📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀫𑀚𑁆𑀛𑀺𑀫𑀦𑀺𑀓𑀸𑀬𑁂

𑀫𑀚𑁆𑀛𑀺𑀫𑀧𑀡𑁆𑀡𑀸𑀲-𑀅𑀝𑁆𑀞𑀓𑀣𑀸

𑁧. 𑀕𑀳𑀧𑀢𑀺𑀯𑀕𑁆𑀕𑁄

𑁧. 𑀓𑀦𑁆𑀤𑀭𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀏𑀯𑀁 ¶ ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀓𑀦𑁆𑀤𑀭𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀘𑀫𑁆𑀧𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀢𑀲𑁆𑀲 𑀳𑀺 𑀦𑀕𑀭𑀲𑁆𑀲 𑀆𑀭𑀸𑀫𑀧𑁄𑀓𑁆𑀔𑀭𑀡𑀻𑀆𑀤𑀻𑀲𑀼 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀘𑀫𑁆𑀧𑀓𑀭𑀼𑀓𑁆𑀔𑀸𑀯 𑀉𑀲𑁆𑀲𑀦𑁆𑀦𑀸 𑀅𑀳𑁂𑀲𑀼𑀁, 𑀢𑀲𑁆𑀫𑀸 𑀘𑀫𑁆𑀧𑀸𑀢𑀺 𑀲𑀗𑁆𑀔𑀫𑀕𑀫𑀸𑀲𑀺. 𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂𑀢𑀺 𑀢𑀲𑁆𑀲 𑀘𑀫𑁆𑀧𑀸𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀕𑀕𑁆𑀕𑀭𑀸𑀬 𑀦𑀸𑀫 𑀭𑀸𑀚𑀫𑀳𑁂𑀲𑀺𑀬𑀸 𑀔𑀡𑀺𑀢𑀢𑁆𑀢𑀸 𑀕𑀕𑁆𑀕𑀭𑀸𑀢𑀺 𑀮𑀤𑁆𑀥𑀯𑁄𑀳𑀸𑀭𑀸 𑀧𑁄𑀓𑁆𑀔𑀭𑀡𑀻 𑀅𑀢𑁆𑀣𑀺. 𑀢𑀲𑁆𑀲𑀸 𑀢𑀻𑀭𑁂 𑀲𑀫𑀦𑁆𑀢𑀢𑁄 𑀦𑀻𑀮𑀸𑀤𑀺𑀧𑀜𑁆𑀘𑀯𑀡𑁆𑀡𑀓𑀼𑀲𑀼𑀫𑀧𑀝𑀺𑀫𑀡𑁆𑀟𑀺𑀢𑀁 𑀫𑀳𑀦𑁆𑀢𑀁 𑀘𑀫𑁆𑀧𑀓𑀯𑀦𑀁. 𑀢𑀲𑁆𑀫𑀺𑀁 𑀪𑀕𑀯𑀸 𑀓𑀼𑀲𑀼𑀫𑀕𑀦𑁆𑀥𑀲𑀼𑀕𑀦𑁆𑀥𑁂 𑀘𑀫𑁆𑀧𑀓𑀯𑀦𑁂 𑀯𑀺𑀳𑀭𑀢𑀺. 𑀢𑀁 𑀲𑀦𑁆𑀥𑀸𑀬 ‘‘𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂’’𑀢𑀺 𑀯𑀼𑀢𑁆𑀢𑀁. 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀦𑁆𑀢𑀺 𑀅𑀤𑀲𑁆𑀲𑀺𑀢𑀧𑀭𑀺𑀘𑁆𑀙𑁂𑀤𑁂𑀦 𑀫𑀳𑀦𑁆𑀢𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁. 𑀧𑁂𑀲𑁆𑀲𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀳𑀢𑁆𑀣𑀸𑀭𑁄𑀳𑀧𑀼𑀢𑁆𑀢𑁄𑀢𑀺 𑀳𑀢𑁆𑀣𑀸𑀘𑀭𑀺𑀬𑀲𑁆𑀲 𑀧𑀼𑀢𑁆𑀢𑁄. 𑀓𑀦𑁆𑀤𑀭𑀓𑁄 ¶ 𑀘 𑀧𑀭𑀺𑀩𑁆𑀩𑀸𑀚𑀓𑁄𑀢𑀺 𑀓𑀦𑁆𑀤𑀭𑀓𑁄𑀢𑀺 𑀏𑀯𑀁𑀦𑀸𑀫𑁄 ¶ 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑁄. 𑀅𑀪𑀺𑀯𑀸𑀤𑁂𑀢𑁆𑀯𑀸𑀢𑀺 𑀙𑀩𑁆𑀩𑀡𑁆𑀡𑀸𑀦𑀁 𑀖𑀦𑀩𑀼𑀤𑁆𑀥𑀭𑀲𑁆𑀫𑀻𑀦𑀁 𑀅𑀦𑁆𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀲𑀦𑁆𑀦𑀮𑀸𑀔𑀸𑀭𑀲𑁂 𑀦𑀺𑀫𑀼𑀚𑁆𑀚𑀫𑀸𑀦𑁄 𑀯𑀺𑀬, 𑀲𑀺𑀗𑁆𑀕𑀻𑀲𑀼𑀯𑀡𑁆𑀡𑀯𑀡𑁆𑀡𑀁 𑀤𑀼𑀲𑁆𑀲𑀯𑀭𑀁 𑀧𑀲𑀸𑀭𑁂𑀢𑁆𑀯𑀸 𑀲𑀲𑀻𑀲𑀁 𑀧𑀸𑀭𑀼𑀧𑀫𑀸𑀦𑁄 𑀯𑀺𑀬, 𑀯𑀡𑁆𑀡𑀕𑀦𑁆𑀥𑀲𑀫𑁆𑀧𑀦𑁆𑀦𑀘𑀫𑁆𑀧𑀓𑀧𑀼𑀧𑁆𑀨𑀸𑀦𑀺 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀯𑀺𑀬, 𑀲𑀺𑀦𑁂𑀭𑀼𑀧𑀸𑀤𑀁 𑀉𑀧𑀕𑀘𑁆𑀙𑀦𑁆𑀢𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀪𑀕𑀯𑀢𑁄 𑀘𑀓𑁆𑀓𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑁂 𑀅𑀮𑀢𑁆𑀢𑀓𑀯𑀡𑁆𑀡𑀨𑀼𑀮𑁆𑀮𑀧𑀤𑀼𑀫𑀲𑀲𑁆𑀲𑀺𑀭𑀺𑀓𑁂 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀻𑀢𑀺 𑀙𑀦𑀺𑀲𑀚𑁆𑀚𑀤𑁄𑀲𑀯𑀺𑀭𑀳𑀺𑀢𑁂 𑀏𑀓𑀲𑁆𑀫𑀺𑀁 𑀑𑀓𑀸𑀲𑁂 𑀦𑀺𑀲𑀻𑀤𑀺.

𑀢𑀼𑀡𑁆𑀳𑀻𑀪𑀽 ¶ 𑀢𑀁 𑀢𑀼𑀡𑁆𑀳𑀻𑀪𑀽𑀢𑀦𑁆𑀢𑀺 𑀬𑀢𑁄 𑀬𑀢𑁄 𑀅𑀦𑀼𑀯𑀺𑀮𑁄𑀓𑁂𑀢𑀺, 𑀢𑀢𑁄 𑀢𑀢𑁄 𑀢𑀼𑀡𑁆𑀳𑀻𑀪𑀽𑀢𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀳𑀺 𑀏𑀓𑀪𑀺𑀓𑁆𑀔𑀼𑀲𑁆𑀲𑀸𑀧𑀺 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀁 𑀯𑀸 𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀁 𑀯𑀸 𑀦𑀢𑁆𑀣𑀺, 𑀲𑀩𑁆𑀩𑁂 𑀪𑀕𑀯𑀢𑁄 𑀘𑁂𑀯 𑀕𑀸𑀭𑀯𑁂𑀦 𑀅𑀢𑁆𑀢𑀦𑁄 𑀘 𑀲𑀺𑀓𑁆𑀔𑀺𑀢𑀲𑀺𑀓𑁆𑀔𑀢𑀸𑀬 𑀅𑀜𑁆𑀜𑀫𑀜𑁆𑀜𑀁 𑀯𑀺𑀕𑀢𑀲𑀮𑁆𑀮𑀸𑀧𑀸 𑀅𑀦𑁆𑀢𑀫𑀲𑁄 𑀉𑀓𑁆𑀓𑀸𑀲𑀺𑀢𑀲𑀤𑁆𑀤𑀫𑁆𑀧𑀺 𑀅𑀓𑀭𑁄𑀦𑁆𑀢𑀸 𑀲𑀼𑀦𑀺𑀔𑀸𑀢𑀇𑀦𑁆𑀤𑀔𑀻𑀮𑀸 𑀯𑀺𑀬 𑀦𑀺𑀯𑀸𑀢𑀝𑁆𑀞𑀸𑀦𑁂 𑀲𑀦𑁆𑀦𑀺𑀲𑀺𑀦𑁆𑀦𑀁 𑀫𑀳𑀸𑀲𑀫𑀼𑀤𑁆𑀤𑀉𑀤𑀓𑀁 𑀯𑀺𑀬 𑀓𑀸𑀬𑁂𑀦𑀧𑀺 𑀦𑀺𑀘𑁆𑀘𑀮𑀸 𑀫𑀦𑀲𑀸𑀧𑀺 𑀅𑀯𑀺𑀓𑁆𑀔𑀺𑀢𑁆𑀢𑀸 𑀭𑀢𑁆𑀢𑀯𑀮𑀸𑀳𑀓𑀸 𑀯𑀺𑀬 𑀲𑀺𑀦𑁂𑀭𑀼𑀓𑀽𑀝𑀁 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀏𑀯𑀁 𑀲𑀦𑁆𑀦𑀺𑀲𑀺𑀦𑁆𑀦𑀁 𑀧𑀭𑀺𑀲𑀁 𑀤𑀺𑀲𑁆𑀯𑀸 𑀫𑀳𑀦𑁆𑀢𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀺. 𑀉𑀧𑁆𑀧𑀦𑁆𑀦𑀁 𑀧𑀦 𑀅𑀦𑁆𑀢𑁄𑀳𑀤𑀬𑀲𑁆𑀫𑀺𑀁𑀬𑁂𑀯 𑀲𑀦𑁆𑀦𑀺𑀤𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀺𑀬𑀲𑀫𑀼𑀤𑀸𑀳𑀸𑀭𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀢𑀲𑁆𑀫𑀸 𑀅𑀘𑁆𑀙𑀭𑀺𑀬𑀁 𑀪𑁄𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀅𑀦𑁆𑀥𑀲𑁆𑀲 𑀧𑀩𑁆𑀩𑀢𑀸𑀭𑁄𑀳𑀦𑀁 𑀯𑀺𑀬 𑀦𑀺𑀘𑁆𑀘𑀁 𑀦 𑀳𑁄𑀢𑀻𑀢𑀺 𑀅𑀘𑁆𑀙𑀭𑀺𑀬𑀁. 𑀅𑀬𑀁 𑀢𑀸𑀯 𑀲𑀤𑁆𑀤𑀦𑀬𑁄. 𑀅𑀬𑀁 𑀧𑀦 𑀅𑀝𑁆𑀞𑀓𑀣𑀸𑀦𑀬𑁄 ¶ , 𑀅𑀘𑁆𑀙𑀭𑀸𑀬𑁄𑀕𑁆𑀕𑀦𑁆𑀢𑀺 𑀅𑀘𑁆𑀙𑀭𑀺𑀬𑀁. 𑀅𑀘𑁆𑀙𑀭𑀁 𑀧𑀳𑀭𑀺𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀪𑀽𑀢𑀧𑀼𑀩𑁆𑀩𑀁 𑀪𑀽𑀢𑀦𑁆𑀢𑀺 𑀅𑀩𑁆𑀪𑀼𑀢𑀁. 𑀉𑀪𑀬𑀫𑁆𑀧𑁂𑀢𑀁 𑀯𑀺𑀫𑁆𑀳𑀬𑀲𑁆𑀲𑁂𑀯𑀸𑀥𑀺𑀯𑀘𑀦𑀁. 𑀢𑀁 𑀧𑀦𑁂𑀢𑀁 𑀕𑀭𑀳𑀅𑀘𑁆𑀙𑀭𑀺𑀬𑀁, 𑀧𑀲𑀁𑀲𑀸𑀅𑀘𑁆𑀙𑀭𑀺𑀬𑀦𑁆𑀢𑀺 𑀤𑀼𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀅𑀘𑁆𑀙𑀭𑀺𑀬𑀁 𑀫𑁄𑀕𑁆𑀕𑀮𑁆𑀮𑀸𑀦 𑀅𑀩𑁆𑀪𑀼𑀢𑀁 𑀫𑁄𑀕𑁆𑀕𑀮𑁆𑀮𑀸𑀦, 𑀬𑀸𑀯 𑀩𑀸𑀳𑀸𑀕𑀳𑀡𑀸𑀧𑀺 𑀦𑀸𑀫 𑀲𑁄 𑀫𑁄𑀖𑀧𑀼𑀭𑀺𑀲𑁄 𑀆𑀕𑀫𑁂𑀲𑁆𑀲𑀢𑀻𑀢𑀺 (𑀘𑀽𑀴𑀯. 𑁩𑁮𑁩; 𑀅. 𑀦𑀺. 𑁮.𑁨𑁦), 𑀇𑀤𑀁 𑀕𑀭𑀳𑀅𑀘𑁆𑀙𑀭𑀺𑀬𑀁 𑀦𑀸𑀫. ‘‘𑀅𑀘𑁆𑀙𑀭𑀺𑀬𑀁 𑀦𑀦𑁆𑀤𑀫𑀸𑀢𑁂 𑀅𑀩𑁆𑀪𑀼𑀢𑀁 𑀦𑀦𑁆𑀤𑀫𑀸𑀢𑁂, 𑀬𑀢𑁆𑀭 𑀳𑀺 𑀦𑀸𑀫 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑁆𑀧𑀺 𑀧𑀭𑀺𑀲𑁄𑀥𑁂𑀲𑁆𑀲𑀲𑀻𑀢𑀺 (𑀅. 𑀦𑀺. 𑁭.𑁫𑁩) 𑀇𑀤𑀁 𑀧𑀲𑀁𑀲𑀸𑀅𑀘𑁆𑀙𑀭𑀺𑀬𑀁 𑀦𑀸𑀫. 𑀇𑀥𑀸𑀧𑀺 𑀇𑀤𑀫𑁂𑀯 𑀅𑀥𑀺𑀧𑁆𑀧𑁂𑀢𑀁’’ 𑀅𑀬𑀜𑁆𑀳𑀺 𑀢𑀁 𑀧𑀲𑀁𑀲𑀦𑁆𑀢𑁄 𑀏𑀯𑀫𑀸𑀳.

𑀬𑀸𑀯𑀜𑁆𑀘𑀺𑀤𑀦𑁆𑀢𑀺 𑀏𑀢𑁆𑀣 𑀇𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀬𑀸𑀯𑀸𑀢𑀺 𑀧𑀫𑀸𑀡𑀧𑀭𑀺𑀘𑁆𑀙𑁂𑀤𑁄, 𑀬𑀸𑀯 𑀲𑀫𑁆𑀫𑀸 𑀧𑀝𑀺𑀧𑀸𑀤𑀺𑀢𑁄, 𑀬𑀢𑁆𑀢𑀓𑁂𑀦 𑀧𑀫𑀸𑀡𑁂𑀦 𑀲𑀫𑁆𑀫𑀸 𑀧𑀝𑀺𑀧𑀸𑀤𑀺𑀢𑁄, 𑀦 𑀲𑀓𑁆𑀓𑀸 𑀢𑀲𑁆𑀲 𑀯𑀡𑁆𑀡𑁂 𑀯𑀢𑁆𑀢𑀼𑀁, 𑀅𑀣 𑀔𑁄 𑀅𑀘𑁆𑀙𑀭𑀺𑀬𑀫𑁂𑀯𑁂𑀢𑀁 𑀅𑀩𑁆𑀪𑀼𑀢𑀫𑁂𑀯𑁂𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑀧𑀭𑀫𑀁𑀬𑁂𑀯𑀸𑀢𑀺 𑀏𑀯𑀁 𑀲𑀫𑁆𑀫𑀸 𑀧𑀝𑀺𑀧𑀸𑀤𑀺𑀢𑁄 𑀏𑀲𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 ¶ 𑀢𑀲𑁆𑀲𑀸𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀭𑀫𑁄𑀢𑀺 𑀏𑀢𑀧𑀭𑀫𑁄, 𑀢𑀁 𑀏𑀢𑀧𑀭𑀫𑀁 𑀬𑀣𑀸 𑀅𑀬𑀁 𑀧𑀝𑀺𑀧𑀸𑀤𑀺𑀢𑁄, 𑀏𑀯𑀁 𑀧𑀝𑀺𑀧𑀸𑀤𑀺𑀢𑀁 𑀓𑀢𑁆𑀯𑀸 𑀧𑀝𑀺𑀧𑀸𑀤𑁂𑀲𑀼𑀁, 𑀦 𑀇𑀢𑁄 𑀪𑀺𑀬𑁆𑀬𑁄𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑀦𑀬𑁂 𑀏𑀯𑀁 𑀧𑀝𑀺𑀧𑀸𑀤𑁂𑀲𑁆𑀲𑀦𑁆𑀢𑀺, 𑀦 𑀇𑀢𑁄 𑀪𑀺𑀬𑁆𑀬𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀣 𑀧𑀝𑀺𑀧𑀸𑀤𑀺𑀢𑁄𑀢𑀺 𑀆𑀪𑀺𑀲𑀫𑀸𑀘𑀸𑀭𑀺𑀓𑀯𑀢𑁆𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀫𑁆𑀫𑀸 𑀅𑀧𑀘𑁆𑀘𑀦𑀻𑀓𑀧𑀝𑀺𑀧𑀢𑁆𑀢𑀺𑀬𑀁 𑀬𑁄𑀚𑀺𑀢𑁄. 𑀅𑀣 𑀓𑀲𑁆𑀫𑀸 𑀅𑀬𑀁 𑀧𑀭𑀺𑀩𑁆𑀩𑀸𑀚𑀓𑁄 ¶ 𑀅𑀢𑀻𑀢𑀸𑀦𑀸𑀕𑀢𑁂 𑀩𑀼𑀤𑁆𑀥𑁂 𑀤𑀲𑁆𑀲𑁂𑀢𑀺, 𑀓𑀺𑀫𑀲𑁆𑀲 𑀢𑀺𑀬𑀤𑁆𑀥𑀚𑀸𑀦𑀦𑀜𑀸𑀡𑀁 𑀅𑀢𑁆𑀣𑀻𑀢𑀺. 𑀦𑀢𑁆𑀣𑀺, 𑀦𑀬𑀕𑁆𑀕𑀸𑀳𑁂 𑀧𑀦 𑀞𑀢𑁆𑀯𑀸 ¶ ‘‘𑀬𑁂𑀦𑀸𑀓𑀸𑀭𑁂𑀦 𑀅𑀬𑀁 𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀦𑁆𑀦𑀺𑀲𑀺𑀦𑁆𑀦𑁄 𑀤𑀦𑁆𑀢𑁄 𑀯𑀺𑀦𑀻𑀢𑁄 𑀉𑀧𑀲𑀦𑁆𑀢𑁄, 𑀅𑀢𑀻𑀢𑀩𑀼𑀤𑁆𑀥𑀸𑀧𑀺 𑀏𑀢𑀧𑀭𑀫𑀁𑀬𑁂𑀯 𑀓𑀢𑁆𑀯𑀸 𑀧𑀝𑀺𑀧𑀚𑁆𑀚𑀸𑀧𑁂𑀲𑀼𑀁, 𑀅𑀦𑀸𑀕𑀢𑀩𑀼𑀤𑁆𑀥𑀸𑀧𑀺 𑀧𑀝𑀺𑀧𑀚𑁆𑀚𑀸𑀧𑁂𑀲𑁆𑀲𑀦𑁆𑀢𑀺, 𑀦𑀢𑁆𑀣𑀺 𑀇𑀢𑁄 𑀉𑀢𑁆𑀢𑀭𑀺 𑀧𑀝𑀺𑀧𑀸𑀤𑀦𑀸’’𑀢𑀺 𑀫𑀜𑁆𑀜𑀫𑀸𑀦𑁄 𑀅𑀦𑀼𑀩𑀼𑀤𑁆𑀥𑀺𑀬𑀸 𑀏𑀯𑀫𑀸𑀳.

𑁨. 𑀏𑀯𑀫𑁂𑀢𑀁 𑀓𑀦𑁆𑀤𑀭𑀓𑀸𑀢𑀺 𑀧𑀸𑀝𑀺𑀏𑀓𑁆𑀓𑁄 𑀅𑀦𑀼𑀲𑀦𑁆𑀥𑀺. 𑀪𑀕𑀯𑀸 𑀓𑀺𑀭 𑀢𑀁 𑀲𑀼𑀢𑁆𑀯𑀸 ‘‘𑀓𑀦𑁆𑀤𑀭𑀓 𑀢𑁆𑀯𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀉𑀧𑀲𑀦𑁆𑀢𑁄𑀢𑀺 𑀯𑀤𑀲𑀺, 𑀇𑀫𑀲𑁆𑀲 𑀧𑀦 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀉𑀧𑀲𑀦𑁆𑀢𑀓𑀸𑀭𑀡𑀁 𑀢𑀼𑀬𑁆𑀳𑀁 𑀅𑀧𑀸𑀓𑀝𑀁, 𑀦 𑀳𑀺 𑀢𑁆𑀯𑀁 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑀸 𑀧𑀽𑀭𑁂𑀢𑁆𑀯𑀸 𑀓𑀼𑀲𑀮𑀫𑀽𑀮𑀁 𑀧𑀭𑀺𑀧𑀸𑀘𑁂𑀢𑁆𑀯𑀸 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀺, 𑀫𑀬𑀸 𑀧𑀦 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀜𑀸𑀢𑀢𑁆𑀣𑀘𑀭𑀺𑀬𑀁 𑀮𑁄𑀓𑀢𑁆𑀣𑀘𑀭𑀺𑀬𑀁 𑀩𑀼𑀤𑁆𑀥𑀢𑁆𑀣𑀘𑀭𑀺𑀬𑀜𑁆𑀘 𑀓𑁄𑀝𑀺𑀁 𑀧𑀸𑀧𑁂𑀢𑁆𑀯𑀸 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀤𑁆𑀥𑀁, 𑀫𑀬𑁆𑀳𑀁 𑀏𑀢𑁂𑀲𑀁 𑀉𑀧𑀲𑀦𑁆𑀢𑀓𑀸𑀭𑀡𑀁 𑀧𑀸𑀓𑀝’’𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺.

𑀲𑀦𑁆𑀢𑀺 𑀳𑀺 𑀓𑀦𑁆𑀤𑀭𑀓𑀸𑀢𑀺 𑀅𑀬𑀫𑁆𑀧𑀺 𑀧𑀸𑀝𑀺𑀏𑀓𑁆𑀓𑁄 𑀅𑀦𑀼𑀲𑀦𑁆𑀥𑀺. 𑀪𑀕𑀯𑀢𑁄 𑀓𑀺𑀭 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀧𑀭𑀺𑀩𑁆𑀩𑀸𑀚𑀓𑁄 𑀇𑀫𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀉𑀧𑀲𑀦𑁆𑀢𑁄𑀢𑀺 𑀯𑀤𑀢𑀺, 𑀅𑀬𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑁄 𑀓𑀧𑁆𑀧𑁂𑀢𑁆𑀯𑀸 𑀧𑀓𑀧𑁆𑀧𑁂𑀢𑁆𑀯𑀸 𑀓𑀼𑀳𑀓𑀪𑀸𑀯𑁂𑀦 𑀇𑀭𑀺𑀬𑀸𑀧𑀣𑀁 𑀲𑀡𑁆𑀞𑀧𑁂𑀦𑁆𑀢𑁄 𑀘𑀺𑀢𑁆𑀢𑁂𑀦 𑀅𑀦𑀼𑀧𑀲𑀦𑁆𑀢𑁄 𑀦 𑀉𑀧𑀲𑀦𑁆𑀢𑀸𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀧𑀦 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀝𑀺𑀧𑀤𑀁 𑀧𑀽𑀭𑀬𑀫𑀸𑀦𑀸𑀧𑀺 𑀧𑀝𑀺𑀧𑀤𑀁 𑀧𑀽𑀭𑁂𑀢𑁆𑀯𑀸 𑀫𑀢𑁆𑀣𑀓𑀁 𑀧𑀢𑁆𑀯𑀸 𑀞𑀺𑀢𑀪𑀺𑀓𑁆𑀔𑀽𑀧𑀺 𑀅𑀢𑁆𑀣𑀺, 𑀢𑀢𑁆𑀣 𑀧𑀝𑀺𑀧𑀤𑀁 𑀧𑀽𑀭𑁂𑀢𑁆𑀯𑀸 𑀫𑀢𑁆𑀣𑀓𑀁 𑀧𑀢𑁆𑀢𑀸 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀕𑀼𑀡𑁂𑀳𑁂𑀯 𑀉𑀧𑀲𑀦𑁆𑀢𑀸, 𑀧𑀝𑀺𑀧𑀤𑀁 𑀧𑀽𑀭𑀬𑀫𑀸𑀦𑀸 𑀉𑀧𑀭𑀺𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀸𑀬 𑀉𑀧𑀲𑀦𑁆𑀢𑀸, 𑀇𑀢𑁄 𑀫𑀼𑀢𑁆𑀢𑀸 𑀧𑀦 𑀅𑀯𑀲𑁂𑀲𑀸 𑀘𑀢𑀽𑀳𑀺 𑀲𑀢𑀺𑀧𑀝𑁆𑀞𑀸𑀦𑁂𑀳𑀺 𑀉𑀧𑀲𑀦𑁆𑀢𑀸. 𑀢𑀁 𑀦𑁂𑀲𑀁 𑀉𑀧𑀲𑀦𑁆𑀢𑀓𑀸𑀭𑀡𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 ‘‘𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀓𑀸𑀭𑀡𑁂𑀦 𑀅𑀬𑀁 𑀪𑀺𑀓𑁆𑀔𑀼𑀲𑀗𑁆𑀖𑁄 𑀉𑀧𑀲𑀦𑁆𑀢𑁄’’𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀦𑁆𑀢𑀺 𑀳𑀺 𑀓𑀦𑁆𑀤𑀭𑀓𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀫𑀽𑀮𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀫𑁂𑀯 𑀯𑀼𑀢𑁆𑀢𑀁. 𑀲𑁂𑀔𑀧𑀝𑀺𑀧𑀤𑀫𑁆𑀧𑀺 𑀢𑀢𑁆𑀣𑁂𑀯 𑀯𑀺𑀢𑁆𑀣𑀸𑀭𑀺𑀢𑀁. 𑀲𑀦𑁆𑀢𑀢𑀲𑀻𑀮𑀸𑀢𑀺 𑀲𑀢𑀢𑀲𑀻𑀮𑀸 𑀦𑀺𑀭𑀦𑁆𑀢𑀭𑀲𑀻𑀮𑀸. 𑀲𑀦𑁆𑀢𑀢𑀯𑀼𑀢𑁆𑀢𑀺𑀦𑁄𑀢𑀺 ¶ 𑀢𑀲𑁆𑀲𑁂𑀯 ¶ 𑀯𑁂𑀯𑀘𑀦𑀁, 𑀲𑀦𑁆𑀢𑀢𑀚𑀻𑀯𑀺𑀓𑀸 𑀯𑀸𑀢𑀺𑀧𑀺 𑀅𑀢𑁆𑀣𑁄. 𑀢𑀲𑁆𑀫𑀺𑀁 𑀲𑀦𑁆𑀢𑀢𑀲𑀻𑀮𑁂 𑀞𑀢𑁆𑀯𑀸𑀯 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀺, 𑀦 𑀤𑀼𑀲𑁆𑀲𑀻𑀮𑁆𑀬𑀁 𑀫𑀭𑀡𑀁 𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀦𑀺𑀧𑀓𑀸𑀢𑀺 𑀦𑁂𑀧𑀓𑁆𑀓𑁂𑀦 𑀲𑀫𑀦𑁆𑀦𑀸𑀕𑀢𑀸 𑀧𑀜𑁆𑀜𑀯𑀦𑁆𑀢𑁄. 𑀦𑀺𑀧𑀓𑀯𑀼𑀢𑁆𑀢𑀺𑀦𑁄𑀢𑀺 𑀧𑀜𑁆𑀜𑀸𑀬 𑀯𑀼𑀢𑁆𑀢𑀺𑀦𑁄, 𑀧𑀜𑁆𑀜𑀸𑀬 𑀞𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀺. 𑀬𑀣𑀸 𑀏𑀓𑀘𑁆𑀘𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸𑀧𑀺 ¶ 𑀚𑀻𑀯𑀺𑀢𑀓𑀸𑀭𑀡𑀸 𑀙𑀲𑀼 𑀅𑀕𑁄𑀘𑀭𑁂𑀲𑀼 𑀘𑀭𑀢𑀺, 𑀯𑁂𑀲𑀺𑀬𑀸𑀕𑁄𑀘𑀭𑁄 𑀳𑁄𑀢𑀺, 𑀯𑀺𑀥𑀯𑀣𑀼𑀮𑁆𑀮𑀓𑀼𑀫𑀸𑀭𑀺𑀓𑀧𑀡𑁆𑀟𑀓𑀧𑀸𑀦𑀸𑀕𑀸𑀭𑀪𑀺𑀓𑁆𑀔𑀼𑀦𑀺𑀕𑁄𑀘𑀭𑁄 𑀳𑁄𑀢𑀺. 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀭𑀸𑀚𑀽𑀳𑀺 𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀢𑀺𑀢𑁆𑀣𑀺𑀬𑁂𑀳𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺 𑀅𑀦𑀦𑀼𑀮𑁄𑀫𑀺𑀓𑁂𑀦 𑀕𑀺𑀳𑀺𑀲𑀁𑀲𑀕𑁆𑀕𑁂𑀦 (𑀯𑀺𑀪. 𑁫𑁧𑁪), 𑀯𑁂𑀚𑁆𑀚𑀓𑀫𑁆𑀫𑀁 𑀓𑀭𑁄𑀢𑀺, 𑀤𑀽𑀢𑀓𑀫𑁆𑀫𑀁 𑀓𑀭𑁄𑀢𑀺, 𑀧𑀳𑀺𑀡𑀓𑀫𑁆𑀫𑀁 𑀓𑀭𑁄𑀢𑀺, 𑀕𑀡𑁆𑀟𑀁 𑀨𑀸𑀮𑁂𑀢𑀺, 𑀅𑀭𑀼𑀫𑀓𑁆𑀔𑀦𑀁 𑀤𑁂𑀢𑀺, 𑀉𑀤𑁆𑀥𑀁𑀯𑀺𑀭𑁂𑀘𑀦𑀁 𑀤𑁂𑀢𑀺, 𑀅𑀥𑁄𑀯𑀺𑀭𑁂𑀘𑀦𑀁 𑀤𑁂𑀢𑀺, 𑀦𑀢𑁆𑀣𑀼𑀢𑁂𑀮𑀁 𑀧𑀘𑀢𑀺, 𑀧𑀺𑀯𑀦𑀢𑁂𑀮𑀁 𑀧𑀘𑀢𑀺, 𑀯𑁂𑀴𑀼𑀤𑀸𑀦𑀁, 𑀧𑀢𑁆𑀢𑀤𑀸𑀦𑀁, 𑀧𑀼𑀧𑁆𑀨𑀤𑀸𑀦𑀁, 𑀨𑀮𑀤𑀸𑀦𑀁, 𑀲𑀺𑀦𑀸𑀦𑀤𑀸𑀦𑀁, 𑀤𑀦𑁆𑀢𑀓𑀝𑁆𑀞𑀤𑀸𑀦𑀁, 𑀫𑀼𑀔𑁄𑀤𑀓𑀤𑀸𑀦𑀁, 𑀘𑀼𑀡𑁆𑀡𑀫𑀢𑁆𑀢𑀺𑀓𑀤𑀸𑀦𑀁 𑀤𑁂𑀢𑀺, 𑀘𑀸𑀝𑀼𑀓𑀫𑁆𑀬𑀁 𑀓𑀭𑁄𑀢𑀺, 𑀫𑀼𑀕𑁆𑀕𑀲𑀽𑀧𑀺𑀬𑀁, 𑀧𑀸𑀭𑀺𑀪𑀝𑀼𑀁, 𑀚𑀗𑁆𑀖𑀧𑁂𑀲𑀦𑀺𑀬𑀁 𑀓𑀭𑁄𑀢𑀻𑀢𑀺 𑀏𑀓𑀯𑀻𑀲𑀢𑀺𑀯𑀺𑀥𑀸𑀬 𑀅𑀦𑁂𑀲𑀦𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁄 𑀅𑀦𑀺𑀧𑀓𑀯𑀼𑀢𑁆𑀢𑀺 𑀦𑀸𑀫 𑀳𑁄𑀢𑀺, 𑀦 𑀧𑀜𑁆𑀜𑀸𑀬 𑀞𑀢𑁆𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺, 𑀢𑀢𑁄 𑀓𑀸𑀮𑀓𑀺𑀭𑀺𑀬𑀁 𑀓𑀢𑁆𑀯𑀸 𑀲𑀫𑀡𑀬𑀓𑁆𑀔𑁄 𑀦𑀸𑀫 𑀳𑀼𑀢𑁆𑀯𑀸 ‘‘𑀢𑀲𑁆𑀲 𑀲𑀗𑁆𑀖𑀸𑀝𑀺𑀧𑀺 𑀆𑀤𑀺𑀢𑁆𑀢𑀸 𑀳𑁄𑀢𑀺 𑀲𑀫𑁆𑀧𑀚𑁆𑀚𑀮𑀺𑀢𑀸’’𑀢𑀺 𑀯𑀼𑀢𑁆𑀢𑀦𑀬𑁂𑀦 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑁄𑀢𑀺. 𑀏𑀯𑀁𑀯𑀺𑀥𑀸 𑀅𑀳𑀼𑀢𑁆𑀯𑀸 𑀚𑀻𑀯𑀺𑀢𑀳𑁂𑀢𑀼𑀧𑀺 𑀲𑀺𑀓𑁆𑀔𑀸𑀧𑀤𑀁 𑀅𑀦𑀢𑀺𑀓𑁆𑀓𑀫𑀦𑁆𑀢𑁄 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀬𑀣𑀸𑀩𑀮𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 ¶ 𑀭𑀣𑀯𑀺𑀦𑀻𑀢𑀧𑀝𑀺𑀧𑀤𑀁, 𑀫𑀳𑀸𑀕𑁄𑀲𑀺𑀗𑁆𑀕𑀧𑀝𑀺𑀧𑀤𑀁, 𑀫𑀳𑀸𑀲𑀼𑀜𑁆𑀜𑀢𑀧𑀝𑀺𑀧𑀤𑀁, 𑀅𑀦𑀗𑁆𑀕𑀡𑀧𑀝𑀺𑀧𑀤𑀁, 𑀥𑀫𑁆𑀫𑀤𑀸𑀬𑀸𑀤𑀧𑀝𑀺𑀧𑀤𑀁, 𑀦𑀸𑀮𑀓𑀧𑀝𑀺𑀧𑀤𑀁, 𑀢𑀼𑀯𑀝𑁆𑀝𑀓𑀧𑀝𑀺𑀧𑀤𑀁, 𑀘𑀦𑁆𑀤𑁄𑀧𑀫𑀧𑀝𑀺𑀧𑀤𑀦𑁆𑀢𑀺 𑀇𑀫𑀸𑀦𑀺 𑀅𑀭𑀺𑀬𑀧𑀝𑀺𑀧𑀤𑀸𑀦𑀺 𑀧𑀽𑀭𑁂𑀦𑁆𑀢𑁄 𑀘𑀢𑀼𑀧𑀘𑁆𑀘𑀬-𑀲𑀦𑁆𑀢𑁄𑀲-𑀪𑀸𑀯𑀦𑀸𑀭𑀸𑀫-𑀅𑀭𑀺𑀬𑀯𑀁𑀲𑀧𑀝𑀺𑀧𑀢𑁆𑀢𑀺𑀬𑀁 𑀓𑀸𑀬𑀲𑀓𑁆𑀔𑀺𑀦𑁄 𑀳𑀼𑀢𑁆𑀯𑀸 𑀅𑀦𑀻𑀓𑀸 𑀦𑀺𑀓𑁆𑀔𑀦𑁆𑀢𑀳𑀢𑁆𑀣𑀻 𑀯𑀺𑀬 𑀬𑀽𑀣𑀸 𑀯𑀺𑀲𑁆𑀲𑀝𑁆𑀞𑀲𑀻𑀳𑁄 𑀯𑀺𑀬 𑀦𑀺𑀧𑀘𑁆𑀙𑀸𑀩𑀦𑁆𑀥𑀫𑀳𑀸𑀦𑀸𑀯𑀸 𑀯𑀺𑀬 𑀘 𑀕𑀫𑀦𑀸𑀤𑀻𑀲𑀼 𑀏𑀓𑀯𑀺𑀳𑀸𑀭𑀺𑀦𑁄 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀚𑁆𑀚𑀅𑀚𑁆𑀚𑁂𑀯 𑀅𑀭𑀳𑀢𑁆𑀢𑀦𑁆𑀢𑀺 𑀧𑀯𑀢𑁆𑀢𑀉𑀲𑁆𑀲𑀸𑀳𑀸 𑀯𑀺𑀳𑀭𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑀸𑀢𑀺 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀝𑁆𑀞𑀧𑀺𑀢𑀘𑀺𑀢𑁆𑀢𑀸 𑀳𑀼𑀢𑁆𑀯𑀸. 𑀲𑁂𑀲𑀸 𑀲𑀢𑀺𑀧𑀝𑁆𑀞𑀸𑀦𑀓𑀣𑀸 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀸𑀯. 𑀇𑀥 𑀧𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸 𑀲𑀢𑀺𑀧𑀝𑁆𑀞𑀸𑀦𑀸 𑀓𑀣𑀺𑀢𑀸, 𑀏𑀢𑁆𑀢𑀓𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀉𑀧𑀲𑀦𑁆𑀢𑀓𑀸𑀭𑀡𑀁 𑀓𑀣𑀺𑀢𑀁 𑀳𑁄𑀢𑀺.

𑁩. 𑀬𑀸𑀯 𑀲𑀼𑀧𑀜𑁆𑀜𑀢𑁆𑀢𑀸𑀢𑀺 𑀬𑀸𑀯 𑀲𑀼𑀝𑁆𑀞𑀧𑀺𑀢𑀸 𑀲𑀼𑀤𑁂𑀲𑀺𑀢𑀸. 𑀫𑀬𑀫𑁆𑀧𑀺 𑀳𑀺, 𑀪𑀦𑁆𑀢𑁂𑀢𑀺 𑀇𑀫𑀺𑀦𑀸 𑀏𑀲 𑀅𑀢𑁆𑀢𑀦𑁄 ¶ 𑀓𑀸𑀭𑀓𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘 𑀉𑀓𑁆𑀔𑀺𑀧𑀢𑀺. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄, 𑀫𑀬𑀫𑁆𑀧𑀺 𑀳𑀺, 𑀪𑀦𑁆𑀢𑁂, 𑀕𑀺𑀳𑀺…𑀧𑁂… 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑀸 𑀯𑀺𑀳𑀭𑀸𑀫, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀦 𑀅𑀬𑀫𑁂𑀯 𑀓𑀲𑀺 𑀘 𑀩𑀻𑀚𑀜𑁆𑀘 𑀬𑀼𑀕𑀦𑀗𑁆𑀕𑀮𑀜𑁆𑀘 𑀨𑀸𑀮𑀧𑀸𑀘𑀦𑀜𑁆𑀘, 𑀢𑀲𑁆𑀫𑀸 𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀩𑁆𑀩𑀓𑀸𑀮𑀁 𑀲𑀢𑀺𑀧𑀝𑁆𑀞𑀸𑀦𑀧𑀭𑀸𑀬𑀡𑁄, 𑀫𑀬𑀁 ¶ 𑀧𑀦 𑀓𑀸𑀮𑁂𑀦 𑀓𑀸𑀮𑀁 𑀑𑀓𑀸𑀲𑀁 𑀮𑀪𑀺𑀢𑁆𑀯𑀸 𑀏𑀢𑀁 𑀫𑀦𑀲𑀺𑀓𑀸𑀭𑀁 𑀓𑀭𑁄𑀫, 𑀫𑀬𑀫𑁆𑀧𑀺 𑀓𑀸𑀭𑀓𑀸, 𑀦 𑀲𑀩𑁆𑀩𑀲𑁄 𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀝𑁆𑀞𑀸𑀦𑀸𑀬𑁂𑀯𑀸𑀢𑀺. 𑀫𑀦𑀼𑀲𑁆𑀲𑀕𑀳𑀦𑁂𑀢𑀺 ¶ 𑀫𑀦𑀼𑀲𑁆𑀲𑀸𑀦𑀁 𑀅𑀚𑁆𑀛𑀸𑀲𑀬𑀕𑀳𑀦𑁂𑀦 𑀕𑀳𑀦𑀢𑀸, 𑀅𑀚𑁆𑀛𑀸𑀲𑀬𑀲𑁆𑀲𑀸𑀧𑀺 𑀦𑁂𑀲𑀁 𑀓𑀺𑀮𑁂𑀲𑀕𑀳𑀦𑁂𑀦 𑀕𑀳𑀦𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀲𑀝𑀲𑀸𑀞𑁂𑀬𑁆𑀬𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀅𑀧𑀭𑀺𑀲𑀼𑀤𑁆𑀥𑀝𑁆𑀞𑁂𑀦 𑀓𑀲𑀝𑀢𑀸, 𑀓𑁂𑀭𑀸𑀝𑀺𑀬𑀝𑁆𑀞𑁂𑀦 𑀲𑀸𑀞𑁂𑀬𑁆𑀬𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀢𑁆𑀢𑀸𑀦𑀁 𑀳𑀺𑀢𑀸𑀳𑀺𑀢𑀁 𑀚𑀸𑀦𑀸𑀢𑀻𑀢𑀺 𑀏𑀯𑀁 𑀕𑀳𑀦𑀓𑀲𑀝𑀓𑁂𑀭𑀸𑀝𑀺𑀬𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀳𑀺𑀢𑀸𑀳𑀺𑀢𑀧𑀝𑀺𑀧𑀤𑀁 𑀬𑀸𑀯 𑀲𑀼𑀝𑁆𑀞𑀼 𑀪𑀕𑀯𑀸 𑀚𑀸𑀦𑀸𑀢𑀺. 𑀬𑀤𑀺𑀤𑀁 𑀧𑀲𑀯𑁄𑀢𑀺 𑀏𑀢𑁆𑀣 𑀲𑀩𑁆𑀩𑀸𑀧𑀺 𑀘𑀢𑀼𑀧𑁆𑀧𑀤𑀚𑀸𑀢𑀺 𑀧𑀲𑀯𑁄𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀧𑀳𑁄𑀫𑀻𑀢𑀺 𑀲𑀓𑁆𑀓𑁄𑀫𑀺. 𑀬𑀸𑀯𑀢𑀓𑁂𑀦 𑀅𑀦𑁆𑀢𑀭𑁂𑀦𑀸𑀢𑀺 𑀬𑀢𑁆𑀢𑀓𑁂𑀦 𑀔𑀡𑁂𑀦. 𑀘𑀫𑁆𑀧𑀁 𑀕𑀢𑀸𑀕𑀢𑀁 𑀓𑀭𑀺𑀲𑁆𑀲𑀢𑀻𑀢𑀺 𑀅𑀲𑁆𑀲𑀫𑀡𑁆𑀟𑀮𑀢𑁄 𑀬𑀸𑀯 𑀘𑀫𑁆𑀧𑀸𑀦𑀕𑀭𑀤𑁆𑀯𑀸𑀭𑀸 𑀕𑀫𑀦𑀜𑁆𑀘 𑀆𑀕𑀫𑀦𑀜𑁆𑀘 𑀓𑀭𑀺𑀲𑁆𑀲𑀢𑀺. 𑀲𑀸𑀞𑁂𑀬𑁆𑀬𑀸𑀦𑀻𑀢𑀺 𑀲𑀞𑀢𑁆𑀢𑀸𑀦𑀺. 𑀓𑀽𑀝𑁂𑀬𑁆𑀬𑀸𑀦𑀻𑀢𑀺 𑀓𑀽𑀝𑀢𑁆𑀢𑀸𑀦𑀺. 𑀯𑀗𑁆𑀓𑁂𑀬𑁆𑀬𑀸𑀦𑀻𑀢𑀺 𑀯𑀗𑁆𑀓𑀢𑁆𑀢𑀸𑀦𑀺. 𑀚𑀺𑀫𑁆𑀳𑁂𑀬𑁆𑀬𑀸𑀦𑀻𑀢𑀺 𑀚𑀺𑀫𑁆𑀳𑀢𑁆𑀢𑀸𑀦𑀺. 𑀧𑀸𑀢𑀼𑀓𑀭𑀺𑀲𑁆𑀲𑀢𑀻𑀢𑀺 𑀧𑀓𑀸𑀲𑁂𑀲𑁆𑀲𑀢𑀺 𑀤𑀲𑁆𑀲𑁂𑀲𑁆𑀲𑀢𑀺. 𑀦 𑀳𑀺 𑀲𑀓𑁆𑀓𑀸 𑀢𑁂𑀦 𑀢𑀸𑀦𑀺 𑀏𑀢𑁆𑀢𑀓𑁂𑀦 𑀅𑀦𑁆𑀢𑀭𑁂𑀦 𑀤𑀲𑁆𑀲𑁂𑀢𑀼𑀁.

𑀢𑀢𑁆𑀣 𑀬𑀲𑁆𑀲 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀞𑀸𑀦𑁂 𑀞𑀸𑀢𑀼𑀓𑀸𑀫𑀲𑁆𑀲 𑀲𑀢𑁄 𑀬𑀁 𑀞𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀲𑀧𑁆𑀧𑀝𑀺𑀪𑀬𑀁, 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀯𑀜𑁆𑀘𑁂𑀢𑁆𑀯𑀸 𑀞𑀲𑁆𑀲𑀸𑀫𑀻𑀢𑀺 𑀦 𑀳𑁄𑀢𑀺, 𑀢𑀲𑁆𑀫𑀺𑀁 𑀞𑀸𑀢𑀼𑀓𑀸𑀫𑀝𑁆𑀞𑀸𑀦𑁂𑀬𑁂𑀯 𑀦𑀺𑀔𑀸𑀢𑀢𑁆𑀣𑀫𑁆𑀪𑁄 𑀯𑀺𑀬 𑀘𑀢𑁆𑀢𑀸𑀭𑁄 𑀧𑀸𑀤𑁂 𑀦𑀺𑀘𑁆𑀘𑀮𑁂 𑀓𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀅𑀬𑀁 𑀲𑀞𑁄 𑀦𑀸𑀫. 𑀬𑀲𑁆𑀲 𑀧𑀦 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀞𑀸𑀦𑁂 𑀅𑀯𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀔𑀦𑁆𑀥𑀕𑀢𑀁 𑀧𑀸𑀢𑁂𑀢𑀼𑀓𑀸𑀫𑀲𑁆𑀲 𑀲𑀢𑁄 𑀬𑀁 𑀞𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀲𑀧𑁆𑀧𑀝𑀺𑀪𑀬𑀁, 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀯𑀜𑁆𑀘𑁂𑀢𑁆𑀯𑀸 𑀧𑀸𑀢𑁂𑀲𑁆𑀲𑀸𑀫𑀻𑀢𑀺 𑀦 𑀳𑁄𑀢𑀺, 𑀢𑀢𑁆𑀣𑁂𑀯 𑀅𑀯𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀢𑁂𑀢𑀺, 𑀅𑀬𑀁 𑀓𑀽𑀝𑁄 𑀦𑀸𑀫. 𑀬𑀲𑁆𑀲 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀞𑀸𑀦𑁂 𑀫𑀕𑁆𑀕𑀸 𑀉𑀓𑁆𑀓𑀫𑁆𑀫 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀝𑀺𑀫𑀕𑁆𑀕𑀁 𑀆𑀭𑁄𑀳𑀺𑀢𑀼𑀓𑀸𑀫𑀲𑁆𑀲 ¶ 𑀲𑀢𑁄 𑀬𑀁 𑀞𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀲𑀧𑁆𑀧𑀝𑀺𑀪𑀬𑀁, 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀯𑀜𑁆𑀘𑁂𑀢𑁆𑀯𑀸 𑀏𑀯𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀦 𑀳𑁄𑀢𑀺, 𑀢𑀢𑁆𑀣𑁂𑀯 𑀫𑀕𑁆𑀕𑀸 𑀉𑀓𑁆𑀓𑀫𑁆𑀫 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀝𑀺𑀫𑀕𑁆𑀕𑀁 𑀆𑀭𑁄𑀳𑀢𑀺, 𑀅𑀬𑀁 𑀯𑀗𑁆𑀓𑁄 𑀦𑀸𑀫. 𑀬𑀲𑁆𑀲 𑀧𑀦 𑀓𑀸𑀮𑁂𑀦 𑀯𑀸𑀫𑀢𑁄 𑀓𑀸𑀮𑁂𑀦 𑀤𑀓𑁆𑀔𑀺𑀡𑀢𑁄 𑀓𑀸𑀮𑁂𑀦 𑀉𑀚𑀼𑀫𑀕𑁆𑀕𑁂𑀦𑁂𑀯 𑀕𑀦𑁆𑀢𑀼𑀓𑀸𑀫𑀲𑁆𑀲 𑀲𑀢𑁄 𑀬𑀁 𑀞𑀸𑀦𑀁 𑀫𑀦𑀼𑀲𑁆𑀲𑀸𑀦𑀁 𑀲𑀧𑁆𑀧𑀝𑀺𑀪𑀬𑀁, 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀯𑀜𑁆𑀘𑁂𑀢𑁆𑀯𑀸 𑀏𑀯𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀦 𑀳𑁄𑀢𑀺, 𑀢𑀢𑁆𑀣𑁂𑀯 𑀓𑀸𑀮𑁂𑀦 𑀯𑀸𑀫𑀢𑁄 𑀓𑀸𑀮𑁂𑀦 𑀤𑀓𑁆𑀔𑀺𑀡𑀢𑁄 𑀓𑀸𑀮𑁂𑀦 𑀉𑀚𑀼𑀫𑀕𑁆𑀕𑀁 𑀕𑀘𑁆𑀙𑀢𑀺, 𑀢𑀣𑀸 𑀮𑀡𑁆𑀟𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀼𑀓𑀸𑀫𑀲𑁆𑀲 𑀲𑀢𑁄 𑀇𑀤𑀁 𑀞𑀸𑀦𑀁 𑀲𑀼𑀲𑀫𑁆𑀫𑀝𑁆𑀞𑀁 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀁 𑀭𑀫𑀡𑀻𑀬𑀁, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀏𑀯𑀭𑀽𑀧𑀁 𑀓𑀸𑀢𑀼𑀁 𑀦 𑀬𑀼𑀢𑁆𑀢𑀁, 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀧𑀝𑀺𑀘𑁆𑀙𑀦𑁆𑀦𑀞𑀸𑀦𑁂 𑀓𑀭𑀺𑀲𑁆𑀲𑀸𑀫𑀻𑀢𑀺 𑀦 𑀳𑁄𑀢𑀺, 𑀢𑀢𑁆𑀣𑁂𑀯 𑀓𑀭𑁄𑀢𑀺, 𑀅𑀬𑀁 𑀚𑀺𑀫𑁆𑀳𑁄 𑀦𑀸𑀫. 𑀇𑀢𑀺 𑀇𑀫𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 ¶ 𑀓𑀺𑀭𑀺𑀬𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀲𑀸𑀞𑁂𑀬𑁆𑀬𑀸𑀦𑀺 ¶ 𑀓𑀽𑀝𑁂𑀬𑁆𑀬𑀸𑀦𑀺 𑀯𑀗𑁆𑀓𑁂𑀬𑁆𑀬𑀸𑀦𑀺 𑀚𑀺𑀫𑁆𑀳𑁂𑀬𑁆𑀬𑀸𑀦𑀺 𑀧𑀸𑀢𑀼𑀓𑀭𑀺𑀲𑁆𑀲𑀢𑀻𑀢𑀺 𑀏𑀯𑀁 𑀓𑀭𑁄𑀦𑁆𑀢𑀸𑀧𑀺 𑀢𑁂 𑀲𑀞𑀸𑀤𑀬𑁄 𑀢𑀸𑀦𑀺 𑀲𑀸𑀞𑁂𑀬𑁆𑀬𑀸𑀤𑀻𑀦𑀺 𑀧𑀸𑀢𑀼𑀓𑀭𑁄𑀦𑁆𑀢𑀺 𑀦𑀸𑀫.

𑀏𑀯𑀁 𑀧𑀲𑀽𑀦𑀁 𑀉𑀢𑁆𑀢𑀸𑀦𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀫𑀦𑀼𑀲𑁆𑀲𑀸𑀦𑀁 𑀕𑀳𑀦𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀅𑀫𑁆𑀳𑀸𑀓𑀁 𑀧𑀦, 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀸𑀲𑀸𑀢𑀺 𑀅𑀦𑁆𑀢𑁄𑀚𑀸𑀢𑀓𑀸 𑀯𑀸 𑀥𑀦𑀓𑁆𑀓𑀻𑀢𑀸 𑀯𑀸 𑀓𑀭𑀫𑀭𑀸𑀦𑀻𑀢𑀸 𑀯𑀸 𑀲𑀬𑀁 𑀯𑀸 𑀤𑀸𑀲𑀩𑁆𑀬𑀁 𑀉𑀧𑀕𑀢𑀸. 𑀧𑁂𑀲𑁆𑀲𑀸𑀢𑀺 𑀧𑁂𑀲𑀦𑀓𑀸𑀭𑀓𑀸. 𑀓𑀫𑁆𑀫𑀓𑀭𑀸𑀢𑀺 𑀪𑀢𑁆𑀢𑀯𑁂𑀢𑀦𑀪𑀢𑀸. 𑀅𑀜𑁆𑀜𑀣𑀸𑀯 𑀓𑀸𑀬𑁂𑀦𑀸𑀢𑀺 𑀅𑀜𑁆𑀜𑁂𑀦𑁂𑀯𑀸𑀓𑀸𑀭𑁂𑀦 𑀓𑀸𑀬𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀅𑀜𑁆𑀜𑁂𑀦𑁂𑀯𑀸𑀓𑀸𑀭𑁂𑀦 𑀯𑀸𑀘𑀸𑀬, 𑀅𑀜𑁆𑀜𑁂𑀦 𑀘 𑀦𑁂𑀲𑀁 𑀆𑀓𑀸𑀭𑁂𑀦 𑀘𑀺𑀢𑁆𑀢𑀁 𑀞𑀺𑀢𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀬𑁂 𑀲𑀫𑁆𑀫𑀼𑀔𑀸 𑀲𑀸𑀫𑀺𑀓𑁂 𑀤𑀺𑀲𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀭𑁄𑀦𑁆𑀢𑀺, 𑀳𑀢𑁆𑀣𑀢𑁄 𑀪𑀡𑁆𑀟𑀓𑀁 𑀕𑀡𑁆𑀳𑀦𑁆𑀢𑀺, 𑀇𑀫𑀁 ¶ 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀇𑀫𑀁 𑀕𑀡𑁆𑀳𑀦𑁆𑀢𑀸 𑀲𑁂𑀲𑀸𑀦𑀺𑀧𑀺 𑀆𑀲𑀦-𑀧𑀜𑁆𑀜𑀸𑀧𑀦-𑀢𑀸𑀮𑀯𑀡𑁆𑀝𑀩𑀻𑀚𑀦-𑀧𑀸𑀤𑀥𑁄𑀯𑀦𑀸𑀤𑀻𑀦𑀺 𑀲𑀩𑁆𑀩𑀸𑀦𑀺 𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑀺, 𑀧𑀭𑀫𑁆𑀫𑀼𑀔𑀓𑀸𑀮𑁂 𑀧𑀦 𑀢𑁂𑀮𑀫𑁆𑀧𑀺 𑀉𑀢𑁆𑀢𑀭𑀦𑁆𑀢𑀁 𑀦 𑀑𑀮𑁄𑀓𑁂𑀦𑁆𑀢𑀺, 𑀲𑀢𑀕𑁆𑀖𑀦𑀓𑁂𑀧𑀺 𑀲𑀳𑀲𑁆𑀲𑀕𑁆𑀖𑀦𑀓𑁂𑀧𑀺 𑀓𑀫𑁆𑀫𑁂 𑀧𑀭𑀺𑀳𑀸𑀬𑀦𑁆𑀢𑁂 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀢𑀼𑀫𑁆𑀧𑀺 𑀦 𑀇𑀘𑁆𑀙𑀦𑁆𑀢𑀺, 𑀇𑀫𑁂 𑀅𑀜𑁆𑀜𑀣𑀸 𑀓𑀸𑀬𑁂𑀦 𑀲𑀫𑀼𑀤𑀸𑀘𑀭𑀦𑁆𑀢𑀺 𑀦𑀸𑀫. 𑀬𑁂 𑀧𑀦 𑀲𑀫𑁆𑀫𑀼𑀔𑀸 ‘‘𑀅𑀫𑁆𑀳𑀸𑀓𑀁 𑀲𑀸𑀫𑀺 𑀅𑀫𑁆𑀳𑀸𑀓𑀁 𑀅𑀬𑁆𑀬𑁄’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀧𑀲𑀁𑀲𑀦𑁆𑀢𑀺, 𑀧𑀭𑀫𑁆𑀫𑀼𑀔𑀸 𑀅𑀯𑀢𑁆𑀢𑀩𑁆𑀩𑀁 𑀦𑀸𑀫 𑀦𑀢𑁆𑀣𑀺, 𑀬𑀁 𑀇𑀘𑁆𑀙𑀦𑁆𑀢𑀺, 𑀢𑀁 𑀯𑀤𑀦𑁆𑀢𑀺, 𑀇𑀫𑁂 𑀅𑀜𑁆𑀜𑀣𑀸 𑀯𑀸𑀘𑀸𑀬 𑀲𑀫𑀼𑀤𑀸𑀘𑀭𑀦𑁆𑀢𑀺 𑀦𑀸𑀫.

𑁪. 𑀘𑀢𑁆𑀢𑀸𑀭𑁄𑀫𑁂 𑀧𑁂𑀲𑁆𑀲𑀧𑀼𑀕𑁆𑀕𑀮𑀸𑀢𑀺 𑀅𑀬𑀫𑁆𑀧𑀺 𑀧𑀸𑀝𑀺𑀏𑀓𑁆𑀓𑁄 𑀅𑀦𑀼𑀲𑀦𑁆𑀥𑀺. 𑀅𑀬𑀜𑁆𑀳𑀺 𑀧𑁂𑀲𑁆𑀲𑁄 ‘‘𑀬𑀸𑀯𑀜𑁆𑀘𑀺𑀤𑀁, 𑀪𑀦𑁆𑀢𑁂, 𑀪𑀕𑀯𑀸 𑀏𑀯𑀁 𑀫𑀦𑀼𑀲𑁆𑀲𑀕𑀳𑀡𑁂 𑀏𑀯𑀁 𑀫𑀦𑀼𑀲𑁆𑀲𑀓𑀲𑀝𑁂 𑀏𑀯𑀁 𑀫𑀦𑀼𑀲𑁆𑀲𑀲𑀸𑀞𑁂𑀬𑁆𑀬𑁂 𑀯𑀢𑁆𑀢𑀫𑀸𑀦𑁂 𑀲𑀢𑁆𑀢𑀸𑀦𑀁 𑀳𑀺𑀢𑀸𑀳𑀺𑀢𑀁 𑀚𑀸𑀦𑀸𑀢𑀻’’𑀢𑀺 𑀆𑀳. 𑀧𑀼𑀭𑀺𑀫𑁂 𑀘 𑀢𑀬𑁄 𑀧𑀼𑀕𑁆𑀕𑀮𑀸 𑀅𑀳𑀺𑀢𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸, 𑀉𑀧𑀭𑀺 𑀘𑀢𑀼𑀢𑁆𑀣𑁄 𑀳𑀺𑀢𑀧𑀝𑀺𑀧𑀤𑀁, 𑀏𑀯𑀫𑀳𑀁 𑀲𑀢𑁆𑀢𑀸𑀦𑀁 𑀳𑀺𑀢𑀸𑀳𑀺𑀢𑀁 𑀚𑀸𑀦𑀸𑀫𑀻𑀢𑀺 𑀤𑀲𑁆𑀲𑁂𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀳𑁂𑀝𑁆𑀞𑀸 𑀓𑀦𑁆𑀤𑀭𑀓𑀲𑁆𑀲 𑀓𑀣𑀸𑀬 𑀲𑀤𑁆𑀥𑀺𑀁 𑀬𑁄𑀚𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀸𑀯𑀜𑁆𑀘𑀺𑀤𑀁 𑀪𑁄𑀢𑀸 𑀕𑁄𑀢𑀫𑁂𑀦 𑀲𑀫𑁆𑀫𑀸 𑀪𑀺𑀓𑁆𑀔𑀼𑀲𑀗𑁆𑀖𑁄 𑀧𑀝𑀺𑀧𑀸𑀤𑀺𑀢𑁄’’𑀢𑀺. 𑀅𑀣𑀲𑁆𑀲 𑀪𑀕𑀯𑀸 ‘‘𑀧𑀼𑀭𑀺𑀫𑁂 𑀢𑀬𑁄 𑀧𑀼𑀕𑁆𑀕𑀮𑁂 𑀧𑀳𑀸𑀬 𑀉𑀧𑀭𑀺 𑀘𑀢𑀼𑀢𑁆𑀣𑀧𑀼𑀕𑁆𑀕𑀮𑀲𑁆𑀲 𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀁𑀬𑁂𑀯 𑀧𑀝𑀺𑀧𑀸𑀤𑁂𑀫𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄𑀧𑀺 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀲𑀦𑁆𑀢𑁄𑀢𑀺 𑀇𑀤𑀁 𑀲𑀁𑀯𑀺𑀚𑁆𑀚𑀫𑀸𑀦𑀸𑀢𑀺 𑀧𑀤𑀲𑁆𑀲𑁂𑀯 𑀯𑁂𑀯𑀘𑀦𑀁. ‘‘𑀲𑀦𑁆𑀢𑀸 𑀳𑁄𑀦𑁆𑀢𑀺 𑀲𑀫𑀺𑀢𑀸 𑀯𑀽𑀧𑀲𑀦𑁆𑀢𑀸’’𑀢𑀺 (𑀯𑀺𑀪. 𑁫𑁪𑁨) 𑀏𑀢𑁆𑀣 𑀳𑀺 𑀦𑀺𑀭𑀼𑀤𑁆𑀥𑀸 𑀲𑀦𑁆𑀢𑀸𑀢𑀺 𑀯𑀼𑀢𑁆𑀢𑀸. ‘‘𑀲𑀦𑁆𑀢𑀸 𑀏𑀢𑁂 𑀯𑀺𑀳𑀸𑀭𑀸 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀯𑀼𑀘𑁆𑀘𑀦𑁆𑀢𑀻’’𑀢𑀺 𑀏𑀢𑁆𑀣 (𑀫. 𑀦𑀺. 𑁧.𑁮𑁨) 𑀦𑀺𑀩𑁆𑀩𑀼𑀢𑀸. ‘‘𑀲𑀦𑁆𑀢𑁄 𑀳𑀯𑁂 𑀲𑀩𑁆𑀪𑀺 𑀧𑀯𑁂𑀤𑀬𑀦𑁆𑀢𑀻’’𑀢𑀺 𑀏𑀢𑁆𑀣 (𑀚𑀸. 𑁨.𑁨𑁧.𑁪𑁧𑁩) 𑀧𑀡𑁆𑀟𑀺𑀢𑀸. 𑀇𑀥 𑀧𑀦 𑀯𑀺𑀚𑁆𑀚𑀫𑀸𑀦𑀸 𑀉𑀧𑀮𑀩𑁆𑀪𑀫𑀸𑀦𑀸𑀢𑀺 𑀅𑀢𑁆𑀣𑁄.

𑀅𑀢𑁆𑀢𑀦𑁆𑀢𑀧𑀸𑀤𑀻𑀲𑀼 ¶ ¶ 𑀅𑀢𑁆𑀢𑀸𑀦𑀁 𑀢𑀧𑀢𑀺 𑀤𑀼𑀓𑁆𑀔𑀸𑀧𑁂𑀢𑀻𑀢𑀺 𑀅𑀢𑁆𑀢𑀦𑁆𑀢𑀧𑁄. 𑀅𑀢𑁆𑀢𑀦𑁄 ¶ 𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀁 𑀅𑀢𑁆𑀢𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀁. 𑀧𑀭𑀁 𑀢𑀧𑀢𑀺 𑀤𑀼𑀓𑁆𑀔𑀸𑀧𑁂𑀢𑀻𑀢𑀺 𑀧𑀭𑀦𑁆𑀢𑀧𑁄. 𑀧𑀭𑁂𑀲𑀁 𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀁 𑀧𑀭𑀧𑀭𑀺𑀢𑀸𑀧𑀦𑀸𑀦𑀼𑀬𑁄𑀕𑀁. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂. 𑀦𑀺𑀘𑁆𑀙𑀸𑀢𑁄𑀢𑀺 𑀙𑀸𑀢𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸, 𑀲𑀸 𑀅𑀲𑁆𑀲 𑀦𑀢𑁆𑀣𑀻𑀢𑀺 𑀦𑀺𑀘𑁆𑀙𑀸𑀢𑁄. 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀦𑀺𑀩𑁆𑀩𑀼𑀢𑀢𑁆𑀢𑀸 𑀦𑀺𑀩𑁆𑀩𑀼𑀢𑁄. 𑀅𑀦𑁆𑀢𑁄 𑀢𑀸𑀧𑀦𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑀸 𑀲𑀻𑀢𑀮𑁄 𑀚𑀸𑀢𑁄𑀢𑀺 𑀲𑀻𑀢𑀺𑀪𑀽𑀢𑁄. 𑀛𑀸𑀦𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀲𑀼𑀔𑀸𑀦𑀺 𑀧𑀝𑀺𑀲𑀁𑀯𑁂𑀤𑁂𑀢𑀻𑀢𑀺 𑀲𑀼𑀔𑀧𑀝𑀺𑀲𑀁𑀯𑁂𑀤𑀻. 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸𑀢𑀺 𑀲𑁂𑀝𑁆𑀞𑀪𑀽𑀢𑁂𑀦 𑀅𑀢𑁆𑀢𑀦𑀸. 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑀻𑀢𑀺 𑀘𑀺𑀢𑁆𑀢𑀁 𑀲𑀫𑁆𑀧𑀸𑀤𑁂𑀢𑀺, 𑀧𑀭𑀺𑀧𑀽𑀭𑁂𑀢𑀺 𑀕𑀡𑁆𑀳𑀸𑀢𑀺 𑀧𑀲𑀸𑀤𑁂𑀢𑀻𑀢𑀺 𑀅𑀢𑁆𑀣𑁄.

𑁫. 𑀤𑀼𑀓𑁆𑀔𑀧𑀝𑀺𑀓𑁆𑀓𑀽𑀮𑀦𑁆𑀢𑀺 𑀤𑀼𑀓𑁆𑀔𑀲𑁆𑀲 𑀧𑀝𑀺𑀓𑀽𑀮𑀁, 𑀧𑀘𑁆𑀘𑀦𑀻𑀓𑀲𑀡𑁆𑀞𑀺𑀢𑀁 𑀤𑀼𑀓𑁆𑀔𑀁 𑀅𑀧𑀢𑁆𑀣𑀬𑀫𑀸𑀦𑀦𑁆𑀢𑀺 𑀅𑀢𑁆𑀣𑁄.

𑁬. 𑀧𑀡𑁆𑀟𑀺𑀢𑁄𑀢𑀺 𑀇𑀥 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀧𑀡𑁆𑀟𑀺𑀢𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄, 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀧𑀦 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀧𑀡𑁆𑀟𑀺𑀢𑁄𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀫𑀳𑀸𑀧𑀜𑁆𑀜𑁄𑀢𑀺 𑀇𑀤𑀫𑁆𑀧𑀺 𑀫𑀳𑀦𑁆𑀢𑁂 𑀅𑀢𑁆𑀣𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺𑀆𑀤𑀺𑀦𑀸 𑀫𑀳𑀸𑀧𑀜𑁆𑀜𑀮𑀓𑁆𑀔𑀡𑁂𑀦 𑀦 𑀯𑀢𑁆𑀢𑀩𑁆𑀩𑀁, 𑀲𑀢𑀺𑀧𑀝𑁆𑀞𑀸𑀦𑀧𑀭𑀺𑀕𑁆𑀕𑀸𑀳𑀺𑀓𑀸𑀬 𑀧𑀦 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀳𑀸𑀧𑀜𑁆𑀜𑁄𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀫𑀳𑀢𑀸 𑀅𑀢𑁆𑀣𑁂𑀦 𑀲𑀁𑀬𑀼𑀢𑁆𑀢𑁄 𑀅𑀕𑀫𑀺𑀲𑁆𑀲𑀸𑀢𑀺 𑀫𑀳𑀢𑀸 𑀅𑀢𑁆𑀣𑁂𑀦 𑀲𑀁𑀬𑀼𑀢𑁆𑀢𑁄 𑀳𑀼𑀢𑁆𑀯𑀸 𑀕𑀢𑁄 𑀪𑀯𑁂𑀬𑁆𑀬, 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀸𑀧𑀼𑀡𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀓𑀺𑀁 𑀧𑀦 𑀬𑁂𑀲𑀁 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀅𑀢𑁆𑀣𑀺, 𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑁂 𑀞𑀺𑀢𑁂𑀧𑀺 𑀢𑁂𑀲𑀁 𑀅𑀦𑁆𑀢𑀭𑀸𑀬𑁄 𑀳𑁄𑀢𑀻𑀢𑀺. 𑀆𑀫 𑀳𑁄𑀢𑀺, 𑀦 𑀧𑀦 𑀩𑀼𑀤𑁆𑀥𑁂 𑀧𑀝𑀺𑀘𑁆𑀘, 𑀅𑀣 𑀔𑁄 𑀓𑀺𑀭𑀺𑀬𑀧𑀭𑀺𑀳𑀸𑀦𑀺𑀬𑀸 𑀯𑀸 𑀧𑀸𑀧𑀫𑀺𑀢𑁆𑀢𑀢𑀸𑀬 𑀯𑀸 𑀳𑁄𑀢𑀺. 𑀢𑀢𑁆𑀣 𑀓𑀺𑀭𑀺𑀬𑀧𑀭𑀺𑀳𑀸𑀦𑀺𑀬𑀸 𑀳𑁄𑀢𑀺 𑀦𑀸𑀫 𑁋 𑀲𑀘𑁂 𑀳𑀺 𑀥𑀫𑁆𑀫𑀲𑁂𑀦𑀸𑀧𑀢𑀺 𑀥𑀦𑀜𑁆𑀚𑀸𑀦𑀺𑀲𑁆𑀲 ¶ 𑀩𑁆𑀭𑀸𑀳𑁆𑀫𑀡𑀲𑁆𑀲 𑀆𑀲𑀬𑀁 𑀜𑀢𑁆𑀯𑀸 𑀥𑀫𑁆𑀫𑀁 𑀅𑀤𑁂𑀲𑀬𑀺𑀲𑁆𑀲𑀸, 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀲𑁄𑀢𑀸𑀧𑀦𑁆𑀦𑁄 𑀅𑀪𑀯𑀺𑀲𑁆𑀲𑀸, 𑀏𑀯𑀁 𑀢𑀸𑀯 𑀓𑀺𑀭𑀺𑀬𑀧𑀭𑀺𑀳𑀸𑀦𑀺𑀬𑀸 𑀳𑁄𑀢𑀺. 𑀧𑀸𑀧𑀫𑀺𑀢𑁆𑀢𑀢𑀸𑀬 𑀳𑁄𑀢𑀺 𑀦𑀸𑀫 𑁋 𑀲𑀘𑁂 𑀳𑀺 𑀅𑀚𑀸𑀢𑀲𑀢𑁆𑀢𑀼 𑀤𑁂𑀯𑀤𑀢𑁆𑀢𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀧𑀺𑀢𑀼𑀖𑀸𑀢𑀓𑀫𑁆𑀫𑀁 𑀦𑀸𑀓𑀭𑀺𑀲𑁆𑀲𑀸, 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀓𑀣𑀺𑀢𑀤𑀺𑀯𑀲𑁂𑀯 𑀲𑁄𑀢𑀸𑀧𑀦𑁆𑀦𑁄 𑀅𑀪𑀯𑀺𑀲𑁆𑀲𑀸, 𑀢𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀧𑀺𑀢𑀼𑀖𑀸𑀢𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀧𑀦 𑀦 𑀳𑁄𑀢𑀺, 𑀏𑀯𑀁 𑀧𑀸𑀧𑀫𑀺𑀢𑁆𑀢𑀢𑀸𑀬 𑀳𑁄𑀢𑀺. 𑀇𑀫𑀲𑁆𑀲𑀸𑀧𑀺 𑀉𑀧𑀸𑀲𑀓𑀲𑁆𑀲 𑀓𑀺𑀭𑀺𑀬𑀧𑀭𑀺𑀳𑀸𑀦𑀺 𑀚𑀸𑀢𑀸, 𑀅𑀧𑀭𑀺𑀦𑀺𑀝𑁆𑀞𑀺𑀢𑀸𑀬 𑀤𑁂𑀲𑀦𑀸𑀬 𑀉𑀝𑁆𑀞𑀳𑀺𑀢𑁆𑀯𑀸 𑀧𑀓𑁆𑀓𑀦𑁆𑀢𑁄. 𑀅𑀧𑀺𑀘, 𑀪𑀺𑀓𑁆𑀔𑀯𑁂, 𑀏𑀢𑁆𑀢𑀸𑀯𑀢𑀸𑀧𑀺 𑀧𑁂𑀲𑁆𑀲𑁄 𑀳𑀢𑁆𑀣𑀸𑀭𑁄𑀳𑀧𑀼𑀢𑁆𑀢𑁄 𑀫𑀳𑀢𑀸 𑀅𑀢𑁆𑀣𑁂𑀦 𑀲𑀁𑀬𑀼𑀢𑁆𑀢𑁄𑀢𑀺 𑀓𑀢𑀭𑁂𑀦 𑀫𑀳𑀦𑁆𑀢𑁂𑀦 𑀅𑀢𑁆𑀣𑁂𑀦? 𑀤𑁆𑀯𑀻𑀳𑀺 ¶ 𑀆𑀦𑀺𑀲𑀁𑀲𑁂𑀳𑀺. 𑀲𑁄 𑀓𑀺𑀭 𑀉𑀧𑀸𑀲𑀓𑁄 𑀲𑀗𑁆𑀖𑁂 𑀘 𑀧𑀲𑀸𑀤𑀁 𑀧𑀝𑀺𑀮𑀪𑀺, 𑀲𑀢𑀺𑀧𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑀡𑀢𑁆𑀣𑀸𑀬 𑀘𑀲𑁆𑀲 𑀅𑀪𑀺𑀦𑀯𑁄 𑀦𑀬𑁄 𑀉𑀤𑀧𑀸𑀤𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀳𑀢𑀸 𑀅𑀢𑁆𑀣𑁂𑀦 𑀲𑀁𑀬𑀼𑀢𑁆𑀢𑁄’’𑀢𑀺. 𑀓𑀦𑁆𑀤𑀭𑀓𑁄 𑀧𑀦 𑀲𑀗𑁆𑀖𑁂 𑀧𑀲𑀸𑀤𑀫𑁂𑀯 ¶ 𑀧𑀝𑀺𑀮𑀪𑀺. 𑀏𑀢𑀲𑁆𑀲 𑀪𑀕𑀯𑀸 𑀓𑀸𑀮𑁄𑀢𑀺 𑀏𑀢𑀲𑁆𑀲 𑀥𑀫𑁆𑀫𑀓𑁆𑀔𑀸𑀦𑀲𑁆𑀲, 𑀘𑀢𑀼𑀦𑁆𑀦𑀁 𑀯𑀸 𑀧𑀼𑀕𑁆𑀕𑀮𑀸𑀦𑀁 𑀯𑀺𑀪𑀚𑀦𑀲𑁆𑀲 𑀓𑀸𑀮𑁄.

𑁮. 𑀑𑀭𑀩𑁆𑀪𑀺𑀓𑀸𑀤𑀻𑀲𑀼 𑀉𑀭𑀩𑁆𑀪𑀸 𑀯𑀼𑀘𑁆𑀘𑀦𑁆𑀢𑀺 𑀏𑀴𑀓𑀸, 𑀉𑀭𑀩𑁆𑀪𑁂 𑀳𑀦𑀢𑀻𑀢𑀺 𑀑𑀭𑀩𑁆𑀪𑀺𑀓𑁄. 𑀲𑀽𑀓𑀭𑀺𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀮𑀼𑀤𑁆𑀤𑁄𑀢𑀺 𑀤𑀸𑀭𑀼𑀡𑁄 𑀓𑀓𑁆𑀔𑀴𑁄. 𑀫𑀘𑁆𑀙𑀖𑀸𑀢𑀓𑁄𑀢𑀺 𑀫𑀘𑁆𑀙𑀩𑀦𑁆𑀥𑀓𑁂𑀯𑀝𑁆𑀝𑁄. 𑀩𑀦𑁆𑀥𑀦𑀸𑀕𑀸𑀭𑀺𑀓𑁄𑀢𑀺 𑀩𑀦𑁆𑀥𑀦𑀸𑀕𑀸𑀭𑀕𑁄𑀧𑀓𑁄. 𑀓𑀼𑀭𑀼𑀭𑀓𑀫𑁆𑀫𑀦𑁆𑀢𑀸𑀢𑀺 𑀤𑀸𑀭𑀼𑀡𑀓𑀫𑁆𑀫𑀦𑁆𑀢𑀸.

𑁯. 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑁄𑀢𑀺 ¶ 𑀔𑀢𑁆𑀢𑀺𑀬𑀸𑀪𑀺𑀲𑁂𑀓𑁂𑀦 𑀫𑀼𑀤𑁆𑀥𑀦𑀺 𑀅𑀪𑀺𑀲𑀺𑀢𑁆𑀢𑁄. 𑀧𑀼𑀭𑀢𑁆𑀣𑀺𑀫𑁂𑀦 𑀦𑀕𑀭𑀲𑁆𑀲𑀸𑀢𑀺 𑀦𑀕𑀭𑀢𑁄 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬. 𑀲𑀦𑁆𑀣𑀸𑀕𑀸𑀭𑀦𑁆𑀢𑀺 𑀬𑀜𑁆𑀜𑀲𑀸𑀮𑀁. 𑀔𑀭𑀸𑀚𑀺𑀦𑀁 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀲𑀔𑀼𑀭𑀁 𑀅𑀚𑀺𑀦𑀘𑀫𑁆𑀫𑀁 𑀦𑀺𑀯𑀸𑀲𑁂𑀢𑁆𑀯𑀸. 𑀲𑀧𑁆𑀧𑀺𑀢𑁂𑀮𑁂𑀦𑀸𑀢𑀺 𑀲𑀧𑁆𑀧𑀺𑀦𑀸 𑀘 𑀢𑁂𑀮𑁂𑀦 𑀘. 𑀞𑀧𑁂𑀢𑁆𑀯𑀸 𑀳𑀺 𑀲𑀧𑁆𑀧𑀺𑀁 𑀅𑀯𑀲𑁂𑀲𑁄 𑀬𑁄 𑀓𑁄𑀘𑀺 𑀲𑁆𑀦𑁂𑀳𑁄 𑀢𑁂𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀡𑁆𑀟𑀽𑀯𑀫𑀸𑀦𑁄𑀢𑀺 𑀦𑀔𑀸𑀦𑀁 𑀙𑀺𑀦𑁆𑀦𑀢𑁆𑀢𑀸 𑀓𑀡𑁆𑀟𑀽𑀯𑀺𑀢𑀩𑁆𑀩𑀓𑀸𑀮𑁂 𑀢𑁂𑀦 𑀓𑀡𑁆𑀟𑀽𑀯𑀫𑀸𑀦𑁄. 𑀅𑀦𑀦𑁆𑀢𑀭𑀳𑀺𑀢𑀸𑀬𑀸𑀢𑀺 𑀅𑀲𑀦𑁆𑀣𑀢𑀸𑀬. 𑀲𑀭𑀽𑀧𑀯𑀘𑁆𑀙𑀸𑀬𑀸𑀢𑀺 𑀲𑀤𑀺𑀲𑀯𑀘𑁆𑀙𑀸𑀬. 𑀲𑀘𑁂 𑀕𑀸𑀯𑀻 𑀲𑁂𑀢𑀸 𑀳𑁄𑀢𑀺, 𑀯𑀘𑁆𑀙𑁄𑀧𑀺 𑀲𑁂𑀢𑀓𑁄𑀯. 𑀲𑀘𑁂 𑀕𑀸𑀯𑀻 𑀓𑀩𑀭𑀸 𑀯𑀸 𑀭𑀢𑁆𑀢𑀸 𑀯𑀸, 𑀯𑀘𑁆𑀙𑁄𑀧𑀺 𑀢𑀸𑀤𑀺𑀲𑁄 𑀯𑀸𑀢𑀺 𑀏𑀯𑀁 𑀲𑀭𑀽𑀧𑀯𑀘𑁆𑀙𑀸𑀬. 𑀲𑁄 𑀏𑀯𑀫𑀸𑀳𑀸𑀢𑀺 𑀲𑁄 𑀭𑀸𑀚𑀸 𑀏𑀯𑀁 𑀯𑀤𑁂𑀢𑀺. 𑀯𑀘𑁆𑀙𑀢𑀭𑀸𑀢𑀺 𑀢𑀭𑀼𑀡𑀯𑀘𑁆𑀙𑀓𑀪𑀸𑀯𑀁 𑀅𑀢𑀺𑀓𑁆𑀓𑀦𑁆𑀢𑀸 𑀩𑀮𑀯𑀯𑀘𑁆𑀙𑀸. 𑀯𑀘𑁆𑀙𑀢𑀭𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀩𑀭𑀺𑀳𑀺𑀲𑀢𑁆𑀣𑀸𑀬𑀸𑀢𑀺 𑀧𑀭𑀺𑀓𑁆𑀔𑁂𑀧𑀓𑀭𑀡𑀢𑁆𑀣𑀸𑀬 𑀘𑁂𑀯 𑀬𑀜𑁆𑀜𑀪𑀽𑀫𑀺𑀬𑀁 𑀅𑀢𑁆𑀣𑀭𑀡𑀢𑁆𑀣𑀸𑀬 𑀘. 𑀲𑁂𑀲𑀁 𑀳𑁂𑀝𑁆𑀞𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀢𑁆𑀣𑀸𑀭𑀺𑀢𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀓𑀦𑁆𑀤𑀭𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀝𑁆𑀞𑀓𑀦𑀸𑀕𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭. 𑀏𑀯𑀁 ¶ 𑀫𑁂 𑀲𑀼𑀢𑀦𑁆𑀢𑀺 𑀅𑀝𑁆𑀞𑀓𑀦𑀸𑀕𑀭𑀲𑀼𑀢𑁆𑀢𑀁. 𑀢𑀢𑁆𑀣 𑀩𑁂𑀮𑀼𑀯𑀕𑀸𑀫𑀓𑁂𑀢𑀺 𑀯𑁂𑀲𑀸𑀮𑀺𑀬𑀸 𑀤𑀓𑁆𑀔𑀺𑀡𑀧𑀲𑁆𑀲𑁂 𑀅𑀯𑀺𑀤𑀽𑀭𑁂 𑀩𑁂𑀮𑀼𑀯𑀕𑀸𑀫𑀓𑁄 𑀦𑀸𑀫 𑀅𑀢𑁆𑀣𑀺, 𑀢𑀁 𑀕𑁄𑀘𑀭𑀕𑀸𑀫𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀤𑀲𑀫𑁄𑀢𑀺 ¶ 𑀲𑁄 𑀳𑀺 𑀚𑀸𑀢𑀺𑀕𑁄𑀢𑁆𑀢𑀯𑀲𑁂𑀦 𑀘𑁂𑀯 ¶ 𑀲𑀸𑀭𑀧𑁆𑀧𑀢𑁆𑀢𑀓𑀼𑀮𑀕𑀡𑀦𑀸𑀬 𑀘 𑀤𑀲𑀫𑁂 𑀞𑀸𑀦𑁂 𑀕𑀡𑀻𑀬𑀢𑀺, 𑀢𑁂𑀦𑀲𑁆𑀲 𑀤𑀲𑀫𑁄𑀢𑁆𑀯𑁂𑀯 𑀦𑀸𑀫𑀁 𑀚𑀸𑀢𑀁. 𑀅𑀝𑁆𑀞𑀓𑀦𑀸𑀕𑀭𑁄𑀢𑀺 𑀅𑀝𑁆𑀞𑀓𑀦𑀕𑀭𑀯𑀸𑀲𑀻. 𑀓𑀼𑀓𑁆𑀓𑀼𑀝𑀸𑀭𑀸𑀫𑁄𑀢𑀺 𑀓𑀼𑀓𑁆𑀓𑀼𑀝𑀲𑁂𑀝𑁆𑀞𑀺𑀦𑀸 𑀓𑀸𑀭𑀺𑀢𑁄 𑀆𑀭𑀸𑀫𑁄.

𑁧𑁮. 𑀢𑁂𑀦 𑀪𑀕𑀯𑀢𑀸…𑀧𑁂… 𑀅𑀓𑁆𑀔𑀸𑀢𑁄𑀢𑀺 𑀏𑀢𑁆𑀣 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄, 𑀬𑁄 𑀲𑁄 𑀪𑀕𑀯𑀸 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀓𑀺𑀮𑁂𑀲𑁂 𑀪𑀜𑁆𑀚𑀺𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀢𑁂𑀦 𑀪𑀕𑀯𑀢𑀸, 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀆𑀲𑀬𑀸𑀦𑀼𑀲𑀬𑀁 𑀚𑀸𑀦𑀢𑀸, 𑀳𑀢𑁆𑀣𑀢𑀮𑁂 𑀞𑀧𑀺𑀢𑀆𑀫𑀮𑀓𑀁 𑀯𑀺𑀬 𑀲𑀩𑁆𑀩𑀁 𑀜𑁂𑀬𑁆𑀬𑀥𑀫𑁆𑀫𑀁 𑀧𑀲𑁆𑀲𑀢𑀸. 𑀅𑀧𑀺𑀘 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀤𑀻𑀳𑀺 𑀚𑀸𑀦𑀢𑀸, 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀸, 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀙𑀳𑀺 𑀯𑀸 𑀧𑀦 𑀅𑀪𑀺𑀜𑁆𑀜𑀸𑀳𑀺 𑀚𑀸𑀦𑀢𑀸, 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑁂𑀦 𑀲𑀫𑀦𑁆𑀢𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀸, 𑀲𑀩𑁆𑀩𑀥𑀫𑁆𑀫𑀚𑀸𑀦𑀦𑀲𑀫𑀢𑁆𑀣𑀸𑀬 𑀧𑀜𑁆𑀜𑀸𑀬 𑀚𑀸𑀦𑀢𑀸, 𑀲𑀩𑁆𑀩𑀲𑀢𑁆𑀢𑀸𑀦𑀁 𑀘𑀓𑁆𑀔𑀼𑀯𑀺𑀲𑀬𑀸𑀢𑀻𑀢𑀸𑀦𑀺 𑀢𑀺𑀭𑁄𑀓𑀼𑀝𑁆𑀝𑀸𑀤𑀺𑀕𑀢𑀸𑀦𑀺𑀧𑀺 𑀭𑀽𑀧𑀸𑀦𑀺 𑀅𑀢𑀺𑀯𑀺𑀲𑀼𑀤𑁆𑀥𑁂𑀦 𑀫𑀁𑀲𑀘𑀓𑁆𑀔𑀼𑀦𑀸 𑀧𑀲𑁆𑀲𑀢𑀸, 𑀅𑀢𑁆𑀢𑀳𑀺𑀢𑀲𑀸𑀥𑀺𑀓𑀸𑀬 𑀲𑀫𑀸𑀥𑀺𑀧𑀤𑀝𑁆𑀞𑀸𑀦𑀸𑀬 𑀧𑀝𑀺𑀯𑁂𑀥𑀧𑀜𑁆𑀜𑀸𑀬 𑀚𑀸𑀦𑀢𑀸, 𑀧𑀭𑀳𑀺𑀢𑀲𑀸𑀥𑀺𑀓𑀸𑀬 𑀓𑀭𑀼𑀡𑀸𑀧𑀤𑀝𑁆𑀞𑀸𑀦𑀸𑀬 𑀤𑁂𑀲𑀦𑀸𑀧𑀜𑁆𑀜𑀸𑀬 𑀧𑀲𑁆𑀲𑀢𑀸, 𑀅𑀭𑀻𑀦𑀁 𑀳𑀢𑀢𑁆𑀢𑀸 𑀧𑀘𑁆𑀘𑀬𑀸𑀤𑀻𑀦𑀜𑁆𑀘 𑀅𑀭𑀳𑀢𑁆𑀢𑀸 𑀅𑀭𑀳𑀢𑀸, 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀲𑀘𑁆𑀘𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦. 𑀅𑀦𑁆𑀢𑀭𑀸𑀬𑀺𑀓𑀥𑀫𑁆𑀫𑁂 𑀯𑀸 𑀚𑀸𑀦𑀢𑀸, 𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑁂 𑀧𑀲𑁆𑀲𑀢𑀸, 𑀓𑀺𑀮𑁂𑀲𑀸𑀭𑀻𑀦𑀁 𑀳𑀢𑀢𑁆𑀢𑀸 𑀅𑀭𑀳𑀢𑀸, 𑀲𑀸𑀫𑀁 𑀲𑀩𑁆𑀩𑀥𑀫𑁆𑀫𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸𑀢𑀺 𑀏𑀯𑀁 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀲𑁂𑀦 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀣𑁄𑀫𑀺𑀢𑁂𑀦. 𑀅𑀢𑁆𑀣𑀺 𑀦𑀼 𑀔𑁄 𑀏𑀓𑁄 𑀥𑀫𑁆𑀫𑁄 𑀅𑀓𑁆𑀔𑀸𑀢𑁄𑀢𑀺.

𑁧𑁯. 𑀅𑀪𑀺𑀲𑀗𑁆𑀔𑀢𑀦𑁆𑀢𑀺 𑀓𑀢𑀁 𑀉𑀧𑁆𑀧𑀸𑀤𑀺𑀢𑀁. 𑀅𑀪𑀺𑀲𑀜𑁆𑀘𑁂𑀢𑀬𑀺𑀢𑀦𑁆𑀢𑀺 𑀘𑁂𑀢𑀬𑀺𑀢𑀁 𑀧𑀓𑀧𑁆𑀧𑀺𑀢𑀁. 𑀲𑁄 𑀢𑀢𑁆𑀣 𑀞𑀺𑀢𑁄𑀢𑀺 𑀲𑁄 𑀢𑀲𑁆𑀫𑀺𑀁 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂 𑀞𑀺𑀢𑁄. 𑀥𑀫𑁆𑀫𑀭𑀸𑀕𑁂𑀦 𑀥𑀫𑁆𑀫𑀦𑀦𑁆𑀤𑀺𑀬𑀸𑀢𑀺 𑀧𑀤𑀤𑁆𑀯𑀬𑁂𑀳𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀙𑀦𑁆𑀤𑀭𑀸𑀕𑁄 𑀯𑀼𑀢𑁆𑀢𑁄. 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 ¶ 𑀳𑀺 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀙𑀦𑁆𑀤𑀭𑀸𑀕𑀁 𑀧𑀭𑀺𑀬𑀸𑀤𑀺𑀬𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑁄 𑀅𑀭𑀳𑀸 𑀳𑁄𑀢𑀺, 𑀅𑀲𑀓𑁆𑀓𑁄𑀦𑁆𑀢𑁄 𑀅𑀦𑀸𑀕𑀸𑀫𑀻 𑀳𑁄𑀢𑀺. 𑀲𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀙𑀦𑁆𑀤𑀭𑀸𑀕𑀲𑁆𑀲 ¶ 𑀅𑀧𑁆𑀧𑀳𑀻𑀦𑀢𑁆𑀢𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑁂𑀢𑀦𑀸𑀬 𑀲𑀼𑀤𑁆𑀥𑀸𑀯𑀸𑀲𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀅𑀬𑀁 𑀆𑀘𑀭𑀺𑀬𑀸𑀦𑀁 𑀲𑀫𑀸𑀦𑀓𑀣𑀸.

𑀯𑀺𑀢𑀡𑁆𑀟𑀯𑀸𑀤𑀻 𑀧𑀦𑀸𑀳 ‘‘𑀢𑁂𑀦𑁂𑀯 𑀥𑀫𑁆𑀫𑀭𑀸𑀕𑁂𑀦𑀸𑀢𑀺 𑀯𑀘𑀦𑀢𑁄 𑀅𑀓𑀼𑀲𑀮𑁂𑀦 𑀲𑀼𑀤𑁆𑀥𑀸𑀯𑀸𑀲𑁂 𑀦𑀺𑀩𑁆𑀩𑀢𑁆𑀢𑀢𑀻’’𑀢𑀺 𑀲𑁄 ‘‘𑀲𑀼𑀢𑁆𑀢𑀁 𑀆𑀳𑀭𑀸’’𑀢𑀺 𑀯𑀢𑁆𑀢𑀩𑁆𑀩𑁄, 𑀅𑀤𑁆𑀥𑀸 𑀅𑀜𑁆𑀜𑀁 𑀅𑀧𑀲𑁆𑀲𑀦𑁆𑀢𑁄 𑀇𑀤𑀫𑁂𑀯 𑀆𑀳𑀭𑀺𑀲𑁆𑀲𑀢𑀺, 𑀢𑀢𑁄 𑀯𑀢𑁆𑀢𑀩𑁆𑀩𑁄 ‘‘𑀓𑀺𑀁 𑀧𑀦𑀺𑀤𑀁 𑀲𑀼𑀢𑁆𑀢𑀁 𑀦𑁂𑀬𑁆𑀬𑀢𑁆𑀣𑀁 𑀦𑀻𑀢𑀢𑁆𑀣’’𑀦𑁆𑀢𑀺, 𑀅𑀤𑁆𑀥𑀸 𑀦𑀻𑀢𑀢𑁆𑀣𑀦𑁆𑀢𑀺 𑀯𑀓𑁆𑀔𑀢𑀺. 𑀢𑀢𑁄 𑀯𑀢𑁆𑀢𑀩𑁆𑀩𑁄 𑁋 𑀏𑀯𑀁 𑀲𑀦𑁆𑀢𑁂 𑀅𑀦𑀸𑀕𑀸𑀫𑀺𑀨𑀮𑀢𑁆𑀣𑀺𑀓𑁂𑀦 ¶ 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀙𑀦𑁆𑀤𑀭𑀸𑀕𑁄 𑀓𑀢𑁆𑀢𑀩𑁆𑀩𑁄 𑀪𑀯𑀺𑀲𑁆𑀲𑀢𑀺, 𑀙𑀦𑁆𑀤𑀭𑀸𑀕𑁂 𑀉𑀧𑁆𑀧𑀸𑀤𑀺𑀢𑁂 𑀅𑀦𑀸𑀕𑀸𑀫𑀺𑀨𑀮𑀁 𑀧𑀝𑀺𑀯𑀺𑀤𑁆𑀥𑀁 𑀪𑀯𑀺𑀲𑁆𑀲𑀢𑀺 ‘‘𑀫𑀸 𑀲𑀼𑀢𑁆𑀢𑀁 𑀫𑁂 𑀮𑀤𑁆𑀥’’𑀦𑁆𑀢𑀺 𑀬𑀁 𑀯𑀸 𑀢𑀁 𑀯𑀸 𑀤𑀻𑀧𑁂𑀳𑀺. 𑀧𑀜𑁆𑀳𑀁 𑀓𑀣𑁂𑀦𑁆𑀢𑁂𑀦 𑀳𑀺 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑁂𑀢𑁆𑀯𑀸 𑀅𑀢𑁆𑀣𑀭𑀲𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺, 𑀅𑀓𑀼𑀲𑀮𑁂𑀦 𑀳𑀺 𑀲𑀕𑁆𑀕𑁂, 𑀓𑀼𑀲𑀮𑁂𑀦 𑀯𑀸 𑀅𑀧𑀸𑀬𑁂 𑀧𑀝𑀺𑀲𑀦𑁆𑀥𑀺 𑀦𑀸𑀫 𑀦𑀢𑁆𑀣𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀦, 𑀪𑀺𑀓𑁆𑀔𑀯𑁂, 𑀮𑁄𑀪𑀚𑁂𑀦 𑀓𑀫𑁆𑀫𑁂𑀦 𑀤𑁄𑀲𑀚𑁂𑀦 𑀓𑀫𑁆𑀫𑁂𑀦 𑀫𑁄𑀳𑀚𑁂𑀦 𑀓𑀫𑁆𑀫𑁂𑀦 𑀤𑁂𑀯𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀬𑀸 𑀯𑀸 𑀧𑀦𑀜𑁆𑀜𑀸𑀧𑀺 𑀓𑀸𑀘𑀺 𑀲𑀼𑀕𑀢𑀺𑀬𑁄, 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀮𑁄𑀪𑀚𑁂𑀦 𑀓𑀫𑁆𑀫𑁂𑀦 𑀤𑁄𑀲𑀚𑁂𑀦 𑀓𑀫𑁆𑀫𑁂𑀦 𑀫𑁄𑀳𑀚𑁂𑀦 𑀓𑀫𑁆𑀫𑁂𑀦 𑀦𑀺𑀭𑀬𑁄 𑀧𑀜𑁆𑀜𑀸𑀬𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀧𑀜𑁆𑀜𑀸𑀬𑀢𑀺, 𑀧𑁂𑀢𑁆𑀢𑀺𑀯𑀺𑀲𑀬𑁄 𑀧𑀜𑁆𑀜𑀸𑀬𑀢𑀺, 𑀬𑀸 𑀯𑀸 𑀧𑀦𑀜𑁆𑀜𑀸𑀧𑀺 𑀓𑀸𑀘𑀺 𑀤𑀼𑀕𑁆𑀕𑀢𑀺𑀬𑁄’’𑀢𑀺 𑁋

𑀏𑀯𑀁 𑀧𑀜𑁆𑀜𑀸𑀧𑁂𑀢𑀩𑁆𑀩𑁄. 𑀲𑀘𑁂 𑀲𑀜𑁆𑀚𑀸𑀦𑀸𑀢𑀺 𑀲𑀜𑁆𑀚𑀸𑀦𑀸𑀢𑀼, 𑀦𑁄 𑀘𑁂 𑀲𑀜𑁆𑀚𑀸𑀦𑀸𑀢𑀺, ‘‘𑀕𑀘𑁆𑀙 𑀧𑀸𑀢𑁄𑀯 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀬𑀸𑀕𑀼𑀁 𑀧𑀺𑀯𑀸𑀳𑀻’’𑀢𑀺 𑀉𑀬𑁆𑀬𑁄𑀚𑁂𑀢𑀩𑁆𑀩𑁄.

𑀬𑀣𑀸 𑀘 𑀧𑀦 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂, 𑀏𑀯𑀁 𑀫𑀳𑀸𑀫𑀸𑀮𑀼𑀓𑁆𑀬𑁄𑀯𑀸𑀤𑁂𑀧𑀺 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑁂𑀧𑀺 𑀓𑀸𑀬𑀕𑀢𑀸𑀲𑀢𑀺𑀲𑀼𑀢𑁆𑀢𑁂𑀧𑀺 𑀲𑀫𑀣𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸. 𑀢𑀢𑁆𑀣 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀫𑀣𑀯𑀲𑁂𑀦 𑀕𑀘𑁆𑀙𑀢𑁄𑀧𑀺 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀕𑀘𑁆𑀙𑀢𑁄𑀧𑀺 𑀲𑀫𑀣𑀥𑀼𑀭𑀫𑁂𑀯 𑀥𑀼𑀭𑀁, 𑀫𑀳𑀸𑀫𑀸𑀮𑀼𑀓𑁆𑀬𑁄𑀯𑀸𑀤𑁂 𑀯𑀺𑀧𑀲𑁆𑀲𑀦𑀸𑀯 𑀥𑀼𑀭𑀁, 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀁 𑀧𑀦 𑀯𑀺𑀧𑀲𑁆𑀲𑀦𑀼𑀢𑁆𑀢𑀭𑀁 ¶ 𑀦𑀸𑀫 𑀓𑀣𑀺𑀢𑀁, 𑀓𑀸𑀬𑀕𑀢𑀸𑀲𑀢𑀺𑀲𑀼𑀢𑁆𑀢𑀁 𑀲𑀫𑀣𑀼𑀢𑁆𑀢𑀭𑀦𑁆𑀢𑀺.

𑀅𑀬𑀁 𑀔𑁄 𑀕𑀳𑀧𑀢𑀺…𑀧𑁂… 𑀏𑀓𑀥𑀫𑁆𑀫𑁄 𑀅𑀓𑁆𑀔𑀸𑀢𑁄𑀢𑀺 𑀏𑀓𑀥𑀫𑁆𑀫𑀁 𑀧𑀼𑀘𑁆𑀙𑀺𑀢𑁂𑀦 𑀅𑀬𑀫𑁆𑀧𑀺 𑀏𑀓𑀥𑀫𑁆𑀫𑁄𑀢𑀺 𑀏𑀯𑀁 𑀧𑀼𑀘𑁆𑀙𑀸𑀯𑀲𑁂𑀦 𑀓𑀣𑀺𑀢𑀢𑁆𑀢𑀸 𑀏𑀓𑀸𑀤𑀲𑀧𑀺 𑀥𑀫𑁆𑀫𑀸 𑀏𑀓𑀥𑀫𑁆𑀫𑁄 𑀦𑀸𑀫 𑀚𑀸𑀢𑁄. 𑀫𑀳𑀸𑀲𑀓𑀼𑀮𑀼𑀤𑀸𑀬𑀺𑀲𑀼𑀢𑁆𑀢𑀲𑁆𑀫𑀺𑀜𑁆𑀳𑀺 ¶ 𑀏𑀓𑀽𑀦𑀯𑀻𑀲𑀢𑀺 𑀧𑀩𑁆𑀩𑀸𑀦𑀺 𑀧𑀝𑀺𑀧𑀤𑀸𑀯𑀲𑁂𑀦 𑀏𑀓𑀥𑀫𑁆𑀫𑁄 𑀦𑀸𑀫 𑀚𑀸𑀢𑀸𑀦𑀺, 𑀇𑀥 𑀏𑀓𑀸𑀤𑀲𑀧𑀼𑀘𑁆𑀙𑀸𑀯𑀲𑁂𑀦 𑀏𑀓𑀥𑀫𑁆𑀫𑁄𑀢𑀺 𑀆𑀕𑀢𑀸𑀦𑀺. 𑀅𑀫𑀢𑀼𑀧𑁆𑀧𑀢𑁆𑀢𑀺𑀬𑀢𑁆𑀣𑁂𑀦 𑀯𑀸 𑀲𑀩𑁆𑀩𑀸𑀦𑀺𑀧𑀺 𑀏𑀓𑀥𑀫𑁆𑀫𑁄𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑁨𑁧. 𑀦𑀺𑀥𑀺𑀫𑀼𑀔𑀁 𑀕𑀯𑁂𑀲𑀦𑁆𑀢𑁄𑀢𑀺 𑀦𑀺𑀥𑀺𑀁 𑀧𑀭𑀺𑀬𑁂𑀲𑀦𑁆𑀢𑁄. 𑀲𑀓𑀺𑀤𑁂𑀯𑀸𑀢𑀺 𑀏𑀓𑀧𑀬𑁄𑀕𑁂𑀦. 𑀓𑀣𑀁 𑀧𑀦 𑀏𑀓𑀧𑀬𑁄𑀕𑁂𑀦𑁂𑀯 𑀏𑀓𑀸𑀤𑀲𑀦𑁆𑀦𑀁 𑀦𑀺𑀥𑀻𑀦𑀁 𑀅𑀥𑀺𑀕𑀫𑁄 𑀳𑁄𑀢𑀻𑀢𑀺. 𑀇𑀥𑁂𑀓𑀘𑁆𑀘𑁄 𑀅𑀭𑀜𑁆𑀜𑁂 𑀦𑀺𑀥𑀺𑀁 𑀕𑀯𑁂𑀲𑀫𑀸𑀦𑁄 𑀘𑀭𑀢𑀺, 𑀢𑀫𑁂𑀦𑀁 𑀅𑀜𑁆𑀜𑀢𑀭𑁄 𑀅𑀢𑁆𑀣𑀘𑀭𑀓𑁄 𑀤𑀺𑀲𑁆𑀯𑀸 ‘‘𑀓𑀺𑀁 𑀪𑁄 𑀘𑀭𑀲𑀻’’𑀢𑀺 𑀧𑀼𑀘𑁆𑀙𑀢𑀺. 𑀲𑁄 ‘‘𑀚𑀻𑀯𑀺𑀢𑀯𑀼𑀢𑁆𑀢𑀺𑀁 𑀧𑀭𑀺𑀬𑁂𑀲𑀸𑀫𑀻’’𑀢𑀺 ¶ 𑀆𑀳. 𑀇𑀢𑀭𑁄 ‘‘𑀢𑁂𑀦 𑀳𑀺 𑀲𑀫𑁆𑀫 𑀆𑀕𑀘𑁆𑀙, 𑀏𑀢𑀁 𑀧𑀸𑀲𑀸𑀡𑀁 𑀧𑀯𑀢𑁆𑀢𑁂𑀳𑀻’’𑀢𑀺 𑀆𑀳. 𑀲𑁄 𑀢𑀁 𑀧𑀯𑀢𑁆𑀢𑁂𑀢𑁆𑀯𑀸 𑀉𑀧𑀭𑀽𑀧𑀭𑀺 𑀞𑀧𑀺𑀢𑀸 𑀯𑀸 𑀓𑀼𑀘𑁆𑀙𑀺𑀬𑀸 𑀓𑀼𑀘𑁆𑀙𑀺𑀁 𑀆𑀳𑀘𑁆𑀘 𑀞𑀺𑀢𑀸 𑀯𑀸 𑀏𑀓𑀸𑀤𑀲 𑀓𑀼𑀫𑁆𑀪𑀺𑀬𑁄 𑀧𑀲𑁆𑀲𑁂𑀬𑁆𑀬, 𑀏𑀯𑀁 𑀏𑀓𑀧𑀬𑁄𑀕𑁂𑀦 𑀏𑀓𑀸𑀤𑀲𑀦𑁆𑀦𑀁 𑀦𑀺𑀥𑀻𑀦𑀁 𑀅𑀥𑀺𑀕𑀫𑁄 𑀳𑁄𑀢𑀺.

𑀆𑀘𑀭𑀺𑀬𑀥𑀦𑀁 𑀧𑀭𑀺𑀬𑁂𑀲𑀺𑀲𑁆𑀲𑀦𑁆𑀢𑀻𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀳𑀺 𑀬𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀦𑁆𑀢𑀺, 𑀢𑀲𑁆𑀲 𑀲𑀺𑀧𑁆𑀧𑀼𑀕𑁆𑀕𑀳𑀡𑀢𑁄 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸 𑀅𑀦𑁆𑀢𑀭𑀦𑁆𑀢𑀭𑁂 𑀯𑀸 𑀕𑁂𑀳𑀢𑁄 𑀦𑀻𑀳𑀭𑀺𑀢𑁆𑀯𑀸 𑀥𑀦𑀁 𑀤𑁂𑀦𑁆𑀢𑀺. 𑀬𑁂𑀲𑀁 𑀕𑁂𑀳𑁂 𑀦𑀢𑁆𑀣𑀺, 𑀢𑁂 𑀜𑀸𑀢𑀺𑀲𑀪𑀸𑀕𑀢𑁄 𑀧𑀭𑀺𑀬𑁂𑀲𑀦𑁆𑀢𑀺, 𑀢𑀣𑀸 𑀅𑀮𑀪𑀫𑀸𑀦𑀸 𑀪𑀺𑀓𑁆𑀔𑀫𑁆𑀧𑀺 𑀘𑀭𑀺𑀢𑁆𑀯𑀸 𑀤𑁂𑀦𑁆𑀢𑀺𑀬𑁂𑀯. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀓𑀺𑀫𑀗𑁆𑀕𑀁 𑀧𑀦𑀸𑀳𑀦𑁆𑀢𑀺 𑀩𑀸𑀳𑀺𑀭𑀓𑀸 𑀢𑀸𑀯 𑀅𑀦𑀺𑀬𑁆𑀬𑀸𑀦𑀺𑀓𑁂𑀧𑀺 𑀲𑀸𑀲𑀦𑁂 𑀲𑀺𑀧𑁆𑀧𑀫𑀢𑁆𑀢𑀤𑀸𑀬𑀓𑀲𑁆𑀲 𑀥𑀦𑀁 𑀧𑀭𑀺𑀬𑁂𑀲𑀦𑁆𑀢𑀺; 𑀅𑀳𑀁 𑀧𑀦 𑀏𑀯𑀁𑀯𑀺𑀥𑁂 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀏𑀓𑀸𑀤𑀲𑀯𑀺𑀥𑀁 𑀅𑀫𑀢𑀼𑀧𑁆𑀧𑀢𑁆𑀢𑀺𑀧𑀝𑀺𑀧𑀤𑀁 𑀤𑁂𑀲𑁂𑀦𑁆𑀢𑀲𑁆𑀲 𑀆𑀘𑀭𑀺𑀬𑀲𑁆𑀲 𑀧𑀽𑀚𑀁 𑀓𑀺𑀁 𑀦 𑀓𑀭𑀺𑀲𑁆𑀲𑀸𑀫𑀺, 𑀓𑀭𑀺𑀲𑁆𑀲𑀸𑀫𑀺𑀬𑁂𑀯𑀸𑀢𑀺 𑀯𑀤𑀢𑀺. 𑀧𑀘𑁆𑀘𑁂𑀓𑀤𑀼𑀲𑁆𑀲𑀬𑀼𑀕𑁂𑀦 ¶ 𑀅𑀘𑁆𑀙𑀸𑀤𑁂𑀲𑀻𑀢𑀺 𑀏𑀓𑀫𑁂𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀏𑀓𑁂𑀓𑀁 𑀤𑀼𑀲𑁆𑀲𑀬𑀼𑀕𑀫𑀤𑀸𑀲𑀻𑀢𑀺 𑀅𑀢𑁆𑀣𑁄. 𑀲𑀫𑀼𑀤𑀸𑀘𑀸𑀭𑀯𑀘𑀦𑀁 𑀧𑀦𑁂𑀢𑁆𑀣 𑀏𑀯𑀭𑀽𑀧𑀁 𑀳𑁄𑀢𑀺, 𑀢𑀲𑁆𑀫𑀸 𑀅𑀘𑁆𑀙𑀸𑀤𑁂𑀲𑀻𑀢𑀺 𑀯𑀼𑀢𑁆𑀢𑀁. 𑀧𑀜𑁆𑀘𑀲𑀢𑀯𑀺𑀳𑀸𑀭𑀦𑁆𑀢𑀺 𑀧𑀜𑁆𑀘𑀲𑀢𑀕𑁆𑀖𑀦𑀺𑀓𑀁 𑀧𑀡𑁆𑀡𑀲𑀸𑀮𑀁 𑀓𑀸𑀭𑁂𑀲𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀅𑀝𑁆𑀞𑀓𑀦𑀸𑀕𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑁂𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨. 𑀏𑀯𑀁 ¶ 𑀫𑁂 𑀲𑀼𑀢𑀦𑁆𑀢𑀺 𑀲𑁂𑀔𑀲𑀼𑀢𑁆𑀢𑀁. 𑀢𑀢𑁆𑀣 𑀦𑀯𑀁 𑀲𑀦𑁆𑀣𑀸𑀕𑀸𑀭𑀦𑁆𑀢𑀺 𑀅𑀥𑀼𑀦𑀸 𑀓𑀸𑀭𑀺𑀢𑀁 𑀲𑀦𑁆𑀣𑀸𑀕𑀸𑀭𑀁, 𑀏𑀓𑀸 𑀫𑀳𑀸𑀲𑀸𑀮𑀸𑀢𑀺 𑀅𑀢𑁆𑀣𑁄. 𑀉𑀬𑁆𑀬𑁄𑀕𑀓𑀸𑀮𑀸𑀤𑀻𑀲𑀼 𑀳𑀺 𑀭𑀸𑀚𑀸𑀦𑁄 𑀢𑀢𑁆𑀣 𑀞𑀢𑁆𑀯𑀸 ‘‘𑀏𑀢𑁆𑀢𑀓𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀼, 𑀏𑀢𑁆𑀢𑀓𑀸 𑀧𑀘𑁆𑀙𑀸, 𑀏𑀢𑁆𑀢𑀓𑀸 𑀉𑀪𑁄𑀳𑀺 𑀧𑀲𑁆𑀲𑁂𑀳𑀺, 𑀏𑀢𑁆𑀢𑀓𑀸 𑀳𑀢𑁆𑀣𑀻𑀲𑀼 𑀅𑀪𑀺𑀭𑀼𑀳𑀦𑁆𑀢𑀼, 𑀏𑀢𑁆𑀢𑀓𑀸 𑀅𑀲𑁆𑀲𑁂𑀲𑀼, 𑀏𑀢𑁆𑀢𑀓𑀸 𑀭𑀣𑁂𑀲𑀼 𑀢𑀺𑀝𑁆𑀞𑀦𑁆𑀢𑀽’’𑀢𑀺 𑀏𑀯𑀁 𑀲𑀦𑁆𑀣𑀁 𑀓𑀭𑁄𑀦𑁆𑀢𑀺, 𑀫𑀭𑀺𑀬𑀸𑀤𑀁 𑀩𑀦𑁆𑀥𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀞𑀸𑀦𑀁 𑀲𑀦𑁆𑀣𑀸𑀕𑀸𑀭𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀉𑀬𑁆𑀬𑁄𑀕𑀝𑁆𑀞𑀸𑀦𑀢𑁄 𑀘 𑀆𑀕𑀦𑁆𑀢𑁆𑀯𑀸 𑀬𑀸𑀯 𑀕𑁂𑀳𑁂𑀲𑀼 𑀅𑀮𑁆𑀮𑀕𑁄𑀫𑀬𑀧𑀭𑀺𑀪𑀡𑁆𑀟𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀢𑀸𑀯 𑀤𑁆𑀯𑁂 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀢𑁂 𑀭𑀸𑀚𑀸𑀦𑁄 𑀢𑀢𑁆𑀣 𑀲𑀦𑁆𑀣𑀫𑁆𑀪𑀦𑁆𑀢𑀻𑀢𑀺𑀧𑀺 𑀲𑀦𑁆𑀣𑀸𑀕𑀸𑀭𑀁. 𑀢𑁂𑀲𑀁 𑀭𑀸𑀚𑀽𑀦𑀁 𑀲𑀳 𑀅𑀢𑁆𑀣𑀸𑀦𑀼𑀲𑀸𑀲𑀦𑀁 𑀅𑀕𑀸𑀭𑀦𑁆𑀢𑀺𑀧𑀺 𑀲𑀦𑁆𑀣𑀸𑀕𑀸𑀭𑀁 𑀕𑀡𑀭𑀸𑀚𑀸𑀦𑁄 𑀳𑀺 𑀢𑁂 ¶ , 𑀢𑀲𑁆𑀫𑀸 𑀉𑀧𑁆𑀧𑀦𑁆𑀦𑀓𑀺𑀘𑁆𑀘𑀁 𑀏𑀓𑀲𑁆𑀲 𑀯𑀲𑁂𑀦 𑀦 𑀙𑀺𑀚𑁆𑀚𑀢𑀺, 𑀲𑀩𑁆𑀩𑁂𑀲𑀁 𑀙𑀦𑁆𑀤𑁄 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀲𑀩𑁆𑀩𑁂 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀦𑀼𑀲𑀸𑀲𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀳 𑀅𑀢𑁆𑀣𑀸𑀦𑀼𑀲𑀸𑀲𑀦𑀁 𑀅𑀕𑀸𑀭𑀦𑁆𑀢𑀺𑀧𑀺 𑀲𑀦𑁆𑀣𑀸𑀕𑀸𑀭’’𑀦𑁆𑀢𑀺. 𑀬𑀲𑁆𑀫𑀸 𑀧𑀦𑁂𑀢𑁂 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀓𑀲𑀺𑀢𑀼𑀁 𑀯𑀝𑁆𑀝𑀢𑀺, 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀯𑀧𑀺𑀢𑀼’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀖𑀭𑀸𑀯𑀸𑀲𑀓𑀺𑀘𑁆𑀘𑀸𑀦𑀺 𑀲𑀫𑁆𑀫𑀦𑁆𑀢𑀬𑀦𑁆𑀢𑀺, 𑀢𑀲𑁆𑀫𑀸 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁 ¶ 𑀖𑀭𑀸𑀯𑀸𑀲𑀁 𑀢𑀢𑁆𑀣 𑀲𑀦𑁆𑀣𑀭𑀦𑁆𑀢𑀻𑀢𑀺𑀧𑀺 𑀲𑀦𑁆𑀣𑀸𑀕𑀸𑀭𑀁. 𑀅𑀘𑀺𑀭𑀓𑀸𑀭𑀺𑀢𑀁 𑀳𑁄𑀢𑀻𑀢𑀺 𑀓𑀝𑁆𑀞𑀓𑀫𑁆𑀫-𑀲𑀺𑀮𑀸𑀓𑀫𑁆𑀫-𑀘𑀺𑀢𑁆𑀢𑀓𑀫𑁆𑀫𑀸𑀤𑀺𑀯𑀲𑁂𑀦 𑀲𑀼𑀲𑀚𑁆𑀚𑀺𑀢𑀁 𑀤𑁂𑀯𑀯𑀺𑀫𑀸𑀦𑀁 𑀯𑀺𑀬 𑀅𑀥𑀼𑀦𑀸 𑀦𑀺𑀝𑁆𑀞𑀸𑀧𑀺𑀢𑀁. 𑀲𑀫𑀡𑁂𑀦 𑀯𑀸𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀖𑀭𑀯𑀢𑁆𑀣𑀼𑀧𑀭𑀺𑀕𑁆𑀕𑀳𑀓𑀸𑀮𑁂𑀬𑁂𑀯 𑀤𑁂𑀯𑀢𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀡𑁆𑀳𑀦𑁆𑀢𑀺, 𑀢𑀲𑁆𑀫𑀸 ‘‘𑀤𑁂𑀯𑁂𑀦 𑀯𑀸’’𑀢𑀺 𑀅𑀯𑀢𑁆𑀯𑀸 ‘‘𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀓𑁂𑀦𑀘𑀺 𑀯𑀸 𑀫𑀦𑀼𑀲𑁆𑀲𑀪𑀽𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀽𑀢𑀺 𑀲𑀦𑁆𑀣𑀸𑀕𑀸𑀭𑀁 𑀦𑀺𑀝𑁆𑀞𑀺𑀢𑀦𑁆𑀢𑀺 𑀲𑀼𑀢𑁆𑀯𑀸 ‘‘𑀕𑀘𑁆𑀙𑀸𑀫, 𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀇𑀤𑀁 𑀲𑀦𑁆𑀣𑀸𑀕𑀸𑀭𑀁 𑀤𑁂𑀯𑀯𑀺𑀫𑀸𑀦𑀲𑀤𑀺𑀲𑀁 𑀅𑀢𑀺𑀯𑀺𑀬 𑀫𑀦𑁄𑀭𑀫𑀁 𑀲𑀲𑁆𑀲𑀺𑀭𑀺𑀓𑀁 𑀓𑁂𑀦 𑀧𑀞𑀫𑀁 𑀧𑀭𑀺𑀪𑀼𑀢𑁆𑀢𑀁 𑀅𑀫𑁆𑀳𑀸𑀓𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀅𑀲𑁆𑀲𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀜𑀸𑀢𑀺𑀲𑁂𑀝𑁆𑀞𑀲𑁆𑀲 𑀧𑀞𑀫𑀁 𑀤𑀺𑀬𑁆𑀬𑀫𑀸𑀦𑁂𑀧𑀺 𑀲𑀢𑁆𑀣𑀼𑀦𑁄𑀯 𑀅𑀦𑀼𑀘𑁆𑀙𑀯𑀺𑀓𑀁, 𑀤𑀓𑁆𑀔𑀺𑀡𑁂𑀬𑁆𑀬𑀯𑀲𑁂𑀦 𑀤𑀺𑀬𑁆𑀬𑀫𑀸𑀦𑁂𑀧𑀺 𑀲𑀢𑁆𑀣𑀼𑀦𑁄𑀯 𑀅𑀦𑀼𑀘𑁆𑀙𑀯𑀺𑀓𑀁, 𑀢𑀲𑁆𑀫𑀸 𑀧𑀞𑀫𑀁 𑀲𑀢𑁆𑀣𑀸𑀭𑀁 𑀧𑀭𑀺𑀪𑀼𑀜𑁆𑀚𑀸𑀧𑁂𑀲𑁆𑀲𑀸𑀫, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀕𑀫𑀦𑀁 𑀓𑀭𑀺𑀲𑁆𑀲𑀸𑀫, 𑀪𑀺𑀓𑁆𑀔𑀼𑀲𑀗𑁆𑀖𑁂 𑀆𑀕𑀢𑁂 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀆𑀕𑀢𑀫𑁂𑀯 𑀪𑀯𑀺𑀲𑁆𑀲𑀢𑀺, 𑀲𑀢𑁆𑀣𑀸𑀭𑀁 𑀢𑀺𑀬𑀸𑀫𑀭𑀢𑁆𑀢𑀺𑀁 𑀅𑀫𑁆𑀳𑀸𑀓𑀁 𑀥𑀫𑁆𑀫𑀓𑀣𑀁 𑀓𑀣𑀸𑀧𑁂𑀲𑁆𑀲𑀸𑀫, 𑀇𑀢𑀺 𑀢𑀻𑀳𑀺 𑀭𑀢𑀦𑁂𑀳𑀺 𑀧𑀭𑀺𑀪𑀼𑀢𑁆𑀢𑀁 𑀫𑀬𑀁 𑀧𑀘𑁆𑀙𑀸 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫 ¶ , 𑀏𑀯𑀁 𑀦𑁄 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀁𑀲𑀼.

𑀬𑁂𑀦 𑀲𑀦𑁆𑀣𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀽𑀢𑀺 𑀢𑀁 𑀤𑀺𑀯𑀲𑀁 𑀓𑀺𑀭 𑀲𑀦𑁆𑀣𑀸𑀕𑀸𑀭𑀁 𑀓𑀺𑀜𑁆𑀘𑀸𑀧𑀺 𑀭𑀸𑀚𑀓𑀼𑀮𑀸𑀦𑀁 𑀤𑀲𑁆𑀲𑀦𑀢𑁆𑀣𑀸𑀬 𑀤𑁂𑀯𑀯𑀺𑀫𑀸𑀦𑀁 𑀯𑀺𑀬 𑀲𑀼𑀲𑀚𑁆𑀚𑀺𑀢𑀁 𑀳𑁄𑀢𑀺 𑀲𑀼𑀧𑀝𑀺𑀚𑀕𑁆𑀕𑀺𑀢𑀁, 𑀩𑀼𑀤𑁆𑀥𑀸𑀭𑀳𑀁 𑀧𑀦 𑀓𑀢𑁆𑀯𑀸 𑀅𑀧𑁆𑀧𑀜𑁆𑀜𑀢𑁆𑀢𑀁. 𑀩𑀼𑀤𑁆𑀥𑀸 𑀳𑀺 𑀦𑀸𑀫 𑀅𑀭𑀜𑁆𑀜𑀚𑁆𑀛𑀸𑀲𑀬𑀸 𑀅𑀭𑀜𑁆𑀜𑀸𑀭𑀸𑀫𑀸 𑀅𑀦𑁆𑀢𑁄𑀕𑀸𑀫𑁂 𑀯𑀲𑁂𑀬𑁆𑀬𑀼𑀁 𑀯𑀸 𑀦𑁄 𑀯𑀸, 𑀢𑀲𑁆𑀫𑀸 𑀪𑀕𑀯𑀢𑁄 𑀫𑀦𑀁 ¶ 𑀚𑀸𑀦𑀺𑀢𑁆𑀯𑀸𑀯 𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀸𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀁𑀲𑀼. 𑀇𑀤𑀸𑀦𑀺 𑀧𑀦 𑀫𑀦𑀁 𑀮𑀪𑀺𑀢𑁆𑀯𑀸 𑀧𑀜𑁆𑀜𑀸𑀧𑁂𑀢𑀼𑀓𑀸𑀫𑀸 𑀬𑁂𑀦 𑀲𑀦𑁆𑀣𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼.

𑀲𑀩𑁆𑀩𑀲𑀦𑁆𑀣𑀭𑀺𑀁 𑀲𑀦𑁆𑀣𑀸𑀕𑀸𑀭𑀁 𑀲𑀦𑁆𑀣𑀭𑀺𑀢𑁆𑀯𑀸𑀢𑀺 𑀬𑀣𑀸 𑀲𑀩𑁆𑀩𑀫𑁂𑀯 𑀲𑀦𑁆𑀣𑀢𑀁 𑀳𑁄𑀢𑀺, 𑀏𑀯𑀁 𑀢𑀁 𑀲𑀦𑁆𑀣𑀭𑀸𑀧𑁂𑀢𑁆𑀯𑀸. 𑀲𑀩𑁆𑀩𑀧𑀞𑀫𑀁 𑀢𑀸𑀯 ‘‘𑀕𑁄𑀫𑀬𑀁 𑀦𑀸𑀫 𑀲𑀩𑁆𑀩𑀫𑀗𑁆𑀕𑀮𑁂𑀲𑀼 𑀯𑀝𑁆𑀝𑀢𑀻’’𑀢𑀺 ¶ 𑀲𑀼𑀥𑀸𑀧𑀭𑀺𑀓𑀫𑁆𑀫𑀓𑀢𑀫𑁆𑀧𑀺 𑀪𑀽𑀫𑀺𑀁 𑀅𑀮𑁆𑀮𑀕𑁄𑀫𑀬𑁂𑀦 𑀑𑀧𑀼𑀜𑁆𑀙𑀸𑀧𑁂𑀢𑁆𑀯𑀸 𑀧𑀭𑀺𑀲𑀼𑀓𑁆𑀔𑀪𑀸𑀯𑀁 𑀜𑀢𑁆𑀯𑀸 𑀬𑀣𑀸 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑁂 𑀧𑀤𑀁 𑀦 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀘𑀢𑀼𑀚𑁆𑀚𑀸𑀢𑀺𑀬𑀕𑀦𑁆𑀥𑁂𑀳𑀺 𑀮𑀺𑀫𑁆𑀧𑀸𑀧𑁂𑀢𑁆𑀯𑀸 𑀉𑀧𑀭𑀺 𑀦𑀸𑀦𑀸𑀯𑀡𑁆𑀡𑁂 𑀓𑀝𑀲𑀸𑀭𑀓𑁂 𑀲𑀦𑁆𑀣𑀭𑀺𑀢𑁆𑀯𑀸 𑀢𑁂𑀲𑀁 𑀉𑀧𑀭𑀺 𑀫𑀳𑀸𑀧𑀺𑀝𑁆𑀞𑀺𑀓𑀓𑁄𑀚𑀯𑀓𑁂 𑀆𑀤𑀺𑀁 𑀓𑀢𑁆𑀯𑀸 𑀳𑀢𑁆𑀣𑀢𑁆𑀣𑀭𑀓-𑀅𑀲𑁆𑀲𑀢𑁆𑀣𑀭𑀓-𑀲𑀻𑀳𑀢𑁆𑀣𑀭𑀓-𑀩𑁆𑀬𑀕𑁆𑀖𑀢𑁆𑀣𑀭𑀓-𑀘𑀦𑁆𑀤𑀢𑁆𑀣𑀭𑀓-𑀲𑀽𑀭𑀺𑀬𑀢𑁆𑀣𑀭𑀓-𑀘𑀺𑀢𑁆𑀢𑀢𑁆𑀣𑀭𑀓𑀸𑀤𑀻𑀳𑀺 𑀦𑀸𑀦𑀸𑀯𑀡𑁆𑀡𑁂𑀳𑀺 𑀅𑀢𑁆𑀣𑀭𑀡𑁂𑀳𑀺 𑀲𑀦𑁆𑀣𑀭𑀺𑀢𑀩𑁆𑀩𑀓𑀬𑀼𑀢𑁆𑀢𑀁 𑀲𑀩𑁆𑀩𑁄𑀓𑀸𑀲𑀁 𑀲𑀦𑁆𑀣𑀭𑀸𑀧𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀲𑀦𑁆𑀣𑀭𑀺𑀁 𑀲𑀦𑁆𑀣𑀸𑀕𑀸𑀭𑀁 𑀲𑀦𑁆𑀣𑀭𑀺𑀢𑁆𑀯𑀸’’𑀢𑀺.

𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀫𑀚𑁆𑀛𑀝𑁆𑀞𑀸𑀦𑁂 𑀢𑀸𑀯 𑀫𑀗𑁆𑀕𑀮𑀢𑁆𑀣𑀫𑁆𑀪𑀁 𑀦𑀺𑀲𑁆𑀲𑀸𑀬 𑀫𑀳𑀸𑀭𑀳𑀁 𑀩𑀼𑀤𑁆𑀥𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑀢𑁆𑀣 𑀬𑀁 𑀬𑀁 𑀫𑀼𑀤𑀼𑀓𑀜𑁆𑀘 𑀫𑀦𑁄𑀭𑀫𑀜𑁆𑀘 𑀧𑀘𑁆𑀘𑀢𑁆𑀣𑀭𑀡𑀁, 𑀢𑀁 𑀢𑀁 𑀧𑀘𑁆𑀘𑀢𑁆𑀣𑀭𑀺𑀢𑁆𑀯𑀸 𑀪𑀕𑀯𑀢𑁄 𑀮𑁄𑀳𑀺𑀢𑀓𑀁 𑀫𑀦𑀼𑀜𑁆𑀜𑀤𑀲𑁆𑀲𑀦𑀁 𑀉𑀧𑀥𑀸𑀦𑀁 𑀉𑀧𑀤𑀳𑀺𑀢𑁆𑀯𑀸 𑀉𑀧𑀭𑀺 𑀲𑀼𑀯𑀡𑁆𑀡𑀭𑀚𑀢𑀢𑀸𑀭𑀓𑀯𑀺𑀘𑀺𑀢𑁆𑀢𑀁 𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀕𑀦𑁆𑀥𑀤𑀸𑀫𑀧𑀼𑀧𑁆𑀨𑀤𑀸𑀫𑀧𑀢𑁆𑀢𑀤𑀸𑀫𑀸𑀤𑀻𑀳𑀺 𑀧𑀘𑁆𑀘𑀢𑁆𑀣𑀭𑀡𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀫𑀦𑁆𑀢𑀸 𑀤𑁆𑀯𑀸𑀤𑀲𑀳𑀢𑁆𑀣𑀝𑁆𑀞𑀸𑀦𑁂 𑀧𑀼𑀧𑁆𑀨𑀚𑀸𑀮𑀁 𑀓𑀭𑀺𑀢𑁆𑀯𑀸 𑀢𑀺𑀁𑀲𑀳𑀢𑁆𑀣𑀫𑀢𑁆𑀢𑀁 𑀞𑀸𑀦𑀁 𑀧𑀝𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 ¶ 𑀧𑀘𑁆𑀙𑀺𑀫𑀪𑀺𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀮𑁆𑀮𑀗𑁆𑀓𑀧𑀻𑀞-𑀅𑀧𑀲𑁆𑀲𑀬𑀧𑀻𑀞-𑀫𑀼𑀡𑁆𑀟𑀧𑀻𑀞𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀉𑀧𑀭𑀺 𑀲𑁂𑀢𑀧𑀘𑁆𑀘𑀢𑁆𑀣𑀭𑀡𑁂𑀳𑀺 𑀧𑀘𑁆𑀘𑀢𑁆𑀣𑀭𑀸𑀧𑁂𑀢𑁆𑀯𑀸 𑀧𑀸𑀘𑀻𑀦𑀪𑀺𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀫𑀳𑀸𑀧𑀺𑀝𑁆𑀞𑀺𑀓𑀓𑁄𑀚𑀯𑀓𑁂 𑀧𑀜𑁆𑀜𑀸𑀧𑁂𑀢𑁆𑀯𑀸 𑀳𑀁𑀲𑀮𑁄𑀫𑀸𑀤𑀺𑀧𑀽𑀭𑀺𑀢𑀸𑀦𑀺 𑀉𑀧𑀥𑀸𑀦𑀸𑀦𑀺 𑀞𑀧𑀸𑀧𑁂𑀲𑀼𑀁 ‘‘𑀏𑀯𑀁 𑀅𑀓𑀺𑀮𑀫𑀫𑀸𑀦𑀸 𑀲𑀩𑁆𑀩𑀭𑀢𑁆𑀢𑀺𑀁 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀸’’𑀢𑀺. 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸’’𑀢𑀺.

𑀉𑀤𑀓𑀫𑀡𑀺𑀓𑀦𑁆𑀢𑀺 ¶ 𑀫𑀳𑀸𑀓𑀼𑀘𑁆𑀙𑀺𑀓𑀁 𑀉𑀤𑀓𑀘𑀸𑀝𑀺𑀁. 𑀉𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀏𑀯𑀁 𑀪𑀕𑀯𑀸 𑀘 𑀪𑀺𑀓𑁆𑀔𑀼𑀲𑀗𑁆𑀖𑁄 𑀘 𑀬𑀣𑀸𑀭𑀼𑀘𑀺𑀬𑀸 𑀳𑀢𑁆𑀣𑁂 𑀯𑀸 𑀥𑁄𑀯𑀺𑀲𑁆𑀲𑀦𑁆𑀢𑀺 𑀧𑀸𑀤𑁂 𑀯𑀸, 𑀫𑀼𑀔𑀁 𑀯𑀸 𑀯𑀺𑀓𑁆𑀔𑀸𑀮𑁂𑀲𑁆𑀲𑀦𑁆𑀢𑀻𑀢𑀺 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀫𑀡𑀺𑀯𑀡𑁆𑀡𑀲𑁆𑀲 𑀉𑀤𑀓𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸 𑀯𑀸𑀲𑀢𑁆𑀣𑀸𑀬 𑀦𑀸𑀦𑀸𑀧𑀼𑀧𑁆𑀨𑀸𑀦𑀺 𑀘𑁂𑀯 𑀉𑀤𑀓𑀯𑀸𑀲𑀘𑀼𑀡𑁆𑀡𑀸𑀦𑀺 𑀘 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀤𑀮𑀺𑀧𑀡𑁆𑀡𑁂𑀳𑀺 𑀧𑀺𑀤𑀳𑀺𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑁂𑀲𑀼𑀁. 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀉𑀧𑀝𑁆𑀞𑀧𑁂𑀢𑁆𑀯𑀸’’𑀢𑀺.

𑀢𑁂𑀮𑀧𑁆𑀧𑀤𑀻𑀧𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 𑀭𑀚𑀢𑀲𑀼𑀯𑀡𑁆𑀡𑀸𑀤𑀺𑀫𑀬𑀤𑀡𑁆𑀟𑀸𑀲𑀼 𑀤𑀻𑀧𑀺𑀓𑀸𑀲𑀼 𑀬𑁄𑀦𑀓𑀭𑀽𑀧𑀓𑀺𑀭𑀸𑀢𑀭𑀽𑀧𑀓𑀸𑀤𑀻𑀦𑀁 𑀳𑀢𑁆𑀣𑁂 𑀞𑀧𑀺𑀢𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀫𑀬𑀓𑀧𑀮𑁆𑀮𑀓𑀸𑀤𑀻𑀲𑀼 𑀘 𑀢𑁂𑀮𑀧𑁆𑀧𑀤𑀻𑀧𑀁 𑀚𑀮𑀬𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀽𑀢𑀺 𑀏𑀢𑁆𑀣 𑀧𑀦 𑀢𑁂 𑀲𑀓𑁆𑀬𑀭𑀸𑀚𑀸𑀦𑁄 𑀦 𑀓𑁂𑀯𑀮𑀁 𑀲𑀦𑁆𑀣𑀸𑀕𑀸𑀭𑀫𑁂𑀯, 𑀅𑀣 𑀔𑁄 𑀬𑁄𑀚𑀦𑀸𑀯𑀝𑁆𑀝𑁂 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀕𑀭𑀯𑀻𑀣𑀺𑀬𑁄𑀧𑀺 𑀲𑀫𑁆𑀫𑀚𑁆𑀚𑀸𑀧𑁂𑀢𑁆𑀯𑀸 𑀥𑀚𑁂 ¶ 𑀉𑀲𑁆𑀲𑀸𑀧𑁂𑀢𑁆𑀯𑀸 𑀕𑁂𑀳𑀤𑁆𑀯𑀸𑀭𑁂𑀲𑀼 𑀧𑀼𑀡𑁆𑀡𑀖𑀝𑁂 𑀘 𑀓𑀤𑀮𑀺𑀬𑁄 𑀘 𑀞𑀧𑀸𑀧𑁂𑀢𑁆𑀯𑀸 𑀲𑀓𑀮𑀦𑀕𑀭𑀁 𑀤𑀻𑀧𑀫𑀸𑀮𑀸𑀤𑀻𑀳𑀺 𑀯𑀺𑀧𑁆𑀧𑀓𑀺𑀡𑁆𑀡𑀢𑀸𑀭𑀓𑀁 𑀯𑀺𑀬 𑀓𑀢𑁆𑀯𑀸 ‘‘𑀔𑀻𑀭𑀧𑀸𑀬𑀓𑁂 𑀤𑀸𑀭𑀓𑁂 𑀔𑀻𑀭𑀁 𑀧𑀸𑀬𑁂𑀣, 𑀤𑀳𑀭𑁂 𑀓𑀼𑀫𑀸𑀭𑁂 𑀮𑀳𑀼𑀁 𑀮𑀳𑀼𑀁 𑀪𑁄𑀚𑁂𑀢𑁆𑀯𑀸 𑀲𑀬𑀸𑀧𑁂𑀣, 𑀉𑀘𑁆𑀘𑀸𑀲𑀤𑁆𑀤𑀁 𑀫𑀸 𑀓𑀭𑀺𑀢𑁆𑀣, 𑀅𑀚𑁆𑀚 𑀏𑀓𑀭𑀢𑁆𑀢𑀺𑀁 𑀲𑀢𑁆𑀣𑀸 𑀅𑀦𑁆𑀢𑁄𑀕𑀸𑀫𑁂 𑀯𑀲𑀺𑀲𑁆𑀲𑀢𑀺, 𑀩𑀼𑀤𑁆𑀥𑀸 𑀦𑀸𑀫 𑀅𑀧𑁆𑀧𑀲𑀤𑁆𑀤𑀓𑀸𑀫𑀸 𑀳𑁄𑀦𑁆𑀢𑀻’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀲𑀬𑀁 𑀤𑀡𑁆𑀟𑀤𑀻𑀧𑀺𑀓𑀸 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼.

𑀅𑀣 ¶ 𑀔𑁄 𑀪𑀕𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀦𑀯𑀁 𑀲𑀦𑁆𑀣𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺. ‘‘𑀬𑀲𑁆𑀲 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺 𑀏𑀯𑀁 𑀓𑀺𑀭 𑀓𑀸𑀮𑁂 𑀆𑀭𑁄𑀘𑀺𑀢𑁂 𑀪𑀕𑀯𑀸 𑀮𑀸𑀔𑀸𑀭𑀲𑁂𑀦 𑀢𑀺𑀦𑁆𑀢𑀭𑀢𑁆𑀢𑀓𑁄𑀯𑀺𑀴𑀸𑀭𑀧𑀼𑀧𑁆𑀨𑀯𑀡𑁆𑀡𑀁 𑀭𑀢𑁆𑀢𑀤𑀼𑀧𑀝𑁆𑀝𑀁 𑀓𑀢𑁆𑀢𑀭𑀺𑀬𑀸 𑀧𑀤𑀼𑀫𑀁 𑀓𑀦𑁆𑀢𑀦𑁆𑀢𑁄 𑀯𑀺𑀬 𑀲𑀁𑀯𑀺𑀥𑀸𑀬 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄 𑀦𑀺𑀯𑀸𑀲𑁂𑀢𑁆𑀯𑀸 𑀲𑀼𑀯𑀡𑁆𑀡𑀧𑀸𑀫𑀗𑁆𑀕𑁂𑀦 𑀧𑀤𑀼𑀫𑀓𑀮𑀸𑀧𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀯𑀺𑀚𑁆𑀚𑀼𑀮𑁆𑀮𑀢𑀸𑀲𑀲𑁆𑀲𑀺𑀭𑀺𑀓𑀁 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀭𑀢𑁆𑀢𑀓𑀫𑁆𑀩𑀮𑁂𑀦 𑀕𑀚𑀓𑀼𑀫𑁆𑀪𑀁 𑀧𑀭𑀺𑀬𑁄𑀦𑀤𑁆𑀥𑀦𑁆𑀢𑁄 𑀯𑀺𑀬 𑀭𑀢𑀦𑀲𑀢𑀼𑀩𑁆𑀩𑁂𑀥𑁂 𑀲𑀼𑀯𑀡𑁆𑀡𑀕𑁆𑀖𑀺𑀓𑁂 𑀧𑀯𑀸𑀴𑀚𑀸𑀮𑀁 𑀔𑀺𑀧𑀫𑀸𑀦𑁄 𑀯𑀺𑀬 𑀲𑀼𑀯𑀡𑁆𑀡𑀘𑁂𑀢𑀺𑀬𑁂 𑀭𑀢𑁆𑀢𑀓𑀫𑁆𑀩𑀮𑀓𑀜𑁆𑀘𑀼𑀓𑀁 𑀧𑀝𑀺𑀫𑀼𑀜𑁆𑀘𑀦𑁆𑀢𑁄 𑀯𑀺𑀬 𑀕𑀘𑁆𑀙𑀦𑁆𑀢𑀁 𑀧𑀼𑀡𑁆𑀡𑀘𑀦𑁆𑀤𑀁 𑀭𑀢𑁆𑀢𑀯𑀡𑁆𑀡𑀯𑀮𑀸𑀳𑀓𑁂𑀦 𑀧𑀝𑀺𑀘𑁆𑀙𑀸𑀤𑀬𑀫𑀸𑀦𑁄 𑀯𑀺𑀬 𑀓𑀜𑁆𑀘𑀦𑀧𑀩𑁆𑀩𑀢𑀫𑀢𑁆𑀣𑀓𑁂 𑀲𑀼𑀧𑀓𑁆𑀓𑀮𑀸𑀔𑀸𑀭𑀲𑀁 𑀧𑀭𑀺𑀲𑀺𑀜𑁆𑀘𑀦𑁆𑀢𑁄 𑀯𑀺𑀬 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑀫𑀢𑁆𑀣𑀓𑀁 𑀯𑀺𑀚𑁆𑀚𑀼𑀮𑁆𑀮𑀢𑀸𑀬 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀘 𑀲𑀘𑀓𑁆𑀓𑀯𑀸𑀴𑀲𑀺𑀦𑁂𑀭𑀼𑀬𑀼𑀕𑀦𑁆𑀥𑀭𑀁 𑀫𑀳𑀸𑀧𑀣𑀯𑀺𑀁 𑀘𑀸𑀮𑁂𑀢𑁆𑀯𑀸 𑀕𑀳𑀺𑀢𑀁 𑀦𑀺𑀕𑁆𑀭𑁄𑀥𑀧𑀮𑁆𑀮𑀯𑀲𑀫𑀸𑀦𑀯𑀡𑁆𑀡𑀁 𑀭𑀢𑁆𑀢𑀯𑀭𑀧𑀁𑀲𑀼𑀓𑀽𑀮𑀁 𑀧𑀸𑀭𑀼𑀧𑀺𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀤𑁆𑀯𑀸𑀭𑀢𑁄 𑀦𑀺𑀓𑁆𑀔𑀫𑀺 𑀓𑀜𑁆𑀘𑀦𑀕𑀼𑀳𑀢𑁄 𑀲𑀻𑀳𑁄 𑀯𑀺𑀬 𑀉𑀤𑀬𑀧𑀩𑁆𑀩𑀢𑀓𑀽𑀝𑀢𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀘. 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀦 𑀕𑀦𑁆𑀥𑀓𑀼𑀝𑀺𑀧𑀫𑀼𑀔𑁂 𑀅𑀝𑁆𑀞𑀸𑀲𑀺.

𑀅𑀣𑀲𑁆𑀲 ¶ 𑀓𑀸𑀬𑀢𑁄 𑀫𑁂𑀖𑀫𑀼𑀔𑁂𑀳𑀺 𑀯𑀺𑀚𑁆𑀚𑀼𑀓𑀮𑀸𑀧𑀸 𑀯𑀺𑀬 𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀼𑀯𑀡𑁆𑀡𑀭𑀲𑀥𑀸𑀭𑀸𑀧𑀭𑀺𑀲𑁂𑀓𑀫𑀜𑁆𑀚𑀭𑀺𑀧𑀢𑁆𑀢𑀧𑀼𑀧𑁆𑀨𑀨𑀮𑀯𑀺𑀝𑀧𑁂 𑀯𑀺𑀬 𑀆𑀭𑀸𑀫𑀭𑀼𑀓𑁆𑀔𑁂 𑀓𑀭𑀺𑀁𑀲𑀼. 𑀢𑀸𑀯𑀤𑁂𑀯 𑀘 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁄 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀲𑀺. 𑀢𑁂 𑀧𑀦 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸 𑀪𑀺𑀓𑁆𑀔𑀽 𑀏𑀯𑀭𑀽𑀧𑀸 𑀅𑀳𑁂𑀲𑀼𑀁 𑀅𑀧𑁆𑀧𑀺𑀘𑁆𑀙𑀸 𑀲𑀦𑁆𑀢𑀼𑀝𑁆𑀞𑀸 𑀧𑀯𑀺𑀯𑀺𑀢𑁆𑀢𑀸 𑀅𑀲𑀁𑀲𑀝𑁆𑀞𑀸 𑀆𑀭𑀤𑁆𑀥𑀯𑀻𑀭𑀺𑀬𑀸 ¶ 𑀯𑀢𑁆𑀢𑀸𑀭𑁄 𑀯𑀘𑀦𑀓𑁆𑀔𑀫𑀸 𑀘𑁄𑀤𑀓𑀸 𑀧𑀸𑀧𑀕𑀭𑀳𑀻 𑀲𑀻𑀮𑀲𑀫𑁆𑀧𑀦𑁆𑀦𑀸 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀸𑀢𑀺. 𑀢𑁂𑀳𑀺 𑀧𑀭𑀺𑀯𑀸𑀭𑀺𑀢𑁄 𑀪𑀕𑀯𑀸 𑀭𑀢𑁆𑀢𑀓𑀫𑁆𑀩𑀮𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀺𑀬 𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑁄 𑀭𑀢𑁆𑀢𑀧𑀤𑀼𑀫𑀲𑀡𑁆𑀟𑀫𑀚𑁆𑀛𑀕𑀢𑀸 𑀯𑀺𑀬 𑀲𑀼𑀯𑀡𑁆𑀡𑀦𑀸𑀯𑀸 𑀧𑀯𑀸𑀴𑀯𑁂𑀤𑀺𑀓𑀸𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀺𑀬 𑀲𑀼𑀯𑀡𑁆𑀡𑀧𑀸𑀲𑀸𑀤𑁄 𑀯𑀺𑀭𑁄𑀘𑀺𑀢𑁆𑀣. 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀬𑁄 𑀫𑀳𑀸𑀣𑁂𑀭𑀸𑀧𑀺 𑀦𑀁 𑀫𑁂𑀖𑀯𑀡𑁆𑀡𑀁 𑀧𑀁𑀲𑀼𑀓𑀽𑀮𑀁 ¶ 𑀧𑀸𑀭𑀼𑀧𑀺𑀢𑁆𑀯𑀸 𑀫𑀡𑀺𑀯𑀫𑁆𑀫𑀯𑀫𑁆𑀫𑀺𑀓𑀸 𑀯𑀺𑀬 𑀫𑀳𑀸𑀦𑀸𑀕𑀸 𑀧𑀭𑀺𑀯𑀸𑀭𑀬𑀺𑀁𑀲𑀼 𑀯𑀦𑁆𑀢𑀭𑀸𑀕𑀸 𑀪𑀺𑀦𑁆𑀦𑀓𑀺𑀮𑁂𑀲𑀸 𑀯𑀺𑀚𑀝𑀺𑀢𑀚𑀝𑀸 𑀙𑀺𑀦𑁆𑀦𑀩𑀦𑁆𑀥𑀦𑀸 𑀓𑀼𑀮𑁂 𑀯𑀸 𑀕𑀡𑁂 𑀯𑀸 𑀅𑀮𑀕𑁆𑀕𑀸.

𑀇𑀢𑀺 𑀪𑀕𑀯𑀸 𑀲𑀬𑀁 𑀯𑀻𑀢𑀭𑀸𑀕𑁄 𑀯𑀻𑀢𑀭𑀸𑀕𑁂𑀳𑀺, 𑀯𑀻𑀢𑀤𑁄𑀲𑁄 𑀯𑀻𑀢𑀤𑁄𑀲𑁂𑀳𑀺, 𑀯𑀻𑀢𑀫𑁄𑀳𑁄 𑀯𑀻𑀢𑀫𑁄𑀳𑁂𑀳𑀺, 𑀦𑀺𑀢𑁆𑀢𑀡𑁆𑀳𑁄 𑀦𑀺𑀢𑁆𑀢𑀡𑁆𑀳𑁂𑀳𑀺, 𑀦𑀺𑀓𑁆𑀓𑀺𑀮𑁂𑀲𑁄 𑀦𑀺𑀓𑁆𑀓𑀺𑀮𑁂𑀲𑁂𑀳𑀺, 𑀲𑀬𑀁 𑀩𑀼𑀤𑁆𑀥𑁄 𑀩𑀳𑀼𑀲𑁆𑀲𑀼𑀢𑀩𑀼𑀤𑁆𑀥𑁂𑀳𑀺 𑀧𑀭𑀺𑀯𑀸𑀭𑀺𑀢𑁄, 𑀧𑀢𑁆𑀢𑀧𑀭𑀺𑀯𑀸𑀭𑀺𑀢𑀁 𑀯𑀺𑀬 𑀓𑁂𑀲𑀭𑀁, 𑀓𑁂𑀲𑀭𑀧𑀭𑀺𑀯𑀸𑀭𑀺𑀢𑀸 𑀯𑀺𑀬 𑀓𑀡𑁆𑀡𑀺𑀓𑀸, 𑀅𑀝𑁆𑀞𑀦𑀸𑀕𑀲𑀳𑀲𑁆𑀲𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀙𑀤𑁆𑀤𑀦𑁆𑀢𑁄 𑀦𑀸𑀕𑀭𑀸𑀚𑀸, 𑀦𑀯𑀼𑀢𑀺𑀳𑀁𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀥𑀢𑀭𑀝𑁆𑀞𑁄 𑀳𑀁𑀲𑀭𑀸𑀚𑀸, 𑀲𑁂𑀦𑀗𑁆𑀕𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀘𑀓𑁆𑀓𑀯𑀢𑁆𑀢𑀺, 𑀫𑀭𑀼𑀕𑀡𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸, 𑀩𑁆𑀭𑀳𑁆𑀫𑀕𑀡𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀳𑀸𑀭𑀺𑀢𑀫𑀳𑀸𑀩𑁆𑀭𑀳𑁆𑀫𑀸, 𑀢𑀸𑀭𑀸𑀕𑀡𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀧𑀼𑀡𑁆𑀡𑀘𑀦𑁆𑀤𑁄, 𑀅𑀲𑀫𑁂𑀦 𑀩𑀼𑀤𑁆𑀥𑀯𑁂𑀲𑁂𑀦 𑀅𑀧𑀭𑀺𑀫𑀸𑀡𑁂𑀦 𑀩𑀼𑀤𑁆𑀥𑀯𑀺𑀮𑀸𑀲𑁂𑀦 𑀓𑀧𑀺𑀮𑀯𑀢𑁆𑀣𑀼𑀕𑀫𑀦𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺.

𑀅𑀣𑀲𑁆𑀲 𑀧𑀼𑀭𑀢𑁆𑀣𑀺𑀫𑀓𑀸𑀬𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀸 𑀭𑀲𑁆𑀫𑀻 𑀉𑀝𑁆𑀞𑀳𑀺𑀢𑁆𑀯𑀸 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕𑀳𑁂𑀲𑀺. 𑀧𑀘𑁆𑀙𑀺𑀫𑀓𑀸𑀬𑀢𑁄 𑀤𑀓𑁆𑀔𑀺𑀡𑀳𑀢𑁆𑀣𑀢𑁄, 𑀯𑀸𑀫𑀳𑀢𑁆𑀣𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀸 𑀭𑀲𑁆𑀫𑀻 𑀉𑀝𑁆𑀞𑀳𑀺𑀢𑁆𑀯𑀸 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕𑀳𑁂𑀲𑀺. 𑀉𑀧𑀭𑀺 𑀓𑁂𑀲𑀦𑁆𑀢𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀓𑁂𑀲𑀸𑀯𑀢𑁆𑀢𑁂𑀳𑀺 𑀫𑁄𑀭𑀕𑀻𑀯𑀯𑀡𑁆𑀡𑀸 𑀭𑀲𑁆𑀫𑀻 𑀉𑀝𑁆𑀞𑀳𑀺𑀢𑁆𑀯𑀸 𑀕𑀕𑀦𑀢𑀮𑁂 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕𑀳𑁂𑀲𑀺. 𑀳𑁂𑀝𑁆𑀞𑀸 𑀧𑀸𑀤𑀢𑀮𑁂𑀳𑀺 𑀧𑀯𑀸𑀴𑀯𑀡𑁆𑀡𑀸 𑀭𑀲𑁆𑀫𑀻 𑀉𑀝𑁆𑀞𑀳𑀺𑀢𑁆𑀯𑀸 𑀖𑀦𑀧𑀣𑀯𑀺𑀬𑀁 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕𑀳𑁂𑀲𑀺. 𑀏𑀯𑀁 𑀲𑀫𑀦𑁆𑀢𑀸 𑀅𑀲𑀻𑀢𑀺𑀳𑀢𑁆𑀣𑀫𑀢𑁆𑀢𑀁 𑀞𑀸𑀦𑀁 𑀙𑀩𑁆𑀩𑀡𑁆𑀡𑀸 𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀚𑁆𑀚𑁄𑀢𑀫𑀸𑀦𑀸 ¶ 𑀯𑀺𑀧𑁆𑀨𑀦𑁆𑀤𑀫𑀸𑀦𑀸 𑀓𑀜𑁆𑀘𑀦𑀤𑀡𑁆𑀟𑀤𑀻𑀧𑀺𑀓𑀸𑀳𑀺 𑀦𑀺𑀘𑁆𑀙𑀭𑀺𑀢𑁆𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀚𑀸𑀮𑀸 𑀯𑀺𑀬 𑀘𑀸𑀢𑀼𑀤𑁆𑀤𑀻𑀧𑀺𑀓𑀫𑀳𑀸𑀫𑁂𑀖𑀢𑁄 𑀦𑀺𑀓𑁆𑀔𑀦𑁆𑀢𑀯𑀺𑀚𑁆𑀚𑀼𑀮𑁆𑀮𑀢𑀸 𑀯𑀺𑀬 𑀯𑀺𑀥𑀸𑀯𑀺𑀁𑀲𑀼. 𑀲𑀩𑁆𑀩𑀤𑀺𑀲𑀸𑀪𑀸𑀕𑀸 𑀲𑀼𑀯𑀡𑁆𑀡𑀘𑀫𑁆𑀧𑀓𑀧𑀼𑀧𑁆𑀨𑁂𑀳𑀺 𑀯𑀺𑀓𑀺𑀭𑀺𑀬𑀫𑀸𑀦𑀸 𑀯𑀺𑀬, 𑀲𑀼𑀯𑀡𑁆𑀡𑀖𑀝𑀸 𑀦𑀺𑀓𑁆𑀔𑀦𑁆𑀢𑀲𑀼𑀯𑀡𑁆𑀡𑀭𑀲𑀥𑀸𑀭𑀸𑀳𑀺 ¶ 𑀲𑀺𑀜𑁆𑀘𑀫𑀸𑀦𑀸 𑀯𑀺𑀬, 𑀧𑀲𑀸𑀭𑀺𑀢𑀲𑀼𑀯𑀡𑁆𑀡𑀧𑀝𑀧𑀭𑀺𑀓𑁆𑀔𑀺𑀢𑁆𑀢𑀸 𑀯𑀺𑀬, 𑀯𑁂𑀭𑀫𑁆𑀪𑀯𑀸𑀢𑀲𑀫𑀼𑀝𑁆𑀞𑀺𑀢𑀓𑀺𑀁𑀲𑀼𑀓𑀓𑀡𑀺𑀓𑀸𑀭𑀧𑀼𑀧𑁆𑀨𑀘𑀼𑀡𑁆𑀡𑀲𑀫𑁄𑀓𑀺𑀡𑁆𑀡𑀸 𑀯𑀺𑀬 𑀯𑀺𑀧𑁆𑀧𑀓𑀺𑀭𑀺𑀁𑀲𑀼.

𑀪𑀕𑀯𑀢𑁄𑀧𑀺 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀲𑀫𑀼𑀚𑁆𑀚𑀮𑀁 𑀲𑀭𑀻𑀭𑀁 𑀲𑀫𑀼𑀕𑁆𑀕𑀢𑀢𑀸𑀭𑀓𑀁 𑀯𑀺𑀬 𑀕𑀕𑀦𑀢𑀮𑀁, 𑀯𑀺𑀓𑀲𑀺𑀢𑀫𑀺𑀯 𑀧𑀤𑀼𑀫𑀯𑀦𑀁, 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑁄 𑀯𑀺𑀬 𑀬𑁄𑀚𑀦𑀲𑀢𑀺𑀓𑁄 𑀧𑀸𑀭𑀺𑀘𑁆𑀙𑀢𑁆𑀢𑀓𑁄, 𑀧𑀝𑀺𑀧𑀸𑀝𑀺𑀬𑀸 𑀞𑀧𑀺𑀢𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀽𑀘𑀦𑁆𑀤𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀲𑀽𑀭𑀺𑀬𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀘𑀓𑁆𑀓𑀯𑀢𑁆𑀢𑀻𑀦𑀁 𑀤𑁆𑀯𑀢𑁆𑀢𑀺𑀁𑀲𑀤𑁂𑀯𑀭𑀸𑀚𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀩𑁆𑀭𑀳𑁆𑀫𑀸𑀦𑀁 ¶ 𑀲𑀺𑀭𑀺𑀬𑀸 𑀲𑀺𑀭𑀺𑀁 𑀅𑀪𑀺𑀪𑀯𑀫𑀸𑀦𑀁 𑀯𑀺𑀬 𑀯𑀺𑀭𑁄𑀘𑀺𑀢𑁆𑀣, 𑀬𑀣𑀸 𑀢𑀁 𑀤𑀲𑀳𑀺 𑀧𑀸𑀭𑀫𑀻𑀳𑀺 𑀤𑀲𑀳𑀺 𑀉𑀧𑀧𑀸𑀭𑀫𑀻𑀳𑀺 𑀤𑀲𑀳𑀺 𑀧𑀭𑀫𑀢𑁆𑀣𑀧𑀸𑀭𑀫𑀻𑀳𑀺 𑀲𑀼𑀧𑀽𑀭𑀺𑀢𑀸𑀳𑀺 𑀲𑀫𑀢𑀺𑀁𑀲𑀧𑀸𑀭𑀫𑀺𑀢𑀸𑀳𑀺 𑀅𑀮𑀗𑁆𑀓𑀢𑀁. 𑀓𑀧𑁆𑀧𑀲𑀢𑀲𑀳𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀤𑀺𑀦𑁆𑀦𑀤𑀸𑀦𑀁 𑀭𑀓𑁆𑀔𑀺𑀢𑀲𑀻𑀮𑀁 𑀓𑀢𑀓𑀮𑁆𑀬𑀸𑀡𑀓𑀫𑁆𑀫𑀁 𑀏𑀓𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀑𑀲𑀭𑀺𑀢𑁆𑀯𑀸 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀞𑀸𑀦𑀁 𑀅𑀮𑀪𑀫𑀸𑀦𑀁 𑀲𑀫𑁆𑀩𑀸𑀥𑀧𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺. 𑀦𑀸𑀯𑀸𑀲𑀳𑀲𑁆𑀲𑀪𑀡𑁆𑀟𑀁 𑀏𑀓𑀦𑀸𑀯𑀁 𑀆𑀭𑁄𑀧𑀦𑀓𑀸𑀮𑁄 𑀯𑀺𑀬, 𑀲𑀓𑀝𑀲𑀳𑀲𑁆𑀲𑀪𑀡𑁆𑀟𑀁 𑀏𑀓𑀲𑀓𑀝𑀁 𑀆𑀭𑁄𑀧𑀦𑀓𑀸𑀮𑁄 𑀯𑀺𑀬, 𑀧𑀜𑁆𑀘𑀯𑀻𑀲𑀢𑀺𑀬𑀸 𑀦𑀤𑀻𑀦𑀁 𑀑𑀖𑀲𑁆𑀲 𑀲𑀫𑁆𑀪𑀺𑀚𑁆𑀚 𑀫𑀼𑀔𑀤𑁆𑀯𑀸𑀭𑁂 𑀏𑀓𑀢𑁄 𑀭𑀸𑀲𑀻𑀪𑀽𑀢𑀓𑀸𑀮𑁄 𑀯𑀺𑀬 𑀘 𑀅𑀳𑁄𑀲𑀺.

𑀇𑀫𑀸𑀬 𑀩𑀼𑀤𑁆𑀥𑀲𑀺𑀭𑀺𑀬𑀸 𑀑𑀪𑀸𑀲𑀫𑀸𑀦𑀲𑁆𑀲𑀸𑀧𑀺 𑀘 𑀪𑀕𑀯𑀢𑁄 𑀧𑀼𑀭𑀢𑁄 𑀅𑀦𑁂𑀓𑀸𑀦𑀺 𑀤𑀡𑁆𑀟𑀤𑀻𑀧𑀺𑀓𑀲𑀳𑀲𑁆𑀲𑀸𑀦𑀺 𑀉𑀓𑁆𑀔𑀺𑀧𑀺𑀁𑀲𑀼. 𑀢𑀣𑀸 𑀧𑀘𑁆𑀙𑀢𑁄. 𑀯𑀸𑀫𑀧𑀲𑁆𑀲𑁂 𑀤𑀓𑁆𑀔𑀺𑀡𑀧𑀲𑁆𑀲𑁂. 𑀚𑀸𑀢𑀺𑀓𑀼𑀲𑀼𑀫𑀘𑀫𑁆𑀧𑀓𑀯𑀦𑀫𑀮𑁆𑀮𑀺𑀓𑀭𑀢𑁆𑀢𑀼𑀧𑁆𑀧𑀮𑀦𑀻𑀮𑀼𑀧𑁆𑀧𑀮𑀫𑀓𑀼𑀮𑀲𑀺𑀦𑁆𑀤𑀼𑀯𑀸𑀭𑀧𑀼𑀧𑁆𑀨𑀸𑀦𑀺 ¶ 𑀘𑁂𑀯 𑀦𑀻𑀮𑀧𑀻𑀢𑀸𑀤𑀺𑀯𑀡𑁆𑀡𑀲𑀼𑀕𑀦𑁆𑀥𑀕𑀦𑁆𑀥𑀘𑀼𑀡𑁆𑀡𑀸𑀦𑀺 𑀘 𑀘𑀸𑀢𑀼𑀤𑁆𑀤𑀻𑀧𑀺𑀓𑀫𑁂𑀖𑀯𑀺𑀲𑁆𑀲𑀝𑁆𑀞𑁄𑀤𑀓𑀯𑀼𑀝𑁆𑀞𑀺𑀬𑁄 𑀯𑀺𑀬 𑀯𑀺𑀧𑁆𑀧𑀓𑀺𑀭𑀺𑀁𑀲𑀼. 𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀦𑀺𑀕𑁆𑀖𑁄𑀲𑀸 𑀘𑁂𑀯 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀕𑀼𑀡𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸 𑀣𑀼𑀢𑀺𑀖𑁄𑀲𑀸 𑀘 𑀲𑀩𑁆𑀩𑀤𑀺𑀲𑀸 𑀧𑀽𑀭𑀬𑀺𑀁𑀲𑀼. 𑀤𑁂𑀯𑀫𑀦𑀼𑀲𑁆𑀲𑀦𑀸𑀕𑀲𑀼𑀧𑀡𑁆𑀡𑀕𑀦𑁆𑀥𑀩𑁆𑀩𑀬𑀓𑁆𑀔𑀸𑀤𑀻𑀦𑀁 𑀅𑀓𑁆𑀔𑀻𑀦𑀺 𑀅𑀫𑀢𑀧𑀸𑀦𑀁 𑀯𑀺𑀬 𑀮𑀪𑀺𑀁𑀲𑀼. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀞𑀢𑁆𑀯𑀸 𑀧𑀤𑀲𑀳𑀲𑁆𑀲𑁂𑀦 𑀕𑀫𑀦𑀯𑀡𑁆𑀡𑀁 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀢𑀢𑁆𑀭𑀺𑀤𑀁 𑀫𑀼𑀔𑀫𑀢𑁆𑀢𑀁 𑁋

‘‘𑀏𑀯𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑁄, 𑀓𑀫𑁆𑀧𑀬𑀦𑁆𑀢𑁄 𑀯𑀲𑀼𑀦𑁆𑀥𑀭𑀁;

𑀅𑀳𑁂𑀞𑀬𑀦𑁆𑀢𑁄 𑀧𑀸𑀡𑀸𑀦𑀺, 𑀬𑀸𑀢𑀺 𑀮𑁄𑀓𑀯𑀺𑀦𑀸𑀬𑀓𑁄.

𑀤𑀓𑁆𑀔𑀺𑀡𑀁 𑀧𑀞𑀫𑀁 𑀧𑀸𑀤𑀁, 𑀉𑀤𑁆𑀥𑀭𑀦𑁆𑀢𑁄 𑀦𑀭𑀸𑀲𑀪𑁄;

𑀕𑀘𑁆𑀙𑀦𑁆𑀢𑁄 𑀲𑀺𑀭𑀺𑀲𑀫𑁆𑀧𑀦𑁆𑀦𑁄, 𑀲𑁄𑀪𑀢𑁂 𑀤𑁆𑀯𑀺𑀧𑀤𑀼𑀢𑁆𑀢𑀫𑁄.

𑀕𑀘𑁆𑀙𑀢𑁄 ¶ 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲, 𑀳𑁂𑀝𑁆𑀞𑀸 𑀧𑀸𑀤𑀢𑀮𑀁 𑀫𑀼𑀤𑀼;

𑀲𑀫𑀁 𑀲𑀫𑁆𑀨𑀼𑀲𑀢𑁂 𑀪𑀽𑀫𑀺𑀁, 𑀭𑀚𑀲𑀸 𑀦𑀼𑀧𑀮𑀺𑀧𑁆𑀧𑀢𑀺.

𑀦𑀺𑀦𑁆𑀦𑀝𑁆𑀞𑀸𑀦𑀁 𑀉𑀦𑁆𑀦𑀫𑀢𑀺, 𑀕𑀘𑁆𑀙𑀦𑁆𑀢𑁂 𑀮𑁄𑀓𑀦𑀸𑀬𑀓𑁂;

𑀉𑀦𑁆𑀦𑀢𑀜𑁆𑀘 𑀲𑀫𑀁 𑀳𑁄𑀢𑀺, 𑀧𑀣𑀯𑀻 𑀘 𑀅𑀘𑁂𑀢𑀦𑀸.

𑀧𑀸𑀲𑀸𑀡𑀸 𑀲𑀓𑁆𑀔𑀭𑀸 𑀘𑁂𑀯, 𑀓𑀣𑀮𑀸 𑀔𑀸𑀡𑀼𑀓𑀡𑁆𑀝𑀓𑀸;

𑀲𑀩𑁆𑀩𑁂 𑀫𑀕𑁆𑀕𑀸 𑀯𑀺𑀯𑀚𑁆𑀚𑀦𑁆𑀢𑀺, 𑀕𑀘𑁆𑀙𑀦𑁆𑀢𑁂 𑀮𑁄𑀓𑀦𑀸𑀬𑀓𑁂.

𑀦𑀸𑀢𑀺𑀤𑀽𑀭𑁂 ¶ 𑀉𑀤𑁆𑀥𑀭𑀢𑀺, 𑀦𑀘𑁆𑀘𑀸𑀲𑀦𑁆𑀦𑁂 𑀘 𑀦𑀺𑀓𑁆𑀔𑀺𑀧𑀁;

𑀅𑀖𑀝𑁆𑀝𑀬𑀦𑁆𑀢𑁄 𑀦𑀺𑀬𑁆𑀬𑀸𑀢𑀺, 𑀉𑀪𑁄 𑀚𑀸𑀡𑀽 𑀘 𑀕𑁄𑀧𑁆𑀨𑀓𑁂.

𑀦𑀸𑀢𑀺𑀲𑀻𑀖𑀁 ¶ 𑀧𑀓𑁆𑀓𑀫𑀢𑀺, 𑀲𑀫𑁆𑀧𑀦𑁆𑀦𑀘𑀭𑀡𑁄 𑀫𑀼𑀦𑀺;

𑀦 𑀘𑀸𑀢𑀺𑀲𑀡𑀺𑀓𑀁 𑀬𑀸𑀢𑀺, 𑀕𑀘𑁆𑀙𑀫𑀸𑀦𑁄 𑀲𑀫𑀸𑀳𑀺𑀢𑁄.

𑀉𑀤𑁆𑀥𑀁 𑀅𑀥𑁄 𑀘 𑀢𑀺𑀭𑀺𑀬𑀁, 𑀤𑀺𑀲𑀜𑁆𑀘 𑀯𑀺𑀤𑀺𑀲𑀁 𑀢𑀣𑀸;

𑀦 𑀧𑁂𑀓𑁆𑀔𑀫𑀸𑀦𑁄 𑀲𑁄 𑀬𑀸𑀢𑀺, 𑀬𑀼𑀕𑀫𑀢𑁆𑀢𑀫𑁆𑀳𑀺 𑀧𑁂𑀓𑁆𑀔𑀢𑀺.

𑀦𑀸𑀕𑀯𑀺𑀓𑁆𑀓𑀦𑁆𑀢𑀘𑀸𑀭𑁄 𑀲𑁄, 𑀕𑀫𑀦𑁂 𑀲𑁄𑀪𑀢𑁂 𑀚𑀺𑀦𑁄;

𑀘𑀸𑀭𑀼𑀁 𑀕𑀘𑁆𑀙𑀢𑀺 𑀮𑁄𑀓𑀕𑁆𑀕𑁄, 𑀳𑀸𑀲𑀬𑀦𑁆𑀢𑁄 𑀲𑀤𑁂𑀯𑀓𑁂.

𑀉𑀴𑀼𑀭𑀸𑀚𑀸𑀯 𑀲𑁄𑀪𑀦𑁆𑀢𑁄, 𑀘𑀢𑀼𑀘𑀸𑀭𑀻𑀯 𑀓𑁂𑀲𑀭𑀻;

𑀢𑁄𑀲𑀬𑀦𑁆𑀢𑁄 𑀩𑀳𑀽 𑀲𑀢𑁆𑀢𑁂, 𑀧𑀼𑀭𑀁 𑀲𑁂𑀝𑁆𑀞𑀁 𑀉𑀧𑀸𑀕𑀫𑀻’’𑀢𑀺.

𑀯𑀡𑁆𑀡𑀓𑀸𑀮𑁄 𑀦𑀸𑀫 𑀓𑀺𑀭𑁂𑀲, 𑀏𑀯𑀁𑀯𑀺𑀥𑁂𑀲𑀼 𑀓𑀸𑀮𑁂𑀲𑀼 𑀩𑀼𑀤𑁆𑀥𑀲𑁆𑀲 𑀲𑀭𑀻𑀭𑀯𑀡𑁆𑀡𑁂 𑀯𑀸 𑀕𑀼𑀡𑀯𑀡𑁆𑀡𑁂 𑀯𑀸 𑀥𑀫𑁆𑀫𑀓𑀣𑀺𑀓𑀲𑁆𑀲 𑀣𑀸𑀫𑁄𑀬𑁂𑀯 𑀧𑀫𑀸𑀡𑀁 𑀘𑀼𑀡𑁆𑀡𑀺𑀬𑀧𑀤𑁂𑀳𑀺 𑀯𑀸 𑀕𑀸𑀣𑀸𑀩𑀦𑁆𑀥𑁂𑀦 𑀯𑀸 𑀬𑀢𑁆𑀢𑀓𑀁 𑀲𑀓𑁆𑀓𑁄𑀢𑀺, 𑀢𑀢𑁆𑀢𑀓𑀁 𑀯𑀢𑁆𑀢𑀩𑁆𑀩𑀁. 𑀤𑀼𑀓𑁆𑀓𑀣𑀺𑀢𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀅𑀧𑁆𑀧𑀫𑀸𑀡𑀯𑀡𑁆𑀡𑀸 𑀳𑀺 𑀩𑀼𑀤𑁆𑀥𑀸, 𑀢𑁂𑀲𑀁 𑀩𑀼𑀤𑁆𑀥𑀸𑀧𑀺 𑀅𑀦𑀯𑀲𑁂𑀲𑀢𑁄 𑀯𑀡𑁆𑀡𑀁 ¶ 𑀯𑀢𑁆𑀢𑀼𑀁 𑀅𑀲𑀫𑀢𑁆𑀣𑀸, 𑀧𑀕𑁂𑀯 𑀇𑀢𑀭𑀸 𑀧𑀚𑀸𑀢𑀺. 𑀇𑀫𑀺𑀦𑀸 𑀲𑀺𑀭𑀺𑀯𑀺𑀮𑀸𑀲𑁂𑀦 𑀅𑀮𑀗𑁆𑀓𑀢𑀧𑁆𑀧𑀝𑀺𑀬𑀢𑁆𑀢𑀁 𑀲𑀓𑁆𑀬𑀭𑀸𑀚𑀧𑀼𑀭𑀁 𑀧𑀯𑀺𑀲𑀺𑀢𑁆𑀯𑀸 𑀪𑀕𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁂𑀦 𑀚𑀦𑁂𑀦 𑀕𑀦𑁆𑀥𑀥𑀽𑀫𑀯𑀸𑀲𑀘𑀼𑀡𑁆𑀡𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑁄 𑀲𑀦𑁆𑀣𑀸𑀕𑀸𑀭𑀁 𑀧𑀸𑀯𑀺𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀪𑀕𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀏𑀯𑀁 𑀲𑀦𑁆𑀣𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀻’’𑀢𑀺.

𑀪𑀕𑀯𑀦𑁆𑀢𑀁𑀬𑁂𑀯 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀪𑀕𑀯𑀦𑁆𑀢𑀁 𑀧𑀼𑀭𑀢𑁄 𑀓𑀢𑁆𑀯𑀸. 𑀢𑀢𑁆𑀣 𑀪𑀕𑀯𑀸 𑀪𑀺𑀓𑁆𑀔𑀽𑀦𑀜𑁆𑀘𑁂𑀯 𑀉𑀧𑀸𑀲𑀓𑀸𑀦𑀜𑁆𑀘 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂𑀦 𑀯𑁄𑀤𑀓𑀁 𑀓𑀢𑁆𑀯𑀸 𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑁂𑀦 𑀫𑀚𑁆𑀚𑀺𑀢𑁆𑀯𑀸 𑀭𑀢𑁆𑀢𑀓𑀫𑁆𑀩𑀮𑀧𑀮𑀺𑀯𑁂𑀞𑀺𑀢𑁂 ¶ 𑀧𑀻𑀞𑁂 𑀞𑀧𑀺𑀢𑀭𑀢𑁆𑀢𑀲𑀼𑀯𑀡𑁆𑀡𑀖𑀦𑀧𑀝𑀺𑀫𑀸 𑀯𑀺𑀬 𑀅𑀢𑀺𑀯𑀺𑀭𑁄𑀘𑀺𑀢𑁆𑀣. 𑀅𑀬𑀁 𑀧𑀦𑁂𑀢𑁆𑀣 𑀧𑁄𑀭𑀸𑀡𑀸𑀦𑀁 𑀯𑀡𑁆𑀡𑀪𑀡𑀦𑀫𑀕𑁆𑀕𑁄 𑁋

‘‘𑀕𑀦𑁆𑀢𑁆𑀯𑀸𑀦 𑀫𑀡𑁆𑀟𑀮𑀫𑀸𑀴𑀁, 𑀦𑀸𑀕𑀯𑀺𑀓𑁆𑀓𑀦𑁆𑀢𑀘𑀭𑀡𑁄;

𑀑𑀪𑀸𑀲𑀬𑀦𑁆𑀢𑁄 𑀮𑁄𑀓𑀕𑁆𑀕𑁄, 𑀦𑀺𑀲𑀻𑀤𑀺 𑀯𑀭𑀫𑀸𑀲𑀦𑁂.

𑀢𑀲𑁆𑀫𑀺𑀁 ¶ 𑀦𑀺𑀲𑀺𑀦𑁆𑀦𑁄 𑀦𑀭𑀤𑀫𑁆𑀫𑀲𑀸𑀭𑀣𑀺,

𑀤𑁂𑀯𑀸𑀢𑀺𑀤𑁂𑀯𑁄 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑁄;

𑀩𑀼𑀤𑁆𑀥𑀸𑀲𑀦𑁂 𑀫𑀚𑁆𑀛𑀕𑀢𑁄 𑀯𑀺𑀭𑁄𑀘𑀢𑀺,

𑀲𑀼𑀯𑀡𑁆𑀡𑀦𑁂𑀓𑁆𑀔𑀁 𑀯𑀺𑀬 𑀧𑀡𑁆𑀟𑀼𑀓𑀫𑁆𑀩𑀮𑁂.

𑀦𑁂𑀓𑁆𑀔𑀁 𑀚𑀫𑁆𑀩𑁄𑀦𑀤𑀲𑁆𑀲𑁂𑀯, 𑀦𑀺𑀓𑁆𑀔𑀺𑀢𑁆𑀢𑀁 𑀧𑀡𑁆𑀟𑀼𑀓𑀫𑁆𑀩𑀮𑁂;

𑀯𑀺𑀭𑁄𑀘𑀢𑀺 𑀯𑀻𑀢𑀫𑀮𑁄, 𑀫𑀡𑀺𑀯𑁂𑀭𑁄𑀘𑀦𑁄 𑀬𑀣𑀸.

𑀫𑀳𑀸𑀲𑀸𑀮𑁄𑀯 𑀲𑀫𑁆𑀨𑀼𑀮𑁆𑀮𑁄, 𑀦𑁂𑀭𑀼𑀭𑀸𑀚𑀸𑀯𑀮𑀗𑁆𑀓𑀢𑁄;

𑀲𑀼𑀯𑀡𑁆𑀡𑀬𑀽𑀧𑀲𑀗𑁆𑀓𑀸𑀲𑁄, 𑀧𑀤𑀼𑀫𑁄 𑀓𑁄𑀓𑀦𑀤𑁄 𑀬𑀣𑀸.

𑀚𑀮𑀦𑁆𑀢𑁄 𑀤𑀻𑀧𑀭𑀼𑀓𑁆𑀔𑁄𑀯, 𑀧𑀩𑁆𑀩𑀢𑀕𑁆𑀕𑁂 𑀬𑀣𑀸 𑀲𑀺𑀔𑀻;

𑀤𑁂𑀯𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑁄𑀯, 𑀲𑀩𑁆𑀩𑀨𑀼𑀮𑁆𑀮𑁄 𑀯𑀺𑀭𑁄𑀘𑀣𑀸’’𑀢𑀺.

𑀓𑀸𑀧𑀺𑀮𑀯𑀢𑁆𑀣𑀯𑁂 ¶ 𑀲𑀓𑁆𑀬𑁂 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬𑀸𑀢𑀺 𑀏𑀢𑁆𑀣 𑀥𑀫𑁆𑀫𑀻 𑀓𑀣𑀸 𑀦𑀸𑀫 𑀲𑀦𑁆𑀣𑀸𑀕𑀸𑀭𑀅𑀦𑀼𑀫𑁄𑀤𑀦𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸 𑀧𑀓𑀺𑀡𑁆𑀡𑀓𑀓𑀣𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀤𑀸 𑀳𑀺 𑀪𑀕𑀯𑀸 𑀆𑀓𑀸𑀲𑀕𑀗𑁆𑀕𑀁 𑀑𑀢𑀸𑀭𑁂𑀦𑁆𑀢𑁄 𑀯𑀺𑀬 𑀧𑀣𑀯𑁄𑀚𑀁 𑀆𑀓𑀟𑁆𑀠𑀦𑁆𑀢𑁄 𑀯𑀺𑀬 𑀫𑀳𑀸𑀚𑀫𑁆𑀩𑀼𑀁 𑀔𑀦𑁆𑀥𑁂 𑀕𑀳𑁂𑀢𑁆𑀯𑀸 𑀘𑀸𑀮𑁂𑀦𑁆𑀢𑁄 𑀯𑀺𑀬 𑀬𑁄𑀚𑀦𑀺𑀓𑀁 𑀫𑀥𑀼𑀪𑀡𑁆𑀟𑀁 𑀘𑀓𑁆𑀓𑀬𑀦𑁆𑀢𑁂𑀦 𑀧𑀻𑀴𑁂𑀢𑁆𑀯𑀸 𑀫𑀥𑀼𑀧𑀸𑀦𑀁 𑀧𑀸𑀬𑀫𑀸𑀦𑁄 𑀯𑀺𑀬 𑀓𑀸𑀧𑀺𑀮𑀯𑀢𑁆𑀣𑀯𑀸𑀦𑀁 𑀲𑀓𑁆𑀬𑀸𑀦𑀁 𑀳𑀺𑀢𑀲𑀼𑀔𑀸𑀯𑀳𑀁 ¶ 𑀧𑀓𑀺𑀡𑁆𑀡𑀓𑀓𑀣𑀁 𑀓𑀣𑁂𑀲𑀺. ‘‘𑀆𑀯𑀸𑀲𑀤𑀸𑀦𑀁 𑀦𑀸𑀫𑁂𑀢𑀁 𑀫𑀳𑀸𑀭𑀸𑀚 𑀫𑀳𑀦𑁆𑀢𑀁, 𑀢𑀼𑀫𑁆𑀳𑀸𑀓𑀁 𑀆𑀯𑀸𑀲𑁄 𑀫𑀬𑀸 𑀧𑀭𑀺𑀪𑀼𑀢𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀧𑀭𑀺𑀪𑀼𑀢𑁆𑀢𑁄 𑀫𑀬𑀸 𑀘 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀘 𑀧𑀭𑀺𑀪𑀼𑀢𑁆𑀢𑁄 𑀧𑀦 𑀥𑀫𑁆𑀫𑀭𑀢𑀦𑁂𑀦 𑀧𑀭𑀺𑀪𑀼𑀢𑁆𑀢𑁄 𑀬𑁂𑀯𑀸𑀢𑀺 𑀢𑀻𑀳𑀺 𑀭𑀢𑀦𑁂𑀳𑀺 𑀧𑀭𑀺𑀪𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀆𑀯𑀸𑀲𑀤𑀸𑀦𑀲𑁆𑀫𑀺𑀜𑁆𑀳𑀺 𑀤𑀺𑀦𑁆𑀦𑁂 𑀲𑀩𑁆𑀩𑀤𑀸𑀦𑀁 𑀤𑀺𑀦𑁆𑀦𑀫𑁂𑀯 𑀳𑁄𑀢𑀺. 𑀪𑀽𑀫𑀝𑁆𑀞𑀓𑀧𑀡𑁆𑀡𑀲𑀸𑀮𑀸𑀬 𑀯𑀸 𑀲𑀸𑀔𑀸𑀫𑀡𑁆𑀟𑀧𑀲𑁆𑀲 𑀯𑀸𑀧𑀺 𑀆𑀦𑀺𑀲𑀁𑀲𑁄 𑀦𑀸𑀫 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀁 𑀩𑀳𑀼𑀁 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸 𑁋

‘‘𑀲𑀻𑀢𑀁 𑀉𑀡𑁆𑀳𑀁 𑀧𑀝𑀺𑀳𑀦𑁆𑀢𑀺, 𑀢𑀢𑁄 𑀯𑀸𑀴𑀫𑀺𑀕𑀸𑀦𑀺 𑀘;

𑀲𑀭𑀻𑀲𑀧𑁂 𑀘 𑀫𑀓𑀲𑁂, 𑀲𑀺𑀲𑀺𑀭𑁂 𑀘𑀸𑀧𑀺 𑀯𑀼𑀝𑁆𑀞𑀺𑀬𑁄.

𑀢𑀢𑁄 𑀯𑀸𑀢𑀸𑀢𑀧𑁄 𑀖𑁄𑀭𑁄, 𑀲𑀜𑁆𑀚𑀸𑀢𑁄 𑀧𑀝𑀺𑀳𑀜𑁆𑀜𑀢𑀺;

𑀮𑁂𑀡𑀢𑁆𑀣𑀜𑁆𑀘 𑀲𑀼𑀔𑀢𑁆𑀣𑀜𑁆𑀘, 𑀛𑀸𑀬𑀺𑀢𑀼𑀜𑁆𑀘 𑀯𑀺𑀧𑀲𑁆𑀲𑀺𑀢𑀼𑀁.

𑀯𑀺𑀳𑀸𑀭𑀤𑀸𑀦𑀁 𑀲𑀗𑁆𑀖𑀲𑁆𑀲, 𑀅𑀕𑁆𑀕𑀁 𑀩𑀼𑀤𑁆𑀥𑁂𑀦 𑀯𑀡𑁆𑀡𑀺𑀢𑀁;

𑀢𑀲𑁆𑀫𑀸 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄.

𑀯𑀺𑀳𑀸𑀭𑁂 ¶ 𑀓𑀸𑀭𑀬𑁂 𑀭𑀫𑁆𑀫𑁂, 𑀯𑀸𑀲𑀬𑁂𑀢𑁆𑀣 𑀩𑀳𑀼𑀲𑁆𑀲𑀼𑀢𑁂;

𑀢𑁂𑀲𑀁 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘.

𑀤𑀤𑁂𑀬𑁆𑀬 𑀉𑀚𑀼𑀪𑀽𑀢𑁂𑀲𑀼, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀢𑁂 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀲𑀩𑁆𑀩𑀤𑀼𑀓𑁆𑀔𑀸𑀧𑀦𑀽𑀤𑀦𑀁;

𑀬𑀁 𑀲𑁄 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬, 𑀧𑀭𑀺𑀦𑀺𑀩𑁆𑀩𑀸𑀢𑀺 𑀅𑀦𑀸𑀲𑀯𑁄’’𑀢𑀺. (𑀘𑀽𑀴𑀯. 𑁨𑁯𑁫) 𑁋

𑀏𑀯𑀁 𑀅𑀬𑀫𑁆𑀧𑀺 𑀆𑀯𑀸𑀲𑁂 𑀆𑀦𑀺𑀲𑀁𑀲𑁄, 𑀅𑀬𑀫𑁆𑀧𑀺 𑀆𑀦𑀺𑀲𑀁𑀲𑁄𑀢𑀺 𑀩𑀳𑀼𑀤𑁂𑀯𑀭𑀢𑁆𑀢𑀺𑀁 𑀅𑀢𑀺𑀭𑁂𑀓𑀢𑀭𑀁 𑀤𑀺𑀬𑀟𑁆𑀠𑀬𑀸𑀫𑀁 𑀆𑀯𑀸𑀲𑀸𑀦𑀺𑀲𑀁𑀲𑀓𑀣𑀁 ¶ 𑀓𑀣𑁂𑀲𑀺. 𑀢𑀢𑁆𑀣 𑀇𑀫𑀸 𑀕𑀸𑀣𑀸𑀯 𑀲𑀗𑁆𑀕𑀳𑀁 𑀆𑀭𑀼𑀴𑁆𑀳𑀸, 𑀧𑀓𑀺𑀡𑁆𑀡𑀓𑀥𑀫𑁆𑀫𑀤𑁂𑀲𑀦𑀸 𑀧𑀦 𑀲𑀗𑁆𑀕𑀳𑀁 𑀦 𑀆𑀭𑁄𑀳𑀢𑀺. 𑀲𑀦𑁆𑀤𑀲𑁆𑀲𑁂𑀲𑀻𑀢𑀺𑀆𑀤𑀻𑀦𑀺 ¶ 𑀯𑀼𑀢𑁆𑀢𑀢𑁆𑀣𑀸𑀦𑁂𑀯.

𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀻𑀢𑀺 𑀥𑀫𑁆𑀫𑀓𑀣𑀁 𑀓𑀣𑀸𑀧𑁂𑀢𑀼𑀓𑀸𑀫𑁄 𑀚𑀸𑀦𑀸𑀧𑁂𑀲𑀺. 𑀅𑀣 𑀓𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀫𑀳𑀸𑀓𑀲𑁆𑀲𑀧𑀸𑀤𑀻𑀲𑀼 𑀅𑀲𑀻𑀢𑀺𑀫𑀳𑀸𑀣𑁂𑀭𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀪𑀕𑀯𑀸 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀪𑀸𑀭𑀫𑀓𑀸𑀲𑀻𑀢𑀺. 𑀧𑀭𑀺𑀲𑀚𑁆𑀛𑀸𑀲𑀬𑀯𑀲𑁂𑀦. 𑀆𑀬𑀲𑁆𑀫𑀸 𑀳𑀺 𑀆𑀦𑀦𑁆𑀤𑁄 𑀩𑀳𑀼𑀲𑁆𑀲𑀼𑀢𑀸𑀦𑀁 𑀅𑀕𑁆𑀕𑁄, 𑀧𑀳𑁄𑀲𑀺 𑀧𑀭𑀺𑀫𑀡𑁆𑀟𑀮𑁂𑀳𑀺 𑀧𑀤𑀩𑁆𑀬𑀜𑁆𑀚𑀦𑁂𑀳𑀺 𑀫𑀥𑀼𑀭𑀥𑀫𑁆𑀫𑀓𑀣𑀁 𑀓𑀣𑁂𑀢𑀼𑀦𑁆𑀢𑀺 𑀲𑀸𑀓𑀺𑀬𑀫𑀡𑁆𑀟𑀮𑁂 𑀧𑀸𑀓𑀝𑁄 𑀧𑀜𑁆𑀜𑀸𑀢𑁄. 𑀢𑀲𑁆𑀲 𑀲𑀓𑁆𑀬𑀭𑀸𑀚𑀽𑀳𑀺 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸𑀧𑀺 𑀥𑀫𑁆𑀫𑀓𑀣𑀸 𑀲𑀼𑀢𑀧𑀼𑀩𑁆𑀩𑀸, 𑀑𑀭𑁄𑀥𑀸 𑀧𑀦 𑀦𑁂𑀲𑀁 𑀦 𑀬𑀣𑀸𑀭𑀼𑀘𑀺𑀬𑀸 𑀯𑀺𑀳𑀸𑀭𑀁 𑀕𑀦𑁆𑀢𑀼𑀁 𑀮𑀪𑀦𑁆𑀢𑀺, 𑀢𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑁄 𑀯𑀢 𑀪𑀕𑀯𑀸 𑀅𑀧𑁆𑀧𑀁𑀬𑁂𑀯 𑀥𑀫𑁆𑀫𑀓𑀣𑀁 𑀓𑀣𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀜𑀸𑀢𑀺𑀲𑁂𑀝𑁆𑀞𑀲𑁆𑀲 𑀆𑀦𑀦𑁆𑀤𑀲𑁆𑀲 𑀪𑀸𑀭𑀁 𑀓𑀭𑁂𑀬𑁆𑀬𑀸’’𑀢𑀺. 𑀢𑁂𑀲𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀪𑀕𑀯𑀸 𑀢𑀲𑁆𑀲𑁂𑀯 𑀪𑀸𑀭𑀫𑀓𑀸𑀲𑀺.

𑀲𑁂𑀔𑁄 𑀧𑀸𑀝𑀺𑀧𑀤𑁄𑀢𑀺 𑀧𑀝𑀺𑀧𑀦𑁆𑀦𑀓𑁄 𑀲𑁂𑀔𑀲𑀫𑀡𑁄. 𑀲𑁄 𑀢𑀼𑀬𑁆𑀳𑀁 𑀧𑀝𑀺𑀪𑀸𑀢𑀼 𑀉𑀧𑀝𑁆𑀞𑀸𑀢𑀼, 𑀢𑀲𑁆𑀲 𑀧𑀝𑀺𑀧𑀤𑀁 𑀤𑁂𑀲𑁂𑀳𑀻𑀢𑀺 𑀧𑀝𑀺𑀧𑀤𑀸𑀬 𑀧𑀼𑀕𑁆𑀕𑀮𑀁 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀇𑀫𑀁 𑀧𑀝𑀺𑀧𑀤𑀁 𑀦𑀺𑀬𑀫𑁂𑀲𑀺? 𑀩𑀳𑀽𑀳𑀺 𑀓𑀸𑀭𑀡𑁂𑀳𑀺. 𑀇𑀫𑁂 𑀢𑀸𑀯 𑀲𑀓𑁆𑀬𑀸 𑀫𑀗𑁆𑀕𑀮𑀲𑀸𑀮𑀸𑀬 𑀫𑀗𑁆𑀕𑀮𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀺 𑀯𑀟𑁆𑀠𑀺𑀁 𑀇𑀘𑁆𑀙𑀦𑁆𑀢𑀺, 𑀅𑀬𑀜𑁆𑀘 𑀲𑁂𑀔𑀧𑀝𑀺𑀧𑀤𑀸 𑀫𑀬𑁆𑀳𑀁 𑀲𑀸𑀲𑀦𑁂 𑀫𑀗𑁆𑀕𑀮𑀧𑀝𑀺𑀧𑀤𑀸 𑀯𑀟𑁆𑀠𑀫𑀸𑀦𑀓𑀧𑀝𑀺𑀧𑀤𑀸𑀢𑀺𑀧𑀺 𑀇𑀫𑀁 𑀧𑀝𑀺𑀧𑀤𑀁 𑀦𑀺𑀬𑀫𑁂𑀲𑀺. 𑀢𑀲𑁆𑀲𑀜𑁆𑀘 𑀧𑀭𑀺𑀲𑀢𑀺 𑀲𑁂𑀔𑀸𑀯 𑀩𑀳𑀽 𑀦𑀺𑀲𑀺𑀦𑁆𑀦𑀸, 𑀢𑁂 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀝𑁆𑀞𑀸𑀦𑁂 𑀓𑀣𑀻𑀬𑀫𑀸𑀦𑁂 𑀅𑀓𑀺𑀮𑀫𑀦𑁆𑀢𑀸𑀯 𑀲𑀮𑁆𑀮𑀓𑁆𑀔𑁂𑀲𑁆𑀲𑀦𑁆𑀢𑀻𑀢𑀺𑀧𑀺 𑀇𑀫𑀁 𑀧𑀝𑀺𑀧𑀤𑀁 𑀦𑀺𑀬𑀫𑁂𑀲𑀺. 𑀆𑀬𑀲𑁆𑀫𑀸 𑀘 𑀆𑀦𑀦𑁆𑀤𑁄 𑀲𑁂𑀔𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄𑀯, 𑀲𑁄 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑁂 𑀧𑀘𑁆𑀘𑀓𑁆𑀔𑀝𑁆𑀞𑀸𑀦𑁂 𑀓𑀣𑁂𑀦𑁆𑀢𑁄 𑀅𑀓𑀺𑀮𑀫𑀦𑁆𑀢𑁄 𑀯𑀺𑀜𑁆𑀜𑀸𑀧𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻𑀢𑀺𑀧𑀺 𑀇𑀫𑀁 𑀧𑀝𑀺𑀧𑀤𑀁 𑀦𑀺𑀬𑀫𑁂𑀲𑀺. 𑀲𑁂𑀔𑀧𑀝𑀺𑀧𑀤𑀸𑀬 𑀘 𑀢𑀺𑀲𑁆𑀲𑁄𑀧𑀺 𑀲𑀺𑀓𑁆𑀔𑀸 𑀑𑀲𑀝𑀸 ¶ , 𑀢𑀢𑁆𑀣 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬 ¶ 𑀓𑀣𑀺𑀢𑀸𑀬 𑀲𑀓𑀮𑀁 𑀯𑀺𑀦𑀬𑀧𑀺𑀝𑀓𑀁 𑀓𑀣𑀺𑀢𑀫𑁂𑀯 𑀳𑁄𑀢𑀺, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸𑀬 𑀓𑀣𑀺𑀢𑀸𑀬 𑀲𑀓𑀮𑀁 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀓𑀣𑀺𑀢𑀁 𑀳𑁄𑀢𑀺, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀬 𑀓𑀣𑀺𑀢𑀸𑀬 𑀲𑀓𑀮𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀓𑀣𑀺𑀢𑀁 𑀳𑁄𑀢𑀺, 𑀆𑀦𑀦𑁆𑀤𑁄 𑀘 𑀩𑀳𑀼𑀲𑁆𑀲𑀼𑀢𑁄 𑀢𑀺𑀧𑀺𑀝𑀓𑀥𑀭𑁄, 𑀲𑁄 𑀧𑀳𑁄𑀢𑀺 𑀢𑀻𑀳𑀺 𑀧𑀺𑀝𑀓𑁂𑀳𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀓𑀣𑁂𑀢𑀼𑀁, 𑀏𑀯𑀁 𑀓𑀣𑀺𑀢𑁂 𑀲𑀓𑁆𑀬𑀸𑀦𑀁 𑀫𑀗𑁆𑀕𑀮𑀫𑁂𑀯 𑀯𑀟𑁆𑀠𑀺𑀬𑁂𑀯 𑀪𑀯𑀺𑀲𑁆𑀲𑀢𑀻𑀢𑀺𑀧𑀺 𑀇𑀫𑀁 𑀧𑀝𑀺𑀧𑀤𑀁 𑀦𑀺𑀬𑀫𑁂𑀲𑀺.

𑀧𑀺𑀝𑁆𑀞𑀺 𑀫𑁂 𑀆𑀕𑀺𑀮𑀸𑀬𑀢𑀻𑀢𑀺 𑀓𑀲𑁆𑀫𑀸 𑀆𑀕𑀺𑀮𑀸𑀬𑀢𑀺? 𑀪𑀕𑀯𑀢𑁄 𑀳𑀺 𑀙𑀩𑁆𑀩𑀲𑁆𑀲𑀸𑀦𑀺 𑀧𑀥𑀸𑀦𑀁 𑀧𑀤𑀳𑀦𑁆𑀢𑀲𑁆𑀲 ¶ 𑀫𑀳𑀦𑁆𑀢𑀁 𑀓𑀸𑀬𑀤𑀼𑀓𑁆𑀔𑀁 𑀅𑀳𑁄𑀲𑀺, 𑀅𑀣𑀲𑁆𑀲 𑀅𑀧𑀭𑀪𑀸𑀕𑁂 𑀫𑀳𑀮𑁆𑀮𑀓𑀓𑀸𑀮𑁂 𑀧𑀺𑀝𑁆𑀞𑀺𑀯𑀸𑀢𑁄 𑀉𑀧𑁆𑀧𑀚𑁆𑀚𑀺. 𑀅𑀓𑀸𑀭𑀡𑀁 𑀯𑀸 𑀏𑀢𑀁. 𑀧𑀳𑁄𑀢𑀺 𑀳𑀺 𑀪𑀕𑀯𑀸 𑀉𑀧𑁆𑀧𑀦𑁆𑀦𑀁 𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀏𑀓𑀫𑁆𑀧𑀺 𑀤𑁆𑀯𑁂𑀧𑀺 𑀲𑀢𑁆𑀢𑀸𑀳𑁂 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑀼𑀁. 𑀲𑀦𑁆𑀣𑀸𑀕𑀸𑀭𑀲𑀸𑀮𑀁 𑀧𑀦 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀅𑀳𑁄𑀲𑀺, 𑀢𑀢𑁆𑀣 𑀧𑀸𑀤𑀥𑁄𑀯𑀦𑀝𑁆𑀞𑀸𑀦𑀢𑁄 𑀬𑀸𑀯 𑀥𑀫𑁆𑀫𑀸𑀲𑀦𑀸 𑀅𑀕𑀫𑀸𑀲𑀺, 𑀏𑀢𑁆𑀢𑀓𑁂 𑀞𑀸𑀦𑁂 𑀕𑀫𑀦𑀁 𑀦𑀺𑀧𑁆𑀨𑀦𑁆𑀦𑀁. 𑀥𑀫𑁆𑀫𑀸𑀲𑀦𑀁 𑀧𑀢𑁆𑀢𑁄 𑀣𑁄𑀓𑀁 𑀞𑀢𑁆𑀯𑀸 𑀦𑀺𑀲𑀻𑀤𑀺, 𑀏𑀢𑁆𑀢𑀓𑁂 𑀞𑀸𑀦𑀁. 𑀤𑀺𑀬𑀟𑁆𑀠𑀬𑀸𑀫𑀁 𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺, 𑀏𑀢𑁆𑀢𑀓𑁂 𑀞𑀸𑀦𑁂 𑀦𑀺𑀲𑀚𑁆𑀚𑀸 𑀦𑀺𑀧𑁆𑀨𑀦𑁆𑀦𑀸. 𑀇𑀤𑀸𑀦𑀺 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀣𑁄𑀓𑀁 𑀦𑀺𑀧𑀦𑁆𑀦𑁂 𑀲𑀬𑀦𑀁 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀢𑀻𑀢𑀺 𑀏𑀯𑀁 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀉𑀧𑀸𑀤𑀺𑀦𑁆𑀦𑀓𑀲𑀭𑀻𑀭𑀜𑁆𑀘 𑀦𑀸𑀫 ‘‘𑀦𑁄 𑀆𑀕𑀺𑀮𑀸𑀬𑀢𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀢𑀲𑁆𑀫𑀸 𑀘𑀺𑀭𑀁 𑀦𑀺𑀲𑀚𑁆𑀚𑀸𑀬 𑀲𑀜𑁆𑀚𑀸𑀢𑀁 𑀅𑀧𑁆𑀧𑀓𑀫𑁆𑀧𑀺 𑀆𑀕𑀺𑀮𑀸𑀬𑀦𑀁 𑀕𑀳𑁂𑀢𑁆𑀯𑀸 𑀏𑀯𑀫𑀸𑀳.

𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀲𑀦𑁆𑀣𑀸𑀕𑀸𑀭𑀲𑁆𑀲 𑀓𑀺𑀭 𑀏𑀓𑀧𑀲𑁆𑀲𑁂 𑀢𑁂 𑀭𑀸𑀚𑀸𑀦𑁄 𑀧𑀝𑁆𑀝𑀲𑀸𑀡𑀺𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀓𑀧𑁆𑀧𑀺𑀬𑀫𑀜𑁆𑀘𑀓𑀁 𑀧𑀜𑁆𑀜𑀧𑁂𑀢𑁆𑀯𑀸 𑀓𑀧𑁆𑀧𑀺𑀬𑀧𑀘𑁆𑀘𑀢𑁆𑀣𑀭𑀡𑁂𑀦 𑀅𑀢𑁆𑀣𑀭𑀺𑀢𑁆𑀯𑀸 𑀉𑀧𑀭𑀺 𑀲𑀼𑀯𑀡𑁆𑀡-𑀢𑀸𑀭𑀓-𑀕𑀦𑁆𑀥𑀫𑀸𑀮𑀸-𑀤𑀸𑀫𑀧𑀝𑀺𑀫𑀡𑁆𑀟𑀺𑀢𑀁 𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀕𑀦𑁆𑀥𑀢𑁂𑀮𑀧𑁆𑀧𑀤𑀻𑀧𑀁 𑀆𑀭𑁄𑀧𑀬𑀺𑀁𑀲𑀼 ‘‘𑀅𑀧𑁆𑀧𑁂𑀯 𑀦𑀸𑀫 𑀲𑀢𑁆𑀣𑀸 𑀥𑀫𑁆𑀫𑀸𑀲𑀦𑀢𑁄 ¶ 𑀯𑀼𑀝𑁆𑀞𑀸𑀬 𑀣𑁄𑀓𑀁 𑀯𑀺𑀲𑁆𑀲𑀫𑀦𑁆𑀢𑁄 𑀇𑀥 𑀦𑀺𑀧𑀚𑁆𑀚𑁂𑀬𑁆𑀬, 𑀏𑀯𑀁 𑀦𑁄 𑀇𑀫𑀁 𑀲𑀦𑁆𑀣𑀸𑀕𑀸𑀭𑀁 𑀪𑀕𑀯𑀢𑀸 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀧𑀭𑀺𑀪𑀼𑀢𑁆𑀢𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑀢𑁆𑀣𑀸𑀧𑀺 𑀢𑀤𑁂𑀯 𑀲𑀦𑁆𑀥𑀸𑀬 𑀢𑀢𑁆𑀣 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀧𑁂𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀉𑀝𑁆𑀞𑀸𑀦𑀲𑀜𑁆𑀜𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸𑀢𑀺 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻𑀢𑀺 𑀯𑀼𑀝𑁆𑀞𑀸𑀦𑀲𑀜𑁆𑀜𑀁 𑀘𑀺𑀢𑁆𑀢𑁂 𑀞𑀧𑁂𑀢𑁆𑀯𑀸.

𑁨𑁩. 𑀫𑀳𑀸𑀦𑀸𑀫𑀁 𑀲𑀓𑁆𑀓𑀁 𑀆𑀫𑀦𑁆𑀢𑁂𑀲𑀻𑀢𑀺 𑀲𑁄 𑀓𑀺𑀭 𑀢𑀲𑁆𑀫𑀺𑀁 𑀓𑀸𑀮𑁂 𑀢𑀲𑁆𑀲𑀁 𑀧𑀭𑀺𑀲𑀢𑀺 𑀚𑁂𑀝𑁆𑀞𑀓𑁄 𑀧𑀸𑀫𑁄𑀓𑁆𑀔𑁄, 𑀢𑀲𑁆𑀫𑀺𑀁 𑀲𑀗𑁆𑀕𑀳𑀺𑀢𑁂 𑀲𑁂𑀲𑀧𑀭𑀺𑀲𑀸 𑀲𑀗𑁆𑀕𑀳𑀺𑀢𑀸𑀯 ¶ 𑀳𑁄𑀢𑀻𑀢𑀺 𑀣𑁂𑀭𑁄 𑀢𑀫𑁂𑀯 𑀆𑀫𑀦𑁆𑀢𑁂𑀲𑀺. 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑁄, 𑀲𑀫𑁆𑀧𑀦𑁆𑀦𑀲𑀻𑀮𑁄 𑀧𑀭𑀺𑀧𑀼𑀡𑁆𑀡𑀲𑀻𑀮𑁄𑀢𑀺 𑀅𑀢𑁆𑀣𑁄. 𑀲𑀤𑁆𑀥𑀫𑁆𑀫𑁂𑀳𑀻𑀢𑀺 𑀲𑀼𑀦𑁆𑀤𑀭𑀥𑀫𑁆𑀫𑁂𑀳𑀺, 𑀲𑀢𑀁 𑀯𑀸 𑀲𑀧𑁆𑀧𑀼𑀭𑀺𑀲𑀸𑀦𑀁 𑀥𑀫𑁆𑀫𑁂𑀳𑀺.

𑁨𑁪. 𑀓𑀣𑀜𑁆𑀘 𑀫𑀳𑀸𑀦𑀸𑀫𑀸𑀢𑀺 𑀇𑀫𑀺𑀦𑀸 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦 𑀲𑁂𑀔𑀧𑀝𑀺𑀧𑀤𑀸𑀬 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀯𑀺𑀢𑁆𑀣𑀸𑀭𑁂𑀢𑀼𑀓𑀸𑀫𑁄 𑀏𑀯𑀫𑀸𑀳. 𑀢𑀢𑁆𑀣 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺𑀆𑀤𑀻𑀦𑀺 ‘‘𑀲𑀫𑁆𑀧𑀦𑁆𑀦𑀲𑀻𑀮𑀸, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀣𑀸’’𑀢𑀺 𑀆𑀓𑀗𑁆𑀔𑁂𑀬𑁆𑀬𑀲𑀼𑀢𑁆𑀢𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁨𑁫. 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦𑀸𑀢𑀺𑀆𑀤𑀻𑀲𑀼 ¶ 𑀉𑀧𑀬𑁄𑀕𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀳𑀺𑀭𑀺𑀬𑀺𑀢𑀩𑁆𑀩𑀸𑀦𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀳𑀺𑀭𑀺𑀬𑀢𑀺 𑀚𑀺𑀕𑀼𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀑𑀢𑁆𑀢𑀧𑁆𑀧𑀦𑀺𑀤𑁆𑀤𑁂𑀲𑁂 𑀳𑁂𑀢𑁆𑀯𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀑𑀢𑁆𑀢𑀧𑁆𑀧𑀲𑁆𑀲 𑀳𑁂𑀢𑀼𑀪𑀽𑀢𑁂𑀳𑀺 𑀑𑀢𑁆𑀢𑀧𑁆𑀧𑀢𑀺 𑀪𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀆𑀭𑀤𑁆𑀥𑀯𑀻𑀭𑀺𑀬𑁄𑀢𑀺 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑁄 𑀅𑀦𑁄𑀲𑀓𑁆𑀓𑀺𑀢𑀫𑀸𑀦𑀲𑁄. 𑀧𑀳𑀸𑀦𑀸𑀬𑀸𑀢𑀺 𑀧𑀳𑀸𑀦𑀢𑁆𑀣𑀸𑀬. 𑀉𑀧𑀲𑀫𑁆𑀧𑀤𑀸𑀬𑀸𑀢𑀺 ¶ 𑀧𑀝𑀺𑀮𑀸𑀪𑀢𑁆𑀣𑀸𑀬. 𑀣𑀸𑀫𑀯𑀸𑀢𑀺 𑀯𑀻𑀭𑀺𑀬𑀣𑀸𑀫𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀤𑀴𑁆𑀳𑀧𑀭𑀓𑁆𑀓𑀫𑁄𑀢𑀺 𑀣𑀺𑀭𑀧𑀭𑀓𑁆𑀓𑀫𑁄. 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑁄𑀭𑁄𑀧𑀺𑀢𑀥𑀼𑀭𑁄 𑀅𑀦𑁄𑀲𑀓𑁆𑀓𑀺𑀢𑀯𑀻𑀭𑀺𑀬𑁄. 𑀧𑀭𑀫𑁂𑀦𑀸𑀢𑀺 𑀉𑀢𑁆𑀢𑀫𑁂𑀦. 𑀲𑀢𑀺𑀦𑁂𑀧𑀓𑁆𑀓𑁂𑀦𑀸𑀢𑀺 𑀲𑀢𑀺𑀬𑀸 𑀘 𑀦𑀺𑀧𑀓𑀪𑀸𑀯𑁂𑀦 𑀘. 𑀓𑀲𑁆𑀫𑀸 𑀧𑀦 𑀲𑀢𑀺𑀪𑀸𑀚𑀦𑀺𑀬𑁂 𑀧𑀜𑁆𑀜𑀸 𑀆𑀕𑀢𑀸𑀢𑀺? 𑀲𑀢𑀺𑀬𑀸 𑀩𑀮𑀯𑀪𑀸𑀯𑀤𑀻𑀧𑀦𑀢𑁆𑀣𑀁. 𑀧𑀜𑁆𑀜𑀸𑀯𑀺𑀧𑁆𑀧𑀬𑀼𑀢𑁆𑀢𑀸 𑀳𑀺 𑀲𑀢𑀺 𑀤𑀼𑀩𑁆𑀩𑀮𑀸 𑀳𑁄𑀢𑀺, 𑀲𑀫𑁆𑀧𑀬𑀼𑀢𑁆𑀢𑀸 𑀩𑀮𑀯𑀢𑀻𑀢𑀺.

𑀘𑀺𑀭𑀓𑀢𑀫𑁆𑀧𑀻𑀢𑀺 𑀅𑀢𑁆𑀢𑀦𑀸 𑀯𑀸 𑀧𑀭𑁂𑀦 𑀯𑀸 𑀓𑀸𑀬𑁂𑀦 𑀘𑀺𑀭𑀓𑀢𑀁 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀸𑀤𑀺 𑀅𑀲𑀻𑀢𑀺 𑀫𑀳𑀸𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑀁. 𑀘𑀺𑀭𑀪𑀸𑀲𑀺𑀢𑀫𑁆𑀧𑀻𑀢𑀺 𑀅𑀢𑁆𑀢𑀦𑀸 𑀯𑀸 𑀧𑀭𑁂𑀦 𑀯𑀸 𑀯𑀸𑀘𑀸𑀬 𑀘𑀺𑀭𑀪𑀸𑀲𑀺𑀢𑀁 𑀲𑀓𑁆𑀓𑀘𑁆𑀘𑀁 𑀉𑀤𑁆𑀤𑀺𑀲𑀦-𑀉𑀤𑁆𑀤𑀺𑀲𑀸𑀧𑀦-𑀥𑀫𑁆𑀫𑁄𑀲𑀸𑀭𑀡-𑀥𑀫𑁆𑀫𑀤𑁂𑀲𑀦𑀸-𑀉𑀧𑀦𑀺𑀲𑀺𑀦𑁆𑀦𑀓𑀣𑀸-𑀅𑀦𑀼𑀫𑁄𑀤𑀦𑀺𑀬𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀢𑀁 𑀯𑀘𑀻𑀓𑀫𑁆𑀫𑀁. 𑀲𑀭𑀺𑀢𑀸 𑀅𑀦𑀼𑀲𑁆𑀲𑀭𑀺𑀢𑀸𑀢𑀺 𑀢𑀲𑁆𑀫𑀺𑀁 𑀓𑀸𑀬𑁂𑀦 𑀘𑀺𑀭𑀓𑀢𑁂 ‘‘𑀓𑀸𑀬𑁄 𑀦𑀸𑀫 𑀓𑀸𑀬𑀯𑀺𑀜𑁆𑀜𑀢𑁆𑀢𑀺, 𑀘𑀺𑀭𑀪𑀸𑀲𑀺𑀢𑁂 𑀯𑀸𑀘𑀸 𑀦𑀸𑀫 𑀯𑀘𑀻𑀯𑀺𑀜𑁆𑀜𑀢𑁆𑀢𑀺. 𑀢𑀤𑀼𑀪𑀬𑀫𑁆𑀧𑀺 𑀭𑀽𑀧𑀁, 𑀢𑀁𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑀺𑀢𑁆𑀢𑀘𑁂𑀢𑀲𑀺𑀓𑀸 𑀅𑀭𑀽𑀧𑀁. 𑀇𑀢𑀺 𑀇𑀫𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀏𑀯𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀏𑀯𑀁 𑀦𑀺𑀭𑀼𑀤𑁆𑀥𑀸’’𑀢𑀺 𑀲𑀭𑀢𑀺 𑀘𑁂𑀯 𑀅𑀦𑀼𑀲𑁆𑀲𑀭𑀢𑀺 𑀘, 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀩𑁄𑀚𑁆𑀛𑀗𑁆𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀳𑀺 𑀲𑀢𑀺 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀢𑀸𑀬 𑀲𑀢𑀺𑀬𑀸 𑀏𑀲 𑀲𑀓𑀺𑀫𑁆𑀧𑀺 𑀲𑀭𑀡𑁂𑀦 𑀲𑀭𑀺𑀢𑀸, 𑀧𑀼𑀦𑀧𑁆𑀧𑀼𑀦𑀁 𑀲𑀭𑀡𑁂𑀦 𑀅𑀦𑀼𑀲𑁆𑀲𑀭𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸𑀢𑀺 ¶ 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀉𑀤𑀬𑀯𑀬𑀕𑀸𑀫𑀺𑀦𑀺𑀬𑀸 𑀉𑀤𑀬𑀜𑁆𑀘 𑀯𑀬𑀜𑁆𑀘 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑀸𑀬. 𑀅𑀭𑀺𑀬𑀸𑀬𑀸𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀘 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀘 𑀓𑀺𑀮𑁂𑀲𑁂𑀳𑀺 𑀆𑀭𑀓𑀸 𑀞𑀺𑀢𑀸𑀬 𑀧𑀭𑀺𑀲𑀼𑀤𑁆𑀥𑀸𑀬. 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀘𑁂𑀯 𑀫𑀕𑁆𑀕𑀧𑀜𑁆𑀜𑀸𑀬 𑀘 𑀲𑀫𑀗𑁆𑀕𑀻𑀪𑀽𑀢𑁄. 𑀦𑀺𑀩𑁆𑀩𑁂𑀥𑀺𑀓𑀸𑀬𑀸𑀢𑀺 ¶ 𑀲𑀸𑀬𑁂𑀯 𑀦𑀺𑀩𑁆𑀩𑀺𑀚𑁆𑀛𑀦𑀢𑁄 𑀦𑀺𑀩𑁆𑀩𑁂𑀥𑀺𑀓𑀸𑀢𑀺 𑀯𑀼𑀘𑁆𑀘𑀢𑀺, 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀫𑀕𑁆𑀕𑀧𑀜𑁆𑀜𑀸𑀬 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀮𑁄𑀪𑀓𑁆𑀔𑀦𑁆𑀥𑀁 𑀤𑁄𑀲𑀓𑁆𑀔𑀦𑁆𑀥𑀁 𑀫𑁄𑀳𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀺𑀚𑁆𑀛𑀢𑀺 𑀧𑀤𑀸𑀮𑁂𑀢𑀻𑀢𑀺 𑀦𑀺𑀩𑁆𑀩𑁂𑀥𑀺𑀓𑀸. 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀢𑀤𑀗𑁆𑀕𑀯𑀲𑁂𑀦 𑀦𑀺𑀩𑁆𑀩𑁂𑀥𑀺𑀓𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀧𑀝𑀺𑀮𑀸𑀪𑀲𑀁𑀯𑀢𑁆𑀢𑀦𑀢𑁄 𑀘𑀸𑀢𑀺 𑀯𑀺𑀧𑀲𑁆𑀲𑀦𑀸 ‘‘𑀦𑀺𑀩𑁆𑀩𑁂𑀥𑀺𑀓𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸𑀢𑀺 𑀇𑀥𑀸𑀧𑀺 𑀫𑀕𑁆𑀕𑀧𑀜𑁆𑀜𑀸 ‘‘𑀲𑀫𑁆𑀫𑀸 𑀳𑁂𑀢𑀼𑀦𑀸 𑀦𑀬𑁂𑀦 𑀯𑀝𑁆𑀝𑀤𑀼𑀓𑁆𑀔𑀁 𑀔𑁂𑀧𑀬𑀫𑀸𑀦𑀸 𑀕𑀘𑁆𑀙𑀢𑀻𑀢𑀺 ¶ 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀻 𑀦𑀸𑀫. 𑀯𑀺𑀧𑀲𑁆𑀲𑀦𑀸 𑀢𑀤𑀗𑁆𑀕𑀯𑀲𑁂𑀦 𑀯𑀝𑁆𑀝𑀤𑀼𑀓𑁆𑀔𑀜𑁆𑀘 𑀓𑀺𑀮𑁂𑀲𑀤𑀼𑀓𑁆𑀔𑀜𑁆𑀘 𑀔𑁂𑀧𑀬𑀫𑀸𑀦𑀸 𑀕𑀘𑁆𑀙𑀢𑀻𑀢𑀺 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀻. 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸 𑀯𑀸 𑀫𑀕𑁆𑀕𑀧𑀜𑁆𑀜𑀸𑀬 𑀧𑀝𑀺𑀮𑀸𑀪𑀲𑀁𑀯𑀢𑁆𑀢𑀦𑀢𑁄 𑀏𑀲𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀻’’𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁨𑁬. 𑀅𑀪𑀺𑀘𑁂𑀢𑀲𑀺𑀓𑀸𑀦𑀦𑁆𑀢𑀺 𑀅𑀪𑀺𑀘𑀺𑀢𑁆𑀢𑀁 𑀲𑁂𑀝𑁆𑀞𑀘𑀺𑀢𑁆𑀢𑀁 𑀲𑀺𑀢𑀸𑀦𑀁 𑀦𑀺𑀲𑁆𑀲𑀺𑀢𑀸𑀦𑀁. 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀦𑀦𑁆𑀢𑀺 𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂 𑀲𑀼𑀔𑀧𑀝𑀺𑀮𑀸𑀪𑀳𑁂𑀢𑀽𑀦𑀁. 𑀦𑀺𑀓𑀸𑀫𑀮𑀸𑀪𑀻𑀢𑀺 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀲𑀫𑀸𑀧𑀚𑁆𑀚𑀺𑀢𑀸. 𑀅𑀓𑀺𑀘𑁆𑀙𑀮𑀸𑀪𑀻𑀢𑀺 𑀦𑀺𑀤𑀼𑀓𑁆𑀔𑀮𑀸𑀪𑀻. 𑀅𑀓𑀲𑀺𑀭𑀮𑀸𑀪𑀻𑀢𑀺 𑀯𑀺𑀧𑀼𑀮𑀮𑀸𑀪𑀻. 𑀧𑀕𑀼𑀡𑀪𑀸𑀯𑁂𑀦 𑀏𑀓𑁄 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀲𑀫𑀸𑀥𑀺𑀧𑀸𑀭𑀺𑀧𑀦𑁆𑀣𑀺𑀓𑀥𑀫𑁆𑀫𑁂 𑀧𑀦 𑀅𑀓𑀺𑀮𑀫𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀲𑁄 𑀅𑀢𑁆𑀢𑀦𑁄 𑀅𑀦𑀺𑀘𑁆𑀙𑀸𑀬 𑀔𑀺𑀧𑁆𑀧𑀫𑁂𑀯 𑀯𑀼𑀝𑁆𑀞𑀸𑀢𑀺, 𑀬𑀣𑀸𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀫𑀸𑀧𑀢𑁆𑀢𑀺𑀁 𑀞𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀅𑀬𑀁 𑀓𑀺𑀘𑁆𑀙𑀮𑀸𑀪𑀻 𑀓𑀲𑀺𑀭𑀮𑀸𑀪𑀻 𑀦𑀸𑀫. 𑀏𑀓𑁄 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀘 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀲𑀫𑀸𑀥𑀺𑀧𑀸𑀭𑀺𑀧𑀦𑁆𑀣𑀺𑀓𑀥𑀫𑁆𑀫𑁂 𑀘 𑀅𑀓𑀺𑀮𑀫𑀦𑁆𑀢𑁄 𑀯𑀺𑀓𑁆𑀔𑀫𑁆𑀪𑁂𑀢𑀺, 𑀲𑁄 𑀬𑀣𑀸𑀧𑀭𑀺𑀘𑁆𑀙𑁂𑀤𑀯𑀲𑁂𑀦𑁂𑀯 𑀯𑀼𑀝𑁆𑀞𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀅𑀬𑀁 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻 𑀦𑀸𑀫.

𑁨𑁭. 𑀅𑀬𑀁 ¶ 𑀯𑀼𑀘𑁆𑀘𑀢𑀺 𑀫𑀳𑀸𑀦𑀸𑀫 𑀅𑀭𑀺𑀬𑀲𑀸𑀯𑀓𑁄 𑀲𑁂𑀔𑁄 𑀧𑀸𑀝𑀺𑀧𑀤𑁄𑀢𑀺 𑀫𑀳𑀸𑀦𑀸𑀫 𑀅𑀭𑀺𑀬𑀲𑀸𑀯𑀓𑁄 𑀲𑁂𑀔𑁄 𑀧𑀸𑀝𑀺𑀧𑀤𑁄 𑀯𑀺𑀧𑀲𑁆𑀲𑀦𑀸𑀕𑀩𑁆𑀪𑀸𑀬 𑀯𑀟𑁆𑀠𑀫𑀸𑀦𑀓𑀧𑀝𑀺𑀧𑀤𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀧𑀼𑀘𑁆𑀘𑀡𑁆𑀟𑀢𑀸𑀬𑀸𑀢𑀺 𑀅𑀧𑀽𑀢𑀺𑀅𑀡𑁆𑀟𑀢𑀸𑀬. 𑀪𑀩𑁆𑀩𑁄 𑀅𑀪𑀺𑀦𑀺𑀩𑁆𑀪𑀺𑀤𑀸𑀬𑀸𑀢𑀺 𑀯𑀺𑀧𑀲𑁆𑀲𑀦𑀸𑀤𑀺𑀜𑀸𑀡𑀧𑁆𑀧𑀪𑁂𑀤𑀸𑀬 𑀪𑀩𑁆𑀩𑁄. 𑀲𑀫𑁆𑀩𑁄𑀥𑀸𑀬𑀸𑀢𑀺 𑀅𑀭𑀺𑀬𑀫𑀕𑁆𑀕𑀸𑀬. 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲𑀸𑀢𑀺 𑀅𑀭𑀳𑀢𑁆𑀢𑀁 ¶ 𑀅𑀦𑀼𑀢𑁆𑀢𑀭𑁄 𑀬𑁄𑀕𑀓𑁆𑀔𑁂𑀫𑁄 𑀦𑀸𑀫, 𑀢𑀤𑀪𑀺𑀕𑀫𑀸𑀬 𑀪𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀬𑀸 𑀧𑀦𑀸𑀬𑀫𑁂𑀢𑁆𑀣 𑀅𑀢𑁆𑀣𑀤𑀻𑀧𑀦𑀢𑁆𑀣𑀁 𑀉𑀧𑀫𑀸 𑀆𑀳𑀝𑀸, 𑀲𑀸 𑀘𑁂𑀢𑁄𑀔𑀺𑀮𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀯𑀮𑀜𑁆𑀳𑀺 𑀢𑀢𑁆𑀣 ‘‘𑀢𑀲𑁆𑀲𑀸 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑁂𑀲𑀼 𑀢𑀺𑀯𑀺𑀥𑀓𑀺𑀭𑀺𑀬𑀓𑀭𑀡𑀁 𑀯𑀺𑀬 𑀳𑀺 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀉𑀲𑁆𑀲𑁄𑀴𑁆𑀳𑀺𑀧𑀦𑁆𑀦𑀭𑀲𑁂𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀪𑀸𑀯𑁄’’𑀢𑀺 𑀬𑀁 𑀏𑀯𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀆𑀕𑀢𑀁, 𑀢𑀁 𑀇𑀥 𑀏𑀯𑀁 𑀲𑀻𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀻𑀢𑀺𑀆𑀤𑀺𑀯𑀘𑀦𑀢𑁄 ‘‘𑀢𑀲𑁆𑀲𑀸 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑁂𑀲𑀼 𑀢𑀺𑀯𑀺𑀥𑀓𑀺𑀭𑀺𑀬𑀓𑀭𑀡𑀁 𑀯𑀺𑀬 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀻𑀮𑀲𑀫𑁆𑀧𑀦𑁆𑀦𑀢𑀸𑀤𑀻𑀳𑀺 𑀧𑀦𑁆𑀦𑀭𑀲𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀗𑁆𑀕𑀺𑀪𑀸𑀯𑁄’’𑀢𑀺. 𑀏𑀯𑀁 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀲𑀤𑀺𑀲𑀫𑁂𑀯.

𑁨𑁮. 𑀇𑀫𑀁𑀬𑁂𑀯 𑀅𑀦𑀼𑀢𑁆𑀢𑀭𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀦𑁆𑀢𑀺 𑀇𑀫𑀁 𑀧𑀞𑀫𑀸𑀤𑀺𑀚𑁆𑀛𑀸𑀦𑁂𑀳𑀺 𑀅𑀲𑀤𑀺𑀲𑀁 𑀉𑀢𑁆𑀢𑀫𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁. 𑀧𑀞𑀫𑀸𑀪𑀺𑀦𑀺𑀩𑁆𑀪𑀺𑀤𑀸𑀢𑀺 𑀧𑀞𑀫𑁄 𑀜𑀸𑀡𑀪𑁂𑀤𑁄. 𑀤𑀼𑀢𑀺𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 ¶ 𑀦𑀬𑁄. 𑀓𑀼𑀓𑁆𑀓𑀼𑀝𑀘𑁆𑀙𑀸𑀧𑀓𑁄 𑀧𑀦 𑀏𑀓𑀯𑀸𑀭𑀁 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀏𑀓𑀯𑀸𑀭𑀁 𑀅𑀡𑁆𑀟𑀓𑁄𑀲𑀢𑁄𑀢𑀺 𑀤𑁆𑀯𑁂 𑀯𑀸𑀭𑁂 𑀚𑀸𑀬𑀢𑀺. 𑀅𑀭𑀺𑀬𑀲𑀸𑀯𑀓𑁄 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀢𑀸𑀬𑁄 𑀯𑀸𑀭𑁂 𑀚𑀸𑀬𑀢𑀺. 𑀧𑀼𑀩𑁆𑀩𑁂𑀦𑀺𑀯𑀸𑀲𑀘𑁆𑀙𑀸𑀤𑀓𑀁 ¶ 𑀢𑀫𑀁 𑀯𑀺𑀦𑁄𑀤𑁂𑀢𑁆𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀧𑀞𑀫𑀁 𑀚𑀸𑀬𑀢𑀺, 𑀲𑀢𑁆𑀢𑀸𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀘𑁆𑀙𑀸𑀤𑀓𑀁 𑀢𑀫𑀁 𑀯𑀺𑀦𑁄𑀤𑁂𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂𑀦 𑀤𑀼𑀢𑀺𑀬𑀁 𑀚𑀸𑀬𑀢𑀺, 𑀘𑀢𑀼𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀁 𑀢𑀫𑀁 𑀯𑀺𑀦𑁄𑀤𑁂𑀢𑁆𑀯𑀸 𑀆𑀲𑀯𑀓𑁆𑀔𑀬𑀜𑀸𑀡𑁂𑀦 𑀢𑀢𑀺𑀬𑀁 𑀚𑀸𑀬𑀢𑀺.

𑁨𑁯. 𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀘𑀭𑀡𑀲𑁆𑀫𑀺𑀦𑁆𑀢𑀺 𑀇𑀤𑀫𑁆𑀧𑀺 𑀲𑀻𑀮𑀁 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀭𑀡𑀁 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀘𑀭𑀡𑀁 𑀦𑀸𑀫 𑀩𑀳𑀼 𑀅𑀦𑁂𑀓𑀯𑀺𑀥𑀁, 𑀲𑀻𑀮𑀸𑀤𑀬𑁄 𑀧𑀦𑁆𑀦𑀭𑀲𑀥𑀫𑁆𑀫𑀸, 𑀢𑀢𑁆𑀣 𑀇𑀤𑀫𑁆𑀧𑀺 𑀏𑀓𑀁 𑀘𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀧𑀤𑀢𑁆𑀣𑁄 𑀧𑀦 𑀘𑀭𑀢𑀺 𑀢𑁂𑀦 𑀅𑀕𑀢𑀧𑀼𑀩𑁆𑀩𑀁 𑀤𑀺𑀲𑀁 𑀕𑀘𑁆𑀙𑀢𑀻𑀢𑀺 𑀘𑀭𑀡𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀇𑀤𑀫𑁆𑀧𑀺𑀲𑁆𑀲 𑀳𑁄𑀢𑀺 𑀯𑀺𑀚𑁆𑀚𑀸𑀬𑀸𑀢𑀺 𑀇𑀤𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀢𑀲𑁆𑀲 𑀯𑀺𑀚𑁆𑀚𑀸 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀚𑁆𑀚𑀸 𑀦𑀸𑀫 𑀩𑀳𑀼 𑀅𑀦𑁂𑀓𑀯𑀺𑀥𑀸, 𑀯𑀺𑀧𑀲𑁆𑀲𑀦𑀜𑀸𑀡𑀸𑀤𑀻𑀦𑀺 𑀅𑀝𑁆𑀞 𑀜𑀸𑀡𑀸𑀦𑀺, 𑀢𑀢𑁆𑀣 𑀇𑀤𑀫𑁆𑀧𑀺 𑀜𑀸𑀡𑀁 𑀏𑀓𑀸 𑀯𑀺𑀚𑁆𑀚𑀸𑀢𑀺𑀧𑀺 𑀅𑀢𑁆𑀣𑁄. 𑀧𑀤𑀢𑁆𑀣𑁄 𑀧𑀦 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀏𑀢𑀸𑀬 𑀚𑀸𑀦𑀸𑀢𑀻𑀢𑀺 𑀯𑀺𑀚𑁆𑀚𑀸. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀯𑀺𑀚𑁆𑀚𑀸𑀲𑀫𑁆𑀧𑀦𑁆𑀦𑁄 𑀇𑀢𑀺𑀧𑀻𑀢𑀺 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀯𑀺𑀚𑁆𑀚𑀸𑀲𑀫𑁆𑀧𑀦𑁆𑀦𑁄 𑀇𑀢𑀺𑀧𑀺. 𑀘𑀭𑀡𑀲𑀫𑁆𑀧𑀦𑁆𑀦𑁄 𑀇𑀢𑀺𑀧𑀻𑀢𑀺 𑀧𑀜𑁆𑀘𑀤𑀲𑀳𑀺 𑀥𑀫𑁆𑀫𑁂𑀳𑀺 𑀘𑀭𑀡𑀲𑀫𑁆𑀧𑀦𑁆𑀦𑁄 𑀇𑀢𑀺𑀧𑀺. 𑀢𑀤𑀼𑀪𑀬𑁂𑀦 𑀧𑀦 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀇𑀢𑀺𑀧𑀻𑀢𑀺.

𑁩𑁦. 𑀲𑀦𑀗𑁆𑀓𑀼𑀫𑀸𑀭𑁂𑀦𑀸𑀢𑀺 ¶ 𑀧𑁄𑀭𑀸𑀡𑀓𑀓𑀼𑀫𑀸𑀭𑁂𑀦, 𑀘𑀺𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀓𑀼𑀫𑀸𑀭𑁄𑀢𑀺 𑀧𑀜𑁆𑀜𑀸𑀢𑁂𑀦. 𑀲𑁄 𑀓𑀺𑀭 𑀫𑀦𑀼𑀲𑁆𑀲𑀧𑀣𑁂 𑀧𑀜𑁆𑀘𑀘𑀽𑀴𑀓𑀓𑀼𑀫𑀸𑀭𑀓𑀓𑀸𑀮𑁂 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺, 𑀢𑀲𑁆𑀲 𑀲𑁄 𑀅𑀢𑁆𑀢𑀪𑀸𑀯𑁄 𑀧𑀺𑀬𑁄 𑀅𑀳𑁄𑀲𑀺 𑀫𑀦𑀸𑀧𑁄, 𑀢𑀲𑁆𑀫𑀸 𑀢𑀸𑀤𑀺𑀲𑁂𑀦𑁂𑀯 𑀅𑀢𑁆𑀢𑀪𑀸𑀯𑁂𑀦 𑀘𑀭𑀢𑀺, 𑀢𑁂𑀦 𑀦𑀁 𑀲𑀦𑀗𑁆𑀓𑀼𑀫𑀸𑀭𑁄𑀢𑀺 𑀲𑀜𑁆𑀚𑀸𑀦𑀦𑁆𑀢𑀺. 𑀚𑀦𑁂𑀢𑀲𑁆𑀫𑀺𑀦𑁆𑀢𑀺 ¶ 𑀚𑀦𑀺𑀢𑀲𑁆𑀫𑀺𑀁, 𑀧𑀚𑀸𑀬𑀸𑀢𑀺 𑀅𑀢𑁆𑀣𑁄. 𑀬𑁂 𑀕𑁄𑀢𑁆𑀢𑀧𑀝𑀺𑀲𑀸𑀭𑀺𑀦𑁄𑀢𑀺 𑀬𑁂 𑀚𑀦𑁂𑀢𑀲𑁆𑀫𑀺𑀁 𑀕𑁄𑀢𑁆𑀢𑀁 𑀧𑀝𑀺𑀲𑀭𑀦𑁆𑀢𑀺 ‘‘𑀅𑀳𑀁 𑀕𑁄𑀢𑀫𑁄, 𑀅𑀳𑀁 𑀓𑀲𑁆𑀲𑀧𑁄’’𑀢𑀺, 𑀢𑁂𑀲𑀼 𑀮𑁄𑀓𑁂 𑀕𑁄𑀢𑁆𑀢𑀧𑀝𑀺𑀲𑀸𑀭𑀻𑀲𑀼 𑀔𑀢𑁆𑀢𑀺𑀬𑁄 𑀲𑁂𑀝𑁆𑀞𑁄. 𑀅𑀦𑀼𑀫𑀢𑀸 𑀪𑀕𑀯𑀢𑀸𑀢𑀺 𑀫𑀫 𑀧𑀜𑁆𑀳𑀩𑁆𑀬𑀸𑀓𑀭𑀡𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀤𑁂𑀲𑀺𑀢𑀸𑀢𑀺 𑀅𑀫𑁆𑀩𑀝𑁆𑀞𑀲𑀼𑀢𑁆𑀢𑁂 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 ‘‘𑀅𑀳𑀫𑁆𑀧𑀺, 𑀅𑀫𑁆𑀩𑀝𑁆𑀞, 𑀏𑀯𑀁 𑀯𑀤𑀸𑀫𑀺 𑁋

‘𑀔𑀢𑁆𑀢𑀺𑀬𑁄 ¶ 𑀲𑁂𑀝𑁆𑀞𑁄 𑀚𑀦𑁂𑀢𑀲𑁆𑀫𑀺𑀁, 𑀬𑁂 𑀕𑁄𑀢𑁆𑀢𑀧𑀝𑀺𑀲𑀸𑀭𑀺𑀦𑁄;

𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄, 𑀲𑁄 𑀲𑁂𑀝𑁆𑀞𑁄 𑀤𑁂𑀯𑀫𑀸𑀦𑀼𑀲𑁂’𑀢𑀺’’. (𑀤𑀻. 𑀦𑀺. 𑁧.𑁨𑁭𑁭) 𑁋

𑀏𑀯𑀁 𑀪𑀸𑀲𑀦𑁆𑀢𑁂𑀦 𑀅𑀦𑀼𑀜𑁆𑀜𑀸𑀢𑀸 𑀅𑀦𑀼𑀫𑁄𑀤𑀺𑀢𑀸. 𑀲𑀸𑀥𑀼 𑀲𑀸𑀥𑀼 𑀆𑀦𑀦𑁆𑀤𑀸𑀢𑀺, 𑀪𑀕𑀯𑀸 𑀓𑀺𑀭 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀦𑀺𑀤𑁆𑀤𑀁 𑀅𑀦𑁄𑀓𑁆𑀓𑀫𑀦𑁆𑀢𑁄𑀯 𑀇𑀫𑀁 𑀲𑀼𑀢𑁆𑀢𑀁 𑀲𑀼𑀢𑁆𑀯𑀸 𑀆𑀦𑀦𑁆𑀤𑁂𑀦 𑀲𑁂𑀔𑀧𑀝𑀺𑀧𑀤𑀸𑀬 𑀓𑀽𑀝𑀁 𑀕𑀳𑀺𑀢𑀦𑁆𑀢𑀺 𑀜𑀢𑁆𑀯𑀸 𑀉𑀝𑁆𑀞𑀸𑀬 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀲𑀸𑀥𑀼𑀓𑀸𑀭𑀁 𑀅𑀤𑀸𑀲𑀺. 𑀏𑀢𑁆𑀢𑀸𑀯𑀢𑀸 𑀘 𑀧𑀦 𑀇𑀤𑀁 𑀲𑀼𑀢𑁆𑀢𑀁 𑀚𑀺𑀦𑀪𑀸𑀲𑀺𑀢𑀁 𑀦𑀸𑀫 𑀚𑀸𑀢𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀲𑁂𑀔𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑁄𑀢𑀮𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀏𑀯𑀁 ¶ 𑀫𑁂 𑀲𑀼𑀢𑀦𑁆𑀢𑀺 𑀧𑁄𑀢𑀮𑀺𑀬𑀲𑀼𑀢𑁆𑀢𑀁. 𑀢𑀢𑁆𑀣 𑀅𑀗𑁆𑀕𑀼𑀢𑁆𑀢𑀭𑀸𑀧𑁂𑀲𑀽𑀢𑀺 𑀅𑀗𑁆𑀕𑀸𑀬𑁂𑀯 𑀲𑁄 𑀚𑀦𑀧𑀤𑁄, 𑀫𑀳𑀺𑀬𑀸 𑀧𑀦𑀲𑁆𑀲 𑀉𑀢𑁆𑀢𑀭𑁂𑀦 𑀬𑀸 𑀆𑀧𑁄, 𑀢𑀸𑀲𑀁 𑀅𑀯𑀺𑀤𑀽𑀭𑀢𑁆𑀢𑀸 𑀉𑀢𑁆𑀢𑀭𑀸𑀧𑁄𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀓𑀢𑀭𑀫𑀳𑀺𑀬𑀸 𑀉𑀢𑁆𑀢𑀭𑁂𑀦 𑀬𑀸 𑀆𑀧𑁄𑀢𑀺, 𑀫𑀳𑀸𑀫𑀳𑀺𑀬𑀸. 𑀢𑀢𑁆𑀣𑀸𑀬𑀁 𑀆𑀯𑀺𑀪𑀸𑀯𑀓𑀣𑀸 𑁋 𑀅𑀬𑀁 𑀓𑀺𑀭 𑀚𑀫𑁆𑀩𑀼𑀤𑀻𑀧𑁄 ¶ 𑀤𑀲𑀲𑀳𑀲𑁆𑀲𑀬𑁄𑀚𑀦𑀧𑀭𑀺𑀫𑀸𑀡𑁄. 𑀢𑀢𑁆𑀣 𑀘 𑀘𑀢𑀼𑀲𑀳𑀲𑁆𑀲𑀬𑁄𑀚𑀦𑀧𑁆𑀧𑀫𑀸𑀡𑁄 𑀧𑀤𑁂𑀲𑁄 𑀉𑀤𑀓𑁂𑀦 𑀅𑀚𑁆𑀛𑁄𑀢𑁆𑀣𑀝𑁄 𑀲𑀫𑀼𑀤𑁆𑀤𑁄𑀢𑀺 𑀲𑀗𑁆𑀔𑀁 𑀕𑀢𑁄 ¶ . 𑀢𑀺𑀲𑀳𑀲𑁆𑀲𑀬𑁄𑀚𑀦𑀧𑁆𑀧𑀫𑀸𑀡𑁂 𑀫𑀦𑀼𑀲𑁆𑀲𑀸 𑀯𑀲𑀦𑁆𑀢𑀺. 𑀢𑀺𑀲𑀳𑀲𑁆𑀲𑀬𑁄𑀚𑀦𑀧𑁆𑀧𑀫𑀸𑀡𑁂 𑀳𑀺𑀫𑀯𑀸 𑀧𑀢𑀺𑀝𑁆𑀞𑀺𑀢𑁄 𑀉𑀩𑁆𑀩𑁂𑀥𑁂𑀦 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑁄 𑀘𑀢𑀼𑀭𑀸𑀲𑀻𑀢𑀺𑀓𑀽𑀝𑀲𑀳𑀲𑁆𑀲𑀧𑀝𑀺𑀫𑀡𑁆𑀟𑀺𑀢𑁄 𑀲𑀫𑀦𑁆𑀢𑀢𑁄 𑀲𑀦𑁆𑀤𑀫𑀸𑀦𑀧𑀜𑁆𑀘𑀲𑀢𑀦𑀤𑀻𑀯𑀺𑀘𑀺𑀢𑁆𑀢𑁄, 𑀬𑀢𑁆𑀣 𑀆𑀬𑀸𑀫𑀯𑀺𑀢𑁆𑀣𑀸𑀭𑁂𑀦 𑀘𑁂𑀯 𑀕𑀫𑁆𑀪𑀻𑀭𑀢𑀸𑀬 𑀘 𑀧𑀡𑁆𑀡𑀸𑀲𑀧𑀡𑁆𑀡𑀸𑀲𑀬𑁄𑀚𑀦𑀸 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀧𑀭𑀺𑀫𑀡𑁆𑀟𑀮𑀸 𑀅𑀦𑁄𑀢𑀢𑁆𑀢𑀤𑀳𑁄 𑀓𑀡𑁆𑀡𑀫𑀼𑀡𑁆𑀟𑀤𑀳𑁄 𑀭𑀣𑀓𑀸𑀭𑀤𑀳𑁄 𑀙𑀤𑁆𑀤𑀦𑁆𑀢𑀤𑀳𑁄 𑀓𑀼𑀡𑀸𑀮𑀤𑀳𑁄 𑀫𑀦𑁆𑀤𑀸𑀓𑀺𑀦𑀻𑀤𑀳𑁄 𑀲𑀻𑀳𑀧𑀧𑀸𑀢𑀤𑀳𑁄𑀢𑀺 𑀲𑀢𑁆𑀢 𑀫𑀳𑀸𑀲𑀭𑀸 𑀧𑀢𑀺𑀝𑁆𑀞𑀺𑀢𑀸. 𑀢𑁂𑀲𑀼 𑀅𑀦𑁄𑀢𑀢𑁆𑀢𑀤𑀳𑁄 𑀲𑀼𑀤𑀲𑁆𑀲𑀦𑀓𑀽𑀝𑀁 𑀘𑀺𑀢𑁆𑀭𑀓𑀽𑀝𑀁 𑀓𑀸𑀴𑀓𑀽𑀝𑀁 𑀕𑀦𑁆𑀥𑀫𑀸𑀤𑀦𑀓𑀽𑀝𑀁 𑀓𑁂𑀮𑀸𑀲𑀓𑀽𑀝𑀦𑁆𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀧𑀩𑁆𑀩𑀢𑁂𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑁄.

𑀢𑀢𑁆𑀣 𑀲𑀼𑀤𑀲𑁆𑀲𑀦𑀓𑀽𑀝𑀁 𑀲𑁄𑀯𑀡𑁆𑀡𑀫𑀬𑀁 𑀤𑁆𑀯𑀺𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑀁 𑀅𑀦𑁆𑀢𑁄𑀯𑀗𑁆𑀓𑀁 𑀓𑀸𑀓𑀫𑀼𑀔𑀲𑀡𑁆𑀞𑀸𑀦𑀁 𑀢𑀫𑁂𑀯 𑀲𑀭𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀞𑀺𑀢𑀁. 𑀘𑀺𑀢𑁆𑀭𑀓𑀽𑀝𑀁 𑀲𑀩𑁆𑀩𑀭𑀢𑀦𑀫𑀬𑀁. 𑀓𑀸𑀴𑀓𑀽𑀝𑀁 𑀅𑀜𑁆𑀚𑀦𑀫𑀬𑀁. 𑀕𑀦𑁆𑀥𑀫𑀸𑀤𑀦𑀓𑀽𑀝𑀁 𑀲𑀸𑀦𑀼𑀫𑀬𑀁 𑀅𑀩𑁆𑀪𑀦𑁆𑀢𑀭𑁂 𑀫𑀼𑀕𑁆𑀕𑀯𑀡𑁆𑀡𑀁, 𑀫𑀽𑀮𑀕𑀦𑁆𑀥𑁄 𑀲𑀸𑀭𑀕𑀦𑁆𑀥𑁄 𑀨𑁂𑀕𑁆𑀕𑀼𑀕𑀦𑁆𑀥𑁄 𑀢𑀘𑀕𑀦𑁆𑀥𑁄 𑀧𑀧𑀝𑀺𑀓𑀕𑀦𑁆𑀥𑁄 𑀭𑀲𑀕𑀦𑁆𑀥𑁄 𑀧𑀢𑁆𑀢𑀕𑀦𑁆𑀥𑁄 𑀧𑀼𑀧𑁆𑀨𑀕𑀦𑁆𑀥𑁄 𑀨𑀮𑀕𑀦𑁆𑀥𑁄 𑀕𑀦𑁆𑀥𑀕𑀦𑁆𑀥𑁄𑀢𑀺 𑀇𑀫𑁂𑀳𑀺 𑀤𑀲𑀳𑀺 𑀕𑀦𑁆𑀥𑁂𑀳𑀺 𑀉𑀲𑁆𑀲𑀦𑁆𑀦𑀁 𑀦𑀸𑀦𑀧𑁆𑀧𑀓𑀸𑀭𑀑𑀲𑀥𑀲𑀜𑁆𑀙𑀦𑁆𑀦𑀁, 𑀓𑀸𑀴𑀧𑀓𑁆𑀔𑀉𑀧𑁄𑀲𑀣𑀤𑀺𑀯𑀲𑁂 𑀆𑀤𑀺𑀢𑁆𑀢𑀫𑀺𑀯 𑀅𑀗𑁆𑀕𑀸𑀭𑀁 𑀚𑀮𑀦𑁆𑀢𑀁 𑀢𑀺𑀝𑁆𑀞𑀢𑀺. 𑀓𑁂𑀮𑀸𑀲𑀓𑀽𑀝𑀁 𑀭𑀚𑀢𑀫𑀬𑀁. 𑀲𑀩𑁆𑀩𑀸𑀦𑀺 𑀲𑀼𑀤𑀲𑁆𑀲𑀦𑁂𑀦 𑀲𑀫𑀸𑀦𑀼𑀩𑁆𑀩𑁂𑀥𑀲𑀡𑁆𑀞𑀸𑀦𑀸𑀦𑀺, 𑀢𑀫𑁂𑀯 𑀲𑀭𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀞𑀺𑀢𑀸𑀦𑀺. 𑀢𑀸𑀦𑀺 𑀲𑀩𑁆𑀩𑀸𑀦𑀺 ¶ 𑀤𑁂𑀯𑀸𑀦𑀼𑀪𑀸𑀯𑁂𑀦 𑀦𑀸𑀕𑀸𑀦𑀼𑀪𑀸𑀯𑁂𑀦 𑀘 𑀯𑀲𑁆𑀲𑀦𑁆𑀢𑀺, 𑀦𑀤𑀺𑀬𑁄 𑀘 𑀢𑁂𑀲𑀼 𑀲𑀦𑁆𑀤𑀦𑁆𑀢𑀺. 𑀢𑀁 𑀲𑀩𑁆𑀩𑀫𑁆𑀧𑀺 𑀉𑀤𑀓𑀁 𑀅𑀦𑁄𑀢𑀢𑁆𑀢𑀫𑁂𑀯 𑀧𑀯𑀺𑀲𑀢𑀺. 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀤𑀓𑁆𑀔𑀺𑀡𑁂𑀦 𑀯𑀸 𑀉𑀢𑁆𑀢𑀭𑁂𑀦 𑀯𑀸 𑀕𑀘𑁆𑀙𑀦𑁆𑀢𑀸 𑀧𑀩𑁆𑀩𑀢𑀦𑁆𑀢𑀭𑁂𑀦 𑀢𑀢𑁆𑀣 𑀑𑀪𑀸𑀲𑀁 𑀓𑀭𑁄𑀦𑁆𑀢𑀺, 𑀉𑀚𑀼𑀁 𑀕𑀘𑁆𑀙𑀦𑁆𑀢𑀸 𑀦 𑀓𑀭𑁄𑀦𑁆𑀢𑀺, 𑀢𑁂𑀦𑁂𑀯𑀲𑁆𑀲 𑀅𑀦𑁄𑀢𑀢𑁆𑀢𑀦𑁆𑀢𑀺 𑀲𑀗𑁆𑀔𑀸 𑀉𑀤𑀧𑀸𑀤𑀺.

𑀢𑀢𑁆𑀣 ¶ 𑀫𑀦𑁄𑀳𑀭𑀲𑀺𑀮𑀸𑀢𑀮𑀸𑀦𑀺 𑀦𑀺𑀫𑁆𑀫𑀘𑁆𑀙𑀓𑀘𑁆𑀙𑀧𑀸𑀦𑀺 𑀨𑀮𑀺𑀓𑀲𑀤𑀺𑀲𑀦𑀺𑀫𑁆𑀫𑀮𑀼𑀤𑀓𑀸𑀦𑀺 𑀦𑁆𑀳𑀸𑀦𑀢𑀺𑀢𑁆𑀣𑀸𑀦𑀺 𑀲𑀼𑀧𑀝𑀺𑀬𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀬𑁂𑀲𑀼 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀔𑀻𑀡𑀸𑀲𑀯𑀸 𑀘 𑀇𑀤𑁆𑀥𑀺𑀫𑀦𑁆𑀢𑁄 𑀘 𑀇𑀲𑀬𑁄 𑀦𑁆𑀳𑀸𑀬𑀦𑁆𑀢𑀺, 𑀤𑁂𑀯𑀬𑀓𑁆𑀔𑀸𑀤𑀬𑁄 𑀉𑀬𑁆𑀬𑀸𑀦𑀓𑀻𑀴𑀓𑀁 𑀓𑀻𑀴𑀦𑁆𑀢𑀺.

𑀢𑀲𑁆𑀲 𑀘𑀢𑀽𑀲𑀼 𑀧𑀲𑁆𑀲𑁂𑀲𑀼 𑀲𑀻𑀳𑀫𑀼𑀔𑀁 𑀳𑀢𑁆𑀣𑀺𑀫𑀼𑀔𑀁 𑀅𑀲𑁆𑀲𑀫𑀼𑀔𑀁 𑀉𑀲𑀪𑀫𑀼𑀔𑀦𑁆𑀢𑀺 𑀘𑀢𑁆𑀢𑀸𑀭𑀺 𑀫𑀼𑀔𑀸𑀦𑀺 𑀳𑁄𑀦𑁆𑀢𑀺, 𑀬𑁂𑀳𑀺 𑀘𑀢𑀲𑁆𑀲𑁄 𑀦𑀤𑀺𑀬𑁄 𑀲𑀦𑁆𑀤𑀦𑁆𑀢𑀺. 𑀲𑀻𑀳𑀫𑀼𑀔𑁂𑀦 𑀦𑀺𑀓𑁆𑀔𑀦𑁆𑀢𑀦𑀤𑀻𑀢𑀻𑀭𑁂 𑀲𑀻𑀳𑀸 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺. 𑀳𑀢𑁆𑀣𑀺𑀫𑀼𑀔𑀸𑀤𑀻𑀳𑀺 𑀳𑀢𑁆𑀣𑀺𑀅𑀲𑁆𑀲𑀉𑀲𑀪𑀸. 𑀧𑀼𑀭𑀢𑁆𑀣𑀺𑀫𑀤𑀺𑀲𑀢𑁄 𑀦𑀺𑀓𑁆𑀔𑀦𑁆𑀢𑀦𑀤𑀻 𑀅𑀦𑁄𑀢𑀢𑁆𑀢𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀇𑀢𑀭𑀸 𑀢𑀺𑀲𑁆𑀲𑁄 𑀦𑀤𑀺𑀬𑁄 𑀅𑀦𑀼𑀧𑀕𑀫𑁆𑀫 ¶ 𑀧𑀸𑀘𑀻𑀦𑀳𑀺𑀫𑀯𑀦𑁆𑀢𑁂𑀦𑁂𑀯 𑀅𑀫𑀦𑀼𑀲𑁆𑀲𑀧𑀣𑀁 𑀕𑀦𑁆𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀯𑀺𑀲𑀢𑀺. 𑀧𑀘𑁆𑀙𑀺𑀫𑀤𑀺𑀲𑀢𑁄 𑀘 𑀉𑀢𑁆𑀢𑀭𑀤𑀺𑀲𑀢𑁄 𑀘 𑀦𑀺𑀓𑁆𑀔𑀦𑁆𑀢𑀦𑀤𑀺𑀬𑁄𑀧𑀺 𑀢𑀣𑁂𑀯 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀘𑁆𑀙𑀺𑀫𑀳𑀺𑀫𑀯𑀦𑁆𑀢𑁂𑀦𑁂𑀯 𑀉𑀢𑁆𑀢𑀭𑀳𑀺𑀫𑀯𑀦𑁆𑀢𑁂𑀦𑁂𑀯 𑀘 𑀅𑀫𑀦𑀼𑀲𑁆𑀲𑀧𑀣𑀁 𑀕𑀦𑁆𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀯𑀺𑀲𑀦𑁆𑀢𑀺. 𑀤𑀓𑁆𑀔𑀺𑀡𑀤𑀺𑀲𑀢𑁄 𑀦𑀺𑀓𑁆𑀔𑀦𑁆𑀢𑀦𑀤𑀻 𑀧𑀦 𑀢𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀉𑀚𑀼𑀓𑀁 𑀧𑀸𑀲𑀸𑀡𑀧𑀺𑀝𑁆𑀞𑁂𑀦𑁂𑀯 𑀲𑀝𑁆𑀞𑀺𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀧𑀩𑁆𑀩𑀢𑀁 𑀧𑀳𑀭𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀧𑀭𑀺𑀓𑁆𑀔𑁂𑀧𑁂𑀦 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀸 𑀉𑀤𑀓𑀥𑀸𑀭𑀸 𑀘 𑀳𑀼𑀢𑁆𑀯𑀸 𑀆𑀓𑀸𑀲𑁂𑀦 𑀲𑀝𑁆𑀞𑀺𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀢𑀺𑀬𑀕𑁆𑀕𑀴𑁂 𑀦𑀸𑀫 𑀧𑀸𑀲𑀸𑀡𑁂 𑀧𑀢𑀺𑀢𑀸, 𑀧𑀸𑀲𑀸𑀡𑁄 𑀉𑀤𑀓𑀥𑀸𑀭𑀸𑀯𑁂𑀕𑁂𑀦 𑀪𑀺𑀦𑁆𑀦𑁄. 𑀢𑀢𑁆𑀣 𑀧𑀜𑁆𑀜𑀸𑀲𑀬𑁄𑀚𑀦𑀧𑁆𑀧𑀫𑀸𑀡𑀸 𑀢𑀺𑀬𑀕𑁆𑀕𑀴𑀸 𑀦𑀸𑀫 𑀧𑁄𑀓𑁆𑀔𑀭𑀡𑀻 𑀚𑀸𑀢𑀸, 𑀧𑁄𑀓𑁆𑀔𑀭𑀡𑀺𑀬𑀸 𑀓𑀽𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀸𑀲𑀸𑀡𑀁 𑀧𑀯𑀺𑀲𑀺𑀢𑁆𑀯𑀸 𑀲𑀝𑁆𑀞𑀺𑀬𑁄𑀚𑀦𑀸𑀦𑀺 𑀕𑀢𑀸. 𑀢𑀢𑁄 𑀖𑀦𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀉𑀫𑀗𑁆𑀕𑁂𑀦 𑀲𑀝𑁆𑀞𑀺𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀯𑀺𑀜𑁆𑀛𑀼𑀁 𑀦𑀸𑀫 𑀢𑀺𑀭𑀘𑁆𑀙𑀸𑀦𑀧𑀩𑁆𑀩𑀢𑀁 ¶ 𑀧𑀳𑀭𑀺𑀢𑁆𑀯𑀸 𑀳𑀢𑁆𑀣𑀢𑀮𑁂 𑀧𑀜𑁆𑀘𑀗𑁆𑀕𑀼𑀮𑀺𑀲𑀤𑀺𑀲𑀸 𑀧𑀜𑁆𑀘𑀥𑀸𑀭𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺. 𑀲𑀸 𑀢𑀺𑀓𑁆𑀔𑀢𑁆𑀢𑀼𑀁 𑀅𑀦𑁄𑀢𑀢𑁆𑀢𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀕𑀢𑀝𑁆𑀞𑀸𑀦𑁂 𑀆𑀯𑀝𑁆𑀝𑀕𑀗𑁆𑀕𑀸𑀢𑀺 𑀯𑀼𑀘𑁆𑀘𑀢𑀺. 𑀉𑀚𑀼𑀓𑀁 𑀧𑀸𑀲𑀸𑀡𑀧𑀺𑀝𑁆𑀞𑁂𑀦 𑀲𑀝𑁆𑀞𑀺𑀬𑁄𑀚𑀦𑀸𑀦𑀺 𑀕𑀢𑀝𑁆𑀞𑀸𑀦𑁂 𑀓𑀡𑁆𑀳𑀕𑀗𑁆𑀕𑀸𑀢𑀺, 𑀆𑀓𑀸𑀲𑁂𑀦 𑀲𑀝𑁆𑀞𑀺𑀬𑁄𑀚𑀦𑀸𑀦𑀺 𑀕𑀢𑀝𑁆𑀞𑀸𑀦𑁂 𑀆𑀓𑀸𑀲𑀕𑀗𑁆𑀕𑀸𑀢𑀺, 𑀢𑀺𑀬𑀕𑁆𑀕𑀴𑀧𑀸𑀲𑀸𑀡𑁂 𑀧𑀜𑁆𑀜𑀸𑀲𑀬𑁄𑀚𑀦𑁄𑀓𑀸𑀲𑁂 𑀞𑀺𑀢𑀸 𑀢𑀺𑀬𑀕𑁆𑀕𑀴𑀧𑁄𑀓𑁆𑀔𑀭𑀡𑀻𑀢𑀺, 𑀓𑀽𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀸𑀲𑀸𑀡𑀁 𑀧𑀯𑀺𑀲𑀺𑀢𑁆𑀯𑀸 𑀲𑀝𑁆𑀞𑀺𑀬𑁄𑀚𑀦𑀸𑀦𑀺 𑀕𑀢𑀝𑁆𑀞𑀸𑀦𑁂 𑀩𑀳𑀮𑀕𑀗𑁆𑀕𑀸𑀢𑀺, 𑀉𑀫𑀗𑁆𑀕𑁂𑀦 𑀲𑀝𑁆𑀞𑀺𑀬𑁄𑀚𑀦𑀸𑀦𑀺 𑀕𑀢𑀝𑁆𑀞𑀸𑀦𑁂 𑀉𑀫𑀗𑁆𑀕𑀕𑀗𑁆𑀕𑀸𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀜𑁆𑀛𑀼𑀁 𑀦𑀸𑀫 𑀢𑀺𑀭𑀘𑁆𑀙𑀸𑀦𑀧𑀩𑁆𑀩𑀢𑀁 𑀧𑀳𑀭𑀺𑀢𑁆𑀯𑀸 𑀧𑀜𑁆𑀘𑀥𑀸𑀭𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀝𑁆𑀞𑀸𑀦𑁂 𑀧𑀦 𑀕𑀗𑁆𑀕𑀸 𑀬𑀫𑀼𑀦𑀸 𑀅𑀘𑀺𑀭𑀯𑀢𑀻 𑀲𑀭𑀪𑀽 𑀫𑀳𑀻𑀢𑀺 𑀧𑀜𑁆𑀘𑀥𑀸 𑀲𑀗𑁆𑀔𑀁 𑀕𑀢𑀸. 𑀏𑀯𑀫𑁂𑀢𑀸 𑀧𑀜𑁆𑀘 𑀫𑀳𑀸𑀦𑀤𑀺𑀬𑁄 𑀳𑀺𑀫𑀯𑀦𑁆𑀢𑀢𑁄 𑀧𑀪𑀯𑀦𑁆𑀢𑀺. 𑀢𑀸𑀲𑀼 𑀬𑀸 𑀅𑀬𑀁 𑀧𑀜𑁆𑀘𑀫𑀻 𑀫𑀳𑀻 𑀦𑀸𑀫, 𑀲𑀸 𑀇𑀥 𑀫𑀳𑀸𑀫𑀳𑀻𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑀲𑁆𑀲𑀸 𑀉𑀢𑁆𑀢𑀭𑁂𑀦 𑀬𑀸 𑀆𑀧𑁄, 𑀢𑀸𑀲𑀁 𑀅𑀯𑀺𑀤𑀽𑀭𑀢𑁆𑀢𑀸 𑀲𑁄 𑀚𑀦𑀧𑀤𑁄 𑀅𑀗𑁆𑀕𑀼𑀢𑁆𑀢𑀭𑀸𑀧𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀫𑀺𑀁 𑀅𑀗𑁆𑀕𑀼𑀢𑁆𑀢𑀭𑀸𑀧𑁂𑀲𑀼 𑀚𑀦𑀧𑀤𑁂.

𑀆𑀧𑀡𑀁 ¶ 𑀦𑀸𑀫𑀸𑀢𑀺 𑀢𑀲𑁆𑀫𑀺𑀁 𑀓𑀺𑀭 𑀦𑀺𑀕𑀫𑁂 𑀯𑀻𑀲𑀢𑀺 𑀆𑀧𑀡𑀫𑀼𑀔𑀲𑀳𑀲𑁆𑀲𑀸𑀦𑀺 𑀯𑀺𑀪𑀢𑁆𑀢𑀸𑀦𑀺 𑀅𑀳𑁂𑀲𑀼𑀁. 𑀇𑀢𑀺 𑀲𑁄 𑀆𑀧𑀡𑀸𑀦𑀁 𑀉𑀲𑁆𑀲𑀦𑁆𑀦𑀢𑁆𑀢𑀸 𑀆𑀧𑀡𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀢𑁄. 𑀢𑀲𑁆𑀲 𑀘 𑀦𑀺𑀕𑀫𑀲𑁆𑀲 𑀅𑀯𑀺𑀤𑀽𑀭𑁂 𑀦𑀤𑀻𑀢𑀻𑀭𑁂 𑀖𑀦𑀘𑁆𑀙𑀸𑀬𑁄 𑀭𑀫𑀡𑀻𑀬𑁄 𑀪𑀽𑀫𑀺𑀪𑀸𑀕𑁄 𑀫𑀳𑀸𑀯𑀦𑀲𑀡𑁆𑀟𑁄, 𑀢𑀲𑁆𑀫𑀺𑀁 𑀪𑀕𑀯𑀸 𑀯𑀺𑀳𑀭𑀢𑀺. 𑀢𑁂𑀦𑁂𑀯𑁂𑀢𑁆𑀣 𑀯𑀲𑀦𑀝𑁆𑀞𑀸𑀦𑀁 𑀦 𑀦𑀺𑀬𑀸𑀫𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑁂𑀦𑀜𑁆𑀜𑀢𑀭𑁄 𑀯𑀦𑀲𑀡𑁆𑀟𑁄 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 ¶ 𑀪𑀺𑀓𑁆𑀔𑀼𑀲𑀗𑁆𑀖𑀁 𑀯𑀲𑀦𑀝𑁆𑀞𑀸𑀦𑀁 𑀧𑁂𑀲𑁂𑀢𑁆𑀯𑀸 𑀏𑀓𑀓𑁄𑀯 𑀉𑀧𑀲𑀗𑁆𑀓𑀫𑀺 𑀧𑁄𑀢𑀮𑀺𑀬𑀁 𑀕𑀳𑀧𑀢𑀺𑀁 𑀲𑀦𑁆𑀥𑀸𑀬. 𑀧𑁄𑀢𑀮𑀺𑀬𑁄𑀧𑀺 𑀔𑁄 𑀕𑀳𑀧𑀢𑀻𑀢𑀺 𑀧𑁄𑀢𑀮𑀺𑀬𑁄𑀢𑀺 𑀏𑀯𑀁𑀦𑀸𑀫𑀓𑁄 𑀕𑀳𑀧𑀢𑀺. 𑀲𑀫𑁆𑀧𑀦𑁆𑀦𑀦𑀺𑀯𑀸𑀲𑀦𑀧𑀸𑀯𑀼𑀭𑀡𑁄𑀢𑀺 𑀧𑀭𑀺𑀧𑀼𑀡𑁆𑀡𑀦𑀺𑀯𑀸𑀲𑀦𑀧𑀸𑀯𑀼𑀭𑀡𑁄 ¶ , 𑀏𑀓𑀁 𑀤𑀻𑀖𑀤𑀲𑀁 𑀲𑀸𑀝𑀓𑀁 𑀦𑀺𑀯𑀢𑁆𑀣𑁄 𑀏𑀓𑀁 𑀧𑀸𑀭𑀼𑀢𑁄𑀢𑀺 𑀅𑀢𑁆𑀣𑁄. 𑀙𑀢𑁆𑀢𑀼𑀧𑀸𑀳𑀦𑀸𑀳𑀻𑀢𑀺 𑀙𑀢𑁆𑀢𑀁 𑀕𑀳𑁂𑀢𑁆𑀯𑀸 𑀉𑀧𑀸𑀳𑀦𑀸 𑀆𑀭𑀼𑀬𑁆𑀳𑀸𑀢𑀺 𑀅𑀢𑁆𑀣𑁄. 𑀆𑀲𑀦𑀸𑀦𑀻𑀢𑀺 𑀧𑀮𑁆𑀮𑀗𑁆𑀓𑀧𑀻𑀞𑀧𑀮𑀸𑀮𑀧𑀻𑀞𑀓𑀸𑀤𑀻𑀦𑀺. 𑀅𑀦𑁆𑀢𑀫𑀲𑁄 𑀲𑀸𑀔𑀸𑀪𑀗𑁆𑀕𑀫𑁆𑀧𑀺 𑀳𑀺 𑀆𑀲𑀦𑀦𑁆𑀢𑁂𑀯 𑀯𑀼𑀘𑁆𑀘𑀢𑀺. 𑀕𑀳𑀧𑀢𑀺𑀯𑀸𑀤𑁂𑀦𑀸𑀢𑀺 𑀕𑀳𑀧𑀢𑀻𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦. 𑀲𑀫𑀼𑀤𑀸𑀘𑀭𑀢𑀻𑀢𑀺 𑀯𑁄𑀳𑀭𑀢𑀺.

𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀸𑀢𑀺 𑀢𑀢𑀺𑀬𑀁 𑀕𑀳𑀧𑀢𑀻𑀢𑀺 𑀯𑀘𑀦𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀪𑀕𑀯𑀦𑁆𑀢𑀫𑁂𑀢𑀁 ‘‘𑀢𑀬𑀺𑀤𑀁, 𑀪𑁄, 𑀕𑁄𑀢𑀫𑀸’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀢𑀢𑁆𑀣 𑀦𑀘𑁆𑀙𑀦𑁆𑀦𑀦𑁆𑀢𑀺 𑀦 𑀅𑀦𑀼𑀘𑁆𑀙𑀯𑀺𑀓𑀁. 𑀦𑀧𑁆𑀧𑀢𑀺𑀭𑀽𑀧𑀦𑁆𑀢𑀺 𑀦 𑀲𑀸𑀭𑀼𑀧𑁆𑀧𑀁. 𑀆𑀓𑀸𑀭𑀸𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑁂𑀯 𑀓𑀸𑀭𑀡𑀯𑁂𑀯𑀘𑀦𑀸𑀦𑀺. 𑀤𑀻𑀖𑀤𑀲𑀯𑀢𑁆𑀣𑀥𑀸𑀭𑀡-𑀓𑁂𑀲𑀫𑀲𑁆𑀲𑀼𑀦𑀔𑀞𑀧𑀦𑀸𑀤𑀻𑀦𑀺 𑀳𑀺 𑀲𑀩𑁆𑀩𑀸𑀦𑁂𑀯 𑀕𑀺𑀳𑀺𑀩𑁆𑀬𑀜𑁆𑀚𑀦𑀸𑀦𑀺 𑀢𑀲𑁆𑀲 𑀕𑀺𑀳𑀺𑀪𑀸𑀯𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑀻𑀢𑀺 𑀆𑀓𑀸𑀭𑀸, 𑀕𑀺𑀳𑀺𑀲𑀡𑁆𑀞𑀸𑀦𑁂𑀦 𑀲𑀡𑁆𑀞𑀺𑀢𑀢𑁆𑀢𑀸 𑀮𑀺𑀗𑁆𑀕𑀸, 𑀕𑀺𑀳𑀺𑀪𑀸𑀯𑀲𑁆𑀲 𑀲𑀜𑁆𑀚𑀸𑀦𑀦𑀦𑀺𑀫𑀺𑀢𑁆𑀢𑀢𑀸𑀬 𑀦𑀺𑀫𑀺𑀢𑁆𑀢𑀸𑀢𑀺 𑀯𑀼𑀢𑁆𑀢𑀸. 𑀬𑀣𑀸 𑀢𑀁 𑀕𑀳𑀧𑀢𑀺𑀲𑁆𑀲𑀸𑀢𑀺 𑀬𑀣𑀸 𑀕𑀳𑀧𑀢𑀺𑀲𑁆𑀲 𑀆𑀓𑀸𑀭𑀮𑀺𑀗𑁆𑀕𑀦𑀺𑀫𑀺𑀢𑁆𑀢𑀸 𑀪𑀯𑁂𑀬𑁆𑀬𑀼𑀁, 𑀢𑀣𑁂𑀯 𑀢𑀼𑀬𑁆𑀳𑀁. 𑀢𑁂𑀦 𑀢𑀸𑀳𑀁 𑀏𑀯𑀁 𑀲𑀫𑀼𑀤𑀸𑀘𑀭𑀸𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀣 𑀲𑁄 𑀬𑁂𑀦 𑀓𑀸𑀭𑀡𑁂𑀦 𑀕𑀳𑀧𑀢𑀺𑀯𑀸𑀤𑀁 𑀦𑀸𑀥𑀺𑀯𑀸𑀲𑁂𑀢𑀺, 𑀢𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀢𑀣𑀸 𑀳𑀺 𑀧𑀦 𑀫𑁂’’𑀢𑀺𑀆𑀤𑀺𑀫𑀸𑀳.

𑀦𑀺𑀬𑁆𑀬𑀸𑀢𑀦𑁆𑀢𑀺 𑀦𑀺𑀬𑁆𑀬𑀸𑀢𑀺𑀢𑀁. 𑀅𑀦𑁄𑀯𑀸𑀤𑀻 𑀅𑀦𑀼𑀧𑀯𑀸𑀤𑀻𑀢𑀺 ‘‘𑀢𑀸𑀢𑀸, 𑀓𑀲𑀣, 𑀯𑀧𑀣, 𑀯𑀡𑀺𑀧𑁆𑀧𑀣𑀁 𑀧𑀬𑁄𑀚𑁂𑀣𑀸’’𑀢𑀺𑀆𑀤𑀺𑀦𑀸 𑀳𑀺 𑀦𑀬𑁂𑀦 𑀑𑀯𑀤𑀦𑁆𑀢𑁄 𑀑𑀯𑀸𑀤𑀻 𑀦𑀸𑀫 𑀳𑁄𑀢𑀺. ‘‘𑀢𑀼𑀫𑁆𑀳𑁂 𑀦 𑀓𑀲𑀣, 𑀦 𑀯𑀧𑀣, 𑀦 𑀯𑀡𑀺𑀧𑁆𑀧𑀣𑀁 𑀧𑀬𑁄𑀚𑁂𑀣, 𑀓𑀣𑀁 𑀚𑀻𑀯𑀺𑀲𑁆𑀲𑀣, 𑀧𑀼𑀢𑁆𑀢𑀤𑀸𑀭𑀁 𑀯𑀸 𑀪𑀭𑀺𑀲𑁆𑀲𑀣𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀦 𑀉𑀧𑀯𑀤𑀦𑁆𑀢𑁄 𑀉𑀧𑀯𑀸𑀤𑀻 𑀦𑀸𑀫 𑀳𑁄𑀢𑀺. 𑀅𑀳𑀁 𑀧𑀦 𑀉𑀪𑀬𑀫𑁆𑀧𑀺 𑀢𑀁 𑀦 𑀓𑀭𑁄𑀫𑀺. 𑀢𑁂𑀦𑀸𑀳𑀁 𑀢𑀢𑁆𑀣 𑀅𑀦𑁄𑀯𑀸𑀤𑀻 𑀅𑀦𑀼𑀧𑀯𑀸𑀤𑀻𑀢𑀺 𑀤𑀲𑁆𑀲𑁂𑀢𑀺. 𑀖𑀸𑀲𑀘𑁆𑀙𑀸𑀤𑀦𑀧𑀭𑀫𑁄 ¶ 𑀯𑀺𑀳𑀭𑀸𑀫𑀻𑀢𑀺 𑀖𑀸𑀲𑀫𑀢𑁆𑀢𑀜𑁆𑀘𑁂𑀯 𑀅𑀘𑁆𑀙𑀸𑀤𑀦𑀫𑀢𑁆𑀢𑀜𑁆𑀘 𑀧𑀭𑀫𑀁 𑀓𑀢𑁆𑀯𑀸 𑀯𑀺𑀳𑀭𑀸𑀫𑀺, 𑀢𑀢𑁄 𑀧𑀭𑀁 𑀦𑀢𑁆𑀣𑀺, 𑀦 𑀘 𑀧𑀢𑁆𑀣𑁂𑀫𑀻𑀢𑀺 𑀤𑀻𑀧𑁂𑀢𑀺.

𑁩𑁨. 𑀕𑀺𑀤𑁆𑀥𑀺𑀮𑁄𑀪𑁄 ¶ 𑀧𑀳𑀸𑀢𑀩𑁆𑀩𑁄𑀢𑀺 𑀕𑁂𑀥𑀪𑀽𑀢𑁄 𑀮𑁄𑀪𑁄 𑀧𑀳𑀸𑀢𑀩𑁆𑀩𑁄. 𑀅𑀦𑀺𑀦𑁆𑀤𑀸𑀭𑁄𑀲𑀦𑁆𑀢𑀺 𑀅𑀦𑀺𑀦𑁆𑀤𑀸𑀪𑀽𑀢𑀁 𑀅𑀖𑀝𑁆𑀝𑀦𑀁. 𑀦𑀺𑀦𑁆𑀤𑀸𑀭𑁄𑀲𑁄𑀢𑀺 𑀦𑀺𑀦𑁆𑀤𑀸𑀖𑀝𑁆𑀝𑀦𑀸. 𑀯𑁄𑀳𑀸𑀭𑀲𑀫𑀼𑀘𑁆𑀙𑁂𑀤𑀸𑀬𑀸𑀢𑀺 𑀏𑀢𑁆𑀣 𑀯𑁄𑀳𑀸𑀭𑁄𑀢𑀺 𑀩𑁆𑀬𑀯𑀳𑀸𑀭𑀯𑁄𑀳𑀸𑀭𑁄𑀧𑀺 𑀧𑀡𑁆𑀡𑀢𑁆𑀢𑀺𑀧𑀺 𑀯𑀘𑀦𑀫𑁆𑀧𑀺 𑀘𑁂𑀢𑀦𑀸𑀧𑀺. 𑀢𑀢𑁆𑀣 𑁋

‘‘𑀬𑁄 ¶ 𑀳𑀺 𑀓𑁄𑀘𑀺 𑀫𑀦𑀼𑀲𑁆𑀲𑁂𑀲𑀼, 𑀯𑁄𑀳𑀸𑀭𑀁 𑀉𑀧𑀚𑀻𑀯𑀢𑀺;

𑀏𑀯𑀁 𑀯𑀸𑀲𑁂𑀝𑁆𑀞 𑀚𑀸𑀦𑀸𑀳𑀺, 𑀯𑀸𑀡𑀺𑀚𑁄 𑀲𑁄 𑀦 𑀩𑁆𑀭𑀸𑀳𑁆𑀫𑀡𑁄’’𑀢𑀺. (𑀫. 𑀦𑀺. 𑁨.𑁪𑁫𑁭) 𑁋

𑀅𑀬𑀁 𑀩𑁆𑀬𑀯𑀳𑀸𑀭𑀯𑁄𑀳𑀸𑀭𑁄 𑀦𑀸𑀫. ‘‘𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄’’𑀢𑀺 (𑀥. 𑀲. 𑁧𑁩𑁧𑁩-𑁧𑁩𑁧𑁫) 𑀅𑀬𑀁 𑀧𑀡𑁆𑀡𑀢𑁆𑀢𑀺𑀯𑁄𑀳𑀸𑀭𑁄 𑀦𑀸𑀫. ‘‘𑀢𑀣𑀸 𑀢𑀣𑀸 𑀯𑁄𑀳𑀭𑀢𑀺 𑀅𑀧𑀭𑀸𑀫𑀲’’𑀦𑁆𑀢𑀺 (𑀫. 𑀦𑀺. 𑁩.𑁩𑁩𑁨) 𑀅𑀬𑀁 𑀯𑀘𑀦𑀯𑁄𑀳𑀸𑀭𑁄 𑀦𑀸𑀫. ‘‘𑀅𑀝𑁆𑀞 𑀅𑀭𑀺𑀬𑀯𑁄𑀳𑀸𑀭𑀸 𑀅𑀝𑁆𑀞 𑀅𑀦𑀭𑀺𑀬𑀯𑁄𑀳𑀭𑀸’’𑀢𑀺 (𑀅. 𑀦𑀺. 𑁮.𑁬𑁭) 𑀅𑀬𑀁 𑀘𑁂𑀢𑀦𑀸𑀯𑁄𑀳𑀸𑀭𑁄 𑀦𑀸𑀫, 𑀅𑀬𑀫𑀺𑀥𑀸𑀥𑀺𑀧𑁆𑀧𑁂𑀢𑁄. 𑀬𑀲𑁆𑀫𑀸 𑀯𑀸 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑀺𑀳𑀻𑀢𑀺 𑀘𑁂𑀢𑀦𑀸 𑀦𑀢𑁆𑀣𑀺, 𑀲𑀫𑀡𑁄𑀢𑀺 𑀘𑁂𑀢𑀦𑀸 𑀳𑁄𑀢𑀺. 𑀕𑀺𑀳𑀻𑀢𑀺 𑀯𑀘𑀦𑀁 𑀦𑀢𑁆𑀣𑀺, 𑀲𑀫𑀡𑁄𑀢𑀺 𑀯𑀘𑀦𑀁 𑀳𑁄𑀢𑀺. 𑀕𑀺𑀳𑀻𑀢𑀺 𑀧𑀡𑁆𑀡𑀢𑁆𑀢𑀺 𑀦𑀢𑁆𑀣𑀺, 𑀲𑀫𑀡𑁄𑀢𑀺 𑀧𑀡𑁆𑀡𑀢𑁆𑀢𑀺 𑀳𑁄𑀢𑀺. 𑀕𑀺𑀳𑀻𑀢𑀺 𑀩𑁆𑀬𑀯𑀳𑀸𑀭𑁄 𑀦𑀢𑁆𑀣𑀺, 𑀲𑀫𑀡𑁄𑀢𑀺 𑀯𑀸 𑀧𑀩𑁆𑀩𑀚𑀺𑀢𑁄𑀢𑀺 𑀯𑀸 𑀩𑁆𑀬𑀯𑀳𑀸𑀭𑁄 𑀳𑁄𑀢𑀺. 𑀢𑀲𑁆𑀫𑀸 𑀲𑀩𑁆𑀩𑁂𑀧𑁂𑀢𑁂 𑀮𑀩𑁆𑀪𑀦𑁆𑀢𑀺.

𑁩𑁩. 𑀬𑁂𑀲𑀁 𑀔𑁄 𑀅𑀳𑀁 𑀲𑀁𑀬𑁄𑀚𑀦𑀸𑀦𑀁 𑀳𑁂𑀢𑀼 𑀧𑀸𑀡𑀸𑀢𑀺𑀧𑀸𑀢𑀻𑀢𑀺 𑀏𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑁄𑀯 𑀲𑀁𑀬𑁄𑀚𑀦𑀁. 𑀧𑀸𑀡𑀸𑀢𑀺𑀧𑀸𑀢𑀲𑁆𑀲𑁂𑀯 𑀳𑀺 𑀳𑁂𑀢𑀼 𑀧𑀸𑀡𑀸𑀢𑀺𑀧𑀸𑀢𑀧𑀘𑁆𑀘𑀬𑀸 𑀧𑀸𑀡𑀸𑀢𑀺𑀧𑀸𑀢𑀻 𑀦𑀸𑀫 𑀳𑁄𑀢𑀺. 𑀧𑀸𑀡𑀸𑀢𑀺𑀧𑀸𑀢𑀸𑀦𑀁 𑀧𑀦 𑀩𑀳𑀼𑀢𑀸𑀬 ‘‘𑀬𑁂𑀲𑀁 𑀔𑁄 𑀅𑀳’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀸𑀳𑀁 ¶ 𑀲𑀁𑀬𑁄𑀚𑀦𑀸𑀦𑀦𑁆𑀢𑀺 𑀢𑁂𑀲𑀁 𑀅𑀳𑀁 𑀧𑀸𑀡𑀸𑀢𑀺𑀧𑀸𑀢𑀩𑀦𑁆𑀥𑀦𑀸𑀦𑀁. 𑀧𑀳𑀸𑀦𑀸𑀬 𑀲𑀫𑀼𑀘𑁆𑀙𑁂𑀤𑀸𑀬 𑀧𑀝𑀺𑀧𑀦𑁆𑀦𑁄𑀢𑀺 𑀇𑀫𑀺𑀦𑀸 𑀅𑀧𑀸𑀡𑀸𑀢𑀺𑀧𑀸𑀢𑀲𑀗𑁆𑀔𑀸𑀢𑁂𑀦 𑀓𑀸𑀬𑀺𑀓𑀲𑀻𑀮𑀲𑀁𑀯𑀭𑁂𑀦 𑀧𑀳𑀸𑀦𑀢𑁆𑀣𑀸𑀬 𑀲𑀫𑀼𑀘𑁆𑀙𑁂𑀤𑀦𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑁄. 𑀅𑀢𑁆𑀢𑀸𑀧𑀺 𑀫𑀁 𑀉𑀧𑀯𑀤𑁂𑀬𑁆𑀬𑀸𑀢𑀺 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀫𑁆𑀧𑀺 𑀦𑀸𑀫 𑀚𑀻𑀯𑀺𑀢𑀸 𑀅𑀯𑁄𑀭𑁄𑀧𑀦𑀓𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀫𑀢𑁆𑀢𑀢𑁄𑀧𑀺 𑀑𑀭𑀫𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀓𑀺𑀁 𑀫𑀬𑁆𑀳𑀁 𑀧𑀩𑁆𑀩𑀚𑁆𑀚𑀸𑀬𑀸𑀢𑀺 𑀏𑀯𑀁 𑀅𑀢𑁆𑀢𑀸𑀧𑀺 𑀫𑀁 𑀉𑀧𑀯𑀤𑁂𑀬𑁆𑀬. 𑀅𑀦𑀼𑀯𑀺𑀘𑁆𑀘𑀸𑀧𑀺 𑀫𑀁 𑀯𑀺𑀜𑁆𑀜𑀽 𑀕𑀭𑀳𑁂𑀬𑁆𑀬𑀼𑀦𑁆𑀢𑀺 𑀏𑀯𑀭𑀽𑀧𑁂 𑀦𑀸𑀫 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀸𑀡𑀸𑀢𑀺𑀧𑀸𑀢𑀫𑀢𑁆𑀢𑀢𑁄𑀧𑀺 𑀑𑀭𑀫𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀓𑀺𑀁 𑀏𑀢𑀲𑁆𑀲 𑀧𑀩𑁆𑀩𑀚𑁆𑀚𑀸𑀬𑀸𑀢𑀺 𑀏𑀯𑀁 𑀅𑀦𑀼𑀯𑀺𑀘𑁆𑀘 𑀢𑀼𑀮𑀬𑀺𑀢𑁆𑀯𑀸 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀅𑀜𑁆𑀜𑁂𑀧𑀺 𑀯𑀺𑀜𑁆𑀜𑀽 𑀧𑀡𑁆𑀟𑀺𑀢𑀸 𑀕𑀭𑀳𑁂𑀬𑁆𑀬𑀼𑀁. 𑀏𑀢𑀤𑁂𑀯 𑀔𑁄 𑀧𑀦 𑀲𑀁𑀬𑁄𑀚𑀦𑀫𑁂𑀢𑀁 𑀦𑀻𑀯𑀭𑀡𑀦𑁆𑀢𑀺 𑀤𑀲𑀲𑀼 𑀲𑀁𑀬𑁄𑀚𑀦𑁂𑀲𑀼 𑀧𑀜𑁆𑀘𑀲𑀼 𑀘 𑀦𑀻𑀯𑀭𑀡𑁂𑀲𑀼 𑀅𑀧𑀭𑀺𑀬𑀸𑀧𑀦𑁆𑀦𑀫𑁆𑀧𑀺 ‘‘𑀅𑀝𑁆𑀞 𑀦𑀻𑀯𑀭𑀡𑀸’’𑀢𑀺 𑀤𑁂𑀲𑀦𑀸𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀯𑀝𑁆𑀝𑀩𑀦𑁆𑀥𑀦𑀝𑁆𑀞𑁂𑀦 𑀳𑀺 𑀳𑀺𑀢𑀧𑀝𑀺𑀘𑁆𑀙𑀸𑀤𑀦𑀝𑁆𑀞𑁂𑀦 ¶ 𑀘 𑀲𑀁𑀬𑁄𑀚𑀦𑀦𑁆𑀢𑀺𑀧𑀺 𑀦𑀻𑀯𑀭𑀡𑀦𑁆𑀢𑀺𑀧𑀺 𑀯𑀼𑀢𑁆𑀢𑀁. 𑀆𑀲𑀯𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑀓𑀸𑀭𑀡𑀸 𑀏𑀓𑁄 𑀅𑀯𑀺𑀚𑁆𑀚𑀸𑀲𑀯𑁄 𑀉𑀧𑁆𑀧𑀚𑁆𑀚𑀢𑀺. 𑀯𑀺𑀖𑀸𑀢𑀧𑀭𑀺𑀴𑀸𑀳𑀸𑀢𑀺 𑀯𑀺𑀖𑀸𑀢𑀸 𑀘 𑀧𑀭𑀺𑀴𑀸𑀳𑀸 𑀘. 𑀢𑀢𑁆𑀣 ¶ 𑀯𑀺𑀖𑀸𑀢𑀕𑁆𑀕𑀳𑀡𑁂𑀦 𑀓𑀺𑀮𑁂𑀲𑀤𑀼𑀓𑁆𑀔𑀜𑁆𑀘 𑀯𑀺𑀧𑀸𑀓𑀤𑀼𑀓𑁆𑀔𑀜𑁆𑀘 𑀕𑀳𑀺𑀢𑀁, 𑀧𑀭𑀺𑀴𑀸𑀳𑀕𑁆𑀕𑀳𑀡𑁂𑀦𑀧𑀺 𑀓𑀺𑀮𑁂𑀲𑀧𑀭𑀺𑀴𑀸𑀳𑁄 𑀘 𑀯𑀺𑀧𑀸𑀓𑀧𑀭𑀺𑀴𑀸𑀳𑁄 𑀘 𑀕𑀳𑀺𑀢𑁄. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁩𑁪-𑁪𑁦. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀢𑁂𑀲𑀸𑀳𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀸𑀬𑀸𑀢𑀺 𑀇𑀫𑀲𑁆𑀫𑀺𑀁 𑀧𑀤𑁂 𑀇𑀫𑀺𑀦𑀸 𑀤𑀺𑀦𑁆𑀦𑀸𑀤𑀸𑀦𑀲𑀗𑁆𑀔𑀸𑀢𑁂𑀦 𑀓𑀸𑀬𑀺𑀓𑀲𑀻𑀮𑀲𑀁𑀯𑀭𑁂𑀦, 𑀲𑀘𑁆𑀘𑀯𑀸𑀘𑀸𑀲𑀗𑁆𑀔𑀸𑀢𑁂𑀦 𑀯𑀸𑀘𑀲𑀺𑀓𑀲𑀻𑀮𑀲𑀁𑀯𑀭𑁂𑀦, 𑀅𑀧𑀺𑀲𑀼𑀡𑀸𑀯𑀸𑀘𑀸𑀲𑀗𑁆𑀔𑀸𑀢𑁂𑀦 𑀯𑀸𑀘𑀲𑀺𑀓𑀲𑀻𑀮𑀲𑀁𑀯𑀭𑁂𑀦, 𑀅𑀕𑀺𑀤𑁆𑀥𑀺𑀮𑁄𑀪𑀲𑀗𑁆𑀔𑀸𑀢𑁂𑀦 𑀫𑀸𑀦𑀲𑀺𑀓𑀲𑀻𑀮𑀲𑀁𑀯𑀭𑁂𑀦, 𑀅𑀦𑀺𑀦𑁆𑀤𑀸𑀭𑁄𑀲𑀲𑀗𑁆𑀔𑀸𑀢𑁂𑀦 𑀓𑀸𑀬𑀺𑀓𑀯𑀸𑀘𑀲𑀺𑀓𑀲𑀻𑀮𑀲𑀁𑀯𑀭𑁂𑀦 ¶ , 𑀅𑀓𑁄𑀥𑀼𑀧𑀸𑀬𑀸𑀲𑀲𑀗𑁆𑀔𑀸𑀢𑁂𑀦 𑀫𑀸𑀦𑀲𑀺𑀓𑀲𑀻𑀮𑀲𑀁𑀯𑀭𑁂𑀦, 𑀅𑀦𑀢𑀺𑀫𑀸𑀦𑀲𑀗𑁆𑀔𑀸𑀢𑁂𑀦 𑀫𑀸𑀦𑀲𑀺𑀓𑀲𑀻𑀮𑀲𑀁𑀯𑀭𑁂𑀦 𑀧𑀳𑀸𑀦𑀢𑁆𑀣𑀸𑀬 𑀲𑀫𑀼𑀘𑁆𑀙𑁂𑀤𑀦𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑁄𑀢𑀺 𑀏𑀯𑀁 𑀲𑀩𑁆𑀩𑀯𑀸𑀭𑁂𑀲𑀼 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀅𑀢𑁆𑀢𑀸𑀧𑀺 𑀫𑀁 𑀉𑀧𑀯𑀤𑁂𑀬𑁆𑀬 𑀅𑀦𑀼𑀯𑀺𑀘𑁆𑀘𑀸𑀧𑀺 𑀫𑀁 𑀯𑀺𑀜𑁆𑀜𑀽 𑀕𑀭𑀳𑁂𑀬𑁆𑀬𑀼𑀦𑁆𑀢𑀺 𑀇𑀫𑁂𑀲𑀼 𑀧𑀦 𑀧𑀤𑁂𑀲𑀼 𑀢𑀺𑀡𑀲𑀮𑀸𑀓𑀫𑁆𑀧𑀺 𑀦𑀸𑀫 𑀉𑀧𑀸𑀤𑀸𑀬 𑀅𑀤𑀺𑀦𑁆𑀦𑀁 𑀅𑀕𑁆𑀕𑀳𑀡𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀤𑀺𑀦𑁆𑀦𑀸𑀤𑀸𑀦𑀫𑀢𑁆𑀢𑀢𑁄𑀧𑀺 𑀯𑀺𑀭𑀫𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀓𑀺𑀁 𑀫𑀬𑁆𑀳𑀁 𑀧𑀩𑁆𑀩𑀚𑁆𑀚𑀸𑀬𑀸𑀢𑀺 𑀏𑀯𑀁 𑀅𑀢𑁆𑀢𑀸𑀧𑀺 𑀫𑀁 𑀉𑀧𑀯𑀤𑁂𑀬𑁆𑀬. 𑀏𑀯𑀭𑀽𑀧𑁂 𑀦𑀸𑀫 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀤𑀺𑀦𑁆𑀦𑀸𑀤𑀸𑀦𑀫𑀢𑁆𑀢𑀢𑁄𑀧𑀺 𑀑𑀭𑀫𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀓𑀺𑀁 𑀇𑀫𑀲𑁆𑀲 𑀧𑀩𑁆𑀩𑀚𑁆𑀚𑀸𑀬𑀸𑀢𑀺 𑀏𑀯𑀁 𑀅𑀦𑀼𑀯𑀺𑀘𑁆𑀘𑀸𑀧𑀺 𑀫𑀁 𑀯𑀺𑀜𑁆𑀜𑀽 𑀕𑀭𑀳𑁂𑀬𑁆𑀬𑀼𑀁? 𑀳𑀲𑀸𑀧𑁂𑀓𑁆𑀔𑀢𑀸𑀬𑀧𑀺 𑀦𑀸𑀫 𑀤𑀯𑀓𑀫𑁆𑀬𑀢𑀸𑀬 𑀯𑀸 𑀫𑀼𑀲𑀸𑀯𑀸𑀤𑀁 𑀅𑀓𑀭𑀡𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸. 𑀲𑀩𑁆𑀩𑀸𑀓𑀸𑀭𑁂𑀦 𑀧𑀺𑀲𑀼𑀡𑀁 𑀅𑀓𑀭𑀡𑀲𑀸𑀲𑀦𑁂 𑀦𑀸𑀫 𑀧𑀩𑁆𑀩𑀚𑀺𑀢𑁆𑀯𑀸. 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀕𑀺𑀤𑁆𑀥𑀺𑀮𑁄𑀪𑀁 𑀅𑀓𑀭𑀡𑀲𑀸𑀲𑀦𑁂 𑀦𑀸𑀫 𑀧𑀩𑁆𑀩𑀚𑀺𑀢𑁆𑀯𑀸𑀧𑀺. 𑀓𑀓𑀘𑁂𑀦 𑀅𑀗𑁆𑀕𑁂𑀲𑀼 𑀑𑀓𑁆𑀓𑀦𑁆𑀢𑀺𑀬𑀫𑀸𑀦𑁂𑀲𑀼𑀧𑀺 𑀦𑀸𑀫 𑀧𑀭𑁂𑀲𑀁 𑀦𑀺𑀦𑁆𑀤𑀸𑀭𑁄𑀲𑀁 𑀅𑀓𑀭𑀡𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸. 𑀙𑀺𑀦𑁆𑀦𑀔𑀸𑀡𑀼𑀓𑀡𑁆𑀝𑀓𑀸𑀤𑀻𑀲𑀼𑀧𑀺 𑀦𑀸𑀫 𑀓𑁄𑀥𑀼𑀧𑀸𑀬𑀸𑀲𑀁 𑀅𑀓𑀭𑀡𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸. 𑀅𑀥𑀺𑀫𑀸𑀦𑀫𑀢𑁆𑀢𑀫𑁆𑀧𑀺 𑀦𑀸𑀫 𑀫𑀸𑀦𑀁 𑀅𑀓𑀭𑀡𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑀺𑀫𑀸𑀦𑀫𑀢𑁆𑀢𑀫𑁆𑀧𑀺 𑀧𑀚𑀳𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀓𑀺𑀁 𑀫𑀬𑁆𑀳𑀁 𑀧𑀩𑁆𑀩𑀚𑁆𑀚𑀸𑀬𑀸𑀢𑀺 𑀏𑀯𑀁 𑀅𑀢𑁆𑀢𑀸𑀧𑀺 𑀫𑀁 𑀉𑀧𑀯𑀤𑁂𑀬𑁆𑀬. 𑀏𑀯𑀭𑀽𑀧𑁂 𑀦𑀸𑀫 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀢𑀺𑀫𑀸𑀦𑀫𑀢𑁆𑀢𑀫𑁆𑀧𑀺 𑀧𑀚𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀓𑀺𑀁 𑀇𑀫𑀲𑁆𑀲 𑀧𑀩𑁆𑀩𑀚𑁆𑀚𑀸𑀬𑀸𑀢𑀺 𑀏𑀯𑀁 𑀅𑀦𑀼𑀯𑀺𑀘𑁆𑀘𑀸𑀧𑀺 𑀫𑀁 𑀯𑀺𑀜𑁆𑀜𑀽 𑀕𑀭𑀳𑁂𑀬𑁆𑀬𑀼𑀦𑁆𑀢𑀺 𑀏𑀯𑀁 𑀲𑀩𑁆𑀩𑀯𑀸𑀭𑁂𑀲𑀼 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀆𑀲𑀯𑀸𑀢𑀺 𑀇𑀫𑀲𑁆𑀫𑀺𑀁 𑀧𑀦 𑀧𑀤𑁂 𑀅𑀤𑀺𑀦𑁆𑀦𑀸𑀤𑀸𑀦𑀓𑀸𑀭𑀡𑀸 𑀓𑀸𑀫𑀸𑀲𑀯𑁄 ¶ 𑀤𑀺𑀝𑁆𑀞𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄𑀢𑀺 𑀢𑀬𑁄 ¶ 𑀆𑀲𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀣𑀸 𑀫𑀼𑀲𑀸𑀯𑀸𑀤𑀓𑀸𑀭𑀡𑀸 𑀧𑀺𑀲𑀼𑀡𑀸𑀯𑀸𑀘𑀸𑀓𑀸𑀭𑀡𑀸 𑀘, 𑀕𑀺𑀤𑁆𑀥𑀺𑀮𑁄𑀪𑀓𑀸𑀭𑀡𑀸 𑀤𑀺𑀝𑁆𑀞𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄 ¶ 𑀘, 𑀦𑀺𑀦𑁆𑀤𑀸𑀭𑁄𑀲𑀓𑀸𑀭𑀡𑀸 𑀅𑀯𑀺𑀚𑁆𑀚𑀸𑀲𑀯𑁄𑀯, 𑀢𑀣𑀸 𑀓𑁄𑀥𑀼𑀧𑀸𑀬𑀸𑀲𑀓𑀸𑀭𑀡𑀸, 𑀅𑀢𑀺𑀫𑀸𑀦𑀓𑀸𑀭𑀡𑀸 𑀪𑀯𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄 𑀘𑀸𑀢𑀺 𑀤𑁆𑀯𑁂𑀯 𑀆𑀲𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀏𑀯𑀁 𑀆𑀲𑀯𑀼𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀫𑁂𑀲𑀼 𑀧𑀦 𑀅𑀝𑁆𑀞𑀲𑀼𑀧𑀺 𑀯𑀸𑀭𑁂𑀲𑀼 𑀅𑀲𑀫𑁆𑀫𑁄𑀳𑀢𑁆𑀣𑀁 𑀧𑀼𑀦 𑀅𑀬𑀁 𑀲𑀗𑁆𑀔𑁂𑀧𑀯𑀺𑀦𑀺𑀘𑁆𑀙𑀬𑁄 𑁋 𑀧𑀼𑀭𑀺𑀫𑁂𑀲𑀼 𑀢𑀸𑀯 𑀘𑀢𑀽𑀲𑀼 𑀯𑀺𑀭𑀫𑀺𑀢𑀼𑀁 𑀦 𑀲𑀓𑁆𑀓𑁄𑀫𑀻𑀢𑀺 𑀯𑀢𑁆𑀢𑀩𑁆𑀩𑀁, 𑀧𑀘𑁆𑀙𑀺𑀫𑁂𑀲𑀼 𑀧𑀚𑀳𑀺𑀢𑀼𑀁 𑀦 𑀲𑀓𑁆𑀓𑁄𑀫𑀻𑀢𑀺. 𑀧𑀸𑀡𑀸𑀢𑀺𑀧𑀸𑀢𑀦𑀺𑀦𑁆𑀤𑀸𑀭𑁄𑀲𑀓𑁄𑀥𑀼𑀧𑀸𑀬𑀸𑀲𑁂𑀲𑀼 𑀘 𑀏𑀓𑁄 𑀅𑀯𑀺𑀚𑁆𑀚𑀸𑀲𑀯𑁄𑀯 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀫𑀼𑀲𑀸𑀯𑀸𑀤𑀧𑀺𑀲𑀼𑀡𑀸𑀯𑀸𑀘𑀸𑀲𑀼 𑀓𑀸𑀫𑀸𑀲𑀯𑁄 𑀤𑀺𑀝𑁆𑀞𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄, 𑀕𑀺𑀤𑁆𑀥𑀺𑀮𑁄𑀪𑁂 𑀤𑀺𑀝𑁆𑀞𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄, 𑀅𑀢𑀺𑀫𑀸𑀦𑁂 𑀪𑀯𑀸𑀲𑀯𑁄 𑀅𑀯𑀺𑀚𑁆𑀚𑀸𑀲𑀯𑁄, 𑀅𑀧𑀸𑀡𑀸𑀢𑀺𑀧𑀸𑀢𑀁 𑀤𑀺𑀦𑁆𑀦𑀸𑀤𑀸𑀦𑀁 𑀓𑀸𑀬𑀺𑀓𑀁 𑀲𑀻𑀮𑀁, 𑀅𑀫𑀼𑀲𑀸 𑀅𑀧𑀺𑀲𑀼𑀡𑀁 𑀯𑀸𑀘𑀲𑀺𑀓𑀲𑀻𑀮𑀁, 𑀞𑀧𑁂𑀢𑁆𑀯𑀸 𑀅𑀦𑀺𑀦𑁆𑀤𑀸𑀭𑁄𑀲𑀁 𑀲𑁂𑀲𑀸𑀦𑀺 𑀢𑀻𑀡𑀺 𑀫𑀸𑀦𑀲𑀺𑀓𑀲𑀻𑀮𑀸𑀦𑀺. 𑀬𑀲𑁆𑀫𑀸 𑀧𑀦 𑀓𑀸𑀬𑁂𑀦𑀧𑀺 𑀖𑀝𑁆𑀝𑁂𑀢𑀺 𑀭𑁄𑀲𑁂𑀢𑀺 𑀯𑀸𑀘𑀸𑀬𑀧𑀺, 𑀢𑀲𑁆𑀫𑀸 𑀅𑀦𑀺𑀦𑁆𑀤𑀸𑀭𑁄𑀲𑁄 𑀤𑁆𑀯𑁂 𑀞𑀸𑀦𑀸𑀦𑀺 𑀬𑀸𑀢𑀺, 𑀓𑀸𑀬𑀺𑀓𑀲𑀻𑀮𑀫𑁆𑀧𑀺 𑀳𑁄𑀢𑀺 𑀯𑀸𑀘𑀲𑀺𑀓𑀲𑀻𑀮𑀫𑁆𑀧𑀺. 𑀏𑀢𑁆𑀢𑀸𑀯𑀢𑀸 𑀓𑀺𑀁 𑀓𑀣𑀺𑀢𑀁? 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑁂 𑀞𑀺𑀢𑀲𑁆𑀲 𑀘 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀗𑁆𑀔𑀸𑀧𑀳𑀸𑀦𑀯𑀲𑁂𑀦 𑀕𑀺𑀳𑀺𑀯𑁄𑀳𑀸𑀭𑀲𑀫𑀼𑀘𑁆𑀙𑁂𑀤𑁄 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀓𑀸𑀫𑀸𑀤𑀻𑀦𑀯𑀓𑀣𑀸𑀯𑀡𑁆𑀡𑀦𑀸

𑁪𑁨. 𑀯𑀺𑀢𑁆𑀣𑀸𑀭𑀤𑁂𑀲𑀦𑀸𑀬𑀁 𑀢𑀫𑁂𑀦𑀁 𑀤𑀓𑁆𑀔𑁄𑀢𑀺 𑀧𑀤𑀲𑁆𑀲 𑀉𑀧𑀲𑀼𑀫𑁆𑀪𑁂𑀬𑁆𑀬𑀸𑀢𑀺 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀫𑁂𑀦𑀁 𑀓𑀼𑀓𑁆𑀓𑀼𑀭𑀁 𑀉𑀧𑀲𑀼𑀫𑁆𑀪𑁂𑀬𑁆𑀬, 𑀢𑀲𑁆𑀲 𑀲𑀫𑀻𑀧𑁂 𑀔𑀺𑀧𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀺𑀓𑀗𑁆𑀓𑀮𑀦𑁆𑀢𑀺 𑀉𑀭𑀝𑁆𑀞𑀺𑀁 𑀯𑀸 𑀧𑀺𑀝𑁆𑀞𑀺𑀓𑀡𑁆𑀝𑀓𑀁 𑀯𑀸 𑀲𑀻𑀲𑀝𑁆𑀞𑀺𑀁 𑀯𑀸. 𑀢𑀜𑁆𑀳𑀺 𑀦𑀺𑀫𑁆𑀫𑀁𑀲𑀢𑁆𑀢𑀸 𑀓𑀗𑁆𑀓𑀮𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀼𑀦𑀺𑀓𑁆𑀓𑀦𑁆𑀢𑀁 ¶ 𑀦𑀺𑀓𑁆𑀓𑀦𑁆𑀢𑀦𑁆𑀢𑀺 𑀬𑀣𑀸 𑀲𑀼𑀦𑀺𑀓𑁆𑀓𑀦𑁆𑀢𑀁 𑀳𑁄𑀢𑀺, 𑀏𑀯𑀁 𑀦𑀺𑀓𑁆𑀓𑀦𑁆𑀢𑀁 𑀦𑀺𑀮𑁆𑀮𑀺𑀔𑀺𑀢𑀁, 𑀬𑀤𑁂𑀢𑁆𑀣 𑀅𑀮𑁆𑀮𑀻𑀦𑀫𑀁𑀲𑀁 𑀅𑀢𑁆𑀣𑀺, 𑀢𑀁 𑀲𑀩𑁆𑀩𑀁 𑀦𑀺𑀮𑁆𑀮𑀺𑀔𑀺𑀢𑁆𑀯𑀸 𑀅𑀝𑁆𑀞𑀺𑀫𑀢𑁆𑀢𑀫𑁂𑀯 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀦𑀺𑀫𑁆𑀫𑀁𑀲’’𑀦𑁆𑀢𑀺. 𑀮𑁄𑀳𑀺𑀢𑀁 𑀧𑀦 𑀫𑀓𑁆𑀔𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀮𑁄𑀳𑀺𑀢𑀫𑀓𑁆𑀔𑀺𑀢’’𑀦𑁆𑀢𑀺.

𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑁂𑀳𑀺 𑀤𑀼𑀓𑁆𑀔𑁂𑀳𑀺 𑀩𑀳𑀼𑀤𑀼𑀓𑁆𑀔𑀸, 𑀉𑀧𑀸𑀬𑀸𑀲𑀲𑀁𑀓𑀺𑀮𑁂𑀲𑁂𑀳𑀺 𑀩𑀳𑀼𑀧𑀸𑀬𑀸𑀲𑀸. 𑀬𑀸𑀬𑀁 𑀉𑀧𑁂𑀓𑁆𑀔𑀸 𑀦𑀸𑀦𑀢𑁆𑀢𑀸 𑀦𑀸𑀦𑀢𑁆𑀢𑀲𑀺𑀢𑀸𑀢𑀺 𑀬𑀸 𑀅𑀬𑀁 𑀧𑀜𑁆𑀘𑀓𑀸𑀫𑀕𑀼𑀡𑀸𑀭𑀫𑁆𑀫𑀡𑀯𑀲𑁂𑀦 𑀦𑀸𑀦𑀸𑀲𑀪𑀸𑀯𑀸, 𑀢𑀸𑀦𑁂𑀯 ¶ 𑀘 𑀆𑀭𑀫𑁆𑀫𑀡𑀸𑀦𑀺 𑀦𑀺𑀲𑁆𑀲𑀺𑀢𑀢𑁆𑀢𑀸 ‘‘𑀦𑀸𑀦𑀢𑁆𑀢𑀲𑀺𑀢𑀸’’𑀢𑀺 ¶ 𑀯𑀼𑀘𑁆𑀘𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀽𑀧𑁂𑀓𑁆𑀔𑀸, 𑀢𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸. 𑀏𑀓𑀢𑁆𑀢𑀸 𑀏𑀓𑀢𑁆𑀢𑀲𑀺𑀢𑀸𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑁂𑀓𑁆𑀔𑀸, 𑀲𑀸 𑀳𑀺 𑀤𑀺𑀯𑀲𑀫𑁆𑀧𑀺 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀉𑀧𑁆𑀧𑀚𑁆𑀚𑀦𑀢𑁄 𑀏𑀓𑀲𑀪𑀸𑀯𑀸, 𑀢𑀤𑁂𑀯 𑀏𑀓𑀁 𑀆𑀭𑀫𑁆𑀫𑀡𑀁 𑀦𑀺𑀲𑁆𑀲𑀺𑀢𑀢𑁆𑀢𑀸 𑀏𑀓𑀢𑁆𑀢𑀲𑀺𑀢𑀸 𑀦𑀸𑀫. 𑀬𑀢𑁆𑀣 𑀲𑀩𑁆𑀩𑀲𑁄 𑀮𑁄𑀓𑀸𑀫𑀺𑀲𑀽𑀧𑀸𑀤𑀸𑀦𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀬𑀢𑁆𑀣 𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑁂𑀓𑁆𑀔𑀸𑀬𑀁 𑀬𑀁 𑀉𑀧𑁂𑀓𑁆𑀔𑀁 𑀆𑀕𑀫𑁆𑀫 𑀬𑀁 𑀧𑀝𑀺𑀘𑁆𑀘 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀧𑀭𑀺𑀲𑁂𑀲𑀸 𑀮𑁄𑀓𑀸𑀫𑀺𑀲𑀲𑀗𑁆𑀔𑀸𑀢𑀸 𑀧𑀜𑁆𑀘𑀓𑀸𑀫𑀕𑀼𑀡𑀸𑀫𑀺𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀧𑀜𑁆𑀘𑀓𑀸𑀫𑀕𑀼𑀡𑀸𑀫𑀺𑀲𑀸𑀢𑀺 𑀘 𑀓𑀸𑀫𑀕𑀼𑀡𑀸𑀭𑀫𑁆𑀫𑀡𑀙𑀦𑁆𑀤𑀭𑀸𑀕𑀸, 𑀕𑀳𑀡𑀝𑁆𑀞𑁂𑀦 𑀢𑁂𑀬𑁂𑀯 𑀘 𑀉𑀧𑀸𑀤𑀸𑀦𑀸𑀢𑀺𑀧𑀺 𑀯𑀼𑀢𑁆𑀢𑀸. 𑀢𑀫𑁂𑀯𑀽𑀧𑁂𑀓𑁆𑀔𑀁 𑀪𑀸𑀯𑁂𑀢𑀻𑀢𑀺 𑀢𑀁 𑀮𑁄𑀓𑀸𑀫𑀺𑀲𑀽𑀧𑀸𑀤𑀸𑀦𑀸𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑁂𑀓𑁆𑀔𑀫𑁂𑀯 𑀯𑀟𑁆𑀠𑁂𑀢𑀺.

𑁪𑁩. 𑀉𑀟𑁆𑀟𑀻𑀬𑁂𑀬𑁆𑀬𑀸𑀢𑀺 ¶ 𑀉𑀧𑁆𑀧𑀢𑀺𑀢𑁆𑀯𑀸 𑀕𑀘𑁆𑀙𑁂𑀬𑁆𑀬. 𑀅𑀦𑀼𑀧𑀢𑀺𑀢𑁆𑀯𑀸𑀢𑀺 𑀅𑀦𑀼𑀩𑀦𑁆𑀥𑀺𑀢𑁆𑀯𑀸. 𑀯𑀺𑀢𑀘𑁆𑀙𑁂𑀬𑁆𑀬𑀼𑀦𑁆𑀢𑀺 𑀫𑀼𑀔𑀢𑀼𑀡𑁆𑀟𑀓𑁂𑀦 𑀟𑀁𑀲𑀦𑁆𑀢𑀸 𑀢𑀘𑁆𑀙𑁂𑀬𑁆𑀬𑀼𑀁. 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀫𑀁𑀲𑀧𑁂𑀲𑀺𑀁 𑀦𑀔𑁂𑀳𑀺 𑀓𑀟𑁆𑀠𑀺𑀢𑁆𑀯𑀸 𑀧𑀸𑀢𑁂𑀬𑁆𑀬𑀼𑀁.

𑁪𑁭. 𑀬𑀸𑀦𑀁 𑀯𑀸 𑀧𑁄𑀭𑀺𑀲𑁂𑀬𑁆𑀬𑀦𑁆𑀢𑀺 𑀧𑀼𑀭𑀺𑀲𑀸𑀦𑀼𑀘𑁆𑀙𑀯𑀺𑀓𑀁 𑀬𑀸𑀦𑀁. 𑀧𑀯𑀭𑀫𑀡𑀺𑀓𑀼𑀡𑁆𑀟𑀮𑀦𑁆𑀢𑀺 𑀦𑀸𑀦𑀧𑁆𑀧𑀓𑀸𑀭𑀁 𑀉𑀢𑁆𑀢𑀫𑀫𑀡𑀺𑀜𑁆𑀘 𑀓𑀼𑀡𑁆𑀟𑀮𑀜𑁆𑀘. 𑀲𑀸𑀦𑀺 𑀳𑀭𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀪𑀡𑁆𑀟𑀓𑀸𑀦𑀺 𑀕𑀡𑁆𑀳𑀦𑁆𑀢𑀺.

𑁪𑁮. 𑀲𑀫𑁆𑀧𑀦𑁆𑀦𑀨𑀮𑀦𑁆𑀢𑀺 𑀫𑀥𑀼𑀭𑀨𑀮𑀁. 𑀉𑀧𑀧𑀦𑁆𑀦𑀨𑀮𑀦𑁆𑀢𑀺 𑀨𑀮𑀽𑀧𑀧𑀦𑁆𑀦𑀁 𑀩𑀳𑀼𑀨𑀮𑀁.

𑁪𑁯. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀉𑀢𑁆𑀢𑀫𑀁 𑀧𑀪𑀲𑁆𑀲𑀭𑀁 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁.

𑁫𑁦. 𑀆𑀭𑀓𑀸 𑀅𑀳𑀁, 𑀪𑀦𑁆𑀢𑁂𑀢𑀺 𑀧𑀣𑀯𑀺𑀢𑁄 𑀦𑀪𑀁 𑀯𑀺𑀬 𑀲𑀫𑀼𑀤𑁆𑀤𑀲𑁆𑀲 𑀑𑀭𑀺𑀫𑀢𑀻𑀭𑀢𑁄 𑀧𑀭𑀢𑀻𑀭𑀁 𑀯𑀺𑀬 𑀘 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑁂 𑀅𑀳𑀁. 𑀅𑀦𑀸𑀚𑀸𑀦𑀻𑀬𑁂𑀢𑀺 𑀕𑀺𑀳𑀺𑀯𑁄𑀳𑀸𑀭𑀲𑀫𑀼𑀘𑁆𑀙𑁂𑀤𑀦𑀲𑁆𑀲 𑀓𑀸𑀭𑀡𑀁 𑀅𑀚𑀸𑀦𑀦𑀓𑁂. 𑀆𑀚𑀸𑀦𑀻𑀬𑀪𑁄𑀚𑀦𑀦𑁆𑀢𑀺 𑀓𑀸𑀭𑀡𑀁 𑀚𑀸𑀦𑀦𑁆𑀢𑁂𑀳𑀺 𑀪𑀼𑀜𑁆𑀚𑀺𑀢𑀩𑁆𑀩𑀁 𑀪𑁄𑀚𑀦𑀁. 𑀅𑀦𑀸𑀚𑀸𑀦𑀻𑀬𑀪𑁄𑀚𑀦𑀦𑁆𑀢𑀺 𑀓𑀸𑀭𑀡𑀁 𑀅𑀚𑀸𑀦𑀦𑁆𑀢𑁂𑀳𑀺 𑀪𑀼𑀜𑁆𑀚𑀺𑀢𑀩𑁆𑀩𑀁 𑀪𑁄𑀚𑀦𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀧𑁄𑀢𑀮𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀚𑀻𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧. 𑀏𑀯𑀁 ¶ ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀚𑀻𑀯𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀅𑀫𑁆𑀩𑀯𑀦𑁂𑀢𑀺 𑀏𑀢𑁆𑀣 𑀚𑀻𑀯𑀢𑀻𑀢𑀺 𑀚𑀻𑀯𑀓𑁄. 𑀓𑀼𑀫𑀸𑀭𑁂𑀦 𑀪𑀢𑁄𑀢𑀺 𑀓𑁄𑀫𑀸𑀭𑀪𑀘𑁆𑀘𑁄. 𑀬𑀣𑀸𑀳 ‘‘𑀓𑀺𑀁 𑀏𑀢𑀁 𑀪𑀡𑁂 𑀓𑀸𑀓𑁂𑀳𑀺 𑀲𑀫𑁆𑀧𑀭𑀺𑀓𑀺𑀡𑁆𑀡𑀦𑁆𑀢𑀺? 𑀤𑀸𑀭𑀓𑁄 𑀤𑁂𑀯𑀸𑀢𑀺. 𑀚𑀻𑀯𑀢𑀺 𑀪𑀡𑁂𑀢𑀺? 𑀚𑀻𑀯𑀢𑀺 𑀤𑁂𑀯𑀸𑀢𑀺. 𑀢𑁂𑀦 𑀳𑀺 𑀪𑀡𑁂 𑀢𑀁 𑀤𑀸𑀭𑀓𑀁 𑀅𑀫𑁆𑀳𑀸𑀓𑀁 𑀅𑀦𑁆𑀢𑁂𑀧𑀼𑀭𑀁 𑀦𑁂𑀢𑁆𑀯𑀸 𑀥𑀸𑀢𑀻𑀦𑀁 𑀤𑁂𑀣 𑀧𑁄𑀲𑁂𑀢𑀼𑀦𑁆𑀢𑀺. 𑀢𑀲𑁆𑀲 𑀚𑀻𑀯𑀢𑀻𑀢𑀺 𑀚𑀻𑀯𑀓𑁄𑀢𑀺 𑀦𑀸𑀫𑀁 𑀅𑀓𑀁𑀲𑀼, 𑀓𑀼𑀫𑀸𑀭𑁂𑀦 𑀧𑁄𑀲𑀸𑀧𑀺𑀢𑁄𑀢𑀺 𑀓𑁄𑀫𑀸𑀭𑀪𑀘𑁆𑀘𑁄𑀢𑀺 𑀦𑀸𑀫𑀁 𑀅𑀓𑀁𑀲𑀽’’𑀢𑀺 (𑀫𑀳𑀸𑀯. 𑁩𑁨𑁮). 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑁂𑀦 𑀧𑀦 𑀚𑀻𑀯𑀓𑀯𑀢𑁆𑀣𑀼 𑀔𑀦𑁆𑀥𑀓𑁂 𑀆𑀕𑀢𑀫𑁂𑀯. 𑀯𑀺𑀦𑀺𑀘𑁆𑀙𑀬𑀓𑀣𑀸𑀧𑀺𑀲𑁆𑀲 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀸.

𑀅𑀬𑀁 𑀧𑀦 𑀚𑀻𑀯𑀓𑁄 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀪𑀕𑀯𑀢𑁄 𑀤𑁄𑀲𑀸𑀪𑀺𑀲𑀦𑁆𑀦𑀁 𑀓𑀸𑀬𑀁 𑀯𑀺𑀭𑁂𑀘𑁂𑀢𑁆𑀯𑀸 𑀲𑀻𑀯𑁂𑀬𑁆𑀬𑀓𑀁 𑀤𑀼𑀲𑁆𑀲𑀬𑀼𑀕𑀁 𑀤𑀢𑁆𑀯𑀸 𑀯𑀢𑁆𑀣𑀸𑀦𑀼𑀫𑁄𑀤𑀦𑀧𑀭𑀺𑀬𑁄𑀲𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀸 𑀤𑀺𑀯𑀲𑀲𑁆𑀲 𑀤𑁆𑀯𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀕𑀦𑁆𑀢𑀩𑁆𑀩𑀁, 𑀇𑀤𑀜𑁆𑀘 𑀯𑁂𑀴𑀼𑀯𑀦𑀁 𑀅𑀢𑀺𑀤𑀽𑀭𑁂, 𑀫𑀬𑁆𑀳𑀁 𑀉𑀬𑁆𑀬𑀸𑀦𑀁 𑀅𑀫𑁆𑀩𑀯𑀦𑀁 𑀆𑀲𑀦𑁆𑀦𑀢𑀭𑀁, 𑀬𑀁𑀦𑀽𑀦𑀸𑀳𑀫𑁂𑀢𑁆𑀣 𑀪𑀕𑀯𑀢𑁄 𑀯𑀺𑀳𑀸𑀭𑀁 𑀓𑀸𑀭𑁂𑀬𑁆𑀬’’𑀦𑁆𑀢𑀺. 𑀲𑁄 ¶ 𑀢𑀲𑁆𑀫𑀺𑀁 𑀅𑀫𑁆𑀩𑀯𑀦𑁂 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀮𑁂𑀡𑀓𑀼𑀝𑀺𑀫𑀡𑁆𑀟𑀧𑀸𑀤𑀻𑀦𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀪𑀕𑀯𑀢𑁄 𑀅𑀦𑀼𑀘𑁆𑀙𑀯𑀺𑀓𑀁 𑀕𑀦𑁆𑀥𑀓𑀼𑀝𑀺𑀁 𑀓𑀸𑀭𑁂𑀢𑁆𑀯𑀸 𑀅𑀫𑁆𑀩𑀯𑀦𑀁 𑀅𑀝𑁆𑀞𑀸𑀭𑀲𑀳𑀢𑁆𑀣𑀼𑀩𑁆𑀩𑁂𑀥𑁂𑀦 𑀢𑀫𑁆𑀩𑀧𑀝𑁆𑀝𑀯𑀡𑁆𑀡𑁂𑀦 𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀘𑀻𑀯𑀭𑀪𑀢𑁆𑀢𑁂𑀦 𑀲𑀦𑁆𑀢𑀧𑁆𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁄𑀤𑀓𑀁 𑀧𑀸𑀢𑁂𑀢𑁆𑀯𑀸 𑀯𑀺𑀳𑀸𑀭𑀁 𑀦𑀺𑀬𑁆𑀬𑀸𑀢𑁂𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀚𑀻𑀯𑀓𑀲𑁆𑀲 𑀓𑁄𑀫𑀸𑀭𑀪𑀘𑁆𑀘𑀲𑁆𑀲 𑀅𑀫𑁆𑀩𑀯𑀦𑁂’’𑀢𑀺.

𑀆𑀭𑀪𑀦𑁆𑀢𑀻𑀢𑀺 𑀖𑀸𑀢𑁂𑀦𑁆𑀢𑀺. 𑀉𑀤𑁆𑀤𑀺𑀲𑁆𑀲𑀓𑀢𑀦𑁆𑀢𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀓𑀢𑀁. 𑀧𑀝𑀺𑀘𑁆𑀘𑀓𑀫𑁆𑀫𑀦𑁆𑀢𑀺 𑀅𑀢𑁆𑀢𑀸𑀦𑀁 𑀧𑀝𑀺𑀘𑁆𑀘 𑀓𑀢𑀁. 𑀅𑀣 𑀯𑀸 𑀧𑀝𑀺𑀘𑁆𑀘𑀓𑀫𑁆𑀫𑀦𑁆𑀢𑀺 𑀦𑀺𑀫𑀺𑀢𑁆𑀢𑀓𑀫𑁆𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀁 𑀧𑀝𑀺𑀘𑁆𑀘 𑀓𑀫𑁆𑀫𑀫𑁂𑀢𑁆𑀣 𑀅𑀢𑁆𑀣𑀻𑀢𑀺 𑀫𑀁𑀲𑀁 ‘‘𑀧𑀝𑀺𑀘𑁆𑀘𑀓𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺 𑀬𑁄 𑀏𑀯𑀭𑀽𑀧𑀁 𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀲𑁄𑀧𑀺 𑀢𑀲𑁆𑀲 𑀓𑀫𑁆𑀫𑀲𑁆𑀲 𑀤𑀸𑀬𑀸𑀤𑁄 𑀳𑁄𑀢𑀺, 𑀯𑀥𑀓𑀲𑁆𑀲 𑀯𑀺𑀬 𑀢𑀲𑁆𑀲𑀸𑀧𑀺 𑀧𑀸𑀡𑀖𑀸𑀢𑀓𑀫𑁆𑀫𑀁 𑀳𑁄𑀢𑀻𑀢𑀺 𑀢𑁂𑀲𑀁 𑀮𑀤𑁆𑀥𑀺. 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁄𑀦𑁆𑀢𑀻𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀓𑀸𑀭𑀡𑀲𑁆𑀲 𑀅𑀦𑀼𑀓𑀸𑀭𑀡𑀁 𑀓𑀣𑁂𑀦𑁆𑀢𑀺. 𑀏𑀢𑁆𑀣 𑀘 𑀓𑀸𑀭𑀡𑀁 𑀦𑀸𑀫 𑀢𑀺𑀓𑁄𑀝𑀺𑀧𑀭𑀺𑀲𑀼𑀤𑁆𑀥𑀫𑀘𑁆𑀙𑀫𑀁𑀲𑀧𑀭𑀺𑀪𑁄𑀕𑁄, 𑀅𑀦𑀼𑀓𑀸𑀭𑀡𑀁 𑀦𑀸𑀫 𑀫𑀳𑀸𑀚𑀦𑀲𑁆𑀲 𑀢𑀣𑀸 𑀩𑁆𑀬𑀸𑀓𑀭𑀡𑀁. 𑀬𑀲𑁆𑀫𑀸 𑀧𑀦 ¶ 𑀪𑀕𑀯𑀸 𑀉𑀤𑁆𑀤𑀺𑀲𑁆𑀲𑀓𑀢𑀁 𑀦 𑀧𑀭𑀺𑀪𑀼𑀜𑁆𑀚𑀢𑀺, 𑀢𑀲𑁆𑀫𑀸 𑀦𑁂𑀯 𑀢𑀁 𑀓𑀸𑀭𑀡𑀁 𑀳𑁄𑀢𑀺, 𑀦 𑀢𑀺𑀢𑁆𑀣𑀺𑀬𑀸𑀦𑀁 𑀢𑀣𑀸 𑀩𑁆𑀬𑀸𑀓𑀭𑀡𑀁 ¶ 𑀅𑀦𑀼𑀓𑀸𑀭𑀡𑀁. 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀯𑀸𑀤𑁄𑀢𑀺 𑀧𑀭𑁂𑀳𑀺 𑀯𑀼𑀢𑁆𑀢𑀓𑀸𑀭𑀡𑁂𑀦 𑀲𑀓𑀸𑀭𑀡𑁄 𑀳𑀼𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀯𑀸𑀤𑁄 𑀯𑀸 𑀅𑀦𑀼𑀯𑀸𑀤𑁄 𑀯𑀸 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀢𑀩𑁆𑀩𑀓𑀸𑀭𑀡𑀁 𑀓𑁄𑀘𑀺 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀓𑀺𑀁 𑀦 𑀆𑀕𑀘𑁆𑀙𑀢𑀺 ¶ . 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀓𑀺𑀁 𑀲𑀩𑁆𑀩𑀸𑀓𑀸𑀭𑁂𑀦𑀧𑀺 𑀢𑀼𑀫𑁆𑀳𑀸𑀓𑀁 𑀯𑀸𑀤𑁂 𑀕𑀸𑀭𑀬𑁆𑀳𑀁 𑀓𑀸𑀭𑀡𑀁 𑀦𑀢𑁆𑀣𑀻’’𑀢𑀺. 𑀅𑀩𑁆𑀪𑀸𑀘𑀺𑀓𑁆𑀔𑀦𑁆𑀢𑀻𑀢𑀺 𑀅𑀪𑀺𑀪𑀯𑀺𑀢𑁆𑀯𑀸 𑀆𑀘𑀺𑀓𑁆𑀔𑀦𑁆𑀢𑀺.

𑁫𑁨. 𑀞𑀸𑀦𑁂𑀳𑀻𑀢𑀺 𑀓𑀸𑀭𑀡𑁂𑀳𑀺. 𑀤𑀺𑀝𑁆𑀞𑀸𑀤𑀻𑀲𑀼 𑀤𑀺𑀝𑁆𑀞𑀁 𑀦𑀸𑀫 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀫𑀺𑀕𑀫𑀘𑁆𑀙𑁂 𑀯𑀥𑀺𑀢𑁆𑀯𑀸 𑀕𑀬𑁆𑀳𑀫𑀸𑀦𑀁 𑀤𑀺𑀝𑁆𑀞𑀁. 𑀲𑀼𑀢𑀁 𑀦𑀸𑀫 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀫𑀺𑀕𑀫𑀘𑁆𑀙𑁂 𑀯𑀥𑀺𑀢𑁆𑀯𑀸 𑀕𑀳𑀺𑀢𑀦𑁆𑀢𑀺 𑀲𑀼𑀢𑀁. 𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑀁 𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁 𑀢𑀤𑀼𑀪𑀬𑀯𑀺𑀫𑀼𑀢𑁆𑀢𑀧𑀭𑀺𑀲𑀗𑁆𑀓𑀺𑀢𑀦𑁆𑀢𑀺 𑀢𑀺𑀯𑀺𑀥𑀁 𑀳𑁄𑀢𑀺.

𑀢𑀢𑁆𑀭𑀸𑀬𑀁 𑀲𑀩𑁆𑀩𑀲𑀗𑁆𑀕𑀸𑀳𑀓𑀯𑀺𑀦𑀺𑀘𑁆𑀙𑀬𑁄 𑁋 𑀇𑀥 𑀪𑀺𑀓𑁆𑀔𑀽 𑀧𑀲𑁆𑀲𑀦𑁆𑀢𑀺 𑀫𑀦𑀼𑀲𑁆𑀲𑁂 𑀚𑀸𑀮𑀯𑀸𑀕𑀼𑀭𑀸𑀤𑀺𑀳𑀢𑁆𑀣𑁂 𑀕𑀸𑀫𑀢𑁄 𑀯𑀸 𑀦𑀺𑀓𑁆𑀔𑀫𑀦𑁆𑀢𑁂 𑀅𑀭𑀜𑁆𑀜𑁂 𑀯𑀸 𑀯𑀺𑀘𑀭𑀦𑁆𑀢𑁂. 𑀤𑀼𑀢𑀺𑀬𑀤𑀺𑀯𑀲𑁂 𑀘 𑀦𑁂𑀲𑀁 𑀢𑀁 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀸𑀦𑀁 𑀲𑀫𑀘𑁆𑀙𑀫𑀁𑀲𑀁 𑀧𑀺𑀡𑁆𑀟𑀧𑀸𑀢𑀁 𑀅𑀪𑀺𑀳𑀭𑀦𑁆𑀢𑀺. 𑀢𑁂 𑀢𑁂𑀦 𑀤𑀺𑀝𑁆𑀞𑁂𑀦 𑀧𑀭𑀺𑀲𑀗𑁆𑀓𑀦𑁆𑀢𑀺 ‘‘𑀪𑀺𑀓𑁆𑀔𑀽𑀦𑀁 𑀦𑀼 𑀔𑁄 𑀅𑀢𑁆𑀣𑀸𑀬 𑀓𑀢’’𑀦𑁆𑀢𑀺, 𑀇𑀤𑀁 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫, 𑀏𑀢𑀁 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀁 𑀏𑀯𑀁 𑀅𑀧𑀭𑀺𑀲𑀗𑁆𑀓𑀺𑀢𑀁, 𑀢𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀢𑁂 𑀫𑀦𑀼𑀲𑁆𑀲𑀸 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀦 𑀕𑀡𑁆𑀳𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 ‘‘𑀦𑀬𑀺𑀤𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀓𑀢𑀁, 𑀅𑀫𑁆𑀳𑁂𑀳𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀸 𑀭𑀸𑀚𑀬𑀼𑀢𑁆𑀢𑀸𑀤𑀻𑀦𑀁 𑀅𑀢𑁆𑀣𑀸𑀬 𑀯𑀸 𑀓𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀓𑀧𑁆𑀧𑀢𑀺.

𑀦 𑀳𑁂𑀯 𑀔𑁄 𑀪𑀺𑀓𑁆𑀔𑀽 𑀧𑀲𑁆𑀲𑀦𑁆𑀢𑀺, 𑀅𑀧𑀺𑀘 𑀲𑀼𑀡𑀦𑁆𑀢𑀺 ‘‘𑀫𑀦𑀼𑀲𑁆𑀲𑀸 𑀓𑀺𑀭 𑀚𑀸𑀮𑀯𑀸𑀕𑀼𑀭𑀸𑀤𑀺𑀳𑀢𑁆𑀣𑀸 𑀕𑀸𑀫𑀢𑁄 𑀯𑀸 𑀦𑀺𑀓𑁆𑀔𑀫𑀦𑁆𑀢𑀺 𑀅𑀭𑀜𑁆𑀜𑁂 𑀯𑀸 𑀯𑀺𑀘𑀭𑀦𑁆𑀢𑀻’’𑀢𑀺. 𑀤𑀼𑀢𑀺𑀬𑀤𑀺𑀯𑀲𑁂 𑀘 𑀦𑁂𑀲𑀁 𑀢𑀁 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀸𑀦𑀁 𑀲𑀫𑀘𑁆𑀙𑀫𑀁𑀲𑀁 𑀧𑀺𑀡𑁆𑀟𑀧𑀸𑀢𑀁 𑀅𑀪𑀺𑀳𑀭𑀦𑁆𑀢𑀺. 𑀢𑁂 𑀢𑁂𑀦 𑀲𑀼𑀢𑁂𑀦 𑀧𑀭𑀺𑀲𑀗𑁆𑀓𑀦𑁆𑀢𑀺 ‘‘𑀪𑀺𑀓𑁆𑀔𑀽𑀦𑀁 𑀦𑀼 𑀔𑁄 𑀅𑀢𑁆𑀣𑀸𑀬 𑀓𑀢’’𑀦𑁆𑀢𑀺, 𑀇𑀤𑀁 𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫, 𑀏𑀢𑀁 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀁 𑀏𑀯𑀁 𑀅𑀧𑀭𑀺𑀲𑀗𑁆𑀓𑀺𑀢𑀁, 𑀢𑀁 𑀯𑀝𑁆𑀝𑀢𑀺. 𑀲𑀘𑁂 𑀧𑀦 𑀢𑁂 𑀫𑀦𑀼𑀲𑁆𑀲𑀸 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀦 𑀕𑀡𑁆𑀳𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 ‘‘𑀦𑀬𑀺𑀤𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀓𑀢𑀁, 𑀅𑀫𑁆𑀳𑁂𑀳𑀺 ¶ 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀸 𑀭𑀸𑀚𑀬𑀼𑀢𑁆𑀢𑀸𑀤𑀻𑀦𑀁 𑀅𑀢𑁆𑀣𑀸𑀬 𑀯𑀸 𑀓𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀓𑀧𑁆𑀧𑀢𑀺.

𑀦 𑀳𑁂𑀯 𑀔𑁄 𑀧𑀦 𑀧𑀲𑁆𑀲𑀦𑁆𑀢𑀺 𑀦 𑀲𑀼𑀡𑀦𑁆𑀢𑀺, 𑀅𑀧𑀺𑀘 𑀢𑁂𑀲𑀁 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀸𑀦𑀁 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 ¶ 𑀲𑀫𑀘𑁆𑀙𑀫𑀁𑀲𑀁 𑀧𑀺𑀡𑁆𑀟𑀧𑀸𑀢𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀪𑀺𑀳𑀭𑀦𑁆𑀢𑀺. 𑀢𑁂 𑀧𑀭𑀺𑀲𑀗𑁆𑀓𑀦𑁆𑀢𑀺 ‘‘𑀪𑀺𑀓𑁆𑀔𑀽𑀦𑀁 𑀦𑀼 𑀔𑁄 𑀅𑀢𑁆𑀣𑀸𑀬 𑀓𑀢’’𑀦𑁆𑀢𑀺, 𑀇𑀤𑀁 𑀢𑀤𑀼𑀪𑀬𑀯𑀺𑀫𑀼𑀢𑁆𑀢𑀧𑀭𑀺𑀲𑀗𑁆𑀓𑀺𑀢𑀁 𑀦𑀸𑀫. 𑀏𑀢𑀫𑁆𑀧𑀺 𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀬𑀁 𑀏𑀯𑀁 𑀅𑀧𑀭𑀺𑀲𑀗𑁆𑀓𑀺𑀢𑀁, 𑀢𑀁 𑀯𑀝𑁆𑀝𑀢𑀺 ¶ . 𑀲𑀘𑁂 𑀧𑀦 𑀢𑁂 𑀫𑀦𑀼𑀲𑁆𑀲𑀸 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀦 𑀕𑀡𑁆𑀳𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 ‘‘𑀦𑀬𑀺𑀤𑀁, 𑀪𑀦𑁆𑀢𑁂, 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀓𑀢𑀁, 𑀅𑀫𑁆𑀳𑁂𑀳𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀸 𑀭𑀸𑀚𑀬𑀼𑀢𑁆𑀢𑀸𑀤𑀻𑀦𑀁 𑀅𑀢𑁆𑀣𑀸𑀬 𑀯𑀸 𑀓𑀢𑀁, 𑀧𑀯𑀢𑁆𑀢𑀫𑀁𑀲𑀁 𑀯𑀸 𑀓𑀢𑀁, 𑀓𑀧𑁆𑀧𑀺𑀬𑀫𑁂𑀯 𑀮𑀪𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀲𑀫𑁆𑀧𑀸𑀤𑀺𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀓𑀧𑁆𑀧𑀢𑀺.

𑀫𑀢𑀸𑀦𑀁 𑀧𑁂𑀢𑀓𑀺𑀘𑁆𑀘𑀢𑁆𑀣𑀸𑀬 𑀫𑀗𑁆𑀕𑀮𑀸𑀤𑀻𑀦𑀁 𑀯𑀸 𑀅𑀢𑁆𑀣𑀸𑀬 𑀓𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀁 𑀬𑀜𑁆𑀳𑀺 𑀪𑀺𑀓𑁆𑀔𑀽𑀦𑀁𑀬𑁂𑀯 𑀅𑀢𑁆𑀣𑀸𑀬 𑀅𑀓𑀢𑀁, 𑀬𑀢𑁆𑀣 𑀘 𑀦𑀺𑀩𑁆𑀩𑁂𑀫𑀢𑀺𑀓𑀸 𑀳𑁄𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀓𑀧𑁆𑀧𑀢𑀺. 𑀲𑀘𑁂 𑀧𑀦 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀉𑀤𑁆𑀤𑀺𑀲𑁆𑀲 𑀓𑀢𑀁 𑀳𑁄𑀢𑀺, 𑀢𑁂 𑀘 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀓𑀢𑀪𑀸𑀯𑀁 𑀦 𑀚𑀸𑀦𑀦𑁆𑀢𑀺, 𑀅𑀜𑁆𑀜𑁂 𑀚𑀸𑀦𑀦𑁆𑀢𑀺. 𑀬𑁂 𑀚𑀸𑀦𑀦𑁆𑀢𑀺, 𑀢𑁂𑀲𑀁 𑀦 𑀯𑀝𑁆𑀝𑀢𑀺, 𑀇𑀢𑀭𑁂𑀲𑀁 𑀯𑀝𑁆𑀝𑀢𑀺. 𑀅𑀜𑁆𑀜𑁂 𑀦 𑀚𑀸𑀦𑀦𑁆𑀢𑀺, 𑀢𑁂𑀬𑁂𑀯 𑀚𑀸𑀦𑀦𑁆𑀢𑀺, 𑀢𑁂𑀲𑀁𑀬𑁂𑀯 𑀦 𑀯𑀝𑁆𑀝𑀢𑀺, 𑀅𑀜𑁆𑀜𑁂𑀲𑀁 𑀯𑀝𑁆𑀝𑀢𑀺. 𑀢𑁂𑀧𑀺 ‘‘𑀅𑀫𑁆𑀳𑀸𑀓𑀁 𑀅𑀢𑁆𑀣𑀸𑀬 𑀓𑀢𑀁’’𑀢𑀺 𑀚𑀸𑀦𑀦𑁆𑀢𑀺 𑀅𑀜𑁆𑀜𑁂𑀧𑀺 ‘‘𑀏𑀢𑁂𑀲𑀁 𑀅𑀢𑁆𑀣𑀸𑀬 𑀓𑀢’’𑀦𑁆𑀢𑀺 𑀚𑀸𑀦𑀦𑁆𑀢𑀺, 𑀲𑀩𑁆𑀩𑁂𑀲𑀫𑁆𑀧𑀺 𑀢𑀁 𑀦 𑀯𑀝𑁆𑀝𑀢𑀺. 𑀲𑀩𑁆𑀩𑁂 𑀦 𑀚𑀸𑀦𑀦𑁆𑀢𑀺, 𑀲𑀩𑁆𑀩𑁂𑀲𑀁 𑀯𑀝𑁆𑀝𑀢𑀺. 𑀧𑀜𑁆𑀘𑀲𑀼 𑀳𑀺 𑀲𑀳𑀥𑀫𑁆𑀫𑀺𑀓𑁂𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀯𑀸 𑀅𑀢𑁆𑀣𑀸𑀬 𑀉𑀤𑁆𑀤𑀺𑀲𑁆𑀲 𑀓𑀢𑀁 𑀲𑀩𑁆𑀩𑁂𑀲𑀁 𑀦 𑀓𑀧𑁆𑀧𑀢𑀺.

𑀲𑀘𑁂 𑀧𑀦 𑀓𑁄𑀘𑀺 𑀏𑀓𑀁 𑀪𑀺𑀓𑁆𑀔𑀼𑀁 𑀉𑀤𑁆𑀤𑀺𑀲𑁆𑀲 𑀧𑀸𑀡𑀁 𑀯𑀥𑀺𑀢𑁆𑀯𑀸 𑀢𑀲𑁆𑀲 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀤𑁂𑀢𑀺, 𑀲𑁄 𑀘𑁂 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀓𑀢𑀪𑀸𑀯𑀁 𑀚𑀸𑀦𑀁𑀬𑁂𑀯 𑀕𑀳𑁂𑀢𑁆𑀯𑀸 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑁂𑀢𑀺, 𑀲𑁄 𑀢𑀲𑁆𑀲 𑀲𑀤𑁆𑀥𑀸𑀬 𑀧𑀭𑀺𑀪𑀼𑀜𑁆𑀚𑀢𑀺. 𑀓𑀲𑁆𑀲𑀸𑀧𑀢𑁆𑀢𑀻𑀢𑀺? 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀦𑀸𑀧𑀢𑁆𑀢𑀺. 𑀬𑀜𑁆𑀳𑀺 𑀉𑀤𑁆𑀤𑀺𑀲𑁆𑀲 ¶ 𑀓𑀢𑀁, 𑀢𑀲𑁆𑀲 𑀅𑀪𑀼𑀢𑁆𑀢𑀢𑀸𑀬 𑀅𑀦𑀸𑀧𑀢𑁆𑀢𑀺, 𑀇𑀢𑀭𑀲𑁆𑀲 𑀅𑀚𑀸𑀦𑀦𑀢𑀸𑀬. 𑀓𑀧𑁆𑀧𑀺𑀬𑀫𑀁𑀲𑀲𑁆𑀲 𑀳𑀺 𑀧𑀝𑀺𑀕𑁆𑀕𑀳𑀡𑁂 𑀆𑀧𑀢𑁆𑀢𑀺 𑀦𑀢𑁆𑀣𑀺. 𑀉𑀤𑁆𑀤𑀺𑀲𑁆𑀲𑀓𑀢𑀜𑁆𑀘 𑀅𑀚𑀸𑀦𑀺𑀢𑁆𑀯𑀸 𑀪𑀼𑀢𑁆𑀢𑀲𑁆𑀲 𑀧𑀘𑁆𑀙𑀸 𑀜𑀢𑁆𑀯𑀸 𑀆𑀧𑀢𑁆𑀢𑀺𑀤𑁂𑀲𑀦𑀸𑀓𑀺𑀘𑁆𑀘𑀁 𑀦𑀸𑀫 𑀦𑀢𑁆𑀣𑀺. 𑀅𑀓𑀧𑁆𑀧𑀺𑀬𑀫𑀁𑀲𑀁 𑀧𑀦 𑀅𑀚𑀸𑀦𑀺𑀢𑁆𑀯𑀸 𑀪𑀼𑀢𑁆𑀢𑁂𑀦 𑀧𑀘𑁆𑀙𑀸 𑀜𑀢𑁆𑀯𑀸𑀧𑀺 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸. 𑀉𑀤𑁆𑀤𑀺𑀲𑁆𑀲𑀓𑀢𑀜𑁆𑀳𑀺 𑀜𑀢𑁆𑀯𑀸 𑀪𑀼𑀜𑁆𑀚𑀢𑁄𑀯 𑀆𑀧𑀢𑁆𑀢𑀺, 𑀅𑀓𑀧𑁆𑀧𑀺𑀬𑀫𑀁𑀲𑀁 𑀅𑀚𑀸𑀦𑀺𑀢𑁆𑀯𑀸 𑀪𑀼𑀢𑁆𑀢𑀲𑁆𑀲𑀸𑀧𑀺 𑀆𑀧𑀢𑁆𑀢𑀺𑀬𑁂𑀯. 𑀢𑀲𑁆𑀫𑀸 𑀆𑀧𑀢𑁆𑀢𑀺𑀪𑀻𑀭𑀼𑀓𑁂𑀦 𑀭𑀽𑀧𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁂𑀦𑀸𑀧𑀺 𑀧𑀼𑀘𑁆𑀙𑀺𑀢𑁆𑀯𑀸𑀯 𑀫𑀁𑀲𑀁 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀁, 𑀧𑀭𑀺𑀪𑁄𑀕𑀓𑀸𑀮𑁂 𑀧𑀼𑀘𑁆𑀙𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻𑀢𑀺 𑀯𑀸 𑀕𑀳𑁂𑀢𑁆𑀯𑀸 𑀧𑀼𑀘𑁆𑀙𑀺𑀢𑁆𑀯𑀸𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸. 𑀅𑀘𑁆𑀙𑀫𑀁𑀲𑀜𑁆𑀳𑀺 𑀲𑀽𑀓𑀭𑀫𑀁𑀲𑀲𑀤𑀺𑀲𑀁 𑀳𑁄𑀢𑀺, 𑀤𑀻𑀧𑀺𑀫𑀁𑀲𑀸𑀤𑀻𑀦𑀺 𑀘 𑀫𑀺𑀕𑀫𑀁𑀲𑀲𑀤𑀺𑀲𑀸𑀦𑀺, 𑀢𑀲𑁆𑀫𑀸 𑀧𑀼𑀘𑁆𑀙𑀺𑀢𑁆𑀯𑀸 𑀕𑀳𑀡𑀫𑁂𑀯 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺.

𑀅𑀤𑀺𑀝𑁆𑀞𑀦𑁆𑀢𑀺 ¶ 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀯𑀥𑀺𑀢𑁆𑀯𑀸 𑀕𑀬𑁆𑀳𑀫𑀸𑀦𑀁 𑀅𑀤𑀺𑀝𑁆𑀞𑀁. 𑀅𑀲𑀼𑀢𑀦𑁆𑀢𑀺 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀯𑀥𑀺𑀢𑁆𑀯𑀸 𑀕𑀳𑀺𑀢𑀦𑁆𑀢𑀺 𑀅𑀲𑀼𑀢𑀁. 𑀅𑀧𑀭𑀺𑀲𑀗𑁆𑀓𑀺𑀢𑀦𑁆𑀢𑀺 𑀤𑀺𑀝𑁆𑀞𑀧𑀭𑀺𑀲𑀗𑁆𑀓𑀺𑀢𑀸𑀤𑀺𑀯𑀲𑁂𑀦 𑀅𑀧𑀭𑀺𑀲𑀗𑁆𑀓𑀺𑀢𑀁. 𑀧𑀭𑀺𑀪𑁄𑀕𑀦𑁆𑀢𑀺 𑀯𑀤𑀸𑀫𑀻𑀢𑀺 𑀇𑀫𑁂𑀳𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀧𑀭𑀺𑀲𑀼𑀤𑁆𑀥𑀁 𑀢𑀺𑀓𑁄𑀝𑀺𑀧𑀭𑀺𑀲𑀼𑀤𑁆𑀥𑀁 𑀦𑀸𑀫 𑀳𑁄𑀢𑀺, 𑀢𑀲𑁆𑀲 𑀧𑀭𑀺𑀪𑁄𑀕𑁄 𑀅𑀭𑀜𑁆𑀜𑁂 𑀚𑀸𑀢𑀲𑀽𑀧𑁂𑀬𑁆𑀬𑀲𑀸𑀓𑀧𑀭𑀺𑀪𑁄𑀕𑀲𑀤𑀺𑀲𑁄 𑀳𑁄𑀢𑀺, 𑀢𑀣𑀸𑀭𑀽𑀧𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀲𑁆𑀲 ¶ 𑀪𑀺𑀓𑁆𑀔𑀼𑀦𑁄 𑀤𑁄𑀲𑁄 𑀯𑀸 𑀯𑀚𑁆𑀚𑀁 𑀯𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑁫𑁩. 𑀇𑀤𑀸𑀦𑀺 𑀢𑀸𑀤𑀺𑀲𑀲𑁆𑀲 𑀧𑀭𑀺𑀪𑁄𑀕𑁂 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀦𑁄𑀧𑀺 𑀅𑀦𑀯𑀚𑁆𑀚𑀢𑀁 𑀤𑀲𑁆𑀲𑁂𑀢𑀼𑀁 𑀇𑀥, 𑀚𑀻𑀯𑀓, 𑀪𑀺𑀓𑁆𑀔𑀽𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀦𑀺𑀬𑀫𑁂𑀢𑁆𑀯𑀸 𑀪𑀺𑀓𑁆𑀔𑀽𑀢𑀺 𑀯𑀼𑀢𑁆𑀢𑀁, 𑀅𑀣 𑀔𑁄 𑀅𑀢𑁆𑀢𑀸𑀦𑀫𑁂𑀯 𑀲𑀦𑁆𑀥𑀸𑀬 𑀏𑀢𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀪𑀕𑀯𑀢𑀸 𑀳𑀺 𑀫𑀳𑀸𑀯𑀘𑁆𑀙𑀕𑁄𑀢𑁆𑀢𑀲𑀼𑀢𑁆𑀢𑁂, 𑀘𑀗𑁆𑀓𑀻𑀲𑀼𑀢𑁆𑀢𑁂, 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂𑀢𑀺 𑀢𑀻𑀲𑀼 𑀞𑀸𑀦𑁂𑀲𑀼 𑀅𑀢𑁆𑀢𑀸𑀦𑀁𑀬𑁂𑀯 𑀲𑀦𑁆𑀥𑀸𑀬 𑀤𑁂𑀲𑀦𑀸 𑀓𑀢𑀸. 𑀧𑀡𑀻𑀢𑁂𑀦 ¶ 𑀧𑀺𑀡𑁆𑀟𑀧𑀸𑀢𑁂𑀦𑀸𑀢𑀺 𑀳𑁂𑀝𑁆𑀞𑀸 𑀅𑀦𑀗𑁆𑀕𑀡𑀲𑀼𑀢𑁆𑀢𑁂 𑀬𑁄 𑀓𑁄𑀘𑀺 𑀫𑀳𑀕𑁆𑀖𑁄 𑀧𑀺𑀡𑁆𑀟𑀧𑀸𑀢𑁄 𑀧𑀡𑀻𑀢𑀧𑀺𑀡𑁆𑀟𑀧𑀸𑀢𑁄𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀇𑀥 𑀧𑀦 𑀫𑀁𑀲𑀽𑀧𑀲𑁂𑀘𑀦𑁄𑀯 𑀅𑀥𑀺𑀧𑁆𑀧𑁂𑀢𑁄. 𑀅𑀕𑀣𑀺𑀢𑁄𑀢𑀺 𑀢𑀡𑁆𑀳𑀸𑀬 𑀅𑀕𑀣𑀺𑀢𑁄. 𑀅𑀫𑀼𑀘𑁆𑀙𑀺𑀢𑁄𑀢𑀺 𑀢𑀡𑁆𑀳𑀸𑀫𑀼𑀘𑁆𑀙𑀦𑀸𑀬 𑀅𑀫𑀼𑀘𑁆𑀙𑀺𑀢𑁄. 𑀅𑀦𑀚𑁆𑀛𑁄𑀧𑀦𑁆𑀦𑁄𑀢𑀺 𑀦 𑀅𑀥𑀺𑀑𑀧𑀦𑁆𑀦𑁄, 𑀲𑀩𑁆𑀩𑀁 𑀆𑀮𑀼𑀫𑁆𑀧𑀺𑀢𑁆𑀯𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀕𑀺𑀮𑀺𑀢𑀼𑀓𑀸𑀫𑁄 𑀓𑀸𑀓𑁄 𑀯𑀺𑀬 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀆𑀤𑀻𑀦𑀯𑀤𑀲𑁆𑀲𑀸𑀯𑀻𑀢𑀺 𑀏𑀓𑀭𑀢𑁆𑀢𑀺𑀯𑀸𑀲𑁂𑀦 𑀉𑀤𑀭𑀧𑀝𑀮𑀁 𑀧𑀯𑀺𑀲𑀺𑀢𑁆𑀯𑀸 𑀦𑀯𑀳𑀺 𑀯𑀡𑀫𑀼𑀔𑁂𑀳𑀺 𑀦𑀺𑀓𑁆𑀔𑀫𑀺𑀲𑁆𑀲𑀢𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀤𑀻𑀦𑀯𑀁 𑀧𑀲𑁆𑀲𑀦𑁆𑀢𑁄. 𑀦𑀺𑀲𑁆𑀲𑀭𑀡𑀧𑀜𑁆𑀜𑁄 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀇𑀤𑀫𑀢𑁆𑀣𑀫𑀸𑀳𑀸𑀭𑀧𑀭𑀺𑀪𑁄𑀕𑁄𑀢𑀺 𑀧𑀜𑁆𑀜𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺. 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬 𑀯𑀸 𑀘𑁂𑀢𑁂𑀢𑀻𑀢𑀺 𑀅𑀢𑁆𑀢𑀤𑀼𑀓𑁆𑀔𑀸𑀬 𑀯𑀸 𑀘𑀺𑀢𑁂𑀢𑀺. 𑀲𑀼𑀢𑀫𑁂𑀢𑀦𑁆𑀢𑀺 𑀲𑀼𑀢𑀁 𑀫𑀬𑀸 𑀏𑀢𑀁 𑀧𑀼𑀩𑁆𑀩𑁂, 𑀏𑀢𑀁 𑀫𑀬𑁆𑀳𑀁 𑀲𑀯𑀦𑀫𑀢𑁆𑀢𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀲𑀘𑁂 𑀔𑁄 𑀢𑁂, 𑀚𑀻𑀯𑀓, 𑀇𑀤𑀁 𑀲𑀦𑁆𑀥𑀸𑀬 𑀪𑀸𑀲𑀺𑀢𑀦𑁆𑀢𑀺, 𑀚𑀻𑀯𑀓, 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑁂𑀦 𑀩𑁆𑀬𑀸𑀧𑀸𑀤𑀸𑀤𑀬𑁄 𑀧𑀳𑀻𑀦𑀸, 𑀢𑁂𑀦 𑀲𑁄 𑀫𑁂𑀢𑁆𑀢𑀸𑀯𑀺𑀳𑀸𑀭𑀻 𑀫𑀬𑁆𑀳𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂𑀦, 𑀲𑀘𑁂 𑀢𑁂 𑀇𑀤𑀁 𑀲𑀦𑁆𑀥𑀸𑀬 𑀪𑀸𑀲𑀺𑀢𑀁, 𑀏𑀯𑀁 𑀲𑀦𑁆𑀢𑁂 𑀢𑀯 𑀇𑀤𑀁 𑀯𑀘𑀦𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀲𑁄 𑀲𑀫𑁆𑀧𑀝𑀺𑀘𑁆𑀙𑀺.

𑁫𑁪. 𑀅𑀣𑀲𑁆𑀲 𑀪𑀕𑀯𑀸 𑀲𑁂𑀲𑀩𑁆𑀭𑀳𑁆𑀫𑀯𑀺𑀳𑀸𑀭𑀯𑀲𑁂𑀦𑀸𑀧𑀺 𑀉𑀢𑁆𑀢𑀭𑀺 𑀤𑁂𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 ‘‘𑀇𑀥, 𑀚𑀻𑀯𑀓, 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀫𑀸𑀳. 𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁫𑁫. 𑀬𑁄 ¶ 𑀔𑁄 𑀚𑀻𑀯𑀓𑀸𑀢𑀺 𑀅𑀬𑀁 𑀧𑀸𑀝𑀺𑀏𑀓𑁆𑀓𑁄 𑀅𑀦𑀼𑀲𑀦𑁆𑀥𑀺. 𑀇𑀫𑀲𑁆𑀫𑀺𑀜𑁆𑀳𑀺 𑀞𑀸𑀦𑁂 𑀪𑀕𑀯𑀸 𑀤𑁆𑀯𑀸𑀭𑀁 𑀣𑀓𑁂𑀢𑀺, 𑀲𑀢𑁆𑀢𑀸𑀦𑀼𑀤𑁆𑀤𑀬𑀁 𑀤𑀲𑁆𑀲𑁂𑀢𑀺. 𑀲𑀘𑁂 𑀳𑀺 𑀓𑀲𑁆𑀲𑀘𑀺 𑀏𑀯𑀫𑀲𑁆𑀲 ‘‘𑀏𑀓𑀁 𑀭𑀲𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 ¶ 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀁 𑀧𑀝𑀺𑀮𑀪𑀦𑁆𑀢𑀺, 𑀬𑀁𑀓𑀺𑀜𑁆𑀘𑀺 𑀓𑀢𑁆𑀯𑀸 𑀧𑀭𑀁 𑀫𑀸𑀭𑁂𑀢𑁆𑀯𑀸𑀧𑀺 𑀭𑀲𑀧𑀺𑀡𑁆𑀟𑀧𑀸𑀢𑁄𑀯 𑀤𑀸𑀢𑀩𑁆𑀩𑁄’’𑀢𑀺, 𑀢𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 ‘‘𑀬𑁄 𑀔𑁄, 𑀚𑀻𑀯𑀓, 𑀢𑀣𑀸𑀕𑀢𑀁 𑀯𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 ¶ 𑀇𑀫𑀺𑀦𑀸 𑀧𑀞𑀫𑁂𑀦 𑀞𑀸𑀦𑁂𑀦𑀸𑀢𑀺 𑀇𑀫𑀺𑀦𑀸 𑀆𑀡𑀢𑁆𑀢𑀺𑀫𑀢𑁆𑀢𑁂𑀦𑁂𑀯 𑀢𑀸𑀯 𑀧𑀞𑀫𑁂𑀦 𑀓𑀸𑀭𑀡𑁂𑀦. 𑀕𑀮𑀧𑁆𑀧𑀯𑁂𑀥𑀓𑁂𑀦𑀸𑀢𑀺 𑀬𑁄𑀢𑁆𑀢𑁂𑀦 𑀕𑀮𑁂 𑀩𑀦𑁆𑀥𑀺𑀢𑁆𑀯𑀸 𑀓𑀟𑁆𑀠𑀺𑀢𑁄 𑀕𑀮𑁂𑀦 𑀧𑀯𑁂𑀥𑁂𑀦𑁆𑀢𑁂𑀦. 𑀆𑀭𑀪𑀺𑀬𑀫𑀸𑀦𑁄𑀢𑀺 𑀫𑀸𑀭𑀺𑀬𑀫𑀸𑀦𑁄. 𑀅𑀓𑀧𑁆𑀧𑀺𑀬𑁂𑀦 𑀆𑀲𑀸𑀤𑁂𑀢𑀻𑀢𑀺 𑀅𑀘𑁆𑀙𑀫𑀁𑀲𑀁 𑀲𑀽𑀓𑀭𑀫𑀁𑀲𑀦𑁆𑀢𑀺, 𑀤𑀻𑀧𑀺𑀫𑀁𑀲𑀁 𑀯𑀸 𑀫𑀺𑀕𑀫𑀁𑀲𑀦𑁆𑀢𑀺 𑀔𑀸𑀤𑀸𑀧𑁂𑀢𑁆𑀯𑀸 𑁋 ‘‘𑀢𑁆𑀯𑀁 𑀓𑀺𑀁 𑀲𑀫𑀡𑁄 𑀦𑀸𑀫, 𑀅𑀓𑀧𑁆𑀧𑀺𑀬𑀫𑀁𑀲𑀁 𑀢𑁂 𑀔𑀸𑀤𑀺𑀢’’𑀦𑁆𑀢𑀺 𑀖𑀝𑁆𑀝𑁂𑀢𑀺. 𑀬𑁂 𑀧𑀦 𑀤𑀼𑀩𑁆𑀪𑀺𑀓𑁆𑀔𑀸𑀤𑀻𑀲𑀼 𑀯𑀸 𑀩𑁆𑀬𑀸𑀥𑀺𑀦𑀺𑀕𑁆𑀕𑀳𑀡𑀢𑁆𑀣𑀁 𑀯𑀸 ‘‘𑀅𑀘𑁆𑀙𑀫𑀁𑀲𑀁 𑀦𑀸𑀫 𑀲𑀽𑀓𑀭𑀫𑀁𑀲𑀲𑀤𑀺𑀲𑀁, 𑀤𑀻𑀧𑀺𑀫𑀁𑀲𑀁 𑀫𑀺𑀕𑀫𑀁𑀲𑀲𑀤𑀺𑀲’’𑀦𑁆𑀢𑀺 𑀚𑀸𑀦𑀦𑁆𑀢𑀸 ‘‘𑀲𑀽𑀓𑀭𑀫𑀁𑀲𑀁 𑀇𑀤𑀁, 𑀫𑀺𑀕𑀫𑀁𑀲𑀁 𑀇𑀤’’𑀦𑁆𑀢𑀺 𑀯𑀢𑁆𑀯𑀸 𑀳𑀺𑀢𑀚𑁆𑀛𑀸𑀲𑀬𑁂𑀦 𑀔𑀸𑀤𑀸𑀧𑁂𑀦𑁆𑀢𑀺, 𑀦 𑀢𑁂 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀢𑁂𑀲𑀜𑁆𑀳𑀺 𑀩𑀳𑀼𑀧𑀼𑀜𑁆𑀜𑀫𑁂𑀯 𑀳𑁄𑀢𑀺. 𑀏𑀲𑀸𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘𑀸𑀢𑀺 𑀅𑀬𑀁 𑀆𑀕𑀢𑀨𑀮𑁄 𑀯𑀺𑀜𑁆𑀜𑀸𑀢𑀲𑀸𑀲𑀦𑁄 𑀤𑀺𑀝𑁆𑀞𑀲𑀘𑁆𑀘𑁄 𑀅𑀭𑀺𑀬𑀲𑀸𑀯𑀓𑁄. 𑀇𑀫𑀁 𑀧𑀦 𑀥𑀫𑁆𑀫𑀤𑁂𑀲𑀦𑀁 𑀑𑀕𑀸𑀳𑀦𑁆𑀢𑁄 𑀧𑀲𑀸𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀥𑀫𑁆𑀫𑀓𑀣𑀸𑀬 𑀣𑀼𑀢𑀺𑀁 𑀓𑀭𑁄𑀦𑁆𑀢𑁄 𑀏𑀯𑀫𑀸𑀳. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀚𑀻𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀉𑀧𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁬. 𑀏𑀯𑀁 ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀉𑀧𑀸𑀮𑀺𑀲𑀼𑀢𑁆𑀢𑀁. 𑀢𑀢𑁆𑀣 𑀦𑀸𑀴𑀦𑁆𑀤𑀸𑀬𑀦𑁆𑀢𑀺 𑀦𑀸𑀮𑀦𑁆𑀤𑀸𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂 𑀢𑀁 𑀦𑀕𑀭𑀁 𑀕𑁄𑀘𑀭𑀕𑀸𑀫𑀁 𑀓𑀢𑁆𑀯𑀸. 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑁂𑀢𑀺 𑀤𑀼𑀲𑁆𑀲𑀧𑀸𑀯𑀸𑀭𑀺𑀓𑀲𑁂𑀝𑁆𑀞𑀺𑀦𑁄 𑀅𑀫𑁆𑀩𑀯𑀦𑁂. 𑀢𑀁 𑀓𑀺𑀭 𑀢𑀲𑁆𑀲 𑀉𑀬𑁆𑀬𑀸𑀦𑀁 𑀅𑀳𑁄𑀲𑀺, 𑀲𑁄 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀪𑀕𑀯𑀢𑀺 𑀧𑀲𑀦𑁆𑀦𑁄 𑀢𑀲𑁆𑀫𑀺𑀁 𑀉𑀬𑁆𑀬𑀸𑀦𑁂 𑀓𑀼𑀝𑀺𑀮𑁂𑀡𑀫𑀡𑁆𑀟𑀧𑀸𑀤𑀺𑀧𑀝𑀺𑀫𑀡𑁆𑀟𑀺𑀢𑀁 𑀪𑀕𑀯𑀢𑁄 𑀯𑀺𑀳𑀸𑀭𑀁 𑀓𑀢𑁆𑀯𑀸 𑀦𑀺𑀬𑁆𑀬𑀸𑀤𑁂𑀲𑀺, 𑀲𑁄 𑀯𑀺𑀳𑀸𑀭𑁄 𑀚𑀻𑀯𑀓𑀫𑁆𑀩𑀯𑀦𑀁 𑀯𑀺𑀬 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑀦𑁆𑀢𑁂𑀯 𑀲𑀗𑁆𑀔𑀁 𑀕𑀢𑁄. 𑀢𑀲𑁆𑀫𑀺𑀁 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑁂 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀤𑀻𑀖𑀢𑀧𑀲𑁆𑀲𑀻𑀢𑀺 𑀤𑀻𑀖𑀢𑁆𑀢𑀸 𑀏𑀯𑀁𑀮𑀤𑁆𑀥𑀦𑀸𑀫𑁄. 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄𑀢𑀺 𑀧𑀺𑀡𑁆𑀟𑀧𑀸𑀢𑀢𑁄 𑀧𑀝𑀺𑀓𑁆𑀓𑀦𑁆𑀢𑁄. 𑀲𑀸𑀲𑀦𑁂 𑀯𑀺𑀬 𑀓𑀺𑀁 𑀧𑀦 𑀩𑀸𑀳𑀺𑀭𑀸𑀬𑀢𑀦𑁂 𑀧𑀺𑀡𑁆𑀟𑀧𑀸𑀢𑁄𑀢𑀺 𑀯𑁄𑀳𑀸𑀭𑁄 𑀅𑀢𑁆𑀣𑀻𑀢𑀺, 𑀦𑀢𑁆𑀣𑀺.

𑀧𑀜𑁆𑀜𑀧𑁂𑀢𑀻𑀢𑀺 𑀤𑀲𑁆𑀲𑁂𑀢𑀺 𑀞𑀧𑁂𑀢𑀺. 𑀤𑀡𑁆𑀟𑀸𑀦𑀺 𑀧𑀜𑁆𑀜𑀧𑁂𑀢𑀻𑀢𑀺 𑀇𑀤𑀁 𑀦𑀺𑀕𑀡𑁆𑀞𑀲𑀫𑀬𑁂𑀦 𑀧𑀼𑀘𑁆𑀙𑀦𑁆𑀢𑁄 𑀆𑀳. 𑀓𑀸𑀬𑀤𑀡𑁆𑀟𑀁 𑀯𑀘𑀻𑀤𑀡𑁆𑀟𑀁 𑀫𑀦𑁄𑀤𑀡𑁆𑀟𑀦𑁆𑀢𑀺 𑀏𑀢𑁆𑀣 𑀧𑀼𑀭𑀺𑀫𑀤𑀡𑁆𑀟𑀤𑁆𑀯𑀬𑀁 𑀢𑁂 𑀅𑀘𑀺𑀢𑁆𑀢𑀓𑀁 𑀧𑀬𑁆𑀬𑀧𑁂𑀦𑁆𑀢𑀺. 𑀬𑀣𑀸 𑀓𑀺𑀭 𑀯𑀸𑀢𑁂 𑀯𑀸𑀬𑀦𑁆𑀢𑁂 𑀲𑀸𑀔𑀸 𑀘𑀮𑀢𑀺, 𑀉𑀤𑀓𑀁 ¶ 𑀘𑀮𑀢𑀺, 𑀦 𑀘 𑀢𑀢𑁆𑀣 𑀘𑀺𑀢𑁆𑀢𑀁 𑀅𑀢𑁆𑀣𑀺, 𑀏𑀯𑀁 𑀓𑀸𑀬𑀤𑀡𑁆𑀟𑁄𑀧𑀺 𑀅𑀘𑀺𑀢𑁆𑀢𑀓𑁄𑀯 𑀳𑁄𑀢𑀺. 𑀬𑀣𑀸 𑀘 𑀯𑀸𑀢𑁂 𑀯𑀸𑀬𑀦𑁆𑀢𑁂 𑀢𑀸𑀮𑀧𑀡𑁆𑀡𑀸𑀤𑀻𑀦𑀺 𑀲𑀤𑁆𑀤𑀁 𑀓𑀭𑁄𑀦𑁆𑀢𑀺, 𑀉𑀤𑀓𑀸𑀦𑀺 𑀲𑀤𑁆𑀤𑀁 𑀓𑀭𑁄𑀦𑁆𑀢𑀺 ¶ , 𑀦 𑀘 𑀢𑀢𑁆𑀣 𑀘𑀺𑀢𑁆𑀢𑀁 𑀅𑀢𑁆𑀣𑀺, 𑀏𑀯𑀁 𑀯𑀘𑀻𑀤𑀡𑁆𑀟𑁄𑀧𑀺 𑀅𑀘𑀺𑀢𑁆𑀢𑀓𑁄𑀯 𑀳𑁄𑀢𑀻𑀢𑀺 𑀇𑀫𑀁 𑀤𑀡𑁆𑀟𑀤𑁆𑀯𑀬𑀁 𑀅𑀘𑀺𑀢𑁆𑀢𑀓𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀘𑀺𑀢𑁆𑀢𑀁 𑀧𑀦 𑀫𑀦𑁄𑀤𑀡𑁆𑀟𑀦𑁆𑀢𑀺 𑀧𑀜𑁆𑀜𑀧𑁂𑀦𑁆𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀯𑀘𑀦𑀁 𑀧𑀢𑀺𑀝𑁆𑀞𑀧𑁂𑀢𑀼𑀓𑀸𑀫𑁄 ‘‘𑀓𑀺𑀁 𑀧𑀦 𑀢𑀧𑀲𑁆𑀲𑀻’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀓𑀣𑀸𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀏𑀢𑁆𑀣 𑀓𑀣𑀸𑀬𑁂𑀯 𑀓𑀣𑀸𑀯𑀢𑁆𑀣𑀼. 𑀓𑀣𑀸𑀬𑀁 𑀧𑀢𑀺𑀝𑁆𑀞𑀧𑁂𑀲𑀻𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀏𑀯𑀫𑀓𑀸𑀲𑀺? 𑀧𑀲𑁆𑀲𑀢𑀺 𑀳𑀺 𑀪𑀕𑀯𑀸 ‘‘𑀅𑀬𑀁 𑀇𑀫𑀁 𑀓𑀣𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀲𑀢𑁆𑀣𑀼 𑀫𑀳𑀸𑀦𑀺𑀕𑀡𑁆𑀞𑀲𑁆𑀲 𑀆𑀭𑁄𑀘𑁂𑀲𑁆𑀲𑀢𑀺, 𑀢𑀸𑀲𑀜𑁆𑀘 𑀧𑀭𑀺𑀲𑀢𑀺, 𑀉𑀧𑀸𑀮𑀺 𑀕𑀳𑀧𑀢𑀺 𑀦𑀺𑀲𑀺𑀦𑁆𑀦𑁄, 𑀲𑁄 𑀇𑀫𑀁 𑀓𑀣𑀁 𑀲𑀼𑀢𑁆𑀯𑀸 𑀫𑀫 𑀯𑀸𑀤𑀁 𑀆𑀭𑁄𑀧𑁂𑀢𑀼𑀁 𑀆𑀕𑀫𑀺𑀲𑁆𑀲𑀢𑀺, 𑀢𑀲𑁆𑀲𑀸𑀳𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀲𑁄 𑀢𑀺𑀓𑁆𑀔𑀢𑁆𑀢𑀼𑀁 𑀲𑀭𑀡𑀁 𑀕𑀫𑀺𑀲𑁆𑀲𑀢𑀺, 𑀅𑀣𑀲𑁆𑀲 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑁆𑀲𑀸𑀫𑀺, 𑀲𑁄 𑀲𑀘𑁆𑀘𑀧𑀓𑀸𑀲𑀦𑀸𑀯𑀲𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀺, 𑀧𑀭𑁂𑀲𑀁 𑀲𑀗𑁆𑀕𑀳𑀢𑁆𑀣𑀫𑁂𑀯 𑀳𑀺 𑀫𑀬𑀸 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸’’𑀢𑀺. 𑀇𑀫𑀫𑀢𑁆𑀣𑀁 𑀧𑀲𑁆𑀲𑀦𑁆𑀢𑁄 𑀏𑀯𑀫𑀓𑀸𑀲𑀺.

