑀢𑀁 𑀤𑀺𑀝𑁆𑀞𑀁 𑀦 𑀳𑁄𑀢𑀺 𑀅𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸, 𑀤𑀺𑀝𑁆𑀞𑀁 𑀯𑀸 𑀢𑀁 𑀦 𑀳𑁄𑀢𑀺. 𑀬𑀁 𑀤𑀺𑀝𑁆𑀞𑀁 𑀢𑀁 𑀦 𑀧𑀲𑁆𑀲𑀢𑀻𑀢𑀺 𑀬𑀁 𑀭𑀽𑀧𑀸𑀬𑀢𑀦𑀁 𑀓𑁂𑀲𑀸𑀤𑀺𑀪𑀽𑀢𑀼𑀧𑀸𑀤𑀸𑀬𑀲𑀫𑀽𑀳𑀲𑀗𑁆𑀔𑀸𑀢𑀁 𑀤𑀺𑀝𑁆𑀞𑀁, 𑀢𑀁 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀪𑀽𑀢𑀢𑁄 𑀦 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀲𑁆𑀲𑀁 𑀩𑀚𑁆𑀛𑀢𑁂𑀢𑀺 𑀇𑀫𑀁 𑀅𑀢𑁆𑀢𑀪𑀸𑀯𑀁 𑀬𑀣𑀸𑀪𑀽𑀢𑀁 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀅𑀧𑀲𑁆𑀲𑀦𑁆𑀢𑁄 ‘‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑁄’’𑀢𑀺 𑀓𑀺𑀮𑁂𑀲𑀩𑀦𑁆𑀥𑀦𑁂𑀦 𑀩𑀚𑁆𑀛𑀢𑀺.

𑀦 ¶ 𑀅𑀜𑁆𑀜𑀥𑀫𑁆𑀫𑀸𑀦𑀼𑀧𑀲𑁆𑀲𑀻𑀢𑀺 𑀦 𑀅𑀜𑁆𑀜𑀲𑀪𑀸𑀯𑀸𑀦𑀼𑀧𑀲𑁆𑀲𑀻, 𑀅𑀲𑀼𑀪𑀸𑀤𑀺𑀢𑁄 𑀅𑀜𑁆𑀜𑀸𑀓𑀸𑀭𑀸𑀦𑀼𑀧𑀲𑁆𑀲𑀻 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀭𑁄𑀢𑀺. 𑀧𑀣𑀯𑀻𑀓𑀸𑀬𑀦𑁆𑀢𑀺 𑀓𑁂𑀲𑀸𑀤𑀺𑀓𑁄𑀝𑁆𑀞𑀸𑀲𑀧𑀣𑀯𑀺𑀁 𑀥𑀫𑁆𑀫𑀲𑀫𑀽𑀳𑀢𑁆𑀢𑀸 ‘‘𑀓𑀸𑀬𑁄’’𑀢𑀺 𑀯𑀤𑀢𑀺, 𑀮𑀓𑁆𑀔𑀡𑀧𑀣𑀯𑀺𑀫𑁂𑀯 𑀯𑀸 𑀅𑀦𑁂𑀓𑀧𑁆𑀧𑀪𑁂𑀤𑀁 𑀲𑀓𑀮𑀲𑀭𑀻𑀭𑀕𑀢𑀁 𑀧𑀼𑀩𑁆𑀩𑀸𑀧𑀭𑀺𑀬𑀪𑀸𑀯𑁂𑀦 𑀘 𑀧𑀯𑀢𑁆𑀢𑀫𑀸𑀦𑀁 𑀲𑀫𑀽𑀳𑀯𑀲𑁂𑀦 𑀕𑀳𑁂𑀢𑁆𑀯𑀸 ‘‘𑀓𑀸𑀬𑁄’’𑀢𑀺 𑀯𑀤𑀢𑀺. 𑀆𑀧𑁄𑀓𑀸𑀬𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀏𑀯𑀁 𑀕𑀳𑁂𑀢𑀩𑁆𑀩𑀲𑁆𑀲𑀸𑀢𑀺 ‘‘𑀅𑀳𑀁 𑀫𑀫’’𑀦𑁆𑀢𑀺 𑀏𑀯𑀁 𑀅𑀢𑁆𑀢𑀢𑁆𑀢𑀦𑀺𑀬𑀪𑀸𑀯𑁂𑀦 𑀅𑀦𑁆𑀥𑀩𑀸𑀮𑁂𑀳𑀺 𑀕𑀳𑁂𑀢𑀩𑁆𑀩𑀲𑁆𑀲. 𑀇𑀤𑀸𑀦𑀺 𑀲𑀢𑁆𑀢𑀦𑁆𑀦𑀁 𑀅𑀦𑀼𑀧𑀲𑁆𑀲𑀦𑀸𑀓𑀸𑀭𑀸𑀦𑀫𑁆𑀧𑀺 𑀯𑀲𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀻𑀢𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑀁 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀅𑀦𑀼𑀧𑀲𑁆𑀲𑀢𑀺, 𑀏𑀯𑀁 𑀧𑀲𑁆𑀲𑀦𑁆𑀢𑁄 𑀏𑀯𑀁 𑀘𑀲𑁆𑀲 𑀅𑀦𑀺𑀘𑁆𑀘𑀸𑀓𑀸𑀭𑀫𑁆𑀧𑀺 𑀅𑀦𑀼𑀧𑀲𑁆𑀲𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸𑀪𑀽𑀢𑀲𑁆𑀲 𑀘𑀲𑁆𑀲 𑀦𑀺𑀘𑁆𑀘𑀕𑁆𑀕𑀸𑀳𑀲𑁆𑀲 𑀮𑁂𑀲𑁄𑀧𑀺 𑀦 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀦𑁄 𑀦𑀺𑀘𑁆𑀘𑀢𑁄’’𑀢𑀺 𑀢𑀣𑀸𑀳𑁂𑀲 ‘‘𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀻’’𑀢𑀺 (𑀧𑀝𑀺. 𑀫. 𑁩.𑁩𑁫) 𑀯𑀼𑀢𑁆𑀢𑁄. 𑀏𑀢𑁆𑀣 𑀘 ‘‘𑀅𑀦𑀺𑀘𑁆𑀘𑀢𑁄 𑀏𑀯 𑀅𑀦𑀼𑀧𑀲𑁆𑀲𑀢𑀻’’𑀢𑀺 𑀏𑀯-𑀓𑀸𑀭𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 𑀢𑁂𑀦 𑀦𑀺𑀯𑀢𑁆𑀢𑀺𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀦𑁄 𑀦𑀺𑀘𑁆𑀘𑀢𑁄’’𑀢𑀺 𑀯𑀼𑀢𑁆𑀢𑀁. 𑀦 𑀘𑁂𑀢𑁆𑀣 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀦𑀸𑀤𑀺𑀦𑀺𑀯𑀢𑁆𑀢𑀦𑀫𑀸𑀲𑀗𑁆𑀓𑀺𑀢𑀩𑁆𑀩𑀁 𑀧𑀝𑀺𑀬𑁄𑀕𑀻𑀦𑀺𑀯𑀢𑁆𑀢𑀦𑀧𑀭𑀢𑁆𑀢𑀸 𑀏𑀯-𑀓𑀸𑀭𑀲𑁆𑀲, 𑀉𑀧𑀭𑀺𑀤𑁂𑀲𑀦𑀸𑀭𑀼𑀴𑁆𑀳𑀢𑁆𑀢𑀸 𑀘 𑀢𑀸𑀲𑀁.

𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀢𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀅𑀦𑀺𑀘𑁆𑀘𑀲𑁆𑀲 𑀤𑀼𑀓𑁆𑀔𑀢𑁆𑀢𑀸 𑀢𑀫𑁂𑀯 𑀓𑀸𑀬𑀁 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀤𑀼𑀓𑁆𑀔𑀲𑁆𑀲 𑀅𑀦𑀢𑁆𑀢𑀢𑁆𑀢𑀸 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀢𑀺. 𑀬𑀲𑁆𑀫𑀸 𑀧𑀦 𑀬𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸, 𑀢𑀁 𑀅𑀦𑀪𑀺𑀦𑀦𑁆𑀤𑀺𑀢𑀩𑁆𑀩𑀁, 𑀦 𑀢𑀢𑁆𑀣 𑀭𑀚𑁆𑀚𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦𑀺𑀩𑁆𑀩𑀺𑀦𑁆𑀤𑀢𑀺 𑀦𑁄 𑀦𑀦𑁆𑀤𑀢𑀺, 𑀯𑀺𑀭𑀚𑁆𑀚𑀢𑀺 𑀦𑁄 𑀭𑀚𑁆𑀚𑀢𑀻’’𑀢𑀺. 𑀲𑁄 𑀏𑀯𑀁 𑀅𑀭𑀚𑁆𑀚𑀦𑁆𑀢𑁄 𑀭𑀸𑀕𑀁 𑀦𑀺𑀭𑁄𑀥𑁂𑀢𑀺 𑀦𑁄 𑀲𑀫𑀼𑀤𑁂𑀢𑀺, 𑀲𑀫𑀼𑀤𑀬𑀁 𑀦 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀘 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺 𑀦𑁄 𑀆𑀤𑀺𑀬𑀢𑀺. 𑀅𑀬𑀜𑁆𑀳𑀺 𑀅𑀦𑀺𑀘𑁆𑀘𑀸𑀤𑀺𑀅𑀦𑀼𑀧𑀲𑁆𑀲𑀦𑀸 𑀢𑀤𑀗𑁆𑀕𑀯𑀲𑁂𑀦 𑀲𑀤𑁆𑀥𑀺𑀁 𑀓𑀸𑀬𑀢𑀦𑁆𑀦𑀺𑀲𑁆𑀲𑀬𑀔𑀦𑁆𑀥𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀓𑀺𑀮𑁂𑀲𑀸𑀦𑀁 ¶ 𑀧𑀭𑀺𑀘𑁆𑀘𑀚𑀦𑀢𑁄, 𑀲𑀗𑁆𑀔𑀢𑀤𑁄𑀲𑀤𑀲𑁆𑀲𑀦𑁂𑀦 𑀢𑀩𑁆𑀩𑀺𑀧𑀭𑀻𑀢𑁂 𑀦𑀺𑀩𑁆𑀩𑀸𑀦𑁂 𑀢𑀦𑁆𑀦𑀺𑀦𑁆𑀦𑀢𑀸𑀬 𑀧𑀓𑁆𑀔𑀦𑁆𑀤𑀦𑀢𑁄 ‘‘𑀧𑀭𑀺𑀘𑁆𑀘𑀸𑀕𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀘𑁂𑀯 𑀧𑀓𑁆𑀔𑀦𑁆𑀤𑀦𑀧𑀝𑀺𑀦𑀺𑀲𑁆𑀲𑀕𑁆𑀕𑁄 𑀘𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀯𑀼𑀢𑁆𑀢𑀦𑀬𑁂𑀦 𑀓𑀺𑀮𑁂𑀲𑁂 𑀘 𑀧𑀭𑀺𑀘𑁆𑀘𑀚𑀢𑀺, 𑀦𑀺𑀩𑁆𑀩𑀸𑀦𑁂 𑀘 𑀧𑀓𑁆𑀔𑀦𑁆𑀤𑀢𑀺 ¶ , 𑀢𑀣𑀸𑀪𑀽𑀢𑁄 𑀘 𑀦𑀺𑀩𑁆𑀩𑀢𑁆𑀢𑀦𑀯𑀲𑁂𑀦 𑀓𑀺𑀮𑁂𑀲𑁂 𑀦 𑀆𑀤𑀺𑀬𑀢𑀺, 𑀦𑀸𑀧𑀺 𑀅𑀤𑁄𑀲𑀤𑀲𑁆𑀲𑀺𑀢𑀸𑀯𑀲𑁂𑀦 𑀲𑀗𑁆𑀔𑀢𑀸𑀭𑀫𑁆𑀫𑀡𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺 𑀦𑁄 𑀆𑀤𑀺𑀬𑀢𑀻’’𑀢𑀺. 𑀇𑀤𑀸𑀦𑀺𑀲𑁆𑀲 𑀢𑀸𑀳𑀺 𑀅𑀦𑀼𑀧𑀲𑁆𑀲𑀦𑀸𑀳𑀺 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀁 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀢𑀁 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀻’’𑀢𑀺. 𑀢𑀢𑁆𑀣 𑀦𑀺𑀘𑁆𑀘𑀲𑀜𑁆𑀜𑀦𑁆𑀢𑀺 ‘‘𑀲𑀗𑁆𑀔𑀸𑀭𑀸 𑀦𑀺𑀘𑁆𑀘𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀯𑀺𑀧𑀭𑀻𑀢𑀲𑀜𑁆𑀜𑀁. 𑀤𑀺𑀝𑁆𑀞𑀺𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑀧𑀳𑀸𑀦𑀫𑀼𑀔𑁂𑀦𑁂𑀯 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀦𑁆𑀢𑀺 𑀲𑀜𑁆𑀜𑀸𑀕𑀳𑀡𑀁, 𑀲𑀜𑁆𑀜𑀸𑀲𑀻𑀲𑁂𑀦 𑀯𑀸 𑀢𑁂𑀲𑀫𑁆𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀦𑀦𑁆𑀤𑀺𑀦𑁆𑀢𑀺 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀫𑁂𑀯.