𑁫𑁭. 𑀓𑀫𑁆𑀫𑀸𑀦𑀺 ¶ 𑀧𑀜𑁆𑀜𑀧𑁂𑀲𑀻𑀢𑀺 𑀇𑀤𑀁 𑀦𑀺𑀕𑀡𑁆𑀞𑁄 𑀩𑀼𑀤𑁆𑀥𑀲𑀫𑀬𑁂𑀦 𑀧𑀼𑀘𑁆𑀙𑀦𑁆𑀢𑁄 𑀆𑀳. 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀫𑀦𑁄𑀓𑀫𑁆𑀫𑀦𑁆𑀢𑀺 𑀏𑀢𑁆𑀣 𑀓𑀸𑀬𑀤𑁆𑀯𑀸𑀭𑁂 𑀆𑀤𑀸𑀦𑀕𑀳𑀡𑀫𑀼𑀜𑁆𑀘𑀦𑀘𑁄𑀧𑀦𑀧𑀢𑁆𑀢𑀸 𑀅𑀝𑁆𑀞𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑁂𑀢𑀦𑀸𑀢𑀺 𑀯𑀻𑀲𑀢𑀺𑀘𑁂𑀢𑀦𑀸 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀓𑀸𑀬𑀤𑁆𑀯𑀸𑀭𑁂 𑀆𑀤𑀸𑀦𑀸𑀤𑀻𑀦𑀺 𑀅𑀧𑀢𑁆𑀯𑀸 𑀯𑀘𑀻𑀤𑁆𑀯𑀸𑀭𑁂 𑀯𑀘𑀦𑀪𑁂𑀤𑀁 𑀧𑀸𑀧𑀬𑀫𑀸𑀦𑀸 𑀉𑀧𑁆𑀧𑀦𑁆𑀦𑀸 𑀢𑀸𑀬𑁂𑀯 𑀯𑀻𑀲𑀢𑀺𑀘𑁂𑀢𑀦𑀸 𑀯𑀘𑀻𑀓𑀫𑁆𑀫𑀁 𑀦𑀸𑀫. 𑀉𑀪𑀬𑀤𑁆𑀯𑀸𑀭𑁂 𑀘𑁄𑀧𑀦𑀁 𑀅𑀧𑁆𑀧𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑁂 𑀉𑀧𑁆𑀧𑀦𑁆𑀦𑀸 𑀏𑀓𑀽𑀦𑀢𑀺𑀁𑀲𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀫𑀦𑁄𑀓𑀫𑁆𑀫𑀁 𑀦𑀸𑀫. 𑀅𑀧𑀺𑀘 𑀲𑀗𑁆𑀔𑁂𑀧𑀢𑁄 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀓𑀸𑀬𑀓𑀫𑁆𑀫𑀁 𑀦𑀸𑀫, 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀓𑀫𑁆𑀫𑀁 𑀦𑀸𑀫, 𑀢𑀺𑀯𑀺𑀥𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀫𑀦𑁄𑀓𑀫𑁆𑀫𑀁 𑀦𑀸𑀫. 𑀇𑀫𑀲𑁆𑀫𑀺𑀜𑁆𑀘 𑀲𑀼𑀢𑁆𑀢𑁂 𑀓𑀫𑁆𑀫𑀁 𑀥𑀼𑀭𑀁, 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 ¶ ‘‘𑀘𑀢𑁆𑀢𑀸𑀭𑀺𑀫𑀸𑀦𑀺 𑀧𑀼𑀡𑁆𑀡 𑀓𑀫𑁆𑀫𑀸𑀦𑀺 𑀫𑀬𑀸 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑀺𑀢𑀸𑀦𑀻’’𑀢𑀺 (𑀫. 𑀦𑀺. 𑁨.𑁮𑁧) 𑀏𑀯𑀫𑀸𑀕𑀢𑁂𑀧𑀺 𑀘𑁂𑀢𑀦𑀸 𑀥𑀼𑀭𑀁. 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀯𑀢𑁆𑀢𑀸 𑀘𑁂𑀢𑀦𑀸 ‘‘𑀓𑀡𑁆𑀳𑀁 𑀓𑀡𑁆𑀳𑀯𑀺𑀧𑀸𑀓’’𑀦𑁆𑀢𑀺𑀆𑀤𑀺𑀪𑁂𑀤𑀁 𑀮𑀪𑀢𑀺. 𑀦𑀺𑀤𑁆𑀤𑁂𑀲𑀯𑀸𑀭𑁂 𑀘𑀲𑁆𑀲 ‘‘𑀲𑀩𑁆𑀬𑀸𑀩𑀚𑁆𑀛𑀁 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀸 𑀯𑀼𑀢𑁆𑀢𑀸𑀯. 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀸 𑀧𑀦 𑀇𑀥 𑀓𑀸𑀬𑀓𑀫𑁆𑀫𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀯𑀘𑀻𑀤𑁆𑀯𑀸𑀭𑁂 ¶ 𑀧𑀯𑀢𑁆𑀢𑀸 𑀯𑀘𑀻𑀓𑀫𑁆𑀫𑀁, 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀸 𑀫𑀦𑁄𑀓𑀫𑁆𑀫𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀓𑀫𑁆𑀫𑀁 𑀥𑀼𑀭𑀁, 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀘𑁂𑀢𑀦𑀸’’𑀢𑀺. 𑀓𑀫𑁆𑀫𑀫𑁆𑀧𑀺 𑀳𑀺 𑀪𑀕𑀯𑀸 𑀓𑀫𑁆𑀫𑀦𑁆𑀢𑀺 𑀧𑀜𑁆𑀜𑀧𑁂𑀢𑀺 𑀬𑀣𑀸 𑀇𑀫𑀲𑁆𑀫𑀺𑀁𑀬𑁂𑀯 𑀲𑀼𑀢𑁆𑀢𑁂. 𑀘𑁂𑀢𑀦𑀫𑁆𑀧𑀺, 𑀬𑀣𑀸𑀳 𑁋 ‘‘𑀘𑁂𑀢𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀯𑀤𑀸𑀫𑀺, 𑀘𑁂𑀢𑀬𑀺𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀢𑀻’’𑀢𑀺 (𑀅. 𑀦𑀺. 𑁬.𑁬𑁩). 𑀓𑀲𑁆𑀫𑀸 𑀧𑀦 𑀘𑁂𑀢𑀦𑀸 𑀓𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀸? 𑀘𑁂𑀢𑀦𑀸𑀫𑀽𑀮𑀓𑀢𑁆𑀢𑀸 𑀓𑀫𑁆𑀫𑀲𑁆𑀲.

𑀏𑀢𑁆𑀣 𑀘 𑀅𑀓𑀼𑀲𑀮𑀁 𑀧𑀢𑁆𑀯𑀸 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀫𑀳𑀦𑁆𑀢𑀦𑁆𑀢𑀺 𑀯𑀤𑀦𑁆𑀢𑁄 𑀦 𑀓𑀺𑀮𑀫𑀢𑀺, 𑀓𑀼𑀲𑀮𑀁 𑀧𑀢𑁆𑀯𑀸 𑀫𑀦𑁄𑀓𑀫𑁆𑀫𑀁. 𑀢𑀣𑀸 𑀳𑀺 𑀫𑀸𑀢𑀼𑀖𑀸𑀢𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀓𑀸𑀬𑁂𑀦𑁂𑀯 𑀉𑀧𑀓𑁆𑀓𑀫𑀺𑀢𑁆𑀯𑀸 𑀓𑀸𑀬𑁂𑀦𑁂𑀯 𑀓𑀭𑁄𑀢𑀺, 𑀦𑀺𑀭𑀬𑁂 𑀓𑀧𑁆𑀧𑀝𑁆𑀞𑀺𑀓𑀲𑀗𑁆𑀖𑀪𑁂𑀤𑀓𑀫𑁆𑀫𑀁 𑀯𑀘𑀻𑀤𑁆𑀯𑀸𑀭𑁂𑀦 𑀓𑀭𑁄𑀢𑀺. 𑀏𑀯𑀁 𑀅𑀓𑀼𑀲𑀮𑀁 𑀧𑀢𑁆𑀯𑀸 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀫𑀳𑀦𑁆𑀢𑀦𑁆𑀢𑀺 𑀯𑀤𑀦𑁆𑀢𑁄 𑀦 𑀓𑀺𑀮𑀫𑀢𑀺 𑀦𑀸𑀫. 𑀏𑀓𑀸 𑀧𑀦 𑀛𑀸𑀦𑀘𑁂𑀢𑀦𑀸 𑀘𑀢𑀼𑀭𑀸𑀲𑀻𑀢𑀺𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀁 𑀆𑀯𑀳𑀢𑀺, 𑀏𑀓𑀸 𑀫𑀕𑁆𑀕𑀘𑁂𑀢𑀦𑀸 𑀲𑀩𑁆𑀩𑀸𑀓𑀼𑀲𑀮𑀁 𑀲𑀫𑀼𑀕𑁆𑀖𑀸𑀢𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀧𑁂𑀢𑀺. 𑀏𑀯𑀁 𑀓𑀼𑀲𑀮𑀁 𑀧𑀢𑁆𑀯𑀸 𑀫𑀦𑁄𑀓𑀫𑁆𑀫𑀁 𑀫𑀳𑀦𑁆𑀢𑀦𑁆𑀢𑀺 𑀯𑀤𑀦𑁆𑀢𑁄 𑀦 𑀓𑀺𑀮𑀫𑀢𑀺 𑀦𑀸𑀫. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀪𑀕𑀯𑀸 𑀅𑀓𑀼𑀲𑀮𑀁 𑀧𑀢𑁆𑀯𑀸 𑀫𑀦𑁄𑀓𑀫𑁆𑀫𑀁 𑀫𑀳𑀸𑀲𑀸𑀯𑀚𑁆𑀚𑀁 𑀯𑀤𑀫𑀸𑀦𑁄 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀫𑀳𑀸𑀲𑀸𑀯𑀚𑁆𑀚𑀁, 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀸𑀯𑀚𑁆𑀚𑀸𑀦𑀻’’𑀢𑀺 (𑀅. 𑀦𑀺. 𑁧.𑁩𑁧𑁦).

𑀇𑀤𑀸𑀦𑀺 ¶ 𑀦𑀺𑀕𑀡𑁆𑀞𑁄𑀧𑀺 𑀢𑀣𑀸𑀕𑀢𑁂𑀦 𑀕𑀢𑀫𑀕𑁆𑀕𑀁 ¶ 𑀧𑀝𑀺𑀧𑀚𑁆𑀚𑀦𑁆𑀢𑁄 𑀓𑀺𑀜𑁆𑀘𑀺 𑀅𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀁 𑀅𑀧𑀲𑁆𑀲𑀦𑁆𑀢𑁄𑀧𑀺 ‘‘𑀓𑀺𑀁 𑀧𑀦𑀸𑀯𑀼𑀲𑁄, 𑀕𑁄𑀢𑀫𑀸’’𑀢𑀺𑀆𑀤𑀺𑀫𑀸𑀳.

𑁫𑁮. 𑀩𑀸𑀮𑀓𑀺𑀦𑀺𑀬𑀸𑀢𑀺 𑀉𑀧𑀸𑀮𑀺𑀲𑁆𑀲 𑀓𑀺𑀭 𑀩𑀸𑀮𑀓𑀮𑁄𑀡𑀓𑀸𑀭𑀕𑀸𑀫𑁄 𑀦𑀸𑀫 𑀅𑀢𑁆𑀣𑀺, 𑀢𑀢𑁄 𑀆𑀬𑀁 𑀕𑀳𑁂𑀢𑁆𑀯𑀸 𑀫𑀦𑀼𑀲𑁆𑀲𑀸 𑀆𑀕𑀢𑀸, 𑀲𑁄 ‘‘𑀏𑀣 𑀪𑀡𑁂, 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸𑀭𑀁 𑀫𑀳𑀸𑀦𑀺𑀕𑀡𑁆𑀞𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀢𑀸𑀬 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀢𑀢𑁆𑀣 𑀅𑀕𑀫𑀸𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀩𑀸𑀮𑀓𑀺𑀦𑀺𑀬𑀸 𑀧𑀭𑀺𑀲𑀸𑀬𑀸’’𑀢𑀺, 𑀩𑀸𑀮𑀓𑀕𑀸𑀫𑀯𑀸𑀲𑀺𑀦𑀺𑀬𑀸𑀢𑀺 𑀅𑀢𑁆𑀣𑁄. 𑀉𑀧𑀸𑀮𑀺𑀧𑀫𑀼𑀔𑀸𑀬𑀸𑀢𑀺 𑀉𑀧𑀸𑀮𑀺𑀚𑁂𑀝𑁆𑀞𑀓𑀸𑀬. 𑀅𑀧𑀺𑀘 𑀩𑀸𑀮𑀓𑀺𑀦𑀺𑀬𑀸𑀢𑀺 𑀩𑀸𑀮𑀯𑀢𑀺𑀬𑀸 𑀩𑀸𑀮𑀼𑀲𑁆𑀲𑀦𑁆𑀦𑀸𑀬𑀸𑀢𑀺𑀧𑀺 𑀅𑀢𑁆𑀣𑁄. 𑀉𑀧𑀸𑀮𑀺𑀧𑀫𑀼𑀔𑀸𑀬𑀸𑀢𑀺 𑀉𑀧𑀸𑀮𑀺𑀕𑀳𑀧𑀢𑀺𑀬𑁂𑀯 𑀢𑀢𑁆𑀣 𑀣𑁄𑀓𑀁 𑀲𑀧𑁆𑀧𑀜𑁆𑀜𑁄, 𑀲𑁄 𑀢𑀲𑁆𑀲𑀸 𑀧𑀫𑀼𑀔𑁄 𑀚𑁂𑀝𑁆𑀞𑀓𑁄. 𑀢𑁂𑀦𑀸𑀧𑀺 𑀯𑀼𑀢𑁆𑀢𑀁 ‘‘𑀉𑀧𑀸𑀮𑀺𑀧𑀫𑀼𑀔𑀸𑀬𑀸’’𑀢𑀺. 𑀳𑀦𑁆𑀤𑀸𑀢𑀺 𑀯𑀘𑀲𑀸𑀬𑀢𑁆𑀣𑁂 𑀦𑀺𑀧𑀸𑀢𑁄. 𑀙𑀯𑁄𑀢𑀺 𑀮𑀸𑀫𑀓𑁄. 𑀑𑀴𑀸𑀭𑀺𑀓𑀲𑁆𑀲𑀸𑀢𑀺 𑀫𑀳𑀦𑁆𑀢𑀲𑁆𑀲 ¶ . 𑀉𑀧𑀦𑀺𑀥𑀸𑀬𑀸𑀢𑀺 𑀉𑀧𑀦𑀺𑀓𑁆𑀔𑀺𑀧𑀺𑀢𑁆𑀯𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺, 𑀓𑀸𑀬𑀤𑀡𑁆𑀟𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀬𑀁 𑀦𑀼 𑀔𑁄 𑀫𑀳𑀦𑁆𑀢𑁄, 𑀅𑀬𑀁 𑀫𑀳𑀦𑁆𑀢𑁄’’𑀢𑀺 𑀏𑀯𑀁 𑀑𑀮𑁄𑀓𑀺𑀬𑀫𑀸𑀦𑁄 𑀙𑀯𑁄 𑀫𑀦𑁄𑀤𑀡𑁆𑀟𑁄 𑀓𑀺𑀁 𑀲𑁄𑀪𑀢𑀺, 𑀓𑀼𑀢𑁄 𑀲𑁄𑀪𑀺𑀲𑁆𑀲𑀢𑀺, 𑀦 𑀲𑁄𑀪𑀢𑀺, 𑀉𑀧𑀦𑀺𑀓𑁆𑀔𑁂𑀧𑀫𑀢𑁆𑀢𑀫𑁆𑀧𑀺 𑀦𑀧𑁆𑀧𑀳𑁄𑀢𑀻𑀢𑀺 𑀤𑀻𑀧𑁂𑀢𑀺. 𑀲𑀸𑀥𑀼 𑀲𑀸𑀥𑀼, 𑀪𑀦𑁆𑀢𑁂, 𑀢𑀧𑀲𑁆𑀲𑀻𑀢𑀺 𑀤𑀻𑀖𑀢𑀧𑀲𑁆𑀲𑀺𑀲𑁆𑀲 𑀲𑀸𑀥𑀼𑀓𑀸𑀭𑀁 𑀤𑁂𑀦𑁆𑀢𑁄, 𑀪𑀦𑁆𑀢𑁂𑀢𑀺 𑀦𑀸𑀝𑀧𑀼𑀢𑁆𑀢𑀫𑀸𑀮𑀧𑀢𑀺.

𑁬𑁦. 𑀦 ¶ 𑀔𑁄 𑀫𑁂𑀢𑀁, 𑀪𑀦𑁆𑀢𑁂, 𑀭𑀼𑀘𑁆𑀘𑀢𑀻𑀢𑀺, 𑀪𑀦𑁆𑀢𑁂, 𑀏𑀢𑀁 𑀫𑀬𑁆𑀳𑀁 𑀦 𑀭𑀼𑀘𑁆𑀘𑀢𑀺. 𑀫𑀸𑀬𑀸𑀯𑀻𑀢𑀺 𑀫𑀸𑀬𑀸𑀓𑀸𑀭𑁄. 𑀆𑀯𑀝𑁆𑀝𑀦𑀺𑀫𑀸𑀬𑀦𑁆𑀢𑀺 𑀆𑀯𑀝𑁆𑀝𑁂𑀢𑁆𑀯𑀸 𑀕𑀳𑀡𑀫𑀸𑀬𑀁. 𑀆𑀯𑀝𑁆𑀝𑁂𑀢𑀻𑀢𑀺 𑀆𑀯𑀝𑁆𑀝𑁂𑀢𑁆𑀯𑀸 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀕𑀘𑁆𑀙 𑀢𑁆𑀯𑀁 𑀕𑀳𑀧𑀢𑀻𑀢𑀺 𑀓𑀲𑁆𑀫𑀸 𑀫𑀳𑀸𑀦𑀺𑀕𑀡𑁆𑀞𑁄 𑀕𑀳𑀧𑀢𑀺𑀁 𑀬𑀸𑀯𑀢𑀢𑀺𑀬𑀁 𑀧𑀳𑀺𑀡𑀢𑀺𑀬𑁂𑀯? 𑀤𑀻𑀖𑀢𑀧𑀲𑁆𑀲𑀻 𑀧𑀦 𑀧𑀝𑀺𑀩𑀸𑀳𑀢𑁂𑀯? 𑀫𑀳𑀸𑀦𑀺𑀕𑀡𑁆𑀞𑁂𑀦 𑀳𑀺 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀏𑀓𑀁 𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁂𑀦𑀧𑀺 𑀦 𑀪𑀕𑀯𑀸 𑀤𑀺𑀝𑁆𑀞𑀧𑀼𑀩𑁆𑀩𑁄. 𑀬𑁄 𑀳𑀺 𑀲𑀢𑁆𑀣𑀼𑀯𑀸𑀤𑀧𑀝𑀺𑀜𑁆𑀜𑁄 𑀳𑁄𑀢𑀺, 𑀲𑁄 𑀢𑀁 𑀧𑀝𑀺𑀜𑁆𑀜𑀁 𑀅𑀧𑁆𑀧𑀳𑀸𑀬 𑀩𑀼𑀤𑁆𑀥𑀤𑀲𑁆𑀲𑀦𑁂 𑀅𑀪𑀩𑁆𑀩𑁄. 𑀢𑀲𑁆𑀫𑀸 𑀏𑀲 𑀩𑀼𑀤𑁆𑀥𑀤𑀲𑁆𑀲𑀦𑀲𑁆𑀲 𑀅𑀮𑀤𑁆𑀥𑀧𑀼𑀩𑁆𑀩𑀢𑁆𑀢𑀸 𑀤𑀲𑀩𑀮𑀲𑁆𑀲 𑀤𑀲𑁆𑀲𑀦𑀲𑀫𑁆𑀧𑀢𑁆𑀢𑀺𑀜𑁆𑀘 𑀦𑀺𑀬𑁆𑀬𑀸𑀦𑀺𑀓𑀓𑀣𑀸𑀪𑀸𑀯𑀜𑁆𑀘 𑀅𑀚𑀸𑀦𑀦𑁆𑀢𑁄 𑀬𑀸𑀯𑀢𑀢𑀺𑀬𑀁 𑀧𑀳𑀺𑀡𑀢𑁂𑀯. 𑀤𑀻𑀖𑀢𑀧𑀲𑁆𑀲𑀻 𑀧𑀦 𑀓𑀸𑀮𑁂𑀦 𑀓𑀸𑀮𑀁 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀺𑀝𑁆𑀞𑀢𑀺𑀧𑀺 𑀦𑀺𑀲𑀻𑀤𑀢𑀺𑀧𑀺 𑀧𑀜𑁆𑀳𑀫𑁆𑀧𑀺 𑀧𑀼𑀘𑁆𑀙𑀢𑀺, 𑀲𑁄 𑀢𑀣𑀸𑀕𑀢𑀲𑁆𑀲 𑀤𑀲𑁆𑀲𑀦𑀲𑀫𑁆𑀧𑀢𑁆𑀢𑀺𑀫𑁆𑀧𑀺 𑀦𑀺𑀬𑁆𑀬𑀸𑀦𑀺𑀓𑀓𑀣𑀸𑀪𑀸𑀯𑀫𑁆𑀧𑀺 𑀚𑀸𑀦𑀸𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀬𑀁 𑀕𑀳𑀧𑀢𑀺 𑀧𑀡𑁆𑀟𑀺𑀢𑁄, 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑁂 𑀕𑀦𑁆𑀢𑁆𑀯𑀸 𑀤𑀲𑁆𑀲𑀦𑁂𑀧𑀺 𑀧𑀲𑀻𑀤𑁂𑀬𑁆𑀬, 𑀦𑀺𑀬𑁆𑀬𑀸𑀦𑀺𑀓𑀓𑀣𑀁 𑀲𑀼𑀢𑁆𑀯𑀸𑀧𑀺 𑀧𑀲𑀻𑀤𑁂𑀬𑁆𑀬. 𑀢𑀢𑁄 𑀦 𑀧𑀼𑀦 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺. 𑀢𑀲𑁆𑀫𑀸 𑀬𑀸𑀯𑀢𑀢𑀺𑀬𑀁 𑀧𑀝𑀺𑀩𑀸𑀳𑀢𑁂𑀯.

𑀅𑀪𑀺𑀯𑀸𑀤𑁂𑀢𑁆𑀯𑀸𑀢𑀺 ¶ 𑀯𑀦𑁆𑀤𑀺𑀢𑁆𑀯𑀸. 𑀢𑀣𑀸𑀕𑀢𑀜𑁆𑀳𑀺 𑀤𑀺𑀲𑁆𑀯𑀸 𑀧𑀲𑀦𑁆𑀦𑀸𑀧𑀺 𑀅𑀧𑁆𑀧𑀲𑀦𑁆𑀦𑀸𑀧𑀺 𑀬𑁂𑀪𑀼𑀬𑁆𑀬𑁂𑀦 𑀯𑀦𑁆𑀤𑀦𑁆𑀢𑀺𑀬𑁂𑀯, 𑀅𑀧𑁆𑀧𑀓𑀸 𑀦 𑀯𑀦𑁆𑀤𑀦𑁆𑀢𑀺. 𑀓𑀲𑁆𑀫𑀸? 𑀅𑀢𑀺𑀉𑀘𑁆𑀘𑁂 𑀳𑀺 𑀓𑀼𑀮𑁂 𑀚𑀸𑀢𑁄 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀦𑁆𑀢𑁄𑀧𑀺 𑀯𑀦𑁆𑀤𑀺𑀢𑀩𑁆𑀩𑁄𑀬𑁂𑀯𑀸𑀢𑀺. 𑀅𑀬𑀁 𑀧𑀦 𑀕𑀳𑀧𑀢𑀺 𑀧𑀲𑀦𑁆𑀦𑀢𑁆𑀢𑀸𑀯 𑀯𑀦𑁆𑀤𑀺, 𑀤𑀲𑁆𑀲𑀦𑁂𑀬𑁂𑀯 𑀓𑀺𑀭 𑀧𑀲𑀦𑁆𑀦𑁄. 𑀆𑀕𑀫𑀸 𑀦𑀼 𑀔𑁆𑀯𑀺𑀥𑀸𑀢𑀺 𑀆𑀕𑀫𑀸 𑀦𑀼 𑀔𑁄 𑀇𑀥.

𑁬𑁧. 𑀲𑀸𑀥𑀼 𑀲𑀸𑀥𑀼, 𑀪𑀦𑁆𑀢𑁂, 𑀢𑀧𑀲𑁆𑀲𑀻𑀢𑀺 𑀤𑀻𑀖𑀢𑀧𑀲𑁆𑀲𑀺𑀲𑁆𑀲 𑀲𑀸𑀥𑀼𑀓𑀸𑀭𑀁 𑀤𑁂𑀦𑁆𑀢𑁄, 𑀪𑀦𑁆𑀢𑁂𑀢𑀺, 𑀪𑀕𑀯𑀦𑁆𑀢𑀁 𑀆𑀮𑀧𑀢𑀺. 𑀲𑀘𑁆𑀘𑁂 𑀧𑀢𑀺𑀝𑁆𑀞𑀸𑀬𑀸𑀢𑀺 𑀣𑀼𑀲𑀭𑀸𑀲𑀺𑀫𑁆𑀳𑀺 𑀆𑀓𑁄𑀝𑀺𑀢𑀔𑀸𑀡𑀼𑀓𑁄 𑀯𑀺𑀬 𑀅𑀘𑀮𑀦𑁆𑀢𑁄 𑀯𑀘𑀻𑀲𑀘𑁆𑀘𑁂 𑀧𑀢𑀺𑀝𑁆𑀞𑀳𑀺𑀢𑁆𑀯𑀸. 𑀲𑀺𑀬𑀸 ¶ 𑀦𑁄𑀢𑀺 𑀪𑀯𑁂𑀬𑁆𑀬 𑀅𑀫𑁆𑀳𑀸𑀓𑀁.

𑁬𑁨. 𑀇𑀥𑀸𑀢𑀺 ¶ 𑀇𑀫𑀲𑁆𑀫𑀺𑀁 𑀮𑁄𑀓𑁂. 𑀅𑀲𑁆𑀲𑀸𑀢𑀺 𑀪𑀯𑁂𑀬𑁆𑀬. 𑀲𑀻𑀢𑁄𑀤𑀓𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺 𑀦𑀺𑀕𑀡𑁆𑀞𑀸 𑀲𑀢𑁆𑀢𑀲𑀜𑁆𑀜𑀸𑀬 𑀲𑀻𑀢𑁄𑀤𑀓𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀫𑀦𑁄𑀲𑀢𑁆𑀢𑀸 𑀦𑀸𑀫 𑀤𑁂𑀯𑀸𑀢𑀺 𑀫𑀦𑀫𑁆𑀳𑀺 𑀲𑀢𑁆𑀢𑀸 𑀮𑀕𑁆𑀕𑀸 𑀮𑀕𑀺𑀢𑀸. 𑀫𑀦𑁄𑀧𑀝𑀺𑀩𑀤𑁆𑀥𑁄𑀢𑀺 𑀬𑀲𑁆𑀫𑀸 𑀫𑀦𑀫𑁆𑀳𑀺 𑀧𑀝𑀺𑀩𑀤𑁆𑀥𑁄 𑀳𑀼𑀢𑁆𑀯𑀸 𑀓𑀸𑀮𑀗𑁆𑀓𑀭𑁄𑀢𑀺, 𑀢𑀲𑁆𑀫𑀸 𑀫𑀦𑁄𑀲𑀢𑁆𑀢𑁂𑀲𑀼 𑀤𑁂𑀯𑁂𑀲𑀼 𑀉𑀧𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀲𑁆𑀲 𑀳𑀺 𑀧𑀺𑀢𑁆𑀢𑀚𑀭𑀭𑁄𑀕𑁄 𑀪𑀯𑀺𑀲𑁆𑀲𑀢𑀺. 𑀢𑁂𑀦𑀲𑁆𑀲 𑀉𑀡𑁆𑀳𑁄𑀤𑀓𑀁 𑀧𑀺𑀯𑀺𑀢𑀼𑀁 𑀯𑀸 𑀳𑀢𑁆𑀣𑀧𑀸𑀤𑀸𑀤𑀺𑀥𑁄𑀯𑀦𑀢𑁆𑀣𑀸𑀬 𑀯𑀸 𑀕𑀢𑁆𑀢𑀧𑀭𑀺𑀲𑀺𑀜𑁆𑀘𑀦𑀢𑁆𑀣𑀸𑀬 𑀯𑀸 𑀉𑀧𑀦𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀭𑁄𑀕𑁄 𑀩𑀮𑀯𑀢𑀭𑁄 𑀳𑁄𑀢𑀺. 𑀲𑀻𑀢𑁄𑀤𑀓𑀁 𑀯𑀝𑁆𑀝𑀢𑀺, 𑀭𑁄𑀕𑀁 𑀯𑀽𑀧𑀲𑀫𑁂𑀢𑀺. 𑀅𑀬𑀁 𑀧𑀦 𑀉𑀡𑁆𑀳𑁄𑀤𑀓𑀫𑁂𑀯 𑀧𑀝𑀺𑀲𑁂𑀯𑀢𑀺, 𑀢𑀁 𑀅𑀮𑀪𑀫𑀸𑀦𑁄 𑀑𑀤𑀦𑀓𑀜𑁆𑀚𑀺𑀓𑀁 𑀧𑀝𑀺𑀲𑁂𑀯𑀢𑀺. 𑀘𑀺𑀢𑁆𑀢𑁂𑀦 𑀧𑀦 𑀲𑀻𑀢𑁄𑀤𑀓𑀁 𑀧𑀸𑀢𑀼𑀓𑀸𑀫𑁄 𑀘 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀘 𑀳𑁄𑀢𑀺. 𑀢𑁂𑀦𑀲𑁆𑀲 𑀫𑀦𑁄𑀤𑀡𑁆𑀟𑁄 𑀢𑀢𑁆𑀣𑁂𑀯 𑀪𑀺𑀚𑁆𑀚𑀢𑀺. 𑀲𑁄 𑀓𑀸𑀬𑀤𑀡𑁆𑀟𑀁 𑀯𑀘𑀻𑀤𑀡𑁆𑀟𑀁 𑀭𑀓𑁆𑀔𑀸𑀫𑀻𑀢𑀺 𑀲𑀻𑀢𑁄𑀤𑀓𑀁 𑀧𑀸𑀢𑀼𑀓𑀸𑀫𑁄 𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀯𑀸 𑀲𑀻𑀢𑁄𑀤𑀓𑀫𑁂𑀯 𑀤𑁂𑀣𑀸𑀢𑀺 𑀯𑀢𑁆𑀢𑀼𑀁 𑀦 𑀯𑀺𑀲𑀳𑀢𑀺. 𑀢𑀲𑁆𑀲 𑀏𑀯𑀁 𑀭𑀓𑁆𑀔𑀺𑀢𑀸𑀧𑀺 𑀓𑀸𑀬𑀤𑀡𑁆𑀟𑀯𑀘𑀻𑀤𑀡𑁆𑀟𑀸 𑀘𑀼𑀢𑀺𑀁 𑀯𑀸 𑀧𑀝𑀺𑀲𑀦𑁆𑀥𑀺𑀁 𑀯𑀸 𑀆𑀓𑀟𑁆𑀠𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀫𑀦𑁄𑀤𑀡𑁆𑀟𑁄 𑀧𑀦 𑀪𑀺𑀦𑁆𑀦𑁄𑀧𑀺 𑀘𑀼𑀢𑀺𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀫𑁆𑀧𑀺 𑀆𑀓𑀟𑁆𑀠𑀢𑀺𑀬𑁂𑀯. 𑀇𑀢𑀺 𑀦𑀁 𑀪𑀕𑀯𑀸 𑀤𑀼𑀩𑁆𑀩𑀮𑀓𑀸𑀬𑀤𑀡𑁆𑀟𑀯𑀘𑀻𑀤𑀡𑁆𑀟𑀸 𑀙𑀯𑀸 𑀮𑀸𑀫𑀓𑀸, 𑀫𑀦𑁄𑀤𑀡𑁆𑀟𑁄𑀯 𑀩𑀮𑀯𑀸 𑀫𑀳𑀦𑁆𑀢𑁄𑀢𑀺 𑀯𑀤𑀸𑀧𑁂𑀲𑀺.

𑀢𑀲𑁆𑀲𑀧𑀺 𑀉𑀧𑀸𑀲𑀓𑀲𑁆𑀲 𑀏𑀢𑀤𑀳𑁄𑀲𑀺. ‘‘𑀫𑀼𑀘𑁆𑀙𑀸𑀯𑀲𑁂𑀦 𑀅𑀲𑀜𑁆𑀜𑀺𑀪𑀽𑀢𑀸𑀦𑀜𑁆𑀳𑀺 𑀲𑀢𑁆𑀢𑀸𑀳𑀫𑁆𑀧𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀦𑀧𑁆𑀧𑀯𑀢𑁆𑀢𑀦𑁆𑀢𑀺, 𑀘𑀺𑀢𑁆𑀢𑀲𑀦𑁆𑀢𑀢𑀺𑀧𑀯𑀢𑁆𑀢𑀺𑀫𑀢𑁆𑀢𑁂𑀦𑁂𑀯 𑀧𑀦 𑀢𑁂 𑀫𑀢𑀸𑀢𑀺 𑀦 𑀯𑀼𑀘𑁆𑀘𑀦𑁆𑀢𑀺. 𑀬𑀤𑀸 𑀦𑁂𑀲𑀁 𑀘𑀺𑀢𑁆𑀢𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀢𑀤𑀸 ‘𑀫𑀢𑀸 𑀏𑀢𑁂 𑀦𑀻𑀳𑀭𑀺𑀢𑁆𑀯𑀸 𑀢𑁂 𑀛𑀸𑀧𑁂𑀣𑀸’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀦𑁆𑀢𑀺. 𑀓𑀸𑀬𑀤𑀡𑁆𑀟𑁄 𑀦𑀺𑀭𑀻𑀳𑁄 𑀅𑀩𑁆𑀬𑀸𑀧𑀸𑀭𑁄, 𑀢𑀣𑀸 ¶ 𑀯𑀘𑀻𑀤𑀡𑁆𑀟𑁄. 𑀘𑀺𑀢𑁆𑀢𑁂𑀦𑁂𑀯 𑀧𑀦 𑀢𑁂𑀲𑀁 𑀘𑀼𑀢𑀺𑀧𑀺 𑀧𑀝𑀺𑀲𑀦𑁆𑀥𑀺𑀧𑀺 𑀳𑁄𑀢𑀺 ¶ . 𑀇𑀢𑀺𑀧𑀺 𑀫𑀦𑁄𑀤𑀡𑁆𑀟𑁄𑀯 𑀫𑀳𑀦𑁆𑀢𑁄. 𑀪𑀺𑀚𑁆𑀚𑀺𑀢𑁆𑀯𑀸𑀧𑀺 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑀢𑁄 𑀏𑀲𑁂𑀯 𑀫𑀳𑀦𑁆𑀢𑁄. 𑀅𑀫𑁆𑀳𑀸𑀓𑀁 𑀧𑀦 𑀫𑀳𑀸𑀦𑀺𑀕𑀡𑁆𑀞𑀲𑁆𑀲 𑀓𑀣𑀸 𑀅𑀦𑀺𑀬𑁆𑀬𑀸𑀦𑀺𑀓𑀸’’𑀢𑀺 𑀲𑀮𑁆𑀮𑀓𑁆𑀔𑁂𑀲𑀺. 𑀪𑀕𑀯𑀢𑁄 𑀧𑀦 𑀯𑀺𑀘𑀺𑀢𑁆𑀢𑀸𑀦𑀺 𑀧𑀜𑁆𑀳𑀧𑀝𑀺𑀪𑀸𑀦𑀸𑀦𑀺 𑀲𑁄𑀢𑀼𑀓𑀸𑀫𑁄 𑀦 𑀢𑀸𑀯 𑀅𑀦𑀼𑀚𑀸𑀦𑀸𑀢𑀺.

𑀦 𑀔𑁄 𑀢𑁂 𑀲𑀦𑁆𑀥𑀺𑀬𑀢𑀻𑀢𑀺 𑀦 𑀔𑁄 𑀢𑁂 𑀖𑀝𑀺𑀬𑀢𑀺. 𑀧𑀼𑀭𑀺𑀫𑁂𑀦 𑀯𑀸 𑀧𑀘𑁆𑀙𑀺𑀫𑀦𑁆𑀢𑀺 ‘‘𑀓𑀸𑀬𑀤𑀡𑁆𑀟𑁄 𑀫𑀳𑀦𑁆𑀢𑁄’’𑀢𑀺 𑀇𑀫𑀺𑀦𑀸 𑀧𑀼𑀭𑀺𑀫𑁂𑀦 𑀯𑀘𑀦𑁂𑀦 𑀇𑀤𑀸𑀦𑀺 ‘‘𑀫𑀦𑁄𑀤𑀡𑁆𑀟𑁄 𑀫𑀳𑀦𑁆𑀢𑁄’’𑀢𑀺 𑀇𑀤𑀁 𑀯𑀘𑀦𑀁. 𑀧𑀘𑁆𑀙𑀺𑀫𑁂𑀦 𑀯𑀸 𑀧𑀼𑀭𑀺𑀫𑀦𑁆𑀢𑀺 𑀢𑁂𑀦 𑀯𑀸 𑀧𑀘𑁆𑀙𑀺𑀫𑁂𑀦 𑀅𑀤𑀼𑀁 𑀧𑀼𑀭𑀺𑀫𑀯𑀘𑀦𑀁 𑀦 𑀖𑀝𑀺𑀬𑀢𑀺.

𑁬𑁩. 𑀇𑀤𑀸𑀦𑀺𑀲𑁆𑀲 ¶ 𑀪𑀕𑀯𑀸 𑀅𑀜𑁆𑀜𑀸𑀦𑀺𑀧𑀺 𑀓𑀸𑀭𑀡𑀸𑀦𑀺 𑀆𑀳𑀭𑀦𑁆𑀢𑁄 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀸𑀢𑀼𑀬𑀸𑀫𑀲𑀁𑀯𑀭𑀲𑀁𑀯𑀼𑀢𑁄𑀢𑀺 𑀦 𑀧𑀸𑀡𑀫𑀢𑀺𑀧𑀸𑀢𑁂𑀢𑀺, 𑀦 𑀧𑀸𑀡𑀫𑀢𑀺𑀧𑀸𑀢𑀬𑀢𑀺, 𑀦 𑀧𑀸𑀡𑀫𑀢𑀺𑀧𑀸𑀢𑀬𑀢𑁄 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺. 𑀦 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺, 𑀦 𑀅𑀤𑀺𑀦𑁆𑀦𑀁 𑀆𑀤𑀺𑀬𑀸𑀧𑁂𑀢𑀺, 𑀦 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑁄 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺. 𑀦 𑀫𑀼𑀲𑀸 𑀪𑀡𑀢𑀺, 𑀦 𑀫𑀼𑀲𑀸 𑀪𑀡𑀸𑀧𑁂𑀢𑀺, 𑀦 𑀫𑀼𑀲𑀸 𑀪𑀡𑀢𑁄 𑀲𑀫𑀦𑀼𑀜𑁆𑀜𑁄 𑀳𑁄𑀢𑀺. 𑀦 𑀪𑀸𑀯𑀺𑀢𑀫𑀸𑀲𑀻𑀲𑀢𑀺, 𑀦 𑀪𑀸𑀯𑀺𑀢𑀫𑀸𑀲𑀻𑀲𑀸𑀧𑁂𑀢𑀺, 𑀦 𑀪𑀸𑀯𑀺𑀢𑀫𑀸𑀲𑀻𑀲𑀢𑁄 𑀲𑀫𑀦𑀼𑀜𑁆𑀜𑁄 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀘𑀢𑀼𑀓𑁄𑀝𑁆𑀞𑀸𑀲𑁂𑀦 𑀲𑀁𑀯𑀭𑁂𑀦 𑀲𑀁𑀯𑀼𑀢𑁄. 𑀏𑀢𑁆𑀣 𑀘 𑀪𑀸𑀯𑀺𑀢𑀦𑁆𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀸.

𑀲𑀩𑁆𑀩𑀯𑀸𑀭𑀺𑀯𑀸𑀭𑀺𑀢𑁄𑀢𑀺 𑀯𑀸𑀭𑀺𑀢𑀲𑀩𑁆𑀩𑀉𑀤𑀓𑁄, 𑀧𑀝𑀺𑀓𑁆𑀔𑀺𑀢𑁆𑀢𑀲𑀩𑁆𑀩𑀲𑀻𑀢𑁄𑀤𑀓𑁄𑀢𑀺 𑀅𑀢𑁆𑀣𑁄. 𑀲𑁄 𑀳𑀺 𑀲𑀻𑀢𑁄𑀤𑀓𑁂 𑀲𑀢𑁆𑀢𑀲𑀜𑁆𑀜𑀻 𑀳𑁄𑀢𑀺, 𑀢𑀲𑁆𑀫𑀸 𑀦 𑀢𑀁 𑀯𑀮𑀜𑁆𑀚𑁂𑀢𑀺. 𑀅𑀣 𑀯𑀸 𑀲𑀩𑁆𑀩𑀯𑀸𑀭𑀺𑀯𑀸𑀭𑀺𑀢𑁄𑀢𑀺 𑀲𑀩𑁆𑀩𑁂𑀦 𑀧𑀸𑀧𑀯𑀸𑀭𑀡𑁂𑀦 𑀯𑀸𑀭𑀺𑀢𑀧𑀸𑀧𑁄. 𑀲𑀩𑁆𑀩𑀯𑀸𑀭𑀺𑀬𑀼𑀢𑁆𑀢𑁄𑀢𑀺 𑀲𑀩𑁆𑀩𑁂𑀦 𑀧𑀸𑀧𑀯𑀸𑀭𑀡𑁂𑀦 ¶ 𑀬𑀼𑀢𑁆𑀢𑁄. 𑀲𑀩𑁆𑀩𑀯𑀸𑀭𑀺𑀥𑀼𑀢𑁄𑀢𑀺 𑀲𑀩𑁆𑀩𑁂𑀦 𑀧𑀸𑀧𑀯𑀸𑀭𑀡𑁂𑀦 𑀥𑀼𑀢𑀧𑀸𑀧𑁄. 𑀲𑀩𑁆𑀩𑀯𑀸𑀭𑀺𑀨𑀼𑀝𑁄𑀢𑀺 𑀲𑀩𑁆𑀩𑁂𑀦 𑀧𑀸𑀧𑀯𑀸𑀭𑀡𑁂𑀦 𑀨𑀼𑀝𑁄. 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀲𑀗𑁆𑀖𑀸𑀢𑀁 𑀆𑀧𑀸𑀤𑁂𑀢𑀻𑀢𑀺 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀯𑀥𑀁 𑀆𑀧𑀸𑀤𑁂𑀢𑀺. 𑀲𑁄 𑀓𑀺𑀭 𑀏𑀓𑀺𑀦𑁆𑀤𑁆𑀭𑀺𑀬𑀁 𑀧𑀸𑀡𑀁 𑀤𑀼𑀯𑀺𑀦𑁆𑀤𑁆𑀭𑀺𑀬𑀁 𑀧𑀸𑀡𑀦𑁆𑀢𑀺 𑀧𑀜𑁆𑀜𑀧𑁂𑀢𑀺. 𑀲𑀼𑀓𑁆𑀔𑀤𑀡𑁆𑀟𑀓-𑀧𑀼𑀭𑀸𑀡𑀧𑀡𑁆𑀡𑀲𑀓𑁆𑀔𑀭-𑀓𑀣𑀮𑀸𑀦𑀺𑀧𑀺 𑀧𑀸𑀡𑁄𑀢𑁂𑀯 𑀧𑀜𑁆𑀜𑀧𑁂𑀢𑀺. 𑀢𑀢𑁆𑀣 𑀔𑀼𑀤𑁆𑀤𑀓𑀁 𑀉𑀤𑀓𑀩𑀺𑀦𑁆𑀤𑀼 𑀔𑀼𑀤𑁆𑀤𑀓𑁄 𑀧𑀸𑀡𑁄, 𑀫𑀳𑀦𑁆𑀢𑀁 𑀫𑀳𑀦𑁆𑀢𑁄𑀢𑀺 𑀲𑀜𑁆𑀜𑀻 𑀳𑁄𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀲𑁆𑀫𑀺𑀁 𑀧𑀜𑁆𑀜𑀧𑁂𑀢𑀻𑀢𑀺 𑀓𑀢𑁆𑀣 𑀓𑀢𑀭𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀧𑀜𑁆𑀜𑀧𑁂𑀢𑀺. 𑀫𑀦𑁄𑀤𑀡𑁆𑀟𑀲𑁆𑀫𑀺𑀦𑁆𑀢𑀺 𑀫𑀦𑁄𑀤𑀡𑁆𑀟𑀓𑁄𑀝𑁆𑀞𑀸𑀲𑁂, 𑀪𑀦𑁆𑀢𑁂𑀢𑀺. 𑀅𑀬𑀁 𑀧𑀦 𑀉𑀧𑀸𑀲𑀓𑁄 𑀪𑀡𑀦𑁆𑀢𑁄𑀯 𑀲𑀬𑀫𑁆𑀧𑀺 𑀲𑀮𑁆𑀮𑀓𑁆𑀔𑁂𑀲𑀺 𑁋 ‘‘𑀅𑀫𑁆𑀳𑀸𑀓𑀁 𑀫𑀳𑀸𑀦𑀺𑀕𑀡𑁆𑀞𑁄 ‘𑀅𑀲𑀜𑁆𑀘𑁂𑀢𑀦𑀺𑀓𑀁 𑀓𑀫𑁆𑀫𑀁 𑀅𑀧𑁆𑀧𑀲𑀸𑀯𑀚𑁆𑀚𑀁, 𑀲𑀜𑁆𑀘𑁂𑀢𑀦𑀺𑀓𑀁 𑀫𑀳𑀸𑀲𑀸𑀯𑀚𑁆𑀚’𑀦𑁆𑀢𑀺 𑀧𑀜𑁆𑀜𑀧𑁂𑀢𑁆𑀯𑀸 𑀘𑁂𑀢𑀦𑀁 𑀫𑀦𑁄𑀤𑀡𑁆𑀟𑁄𑀢𑀺 𑀧𑀜𑁆𑀜𑀧𑁂𑀢𑀺, 𑀅𑀦𑀺𑀬𑁆𑀬𑀸𑀦𑀺𑀓𑀸 𑀏𑀢𑀲𑁆𑀲 𑀓𑀣𑀸, 𑀪𑀕𑀯𑀢𑁄𑀯 𑀦𑀺𑀬𑁆𑀬𑀸𑀦𑀺𑀓𑀸’’𑀢𑀺.

𑁬𑁪. 𑀇𑀤𑁆𑀥𑀸𑀢𑀺 ¶ 𑀲𑀫𑀺𑀤𑁆𑀥𑀸. 𑀨𑀻𑀢𑀸𑀢𑀺 𑀅𑀢𑀺𑀲𑀫𑀺𑀤𑁆𑀥𑀸 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀸 𑀯𑀺𑀬. 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀸𑀢𑀺 𑀚𑀦𑀲𑀫𑀸𑀓𑀼𑀮𑀸. 𑀧𑀸𑀡𑀸𑀢𑀺 𑀳𑀢𑁆𑀣𑀺𑀅𑀲𑁆𑀲𑀸𑀤𑀬𑁄 𑀢𑀺𑀭𑀘𑁆𑀙𑀸𑀦𑀕𑀢𑀸 𑀘𑁂𑀯 𑀇𑀢𑁆𑀣𑀺𑀧𑀼𑀭𑀺𑀲𑀤𑀸𑀭𑀓𑀸𑀤𑀬𑁄 𑀫𑀦𑀼𑀲𑁆𑀲𑀚𑀸𑀢𑀺𑀓𑀸 𑀘. 𑀏𑀓𑀁 𑀫𑀁𑀲𑀔𑀮𑀦𑁆𑀢𑀺 𑀏𑀓𑀁 𑀫𑀁𑀲𑀭𑀸𑀲𑀺𑀁. 𑀧𑀼𑀜𑁆𑀚𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀇𑀤𑁆𑀥𑀺𑀫𑀸𑀢𑀺 𑀆𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑁄. 𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄𑀢𑀺 𑀘𑀺𑀢𑁆𑀢𑁂 𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑁄. 𑀪𑀲𑁆𑀫𑀁 ¶ 𑀓𑀭𑀺𑀲𑁆𑀲𑀸𑀫𑀻𑀢𑀺 𑀙𑀸𑀭𑀺𑀓𑀁 𑀓𑀭𑀺𑀲𑁆𑀲𑀸𑀫𑀺. 𑀓𑀺𑀜𑁆𑀳𑀺 𑀲𑁄𑀪𑀢𑀺 𑀏𑀓𑀸 𑀙𑀯𑀸 𑀦𑀸𑀴𑀦𑁆𑀤𑀸𑀢𑀺 𑀇𑀤𑀫𑁆𑀧𑀺 𑀪𑀡𑀦𑁆𑀢𑁄 𑀲𑁄 𑀕𑀳𑀧𑀢𑀺 𑁋 ‘‘𑀓𑀸𑀬𑀧𑀬𑁄𑀕𑁂𑀦 𑀧𑀜𑁆𑀜𑀸𑀲𑀫𑁆𑀧𑀺 𑀫𑀦𑀼𑀲𑁆𑀲𑀸 𑀏𑀓𑀁 𑀦𑀸𑀴𑀦𑁆𑀤𑀁 𑀏𑀓𑀁 𑀫𑀁𑀲𑀔𑀮𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀇𑀤𑁆𑀥𑀺𑀫𑀸 𑀧𑀦 𑀏𑀓𑁄 ¶ 𑀏𑀓𑁂𑀦𑁂𑀯 𑀫𑀦𑁄𑀧𑀤𑁄𑀲𑁂𑀦 𑀪𑀲𑁆𑀫𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄. 𑀅𑀫𑁆𑀳𑀸𑀓𑀁 𑀫𑀳𑀸𑀦𑀺𑀕𑀡𑁆𑀞𑀲𑁆𑀲 𑀓𑀣𑀸 𑀅𑀦𑀺𑀬𑁆𑀬𑀸𑀦𑀺𑀓𑀸, 𑀪𑀕𑀯𑀢𑁄𑀯 𑀓𑀣𑀸 𑀦𑀺𑀬𑁆𑀬𑀸𑀦𑀺𑀓𑀸’’𑀢𑀺 𑀲𑀮𑁆𑀮𑀓𑁆𑀔𑁂𑀲𑀺.

𑁬𑁫. 𑀅𑀭𑀜𑁆𑀜𑀁 𑀅𑀭𑀜𑁆𑀜𑀪𑀽𑀢𑀦𑁆𑀢𑀺 𑀅𑀕𑀸𑀫𑀓𑀁 𑀅𑀭𑀜𑁆𑀜𑀫𑁂𑀯 𑀳𑀼𑀢𑁆𑀯𑀸 𑀅𑀭𑀜𑁆𑀜𑀁 𑀚𑀸𑀢𑀁. 𑀇𑀲𑀻𑀦𑀁 𑀫𑀦𑁄𑀧𑀤𑁄𑀲𑁂𑀦𑀸𑀢𑀺 𑀇𑀲𑀻𑀦𑀁 𑀅𑀢𑁆𑀣𑀸𑀬 𑀓𑀢𑁂𑀦 𑀫𑀦𑁄𑀧𑀤𑁄𑀲𑁂𑀦 𑀢𑀁 𑀫𑀦𑁄𑀧𑀤𑁄𑀲𑀁 𑀅𑀲𑀳𑀫𑀸𑀦𑀸𑀳𑀺 𑀤𑁂𑀯𑀢𑀸𑀳𑀺 𑀢𑀸𑀦𑀺 𑀭𑀝𑁆𑀞𑀸𑀦𑀺 𑀯𑀺𑀦𑀸𑀲𑀺𑀢𑀸𑀦𑀺. 𑀮𑁄𑀓𑀺𑀓𑀸 𑀧𑀦 𑀇𑀲𑀬𑁄 𑀫𑀦𑀁 𑀧𑀤𑁄𑀲𑁂𑀢𑁆𑀯𑀸 𑀯𑀺𑀦𑀸𑀲𑀬𑀺𑀁𑀲𑀽𑀢𑀺 𑀫𑀜𑁆𑀜𑀦𑁆𑀢𑀺. 𑀢𑀲𑁆𑀫𑀸 𑀇𑀫𑀲𑁆𑀫𑀺𑀁 𑀮𑁄𑀓𑀯𑀸𑀤𑁂 𑀞𑀢𑁆𑀯𑀸𑀯 𑀇𑀤𑀁 𑀯𑀸𑀤𑀸𑀭𑁄𑀧𑀦𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀤𑀡𑁆𑀟𑀓𑀻𑀭𑀜𑁆𑀜𑀸𑀤𑀻𑀦𑀁 𑀏𑀯𑀁 𑀅𑀭𑀜𑁆𑀜𑀪𑀽𑀢𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄 𑁋 𑀲𑀭𑀪𑀗𑁆𑀕𑀩𑁄𑀥𑀺𑀲𑀢𑁆𑀢𑀲𑁆𑀲 𑀢𑀸𑀯 𑀧𑀭𑀺𑀲𑀸𑀬 𑀅𑀢𑀺𑀯𑁂𑀧𑀼𑀮𑁆𑀮𑀢𑀁 𑀕𑀢𑀸𑀬 𑀓𑀺𑀲𑀯𑀘𑁆𑀙𑁄 𑀦𑀸𑀫 𑀢𑀸𑀧𑀲𑁄 𑀫𑀳𑀸𑀲𑀢𑁆𑀢𑀲𑁆𑀲 𑀅𑀦𑁆𑀢𑁂𑀯𑀸𑀲𑀻 𑀯𑀺𑀯𑁂𑀓𑀯𑀸𑀲𑀁 𑀧𑀢𑁆𑀣𑀬𑀫𑀸𑀦𑁄 𑀕𑀡𑀁 𑀧𑀳𑀸𑀬 𑀕𑁄𑀥𑀸𑀯𑀭𑀻𑀢𑀻𑀭𑀢𑁄 𑀓𑀮𑀺𑀗𑁆𑀕𑀭𑀝𑁆𑀞𑁂 𑀤𑀡𑁆𑀟𑀓𑀻𑀭𑀜𑁆𑀜𑁄 𑀓𑀼𑀫𑁆𑀪𑀧𑀼𑀭𑀁 𑀦𑀸𑀫 𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀭𑀸𑀚𑀼𑀬𑁆𑀬𑀸𑀦𑁂 𑀯𑀺𑀯𑁂𑀓𑀫𑀦𑀼𑀩𑁆𑀭𑀽𑀳𑀬𑀫𑀸𑀦𑁄 𑀯𑀺𑀳𑀭𑀢𑀺. 𑀢𑀲𑁆𑀲 𑀲𑁂𑀦𑀸𑀧𑀢𑀺 𑀉𑀧𑀝𑁆𑀞𑀸𑀓𑁄 𑀳𑁄𑀢𑀺.

𑀢𑀤𑀸 𑀘 𑀏𑀓𑀸 𑀕𑀡𑀺𑀓𑀸 𑀭𑀣𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀧𑀜𑁆𑀘𑀫𑀸𑀢𑀼𑀕𑀸𑀫𑀲𑀢𑀧𑀭𑀺𑀯𑀸𑀭𑀸 𑀦𑀕𑀭𑀁 𑀉𑀧𑀲𑁄𑀪𑀬𑀫𑀸𑀦𑀸 𑀯𑀺𑀘𑀭𑀢𑀺. 𑀫𑀳𑀸𑀚𑀦𑁄 𑀢𑀫𑁂𑀯 𑀑𑀮𑁄𑀓𑀬𑀫𑀸𑀦𑁄 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀺𑀘𑀭𑀢𑀺, 𑀦𑀕𑀭𑀯𑀻𑀣𑀺𑀬𑁄 𑀦𑀧𑁆𑀧𑀳𑁄𑀦𑁆𑀢𑀺. 𑀭𑀸𑀚𑀸 𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀞𑀺𑀢𑁄 𑀢𑀁 𑀤𑀺𑀲𑁆𑀯𑀸 𑀓𑀸 𑀏𑀲𑀸𑀢𑀺 𑀧𑀼𑀘𑁆𑀙𑀺. 𑀢𑀼𑀫𑁆𑀳𑀸𑀓𑀁 𑀦𑀕𑀭𑀲𑁄𑀪𑀺𑀦𑀻 ¶ 𑀤𑁂𑀯𑀸𑀢𑀺. 𑀲𑁄 𑀉𑀲𑁆𑀲𑀽𑀬𑀫𑀸𑀦𑁄 ‘‘𑀓𑀺𑀁 𑀏𑀢𑀸𑀬 𑀲𑁄𑀪𑀢𑀺, 𑀦𑀕𑀭𑀁 𑀲𑀬𑀁 𑀲𑁄𑀪𑀺𑀲𑁆𑀲𑀢𑀻’’𑀢𑀺 𑀢𑀁 𑀞𑀸𑀦𑀦𑁆𑀢𑀭𑀁 𑀅𑀘𑁆𑀙𑀺𑀦𑁆𑀤𑀸𑀧𑁂𑀲𑀺.

𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀲𑀦𑁆𑀣𑀯𑀁 𑀓𑀢𑁆𑀯𑀸 𑀞𑀸𑀦𑀦𑁆𑀢𑀭𑀁 𑀧𑀭𑀺𑀬𑁂𑀲𑀫𑀸𑀦𑀸 𑀏𑀓𑀤𑀺𑀯𑀲𑀁 𑀭𑀸𑀚𑀼𑀬𑁆𑀬𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀆𑀮𑀫𑁆𑀩𑀦𑀨𑀮𑀓𑀁 𑀦𑀺𑀲𑁆𑀲𑀸𑀬 𑀧𑀸𑀲𑀸𑀡𑀨𑀮𑀓𑁂 𑀦𑀺𑀲𑀺𑀦𑁆𑀦𑀁 𑀢𑀸𑀧𑀲𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ¶ 𑁋 ‘‘𑀓𑀺𑀮𑀺𑀝𑁆𑀞𑁄 𑀯𑀢𑀸𑀬𑀁 𑀢𑀸𑀧𑀲𑁄 𑀅𑀦𑀜𑁆𑀚𑀺𑀢𑀫𑀡𑁆𑀟𑀺𑀢𑁄, 𑀤𑀸𑀞𑀺𑀓𑀸𑀳𑀺 𑀧𑀭𑀼𑀴𑁆𑀳𑀸𑀳𑀺 𑀫𑀼𑀔𑀁 𑀧𑀺𑀳𑀺𑀢𑀁, 𑀫𑀲𑁆𑀲𑀼𑀦𑀸 𑀉𑀭𑀁 𑀧𑀺𑀳𑀺𑀢𑀁, 𑀉𑀪𑁄 𑀓𑀘𑁆𑀙𑀸 𑀧𑀭𑀼𑀴𑁆𑀳𑀸’’𑀢𑀺. 𑀅𑀣𑀲𑁆𑀲𑀸 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀺 𑁋 ‘‘𑀅𑀳𑀁 𑀏𑀓𑁂𑀦 𑀓𑀺𑀘𑁆𑀘𑁂𑀦 𑀯𑀺𑀘𑀭𑀸𑀫𑀺, 𑀅𑀬𑀜𑁆𑀘 𑀫𑁂 𑀓𑀸𑀴𑀓𑀡𑁆𑀡𑀻 𑀤𑀺𑀝𑁆𑀞𑁄, 𑀉𑀤𑀓𑀁 𑀆𑀳𑀭𑀣, 𑀅𑀓𑁆𑀔𑀻𑀦𑀺 𑀥𑁄𑀯𑀺𑀲𑁆𑀲𑀸𑀫𑀻’’𑀢𑀺 𑀉𑀤𑀓𑀤𑀦𑁆𑀢𑀓𑀝𑁆𑀞𑀁 𑀆𑀳𑀭𑀸𑀧𑁂𑀢𑁆𑀯𑀸 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑁆𑀯𑀸 𑀢𑀸𑀧𑀲𑀲𑁆𑀲 𑀲𑀭𑀻𑀭𑁂 𑀧𑀺𑀡𑁆𑀟𑀁 𑀧𑀺𑀡𑁆𑀟𑀁 𑀔𑁂𑀴𑀁 𑀧𑀸𑀢𑁂𑀢𑁆𑀯𑀸 𑀤𑀦𑁆𑀢𑀓𑀝𑁆𑀞𑀁 𑀚𑀝𑀸𑀫𑀢𑁆𑀣𑀓𑁂 𑀔𑀺𑀧𑀺𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀉𑀤𑀓𑀁 𑀢𑀸𑀧𑀲𑀲𑁆𑀲 𑀫𑀢𑁆𑀣𑀓𑀲𑁆𑀫𑀺𑀁𑀬𑁂𑀯 𑀲𑀺𑀜𑁆𑀘𑀺𑀢𑁆𑀯𑀸 ¶ 𑁋 ‘‘𑀬𑁂𑀳𑀺 𑀫𑁂 𑀅𑀓𑁆𑀔𑀻𑀳𑀺 𑀓𑀸𑀴𑀓𑀡𑁆𑀡𑀻 𑀤𑀺𑀝𑁆𑀞𑁄, 𑀢𑀸𑀦𑀺 𑀥𑁄𑀢𑀸𑀦𑀺 𑀓𑀮𑀺𑀧𑀯𑀸𑀳𑀺𑀢𑁄’’𑀢𑀺 𑀦𑀺𑀓𑁆𑀔𑀦𑁆𑀢𑀸.

𑀢𑀁𑀤𑀺𑀯𑀲𑀜𑁆𑀘 𑀭𑀸𑀚𑀸 𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑁋 ‘‘𑀪𑁄 𑀓𑀼𑀳𑀺𑀁 𑀦𑀕𑀭𑀲𑁄𑀪𑀺𑀦𑀻’’𑀢𑀺 𑀧𑀼𑀘𑁆𑀙𑀺. 𑀇𑀫𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀤𑁂𑀯𑀸𑀢𑀺. 𑀧𑀓𑀢𑀺𑀝𑁆𑀞𑀸𑀦𑀦𑁆𑀢𑀭𑀁 𑀢𑀲𑁆𑀲𑀸 𑀤𑁂𑀣𑀸𑀢𑀺 𑀞𑀸𑀦𑀦𑁆𑀢𑀭𑀁 𑀤𑀸𑀧𑁂𑀲𑀺. 𑀲𑀸 𑀧𑀼𑀩𑁆𑀩𑁂 𑀲𑀼𑀓𑀢𑀓𑀫𑁆𑀫𑀁 𑀦𑀺𑀲𑁆𑀲𑀸𑀬 𑀮𑀤𑁆𑀥𑀁 𑀞𑀸𑀦𑀦𑁆𑀢𑀭𑀁 𑀢𑀸𑀧𑀲𑀲𑁆𑀲 𑀲𑀭𑀻𑀭𑁂 𑀔𑁂𑀴𑀧𑀸𑀢𑀦𑁂𑀦 𑀮𑀤𑁆𑀥𑀦𑁆𑀢𑀺 𑀲𑀜𑁆𑀜𑀫𑀓𑀸𑀲𑀺.

𑀢𑀢𑁄 𑀓𑀢𑀺𑀧𑀸𑀳𑀲𑁆𑀲𑀘𑁆𑀘𑀬𑁂𑀦 𑀭𑀸𑀚𑀸 𑀧𑀼𑀭𑁄𑀳𑀺𑀢𑀲𑁆𑀲 𑀞𑀸𑀦𑀦𑁆𑀢𑀭𑀁 𑀕𑀡𑁆𑀳𑀺. 𑀲𑁄 𑀦𑀕𑀭𑀲𑁄𑀪𑀺𑀦𑀺𑀬𑀸 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀪𑀕𑀺𑀦𑀺 𑀓𑀺𑀦𑁆𑀢𑀺 𑀓𑀢𑁆𑀯𑀸 𑀞𑀸𑀦𑀦𑁆𑀢𑀭𑀁 𑀧𑀝𑀺𑀮𑀪𑀻’’𑀢𑀺 𑀧𑀼𑀘𑁆𑀙𑀺. ‘‘𑀓𑀺𑀁 𑀩𑁆𑀭𑀸𑀳𑁆𑀫𑀡 𑀅𑀜𑁆𑀜𑀁 𑀓𑀸𑀢𑀩𑁆𑀩𑀁 𑀅𑀢𑁆𑀣𑀺, 𑀭𑀸𑀚𑀼𑀬𑁆𑀬𑀸𑀦𑁂 ¶ 𑀅𑀦𑀜𑁆𑀚𑀺𑀢𑀓𑀸𑀴𑀓𑀡𑁆𑀡𑀻 𑀓𑀽𑀝𑀚𑀝𑀺𑀮𑁄 𑀏𑀓𑁄 𑀅𑀢𑁆𑀣𑀺, 𑀢𑀲𑁆𑀲 𑀲𑀭𑀻𑀭𑁂 𑀔𑁂𑀴𑀁 𑀧𑀸𑀢𑁂𑀳𑀺, 𑀏𑀯𑀁 𑀞𑀸𑀦𑀦𑁆𑀢𑀭𑀁 𑀮𑀪𑀺𑀲𑁆𑀲𑀲𑀻’’𑀢𑀺 𑀆𑀳. 𑀲𑁄 ‘‘𑀏𑀯𑀁 𑀓𑀭𑀺𑀲𑁆𑀲𑀸𑀫𑀺 𑀪𑀕𑀺𑀦𑀻’’𑀢𑀺 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀢𑀸𑀬 𑀓𑀣𑀺𑀢𑀲𑀤𑀺𑀲𑀫𑁂𑀯 𑀲𑀩𑁆𑀩𑀁 𑀓𑀢𑁆𑀯𑀸 𑀦𑀺𑀓𑁆𑀔𑀫𑀺. 𑀭𑀸𑀚𑀸𑀧𑀺 𑀢𑀁𑀤𑀺𑀯𑀲𑀫𑁂𑀯 𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑁋 ‘‘𑀓𑀼𑀳𑀺𑀁, 𑀪𑁄, 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀧𑀼𑀘𑁆𑀙𑀺. 𑀇𑀫𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀤𑁂𑀯𑀸𑀢𑀺. ‘‘𑀅𑀫𑁆𑀳𑁂𑀳𑀺 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀓𑀢𑀁, 𑀢𑀤𑁂𑀯𑀲𑁆𑀲 𑀞𑀸𑀦𑀦𑁆𑀢𑀭𑀁 𑀤𑁂𑀣𑀸’’𑀢𑀺 𑀤𑀸𑀧𑁂𑀲𑀺. 𑀲𑁄𑀧𑀺 𑀧𑀼𑀜𑁆𑀜𑀩𑀮𑁂𑀦 𑀮𑀪𑀺𑀢𑁆𑀯𑀸 ‘‘𑀢𑀸𑀧𑀲𑀲𑁆𑀲 𑀲𑀭𑀻𑀭𑁂 𑀔𑁂𑀴𑀧𑀸𑀢𑀦𑁂𑀦 𑀮𑀤𑁆𑀥𑀁 𑀫𑁂’’𑀢𑀺 𑀲𑀜𑁆𑀜𑀫𑀓𑀸𑀲𑀺.

𑀢𑀢𑁄 𑀓𑀢𑀺𑀧𑀸𑀳𑀲𑁆𑀲𑀘𑁆𑀘𑀬𑁂𑀦 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑁄 𑀓𑀼𑀧𑀺𑀢𑁄. 𑀭𑀸𑀚𑀸 𑀧𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑁂𑀲𑁆𑀲𑀸𑀫𑀻𑀢𑀺 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀦𑀺𑀓𑁆𑀔𑀫𑀺. 𑀧𑀼𑀭𑁄𑀳𑀺𑀢𑁄 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀧𑀼𑀭𑀢𑁄 𑀞𑀢𑁆𑀯𑀸 ‘‘𑀚𑀬𑀢𑀼 𑀫𑀳𑀸𑀭𑀸𑀚𑀸’’𑀢𑀺 𑀯𑀢𑁆𑀯𑀸 𑁋 ‘‘𑀢𑀼𑀫𑁆𑀳𑁂, 𑀫𑀳𑀸𑀭𑀸𑀚, 𑀚𑀬𑀢𑁆𑀣𑀸𑀬 𑀕𑀘𑁆𑀙𑀣𑀸’’𑀢𑀺 𑀧𑀼𑀘𑁆𑀙𑀺. 𑀆𑀫 𑀩𑁆𑀭𑀸𑀳𑁆𑀫𑀡𑀸𑀢𑀺. 𑀏𑀯𑀁 𑀲𑀦𑁆𑀢𑁂 𑀭𑀸𑀚𑀼𑀬𑁆𑀬𑀸𑀦𑁂 𑀅𑀦𑀜𑁆𑀚𑀺𑀢𑀓𑀸𑀴𑀓𑀡𑁆𑀡𑀻 𑀏𑀓𑁄 𑀓𑀽𑀝𑀚𑀝𑀺𑀮𑁄 𑀯𑀲𑀢𑀺, 𑀢𑀲𑁆𑀲 𑀲𑀭𑀻𑀭𑁂 𑀔𑁂𑀴𑀁 𑀧𑀸𑀢𑁂𑀣𑀸𑀢𑀺. 𑀭𑀸𑀚𑀸 𑀢𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀬𑀣𑀸 𑀕𑀡𑀺𑀓𑀸𑀬 𑀘 𑀢𑁂𑀦 𑀘 𑀓𑀢𑀁, 𑀢𑀣𑁂𑀯 𑀲𑀩𑁆𑀩𑀁 𑀓𑀢𑁆𑀯𑀸 𑀑𑀭𑁄𑀥𑁂𑀧𑀺 𑀆𑀡𑀸𑀧𑁂𑀲𑀺 𑁋 ‘‘𑀏𑀢𑀲𑁆𑀲 𑀓𑀽𑀝𑀚𑀝𑀺𑀮𑀲𑁆𑀲 𑀲𑀭𑀻𑀭𑁂 𑀔𑁂𑀴𑀁 𑀧𑀸𑀢𑁂𑀣𑀸’’𑀢𑀺. 𑀢𑀢𑁄 𑀑𑀭𑁄𑀥𑀸𑀧𑀺 𑀑𑀭𑁄𑀥𑀧𑀸𑀮𑀓𑀸𑀧𑀺 𑀢𑀣𑁂𑀯 𑀅𑀓𑀁𑀲𑀼. 𑀅𑀣 𑀭𑀸𑀚𑀸 𑀉𑀬𑁆𑀬𑀸𑀦𑀤𑁆𑀯𑀸𑀭𑁂 𑀭𑀓𑁆𑀔𑀁 𑀞𑀧𑀸𑀧𑁂𑀢𑁆𑀯𑀸 ‘‘𑀭𑀜𑁆𑀜𑀸 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀦𑁆𑀢𑀸 ¶ 𑀲𑀩𑁆𑀩𑁂 𑀢𑀸𑀧𑀲𑀲𑁆𑀲 𑀲𑀭𑀻𑀭𑁂 𑀔𑁂𑀴𑀁 𑀅𑀧𑀸𑀢𑁂𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑀼𑀁 𑀦 𑀮𑀪𑀦𑁆𑀢𑀻’’𑀢𑀺 𑀆𑀡𑀸𑀧𑁂𑀲𑀺. 𑀅𑀣 𑀲𑀩𑁆𑀩𑁄 𑀩𑀮𑀓𑀸𑀬𑁄 𑀘 𑀲𑁂𑀦𑀺𑀬𑁄 𑀘 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀢𑀸𑀧𑀲𑀲𑁆𑀲 𑀉𑀧𑀭𑀺 𑀔𑁂𑀴𑀜𑁆𑀘 𑀤𑀦𑁆𑀢𑀓𑀝𑁆𑀞𑀸𑀦𑀺 𑀘 𑀫𑀼𑀔𑀯𑀺𑀓𑁆𑀔𑀸𑀮𑀺𑀢 𑀉𑀤𑀓𑀜𑁆𑀘 𑀧𑀸𑀧𑀬𑀺𑀁𑀲𑀼, 𑀔𑁂𑀴𑁄 𑀘 𑀤𑀦𑁆𑀢𑀓𑀝𑁆𑀞𑀸𑀦𑀺 𑀘 𑀲𑀓𑀮𑀲𑀭𑀻𑀭𑀁 𑀅𑀯𑀢𑁆𑀣𑀭𑀺𑀁𑀲𑀼.

𑀲𑁂𑀦𑀸𑀧𑀢𑀺 ¶ 𑀲𑀩𑁆𑀩𑀧𑀘𑁆𑀙𑀸 𑀲𑀼𑀡𑀺𑀢𑁆𑀯𑀸 ‘‘𑀫𑀬𑁆𑀳𑀁 𑀓𑀺𑀭 𑀲𑀢𑁆𑀣𑀸𑀭𑀁 𑀪𑀯𑀦𑁆𑀢𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀲𑀕𑁆𑀕𑀲𑁄𑀧𑀸𑀦𑀁 𑀏𑀯𑀁 𑀖𑀝𑁆𑀝𑀬𑀺𑀁𑀲𑀽’’𑀢𑀺 𑀉𑀲𑀼𑀫𑀚𑀸𑀢𑀳𑀤𑀬𑁄 𑀫𑀼𑀔𑁂𑀦 𑀅𑀲𑁆𑀲𑀲𑀦𑁆𑀢𑁄 ¶ 𑀯𑁂𑀕𑁂𑀦 𑀭𑀸𑀚𑀼𑀬𑁆𑀬𑀸𑀦𑀁 𑀆𑀕𑀦𑁆𑀢𑁆𑀯𑀸 𑀢𑀣𑀸 𑀩𑁆𑀬𑀲𑀦𑀧𑀢𑁆𑀢𑀁 𑀇𑀲𑀺𑀁 𑀤𑀺𑀲𑁆𑀯𑀸 𑀓𑀘𑁆𑀙𑀁 𑀩𑀦𑁆𑀥𑀺𑀢𑁆𑀯𑀸 𑀤𑁆𑀯𑀻𑀳𑀺 𑀳𑀢𑁆𑀣𑁂𑀳𑀺 𑀤𑀦𑁆𑀢𑀓𑀝𑁆𑀞𑀸𑀦𑀺 𑀅𑀧𑀯𑀺𑀬𑀽𑀳𑀺𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀉𑀤𑀓𑀁 𑀆𑀳𑀭𑀸𑀧𑁂𑀢𑁆𑀯𑀸 𑀦𑁆𑀳𑀸𑀧𑁂𑀢𑁆𑀯𑀸 𑀲𑀩𑁆𑀩𑀑𑀲𑀥𑁂𑀳𑀺 𑀘𑁂𑀯 𑀘𑀢𑀼𑀚𑁆𑀚𑀸𑀢𑀺𑀕𑀦𑁆𑀥𑁂𑀳𑀺 𑀘 𑀲𑀭𑀻𑀭𑀁 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀲𑀼𑀔𑀼𑀫𑀲𑀸𑀝𑀓𑁂𑀦 𑀧𑀼𑀜𑁆𑀙𑀺𑀢𑁆𑀯𑀸 𑀧𑀼𑀭𑀢𑁄 𑀅𑀜𑁆𑀚𑀮𑀺𑀁 𑀓𑀢𑁆𑀯𑀸 𑀞𑀺𑀢𑁄 𑀏𑀯𑀫𑀸𑀳 ‘‘𑀅𑀬𑀼𑀢𑁆𑀢𑀁, 𑀪𑀦𑁆𑀢𑁂, 𑀫𑀦𑀼𑀲𑁆𑀲𑁂𑀳𑀺 𑀓𑀢𑀁, 𑀏𑀢𑁂𑀲𑀁 𑀓𑀺𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀤𑁂𑀯𑀢𑀸 𑀲𑁂𑀦𑀸𑀧𑀢𑀺 𑀢𑀺𑀥𑀸 𑀪𑀺𑀦𑁆𑀦𑀸, 𑀏𑀓𑀘𑁆𑀘𑀸 ‘‘𑀭𑀸𑀚𑀸𑀦𑀫𑁂𑀯 𑀦𑀸𑀲𑁂𑀲𑁆𑀲𑀸𑀫𑀸’’𑀢𑀺 𑀯𑀤𑀦𑁆𑀢𑀺, 𑀏𑀓𑀘𑁆𑀘𑀸 ‘‘𑀲𑀤𑁆𑀥𑀺𑀁 𑀧𑀭𑀺𑀲𑀸𑀬 𑀭𑀸𑀚𑀸𑀦’’𑀦𑁆𑀢𑀺, 𑀏𑀓𑀘𑁆𑀘𑀸 ‘‘𑀭𑀜𑁆𑀜𑁄 𑀯𑀺𑀚𑀺𑀢𑀁 𑀲𑀩𑁆𑀩𑀁 𑀦𑀸𑀲𑁂𑀲𑁆𑀲𑀸𑀫𑀸’’𑀢𑀺. 𑀇𑀤𑀁 𑀯𑀢𑁆𑀯𑀸 𑀧𑀦 𑀢𑀸𑀧𑀲𑁄 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀓𑁄𑀧𑀁 𑀅𑀓𑀢𑁆𑀯𑀸 𑀮𑁄𑀓𑀲𑁆𑀲 𑀲𑀦𑁆𑀢𑀺𑀉𑀧𑀸𑀬𑀫𑁂𑀯 𑀆𑀘𑀺𑀓𑁆𑀔𑀦𑁆𑀢𑁄 𑀆𑀳 ‘‘𑀅𑀧𑀭𑀸𑀥𑁄 𑀦𑀸𑀫 𑀳𑁄𑀢𑀺, 𑀅𑀘𑁆𑀘𑀬𑀁 𑀧𑀦 𑀤𑁂𑀲𑁂𑀢𑀼𑀁 𑀚𑀸𑀦𑀦𑁆𑀢𑀲𑁆𑀲 𑀧𑀸𑀓𑀢𑀺𑀓𑀫𑁂𑀯 𑀳𑁄𑀢𑀻’’𑀢𑀺.

𑀲𑁂𑀦𑀸𑀧𑀢𑀺 𑀦𑀬𑀁 𑀮𑀪𑀺𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀢𑀼𑀫𑁆𑀳𑁂𑀳𑀺, 𑀫𑀳𑀸𑀭𑀸𑀚, 𑀦𑀺𑀭𑀸𑀧𑀭𑀸𑀥𑁂 𑀫𑀳𑀺𑀤𑁆𑀥𑀺𑀓𑁂 𑀢𑀸𑀧𑀲𑁂 𑀅𑀧𑀭𑀚𑁆𑀛𑀦𑁆𑀢𑁂𑀳𑀺 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀓𑀢𑀁, 𑀤𑁂𑀯𑀢𑀸 𑀓𑀺𑀭 𑀢𑀺𑀥𑀸 𑀪𑀺𑀦𑁆𑀦𑀸 𑀏𑀯𑀁 𑀯𑀤𑀦𑁆𑀢𑀻’’𑀢𑀺 𑀲𑀩𑁆𑀩𑀁 𑀆𑀭𑁄𑀘𑁂𑀢𑁆𑀯𑀸 𑁋 ‘‘𑀔𑀫𑀸𑀧𑀺𑀢𑁂 𑀓𑀺𑀭, 𑀫𑀳𑀸𑀭𑀸𑀚, 𑀧𑀸𑀓𑀢𑀺𑀓𑀁 𑀳𑁄𑀢𑀺, 𑀭𑀝𑁆𑀞𑀁 𑀫𑀸 𑀦𑀸𑀲𑁂𑀣, 𑀢𑀸𑀧𑀲𑀁 𑀔𑀫𑀸𑀧𑁂𑀣𑀸’’𑀢𑀺 𑀆𑀳. 𑀭𑀸𑀚𑀸 𑀅𑀢𑁆𑀢𑀦𑀺 𑀤𑁄𑀲𑀁 𑀓𑀢𑀁 𑀤𑀺𑀲𑁆𑀯𑀸𑀧𑀺 𑀏𑀯𑀁 𑀯𑀤𑀢𑀺 ‘‘𑀦 𑀢𑀁 𑀔𑀫𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀲𑁂𑀦𑀸𑀧𑀢𑀺 𑀬𑀸𑀯𑀢𑀢𑀺𑀬𑀁 𑀬𑀸𑀘𑀺𑀢𑁆𑀯𑀸 𑀅𑀦𑀺𑀘𑁆𑀙𑀦𑁆𑀢𑀫𑀸𑀳 𑁋 ‘‘𑀅𑀳𑀁, 𑀫𑀳𑀸𑀭𑀸𑀚, 𑀢𑀸𑀧𑀲𑀲𑁆𑀲 𑀩𑀮𑀁 𑀚𑀸𑀦𑀸𑀫𑀺, 𑀦 𑀲𑁄 𑀅𑀪𑀽𑀢𑀯𑀸𑀤𑀻, 𑀦𑀸𑀧𑀺 𑀓𑀼𑀧𑀺𑀢𑁄, 𑀲𑀢𑁆𑀢𑀸𑀦𑀼𑀤𑁆𑀤𑀬𑁂𑀦 𑀧𑀦 𑀏𑀯𑀫𑀸𑀳 𑀔𑀫𑀸𑀧𑁂𑀣 𑀦𑀁 𑀫𑀳𑀸𑀭𑀸𑀚𑀸’’𑀢𑀺. 𑀦 𑀔𑀫𑀸𑀧𑁂𑀫𑀻𑀢𑀺. 𑀢𑁂𑀦 𑀳𑀺 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀅𑀜𑁆𑀜𑀲𑁆𑀲 𑀤𑁂𑀣, 𑀅𑀳𑀁 𑀢𑀼𑀫𑁆𑀳𑀸𑀓𑀁 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑁂 𑀦 𑀯𑀲𑀺𑀲𑁆𑀲𑀸𑀫𑀻𑀢𑀺. 𑀢𑁆𑀯𑀁 𑀬𑁂𑀦𑀓𑀸𑀫𑀁 𑀕𑀘𑁆𑀙, 𑀅𑀳𑀁 𑀫𑀬𑁆𑀳𑀁 𑀲𑁂𑀦𑀸𑀧𑀢𑀺𑀁 𑀮𑀪𑀺𑀲𑁆𑀲𑀸𑀫𑀻𑀢𑀺. 𑀢𑀢𑁄 𑀲𑁂𑀦𑀸𑀧𑀢𑀺 𑀢𑀸𑀧𑀲𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 ¶ ‘‘𑀓𑀣𑀁 𑀧𑀝𑀺𑀧𑀚𑁆𑀚𑀸𑀫𑀺, 𑀪𑀦𑁆𑀢𑁂’’𑀢𑀺 𑀆𑀳. 𑀲𑁂𑀦𑀸𑀧𑀢𑀺 𑀬𑁂 𑀢𑁂 𑀯𑀘𑀦𑀁 𑀲𑀼𑀡𑀦𑁆𑀢𑀺, 𑀲𑀩𑁆𑀩𑁂 𑀲𑀧𑀭𑀺𑀓𑁆𑀔𑀸𑀭𑁂 𑀲𑀥𑀦𑁂 𑀲𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑁂 𑀕𑀳𑁂𑀢𑁆𑀯𑀸 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑁂 𑀩𑀳𑀺 𑀭𑀚𑁆𑀚𑀲𑀻𑀫𑀁 𑀕𑀘𑁆𑀙, 𑀤𑁂𑀯𑀢𑀸 𑀅𑀢𑀺𑀯𑀺𑀬 𑀓𑀼𑀧𑀺𑀢𑀸 𑀥𑀼𑀯𑀁 𑀭𑀝𑁆𑀞𑀫𑁆𑀧𑀺 𑀅𑀭𑀝𑁆𑀞𑀁 𑀓𑀭𑀺𑀲𑁆𑀲𑀦𑁆𑀢𑀻𑀢𑀺. 𑀲𑁂𑀦𑀸𑀧𑀢𑀺 𑀢𑀣𑀸 𑀅𑀓𑀸𑀲𑀺.

𑀭𑀸𑀚𑀸 ¶ 𑀕𑀢𑀫𑀢𑁆𑀢𑁄𑀬𑁂𑀯 𑀅𑀫𑀺𑀢𑁆𑀢𑀫𑀣𑀦𑀁 𑀓𑀢𑁆𑀯𑀸 𑀚𑀦𑀧𑀤𑀁 𑀯𑀽𑀧𑀲𑀫𑁂𑀢𑁆𑀯𑀸 𑀆𑀕𑀫𑁆𑀫 𑀚𑀬𑀔𑀦𑁆𑀥𑀸𑀯𑀸𑀭𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀦𑀕𑀭𑀁 𑀧𑀝𑀺𑀚𑀕𑁆𑀕𑀸𑀧𑁂𑀢𑁆𑀯𑀸 𑀅𑀦𑁆𑀢𑁄𑀦𑀕𑀭𑀁 𑀧𑀸𑀯𑀺𑀲𑀺. 𑀤𑁂𑀯𑀢𑀸 ¶ 𑀧𑀞𑀫𑀁𑀬𑁂𑀯 𑀉𑀤𑀓𑀯𑀼𑀝𑁆𑀞𑀺𑀁 𑀧𑀸𑀢𑀬𑀺𑀁𑀲𑀼. 𑀫𑀳𑀸𑀚𑀦𑁄 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺 ‘‘𑀓𑀽𑀝𑀚𑀝𑀺𑀮𑀁 𑀅𑀧𑀭𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀯𑀟𑁆𑀠𑀺𑀬𑁂𑀯, 𑀅𑀫𑀺𑀢𑁆𑀢𑁂 𑀦𑀺𑀫𑁆𑀫𑀣𑁂𑀲𑀺, 𑀆𑀕𑀢𑀤𑀺𑀯𑀲𑁂𑀬𑁂𑀯 𑀤𑁂𑀯𑁄 𑀯𑀼𑀝𑁆𑀞𑁄’’𑀢𑀺. 𑀤𑁂𑀯𑀢𑀸 𑀧𑀼𑀦 𑀲𑀼𑀫𑀦𑀧𑀼𑀧𑁆𑀨𑀯𑀼𑀝𑁆𑀞𑀺𑀁 𑀧𑀸𑀢𑀬𑀺𑀁𑀲𑀼, 𑀫𑀳𑀸𑀚𑀦𑁄 𑀅𑀢𑁆𑀢𑀫𑀦𑀢𑀭𑁄 𑀅𑀳𑁄𑀲𑀺. 𑀤𑁂𑀯𑀢𑀸 𑀧𑀼𑀦 𑀫𑀸𑀲𑀓𑀯𑀼𑀝𑁆𑀞𑀺𑀁 𑀧𑀸𑀢𑀬𑀺𑀁𑀲𑀼. 𑀢𑀢𑁄 𑀓𑀳𑀸𑀧𑀡𑀯𑀼𑀝𑁆𑀞𑀺𑀁, 𑀢𑀢𑁄 𑀓𑀳𑀸𑀧𑀡𑀢𑁆𑀣𑀁 𑀦 𑀦𑀺𑀓𑁆𑀔𑀫𑁂𑀬𑁆𑀬𑀼𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀳𑀢𑁆𑀣𑀽𑀧𑀕𑀧𑀸𑀤𑀽𑀧𑀕𑀸𑀤𑀺𑀓𑀢𑀪𑀡𑁆𑀟𑀯𑀼𑀝𑁆𑀞𑀺𑀁 𑀧𑀸𑀢𑁂𑀲𑀼𑀁. 𑀫𑀳𑀸𑀚𑀦𑁄 𑀲𑀢𑁆𑀢𑀪𑀽𑀫𑀺𑀓𑀧𑀸𑀲𑀸𑀤𑁂 𑀞𑀺𑀢𑁄𑀧𑀺 𑀑𑀢𑀭𑀺𑀢𑁆𑀯𑀸 𑀆𑀪𑀭𑀡𑀸𑀦𑀺 𑀧𑀺𑀴𑀦𑁆𑀥𑀦𑁆𑀢𑁄 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺. ‘‘𑀅𑀭𑀳𑀢𑀺 𑀯𑀢 𑀓𑀽𑀝𑀚𑀝𑀺𑀮𑀓𑁂 𑀔𑁂𑀴𑀧𑀸𑀢𑀦𑀁, 𑀢𑀲𑁆𑀲 𑀉𑀧𑀭𑀺 𑀔𑁂𑀴𑀧𑀸𑀢𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀯𑀟𑁆𑀠𑀺 𑀚𑀸𑀢𑀸, 𑀅𑀫𑀺𑀢𑁆𑀢𑀫𑀣𑀦𑀁 𑀓𑀢𑀁, 𑀆𑀕𑀢𑀤𑀺𑀯𑀲𑁂𑀬𑁂𑀯 𑀤𑁂𑀯𑁄 𑀯𑀲𑁆𑀲𑀺, 𑀢𑀢𑁄 𑀲𑀼𑀫𑀦𑀯𑀼𑀝𑁆𑀞𑀺 𑀫𑀸𑀲𑀓𑀯𑀼𑀝𑁆𑀞𑀺 𑀓𑀳𑀸𑀧𑀡𑀯𑀼𑀝𑁆𑀞𑀺 𑀓𑀢𑀪𑀡𑁆𑀟𑀯𑀼𑀝𑁆𑀞𑀻𑀢𑀺 𑀘𑀢𑀲𑁆𑀲𑁄 𑀯𑀼𑀝𑁆𑀞𑀺𑀬𑁄 𑀚𑀸𑀢𑀸’’𑀢𑀺 𑀅𑀢𑁆𑀢𑀫𑀦𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀭𑀜𑁆𑀜𑁄 𑀓𑀢𑀧𑀸𑀧𑁂 𑀲𑀫𑀦𑀼𑀜𑁆𑀜𑁄 𑀚𑀸𑀢𑁄.

𑀢𑀲𑁆𑀫𑀺𑀁 𑀲𑀫𑀬𑁂 𑀤𑁂𑀯𑀢𑀸 𑀏𑀓𑀢𑁄𑀥𑀸𑀭𑀉𑀪𑀢𑁄𑀥𑀸𑀭𑀸𑀤𑀻𑀦𑀺 𑀦𑀸𑀦𑀧𑁆𑀧𑀓𑀸𑀭𑀸𑀦𑀺 𑀆𑀯𑀼𑀥𑀸𑀦𑀺 𑀫𑀳𑀸𑀚𑀦𑀲𑁆𑀲 𑀉𑀧𑀭𑀺 𑀨𑀮𑀓𑁂 ¶ 𑀫𑀁𑀲𑀁 𑀓𑁄𑀝𑁆𑀝𑀬𑀫𑀸𑀦𑀸 𑀯𑀺𑀬 𑀧𑀸𑀢𑀬𑀺𑀁𑀲𑀼. 𑀢𑀤𑀦𑀦𑁆𑀢𑀭𑀁 𑀯𑀻𑀢𑀘𑁆𑀘𑀺𑀓𑁂 𑀯𑀻𑀢𑀥𑀽𑀫𑁂 𑀓𑀺𑀁𑀲𑀼𑀓𑀧𑀼𑀧𑁆𑀨𑀯𑀡𑁆𑀡𑁂 𑀅𑀗𑁆𑀕𑀸𑀭𑁂, 𑀢𑀤𑀦𑀦𑁆𑀢𑀭𑀁 𑀓𑀽𑀝𑀸𑀕𑀸𑀭𑀧𑁆𑀧𑀫𑀸𑀡𑁂 𑀧𑀸𑀲𑀸𑀡𑁂, 𑀢𑀤𑀦𑀦𑁆𑀢𑀭𑀁 𑀅𑀦𑁆𑀢𑁄𑀫𑀼𑀝𑁆𑀞𑀺𑀬𑀁 𑀅𑀲𑀡𑁆𑀞𑀳𑀦𑀺𑀓𑀁 𑀲𑀼𑀔𑀼𑀫𑀯𑀸𑀮𑀺𑀓𑀁 𑀯𑀲𑁆𑀲𑀸𑀧𑀬𑀫𑀸𑀦𑀸 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑀁 𑀣𑀮𑀁 𑀅𑀓𑀁𑀲𑀼. 𑀭𑀜𑁆𑀜𑁄 𑀯𑀺𑀚𑀺𑀢𑀝𑁆𑀞𑀸𑀦𑁂 𑀓𑀺𑀲𑀯𑀘𑁆𑀙𑀢𑀸𑀧𑀲𑁄 𑀲𑁂𑀦𑀸𑀧𑀢𑀺 𑀫𑀸𑀢𑀼𑀧𑁄𑀲𑀓𑀭𑀸𑀫𑁄𑀢𑀺 𑀢𑀬𑁄𑀯 𑀫𑀦𑀼𑀲𑁆𑀲𑀪𑀽𑀢𑀸 𑀅𑀭𑁄𑀕𑀸 𑀅𑀳𑁂𑀲𑀼𑀁. 𑀲𑁂𑀲𑀸𑀦𑀁 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀅𑀲𑀫𑀗𑁆𑀕𑀻𑀪𑀽𑀢𑀸𑀦𑀁 𑀢𑀺𑀭𑀘𑁆𑀙𑀸𑀦𑀸𑀦𑀁 𑀧𑀸𑀦𑀻𑀬𑀝𑁆𑀞𑀸𑀦𑁂 𑀧𑀸𑀦𑀻𑀬𑀁 𑀦𑀸𑀳𑁄𑀲𑀺, 𑀢𑀺𑀡𑀝𑁆𑀞𑀸𑀦𑁂 𑀢𑀺𑀡𑀁. 𑀢𑁂 𑀬𑁂𑀦 𑀧𑀸𑀦𑀻𑀬𑀁 𑀬𑁂𑀦 𑀢𑀺𑀡𑀦𑁆𑀢𑀺 𑀕𑀘𑁆𑀙𑀦𑁆𑀢𑀸 𑀅𑀧𑁆𑀧𑀢𑁆𑀢𑁂𑀬𑁂𑀯 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀩𑀳𑀺𑀭𑀚𑁆𑀚𑀲𑀻𑀫𑀁 𑀧𑀸𑀧𑀼𑀡𑀺𑀁𑀲𑀼. 𑀢𑁂𑀦𑀸𑀳 𑀲𑀭𑀪𑀗𑁆𑀕𑀩𑁄𑀥𑀺𑀲𑀢𑁆𑀢𑁄 𑁋

‘‘𑀓𑀺𑀲𑀜𑁆𑀳𑀺 𑀯𑀘𑁆𑀙𑀁 𑀅𑀯𑀓𑀺𑀭𑀺𑀬 𑀤𑀡𑁆𑀟𑀓𑀻,

𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀲𑀚𑀦𑁄 𑀲𑀭𑀝𑁆𑀞𑁄;

𑀓𑀼𑀓𑁆𑀓𑀼𑀴𑀦𑀸𑀫𑁂 𑀦𑀺𑀭𑀬𑀫𑁆𑀳𑀺 𑀧𑀘𑁆𑀘𑀢𑀺,

𑀢𑀲𑁆𑀲 𑀨𑀼𑀮𑀺𑀗𑁆𑀕𑀸𑀦𑀺 𑀧𑀢𑀦𑁆𑀢𑀺 𑀓𑀸𑀬𑁂’’𑀢𑀺. (𑀚𑀸. 𑁨.𑁧𑁭.𑁭𑁦);

𑀏𑀯𑀁 𑀢𑀸𑀯 𑀤𑀡𑁆𑀟𑀓𑀻𑀭𑀜𑁆𑀜𑀲𑁆𑀲 𑀅𑀭𑀜𑁆𑀜𑀪𑀽𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀓𑀮𑀺𑀗𑁆𑀕𑀭𑀝𑁆𑀞𑁂 ¶ ¶ 𑀧𑀦 𑀦𑀸𑀴𑀺𑀓𑀺𑀭𑀭𑀜𑁆𑀜𑁂 𑀭𑀚𑁆𑀚𑀁 𑀓𑀸𑀭𑀬𑀫𑀸𑀦𑁂 𑀳𑀺𑀫𑀯𑀢𑀺 𑀧𑀜𑁆𑀘𑀲𑀢𑀢𑀸𑀧𑀲𑀸 𑀅𑀦𑀺𑀢𑁆𑀣𑀺𑀕𑀦𑁆𑀥𑀸 𑀅𑀚𑀺𑀦𑀚𑀝𑀯𑀸𑀓𑀘𑀻𑀭𑀥𑀭𑀸 𑀯𑀦𑀫𑀽𑀮𑀨𑀮𑀪𑀓𑁆𑀔𑀸 𑀳𑀼𑀢𑁆𑀯𑀸 𑀘𑀺𑀭𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀁 𑀫𑀦𑀼𑀲𑁆𑀲𑀧𑀣𑀁 𑀑𑀢𑀭𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀓𑀮𑀺𑀗𑁆𑀕𑀭𑀝𑁆𑀞𑁂 𑀦𑀸𑀴𑀺𑀓𑀺𑀭𑀭𑀜𑁆𑀜𑁄 𑀦𑀕𑀭𑀁 𑀲𑀫𑁆𑀧𑀢𑁆𑀢𑀸. 𑀢𑁂 𑀚𑀝𑀸𑀚𑀺𑀦𑀯𑀸𑀓𑀘𑀻𑀭𑀸𑀦𑀺 ¶ 𑀲𑀡𑁆𑀞𑀧𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀸𑀦𑀼𑀭𑀽𑀧𑀁 𑀉𑀧𑀲𑀫𑀲𑀺𑀭𑀺𑀁 𑀤𑀲𑁆𑀲𑀬𑀫𑀸𑀦𑀸 𑀦𑀕𑀭𑀁 𑀪𑀺𑀓𑁆𑀔𑀸𑀬 𑀧𑀯𑀺𑀲𑀺𑀁𑀲𑀼. 𑀫𑀦𑀼𑀲𑁆𑀲𑀸 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀢𑀸𑀧𑀲𑀧𑀩𑁆𑀩𑀚𑀺𑀢𑁂 𑀤𑀺𑀲𑁆𑀯𑀸 𑀧𑀲𑀦𑁆𑀦𑀸 𑀦𑀺𑀲𑀚𑁆𑀚𑀝𑁆𑀞𑀸𑀦𑀁 𑀲𑀁𑀯𑀺𑀥𑀸𑀬 𑀳𑀢𑁆𑀣𑀢𑁄 𑀪𑀺𑀓𑁆𑀔𑀸𑀪𑀸𑀚𑀦𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀅𑀤𑀁𑀲𑀼. 𑀢𑀸𑀧𑀲𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀸 𑀅𑀦𑀼𑀫𑁄𑀤𑀦𑀁 𑀅𑀓𑀁𑀲𑀼. 𑀫𑀦𑀼𑀲𑁆𑀲𑀸 𑀲𑀼𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 ‘‘𑀓𑀼𑀳𑀺𑀁 𑀪𑀤𑀦𑁆𑀢𑀸 𑀕𑀘𑁆𑀙𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀬𑀣𑀸𑀨𑀸𑀲𑀼𑀓𑀝𑁆𑀞𑀸𑀦𑀁, 𑀆𑀯𑀼𑀲𑁄𑀢𑀺. 𑀪𑀦𑁆𑀢𑁂, 𑀅𑀮𑀁 𑀅𑀜𑁆𑀜𑀢𑁆𑀣 𑀕𑀫𑀦𑁂𑀦, 𑀭𑀸𑀚𑀼𑀬𑁆𑀬𑀸𑀦𑁂 𑀯𑀲𑀣, 𑀫𑀬𑀁 𑀪𑀼𑀢𑁆𑀢𑀧𑀸𑀢𑀭𑀸𑀲𑀸 𑀆𑀕𑀦𑁆𑀢𑁆𑀯𑀸 𑀥𑀫𑁆𑀫𑀓𑀣𑀁 𑀲𑁄𑀲𑁆𑀲𑀸𑀫𑀸𑀢𑀺. 𑀢𑀸𑀧𑀲𑀸 𑀅𑀥𑀺𑀯𑀸𑀲𑁂𑀢𑁆𑀯𑀸 𑀉𑀬𑁆𑀬𑀸𑀦𑀁 𑀅𑀕𑀫𑀁𑀲𑀼. 𑀦𑀸𑀕𑀭𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑀸 𑀲𑀼𑀤𑁆𑀥𑀯𑀢𑁆𑀣𑀦𑀺𑀯𑀢𑁆𑀣𑀸 ‘‘𑀥𑀫𑁆𑀫𑀓𑀣𑀁 𑀲𑁄𑀲𑁆𑀲𑀸𑀫𑀸’’𑀢𑀺 𑀲𑀗𑁆𑀖𑀸 𑀕𑀡𑀸 𑀕𑀡𑀻𑀪𑀽𑀢𑀸 𑀉𑀬𑁆𑀬𑀸𑀦𑀸𑀪𑀺𑀫𑀼𑀔𑀸 𑀅𑀕𑀫𑀁𑀲𑀼. 𑀭𑀸𑀚𑀸 𑀉𑀧𑀭𑀺𑀧𑀸𑀲𑀸𑀤𑁂 𑀞𑀺𑀢𑁄 𑀢𑁂 𑀢𑀣𑀸 𑀕𑀘𑁆𑀙𑀫𑀸𑀦𑁂 𑀤𑀺𑀲𑁆𑀯𑀸 𑀉𑀧𑀝𑁆𑀞𑀸𑀓𑀁 𑀧𑀼𑀘𑁆𑀙𑀺 ‘‘𑀓𑀺𑀁 𑀏𑀢𑁂 𑀪𑀡𑁂 𑀦𑀸𑀕𑀭𑀸 𑀲𑀼𑀤𑁆𑀥𑀯𑀢𑁆𑀣𑀸 𑀲𑀼𑀤𑁆𑀥𑀼𑀢𑁆𑀢𑀭𑀸𑀲𑀗𑁆𑀕𑀸 𑀳𑀼𑀢𑁆𑀯𑀸 𑀉𑀬𑁆𑀬𑀸𑀦𑀸𑀪𑀺𑀫𑀼𑀔𑀸 𑀕𑀘𑁆𑀙𑀦𑁆𑀢𑀺, 𑀓𑀺𑀫𑁂𑀢𑁆𑀣 𑀲𑀫𑀚𑁆𑀚𑀁 𑀯𑀸 𑀦𑀸𑀝𑀓𑀁 𑀯𑀸 𑀅𑀢𑁆𑀣𑀻’’𑀢𑀺? 𑀦𑀢𑁆𑀣𑀺 𑀤𑁂𑀯, 𑀏𑀢𑁂 𑀢𑀸𑀧𑀲𑀸𑀦𑀁 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑁄𑀢𑀼𑀓𑀸𑀫𑀸 𑀕𑀘𑁆𑀙𑀦𑁆𑀢𑀻𑀢𑀺. 𑀢𑁂𑀦 𑀳𑀺 𑀪𑀡𑁂 𑀅𑀳𑀫𑁆𑀧𑀺 𑀕𑀘𑁆𑀙𑀺𑀲𑁆𑀲𑀸𑀫𑀺, 𑀫𑀬𑀸 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀽𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀢𑁂𑀲𑀁 𑀆𑀭𑁄𑀘𑁂𑀲𑀺 𑁋 ‘‘𑀭𑀸𑀚𑀸𑀧𑀺 𑀕𑀦𑁆𑀢𑀼𑀓𑀸𑀫𑁄, 𑀭𑀸𑀚𑀸𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸𑀯 𑀕𑀘𑁆𑀙𑀣𑀸’’𑀢𑀺. 𑀦𑀸𑀕𑀭𑀸 𑀧𑀓𑀢𑀺𑀬𑀸𑀧𑀺 𑀅𑀢𑁆𑀢𑀫𑀦𑀸 𑀢𑀁 𑀲𑀼𑀢𑁆𑀯𑀸 𑁋 ‘‘𑀅𑀫𑁆𑀳𑀸𑀓𑀁 𑀭𑀸𑀚𑀸 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄 𑀤𑀼𑀲𑁆𑀲𑀻𑀮𑁄, 𑀢𑀸𑀧𑀲𑀸 𑀥𑀫𑁆𑀫𑀺𑀓𑀸, 𑀢𑁂 𑀆𑀕𑀫𑁆𑀫 𑀭𑀸𑀚𑀸𑀧𑀺 𑀥𑀫𑁆𑀫𑀺𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀢𑁆𑀢𑀫𑀦𑀢𑀭𑀸 𑀅𑀳𑁂𑀲𑀼𑀁.

𑀭𑀸𑀚𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑁂𑀳𑀺 𑀧𑀭𑀺𑀯𑀸𑀭𑀺𑀢𑁄 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀢𑀸𑀧𑀲𑁂𑀳𑀺 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀢𑀸𑀧𑀲𑀸 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀧𑀭𑀺𑀓𑀣𑀸𑀬 𑀓𑀼𑀲𑀮𑀲𑁆𑀲𑁂𑀓𑀲𑁆𑀲 𑀢𑀸𑀧𑀲𑀲𑁆𑀲 ‘‘𑀭𑀜𑁆𑀜𑁄 𑀥𑀫𑁆𑀫𑀁 𑀓𑀣𑁂𑀳𑀻’’𑀢𑀺 𑀲𑀜𑁆𑀜𑀫𑀤𑀁𑀲𑀼, 𑀲𑁄 𑀢𑀸𑀧𑀲𑁄 ¶ 𑀧𑀭𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 𑀧𑀜𑁆𑀘𑀲𑀼 𑀯𑁂𑀭𑁂𑀲𑀼 𑀆𑀤𑀻𑀦𑀯𑀁 𑀧𑀜𑁆𑀘𑀲𑀼 𑀘 𑀲𑀻𑀮𑁂𑀲𑀼 𑀆𑀦𑀺𑀲𑀁𑀲𑀁 𑀓𑀣𑁂𑀦𑁆𑀢𑁄 𑁋

‘‘𑀧𑀸𑀡𑁄 ¶ 𑀦 𑀳𑀦𑁆𑀢𑀩𑁆𑀩𑁄, 𑀅𑀤𑀺𑀦𑁆𑀦𑀁 𑀦𑀸𑀤𑀸𑀢𑀩𑁆𑀩𑀁, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄 𑀦 𑀘𑀭𑀺𑀢𑀩𑁆𑀩𑁄, 𑀫𑀼𑀲𑀸 𑀦 𑀪𑀸𑀲𑀺𑀢𑀩𑁆𑀩𑀸, 𑀫𑀚𑁆𑀚𑀁 𑀦 𑀧𑀸𑀢𑀩𑁆𑀩𑀁, 𑀧𑀸𑀡𑀸𑀢𑀺𑀧𑀸𑀢𑁄 𑀦𑀸𑀫 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓𑁄 𑀳𑁄𑀢𑀺 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀲𑀁𑀯𑀢𑁆𑀢𑀦𑀺𑀓𑁄 𑀧𑁂𑀢𑁆𑀢𑀺𑀯𑀺𑀲𑀬𑀲𑀁𑀯𑀢𑁆𑀢𑀦𑀺𑀓𑁄, 𑀢𑀣𑀸 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀦𑀺. 𑀧𑀸𑀡𑀸𑀢𑀺𑀧𑀸𑀢𑁄 𑀦𑀺𑀭𑀬𑁂 𑀧𑀘𑁆𑀘𑀺𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀢𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦 𑀅𑀧𑁆𑀧𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀓𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀁 ¶ 𑀅𑀧𑁆𑀧𑀪𑁄𑀕𑀲𑀁𑀯𑀢𑁆𑀢𑀦𑀺𑀓𑀁, 𑀫𑀺𑀘𑁆𑀙𑀸𑀘𑀸𑀭𑁄 𑀩𑀳𑀼𑀲𑀧𑀢𑁆𑀢𑀲𑀁𑀯𑀢𑁆𑀢𑀦𑀺𑀓𑁄, 𑀫𑀼𑀲𑀸𑀯𑀸𑀤𑁄 𑀅𑀪𑀽𑀢𑀩𑁆𑀪𑀓𑁆𑀔𑀸𑀦𑀲𑀁𑀯𑀢𑁆𑀢𑀦𑀺𑀓𑁄, 𑀫𑀚𑁆𑀚𑀧𑀸𑀦𑀁 𑀉𑀫𑁆𑀫𑀢𑁆𑀢𑀓𑀪𑀸𑀯𑀲𑀁𑀯𑀢𑁆𑀢𑀦𑀺𑀓’’𑀦𑁆𑀢𑀺 𑁋

𑀧𑀜𑁆𑀘𑀲𑀼 𑀯𑁂𑀭𑁂𑀲𑀼 𑀇𑀫𑀁 𑀆𑀤𑀻𑀦𑀯𑀁 𑀓𑀣𑁂𑀲𑀺.

𑀭𑀸𑀚𑀸 𑀧𑀓𑀢𑀺𑀬𑀸𑀧𑀺 𑀅𑀲𑁆𑀲𑀤𑁆𑀥𑁄 𑀅𑀧𑁆𑀧𑀲𑀦𑁆𑀦𑁄 𑀤𑀼𑀲𑁆𑀲𑀻𑀮𑁄, 𑀤𑀼𑀲𑁆𑀲𑀻𑀮𑀲𑁆𑀲 𑀘 𑀲𑀻𑀮𑀓𑀣𑀸 𑀦𑀸𑀫 𑀤𑀼𑀓𑁆𑀓𑀣𑀸, 𑀓𑀡𑁆𑀡𑁂 𑀲𑀽𑀮𑀧𑁆𑀧𑀯𑁂𑀲𑀦𑀁 𑀯𑀺𑀬 𑀳𑁄𑀢𑀺. 𑀢𑀲𑁆𑀫𑀸 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 ‘𑀏𑀢𑁂 𑀧𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’𑀢𑀺 𑀆𑀕𑀢𑁄, 𑀇𑀫𑁂 𑀧𑀦 𑀫𑀬𑁆𑀳𑀁 𑀆𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀁𑀬𑁂𑀯 𑀖𑀝𑁆𑀝𑁂𑀦𑁆𑀢𑀸 𑀯𑀺𑀚𑁆𑀛𑀦𑁆𑀢𑀸 𑀧𑀭𑀺𑀲𑀫𑀚𑁆𑀛𑁂 𑀓𑀣𑁂𑀦𑁆𑀢𑀺, 𑀓𑀭𑀺𑀲𑁆𑀲𑀸𑀫𑀺 𑀦𑁂𑀲𑀁 𑀓𑀸𑀢𑁆𑀢𑀩𑁆𑀩’’𑀦𑁆𑀢𑀺. 𑀲𑁄 𑀥𑀫𑁆𑀫𑀓𑀣𑀸𑀧𑀭𑀺𑀬𑁄𑀲𑀸𑀦𑁂 ‘‘𑀆𑀘𑀭𑀺𑀬𑀸 𑀲𑁆𑀯𑁂 𑀫𑀬𑁆𑀳𑀁 𑀕𑁂𑀳𑁂 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀦𑀺𑀫𑀦𑁆𑀢𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀲𑁄 𑀤𑀼𑀢𑀺𑀬𑀤𑀺𑀯𑀲𑁂 𑀫𑀳𑀦𑁆𑀢𑁂 𑀫𑀳𑀦𑁆𑀢𑁂 𑀓𑁄𑀴𑀼𑀫𑁆𑀩𑁂 𑀆𑀳𑀭𑀸𑀧𑁂𑀢𑁆𑀯𑀸 𑀕𑀽𑀣𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸 𑀓𑀤𑀮𑀺𑀧𑀢𑁆𑀢𑁂𑀳𑀺 𑀦𑁂𑀲𑀁 𑀫𑀼𑀔𑀸𑀦𑀺 𑀩𑀦𑁆𑀥𑀸𑀧𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀞𑀧𑀸𑀧𑁂𑀲𑀺, 𑀧𑀼𑀦 𑀩𑀳𑀮𑀫𑀥𑀼𑀓𑀢𑁂𑀮𑀦𑀸𑀕𑀩𑀮𑀧𑀺𑀘𑁆𑀙𑀺𑀮𑁆𑀮𑀸𑀤𑀻𑀦𑀁 𑀓𑀽𑀝𑁂 𑀧𑀽𑀭𑁂𑀢𑁆𑀯𑀸 𑀦𑀺𑀲𑁆𑀲𑁂𑀡𑀺𑀫𑀢𑁆𑀣𑀓𑁂 𑀞𑀧𑀸𑀧𑁂𑀲𑀺, 𑀢𑀢𑁆𑀣𑁂𑀯 𑀘 𑀫𑀳𑀸𑀫𑀮𑁆𑀮𑁂 𑀩𑀤𑁆𑀥𑀓𑀘𑁆𑀙𑁂 𑀳𑀢𑁆𑀣𑁂𑀳𑀺 𑀫𑀼𑀕𑁆𑀕𑀭𑁂 𑀕𑀸𑀳𑀸𑀧𑁂𑀢𑁆𑀯𑀸 𑀞𑀧𑁂𑀢𑁆𑀯𑀸 𑀆𑀳 ‘‘𑀓𑀽𑀝𑀢𑀸𑀧𑀲𑀸 𑀅𑀢𑀺𑀯𑀺𑀬 𑀫𑀁 𑀯𑀺𑀳𑁂𑀞𑀬𑀺𑀁𑀲𑀼, 𑀢𑁂𑀲𑀁 𑀧𑀸𑀲𑀸𑀤𑀢𑁄 𑀑𑀢𑀭𑀡𑀓𑀸𑀮𑁂 ¶ 𑀓𑀽𑀝𑁂𑀳𑀺 𑀧𑀺𑀘𑁆𑀙𑀺𑀮𑁆𑀮𑀁 𑀲𑁄𑀧𑀸𑀦𑀫𑀢𑁆𑀣𑀓𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀻𑀲𑁂 𑀫𑀼𑀕𑁆𑀕𑀭𑁂𑀳𑀺 𑀧𑁄𑀣𑁂𑀢𑁆𑀯𑀸 𑀕𑀮𑁂 𑀕𑀳𑁂𑀢𑁆𑀯𑀸 𑀲𑁄𑀧𑀸𑀦𑁂 𑀔𑀺𑀧𑀣𑀸’’𑀢𑀺. 𑀲𑁄𑀧𑀸𑀦𑀧𑀸𑀤𑀫𑀽𑀮𑁂 𑀧𑀦 𑀘𑀡𑁆𑀟𑁂 𑀓𑀼𑀓𑁆𑀓𑀼𑀭𑁂 𑀩𑀦𑁆𑀥𑀸𑀧𑁂𑀲𑀺.

𑀢𑀸𑀧𑀲𑀸𑀧𑀺 ‘‘𑀲𑁆𑀯𑁂 𑀭𑀸𑀚𑀕𑁂𑀳𑁂 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀑𑀯𑀤𑀺𑀁𑀲𑀼 𑁋 ‘‘𑀫𑀸𑀭𑀺𑀲𑀸 𑀭𑀸𑀚𑀕𑁂𑀳𑀁 𑀦𑀸𑀫 𑀲𑀸𑀲𑀗𑁆𑀓𑀁 𑀲𑀧𑁆𑀧𑀝𑀺𑀪𑀬𑀁, 𑀧𑀩𑁆𑀩𑀚𑀺𑀢𑁂𑀳𑀺 𑀦𑀸𑀫 𑀙𑀤𑁆𑀯𑀸𑀭𑀸𑀭𑀫𑁆𑀫𑀡𑁂 𑀲𑀜𑁆𑀜𑀢𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀤𑀺𑀝𑁆𑀞𑀤𑀺𑀝𑁆𑀞𑁂 𑀆𑀭𑀫𑁆𑀫𑀡𑁂 𑀦𑀺𑀫𑀺𑀢𑁆𑀢𑀁 𑀦 𑀕𑀳𑁂𑀢𑀩𑁆𑀩𑀁, 𑀘𑀓𑁆𑀔𑀼𑀤𑁆𑀯𑀸𑀭𑁂 𑀲𑀁𑀯𑀭𑁄 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀩𑁆𑀩𑁄’’𑀢𑀺.

𑀧𑀼𑀦𑀤𑀺𑀯𑀲𑁂 ¶ 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀯𑀸𑀓𑀘𑀻𑀭𑀁 𑀦𑀺𑀯𑀸𑀲𑁂𑀢𑁆𑀯𑀸 𑀅𑀚𑀺𑀦𑀘𑀫𑁆𑀫𑀁 𑀏𑀓𑀁𑀲𑀕𑀢𑀁 𑀓𑀢𑁆𑀯𑀸 𑀚𑀝𑀸𑀓𑀮𑀸𑀧𑀁 𑀲𑀡𑁆𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀸𑀪𑀸𑀚𑀦𑀁 𑀕𑀳𑁂𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀭𑀸𑀚𑀦𑀺𑀯𑁂𑀲𑀦𑀁 𑀅𑀪𑀺𑀭𑀼𑀴𑁆𑀳𑀸. 𑀭𑀸𑀚𑀸 𑀆𑀭𑀼𑀴𑁆𑀳𑀪𑀸𑀯𑀁 𑀜𑀢𑁆𑀯𑀸 𑀕𑀽𑀣𑀓𑁄𑀴𑀼𑀫𑁆𑀩𑀫𑀼𑀔𑀢𑁄 𑀓𑀤𑀮𑀺𑀧𑀢𑁆𑀢𑀁 𑀦𑀻𑀳𑀭𑀸𑀧𑁂𑀲𑀺. 𑀤𑀼𑀕𑁆𑀕𑀦𑁆𑀥𑁄 𑀢𑀸𑀧𑀲𑀸𑀦𑀁 𑀦𑀸𑀲𑀧𑀼𑀝𑀁 𑀧𑀳𑀭𑀺𑀢𑁆𑀯𑀸 𑀫𑀢𑁆𑀣𑀮𑀼𑀗𑁆𑀕𑀧𑀸𑀢𑀦𑀸𑀓𑀸𑀭𑀧𑀢𑁆𑀢𑁄 𑀅𑀳𑁄𑀲𑀺. 𑀫𑀳𑀸𑀢𑀸𑀧𑀲𑁄 𑀭𑀸𑀚𑀸𑀦𑀁 𑀑𑀮𑁄𑀓𑁂𑀲𑀺. 𑀭𑀸𑀚𑀸 𑁋 ‘‘𑀏𑀢𑁆𑀣 𑀪𑁄𑀦𑁆𑀢𑁄 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀦𑁆𑀢𑀼 𑀘𑁂𑀯 𑀳𑀭𑀦𑁆𑀢𑀼 𑀘, 𑀢𑀼𑀫𑁆𑀳𑀸𑀓𑀫𑁂𑀢𑀁 𑀅𑀦𑀼𑀘𑁆𑀙𑀯𑀺𑀓𑀁, 𑀳𑀺𑀬𑁆𑀬𑁄 𑀅𑀳𑀁 𑀢𑀼𑀫𑁆𑀳𑁂 𑀧𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀆𑀕𑀢𑁄, 𑀢𑀼𑀫𑁆𑀳𑁂 𑀧𑀦 𑀫𑀁𑀬𑁂𑀯 𑀖𑀝𑁆𑀝𑁂𑀦𑁆𑀢𑁄 𑀯𑀺𑀚𑁆𑀛𑀦𑁆𑀢𑀸 𑀧𑀭𑀺𑀲𑀫𑀚𑁆𑀛𑁂 𑀓𑀣𑀬𑀺𑀢𑁆𑀣 ¶ , 𑀢𑀼𑀫𑁆𑀳𑀸𑀓𑀫𑀺𑀤𑀁 𑀅𑀦𑀼𑀘𑁆𑀙𑀯𑀺𑀓𑀁, 𑀪𑀼𑀜𑁆𑀚𑀣𑀸’’𑀢𑀺 𑀫𑀳𑀸𑀢𑀸𑀧𑀲𑀲𑁆𑀲 𑀉𑀮𑀼𑀗𑁆𑀓𑁂𑀦 𑀕𑀽𑀣𑀁 𑀉𑀧𑀦𑀸𑀫𑁂𑀲𑀺. 𑀫𑀳𑀸𑀢𑀸𑀧𑀲𑁄 𑀥𑀻 𑀥𑀻𑀢𑀺 𑀯𑀤𑀦𑁆𑀢𑁄 𑀧𑀝𑀺𑀦𑀺𑀯𑀢𑁆𑀢𑀺. ‘‘𑀏𑀢𑁆𑀢𑀓𑁂𑀦𑁂𑀯 𑀕𑀘𑁆𑀙𑀺𑀲𑁆𑀲𑀣 𑀢𑀼𑀫𑁆𑀳𑁂’’𑀢𑀺 𑀲𑁄𑀧𑀸𑀦𑁂 𑀓𑀽𑀝𑁂𑀳𑀺 𑀧𑀺𑀘𑁆𑀙𑀺𑀮𑁆𑀮𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀫𑀮𑁆𑀮𑀸𑀦𑀁 𑀲𑀜𑁆𑀜𑀫𑀤𑀸𑀲𑀺. 𑀫𑀮𑁆𑀮𑀸 𑀫𑀼𑀕𑁆𑀕𑀭𑁂𑀳𑀺 𑀲𑀻𑀲𑀸𑀦𑀺 𑀧𑁄𑀣𑁂𑀢𑁆𑀯𑀸 𑀕𑀻𑀯𑀸𑀬 𑀕𑀳𑁂𑀢𑁆𑀯𑀸 𑀲𑁄𑀧𑀸𑀦𑁂 𑀔𑀺𑀧𑀺𑀁𑀲𑀼, 𑀏𑀓𑁄𑀧𑀺 𑀲𑁄𑀧𑀸𑀦𑁂 𑀧𑀢𑀺𑀝𑁆𑀞𑀸𑀢𑀼𑀁 𑀦𑀸𑀲𑀓𑁆𑀔𑀺 ¶ , 𑀧𑀯𑀝𑁆𑀝𑀫𑀸𑀦𑀸 𑀲𑁄𑀧𑀸𑀦𑀧𑀸𑀤𑀫𑀽𑀮𑀁𑀬𑁂𑀯 𑀧𑀸𑀧𑀼𑀡𑀺𑀁𑀲𑀼. 𑀲𑀫𑁆𑀧𑀢𑁆𑀢𑁂 𑀲𑀫𑁆𑀧𑀢𑁆𑀢𑁂 𑀘𑀡𑁆𑀟𑀓𑀼𑀓𑁆𑀓𑀼𑀭𑀸 𑀧𑀝𑀧𑀝𑀸𑀢𑀺 𑀮𑀼𑀜𑁆𑀘𑀫𑀸𑀦𑀸 𑀔𑀸𑀤𑀺𑀁𑀲𑀼. 𑀬𑁄𑀧𑀺 𑀦𑁂𑀲𑀁 𑀉𑀝𑁆𑀞𑀳𑀺𑀢𑁆𑀯𑀸 𑀧𑀮𑀸𑀬𑀢𑀺, 𑀲𑁄𑀧𑀺 𑀆𑀯𑀸𑀝𑁂 𑀧𑀢𑀢𑀺, 𑀢𑀢𑁆𑀭𑀸𑀧𑀺 𑀦𑀁 𑀓𑀼𑀓𑁆𑀓𑀼𑀭𑀸 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀔𑀸𑀤𑀦𑁆𑀢𑀺𑀬𑁂𑀯. 𑀇𑀢𑀺 𑀦𑁂𑀲𑀁 𑀓𑀼𑀓𑁆𑀓𑀼𑀭𑀸 𑀅𑀝𑁆𑀞𑀺𑀲𑀗𑁆𑀔𑀮𑀺𑀓𑀫𑁂𑀯 𑀅𑀯𑀲𑁂𑀲𑀬𑀺𑀁𑀲𑀼. 𑀏𑀯𑀁 𑀲𑁄 𑀭𑀸𑀚𑀸 𑀢𑀧𑀲𑀫𑁆𑀧𑀦𑁆𑀦𑁂 𑀧𑀜𑁆𑀘𑀲𑀢𑁂 𑀢𑀸𑀧𑀲𑁂 𑀏𑀓𑀤𑀺𑀯𑀲𑁂𑀦𑁂𑀯 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀺.

𑀅𑀣𑀲𑁆𑀲 𑀭𑀝𑁆𑀞𑁂 𑀤𑁂𑀯𑀢𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀼𑀦 𑀦𑀯𑀯𑀼𑀝𑁆𑀞𑀺𑀬𑁄 𑀧𑀸𑀢𑁂𑀲𑀼𑀁. 𑀢𑀲𑁆𑀲 𑀭𑀚𑁆𑀚𑀁 𑀲𑀝𑁆𑀞𑀺𑀬𑁄𑀚𑀦𑀼𑀩𑁆𑀩𑁂𑀥𑁂𑀦 𑀯𑀸𑀮𑀺𑀓𑀣𑀮𑁂𑀦 𑀅𑀯𑀘𑁆𑀙𑀸𑀤𑀺𑀬𑀺𑀢𑁆𑀣. 𑀢𑁂𑀦𑀸𑀳 𑀲𑀭𑀪𑀗𑁆𑀕𑁄 𑀩𑁄𑀥𑀺𑀲𑀢𑁆𑀢𑁄 𑁋

‘‘𑀬𑁄 𑀲𑀜𑁆𑀜𑀢𑁂 𑀧𑀩𑁆𑀩𑀚𑀺𑀢𑁂 𑀅𑀯𑀜𑁆𑀘𑀬𑀺,

𑀥𑀫𑁆𑀫𑀁 𑀪𑀡𑀦𑁆𑀢𑁂 𑀲𑀫𑀡𑁂 𑀅𑀤𑀽𑀲𑀓𑁂;

𑀢𑀁 𑀦𑀸𑀴𑀺𑀓𑁂𑀭𑀁 𑀲𑀼𑀦𑀔𑀸 𑀧𑀭𑀢𑁆𑀣,

𑀲𑀗𑁆𑀕𑀫𑁆𑀫 𑀔𑀸𑀤𑀦𑁆𑀢𑀺 𑀯𑀺𑀨𑀦𑁆𑀤𑀫𑀸𑀦’’𑀦𑁆𑀢𑀺. (𑀚𑀸. 𑁨.𑁧𑁭.𑁭𑁧);

𑀏𑀯𑀁 𑀓𑀸𑀮𑀺𑀗𑁆𑀕𑀸𑀭𑀜𑁆𑀜𑀲𑁆𑀲 𑀅𑀭𑀜𑁆𑀜𑀪𑀽𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀢𑀻𑀢𑁂 𑀧𑀦 𑀩𑀸𑀭𑀸𑀡𑀲𑀺𑀦𑀕𑀭𑁂 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀦𑀸𑀫 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀯𑀺𑀪𑀯𑀲𑁆𑀲 𑀲𑁂𑀝𑁆𑀞𑀺𑀦𑁄 𑀏𑀓𑀸 𑀥𑀻𑀢𑀸 𑀅𑀳𑁄𑀲𑀺 𑀤𑀲𑁆𑀲𑀦𑀻𑀬𑀸 𑀧𑀸𑀲𑀸𑀤𑀺𑀓𑀸. 𑀲𑀸 𑀭𑀽𑀧𑀪𑁄𑀕𑀓𑀼𑀮𑀲𑀫𑁆𑀧𑀢𑁆𑀢𑀺𑀲𑀫𑁆𑀧𑀦𑁆𑀦𑀢𑀸𑀬 𑀩𑀳𑀽𑀦𑀁 𑀧𑀢𑁆𑀣𑀦𑀻𑀬𑀸 𑀅𑀳𑁄𑀲𑀺. 𑀬𑁄 ¶ 𑀧𑀦𑀲𑁆𑀲𑀸 𑀯𑀸𑀭𑁂𑀬𑁆𑀬𑀢𑁆𑀣𑀸𑀬 𑀧𑀳𑀺𑀡𑀸𑀢𑀺, 𑀢𑀁 𑀢𑀁 𑀤𑀺𑀲𑁆𑀯𑀸𑀦𑀲𑁆𑀲 𑀚𑀸𑀢𑀺𑀬𑀁 𑀯𑀸 𑀳𑀢𑁆𑀣𑀧𑀸𑀤𑀸𑀤𑀻𑀲𑀼 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀤𑁄𑀲𑀁 𑀆𑀭𑁄𑀧𑁂𑀢𑁆𑀯𑀸 ‘‘𑀓𑁄 𑀏𑀲 𑀤𑀼𑀚𑁆𑀚𑀸𑀢𑁄 𑀤𑀼𑀲𑁆𑀲𑀡𑁆𑀞𑀺𑀢𑁄’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑁋 ‘‘𑀦𑀻𑀳𑀭𑀣 𑀦’’𑀦𑁆𑀢𑀺 𑀦𑀻𑀳𑀭𑀸𑀧𑁂𑀢𑁆𑀯𑀸 ‘‘𑀏𑀯𑀭𑀽𑀧𑀫𑁆𑀧𑀺 𑀦𑀸𑀫 𑀅𑀤𑁆𑀤𑀲𑀁, 𑀉𑀤𑀓𑀁 𑀆𑀳𑀭𑀣, 𑀅𑀓𑁆𑀔𑀻𑀦𑀺 𑀥𑁄𑀯𑀺𑀲𑁆𑀲𑀸𑀫𑀻’’𑀢𑀺 𑀅𑀓𑁆𑀔𑀻𑀦𑀺 𑀥𑁄𑀯𑀢𑀺. 𑀢𑀲𑁆𑀲𑀸 𑀤𑀺𑀝𑁆𑀞𑀁 𑀤𑀺𑀝𑁆𑀞𑀁 𑀯𑀺𑀧𑁆𑀧𑀓𑀸𑀭𑀁 𑀧𑀸𑀧𑁂𑀢𑁆𑀯𑀸 𑀦𑀻𑀳𑀭𑀸𑀧𑁂𑀢𑀻𑀢𑀺 ¶ 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀢𑁆𑀯𑁂𑀯 𑀲𑀗𑁆𑀔𑀸 𑀉𑀤𑀧𑀸𑀤𑀺, 𑀫𑀽𑀮𑀦𑀸𑀫𑀁 𑀅𑀦𑁆𑀢𑀭𑀥𑀸𑀬𑀺.

𑀲𑀸 ¶ 𑀏𑀓𑀤𑀺𑀯𑀲𑀁 𑀕𑀗𑁆𑀕𑀸𑀬 𑀉𑀤𑀓𑀓𑀻𑀴𑀁 𑀓𑀻𑀴𑀺𑀲𑁆𑀲𑀸𑀫𑀻𑀢𑀺 𑀢𑀺𑀢𑁆𑀣𑀁 𑀲𑀚𑁆𑀚𑀸𑀧𑁂𑀢𑁆𑀯𑀸 𑀧𑀳𑀽𑀢𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀲𑀓𑀝𑁂𑀲𑀼 𑀧𑀽𑀭𑀸𑀧𑁂𑀢𑁆𑀯𑀸 𑀩𑀳𑀽𑀦𑀺 𑀕𑀦𑁆𑀥𑀫𑀸𑀮𑀸𑀤𑀻𑀦𑀺 𑀆𑀤𑀸𑀬 𑀧𑀝𑀺𑀘𑁆𑀙𑀦𑁆𑀦𑀬𑀸𑀦𑀁 𑀆𑀭𑀼𑀬𑁆𑀳 𑀜𑀸𑀢𑀺𑀕𑀡𑀧𑀭𑀺𑀯𑀼𑀢𑀸 𑀕𑁂𑀳𑀫𑁆𑀳𑀸 𑀦𑀺𑀓𑁆𑀔𑀫𑀺. 𑀢𑁂𑀦 𑀘 𑀲𑀫𑀬𑁂𑀦 𑀫𑀳𑀸𑀧𑀼𑀭𑀺𑀲𑁄 𑀘𑀡𑁆𑀟𑀸𑀮𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄 𑀩𑀳𑀺𑀦𑀕𑀭𑁂 𑀘𑀫𑁆𑀫𑀕𑁂𑀳𑁂 𑀯𑀲𑀢𑀺, 𑀫𑀸𑀢𑀗𑁆𑀕𑁄𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄 𑀳𑀼𑀢𑁆𑀯𑀸 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀅𑀦𑁆𑀢𑁄𑀦𑀕𑀭𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀏𑀓𑀁 𑀦𑀻𑀮𑀧𑀺𑀮𑁄𑀢𑀺𑀓𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀳𑀢𑁆𑀣𑁂 𑀩𑀦𑁆𑀥𑀺𑀢𑁆𑀯𑀸 𑀏𑀓𑁂𑀦 𑀳𑀢𑁆𑀣𑁂𑀦 𑀧𑀘𑁆𑀙𑀺𑀁, 𑀏𑀓𑁂𑀦 𑀖𑀡𑁆𑀟𑀁 𑀕𑀳𑁂𑀢𑁆𑀯𑀸 ‘‘𑀉𑀲𑁆𑀲𑀭𑀣 𑀅𑀬𑁆𑀬𑀸, 𑀘𑀡𑁆𑀟𑀸𑀮𑁄𑀳’’𑀦𑁆𑀢𑀺 𑀚𑀸𑀦𑀸𑀧𑀦𑀢𑁆𑀣𑀁 𑀢𑀁 𑀯𑀸𑀤𑁂𑀦𑁆𑀢𑁄 𑀦𑀻𑀘𑀘𑀺𑀢𑁆𑀢𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀤𑀺𑀝𑁆𑀞𑀤𑀺𑀝𑁆𑀞𑁂 𑀫𑀦𑀼𑀲𑁆𑀲𑁂 𑀦𑀫𑀲𑁆𑀲𑀫𑀸𑀦𑁄 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀫𑀳𑀸𑀧𑀣𑀁 𑀧𑀝𑀺𑀧𑀚𑁆𑀚𑀺.

𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀖𑀡𑁆𑀟𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀸𑀡𑀺𑀅𑀦𑁆𑀢𑀭𑁂𑀦 𑀑𑀮𑁄𑀓𑁂𑀦𑁆𑀢𑀻 𑀤𑀽𑀭𑀢𑁄𑀯 𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀫𑁂𑀢’’𑀦𑁆𑀢𑀺 𑀧𑀼𑀘𑁆𑀙𑀺. 𑀫𑀸𑀢𑀗𑁆𑀕𑁄 𑀅𑀬𑁆𑀬𑁂𑀢𑀺. ‘‘𑀓𑀺𑀁 𑀯𑀢, 𑀪𑁄, 𑀅𑀓𑀼𑀲𑀮𑀁 𑀅𑀓𑀭𑀫𑁆𑀳, 𑀓𑀲𑁆𑀲𑀸𑀬𑀁 𑀦𑀺𑀲𑁆𑀲𑀦𑁆𑀤𑁄, 𑀯𑀺𑀦𑀸𑀲𑁄 𑀦𑀼 𑀔𑁄 𑀫𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁄, 𑀫𑀗𑁆𑀕𑀮𑀓𑀺𑀘𑁆𑀘𑁂𑀦 𑀦𑀸𑀫 𑀕𑀘𑁆𑀙𑀫𑀸𑀦𑀸 𑀘𑀡𑁆𑀟𑀸𑀮𑀁 𑀅𑀤𑁆𑀤𑀲’’𑀦𑁆𑀢𑀺 𑀲𑀭𑀻𑀭𑀁 𑀓𑀫𑁆𑀧𑁂𑀢𑁆𑀯𑀸 𑀚𑀺𑀕𑀼𑀘𑁆𑀙𑀫𑀸𑀦𑀸 𑀔𑁂𑀴𑀁 𑀧𑀸𑀢𑁂𑀢𑁆𑀯𑀸 𑀥𑀸𑀢𑀺𑀬𑁄 𑀆𑀳 𑁋 ‘‘𑀯𑁂𑀕𑁂𑀦 𑀉𑀤𑀓𑀁 𑀆𑀳𑀭𑀣, 𑀘𑀡𑁆𑀟𑀸𑀮𑁄 𑀤𑀺𑀝𑁆𑀞𑁄, 𑀅𑀓𑁆𑀔𑀻𑀦𑀺 𑀘𑁂𑀯 𑀦𑀸𑀫 ¶ 𑀕𑀳𑀺𑀢𑀫𑀼𑀔𑀜𑁆𑀘 𑀥𑁄𑀯𑀺𑀲𑁆𑀲𑀸𑀫𑀻’’𑀢𑀺 𑀥𑁄𑀯𑀺𑀢𑁆𑀯𑀸 𑀭𑀣𑀁 𑀦𑀺𑀯𑀢𑁆𑀢𑀸𑀧𑁂𑀢𑁆𑀯𑀸 𑀲𑀩𑁆𑀩𑀧𑀝𑀺𑀬𑀸𑀤𑀸𑀦𑀁 𑀕𑁂𑀳𑀁 𑀧𑁂𑀲𑁂𑀢𑁆𑀯𑀸 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺. 𑀲𑀼𑀭𑀸𑀲𑁄𑀡𑁆𑀟𑀸𑀤𑀬𑁄 𑀘𑁂𑀯 𑀢𑀲𑁆𑀲𑀸 𑀉𑀧𑀝𑁆𑀞𑀸𑀓𑀫𑀦𑀼𑀲𑁆𑀲𑀸 𑀘 ‘‘𑀓𑀼𑀳𑀺𑀁, 𑀪𑁄 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸, 𑀇𑀫𑀸𑀬𑀧𑀺 𑀯𑁂𑀮𑀸𑀬 𑀦𑀸𑀕𑀘𑁆𑀙𑀢𑀻’’𑀢𑀺 𑀧𑀼𑀘𑁆𑀙𑀦𑁆𑀢𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑁋 ‘‘𑀫𑀳𑀦𑁆𑀢𑀁 𑀯𑀢, 𑀪𑁄, 𑀲𑀼𑀭𑀸𑀫𑀁𑀲𑀕𑀦𑁆𑀥𑀫𑀸𑀮𑀸𑀤𑀺𑀲𑀓𑁆𑀓𑀸𑀭𑀁 𑀘𑀡𑁆𑀟𑀸𑀮𑀁 𑀦𑀺𑀲𑁆𑀲𑀸𑀬 𑀅𑀦𑀼𑀪𑀯𑀺𑀢𑀼𑀁 𑀦 𑀮𑀪𑀺𑀫𑁆𑀳, 𑀕𑀡𑁆𑀳𑀣 𑀘𑀡𑁆𑀟𑀸𑀮’’𑀦𑁆𑀢𑀺 𑀕𑀢𑀝𑁆𑀞𑀸𑀦𑀁 𑀕𑀯𑁂𑀲𑀺𑀢𑁆𑀯𑀸 𑀦𑀺𑀭𑀸𑀧𑀭𑀸𑀥𑀁 𑀫𑀸𑀢𑀗𑁆𑀕𑀧𑀡𑁆𑀟𑀺𑀢𑀁 𑀢𑀚𑁆𑀚𑀺𑀢𑁆𑀯𑀸 𑁋 ‘‘𑀅𑀭𑁂 𑀫𑀸𑀢𑀗𑁆𑀕 𑀢𑀁 𑀦𑀺𑀲𑁆𑀲𑀸𑀬 𑀇𑀤𑀜𑁆𑀘𑀺𑀤𑀜𑁆𑀘 𑀲𑀓𑁆𑀓𑀸𑀭𑀁 𑀅𑀦𑀼𑀪𑀯𑀺𑀢𑀼𑀁 𑀦 𑀮𑀪𑀺𑀫𑁆𑀳𑀸’’𑀢𑀺 𑀓𑁂𑀲𑁂𑀲𑀼 ¶ 𑀕𑀳𑁂𑀢𑁆𑀯𑀸 𑀪𑀽𑀫𑀺𑀬𑀁 𑀧𑀸𑀢𑁂𑀢𑁆𑀯𑀸 𑀚𑀸𑀡𑀼𑀓𑀧𑁆𑀧𑀭𑀧𑀸𑀲𑀸𑀡𑀸𑀤𑀻𑀳𑀺 𑀓𑁄𑀝𑁆𑀝𑁂𑀢𑁆𑀯𑀸 𑀫𑀢𑁄𑀢𑀺 𑀲𑀜𑁆𑀜𑀸𑀬 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀓𑀟𑁆𑀠𑀦𑁆𑀢𑀸 𑀲𑀗𑁆𑀓𑀸𑀭𑀓𑀽𑀝𑁂 𑀙𑀟𑁆𑀟𑁂𑀲𑀼𑀁.

𑀫𑀳𑀸𑀧𑀼𑀭𑀺𑀲𑁄 𑀲𑀜𑁆𑀜𑀁 𑀧𑀝𑀺𑀮𑀪𑀺𑀢𑁆𑀯𑀸 𑀳𑀢𑁆𑀣𑀧𑀸𑀤𑁂 𑀧𑀭𑀸𑀫𑀲𑀺𑀢𑁆𑀯𑀸 𑁋 ‘‘𑀇𑀤𑀁 𑀤𑀼𑀓𑁆𑀔𑀁 𑀓𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑁋 ‘‘𑀦 𑀅𑀜𑁆𑀜𑀁 𑀓𑀜𑁆𑀘𑀺, 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀜𑀢𑁆𑀯𑀸 ‘‘𑀲𑀘𑀸𑀳𑀁 𑀧𑀼𑀭𑀺𑀲𑁄, 𑀧𑀸𑀤𑁂𑀲𑀼 𑀦𑀁 𑀦𑀺𑀧𑀸𑀢𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀯𑁂𑀥𑀫𑀸𑀦𑁄 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀓𑀼𑀮𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑁋 ‘‘𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀁 𑀮𑀪𑀦𑁆𑀢𑁄 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀺, 𑀅𑀮𑀪𑀦𑁆𑀢𑀲𑁆𑀲 𑀏𑀢𑁆𑀣𑁂𑀯 𑀫𑀭𑀡’’𑀦𑁆𑀢𑀺 𑀕𑁂𑀳𑀗𑁆𑀕𑀡𑁂 𑀦𑀺𑀧𑀚𑁆𑀚𑀺. 𑀢𑁂𑀦 𑀘 𑀲𑀫𑀬𑁂𑀦 𑀚𑀫𑁆𑀩𑀼𑀤𑀻𑀧𑁂 𑀅𑀬𑀁 𑀥𑀫𑁆𑀫𑀢𑀸 𑀳𑁄𑀢𑀺 𑁋 𑀬𑀲𑁆𑀲 𑀘𑀡𑁆𑀟𑀸𑀮𑁄 𑀓𑀼𑀚𑁆𑀛𑀺𑀢𑁆𑀯𑀸 𑀕𑀩𑁆𑀪𑀤𑁆𑀯𑀸𑀭𑁂 ¶ 𑀦𑀺𑀧𑀦𑁆𑀦𑁄 𑀫𑀭𑀢𑀺, 𑀬𑁂 𑀘 𑀢𑀲𑁆𑀫𑀺𑀁 𑀕𑀩𑁆𑀪𑁂 𑀯𑀲𑀦𑁆𑀢𑀺, 𑀲𑀩𑁆𑀩𑁂 𑀘𑀡𑁆𑀟𑀸𑀮𑀸 𑀳𑁄𑀦𑁆𑀢𑀺. 𑀕𑁂𑀳𑀫𑀚𑁆𑀛𑀫𑁆𑀳𑀺 𑀫𑀢𑁂 𑀲𑀩𑁆𑀩𑁂 𑀕𑁂𑀳𑀯𑀸𑀲𑀺𑀦𑁄, 𑀤𑁆𑀯𑀸𑀭𑀫𑁆𑀳𑀺 𑀫𑀢𑁂 𑀉𑀪𑀢𑁄 𑀅𑀦𑀦𑁆𑀢𑀭𑀕𑁂𑀳𑀯𑀸𑀲𑀺𑀓𑀸, 𑀅𑀗𑁆𑀕𑀡𑀫𑁆𑀳𑀺 𑀫𑀢𑁂 𑀇𑀢𑁄 𑀲𑀢𑁆𑀢 𑀇𑀢𑁄 𑀲𑀢𑁆𑀢𑀸𑀢𑀺 𑀘𑀼𑀤𑁆𑀤𑀲𑀕𑁂𑀳𑀯𑀸𑀲𑀺𑀦𑁄 𑀲𑀩𑁆𑀩𑁂 𑀘𑀡𑁆𑀟𑀸𑀮𑀸 𑀳𑁄𑀦𑁆𑀢𑀻𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀅𑀗𑁆𑀕𑀡𑁂 𑀦𑀺𑀧𑀚𑁆𑀚𑀺.

𑀲𑁂𑀝𑁆𑀞𑀺𑀲𑁆𑀲 𑀆𑀭𑁄𑀘𑁂𑀲𑀼𑀁 𑁋 ‘‘𑀫𑀸𑀢𑀗𑁆𑀕𑁄 𑀢𑁂 𑀲𑀸𑀫𑀺 𑀕𑁂𑀳𑀗𑁆𑀕𑀡𑁂 𑀧𑀢𑀺𑀢𑁄’’𑀢𑀺 ¶ 𑀕𑀘𑁆𑀙𑀣 𑀪𑀡𑁂, 𑀓𑀺𑀁 𑀓𑀸𑀭𑀡𑀸𑀢𑀺 𑀯𑀢𑁆𑀯𑀸 𑀏𑀓𑀫𑀸𑀲𑀓𑀁 𑀤𑀢𑁆𑀯𑀸 𑀉𑀝𑁆𑀞𑀸𑀧𑁂𑀣𑀸𑀢𑀺. 𑀢𑁂 𑀕𑀦𑁆𑀢𑁆𑀯𑀸 ‘‘𑀇𑀫𑀁 𑀓𑀺𑀭 𑀫𑀸𑀲𑀓𑀁 𑀕𑀳𑁂𑀢𑁆𑀯𑀸 𑀉𑀝𑁆𑀞𑀳𑀸’’𑀢𑀺 𑀯𑀤𑀺𑀁𑀲𑀼. 𑀲𑁄 𑁋 ‘‘𑀦𑀸𑀳𑀁 𑀫𑀸𑀲𑀓𑀢𑁆𑀣𑀸𑀬 𑀦𑀺𑀧𑀦𑁆𑀦𑁄, 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀲𑁆𑀯𑀸𑀳𑀁 𑀦𑀺𑀧𑀦𑁆𑀦𑁄’’𑀢𑀺 𑀆𑀳. 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀓𑁄 𑀤𑁄𑀲𑁄𑀢𑀺? 𑀓𑀺𑀁 𑀢𑀲𑁆𑀲𑀸 𑀤𑁄𑀲𑀁 𑀦 𑀧𑀲𑁆𑀲𑀣, 𑀦𑀺𑀭𑀧𑀭𑀸𑀥𑁄 𑀅𑀳𑀁 𑀢𑀲𑁆𑀲𑀸 𑀫𑀦𑀼𑀲𑁆𑀲𑁂𑀳𑀺 𑀩𑁆𑀬𑀲𑀦𑀁 𑀧𑀸𑀧𑀺𑀢𑁄, 𑀢𑀁 𑀮𑀪𑀦𑁆𑀢𑁄𑀯 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀺, 𑀅𑀮𑀪𑀦𑁆𑀢𑁄 𑀦 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻𑀢𑀺.

𑀢𑁂 𑀕𑀦𑁆𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀲𑁂𑀝𑁆𑀞𑀺 𑀥𑀻𑀢𑀼 𑀤𑁄𑀲𑀁 𑀜𑀢𑁆𑀯𑀸 ‘‘𑀕𑀘𑁆𑀙𑀣, 𑀏𑀓𑀁 𑀓𑀳𑀸𑀧𑀡𑀁 𑀤𑁂𑀣𑀸’’𑀢𑀺 𑀧𑁂𑀲𑁂𑀢𑀺. 𑀲𑁄 ‘‘𑀦 𑀇𑀘𑁆𑀙𑀸𑀫𑀺 𑀓𑀳𑀸𑀧𑀡𑀁, 𑀢𑀫𑁂𑀯 𑀇𑀘𑁆𑀙𑀸𑀫𑀻’’𑀢𑀺 𑀆𑀳. 𑀢𑀁 𑀲𑀼𑀢𑁆𑀯𑀸 𑀲𑁂𑀝𑁆𑀞𑀺 𑀘 𑀲𑁂𑀝𑁆𑀞𑀺𑀪𑀭𑀺𑀬𑀸 𑀘 𑁋 ‘‘𑀏𑀓𑀸𑀬𑁂𑀯 𑀦𑁄 𑀧𑀺𑀬𑀥𑀻𑀢𑀸, 𑀧𑀯𑁂𑀡𑀺𑀬𑀸 𑀖𑀝𑀓𑁄 𑀅𑀜𑁆𑀜𑁄 𑀤𑀸𑀭𑀓𑁄𑀧𑀺 𑀦𑀢𑁆𑀣𑀻’’𑀢𑀺 𑀲𑀁𑀯𑁂𑀕𑀧𑁆𑀧𑀢𑁆𑀢𑀸 𑁋 ‘‘𑀕𑀘𑁆𑀙𑀣 𑀢𑀸𑀢𑀸, 𑀓𑁄𑀘𑀺 𑀅𑀫𑁆𑀳𑀸𑀓𑀁 𑀅𑀲𑀳𑀦𑀓𑁄 𑀏𑀢𑀁 𑀚𑀻𑀯𑀺𑀢𑀸𑀧𑀺 𑀯𑁄𑀭𑁄𑀧𑁂𑀬𑁆𑀬, 𑀏𑀢𑀲𑁆𑀫𑀺𑀜𑁆𑀳𑀺 𑀫𑀢𑁂 𑀲𑀩𑁆𑀩𑁂 𑀫𑀬𑀁 𑀦𑀝𑁆𑀞𑀸 𑀳𑁄𑀫, 𑀆𑀭𑀓𑁆𑀔𑀫𑀲𑁆𑀲 𑀕𑀡𑁆𑀳𑀣𑀸’’𑀢𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀆𑀭𑀓𑁆𑀔𑀁 𑀲𑀁𑀯𑀺𑀥𑀸𑀬 𑀬𑀸𑀕𑀼𑀁 𑀧𑁂𑀲𑀬𑀺𑀁𑀲𑀼, 𑀪𑀢𑁆𑀢𑀁 𑀥𑀦𑀁 𑀧𑁂𑀲𑀬𑀺𑀁𑀲𑀼, 𑀏𑀯𑀁 𑀲𑁄 𑀲𑀩𑁆𑀩𑀁 𑀧𑀝𑀺𑀓𑁆𑀔𑀺𑀧𑀺. 𑀏𑀯𑀁 𑀏𑀓𑁄 𑀤𑀺𑀯𑀲𑁄 𑀕𑀢𑁄; 𑀤𑁆𑀯𑁂, 𑀢𑀬𑁄, 𑀘𑀢𑁆𑀢𑀸𑀭𑁄, 𑀧𑀜𑁆𑀘 𑀤𑀺𑀯𑀲𑀸 𑀕𑀢𑀸.

𑀢𑀢𑁄 ¶ 𑀲𑀢𑁆𑀢𑀲𑀢𑁆𑀢𑀕𑁂𑀳𑀯𑀸𑀲𑀺𑀓𑀸 𑀉𑀝𑁆𑀞𑀸𑀬 𑁋 ‘‘𑀦 𑀲𑀓𑁆𑀓𑁄𑀫 𑀫𑀬𑀁 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀘𑀡𑁆𑀟𑀸𑀮𑀸 𑀪𑀯𑀺𑀢𑀼𑀁, 𑀅𑀫𑁆𑀳𑁂 𑀫𑀸 𑀦𑀸𑀲𑁂𑀣, 𑀢𑀼𑀫𑁆𑀳𑀸𑀓𑀁 𑀤𑀸𑀭𑀺𑀓𑀁 𑀤𑀢𑁆𑀯𑀸 𑀏𑀢𑀁 𑀉𑀝𑁆𑀞𑀸𑀧𑁂𑀣𑀸’’𑀢𑀺 𑀆𑀳𑀁𑀲𑀼. 𑀢𑁂 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀲𑀢𑀲𑀳𑀲𑁆𑀲𑀫𑁆𑀧𑀺 𑀧𑀳𑀺𑀡𑀺𑀁𑀲𑀼, 𑀲𑁄 𑀧𑀝𑀺𑀓𑁆𑀔𑀺𑀧𑀢𑁂𑀯. 𑀏𑀯𑀁 𑀙 𑀤𑀺𑀯𑀲𑀸 𑀕𑀢𑀸. 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀉𑀪𑀢𑁄 𑀘𑀼𑀤𑁆𑀤𑀲𑀕𑁂𑀳𑀯𑀸𑀲𑀺𑀓𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑁋 ‘‘𑀦 𑀫𑀬𑀁 𑀘𑀡𑁆𑀟𑀸𑀮𑀸 𑀪𑀯𑀺𑀢𑀼𑀁 𑀲𑀓𑁆𑀓𑁄𑀫, 𑀢𑀼𑀫𑁆𑀳𑀸𑀓𑀁 𑀅𑀓𑀸𑀫𑀓𑀸𑀦𑀫𑁆𑀧𑀺 𑀫𑀬𑀁 𑀏𑀢𑀲𑁆𑀲 𑀤𑀸𑀭𑀺𑀓𑀁 𑀤𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼.

𑀫𑀸𑀢𑀸𑀧𑀺𑀢𑀭𑁄 𑀲𑁄𑀓𑀲𑀮𑁆𑀮𑀲𑀫𑀧𑁆𑀧𑀺𑀢𑀸 𑀯𑀺𑀲𑀜𑁆𑀜𑀻 𑀳𑀼𑀢𑁆𑀯𑀸 𑀲𑀬𑀦𑁂 𑀦𑀺𑀧𑀢𑀺𑀁𑀲𑀼. 𑀉𑀪𑀢𑁄 𑀘𑀼𑀤𑁆𑀤𑀲𑀕𑁂𑀳𑀯𑀸𑀲𑀺𑀦𑁄 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀲𑀼𑀧𑀼𑀧𑁆𑀨𑀺𑀢𑀓𑀺𑀁𑀲𑀼𑀓𑀲𑀸𑀔𑀁 ¶ 𑀉𑀘𑁆𑀙𑀺𑀦𑁆𑀤𑀦𑁆𑀢𑀸 𑀯𑀺𑀬 𑀢𑀲𑁆𑀲𑀸 𑀲𑀩𑁆𑀩𑀸𑀪𑀭𑀡𑀸𑀦𑀺 𑀑𑀫𑀼𑀜𑁆𑀘𑀺𑀢𑁆𑀯𑀸 𑀦𑀔𑁂𑀳𑀺 𑀲𑀻𑀫𑀦𑁆𑀢𑀁 𑀓𑀢𑁆𑀯𑀸 𑀓𑁂𑀲𑁂 𑀩𑀦𑁆𑀥𑀺𑀢𑁆𑀯𑀸 𑀦𑀻𑀮𑀲𑀸𑀝𑀓𑀁 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀳𑀢𑁆𑀣𑁂 ¶ 𑀦𑀻𑀮𑀧𑀺𑀮𑁄𑀢𑀺𑀓𑀔𑀡𑁆𑀟𑀁 𑀯𑁂𑀞𑁂𑀢𑁆𑀯𑀸 𑀓𑀡𑁆𑀡𑁂𑀲𑀼 𑀢𑀺𑀧𑀼𑀧𑀝𑁆𑀝𑀓𑁂 𑀧𑀺𑀴𑀦𑁆𑀥𑀸𑀧𑁂𑀢𑁆𑀯𑀸 𑀢𑀸𑀮𑀧𑀡𑁆𑀡𑀧𑀘𑁆𑀙𑀺𑀁 𑀤𑀢𑁆𑀯𑀸 𑀧𑀸𑀲𑀸𑀤𑀢𑁄 𑀑𑀢𑀸𑀭𑀸𑀧𑁂𑀢𑁆𑀯𑀸 𑀤𑁆𑀯𑀻𑀲𑀼 𑀩𑀸𑀳𑀸𑀲𑀼 𑀕𑀳𑁂𑀢𑁆𑀯𑀸 𑁋 ‘‘𑀢𑀯 𑀲𑀸𑀫𑀺𑀓𑀁 𑀕𑀳𑁂𑀢𑁆𑀯𑀸 𑀬𑀸𑀳𑀻’’𑀢𑀺 𑀫𑀳𑀸𑀧𑀼𑀭𑀺𑀲𑀲𑁆𑀲 𑀅𑀤𑀁𑀲𑀼.

𑀦𑀻𑀮𑀼𑀧𑁆𑀧𑀮𑀫𑁆𑀧𑀺 𑀅𑀢𑀺𑀪𑀸𑀭𑁄𑀢𑀺 𑀅𑀦𑀼𑀓𑁆𑀔𑀺𑀢𑁆𑀢𑀧𑀼𑀩𑁆𑀩𑀸 𑀲𑀼𑀔𑀼𑀫𑀸𑀮𑀤𑀸𑀭𑀺𑀓𑀸 ‘‘𑀉𑀝𑁆𑀞𑀸𑀳𑀺 𑀲𑀸𑀫𑀺, 𑀕𑀘𑁆𑀙𑀸𑀫𑀸’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑀦𑀺𑀧𑀦𑁆𑀦𑀓𑁄𑀯 𑀆𑀳 ‘‘𑀦𑀸𑀳𑀁 𑀉𑀝𑁆𑀞𑀳𑀸𑀫𑀻’’𑀢𑀺. 𑀅𑀣 𑀓𑀺𑀦𑁆𑀢𑀺 𑀯𑀤𑀸𑀫𑀻𑀢𑀺. ‘‘𑀉𑀝𑁆𑀞𑁂𑀳𑀺 𑀅𑀬𑁆𑀬 𑀫𑀸𑀢𑀗𑁆𑀕𑀸’’𑀢𑀺 𑀏𑀯𑀁 𑀫𑀁 𑀯𑀤𑀸𑀳𑀻𑀢𑀺. 𑀲𑀸 𑀢𑀣𑀸 𑀅𑀯𑁄𑀘. 𑀦 𑀢𑀼𑀬𑁆𑀳𑀁 𑀫𑀦𑀼𑀲𑁆𑀲𑀸 𑀉𑀝𑁆𑀞𑀸𑀦𑀲𑀫𑀢𑁆𑀣𑀁 𑀫𑀁 𑀅𑀓𑀁𑀲𑀼, 𑀩𑀸𑀳𑀸𑀬 𑀫𑀁 𑀕𑀳𑁂𑀢𑁆𑀯𑀸 𑀉𑀝𑁆𑀞𑀸𑀧𑁂𑀳𑀻𑀢𑀺. 𑀲𑀸 𑀢𑀣𑀸 𑀅𑀓𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀉𑀝𑁆𑀞𑀳𑀦𑁆𑀢𑁄 𑀯𑀺𑀬 𑀧𑀭𑀺𑀯𑀝𑁆𑀝𑁂𑀢𑁆𑀯𑀸 𑀪𑀽𑀫𑀺𑀬𑀁 𑀧𑀢𑀺𑀢𑁆𑀯𑀸 𑁋 ‘‘𑀦𑀸𑀲𑀺𑀢𑀁, 𑀪𑁄, 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀧𑀞𑀫𑀁 𑀫𑀦𑀼𑀲𑁆𑀲𑁂𑀳𑀺 𑀓𑁄𑀝𑁆𑀝𑀸𑀧𑁂𑀢𑁆𑀯𑀸, 𑀇𑀤𑀸𑀦𑀺 𑀲𑀬𑀁 𑀓𑁄𑀝𑁆𑀝𑁂𑀢𑀻’’𑀢𑀺 𑀯𑀺𑀭𑀯𑀺𑀢𑁆𑀣. 𑀲𑀸 𑀓𑀺𑀁 𑀓𑀭𑁄𑀫𑀺 𑀅𑀬𑁆𑀬𑀸𑀢𑀺? 𑀤𑁆𑀯𑀻𑀳𑀺 𑀳𑀢𑁆𑀣𑁂𑀳𑀺 𑀕𑀳𑁂𑀢𑁆𑀯𑀸 𑀉𑀝𑁆𑀞𑀸𑀧𑁂𑀳𑀻𑀢𑀺. 𑀲𑀸 𑀢𑀣𑀸 𑀉𑀝𑁆𑀞𑀸𑀧𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀕𑀘𑁆𑀙𑀸𑀫 𑀲𑀸𑀫𑀻𑀢𑀺. 𑀕𑀘𑁆𑀙𑀸 𑀦𑀸𑀫 𑀅𑀭𑀜𑁆𑀜𑁂 𑀳𑁄𑀦𑁆𑀢𑀺, 𑀫𑀬𑀁 𑀫𑀦𑀼𑀲𑁆𑀲𑀸, 𑀅𑀢𑀺𑀓𑁄𑀝𑁆𑀝𑀺𑀢𑁄𑀫𑁆𑀳𑀺 𑀢𑀼𑀬𑁆𑀳𑀁 𑀫𑀦𑀼𑀲𑁆𑀲𑁂𑀳𑀺, 𑀦 𑀲𑀓𑁆𑀓𑁄𑀫𑀺 𑀧𑀤𑀲𑀸 𑀕𑀦𑁆𑀢𑀼𑀁, 𑀧𑀺𑀝𑁆𑀞𑀺𑀬𑀸 𑀫𑀁 𑀦𑁂𑀳𑀻𑀢𑀺. 𑀲𑀸 𑀑𑀦𑀫𑀺𑀢𑁆𑀯𑀸 𑀧𑀺𑀝𑁆𑀞𑀺𑀁 𑀅𑀤𑀸𑀲𑀺. 𑀩𑁄𑀥𑀺𑀲𑀢𑁆𑀢𑁄 𑀅𑀪𑀺𑀭𑀼𑀳𑀺. 𑀓𑀼𑀳𑀺𑀁 𑀦𑁂𑀫𑀺 𑀲𑀸𑀫𑀻𑀢𑀺? 𑀩𑀳𑀺𑀦𑀕𑀭𑀁 𑀦𑁂𑀳𑀻𑀢𑀺. 𑀲𑀸 𑀧𑀸𑀘𑀻𑀦𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 𑁋 ‘‘𑀇𑀥 𑀢𑁂 𑀲𑀸𑀫𑀺 𑀯𑀲𑀦𑀝𑁆𑀞𑀸𑀦’’𑀦𑁆𑀢𑀺 𑀧𑀼𑀘𑁆𑀙𑀺. 𑀓𑀢𑀭𑀝𑁆𑀞𑀸𑀦𑀁 𑀏𑀢𑀦𑁆𑀢𑀺? 𑀧𑀸𑀘𑀻𑀦𑀤𑁆𑀯𑀸𑀭𑀁 𑀲𑀸𑀫𑀻𑀢𑀺. 𑀧𑀸𑀘𑀻𑀦𑀤𑁆𑀯𑀸𑀭𑁂 𑀘𑀡𑁆𑀟𑀸𑀮𑀧𑀼𑀢𑁆𑀢𑀸 𑀯𑀲𑀺𑀢𑀼𑀁 𑀦 𑀮𑀪𑀦𑁆𑀢𑀻𑀢𑀺 ¶ 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀅𑀦𑀸𑀘𑀺𑀓𑁆𑀔𑀺𑀢𑁆𑀯𑀸𑀯 𑀲𑀩𑁆𑀩𑀤𑁆𑀯𑀸𑀭𑀸𑀦𑀺 𑀆𑀳𑀺𑀡𑁆𑀟𑀸𑀧𑁂𑀲𑀺. 𑀓𑀲𑁆𑀫𑀸? 𑀪𑀯𑀕𑁆𑀕𑀧𑀢𑁆𑀢𑀫𑀲𑁆𑀲𑀸 ¶ 𑀫𑀸𑀦𑀁 𑀧𑀸𑀢𑁂𑀲𑁆𑀲𑀸𑀫𑀻𑀢𑀺. 𑀫𑀳𑀸𑀚𑀦𑁄 𑀉𑀓𑁆𑀓𑀼𑀝𑁆𑀞𑀺𑀫𑀓𑀸𑀲𑀺 𑁋 ‘‘𑀞𑀧𑁂𑀢𑁆𑀯𑀸 𑀢𑀼𑀫𑁆𑀳𑀸𑀤𑀺𑀲𑀁 𑀅𑀜𑁆𑀜𑁄 𑀏𑀢𑀺𑀲𑁆𑀲𑀸 𑀫𑀸𑀦𑀁 𑀪𑁂𑀤𑀓𑁄 𑀦𑀢𑁆𑀣𑀻’’𑀢𑀺.

𑀲𑀸 𑀧𑀘𑁆𑀙𑀺𑀫𑀤𑁆𑀯𑀸𑀭𑀁 𑀧𑀢𑁆𑀯𑀸 ‘‘𑀇𑀥 𑀢𑁂 𑀲𑀸𑀫𑀺 𑀯𑀲𑀦𑀝𑁆𑀞𑀸𑀦’’𑀦𑁆𑀢𑀺 𑀧𑀼𑀘𑁆𑀙𑀺. 𑀓𑀢𑀭𑀝𑁆𑀞𑀸𑀦𑀁 𑀏𑀢𑀦𑁆𑀢𑀺? 𑀧𑀘𑁆𑀙𑀺𑀫𑀤𑁆𑀯𑀸𑀭𑀁 𑀲𑀸𑀫𑀻𑀢𑀺. 𑀇𑀫𑀺𑀦𑀸 𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀫𑁆𑀫𑀕𑁂𑀳𑀁 𑀑𑀮𑁄𑀓𑁂𑀦𑁆𑀢𑀻 𑀕𑀘𑁆𑀙𑀸𑀢𑀺. 𑀲𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀆𑀳 ‘‘𑀇𑀤𑀁 𑀘𑀫𑁆𑀫𑀕𑁂𑀳𑀁 𑀢𑀼𑀫𑁆𑀳𑀸𑀓𑀁 𑀯𑀲𑀦𑀝𑁆𑀞𑀸𑀦𑀁 𑀲𑀸𑀫𑀻’’𑀢𑀺? 𑀆𑀫𑀸𑀢𑀺 𑀧𑀺𑀝𑁆𑀞𑀺𑀢𑁄 𑀑𑀢𑀭𑀺𑀢𑁆𑀯𑀸 𑀘𑀫𑁆𑀫𑀕𑁂𑀳𑀁 𑀧𑀸𑀯𑀺𑀲𑀺.

𑀢𑀢𑁆𑀣 𑀲𑀢𑁆𑀢𑀝𑁆𑀞𑀤𑀺𑀯𑀲𑁂 𑀯𑀲𑀦𑁆𑀢𑁄 𑀲𑀩𑁆𑀩𑀜𑁆𑀜𑀼𑀢𑀕𑀯𑁂𑀲𑀦𑀥𑀻𑀭𑁄 𑀏𑀢𑁆𑀢𑀓𑁂𑀲𑀼 𑀤𑀺𑀯𑀲𑁂𑀲𑀼 𑀦 𑀘 𑀚𑀸𑀢𑀺𑀲𑀫𑁆𑀪𑁂𑀤𑀫𑀓𑀸𑀲𑀺. ‘‘𑀫𑀳𑀸𑀓𑀼𑀮𑀲𑁆𑀲 𑀥𑀻𑀢𑀸 𑀲𑀘𑁂 𑀫𑀁 𑀦𑀺𑀲𑁆𑀲𑀸𑀬 𑀫𑀳𑀦𑁆𑀢𑀁 𑀬𑀲𑀁 𑀦 𑀧𑀸𑀧𑀼𑀡𑀸𑀢𑀺, 𑀦 𑀘𑀫𑁆𑀳𑀸𑀳𑀁 𑀘𑀢𑀼𑀯𑀻𑀲𑀢𑀺𑀬𑀸 𑀩𑀼𑀤𑁆𑀥𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑁄. 𑀏𑀢𑀺𑀲𑁆𑀲𑀸 𑀧𑀸𑀤𑀥𑁄𑀯𑀦𑀉𑀤𑀓𑁂𑀦 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀸𑀚𑀽𑀦𑀁 ¶ 𑀅𑀪𑀺𑀲𑁂𑀓𑀓𑀺𑀘𑁆𑀘𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀕𑀸𑀭𑀫𑀚𑁆𑀛𑁂𑀯𑀲𑀦𑁆𑀢𑁄 𑀦 𑀲𑀓𑁆𑀔𑀺𑀲𑁆𑀲𑀸𑀫𑀺, 𑀧𑀩𑁆𑀩𑀚𑀺𑀢𑁆𑀯𑀸 𑀧𑀦 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺. 𑀘𑀺𑀦𑁆𑀢𑁂𑀢𑁆𑀯𑀸 𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑁂 𑀫𑀬𑀁 𑀧𑀼𑀩𑁆𑀩𑁂 𑀏𑀓𑀘𑀭𑀸 𑀓𑀫𑁆𑀫𑀁 𑀓𑀢𑁆𑀯𑀸𑀧𑀺 𑀅𑀓𑀢𑁆𑀯𑀸𑀧𑀺 𑀲𑀓𑁆𑀓𑀸 𑀚𑀻𑀯𑀺𑀢𑀼𑀁, 𑀇𑀤𑀸𑀦𑀺 𑀧𑀦 𑀤𑀸𑀭𑀪𑀭𑀡𑀁 𑀧𑀝𑀺𑀧𑀦𑁆𑀦𑀫𑁆𑀳, 𑀓𑀫𑁆𑀫𑀁 𑀅𑀓𑀢𑁆𑀯𑀸 𑀦 𑀲𑀓𑁆𑀓𑀸 𑀚𑀻𑀯𑀺𑀢𑀼𑀁, 𑀢𑁆𑀯𑀁 𑀬𑀸𑀯𑀸𑀳𑀁 𑀆𑀕𑀘𑁆𑀙𑀸𑀫𑀺, 𑀢𑀸𑀯 𑀫𑀸 𑀉𑀓𑁆𑀓𑀡𑁆𑀞𑀺𑀢𑁆𑀣𑀸’’𑀢𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀲𑀼𑀲𑀸𑀦𑀸𑀤𑀻𑀲𑀼 𑀦𑀦𑁆𑀢𑀓𑀸𑀦𑀺 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁 𑀓𑀢𑁆𑀯𑀸 𑀲𑀫𑀡𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀏𑀓𑀘𑀭𑁄 𑀮𑀤𑁆𑀥𑀓𑀸𑀬𑀯𑀺𑀯𑁂𑀓𑁄 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀜𑁆𑀘 𑀅𑀪𑀺𑀜𑁆𑀜𑀸𑀬𑁄 𑀘 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀲𑀓𑁆𑀓𑀸 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀅𑀯𑀲𑁆𑀲𑀬𑁂𑀦 𑀫𑀬𑀸 𑀪𑀯𑀺𑀢𑀼’’𑀦𑁆𑀢𑀺 𑀩𑀸𑀭𑀸𑀡𑀲𑀺𑀅𑀪𑀺𑀫𑀼𑀔𑁄 𑀕𑀦𑁆𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀪𑀺𑀓𑁆𑀔𑀁 𑀘𑀭𑀫𑀸𑀦𑁄 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 ¶ 𑀕𑁂𑀳𑀸𑀪𑀺𑀫𑀼𑀔𑁄 𑀅𑀕𑀫𑀸𑀲𑀺.

𑀲𑀸 𑀢𑀁 𑀤𑁆𑀯𑀸𑀭𑁂 𑀞𑀺𑀢𑀁 𑀤𑀺𑀲𑁆𑀯𑀸 𑀅𑀲𑀜𑁆𑀚𑀸𑀦𑀦𑁆𑀢𑀻 𑁋 ‘‘𑀅𑀢𑀺𑀘𑁆𑀙𑀣, 𑀪𑀦𑁆𑀢𑁂, 𑀘𑀡𑁆𑀟𑀸𑀮𑀸𑀦𑀁 𑀯𑀲𑀦𑀝𑁆𑀞𑀸𑀦𑀫𑁂𑀢’’𑀦𑁆𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑀢𑀢𑁆𑀣𑁂𑀯 𑀅𑀝𑁆𑀞𑀸𑀲𑀺. 𑀲𑀸 𑀧𑀼𑀦𑀧𑁆𑀧𑀼𑀦𑀁 𑀑𑀮𑁄𑀓𑁂𑀦𑁆𑀢𑀻 𑀲𑀜𑁆𑀚𑀸𑀦𑀺𑀢𑁆𑀯𑀸 𑀳𑀢𑁆𑀣𑁂𑀳𑀺 𑀉𑀭𑀁 𑀧𑀳𑀭𑀺𑀢𑁆𑀯𑀸 𑀯𑀺𑀭𑀯𑀫𑀸𑀦𑀸 𑀧𑀸𑀤𑀫𑀽𑀮𑁂 𑀧𑀢𑀺𑀢𑁆𑀯𑀸 𑀆𑀳 𑁋 ‘‘𑀬𑀤𑀺 𑀢𑁂 𑀲𑀸𑀫𑀺 𑀏𑀤𑀺𑀲𑀁 𑀘𑀺𑀢𑁆𑀢𑀁 𑀅𑀢𑁆𑀣𑀺, 𑀓𑀲𑁆𑀫𑀸 𑀫𑀁 𑀫𑀳𑀢𑀸 𑀬𑀲𑀸 𑀧𑀭𑀺𑀳𑀸𑀧𑁂𑀢𑁆𑀯𑀸 𑀅𑀦𑀸𑀣𑀁 𑀅𑀓𑀸𑀲𑀻’’𑀢𑀺. 𑀦𑀸𑀦𑀧𑁆𑀧𑀓𑀸𑀭𑀁 𑀧𑀭𑀺𑀤𑁂𑀯𑀁 𑀧𑀭𑀺𑀤𑁂𑀯𑀺𑀢𑁆𑀯𑀸 𑀅𑀓𑁆𑀔𑀻𑀦𑀺 𑀧𑀼𑀜𑁆𑀙𑀫𑀸𑀦𑀸 𑀉𑀝𑁆𑀞𑀸𑀬 𑀪𑀺𑀓𑁆𑀔𑀸𑀪𑀸𑀚𑀦𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀕𑁂𑀳𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀁 𑀅𑀤𑀸𑀲𑀺. 𑀫𑀳𑀸𑀧𑀼𑀭𑀺𑀲𑁄 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀆𑀳 𑁋 ‘‘𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑁂 𑀫𑀸 𑀲𑁄𑀘𑀺 𑀫𑀸 𑀧𑀭𑀺𑀤𑁂𑀯𑀺, 𑀅𑀳𑀁 𑀢𑀼𑀬𑁆𑀳𑀁 𑀧𑀸𑀤𑀥𑁄𑀯𑀦𑀉𑀤𑀓𑁂𑀦 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀸𑀚𑀽𑀦𑀁 𑀅𑀪𑀺𑀲𑁂𑀓𑀓𑀺𑀘𑁆𑀘𑀁 𑀓𑀸𑀭𑁂𑀢𑀼𑀁 𑀲𑀫𑀢𑁆𑀣𑁄, 𑀢𑁆𑀯𑀁 𑀧𑀦 ¶ 𑀏𑀓𑀁 𑀫𑀫 𑀯𑀘𑀦𑀁 𑀓𑀭𑁄𑀳𑀺, 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 ‘𑀦 𑀫𑀬𑁆𑀳𑀁 𑀲𑀸𑀫𑀺𑀓𑁄 𑀘𑀡𑁆𑀟𑀸𑀮𑁄, 𑀫𑀳𑀸𑀩𑁆𑀭𑀳𑁆𑀫𑀸 𑀫𑀬𑁆𑀳𑀁 𑀲𑀸𑀫𑀺𑀓𑁄’𑀢𑀺 𑀉𑀕𑁆𑀖𑁄𑀲𑀬𑀫𑀸𑀦𑀸 𑀲𑀓𑀮𑀦𑀕𑀭𑀁 𑀘𑀭𑀸𑀳𑀻’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑁋 ‘‘𑀧𑀓𑀢𑀺𑀬𑀸𑀧𑀺 𑀅𑀳𑀁 𑀲𑀸𑀫𑀺 𑀫𑀼𑀔𑀤𑁄𑀲𑁂𑀦𑁂𑀯 𑀩𑁆𑀬𑀲𑀦𑀁 𑀧𑀢𑁆𑀢𑀸, 𑀦 𑀲𑀓𑁆𑀔𑀺𑀲𑁆𑀲𑀸𑀫𑁂𑀯𑀁 𑀯𑀢𑁆𑀢𑀼’’𑀦𑁆𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 𑁋 ‘‘𑀓𑀺𑀁 𑀧𑀦 𑀢𑀬𑀸 𑀫𑀬𑁆𑀳𑀁 𑀅𑀕𑀸𑀭𑁂 𑀯𑀲𑀦𑁆𑀢𑀲𑁆𑀲 𑀅𑀮𑀺𑀓𑀯𑀘𑀦𑀁 𑀲𑀼𑀢𑀧𑀼𑀩𑁆𑀩𑀁, 𑀅𑀳𑀁 𑀢𑀤𑀸𑀧𑀺 𑀅𑀮𑀺𑀓𑀁 𑀦 𑀪𑀡𑀸𑀫𑀺, 𑀇𑀤𑀸𑀦𑀺 𑀧𑀩𑁆𑀩𑀚𑀺𑀢𑁄 𑀓𑀺𑀁 𑀯𑀓𑁆𑀔𑀸𑀫𑀺, 𑀲𑀘𑁆𑀘𑀯𑀸𑀤𑀻 𑀧𑀼𑀭𑀺𑀲𑁄 𑀦𑀸𑀫𑀸𑀳’’𑀦𑁆𑀢𑀺 𑀯𑀢𑁆𑀯𑀸 𑁋 ‘‘𑀅𑀚𑁆𑀚 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻, 𑀢𑁆𑀯𑀁 ‘𑀇𑀢𑁄 𑀲𑀢𑁆𑀢𑀸𑀳𑀲𑁆𑀲𑀘𑁆𑀘𑀬𑁂𑀦 𑀉𑀧𑁄𑀲𑀣𑀤𑀺𑀯𑀲𑁂 𑀫𑀬𑁆𑀳𑀁 𑀲𑀸𑀫𑀺𑀓𑁄 𑀫𑀳𑀸𑀩𑁆𑀭𑀳𑁆𑀫𑀸 𑀘𑀦𑁆𑀤𑀫𑀡𑁆𑀟𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀢𑀻’𑀢𑀺 𑀲𑀓𑀮𑀦𑀕𑀭𑁂 𑀉𑀕𑁆𑀖𑁄𑀲𑁂𑀳𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑀸 ¶ 𑀲𑀤𑁆𑀤𑀳𑀺𑀢𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑀸 𑀲𑀽𑀭𑀸 𑀳𑀼𑀢𑁆𑀯𑀸 𑀲𑀸𑀬𑀁𑀧𑀸𑀢𑀁 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀢𑀣𑀸 𑀉𑀕𑁆𑀖𑁄𑀲𑁂𑀲𑀺. 𑀫𑀦𑀼𑀲𑁆𑀲𑀸 𑀧𑀸𑀡𑀺𑀦𑀸 𑀧𑀸𑀡𑀺𑀁 𑀧𑀳𑀭𑀦𑁆𑀢𑀸 𑁋 ‘‘𑀧𑀲𑁆𑀲𑀣, 𑀅𑀫𑁆𑀳𑀸𑀓𑀁 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀘𑀡𑁆𑀟𑀸𑀮𑀧𑀼𑀢𑁆𑀢𑀁 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀓𑀭𑁄𑀢𑀻’’𑀢𑀺 𑀳𑀲𑀦𑁆𑀢𑀸 𑀓𑁂𑀴𑀺𑀁 𑀓𑀭𑁄𑀦𑁆𑀢𑀺. 𑀲𑀸 𑀧𑀼𑀦𑀤𑀺𑀯𑀲𑁂𑀧𑀺 𑀢𑀣𑁂𑀯 𑀲𑀸𑀬𑀁𑀧𑀸𑀢𑀁 𑀧𑀯𑀺𑀲𑀺𑀢𑁆𑀯𑀸 𑁋 ‘‘𑀇𑀤𑀸𑀦𑀺 𑀙𑀸𑀳𑀘𑁆𑀘𑀬𑁂𑀦, 𑀧𑀜𑁆𑀘𑀸𑀳-𑀘𑀢𑀽𑀳-𑀢𑀻𑀳-𑀤𑁆𑀯𑀻𑀳-𑀏𑀓𑀸𑀳𑀘𑁆𑀘𑀬𑁂𑀦 𑀫𑀬𑁆𑀳𑀁 𑀲𑀸𑀫𑀺𑀓𑁄 𑀫𑀳𑀸𑀩𑁆𑀭𑀳𑁆𑀫𑀸 𑀘𑀦𑁆𑀤𑀫𑀡𑁆𑀟𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀉𑀕𑁆𑀖𑁄𑀲𑁂𑀲𑀺.

𑀩𑁆𑀭𑀸𑀳𑁆𑀫𑀡𑀸 ¶ 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀅𑀬𑀁 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀅𑀢𑀺𑀲𑀽𑀭𑀸 𑀳𑀼𑀢𑁆𑀯𑀸 𑀓𑀣𑁂𑀢𑀺, 𑀓𑀤𑀸𑀘𑀺 𑀏𑀯𑀁 𑀲𑀺𑀬𑀸, 𑀏𑀣 𑀫𑀬𑀁 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀯𑀲𑀦𑀝𑁆𑀞𑀸𑀦𑀁 𑀧𑀝𑀺𑀚𑀕𑁆𑀕𑀸𑀫𑀸’’𑀢𑀺 𑀘𑀫𑁆𑀫𑀕𑁂𑀳𑀲𑁆𑀲 𑀩𑀸𑀳𑀺𑀭𑀪𑀸𑀕𑀁 𑀲𑀫𑀦𑁆𑀢𑀸 𑀢𑀘𑁆𑀙𑀸𑀧𑁂𑀢𑁆𑀯𑀸 𑀯𑀸𑀮𑀺𑀓𑀁 𑀑𑀓𑀺𑀭𑀺𑀁𑀲𑀼. 𑀲𑀸𑀧𑀺 𑀉𑀧𑁄𑀲𑀣𑀤𑀺𑀯𑀲𑁂 𑀧𑀸𑀢𑁄𑀯 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 ‘‘𑀅𑀚𑁆𑀚 𑀫𑀬𑁆𑀳𑀁 𑀲𑀸𑀫𑀺𑀓𑁄 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀉𑀕𑁆𑀖𑁄𑀲𑁂𑀲𑀺. 𑀩𑁆𑀭𑀸𑀳𑁆𑀫𑀡𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀅𑀬𑀁 𑀪𑁄 𑀦 𑀤𑀽𑀭𑀁 𑀅𑀧𑀤𑀺𑀲𑁆𑀲𑀢𑀺, 𑀅𑀚𑁆𑀚 𑀓𑀺𑀭 𑀫𑀳𑀸𑀩𑁆𑀭𑀳𑁆𑀫𑀸 𑀆𑀕𑀫𑀺𑀲𑁆𑀲𑀢𑀺, 𑀯𑀲𑀦𑀝𑁆𑀞𑀸𑀦𑀁 𑀲𑀁𑀯𑀺𑀤𑀳𑀸𑀫𑀸’’𑀢𑀺 𑀘𑀫𑁆𑀫𑀕𑁂𑀳𑀁 𑀲𑀫𑀚𑁆𑀚𑀸𑀧𑁂𑀢𑁆𑀯𑀸 𑀳𑀭𑀺𑀢𑀽𑀧𑀮𑀺𑀢𑁆𑀢𑀁 𑀅𑀳𑀢𑀯𑀢𑁆𑀣𑁂𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀳𑀸𑀭𑀳𑀁 𑀧𑀮𑁆𑀮𑀗𑁆𑀓𑀁 𑀅𑀢𑁆𑀣𑀭𑀺𑀢𑁆𑀯𑀸 𑀉𑀧𑀭𑀺 𑀘𑁂𑀮𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀕𑀦𑁆𑀥𑀫𑀸𑀮𑀤𑀸𑀫𑀸𑀦𑀺 𑀑𑀲𑀸𑀭𑀬𑀺𑀁𑀲𑀼. 𑀢𑁂𑀲𑀁 𑀧𑀝𑀺𑀚𑀕𑁆𑀕𑀦𑁆𑀢𑀸𑀦𑀁𑀬𑁂𑀯 𑀲𑀽𑀭𑀺𑀬𑁄 𑀅𑀢𑁆𑀣𑀁 𑀕𑀢𑁄.

𑀫𑀳𑀸𑀧𑀼𑀭𑀺𑀲𑁄 𑀘𑀦𑁆𑀤𑁂 𑀉𑀕𑁆𑀕𑀢𑀫𑀢𑁆𑀢𑁂 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑁂𑀦 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀇𑀤𑁆𑀥𑀺𑀘𑀺𑀢𑁆𑀢𑁂𑀦 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑀁 𑀫𑀸𑀧𑁂𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀘𑀦𑁆𑀤𑀯𑀺𑀫𑀸𑀦𑀲𑁆𑀲 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 ¶ 𑀯𑀦𑀦𑁆𑀢𑀢𑁄 𑀅𑀩𑁆𑀪𑀼𑀲𑁆𑀲𑀓𑁆𑀓𑀫𑀸𑀦𑀁 𑀘𑀦𑁆𑀤𑀁 𑀪𑀺𑀦𑁆𑀤𑀺𑀢𑁆𑀯𑀸 𑀘𑀦𑁆𑀤𑀯𑀺𑀫𑀸𑀦𑀁 𑀑𑀳𑀸𑀬 𑀧𑀼𑀭𑀢𑁄 𑀳𑀼𑀢𑁆𑀯𑀸 ‘‘𑀫𑀳𑀸𑀚𑀦𑁄 𑀫𑀁 𑀧𑀲𑁆𑀲𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀫𑀳𑀸𑀚𑀦𑁄 𑀤𑀺𑀲𑁆𑀯𑀸 𑁋 ‘‘𑀲𑀘𑁆𑀘𑀁, 𑀪𑁄, 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀯𑀘𑀦𑀁, 𑀆𑀕𑀘𑁆𑀙𑀦𑁆𑀢𑀁 𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀧𑀽𑀚𑁂𑀲𑁆𑀲𑀸𑀫𑀸’’𑀢𑀺 𑀕𑀦𑁆𑀥𑀫𑀸𑀮𑀁 𑀆𑀤𑀸𑀬 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬 𑀖𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀫𑀳𑀸𑀧𑀼𑀭𑀺𑀲𑁄 𑀫𑀢𑁆𑀣𑀓𑀫𑀢𑁆𑀣𑀓𑁂𑀦 𑀲𑀢𑁆𑀢𑀯𑀸𑀭𑁂 𑀩𑀸𑀭𑀸𑀡𑀲𑀺𑀁 𑀅𑀦𑀼𑀧𑀭𑀺𑀕𑀦𑁆𑀢𑁆𑀯𑀸 𑀫𑀳𑀸𑀚𑀦𑁂𑀦 𑀤𑀺𑀝𑁆𑀞𑀪𑀸𑀯𑀁 𑀜𑀢𑁆𑀯𑀸 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀅𑀢𑁆𑀢𑀪𑀸𑀯𑀁 𑀯𑀺𑀚𑀳𑀺𑀢𑁆𑀯𑀸 𑀫𑀦𑀼𑀲𑁆𑀲𑀧𑁆𑀧𑀫𑀸𑀡𑀫𑁂𑀯 𑀫𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀘𑀫𑁆𑀫𑀕𑁂𑀳𑀁 𑀧𑀸𑀯𑀺𑀲𑀺. 𑀫𑀳𑀸𑀚𑀦𑁄 𑀤𑀺𑀲𑁆𑀯𑀸 𑁋 ‘‘𑀑𑀢𑀺𑀡𑁆𑀡𑁄 𑀦𑁄 𑀫𑀳𑀸𑀩𑁆𑀭𑀳𑁆𑀫𑀸, 𑀲𑀸𑀡𑀺𑀁 𑀆𑀳𑀭𑀣𑀸’’𑀢𑀺 𑀦𑀺𑀯𑁂𑀲𑀦𑀁 𑀫𑀳𑀸𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 ¶ 𑀞𑀺𑀢𑁄.

𑀫𑀳𑀸𑀧𑀼𑀭𑀺𑀲𑁄𑀧𑀺 𑀲𑀺𑀭𑀺𑀲𑀬𑀦𑀫𑀚𑁆𑀛𑁂 𑀦𑀺𑀲𑀻𑀤𑀺. 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸 𑀲𑀫𑀻𑀧𑁂 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀧𑀼𑀘𑁆𑀙𑀺 ¶ ‘‘𑀉𑀢𑀼𑀲𑀫𑀬𑁄 𑀢𑁂 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑁂’’𑀢𑀺. 𑀆𑀫 𑀅𑀬𑁆𑀬𑀸𑀢𑀺. 𑀫𑀬𑀸 𑀤𑀺𑀦𑁆𑀦𑀁 𑀧𑀼𑀢𑁆𑀢𑀁 𑀕𑀡𑁆𑀳𑀸𑀳𑀻𑀢𑀺 𑀅𑀗𑁆𑀕𑀼𑀝𑁆𑀞𑀓𑁂𑀦 𑀦𑀸𑀪𑀺𑀫𑀡𑁆𑀟𑀮𑀁 𑀨𑀼𑀲𑀺. 𑀢𑀲𑁆𑀲𑀸 𑀧𑀭𑀸𑀫𑀲𑀦𑁂𑀦𑁂𑀯 𑀕𑀩𑁆𑀪𑁄 𑀧𑀢𑀺𑀝𑁆𑀞𑀸𑀲𑀺. 𑀫𑀳𑀸𑀧𑀼𑀭𑀺𑀲𑁄 𑁋 ‘‘𑀏𑀢𑁆𑀢𑀸𑀯𑀢𑀸 𑀢𑁂 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑁂 𑀧𑀸𑀤𑀥𑁄𑀯𑀦𑀉𑀤𑀓𑀁 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀸𑀚𑀽𑀦𑀁 𑀅𑀪𑀺𑀲𑁂𑀓𑁄𑀤𑀓𑀁 𑀪𑀯𑀺𑀲𑁆𑀲𑀢𑀺, 𑀢𑁆𑀯𑀁 𑀢𑀺𑀝𑁆𑀞𑀸’’𑀢𑀺 𑀯𑀢𑁆𑀯𑀸 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑀁 𑀫𑀸𑀧𑁂𑀢𑁆𑀯𑀸 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀫𑀳𑀸𑀚𑀦𑀲𑁆𑀲 𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀘𑀡𑁆𑀟𑀫𑀡𑁆𑀟𑀮𑀫𑁂𑀯 𑀧𑀯𑀺𑀝𑁆𑀞𑁄. 𑀲𑀸 𑀢𑀢𑁄 𑀧𑀝𑁆𑀞𑀸𑀬 𑀩𑁆𑀭𑀳𑁆𑀫𑀧𑀚𑀸𑀧𑀢𑀻 𑀦𑀸𑀫 𑀚𑀸𑀢𑀸. 𑀧𑀸𑀤𑀥𑁄𑀯𑀦𑀉𑀤𑀓𑀁 𑀮𑀪𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺.

𑀩𑁆𑀭𑀸𑀳𑁆𑀫𑀡𑀸 𑁋 ‘‘𑀩𑁆𑀭𑀳𑁆𑀫𑀧𑀚𑀸𑀧𑀢𑀺𑀁 𑀅𑀦𑁆𑀢𑁄𑀦𑀕𑀭𑁂 𑀯𑀲𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀲𑀼𑀯𑀡𑁆𑀡𑀲𑀺𑀯𑀺𑀓𑀸𑀬 𑀆𑀭𑁄𑀧𑁂𑀢𑁆𑀯𑀸 𑀬𑀸𑀯 𑀲𑀢𑁆𑀢𑀫𑀓𑁄𑀝𑀺𑀬𑀸 𑀅𑀧𑀭𑀺𑀲𑀼𑀤𑁆𑀥𑀚𑀸𑀢𑀺𑀓𑀲𑁆𑀲 𑀲𑀺𑀯𑀺𑀓𑀁 𑀕𑀳𑁂𑀢𑀼𑀁 𑀦 𑀅𑀤𑀁𑀲𑀼. 𑀲𑁄𑀴𑀲 𑀚𑀸𑀢𑀺𑀫𑀦𑁆𑀢𑀩𑁆𑀭𑀸𑀳𑁆𑀫𑀡𑀸 𑀕𑀡𑁆𑀳𑀺𑀁𑀲𑀼. 𑀲𑁂𑀲𑀸 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑁋 ‘‘𑀦 𑀲𑀓𑁆𑀓𑀸, 𑀪𑁄, 𑀉𑀘𑁆𑀙𑀺𑀝𑁆𑀞𑀕𑁂𑀳𑁂 𑀩𑁆𑀭𑀳𑁆𑀫𑀧𑀚𑀸𑀧𑀢𑀺𑀬𑀸 𑀯𑀲𑀺𑀢𑀼𑀁, 𑀯𑀢𑁆𑀣𑀼𑀁 𑀕𑀳𑁂𑀢𑁆𑀯𑀸 𑀕𑁂𑀳𑀁 𑀓𑀭𑀺𑀲𑁆𑀲𑀸𑀫, 𑀬𑀸𑀯 𑀧𑀦 𑀢𑀁 𑀓𑀭𑀻𑀬𑀢𑀺, 𑀢𑀸𑀯 𑀫𑀡𑁆𑀟𑀧𑁂𑀯 𑀯𑀲𑀢𑀽’’𑀢𑀺 𑀫𑀡𑁆𑀟𑀧𑁂 𑀯𑀲𑀸𑀧𑁂𑀲𑀼𑀁. 𑀢𑀢𑁄 𑀧𑀝𑁆𑀞𑀸𑀬 𑀘𑀓𑁆𑀔𑀼𑀧𑀣𑁂 𑀞𑀢𑁆𑀯𑀸 𑀯𑀦𑁆𑀤𑀺𑀢𑀼𑀓𑀸𑀫𑀸 𑀓𑀳𑀸𑀧𑀡𑀁 𑀤𑀢𑁆𑀯𑀸 𑀯𑀦𑁆𑀤𑀺𑀢𑀼𑀁 𑀮𑀪𑀦𑁆𑀢𑀺, 𑀲𑀯𑀦𑀽𑀧𑀘𑀸𑀭𑁂 𑀯𑀦𑁆𑀤𑀺𑀢𑀼𑀓𑀸𑀫𑀸 𑀲𑀢𑀁 𑀤𑀢𑁆𑀯𑀸 𑀮𑀪𑀦𑁆𑀢𑀺, 𑀆𑀲𑀦𑁆𑀦𑁂 𑀧𑀓𑀢𑀺𑀓𑀣𑀁 𑀲𑀯𑀦𑀝𑁆𑀞𑀸𑀦𑁂 𑀯𑀦𑁆𑀤𑀺𑀢𑀼𑀓𑀸𑀫𑀸 𑀧𑀜𑁆𑀘𑀲𑀢𑀸𑀦𑀺 𑀤𑀢𑁆𑀯𑀸 𑀮𑀪𑀦𑁆𑀢𑀺, 𑀧𑀸𑀤𑀧𑀺𑀝𑁆𑀞𑀺𑀬𑀁 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀯𑀦𑁆𑀤𑀺𑀢𑀼𑀓𑀸𑀫𑀸 𑀲𑀳𑀲𑁆𑀲𑀁 𑀤𑀢𑁆𑀯𑀸 𑀮𑀪𑀦𑁆𑀢𑀺, 𑀧𑀸𑀤𑀥𑁄𑀯𑀦𑀉𑀤𑀓𑀁 𑀧𑀢𑁆𑀣𑀬𑀫𑀸𑀦𑀸 𑀤𑀲𑀲𑀳𑀲𑁆𑀲𑀸𑀦𑀺 𑀤𑀢𑁆𑀯𑀸 𑀮𑀪𑀦𑁆𑀢𑀺. 𑀩𑀳𑀺𑀦𑀕𑀭𑀢𑁄 𑀅𑀦𑁆𑀢𑁄𑀦𑀕𑀭𑁂 𑀬𑀸𑀯 𑀫𑀡𑁆𑀟𑀧𑀸 𑀆𑀕𑀘𑁆𑀙𑀦𑁆𑀢𑀺𑀬𑀸 𑀮𑀤𑁆𑀥𑀥𑀦𑀁𑀬𑁂𑀯 𑀓𑁄𑀝𑀺𑀲𑀢𑀫𑀢𑁆𑀢𑀁 𑀅𑀳𑁄𑀲𑀺.

𑀲𑀓𑀮𑀚𑀫𑁆𑀩𑀼𑀤𑀻𑀧𑁄 ¶ 𑀲𑀗𑁆𑀔𑀼𑀪𑀺, 𑀢𑀢𑁄 𑀲𑀩𑁆𑀩𑀭𑀸𑀚𑀸𑀦𑁄 ‘‘𑀩𑁆𑀭𑀳𑁆𑀫𑀧𑀚𑀸𑀧𑀢𑀺𑀬𑀸 𑀧𑀸𑀤𑀥𑁄𑀯𑀦𑁂𑀦 ¶ 𑀅𑀪𑀺𑀲𑁂𑀓𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀲𑀢𑀲𑀳𑀲𑁆𑀲𑀁 𑀧𑁂𑀲𑁂𑀢𑁆𑀯𑀸 𑀮𑀪𑀺𑀁𑀲𑀼. 𑀫𑀡𑁆𑀟𑀧𑁂 𑀯𑀲𑀦𑁆𑀢𑀺𑀬𑀸 𑀏𑀯 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺. 𑀫𑀳𑀸𑀧𑀼𑀭𑀺𑀲𑀁 𑀧𑀝𑀺𑀘𑁆𑀘 𑀮𑀤𑁆𑀥𑀓𑀼𑀫𑀸𑀭𑁄 𑀧𑀸𑀲𑀸𑀤𑀺𑀓𑁄 𑀅𑀳𑁄𑀲𑀺 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄. 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀧𑀼𑀢𑁆𑀢𑁄 𑀚𑀸𑀢𑁄𑀢𑀺 𑀲𑀓𑀮 𑀚𑀫𑁆𑀩𑀼𑀤𑀻𑀧𑁄 𑀏𑀓𑀓𑁄𑀮𑀸𑀳𑀮𑁄 𑀅𑀳𑁄𑀲𑀺. 𑀓𑀼𑀫𑀸𑀭𑀲𑁆𑀲 𑀔𑀻𑀭𑀫𑀡𑀺𑀫𑀽𑀮𑀁 𑀳𑁄𑀢𑀽𑀢𑀺 𑀢𑀢𑁄 𑀢𑀢𑁄 𑀆𑀕𑀢𑀥𑀦𑀁 𑀓𑁄𑀝𑀺𑀲𑀳𑀲𑁆𑀲𑀁 𑀅𑀳𑁄𑀲𑀺. 𑀏𑀢𑁆𑀢𑀸𑀯𑀢𑀸 𑀦𑀺𑀯𑁂𑀲𑀦𑀫𑁆𑀧𑀺 𑀦𑀺𑀝𑁆𑀞𑀺𑀢𑀁. 𑀓𑀼𑀫𑀸𑀭𑀲𑁆𑀲 𑀦𑀸𑀫𑀓𑀭𑀡𑀁 𑀓𑀭𑀺𑀲𑁆𑀲𑀸𑀫𑀸𑀢𑀺 𑀦𑀺𑀯𑁂𑀲𑀦𑀁 𑀲𑀚𑁆𑀚𑁂𑀢𑁆𑀯𑀸 𑀓𑀼𑀫𑀸𑀭𑀁 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀫𑀡𑁆𑀟𑀧𑁂 𑀚𑀸𑀢𑀢𑁆𑀢𑀸 𑀫𑀡𑁆𑀟𑀩𑁆𑀬𑁄𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼.

𑀓𑀼𑀫𑀸𑀭𑁄 𑀲𑀼𑀔𑁂𑀦 𑀲𑀁𑀯𑀟𑁆𑀠𑀫𑀸𑀦𑁄 𑀲𑀺𑀧𑁆𑀧𑀼𑀕𑁆𑀕𑀳𑀡𑀯𑀬𑀧𑀢𑁆𑀢𑁄𑀢𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀲𑀺𑀧𑁆𑀧𑀚𑀸𑀦𑀦𑀓𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀆𑀕𑀦𑁆𑀢𑁆𑀯𑀸 𑀲𑀺𑀧𑁆𑀧𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑀺. 𑀓𑀼𑀫𑀸𑀭𑁄 𑀫𑁂𑀥𑀸𑀯𑀻 𑀧𑀜𑁆𑀜𑀯𑀸 𑀲𑀼𑀢𑀁 𑀲𑀼𑀢𑀁 𑀫𑀼𑀢𑀁 𑀆𑀯𑀼𑀡𑀦𑁆𑀢𑁄 𑀯𑀺𑀬 ¶ 𑀕𑀡𑁆𑀳𑀸𑀢𑀺, 𑀕𑀳𑀺𑀢𑀕𑀳𑀺𑀢𑀁 𑀲𑀼𑀯𑀡𑁆𑀡𑀖𑀝𑁂 𑀧𑀓𑁆𑀔𑀺𑀢𑁆𑀢𑀢𑁂𑀮𑀁 𑀯𑀺𑀬 𑀢𑀺𑀝𑁆𑀞𑀢𑀺. 𑀬𑀸𑀯𑀢𑀸 𑀯𑀸𑀘𑀼𑀕𑁆𑀕𑀢𑀸 𑀧𑀭𑀺𑀬𑀢𑁆𑀢𑀺 𑀅𑀢𑁆𑀣𑀺, 𑀢𑁂𑀦 𑀅𑀦𑀼𑀕𑁆𑀕𑀳𑀺𑀢𑀸 𑀦𑀸𑀫 𑀦𑀸𑀳𑁄𑀲𑀺. 𑀩𑁆𑀭𑀸𑀳𑁆𑀫𑀡𑀸 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀘𑀭𑀦𑁆𑀢𑀺, 𑀲𑁄𑀧𑀺 𑀩𑁆𑀭𑀸𑀳𑁆𑀫𑀡𑀪𑀢𑁆𑀢𑁄 𑀅𑀳𑁄𑀲𑀺. 𑀕𑁂𑀳𑁂 𑀅𑀲𑀻𑀢𑀺𑀩𑁆𑀭𑀸𑀳𑁆𑀫𑀡𑀲𑀳𑀲𑁆𑀲𑀸𑀦𑀺 𑀦𑀺𑀘𑁆𑀘𑀪𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑀺. 𑀕𑁂𑀳𑀫𑁆𑀧𑀺𑀲𑁆𑀲 𑀲𑀢𑁆𑀢𑀤𑁆𑀯𑀸𑀭𑀓𑁄𑀝𑁆𑀞𑀓𑀁 𑀫𑀳𑀦𑁆𑀢𑀁 𑀅𑀳𑁄𑀲𑀺. 𑀕𑁂𑀳𑁂 𑀫𑀗𑁆𑀕𑀮𑀤𑀺𑀯𑀲𑁂 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀳𑀺 𑀧𑁂𑀲𑀺𑀢𑀥𑀦𑀁 𑀓𑁄𑀝𑀺𑀲𑀳𑀲𑁆𑀲𑀫𑀢𑁆𑀢𑀁 𑀅𑀳𑁄𑀲𑀺.

𑀩𑁄𑀥𑀺𑀲𑀢𑁆𑀢𑁄 𑀆𑀯𑀚𑁆𑀚𑁂𑀲𑀺 𑁋 ‘‘𑀧𑀫𑀢𑁆𑀢𑁄 𑀦𑀼 𑀔𑁄 𑀓𑀼𑀫𑀸𑀭𑁄 𑀅𑀧𑁆𑀧𑀫𑀢𑁆𑀢𑁄’’𑀢𑀺. 𑀅𑀣𑀲𑁆𑀲 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑁋 ‘‘𑀩𑁆𑀭𑀸𑀳𑁆𑀫𑀡𑀪𑀢𑁆𑀢𑁄 𑀚𑀸𑀢𑁄, 𑀬𑀢𑁆𑀣 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺, 𑀢𑀁 𑀦 𑀚𑀸𑀦𑀸𑀢𑀺, 𑀕𑀘𑁆𑀙𑀸𑀫𑀺 𑀦𑀁 𑀤𑀫𑁂𑀫𑀻’’𑀢𑀺 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀪𑀺𑀓𑁆𑀔𑀸𑀪𑀸𑀚𑀦𑀁 𑀕𑀳𑁂𑀢𑁆𑀯𑀸 𑁋 ‘‘𑀤𑁆𑀯𑀸𑀭𑀓𑁄𑀝𑁆𑀞𑀓𑀸 𑀅𑀢𑀺𑀲𑀫𑁆𑀩𑀸𑀥𑀸, 𑀦 𑀲𑀓𑁆𑀓𑀸 𑀓𑁄𑀝𑁆𑀞𑀓𑁂𑀦 𑀧𑀯𑀺𑀲𑀺𑀢𑀼’’𑀦𑁆𑀢𑀺 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀅𑀲𑀻𑀢𑀺𑀩𑁆𑀭𑀸𑀳𑁆𑀫𑀡𑀲𑀳𑀲𑁆𑀲𑀸𑀦𑀁 𑀪𑀼𑀜𑁆𑀚𑀦𑀝𑁆𑀞𑀸𑀦𑁂 𑀆𑀓𑀸𑀲𑀗𑁆𑀕𑀡𑁂 𑀑𑀢𑀭𑀺. 𑀫𑀡𑁆𑀟𑀩𑁆𑀬𑀓𑀼𑀫𑀸𑀭𑁄𑀧𑀺 ¶ 𑀲𑀼𑀯𑀡𑁆𑀡𑀓𑀝𑀘𑁆𑀙𑀼𑀁 𑀕𑀸𑀳𑀸𑀧𑁂𑀢𑁆𑀯𑀸 𑁋 ‘‘𑀇𑀥 𑀲𑀽𑀧𑀁 𑀤𑁂𑀣 𑀇𑀥 𑀑𑀤𑀦’’𑀦𑁆𑀢𑀺 𑀧𑀭𑀺𑀯𑀺𑀲𑀸𑀧𑁂𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑀁 𑀤𑀺𑀲𑁆𑀯𑀸 𑀤𑀡𑁆𑀟𑀓𑁂𑀦 𑀖𑀝𑁆𑀝𑀺𑀢𑀆𑀲𑀺𑀯𑀺𑀲𑁄 𑀯𑀺𑀬 𑀓𑀼𑀧𑀺𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀓𑀼𑀢𑁄 ¶ 𑀦𑀼 𑀆𑀕𑀘𑁆𑀙𑀲𑀺 𑀤𑀼𑀫𑁆𑀫𑀯𑀸𑀲𑀻,

𑀑𑀢𑀮𑁆𑀮𑀓𑁄 𑀧𑀁𑀲𑀼𑀧𑀺𑀲𑀸𑀘𑀓𑁄𑀯;

𑀲𑀗𑁆𑀓𑀸𑀭𑀘𑁄𑀴𑀁 𑀧𑀝𑀺𑀫𑀼𑀜𑁆𑀘 𑀓𑀡𑁆𑀞𑁂,

𑀓𑁄 𑀭𑁂 𑀢𑀼𑀯𑀁 𑀳𑁄𑀲𑀺 𑀅𑀤𑀓𑁆𑀔𑀺𑀡𑁂𑀬𑁆𑀬𑁄’’𑀢𑀺. (𑀚𑀸. 𑁧.𑁧𑁫.𑁧);

𑀅𑀣 𑀦𑀁 𑀫𑀳𑀸𑀲𑀢𑁆𑀢𑁄 𑀅𑀓𑀼𑀚𑁆𑀛𑀺𑀢𑁆𑀯𑀸𑀯 𑀑𑀯𑀤𑀦𑁆𑀢𑁄 𑀆𑀳 𑁋

‘‘𑀅𑀦𑁆𑀦𑀁 𑀢𑀯𑁂𑀤𑀁 𑀧𑀓𑀢𑀁 𑀬𑀲𑀲𑁆𑀲𑀺,

𑀢𑀁 𑀔𑀚𑁆𑀚𑀭𑁂 𑀪𑀼𑀜𑁆𑀚𑀭𑁂 𑀧𑀺𑀬𑁆𑀬𑀭𑁂 𑀘;

𑀚𑀸𑀦𑀸𑀲𑀺 𑀫𑀁 𑀢𑁆𑀯𑀁 𑀧𑀭𑀤𑀢𑁆𑀢𑀽𑀧𑀚𑀻𑀯𑀺𑀁,

𑀉𑀢𑁆𑀢𑀺𑀝𑁆𑀞 𑀧𑀺𑀡𑁆𑀟𑀁 𑀮𑀪𑀢𑀁 𑀲𑀧𑀸𑀓𑁄’’𑀢𑀺. (𑀚𑀸. 𑁧.𑁧𑁫.𑁨);

𑀲𑁄 𑀦𑀬𑀺𑀤𑀁 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀧𑀝𑀺𑀬𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋

‘‘𑀅𑀦𑁆𑀦𑀁 ¶ 𑀫𑀫𑁂𑀤𑀁 𑀧𑀓𑀢𑀁 𑀩𑁆𑀭𑀸𑀳𑁆𑀫𑀡𑀸𑀦𑀁,

𑀅𑀢𑁆𑀣𑀢𑁆𑀣𑀺𑀢𑀁 𑀲𑀤𑁆𑀤𑀳𑀢𑁄 𑀫𑀫𑁂𑀤𑀁;

𑀅𑀧𑁂𑀳𑀺 𑀏𑀢𑁆𑀢𑁄 𑀓𑀺𑀫𑀺𑀥𑀝𑁆𑀞𑀺𑀢𑁄𑀲𑀺,

𑀦 𑀫𑀸𑀤𑀺𑀲𑀸 𑀢𑀼𑀬𑁆𑀳𑀁 𑀤𑀤𑀦𑁆𑀢𑀺 𑀚𑀫𑁆𑀫𑀸’’𑀢𑀺. (𑀚𑀸. 𑁧.𑁧𑁫.𑁩);

𑀅𑀣 𑀩𑁄𑀥𑀺𑀲𑀢𑁆𑀢𑁄 ‘‘𑀤𑀸𑀦𑀁 𑀦𑀸𑀫 𑀲𑀕𑀼𑀡𑀲𑁆𑀲𑀧𑀺 𑀦𑀺𑀕𑁆𑀕𑀼𑀡𑀲𑁆𑀲𑀧𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀤𑀸𑀢𑀩𑁆𑀩𑀁, 𑀬𑀣𑀸 𑀳𑀺 𑀦𑀺𑀦𑁆𑀦𑁂𑀧𑀺 𑀣𑀮𑁂𑀧𑀺 𑀧𑀢𑀺𑀝𑁆𑀞𑀸𑀧𑀺𑀢𑀁 𑀩𑀻𑀚𑀁 𑀧𑀣𑀯𑀻𑀭𑀲𑀁 𑀆𑀧𑁄𑀭𑀲𑀜𑁆𑀘 𑀆𑀕𑀫𑁆𑀫 𑀲𑀫𑁆𑀧𑀚𑁆𑀚𑀢𑀺, 𑀏𑀯𑀁 ¶ 𑀦𑀺𑀧𑁆𑀨𑀮𑀁 𑀦𑀸𑀫 𑀦𑀢𑁆𑀣𑀺, 𑀲𑀼𑀔𑁂𑀢𑁆𑀢𑁂 𑀯𑀧𑀺𑀢𑀩𑀻𑀚𑀁 𑀯𑀺𑀬 𑀕𑀼𑀡𑀯𑀦𑁆𑀢𑁂 𑀫𑀳𑀧𑁆𑀨𑀮𑀁 𑀳𑁄𑀢𑀻’’𑀢𑀺 𑀤𑀲𑁆𑀲𑁂𑀢𑀼𑀁 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀣𑀮𑁂 𑀘 𑀦𑀺𑀦𑁆𑀦𑁂 𑀘 𑀯𑀧𑀦𑁆𑀢𑀺 𑀩𑀻𑀚𑀁,

𑀅𑀦𑀽𑀧𑀔𑁂𑀢𑁆𑀢𑁂 𑀨𑀮𑀫𑀸𑀲𑀫𑀸𑀦𑀸;

𑀏𑀢𑀸𑀬 𑀲𑀤𑁆𑀥𑀸𑀬 𑀤𑀤𑀸𑀳𑀺 𑀤𑀸𑀦𑀁,

𑀅𑀧𑁆𑀧𑁂𑀯 𑀆𑀭𑀸𑀥𑀬𑁂 𑀤𑀓𑁆𑀔𑀺𑀡𑁂𑀬𑁆𑀬𑁂’’𑀢𑀺. (𑀚𑀸. 𑁧.𑁧𑁫.𑁪);

𑀅𑀣 𑀓𑀼𑀫𑀸𑀭𑁄 𑀓𑁄𑀥𑀸𑀪𑀺𑀪𑀽𑀢𑁄 𑁋 ‘‘𑀓𑁂𑀦𑀺𑀫𑀲𑁆𑀲 𑀫𑀼𑀡𑁆𑀟𑀓𑀲𑁆𑀲 𑀧𑀯𑁂𑀲𑁄 𑀤𑀺𑀦𑁆𑀦𑁄’’𑀢𑀺 𑀤𑁆𑀯𑀸𑀭𑀭𑀓𑁆𑀔𑀸𑀤𑀬𑁄 𑀢𑀚𑁆𑀚𑁂𑀢𑁆𑀯𑀸 𑁋

‘‘𑀔𑁂𑀢𑁆𑀢𑀸𑀦𑀺 ¶ 𑀫𑀬𑁆𑀳𑀁 𑀯𑀺𑀤𑀺𑀢𑀸𑀦𑀺 𑀮𑁄𑀓𑁂,

𑀬𑁂𑀲𑀸𑀳𑀁 𑀩𑀻𑀚𑀸𑀦𑀺 𑀧𑀢𑀺𑀝𑁆𑀞𑀧𑁂𑀫𑀺;

𑀬𑁂 𑀩𑁆𑀭𑀸𑀳𑁆𑀫𑀡𑀸 𑀚𑀸𑀢𑀺𑀫𑀦𑁆𑀢𑀽𑀧𑀧𑀦𑁆𑀦𑀸,

𑀢𑀸𑀦𑀻𑀥 𑀔𑁂𑀢𑁆𑀢𑀸𑀦𑀺 𑀲𑀼𑀧𑁂𑀲𑀮𑀸𑀦𑀻’’𑀢𑀺. (𑀚𑀸. 𑁧.𑁧𑁫.𑁫) 𑁋

𑀕𑀸𑀣𑀁 𑀯𑀢𑁆𑀯𑀸 ‘‘𑀇𑀫𑀁 𑀚𑀫𑁆𑀫𑀁 𑀯𑁂𑀡𑀼𑀧𑀤𑀭𑁂𑀦 𑀧𑁄𑀣𑁂𑀢𑁆𑀯𑀸 𑀕𑀻𑀯𑀸𑀬𑀁 𑀕𑀳𑁂𑀢𑁆𑀯𑀸 𑀲𑀢𑁆𑀢𑀧𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀩𑀳𑀺 𑀦𑀻𑀳𑀭𑀣𑀸’’𑀢𑀺 𑀆𑀳. 𑀅𑀣 𑀦𑀁 𑀫𑀳𑀸𑀧𑀼𑀭𑀺𑀲𑁄 𑀆𑀳 𑁋

‘‘𑀕𑀺𑀭𑀺𑀁 𑀦𑀔𑁂𑀦 𑀔𑀡𑀲𑀺, 𑀅𑀬𑁄 𑀤𑀦𑁆𑀢𑁂𑀪𑀺 𑀔𑀸𑀤𑀲𑀺;

𑀚𑀸𑀢𑀯𑁂𑀤𑀁 𑀧𑀤𑀳𑀲𑀺, 𑀬𑁄 𑀇𑀲𑀺𑀁 𑀧𑀭𑀺𑀪𑀸𑀲𑀲𑀻’’𑀢𑀺. (𑀚𑀸. 𑁧.𑁧𑁫.𑁯);

𑀏𑀯𑀜𑁆𑀘 ¶ 𑀧𑀦 𑀯𑀢𑁆𑀯𑀸 𑁋 ‘‘𑀲𑀘𑁂 𑀫𑁆𑀬𑀸𑀬𑀁 𑀳𑀢𑁆𑀣𑁂 𑀯𑀸 𑀧𑀸𑀤𑁂 𑀯𑀸 𑀕𑀡𑁆𑀳𑀸𑀧𑁂𑀢𑁆𑀯𑀸 𑀤𑀼𑀓𑁆𑀔𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀩𑀳𑀼𑀁 𑀅𑀧𑀼𑀜𑁆𑀜𑀁 𑀧𑀲𑀯𑁂𑀬𑁆𑀬𑀸’’𑀢𑀺 𑀲𑀢𑁆𑀢𑀸𑀦𑀼𑀤𑁆𑀤𑀬𑀢𑀸𑀬 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀬𑀁 𑀑𑀢𑀭𑀺. 𑀪𑀕𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀇𑀤𑀁 𑀯𑀢𑁆𑀯𑀸𑀦 𑀫𑀸𑀢𑀗𑁆𑀕𑁄, 𑀇𑀲𑀺 𑀲𑀘𑁆𑀘𑀧𑀭𑀓𑁆𑀓𑀫𑁄;

𑀅𑀦𑁆𑀢𑀮𑀺𑀓𑁆𑀔𑀲𑁆𑀫𑀺𑀁 𑀧𑀓𑁆𑀓𑀸𑀫𑀺, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀉𑀤𑀺𑀓𑁆𑀔𑀢’’𑀦𑁆𑀢𑀺. (𑀚𑀸. 𑁧.𑁧𑁫.𑁧𑁦);

𑀢𑀸𑀯𑀤𑁂𑀯 𑀦𑀕𑀭𑀭𑀓𑁆𑀔𑀺𑀓𑀤𑁂𑀯𑀢𑀸𑀦𑀁 𑀚𑁂𑀝𑁆𑀞𑀓𑀤𑁂𑀯𑀭𑀸𑀚𑀸 𑀫𑀡𑁆𑀟𑀩𑁆𑀬𑀲𑁆𑀲 𑀕𑀻𑀯𑀁 𑀧𑀭𑀺𑀯𑀢𑁆𑀢𑁂𑀲𑀺. 𑀢𑀲𑁆𑀲 𑀫𑀼𑀔𑀁 𑀧𑀭𑀺𑀯𑀢𑁆𑀢𑁂𑀢𑀺𑀢𑁆𑀯𑀸 ¶ 𑀧𑀘𑁆𑀙𑀸𑀫𑀼𑀔𑀁 𑀚𑀸𑀢𑀁, 𑀅𑀓𑁆𑀔𑀻𑀦𑀺 𑀧𑀭𑀺𑀯𑀢𑁆𑀢𑀸𑀦𑀺, 𑀫𑀼𑀔𑁂𑀦 𑀔𑁂𑀴𑀁 𑀯𑀫𑀢𑀺, 𑀲𑀭𑀻𑀭𑀁 𑀣𑀤𑁆𑀥𑀁 𑀲𑀽𑀮𑁂 𑀆𑀭𑁄𑀧𑀺𑀢𑀁 𑀯𑀺𑀬 𑀅𑀳𑁄𑀲𑀺. 𑀅𑀲𑀻𑀢𑀺𑀲𑀳𑀲𑁆𑀲𑀸 𑀧𑀭𑀺𑀘𑀸𑀭𑀓𑀬𑀓𑁆𑀔𑀸 𑀅𑀲𑀻𑀢𑀺𑀩𑁆𑀭𑀸𑀳𑁆𑀫𑀡𑀲𑀳𑀲𑁆𑀲𑀸𑀦𑀺 𑀢𑀣𑁂𑀯 𑀅𑀓𑀁𑀲𑀼. 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀩𑁆𑀭𑀳𑁆𑀫𑀧𑀚𑀸𑀧𑀢𑀺𑀬𑀸 𑀆𑀭𑁄𑀘𑀬𑀺𑀁𑀲𑀼. 𑀲𑀸 𑀢𑀭𑀫𑀸𑀦𑀭𑀽𑀧𑀸 𑀆𑀕𑀦𑁆𑀢𑁆𑀯𑀸 𑀢𑀁 𑀯𑀺𑀧𑁆𑀧𑀓𑀸𑀭𑀁 𑀤𑀺𑀲𑁆𑀯𑀸 𑀕𑀸𑀣𑀫𑀸𑀳 𑁋

‘‘𑀆𑀯𑁂𑀥𑀺𑀢𑀁 𑀧𑀺𑀝𑁆𑀞𑀺𑀢𑁄 𑀉𑀢𑁆𑀢𑀫𑀗𑁆𑀕𑀁,

𑀩𑀸𑀳𑀼𑀁 𑀧𑀲𑀸𑀭𑁂𑀢𑀺 𑀅𑀓𑀫𑁆𑀫𑀦𑁂𑀬𑁆𑀬𑀁;

𑀲𑁂𑀢𑀸𑀦𑀺 𑀅𑀓𑁆𑀔𑀻𑀦𑀺 𑀬𑀣𑀸 𑀫𑀢𑀲𑁆𑀲,

𑀓𑁄 𑀫𑁂 𑀇𑀫𑀁 𑀧𑀼𑀢𑁆𑀢𑀫𑀓𑀸𑀲𑀺 𑀏𑀯’’𑀦𑁆𑀢𑀺. (𑀚𑀸. 𑁧.𑁧𑁫.𑁧𑁧);

𑀅𑀣𑀲𑁆𑀲𑀸 ¶ 𑀆𑀭𑁄𑀘𑁂𑀲𑀼𑀁 𑁋

‘‘𑀇𑀥𑀸𑀕𑀫𑀸 𑀲𑀫𑀡𑁄 𑀤𑀼𑀫𑁆𑀫𑀯𑀸𑀲𑀻,

𑀑𑀢𑀮𑁆𑀮𑀓𑁄 𑀧𑀁𑀲𑀼𑀧𑀺𑀲𑀸𑀘𑀓𑁄𑀯,

𑀲𑀗𑁆𑀓𑀸𑀭𑀘𑁄𑀴𑀁 𑀧𑀝𑀺𑀫𑀼𑀜𑁆𑀘 𑀓𑀡𑁆𑀞𑁂,

𑀲𑁄 𑀢𑁂 𑀇𑀫𑀁 𑀧𑀼𑀢𑁆𑀢𑀫𑀓𑀸𑀲𑀺 𑀏𑀯’’𑀦𑁆𑀢𑀺. (𑀚𑀸. 𑁧.𑁧𑁫.𑁧𑁨);

𑀲𑀸 𑀲𑀼𑀢𑁆𑀯𑀸𑀯 𑀅𑀜𑁆𑀜𑀸𑀲𑀺 𑁋 ‘‘𑀫𑀬𑁆𑀳𑀁 𑀬𑀲𑀤𑀸𑀬𑀓𑁄 𑀅𑀬𑁆𑀬𑁄 𑀅𑀦𑀼𑀓𑀫𑁆𑀧𑀸𑀬 𑀧𑀼𑀢𑁆𑀢𑀲𑁆𑀲 𑀧𑀫𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀆𑀕𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀢𑁄 𑀉𑀧𑀝𑁆𑀞𑀸𑀓𑁂 𑀧𑀼𑀘𑁆𑀙𑀺 𑁋

‘‘𑀓𑀢𑀫𑀁 ¶ 𑀤𑀺𑀲𑀁 𑀅𑀕𑀫𑀸 𑀪𑀽𑀭𑀺𑀧𑀜𑁆𑀜𑁄,

𑀅𑀓𑁆𑀔𑀸𑀣 𑀫𑁂 𑀫𑀸𑀡𑀯𑀸 𑀏𑀢𑀫𑀢𑁆𑀣𑀁;

𑀕𑀦𑁆𑀢𑁆𑀯𑀸𑀦 𑀢𑀁 𑀧𑀝𑀺𑀓𑀭𑁂𑀫𑀼 𑀅𑀘𑁆𑀘𑀬𑀁,

𑀅𑀧𑁆𑀧𑁂𑀯 𑀦𑀁 𑀧𑀼𑀢𑁆𑀢 𑀮𑀪𑁂𑀫𑀼 𑀚𑀻𑀯𑀺𑀢’’𑀦𑁆𑀢𑀺. (𑀚𑀸. 𑁧.𑁧𑁫.𑁧𑁩);

𑀢𑁂 𑀆𑀳𑀁𑀲𑀼 𑁋

‘‘𑀯𑁂𑀳𑀸𑀬𑀲𑀁 𑀅𑀕𑀫𑀸 𑀪𑀽𑀭𑀺𑀧𑀜𑁆𑀜𑁄,

𑀧𑀣𑀤𑁆𑀥𑀼𑀦𑁄 𑀧𑀦𑁆𑀦𑀭𑀲𑁂𑀯 𑀘𑀦𑁆𑀤𑁄;

𑀅𑀧𑀺𑀘𑀸𑀧𑀺 ¶ 𑀲𑁄 𑀧𑀼𑀭𑀺𑀫𑀤𑀺𑀲𑀁 𑀅𑀕𑀘𑁆𑀙𑀺,

𑀲𑀘𑁆𑀘𑀧𑁆𑀧𑀝𑀺𑀜𑁆𑀜𑁄 𑀇𑀲𑀺 𑀲𑀸𑀥𑀼𑀭𑀽𑀧𑁄’’𑀢𑀺. (𑀚𑀸. 𑁧.𑁧𑁫.𑁧𑁪);

𑀫𑀳𑀸𑀧𑀼𑀭𑀺𑀲𑁄𑀧𑀺 𑀅𑀦𑁆𑀢𑀭𑀯𑀻𑀣𑀺𑀬𑀁 𑀑𑀢𑀺𑀡𑁆𑀡𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑁋 ‘‘𑀫𑀬𑁆𑀳𑀁 𑀧𑀤𑀯𑀴𑀜𑁆𑀚𑀁 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀦𑀁 𑀯𑀲𑁂𑀦 𑀫𑀸 𑀅𑀦𑁆𑀢𑀭𑀥𑀸𑀬𑀺𑀢𑁆𑀣, 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀬𑁂𑀯 𑀦𑀁 𑀧𑀲𑁆𑀲𑀢𑀼, 𑀫𑀸 𑀅𑀜𑁆𑀜𑁂’’𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀬𑀸𑀧𑀦𑀫𑀢𑁆𑀢𑀁 𑀫𑀺𑀲𑁆𑀲𑀓𑁄𑀤𑀦𑀁 𑀕𑀳𑁂𑀢𑁆𑀯𑀸 𑀧𑀝𑀺𑀓𑁆𑀓𑀫𑀦𑀲𑀸𑀮𑀸𑀬𑀁 𑀦𑀺𑀲𑀺𑀦𑁆𑀦𑁄 𑀪𑀼𑀜𑁆𑀚𑀺𑀢𑁆𑀯𑀸 𑀣𑁄𑀓𑀁 𑀪𑀼𑀢𑁆𑀢𑀸𑀯𑀲𑁂𑀲𑀁 𑀪𑀺𑀓𑁆𑀔𑀸𑀪𑀸𑀚𑀦𑁂𑀬𑁂𑀯 𑀞𑀧𑁂𑀲𑀺. 𑀤𑀺𑀝𑁆𑀞𑀫𑀗𑁆𑀕𑀮𑀺𑀓𑀸𑀧𑀺 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀅𑀦𑁆𑀢𑀭𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀫𑀸𑀦𑀸 𑀧𑀤𑀯𑀴𑀜𑁆𑀚𑀁 𑀤𑀺𑀲𑁆𑀯𑀸 𑁋 ‘‘𑀇𑀤𑀁 𑀫𑀬𑁆𑀳𑀁 𑀬𑀲𑀤𑀸𑀬𑀓𑀲𑁆𑀲 𑀅𑀬𑁆𑀬𑀲𑁆𑀲 𑀧𑀤’’𑀦𑁆𑀢𑀺 𑀧𑀤𑀸𑀦𑀼𑀲𑀸𑀭𑁂𑀦𑀸𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀢𑀼𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀤𑀸𑀲𑁂𑀦 𑀓𑀢𑀸𑀧𑀭𑀸𑀥𑀁 𑀫𑀬𑁆𑀳𑀁 𑀔𑀫𑀣, 𑀦 𑀳𑀺 𑀢𑀼𑀫𑁆𑀳𑁂 𑀓𑁄𑀥𑀯𑀲𑀺𑀓𑀸 𑀦𑀸𑀫, 𑀤𑁂𑀣 𑀫𑁂 𑀧𑀼𑀢𑁆𑀢𑀲𑁆𑀲 𑀚𑀻𑀯𑀺𑀢’’𑀦𑁆𑀢𑀺.

𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑁋

‘‘𑀆𑀯𑁂𑀥𑀺𑀢𑀁 ¶ 𑀧𑀺𑀝𑁆𑀞𑀺𑀢𑁄 𑀉𑀢𑁆𑀢𑀫𑀗𑁆𑀕𑀁,

𑀩𑀸𑀳𑀼𑀁 𑀧𑀲𑀸𑀭𑁂𑀢𑀺 𑀅𑀓𑀫𑁆𑀫𑀦𑁂𑀬𑁆𑀬𑀁;

𑀲𑁂𑀢𑀸𑀦𑀺 𑀅𑀓𑁆𑀔𑀻𑀦𑀺 𑀬𑀣𑀸 𑀫𑀢𑀲𑁆𑀲,

𑀓𑁄 𑀫𑁂 𑀇𑀫𑀁 𑀧𑀼𑀢𑁆𑀢𑀫𑀓𑀸𑀲𑀺 𑀏𑀯’’𑀦𑁆𑀢𑀺. (𑀚𑀸. 𑁧.𑁧𑁫.𑁧𑁫) 𑁋

𑀕𑀸𑀣𑀁 ¶ 𑀅𑀪𑀸𑀲𑀺. 𑀫𑀳𑀸𑀧𑀼𑀭𑀺𑀲𑁄 𑀆𑀳 𑁋 ‘‘𑀦 𑀫𑀬𑀁 𑀏𑀯𑀭𑀽𑀧𑀁 𑀓𑀭𑁄𑀫, 𑀧𑀩𑁆𑀩𑀚𑀺𑀢𑀁 𑀧𑀦 𑀳𑀺𑀁𑀲𑀦𑁆𑀢𑁂 𑀤𑀺𑀲𑁆𑀯𑀸 𑀧𑀩𑁆𑀩𑀚𑀺𑀢𑁂𑀲𑀼 𑀲𑀕𑀸𑀭𑀯𑀸𑀳𑀺 𑀪𑀽𑀢𑀬𑀓𑁆𑀔𑀤𑁂𑀯𑀢𑀸𑀳𑀺 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺.

𑀓𑁂𑀯𑀮𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀫𑀦𑁄𑀧𑀤𑁄𑀲𑁄 𑀫𑀸 𑀳𑁄𑀢𑀼, 𑀤𑁂𑀯𑀢𑀸𑀳𑀺 𑀓𑀢𑀁 𑀳𑁄𑀢𑀼, 𑀲𑀼𑀔𑀫𑀸𑀧𑀬𑀸 ¶ , 𑀪𑀦𑁆𑀢𑁂, 𑀤𑁂𑀯𑀢𑀸, 𑀅𑀧𑀺𑀘𑀸𑀳𑀁, 𑀪𑀦𑁆𑀢𑁂, 𑀓𑀣𑀁 𑀧𑀝𑀺𑀧𑀚𑁆𑀚𑀸𑀫𑀻𑀢𑀺. 𑀢𑁂𑀦 𑀳𑀺 𑀑𑀲𑀥𑀁 𑀢𑁂 𑀓𑀣𑁂𑀲𑁆𑀲𑀸𑀫𑀺, 𑀫𑀫 𑀪𑀺𑀓𑁆𑀔𑀸𑀪𑀸𑀚𑀦𑁂 𑀪𑀼𑀢𑁆𑀢𑀸𑀯𑀲𑁂𑀲𑀁 𑀪𑀢𑁆𑀢𑀫𑀢𑁆𑀣𑀺, 𑀢𑀢𑁆𑀣 𑀣𑁄𑀓𑀁 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑁆𑀯𑀸 𑀣𑁄𑀓𑀁 𑀕𑀳𑁂𑀢𑁆𑀯𑀸 𑀢𑀯 𑀧𑀼𑀢𑁆𑀢𑀲𑁆𑀲 𑀫𑀼𑀔𑁂 𑀧𑀓𑁆𑀔𑀺𑀧, 𑀅𑀯𑀲𑁂𑀲𑀁 𑀉𑀤𑀓𑀘𑀸𑀝𑀺𑀬𑀁 𑀆𑀮𑁄𑀴𑁂𑀢𑁆𑀯𑀸 𑀅𑀲𑀻𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀲𑀳𑀲𑁆𑀲𑀸𑀦𑀁 𑀫𑀼𑀔𑁂 𑀧𑀓𑁆𑀔𑀺𑀧𑀸𑀢𑀺. 𑀲𑀸 𑀏𑀯𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀁 𑀯𑀦𑁆𑀤𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺.

𑀫𑀼𑀔𑁂 𑀧𑀓𑁆𑀔𑀺𑀢𑁆𑀢𑀫𑀢𑁆𑀢𑁂 𑀚𑁂𑀝𑁆𑀞𑀓𑀤𑁂𑀯𑀭𑀸𑀚𑀸 𑁋 ‘‘𑀲𑀸𑀫𑀺𑀫𑁆𑀳𑀺 𑀲𑀬𑀁 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑁂 𑀅𑀫𑁆𑀳𑁂𑀳𑀺 𑀦 𑀲𑀓𑁆𑀓𑀸 𑀓𑀺𑀜𑁆𑀘𑀺 𑀓𑀸𑀢𑀼’’𑀦𑁆𑀢𑀺 𑀓𑀼𑀫𑀸𑀭𑀁 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑁄𑀧𑀺 𑀔𑀺𑀧𑀺𑀢𑁆𑀯𑀸 𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀅𑀧𑁆𑀧𑀢𑁆𑀢𑀧𑀼𑀩𑁆𑀩𑁄 𑀯𑀺𑀬 𑀧𑀓𑀢𑀺𑀯𑀡𑁆𑀡𑁄 𑀅𑀳𑁄𑀲𑀺. 𑀅𑀣 𑀦𑀁 𑀫𑀸𑀢𑀸 𑀅𑀯𑁄𑀘 𑁋 ‘‘𑀧𑀲𑁆𑀲 𑀢𑀸𑀢 𑀢𑀯 𑀓𑀼𑀮𑀼𑀧𑀓𑀸𑀦𑀁 𑀳𑀺𑀭𑁄𑀢𑁆𑀢𑀧𑁆𑀧𑀭𑀳𑀺𑀢𑀸𑀦𑀁 𑀯𑀺𑀧𑁆𑀧𑀓𑀸𑀭𑀁, 𑀲𑀫𑀡𑀸 𑀧𑀦 𑀦 𑀏𑀯𑀭𑀽𑀧𑀸 𑀳𑁄𑀦𑁆𑀢𑀺, 𑀲𑀫𑀡𑁂 𑀢𑀸𑀢 𑀪𑁄𑀚𑁂𑀬𑁆𑀬𑀸𑀲𑀻’’𑀢𑀺. 𑀢𑀢𑁄 𑀲𑁂𑀲𑀓𑀁 𑀉𑀤𑀓𑀘𑀸𑀝𑀺𑀬𑀁 𑀆𑀮𑀼𑀴𑀸𑀧𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀼𑀔𑁂 𑀧𑀓𑁆𑀔𑀺𑀧𑀸𑀧𑁂𑀲𑀺. 𑀬𑀓𑁆𑀔𑀸 𑀢𑀸𑀯𑀤𑁂𑀯 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀮𑀸𑀬𑀺𑀁𑀲𑀼. 𑀩𑁆𑀭𑀸𑀳𑁆𑀫𑀡𑀸 𑀔𑀺𑀧𑀺𑀢𑁆𑀯𑀸 𑀔𑀺𑀧𑀺𑀢𑁆𑀯𑀸 𑀉𑀝𑁆𑀞𑀳𑀺𑀢𑁆𑀯𑀸 𑀓𑀺𑀁 𑀅𑀫𑁆𑀳𑀸𑀓𑀁 𑀫𑀼𑀔𑁂 𑀧𑀓𑁆𑀔𑀺𑀢𑁆𑀢𑀦𑁆𑀢𑀺 𑀧𑀼𑀘𑁆𑀙𑀺𑀁𑀲𑀼. 𑀫𑀸𑀢𑀗𑁆𑀕𑀇𑀲𑀺𑀲𑁆𑀲 𑀉𑀘𑁆𑀙𑀺𑀝𑁆𑀞𑀪𑀢𑁆𑀢𑀦𑁆𑀢𑀺. 𑀢𑁂 ‘‘𑀘𑀡𑁆𑀟𑀸𑀮𑀲𑁆𑀲 𑀉𑀘𑁆𑀙𑀺𑀝𑁆𑀞𑀓𑀁 𑀔𑀸𑀤𑀸𑀧𑀺𑀢𑀫𑁆𑀳𑀸, 𑀅𑀩𑁆𑀭𑀸𑀳𑁆𑀫𑀡𑀸 𑀤𑀸𑀦𑀺𑀫𑁆𑀳𑀸 𑀚𑀸𑀢𑀸, 𑀇𑀤𑀸𑀦𑀺 𑀦𑁄 𑀩𑁆𑀭𑀸𑀳𑁆𑀫𑀡𑀸 ‘𑀅𑀲𑀼𑀤𑁆𑀥𑀩𑁆𑀭𑀸𑀳𑁆𑀫𑀡𑀸 𑀇𑀫𑁂’𑀢𑀺 𑀲𑀫𑁆𑀪𑁄𑀕𑀁 𑀦 𑀤𑀲𑁆𑀲𑀦𑁆𑀢𑀻’’𑀢𑀺 𑀢𑀢𑁄 𑀧𑀮𑀸𑀬𑀺𑀢𑁆𑀯𑀸 𑀫𑀚𑁆𑀛𑀭𑀝𑁆𑀞𑀁 𑀕𑀦𑁆𑀢𑁆𑀯𑀸 𑀫𑀚𑁆𑀛𑀭𑀸𑀚𑀲𑁆𑀲 𑀦𑀕𑀭𑁂 𑀅𑀕𑁆𑀕𑀸𑀲𑀦𑀺𑀓𑀸 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀫𑀬𑀦𑁆𑀢𑀺 𑀭𑀸𑀚𑀕𑁂𑀳𑁂 𑀪𑀼𑀜𑁆𑀚𑀦𑁆𑀢𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀩𑁄𑀥𑀺𑀲𑀢𑁆𑀢𑁄 𑀧𑀸𑀧𑀦𑀺𑀕𑁆𑀕𑀳𑀁 𑀓𑀭𑁄𑀦𑁆𑀢𑁄 𑀫𑀸𑀦𑀚𑀸𑀢𑀺𑀓𑁂 𑀦𑀺𑀫𑁆𑀫𑀤𑀬𑀦𑁆𑀢𑁄 𑀯𑀺𑀘𑀭𑀢𑀺. 𑀅𑀣𑁂𑀓𑁄 ‘‘𑀚𑀸𑀢𑀺𑀫𑀦𑁆𑀢𑀢𑀸𑀧𑀲𑁄 𑀦𑀸𑀫 𑀫𑀬𑀸 𑀲𑀤𑀺𑀲𑁄 ¶ 𑀦𑀢𑁆𑀣𑀻’’𑀢𑀺 𑀅𑀜𑁆𑀜𑁂𑀲𑀼 𑀲𑀜𑁆𑀜𑀫𑁆𑀧𑀺 𑀦 𑀓𑀭𑁄𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀢𑀁 𑀕𑀗𑁆𑀕𑀸𑀢𑀻𑀭𑁂 𑀯𑀲𑀫𑀸𑀦𑀁 𑀤𑀺𑀲𑁆𑀯𑀸 ‘‘𑀫𑀸𑀦𑀦𑀺𑀕𑁆𑀕𑀳𑀫𑀲𑁆𑀲 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀢𑁆𑀣 𑀅𑀕𑀫𑀸𑀲𑀺 ¶ . 𑀢𑀁 𑀚𑀸𑀢𑀺𑀫𑀦𑁆𑀢𑀢𑀸𑀧𑀲𑁄 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀚𑀘𑁆𑀘𑁄 𑀪𑀯’’𑀦𑁆𑀢𑀺? 𑀘𑀡𑁆𑀟𑀸𑀮𑁄 𑀅𑀳𑀁 𑀆𑀘𑀭𑀺𑀬𑀸𑀢𑀺. 𑀅𑀧𑁂𑀳𑀺 𑀘𑀡𑁆𑀟𑀸𑀮 𑀅𑀧𑁂𑀳𑀺 𑀘𑀡𑁆𑀟𑀸𑀮, 𑀳𑁂𑀝𑁆𑀞𑀸𑀕𑀗𑁆𑀕𑀸𑀬 𑀯𑀲, 𑀫𑀸 𑀉𑀧𑀭𑀺𑀕𑀗𑁆𑀕𑀸𑀬 𑀉𑀤𑀓𑀁 𑀉𑀘𑁆𑀙𑀺𑀝𑁆𑀞𑀫𑀓𑀸𑀲𑀻𑀢𑀺.

𑀩𑁄𑀥𑀺𑀲𑀢𑁆𑀢𑁄 ¶ 𑁋 ‘‘𑀲𑀸𑀥𑀼 𑀆𑀘𑀭𑀺𑀬, 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀯𑀲𑀺𑀲𑁆𑀲𑀸𑀫𑀻’’𑀢𑀺 𑀳𑁂𑀝𑁆𑀞𑀸𑀕𑀗𑁆𑀕𑀸𑀬 𑀯𑀲𑀦𑁆𑀢𑁄 ‘‘𑀕𑀗𑁆𑀕𑀸𑀬 𑀉𑀤𑀓𑀁 𑀧𑀝𑀺𑀲𑁄𑀢𑀁 𑀲𑀦𑁆𑀤𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀚𑀸𑀢𑀺𑀫𑀦𑁆𑀢𑀢𑀸𑀧𑀲𑁄 𑀧𑀸𑀢𑁄𑀯 𑀕𑀗𑁆𑀕𑀁 𑀑𑀭𑀼𑀬𑁆𑀳 𑀉𑀤𑀓𑀁 𑀆𑀘𑀫𑀢𑀺, 𑀚𑀝𑀸 𑀥𑁄𑀯𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀦𑁆𑀢𑁄 𑀧𑀺𑀡𑁆𑀟𑀁 𑀧𑀺𑀡𑁆𑀟𑀁 𑀔𑁂𑀴𑀁 𑀉𑀤𑀓𑁂 𑀧𑀸𑀢𑁂𑀢𑀺. 𑀤𑀦𑁆𑀢𑀓𑀝𑁆𑀞𑀓𑀼𑀘𑁆𑀙𑀺𑀝𑁆𑀞𑀓𑀫𑁆𑀧𑀺 𑀢𑀢𑁆𑀣𑁂𑀯 𑀧𑀯𑀸𑀳𑁂𑀢𑀺. 𑀬𑀣𑀸 𑀘𑁂 𑀢𑀁 𑀅𑀜𑁆𑀜𑀢𑁆𑀣 𑀅𑀮𑀕𑁆𑀕𑀺𑀢𑁆𑀯𑀸 𑀢𑀸𑀧𑀲𑀲𑁆𑀲𑁂𑀯 𑀚𑀝𑀸𑀲𑀼 𑀮𑀕𑁆𑀕𑀢𑀺, 𑀢𑀣𑀸 𑀅𑀥𑀺𑀝𑁆𑀞𑀸𑀲𑀺. 𑀔𑁂𑀴𑀫𑁆𑀧𑀺 𑀤𑀦𑁆𑀢𑀓𑀝𑁆𑀞𑀫𑁆𑀧𑀺 𑀢𑀸𑀧𑀲𑀲𑁆𑀲 𑀚𑀝𑀸𑀲𑀼𑀬𑁂𑀯 𑀧𑀢𑀺𑀝𑁆𑀞𑀸𑀢𑀺.

𑀢𑀸𑀧𑀲𑁄 𑀘𑀡𑁆𑀟𑀸𑀮𑀲𑁆𑀲𑀺𑀤𑀁 𑀓𑀫𑁆𑀫𑀁 𑀪𑀯𑀺𑀲𑁆𑀲𑀢𑀻𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀇𑀤𑀁, 𑀪𑁄 𑀘𑀡𑁆𑀟𑀸𑀮, 𑀕𑀗𑁆𑀕𑀸𑀬 𑀉𑀤𑀓𑀁 𑀢𑀬𑀸 𑀧𑀝𑀺𑀲𑁄𑀢𑀕𑀸𑀫𑀺𑀓𑀢’’𑀦𑁆𑀢𑀺? 𑀆𑀫 𑀆𑀘𑀭𑀺𑀬. 𑀢𑁂𑀦 𑀳𑀺 𑀢𑁆𑀯𑀁 𑀳𑁂𑀝𑁆𑀞𑀸𑀕𑀗𑁆𑀕𑀸𑀬 𑀫𑀸 𑀯𑀲, 𑀉𑀧𑀭𑀺𑀕𑀗𑁆𑀕𑀸𑀬 𑀯𑀲𑀸𑀢𑀺. 𑀲𑀸𑀥𑀼 𑀆𑀘𑀭𑀺𑀬, 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀯𑀲𑀺𑀲𑁆𑀲𑀸𑀫𑀻𑀢𑀺 𑀢𑀢𑁆𑀣 𑀯𑀲𑀦𑁆𑀢𑁄 𑀇𑀤𑁆𑀥𑀺𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀲𑀺, 𑀉𑀤𑀓𑀁 𑀬𑀣𑀸𑀕𑀢𑀺𑀓𑀫𑁂𑀯 𑀚𑀸𑀢𑀁. 𑀧𑀼𑀦 𑀢𑀸𑀧𑀲𑁄 𑀢𑀤𑁂𑀯 𑀩𑁆𑀬𑀲𑀦𑀁 𑀧𑀸𑀧𑀼𑀡𑀺. 𑀲𑁄 𑀧𑀼𑀦 𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀁 𑀧𑀼𑀘𑁆𑀙𑀺, 𑁋 ‘‘𑀪𑁄 𑀘𑀡𑁆𑀟𑀸𑀮, 𑀢𑁆𑀯𑀫𑀺𑀤𑀁 𑀕𑀗𑁆𑀕𑀸𑀬 𑀉𑀤𑀓𑀁 𑀓𑀸𑀮𑁂𑀦 𑀧𑀝𑀺𑀲𑁄𑀢𑀕𑀸𑀫𑀺𑀁 𑀓𑀸𑀮𑁂𑀦 𑀅𑀦𑀼𑀲𑁄𑀢𑀕𑀸𑀫𑀺𑀁 𑀓𑀭𑁄𑀲𑀻’’𑀢𑀺? 𑀆𑀫 𑀆𑀘𑀭𑀺𑀬. 𑀘𑀡𑁆𑀟𑀸𑀮, ‘‘𑀢𑁆𑀯𑀁 𑀲𑀼𑀔𑀯𑀺𑀳𑀸𑀭𑀻𑀦𑀁 𑀧𑀩𑁆𑀩𑀚𑀺𑀢𑀸𑀦𑀁 𑀲𑀼𑀔𑁂𑀦 𑀯𑀲𑀺𑀢𑀼𑀁 𑀦 𑀤𑁂𑀲𑀺, 𑀲𑀢𑁆𑀢𑀫𑁂 𑀢𑁂 𑀤𑀺𑀯𑀲𑁂 𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀨𑀮𑀢𑀽’’𑀢𑀺. 𑀲𑀸𑀥𑀼 𑀅𑀘𑀭𑀺𑀬, 𑀅𑀳𑀁 𑀧𑀦 𑀲𑀽𑀭𑀺𑀬𑀲𑁆𑀲 𑀉𑀕𑁆𑀕𑀦𑁆𑀢𑀼𑀁 𑀦 𑀤𑀲𑁆𑀲𑀸𑀫𑀻𑀢𑀺.

𑀅𑀣 𑀫𑀳𑀸𑀲𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀢𑀲𑁆𑀲 𑀅𑀪𑀺𑀲𑀸𑀧𑁄 𑀏𑀢𑀲𑁆𑀲𑁂𑀯 𑀉𑀧𑀭𑀺 𑀧𑀢𑀺𑀲𑁆𑀲𑀢𑀺, 𑀭𑀓𑁆𑀔𑀸𑀫𑀺 𑀦’’𑀦𑁆𑀢𑀺 𑀲𑀢𑁆𑀢𑀸𑀦𑀼𑀤𑁆𑀤𑀬𑀢𑀸𑀬 𑀧𑀼𑀦𑀤𑀺𑀯𑀲𑁂 𑀇𑀤𑁆𑀥𑀺𑀬𑀸 𑀲𑀽𑀭𑀺𑀬𑀲𑁆𑀲 𑀉𑀕𑁆𑀕𑀦𑁆𑀢𑀼𑀁 𑀦 𑀅𑀤𑀸𑀲𑀺. 𑀇𑀤𑁆𑀥𑀺𑀫𑀢𑁄 𑀇𑀤𑁆𑀥𑀺𑀯𑀺𑀲𑀬𑁄 ¶ 𑀦𑀸𑀫 𑀅𑀘𑀺𑀦𑁆𑀢𑁂𑀬𑁆𑀬𑁄, 𑀢𑀢𑁄 𑀧𑀝𑁆𑀞𑀸𑀬 𑀅𑀭𑀼𑀡𑀼𑀕𑁆𑀕𑀁 𑀦 𑀧𑀜𑁆𑀜𑀸𑀬𑀢𑀺, 𑀭𑀢𑁆𑀢𑀺𑀦𑁆𑀤𑀺𑀯𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺, 𑀓𑀲𑀺𑀯𑀡𑀺𑀚𑁆𑀚𑀸𑀤𑀻𑀦𑀺 𑀓𑀫𑁆𑀫𑀸𑀦𑀺 𑀧𑀬𑁄𑀚𑁂𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺.

𑀫𑀦𑀼𑀲𑁆𑀲𑀸 𑁋 ‘‘𑀬𑀓𑁆𑀔𑀸𑀯𑀝𑁆𑀝𑁄 𑀦𑀼 𑀔𑁄 𑀅𑀬𑀁 𑀪𑀽𑀢𑀤𑁂𑀯𑀝𑁆𑀝𑁄𑀦𑀸𑀕𑀲𑀼𑀧𑀡𑁆𑀡𑀸𑀯𑀝𑁆𑀝𑁄’’𑀢𑀺 𑀉𑀧𑀤𑁆𑀤𑀯𑀧𑁆𑀧𑀢𑁆𑀢𑀸 ‘‘𑀓𑀺𑀁 𑀦𑀼 𑀔𑁄 𑀓𑀸𑀢𑀩𑁆𑀩’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀭𑀸𑀚𑀓𑀼𑀮𑀁 𑀦𑀸𑀫 𑀫𑀳𑀸𑀧𑀜𑁆𑀜𑀁, 𑀮𑁄𑀓𑀲𑁆𑀲 𑀳𑀺𑀢𑀁 𑀘𑀺𑀦𑁆𑀢𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀢𑁆𑀣 𑀕𑀘𑁆𑀙𑀸𑀫𑀸’’𑀢𑀺 𑀭𑀸𑀚𑀓𑀼𑀮𑀁 𑀕𑀦𑁆𑀢𑁆𑀯𑀸 ¶ 𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀲𑀼𑀢𑁆𑀯𑀸 𑀪𑀻𑀢𑁄𑀧𑀺 𑀅𑀪𑀻𑀢𑀸𑀓𑀸𑀭𑀁 𑀓𑀢𑁆𑀯𑀸 𑁋 ‘‘𑀫𑀸 𑀢𑀸𑀢𑀸 𑀪𑀸𑀬𑀣, 𑀇𑀫𑀁 𑀓𑀸𑀭𑀡𑀁 𑀕𑀗𑁆𑀕𑀸𑀢𑀻𑀭𑀯𑀸𑀲𑀻 𑀚𑀸𑀢𑀺𑀫𑀦𑁆𑀢𑀢𑀸𑀧𑀲𑁄 𑀚𑀸𑀦𑀺𑀲𑁆𑀲𑀢𑀺, 𑀢𑀁 𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀓𑁆𑀓𑀗𑁆𑀔𑀸 𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀓𑀢𑀺𑀧𑀬𑁂𑀳𑁂𑀯 𑀅𑀢𑁆𑀣𑀘𑀭𑀓𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀲𑀤𑁆𑀥𑀺𑀁 𑀢𑀸𑀧𑀲𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀢𑀧𑀝𑀺𑀲𑀦𑁆𑀣𑀸𑀭𑁄 𑀢𑀫𑀢𑁆𑀣𑀁 𑀧𑀼𑀘𑁆𑀙𑀺. 𑀢𑀸𑀧𑀲𑁄 𑀆𑀳 𑁋 ‘‘𑀆𑀫 𑀫𑀳𑀸𑀭𑀸𑀚, 𑀏𑀓𑁄 ¶ 𑀘𑀡𑁆𑀟𑀸𑀮𑁄 𑀅𑀢𑁆𑀣𑀺, 𑀲𑁄 𑀇𑀫𑀁 𑀕𑀗𑁆𑀕𑀸𑀬 𑀉𑀤𑀓𑀁 𑀓𑀸𑀮𑁂𑀦 𑀅𑀦𑀼𑀲𑁄𑀢𑀕𑀸𑀫𑀺𑀁 𑀓𑀸𑀮𑁂𑀦 𑀧𑀢𑀺𑀲𑁄𑀢𑀕𑀸𑀫𑀺𑀁 𑀓𑀭𑁄𑀢𑀺, 𑀫𑀬𑀸 𑀢𑀤𑀢𑁆𑀣𑀁 𑀓𑀺𑀜𑁆𑀘𑀺 𑀓𑀣𑀺𑀢𑀁 𑀅𑀢𑁆𑀣𑀺, 𑀢𑀁 𑀧𑀼𑀘𑁆𑀙𑀣, 𑀲𑁄 𑀚𑀸𑀦𑀺𑀲𑁆𑀲𑀢𑀻’’𑀢𑀺.

𑀭𑀸𑀚𑀸 𑀫𑀸𑀢𑀗𑁆𑀕𑀇𑀲𑀺𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑁋 ‘‘𑀢𑀼𑀫𑁆𑀳𑁂, 𑀪𑀦𑁆𑀢𑁂, 𑀅𑀭𑀼𑀡𑀲𑁆𑀲 𑀉𑀕𑁆𑀕𑀦𑁆𑀢𑀼𑀁 𑀦 𑀤𑁂𑀣𑀸’’𑀢𑀺 𑀧𑀼𑀘𑁆𑀙𑀺. 𑀆𑀫, 𑀫𑀳𑀸𑀭𑀸𑀚𑀸𑀢𑀺. 𑀓𑀺𑀁 𑀓𑀸𑀭𑀡𑀸 𑀪𑀦𑁆𑀢𑁂𑀢𑀺? 𑀚𑀸𑀢𑀺𑀫𑀦𑁆𑀢𑀢𑀸𑀧𑀲𑀓𑀸𑀭𑀡𑀸, 𑀫𑀳𑀸𑀭𑀸𑀚, 𑀚𑀸𑀢𑀺𑀫𑀦𑁆𑀢𑀢𑀸𑀧𑀲𑁂𑀦 𑀆𑀕𑀦𑁆𑀢𑁆𑀯𑀸 𑀫𑀁 𑀯𑀦𑁆𑀤𑀺𑀢𑁆𑀯𑀸 𑀔𑀫𑀸𑀧𑀺𑀢𑀓𑀸𑀮𑁂 𑀤𑀲𑁆𑀲𑀸𑀫𑀺 𑀫𑀳𑀸𑀭𑀸𑀚𑀸𑀢𑀺. 𑀭𑀸𑀚𑀸 𑀕𑀦𑁆𑀢𑁆𑀯𑀸 ‘‘𑀏𑀣 𑀆𑀘𑀭𑀺𑀬, 𑀢𑀸𑀧𑀲𑀁 𑀔𑀫𑀸𑀧𑁂𑀣𑀸’’𑀢𑀺 𑀆𑀳. 𑀦𑀸𑀳𑀁, 𑀫𑀳𑀸𑀭𑀸𑀚, 𑀘𑀡𑁆𑀟𑀸𑀮𑀁 𑀯𑀦𑁆𑀤𑀸𑀫𑀻𑀢𑀺. 𑀫𑀸 𑀆𑀘𑀭𑀺𑀬, 𑀏𑀯𑀁 𑀓𑀭𑁄𑀣, 𑀚𑀦𑀧𑀤𑀲𑁆𑀲 𑀫𑀼𑀔𑀁 𑀧𑀲𑁆𑀲𑀣𑀸𑀢𑀺. 𑀲𑁄 𑀧𑀼𑀦 𑀧𑀝𑀺𑀓𑁆𑀔𑀺𑀧𑀺𑀬𑁂𑀯. 𑀭𑀸𑀚𑀸 𑀩𑁄𑀥𑀺𑀲𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ¶ ‘‘𑀆𑀘𑀭𑀺𑀬𑁄 𑀔𑀫𑀸𑀧𑁂𑀢𑀼𑀁 𑀦 𑀇𑀘𑁆𑀙𑀺𑀢𑀻’’𑀢𑀺 𑀆𑀳. 𑀅𑀔𑀫𑀸𑀧𑀺𑀢𑁂 𑀅𑀳𑀁 𑀲𑀽𑀭𑀺𑀬𑀁 𑀦 𑀫𑀼𑀜𑁆𑀘𑀸𑀫𑀻𑀢𑀺. 𑀭𑀸𑀚𑀸 ‘‘𑀅𑀬𑀁 𑀔𑀫𑀸𑀧𑁂𑀢𑀼𑀁 𑀦 𑀇𑀘𑁆𑀙𑀢𑀺, 𑀅𑀬𑀁 𑀅𑀔𑀫𑀸𑀧𑀺𑀢𑁂 𑀲𑀽𑀭𑀺𑀬𑀁 𑀦 𑀫𑀼𑀜𑁆𑀘𑀢𑀺, 𑀓𑀺𑀁 𑀅𑀫𑁆𑀳𑀸𑀓𑀁 𑀢𑁂𑀦 𑀢𑀸𑀧𑀲𑁂𑀦, 𑀮𑁄𑀓𑀁 𑀑𑀮𑁄𑀓𑁂𑀲𑁆𑀲𑀸𑀫𑀸’’𑀢𑀺 ‘‘𑀕𑀘𑁆𑀙𑀣, 𑀪𑁄, 𑀢𑀸𑀧𑀲𑀲𑀦𑁆𑀢𑀺𑀓𑀁, 𑀢𑀁 𑀳𑀢𑁆𑀣𑁂𑀲𑀼 𑀘 𑀧𑀸𑀤𑁂𑀲𑀼 𑀘 𑀕𑀳𑁂𑀢𑁆𑀯𑀸 𑀫𑀸𑀢𑀗𑁆𑀕𑀇𑀲𑀺𑀲𑁆𑀲 𑀧𑀸𑀤𑀫𑀽𑀮𑁂 𑀦𑁂𑀢𑁆𑀯𑀸 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀔𑀫𑀸𑀧𑁂𑀣 𑀏𑀢𑀲𑁆𑀲 𑀚𑀦𑀧𑀤𑀸𑀦𑀼𑀤𑁆𑀤𑀬𑀢𑀁 𑀧𑀝𑀺𑀘𑁆𑀘𑀸’’𑀢𑀺 𑀆𑀳. 𑀢𑁂 𑀭𑀸𑀚𑀧𑀼𑀭𑀺𑀲𑀸 𑀕𑀦𑁆𑀢𑁆𑀯𑀸 𑀢𑀁 𑀢𑀣𑀸 𑀓𑀢𑁆𑀯𑀸 𑀆𑀦𑁂𑀢𑁆𑀯𑀸 𑀫𑀸𑀢𑀗𑁆𑀕𑀇𑀲𑀺𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀔𑀫𑀸𑀧𑁂𑀲𑀼𑀁.

𑀅𑀳𑀁 𑀦𑀸𑀫 𑀔𑀫𑀺𑀢𑀩𑁆𑀩𑀁 𑀔𑀫𑀸𑀫𑀺, 𑀅𑀧𑀺𑀘 𑀔𑁄 𑀧𑀦 𑀏𑀢𑀲𑁆𑀲 𑀓𑀣𑀸 𑀏𑀢𑀲𑁆𑀲𑁂𑀯 𑀉𑀧𑀭𑀺 𑀧𑀢𑀺𑀲𑁆𑀲𑀢𑀺. 𑀫𑀬𑀸 𑀲𑀽𑀭𑀺𑀬𑁂 𑀯𑀺𑀲𑁆𑀲𑀚𑁆𑀚𑀺𑀢𑁂 𑀲𑀽𑀭𑀺𑀬𑀭𑀲𑁆𑀫𑀺 𑀏𑀢𑀲𑁆𑀲 𑀫𑀢𑁆𑀣𑀓𑁂 𑀧𑀢𑀺𑀲𑁆𑀲𑀢𑀺, 𑀅𑀣𑀲𑁆𑀲 𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀨𑀮𑀺𑀲𑁆𑀲𑀢𑀺. 𑀢𑀜𑁆𑀘 𑀔𑁄 𑀧𑀦𑁂𑀲 𑀩𑁆𑀬𑀲𑀦𑀁 𑀫𑀸 𑀧𑀸𑀧𑀼𑀡𑀸𑀢𑀼, 𑀏𑀣 𑀢𑀼𑀫𑁆𑀳𑁂 𑀏𑀢𑀁 𑀕𑀮𑀧𑁆𑀧𑀫𑀸𑀡𑁂 𑀉𑀤𑀓𑁂 𑀑𑀢𑀸𑀭𑁂𑀢𑁆𑀯𑀸 𑀫𑀳𑀦𑁆𑀢𑀁 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀫𑀲𑁆𑀲 𑀲𑀻𑀲𑁂 𑀞𑀧𑁂𑀣. 𑀅𑀣𑀸𑀳𑀁 𑀲𑀽𑀭𑀺𑀬𑀁 𑀯𑀺𑀲𑁆𑀲𑀚𑁆𑀚𑀺𑀲𑁆𑀲𑀸𑀫𑀺. 𑀲𑀽𑀭𑀺𑀬𑀭𑀲𑁆𑀫𑀺 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑁂 𑀧𑀢𑀺𑀢𑁆𑀯𑀸 𑀢𑀁 𑀲𑀢𑁆𑀢𑀥𑀸 𑀪𑀺𑀦𑁆𑀤𑀺𑀲𑁆𑀲𑀢𑀺. 𑀅𑀣𑁂𑀲 𑀫𑀢𑁆𑀢𑀺𑀓𑀸𑀧𑀺𑀡𑁆𑀟𑀁 𑀙𑀟𑁆𑀟𑁂𑀢𑁆𑀯𑀸 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀅𑀜𑁆𑀜𑁂𑀦 𑀢𑀺𑀢𑁆𑀣𑁂𑀦 𑀉𑀢𑁆𑀢𑀭𑀢𑀼, 𑀇𑀢𑀺 𑀦𑀁 𑀯𑀤𑀣, 𑀏𑀯𑀫𑀲𑁆𑀲 𑀲𑁄𑀢𑁆𑀣𑀺 𑀪𑀯𑀺𑀲𑁆𑀲𑀢𑀻𑀢𑀺. 𑀢𑁂 𑀫𑀦𑀼𑀲𑁆𑀲𑀸 ‘‘𑀏𑀯𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀢𑀣𑀸 𑀓𑀸𑀭𑁂𑀲𑀼𑀁. 𑀢𑀲𑁆𑀲𑀸𑀧𑀺 𑀢𑀣𑁂𑀯 𑀲𑁄𑀢𑁆𑀣𑀺 𑀚𑀸𑀢𑀸. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑁋 ‘‘𑀚𑀸𑀢𑀺 ¶ 𑀦𑀸𑀫 𑀅𑀓𑀸𑀭𑀡𑀁, 𑀧𑀩𑁆𑀩𑀚𑀺𑀢𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀕𑀼𑀡𑁄𑀯 𑀓𑀸𑀭𑀡’’𑀦𑁆𑀢𑀺 𑀚𑀸𑀢𑀺𑀕𑁄𑀢𑁆𑀢𑀫𑀸𑀦𑀁 𑀧𑀳𑀸𑀬 𑀦𑀺𑀫𑁆𑀫𑀤𑁄 𑀅𑀳𑁄𑀲𑀺.

𑀇𑀢𑀺 𑀚𑀸𑀢𑀺𑀫𑀦𑁆𑀢𑀢𑀸𑀧𑀲𑁂 𑀤𑀫𑀺𑀢𑁂 𑀫𑀳𑀸𑀚𑀦𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀣𑀸𑀫𑀁 𑀅𑀜𑁆𑀜𑀸𑀲𑀺, 𑀫𑀳𑀸𑀓𑁄𑀮𑀸𑀳𑀮𑀁 𑀚𑀸𑀢𑀁. 𑀭𑀸𑀚𑀸 𑀅𑀢𑁆𑀢𑀦𑁄 𑀦𑀕𑀭𑀁 𑀕𑀫𑀦𑀢𑁆𑀣𑀸𑀬 𑀩𑁄𑀥𑀺𑀲𑀢𑁆𑀢𑀁 𑀬𑀸𑀘𑀺. 𑀫𑀳𑀸𑀲𑀢𑁆𑀢𑁄 ¶ 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 𑀢𑀸𑀦𑀺 𑀘 ¶ 𑀅𑀲𑀻𑀢𑀺𑀩𑁆𑀭𑀸𑀳𑁆𑀫𑀡𑀲𑀳𑀲𑁆𑀲𑀸𑀦𑀺 𑀤𑀫𑁂𑀲𑁆𑀲𑀸𑀫𑀺, 𑀧𑀝𑀺𑀜𑁆𑀜𑀜𑁆𑀘 𑀫𑁄𑀘𑁂𑀲𑁆𑀲𑀸𑀫𑀻𑀢𑀺 𑀫𑀚𑁆𑀛𑀭𑀸𑀚𑀲𑁆𑀲 𑀦𑀕𑀭𑀁 𑀅𑀕𑀫𑀸𑀲𑀺. 𑀩𑁆𑀭𑀸𑀳𑁆𑀫𑀡𑀸 𑀩𑁄𑀥𑀺𑀲𑀢𑁆𑀢𑀁 𑀤𑀺𑀲𑁆𑀯𑀸𑀯 𑁋 𑀪𑁄, ‘‘𑀅𑀬𑀁 𑀲𑁄, 𑀪𑁄 𑀫𑀳𑀸𑀘𑁄𑀭𑁄, 𑀆𑀕𑀢𑁄, 𑀇𑀤𑀸𑀦𑁂𑀯 𑀲𑀩𑁆𑀩𑁂 𑀏𑀢𑁂 𑀫𑀬𑁆𑀳𑀁 𑀉𑀘𑁆𑀙𑀺𑀝𑁆𑀞𑀓𑀁 𑀔𑀸𑀤𑀺𑀢𑁆𑀯𑀸 𑀅𑀩𑁆𑀭𑀸𑀳𑁆𑀫𑀡𑀸 𑀚𑀸𑀢𑀸𑀢𑀺 𑀅𑀫𑁆𑀳𑁂 𑀧𑀸𑀓𑀝𑁂 𑀓𑀭𑀺𑀲𑁆𑀲𑀢𑀺, 𑀏𑀯𑀁 𑀦𑁄 𑀇𑀥𑀸𑀧𑀺 𑀆𑀯𑀸𑀲𑁄 𑀦 𑀪𑀯𑀺𑀲𑁆𑀲𑀢𑀺, 𑀧𑀝𑀺𑀓𑀘𑁆𑀘𑁂𑀯 𑀫𑀸𑀭𑁂𑀲𑁆𑀲𑀸𑀫𑀸’’𑀢𑀺 𑀭𑀸𑀚𑀸𑀦𑀁 𑀧𑀼𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳𑀁𑀲𑀼 𑁋 ‘‘𑀢𑀼𑀫𑁆𑀳𑁂, 𑀫𑀳𑀸𑀭𑀸𑀚, 𑀏𑀢𑀁 𑀘𑀡𑁆𑀟𑀸𑀮𑀧𑀩𑁆𑀩𑀚𑀺𑀢𑀁 𑀫𑀸 𑀲𑀸𑀥𑀼𑀭𑀽𑀧𑁄𑀢𑀺 𑀫𑀜𑁆𑀜𑀺𑀢𑁆𑀣, 𑀏𑀲 𑀕𑀭𑀼𑀓𑀫𑀦𑁆𑀢𑀁 𑀚𑀸𑀦𑀸𑀢𑀺, 𑀧𑀣𑀯𑀺𑀁 𑀕𑀳𑁂𑀢𑁆𑀯𑀸 𑀆𑀓𑀸𑀲𑀁 𑀓𑀭𑁄𑀢𑀺, 𑀆𑀓𑀸𑀲𑀁 𑀧𑀣𑀯𑀺𑀁, 𑀤𑀽𑀭𑀁 𑀕𑀳𑁂𑀢𑁆𑀯𑀸 𑀲𑀦𑁆𑀢𑀺𑀓𑀁 𑀓𑀭𑁄𑀢𑀺, 𑀲𑀦𑁆𑀢𑀺𑀓𑀁 𑀤𑀽𑀭𑀁, 𑀕𑀗𑁆𑀕𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀉𑀤𑁆𑀥𑀕𑀸𑀫𑀺𑀦𑀺𑀁 𑀓𑀭𑁄𑀢𑀺, 𑀇𑀘𑁆𑀙𑀦𑁆𑀢𑁄 𑀧𑀣𑀯𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀸𑀢𑁂𑀢𑀼𑀁 𑀫𑀜𑁆𑀜𑁂 𑀲𑀓𑁆𑀓𑁄𑀢𑀺. 𑀧𑀭𑀲𑁆𑀲 𑀯𑀸 𑀘𑀺𑀢𑁆𑀢𑀁 𑀦𑀸𑀫 𑀲𑀩𑁆𑀩𑀓𑀸𑀮𑀁 𑀦 𑀲𑀓𑁆𑀓𑀸 𑀕𑀳𑁂𑀢𑀼𑀁, 𑀅𑀬𑀁 𑀇𑀥 𑀧𑀢𑀺𑀝𑁆𑀞𑀁 𑀮𑀪𑀦𑁆𑀢𑁄 𑀢𑀼𑀫𑁆𑀳𑀸𑀓𑀁 𑀭𑀚𑁆𑀚𑀫𑁆𑀧𑀺 𑀦𑀸𑀲𑁂𑀬𑁆𑀬, 𑀚𑀻𑀯𑀺𑀢𑀦𑁆𑀢𑀭𑀸𑀬𑀫𑁆𑀧𑀺 𑀯𑀁𑀲𑀼𑀧𑀘𑁆𑀙𑁂𑀤𑀫𑁆𑀧𑀺 𑀓𑀭𑁂𑀬𑁆𑀬, 𑀅𑀫𑁆𑀳𑀸𑀓𑀁 𑀯𑀘𑀦𑀁 𑀓𑀭𑁄𑀣, 𑀫𑀳𑀸𑀭𑀸𑀚, 𑀅𑀚𑁆𑀚𑁂𑀯 𑀇𑀫𑀁 𑀫𑀸𑀭𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺.

𑀭𑀸𑀚𑀸𑀦𑁄 𑀦𑀸𑀫 𑀧𑀭𑀧𑀢𑁆𑀢𑀺𑀬𑀸 𑀳𑁄𑀦𑁆𑀢𑀺, 𑀇𑀢𑀺 𑀲𑁄 𑀩𑀳𑀽𑀦𑀁 𑀓𑀣𑀸𑀯𑀲𑁂𑀦 𑀦𑀺𑀝𑁆𑀞𑀁 𑀕𑀢𑁄. 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀉𑀤𑀓𑀨𑀸𑀲𑀼𑀓𑀝𑁆𑀞𑀸𑀦𑁂 𑀫𑀺𑀲𑁆𑀲𑀓𑁄𑀤𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀭𑀸𑀚𑀼𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀦𑀺𑀭𑀸𑀧𑀭𑀸𑀥𑀢𑀸𑀬 𑀦𑀺𑀭𑀸𑀲𑀗𑁆𑀓𑁄 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀦𑀺𑀲𑀻𑀤𑀺. 𑀅𑀢𑀻𑀢𑁂 𑀘𑀢𑁆𑀢𑀸𑀮𑀻𑀲, 𑀅𑀦𑀸𑀕𑀢𑁂 𑀘𑀢𑁆𑀢𑀸𑀮𑀻𑀲𑀸𑀢𑀺 𑀅𑀲𑀻𑀢𑀺𑀓𑀧𑁆𑀧𑁂 𑀅𑀦𑀼𑀲𑁆𑀲𑀭𑀺𑀢𑀼𑀁 𑀲𑀫𑀢𑁆𑀣𑀜𑀸𑀡𑀲𑁆𑀲 ¶ 𑀅𑀦𑀸𑀯𑀚𑁆𑀚𑀦𑀢𑀸𑀬 𑀫𑀼𑀳𑀼𑀢𑁆𑀢𑀫𑀢𑁆𑀢𑀓𑁂 𑀓𑀸𑀮𑁂 𑀲𑀢𑀺 𑀦𑀧𑁆𑀧𑀳𑁄𑀢𑀺, 𑀭𑀸𑀚𑀸 𑀅𑀜𑁆𑀜𑀁 𑀅𑀚𑀸𑀦𑀸𑀧𑁂𑀢𑁆𑀯𑀸 𑀲𑀬𑀫𑁂𑀯 𑀕𑀦𑁆𑀢𑁆𑀯𑀸 𑀦𑀺𑀭𑀸𑀯𑀚𑁆𑀚𑀦𑀢𑀸𑀬 𑀧𑀫𑀸𑀤𑁂𑀦 𑀦𑀺𑀲𑀺𑀦𑁆𑀦𑀁 𑀫𑀳𑀸𑀧𑀼𑀭𑀺𑀲𑀁 𑀅𑀲𑀺𑀦𑀸 𑀧𑀳𑀭𑀺𑀢𑁆𑀯𑀸 𑀤𑁆𑀯𑁂 𑀪𑀸𑀕𑁂 𑀅𑀓𑀸𑀲𑀺. 𑀇𑀫𑀲𑁆𑀲 𑀭𑀜𑁆𑀜𑁄 𑀯𑀺𑀚𑀺𑀢𑁂 𑀅𑀝𑁆𑀞𑀫𑀁 𑀮𑁄𑀳𑀓𑀽𑀝𑀯𑀲𑁆𑀲𑀁, 𑀦𑀯𑀫𑀁 𑀓𑀮𑀮𑀯𑀲𑁆𑀲𑀁 𑀯𑀲𑁆𑀲𑀺. 𑀇𑀢𑀺 𑀇𑀫𑀲𑁆𑀲𑀸𑀧𑀺 𑀭𑀝𑁆𑀞𑁂 𑀦𑀯 𑀯𑀼𑀝𑁆𑀞𑀺𑀬𑁄 𑀧𑀢𑀺𑀢𑀸. 𑀲𑁄 𑀘 𑀭𑀸𑀚𑀸 𑀲𑀧𑀭𑀺𑀲𑁄 𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄. 𑀢𑁂𑀦𑀸𑀳 𑀲𑀁𑀓𑀺𑀘𑁆𑀘𑀧𑀡𑁆𑀟𑀺𑀢𑁄 𑁋

‘‘𑀉𑀧𑀳𑀘𑁆𑀘 ¶ 𑀫𑀦𑀁 𑀫𑀚𑁆𑀛𑁄, 𑀫𑀸𑀢𑀗𑁆𑀕𑀲𑁆𑀫𑀺𑀁 𑀬𑀲𑀲𑁆𑀲𑀺𑀦𑁂;

𑀲𑀧𑀸𑀭𑀺𑀲𑀚𑁆𑀚𑁄 𑀉𑀘𑁆𑀙𑀺𑀦𑁆𑀦𑁄, 𑀫𑀚𑁆𑀛𑀸𑀭𑀜𑁆𑀜𑀁 𑀢𑀤𑀸 𑀅𑀳𑀽𑀢𑀺’’. (𑀚𑀸. 𑁨.𑁧𑁯.𑁯𑁬) 𑁋

𑀏𑀯𑀁 𑀫𑀚𑁆𑀛𑀸𑀭𑀜𑁆𑀜𑀲𑁆𑀲 𑀅𑀭𑀜𑁆𑀜𑀪𑀽𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀸𑀢𑀗𑁆𑀕𑀲𑁆𑀲 𑀧𑀦 𑀇𑀲𑀺𑀦𑁄 𑀯𑀲𑁂𑀦 𑀢𑀤𑁂𑀯 𑀫𑀸𑀢𑀗𑁆𑀕𑀸𑀭𑀜𑁆𑀜𑀦𑁆𑀢𑀺 𑀯𑀼𑀢𑁆𑀢𑀁.

𑁬𑁬. 𑀧𑀜𑁆𑀳𑀧𑀝𑀺𑀪𑀸𑀦𑀸𑀦𑀻𑀢𑀺 ¶ 𑀧𑀜𑁆𑀳𑀩𑁆𑀬𑀸𑀓𑀭𑀡𑀸𑀦𑀺. 𑀧𑀘𑁆𑀘𑀦𑀻𑀓𑀁 𑀓𑀢𑀩𑁆𑀩𑀦𑁆𑀢𑀺 𑀧𑀘𑁆𑀘𑀦𑀻𑀓𑀁 𑀓𑀸𑀢𑀩𑁆𑀩𑀁. 𑀅𑀫𑀜𑁆𑀜𑀺𑀲𑁆𑀲𑀦𑁆𑀢𑀺 𑀯𑀺𑀮𑁄𑀫𑀪𑀸𑀕𑀁 𑀕𑀡𑁆𑀳𑀦𑁆𑀢𑁄 𑀯𑀺𑀬 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄.

𑁬𑁭. 𑀅𑀦𑀼𑀯𑀺𑀘𑁆𑀘𑀓𑀸𑀭𑀦𑁆𑀢𑀺 𑀅𑀦𑀼𑀯𑀺𑀘𑀸𑀭𑁂𑀢𑁆𑀯𑀸 𑀘𑀺𑀦𑁆𑀢𑁂𑀢𑁆𑀯𑀸 𑀢𑀼𑀮𑀬𑀺𑀢𑁆𑀯𑀸 𑀓𑀸𑀢𑀩𑁆𑀩𑀁 𑀓𑀭𑁄𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀸𑀥𑀼 𑀳𑁄𑀢𑀻𑀢𑀺 𑀲𑀼𑀦𑁆𑀤𑀭𑁄 𑀳𑁄𑀢𑀺. 𑀢𑀼𑀫𑁆𑀳𑀸𑀤𑀺𑀲𑀲𑁆𑀫𑀺𑀜𑁆𑀳𑀺 𑀫𑀁 𑀤𑀺𑀲𑁆𑀯𑀸 𑀫𑀁 𑀲𑀭𑀡𑀁 𑀕𑀘𑁆𑀙𑀦𑁆𑀢𑁂 𑀦𑀺𑀕𑀡𑁆𑀞𑀁 𑀤𑀺𑀲𑁆𑀯𑀸 𑀦𑀺𑀕𑀡𑁆𑀞𑀁 𑀲𑀭𑀡𑀁 𑀕𑀘𑁆𑀙𑀦𑁆𑀢𑁂 𑁋 ‘‘𑀓𑀺𑀁 𑀅𑀬𑀁 𑀉𑀧𑀸𑀮𑀺 𑀤𑀺𑀝𑁆𑀞𑀤𑀺𑀝𑁆𑀞𑀫𑁂𑀯 𑀲𑀭𑀡𑀁 𑀕𑀘𑁆𑀙𑀢𑀻’’𑀢𑀺? 𑀕𑀭𑀳𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀅𑀦𑀼𑀯𑀺𑀘𑁆𑀘𑀓𑀸𑀭𑁄 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀲𑀸𑀥𑀽𑀢𑀺 𑀤𑀲𑁆𑀲𑁂𑀢𑀺. 𑀧𑀝𑀸𑀓𑀁 𑀧𑀭𑀺𑀳𑀭𑁂𑀬𑁆𑀬𑀼𑀦𑁆𑀢𑀺 𑀢𑁂 𑀓𑀺𑀭 𑀏𑀯𑀭𑀽𑀧𑀁 𑀲𑀸𑀯𑀓𑀁 𑀮𑀪𑀺𑀢𑁆𑀯𑀸 ¶ 𑁋 ‘‘𑀅𑀲𑀼𑀓𑁄 𑀦𑀸𑀫 𑀭𑀸𑀚𑀸 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑁄 𑀯𑀸 𑀲𑁂𑀝𑁆𑀞𑀺 𑀯𑀸 𑀅𑀫𑁆𑀳𑀸𑀓𑀁 𑀲𑀭𑀡𑀁 𑀕𑀢𑁄 𑀲𑀸𑀯𑀓𑁄 𑀚𑀸𑀢𑁄’’𑀢𑀺 𑀧𑀝𑀸𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀦𑀕𑀭𑁂 𑀖𑁄𑀲𑁂𑀦𑁆𑀢𑀸 𑀆𑀳𑀺𑀡𑁆𑀟𑀦𑁆𑀢𑀺. 𑀓𑀲𑁆𑀫𑀸? 𑀏𑀯𑀁 𑀦𑁄 𑀫𑀳𑀦𑁆𑀢𑀪𑀸𑀯𑁄 𑀆𑀯𑀺 𑀪𑀯𑀺𑀲𑁆𑀲𑀢𑀻𑀢𑀺 𑀘, 𑀲𑀘𑁂 𑀢𑀲𑁆𑀲 ‘‘𑀓𑀺𑀫𑀳𑀁 𑀏𑀢𑁂𑀲𑀁 𑀲𑀭𑀡𑀁 𑀕𑀢𑁄’’𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀫𑁆𑀧𑀺 𑀲𑁄 ‘‘𑀏𑀢𑁂𑀲𑀁 𑀫𑁂 𑀲𑀭𑀡𑀕𑀢𑀪𑀸𑀯𑀁 𑀩𑀳𑀽 𑀚𑀸𑀦𑀦𑁆𑀢𑀺, 𑀤𑀼𑀓𑁆𑀔𑀁 𑀇𑀤𑀸𑀦𑀺 𑀧𑀝𑀺𑀦𑀺𑀯𑀢𑁆𑀢𑀺𑀢𑀼’’𑀦𑁆𑀢𑀺 𑀯𑀺𑀦𑁄𑀤𑁂𑀢𑁆𑀯𑀸 𑀦 𑀧𑀝𑀺𑀓𑁆𑀓𑀫𑀺𑀲𑁆𑀲𑀢𑀻𑀢𑀺 𑀘. ‘‘𑀢𑁂𑀦𑀸𑀳 𑀧𑀝𑀸𑀓𑀁 𑀧𑀭𑀺𑀳𑀭𑁂𑀬𑁆𑀬𑀼’’𑀦𑁆𑀢𑀺.

𑁬𑁮. 𑀑𑀧𑀸𑀦𑀪𑀽𑀢𑀦𑁆𑀢𑀺 𑀧𑀝𑀺𑀬𑀢𑁆𑀢𑀉𑀤𑀧𑀸𑀦𑁄 𑀯𑀺𑀬 𑀞𑀺𑀢𑀁. 𑀓𑀼𑀮𑀦𑁆𑀢𑀺 𑀢𑀯 𑀦𑀺𑀯𑁂𑀲𑀦𑀁. 𑀤𑀸𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸𑀲𑀻𑀢𑀺 𑀧𑀼𑀩𑁆𑀩𑁂 𑀤𑀲𑀧𑀺 𑀯𑀻𑀲𑀢𑀺𑀧𑀺 𑀲𑀝𑁆𑀞𑀺𑀧𑀺 𑀚𑀦𑁂 𑀆𑀕𑀢𑁂 𑀤𑀺𑀲𑁆𑀯𑀸 𑀦𑀢𑁆𑀣𑀻𑀢𑀺 𑀅𑀯𑀢𑁆𑀯𑀸 𑀤𑁂𑀢𑀺. 𑀇𑀤𑀸𑀦𑀺 𑀫𑀁 𑀲𑀭𑀡𑀁 𑀕𑀢𑀓𑀸𑀭𑀡𑀫𑀢𑁆𑀢𑁂𑀦𑀯 𑀫𑀸 𑀇𑀫𑁂𑀲𑀁 𑀤𑁂𑀬𑁆𑀬𑀥𑀫𑁆𑀫𑀁, 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀣, 𑀲𑀫𑁆𑀧𑀢𑁆𑀢𑀸𑀦𑀜𑁆𑀳𑀺 𑀤𑀸𑀢𑀩𑁆𑀩𑀫𑁂𑀯𑀸𑀢𑀺 𑀑𑀯𑀤𑀢𑀺. 𑀲𑀼𑀢𑀫𑁂𑀢𑀁, 𑀪𑀦𑁆𑀢𑁂𑀢𑀺 𑀓𑀼𑀢𑁄 𑀲𑀼𑀢𑀁? 𑀦𑀺𑀕𑀡𑁆𑀞𑀸𑀦𑀁 𑀲𑀦𑁆𑀢𑀺𑀓𑀸, 𑀢𑁂 𑀓𑀺𑀭 𑀓𑀼𑀮𑀖𑀭𑁂𑀲𑀼 𑀏𑀯𑀁 𑀧𑀓𑀸𑀲𑁂𑀦𑁆𑀢𑀺 𑁋 ‘‘𑀫𑀬𑀁 ‘𑀬𑀲𑁆𑀲 𑀓𑀲𑁆𑀲𑀘𑀺 𑀲𑀫𑁆𑀧𑀢𑁆𑀢𑀲𑁆𑀲 𑀤𑀸𑀢𑀩𑁆𑀩’𑀦𑁆𑀢𑀺 𑀯𑀤𑀸𑀫, 𑀲𑀫𑀡𑁄 𑀧𑀦 𑀕𑁄𑀢𑀫𑁄 ‘𑀫𑀬𑁆𑀳𑀫𑁂𑀯 𑀤𑀸𑀦𑀁 𑀤𑀸𑀢𑀩𑁆𑀩𑀁…𑀧𑁂… 𑀦 𑀅𑀜𑁆𑀜𑁂𑀲𑀁 𑀲𑀸𑀯𑀓𑀸𑀦𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’𑀦𑁆𑀢𑀺 𑀯𑀤𑀢𑀻’’𑀢𑀺. 𑀢𑀁 𑀲𑀦𑁆𑀥𑀸𑀬 𑀅𑀬𑀁 𑀕𑀳𑀧𑀢𑀺 ‘‘𑀲𑀼𑀢𑀫𑁂𑀢’’𑀦𑁆𑀢𑀺 𑀆𑀳.

𑁬𑁯. 𑀅𑀦𑀼𑀧𑀼𑀩𑁆𑀩𑀺𑀁 ¶ 𑀓𑀣𑀦𑁆𑀢𑀺 𑀤𑀸𑀦𑀸𑀦𑀦𑁆𑀢𑀭𑀁 𑀲𑀻𑀮𑀁, 𑀲𑀻𑀮𑀸𑀦𑀦𑁆𑀢𑀭𑀁 𑀲𑀕𑁆𑀕𑀁, 𑀲𑀕𑁆𑀕𑀸𑀦𑀦𑁆𑀢𑀭𑀁 𑀫𑀕𑁆𑀕𑀦𑁆𑀢𑀺 𑀏𑀯𑀁 𑀅𑀦𑀼𑀧𑀝𑀺𑀧𑀸𑀝𑀺𑀓𑀣𑀁. 𑀢𑀢𑁆𑀣 ¶ 𑀤𑀸𑀦𑀓𑀣𑀦𑁆𑀢𑀺 𑀇𑀤𑀁 𑀤𑀸𑀦𑀁 𑀦𑀸𑀫 𑀲𑀼𑀔𑀸𑀦𑀁 𑀦𑀺𑀤𑀸𑀦𑀁, 𑀲𑀫𑁆𑀧𑀢𑁆𑀢𑀻𑀦𑀁 𑀫𑀽𑀮𑀁, 𑀪𑁄𑀕𑀸𑀦𑀁 𑀧𑀢𑀺𑀝𑁆𑀞𑀸, 𑀯𑀺𑀲𑀫𑀕𑀢𑀲𑁆𑀲 𑀢𑀸𑀡𑀁 𑀮𑁂𑀡𑀁 𑀕𑀢𑀺𑀧𑀭𑀸𑀬𑀡𑀁, 𑀇𑀥𑀮𑁄𑀓𑀧𑀭𑀮𑁄𑀓𑁂𑀲𑀼 𑀤𑀸𑀦𑀲𑀤𑀺𑀲𑁄 𑀅𑀯𑀲𑁆𑀲𑀬𑁄 𑀧𑀢𑀺𑀝𑁆𑀞𑀸 𑀆𑀭𑀫𑁆𑀫𑀡𑀁 𑀢𑀸𑀡𑀁 𑀮𑁂𑀡𑀁 𑀕𑀢𑀺 𑀧𑀭𑀸𑀬𑀡𑀁 𑀦𑀢𑁆𑀣𑀺. 𑀇𑀤𑀜𑁆𑀳𑀺 𑀅𑀯𑀲𑁆𑀲𑀬𑀝𑁆𑀞𑁂𑀦 𑀭𑀢𑀦𑀫𑀬𑀲𑀻𑀳𑀸𑀲𑀦𑀲𑀤𑀺𑀲𑀁, 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀫𑀳𑀸𑀧𑀣𑀯𑀺𑀲𑀤𑀺𑀲𑀁, 𑀆𑀮𑀫𑁆𑀩𑀦𑀝𑁆𑀞𑁂𑀦 𑀆𑀮𑀫𑁆𑀩𑀦𑀭𑀚𑁆𑀚𑀼𑀲𑀤𑀺𑀲𑀁. 𑀇𑀤𑀜𑁆𑀳𑀺 ¶ 𑀤𑀼𑀓𑁆𑀔𑀦𑀺𑀢𑁆𑀣𑀭𑀡𑀝𑁆𑀞𑁂𑀦 𑀦𑀸𑀯𑀸, 𑀲𑀫𑀲𑁆𑀲𑀸𑀲𑀦𑀝𑁆𑀞𑁂𑀦 𑀲𑀗𑁆𑀕𑀸𑀫𑀲𑀽𑀭𑁄, 𑀪𑀬𑀧𑀭𑀺𑀢𑁆𑀢𑀸𑀡𑀝𑁆𑀞𑁂𑀦 𑀲𑀼𑀲𑀗𑁆𑀔𑀢𑀦𑀕𑀭𑀁, 𑀫𑀘𑁆𑀙𑁂𑀭𑀫𑀮𑀸𑀤𑀻𑀳𑀺 𑀅𑀦𑀼𑀧𑀮𑀺𑀢𑁆𑀢𑀝𑁆𑀞𑁂𑀦 𑀧𑀤𑀼𑀫𑀁, 𑀢𑁂𑀲𑀁 𑀦𑀺𑀤𑀳𑀦𑀝𑁆𑀞𑁂𑀦 𑀅𑀕𑁆𑀕𑀺, 𑀤𑀼𑀭𑀸𑀲𑀤𑀝𑁆𑀞𑁂𑀦 𑀆𑀲𑀻𑀯𑀺𑀲𑁄. 𑀅𑀲𑀦𑁆𑀢𑀸𑀲𑀦𑀝𑁆𑀞𑁂𑀦 𑀲𑀻𑀳𑁄, 𑀩𑀮𑀯𑀦𑁆𑀢𑀝𑁆𑀞𑁂𑀦 𑀳𑀢𑁆𑀣𑀻, 𑀅𑀪𑀺𑀫𑀗𑁆𑀕𑀮𑀲𑀫𑁆𑀫𑀢𑀝𑁆𑀞𑁂𑀦 𑀲𑁂𑀢𑀯𑀲𑀪𑁄, 𑀔𑁂𑀫𑀦𑁆𑀢𑀪𑀽𑀫𑀺𑀲𑀫𑁆𑀧𑀸𑀧𑀦𑀝𑁆𑀞𑁂𑀦 𑀯𑀮𑀸𑀳𑀓𑁄 𑀅𑀲𑁆𑀲𑀭𑀸𑀚𑀸. 𑀤𑀸𑀦𑀁 𑀦𑀸𑀫𑁂𑀪𑀁 𑀫𑀬𑁆𑀳𑀁 𑀕𑀢𑀫𑀕𑁆𑀕𑁄, 𑀫𑀬𑁆𑀳𑁂𑀯𑁂𑀲𑁄 𑀯𑀁𑀲𑁄, 𑀫𑀬𑀸 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁂𑀦 𑀯𑁂𑀮𑀸𑀫𑀫𑀳𑀸𑀬𑀜𑁆𑀜𑁄, 𑀫𑀳𑀸𑀕𑁄𑀯𑀺𑀦𑁆𑀤𑀫𑀳𑀸𑀬𑀜𑁆𑀜𑁄 𑀫𑀳𑀸𑀲𑀼𑀤𑀲𑁆𑀲𑀦𑀫𑀳𑀸𑀬𑀜𑁆𑀜𑁄, 𑀯𑁂𑀲𑁆𑀲𑀦𑁆𑀢𑀭𑀫𑀳𑀸𑀬𑀜𑁆𑀜𑁄𑀢𑀺 𑀅𑀦𑁂𑀓𑀫𑀳𑀸𑀬𑀜𑁆𑀜𑀸 𑀧𑀯𑀢𑁆𑀢𑀺𑀢𑀸, 𑀲𑀲𑀪𑀽𑀢𑁂𑀦 𑀚𑀮𑀺𑀢𑁂 𑀅𑀕𑁆𑀕𑀺𑀓𑁆𑀔𑀦𑁆𑀥𑁂 𑀅𑀢𑁆𑀢𑀸𑀦𑀁 𑀦𑀺𑀬𑁆𑀬𑀸𑀤𑁂𑀦𑁆𑀢𑁂𑀦 𑀲𑀫𑁆𑀧𑀢𑁆𑀢𑀬𑀸𑀘𑀓𑀸𑀦𑀁 𑀘𑀺𑀢𑁆𑀢𑀁 𑀕𑀳𑀺𑀢𑀁. 𑀤𑀸𑀦𑀜𑁆𑀳𑀺 𑀮𑁄𑀓𑁂 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀁 𑀤𑁂𑀢𑀺, 𑀫𑀸𑀭𑀲𑀫𑁆𑀧𑀢𑁆𑀢𑀺𑀁 𑀤𑁂𑀢𑀺, 𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀁 𑀤𑁂𑀢𑀺, 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀁 𑀤𑁂𑀢𑀺, 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁, 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁, 𑀅𑀪𑀺𑀲𑀫𑁆𑀩𑁄𑀥𑀺𑀜𑀸𑀡𑀁 𑀤𑁂𑀢𑀻𑀢𑀺 𑀏𑀯𑀫𑀸𑀤𑀺𑀁 𑀤𑀸𑀦𑀕𑀼𑀡𑀧𑀝𑀺𑀲𑀁𑀬𑀼𑀢𑁆𑀢𑀁 𑀓𑀣𑀁.

𑀬𑀲𑁆𑀫𑀸 𑀧𑀦 𑀤𑀸𑀦𑀁 𑀤𑀤𑀦𑁆𑀢𑁄 𑀲𑀻𑀮𑀁 𑀲𑀫𑀸𑀤𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀢𑀤𑀦𑀢𑀭𑀁 𑀲𑀻𑀮𑀓𑀣𑀁 𑀓𑀣𑁂𑀲𑀺. 𑀲𑀻𑀮𑀓𑀣𑀦𑁆𑀢𑀺 𑀲𑀻𑀮𑀁 𑀦𑀸𑀫𑁂𑀢𑀁 𑀅𑀯𑀲𑁆𑀲𑀬𑁄 𑀧𑀢𑀺𑀝𑁆𑀞𑀸 𑀆𑀭𑀫𑁆𑀫𑀡𑀁 𑀢𑀸𑀡𑀁 𑀮𑁂𑀡𑀁 ¶ 𑀕𑀢𑀺 𑀧𑀭𑀸𑀬𑀡𑀁, 𑀲𑀻𑀮𑀁 𑀦𑀸𑀫𑁂𑀢𑀁 𑀫𑀫 𑀯𑀁𑀲𑁄, 𑀅𑀳𑀁 𑀲𑀗𑁆𑀔𑀧𑀸𑀮𑀦𑀸𑀕𑀭𑀸𑀚𑀓𑀸𑀮𑁂, 𑀪𑀽𑀭𑀺𑀤𑀢𑁆𑀢𑀦𑀸𑀕𑀭𑀸𑀚𑀓𑀸𑀮𑁂, 𑀘𑀫𑁆𑀧𑁂𑀬𑁆𑀬𑀦𑀸𑀕𑀭𑀸𑀚𑀓𑀸𑀮𑁂, 𑀲𑀻𑀮𑀯𑀦𑀸𑀕𑀭𑀸𑀚𑀓𑀸𑀮𑁂, 𑀫𑀸𑀢𑀼𑀧𑁄𑀲𑀓𑀳𑀢𑁆𑀣𑀺𑀭𑀸𑀚𑀓𑀸𑀮𑁂, 𑀙𑀤𑁆𑀤𑀦𑁆𑀢𑀳𑀢𑁆𑀣𑀺𑀭𑀸𑀚𑀓𑀸𑀮𑁂𑀢𑀺 𑀅𑀦𑀦𑁆𑀢𑁂𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀲𑀻𑀮𑀁 𑀧𑀭𑀺𑀧𑀽𑀭𑁂𑀲𑀺𑀁. 𑀇𑀥𑀮𑁄𑀓𑀧𑀭𑀮𑁄𑀓𑀲𑀫𑁆𑀧𑀢𑁆𑀢𑀻𑀦𑀜𑁆𑀳𑀺 𑀲𑀻𑀮𑀲𑀤𑀺𑀲𑁄 𑀅𑀯𑀲𑁆𑀲𑀬𑁄, 𑀲𑀻𑀮𑀲𑀤𑀺𑀲𑀸 𑀧𑀢𑀺𑀝𑁆𑀞𑀸, 𑀆𑀭𑀫𑁆𑀫𑀡𑀁 𑀢𑀸𑀡𑀁 𑀮𑁂𑀡𑀁 𑀕𑀢𑀺 𑀧𑀭𑀸𑀬𑀡𑀁 𑀦𑀢𑁆𑀣𑀺, 𑀲𑀻𑀮𑀸𑀮𑀗𑁆𑀓𑀸𑀭𑀲𑀤𑀺𑀲𑁄 𑀅𑀮𑀗𑁆𑀓𑀸𑀭𑁄 𑀦𑀢𑁆𑀣𑀺, 𑀲𑀻𑀮𑀧𑀼𑀧𑁆𑀨𑀲𑀤𑀺𑀲𑀁 𑀧𑀼𑀧𑁆𑀨𑀁 𑀦𑀢𑁆𑀣𑀺, 𑀲𑀻𑀮𑀕𑀦𑁆𑀥𑀲𑀤𑀺𑀲𑁄 𑀕𑀦𑁆𑀥𑁄 𑀦𑀢𑁆𑀣𑀺. 𑀲𑀻𑀮𑀸𑀮𑀗𑁆𑀓𑀸𑀭𑁂𑀦 𑀳𑀺 𑀅𑀮𑀗𑁆𑀓𑀢𑀁 𑀲𑀻𑀮𑀓𑀼𑀲𑀼𑀫𑀧𑀺𑀴𑀦𑁆𑀥𑀦𑀁 𑀲𑀻𑀮𑀕𑀦𑁆𑀥𑀸𑀦𑀼𑀮𑀺𑀢𑁆𑀢𑀁 ¶ 𑀲𑀤𑁂𑀯𑀓𑁄𑀧𑀺 𑀮𑁄𑀓𑁄 𑀑𑀮𑁄𑀓𑁂𑀦𑁆𑀢𑁄 𑀢𑀺𑀢𑁆𑀢𑀺𑀁 𑀦 𑀕𑀘𑁆𑀙𑀢𑀻𑀢𑀺 𑀏𑀯𑀫𑀸𑀤𑀺𑀁 𑀲𑀻𑀮𑀕𑀼𑀡𑀧𑀝𑀺𑀲𑀁𑀬𑀼𑀢𑁆𑀢𑀁 𑀓𑀣𑀁.

𑀇𑀤𑀁 𑀧𑀦 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀅𑀬𑀁 𑀲𑀕𑁆𑀕𑁄 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀲𑀻𑀮𑀸𑀦𑀦𑁆𑀢𑀭𑀁 𑀲𑀕𑁆𑀕𑀓𑀣𑀁 𑀓𑀣𑁂𑀲𑀺. 𑀲𑀕𑁆𑀕𑀓𑀣𑀦𑁆𑀢𑀺 𑀅𑀬𑀁 𑀲𑀕𑁆𑀕𑁄 𑀦𑀸𑀫 𑀇𑀝𑁆𑀞𑁄 𑀓𑀦𑁆𑀢𑁄 𑀫𑀦𑀸𑀧𑁄, 𑀦𑀺𑀘𑁆𑀘𑀫𑁂𑀢𑁆𑀣 𑀓𑀻𑀴𑀸, 𑀦𑀺𑀘𑁆𑀘𑀁 𑀲𑀫𑁆𑀧𑀢𑁆𑀢𑀺𑀬𑁄 𑀮𑀩𑁆𑀪𑀦𑁆𑀢𑀺, 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸 𑀤𑁂𑀯𑀸 𑀦𑀯𑀼𑀢𑀺𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀤𑀺𑀩𑁆𑀩𑀲𑀼𑀔𑀁 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀺, 𑀢𑀸𑀯𑀢𑀺𑀁𑀲𑀸 𑀢𑀺𑀲𑁆𑀲𑁄 𑀘 𑀯𑀲𑁆𑀲𑀓𑁄𑀝𑀺𑀬𑁄 𑀲𑀝𑁆𑀞𑀺 𑀘 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀏𑀯𑀫𑀸𑀤𑀺𑀁 𑀲𑀕𑁆𑀕𑀕𑀼𑀡𑀧𑀝𑀺𑀲𑀁𑀬𑀼𑀢𑁆𑀢𑀁 𑀓𑀣𑀁. 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀁 𑀓𑀣𑀬𑀦𑁆𑀢𑀸𑀦𑀜𑁆𑀳𑀺 𑀩𑀼𑀤𑁆𑀥𑀸𑀦𑀁 𑀫𑀼𑀔𑀁 𑀦𑀧𑁆𑀧𑀳𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀲𑀕𑁆𑀕𑀓𑀣𑀁 𑀓𑀣𑁂𑀬𑁆𑀬’’𑀦𑁆𑀢𑀺𑀆𑀤𑀺 (𑀫. 𑀦𑀺. 𑁩.𑁨𑁫𑁫).

𑀏𑀯𑀁 ¶ 𑀲𑀕𑁆𑀕𑀓𑀣𑀸𑀬 𑀧𑀮𑁄𑀪𑁂𑀢𑁆𑀯𑀸 𑀧𑀼𑀦 𑀳𑀢𑁆𑀣𑀺𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀢𑀲𑁆𑀲 𑀲𑁄𑀡𑁆𑀟𑀁 𑀙𑀺𑀦𑁆𑀤𑀦𑁆𑀢𑁄 𑀯𑀺𑀬 𑁋 ‘‘𑀅𑀬𑀫𑁆𑀧𑀺 𑀲𑀕𑁆𑀕𑁄 𑀅𑀦𑀺𑀘𑁆𑀘𑁄 𑀅𑀤𑁆𑀥𑀼𑀯𑁄, 𑀦 𑀏𑀢𑁆𑀣 𑀙𑀦𑁆𑀤𑀭𑀸𑀕𑁄 𑀓𑀸𑀢𑀩𑁆𑀩𑁄’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑁋 ‘‘𑀅𑀧𑁆𑀧𑀲𑁆𑀲𑀸𑀤𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀫𑀬𑀸 𑀩𑀳𑀼𑀤𑀼𑀓𑁆𑀔𑀸 ¶ 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁪𑁧𑁭; 𑀫. 𑀦𑀺. 𑁧.𑁨𑁩𑁫) 𑀦𑀬𑁂𑀦 𑀓𑀸𑀫𑀸𑀦𑀁 𑀆𑀤𑀻𑀦𑀯𑀁 𑀑𑀓𑀸𑀭𑀁 𑀲𑀁𑀓𑀺𑀮𑁂𑀲𑀁 𑀓𑀣𑁂𑀲𑀺. 𑀢𑀢𑁆𑀣 𑀆𑀤𑀻𑀦𑀯𑁄𑀢𑀺 𑀤𑁄𑀲𑁄. 𑀑𑀓𑀸𑀭𑁄𑀢𑀺 𑀅𑀯𑀓𑀸𑀭𑁄 𑀮𑀸𑀫𑀓𑀪𑀸𑀯𑁄. 𑀲𑀁𑀓𑀺𑀮𑁂𑀲𑁄𑀢𑀺 𑀢𑁂𑀳𑀺 𑀲𑀢𑁆𑀢𑀸𑀦𑀁 𑀲𑀁𑀲𑀸𑀭𑁂 𑀲𑀁𑀓𑀺𑀮𑀺𑀲𑁆𑀲𑀦𑀁. 𑀬𑀣𑀸𑀳 ‘‘𑀓𑀺𑀮𑀺𑀲𑁆𑀲𑀦𑁆𑀢𑀺 𑀯𑀢, 𑀪𑁄, 𑀲𑀢𑁆𑀢𑀸’’𑀢𑀺 (𑀫. 𑀦𑀺. 𑁨.𑁩𑁫𑁧).

𑀏𑀯𑀁 𑀓𑀸𑀫𑀸𑀤𑀻𑀦𑀯𑁂𑀦 𑀢𑀚𑁆𑀚𑀺𑀢𑁆𑀯𑀸 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀁 𑀧𑀓𑀸𑀲𑁂𑀲𑀺. 𑀓𑀮𑁆𑀮𑀘𑀺𑀢𑁆𑀢𑀦𑁆𑀢𑀺 𑀅𑀭𑁄𑀕𑀘𑀺𑀢𑁆𑀢𑀁. 𑀲𑀸𑀫𑀼𑀓𑁆𑀓𑀁𑀲𑀺𑀓𑀸𑀢𑀺 𑀲𑀸𑀫𑀁 𑀉𑀓𑁆𑀓𑀁𑀲𑀺𑀓𑀸 𑀅𑀢𑁆𑀢𑀦𑀸𑀬𑁂𑀯 𑀕𑀳𑁂𑀢𑁆𑀯𑀸 𑀉𑀤𑁆𑀥𑀭𑀺𑀢𑁆𑀯𑀸 𑀕𑀳𑀺𑀢𑀸, 𑀲𑀬𑀫𑁆𑀪𑀽𑀜𑀸𑀡𑁂𑀦 𑀤𑀺𑀝𑁆𑀞𑀸, 𑀅𑀲𑀸𑀥𑀸𑀭𑀡𑀸 𑀅𑀜𑁆𑀜𑁂𑀲𑀦𑁆𑀢𑀺 𑀅𑀢𑁆𑀣𑁄. 𑀓𑀸 𑀧𑀦𑁂𑀲𑀸𑀢𑀺, 𑀅𑀭𑀺𑀬𑀲𑀘𑁆𑀘𑀤𑁂𑀲𑀦𑀸? 𑀢𑁂𑀦𑁂𑀯𑀸𑀳 𑁋 ‘‘𑀤𑀼𑀓𑁆𑀔𑀁 𑀲𑀫𑀼𑀤𑀬𑀁 𑀦𑀺𑀭𑁄𑀥𑀁 𑀫𑀕𑁆𑀕’’𑀦𑁆𑀢𑀺.

𑀯𑀺𑀭𑀚𑀁 𑀯𑀻𑀢𑀫𑀮𑀦𑁆𑀢𑀺 𑀭𑀸𑀕𑀭𑀚𑀸𑀤𑀻𑀦𑀁 𑀅𑀪𑀸𑀯𑀸 𑀯𑀺𑀭𑀚𑀁, 𑀭𑀸𑀕𑀫𑀮𑀸𑀤𑀻𑀦𑀁 𑀯𑀺𑀕𑀢𑀢𑁆𑀢𑀸 𑀯𑀻𑀢𑀫𑀮𑀁. 𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀉𑀧𑀭𑀺 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑁂 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁, 𑀘𑀽𑀴𑀭𑀸𑀳𑀼𑀮𑁄𑀯𑀸𑀤𑁂 𑀆𑀲𑀯𑀓𑁆𑀔𑀬𑀲𑁆𑀲𑁂𑀢𑀁 𑀦𑀸𑀫𑀁. 𑀇𑀥 𑀧𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀢𑁆𑀣𑀁 ‘‘𑀬𑀁𑀓𑀺𑀜𑁆𑀘𑀺 𑀲𑀫𑀼𑀤𑀬𑀥𑀫𑁆𑀫𑀁, 𑀲𑀩𑁆𑀩𑀁 𑀢𑀁 𑀦𑀺𑀭𑁄𑀥𑀥𑀫𑁆𑀫’’𑀦𑁆𑀢𑀺 𑀆𑀳. 𑀢𑀜𑁆𑀳𑀺 𑀦𑀺𑀭𑁄𑀥𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀓𑀺𑀘𑁆𑀘𑀯𑀲𑁂𑀦 𑀏𑀯𑀁 𑀲𑀩𑁆𑀩𑀲𑀗𑁆𑀔𑀢𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑀤𑀺𑀝𑁆𑀞𑁄 ¶ 𑀅𑀭𑀺𑀬𑀲𑀘𑁆𑀘𑀥𑀫𑁆𑀫𑁄 𑀏𑀢𑁂𑀦𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑁄. 𑀏𑀲 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺. 𑀢𑀺𑀡𑁆𑀡𑀸 ¶ 𑀯𑀺𑀘𑀺𑀓𑀺𑀘𑁆𑀙𑀸 𑀅𑀦𑁂𑀦𑀸𑀢𑀺 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄. 𑀯𑀺𑀕𑀢𑀸 𑀓𑀣𑀁𑀓𑀣𑀸 𑀅𑀲𑁆𑀲𑀸𑀢𑀺 𑀯𑀺𑀕𑀢𑀓𑀣𑀁𑀓𑀣𑁄. 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄𑀢𑀺 𑀯𑁂𑀲𑀸𑀭𑀚𑁆𑀚𑀁 𑀧𑀢𑁆𑀢𑁄. 𑀓𑀢𑁆𑀣? 𑀲𑀢𑁆𑀣𑀼 𑀲𑀸𑀲𑀦𑁂. 𑀦𑀸𑀲𑁆𑀲 𑀧𑀭𑁄 𑀧𑀘𑁆𑀘𑀬𑁄, 𑀦 𑀧𑀭𑀲𑁆𑀲 𑀲𑀤𑁆𑀥𑀸𑀬 𑀏𑀢𑁆𑀣 𑀯𑀢𑁆𑀢𑀢𑀻𑀢𑀺 𑀅𑀧𑀭𑀧𑁆𑀧𑀘𑁆𑀘𑀬𑁄.

𑁭𑁦. 𑀘𑀺𑀢𑁆𑀢𑁂𑀦 𑀲𑀫𑁆𑀧𑀝𑀺𑀘𑁆𑀙𑀫𑀸𑀦𑁄 𑀅𑀪𑀺𑀦𑀦𑁆𑀤𑀺𑀢𑁆𑀯𑀸, 𑀯𑀸𑀘𑀸𑀬 𑀧𑀲𑀁𑀲𑀫𑀸𑀦𑁄 𑀅𑀦𑀼𑀫𑁄𑀤𑀺𑀢𑁆𑀯𑀸. 𑀆𑀯𑀭𑀸𑀫𑀻𑀢𑀺 𑀣𑀓𑁂𑀫𑀺 𑀧𑀺𑀤𑀳𑀸𑀫𑀺. 𑀅𑀦𑀸𑀯𑀝𑀦𑁆𑀢𑀺 𑀦 𑀆𑀯𑀭𑀺𑀢𑀁 𑀯𑀺𑀯𑀝𑀁 𑀉𑀕𑁆𑀖𑀸𑀝𑀺𑀢𑀁.

𑁭𑁧. 𑀅𑀲𑁆𑀲𑁄𑀲𑀺 𑀔𑁄 𑀤𑀻𑀖𑀢𑀧𑀲𑁆𑀲𑀻𑀢𑀺 𑀲𑁄 𑀓𑀺𑀭 𑀢𑀲𑁆𑀲 𑀕𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑁋 ‘‘𑀧𑀡𑁆𑀟𑀺𑀢𑁄 𑀕𑀳𑀧𑀢𑀺 ¶ , 𑀲𑀫𑀡𑁄 𑀘 𑀕𑁄𑀢𑀫𑁄 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄 𑀦𑀺𑀬𑁆𑀬𑀸𑀦𑀺𑀓𑀓𑀣𑁄, 𑀤𑀲𑁆𑀲𑀦𑁂𑀧𑀺 𑀢𑀲𑁆𑀲 𑀧𑀲𑀻𑀤𑀺𑀲𑁆𑀲𑀢𑀺, 𑀥𑀫𑁆𑀫𑀓𑀣𑀸𑀬𑀧𑀺 𑀧𑀲𑀻𑀤𑀺𑀲𑁆𑀲𑀢𑀺, 𑀧𑀲𑀻𑀤𑀺𑀢𑁆𑀯𑀸 𑀲𑀭𑀡𑀁 𑀕𑀫𑀺𑀲𑁆𑀲𑀢𑀺, 𑀕𑀢𑁄 𑀦𑀼 𑀔𑁄 𑀲𑀭𑀡𑀁 𑀕𑀳𑀧𑀢𑀺 𑀦 𑀢𑀸𑀯 𑀕𑀢𑁄’’𑀢𑀺 𑀑𑀳𑀺𑀢𑀲𑁄𑀢𑁄𑀯 𑀳𑀼𑀢𑁆𑀯𑀸 𑀯𑀺𑀘𑀭𑀢𑀺. 𑀢𑀲𑁆𑀫𑀸 𑀧𑀞𑀫𑀁𑀬𑁂𑀯 𑀅𑀲𑁆𑀲𑁄𑀲𑀺.

𑁭𑁨. 𑀢𑁂𑀦 𑀳𑀺 𑀲𑀫𑁆𑀫𑀸𑀢𑀺 𑀩𑀮𑀯𑀲𑁄𑀓𑁂𑀦 𑀅𑀪𑀺𑀪𑀽𑀢𑁄 ‘‘𑀏𑀢𑁆𑀣𑁂𑀯 𑀢𑀺𑀝𑁆𑀞𑀸’’𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸𑀧𑀺 𑀅𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀤𑁄𑀯𑀸𑀭𑀺𑀓𑁂𑀦 𑀲𑀤𑁆𑀥𑀺𑀁 𑀲𑀮𑁆𑀮𑀧𑀢𑀺𑀬𑁂𑀯.

𑀫𑀚𑁆𑀛𑀺𑀫𑀸𑀬 𑀤𑁆𑀯𑀸𑀭𑀲𑀸𑀮𑀸𑀬𑀸𑀦𑁆𑀢𑀺 𑀬𑀲𑁆𑀲 𑀖𑀭𑀲𑁆𑀲 𑀲𑀢𑁆𑀢 𑀤𑁆𑀯𑀸𑀭𑀓𑁄𑀝𑁆𑀞𑀓𑀸, 𑀢𑀲𑁆𑀲 𑀲𑀩𑁆𑀩𑀅𑀩𑁆𑀪𑀦𑁆𑀢𑀭𑀢𑁄 𑀯𑀸 𑀲𑀩𑁆𑀩𑀩𑀸𑀳𑀺𑀭𑀢𑁄 𑀯𑀸 𑀧𑀝𑁆𑀞𑀸𑀬 𑀘𑀢𑀼𑀢𑁆𑀣𑀤𑁆𑀯𑀸𑀭𑀓𑁄𑀝𑁆𑀞𑀓𑁄, 𑀬𑀲𑁆𑀲 𑀧𑀜𑁆𑀘, 𑀢𑀲𑁆𑀲 𑀢𑀢𑀺𑀬𑁄, 𑀬𑀲𑁆𑀲 𑀢𑀬𑁄, 𑀢𑀲𑁆𑀲 𑀤𑀼𑀢𑀺𑀬𑁄 𑀤𑁆𑀯𑀸𑀭𑀓𑁄𑀝𑁆𑀞𑀓𑁄 𑀫𑀚𑁆𑀛𑀺𑀫𑀤𑁆𑀯𑀸𑀭𑀲𑀸𑀮𑀸 𑀦𑀸𑀫. 𑀏𑀓𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑁆𑀲 𑀧𑀦 𑀖𑀭𑀲𑁆𑀲 𑀫𑀚𑁆𑀛𑀝𑁆𑀞𑀸𑀦𑁂 𑀫𑀗𑁆𑀕𑀮𑀢𑁆𑀣𑀫𑁆𑀪𑀁 𑀦𑀺𑀲𑁆𑀲𑀸𑀬 𑀫𑀚𑁆𑀛𑀺𑀫𑀤𑁆𑀯𑀸𑀭𑀲𑀸𑀮𑀸. 𑀢𑀲𑁆𑀲 𑀧𑀦 𑀕𑁂𑀳𑀲𑁆𑀲 𑀲𑀢𑁆𑀢 𑀤𑁆𑀯𑀸𑀭𑀓𑁄𑀝𑁆𑀞𑀓𑀸, 𑀧𑀜𑁆𑀘𑀸𑀢𑀺𑀧𑀺 𑀯𑀼𑀢𑁆𑀢𑀁.

𑁭𑁩. 𑀅𑀕𑁆𑀕𑀦𑁆𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀺. 𑀬𑀁 𑀲𑀼𑀤𑀦𑁆𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀬𑀁 𑀦𑀸𑀝𑀧𑀼𑀢𑁆𑀢𑀁. 𑀲𑀼𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀢𑁂𑀦𑁂𑀯 𑀉𑀢𑁆𑀢𑀭𑀸𑀲𑀗𑁆𑀕𑁂𑀦 𑀉𑀤𑀭𑁂 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀕𑀳𑁂𑀢𑁆𑀯𑀸. 𑀦𑀺𑀲𑀻𑀤𑀸𑀧𑁂𑀢𑀻𑀢𑀺 ¶ 𑀲𑀡𑀺𑀓𑀁 𑀆𑀘𑀭𑀺𑀬, 𑀲𑀡𑀺𑀓𑀁 𑀆𑀘𑀭𑀺𑀬𑀸𑀢𑀺 𑀫𑀳𑀦𑁆𑀢𑀁 𑀢𑁂𑀮𑀖𑀝𑀁 𑀞𑀧𑁂𑀦𑁆𑀢𑁄 𑀯𑀺𑀬 𑀦𑀺𑀲𑀻𑀤𑀸𑀧𑁂𑀢𑀺. 𑀤𑀢𑁆𑀢𑁄𑀲𑀻𑀢𑀺 𑀓𑀺𑀁 𑀚𑀴𑁄𑀲𑀺 𑀚𑀸𑀢𑁄𑀢𑀺 𑀅𑀢𑁆𑀣𑁄. 𑀧𑀝𑀺𑀫𑀼𑀓𑁆𑀓𑁄𑀢𑀺 𑀲𑀻𑀲𑁂 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 ¶ 𑀕𑀳𑀺𑀢𑁄. 𑀅𑀡𑁆𑀟𑀳𑀸𑀭𑀓𑁄𑀢𑀺𑀆𑀤𑀺𑀁 𑀤𑀼𑀝𑁆𑀞𑀼𑀮𑁆𑀮𑀯𑀘𑀦𑀫𑁆𑀧𑀺 𑀲𑀫𑀸𑀦𑀁 𑀉𑀧𑀝𑁆𑀞𑀸𑀓𑀲𑁆𑀲 𑀅𑀜𑁆𑀜𑀣𑀸𑀪𑀸𑀯𑁂𑀦 𑀉𑀧𑁆𑀧𑀦𑁆𑀦𑀩𑀮𑀯𑀲𑁄𑀓𑀢𑀸𑀬 𑀇𑀤𑀁 𑀦𑀸𑀫 𑀪𑀡𑀸𑀫𑀻𑀢𑀺 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀯 𑀪𑀡𑀢𑀺.

𑁭𑁪. 𑀪𑀤𑁆𑀤𑀺𑀓𑀸, 𑀪𑀦𑁆𑀢𑁂, 𑀆𑀯𑀝𑁆𑀝𑀦𑀻𑀢𑀺 𑀦𑀺𑀕𑀡𑁆𑀞𑁄 𑀫𑀸𑀬𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺, 𑀉𑀧𑀸𑀲𑀓𑁄 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁. 𑀢𑁂𑀦 𑀳𑀻𑀢𑀺 𑀦𑀺𑀧𑀸𑀢𑀫𑀢𑁆𑀢𑀫𑁂𑀢𑀁, 𑀪𑀦𑁆𑀢𑁂, 𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀺𑀘𑁆𑀘𑁂𑀯 𑀅𑀢𑁆𑀣𑁄. 𑀓𑀸𑀭𑀡𑀯𑀘𑀦𑀁 𑀯𑀸, 𑀬𑁂𑀦 𑀓𑀸𑀭𑀡𑁂𑀦 𑀢𑀼𑀫𑁆𑀳𑀸𑀓𑀁 𑀲𑀸𑀲𑀦𑀁 𑀅𑀦𑀺𑀬𑁆𑀬𑀸𑀦𑀺𑀓𑀁, 𑀫𑀫 𑀲𑀢𑁆𑀣𑀼 𑀦𑀺𑀬𑁆𑀬𑀸𑀦𑀺𑀓𑀁, 𑀢𑁂𑀦 𑀓𑀸𑀭𑀡𑁂𑀦 𑀉𑀧𑀫𑀁 𑀢𑁂 𑀓𑀭𑀺𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁭𑁫. 𑀉𑀧𑀯𑀺𑀚𑀜𑁆𑀜𑀸𑀢𑀺 𑀯𑀺𑀚𑀸𑀬𑀦𑀓𑀸𑀮𑀁 𑀉𑀧𑀕𑀢𑀸. 𑀫𑀓𑁆𑀓𑀝𑀘𑁆𑀙𑀸𑀧𑀓𑀦𑁆𑀢𑀺 𑀫𑀓𑁆𑀓𑀝𑀧𑁄𑀢𑀓𑀁. 𑀓𑀺𑀡𑀺𑀢𑁆𑀯𑀸 𑀆𑀦𑁂𑀳𑀻𑀢𑀺 𑀫𑀽𑀮𑀁 𑀤𑀢𑁆𑀯𑀸𑀯 𑀆𑀳𑀭. 𑀆𑀧𑀡𑁂𑀲𑀼 𑀳𑀺 𑀲𑀯𑀺𑀜𑁆𑀜𑀸𑀡𑀓𑀫𑁆𑀧𑀺 𑀅𑀯𑀺𑀜𑁆𑀜𑀸𑀡𑀓𑀫𑁆𑀧𑀺 𑀫𑀓𑁆𑀓𑀝𑀸𑀤𑀺𑀓𑀻𑀴𑀦𑀪𑀡𑁆𑀟𑀓𑀁 ¶ 𑀯𑀺𑀓𑁆𑀓𑀺𑀡𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀆𑀳. 𑀭𑀚𑀺𑀢𑀦𑁆𑀢𑀺 𑀩𑀳𑀮𑀩𑀳𑀮𑀁 𑀧𑀻𑀢𑀸𑀯𑀮𑁂𑀧𑀦𑀭𑀗𑁆𑀕𑀚𑀸𑀢𑀁 𑀕𑀳𑁂𑀢𑁆𑀯𑀸 𑀭𑀚𑀺𑀢𑁆𑀯𑀸 𑀤𑀺𑀦𑁆𑀦𑀁 𑀇𑀫𑀁 𑀇𑀘𑁆𑀙𑀸𑀫𑀻𑀢𑀺 𑀅𑀢𑁆𑀣𑁄. 𑀆𑀓𑁄𑀝𑀺𑀢𑀧𑀘𑁆𑀘𑀸𑀓𑁄𑀝𑀺𑀢𑀦𑁆𑀢𑀺 𑀆𑀓𑁄𑀝𑀺𑀢𑀜𑁆𑀘𑁂𑀯 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀆𑀓𑁄𑀝𑀺𑀢𑀜𑁆𑀘. 𑀉𑀪𑀢𑁄𑀪𑀸𑀕𑀯𑀺𑀫𑀝𑁆𑀞𑀦𑁆𑀢𑀺 𑀫𑀡𑀺𑀧𑀸𑀲𑀸𑀡𑁂𑀦 𑀉𑀪𑁄𑀲𑀼 ¶ 𑀧𑀲𑁆𑀲𑁂𑀲𑀼 𑀲𑀼𑀝𑁆𑀞𑀼 𑀯𑀺𑀫𑀝𑁆𑀞𑀁 𑀖𑀝𑁆𑀝𑁂𑀢𑁆𑀯𑀸 𑀉𑀧𑁆𑀧𑀸𑀤𑀺𑀢𑀘𑁆𑀙𑀯𑀺𑀁.

𑀭𑀗𑁆𑀕𑀓𑁆𑀔𑀫𑁄 𑀳𑀺 𑀔𑁄𑀢𑀺 𑀲𑀯𑀺𑀜𑁆𑀜𑀸𑀡𑀓𑀫𑁆𑀧𑀺 𑀅𑀯𑀺𑀜𑁆𑀜𑀸𑀡𑀓𑀫𑁆𑀧𑀺 𑀭𑀗𑁆𑀕𑀁 𑀧𑀺𑀯𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀦𑁄 𑀆𑀓𑁄𑀝𑁆𑀝𑀦𑀓𑁆𑀔𑀫𑁄𑀢𑀺 𑀲𑀯𑀺𑀜𑁆𑀜𑀸𑀡𑀓𑀲𑁆𑀲 𑀢𑀸𑀯 𑀆𑀓𑁄𑀝𑁆𑀝𑀦𑀨𑀮𑀓𑁂 𑀞𑀧𑁂𑀢𑁆𑀯𑀸 𑀓𑀼𑀘𑁆𑀙𑀺𑀬𑀁 𑀆𑀓𑁄𑀝𑀺𑀢𑀲𑁆𑀲 𑀓𑀼𑀘𑁆𑀙𑀺 𑀪𑀺𑀚𑁆𑀚𑀢𑀺, 𑀓𑀭𑀻𑀲𑀁 𑀦𑀺𑀓𑁆𑀔𑀫𑀢𑀺. 𑀲𑁂𑀲𑀻 𑀆𑀓𑁄𑀝𑀺𑀢𑀲𑁆𑀲 𑀲𑀻𑀲𑀁 𑀪𑀺𑀚𑁆𑀚𑀢𑀺, 𑀫𑀢𑁆𑀢𑀮𑀼𑀗𑁆𑀕𑀁 𑀦𑀺𑀓𑁆𑀔𑀫𑀢𑀺. 𑀅𑀯𑀺𑀜𑁆𑀜𑀸𑀡𑀓𑁄 𑀔𑀡𑁆𑀟𑀔𑀡𑁆𑀟𑀺𑀢𑀁 𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀦𑁄 𑀯𑀺𑀫𑀚𑁆𑀚𑀦𑀓𑁆𑀔𑀫𑁄𑀢𑀺 𑀲𑀯𑀺𑀜𑁆𑀜𑀸𑀡𑀓𑁄 𑀫𑀡𑀺𑀧𑀸𑀲𑀸𑀡𑁂𑀦 𑀯𑀺𑀫𑀤𑁆𑀤𑀺𑀬𑀫𑀸𑀦𑁄 𑀦𑀺𑀮𑁆𑀮𑁄𑀫𑀢𑀁 𑀦𑀺𑀘𑁆𑀙𑀯𑀺𑀢𑀜𑁆𑀘 𑀆𑀧𑀚𑁆𑀚𑀢𑀺, 𑀅𑀯𑀺𑀜𑁆𑀜𑀸𑀡𑀓𑁄𑀧𑀺 𑀯𑀘𑀼𑀡𑁆𑀡𑀓𑀪𑀸𑀯𑀁 𑀆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀭𑀗𑁆𑀕𑀓𑁆𑀔𑀫𑁄 𑀳𑀺 𑀔𑁄 𑀩𑀸𑀮𑀸𑀦𑀦𑁆𑀢𑀺 𑀩𑀸𑀮𑀸𑀦𑀁 𑀫𑀦𑁆𑀤𑀩𑀼𑀤𑁆𑀥𑀻𑀦𑀁 𑀭𑀗𑁆𑀕𑀓𑁆𑀔𑀫𑁄, 𑀭𑀸𑀕𑀫𑀢𑁆𑀢𑀁 𑀚𑀦𑁂𑀢𑀺, 𑀧𑀺𑀬𑁄 𑀳𑁄𑀢𑀺. 𑀧𑀡𑁆𑀟𑀺𑀢𑀸𑀦𑀁 𑀧𑀦 𑀦𑀺𑀕𑀡𑁆𑀞𑀯𑀸𑀤𑁄 𑀯𑀸 𑀅𑀜𑁆𑀜𑁄 𑀯𑀸 𑀪𑀸𑀭𑀢𑀭𑀸𑀫𑀲𑀻𑀢𑀸𑀳𑀭𑀡𑀸𑀤𑀺 𑀦𑀺𑀭𑀢𑁆𑀣𑀓𑀓𑀣𑀸𑀫𑀕𑁆𑀕𑁄 𑀅𑀧𑁆𑀧𑀺𑀬𑁄𑀯 𑀳𑁄𑀢𑀺. 𑀦𑁄 𑀅𑀦𑀼𑀬𑁄𑀕𑀓𑁆𑀔𑀫𑁄, 𑀦𑁄 𑀯𑀺𑀫𑀚𑁆𑀚𑀦𑀓𑁆𑀔𑀫𑁄𑀢𑀺 𑀅𑀦𑀼𑀬𑁄𑀕𑀁 𑀯𑀸 𑀯𑀻𑀫𑀁𑀲𑀁 𑀯𑀸 𑀦 𑀔𑀫𑀢𑀺, 𑀣𑀼𑀲𑁂 𑀓𑁄𑀝𑁆𑀝𑁂𑀢𑁆𑀯𑀸 𑀢𑀡𑁆𑀟𑀼𑀮𑀧𑀭𑀺𑀬𑁂𑀲𑀦𑀁 𑀯𑀺𑀬 𑀓𑀤𑀮𑀺𑀬𑀁 𑀲𑀸𑀭𑀕𑀯𑁂𑀲𑀦𑀁 𑀯𑀺𑀬 𑀘 𑀭𑀺𑀢𑁆𑀢𑀓𑁄 𑀢𑀼𑀘𑁆𑀙𑀓𑁄𑀯 𑀳𑁄𑀢𑀺. 𑀭𑀗𑁆𑀕𑀓𑁆𑀔𑀫𑁄 𑀘𑁂𑀯 𑀧𑀡𑁆𑀟𑀺𑀢𑀸𑀦𑀦𑁆𑀢𑀺 ¶ 𑀘𑀢𑀼𑀲𑀘𑁆𑀘𑀓𑀣𑀸 𑀳𑀺 𑀧𑀡𑁆𑀟𑀺𑀢𑀸𑀦𑀁 𑀧𑀺𑀬𑀸 𑀳𑁄𑀢𑀺, 𑀯𑀲𑁆𑀲𑀲𑀢𑀫𑁆𑀧𑀺 𑀲𑀼𑀡𑀦𑁆𑀢𑁄 𑀢𑀺𑀢𑁆𑀢𑀺𑀁 𑀦 𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀩𑀼𑀤𑁆𑀥𑀯𑀘𑀦𑀁 𑀧𑀦 𑀬𑀣𑀸 𑀬𑀣𑀸𑀧𑀺 𑀑𑀕𑀸𑀳𑀺𑀲𑁆𑀲𑀢𑀺 𑀫𑀳𑀸𑀲𑀫𑀼𑀤𑁆𑀤𑁄 𑀯𑀺𑀬 𑀕𑀫𑁆𑀪𑀻𑀭𑀫𑁂𑀯 𑀳𑁄𑀢𑀻𑀢𑀺 ‘‘𑀅𑀦𑀼𑀬𑁄𑀕𑀓𑁆𑀔𑀫𑁄 𑀘 𑀯𑀺𑀫𑀚𑁆𑀚𑀦𑀓𑁆𑀔𑀫𑁄 𑀘𑀸’’𑀢𑀺 𑀆𑀳. 𑀲𑀼𑀡𑁄𑀳𑀺 ¶ 𑀬𑀲𑁆𑀲𑀸𑀳𑀁 𑀲𑀸𑀯𑀓𑁄𑀢𑀺 𑀢𑀲𑁆𑀲 𑀕𑀼𑀡𑁂 𑀲𑀼𑀡𑀸𑀳𑀻𑀢𑀺 𑀪𑀕𑀯𑀢𑁄 𑀯𑀡𑁆𑀡𑁂 𑀯𑀢𑁆𑀢𑀼𑀁 𑀆𑀭𑀤𑁆𑀥𑁄.

𑁭𑁬. 𑀥𑀻𑀭𑀲𑁆𑀲𑀸𑀢𑀺 𑀥𑀻𑀭𑀁 𑀯𑀼𑀘𑁆𑀘𑀢𑀺 𑀧𑀡𑁆𑀟𑀺𑀘𑁆𑀘𑀁, 𑀬𑀸 𑀧𑀜𑁆𑀜𑀸 𑀧𑀚𑀸𑀦𑀦𑀸…𑀧𑁂… 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀢𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 𑀥𑀸𑀢𑀼𑀆𑀬𑀢𑀦𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀝𑁆𑀞𑀸𑀦𑀸𑀝𑁆𑀞𑀸𑀦𑀓𑀼𑀲𑀮𑀲𑁆𑀲 𑀧𑀡𑁆𑀟𑀺𑀢𑀲𑁆𑀲𑀸𑀳𑀁 𑀲𑀸𑀯𑀓𑁄, 𑀲𑁄 𑀫𑀬𑁆𑀳𑀁 𑀲𑀢𑁆𑀣𑀸𑀢𑀺 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀪𑀺𑀦𑁆𑀦𑀔𑀻𑀮𑀲𑁆𑀲𑀸𑀢𑀺 𑀪𑀺𑀦𑁆𑀦𑀧𑀜𑁆𑀘𑀘𑁂𑀢𑁄𑀔𑀺𑀮𑀲𑁆𑀲. 𑀲𑀩𑁆𑀩𑀧𑀼𑀣𑀼𑀚𑁆𑀚𑀦𑁂 𑀯𑀺𑀚𑀺𑀦𑀺𑀁𑀲𑀼 𑀯𑀺𑀚𑀺𑀦𑀦𑁆𑀢𑀺 𑀯𑀺𑀚𑀺𑀦𑀺𑀲𑁆𑀲𑀦𑁆𑀢𑀺 𑀯𑀸𑀢𑀺 𑀯𑀺𑀚𑀬𑀸. 𑀓𑁂 𑀢𑁂, 𑀫𑀘𑁆𑀘𑀼𑀫𑀸𑀭𑀓𑀺𑀮𑁂𑀲𑀫𑀸𑀭𑀤𑁂𑀯𑀧𑀼𑀢𑁆𑀢𑀫𑀸𑀭𑀸𑀢𑀺? 𑀢𑁂 𑀯𑀺𑀚𑀺𑀢𑀸 𑀯𑀺𑀚𑀬𑀸 𑀏𑀢𑁂𑀦𑀸𑀢𑀺 𑀯𑀺𑀚𑀺𑀢𑀯𑀺𑀚𑀬𑁄. 𑀪𑀕𑀯𑀸, 𑀢𑀲𑁆𑀲 𑀯𑀺𑀚𑀺𑀢𑀯𑀺𑀚𑀬𑀲𑁆𑀲. 𑀅𑀦𑀻𑀖𑀲𑁆𑀲𑀸𑀢𑀺 𑀓𑀺𑀮𑁂𑀲𑀤𑀼𑀓𑁆𑀔𑁂𑀦𑀧𑀺 𑀯𑀺𑀧𑀸𑀓𑀤𑀼𑀓𑁆𑀔𑁂𑀦𑀧𑀺 𑀦𑀺𑀤𑁆𑀤𑀼𑀓𑁆𑀔𑀲𑁆𑀲. 𑀲𑀼𑀲𑀫𑀘𑀺𑀢𑁆𑀢𑀲𑁆𑀲𑀸𑀢𑀺 𑀤𑁂𑀯𑀤𑀢𑁆𑀢𑀥𑀦𑀧𑀸𑀮𑀓𑀅𑀗𑁆𑀕𑀼𑀮𑀺𑀫𑀸𑀮𑀭𑀸𑀳𑀼𑀮𑀣𑁂𑀭𑀸𑀤𑀻𑀲𑀼𑀧𑀺 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀼𑀝𑁆𑀞𑀼 𑀲𑀫𑀘𑀺𑀢𑁆𑀢𑀲𑁆𑀲. 𑀯𑀼𑀤𑁆𑀥𑀲𑀻𑀮𑀲𑁆𑀲𑀸𑀢𑀺 ¶ 𑀯𑀟𑁆𑀠𑀺𑀢𑀸𑀘𑀸𑀭𑀲𑁆𑀲. 𑀲𑀸𑀥𑀼𑀧𑀜𑁆𑀜𑀲𑁆𑀲𑀸𑀢𑀺 𑀲𑀼𑀦𑁆𑀤𑀭𑀧𑀜𑁆𑀜𑀲𑁆𑀲. 𑀯𑁂𑀲𑀫𑀦𑁆𑀢𑀭𑀲𑁆𑀲𑀸𑀢𑀺 𑀭𑀸𑀕𑀸𑀤𑀺𑀯𑀺𑀲𑀫𑀁 𑀢𑀭𑀺𑀢𑁆𑀯𑀸 𑀯𑀺𑀢𑀭𑀺𑀢𑁆𑀯𑀸 𑀞𑀺𑀢𑀲𑁆𑀲. 𑀯𑀺𑀫𑀮𑀲𑁆𑀲𑀸𑀢𑀺 𑀯𑀺𑀕𑀢𑀭𑀸𑀕𑀸𑀤𑀺𑀫𑀮𑀲𑁆𑀲.

𑀢𑀼𑀲𑀺𑀢𑀲𑁆𑀲𑀸𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑀲𑁆𑀲. 𑀯𑀦𑁆𑀢𑀮𑁄𑀓𑀸𑀫𑀺𑀲𑀲𑁆𑀲𑀸𑀢𑀺 𑀯𑀦𑁆𑀢𑀓𑀸𑀫𑀕𑀼𑀡𑀲𑁆𑀲. 𑀫𑀼𑀤𑀺𑀢𑀲𑁆𑀲𑀸𑀢𑀺 𑀫𑀼𑀤𑀺𑀢𑀸𑀯𑀺𑀳𑀸𑀭𑀯𑀲𑁂𑀦 𑀫𑀼𑀤𑀺𑀢𑀲𑁆𑀲, 𑀧𑀼𑀦𑀭𑀼𑀢𑁆𑀢𑀫𑁂𑀯 𑀯𑀸 𑀏𑀢𑀁. 𑀧𑀲𑀸𑀤𑀯𑀲𑁂𑀦 𑀳𑀺 𑀏𑀓𑀫𑁆𑀧𑀺 𑀕𑀼𑀡𑀁 𑀧𑀼𑀦𑀧𑁆𑀧𑀼𑀦𑀁 𑀯𑀤𑀢𑀺𑀬𑁂𑀯. 𑀓𑀢𑀲𑀫𑀡𑀲𑁆𑀲𑀸𑀢𑀺 ¶ 𑀓𑀢𑀲𑀸𑀫𑀜𑁆𑀜𑀲𑁆𑀲, 𑀲𑀫𑀡𑀥𑀫𑁆𑀫𑀲𑁆𑀲 𑀫𑀢𑁆𑀣𑀓𑀁 𑀧𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀫𑀦𑀼𑀚𑀲𑁆𑀲𑀸𑀢𑀺 𑀮𑁄𑀓𑀯𑁄𑀳𑀸𑀭𑀯𑀲𑁂𑀦 𑀏𑀓𑀲𑁆𑀲 𑀲𑀢𑁆𑀢𑀲𑁆𑀲. 𑀦𑀭𑀲𑁆𑀲𑀸𑀢𑀺 𑀧𑀼𑀦𑀭𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀯𑀼𑀘𑁆𑀘𑀫𑀸𑀦𑁂 𑀏𑀓𑁂𑀓𑀕𑀸𑀣𑀸𑀬 𑀤𑀲 𑀕𑀼𑀡𑀸 𑀦𑀧𑁆𑀧𑀳𑁄𑀦𑁆𑀢𑀺.

𑀯𑁂𑀦𑀬𑀺𑀓𑀲𑁆𑀲𑀸𑀢𑀺 𑀲𑀢𑁆𑀢𑀸𑀦𑀁 𑀯𑀺𑀦𑀸𑀬𑀓𑀲𑁆𑀲. 𑀭𑀼𑀘𑀺𑀭𑀥𑀫𑁆𑀫𑀲𑁆𑀲𑀸𑀢𑀺 𑀲𑀼𑀘𑀺𑀥𑀫𑁆𑀫𑀲𑁆𑀲. 𑀧𑀪𑀸𑀲𑀓𑀲𑁆𑀲𑀸𑀢𑀺 𑀑𑀪𑀸𑀲𑀓𑀲𑁆𑀲. 𑀯𑀻𑀭𑀲𑁆𑀲𑀸𑀢𑀺 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑀲𑁆𑀲. 𑀦𑀺𑀲𑀪𑀲𑁆𑀲𑀸𑀢𑀺 𑀉𑀲𑀪𑀯𑀲𑀪𑀦𑀺𑀲𑀪𑁂𑀲𑀼 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀲𑀫𑀝𑁆𑀞𑁂𑀦 𑀦𑀺𑀲𑀪𑀲𑁆𑀲. 𑀕𑀫𑁆𑀪𑀻𑀭𑀲𑁆𑀲𑀸𑀢𑀺 𑀕𑀫𑁆𑀪𑀻𑀭𑀕𑀼𑀡𑀲𑁆𑀲, 𑀕𑀼𑀡𑁂𑀳𑀺 𑀯𑀸 𑀕𑀫𑁆𑀪𑀻𑀭𑀲𑁆𑀲. 𑀫𑁄𑀦𑀧𑀢𑁆𑀢𑀲𑁆𑀲𑀸𑀢𑀺 𑀜𑀸𑀡𑀧𑀢𑁆𑀢𑀲𑁆𑀲. 𑀯𑁂𑀤𑀲𑁆𑀲𑀸𑀢𑀺 𑀯𑁂𑀤𑁄 𑀯𑀼𑀘𑁆𑀘𑀢𑀺 𑀜𑀸𑀡𑀁, 𑀢𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲. 𑀥𑀫𑁆𑀫𑀝𑁆𑀞𑀲𑁆𑀲𑀸𑀢𑀺 𑀥𑀫𑁆𑀫𑁂 𑀞𑀺𑀢𑀲𑁆𑀲. 𑀲𑀁𑀯𑀼𑀢𑀢𑁆𑀢𑀲𑁆𑀲𑀸𑀢𑀺 𑀧𑀺𑀳𑀺𑀢𑀢𑁆𑀢𑀲𑁆𑀲.

𑀦𑀸𑀕𑀲𑁆𑀲𑀸𑀢𑀺 ¶ 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀦𑀸𑀕𑀲𑁆𑀲. 𑀧𑀦𑁆𑀢𑀲𑁂𑀦𑀲𑁆𑀲𑀸𑀢𑀺 𑀧𑀦𑁆𑀢𑀲𑁂𑀦𑀸𑀲𑀦𑀲𑁆𑀲. 𑀧𑀝𑀺𑀫𑀦𑁆𑀢𑀓𑀲𑁆𑀲𑀸𑀢𑀺 𑀧𑀝𑀺𑀫𑀦𑁆𑀢𑀦𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀲𑁆𑀲. 𑀫𑁄𑀦𑀲𑁆𑀲𑀸𑀢𑀺 𑀫𑁄𑀦𑀁 𑀯𑀼𑀘𑁆𑀘𑀢𑀺 𑀜𑀸𑀡𑀁, 𑀢𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲, 𑀥𑀼𑀢𑀓𑀺𑀮𑁂𑀲𑀲𑁆𑀲 𑀯𑀸. 𑀤𑀦𑁆𑀢𑀲𑁆𑀲𑀸𑀢𑀺 𑀦𑀺𑀩𑁆𑀩𑀺𑀲𑁂𑀯𑀦𑀲𑁆𑀲.

𑀇𑀲𑀺𑀲𑀢𑁆𑀢𑀫𑀲𑁆𑀲𑀸𑀢𑀺 𑀯𑀺𑀧𑀲𑁆𑀲𑀺𑀆𑀤𑀬𑁄 𑀙 𑀇𑀲𑀬𑁄 𑀉𑀧𑀸𑀤𑀸𑀬 𑀲𑀢𑁆𑀢𑀫𑀲𑁆𑀲. 𑀩𑁆𑀭𑀳𑁆𑀫𑀧𑀢𑁆𑀢𑀲𑁆𑀲𑀸𑀢𑀺 ¶ 𑀲𑁂𑀝𑁆𑀞𑀧𑀢𑁆𑀢𑀲𑁆𑀲. 𑀦𑁆𑀳𑀸𑀢𑀓𑀲𑁆𑀲𑀸𑀢𑀺 𑀦𑁆𑀳𑀸𑀢𑀓𑀺𑀮𑁂𑀲𑀲𑁆𑀲. 𑀧𑀤𑀓𑀲𑁆𑀲𑀸𑀢𑀺 𑀅𑀓𑁆𑀔𑀭𑀸𑀤𑀻𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀕𑀸𑀣𑀸𑀧𑀤𑀓𑀭𑀡𑀓𑀼𑀲𑀮𑀲𑁆𑀲. 𑀯𑀺𑀤𑀺𑀢𑀯𑁂𑀤𑀲𑁆𑀲𑀸𑀢𑀺 𑀯𑀺𑀤𑀺𑀢𑀜𑀸𑀡𑀲𑁆𑀲. 𑀧𑀼𑀭𑀺𑀦𑁆𑀤𑀤𑀲𑁆𑀲𑀸𑀢𑀺 𑀲𑀩𑁆𑀩𑀧𑀞𑀫𑀁 𑀥𑀫𑁆𑀫𑀤𑀸𑀦𑀤𑀸𑀬𑀓𑀲𑁆𑀲. 𑀲𑀓𑁆𑀓𑀲𑁆𑀲𑀸𑀢𑀺 𑀲𑀫𑀢𑁆𑀣𑀲𑁆𑀲. 𑀧𑀢𑁆𑀢𑀺𑀧𑀢𑁆𑀢𑀲𑁆𑀲𑀸𑀢𑀺 𑀬𑁂 𑀧𑀢𑁆𑀢𑀩𑁆𑀩𑀸 𑀕𑀼𑀡𑀸, 𑀢𑁂 𑀧𑀢𑁆𑀢𑀲𑁆𑀲. 𑀯𑁂𑀬𑁆𑀬𑀸𑀓𑀭𑀡𑀲𑁆𑀲𑀸𑀢𑀺 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀅𑀢𑁆𑀣𑀤𑀻𑀧𑀓𑀲𑁆𑀲. 𑀪𑀕𑀯𑀢𑀸 𑀳𑀺 𑀅𑀩𑁆𑀬𑀸𑀓𑀢𑀁 𑀦𑀸𑀫 𑀢𑀦𑁆𑀢𑀺 𑀧𑀤𑀁 𑀦𑀢𑁆𑀣𑀺 𑀲𑀩𑁆𑀩𑁂𑀲𑀁𑀬𑁂𑀯 𑀅𑀢𑁆𑀣𑁄 𑀓𑀣𑀺𑀢𑁄.

𑀯𑀺𑀧𑀲𑁆𑀲𑀺𑀲𑁆𑀲𑀸𑀢𑀺 ¶ 𑀯𑀺𑀧𑀲𑁆𑀲𑀦𑀓𑀲𑁆𑀲. 𑀅𑀦𑀪𑀺𑀦𑀢𑀲𑁆𑀲𑀸𑀢𑀺 𑀅𑀦𑀢𑀲𑁆𑀲. 𑀦𑁄 𑀅𑀧𑀦𑀢𑀲𑁆𑀲𑀸𑀢𑀺 𑀅𑀤𑀼𑀝𑁆𑀞𑀲𑁆𑀲.

𑀅𑀦𑀦𑀼𑀕𑀢𑀦𑁆𑀢𑀭𑀲𑁆𑀲𑀸𑀢𑀺 𑀓𑀺𑀮𑁂𑀲𑁂 𑀅𑀦𑀦𑀼𑀕𑀢𑀘𑀺𑀢𑁆𑀢𑀲𑁆𑀲. 𑀅𑀲𑀺𑀢𑀲𑁆𑀲𑀸𑀢𑀺 𑀅𑀩𑀤𑁆𑀥𑀲𑁆𑀲.

𑀪𑀽𑀭𑀺𑀧𑀜𑁆𑀜𑀲𑁆𑀲𑀸𑀢𑀺 𑀪𑀽𑀭𑀺 𑀯𑀼𑀘𑁆𑀘𑀢𑀺 𑀧𑀣𑀯𑀻, 𑀢𑀸𑀬 𑀧𑀣𑀯𑀻𑀲𑀫𑀸𑀬 𑀧𑀜𑁆𑀜𑀸𑀬 𑀯𑀺𑀧𑀼𑀮𑀸𑀬 𑀫𑀳𑀦𑁆𑀢𑀸𑀬 𑀯𑀺𑀢𑁆𑀣𑀢𑀸𑀬 𑀲𑀫𑀦𑁆𑀦𑀸𑀕𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀫𑀳𑀸𑀧𑀜𑁆𑀜𑀲𑁆𑀲𑀸𑀢𑀺 𑀫𑀳𑀸𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀲𑁆𑀲.

𑀅𑀦𑀼𑀧𑀮𑀺𑀢𑁆𑀢𑀲𑁆𑀲𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀓𑀺𑀮𑁂𑀲𑁂𑀳𑀺 𑀅𑀮𑀺𑀢𑁆𑀢𑀲𑁆𑀲. 𑀆𑀳𑀼𑀦𑁂𑀬𑁆𑀬𑀲𑁆𑀲𑀸𑀢𑀺 𑀆𑀳𑀼𑀢𑀺𑀁 𑀧𑀝𑀺𑀕𑁆𑀕𑀳𑁂𑀢𑀼𑀁 𑀬𑀼𑀢𑁆𑀢𑀲𑁆𑀲. 𑀬𑀓𑁆𑀔𑀲𑁆𑀲𑀸𑀢𑀺 𑀆𑀦𑀼𑀪𑀸𑀯𑀤𑀲𑁆𑀲𑀦𑀝𑁆𑀞𑁂𑀦 𑀆𑀤𑀺𑀲𑁆𑀲𑀫𑀸𑀦𑀓𑀝𑁆𑀞𑁂𑀦 𑀯𑀸 𑀪𑀕𑀯𑀸 𑀬𑀓𑁆𑀔𑁄 𑀦𑀸𑀫. 𑀢𑁂𑀦𑀸𑀳 ‘‘𑀬𑀓𑁆𑀔𑀲𑁆𑀲𑀸’’𑀢𑀺. 𑀫𑀳𑀢𑁄𑀢𑀺 ¶ 𑀫𑀳𑀦𑁆𑀢𑀲𑁆𑀲. 𑀢𑀲𑁆𑀲 𑀲𑀸𑀯𑀓𑁄𑀳𑀫𑀲𑁆𑀫𑀻𑀢𑀺 𑀢𑀲𑁆𑀲 𑀏𑀯𑀁𑀯𑀺𑀯𑀺𑀥𑀕𑀼𑀡𑀲𑁆𑀲 𑀲𑀢𑁆𑀣𑀼𑀲𑁆𑀲 𑀅𑀳𑀁 𑀲𑀸𑀯𑀓𑁄𑀢𑀺. 𑀉𑀧𑀸𑀲𑀓𑀲𑁆𑀲 𑀲𑁄𑀪𑀸𑀧𑀢𑁆𑀢𑀺𑀫𑀕𑁆𑀕𑁂𑀦𑁂𑀯 𑀧𑀝𑀺𑀲𑀫𑁆𑀪𑀺𑀤𑀸 𑀆𑀕𑀢𑀸. 𑀇𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑁂 𑀞𑀢𑁆𑀯𑀸 𑀧𑀤𑀲𑀢𑁂𑀦 𑀤𑀲𑀩𑀮𑀲𑁆𑀲 𑀓𑀺𑀮𑁂𑀲𑀧𑁆𑀧𑀳𑀸𑀦𑀯𑀡𑁆𑀡𑀁 𑀓𑀣𑁂𑀦𑁆𑀢𑁄 ‘‘𑀓𑀲𑁆𑀲 𑀢𑀁 𑀕𑀳𑀧𑀢𑀺 𑀲𑀸𑀯𑀓𑀁 𑀥𑀸𑀭𑁂𑀫𑀸’’𑀢𑀺 𑀧𑀜𑁆𑀳𑀲𑁆𑀲 𑀅𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀲𑀺.

𑁭𑁭. 𑀓𑀤𑀸 ¶ 𑀲𑀜𑁆𑀜𑀽𑀴𑁆𑀳𑀸𑀢𑀺 𑀓𑀤𑀸 𑀲𑀫𑁆𑀧𑀺𑀡𑁆𑀟𑀺𑀢𑀸. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀬𑀁 𑀇𑀤𑀸𑀦𑁂𑀯 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀆𑀕𑀢𑁄, 𑀓𑀤𑀸𑀦𑁂𑀦 𑀏𑀢𑁂 𑀯𑀡𑁆𑀡𑀸 𑀲𑀫𑁆𑀧𑀺𑀡𑁆𑀟𑀺𑀢𑀸’’𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀯𑀺𑀘𑀺𑀢𑁆𑀢𑀁 𑀫𑀸𑀮𑀁 𑀕𑀦𑁆𑀣𑁂𑀬𑁆𑀬𑀸𑀢𑀺 𑀲𑀬𑀫𑁆𑀧𑀺 𑀤𑀓𑁆𑀔𑀢𑀸𑀬 𑀧𑀼𑀧𑁆𑀨𑀸𑀦𑀫𑁆𑀧𑀺 𑀦𑀸𑀦𑀸𑀯𑀡𑁆𑀡𑀢𑀸𑀬 𑀏𑀓𑀢𑁄𑀯𑀡𑁆𑀝𑀺𑀓𑀸𑀤𑀺𑀪𑁂𑀤𑀁 𑀯𑀺𑀘𑀺𑀢𑁆𑀭𑀫𑀸𑀮𑀁 𑀕𑀦𑁆𑀣𑁂𑀬𑁆𑀬. 𑀏𑀯𑀫𑁂𑀯 𑀔𑁄, 𑀪𑀦𑁆𑀢𑁂𑀢𑀺 𑀏𑀢𑁆𑀣 𑀦𑀸𑀦𑀸𑀧𑀼𑀧𑁆𑀨𑀸𑀦𑀁 𑀫𑀳𑀸𑀧𑀼𑀧𑁆𑀨𑀭𑀸𑀲𑀺 𑀯𑀺𑀬 𑀦𑀸𑀦𑀸𑀯𑀺𑀥𑀸𑀦𑀁 𑀯𑀡𑁆𑀡𑀸𑀦𑀁 𑀪𑀕𑀯𑀢𑁄 𑀲𑀺𑀦𑁂𑀭𑀼𑀫𑀢𑁆𑀢𑁄 𑀯𑀡𑁆𑀡𑀭𑀸𑀲𑀺 𑀤𑀝𑁆𑀞𑀩𑁆𑀩𑁄. 𑀙𑁂𑀓𑀫𑀸𑀮𑀸𑀓𑀸𑀭𑁄 𑀯𑀺𑀬 𑀉𑀧𑀸𑀮𑀺 𑀕𑀳𑀧𑀢𑀺. 𑀫𑀸𑀮𑀸𑀓𑀸𑀭𑀲𑁆𑀲 𑀯𑀺𑀘𑀺𑀢𑁆𑀭𑀫𑀸𑀮𑀸𑀕𑀦𑁆𑀣𑀦𑀁 𑀯𑀺𑀬 𑀕𑀳𑀧𑀢𑀺𑀦𑁄 𑀢𑀣𑀸𑀕𑀢𑀲𑁆𑀲 𑀯𑀺𑀘𑀺𑀢𑁆𑀭𑀯𑀡𑁆𑀡𑀕𑀦𑁆𑀣𑀦𑀁.

𑀉𑀡𑁆𑀳𑀁 𑀮𑁄𑀳𑀺𑀢𑀁 𑀫𑀼𑀔𑀢𑁄 𑀉𑀕𑁆𑀕𑀜𑁆𑀙𑀻𑀢𑀺 𑀢𑀲𑁆𑀲 𑀳𑀺 𑀪𑀕𑀯𑀢𑁄 𑀲𑀓𑁆𑀓𑀸𑀭𑀁 𑀅𑀲𑀳𑀫𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀦𑀢𑁆𑀣𑀺𑀓𑁄 𑀤𑀸𑀦𑀺 𑀅𑀬𑀁 𑀕𑀳𑀧𑀢𑀺 𑀅𑀫𑁆𑀳𑁂𑀳𑀺, 𑀲𑁆𑀯𑁂 𑀧𑀝𑁆𑀞𑀸𑀬 𑀧𑀡𑁆𑀡𑀸𑀲 𑀲𑀝𑁆𑀞𑀺 𑀚𑀦𑁂 𑀕𑀳𑁂𑀢𑁆𑀯𑀸 𑀏𑀢𑀲𑁆𑀲 𑀖𑀭𑀁 𑀧𑀯𑀺𑀲𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀦 𑀮𑀪𑀺𑀲𑁆𑀲𑀸𑀫𑀺, 𑀪𑀺𑀦𑁆𑀦𑀸 𑀫𑁂 𑀪𑀢𑁆𑀢𑀓𑀼𑀫𑁆𑀪𑀻’’𑀢𑀺. 𑀅𑀣𑀲𑁆𑀲 𑀉𑀧𑀝𑁆𑀞𑀸𑀓𑀯𑀺𑀧𑀭𑀺𑀡𑀸𑀫𑁂𑀦 𑀩𑀮𑀯𑀲𑁄𑀓𑁄 𑀉𑀧𑁆𑀧𑀚𑁆𑀚𑀺. 𑀇𑀫𑁂 𑀳𑀺 𑀲𑀢𑁆𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄𑀯 𑀘𑀺𑀦𑁆𑀢𑀬𑀦𑁆𑀢𑀺. 𑀢𑀲𑁆𑀲 ¶ 𑀢𑀲𑁆𑀫𑀺𑀁 𑀲𑁄𑀓𑁂 𑀉𑀧𑁆𑀧𑀦𑁆𑀦𑁂 𑀅𑀩𑁆𑀪𑀦𑁆𑀢𑀭𑀁 𑀉𑀡𑁆𑀳𑀁 𑀅𑀳𑁄𑀲𑀺, 𑀮𑁄𑀳𑀺𑀢𑀁 𑀯𑀺𑀮𑀻𑀬𑀺𑀢𑁆𑀣, 𑀢𑀁 𑀫𑀳𑀸𑀯𑀸𑀢𑁂𑀦 𑀲𑀫𑀼𑀤𑁆𑀥𑀭𑀺𑀢𑀁 𑀓𑀼𑀝𑁂 𑀧𑀓𑁆𑀔𑀺𑀢𑁆𑀢𑀭𑀚𑀦𑀁 𑀯𑀺𑀬 𑀧𑀢𑁆𑀢𑀫𑀢𑁆𑀢𑀁 𑀫𑀼𑀔𑀢𑁄 𑀉𑀕𑁆𑀕𑀜𑁆𑀙𑀺. 𑀦𑀺𑀥𑀸𑀦𑀕𑀢𑀮𑁄𑀳𑀺𑀢𑀁 𑀯𑀫𑀺𑀢𑁆𑀯𑀸 𑀧𑀦 𑀅𑀧𑁆𑀧𑀓𑀸 𑀲𑀢𑁆𑀢𑀸 𑀚𑀻𑀯𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀦𑀺𑀕𑀡𑁆𑀞𑁄 𑀢𑀢𑁆𑀣𑁂𑀯 𑀚𑀸𑀡𑀼𑀦𑀸 𑀧𑀢𑀺𑀢𑁄, 𑀅𑀣 𑀦𑀁 𑀧𑀸𑀝𑀗𑁆𑀓𑀺𑀬𑀸 𑀩𑀳𑀺𑀦𑀕𑀭𑀁 ¶ 𑀦𑀻𑀳𑀭𑀺𑀢𑁆𑀯𑀸 𑀫𑀜𑁆𑀘𑀓𑀲𑀺𑀯𑀺𑀓𑀸𑀬 𑀕𑀳𑁂𑀢𑁆𑀯𑀸 𑀧𑀸𑀯𑀁 𑀅𑀕𑀫𑀁𑀲𑀼, 𑀲𑁄 𑀦 𑀘𑀺𑀭𑀲𑁆𑀲𑁂𑀯 𑀧𑀸𑀯𑀸𑀬𑀁 𑀓𑀸𑀮𑀫𑀓𑀸𑀲𑀺. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀉𑀕𑁆𑀖𑀸𑀝𑀺𑀢𑀜𑁆𑀜𑀽𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀥𑀫𑁆𑀫𑀤𑁂𑀲𑀦𑀸 𑀧𑀭𑀺𑀦𑀺𑀝𑁆𑀞𑀺𑀢𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀉𑀧𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀓𑀼𑀓𑁆𑀓𑀼𑀭𑀯𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁮. 𑀏𑀯𑀁 ¶ 𑀫𑁂 𑀲𑀼𑀢𑀦𑁆𑀢𑀺 𑀓𑀼𑀓𑁆𑀓𑀼𑀭𑀯𑀢𑀺𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀓𑁄𑀮𑀺𑀬𑁂𑀲𑀽𑀢𑀺 𑀏𑀯𑀁𑀦𑀸𑀫𑀓𑁂 𑀚𑀦𑀧𑀤𑁂. 𑀲𑁄 𑀳𑀺 𑀏𑀓𑁄𑀧𑀺 𑀓𑁄𑀮𑀦𑀕𑀭𑁂 𑀧𑀢𑀺𑀝𑁆𑀞𑀺𑀢𑀸𑀦𑀁 𑀓𑁄𑀮𑀺𑀬𑀸𑀦𑀁 𑀭𑀸𑀚𑀓𑀼𑀫𑀸𑀭𑀸𑀦𑀁 𑀦𑀺𑀯𑀸𑀲𑀝𑁆𑀞𑀸𑀦𑀢𑁆𑀢𑀸 𑀏𑀯𑀁 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀓𑁄𑀮𑀺𑀬𑁂𑀲𑀼 𑀚𑀦𑀧𑀤𑁂. 𑀳𑀮𑀺𑀤𑁆𑀤𑀯𑀲𑀦𑀦𑁆𑀢𑀺 𑀢𑀲𑁆𑀲 𑀓𑀺𑀭 𑀦𑀺𑀕𑀫𑀲𑁆𑀲 𑀫𑀸𑀧𑀺𑀢𑀓𑀸𑀮𑁂 𑀧𑀻𑀢𑀓𑀯𑀢𑁆𑀣𑀦𑀺𑀯𑀢𑁆𑀣𑀸 ¶ 𑀫𑀦𑀼𑀲𑁆𑀲𑀸 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀁𑀲𑀼. 𑀢𑁂 𑀦𑀓𑁆𑀔𑀢𑁆𑀢𑀓𑀻𑀴𑀸𑀯𑀲𑀸𑀦𑁂 𑀦𑀺𑀕𑀫𑀲𑁆𑀲 𑀦𑀸𑀫𑀁 𑀆𑀭𑁄𑀧𑁂𑀦𑁆𑀢𑀸 𑀳𑀮𑀺𑀤𑁆𑀤𑀯𑀲𑀦𑀦𑁆𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀢𑀁 𑀕𑁄𑀘𑀭𑀕𑀸𑀫𑀁 𑀓𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀳𑀸𑀭𑁄 𑀧𑀦𑁂𑀢𑁆𑀣 𑀓𑀺𑀜𑁆𑀘𑀸𑀧𑀺 𑀦 𑀦𑀺𑀬𑀸𑀫𑀺𑀢𑁄, 𑀢𑀣𑀸𑀧𑀺 𑀩𑀼𑀤𑁆𑀥𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑁂 𑀲𑁂𑀦𑀸𑀲𑀦𑁂𑀬𑁂𑀯 𑀯𑀺𑀳𑀸𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀕𑁄𑀯𑀢𑀺𑀓𑁄𑀢𑀺 𑀲𑀫𑀸𑀤𑀺𑀦𑁆𑀦𑀕𑁄𑀯𑀢𑁄, 𑀲𑀻𑀲𑁂 𑀲𑀺𑀗𑁆𑀕𑀸𑀦𑀺 𑀞𑀧𑁂𑀢𑁆𑀯𑀸 𑀦𑀗𑁆𑀕𑀼𑀝𑁆𑀞𑀁 𑀩𑀦𑁆𑀥𑀺𑀢𑁆𑀯𑀸 𑀕𑀸𑀯𑀻𑀳𑀺 𑀲𑀤𑁆𑀥𑀺𑀁 𑀢𑀺𑀡𑀸𑀦𑀺 𑀔𑀸𑀤𑀦𑁆𑀢𑁄 𑀯𑀺𑀬 𑀘𑀭𑀢𑀺. 𑀅𑀘𑁂𑀮𑁄𑀢𑀺 𑀦𑀕𑁆𑀕𑁄 𑀦𑀺𑀘𑁆𑀘𑁂𑀮𑁄. 𑀲𑁂𑀦𑀺𑀬𑁄𑀢𑀺 𑀢𑀲𑁆𑀲 𑀦𑀸𑀫𑀁.

𑀓𑀼𑀓𑁆𑀓𑀼𑀭𑀯𑀢𑀺𑀓𑁄𑀢𑀺 𑀲𑀫𑀸𑀤𑀺𑀦𑁆𑀦𑀓𑀼𑀓𑁆𑀓𑀼𑀭𑀯𑀢𑁄, 𑀲𑀩𑁆𑀩𑀁 𑀲𑀼𑀦𑀔𑀓𑀺𑀭𑀺𑀬𑀁 𑀓𑀭𑁄𑀢𑀺. 𑀉𑀪𑁄𑀧𑁂𑀢𑁂 𑀲𑀳𑀧𑀁𑀲𑀼𑀓𑀻𑀴𑀺𑀓𑀸 𑀲𑀳𑀸𑀬𑀓𑀸. 𑀓𑀼𑀓𑁆𑀓𑀼𑀭𑁄𑀯 𑀧𑀮𑀺𑀓𑀼𑀚𑁆𑀚𑀺𑀢𑁆𑀯𑀸𑀢𑀺 𑀲𑀼𑀦𑀔𑁄 𑀦𑀸𑀫 𑀲𑀸𑀫𑀺𑀓𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀦𑁆𑀢𑁄 𑀤𑁆𑀯𑀻𑀳𑀺 𑀧𑀸𑀤𑁂𑀳𑀺 𑀪𑀽𑀫𑀺𑀬𑀁 𑀯𑀺𑀮𑁂𑀔𑀺𑀢𑁆𑀯𑀸 𑀓𑀼𑀓𑁆𑀓𑀼𑀭𑀓𑀽𑀚𑀺𑀢𑀁 ¶ 𑀓𑀽𑀚𑀦𑁆𑀢𑁄 𑀦𑀺𑀲𑀻𑀤𑀢𑀺, 𑀅𑀬𑀫𑁆𑀧𑀺 ‘‘𑀓𑀼𑀓𑁆𑀓𑀼𑀭𑀓𑀺𑀭𑀺𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀢𑁆𑀯𑀸 𑀤𑁆𑀯𑀻𑀳𑀺 𑀳𑀢𑁆𑀣𑁂𑀳𑀺 𑀪𑀽𑀫𑀺𑀬𑀁 𑀯𑀺𑀮𑁂𑀔𑀺𑀢𑁆𑀯𑀸 𑀲𑀻𑀲𑀁 𑀯𑀺𑀥𑀼𑀦𑀦𑁆𑀢𑁄 ‘𑀪𑀽 𑀪𑀽’𑀢𑀺 𑀓𑀢𑁆𑀯𑀸 𑀳𑀢𑁆𑀣𑀧𑀸𑀤𑁂 𑀲𑀫𑀺𑀜𑁆𑀚𑀺𑀢𑁆𑀯𑀸 𑀲𑀼𑀦𑀔𑁄 𑀯𑀺𑀬 𑀦𑀺𑀲𑀻𑀤𑀺. 𑀙𑀫𑀸𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀪𑀽𑀫𑀺𑀬𑀁 𑀞𑀧𑀺𑀢𑀁. 𑀲𑀫𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀕𑀳𑀺𑀢𑀁. 𑀓𑀸 𑀕𑀢𑀻𑀢𑀺 𑀓𑀸 𑀦𑀺𑀧𑁆𑀨𑀢𑁆𑀢𑀺. 𑀓𑁄 𑀅𑀪𑀺𑀲𑀫𑁆𑀧𑀭𑀸𑀬𑁄𑀢𑀺 𑀅𑀪𑀺𑀲𑀫𑁆𑀧𑀭𑀸𑀬𑀫𑁆𑀳𑀺 𑀓𑀢𑁆𑀣 𑀦𑀺𑀩𑁆𑀩𑀢𑁆𑀢𑀺. 𑀅𑀮𑀦𑁆𑀢𑀺 𑀢𑀲𑁆𑀲 𑀅𑀧𑁆𑀧𑀺𑀬𑀁 𑀪𑀯𑀺𑀲𑁆𑀲𑀢𑀻𑀢𑀺 𑀬𑀸𑀯𑀢𑀢𑀺𑀬𑀁 𑀧𑀝𑀺𑀩𑀸𑀳𑀢𑀺. 𑀓𑀼𑀓𑁆𑀓𑀼𑀭𑀯𑀢𑀦𑁆𑀢𑀺 𑀓𑀼𑀓𑁆𑀓𑀼𑀭𑀯𑀢𑀲𑀫𑀸𑀤𑀸𑀦𑀁.

𑁭𑁯. 𑀪𑀸𑀯𑁂𑀢𑀻𑀢𑀺 𑀯𑀟𑁆𑀠𑁂𑀢𑀺. 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀦𑀽𑀦𑀁. 𑀅𑀩𑁆𑀩𑁄𑀓𑀺𑀡𑁆𑀡𑀦𑁆𑀢𑀺 𑀦𑀺𑀭𑀦𑁆𑀢𑀭𑀁. 𑀓𑀼𑀓𑁆𑀓𑀼𑀭𑀲𑀻𑀮𑀦𑁆𑀢𑀺 𑀓𑀼𑀓𑁆𑀓𑀼𑀭𑀸𑀘𑀸𑀭𑀁. 𑀓𑀼𑀓𑁆𑀓𑀼𑀭𑀘𑀺𑀢𑁆𑀢𑀦𑁆𑀢𑀺 ‘‘𑀅𑀚𑁆𑀚 𑀧𑀝𑁆𑀞𑀸𑀬 𑀓𑀼𑀓𑁆𑀓𑀼𑀭𑁂𑀳𑀺 𑀓𑀸𑀢𑀩𑁆𑀩𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀁. 𑀓𑀼𑀓𑁆𑀓𑀼𑀭𑀸𑀓𑀧𑁆𑀧𑀦𑁆𑀢𑀺 𑀓𑀼𑀓𑁆𑀓𑀼𑀭𑀸𑀦𑀁 𑀕𑀫𑀦𑀸𑀓𑀸𑀭𑁄 𑀅𑀢𑁆𑀣𑀺, 𑀢𑀺𑀝𑁆𑀞𑀦𑀸𑀓𑀸𑀭𑁄 𑀅𑀢𑁆𑀣𑀺, 𑀦𑀺𑀲𑀻𑀤𑀦𑀸𑀓𑀸𑀭𑁄 𑀅𑀢𑁆𑀣𑀺, 𑀲𑀬𑀦𑀸𑀓𑀸𑀭𑁄 𑀅𑀢𑁆𑀣𑀺, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀭𑀡𑀸𑀓𑀸𑀭𑁄 𑀅𑀢𑁆𑀣𑀺, 𑀅𑀜𑁆𑀜𑁂 𑀓𑀼𑀓𑁆𑀓𑀼𑀭𑁂 𑀤𑀺𑀲𑁆𑀯𑀸 𑀤𑀦𑁆𑀢𑁂 𑀯𑀺𑀯𑀭𑀺𑀢𑁆𑀯𑀸 𑀕𑀫𑀦𑀸𑀓𑀸𑀭𑁄 𑀅𑀢𑁆𑀣𑀺, 𑀅𑀬𑀁 𑀓𑀼𑀓𑁆𑀓𑀼𑀭𑀸𑀓𑀧𑁆𑀧𑁄 𑀦𑀸𑀫, 𑀢𑀁 𑀪𑀸𑀯𑁂𑀢𑀻𑀢𑀺 𑀅𑀢𑁆𑀣𑁄 ¶ . 𑀇𑀫𑀺𑀦𑀸𑀳𑀁 𑀲𑀻𑀮𑁂𑀦𑀸𑀢𑀺𑀆𑀤𑀻𑀲𑀼 𑀅𑀳𑀁 𑀇𑀫𑀺𑀦𑀸 𑀆𑀘𑀸𑀭𑁂𑀦 𑀯𑀸 𑀯𑀢𑀲𑀫𑀸𑀤𑀸𑀦𑁂𑀦 𑀯𑀸 𑀤𑀼𑀓𑁆𑀓𑀭𑀢𑀧𑀘𑀭𑀡𑁂𑀦 𑀯𑀸 𑀫𑁂𑀣𑀼𑀦𑀯𑀺𑀭𑀢𑀺𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸𑀢𑀺 𑀅𑀢𑁆𑀣𑁄. 𑀤𑁂𑀯𑁄𑀢𑀺 𑀲𑀓𑁆𑀓𑀲𑀼𑀬𑀸𑀫𑀸𑀤𑀻𑀲𑀼 𑀅𑀜𑁆𑀜𑀢𑀭𑁄. 𑀤𑁂𑀯𑀜𑁆𑀜𑀢𑀭𑁄𑀢𑀺 ¶ 𑀢𑁂𑀲𑀁 𑀤𑀼𑀢𑀺𑀬𑀢𑀢𑀺𑀬𑀝𑁆𑀞𑀸𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀤𑁂𑀯𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀅𑀤𑁂𑀯𑀮𑁄𑀓𑀕𑀸𑀫𑀺𑀫𑀕𑁆𑀕𑀫𑁂𑀯 𑀤𑁂𑀯𑀮𑁄𑀓𑀕𑀸𑀫𑀺𑀫𑀕𑁆𑀕𑁄𑀢𑀺 𑀕𑀳𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑀢𑀸𑀬 𑀲𑀸 𑀅𑀲𑁆𑀲 ¶ 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀦𑀸𑀫 𑀳𑁄𑀢𑀺. 𑀅𑀜𑁆𑀜𑀢𑀭𑀁 𑀕𑀢𑀺𑀁 𑀯𑀤𑀸𑀫𑀻𑀢𑀺 𑀢𑀲𑁆𑀲 𑀳𑀺 𑀦𑀺𑀭𑀬𑀢𑁄 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀢𑁄 𑀯𑀸 𑀅𑀜𑁆𑀜𑀸 𑀕𑀢𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀲𑀫𑁆𑀧𑀚𑁆𑀚𑀫𑀸𑀦𑀦𑁆𑀢𑀺 𑀤𑀺𑀝𑁆𑀞𑀺𑀬𑀸 𑀅𑀲𑀫𑁆𑀫𑀺𑀲𑁆𑀲𑀁 𑀳𑀼𑀢𑁆𑀯𑀸 𑀦𑀺𑀧𑀚𑁆𑀚𑀫𑀸𑀦𑀁.

𑀦𑀸𑀳𑀁, 𑀪𑀦𑁆𑀢𑁂, 𑀏𑀢𑀁 𑀭𑁄𑀤𑀸𑀫𑀺, 𑀬𑀁 𑀫𑀁 𑀪𑀕𑀯𑀸 𑀏𑀯𑀫𑀸𑀳𑀸𑀢𑀺 𑀬𑀁 𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀏𑀯𑀫𑀸𑀳, 𑀅𑀳𑀫𑁂𑀢𑀁 𑀪𑀕𑀯𑀢𑁄 𑀩𑁆𑀬𑀸𑀓𑀭𑀡𑀁 𑀦 𑀭𑁄𑀤𑀸𑀫𑀺 𑀦 𑀧𑀭𑀺𑀤𑁂𑀯𑀸𑀫𑀺, 𑀦 𑀅𑀦𑀼𑀢𑁆𑀣𑀼𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀓𑀫𑁆𑀫𑀓𑀯𑀲𑁂𑀦𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀅𑀲𑁆𑀲𑀼𑀫𑀼𑀜𑁆𑀘𑀦𑀫𑀢𑁆𑀢𑁂𑀦.