𑀯𑀺𑀳𑀭𑀢𑀻𑀢𑀺 𑀇𑀫𑀺𑀦𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀫𑀗𑁆𑀕𑀺𑀦𑁄 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀇𑀭𑀺𑀬𑀢𑀻’’𑀢𑀺 𑀇𑀭𑀺𑀬𑀸𑀧𑀣𑀁 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀅𑀪𑀺𑀩𑁆𑀬𑀸𑀧𑀦𑀢𑁄 ‘‘𑀢𑀻𑀲𑀼 𑀪𑀯𑁂𑀲𑀽’’𑀢𑀺 𑀯𑀼𑀢𑁆𑀢𑀁, 𑀉𑀧𑁆𑀧𑀚𑁆𑀚𑀦𑀯𑀲𑁂𑀦 𑀧𑀦 𑀓𑀺𑀮𑁂𑀲𑀸 𑀧𑀭𑀺𑀢𑁆𑀢𑀪𑀽𑀫𑀓𑀸 𑀏𑀯𑀸𑀢𑀺. 𑀬𑀤𑀺𑀧𑀺 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀁 𑀆𑀢𑀸𑀧𑀦𑀦𑁆𑀢𑀺 𑀢𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀫𑁆𑀧𑀺 𑀅𑀢𑁆𑀣𑁂𑀯, 𑀆𑀢𑀸𑀧-𑀲𑀤𑁆𑀤𑁄 𑀧𑀦 𑀯𑀻𑀭𑀺𑀬𑁂𑀬𑁂𑀯 𑀦𑀺𑀭𑀼𑀴𑁆𑀳𑁄𑀢𑀺 𑀯𑀼𑀢𑁆𑀢𑀁 ‘‘𑀯𑀻𑀭𑀺𑀬𑀲𑁆𑀲𑁂𑀢𑀁 𑀦𑀸𑀫’’𑀦𑁆𑀢𑀺. 𑀅𑀣 𑀯𑀸 𑀧𑀝𑀺𑀧𑀓𑁆𑀔𑀧𑀳𑀸𑀦𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀩𑁆𑀪𑀼𑀲𑁆𑀲𑀳𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀲𑁆𑀲 𑀯𑀻𑀭𑀺𑀬𑀲𑁆𑀲 𑀲𑀸𑀢𑀺𑀲𑀬𑀁 𑀢𑀤𑀸𑀢𑀸𑀧𑀦𑀦𑁆𑀢𑀺 𑀯𑀻𑀭𑀺𑀬𑀫𑁂𑀯 𑀢𑀣𑀸 𑀯𑀼𑀘𑁆𑀘𑀢𑀺, 𑀦 𑀅𑀜𑁆𑀜𑁂 𑀥𑀫𑁆𑀫𑀸. 𑀆𑀢𑀸𑀧𑀻𑀢𑀺 𑀘𑀸𑀬𑀫𑀻𑀓𑀸𑀭𑁄 𑀧𑀲𑀁𑀲𑀸𑀬, 𑀅𑀢𑀺𑀲𑀬𑀲𑁆𑀲 𑀯𑀸 𑀤𑀻𑀧𑀓𑁄𑀢𑀺 𑀆𑀢𑀸𑀧𑀻𑀕𑀳𑀡𑁂𑀦 𑀲𑀫𑁆𑀫𑀧𑁆𑀧𑀥𑀸𑀦𑀲𑀫𑀗𑁆𑀕𑀺𑀢𑀁 𑀤𑀲𑁆𑀲𑁂𑀢𑀺. 𑀲𑀫𑁆𑀫𑀸, 𑀲𑀫𑀦𑁆𑀢𑀢𑁄, 𑀲𑀸𑀫𑀜𑁆𑀘 𑀧𑀚𑀸𑀦𑀦𑁆𑀢𑁄 𑀲𑀫𑁆𑀧𑀚𑀸𑀦𑁄, 𑀅𑀲𑀫𑁆𑀫𑀺𑀲𑁆𑀲𑀢𑁄 𑀯𑀯𑀢𑁆𑀣𑀸𑀦𑁂 𑀅𑀜𑁆𑀜𑀥𑀫𑁆𑀫𑀸𑀦𑀼𑀧𑀲𑁆𑀲𑀺𑀢𑀸𑀪𑀸𑀯𑁂𑀦 𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑀁, 𑀲𑀩𑁆𑀩𑀸𑀓𑀸𑀭𑀧𑀚𑀸𑀦𑀦𑁂𑀦 𑀲𑀫𑀦𑁆𑀢𑀢𑁄, 𑀉𑀧𑀭𑀽𑀧𑀭𑀺 𑀯𑀺𑀲𑁂𑀲𑀸𑀯𑀳𑀪𑀸𑀯𑁂𑀦 𑀧𑀯𑀢𑁆𑀢𑀺𑀬𑀸 𑀲𑀬𑀁 𑀧𑀚𑀸𑀦𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀬𑀤𑀺 𑀧𑀜𑁆𑀜𑀸𑀬 𑀅𑀦𑀼𑀧𑀲𑁆𑀲𑀢𑀺, 𑀓𑀣𑀁 𑀲𑀢𑀺𑀧𑀝𑁆𑀞𑀸𑀦𑀢𑀸𑀢𑀺 𑀆𑀳 ‘‘𑀦 𑀳𑀻’’𑀢𑀺𑀆𑀤𑀺. 𑀲𑀩𑁆𑀩𑀢𑁆𑀣𑀺𑀓𑀦𑁆𑀢𑀺 𑀲𑀩𑁆𑀩𑀢𑁆𑀣 𑀪𑀯𑀁 𑀲𑀩𑁆𑀩𑀢𑁆𑀣 𑀮𑀻𑀦𑁂 𑀉𑀤𑁆𑀥𑀢𑁂 𑀘 𑀘𑀺𑀢𑁆𑀢𑁂 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸, 𑀲𑀩𑁆𑀩𑁂 𑀯𑀸 𑀮𑀻𑀦𑁂 𑀉𑀤𑁆𑀥𑀢𑁂 𑀘 𑀪𑀸𑀯𑁂𑀢𑀩𑁆𑀩𑀸 𑀩𑁄𑀚𑁆𑀛𑀗𑁆𑀕𑀸 𑀅𑀢𑁆𑀣𑀺𑀓𑀸 𑀏𑀢𑀸𑀬𑀸𑀢𑀺 𑀲𑀩𑁆𑀩𑀢𑁆𑀣𑀺𑀓𑀸. 𑀲𑀢𑀺𑀬𑀸 𑀮𑀤𑁆𑀥𑀽𑀧𑀓𑀸𑀭𑀸𑀬 𑀏𑀯 𑀧𑀜𑁆𑀜𑀸𑀬 𑀏𑀢𑁆𑀣 𑀬𑀣𑀸𑀯𑀼𑀢𑁆𑀢𑁂 𑀓𑀸𑀬𑁂 𑀓𑀫𑁆𑀫𑀝𑁆𑀞𑀸𑀦𑀺𑀓𑁄 𑀪𑀺𑀓𑁆𑀔𑀼 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺. 𑀅𑀦𑁆𑀢𑁄𑀲𑀗𑁆𑀔𑁂𑀧𑁄 𑀅𑀦𑁆𑀢𑁄 𑀑𑀮𑀻𑀬𑀦𑁄, 𑀓𑁄𑀲𑀚𑁆𑀚𑀦𑁆𑀢𑀺 𑀅𑀢𑁆𑀣𑁄. 𑀉𑀧𑀸𑀬𑀧𑀭𑀺𑀕𑁆𑀕𑀳𑁂𑀢𑀺 𑀏𑀢𑁆𑀣 𑀲𑀻𑀮𑀯𑀺𑀲𑁄𑀥𑀦𑀸𑀤𑀺 𑀕𑀡𑀦𑀸𑀤𑀺 𑀉𑀕𑁆𑀕𑀳𑀓𑁄𑀲𑀮𑁆𑀮𑀸𑀤𑀺 𑀘 𑀉𑀧𑀸𑀬𑁄, 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀅𑀦𑀼𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀘 𑀉𑀧𑀝𑁆𑀞𑀺𑀢𑀲𑁆𑀲𑀢𑀺 𑀬𑀣𑀸𑀯𑀼𑀢𑁆𑀢𑀉𑀧𑀸𑀬𑀁 𑀦 𑀧𑀭𑀺𑀘𑁆𑀘𑀚𑀢𑀺, 𑀅𑀦𑀼𑀧𑀸𑀬𑀜𑁆𑀘 𑀦 𑀉𑀧𑀸𑀤𑀺𑀬𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀫𑀼𑀝𑁆𑀞𑀲𑁆𑀲𑀢𑀺…𑀧𑁂… 𑀅𑀲𑀫𑀢𑁆𑀣𑁄 ¶ 𑀳𑁄𑀢𑀻’’𑀢𑀺. 𑀢𑁂𑀦𑀸𑀢𑀺 𑀉𑀧𑀸𑀬𑀸𑀦𑀼𑀧𑀸𑀬𑀸𑀦𑀁 𑀧𑀭𑀺𑀕𑁆𑀕𑀳𑀧𑀭𑀺𑀯𑀚𑁆𑀚𑀦𑁂𑀲𑀼 𑀅𑀧𑀭𑀺𑀘𑁆𑀘𑀸𑀕𑀸𑀧𑀭𑀺𑀕𑁆𑀕𑀳𑁂𑀲𑀼 𑀘 𑀅𑀲𑀫𑀢𑁆𑀣𑀪𑀸𑀯𑁂𑀦 𑀅𑀲𑁆𑀲 𑀬𑁄𑀕𑀺𑀦𑁄.

𑀬𑀲𑁆𑀫𑀸 ¶ 𑀲𑀢𑀺𑀬𑁂𑀯𑁂𑀢𑁆𑀣 𑀲𑀢𑀺𑀧𑀝𑁆𑀞𑀸𑀦𑀁 𑀯𑀼𑀢𑁆𑀢𑀸, 𑀢𑀲𑁆𑀫𑀸𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀯𑀻𑀭𑀺𑀬𑀸𑀤𑀬𑁄 𑀅𑀗𑁆𑀕𑀦𑁆𑀢𑀺 𑀆𑀳 ‘‘𑀲𑀫𑁆𑀧𑀬𑁄𑀕𑀗𑁆𑀕𑀜𑁆𑀘𑀲𑁆𑀲 𑀤𑀲𑁆𑀲𑁂𑀢𑁆𑀯𑀸’’𑀢𑀺. 𑀅𑀗𑁆𑀕-𑀲𑀤𑁆𑀤𑁄 𑀘𑁂𑀢𑁆𑀣 𑀓𑀸𑀭𑀡𑀧𑀭𑀺𑀬𑀸𑀬𑁄 𑀤𑀝𑁆𑀞𑀩𑁆𑀩𑁄, 𑀲𑀢𑀺𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀲𑀫𑀸𑀥𑀺𑀲𑁆𑀲𑀢𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁 𑀢𑀲𑁆𑀲𑀸 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀬𑀲𑁆𑀫𑀸 𑀯𑀸 𑀲𑀢𑀺𑀲𑀻𑀲𑁂𑀦𑀸𑀬𑀁 𑀤𑁂𑀲𑀦𑀸. 𑀦 𑀳𑀺 𑀓𑁂𑀯𑀮𑀸𑀬 𑀲𑀢𑀺𑀬𑀸 𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀳𑁄𑀢𑀺, 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑁄 𑀯𑀸, 𑀦 𑀘 𑀓𑁂𑀯𑀮𑀸 𑀲𑀢𑀺 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸𑀲𑁆𑀲 𑀛𑀸𑀦𑀤𑁂𑀲𑀦𑀸𑀬𑀁 𑀲𑀯𑀺𑀢𑀓𑁆𑀓𑀸𑀤𑀺𑀯𑀘𑀦𑀲𑁆𑀲 𑀯𑀺𑀬 𑀲𑀫𑁆𑀧𑀬𑁄𑀕𑀗𑁆𑀕𑀤𑀲𑁆𑀲𑀦𑀢𑀸𑀢𑀺 𑀅𑀗𑁆𑀕-𑀲𑀤𑁆𑀤𑀲𑁆𑀲 𑀅𑀯𑀬𑀯𑀧𑀭𑀺𑀬𑀸𑀬𑀢𑀸 𑀤𑀝𑁆𑀞𑀩𑁆𑀩𑀸. 𑀧𑀳𑀸𑀦𑀗𑁆𑀕𑀦𑁆𑀢𑀺 ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁨𑁬; 𑀫. 𑀦𑀺. 𑁧.𑁨𑁭𑁧, 𑁨𑁮𑁭; 𑀲𑀁. 𑀦𑀺. 𑁨.𑁧𑁫𑁨; 𑀅. 𑀦𑀺. 𑁪.𑁧𑁨𑁩; 𑀧𑀸𑀭𑀸. 𑁧𑁧) 𑀯𑀺𑀬 𑀧𑀳𑀸𑀢𑀩𑁆𑀩𑀗𑁆𑀕𑀁 𑀤𑀲𑁆𑀲𑁂𑀢𑀼𑀁. 𑀬𑀲𑁆𑀫𑀸 𑀏𑀢𑁆𑀣 𑀮𑁄𑀓𑀺𑀬𑀫𑀕𑁆𑀕𑁄 𑀅𑀥𑀺𑀧𑁆𑀧𑁂𑀢𑁄, 𑀦 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄, 𑀢𑀲𑁆𑀫𑀸 𑀧𑀼𑀩𑁆𑀩𑀪𑀸𑀕𑀺𑀬𑀫𑁂𑀯 𑀯𑀺𑀦𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀤𑀗𑁆𑀕𑀯𑀺𑀦𑀬𑁂𑀦 𑀯𑀸 𑀯𑀺𑀓𑁆𑀔𑀫𑁆𑀪𑀦𑀯𑀺𑀦𑀬𑁂𑀦 𑀯𑀸’’𑀢𑀺 𑀆𑀳. 𑀢𑁂𑀲𑀁 𑀥𑀫𑁆𑀫𑀸𑀦𑀦𑁆𑀢𑀺 𑀯𑁂𑀤𑀦𑀸𑀤𑀺𑀥𑀫𑁆𑀫𑀸𑀦𑀁. 𑀢𑁂𑀲𑀜𑁆𑀳𑀺 𑀢𑀢𑁆𑀣 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀅𑀢𑁆𑀣𑀼𑀤𑁆𑀥𑀸𑀭𑀦𑀬𑁂𑀦𑁂𑀢𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀅𑀯𑀺𑀲𑁂𑀲𑁂𑀦 𑀤𑁆𑀯𑀻𑀳𑀺𑀧𑀺 𑀦𑀻𑀯𑀭𑀡𑀧𑁆𑀧𑀳𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀓𑀢𑁆𑀯𑀸 𑀧𑀼𑀦 𑀏𑀓𑁂𑀓𑁂𑀦 𑀯𑀼𑀢𑁆𑀢𑀁 𑀧𑀳𑀸𑀦𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀲𑁂𑀲𑁂𑀦𑀸’’𑀢𑀺 𑀆𑀳. 𑀅𑀣 𑀯𑀸 ‘‘𑀯𑀺𑀦𑁂𑀬𑁆𑀬 𑀦𑀻𑀯𑀭𑀡𑀸𑀦𑀻’’𑀢𑀺 𑀅𑀯𑀢𑁆𑀯𑀸 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀯𑀘𑀦𑀲𑁆𑀲 𑀧𑀬𑁄𑀚𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀲𑁂𑀲𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀪𑀸𑀯𑀦𑀸𑀬 𑀳𑀺 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀸𑀦𑀁 𑀅𑀦𑀼𑀭𑁄𑀥𑀸𑀤𑀻𑀦𑀁 𑀧𑀳𑀸𑀦𑀁 𑀤𑀲𑁆𑀲𑀦𑀁 𑀏𑀢𑀲𑁆𑀲 𑀧𑀬𑁄𑀚𑀦𑀦𑁆𑀢𑀺. 𑀓𑀸𑀬𑀲𑀫𑁆𑀧𑀢𑁆𑀢𑀺𑀫𑀽𑀮𑀓𑀲𑁆𑀲𑀸𑀢𑀺 𑀭𑀽𑀧-𑀩𑀮-𑀬𑁄𑀩𑁆𑀩𑀦𑀸𑀭𑁄𑀕𑁆𑀬𑀸𑀤𑀺-𑀲𑀭𑀻𑀭𑀲𑀫𑁆𑀧𑀤𑀸-𑀦𑀺𑀫𑀺𑀢𑁆𑀢𑀲𑁆𑀲. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑀢𑁄 𑀓𑀸𑀬𑀯𑀺𑀧𑀢𑁆𑀢𑀺𑀫𑀽𑀮𑀓𑁄 𑀯𑀺𑀭𑁄𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀸𑀬𑀪𑀸𑀯𑀦𑀸𑀬𑀸𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀪𑀸𑀯𑀦𑀸𑀬. 𑀲𑀸 𑀳𑀺 𑀇𑀥 ‘‘𑀓𑀸𑀬𑀪𑀸𑀯𑀦𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀦𑀸𑀢𑀺 𑀅𑀦𑀼𑀭𑁄𑀥𑀸𑀤𑀺𑀧𑁆𑀧𑀳𑀸𑀦𑀯𑀘𑀦𑁂𑀦. 𑀬𑁄𑀕𑀸𑀦𑀼𑀪𑀸𑀯𑁄 𑀳𑀻𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀸𑀓𑀝𑀓𑀭𑀡𑀁.

𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦𑀸𑀢𑀺 𑀅𑀢𑀺𑀲𑀫𑁆𑀧𑀚𑀜𑁆𑀜𑀕𑁆𑀕𑀳𑀡𑁂𑀦. 𑀲𑀩𑁆𑀩𑀢𑁆𑀣𑀺𑀓𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺 𑀫𑁂𑀢𑁆𑀢𑀸 𑀫𑀭𑀡𑀲𑁆𑀲𑀢𑀺 𑀅𑀲𑀼𑀪𑀪𑀸𑀯𑀦𑀸 𑀘. 𑀇𑀤𑀜𑁆𑀳𑀺 𑀘𑀢𑀼𑀓𑁆𑀓𑀁 𑀬𑁄𑀕𑀺𑀦𑀸 𑀧𑀭𑀺𑀳𑀭𑀺𑀬𑀫𑀸𑀦𑀁 ‘‘𑀲𑀩𑁆𑀩𑀢𑁆𑀣𑀺𑀓𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀅𑀢𑀺𑀲𑀫𑁆𑀧𑀚𑀜𑁆𑀜𑀩𑀮𑁂𑀦 𑀅𑀯𑀺𑀘𑁆𑀙𑀺𑀦𑁆𑀦𑀲𑁆𑀲 𑀢𑀲𑁆𑀲 𑀧𑀭𑀺𑀳𑀭𑀺𑀢𑀩𑁆𑀩𑀢𑁆𑀢𑀸, 𑀲𑀢𑀺𑀬𑀸 𑀯𑀸 𑀲𑀫𑀣𑁄 𑀯𑀼𑀢𑁆𑀢𑁄 𑀢𑀲𑁆𑀲𑀸 𑀲𑀫𑀸𑀤𑁆𑀥𑀺𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸.

𑀢𑁂𑀦𑀸𑀢𑀺 ¶ 𑀲𑀤𑁆𑀤𑀢𑁆𑀣𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀪𑀸𑀯𑀢𑁆𑀣𑀲𑁆𑀲𑁂𑀯 𑀯𑀺𑀪𑀚𑀦𑀯𑀲𑁂𑀦 𑀧𑀯𑀢𑁆𑀢𑁂𑀦 𑀯𑀺𑀪𑀗𑁆𑀕𑀧𑀸𑀞𑁂𑀦 𑀲𑀳. 𑀅𑀝𑁆𑀞𑀓𑀣𑀸𑀦𑀬𑁄𑀢𑀺 𑀲𑀤𑁆𑀤𑀢𑁆𑀣𑀲𑁆𑀲𑀧𑀺 𑀯𑀺𑀯𑀭𑀡𑀯𑀲𑁂𑀦 𑀬𑀣𑀸𑀭𑀳𑀁 𑀯𑀼𑀢𑁆𑀢𑁄 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀦𑀬𑁄. 𑀬𑀣𑀸 𑀲𑀁𑀲𑀦𑁆𑀤𑀢𑀻𑀢𑀺 𑀬𑀣𑀸 𑀅𑀢𑁆𑀣𑀢𑁄 𑀅𑀥𑀺𑀧𑁆𑀧𑀸𑀬𑀢𑁄 𑀘 𑀅𑀯𑀺𑀮𑁄𑀫𑁂𑀦𑁆𑀢𑁄 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺, 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄.

𑀯𑁂𑀤𑀦𑀸𑀤𑀻𑀦𑀁 ¶ 𑀧𑀼𑀦 𑀯𑀘𑀦𑁂𑀢𑀺 𑀏𑀢𑁆𑀣 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑀯𑀲𑁂𑀦 𑀘𑀺𑀢𑁆𑀢𑀥𑀫𑁆𑀫𑀸𑀦𑀁 𑀯𑁂𑀤𑀦𑀸𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀅𑀭𑀽𑀧𑀥𑀫𑁆𑀫𑀸𑀦𑀁 𑀭𑀽𑀧𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑁄 𑀘 𑀯𑁂𑀤𑀦𑀸𑀬 𑀓𑀸𑀬𑀸𑀤𑀺𑀅𑀦𑀼𑀧𑀲𑁆𑀲𑀦𑀸𑀧𑀲𑀗𑁆𑀕𑁂𑀧𑀺 𑀆𑀧𑀦𑁆𑀦𑁂 𑀢𑀤𑀲𑀫𑁆𑀫𑀺𑀲𑁆𑀲𑀢𑁄 𑀯𑀯𑀢𑁆𑀣𑀸𑀦𑀤𑀲𑁆𑀲𑀦𑀢𑁆𑀣𑀁 𑀖𑀦𑀯𑀺𑀦𑀺𑀩𑁆𑀪𑁄𑀕𑀸𑀤𑀺𑀤𑀲𑁆𑀲𑀦𑀢𑁆𑀣𑀜𑁆𑀘 𑀤𑀼𑀢𑀺𑀬𑀯𑁂𑀤𑀦𑀸𑀕𑀳𑀡𑀁. 𑀢𑁂𑀦 𑀦 𑀯𑁂𑀤𑀦𑀸𑀬𑀁 𑀓𑀸𑀬𑀸𑀦𑀼𑀧𑀲𑁆𑀲𑀻, 𑀘𑀺𑀢𑁆𑀢𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸, 𑀅𑀣 𑀔𑁄 𑀯𑁂𑀤𑀦𑀸𑀦𑀼𑀧𑀲𑁆𑀲𑀻𑀬𑁂𑀯𑀸𑀢𑀺 𑀯𑁂𑀤𑀦𑀸𑀲𑀗𑁆𑀔𑀸𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀓𑀸𑀭𑀲𑁆𑀲𑁂𑀯 𑀤𑀲𑁆𑀲𑀦𑁂𑀦 𑀅𑀲𑀫𑁆𑀫𑀺𑀲𑁆𑀲𑀢𑁄 𑀯𑀯𑀢𑁆𑀣𑀸𑀦𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑀣𑀸 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀲𑀼𑀔𑀸 𑀯𑁂𑀤𑀦𑀸, 𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀤𑀼𑀓𑁆𑀔𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑀸 𑀯𑁂𑀤𑀦𑀸. 𑀬𑀲𑁆𑀫𑀺𑀁 𑀯𑀸 𑀧𑀦 𑀲𑀫𑀬𑁂 𑀤𑀼𑀓𑁆𑀔𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑀸 𑀯𑁂𑀤𑀦𑀸, 𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀇𑀢𑀭𑀸 𑀯𑁂𑀤𑀦𑀸’’𑀢𑀺 𑀯𑁂𑀤𑀦𑀸𑀪𑀸𑀯𑀲𑀸𑀫𑀜𑁆𑀜𑁂 𑀅𑀝𑁆𑀞𑀢𑁆𑀯𑀸 𑀢𑀁 𑀢𑀁 𑀯𑁂𑀤𑀦𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀤𑀲𑁆𑀲𑀦𑁂𑀦 𑀖𑀦𑀯𑀺𑀦𑀺𑀩𑁆𑀪𑁄𑀕𑁄 𑀥𑀼𑀯𑀪𑀸𑀯𑀯𑀺𑀯𑁂𑀓𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀢𑁂𑀦 𑀢𑀸𑀲𑀁 𑀔𑀡𑀫𑀢𑁆𑀢𑀸𑀯𑀝𑁆𑀞𑀸𑀦𑀤𑀲𑁆𑀲𑀦𑁂𑀦 𑀅𑀦𑀺𑀘𑁆𑀘𑀢𑀸𑀬 𑀢𑀢𑁄 𑀏𑀯 𑀤𑀼𑀓𑁆𑀔𑀢𑀸𑀬 𑀅𑀦𑀢𑁆𑀢𑀢𑀸𑀬 𑀘 𑀤𑀲𑁆𑀲𑀦𑀁 𑀯𑀺𑀪𑀸𑀯𑀺𑀢𑀁 𑀳𑁄𑀢𑀺. 𑀖𑀦𑀯𑀺𑀦𑀺𑀩𑁆𑀪𑁄𑀕𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀜𑁆𑀳𑀺 𑀯𑁂𑀤𑀦𑀸𑀬𑀁 𑀯𑁂𑀤𑀦𑀸𑀦𑀼𑀧𑀲𑁆𑀲𑀻𑀬𑁂𑀯, 𑀦 𑀅𑀜𑁆𑀜𑀥𑀫𑁆𑀫𑀸𑀦𑀼𑀧𑀲𑁆𑀲𑀻. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀦𑀸𑀫 𑀩𑀸𑀮𑁄 𑀅𑀫𑀡𑀺𑀲𑀪𑀸𑀯𑁂𑀧𑀺 𑀉𑀤𑀓𑀩𑀼𑀩𑁆𑀩𑀼𑀴𑀓𑁂 𑀫𑀡𑀺𑀆𑀓𑀸𑀭𑀸𑀦𑀼𑀧𑀲𑁆𑀲𑀻 𑀳𑁄𑀢𑀺, 𑀦 𑀏𑀯𑀫𑀬𑀁 𑀞𑀺𑀢𑀺𑀭𑀫𑀡𑀻𑀬𑁂𑀧𑀺 𑀯𑁂𑀤𑀬𑀺𑀢𑁂, 𑀧𑀕𑁂𑀯 𑀇𑀢𑀭𑀲𑁆𑀫𑀺𑀁 𑀫𑀦𑀼𑀜𑁆𑀜𑀸𑀓𑀸𑀭𑀸𑀦𑀼𑀧𑀲𑁆𑀲𑀻, 𑀅𑀣 𑀔𑁄 𑀔𑀡𑀪𑀗𑁆𑀕𑀼𑀭𑀢𑀸𑀬 𑀅𑀯𑀲𑀯𑀢𑁆𑀢𑀺𑀢𑀸𑀬 𑀓𑀺𑀮𑁂𑀲𑀸𑀲𑀼𑀘𑀺𑀧𑀕𑁆𑀖𑀭𑀡𑀢𑀸𑀬 𑀘 𑀅𑀦𑀺𑀘𑁆𑀘𑀅𑀦𑀢𑁆𑀢𑀅𑀲𑀼𑀪𑀸𑀓𑀸𑀭𑀸𑀦𑀼𑀧𑀲𑁆𑀲𑀻, 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀬 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀘 𑀯𑀺𑀲𑁂𑀲𑀢𑁄 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀻𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀘𑀺𑀢𑁆𑀢𑀥𑀫𑁆𑀫𑁂𑀲𑀼𑀧𑀺 𑀬𑀣𑀸𑀭𑀳𑀁 𑀧𑀼𑀦 𑀯𑀘𑀦𑁂 𑀧𑀬𑁄𑀚𑀦𑀁 𑀯𑀢𑁆𑀢𑀩𑁆𑀩𑀁. ‘‘𑀓𑁂𑀯𑀮𑀁 𑀧𑀦𑀺𑀥𑀸’’𑀢𑀺𑀆𑀤𑀺𑀦𑀸 𑀇𑀥 ‘𑀏𑀢𑁆𑀢𑀓𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄𑀢𑀺 𑀇𑀫𑀺𑀦𑀸 𑀬𑀣𑀸 𑀘𑀺𑀢𑁆𑀢𑀁 𑀥𑀫𑁆𑀫𑀸 𑀘 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸, 𑀢𑀣𑀸 𑀢𑀸𑀦𑀺 𑀅𑀦𑀼𑀧𑀲𑁆𑀲𑀦𑁆𑀢𑁄 ‘‘𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻, 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑀇𑀫𑀫𑀢𑁆𑀣𑀁 𑀅𑀢𑀺𑀤𑀺𑀲𑀢𑀺.

𑀬𑁄 ¶ 𑀲𑀼𑀔𑀁 𑀤𑀼𑀓𑁆𑀔𑀢𑁄 𑀅𑀤𑁆𑀤𑀸𑀢𑀺 𑀬𑁄 𑀪𑀺𑀓𑁆𑀔𑀼 𑀲𑀼𑀔𑀯𑁂𑀤𑀦𑀁 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀬 ‘‘𑀤𑀼𑀓𑁆𑀔’’𑀦𑁆𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀅𑀤𑁆𑀤𑀓𑁆𑀔𑀺. 𑀤𑀼𑀓𑁆𑀔𑀫𑀤𑁆𑀤𑀓𑁆𑀔𑀺 𑀲𑀮𑁆𑀮𑀢𑁄𑀢𑀺 𑀤𑀼𑀓𑁆𑀔𑀯𑁂𑀤𑀦𑀁 𑀧𑀻𑀴𑀸𑀚𑀦𑀦𑀢𑁄 𑀅𑀦𑁆𑀢𑁄𑀢𑀼𑀤𑀦𑀢𑁄 𑀤𑀼𑀦𑁆𑀦𑀻𑀳𑀭𑀡𑀢𑁄 𑀘 𑀲𑀮𑁆𑀮𑀦𑁆𑀢𑀺 𑀅𑀤𑁆𑀤𑀓𑁆𑀔𑀺 𑀧𑀲𑁆𑀲𑀺. 𑀅𑀤𑀼𑀓𑁆𑀔𑀫𑀲𑀼𑀔𑀦𑁆𑀢𑀺 𑀉𑀧𑁂𑀓𑁆𑀔𑀸𑀯𑁂𑀤𑀦𑀁. 𑀲𑀦𑁆𑀢𑀦𑁆𑀢𑀺 𑀲𑀼𑀔𑀤𑀼𑀓𑁆𑀔𑀸𑀦𑀺 𑀯𑀺𑀬 𑀅𑀦𑁄𑀴𑀸𑀭𑀺𑀓𑀢𑀸𑀬 𑀧𑀘𑁆𑀘𑀬𑀯𑀲𑁂𑀦 𑀯𑀽𑀧𑀲𑀦𑁆𑀢𑀲𑀪𑀸𑀯𑀢𑀸𑀬 𑀘 𑀲𑀦𑁆𑀢𑀁. 𑀅𑀦𑀺𑀘𑁆𑀘𑀢𑁄𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄 𑀉𑀤𑀬𑀩𑁆𑀩𑀬𑀯𑀦𑁆𑀢𑀢𑁄 𑀢𑀸𑀯𑀓𑀸𑀮𑀺𑀓𑀢𑁄𑀦𑀺𑀘𑁆𑀘𑀧𑀝𑀺𑀓𑁆𑀔𑁂𑀧𑀢𑁄 𑀘 ‘‘𑀅𑀦𑀺𑀘𑁆𑀘’’𑀦𑁆𑀢𑀺 𑀬𑁄 𑀅𑀤𑁆𑀤𑀓𑁆𑀔𑀺. 𑀲 𑀯𑁂 𑀲𑀫𑁆𑀫𑀤𑁆𑀤𑀲𑁄 𑀪𑀺𑀓𑁆𑀔𑀼 𑀏𑀓𑀁𑀲𑁂𑀦 𑀧𑀭𑀺𑀩𑁆𑀬𑀢𑁆𑀢𑀁 𑀯𑀸 𑀯𑁂𑀤𑀦𑀸𑀬 𑀲𑀫𑁆𑀫𑀸 𑀧𑀲𑁆𑀲𑀦𑀓𑁄𑀢𑀺 𑀅𑀢𑁆𑀣𑁄.