‘‘𑀫𑀢𑀁 𑀯𑀸 𑀅𑀫𑁆𑀫 𑀭𑁄𑀤𑀦𑁆𑀢𑀺, 𑀬𑁄 𑀯𑀸 𑀚𑀻𑀯𑀁 𑀦 𑀤𑀺𑀲𑁆𑀲𑀢𑀺;

𑀚𑀻𑀯𑀦𑁆𑀢𑀁 𑀅𑀫𑁆𑀫 𑀧𑀲𑁆𑀲𑀦𑁆𑀢𑀻, 𑀓𑀲𑁆𑀫𑀸 𑀫𑀁 𑀅𑀫𑁆𑀫 𑀭𑁄𑀤𑀲𑀻’’𑀢𑀺. (𑀲𑀁. 𑀦𑀺. 𑁧.𑁨𑁩𑁯) 𑁋

𑀅𑀬𑀜𑁆𑀘𑁂𑀢𑁆𑀣 𑀧𑀬𑁄𑀕𑁄. 𑀅𑀧𑀺𑀘 𑀫𑁂 𑀇𑀤𑀁, 𑀪𑀦𑁆𑀢𑁂𑀢𑀺 𑀅𑀧𑀺𑀘 𑀔𑁄 𑀫𑁂 𑀇𑀤𑀁, 𑀪𑀦𑁆𑀢𑁂, 𑀓𑀼𑀓𑁆𑀓𑀼𑀭𑀯𑀢𑀁 𑀤𑀻𑀖𑀭𑀢𑁆𑀢𑀁 𑀲𑀫𑀸𑀤𑀺𑀦𑁆𑀦𑀁, 𑀢𑀲𑁆𑀫𑀺𑀁 𑀲𑀫𑁆𑀧𑀚𑁆𑀚𑀦𑁆𑀢𑁂𑀧𑀺 𑀯𑀼𑀤𑁆𑀥𑀺 𑀦𑀢𑁆𑀣𑀺, 𑀯𑀺𑀧𑀚𑁆𑀚𑀦𑁆𑀢𑁂𑀧𑀺. 𑀇𑀢𑀺 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀫𑀬𑀸 𑀓𑀢𑀓𑀫𑁆𑀫𑀁 𑀫𑁄𑀖𑀁 𑀚𑀸𑀢’’𑀦𑁆𑀢𑀺 𑀅𑀢𑁆𑀢𑀦𑁄 𑀯𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀭𑁄𑀤𑀸𑀫𑀺, 𑀪𑀦𑁆𑀢𑁂𑀢𑀺.

𑁮𑁦. 𑀕𑁄𑀯𑀢𑀦𑁆𑀢𑀺𑀆𑀤𑀻𑀦𑀺 𑀓𑀼𑀓𑁆𑀓𑀼𑀭𑀯𑀢𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀕𑀯𑀸𑀓𑀧𑁆𑀧𑀦𑁆𑀢𑀺 𑀕𑁄𑀆𑀓𑀧𑁆𑀧𑀁. 𑀲𑁂𑀲𑀁 𑀓𑀼𑀓𑁆𑀓𑀼𑀭𑀸𑀓𑀧𑁆𑀧𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯. 𑀬𑀣𑀸 𑀧𑀦 𑀢𑀢𑁆𑀣 𑀅𑀜𑁆𑀜𑁂 𑀓𑀼𑀓𑁆𑀓𑀼𑀭𑁂 𑀤𑀺𑀲𑁆𑀯𑀸 𑀤𑀦𑁆𑀢𑁂 𑀯𑀺𑀯𑀭𑀺𑀢𑁆𑀯𑀸 𑀕𑀫𑀦𑀸𑀓𑀸𑀭𑁄, 𑀏𑀯𑀫𑀺𑀥 𑀅𑀜𑁆𑀜𑁂 𑀕𑀸𑀯𑁄 𑀤𑀺𑀲𑁆𑀯𑀸 𑀓𑀡𑁆𑀡𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀫𑀦𑀸𑀓𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯.

𑁮𑁧. 𑀘𑀢𑁆𑀢𑀸𑀭𑀺𑀫𑀸𑀦𑀺 ¶ 𑀧𑀼𑀡𑁆𑀡 𑀓𑀫𑁆𑀫𑀸𑀦𑀻𑀢𑀺 𑀓𑀲𑁆𑀫𑀸 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺? 𑀅𑀬𑀜𑁆𑀳𑀺 𑀤𑁂𑀲𑀦𑀸 𑀏𑀓𑀘𑁆𑀘𑀓𑀫𑁆𑀫𑀓𑀺𑀭𑀺𑀬𑀯𑀲𑁂𑀦 𑀆𑀕𑀢𑀸, 𑀇𑀫𑀲𑁆𑀫𑀺𑀜𑁆𑀘 𑀓𑀫𑁆𑀫𑀘𑀢𑀼𑀓𑁆𑀓𑁂 𑀓𑀣𑀺𑀢𑁂 𑀇𑀫𑁂𑀲𑀁 𑀓𑀺𑀭𑀺𑀬𑀸 𑀧𑀸𑀓𑀝𑀸 𑀪𑀯𑀺𑀲𑁆𑀲𑀢𑀻𑀢𑀺 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀅𑀧𑀺𑀘 𑀇𑀫𑀁 𑀓𑀫𑁆𑀫𑀘𑀢𑀼𑀓𑁆𑀓𑀫𑁂𑀯 𑀤𑁂𑀲𑀺𑀬𑀫𑀸𑀦𑀁 𑀇𑀫𑁂 𑀲𑀜𑁆𑀚𑀸𑀦𑀺𑀲𑁆𑀲𑀦𑁆𑀢𑀺 ¶ , 𑀢𑀢𑁄 𑀏𑀓𑁄 𑀲𑀭𑀡𑀁 𑀕𑀫𑀺𑀲𑁆𑀲𑀢𑀺, 𑀏𑀓𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀻𑀢𑀺 𑀅𑀬𑀫𑁂𑀯 𑀏𑀢𑁂𑀲𑀁 𑀲𑀧𑁆𑀧𑀸𑀬𑀸𑀢𑀺 𑀜𑀢𑁆𑀯𑀸𑀧𑀺 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺.

𑀢𑀢𑁆𑀣 𑀓𑀡𑁆𑀳𑀦𑁆𑀢𑀺 𑀓𑀸𑀴𑀓𑀁 𑀤𑀲𑀅𑀓𑀼𑀲𑀮𑀓𑀫𑁆𑀫𑀧𑀣𑀓𑀫𑁆𑀫𑀁. 𑀓𑀡𑁆𑀳𑀯𑀺𑀧𑀸𑀓𑀦𑁆𑀢𑀺 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑀦𑀢𑁄 𑀓𑀸𑀴𑀓𑀯𑀺𑀧𑀸𑀓𑀁. 𑀲𑀼𑀓𑁆𑀓𑀦𑁆𑀢𑀺 𑀧𑀡𑁆𑀟𑀭𑀁 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀓𑀫𑁆𑀫𑀁. 𑀲𑀼𑀓𑁆𑀓𑀯𑀺𑀧𑀸𑀓𑀦𑁆𑀢𑀺 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀦𑀢𑁄 𑀧𑀡𑁆𑀟𑀭𑀯𑀺𑀧𑀸𑀓𑀁. 𑀓𑀡𑁆𑀳𑀲𑀼𑀓𑁆𑀓𑀦𑁆𑀢𑀺 𑀯𑁄𑀫𑀺𑀲𑁆𑀲𑀓𑀓𑀫𑁆𑀫𑀁. 𑀓𑀡𑁆𑀳𑀲𑀼𑀓𑁆𑀓𑀯𑀺𑀧𑀸𑀓𑀦𑁆𑀢𑀺 𑀲𑀼𑀔𑀤𑀼𑀓𑁆𑀔𑀯𑀺𑀧𑀸𑀓𑀁. 𑀫𑀺𑀲𑁆𑀲𑀓𑀓𑀫𑁆𑀫𑀜𑁆𑀳𑀺 𑀓𑀢𑁆𑀯𑀸 ¶ 𑀅𑀓𑀼𑀲𑀮𑁂𑀦 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀫𑀗𑁆𑀕𑀮𑀳𑀢𑁆𑀣𑀺𑀝𑁆𑀞𑀸𑀦𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁄 𑀓𑀼𑀲𑀮𑁂𑀦 𑀧𑀯𑀢𑁆𑀢𑁂 𑀲𑀼𑀔𑀁 𑀯𑁂𑀤𑀺𑀬𑀢𑀺. 𑀓𑀼𑀲𑀮𑁂𑀦 𑀭𑀸𑀚𑀓𑀼𑀮𑁂𑀧𑀺 𑀦𑀺𑀩𑁆𑀩𑀢𑁆𑀢𑁄 𑀅𑀓𑀼𑀲𑀮𑁂𑀦 𑀧𑀯𑀢𑁆𑀢𑁂 𑀤𑀼𑀓𑁆𑀔𑀁 𑀯𑁂𑀤𑀺𑀬𑀢𑀺. 𑀅𑀓𑀡𑁆𑀳𑀁 𑀅𑀲𑀼𑀓𑁆𑀓𑀦𑁆𑀢𑀺 𑀓𑀫𑁆𑀫𑀓𑁆𑀔𑀬𑀓𑀭𑀁 𑀘𑀢𑀼𑀫𑀕𑁆𑀕𑀘𑁂𑀢𑀦𑀸𑀓𑀫𑁆𑀫𑀁 𑀅𑀥𑀺𑀧𑁆𑀧𑁂𑀢𑀁. 𑀢𑀜𑁆𑀳𑀺 𑀬𑀤𑀺 𑀓𑀡𑁆𑀳𑀁 𑀪𑀯𑁂𑀬𑁆𑀬, 𑀓𑀡𑁆𑀳𑀯𑀺𑀧𑀸𑀓𑀁 𑀤𑀤𑁂𑀬𑁆𑀬. 𑀬𑀤𑀺 𑀲𑀼𑀓𑁆𑀓𑀁 𑀪𑀯𑁂𑀬𑁆𑀬, 𑀲𑀼𑀓𑁆𑀓𑀯𑀺𑀧𑀸𑀓𑀁 𑀤𑀤𑁂𑀬𑁆𑀬. 𑀉𑀪𑀬𑀯𑀺𑀧𑀸𑀓𑀲𑁆𑀲 𑀧𑀦 𑀅𑀤𑀸𑀦𑀢𑁄 𑀅𑀓𑀡𑁆𑀳𑀸𑀲𑀼𑀓𑁆𑀓𑀯𑀺𑀧𑀸𑀓𑀢𑁆𑀢𑀸 ‘‘𑀅𑀓𑀡𑁆𑀳𑀁 𑀅𑀲𑀼𑀓𑁆𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀬𑀁 𑀢𑀸𑀯 𑀉𑀤𑁆𑀤𑁂𑀲𑁂 𑀅𑀢𑁆𑀣𑁄.

𑀦𑀺𑀤𑁆𑀤𑁂𑀲𑁂 𑀧𑀦 𑀲𑀩𑁆𑀬𑀸𑀩𑀚𑁆𑀛𑀦𑁆𑀢𑀺 𑀲𑀤𑀼𑀓𑁆𑀔𑀁. 𑀓𑀸𑀬𑀲𑀗𑁆𑀔𑀸𑀭𑀸𑀤𑀻𑀲𑀼 𑀓𑀸𑀬𑀤𑁆𑀯𑀸𑀭𑁂 𑀕𑀳𑀡𑀸𑀤𑀺𑀯𑀲𑁂𑀦 𑀘𑁄𑀧𑀦𑀧𑁆𑀧𑀢𑁆𑀢𑀸 𑀤𑁆𑀯𑀸𑀤𑀲 ¶ 𑀅𑀓𑀼𑀲𑀮𑀘𑁂𑀢𑀦𑀸 𑀲𑀩𑁆𑀬𑀸𑀩𑀚𑁆𑀛𑀓𑀸𑀬𑀲𑀗𑁆𑀔𑀸𑀭𑁄 𑀦𑀸𑀫. 𑀯𑀘𑀻𑀤𑁆𑀯𑀸𑀭𑁂 𑀳𑀦𑀼𑀲𑀜𑁆𑀘𑁄𑀧𑀦𑀯𑀲𑁂𑀦 𑀯𑀘𑀻𑀪𑁂𑀤𑀧𑀯𑀢𑁆𑀢𑀺𑀓𑀸 𑀢𑀸𑀬𑁂𑀯 𑀤𑁆𑀯𑀸𑀤𑀲 𑀯𑀘𑀻𑀲𑀗𑁆𑀔𑀸𑀭𑁄 𑀦𑀸𑀫. 𑀉𑀪𑀬𑀘𑁄𑀧𑀦𑀁 𑀅𑀧𑁆𑀧𑀢𑁆𑀢𑀸 𑀭𑀳𑁄 𑀘𑀺𑀦𑁆𑀢𑀬𑀦𑁆𑀢𑀲𑁆𑀲 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀸 𑀫𑀦𑁄𑀲𑀗𑁆𑀔𑀸𑀭𑁄 𑀦𑀸𑀫. 𑀇𑀢𑀺 𑀢𑀻𑀲𑀼𑀧𑀺 𑀤𑁆𑀯𑀸𑀭𑁂𑀲𑀼 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀪𑁂𑀤𑀸 𑀅𑀓𑀼𑀲𑀮𑀘𑁂𑀢𑀦𑀸𑀯 𑀲𑀗𑁆𑀔𑀸𑀭𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀲𑁆𑀫𑀺𑀜𑁆𑀳𑀺 𑀲𑀼𑀢𑁆𑀢𑁂 𑀘𑁂𑀢𑀦𑀸 𑀥𑀼𑀭𑀁, 𑀉𑀧𑀸𑀮𑀺𑀲𑀼𑀢𑁆𑀢𑁂 𑀓𑀫𑁆𑀫𑀁. 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸𑀢𑀺 𑀲𑀗𑁆𑀓𑀟𑁆𑀠𑀺𑀢𑁆𑀯𑀸, 𑀧𑀺𑀡𑁆𑀟𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀬𑀸𑀩𑀚𑁆𑀛𑀁 𑀮𑁄𑀓𑀦𑁆𑀢𑀺 𑀲𑀤𑀼𑀓𑁆𑀔𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀺. 𑀲𑀩𑁆𑀬𑀸𑀩𑀚𑁆𑀛𑀸 𑀨𑀲𑁆𑀲𑀸 𑀨𑀼𑀲𑀦𑁆𑀢𑀻𑀢𑀺 𑀲𑀤𑀼𑀓𑁆𑀔𑀸 𑀯𑀺𑀧𑀸𑀓𑀨𑀲𑁆𑀲𑀸 𑀨𑀼𑀲𑀦𑁆𑀢𑀺. 𑀏𑀓𑀦𑁆𑀢𑀤𑀼𑀓𑁆𑀔𑀦𑁆𑀢𑀺 𑀦𑀺𑀭𑀦𑁆𑀢𑀭𑀤𑀼𑀓𑁆𑀔𑀁. 𑀪𑀽𑀢𑀸𑀢𑀺 𑀳𑁂𑀢𑁆𑀯𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁, 𑀪𑀽𑀢𑀓𑀫𑁆𑀫𑀢𑁄 𑀪𑀽𑀢𑀲𑁆𑀲 𑀲𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺 𑀳𑁄𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸𑀪𑀽𑀢𑀁 𑀓𑀫𑁆𑀫𑀁 𑀲𑀢𑁆𑀢𑀸 𑀓𑀭𑁄𑀦𑁆𑀢𑀺, 𑀢𑀣𑀸𑀪𑀽𑀢𑁂𑀦 𑀓𑀫𑁆𑀫𑁂𑀦 𑀓𑀫𑁆𑀫𑀲𑀪𑀸𑀕𑀯𑀲𑁂𑀦 𑀢𑁂𑀲𑀁 𑀉𑀧𑀧𑀢𑁆𑀢𑀺 𑀳𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀬𑀁 𑀓𑀭𑁄𑀢𑀺 𑀢𑁂𑀦 𑀉𑀧𑀧𑀚𑁆𑀚𑀢𑀻’’𑀢𑀺. 𑀏𑀢𑁆𑀣 𑀘 𑀢𑁂𑀦𑀸𑀢𑀺 𑀓𑀫𑁆𑀫𑁂𑀦 𑀯𑀺𑀬 𑀯𑀼𑀢𑁆𑀢𑀸, 𑀉𑀧𑀧𑀢𑁆𑀢𑀺 𑀘 𑀦𑀸𑀫 𑀯𑀺𑀧𑀸𑀓𑁂𑀦 𑀳𑁄𑀢𑀺. 𑀬𑀲𑁆𑀫𑀸 𑀧𑀦 𑀯𑀺𑀧𑀸𑀓𑀲𑁆𑀲 𑀓𑀫𑁆𑀫𑀁 𑀳𑁂𑀢𑀼, 𑀢𑀲𑁆𑀫𑀸 𑀢𑁂𑀦 𑀫𑀽𑀮𑀳𑁂𑀢𑀼𑀪𑀽𑀢𑁂𑀦 𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀨𑀲𑁆𑀲𑀸 𑀨𑀼𑀲𑀦𑁆𑀢𑀻𑀢𑀺 𑀬𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦 𑀦𑀺𑀩𑁆𑀩𑀢𑁆𑀢𑁄, 𑀢𑀁𑀓𑀫𑁆𑀫𑀯𑀺𑀧𑀸𑀓𑀨𑀲𑁆𑀲𑀸 𑀨𑀼𑀲𑀦𑁆𑀢𑀺. 𑀓𑀫𑁆𑀫𑀤𑀸𑀬𑀸𑀤𑀸𑀢𑀺 𑀓𑀫𑁆𑀫𑀤𑀸𑀬𑀚𑁆𑀚𑀸 𑀓𑀫𑁆𑀫𑀫𑁂𑀯 𑀦𑁂𑀲𑀁 𑀤𑀸𑀬𑀚𑁆𑀚𑀁 𑀲𑀦𑁆𑀢𑀓𑀦𑁆𑀢𑀺 𑀯𑀤𑀸𑀫𑀺.

𑀅𑀩𑁆𑀬𑀸𑀩𑀚𑁆𑀛𑀦𑁆𑀢𑀺 ¶ 𑀦𑀺𑀤𑁆𑀤𑀼𑀓𑁆𑀔𑀁 ¶ . 𑀇𑀫𑀲𑁆𑀫𑀺𑀁 𑀯𑀸𑀭𑁂 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀸 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀓𑀸𑀬𑀲𑀗𑁆𑀔𑀸𑀭𑁄 𑀦𑀸𑀫. 𑀢𑀸𑀬𑁂𑀯 𑀯𑀘𑀻𑀤𑁆𑀯𑀸𑀭𑁂 𑀧𑀯𑀢𑁆𑀢𑀸 𑀯𑀘𑀻𑀲𑀗𑁆𑀔𑀸𑀭𑁄 𑀦𑀸𑀫. 𑀫𑀦𑁄𑀤𑁆𑀯𑀸𑀭𑁂 𑀧𑀯𑀢𑁆𑀢𑀸 𑀢𑀸𑀬𑁂𑀯 𑀅𑀝𑁆𑀞, 𑀢𑀺𑀲𑁆𑀲𑁄 𑀘 𑀳𑁂𑀝𑁆𑀞𑀺𑀫𑀛𑀸𑀦𑀘𑁂𑀢𑀦𑀸 𑀅𑀩𑁆𑀬𑀸𑀩𑀚𑁆𑀛𑀫𑀦𑁄𑀲𑀗𑁆𑀔𑀸𑀭𑁄 𑀦𑀸𑀫. 𑀛𑀸𑀦𑀘𑁂𑀢𑀦𑀸 𑀢𑀸𑀯 𑀳𑁄𑀢𑀼, 𑀓𑀸𑀫𑀸𑀯𑀘𑀭𑀸 𑀓𑀺𑀦𑁆𑀢𑀺 𑀅𑀩𑁆𑀬𑀸𑀩𑀚𑁆𑀛𑀫𑀦𑁄𑀲𑀗𑁆𑀔𑀸𑀭𑁄 𑀦𑀸𑀫 𑀚𑀸𑀢𑀸𑀢𑀺. 𑀓𑀲𑀺𑀡𑀲𑀚𑁆𑀚𑀦𑀓𑀸𑀮𑁂 ¶ 𑀘 𑀓𑀲𑀺𑀡𑀸𑀲𑁂𑀯𑀦𑀓𑀸𑀮𑁂 𑀘 𑀮𑀩𑁆𑀪𑀦𑁆𑀢𑀺. 𑀓𑀸𑀫𑀸𑀯𑀘𑀭𑀘𑁂𑀢𑀦𑀸 𑀧𑀞𑀫𑀚𑁆𑀛𑀸𑀦𑀘𑁂𑀢𑀦𑀸𑀬 𑀖𑀝𑀺𑀢𑀸, 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑁂𑀢𑀦𑀸 𑀢𑀢𑀺𑀬𑀚𑁆𑀛𑀸𑀦𑀘𑁂𑀢𑀦𑀸𑀬 𑀖𑀝𑀺𑀢𑀸. 𑀇𑀢𑀺 𑀢𑀻𑀲𑀼𑀧𑀺 𑀤𑁆𑀯𑀸𑀭𑁂𑀲𑀼 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀪𑁂𑀤𑀸 𑀓𑀼𑀲𑀮𑀘𑁂𑀢𑀦𑀸𑀯 𑀲𑀗𑁆𑀔𑀸𑀭𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑀺𑀬𑀯𑀸𑀭𑁄 𑀉𑀪𑀬𑀫𑀺𑀲𑁆𑀲𑀓𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀲𑁂𑀬𑁆𑀬𑀣𑀸𑀧𑀺 𑀫𑀦𑀼𑀲𑁆𑀲𑀸𑀢𑀺𑀆𑀤𑀻𑀲𑀼 𑀫𑀦𑀼𑀲𑁆𑀲𑀸𑀦𑀁 𑀢𑀸𑀯 𑀓𑀸𑀮𑁂𑀦 𑀲𑀼𑀔𑀁 𑀓𑀸𑀮𑁂𑀦 𑀤𑀼𑀓𑁆𑀔𑀁 𑀧𑀸𑀓𑀝𑀫𑁂𑀯, 𑀤𑁂𑀯𑁂𑀲𑀼 𑀧𑀦 𑀪𑀼𑀫𑁆𑀫𑀤𑁂𑀯𑀢𑀸𑀦𑀁, 𑀯𑀺𑀦𑀺𑀧𑀸𑀢𑀺𑀓𑁂𑀲𑀼 𑀯𑁂𑀫𑀸𑀦𑀺𑀓𑀧𑁂𑀢𑀸𑀦𑀁 𑀓𑀸𑀮𑁂𑀦 𑀲𑀼𑀔𑀁 𑀓𑀸𑀮𑁂𑀦 𑀤𑀼𑀓𑁆𑀔𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀳𑀢𑁆𑀣𑀺𑀆𑀤𑀻𑀲𑀼 𑀢𑀺𑀭𑀘𑁆𑀙𑀸𑀦𑁂𑀲𑀼𑀧𑀺 𑀮𑀩𑁆𑀪𑀢𑀺𑀬𑁂𑀯.

𑀢𑀢𑁆𑀭𑀸𑀢𑀺 𑀢𑁂𑀲𑀼 𑀢𑀻𑀲𑀼 𑀓𑀫𑁆𑀫𑁂𑀲𑀼. 𑀢𑀲𑁆𑀲 𑀧𑀳𑀸𑀦𑀸𑀬 𑀬𑀸 𑀘𑁂𑀢𑀦𑀸𑀢𑀺 𑀢𑀲𑁆𑀲 𑀧𑀳𑀸𑀦𑀢𑁆𑀣𑀸𑀬 𑀫𑀕𑁆𑀕𑀘𑁂𑀢𑀦𑀸. 𑀓𑀫𑁆𑀫𑀁 𑀧𑀢𑁆𑀯𑀸𑀯 𑀫𑀕𑁆𑀕𑀘𑁂𑀢𑀦𑀸𑀬 𑀅𑀜𑁆𑀜𑁄 𑀧𑀡𑁆𑀟𑀭𑀢𑀭𑁄 𑀥𑀫𑁆𑀫𑁄 𑀦𑀸𑀫 𑀦𑀢𑁆𑀣𑀺. 𑀇𑀤𑀁 𑀧𑀦 𑀓𑀫𑁆𑀫𑀘𑀢𑀼𑀓𑁆𑀓𑀁 𑀧𑀢𑁆𑀯𑀸 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑁂𑀢𑀦𑀸 𑀓𑀡𑁆𑀳𑀸 𑀦𑀸𑀫, 𑀢𑁂𑀪𑀽𑀫𑀓𑀓𑀼𑀲𑀮𑀘𑁂𑀢𑀦𑀸 𑀲𑀼𑀓𑁆𑀓𑀸 𑀦𑀸𑀫, 𑀫𑀕𑁆𑀕𑀘𑁂𑀢𑀦𑀸 𑀅𑀓𑀡𑁆𑀳𑀸 𑀅𑀲𑀼𑀓𑁆𑀓𑀸𑀢𑀺 𑀆𑀕𑀢𑀸.

𑁮𑁨. ‘‘𑀮𑀪𑁂𑀬𑁆𑀬𑀸𑀳𑀁, 𑀪𑀦𑁆𑀢𑁂’’𑀢𑀺 𑀇𑀤𑀁 𑀲𑁄 ‘‘𑀘𑀺𑀭𑀁 𑀯𑀢 𑀫𑁂 𑀅𑀦𑀺𑀬𑁆𑀬𑀸𑀦𑀺𑀓𑀧𑀓𑁆𑀔𑁂 𑀬𑁄𑀚𑁂𑀢𑁆𑀯𑀸 𑀅𑀢𑁆𑀢𑀸 𑀓𑀺𑀮𑀫𑀺𑀢𑁄, ‘𑀲𑀼𑀓𑁆𑀔𑀦𑀤𑀻𑀢𑀻𑀭𑁂 𑀦𑁆𑀳𑀸𑀬𑀺𑀲𑁆𑀲𑀸𑀫𑀻’𑀢𑀺 𑀲𑀫𑁆𑀧𑀭𑀺𑀯𑀢𑁆𑀢𑁂𑀦𑁆𑀢𑁂𑀦 𑀯𑀺𑀬 𑀣𑀼𑀲𑁂 𑀓𑁄𑀝𑁆𑀝𑁂𑀦𑁆𑀢𑁂𑀦 𑀯𑀺𑀬 𑀘 𑀦 𑀓𑁄𑀘𑀺 𑀅𑀢𑁆𑀣𑁄 𑀦𑀺𑀧𑁆𑀨𑀸𑀤𑀺𑀢𑁄, 𑀳𑀦𑁆𑀤𑀸𑀳𑀁 𑀅𑀢𑁆𑀢𑀸𑀦𑀁 𑀬𑁄𑀕𑁂 𑀬𑁄𑀚𑁂𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀳. 𑀅𑀣 ¶ 𑀪𑀕𑀯𑀸 𑀬𑁄𑀦𑁂𑀦 𑀔𑀦𑁆𑀥𑀓𑁂 𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑁄 𑀧𑀜𑁆𑀜𑀢𑁆𑀢𑁄, 𑀬𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀺𑀢𑁄 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑁄 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀆𑀓𑀗𑁆𑀔𑀸𑀫𑀺 𑀉𑀧𑀲𑀫𑁆𑀧𑀤𑀁, 𑀲𑁆𑀯𑀸𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀭𑀺𑀯𑀸𑀲𑀁 𑀬𑀸𑀘𑀸𑀫𑀻’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁮𑁬) 𑀦𑀬𑁂𑀦 𑀲𑀫𑀸𑀤𑀺𑀬𑀺𑀢𑁆𑀯𑀸 𑀧𑀭𑀺𑀯𑀲𑀢𑀺, 𑀢𑀁 𑀲𑀦𑁆𑀥𑀸𑀬 ‘‘𑀬𑁄 𑀔𑁄, 𑀲𑁂𑀦𑀺𑀬, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀧𑀩𑁆𑀩𑀚𑁆𑀚𑀦𑁆𑀢𑀺 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀅𑀧𑀭𑀺𑀯𑀲𑀺𑀢𑁆𑀯𑀸𑀬𑁂𑀯 𑀳𑀺 𑀧𑀩𑁆𑀩𑀚𑁆𑀚𑀁 𑀮𑀪𑀢𑀺. 𑀉𑀧𑀲𑀫𑁆𑀧𑀤𑀢𑁆𑀣𑀺𑀓𑁂𑀦 𑀧𑀦 𑀦𑀸𑀢𑀺𑀓𑀸𑀮𑁂𑀦 𑀕𑀸𑀫𑀧𑁆𑀧𑀯𑁂𑀲𑀦𑀸𑀤𑀻𑀦𑀺 𑀅𑀝𑁆𑀞 𑀯𑀢𑁆𑀢𑀸𑀦𑀺 𑀧𑀽𑀭𑁂𑀦𑁆𑀢𑁂𑀦 𑀧𑀭𑀺𑀯𑀲𑀺𑀢𑀩𑁆𑀩𑀁 ¶ . 𑀆𑀭𑀤𑁆𑀥𑀘𑀺𑀢𑁆𑀢𑀸𑀢𑀺 𑀅𑀝𑁆𑀞𑀯𑀢𑁆𑀢𑀧𑀽𑀭𑀡𑁂𑀦 𑀢𑀼𑀝𑁆𑀞𑀘𑀺𑀢𑁆𑀢𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀲 𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑁄 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀧𑀩𑁆𑀩𑀚𑁆𑀚𑀔𑀦𑁆𑀥𑀓𑀯𑀡𑁆𑀡𑀦𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁮𑁬) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄 ¶ . 𑀅𑀧𑀺𑀘 𑀫𑁂𑀢𑁆𑀣𑀸𑀢𑀺 𑀅𑀧𑀺𑀘 𑀫𑁂 𑀏𑀢𑁆𑀣. 𑀧𑀼𑀕𑁆𑀕𑀮𑀯𑁂𑀫𑀢𑁆𑀢𑀢𑀸 𑀯𑀺𑀤𑀺𑀢𑀸𑀢𑀺 𑀧𑀼𑀕𑁆𑀕𑀮𑀦𑀸𑀦𑀢𑁆𑀢𑀁 𑀯𑀺𑀤𑀺𑀢𑀁. 𑀅𑀬𑀁 𑀧𑀼𑀕𑁆𑀕𑀮𑁄 𑀧𑀭𑀺𑀯𑀸𑀲𑀸𑀭𑀳𑁄, 𑀅𑀬𑀁 𑀦 𑀧𑀭𑀺𑀯𑀸𑀲𑀸𑀭𑀳𑁄𑀢𑀺 𑀇𑀤𑀁 𑀫𑀬𑁆𑀳𑀁 𑀧𑀸𑀓𑀝𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀢𑀢𑁄 𑀲𑁂𑀦𑀺𑀬𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑁄 𑀅𑀘𑁆𑀙𑀭𑀺𑀬𑀁 𑀩𑀼𑀤𑁆𑀥𑀲𑀸𑀲𑀦𑀁, 𑀬𑀢𑁆𑀣 𑀏𑀯𑀁 𑀖𑀁𑀲𑀺𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀬𑀼𑀢𑁆𑀢𑀫𑁂𑀯 𑀕𑀡𑁆𑀳𑀦𑁆𑀢𑀺, 𑀅𑀬𑀼𑀢𑁆𑀢𑀁 𑀙𑀟𑁆𑀟𑁂𑀦𑁆𑀢𑀻’’𑀢𑀺. 𑀢𑀢𑁄 𑀲𑀼𑀝𑁆𑀞𑀼𑀢𑀭𑀁 𑀧𑀩𑁆𑀩𑀚𑁆𑀚𑀸𑀬 𑀲𑀜𑁆𑀚𑀸𑀢𑀼𑀲𑁆𑀲𑀸𑀳𑁄 𑀲𑀘𑁂, 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀅𑀣 𑀪𑀕𑀯𑀸 𑀢𑀲𑁆𑀲 𑀢𑀺𑀩𑁆𑀩𑀘𑁆𑀙𑀦𑁆𑀤𑀢𑀁 𑀯𑀺𑀤𑀺𑀢𑁆𑀯𑀸 𑀦 𑀲𑁂𑀦𑀺𑀬𑁄 𑀧𑀭𑀺𑀯𑀸𑀲𑀁 𑀅𑀭𑀳𑀢𑀻𑀢𑀺 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀕𑀘𑁆𑀙 𑀢𑁆𑀯𑀁, 𑀪𑀺𑀓𑁆𑀔𑀼, 𑀲𑁂𑀦𑀺𑀬𑀁 𑀦𑁆𑀳𑀸𑀧𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀆𑀦𑁂𑀳𑀻’’𑀢𑀺. 𑀲𑁄 𑀢𑀣𑀸 𑀓𑀢𑁆𑀯𑀸 𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀆𑀦𑀬𑀺. 𑀪𑀕𑀯𑀸 𑀕𑀡𑁂 𑀦𑀺𑀲𑀻𑀤𑀺𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀮𑀢𑁆𑀣 𑀔𑁄 𑀅𑀘𑁂𑀮𑁄 𑀲𑁂𑀦𑀺𑀬𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁 𑀅𑀮𑀢𑁆𑀣 𑀉𑀧𑀲𑀫𑁆𑀧𑀤’’𑀦𑁆𑀢𑀺.

𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑁄𑀢𑀺 ¶ 𑀉𑀧𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀦𑀘𑀺𑀭𑀫𑁂𑀯. 𑀯𑀽𑀧𑀓𑀝𑁆𑀞𑁄𑀢𑀺 𑀯𑀢𑁆𑀣𑀼𑀓𑀸𑀫𑀓𑀺𑀮𑁂𑀲𑀓𑀸𑀫𑁂𑀳𑀺 𑀓𑀸𑀬𑁂𑀦 𑀘 𑀘𑀺𑀢𑁆𑀢𑁂𑀦 𑀘 𑀯𑀽𑀧𑀓𑀝𑁆𑀞𑁄. 𑀅𑀧𑁆𑀧𑀫𑀢𑁆𑀢𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑁂 𑀲𑀢𑀺𑀁 𑀅𑀯𑀺𑀚𑀳𑀦𑁆𑀢𑁄. 𑀆𑀢𑀸𑀧𑀻𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀗𑁆𑀔𑀸𑀢𑁂𑀦 𑀯𑀻𑀭𑀺𑀬𑀸𑀢𑀸𑀧𑁂𑀦 𑀆𑀢𑀸𑀧𑀻. 𑀧𑀳𑀺𑀢𑀢𑁆𑀢𑁄𑀢𑀺 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑀢𑀸𑀬 𑀧𑁂𑀲𑀺𑀢𑀢𑁆𑀢𑁄 𑀯𑀺𑀲𑁆𑀲𑀝𑁆𑀞𑀅𑀢𑁆𑀢𑀪𑀸𑀯𑁄. 𑀬𑀲𑁆𑀲𑀢𑁆𑀣𑀸𑀬𑀸𑀢𑀺 𑀬𑀲𑁆𑀲 𑀅𑀢𑁆𑀣𑀸𑀬. 𑀓𑀼𑀮𑀧𑀼𑀢𑁆𑀢𑀸𑀢𑀺 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑀸. 𑀲𑀫𑁆𑀫𑀤𑁂𑀯𑀸𑀢𑀺 𑀳𑁂𑀢𑀼𑀦𑀸𑀯 𑀓𑀸𑀭𑀡𑁂𑀦𑁂𑀯. 𑀢𑀤𑀦𑀼𑀢𑁆𑀢𑀭𑀦𑁆𑀢𑀺 𑀢𑀁 𑀅𑀦𑀼𑀢𑁆𑀢𑀭𑀁. 𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀧𑀭𑀺𑀬𑁄𑀲𑀸𑀦𑀪𑀽𑀢𑀁 𑀅𑀭𑀳𑀢𑁆𑀢𑀨𑀮𑀁. 𑀢𑀲𑁆𑀲 𑀳𑀺 𑀅𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀸 𑀧𑀩𑁆𑀩𑀚𑀦𑁆𑀢𑀺. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂. 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀅𑀢𑁆𑀢𑀦𑀸𑀬𑁂𑀯 𑀧𑀜𑁆𑀜𑀸𑀬 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸, 𑀅𑀧𑀭𑀧𑁆𑀧𑀘𑁆𑀘𑀬𑀁 𑀜𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀻𑀢𑀺 𑀧𑀸𑀧𑀼𑀡𑀺𑀢𑁆𑀯𑀸 𑀲𑀫𑁆𑀧𑀸𑀤𑁂𑀢𑁆𑀯𑀸 𑀯𑀺𑀳𑀸𑀲𑀺. 𑀏𑀯𑀁 𑀯𑀺𑀳𑀭𑀦𑁆𑀢𑁄𑀯 𑀔𑀻𑀡𑀸 𑀚𑀸𑀢𑀺…𑀧𑁂… 𑀅𑀩𑁆𑀪𑀜𑁆𑀜𑀸𑀲𑀺.

𑀏𑀯𑀫𑀲𑁆𑀲 ¶ 𑀧𑀘𑁆𑀘𑀯𑁂𑀓𑁆𑀔𑀡𑀪𑀽𑀫𑀺𑀁 𑀤𑀲𑁆𑀲𑁂𑀢𑁆𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀢𑀼𑀁 ‘‘𑀅𑀜𑁆𑀜𑀢𑀭𑁄 𑀔𑁄 𑀧𑀦𑀸𑀬𑀲𑁆𑀫𑀸 𑀲𑁂𑀦𑀺𑀬𑁄 𑀅𑀭𑀳𑀢𑀁 𑀅𑀳𑁄𑀲𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀜𑁆𑀜𑀢𑀭𑁄𑀢𑀺 𑀏𑀓𑁄. 𑀅𑀭𑀳𑀢𑀦𑁆𑀢𑀺 𑀅𑀭𑀳𑀦𑁆𑀢𑀸𑀦𑀁, 𑀪𑀕𑀯𑀢𑁄 𑀲𑀸𑀯𑀓𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀅𑀩𑁆𑀪𑀦𑁆𑀢𑀭𑁄 𑀅𑀳𑁄𑀲𑀻𑀢𑀺 𑀅𑀬𑀫𑁂𑀯𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀓𑀼𑀓𑁆𑀓𑀼𑀭𑀯𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀪𑀬𑀭𑀸𑀚𑀓𑀼𑀫𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁩. 𑀏𑀯𑀁 ¶ ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀅𑀪𑀬𑀲𑀼𑀢𑁆𑀢𑀁. 𑀢𑀢𑁆𑀣 𑀅𑀪𑀬𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀭𑀸𑀚𑀓𑀼𑀫𑀸𑀭𑁄𑀢𑀺 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀑𑀭𑀲𑀧𑀼𑀢𑁆𑀢𑁄. 𑀯𑀸𑀤𑀁 𑀆𑀭𑁄𑀧𑁂𑀳𑀻𑀢𑀺 𑀤𑁄𑀲𑀁 𑀆𑀭𑁄𑀧𑁂𑀳𑀺. 𑀦𑁂𑀭𑀬𑀺𑀓𑁄𑀢𑀺 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀓𑁄. 𑀓𑀧𑁆𑀧𑀝𑁆𑀞𑁄𑀢𑀺 𑀓𑀧𑁆𑀧𑀝𑁆𑀞𑀺𑀢𑀺𑀓𑁄. 𑀅𑀢𑁂𑀓𑀺𑀘𑁆𑀙𑁄𑀢𑀺 𑀩𑀼𑀤𑁆𑀥𑀲𑀳𑀲𑁆𑀲𑁂𑀦𑀸𑀧𑀺 𑀢𑀺𑀓𑀺𑀘𑁆𑀙𑀺𑀢𑀼𑀁 𑀦 𑀲𑀓𑁆𑀓𑀸. 𑀉𑀕𑁆𑀕𑀺𑀮𑀺𑀢𑀼𑀦𑁆𑀢𑀺 𑀤𑁆𑀯𑁂 𑀅𑀦𑁆𑀢𑁂 𑀫𑁄𑀘𑁂𑀢𑁆𑀯𑀸 𑀓𑀣𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀕𑁆𑀕𑀺𑀮𑀺𑀢𑀼𑀁 𑀩𑀳𑀺 𑀦𑀻𑀳𑀭𑀺𑀢𑀼𑀁 𑀦 𑀲𑀓𑁆𑀔𑀺𑀢𑀺. 𑀑𑀕𑀺𑀮𑀺𑀢𑀼𑀦𑁆𑀢𑀺 𑀧𑀼𑀘𑁆𑀙𑀸𑀬 𑀤𑁄𑀲𑀁 𑀤𑀢𑁆𑀯𑀸 𑀳𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀑𑀕𑀺𑀮𑀺𑀢𑀼𑀁 𑀅𑀦𑁆𑀢𑁄 𑀧𑀯𑁂𑀲𑁂𑀢𑀼𑀁 𑀦 𑀲𑀓𑁆𑀔𑀺𑀢𑀺.

𑀏𑀯𑀁, 𑀪𑀦𑁆𑀢𑁂𑀢𑀺 𑀦𑀺𑀕𑀡𑁆𑀞𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀫𑀡𑁄 𑀕𑁄𑀢𑀫𑁄 𑀫𑀬𑁆𑀳𑀁 𑀲𑀸𑀯𑀓𑁂 𑀪𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀳𑀦𑁆𑀤𑀸𑀳𑀁 𑀏𑀓𑀁 𑀧𑀜𑁆𑀳𑀁 𑀅𑀪𑀺𑀲𑀗𑁆𑀔𑀭𑁄𑀫𑀺, 𑀬𑀁 𑀧𑀼𑀝𑁆𑀞𑁄 𑀲𑀫𑀡𑁄 𑀕𑁄𑀢𑀫𑁄 𑀉𑀓𑁆𑀓𑀼𑀝𑀺𑀓𑁄 𑀳𑀼𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀉𑀝𑁆𑀞𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺. 𑀲𑁄 𑀅𑀪𑀬𑀲𑁆𑀲 𑀕𑁂𑀳𑀸 𑀦𑀻𑀳𑀝𑀪𑀢𑁆𑀢𑁄 𑀲𑀺𑀦𑀺𑀤𑁆𑀥𑀪𑁄𑀚𑀦𑀁 𑀪𑀼𑀜𑁆𑀚𑀦𑁆𑀢𑁄 𑀩𑀳𑀽 𑀧𑀜𑁆𑀳𑁂 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑁋 ‘‘𑀏𑀢𑁆𑀣 𑀲𑀫𑀡𑁄 𑀕𑁄𑀢𑀫𑁄 𑀇𑀫𑀁 𑀦𑀸𑀫 𑀤𑁄𑀲𑀁 𑀤𑀲𑁆𑀲𑁂𑀲𑁆𑀲𑀢𑀺, 𑀏𑀢𑁆𑀣 𑀇𑀫𑀁 𑀦𑀸𑀫𑀸’’𑀢𑀺 𑀲𑀩𑁆𑀩𑁂 𑀧𑀳𑀸𑀬 𑀘𑀸𑀢𑀼𑀫𑀸𑀲𑀫𑀢𑁆𑀣𑀓𑁂 𑀇𑀫𑀁 𑀧𑀜𑁆𑀳𑀁 𑀅𑀤𑁆𑀤𑀲. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑀲𑁆𑀲 𑀧𑀜𑁆𑀳𑀲𑁆𑀲 𑀧𑀼𑀘𑁆𑀙𑀸𑀬 𑀯𑀸 𑀯𑀺𑀲𑁆𑀲𑀚𑁆𑀚𑀦𑁂 𑀯𑀸 𑀦 𑀲𑀓𑁆𑀓𑀸 𑀤𑁄𑀲𑁄 𑀤𑀸𑀢𑀼𑀁, 𑀑𑀯𑀝𑁆𑀝𑀺𑀓𑀲𑀸𑀭𑁄 𑀅𑀬𑀁, 𑀓𑁄 𑀦𑀼 𑀔𑁄 𑀇𑀫𑀁 𑀕𑀳𑁂𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀢𑀻’’𑀢𑀺. 𑀢𑀢𑁄 ‘‘𑀅𑀪𑀬𑁄 𑀭𑀸𑀚𑀓𑀼𑀫𑀸𑀭𑁄 𑀧𑀡𑁆𑀟𑀺𑀢𑁄, 𑀲𑁄 𑀲𑀓𑁆𑀔𑀺𑀲𑁆𑀲𑀢𑀻𑀢𑀺 𑀢𑀁 𑀉𑀕𑁆𑀕𑀡𑁆𑀳𑀸𑀧𑁂𑀫𑀻’’𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑁆𑀯𑀸 𑀉𑀕𑁆𑀕𑀡𑁆𑀳𑀸𑀧𑁂𑀲𑀺. 𑀲𑁄 𑀯𑀸𑀤𑀚𑁆𑀛𑀸𑀲𑀬𑀢𑀸𑀬 𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 ‘‘𑀏𑀯𑀁, 𑀪𑀦𑁆𑀢𑁂,’’𑀢𑀺 𑀆𑀳.

𑁮𑁪. 𑀅𑀓𑀸𑀮𑁄 ¶ 𑀔𑁄 𑀅𑀚𑁆𑀚𑀸𑀢𑀺 𑀅𑀬𑀁 𑀧𑀜𑁆𑀳𑁄 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀅𑀪𑀺𑀲𑀗𑁆𑀔𑀢𑁄, 𑀢𑀢𑁆𑀣 𑀇𑀤𑀁 𑀕𑀳𑁂𑀢𑁆𑀯𑀸 𑀇𑀤𑀁 𑀯𑀺𑀲𑁆𑀲𑀚𑁆𑀚𑀺𑀬𑀫𑀸𑀦𑁂 𑀤𑀺𑀯𑀲𑀪𑀸𑀕𑁄 𑀦𑀧𑁆𑀧𑀳𑁄𑀲𑁆𑀲𑀢𑀻𑀢𑀺 𑀫𑀜𑁆𑀜𑀦𑁆𑀢𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺. 𑀲𑁄 𑀤𑀸𑀦𑀻𑀢𑀺 𑀲𑁆𑀯𑁂 𑀤𑀸𑀦𑀺. 𑀅𑀢𑁆𑀢𑀘𑀢𑀼𑀢𑁆𑀣𑁄𑀢𑀺 𑀓𑀲𑁆𑀫𑀸 𑀩𑀳𑀽𑀳𑀺 𑀲𑀤𑁆𑀥𑀺𑀁 𑀦 𑀦𑀺𑀫𑀦𑁆𑀢𑁂𑀲𑀺? 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀩𑀳𑀽𑀲𑀼 𑀦𑀺𑀲𑀺𑀦𑁆𑀦𑁂𑀲𑀼 𑀣𑁄𑀓𑀁 𑀤𑀢𑁆𑀯𑀸 𑀯𑀤𑀦𑁆𑀢𑀲𑁆𑀲 𑀅𑀜𑁆𑀜𑀁 𑀲𑀼𑀢𑁆𑀢𑀁 𑀅𑀜𑁆𑀜𑀁 𑀓𑀸𑀭𑀡𑀁 𑀅𑀜𑁆𑀜𑀁 𑀢𑀣𑀸𑀭𑀽𑀧𑀁 𑀯𑀢𑁆𑀣𑀼𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀲𑁆𑀲𑀢𑀺, 𑀏𑀯𑀁 𑀲𑀦𑁆𑀢𑁂 𑀓𑀮𑀳𑁄 𑀯𑀸 𑀓𑁄𑀮𑀸𑀳𑀮𑀫𑁂𑀯 𑀯𑀸 𑀪𑀯𑀺𑀲𑁆𑀲𑀢𑀺. 𑀅𑀣𑀸𑀧𑀺 𑀏𑀓𑀓𑀁𑀬𑁂𑀯 𑀦𑀺𑀫𑀦𑁆𑀢𑁂𑀲𑁆𑀲𑀸𑀫𑀺, 𑀏𑀯𑀫𑁆𑀧𑀺 𑀫𑁂 𑀕𑀭𑀳𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺 ‘𑀬𑀸𑀯𑀫𑀘𑁆𑀙𑀭𑀻 𑀯𑀸𑀬𑀁 𑀅𑀪𑀬𑁄, 𑀪𑀕𑀯𑀦𑁆𑀢𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀪𑀺𑀓𑁆𑀔𑀽𑀦𑀁 𑀲𑀢𑁂𑀦𑀧𑀺 𑀲𑀳𑀲𑁆𑀲𑁂𑀦𑀧𑀺 𑀲𑀤𑁆𑀥𑀺𑀁 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸𑀧𑀺 𑀏𑀓𑀓𑀁𑀬𑁂𑀯 ¶ ¶ 𑀦𑀺𑀫𑀦𑁆𑀢𑁂𑀲𑀻’’’𑀢𑀺. ‘‘𑀏𑀯𑀁 𑀧𑀦 𑀤𑁄𑀲𑁄 𑀦 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀧𑀭𑁂𑀳𑀺 𑀢𑀻𑀳𑀺 𑀲𑀤𑁆𑀥𑀺𑀁 𑀅𑀢𑁆𑀢𑀘𑀢𑀼𑀢𑁆𑀣𑀁 𑀦𑀺𑀫𑀦𑁆𑀢𑁂𑀲𑀺.

𑁮𑁫. 𑀦 𑀔𑁆𑀯𑁂𑀢𑁆𑀣, 𑀭𑀸𑀚𑀓𑀼𑀫𑀸𑀭, 𑀏𑀓𑀁𑀲𑁂𑀦𑀸𑀢𑀺 𑀦 𑀔𑁄, 𑀭𑀸𑀚𑀓𑀼𑀫𑀸𑀭, 𑀏𑀢𑁆𑀣 𑀧𑀜𑁆𑀳𑁂 𑀏𑀓𑀁𑀲𑁂𑀦 𑀯𑀺𑀲𑁆𑀲𑀚𑁆𑀚𑀦𑀁 𑀳𑁄𑀢𑀺. 𑀏𑀯𑀭𑀽𑀧𑀜𑁆𑀳𑀺 𑀯𑀸𑀘𑀁 𑀢𑀣𑀸𑀕𑀢𑁄 𑀪𑀸𑀲𑁂𑀬𑁆𑀬𑀸𑀧𑀺 𑀦 𑀪𑀸𑀲𑁂𑀬𑁆𑀬𑀸𑀧𑀺. 𑀪𑀸𑀲𑀺𑀢𑀧𑀘𑁆𑀘𑀬𑁂𑀦 𑀅𑀢𑁆𑀣𑀁 𑀧𑀲𑁆𑀲𑀦𑁆𑀢𑁄 𑀪𑀸𑀲𑁂𑀬𑁆𑀬, 𑀅𑀧𑀲𑁆𑀲𑀦𑁆𑀢𑁄 𑀦 𑀪𑀸𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀇𑀢𑀺 𑀪𑀕𑀯𑀸 𑀫𑀳𑀸𑀦𑀺𑀕𑀡𑁆𑀞𑁂𑀦 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀅𑀪𑀺𑀲𑀗𑁆𑀔𑀢𑀁 𑀧𑀜𑁆𑀳𑀁 𑀅𑀲𑀦𑀺𑀧𑀸𑀢𑁂𑀦 𑀧𑀩𑁆𑀩𑀢𑀓𑀽𑀝𑀁 𑀯𑀺𑀬 𑀏𑀓𑀯𑀘𑀦𑁂𑀦𑁂𑀯 𑀲𑀁𑀘𑀼𑀡𑁆𑀡𑁂𑀲𑀺. 𑀅𑀦𑀲𑁆𑀲𑀼𑀁 𑀦𑀺𑀕𑀡𑁆𑀞𑀸𑀢𑀺 𑀦𑀝𑁆𑀞𑀸 𑀦𑀺𑀕𑀡𑁆𑀞𑀸.

𑁮𑁬. 𑀅𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺 𑀊𑀭𑀽𑀲𑀼 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀮𑁂𑀲𑀯𑀸𑀤𑀺𑀦𑁄 𑀳𑀺 𑀯𑀸𑀤𑀁 𑀧𑀝𑁆𑀞𑀧𑁂𑀦𑁆𑀢𑀸 𑀓𑀺𑀜𑁆𑀘𑀺𑀤𑁂𑀯 𑀨𑀮𑀁 𑀯𑀸 𑀧𑀼𑀧𑁆𑀨𑀁 𑀯𑀸 𑀧𑁄𑀢𑁆𑀣𑀓𑀁 𑀯𑀸 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺. 𑀢𑁂 𑀅𑀢𑁆𑀢𑀦𑁄 𑀚𑀬𑁂 𑀲𑀢𑀺 𑀧𑀭𑀁 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺, 𑀧𑀭𑀲𑁆𑀲 𑀚𑀬𑁂 𑀲𑀢𑀺 𑀨𑀮𑀁 𑀔𑀸𑀤𑀦𑁆𑀢𑀸 𑀯𑀺𑀬 𑀧𑀼𑀧𑁆𑀨𑀁 ¶ 𑀖𑀸𑀬𑀦𑁆𑀢𑀸 𑀯𑀺𑀬 𑀧𑁄𑀢𑁆𑀣𑀓𑀁 𑀯𑀸𑀘𑁂𑀦𑁆𑀢𑀸 𑀯𑀺𑀬 𑀯𑀺𑀓𑁆𑀔𑁂𑀧𑀁 𑀤𑀲𑁆𑀲𑁂𑀦𑁆𑀢𑀺. 𑀅𑀬𑀁 𑀧𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀏𑀲 𑀑𑀲𑀝𑀲𑀗𑁆𑀕𑀸𑀫𑁄 𑀧𑀭𑀯𑀸𑀤𑀫𑀤𑁆𑀤𑀦𑁄. 𑀲𑀘𑁂 𑀫𑁂 𑀚𑀬𑁄 𑀪𑀯𑀺𑀲𑁆𑀲𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀪𑀯𑀺𑀲𑁆𑀲𑀢𑀺, 𑀤𑀸𑀭𑀓𑀁 𑀯𑀺𑀚𑁆𑀛𑀺𑀢𑁆𑀯𑀸 𑀭𑁄𑀤𑀸𑀧𑁂𑀲𑁆𑀲𑀸𑀫𑀺. 𑀢𑀢𑁄 𑀧𑀲𑁆𑀲𑀣, 𑀪𑁄, 𑀅𑀬𑀁 𑀤𑀸𑀭𑀓𑁄 𑀭𑁄𑀤𑀢𑀺, 𑀉𑀝𑁆𑀞𑀳𑀣 𑀢𑀸𑀯, 𑀧𑀘𑁆𑀙𑀸𑀧𑀺 𑀚𑀸𑀦𑀺𑀲𑁆𑀲𑀸𑀫𑀸’’𑀢𑀺 𑀢𑀲𑁆𑀫𑀸 𑀤𑀸𑀭𑀓𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀪𑀕𑀯𑀸 𑀧𑀦 𑀭𑀸𑀚𑀓𑀼𑀫𑀸𑀭𑀢𑁄 𑀲𑀳𑀲𑁆𑀲𑀕𑀼𑀡𑁂𑀦𑀧𑀺 𑀲𑀢𑀲𑀳𑀲𑁆𑀲𑀕𑀼𑀡𑁂𑀦𑀧𑀺 𑀯𑀸𑀤𑀻𑀯𑀭𑀢𑀭𑁄, ‘‘𑀇𑀫𑀫𑁂𑀯𑀲𑁆𑀲 𑀤𑀸𑀭𑀓𑀁 𑀉𑀧𑀫𑀁 𑀓𑀢𑁆𑀯𑀸 𑀯𑀸𑀤𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀭𑀸𑀚𑀓𑀼𑀫𑀸𑀭𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀫𑀼𑀔𑁂 𑀆𑀳𑀭𑁂𑀬𑁆𑀬𑀸𑀢𑀺 𑀫𑀼𑀔𑁂 𑀞𑀧𑁂𑀬𑁆𑀬. 𑀆𑀳𑀭𑁂𑀬𑁆𑀬𑀲𑁆𑀲𑀸𑀳𑀦𑁆𑀢𑀺 𑀅𑀧𑀦𑁂𑀬𑁆𑀬𑀁 𑀅𑀲𑁆𑀲 𑀅𑀳𑀁. 𑀆𑀤𑀺𑀓𑁂𑀦𑁂𑀯𑀸𑀢𑀺 𑀧𑀞𑀫𑀧𑀬𑁄𑀕𑁂𑀦𑁂𑀯. 𑀅𑀪𑀽𑀢𑀦𑁆𑀢𑀺 𑀅𑀪𑀽𑀢𑀢𑁆𑀣𑀁. 𑀅𑀢𑀘𑁆𑀙𑀦𑁆𑀢𑀺 𑀦 𑀢𑀘𑁆𑀙𑀁. 𑀅𑀦𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀦 𑀅𑀢𑁆𑀣𑀲𑀁𑀳𑀺𑀢𑀁 𑀦 𑀯𑀟𑁆𑀠𑀺𑀦𑀺𑀲𑁆𑀲𑀺𑀢𑀁. 𑀅𑀧𑁆𑀧𑀺𑀬𑀸 𑀅𑀫𑀦𑀸𑀧𑀸𑀢𑀺 𑀦𑁂𑀯 𑀧𑀺𑀬𑀸 𑀦 𑀫𑀦𑀸𑀧𑀸. 𑀇𑀫𑀺𑀦𑀸 𑀦𑀬𑁂𑀦𑁂𑀯 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀢𑀢𑁆𑀣 𑀅𑀧𑁆𑀧𑀺𑀬𑀧𑀓𑁆𑀔𑁂 𑀧𑀞𑀫𑀯𑀸𑀘𑀸 𑀅𑀘𑁄𑀭𑀁𑀬𑁂𑀯 𑀘𑁄𑀭𑁄𑀢𑀺, 𑀅𑀤𑀸𑀲𑀁𑀬𑁂𑀯 𑀤𑀸𑀲𑁄𑀢𑀺, 𑀅𑀤𑀼𑀧𑁆𑀧𑀬𑀼𑀢𑁆𑀢𑀁𑀬𑁂𑀯 𑀤𑀼𑀧𑁆𑀧𑀬𑀼𑀢𑁆𑀢𑁄𑀢𑀺 𑀧𑀯𑀢𑁆𑀢𑀸. 𑀦 𑀢𑀁 𑀢𑀣𑀸𑀕𑀢𑁄 𑀪𑀸𑀲𑀢𑀺. 𑀤𑀼𑀢𑀺𑀬𑀯𑀸𑀘𑀸 𑀘𑁄𑀭𑀁𑀬𑁂𑀯 𑀘𑁄𑀭𑁄 𑀅𑀬𑀦𑁆𑀢𑀺𑀆𑀤𑀺𑀯𑀲𑁂𑀦 𑀧𑀯𑀢𑁆𑀢𑀸. 𑀢𑀫𑁆𑀧𑀺 ¶ 𑀢𑀣𑀸𑀕𑀢𑁄 𑀦 𑀪𑀸𑀲𑀢𑀺. 𑀢𑀢𑀺𑀬𑀯𑀸𑀘𑀸 ‘‘𑀇𑀤𑀸𑀦𑀺 𑀅𑀓𑀢𑀧𑀼𑀜𑁆𑀜𑀢𑀸𑀬 𑀤𑀼𑀕𑁆𑀕𑀢𑁄 𑀤𑀼𑀩𑁆𑀩𑀡𑁆𑀡𑁄 𑀅𑀧𑁆𑀧𑁂𑀲𑀓𑁆𑀔𑁄 ¶ , 𑀇𑀥 𑀞𑀢𑁆𑀯𑀸𑀧𑀺 𑀧𑀼𑀦 𑀧𑀼𑀜𑁆𑀜𑀁 𑀦 𑀓𑀭𑁄𑀲𑀺, 𑀤𑀼𑀢𑀺𑀬𑀘𑀺𑀢𑁆𑀢𑀯𑀸𑀭𑁂 𑀓𑀣𑀁 𑀘𑀢𑀽𑀳𑀺 𑀅𑀧𑀸𑀬𑁂𑀳𑀺 𑀦 𑀫𑀼𑀘𑁆𑀘𑀺𑀲𑁆𑀲𑀲𑀻’’𑀢𑀺 𑀏𑀯𑀁 𑀫𑀳𑀸𑀚𑀦𑀲𑁆𑀲 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑁂𑀦 ¶ 𑀥𑀫𑁆𑀫𑀧𑀼𑀭𑁂𑀓𑁆𑀔𑀸𑀭𑁂𑀦 𑀅𑀦𑀼𑀲𑀸𑀲𑀦𑀻𑀧𑀼𑀭𑁂𑀓𑁆𑀔𑀸𑀭𑁂𑀦 𑀘 𑀯𑀢𑁆𑀢𑀩𑁆𑀩𑀯𑀸𑀘𑀸. 𑀢𑀢𑁆𑀭 𑀓𑀸𑀮𑀜𑁆𑀜𑀽 𑀢𑀣𑀸𑀕𑀢𑁄𑀢𑀺 𑀢𑀲𑁆𑀫𑀺𑀁 𑀢𑀢𑀺𑀬𑀩𑁆𑀬𑀸𑀓𑀭𑀡𑁂 𑀢𑀲𑁆𑀲𑀸 𑀯𑀸𑀘𑀸𑀬 𑀩𑁆𑀬𑀸𑀓𑀭𑀡𑀢𑁆𑀣𑀸𑀬 𑀢𑀣𑀸𑀕𑀢𑁄 𑀓𑀸𑀮𑀜𑁆𑀜𑀽 𑀳𑁄𑀢𑀺, 𑀫𑀳𑀸𑀚𑀦𑀲𑁆𑀲 𑀆𑀤𑀸𑀦𑀓𑀸𑀮𑀁 𑀕𑀳𑀡𑀓𑀸𑀮𑀁 𑀚𑀸𑀦𑀺𑀢𑁆𑀯𑀸𑀯 𑀩𑁆𑀬𑀸𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑀧𑀺𑀬𑀧𑀓𑁆𑀔𑁂 𑀧𑀞𑀫𑀯𑀸𑀘𑀸 𑀅𑀝𑁆𑀞𑀸𑀦𑀺𑀬𑀓𑀣𑀸 𑀦𑀸𑀫. 𑀲𑀸 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀏𑀯𑀁 𑀓𑀺𑀭 𑀕𑀸𑀫𑀯𑀸𑀲𑀺𑀫𑀳𑀮𑁆𑀮𑀓𑀁 𑀦𑀕𑀭𑀁 𑀆𑀕𑀦𑁆𑀢𑁆𑀯𑀸 𑀧𑀸𑀦𑀸𑀕𑀸𑀭𑁂 𑀧𑀺𑀯𑀦𑁆𑀢𑀁 𑀯𑀜𑁆𑀘𑁂𑀢𑀼𑀓𑀸𑀫𑀸 𑀲𑀫𑁆𑀩𑀳𑀼𑀮𑀸 𑀥𑀼𑀢𑁆𑀢𑀸 𑀧𑀻𑀢𑀝𑁆𑀞𑀸𑀦𑁂 𑀞𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀼𑀭𑀁 𑀧𑀺𑀯𑀦𑁆𑀢𑀸 ‘‘𑀇𑀫𑀲𑁆𑀲 𑀦𑀺𑀯𑀸𑀲𑀦𑀧𑀸𑀯𑀼𑀭𑀡𑀫𑁆𑀧𑀺 𑀳𑀢𑁆𑀣𑁂 𑀪𑀡𑁆𑀟𑀓𑀫𑁆𑀧𑀺 𑀲𑀩𑁆𑀩𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀢𑀺𑀓𑀁 𑀅𑀓𑀁𑀲𑀼 𑁋 ‘‘𑀏𑀓𑁂𑀓𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀓𑀣𑀁 𑀓𑀣𑁂𑀫, 𑀬𑁄 ‘𑀅𑀪𑀽𑀢’𑀦𑁆𑀢𑀺 𑀓𑀣𑁂𑀲𑀺, 𑀓𑀣𑀺𑀢𑀁 𑀯𑀸 𑀦 𑀲𑀤𑁆𑀤𑀳𑀢𑀺, 𑀢𑀁 𑀤𑀸𑀲𑀁 𑀓𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺. 𑀢𑀫𑁆𑀧𑀺 𑀫𑀳𑀮𑁆𑀮𑀓𑀁 𑀧𑀼𑀘𑁆𑀙𑀺𑀁𑀲𑀼 ‘‘𑀢𑀼𑀫𑁆𑀳𑀸𑀓𑀫𑁆𑀧𑀺 𑀢𑀸𑀢 𑀭𑀼𑀘𑁆𑀘𑀢𑀻’’𑀢𑀺. 𑀏𑀯𑀁 𑀳𑁄𑀢𑀼 𑀢𑀸𑀢𑀸𑀢𑀺.

𑀏𑀓𑁄 𑀥𑀼𑀢𑁆𑀢𑁄 𑀆𑀳 𑁋 𑀫𑀬𑁆𑀳𑀁, 𑀪𑁄 𑀫𑀸𑀢𑀼, 𑀫𑀬𑀺 𑀓𑀼𑀘𑁆𑀙𑀺𑀕𑀢𑁂 𑀓𑀧𑀺𑀝𑁆𑀞𑀨𑀮𑀤𑁄𑀳𑀮𑁄 𑀅𑀳𑁄𑀲𑀺. 𑀲𑀸 𑀅𑀜𑁆𑀜𑀁 𑀓𑀧𑀺𑀝𑁆𑀞𑀳𑀸𑀭𑀓𑀁 𑀅𑀮𑀩𑁆𑀪𑀫𑀸𑀦𑀸 𑀫𑀁𑀬𑁂𑀯 𑀧𑁂𑀲𑁂𑀲𑀺. 𑀅𑀳𑀁 𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀁 𑀅𑀪𑀺𑀭𑀼𑀳𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀸𑀦𑀁 𑀧𑀸𑀤𑁂 𑀕𑀳𑁂𑀢𑁆𑀯𑀸 𑀫𑀼𑀕𑁆𑀕𑀭𑀁 𑀯𑀺𑀬 𑀭𑀼𑀓𑁆𑀔𑀲𑁆𑀲 𑀉𑀧𑀭𑀺 𑀔𑀺𑀧𑀺𑀁; 𑀅𑀣 𑀲𑀸𑀔𑀢𑁄 𑀲𑀸𑀔𑀁 𑀯𑀺𑀘𑀭𑀦𑁆𑀢𑁄 𑀨𑀮𑀸𑀦𑀺 𑀕𑀳𑁂𑀢𑁆𑀯𑀸 𑀑𑀢𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀖𑀭𑀁 𑀕𑀦𑁆𑀢𑁆𑀯𑀸 𑀦𑀺𑀲𑁆𑀲𑁂𑀡𑀺𑀁 𑀆𑀳𑀭𑀺𑀢𑁆𑀯𑀸 𑀑𑀭𑀼𑀬𑁆𑀳 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀨𑀮𑀸𑀦𑀺 𑀫𑀸𑀢𑀼𑀬𑀸 𑀅𑀤𑀸𑀲𑀺𑀁; 𑀢𑀸𑀦𑀺 𑀧𑀦 𑀫𑀳𑀦𑁆𑀢𑀸𑀦𑀺 𑀳𑁄𑀦𑁆𑀢𑀺 𑀘𑀸𑀝𑀺𑀧𑁆𑀧𑀫𑀸𑀡𑀸𑀦𑀺. 𑀢𑀢𑁄 𑀫𑁂 𑀫𑀸𑀢𑀭𑀸 𑀏𑀓𑀸𑀲𑀦𑁂 𑀦𑀺𑀲𑀺𑀦𑁆𑀦𑀸𑀬 𑀲𑀫𑀲𑀝𑁆𑀞𑀺𑀨𑀮𑀸𑀦𑀺 ¶ 𑀔𑀸𑀤𑀺𑀢𑀸𑀦𑀺. 𑀫𑀬𑀸 𑀏𑀓𑀼𑀘𑁆𑀙𑀗𑁆𑀕𑁂𑀦 𑀆𑀦𑀻𑀢𑀨𑀮𑁂𑀲𑀼 𑀲𑁂𑀲𑀓𑀸𑀦𑀺 𑀓𑀼𑀮𑀲𑀦𑁆𑀢𑀓𑁂 𑀕𑀸𑀫𑁂 𑀔𑀼𑀤𑁆𑀤𑀓𑀫𑀳𑀮𑁆𑀮𑀓𑀸𑀦𑀁 𑀅𑀳𑁂𑀲𑀼𑀁. 𑀅𑀫𑁆𑀳𑀸𑀓𑀁 𑀖𑀭𑀁 𑀲𑁄𑀴𑀲𑀳𑀢𑁆𑀣𑀁, 𑀲𑁂𑀲𑀧𑀭𑀺𑀓𑁆𑀔𑀸𑀭𑀪𑀡𑁆𑀟𑀓𑀁 𑀅𑀧𑀦𑁂𑀢𑁆𑀯𑀸 𑀓𑀧𑀺𑀝𑁆𑀞𑀨𑀮𑁂𑀳𑁂𑀯 𑀬𑀸𑀯 𑀙𑀤𑀦𑀁 𑀧𑀽𑀭𑀺𑀢𑀁. 𑀢𑀢𑁄 𑀅𑀢𑀺𑀭𑁂𑀓𑀸𑀦𑀺 𑀕𑀳𑁂𑀢𑁆𑀯𑀸 𑀕𑁂𑀳𑀤𑁆𑀯𑀸𑀭𑁂 𑀭𑀸𑀲𑀺𑀁 𑀅𑀓𑀁𑀲𑀼. 𑀲𑁄 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑁄 𑀧𑀩𑁆𑀩𑀢𑁄 𑀯𑀺𑀬 𑀅𑀳𑁄𑀲𑀺. 𑀓𑀺𑀁 𑀈𑀤𑀺𑀲𑀁, 𑀪𑁄 𑀲𑀓𑁆𑀓𑀸, 𑀲𑀤𑁆𑀤𑀳𑀺𑀢𑀼𑀦𑁆𑀢𑀺?

𑀕𑀸𑀫𑀺𑀓𑀫𑀳𑀮𑁆𑀮𑀓𑁄 ¶ 𑀢𑀼𑀡𑁆𑀳𑀻 𑀦𑀺𑀲𑀻𑀤𑀺𑀢𑁆𑀯𑀸 𑀲𑀩𑁆𑀩𑁂𑀲𑀁 𑀓𑀣𑀸𑀧𑀭𑀺𑀬𑁄𑀲𑀸𑀦𑁂 𑀧𑀼𑀘𑁆𑀙𑀺𑀢𑁄 𑀆𑀳 𑁋 ‘‘𑀏𑀯𑀁 𑀪𑀯𑀺𑀲𑁆𑀲𑀢𑀺 𑀢𑀸𑀢𑀸, 𑀫𑀳𑀦𑁆𑀢𑀁 𑀭𑀝𑁆𑀞𑀁, 𑀭𑀝𑁆𑀞𑀫𑀳𑀦𑁆𑀢𑀢𑀸𑀬 𑀲𑀓𑁆𑀓𑀸 𑀲𑀤𑁆𑀤𑀳𑀺𑀢𑀼’’𑀦𑁆𑀢𑀺. 𑀬𑀣𑀸 𑀘 𑀢𑁂𑀦, 𑀏𑀯𑀁 𑀲𑁂𑀲𑁂𑀳𑀺𑀧𑀺 𑀢𑀣𑀸𑀭𑀽𑀧𑀸𑀲𑀼 𑀦𑀺𑀓𑁆𑀓𑀸𑀭𑀡𑀓𑀣𑀸𑀲𑀼 𑀓𑀣𑀺𑀢𑀸𑀲𑀼 𑀆𑀳 𑁋 𑀫𑀬𑁆𑀳𑀫𑁆𑀧𑀺 𑀢𑀸𑀢𑀸 𑀲𑀼𑀡𑀸𑀣, 𑀦 𑀢𑀼𑀫𑁆𑀳𑀸𑀓𑀁𑀬𑁂𑀯 𑀓𑀼𑀮𑀸𑀦𑀺, 𑀅𑀫𑁆𑀳𑀸𑀓𑀫𑁆𑀧𑀺 𑀓𑀼𑀮𑀁 𑀫𑀳𑀸𑀓𑀼𑀮𑀁, 𑀅𑀫𑁆𑀳𑀸𑀓𑀁 𑀧𑀦 𑀅𑀯𑀲𑁂𑀲𑀔𑁂𑀢𑁆𑀢𑁂𑀳𑀺 𑀓𑀧𑁆𑀧𑀸𑀲𑀔𑁂𑀢𑁆𑀢𑀁 𑀫𑀳𑀦𑁆𑀢𑀢𑀭𑀁 ¶ . 𑀢𑀲𑁆𑀲 𑀅𑀦𑁂𑀓𑀓𑀭𑀻𑀲𑀲𑀢𑀲𑁆𑀲 𑀓𑀧𑁆𑀧𑀸𑀲𑀔𑁂𑀢𑁆𑀢𑀲𑁆𑀲 𑀫𑀚𑁆𑀛𑁂 𑀏𑀓𑁄 𑀓𑀧𑁆𑀧𑀸𑀲𑀭𑀼𑀓𑁆𑀔𑁄 𑀫𑀳𑀸 𑀅𑀲𑀻𑀢𑀺𑀳𑀢𑁆𑀣𑀼𑀩𑁆𑀩𑁂𑀥𑁄 𑀅𑀳𑁄𑀲𑀺. 𑀢𑀲𑁆𑀲 𑀧𑀜𑁆𑀘 𑀲𑀸𑀔𑀸, 𑀢𑀸𑀲𑀼 𑀅𑀯𑀲𑁂𑀲𑀲𑀸𑀔𑀸 𑀨𑀮𑀁 𑀦 𑀕𑀡𑁆𑀳𑀺𑀁𑀲𑀼, 𑀧𑀸𑀘𑀻𑀦𑀲𑀸𑀔𑀸𑀬 𑀏𑀓𑀫𑁂𑀯 𑀫𑀳𑀸𑀘𑀸𑀝𑀺𑀫𑀢𑁆𑀢𑀁 𑀨𑀮𑀁 𑀅𑀳𑁄𑀲𑀺. 𑀢𑀲𑁆𑀲 𑀙 𑀅𑀁𑀲𑀺𑀬𑁄, 𑀙𑀲𑀼 𑀅𑀁𑀲𑀻𑀲𑀼 𑀙 𑀓𑀧𑁆𑀧𑀸𑀲𑀧𑀺𑀡𑁆𑀟𑀺𑀬𑁄 𑀧𑀼𑀧𑁆𑀨𑀺𑀢𑀸. 𑀅𑀳𑀁 𑀫𑀲𑁆𑀲𑀼𑀁 𑀓𑀸𑀭𑁂𑀢𑁆𑀯𑀸 𑀦𑁆𑀳𑀸𑀢𑀯𑀺𑀮𑀺𑀢𑁆𑀢𑁄 𑀔𑁂𑀢𑁆𑀢𑀁 𑀕𑀦𑁆𑀢𑁆𑀯𑀸 𑀢𑀸 𑀓𑀧𑁆𑀧𑀸𑀲𑀧𑀺𑀡𑁆𑀟𑀺𑀬𑁄 𑀧𑀼𑀧𑁆𑀨𑀺𑀢𑀸 𑀤𑀺𑀲𑁆𑀯𑀸 𑀞𑀺𑀢𑀓𑁄𑀯 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀕𑀡𑁆𑀳𑀺𑀁. 𑀢𑀸 𑀓𑀧𑁆𑀧𑀸𑀲𑀧𑀺𑀡𑁆𑀟𑀺𑀬𑁄 𑀣𑀸𑀫𑀲𑀫𑁆𑀧𑀦𑁆𑀦𑀸 𑀙 𑀤𑀸𑀲𑀸 𑀅𑀳𑁂𑀲𑀼𑀁. 𑀢𑁂 𑀲𑀩𑁆𑀩𑁂 𑀫𑀁 𑀏𑀓𑀓𑀁 𑀑𑀳𑀸𑀬 𑀧𑀮𑀸𑀢𑀸. 𑀏𑀢𑁆𑀢𑀓𑁂 𑀅𑀤𑁆𑀥𑀸𑀦𑁂 𑀢𑁂 𑀦 𑀧𑀲𑁆𑀲𑀸𑀫𑀺, 𑀅𑀚𑁆𑀚 𑀤𑀺𑀝𑁆𑀞𑀸, 𑀢𑀼𑀫𑁆𑀳𑁂 𑀢𑁂 𑀙 𑀚𑀦𑀸. 𑀢𑁆𑀯𑀁 𑀦𑀦𑁆𑀤𑁄 𑀦𑀸𑀫, 𑀢𑁆𑀯𑀁 𑀧𑀼𑀡𑁆𑀡𑁄 𑀦𑀸𑀫, 𑀢𑁆𑀯𑀁 𑀯𑀟𑁆𑀠𑀫𑀸𑀦𑁄 𑀦𑀸𑀫, 𑀢𑁆𑀯𑀁 𑀘𑀺𑀢𑁆𑀢𑁄 𑀦𑀸𑀫 𑀢𑁆𑀯𑀁 𑀫𑀗𑁆𑀕𑀮𑁄 𑀦𑀸𑀫, 𑀢𑁆𑀯𑀁 𑀧𑁄𑀝𑁆𑀞𑀺𑀬𑁄 𑀦𑀸𑀫𑀸𑀢𑀺 𑀯𑀢𑁆𑀯𑀸 𑀉𑀝𑁆𑀞𑀸𑀬 𑀦𑀺𑀲𑀺𑀦𑁆𑀦𑀓𑁂𑀬𑁂𑀯 𑀘𑀽𑀴𑀸𑀲𑀼 𑀕𑀳𑁂𑀢𑁆𑀯𑀸 ¶ 𑀅𑀝𑁆𑀞𑀸𑀲𑀺. 𑀢𑁂 ‘‘𑀦 𑀫𑀬𑀁 𑀤𑀸𑀲𑀸’’𑀢𑀺𑀧𑀺 𑀯𑀢𑁆𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀅𑀣 𑀦𑁂 𑀓𑀟𑁆𑀠𑀦𑁆𑀢𑁄 𑀯𑀺𑀦𑀺𑀘𑁆𑀙𑀬𑀁 𑀦𑁂𑀢𑁆𑀯𑀸 𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀬𑀸𑀯𑀚𑀻𑀯𑀁 𑀤𑀸𑀲𑁂 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺. 𑀏𑀯𑀭𑀽𑀧𑀺𑀁 𑀓𑀣𑀁 𑀢𑀣𑀸𑀕𑀢𑁄 𑀦 𑀪𑀸𑀲𑀢𑀺.

𑀤𑀼𑀢𑀺𑀬𑀯𑀸𑀘𑀸 𑀆𑀫𑀺𑀲𑀳𑁂𑀢𑀼𑀘𑀸𑀝𑀼𑀓𑀫𑁆𑀬𑀢𑀸𑀤𑀺𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀸 𑀧𑀭𑁂𑀲𑀁 𑀣𑁄𑀫𑀦𑀯𑀸𑀘𑀸 𑀘𑁂𑀯, 𑀘𑁄𑀭𑀓𑀣𑀁 𑀭𑀸𑀚𑀓𑀣𑀦𑁆𑀢𑀺 𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀢𑀺𑀭𑀘𑁆𑀙𑀸𑀦𑀓𑀣𑀸 𑀘. 𑀢𑀫𑁆𑀧𑀺 𑀢𑀣𑀸𑀕𑀢𑁄 𑀦 𑀪𑀸𑀲𑀢𑀺. 𑀢𑀢𑀺𑀬𑀯𑀸𑀘𑀸 𑀅𑀭𑀺𑀬𑀲𑀘𑁆𑀘𑀲𑀦𑁆𑀦𑀺𑀲𑁆𑀲𑀺𑀢𑀓𑀣𑀸, 𑀬𑀁 𑀯𑀲𑁆𑀲𑀲𑀢𑀫𑁆𑀧𑀺 𑀲𑀼𑀡𑀦𑁆𑀢𑀸 𑀧𑀡𑁆𑀟𑀺𑀢𑀸 𑀦𑁂𑀯 𑀢𑀺𑀢𑁆𑀢𑀺𑀁 𑀕𑀘𑁆𑀙𑀦𑁆𑀢𑀺. 𑀇𑀢𑀺 𑀢𑀣𑀸𑀕𑀢𑁄 𑀦𑁂𑀯 𑀲𑀩𑁆𑀩𑀫𑁆𑀧𑀺 𑀅𑀧𑁆𑀧𑀺𑀬𑀯𑀸𑀘𑀁 𑀪𑀸𑀲𑀢𑀺 𑀦 𑀧𑀺𑀬𑀯𑀸𑀘𑀁. 𑀢𑀢𑀺𑀬𑀁 𑀢𑀢𑀺𑀬𑀫𑁂𑀯 𑀧𑀦 𑀪𑀸𑀲𑀺𑀢𑀩𑁆𑀩𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀪𑀸𑀲𑀢𑀺. 𑀢𑀢𑁆𑀣 𑀢𑀢𑀺𑀬𑀁 𑀅𑀧𑁆𑀧𑀺𑀬𑀯𑀸𑀘𑀁 𑀲𑀦𑁆𑀥𑀸𑀬 𑀳𑁂𑀝𑁆𑀞𑀸 𑀤𑀳𑀭𑀓𑀼𑀫𑀸𑀭𑀉𑀧𑀫𑀸 𑀆𑀕𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁮𑁭. 𑀉𑀤𑀸𑀳𑀼 𑀞𑀸𑀦𑀲𑁄𑀯𑁂𑀢𑀦𑁆𑀢𑀺 𑀉𑀤𑀸𑀳𑀼 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀜𑀸𑀡𑁂𑀦 𑀢𑀗𑁆𑀔𑀡𑀁𑀬𑁂𑀯 𑀢𑀁 𑀢𑀣𑀸𑀕𑀢𑀲𑁆𑀲 𑀉𑀧𑀝𑁆𑀞𑀸𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀲𑀜𑁆𑀜𑀸𑀢𑁄𑀢𑀺 𑀜𑀸𑀢𑁄 𑀧𑀜𑁆𑀜𑀸𑀢𑁄 𑀧𑀸𑀓𑀝𑁄. 𑀥𑀫𑁆𑀫𑀥𑀸𑀢𑀽𑀢𑀺 𑀥𑀫𑁆𑀫𑀲𑀪𑀸𑀯𑁄. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 ¶ . 𑀢𑀁 𑀪𑀕𑀯𑀢𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀁, 𑀳𑀢𑁆𑀣𑀕𑀢𑀁 𑀪𑀕𑀯𑀢𑁄. 𑀢𑀲𑁆𑀫𑀸 𑀲𑁄 𑀬𑀁 𑀬𑀁 𑀇𑀘𑁆𑀙𑀢𑀺, 𑀢𑀁 𑀢𑀁 𑀲𑀩𑁆𑀩𑀁 𑀞𑀸𑀦𑀲𑁄𑀯 𑀧𑀝𑀺𑀪𑀸𑀢𑀻𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀅𑀬𑀁 𑀧𑀦 𑀥𑀫𑁆𑀫𑀤𑁂𑀲𑀦𑀸 𑀦𑁂𑀬𑁆𑀬𑀧𑀼𑀕𑁆𑀕𑀮𑀯𑀲𑁂𑀦 𑀧𑀭𑀺𑀦𑀺𑀝𑁆𑀞𑀺𑀢𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀅𑀪𑀬𑀭𑀸𑀚𑀓𑀼𑀫𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀩𑀳𑀼𑀯𑁂𑀤𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁮. 𑀏𑀯𑀁 ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀩𑀳𑀼𑀯𑁂𑀤𑀦𑀻𑀬𑀲𑀼𑀢𑁆𑀢𑀁. 𑀢𑀢𑁆𑀣 𑀧𑀜𑁆𑀘𑀓𑀗𑁆𑀕𑁄 𑀣𑀧𑀢𑀻𑀢𑀺 𑀧𑀜𑁆𑀘𑀓𑀗𑁆𑀕𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀯𑀸𑀲𑀺𑀨𑀭𑀲𑀼𑀦𑀺𑀔𑀸𑀤𑀦𑀤𑀡𑁆𑀟𑀫𑀼𑀕𑁆𑀕𑀭𑀓𑀸𑀴𑀲𑀼𑀢𑁆𑀢𑀦𑀸𑀴𑀺𑀲𑀗𑁆𑀔𑀸𑀢𑁂𑀳𑀺 𑀯𑀸 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑁄 𑀧𑀜𑁆𑀘𑀗𑁆𑀕𑁄𑀢𑀺 𑀧𑀜𑁆𑀜𑀸𑀢𑁄. 𑀣𑀧𑀢𑀻𑀢𑀺 𑀯𑀟𑁆𑀠𑀓𑀻𑀚𑁂𑀝𑁆𑀞𑀓𑁄. 𑀉𑀤𑀸𑀬𑀻𑀢𑀺 𑀧𑀡𑁆𑀟𑀺𑀢𑀉𑀤𑀸𑀬𑀺𑀢𑁆𑀣𑁂𑀭𑁄.

𑁮𑁯. 𑀧𑀭𑀺𑀬𑀸𑀬𑀦𑁆𑀢𑀺 𑀓𑀸𑀭𑀡𑀁. 𑀤𑁆𑀯𑁂𑀧𑀸𑀦𑀦𑁆𑀤𑀸𑀢𑀺 𑀤𑁆𑀯𑁂𑀧𑀺, 𑀆𑀦𑀦𑁆𑀤. 𑀧𑀭𑀺𑀬𑀸𑀬𑁂𑀦𑀸𑀢𑀺 𑀓𑀸𑀭𑀡𑁂𑀦. 𑀏𑀢𑁆𑀣 𑀘 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀲𑁂𑀦 𑀤𑁆𑀯𑁂 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀔𑀸𑀤𑀺𑀯𑀲𑁂𑀦 𑀢𑀺𑀲𑁆𑀲𑁄, 𑀇𑀦𑁆𑀤𑁆𑀭𑀺𑀬𑀯𑀲𑁂𑀦 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀺𑀓𑀸 𑀧𑀜𑁆𑀘, 𑀤𑁆𑀯𑀸𑀭𑀯𑀲𑁂𑀦 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀤𑀺𑀓𑀸 𑀙, 𑀉𑀧𑀯𑀺𑀘𑀸𑀭𑀯𑀲𑁂𑀦 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀁 𑀭𑀽𑀧𑀁 𑀉𑀧𑀯𑀺𑀘𑀭𑀢𑀻’’𑀢𑀺𑀆𑀤𑀺𑀓𑀸 𑀅𑀝𑁆𑀞𑀸𑀭𑀲, 𑀙 𑀕𑁂𑀳𑀲𑁆𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺, 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺, 𑀙 𑀕𑁂𑀳𑀲𑁆𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺, 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺, 𑀙 𑀕𑁂𑀳𑀲𑁆𑀲𑀺𑀢𑀸 𑀉𑀧𑁂𑀓𑁆𑀔𑀸, 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀢𑀺 𑀏𑀯𑀁 𑀙𑀢𑁆𑀢𑀺𑀁𑀲, 𑀢𑀸 𑀅𑀢𑀻𑀢𑁂 𑀙𑀢𑁆𑀢𑀺𑀁𑀲, 𑀅𑀦𑀸𑀕𑀢𑁂 𑀙𑀢𑁆𑀢𑀺𑀁𑀲, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀙𑀢𑁆𑀢𑀺𑀁𑀲𑀸𑀢𑀺 𑀏𑀯𑀁 𑀅𑀝𑁆𑀞𑀯𑁂𑀤𑀦𑀸𑀲𑀢𑀁 𑀯𑁂𑀤𑀺𑀢𑀩𑁆𑀩𑀁.

𑁯𑁦. 𑀧𑀜𑁆𑀘 𑀔𑁄 𑀇𑀫𑁂, 𑀆𑀦𑀦𑁆𑀤, 𑀓𑀸𑀫𑀕𑀼𑀡𑀸𑀢𑀺 𑀅𑀬𑀁 𑀧𑀸𑀝𑀺𑀏𑀓𑁆𑀓𑁄 𑀅𑀦𑀼𑀲𑀦𑁆𑀥𑀺. 𑀦 𑀓𑁂𑀯𑀮𑀫𑁆𑀧𑀺 𑀤𑁆𑀯𑁂 𑀆𑀤𑀺𑀁 𑀓𑀢𑁆𑀯𑀸 𑀯𑁂𑀤𑀦𑀸 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀸, 𑀧𑀭𑀺𑀬𑀸𑀬𑁂𑀦 𑀏𑀓𑀸𑀧𑀺 𑀯𑁂𑀤𑀦𑀸 𑀓𑀣𑀺𑀢𑀸. 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀧𑀜𑁆𑀘𑀓𑀗𑁆𑀕𑀲𑁆𑀲 ¶ 𑀣𑀧𑀢𑀺𑀦𑁄 𑀯𑀸𑀤𑀁 𑀉𑀧𑀢𑁆𑀣𑀫𑁆𑀪𑁂𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺.

𑀅𑀪𑀺𑀓𑁆𑀓𑀦𑁆𑀢𑀢𑀭𑀦𑁆𑀢𑀺 𑀲𑀼𑀦𑁆𑀤𑀭𑀢𑀭𑀁. 𑀧𑀡𑀻𑀢𑀢𑀭𑀦𑁆𑀢𑀺 𑀅𑀢𑀧𑁆𑀧𑀓𑀢𑀭𑀁. 𑀏𑀢𑁆𑀣 𑀘 𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀧𑀝𑁆𑀞𑀸𑀬 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸, 𑀲𑀸𑀧𑀺 𑀲𑀦𑁆𑀢𑀝𑁆𑀞𑁂𑀦 𑀧𑀡𑀻𑀢𑀝𑁆𑀞𑁂𑀦 𑀘 𑀲𑀼𑀔𑀦𑁆𑀢𑀺 𑀯𑀼𑀢𑁆𑀢𑀸. 𑀙 𑀕𑁂𑀳𑀲𑁆𑀲𑀺𑀢𑀸𑀦𑀺 𑀲𑀼𑀔𑀦𑁆𑀢𑀺 𑀯𑀼𑀢𑁆𑀢𑀸𑀦𑀺. 𑀦𑀺𑀭𑁄𑀥𑁄 𑀅𑀯𑁂𑀤𑀬𑀺𑀢𑀲𑀼𑀔𑀯𑀲𑁂𑀦 ¶ 𑀲𑀼𑀔𑀁 𑀦𑀸𑀫 𑀚𑀸𑀢𑁄. 𑀧𑀜𑁆𑀘𑀓𑀸𑀫𑀕𑀼𑀡𑀯𑀲𑁂𑀦 𑀳𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀘 𑀉𑀧𑁆𑀧𑀦𑁆𑀦𑀁 𑀯𑁂𑀤𑀬𑀺𑀢𑀲𑀼𑀔𑀁 𑀦𑀸𑀫. 𑀦𑀺𑀭𑁄𑀥𑁄 𑀅𑀯𑁂𑀤𑀬𑀺𑀢𑀲𑀼𑀔𑀁 𑀦𑀸𑀫. 𑀇𑀢𑀺 𑀯𑁂𑀤𑀬𑀺𑀢𑀲𑀼𑀔𑀁 𑀯𑀸 𑀳𑁄𑀢𑀼 𑀅𑀯𑁂𑀤𑀬𑀺𑀢𑀲𑀼𑀔𑀁 𑀯𑀸, 𑀢𑀁 𑀦𑀺𑀤𑁆𑀤𑀼𑀓𑁆𑀔𑀪𑀸𑀯𑀲𑀗𑁆𑀔𑀸𑀢𑁂𑀦 𑀲𑀼𑀔𑀝𑁆𑀞𑁂𑀦 𑀏𑀓𑀦𑁆𑀢𑀲𑀼𑀔𑀫𑁂𑀯 𑀚𑀸𑀢𑀁.

𑁯𑁧. 𑀬𑀢𑁆𑀣 ¶ 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀞𑀸𑀦𑁂. 𑀲𑀼𑀔𑀁 𑀉𑀧𑀮𑀩𑁆𑀪𑀢𑀻𑀢𑀺 𑀯𑁂𑀤𑀬𑀺𑀢𑀲𑀼𑀔𑀁 𑀯𑀸 𑀅𑀯𑁂𑀤𑀬𑀺𑀢𑀲𑀼𑀔𑀁 𑀯𑀸 𑀉𑀧𑀮𑀩𑁆𑀪𑀢𑀺. 𑀢𑀁 𑀢𑀁 𑀢𑀣𑀸𑀕𑀢𑁄 𑀲𑀼𑀔𑀲𑁆𑀫𑀺𑀁 𑀧𑀜𑁆𑀜𑀧𑁂𑀢𑀻𑀢𑀺 𑀢𑀁 𑀲𑀩𑁆𑀩𑀁 𑀢𑀣𑀸𑀕𑀢𑁄 𑀦𑀺𑀤𑁆𑀤𑀼𑀓𑁆𑀔𑀪𑀸𑀯𑀁 𑀲𑀼𑀔𑀲𑁆𑀫𑀺𑀁𑀬𑁂𑀯 𑀧𑀜𑁆𑀜𑀧𑁂𑀢𑀻𑀢𑀺. 𑀇𑀥 𑀪𑀕𑀯𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀻𑀲𑀁 𑀓𑀢𑁆𑀯𑀸 𑀦𑁂𑀬𑁆𑀬𑀧𑀼𑀕𑁆𑀕𑀮𑀯𑀲𑁂𑀦 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀩𑀳𑀼𑀯𑁂𑀤𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀅𑀧𑀡𑁆𑀡𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁨. 𑀏𑀯𑀁 ¶ 𑀫𑁂 𑀲𑀼𑀢𑀦𑁆𑀢𑀺 𑀅𑀧𑀡𑁆𑀡𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀘𑀸𑀭𑀺𑀓𑀦𑁆𑀢𑀺 𑀅𑀢𑀼𑀭𑀺𑀢𑀘𑀸𑀭𑀺𑀓𑀁.

𑁯𑁩. 𑀅𑀢𑁆𑀣𑀺 𑀧𑀦 𑀯𑁄 𑀕𑀳𑀧𑀢𑀬𑁄𑀢𑀺 𑀓𑀲𑁆𑀫𑀸 𑀆𑀳? 𑀲𑁄 𑀓𑀺𑀭 𑀕𑀸𑀫𑁄 𑀅𑀝𑀯𑀺𑀤𑁆𑀯𑀸𑀭𑁂 𑀦𑀺𑀯𑀺𑀝𑁆𑀞𑁄. 𑀦𑀸𑀦𑀸𑀯𑀺𑀥𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀤𑀺𑀯𑀲𑀁 𑀫𑀕𑁆𑀕𑀁 ¶ 𑀕𑀦𑁆𑀢𑁆𑀯𑀸 𑀲𑀸𑀬𑀁 𑀢𑀁 𑀕𑀸𑀫𑀁 𑀯𑀸𑀲𑀢𑁆𑀣𑀸𑀬 𑀉𑀧𑁂𑀦𑁆𑀢𑀺, 𑀢𑁂𑀲𑀁 𑀢𑁂 𑀫𑀦𑀼𑀲𑁆𑀲𑀸 𑀫𑀜𑁆𑀘𑀧𑀻𑀞𑀸𑀦𑀺 𑀧𑀢𑁆𑀣𑀭𑀺𑀢𑁆𑀯𑀸 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀧𑀸𑀤𑁂 𑀫𑀓𑁆𑀔𑁂𑀢𑁆𑀯𑀸 𑀓𑀧𑁆𑀧𑀺𑀬𑀧𑀸𑀦𑀓𑀸𑀦𑀺 𑀤𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀸𑀦𑀁 𑀤𑁂𑀦𑁆𑀢𑀺. 𑀢𑁂 𑀧𑀲𑀦𑁆𑀦𑀘𑀺𑀢𑁆𑀢𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑀦𑁆𑀢𑀬𑀫𑀸𑀦𑀸 𑀏𑀯𑀁 𑀯𑀤𑀦𑁆𑀢𑀺 ‘‘𑀅𑀢𑁆𑀣𑀺 𑀧𑀦 𑀯𑁄 𑀕𑀳𑀧𑀢𑀬𑁄 𑀓𑀺𑀜𑁆𑀘𑀺 𑀤𑀲𑁆𑀲𑀦𑀁 𑀕𑀳𑀺𑀢’’𑀦𑁆𑀢𑀺? 𑀦𑀢𑁆𑀣𑀺, 𑀪𑀦𑁆𑀢𑁂𑀢𑀺. ‘‘𑀕𑀳𑀧𑀢𑀬𑁄 𑀯𑀺𑀦𑀸 𑀤𑀲𑁆𑀲𑀦𑁂𑀦 𑀮𑁄𑀓𑁄 𑀦 𑀦𑀺𑀬𑁆𑀬𑀸𑀢𑀺, 𑀏𑀓𑀁 𑀤𑀲𑁆𑀲𑀦𑀁 𑀭𑀼𑀘𑁆𑀘𑀺𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺, ‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺 𑀤𑀲𑁆𑀲𑀦𑀁 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀦𑁆𑀢𑀸. 𑀅𑀧𑀭𑀤𑀺𑀯𑀲𑁂 𑀅𑀜𑁆𑀜𑁂 𑀆𑀕𑀢𑀸. 𑀢𑁂𑀧𑀺 𑀢𑀣𑁂𑀯 𑀧𑀼𑀘𑁆𑀙𑀺𑀁𑀲𑀼. 𑀢𑁂 𑀢𑁂𑀲𑀁 ‘‘𑀆𑀫, 𑀪𑀦𑁆𑀢𑁂, 𑀧𑀼𑀭𑀺𑀫𑁂𑀲𑀼 𑀤𑀺𑀯𑀲𑁂𑀲𑀼 𑀢𑀼𑀫𑁆𑀳𑀸𑀤𑀺𑀲𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀆𑀕𑀦𑁆𑀢𑁆𑀯𑀸 ‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺 𑀅𑀫𑁆𑀳𑁂 𑀇𑀤𑀁 𑀤𑀲𑁆𑀲𑀦𑀁 𑀕𑀸𑀳𑀸𑀧𑁂𑀢𑁆𑀯𑀸 𑀕𑀢𑀸’’𑀢𑀺 𑀆𑀭𑁄𑀘𑁂𑀲𑀼𑀁. ‘‘𑀢𑁂 𑀩𑀸𑀮𑀸 𑀓𑀺𑀁 𑀚𑀸𑀦𑀦𑁆𑀢𑀺? ‘𑀉𑀘𑁆𑀙𑀺𑀚𑁆𑀚𑀢𑀺 𑀅𑀬𑀁 𑀮𑁄𑀓𑁄’𑀢𑀺 𑀉𑀘𑁆𑀙𑁂𑀤𑀤𑀲𑁆𑀲𑀦𑀁 𑀕𑀡𑁆𑀳𑀣𑀸’’𑀢𑀺 𑀏𑀯𑀁 𑀢𑁂𑀧𑀺 𑀉𑀘𑁆𑀙𑁂𑀤𑀤𑀲𑁆𑀲𑀦𑀁 𑀕𑀡𑁆𑀳𑀸𑀧𑁂𑀢𑁆𑀯𑀸 𑀧𑀓𑁆𑀓𑀦𑁆𑀢𑀸. 𑀏𑀢𑁂𑀦𑀼𑀧𑀸𑀬𑁂𑀦 𑀅𑀜𑁆𑀜𑁂 𑀏𑀓𑀘𑁆𑀘𑀲𑀲𑁆𑀲𑀢𑀁, 𑀅𑀜𑁆𑀜𑁂 𑀅𑀦𑁆𑀢𑀸𑀦𑀦𑁆𑀢𑀁 ¶ , 𑀅𑀜𑁆𑀜𑁂 𑀅𑀫𑀭𑀸𑀯𑀺𑀓𑁆𑀔𑁂𑀧𑀦𑁆𑀢𑀺 𑀏𑀯𑀁 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀉𑀕𑁆𑀕𑀡𑁆𑀳𑀸𑀧𑁂𑀲𑀼𑀁. 𑀢𑁂 𑀧𑀦 𑀏𑀓𑀤𑀺𑀝𑁆𑀞𑀺𑀬𑀫𑁆𑀧𑀺 𑀧𑀢𑀺𑀝𑁆𑀞𑀸𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀲𑀩𑁆𑀩𑀧𑀘𑁆𑀙𑀸 𑀪𑀕𑀯𑀸 𑀅𑀕𑀫𑀸𑀲𑀺. 𑀲𑁄 𑀢𑁂𑀲𑀁 𑀳𑀺𑀢𑀢𑁆𑀣𑀸𑀬 𑀧𑀼𑀘𑁆𑀙𑀦𑁆𑀢𑁄 ‘‘𑀅𑀢𑁆𑀣𑀺 𑀧𑀦 𑀯𑁄 𑀕𑀳𑀧𑀢𑀬𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀓𑀸𑀭𑀯𑀢𑀻𑀢𑀺 𑀓𑀸𑀭𑀡𑀯𑀢𑀻 𑀲𑀳𑁂𑀢𑀼𑀓𑀸. 𑀅𑀧𑀡𑁆𑀡𑀓𑁄𑀢𑀺 𑀅𑀯𑀺𑀭𑀤𑁆𑀥𑁄 𑀅𑀤𑁆𑀯𑁂𑀚𑁆𑀛𑀕𑀸𑀫𑀻 𑀏𑀓𑀁𑀲𑀕𑀸𑀳𑀺𑀓𑁄.

𑁯𑁪. 𑀦𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺𑀆𑀤𑀺 𑀤𑀲𑀯𑀢𑁆𑀣𑀼𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀳𑁂𑀝𑁆𑀞𑀸 𑀲𑀸𑀮𑁂𑀬𑁆𑀬𑀓𑀲𑀼𑀢𑁆𑀢𑁂 𑀯𑀺𑀢𑁆𑀣𑀸𑀭𑀺𑀢𑀸. 𑀢𑀣𑀸 𑀢𑀩𑁆𑀩𑀺𑀧𑀘𑁆𑀘𑀦𑀻𑀓𑀪𑀽𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺.

𑁯𑁫. 𑀦𑁂𑀓𑁆𑀔𑀫𑁆𑀫𑁂 𑀆𑀦𑀺𑀲𑀁𑀲𑀦𑁆𑀢𑀺 𑀬𑁄 𑀦𑁂𑀲𑀁 𑀅𑀓𑀼𑀲𑀮𑀢𑁄 𑀦𑀺𑀓𑁆𑀔𑀦𑁆𑀢𑀪𑀸𑀯𑁂 𑀆𑀦𑀺𑀲𑀁𑀲𑁄, 𑀬𑁄 𑀘 𑀯𑁄𑀤𑀸𑀦𑀧𑀓𑁆𑀔𑁄 𑀯𑀺𑀲𑀼𑀤𑁆𑀥𑀺𑀧𑀓𑁆𑀔𑁄, 𑀢𑀁 𑀦 𑀧𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀲𑀤𑁆𑀥𑀫𑁆𑀫𑀲𑀜𑁆𑀜𑀢𑁆𑀢𑀻𑀢𑀺 ¶ 𑀅𑀪𑀽𑀢𑀥𑀫𑁆𑀫𑀲𑀜𑁆𑀜𑀸𑀧𑀦𑀸 ¶ . 𑀅𑀢𑁆𑀢𑀸𑀦𑀼𑀓𑁆𑀓𑀁𑀲𑁂𑀢𑀻𑀢𑀺 𑀞𑀧𑁂𑀢𑁆𑀯𑀸 𑀫𑀁 𑀓𑁄 𑀅𑀜𑁆𑀜𑁄 𑀅𑀢𑁆𑀢𑀦𑁄 𑀤𑀲𑁆𑀲𑀦𑀁 𑀧𑀭𑁂 𑀕𑀡𑁆𑀳𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀅𑀢𑁆𑀢𑀸𑀦𑀁 𑀉𑀓𑁆𑀔𑀺𑀧𑀢𑀺. 𑀧𑀭𑀁 𑀯𑀫𑁆𑀪𑁂𑀢𑀻𑀢𑀺 𑀏𑀢𑁆𑀢𑀓𑁂𑀲𑀼 𑀚𑀦𑁂𑀲𑀼 𑀏𑀓𑁄𑀧𑀺 𑀅𑀢𑁆𑀢𑀦𑁄 𑀤𑀲𑁆𑀲𑀦𑀁 𑀧𑀭𑁂 𑀕𑀡𑁆𑀳𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀏𑀯𑀁 𑀧𑀭𑀁 𑀳𑁂𑀝𑁆𑀞𑀸 𑀔𑀺𑀧𑀢𑀺. 𑀧𑀼𑀩𑁆𑀩𑁂𑀯 𑀔𑁄 𑀧𑀦𑀸𑀢𑀺 𑀧𑀼𑀩𑁆𑀩𑁂 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀕𑀡𑁆𑀳𑀦𑁆𑀢𑀲𑁆𑀲𑁂𑀯 𑀲𑀼𑀲𑀻𑀮𑁆𑀬𑀁 𑀧𑀳𑀻𑀦𑀁 𑀳𑁄𑀢𑀺, 𑀤𑀼𑀲𑁆𑀲𑀻𑀮𑀪𑀸𑀯𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄. 𑀏𑀯𑀫𑀲𑁆𑀲𑀺𑀫𑁂𑀢𑀺 𑀏𑀯𑀁 𑀅𑀲𑁆𑀲 𑀇𑀫𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀬𑁄 𑀲𑀢𑁆𑀢. 𑀅𑀧𑀭𑀸𑀧𑀭𑀁 𑀉𑀧𑁆𑀧𑀚𑁆𑀚𑀦𑀯𑀲𑁂𑀦 𑀧𑀦 𑀢𑁂𑀬𑁂𑀯 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀦𑀸𑀫.

𑀢𑀢𑁆𑀭𑀸𑀢𑀺 𑀢𑀸𑀲𑀼 𑀢𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀮𑀤𑁆𑀥𑀻𑀲𑀼. 𑀓𑀮𑀺𑀕𑁆𑀕𑀳𑁄𑀢𑀺 𑀧𑀭𑀸𑀚𑀬𑀕𑁆𑀕𑀸𑀳𑁄. 𑀤𑀼𑀲𑁆𑀲𑀫𑀢𑁆𑀢𑁄 𑀲𑀫𑀸𑀤𑀺𑀦𑁆𑀦𑁄𑀢𑀺 𑀤𑀼𑀕𑁆𑀕𑀳𑀺𑀢𑁄 𑀤𑀼𑀧𑁆𑀧𑀭𑀸𑀫𑀝𑁆𑀞𑁄. 𑀏𑀓𑀁𑀲𑀁 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀏𑀓𑀦𑁆𑀢𑀁 𑀏𑀓𑀓𑁄𑀝𑁆𑀞𑀸𑀲𑀁 𑀲𑀓𑀯𑀸𑀤𑀫𑁂𑀯 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, ‘‘𑀲𑀘𑁂 𑀔𑁄 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄’’𑀢𑀺 𑀏𑀯𑀁 𑀲𑀦𑁆𑀢𑁂𑀬𑁂𑀯 𑀲𑁄𑀢𑁆𑀣𑀺𑀪𑀸𑀯𑀸𑀯𑀳𑁄 𑀳𑁄𑀢𑀺. 𑀭𑀺𑀜𑁆𑀘𑀢𑀻𑀢𑀺 𑀯𑀚𑁆𑀚𑁂𑀢𑀺.

𑁯𑁬. 𑀲𑀤𑁆𑀥𑀫𑁆𑀫𑀲𑀜𑁆𑀜𑀢𑁆𑀢𑀻𑀢𑀺 𑀪𑀽𑀢𑀥𑀫𑁆𑀫𑀲𑀜𑁆𑀜𑀸𑀧𑀦𑀸.

𑀓𑀝𑀕𑁆𑀕𑀳𑁄𑀢𑀺 𑀚𑀬𑀕𑁆𑀕𑀸𑀳𑁄. 𑀲𑀼𑀲𑀫𑀢𑁆𑀢𑁄 𑀲𑀫𑀸𑀤𑀺𑀦𑁆𑀦𑁄𑀢𑀺 𑀲𑀼𑀕𑁆𑀕𑀳𑀺𑀢𑁄 𑀲𑀼𑀧𑀭𑀸𑀫𑀝𑁆𑀞𑁄. 𑀉𑀪𑀬𑀁𑀲𑀁 ¶ 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀉𑀪𑀬𑀦𑁆𑀢𑀁 𑀉𑀪𑀬𑀓𑁄𑀝𑁆𑀞𑀸𑀲𑀁 𑀲𑀓𑀯𑀸𑀤𑀁 𑀧𑀭𑀯𑀸𑀤𑀜𑁆𑀘 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀢𑀺𑀝𑁆𑀞𑀢𑀺 ‘‘𑀲𑀘𑁂 𑀔𑁄 𑀅𑀢𑁆𑀣𑀺 𑀧𑀭𑁄 𑀮𑁄𑀓𑁄’’𑀢𑀺 𑀏𑀯𑀁 𑀲𑀦𑁆𑀢𑁂𑀧𑀺 ‘‘𑀲𑀘𑁂 𑀔𑁄 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄’’𑀢𑀺 𑀏𑀯𑀁 𑀲𑀦𑁆𑀢𑁂𑀧𑀺 𑀲𑁄𑀢𑁆𑀣𑀺𑀪𑀸𑀯𑀸𑀯𑀳𑁄 𑀳𑁄𑀢𑀺. 𑀧𑀭𑀢𑁄𑀧𑀺 𑀏𑀓𑀁𑀲𑀉𑀪𑀬𑀁𑀲𑁂𑀲𑀼 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁯𑁭. 𑀓𑀭𑁄𑀢𑁄𑀢𑀺 ¶ 𑀲𑀳𑀢𑁆𑀣𑀸 𑀓𑀭𑁄𑀦𑁆𑀢𑀲𑁆𑀲. 𑀓𑀸𑀭𑀬𑀢𑁄𑀢𑀺 𑀆𑀡𑀢𑁆𑀢𑀺𑀬𑀸 𑀓𑀸𑀭𑁂𑀦𑁆𑀢𑀲𑁆𑀲. 𑀙𑀺𑀦𑁆𑀤𑀢𑁄𑀢𑀺 𑀧𑀭𑁂𑀲𑀁 𑀳𑀢𑁆𑀣𑀸𑀤𑀻𑀦𑀺 𑀙𑀺𑀦𑁆𑀤𑀦𑁆𑀢𑀲𑁆𑀲. 𑀧𑀘𑀢𑁄𑀢𑀺 𑀤𑀡𑁆𑀟𑁂𑀦 𑀧𑀻𑀴𑁂𑀦𑁆𑀢𑀲𑁆𑀲 𑀯𑀸 𑀢𑀚𑁆𑀚𑁂𑀦𑁆𑀢𑀲𑁆𑀲 𑀯𑀸. 𑀲𑁄𑀘𑀬𑀢𑁄𑀢𑀺 𑀧𑀭𑀲𑁆𑀲 𑀪𑀡𑁆𑀟𑀳𑀭𑀡𑀸𑀤𑀻𑀳𑀺 𑀲𑁄𑀓𑀁 𑀲𑀬𑀁 𑀓𑀭𑁄𑀦𑁆𑀢𑀲𑁆𑀲𑀧𑀺 𑀧𑀭𑁂𑀳𑀺 𑀓𑀸𑀭𑁂𑀦𑁆𑀢𑀲𑁆𑀲𑀧𑀺. 𑀓𑀺𑀮𑀫𑀢𑁄𑀢𑀺 𑀆𑀳𑀸𑀭𑀽𑀧𑀘𑁆𑀙𑁂𑀤-𑀩𑀦𑁆𑀥𑀦𑀸𑀕𑀸𑀭𑀧𑁆𑀧𑀯𑁂𑀲𑀦𑀸𑀤𑀻𑀳𑀺 𑀲𑀬𑀁 𑀓𑀺𑀮𑀫𑀦𑁆𑀢𑀲𑁆𑀲𑀸𑀧𑀺 𑀧𑀭𑁂𑀳𑀺 𑀓𑀺𑀮𑀫𑀸𑀧𑁂𑀦𑁆𑀢𑀲𑁆𑀲𑀸𑀧𑀺. 𑀨𑀦𑁆𑀤𑀢𑁄 𑀨𑀦𑁆𑀤𑀸𑀧𑀬𑀢𑁄𑀢𑀺 𑀧𑀭𑀁 𑀨𑀦𑁆𑀤𑀦𑁆𑀢𑀁 𑀨𑀦𑁆𑀤𑀦𑀓𑀸𑀮𑁂 𑀲𑀬𑀫𑁆𑀧𑀺 𑀨𑀦𑁆𑀤𑀢𑁄 𑀧𑀭𑀫𑁆𑀧𑀺 𑀨𑀦𑁆𑀤𑀸𑀧𑀬𑀢𑁄. 𑀧𑀸𑀡𑀫𑀢𑀺𑀧𑀸𑀢𑀬𑀢𑁄𑀢𑀺 𑀧𑀸𑀡𑀁 𑀳𑀦𑀦𑁆𑀢𑀲𑁆𑀲𑀧𑀺 𑀳𑀦𑀸𑀧𑁂𑀦𑁆𑀢𑀲𑁆𑀲𑀧𑀺. 𑀏𑀯𑀁 𑀲𑀩𑁆𑀩𑀢𑁆𑀣 𑀓𑀭𑀡𑀓𑀸𑀭𑀸𑀧𑀦𑀯𑀲𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀦𑁆𑀥𑀺𑀦𑁆𑀢𑀺 ¶ 𑀖𑀭𑀲𑀦𑁆𑀥𑀺𑀁. 𑀦𑀺𑀮𑁆𑀮𑁄𑀧𑀦𑁆𑀢𑀺 𑀫𑀳𑀸𑀯𑀺𑀮𑁄𑀧𑀁. 𑀏𑀓𑀸𑀕𑀸𑀭𑀺𑀓𑀦𑁆𑀢𑀺 𑀏𑀓𑀫𑁂𑀯 𑀖𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀺𑀮𑀼𑀫𑁆𑀧𑀦𑀁. 𑀧𑀭𑀺𑀧𑀦𑁆𑀣𑁂 ¶ 𑀢𑀺𑀝𑁆𑀞𑀢𑁄𑀢𑀺 𑀆𑀕𑀢𑀸𑀕𑀢𑀸𑀦𑀁 𑀅𑀘𑁆𑀙𑀺𑀦𑁆𑀤𑀦𑀢𑁆𑀣𑀁 𑀫𑀕𑁆𑀕𑁂 𑀢𑀺𑀝𑁆𑀞𑀢𑁄. 𑀓𑀭𑁄𑀢𑁄 𑀦 𑀓𑀭𑀻𑀬𑀢𑀺 𑀧𑀸𑀧𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀧𑀸𑀧𑀁 𑀓𑀭𑁄𑀫𑀻𑀢𑀺 𑀲𑀜𑁆𑀜𑀸𑀬 𑀓𑀭𑁄𑀢𑁄𑀧𑀺 𑀧𑀸𑀧𑀁 𑀦 𑀓𑀭𑀻𑀬𑀢𑀺, 𑀦𑀢𑁆𑀣𑀺 𑀧𑀸𑀧𑀁. 𑀲𑀢𑁆𑀢𑀸 𑀧𑀦 𑀓𑀭𑁄𑀫𑀸𑀢𑀺 𑀏𑀯𑀁𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀔𑀼𑀭𑀧𑀭𑀺𑀬𑀦𑁆𑀢𑁂𑀦𑀸𑀢𑀺 𑀔𑀼𑀭𑀦𑁂𑀫𑀺𑀦𑀸, 𑀔𑀼𑀭𑀥𑀸𑀭𑀲𑀤𑀺𑀲𑀧𑀭𑀺𑀬𑀦𑁆𑀢𑁂𑀦 𑀯𑀸. 𑀏𑀓𑀁 𑀫𑀁𑀲𑀔𑀮𑀦𑁆𑀢𑀺 𑀏𑀓𑀁 𑀫𑀁𑀲𑀭𑀸𑀲𑀺𑀁. 𑀧𑀼𑀜𑁆𑀚𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀢𑀢𑁄𑀦𑀺𑀤𑀸𑀦𑀦𑁆𑀢𑀺 𑀏𑀓𑀫𑀁𑀲𑀔𑀮𑀓𑀭𑀡𑀦𑀺𑀤𑀸𑀦𑀁. 𑀤𑀓𑁆𑀔𑀺𑀡𑀢𑀻𑀭𑁂 𑀫𑀦𑀼𑀲𑁆𑀲𑀸 𑀓𑀓𑁆𑀔𑀴𑀸 𑀤𑀸𑀭𑀼𑀡𑀸, 𑀢𑁂 𑀲𑀦𑁆𑀥𑀸𑀬 𑀳𑀦𑀦𑁆𑀢𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀢𑁆𑀢𑀭𑀢𑀻𑀭𑁂 𑀲𑀤𑁆𑀥𑀸 𑀳𑁄𑀦𑁆𑀢𑀺 𑀧𑀲𑀦𑁆𑀦𑀸 𑀩𑀼𑀤𑁆𑀥𑀫𑀸𑀫𑀓𑀸 𑀥𑀫𑁆𑀫𑀫𑀸𑀫𑀓𑀸 𑀲𑀗𑁆𑀖𑀫𑀸𑀫𑀓𑀸, 𑀢𑁂 𑀲𑀦𑁆𑀥𑀸𑀬 𑀤𑀤𑀦𑁆𑀢𑁄𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀬𑀚𑀦𑁆𑀢𑁄𑀢𑀺 𑀫𑀳𑀸𑀬𑀸𑀕𑀁 𑀓𑀭𑁄𑀦𑁆𑀢𑁄. 𑀤𑀫𑁂𑀦𑀸𑀢𑀺 𑀇𑀦𑁆𑀤𑁆𑀭𑀺𑀬𑀤𑀫𑁂𑀦 𑀉𑀧𑁄𑀲𑀣𑀓𑀫𑁆𑀫𑁂𑀦. 𑀲𑀁𑀬𑀫𑁂𑀦𑀸𑀢𑀺 𑀲𑀻𑀮𑀲𑀁𑀬𑀫𑁂𑀦. 𑀲𑀘𑁆𑀘𑀯𑀚𑁆𑀚𑁂𑀦𑀸𑀢𑀺 𑀲𑀘𑁆𑀘𑀯𑀘𑀦𑁂𑀦. 𑀆𑀕𑀫𑁄𑀢𑀺 𑀆𑀕𑀫𑀦𑀁, 𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀣𑀸𑀧𑀺 𑀧𑀸𑀧𑀧𑀼𑀜𑁆𑀜𑀸𑀦𑀁 𑀓𑀺𑀭𑀺𑀬𑀫𑁂𑀯 𑀧𑀝𑀺𑀓𑁆𑀔𑀺𑀧𑀦𑁆𑀢𑀺. 𑀲𑀼𑀓𑁆𑀓𑀧𑀓𑁆𑀔𑁄𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀫𑁂𑀢𑁆𑀣 𑀧𑀼𑀭𑀺𑀫𑀯𑀸𑀭𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯.

𑁧𑁦𑁦. 𑀦𑀢𑁆𑀣𑀺 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄𑀢𑀺 𑀏𑀢𑁆𑀣 𑀧𑀘𑁆𑀘𑀬𑁄 𑀳𑁂𑀢𑀼𑀯𑁂𑀯𑀘𑀦𑀁. 𑀉𑀪𑀬𑁂𑀦𑀸𑀧𑀺 𑀯𑀺𑀚𑁆𑀚𑀫𑀸𑀦𑀓𑀫𑁂𑀯 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀲𑀁𑀓𑀺𑀮𑁂𑀲𑀧𑀘𑁆𑀘𑀬𑀁 𑀓𑀸𑀬𑀲𑀼𑀘𑀭𑀺𑀢𑀸𑀤𑀺𑀯𑀺𑀲𑀼𑀤𑁆𑀥𑀺𑀧𑀘𑁆𑀘𑀬𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀺. 𑀦𑀢𑁆𑀣𑀺 ¶ 𑀩𑀮𑀁, 𑀦𑀢𑁆𑀣𑀺 𑀯𑀻𑀭𑀺𑀬𑀁, 𑀦𑀢𑁆𑀣𑀺 𑀧𑀼𑀭𑀺𑀲𑀣𑀸𑀫𑁄, 𑀦𑀢𑁆𑀣𑀺 𑀧𑀼𑀭𑀺𑀲𑀧𑀭𑀓𑁆𑀓𑀫𑁄𑀢𑀺 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀺𑀢𑀼𑀁 𑀯𑀸 𑀯𑀺𑀲𑀼𑀚𑁆𑀛𑀺𑀢𑀼𑀁 𑀯𑀸 ¶ 𑀩𑀮𑀁 𑀯𑀸 𑀯𑀻𑀭𑀺𑀬𑀁 𑀯𑀸 𑀧𑀼𑀭𑀺𑀲𑁂𑀦 𑀓𑀸𑀢𑀩𑁆𑀩𑁄 𑀦𑀸𑀫 𑀧𑀼𑀭𑀺𑀲𑀣𑀸𑀫𑁄 𑀯𑀸 𑀧𑀼𑀭𑀺𑀲𑀧𑀭𑀓𑁆𑀓𑀫𑁄 𑀯𑀸 𑀦𑀢𑁆𑀣𑀺.

𑀲𑀩𑁆𑀩𑁂 𑀲𑀢𑁆𑀢𑀸𑀢𑀺 𑀑𑀝𑁆𑀞𑀕𑁄𑀡𑀕𑀤𑁆𑀭𑀪𑀸𑀤𑀬𑁄 𑀅𑀦𑀯𑀲𑁂𑀲𑁂 𑀦𑀺𑀤𑀲𑁆𑀲𑁂𑀦𑁆𑀢𑀺. 𑀲𑀩𑁆𑀩𑁂 𑀧𑀸𑀡𑀸𑀢𑀺 𑀏𑀓𑀺𑀦𑁆𑀤𑁆𑀭𑀺𑀬𑁄 𑀧𑀸𑀡𑁄 𑀤𑁆𑀯𑀺𑀦𑁆𑀤𑁆𑀭𑀺𑀬𑁄 𑀧𑀸𑀡𑁄𑀢𑀺 𑀆𑀤𑀺𑀯𑀲𑁂𑀦 𑀯𑀤𑀦𑁆𑀢𑀺. 𑀲𑀩𑁆𑀩𑁂 𑀪𑀽𑀢𑀸𑀢𑀺 𑀅𑀡𑁆𑀟𑀓𑁄𑀲𑀯𑀢𑁆𑀣𑀺𑀓𑁄𑀲𑁂𑀲𑀼 𑀪𑀽𑀢𑁂 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺. 𑀲𑀩𑁆𑀩𑁂 𑀚𑀻𑀯𑀸𑀢𑀺 𑀲𑀸𑀮𑀺𑀬𑀯𑀕𑁄𑀥𑀼𑀫𑀸𑀤𑀬𑁄 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺. 𑀢𑁂𑀲𑀼 𑀳𑁂𑀢𑁂 𑀯𑀺𑀭𑀼𑀳𑀦𑀪𑀸𑀯𑁂𑀦 𑀚𑀻𑀯𑀲𑀜𑁆𑀜𑀺𑀦𑁄. 𑀅𑀯𑀲𑀸 𑀅𑀩𑀮𑀸 𑀅𑀯𑀻𑀭𑀺𑀬𑀸𑀢𑀺 𑀢𑁂𑀲𑀁 𑀅𑀢𑁆𑀢𑀦𑁄 𑀯𑀲𑁄 𑀯𑀸 𑀩𑀮𑀁 𑀯𑀸 𑀯𑀻𑀭𑀺𑀬𑀁 𑀯𑀸 𑀦𑀢𑁆𑀣𑀺. 𑀦𑀺𑀬𑀢𑀺𑀲𑀗𑁆𑀕𑀢𑀺𑀪𑀸𑀯𑀧𑀭𑀺𑀡𑀢𑀸𑀢𑀺 𑀏𑀢𑁆𑀣 𑀦𑀺𑀬𑀢𑀻𑀢𑀺 𑀦𑀺𑀬𑀢𑀢𑀸. 𑀲𑀗𑁆𑀕𑀢𑀻𑀢𑀺 𑀙𑀦𑁆𑀦𑀁 𑀅𑀪𑀺𑀚𑀸𑀢𑀻𑀦𑀁 𑀢𑀢𑁆𑀣 𑀢𑀢𑁆𑀣 𑀕𑀫𑀦𑀁. 𑀪𑀸𑀯𑁄𑀢𑀺 𑀲𑀪𑀸𑀯𑁄𑀬𑁂𑀯. 𑀏𑀯𑀁 𑀦𑀺𑀬𑀢𑀺𑀬𑀸 𑀘 𑀲𑀗𑁆𑀕𑀢𑀺𑀬𑀸 𑀘 𑀪𑀸𑀯𑁂𑀦 𑀘 𑀧𑀭𑀺𑀡𑀢𑀸 𑀦𑀸𑀦𑀧𑁆𑀧𑀓𑀸𑀭𑀢𑀁 𑀧𑀢𑁆𑀢𑀸. 𑀬𑁂𑀦 𑀳𑀺 𑀬𑀣𑀸 𑀪𑀯𑀺𑀢𑀩𑁆𑀩𑀁, 𑀲𑁄 𑀢𑀣𑁂𑀯 𑀪𑀯𑀢𑀺. 𑀬𑁂𑀦 𑀦𑁄 ¶ 𑀪𑀯𑀺𑀢𑀩𑁆𑀩𑀁, 𑀲𑁄 𑀦 𑀪𑀯𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑀺. 𑀙𑀲𑁆𑀯𑁂𑀯𑀸𑀪𑀺𑀚𑀸𑀢𑀻𑀲𑀽𑀢𑀺 𑀙𑀲𑀼 𑀏𑀯 𑀅𑀪𑀺𑀚𑀸𑀢𑀻𑀲𑀼 𑀞𑀢𑁆𑀯𑀸 𑀲𑀼𑀔𑀜𑁆𑀘 𑀤𑀼𑀓𑁆𑀔𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀺, 𑀅𑀜𑁆𑀜𑀸 𑀲𑀼𑀔𑀤𑀼𑀓𑁆𑀔𑀪𑀽𑀫𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑀺.

𑀢𑀢𑁆𑀣 𑀙 𑀅𑀪𑀺𑀚𑀸𑀢𑀺𑀬𑁄 ¶ 𑀦𑀸𑀫 𑀓𑀡𑁆𑀳𑀸𑀪𑀺𑀚𑀸𑀢𑀺 𑀦𑀻𑀮𑀸𑀪𑀺𑀚𑀸𑀢𑀺 𑀮𑁄𑀳𑀺𑀢𑀸𑀪𑀺𑀚𑀸𑀢𑀺 𑀳𑀮𑀺𑀤𑁆𑀤𑀸𑀪𑀺𑀚𑀸𑀢𑀺 𑀲𑀼𑀓𑁆𑀓𑀸𑀪𑀺𑀚𑀸𑀢𑀺 𑀧𑀭𑀫𑀲𑀼𑀓𑁆𑀓𑀸𑀪𑀺𑀚𑀸𑀢𑀻𑀢𑀺. 𑀢𑀢𑁆𑀣 𑀲𑀸𑀓𑀼𑀡𑀺𑀓𑁄 𑀲𑀽𑀓𑀭𑀺𑀓𑁄 𑀮𑀼𑀤𑁆𑀤𑁄 𑀫𑀘𑁆𑀙𑀖𑀸𑀢𑀓𑁄 𑀘𑁄𑀭𑁄 𑀘𑁄𑀭𑀖𑀸𑀢𑀓𑁄, 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 𑀓𑁂𑀘𑀺 𑀓𑀼𑀭𑀽𑀭𑀓𑀫𑁆𑀫𑀦𑁆𑀢𑀸, 𑀅𑀬𑀁 𑀓𑀡𑁆𑀳𑀸𑀪𑀺𑀚𑀸𑀢𑀺 𑀦𑀸𑀫. 𑀪𑀺𑀓𑁆𑀔𑀽 𑀦𑀻𑀮𑀸𑀪𑀺𑀚𑀸𑀢𑀻𑀢𑀺 𑀯𑀤𑀦𑁆𑀢𑀺. 𑀢𑁂 𑀓𑀺𑀭 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀓𑀡𑁆𑀝𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀔𑀸𑀤𑀦𑁆𑀢𑀺. ‘‘𑀪𑀺𑀓𑁆𑀔𑀽 𑀘 𑀓𑀡𑁆𑀝𑀓𑀯𑀼𑀢𑁆𑀢𑀺𑀦𑁄’’𑀢𑀺 𑀅𑀬𑀜𑁆𑀳𑀺 𑀦𑁂𑀲𑀁 𑀧𑀸𑀴𑀺𑀬𑁂𑀯. 𑀅𑀣 𑀯𑀸 𑀓𑀡𑁆𑀝𑀓𑀯𑀼𑀢𑁆𑀢𑀺𑀓𑀸 𑀏𑀯𑀁 𑀦𑀸𑀫 𑀏𑀓𑁂 𑀧𑀩𑁆𑀩𑀚𑀺𑀢𑀸𑀢𑀺 𑀯𑀤𑀦𑁆𑀢𑀺. ‘‘𑀲𑀫𑀡𑀓𑀡𑁆𑀝𑀓𑀯𑀼𑀢𑁆𑀢𑀺𑀓𑀸’’𑀢𑀺𑀧𑀺 𑀳𑀺 𑀦𑁂𑀲𑀁 𑀧𑀸𑀴𑀺. 𑀮𑁄𑀳𑀺𑀢𑀸𑀪𑀺𑀚𑀸𑀢𑀺 𑀦𑀸𑀫 𑀦𑀺𑀕𑀡𑁆𑀞𑀸 𑀏𑀓𑀲𑀸𑀝𑀓𑀸𑀢𑀺 𑀯𑀤𑀦𑁆𑀢𑀺. 𑀇𑀫𑁂 𑀓𑀺𑀭 𑀧𑀼𑀭𑀺𑀫𑁂𑀳𑀺 𑀤𑁆𑀯𑀻𑀳𑀺 𑀧𑀡𑁆𑀟𑀭𑀢𑀭𑀸. 𑀕𑀺𑀳𑀻 𑀅𑀘𑁂𑀮𑀓𑀲𑀸𑀯𑀓𑀸 𑀳𑀮𑀺𑀤𑁆𑀤𑀸𑀪𑀺𑀚𑀸𑀢𑀻𑀢𑀺 𑀯𑀤𑀦𑁆𑀢𑀺. 𑀇𑀢𑀺 𑀅𑀢𑁆𑀢𑀦𑁄 𑀧𑀘𑁆𑀘𑀬𑀤𑀸𑀬𑀓𑁂 𑀦𑀺𑀕𑀡𑁆𑀞𑁂𑀳𑀺𑀧𑀺 𑀚𑁂𑀝𑁆𑀞𑀓𑀢𑀭𑁂 𑀓𑀭𑁄𑀦𑁆𑀢𑀺. 𑀦𑀦𑁆𑀤𑁄, 𑀯𑀘𑁆𑀙𑁄, 𑀲𑀗𑁆𑀓𑀺𑀘𑁆𑀘𑁄, 𑀅𑀬𑀁 𑀲𑀼𑀓𑁆𑀓𑀸𑀪𑀺𑀚𑀸𑀢𑀻𑀢𑀺 𑀯𑀤𑀦𑁆𑀢𑀺. 𑀢𑁂 𑀓𑀺𑀭 𑀧𑀼𑀭𑀺𑀫𑁂𑀳𑀺 𑀘𑀢𑀽𑀳𑀺 𑀧𑀡𑁆𑀟𑀭𑀢𑀭𑀸. 𑀆𑀚𑀻𑀯𑀓𑁂 𑀧𑀦 𑀧𑀭𑀫𑀲𑀼𑀓𑁆𑀓𑀸𑀪𑀺𑀚𑀸𑀢𑀻𑀢𑀺 𑀯𑀤𑀦𑁆𑀢𑀺. 𑀢𑁂 𑀓𑀺𑀭 𑀲𑀩𑁆𑀩𑁂𑀳𑀺 𑀧𑀡𑁆𑀟𑀭𑀢𑀭𑀸.

𑀢𑀢𑁆𑀣 ¶ 𑀲𑀩𑁆𑀩𑁂 𑀲𑀢𑁆𑀢𑀸 𑀧𑀞𑀫𑀁 𑀲𑀸𑀓𑀼𑀡𑀺𑀓𑀸𑀤𑀬𑁄𑀯 𑀳𑁄𑀦𑁆𑀢𑀺, 𑀢𑀢𑁄 𑀯𑀺𑀲𑀼𑀚𑁆𑀛𑀫𑀸𑀦𑀸 𑀲𑀓𑁆𑀬𑀲𑀫𑀡𑀸 𑀳𑁄𑀦𑁆𑀢𑀺, 𑀢𑀢𑁄 𑀯𑀺𑀲𑀼𑀚𑁆𑀛𑀫𑀸𑀦𑀸 𑀦𑀺𑀕𑀡𑁆𑀞𑀸, 𑀢𑀢𑁄 𑀆𑀚𑀻𑀯𑀓𑀲𑀸𑀯𑀓𑀸, 𑀢𑀢𑁄 𑀦𑀦𑁆𑀤𑀸𑀤𑀬𑁄, 𑀢𑀢𑁄 𑀆𑀚𑀻𑀯𑀓𑀸𑀢𑀺 𑀅𑀬𑀫𑁂𑀢𑁂𑀲𑀁 𑀮𑀤𑁆𑀥𑀺. 𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑀧𑀘𑁆𑀘𑀦𑀻𑀓𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀫𑀺𑀥𑀸𑀧𑀺 𑀧𑀼𑀭𑀺𑀫𑀯𑀸𑀭𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯.

𑀇𑀫𑀸𑀲𑀼 𑀧𑀦 𑀢𑀻𑀲𑀼 𑀤𑀺𑀝𑁆𑀞𑀻𑀲𑀼 𑀦𑀢𑁆𑀣𑀺𑀓𑀤𑀺𑀝𑁆𑀞𑀺 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀢𑀺, 𑀅𑀓𑀺𑀭𑀺𑀬𑀤𑀺𑀝𑁆𑀞𑀺 𑀓𑀫𑁆𑀫𑀁 𑀧𑀝𑀺𑀩𑀸𑀳𑀢𑀺, 𑀅𑀳𑁂𑀢𑀼𑀓𑀤𑀺𑀝𑁆𑀞𑀺 𑀉𑀪𑀬𑀫𑁆𑀧𑀺 𑀧𑀝𑀺𑀩𑀸𑀳𑀢𑀺. 𑀢𑀢𑁆𑀣 𑀓𑀫𑁆𑀫𑀁 𑀧𑀝𑀺𑀩𑀸𑀳𑀦𑁆𑀢𑁂𑀦𑀸𑀧𑀺 𑀯𑀺𑀧𑀸𑀓𑁄 𑀧𑀝𑀺𑀩𑀸𑀳𑀺𑀢𑁄 𑀳𑁄𑀢𑀺, 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀦𑁆𑀢𑁂𑀦𑀸𑀧𑀺 𑀓𑀫𑁆𑀫𑀁 𑀧𑀝𑀺𑀩𑀸𑀳𑀺𑀢𑀁. 𑀇𑀢𑀺 𑀲𑀩𑁆𑀩𑁂𑀧𑁂𑀢𑁂 ¶ 𑀅𑀢𑁆𑀣𑀢𑁄 𑀉𑀪𑀬𑀧𑀝𑀺𑀩𑀸𑀳𑀓𑀸 𑀦𑀢𑁆𑀣𑀺𑀓𑀯𑀸𑀤𑀸 𑀘𑁂𑀯 𑀅𑀳𑁂𑀢𑀼𑀓𑀯𑀸𑀤𑀸 𑀅𑀓𑀺𑀭𑀺𑀬𑀯𑀸𑀤𑀸 𑀘 𑀳𑁄𑀦𑁆𑀢𑀺. 𑀬𑁂 𑀧𑀦 𑀢𑁂𑀲𑀁 𑀮𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀭𑀢𑁆𑀢𑀺𑀝𑁆𑀞𑀸𑀦𑁂 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀸 𑀲𑀚𑁆𑀛𑀸𑀬𑀦𑁆𑀢𑀺 𑀯𑀻𑀫𑀁𑀲𑀦𑁆𑀢𑀺, 𑀢𑁂𑀲𑀁 𑁋 ‘‘𑀦𑀢𑁆𑀣𑀺 𑀤𑀺𑀦𑁆𑀦𑀁 𑀦𑀢𑁆𑀣𑀺 𑀬𑀺𑀝𑁆𑀞𑀁, 𑀓𑀭𑁄𑀢𑁄 𑀦 𑀓𑀭𑀺𑀬𑀢𑀺 𑀧𑀸𑀧𑀁, 𑀦𑀢𑁆𑀣𑀺 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄’’𑀢𑀺 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀫𑀺𑀘𑁆𑀙𑀸𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀺 ¶ , 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺, 𑀚𑀯𑀦𑀸𑀦𑀺 𑀚𑀯𑀦𑁆𑀢𑀺, 𑀧𑀞𑀫𑀚𑀯𑀦𑁂 𑀲𑀢𑁂𑀓𑀺𑀘𑁆𑀙𑀸 𑀳𑁄𑀦𑁆𑀢𑀺, 𑀢𑀣𑀸 𑀤𑀼𑀢𑀺𑀬𑀸𑀤𑀻𑀲𑀼. 𑀲𑀢𑁆𑀢𑀫𑁂 𑀩𑀼𑀤𑁆𑀥𑀸𑀦𑀫𑁆𑀧𑀺 𑀅𑀢𑁂𑀓𑀺𑀘𑁆𑀙𑀸 𑀅𑀦𑀺𑀯𑀢𑁆𑀢𑀺𑀦𑁄 𑀅𑀭𑀺𑀝𑁆𑀞𑀓𑀡𑁆𑀝𑀓𑀲𑀤𑀺𑀲𑀸.

𑀢𑀢𑁆𑀣 𑀓𑁄𑀘𑀺 𑀏𑀓𑀁 𑀤𑀲𑁆𑀲𑀦𑀁 𑀑𑀓𑁆𑀓𑀫𑀢𑀺, 𑀓𑁄𑀘𑀺 𑀤𑁆𑀯𑁂, 𑀓𑁄𑀘𑀺 𑀢𑀻𑀡𑀺𑀧𑀺, 𑀏𑀓𑀲𑁆𑀫𑀺𑀁 𑀑𑀓𑁆𑀓𑀦𑁆𑀢𑁂𑀧𑀺 𑀤𑁆𑀯𑀻𑀲𑀼 𑀢𑀻𑀲𑀼 𑀑𑀓𑁆𑀓𑀦𑁆𑀢𑁂𑀲𑀼𑀧𑀺 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄𑀯 𑀳𑁄𑀢𑀺, 𑀧𑀢𑁆𑀢𑁄 𑀲𑀕𑁆𑀕𑀫𑀕𑁆𑀕𑀸𑀯𑀭𑀡𑀜𑁆𑀘𑁂𑀯 𑀫𑁄𑀓𑁆𑀔𑀫𑀕𑁆𑀕𑀸𑀯𑀭𑀡𑀜𑁆𑀘, 𑀅𑀪𑀩𑁆𑀩𑁄 𑀢𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀅𑀦𑀦𑁆𑀢𑀭𑀁 𑀲𑀕𑁆𑀕𑀫𑁆𑀧𑀺 𑀕𑀦𑁆𑀢𑀼𑀁, 𑀧𑀕𑁂𑀯 𑀫𑁄𑀓𑁆𑀔𑀁. 𑀯𑀝𑁆𑀝𑀔𑀸𑀡𑀼 𑀦𑀸𑀫𑁂𑀲 𑀲𑀢𑁆𑀢𑁄 𑀧𑀣𑀯𑀻𑀕𑁄𑀧𑀓𑁄. 𑀓𑀺𑀁 𑀧𑀦𑁂𑀲 𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀦𑀺𑀬𑀢𑁄 𑀳𑁄𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀲𑁆𑀫𑀺𑀫𑁆𑀧𑀻𑀢𑀺? 𑀏𑀓𑀲𑁆𑀫𑀺𑀜𑁆𑀜𑁂𑀯 𑀦𑀺𑀬𑀢𑁄, 𑀆𑀲𑁂𑀯𑀦𑀯𑀲𑁂𑀦 𑀧𑀦 𑀪𑀯𑀦𑁆𑀢𑀭𑁂𑀧𑀺 𑀢𑀁 𑀢𑀁 𑀤𑀺𑀝𑁆𑀞𑀺𑀁 𑀭𑁄𑀘𑁂𑀢𑀺𑀬𑁂𑀯. 𑀏𑀯𑀭𑀽𑀧𑀲𑁆𑀲 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀪𑀯𑀢𑁄 𑀯𑀼𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺.

𑀢𑀲𑁆𑀫𑀸 𑀅𑀓𑀮𑁆𑀬𑀸𑀡𑀚𑀦𑀁, 𑀆𑀲𑀻𑀯𑀺𑀲𑀫𑀺𑀯𑁄𑀭𑀕𑀁;

𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀬𑁆𑀬, 𑀪𑀽𑀢𑀺𑀓𑀸𑀫𑁄 𑀯𑀺𑀘𑀓𑁆𑀔𑀡𑁄𑀢𑀺.

𑁧𑁦𑁩. 𑀦𑀢𑁆𑀣𑀺 𑀲𑀩𑁆𑀩𑀲𑁄 𑀆𑀭𑀼𑀧𑁆𑀧𑀸𑀢𑀺 𑀅𑀭𑀽𑀧𑀩𑁆𑀭𑀳𑁆𑀫𑀮𑁄𑀓𑁄 𑀦𑀸𑀫 𑀲𑀩𑁆𑀩𑀸𑀓𑀸𑀭𑁂𑀦 𑀦𑀢𑁆𑀣𑀺. 𑀫𑀦𑁄𑀫𑀬𑀸𑀢𑀺 𑀛𑀸𑀦𑀘𑀺𑀢𑁆𑀢𑀫𑀬𑀸. 𑀲𑀜𑁆𑀜𑀸𑀫𑀬𑀸𑀢𑀺 𑀅𑀭𑀽𑀧𑀚𑁆𑀛𑀸𑀦𑀲𑀜𑁆𑀜𑀸𑀬 𑀲𑀜𑁆𑀜𑀸𑀫𑀬𑀸. 𑀭𑀽𑀧𑀸𑀦𑀁𑀬𑁂𑀯 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻𑀢𑀺 𑀅𑀬𑀁 𑀮𑀸𑀪𑀻 𑀯𑀸 𑀳𑁄𑀢𑀺 𑀢𑀓𑁆𑀓𑀻 𑀯𑀸. 𑀮𑀸𑀪𑀻 𑀦𑀸𑀫 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀮𑀸𑀪𑀻. 𑀢𑀲𑁆𑀲 𑀭𑀽𑀧𑀸𑀯𑀘𑀭𑁂 𑀓𑀗𑁆𑀔𑀸 𑀦𑀢𑁆𑀣𑀺, 𑀅𑀭𑀽𑀧𑀸𑀯𑀘𑀭𑀮𑁄𑀓𑁂 𑀅𑀢𑁆𑀣𑀺 ¶ . 𑀲𑁄 𑁋 ‘‘𑀅𑀳𑀁 𑀆𑀭𑀼𑀧𑁆𑀧𑀸 𑀅𑀢𑁆𑀣𑀻𑀢𑀺 𑀯𑀤𑀦𑁆𑀢𑀸𑀦𑀫𑁆𑀧𑀺 ¶ 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀸𑀦𑀫𑁆𑀧𑀺 𑀲𑀼𑀡𑀸𑀫𑀺, 𑀅𑀢𑁆𑀣𑀺 𑀦𑀢𑁆𑀣𑀻𑀢𑀺 𑀧𑀦 𑀦 𑀚𑀸𑀦𑀸𑀫𑀺. 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀧𑀤𑀝𑁆𑀞𑀸𑀦𑀁 𑀓𑀢𑁆𑀯𑀸 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀺. 𑀲𑀘𑁂 𑀆𑀭𑀼𑀧𑁆𑀧𑀸 𑀅𑀢𑁆𑀣𑀺, 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀺, 𑀲𑀘𑁂 𑀦𑀢𑁆𑀣𑀺, 𑀭𑀽𑀧𑀸𑀯𑀘𑀭𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀺. 𑀏𑀯𑀁 𑀫𑁂 𑀅𑀧𑀡𑁆𑀡𑀓𑁄 𑀥𑀫𑁆𑀫𑁄 𑀅𑀧𑀡𑁆𑀡𑀓𑁄𑀯 𑀅𑀯𑀺𑀭𑀤𑁆𑀥𑁄𑀯 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀣𑀸 𑀧𑀝𑀺𑀧𑀚𑁆𑀚𑀢𑀺. 𑀢𑀓𑁆𑀓𑀻 𑀧𑀦 𑀅𑀧𑁆𑀧𑀝𑀺𑀮𑀤𑁆𑀥𑀚𑁆𑀛𑀸𑀦𑁄, 𑀢𑀲𑁆𑀲𑀸𑀧𑀺 𑀭𑀽𑀧𑀚𑁆𑀛𑀸𑀦𑁂 𑀓𑀗𑁆𑀔𑀸 𑀦𑀢𑁆𑀣𑀺, 𑀅𑀭𑀽𑀧𑀮𑁄𑀓𑁂 𑀧𑀦 𑀅𑀢𑁆𑀣𑀺. 𑀲𑁄 𑁋 ‘‘𑀅𑀳𑀁 𑀆𑀭𑀼𑀧𑁆𑀧𑀸 𑀅𑀢𑁆𑀣𑀻𑀢𑀺 𑀯𑀤𑀦𑁆𑀢𑀸𑀦𑀫𑁆𑀧𑀺 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀸𑀦𑀫𑁆𑀧𑀺 𑀲𑀼𑀡𑀸𑀫𑀺, 𑀅𑀢𑁆𑀣𑀺 𑀦𑀢𑁆𑀣𑀻𑀢𑀺 𑀧𑀦 𑀦 𑀚𑀸𑀦𑀸𑀫𑀺. 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀁 𑀧𑀤𑀝𑁆𑀞𑀸𑀦𑀁 𑀓𑀢𑁆𑀯𑀸 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀺. 𑀲𑀘𑁂 𑀆𑀭𑀼𑀧𑁆𑀧𑀸 𑀅𑀢𑁆𑀣𑀺, 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀺. 𑀲𑀘𑁂 𑀦𑀢𑁆𑀣𑀺, 𑀭𑀽𑀧𑀸𑀯𑀘𑀭𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀺. 𑀏𑀯𑀁 𑀫𑁂 𑀅𑀧𑀡𑁆𑀡𑀓𑁄 𑀥𑀫𑁆𑀫𑁄 𑀅𑀧𑀡𑁆𑀡𑀓𑁄𑀯 𑀅𑀯𑀺𑀭𑀤𑁆𑀥𑁄𑀯 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀣𑀸 𑀧𑀝𑀺𑀧𑀚𑁆𑀚𑀢𑀺.

𑁧𑁦𑁪. 𑀪𑀯𑀦𑀺𑀭𑁄𑀥𑁄𑀢𑀺 ¶ 𑀦𑀺𑀩𑁆𑀩𑀸𑀦𑀁. 𑀲𑀸𑀭𑀸𑀕𑀸𑀬 𑀲𑀦𑁆𑀢𑀺𑀓𑁂𑀢𑀺 𑀭𑀸𑀕𑀯𑀲𑁂𑀦 𑀯𑀝𑁆𑀝𑁂 𑀭𑀚𑁆𑀚𑀦𑀲𑁆𑀲 𑀲𑀦𑁆𑀢𑀺𑀓𑁂. 𑀲𑀁𑀬𑁄𑀕𑀸𑀬𑀸𑀢𑀺 𑀢𑀡𑁆𑀳𑀸𑀯𑀲𑁂𑀦 𑀲𑀁𑀬𑁄𑀚𑀦𑀢𑁆𑀣𑀸𑀬. 𑀅𑀪𑀺𑀦𑀦𑁆𑀤𑀦𑀸𑀬𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀅𑀪𑀺𑀦𑀦𑁆𑀤𑀦𑀸𑀬. 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻𑀢𑀺 𑀅𑀬𑀫𑁆𑀧𑀺 𑀮𑀸𑀪𑀻 𑀯𑀸 𑀳𑁄𑀢𑀺 𑀢𑀓𑁆𑀓𑀻 𑀯𑀸. 𑀮𑀸𑀪𑀻 𑀦𑀸𑀫 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻. 𑀢𑀲𑁆𑀲 𑀆𑀭𑀼𑀧𑁆𑀧𑁂 𑀓𑀗𑁆𑀔𑀸 𑀦𑀢𑁆𑀣𑀺, 𑀦𑀺𑀩𑁆𑀩𑀸𑀦𑁂 𑀅𑀢𑁆𑀣𑀺. 𑀲𑁄 𑁋 ‘‘𑀅𑀳𑀁 𑀦𑀺𑀭𑁄𑀥𑁄 𑀅𑀢𑁆𑀣𑀻𑀢𑀺𑀧𑀺 𑀦𑀢𑁆𑀣𑀻𑀢𑀺𑀧𑀺 𑀲𑀼𑀡𑀸𑀫𑀺, 𑀲𑀬𑀁 𑀦 𑀚𑀸𑀦𑀸𑀫𑀺. 𑀲𑀫𑀸𑀧𑀢𑁆𑀢𑀺𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀲𑁆𑀲𑀸𑀫𑀺. 𑀲𑀘𑁂 𑀦𑀺𑀭𑁄𑀥𑁄 𑀪𑀯𑀺𑀲𑁆𑀲𑀢𑀺, 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺. 𑀦𑁄 𑀘𑁂 𑀪𑀯𑀺𑀲𑁆𑀲𑀢𑀺, 𑀆𑀭𑀼𑀧𑁆𑀧𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀧𑀝𑀺𑀧𑀚𑁆𑀚𑀢𑀺. 𑀢𑀓𑁆𑀓𑀻 𑀧𑀦 𑀏𑀓𑀲𑀫𑀸𑀧𑀢𑁆𑀢𑀺𑀬𑀸𑀧𑀺 𑀦 𑀮𑀸𑀪𑀻, 𑀆𑀭𑀼𑀧𑁆𑀧𑁂 𑀧𑀦𑀲𑁆𑀲 𑀓𑀗𑁆𑀔𑀸 𑀦𑀢𑁆𑀣𑀺, 𑀪𑀯𑀦𑀺𑀭𑁄𑀥𑁂 𑀅𑀢𑁆𑀣𑀺. 𑀲𑁄 𑁋 ‘‘𑀅𑀳𑀁 𑀦𑀺𑀭𑁄𑀥𑁄 𑀅𑀢𑁆𑀣𑀻𑀢𑀺𑀧𑀺 𑀦𑀢𑁆𑀣𑀻𑀢𑀺𑀧𑀺 𑀲𑀼𑀡𑀸𑀫𑀺, 𑀲𑀬𑀁 𑀦 𑀚𑀸𑀦𑀸𑀫𑀺, 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀲𑁆𑀲𑀸𑀫𑀺. 𑀲𑀘𑁂 𑀦𑀺𑀭𑁄𑀥𑁄 𑀪𑀯𑀺𑀲𑁆𑀲𑀢𑀺, 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺. 𑀦𑁄 𑀘𑁂 𑀪𑀯𑀺𑀲𑁆𑀲𑀢𑀺, 𑀆𑀭𑀼𑀧𑁆𑀧𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀧𑀝𑀺𑀧𑀚𑁆𑀚𑀢𑀺. 𑀏𑀢𑁆𑀣𑀸𑀳 ¶ 𑁋 ‘‘𑀅𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺𑀆𑀤𑀻𑀦𑀺 𑀢𑀸𑀯 𑀅𑀧𑀡𑁆𑀡𑀓𑀸𑀦𑀺 𑀪𑀯𑀦𑁆𑀢𑀼, 𑀦𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺𑀆𑀤𑀻𑀦𑀺 𑀧𑀦 𑀓𑀣𑀁 𑀅𑀧𑀡𑁆𑀡𑀓𑀸𑀦𑀻’’𑀢𑀺. 𑀕𑀳𑀡𑀯𑀲𑁂𑀦. 𑀢𑀸𑀦𑀺 𑀳𑀺 𑀅𑀧𑀡𑁆𑀡𑀓𑀁 𑀅𑀧𑀡𑁆𑀡𑀓𑀦𑁆𑀢𑀺 𑀏𑀯𑀁 𑀕𑀳𑀺𑀢𑀢𑁆𑀢𑀸 𑀅𑀧𑀡𑁆𑀡𑀓𑀸𑀦𑀺 𑀦𑀸𑀫 𑀚𑀸𑀢𑀸𑀦𑀺.

𑁧𑁦𑁫. 𑀘𑀢𑁆𑀢𑀸𑀭𑁄𑀫𑁂𑀢𑀺 ¶ 𑀅𑀬𑀁 𑀧𑀸𑀝𑀺𑀏𑀓𑁆𑀓𑁄 𑀅𑀦𑀼𑀲𑀦𑁆𑀥𑀺. 𑀦𑀢𑁆𑀣𑀺𑀓𑀯𑀸𑀤𑁄, 𑀅𑀳𑁂𑀢𑀼𑀓𑀯𑀸𑀤𑁄 𑀅𑀓𑀺𑀭𑀺𑀬𑀯𑀸𑀤𑁄, 𑀆𑀭𑀼𑀧𑁆𑀧𑀸 𑀦𑀢𑁆𑀣𑀺 𑀦𑀺𑀭𑁄𑀥𑁄 𑀦𑀢𑁆𑀣𑀻𑀢𑀺 𑀏𑀯𑀁𑀯𑀸𑀤𑀺𑀦𑁄 𑀘 𑀤𑁆𑀯𑁂𑀢𑀺 𑀇𑀫𑁂 𑀧𑀜𑁆𑀘 𑀧𑀼𑀕𑁆𑀕𑀮𑀸 𑀳𑁂𑀝𑁆𑀞𑀸 𑀢𑀬𑁄 𑀧𑀼𑀕𑁆𑀕𑀮𑀸𑀯 𑀳𑁄𑀦𑁆𑀢𑀺. 𑀅𑀢𑁆𑀣𑀺𑀓𑀯𑀸𑀤𑀸𑀤𑀬𑁄 𑀧𑀜𑁆𑀘 𑀏𑀓𑁄 𑀘𑀢𑀼𑀢𑁆𑀣𑀧𑀼𑀕𑁆𑀕𑀮𑁄𑀯 𑀳𑁄𑀢𑀺. 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀪𑀕𑀯𑀸 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀲𑀩𑁆𑀩𑀁 𑀅𑀢𑁆𑀣𑀢𑁄 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀅𑀧𑀡𑁆𑀡𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀪𑀺𑀓𑁆𑀔𑀼𑀯𑀕𑁆𑀕𑁄

𑁧. 𑀅𑀫𑁆𑀩𑀮𑀝𑁆𑀞𑀺𑀓𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁭. 𑀏𑀯𑀁 ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀅𑀫𑁆𑀩𑀮𑀝𑁆𑀞𑀺𑀓𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀁. 𑀢𑀢𑁆𑀣 𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀁 𑀯𑀺𑀳𑀭𑀢𑀻𑀢𑀺 𑀯𑁂𑀴𑀼𑀯𑀦𑀯𑀺𑀳𑀸𑀭𑀲𑁆𑀲 𑀧𑀘𑁆𑀘𑀦𑁆𑀢𑁂 𑀧𑀥𑀸𑀦𑀖𑀭𑀲𑀗𑁆𑀔𑁂𑀧𑁂 𑀯𑀺𑀯𑁂𑀓𑀓𑀸𑀫𑀸𑀦𑀁 𑀯𑀲𑀦𑀢𑁆𑀣𑀸𑀬 𑀓𑀢𑁂 𑀅𑀫𑁆𑀩𑀮𑀝𑁆𑀞𑀺𑀓𑀸𑀢𑀺 𑀏𑀯𑀁𑀦𑀸𑀫𑀓𑁂 𑀧𑀸𑀲𑀸𑀤𑁂 𑀧𑀯𑀺𑀯𑁂𑀓𑀁 𑀩𑁆𑀭𑀽𑀳𑀬𑀦𑁆𑀢𑁄 𑀯𑀺𑀳𑀭𑀢𑀺. 𑀓𑀡𑁆𑀝𑀓𑁄 𑀦𑀸𑀫 𑀚𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀺𑀔𑀺𑀡𑁄𑀯 𑀳𑁄𑀢𑀺, 𑀏𑀯𑀫𑁂𑀯𑀁 𑀅𑀬𑀫𑁆𑀧𑀺 𑀆𑀬𑀲𑁆𑀫𑀸 𑀲𑀢𑁆𑀢𑀯𑀲𑁆𑀲𑀺𑀓𑀲𑀸𑀫𑀡𑁂𑀭𑀓𑀸𑀮𑁂𑀬𑁂𑀯 𑀧𑀯𑀺𑀯𑁂𑀓𑀁 𑀩𑁆𑀭𑀽𑀳𑀬𑀫𑀸𑀦𑁄 𑀢𑀢𑁆𑀣 𑀯𑀺𑀳𑀸𑀲𑀺. 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬. 𑀆𑀲𑀦𑀦𑁆𑀢𑀺 𑀧𑀓𑀢𑀺𑀧𑀜𑁆𑀜𑀢𑁆𑀢𑀫𑁂𑀯𑁂𑀢𑁆𑀣 𑀆𑀲𑀦𑀁 𑀅𑀢𑁆𑀣𑀺, 𑀢𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀞𑀧𑁂𑀲𑀺. 𑀉𑀤𑀓𑀸𑀥𑀸𑀦𑁂𑀢𑀺 ¶ 𑀉𑀤𑀓𑀪𑀸𑀚𑀦𑁂. ‘‘𑀉𑀤𑀓𑀝𑁆𑀞𑀸𑀦𑁂’’𑀢𑀺𑀧𑀺 𑀧𑀸𑀞𑁄.

𑀆𑀬𑀲𑁆𑀫𑀦𑁆𑀢𑀁 𑀭𑀸𑀳𑀼𑀮𑀁 𑀆𑀫𑀦𑁆𑀢𑁂𑀲𑀻𑀢𑀺 𑀑𑀯𑀸𑀤𑀤𑀸𑀦𑀢𑁆𑀣𑀁 𑀆𑀫𑀦𑁆𑀢𑁂𑀲𑀺. 𑀪𑀕𑀯𑀢𑀸 𑀳𑀺 𑀭𑀸𑀳𑀼𑀮𑀢𑁆𑀣𑁂𑀭𑀲𑁆𑀲 𑀲𑀫𑁆𑀩𑀳𑀼𑀮𑀸 𑀥𑀫𑁆𑀫𑀤𑁂𑀲𑀦𑀸 𑀓𑀢𑀸. 𑀲𑀸𑀫𑀡𑁂𑀭𑀧𑀜𑁆𑀳𑀁 𑀣𑁂𑀭𑀲𑁆𑀲𑁂𑀯 𑀯𑀼𑀢𑁆𑀢𑀁. 𑀢𑀣𑀸 𑀭𑀸𑀳𑀼𑀮𑀲𑀁𑀬𑀼𑀢𑁆𑀢𑀁 𑀫𑀳𑀸𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀁 𑀘𑀽𑀴𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀫𑀺𑀤𑀁 𑀅𑀫𑁆𑀩𑀮𑀝𑁆𑀞𑀺𑀓𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀦𑁆𑀢𑀺.

𑀅𑀬𑀜𑁆𑀳𑀺 𑀆𑀬𑀲𑁆𑀫𑀸 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀪𑀕𑀯𑀦𑁆𑀢𑀁 𑀘𑀻𑀯𑀭𑀓𑀡𑁆𑀡𑁂 𑀕𑀳𑁂𑀢𑁆𑀯𑀸 ‘‘𑀤𑀸𑀬𑀚𑁆𑀚𑀁 𑀫𑁂 𑀲𑀫𑀡 𑀤𑁂𑀳𑀻’’𑀢𑀺 𑀤𑀸𑀬𑀚𑁆𑀚𑀁 𑀬𑀸𑀘𑀫𑀸𑀦𑁄 𑀪𑀕𑀯𑀢𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀧𑀩𑁆𑀩𑀸𑀚𑀺𑀢𑁄. 𑀅𑀣 𑀪𑀕𑀯𑀸 𑀤𑀳𑀭𑀓𑀼𑀫𑀸𑀭𑀸 𑀦𑀸𑀫 𑀬𑀼𑀢𑁆𑀢𑀸𑀬𑀼𑀢𑁆𑀢𑀁 𑀓𑀣𑀁 𑀓𑀣𑁂𑀦𑁆𑀢𑀺, 𑀑𑀯𑀸𑀤𑀫𑀲𑁆𑀲 𑀤𑁂𑀫𑀻𑀢𑀺 𑀭𑀸𑀳𑀼𑀮𑀓𑀼𑀫𑀸𑀭𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀲𑀸𑀫𑀡𑁂𑀭𑁂𑀦 𑀦𑀸𑀫, 𑀭𑀸𑀳𑀼𑀮, 𑀢𑀺𑀭𑀘𑁆𑀙𑀸𑀦𑀓𑀣𑀁 𑀓𑀣𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑁆𑀯𑀁 𑀓𑀣𑀬𑀫𑀸𑀦𑁄 𑀏𑀯𑀭𑀽𑀧𑀁 𑀓𑀣𑀁 𑀓𑀣𑁂𑀬𑁆𑀬𑀸𑀲𑀻’’𑀢𑀺 𑀲𑀩𑁆𑀩𑀩𑀼𑀤𑁆𑀥𑁂𑀳𑀺 𑀅𑀯𑀺𑀚𑀳𑀺𑀢𑀁 𑀤𑀲𑀧𑀼𑀘𑁆𑀙𑀁 𑀧𑀜𑁆𑀘𑀧𑀡𑁆𑀡𑀸𑀲𑀯𑀺𑀲𑁆𑀲𑀚𑁆𑀚𑀦𑀁 𑁋 ‘‘𑀏𑀓𑁄 𑀧𑀜𑁆𑀳𑁄 𑀏𑀓𑁄 𑀉𑀤𑁆𑀤𑁂𑀲𑁄 𑀏𑀓𑀁 𑀯𑁂𑀬𑁆𑀬𑀸𑀓𑀭𑀡𑀁 𑀤𑁆𑀯𑁂 𑀧𑀜𑁆𑀳𑀸…𑀧𑁂… 𑀤𑀲 𑀧𑀜𑁆𑀳𑀸 𑀤𑀲 𑀉𑀤𑁆𑀤𑁂𑀲𑀸 𑀤𑀲 ¶ 𑀯𑁂𑀬𑁆𑀬𑀸𑀓𑀭𑀡𑀸𑀢𑀺. 𑀏𑀓𑀁 𑀦𑀸𑀫 𑀓𑀺𑀁? 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸…𑀧𑁂… 𑀤𑀲 𑀦𑀸𑀫 𑀓𑀺𑀁? 𑀤𑀲𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀭𑀳𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺 (𑀔𑀼. 𑀧𑀸. 𑁪.𑁧𑁦) 𑀇𑀫𑀁 𑀲𑀸𑀫𑀡𑁂𑀭𑀧𑀜𑁆𑀳𑀁 𑀓𑀣𑁂𑀲𑀺. 𑀧𑀼𑀦 𑀘𑀺𑀦𑁆𑀢𑁂𑀲𑀺 ‘‘𑀤𑀳𑀭𑀓𑀼𑀫𑀸𑀭𑀸 𑀦𑀸𑀫 𑀧𑀺𑀬𑀫𑀼𑀲𑀸𑀯𑀸𑀤𑀸 𑀳𑁄𑀦𑁆𑀢𑀺, 𑀅𑀤𑀺𑀝𑁆𑀞𑀫𑁂𑀯 ¶ 𑀤𑀺𑀝𑁆𑀞𑀁 𑀅𑀫𑁆𑀳𑁂𑀳𑀺, 𑀤𑀺𑀝𑁆𑀞𑀫𑁂𑀯 𑀦 𑀤𑀺𑀝𑁆𑀞𑀁 𑀅𑀫𑁆𑀳𑁂𑀳𑀻𑀢𑀺 𑀯𑀤𑀦𑁆𑀢𑀺 𑀑𑀯𑀸𑀤𑀫𑀲𑁆𑀲 𑀤𑁂𑀫𑀻’’𑀢𑀺 𑀅𑀓𑁆𑀔𑀻𑀳𑀺 𑀑𑀮𑁄𑀓𑁂𑀢𑁆𑀯𑀸𑀧𑀺 𑀲𑀼𑀔𑀲𑀜𑁆𑀚𑀸𑀦𑀦𑀢𑁆𑀣𑀁 𑀧𑀞𑀫𑀫𑁂𑀯 𑀘𑀢𑀲𑁆𑀲𑁄 𑀉𑀤𑀓𑀸𑀥𑀸𑀦𑀽𑀧𑀫𑀸𑀬𑁄 ¶ , 𑀢𑀢𑁄 𑀤𑁆𑀯𑁂 𑀳𑀢𑁆𑀣𑀺𑀉𑀧𑀫𑀸𑀬𑁄 𑀏𑀓𑀁 𑀆𑀤𑀸𑀲𑀽𑀧𑀫𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀫𑀁 𑀲𑀼𑀢𑁆𑀢𑀁 𑀓𑀣𑁂𑀲𑀺. 𑀘𑀢𑀽𑀲𑀼 𑀧𑀦 𑀧𑀘𑁆𑀘𑀬𑁂𑀲𑀼 𑀢𑀡𑁆𑀳𑀸𑀯𑀺𑀯𑀝𑁆𑀝𑀦𑀁 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀼𑀧𑀦𑀺𑀲𑁆𑀲𑀬𑀲𑁆𑀲 𑀫𑀳𑀦𑁆𑀢𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀭𑀸𑀳𑀼𑀮𑀲𑀼𑀢𑁆𑀢𑀁 (𑀲𑀼. 𑀦𑀺. 𑀭𑀸𑀳𑀼𑀮𑀲𑀼𑀢𑁆𑀢) 𑀓𑀣𑁂𑀲𑀺. 𑀆𑀕𑀢𑀸𑀕𑀢𑀝𑁆𑀞𑀸𑀦𑁂 𑀪𑀯𑁂𑀲𑀼 𑀙𑀦𑁆𑀤𑀭𑀸𑀕𑁄 𑀦 𑀓𑀢𑁆𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 𑀭𑀸𑀳𑀼𑀮𑀲𑀁𑀬𑀼𑀢𑁆𑀢𑀁 (𑀲𑀁. 𑀦𑀺. 𑁨.𑁧𑁮𑁮 𑀆𑀤𑀬𑁄) 𑀓𑀣𑁂𑀲𑀺. ‘‘𑀅𑀳𑀁 𑀲𑁄𑀪𑀸𑀫𑀺, 𑀫𑀫 𑀯𑀡𑁆𑀡𑀸𑀬𑀢𑀦𑀁 𑀧𑀲𑀦𑁆𑀦’’𑀦𑁆𑀢𑀺 𑀅𑀢𑁆𑀢𑀪𑀸𑀯𑀁 𑀦𑀺𑀲𑁆𑀲𑀸𑀬 𑀕𑁂𑀳𑀲𑁆𑀲𑀺𑀢𑀙𑀦𑁆𑀤𑀭𑀸𑀕𑁄 𑀦 𑀓𑀢𑁆𑀢𑀩𑁆𑀩𑁄𑀢𑀺 𑀫𑀳𑀸𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀁 𑀓𑀣𑁂𑀲𑀺.

𑀢𑀢𑁆𑀣 𑀭𑀸𑀳𑀼𑀮𑀲𑀼𑀢𑁆𑀢𑀁 𑀇𑀫𑀲𑁆𑀫𑀺𑀁 𑀦𑀸𑀫 𑀓𑀸𑀮𑁂 𑀯𑀼𑀢𑁆𑀢𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀢𑀜𑁆𑀳𑀺 𑀅𑀪𑀺𑀡𑁆𑀳𑁄𑀯𑀸𑀤𑀯𑀲𑁂𑀦 𑀯𑀼𑀢𑁆𑀢𑀁. 𑀭𑀸𑀳𑀼𑀮𑀲𑀁𑀬𑀼𑀢𑁆𑀢𑀁 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀯𑀲𑁆𑀲𑀺𑀓𑀪𑀺𑀓𑁆𑀔𑀼𑀓𑀸𑀮𑀸 𑀯𑀼𑀢𑁆𑀢𑀁. 𑀫𑀳𑀸𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀁 𑀅𑀝𑁆𑀞𑀸𑀭𑀲 𑀯𑀲𑁆𑀲𑀲𑀸𑀫𑀡𑁂𑀭𑀓𑀸𑀮𑁂 𑀯𑀼𑀢𑁆𑀢𑀁. 𑀘𑀽𑀴𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀁 𑀅𑀯𑀲𑁆𑀲𑀺𑀓𑀪𑀺𑀓𑁆𑀔𑀼𑀓𑀸𑀮𑁂 𑀯𑀼𑀢𑁆𑀢𑀁. 𑀓𑀼𑀫𑀸𑀭𑀓𑀧𑀜𑁆𑀳𑀜𑁆𑀘 𑀇𑀤𑀜𑁆𑀘 𑀅𑀫𑁆𑀩𑀮𑀝𑁆𑀞𑀺𑀓𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀁 𑀲𑀢𑁆𑀢𑀯𑀲𑁆𑀲𑀺𑀓𑀲𑀸𑀫𑀡𑁂𑀭𑀓𑀸𑀮𑁂 𑀯𑀼𑀢𑁆𑀢𑀁. 𑀢𑁂𑀲𑀼 𑀭𑀸𑀳𑀼𑀮𑀲𑀼𑀢𑁆𑀢𑀁 𑀅𑀪𑀺𑀡𑁆𑀳𑁄𑀯𑀸𑀤𑀢𑁆𑀣𑀁, 𑀭𑀸𑀳𑀼𑀮𑀲𑀁𑀬𑀼𑀢𑁆𑀢𑀁, 𑀣𑁂𑀭𑀲𑁆𑀲 𑀯𑀺𑀧𑀲𑁆𑀲𑀦𑀸𑀕𑀩𑁆𑀪𑀕𑀳𑀡𑀢𑁆𑀣𑀁, 𑀫𑀳𑀸𑀭𑀸𑀳𑀼𑀮𑁄𑀯𑀸𑀤𑀁 𑀕𑁂𑀳𑀲𑁆𑀲𑀺𑀢𑀙𑀦𑁆𑀤𑀭𑀸𑀕𑀯𑀺𑀦𑁄𑀤𑀦𑀢𑁆𑀣𑀁, 𑀘𑀽𑀴𑀭𑀸𑀳𑀼𑀮𑁄𑀯𑀸𑀤𑀁 𑀣𑁂𑀭𑀲𑁆𑀲 𑀧𑀜𑁆𑀘𑀤𑀲-𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬-𑀥𑀫𑁆𑀫𑀧𑀭𑀺𑀧𑀸𑀓𑀓𑀸𑀮𑁂 𑀅𑀭𑀳𑀢𑁆𑀢𑀕𑀸𑀳𑀸𑀧𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀇𑀤𑀜𑁆𑀘 ¶ 𑀧𑀦 𑀲𑀦𑁆𑀥𑀸𑀬 𑀭𑀸𑀳𑀼𑀮𑀢𑁆𑀣𑁂𑀭𑁄 𑀪𑀺𑀓𑁆𑀔𑀼𑀲𑀗𑁆𑀖𑀫𑀚𑁆𑀛𑁂 𑀢𑀣𑀸𑀕𑀢𑀲𑁆𑀲 𑀕𑀼𑀡𑀁 𑀓𑀣𑁂𑀦𑁆𑀢𑁄 𑀇𑀤𑀫𑀸𑀳 𑁋

‘‘𑀓𑀺𑀓𑀻𑀯 𑀩𑀻𑀚𑀁 𑀭𑀓𑁆𑀔𑁂𑀬𑁆𑀬, 𑀘𑀸𑀫𑀭𑀻 𑀯𑀸𑀮𑀫𑀼𑀢𑁆𑀢𑀫𑀁;

𑀦𑀺𑀧𑀓𑁄 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀫𑀫𑀁 𑀭𑀓𑁆𑀔𑀺 𑀢𑀣𑀸𑀕𑀢𑁄’’𑀢𑀺. (𑀅𑀧. 𑁧.𑁨.𑁮𑁩);

𑀲𑀸𑀫𑀡𑁂𑀭𑀧𑀜𑁆𑀳𑀁 𑀅𑀬𑀼𑀢𑁆𑀢𑀯𑀘𑀦𑀧𑀳𑀸𑀦𑀢𑁆𑀣𑀁, 𑀇𑀤𑀁 𑀅𑀫𑁆𑀩𑀮𑀝𑁆𑀞𑀺𑀓𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀁 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀲𑁆𑀲 𑀅𑀓𑀭𑀡𑀢𑁆𑀣𑀁 𑀯𑀼𑀢𑁆𑀢𑀁.

𑀢𑀢𑁆𑀣 ¶ 𑀧𑀲𑁆𑀲𑀲𑀺 𑀦𑁄𑀢𑀺 𑀧𑀲𑁆𑀲𑀲𑀺 𑀦𑀼. 𑀧𑀭𑀺𑀢𑁆𑀢𑀦𑁆𑀢𑀺 𑀣𑁄𑀓𑀁. 𑀲𑀸𑀫𑀜𑁆𑀜𑀦𑁆𑀢𑀺 𑀲𑀫𑀡𑀥𑀫𑁆𑀫𑁄. 𑀦𑀺𑀓𑁆𑀓𑀼𑀚𑁆𑀚𑀺𑀢𑁆𑀯𑀸𑀢𑀺 𑀅𑀥𑁄𑀫𑀼𑀔𑀁 𑀓𑀢𑁆𑀯𑀸. 𑀉𑀓𑁆𑀓𑀼𑀚𑁆𑀚𑀺𑀢𑁆𑀯𑀸𑀢𑀺 𑀉𑀢𑁆𑀢𑀸𑀦𑀁 𑀓𑀢𑁆𑀯𑀸.

𑁧𑁦𑁮. 𑀲𑁂𑀬𑁆𑀬𑀣𑀸𑀧𑀺, 𑀭𑀸𑀳𑀼𑀮, 𑀭𑀜𑁆𑀜𑁄 𑀦𑀸𑀕𑁄𑀢𑀺 𑀅𑀬𑀁 𑀉𑀧𑀫𑀸 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀲𑀁𑀯𑀭𑀭𑀳𑀺𑀢𑀲𑁆𑀲 𑀑𑀧𑀫𑁆𑀫𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸. 𑀢𑀢𑁆𑀣 𑀈𑀲𑀸𑀤𑀦𑁆𑀢𑁄𑀢𑀺 𑀭𑀣𑀻𑀲𑀸𑀲𑀤𑀺𑀲𑀤𑀦𑁆𑀢𑁄 ¶ . 𑀉𑀭𑀼𑀴𑁆𑀳𑀯𑀸𑀢𑀺 𑀅𑀪𑀺𑀯𑀟𑁆𑀠𑀺𑀢𑁄 𑀆𑀭𑁄𑀳𑀲𑀫𑁆𑀧𑀦𑁆𑀦𑁄. 𑀅𑀪𑀺𑀚𑀸𑀢𑁄𑀢𑀺 𑀲𑀼𑀚𑀸𑀢𑁄 𑀚𑀸𑀢𑀺𑀲𑀫𑁆𑀧𑀦𑁆𑀦𑁄. 𑀲𑀗𑁆𑀕𑀸𑀫𑀸𑀯𑀘𑀭𑁄𑀢𑀺 𑀲𑀗𑁆𑀕𑀸𑀫𑀁 𑀑𑀢𑀺𑀡𑁆𑀡𑀧𑀼𑀩𑁆𑀩𑁄. 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀆𑀕𑀢𑀸𑀕𑀢𑁂 𑀧𑀯𑀝𑁆𑀝𑁂𑀦𑁆𑀢𑁄 𑀖𑀸𑀢𑁂𑀢𑀺. 𑀧𑀼𑀭𑀢𑁆𑀣𑀺𑀫𑀓𑀸𑀬𑀸𑀤𑀻𑀲𑀼 𑀧𑀦 𑀧𑀼𑀭𑀢𑁆𑀣𑀺𑀫𑀓𑀸𑀬𑁂𑀦 𑀢𑀸𑀯 𑀧𑀝𑀺𑀲𑁂𑀦𑀸𑀬 𑀨𑀮𑀓𑀓𑁄𑀝𑁆𑀞𑀓𑀫𑀼𑀡𑁆𑀟𑀧𑀸𑀓𑀸𑀭𑀸𑀤𑀬𑁄 𑀧𑀸𑀢𑁂𑀢𑀺, 𑀢𑀣𑀸 𑀧𑀘𑁆𑀙𑀺𑀫𑀓𑀸𑀬𑁂𑀦. 𑀲𑀻𑀲𑁂𑀦 𑀓𑀫𑁆𑀫𑀁 𑀦𑀸𑀫 𑀦𑀺𑀬𑀫𑁂𑀢𑁆𑀯𑀸 𑀏𑀢𑀁 𑀧𑀤𑁂𑀲𑀁 𑀫𑀤𑁆𑀤𑀺𑀲𑁆𑀲𑀸𑀫𑀻𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀢𑀺, 𑀏𑀢𑁆𑀢𑀓𑁂𑀦 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀤𑁆𑀯𑁂𑀥𑀸 𑀪𑀺𑀚𑁆𑀚𑀢𑀺. 𑀓𑀡𑁆𑀡𑁂𑀳𑀺 𑀓𑀫𑁆𑀫𑀁 𑀦𑀸𑀫 𑀆𑀕𑀢𑀸𑀕𑀢𑁂 𑀲𑀭𑁂 𑀓𑀡𑁆𑀡𑁂𑀳𑀺 𑀧𑀳𑀭𑀺𑀢𑁆𑀯𑀸 𑀧𑀸𑀢𑀦𑀁. 𑀤𑀦𑁆𑀢𑁂𑀳𑀺 𑀓𑀫𑁆𑀫𑀁 𑀦𑀸𑀫 𑀧𑀝𑀺𑀳𑀢𑁆𑀣𑀺𑀅𑀲𑁆𑀲𑀳𑀢𑁆𑀣𑀸𑀭𑁄𑀳𑀅𑀲𑁆𑀲𑀸𑀭𑁄𑀳𑀧𑀤𑀸𑀤𑀻𑀦𑀁 𑀯𑀺𑀚𑁆𑀛𑀦𑀁. 𑀦𑀗𑁆𑀕𑀼𑀝𑁆𑀞𑁂𑀦 𑀓𑀫𑁆𑀫𑀁 ¶ 𑀦𑀸𑀫 𑀦𑀗𑁆𑀕𑀼𑀝𑁆𑀞𑁂 𑀩𑀦𑁆𑀥𑀸𑀬 𑀤𑀻𑀖𑀸𑀲𑀺𑀮𑀝𑁆𑀞𑀺𑀬𑀸 𑀯𑀸 𑀅𑀬𑀫𑀼𑀲𑀮𑁂𑀦 𑀯𑀸 𑀙𑁂𑀤𑀦𑀪𑁂𑀤𑀦𑀁. 𑀭𑀓𑁆𑀔𑀢𑁂𑀯 𑀲𑁄𑀡𑁆𑀟𑀦𑁆𑀢𑀺 𑀲𑁄𑀡𑁆𑀟𑀁 𑀧𑀦 𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀭𑀓𑁆𑀔𑀢𑀺.

𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀲 𑀳𑀢𑁆𑀣𑀺𑀦𑁄 𑀓𑀭𑀡𑁂. 𑀅𑀧𑀭𑀺𑀘𑁆𑀘𑀢𑁆𑀢𑀦𑁆𑀢𑀺 𑀅𑀦𑀺𑀲𑁆𑀲𑀝𑁆𑀞𑀁, 𑀧𑀭𑁂𑀲𑀁 𑀚𑀬𑀁 𑀅𑀫𑁆𑀳𑀸𑀓𑀜𑁆𑀘 𑀧𑀭𑀸𑀚𑀬𑀁 𑀧𑀲𑁆𑀲𑀻𑀢𑀺 𑀫𑀜𑁆𑀜𑀢𑀺. 𑀲𑁄𑀡𑁆𑀟𑀸𑀬𑀧𑀺 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀅𑀬𑀫𑀼𑀕𑁆𑀕𑀭𑀁 𑀯𑀸 𑀔𑀤𑀺𑀭𑀫𑀼𑀲𑀮𑀁 𑀯𑀸 𑀕𑀳𑁂𑀢𑁆𑀯𑀸 𑀲𑀫𑀦𑁆𑀢𑀸 𑀅𑀝𑁆𑀞𑀸𑀭𑀲𑀳𑀢𑁆𑀣𑀝𑁆𑀞𑀸𑀦𑀁 𑀫𑀤𑁆𑀤𑀢𑀺. 𑀧𑀭𑀺𑀘𑁆𑀘𑀢𑁆𑀢𑀦𑁆𑀢𑀺 𑀯𑀺𑀲𑁆𑀲𑀝𑁆𑀞𑀁, 𑀇𑀤𑀸𑀦𑀺 𑀳𑀢𑁆𑀣𑀺𑀬𑁄𑀥𑀸𑀤𑀻𑀲𑀼 𑀦 𑀓𑀼𑀢𑁄𑀘𑀺 𑀪𑀸𑀬𑀢𑀺, 𑀅𑀫𑁆𑀳𑀸𑀓𑀁 𑀚𑀬𑀁 𑀧𑀭𑁂𑀲𑀜𑁆𑀘 𑀧𑀭𑀸𑀚𑀬𑀁 𑀧𑀲𑁆𑀲𑀻𑀢𑀺 𑀫𑀜𑁆𑀜𑀢𑀺. 𑀦𑀸𑀳𑀁 𑀢𑀲𑁆𑀲 𑀓𑀺𑀜𑁆𑀘𑀺 𑀧𑀸𑀧𑀦𑁆𑀢𑀺 𑀢𑀲𑁆𑀲 𑀤𑀼𑀓𑁆𑀓𑀝𑀸𑀤𑀺𑀆𑀧𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑁂 𑀯𑀸 𑀫𑀸𑀢𑀼𑀖𑀸𑀢𑀓𑀸𑀤𑀺𑀓𑀫𑁆𑀫𑁂𑀲𑀼 𑀯𑀸 𑀓𑀺𑀜𑁆𑀘𑀺 𑀧𑀸𑀧𑀁 𑀅𑀓𑀢𑁆𑀢𑀩𑁆𑀩𑀁 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀢𑀺𑀳 𑀢𑁂𑀢𑀺 𑀬𑀲𑁆𑀫𑀸 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑀺𑀦𑁄 𑀅𑀓𑀢𑁆𑀢𑀩𑁆𑀩𑀁 𑀧𑀸𑀧𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀬𑀸 𑀳𑀲𑀸𑀬𑀧𑀺 𑀤𑀯𑀓𑀫𑁆𑀬𑀢𑀸𑀬𑀧𑀺 𑀫𑀼𑀲𑀸 𑀦 𑀪𑀡𑀺𑀲𑁆𑀲𑀸𑀫𑀻𑀢𑀺 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀧𑀘𑁆𑀘𑀯𑁂𑀓𑁆𑀔𑀡𑀢𑁆𑀣𑁄𑀢𑀺 𑀑𑀮𑁄𑀓𑀦𑀢𑁆𑀣𑁄, 𑀬𑀁 𑀫𑀼𑀔𑁂 𑀯𑀚𑁆𑀚𑀁 𑀳𑁄𑀢𑀺, 𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸𑀢𑀺 𑀑𑀮𑁄𑀓𑁂𑀢𑁆𑀯𑀸 𑀑𑀮𑁄𑀓𑁂𑀢𑁆𑀯𑀸.

𑁧𑁦𑁯. 𑀲𑀲𑀓𑁆𑀓𑀁 𑀦 𑀓𑀭𑀡𑀻𑀬𑀦𑁆𑀢𑀺 𑀏𑀓𑀁𑀲𑁂𑀦𑁂𑀯 𑀦 𑀓𑀸𑀢𑀩𑁆𑀩𑀁. 𑀧𑀝𑀺𑀲𑀁𑀳𑀭𑁂𑀬𑁆𑀬𑀸𑀲𑀻𑀢𑀺 𑀦𑀺𑀯𑀢𑁆𑀢𑁂𑀬𑁆𑀬𑀸𑀲𑀺 𑀫𑀸 𑀓𑀭𑁂𑀬𑁆𑀬𑀸𑀲𑀺. 𑀅𑀦𑀼𑀧𑀤𑀚𑁆𑀚𑁂𑀬𑁆𑀬𑀸𑀲𑀻𑀢𑀺 𑀅𑀦𑀼𑀧𑀤𑁂𑀬𑁆𑀬𑀸𑀲𑀺 𑀉𑀧𑀢𑁆𑀣𑀫𑁆𑀪𑁂𑀬𑁆𑀬𑀸𑀲𑀺 𑀧𑀼𑀦𑀧𑁆𑀧𑀼𑀦𑀁 𑀓𑀭𑁂𑀬𑁆𑀬𑀸𑀲𑀺. 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀻𑀢𑀺 𑀭𑀢𑁆𑀢𑀺𑀜𑁆𑀘 𑀤𑀺𑀯𑀜𑁆𑀘 𑀲𑀺𑀓𑁆𑀔𑀫𑀸𑀦𑁄.

𑁧𑁧𑁧. 𑀅𑀝𑁆𑀝𑀻𑀬𑀺𑀢𑀩𑁆𑀩𑀦𑁆𑀢𑀺 ¶ ¶ 𑀅𑀝𑁆𑀝𑁂𑀦 𑀧𑀻𑀴𑀺𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀳𑀭𑀸𑀬𑀺𑀢𑀩𑁆𑀩𑀦𑁆𑀢𑀺 𑀮𑀚𑁆𑀚𑀺𑀢𑀩𑁆𑀩𑀁. 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀕𑀽𑀣𑀁 𑀤𑀺𑀲𑁆𑀯𑀸 𑀯𑀺𑀬 𑀚𑀺𑀕𑀼𑀘𑁆𑀙𑀸 𑀉𑀧𑁆𑀧𑀸𑀤𑁂𑀢𑀩𑁆𑀩𑀸. 𑀫𑀦𑁄𑀓𑀫𑁆𑀫𑀲𑁆𑀲 𑀧𑀦 𑀅𑀤𑁂𑀲𑀦𑀸𑀯𑀢𑁆𑀣𑀼𑀓𑀢𑁆𑀢𑀸 𑀇𑀥 𑀤𑁂𑀲𑁂𑀢𑀩𑁆𑀩𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀓𑀺𑀢𑁆𑀢𑀓𑁂 𑀧𑀦 𑀞𑀸𑀦𑁂 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀸𑀦𑀺 ¶ 𑀲𑁄𑀥𑁂𑀢𑀩𑁆𑀩𑀸𑀦𑀺, 𑀓𑀺𑀢𑁆𑀢𑀓𑁂 𑀫𑀦𑁄𑀓𑀫𑁆𑀫𑀦𑁆𑀢𑀺. 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀸𑀦𑀺 𑀢𑀸𑀯 𑀏𑀓𑀲𑁆𑀫𑀺𑀁 𑀧𑀼𑀭𑁂𑀪𑀢𑁆𑀢𑁂𑀬𑁂𑀯 𑀲𑁄𑀥𑁂𑀢𑀩𑁆𑀩𑀸𑀦𑀺. 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁂𑀦 𑀳𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁 ‘‘𑀅𑀭𑀼𑀡𑀼𑀕𑁆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦𑀺𑀲𑀚𑁆𑀚𑀸 𑀅𑀢𑁆𑀣𑀺 𑀦𑀼 𑀔𑁄 𑀫𑁂 𑀇𑀫𑀲𑁆𑀫𑀺𑀁 𑀅𑀦𑁆𑀢𑀭𑁂 𑀧𑀭𑁂𑀲𑀁 𑀅𑀧𑁆𑀧𑀺𑀬𑀁 𑀓𑀸𑀬𑀓𑀫𑁆𑀫𑀁 𑀯𑀸 𑀯𑀘𑀻𑀓𑀫𑁆𑀫𑀁 𑀯𑀸’’𑀢𑀺. 𑀲𑀘𑁂 𑀅𑀢𑁆𑀣𑀻𑀢𑀺 𑀚𑀸𑀦𑀸𑀢𑀺, 𑀤𑁂𑀲𑀦𑀸𑀬𑀼𑀢𑁆𑀢𑀁 𑀤𑁂𑀲𑁂𑀢𑀩𑁆𑀩𑀁, 𑀆𑀯𑀺𑀓𑀭𑀡𑀬𑀼𑀢𑁆𑀢𑀁 𑀆𑀯𑀺𑀓𑀸𑀢𑀩𑁆𑀩𑀁. 𑀲𑀘𑁂 𑀦𑀢𑁆𑀣𑀺, 𑀢𑁂𑀦𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀯𑀺𑀳𑀸𑀢𑀩𑁆𑀩𑀁. 𑀫𑀦𑁄𑀓𑀫𑁆𑀫𑀁 𑀧𑀦 𑀏𑀢𑀲𑁆𑀫𑀺𑀁 𑀧𑀺𑀡𑁆𑀟𑀧𑀸𑀢𑀧𑀭𑀺𑀬𑁂𑀲𑀦𑀝𑁆𑀞𑀸𑀦𑁂 𑀲𑁄𑀥𑁂𑀢𑀩𑁆𑀩𑀁. 𑀓𑀣𑀁? ‘‘𑀅𑀢𑁆𑀣𑀺 𑀦𑀼 𑀔𑁄 𑀫𑁂 𑀅𑀚𑁆𑀚 𑀧𑀺𑀡𑁆𑀟𑀧𑀸𑀢𑀧𑀭𑀺𑀬𑁂𑀲𑀦𑀝𑁆𑀞𑀸𑀦𑁂 𑀭𑀽𑀧𑀸𑀤𑀻𑀲𑀼 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀧𑀝𑀺𑀖𑀁 𑀯𑀸’’𑀢𑀺? 𑀲𑀘𑁂 𑀅𑀢𑁆𑀣𑀺, ‘‘𑀧𑀼𑀦 𑀦 𑀏𑀯𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑁂𑀦𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀲𑀘𑁂 𑀦𑀢𑁆𑀣𑀺, 𑀢𑁂𑀦𑁂𑀯 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀯𑀺𑀳𑀸𑀢𑀩𑁆𑀩𑀁.