𑀤𑀼𑀓𑁆𑀔𑀸𑀢𑀺𑀧𑀻𑀢𑀺 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀤𑀼𑀓𑁆𑀔𑀸 𑀇𑀢𑀺𑀧𑀺. 𑀲𑀩𑁆𑀩𑀁 𑀢𑀁 𑀤𑀼𑀓𑁆𑀔𑀲𑁆𑀫𑀺𑀦𑁆𑀢𑀺 𑀲𑀩𑁆𑀩𑀁 𑀢𑀁 𑀯𑁂𑀤𑀬𑀺𑀢𑀁 𑀤𑀼𑀓𑁆𑀔𑀲𑁆𑀫𑀺𑀁 𑀅𑀦𑁆𑀢𑁄𑀕𑀥𑀁 𑀧𑀭𑀺𑀬𑀸𑀧𑀦𑁆𑀦𑀁 𑀯𑀤𑀸𑀫𑀺 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀦𑀢𑀺𑀯𑀢𑁆𑀢𑀦𑀢𑁄. 𑀲𑀼𑀔𑀤𑀼𑀓𑁆𑀔𑀢𑁄𑀧𑀺 𑀘𑀸𑀢𑀺 ¶ 𑀲𑀼𑀔𑀸𑀤𑀻𑀦𑀁 𑀞𑀺𑀢𑀺𑀯𑀺𑀧𑀭𑀺𑀡𑀸𑀫𑀜𑁆𑀜𑀸𑀡𑀲𑀼𑀔𑀢𑀸𑀬 𑀯𑀺𑀧𑀭𑀺𑀡𑀸𑀫𑀞𑀺𑀢𑀺𑀅𑀜𑁆𑀜𑀸𑀡𑀤𑀼𑀓𑁆𑀔𑀢𑀸𑀬 𑀘 𑀯𑀼𑀢𑁆𑀢𑀢𑁆𑀢𑀸 𑀢𑀺𑀲𑁆𑀲𑁄𑀧𑀺 𑀲𑀼𑀔𑀢𑁄, 𑀢𑀺𑀲𑁆𑀲𑁄𑀧𑀺 𑀘 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀭𑀽𑀧𑀸𑀤𑀺-𑀆𑀭𑀫𑁆𑀫𑀡𑀙𑀦𑁆𑀤𑀸𑀤𑀺-𑀅𑀥𑀺𑀧𑀢𑀺-𑀜𑀸𑀡𑀸𑀤𑀺-𑀲𑀳𑀚𑀸𑀢- 𑀓𑀸𑀫𑀸𑀯𑀘𑀭𑀸𑀤𑀺-𑀪𑀽𑀫𑀺𑀦𑀸𑀦𑀢𑁆𑀢𑀪𑁂𑀤𑀸𑀦𑀁 𑀓𑀼𑀲𑀮𑀸𑀓𑀼𑀲𑀮-𑀢𑀁𑀯𑀺𑀧𑀸𑀓𑀓𑀺𑀭𑀺𑀬𑀸-𑀦𑀸𑀦𑀢𑁆𑀢𑀸𑀤𑀺𑀪𑁂𑀤𑀸𑀦𑀜𑁆𑀘, 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀔𑀸𑀭𑀺𑀓𑀸𑀲𑀗𑁆𑀔𑀸𑀭𑀺𑀓𑀲-𑀯𑀢𑁆𑀣𑀼𑀓𑀸𑀯𑀢𑁆𑀣𑀼𑀓𑀸𑀤𑀺-𑀦𑀸𑀦𑀢𑁆𑀢𑀪𑁂𑀤𑀸𑀦𑀜𑁆𑀘 𑀯𑀲𑁂𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀼𑀜𑁆𑀜𑀢𑀥𑀫𑁆𑀫𑀲𑁆𑀲𑀸𑀢𑀺 ‘‘𑀥𑀫𑁆𑀫𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁨𑁧) 𑀲𑀼𑀜𑁆𑀜𑀢𑀯𑀸𑀭𑁂 𑀆𑀕𑀢𑀲𑀼𑀜𑁆𑀜𑀢𑀲𑀪𑀸𑀯𑀲𑁆𑀲 𑀯𑀲𑁂𑀦. ‘‘𑀓𑀸𑀫𑀜𑁆𑀘𑁂𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀧𑀳𑀻𑀦𑀢𑁆𑀢𑀸 𑀧𑀼𑀦 𑀧𑀳𑀸𑀦𑀁 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁄𑀤𑀦𑀁 𑀤𑀲𑁆𑀲𑁂𑀢𑀺, 𑀫𑀕𑁆𑀕𑀘𑀺𑀢𑁆𑀢𑀓𑁆𑀔𑀡𑁂 𑀯𑀸 𑀏𑀓𑀢𑁆𑀣 𑀧𑀳𑀻𑀦𑀁 𑀲𑀩𑁆𑀩𑀢𑁆𑀣 𑀧𑀳𑀻𑀦𑀫𑁂𑀯 𑀳𑁄𑀢𑀻𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺. 𑀢𑀢𑁆𑀣 𑀧𑀼𑀭𑀺𑀫𑀸𑀬 𑀘𑁄𑀤𑀦𑀸𑀬 𑀦𑀸𑀦𑀸𑀧𑀼𑀕𑁆𑀕𑀮𑀧𑀭𑀺𑀳𑀸𑀭𑁄, 𑀧𑀘𑁆𑀙𑀺𑀫𑀸𑀬 𑀦𑀸𑀦𑀸𑀘𑀺𑀢𑁆𑀢𑀓𑁆𑀔𑀡𑀺𑀓𑀧𑀭𑀺𑀳𑀸𑀭𑁄. 𑀮𑁄𑀓𑀺𑀬𑀪𑀸𑀯𑀦𑀸𑀬 𑀳𑀺 𑀓𑀸𑀬𑁂 𑀧𑀳𑀻𑀦𑀁 𑀦 𑀯𑁂𑀤𑀦𑀸𑀤𑀻𑀲𑀼 𑀧𑀳𑀻𑀦𑀁 𑀳𑁄𑀢𑀺 𑀬𑀤𑀺𑀧𑀺 𑀦 𑀧𑀯𑀢𑁆𑀢𑁂𑀬𑁆𑀬, 𑀦 𑀧𑀝𑀺𑀧𑀓𑁆𑀔𑀪𑀸𑀯𑀦𑀸𑀬 𑀢𑀢𑁆𑀣 𑀲𑀸 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀲𑁆𑀲 𑀅𑀧𑁆𑀧𑀯𑀢𑁆𑀢𑀺 𑀳𑁄𑀢𑀻𑀢𑀺 𑀧𑀼𑀦 𑀢𑀧𑁆𑀧𑀳𑀸𑀦𑀁 𑀯𑀢𑁆𑀢𑀩𑁆𑀩𑀫𑁂𑀯𑀸𑀢𑀺. 𑀏𑀓𑀢𑁆𑀣 𑀧𑀳𑀻𑀦𑀁 𑀲𑁂𑀲𑁂𑀲𑀼𑀧𑀺 𑀧𑀳𑀻𑀦𑀁 𑀳𑁄𑀢𑀻𑀢𑀺 𑀫𑀕𑁆𑀕𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀁, 𑀮𑁄𑀓𑀺𑀬𑀪𑀸𑀯𑀦𑀸𑀬 𑀯𑀸 𑀲𑀩𑁆𑀩𑀢𑁆𑀣 𑀅𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀧𑀜𑁆𑀘𑀧𑀺 𑀔𑀦𑁆𑀥𑀸 𑀮𑁄𑀓𑁄’’𑀢𑀺 𑀳𑀺 𑀯𑀺𑀪𑀗𑁆𑀕𑁂 (𑀯𑀺𑀪. 𑁩𑁬𑁨, 𑁩𑁬𑁪, 𑁩𑁬𑁬, 𑁩𑁭𑁩) 𑀘𑀢𑀽𑀲𑀼𑀧𑀺 𑀞𑀸𑀦𑁂𑀲𑀼 𑀯𑀼𑀢𑁆𑀢𑀦𑁆𑀢𑀺.

𑀉𑀤𑁆𑀤𑁂𑀲𑀯𑀸𑀭𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀯𑀡𑁆𑀡𑀦𑀸

𑀆𑀦𑀸𑀧𑀸𑀦𑀧𑀩𑁆𑀩𑀯𑀡𑁆𑀡𑀦𑀸

𑁧𑁦𑁭. 𑀩𑀸𑀳𑀺𑀭𑀓𑁂𑀲𑀼𑀧𑀺 ¶ 𑀇𑀢𑁄 𑀏𑀓𑀤𑁂𑀲𑀲𑁆𑀲 𑀲𑀫𑁆𑀪𑀯𑀢𑁄 𑀲𑀩𑁆𑀩𑀧𑁆𑀧𑀓𑀸𑀭𑀕𑁆𑀕𑀳𑀡𑀁 𑀓𑀢𑀁 ‘‘𑀲𑀩𑁆𑀩𑀧𑁆𑀧𑀓𑀸𑀭𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀦𑀺𑀩𑁆𑀩𑀢𑁆𑀢𑀓𑀲𑁆𑀲𑀸’’𑀢𑀺. 𑀢𑁂𑀦 𑀬𑁂 𑀇𑀫𑁂 𑀆𑀦𑀸𑀧𑀸𑀦𑀧𑀩𑁆𑀩𑀸𑀤𑀺𑀯𑀲𑁂𑀦 𑀆𑀕𑀢𑀸 𑀘𑀼𑀤𑁆𑀤𑀲𑀧𑁆𑀧𑀓𑀸𑀭𑀸, 𑀢𑀤𑀦𑁆𑀢𑁄𑀕𑀥𑀸 𑀘 𑀅𑀚𑁆𑀛𑀢𑁆𑀢𑀸𑀤𑀺𑀅𑀦𑀼𑀧𑀲𑁆𑀲𑀦𑀸 𑀧𑀓𑀸𑀭𑀸, 𑀢𑀣𑀸 𑀓𑀸𑀬𑀕𑀢𑀸𑀲𑀢𑀺𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁧𑁫𑁪) 𑀯𑀼𑀢𑁆𑀢𑀸 𑀓𑁂𑀲𑀸𑀤𑀺𑀯𑀡𑁆𑀡𑀲𑀡𑁆𑀞𑀸𑀦𑀓𑀲𑀺𑀡𑀸𑀭𑀫𑁆𑀫𑀡𑀘𑀢𑀼𑀓𑁆𑀓𑀚𑁆𑀛𑀸𑀦𑀧𑁆𑀧𑀓𑀸𑀭𑀸, 𑀮𑁄𑀓𑀺𑀬𑀸𑀤𑀺𑀧𑁆𑀧𑀓𑀸𑀭𑀸 𑀘, 𑀢𑁂 𑀲𑀩𑁆𑀩𑁂𑀧𑀺 𑀅𑀦𑀯𑀲𑁂𑀲𑀢𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀇𑀫𑁂 𑀘 𑀧𑀓𑀸𑀭𑀸 𑀇𑀫𑀲𑁆𑀫𑀺𑀁𑀬𑁂𑀯 𑀲𑀸𑀲𑀦𑁂, 𑀦 𑀇𑀢𑁄 𑀩𑀳𑀺𑀤𑁆𑀥𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀧𑁆𑀧𑀓𑀸𑀭…𑀧𑁂… 𑀧𑀝𑀺𑀲𑁂𑀥𑀦𑁄 𑀘𑀸’’𑀢𑀺. 𑀢𑀢𑁆𑀣 𑀢𑀣𑀸𑀪𑀸𑀯𑀧𑀝𑀺𑀲𑁂𑀥𑀦𑁄𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀜𑁆𑀜𑀲𑀸𑀲𑀦𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑀧𑀝𑀺𑀲𑁂𑀥𑀦𑁄. 𑀏𑀢𑁂𑀦 ‘‘𑀇𑀥, 𑀪𑀺𑀓𑁆𑀔𑀯𑁂’’𑀢𑀺 𑀏𑀢𑁆𑀣 𑀇𑀥-𑀲𑀤𑁆𑀤𑁄 𑀅𑀦𑁆𑀢𑁄𑀕𑀥𑀏𑀯𑀲𑀤𑁆𑀤𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺 ¶ . 𑀲𑀦𑁆𑀢𑀺 𑀳𑀺 𑀏𑀓𑀧𑀤𑀸𑀦𑀺𑀧𑀺 𑀲𑀸𑀯𑀥𑀸𑀭𑀡𑀸𑀦𑀺 𑀬𑀣𑀸 ‘‘𑀯𑀸𑀬𑀼𑀪𑀓𑁆𑀔𑁄’’𑀢𑀺 (𑀤𑀻. 𑀦𑀺. 𑀝𑀻. 𑁨.𑁩𑁭𑁪). 𑀢𑁂𑀦𑀸𑀳 ‘‘𑀇𑀥𑁂𑀯 𑀲𑀫𑀡𑁄’’𑀢𑀺𑀆𑀤𑀺. 𑀧𑀭𑀺𑀧𑀼𑀡𑁆𑀡𑀲𑀫𑀡𑀓𑀭𑀡𑀥𑀫𑁆𑀫𑁄 𑀳𑀺 𑀲𑁄, 𑀬𑁄 𑀲𑀩𑁆𑀩𑀧𑁆𑀧𑀓𑀸𑀭𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀦𑀺𑀩𑁆𑀩𑀢𑁆𑀢𑀓𑁄. 𑀧𑀭𑀧𑁆𑀧𑀯𑀸𑀤𑀸𑀢𑀺 𑀧𑀭𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀦𑀸𑀦𑀧𑁆𑀧𑀓𑀸𑀭𑀸 𑀯𑀸𑀤𑀸 𑀢𑀺𑀢𑁆𑀣𑀸𑀬𑀢𑀦𑀸𑀦𑀺.

𑀅𑀭𑀜𑁆𑀜𑀸𑀤𑀺𑀓𑀲𑁆𑀲𑁂𑀯 𑀪𑀸𑀯𑀦𑀸𑀦𑀼𑀭𑀽𑀧𑀲𑁂𑀦𑀸𑀲𑀦𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑀲𑁆𑀲 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀼𑀤𑁆𑀤𑀫𑁄 𑀤𑀫𑀣𑀁 𑀅𑀦𑀼𑀧𑀕𑀢𑁄 𑀕𑁄𑀡𑁄 𑀓𑀽𑀝𑀕𑁄𑀡𑁄. 𑀤𑁄𑀳𑀦𑀓𑀸𑀮𑁂 𑀬𑀣𑀸 𑀣𑀦𑁂𑀳𑀺 𑀅𑀦𑀯𑀲𑁂𑀲𑀢𑁄 𑀔𑀻𑀭𑀁 𑀦 𑀧𑀕𑁆𑀖𑀭𑀢𑀺, 𑀏𑀯𑀁 𑀤𑁄𑀳𑀧𑀝𑀺𑀩𑀦𑁆𑀥𑀺𑀦𑀻 𑀓𑀽𑀝𑀥𑁂𑀦𑀼. 𑀭𑀽𑀧𑀲𑀤𑁆𑀤𑀸𑀤𑀺𑀓𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀓𑀅𑀲𑁆𑀲𑀸𑀤𑁄 𑀭𑀽𑀧𑀸𑀭𑀫𑁆𑀫𑀡𑀸𑀤𑀺𑀭𑀲𑁄. 𑀧𑀼𑀩𑁆𑀩𑁂 𑀆𑀘𑀺𑀡𑁆𑀡𑀸𑀭𑀫𑁆𑀫𑀡𑀦𑁆𑀢𑀺 𑀧𑀩𑁆𑀩𑀚𑁆𑀚𑀸𑀢𑁄 𑀧𑀼𑀩𑁆𑀩𑁂, 𑀅𑀦𑀸𑀤𑀺𑀫𑀢𑀺 𑀯𑀸 𑀲𑀁𑀲𑀸𑀭𑁂 𑀧𑀭𑀺𑀘𑀺𑀢𑀸𑀭𑀫𑁆𑀫𑀡𑀁.

𑀦𑀺𑀩𑀦𑁆𑀥𑁂𑀬𑁆𑀬𑀸𑀢𑀺 𑀩𑀦𑁆𑀥𑁂𑀬𑁆𑀬. 𑀲𑀢𑀺𑀬𑀸𑀢𑀺 𑀲𑀫𑁆𑀫𑀤𑁂𑀯 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀲𑀮𑁆𑀮𑀓𑁆𑀔𑀡𑀯𑀲𑁂𑀦 𑀧𑀯𑀢𑁆𑀢𑀸𑀬 𑀲𑀢𑀺𑀬𑀸. 𑀆𑀭𑀫𑁆𑀫𑀡𑁂𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀭𑀫𑁆𑀫𑀡𑁂. 𑀤𑀴𑁆𑀳𑀦𑁆𑀢𑀺 𑀣𑀺𑀭𑀁, 𑀬𑀣𑀸 𑀲𑀢𑁄𑀓𑀸𑀭𑀺𑀲𑁆𑀲 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑁄 𑀲𑀫𑀸𑀥𑀺 𑀇𑀚𑁆𑀛𑀢𑀺, 𑀢𑀣𑀸 𑀣𑀸𑀫𑀕𑀢𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀯𑀺𑀲𑁂𑀲𑀸𑀥𑀺𑀕𑀫𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀧𑀤𑀝𑁆𑀞𑀸𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀩𑀼𑀤𑁆𑀥𑀸𑀦𑀁, 𑀏𑀓𑀘𑁆𑀘𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁, 𑀩𑀼𑀤𑁆𑀥𑀲𑀸𑀯𑀓𑀸𑀦𑀜𑁆𑀘 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲, 𑀅𑀜𑁆𑀜𑁂𑀦 𑀓𑀫𑁆𑀫𑀝𑁆𑀞𑀸𑀦𑁂𑀦 𑀅𑀥𑀺𑀕𑀢𑀯𑀺𑀲𑁂𑀲𑀸𑀦𑀁 ¶ 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑁆𑀲 𑀘 𑀧𑀤𑀝𑁆𑀞𑀸𑀦𑀪𑀽𑀢𑀁. 𑀯𑀢𑁆𑀣𑀼𑀯𑀺𑀚𑁆𑀚𑀸𑀘𑀭𑀺𑀬𑁄 𑀯𑀺𑀬 𑀪𑀕𑀯𑀸 𑀬𑁄𑀕𑀻𑀦𑀁 𑀅𑀦𑀼𑀭𑀽𑀧𑀦𑀺𑀯𑀸𑀲𑀝𑁆𑀞𑀸𑀦𑀼𑀧𑀤𑀺𑀲𑀦𑀢𑁄. 𑀪𑀺𑀓𑁆𑀔𑀼 𑀤𑀻𑀧𑀺𑀲𑀤𑀺𑀲𑁄 𑀅𑀭𑀜𑁆𑀜𑁂 𑀏𑀓𑀸𑀓𑀻 𑀯𑀺𑀳𑀭𑀺𑀢𑁆𑀯𑀸 𑀧𑀝𑀺𑀧𑀓𑁆𑀔𑀦𑀺𑀫𑁆𑀫𑀣𑀦𑁂𑀦 𑀇𑀘𑁆𑀙𑀺𑀢𑀢𑁆𑀣𑀲𑀸𑀥𑀦𑀢𑁄. 𑀨𑀮𑀫𑀼𑀢𑁆𑀢𑀫𑀦𑁆𑀢𑀺 𑀲𑀸𑀫𑀜𑁆𑀜𑀨𑀮𑀁 𑀲𑀦𑁆𑀥𑀸𑀬𑀸𑀳. 𑀧𑀭𑀓𑁆𑀓𑀫𑀚𑀯𑀬𑁄𑀕𑁆𑀕𑀪𑀽𑀫𑀺𑀦𑁆𑀢𑀺 𑀪𑀸𑀯𑀦𑀼𑀲𑁆𑀲𑀸𑀳𑀚𑀯𑀲𑁆𑀲 𑀬𑁄𑀕𑁆𑀕𑀓𑀭𑀡𑀪𑀽𑀫𑀺𑀪𑀽𑀢𑀁.

𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀯𑀲𑁂𑀦 𑀲𑀺𑀓𑁆𑀔𑀢𑁄𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀤𑀻𑀖𑀭𑀲𑁆𑀲𑀢𑀸𑀧𑀚𑀸𑀦𑀦-𑀲𑀩𑁆𑀩𑀓𑀸𑀬𑀧𑀝𑀺𑀲𑀁𑀯𑁂𑀤𑀦-𑀑𑀴𑀸𑀭𑀺𑀓𑁄𑀴𑀸𑀭𑀺𑀓𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀯𑀲𑁂𑀦 𑀪𑀸𑀯𑀦𑀸𑀦𑀼𑀬𑁄𑀕𑀁 𑀲𑀺𑀓𑁆𑀔𑀢𑁄, 𑀢𑀣𑀸𑀪𑀽𑀢𑁄 𑀯𑀸 𑀳𑀼𑀢𑁆𑀯𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀧𑀯𑀢𑁆𑀢𑀬𑀢𑁄. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀫𑀺𑀢𑁆𑀢𑁂𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀲𑀦𑁆𑀦𑀺𑀲𑁆𑀲𑀬𑁂𑀦 𑀉𑀧𑀝𑁆𑀞𑀺𑀢𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀺 𑀭𑀽𑀧𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀁 𑀅𑀪𑀺𑀦𑀺𑀯𑀺𑀲𑀦𑁆𑀢𑁄, 𑀬𑁄 ‘‘𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀫𑁆𑀫𑀺𑀓𑁄’’𑀢𑀺 𑀯𑀼𑀢𑁆𑀢𑁄. 𑀛𑀸𑀦𑀗𑁆𑀕𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀸𑀢𑀺 𑀅𑀭𑀽𑀧𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀁 𑀅𑀪𑀺𑀦𑀺𑀯𑀺𑀲𑀦𑁆𑀢𑁄. 𑀯𑀢𑁆𑀣𑀼 𑀦𑀸𑀫 𑀓𑀭𑀚𑀓𑀸𑀬𑁄 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄. 𑀅𑀜𑁆𑀜𑁄 𑀲𑀢𑁆𑀢𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸 𑀦𑀢𑁆𑀣𑀻𑀢𑀺 𑀯𑀺𑀲𑀼𑀤𑁆𑀥𑀤𑀺𑀝𑁆𑀞𑀺 ‘‘𑀢𑀬𑀺𑀤𑀁 𑀥𑀫𑁆𑀫𑀫𑀢𑁆𑀢𑀁 𑀦 𑀅𑀳𑁂𑀢𑀼𑀓𑀁, 𑀦𑀸𑀧𑀺 𑀇𑀲𑁆𑀲𑀭𑀸𑀤𑀺𑀯𑀺𑀲𑀫𑀳𑁂𑀢𑀼𑀓𑀁, 𑀅𑀣 𑀔𑁄 𑀅𑀯𑀺𑀚𑁆𑀚𑀸𑀤𑀻𑀳𑀺 𑀏𑀯 𑀲𑀳𑁂𑀢𑀼𑀓’’𑀦𑁆𑀢𑀺 𑀅𑀤𑁆𑀥𑀢𑁆𑀢𑀬𑁂𑀧𑀺 𑀓𑀗𑁆𑀔𑀸𑀯𑀺𑀢𑀭𑀡𑁂𑀦 𑀯𑀺𑀢𑀺𑀡𑁆𑀡𑀓𑀗𑁆𑀔𑁄 ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁩𑁬𑁧; 𑀫. 𑀦𑀺. 𑁨.𑁧𑁧𑁩; 𑀫. 𑀦𑀺. 𑁩.𑁮𑁬; 𑀅. 𑀦𑀺. 𑁪.𑁧𑁮𑁧; 𑀧𑀝𑀺. 𑀫. 𑁧.𑁪𑁮) 𑀓𑀮𑀸𑀧𑀲𑀫𑁆𑀫𑀲𑀦𑀯𑀲𑁂𑀦 ¶ 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸.

𑀧𑀭𑀲𑁆𑀲 𑀯𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑁂𑀢𑀺 𑀇𑀤𑀁 𑀲𑀫𑁆𑀫𑀲𑀦𑀘𑀸𑀭𑀯𑀲𑁂𑀦𑀸𑀬𑀁 𑀧𑀸𑀴𑀺 𑀧𑀯𑀢𑁆𑀢𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀲𑀫𑀣𑀯𑀲𑁂𑀦 𑀧𑀦 𑀧𑀭𑀲𑁆𑀲 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑁂 𑀅𑀧𑁆𑀧𑀦𑀸𑀦𑀺𑀫𑀺𑀢𑁆𑀢𑀼𑀧𑁆𑀧𑀢𑁆𑀢𑀺 𑀏𑀯 𑀦𑀢𑁆𑀣𑀻𑀢𑀺. 𑀇𑀤𑀁 𑀉𑀪𑀬𑀁 𑀦 𑀮𑀩𑁆𑀪𑀢𑀻𑀢𑀺 ‘‘𑀅𑀚𑁆𑀛𑀢𑁆𑀢𑀁, 𑀩𑀳𑀺𑀤𑁆𑀥𑀸’’𑀢𑀺 𑀘 𑀯𑀼𑀢𑁆𑀢𑀁 𑀇𑀤𑀁 𑀥𑀫𑁆𑀫𑀤𑁆𑀯𑀬𑀖𑀝𑀺𑀢𑀁 𑀏𑀓𑀢𑁄 𑀆𑀭𑀫𑁆𑀫𑀡𑀪𑀸𑀯𑁂𑀦 𑀦 𑀮𑀩𑁆𑀪𑀢𑀺.