𑁧𑁧𑁨. 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸𑀢𑀺 𑀩𑀼𑀤𑁆𑀥𑀸 𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀯𑀸 𑀢𑀣𑀸𑀕𑀢𑀲𑀸𑀯𑀓𑀸 𑀯𑀸. 𑀢𑀲𑁆𑀫𑀸𑀢𑀺𑀳𑀸𑀢𑀺 𑀬𑀲𑁆𑀫𑀸 𑀅𑀢𑀻𑀢𑁂𑀧𑀺 𑀏𑀯𑀁 𑀧𑀭𑀺𑀲𑁄𑀥𑁂𑀲𑀼𑀁, 𑀅𑀦𑀸𑀕𑀢𑁂𑀧𑀺 𑀧𑀭𑀺𑀲𑁄𑀥𑁂𑀲𑁆𑀲𑀦𑁆𑀢𑀺, 𑀏𑀢𑀭𑀳𑀺𑀧𑀺 𑀧𑀭𑀺𑀲𑁄𑀥𑁂𑀦𑁆𑀢𑀺, 𑀢𑀲𑁆𑀫𑀸 𑀢𑀼𑀫𑁆𑀳𑁂𑀳𑀺𑀧𑀺 𑀢𑁂𑀲𑀁 𑀅𑀦𑀼𑀲𑀺𑀓𑁆𑀔𑀦𑁆𑀢𑁂𑀳𑀺 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀇𑀫𑀁 𑀧𑀦 𑀤𑁂𑀲𑀦𑀁 𑀪𑀕𑀯𑀸 𑀬𑀸𑀯 𑀪𑀯𑀕𑁆𑀕𑀸 𑀉𑀲𑁆𑀲𑀺𑀢𑀲𑁆𑀲 𑀭𑀢𑀦𑀭𑀸𑀲𑀺𑀦𑁄 𑀬𑁄𑀚𑀦𑀺𑀬𑀫𑀡𑀺𑀓𑁆𑀔𑀦𑁆𑀥𑁂𑀦 𑀓𑀽𑀝𑀁 𑀕𑀡𑁆𑀳𑀦𑁆𑀢𑁄 𑀯𑀺𑀬 𑀦𑁂𑀬𑁆𑀬𑀧𑀼𑀕𑁆𑀕𑀮𑀯𑀲𑁂𑀦 𑀧𑀭𑀺𑀦𑀺𑀝𑁆𑀞𑀸𑀧𑁂𑀲𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀅𑀫𑁆𑀩𑀮𑀝𑁆𑀞𑀺𑀓𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀫𑀳𑀸𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁩. 𑀏𑀯𑀁 ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀁. 𑀢𑀢𑁆𑀣 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀻𑀢𑀺 𑀤𑀲𑁆𑀲𑀦𑀁 𑀅𑀯𑀺𑀚𑀳𑀺𑀢𑁆𑀯𑀸 𑀕𑀫𑀦𑀁 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀓𑀢𑁆𑀯𑀸 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀇𑀭𑀺𑀬𑀸𑀧𑀣𑀸𑀦𑀼𑀩𑀦𑁆𑀥𑀦𑁂𑀦 𑀅𑀦𑀼𑀩𑀦𑁆𑀥𑀺. 𑀢𑀤𑀸 𑀳𑀺 𑀪𑀕𑀯𑀸 𑀧𑀤𑁂 𑀧𑀤𑀁 𑀦𑀺𑀓𑁆𑀔𑀺𑀧𑀦𑁆𑀢𑁄 𑀯𑀺𑀮𑀸𑀲𑀺𑀢𑀕𑀫𑀦𑁂𑀦 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀘𑁆𑀙𑀢𑀺, 𑀭𑀸𑀳𑀼𑀮𑀢𑁆𑀣𑁂𑀭𑁄 𑀤𑀲𑀩𑀮𑀲𑁆𑀲 𑀧𑀤𑀸𑀦𑀼𑀧𑀤𑀺𑀓𑁄 𑀳𑀼𑀢𑁆𑀯𑀸 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄.

𑀢𑀢𑁆𑀣 𑀪𑀕𑀯𑀸 𑀲𑀼𑀧𑀼𑀧𑁆𑀨𑀺𑀢𑀲𑀸𑀮𑀯𑀦𑀫𑀚𑁆𑀛𑀕𑀢𑁄 𑀲𑀼𑀪𑀽𑀫𑀺𑀑𑀢𑀭𑀡𑀢𑁆𑀣𑀸𑀬 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑀯𑀭𑀯𑀸𑀭𑀡𑁄 𑀯𑀺𑀬 𑀯𑀺𑀭𑁄𑀘𑀺𑀢𑁆𑀣, 𑀭𑀸𑀳𑀼𑀮𑀪𑀤𑁆𑀤𑁄 𑀘 𑀯𑀭𑀯𑀸𑀭𑀡𑀲𑁆𑀲 𑀧𑀘𑁆𑀙𑀢𑁄 ¶ 𑀦𑀺𑀓𑁆𑀔𑀦𑁆𑀢𑀕𑀚𑀧𑁄𑀢𑀓𑁄 𑀯𑀺𑀬. 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀫𑀡𑀺𑀕𑀼𑀳𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑁄𑀘𑀭𑀁 𑀧𑀝𑀺𑀧𑀦𑁆𑀦𑁄 𑀓𑁂𑀲𑀭𑀲𑀻𑀳𑁄 𑀯𑀺𑀬, 𑀭𑀸𑀳𑀼𑀮𑀪𑀤𑁆𑀤𑁄 𑀘 𑀲𑀻𑀳𑀫𑀺𑀕𑀭𑀸𑀚𑀸𑀦𑀁 𑀅𑀦𑀼𑀩𑀦𑁆𑀥𑀦𑁆𑀢𑁄 𑀦𑀺𑀓𑁆𑀔𑀦𑁆𑀢𑀲𑀻𑀳𑀧𑁄𑀢𑀓𑁄 𑀯𑀺𑀬. 𑀪𑀕𑀯𑀸 𑀫𑀡𑀺𑀧𑀩𑁆𑀩𑀢𑀲𑀲𑁆𑀲𑀺𑀭𑀺𑀓𑀯𑀦𑀲𑀡𑁆𑀟𑀢𑁄 𑀤𑀸𑀞𑀩𑀮𑁄 𑀫𑀳𑀸𑀩𑁆𑀬𑀕𑁆𑀖𑁄 𑀯𑀺𑀬, 𑀭𑀸𑀳𑀼𑀮𑀪𑀤𑁆𑀤𑁄 𑀘 𑀩𑁆𑀬𑀕𑁆𑀖𑀭𑀸𑀚𑀸𑀦𑀁 𑀅𑀦𑀼𑀩𑀦𑁆𑀥𑀩𑁆𑀬𑀕𑁆𑀖𑀧𑁄𑀢𑀓𑁄 𑀯𑀺𑀬. 𑀪𑀕𑀯𑀸 𑀲𑀺𑀫𑁆𑀩𑀮𑀺𑀤𑀸𑀬𑀢𑁄 𑀦𑀺𑀓𑁆𑀔𑀦𑁆𑀢𑀲𑀼𑀧𑀡𑁆𑀡𑀭𑀸𑀚𑀸 𑀯𑀺𑀬, 𑀭𑀸𑀳𑀼𑀮𑀪𑀤𑁆𑀤𑁄 𑀘 𑀲𑀼𑀧𑀡𑁆𑀡𑀭𑀸𑀚𑀲𑁆𑀲 𑀧𑀘𑁆𑀙𑀢𑁄 𑀦𑀺𑀓𑁆𑀔𑀦𑁆𑀢𑀲𑀼𑀧𑀡𑁆𑀡𑀧𑁄𑀢𑀓𑁄 𑀯𑀺𑀬. 𑀪𑀕𑀯𑀸 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑀢𑁄 𑀕𑀕𑀦𑀢𑀮𑀁 𑀧𑀓𑁆𑀔𑀦𑁆𑀤𑀲𑀼𑀯𑀡𑁆𑀡𑀳𑀁𑀲𑀭𑀸𑀚𑀸 𑀯𑀺𑀬, 𑀭𑀸𑀳𑀼𑀮𑀪𑀤𑁆𑀤𑁄 𑀘 𑀳𑀁𑀲𑀸𑀥𑀺𑀧𑀢𑀺𑀁 𑀅𑀦𑀼𑀧𑀓𑁆𑀔𑀦𑁆𑀤𑀳𑀁𑀲𑀧𑁄𑀢𑀓𑁄 𑀯𑀺𑀬. 𑀪𑀕𑀯𑀸 ¶ 𑀫𑀳𑀸𑀲𑀭𑀁 𑀅𑀚𑁆𑀛𑁄𑀕𑀸𑀴𑁆𑀳𑀸 𑀲𑀼𑀯𑀡𑁆𑀡𑀫𑀳𑀸𑀦𑀸𑀯𑀸 𑀯𑀺𑀬, 𑀭𑀸𑀳𑀼𑀮𑀪𑀤𑁆𑀤𑁄 𑀘 𑀲𑀼𑀯𑀡𑁆𑀡𑀦𑀸𑀯𑀁 𑀧𑀘𑁆𑀙𑀸 𑀅𑀦𑀼𑀩𑀦𑁆𑀥𑀦𑀸𑀯𑀸𑀧𑁄𑀢𑀓𑁄 𑀯𑀺𑀬. 𑀪𑀕𑀯𑀸 𑀘𑀓𑁆𑀓𑀭𑀢𑀦𑀸𑀦𑀼𑀪𑀸𑀯𑁂𑀦 𑀕𑀕𑀦𑀢𑀮𑁂 𑀲𑀫𑁆𑀧𑀬𑀸𑀢𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀯𑀺𑀬, 𑀭𑀸𑀳𑀼𑀮𑀪𑀤𑁆𑀤𑁄 𑀘 𑀭𑀸𑀚𑀸𑀦𑀁 𑀅𑀦𑀼𑀲𑀫𑁆𑀧𑀬𑀸𑀢𑀧𑀭𑀺𑀡𑀸𑀬𑀓𑀭𑀢𑀦𑀁 𑀯𑀺𑀬. 𑀪𑀕𑀯𑀸 𑀯𑀺𑀕𑀢𑀯𑀮𑀸𑀳𑀓𑀁 𑀦𑀪𑀁 𑀧𑀝𑀺𑀧𑀦𑁆𑀦𑀢𑀸𑀭𑀓𑀭𑀸𑀚𑀸 𑀯𑀺𑀬, 𑀭𑀸𑀳𑀼𑀮𑀪𑀤𑁆𑀤𑁄 𑀘 𑀢𑀸𑀭𑀓𑀸𑀥𑀺𑀧𑀢𑀺𑀦𑁄 𑀅𑀦𑀼𑀫𑀕𑁆𑀕𑀧𑀝𑀺𑀧𑀦𑁆𑀦𑀸 𑀧𑀭𑀺𑀲𑀼𑀤𑁆𑀥𑀑𑀲𑀥𑀺𑀢𑀸𑀭𑀓𑀸 𑀯𑀺𑀬.

𑀪𑀕𑀯𑀸𑀧𑀺 𑀫𑀳𑀸𑀲𑀫𑁆𑀫𑀢𑀧𑀯𑁂𑀡𑀺𑀬𑀁 𑀑𑀓𑁆𑀓𑀸𑀓𑀭𑀸𑀚𑀯𑀁𑀲𑁂 𑀚𑀸𑀢𑁄, 𑀭𑀸𑀳𑀼𑀮𑀪𑀤𑁆𑀤𑁄𑀧𑀺. 𑀪𑀕𑀯𑀸𑀧𑀺 𑀲𑀗𑁆𑀔𑁂 𑀧𑀓𑁆𑀔𑀺𑀢𑁆𑀢𑀔𑀻𑀭𑀲𑀤𑀺𑀲𑁄 𑀲𑀼𑀧𑀭𑀺𑀲𑀼𑀤𑁆𑀥𑀚𑀸𑀢𑀺𑀔𑀢𑁆𑀢𑀺𑀬𑀓𑀼𑀮𑁂 𑀚𑀸𑀢𑁄, 𑀭𑀸𑀳𑀼𑀮𑀪𑀤𑁆𑀤𑁄𑀧𑀺. 𑀪𑀕𑀯𑀸𑀧𑀺 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁄, 𑀭𑀸𑀳𑀼𑀮𑀪𑀤𑁆𑀤𑁄𑀧𑀺. 𑀪𑀕𑀯𑀢𑁄𑀧𑀺 𑀲𑀭𑀻𑀭𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑀁 𑀤𑁂𑀯𑀦𑀕𑀭𑁂𑀲𑀼 𑀲𑀫𑀼𑀲𑁆𑀲𑀺𑀢𑀭𑀢𑀦𑀢𑁄𑀭𑀡𑀁 𑀯𑀺𑀬 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑁄 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀯𑀺𑀬 𑀘 𑀅𑀢𑀺𑀫𑀦𑁄𑀳𑀭𑀡𑀁, 𑀭𑀸𑀳𑀼𑀮𑀪𑀤𑁆𑀤𑀲𑁆𑀲𑀸𑀧𑀺. 𑀇𑀢𑀺 𑀤𑁆𑀯𑁂𑀧𑀺 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑀸, 𑀤𑁆𑀯𑁂𑀧𑀺 𑀭𑀸𑀚𑀧𑀩𑁆𑀩𑀚𑀺𑀢𑀸, 𑀤𑁆𑀯𑁂𑀧𑀺 𑀔𑀢𑁆𑀢𑀺𑀬𑀲𑀼𑀔𑀼𑀫𑀸𑀮𑀸, 𑀤𑁆𑀯𑁂𑀧𑀺 ¶ 𑀲𑀼𑀯𑀡𑁆𑀡𑀯𑀡𑁆𑀡𑀸, 𑀤𑁆𑀯𑁂𑀧𑀺 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀸 𑀏𑀓𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑀸 𑀧𑀝𑀺𑀧𑀸𑀝𑀺𑀬𑀸 𑀕𑀘𑁆𑀙𑀦𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀘𑀦𑁆𑀤𑀫𑀡𑁆𑀟𑀮𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑀽𑀭𑀺𑀬𑀫𑀡𑁆𑀟𑀮𑀸𑀦𑀁 𑀤𑁆𑀯𑀺𑀦𑁆𑀦𑀁 𑀲𑀓𑁆𑀓𑀲𑀼𑀬𑀸𑀫𑀲𑀦𑁆𑀢𑀼𑀲𑀺𑀢𑀲𑀼𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀫𑀳𑀸𑀩𑁆𑀭𑀳𑁆𑀫𑀸𑀤𑀻𑀦𑀁 𑀲𑀺𑀭𑀺𑀬𑀸 𑀲𑀺𑀭𑀺𑀁 𑀅𑀪𑀺𑀪𑀯𑀫𑀸𑀦𑀸 𑀯𑀺𑀬 𑀯𑀺𑀭𑁄𑀘𑀺𑀁𑀲𑀼.

𑀢𑀢𑁆𑀭𑀸𑀬𑀲𑁆𑀫𑀸 𑀭𑀸𑀳𑀼𑀮𑁄 𑀪𑀕𑀯𑀢𑁄 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀕𑀘𑁆𑀙𑀦𑁆𑀢𑁄𑀯 𑀧𑀸𑀤𑀢𑀮𑀢𑁄 𑀬𑀸𑀯 𑀉𑀧𑀭𑀺 𑀓𑁂𑀲𑀦𑁆𑀢𑀸 𑀢𑀣𑀸𑀕𑀢𑀁 𑀆𑀮𑁄𑀓𑁂𑀲𑀺. 𑀲𑁄 𑀪𑀕𑀯𑀢𑁄 𑀩𑀼𑀤𑁆𑀥𑀯𑁂𑀲𑀯𑀺𑀮𑀸𑀲𑀁 𑀤𑀺𑀲𑁆𑀯𑀸 ‘‘𑀲𑁄𑀪𑀢𑀺 𑀪𑀕𑀯𑀸 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀯𑀺𑀘𑀺𑀢𑁆𑀢𑀲𑀭𑀻𑀭𑁄 𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑀺𑀢𑁆𑀢𑀢𑀸𑀬 𑀯𑀺𑀧𑁆𑀧𑀓𑀺𑀡𑁆𑀡𑀲𑀼𑀯𑀡𑁆𑀡𑀘𑀼𑀡𑁆𑀡𑀫𑀚𑁆𑀛𑀕𑀢𑁄 𑀯𑀺𑀬, 𑀯𑀺𑀚𑁆𑀚𑀼𑀮𑀢𑀸𑀧𑀭𑀺𑀓𑁆𑀔𑀺𑀢𑁆𑀢𑁄 ¶ 𑀓𑀦𑀓𑀧𑀩𑁆𑀩𑀢𑁄 𑀯𑀺𑀬, 𑀬𑀦𑁆𑀢𑀲𑀼𑀢𑁆𑀢𑀲𑀫𑀸𑀓𑀟𑁆𑀠𑀺𑀢𑀭𑀢𑀦𑀯𑀺𑀘𑀺𑀢𑁆𑀢𑀁 𑀲𑀼𑀯𑀡𑁆𑀡𑀅𑀕𑁆𑀖𑀺𑀓𑀁 𑀯𑀺𑀬, 𑀭𑀢𑁆𑀢𑀧𑀁𑀲𑀼𑀓𑀽𑀮𑀘𑀻𑀯𑀭𑀧𑀝𑀺𑀘𑁆𑀙𑀦𑁆𑀦𑁄𑀧𑀺 𑀭𑀢𑁆𑀢𑀓𑀫𑁆𑀩𑀮𑀧𑀭𑀺𑀓𑁆𑀔𑀺𑀢𑁆𑀢𑀓𑀦𑀓𑀧𑀩𑁆𑀩𑀢𑁄 𑀯𑀺𑀬, 𑀧𑀯𑀸𑀴𑀮𑀢𑀸𑀧𑀝𑀺𑀫𑀡𑁆𑀟𑀺𑀢𑀁 𑀲𑀼𑀯𑀡𑁆𑀡𑀅𑀕𑁆𑀖𑀺𑀓𑀁 𑀯𑀺𑀬 ¶ , 𑀘𑀻𑀦𑀧𑀺𑀝𑁆𑀞𑀘𑀼𑀡𑁆𑀡𑀧𑀽𑀚𑀺𑀢𑀁 𑀲𑀼𑀯𑀡𑁆𑀡𑀘𑁂𑀢𑀺𑀬𑀁 𑀯𑀺𑀬, 𑀮𑀸𑀔𑀸𑀭𑀲𑀸𑀦𑀼𑀮𑀺𑀢𑁆𑀢𑁄 𑀓𑀦𑀓𑀬𑀽𑀧𑁄 𑀯𑀺𑀬, 𑀭𑀢𑁆𑀢𑀯𑀮𑀸𑀳𑀓𑀦𑁆𑀢𑀭𑀢𑁄 𑀢𑀗𑁆𑀔𑀡𑀩𑁆𑀪𑀼𑀕𑁆𑀕𑀢𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬, 𑀅𑀳𑁄 𑀲𑀫𑀢𑀺𑀁𑀲𑀧𑀸𑀭𑀫𑀺𑀢𑀸𑀦𑀼𑀪𑀸𑀯𑀲𑀚𑁆𑀚𑀺𑀢𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀲𑀺𑀭𑀻𑀲𑀫𑁆𑀧𑀢𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀢𑁄 𑀅𑀢𑁆𑀢𑀸𑀦𑀫𑁆𑀧𑀺 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀅𑀳𑀫𑁆𑀧𑀺 𑀲𑁄𑀪𑀸𑀫𑀺. 𑀲𑀘𑁂 𑀪𑀕𑀯𑀸 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀅𑀓𑀭𑀺𑀲𑁆𑀲𑀸, 𑀫𑀬𑁆𑀳𑀁 𑀧𑀭𑀺𑀡𑀸𑀬𑀓𑀝𑁆𑀞𑀸𑀦𑀦𑁆𑀢𑀭𑀁 𑀅𑀤𑀲𑁆𑀲𑀸. 𑀏𑀯𑀁 𑀲𑀦𑁆𑀢𑁂 𑀅𑀢𑀺𑀯𑀺𑀬 𑀚𑀫𑁆𑀩𑀼𑀤𑀻𑀧𑀢𑀮𑀁 𑀅𑀲𑁄𑀪𑀺𑀲𑁆𑀲𑀸’’𑀢𑀺 𑀅𑀢𑁆𑀢𑀪𑀸𑀯𑀁 𑀦𑀺𑀲𑁆𑀲𑀸𑀬 𑀕𑁂𑀳𑀲𑁆𑀲𑀺𑀢𑀁 𑀙𑀦𑁆𑀤𑀭𑀸𑀕𑀁 𑀉𑀧𑁆𑀧𑀸𑀤𑁂𑀲𑀺.

𑀪𑀕𑀯𑀸𑀧𑀺 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄𑀯 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀭𑀺𑀧𑀼𑀡𑁆𑀡𑀘𑁆𑀙𑀯𑀺𑀫𑀁𑀲𑀮𑁄𑀳𑀺𑀢𑁄 𑀤𑀸𑀦𑀺 𑀭𑀸𑀳𑀼𑀮𑀲𑁆𑀲 𑀅𑀢𑁆𑀢𑀪𑀸𑀯𑁄. 𑀭𑀚𑀦𑀻𑀬𑁂𑀲𑀼 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀲𑀼 𑀳𑀺 𑀘𑀺𑀢𑁆𑀢𑀲𑁆𑀲 𑀧𑀓𑁆𑀔𑀦𑁆𑀤𑀦𑀓𑀸𑀮𑁄 𑀚𑀸𑀢𑁄, 𑀓𑀺𑀁 𑀩𑀳𑀼𑀮𑀢𑀸𑀬 𑀦𑀼 𑀔𑁄 𑀭𑀸𑀳𑀼𑀮𑁄 𑀯𑀻𑀢𑀺𑀦𑀸𑀫𑁂𑀢𑀻’’𑀢𑀺. 𑀅𑀣 𑀲𑀳𑀸𑀯𑀚𑁆𑀚𑀦𑁂𑀦𑁂𑀯 𑀧𑀲𑀦𑁆𑀦𑀉𑀤𑀓𑁂 𑀫𑀘𑁆𑀙𑀁 𑀯𑀺𑀬, 𑀧𑀭𑀺𑀲𑀼𑀤𑁆𑀥𑁂 𑀆𑀤𑀸𑀲𑀫𑀡𑁆𑀟𑀮𑁂 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀺𑀬 𑀘 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀁 𑀅𑀤𑁆𑀤𑀲. 𑀤𑀺𑀲𑁆𑀯𑀸𑀯 𑁋 ‘‘𑀅𑀬𑀁 𑀭𑀸𑀳𑀼𑀮𑁄 𑀫𑀬𑁆𑀳𑀁 𑀅𑀢𑁆𑀭𑀚𑁄 𑀳𑀼𑀢𑁆𑀯𑀸 𑀫𑀫 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑁄 ‘𑀅𑀳𑀁 𑀲𑁄𑀪𑀸𑀫𑀺, 𑀫𑀬𑁆𑀳𑀁 𑀯𑀡𑁆𑀡𑀸𑀬𑀢𑀦𑀁 𑀧𑀲𑀦𑁆𑀦’𑀦𑁆𑀢𑀺 𑀅𑀢𑁆𑀢𑀪𑀸𑀯𑀁 𑀦𑀺𑀲𑁆𑀲𑀸𑀬 𑀕𑁂𑀳𑀲𑁆𑀲𑀺𑀢𑀙𑀦𑁆𑀤𑀭𑀸𑀕𑀁 𑀉𑀧𑁆𑀧𑀸𑀤𑁂𑀢𑀺, 𑀅𑀢𑀺𑀢𑁆𑀣𑁂 𑀧𑀓𑁆𑀔𑀦𑁆𑀤𑁄 𑀉𑀧𑁆𑀧𑀣𑀁 𑀧𑀝𑀺𑀧𑀦𑁆𑀦𑁄 𑀅𑀕𑁄𑀘𑀭𑁂 𑀘𑀭𑀢𑀺, 𑀤𑀺𑀲𑀸𑀫𑀽𑀴𑁆𑀳𑀅𑀤𑁆𑀥𑀺𑀓𑁄 𑀯𑀺𑀬 𑀅𑀕𑀦𑁆𑀢𑀩𑁆𑀩𑀁 𑀤𑀺𑀲𑀁 𑀕𑀘𑁆𑀙𑀢𑀺. 𑀅𑀬𑀁 𑀔𑁄 𑀧𑀦𑀲𑁆𑀲 𑀓𑀺𑀮𑁂𑀲𑁄 𑀅𑀩𑁆𑀪𑀦𑁆𑀢𑀭𑁂 𑀯𑀟𑁆𑀠𑀦𑁆𑀢𑁄 𑀅𑀢𑁆𑀢𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀧𑀲𑁆𑀲𑀺𑀢𑀼𑀁 𑀦 𑀤𑀲𑁆𑀲𑀢𑀺, 𑀧𑀭𑀢𑁆𑀣𑀫𑁆𑀧𑀺, 𑀉𑀪𑀬𑀢𑁆𑀣𑀫𑁆𑀧𑀺. 𑀢𑀢𑁄 𑀦𑀺𑀭𑀬𑁂𑀧𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀸𑀧𑁂𑀲𑁆𑀲𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀫𑁆𑀧𑀺, 𑀧𑁂𑀢𑁆𑀢𑀺𑀯𑀺𑀲𑀬𑁂𑀧𑀺, 𑀅𑀲𑀼𑀭𑀓𑀸𑀬𑁂𑀧𑀺, 𑀲𑀫𑁆𑀩𑀸𑀥𑁂𑀧𑀺 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀦𑁆𑀢𑀺 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑀯𑀝𑁆𑀝𑁂 𑀧𑀭𑀺𑀧𑀸𑀢𑁂𑀲𑁆𑀲𑀢𑀺. 𑀅𑀬𑀜𑁆𑀳𑀺 𑁋

𑀅𑀦𑀢𑁆𑀣𑀚𑀦𑀦𑁄 ¶ ¶ 𑀮𑁄𑀪𑁄, 𑀮𑁄𑀪𑁄 𑀘𑀺𑀢𑁆𑀢𑀧𑁆𑀧𑀓𑁄𑀧𑀦𑁄;

𑀪𑀬𑀫𑀦𑁆𑀢𑀭𑀢𑁄 𑀚𑀸𑀢𑀁, 𑀢𑀁 𑀚𑀦𑁄 𑀦𑀸𑀯𑀩𑀼𑀚𑁆𑀛𑀢𑀺.

𑀮𑀼𑀤𑁆𑀥𑁄 𑀅𑀢𑁆𑀣𑀁 𑀦 𑀚𑀸𑀦𑀸𑀢𑀺, 𑀮𑀼𑀤𑁆𑀥𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀢𑀺;

𑀅𑀦𑁆𑀥𑀢𑀫𑀁 𑀢𑀤𑀸 𑀳𑁄𑀢𑀺, 𑀬𑀁 𑀮𑁄𑀪𑁄 𑀲𑀳𑀢𑁂 𑀦𑀭𑀁. (𑀇𑀢𑀺𑀯𑀼. 𑁮𑁮) 𑁋

𑀬𑀣𑀸 𑀔𑁄 𑀧𑀦 𑀅𑀦𑁂𑀓𑀭𑀢𑀦𑀧𑀽𑀭𑀸 𑀫𑀳𑀸𑀦𑀸𑀯𑀸 𑀪𑀺𑀦𑁆𑀦𑀨𑀮𑀓𑀦𑁆𑀢𑀭𑁂𑀦 𑀉𑀤𑀓𑀁 𑀆𑀤𑀺𑀬𑀫𑀸𑀦𑀸 𑀫𑀼𑀳𑀼𑀢𑁆𑀢𑀫𑁆𑀧𑀺 𑀦 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑀸 𑀳𑁄𑀢𑀺, 𑀯𑁂𑀕𑁂𑀦𑀲𑁆𑀲𑀸 𑀯𑀺𑀯𑀭𑀁 𑀧𑀺𑀤𑀳𑀺𑀢𑀼𑀁 𑀯𑀝𑁆𑀝𑀢𑀺, 𑀏𑀯𑀫𑁂𑀯𑀁 𑀅𑀬𑀫𑁆𑀧𑀺 𑀦 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑁄. 𑀬𑀸𑀯𑀲𑁆𑀲 𑀅𑀬𑀁 𑀓𑀺𑀮𑁂𑀲𑁄 𑀅𑀩𑁆𑀪𑀦𑁆𑀢𑀭𑁂 𑀲𑀻𑀮𑀭𑀢𑀦𑀸𑀤𑀻𑀦𑀺 𑀦 𑀯𑀺𑀦𑀸𑀲𑁂𑀢𑀺, 𑀢𑀸𑀯𑀤𑁂𑀯 𑀦𑀁 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀅𑀚𑁆𑀛𑀸𑀲𑀬𑀫𑀓𑀸𑀲𑀺. 𑀏𑀯𑀭𑀽𑀧𑁂𑀲𑀼 𑀧𑀦 𑀞𑀸𑀦𑁂𑀲𑀼 𑀩𑀼𑀤𑁆𑀥𑀸𑀦𑀁 𑀦𑀸𑀕𑀯𑀺𑀮𑁄𑀓𑀦𑀁 ¶ 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 𑀬𑀦𑁆𑀢𑁂𑀦 𑀧𑀭𑀺𑀯𑀢𑁆𑀢𑀺𑀢𑀲𑀼𑀯𑀡𑁆𑀡𑀧𑀝𑀺𑀫𑀸 𑀯𑀺𑀬 𑀲𑀓𑀮𑀓𑀸𑀬𑁂𑀦𑁂𑀯 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀞𑀺𑀢𑁄 𑀭𑀸𑀳𑀼𑀮𑀪𑀤𑁆𑀤𑀁 𑀆𑀫𑀦𑁆𑀢𑁂𑀲𑀺. 𑀢𑀁 𑀲𑀦𑁆𑀥𑀸𑀬 ‘‘𑀅𑀣 𑀔𑁄 𑀪𑀕𑀯𑀸 𑀅𑀧𑀮𑁄𑀓𑁂𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀬𑀁𑀓𑀺𑀜𑁆𑀘𑀺 𑀭𑀽𑀧𑀦𑁆𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑀺. 𑀦𑁂𑀢𑀁 𑀫𑀫𑀸𑀢𑀺𑀆𑀤𑀻𑀦𑀺 𑀫𑀳𑀸𑀳𑀢𑁆𑀣𑀺𑀧𑀤𑁄𑀧𑀫𑁂 𑀯𑀼𑀢𑁆𑀢𑀸𑀦𑀺. 𑀭𑀽𑀧𑀫𑁂𑀯 𑀦𑀼 𑀔𑁄 𑀪𑀕𑀯𑀸𑀢𑀺 𑀓𑀲𑁆𑀫𑀸 𑀧𑀼𑀘𑁆𑀙𑀢𑀺? 𑀢𑀲𑁆𑀲 𑀓𑀺𑀭 𑁋 ‘‘𑀲𑀩𑁆𑀩𑀁 𑀭𑀽𑀧𑀁 𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺 𑀦 𑀫𑁂𑀲𑁄 𑀅𑀢𑁆𑀢𑀸’’𑀢𑀺 𑀲𑀼𑀢𑁆𑀯𑀸 𑁋 ‘‘𑀪𑀕𑀯𑀸 𑀲𑀩𑁆𑀩𑀁 𑀭𑀽𑀧𑀁 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀏𑀯𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀯𑀤𑀢𑀺, 𑀯𑁂𑀤𑀦𑀸𑀤𑀻𑀲𑀼 𑀦𑀼 𑀔𑁄 𑀓𑀣𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀦𑀬𑁄 𑀉𑀤𑀧𑀸𑀤𑀺. 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀦𑀬𑁂 𑀞𑀺𑀢𑁄 𑀧𑀼𑀘𑁆𑀙𑀢𑀺. 𑀦𑀬𑀓𑀼𑀲𑀮𑁄 𑀳𑁂𑀲 𑀆𑀬𑀲𑁆𑀫𑀸 𑀭𑀸𑀳𑀼𑀮𑁄, 𑀇𑀤𑀁 𑀦 𑀓𑀢𑁆𑀢𑀩𑁆𑀩𑀦𑁆𑀢𑀺 ¶ 𑀯𑀼𑀢𑁆𑀢𑁂 𑀇𑀤𑀫𑁆𑀧𑀺 𑀦 𑀓𑀢𑁆𑀢𑀩𑁆𑀩𑀁 𑀇𑀤𑀫𑁆𑀧𑀺 𑀦 𑀓𑀢𑁆𑀢𑀩𑁆𑀩𑀫𑁂𑀯𑀸𑀢𑀺 𑀦𑀬𑀲𑀢𑁂𑀦𑀧𑀺 𑀦𑀬𑀲𑀳𑀲𑁆𑀲𑁂𑀦𑀧𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀇𑀤𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄.

𑀲𑀺𑀓𑁆𑀔𑀸𑀓𑀸𑀫𑁄 𑀳𑀺 𑀅𑀬𑀁 𑀆𑀬𑀲𑁆𑀫𑀸, 𑀧𑀸𑀢𑁄𑀯 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀧𑀢𑁆𑀣𑀫𑀢𑁆𑀢𑀁 𑀯𑀸𑀮𑀺𑀓𑀁 𑀑𑀓𑀺𑀭𑀢𑀺 𑁋 ‘‘𑀅𑀚𑁆𑀚 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑀸 𑀫𑀬𑁆𑀳𑀁 𑀉𑀧𑀚𑁆𑀛𑀸𑀬𑀲𑁆𑀲 𑀲𑀦𑁆𑀢𑀺𑀓𑀸 𑀏𑀢𑁆𑀢𑀓𑀁 𑀑𑀯𑀸𑀤𑀁 𑀏𑀢𑁆𑀢𑀓𑀁 𑀧𑀭𑀺𑀪𑀸𑀲𑀁 𑀮𑀪𑀸𑀫𑀻’’𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀧𑀺 𑀦𑀁 𑀏𑀢𑀤𑀕𑁆𑀕𑁂 𑀞𑀧𑁂𑀦𑁆𑀢𑁄 𑁋 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀓𑀸𑀫𑀸𑀦𑀁 𑀬𑀤𑀺𑀤𑀁 𑀭𑀸𑀳𑀼𑀮𑁄’’𑀢𑀺 (𑀅. 𑀦𑀺. 𑁧.𑁨𑁦𑁯) 𑀲𑀺𑀓𑁆𑀔𑀸𑀬𑀫𑁂𑀯 𑀅𑀕𑁆𑀕𑀁 𑀓𑀢𑁆𑀯𑀸 𑀞𑀧𑁂𑀲𑀺. 𑀲𑁄𑀧𑀺 𑀆𑀬𑀲𑁆𑀫𑀸 𑀪𑀺𑀓𑁆𑀔𑀼𑀲𑀗𑁆𑀖𑀫𑀚𑁆𑀛𑁂 𑀢𑀫𑁂𑀯 𑀲𑀻𑀳𑀦𑀸𑀤𑀁 𑀦𑀤𑀺 𑁋

‘‘𑀲𑀩𑁆𑀩𑀫𑁂𑀢𑀁 ¶ 𑀅𑀪𑀺𑀜𑁆𑀜𑀸𑀬, 𑀥𑀫𑁆𑀫𑀭𑀸𑀚𑀸 𑀧𑀺𑀢𑀸 𑀫𑀫;

𑀲𑀫𑁆𑀫𑀼𑀔𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲, 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺 𑀫𑀁.

𑀲𑀺𑀓𑁆𑀔𑀸𑀓𑀸𑀫𑀸𑀦𑀳𑀁 𑀅𑀕𑁆𑀕𑁄, 𑀥𑀫𑁆𑀫𑀭𑀸𑀚𑁂𑀦 𑀣𑁄𑀫𑀺𑀢𑁄;

𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸𑀦𑀜𑁆𑀘, 𑀲𑀳𑀸𑀬𑁄 𑀧𑀯𑀭𑁄 𑀫𑀫.

𑀥𑀫𑁆𑀫𑀭𑀸𑀚𑀸 𑀧𑀺𑀢𑀸 𑀫𑀬𑁆𑀳𑀁, 𑀥𑀫𑁆𑀫𑀸𑀭𑀓𑁆𑀔𑁄 𑀘 𑀧𑁂𑀢𑁆𑀢𑀺𑀬𑁄;

𑀲𑀸𑀭𑀺𑀧𑀼𑀢𑁆𑀢𑁄 𑀉𑀧𑀚𑁆𑀛𑀸𑀬𑁄, 𑀲𑀩𑁆𑀩𑀁 𑀫𑁂 𑀚𑀺𑀦𑀲𑀸𑀲𑀦’’𑀦𑁆𑀢𑀺.

𑀅𑀣𑀲𑁆𑀲 𑀪𑀕𑀯𑀸 𑀬𑀲𑁆𑀫𑀸 𑀦 𑀓𑁂𑀯𑀮𑀁 𑀭𑀽𑀧𑀫𑁂𑀯, 𑀯𑁂𑀤𑀦𑀸𑀤𑀬𑁄𑀧𑀺 𑀏𑀯𑀁 𑀤𑀝𑁆𑀞𑀩𑁆𑀩𑀸, 𑀢𑀲𑁆𑀫𑀸 𑀭𑀽𑀧𑀫𑁆𑀧𑀺 𑀭𑀸𑀳𑀼𑀮𑀸𑀢𑀺𑀆𑀤𑀺𑀫𑀸𑀳. 𑀓𑁄 𑀦𑀚𑁆𑀚𑀸𑀢𑀺 𑀓𑁄 𑀦𑀼 𑀅𑀚𑁆𑀚. 𑀣𑁂𑀭𑀲𑁆𑀲 𑀓𑀺𑀭 𑀏𑀢𑀤𑀳𑁄𑀲𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀫𑀬𑁆𑀳𑀁 𑀅𑀢𑁆𑀢𑀪𑀸𑀯𑀦𑀺𑀲𑁆𑀲𑀺𑀢𑀁 𑀙𑀦𑁆𑀤𑀭𑀸𑀕𑀁 𑀜𑀢𑁆𑀯𑀸 ‘𑀲𑀫𑀡𑁂𑀦 𑀦𑀸𑀫 𑀏𑀯𑀭𑀽𑀧𑁄 𑀯𑀺𑀢𑀓𑁆𑀓𑁄 𑀦 𑀯𑀺𑀢𑀓𑁆𑀓𑀺𑀢𑀩𑁆𑀩𑁄’𑀢𑀺 𑀦𑁂𑀯 𑀧𑀭𑀺𑀬𑀸𑀬𑁂𑀦 𑀓𑀣𑀁 𑀓𑀣𑁂𑀲𑀺, 𑀕𑀘𑁆𑀙 𑀪𑀺𑀓𑁆𑀔𑀼 𑀭𑀸𑀳𑀼𑀮𑀁 𑀯𑀤𑁂𑀳𑀺 ¶ ‘𑀫𑀸 𑀧𑀼𑀦 𑀏𑀯𑀭𑀽𑀧𑀁 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀲𑀻’𑀢𑀺 𑀦 𑀤𑀽𑀢𑀁 𑀧𑁂𑀲𑁂𑀲𑀺. 𑀫𑀁 𑀲𑀫𑁆𑀫𑀼𑀓𑁆𑀔𑁂 𑀞𑀢𑁆𑀯𑀸𑀬𑁂𑀯 𑀧𑀦 𑀲𑀪𑀡𑁆𑀟𑀓𑀁 𑀘𑁄𑀭𑀁 𑀘𑀽𑀴𑀸𑀬 𑀕𑀡𑁆𑀳𑀦𑁆𑀢𑁄 𑀯𑀺𑀬 𑀲𑀫𑁆𑀫𑀼𑀔𑀸 𑀲𑀼𑀕𑀢𑁄𑀯𑀸𑀤𑀁 𑀅𑀤𑀸𑀲𑀺. 𑀲𑀼𑀕𑀢𑁄𑀯𑀸𑀤𑁄 𑀘 𑀦𑀸𑀫 𑀅𑀲𑀗𑁆𑀔𑁂𑀬𑁆𑀬𑁂𑀳𑀺𑀧𑀺 𑀓𑀧𑁆𑀧𑁂𑀳𑀺 𑀤𑀼𑀮𑁆𑀮𑀪𑁄. 𑀏𑀯𑀭𑀽𑀧𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀫𑁆𑀫𑀼𑀔𑀸 𑀑𑀯𑀸𑀤𑀁 𑀮𑀪𑀺𑀢𑁆𑀯𑀸 𑀓𑁄 𑀦𑀼 ¶ 𑀯𑀺𑀜𑁆𑀜𑀽 𑀧𑀡𑁆𑀟𑀺𑀢𑀚𑀸𑀢𑀺𑀓𑁄 𑀅𑀚𑁆𑀚 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀲𑁆𑀲𑀢𑀻’’𑀢𑀺. 𑀅𑀣𑁂𑀲 𑀆𑀬𑀲𑁆𑀫𑀸 𑀆𑀳𑀸𑀭𑀓𑀺𑀘𑁆𑀘𑀁 𑀧𑀳𑀸𑀬 𑀬𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂 𑀞𑀺𑀢𑁂𑀦 𑀑𑀯𑀸𑀤𑁄 𑀮𑀤𑁆𑀥𑁄, 𑀢𑀢𑁄𑀯 𑀧𑀝𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀪𑀕𑀯𑀸𑀧𑀺 𑀢𑀁 𑀆𑀬𑀲𑁆𑀫𑀦𑁆𑀢𑀁 𑀦𑀺𑀯𑀢𑁆𑀢𑀫𑀸𑀦𑀁 𑀤𑀺𑀲𑁆𑀯𑀸 𑀦 𑀏𑀯𑀫𑀸𑀳 𑁋 ‘‘𑀫𑀸 𑀦𑀺𑀯𑀢𑁆𑀢 𑀢𑀸𑀯, 𑀭𑀸𑀳𑀼𑀮, 𑀪𑀺𑀓𑁆𑀔𑀸𑀘𑀸𑀭𑀓𑀸𑀮𑁄 𑀢𑁂’’𑀢𑀺. 𑀓𑀲𑁆𑀫𑀸? 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀚𑁆𑀚 𑀢𑀸𑀯 𑀓𑀸𑀬𑀕𑀢𑀸𑀲𑀢𑀺𑀅𑀫𑀢𑀪𑁄𑀚𑀦𑀁 𑀪𑀼𑀜𑁆𑀚𑀢𑀽’’𑀢𑀺.

𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀪𑀕𑀯𑀢𑀺 𑀕𑀢𑁂 𑀧𑀘𑁆𑀙𑀸 𑀕𑀘𑁆𑀙𑀦𑁆𑀢𑁄 𑀅𑀤𑁆𑀤𑀲. 𑀏𑀢𑀲𑁆𑀲 𑀓𑀺𑀭𑀸𑀬𑀲𑁆𑀫𑀢𑁄 𑀏𑀓𑀓𑀲𑁆𑀲 𑀯𑀺𑀳𑀭𑀢𑁄 𑀅𑀜𑁆𑀜𑀁 𑀯𑀢𑁆𑀢𑀁, 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀯𑀺𑀳𑀭𑀢𑁄 𑀅𑀜𑁆𑀜𑀁. 𑀬𑀤𑀸 𑀳𑀺 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀏𑀓𑀸𑀓𑀺𑀦𑁄 𑀯𑀲𑀦𑁆𑀢𑀺, 𑀢𑀤𑀸 𑀧𑀸𑀢𑁄𑀯 𑀲𑁂𑀦𑀸𑀲𑀦𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀲𑀦𑁆𑀦𑀺𑀲𑀺𑀦𑁆𑀦𑀸 𑀅𑀢𑁆𑀢𑀦𑁄 𑀘𑀺𑀢𑁆𑀢𑀭𑀼𑀘𑀺𑀬𑀸 𑀪𑀺𑀓𑁆𑀔𑀸𑀘𑀸𑀭𑀁 𑀕𑀘𑁆𑀙𑀦𑁆𑀢𑀺. 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀯𑀺𑀳𑀭𑀦𑁆𑀢𑀸 𑀧𑀦 𑀣𑁂𑀭𑀸 𑀏𑀯𑀁 𑀦 𑀓𑀭𑁄𑀦𑁆𑀢𑀺. 𑀢𑀤𑀸 𑀳𑀺 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀧𑀞𑀫𑀁 𑀪𑀺𑀓𑁆𑀔𑀸𑀘𑀸𑀭𑀁 𑀕𑀘𑁆𑀙𑀢𑀺. 𑀢𑀲𑁆𑀫𑀺𑀁 𑀕𑀢𑁂 𑀣𑁂𑀭𑁄 𑀅𑀢𑁆𑀢𑀦𑁄 𑀲𑁂𑀦𑀸𑀲𑀦𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑁋 ‘‘𑀩𑀳𑀽𑀦𑀁 𑀯𑀲𑀦𑀝𑁆𑀞𑀸𑀦𑁂 𑀦𑀸𑀫 𑀲𑀩𑁆𑀩𑁂𑀯 𑀧𑀸𑀲𑀸𑀤𑀺𑀓𑀁 ¶ 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺 𑀯𑀸, 𑀦 𑀯𑀸 𑀲𑀓𑁆𑀓𑁄𑀦𑁆𑀢𑀻’’𑀢𑀺 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀅𑀲𑀫𑁆𑀫𑀝𑁆𑀞𑀁 𑀞𑀸𑀦𑀁 𑀲𑀫𑁆𑀫𑀚𑁆𑀚𑀢𑀺. 𑀲𑀘𑁂 𑀓𑀘𑀯𑀭𑁄 𑀅𑀙𑀟𑁆𑀟𑀺𑀢𑁄 𑀳𑁄𑀢𑀺, 𑀢𑀁 𑀙𑀟𑁆𑀟𑁂𑀢𑀺. 𑀧𑀸𑀦𑀻𑀬𑀝𑁆𑀞𑀧𑁂𑀢𑀩𑁆𑀩𑀝𑁆𑀞𑀸𑀦𑀫𑁆𑀳𑀺 𑀧𑀸𑀦𑀻𑀬𑀓𑀽𑀝𑁂 𑀅𑀲𑀢𑀺 𑀧𑀸𑀦𑀻𑀬𑀖𑀝𑀁 𑀞𑀧𑁂𑀢𑀺. 𑀕𑀺𑀮𑀸𑀦𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀆𑀯𑀼𑀲𑁄, 𑀢𑀼𑀫𑁆𑀳𑀸𑀓𑀁 𑀓𑀺𑀁 𑀆𑀳𑀭𑀸𑀫𑀺, 𑀓𑀺𑀁 𑀯𑁄 𑀇𑀘𑁆𑀙𑀺𑀢𑀩𑁆𑀩’’𑀦𑁆𑀢𑀺? 𑀧𑀼𑀘𑁆𑀙𑀢𑀺. 𑀅𑀯𑀲𑁆𑀲𑀺𑀓𑀤𑀳𑀭𑀸𑀦𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑁋 ‘‘𑀅𑀪𑀺𑀭𑀫𑀣, 𑀆𑀯𑀼𑀲𑁄, 𑀫𑀸 𑀉𑀓𑁆𑀓𑀡𑁆𑀞𑀺𑀢𑁆𑀣, 𑀧𑀝𑀺𑀧𑀢𑁆𑀢𑀺𑀲𑀸𑀭𑀓𑀁 𑀩𑀼𑀤𑁆𑀥𑀲𑀸𑀲𑀦’’𑀦𑁆𑀢𑀺 𑀑𑀯𑀤𑀢𑀺. 𑀏𑀯𑀁 𑀓𑀢𑁆𑀯𑀸 𑀲𑀩𑁆𑀩𑀧𑀘𑁆𑀙𑀸 𑀪𑀺𑀓𑁆𑀔𑀸𑀘𑀸𑀭𑀁 𑀕𑀘𑁆𑀙𑀢𑀺. 𑀬𑀣𑀸 ¶ 𑀳𑀺 𑀘𑀓𑁆𑀓𑀯𑀢𑁆𑀢𑀺 𑀓𑀼𑀳𑀺𑀜𑁆𑀘𑀺 𑀕𑀦𑁆𑀢𑀼𑀓𑀸𑀫𑁄 𑀲𑁂𑀦𑀸𑀬 𑀧𑀭𑀺𑀯𑀸𑀭𑀺𑀢𑁄 𑀧𑀞𑀫𑀁 𑀦𑀺𑀓𑁆𑀔𑀫𑀢𑀺, 𑀧𑀭𑀺𑀡𑀸𑀬𑀓𑀭𑀢𑀦𑀁 𑀲𑁂𑀦𑀗𑁆𑀕𑀸𑀦𑀺 𑀲𑀁𑀯𑀺𑀥𑀸𑀬 𑀧𑀘𑁆𑀙𑀸 𑀦𑀺𑀓𑁆𑀔𑀫𑀢𑀺, 𑀏𑀯𑀁 𑀲𑀤𑁆𑀥𑀫𑁆𑀫𑀘𑀓𑁆𑀓𑀯𑀢𑁆𑀢𑀺 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀧𑀞𑀫𑀁 𑀦𑀺𑀓𑁆𑀔𑀫𑀢𑀺, 𑀢𑀲𑁆𑀲 𑀪𑀕𑀯𑀢𑁄 𑀧𑀭𑀺𑀡𑀸𑀬𑀓𑀭𑀢𑀦𑀪𑀽𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺 𑀇𑀫𑀁 𑀓𑀺𑀘𑁆𑀘𑀁 𑀓𑀢𑁆𑀯𑀸 𑀲𑀩𑁆𑀩𑀧𑀘𑁆𑀙𑀸 𑀦𑀺𑀓𑁆𑀔𑀫𑀢𑀺. 𑀲𑁄 𑀏𑀯𑀁 𑀦𑀺𑀓𑁆𑀔𑀦𑁆𑀢𑁄 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑀁 𑀭𑀸𑀳𑀼𑀮𑀪𑀤𑁆𑀤𑀁 𑀅𑀤𑁆𑀤𑀲. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀘𑁆𑀙𑀸 𑀕𑀘𑁆𑀙𑀦𑁆𑀢𑁄 𑀅𑀤𑁆𑀤𑀲𑀸’’𑀢𑀺.

𑀅𑀣 ¶ 𑀓𑀲𑁆𑀫𑀸 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀁 𑀦𑀺𑀬𑁄𑀚𑁂𑀲𑀺? 𑀦𑀺𑀲𑀚𑁆𑀚𑀸𑀦𑀼𑀘𑁆𑀙𑀯𑀺𑀓𑀢𑁆𑀢𑀸. 𑀣𑁂𑀭𑁄 𑀓𑀺𑀭 ‘‘𑀏𑀢𑀲𑁆𑀲 𑀪𑀕𑀯𑀢𑀸 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀺𑀢’’𑀦𑁆𑀢𑀺 𑀅𑀦𑀸𑀯𑀚𑁆𑀚𑀺𑀢𑁆𑀯𑀸𑀯 𑀬𑁂𑀦𑀸𑀓𑀸𑀭𑁂𑀦 𑀅𑀬𑀁 𑀅𑀘𑀮𑁄 𑀅𑀦𑁄𑀩𑀤𑁆𑀥𑁄 𑀳𑀼𑀢𑁆𑀯𑀸 𑀦𑀺𑀲𑀺𑀦𑁆𑀦𑁄, 𑀇𑀤𑀫𑀲𑁆𑀲 𑀏𑀢𑀺𑀲𑁆𑀲𑀸 𑀦𑀺𑀲𑀚𑁆𑀚𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳. 𑀢𑀢𑁆𑀣 𑀆𑀦𑀸𑀧𑀸𑀦𑀲𑁆𑀲𑀢𑀺𑀦𑁆𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑀢𑁆𑀣 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀳𑀻𑀢𑀺 𑀤𑀲𑁆𑀲𑁂𑀢𑀺.

𑀫𑀳𑀧𑁆𑀨𑀮𑀸 𑀳𑁄𑀢𑀻𑀢𑀺 𑀓𑀻𑀯𑀫𑀳𑀧𑁆𑀨𑀮𑀸 𑀳𑁄𑀢𑀺? 𑀇𑀥 𑀪𑀺𑀓𑁆𑀔𑀼 𑀆𑀦𑀸𑀧𑀸𑀦𑀲𑁆𑀲𑀢𑀺𑀁 𑀅𑀦𑀼𑀬𑀼𑀢𑁆𑀢𑁄 𑀏𑀓𑀸𑀲𑀦𑁂 𑀦𑀺𑀲𑀺𑀦𑁆𑀦𑁄𑀯 𑀲𑀩𑁆𑀩𑀸𑀲𑀯𑁂 𑀔𑁂𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑁄 𑀫𑀭𑀡𑀓𑀸𑀮𑁂 𑀲𑀫𑀲𑀻𑀲𑀻 𑀳𑁄𑀢𑀺, 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑁄 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀥𑀫𑁆𑀫𑀓𑀣𑀺𑀓𑀤𑁂𑀯𑀧𑀼𑀢𑁆𑀢𑀲𑁆𑀲 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀢𑀢𑁄 𑀯𑀺𑀭𑀤𑁆𑀥𑁄 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀢𑀁 𑀅𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑁂 𑀩𑀸𑀳𑀺𑀬𑀢𑁆𑀣𑁂𑀭𑀸𑀤𑀬𑁄 𑀯𑀺𑀬 𑀔𑀺𑀧𑁆𑀧𑀸𑀪𑀺𑀜𑁆𑀜𑁄 𑀳𑁄𑀢𑀺, 𑀏𑀯𑀁 𑀫𑀳𑀧𑁆𑀨𑀮𑀸. 𑀫𑀳𑀸𑀦𑀺𑀲𑀁𑀲𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀆𑀦𑀸𑀧𑀸𑀦𑀲𑁆𑀲𑀢𑀻 ¶ 𑀬𑀲𑁆𑀲, 𑀧𑀭𑀺𑀧𑀼𑀡𑁆𑀡𑀸 𑀲𑀼𑀪𑀸𑀯𑀺𑀢𑀸;

𑀅𑀦𑀼𑀧𑀼𑀩𑁆𑀩𑀁 𑀧𑀭𑀺𑀘𑀺𑀢𑀸, 𑀬𑀣𑀸 𑀩𑀼𑀤𑁆𑀥𑁂𑀦 𑀤𑁂𑀲𑀺𑀢𑀸;

𑀲𑁄𑀫𑀁 𑀮𑁄𑀓𑀁 𑀧𑀪𑀸𑀲𑁂𑀢𑀺, 𑀅𑀩𑁆𑀪𑀸 𑀫𑀼𑀢𑁆𑀢𑁄𑀯 𑀘𑀦𑁆𑀤𑀺𑀫𑀸’’𑀢𑀺. (𑀣𑁂𑀭𑀕𑀸. 𑁫𑁪𑁮; 𑀧𑀝𑀺. 𑀫. 𑁧.𑁧.𑁬𑁦) 𑁋

𑀇𑀫𑀁 ¶ 𑀫𑀳𑀧𑁆𑀨𑀮𑀢𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀣𑁂𑀭𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀢𑀢𑁆𑀣 𑀦𑀺𑀬𑁄𑀚𑁂𑀢𑀺.

𑀇𑀢𑀺 𑀪𑀕𑀯𑀸 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁, 𑀣𑁂𑀭𑁄 𑀆𑀦𑀸𑀧𑀸𑀦𑀲𑁆𑀲𑀢𑀺𑀦𑁆𑀢𑀺 𑀉𑀪𑁄𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀕𑀢𑀸, 𑀭𑀸𑀳𑀼𑀮𑀪𑀤𑁆𑀤𑁄 𑀯𑀺𑀳𑀸𑀭𑁂𑀬𑁂𑀯 𑀑𑀳𑀻𑀦𑁄. 𑀪𑀕𑀯𑀸 𑀢𑀲𑁆𑀲 𑀑𑀳𑀻𑀦𑀪𑀸𑀯𑀁 𑀚𑀸𑀦𑀦𑁆𑀢𑁄𑀧𑀺 𑀦𑁂𑀯 𑀅𑀢𑁆𑀢𑀦𑀸 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀕𑀳𑁂𑀢𑁆𑀯𑀸 𑀅𑀕𑀫𑀸𑀲𑀺, 𑀦 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀳𑀢𑁆𑀣𑁂 𑀧𑁂𑀲𑁂𑀲𑀺, 𑀦 𑀧𑀲𑁂𑀦𑀤𑀺𑀫𑀳𑀸𑀭𑀸𑀚𑀅𑀦𑀸𑀣𑀧𑀺𑀡𑁆𑀟𑀺𑀓𑀸𑀤𑀻𑀦𑀁 𑀲𑀜𑁆𑀜𑀁 𑀅𑀤𑀸𑀲𑀺. 𑀲𑀜𑁆𑀜𑀸𑀫𑀢𑁆𑀢𑀓𑀜𑁆𑀳𑀺 𑀮𑀪𑀺𑀢𑁆𑀯𑀸 𑀢𑁂 𑀓𑀸𑀚𑀪𑀢𑁆𑀢𑀁 𑀅𑀪𑀺𑀳𑀭𑁂𑀬𑁆𑀬𑀼𑀁. 𑀬𑀣𑀸 𑀘 𑀪𑀕𑀯𑀸, 𑀏𑀯𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀦 𑀓𑀺𑀜𑁆𑀘𑀺 𑀅𑀓𑀸𑀲𑀺. 𑀭𑀸𑀳𑀼𑀮𑀢𑁆𑀣𑁂𑀭𑁄 𑀦𑀺𑀭𑀸𑀳𑀸𑀭𑁄 𑀙𑀺𑀦𑁆𑀦𑀪𑀢𑁆𑀢𑁄 𑀅𑀳𑁄𑀲𑀺. 𑀢𑀲𑁆𑀲 𑀧𑀦𑀸𑀬𑀲𑁆𑀫𑀢𑁄 𑁋 ‘‘𑀪𑀕𑀯𑀸 𑀫𑀁 𑀯𑀺𑀳𑀸𑀭𑁂 𑀑𑀳𑀻𑀦𑀁 𑀚𑀸𑀦𑀦𑁆𑀢𑁄𑀧𑀺 𑀅𑀢𑁆𑀢𑀦𑀸 𑀮𑀤𑁆𑀥𑀧𑀺𑀡𑁆𑀟𑀧𑀸𑀢𑀁 𑀦𑀸𑀧𑀺 𑀲𑀬𑀁 𑀕𑀳𑁂𑀢𑁆𑀯𑀸 𑀆𑀕𑀢𑁄, 𑀦 𑀅𑀜𑁆𑀜𑀲𑁆𑀲 𑀳𑀢𑁆𑀣𑁂 𑀧𑀳𑀺𑀡𑀺 ¶ , 𑀦 𑀫𑀦𑀼𑀲𑁆𑀲𑀸𑀦𑀁 𑀲𑀜𑁆𑀜𑀁 𑀅𑀤𑀸𑀲𑀺, 𑀉𑀧𑀚𑁆𑀛𑀸𑀬𑁄𑀧𑀺 𑀫𑁂 𑀑𑀳𑀻𑀦𑀪𑀸𑀯𑀁 𑀚𑀸𑀦𑀦𑁆𑀢𑁄 𑀢𑀣𑁂𑀯 𑀦 𑀓𑀺𑀜𑁆𑀘𑀺 𑀅𑀓𑀸𑀲𑀻’’𑀢𑀺 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀦𑁆𑀦𑀁, 𑀓𑀼𑀢𑁄 𑀢𑀧𑁆𑀧𑀘𑁆𑀘𑀬𑀸 𑀑𑀫𑀸𑀦𑀁 𑀯𑀸 𑀅𑀢𑀺𑀫𑀸𑀦𑀁 𑀯𑀸 𑀚𑀦𑁂𑀲𑁆𑀲𑀢𑀺. 𑀪𑀕𑀯𑀢𑀸 𑀧𑀦 𑀆𑀘𑀺𑀓𑁆𑀔𑀺𑀢𑀓𑀫𑁆𑀫𑀝𑁆𑀞𑀸𑀦𑀫𑁂𑀯 𑀧𑀼𑀭𑁂𑀪𑀢𑁆𑀢𑀫𑁆𑀧𑀺 𑀧𑀘𑁆𑀙𑀸𑀪𑀢𑁆𑀢𑀫𑁆𑀧𑀺 𑁋 ‘‘𑀇𑀢𑀺𑀧𑀺 𑀭𑀽𑀧𑀁 𑀅𑀦𑀺𑀘𑁆𑀘𑀁, 𑀇𑀢𑀺𑀧𑀺 𑀤𑀼𑀓𑁆𑀔𑀁, 𑀇𑀢𑀺𑀧𑀺 𑀅𑀲𑀼𑀪𑀁, 𑀇𑀢𑀺𑀧𑀺 𑀅𑀦𑀢𑁆𑀢𑀸’’𑀢𑀺 𑀅𑀕𑁆𑀕𑀺𑀁 𑀅𑀪𑀺𑀫𑀢𑁆𑀣𑁂𑀦𑁆𑀢𑁄 𑀯𑀺𑀬 𑀦𑀺𑀭𑀦𑁆𑀢𑀭𑀁 𑀫𑀦𑀲𑀺𑀓𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀉𑀧𑀚𑁆𑀛𑀸𑀬𑁂𑀦 𑀆𑀦𑀸𑀧𑀸𑀦𑀲𑁆𑀲𑀢𑀺𑀁 𑀪𑀸𑀯𑁂𑀳𑀻𑀢𑀺 𑀯𑀼𑀢𑁆𑀢𑁄 ¶ , 𑀢𑀲𑁆𑀲 𑀯𑀘𑀦𑀁 𑀦 𑀓𑀭𑀺𑀲𑁆𑀲𑀸𑀫𑀺. 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀜𑁆𑀳𑀺 𑀯𑀘𑀦𑀁 𑀅𑀓𑀭𑁄𑀦𑁆𑀢𑁄 𑀤𑀼𑀩𑁆𑀩𑀘𑁄 𑀦𑀸𑀫 𑀳𑁄𑀢𑀺. ‘𑀤𑀼𑀩𑁆𑀩𑀘𑁄 𑀭𑀸𑀳𑀼𑀮𑁄, 𑀉𑀧𑀚𑁆𑀛𑀸𑀬𑀲𑁆𑀲𑀧𑀺 𑀯𑀘𑀦𑀁 𑀦 𑀓𑀭𑁄𑀢𑀻’𑀢𑀺 𑀘 𑀕𑀭𑀳𑀼𑀧𑁆𑀧𑀢𑁆𑀢𑀺𑀢𑁄 𑀓𑀓𑁆𑀔𑀴𑀢𑀭𑀸 𑀧𑀻𑀴𑀸 𑀦𑀸𑀫 𑀦𑀢𑁆𑀣𑀻’’𑀢𑀺 𑀪𑀸𑀯𑀦𑀸𑀯𑀺𑀥𑀸𑀦𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑀁 𑀤𑀲𑁆𑀲𑁂𑀢𑀼𑀁 𑀅𑀣 𑀔𑁄 𑀆𑀬𑀲𑁆𑀫𑀸 𑀭𑀸𑀳𑀼𑀮𑁄𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁧𑁧𑁪. 𑀢𑀢𑁆𑀣 𑀧𑀝𑀺𑀲𑀮𑁆𑀮𑀸𑀦𑀸𑀢𑀺 𑀏𑀓𑀻𑀪𑀸𑀯𑀢𑁄. 𑀬𑀁𑀓𑀺𑀜𑁆𑀘𑀺 𑀭𑀸𑀳𑀼𑀮𑀸𑀢𑀺 𑀓𑀲𑁆𑀫𑀸? 𑀪𑀕𑀯𑀸 𑀆𑀦𑀸𑀧𑀸𑀦𑀲𑁆𑀲𑀢𑀺𑀁 𑀧𑀼𑀝𑁆𑀞𑁄 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑀻𑀢𑀺. 𑀭𑀽𑀧𑁂 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀢𑁆𑀣𑀁. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀭𑀸𑀳𑀼𑀮𑀲𑁆𑀲 𑀅𑀢𑁆𑀢𑀪𑀸𑀯𑀁 𑀦𑀺𑀲𑁆𑀲𑀸𑀬 𑀙𑀦𑁆𑀤𑀭𑀸𑀕𑁄 𑀉𑀧𑁆𑀧𑀦𑁆𑀦𑁄, 𑀳𑁂𑀝𑁆𑀞𑀸 𑀘𑀲𑁆𑀲 𑀲𑀗𑁆𑀔𑁂𑀧𑁂𑀦 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀺𑀢𑀁. 𑀇𑀤𑀸𑀦𑀺𑀲𑁆𑀲𑀸𑀧𑀺 𑀤𑁆𑀯𑀺𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺 𑀅𑀢𑁆𑀢𑀪𑀸𑀯𑀁 𑀯𑀺𑀭𑀸𑀚𑁂𑀢𑁆𑀯𑀸 𑀯𑀺𑀲𑀗𑁆𑀔𑀭𑀺𑀢𑁆𑀯𑀸 𑀢𑀁𑀦𑀺𑀲𑁆𑀲𑀺𑀢𑀁 𑀙𑀦𑁆𑀤𑀭𑀸𑀕𑀁 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺. 𑀅𑀣 𑀆𑀓𑀸𑀲𑀥𑀸𑀢𑀼𑀁 𑀓𑀲𑁆𑀫𑀸 𑀯𑀺𑀢𑁆𑀣𑀸𑀭𑁂𑀲𑀻𑀢𑀺? 𑀉𑀧𑀸𑀤𑀸𑀭𑀽𑀧𑀤𑀲𑁆𑀲𑀦𑀢𑁆𑀣𑀁. 𑀳𑁂𑀝𑁆𑀞𑀸 𑀳𑀺 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑁂𑀯 𑀓𑀣𑀺𑀢𑀸𑀦𑀺, 𑀦 𑀉𑀧𑀸𑀤𑀸𑀭𑀽𑀧𑀁. 𑀢𑀲𑁆𑀫𑀸 𑀇𑀫𑀺𑀦𑀸 𑀫𑀼𑀔𑁂𑀦 𑀢𑀁 𑀤𑀲𑁆𑀲𑁂𑀢𑀼𑀁 𑀆𑀓𑀸𑀲𑀥𑀸𑀢𑀼𑀁 𑀯𑀺𑀢𑁆𑀣𑀸𑀭𑁂𑀲𑀺. 𑀅𑀧𑀺𑀘 𑀅𑀚𑁆𑀛𑀢𑁆𑀢𑀺𑀓𑁂𑀦 𑀆𑀓𑀸𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑀫𑁆𑀧𑀺 𑀧𑀸𑀓𑀝𑀁 𑀳𑁄𑀢𑀺.

𑀆𑀓𑀸𑀲𑁂𑀦 ¶ 𑀧𑀭𑀺𑀘𑁆𑀙𑀺𑀦𑁆𑀦𑀁, 𑀭𑀽𑀧𑀁 𑀬𑀸𑀢𑀺 𑀯𑀺𑀪𑀽𑀢𑀢𑀁;

𑀢𑀲𑁆𑀲𑁂𑀯𑀁 𑀆𑀯𑀺𑀪𑀸𑀯𑀢𑁆𑀣𑀁, 𑀢𑀁 𑀧𑀓𑀸𑀲𑁂𑀲𑀺 𑀦𑀸𑀬𑀓𑁄.

𑀏𑀢𑁆𑀣 ¶ 𑀧𑀦 𑀧𑀼𑀭𑀺𑀫𑀸𑀲𑀼 𑀢𑀸𑀯 𑀘𑀢𑀽𑀲𑀼 𑀥𑀸𑀢𑀽𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀫𑀳𑀸𑀳𑀢𑁆𑀣𑀺𑀧𑀤𑁄𑀧𑀫𑁂 𑀯𑀼𑀢𑁆𑀢𑀫𑁂𑀯.

𑁧𑁧𑁮. 𑀆𑀓𑀸𑀲𑀥𑀸𑀢𑀼𑀬𑀁 𑀆𑀓𑀸𑀲𑀕𑀢𑀦𑁆𑀢𑀺 𑀆𑀓𑀸𑀲𑀪𑀸𑀯𑀁 𑀕𑀢𑀁. 𑀉𑀧𑀸𑀤𑀺𑀦𑁆𑀦𑀦𑁆𑀢𑀺𑀆𑀤𑀺𑀦𑁆𑀦𑀁 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞𑀁, 𑀲𑀭𑀻𑀭𑀝𑁆𑀞𑀓𑀦𑁆𑀢𑀺 𑀅𑀢𑁆𑀣𑁄. 𑀓𑀡𑁆𑀡𑀘𑁆𑀙𑀺𑀤𑁆𑀤𑀦𑁆𑀢𑀺 𑀫𑀁𑀲𑀮𑁄𑀳𑀺𑀢𑀸𑀤𑀻𑀳𑀺 𑀅𑀲𑀫𑁆𑀨𑀼𑀝𑁆𑀞𑀓𑀡𑁆𑀡𑀯𑀺𑀯𑀭𑀁. 𑀦𑀸𑀲𑀘𑁆𑀙𑀺𑀤𑁆𑀤𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑁂𑀦 ¶ 𑀘𑀸𑀢𑀺 𑀬𑁂𑀦 𑀙𑀺𑀤𑁆𑀤𑁂𑀦. 𑀅𑀚𑁆𑀛𑁄𑀳𑀭𑀢𑀻𑀢𑀺 𑀅𑀦𑁆𑀢𑁄 𑀧𑀯𑁂𑀲𑁂𑀢𑀺, 𑀚𑀺𑀯𑁆𑀳𑀸𑀩𑀦𑁆𑀥𑀦𑀢𑁄 𑀳𑀺 𑀬𑀸𑀯 𑀉𑀤𑀭𑀧𑀝𑀮𑀸 𑀫𑀦𑀼𑀲𑁆𑀲𑀸𑀦𑀁 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀁 𑀙𑀺𑀤𑁆𑀤𑀝𑁆𑀞𑀸𑀦𑀁 𑀳𑁄𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀬𑀢𑁆𑀣 𑀘𑀸𑀢𑀺 𑀬𑀲𑁆𑀫𑀺𑀁 𑀑𑀓𑀸𑀲𑁂. 𑀲𑀦𑁆𑀢𑀺𑀝𑁆𑀞𑀢𑀻𑀢𑀺 𑀧𑀢𑀺𑀝𑁆𑀞𑀸𑀢𑀺. 𑀫𑀦𑀼𑀲𑁆𑀲𑀸𑀦𑀜𑁆𑀳𑀺 𑀫𑀳𑀦𑁆𑀢𑀁 𑀧𑀝𑀧𑀭𑀺𑀲𑁆𑀲𑀸𑀯𑀦𑀫𑀢𑁆𑀢𑀜𑁆𑀘 𑀉𑀤𑀭𑀧𑀝𑀮𑀁 𑀦𑀸𑀫 𑀳𑁄𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀅𑀥𑁄𑀪𑀸𑀕𑀁 𑀦𑀺𑀓𑁆𑀔𑀫𑀢𑀻𑀢𑀺 𑀬𑁂𑀦 𑀳𑁂𑀝𑁆𑀞𑀸 𑀦𑀺𑀓𑁆𑀔𑀫𑀢𑀺. 𑀤𑁆𑀯𑀢𑁆𑀢𑀺𑀁𑀲𑀳𑀢𑁆𑀣𑀫𑀢𑁆𑀢𑀁 𑀏𑀓𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀯𑀗𑁆𑀓𑀁 𑀅𑀦𑁆𑀢𑀁 𑀦𑀸𑀫 𑀳𑁄𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀻𑀢𑀺 𑀇𑀫𑀺𑀦𑀸 𑀲𑀼𑀔𑀼𑀫𑀲𑀼𑀔𑀼𑀫𑀁 𑀘𑀫𑁆𑀫𑀫𑀁𑀲𑀸𑀤𑀺𑀅𑀦𑁆𑀢𑀭𑀕𑀢𑀜𑁆𑀘𑁂𑀯 𑀮𑁄𑀫𑀓𑀽𑀧𑀪𑀸𑀯𑁂𑀦 𑀘 𑀞𑀺𑀢𑀁 𑀆𑀓𑀸𑀲𑀁 𑀤𑀲𑁆𑀲𑁂𑀢𑀺. 𑀲𑁂𑀲𑀫𑁂𑀢𑁆𑀣𑀸𑀧𑀺 𑀧𑀣𑀯𑀻𑀥𑀸𑀢𑀼𑀆𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁧𑁧𑁯. 𑀇𑀤𑀸𑀦𑀺𑀲𑁆𑀲 𑀢𑀸𑀤𑀺𑀪𑀸𑀯𑀮𑀓𑁆𑀔𑀡𑀁 𑀆𑀘𑀺𑀓𑁆𑀔𑀦𑁆𑀢𑁄 𑀧𑀣𑀯𑀻𑀲𑀫𑀦𑁆𑀢𑀺𑀆𑀤𑀺𑀫𑀸𑀳. 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀳𑀺 𑀅𑀭𑀚𑁆𑀚𑀦𑁆𑀢𑁄 𑀅𑀤𑀼𑀲𑁆𑀲𑀦𑁆𑀢𑁄 𑀢𑀸𑀤𑀻 𑀦𑀸𑀫 𑀳𑁄𑀢𑀺. 𑀫𑀦𑀸𑀧𑀸𑀫𑀦𑀸𑀧𑀸𑀢𑀺 ¶ 𑀏𑀢𑁆𑀣 𑀅𑀝𑁆𑀞 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀫𑀦𑀸𑀧𑀸 𑀦𑀸𑀫, 𑀤𑁆𑀯𑁂 𑀤𑁄𑀫𑀦𑀲𑁆𑀲𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀅𑀫𑀦𑀸𑀧𑀸 𑀦𑀸𑀫. 𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀸𑀬 𑀞𑀲𑁆𑀲𑀦𑁆𑀢𑀻𑀢𑀺 𑀏𑀢𑁂 𑀨𑀲𑁆𑀲𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀯 𑀘𑀺𑀢𑁆𑀢𑀁 𑀅𑀦𑁆𑀢𑁄𑀫𑀼𑀝𑁆𑀞𑀺𑀕𑀢𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀧𑀭𑀺𑀬𑀸𑀤𑀸𑀬 𑀕𑀳𑁂𑀢𑁆𑀯𑀸 𑀞𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺 ‘‘𑀅𑀳𑀁 𑀲𑁄𑀪𑀸𑀫𑀺, 𑀫𑀬𑁆𑀳𑀁 𑀯𑀡𑁆𑀡𑀸𑀬𑀢𑀦𑀁 𑀧𑀲𑀦𑁆𑀦’’𑀦𑁆𑀢𑀺 𑀧𑀼𑀦 𑀅𑀢𑁆𑀢𑀪𑀸𑀯𑀁 𑀦𑀺𑀲𑁆𑀲𑀸𑀬 𑀙𑀦𑁆𑀤𑀭𑀸𑀕𑁄 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀢𑀺. 𑀕𑀽𑀣𑀕𑀢𑀦𑁆𑀢𑀺𑀆𑀤𑀻𑀲𑀼 𑀕𑀽𑀣𑀫𑁂𑀯 𑀕𑀽𑀣𑀕𑀢𑀁. 𑀏𑀯𑀁 𑀲𑀩𑁆𑀩𑀢𑁆𑀣.

𑀦 𑀓𑀢𑁆𑀣𑀘𑀺 𑀧𑀢𑀺𑀝𑁆𑀞𑀺𑀢𑁄𑀢𑀺 𑀧𑀣𑀯𑀻𑀧𑀩𑁆𑀩𑀢𑀭𑀼𑀓𑁆𑀔𑀸𑀤𑀻𑀲𑀼 𑀏𑀓𑀲𑁆𑀫𑀺𑀫𑁆𑀧𑀺 𑀦 𑀧𑀢𑀺𑀝𑁆𑀞𑀺𑀢𑁄, 𑀬𑀤𑀺 𑀳𑀺 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑁄 𑀪𑀯𑁂𑀬𑁆𑀬, 𑀧𑀣𑀯𑀺𑀬𑀸 𑀪𑀺𑀚𑁆𑀚𑀫𑀸𑀦𑀸𑀬 𑀲𑀳𑁂𑀯 𑀪𑀺𑀚𑁆𑀚𑁂𑀬𑁆𑀬, 𑀧𑀩𑁆𑀩𑀢𑁂 𑀧𑀢𑀫𑀸𑀦𑁂 𑀲𑀳𑁂𑀯 𑀧𑀢𑁂𑀬𑁆𑀬, 𑀭𑀼𑀓𑁆𑀔𑁂 𑀙𑀺𑀚𑁆𑀚𑀫𑀸𑀦𑁂 𑀲𑀳𑁂𑀯 𑀙𑀺𑀚𑁆𑀚𑁂𑀬𑁆𑀬.

𑁧𑁨𑁦. 𑀫𑁂𑀢𑁆𑀢𑀁 ¶ 𑀭𑀸𑀳𑀼𑀮𑀸𑀢𑀺 𑀓𑀲𑁆𑀫𑀸 𑀆𑀭𑀪𑀺? 𑀢𑀸𑀤𑀺𑀪𑀸𑀯𑀲𑁆𑀲 𑀓𑀸𑀭𑀡𑀤𑀲𑁆𑀲𑀦𑀢𑁆𑀣𑀁. 𑀳𑁂𑀝𑁆𑀞𑀸 𑀳𑀺 𑀢𑀸𑀤𑀺𑀪𑀸𑀯𑀮𑀓𑁆𑀔𑀡𑀁 𑀤𑀲𑁆𑀲𑀺𑀢𑀁, 𑀦 𑀘 𑀲𑀓𑁆𑀓𑀸 𑀅𑀳𑀁 𑀢𑀸𑀤𑀻 𑀳𑁄𑀫𑀻𑀢𑀺 𑀅𑀓𑀸𑀭𑀡𑀸 𑀪𑀯𑀺𑀢𑀼𑀁, 𑀦𑀧𑀺 ‘‘𑀅𑀳𑀁 𑀉𑀘𑁆𑀘𑀸𑀓𑀼𑀮𑀧𑁆𑀧𑀲𑀼𑀢𑁄 𑀩𑀳𑀼𑀲𑁆𑀲𑀼𑀢𑁄 𑀮𑀸𑀪𑀻, 𑀫𑀁 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀬𑁄 𑀪𑀚𑀦𑁆𑀢𑀺, 𑀅𑀳𑀁 𑀢𑀸𑀤𑀻 𑀳𑁄𑀫𑀻’’𑀢𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀓𑁄𑀘𑀺 𑀢𑀸𑀤𑀻 𑀦𑀸𑀫 𑀳𑁄𑀢𑀺, 𑀫𑁂𑀢𑁆𑀢𑀸𑀤𑀺𑀪𑀸𑀯𑀦𑀸𑀬 𑀧𑀦 𑀳𑁄𑀢𑀻𑀢𑀺 𑀢𑀸𑀤𑀺𑀪𑀸𑀯𑀲𑁆𑀲 𑀓𑀸𑀭𑀡𑀤𑀲𑁆𑀲𑀦𑀢𑁆𑀣𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺.

𑀢𑀢𑁆𑀣 ¶ 𑀪𑀸𑀯𑀬𑀢𑁄𑀢𑀺 𑀉𑀧𑀘𑀸𑀭𑀁 𑀯𑀸 𑀅𑀧𑁆𑀧𑀦𑀁 𑀯𑀸 𑀧𑀸𑀧𑁂𑀦𑁆𑀢𑀲𑁆𑀲. 𑀬𑁄 𑀩𑁆𑀬𑀸𑀧𑀸𑀤𑁄𑀢𑀺 𑀬𑁄 𑀲𑀢𑁆𑀢𑁂 𑀓𑁄𑀧𑁄, 𑀲𑁄 𑀧𑀳𑀻𑀬𑀺𑀲𑁆𑀲𑀢𑀺. 𑀯𑀺𑀳𑁂𑀲𑀸𑀢𑀺 𑀧𑀸𑀡𑀺𑀆𑀤𑀻𑀳𑀺 𑀲𑀢𑁆𑀢𑀸𑀦𑀁 𑀯𑀺𑀳𑀺𑀁𑀲𑀦𑀁. 𑀅𑀭𑀢𑀻𑀢𑀺 𑀧𑀦𑁆𑀢𑀲𑁂𑀦𑀸𑀲𑀦𑁂𑀲𑀼 𑀘𑁂𑀯 𑀅𑀥𑀺𑀓𑀼𑀲𑀮𑀥𑀫𑁆𑀫𑁂𑀲𑀼 𑀘 𑀉𑀓𑁆𑀓𑀡𑁆𑀞𑀺𑀢𑀢𑀸. 𑀧𑀝𑀺𑀖𑁄𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀲𑀢𑁆𑀢𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀘 𑀧𑀝𑀺𑀳𑀜𑁆𑀜𑀦𑀓𑀺𑀮𑁂𑀲𑁄. 𑀅𑀲𑀼𑀪𑀦𑁆𑀢𑀺 ¶ 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀲𑀼 𑀉𑀧𑀘𑀸𑀭𑀧𑁆𑀧𑀦𑀁. 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀲𑀼 𑀅𑀲𑀼𑀪𑀪𑀸𑀯𑀦𑀸 𑀘 𑀦𑀸𑀫𑁂𑀲𑀸 𑀯𑀺𑀢𑁆𑀣𑀸𑀭𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀓𑀣𑀺𑀢𑀸𑀯. 𑀭𑀸𑀕𑁄𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑁄. 𑀅𑀦𑀺𑀘𑁆𑀘𑀲𑀜𑁆𑀜𑀦𑁆𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀲𑀳𑀚𑀸𑀢𑀲𑀜𑁆𑀜𑀁. 𑀯𑀺𑀧𑀲𑁆𑀲𑀦𑀸 𑀏𑀯 𑀯𑀸 𑀏𑀲𑀸 𑀅𑀲𑀜𑁆𑀜𑀸𑀧𑀺 𑀲𑀜𑁆𑀜𑀸𑀲𑀻𑀲𑁂𑀦 𑀲𑀜𑁆𑀜𑀸𑀢𑀺 𑀯𑀼𑀢𑁆𑀢𑀸. 𑀅𑀲𑁆𑀫𑀺𑀫𑀸𑀦𑁄𑀢𑀺 𑀭𑀽𑀧𑀸𑀤𑀻𑀲𑀼 𑀅𑀲𑁆𑀫𑀻𑀢𑀺 𑀫𑀸𑀦𑁄.

𑁧𑁨𑁧. 𑀇𑀤𑀸𑀦𑀺 𑀣𑁂𑀭𑁂𑀦 𑀧𑀼𑀘𑁆𑀙𑀺𑀢𑀁 𑀧𑀜𑁆𑀳𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀆𑀦𑀸𑀧𑀸𑀦𑀲𑁆𑀲𑀢𑀺𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀤𑀁 𑀓𑀫𑁆𑀫𑀝𑁆𑀞𑀸𑀦𑀜𑁆𑀘 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸 𑀘 𑀧𑀸𑀴𑀺𑀅𑀢𑁆𑀣𑁄 𑀘 𑀲𑀤𑁆𑀥𑀺𑀁 𑀆𑀦𑀺𑀲𑀁𑀲𑀓𑀣𑀸𑀬 𑀲𑀩𑁆𑀩𑁄 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀅𑀦𑀼𑀲𑁆𑀲𑀢𑀺𑀦𑀺𑀤𑁆𑀤𑁂𑀲𑁂 𑀯𑀺𑀢𑁆𑀣𑀸𑀭𑀺𑀢𑁄𑀬𑁂𑀯. 𑀇𑀫𑀁 𑀤𑁂𑀲𑀦𑀁 𑀪𑀕𑀯𑀸 𑀦𑁂𑀬𑁆𑀬𑀧𑀼𑀕𑁆𑀕𑀮𑀯𑀲𑁂𑀦𑁂𑀯 𑀧𑀭𑀺𑀦𑀺𑀝𑁆𑀞𑀸𑀧𑁂𑀲𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀸𑀳𑀸𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀘𑀽𑀴𑀫𑀸𑀮𑀼𑀓𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁨. 𑀏𑀯𑀁 ¶ 𑀫𑁂 𑀲𑀼𑀢𑀦𑁆𑀢𑀺 𑀫𑀸𑀮𑀼𑀓𑁆𑀬𑀲𑀼𑀢𑁆𑀢𑀁. 𑀢𑀢𑁆𑀣 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀲𑁆𑀲𑀸𑀢𑀺 𑀏𑀯𑀁𑀦𑀸𑀫𑀓𑀲𑁆𑀲 𑀣𑁂𑀭𑀲𑁆𑀲. 𑀞𑀧𑀺𑀢𑀸𑀦𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀻𑀢𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀦𑀸𑀫 𑀦 𑀩𑁆𑀬𑀸𑀓𑀸𑀢𑀩𑁆𑀩𑀸𑀦𑀻𑀢𑀺 𑀏𑀯𑀁 𑀞𑀧𑀺𑀢𑀸𑀦𑀺 𑀘𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀺 𑀘. 𑀢𑀣𑀸𑀕𑀢𑁄𑀢𑀺 𑀲𑀢𑁆𑀢𑁄. 𑀢𑀁 𑀫𑁂 𑀦 𑀭𑀼𑀘𑁆𑀘𑀢𑀻𑀢𑀺 𑀢𑀁 𑀅𑀩𑁆𑀬𑀸𑀓𑀭𑀡𑀁 𑀫𑀬𑁆𑀳𑀁 𑀦 𑀭𑀼𑀘𑁆𑀘𑀢𑀺. 𑀲𑀺𑀓𑁆𑀔𑀁 ¶ 𑀧𑀘𑁆𑀘𑀓𑁆𑀔𑀸𑀬𑀸𑀢𑀺 𑀲𑀺𑀓𑁆𑀔𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸.

𑁧𑁨𑁫. 𑀓𑁄 𑀲𑀦𑁆𑀢𑁄 𑀓𑀁 𑀧𑀘𑁆𑀘𑀸𑀘𑀺𑀓𑁆𑀔𑀲𑀻𑀢𑀺 𑀬𑀸𑀘𑀓𑁄 𑀯𑀸 𑀳𑀺 𑀬𑀸𑀘𑀺𑀢𑀓𑀁 𑀧𑀘𑁆𑀘𑀸𑀘𑀺𑀓𑁆𑀔𑁂𑀬𑁆𑀬, 𑀬𑀸𑀘𑀺𑀢𑀓𑁄 𑀯𑀸 𑀬𑀸𑀘𑀓𑀁. 𑀢𑁆𑀯𑀁 𑀦𑁂𑀯 𑀬𑀸𑀘𑀓𑁄 𑀦 𑀬𑀸𑀘𑀺𑀢𑀓𑁄, 𑀲𑁄 𑀤𑀸𑀦𑀺 𑀢𑁆𑀯𑀁 𑀓𑁄 𑀲𑀦𑁆𑀢𑁄 𑀓𑀁 𑀧𑀘𑁆𑀘𑀸𑀘𑀺𑀓𑁆𑀔𑀲𑀻𑀢𑀺 𑀅𑀢𑁆𑀣𑁄.

𑁧𑁨𑁬. 𑀯𑀺𑀤𑁆𑀥𑁄 ¶ 𑀅𑀲𑁆𑀲𑀸𑀢𑀺 𑀧𑀭𑀲𑁂𑀦𑀸𑀬 𑀞𑀺𑀢𑁂𑀦 𑀯𑀺𑀤𑁆𑀥𑁄 𑀪𑀯𑁂𑀬𑁆𑀬. 𑀕𑀸𑀴𑁆𑀳𑀧𑀮𑁂𑀧𑀦𑁂𑀦𑀸𑀢𑀺 𑀩𑀳𑀮𑀮𑁂𑀧𑀦𑁂𑀦. 𑀪𑀺𑀲𑀓𑁆𑀓𑀦𑁆𑀢𑀺 𑀯𑁂𑀚𑁆𑀚𑀁. 𑀲𑀮𑁆𑀮𑀓𑀢𑁆𑀢𑀦𑁆𑀢𑀺 𑀲𑀮𑁆𑀮𑀓𑀦𑁆𑀢𑀦𑀁 𑀲𑀮𑁆𑀮𑀓𑀦𑁆𑀢𑀺𑀬𑀲𑀼𑀢𑁆𑀢𑀯𑀸𑀘𑀓𑀁. 𑀅𑀓𑁆𑀓𑀲𑁆𑀲𑀸𑀢𑀺 𑀅𑀓𑁆𑀓𑀯𑀸𑀓𑁂 𑀕𑀳𑁂𑀢𑁆𑀯𑀸 𑀚𑀺𑀬𑀁 𑀓𑀭𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀓𑁆𑀓𑀲𑁆𑀲𑀸’’𑀢𑀺. 𑀲𑀡𑁆𑀳𑀲𑁆𑀲𑀸𑀢𑀺 𑀯𑁂𑀡𑀼𑀯𑀺𑀮𑀻𑀯𑀲𑁆𑀲. 𑀫𑀭𑀼𑀯𑀸𑀔𑀻𑀭𑀧𑀡𑁆𑀡𑀻𑀦𑀫𑁆𑀧𑀺 𑀯𑀸𑀓𑁂𑀳𑀺𑀬𑁂𑀯 𑀓𑀭𑁄𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀬𑀤𑀺 𑀯𑀸 𑀫𑀭𑀼𑀯𑀸𑀬 𑀬𑀤𑀺 𑀯𑀸 𑀔𑀻𑀭𑀧𑀡𑁆𑀡𑀺𑀦𑁄𑀢𑀺. 𑀕𑀘𑁆𑀙𑀦𑁆𑀢𑀺 𑀧𑀩𑁆𑀩𑀢𑀕𑀘𑁆𑀙𑀦𑀤𑀻𑀕𑀘𑁆𑀙𑀸𑀤𑀻𑀲𑀼 𑀚𑀸𑀢𑀁. 𑀭𑁄𑀧𑀺𑀫𑀦𑁆𑀢𑀺 𑀭𑁄𑀧𑁂𑀢𑁆𑀯𑀸 𑀯𑀟𑁆𑀠𑀺𑀢𑀁 𑀲𑀭𑀯𑀦𑀢𑁄 𑀲𑀭𑀁 𑀕𑀳𑁂𑀢𑁆𑀯𑀸 𑀓𑀢𑀁. 𑀲𑀺𑀣𑀺𑀮𑀳𑀦𑀼𑀦𑁄𑀢𑀺 𑀏𑀯𑀁𑀦𑀸𑀫𑀓𑀲𑁆𑀲 𑀧𑀓𑁆𑀔𑀺𑀦𑁄. 𑀪𑁂𑀭𑀯𑀲𑁆𑀲𑀸𑀢𑀺 𑀓𑀸𑀴𑀲𑀻𑀳𑀲𑁆𑀲. 𑀲𑁂𑀫𑁆𑀳𑀸𑀭𑀲𑁆𑀲𑀸𑀢𑀺 𑀫𑀓𑁆𑀓𑀝𑀲𑁆𑀲. 𑀏𑀯𑀁 𑀦𑁄𑀢𑀺 𑀏𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑀢𑀺 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁧𑁨𑁭. 𑀅𑀢𑁆𑀣𑁂𑀯 𑀚𑀸𑀢𑀻𑀢𑀺 𑀏𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀯 𑀦𑀢𑁆𑀣𑀺, 𑀚𑀸𑀢𑀺 𑀧𑀦 𑀅𑀢𑁆𑀣𑀺𑀬𑁂𑀯. 𑀢𑀣𑀸 𑀚𑀭𑀸𑀫𑀭𑀡𑀸𑀤𑀻𑀦𑀻𑀢𑀺 𑀤𑀲𑁆𑀲𑁂𑀢𑀺. 𑀬𑁂𑀲𑀸𑀳𑀦𑁆𑀢𑀺 𑀬𑁂𑀲𑀁 𑀅𑀳𑀁. 𑀦𑀺𑀖𑀸𑀢𑀦𑁆𑀢𑀺 𑀉𑀧𑀖𑀸𑀢𑀁 𑀯𑀺𑀦𑀸𑀲𑀁. 𑀫𑀫 𑀲𑀸𑀯𑀓𑀸 𑀳𑀺 𑀏𑀢𑁂𑀲𑀼 𑀦𑀺𑀩𑁆𑀩𑀺𑀦𑁆𑀦𑀸 𑀇𑀥𑁂𑀯 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁨𑁮. 𑀢𑀲𑁆𑀫𑀸𑀢𑀺𑀳𑀸𑀢𑀺 ¶ 𑀬𑀲𑁆𑀫𑀸 𑀅𑀩𑁆𑀬𑀸𑀓𑀢𑀫𑁂𑀢𑀁, 𑀘𑀢𑀼𑀲𑀘𑁆𑀘𑀫𑁂𑀯 𑀫𑀬𑀸 𑀩𑁆𑀬𑀸𑀓𑀢𑀁, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀦 𑀳𑁂𑀢𑀁 𑀫𑀸𑀮𑀼𑀓𑁆𑀬𑀧𑀼𑀢𑁆𑀢 𑀅𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀏𑀢𑀁 𑀤𑀺𑀝𑁆𑀞𑀺𑀕𑀢𑀁 𑀯𑀸 𑀏𑀢𑀁 𑀩𑁆𑀬𑀸𑀓𑀭𑀡𑀁 𑀯𑀸 𑀓𑀸𑀭𑀡𑀦𑀺𑀲𑁆𑀲𑀺𑀢𑀁 ¶ 𑀦 𑀳𑁄𑀢𑀺. 𑀦 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺𑀫𑀢𑁆𑀢𑀫𑁆𑀧𑀺 𑀧𑀼𑀩𑁆𑀩𑀪𑀸𑀕𑀲𑀻𑀮𑀫𑀢𑁆𑀢𑀫𑁆𑀧𑀺 𑀦 𑀳𑁄𑀢𑀺. 𑀦 𑀦𑀺𑀩𑁆𑀩𑀺𑀤𑀸𑀬𑀸𑀢𑀺𑀆𑀤𑀻𑀲𑀼 𑀯𑀝𑁆𑀝𑁂 𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀣𑀸𑀬 𑀯𑀸 𑀯𑀺𑀭𑀚𑁆𑀛𑀦𑀢𑁆𑀣𑀸𑀬 𑀯𑀸 𑀯𑀝𑁆𑀝𑀦𑀺𑀭𑁄𑀥𑀸𑀬 𑀯𑀸 𑀭𑀸𑀕𑀸𑀤𑀺𑀯𑀽𑀧𑀲𑀫𑀦𑀢𑁆𑀣𑀸𑀬 𑀯𑀸 𑀅𑀪𑀺𑀜𑁆𑀜𑁂𑀬𑁆𑀬𑁂 𑀥𑀫𑁆𑀫𑁂 𑀅𑀪𑀺𑀚𑀸𑀦𑀦𑀢𑁆𑀣𑀸𑀬 𑀯𑀸 𑀘𑀢𑀼𑀫𑀕𑁆𑀕𑀲𑀗𑁆𑀔𑀸𑀢𑀲𑀫𑁆𑀩𑁄𑀥𑀢𑁆𑀣𑀸𑀬 𑀯𑀸 𑀅𑀲𑀗𑁆𑀔𑀢𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀢𑁆𑀣𑀸𑀬 𑀯𑀸 𑀦 𑀳𑁄𑀢𑀺. 𑀏𑀢𑀁 𑀳𑀻𑀢𑀺 𑀏𑀢𑀁 𑀘𑀢𑀼𑀲𑀘𑁆𑀘𑀩𑁆𑀬𑀸𑀓𑀭𑀡𑀁. 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺𑀪𑀽𑀢𑀁 𑀧𑀼𑀩𑁆𑀩𑀧𑀤𑀝𑁆𑀞𑀸𑀦𑀁. 𑀲𑁂𑀲𑀁 𑀯𑀼𑀢𑁆𑀢𑀧𑀝𑀺𑀯𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀫𑁆𑀧𑀺 𑀤𑁂𑀲𑀦𑀁 𑀪𑀕𑀯𑀸 𑀦𑁂𑀬𑁆𑀬𑀧𑀼𑀕𑁆𑀕𑀮𑀯𑀲𑁂𑀦 𑀦𑀺𑀝𑁆𑀞𑀸𑀧𑁂𑀲𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀘𑀽𑀴𑀫𑀸𑀮𑀼𑀓𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀫𑀳𑀸𑀫𑀸𑀮𑀼𑀓𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁯. 𑀏𑀯𑀁 ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀫𑀸𑀮𑀼𑀓𑁆𑀬𑀲𑀼𑀢𑁆𑀢𑀁. 𑀢𑀢𑁆𑀣 𑀑𑀭𑀫𑁆𑀪𑀸𑀕𑀺𑀬𑀸𑀦𑀻𑀢𑀺 𑀳𑁂𑀝𑁆𑀞𑀸 𑀓𑁄𑀝𑁆𑀞𑀸𑀲𑀺𑀓𑀸𑀦𑀺 𑀓𑀸𑀫𑀪𑀯𑁂 𑀦𑀺𑀩𑁆𑀩𑀢𑁆𑀢𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀺. 𑀲𑀁𑀬𑁄𑀚𑀦𑀸𑀦𑀻𑀢𑀺 𑀩𑀦𑁆𑀥𑀦𑀸𑀦𑀺. 𑀓𑀲𑁆𑀲 ¶ 𑀔𑁄 𑀦𑀸𑀫𑀸𑀢𑀺 𑀓𑀲𑁆𑀲 𑀤𑁂𑀯𑀲𑁆𑀲 𑀯𑀸 𑀫𑀦𑀼𑀲𑁆𑀲𑀲𑁆𑀲 𑀯𑀸 𑀤𑁂𑀲𑀺𑀢𑀸𑀦𑀺 𑀥𑀸𑀭𑁂𑀲𑀺, 𑀓𑀺𑀁 𑀢𑁆𑀯𑀫𑁂𑀯𑁂𑀓𑁄 𑀅𑀲𑁆𑀲𑁄𑀲𑀺, 𑀦 𑀅𑀜𑁆𑀜𑁄 𑀓𑁄𑀘𑀻𑀢𑀺? 𑀅𑀦𑀼𑀲𑁂𑀢𑀻𑀢𑀺 𑀅𑀧𑁆𑀧𑀳𑀻𑀦𑀢𑀸𑀬 𑀅𑀦𑀼𑀲𑁂𑀢𑀺. 𑀅𑀦𑀼𑀲𑀬𑀫𑀸𑀦𑁄 𑀲𑀁𑀬𑁄𑀚𑀦𑀁 𑀦𑀸𑀫 𑀳𑁄𑀢𑀺.

𑀏𑀢𑁆𑀣 𑀘 𑀪𑀕𑀯𑀢𑀸 𑀲𑀁𑀬𑁄𑀚𑀦𑀁 𑀧𑀼𑀘𑁆𑀙𑀺𑀢𑀁, 𑀣𑁂𑀭𑁂𑀦𑀧𑀺 𑀲𑀁𑀬𑁄𑀚𑀦𑀫𑁂𑀯 𑀩𑁆𑀬𑀸𑀓𑀢𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀲𑁆𑀲 𑀯𑀸𑀤𑁂 𑀪𑀕𑀯𑀢𑀸 𑀤𑁄𑀲𑁄 𑀆𑀭𑁄𑀧𑀺𑀢𑁄. 𑀲𑁄 𑀓𑀲𑁆𑀫𑀸𑀢𑀺 𑀘𑁂? 𑀣𑁂𑀭𑀲𑁆𑀲 𑀢𑀣𑀸𑀮𑀤𑁆𑀥𑀺𑀓𑀢𑁆𑀢𑀸. 𑀅𑀬𑀜𑁆𑀳𑀺 𑀢𑀲𑁆𑀲 𑀮𑀤𑁆𑀥𑀺 ‘‘𑀲𑀫𑀼𑀤𑀸𑀘𑀸𑀭𑀓𑁆𑀔𑀡𑁂𑀬𑁂𑀯 𑀓𑀺𑀮𑁂𑀲𑁂𑀳𑀺 𑀲𑀁𑀬𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺, 𑀇𑀢𑀭𑀲𑁆𑀫𑀺𑀁 𑀔𑀡𑁂 𑀅𑀲𑀁𑀬𑀼𑀢𑁆𑀢𑁄’’𑀢𑀺. 𑀢𑁂𑀦𑀲𑁆𑀲 𑀪𑀕𑀯𑀢𑀸 𑀤𑁄𑀲𑁄 𑀆𑀭𑁄𑀧𑀺𑀢𑁄. 𑀅𑀣𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀪𑀕𑀯𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑁂𑀯 𑀅𑀬𑀁 𑀥𑀫𑁆𑀫𑀤𑁂𑀲𑀦𑀸 𑀆𑀭𑀤𑁆𑀥𑀸, 𑀲𑀸 𑀇𑀫𑀺𑀦𑀸 𑀅𑀧𑀡𑁆𑀟𑀺𑀢𑁂𑀦 𑀪𑀺𑀓𑁆𑀔𑀼𑀦𑀸 𑀯𑀺𑀲𑀁𑀯𑀸𑀤𑀺𑀢𑀸. 𑀳𑀦𑁆𑀤𑀸𑀳𑀁 𑀪𑀕𑀯𑀦𑁆𑀢𑀁 𑀬𑀸𑀘𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀏𑀯𑀫𑀓𑀸𑀲𑀺. 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑀭𑀺𑀬𑀼𑀝𑁆𑀞𑀺𑀢𑁂𑀦𑀸𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀕𑀳𑀺𑀢𑁂𑀦 𑀅𑀪𑀺𑀪𑀽𑀢𑁂𑀦. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑀭𑁂𑀢𑁂𑀦𑀸𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀅𑀦𑀼𑀕𑀢𑁂𑀦. 𑀦𑀺𑀲𑁆𑀲𑀭𑀡𑀦𑁆𑀢𑀺 𑀤𑀺𑀝𑁆𑀞𑀺𑀦𑀺𑀲𑁆𑀲𑀭𑀡𑀁 𑀦𑀸𑀫 𑀦𑀺𑀩𑁆𑀩𑀸𑀦𑀁, 𑀢𑀁 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀺. 𑀅𑀧𑁆𑀧𑀝𑀺𑀯𑀺𑀦𑀻𑀢𑀸𑀢𑀺 𑀅𑀯𑀺𑀦𑁄𑀤𑀺𑀢𑀸 𑀅𑀦𑀻𑀳𑀝𑀸. 𑀑𑀭𑀫𑁆𑀪𑀸𑀕𑀺𑀬𑀁 𑀲𑀁𑀬𑁄𑀚𑀦𑀦𑁆𑀢𑀺 𑀳𑁂𑀝𑁆𑀞𑀸𑀪𑀸𑀕𑀺𑀬𑀲𑀁𑀬𑁄𑀚𑀦𑀁 𑀦𑀸𑀫 𑀳𑁄𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀼𑀓𑁆𑀓𑀧𑀓𑁆𑀔𑁄 𑀉𑀢𑁆𑀢𑀸𑀦𑀢𑁆𑀣𑁄𑀬𑁂𑀯. ‘‘𑀲𑀸𑀦𑀼𑀲𑀬𑀸 𑀧𑀳𑀻𑀬𑀢𑀻’’𑀢𑀺 𑀯𑀘𑀦𑀢𑁄 𑀧𑀦𑁂𑀢𑁆𑀣 𑀏𑀓𑀘𑁆𑀘𑁂 ‘‘𑀅𑀜𑁆𑀜𑀁 𑀲𑀁𑀬𑁄𑀚𑀦𑀁 𑀅𑀜𑁆𑀜𑁄 𑀅𑀦𑀼𑀲𑀬𑁄’’𑀢𑀺 𑀯𑀤𑀦𑁆𑀢𑀺. ‘‘𑀬𑀣𑀸 𑀳𑀺 𑀲𑀩𑁆𑀬𑀜𑁆𑀚𑀦𑀁 𑀪𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀪𑀢𑁆𑀢𑀢𑁄 𑀅𑀜𑁆𑀜𑀁 𑀩𑁆𑀬𑀜𑁆𑀚𑀦𑀁 𑀳𑁄𑀢𑀺, 𑀏𑀯𑀁 ‘‘𑀲𑀸𑀦𑀼𑀲𑀬𑀸’’𑀢𑀺 𑀯𑀘𑀦𑀢𑁄 𑀧𑀭𑀺𑀬𑀼𑀝𑁆𑀞𑀸𑀦𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀢𑁄 𑀅𑀜𑁆𑀜𑁂𑀦 𑀅𑀦𑀼𑀲𑀬𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀢𑁂𑀲𑀁 𑀮𑀤𑁆𑀥𑀺. 𑀢𑁂 ‘‘𑀲𑀲𑀻𑀲𑀁 𑀧𑀸𑀭𑀼𑀧𑀺𑀢𑁆𑀯𑀸’’𑀢𑀺𑀆𑀤𑀻𑀳𑀺 ¶ 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸. 𑀦 𑀳𑀺 𑀲𑀻𑀲𑀢𑁄 𑀅𑀜𑁆𑀜𑁄 𑀧𑀼𑀭𑀺𑀲𑁄 𑀅𑀢𑁆𑀣𑀺. 𑀅𑀣𑀸𑀧𑀺 𑀲𑀺𑀬𑀸 𑁋 ‘‘𑀬𑀤𑀺 𑀢𑀤𑁂𑀯 𑀲𑀁𑀬𑁄𑀚𑀦𑀁 𑀲𑁄 𑀅𑀦𑀼𑀲𑀬𑁄, 𑀏𑀯𑀁 𑀲𑀦𑁆𑀢𑁂 𑀪𑀕𑀯𑀢𑀸 𑀣𑁂𑀭𑀲𑁆𑀲 ¶ 𑀢𑀭𑀼𑀡𑀽𑀧𑀫𑁄 𑀉𑀧𑀸𑀭𑀫𑁆𑀪𑁄 𑀤𑀼𑀆𑀭𑁄𑀧𑀺𑀢𑁄 𑀳𑁄𑀢𑀻’’𑀢𑀺. 𑀦 𑀤𑀼𑀆𑀭𑁄𑀧𑀺𑀢𑁄, 𑀓𑀲𑁆𑀫𑀸? 𑀏𑀯𑀁𑀮𑀤𑁆𑀥𑀺𑀓𑀢𑁆𑀢𑀸𑀢𑀺 ¶ 𑀯𑀺𑀢𑁆𑀣𑀸𑀭𑀺𑀢𑀫𑁂𑀢𑀁. 𑀢𑀲𑁆𑀫𑀸 𑀲𑁄𑀬𑁂𑀯 𑀓𑀺𑀮𑁂𑀲𑁄 𑀩𑀦𑁆𑀥𑀦𑀝𑁆𑀞𑁂𑀦 𑀲𑀁𑀬𑁄𑀚𑀦𑀁, 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀅𑀦𑀼𑀲𑀬𑁄𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀪𑀕𑀯𑀢𑀸 ‘‘𑀲𑀸𑀦𑀼𑀲𑀬𑀸 𑀧𑀳𑀻𑀬𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁩𑁨. 𑀢𑀘𑀁 𑀙𑁂𑀢𑁆𑀯𑀸𑀢𑀺𑀆𑀤𑀻𑀲𑀼 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀢𑀘𑀘𑁆𑀙𑁂𑀤𑁄 𑀯𑀺𑀬 𑀳𑀺 𑀲𑀫𑀸𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸, 𑀨𑁂𑀕𑁆𑀕𑀼𑀘𑁆𑀙𑁂𑀤𑁄 𑀯𑀺𑀬 𑀯𑀺𑀧𑀲𑁆𑀲𑀦𑀸, 𑀲𑀸𑀭𑀘𑁆𑀙𑁂𑀤𑁄 𑀯𑀺𑀬 𑀫𑀕𑁆𑀕𑁄. 𑀧𑀝𑀺𑀧𑀤𑀸 𑀧𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀯 𑀯𑀝𑁆𑀝𑀢𑀺. 𑀏𑀯𑀫𑁂𑀢𑁂 𑀤𑀝𑁆𑀞𑀩𑁆𑀩𑀸𑀢𑀺 𑀏𑀯𑀭𑀽𑀧𑀸 𑀧𑀼𑀕𑁆𑀕𑀮𑀸 𑀏𑀯𑀁 𑀤𑀝𑁆𑀞𑀩𑁆𑀩𑀸.

𑁧𑁩𑁩. 𑀉𑀧𑀥𑀺𑀯𑀺𑀯𑁂𑀓𑀸𑀢𑀺 𑀉𑀧𑀥𑀺𑀯𑀺𑀯𑁂𑀓𑁂𑀦. 𑀇𑀫𑀺𑀦𑀸 𑀧𑀜𑁆𑀘𑀓𑀸𑀫𑀕𑀼𑀡𑀯𑀺𑀯𑁂𑀓𑁄 𑀓𑀣𑀺𑀢𑁄. 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀢𑀺 𑀇𑀫𑀺𑀦𑀸 𑀦𑀻𑀯𑀭𑀡𑀧𑁆𑀧𑀳𑀸𑀦𑀁 𑀓𑀣𑀺𑀢𑀁. 𑀓𑀸𑀬𑀤𑀼𑀝𑁆𑀞𑀼𑀮𑁆𑀮𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸𑀢𑀺 𑀇𑀫𑀺𑀦𑀸 𑀓𑀸𑀬𑀸𑀮𑀲𑀺𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺 𑀓𑀣𑀺𑀢𑀸. 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺 𑀉𑀧𑀥𑀺𑀯𑀺𑀯𑁂𑀓𑁂𑀦 𑀓𑀸𑀫𑁂𑀳𑀺 𑀯𑀺𑀦𑀸 𑀳𑀼𑀢𑁆𑀯𑀸. 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀻𑀢𑀺 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑁂𑀦 𑀓𑀸𑀬𑀤𑀼𑀝𑁆𑀞𑀼𑀮𑁆𑀮𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀘 𑀅𑀓𑀼𑀲𑀮𑁂𑀳𑀺 𑀯𑀺𑀦𑀸 𑀳𑀼𑀢𑁆𑀯𑀸. 𑀬𑀤𑁂𑀯 𑀢𑀢𑁆𑀣 𑀳𑁄𑀢𑀻𑀢𑀺 𑀬𑀁 𑀢𑀢𑁆𑀣 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂𑀬𑁂𑀯 𑀲𑀫𑀸𑀧𑀢𑁆𑀢𑀺𑀲𑀫𑀼𑀝𑁆𑀞𑀺𑀢𑀜𑁆𑀘 𑀭𑀽𑀧𑀸𑀤𑀺𑀥𑀫𑁆𑀫𑀚𑀸𑀢𑀁 𑀳𑁄𑀢𑀺. 𑀢𑁂 ¶ 𑀥𑀫𑁆𑀫𑁂𑀢𑀺 𑀢𑁂 𑀭𑀽𑀧𑀕𑀢𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁂 𑀭𑀽𑀧𑀸𑀤𑀬𑁄 𑀥𑀫𑁆𑀫𑁂. 𑀅𑀦𑀺𑀘𑁆𑀘𑀢𑁄𑀢𑀺 𑀦 𑀦𑀺𑀘𑁆𑀘𑀢𑁄. 𑀤𑀼𑀓𑁆𑀔𑀢𑁄𑀢𑀺 𑀦 𑀲𑀼𑀔𑀢𑁄. 𑀭𑁄𑀕𑀢𑁄𑀢𑀺𑀆𑀤𑀻𑀲𑀼 𑀆𑀩𑀸𑀥𑀝𑁆𑀞𑁂𑀦 𑀭𑁄𑀕𑀢𑁄, 𑀅𑀦𑁆𑀢𑁄𑀤𑁄𑀲𑀝𑁆𑀞𑁂𑀦 𑀕𑀡𑁆𑀟𑀢𑁄, 𑀅𑀦𑀼𑀧𑀯𑀺𑀤𑁆𑀥𑀝𑁆𑀞𑁂𑀦 𑀤𑀼𑀓𑁆𑀔𑀚𑀦𑀦𑀝𑁆𑀞𑁂𑀦 𑀘 𑀲𑀮𑁆𑀮𑀢𑁄, 𑀤𑀼𑀓𑁆𑀔𑀝𑁆𑀞𑁂𑀦 𑀅𑀖𑀢𑁄, 𑀭𑁄𑀕𑀝𑁆𑀞𑁂𑀦 𑀆𑀩𑀸𑀥𑀢𑁄, 𑀅𑀲𑀓𑀝𑁆𑀞𑁂𑀦 𑀧𑀭𑀢𑁄, 𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀧𑀮𑁄𑀓𑀢𑁄, 𑀦𑀺𑀲𑁆𑀲𑀢𑁆𑀢𑀝𑁆𑀞𑁂𑀦 𑀲𑀼𑀜𑁆𑀜𑀢𑁄, 𑀦 𑀅𑀢𑁆𑀢𑀝𑁆𑀞𑁂𑀦 𑀅𑀦𑀢𑁆𑀢𑀢𑁄. 𑀢𑀢𑁆𑀣 𑀅𑀦𑀺𑀘𑁆𑀘𑀢𑁄, 𑀧𑀮𑁄𑀓𑀢𑁄𑀢𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀓𑀣𑀺𑀢𑀁, 𑀤𑀼𑀓𑁆𑀔𑀢𑁄𑀢𑀺𑀆𑀤𑀻𑀳𑀺 𑀙𑀳𑀺 𑀤𑀼𑀓𑁆𑀔𑀮𑀓𑁆𑀔𑀡𑀁, 𑀧𑀭𑀢𑁄 𑀲𑀼𑀜𑁆𑀜𑀢𑁄 𑀅𑀦𑀢𑁆𑀢𑀢𑁄𑀢𑀺 𑀢𑀻𑀳𑀺 𑀅𑀦𑀢𑁆𑀢𑀮𑀓𑁆𑀔𑀡𑀁.

𑀲𑁄 𑀢𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀲𑁄 𑀢𑁂𑀳𑀺 𑀏𑀯𑀁 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀤𑀺𑀝𑁆𑀞𑁂𑀳𑀺 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀧𑀜𑁆𑀘𑀓𑁆𑀔𑀦𑁆𑀥𑀥𑀫𑁆𑀫𑁂𑀳𑀺. 𑀘𑀺𑀢𑁆𑀢𑀁 𑀧𑀝𑀺𑀯𑀸𑀧𑁂𑀢𑀻𑀢𑀺 𑀘𑀺𑀢𑁆𑀢𑀁 𑀧𑀝𑀺𑀲𑀁𑀳𑀭𑀢𑀺 𑀫𑁄𑀘𑁂𑀢𑀺 𑀅𑀧𑀦𑁂𑀢𑀺. 𑀉𑀧𑀲𑀁𑀳𑀭𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀢𑀸𑀯 𑀲𑀯𑀦𑀯𑀲𑁂𑀦 ¶ 𑀣𑀼𑀢𑀺𑀯𑀲𑁂𑀦 𑀧𑀭𑀺𑀬𑀢𑁆𑀢𑀺𑀯𑀲𑁂𑀦 𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀘 𑀏𑀢𑀁 𑀲𑀦𑁆𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀏𑀯𑀁 𑀅𑀲𑀗𑁆𑀔𑀢𑀸𑀬 𑀅𑀫𑀢𑀸𑀬 𑀥𑀸𑀢𑀼𑀬𑀸 𑀉𑀧𑀲𑀁𑀳𑀭𑀢𑀺. 𑀫𑀕𑁆𑀕𑀘𑀺𑀢𑁆𑀢𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑁂𑀯 𑀏𑀢𑀁 𑀲𑀦𑁆𑀢𑀫𑁂𑀢𑀁 𑀧𑀡𑀻𑀢𑀦𑁆𑀢𑀺 𑀦 𑀏𑀯𑀁 𑀯𑀤𑀢𑀺, 𑀇𑀫𑀺𑀦𑀸 𑀧𑀦 𑀆𑀓𑀸𑀭𑁂𑀦 𑀢𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀢𑀢𑁆𑀣 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀲𑁄 𑀢𑀢𑁆𑀣 𑀞𑀺𑀢𑁄𑀢𑀺 𑀢𑀸𑀬 𑀢𑀺𑀮𑀓𑁆𑀔𑀡𑀸𑀭𑀫𑁆𑀫𑀡𑀸𑀬 𑀯𑀺𑀧𑀲𑁆𑀲𑀦𑀸𑀬 𑀞𑀺𑀢𑁄. 𑀆𑀲𑀯𑀸𑀦𑀁 𑀔𑀬𑀁 𑀧𑀸𑀧𑀼𑀡𑀸𑀢𑀻𑀢𑀺 𑀅𑀦𑀼𑀓𑁆𑀓𑀫𑁂𑀦 𑀘𑀢𑁆𑀢𑀸𑀭𑁄 𑀫𑀕𑁆𑀕𑁂 𑀪𑀸𑀯𑁂𑀢𑁆𑀯𑀸 𑀧𑀸𑀧𑀼𑀡𑀸𑀢𑀺 ¶ . 𑀢𑁂𑀦𑁂𑀯 𑀥𑀫𑁆𑀫𑀭𑀸𑀕𑁂𑀦𑀸𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂 𑀙𑀦𑁆𑀤𑀭𑀸𑀕𑁂𑀦. 𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀳𑀺 𑀲𑀩𑁆𑀩𑀲𑁄 𑀙𑀦𑁆𑀤𑀭𑀸𑀕𑀁 𑀧𑀭𑀺𑀬𑀸𑀤𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀲𑀓𑁆𑀓𑁄𑀦𑁆𑀢𑁄 𑀅𑀦𑀸𑀕𑀸𑀫𑀻 𑀳𑁄𑀢𑀺.

𑀬𑀤𑁂𑀯 ¶ 𑀢𑀢𑁆𑀣 𑀳𑁄𑀢𑀺 𑀯𑁂𑀤𑀦𑀸𑀕𑀢𑀦𑁆𑀢𑀺 𑀇𑀥 𑀧𑀦 𑀭𑀽𑀧𑀁 𑀦 𑀕𑀳𑀺𑀢𑀁. 𑀓𑀲𑁆𑀫𑀸? 𑀲𑀫𑀢𑀺𑀓𑁆𑀓𑀦𑁆𑀢𑀢𑁆𑀢𑀸. 𑀅𑀬𑀜𑁆𑀳𑀺 𑀳𑁂𑀝𑁆𑀞𑀸 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀭𑀽𑀧𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑁄𑀢𑀺 𑀲𑀫𑀣𑀯𑀲𑁂𑀦𑀧𑀺𑀦𑁂𑀦 𑀭𑀽𑀧𑀁 𑀅𑀢𑀺𑀓𑁆𑀓𑀦𑁆𑀢𑀁, 𑀳𑁂𑀝𑁆𑀞𑀸 𑀭𑀽𑀧𑀁 𑀲𑀫𑁆𑀫𑀤𑁂𑀯 𑀲𑀫𑁆𑀫𑀲𑀺𑀢𑁆𑀯𑀸 𑀢𑀁 𑀅𑀢𑀺𑀓𑁆𑀓𑀫𑁆𑀫 𑀇𑀤𑀸𑀦𑀺 𑀅𑀭𑀽𑀧𑀁 𑀲𑀫𑁆𑀫𑀲𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑀧𑀺𑀦𑁂𑀦 𑀭𑀽𑀧𑀁 𑀅𑀢𑀺𑀓𑁆𑀓𑀦𑁆𑀢𑀁. 𑀅𑀭𑀽𑀧𑁂 𑀧𑀦 𑀲𑀩𑁆𑀩𑀲𑁄𑀧𑀺 𑀭𑀽𑀧𑀁 𑀦𑀢𑁆𑀣𑀻𑀢𑀺 𑀢𑀁 𑀲𑀦𑁆𑀥𑀸𑀬𑀧𑀺 𑀇𑀥 𑀭𑀽𑀧𑀁 𑀦 𑀕𑀳𑀺𑀢𑀁.

𑀅𑀣 𑀓𑀺𑀜𑁆𑀘𑀭𑀳𑀻𑀢𑀺 𑀓𑀺𑀁 𑀧𑀼𑀘𑁆𑀙𑀸𑀫𑀻𑀢𑀺 𑀧𑀼𑀘𑁆𑀙𑀢𑀺? 𑀲𑀫𑀣𑀯𑀲𑁂𑀦 𑀕𑀘𑁆𑀙𑀢𑁄 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀥𑀼𑀭𑀁 𑀳𑁄𑀢𑀺, 𑀲𑁄 𑀘𑁂𑀢𑁄𑀯𑀺𑀫𑀼𑀢𑁆𑀢𑁄 𑀦𑀸𑀫. 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀕𑀘𑁆𑀙𑀢𑁄 𑀧𑀜𑁆𑀜𑀸 𑀥𑀼𑀭𑀁 𑀳𑁄𑀢𑀺, 𑀲𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀦𑀸𑀫𑀸𑀢𑀺 𑀏𑀢𑁆𑀣 𑀣𑁂𑀭𑀲𑁆𑀲 𑀓𑀗𑁆𑀔𑀸 𑀦𑀢𑁆𑀣𑀺. 𑀅𑀬𑀁 𑀲𑀪𑀸𑀯𑀥𑀫𑁆𑀫𑁄𑀬𑁂𑀯, 𑀲𑀫𑀣𑀯𑀲𑁂𑀦𑁂𑀯 𑀧𑀦 𑀕𑀘𑁆𑀙𑀦𑁆𑀢𑁂𑀲𑀼 𑀏𑀓𑁄 𑀘𑁂𑀢𑁄𑀯𑀺𑀫𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺, 𑀏𑀓𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄. 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀕𑀘𑁆𑀙𑀦𑁆𑀢𑁂𑀲𑀼𑀧𑀺 𑀏𑀓𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺, 𑀏𑀓𑁄 𑀘𑁂𑀢𑁄𑀯𑀺𑀫𑀼𑀢𑁆𑀢𑁄𑀢𑀺 𑀏𑀢𑁆𑀣 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀧𑀼𑀘𑁆𑀙𑀢𑀺.

𑀇𑀦𑁆𑀤𑁆𑀭𑀺𑀬𑀯𑁂𑀫𑀢𑁆𑀢𑀢𑀁 𑀯𑀤𑀸𑀫𑀻𑀢𑀺 𑀇𑀦𑁆𑀤𑁆𑀭𑀺𑀬𑀦𑀸𑀦𑀢𑁆𑀢𑀢𑀁 𑀯𑀤𑀸𑀫𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺, 𑀦 𑀢𑁆𑀯𑀁, 𑀆𑀦𑀦𑁆𑀤, 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀝𑀺𑀯𑀺𑀚𑁆𑀛𑀺, 𑀢𑁂𑀦 𑀢𑁂 𑀏𑀢𑀁 𑀅𑀧𑀸𑀓𑀝𑀁. 𑀅𑀳𑀁 𑀧𑀦 𑀧𑀝𑀺𑀯𑀺𑀚𑁆𑀛𑀺𑀁, 𑀢𑁂𑀦 𑀫𑁂 𑀏𑀢𑀁 𑀧𑀸𑀓𑀝𑀁. 𑀏𑀢𑁆𑀣 𑀳𑀺 𑀇𑀦𑁆𑀤𑁆𑀭𑀺𑀬𑀦𑀸𑀦𑀢𑁆𑀢𑀢𑀸 𑀓𑀸𑀭𑀡𑀁. 𑀲𑀫𑀣𑀯𑀲𑁂𑀦𑁂𑀯 𑀳𑀺 𑀕𑀘𑁆𑀙𑀦𑁆𑀢𑁂𑀲𑀼 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀥𑀼𑀭𑀁 𑀳𑁄𑀢𑀺, 𑀲𑁄 𑀘𑁂𑀢𑁄𑀯𑀺𑀫𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀏𑀓𑀲𑁆𑀲 𑀧𑀜𑁆𑀜𑀸 𑀥𑀼𑀭𑀁 𑀳𑁄𑀢𑀺, 𑀲𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑁂𑀯 𑀘 𑀕𑀘𑁆𑀙𑀦𑁆𑀢𑁂𑀲𑀼 𑀏𑀓𑀲𑁆𑀲 𑀧𑀜𑁆𑀜𑀸 𑀥𑀼𑀭𑀁 𑀳𑁄𑀢𑀺, 𑀲𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 ¶ 𑀦𑀸𑀫 𑀳𑁄𑀢𑀺. 𑀏𑀓𑀲𑁆𑀲 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀥𑀼𑀭𑀁 𑀳𑁄𑀢𑀺, 𑀲𑁄 𑀘𑁂𑀢𑁄𑀯𑀺𑀫𑀼𑀢𑁆𑀢𑁄 𑀦𑀸𑀫 ¶ 𑀳𑁄𑀢𑀺. 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀼𑀭𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸. 𑀢𑁂𑀲𑀼 𑀥𑀫𑁆𑀫𑀲𑁂𑀦𑀸𑀧𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀚𑀸𑀢𑁄, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀘𑁂𑀢𑁄𑀯𑀺𑀫𑀼𑀢𑁆𑀢𑁄. 𑀇𑀢𑀺 𑀇𑀦𑁆𑀤𑁆𑀭𑀺𑀬𑀯𑁂𑀫𑀢𑁆𑀢𑀫𑁂𑀢𑁆𑀣 𑀓𑀸𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀳𑀸𑀫𑀸𑀮𑀼𑀓𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀪𑀤𑁆𑀤𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁪. 𑀏𑀯𑀁 ¶ 𑀫𑁂 𑀲𑀼𑀢𑀦𑁆𑀢𑀺 𑀪𑀤𑁆𑀤𑀸𑀮𑀺𑀲𑀼𑀢𑁆𑀢𑀁. 𑀢𑀢𑁆𑀣 𑀏𑀓𑀸𑀲𑀦𑀪𑁄𑀚𑀦𑀦𑁆𑀢𑀺 𑀏𑀓𑀲𑁆𑀫𑀺𑀁 𑀧𑀼𑀭𑁂𑀪𑀢𑁆𑀢𑁂 𑀅𑀲𑀦𑀪𑁄𑀚𑀦𑀁, 𑀪𑀼𑀜𑁆𑀚𑀺𑀢𑀩𑁆𑀩𑀪𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀸𑀩𑀸𑀥𑀢𑀦𑁆𑀢𑀺𑀆𑀤𑀻𑀦𑀺 𑀓𑀓𑀘𑁄𑀧𑀫𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑀺. 𑀦 𑀉𑀲𑁆𑀲𑀳𑀸𑀫𑀻𑀢𑀺 𑀦 𑀲𑀓𑁆𑀓𑁄𑀫𑀺. 𑀲𑀺𑀬𑀸 𑀓𑀼𑀓𑁆𑀓𑀼𑀘𑁆𑀘𑀁 𑀲𑀺𑀬𑀸 𑀯𑀺𑀧𑁆𑀧𑀝𑀺𑀲𑀸𑀭𑁄𑀢𑀺 𑀏𑀯𑀁 𑀪𑀼𑀜𑁆𑀚𑀦𑁆𑀢𑁄 𑀬𑀸𑀯𑀚𑀻𑀯𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀺 𑀦𑀼 𑀔𑁄, 𑀦 𑀦𑀼 𑀔𑁄𑀢𑀺 𑀇𑀢𑀺 𑀫𑁂 𑀯𑀺𑀧𑁆𑀧𑀝𑀺𑀲𑀸𑀭𑀓𑀼𑀓𑁆𑀓𑀼𑀘𑁆𑀘𑀁 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀏𑀓𑀤𑁂𑀲𑀁 𑀪𑀼𑀜𑁆𑀚𑀺𑀢𑁆𑀯𑀸𑀢𑀺 𑀧𑁄𑀭𑀸𑀡𑀓𑀢𑁆𑀣𑁂𑀭𑀸 𑀓𑀺𑀭 𑀧𑀢𑁆𑀢𑁂 𑀪𑀢𑁆𑀢𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀧𑁆𑀧𑀺𑀫𑁆𑀳𑀺 𑀤𑀺𑀦𑁆𑀦𑁂 𑀲𑀧𑁆𑀧𑀺𑀦𑀸 𑀉𑀡𑁆𑀳𑀫𑁂𑀯 𑀣𑁄𑀓𑀁 𑀪𑀼𑀜𑁆𑀚𑀺𑀢𑁆𑀯𑀸 𑀳𑀢𑁆𑀣𑁂 𑀥𑁄𑀯𑀺𑀢𑁆𑀯𑀸 𑀅𑀯𑀲𑁂𑀲𑀁 𑀩𑀳𑀺 𑀦𑀻𑀳𑀭𑀺𑀢𑁆𑀯𑀸 𑀙𑀸𑀬𑀽𑀤𑀓𑀨𑀸𑀲𑀼𑀓𑁂 𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺. 𑀏𑀢𑀁 𑀲𑀦𑁆𑀥𑀸𑀬 𑀲𑀢𑁆𑀣𑀸 𑀆𑀳. 𑀪𑀤𑁆𑀤𑀸𑀮𑀺, 𑀧𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀲𑀓𑀺𑀁 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀤𑀺𑀦𑁆𑀦𑀁 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀧𑀼𑀦 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀑𑀤𑀦𑀲𑁆𑀲 𑀧𑀽𑀭𑁂𑀢𑁆𑀯𑀸 𑀮𑀤𑁆𑀥𑀁 ¶ 𑀩𑀳𑀺 𑀦𑀻𑀳𑀭𑀺𑀢𑁆𑀯𑀸 𑀙𑀸𑀬𑀽𑀤𑀓𑀨𑀸𑀲𑀼𑀓𑁂 𑀞𑀸𑀦𑁂 𑀪𑀼𑀜𑁆𑀚𑁂𑀬𑁆𑀬, 𑀇𑀢𑀺 𑀏𑀯𑀁 𑀯𑀝𑁆𑀝𑁂𑀬𑁆𑀬, 𑀇𑀢𑀭𑀣𑀸 𑀓𑁄 𑀲𑀓𑁆𑀓𑁄𑀢𑀻’’𑀢𑀺. 𑀢𑀲𑁆𑀫𑀸 𑀏𑀯𑀫𑁆𑀧𑀺 𑀔𑁄 𑀅𑀳𑀁, 𑀪𑀦𑁆𑀢𑁂, 𑀦 𑀉𑀲𑁆𑀲𑀳𑀸𑀫𑀻𑀢𑀺 𑀆𑀳. 𑀅𑀬𑀁 𑀓𑀺𑀭 𑀅𑀢𑀻𑀢𑁂 𑀅𑀦𑀦𑁆𑀢𑀭𑀸𑀬 𑀚𑀸𑀢𑀺𑀬𑀸 𑀓𑀸𑀓𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺. 𑀓𑀸𑀓𑀸 𑀘 𑀦𑀸𑀫 𑀫𑀳𑀸𑀙𑀸𑀢𑀓𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀙𑀸𑀢𑀓𑀢𑁆𑀣𑁂𑀭𑁄 𑀦𑀸𑀫 𑀅𑀳𑁄𑀲𑀺. 𑀢𑀲𑁆𑀲 𑀧𑀦 𑀯𑀺𑀭𑀯𑀦𑁆𑀢𑀲𑁆𑀲𑁂𑀯 𑀪𑀕𑀯𑀸 𑀢𑀁 𑀫𑀤𑁆𑀤𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑁋 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀯𑀺𑀓𑀸𑀮𑁂 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀔𑀸𑀤𑁂𑀬𑁆𑀬 𑀯𑀸 𑀪𑀼𑀜𑁆𑀚𑁂𑀬𑁆𑀬 𑀯𑀸 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁨𑁪𑁮) 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀣 𑀔𑁄 𑀆𑀬𑀲𑁆𑀫𑀸, 𑀪𑀤𑁆𑀤𑀸𑀮𑀺,…𑀧𑁂… 𑀅𑀦𑀼𑀲𑁆𑀲𑀸𑀳𑀁 𑀧𑀯𑁂𑀤𑁂𑀲𑀻𑀢𑀺.

𑀬𑀣𑀸 ¶ 𑀢𑀦𑁆𑀢𑀺 𑀬𑀣𑀸 𑀅𑀜𑁆𑀜𑁄𑀧𑀺 𑀲𑀺𑀓𑁆𑀔𑀸𑀬 𑀦 𑀧𑀭𑀺𑀧𑀽𑀭𑀓𑀸𑀭𑀻 𑀏𑀓𑀯𑀺𑀳𑀸𑀭𑁂𑀧𑀺 𑀯𑀲𑀦𑁆𑀢𑁄 𑀲𑀢𑁆𑀣𑀼 𑀲𑀫𑁆𑀫𑀼𑀔𑀻𑀪𑀸𑀯𑀁 𑀦 𑀤𑀤𑁂𑀬𑁆𑀬, 𑀢𑀣𑁂𑀯 𑀦 𑀅𑀤𑀸𑀲𑀻𑀢𑀺 𑀅𑀢𑁆𑀣𑁄. 𑀦𑁂𑀯 𑀪𑀕𑀯𑀢𑁄 𑀉𑀧𑀝𑁆𑀞𑀸𑀦𑀁 𑀅𑀕𑀫𑀸𑀲𑀺, 𑀦 𑀥𑀫𑁆𑀫𑀤𑁂𑀲𑀦𑀝𑁆𑀞𑀸𑀦𑀁 𑀦 𑀯𑀺𑀢𑀓𑁆𑀓𑀫𑀸𑀴𑀓𑀁, 𑀦 𑀏𑀓𑀁 𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺. 𑀬𑀲𑁆𑀫𑀺𑀁 𑀓𑀼𑀮𑁂 𑀪𑀕𑀯𑀸 𑀦𑀺𑀲𑀻𑀤𑀢𑀺, 𑀢𑀲𑁆𑀲 𑀤𑁆𑀯𑀸𑀭𑁂𑀧𑀺 𑀦 𑀅𑀝𑁆𑀞𑀸𑀲𑀺. 𑀲𑀘𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀪𑀕𑀯𑀸 𑀕𑀘𑁆𑀙𑀢𑀺, 𑀲𑁄 𑀧𑀼𑀭𑁂𑀢𑀭𑀫𑁂𑀯 𑀜𑀢𑁆𑀯𑀸 𑀅𑀜𑁆𑀜𑀢𑁆𑀣 𑀕𑀘𑁆𑀙𑀢𑀺. 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁄 𑀓𑀺𑀭𑁂𑀲 𑀓𑀼𑀮𑀧𑀼𑀢𑁆𑀢𑁄 𑀧𑀭𑀺𑀲𑀼𑀤𑁆𑀥𑀲𑀻𑀮𑁄. 𑀢𑁂𑀦𑀲𑁆𑀲 𑀦 𑀅𑀜𑁆𑀜𑁄 𑀯𑀺𑀢𑀓𑁆𑀓𑁄 𑀅𑀳𑁄𑀲𑀺, 𑁋 ‘‘𑀫𑀬𑀸 𑀦𑀸𑀫 𑀉𑀤𑀭𑀓𑀸𑀭𑀡𑀸 𑀪𑀕𑀯𑀢𑁄 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀁 𑀧𑀝𑀺𑀩𑀸𑀳𑀺𑀢𑀁, 𑀅𑀦𑀦𑀼𑀘𑁆𑀙𑀯𑀺𑀓𑀁 ¶ 𑀫𑁂 𑀓𑀢’’𑀦𑁆𑀢𑀺 𑀅𑀬𑀫𑁂𑀯 𑀯𑀺𑀢𑀓𑁆𑀓𑁄 𑀅𑀳𑁄𑀲𑀺. 𑀢𑀲𑁆𑀫𑀸 𑀏𑀓𑀯𑀺𑀳𑀸𑀭𑁂 𑀯𑀲𑀦𑁆𑀢𑁄𑀧𑀺 𑀮𑀚𑁆𑀚𑀸𑀬 𑀲𑀢𑁆𑀣𑀼 𑀲𑀫𑁆𑀫𑀼𑀔𑀻𑀪𑀸𑀯𑀁 𑀦𑀸𑀤𑀸𑀲𑀺.

𑁧𑁩𑁫. 𑀘𑀻𑀯𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑀻𑀢𑀺 𑀫𑀦𑀼𑀲𑁆𑀲𑀸 𑀪𑀕𑀯𑀢𑁄 𑀘𑀻𑀯𑀭𑀲𑀸𑀝𑀓𑀁 𑀅𑀤𑀁𑀲𑀼, 𑀢𑀁 𑀕𑀳𑁂𑀢𑁆𑀯𑀸 𑀘𑀻𑀯𑀭𑀁 𑀓𑀭𑁄𑀦𑁆𑀢𑀺. 𑀏𑀢𑀁 𑀤𑁄𑀲𑀓𑀦𑁆𑀢𑀺 𑀏𑀢𑀁 𑀑𑀓𑀸𑀲𑀫𑁂𑀢𑀁 𑀅𑀧𑀭𑀸𑀥𑀁, 𑀲𑀢𑁆𑀣𑀼 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀦𑁆𑀢𑀲𑁆𑀲 𑀧𑀝𑀺𑀩𑀸𑀳𑀺𑀢𑀓𑀸𑀭𑀡𑀁 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀳𑀻𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀓𑀭𑀢𑀭𑀦𑁆𑀢𑀺 ¶ 𑀯𑀲𑁆𑀲𑀜𑁆𑀳𑀺 𑀯𑀲𑀺𑀢𑁆𑀯𑀸 𑀤𑀺𑀲𑀸𑀧𑀓𑁆𑀓𑀦𑁆𑀢𑁂 𑀪𑀺𑀓𑁆𑀔𑀽 𑀓𑀼𑀳𑀺𑀁 𑀯𑀲𑀺𑀢𑁆𑀣𑀸𑀢𑀺 𑀧𑀼𑀘𑁆𑀙𑀦𑁆𑀢𑀺, 𑀢𑁂𑀳𑀺 𑀚𑁂𑀢𑀯𑀦𑁂 𑀯𑀲𑀺𑀫𑁆𑀳𑀸𑀢𑀺 𑀯𑀼𑀢𑁆𑀢𑁂, ‘‘𑀆𑀯𑀼𑀲𑁄, 𑀪𑀕𑀯𑀸 𑀇𑀫𑀲𑁆𑀫𑀺𑀁 𑀅𑀦𑁆𑀢𑁄𑀯𑀲𑁆𑀲𑁂 𑀓𑀢𑀭𑀁 𑀚𑀸𑀢𑀓𑀁 𑀓𑀣𑁂𑀲𑀺, 𑀓𑀢𑀭𑀁 𑀲𑀼𑀢𑁆𑀢𑀦𑁆𑀢𑀁, 𑀓𑀢𑀭𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀻’’𑀢𑀺 𑀧𑀼𑀘𑁆𑀙𑀺𑀢𑀸𑀭𑁄 𑀳𑁄𑀦𑁆𑀢𑀺. 𑀢𑀢𑁄 ‘‘𑀯𑀺𑀓𑀸𑀮𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀺, 𑀪𑀤𑁆𑀤𑀸𑀮𑀺, 𑀦𑀸𑀫 𑀦𑀁 𑀏𑀓𑁄 𑀣𑁂𑀭𑁄 𑀧𑀝𑀺𑀩𑀸𑀳𑀻’’𑀢𑀺 𑀯𑀓𑁆𑀔𑀦𑁆𑀢𑀺. 𑀢𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑁋 ‘‘𑀪𑀕𑀯𑀢𑁄𑀧𑀺 𑀦𑀸𑀫 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀦𑁆𑀢𑀲𑁆𑀲 𑀧𑀝𑀺𑀩𑀸𑀳𑀺𑀢𑀁 𑀅𑀬𑀼𑀢𑁆𑀢𑀁 𑀅𑀓𑀸𑀭𑀡’’𑀦𑁆𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀢𑁂 𑀅𑀬𑀁 𑀤𑁄𑀲𑁄 𑀫𑀳𑀸𑀚𑀦𑀦𑁆𑀢𑀭𑁂 𑀧𑀸𑀓𑀝𑁄 𑀳𑀼𑀢𑁆𑀯𑀸 𑀤𑀼𑀧𑁆𑀧𑀝𑀺𑀓𑀸𑀭𑀢𑀁 𑀆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀫𑀜𑁆𑀜𑀫𑀸𑀦𑀸 𑀏𑀯𑀫𑀸𑀳𑀁𑀲𑀼. 𑀅𑀧𑀺𑀘 𑀅𑀜𑁆𑀜𑁂𑀧𑀺 𑀪𑀺𑀓𑁆𑀔𑀽 𑀧𑀯𑀸𑀭𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀦𑁆𑀢𑀺. 𑀅𑀣 𑀢𑁆𑀯𑀁 ‘‘𑀏𑀣𑀸𑀯𑀼𑀲𑁄, 𑀫𑀫 𑀲𑀢𑁆𑀣𑀸𑀭𑀁 𑀔𑀫𑀸𑀧𑁂𑀦𑁆𑀢𑀲𑁆𑀲 𑀲𑀳𑀸𑀬𑀸 𑀳𑁄𑀣𑀸’’𑀢𑀺 𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀲𑁆𑀲𑀲𑀺. 𑀢𑀢𑁆𑀣 𑀆𑀕𑀦𑁆𑀢𑀼𑀓𑀸 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺, ‘‘𑀆𑀯𑀼𑀲𑁄, 𑀓𑀺𑀁 𑀇𑀫𑀺𑀦𑀸𑀧𑀺 𑀪𑀺𑀓𑁆𑀔𑀼𑀦𑀸 𑀓𑀢’’𑀦𑁆𑀢𑀺. 𑀢𑀢𑁄 𑀏𑀢𑀫𑀢𑁆𑀣𑀁 𑀲𑀼𑀢𑁆𑀯𑀸 ‘‘𑀪𑀸𑀭𑀺𑀬𑀁 𑀓𑀢𑀁 𑀪𑀺𑀓𑁆𑀔𑀼𑀦𑀸, 𑀤𑀲𑀩𑀮𑀁 𑀦𑀸𑀫 𑀧𑀝𑀺𑀩𑀸𑀳𑀺𑀲𑁆𑀲𑀢𑀻𑀢𑀺 𑀅𑀬𑀼𑀢𑁆𑀢𑀫𑁂𑀢’’𑀦𑁆𑀢𑀺 𑀯𑀓𑁆𑀔𑀦𑁆𑀢𑀺. 𑀏𑀯𑀫𑁆𑀧𑀺 𑀢𑁂 𑀅𑀬𑀁 𑀅𑀧𑀭𑀸𑀥𑁄 𑀫𑀳𑀸𑀚𑀦𑀦𑁆𑀢𑀭𑁂 𑀧𑀸𑀓𑀝𑁄 𑀳𑀼𑀢𑁆𑀯𑀸 𑀤𑀼𑀧𑁆𑀧𑀝𑀺𑀓𑀸𑀭𑀢𑀁 𑀆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀫𑀜𑁆𑀜𑀫𑀸𑀦𑀸𑀧𑀺 𑀏𑀯𑀫𑀸𑀳𑀁𑀲𑀼. 𑀅𑀣 𑀯𑀸 𑀪𑀕𑀯𑀸 𑀧𑀯𑀸𑀭𑁂𑀢𑁆𑀯𑀸 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀲𑁆𑀲𑀢𑀺, 𑀅𑀣 𑀢𑁆𑀯𑀁 𑀕𑀢𑀕𑀢𑀝𑁆𑀞𑀸𑀦𑁂 𑀪𑀕𑀯𑀢𑁄 𑀔𑀫𑀸𑀧𑀦𑀢𑁆𑀣𑀸𑀬 𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀲𑁆𑀲𑀲𑀺. 𑀢𑀢𑁆𑀭 𑀤𑀺𑀲𑀸𑀯𑀸𑀲𑀺𑀦𑁄 ¶ 𑀪𑀺𑀓𑁆𑀔𑀽 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺, ‘‘𑀆𑀯𑀼𑀲𑁄, 𑀓𑀺𑀁 𑀇𑀫𑀺𑀦𑀸 𑀪𑀺𑀓𑁆𑀔𑀼𑀦𑀸 𑀓𑀢’’𑀦𑁆𑀢𑀺…𑀧𑁂… 𑀤𑀼𑀧𑁆𑀧𑀝𑀺𑀓𑀸𑀭𑀢𑀁 𑀆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀫𑀜𑁆𑀜𑀫𑀸𑀦𑀸𑀧𑀺 𑀏𑀯𑀫𑀸𑀳𑀁𑀲𑀼.

𑀏𑀢𑀤𑀯𑁄𑀘𑀸𑀢𑀺 𑀅𑀧𑁆𑀧𑀢𑀺𑀭𑀽𑀧𑀁 𑀫𑀬𑀸 𑀓𑀢𑀁, 𑀪𑀕𑀯𑀸 𑀧𑀦 𑀫𑀳𑀦𑁆𑀢𑁂𑀧𑀺 𑀅𑀕𑀼𑀡𑁂 𑀅𑀮𑀕𑁆𑀕𑀺𑀢𑁆𑀯𑀸 𑀫𑀬𑁆𑀳𑀁 𑀅𑀘𑁆𑀘𑀬𑀁 𑀧𑀝𑀺𑀕𑁆𑀕𑀡𑁆𑀳𑀺𑀲𑁆𑀲𑀢𑀻𑀢𑀺 𑀫𑀜𑁆𑀜𑀫𑀸𑀦𑁄 𑀏𑀢𑀁 ‘‘𑀅𑀘𑁆𑀘𑀬𑁄 𑀫𑀁, 𑀪𑀦𑁆𑀢𑁂,’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀢𑀢𑁆𑀣 ¶ 𑀅𑀘𑁆𑀘𑀬𑁄𑀢𑀺 𑀅𑀧𑀭𑀸𑀥𑁄. 𑀫𑀁 𑀅𑀘𑁆𑀘𑀕𑀫𑀸𑀢𑀺 𑀫𑀁 𑀅𑀢𑀺𑀓𑁆𑀓𑀫𑁆𑀫 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑁄. 𑀧𑀝𑀺𑀕𑁆𑀕𑀡𑁆𑀳𑀸𑀢𑀽𑀢𑀺 𑀔𑀫𑀢𑀼. 𑀆𑀬𑀢𑀺𑀁 𑀲𑀁𑀯𑀭𑀸𑀬𑀸𑀢𑀺 𑀅𑀦𑀸𑀕𑀢𑁂 𑀲𑀁𑀯𑀭𑀡𑀢𑁆𑀣𑀸𑀬, 𑀧𑀼𑀦 𑀏𑀯𑀭𑀽𑀧𑀲𑁆𑀲 𑀅𑀧𑀭𑀸𑀥𑀲𑁆𑀲 𑀤𑁄𑀲𑀲𑁆𑀲 𑀔𑀮𑀺𑀢𑀲𑁆𑀲 𑀅𑀓𑀭𑀡𑀢𑁆𑀣𑀸𑀬. 𑀢𑀕𑁆𑀖𑀸𑀢𑀺 𑀏𑀓𑀁𑀲𑁂𑀦. 𑀲𑀫𑀬𑁄𑀧𑀺 𑀔𑁄 𑀢𑁂, 𑀪𑀤𑁆𑀤𑀸𑀮𑀻𑀢𑀺, 𑀪𑀤𑁆𑀤𑀸𑀮𑀺, 𑀢𑀬𑀸 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀏𑀓𑀁 𑀓𑀸𑀭𑀡𑀁 𑀅𑀢𑁆𑀣𑀺, 𑀢𑀫𑁆𑀧𑀺 𑀢𑁂 𑀦 𑀧𑀝𑀺𑀯𑀺𑀤𑁆𑀥𑀁 𑀦 𑀲𑀮𑁆𑀮𑀓𑁆𑀔𑀺𑀢𑀦𑁆𑀢𑀺 𑀤𑀲𑁆𑀲𑁂𑀢𑀺.

𑁧𑁩𑁬. 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀢𑀺𑀆𑀤𑀻𑀲𑀼 ¶ 𑀥𑀫𑁆𑀫𑀸𑀦𑀼𑀲𑀸𑀭𑀻, 𑀲𑀤𑁆𑀥𑀸𑀦𑀼𑀲𑀸𑀭𑀻𑀢𑀺 𑀤𑁆𑀯𑁂 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸 𑀫𑀕𑁆𑀕𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀸. 𑀏𑀢𑁂 𑀧𑀦 𑀲𑀢𑁆𑀢𑀧𑀺 𑀅𑀭𑀺𑀬𑀧𑀼𑀕𑁆𑀕𑀮𑁂 𑀪𑀕𑀯𑀢𑀸𑀧𑀺 𑀏𑀯𑀁 𑀆𑀡𑀸𑀧𑁂𑀢𑀼𑀁 𑀦 𑀬𑀼𑀢𑁆𑀢𑀁, 𑀪𑀕𑀯𑀢𑀸 𑀆𑀡𑀢𑁆𑀢𑁂 𑀢𑁂𑀲𑀫𑁆𑀧𑀺 𑀏𑀯𑀁 𑀓𑀸𑀢𑀼𑀁 𑀦 𑀬𑀼𑀢𑁆𑀢𑀁. 𑀅𑀝𑁆𑀞𑀸𑀦𑀧𑀭𑀺𑀓𑀧𑁆𑀧𑀯𑀲𑁂𑀦 𑀧𑀦 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀲𑀼𑀯𑀘𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ¶ 𑀪𑀤𑁆𑀤𑀸𑀮𑀺𑀢𑁆𑀣𑁂𑀭𑀲𑁆𑀲 𑀘 𑀤𑀼𑀩𑁆𑀩𑀘𑀪𑀸𑀯𑀤𑀲𑁆𑀲𑀦𑀢𑁆𑀣𑀫𑁂𑀢𑀁 𑀯𑀼𑀢𑁆𑀢𑀁.

𑀅𑀧𑀺 𑀦𑀼 𑀢𑁆𑀯𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀢𑀺 𑀤𑁂𑀲𑀦𑀁 𑀓𑀲𑁆𑀫𑀸 𑀆𑀭𑀪𑀺? 𑀪𑀤𑁆𑀤𑀸𑀮𑀺𑀲𑁆𑀲 𑀦𑀺𑀕𑁆𑀕𑀳𑀡𑀢𑁆𑀣𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀪𑀤𑁆𑀤𑀸𑀮𑀺, 𑀇𑀫𑁂 𑀲𑀢𑁆𑀢 𑀅𑀭𑀺𑀬𑀧𑀼𑀕𑁆𑀕𑀮𑀸 𑀮𑁄𑀓𑁂 𑀤𑀓𑁆𑀔𑀺𑀡𑁂𑀬𑁆𑀬𑀸 𑀫𑀫 𑀲𑀸𑀲𑀦𑁂 𑀲𑀸𑀫𑀺𑀦𑁄, 𑀫𑀬𑀺 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀦𑁆𑀢𑁂 𑀧𑀝𑀺𑀩𑀸𑀳𑀺𑀢𑀩𑁆𑀩𑀬𑀼𑀢𑁆𑀢𑁂 𑀓𑀸𑀭𑀡𑁂 𑀲𑀢𑀺 𑀏𑀢𑁂𑀲𑀁 𑀧𑀝𑀺𑀩𑀸𑀳𑀺𑀢𑀼𑀁 𑀬𑀼𑀢𑁆𑀢𑀁. 𑀢𑁆𑀯𑀁 𑀧𑀦 𑀫𑀫 𑀲𑀸𑀲𑀦𑀢𑁄 𑀩𑀸𑀳𑀺𑀭𑀓𑁄, 𑀫𑀬𑀺 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀦𑁆𑀢𑁂 𑀢𑀼𑀬𑁆𑀳𑀁 𑀧𑀝𑀺𑀩𑀸𑀳𑀺𑀢𑀼𑀁 𑀦 𑀬𑀼𑀢𑁆𑀢𑀦𑁆𑀢𑀺.

𑀭𑀺𑀢𑁆𑀢𑁄 𑀢𑀼𑀘𑁆𑀙𑁄𑀢𑀺 𑀅𑀦𑁆𑀢𑁄 𑀅𑀭𑀺𑀬𑀕𑀼𑀡𑀸𑀦𑀁 𑀅𑀪𑀸𑀯𑁂𑀦 𑀭𑀺𑀢𑁆𑀢𑀓𑁄 𑀢𑀼𑀘𑁆𑀙𑀓𑁄, 𑀇𑀲𑁆𑀲𑀭𑀯𑀘𑀦𑁂 𑀓𑀺𑀜𑁆𑀘𑀺 𑀦 𑀳𑁄𑀢𑀺. 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀲𑀻𑀢𑀺 𑀬𑀣𑀸 𑀥𑀫𑁆𑀫𑁄 𑀞𑀺𑀢𑁄, 𑀢𑀣𑁂𑀯 𑀓𑀭𑁄𑀲𑀺, 𑀔𑀫𑀸𑀧𑁂𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀢𑁂 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫𑀸𑀢𑀺 𑀢𑀁 𑀢𑀯 𑀅𑀧𑀭𑀸𑀥𑀁 𑀫𑀬𑀁 𑀔𑀫𑀸𑀫. 𑀯𑀼𑀟𑁆𑀠𑀺 𑀳𑁂𑀲𑀸, 𑀪𑀤𑁆𑀤𑀸𑀮𑀺, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂𑀢𑀺 𑀏𑀲𑀸, 𑀪𑀤𑁆𑀤𑀸𑀮𑀺, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀯𑀼𑀟𑁆𑀠𑀺 𑀦𑀸𑀫. 𑀓𑀢𑀫𑀸? 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑀺𑀢𑁆𑀯𑀸 𑀆𑀬𑀢𑀺𑀁 𑀲𑀁𑀯𑀭𑀸𑀧𑀚𑁆𑀚𑀦𑀸. 𑀤𑁂𑀲𑀦𑀁 𑀧𑀦 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑁄 ‘‘𑀬𑁄 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀢𑀺, 𑀆𑀬𑀢𑀺𑀁 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻’’𑀢𑀺 𑀆𑀳.

𑁧𑁩𑁭. 𑀲𑀢𑁆𑀣𑀸𑀧𑀺 ¶ 𑀉𑀧𑀯𑀤𑀢𑀻𑀢𑀺 ‘‘𑀅𑀲𑀼𑀓𑀯𑀺𑀳𑀸𑀭𑀯𑀸𑀲𑀻 𑀅𑀲𑀼𑀓𑀲𑁆𑀲 𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀅𑀲𑀼𑀓𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑁄 𑀇𑀢𑁆𑀣𑀦𑁆𑀦𑀸𑀫𑁄 𑀦𑀸𑀫 𑀪𑀺𑀓𑁆𑀔𑀼 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄’’𑀢𑀺 𑀲𑀼𑀢𑁆𑀯𑀸 𑁋 ‘‘𑀓𑀺𑀁 𑀢𑀲𑁆𑀲 𑀅𑀭𑀜𑁆𑀜𑀯𑀸𑀲𑁂𑀦, 𑀬𑁄 𑀫𑀬𑁆𑀳𑀁 𑀧𑀦 𑀲𑀸𑀲𑀦𑁂 𑀲𑀺𑀓𑁆𑀔𑀸𑀬 𑀅𑀧𑀭𑀺𑀧𑀽𑀭𑀓𑀸𑀭𑀻’’𑀢𑀺 𑀏𑀯𑀁 𑀉𑀧𑀯𑀤𑀢𑀺, 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄, 𑀅𑀧𑀺𑀘𑁂𑀢𑁆𑀣 𑀤𑁂𑀯𑀢𑀸 𑀦 𑀓𑁂𑀯𑀮𑀁 𑀉𑀧𑀯𑀤𑀦𑁆𑀢𑀺, 𑀪𑁂𑀭𑀯𑀸𑀭𑀫𑁆𑀫𑀡𑀁 𑀤𑀲𑁆𑀲𑁂𑀢𑁆𑀯𑀸 𑀧𑀮𑀸𑀬𑀦𑀸𑀓𑀸𑀭𑀫𑁆𑀧𑀺 𑀓𑀭𑁄𑀦𑁆𑀢𑀺. 𑀅𑀢𑁆𑀢𑀦𑀸𑀧𑀺 𑀅𑀢𑁆𑀢𑀸𑀦𑀦𑁆𑀢𑀺 𑀲𑀻𑀮𑀁 𑀆𑀯𑀚𑁆𑀚𑀦𑁆𑀢𑀲𑁆𑀲 𑀲𑀁𑀓𑀺𑀮𑀺𑀝𑁆𑀞𑀝𑁆𑀞𑀸𑀦𑀁 𑀧𑀸𑀓𑀝𑀁 𑀳𑁄𑀢𑀺, 𑀘𑀺𑀢𑁆𑀢𑀁 𑀯𑀺𑀥𑀸𑀯𑀢𑀺, 𑀦 𑀓𑀫𑁆𑀫𑀝𑁆𑀞𑀸𑀦𑀁 𑀅𑀮𑁆𑀮𑀻𑀬𑀢𑀺. 𑀲𑁄 ‘‘𑀓𑀺𑀁 𑀫𑀸𑀤𑀺𑀲𑀲𑁆𑀲 𑀅𑀭𑀜𑁆𑀜𑀯𑀸𑀲𑁂𑀦𑀸’’𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀉𑀝𑁆𑀞𑀸𑀬 𑀧𑀓𑁆𑀓𑀫𑀢𑀺. 𑀅𑀢𑁆𑀢𑀸𑀧𑀺 𑀅𑀢𑁆𑀢𑀸𑀦𑀁 𑀉𑀧𑀯𑀤𑀺𑀢𑁄𑀢𑀺 𑀅𑀢𑁆𑀢𑀦𑀸𑀧𑀺 ¶ 𑀅𑀢𑁆𑀢𑀸 𑀉𑀧𑀯𑀤𑀺𑀢𑁄, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑀧𑀘𑁆𑀘𑀦𑀻𑀓𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀲𑁄 ¶ 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺𑀆𑀤𑀺 𑀏𑀯𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁.

𑁧𑁪𑁦. 𑀧𑀲𑀬𑁆𑀳 𑀧𑀲𑀬𑁆𑀳 𑀓𑀸𑀭𑀡𑀁 𑀓𑀭𑁄𑀦𑁆𑀢𑀻𑀢𑀺 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀤𑁄𑀲𑁂 𑀦𑀺𑀕𑁆𑀕𑀳𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀓𑀸𑀭𑁂𑀦𑁆𑀢𑀺. 𑀦𑁄 𑀢𑀣𑀸𑀢𑀺 𑀫𑀳𑀦𑁆𑀢𑁂𑀧𑀺 𑀅𑀧𑀭𑀸𑀥𑁂 𑀬𑀣𑀸 𑀇𑀢𑀭𑀁, 𑀏𑀯𑀁 𑀧𑀲𑀬𑁆𑀳 𑀦 𑀓𑀸𑀭𑁂𑀦𑁆𑀢𑀺. 𑀲𑁄 𑀓𑀺𑀭, ‘‘𑀆𑀯𑀼𑀲𑁄, 𑀪𑀤𑁆𑀤𑀸𑀮𑀺, 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀏𑀯𑀭𑀽𑀧𑀁 𑀦𑀸𑀫 𑀳𑁄𑀢𑀺, 𑀏𑀳𑀺 𑀲𑀢𑁆𑀣𑀸𑀭𑀁 𑀔𑀫𑀸𑀧𑁂𑀳𑀻’’𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀢𑁄𑀧𑀺, 𑀓𑀜𑁆𑀘𑀺 𑀪𑀺𑀓𑁆𑀔𑀼𑀁 𑀧𑁂𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀪𑀤𑁆𑀤𑀸𑀮𑀺, 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣, 𑀏𑀯𑀭𑀽𑀧𑀁 𑀦𑀸𑀫 𑀳𑁄𑀢𑀻’’𑀢𑀺 𑀏𑀯𑀁 𑀲𑀢𑁆𑀣𑀼𑀲𑀦𑁆𑀢𑀺𑀓𑀸𑀧𑀺 𑀅𑀦𑀼𑀕𑁆𑀕𑀳𑀁 𑀧𑀘𑁆𑀘𑀸𑀲𑀻𑀲𑀢𑀺. 𑀢𑀢𑁄 ‘‘𑀪𑀺𑀓𑁆𑀔𑀼𑀲𑀗𑁆𑀖𑁂𑀦𑀸𑀧𑀺 𑀦 𑀲𑀫𑀲𑁆𑀲𑀸𑀲𑀺𑀢𑁄, 𑀲𑀢𑁆𑀣𑀸𑀭𑀸𑀧𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳.

𑀅𑀣 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀲𑀢𑁆𑀣𑀸𑀧𑀺 𑀑𑀯𑀤𑀺𑀢𑀩𑁆𑀩𑀬𑀼𑀢𑁆𑀢𑀫𑁂𑀯 𑀑𑀯𑀤𑀢𑀺, 𑀦 𑀇𑀢𑀭𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀇𑀥, 𑀪𑀤𑁆𑀤𑀸𑀮𑀺, 𑀏𑀓𑀘𑁆𑀘𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀜𑁆𑀜𑁂𑀦𑀸𑀜𑁆𑀜𑀦𑁆𑀢𑀺𑀆𑀤𑀻𑀦𑀺 𑀅𑀦𑀼𑀫𑀸𑀦𑀲𑀼𑀢𑁆𑀢𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑀺. 𑀦 𑀲𑀫𑁆𑀫𑀸 𑀯𑀢𑁆𑀢𑀢𑀻𑀢𑀺 𑀲𑀫𑁆𑀫𑀸 𑀯𑀢𑁆𑀢𑀫𑁆𑀧𑀺 𑀦 𑀯𑀢𑁆𑀢𑀢𑀺. 𑀦 𑀮𑁄𑀫𑀁 𑀧𑀸𑀢𑁂𑀢𑀻𑀢𑀺 𑀅𑀦𑀼𑀮𑁄𑀫𑀯𑀢𑁆𑀢𑁂 𑀦 𑀯𑀢𑁆𑀢𑀢𑀺, 𑀯𑀺𑀮𑁄𑀫𑀫𑁂𑀯 𑀕𑀡𑁆𑀳𑀸𑀢𑀺. 𑀦 𑀦𑀺𑀢𑁆𑀣𑀸𑀭𑀁 𑀯𑀢𑁆𑀢𑀢𑀻𑀢𑀺 𑀦𑀺𑀢𑁆𑀣𑀸𑀭𑀡𑀓𑀯𑀢𑁆𑀢𑀫𑁆𑀳𑀺 𑀦 𑀯𑀢𑁆𑀢𑀢𑀺, 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀢𑁆𑀣𑀁 𑀢𑀼𑀭𑀺𑀢𑀢𑀼𑀭𑀺𑀢𑁄 𑀙𑀦𑁆𑀤𑀚𑀸𑀢𑁄 𑀦 𑀳𑁄𑀢𑀺. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀲 𑀤𑀼𑀩𑁆𑀩𑀘𑀓𑀭𑀡𑁂. 𑀅𑀪𑀺𑀡𑁆𑀳𑀸𑀧𑀢𑁆𑀢𑀺𑀓𑁄𑀢𑀺 𑀦𑀺𑀭𑀦𑁆𑀢𑀭𑀸𑀧𑀢𑁆𑀢𑀺𑀓𑁄. 𑀆𑀧𑀢𑁆𑀢𑀺𑀩𑀳𑀼𑀮𑁄𑀢𑀺 𑀲𑀸𑀧𑀢𑁆𑀢𑀺𑀓𑀓𑀸𑀮𑁄𑀯𑀲𑁆𑀲 𑀩𑀳𑀼, 𑀲𑀼𑀤𑁆𑀥𑁄 𑀦𑀺𑀭𑀸𑀧𑀢𑁆𑀢𑀺𑀓𑀓𑀸𑀮𑁄 𑀅𑀧𑁆𑀧𑁄𑀢𑀺 𑀅𑀢𑁆𑀣𑁄. 𑀦 𑀔𑀺𑀧𑁆𑀧𑀫𑁂𑀯 𑀯𑀽𑀧𑀲𑀫𑁆𑀫𑀢𑀻𑀢𑀺 𑀔𑀺𑀧𑁆𑀧𑀁 𑀦 𑀯𑀽𑀧𑀲𑀫𑁆𑀫𑀢𑀺, 𑀤𑀻𑀖𑀲𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀦𑀬𑀥𑀭𑀸 ¶ 𑀧𑀸𑀤𑀥𑁄𑀯𑀦𑀓𑀸𑀮𑁂 𑀆𑀕𑀢𑀁 ¶ ‘‘𑀕𑀘𑁆𑀙𑀸𑀯𑀼𑀲𑁄, 𑀯𑀢𑁆𑀢𑀯𑁂𑀮𑀸’’𑀢𑀺 𑀯𑀤𑀦𑁆𑀢𑀺. 𑀧𑀼𑀦 𑀓𑀸𑀮𑀁 𑀫𑀜𑁆𑀜𑀺𑀢𑁆𑀯𑀸 𑀆𑀕𑀢𑀁 ‘‘𑀕𑀘𑁆𑀙𑀸𑀯𑀼𑀲𑁄, 𑀢𑀼𑀬𑁆𑀳𑀁 𑀯𑀺𑀳𑀸𑀭𑀯𑁂𑀮𑀸, 𑀕𑀘𑁆𑀙𑀸𑀯𑀼𑀲𑁄, 𑀲𑀸𑀫𑀡𑁂𑀭𑀸𑀤𑀻𑀦𑀁 𑀉𑀤𑁆𑀤𑁂𑀲𑀤𑀸𑀦𑀯𑁂𑀮𑀸, 𑀅𑀫𑁆𑀳𑀸𑀓𑀁 𑀦𑁆𑀳𑀸𑀦𑀯𑁂𑀮𑀸, 𑀣𑁂𑀭𑀽𑀧𑀝𑁆𑀞𑀸𑀦𑀯𑁂𑀮𑀸, 𑀫𑀼𑀔𑀥𑁄𑀯𑀦𑀯𑁂𑀮𑀸’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀤𑀺𑀯𑀲𑀪𑀸𑀕𑁂𑀧𑀺 𑀭𑀢𑁆𑀢𑀺𑀪𑀸𑀕𑁂𑀧𑀺 𑀆𑀕𑀢𑀁 𑀉𑀬𑁆𑀬𑁄𑀚𑁂𑀦𑁆𑀢𑀺𑀬𑁂𑀯. ‘‘𑀓𑀸𑀬 𑀯𑁂𑀮𑀸𑀬, 𑀪𑀦𑁆𑀢𑁂, 𑀑𑀓𑀸𑀲𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑁂𑀧𑀺 ‘‘𑀕𑀘𑁆𑀙𑀸𑀯𑀼𑀲𑁄, 𑀢𑁆𑀯𑀁 𑀇𑀫𑀫𑁂𑀯 𑀞𑀸𑀦𑀁 𑀚𑀸𑀦𑀸𑀲𑀺, 𑀅𑀲𑀼𑀓𑁄 𑀦𑀸𑀫 𑀯𑀺𑀦𑀬𑀥𑀭𑀢𑁆𑀣𑁂𑀭𑁄 𑀲𑀺𑀦𑁂𑀳𑀧𑀸𑀦𑀁 𑀧𑀺𑀯𑀢𑀺, 𑀅𑀲𑀼𑀓𑁄 𑀯𑀺𑀭𑁂𑀘𑀦𑀁 𑀓𑀸𑀭𑁂𑀢𑀺, 𑀓𑀲𑁆𑀫𑀸 𑀢𑀼𑀭𑀺𑀢𑁄𑀲𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀤𑀻𑀖𑀲𑀼𑀢𑁆𑀢𑀫𑁂𑀯 𑀓𑀭𑁄𑀦𑁆𑀢𑀺.

𑁧𑁪𑁧. 𑀔𑀺𑀧𑁆𑀧𑀫𑁂𑀯 𑀯𑀽𑀧𑀲𑀫𑁆𑀫𑀢𑀻𑀢𑀺 𑀮𑀳𑀼𑀁 𑀯𑀽𑀧𑀲𑀫𑁆𑀫𑀢𑀺, 𑀦 𑀤𑀻𑀖𑀲𑀼𑀢𑁆𑀢𑀁 𑀳𑁄𑀢𑀺. 𑀉𑀲𑁆𑀲𑀼𑀓𑁆𑀓𑀸𑀧𑀦𑁆𑀦𑀸 𑀪𑀺𑀓𑁆𑀔𑀽 𑁋 ‘‘𑀆𑀯𑀼𑀲𑁄, 𑀅𑀬𑀁 𑀲𑀼𑀩𑁆𑀩𑀘𑁄 𑀪𑀺𑀓𑁆𑀔𑀼, 𑀚𑀦𑀧𑀤𑀯𑀸𑀲𑀺𑀦𑁄 𑀦𑀸𑀫 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑁂 𑀯𑀲𑀦𑀝𑁆𑀞𑀸𑀦𑀦𑀺𑀲𑀚𑁆𑀚𑀦𑀸𑀤𑀻𑀦𑀺 ¶ 𑀦 𑀨𑀸𑀲𑀼𑀓𑀸𑀦𑀺 𑀳𑁄𑀦𑁆𑀢𑀺, 𑀪𑀺𑀓𑁆𑀔𑀸𑀘𑀸𑀭𑁄𑀧𑀺 𑀤𑀼𑀓𑁆𑀔𑁄 𑀳𑁄𑀢𑀺, 𑀲𑀻𑀖𑀫𑀲𑁆𑀲 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀫𑀸’’𑀢𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀆𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀧𑁂𑀢𑁆𑀯𑀸 𑀲𑀼𑀤𑁆𑀥𑀦𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀦𑁆𑀢𑀺.

𑁧𑁪𑁨. 𑀅𑀥𑀺𑀘𑁆𑀘𑀸𑀧𑀢𑁆𑀢𑀺𑀓𑁄𑀢𑀺 𑀓𑀤𑀸𑀘𑀺 𑀓𑀤𑀸𑀘𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀲𑁄 𑀓𑀺𑀜𑁆𑀘𑀸𑀧𑀺 𑀮𑀚𑁆𑀚𑀻 𑀳𑁄𑀢𑀺 𑀧𑀓𑀢𑀢𑁆𑀢𑁄, 𑀤𑀼𑀩𑁆𑀩𑀘𑀢𑁆𑀢𑀸 𑀧𑀦𑀲𑁆𑀲 𑀪𑀺𑀓𑁆𑀔𑀽 𑀢𑀣𑁂𑀯 𑀧𑀝𑀺𑀧𑀚𑁆𑀚𑀦𑁆𑀢𑀺.

𑁧𑁪𑁪. 𑀲𑀤𑁆𑀥𑀸𑀫𑀢𑁆𑀢𑀓𑁂𑀦 𑀯𑀳𑀢𑀺 𑀧𑁂𑀫𑀫𑀢𑁆𑀢𑀓𑁂𑀦𑀸𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀲𑀼 𑀅𑀧𑁆𑀧𑀫𑀢𑁆𑀢𑀺𑀓𑀸𑀬 𑀕𑁂𑀳𑀲𑁆𑀲𑀺𑀢𑀲𑀤𑁆𑀥𑀸𑀬 𑀅𑀧𑁆𑀧𑀫𑀢𑁆𑀢𑀓𑁂𑀦 𑀕𑁂𑀳𑀲𑁆𑀲𑀺𑀢𑀧𑁂𑀫𑁂𑀦 𑀬𑀸𑀧𑁂𑀢𑀺. 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀲𑀤𑀺𑀲𑀸 𑀳𑀺 𑀅𑀬𑀁 𑀧𑀩𑁆𑀩𑀚𑁆𑀚𑀸 𑀦𑀸𑀫, 𑀦𑀯𑀧𑀩𑁆𑀩𑀚𑀺𑀢𑁄 𑀧𑀩𑁆𑀩𑀚𑁆𑀚𑀸𑀬 𑀕𑀼𑀡𑀁 𑀅𑀚𑀸𑀦𑀦𑁆𑀢𑁄 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀲𑀼 𑀧𑁂𑀫𑀫𑀢𑁆𑀢𑁂𑀦 𑀬𑀸𑀧𑁂𑀢𑀺, 𑀢𑀲𑁆𑀫𑀸 𑀏𑀯𑀭𑀽𑀧𑀸 𑀲𑀗𑁆𑀕𑀡𑁆𑀳𑀺𑀢𑀩𑁆𑀩𑀸. 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀳𑀺 𑀲𑀗𑁆𑀕𑀳𑀁 𑀮𑀪𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀬 𑀞𑀺𑀢𑀸 𑀅𑀪𑀺𑀜𑁆𑀜𑀸𑀧𑀢𑁆𑀢𑀸 𑀫𑀳𑀸𑀲𑀫𑀡𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀏𑀢𑁆𑀢𑀓𑁂𑀦 𑀓𑀣𑀸𑀫𑀕𑁆𑀕𑁂𑀦 ‘‘𑀑𑀯𑀤𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀑𑀯𑀤𑀦𑁆𑀢𑀺, 𑀦 𑀇𑀢𑀭’’𑀦𑁆𑀢𑀺 𑀇𑀫𑀫𑁂𑀯 𑀪𑀕𑀯𑀢𑀸 𑀤𑀲𑁆𑀲𑀺𑀢𑀁.

𑁧𑁪𑁫. 𑀅𑀜𑁆𑀜𑀸𑀬 ¶ 𑀲𑀡𑁆𑀞𑀳𑀺𑀁𑀲𑀽𑀢𑀺 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀲𑀢𑁆𑀢𑁂𑀲𑀼 𑀳𑀸𑀬𑀫𑀸𑀦𑁂𑀲𑀽𑀢𑀺 𑀧𑀝𑀺𑀧𑀢𑁆𑀢𑀺𑀬𑀸 𑀳𑀸𑀬𑀫𑀸𑀦𑀸𑀬 𑀲𑀢𑁆𑀢𑀸 𑀳𑀸𑀬𑀦𑁆𑀢𑀺 𑀦𑀸𑀫. 𑀲𑀤𑁆𑀥𑀫𑁆𑀫𑁂 𑀅𑀦𑁆𑀢𑀭𑀥𑀸𑀬𑀫𑀸𑀦𑁂𑀢𑀺 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑁂 𑀅𑀦𑁆𑀢𑀭𑀥𑀸𑀬𑀫𑀸𑀦𑁂. 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑁄𑀧𑀺 𑀳𑀺 𑀧𑀝𑀺𑀧𑀢𑁆𑀢𑀺𑀧𑀽𑀭𑀓𑁂𑀲𑀼 𑀲𑀢𑁆𑀢𑁂𑀲𑀼 𑀅𑀲𑀢𑀺 𑀅𑀦𑁆𑀢𑀭𑀥𑀸𑀬𑀢𑀺 𑀦𑀸𑀫 ¶ . 𑀆𑀲𑀯𑀝𑁆𑀞𑀸𑀦𑀻𑀬𑀸𑀢𑀺 𑀆𑀲𑀯𑀸 𑀢𑀺𑀝𑁆𑀞𑀦𑁆𑀢𑀺 𑀏𑀢𑁂𑀲𑀽𑀢𑀺 𑀆𑀲𑀯𑀝𑁆𑀞𑀸𑀦𑀻𑀬𑀸. 𑀬𑁂𑀲𑀼 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸 𑀧𑀭𑀽𑀧𑀯𑀸𑀤𑀯𑀺𑀧𑁆𑀧𑀝𑀺𑀲𑀸𑀭𑀯𑀥𑀩𑀦𑁆𑀥𑀦𑀸𑀤𑀬𑁄 𑀘𑁂𑀯 𑀅𑀧𑀸𑀬𑀤𑀼𑀓𑁆𑀔𑀯𑀺𑀲𑁂𑀲𑀪𑀽𑀢𑀸 𑀘 𑀆𑀲𑀯𑀸 𑀢𑀺𑀝𑁆𑀞𑀦𑁆𑀢𑀺𑀬𑁂𑀯. 𑀬𑀲𑁆𑀫𑀸 𑀦𑁂𑀲𑀁 𑀢𑁂 𑀓𑀸𑀭𑀡𑀁 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂 𑀆𑀲𑀯𑀝𑁆𑀞𑀸𑀦𑀻𑀬𑀸 𑀯𑀻𑀢𑀺𑀓𑁆𑀓𑀫𑀥𑀫𑁆𑀫𑀸 𑀬𑀸𑀯 𑀦 𑀲𑀗𑁆𑀖𑁂 𑀧𑀸𑀢𑀼𑀪𑀯𑀦𑁆𑀢𑀺, 𑀦 𑀢𑀸𑀯 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀻𑀢𑀺 𑀅𑀬𑀫𑁂𑀢𑁆𑀣 𑀬𑁄𑀚𑀦𑀸.

𑀏𑀯𑀁 𑀅𑀓𑀸𑀮𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀓𑀸𑀮𑀁 𑀤𑀲𑁆𑀲𑁂𑀢𑀼𑀁 𑀬𑀢𑁄 𑀘 𑀔𑁄, 𑀪𑀤𑁆𑀤𑀸𑀮𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀢𑁄𑀢𑀺 𑀬𑀤𑀸, 𑀬𑀲𑁆𑀫𑀺𑀁 𑀓𑀸𑀮𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀯𑀸 𑀏𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀲𑁆𑀫𑀺𑀁 𑀓𑀸𑀮𑁂 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸𑀢𑀺 𑀲𑀗𑁆𑀔𑀁 𑀕𑀢𑀸 𑀯𑀻𑀢𑀺𑀓𑁆𑀓𑀫𑀤𑁄𑀲𑀸 𑀲𑀗𑁆𑀖𑁂 𑀧𑀸𑀢𑀼𑀪𑀯𑀦𑁆𑀢𑀺, 𑀢𑀤𑀸 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺. 𑀓𑀲𑁆𑀫𑀸? 𑀢𑁂𑀲𑀁𑀬𑁂𑀯 𑀆𑀲𑀯𑀝𑁆𑀞𑀸𑀦𑀻𑀬𑀥𑀫𑁆𑀫𑀲𑀗𑁆𑀔𑀸𑀢𑀸𑀦𑀁 𑀯𑀻𑀢𑀺𑀓𑁆𑀓𑀫𑀤𑁄𑀲𑀸𑀦𑀁 𑀧𑀝𑀺𑀖𑀸𑀢𑀸𑀬.

𑀏𑀯𑀁 ¶ 𑀆𑀲𑀯𑀝𑁆𑀞𑀸𑀦𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀅𑀓𑀸𑀮𑀁, 𑀉𑀧𑁆𑀧𑀢𑁆𑀢𑀺𑀜𑁆𑀘 𑀓𑀸𑀮𑀦𑁆𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀓𑀸𑀮𑀜𑁆𑀘 𑀉𑀧𑁆𑀧𑀢𑁆𑀢𑀺𑀓𑀸𑀮𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀦 𑀢𑀸𑀯, 𑀪𑀤𑁆𑀤𑀸𑀮𑀺, 𑀇𑀥𑁂𑀓𑀘𑁆𑀘𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀳𑀢𑁆𑀢𑀦𑁆𑀢𑀺 𑀫𑀳𑀦𑁆𑀢𑀪𑀸𑀯𑀁. 𑀲𑀗𑁆𑀖𑁄 𑀳𑀺 𑀬𑀸𑀯 𑀦 𑀣𑁂𑀭𑀦𑀯𑀫𑀚𑁆𑀛𑀺𑀫𑀸𑀦𑀁 𑀯𑀲𑁂𑀦 𑀫𑀳𑀢𑁆𑀢𑀁 𑀧𑀢𑁆𑀢𑁄 𑀳𑁄𑀢𑀺, 𑀢𑀸𑀯 𑀲𑁂𑀦𑀸𑀲𑀦𑀸𑀦𑀺 𑀧𑀳𑁄𑀦𑁆𑀢𑀺, 𑀲𑀸𑀲𑀦𑁂 𑀏𑀓𑀘𑁆𑀘𑁂 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 ¶ 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀫𑀳𑀢𑁆𑀢𑀁 𑀧𑀢𑁆𑀢𑁂 𑀧𑀦 𑀢𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀣 𑀲𑀢𑁆𑀣𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺. 𑀢𑀢𑁆𑀣 𑀫𑀳𑀢𑁆𑀢𑀁 𑀧𑀢𑁆𑀢𑁂 𑀲𑀗𑁆𑀖𑁂 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀺 𑁋

‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀉𑀢𑁆𑀢𑀭𑀺𑀤𑁆𑀯𑀺𑀭𑀢𑁆𑀢𑀢𑀺𑀭𑀢𑁆𑀢𑀁 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬 𑀧𑀸𑀘𑀺𑀢𑁆𑀢𑀺𑀬𑀁 (𑀧𑀸𑀘𑀺. 𑁫𑁧). 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀅𑀦𑀼𑀯𑀲𑁆𑀲𑀁 𑀯𑀼𑀝𑁆𑀞𑀸𑀧𑁂𑀬𑁆𑀬 𑀧𑀸𑀘𑀺𑀢𑁆𑀢𑀺𑀬𑀁 (𑀧𑀸𑀘𑀺. 𑁧𑁧𑁭𑁧). 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀏𑀓𑀯𑀲𑁆𑀲𑀁 𑀤𑁆𑀯𑁂 𑀯𑀼𑀝𑁆𑀞𑀸𑀧𑁂𑀬𑁆𑀬 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁧𑁧𑁭𑁫).

𑀇𑀫𑀺𑀦𑀸 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀮𑀸𑀪𑀕𑁆𑀕𑀦𑁆𑀢𑀺 𑀮𑀸𑀪𑀲𑁆𑀲 𑀅𑀕𑁆𑀕𑀁. 𑀲𑀗𑁆𑀖𑁄 𑀳𑀺 𑀬𑀸𑀯 𑀦 𑀮𑀸𑀪𑀕𑁆𑀕𑀧𑀢𑁆𑀢𑁄 𑀳𑁄𑀢𑀺, 𑀦 𑀢𑀸𑀯 𑀮𑀸𑀪𑀁 𑀧𑀝𑀺𑀘𑁆𑀘 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀧𑀢𑁆𑀢𑁂 𑀧𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀣 𑀲𑀢𑁆𑀣𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺 𑁋

‘‘𑀬𑁄 ¶ 𑀧𑀦 𑀪𑀺𑀓𑁆𑀔𑀼 𑀅𑀘𑁂𑀮𑀓𑀲𑁆𑀲 𑀯𑀸 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑀸 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀯𑀸 𑀲𑀳𑀢𑁆𑀣𑀸 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀤𑀤𑁂𑀬𑁆𑀬 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁨𑁭𑁦).

𑀇𑀤𑀜𑁆𑀳𑀺 𑀮𑀸𑀪𑀕𑁆𑀕𑀧𑀢𑁆𑀢𑁂 𑀲𑀗𑁆𑀖𑁂 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁.

𑀬𑀲𑀕𑁆𑀕𑀦𑁆𑀢𑀺 𑀬𑀲𑀲𑁆𑀲 𑀅𑀕𑁆𑀕𑀁. 𑀲𑀗𑁆𑀖𑁄 𑀳𑀺 𑀬𑀸𑀯 𑀦 𑀬𑀲𑀕𑁆𑀕𑀧𑀢𑁆𑀢𑁄 𑀳𑁄𑀢𑀺, 𑀦 𑀢𑀸𑀯 𑀬𑀲𑀁 𑀧𑀝𑀺𑀘𑁆𑀘 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀧𑀢𑁆𑀢𑁂 𑀧𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀣 𑀲𑀢𑁆𑀣𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺 ‘‘𑀲𑀼𑀭𑀸𑀫𑁂𑀭𑀬𑀧𑀸𑀦𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁩𑁨𑁭). 𑀇𑀤𑀜𑁆𑀳𑀺 𑀬𑀲𑀕𑁆𑀕𑀧𑀢𑁆𑀢𑁂 𑀲𑀗𑁆𑀖𑁂 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁.

𑀩𑀸𑀳𑀼𑀲𑀘𑁆𑀘𑀦𑁆𑀢𑀺 ¶ 𑀩𑀳𑀼𑀲𑁆𑀲𑀼𑀢𑀪𑀸𑀯𑀁. 𑀲𑀗𑁆𑀖𑁄 𑀳𑀺 𑀬𑀸𑀯 𑀦 𑀩𑀸𑀳𑀼𑀲𑀘𑁆𑀘𑀧𑀢𑁆𑀢𑁄 𑀳𑁄𑀢𑀺, 𑀦 𑀢𑀸𑀯 𑀆𑀲𑀯𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀩𑀸𑀳𑀼𑀲𑀘𑁆𑀘𑀧𑀢𑁆𑀢𑁂 𑀧𑀦 𑀬𑀲𑁆𑀫𑀸 𑀏𑀓𑀁 𑀦𑀺𑀓𑀸𑀬𑀁 𑀤𑁆𑀯𑁂 𑀦𑀺𑀓𑀸𑀬𑁂 𑀧𑀜𑁆𑀘𑀧𑀺 𑀦𑀺𑀓𑀸𑀬𑁂 𑀉𑀕𑁆𑀕𑀳𑁂𑀢𑁆𑀯𑀸 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀫𑀸𑀦𑀸 ¶ 𑀧𑀼𑀕𑁆𑀕𑀮𑀸 𑀭𑀲𑁂𑀦 𑀭𑀲𑀁 𑀲𑀁𑀲𑀦𑁆𑀤𑁂𑀢𑁆𑀯𑀸 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀲𑀢𑁆𑀣𑀼 𑀲𑀸𑀲𑀦𑀁 𑀤𑀻𑀧𑁂𑀦𑁆𑀢𑀺, 𑀅𑀣 𑀲𑀢𑁆𑀣𑀸 𑁋 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀏𑀯𑀁 𑀯𑀤𑁂𑀬𑁆𑀬 𑀢𑀣𑀸𑀳𑀁 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀺 (𑀧𑀸𑀘𑀺. 𑁪𑁧𑁮)…𑀧𑁂… 𑀲𑀫𑀡𑀼𑀤𑁆𑀤𑁂𑀲𑁄𑀧𑀺 𑀘𑁂 𑀏𑀯𑀁 𑀯𑀤𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁪𑁨𑁯) 𑀦𑀬𑁂𑀦 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀺.