𑀲𑀫𑀼𑀤𑁂𑀢𑀺 𑀏𑀢𑀲𑁆𑀫𑀸𑀢𑀺 𑀲𑀫𑀼𑀤𑀬𑁄, 𑀲𑁄 𑀏𑀯 𑀓𑀸𑀭𑀡𑀝𑁆𑀞𑁂𑀦 𑀥𑀫𑁆𑀫𑁄𑀢𑀺 𑀲𑀫𑀼𑀤𑀬𑀥𑀫𑁆𑀫𑁄, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀦𑀁 𑀧𑀯𑀢𑁆𑀢𑀺𑀳𑁂𑀢𑀼𑀓𑀭𑀚𑀓𑀸𑀬𑀸𑀤𑀺. 𑀢𑀲𑁆𑀲 𑀅𑀦𑀼𑀧𑀲𑁆𑀲𑀦𑀲𑀻𑀮𑁄 𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻. 𑀢𑀁 𑀧𑀦 𑀲𑀫𑀼𑀤𑀬𑀥𑀫𑁆𑀫𑀁 𑀉𑀧𑀫𑀸𑀫𑀼𑀔𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀲𑁆𑀢𑀦𑁆𑀢𑀺 𑀭𑀼𑀢𑁆𑀢𑀺𑀁. 𑀕𑀕𑁆𑀕𑀭𑀦𑀸𑀴𑀺𑀦𑁆𑀢𑀺 𑀉𑀓𑁆𑀓𑀸𑀧𑀦𑀸𑀴𑀺𑀁. 𑀢𑁂𑀢𑀺 𑀓𑀭𑀚𑀓𑀸𑀬𑀸𑀤𑀺𑀓𑁂. 𑀬𑀣𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑁄 𑀓𑀭𑀚𑀓𑀸𑀬𑀸𑀤𑀺𑀲𑀫𑁆𑀩𑀦𑁆𑀥𑀻 𑀨𑀮𑀪𑀸𑀯𑁂𑀦, 𑀏𑀯𑀁 𑀢𑁂𑀧𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑀲𑀫𑁆𑀩𑀦𑁆𑀥𑀺𑀦𑁄 𑀳𑁂𑀢𑀼𑀪𑀸𑀯𑁂𑀦𑀸𑀢𑀺 ‘‘𑀲𑀫𑀼𑀤𑀬𑀥𑀫𑁆𑀫𑀸 𑀓𑀸𑀬𑀲𑁆𑀫𑀺’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 ¶ 𑀮𑀪𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀫𑀼𑀤𑀬…𑀧𑁂… 𑀯𑀼𑀘𑁆𑀘𑀢𑀻’’𑀢𑀺. 𑀧𑀓𑀢𑀺𑀯𑀸𑀘𑀻 𑀯𑀸 𑀥𑀫𑁆𑀫-𑀲𑀤𑁆𑀤𑁄 ‘‘𑀚𑀸𑀢𑀺𑀥𑀫𑁆𑀫𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁩𑁧; 𑀫. 𑀦𑀺. 𑁩.𑁩𑁭𑁩; 𑀧𑀝𑀺. 𑀫. 𑁧.𑁩𑁩) 𑀯𑀺𑀬𑀸𑀢𑀺 𑀓𑀸𑀬𑀲𑁆𑀲 𑀧𑀘𑁆𑀘𑀬𑀲𑀫𑀯𑀸𑀬𑁂 𑀉𑀧𑁆𑀧𑀚𑁆𑀚𑀦𑀧𑀓𑀢𑀺𑀓𑀸𑀦𑀼𑀧𑀲𑁆𑀲𑀻 ‘‘𑀲𑀫𑀼𑀤𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻’’𑀢𑀺 𑀯𑀼𑀢𑁆𑀢𑁄. 𑀢𑁂𑀦𑀸𑀳 𑁋 ‘‘𑀓𑀭𑀚𑀓𑀸𑀬𑀜𑁆𑀘𑀸’’𑀢𑀺𑀆𑀤𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀓𑀸𑀬𑀲𑁆𑀫𑀺𑀦𑁆𑀢𑀺 𑀪𑀼𑀫𑁆𑀫𑀯𑀘𑀦𑀜𑁆𑀘 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀻𑀢𑀺 𑀏𑀢𑁆𑀣 𑀅𑀳𑁂𑀢𑀼𑀓𑀢𑁆𑀢𑁂𑀧𑀺 𑀯𑀺𑀦𑀸𑀲𑀲𑁆𑀲 𑀬𑁂𑀲𑀁 𑀳𑁂𑀢𑀼𑀥𑀫𑁆𑀫𑀸𑀦𑀁 𑀅𑀪𑀸𑀯𑁂 𑀬𑀁 𑀦 𑀳𑁄𑀢𑀺, 𑀢𑀤𑀪𑀸𑀯𑁄 𑀢𑀲𑁆𑀲 𑀅𑀪𑀸𑀯𑀲𑁆𑀲 𑀳𑁄𑀢𑀼 𑀯𑀺𑀬 𑀯𑁄𑀳𑀭𑀻𑀬𑀢𑀻𑀢𑀺 𑀉𑀧𑀘𑀸𑀭𑀢𑁄 𑀓𑀭𑀚𑀓𑀸𑀬𑀸𑀤𑀺𑀅𑀪𑀸𑀯𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑀲𑁆𑀲 𑀯𑀬𑀓𑀸𑀭𑀡𑀁 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀬𑀣𑀸 𑀪𑀲𑁆𑀢𑀸𑀬𑀸’’𑀢𑀺𑀆𑀤𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀧𑀞𑀫𑀯𑀺𑀓𑀧𑁆𑀧𑀯𑀲𑁂𑀦 𑀅𑀢𑁆𑀣𑀯𑀺𑀪𑀸𑀯𑀦𑀸. 𑀤𑀼𑀢𑀺𑀬𑀯𑀺𑀓𑀧𑁆𑀧𑀯𑀲𑁂𑀦 𑀧𑀦 𑀉𑀧𑀘𑀸𑀭𑁂𑀦 𑀯𑀺𑀦𑀸𑀬𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀦𑀼𑀧𑀲𑁆𑀲𑀦𑀸 𑀯𑀺𑀬 𑀪𑀺𑀦𑁆𑀦𑀯𑀢𑁆𑀣𑀼𑀯𑀺𑀲𑀬𑀢𑀸𑀬 𑀲𑀫𑀼𑀤𑀬𑀯𑀬𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀧𑀺 𑀏𑀓𑀓𑀸𑀮𑁂 𑀦 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀓𑀸𑀮𑁂𑀦 𑀲𑀫𑀼𑀤𑀬𑀁 𑀓𑀸𑀮𑁂𑀦 𑀯𑀬𑀁 𑀅𑀦𑀼𑀧𑀲𑁆𑀲𑀦𑁆𑀢𑁄’’𑀢𑀺.

𑀅𑀢𑁆𑀣𑀺 𑀓𑀸𑀬𑁄𑀢𑀺 𑀏𑀯-𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄𑀢𑀺 ‘‘𑀓𑀸𑀬𑁄𑀯 𑀅𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀅𑀯𑀥𑀸𑀭𑀡𑁂𑀦 𑀦𑀺𑀯𑀢𑁆𑀣𑀺𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀲𑀢𑁆𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀯𑀺𑀲𑀢𑁆𑀢𑀢𑀸𑀬 𑀧𑀭𑁂𑀲𑀜𑁆𑀘 𑀲𑀚𑁆𑀚𑀸𑀧𑀦𑀝𑁆𑀞𑁂𑀦, 𑀲𑀢𑁆𑀯𑀕𑀼𑀡𑀬𑁄𑀕𑀢𑁄 𑀯𑀸 ‘‘𑀲𑀢𑁆𑀢𑁄’’𑀢𑀺 𑀧𑀭𑁂𑀳𑀺 𑀧𑀭𑀺𑀓𑀧𑁆𑀧𑀺𑀢𑁄. 𑀢𑀲𑁆𑀲 𑀲𑀢𑁆𑀢𑀦𑀺𑀓𑀸𑀬𑀲𑁆𑀲 𑀧𑀽𑀭𑀡𑀢𑁄 𑀘 𑀘𑀯𑀦𑀼𑀧𑀧𑀚𑁆𑀚𑀦𑀥𑀫𑁆𑀫𑀢𑀸𑀬 𑀕𑀮𑀦𑀢𑁄 𑀘 ‘‘𑀧𑀼𑀕𑁆𑀕𑀮𑁄’’𑀢𑀺. 𑀣𑀻𑀬𑀢𑀺 𑀲𑀁𑀳𑀜𑁆𑀜𑀢𑀺 𑀏𑀢𑁆𑀣 𑀕𑀩𑁆𑀪𑁄𑀢𑀺 ‘‘𑀇𑀢𑁆𑀣𑀻’’𑀢𑀺. 𑀧𑀼𑀭𑀺 𑀧𑀼𑀭𑁂 𑀪𑀸𑀕𑁂 𑀲𑁂𑀢𑀺 𑀧𑀯𑀢𑁆𑀢𑀢𑀻𑀢𑀺 ‘‘𑀧𑀼𑀭𑀺𑀲𑁄’’𑀢𑀺. 𑀆𑀳𑀺𑀢𑁄 ¶ 𑀅𑀳𑀁𑀫𑀸𑀦𑁄 𑀏𑀢𑁆𑀣𑀸𑀢𑀺 ‘‘𑀅𑀢𑁆𑀢𑀸’’𑀢𑀺, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀪𑀸𑀯𑁂𑀦 ‘‘𑀅𑀢𑁆𑀢𑀦𑀺𑀬’’𑀦𑁆𑀢𑀺. 𑀧𑀭𑁄 𑀦 𑀳𑁄𑀢𑀻𑀢𑀺 𑀓𑀢𑁆𑀯𑀸 ‘‘𑀅𑀳’’𑀦𑁆𑀢𑀺, 𑀫𑀫 𑀲𑀦𑁆𑀢𑀓𑀦𑁆𑀢𑀺 𑀓𑀢𑁆𑀯𑀸 ‘‘𑀫𑀫’’𑀦𑁆𑀢𑀺. 𑀯𑀼𑀢𑁆𑀢𑀧𑁆𑀧𑀓𑀸𑀭𑀯𑀺𑀦𑀺𑀫𑀼𑀢𑁆𑀢𑁄 𑀅𑀜𑁆𑀜𑁄𑀢𑀺 𑀓𑀢𑁆𑀯𑀸 ‘‘𑀓𑁄𑀘𑀻’’𑀢𑀺, 𑀢𑀲𑁆𑀲 𑀲𑀦𑁆𑀢𑀓𑀪𑀸𑀯𑁂𑀦 ‘‘𑀓𑀲𑁆𑀲𑀘𑀻’’𑀢𑀺 𑀧𑀭𑀺𑀓𑀧𑁆𑀧𑁂𑀢𑀩𑁆𑀩𑁄 𑀓𑁄𑀘𑀺 𑀦𑀢𑁆𑀣𑀺, 𑀓𑁂𑀯𑀮𑀁 𑀓𑀸𑀬𑁄 𑀏𑀯 𑀅𑀢𑁆𑀣𑀻𑀢𑀺 𑀅𑀢𑁆𑀢𑀢𑁆𑀢𑀦𑀺𑀬𑀲𑀼𑀜𑁆𑀜𑀢𑀫𑁂𑀯 𑀓𑀸𑀬𑀲𑁆𑀲 𑀯𑀺𑀪𑀸𑀯𑁂𑀢𑀺. 𑀏𑀯𑀦𑁆𑀢𑀺 ‘‘𑀓𑀸𑀬𑁄𑀯 𑀅𑀢𑁆𑀣𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀜𑀸𑀡𑀧𑀫𑀸𑀡𑀢𑁆𑀣𑀸𑀬𑀸𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀜𑀸𑀡𑀧𑀭𑀁 𑀧𑀫𑀸𑀡𑀁 𑀧𑀸𑀧𑀦𑀢𑁆𑀣𑀸𑀬. 𑀲𑀢𑀺𑀧𑀫𑀸𑀡𑀢𑁆𑀣𑀸𑀬𑀸𑀢𑀺 𑀓𑀸𑀬𑀧𑀭𑀺𑀕𑁆𑀕𑀸𑀳𑀺𑀓𑀲𑀢𑀺𑀧𑀯𑀢𑁆𑀢𑀁 𑀲𑀢𑀺𑀧𑀭𑀁 𑀧𑀫𑀸𑀡𑀁 𑀧𑀸𑀧𑀦𑀢𑁆𑀣𑀸𑀬. 𑀇𑀫𑀲𑁆𑀲 𑀳𑀺 𑀯𑀼𑀢𑁆𑀢𑀦𑀬𑁂𑀦 ‘‘𑀅𑀢𑁆𑀣𑀺 𑀓𑀸𑀬𑁄’’𑀢𑀺 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀲𑀢𑀺 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀢𑀢𑁆𑀣 𑀜𑀸𑀡𑀲𑁆𑀲 𑀲𑀢𑀺𑀬𑀸 𑀘 𑀧𑀭𑀺𑀩𑁆𑀭𑀽𑀳𑀦𑀸𑀬 𑀳𑁄𑀢𑀺. 𑀢𑁂𑀦𑀸𑀳 ‘‘𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀦𑀁 𑀯𑀟𑁆𑀠𑀢𑁆𑀣𑀸𑀬𑀸’’𑀢𑀺.

𑀇𑀫𑀺𑀲𑁆𑀲𑀸 ¶ 𑀪𑀸𑀯𑀦𑀸𑀬 𑀢𑀡𑁆𑀳𑀸𑀤𑀺𑀝𑁆𑀞𑀺𑀕𑀸𑀳𑀸𑀦𑀁 𑀉𑀚𑀼𑀧𑀝𑀺𑀧𑀓𑁆𑀔𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀢𑀡𑁆𑀳𑀸…𑀧𑁂… 𑀯𑀺𑀳𑀭𑀢𑀻’’𑀢𑀺. 𑀢𑀣𑀸𑀪𑀽𑀢𑁄 𑀘 𑀮𑁄𑀓𑁂 𑀓𑀺𑀜𑁆𑀘𑀺 ‘‘𑀅𑀳’’𑀦𑁆𑀢𑀺 𑀯𑀸 ‘‘𑀫𑀫’’𑀦𑁆𑀢𑀺 𑀯𑀸 𑀕𑀳𑁂𑀢𑀩𑁆𑀩𑀁 𑀦 𑀧𑀲𑁆𑀲𑀢𑀺, 𑀓𑀼𑀢𑁄 𑀕𑀡𑁆𑀳𑁂𑀬𑁆𑀬. 𑀢𑁂𑀦𑀸𑀳 ‘‘𑀦 𑀘 𑀓𑀺𑀜𑁆𑀘𑀻’’𑀢𑀺𑀆𑀤𑀺. 𑀏𑀯𑀫𑁆𑀧𑀻𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀳𑁂𑀝𑁆𑀞𑀸 𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀢𑀸𑀤𑀺𑀲𑀲𑁆𑀲 𑀅𑀢𑁆𑀣𑀲𑁆𑀲 𑀅𑀪𑀸𑀯𑀢𑁄 𑀅𑀯𑀼𑀢𑁆𑀢𑀲𑀫𑀼𑀘𑁆𑀘𑀬𑀢𑁆𑀣𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀧𑀭𑀺 𑀅𑀢𑁆𑀣𑀁 𑀉𑀧𑀸𑀤𑀸𑀬𑀸’’𑀢𑀺 𑀆𑀳. ‘‘𑀏𑀯’’𑀦𑁆𑀢𑀺 𑀧𑀦 𑀦𑀺𑀤𑁆𑀤𑀺𑀝𑁆𑀞𑀸𑀓𑀸𑀭𑀲𑁆𑀲 𑀧𑀘𑁆𑀘𑀸𑀫𑀲𑀦𑀁 𑀦𑀺𑀕𑀫𑀦𑀯𑀲𑁂𑀦 𑀓𑀢𑀦𑁆𑀢𑀺 𑀆𑀳 ‘‘𑀇𑀫𑀺𑀦𑀸 𑀧𑀦…𑀧𑁂… 𑀤𑀲𑁆𑀲𑁂𑀢𑀻’’𑀢𑀺. 𑀧𑀼𑀩𑁆𑀩𑀪𑀸𑀕𑀲𑀢𑀺𑀧𑀝𑁆𑀞𑀸𑀦𑀲𑁆𑀲 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀢𑀺 𑀤𑀼𑀓𑁆𑀔𑀲𑀘𑁆𑀘’’𑀦𑁆𑀢𑀺. 𑀲𑀸 𑀧𑀦 𑀲𑀢𑀺 𑀬𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂, 𑀢𑀲𑁆𑀲 𑀲𑀫𑀼𑀝𑁆𑀞𑀸𑀧𑀺𑀓𑀸 𑀢𑀡𑁆𑀳𑀸 𑀢𑀲𑁆𑀲𑀸𑀧𑀺 𑀲𑀫𑀼𑀝𑁆𑀞𑀸𑀧𑀺𑀓𑀸 𑀏𑀯 𑀦𑀸𑀫 𑀳𑁄𑀢𑀺 𑀢𑀤𑀪𑀸𑀯𑁂 𑀅𑀪𑀸𑀯𑀢𑁄𑀢𑀺 𑀆𑀳 ‘‘𑀢𑀲𑁆𑀲𑀸 𑀲𑀫𑀼𑀝𑁆𑀞𑀸𑀧𑀺𑀓𑀸 𑀧𑀼𑀭𑀺𑀫𑀢𑀡𑁆𑀳𑀸’’𑀢𑀺. 𑀅𑀧𑁆𑀧𑀯𑀢𑁆𑀢𑀻𑀢𑀺 𑀅𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁, 𑀦 𑀧𑀯𑀢𑁆𑀢𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀅𑀧𑁆𑀧𑀯𑀢𑁆𑀢𑀺. 𑀘𑀢𑀼𑀲𑀘𑁆𑀘𑀯𑀲𑁂𑀦𑀸𑀢𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦. 𑀉𑀲𑁆𑀲𑀓𑁆𑀓𑀺𑀢𑁆𑀯𑀸𑀢𑀺 𑀯𑀺𑀲𑀼𑀤𑁆𑀥𑀺𑀧𑀭𑀫𑁆𑀧𑀭𑀸𑀬 𑀆𑀭𑀼𑀳𑀺𑀢𑁆𑀯𑀸, 𑀪𑀸𑀯𑀦𑀁 𑀉𑀧𑀭𑀺 𑀦𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦𑀺𑀬𑁆𑀬𑀸𑀦𑀫𑀼𑀔𑀦𑁆𑀢𑀺 𑀯𑀝𑁆𑀝𑀤𑀼𑀓𑁆𑀔𑀢𑁄 𑀦𑀺𑀲𑁆𑀲𑀭𑀡𑀽𑀧𑀸𑀬𑁄.