𑀭𑀢𑁆𑀢𑀜𑁆𑀜𑀼𑀢𑀁 𑀧𑀢𑁆𑀢𑁄𑀢𑀺 𑀏𑀢𑁆𑀣 𑀭𑀢𑁆𑀢𑀺𑀬𑁄 𑀚𑀸𑀦𑀦𑁆𑀢𑀻𑀢𑀺 𑀭𑀢𑁆𑀢𑀜𑁆𑀜𑀽. 𑀅𑀢𑁆𑀢𑀦𑁄 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀩𑀳𑀽 𑀭𑀢𑁆𑀢𑀺𑀬𑁄 𑀚𑀸𑀦𑀦𑁆𑀢𑀺, 𑀘𑀺𑀭𑀧𑀩𑁆𑀩𑀚𑀺𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀢𑁆𑀢𑀜𑁆𑀜𑀽𑀦𑀁 𑀪𑀸𑀯𑀁 𑀭𑀢𑁆𑀢𑀜𑁆𑀜𑀼𑀢𑀁. 𑀢𑀢𑁆𑀭 𑀭𑀢𑁆𑀢𑀜𑁆𑀜𑀼𑀢𑀁 𑀧𑀢𑁆𑀢𑁂 𑀲𑀗𑁆𑀖𑁂 𑀉𑀧𑀲𑁂𑀦𑀁 𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑀁 𑀆𑀭𑀩𑁆𑀪 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁄 𑀳𑀸𑀬𑀲𑁆𑀫𑀸 𑀊𑀦𑀤𑀲𑀯𑀲𑁆𑀲𑁂 𑀪𑀺𑀓𑁆𑀔𑀽 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑁂 𑀤𑀺𑀲𑁆𑀯𑀸 𑀏𑀓𑀯𑀲𑁆𑀲𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀁 𑀉𑀧𑀲𑀫𑁆𑀧𑀸𑀤𑁂𑀲𑀺. 𑀅𑀣 𑀪𑀕𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀊𑀦𑀤𑀲𑀯𑀲𑁆𑀲𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁭𑁫). 𑀏𑀯𑀁 𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂 𑀧𑀼𑀦 𑀪𑀺𑀓𑁆𑀔𑀽 ‘‘𑀤𑀲𑀯𑀲𑁆𑀲𑀫𑁆𑀳𑀸 𑀤𑀲𑀯𑀲𑁆𑀲𑀫𑁆𑀳𑀸’’𑀢𑀺 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺. 𑀅𑀣 𑀪𑀕𑀯𑀸 𑀅𑀧𑀭𑀫𑁆𑀧𑀺 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀺 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀩𑀸𑀮𑁂𑀦 𑀅𑀩𑁆𑀬𑀢𑁆𑀢𑁂𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀬𑁄 𑀉𑀧𑀲𑀫𑁆𑀧𑀸𑀤𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀩𑁆𑀬𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀩𑀮𑁂𑀦 𑀤𑀲𑀯𑀲𑁆𑀲𑁂𑀦 𑀯𑀸 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑁂𑀦 𑀯𑀸 𑀉𑀧𑀲𑀫𑁆𑀧𑀸𑀤𑁂𑀢𑀼’’𑀦𑁆𑀢𑀺. 𑀇𑀢𑀺 𑀭𑀢𑁆𑀢𑀜𑁆𑀜𑀼𑀢𑀁 𑀧𑀢𑁆𑀢𑀓𑀸𑀮𑁂 𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀺.

𑁧𑁪𑁬. 𑀆𑀚𑀸𑀦𑀻𑀬𑀲𑀼𑀲𑀽𑀧𑀫𑀁 ¶ ¶ 𑀥𑀫𑁆𑀫𑀧𑀭𑀺𑀬𑀸𑀬𑀁 𑀤𑁂𑀲𑁂𑀲𑀺𑀦𑁆𑀢𑀺 𑀢𑀭𑀼𑀡𑀸𑀚𑀸𑀦𑀻𑀬𑀉𑀧𑀫𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑀬𑀺𑀁. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀅𑀲𑀭𑀡𑁂. 𑀦 𑀔𑁄, 𑀪𑀤𑁆𑀤𑀸𑀮𑀺, 𑀏𑀲𑁂𑀯 𑀳𑁂𑀢𑀽𑀢𑀺 𑀦 𑀏𑀲 𑀲𑀺𑀓𑁆𑀔𑀸𑀬 𑀅𑀧𑀭𑀺𑀧𑀽𑀭𑀓𑀸𑀭𑀻𑀪𑀸𑀯𑁄𑀬𑁂𑀯 𑀏𑀓𑁄 𑀳𑁂𑀢𑀼.

𑁧𑁪𑁭. 𑀫𑀼𑀔𑀸𑀥𑀸𑀦𑁂 𑀓𑀸𑀭𑀡𑀁 𑀓𑀸𑀭𑁂𑀢𑀻𑀢𑀺 𑀔𑀮𑀻𑀦𑀩𑀦𑁆𑀥𑀸𑀤𑀻𑀳𑀺 𑀫𑀼𑀔𑀝𑁆𑀞𑀧𑀦𑁂 𑀲𑀸𑀥𑀼𑀓𑀁 𑀕𑀻𑀯𑀁 𑀧𑀕𑁆𑀕𑀡𑁆𑀳𑀸𑀧𑁂𑀢𑀼𑀁 𑀓𑀸𑀭𑀡𑀁 𑀓𑀸𑀭𑁂𑀢𑀺. 𑀯𑀺𑀲𑀽𑀓𑀸𑀬𑀺𑀢𑀸𑀦𑀻𑀢𑀺𑀆𑀤𑀻𑀳𑀺 𑀯𑀺𑀲𑁂𑀯𑀦𑀸𑀘𑀸𑀭𑀁 𑀓𑀣𑁂𑀲𑀺. 𑀲𑀩𑁆𑀩𑀸𑀦𑁂𑀯 𑀳𑁂𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀺. 𑀢𑀲𑁆𑀫𑀺𑀁 𑀞𑀸𑀦𑁂𑀢𑀺 𑀢𑀲𑁆𑀫𑀺𑀁 𑀯𑀺𑀲𑁂𑀯𑀦𑀸𑀘𑀸𑀭𑁂. 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀦𑀺𑀩𑁆𑀩𑀺𑀲𑁂𑀯𑀦𑁄 𑀳𑁄𑀢𑀺, 𑀢𑀁 𑀯𑀺𑀲𑁂𑀯𑀦𑀁 𑀚𑀳𑀢𑀻𑀢𑀺 𑀅𑀢𑁆𑀣𑁄. 𑀬𑀼𑀕𑀸𑀥𑀸𑀦𑁂𑀢𑀺 𑀬𑀼𑀕𑀝𑁆𑀞𑀧𑀦𑁂 𑀬𑀼𑀕𑀲𑁆𑀲 𑀲𑀸𑀥𑀼𑀓𑀁 𑀕𑀳𑀡𑀢𑁆𑀣𑀁.

𑀅𑀦𑀼𑀓𑁆𑀓𑀫𑁂𑀢𑀺 ¶ 𑀘𑀢𑁆𑀢𑀸𑀭𑁄𑀧𑀺 𑀧𑀸𑀤𑁂 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀉𑀓𑁆𑀔𑀺𑀧𑀦𑁂 𑀘 𑀦𑀺𑀓𑁆𑀔𑀺𑀧𑀦𑁂 𑀘. 𑀧𑀭𑀲𑁂𑀦𑀸𑀬 𑀳𑀺 𑀆𑀯𑀸𑀝𑁂 𑀞𑀢𑁆𑀯𑀸 𑀅𑀲𑀺𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀲𑁆𑀲 𑀅𑀲𑁆𑀲𑀲𑁆𑀲 𑀧𑀸𑀤𑁂 𑀙𑀺𑀦𑁆𑀤𑀦𑁆𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀏𑀲 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀘𑀢𑁆𑀢𑀸𑀭𑁄𑀧𑀺 𑀧𑀸𑀤𑁂 𑀉𑀓𑁆𑀔𑀺𑀧𑀺𑀲𑁆𑀲𑀢𑀻𑀢𑀺 𑀭𑀚𑁆𑀚𑀼𑀩𑀦𑁆𑀥𑀦𑀯𑀺𑀥𑀸𑀦𑁂𑀦 𑀏𑀢𑀁 𑀓𑀸𑀭𑀡𑀁 𑀓𑀭𑁄𑀦𑁆𑀢𑀺. 𑀫𑀡𑁆𑀟𑀮𑁂𑀢𑀺 𑀬𑀣𑀸 𑀅𑀲𑁆𑀲𑁂 𑀦𑀺𑀲𑀺𑀦𑁆𑀦𑁄𑀬𑁂𑀯 𑀪𑀽𑀫𑀺𑀬𑀁 𑀧𑀢𑀺𑀢𑀁 𑀆𑀯𑀼𑀥𑀁 𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀏𑀯𑀁 𑀓𑀭𑀡𑀢𑁆𑀣𑀁 𑀫𑀡𑁆𑀟𑀮𑁂 𑀓𑀸𑀭𑀡𑀁 𑀓𑀸𑀭𑁂𑀢𑀺. 𑀔𑀼𑀭𑀓𑀸𑀲𑁂𑀢𑀺 ¶ 𑀅𑀕𑁆𑀕𑀕𑁆𑀕𑀔𑀼𑀭𑁂𑀳𑀺 𑀧𑀣𑀯𑀻𑀓𑀫𑀦𑁂. 𑀭𑀢𑁆𑀢𑀺𑀁 𑀑𑀓𑁆𑀓𑀦𑁆𑀢𑀓𑀭𑀡𑀲𑁆𑀫𑀺𑀜𑁆𑀳𑀺 𑀬𑀣𑀸 𑀧𑀤𑀲𑀤𑁆𑀤𑁄 𑀦 𑀲𑀼𑀬𑁆𑀬𑀢𑀺, 𑀢𑀤𑀢𑁆𑀣𑀁 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀲𑀜𑁆𑀜𑀁 𑀤𑀢𑁆𑀯𑀸 𑀅𑀕𑁆𑀕𑀕𑁆𑀕𑀔𑀼𑀭𑁂𑀳𑀺𑀬𑁂𑀯 𑀕𑀫𑀦𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀚𑀯𑁂𑀢𑀺 𑀲𑀻𑀖𑀯𑀸𑀳𑀦𑁂. ‘‘𑀥𑀸𑀯𑁂’’𑀢𑀺𑀧𑀺 𑀧𑀸𑀞𑁄. 𑀅𑀢𑁆𑀢𑀦𑁄 𑀧𑀭𑀸𑀚𑀬𑁂 𑀲𑀢𑀺 𑀧𑀮𑀸𑀬𑀦𑀢𑁆𑀣𑀁, 𑀧𑀭𑀁 𑀧𑀮𑀸𑀬𑀦𑁆𑀢𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀕𑀳𑀡𑀢𑁆𑀣𑀜𑁆𑀘 𑀏𑀢𑀁 𑀓𑀸𑀭𑀡𑀁 𑀓𑀸𑀭𑁂𑀢𑀺. 𑀤𑀯𑀢𑁆𑀢𑁂𑀢𑀺 𑀤𑀯𑀢𑁆𑀢𑀸𑀬, 𑀬𑀼𑀤𑁆𑀥𑀓𑀸𑀮𑀲𑁆𑀫𑀺𑀜𑁆𑀳𑀺 𑀳𑀢𑁆𑀣𑀻𑀲𑀼 𑀯𑀸 𑀓𑁄𑀜𑁆𑀘𑀦𑀸𑀤𑀁 𑀓𑀭𑁄𑀦𑁆𑀢𑁂𑀲𑀼 𑀅𑀲𑁆𑀲𑁂𑀲𑀼 𑀯𑀸 𑀳𑀲𑀦𑁆𑀢𑁂𑀲𑀼 𑀭𑀣𑁂𑀲𑀼 𑀯𑀸 𑀦𑀺𑀖𑁄𑀲𑀦𑁆𑀢𑁂𑀲𑀼 𑀬𑁄𑀥𑁂𑀲𑀼 𑀯𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑁂𑀲𑀼 𑀢𑀲𑁆𑀲 𑀭𑀯𑀲𑁆𑀲 𑀅𑀪𑀸𑀬𑀺𑀢𑁆𑀯𑀸 𑀧𑀭𑀲𑁂𑀦𑀧𑀯𑁂𑀲𑀦𑀢𑁆𑀣𑀁 𑀅𑀬𑀁 𑀓𑀸𑀭𑀡𑀸 𑀓𑀭𑀻𑀬𑀢𑀺.

𑀭𑀸𑀚𑀕𑀼𑀡𑁂𑀢𑀺 𑀭𑀜𑁆𑀜𑀸 𑀚𑀸𑀦𑀺𑀢𑀩𑁆𑀩𑀕𑀼𑀡𑁂. 𑀓𑀽𑀝𑀓𑀡𑁆𑀡𑀭𑀜𑁆𑀜𑁄 𑀓𑀺𑀭 𑀕𑀼𑀴𑀯𑀡𑁆𑀡𑁄 𑀦𑀸𑀫 𑀅𑀲𑁆𑀲𑁄 𑀅𑀳𑁄𑀲𑀺. 𑀭𑀸𑀚𑀸 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑁂𑀢𑀺𑀬𑀧𑀩𑁆𑀩𑀢𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 ¶ 𑀓𑀮𑀫𑁆𑀩𑀦𑀤𑀻𑀢𑀻𑀭𑀁 𑀲𑀫𑁆𑀧𑀢𑁆𑀢𑁄. 𑀅𑀲𑁆𑀲𑁄 𑀢𑀻𑀭𑁂 𑀞𑀢𑁆𑀯𑀸 𑀉𑀤𑀓𑀁 𑀑𑀢𑀭𑀺𑀢𑀼𑀁 𑀦 𑀇𑀘𑁆𑀙𑀢𑀺, 𑀭𑀸𑀚𑀸 𑀅𑀲𑁆𑀲𑀸𑀘𑀭𑀺𑀬𑀁 𑀆𑀫𑀦𑁆𑀢𑁂𑀢𑁆𑀯𑀸 𑁋 ‘‘𑀅𑀳𑁄 𑀢𑀬𑀸 𑀅𑀲𑁆𑀲𑁄 𑀲𑀺𑀓𑁆𑀔𑀸𑀧𑀺𑀢𑁄 𑀉𑀤𑀓𑀁 𑀑𑀢𑀭𑀺𑀢𑀼𑀁 𑀦 𑀇𑀘𑁆𑀙𑀢𑀻’’𑀢𑀺 𑀆𑀳. 𑀆𑀘𑀭𑀺𑀬𑁄 𑁋 ‘‘𑀲𑀼𑀲𑀺𑀓𑁆𑀔𑀸𑀧𑀺𑀢𑁄 𑀤𑁂𑀯 𑀅𑀲𑁆𑀲𑁄, 𑀏𑀯𑀫𑀲𑁆𑀲 𑀳𑀺 𑀘𑀺𑀢𑁆𑀢𑀁 ‘𑀲𑀘𑀸𑀳𑀁 𑀉𑀤𑀓𑀁 𑀑𑀢𑀭𑀺𑀲𑁆𑀲𑀸𑀫𑀺, 𑀯𑀸𑀮𑀁 𑀢𑁂𑀫𑀺𑀲𑁆𑀲𑀢𑀺, 𑀯𑀸𑀮𑁂 𑀢𑀺𑀦𑁆𑀢𑁂 𑀭𑀜𑁆𑀜𑁄 𑀅𑀗𑁆𑀕𑁂 𑀉𑀤𑀓𑀁 𑀧𑀸𑀢𑁂𑀬𑁆𑀬𑀸’𑀢𑀺 𑀏𑀯𑀁 𑀢𑀼𑀫𑁆𑀳𑀸𑀓𑀁 𑀲𑀭𑀻𑀭𑁂 𑀉𑀤𑀓𑀧𑀸𑀢𑀦𑀪𑀬𑁂𑀦 𑀦 𑀑𑀢𑀭𑀢𑀺, 𑀯𑀸𑀮𑀁 𑀕𑀡𑁆𑀳𑀸𑀧𑁂𑀣𑀸’’𑀢𑀺 ¶ 𑀆𑀳. 𑀭𑀸𑀚𑀸 𑀢𑀣𑀸 𑀓𑀸𑀭𑁂𑀲𑀺. 𑀅𑀲𑁆𑀲𑁄 𑀯𑁂𑀕𑁂𑀦 𑀑𑀢𑀭𑀺𑀢𑁆𑀯𑀸 𑀧𑀸𑀭𑀁 𑀕𑀢𑁄. 𑀏𑀢𑀤𑀢𑁆𑀣𑀁 𑀅𑀬𑀁 𑀓𑀸𑀭𑀡𑀸 𑀓𑀭𑀻𑀬𑀢𑀺. 𑀭𑀸𑀚𑀯𑀁𑀲𑁂𑀢𑀺 𑀅𑀲𑁆𑀲𑀭𑀸𑀚𑀯𑀁𑀲𑁂. 𑀯𑀁𑀲𑁄 𑀘𑁂𑀲𑁄 𑀅𑀲𑁆𑀲𑀭𑀸𑀚𑀸𑀦𑀁, 𑀢𑀣𑀸𑀭𑀽𑀧𑁂𑀦 𑀧𑀳𑀸𑀭𑁂𑀦 𑀙𑀺𑀦𑁆𑀦𑀪𑀺𑀦𑁆𑀦𑀲𑀭𑀻𑀭𑀸𑀧𑀺 𑀅𑀲𑁆𑀲𑀸𑀭𑁄𑀳𑀁 𑀧𑀭𑀲𑁂𑀦𑀸𑀬 𑀅𑀧𑀸𑀢𑁂𑀢𑁆𑀯𑀸 𑀩𑀳𑀺 𑀦𑀻𑀳𑀭𑀦𑁆𑀢𑀺𑀬𑁂𑀯. 𑀏𑀢𑀤𑀢𑁆𑀣𑀁 𑀓𑀸𑀭𑀡𑀁 𑀓𑀸𑀭𑁂𑀢𑀻𑀢𑀺 𑀅𑀢𑁆𑀣𑁄.

𑀉𑀢𑁆𑀢𑀫𑁂 𑀚𑀯𑁂𑀢𑀺 𑀚𑀯𑀲𑀫𑁆𑀧𑀢𑁆𑀢𑀺𑀬𑀁, 𑀬𑀣𑀸 𑀉𑀢𑁆𑀢𑀫𑀚𑀯𑁄 𑀳𑁄𑀢𑀺, 𑀏𑀯𑀁 𑀓𑀸𑀭𑀡𑀁 𑀓𑀸𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀉𑀢𑁆𑀢𑀫𑁂 𑀳𑀬𑁂𑀢𑀺 𑀉𑀢𑁆𑀢𑀫𑀳𑀬𑀪𑀸𑀯𑁂, 𑀬𑀣𑀸 𑀉𑀢𑁆𑀢𑀫𑀳𑀬𑁄 𑀳𑁄𑀢𑀺, 𑀏𑀯𑀁 𑀓𑀸𑀭𑀡𑀁 𑀓𑀸𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀧𑀓𑀢𑀺𑀬𑀸 𑀉𑀢𑁆𑀢𑀫𑀳𑀬𑁄𑀯 𑀉𑀢𑁆𑀢𑀫𑀳𑀬𑀓𑀸𑀭𑀡𑀁 𑀅𑀭𑀳𑀢𑀺, 𑀦 𑀅𑀜𑁆𑀜𑁄. 𑀉𑀢𑁆𑀢𑀫𑀳𑀬𑀓𑀸𑀭𑀡𑀸𑀬 𑀏𑀯 𑀘 𑀳𑀬𑁄 𑀉𑀢𑁆𑀢𑀫𑀚𑀯𑀁 𑀧𑀝𑀺𑀧𑀚𑁆𑀚𑀢𑀺, 𑀦 𑀅𑀜𑁆𑀜𑁄𑀢𑀺.

𑀢𑀢𑁆𑀭𑀺𑀤𑀁 ¶ 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀭𑀸𑀚𑀸 𑀏𑀓𑀁 𑀲𑀺𑀦𑁆𑀥𑀯𑀧𑁄𑀢𑀓𑀁 𑀮𑀪𑀺𑀢𑁆𑀯𑀸 𑀲𑀺𑀦𑁆𑀥𑀯𑀪𑀸𑀯𑀁 𑀅𑀚𑀸𑀦𑀺𑀢𑁆𑀯𑀸𑀯 𑀇𑀫𑀁 𑀲𑀺𑀓𑁆𑀔𑀸𑀧𑁂𑀳𑀻𑀢𑀺 𑀆𑀘𑀭𑀺𑀬𑀲𑁆𑀲 𑀅𑀤𑀸𑀲𑀺. 𑀆𑀘𑀭𑀺𑀬𑁄𑀧𑀺 𑀢𑀲𑁆𑀲 𑀲𑀺𑀦𑁆𑀥𑀯𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 𑀢𑀁 𑀫𑀸𑀲𑀔𑀸𑀤𑀓𑀖𑁄𑀝𑀓𑀸𑀦𑀁 𑀓𑀸𑀭𑀡𑀸𑀲𑀼 𑀉𑀧𑀦𑁂𑀢𑀺. 𑀲𑁄 𑀅𑀢𑁆𑀢𑀦𑁄 𑀅𑀦𑀦𑀼𑀘𑁆𑀙𑀯𑀺𑀓𑀢𑁆𑀢𑀸 𑀓𑀸𑀭𑀡𑀁 𑀦 𑀧𑀝𑀺𑀧𑀚𑁆𑀚𑀢𑀺. 𑀲𑁄 𑀢𑀁 𑀤𑀫𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀓𑀽𑀝𑀲𑁆𑀲𑁄 𑀅𑀬𑀁 𑀫𑀳𑀸𑀭𑀸𑀚𑀸’’𑀢𑀺 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀏𑀓𑁄 𑀅𑀲𑁆𑀲𑀸𑀘𑀭𑀺𑀬𑀧𑀼𑀩𑁆𑀩𑀓𑁄 𑀤𑀳𑀭𑁄 𑀉𑀧𑀚𑁆𑀛𑀸𑀬𑀲𑁆𑀲 𑀪𑀡𑁆𑀟𑀓𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀢𑀁 𑀧𑀭𑀺𑀔𑀸𑀧𑀺𑀝𑁆𑀞𑁂 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑁋 ‘‘𑀅𑀦𑀕𑁆𑀖𑁄, 𑀪𑀦𑁆𑀢𑁂, 𑀲𑀺𑀦𑁆𑀥𑀯𑀧𑁄𑀢𑀓𑁄’’𑀢𑀺 𑀉𑀧𑀚𑁆𑀛𑀸𑀬𑀲𑁆𑀲 𑀓𑀣𑁂𑀲𑀺. 𑀲𑀘𑁂 𑀭𑀸𑀚𑀸 𑀚𑀸𑀦𑁂𑀬𑁆𑀬, 𑀫𑀗𑁆𑀕𑀮𑀲𑁆𑀲𑀁 𑀦𑀁 𑀓𑀭𑁂𑀬𑁆𑀬𑀸𑀢𑀺. 𑀣𑁂𑀭𑁄 𑀆𑀳 𑁋 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄, 𑀢𑀸𑀢, 𑀭𑀸𑀚𑀸 𑀅𑀧𑁆𑀧𑁂𑀯 𑀦𑀸𑀫 𑀩𑀼𑀤𑁆𑀥𑀲𑀸𑀲𑀦𑁂 𑀧𑀲𑀻𑀤𑁂𑀬𑁆𑀬 𑀭𑀜𑁆𑀜𑁄 𑀓𑀣𑁂𑀳𑀻’’𑀢𑀺. 𑀲𑁄 𑀕𑀦𑁆𑀢𑁆𑀯𑀸, 𑁋 ‘‘𑀫𑀳𑀸𑀭𑀸𑀚, 𑀅𑀦𑀕𑁆𑀖𑁄 𑀲𑀺𑀦𑁆𑀥𑀯𑀧𑁄𑀢𑀓𑁄 𑀅𑀢𑁆𑀣𑀻’’𑀢𑀺 ¶ 𑀓𑀣𑁂𑀲𑀺. 𑀢𑀬𑀸 𑀤𑀺𑀝𑁆𑀞𑁄 ¶ , 𑀢𑀸𑀢𑀸𑀢𑀺? 𑀆𑀫, 𑀫𑀳𑀸𑀭𑀸𑀚𑀸𑀢𑀺. 𑀓𑀺𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻𑀢𑀺? 𑀢𑀼𑀫𑁆𑀳𑀸𑀓𑀁 𑀪𑀼𑀜𑁆𑀚𑀦𑀓𑀲𑀼𑀯𑀡𑁆𑀡𑀣𑀸𑀮𑁂 𑀢𑀼𑀫𑁆𑀳𑀸𑀓𑀁 𑀪𑀼𑀜𑁆𑀚𑀦𑀓𑀪𑀢𑁆𑀢𑀁 𑀢𑀼𑀫𑁆𑀳𑀸𑀓𑀁 𑀧𑀺𑀯𑀦𑀓𑀭𑀲𑁄 𑀢𑀼𑀫𑁆𑀳𑀸𑀓𑀁 𑀕𑀦𑁆𑀥𑀸 𑀢𑀼𑀫𑁆𑀳𑀸𑀓𑀁 𑀫𑀸𑀮𑀸𑀢𑀺. 𑀭𑀸𑀚𑀸 𑀲𑀩𑁆𑀩𑀁 𑀤𑀸𑀧𑁂𑀲𑀺. 𑀤𑀳𑀭𑁄 𑀕𑀸𑀳𑀸𑀧𑁂𑀢𑁆𑀯𑀸 𑀅𑀕𑀫𑀸𑀲𑀺.

𑀅𑀲𑁆𑀲𑁄 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸𑀯 ‘‘𑀫𑀬𑁆𑀳𑀁 𑀕𑀼𑀡𑀚𑀸𑀦𑀦𑀓𑀆𑀘𑀭𑀺𑀬𑁄 𑀅𑀢𑁆𑀣𑀺 𑀫𑀜𑁆𑀜𑁂’’𑀢𑀺 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀤𑀳𑀭𑁄 𑀕𑀦𑁆𑀢𑁆𑀯𑀸 ‘‘𑀪𑀢𑁆𑀢𑀁 𑀪𑀼𑀜𑁆𑀚𑀸’’𑀢𑀺 𑀅𑀘𑁆𑀙𑀭𑀁 𑀧𑀳𑀭𑀺. 𑀅𑀲𑁆𑀲𑁄 𑀆𑀕𑀦𑁆𑀢𑁆𑀯𑀸 𑀲𑀼𑀯𑀡𑁆𑀡𑀣𑀸𑀮𑁂 𑀪𑀢𑁆𑀢𑀁 𑀪𑀼𑀜𑁆𑀚𑀺, 𑀭𑀲𑀁 𑀧𑀺𑀯𑀺. 𑀅𑀣 𑀦𑀁 𑀕𑀦𑁆𑀥𑁂𑀳𑀺 𑀯𑀺𑀮𑀺𑀫𑁆𑀧𑀺𑀢𑁆𑀯𑀸 𑀭𑀸𑀚𑀧𑀺𑀴𑀦𑁆𑀥𑀦𑀁 𑀧𑀺𑀴𑀦𑁆𑀥𑀺𑀢𑁆𑀯𑀸 ‘‘𑀧𑀼𑀭𑀢𑁄 𑀧𑀼𑀭𑀢𑁄 𑀕𑀘𑁆𑀙𑀸’’𑀢𑀺 𑀅𑀘𑁆𑀙𑀭𑀁 𑀧𑀳𑀭𑀺. 𑀲𑁄 𑀤𑀳𑀭𑀲𑁆𑀲 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀫𑀗𑁆𑀕𑀮𑀲𑁆𑀲𑀝𑁆𑀞𑀸𑀦𑁂 𑀅𑀝𑁆𑀞𑀸𑀲𑀺. 𑀤𑀳𑀭𑁄 𑁋 ‘‘𑀅𑀬𑀁 𑀢𑁂, 𑀫𑀳𑀸𑀭𑀸𑀚, 𑀅𑀦𑀕𑁆𑀖𑁄 𑀲𑀺𑀦𑁆𑀥𑀯𑀧𑁄𑀢𑀓𑁄, 𑀇𑀫𑀺𑀦𑀸𑀯 𑀦𑀁 𑀦𑀺𑀬𑀸𑀫𑁂𑀦 𑀓𑀢𑀺𑀧𑀸𑀳𑀁 𑀧𑀝𑀺𑀚𑀕𑁆𑀕𑀸𑀧𑁂𑀳𑀻’’𑀢𑀺 𑀯𑀢𑁆𑀯𑀸 𑀦𑀺𑀓𑁆𑀔𑀫𑀺.

𑀅𑀣 𑀓𑀢𑀺𑀧𑀸𑀳𑀲𑁆𑀲 𑀅𑀘𑁆𑀘𑀬𑁂𑀦 𑀆𑀕𑀦𑁆𑀢𑁆𑀯𑀸 𑀅𑀲𑁆𑀲𑀲𑁆𑀲 𑀆𑀦𑀼𑀪𑀸𑀯𑀁 𑀧𑀲𑁆𑀲𑀺𑀲𑁆𑀲𑀲𑀺, 𑀫𑀳𑀸𑀭𑀸𑀚𑀸𑀢𑀺. 𑀲𑀸𑀥𑀼 𑀆𑀘𑀭𑀺𑀬 𑀓𑀼𑀳𑀺𑀁 𑀞𑀢𑁆𑀯𑀸 𑀧𑀲𑁆𑀲𑀸𑀫𑀸𑀢𑀺? 𑀉𑀬𑁆𑀬𑀸𑀦𑀁 𑀕𑀘𑁆𑀙, 𑀫𑀳𑀸𑀭𑀸𑀚𑀸𑀢𑀺. 𑀭𑀸𑀚𑀸 𑀅𑀲𑁆𑀲𑀁 𑀕𑀸𑀳𑀸𑀧𑁂𑀢𑁆𑀯𑀸 𑀅𑀕𑀫𑀸𑀲𑀺. 𑀤𑀳𑀭𑁄 𑀅𑀘𑁆𑀙𑀭𑀁 𑀧𑀳𑀭𑀺𑀢𑁆𑀯𑀸 ‘‘𑀏𑀢𑀁 𑀭𑀼𑀓𑁆𑀔𑀁 𑀅𑀦𑀼𑀧𑀭𑀺𑀬𑀸𑀳𑀻’’𑀢𑀺 𑀅𑀲𑁆𑀲𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺. 𑀅𑀲𑁆𑀲𑁄 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀭𑀼𑀓𑁆𑀔𑀁 𑀅𑀦𑀼𑀧𑀭𑀺𑀕𑀦𑁆𑀢𑁆𑀯𑀸 𑀆𑀕𑀢𑁄. 𑀭𑀸𑀚𑀸 𑀦𑁂𑀯 𑀕𑀘𑁆𑀙𑀦𑁆𑀢𑀁 𑀦 𑀆𑀕𑀘𑁆𑀙𑀦𑁆𑀢𑀁 𑀅𑀤𑁆𑀤𑀲. 𑀤𑀺𑀝𑁆𑀞𑁄 𑀢𑁂, 𑀫𑀳𑀸𑀭𑀸𑀚𑀸𑀢𑀺? 𑀦 𑀤𑀺𑀝𑁆𑀞𑁄, 𑀢𑀸𑀢𑀸𑀢𑀺. 𑀯𑀮𑀜𑁆𑀚𑀓𑀤𑀡𑁆𑀟𑀁 𑀏𑀢𑀁 𑀭𑀼𑀓𑁆𑀔𑀁 𑀦𑀺𑀲𑁆𑀲𑀸𑀬 𑀞𑀧𑁂𑀣𑀸𑀢𑀺 𑀯𑀢𑁆𑀯𑀸 𑀅𑀘𑁆𑀙𑀭𑀁 𑀧𑀳𑀭𑀺 ‘‘𑀯𑀮𑀜𑁆𑀚𑀓𑀤𑀡𑁆𑀟𑀁 𑀕𑀳𑁂𑀢𑁆𑀯𑀸 𑀏𑀳𑀻’’𑀢𑀺. 𑀅𑀲𑁆𑀲𑁄 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀫𑀼𑀔𑁂𑀦 𑀕𑀳𑁂𑀢𑁆𑀯𑀸 𑀆𑀕𑀢𑁄. 𑀤𑀺𑀝𑁆𑀞𑀁, 𑀫𑀳𑀸𑀭𑀸𑀚𑀸𑀢𑀺. 𑀤𑀺𑀝𑁆𑀞𑀁, 𑀢𑀸𑀢𑀸𑀢𑀺.

𑀧𑀼𑀦 ¶ 𑀅𑀘𑁆𑀙𑀭𑀁 𑀧𑀳𑀭𑀺 ‘‘𑀉𑀬𑁆𑀬𑀸𑀦𑀲𑁆𑀲 𑀧𑀸𑀓𑀸𑀭𑀫𑀢𑁆𑀣𑀓𑁂𑀦 𑀘𑀭𑀺𑀢𑁆𑀯𑀸 𑀏𑀳𑀻’’𑀢𑀺. 𑀅𑀲𑁆𑀲𑁄 𑀢𑀣𑀸 𑀅𑀓𑀸𑀲𑀺. 𑀤𑀺𑀝𑁆𑀞𑁄, 𑀫𑀳𑀸𑀭𑀸𑀚𑀸𑀢𑀺. 𑀦 𑀤𑀺𑀝𑁆𑀞𑁄, 𑀢𑀸𑀢𑀸𑀢𑀺. 𑀭𑀢𑁆𑀢𑀓𑀫𑁆𑀩𑀮𑀁 𑀆𑀳𑀭𑀸𑀧𑁂𑀢𑁆𑀯𑀸 𑀅𑀲𑁆𑀲𑀲𑁆𑀲 𑀧𑀸𑀤𑁂 𑀩𑀦𑁆𑀥𑀸𑀧𑁂𑀢𑁆𑀯𑀸 𑀢𑀣𑁂𑀯 𑀲𑀜𑁆𑀜𑀁 𑀅𑀤𑀸𑀲𑀺. 𑀅𑀲𑁆𑀲𑁄 𑀉𑀮𑁆𑀮𑀗𑁆𑀖𑀺𑀢𑁆𑀯𑀸 𑀧𑀸𑀓𑀸𑀭𑀫𑀢𑁆𑀣𑀓𑁂𑀦 𑀅𑀦𑀼𑀧𑀭𑀺𑀬𑀸𑀬𑀺. 𑀩𑀮𑀯𑀢𑀸 𑀧𑀼𑀭𑀺𑀲𑁂𑀦 𑀆𑀯𑀺𑀜𑁆𑀙𑀦𑀅𑀮𑀸𑀢𑀕𑁆𑀕𑀺𑀲𑀺𑀔𑀸 ¶ 𑀯𑀺𑀬 𑀉𑀬𑁆𑀬𑀸𑀦𑀧𑀸𑀓𑀸𑀭𑀫𑀢𑁆𑀣𑀓𑁂 𑀧𑀜𑁆𑀜𑀸𑀬𑀺𑀢𑁆𑀣. 𑀅𑀲𑁆𑀲𑁄 𑀕𑀦𑁆𑀢𑁆𑀯𑀸 𑀲𑀫𑀻𑀧𑁂 𑀞𑀺𑀢𑁄. 𑀤𑀺𑀝𑁆𑀞𑀁, 𑀫𑀳𑀸𑀭𑀸𑀚𑀸𑀢𑀺. 𑀤𑀺𑀝𑁆𑀞𑀁, 𑀢𑀸𑀢𑀸𑀢𑀺. 𑀫𑀗𑁆𑀕𑀮𑀧𑁄𑀓𑁆𑀔𑀭𑀡𑀺𑀧𑀸𑀓𑀸𑀭𑀫𑀢𑁆𑀣𑀓𑁂 𑀅𑀦𑀼𑀧𑀭𑀺𑀬𑀸𑀳𑀻𑀢𑀺 𑀲𑀜𑁆𑀜𑀁 𑀅𑀤𑀸𑀲𑀺.

𑀧𑀼𑀦 ‘‘𑀧𑁄𑀓𑁆𑀔𑀭𑀡𑀺𑀁 𑀑𑀢𑀭𑀺𑀢𑁆𑀯𑀸 𑀧𑀤𑀼𑀫𑀧𑀢𑁆𑀢𑁂𑀲𑀼 𑀘𑀸𑀭𑀺𑀓𑀁 𑀘𑀭𑀸𑀳𑀻’’𑀢𑀺 𑀲𑀜𑁆𑀜𑀁 𑀅𑀤𑀸𑀲𑀺. 𑀧𑁄𑀓𑁆𑀔𑀭𑀡𑀺𑀁 𑀑𑀢𑀭𑀺𑀢𑁆𑀯𑀸 𑀲𑀩𑁆𑀩𑀧𑀤𑀼𑀫𑀧𑀢𑁆𑀢𑁂 𑀘𑀭𑀺𑀢𑁆𑀯𑀸 𑀅𑀕𑀫𑀸𑀲𑀺, 𑀏𑀓𑀁 𑀧𑀢𑁆𑀢𑀫𑁆𑀧𑀺 ¶ 𑀅𑀦𑀓𑁆𑀓𑀦𑁆𑀢𑀁 𑀯𑀸 𑀨𑀸𑀮𑀺𑀢𑀁 𑀯𑀸 𑀙𑀺𑀦𑁆𑀤𑀺𑀢𑀁 𑀯𑀸 𑀔𑀡𑁆𑀟𑀺𑀢𑀁 𑀯𑀸 𑀦𑀸𑀳𑁄𑀲𑀺. 𑀤𑀺𑀝𑁆𑀞𑀁, 𑀫𑀳𑀸𑀭𑀸𑀚𑀸𑀢𑀺. 𑀤𑀺𑀝𑁆𑀞𑀁, 𑀢𑀸𑀢𑀸𑀢𑀺. 𑀅𑀘𑁆𑀙𑀭𑀁 𑀧𑀳𑀭𑀺𑀢𑁆𑀯𑀸 𑀢𑀁 𑀳𑀢𑁆𑀣𑀢𑀮𑀁 𑀉𑀧𑀦𑀸𑀫𑁂𑀲𑀺. 𑀥𑀸𑀢𑀽𑀧𑀢𑁆𑀣𑀤𑁆𑀥𑁄 𑀮𑀗𑁆𑀖𑀺𑀢𑁆𑀯𑀸 𑀳𑀢𑁆𑀣𑀢𑀮𑁂 𑀅𑀝𑁆𑀞𑀸𑀲𑀺. 𑀤𑀺𑀝𑁆𑀞𑀁, 𑀫𑀳𑀸𑀭𑀸𑀚𑀸𑀢𑀺? 𑀤𑀺𑀝𑁆𑀞𑀁, 𑀢𑀸𑀢𑀸𑀢𑀺. 𑀏𑀯𑀁 𑀉𑀢𑁆𑀢𑀫𑀳𑀬𑁄 𑀏𑀯 𑀉𑀢𑁆𑀢𑀫𑀓𑀸𑀭𑀡𑀸𑀬 𑀉𑀢𑁆𑀢𑀫𑀚𑀯𑀁 𑀧𑀝𑀺𑀧𑀚𑁆𑀚𑀢𑀺.

𑀉𑀢𑁆𑀢𑀫𑁂 𑀲𑀸𑀔𑀮𑁆𑀬𑁂𑀢𑀺 𑀫𑀼𑀤𑀼𑀯𑀸𑀘𑀸𑀬. 𑀫𑀼𑀤𑀼𑀯𑀸𑀘𑀸𑀬 𑀳𑀺, ‘‘𑀢𑀸𑀢, 𑀢𑁆𑀯𑀁 𑀫𑀸 𑀘𑀺𑀦𑁆𑀢𑀬𑀺, 𑀭𑀜𑁆𑀜𑁄 𑀫𑀗𑁆𑀕𑀮𑀲𑁆𑀲𑁄 𑀪𑀯𑀺𑀲𑁆𑀲𑀲𑀺, 𑀭𑀸𑀚𑀪𑁄𑀚𑀦𑀸𑀤𑀻𑀦𑀺 𑀮𑀪𑀺𑀲𑁆𑀲𑀲𑀻’’𑀢𑀺 𑀉𑀢𑁆𑀢𑀫𑀳𑀬𑀓𑀸𑀭𑀡𑀁 𑀓𑀸𑀭𑁂𑀢𑀩𑁆𑀩𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀢𑁆𑀢𑀫𑁂 𑀲𑀸𑀔𑀮𑁆𑀬𑁂’’𑀢𑀺. 𑀭𑀸𑀚𑀪𑁄𑀕𑁆𑀕𑁄𑀢𑀺 𑀭𑀜𑁆𑀜𑁄 𑀉𑀧𑀪𑁄𑀕𑁄. 𑀭𑀜𑁆𑀜𑁄 𑀅𑀗𑁆𑀕𑀦𑁆𑀢𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻𑀢𑀺 𑀬𑀢𑁆𑀣 𑀓𑀢𑁆𑀣𑀘𑀺 𑀕𑀘𑁆𑀙𑀦𑁆𑀢𑁂𑀦 𑀳𑀢𑁆𑀣𑀁 𑀯𑀺𑀬 𑀧𑀸𑀤𑀁 𑀯𑀺𑀬 𑀅𑀦𑁄𑀳𑀸𑀬𑁂𑀯 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺. 𑀢𑀲𑁆𑀫𑀸 𑀅𑀗𑁆𑀕𑀦𑁆𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺, 𑀘𑀢𑀽𑀲𑀼 𑀯𑀸 𑀲𑁂𑀦𑀗𑁆𑀕𑁂𑀲𑀼 𑀏𑀓𑀁 𑀅𑀗𑁆𑀕𑀁 𑀳𑁄𑀢𑀺.

𑀅𑀲𑁂𑀔𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸𑀢𑀺 𑀅𑀭𑀳𑀢𑁆𑀢𑀨𑀮𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀬𑁄𑀧𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀯. 𑀲𑀫𑁆𑀫𑀸𑀜𑀸𑀡𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑁂𑀯. 𑀞𑀧𑁂𑀢𑁆𑀯𑀸 𑀧𑀦 𑀅𑀝𑁆𑀞 ¶ 𑀨𑀮𑀗𑁆𑀕𑀸𑀦𑀺 𑀲𑁂𑀲𑀸 𑀥𑀫𑁆𑀫𑀸 𑀯𑀺𑀫𑀼𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀅𑀬𑀁 𑀧𑀦 𑀤𑁂𑀲𑀦𑀸 𑀉𑀕𑁆𑀖𑀝𑀺𑀢𑀜𑁆𑀜𑀽𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀅𑀭𑀳𑀢𑁆𑀢𑀦𑀺𑀓𑀽𑀝𑀁 𑀕𑀳𑁂𑀢𑁆𑀯𑀸 𑀦𑀺𑀝𑁆𑀞𑀸𑀧𑀺𑀢𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀪𑀤𑁆𑀤𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀮𑀝𑀼𑀓𑀺𑀓𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁮. 𑀏𑀯𑀁 ¶ 𑀫𑁂 𑀲𑀼𑀢𑀦𑁆𑀢𑀺 𑀮𑀝𑀼𑀓𑀺𑀓𑁄𑀧𑀫𑀲𑀼𑀢𑁆𑀢𑀁. 𑀢𑀢𑁆𑀣 𑀬𑁂𑀦 𑀲𑁄 𑀯𑀦𑀲𑀡𑁆𑀟𑁄𑀢𑀺 𑀅𑀬𑀫𑁆𑀧𑀺 𑀫𑀳𑀸𑀉𑀤𑀸𑀬𑀺𑀢𑁆𑀣𑁂𑀭𑁄 𑀪𑀕𑀯𑀢𑀸 𑀲𑀤𑁆𑀥𑀺𑀁𑀬𑁂𑀯 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀲𑀤𑁆𑀥𑀺𑀁 𑀧𑀝𑀺𑀓𑁆𑀓𑀫𑀺. 𑀢𑀲𑁆𑀫𑀸 𑀬𑁂𑀦 𑀲𑁄 𑀪𑀕𑀯𑀢𑀸 𑀉𑀧𑀲𑀗𑁆𑀓𑀫𑀦𑁆𑀢𑁄 𑀯𑀦𑀲𑀡𑁆𑀟𑁄 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀳𑀢𑁆𑀢𑀸𑀢𑀺 𑀅𑀧𑀳𑀸𑀭𑀓𑁄. 𑀉𑀧𑀳𑀢𑁆𑀢𑀸𑀢𑀺 𑀉𑀧𑀳𑀸𑀭𑀓𑁄. 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑁄.

𑁧𑁪𑁯. 𑀬𑀁 ¶ 𑀪𑀕𑀯𑀸𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀪𑀕𑀯𑀸. 𑀇𑀗𑁆𑀖𑀸𑀢𑀺 𑀆𑀡𑀢𑁆𑀢𑀺𑀬𑀁 𑀦𑀺𑀧𑀸𑀢𑁄. 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁. 𑀢𑀜𑁆𑀘 𑀔𑁄 𑀦 𑀪𑀕𑀯𑀦𑁆𑀢𑀁 𑀧𑀝𑀺𑀘𑁆𑀘, 𑀏𑀯𑀭𑀽𑀧𑀁 𑀧𑀦 𑀧𑀡𑀻𑀢𑀪𑁄𑀚𑀦𑀁 𑀅𑀮𑀪𑀦𑁆𑀢𑀸 𑀓𑀣𑀁 𑀬𑀸𑀧𑁂𑀲𑁆𑀲𑀸𑀫𑀸𑀢𑀺 𑀏𑀯𑀁 𑀧𑀡𑀻𑀢𑀪𑁄𑀚𑀦𑀁 𑀧𑀝𑀺𑀘𑁆𑀘 𑀅𑀳𑁄𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀪𑀽𑀢𑀧𑀼𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀭𑀢𑁆𑀢𑀺𑀪𑁄𑀚𑀦𑀲𑁆𑀲 𑀧𑀡𑀻𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀽𑀧𑁂𑀬𑁆𑀬𑀦𑁆𑀢𑀺 ¶ 𑀲𑀽𑀧𑁂𑀦 𑀉𑀧𑀦𑁂𑀢𑀩𑁆𑀩𑀁 𑀫𑀘𑁆𑀙𑀫𑀁𑀲𑀓𑀴𑀻𑀭𑀸𑀤𑀺. 𑀲𑀫𑀕𑁆𑀕𑀸 𑀪𑀼𑀜𑁆𑀚𑀺𑀲𑁆𑀲𑀸𑀫𑀸𑀢𑀺 𑀏𑀓𑀢𑁄 𑀪𑀼𑀜𑁆𑀚𑀺𑀲𑁆𑀲𑀸𑀫. 𑀲𑀗𑁆𑀔𑀢𑀺𑀬𑁄𑀢𑀺 𑀅𑀪𑀺𑀲𑀗𑁆𑀔𑀸𑀭𑀺𑀓𑀔𑀸𑀤𑀦𑀻𑀬𑀸𑀦𑀺. 𑀲𑀩𑁆𑀩𑀸 𑀢𑀸 𑀭𑀢𑁆𑀢𑀺𑀦𑁆𑀢𑀺 𑀲𑀩𑁆𑀩𑀸 𑀢𑀸 𑀲𑀗𑁆𑀔𑀢𑀺𑀬𑁄 𑀭𑀢𑁆𑀢𑀺𑀁𑀬𑁂𑀯 𑀳𑁄𑀦𑁆𑀢𑀺, 𑀤𑀺𑀯𑀸 𑀧𑀦 𑀅𑀧𑁆𑀧𑀸 𑀧𑀭𑀺𑀢𑁆𑀢𑀸 𑀣𑁄𑀓𑀺𑀓𑀸 𑀳𑁄𑀦𑁆𑀢𑀻𑀢𑀺. 𑀫𑀦𑀼𑀲𑁆𑀲𑀸 𑀳𑀺 𑀤𑀺𑀯𑀸 𑀬𑀸𑀕𑀼𑀓𑀜𑁆𑀚𑀺𑀬𑀸𑀤𑀻𑀳𑀺 𑀬𑀸𑀧𑁂𑀢𑁆𑀯𑀸𑀧𑀺 𑀭𑀢𑁆𑀢𑀺𑀁 𑀬𑀣𑀸𑀲𑀢𑁆𑀢𑀺 𑀬𑀣𑀸𑀧𑀡𑀻𑀢𑀫𑁂𑀯 𑀪𑀼𑀜𑁆𑀚𑀦𑁆𑀢𑀺.

𑀧𑀼𑀦 𑀪𑀽𑀢𑀧𑀼𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀭𑀢𑁆𑀢𑀺 𑀯𑀺𑀓𑀸𑀮𑀪𑁄𑀚𑀦𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀅𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬𑀦𑁆𑀢𑀺 𑀩𑀳𑀮𑀦𑁆𑀥𑀓𑀸𑀭𑁂. 𑀫𑀸𑀡𑀯𑁂𑀳𑀻𑀢𑀺 𑀘𑁄𑀭𑁂𑀳𑀺. 𑀓𑀢𑀓𑀫𑁆𑀫𑁂𑀳𑀻𑀢𑀺 𑀓𑀢𑀘𑁄𑀭𑀓𑀫𑁆𑀫𑁂𑀳𑀺. 𑀘𑁄𑀭𑀸 𑀓𑀺𑀭 𑀓𑀢𑀓𑀫𑁆𑀫𑀸 𑀬𑀁 𑀦𑁂𑀲𑀁 𑀤𑁂𑀯𑀢𑀁 𑀆𑀬𑀸𑀘𑀺𑀢𑁆𑀯𑀸 𑀓𑀫𑁆𑀫𑀁 𑀦𑀺𑀧𑁆𑀨𑀦𑁆𑀦𑀁, 𑀢𑀲𑁆𑀲 𑀉𑀧𑀳𑀸𑀭𑀢𑁆𑀣𑀸𑀬 𑀫𑀦𑀼𑀲𑁆𑀲𑁂 𑀫𑀸𑀭𑁂𑀢𑁆𑀯𑀸 𑀕𑀮𑀮𑁄𑀳𑀺𑀢𑀸𑀤𑀻𑀦𑀺 𑀕𑀡𑁆𑀳𑀦𑁆𑀢𑀺. 𑀢𑁂 𑀅𑀜𑁆𑀜𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀫𑀸𑀭𑀺𑀬𑀫𑀸𑀦𑁂𑀲𑀼 𑀓𑁄𑀮𑀸𑀳𑀮𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀧𑀩𑁆𑀩𑀚𑀺𑀢𑀁 𑀧𑀭𑀺𑀬𑁂𑀲𑀦𑁆𑀢𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀫𑀜𑁆𑀜𑀫𑀸𑀦𑀸 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀫𑀸𑀭𑁂𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀅𑀓𑀢𑀓𑀫𑁆𑀫𑁂𑀳𑀻𑀢𑀺 𑀅𑀝𑀯𑀺𑀢𑁄 𑀕𑀸𑀫𑀁 𑀆𑀕𑀫𑀦𑀓𑀸𑀮𑁂 𑀓𑀫𑁆𑀫𑀦𑀺𑀧𑁆𑀨𑀦𑁆𑀦𑀢𑁆𑀣𑀁 𑀧𑀼𑀭𑁂𑀢𑀭𑀁 𑀩𑀮𑀺𑀓𑀫𑁆𑀫𑀁 𑀓𑀸𑀢𑀼𑀓𑀸𑀫𑁂𑀳𑀺. 𑀅𑀲𑀤𑁆𑀥𑀫𑁆𑀫𑁂𑀦 𑀦𑀺𑀫𑀦𑁆𑀢𑁂𑀢𑀻𑀢𑀺 ‘‘𑀏𑀳𑀺 𑀪𑀺𑀓𑁆𑀔𑀼 𑀅𑀚𑁆𑀚𑁂𑀓𑀭𑀢𑁆𑀢𑀺𑀁 𑀇𑀥𑁂𑀯 𑀪𑀼𑀜𑁆𑀚𑀺𑀢𑁆𑀯𑀸 𑀇𑀥 𑀯𑀲𑀺𑀢𑁆𑀯𑀸 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀲𑁆𑀯𑁂 𑀕𑀫𑀺𑀲𑁆𑀲𑀲𑀻’’𑀢𑀺 𑀫𑁂𑀣𑀼𑀦𑀥𑀫𑁆𑀫𑁂𑀦 𑀦𑀺𑀫𑀦𑁆𑀢𑁂𑀢𑀺.

𑀧𑀼𑀦 𑀪𑀽𑀢𑀧𑀼𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀅𑀢𑁆𑀢𑀦𑀸 𑀤𑀺𑀝𑁆𑀞𑀓𑀸𑀭𑀡𑀁 𑀓𑀣𑁂𑀢𑀺. 𑀯𑀺𑀚𑁆𑀚𑀦𑁆𑀢𑀭𑀺𑀓𑀸𑀬𑀸𑀢𑀺 ¶ 𑀯𑀺𑀚𑁆𑀚𑀼𑀯𑀺𑀚𑁆𑀚𑁄𑀢𑀦𑀓𑁆𑀔𑀡𑁂 ¶ . 𑀯𑀺𑀲𑁆𑀲𑀭𑀫𑀓𑀸𑀲𑀻𑀢𑀺 𑀫𑀳𑀸𑀲𑀤𑁆𑀤𑀫𑀓𑀸𑀲𑀺. 𑀅𑀪𑀼𑀫𑁆𑀫𑁂𑀢𑀺 𑀪𑀽’𑀢𑀺 𑀯𑀟𑁆𑀠𑀺, 𑀅𑀪𑀽’𑀢𑀺 𑀅𑀯𑀟𑁆𑀠𑀺, 𑀯𑀺𑀦𑀸𑀲𑁄 𑀫𑀬𑁆𑀳𑀦𑁆𑀢𑀺 𑀅𑀢𑁆𑀣𑁄. 𑀧𑀺𑀲𑀸𑀘𑁄 𑀯𑀢 𑀫𑀦𑁆𑀢𑀺 𑀧𑀺𑀲𑀸𑀘𑁄 𑀫𑀁 𑀔𑀸𑀤𑀺𑀢𑀼𑀁 𑀆𑀕𑀢𑁄 𑀯𑀢. 𑀆𑀢𑀼𑀫𑀸𑀭𑀻 𑀫𑀸𑀢𑀼𑀫𑀸𑀭𑀻𑀢𑀺 𑀏𑀢𑁆𑀣 𑀆𑀢𑀽𑀢𑀺 𑀧𑀺𑀢𑀸, 𑀫𑀸𑀢𑀽𑀢𑀺 𑀫𑀸𑀢𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀲 𑀧𑀺𑀢𑀸 𑀯𑀸 𑀫𑀸𑀢𑀸 𑀯𑀸 𑀅𑀢𑁆𑀣𑀺, 𑀢𑀁 𑀫𑀸𑀢𑀸𑀧𑀺𑀢𑀭𑁄 𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀓𑁄𑀢𑀺 𑀬𑀣𑀸 𑀢𑀣𑀸 𑀯𑀸 𑀉𑀧𑁆𑀧𑀸𑀤𑁂𑀢𑁆𑀯𑀸 𑀬𑀁𑀓𑀺𑀜𑁆𑀘𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀤𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀲𑀬𑀸𑀧𑁂𑀦𑁆𑀢𑀺. 𑀲𑁄 𑀏𑀯𑀁 𑀭𑀢𑁆𑀢𑀺𑀁 𑀧𑀺𑀡𑁆𑀟𑀸𑀬 𑀦 𑀘𑀭𑀢𑀺. 𑀢𑀼𑀬𑁆𑀳𑀁 𑀧𑀦 𑀫𑀸𑀢𑀸𑀧𑀺𑀢𑀭𑁄 𑀫𑀢𑀸 𑀫𑀜𑁆𑀜𑁂, 𑀢𑁂𑀦 𑀏𑀯𑀁 𑀘𑀭𑀲𑀻𑀢𑀺.

𑁧𑁫𑁦. 𑀏𑀯𑀫𑁂𑀯𑀸𑀢𑀺 ¶ 𑀏𑀯𑀫𑁂𑀯 𑀓𑀺𑀜𑁆𑀘𑀺 𑀆𑀦𑀺𑀲𑀁𑀲𑀁 𑀅𑀧𑀲𑁆𑀲𑀦𑁆𑀢𑀸 𑀦𑀺𑀓𑁆𑀓𑀸𑀭𑀡𑁂𑀦𑁂𑀯. 𑀏𑀯𑀫𑀸𑀳𑀁𑀲𑀽𑀢𑀺 𑀕𑀭𑀳𑀦𑁆𑀢𑁄 𑀆𑀳. 𑀢𑀢𑁆𑀣 𑀆𑀳𑀁𑀲𑀽𑀢𑀺 𑀯𑀤𑀦𑁆𑀢𑀺. 𑀓𑀺𑀁 𑀧𑀦𑀺𑀫𑀲𑁆𑀲𑀸𑀢𑀺 𑀇𑀫𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑀲𑁆𑀲 𑀳𑁂𑀢𑀼 𑀓𑀺𑀁 𑀯𑀢𑁆𑀢𑀩𑁆𑀩𑀁 𑀦𑀸𑀫, 𑀦𑀦𑀼 𑀅𑀧𑀲𑁆𑀲𑀦𑁆𑀢𑁂𑀦 𑀯𑀺𑀬 𑀅𑀲𑀼𑀡𑀦𑁆𑀢𑁂𑀦 𑀯𑀺𑀬 𑀪𑀯𑀺𑀢𑀩𑁆𑀩𑀦𑁆𑀢𑀺. 𑀑𑀭𑀫𑀢𑁆𑀢𑀓𑀲𑁆𑀲𑀸𑀢𑀺 𑀧𑀭𑀺𑀢𑁆𑀢𑀫𑀢𑁆𑀢𑀓𑀲𑁆𑀲. 𑀅𑀥𑀺𑀲𑀮𑁆𑀮𑀺𑀔𑀢𑁂𑀯𑀸𑀬𑀦𑁆𑀢𑀺 𑀅𑀬𑀁 𑀲𑀫𑀡𑁄 𑀦𑀯𑀦𑀻𑀢𑀁 𑀧𑀺𑀲𑀦𑁆𑀢𑁄 𑀯𑀺𑀬 𑀧𑀤𑀼𑀫𑀦𑀸𑀴𑀲𑀼𑀢𑁆𑀢𑀁 𑀓𑀓𑀘𑁂𑀦 𑀑𑀓𑁆𑀓𑀦𑁆𑀢𑀦𑁆𑀢𑁄 𑀯𑀺𑀬 𑀅𑀢𑀺𑀲𑀮𑁆𑀮𑁂𑀔𑀢𑀺, 𑀅𑀢𑀺𑀯𑀸𑀬𑀸𑀫𑀁 𑀓𑀭𑁄𑀢𑀺. 𑀲𑀺𑀓𑁆𑀔𑀸𑀓𑀸𑀫𑀸𑀢𑀺 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀬𑁄 𑀯𑀺𑀬 𑀲𑀺𑀓𑁆𑀔𑀸𑀓𑀸𑀫𑀸, 𑀢𑁂𑀲𑀼 𑀘 𑀅𑀧𑁆𑀧𑀘𑁆𑀘𑀬𑀁 𑀉𑀧𑀝𑁆𑀞𑀧𑁂𑀦𑁆𑀢𑀺. 𑀢𑁂𑀲𑀜𑁆𑀳𑀺 𑀏𑀯𑀁 𑀳𑁄𑀢𑀺 ‘‘𑀲𑀘𑁂 ¶ 𑀏𑀢𑁂 ‘𑀅𑀧𑁆𑀧𑀫𑀢𑁆𑀢𑀓𑀫𑁂𑀢𑀁, 𑀳𑀭𑀣 𑀪𑀕𑀯𑀸’𑀢𑀺 𑀯𑀤𑁂𑀬𑁆𑀬𑀼𑀁, 𑀓𑀺𑀁 𑀲𑀢𑁆𑀣𑀸 𑀦 𑀳𑀭𑁂𑀬𑁆𑀬. 𑀏𑀯𑀁 𑀧𑀦 𑀅𑀯𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 ‘𑀏𑀯𑀁 𑀪𑀕𑀯𑀸, 𑀲𑀸𑀥𑀼 𑀪𑀕𑀯𑀸, 𑀧𑀜𑁆𑀜𑀧𑁂𑀣 𑀪𑀕𑀯𑀸’𑀢𑀺 𑀅𑀢𑀺𑀭𑁂𑀓𑀢𑀭𑀁 𑀉𑀲𑁆𑀲𑀸𑀳𑀁 𑀧𑀝𑀺𑀮𑀪𑀦𑁆𑀢𑀻’’𑀢𑀺. 𑀢𑀲𑁆𑀫𑀸 𑀢𑁂𑀲𑀼 𑀅𑀧𑁆𑀧𑀘𑁆𑀘𑀬𑀁 𑀉𑀧𑀝𑁆𑀞𑀧𑁂𑀦𑁆𑀢𑀺.

𑀢𑁂𑀲𑀦𑁆𑀢𑀺 𑀢𑁂𑀲𑀁 𑀏𑀓𑀘𑁆𑀘𑀸𑀦𑀁 𑀫𑁄𑀖𑀧𑀼𑀭𑀺𑀲𑀸𑀦𑀁. 𑀢𑀦𑁆𑀢𑀺 𑀢𑀁 𑀅𑀧𑁆𑀧𑀫𑀢𑁆𑀢𑀓𑀁 𑀧𑀳𑀸𑀢𑀩𑁆𑀩𑀁. 𑀣𑀽𑀮𑁄 𑀓𑀮𑀺𑀗𑁆𑀕𑀭𑁄𑀢𑀺 𑀕𑀮𑁂 𑀩𑀤𑁆𑀥𑀁 𑀫𑀳𑀸𑀓𑀝𑁆𑀞𑀁 𑀯𑀺𑀬 𑀳𑁄𑀢𑀺. 𑀮𑀝𑀼𑀓𑀺𑀓𑀸 𑀲𑀓𑀼𑀡𑀺𑀓𑀸𑀢𑀺 𑀘𑀸𑀢𑀓𑀲𑀓𑀼𑀡𑀺𑀓𑀸. 𑀲𑀸 𑀓𑀺𑀭 𑀭𑀯𑀲𑀢𑀁 𑀭𑀯𑀺𑀢𑁆𑀯𑀸 𑀦𑀘𑁆𑀘𑀲𑀢𑀁 𑀦𑀘𑁆𑀘𑀺𑀢𑁆𑀯𑀸 𑀲𑀓𑀺𑀁 𑀕𑁄𑀘𑀭𑀁 𑀕𑀡𑁆𑀳𑀸𑀢𑀺. 𑀆𑀓𑀸𑀲𑀢𑁄 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀺𑀢𑀁 𑀧𑀦 𑀦𑀁 𑀤𑀺𑀲𑁆𑀯𑀸 𑀯𑀘𑁆𑀙𑀧𑀸𑀮𑀓𑀸𑀤𑀬𑁄 𑀓𑀻𑀴𑀦𑀢𑁆𑀣𑀁 𑀧𑀽𑀢𑀺𑀮𑀢𑀸𑀬 𑀩𑀦𑁆𑀥𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀆𑀕𑀫𑁂𑀢𑀻𑀢𑀺 𑀉𑀧𑁂𑀢𑀺. 𑀢𑀜𑁆𑀳𑀺 𑀢𑀲𑁆𑀲𑀸𑀢𑀺 𑀢𑀁 𑀧𑀽𑀢𑀺𑀮𑀢𑀸𑀩𑀦𑁆𑀥𑀦𑀁 𑀢𑀲𑁆𑀲𑀸 𑀅𑀧𑁆𑀧𑀲𑀭𑀻𑀭𑀢𑀸𑀬 𑀘𑁂𑀯 𑀅𑀧𑁆𑀧𑀣𑀸𑀫𑀢𑀸𑀬 𑀘 𑀩𑀮𑀯𑀩𑀦𑁆𑀥𑀦𑀁 𑀦𑀸𑀫, 𑀫𑀳𑀦𑁆𑀢𑀁 𑀦𑀸𑀴𑀺𑀓𑁂𑀭𑀭𑀚𑁆𑀚𑀼 𑀯𑀺𑀬 𑀤𑀼𑀘𑁆𑀙𑀺𑀚𑁆𑀚𑀁 𑀳𑁄𑀢𑀺. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀫𑁄𑀖𑀧𑀼𑀭𑀺𑀲𑀸𑀦𑀁 𑀲𑀤𑁆𑀥𑀸𑀫𑀦𑁆𑀤𑀢𑀸𑀬 𑀘 𑀧𑀜𑁆𑀜𑀸𑀫𑀦𑁆𑀤𑀢𑀸𑀬 𑀘 𑀩𑀮𑀯𑀁 𑀩𑀦𑁆𑀥𑀦𑀁 𑀦𑀸𑀫, 𑀤𑀼𑀓𑁆𑀓𑀝𑀯𑀢𑁆𑀣𑀼𑀫𑀢𑁆𑀢𑀓𑀫𑁆𑀧𑀺 𑀫𑀳𑀦𑁆𑀢𑀁 𑀧𑀸𑀭𑀸𑀚𑀺𑀓𑀯𑀢𑁆𑀣𑀼 𑀯𑀺𑀬 𑀤𑀼𑀧𑁆𑀧𑀚𑀳𑀁 𑀳𑁄𑀢𑀺.

𑁧𑁫𑁧. 𑀲𑀼𑀓𑁆𑀓𑀧𑀓𑁆𑀔𑁂 𑀧𑀳𑀸𑀢𑀩𑁆𑀩𑀲𑁆𑀲𑀸𑀢𑀺 𑀓𑀺𑀁 𑀇𑀫𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑀲𑁆𑀲 𑀧𑀳𑀸𑀢𑀩𑁆𑀩𑀲𑁆𑀲 𑀳𑁂𑀢𑀼 𑀪𑀕𑀯𑀢𑀸 ¶ 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀺, 𑀬𑀲𑁆𑀲 𑀦𑁄 𑀪𑀕𑀯𑀸 𑀧𑀳𑀸𑀦𑀫𑀸𑀳. 𑀦𑀦𑀼 𑀏𑀯𑀁 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸𑀧𑀺 𑀧𑀳𑀸𑀢𑀩𑁆𑀩𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀸𑀢𑀺 𑀅𑀦𑀼𑀲𑁆𑀲𑀼𑀓𑁆𑀓𑀸. 𑀧𑀦𑁆𑀦𑀮𑁄𑀫𑀸𑀢𑀺 ¶ 𑀧𑀢𑀺𑀢𑀮𑁄𑀫𑀸, 𑀦 𑀢𑀲𑁆𑀲 𑀧𑀳𑀸𑀢𑀩𑁆𑀩𑀪𑀬𑁂𑀦 𑀉𑀤𑁆𑀥𑀕𑁆𑀕𑀮𑁄𑀫𑀸. 𑀧𑀭𑀤𑀢𑁆𑀢𑀯𑀼𑀢𑁆𑀢𑀸𑀢𑀺 𑀧𑀭𑁂𑀳𑀺 𑀤𑀺𑀦𑁆𑀦𑀯𑀼𑀢𑁆𑀢𑀺𑀦𑁄, 𑀧𑀭𑀢𑁄 𑀮𑀤𑁆𑀥𑁂𑀦 𑀬𑀸𑀧𑁂𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀫𑀺𑀕𑀪𑀽𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀦𑁆𑀢𑀻𑀢𑀺 𑀅𑀧𑀘𑁆𑀘𑀸𑀲𑀻𑀲𑀦𑀧𑀓𑁆𑀔𑁂 ¶ 𑀞𑀺𑀢𑀸 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑀺. 𑀫𑀺𑀕𑁄 𑀳𑀺 𑀧𑀳𑀸𑀭𑀁 𑀮𑀪𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀯𑀸𑀲𑀁 𑀕𑀦𑁆𑀢𑁆𑀯𑀸 𑀪𑁂𑀲𑀚𑁆𑀚𑀁 𑀯𑀸 𑀯𑀡𑀢𑁂𑀮𑀁 𑀯𑀸 𑀮𑀪𑀺𑀲𑁆𑀲𑀸𑀫𑀻𑀢𑀺 𑀅𑀚𑁆𑀛𑀸𑀲𑀬𑀁 𑀅𑀓𑀢𑁆𑀯𑀸 𑀧𑀳𑀸𑀭𑀁 𑀮𑀪𑀺𑀢𑁆𑀯𑀸𑀯 𑀅𑀕𑀸𑀫𑀓𑀁 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀧𑀳𑀝𑀝𑁆𑀞𑀸𑀦𑀁 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀦𑀺𑀧𑀢𑀺𑀢𑁆𑀯𑀸 𑀨𑀸𑀲𑀼𑀪𑀽𑀢𑀓𑀸𑀮𑁂 𑀉𑀝𑁆𑀞𑀸𑀬 𑀕𑀘𑁆𑀙𑀢𑀺. 𑀏𑀯𑀁 𑀫𑀺𑀕𑀸 𑀅𑀧𑀘𑁆𑀘𑀸𑀲𑀻𑀲𑀦𑀧𑀓𑁆𑀔𑁂 𑀞𑀺𑀢𑀸. 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀫𑀺𑀕𑀪𑀽𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀦𑁆𑀢𑀻’’𑀢𑀺. 𑀢𑀜𑁆𑀳𑀺 𑀢𑀲𑁆𑀲𑀸𑀢𑀺 𑀢𑀁 𑀯𑀭𑀢𑁆𑀢𑀩𑀦𑁆𑀥𑀦𑀁 𑀢𑀲𑁆𑀲 𑀳𑀢𑁆𑀣𑀺𑀦𑀸𑀕𑀲𑁆𑀲 𑀫𑀳𑀸𑀲𑀭𑀻𑀭𑀢𑀸𑀬 𑀘𑁂𑀯 𑀫𑀳𑀸𑀣𑀸𑀫𑀢𑀸𑀬 𑀘 𑀤𑀼𑀩𑁆𑀩𑀮𑀩𑀦𑁆𑀥𑀦𑀁 𑀦𑀸𑀫. 𑀧𑀽𑀢𑀺𑀮𑀢𑀸 𑀯𑀺𑀬 𑀲𑀼𑀙𑀺𑀚𑁆𑀚𑀁 𑀳𑁄𑀢𑀺. 𑀢𑁂𑀲𑀁 𑀢𑀦𑁆𑀢𑀺 𑀢𑁂𑀲𑀁 𑀢𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀲𑀤𑁆𑀥𑀸𑀫𑀳𑀦𑁆𑀢𑀢𑀸𑀬 𑀘 𑀧𑀜𑁆𑀜𑀸𑀫𑀳𑀦𑁆𑀢𑀢𑀸𑀬 𑀘 𑀫𑀳𑀦𑁆𑀢𑀁 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀧𑀺 𑀤𑀼𑀓𑁆𑀓𑀝𑀯𑀢𑁆𑀣𑀼𑀫𑀢𑁆𑀢𑀓𑀁 𑀯𑀺𑀬 𑀲𑀼𑀧𑁆𑀧𑀚𑀳𑀁 𑀳𑁄𑀢𑀺.

𑁧𑁫𑁨. 𑀤𑀮𑀺𑀤𑁆𑀤𑁄𑀢𑀺 𑀤𑀸𑀮𑀺𑀤𑁆𑀤𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀅𑀲𑁆𑀲𑀓𑁄𑀢𑀺 𑀦𑀺𑀲𑁆𑀲𑀓𑁄. 𑀅𑀦𑀸𑀴𑁆𑀳𑀺𑀬𑁄𑀢𑀺 𑀅𑀦𑀟𑁆𑀠𑁄. 𑀅𑀕𑀸𑀭𑀓𑀦𑁆𑀢𑀺 𑀔𑀼𑀤𑁆𑀤𑀓𑀕𑁂𑀳𑀁. 𑀑𑀮𑀼𑀕𑁆𑀕𑀯𑀺𑀮𑀼𑀕𑁆𑀕𑀦𑁆𑀢𑀺 𑀬𑀲𑁆𑀲 𑀕𑁂𑀳𑀬𑀝𑁆𑀞𑀺𑀬𑁄 𑀧𑀺𑀝𑁆𑀞𑀺𑀯𑀁𑀲𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀫𑀡𑁆𑀟𑀮𑁂 𑀮𑀕𑁆𑀕𑀸, 𑀫𑀡𑁆𑀟𑀮𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀪𑀽𑀫𑀺𑀬𑀁 𑀮𑀕𑁆𑀕𑀸. 𑀓𑀸𑀓𑀸𑀢𑀺𑀤𑀸𑀬𑀺𑀦𑁆𑀢𑀺 𑀬𑀢𑁆𑀣 𑀓𑀺𑀜𑁆𑀘𑀺𑀤𑁂𑀯 𑀪𑀼𑀜𑁆𑀚𑀺𑀲𑁆𑀲𑀸𑀫𑀸𑀢𑀺 𑀅𑀦𑁆𑀢𑁄 𑀦𑀺𑀲𑀺𑀦𑁆𑀦𑀓𑀸𑀮𑁂 𑀯𑀺𑀲𑀼𑀁 𑀤𑁆𑀯𑀸𑀭𑀓𑀺𑀘𑁆𑀘𑀁 𑀦𑀸𑀫 𑀦𑀢𑁆𑀣𑀺, 𑀢𑀢𑁄 𑀢𑀢𑁄 𑀓𑀸𑀓𑀸 ¶ 𑀧𑀯𑀺𑀲𑀺𑀢𑁆𑀯𑀸 𑀧𑀭𑀺𑀯𑀸𑀭𑁂𑀦𑁆𑀢𑀺. 𑀲𑀽𑀭𑀓𑀸𑀓𑀸 𑀳𑀺 𑀧𑀮𑀸𑀬𑀦𑀓𑀸𑀮𑁂 𑀘 𑀬𑀣𑀸𑀲𑀫𑁆𑀫𑀼𑀔𑀝𑁆𑀞𑀸𑀦𑁂𑀦𑁂𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀮𑀸𑀬𑀦𑁆𑀢𑀺. 𑀦𑀧𑀭𑀫𑀭𑀽𑀧𑀦𑁆𑀢𑀺 𑀦 𑀧𑀼𑀜𑁆𑀜𑀯𑀦𑁆𑀢𑀸𑀦𑀁 𑀕𑁂𑀳𑀁 𑀯𑀺𑀬 𑀉𑀢𑁆𑀢𑀫𑀭𑀽𑀧𑀁. 𑀔𑀝𑁄𑀧𑀺𑀓𑀸𑀢𑀺 𑀯𑀺𑀮𑀻𑀯𑀫𑀜𑁆𑀘𑀓𑁄. 𑀑𑀮𑀼𑀕𑁆𑀕𑀯𑀺𑀮𑀼𑀕𑁆𑀕𑀸𑀢𑀺 𑀑𑀡𑀢𑀼𑀡𑁆𑀡𑀢𑀸. 𑀥𑀜𑁆𑀜𑀲𑀫𑀯𑀸𑀧𑀓𑀦𑁆𑀢𑀺 𑀥𑀜𑁆𑀜𑀜𑁆𑀘 𑀲𑀫𑀯𑀸𑀧𑀓𑀜𑁆𑀘. 𑀢𑀢𑁆𑀣 𑀥𑀜𑁆𑀜𑀁 𑀦𑀸𑀫 𑀓𑀼𑀤𑁆𑀭𑀽𑀲𑀓𑁄. 𑀲𑀫𑀯𑀸𑀧𑀓𑀦𑁆𑀢𑀺 𑀮𑀸𑀩𑀼𑀩𑀻𑀚𑀓𑀼𑀫𑁆𑀪𑀡𑁆𑀟𑀩𑀻𑀚𑀓𑀸𑀤𑀺 𑀩𑀻𑀚𑀚𑀸𑀢𑀁. 𑀦𑀧𑀭𑀫𑀭𑀽𑀧𑀦𑁆𑀢𑀺 𑀬𑀣𑀸 𑀧𑀼𑀜𑁆𑀜𑀯𑀦𑁆𑀢𑀸𑀦𑀁 𑀕𑀦𑁆𑀥𑀲𑀸𑀮𑀺𑀩𑀻𑀚𑀸𑀤𑀺 𑀧𑀭𑀺𑀲𑀼𑀤𑁆𑀥𑀁 𑀩𑀻𑀚𑀁, 𑀦 𑀏𑀯𑀭𑀽𑀧𑀁. 𑀚𑀸𑀬𑀺𑀓𑀸𑀢𑀺 𑀓𑀧𑀡𑀚𑀸𑀬𑀸. 𑀦𑀧𑀭𑀫𑀭𑀽𑀧𑀸𑀢𑀺 𑀧𑀘𑁆𑀙𑀺𑀲𑀻𑀲𑀸 𑀮𑀫𑁆𑀩𑀢𑁆𑀣𑀦𑀻 𑀫𑀳𑁄𑀤𑀭𑀸 𑀧𑀺𑀲𑀸𑀘𑀸 𑀯𑀺𑀬 𑀩𑀻𑀪𑀘𑁆𑀙𑀸. 𑀲𑀸𑀫𑀜𑁆𑀜𑀦𑁆𑀢𑀺 𑀲𑀫𑀡𑀪𑀸𑀯𑁄. 𑀲𑁄 𑀯𑀢𑀲𑁆𑀲𑀁, 𑀬𑁄𑀳𑀦𑁆𑀢𑀺 𑀲𑁄 𑀯𑀢𑀸𑀳𑀁 𑀧𑀼𑀭𑀺𑀲𑁄 𑀦𑀸𑀫 𑀅𑀲𑁆𑀲𑀁, 𑀬𑁄 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀧𑀩𑁆𑀩𑀚𑁂𑀬𑁆𑀬𑀦𑁆𑀢𑀺.

𑀲𑁄 𑀦 𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺 𑀲𑁄 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸𑀧𑀺 𑀕𑁂𑀳𑀁 𑀕𑀦𑁆𑀢𑁆𑀯𑀸 𑁋 ‘‘𑀧𑀩𑁆𑀩𑀚𑁆𑀚𑀸 𑀦𑀸𑀫 𑀮𑀸𑀪𑀕𑀭𑀼𑀓𑀸 𑀤𑀼𑀓𑁆𑀓𑀭𑀸 𑀤𑀼𑀭𑀸𑀲𑀤𑀸, 𑀲𑀢𑁆𑀢𑀧𑀺 𑀅𑀝𑁆𑀞𑀧𑀺 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀬𑀣𑀸𑀥𑁄𑀢𑁂𑀦𑁂𑀯 𑀧𑀢𑁆𑀢𑁂𑀦 𑀆𑀕𑀦𑁆𑀢𑀩𑁆𑀩𑀫𑁆𑀧𑀺 𑀳𑁄𑀢𑀺 ¶ , 𑀏𑀯𑀁 𑀬𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 ¶ 𑀫𑁂 𑀧𑀼𑀦 𑀆𑀕𑀢𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀢𑀺𑀡𑀯𑀮𑁆𑀮𑀺𑀤𑀩𑁆𑀩𑀲𑀫𑁆𑀪𑀸𑀭𑀸 𑀦𑀸𑀫 𑀤𑀼𑀲𑁆𑀲𑀫𑁄𑀥𑀸𑀦𑀺𑀬𑀸, 𑀓𑀺𑀦𑁆𑀢𑀺 𑀓𑀭𑁄𑀫𑀻’’𑀢𑀺 𑀯𑀻𑀫𑀁𑀲𑀢𑀺. 𑀅𑀣𑀲𑁆𑀲 𑀢𑀁 𑀅𑀕𑀸𑀭𑀓𑀁 𑀯𑁂𑀚𑀬𑀦𑁆𑀢𑀧𑀸𑀲𑀸𑀤𑁄 𑀯𑀺𑀬 𑀉𑀧𑀝𑁆𑀞𑀸𑀢𑀺. 𑀅𑀣𑀲𑁆𑀲 𑀔𑀝𑁄𑀧𑀺𑀓𑀁 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀫𑀬𑀺 𑀕𑀢𑁂 𑀇𑀫𑀁 𑀯𑀺𑀲𑀗𑁆𑀔𑀭𑀺𑀢𑁆𑀯𑀸 𑀉𑀤𑁆𑀥𑀦𑀸𑀮𑀸𑀢𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀧𑀼𑀦 𑀅𑀝𑁆𑀝𑀦𑀺𑀧𑀸𑀤𑀯𑀺𑀮𑀻𑀯𑀸𑀤𑀻𑀦𑀺 𑀮𑀤𑁆𑀥𑀩𑁆𑀩𑀸𑀦𑀺 𑀳𑁄𑀦𑁆𑀢𑀺, 𑀓𑀺𑀦𑁆𑀢𑀺 ¶ 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑀺. 𑀅𑀣𑀲𑁆𑀲 𑀲𑀸 𑀲𑀺𑀭𑀺𑀲𑀬𑀦𑀁 𑀯𑀺𑀬 𑀉𑀧𑀝𑁆𑀞𑀸𑀢𑀺. 𑀢𑀢𑁄 𑀥𑀜𑁆𑀜𑀓𑀼𑀫𑁆𑀪𑀺𑀁 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀫𑀬𑀺 𑀕𑀢𑁂 𑀅𑀬𑀁 𑀖𑀭𑀡𑀻 𑀇𑀫𑀁 𑀥𑀜𑁆𑀜𑀁 𑀢𑁂𑀦 𑀢𑁂𑀦 𑀲𑀤𑁆𑀥𑀺𑀁 𑀪𑀼𑀜𑁆𑀚𑀺𑀲𑁆𑀲𑀢𑀺. 𑀧𑀼𑀦 𑀆𑀕𑀢𑁂𑀦 𑀚𑀻𑀯𑀺𑀢𑀯𑀼𑀢𑁆𑀢𑀺 𑀦𑀸𑀫 𑀮𑀤𑁆𑀥𑀩𑁆𑀩𑀸 𑀳𑁄𑀢𑀺, 𑀓𑀺𑀦𑁆𑀢𑀺 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑀺. 𑀅𑀣𑀲𑁆𑀲 𑀲𑀸 𑀅𑀟𑁆𑀠𑀢𑁂𑀴𑀲𑀸𑀦𑀺 𑀓𑁄𑀝𑁆𑀞𑀸𑀕𑀸𑀭𑀲𑀢𑀸𑀦𑀺 𑀯𑀺𑀬 𑀉𑀧𑀝𑁆𑀞𑀸𑀢𑀺. 𑀢𑀢𑁄 𑀫𑀸𑀢𑀼𑀕𑀸𑀫𑀁 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀫𑀬𑀺 𑀕𑀢𑁂 𑀇𑀫𑀁 𑀳𑀢𑁆𑀣𑀺𑀕𑁄𑀧𑀓𑁄 𑀯𑀸 𑀅𑀲𑁆𑀲𑀕𑁄𑀧𑀓𑁄 𑀯𑀸 𑀬𑁄 𑀓𑁄𑀘𑀺 𑀧𑀮𑁄𑀪𑁂𑀲𑁆𑀲𑀢𑀺, 𑀧𑀼𑀦 𑀆𑀕𑀢𑁂𑀦 𑀪𑀢𑁆𑀢𑀧𑀸𑀘𑀺𑀓𑀸 𑀦𑀸𑀫 𑀮𑀤𑁆𑀥𑀩𑁆𑀩𑀸 𑀳𑁄𑀢𑀺, 𑀓𑀺𑀦𑁆𑀢𑀺 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑀺. 𑀅𑀣𑀲𑁆𑀲 𑀲𑀸 𑀭𑀽𑀧𑀺𑀦𑀻 𑀤𑁂𑀯𑀻 𑀯𑀺𑀬 𑀉𑀧𑀝𑁆𑀞𑀸𑀢𑀺. 𑀇𑀤𑀁 𑀲𑀦𑁆𑀥𑀸𑀬 ‘‘𑀲𑁄 𑀦 𑀲𑀓𑁆𑀓𑀼𑀡𑁂𑀬𑁆𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁧𑁫𑁩. 𑀦𑀺𑀓𑁆𑀔𑀕𑀡𑀸𑀦𑀦𑁆𑀢𑀺 𑀲𑀼𑀯𑀡𑁆𑀡𑀦𑀺𑀓𑁆𑀔𑀲𑀢𑀸𑀦𑀁. 𑀘𑀬𑁄𑀢𑀺 𑀲𑀦𑁆𑀢𑀸𑀦𑀢𑁄 𑀓𑀢𑀲𑀦𑁆𑀦𑀺𑀘𑀬𑁄. 𑀥𑀜𑁆𑀜𑀕𑀡𑀸𑀦𑀦𑁆𑀢𑀺 𑀥𑀜𑁆𑀜𑀲𑀓𑀝𑀲𑀢𑀸𑀦𑀁.

𑁧𑁫𑁪. 𑀘𑀢𑁆𑀢𑀸𑀭𑁄𑀫𑁂, 𑀉𑀤𑀸𑀬𑀺, 𑀧𑀼𑀕𑁆𑀕𑀮𑀸𑀢𑀺 𑀇𑀥 𑀓𑀺𑀁 𑀤𑀲𑁆𑀲𑁂𑀢𑀺? 𑀳𑁂𑀝𑁆𑀞𑀸 ‘‘𑀢𑁂 𑀢𑀜𑁆𑀘𑁂𑀯 𑀧𑀚𑀳𑀦𑁆𑀢𑀺, 𑀢𑁂 𑀢𑀜𑁆𑀘𑁂𑀯 𑀦𑀧𑁆𑀧𑀚𑀳𑀦𑁆𑀢𑀻’’𑀢𑀺 𑀧𑀚𑀳𑀦𑀓𑀸 𑀘 𑀅𑀧𑁆𑀧𑀚𑀳𑀦𑀓𑀸 𑀘 𑀭𑀸𑀲𑀺𑀯𑀲𑁂𑀦 𑀤𑀲𑁆𑀲𑀺𑀢𑀸, 𑀦 𑀧𑀸𑀝𑀺𑀬𑁂𑀓𑁆𑀓𑀁 𑀯𑀺𑀪𑀢𑁆𑀢𑀸. 𑀇𑀤𑀸𑀦𑀺 𑀬𑀣𑀸 𑀦𑀸𑀫 𑀤𑀩𑁆𑀩𑀲𑀫𑁆𑀪𑀸𑀭𑀢𑁆𑀣𑀁 𑀕𑀢𑁄 𑀧𑀼𑀭𑀺𑀲𑁄 𑀧𑀝𑀺𑀧𑀸𑀝𑀺𑀬𑀸 𑀭𑀼𑀓𑁆𑀔𑁂 𑀙𑀺𑀦𑁆𑀤𑀺𑀢𑁆𑀯𑀸 𑀧𑀼𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀯𑀗𑁆𑀓𑀜𑁆𑀘 𑀧𑀳𑀸𑀬 𑀓𑀫𑁆𑀫𑁂 𑀉𑀧𑀦𑁂𑀢𑀩𑁆𑀩𑀬𑀼𑀢𑁆𑀢𑀓𑀫𑁂𑀯 𑀕𑀡𑁆𑀳𑀸𑀢𑀺, 𑀏𑀯𑀫𑁂𑀯 𑀅𑀧𑁆𑀧𑀚𑀳𑀦𑀓𑁂 𑀙𑀟𑁆𑀟𑁂𑀢𑁆𑀯𑀸 𑀅𑀩𑁆𑀩𑁄𑀳𑀸𑀭𑀺𑀓𑁂 𑀓𑀢𑁆𑀯𑀸 𑀧𑀚𑀳𑀦𑀓𑀧𑀼𑀕𑁆𑀕𑀮𑀸 𑀘𑀢𑁆𑀢𑀸𑀭𑁄 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺.

𑀉𑀧𑀥𑀺𑀧𑀳𑀸𑀦𑀸𑀬𑀸𑀢𑀺 𑀔𑀦𑁆𑀥𑀼𑀧𑀥𑀺𑀓𑀺𑀮𑁂𑀲𑀼𑀧𑀥𑀺𑀅𑀪𑀺𑀲𑀗𑁆𑀔𑀸𑀭𑀼𑀧𑀥𑀺𑀓𑀸𑀫𑀕𑀼𑀡𑀽𑀧𑀥𑀻𑀢𑀺 𑀇𑀫𑁂𑀲𑀁 𑀉𑀧𑀥𑀻𑀦𑀁 𑀧𑀳𑀸𑀦𑀸𑀬. 𑀉𑀧𑀥𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀢𑀺 𑀉𑀧𑀥𑀺𑀅𑀦𑀼𑀥𑀸𑀯𑀦𑀓𑀸. 𑀲𑀭𑀲𑀗𑁆𑀓𑀧𑁆𑀧𑀸𑀢𑀺 𑀏𑀢𑁆𑀣 𑀲𑀭𑀦𑁆𑀢𑀺 𑀥𑀸𑀯𑀦𑁆𑀢𑀻𑀢𑀺 𑀲𑀭𑀸. 𑀲𑀗𑁆𑀓𑀧𑁆𑀧𑁂𑀦𑁆𑀢𑀻𑀢𑀺 ¶ 𑀲𑀗𑁆𑀓𑀧𑁆𑀧𑀸. 𑀧𑀤𑀤𑁆𑀯𑀬𑁂𑀦𑀧𑀺 𑀯𑀺𑀢𑀓𑁆𑀓𑀸𑀬𑁂𑀯 𑀯𑀼𑀢𑁆𑀢𑀸. 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀅𑀪𑀺𑀪𑀯𑀦𑁆𑀢𑀺 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀯𑀢𑁆𑀢𑀦𑁆𑀢𑀺. 𑀲𑀁𑀬𑀼𑀢𑁆𑀢𑁄𑀢𑀺 𑀓𑀺𑀮𑁂𑀲𑁂𑀳𑀺 𑀲𑀁𑀬𑀼𑀢𑁆𑀢𑁄. 𑀇𑀦𑁆𑀤𑁆𑀭𑀺𑀬𑀯𑁂𑀫𑀢𑁆𑀢𑀢𑀸𑀢𑀺 𑀇𑀦𑁆𑀤𑁆𑀭𑀺𑀬𑀦𑀸𑀦𑀢𑁆𑀢𑀢𑀸 ¶ . 𑀓𑀤𑀸𑀘𑀺 𑀓𑀭𑀳𑀘𑀻𑀢𑀺 𑀩𑀳𑀼𑀓𑀸𑀮𑀁 𑀯𑀻𑀢𑀺𑀯𑀢𑁆𑀢𑁂𑀢𑁆𑀯𑀸. 𑀲𑀢𑀺𑀲𑀫𑁆𑀫𑁄𑀲𑀸𑀢𑀺 𑀲𑀢𑀺𑀲𑀫𑁆𑀫𑁄𑀲𑁂𑀦. 𑀦𑀺𑀧𑀸𑀢𑁄𑀢𑀺 𑀅𑀬𑁄𑀓𑀝𑀸𑀳𑀫𑁆𑀳𑀺 ¶ 𑀧𑀢𑀦𑀁. 𑀏𑀢𑁆𑀢𑀸𑀯𑀢𑀸 ‘‘𑀦𑀧𑁆𑀧𑀚𑀳𑀢𑀺, 𑀧𑀚𑀳𑀢𑀺, 𑀔𑀺𑀧𑁆𑀧𑀁 𑀧𑀚𑀳𑀢𑀻’’𑀢𑀺 𑀢𑀬𑁄 𑀭𑀸𑀲𑀬𑁄 𑀤𑀲𑁆𑀲𑀺𑀢𑀸. 𑀢𑁂𑀲𑀼 𑀘𑀢𑁆𑀢𑀸𑀭𑁄 𑀚𑀦𑀸 𑀦𑀧𑁆𑀧𑀚𑀳𑀦𑁆𑀢𑀺 𑀦𑀸𑀫, 𑀘𑀢𑁆𑀢𑀸𑀭𑁄 𑀧𑀚𑀳𑀦𑁆𑀢𑀺 𑀦𑀸𑀫, 𑀘𑀢𑁆𑀢𑀸𑀭𑁄 𑀔𑀺𑀧𑁆𑀧𑀁 𑀧𑀚𑀳𑀦𑁆𑀢𑀺 𑀦𑀸𑀫.

𑀢𑀢𑁆𑀣 𑀧𑀼𑀣𑀼𑀚𑁆𑀚𑀦𑁄 𑀲𑁄𑀢𑀸𑀧𑀦𑁆𑀦𑁄 𑀲𑀓𑀤𑀸𑀕𑀸𑀫𑀻 𑀅𑀦𑀸𑀕𑀸𑀫𑀻𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀚𑀦𑀸 𑀦𑀧𑁆𑀧𑀚𑀳𑀦𑁆𑀢𑀺 𑀦𑀸𑀫. 𑀧𑀼𑀣𑀼𑀚𑁆𑀚𑀦𑀸𑀤𑀬𑁄 𑀢𑀸𑀯 𑀫𑀸 𑀧𑀚𑀳𑀦𑁆𑀢𑀼, 𑀅𑀦𑀸𑀕𑀸𑀫𑀻 𑀓𑀣𑀁 𑀦 𑀧𑀚𑀳𑀢𑀻𑀢𑀺? 𑀲𑁄𑀧𑀺 𑀳𑀺 𑀬𑀸𑀯𑀤𑁂𑀯𑀲𑁆𑀲 𑀪𑀯𑀮𑁄𑀪𑁄 𑀅𑀢𑁆𑀣𑀺, 𑀢𑀸𑀯 𑀅𑀳𑁄𑀲𑀼𑀔𑀁 𑀅𑀳𑁄𑀲𑀼𑀔𑀦𑁆𑀢𑀺 𑀅𑀪𑀺𑀦𑀦𑁆𑀤𑀢𑀺. 𑀢𑀲𑁆𑀫𑀸 𑀦𑀧𑁆𑀧𑀚𑀳𑀢𑀺 𑀦𑀸𑀫. 𑀏𑀢𑁂𑀬𑁂𑀯 𑀧𑀦 𑀘𑀢𑁆𑀢𑀸𑀭𑁄 𑀚𑀦𑀸 𑀧𑀚𑀳𑀦𑁆𑀢𑀺 𑀦𑀸𑀫. 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀢𑀸𑀯 𑀧𑀚𑀳𑀦𑁆𑀢𑀼, 𑀧𑀼𑀣𑀼𑀚𑁆𑀚𑀦𑁄 𑀓𑀣𑀁 𑀧𑀚𑀳𑀢𑀻𑀢𑀺? 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄 𑀳𑀺 𑀲𑀢𑀺𑀲𑀫𑁆𑀫𑁄𑀲𑁂𑀦 𑀲𑀳𑀲𑀸 𑀓𑀺𑀮𑁂𑀲𑁂 𑀉𑀧𑁆𑀧𑀦𑁆𑀦𑁂 ‘‘𑀫𑀸𑀤𑀺𑀲𑀲𑁆𑀲 𑀦𑀸𑀫 𑀪𑀺𑀓𑁆𑀔𑀼𑀦𑁄 𑀓𑀺𑀮𑁂𑀲𑁄 𑀉𑀧𑁆𑀧𑀦𑁆𑀦𑁄’’𑀢𑀺 𑀲𑀁𑀯𑁂𑀕𑀁 𑀓𑀢𑁆𑀯𑀸 𑀯𑀻𑀭𑀺𑀬𑀁 𑀧𑀕𑁆𑀕𑀬𑁆𑀳 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀫𑀕𑁆𑀕𑁂𑀦 𑀓𑀺𑀮𑁂𑀲𑁂 𑀲𑀫𑀼𑀕𑁆𑀖𑀸𑀢𑁂𑀢𑀺. 𑀇𑀢𑀺 𑀲𑁄 𑀧𑀚𑀳𑀢𑀺 𑀦𑀸𑀫. 𑀢𑁂𑀬𑁂𑀯 𑀘𑀢𑁆𑀢𑀸𑀭𑁄 𑀔𑀺𑀧𑁆𑀧𑀁 𑀧𑀚𑀳𑀦𑁆𑀢𑀺 𑀦𑀸𑀫. 𑀢𑀢𑁆𑀣 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂, 𑀫𑀳𑀸𑀳𑀢𑁆𑀣𑀺𑀧𑀤𑁄𑀧𑀫𑁂 (𑀫. 𑀦𑀺. 𑁧.𑁨𑁮𑁮 𑀆𑀤𑀬𑁄), 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑁂𑀢𑀺 (𑀫. 𑀦𑀺. 𑁩.𑁪𑁫𑁩 𑀆𑀤𑀬𑁄) 𑀇𑀫𑁂𑀲𑀼 𑀲𑀼𑀢𑁆𑀢𑁂𑀲𑀼 𑀓𑀺𑀜𑁆𑀘𑀸𑀧𑀺 𑀢𑀢𑀺𑀬𑀯𑀸𑀭𑁄 𑀕𑀳𑀺𑀢𑁄, 𑀧𑀜𑁆𑀳𑁄 𑀧𑀦 𑀤𑀼𑀢𑀺𑀬𑀯𑀸𑀭𑁂𑀦𑁂𑀯 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀉𑀧𑀥𑀺 ¶ 𑀤𑀼𑀓𑁆𑀔𑀲𑁆𑀲 𑀫𑀽𑀮𑀦𑁆𑀢𑀺 𑀏𑀢𑁆𑀣 𑀧𑀜𑁆𑀘 𑀔𑀦𑁆𑀥𑀸 𑀉𑀧𑀥𑀺 𑀦𑀸𑀫. 𑀢𑀁 𑀤𑀼𑀓𑁆𑀔𑀲𑁆𑀲 𑀫𑀽𑀮𑀦𑁆𑀢𑀺 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀓𑀺𑀮𑁂𑀲𑀼𑀧𑀥𑀺𑀦𑀸 𑀦𑀺𑀭𑀼𑀧𑀥𑀺 𑀳𑁄𑀢𑀺, 𑀦𑀺𑀕𑁆𑀕𑀳𑀡𑁄 𑀦𑀺𑀢𑀡𑁆𑀳𑁄𑀢𑀺 𑀅𑀢𑁆𑀣𑁄. 𑀉𑀧𑀥𑀺𑀲𑀗𑁆𑀔𑀬𑁂 𑀯𑀺𑀫𑀼𑀢𑁆𑀢𑁄𑀢𑀺 𑀢𑀡𑁆𑀳𑀓𑁆𑀔𑀬𑁂 𑀦𑀺𑀩𑁆𑀩𑀸𑀦𑁂 𑀆𑀭𑀫𑁆𑀫𑀡𑀢𑁄 𑀯𑀺𑀫𑀼𑀢𑁆𑀢𑁄.

𑁧𑁫𑁫. 𑀏𑀯𑀁 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑁂 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀇𑀤𑀸𑀦𑀺 𑀬𑁂 𑀧𑀚𑀳𑀦𑁆𑀢𑀺, 𑀢𑁂 ‘‘𑀇𑀫𑁂 𑀦𑀸𑀫 𑀏𑀢𑁆𑀢𑀓𑁂 𑀓𑀺𑀮𑁂𑀲𑁂 𑀧𑀚𑀳𑀦𑁆𑀢𑀺’’. 𑀬𑁂 𑀦𑀧𑁆𑀧𑀚𑀳𑀦𑁆𑀢𑀺, 𑀢𑁂𑀧𑀺 ‘‘𑀇𑀫𑁂 𑀦𑀸𑀫 𑀏𑀢𑁆𑀢𑀓𑁂 𑀓𑀺𑀮𑁂𑀲𑁂 𑀦𑀧𑁆𑀧𑀚𑀳𑀦𑁆𑀢𑀻’’𑀢𑀺 𑀤𑀲𑁆𑀲𑁂𑀢𑀼𑀁 𑀧𑀜𑁆𑀘 𑀔𑁄 𑀇𑀫𑁂 𑀉𑀤𑀸𑀬𑀺 𑀓𑀸𑀫𑀕𑀼𑀡𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀺𑀴𑁆𑀳𑀲𑀼𑀔𑀦𑁆𑀢𑀺 𑀅𑀲𑀼𑀘𑀺𑀲𑀼𑀔𑀁. 𑀅𑀦𑀭𑀺𑀬𑀲𑀼𑀔𑀦𑁆𑀢𑀺 𑀅𑀦𑀭𑀺𑀬𑁂𑀳𑀺 𑀲𑁂𑀯𑀺𑀢𑀲𑀼𑀔𑀁. 𑀪𑀸𑀬𑀺𑀢𑀩𑁆𑀩𑀦𑁆𑀢𑀺 𑀏𑀢𑀲𑁆𑀲 𑀲𑀼𑀔𑀲𑁆𑀲 𑀧𑀝𑀺𑀮𑀸𑀪𑀢𑁄𑀧𑀺 𑀯𑀺𑀧𑀸𑀓𑀢𑁄𑀧𑀺 𑀪𑀸𑀬𑀺𑀢𑀩𑁆𑀩𑀁. 𑀦𑁂𑀓𑁆𑀔𑀫𑁆𑀫𑀲𑀼𑀔𑀦𑁆𑀢𑀺 𑀓𑀸𑀫𑀢𑁄 𑀦𑀺𑀓𑁆𑀔𑀦𑁆𑀢𑀲𑀼𑀔𑀁. 𑀧𑀯𑀺𑀯𑁂𑀓𑀲𑀼𑀔𑀦𑁆𑀢𑀺 𑀕𑀡𑀢𑁄𑀧𑀺 𑀓𑀺𑀮𑁂𑀲𑀢𑁄𑀧𑀺 𑀧𑀯𑀺𑀯𑀺𑀢𑁆𑀢𑀲𑀼𑀔𑀁. 𑀉𑀧𑀲𑀫𑀲𑀼𑀔𑀦𑁆𑀢𑀺 𑀭𑀸𑀕𑀸𑀤𑀺𑀯𑀽𑀧𑀲𑀫𑀢𑁆𑀣𑀸𑀬 𑀲𑀼𑀔𑀁. 𑀲𑀫𑁆𑀩𑁄𑀥𑀲𑀼𑀔𑀦𑁆𑀢𑀺 𑀫𑀕𑁆𑀕𑀲𑀗𑁆𑀔𑀸𑀢𑀲𑁆𑀲 𑀲𑀫𑁆𑀩𑁄𑀥𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀸𑀬 ¶ 𑀲𑀼𑀔𑀁. 𑀦 𑀪𑀸𑀬𑀺𑀢𑀩𑁆𑀩𑀦𑁆𑀢𑀺 𑀏𑀢𑀲𑁆𑀲 𑀲𑀼𑀔𑀲𑁆𑀲 𑀧𑀝𑀺𑀮𑀸𑀪𑀢𑁄𑀧𑀺 𑀯𑀺𑀧𑀸𑀓𑀢𑁄𑀧𑀺 𑀦 𑀪𑀸𑀬𑀺𑀢𑀩𑁆𑀩𑀁, 𑀪𑀸𑀯𑁂𑀢𑀩𑁆𑀩𑀫𑁂𑀯𑁂𑀢𑀁.

𑁧𑁫𑁬. 𑀇𑀜𑁆𑀚𑀺𑀢𑀲𑁆𑀫𑀺𑀁 ¶ 𑀯𑀤𑀸𑀫𑀻𑀢𑀺 𑀇𑀜𑁆𑀚𑀦𑀁 𑀘𑀮𑀦𑀁 𑀨𑀦𑁆𑀤𑀦𑀦𑁆𑀢𑀺 𑀯𑀤𑀸𑀫𑀺. 𑀓𑀺𑀜𑁆𑀘 𑀢𑀢𑁆𑀣 𑀇𑀜𑁆𑀚𑀺𑀢𑀲𑁆𑀫𑀺𑀦𑁆𑀢𑀺 𑀓𑀺𑀜𑁆𑀘 𑀢𑀢𑁆𑀣 𑀇𑀜𑁆𑀚𑀺𑀢𑀁. 𑀇𑀤𑀁 𑀢𑀢𑁆𑀣 𑀇𑀜𑁆𑀚𑀺𑀢𑀲𑁆𑀫𑀺𑀦𑁆𑀢𑀺 𑀬𑁂 𑀏𑀢𑁂 𑀅𑀦𑀺𑀭𑀼𑀤𑁆𑀥𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸, 𑀇𑀤𑀁 𑀢𑀢𑁆𑀣 𑀇𑀜𑁆𑀚𑀺𑀢𑀁. 𑀤𑀼𑀢𑀺𑀬𑀢𑀢𑀺𑀬𑀚𑁆𑀛𑀸𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑀺𑀜𑁆𑀚𑀺𑀢𑀲𑁆𑀫𑀺𑀁 𑀯𑀤𑀸𑀫𑀻𑀢𑀺 𑀇𑀤𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀅𑀦𑀺𑀜𑁆𑀚𑀦𑀁 𑀅𑀘𑀮𑀦𑀁 𑀦𑀺𑀧𑁆𑀨𑀦𑁆𑀤𑀦𑀦𑁆𑀢𑀺 𑀯𑀤𑀸𑀫𑀺.

𑀅𑀦𑀮𑀦𑁆𑀢𑀺 𑀯𑀤𑀸𑀫𑀻𑀢𑀺 𑀅𑀓𑀢𑁆𑀢𑀩𑁆𑀩𑀆𑀮𑀬𑀦𑁆𑀢𑀺 𑀯𑀤𑀸𑀫𑀺, 𑀢𑀡𑁆𑀳𑀸𑀮𑀬𑁄 ¶ 𑀏𑀢𑁆𑀣 𑀦 𑀉𑀧𑁆𑀧𑀸𑀤𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀅𑀦𑀮𑀁 𑀅𑀧𑀭𑀺𑀬𑀢𑁆𑀢𑀁, 𑀦 𑀏𑀢𑁆𑀢𑀸𑀯𑀢𑀸 𑀅𑀮𑀫𑁂𑀢𑀦𑁆𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀸𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀺. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑁆𑀲𑀸𑀧𑀻𑀢𑀺 𑀏𑀯𑀭𑀽𑀧𑀸𑀬𑀧𑀺 𑀲𑀦𑁆𑀢𑀸𑀬 𑀲𑀫𑀸𑀧𑀢𑁆𑀢𑀺𑀬𑀸 𑀧𑀳𑀸𑀦𑀫𑁂𑀯 𑀯𑀤𑀸𑀫𑀺. 𑀅𑀡𑀼𑀁 𑀯𑀸 𑀣𑀽𑀮𑀁 𑀯𑀸𑀢𑀺 𑀔𑀼𑀤𑁆𑀤𑀓𑀁 𑀯𑀸 𑀫𑀳𑀦𑁆𑀢𑀁 𑀯𑀸 𑀅𑀧𑁆𑀧𑀲𑀸𑀯𑀚𑁆𑀚𑀁 𑀯𑀸 𑀫𑀳𑀸𑀲𑀸𑀯𑀚𑁆𑀚𑀁 𑀯𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀤𑁂𑀲𑀦𑀸 𑀧𑀦 𑀦𑁂𑀬𑁆𑀬𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀦𑀺𑀝𑁆𑀞𑀸𑀧𑀺𑀢𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀮𑀝𑀼𑀓𑀺𑀓𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀘𑀸𑀢𑀼𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁭. 𑀏𑀯𑀁 ¶ 𑀫𑁂 𑀲𑀼𑀢𑀦𑁆𑀢𑀺 𑀘𑀸𑀢𑀼𑀫𑀲𑀼𑀢𑁆𑀢𑀁. 𑀢𑀢𑁆𑀣 𑀘𑀸𑀢𑀼𑀫𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀕𑀸𑀫𑁂. 𑀧𑀜𑁆𑀘𑀫𑀢𑁆𑀢𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀻𑀢𑀺 𑀅𑀥𑀼𑀦𑀸 𑀧𑀩𑁆𑀩𑀚𑀺𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀜𑁆𑀘 𑀲𑀢𑀸𑀦𑀺. 𑀣𑁂𑀭𑀸 𑀓𑀺𑀭 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀇𑀫𑁂 𑀓𑀼𑀮𑀧𑀼𑀢𑁆𑀢𑀸 𑀤𑀲𑀩𑀮𑀁 𑀅𑀤𑀺𑀲𑁆𑀯𑀸𑀯 𑀧𑀩𑁆𑀩𑀚𑀺𑀢𑀸, 𑀏𑀢𑁂𑀲𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑁂𑀲𑁆𑀲𑀸𑀫, 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀬𑀣𑀸𑀉𑀧𑀦𑀺𑀲𑁆𑀲𑀬𑁂𑀦 𑀧𑀢𑀺𑀝𑁆𑀞𑀳𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀲𑁆𑀫𑀸 𑀢𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀆𑀕𑀢𑀸. 𑀧𑀝𑀺𑀲𑀫𑁆𑀫𑁄𑀤𑀫𑀸𑀦𑀸𑀢𑀺 ‘‘𑀓𑀘𑁆𑀘𑀸𑀯𑀼𑀲𑁄, 𑀔𑀫𑀦𑀻𑀬’’𑀦𑁆𑀢𑀺𑀆𑀤𑀺𑀁 𑀧𑀝𑀺𑀲𑀦𑁆𑀣𑀸𑀭𑀓𑀣𑀁 𑀓𑀼𑀭𑀼𑀫𑀸𑀦𑀸. 𑀲𑁂𑀦𑀸𑀲𑀦𑀸𑀦𑀺 𑀧𑀜𑁆𑀜𑀸𑀧𑀬𑀫𑀸𑀦𑀸𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀯𑀲𑀦𑀝𑁆𑀞𑀸𑀦𑀸𑀦𑀺 𑀧𑀼𑀘𑁆𑀙𑀺𑀢𑁆𑀯𑀸 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀦𑀺 ¶ 𑀯𑀺𑀯𑀭𑀺𑀢𑁆𑀯𑀸 𑀫𑀜𑁆𑀘𑀧𑀻𑀞𑀓𑀝𑀲𑀸𑀭𑀓𑀸𑀤𑀻𑀦𑀺 𑀦𑀻𑀳𑀭𑀺𑀢𑁆𑀯𑀸 𑀧𑀧𑁆𑀨𑁄𑀝𑁂𑀢𑁆𑀯𑀸 𑀬𑀣𑀸𑀝𑁆𑀞𑀸𑀦𑁂 𑀲𑀡𑁆𑀞𑀸𑀧𑀬𑀫𑀸𑀦𑀸. 𑀧𑀢𑁆𑀢𑀘𑀻𑀯𑀭𑀸𑀦𑀺 𑀧𑀝𑀺𑀲𑀸𑀫𑀬𑀫𑀸𑀦𑀸𑀢𑀺, 𑀪𑀦𑁆𑀢𑁂, 𑀇𑀤𑀁 ¶ 𑀫𑁂 𑀧𑀢𑁆𑀢𑀁 𑀞𑀧𑁂𑀣, 𑀇𑀤𑀁 𑀘𑀻𑀯𑀭𑀁, 𑀇𑀤𑀁 𑀣𑀸𑀮𑀓𑀁, 𑀇𑀤𑀁 𑀉𑀤𑀓𑀢𑀼𑀫𑁆𑀩𑀁, 𑀇𑀫𑀁 𑀓𑀢𑁆𑀢𑀭𑀬𑀝𑁆𑀞𑀺𑀦𑁆𑀢𑀺 𑀏𑀯𑀁 𑀲𑀫𑀡𑀧𑀭𑀺𑀓𑁆𑀔𑀸𑀭𑁂 𑀲𑀗𑁆𑀕𑁄𑀧𑀬𑀫𑀸𑀦𑀸.

𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸𑀢𑀺 𑀉𑀤𑁆𑀥𑀁 𑀉𑀕𑁆𑀕𑀢𑀢𑁆𑀢𑀸 𑀉𑀘𑁆𑀘𑀁, 𑀧𑀢𑁆𑀣𑀝𑀢𑁆𑀢𑀸 𑀫𑀳𑀦𑁆𑀢𑀁 𑀅𑀯𑀺𑀦𑀺𑀩𑁆𑀪𑁄𑀕𑀲𑀤𑁆𑀤𑀁 𑀓𑀭𑁄𑀦𑁆𑀢𑀸. 𑀓𑁂𑀯𑀝𑁆𑀝𑀸 𑀫𑀜𑁆𑀜𑁂 𑀫𑀘𑁆𑀙𑀯𑀺𑀮𑁄𑀧𑁂𑀢𑀺 𑀓𑁂𑀯𑀝𑁆𑀝𑀸𑀦𑀁 𑀫𑀘𑁆𑀙𑀧𑀘𑁆𑀙𑀺𑀞𑀧𑀺𑀢𑀝𑁆𑀞𑀸𑀦𑁂 𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑁋 ‘‘𑀇𑀥 𑀅𑀜𑁆𑀜𑀁 𑀏𑀓𑀁 𑀫𑀘𑁆𑀙𑀁 𑀤𑁂𑀳𑀺, 𑀏𑀓𑀁 𑀫𑀘𑁆𑀙𑀨𑀸𑀮𑀁 𑀤𑁂𑀳𑀺, 𑀏𑀢𑀲𑁆𑀲 𑀢𑁂 𑀫𑀳𑀸 𑀤𑀺𑀦𑁆𑀦𑁄, 𑀫𑀬𑁆𑀳𑀁 𑀔𑀼𑀤𑁆𑀤𑀓𑁄’’𑀢𑀺 𑀏𑀯𑀁 𑀉𑀘𑁆𑀘𑀸𑀲𑀤𑁆𑀤𑀁 𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀫𑀘𑁆𑀙𑀕𑀳𑀡𑀢𑁆𑀣𑀁 𑀚𑀸𑀮𑁂 𑀧𑀓𑁆𑀔𑀺𑀢𑁆𑀢𑁂𑀧𑀺 𑀢𑀲𑁆𑀫𑀺𑀁 𑀞𑀸𑀦𑁂 𑀓𑁂𑀯𑀝𑁆𑀝𑀸 𑀘𑁂𑀯 𑀅𑀜𑁆𑀜𑁂 𑀘 ‘‘𑀧𑀯𑀺𑀝𑁆𑀞𑁄 𑀦 𑀧𑀯𑀺𑀝𑁆𑀞𑁄, 𑀕𑀳𑀺𑀢𑁄 𑀦 𑀕𑀳𑀺𑀢𑁄’’𑀢𑀺 𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑀺. 𑀢𑀫𑁆𑀧𑀺 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀧𑀡𑀸𑀫𑁂𑀫𑀻𑀢𑀺 𑀦𑀻𑀳𑀭𑀸𑀫𑀺. 𑀦 𑀯𑁄 𑀫𑀫 𑀲𑀦𑁆𑀢𑀺𑀓𑁂 𑀯𑀢𑁆𑀣𑀩𑁆𑀩𑀦𑁆𑀢𑀺 𑀢𑀼𑀫𑁆𑀳𑁂 𑀫𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀏𑀯𑀁 𑀫𑀳𑀸𑀲𑀤𑁆𑀤𑀁 𑀓𑀭𑁄𑀣, 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀯𑀲𑀦𑁆𑀢𑀸 𑀓𑀺𑀁 𑀦𑀸𑀫 𑀲𑀸𑀭𑀼𑀧𑁆𑀧𑀁 𑀓𑀭𑀺𑀲𑁆𑀲𑀣, 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀫𑀫 𑀲𑀦𑁆𑀢𑀺𑀓𑁂 𑀯𑀲𑀦𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. 𑀢𑁂𑀲𑀼 𑀏𑀓𑀪𑀺𑀓𑁆𑀔𑀼𑀧𑀺 ‘‘𑀪𑀕𑀯𑀸 𑀢𑀼𑀫𑁆𑀳𑁂 𑀫𑀳𑀸𑀲𑀤𑁆𑀤𑀫𑀢𑁆𑀢𑀓𑁂𑀦 𑀅𑀫𑁆𑀳𑁂 𑀧𑀡𑀸𑀫𑁂𑀣𑀸’’𑀢𑀺 𑀯𑀸 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀯𑀢𑁆𑀢𑀼𑀁 𑀦𑀸𑀲𑀓𑁆𑀔𑀺, 𑀲𑀩𑁆𑀩𑁂 𑀪𑀕𑀯𑀢𑁄 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀸 ‘‘𑀏𑀯𑀁, 𑀪𑀦𑁆𑀢𑁂,’’𑀢𑀺 𑀯𑀢𑁆𑀯𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀏𑀯𑀁 𑀧𑀦 𑀢𑁂𑀲𑀁 𑀅𑀳𑁄𑀲𑀺 ‘‘𑀫𑀬𑀁 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀲𑁆𑀲𑀸𑀫, 𑀥𑀫𑁆𑀫𑀓𑀣𑀁 𑀲𑁄𑀲𑁆𑀲𑀸𑀫, 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀯𑀲𑀺𑀲𑁆𑀲𑀸𑀫𑀸𑀢𑀺 ¶ 𑀆𑀕𑀢𑀸. 𑀏𑀯𑀭𑀽𑀧𑀲𑁆𑀲 𑀧𑀦 𑀕𑀭𑀼𑀦𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀫𑀳𑀸𑀲𑀤𑁆𑀤𑀁 𑀓𑀭𑀺𑀫𑁆𑀳𑀸, 𑀅𑀫𑁆𑀳𑀸𑀓𑀫𑁂𑀯 𑀤𑁄𑀲𑁄𑀬𑀁, 𑀧𑀡𑀸𑀫𑀺𑀢𑀫𑁆𑀳𑀸, 𑀦 𑀦𑁄 𑀮𑀤𑁆𑀥𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀯𑀢𑁆𑀣𑀼𑀁, 𑀦 ¶ 𑀲𑀼𑀯𑀡𑁆𑀡𑀯𑀡𑁆𑀡𑀲𑀭𑀻𑀭𑀁 𑀑𑀮𑁄𑀓𑁂𑀢𑀼𑀁, 𑀦 𑀫𑀥𑀼𑀭𑀲𑁆𑀲𑀭𑁂𑀦 𑀥𑀫𑁆𑀫𑀁 𑀲𑁄𑀢𑀼’’𑀦𑁆𑀢𑀺. 𑀢𑁂 𑀩𑀮𑀯𑀤𑁄𑀫𑀦𑀲𑁆𑀲𑀚𑀸𑀢𑀸 𑀳𑀼𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑁧𑁫𑁮. 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀽𑀢𑀺 𑀢𑁂 𑀓𑀺𑀭 𑀲𑀓𑁆𑀬𑀸 𑀆𑀕𑀫𑀦𑀲𑀫𑀬𑁂𑀧𑀺 𑀢𑁂 𑀪𑀺𑀓𑁆𑀔𑀽 𑀢𑀢𑁆𑀣𑁂𑀯 𑀦𑀺𑀲𑀺𑀦𑁆𑀦𑀸 𑀧𑀲𑁆𑀲𑀺𑀁𑀲𑀼. 𑀅𑀣 𑀦𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀓𑀺𑀁 𑀦𑀼 𑀔𑁄 𑀏𑀢𑁂 𑀪𑀺𑀓𑁆𑀔𑀽 𑀧𑀯𑀺𑀲𑀺𑀢𑁆𑀯𑀸𑀯 𑀧𑀝𑀺𑀦𑀺𑀯𑀢𑁆𑀢𑀸, 𑀚𑀸𑀦𑀺𑀲𑁆𑀲𑀸𑀫 𑀢𑀁 𑀓𑀸𑀭𑀡’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀳𑀦𑁆𑀤𑀸𑀢𑀺 𑀯𑀯𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄. 𑀓𑀳𑀁 𑀧𑀦 𑀢𑀼𑀫𑁆𑀳𑁂𑀢𑀺 𑀢𑀼𑀫𑁆𑀳𑁂 𑀇𑀤𑀸𑀦𑁂𑀯 𑀆𑀕𑀦𑁆𑀢𑁆𑀯𑀸 𑀓𑀳𑀁 𑀕𑀘𑁆𑀙𑀣, 𑀓𑀺𑀁 𑀢𑀼𑀫𑁆𑀳𑀸𑀓𑀁 𑀓𑁄𑀘𑀺 𑀉𑀧𑀤𑁆𑀤𑀯𑁄, 𑀉𑀤𑀸𑀳𑀼 𑀤𑀲𑀩𑀮𑀲𑁆𑀲𑀸𑀢𑀺? 𑀢𑁂𑀲𑀁 𑀧𑀦 𑀪𑀺𑀓𑁆𑀔𑀽𑀦𑀁, 𑁋 ‘‘𑀆𑀯𑀼𑀲𑁄, 𑀫𑀬𑀁 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀆𑀕𑀢𑀸, 𑀤𑀺𑀝𑁆𑀞𑁄 𑀦𑁄 𑀪𑀕𑀯𑀸, 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀘𑁆𑀙𑀸𑀫𑀸’’𑀢𑀺 𑀓𑀺𑀜𑁆𑀘𑀸𑀧𑀺 𑀏𑀯𑀁 𑀯𑀘𑀦𑀧𑀭𑀺𑀳𑀸𑀭𑁄 𑀅𑀢𑁆𑀣𑀺, 𑀏𑀯𑀭𑀽𑀧𑀁 𑀧𑀦 𑀮𑁂𑀲𑀓𑀧𑁆𑀧𑀁 ¶ 𑀅𑀓𑀢𑁆𑀯𑀸 𑀬𑀣𑀸𑀪𑀽𑀢𑀫𑁂𑀯 𑀆𑀭𑁄𑀘𑁂𑀢𑁆𑀯𑀸 𑀪𑀕𑀯𑀢𑀸 𑀔𑁄, 𑀆𑀯𑀼𑀲𑁄, 𑀪𑀺𑀓𑁆𑀔𑀼𑀲𑀗𑁆𑀖𑁄 𑀧𑀡𑀸𑀫𑀺𑀢𑁄𑀢𑀺 𑀆𑀳𑀁𑀲𑀼. 𑀢𑁂 𑀧𑀦 𑀭𑀸𑀚𑀸𑀦𑁄 𑀲𑀸𑀲𑀦𑁂 𑀥𑀼𑀭𑀯𑀳𑀸, 𑀢𑀲𑁆𑀫𑀸 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀤𑁆𑀯𑀻𑀳𑀺 𑀅𑀕𑁆𑀕𑀲𑀸𑀯𑀓𑁂𑀳𑀺 𑀲𑀤𑁆𑀥𑀺𑀁 𑀧𑀜𑁆𑀘𑀲𑀼 𑀪𑀺𑀓𑁆𑀔𑀼𑀲𑀢𑁂𑀲𑀼 𑀕𑀘𑁆𑀙𑀦𑁆𑀢𑁂𑀲𑀼 𑀪𑀕𑀯𑀢𑁄 𑀧𑀸𑀤𑀫𑀽𑀮𑀁 𑀯𑀺𑀕𑀘𑁆𑀙𑀺𑀲𑁆𑀲𑀢𑀺, 𑀇𑀫𑁂𑀲𑀁 𑀦𑀺𑀯𑀢𑁆𑀢𑀦𑀸𑀓𑀸𑀭𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺. 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂𑀦 𑀳𑀸𑀬𑀲𑁆𑀫𑀦𑁆𑀢𑁄𑀢𑀺𑀆𑀤𑀺𑀫𑀸𑀳𑀁𑀲𑀼. 𑀢𑁂𑀲𑀼𑀧𑀺 ¶ 𑀪𑀺𑀓𑁆𑀔𑀽𑀲𑀼 ‘‘𑀫𑀬𑀁 𑀫𑀳𑀸𑀲𑀤𑁆𑀤𑀫𑀢𑁆𑀢𑀓𑁂𑀦 𑀧𑀡𑀸𑀫𑀺𑀢𑀸, 𑀦 𑀫𑀬𑀁 𑀚𑀻𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀧𑀩𑁆𑀩𑀚𑀺𑀢𑀸’’𑀢𑀺 𑀏𑀓𑀪𑀺𑀓𑁆𑀔𑀼𑀧𑀺 𑀧𑀝𑀺𑀧𑁆𑀨𑀭𑀺𑀢𑁄 𑀦𑀸𑀫 𑀦𑀸𑀳𑁄𑀲𑀺, 𑀲𑀩𑁆𑀩𑁂 𑀧𑀦 𑀲𑀫𑀓𑀁𑀬𑁂𑀯, ‘‘𑀏𑀯𑀫𑀸𑀯𑀼𑀲𑁄,’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼.

𑁧𑁫𑁯. 𑀅𑀪𑀺𑀦𑀦𑁆𑀤𑀢𑀽𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀆𑀕𑀫𑀦𑀁 𑀇𑀘𑁆𑀙𑀦𑁆𑀢𑁄 𑀅𑀪𑀺𑀦𑀦𑁆𑀤𑀢𑀼. 𑀅𑀪𑀺𑀯𑀤𑀢𑀽𑀢𑀺 𑀏𑀢𑀼 𑀪𑀺𑀓𑁆𑀔𑀼𑀲𑀗𑁆𑀖𑁄𑀢𑀺 𑀏𑀯𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀦𑁆𑀢𑁄 𑀅𑀪𑀺𑀯𑀤𑀢𑀼. 𑀅𑀦𑀼𑀕𑁆𑀕𑀳𑀺𑀢𑁄𑀢𑀺 𑀆𑀫𑀺𑀲𑀸𑀦𑀼𑀕𑁆𑀕𑀳𑁂𑀦 𑀘 𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦 𑀘 𑀅𑀦𑀼𑀕𑁆𑀕𑀳𑀺𑀢𑁄. 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀤𑀲𑀩𑀮𑀲𑁆𑀲 𑀤𑀲𑁆𑀲𑀦𑀁 𑀦 𑀮𑀪𑀸𑀫𑀸𑀢𑀺 𑀧𑀲𑀸𑀤𑀜𑁆𑀜𑀣𑀢𑁆𑀢𑀁 𑀪𑀯𑁂𑀬𑁆𑀬. 𑀯𑀺𑀧𑀭𑀺𑀡𑀸𑀫𑁄𑀢𑀺 𑀧𑀲𑀸𑀤𑀜𑁆𑀜𑀣𑀢𑁆𑀢𑁂𑀦 𑀯𑀺𑀩𑁆𑀪𑀫𑀦𑁆𑀢𑀸𑀦𑀁 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀢𑁆𑀢𑀁 𑀪𑀯𑁂𑀬𑁆𑀬. 𑀩𑀻𑀚𑀸𑀦𑀁 𑀢𑀭𑀼𑀡𑀸𑀦𑀦𑁆𑀢𑀺 𑀢𑀭𑀼𑀡𑀲𑀲𑁆𑀲𑀸𑀦𑀁. 𑀲𑀺𑀬𑀸 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀉𑀤𑀓𑀯𑀸𑀭𑀓𑀸𑀮𑁂 𑀉𑀤𑀓𑀁 𑀅𑀮𑀪𑀦𑁆𑀢𑀸𑀦𑀁 𑀫𑀺𑀮𑀸𑀢𑀪𑀸𑀯𑁂𑀦 𑀅𑀜𑁆𑀜𑀣𑀢𑁆𑀢𑀁 𑀪𑀯𑁂𑀬𑁆𑀬, 𑀲𑀼𑀲𑁆𑀲𑀺𑀢𑁆𑀯𑀸 𑀫𑀺𑀮𑀸𑀢𑀪𑀸𑀯𑀁 𑀆𑀧𑀚𑁆𑀚𑀦𑁂𑀦 𑀯𑀺𑀧𑀭𑀺𑀡𑀸𑀫𑁄 𑀪𑀯𑁂𑀬𑁆𑀬. 𑀯𑀘𑁆𑀙𑀓𑀲𑁆𑀲 𑀧𑀦 𑀔𑀻𑀭𑀧𑀺𑀧𑀸𑀲𑀸𑀬 𑀲𑀼𑀲𑁆𑀲𑀦𑀁 𑀅𑀜𑁆𑀜𑀣𑀢𑁆𑀢𑀁 𑀦𑀸𑀫, 𑀲𑀼𑀲𑁆𑀲𑀺𑀢𑁆𑀯𑀸 𑀓𑀸𑀮𑀓𑀺𑀭𑀺𑀬𑀸 𑀯𑀺𑀧𑀭𑀺𑀡𑀸𑀫𑁄 𑀦𑀸𑀫.

𑁧𑁬𑁦. 𑀧𑀲𑀸𑀤𑀺𑀢𑁄 𑀪𑀕𑀯𑀸𑀢𑀺 𑀣𑁂𑀭𑁄 𑀓𑀺𑀭 𑀢𑀢𑁆𑀣 𑀦𑀺𑀲𑀺𑀦𑁆𑀦𑁄𑀯 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀩𑁆𑀭𑀳𑁆𑀫𑀸𑀦𑀁 𑀆𑀕𑀢𑀁 𑀅𑀤𑁆𑀤𑀲 ¶ , 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀘 𑀆𑀬𑀸𑀘𑀦𑀲𑀤𑁆𑀤𑀁 𑀲𑀼𑀡𑀺, 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀪𑀕𑀯𑀢𑁄 𑀧𑀲𑀦𑁆𑀦𑀪𑀸𑀯𑀁 𑀅𑀜𑁆𑀜𑀸𑀲𑀺. 𑀢𑀲𑁆𑀫𑀸 𑁋 ‘‘𑀓𑀜𑁆𑀘𑀺 𑀪𑀺𑀓𑁆𑀔𑀼𑀁 𑀧𑁂𑀲𑁂𑀢𑁆𑀯𑀸 𑀧𑀓𑁆𑀓𑁄𑀲𑀺𑀬𑀫𑀸𑀦𑀸𑀦𑀁 𑀕𑀫𑀦𑀁 𑀦𑀸𑀫 𑀦 𑀨𑀸𑀲𑀼𑀓𑀁, 𑀬𑀸𑀯 𑀲𑀢𑁆𑀣𑀸 𑀦 𑀧𑁂𑀲𑁂𑀢𑀺, 𑀢𑀸𑀯𑀤𑁂𑀯 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀫𑀜𑁆𑀜𑀫𑀸𑀦𑁄 𑀏𑀯𑀫𑀸𑀳. 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄𑀢𑀺 𑀅𑀜𑁆𑀜𑁂𑀲𑀼 𑀓𑀺𑀘𑁆𑀘𑁂𑀲𑀼 𑀅𑀦𑀼𑀲𑁆𑀲𑀼𑀓𑁆𑀓𑁄 𑀳𑀼𑀢𑁆𑀯𑀸. 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀦𑁆𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀁 𑀅𑀦𑀼𑀬𑀼𑀢𑁆𑀢𑁄 𑀫𑀜𑁆𑀜𑁂 𑀪𑀕𑀯𑀸 𑀯𑀺𑀳𑀭𑀺𑀢𑀼𑀓𑀸𑀫𑁄, 𑀲𑁄 𑀇𑀤𑀸𑀦𑀺 𑀬𑀣𑀸𑀭𑀼𑀘𑀺𑀬𑀸 𑀯𑀺𑀳𑀭𑀺𑀲𑁆𑀲𑀢𑀻𑀢𑀺 𑀏𑀯𑀁 𑀫𑁂 𑀅𑀳𑁄𑀲𑀻𑀢𑀺 𑀯𑀤𑀢𑀺. 𑀫𑀬𑀫𑁆𑀧𑀺 ¶ 𑀤𑀸𑀦𑀻𑀢𑀺 𑀫𑀬𑀁 𑀧𑀭𑀁 𑀑𑀯𑀤𑀫𑀸𑀦𑀸 𑀯𑀺𑀳𑀸𑀭𑀢𑁄 𑀦𑀺𑀓𑁆𑀓𑀟𑁆𑀠𑀺𑀢𑀸, 𑀓𑀺𑀁 𑀅𑀫𑁆𑀳𑀸𑀓𑀁 𑀧𑀭𑁄𑀯𑀸𑀤𑁂𑀦. 𑀇𑀤𑀸𑀦𑀺 𑀫𑀬𑀫𑁆𑀧𑀺 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁂𑀦𑁂𑀯 𑀯𑀺𑀳𑀭𑀺𑀲𑁆𑀲𑀸𑀫𑀸𑀢𑀺 𑀤𑀻𑀧𑁂𑀢𑀺. 𑀣𑁂𑀭𑁄 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀯𑀺𑀭𑀤𑁆𑀥𑁄 𑀅𑀢𑁆𑀢𑀦𑁄 𑀪𑀸𑀭𑀪𑀸𑀯𑀁 𑀦 𑀅𑀜𑁆𑀜𑀸𑀲𑀺. 𑀅𑀬𑀜𑁆𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀫𑀳𑀸𑀣𑁂𑀭𑀸𑀦𑀁 𑀪𑀸𑀭𑁄, 𑀢𑁂𑀦 ¶ 𑀦𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 𑀪𑀕𑀯𑀸 𑀆𑀕𑀫𑁂𑀳𑀻𑀢𑀺𑀆𑀤𑀺𑀫𑀸𑀳. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀧𑀦 𑀅𑀢𑁆𑀢𑀦𑁄 𑀪𑀸𑀭𑀪𑀸𑀯𑀁 𑀅𑀜𑁆𑀜𑀸𑀲𑀺. 𑀢𑁂𑀦𑀲𑁆𑀲 𑀪𑀕𑀯𑀸 𑀲𑀸𑀥𑀼𑀓𑀸𑀭𑀁 𑀅𑀤𑀸𑀲𑀺.

𑁧𑁬𑁧. 𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂𑀢𑀺 𑀓𑀲𑁆𑀫𑀸 𑀆𑀭𑀪𑀺? 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺. 𑀬𑁄 𑀢𑀸𑀦𑀺 𑀅𑀪𑀻𑀢𑁄 𑀳𑁄𑀢𑀺, 𑀲𑁄 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀢𑀺𑀝𑁆𑀞𑀸𑀢𑀼𑀁 𑀲𑀓𑁆𑀓𑁄𑀢𑀺. 𑀇𑀢𑀭𑁄 𑀧𑀦 𑀦 𑀲𑀓𑁆𑀓𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀉𑀤𑀓𑁄𑀭𑁄𑀳𑀦𑁆𑀢𑁂𑀢𑀺 𑀉𑀤𑀓𑀁 𑀑𑀭𑁄𑀳𑀦𑁆𑀢𑁂 𑀧𑀼𑀕𑁆𑀕𑀮𑁂. 𑀓𑀼𑀫𑁆𑀪𑀻𑀮𑀪𑀬𑀦𑁆𑀢𑀺 𑀲𑀼𑀁𑀲𑀼𑀫𑀸𑀭𑀪𑀬𑀁. 𑀲𑀼𑀲𑀼𑀓𑀸𑀪𑀬𑀦𑁆𑀢𑀺 𑀘𑀡𑁆𑀟𑀫𑀘𑁆𑀙𑀪𑀬𑀁.

𑁧𑁬𑁨. 𑀓𑁄𑀥𑀼𑀧𑀸𑀬𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀬𑀣𑀸 𑀳𑀺 𑀩𑀸𑀳𑀺𑀭𑀁 𑀉𑀤𑀓𑀁 𑀑𑀢𑀺𑀡𑁆𑀡𑁄 𑀊𑀫𑀻𑀲𑀼 𑀑𑀲𑀻𑀤𑀺𑀢𑁆𑀯𑀸 𑀫𑀭𑀢𑀺, 𑀏𑀯𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀓𑁄𑀥𑀼𑀧𑀸𑀬𑀸𑀲𑁂 𑀑𑀲𑀻𑀤𑀺𑀢𑁆𑀯𑀸 𑀯𑀺𑀩𑁆𑀪𑀫𑀢𑀺. 𑀢𑀲𑁆𑀫𑀸 𑀓𑁄𑀥𑀼𑀧𑀸𑀬𑀸𑀲𑁄 ‘‘𑀊𑀫𑀺𑀪𑀬’’𑀦𑁆𑀢𑀺 𑀯𑀼𑀢𑁆𑀢𑁄.

𑁧𑁬𑁩. 𑀑𑀤𑀭𑀺𑀓𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀬𑀣𑀸 𑀳𑀺 𑀩𑀸𑀳𑀺𑀭𑀁 𑀉𑀤𑀓𑀁 𑀑𑀢𑀺𑀡𑁆𑀡𑁄 𑀓𑀼𑀫𑁆𑀪𑀻𑀮𑁂𑀦 𑀔𑀸𑀤𑀺𑀢𑁄 𑀫𑀭𑀢𑀺, 𑀏𑀯𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀑𑀤𑀭𑀺𑀓𑀢𑁆𑀢𑁂𑀦 𑀔𑀸𑀤𑀺𑀢𑁄 𑀯𑀺𑀩𑁆𑀪𑀫𑀢𑀺. 𑀢𑀲𑁆𑀫𑀸 𑀑𑀤𑀭𑀺𑀓𑀢𑁆𑀢𑀁 ‘‘𑀓𑀼𑀫𑁆𑀪𑀻𑀮𑀪𑀬’’𑀦𑁆𑀢𑀺 𑀯𑀼𑀢𑁆𑀢𑀁.

𑁧𑁬𑁪. 𑀅𑀭𑀓𑁆𑀔𑀺𑀢𑁂𑀦𑁂𑀯 𑀓𑀸𑀬𑁂𑀦𑀸𑀢𑀺 𑀲𑀻𑀲𑀧𑁆𑀧𑀘𑀸𑀮𑀓𑀸𑀤𑀺𑀓𑀭𑀡𑁂𑀦 𑀅𑀭𑀓𑁆𑀔𑀺𑀢𑀓𑀸𑀬𑁄 𑀳𑀼𑀢𑁆𑀯𑀸. 𑀅𑀭𑀓𑁆𑀔𑀺𑀢𑀸𑀬 𑀯𑀸𑀘𑀸𑀬𑀸𑀢𑀺 𑀤𑀼𑀝𑁆𑀞𑀼𑀮𑁆𑀮𑀪𑀸𑀲𑀦𑀸𑀤𑀺𑀯𑀲𑁂𑀦 𑀅𑀭𑀓𑁆𑀔𑀺𑀢𑀯𑀸𑀘𑁄 𑀳𑀼𑀢𑁆𑀯𑀸. 𑀅𑀦𑀼𑀧𑀝𑁆𑀞𑀺𑀢𑀸𑀬 ¶ 𑀲𑀢𑀺𑀬𑀸𑀢𑀺 𑀓𑀸𑀬𑀕𑀢𑀸𑀲𑀢𑀺𑀁 𑀅𑀦𑀼𑀧𑀝𑁆𑀞𑀸𑀧𑁂𑀢𑁆𑀯𑀸. 𑀅𑀲𑀁𑀯𑀼𑀢𑁂𑀳𑀻𑀢𑀺 𑀅𑀧𑀺𑀳𑀺𑀢𑁂𑀳𑀺. 𑀧𑀜𑁆𑀘𑀦𑁆𑀦𑁂𑀢𑀁 𑀓𑀸𑀫𑀕𑀼𑀡𑀸𑀦𑀁 𑀅𑀥𑀺𑀯𑀘𑀦𑀦𑁆𑀢𑀺 𑀬𑀣𑀸 ¶ 𑀳𑀺 𑀩𑀸𑀳𑀺𑀭𑀁 𑀉𑀤𑀓𑀁 𑀑𑀢𑀺𑀡𑁆𑀡𑁄 𑀆𑀯𑀝𑁆𑀝𑁂 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀫𑀭𑀢𑀺, 𑀏𑀯𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁄 𑀧𑀜𑁆𑀘𑀓𑀸𑀫𑀕𑀼𑀡𑀸𑀯𑀝𑁆𑀝𑁂 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀯𑀺𑀩𑁆𑀪𑀫𑀢𑀺. 𑀢𑀲𑁆𑀫𑀸 𑀧𑀜𑁆𑀘 𑀓𑀸𑀫𑀕𑀼𑀡𑀸 ‘‘𑀆𑀯𑀝𑁆𑀝𑀪𑀬’’𑀦𑁆𑀢𑀺 𑀯𑀼𑀢𑁆𑀢𑀸.

𑁧𑁬𑁫. 𑀅𑀦𑀼𑀤𑁆𑀥𑀁𑀲𑁂𑀢𑀻𑀢𑀺 𑀓𑀺𑀮𑀫𑁂𑀢𑀺 𑀫𑀺𑀮𑀸𑀧𑁂𑀢𑀺. 𑀭𑀸𑀕𑀸𑀦𑀼𑀤𑁆𑀥𑀁𑀲𑁂𑀦𑀸𑀢𑀺 𑀭𑀸𑀕𑀸𑀦𑀼𑀤𑁆𑀥𑀁𑀲𑀺𑀢𑁂𑀦. 𑀫𑀸𑀢𑀼𑀕𑀸𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀬𑀣𑀸 𑀳𑀺 𑀩𑀸𑀳𑀺𑀭𑀁 𑀉𑀤𑀓𑀁 𑀑𑀢𑀺𑀡𑁆𑀡𑁄 𑀘𑀡𑁆𑀟𑀫𑀘𑁆𑀙𑀁 𑀆𑀕𑀫𑁆𑀫 𑀮𑀤𑁆𑀥𑀧𑁆𑀧𑀳𑀸𑀭𑁄 𑀫𑀭𑀢𑀺, 𑀏𑀯𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀫𑀸𑀢𑀼𑀕𑀸𑀫𑀁 𑀆𑀕𑀫𑁆𑀫 𑀉𑀧𑁆𑀧𑀦𑁆𑀦𑀓𑀸𑀫𑀭𑀸𑀕𑁄 𑀯𑀺𑀩𑁆𑀪𑀫𑀢𑀺. 𑀢𑀲𑁆𑀫𑀸 𑀫𑀸𑀢𑀼𑀕𑀸𑀫𑁄 ‘‘𑀲𑀼𑀲𑀼𑀓𑀸𑀪𑀬’’𑀦𑁆𑀢𑀺 𑀯𑀼𑀢𑁆𑀢𑁄.

𑀇𑀫𑀸𑀦𑀺 ¶ 𑀧𑀦 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺 𑀪𑀸𑀬𑀺𑀢𑁆𑀯𑀸 𑀬𑀣𑀸 𑀉𑀤𑀓𑀁 𑀅𑀦𑁄𑀭𑁄𑀳𑀦𑁆𑀢𑀲𑁆𑀲 𑀉𑀤𑀓𑀁 𑀦𑀺𑀲𑁆𑀲𑀸𑀬 𑀆𑀦𑀺𑀲𑀁𑀲𑁄 𑀦𑀢𑁆𑀣𑀺, 𑀉𑀤𑀓𑀧𑀺𑀧𑀸𑀲𑀸𑀬 𑀧𑀺𑀧𑀸𑀲𑀺𑀢𑁄 𑀘 𑀳𑁄𑀢𑀺 𑀭𑀚𑁄𑀚𑀮𑁆𑀮𑁂𑀦 𑀓𑀺𑀮𑀺𑀝𑁆𑀞𑀲𑀭𑀻𑀭𑁄 𑀘, 𑀏𑀯𑀫𑁂𑀯𑀁 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺 𑀪𑀸𑀬𑀺𑀢𑁆𑀯𑀸 𑀲𑀸𑀲𑀦𑁂 𑀅𑀧𑀩𑁆𑀩𑀚𑀦𑁆𑀢𑀲𑁆𑀲𑀸𑀧𑀺 𑀇𑀫𑀁 𑀲𑀸𑀲𑀦𑀁 𑀦𑀺𑀲𑁆𑀲𑀸𑀬 𑀆𑀦𑀺𑀲𑀁𑀲𑁄 𑀦𑀢𑁆𑀣𑀺, 𑀢𑀡𑁆𑀳𑀸𑀧𑀺𑀧𑀸𑀲𑀸𑀬 𑀧𑀺𑀧𑀸𑀲𑀺𑀢𑁄 𑀘 𑀳𑁄𑀢𑀺 𑀓𑀺𑀮𑁂𑀲𑀭𑀚𑁂𑀦 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄 𑀘. 𑀬𑀣𑀸 𑀧𑀦 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺 𑀅𑀪𑀸𑀬𑀺𑀢𑁆𑀯𑀸 𑀉𑀤𑀓𑀁 𑀑𑀭𑁄𑀳𑀦𑁆𑀢𑀲𑁆𑀲 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀆𑀦𑀺𑀲𑀁𑀲𑁄 𑀳𑁄𑀢𑀺, 𑀏𑀯𑀁 𑀇𑀫𑀸𑀦𑀺 𑀅𑀪𑀸𑀬𑀺𑀢𑁆𑀯𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀲𑁆𑀲𑀸𑀧𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀆𑀦𑀺𑀲𑀁𑀲𑁄 𑀳𑁄𑀢𑀺. 𑀣𑁂𑀭𑁄 𑀧𑀦𑀸𑀳 𑁋 ‘‘𑀘𑀢𑁆𑀢𑀸𑀭𑀺 𑀪𑀬𑀸𑀦𑀺 𑀪𑀸𑀬𑀺𑀢𑁆𑀯𑀸 𑀉𑀤𑀓𑀁 𑀅𑀦𑁄𑀢𑀭𑀦𑁆𑀢𑁄 𑀲𑁄𑀢𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀭𑀢𑀻𑀭𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀪𑀸𑀬𑀺𑀢𑁆𑀯𑀸 𑀑𑀢𑀭𑀦𑁆𑀢𑁄 𑀲𑀓𑁆𑀓𑁄𑀢𑀺, 𑀏𑀯𑀫𑁂𑀯𑀁 𑀪𑀸𑀬𑀺𑀢𑁆𑀯𑀸 𑀲𑀸𑀲𑀦𑁂 𑀅𑀧𑀩𑁆𑀩𑀚𑀦𑁆𑀢𑁄𑀧𑀺 𑀢𑀡𑁆𑀳𑀸𑀲𑁄𑀢𑀁 ¶ 𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀧𑀸𑀭𑀁 𑀤𑀝𑁆𑀞𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀪𑀸𑀬𑀺𑀢𑁆𑀯𑀸 𑀧𑀩𑁆𑀩𑀚𑀦𑁆𑀢𑁄 𑀧𑀦 𑀲𑀓𑁆𑀓𑁄𑀢𑀻’’𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀅𑀬𑀁 𑀧𑀦 𑀤𑁂𑀲𑀦𑀸 𑀦𑁂𑀬𑁆𑀬𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀦𑀺𑀝𑁆𑀞𑀸𑀧𑀺𑀢𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀘𑀸𑀢𑀼𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀦𑀴𑀓𑀧𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁬. 𑀏𑀯𑀁 ¶ 𑀫𑁂 𑀲𑀼𑀢𑀦𑁆𑀢𑀺 𑀦𑀴𑀓𑀧𑀸𑀦𑀲𑀼𑀢𑁆𑀢𑀁. 𑀢𑀢𑁆𑀣 𑀦𑀴𑀓𑀧𑀸𑀦𑁂𑀢𑀺 𑀏𑀯𑀁𑀦𑀸𑀫𑀓𑁂 𑀕𑀸𑀫𑁂. 𑀧𑀼𑀩𑁆𑀩𑁂 𑀓𑀺𑀭 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀯𑀸𑀦𑀭𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑁄, 𑀫𑀳𑀸𑀓𑀸𑀬𑁄 𑀓𑀧𑀺𑀭𑀸𑀚𑀸 𑀅𑀦𑁂𑀓𑀯𑀸𑀦𑀭𑀲𑀳𑀲𑁆𑀲𑀧𑀭𑀺𑀯𑀼𑀢𑁄 𑀧𑀩𑁆𑀩𑀢𑀧𑀸𑀤𑁂 𑀯𑀺𑀘𑀭𑀢𑀺. 𑀧𑀜𑁆𑀜𑀯𑀸 𑀔𑁄 𑀧𑀦 𑀳𑁄𑀢𑀺 𑀫𑀳𑀸𑀧𑀼𑀜𑁆𑀜𑁄. 𑀲𑁄 𑀧𑀭𑀺𑀲𑀁 𑀏𑀯𑀁 𑀑𑀯𑀤𑀢𑀺 𑁋 ‘‘𑀇𑀫𑀲𑁆𑀫𑀺𑀁 𑀧𑀩𑁆𑀩𑀢𑀧𑀸𑀤𑁂 𑀢𑀸𑀢𑀸, 𑀯𑀺𑀲𑀨𑀮𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑀸 𑀧𑁄𑀓𑁆𑀔𑀭𑀡𑀺𑀬𑁄 𑀦𑀸𑀫 𑀳𑁄𑀦𑁆𑀢𑀺, 𑀢𑀼𑀫𑁆𑀳𑁂 𑀧𑀼𑀩𑁆𑀩𑁂 𑀔𑀸𑀤𑀺𑀢𑀧𑀼𑀩𑁆𑀩𑀸𑀦𑁂𑀯 𑀨𑀮𑀸𑀦𑀺 𑀔𑀸𑀤𑀣, 𑀧𑀻𑀢𑀧𑀼𑀩𑁆𑀩𑀸𑀦𑁂𑀯 𑀧𑀸𑀦𑀻𑀬𑀸𑀦𑀺 𑀘 𑀧𑀺𑀯𑀣, 𑀏𑀢𑁆𑀣 𑀯𑁄 𑀫𑀁 𑀧𑀝𑀺𑀧𑀼𑀘𑁆𑀙𑀺𑀢𑀩𑁆𑀩𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀅𑀔𑀸𑀤𑀺𑀢𑀧𑀼𑀩𑁆𑀩𑀸𑀦𑀺 𑀧𑀦 𑀨𑀮𑀸𑀦𑀺 𑀅𑀧𑀻𑀢𑀧𑀼𑀩𑁆𑀩𑀸𑀦𑀺 𑀘 𑀧𑀸𑀦𑀻𑀬𑀸𑀦𑀺 𑀫𑀁 𑀅𑀧𑀼𑀘𑁆𑀙𑀺𑀢𑁆𑀯𑀸 𑀫𑀸 𑀔𑀸𑀤𑀺𑀢𑁆𑀣 𑀫𑀸 𑀧𑀺𑀯𑀺𑀢𑁆𑀣𑀸’’𑀢𑀺.

𑀢𑁂 ¶ 𑀏𑀓𑀤𑀺𑀯𑀲𑀁 𑀘𑀭𑀫𑀸𑀦𑀸 𑀅𑀜𑁆𑀜𑀁 𑀧𑀩𑁆𑀩𑀢𑀧𑀸𑀤𑀁 𑀕𑀦𑁆𑀢𑁆𑀯𑀸 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸 𑀧𑀸𑀦𑀻𑀬𑀁 𑀑𑀮𑁄𑀓𑁂𑀦𑁆𑀢𑀸 𑀏𑀓𑀁 𑀅𑀫𑀦𑀼𑀲𑁆𑀲𑀧𑀭𑀺𑀕𑁆𑀕𑀳𑀺𑀢𑀁 𑀧𑁄𑀓𑁆𑀔𑀭𑀡𑀺𑀁 𑀤𑀺𑀲𑁆𑀯𑀸 𑀲𑀳𑀲𑀸 𑀅𑀧𑀺𑀯𑀺𑀢𑁆𑀯𑀸 𑀲𑀫𑀦𑁆𑀢𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀫𑀳𑀸𑀲𑀢𑁆𑀢𑀲𑁆𑀲 𑀆𑀕𑀫𑀦𑀁 𑀑𑀮𑁄𑀓𑀬𑀫𑀸𑀦𑀸 𑀦𑀺𑀲𑀻𑀤𑀺𑀁𑀲𑀼. 𑀫𑀳𑀸𑀲𑀢𑁆𑀢𑁄 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀢𑀸𑀢𑀸 𑀧𑀸𑀦𑀻𑀬𑀁 𑀦 𑀧𑀺𑀯𑀣𑀸’’𑀢𑀺 𑀆𑀳. 𑀢𑀼𑀫𑁆𑀳𑀸𑀓𑀁 ¶ 𑀆𑀕𑀫𑀦𑀁 𑀑𑀮𑁄𑀓𑁂𑀫𑀸𑀢𑀺. 𑀲𑀸𑀥𑀼 𑀢𑀸𑀢𑀸𑀢𑀺 𑀲𑀫𑀦𑁆𑀢𑀸 𑀧𑀤𑀁 𑀧𑀭𑀺𑀬𑁂𑀲𑀫𑀸𑀦𑁄 𑀑𑀢𑀺𑀡𑁆𑀡𑀧𑀤𑀁𑀬𑁂𑀯 𑀅𑀤𑁆𑀤𑀲, 𑀦 𑀉𑀢𑁆𑀢𑀺𑀡𑁆𑀡𑀧𑀤𑀁, 𑀤𑀺𑀲𑁆𑀯𑀸 𑀲𑀧𑀭𑀺𑀲𑁆𑀲𑀬𑀸𑀢𑀺 𑀅𑀜𑁆𑀜𑀸𑀲𑀺. 𑀢𑀸𑀯𑀤𑁂𑀯 𑀘 𑀢𑀢𑁆𑀣 𑀅𑀪𑀺𑀦𑀺𑀩𑁆𑀩𑀢𑁆𑀢𑀅𑀫𑀦𑀼𑀲𑁆𑀲𑁄 𑀉𑀤𑀓𑀁 𑀤𑁆𑀯𑁂𑀥𑀸 𑀓𑀢𑁆𑀯𑀸 𑀉𑀝𑁆𑀞𑀸𑀲𑀺 𑀲𑁂𑀢𑀫𑀼𑀔𑁄 𑀦𑀻𑀮𑀓𑀼𑀘𑁆𑀙𑀺 𑀭𑀢𑁆𑀢𑀳𑀢𑁆𑀣𑀧𑀸𑀤𑁄 𑀫𑀳𑀸𑀤𑀸𑀞𑀺𑀓𑁄 𑀯𑀗𑁆𑀓𑀤𑀸𑀞𑁄 𑀯𑀺𑀭𑀽𑀧𑁄 𑀩𑀻𑀪𑀘𑁆𑀙𑁄 𑀉𑀤𑀓𑀭𑀓𑁆𑀔𑀲𑁄. 𑀲𑁄 𑀏𑀯𑀫𑀸𑀳 𑁋 ‘‘𑀓𑀲𑁆𑀫𑀸 𑀧𑀸𑀦𑀻𑀬𑀁 𑀦 𑀧𑀺𑀯𑀣, 𑀫𑀥𑀼𑀭𑀁 𑀉𑀤𑀓𑀁 𑀧𑀺𑀯𑀣, 𑀓𑀺𑀁 𑀢𑀼𑀫𑁆𑀳𑁂 𑀏𑀢𑀲𑁆𑀲 𑀯𑀘𑀦𑀁 𑀲𑀼𑀡𑀸𑀣𑀸’’𑀢𑀺? 𑀫𑀳𑀸𑀲𑀢𑁆𑀢𑁄 𑀆𑀳 𑁋 ‘‘𑀢𑁆𑀯𑀁 𑀇𑀥 𑀅𑀥𑀺𑀯𑀢𑁆𑀣𑁄 𑀅𑀫𑀦𑀼𑀲𑁆𑀲𑁄’’𑀢𑀺? 𑀆𑀫𑀸𑀳𑀦𑁆𑀢𑀺. 𑀢𑁆𑀯𑀁 𑀇𑀥 𑀑𑀢𑀺𑀡𑁆𑀡𑁂 𑀮𑀪𑀲𑀻𑀢𑀺? 𑀆𑀫 𑀮𑀪𑀸𑀫𑀺, 𑀢𑀼𑀫𑁆𑀳𑁂 𑀧𑀦 𑀲𑀩𑁆𑀩𑁂 𑀔𑀸𑀤𑀺𑀲𑁆𑀲𑀸𑀫𑀻𑀢𑀺. 𑀦 𑀲𑀓𑁆𑀔𑀺𑀲𑁆𑀲𑀲𑀺, 𑀬𑀓𑁆𑀔𑀸𑀢𑀺. 𑀧𑀸𑀦𑀻𑀬𑀁 𑀧𑀦 𑀧𑀺𑀯𑀺𑀲𑁆𑀲𑀣𑀸𑀢𑀺? 𑀆𑀫 𑀧𑀺𑀯𑀺𑀲𑁆𑀲𑀸𑀫𑀸𑀢𑀺. 𑀏𑀯𑀁 𑀲𑀦𑁆𑀢𑁂 𑀏𑀓𑁄𑀧𑀺 𑀯𑁄 𑀦 𑀫𑀼𑀘𑁆𑀘𑀺𑀲𑁆𑀲𑀢𑀻𑀢𑀺. 𑀧𑀸𑀦𑀻𑀬𑀜𑁆𑀘 𑀧𑀺𑀯𑀺𑀲𑁆𑀲𑀸𑀫, 𑀦 𑀘 𑀢𑁂 𑀯𑀲𑀁 𑀕𑀫𑀺𑀲𑁆𑀲𑀸𑀫𑀸𑀢𑀺 𑀏𑀓𑀦𑀴𑀁 𑀆𑀳𑀭𑀸𑀧𑁂𑀢𑁆𑀯𑀸 𑀓𑁄𑀝𑀺𑀬𑀁 𑀕𑀳𑁂𑀢𑁆𑀯𑀸 𑀥𑀫𑀺, 𑀲𑀩𑁆𑀩𑁄 𑀏𑀓𑀘𑁆𑀙𑀺𑀤𑁆𑀤𑁄 𑀅𑀳𑁄𑀲𑀺, 𑀢𑀻𑀭𑁂 𑀦𑀺𑀲𑀻𑀤𑀺𑀢𑁆𑀯𑀸𑀯 𑀧𑀸𑀦𑀻𑀬𑀁 𑀧𑀺𑀯𑀺, 𑀲𑁂𑀲𑀯𑀸𑀦𑀭𑀸𑀦𑀁 𑀧𑀸𑀝𑀺𑀬𑁂𑀓𑁆𑀓𑁂 𑀦𑀴𑁂 𑀆𑀳𑀭𑀸𑀧𑁂𑀢𑁆𑀯𑀸 ¶ 𑀥𑀫𑀺𑀢𑁆𑀯𑀸 𑀅𑀤𑀸𑀲𑀺. 𑀲𑀩𑁆𑀩𑁂 𑀬𑀓𑁆𑀔𑀲𑁆𑀲 𑀧𑀲𑁆𑀲𑀦𑁆𑀢𑀲𑁆𑀲𑁂𑀯 𑀧𑀸𑀦𑀻𑀬𑀁 𑀧𑀺𑀯𑀺𑀁𑀲𑀼. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀤𑀺𑀲𑁆𑀯𑀸 𑀧𑀤𑀫𑀦𑀼𑀢𑁆𑀢𑀺𑀡𑁆𑀡𑀁, 𑀤𑀺𑀲𑁆𑀯𑀸𑀦𑁄’ 𑀢𑀭𑀺𑀢𑀁 𑀧𑀤𑀁;

𑀦𑀴𑁂𑀦 𑀯𑀸𑀭𑀺𑀁 𑀧𑀺𑀲𑁆𑀲𑀸𑀫, 𑀦𑁂𑀯 𑀫𑀁 𑀢𑁆𑀯𑀁 𑀯𑀥𑀺𑀲𑁆𑀲𑀲𑀻’’𑀢𑀺. (𑀚𑀸. 𑁧.𑁧.𑁨𑁦);

𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀚𑁆𑀚𑀤𑀺𑀯𑀲𑀸 𑀢𑀲𑁆𑀫𑀺𑀁 𑀞𑀸𑀦𑁂 𑀦𑀴𑀸 𑀏𑀓𑀘𑁆𑀙𑀺𑀤𑁆𑀤𑀸𑀯 𑀳𑁄𑀦𑁆𑀢𑀺. 𑀇𑀫𑀺𑀦𑀸 𑀳𑀺 𑀲𑀤𑁆𑀥𑀺𑀁 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀘𑀢𑁆𑀢𑀸𑀭𑀺 𑀓𑀧𑁆𑀧𑀝𑁆𑀞𑀺𑀬𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀦𑀸𑀫 𑁋 𑀘𑀦𑁆𑀤𑁂 𑀲𑀲𑀩𑀺𑀫𑁆𑀩𑀁 ¶ , 𑀯𑀝𑁆𑀝𑀓𑀚𑀸𑀢𑀓𑀫𑁆𑀳𑀺 𑀲𑀘𑁆𑀘𑀓𑀺𑀭𑀺𑀬𑀝𑁆𑀞𑀸𑀦𑁂 𑀅𑀕𑁆𑀕𑀺𑀲𑁆𑀲 𑀕𑀫𑀦𑀼𑀧𑀘𑁆𑀙𑁂𑀤𑁄, 𑀖𑀝𑀺𑀓𑀸𑀭𑀓𑀼𑀫𑁆𑀪𑀓𑀸𑀭𑀲𑁆𑀲 𑀫𑀸𑀢𑀸𑀧𑀺𑀢𑀽𑀦𑀁 𑀯𑀲𑀦𑀝𑁆𑀞𑀸𑀦𑁂 𑀤𑁂𑀯𑀲𑁆𑀲 𑀅𑀯𑀲𑁆𑀲𑀦𑀁, 𑀢𑀲𑁆𑀲𑀸 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂 𑀦𑀴𑀸𑀦𑀁 𑀏𑀓𑀘𑁆𑀙𑀺𑀤𑁆𑀤𑀪𑀸𑀯𑁄𑀢𑀺. 𑀇𑀢𑀺 𑀲𑀸 𑀧𑁄𑀓𑁆𑀔𑀭𑀡𑀻 𑀦𑀴𑁂𑀦 𑀧𑀸𑀦𑀻𑀬𑀲𑁆𑀲 𑀧𑀻𑀢𑀢𑁆𑀢𑀸 𑀦𑀴𑀓𑀧𑀸𑀦𑀸𑀢𑀺 𑀦𑀸𑀫𑀁 𑀮𑀪𑀺. 𑀅𑀧𑀭𑀪𑀸𑀕𑁂 𑀢𑀁 𑀧𑁄𑀓𑁆𑀔𑀭𑀡𑀺𑀁 𑀦𑀺𑀲𑁆𑀲𑀸𑀬 𑀕𑀸𑀫𑁄 𑀧𑀢𑀺𑀝𑁆𑀞𑀸𑀲𑀺, 𑀢𑀲𑁆𑀲𑀸𑀧𑀺 𑀦𑀴𑀓𑀧𑀸𑀦𑀦𑁆𑀢𑁂𑀯 𑀦𑀸𑀫𑀁 𑀚𑀸𑀢𑀁. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀦𑀴𑀓𑀧𑀸𑀦𑁂’’𑀢𑀺. 𑀧𑀮𑀸𑀲𑀯𑀦𑁂𑀢𑀺 𑀓𑀺𑀁𑀲𑀼𑀓𑀯𑀦𑁂.

𑁧𑁬𑁭. 𑀢𑀕𑁆𑀖 ¶ 𑀫𑀬𑀁, 𑀪𑀦𑁆𑀢𑁂𑀢𑀺 𑀏𑀓𑀁𑀲𑁂𑀦𑁂𑀯 𑀫𑀬𑀁, 𑀪𑀦𑁆𑀢𑁂, 𑀅𑀪𑀺𑀭𑀢𑀸. 𑀅𑀜𑁆𑀜𑁂𑀧𑀺 𑀬𑁂 𑀢𑀼𑀫𑁆𑀳𑀸𑀓𑀁 𑀲𑀸𑀲𑀦𑁂 𑀅𑀪𑀺𑀭𑀫𑀦𑁆𑀢𑀺, 𑀢𑁂 𑀅𑀫𑁆𑀳𑁂𑀳𑀺 𑀲𑀤𑀺𑀲𑀸𑀯 𑀳𑀼𑀢𑁆𑀯𑀸 𑀅𑀪𑀺𑀭𑀫𑀦𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺.

𑀦𑁂𑀯 𑀭𑀸𑀚𑀸𑀪𑀺𑀦𑀻𑀢𑀸𑀢𑀺𑀆𑀤𑀻𑀲𑀼 𑀏𑀓𑁄 𑀭𑀜𑁆𑀜𑁄 𑀅𑀧𑀭𑀸𑀥𑀁 𑀓𑀢𑁆𑀯𑀸 𑀧𑀮𑀸𑀬𑀢𑀺. 𑀭𑀸𑀚𑀸 𑀓𑀼𑀳𑀺𑀁, 𑀪𑁄, 𑀅𑀲𑀼𑀓𑁄𑀢𑀺? 𑀧𑀮𑀸𑀢𑁄 𑀤𑁂𑀯𑀸𑀢𑀺. 𑀧𑀮𑀸𑀢𑀝𑁆𑀞𑀸𑀦𑁂𑀧𑀺 𑀫𑁂 𑀦 𑀫𑀼𑀘𑁆𑀘𑀺𑀲𑁆𑀲𑀢𑀺, 𑀲𑀘𑁂 𑀧𑀦 𑀧𑀩𑁆𑀩𑀚𑁂𑀬𑁆𑀬, 𑀫𑀼𑀘𑁆𑀘𑁂𑀬𑁆𑀬𑀸𑀢𑀺 𑀯𑀤𑀢𑀺. 𑀢𑀲𑁆𑀲 𑀓𑁄𑀘𑀺𑀤𑁂𑀯 𑀲𑀼𑀳𑀤𑁄 𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀢𑁆𑀯𑀸 𑀢𑁆𑀯𑀁 𑀲𑀘𑁂 𑀚𑀻𑀯𑀺𑀢𑀼𑀫𑀺𑀘𑁆𑀙𑀲𑀺, 𑀧𑀩𑁆𑀩𑀚𑀸𑀳𑀻𑀢𑀺. 𑀲𑁄 𑀧𑀩𑁆𑀩𑀚𑀺𑀢𑁆𑀯𑀸 𑀚𑀻𑀯𑀺𑀢𑀁 𑀭𑀓𑁆𑀔𑀫𑀸𑀦𑁄 𑀘𑀭𑀢𑀺. 𑀅𑀬𑀁 𑀭𑀸𑀚𑀸𑀪𑀺𑀦𑀻𑀢𑁄 𑀦𑀸𑀫.

𑀏𑀓𑁄 𑀧𑀦 𑀘𑁄𑀭𑀸𑀦𑀁 𑀫𑀽𑀮𑀁 𑀙𑀺𑀦𑁆𑀤𑀦𑁆𑀢𑁄 𑀘𑀭𑀢𑀺. 𑀘𑁄𑀭𑀸 𑀲𑀼𑀢𑁆𑀯𑀸 ‘‘𑀧𑀼𑀭𑀺𑀲𑀸𑀦𑀁 𑀅𑀢𑁆𑀣𑀺𑀓𑀪𑀸𑀯𑀁 𑀦 𑀚𑀸𑀦𑀸𑀢𑀺, 𑀚𑀸𑀦𑀸𑀧𑁂𑀲𑁆𑀲𑀸𑀫 𑀦’’𑀦𑁆𑀢𑀺 𑀯𑀤𑀦𑁆𑀢𑀺. 𑀲𑁄 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀧𑀮𑀸𑀬𑀢𑀺. 𑀘𑁄𑀭𑀸 𑀧𑀮𑀸𑀢𑁄𑀢𑀺 𑀲𑀼𑀢𑁆𑀯𑀸 ‘‘𑀧𑀮𑀸𑀢𑀝𑁆𑀞𑀸𑀦𑁂𑀧𑀺 𑀦𑁄 𑀦 𑀫𑀼𑀘𑁆𑀘𑀺𑀲𑁆𑀲𑀢𑀺, 𑀲𑀘𑁂 𑀧𑀦 𑀧𑀩𑁆𑀩𑀚𑁂𑀬𑁆𑀬, 𑀫𑀼𑀘𑁆𑀘𑁂𑀬𑁆𑀬𑀸’’𑀢𑀺 𑀯𑀤𑀦𑁆𑀢𑀺. 𑀲𑁄 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀢𑀺. 𑀅𑀬𑀁 𑀘𑁄𑀭𑀸𑀪𑀺𑀦𑀻𑀢𑁄 𑀦𑀸𑀫.

𑀏𑀓𑁄 ¶ 𑀧𑀦 𑀩𑀳𑀼𑀁 𑀇𑀡𑀁 𑀔𑀸𑀤𑀺𑀢𑁆𑀯𑀸 𑀢𑁂𑀦 𑀇𑀡𑁂𑀦 𑀅𑀝𑁆𑀝𑁄 𑀧𑀻𑀴𑀺𑀢𑁄 𑀢𑀫𑁆𑀳𑀸 𑀕𑀸𑀫𑀸 𑀧𑀮𑀸𑀬𑀢𑀺. 𑀇𑀡𑀲𑀸𑀫𑀺𑀓𑀸 𑀲𑀼𑀢𑁆𑀯𑀸 ‘‘𑀧𑀮𑀸𑀢𑀝𑁆𑀞𑀸𑀦𑁂𑀧𑀺 𑀦𑁄 𑀦 𑀫𑀼𑀘𑁆𑀘𑀺𑀲𑁆𑀲𑀢𑀺, 𑀲𑀘𑁂 𑀧𑀦 𑀧𑀩𑁆𑀩𑀚𑁂𑀬𑁆𑀬, 𑀫𑀼𑀘𑁆𑀘𑁂𑀬𑁆𑀬𑀸’’𑀢𑀺 𑀯𑀤𑀦𑁆𑀢𑀺. 𑀲𑁄 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀢𑀺. 𑀅𑀬𑀁 𑀇𑀡𑀝𑁆𑀝𑁄 𑀦𑀸𑀫.

𑀭𑀸𑀚𑀪𑀬𑀸𑀤𑀻𑀦𑀁 ¶ 𑀧𑀦 𑀅𑀜𑁆𑀜𑀢𑀭𑁂𑀦 𑀪𑀬𑁂𑀦 𑀪𑀻𑀢𑁄 𑀅𑀝𑁆𑀝𑁄 𑀆𑀢𑀼𑀭𑁄 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑁄 𑀪𑀬𑀝𑁆𑀝𑁄 𑀦𑀸𑀫. 𑀤𑀼𑀩𑁆𑀪𑀺𑀓𑁆𑀔𑀸𑀤𑀻𑀲𑀼 𑀚𑀻𑀯𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀩𑁆𑀩𑀚𑀺𑀢𑁄 𑀆𑀚𑀻𑀯𑀺𑀓𑀸𑀧𑀓𑀢𑁄 𑀦𑀸𑀫, 𑀆𑀚𑀻𑀯𑀺𑀓𑀸𑀬 𑀧𑀓𑀢𑁄 𑀅𑀪𑀺𑀪𑀽𑀢𑁄𑀢𑀺 𑀅𑀢𑁆𑀣𑁄. 𑀇𑀫𑁂𑀲𑀼 𑀧𑀦 𑀏𑀓𑁄𑀧𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀧𑀩𑁆𑀩𑀚𑀺𑀢𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀦𑁂𑀯 𑀭𑀸𑀚𑀸𑀪𑀺𑀦𑀻𑀢𑁄’’𑀢𑀺𑀆𑀤𑀺𑀫𑀸𑀳.

𑀯𑀺𑀯𑁂𑀓𑀦𑁆𑀢𑀺 𑀯𑀺𑀯𑀺𑀘𑁆𑀘 𑀯𑀺𑀯𑀺𑀢𑁆𑀢𑁄 𑀳𑀼𑀢𑁆𑀯𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀓𑀸𑀫𑁂𑀳𑀺 𑀘 𑀅𑀓𑀼𑀲𑀮𑀥𑀫𑁆𑀫𑁂𑀳𑀺 𑀘 𑀯𑀺𑀯𑀺𑀢𑁆𑀢𑁂𑀦 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑀲𑀗𑁆𑀔𑀸𑀢𑀁 𑀧𑀻𑀢𑀺𑀲𑀼𑀔𑀁 𑀅𑀥𑀺𑀕𑀦𑁆𑀢𑀩𑁆𑀩𑀁, 𑀲𑀘𑁂 𑀢𑀁 𑀯𑀺𑀯𑀺𑀘𑁆𑀘 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀧𑀻𑀢𑀺𑀲𑀼𑀔𑀁 𑀦𑀸𑀥𑀺𑀕𑀘𑁆𑀙𑀢𑀺, 𑀅𑀜𑁆𑀜𑀁 𑀯𑀸 𑀉𑀧𑀭𑀺 𑀤𑁆𑀯𑀺𑀦𑁆𑀦𑀁 𑀛𑀸𑀦𑀸𑀦𑀁 𑀘𑀢𑀼𑀦𑁆𑀦𑀜𑁆𑀘 𑀫𑀕𑁆𑀕𑀸𑀦𑀁 𑀯𑀲𑁂𑀦 𑀲𑀦𑁆𑀢𑀢𑀭𑀁 𑀲𑀼𑀔𑀁 𑀦𑀸𑀥𑀺𑀕𑀘𑁆𑀙𑀢𑀺, 𑀢𑀲𑁆𑀲 𑀇𑀫𑁂 𑀅𑀪𑀺𑀚𑁆𑀛𑀸𑀤𑀬𑁄 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀻𑀢𑀺. 𑀢𑀢𑁆𑀣 𑀅𑀭𑀢𑀻𑀢𑀺 𑀅𑀥𑀺𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀉𑀓𑁆𑀓𑀡𑁆𑀞𑀺𑀢𑀢𑀸. 𑀢𑀦𑁆𑀤𑀻𑀢𑀺 𑀆𑀮𑀲𑀺𑀬𑀪𑀸𑀯𑁄. 𑀏𑀯𑀁 𑀬𑁄 𑀧𑀩𑁆𑀩𑀚𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀇𑀫𑁂 𑀲𑀢𑁆𑀢 𑀧𑀸𑀧𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 ¶ 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀲 𑀢𑁂 𑀥𑀫𑁆𑀫𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀺, 𑀲𑁄𑀬𑁂𑀯 𑀲𑀫𑀡𑀓𑀺𑀘𑁆𑀘𑀫𑁆𑀧𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀧𑀼𑀦 𑀯𑀺𑀯𑁂𑀓𑀁 𑀅𑀦𑀼𑀭𑀼𑀤𑁆𑀥𑀸…𑀧𑁂… 𑀅𑀜𑁆𑀜𑀁 𑀯𑀸 𑀢𑀢𑁄 𑀲𑀦𑁆𑀢𑀢𑀭𑀦𑁆𑀢𑀺 𑀆𑀳.

𑀏𑀯𑀁 𑀓𑀡𑁆𑀳𑀧𑀓𑁆𑀔𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀦𑁂𑀯 𑀦𑀬𑁂𑀦 𑀲𑀼𑀓𑁆𑀓𑀧𑀓𑁆𑀔𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 𑀯𑀺𑀯𑁂𑀓𑀦𑁆𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁧𑁬𑁮. 𑀲𑀗𑁆𑀔𑀸𑀬𑀸𑀢𑀺 𑀚𑀸𑀦𑀺𑀢𑁆𑀯𑀸. 𑀏𑀓𑀦𑁆𑀢𑀺 ¶ 𑀏𑀓𑀘𑁆𑀘𑀁. 𑀧𑀝𑀺𑀲𑁂𑀯𑀢𑀻𑀢𑀺 𑀲𑁂𑀯𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀲𑁂𑀯𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀉𑀧𑀧𑀢𑁆𑀢𑀻𑀲𑀼 𑀩𑁆𑀬𑀸𑀓𑀭𑁄𑀢𑀻𑀢𑀺 𑀲𑀧𑁆𑀧𑀝𑀺𑀲𑀦𑁆𑀥𑀺𑀓𑁂 𑀢𑀸𑀯 𑀩𑁆𑀬𑀸𑀓𑀭𑁄𑀢𑀼, 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑁂 𑀓𑀣𑀁 𑀩𑁆𑀬𑀸𑀓𑀭𑁄𑀢𑀻𑀢𑀺. 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀧𑀼𑀦 𑀪𑀯𑁂 𑀧𑀝𑀺𑀲𑀦𑁆𑀥𑀺 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑁄 𑀉𑀧𑀧𑀢𑁆𑀢𑀻𑀲𑀼 𑀩𑁆𑀬𑀸𑀓𑀭𑁄𑀢𑀺 𑀦𑀸𑀫.

𑀚𑀦𑀓𑀼𑀳𑀦𑀢𑁆𑀣𑀦𑁆𑀢𑀺 ¶ 𑀚𑀦𑀯𑀺𑀫𑁆𑀳𑀸𑀧𑀦𑀢𑁆𑀣𑀁. 𑀚𑀦𑀮𑀧𑀦𑀢𑁆𑀣𑀦𑁆𑀢𑀺 𑀫𑀳𑀸𑀚𑀦𑀲𑁆𑀲 𑀉𑀧𑀮𑀸𑀧𑀦𑀢𑁆𑀣𑀁. 𑀦 𑀇𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽𑀢𑀺 𑀏𑀯𑀁 𑀫𑀁 𑀫𑀳𑀸𑀚𑀦𑁄 𑀚𑀸𑀦𑀺𑀲𑁆𑀲𑀢𑀺, 𑀏𑀯𑀁 𑀫𑁂 𑀫𑀳𑀸𑀚𑀦𑀲𑁆𑀲 𑀅𑀦𑁆𑀢𑀭𑁂 𑀓𑀺𑀢𑁆𑀢𑀺𑀲𑀤𑁆𑀤𑁄 𑀉𑀕𑁆𑀕𑀘𑁆𑀙𑀺𑀲𑁆𑀲𑀢𑀻𑀢𑀺 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀦 𑀩𑁆𑀬𑀸𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀉𑀴𑀸𑀭𑀯𑁂𑀤𑀸𑀢𑀺 𑀫𑀳𑀦𑁆𑀢𑀢𑀼𑀝𑁆𑀞𑀺𑀦𑁄.

𑁧𑁬𑁯. 𑀲𑁄 𑀔𑁄 𑀧𑀦𑀲𑁆𑀲 𑀆𑀬𑀲𑁆𑀫𑀸𑀢𑀺 𑀲𑁄 𑀧𑀭𑀺𑀦𑀺𑀩𑁆𑀩𑀼𑀢𑁄 𑀆𑀬𑀲𑁆𑀫𑀸 𑀇𑀫𑀲𑁆𑀲 𑀞𑀺𑀢𑀲𑁆𑀲 𑀆𑀬𑀲𑁆𑀫𑀢𑁄. 𑀏𑀯𑀁𑀲𑀻𑀮𑁄𑀢𑀺𑀆𑀤𑀻𑀲𑀼 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀯 𑀲𑀻𑀮𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁𑀥𑀫𑁆𑀫𑁄𑀢𑀺 𑀏𑀢𑁆𑀣 𑀧𑀦 𑀲𑀫𑀸𑀥𑀺𑀧𑀓𑁆𑀔𑀺𑀓𑀸 𑀥𑀫𑁆𑀫𑀸 𑀥𑀫𑁆𑀫𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀨𑀸𑀲𑀼𑀯𑀺𑀳𑀸𑀭𑁄 𑀳𑁄𑀢𑀻𑀢𑀺 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀧𑀽𑀭𑀺𑀢𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀦𑁆𑀢𑀲𑁆𑀲 𑀅𑀭𑀳𑀢𑁆𑀢𑀨𑀮𑀁 𑀲𑀘𑁆𑀙𑀺𑀓𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑁂𑀦 𑀨𑀸𑀲𑀼𑀯𑀺𑀳𑀸𑀭𑁄 𑀳𑁄𑀢𑀺, 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀫𑀲𑀓𑁆𑀓𑁄𑀦𑁆𑀢𑀲𑁆𑀲 𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑀬𑀫𑀸𑀦𑀲𑁆𑀲 𑀘𑀭𑀢𑁄𑀧𑀺 𑀨𑀸𑀲𑀼𑀯𑀺𑀳𑀸𑀭𑁄𑀬𑁂𑀯 𑀦𑀸𑀫 𑀳𑁄𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀦𑀴𑀓𑀧𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀕𑁄𑀮𑀺𑀬𑀸𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁩. 𑀏𑀯𑀁 ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀕𑁄𑀮𑀺𑀬𑀸𑀦𑀺𑀲𑀼𑀢𑁆𑀢𑀁. 𑀢𑀢𑁆𑀣 𑀧𑀤𑀲𑀫𑀸𑀘𑀸𑀭𑁄𑀢𑀺 𑀤𑀼𑀩𑁆𑀩𑀮𑀲𑀫𑀸𑀘𑀸𑀭𑁄 𑀑𑀴𑀸𑀭𑀺𑀓𑀸𑀘𑀸𑀭𑁄, 𑀧𑀘𑁆𑀘𑀬𑁂𑀲𑀼 𑀲𑀸𑀧𑁂𑀓𑁆𑀔𑁄 𑀫𑀳𑀸𑀭𑀓𑁆𑀔𑀺𑀢𑀢𑁆𑀣𑁂𑀭𑁄 ¶ 𑀯𑀺𑀬. 𑀢𑀁 𑀓𑀺𑀭 𑀉𑀧𑀝𑁆𑀞𑀸𑀓𑀓𑀼𑀮𑁂 𑀦𑀺𑀲𑀺𑀦𑁆𑀦𑀁 𑀉𑀧𑀝𑁆𑀞𑀸𑀓𑁄 𑀆𑀳 ‘‘𑀅𑀲𑀼𑀓𑀢𑁆𑀣𑁂𑀭𑀲𑁆𑀲 𑀫𑁂, 𑀪𑀦𑁆𑀢𑁂, 𑀘𑀻𑀯𑀭𑀁 𑀤𑀺𑀦𑁆𑀦’’𑀦𑁆𑀢𑀺. 𑀲𑀸𑀥𑀼 𑀢𑁂 𑀓𑀢𑀁 𑀢𑀁𑀬𑁂𑀯 𑀢𑀓𑁆𑀓𑁂𑀢𑁆𑀯𑀸 𑀯𑀺𑀳𑀭𑀦𑁆𑀢𑀲𑁆𑀲 𑀘𑀻𑀯𑀭𑀁 𑀤𑁂𑀦𑁆𑀢𑁂𑀦𑀸𑀢𑀺. 𑀢𑀼𑀫𑁆𑀳𑀸𑀓𑀫𑁆𑀧𑀺, 𑀪𑀦𑁆𑀢𑁂, 𑀤𑀲𑁆𑀲𑀸𑀫𑀻𑀢𑀺. 𑀲𑀸𑀥𑀼 𑀓𑀭𑀺𑀲𑁆𑀲𑀲𑀺 𑀢𑀁𑀬𑁂𑀯 𑀢𑀓𑁆𑀓𑁂𑀦𑁆𑀢𑀲𑁆𑀲𑀸𑀢𑀺 𑀆𑀳. 𑀅𑀬𑀫𑁆𑀧𑀺 𑀏𑀯𑀭𑀽𑀧𑁄 𑀑𑀴𑀸𑀭𑀺𑀓𑀸𑀘𑀸𑀭𑁄 𑀅𑀳𑁄𑀲𑀺. 𑀲𑀧𑁆𑀧𑀢𑀺𑀲𑁆𑀲𑁂𑀦𑀸𑀢𑀺 𑀲𑀚𑁂𑀝𑁆𑀞𑀓𑁂𑀦, 𑀦 𑀅𑀢𑁆𑀢𑀸𑀦𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀯𑀺𑀳𑀭𑀺𑀢𑀩𑁆𑀩𑀁. 𑀲𑁂𑀭𑀺𑀯𑀺𑀳𑀸𑀭𑁂𑀦𑀸𑀢𑀺 𑀲𑀘𑁆𑀙𑀦𑁆𑀤𑀯𑀺𑀳𑀸𑀭𑁂𑀦 𑀦𑀺𑀭𑀗𑁆𑀓𑀼𑀲𑀯𑀺𑀳𑀸𑀭𑁂𑀦.

𑀦𑀸𑀦𑀽𑀧𑀔𑀚𑁆𑀚𑀸𑀢𑀺 𑀦 𑀅𑀦𑀼𑀧𑀔𑀚𑁆𑀚 𑀦 𑀅𑀦𑀼𑀧𑀯𑀺𑀲𑀺𑀢𑁆𑀯𑀸. 𑀢𑀢𑁆𑀣 𑀬𑁄 𑀤𑁆𑀯𑀻𑀲𑀼 𑀫𑀳𑀸𑀣𑁂𑀭𑁂𑀲𑀼 𑀉𑀪𑀢𑁄 𑀦𑀺𑀲𑀺𑀦𑁆𑀦𑁂𑀲𑀼 𑀢𑁂 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀯 𑀘𑀻𑀯𑀭𑁂𑀦 𑀯𑀸 𑀚𑀸𑀡𑀼𑀦𑀸 𑀯𑀸 𑀖𑀝𑁆𑀝𑁂𑀦𑁆𑀢𑁄 𑀦𑀺𑀲𑀻𑀤𑀢𑀺, 𑀅𑀬𑀁 𑀅𑀦𑀼𑀧𑀔𑀚𑁆𑀚 𑀦𑀺𑀲𑀻𑀤𑀢𑀺 𑀦𑀸𑀫. 𑀏𑀯𑀁 𑀅𑀓𑀢𑁆𑀯𑀸 𑀧𑀦 𑀅𑀢𑁆𑀢𑀦𑁄 𑀧𑀢𑁆𑀢𑀆𑀲𑀦𑀲𑀦𑁆𑀢𑀺𑀓𑁂 𑀞𑀢𑁆𑀯𑀸 𑀦𑀺𑀲𑀻𑀤𑀸𑀯𑀼𑀲𑁄𑀢𑀺 𑀯𑀼𑀢𑁆𑀢𑁂 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀲𑀘𑁂 𑀦 𑀯𑀤𑀦𑁆𑀢𑀺, 𑀦𑀺𑀲𑀻𑀤𑀸𑀫𑀺, 𑀪𑀦𑁆𑀢𑁂𑀢𑀺 𑀆𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀁 𑀆𑀧𑀼𑀘𑁆𑀙𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦𑀺𑀲𑀻𑀤𑀸𑀢𑀺 𑀯𑀼𑀢𑁆𑀢𑁂𑀧𑀺 𑀅𑀯𑀼𑀢𑁆𑀢𑁂𑀧𑀺 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀦 𑀧𑀝𑀺𑀩𑀸𑀳𑀺𑀲𑁆𑀲𑀸𑀫𑀻𑀢𑀺 𑀏𑀢𑁆𑀣 𑀬𑁄 𑀅𑀢𑁆𑀢𑀦𑁄 𑀧𑀢𑁆𑀢𑀸𑀲𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀯𑀓𑀸𑀦𑀁 𑀧𑀸𑀧𑀼𑀡𑀦𑀝𑁆𑀞𑀸𑀦𑁂 𑀦𑀺𑀲𑀻𑀤𑀢𑀺, 𑀅𑀬𑀁 𑀦𑀯𑁂 𑀪𑀺𑀓𑁆𑀔𑀽 ¶ 𑀆𑀲𑀦𑁂𑀦 𑀧𑀝𑀺𑀩𑀸𑀳𑀢𑀺 𑀦𑀸𑀫. 𑀢𑀲𑁆𑀫𑀺𑀜𑁆𑀳𑀺 𑀢𑀣𑀸 𑀦𑀺𑀲𑀺𑀦𑁆𑀦𑁂 𑀦𑀯𑀸 𑀪𑀺𑀓𑁆𑀔𑀽 ‘‘𑀅𑀫𑁆𑀳𑀸𑀓𑀁 𑀦𑀺𑀲𑀻𑀤𑀺𑀢𑀼𑀁 𑀦 𑀤𑁂𑀢𑀻’’𑀢𑀺 𑀉𑀚𑁆𑀛𑀸𑀬𑀦𑁆𑀢𑀸 𑀢𑀺𑀝𑁆𑀞𑀦𑁆𑀢𑀺 𑀯𑀸 𑀆𑀲𑀦𑀁 𑀯𑀸 𑀧𑀭𑀺𑀬𑁂𑀲𑀦𑁆𑀢𑀸 𑀆𑀳𑀺𑀡𑁆𑀟𑀦𑁆𑀢𑀺. 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀧𑀢𑁆𑀢𑀸𑀲𑀦𑁂𑀬𑁂𑀯 𑀦𑀺𑀲𑀻𑀤𑀺𑀢𑀩𑁆𑀩𑀁. 𑀏𑀯𑀁 𑀦 𑀧𑀝𑀺𑀩𑀸𑀳𑀢𑀺 𑀦𑀸𑀫.