𑀆𑀦𑀸𑀧𑀸𑀦𑀧𑀩𑁆𑀩𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀭𑀺𑀬𑀸𑀧𑀣𑀧𑀩𑁆𑀩𑀯𑀡𑁆𑀡𑀦𑀸

𑁧𑁦𑁮. 𑀇𑀭𑀺𑀬𑀸𑀧𑀣𑀯𑀲𑁂𑀦𑀸𑀢𑀺 𑀇𑀭𑀺𑀬𑀦𑀁 𑀇𑀭𑀺𑀬𑀸, 𑀓𑀺𑀭𑀺𑀬𑀸, 𑀇𑀥 𑀧𑀦 𑀓𑀸𑀬𑀺𑀓𑀧𑀬𑁄𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀭𑀺𑀬𑀸𑀦𑀁 𑀧𑀣𑁄 𑀧𑀯𑀢𑁆𑀢𑀺𑀫𑀕𑁆𑀕𑁄𑀢𑀺 𑀇𑀭𑀺𑀬𑀸𑀧𑀣𑁄, 𑀕𑀫𑀦𑀸𑀤𑀺𑀲𑀭𑀻𑀭𑀸𑀯𑀢𑁆𑀣𑀸. 𑀕𑀘𑁆𑀙𑀦𑁆𑀢𑁄 𑀯𑀸 𑀳𑀺 𑀲𑀢𑁆𑀢𑁄 𑀓𑀸𑀬𑁂𑀦 𑀓𑀢𑁆𑀢𑀩𑁆𑀩𑀓𑀺𑀭𑀺𑀬𑀁 𑀓𑀭𑁂𑀬𑁆𑀬 𑀞𑀺𑀢𑁄 𑀯𑀸 𑀦𑀺𑀲𑀺𑀦𑁆𑀦𑁄 𑀯𑀸 𑀦𑀺𑀧𑀦𑁆𑀦𑁄 𑀯𑀸𑀢𑀺. 𑀢𑁂𑀲𑀁 𑀯𑀲𑁂𑀦, 𑀇𑀭𑀺𑀬𑀸𑀧𑀣𑀯𑀺𑀪𑀸𑀕𑁂𑀦𑀸𑀢𑀺 ¶ 𑀅𑀢𑁆𑀣𑁄. 𑀧𑀼𑀦 𑀘𑀧𑀭𑀦𑁆𑀢𑀺 𑀧𑀼𑀦 𑀘 𑀅𑀧𑀭𑀁, 𑀬𑀣𑀸𑀯𑀼𑀢𑁆𑀢𑀆𑀦𑀸𑀧𑀸𑀦𑀓𑀫𑁆𑀫𑀝𑁆𑀞𑀸𑀦𑀢𑁄 𑀪𑀺𑀬𑁆𑀬𑁄𑀧𑀺 𑀅𑀜𑁆𑀜𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀫𑀺, 𑀲𑀼𑀡𑀸𑀣𑀸𑀢𑀺 𑀯𑀸 𑀅𑀥𑀺𑀧𑁆𑀧𑀸𑀬𑁄. 𑀕𑀘𑁆𑀙𑀦𑁆𑀢𑁄 𑀯𑀸𑀢𑀺𑀆𑀤𑀺 𑀕𑀫𑀦𑀸𑀤𑀺𑀫𑀢𑁆𑀢𑀚𑀸𑀦𑀦𑀲𑁆𑀲 𑀕𑀫𑀦𑀸𑀤𑀺𑀕𑀢𑀯𑀺𑀲𑁂𑀲𑀚𑀸𑀦𑀦𑀲𑁆𑀲 𑀘 𑀲𑀸𑀥𑀸𑀭𑀡𑀯𑀘𑀦𑀁. 𑀢𑀢𑁆𑀣 𑀕𑀫𑀦𑀸𑀤𑀺𑀫𑀢𑁆𑀢𑀚𑀸𑀦𑀦𑀁 𑀇𑀥 𑀦𑀸𑀥𑀺𑀧𑁆𑀧𑁂𑀢𑀁, 𑀕𑀫𑀦𑀸𑀤𑀺𑀕𑀢𑀯𑀺𑀲𑁂𑀲𑀚𑀸𑀦𑀦𑀁 𑀧𑀦 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀓𑀸𑀫’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀢𑁆𑀢𑀽𑀧𑀮𑀤𑁆𑀥𑀺𑀦𑁆𑀢𑀺 𑀲𑀢𑁆𑀢𑁄 𑀅𑀢𑁆𑀣𑀻𑀢𑀺 𑀉𑀧𑀮𑀤𑁆𑀥𑀺𑀁 𑀲𑀢𑁆𑀢𑀕𑁆𑀕𑀸𑀳𑀁 𑀦 𑀚𑀳𑀢𑀺 𑀦 𑀧𑀭𑀺𑀘𑁆𑀘𑀚𑀢𑀺 ‘‘𑀅𑀳𑀁 𑀕𑀘𑁆𑀙𑀸𑀫𑀺, 𑀫𑀫 𑀕𑀫𑀦’’𑀦𑁆𑀢𑀺 𑀕𑀸𑀳𑀲𑀩𑁆𑀪𑀸𑀯𑀢𑁄. 𑀢𑀢𑁄 𑀏𑀯 𑀅𑀢𑁆𑀢𑀲𑀜𑁆𑀜𑀁 ‘‘𑀅𑀢𑁆𑀣𑀺 𑀅𑀢𑁆𑀢𑀸 𑀓𑀸𑀭𑀓𑁄 𑀯𑁂𑀤𑀓𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀯𑀺𑀧𑀭𑀻𑀢𑀲𑀜𑁆𑀜𑀁 𑀦 𑀉𑀕𑁆𑀖𑀸𑀝𑁂𑀢𑀺 ¶ 𑀦𑀸𑀧𑀦𑁂𑀢𑀺 𑀅𑀧𑀝𑀺𑀧𑀓𑁆𑀔𑀪𑀸𑀯𑀢𑁄, 𑀅𑀦𑀦𑀩𑁆𑀭𑀽𑀳𑀦𑀢𑁄 𑀯𑀸. 𑀏𑀯𑀁 𑀪𑀽𑀢𑀲𑁆𑀲 𑀘𑀲𑁆𑀲 𑀓𑀼𑀢𑁄 𑀓𑀫𑁆𑀫𑀝𑁆𑀞𑀸𑀦𑀸𑀤𑀺𑀪𑀸𑀯𑁄𑀢𑀺 𑀆𑀳 ‘‘𑀓𑀫𑁆𑀫𑀝𑁆𑀞𑀸𑀦𑀁 𑀯𑀸 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸 𑀯𑀸 𑀦 𑀳𑁄𑀢𑀻’’𑀢𑀺. 𑀇𑀫𑀲𑁆𑀲 𑀧𑀦𑀸𑀢𑀺𑀆𑀤𑀺𑀲𑀼𑀓𑁆𑀓𑀧𑀓𑁆𑀔𑀲𑁆𑀲 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀫𑁂𑀯 𑀳𑀺 𑀅𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀇𑀤𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑁄 𑀕𑀘𑁆𑀙𑀢𑀻𑀢𑀺 𑀕𑀫𑀦𑀓𑀺𑀭𑀺𑀬𑀸𑀬 𑀓𑀢𑁆𑀢𑀼𑀧𑀼𑀘𑁆𑀙𑀸, 𑀲𑀸 𑀓𑀢𑁆𑀢𑀼𑀪𑀸𑀯𑀯𑀺𑀲𑀺𑀝𑁆𑀞𑀅𑀢𑁆𑀢𑀧𑀝𑀺𑀓𑁆𑀔𑁂𑀧𑀢𑁆𑀣𑀸 𑀥𑀫𑁆𑀫𑀫𑀢𑁆𑀢𑀲𑁆𑀲𑁂𑀯 𑀕𑀫𑀦𑀲𑀺𑀤𑁆𑀥𑀺𑀤𑀲𑁆𑀲𑀦𑀢𑁄. 𑀓𑀲𑁆𑀲 𑀕𑀫𑀦𑀦𑁆𑀢𑀺 𑀅𑀓𑀢𑁆𑀢𑀼𑀢𑀸𑀯𑀺𑀲𑀺𑀝𑁆𑀞𑀅𑀢𑁆𑀢𑀕𑁆𑀕𑀸𑀳𑀧𑀝𑀺𑀓𑁆𑀔𑁂𑀧𑀢𑁆𑀣𑀸. 𑀓𑀺𑀁𑀓𑀸𑀭𑀡𑀸𑀢𑀺 𑀧𑀦 𑀧𑀝𑀺𑀓𑁆𑀔𑀺𑀢𑁆𑀢𑀓𑀢𑁆𑀢𑀼𑀓𑀸𑀬 𑀕𑀫𑀦𑀓𑀺𑀭𑀺𑀬𑀸𑀬 𑀅𑀯𑀺𑀧𑀭𑀻𑀢𑀓𑀸𑀭𑀡𑀧𑀼𑀘𑁆𑀙𑀸 ‘‘𑀕𑀫𑀦𑀦𑁆𑀢𑀺 𑀅𑀢𑁆𑀢𑀸 𑀫𑀦𑀲𑀸 𑀲𑀁𑀬𑀼𑀚𑁆𑀚𑀢𑀺, 𑀫𑀦𑁄 𑀇𑀦𑁆𑀤𑁆𑀭𑀺𑀬𑁂𑀳𑀺, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀢𑁆𑀢𑁂𑀳𑀻’’𑀢𑀺 𑀏𑀯𑀫𑀸𑀤𑀺𑀕𑀫𑀦𑀓𑀸𑀭𑀡𑀧𑀝𑀺𑀓𑁆𑀔𑁂𑀧𑀦𑀢𑁄. 𑀢𑁂𑀦𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺.

𑀦 𑀓𑁄𑀘𑀺 𑀲𑀢𑁆𑀢𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸 𑀕𑀘𑁆𑀙𑀢𑀺 𑀥𑀫𑁆𑀫𑀫𑀢𑁆𑀢𑀲𑁆𑀲𑁂𑀯 𑀕𑀫𑀦𑀲𑀺𑀤𑁆𑀥𑀺𑀢𑁄 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀘 𑀓𑀲𑁆𑀲𑀘𑀺 𑀅𑀪𑀸𑀯𑀢𑁄. 𑀇𑀤𑀸𑀦𑀺 𑀥𑀫𑁆𑀫𑀫𑀢𑁆𑀢𑀲𑁆𑀲𑁂𑀯 𑀕𑀫𑀦𑀲𑀺𑀤𑁆𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘𑀺𑀢𑁆𑀢𑀓𑀺𑀭𑀺𑀬𑀸 𑀘 𑀲𑀸 𑀯𑀸𑀬𑁄𑀥𑀸𑀢𑀼𑀬𑀸 𑀯𑀺𑀧𑁆𑀨𑀸𑀭𑁄 𑀯𑀺𑀧𑁆𑀨𑀦𑁆𑀤𑀦𑀜𑁆𑀘𑀸𑀢𑀺 𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁄, 𑀢𑁂𑀦. 𑀏𑀢𑁆𑀣 𑀘 𑀘𑀺𑀢𑁆𑀢𑀓𑀺𑀭𑀺𑀬𑀕𑁆𑀕𑀳𑀡𑁂𑀦 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑀁 𑀦𑀺𑀯𑀢𑁆𑀢𑁂𑀢𑀺, 𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑀕𑁆𑀕𑀳𑀡𑁂𑀦 𑀘𑁂𑀢𑀦𑀸𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀪𑁂𑀤𑀁 𑀘𑀺𑀢𑁆𑀢𑀓𑀺𑀭𑀺𑀬𑀁 𑀦𑀺𑀯𑀢𑁆𑀢𑁂𑀢𑀺, 𑀉𑀪𑀬𑁂𑀦 𑀧𑀦 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀁 𑀯𑀺𑀪𑀸𑀯𑁂𑀢𑀺. ‘‘𑀕𑀘𑁆𑀙𑀢𑀻’’𑀢𑀺 𑀯𑀢𑁆𑀯𑀸 𑀬𑀣𑀸 𑀧𑀯𑀢𑁆𑀢𑀫𑀸𑀦𑁂 𑀓𑀸𑀬𑁂 ‘‘𑀕𑀘𑁆𑀙𑀢𑀻’’𑀢𑀺 𑀯𑁄𑀳𑀸𑀭𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀦𑁆𑀢𑀺 𑀕𑀦𑁆𑀢𑀼𑀓𑀸𑀫𑀢𑀸𑀯𑀲𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑀁. 𑀯𑀸𑀬𑀁 𑀚𑀦𑁂𑀢𑀻𑀢𑀺 𑀯𑀸𑀬𑁄𑀥𑀸𑀢𑀼𑀅𑀥𑀺𑀓𑀁 𑀭𑀽𑀧𑀓𑀮𑀸𑀧𑀁 𑀚𑀦𑁂𑀢𑀺, 𑀅𑀥𑀺𑀓𑀢𑀸 𑀘𑁂𑀢𑁆𑀣 𑀲𑀸𑀫𑀢𑁆𑀣𑀺𑀬𑀢𑁄, 𑀦 𑀧𑀫𑀸𑀡𑀢𑁄. 𑀕𑀫𑀦𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀁 𑀲𑀳𑀚𑀸𑀢𑀭𑀽𑀧𑀓𑀸𑀬𑀲𑁆𑀲 𑀣𑀫𑁆𑀪𑀦𑀲𑀦𑁆𑀥𑀸𑀭𑀡𑀘𑀮𑀦𑀸𑀦𑀁 𑀧𑀘𑁆𑀘𑀬𑀪𑀽𑀢𑁂𑀦 𑀆𑀓𑀸𑀭𑀯𑀺𑀲𑁂𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀯𑀸𑀬𑁄𑀥𑀸𑀢𑀼𑀁 𑀲𑀦𑁆𑀥𑀸𑀬𑀸𑀳 ‘‘𑀯𑀸𑀬𑁄 𑀯𑀺𑀜𑁆𑀜𑀢𑁆𑀢𑀺𑀁 𑀚𑀦𑁂𑀢𑀻’’𑀢𑀺. 𑀅𑀥𑀺𑀧𑁆𑀧𑀸𑀬𑀲𑀳𑀪𑀸𑀯𑀻 𑀳𑀺 𑀯𑀺𑀓𑀸𑀭𑁄 𑀯𑀺𑀜𑁆𑀜𑀢𑁆𑀢𑀺, 𑀬𑀣𑀸𑀯𑀼𑀢𑁆𑀢𑀅𑀥𑀺𑀓𑀪𑀸𑀯𑁂𑀦𑁂𑀯 𑀘 𑀯𑀸𑀬𑁄𑀕𑀳𑀡𑀁, 𑀦 𑀯𑀸𑀬𑁄𑀥𑀸𑀢𑀼𑀬𑀸 𑀏𑀯 𑀚𑀦𑀓𑀪𑀸𑀯𑀢𑁄, 𑀅𑀜𑁆𑀜𑀣𑀸 𑀯𑀺𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀬𑀭𑀽𑀧𑀪𑀸𑀯𑁄 𑀤𑀼𑀭𑀼𑀧𑀧𑀸𑀤𑁄 𑀲𑀺𑀬𑀸. 𑀧𑀼𑀭𑀢𑁄 𑀅𑀪𑀺𑀦𑀻𑀳𑀸𑀭𑁄 𑀧𑀼𑀭𑀢𑁄𑀪𑀸𑀕𑁂𑀦 𑀓𑀸𑀬𑀲𑁆𑀲 𑀧𑀯𑀢𑁆𑀢𑀦𑀁, 𑀬𑁄 ‘‘𑀅𑀪𑀺𑀓𑁆𑀓𑀫𑁄’’𑀢𑀺 𑀯𑀼𑀘𑁆𑀘𑀢𑀺.

‘‘𑀏𑀲𑁂𑀯 ¶ 𑀦𑀬𑁄’’𑀢𑀺 𑀅𑀢𑀺𑀤𑁂𑀲𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀯𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀢𑀢𑁆𑀭𑀸𑀧𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑁄𑀝𑀺𑀢𑁄 𑀧𑀝𑁆𑀞𑀸𑀬𑀸𑀢𑀺 𑀳𑁂𑀝𑁆𑀞𑀺𑀫𑀓𑁄𑀝𑀺𑀢𑁄 𑀧𑀝𑁆𑀞𑀸𑀬. 𑀉𑀲𑁆𑀲𑀺𑀢𑀪𑀸𑀯𑁄𑀢𑀺 𑀉𑀩𑁆𑀩𑀺𑀤𑁆𑀥𑀪𑀸𑀯𑁄.

𑀏𑀯𑀁 ¶ 𑀧𑀚𑀸𑀦𑀢𑁄𑀢𑀺 𑀏𑀯𑀁 𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦𑁂𑀯 𑀕𑀫𑀦𑀸𑀤𑀺𑀪𑀸𑀯𑁄 𑀳𑁄𑀢𑀻𑀢𑀺 𑀧𑀚𑀸𑀦𑀢𑁄 𑀢𑀲𑁆𑀲 𑀏𑀯𑀁 𑀧𑀚𑀸𑀦𑀦𑀸𑀬 𑀦𑀺𑀘𑁆𑀙𑀬𑀕𑀫𑀦𑀢𑁆𑀣𑀁 ‘‘𑀏𑀯𑀁 𑀳𑁄𑀢𑀻’’𑀢𑀺 𑀯𑀺𑀘𑀸𑀭𑀡𑀸 𑀯𑀼𑀘𑁆𑀘𑀢𑀺 𑀮𑁄𑀓𑁂 𑀬𑀣𑀸𑀪𑀽𑀢𑀁 𑀅𑀚𑀸𑀦𑀦𑁆𑀢𑁂𑀳𑀺 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀯𑀲𑁂𑀦, 𑀮𑁄𑀓𑀯𑁄𑀳𑀸𑀭𑀯𑀲𑁂𑀦 𑀯𑀸. 𑀅𑀢𑁆𑀣𑀺 𑀧𑀦𑀸𑀢𑀺 𑀅𑀢𑁆𑀢𑀦𑁄 𑀏𑀯 𑀯𑀻𑀫𑀁𑀲𑀦𑀯𑀲𑁂𑀦 𑀧𑀼𑀘𑁆𑀙𑀸𑀯𑀘𑀦𑀁. 𑀦𑀢𑁆𑀣𑀻𑀢𑀺 𑀦𑀺𑀘𑁆𑀙𑀬𑀯𑀲𑁂𑀦 𑀲𑀢𑁆𑀢𑀲𑁆𑀲 𑀧𑀝𑀺𑀓𑁆𑀔𑁂𑀧𑀯𑀘𑀦𑀁. 𑀬𑀣𑀸 𑀧𑀦𑀸𑀢𑀺𑀆𑀤𑀺 𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀉𑀧𑀫𑀸𑀬 𑀯𑀺𑀪𑀸𑀯𑀦𑀁.

𑀦𑀸𑀯𑀸 𑀫𑀸𑀮𑀼𑀢𑀯𑁂𑀕𑁂𑀦𑀸𑀢𑀺 𑀬𑀣𑀸 𑀅𑀘𑁂𑀢𑀦𑀸 𑀦𑀸𑀯𑀸 𑀯𑀸𑀢𑀯𑁂𑀕𑁂𑀦 𑀤𑁂𑀲𑀦𑁆𑀢𑀭𑀁 𑀬𑀸𑀢𑀺, 𑀬𑀣𑀸 𑀘 𑀅𑀘𑁂𑀢𑀦𑁄 𑀢𑁂𑀚𑀦𑀁 𑀓𑀡𑁆𑀟𑁄 𑀚𑀺𑀬𑀸𑀯𑁂𑀕𑁂𑀦 𑀤𑁂𑀲𑀦𑁆𑀢𑀭𑀁 𑀬𑀸𑀢𑀺, 𑀢𑀣𑀸 𑀅𑀘𑁂𑀢𑀦𑁄 𑀓𑀸𑀬𑁄 𑀯𑀸𑀢𑀸𑀳𑀢𑁄 𑀬𑀣𑀸𑀯𑀼𑀢𑁆𑀢𑀯𑀸𑀬𑀼𑀦𑀸 𑀦𑀻𑀢𑁄 𑀤𑁂𑀲𑀦𑁆𑀢𑀭𑀁 𑀬𑀸𑀢𑀻𑀢𑀺 𑀏𑀯𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀘𑁂 𑀧𑀦 𑀓𑁄𑀘𑀺 𑀯𑀤𑁂𑀬𑁆𑀬 ‘‘𑀬𑀣𑀸 𑀦𑀸𑀯𑀸𑀬 𑀢𑁂𑀚𑀦𑀲𑁆𑀲 𑀘 𑀧𑁂𑀮𑁆𑀮𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀯𑀲𑁂𑀦 𑀤𑁂𑀲𑀦𑁆𑀢𑀭𑀕𑀫𑀦𑀁, 𑀏𑀯𑀁 𑀓𑀸𑀬𑀲𑁆𑀲𑀸𑀧𑀻’’𑀢𑀺, 𑀳𑁄𑀢𑀼, 𑀏𑀯𑀁 𑀇𑀘𑁆𑀙𑀺𑀢𑁄𑀯𑀸𑀬𑀫𑀢𑁆𑀣𑁄. 𑀬𑀣𑀸 𑀳𑀺 𑀦𑀸𑀯𑀸 𑀢𑁂𑀚𑀦𑀸𑀦𑀁 𑀲𑀁𑀳𑀢𑀮𑀓𑁆𑀔𑀡𑀲𑁆𑀲𑁂𑀯 𑀧𑀼𑀭𑀺𑀲𑀲𑁆𑀲 𑀯𑀲𑁂𑀦 𑀕𑀫𑀦𑀁, 𑀦 𑀅𑀲𑀁𑀳𑀢𑀮𑀓𑁆𑀔𑀡𑀲𑁆𑀲, 𑀏𑀯𑀁 𑀓𑀸𑀬𑀲𑁆𑀲𑀸𑀧𑀻𑀢𑀺 𑀓𑀸 𑀦𑁄 𑀳𑀸𑀦𑀺, 𑀪𑀺𑀬𑁆𑀬𑁄𑀧𑀺 𑀥𑀫𑁆𑀫𑀫𑀢𑁆𑀢𑀢𑀸𑀯 𑀧𑀢𑀺𑀝𑁆𑀞𑀁 𑀮𑀪𑀢𑀺, 𑀦 𑀧𑀼𑀭𑀺𑀲𑀯𑀸𑀤𑁄. 𑀢𑁂𑀦𑀸𑀳 ‘‘𑀬𑀦𑁆𑀢𑀁 𑀲𑀼𑀢𑁆𑀢𑀯𑀲𑁂𑀦𑀸’’𑀢𑀺𑀆𑀤𑀺.

𑀢𑀢𑁆𑀣 𑀧𑀬𑀼𑀢𑁆𑀢𑀦𑁆𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀕𑀫𑀦𑀸𑀤𑀺𑀓𑀺𑀭𑀺𑀬𑀸𑀯𑀲𑁂𑀦 𑀧𑀬𑁄𑀚𑀺𑀢𑀁. 𑀞𑀸𑀢𑀻𑀢𑀺 𑀢𑀺𑀝𑁆𑀞𑀢𑀺. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂. 𑀯𑀺𑀦𑀸 𑀳𑁂𑀢𑀼𑀧𑀘𑁆𑀘𑀬𑁂𑀢𑀺 𑀕𑀦𑁆𑀢𑀼𑀓𑀸𑀫𑀢𑀸𑀘𑀺𑀢𑁆𑀢-𑀢𑀁𑀲𑀫𑀼𑀝𑁆𑀞𑀸𑀦-𑀯𑀸𑀬𑁄𑀥𑀸𑀢𑀼-𑀆𑀤𑀺𑀳𑁂𑀢𑀼𑀧𑀘𑁆𑀘𑀬𑁂𑀳𑀺 𑀯𑀺𑀦𑀸. 𑀢𑀺𑀝𑁆𑀞𑁂𑀢𑀺 𑀢𑀺𑀝𑁆𑀞𑁂𑀬𑁆𑀬. 𑀯𑀚𑁂𑀢𑀺 𑀯𑀚𑁂𑀬𑁆𑀬 𑀕𑀘𑁆𑀙𑁂𑀬𑁆𑀬 𑀓𑁄 𑀦𑀸𑀫𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀝𑀺𑀓𑁆𑀔𑁂𑀧𑀢𑁆𑀣𑁄 𑀘𑁂𑀢𑁆𑀣 𑀓𑀺𑀁-𑀲𑀤𑁆𑀤𑁄𑀢𑀺 𑀳𑁂𑀢𑀼𑀧𑀘𑁆𑀘𑀬𑀯𑀺𑀭𑀳𑁂𑀦 𑀞𑀸𑀦𑀕𑀫𑀦𑀧𑀝𑀺𑀓𑁆𑀔𑁂𑀧𑀫𑀼𑀔𑁂𑀦 𑀲𑀩𑁆𑀩𑀸𑀬𑀧𑀺 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑀸𑀥𑀻𑀦𑀯𑀼𑀢𑁆𑀢𑀺𑀢𑀸𑀯𑀺𑀪𑀸𑀯𑀦𑁂𑀦 𑀅𑀢𑁆𑀢𑀲𑀼𑀜𑁆𑀜𑀢𑀸 𑀯𑀺𑀬 𑀅𑀦𑀺𑀘𑁆𑀘𑀤𑀼𑀓𑁆𑀔𑀢𑀸𑀧𑀺 𑀯𑀺𑀪𑀸𑀯𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀧𑀡𑀺𑀳𑀺𑀢𑁄𑀢𑀺 𑀬𑀣𑀸 𑀬𑀣𑀸 𑀧𑀘𑁆𑀘𑀬𑁂𑀳𑀺 𑀧𑀓𑀸𑀭𑀢𑁄 𑀦𑀺𑀳𑀺𑀢𑁄 𑀞𑀧𑀺𑀢𑁄. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀘𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀘𑀢𑀼𑀦𑁆𑀦𑀫𑁆𑀧𑀺 𑀇𑀭𑀺𑀬𑀸𑀧𑀣𑀸𑀦𑀁 𑀲𑀗𑁆𑀕𑀡𑁆𑀳𑀦𑀯𑀘𑀦𑀁, 𑀧𑀼𑀩𑁆𑀩𑁂 𑀯𑀺𑀲𑀼𑀁 𑀯𑀺𑀲𑀼𑀁 𑀇𑀭𑀺𑀬𑀸𑀧𑀣𑀸𑀦𑀁 𑀯𑀼𑀢𑁆𑀢𑀢𑁆𑀢𑀸 𑀇𑀤𑀁 𑀢𑁂𑀲𑀁 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀦𑀬𑁄 𑀯𑀸 𑀇𑀭𑀺𑀬𑀸𑀧𑀣𑀧𑁆𑀧𑀥𑀸𑀦𑁄 𑀯𑀼𑀢𑁆𑀢𑁄𑀢𑀺 𑀢𑀢𑁆𑀣 𑀓𑀸𑀬𑁄 𑀅𑀧𑁆𑀧𑀥𑀸𑀦𑁄 𑀅𑀦𑀼𑀦𑀺𑀧𑁆𑀨𑀸𑀤𑀻𑀢𑀺 𑀇𑀥 𑀓𑀸𑀬𑀁 𑀧𑀥𑀸𑀦𑀁 𑀅𑀧𑁆𑀧𑀥𑀸𑀦𑀜𑁆𑀘 𑀇𑀭𑀺𑀬𑀸𑀧𑀣𑀁 𑀅𑀦𑀼𑀦𑀺𑀧𑁆𑀨𑀸𑀤𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀤𑀼𑀢𑀺𑀬𑀦𑀬𑁄 𑀯𑀼𑀢𑁆𑀢𑁄𑀢𑀺 𑀏𑀯𑀫𑁆𑀧𑁂𑀢𑁆𑀣 𑀤𑁆𑀯𑀺𑀦𑁆𑀦𑀁 𑀦𑀬𑀸𑀦𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀞𑀺𑀢𑁄𑀢𑀺 𑀧𑀯𑀢𑁆𑀢𑁄.