𑀆𑀪𑀺𑀲𑀫𑀸𑀘𑀸𑀭𑀺𑀓𑀫𑁆𑀧𑀺 𑀥𑀫𑁆𑀫𑀦𑁆𑀢𑀺 𑀅𑀪𑀺𑀲𑀫𑀸𑀘𑀸𑀭𑀺𑀓𑀁 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀫𑀢𑁆𑀢𑀫𑁆𑀧𑀺. 𑀦𑀸𑀢𑀺𑀓𑀸𑀮𑁂𑀦𑀸𑀢𑀺 𑀦 𑀅𑀢𑀺𑀧𑀸𑀢𑁄 𑀧𑀯𑀺𑀲𑀺𑀢𑀩𑁆𑀩𑀁, 𑀦 𑀅𑀢𑀺𑀤𑀺𑀯𑀸 𑀧𑀝𑀺𑀓𑁆𑀓𑀫𑀺𑀢𑀩𑁆𑀩𑀁, 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁𑀬𑁂𑀯 𑀧𑀯𑀺𑀲𑀺𑀢𑀩𑁆𑀩𑀜𑁆𑀘 𑀦𑀺𑀓𑁆𑀔𑀫𑀺𑀢𑀩𑁆𑀩𑀜𑁆𑀘. 𑀅𑀢𑀺𑀧𑀸𑀢𑁄 𑀧𑀯𑀺𑀲𑀺𑀢𑁆𑀯𑀸 𑀅𑀢𑀺𑀤𑀺𑀯𑀸 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀳𑀺 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑀯𑀢𑁆𑀢𑀸𑀤𑀻𑀦𑀺 𑀧𑀭𑀺𑀳𑀸𑀬𑀦𑁆𑀢𑀺. 𑀓𑀸𑀮𑀲𑁆𑀲𑁂𑀯 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀫𑀓𑁆𑀓𑀝𑀓𑀲𑀼𑀢𑁆𑀢𑀸𑀦𑀺 𑀙𑀺𑀦𑁆𑀤𑀦𑁆𑀢𑁂𑀦 𑀉𑀲𑁆𑀲𑀸𑀯𑀩𑀺𑀦𑁆𑀤𑀽 𑀦𑀺𑀧𑀸𑀢𑁂𑀦𑁆𑀢𑁂𑀦 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀬𑀸𑀕𑀼𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀬𑀸𑀯 𑀪𑀺𑀓𑁆𑀔𑀸𑀓𑀸𑀮𑀸 𑀅𑀦𑁆𑀢𑁄𑀕𑀸𑀫𑁂𑀬𑁂𑀯 𑀦𑀸𑀦𑀧𑁆𑀧𑀓𑀸𑀭𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀓𑀣𑁂𑀦𑁆𑀢𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀤𑀺𑀯𑀸 𑀦𑀺𑀓𑁆𑀔𑀫𑁆𑀫 ¶ 𑀪𑀺𑀓𑁆𑀔𑀽𑀦𑀁 𑀧𑀸𑀤𑀥𑁄𑀯𑀦𑀯𑁂𑀮𑀸𑀬 𑀯𑀺𑀳𑀸𑀭𑀁 𑀧𑀘𑁆𑀘𑀸𑀕𑀦𑁆𑀢𑀩𑁆𑀩𑀁 𑀳𑁄𑀢𑀺. 𑀦 𑀧𑀼𑀭𑁂𑀪𑀢𑁆𑀢𑀁 𑀧𑀘𑁆𑀙𑀸𑀪𑀢𑁆𑀢𑀁 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀦𑀺𑀫𑀦𑁆𑀢𑀺𑀢𑁄 𑀲𑀪𑀢𑁆𑀢𑁄 𑀲𑀫𑀸𑀦𑁄 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀸 𑀧𑀼𑀭𑁂𑀪𑀢𑁆𑀢𑀁 𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸 𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑁂𑀬𑁆𑀬, 𑀅𑀜𑁆𑀜𑀢𑁆𑀭 𑀲𑀫𑀬𑀸 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁨𑁯𑁯) 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀭𑀓𑁆𑀔𑀦𑁆𑀢𑁂𑀦 𑀢𑀲𑁆𑀲 ¶ 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀁 𑀧𑀼𑀭𑁂𑀪𑀢𑁆𑀢𑀜𑁆𑀘 𑀧𑀘𑁆𑀙𑀸𑀪𑀢𑁆𑀢𑀜𑁆𑀘 𑀘𑀸𑀭𑀺𑀢𑁆𑀢𑀁 𑀦 𑀆𑀧𑀚𑁆𑀚𑀺𑀢𑀩𑁆𑀩𑀁. 𑀉𑀤𑁆𑀥𑀢𑁄 𑀳𑁄𑀢𑀺 𑀘𑀧𑀮𑁄𑀢𑀺 𑀉𑀤𑁆𑀥𑀘𑁆𑀘𑀧𑀓𑀢𑀺𑀓𑁄 𑀘𑁂𑀯 𑀳𑁄𑀢𑀺 𑀘𑀻𑀯𑀭𑀫𑀡𑁆𑀟𑀦-𑀧𑀢𑁆𑀢𑀫𑀡𑁆𑀟𑀦-𑀲𑁂𑀦𑀸𑀲𑀦𑀫𑀡𑁆𑀟𑀦𑀸 𑀇𑀫𑀲𑁆𑀲 𑀯𑀸 𑀧𑀽𑀢𑀺𑀓𑀸𑀬𑀲𑁆𑀲 𑀓𑁂𑀮𑀸𑀬𑀦𑀸 𑀫𑀡𑁆𑀟𑀦𑀸𑀢𑀺 𑀏𑀯𑀁 𑀯𑀼𑀢𑁆𑀢𑁂𑀦 𑀘 𑀢𑀭𑀼𑀡𑀤𑀸𑀭𑀓𑀸𑀯𑀘𑀸𑀧𑀮𑁆𑀬𑁂𑀦 𑀲𑀫𑀦𑁆𑀦𑀸𑀕𑀢𑁄.

𑀧𑀜𑁆𑀜𑀯𑀢𑀸 ¶ 𑀪𑀯𑀺𑀢𑀩𑁆𑀩𑀦𑁆𑀢𑀺 𑀘𑀻𑀯𑀭𑀓𑀫𑁆𑀫𑀸𑀤𑀻𑀲𑀼 𑀇𑀢𑀺𑀓𑀢𑁆𑀢𑀩𑁆𑀩𑁂𑀲𑀼 𑀉𑀧𑀸𑀬𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀅𑀪𑀺𑀥𑀫𑁆𑀫𑁂 𑀅𑀪𑀺𑀯𑀺𑀦𑀬𑁂𑀢𑀺 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀘𑁂𑀯 𑀯𑀺𑀦𑀬𑀧𑀺𑀝𑀓𑁂 𑀘 𑀧𑀸𑀴𑀺𑀯𑀲𑁂𑀦 𑀘𑁂𑀯 𑀅𑀝𑁆𑀞𑀓𑀣𑀸𑀯𑀲𑁂𑀦 𑀘 𑀬𑁄𑀕𑁄 𑀓𑀭𑀡𑀻𑀬𑁄. 𑀲𑀩𑁆𑀩𑀦𑁆𑀢𑀺𑀫𑁂𑀦 𑀳𑀺 𑀧𑀭𑀺𑀘𑁆𑀙𑁂𑀤𑁂𑀦 𑀅𑀪𑀺𑀥𑀫𑁆𑀫𑁂 𑀤𑀼𑀓𑀢𑀺𑀓𑀫𑀸𑀢𑀺𑀓𑀸𑀳𑀺 𑀲𑀤𑁆𑀥𑀺𑀁 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑀁 𑀯𑀺𑀦𑀸 𑀦 𑀯𑀝𑁆𑀝𑀢𑀺. 𑀯𑀺𑀦𑀬𑁂 𑀧𑀦 𑀓𑀫𑁆𑀫𑀸𑀓𑀫𑁆𑀫𑀯𑀺𑀦𑀺𑀘𑁆𑀙𑀬𑁂𑀦 𑀲𑀤𑁆𑀥𑀺𑀁 𑀲𑀼𑀯𑀺𑀦𑀺𑀘𑁆𑀙𑀺𑀢𑀸𑀦𑀺 𑀤𑁆𑀯𑁂 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀯𑀺𑀦𑀸 𑀦 𑀯𑀝𑁆𑀝𑀢𑀺.

𑀆𑀭𑀼𑀧𑁆𑀧𑀸𑀢𑀺 𑀏𑀢𑁆𑀢𑀸𑀯𑀢𑀸 𑀅𑀝𑁆𑀞𑀧𑀺 𑀲𑀫𑀸𑀧𑀢𑁆𑀢𑀺𑀬𑁄 𑀯𑀼𑀢𑁆𑀢𑀸 𑀳𑁄𑀦𑁆𑀢𑀺. 𑀢𑀸 𑀧𑀦 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀲𑀢𑁆𑀢𑀲𑀼𑀧𑀺 𑀬𑁄𑀕𑁄 𑀓𑀭𑀡𑀻𑀬𑁄, 𑀙𑀲𑀼𑀧𑀺…𑀧𑁂… 𑀧𑀜𑁆𑀘𑀲𑀼𑀧𑀺. 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀏𑀓𑀁 𑀓𑀲𑀺𑀡𑁂 𑀧𑀭𑀺𑀓𑀫𑁆𑀫𑀓𑀫𑁆𑀫𑀝𑁆𑀞𑀸𑀦𑀁 𑀧𑀕𑀼𑀡𑀁 𑀓𑀢𑁆𑀯𑀸 𑀆𑀤𑀸𑀬 𑀯𑀺𑀘𑀭𑀺𑀢𑀩𑁆𑀩𑀁, 𑀏𑀢𑁆𑀢𑀓𑀁 𑀯𑀺𑀦𑀸 𑀦 𑀯𑀝𑁆𑀝𑀢𑀺. 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂𑀢𑀺 𑀇𑀫𑀺𑀦𑀸 𑀲𑀩𑁆𑀩𑁂𑀧𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀤𑀲𑁆𑀲𑁂𑀢𑀺. 𑀢𑀲𑁆𑀫𑀸 𑀅𑀭𑀳𑀦𑁆𑀢𑁂𑀦 𑀳𑀼𑀢𑁆𑀯𑀸 𑀯𑀺𑀳𑀸𑀢𑀩𑁆𑀩𑀁, 𑀅𑀭𑀳𑀢𑁆𑀢𑀁 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁂𑀦 𑀅𑀦𑀸𑀕𑀸𑀫𑀺𑀨𑀮𑁂 𑀲𑀓𑀤𑀸𑀕𑀸𑀫𑀺𑀨𑀮𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀯𑀸 𑀧𑀢𑀺𑀝𑁆𑀞𑀸𑀢𑀩𑁆𑀩𑀁. 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀬𑀸𑀬𑁂𑀦 𑀏𑀓𑀁 𑀯𑀺𑀧𑀲𑁆𑀲𑀦𑀸𑀫𑀼𑀔𑀁 𑀬𑀸𑀯 𑀅𑀭𑀳𑀢𑁆𑀢𑀸 𑀧𑀕𑀼𑀡𑀁 𑀓𑀢𑁆𑀯𑀸 𑀆𑀤𑀸𑀬 𑀯𑀺𑀘𑀭𑀺𑀢𑀩𑁆𑀩𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀇𑀫𑀁 𑀧𑀦 𑀤𑁂𑀲𑀦𑀁 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀦𑁂𑀬𑁆𑀬𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀆𑀪𑀺𑀲𑀫𑀸𑀘𑀸𑀭𑀺𑀓𑀯𑀢𑁆𑀢𑀢𑁄 𑀧𑀝𑁆𑀞𑀸𑀬 𑀅𑀦𑀼𑀧𑀼𑀩𑁆𑀩𑁂𑀦 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑁆𑀯𑀸 𑀦𑀺𑀝𑁆𑀞𑀸𑀧𑁂𑀲𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀕𑁄𑀮𑀺𑀬𑀸𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀓𑀻𑀝𑀸𑀕𑀺𑀭𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁪. 𑀏𑀯𑀁 ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀓𑀻𑀝𑀸𑀕𑀺𑀭𑀺𑀲𑀼𑀢𑁆𑀢𑀁. 𑀢𑀢𑁆𑀣 𑀓𑀸𑀲𑀻𑀲𑀽𑀢𑀺 𑀏𑀯𑀁𑀦𑀸𑀫𑀓𑁂 𑀚𑀦𑀧𑀤𑁂. 𑀏𑀣 𑀢𑀼𑀫𑁆𑀳𑁂𑀧𑀺, 𑀪𑀺𑀓𑁆𑀔𑀯𑁂𑀢𑀺 𑀏𑀣 𑀢𑀼𑀫𑁆𑀳𑁂𑀧𑀺, 𑀪𑀺𑀓𑁆𑀔𑀯𑁂, 𑀇𑀫𑁂 𑀧𑀜𑁆𑀘 𑀆𑀦𑀺𑀲𑀁𑀲𑁂 ¶ 𑀲𑀫𑁆𑀧𑀲𑁆𑀲𑀫𑀸𑀦𑀸 𑀅𑀜𑁆𑀜𑀢𑁆𑀭𑁂𑀯 𑀭𑀢𑁆𑀢𑀺𑀪𑁄𑀚𑀦𑀸 𑀪𑀼𑀜𑁆𑀚𑀣. 𑀇𑀢𑀺 𑀪𑀕𑀯𑀸 𑀭𑀢𑁆𑀢𑀺𑀁 𑀯𑀺𑀓𑀸𑀮𑀪𑁄𑀚𑀦𑀁, 𑀤𑀺𑀯𑀸 𑀯𑀺𑀓𑀸𑀮𑀪𑁄𑀚𑀦𑀦𑁆𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀪𑁄𑀚𑀦𑀸𑀦𑀺 𑀏𑀓𑀧𑁆𑀧𑀳𑀸𑀭𑁂𑀦 𑀅𑀚𑀳𑀸𑀧𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀲𑀫𑀬𑁂 𑀤𑀺𑀯𑀸 𑀯𑀺𑀓𑀸𑀮𑀪𑁄𑀚𑀦𑀫𑁂𑀯 𑀚𑀳𑀸𑀧𑁂𑀲𑀺, 𑀧𑀼𑀦 𑀓𑀸𑀮𑀁 𑀅𑀢𑀺𑀦𑀸𑀫𑁂𑀢𑁆𑀯𑀸 𑀭𑀢𑁆𑀢𑀺𑀁 𑀯𑀺𑀓𑀸𑀮𑀪𑁄𑀚𑀦𑀁 𑀚𑀳𑀸𑀧𑁂𑀦𑁆𑀢𑁄 𑀏𑀯𑀫𑀸𑀳. 𑀓𑀲𑁆𑀫𑀸? 𑀇𑀫𑀸𑀦𑀺 𑀳𑀺 𑀤𑁆𑀯𑁂 𑀪𑁄𑀚𑀦𑀸𑀦𑀺 𑀯𑀢𑁆𑀢𑀫𑀸𑀦𑀸𑀦𑀺 𑀯𑀝𑁆𑀝𑁂 𑀆𑀘𑀺𑀡𑁆𑀡𑀸𑀦𑀺 𑀲𑀫𑀸𑀘𑀺𑀡𑁆𑀡𑀸𑀦𑀺 𑀦𑀤𑀺𑀁 𑀑𑀢𑀺𑀡𑁆𑀡𑀉𑀤𑀓𑀁 𑀯𑀺𑀬 𑀅𑀦𑀼𑀧𑀓𑁆𑀔𑀦𑁆𑀤𑀸𑀦𑀺, 𑀦𑀺𑀯𑀸𑀢𑁂𑀲𑀼 𑀘 𑀖𑀭𑁂𑀲𑀼 𑀲𑀼𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀢𑁆𑀯𑀸 𑀯𑀟𑁆𑀠𑀺𑀢𑀸 𑀲𑀼𑀔𑀼𑀫𑀸𑀮𑀸 𑀓𑀼𑀮𑀧𑀼𑀢𑁆𑀢𑀸 𑀤𑁆𑀯𑁂 𑀪𑁄𑀚𑀦𑀸𑀦𑀺 𑀏𑀓𑀧𑁆𑀧𑀳𑀸𑀭𑁂𑀦 𑀧𑀚𑀳𑀦𑁆𑀢𑀸 𑀓𑀺𑀮𑀫𑀦𑁆𑀢𑀺. 𑀢𑀲𑁆𑀫𑀸 𑀏𑀓𑀧𑁆𑀧𑀳𑀸𑀭𑁂𑀦 𑀅𑀚𑀳𑀸𑀧𑁂𑀢𑁆𑀯𑀸 𑀪𑀤𑁆𑀤𑀸𑀮𑀺𑀲𑀼𑀢𑁆𑀢𑁂 𑀤𑀺𑀯𑀸 𑀯𑀺𑀓𑀸𑀮𑀪𑁄𑀚𑀦𑀁 𑀚𑀳𑀸𑀧𑁂𑀲𑀺, 𑀇𑀥 𑀭𑀢𑁆𑀢𑀺𑀁 𑀯𑀺𑀓𑀸𑀮𑀪𑁄𑀚𑀦𑀁. 𑀚𑀳𑀸𑀧𑁂𑀦𑁆𑀢𑁄 𑀧𑀦 𑀦 𑀢𑀚𑁆𑀚𑀺𑀢𑁆𑀯𑀸 𑀯𑀸 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀸, 𑀢𑁂𑀲𑀁 𑀧𑀳𑀸𑀦𑀧𑀘𑁆𑀘𑀬𑀸 𑀧𑀦 𑀅𑀧𑁆𑀧𑀸𑀩𑀸𑀥𑀢𑀜𑁆𑀘 𑀲𑀜𑁆𑀚𑀸𑀦𑀺𑀲𑁆𑀲𑀣𑀸𑀢𑀺 𑀏𑀯𑀁 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑁆𑀯𑀸𑀯 𑀚𑀳𑀸𑀧𑁂𑀲𑀺. 𑀓𑀻𑀝𑀸𑀕𑀺𑀭𑀻𑀢𑀺 𑀢𑀲𑁆𑀲 𑀦𑀺𑀕𑀫𑀲𑁆𑀲 𑀦𑀸𑀫𑀁.

𑁧𑁭𑁫. 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸𑀢𑀺 𑀅𑀲𑁆𑀲𑀚𑀺 𑀘 𑀧𑀼𑀦𑀩𑁆𑀩𑀲𑀼𑀓𑁄 𑀘 𑀙𑀲𑀼 𑀙𑀩𑁆𑀩𑀕𑁆𑀕𑀺𑀬𑁂𑀲𑀼 𑀤𑁆𑀯𑁂 𑀕𑀡𑀸𑀘𑀭𑀺𑀬𑀸. 𑀧𑀡𑁆𑀟𑀼𑀓𑁄 𑀮𑁄𑀳𑀺𑀢𑀓𑁄 𑀫𑁂𑀢𑁆𑀢𑀺𑀬𑁄 𑀪𑀼𑀫𑁆𑀫𑀚𑀓𑁄 ¶ 𑀅𑀲𑁆𑀲𑀚𑀺 𑀧𑀼𑀦𑀩𑁆𑀩𑀲𑀼𑀓𑁄𑀢𑀺 𑀇𑀫𑁂 𑀙 𑀚𑀦𑀸 𑀙𑀩𑁆𑀩𑀕𑁆𑀕𑀺𑀬𑀸 𑀦𑀸𑀫. 𑀢𑁂𑀲𑀼 𑀧𑀡𑁆𑀟𑀼𑀓𑀮𑁄𑀳𑀺𑀢𑀓𑀸 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀲𑀦𑁆𑀢𑀺, 𑀫𑁂𑀢𑁆𑀢𑀺𑀬𑀪𑀼𑀫𑁆𑀫𑀚𑀓𑀸 𑀭𑀸𑀚𑀕𑀳𑁂, 𑀇𑀫𑁂 𑀤𑁆𑀯𑁂 𑀚𑀦𑀸 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀆𑀯𑀸𑀲𑀺𑀓𑀸 𑀳𑁄𑀦𑁆𑀢𑀺. 𑀆𑀯𑀸𑀲𑀺𑀓𑀸𑀢𑀺 𑀦𑀺𑀩𑀤𑁆𑀥𑀯𑀸𑀲𑀺𑀦𑁄, 𑀢𑀁𑀦𑀺𑀩𑀦𑁆𑀥𑀸 𑀅𑀓𑀢𑀁 𑀲𑁂𑀦𑀸𑀲𑀦𑀁 𑀓𑀭𑁄𑀦𑁆𑀢𑀺, 𑀚𑀺𑀡𑁆𑀡𑀁 𑀧𑀝𑀺𑀲𑀗𑁆𑀔𑀭𑁄𑀦𑁆𑀢𑀺, 𑀓𑀢𑁂 𑀇𑀲𑁆𑀲𑀭𑀸 𑀳𑁄𑀦𑁆𑀢𑀺. 𑀓𑀸𑀮𑀺𑀓𑀦𑁆𑀢𑀺 𑀅𑀦𑀸𑀕𑀢𑁂 𑀓𑀸𑀮𑁂 𑀧𑀢𑁆𑀢𑀩𑁆𑀩𑀁 𑀆𑀦𑀺𑀲𑀁𑀲𑀁.

𑁧𑁭𑁮. 𑀫𑀬𑀸 𑀘𑁂𑀢𑀁, 𑀪𑀺𑀓𑁆𑀔𑀯𑁂𑀢𑀺 𑀇𑀥 𑀓𑀺𑀁 𑀤𑀲𑁆𑀲𑁂𑀢𑀺? 𑀪𑀺𑀓𑁆𑀔𑀯𑁂, 𑀤𑀺𑀯𑀲𑀲𑁆𑀲 𑀢𑀬𑁄 𑀯𑀸𑀭𑁂 𑀪𑀼𑀜𑁆𑀚𑀺𑀢𑁆𑀯𑀸 𑀲𑀼𑀔𑀯𑁂𑀤𑀦𑀁𑀬𑁂𑀯 𑀉𑀧𑁆𑀧𑀸𑀤𑁂𑀦𑁆𑀢𑁄 𑀦 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀓𑀺𑀘𑁆𑀘𑀓𑀸𑀭𑀻 𑀦𑀸𑀫 𑀳𑁄𑀢𑀺, 𑀏𑀢𑁆𑀢𑀓𑀸 𑀧𑀦 𑀯𑁂𑀤𑀦𑀸 𑀲𑁂𑀯𑀺𑀢𑀩𑁆𑀩𑀸, 𑀏𑀢𑁆𑀢𑀓𑀸 𑀦 𑀲𑁂𑀯𑀺𑀢𑀩𑁆𑀩𑀸𑀢𑀺 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀏𑀯𑀭𑀽𑀧𑀁 𑀲𑀼𑀔𑀯𑁂𑀤𑀦𑀁 𑀧𑀚𑀳𑀣𑀸𑀢𑀺 𑀇𑀤𑀜𑁆𑀘 𑀕𑁂𑀳𑀲𑁆𑀲𑀺𑀢𑀲𑁄𑀫𑀦𑀲𑁆𑀲𑀯𑀲𑁂𑀦 𑀯𑀼𑀢𑁆𑀢𑀁, 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀣𑀸𑀢𑀺 𑀇𑀤𑀜𑁆𑀘 𑀦𑁂𑀓𑁆𑀔𑀫𑁆𑀫𑀲𑀺𑀢𑀲𑁄𑀫𑀦𑀲𑁆𑀲𑀯𑀲𑁂𑀦 ¶ . 𑀇𑀢𑁄 𑀧𑀭𑁂𑀲𑀼𑀧𑀺 𑀤𑁆𑀯𑀻𑀲𑀼 𑀯𑀸𑀭𑁂𑀲𑀼 𑀕𑁂𑀳𑀲𑁆𑀲𑀺𑀢𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀁𑀬𑁂𑀯 𑀤𑁄𑀫𑀦𑀲𑁆𑀲𑀸𑀦𑀜𑁆𑀘 𑀉𑀧𑁂𑀓𑁆𑀔𑀸𑀦𑀜𑁆𑀘 𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁮𑁧. 𑀏𑀯𑀁 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀯𑁂𑀤𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑁂𑀲𑀁 𑀅𑀧𑁆𑀧𑀫𑀸𑀤𑁂𑀦 𑀓𑀺𑀘𑁆𑀘𑀁 𑀓𑀢𑁆𑀢𑀩𑁆𑀩𑀁, 𑀬𑁂𑀲𑀜𑁆𑀘 𑀦 𑀓𑀢𑁆𑀢𑀩𑁆𑀩𑀁, 𑀢𑁂 𑀤𑀲𑁆𑀲𑁂𑀢𑀼𑀁 𑀦𑀸𑀳𑀁, 𑀪𑀺𑀓𑁆𑀔𑀯𑁂 ¶ , 𑀲𑀩𑁆𑀩𑁂𑀲𑀁𑀬𑁂𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀢𑀁 𑀢𑁂𑀲𑀁 𑀅𑀧𑁆𑀧𑀫𑀸𑀤𑁂𑀦𑀸𑀢𑀺 𑀢𑁂𑀲𑀁 𑀬𑀁 𑀅𑀧𑁆𑀧𑀫𑀸𑀤𑁂𑀦 𑀓𑀢𑁆𑀢𑀩𑁆𑀩𑀁, 𑀢𑀁 𑀓𑀢𑀁. 𑀅𑀦𑀼𑀮𑁄𑀫𑀺𑀓𑀸𑀦𑀻𑀢𑀺 𑀧𑀝𑀺𑀧𑀢𑁆𑀢𑀺𑀅𑀦𑀼𑀮𑁄𑀫𑀸𑀦𑀺 𑀓𑀫𑁆𑀫𑀝𑁆𑀞𑀸𑀦𑀲𑀧𑁆𑀧𑀸𑀬𑀸𑀦𑀺, 𑀬𑀢𑁆𑀣 𑀯𑀲𑀦𑁆𑀢𑁂𑀦 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀫𑀕𑁆𑀕𑀨𑀮𑀸𑀦𑀺 𑀧𑀸𑀧𑀼𑀡𑀺𑀢𑀼𑀁. 𑀇𑀦𑁆𑀤𑁆𑀭𑀺𑀬𑀸𑀦𑀺 ¶ 𑀲𑀫𑀦𑁆𑀦𑀸𑀦𑀬𑀫𑀸𑀦𑀸𑀢𑀺 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑀸𑀦𑀁 𑀓𑀼𑀭𑀼𑀫𑀸𑀦𑀸.

𑁧𑁮𑁨. 𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸𑀢𑀺 𑀇𑀥 𑀓𑀺𑀁 𑀤𑀲𑁆𑀲𑁂𑀢𑀺? 𑀬𑁂𑀲𑀁 𑀅𑀧𑁆𑀧𑀫𑀸𑀤𑁂𑀦 𑀓𑀭𑀡𑀻𑀬𑀁 𑀦𑀢𑁆𑀣𑀺, 𑀢𑁂 𑀤𑁆𑀯𑁂 𑀳𑁄𑀦𑁆𑀢𑀺. 𑀬𑁂𑀲𑀁 𑀅𑀢𑁆𑀣𑀺, 𑀢𑁂 𑀧𑀜𑁆𑀘𑀸𑀢𑀺 𑀏𑀯𑀁 𑀲𑀩𑁆𑀩𑁂𑀧𑀺 𑀇𑀫𑁂 𑀲𑀢𑁆𑀢 𑀧𑀼𑀕𑁆𑀕𑀮𑀸 𑀳𑁄𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀢𑀢𑁆𑀣 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄𑀢𑀺 𑀤𑁆𑀯𑀻𑀳𑀺 𑀪𑀸𑀕𑁂𑀳𑀺 𑀯𑀺𑀫𑀼𑀢𑁆𑀢𑁄. 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀸 𑀭𑀽𑀧𑀓𑀸𑀬𑀢𑁄 𑀯𑀺𑀫𑀼𑀢𑁆𑀢𑁄, 𑀫𑀕𑁆𑀕𑁂𑀦 𑀦𑀸𑀫𑀓𑀸𑀬𑀢𑁄. 𑀲𑁄 𑀘𑀢𑀼𑀦𑁆𑀦𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀻𑀦𑀁 𑀏𑀓𑁂𑀓𑀢𑁄 𑀯𑀼𑀝𑁆𑀞𑀸𑀬 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸𑀦𑀁 𑀘𑀢𑀼𑀦𑁆𑀦𑀁, 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑀅𑀦𑀸𑀕𑀸𑀫𑀺𑀦𑁄 𑀘 𑀯𑀲𑁂𑀦 𑀧𑀜𑁆𑀘𑀯𑀺𑀥𑁄 𑀳𑁄𑀢𑀺. 𑀧𑀸𑀴𑀺 𑀧𑀦𑁂𑀢𑁆𑀣 𑁋 ‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻’’𑀢𑀺 (𑀧𑀼. 𑀧. 𑁨𑁦𑁮) 𑀏𑀯𑀁 𑀅𑀪𑀺𑀥𑀫𑁆𑀫𑁂 𑀅𑀝𑁆𑀞𑀯𑀺𑀫𑁄𑀓𑁆𑀔𑀮𑀸𑀪𑀺𑀦𑁄 𑀯𑀲𑁂𑀦 𑀆𑀕𑀢𑀸.

𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄𑀢𑀺 𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑁄. 𑀲𑁄 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄, 𑀘𑀢𑀽𑀳𑀺 𑀛𑀸𑀦𑁂𑀳𑀺 𑀯𑀼𑀝𑁆𑀞𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸 𑀘𑀢𑁆𑀢𑀸𑀭𑁄 𑀘𑀸𑀢𑀺 𑀇𑀫𑁂𑀲𑀁 𑀯𑀲𑁂𑀦 𑀧𑀜𑁆𑀘𑀯𑀺𑀥𑁄𑀯 𑀳𑁄𑀢𑀺. 𑀧𑀸𑀴𑀺 𑀧𑀦𑁂𑀢𑁆𑀣 𑀅𑀝𑁆𑀞𑀯𑀺𑀫𑁄𑀓𑁆𑀔𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑁂𑀯 𑀆𑀕𑀢𑀸. 𑀬𑀣𑀸𑀳 𑁋 ‘‘𑀦 𑀳𑁂𑀯 𑀔𑁄 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄’’𑀢𑀺.

𑀨𑀼𑀝𑁆𑀞𑀦𑁆𑀢𑀁 ¶ 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀓𑀸𑀬𑀲𑀓𑁆𑀔𑀻. 𑀬𑁄 𑀛𑀸𑀦𑀨𑀲𑁆𑀲𑀁 𑀧𑀞𑀫𑀁 𑀨𑀼𑀲𑀢𑀺, 𑀧𑀘𑁆𑀙𑀸 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 ¶ 𑀲𑀘𑁆𑀙𑀺𑀓𑀭𑁄𑀢𑀺, 𑀲𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀝𑁆𑀞𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀝𑁆𑀞𑀸 𑀙𑀩𑁆𑀩𑀺𑀥𑁄 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑁂𑀯𑀸𑀳 𑁋 ‘‘𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀝𑁆𑀞 𑀯𑀺𑀫𑁄𑀓𑁆𑀔𑁂 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀏𑀓𑀘𑁆𑀘𑁂 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀓𑀸𑀬𑀲𑀓𑁆𑀔𑀻’’𑀢𑀺.

𑀤𑀺𑀝𑁆𑀞𑀦𑁆𑀢𑀁 ¶ 𑀧𑀢𑁆𑀢𑁄𑀢𑀺 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄. 𑀢𑀢𑁆𑀭𑀺𑀤𑀁 𑀲𑀗𑁆𑀔𑁂𑀧𑀮𑀓𑁆𑀔𑀡𑀁 𑁋 𑀤𑀼𑀓𑁆𑀔𑀸 𑀲𑀗𑁆𑀔𑀸𑀭𑀸, 𑀲𑀼𑀔𑁄 𑀦𑀺𑀭𑁄𑀥𑁄𑀢𑀺 𑀜𑀸𑀢𑀁 𑀳𑁄𑀢𑀺 𑀤𑀺𑀝𑁆𑀞𑀁 𑀯𑀺𑀤𑀺𑀢𑀁 𑀲𑀘𑁆𑀙𑀺𑀓𑀢𑀁 𑀨𑀼𑀲𑀺𑀢𑀁 𑀧𑀜𑁆𑀜𑀸𑀬𑀸𑀢𑀺 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀲𑁄𑀧𑀺 𑀓𑀸𑀬𑀲𑀓𑁆𑀔𑀺 𑀯𑀺𑀬 𑀙𑀩𑁆𑀩𑀺𑀥𑁄 𑀳𑁄𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺…𑀧𑁂… 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀸 𑀘𑀲𑁆𑀲 𑀥𑀫𑁆𑀫𑀸 𑀧𑀜𑁆𑀜𑀸𑀬 𑀯𑁄𑀤𑀺𑀝𑁆𑀞𑀸 𑀳𑁄𑀦𑁆𑀢𑀺 𑀯𑁄𑀘𑀭𑀺𑀢𑀸…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄’’𑀢𑀺 (𑀧𑀼. 𑀧. 𑁨𑁦𑁮).

𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄𑀢𑀺 𑀲𑀤𑁆𑀥𑀸𑀬 𑀯𑀺𑀫𑀼𑀢𑁆𑀢𑁄. 𑀲𑁄𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀙𑀩𑁆𑀩𑀺𑀥𑁄 𑀳𑁄𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑁋 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺…𑀧𑁂… 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸𑀢𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺 ¶ . 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀸 𑀘𑀲𑁆𑀲 𑀥𑀫𑁆𑀫𑀸 𑀧𑀜𑁆𑀜𑀸𑀬 𑀯𑁄𑀤𑀺𑀝𑁆𑀞𑀸 𑀳𑁄𑀦𑁆𑀢𑀺 𑀯𑁄𑀘𑀭𑀺𑀢𑀸…𑀧𑁂… 𑀦𑁄 𑀘 𑀔𑁄 𑀬𑀣𑀸 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄’’𑀢𑀺 (𑀧𑀼. 𑀧. 𑁨𑁦𑁮). 𑀏𑀢𑁂𑀲𑀼 𑀳𑀺 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀤𑀳𑀦𑁆𑀢𑀲𑁆𑀲 𑀯𑀺𑀬 𑀑𑀓𑀧𑁆𑀧𑁂𑀦𑁆𑀢𑀲𑁆𑀲 𑀯𑀺𑀬 𑀅𑀥𑀺𑀫𑀼𑀘𑁆𑀘𑀦𑁆𑀢𑀲𑁆𑀲 𑀯𑀺𑀬 𑀘 𑀓𑀺𑀮𑁂𑀲𑀓𑁆𑀔𑀬𑁄 𑀳𑁄𑀢𑀺, 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀓𑁆𑀔𑀡𑁂 𑀓𑀺𑀮𑁂𑀲𑀘𑁆𑀙𑁂𑀤𑀓𑀜𑀸𑀡𑀁 𑀅𑀤𑀦𑁆𑀥𑀁 𑀢𑀺𑀔𑀺𑀡𑀁 𑀲𑀽𑀭𑀁 𑀳𑀼𑀢𑁆𑀯𑀸 𑀯𑀳𑀢𑀺. 𑀢𑀲𑁆𑀫𑀸 𑀬𑀣𑀸 𑀦𑀸𑀫 𑀦𑀸𑀢𑀺𑀢𑀺𑀔𑀺𑀡𑁂𑀦 𑀅𑀲𑀺𑀦𑀸 𑀓𑀤𑀮𑀺𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀙𑀺𑀦𑁆𑀦𑀝𑁆𑀞𑀸𑀦𑀁 𑀦 𑀫𑀝𑁆𑀞𑀁 𑀳𑁄𑀢𑀺, 𑀅𑀲𑀺 𑀦 𑀲𑀻𑀖𑀁 𑀯𑀳𑀢𑀺, 𑀲𑀤𑁆𑀤𑁄 𑀲𑀼𑀬𑁆𑀬𑀢𑀺, 𑀩𑀮𑀯𑀢𑀭𑁄 𑀯𑀸𑀬𑀸𑀫𑁄 𑀓𑀸𑀢𑀩𑁆𑀩𑁄 𑀳𑁄𑀢𑀺, 𑀏𑀯𑀭𑀽𑀧𑀸 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀪𑀸𑀯𑀦𑀸. 𑀬𑀣𑀸 𑀧𑀦 𑀦𑀺𑀲𑀺𑀢𑀅𑀲𑀺𑀦𑀸 𑀓𑀤𑀮𑀺𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀙𑀺𑀦𑁆𑀦𑀝𑁆𑀞𑀸𑀦𑀁 𑀫𑀝𑁆𑀞𑀁 𑀳𑁄𑀢𑀺, 𑀅𑀲𑀺 𑀲𑀻𑀖𑀁 𑀯𑀳𑀢𑀺, 𑀲𑀤𑁆𑀤𑁄 𑀦 𑀲𑀼𑀬𑁆𑀬𑀢𑀺, 𑀩𑀮𑀯𑀯𑀸𑀬𑀸𑀫𑀓𑀺𑀘𑁆𑀘𑀁 𑀦 𑀳𑁄𑀢𑀺, 𑀏𑀯𑀭𑀽𑀧𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀪𑀸𑀯𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀥𑀫𑁆𑀫𑀁 𑀅𑀦𑀼𑀲𑁆𑀲𑀭𑀢𑀻𑀢𑀺 𑀥𑀫𑁆𑀫𑀸𑀦𑀼𑀲𑀸𑀭𑀻. 𑀥𑀫𑁆𑀫𑁄𑀢𑀺 𑀧𑀜𑁆𑀜𑀸, 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀁 𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺 𑀅𑀢𑁆𑀣𑁄. 𑀲𑀤𑁆𑀥𑀸𑀦𑀼𑀲𑀸𑀭𑀺𑀫𑁆𑀳𑀺 𑀘 𑀏𑀲𑁂𑀯 𑀦𑀬𑁄. 𑀉𑀪𑁄 𑀧𑀦𑁂𑀢𑁂 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀸𑀬𑁂𑀯. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀬𑀲𑁆𑀲 ¶ 𑀧𑀼𑀕𑁆𑀕𑀮𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺, 𑀧𑀜𑁆𑀜𑀸𑀯𑀸𑀳𑀺𑀁 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀁 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀺 ¶ . 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀥𑀫𑁆𑀫𑀸𑀦𑀼𑀲𑀸𑀭𑀻’’𑀢𑀺 (𑀧𑀼. 𑀧. 𑁨𑁦𑁮). 𑀢𑀣𑀸 𑁋 ‘‘𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑀢𑁆𑀢𑀁 𑀳𑁄𑀢𑀺, 𑀲𑀤𑁆𑀥𑀸𑀯𑀸𑀳𑀺𑀁 𑀲𑀤𑁆𑀥𑀸𑀧𑀼𑀩𑁆𑀩𑀗𑁆𑀕𑀫𑀁 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀦𑀼𑀲𑀸𑀭𑀻’’𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑀢𑁄 ¶ 𑀧𑀦𑁂𑀲𑀸 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑀸𑀤𑀺𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀜𑁆𑀜𑀸𑀪𑀸𑀯𑀦𑀸𑀥𑀺𑀓𑀸𑀭𑁂 𑀯𑀼𑀢𑁆𑀢𑀸. 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀬𑀸 𑀧𑀦𑁂𑀲𑀸 𑀏𑀢𑁂𑀲𑀁 𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀁 𑀇𑀥 𑀧𑀸𑀴𑀺 𑀆𑀕𑀢𑀸, 𑀢𑀢𑁆𑀣 𑀬𑀲𑁆𑀫𑀸 𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀦𑀸 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀆𑀭𑀼𑀧𑁆𑀧𑀸𑀢𑀺 𑀯𑀼𑀢𑁆𑀢𑁂𑀧𑀺 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸 𑀯𑀼𑀢𑁆𑀢𑀸𑀯 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸𑀢𑀺 𑀲𑀳𑀚𑀸𑀢𑀦𑀸𑀫𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸. 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸𑀢𑀺 𑀧𑀜𑁆𑀜𑀸𑀬 𑀘 𑀏𑀢𑀲𑁆𑀲 𑀅𑀭𑀺𑀬𑀲𑀘𑁆𑀘𑀥𑀫𑁆𑀫𑁂 𑀤𑀺𑀲𑁆𑀯𑀸. 𑀏𑀓𑀘𑁆𑀘𑁂 𑀆𑀲𑀯𑀸𑀢𑀺 𑀧𑀞𑀫𑀫𑀕𑁆𑀕𑀸𑀤𑀻𑀳𑀺 𑀧𑀳𑀸𑀢𑀩𑁆𑀩𑀸 𑀏𑀓𑀤𑁂𑀲𑀆𑀲𑀯𑀸. 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀸𑀢𑀺 𑀢𑀣𑀸𑀕𑀢𑁂𑀦 𑀧𑀯𑁂𑀤𑀺𑀢𑀸 𑀘𑀢𑀼𑀲𑀘𑁆𑀘𑀥𑀫𑁆𑀫𑀸. 𑀧𑀜𑁆𑀜𑀸𑀬 𑀯𑁄𑀤𑀺𑀝𑁆𑀞𑀸 𑀳𑁄𑀦𑁆𑀢𑀻𑀢𑀺 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀻𑀮𑀁 𑀓𑀣𑀺𑀢𑀁, 𑀇𑀫𑀲𑁆𑀫𑀺𑀁 𑀲𑀫𑀸𑀥𑀺, 𑀇𑀫𑀲𑁆𑀫𑀺𑀁 𑀯𑀺𑀧𑀲𑁆𑀲𑀦𑀸, 𑀇𑀫𑀲𑁆𑀫𑀺𑀁 𑀫𑀕𑁆𑀕𑁄, 𑀇𑀫𑀲𑁆𑀫𑀺𑀁 𑀨𑀮𑀦𑁆𑀢𑀺 𑀏𑀯𑀁 𑀅𑀢𑁆𑀣𑁂𑀦 𑀅𑀢𑁆𑀣𑁂 𑀓𑀸𑀭𑀡𑁂𑀦 𑀓𑀸𑀭𑀡𑁂 𑀘𑀺𑀡𑁆𑀡𑀘𑀭𑀺𑀢𑀢𑁆𑀢𑀸 𑀫𑀕𑁆𑀕𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀯𑁄𑀘𑀭𑀺𑀢𑀸𑀢𑀺 𑀯𑀺𑀘𑀭𑀺𑀢𑀸. 𑀲𑀤𑁆𑀥𑀸 𑀦𑀺𑀯𑀺𑀝𑁆𑀞𑀸 𑀳𑁄𑀢𑀻𑀢𑀺 𑀑𑀓𑀧𑁆𑀧𑀦𑀲𑀤𑁆𑀥𑀸 𑀧𑀢𑀺𑀝𑁆𑀞𑀺𑀢𑀸 𑀳𑁄𑀢𑀺. 𑀫𑀢𑁆𑀢𑀲𑁄 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀻𑀢𑀺 𑀫𑀢𑁆𑀢𑀸𑀬 𑀑𑀮𑁄𑀓𑀦𑀁 𑀔𑀫𑀦𑁆𑀢𑀺. 𑀲𑀤𑁆𑀥𑀸𑀫𑀢𑁆𑀢𑀦𑁆𑀢𑀺 𑀲𑀤𑁆𑀥𑀸𑀬𑁂𑀯, 𑀇𑀢𑀭𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁 ¶

𑀇𑀢𑀺 𑀇𑀫𑁂𑀲𑀼 𑀅𑀧𑁆𑀧𑀫𑀸𑀤𑁂𑀦 𑀓𑀭𑀡𑀻𑀬𑁂𑀲𑀼 𑀧𑀼𑀕𑁆𑀕𑀮𑁂𑀲𑀼 𑀢𑀬𑁄 𑀧𑀝𑀺𑀯𑀺𑀤𑁆𑀥𑀫𑀕𑁆𑀕𑀨𑀮𑀸 𑀲𑁂𑀔𑀸. 𑀢𑁂𑀲𑀼 𑀅𑀦𑀼𑀮𑁄𑀫𑀲𑁂𑀦𑀸𑀲𑀦𑀁 𑀲𑁂𑀯𑀫𑀸𑀦𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀪𑀚𑀫𑀸𑀦𑀸 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑀦𑁆𑀦𑀸𑀦𑀬𑀫𑀸𑀦𑀸 𑀅𑀦𑀼𑀧𑀼𑀩𑁆𑀩𑁂𑀦 𑀅𑀭𑀳𑀢𑁆𑀢𑀁 𑀕𑀡𑁆𑀳𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀁 𑀬𑀣𑀸𑀞𑀺𑀢𑁄𑀯 𑀧𑀸𑀴𑀺𑀅𑀢𑁆𑀣𑁄. 𑀅𑀯𑀲𑀸𑀦𑁂 𑀧𑀦 𑀤𑁆𑀯𑁂 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑀫𑀗𑁆𑀕𑀺𑀦𑁄. 𑀢𑁂𑀳𑀺 𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀦𑀼𑀮𑁄𑀫𑀲𑁂𑀦𑀸𑀲𑀦𑀁 𑀲𑁂𑀯𑀺𑀢𑀁, 𑀓𑀮𑁆𑀬𑀸𑀡𑀫𑀺𑀢𑁆𑀢𑀸 𑀪𑀚𑀺𑀢𑀸, 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑀦𑁆𑀦𑀸𑀦𑀻𑀢𑀸𑀦𑀺. 𑀉𑀧𑀭𑀺 𑀧𑀦 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀅𑀢𑁆𑀣𑀸𑀬 𑀲𑁂𑀯𑀫𑀸𑀦𑀸 𑀪𑀚𑀫𑀸𑀦𑀸 𑀲𑀫𑀦𑁆𑀦𑀸𑀦𑀬𑀫𑀸𑀦𑀸 𑀅𑀦𑀼𑀧𑀼𑀩𑁆𑀩𑁂𑀦 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀧𑀸𑀴𑀺𑀅𑀢𑁆𑀣𑁄.

𑀯𑀺𑀢𑀡𑁆𑀟𑀯𑀸𑀤𑀻 𑀧𑀦 𑀇𑀫𑀫𑁂𑀯 𑀧𑀸𑀴𑀺𑀁 𑀕𑀳𑁂𑀢𑁆𑀯𑀸 𑁋 ‘‘𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑁄, 𑀩𑀳𑀼𑀘𑀺𑀢𑁆𑀢𑀓𑁆𑀔𑀡𑀺𑀓𑁄’’𑀢𑀺 𑀯𑀤𑀢𑀺. 𑀲𑁄 𑀯𑀢𑁆𑀢𑀩𑁆𑀩𑁄 𑁋 ‘‘𑀬𑀤𑀺 𑀅𑀜𑁆𑀜𑁂𑀦 𑀘𑀺𑀢𑁆𑀢𑁂𑀦 𑀲𑁂𑀦𑀸𑀲𑀦𑀁 𑀧𑀝𑀺𑀲𑁂𑀯𑀢𑀺, 𑀅𑀜𑁆𑀜𑁂𑀦 ¶ 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀪𑀚𑀢𑀺, 𑀅𑀜𑁆𑀜𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑀦𑁆𑀦𑀸𑀦𑁂𑀢𑀺, 𑀅𑀜𑁆𑀜𑀁 𑀫𑀕𑁆𑀕𑀘𑀺𑀢𑁆𑀢𑀦𑁆𑀢𑀺 𑀲𑀦𑁆𑀥𑀸𑀬 𑀢𑁆𑀯𑀁 ‘𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑁄 𑀫𑀕𑁆𑀕𑁄, 𑀩𑀳𑀼𑀘𑀺𑀢𑁆𑀢𑀓𑁆𑀔𑀡𑀺𑀓𑁄’𑀢𑀺 𑀯𑀤𑀲𑀺, 𑀏𑀯𑀁 𑀲𑀦𑁆𑀢𑁂 𑀲𑁂𑀦𑀸𑀲𑀦𑀁 𑀲𑁂𑀯𑀫𑀸𑀦𑁄 𑀦𑀻𑀮𑁄𑀪𑀸𑀲𑀁 𑀧𑀩𑁆𑀩𑀢𑀁 𑀧𑀲𑁆𑀲𑀢𑀺, 𑀯𑀦𑀁 𑀧𑀲𑁆𑀲𑀢𑀺, 𑀫𑀺𑀕𑀧𑀓𑁆𑀔𑀻𑀦𑀁 ¶ 𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀧𑀼𑀧𑁆𑀨𑀨𑀮𑀸𑀦𑀁 𑀕𑀦𑁆𑀥𑀁 𑀖𑀸𑀬𑀢𑀺, 𑀧𑀸𑀦𑀻𑀬𑀁 𑀧𑀺𑀯𑀦𑁆𑀢𑁄 𑀭𑀲𑀁 𑀲𑀸𑀬𑀢𑀺, 𑀦𑀺𑀲𑀻𑀤𑀦𑁆𑀢𑁄 𑀦𑀺𑀧𑀚𑁆𑀚𑀦𑁆𑀢𑁄 𑀨𑀲𑁆𑀲𑀁 𑀨𑀼𑀲𑀢𑀺. 𑀏𑀯𑀁 𑀢𑁂 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀻𑀧𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀫𑀗𑁆𑀕𑀻𑀬𑁂𑀯 𑀪𑀯𑀺𑀲𑁆𑀲𑀢𑀺. 𑀲𑀘𑁂 𑀧𑀦𑁂𑀢𑀁 𑀲𑀫𑁆𑀧𑀝𑀺𑀘𑁆𑀙𑀲𑀺, 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀧𑀝𑀺𑀯𑀺𑀭𑀼𑀚𑁆𑀛𑀲𑀺. 𑀲𑀢𑁆𑀣𑀸𑀭𑀸 𑀳𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑀓𑀸𑀬𑀸 𑀏𑀓𑀦𑁆𑀢𑀁 𑀅𑀩𑁆𑀬𑀸𑀓𑀢𑀸𑀯 𑀯𑀼𑀢𑁆𑀢𑀸, 𑀢𑀁𑀲𑀫𑀗𑁆𑀕𑀺𑀲𑁆𑀲 𑀓𑀼𑀲𑀮𑀸𑀓𑀼𑀲𑀮𑀁 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀘 𑀏𑀓𑀦𑁆𑀢𑀓𑀼𑀲𑀮𑁄. 𑀢𑀲𑁆𑀫𑀸 𑀧𑀚𑀳𑁂𑀢𑀁 𑀯𑀸𑀤’’𑀦𑁆𑀢𑀺 𑀧𑀜𑁆𑀜𑀧𑁂𑀢𑀩𑁆𑀩𑁄. 𑀲𑀘𑁂 𑀧𑀜𑁆𑀜𑀢𑁆𑀢𑀺𑀁 𑀦 𑀉𑀧𑀕𑀘𑁆𑀙𑀢𑀺, ‘‘𑀕𑀘𑁆𑀙 𑀧𑀸𑀢𑁄𑀯 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀬𑀸𑀕𑀼𑀁 𑀧𑀺𑀯𑀸𑀳𑀻’’𑀢𑀺 𑀉𑀬𑁆𑀬𑁄𑀚𑁂𑀢𑀩𑁆𑀩𑁄.

𑁧𑁮𑁩. 𑀦𑀸𑀳𑀁 ¶ , 𑀪𑀺𑀓𑁆𑀔𑀯𑁂, 𑀆𑀤𑀺𑀓𑁂𑀦𑁂𑀯𑀸𑀢𑀺 𑀅𑀳𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑀫𑁂𑀯 𑀫𑀡𑁆𑀟𑀽𑀓𑀲𑁆𑀲 𑀉𑀧𑁆𑀧𑀢𑀺𑀢𑁆𑀯𑀸 𑀕𑀫𑀦𑀁 𑀯𑀺𑀬 𑀅𑀜𑁆𑀜𑀸𑀭𑀸𑀥𑀦𑀁 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀦𑀁 𑀦 𑀯𑀤𑀸𑀫𑀺. 𑀅𑀦𑀼𑀧𑀼𑀩𑁆𑀩𑀲𑀺𑀓𑁆𑀔𑀸𑀢𑀺 𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀧𑀭𑀢𑁄 𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀤𑁆𑀥𑀸𑀚𑀸𑀢𑁄𑀢𑀺 𑀑𑀓𑀧𑁆𑀧𑀦𑀺𑀬𑀲𑀤𑁆𑀥𑀸𑀬 𑀚𑀸𑀢𑀲𑀤𑁆𑀥𑁄. 𑀉𑀧𑀲𑀗𑁆𑀓𑀫𑀢𑀻𑀢𑀺 𑀕𑀭𑀽𑀦𑀁 𑀲𑀫𑀻𑀧𑀁 𑀕𑀘𑁆𑀙𑀢𑀺. 𑀧𑀬𑀺𑀭𑀼𑀧𑀸𑀲𑀢𑀻𑀢𑀺 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀢𑀺. 𑀥𑀸𑀭𑁂𑀢𑀻𑀢𑀺 𑀲𑀸𑀥𑀼𑀓𑀁 𑀓𑀢𑁆𑀯𑀸 𑀥𑀸𑀭𑁂𑀢𑀺. 𑀙𑀦𑁆𑀤𑁄 𑀚𑀸𑀬𑀢𑀻𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀓𑀼𑀲𑀮𑀘𑁆𑀙𑀦𑁆𑀤𑁄 𑀚𑀸𑀬𑀢𑀺. 𑀉𑀲𑁆𑀲𑀳𑀢𑀻𑀢𑀺 𑀯𑀻𑀭𑀺𑀬𑀁 𑀓𑀭𑁄𑀢𑀺. 𑀢𑀼𑀮𑁂𑀢𑀻𑀢𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀢𑀼𑀮𑀬𑀢𑀺. 𑀢𑀼𑀮𑀬𑀺𑀢𑁆𑀯𑀸 𑀧𑀤𑀳𑀢𑀻𑀢𑀺 𑀏𑀯𑀁 𑀢𑀻𑀭𑀡𑀯𑀺𑀧𑀲𑁆𑀲𑀦𑀸𑀬 𑀢𑀼𑀮𑀬𑀦𑁆𑀢𑁄 𑀫𑀕𑁆𑀕𑀧𑀥𑀸𑀦𑀁 𑀧𑀤𑀳𑀢𑀺. 𑀧𑀳𑀺𑀢𑀢𑁆𑀢𑁄𑀢𑀺 𑀧𑁂𑀲𑀺𑀢𑀘𑀺𑀢𑁆𑀢𑁄. 𑀓𑀸𑀬𑁂𑀦 𑀘𑁂𑀯 𑀧𑀭𑀫𑀲𑀘𑁆𑀘𑀦𑁆𑀢𑀺 𑀦𑀸𑀫𑀓𑀸𑀬𑁂𑀦 𑀦𑀺𑀩𑁆𑀩𑀸𑀦𑀲𑀘𑁆𑀘𑀁 𑀲𑀘𑁆𑀙𑀺𑀓𑀭𑁄𑀢𑀺. 𑀧𑀜𑁆𑀜𑀸𑀬 𑀘𑀸𑀢𑀺 𑀦𑀸𑀫𑀓𑀸𑀬𑀲𑀫𑁆𑀧𑀬𑀼𑀢𑁆𑀢𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀧𑀝𑀺𑀯𑀺𑀚𑁆𑀛𑀢𑀺 𑀧𑀲𑁆𑀲𑀢𑀺.

𑀇𑀤𑀸𑀦𑀺 𑀬𑀲𑁆𑀫𑀸 𑀢𑁂 𑀲𑀢𑁆𑀣𑀼 𑀆𑀕𑀫𑀦𑀁 𑀲𑀼𑀢𑁆𑀯𑀸 𑀧𑀘𑁆𑀘𑀼𑀕𑁆𑀕𑀫𑀦𑀫𑀢𑁆𑀢𑀫𑁆𑀧𑀺 𑀦 𑀅𑀓𑀁𑀲𑀼, 𑀢𑀲𑁆𑀫𑀸 𑀢𑁂𑀲𑀁 𑀘𑀭𑀺𑀬𑀁 𑀕𑀭𑀳𑀦𑁆𑀢𑁄 𑀲𑀸𑀧𑀺 𑀦𑀸𑀫, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀸 𑀦𑀸𑀳𑁄𑀲𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀻𑀯𑀤𑀽𑀭𑁂𑀯𑀺𑀫𑁂𑀢𑀺 𑀓𑀺𑀢𑁆𑀢𑀓𑀁 𑀤𑀽𑀭𑁂 𑀞𑀸𑀦𑁂. 𑀬𑁄𑀚𑀦𑀲𑀢𑀫𑁆𑀧𑀺 𑀬𑁄𑀚𑀦𑀲𑀳𑀲𑁆𑀲𑀫𑁆𑀧𑀺 𑀅𑀧𑀓𑁆𑀓𑀦𑁆𑀢𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺, 𑀦 𑀧𑀦 𑀓𑀺𑀜𑁆𑀘𑀺 𑀆𑀳. 𑀘𑀢𑀼𑀧𑁆𑀧𑀤𑀁 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺 𑀘𑀢𑀼𑀲𑀘𑁆𑀘𑀩𑁆𑀬𑀸𑀓𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁧𑁮𑁪. 𑀬𑀲𑁆𑀲𑀼𑀤𑁆𑀤𑀺𑀝𑁆𑀞𑀲𑁆𑀲𑀸𑀢𑀺 𑀬𑀲𑁆𑀲 𑀉𑀤𑁆𑀤𑀺𑀝𑁆𑀞𑀲𑁆𑀲. 𑀬𑁄𑀧𑀺 ¶ 𑀲𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀣𑀸𑀢𑀺 𑀩𑀸𑀳𑀺𑀭𑀓𑀲𑀢𑁆𑀣𑀸𑀭𑀁 𑀤𑀲𑁆𑀲𑁂𑀢𑀺. 𑀏𑀯𑀭𑀽𑀧𑀻𑀢𑀺 𑀏𑀯𑀁𑀚𑀸𑀢𑀺𑀓𑀸. 𑀧𑀡𑁄𑀧𑀡𑀯𑀺𑀬𑀸𑀢𑀺 𑀧𑀡𑀯𑀺𑀬𑀸 𑀘 𑀑𑀧𑀡𑀯𑀺𑀬𑀸 𑀘 ¶ . 𑀦 𑀉𑀧𑁂𑀢𑀻𑀢𑀺 𑀦 𑀳𑁄𑀢𑀺. 𑀓𑀬𑀯𑀺𑀓𑁆𑀓𑀬𑀓𑀸𑀮𑁂 𑀯𑀺𑀬 𑀅𑀕𑁆𑀖𑀯𑀟𑁆𑀠𑀦𑀳𑀸𑀧𑀦𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀕𑁄𑀡𑁄 ¶ 𑀓𑀺𑀁 𑀅𑀕𑁆𑀖𑀢𑀺, 𑀯𑀻𑀲𑀢𑀺 𑀅𑀕𑁆𑀖𑀢𑀻𑀢𑀺 𑀪𑀡𑀦𑁆𑀢𑁄 𑀧𑀡𑀢𑀺 𑀦𑀸𑀫. 𑀦 𑀯𑀻𑀲𑀢𑀺 𑀅𑀕𑁆𑀖𑀢𑀺, 𑀤𑀲 𑀅𑀕𑁆𑀖𑀢𑀻𑀢𑀺 𑀪𑀡𑀦𑁆𑀢𑁄 𑀑𑀧𑀡𑀢𑀺 𑀦𑀸𑀫. 𑀇𑀤𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 𑀆𑀳 ‘‘𑀧𑀡𑁄𑀧𑀡𑀯𑀺𑀬𑀸 𑀦 𑀉𑀧𑁂𑀢𑀻’’𑀢𑀺. 𑀇𑀤𑀸𑀦𑀺 𑀢𑀁 𑀧𑀡𑁄𑀧𑀡𑀯𑀺𑀬𑀁 𑀤𑀲𑁆𑀲𑁂𑀢𑀼𑀁 𑀏𑀯𑀜𑁆𑀘 𑀦𑁄 𑀅𑀲𑁆𑀲, 𑀅𑀣 𑀦𑀁 𑀓𑀭𑁂𑀬𑁆𑀬𑀸𑀫, 𑀦 𑀘 𑀦𑁄 𑀏𑀯𑀫𑀲𑁆𑀲, 𑀦 𑀦𑀁 𑀓𑀭𑁂𑀬𑁆𑀬𑀸𑀫𑀸𑀢𑀺 𑀆𑀳.

𑀓𑀺𑀁 𑀧𑀦, 𑀪𑀺𑀓𑁆𑀔𑀯𑁂𑀢𑀺, 𑀪𑀺𑀓𑁆𑀔𑀯𑁂, 𑀬𑀁 𑀢𑀣𑀸𑀕𑀢𑁄 𑀲𑀩𑁆𑀩𑀲𑁄 𑀆𑀫𑀺𑀲𑁂𑀳𑀺 𑀯𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺, 𑀏𑀯𑀁 𑀯𑀺𑀲𑀁𑀲𑀝𑁆𑀞𑀲𑁆𑀲 𑀲𑀢𑁆𑀣𑀼𑀦𑁄 𑀏𑀯𑀭𑀽𑀧𑀸 𑀧𑀡𑁄𑀧𑀡𑀯𑀺𑀬𑀸 𑀓𑀺𑀁 𑀬𑀼𑀚𑁆𑀚𑀺𑀲𑁆𑀲𑀢𑀺? 𑀧𑀭𑀺𑀬𑁄𑀕𑀸𑀳𑀺𑀬 𑀯𑀢𑁆𑀢𑀢𑁄𑀢𑀺 𑀧𑀭𑀺𑀬𑁄𑀕𑀸𑀳𑀺𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀳𑁂𑀢𑁆𑀯𑀸 𑀯𑀢𑁆𑀢𑀦𑁆𑀢𑀲𑁆𑀲. 𑀅𑀬𑀫𑀦𑀼𑀥𑀫𑁆𑀫𑁄𑀢𑀺 𑀅𑀬𑀁 𑀲𑀪𑀸𑀯𑁄. 𑀚𑀸𑀦𑀸𑀢𑀺 𑀪𑀕𑀯𑀸, 𑀦𑀸𑀳𑀁 𑀚𑀸𑀦𑀸𑀫𑀻𑀢𑀺 𑀪𑀕𑀯𑀸 𑀏𑀓𑀸𑀲𑀦𑀪𑁄𑀚𑀦𑁂 𑀆𑀦𑀺𑀲𑀁𑀲𑀁 𑀚𑀸𑀦𑀸𑀢𑀺, 𑀅𑀳𑀁 𑀦 𑀚𑀸𑀦𑀸𑀫𑀻𑀢𑀺 𑀫𑀬𑀺 𑀲𑀤𑁆𑀥𑀸𑀬 𑀤𑀺𑀯𑀲𑀲𑁆𑀲 𑀢𑀬𑁄 𑀯𑀸𑀭𑁂 𑀪𑁄𑀚𑀦𑀁 𑀧𑀳𑀸𑀬 𑀏𑀓𑀸𑀲𑀦𑀪𑁄𑀚𑀦𑀁 𑀪𑀼𑀜𑁆𑀚𑀢𑀺. 𑀭𑀼𑀴𑀳𑀦𑀻𑀬𑀦𑁆𑀢𑀺 𑀭𑁄𑀳𑀦𑀻𑀬𑀁. 𑀑𑀚𑀯𑀦𑁆𑀢𑀦𑁆𑀢𑀺 𑀲𑀺𑀦𑁂𑀳𑀯𑀦𑁆𑀢𑀁. 𑀓𑀸𑀫𑀁 𑀢𑀘𑁄 𑀘𑀸𑀢𑀺 𑀇𑀫𑀺𑀦𑀸 𑀘𑀢𑀼𑀭𑀗𑁆𑀕𑀯𑀻𑀭𑀺𑀬𑀁 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀳𑀺 𑀢𑀘𑁄 𑀏𑀓𑀁 𑀅𑀗𑁆𑀕𑀁, 𑀦𑁆𑀳𑀸𑀭𑀼 𑀏𑀓𑀁, 𑀅𑀝𑁆𑀞𑀺 𑀏𑀓𑀁, 𑀫𑀁𑀲𑀮𑁄𑀳𑀺𑀢𑀁 𑀏𑀓𑀦𑁆𑀢𑀺 𑀏𑀯𑀁 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀅𑀧𑁆𑀧𑀢𑁆𑀯𑀸 𑀦 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀧𑀝𑀺𑀧𑀚𑁆𑀚𑀢𑀻𑀢𑀺 ¶ 𑀤𑀲𑁆𑀲𑁂𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀤𑁂𑀲𑀦𑀁 𑀧𑀦 𑀪𑀕𑀯𑀸 𑀦𑁂𑀬𑁆𑀬𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀦𑀺𑀝𑁆𑀞𑀸𑀧𑁂𑀲𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀓𑀻𑀝𑀸𑀕𑀺𑀭𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀭𑀺𑀩𑁆𑀩𑀸𑀚𑀓𑀯𑀕𑁆𑀕𑁄

𑁧. 𑀢𑁂𑀯𑀺𑀚𑁆𑀚𑀯𑀘𑁆𑀙𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁫. 𑀏𑀯𑀁 ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀢𑁂𑀯𑀺𑀚𑁆𑀚𑀯𑀘𑁆𑀙𑀲𑀼𑀢𑁆𑀢𑀁. 𑀢𑀢𑁆𑀣 𑀏𑀓𑀧𑀼𑀡𑁆𑀟𑀭𑀻𑀓𑁂𑀢𑀺 𑀧𑀼𑀡𑁆𑀟𑀭𑀻𑀓𑁄 𑀯𑀼𑀘𑁆𑀘𑀢𑀺 𑀲𑁂𑀢𑀫𑁆𑀩𑀭𑀼𑀓𑁆𑀔𑁄, 𑀲𑁄 𑀢𑀲𑁆𑀫𑀺𑀁 𑀆𑀭𑀸𑀫𑁂 𑀏𑀓𑁄 𑀧𑀼𑀡𑁆𑀟𑀭𑀻𑀓𑁄 𑀅𑀢𑁆𑀣𑀻𑀢𑀺 𑀏𑀓𑀧𑀼𑀡𑁆𑀟𑀭𑀻𑀓𑁄. 𑀏𑀢𑀤𑀳𑁄𑀲𑀻𑀢𑀺 𑀢𑀢𑁆𑀣 𑀧𑀯𑀺𑀲𑀺𑀢𑀼𑀓𑀸𑀫𑀢𑀸𑀬 𑀅𑀳𑁄𑀲𑀺. 𑀘𑀺𑀭𑀲𑁆𑀲𑀁 𑀔𑁄, 𑀪𑀦𑁆𑀢𑁂𑀢𑀺 𑀧𑀓𑀢𑀺𑀬𑀸 𑀆𑀕𑀢𑀧𑀼𑀩𑁆𑀩𑀢𑀁 𑀉𑀧𑀸𑀤𑀸𑀬. 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀦𑁆𑀢𑀺 𑀇𑀥 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀥𑀫𑁆𑀫𑁄 𑀦𑀸𑀫, 𑀫𑀳𑀸𑀚𑀦𑀲𑁆𑀲 𑀩𑁆𑀬𑀸𑀓𑀭𑀡𑀁 𑀅𑀦𑀼𑀥𑀫𑁆𑀫𑁄 𑀦𑀸𑀫. 𑀲𑁂𑀲𑀁 𑀚𑀻𑀯𑀓𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁫𑁧 𑀆𑀤𑀬𑁄) 𑀯𑀼𑀢𑁆𑀢𑀦𑀬𑀫𑁂𑀯. 𑀦 𑀫𑁂 𑀢𑁂𑀢𑀺 𑀅𑀦𑀦𑀼𑀜𑁆𑀜𑀸𑀬 𑀞𑀢𑁆𑀯𑀸 𑀅𑀦𑀼𑀜𑁆𑀜𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀢𑀺. ‘‘𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀤𑀲𑁆𑀲𑀸𑀯𑀻 𑀅𑀧𑀭𑀺𑀲𑁂𑀲𑀁 𑀜𑀸𑀡𑀤𑀲𑁆𑀲𑀦𑀁 𑀧𑀝𑀺𑀚𑀸𑀦𑀸𑀢𑀻’’𑀢𑀺 𑀳𑀺 𑀇𑀤𑀁 𑀅𑀦𑀼𑀚𑀸𑀦𑀺𑀢𑀩𑁆𑀩𑀁 𑀲𑀺𑀬𑀸, 𑁋 ‘‘𑀘𑀭𑀢𑁄 𑀘 𑀫𑁂…𑀧𑁂… 𑀧𑀘𑁆𑀘𑀼𑀧𑀝𑁆𑀞𑀺𑀢’’𑀦𑁆𑀢𑀺 𑀇𑀤𑀁 𑀧𑀦 𑀦𑀸𑀦𑀼𑀚𑀸𑀦𑀺𑀢𑀩𑁆𑀩𑀁. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀳𑀺 𑀆𑀯𑀚𑁆𑀚𑀺𑀢𑁆𑀯𑀸 𑀧𑀚𑀸𑀦𑀸𑀢𑀺. 𑀢𑀲𑁆𑀫𑀸 𑀅𑀦𑀦𑀼𑀜𑁆𑀜𑀸𑀬 𑀞𑀢𑁆𑀯𑀸 𑀅𑀦𑀼𑀜𑁆𑀜𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀏𑀯𑀫𑀸𑀳.

𑁧𑁮𑁬. 𑀆𑀲𑀯𑀸𑀦𑀁 𑀔𑀬𑀸𑀢𑀺 𑀏𑀢𑁆𑀣 𑀲𑀓𑀺𑀁 𑀔𑀻𑀡𑀸𑀦𑀁 𑀆𑀲𑀯𑀸𑀦𑀁 𑀧𑀼𑀦 𑀔𑁂𑀧𑁂𑀢𑀩𑁆𑀩𑀸𑀪𑀸𑀯𑀸 𑀬𑀸𑀯𑀤𑁂𑀯𑀸𑀢𑀺 𑀦 𑀯𑀼𑀢𑁆𑀢𑀁. 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀘𑁂𑀢𑁆𑀣 𑀪𑀕𑀯𑀸 𑀅𑀢𑀻𑀢𑀚𑀸𑀦𑀦𑀕𑀼𑀡𑀁 𑀤𑀲𑁆𑀲𑁂𑀢𑀺, 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑁂𑀦 ¶ 𑀧𑀘𑁆𑀘𑀼𑀧𑁆𑀧𑀦𑁆𑀦𑀚𑀸𑀦𑀦𑀕𑀼𑀡𑀁, 𑀆𑀲𑀯𑀓𑁆𑀔𑀬𑀜𑀸𑀡𑁂𑀦 𑀮𑁄𑀓𑀼𑀢𑁆𑀢𑀭𑀕𑀼𑀡𑀦𑁆𑀢𑀺. 𑀇𑀢𑀺 𑀇𑀫𑀸𑀳𑀺 𑀢𑀻𑀳𑀺 𑀯𑀺𑀚𑁆𑀚𑀸𑀳𑀺 𑀲𑀓𑀮𑀩𑀼𑀤𑁆𑀥𑀕𑀼𑀡𑁂 𑀲𑀁𑀔𑀺𑀧𑀺𑀢𑁆𑀯𑀸 𑀓𑀣𑁂𑀲𑀺.

𑀕𑀺𑀳𑀺𑀲𑀁𑀬𑁄𑀚𑀦𑀦𑁆𑀢𑀺 𑀕𑀺𑀳𑀺𑀩𑀦𑁆𑀥𑀦𑀁 𑀕𑀺𑀳𑀺𑀧𑀭𑀺𑀓𑁆𑀔𑀸𑀭𑁂𑀲𑀼 𑀦𑀺𑀓𑀦𑁆𑀢𑀺𑀁. 𑀦𑀢𑁆𑀣𑀺 𑀔𑁄 𑀯𑀘𑁆𑀙𑀸𑀢𑀺 𑀕𑀺𑀳𑀺𑀲𑀁𑀬𑁄𑀚𑀦𑀁 𑀅𑀧𑁆𑀧𑀳𑀸𑀬 𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀦𑀸𑀫 𑀦𑀢𑁆𑀣𑀺. 𑀬𑁂𑀧𑀺 𑀳𑀺 𑀲𑀦𑁆𑀢𑀢𑀺𑀫𑀳𑀸𑀫𑀢𑁆𑀢𑁄 𑀉𑀕𑁆𑀕𑀲𑁂𑀦𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀯𑀻𑀢𑀲𑁄𑀓𑀤𑀸𑀭𑀓𑁄𑀢𑀺 𑀕𑀺𑀳𑀺𑀮𑀺𑀗𑁆𑀕𑁂 𑀞𑀺𑀢𑀸𑀯 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸, 𑀢𑁂𑀧𑀺 𑀫𑀕𑁆𑀕𑁂𑀦 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀓𑀦𑁆𑀢𑀺𑀁 ¶ 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀧𑀢𑁆𑀢𑀸. 𑀢𑀁 𑀧𑀢𑁆𑀯𑀸 𑀧𑀦 𑀦 𑀢𑁂𑀦 𑀮𑀺𑀗𑁆𑀕𑁂𑀦 𑀅𑀝𑁆𑀞𑀁𑀲𑀼, 𑀕𑀺𑀳𑀺𑀮𑀺𑀗𑁆𑀕𑀁 𑀦𑀸𑀫𑁂𑀢𑀁 𑀳𑀻𑀦𑀁, 𑀉𑀢𑁆𑀢𑀫𑀕𑀼𑀡𑀁 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀢𑀢𑁆𑀣 𑀞𑀺𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑀁𑀤𑀺𑀯𑀲𑀫𑁂𑀯 𑀧𑀩𑁆𑀩𑀚𑀢𑀺 𑀯𑀸 𑀧𑀭𑀺𑀦𑀺𑀩𑁆𑀩𑀸𑀢𑀺 𑀯𑀸. 𑀪𑀽𑀫𑀤𑁂𑀯𑀢𑀸 𑀧𑀦 𑀢𑀺𑀝𑁆𑀞𑀦𑁆𑀢𑀺. 𑀓𑀲𑁆𑀫𑀸? 𑀦𑀺𑀮𑀻𑀬𑀦𑁄𑀓𑀸𑀲𑀲𑁆𑀲 𑀅𑀢𑁆𑀣𑀺𑀢𑀸𑀬. 𑀲𑁂𑀲𑀓𑀸𑀫𑀪𑀯𑁂 𑀫𑀦𑀼𑀲𑁆𑀲𑁂𑀲𑀼 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀢𑀬𑁄 𑀢𑀺𑀝𑁆𑀞𑀦𑁆𑀢𑀺, 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼 ¶ 𑀲𑁄𑀢𑀸𑀧𑀦𑁆𑀦𑀸 𑀲𑀓𑀤𑀸𑀕𑀸𑀫𑀺𑀦𑁄 𑀘, 𑀅𑀦𑀸𑀕𑀸𑀫𑀺𑀔𑀻𑀡𑀸𑀲𑀯𑀸 𑀧𑀦𑁂𑀢𑁆𑀣 𑀦 𑀢𑀺𑀝𑁆𑀞𑀦𑁆𑀢𑀺. 𑀓𑀲𑁆𑀫𑀸? 𑀢𑀜𑁆𑀳𑀺 𑀞𑀸𑀦𑀁 𑀮𑀴𑀺𑀢𑀚𑀦𑀲𑁆𑀲 𑀆𑀯𑀸𑀲𑁄, 𑀦𑀢𑁆𑀣𑀺 𑀢𑀢𑁆𑀣 𑀢𑁂𑀲𑀁 𑀧𑀯𑀺𑀯𑁂𑀓𑀸𑀭𑀳𑀁 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑀜𑁆𑀘. 𑀇𑀢𑀺 𑀢𑀢𑁆𑀣 𑀔𑀻𑀡𑀸𑀲𑀯𑁄 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀅𑀦𑀸𑀕𑀸𑀫𑀻 𑀘𑀯𑀺𑀢𑁆𑀯𑀸 𑀲𑀼𑀤𑁆𑀥𑀸𑀯𑀸𑀲𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀓𑀸𑀫𑀸𑀯𑀘𑀭𑀤𑁂𑀯𑀢𑁄 𑀉𑀧𑀭𑀺 𑀧𑀦 𑀘𑀢𑁆𑀢𑀸𑀭𑁄𑀧𑀺 𑀅𑀭𑀺𑀬𑀸 𑀢𑀺𑀝𑁆𑀞𑀦𑁆𑀢𑀺.

𑀲𑁄𑀧𑀸𑀲𑀺 𑀓𑀫𑁆𑀫𑀯𑀸𑀤𑀻𑀢𑀺 𑀲𑁄𑀧𑀺 𑀓𑀫𑁆𑀫𑀯𑀸𑀤𑀻 𑀅𑀳𑁄𑀲𑀺, 𑀓𑀺𑀭𑀺𑀬𑀫𑁆𑀧𑀺 𑀦 𑀧𑀝𑀺𑀩𑀸𑀳𑀺𑀢𑁆𑀣. 𑀢𑀜𑁆𑀳𑀺 𑀏𑀓𑀦𑀯𑀼𑀢𑀺𑀓𑀧𑁆𑀧𑀫𑀢𑁆𑀣𑀓𑁂 𑀅𑀢𑁆𑀢𑀸𑀦𑀁𑀬𑁂𑀯 𑀕𑀳𑁂𑀢𑁆𑀯𑀸 𑀓𑀣𑁂𑀢𑀺. 𑀢𑀤𑀸 𑀓𑀺𑀭 𑀫𑀳𑀸𑀲𑀢𑁆𑀢𑁄 𑀧𑀸𑀲𑀡𑁆𑀟𑀧𑀭𑀺𑀕𑁆𑀕𑀡𑁆𑀳𑀦𑀢𑁆𑀣𑀁 𑀧𑀩𑁆𑀩𑀚𑀺𑀢𑁄 𑀢𑀲𑁆𑀲𑀧𑀺 𑀧𑀸𑀲𑀡𑁆𑀟𑀲𑁆𑀲 𑀦𑀺𑀧𑁆𑀨𑀮𑀪𑀸𑀯𑀁 ¶ 𑀚𑀸𑀦𑀺𑀢𑁆𑀯𑀸 𑀯𑀻𑀭𑀺𑀬𑀁 𑀦 𑀳𑀸𑀧𑁂𑀲𑀺, 𑀓𑀺𑀭𑀺𑀬𑀯𑀸𑀤𑀻 𑀳𑀼𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀢𑁂𑀯𑀺𑀚𑁆𑀚𑀯𑀘𑁆𑀙𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀕𑁆𑀕𑀺𑀯𑀘𑁆𑀙𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁭. 𑀏𑀯𑀁 ¶ 𑀫𑁂 𑀲𑀼𑀢𑀦𑁆𑀢𑀺 𑀅𑀕𑁆𑀕𑀺𑀯𑀘𑁆𑀙𑀲𑀼𑀢𑁆𑀢𑀁. 𑀢𑀢𑁆𑀣 𑀦 𑀔𑁄 𑀅𑀳𑀦𑁆𑀢𑀺 𑀧𑀞𑀫𑀯𑀸𑀭𑁂 𑀦𑀸𑀳𑀁 𑀲𑀲𑁆𑀲𑀢𑀤𑀺𑀝𑁆𑀞𑀺𑀓𑁄𑀢𑀺 𑀯𑀤𑀢𑀺, 𑀤𑀼𑀢𑀺𑀬𑁂 𑀦𑀸𑀳𑀁 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀓𑁄𑀢𑀺. 𑀏𑀯𑀁 𑀅𑀦𑁆𑀢𑀸𑀦𑀦𑁆𑀢𑀺𑀓𑀸𑀤𑀺𑀯𑀲𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀧𑀝𑀺𑀓𑁆𑀔𑁂𑀧𑁄 𑀯𑁂𑀤𑀺𑀢𑀩𑁆𑀩𑁄. 𑀳𑁄𑀢𑀺 𑀘 𑀦 𑀘 𑀳𑁄𑀢𑀻𑀢𑀺 𑀅𑀬𑀁 𑀧𑀦𑁂𑀢𑁆𑀣 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑁄. 𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀻𑀢𑀺 𑀅𑀬𑀁 𑀅𑀫𑀭𑀸𑀯𑀺𑀓𑁆𑀔𑁂𑀧𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁮𑁯. 𑀲𑀤𑀼𑀓𑁆𑀔𑀦𑁆𑀢𑀺 𑀓𑀺𑀮𑁂𑀲𑀤𑀼𑀓𑁆𑀔𑁂𑀦 𑀘𑁂𑀯 𑀯𑀺𑀧𑀸𑀓𑀤𑀼𑀓𑁆𑀔𑁂𑀦 𑀘 𑀲𑀤𑀼𑀓𑁆𑀔𑀁. 𑀲𑀯𑀺𑀖𑀸𑀢𑀦𑁆𑀢𑀺 𑀢𑁂𑀲𑀁𑀬𑁂𑀯 𑀤𑁆𑀯𑀺𑀦𑁆𑀦𑀁 𑀯𑀲𑁂𑀦 𑀲𑀉𑀧𑀖𑀸𑀢𑀓𑀁. 𑀲𑀉𑀧𑀸𑀬𑀸𑀲𑀦𑁆𑀢𑀺 𑀢𑁂𑀲𑀁𑀬𑁂𑀯 𑀯𑀲𑁂𑀦 𑀲𑀉𑀧𑀸𑀬𑀸𑀲𑀁. 𑀲𑀧𑀭𑀺𑀴𑀸𑀳𑀦𑁆𑀢𑀺 𑀢𑁂𑀲𑀁𑀬𑁂𑀯 𑀯𑀲𑁂𑀦 𑀲𑀧𑀭𑀺𑀴𑀸𑀳𑀁.

𑀓𑀺𑀜𑁆𑀘𑀺 𑀤𑀺𑀝𑁆𑀞𑀺𑀕𑀢𑀦𑁆𑀢𑀺 𑀓𑀸𑀘𑀺 𑀏𑀓𑀸 𑀤𑀺𑀝𑁆𑀞𑀺𑀧𑀺 𑀭𑀼𑀘𑁆𑀘𑀺𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 𑀕𑀳𑀺𑀢𑀸 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀢𑀺. 𑀅𑀧𑀦𑀻𑀢𑀦𑁆𑀢𑀺 𑀦𑀻𑀳𑀝𑀁 𑀅𑀧𑀯𑀺𑀤𑁆𑀥𑀁. 𑀤𑀺𑀝𑁆𑀞𑀦𑁆𑀢𑀺 𑀧𑀜𑁆𑀜𑀸𑀬 𑀤𑀺𑀝𑁆𑀞𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀉𑀤𑀬𑀯𑀬𑀁 𑀅𑀤𑁆𑀤𑀲, 𑀢𑀲𑁆𑀫𑀸. 𑀲𑀩𑁆𑀩𑀫𑀜𑁆𑀜𑀺𑀢𑀸𑀦𑀦𑁆𑀢𑀺 ¶ 𑀲𑀩𑁆𑀩𑁂𑀲𑀁 𑀢𑀺𑀡𑁆𑀡𑀫𑁆𑀧𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀫𑀜𑁆𑀜𑀺𑀢𑀸𑀦𑀁. 𑀫𑀣𑀺𑀢𑀸𑀦𑀦𑁆𑀢𑀺 𑀢𑁂𑀲𑀁𑀬𑁂𑀯 𑀯𑁂𑀯𑀘𑀦𑀁. 𑀇𑀤𑀸𑀦𑀺 𑀢𑀸𑀦𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀲𑀩𑁆𑀩𑀅𑀳𑀁𑀓𑀸𑀭-𑀫𑀫𑀁𑀓𑀸𑀭-𑀫𑀸𑀦𑀸𑀦𑀼𑀲𑀬𑀸𑀦𑀦𑁆𑀢𑀺 𑀆𑀳. 𑀏𑀢𑁆𑀣 ¶ 𑀳𑀺 𑀅𑀳𑀁𑀓𑀸𑀭𑁄 𑀤𑀺𑀝𑁆𑀞𑀺, 𑀫𑀫𑀁𑀓𑀸𑀭𑁄 𑀢𑀡𑁆𑀳𑀸, 𑀫𑀸𑀦𑀸𑀦𑀼𑀲𑀬𑁄 𑀫𑀸𑀦𑁄. 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄𑀢𑀺 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀦𑀼𑀧𑀸𑀤𑀺𑀬𑀺𑀢𑁆𑀯𑀸 𑀯𑀺𑀫𑀼𑀢𑁆𑀢𑁄.

𑁧𑁯𑁦. 𑀦 𑀉𑀧𑁂𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺. 𑀏𑀢𑁆𑀣 𑀘 ‘‘𑀦 𑀉𑀧𑀧𑀚𑁆𑀚𑀢𑀻’’𑀢𑀺 𑀇𑀤𑀁 𑀅𑀦𑀼𑀚𑀸𑀦𑀺𑀢𑀩𑁆𑀩𑀁 𑀲𑀺𑀬𑀸. 𑀬𑀲𑁆𑀫𑀸 𑀧𑀦 𑀏𑀯𑀁 𑀯𑀼𑀢𑁆𑀢𑁂 𑀲𑁄 𑀧𑀭𑀺𑀩𑁆𑀩𑀸𑀚𑀓𑁄 𑀉𑀘𑁆𑀙𑁂𑀤𑀁 𑀕𑀡𑁆𑀳𑁂𑀬𑁆𑀬, 𑀉𑀧𑀧𑀚𑁆𑀚𑀢𑀻𑀢𑀺 𑀧𑀦 𑀲𑀲𑁆𑀲𑀢𑀫𑁂𑀯, 𑀉𑀧𑀧𑀚𑁆𑀚𑀢𑀺 𑀘 𑀦 𑀘 𑀉𑀧𑀧𑀚𑁆𑀚𑀢𑀻𑀢𑀺 𑀏𑀓𑀘𑁆𑀘𑀲𑀲𑁆𑀲𑀢𑀁, 𑀦𑁂𑀯 𑀉𑀧𑀧𑀚𑁆𑀚𑀢𑀺 𑀦 𑀦 𑀉𑀧𑀧𑀚𑁆𑀚𑀢𑀻𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑀁, 𑀢𑀲𑁆𑀫𑀸 𑀪𑀕𑀯𑀸 𑁋 ‘‘𑀅𑀬𑀁 𑀅𑀧𑁆𑀧𑀢𑀺𑀝𑁆𑀞𑁄 𑀅𑀦𑀸𑀮𑀫𑁆𑀩𑁄 𑀳𑁄𑀢𑀼, 𑀲𑀼𑀔𑀧𑀯𑁂𑀲𑀦𑀝𑁆𑀞𑀸𑀦𑀁 𑀫𑀸 𑀮𑀪𑀢𑀽’’𑀢𑀺 𑀅𑀦𑀦𑀼𑀜𑁆𑀜𑀸𑀬 𑀞𑀢𑁆𑀯𑀸 𑀅𑀦𑀼𑀜𑁆𑀜𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺. 𑀅𑀮𑀦𑁆𑀢𑀺 𑀲𑀫𑀢𑁆𑀣𑀁 𑀧𑀭𑀺𑀬𑀢𑁆𑀢𑀁 ¶ . 𑀥𑀫𑁆𑀫𑁄𑀢𑀺 𑀧𑀘𑁆𑀘𑀬𑀸𑀓𑀸𑀭𑀥𑀫𑁆𑀫𑁄. 𑀅𑀜𑁆𑀜𑀢𑁆𑀭𑀬𑁄𑀕𑁂𑀦𑀸𑀢𑀺 𑀅𑀜𑁆𑀜𑀢𑁆𑀣 𑀧𑀬𑁄𑀕𑁂𑀦. 𑀅𑀜𑁆𑀜𑀢𑁆𑀭𑀸𑀘𑀭𑀺𑀬𑀓𑁂𑀦𑀸𑀢𑀺 𑀧𑀘𑁆𑀘𑀬𑀸𑀓𑀸𑀭𑀁 𑀅𑀚𑀸𑀦𑀦𑁆𑀢𑀸𑀦𑀁 𑀅𑀜𑁆𑀜𑁂𑀲𑀁 𑀆𑀘𑀭𑀺𑀬𑀸𑀦𑀁 𑀲𑀦𑁆𑀢𑀺𑀓𑁂 𑀯𑀲𑀦𑁆𑀢𑁂𑀦.

𑁧𑁯𑁧. 𑀢𑁂𑀦 𑀳𑀺 𑀯𑀘𑁆𑀙𑀸𑀢𑀺 𑀬𑀲𑁆𑀫𑀸 𑀢𑁆𑀯𑀁 𑀲𑀫𑁆𑀫𑁄𑀳𑀫𑀸𑀧𑀸𑀤𑀺𑀦𑁆𑀢𑀺 𑀯𑀤𑀲𑀺, 𑀢𑀲𑁆𑀫𑀸 𑀢𑀁𑀬𑁂𑀯𑁂𑀢𑁆𑀣 𑀧𑀝𑀺𑀧𑀼𑀘𑁆𑀙𑀺𑀲𑁆𑀲𑀸𑀫𑀺. 𑀅𑀦𑀸𑀳𑀸𑀭𑁄 ¶ 𑀦𑀺𑀩𑁆𑀩𑀼𑀢𑁄𑀢𑀺 𑀅𑀧𑁆𑀧𑀘𑁆𑀘𑀬𑁄 𑀦𑀺𑀩𑁆𑀩𑀼𑀢𑁄.

𑁧𑁯𑁨. 𑀬𑁂𑀦 𑀭𑀽𑀧𑁂𑀦𑀸𑀢𑀺 𑀬𑁂𑀦 𑀭𑀽𑀧𑁂𑀦 𑀲𑀢𑁆𑀢𑀲𑀗𑁆𑀔𑀸𑀢𑀁 𑀢𑀣𑀸𑀕𑀢𑀁 𑀭𑀽𑀧𑀻𑀢𑀺 𑀧𑀜𑁆𑀜𑀸𑀧𑁂𑀬𑁆𑀬. 𑀕𑀫𑁆𑀪𑀻𑀭𑁄𑀢𑀺 𑀕𑀼𑀡𑀕𑀫𑁆𑀪𑀻𑀭𑁄. 𑀅𑀧𑁆𑀧𑀫𑁂𑀬𑁆𑀬𑁄𑀢𑀺 𑀧𑀫𑀸𑀡𑀁 𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬𑁄. 𑀤𑀼𑀧𑁆𑀧𑀭𑀺𑀬𑁄𑀕𑀸𑀴𑁆𑀳𑁄𑀢𑀺 𑀤𑀼𑀑𑀕𑀸𑀳𑁄 𑀤𑀼𑀚𑁆𑀚𑀸𑀦𑁄. 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀲𑀫𑀼𑀤𑁆𑀤𑁄𑀢𑀺 𑀬𑀣𑀸 𑀫𑀳𑀸𑀲𑀫𑀼𑀤𑁆𑀤𑁄 𑀕𑀫𑁆𑀪𑀻𑀭𑁄 𑀅𑀧𑁆𑀧𑀫𑁂𑀬𑁆𑀬𑁄 𑀤𑀼𑀚𑁆𑀚𑀸𑀦𑁄, 𑀏𑀯𑀫𑁂𑀯 𑀔𑀻𑀡𑀸𑀲𑀯𑁄𑀧𑀺. 𑀢𑀁 𑀆𑀭𑀩𑁆𑀪 𑀉𑀧𑀧𑀚𑁆𑀚𑀢𑀻𑀢𑀺𑀆𑀤𑀺 𑀲𑀩𑁆𑀩𑀁 𑀦 𑀬𑀼𑀚𑁆𑀚𑀢𑀺. 𑀓𑀣𑀁? 𑀬𑀣𑀸 𑀧𑀭𑀺𑀦𑀺𑀩𑁆𑀩𑀼𑀢𑀁 𑀅𑀕𑁆𑀕𑀺𑀁 𑀆𑀭𑀩𑁆𑀪 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀕𑀢𑁄𑀢𑀺𑀆𑀤𑀺 𑀲𑀩𑁆𑀩𑀁 𑀦 𑀬𑀼𑀚𑁆𑀚𑀢𑀺, 𑀏𑀯𑀁.

𑀅𑀦𑀺𑀘𑁆𑀘𑀢𑀸𑀢𑀺 𑀅𑀦𑀺𑀘𑁆𑀘𑀢𑀸𑀬. 𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀲𑀸𑀭𑁂 𑀧𑀢𑀺𑀝𑁆𑀞𑀺𑀢𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀅𑀕𑁆𑀕𑀺𑀯𑀘𑁆𑀙𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑀳𑀸𑀯𑀘𑁆𑀙𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁩. 𑀏𑀯𑀁 ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀯𑀘𑁆𑀙𑀲𑀼𑀢𑁆𑀢𑀁. 𑀢𑀢𑁆𑀣 𑀲𑀳𑀓𑀣𑀻𑀢𑀺 𑀲𑀤𑁆𑀥𑀺𑀁𑀯𑀸𑀤𑁄, 𑀩𑀳𑀼𑀁 𑀫𑀬𑀸 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀓𑀣𑀺𑀢𑀧𑀼𑀩𑁆𑀩𑀦𑁆𑀢𑀺 𑀓𑀣𑀁 𑀲𑀸𑀭𑁂𑀢𑀺 𑀫𑁂𑀢𑁆𑀢𑀺𑀁 𑀖𑀝𑁂𑀢𑀺. 𑀧𑀼𑀭𑀺𑀫𑀸𑀦𑀺 𑀳𑀺 𑀤𑁆𑀯𑁂 𑀲𑀼𑀢𑁆𑀢𑀸𑀦𑀺 𑀏𑀢𑀲𑁆𑀲𑁂𑀯 𑀓𑀣𑀺𑀢𑀸𑀦𑀺, 𑀲𑀁𑀬𑀼𑀢𑁆𑀢𑀓𑁂 𑀅𑀩𑁆𑀬𑀸𑀓𑀢𑀲𑀁𑀬𑀼𑀢𑁆𑀢𑀁 (𑀲𑀁. 𑀦𑀺. 𑁪.𑁪𑁧𑁬 𑀆𑀤𑀬𑁄) 𑀦𑀸𑀫 𑀏𑀢𑀲𑁆𑀲𑁂𑀯 𑀓𑀣𑀺𑀢𑀁 𑁋 ‘‘𑀓𑀺𑀁 𑀦𑀼 𑀔𑁄, 𑀪𑁄 𑀕𑁄𑀢𑀫, 𑀲𑀲𑁆𑀲𑀢𑁄 𑀮𑁄𑀓𑁄 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜𑀦𑁆𑀢𑀺 ¶ 𑀅𑀩𑁆𑀬𑀸𑀓𑀢𑀫𑁂𑀢’’𑀦𑁆𑀢𑀺 𑀏𑀯𑀁 𑀏𑀓𑀼𑀢𑁆𑀢𑀭𑀦𑀺𑀓𑀸𑀬𑁂𑀧𑀺 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀓𑀣𑀺𑀢𑀁 𑀅𑀢𑁆𑀣𑀺𑀬𑁂𑀯. 𑀢𑀲𑁆𑀫𑀸 𑀏𑀯𑀫𑀸𑀳. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀧𑀺 𑀢𑀲𑁆𑀲 𑀆𑀕𑀢𑀸𑀕𑀢𑀲𑁆𑀲 𑀲𑀗𑁆𑀕𑀳𑀁 𑀓𑀢𑁆𑀯𑀸 𑀑𑀓𑀸𑀲𑀫𑀓𑀸𑀲𑀺𑀬𑁂𑀯. 𑀓𑀲𑁆𑀫𑀸? 𑀅𑀬𑀜𑁆𑀳𑀺 𑀲𑀲𑁆𑀲𑀢𑀤𑀺𑀝𑁆𑀞𑀺𑀓𑁄, 𑀲𑀲𑁆𑀲𑀢𑀤𑀺𑀝𑁆𑀞𑀺𑀓𑀸 𑀘 𑀲𑀻𑀖𑀁 𑀮𑀤𑁆𑀥𑀺𑀁 𑀦 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, 𑀯𑀲𑀸𑀢𑁂𑀮𑀫𑀓𑁆𑀔𑀺𑀢𑀧𑀺𑀮𑁄𑀢𑀺𑀓𑀸 𑀯𑀺𑀬 𑀘𑀺𑀭𑁂𑀦 𑀲𑀼𑀚𑁆𑀛𑀦𑁆𑀢𑀺. 𑀧𑀲𑁆𑀲𑀢𑀺 𑀘 𑀪𑀕𑀯𑀸 𑁋 ‘‘𑀅𑀬𑀁 𑀧𑀭𑀺𑀩𑁆𑀩𑀸𑀚𑀓𑁄 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀮𑀤𑁆𑀥𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀫 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀙 𑀅𑀪𑀺𑀜𑁆𑀜𑀸𑀬𑁄 𑀲𑀘𑁆𑀙𑀺𑀓𑀢𑁆𑀯𑀸 𑀅𑀪𑀺𑀜𑁆𑀜𑀸𑀢𑀲𑀸𑀯𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀲𑁆𑀫𑀸 𑀢𑀲𑁆𑀲 𑀆𑀕𑀢𑀸𑀕𑀢𑀲𑁆𑀲 𑀲𑀗𑁆𑀕𑀳𑀁 𑀓𑀢𑁆𑀯𑀸 𑀑𑀓𑀸𑀲𑀫𑀓𑀸𑀲𑀺𑀬𑁂𑀯. 𑀇𑀤𑀁 𑀧𑀦𑀲𑁆𑀲 𑀧𑀘𑁆𑀙𑀺𑀫𑀕𑀫𑀦𑀁. 𑀲𑁄 𑀳𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀢𑀭𑀡𑀁 𑀯𑀸 𑀳𑁄𑀢𑀼 𑀅𑀢𑀭𑀡𑀁 𑀯𑀸, 𑀬𑀝𑁆𑀞𑀺𑀁 𑀑𑀢𑀭𑀺𑀢𑁆𑀯𑀸 𑀉𑀤𑀓𑁂 𑀧𑀢𑀫𑀸𑀦𑁄 𑀯𑀺𑀬 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫𑀻𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀆𑀕𑀢𑁄. 𑀢𑀲𑁆𑀫𑀸 𑀥𑀫𑁆𑀫𑀤𑁂𑀲𑀦𑀁 𑀬𑀸𑀘𑀦𑁆𑀢𑁄 𑀲𑀸𑀥𑀼 𑀫𑁂 𑀪𑀯𑀁 𑀕𑁄𑀢𑀫𑁄𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲 𑀪𑀕𑀯𑀸 𑀫𑀽𑀮𑀯𑀲𑁂𑀦 𑀲𑀁𑀔𑀺𑀢𑁆𑀢𑀤𑁂𑀲𑀦𑀁, 𑀓𑀫𑁆𑀫𑀧𑀣𑀯𑀲𑁂𑀦 𑀯𑀺𑀢𑁆𑀣𑀸𑀭𑀤𑁂𑀲𑀦𑀁 𑀤𑁂𑀲𑁂𑀲𑀺. 𑀫𑀽𑀮𑀯𑀲𑁂𑀦 𑀘𑁂𑀢𑁆𑀣 𑀅𑀢𑀺𑀲𑀁𑀔𑀺𑀢𑁆𑀢𑀸 𑀤𑁂𑀲𑀦𑀸, 𑀓𑀫𑁆𑀫𑀧𑀣𑀯𑀲𑁂𑀦 𑀲𑀁𑀔𑀺𑀢𑁆𑀢𑀸 𑀯𑀺𑀢𑁆𑀣𑀸𑀭𑀲𑀤𑀺𑀲𑀸. 𑀩𑀼𑀤𑁆𑀥𑀸𑀦𑀁 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀯𑀺𑀢𑁆𑀣𑀸𑀭𑀤𑁂𑀲𑀦𑀸 𑀦𑀸𑀫 𑀦𑀢𑁆𑀣𑀺. 𑀘𑀢𑀼𑀯𑀻𑀲𑀢𑀺𑀲𑀫𑀦𑁆𑀢𑀧𑀝𑁆𑀞𑀸𑀦𑀫𑁆𑀧𑀺 𑀳𑀺 𑀲𑀢𑁆𑀢𑀧𑀓𑀭𑀡𑁂 𑀅𑀪𑀺𑀥𑀫𑁆𑀫𑀧𑀺𑀝𑀓𑁂 𑀘 𑀲𑀩𑁆𑀩𑀁 𑀲𑀁𑀔𑀺𑀢𑁆𑀢𑀫𑁂𑀯. 𑀢𑀲𑁆𑀫𑀸 𑀫𑀽𑀮𑀯𑀲𑁂𑀦𑀸𑀧𑀺 𑀓𑀫𑁆𑀫𑀧𑀣𑀯𑀲𑁂𑀦𑀸𑀧𑀺 𑀲𑀁𑀔𑀺𑀢𑁆𑀢𑀫𑁂𑀯 𑀤𑁂𑀲𑁂𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁯𑁪. 𑀢𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻 𑀓𑀼𑀲𑀮𑀦𑁆𑀢𑀺𑀆𑀤𑀻𑀲𑀼 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢𑀥𑀫𑁆𑀫𑀸 𑀓𑀸𑀫𑀸𑀯𑀘𑀭𑀸, 𑀅𑀦𑀪𑀺𑀚𑁆𑀛𑀸𑀤𑀬𑁄 𑀢𑀬𑁄 𑀘𑀢𑀼𑀪𑀽𑀫𑀺𑀓𑀸𑀧𑀺 𑀯𑀝𑁆𑀝𑀦𑁆𑀢𑀺.

𑀬𑀢𑁄 ¶ 𑀔𑁄, 𑀯𑀘𑁆𑀙, 𑀪𑀺𑀓𑁆𑀔𑀼𑀦𑁄𑀢𑀺 𑀓𑀺𑀜𑁆𑀘𑀸𑀧𑀺 𑀅𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀬𑀣𑀸 𑀧𑀦 𑀚𑀻𑀯𑀓𑀲𑀼𑀢𑁆𑀢𑁂 𑀘 𑀘𑀗𑁆𑀓𑀻𑀲𑀼𑀢𑁆𑀢𑁂 𑀘, 𑀏𑀯𑀁 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀘 𑀅𑀢𑁆𑀢𑀸𑀦𑀫𑁂𑀯 𑀲𑀦𑁆𑀥𑀸𑀬𑁂𑀢𑀁 𑀪𑀕𑀯𑀢𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁯𑁫. 𑀅𑀢𑁆𑀣𑀺 ¶ ¶ 𑀧𑀦𑀸𑀢𑀺 𑀓𑀺𑀁 𑀧𑀼𑀘𑁆𑀙𑀸𑀫𑀻𑀢𑀺 𑀧𑀼𑀘𑁆𑀙𑀢𑀺? 𑀅𑀬𑀁 𑀓𑀺𑀭𑀲𑁆𑀲 𑀮𑀤𑁆𑀥𑀺 𑁋 ‘‘𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀸𑀲𑀦𑁂 𑀲𑀢𑁆𑀣𑀸𑀯 𑀅𑀭𑀳𑀸 𑀳𑁄𑀢𑀺, 𑀲𑀸𑀯𑀓𑁄 𑀧𑀦 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀲𑀫𑀢𑁆𑀣𑁄 𑀦𑀢𑁆𑀣𑀺. 𑀲𑀫𑀡𑁄 𑀘 𑀕𑁄𑀢𑀫𑁄 ‘𑀬𑀢𑁄 𑀔𑁄, 𑀯𑀘𑁆𑀙, 𑀪𑀺𑀓𑁆𑀔𑀼𑀦𑁄’𑀢𑀺 𑀏𑀓𑀁 𑀪𑀺𑀓𑁆𑀔𑀼𑀁 𑀓𑀣𑁂𑀦𑁆𑀢𑁄 𑀯𑀺𑀬 𑀓𑀣𑁂𑀢𑀺, 𑀅𑀢𑁆𑀣𑀺 𑀦𑀼 𑀔𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑁄’’𑀢𑀺. 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀻𑀢𑀺 𑀧𑀼𑀘𑁆𑀙𑀢𑀺. 𑀢𑀢𑁆𑀣 𑀢𑀺𑀝𑁆𑀞𑀢𑀽𑀢𑀺 𑀪𑀯𑀁 𑀢𑀸𑀯 𑀕𑁄𑀢𑀫𑁄 𑀢𑀺𑀝𑁆𑀞𑀢𑀼, 𑀪𑀯𑀜𑁆𑀳𑀺 𑀮𑁄𑀓𑁂 𑀧𑀸𑀓𑀝𑁄 𑀅𑀭𑀳𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀺𑀁 𑀩𑁆𑀬𑀸𑀓𑀢𑁂 𑀉𑀢𑁆𑀢𑀭𑀺 𑀪𑀺𑀓𑁆𑀔𑀼𑀦𑀻𑀆𑀤𑀻𑀦𑀁 𑀯𑀲𑁂𑀦 𑀧𑀜𑁆𑀳𑀁 𑀧𑀼𑀘𑁆𑀙𑀺, 𑀪𑀕𑀯𑀸𑀧𑀺𑀲𑁆𑀲 𑀩𑁆𑀬𑀸𑀓𑀸𑀲𑀺.

𑁧𑁯𑁬. 𑀆𑀭𑀸𑀥𑀓𑁄𑀢𑀺 𑀲𑀫𑁆𑀧𑀸𑀤𑀓𑁄 𑀧𑀭𑀺𑀧𑀽𑀭𑀓𑁄.

𑁧𑁯𑁭. 𑀲𑁂𑀔𑀸𑀬 𑀯𑀺𑀚𑁆𑀚𑀸𑀬 𑀧𑀢𑁆𑀢𑀩𑁆𑀩𑀦𑁆𑀢𑀺 𑀳𑁂𑀝𑁆𑀞𑀺𑀫𑀨𑀮𑀢𑁆𑀢𑀬𑀁 𑀧𑀢𑁆𑀢𑀩𑁆𑀩𑀁. 𑀢𑀁 𑀲𑀩𑁆𑀩𑀁 𑀫𑀬𑀸 𑀅𑀦𑀼𑀧𑁆𑀧𑀢𑁆𑀢𑀦𑁆𑀢𑀺 𑀯𑀤𑀢𑀺. 𑀯𑀺𑀢𑀡𑁆𑀟𑀯𑀸𑀤𑀻 𑀧𑀦𑀸𑀳 𑁋 ‘‘𑀓𑀢𑀫𑁂 𑀥𑀫𑁆𑀫𑀸 𑀲𑁂𑀓𑁆𑀔𑀸? 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀅𑀧𑀭𑀺𑀬𑀸𑀧𑀦𑁆𑀦𑀸 𑀳𑁂𑀝𑁆𑀞𑀺𑀫𑀸𑀦𑀺 𑀘 𑀢𑀻𑀡𑀺 𑀲𑀸𑀫𑀜𑁆𑀜𑀨𑀮𑀸𑀦𑀻’’𑀢𑀺 (𑀥. 𑀲. 𑁧𑁦𑁨𑁩) 𑀯𑀘𑀦𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑁄𑀧𑀺 𑀅𑀦𑁂𑀦 𑀧𑀢𑁆𑀢𑁄𑀬𑁂𑀯. 𑀨𑀮𑀁 𑀧𑀦 𑀅𑀧𑀢𑁆𑀢𑀁, 𑀢𑀲𑁆𑀲 𑀧𑀢𑁆𑀢𑀺𑀬𑀸 𑀉𑀢𑁆𑀢𑀭𑀺 𑀬𑁄𑀕𑀁 𑀓𑀣𑀸𑀧𑁂𑀢𑀻𑀢𑀺. 𑀲𑁄 𑀏𑀯𑀁 𑀲𑀜𑁆𑀜𑀸𑀧𑁂𑀢𑀩𑁆𑀩𑁄 𑁋

‘‘𑀬𑁄 ¶ 𑀯𑁂 𑀓𑀺𑀮𑁂𑀲𑀸𑀦𑀺 𑀧𑀳𑀸𑀬 𑀧𑀜𑁆𑀘,

𑀧𑀭𑀺𑀧𑀼𑀡𑁆𑀡𑀲𑁂𑀔𑁄 𑀅𑀧𑀭𑀺𑀳𑀸𑀦𑀥𑀫𑁆𑀫𑁄;

𑀘𑁂𑀢𑁄𑀯𑀲𑀺𑀧𑁆𑀧𑀢𑁆𑀢𑁄 𑀲𑀫𑀸𑀳𑀺𑀢𑀺𑀦𑁆𑀤𑁆𑀭𑀺𑀬𑁄,

𑀲 𑀯𑁂 𑀞𑀺𑀢𑀢𑁆𑀢𑁄𑀢𑀺 𑀦𑀭𑁄 𑀧𑀯𑀼𑀘𑁆𑀘𑀢𑀻’’𑀢𑀺. (𑀅. 𑀦𑀺. 𑁪.𑁫);

𑀅𑀦𑀸𑀕𑀸𑀫𑀺𑀧𑀼𑀕𑁆𑀕𑀮𑁄 𑀳𑀺 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀲𑁂𑀔𑁄. 𑀢𑀁 𑀲𑀦𑁆𑀥𑀸𑀬 ‘‘𑀲𑁂𑀔𑀸𑀬 𑀯𑀺𑀚𑁆𑀚𑀸𑀬 𑀧𑀢𑁆𑀢𑀩𑁆𑀩’’𑀦𑁆𑀢𑀺 𑀆𑀳. 𑀫𑀕𑁆𑀕𑀲𑁆𑀲 𑀧𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑁆𑀢𑀸 𑀢𑀢𑁆𑀣 𑀞𑀺𑀢𑀲𑁆𑀲 𑀧𑀼𑀘𑁆𑀙𑀸 𑀦𑀸𑀫 𑀦𑀢𑁆𑀣𑀺. 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀫𑀕𑁆𑀕𑁄𑀧𑀺 𑀩𑀳𑀼𑀘𑀺𑀢𑁆𑀢𑀓𑁆𑀔𑀡𑀺𑀓𑁄 𑀳𑁄𑀢𑀽𑀢𑀺 𑀘𑁂. 𑀏𑀢𑀁 𑀦 𑀩𑀼𑀤𑁆𑀥𑀯𑀘𑀦𑀁, 𑀯𑀼𑀢𑁆𑀢𑀕𑀸𑀣𑀸𑀬 𑀘 𑀅𑀢𑁆𑀣𑁄 𑀯𑀺𑀭𑀼𑀚𑁆𑀛𑀢𑀺. 𑀢𑀲𑁆𑀫𑀸 𑀅𑀦𑀸𑀕𑀸𑀫𑀺𑀨𑀮𑁂 𑀞𑀢𑁆𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀁 𑀓𑀣𑀸𑀧𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀧𑀦𑀲𑁆𑀲 𑀦 𑀓𑁂𑀯𑀮𑀁 𑀲𑀼𑀤𑁆𑀥𑀅𑀭𑀳𑀢𑁆𑀢𑀲𑁆𑀲𑁂𑀯 𑀉𑀧𑀦𑀺𑀲𑁆𑀲𑀬𑁄, 𑀙𑀦𑁆𑀦𑀫𑁆𑀧𑀺 𑀅𑀪𑀺𑀜𑁆𑀜𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀪𑀕𑀯𑀸 𑁋 ‘‘𑀏𑀯𑀫𑀬𑀁 𑀲𑀫𑀣𑁂 𑀓𑀫𑁆𑀫𑀁 𑀓𑀢𑁆𑀯𑀸 𑀧𑀜𑁆𑀘 𑀅𑀪𑀺𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀢𑀺 ¶ , 𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀺. 𑀏𑀯𑀁 𑀙𑀴𑀪𑀺𑀜𑁆𑀜𑁄 𑀫𑀳𑀸𑀲𑀸𑀯𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀺𑀧𑀲𑁆𑀲𑀦𑀸𑀫𑀢𑁆𑀢𑀁 𑀅𑀓𑀣𑁂𑀢𑁆𑀯𑀸 𑀲𑀫𑀣𑀯𑀺𑀧𑀲𑁆𑀲𑀦𑀸 𑀆𑀘𑀺𑀓𑁆𑀔𑀺.

𑁧𑁯𑁮. 𑀲𑀢𑀺 ¶ 𑀲𑀢𑀺𑀆𑀬𑀢𑀦𑁂𑀢𑀺 𑀲𑀢𑀺 𑀲𑀢𑀺𑀓𑀸𑀭𑀡𑁂. 𑀓𑀺𑀜𑁆𑀘𑁂𑀢𑁆𑀣 𑀓𑀸𑀭𑀡𑀁? 𑀅𑀪𑀺𑀜𑁆𑀜𑀸 𑀯𑀸 𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀁 𑀯𑀸 𑀅𑀯𑀲𑀸𑀦𑁂 𑀧𑀦 𑀅𑀭𑀳𑀢𑁆𑀢𑀁 𑀯𑀸 𑀓𑀸𑀭𑀡𑀁 𑀅𑀭𑀳𑀢𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸 𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁨𑁦𑁦. 𑀧𑀭𑀺𑀘𑀺𑀡𑁆𑀡𑁄 𑀫𑁂 𑀪𑀕𑀯𑀸𑀢𑀺 𑀲𑀢𑁆𑀢 𑀳𑀺 𑀲𑁂𑀔𑀸 𑀪𑀕𑀯𑀦𑁆𑀢𑀁 𑀧𑀭𑀺𑀘𑀭𑀦𑁆𑀢𑀺 𑀦𑀸𑀫, 𑀔𑀻𑀡𑀸𑀲𑀯𑁂𑀦 𑀪𑀕𑀯𑀸 𑀧𑀭𑀺𑀘𑀺𑀡𑁆𑀡𑁄 𑀳𑁄𑀢𑀺. 𑀇𑀢𑀺 𑀲𑀗𑁆𑀔𑁂𑀧𑁂𑀦 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑀣𑁂𑀭𑁄 𑀏𑀯𑀫𑀸𑀳. 𑀢𑁂 𑀧𑀦 𑀪𑀺𑀓𑁆𑀔𑀽 𑀢𑀫𑀢𑁆𑀣𑀁 𑀦 𑀚𑀸𑀦𑀺𑀁𑀲𑀼, 𑀅𑀚𑀸𑀦𑀦𑁆𑀢𑀸𑀯 𑀢𑀲𑁆𑀲 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸. 𑀪𑀕𑀯𑀢𑁄 𑀆𑀭𑁄𑀘𑁂𑀲𑀼𑀁. 𑀤𑁂𑀯𑀢𑀸𑀢𑀺 𑀢𑁂𑀲𑀁 𑀕𑀼𑀡𑀸𑀦𑀁 𑀮𑀸𑀪𑀻 𑀤𑁂𑀯𑀢𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀳𑀸𑀯𑀘𑁆𑀙𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀤𑀻𑀖𑀦𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁧. 𑀏𑀯𑀁 ¶ ¶ 𑀫𑁂 𑀲𑀼𑀢𑀦𑁆𑀢𑀺 𑀤𑀻𑀖𑀦𑀔𑀲𑀼𑀢𑁆𑀢𑀁. 𑀢𑀢𑁆𑀣 𑀲𑀽𑀓𑀭𑀔𑀢𑀸𑀬𑀦𑁆𑀢𑀺 𑀲𑀽𑀓𑀭𑀔𑀢𑀸𑀢𑀺 𑀏𑀯𑀁𑀦𑀸𑀫𑀓𑁂 𑀮𑁂𑀡𑁂. 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀓𑀺𑀭 𑀢𑀁 𑀮𑁂𑀡𑀁 𑀏𑀓𑀲𑁆𑀫𑀺𑀁 𑀩𑀼𑀤𑁆𑀥𑀦𑁆𑀢𑀭𑁂 𑀧𑀣𑀯𑀺𑀬𑀸 𑀯𑀟𑁆𑀠𑀫𑀸𑀦𑀸𑀬 𑀅𑀦𑁆𑀢𑁄𑀪𑀽𑀫𑀺𑀕𑀢𑀁 𑀚𑀸𑀢𑀁. 𑀅𑀣𑁂𑀓𑀤𑀺𑀯𑀲𑀁 𑀏𑀓𑁄 𑀲𑀽𑀓𑀭𑁄 𑀢𑀲𑁆𑀲 𑀙𑀤𑀦𑀧𑀭𑀺𑀬𑀦𑁆𑀢𑀲𑀫𑀻𑀧𑁂 𑀧𑀁𑀲𑀼𑀁 𑀔𑀡𑀺. 𑀤𑁂𑀯𑁂 𑀯𑀼𑀝𑁆𑀝𑁂 𑀧𑀁𑀲𑀼𑀥𑁄𑀢𑁄 𑀙𑀤𑀦𑀧𑀭𑀺𑀬𑀦𑁆𑀢𑁄 𑀧𑀸𑀓𑀝𑁄 𑀅𑀳𑁄𑀲𑀺. 𑀏𑀓𑁄 𑀯𑀦𑀘𑀭𑀓𑁄 𑀤𑀺𑀲𑁆𑀯𑀸 𑁋 ‘‘𑀧𑀼𑀩𑁆𑀩𑁂 𑀲𑀻𑀮𑀯𑀦𑁆𑀢𑁂𑀳𑀺 𑀧𑀭𑀺𑀪𑀼𑀢𑁆𑀢𑀮𑁂𑀡𑁂𑀦 𑀪𑀯𑀺𑀢𑀩𑁆𑀩𑀁, 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀲𑀫𑀦𑁆𑀢𑀢𑁄 𑀧𑀁𑀲𑀼𑀁 𑀅𑀧𑀦𑁂𑀢𑁆𑀯𑀸 𑀮𑁂𑀡𑀁 𑀲𑁄𑀥𑁂𑀢𑁆𑀯𑀸 𑀓𑀼𑀝𑁆𑀝𑀧𑀭𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀤𑁆𑀯𑀸𑀭𑀯𑀸𑀢𑀧𑀸𑀦𑀁 𑀬𑁄𑀚𑁂𑀢𑁆𑀯𑀸 𑀲𑀼𑀧𑀭𑀺𑀦𑀺𑀝𑁆𑀞𑀺𑀢-𑀲𑀼𑀥𑀸𑀓𑀫𑁆𑀫𑀘𑀺𑀢𑁆𑀢𑀓𑀫𑁆𑀫𑀭𑀚𑀢𑀧𑀝𑁆𑀝𑀲𑀤𑀺𑀲𑀸𑀬 𑀯𑀸𑀮𑀼𑀓𑀸𑀬 𑀲𑀦𑁆𑀣𑀢𑀧𑀭𑀺𑀯𑁂𑀡𑀁 𑀮𑁂𑀡𑀁 𑀓𑀢𑁆𑀯𑀸 𑀫𑀜𑁆𑀘𑀧𑀻𑀞𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀯𑀲𑀦𑀢𑁆𑀣𑀸𑀬 𑀅𑀤𑀸𑀲𑀺. 𑀮𑁂𑀡𑀁 𑀕𑀫𑁆𑀪𑀻𑀭𑀁 𑀅𑀳𑁄𑀲𑀺 𑀑𑀢𑀭𑀺𑀢𑁆𑀯𑀸 𑀅𑀪𑀺𑀭𑀼𑀳𑀺𑀢𑀩𑁆𑀩𑀁. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀤𑀻𑀖𑀦𑀔𑁄𑀢𑀺 𑀢𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀦𑀸𑀫𑀁. 𑀉𑀧𑀲𑀗𑁆𑀓𑀫𑀻𑀢𑀺 𑀓𑀲𑁆𑀫𑀸 𑀉𑀧𑀲𑀗𑁆𑀓𑀫𑀺? 𑀲𑁄 𑀓𑀺𑀭 𑀣𑁂𑀭𑁂 𑀅𑀟𑁆𑀠𑀫𑀸𑀲𑀧𑀩𑁆𑀩𑀚𑀺𑀢𑁂 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀫𑀸𑀢𑀼𑀮𑁄 𑀅𑀜𑁆𑀜𑀁 𑀧𑀸𑀲𑀡𑁆𑀟𑀁 𑀕𑀦𑁆𑀢𑁆𑀯𑀸 𑀦 𑀘𑀺𑀭𑀁 𑀢𑀺𑀝𑁆𑀞𑀢𑀺, 𑀇𑀤𑀸𑀦𑀺 𑀧𑀦𑀲𑁆𑀲 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑀁 𑀕𑀢𑀲𑁆𑀲 𑀅𑀟𑁆𑀠𑀫𑀸𑀲𑁄 𑀚𑀸𑀢𑁄. 𑀧𑀯𑀢𑁆𑀢𑀺𑀫𑁆𑀧𑀺𑀲𑁆𑀲 𑀦 𑀲𑀼𑀡𑀸𑀫𑀺, 𑀑𑀚𑀯𑀦𑁆𑀢𑀁 ¶ 𑀦𑀼 𑀔𑁄 𑀲𑀸𑀲𑀦𑀁, 𑀚𑀸𑀦𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀕𑀦𑁆𑀢𑀼𑀓𑀸𑀫𑁄 𑀚𑀸𑀢𑁄. 𑀢𑀲𑁆𑀫𑀸 𑀉𑀧𑀲𑀗𑁆𑀓𑀫𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄𑀢𑀺 𑀢𑀲𑁆𑀫𑀺𑀁 𑀓𑀺𑀭 𑀲𑀫𑀬𑁂 𑀣𑁂𑀭𑁄 𑀪𑀕𑀯𑀦𑁆𑀢𑀁 𑀩𑀻𑀚𑀬𑀫𑀸𑀦𑁄 𑀞𑀺𑀢𑁄 𑀳𑁄𑀢𑀺, 𑀧𑀭𑀺𑀩𑁆𑀩𑀸𑀚𑀓𑁄 𑀫𑀸𑀢𑀼𑀮𑁂 ¶ 𑀳𑀺𑀭𑁄𑀢𑁆𑀢𑀧𑁆𑀧𑁂𑀦 𑀞𑀺𑀢𑀓𑁄𑀯 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀓𑀫𑀦𑁆𑀢𑀁 𑀞𑀺𑀢𑁄’’𑀢𑀺.

𑀲𑀩𑁆𑀩𑀁 𑀫𑁂 𑀦𑀓𑁆𑀔𑀫𑀢𑀻𑀢𑀺 𑀲𑀩𑁆𑀩𑀸 𑀫𑁂 𑀉𑀧𑀧𑀢𑁆𑀢𑀺𑀬𑁄 𑀦𑀓𑁆𑀔𑀫𑀦𑁆𑀢𑀺, 𑀧𑀝𑀺𑀲𑀦𑁆𑀥𑀺𑀬𑁄 𑀦𑀓𑁆𑀔𑀫𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺. 𑀏𑀢𑁆𑀢𑀸𑀯𑀢𑀸𑀦𑁂𑀦 ‘‘𑀉𑀘𑁆𑀙𑁂𑀤𑀯𑀸𑀤𑁄𑀳𑀫𑀲𑁆𑀫𑀻’’𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀪𑀕𑀯𑀸 𑀧𑀦𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀓𑁆𑀔𑀭𑁂 𑀢𑀸𑀯 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄 𑀬𑀸𑀧𑀺 𑀔𑁄 𑀢𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀲𑀸𑀧𑀺 𑀢𑁂 𑀤𑀺𑀝𑁆𑀞𑀺 𑀦𑀓𑁆𑀔𑀫𑀢𑀻𑀢𑀺 𑀏𑀲𑀸𑀧𑀺 𑀢𑁂 𑀧𑀞𑀫𑀁 𑀭𑀼𑀘𑁆𑀘𑀺𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 𑀕𑀳𑀺𑀢𑀤𑀺𑀝𑁆𑀞𑀺 𑀦𑀓𑁆𑀔𑀫𑀢𑀻𑀢𑀺. 𑀏𑀲𑀸 𑀘𑁂 𑀫𑁂, 𑀪𑁄 𑀕𑁄𑀢𑀫, 𑀤𑀺𑀝𑁆𑀞𑀺 𑀔𑀫𑁂𑀬𑁆𑀬𑀸𑀢𑀺 𑀫𑀬𑁆𑀳𑀜𑁆𑀳𑀺 𑀲𑀩𑁆𑀩𑀁 𑀦𑀓𑁆𑀔𑀫𑀢𑀻𑀢𑀺 𑀤𑀺𑀝𑁆𑀞𑀺, 𑀢𑀲𑁆𑀲 𑀫𑀬𑁆𑀳𑀁 𑀬𑀸 𑀏𑀲𑀸 𑀲𑀩𑁆𑀩𑀁 𑀫𑁂 𑀦𑀓𑁆𑀔𑀫𑀢𑀻𑀢𑀺 𑀤𑀺𑀝𑁆𑀞𑀺, 𑀏𑀲𑀸 𑀫𑁂 𑀔𑀫𑁂𑀬𑁆𑀬. 𑀬𑀁 𑀢𑀁 ‘‘𑀲𑀩𑁆𑀩𑀁 𑀫𑁂 𑀦𑀓𑁆𑀔𑀫𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺𑀲𑁆𑀲 𑀢𑀸𑀤𑀺𑀲𑀫𑁂𑀯. 𑀬𑀣𑀸 𑀲𑀩𑁆𑀩𑀕𑀳𑀡𑁂𑀦 𑀕𑀳𑀺𑀢𑀸𑀧𑀺 𑀅𑀬𑀁 𑀤𑀺𑀝𑁆𑀞𑀺 𑀔𑀫𑀢𑀺, 𑀏𑀯𑀫𑁂𑀯𑀁 𑀢𑀫𑁆𑀧𑀺 𑀔𑀫𑁂𑀬𑁆𑀬 ¶ . 𑀏𑀯𑀁 𑀅𑀢𑁆𑀢𑀦𑁄 𑀯𑀸𑀤𑁂 𑀆𑀭𑁄𑀧𑀺𑀢𑀁 𑀤𑁄𑀲𑀁 𑀜𑀢𑁆𑀯𑀸 𑀢𑀁 𑀧𑀭𑀺𑀳𑀭𑀸𑀫𑀻𑀢𑀺 𑀲𑀜𑁆𑀜𑀸𑀬 𑀯𑀤𑀢𑀺, 𑀅𑀢𑁆𑀣𑀢𑁄 𑀧𑀦𑀲𑁆𑀲 ‘‘𑀏𑀲𑀸 𑀤𑀺𑀝𑁆𑀞𑀺 𑀦 𑀫𑁂 𑀔𑀫𑀢𑀻’’𑀢𑀺 𑀆𑀧𑀚𑁆𑀚𑀢𑀺. 𑀬𑀲𑁆𑀲 𑀧𑀦𑁂𑀲𑀸 𑀦 𑀔𑀫𑀢𑀺 𑀦 𑀭𑀼𑀘𑁆𑀘𑀢𑀺, 𑀢𑀲𑁆𑀲𑀸𑀬𑀁 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑀩𑁆𑀩𑀁 𑀫𑁂 𑀦 𑀔𑀫𑀢𑀻𑀢𑀺 𑀤𑀺𑀝𑁆𑀞𑀺 𑀭𑀼𑀘𑀺𑀢𑀁. 𑀢𑁂𑀦 𑀳𑀺 𑀤𑀺𑀝𑁆𑀞𑀺𑀅𑀓𑁆𑀔𑀫𑁂𑀦 𑀅𑀭𑀼𑀘𑀺𑀢𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀲𑀩𑁆𑀩𑀁 𑀔𑀫𑀢𑀻𑀢𑀺 𑀭𑀼𑀘𑁆𑀘𑀢𑀻𑀢𑀺 𑀆𑀧𑀚𑁆𑀚𑀢𑀺. 𑀦 𑀧𑀦𑁂𑀲 𑀢𑀁 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀓𑁂𑀯𑀮𑀁 𑀢𑀲𑁆𑀲𑀸𑀧𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀉𑀘𑁆𑀙𑁂𑀤𑀫𑁂𑀯 𑀕𑀡𑁆𑀳𑀸𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑀅𑀢𑁄 𑀔𑁄 𑀢𑁂, 𑀅𑀕𑁆𑀕𑀺𑀯𑁂𑀲𑁆𑀲𑀦,…𑀧𑁂… 𑀅𑀜𑁆𑀜𑀜𑁆𑀘 𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀦𑁆𑀢𑀻𑀢𑀺. 𑀢𑀢𑁆𑀣 𑀅𑀢𑁄𑀢𑀺 𑀧𑀚𑀳𑀦𑀓𑁂𑀲𑀼 𑀦𑀺𑀲𑁆𑀲𑀓𑁆𑀓𑀁, 𑀬𑁂 𑀧𑀚𑀳𑀦𑁆𑀢𑀺, 𑀢𑁂𑀳𑀺 𑀬𑁂 𑀦𑀧𑁆𑀧𑀚𑀳𑀦𑁆𑀢𑀻𑀢𑀺 𑀯𑀼𑀘𑁆𑀘𑀺𑀬𑀦𑁆𑀢𑀺, 𑀢𑁂𑀯 𑀩𑀳𑀼𑀢𑀭𑀸𑀢𑀺 𑀅𑀢𑁆𑀣𑁄. 𑀩𑀳𑀽 𑀳𑀺 𑀩𑀳𑀼𑀢𑀭𑀸𑀢𑀺 𑀏𑀢𑁆𑀣 𑀳𑀺𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁, 𑀩𑀳𑀽 𑀩𑀳𑀼𑀢𑀭𑀸𑀢𑀺 𑀅𑀢𑁆𑀣𑁄. 𑀧𑀭𑀢𑁄 ¶ 𑀢𑀦𑀽 𑀳𑀺 𑀢𑀦𑀼𑀢𑀭𑀸𑀢𑀺 𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑁂 𑀏𑀯𑀫𑀸𑀳𑀁𑀲𑀽𑀢𑀺 𑀬𑁂 𑀏𑀯𑀁 𑀯𑀤𑀦𑁆𑀢𑀺. 𑀢𑀜𑁆𑀘𑁂𑀯 𑀤𑀺𑀝𑁆𑀞𑀺𑀁 𑀦𑀧𑁆𑀧𑀚𑀳𑀦𑁆𑀢𑀺, 𑀅𑀜𑁆𑀜𑀜𑁆𑀘 𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀦𑁆𑀢𑀻𑀢𑀺 𑀫𑀽𑀮𑀤𑀲𑁆𑀲𑀦𑀁 𑀦𑀧𑁆𑀧𑀚𑀳𑀦𑁆𑀢𑀺, 𑀅𑀧𑀭𑀤𑀲𑁆𑀲𑀦𑀁 𑀉𑀧𑀸𑀤𑀺𑀬𑀦𑁆𑀢𑀺.

𑀏𑀢𑁆𑀣 𑀘 𑀲𑀲𑁆𑀲𑀢𑀁 𑀕𑀳𑁂𑀢𑁆𑀯𑀸 𑀢𑀫𑁆𑀧𑀺 𑀅𑀧𑁆𑀧𑀳𑀸𑀬 𑀉𑀘𑁆𑀙𑁂𑀤𑀁 𑀯𑀸 𑀏𑀓𑀘𑁆𑀘𑀲𑀲𑁆𑀲𑀢𑀁 𑀯𑀸 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸, 𑀉𑀘𑁆𑀙𑁂𑀤𑀫𑁆𑀧𑀺 𑀕𑀳𑁂𑀢𑁆𑀯𑀸 𑀢𑀁 𑀅𑀧𑁆𑀧𑀳𑀸𑀬 𑀲𑀲𑁆𑀲𑀢𑀁 𑀯𑀸 𑀏𑀓𑀘𑁆𑀘𑀲𑀲𑁆𑀲𑀢𑀁 𑀯𑀸 𑀦 𑀲𑀓𑁆𑀓𑀸 𑀕𑀳𑁂𑀢𑀼𑀁, 𑀏𑀓𑀘𑁆𑀘𑀲𑀲𑁆𑀲𑀢𑀫𑁆𑀧𑀺 𑀕𑀳𑁂𑀢𑁆𑀯𑀸 𑀢𑀁 𑀅𑀧𑁆𑀧𑀳𑀸𑀬 𑀲𑀲𑁆𑀲𑀢𑀁 𑀯𑀸 𑀉𑀘𑁆𑀙𑁂𑀤𑀁 𑀯𑀸 𑀦 𑀲𑀓𑁆𑀓𑀸 𑀕𑀳𑁂𑀢𑀼𑀁. 𑀫𑀽𑀮𑀲𑀲𑁆𑀲𑀢𑀁 𑀧𑀦 𑀅𑀧𑁆𑀧𑀳𑀸𑀬 ¶ 𑀅𑀜𑁆𑀜𑀁 𑀲𑀲𑁆𑀲𑀢𑀫𑁂𑀯 𑀲𑀓𑁆𑀓𑀸 𑀕𑀳𑁂𑀢𑀼𑀁. 𑀓𑀣𑀁? 𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 ‘‘𑀭𑀽𑀧𑀁 𑀲𑀲𑁆𑀲𑀢’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀅𑀧𑀭𑀲𑁆𑀫𑀺𑀁 𑀲𑀫𑀬𑁂 ‘‘𑀦 𑀲𑀼𑀤𑁆𑀥𑀭𑀽𑀧𑀫𑁂𑀯 𑀲𑀲𑁆𑀲𑀢𑀁, 𑀯𑁂𑀤𑀦𑀸𑀧𑀺 𑀲𑀲𑁆𑀲𑀢𑀸, 𑀯𑀺𑀜𑁆𑀜𑀸𑀡𑀫𑁆𑀧𑀺 𑀲𑀲𑁆𑀲𑀢’’𑀦𑁆𑀢𑀺 𑀕𑀡𑁆𑀳𑀸𑀢𑀺. 𑀉𑀘𑁆𑀙𑁂𑀤𑁂𑀧𑀺 𑀏𑀓𑀘𑁆𑀘𑀲𑀲𑁆𑀲𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸 𑀘 𑀔𑀦𑁆𑀥𑁂𑀲𑀼, 𑀏𑀯𑀁 𑀆𑀬𑀢𑀦𑁂𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀢𑀜𑁆𑀘𑁂𑀯 𑀤𑀺𑀝𑁆𑀞𑀺𑀁 𑀦𑀧𑁆𑀧𑀚𑀳𑀦𑁆𑀢𑀺, 𑀅𑀜𑁆𑀜𑀜𑁆𑀘 𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀦𑁆𑀢𑀻’’𑀢𑀺.

𑀤𑀼𑀢𑀺𑀬𑀯𑀸𑀭𑁂 𑀅𑀢𑁄𑀢𑀺 𑀅𑀧𑁆𑀧𑀚𑀳𑀦𑀓𑁂𑀲𑀼 𑀦𑀺𑀲𑁆𑀲𑀓𑁆𑀓𑀁, 𑀬𑁂 𑀦𑀧𑁆𑀧𑀚𑀳𑀦𑁆𑀢𑀺, 𑀢𑁂𑀳𑀺, 𑀬𑁂 𑀧𑀚𑀳𑀦𑁆𑀢𑀻𑀢𑀺 𑀯𑀼𑀘𑁆𑀘𑀺𑀬𑀦𑁆𑀢𑀺, 𑀢𑁂𑀯 𑀢𑀦𑀼𑀢𑀭𑀸 𑀅𑀧𑁆𑀧𑀢𑀭𑀸𑀢𑀺 𑀅𑀢𑁆𑀣𑁄. 𑀢𑀜𑁆𑀘𑁂𑀯 𑀤𑀺𑀝𑁆𑀞𑀺𑀁 𑀧𑀚𑀳𑀦𑁆𑀢𑀺, 𑀅𑀜𑁆𑀜𑀜𑁆𑀘 𑀤𑀺𑀝𑁆𑀞𑀺𑀁 𑀦 𑀉𑀧𑀸𑀤𑀺𑀬𑀦𑁆𑀢𑀻𑀢𑀺 𑀢𑀜𑁆𑀘 𑀫𑀽𑀮𑀤𑀲𑁆𑀲𑀦𑀁 𑀧𑀚𑀳𑀦𑁆𑀢𑀺, 𑀅𑀜𑁆𑀜𑀜𑁆𑀘 𑀤𑀲𑁆𑀲𑀦𑀁 𑀦 𑀕𑀡𑁆𑀳𑀦𑁆𑀢𑀺. 𑀓𑀣𑀁? 𑀏𑀓𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 ‘‘𑀭𑀽𑀧𑀁 𑀲𑀲𑁆𑀲𑀢’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀅𑀧𑀭𑀲𑁆𑀫𑀺𑀁 𑀲𑀫𑀬𑁂 𑀢𑀢𑁆𑀣 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 ‘‘𑀑𑀴𑀸𑀭𑀺𑀓𑀫𑁂𑀢𑀁 𑀫𑀬𑁆𑀳𑀁 𑀤𑀲𑁆𑀲𑀦’’𑀦𑁆𑀢𑀺 𑀧𑀚𑀳𑀢𑀺 ‘‘𑀦 𑀓𑁂𑀯𑀮𑀜𑁆𑀘 𑀭𑀽𑀧𑀁 𑀲𑀲𑁆𑀲𑀢𑀦𑁆𑀢𑀺 𑀤𑀲𑁆𑀲𑀦𑀫𑁂𑀯 𑀑𑀴𑀸𑀭𑀺𑀓𑀁, 𑀯𑁂𑀤𑀦𑀸𑀧𑀺 𑀲𑀲𑁆𑀲𑀢𑀸…𑀧𑁂… 𑀯𑀺𑀜𑁆𑀜𑀸𑀡𑀫𑁆𑀧𑀺 𑀲𑀲𑁆𑀲𑀢𑀦𑁆𑀢𑀺 𑀤𑀲𑁆𑀲𑀦𑀁 𑀑𑀴𑀸𑀭𑀺𑀓𑀫𑁂𑀯𑀸’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑀺 ¶ . 𑀉𑀘𑁆𑀙𑁂𑀤𑁂𑀧𑀺 𑀏𑀓𑀘𑁆𑀘𑀲𑀲𑁆𑀲𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀣𑀸 𑀘 𑀔𑀦𑁆𑀥𑁂𑀲𑀼, 𑀏𑀯𑀁 𑀆𑀬𑀢𑀦𑁂𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀯𑀁 𑀢𑀜𑁆𑀘 𑀫𑀽𑀮𑀤𑀲𑁆𑀲𑀦𑀁 𑀧𑀚𑀳𑀦𑁆𑀢𑀺, 𑀅𑀜𑁆𑀜𑀜𑁆𑀘 𑀤𑀲𑁆𑀲𑀦𑀁 𑀦 𑀕𑀡𑁆𑀳𑀦𑁆𑀢𑀺.

𑀲𑀦𑁆𑀢𑀕𑁆𑀕𑀺𑀯𑁂𑀲𑁆𑀲𑀦𑀸𑀢𑀺 ¶ 𑀓𑀲𑁆𑀫𑀸 𑀆𑀭𑀪𑀺? 𑀅𑀬𑀁 𑀉𑀘𑁆𑀙𑁂𑀤𑀮𑀤𑁆𑀥𑀺𑀓𑁄 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀦𑀺𑀕𑀽𑀳𑀢𑀺, 𑀢𑀲𑁆𑀲𑀸 𑀧𑀦 𑀮𑀤𑁆𑀥𑀺𑀬𑀸 𑀯𑀡𑁆𑀡𑁂 𑀯𑀼𑀘𑁆𑀘𑀫𑀸𑀦𑁂 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀧𑀸𑀢𑀼𑀓𑀭𑀺𑀲𑁆𑀲𑀢𑀻𑀢𑀺 𑀢𑀺𑀲𑁆𑀲𑁄 𑀮𑀤𑁆𑀥𑀺𑀬𑁄 𑀏𑀓𑀢𑁄 𑀤𑀲𑁆𑀲𑁂𑀢𑁆𑀯𑀸 𑀯𑀺𑀪𑀚𑀺𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺.

𑀲𑀸𑀭𑀸𑀕𑀸𑀬 𑀲𑀦𑁆𑀢𑀺𑀓𑁂𑀢𑀺𑀆𑀤𑀻𑀲𑀼 𑀭𑀸𑀕𑀯𑀲𑁂𑀦 𑀯𑀝𑁆𑀝𑁂 𑀭𑀚𑁆𑀚𑀦𑀲𑁆𑀲 𑀆𑀲𑀦𑁆𑀦𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑁂𑀦 𑀯𑀝𑁆𑀝𑀲𑀁𑀬𑁄𑀚𑀦𑀲𑁆𑀲 𑀲𑀦𑁆𑀢𑀺𑀓𑁂. 𑀅𑀪𑀺𑀦𑀦𑁆𑀤𑀦𑀸𑀬𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦𑁂𑀯 𑀕𑀺𑀮𑀺𑀢𑁆𑀯𑀸 𑀧𑀭𑀺𑀬𑀸𑀤𑀺𑀬𑀦𑀲𑁆𑀲 𑀕𑀳𑀡𑀲𑁆𑀲 𑀘 𑀆𑀲𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀅𑀲𑀸𑀭𑀸𑀕𑀸𑀬 𑀲𑀦𑁆𑀢𑀺𑀓𑁂𑀢𑀺𑀆𑀤𑀻𑀲𑀼 𑀯𑀝𑁆𑀝𑁂 𑀅𑀭𑀚𑁆𑀚𑀦𑀲𑁆𑀲 𑀆𑀲𑀦𑁆𑀦𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 𑀘 𑀲𑀲𑁆𑀲𑀢𑀤𑀲𑁆𑀲𑀦𑀁 𑀅𑀧𑁆𑀧𑀲𑀸𑀯𑀚𑁆𑀚𑀁 𑀤𑀦𑁆𑀥𑀯𑀺𑀭𑀸𑀕𑀁, 𑀉𑀘𑁆𑀙𑁂𑀤𑀤𑀲𑁆𑀲𑀦𑀁 𑀫𑀳𑀸𑀲𑀸𑀯𑀚𑁆𑀚𑀁 𑀔𑀺𑀧𑁆𑀧𑀯𑀺𑀭𑀸𑀕𑀁. 𑀓𑀣𑀁? 𑀲𑀲𑁆𑀲𑀢𑀯𑀸𑀤𑀻 𑀳𑀺 𑀇𑀥𑀮𑁄𑀓𑀁 𑀧𑀭𑀮𑁄𑀓𑀜𑁆𑀘 𑀅𑀢𑁆𑀣𑀻𑀢𑀺 𑀚𑀸𑀦𑀸𑀢𑀺, 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀨𑀮𑀁 𑀅𑀢𑁆𑀣𑀻𑀢𑀺 𑀚𑀸𑀦𑀸𑀢𑀺, 𑀓𑀼𑀲𑀮𑀁 𑀓𑀭𑁄𑀢𑀺, 𑀅𑀓𑀼𑀲𑀮𑀁 𑀓𑀭𑁄𑀦𑁆𑀢𑁄 𑀪𑀸𑀬𑀢𑀺, 𑀯𑀝𑁆𑀝𑀁 𑀅𑀲𑁆𑀲𑀸𑀤𑁂𑀢𑀺, 𑀅𑀪𑀺𑀦𑀦𑁆𑀤𑀢𑀺. 𑀩𑀼𑀤𑁆𑀥𑀸𑀦𑀁 ¶ 𑀯𑀸 𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀯𑀸 𑀲𑀫𑁆𑀫𑀼𑀔𑀻𑀪𑀽𑀢𑁄 𑀲𑀻𑀖𑀁 𑀮𑀤𑁆𑀥𑀺𑀁 𑀚𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀢𑀁 𑀲𑀲𑁆𑀲𑀢𑀤𑀲𑁆𑀲𑀦𑀁 𑀅𑀧𑁆𑀧𑀲𑀸𑀯𑀚𑁆𑀚𑀁 𑀤𑀦𑁆𑀥𑀯𑀺𑀭𑀸𑀕𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀉𑀘𑁆𑀙𑁂𑀤𑀯𑀸𑀤𑀻 𑀧𑀦 𑀇𑀥𑀮𑁄𑀓𑀧𑀭𑀮𑁄𑀓𑀁 𑀅𑀢𑁆𑀣𑀻𑀢𑀺 𑀚𑀸𑀦𑀸𑀢𑀺, 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀨𑀮𑀁 𑀅𑀢𑁆𑀣𑀻𑀢𑀺 𑀚𑀸𑀦𑀸𑀢𑀺, 𑀓𑀼𑀲𑀮𑀁 𑀦 𑀓𑀭𑁄𑀢𑀺, 𑀅𑀓𑀼𑀲𑀮𑀁 𑀓𑀭𑁄𑀦𑁆𑀢𑁄 𑀦 𑀪𑀸𑀬𑀢𑀺, 𑀯𑀝𑁆𑀝𑀁 𑀦 𑀅𑀲𑁆𑀲𑀸𑀤𑁂𑀢𑀺, 𑀦𑀸𑀪𑀺𑀦𑀦𑁆𑀤𑀢𑀺, 𑀩𑀼𑀤𑁆𑀥𑀸𑀦𑀁 𑀯𑀸 𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀯𑀸 𑀲𑀫𑁆𑀫𑀼𑀔𑀻𑀪𑀸𑀯𑁂 𑀲𑀻𑀖𑀁 𑀤𑀲𑁆𑀲𑀦𑀁 𑀧𑀚𑀳𑀢𑀺. 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑁄 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸, 𑀅𑀲𑀓𑁆𑀓𑁄𑀦𑁆𑀢𑁄 𑀅𑀪𑀺𑀦𑀻𑀳𑀸𑀭𑀁 𑀓𑀢𑁆𑀯𑀸 𑀲𑀸𑀯𑀓𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀢𑀲𑁆𑀫𑀸 𑀉𑀘𑁆𑀙𑁂𑀤𑀤𑀲𑁆𑀲𑀦𑀁 𑀫𑀳𑀸𑀲𑀸𑀯𑀚𑁆𑀚𑀁 𑀔𑀺𑀧𑁆𑀧𑀯𑀺𑀭𑀸𑀕𑀦𑁆𑀢𑀺 𑀯𑀼𑀘𑁆𑀘𑀢𑀺.

𑁨𑁦𑁨. 𑀲𑁄 𑀧𑀦 𑀧𑀭𑀺𑀩𑁆𑀩𑀸𑀚𑀓𑁄 𑀏𑀢𑀫𑀢𑁆𑀣𑀁 ¶ 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑁋 ‘‘𑀫𑀬𑁆𑀳𑀁 𑀤𑀲𑁆𑀲𑀦𑀁 𑀲𑀁𑀯𑀡𑁆𑀡𑁂𑀢𑀺 𑀧𑀲𑀁𑀲𑀢𑀺, 𑀅𑀤𑁆𑀥𑀸 𑀫𑁂 𑀲𑀼𑀦𑁆𑀤𑀭𑀁 𑀤𑀲𑁆𑀲𑀦’’𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀉𑀓𑁆𑀓𑀁𑀲𑁂𑀢𑀺 𑀫𑁂 𑀪𑀯𑀦𑁆𑀢𑀺𑀆𑀤𑀺𑀫𑀸𑀳.

𑀇𑀤𑀸𑀦𑀺 𑀬𑀲𑁆𑀫𑀸 𑀅𑀬𑀁 𑀧𑀭𑀺𑀩𑁆𑀩𑀸𑀚𑀓𑁄 𑀓𑀜𑁆𑀚𑀺𑀬𑁂𑀦𑁂𑀯 𑀢𑀺𑀢𑁆𑀢𑀓𑀸𑀮𑀸𑀩𑀼, 𑀉𑀘𑁆𑀙𑁂𑀤𑀤𑀲𑁆𑀲𑀦𑁂𑀦𑁂𑀯 𑀧𑀽𑀭𑀺𑀢𑁄, 𑀲𑁄 ¶ 𑀬𑀣𑀸 𑀓𑀜𑁆𑀚𑀺𑀬𑀁 𑀅𑀧𑁆𑀧𑀳𑀸𑀬 𑀦 𑀲𑀓𑁆𑀓𑀸 𑀮𑀸𑀩𑀼𑀫𑁆𑀳𑀺 𑀢𑁂𑀮𑀨𑀸𑀡𑀺𑀢𑀸𑀤𑀻𑀦𑀺 𑀧𑀓𑁆𑀔𑀺𑀧𑀺𑀢𑀼𑀁, 𑀧𑀓𑁆𑀔𑀺𑀢𑁆𑀢𑀸𑀦𑀺𑀧𑀺 𑀦 𑀕𑀡𑁆𑀳𑀸𑀢𑀺, 𑀏𑀯𑀫𑁂𑀯𑀁 𑀢𑀁 𑀮𑀤𑁆𑀥𑀺𑀁 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀫𑀕𑁆𑀕𑀨𑀮𑀸𑀦𑀁 𑀮𑀸𑀪𑀸𑀬, 𑀢𑀲𑁆𑀫𑀸 𑀮𑀤𑁆𑀥𑀺𑀁 𑀚𑀳𑀸𑀧𑀦𑀢𑁆𑀣𑀁 𑀢𑀢𑁆𑀭𑀕𑁆𑀕𑀺𑀯𑁂𑀲𑁆𑀲𑀦𑀸𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀯𑀺𑀕𑁆𑀕𑀳𑁄𑀢𑀺 𑀓𑀮𑀳𑁄. 𑀏𑀯𑀫𑁂𑀢𑀸𑀲𑀁 𑀤𑀺𑀝𑁆𑀞𑀻𑀦𑀁 𑀧𑀳𑀸𑀦𑀁 𑀳𑁄𑀢𑀻𑀢𑀺 𑀏𑀯𑀁 𑀯𑀺𑀕𑁆𑀕𑀳𑀸𑀤𑀺𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀢𑀸𑀲𑀁 𑀤𑀺𑀝𑁆𑀞𑀻𑀦𑀁 𑀧𑀳𑀸𑀦𑀁 𑀳𑁄𑀢𑀺. 𑀲𑁄 𑀳𑀺 𑀧𑀭𑀺𑀩𑁆𑀩𑀸𑀚𑀓𑁄 ‘‘𑀓𑀺𑀁 𑀫𑁂 𑀇𑀫𑀺𑀦𑀸 𑀯𑀺𑀕𑁆𑀕𑀳𑀸𑀤𑀺𑀦𑀸’’𑀢𑀺 𑀢𑀁 𑀉𑀘𑁆𑀙𑁂𑀤𑀤𑀲𑁆𑀲𑀦𑀁 𑀧𑀚𑀳𑀢𑀺.

𑁨𑁦𑁫. 𑀅𑀣𑀲𑁆𑀲 𑀪𑀕𑀯𑀸 𑀯𑀫𑀺𑀢𑀓𑀜𑁆𑀚𑀺𑀬𑁂 𑀮𑀸𑀩𑀼𑀫𑁆𑀳𑀺 𑀲𑀧𑁆𑀧𑀺𑀨𑀸𑀡𑀺𑀢𑀸𑀤𑀻𑀦𑀺 𑀧𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀳𑀤𑀬𑁂 𑀅𑀫𑀢𑁄𑀲𑀥𑀁 𑀧𑀽𑀭𑁂𑀲𑁆𑀲𑀸𑀫𑀻𑀢𑀺 𑀯𑀺𑀧𑀲𑁆𑀲𑀦𑀁 𑀆𑀘𑀺𑀓𑁆𑀔𑀦𑁆𑀢𑁄 𑀅𑀬𑀁 𑀔𑁄 𑀧𑀦, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀓𑀸𑀬𑁄𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀯𑀫𑁆𑀫𑀺𑀓𑀲𑀼𑀢𑁆𑀢𑁂 𑀯𑀼𑀢𑁆𑀢𑁄. 𑀅𑀦𑀺𑀘𑁆𑀘𑀢𑁄𑀢𑀺𑀆𑀤𑀻𑀦𑀺𑀧𑀺 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀸𑀦𑁂𑀯. 𑀬𑁄 𑀓𑀸𑀬𑀲𑁆𑀫𑀺𑀁 𑀓𑀸𑀬𑀙𑀦𑁆𑀤𑁄𑀢𑀺 𑀬𑀸 𑀓𑀸𑀬𑀲𑁆𑀫𑀺𑀁 𑀢𑀡𑁆𑀳𑀸. 𑀲𑁆𑀦𑁂𑀳𑁄𑀢𑀺 𑀢𑀡𑁆𑀳𑀸𑀲𑁆𑀦𑁂𑀳𑁄𑀯. 𑀓𑀸𑀬𑀦𑁆𑀯𑀬𑀢𑀸𑀢𑀺 𑀓𑀸𑀬𑀸𑀦𑀼𑀕𑀫𑀦𑀪𑀸𑀯𑁄, 𑀓𑀸𑀬𑀁 𑀅𑀦𑀼𑀕𑀘𑁆𑀙𑀦𑀓𑀓𑀺𑀮𑁂𑀲𑁄𑀢𑀺 𑀅𑀢𑁆𑀣𑁄.

𑀏𑀯𑀁 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀢𑀺𑀲𑁆𑀲𑁄 𑀔𑁄𑀢𑀺𑀆𑀤𑀺𑀫𑀸𑀳. 𑀧𑀼𑀦 𑀢𑀸𑀲𑀁𑀬𑁂𑀯 𑀯𑁂𑀤𑀦𑀸𑀦𑀁 𑀅𑀲𑀫𑁆𑀫𑀺𑀲𑁆𑀲𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀬𑀲𑁆𑀫𑀺𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀲𑀫𑀬𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 ¶ ¶ 𑁋 𑀬𑀲𑁆𑀫𑀺𑀁 𑀲𑀫𑀬𑁂 𑀲𑀼𑀔𑀸𑀤𑀻𑀲𑀼 𑀏𑀓𑀁 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀜𑁆𑀜𑀸 𑀯𑁂𑀤𑀦𑀸 𑀅𑀢𑁆𑀢𑀦𑁄 𑀯𑀸𑀭𑀁 𑀯𑀸 𑀑𑀓𑀸𑀲𑀁 𑀯𑀸 𑀑𑀮𑁄𑀓𑀬𑀫𑀸𑀦𑀸 𑀦𑀺𑀲𑀺𑀦𑁆𑀦𑀸 𑀦𑀸𑀫 𑀦𑀢𑁆𑀣𑀺, 𑀅𑀣 𑀔𑁄 𑀅𑀦𑀼𑀧𑁆𑀧𑀦𑁆𑀦𑀸𑀯 𑀳𑁄𑀦𑁆𑀢𑀺 𑀪𑀺𑀦𑁆𑀦𑀉𑀤𑀓𑀧𑀼𑀧𑁆𑀨𑀼𑀴𑀸 𑀯𑀺𑀬 𑀘 𑀅𑀦𑁆𑀢𑀭𑀳𑀺𑀢𑀸 𑀯𑀸. 𑀲𑀼𑀔𑀸𑀧𑀺 𑀔𑁄𑀢𑀺𑀆𑀤𑀺 𑀢𑀸𑀲𑀁 𑀯𑁂𑀤𑀦𑀸𑀦𑀁 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁.

𑀦 𑀓𑁂𑀦𑀘𑀺 𑀲𑀁𑀯𑀤𑀢𑀻𑀢𑀺 𑀢𑀲𑁆𑀲𑀢𑀁 𑀕𑀳𑁂𑀢𑁆𑀯𑀸 ‘‘𑀲𑀲𑁆𑀲𑀢𑀯𑀸𑀤𑀻 𑀅𑀳’’𑀦𑁆𑀢𑀺 𑀉𑀘𑁆𑀙𑁂𑀤𑀯𑀸𑀤𑀺𑀦𑀸𑀧𑀺 𑀲𑀤𑁆𑀥𑀺𑀁 𑀦 𑀲𑀁𑀯𑀤𑀢𑀺, 𑀢𑀫𑁂𑀯 𑀕𑀳𑁂𑀢𑁆𑀯𑀸 ‘‘𑀲𑀲𑁆𑀲𑀢𑀯𑀸𑀤𑀻 𑀅𑀳’’𑀦𑁆𑀢𑀺 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀺𑀦𑀸 𑀲𑀤𑁆𑀥𑀺𑀁 𑀦 𑀯𑀺𑀯𑀤𑀢𑀺. 𑀏𑀯𑀁 𑀢𑀬𑁄𑀧𑀺 𑀯𑀸𑀤𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀸. 𑀬𑀜𑁆𑀘 𑀮𑁄𑀓𑁂 𑀯𑀼𑀢𑁆𑀢𑀦𑁆𑀢𑀺 𑀬𑀁 𑀮𑁄𑀓𑁂 𑀓𑀣𑀺𑀢𑀁 𑀯𑁄𑀳𑀭𑀺𑀢𑀁, 𑀢𑁂𑀦 𑀯𑁄𑀳𑀭𑀢𑀺 𑀅𑀧𑀭𑀸𑀫𑀲𑀦𑁆𑀢𑁄 𑀓𑀺𑀜𑁆𑀘𑀺 𑀥𑀫𑁆𑀫𑀁 𑀧𑀭𑀸𑀫𑀸𑀲𑀕𑁆𑀕𑀸𑀳𑁂𑀦 𑀅𑀕𑁆𑀕𑀡𑁆𑀳𑀦𑁆𑀢𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀬𑁄 𑀳𑁄𑀢𑀺 𑀪𑀺𑀓𑁆𑀔𑀼 𑀅𑀭𑀳𑀁 𑀓𑀢𑀸𑀯𑀻,

𑀔𑀻𑀡𑀸𑀲𑀯𑁄 𑀅𑀦𑁆𑀢𑀺𑀫𑀤𑁂𑀳𑀥𑀸𑀭𑀻;

𑀅𑀳𑀁 ¶ 𑀯𑀤𑀸𑀫𑀻𑀢𑀺𑀧𑀺 𑀲𑁄 𑀯𑀤𑁂𑀬𑁆𑀬,

𑀫𑀫𑀁 𑀯𑀤𑀦𑁆𑀢𑀻𑀢𑀺𑀧𑀺 𑀲𑁄 𑀯𑀤𑁂𑀬𑁆𑀬;

𑀮𑁄𑀓𑁂 𑀲𑀫𑀜𑁆𑀜𑀁 𑀓𑀼𑀲𑀮𑁄 𑀯𑀺𑀤𑀺𑀢𑁆𑀯𑀸,

𑀯𑁄𑀳𑀸𑀭𑀫𑀢𑁆𑀢𑁂𑀦 𑀲𑁄 𑀯𑁄𑀳𑀭𑁂𑀬𑁆𑀬𑀸’’𑀢𑀺. (𑀲𑀁. 𑀦𑀺. 𑁧.𑁨𑁫);

𑀅𑀧𑀭𑀫𑁆𑀧𑀺 𑀯𑀼𑀢𑁆𑀢𑀁 𑁋 ‘‘𑀇𑀫𑀸 𑀔𑁄 𑀘𑀺𑀢𑁆𑀢 𑀮𑁄𑀓𑀲𑀫𑀜𑁆𑀜𑀸 𑀮𑁄𑀓𑀦𑀺𑀭𑀼𑀢𑁆𑀢𑀺𑀬𑁄 𑀮𑁄𑀓𑀯𑁄𑀳𑀸𑀭𑀸 𑀮𑁄𑀓𑀧𑀜𑁆𑀜𑀢𑁆𑀢𑀺𑀬𑁄, 𑀬𑀸𑀳𑀺 𑀢𑀣𑀸𑀕𑀢𑁄 𑀯𑁄𑀳𑀭𑀢𑀺 𑀅𑀧𑀭𑀸𑀫𑀲’’𑀦𑁆𑀢𑀺 (𑀤𑀻. 𑀦𑀺. 𑁧.𑁪𑁪𑁦).

𑁨𑁦𑁬. 𑀅𑀪𑀺𑀜𑁆𑀜𑀸𑀧𑀳𑀸𑀦𑀫𑀸𑀳𑀸𑀢𑀺 𑀲𑀲𑁆𑀲𑀢𑀸𑀤𑀻𑀲𑀼 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀲𑁆𑀲𑀢𑀁 𑀅𑀪𑀺𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸 𑀲𑀲𑁆𑀲𑀢𑀲𑁆𑀲 𑀧𑀳𑀸𑀦𑀫𑀸𑀳, 𑀉𑀘𑁆𑀙𑁂𑀤𑀁, 𑀏𑀓𑀘𑁆𑀘𑀲𑀲𑁆𑀲𑀢𑀁 𑀅𑀪𑀺𑀜𑁆𑀜𑀸𑀬 𑀏𑀓𑀘𑁆𑀘𑀲𑀲𑁆𑀲𑀢𑀲𑁆𑀲 𑀧𑀳𑀸𑀦𑀁 𑀯𑀤𑀢𑀺. 𑀭𑀽𑀧𑀁 𑀅𑀪𑀺𑀜𑁆𑀜𑀸𑀬 𑀭𑀽𑀧𑀲𑁆𑀲 𑀧𑀳𑀸𑀦𑀁 𑀯𑀤𑀢𑀻𑀢𑀺𑀆𑀤𑀺𑀦𑀸 𑀦𑀬𑁂𑀦𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑁄𑀢𑀺 ¶ 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲. 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀻𑀢𑀺 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁂𑀦 𑀦𑀺𑀭𑀼𑀤𑁆𑀥𑁂𑀳𑀺 𑀆𑀲𑀯𑁂𑀳𑀺 𑀅𑀕𑁆𑀕𑀳𑁂𑀢𑁆𑀯𑀸𑀯 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺. 𑀏𑀢𑁆𑀢𑀸𑀯𑀢𑀸 𑀘𑁂𑀲 𑀧𑀭𑀲𑁆𑀲 𑀯𑀟𑁆𑀠𑀺𑀢𑀁 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀔𑀼𑀤𑀁 𑀯𑀺𑀦𑁄𑀤𑁂𑀦𑁆𑀢𑁄 𑀯𑀺𑀬 𑀧𑀭𑀲𑁆𑀲 ¶ 𑀆𑀭𑀤𑁆𑀥𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀜𑁆𑀘𑁂𑀯 𑀧𑀢𑁆𑀢𑁄, 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀲𑁆𑀲 𑀘 𑀫𑀢𑁆𑀣𑀓𑀁, 𑀲𑁄𑀴𑀲 𑀘 𑀧𑀜𑁆𑀜𑀸 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑁄. 𑀤𑀻𑀖𑀦𑀔𑁄 𑀧𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀯𑀸 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀺𑀢𑁄.

𑀪𑀕𑀯𑀸 𑀧𑀦 𑀇𑀫𑀁 𑀤𑁂𑀲𑀦𑀁 𑀲𑀽𑀭𑀺𑀬𑁂 𑀥𑀭𑀫𑀸𑀦𑁂𑀬𑁂𑀯 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀕𑀺𑀚𑁆𑀛𑀓𑀽𑀝𑀸 𑀑𑀭𑀼𑀬𑁆𑀳 𑀯𑁂𑀴𑀼𑀯𑀦𑀁 𑀕𑀦𑁆𑀢𑁆𑀯𑀸 𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑀫𑀓𑀸𑀲𑀺, 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀲𑀦𑁆𑀦𑀺𑀧𑀸𑀢𑁄 𑀅𑀳𑁄𑀲𑀺. 𑀢𑀢𑁆𑀭𑀺𑀫𑀸𑀦𑀺 𑀅𑀗𑁆𑀕𑀸𑀦𑀺 𑁋 𑀫𑀸𑀖𑀦𑀓𑁆𑀔𑀢𑁆𑀢𑁂𑀦 𑀬𑀼𑀢𑁆𑀢𑁄 𑀧𑀼𑀡𑁆𑀡𑀫𑀉𑀧𑁄𑀲𑀣𑀤𑀺𑀯𑀲𑁄, 𑀓𑁂𑀦𑀘𑀺 𑀅𑀦𑀸𑀫𑀦𑁆𑀢𑀺𑀢𑀸𑀦𑀺 𑀳𑀼𑀢𑁆𑀯𑀸 𑀅𑀢𑁆𑀢𑀦𑁄𑀬𑁂𑀯 𑀥𑀫𑁆𑀫𑀢𑀸𑀬 𑀲𑀦𑁆𑀦𑀺𑀧𑀢𑀺𑀢𑀸𑀦𑀺 𑀅𑀟𑁆𑀠𑀢𑁂𑀮𑀲𑀸𑀦𑀺 𑀪𑀺𑀓𑁆𑀔𑀼𑀲𑀢𑀸𑀦𑀺, 𑀢𑁂𑀲𑀼 𑀏𑀓𑁄𑀧𑀺 𑀧𑀼𑀣𑀼𑀚𑁆𑀚𑀦𑁄 𑀯𑀸 𑀲𑁄𑀢𑀸𑀧𑀦𑁆𑀦-𑀲𑀓𑀤𑀸𑀕𑀸𑀫𑀺-𑀅𑀦𑀸𑀕𑀸𑀫𑀺-𑀲𑀼𑀓𑁆𑀔𑀯𑀺𑀧𑀲𑁆𑀲𑀓-𑀅𑀭𑀳𑀦𑁆𑀢𑁂𑀲𑀼 𑀯𑀸 𑀅𑀜𑁆𑀜𑀢𑀭𑁄 𑀦𑀢𑁆𑀣𑀺, 𑀲𑀩𑁆𑀩𑁂 𑀙𑀴𑀪𑀺𑀜𑁆𑀜𑀸𑀯, 𑀏𑀓𑁄𑀧𑀺 𑀘𑁂𑀢𑁆𑀣 𑀲𑀢𑁆𑀣𑀓𑁂𑀦 𑀓𑁂𑀲𑁂 𑀙𑀺𑀦𑁆𑀤𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑁂 𑀏𑀳𑀺𑀪𑀺𑀓𑁆𑀔𑀼𑀦𑁄𑀬𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀤𑀻𑀖𑀦𑀔𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁭. 𑀏𑀯𑀁 ¶ 𑀫𑁂 𑀲𑀼𑀢𑀦𑁆𑀢𑀺 𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑀁. 𑀢𑀢𑁆𑀣 𑀅𑀕𑁆𑀬𑀸𑀕𑀸𑀭𑁂𑀢𑀺 𑀅𑀕𑁆𑀕𑀺𑀳𑁄𑀫𑀲𑀸𑀮𑀬𑀁. 𑀢𑀺𑀡𑀲𑀦𑁆𑀣𑀸𑀭𑀓𑁂𑀢𑀺 𑀤𑁆𑀯𑁂 𑀫𑀸𑀕𑀡𑁆𑀟𑀺𑀬𑀸 𑀫𑀸𑀢𑀼𑀮𑁄 𑀘 𑀪𑀸𑀕𑀺𑀦𑁂𑀬𑁆𑀬𑁄 𑀘. 𑀢𑁂𑀲𑀼 𑀫𑀸𑀢𑀼𑀮𑁄 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄, 𑀪𑀸𑀕𑀺𑀦𑁂𑀬𑁆𑀬𑁄𑀧𑀺 ¶ 𑀲𑀉𑀧𑀦𑀺𑀲𑁆𑀲𑀬𑁄 𑀦𑀘𑀺𑀭𑀲𑁆𑀲𑁂𑀯 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 𑀭𑀫𑀡𑀻𑀬𑀁 𑀤𑁂𑀯𑀕𑀩𑁆𑀪𑀲𑀤𑀺𑀲𑀁 𑀕𑀦𑁆𑀥𑀓𑀼𑀝𑀺𑀁 𑀧𑀳𑀸𑀬 𑀢𑀢𑁆𑀣 𑀙𑀸𑀭𑀺𑀓𑀢𑀺𑀡𑀓𑀘𑀯𑀭𑀸𑀤𑀻𑀳𑀺 𑀉𑀓𑁆𑀮𑀸𑀧𑁂 𑀅𑀕𑁆𑀬𑀸𑀕𑀸𑀭𑁂 𑀢𑀺𑀡𑀲𑀦𑁆𑀣𑀸𑀭𑀓𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀧𑀭𑀲𑀗𑁆𑀕𑀳𑀓𑀭𑀡𑀢𑁆𑀣𑀁 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀣. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀦 𑀓𑁂𑀯𑀮𑀁 𑀢𑀁𑀤𑀺𑀯𑀲𑀫𑁂𑀯, 𑀬𑀲𑁆𑀫𑀸 𑀧𑀦 𑀢𑀁 𑀅𑀕𑁆𑀬𑀸𑀕𑀸𑀭𑀁 𑀕𑀸𑀫𑀽𑀧𑀘𑀸𑀭𑁂 𑀤𑀸𑀭𑀓𑀤𑀸𑀭𑀺𑀓𑀸𑀳𑀺 𑀑𑀓𑀺𑀡𑁆𑀡𑀁 𑀅𑀯𑀺𑀯𑀺𑀢𑁆𑀢𑀁, 𑀢𑀲𑁆𑀫𑀸 𑀪𑀕𑀯𑀸 𑀦𑀺𑀘𑁆𑀘𑀓𑀸𑀮𑀫𑁆𑀧𑀺 𑀤𑀺𑀯𑀲𑀪𑀸𑀕𑀁 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀲𑀸𑀬𑀁 𑀯𑀸𑀲𑀢𑁆𑀣𑀸𑀬 𑀢𑀢𑁆𑀣 𑀉𑀧𑀕𑀘𑁆𑀙𑀢𑀺.

𑀅𑀤𑁆𑀤𑀲𑀸 ¶ 𑀔𑁄…𑀧𑁂… 𑀢𑀺𑀡𑀲𑀦𑁆𑀣𑀸𑀭𑀓𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀪𑀕𑀯𑀸 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀢𑀺𑀡𑀲𑀦𑁆𑀣𑀸𑀭𑀓𑀁 𑀲𑀗𑁆𑀖𑀭𑀺𑀢𑁆𑀯𑀸 𑀲𑀜𑁆𑀜𑀸𑀡𑀁 𑀓𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀁𑀤𑀺𑀯𑀲𑀁 𑀧𑀦 𑀧𑀜𑁆𑀜𑀧𑁂𑀢𑁆𑀯𑀸𑀯 𑀅𑀕𑀫𑀸𑀲𑀺. 𑀓𑀲𑁆𑀫𑀸? 𑀢𑀤𑀸 𑀳𑀺 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀑𑀮𑁄𑀓𑁂𑀢𑁆𑀯𑀸𑀯 𑀅𑀤𑁆𑀤𑀲 𑁋 ‘‘𑀅𑀚𑁆𑀚 𑀫𑀸𑀕𑀡𑁆𑀟𑀺𑀬𑁄 𑀇𑀥𑀸𑀕𑀦𑁆𑀢𑁆𑀯𑀸 𑀇𑀫𑀁 𑀢𑀺𑀡𑀲𑀦𑁆𑀣𑀸𑀭𑀓𑀁 𑀤𑀺𑀲𑁆𑀯𑀸 𑀪𑀸𑀭𑀤𑁆𑀯𑀸𑀚𑁂𑀦 𑀲𑀤𑁆𑀥𑀺𑀁 𑀢𑀺𑀡𑀲𑀦𑁆𑀣𑀸𑀭𑀓𑀁 𑀆𑀭𑀩𑁆𑀪 𑀓𑀣𑀸𑀲𑀮𑁆𑀮𑀸𑀧𑀁 𑀓𑀭𑀺𑀲𑁆𑀲𑀢𑀺, 𑀅𑀣𑀸𑀳𑀁 𑀆𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀲𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀫𑀫 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀺. 𑀧𑀭𑁂𑀲𑀁 𑀲𑀗𑁆𑀕𑀳𑀓𑀭𑀡𑀢𑁆𑀣𑀫𑁂𑀯 𑀳𑀺 𑀫𑀬𑀸 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸’’𑀢𑀺 𑀢𑀺𑀡𑀲𑀦𑁆𑀣𑀸𑀭𑀓𑀁 𑀧𑀜𑁆𑀜𑀧𑁂𑀢𑁆𑀯𑀸𑀯 𑀅𑀕𑀫𑀸𑀲𑀺.

𑀲𑀫𑀡𑀲𑁂𑀬𑁆𑀬𑀸𑀦𑀼𑀭𑀽𑀧𑀁 𑀫𑀜𑁆𑀜𑁂𑀢𑀺 𑀇𑀫𑀁 𑀢𑀺𑀡𑀲𑀦𑁆𑀣𑀸𑀭𑀓𑀁 ‘‘𑀲𑀫𑀡𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀸 𑀲𑁂𑀬𑁆𑀬𑀸’’𑀢𑀺 𑀫𑀜𑁆𑀜𑀸𑀫𑀺. 𑀦 𑀘 𑀅𑀲𑀜𑁆𑀜𑀢𑀲𑀫𑀡𑀲𑁆𑀲 𑀦𑀺𑀯𑀼𑀢𑁆𑀣𑀝𑁆𑀞𑀸𑀦𑀫𑁂𑀢𑀁. 𑀢𑀣𑀸𑀳𑁂𑀢𑁆𑀣 𑀳𑀢𑁆𑀣𑁂𑀦 𑀆𑀓𑀟𑁆𑀠𑀺𑀢𑀝𑁆𑀞𑀸𑀦𑀁 𑀯𑀸 𑀧𑀸𑀤𑁂𑀦 𑀆𑀓𑀟𑁆𑀠𑀺𑀢𑀝𑁆𑀞𑀸𑀦𑀁 𑀯𑀸 𑀲𑀻𑀲𑁂𑀦 𑀧𑀳𑀝𑀝𑁆𑀞𑀸𑀦𑀁 𑀯𑀸 𑀦 𑀧𑀜𑁆𑀜𑀸𑀬𑀢𑀺, 𑀅𑀦𑀸𑀓𑀼𑀮𑁄 𑀅𑀦𑀸𑀓𑀺𑀡𑁆𑀡𑁄 𑀅𑀪𑀺𑀦𑁆𑀦𑁄 ¶ 𑀙𑁂𑀓𑁂𑀦 𑀘𑀺𑀢𑁆𑀢𑀓𑀸𑀭𑁂𑀦 𑀢𑀽𑀮𑀺𑀓𑀸𑀬 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁄 𑀯𑀺𑀬. 𑀲𑀜𑁆𑀜𑀢𑀲𑀫𑀡𑀲𑁆𑀲 𑀯𑀲𑀺𑀢𑀝𑁆𑀞𑀸𑀦𑀁, 𑀓𑀲𑁆𑀲 𑀪𑁄 𑀯𑀲𑀺𑀢𑀝𑁆𑀞𑀸𑀦𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀪𑀽𑀦𑀳𑀼𑀦𑁄𑀢𑀺 𑀳𑀢𑀯𑀟𑁆𑀠𑀺𑀦𑁄 𑀫𑀭𑀺𑀬𑀸𑀤𑀓𑀸𑀭𑀓𑀲𑁆𑀲. 𑀓𑀲𑁆𑀫𑀸 𑀏𑀯𑀫𑀸𑀳? 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀯𑀟𑁆𑀠𑀺𑀧𑀜𑁆𑀜𑀸𑀧𑀦𑀮𑀤𑁆𑀥𑀺𑀓𑀢𑁆𑀢𑀸. 𑀅𑀬𑀜𑁆𑀳𑀺 𑀢𑀲𑁆𑀲 𑀮𑀤𑁆𑀥𑀺 𑁋 𑀘𑀓𑁆𑀔𑀼 𑀩𑁆𑀭𑀽𑀳𑁂𑀢𑀩𑁆𑀩𑀁 𑀯𑀟𑁆𑀠𑁂𑀢𑀩𑁆𑀩𑀁, 𑀅𑀤𑀺𑀝𑁆𑀞𑀁 𑀤𑀓𑁆𑀔𑀺𑀢𑀩𑁆𑀩𑀁, 𑀤𑀺𑀝𑁆𑀞𑀁 𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩𑀁. 𑀲𑁄𑀢𑀁 𑀩𑁆𑀭𑀽𑀳𑁂𑀢𑀩𑁆𑀩𑀁 𑀯𑀟𑁆𑀠𑁂𑀢𑀩𑁆𑀩𑀁, 𑀅𑀲𑀼𑀢𑀁 ¶ 𑀲𑁄𑀢𑀩𑁆𑀩𑀁, 𑀲𑀼𑀢𑀁 𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩𑀁. 𑀖𑀸𑀦𑀁 𑀩𑁆𑀭𑀽𑀳𑁂𑀢𑀩𑁆𑀩𑀁 𑀯𑀟𑁆𑀠𑁂𑀢𑀩𑁆𑀩𑀁, 𑀅𑀖𑀸𑀬𑀺𑀢𑀁 𑀖𑀸𑀬𑀺𑀢𑀩𑁆𑀩𑀁, 𑀖𑀸𑀬𑀺𑀢𑀁 𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩𑀁. 𑀚𑀺𑀯𑁆𑀳𑀸 𑀩𑁆𑀭𑀽𑀳𑁂𑀢𑀩𑁆𑀩𑀸 𑀯𑀟𑁆𑀠𑁂𑀢𑀩𑁆𑀩𑀸, 𑀅𑀲𑁆𑀲𑀸𑀬𑀺𑀢𑀁 𑀲𑀸𑀬𑀺𑀢𑀩𑁆𑀩𑀁, 𑀲𑀸𑀬𑀺𑀢𑀁 𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩𑀁. 𑀓𑀸𑀬𑁄 𑀩𑁆𑀭𑀽𑀳𑁂𑀢𑀩𑁆𑀩𑁄 𑀯𑀟𑁆𑀠𑁂𑀢𑀩𑁆𑀩𑁄, 𑀅𑀨𑀼𑀝𑁆𑀞𑀁 𑀨𑀼𑀲𑀺𑀢𑀩𑁆𑀩𑀁, 𑀨𑀼𑀝𑁆𑀞𑀁 𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩𑀁. 𑀫𑀦𑁄 𑀩𑁆𑀭𑀽𑀳𑁂𑀢𑀩𑁆𑀩𑁄 𑀯𑀟𑁆𑀠𑁂𑀢𑀩𑁆𑀩𑁄, 𑀅𑀯𑀺𑀜𑁆𑀜𑀸𑀢𑀁 𑀯𑀺𑀚𑀸𑀦𑀺𑀢𑀩𑁆𑀩𑀁, 𑀯𑀺𑀜𑁆𑀜𑀸𑀢𑀁 𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩𑀁. 𑀏𑀯𑀁 𑀲𑁄 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀯𑀟𑁆𑀠𑀺𑀁 𑀧𑀜𑁆𑀜𑀧𑁂𑀢𑀺. 𑀪𑀕𑀯𑀸 𑀧𑀦 𑁋

‘‘𑀘𑀓𑁆𑀔𑀼𑀦𑀸 𑀲𑀁𑀯𑀭𑁄 𑀲𑀸𑀥𑀼, 𑀲𑀸𑀥𑀼 𑀲𑁄𑀢𑁂𑀦 𑀲𑀁𑀯𑀭𑁄;

𑀖𑀸𑀦𑁂𑀦 𑀲𑀁𑀯𑀭𑁄 𑀲𑀸𑀥𑀼, 𑀲𑀸𑀥𑀼 𑀚𑀺𑀯𑁆𑀳𑀸𑀬 𑀲𑀁𑀯𑀭𑁄.

𑀓𑀸𑀬𑁂𑀦 𑀲𑀁𑀯𑀭𑁄 𑀲𑀸𑀥𑀼, 𑀲𑀸𑀥𑀼 𑀯𑀸𑀘𑀸𑀬 𑀲𑀁𑀯𑀭𑁄;

𑀫𑀦𑀲𑀸 𑀲𑀁𑀯𑀭𑁄 𑀲𑀸𑀥𑀼, 𑀲𑀸𑀥𑀼 𑀲𑀩𑁆𑀩𑀢𑁆𑀣 𑀲𑀁𑀯𑀭𑁄;

𑀲𑀩𑁆𑀩𑀢𑁆𑀣 𑀲𑀁𑀯𑀼𑀢𑁄 𑀪𑀺𑀓𑁆𑀔𑀼, 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺. (𑀥. 𑀧. 𑁩𑁬𑁦-𑁩𑁬𑁧) 𑁋

𑀙𑀲𑀼 ¶ 𑀤𑁆𑀯𑀸𑀭𑁂𑀲𑀼 𑀲𑀁𑀯𑀭𑀁 𑀧𑀜𑁆𑀜𑀧𑁂𑀢𑀺. 𑀢𑀲𑁆𑀫𑀸 𑀲𑁄 ‘‘𑀯𑀟𑁆𑀠𑀺𑀳𑀢𑁄 𑀲𑀫𑀡𑁄 𑀕𑁄𑀢𑀫𑁄 𑀫𑀭𑀺𑀬𑀸𑀤𑀓𑀸𑀭𑀓𑁄’’𑀢𑀺 𑀫𑀜𑁆𑀜𑀫𑀸𑀦𑁄 ‘‘𑀪𑀽𑀦𑀳𑀼𑀦𑁄’’𑀢𑀺 𑀆𑀳.

𑀅𑀭𑀺𑀬𑁂 𑀜𑀸𑀬𑁂 𑀥𑀫𑁆𑀫𑁂 𑀓𑀼𑀲𑀮𑁂𑀢𑀺 𑀧𑀭𑀺𑀲𑀼𑀤𑁆𑀥𑁂 𑀓𑀸𑀭𑀡𑀥𑀫𑁆𑀫𑁂 𑀅𑀦𑀯𑀚𑁆𑀚𑁂. 𑀇𑀫𑀺𑀦𑀸 𑀓𑀺𑀁 𑀤𑀲𑁆𑀲𑁂𑀢𑀺? 𑀏𑀯𑀭𑀽𑀧𑀲𑁆𑀲 𑀦𑀸𑀫 𑀉𑀕𑁆𑀕𑀢𑀲𑁆𑀲 𑀧𑀜𑁆𑀜𑀸𑀢𑀲𑁆𑀲 𑀬𑀲𑀲𑁆𑀲𑀺𑀦𑁄 𑀉𑀧𑀭𑀺 𑀯𑀸𑀘𑀁 𑀪𑀸𑀲𑀫𑀸𑀦𑁂𑀦 𑀯𑀻𑀫𑀁𑀲𑀺𑀢𑁆𑀯𑀸 𑀉𑀧𑀥𑀸𑀭𑁂𑀢𑁆𑀯𑀸 𑀫𑀼𑀔𑁂 𑀆𑀭𑀓𑁆𑀔𑀁 𑀞𑀧𑁂𑀢𑁆𑀯𑀸 𑀪𑀸𑀲𑀺𑀢𑀩𑁆𑀩𑁄 ¶ 𑀳𑁄𑀢𑀺. 𑀢𑀲𑁆𑀫𑀸 𑀫𑀸 𑀲𑀳𑀲𑀸 𑀅𑀪𑀸𑀲𑀺, 𑀫𑀼𑀔𑁂 𑀆𑀭𑀓𑁆𑀔𑀁 𑀞𑀧𑁂𑀳𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀜𑁆𑀳𑀺 𑀦𑁄 𑀲𑀼𑀢𑁆𑀢𑁂 𑀑𑀘𑀭𑀢𑀻𑀢𑀺 𑀬𑀲𑁆𑀫𑀸 𑀅𑀫𑁆𑀳𑀸𑀓𑀁 𑀲𑀼𑀢𑁆𑀢𑁂 𑀏𑀯𑀁 𑀆𑀕𑀘𑁆𑀙𑀢𑀺, 𑀦 𑀫𑀬𑀁 𑀫𑀼𑀔𑀸𑀭𑀼𑀴𑁆𑀳𑀺𑀘𑁆𑀙𑀸𑀫𑀢𑁆𑀢𑀁 𑀯𑀤𑀸𑀫, 𑀲𑀼𑀢𑁆𑀢𑁂 𑀘 𑀦𑀸𑀫 𑀆𑀕𑀢𑀁 𑀯𑀤𑀫𑀸𑀦𑀸 𑀓𑀲𑁆𑀲 𑀪𑀸𑀬𑁂𑀬𑁆𑀬𑀸𑀫, 𑀢𑀲𑁆𑀫𑀸 𑀲𑀫𑁆𑀫𑀼𑀔𑀸𑀧𑀺 𑀦𑀁 𑀯𑀤𑁂𑀬𑁆𑀬𑀸𑀫𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄𑀢𑀺 𑀫𑀫 𑀭𑀓𑁆𑀔𑀦𑀢𑁆𑀣𑀸𑀬 𑀅𑀦𑀼𑀲𑁆𑀲𑀼𑀓𑁆𑀓𑁄 𑀅𑀯𑀸𑀯𑀝𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑁄𑀯 𑀦𑀁 𑀯𑀤𑁂𑀬𑁆𑀬𑀸𑀢𑀺 𑀫𑀬𑀸 𑀯𑀼𑀢𑁆𑀢𑁄𑀯 𑀳𑀼𑀢𑁆𑀯𑀸 𑀅𑀧𑀼𑀘𑁆𑀙𑀺𑀢𑁄𑀯 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀅𑀫𑁆𑀩𑀚𑀫𑁆𑀩𑀽𑀆𑀤𑀻𑀦𑀺 𑀕𑀳𑁂𑀢𑁆𑀯𑀸 𑀯𑀺𑀬 𑀅𑀧𑀽𑀭𑀬𑀫𑀸𑀦𑁄 𑀫𑀬𑀸 𑀓𑀣𑀺𑀢𑀦𑀺𑀬𑀸𑀫𑁂𑀦 𑀪𑀯𑀁 𑀪𑀸𑀭𑀤𑁆𑀯𑀸𑀚𑁄 𑀯𑀤𑁂𑀬𑁆𑀬, 𑀯𑀤𑀲𑁆𑀲𑀽𑀢𑀺 𑀅𑀢𑁆𑀣𑁄.

𑁨𑁦𑁮. 𑀅𑀲𑁆𑀲𑁄𑀲𑀺 ¶ 𑀔𑁄𑀢𑀺 𑀲𑀢𑁆𑀣𑀸 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀫𑀸𑀕𑀡𑁆𑀟𑀺𑀬𑀁 𑀢𑀢𑁆𑀣 𑀆𑀕𑀢𑀁 𑀅𑀤𑁆𑀤𑀲, 𑀤𑁆𑀯𑀺𑀦𑁆𑀦𑀁 𑀚𑀦𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 𑀤𑀺𑀩𑁆𑀩𑀲𑁄𑀢𑁂𑀦 𑀲𑀤𑁆𑀤𑀫𑁆𑀧𑀺 𑀅𑀲𑁆𑀲𑁄𑀲𑀺. 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀺𑀢𑁄. 𑀲𑀁𑀯𑀺𑀕𑁆𑀕𑁄𑀢𑀺 𑀧𑀻𑀢𑀺𑀲𑀁𑀯𑁂𑀕𑁂𑀦 𑀲𑀁𑀯𑀺𑀕𑁆𑀕𑁄 𑀘𑀮𑀺𑀢𑁄 𑀓𑀫𑁆𑀧𑀺𑀢𑁄. 𑀢𑀲𑁆𑀲 𑀓𑀺𑀭 𑀏𑀢𑀤𑀳𑁄𑀲𑀺 𑁋 ‘‘𑀦𑁂𑀯 𑀫𑀸𑀕𑀡𑁆𑀟𑀺𑀬𑁂𑀦 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀆𑀭𑁄𑀘𑀺𑀢𑀁, 𑀦 𑀫𑀬𑀸. 𑀅𑀫𑁆𑀳𑁂 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑁄 𑀏𑀢𑁆𑀣 𑀢𑀢𑀺𑀬𑁄𑀧𑀺 𑀦𑀢𑁆𑀣𑀺, 𑀲𑀼𑀢𑁄 𑀪𑀯𑀺𑀲𑁆𑀲𑀢𑀺 𑀅𑀫𑁆𑀳𑀸𑀓𑀁 𑀲𑀤𑁆𑀤𑁄 𑀢𑀺𑀔𑀺𑀡𑀲𑁄𑀢𑁂𑀦 𑀧𑀼𑀭𑀺𑀲𑁂𑀦𑀸’’𑀢𑀺. 𑀅𑀣𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀯𑀦𑀯𑀼𑀢𑀺𑀮𑁄𑀫𑀓𑀽𑀧𑀲𑀳𑀲𑁆𑀲𑀸𑀦𑀺 𑀉𑀤𑁆𑀥𑀕𑁆𑀕𑀸𑀦𑀺 𑀅𑀓𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀁𑀯𑀺𑀕𑁆𑀕𑁄 𑀮𑁄𑀫𑀳𑀝𑁆𑀞𑀚𑀸𑀢𑁄’’𑀢𑀺. 𑀅𑀣 ¶ 𑀔𑁄 𑀫𑀸𑀕𑀡𑁆𑀟𑀺𑀬𑁄 𑀧𑀭𑀺𑀩𑁆𑀩𑀸𑀚𑀓𑁄𑀢𑀺 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀧𑀪𑀺𑀦𑁆𑀦𑀫𑀼𑀔𑀁 𑀯𑀺𑀬 𑀩𑀻𑀚𑀁 𑀧𑀭𑀺𑀧𑀸𑀓𑀕𑀢𑀁 𑀜𑀸𑀡𑀁, 𑀢𑀲𑁆𑀫𑀸 𑀲𑀦𑁆𑀦𑀺𑀲𑀻𑀤𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀆𑀳𑀺𑀡𑁆𑀟𑀫𑀸𑀦𑁄 𑀧𑀼𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀔𑁄 𑀫𑀸𑀕𑀡𑁆𑀟𑀺𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁨𑁦𑁯. 𑀲𑀢𑁆𑀣𑀸 𑁋 ‘‘𑀏𑀯𑀁 𑀓𑀺𑀭 𑀢𑁆𑀯𑀁, 𑀫𑀸𑀕𑀡𑁆𑀟𑀺𑀬, 𑀫𑀁 𑀅𑀯𑀘𑀸’’𑀢𑀺 𑀅𑀯𑀢𑁆𑀯𑀸𑀯 𑀘𑀓𑁆𑀔𑀼𑀁 𑀔𑁄, 𑀫𑀸𑀕𑀡𑁆𑀟𑀺𑀬𑀸𑀢𑀺 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀯𑀲𑀦𑀝𑁆𑀞𑀸𑀦𑀝𑁆𑀞𑁂𑀦 ¶ 𑀭𑀽𑀧𑀁 𑀘𑀓𑁆𑀔𑀼𑀲𑁆𑀲 𑀆𑀭𑀸𑀫𑁄𑀢𑀺 𑀘𑀓𑁆𑀔𑀼 𑀭𑀽𑀧𑀸𑀭𑀸𑀫𑀁. 𑀭𑀽𑀧𑁂 𑀭𑀢𑀦𑁆𑀢𑀺 𑀭𑀽𑀧𑀭𑀢𑀁. 𑀭𑀽𑀧𑁂𑀦 𑀘𑀓𑁆𑀔𑀼 𑀆𑀫𑁄𑀤𑀺𑀢𑀁 𑀧𑀫𑁄𑀤𑀺𑀢𑀦𑁆𑀢𑀺 𑀭𑀽𑀧𑀲𑀫𑀼𑀤𑀺𑀢𑀁. 𑀤𑀦𑁆𑀢𑀦𑁆𑀢𑀺 𑀦𑀺𑀩𑁆𑀩𑀺𑀲𑁂𑀯𑀦𑀁. 𑀕𑀼𑀢𑁆𑀢𑀦𑁆𑀢𑀺 𑀕𑁄𑀧𑀺𑀢𑀁. 𑀭𑀓𑁆𑀔𑀺𑀢𑀦𑁆𑀢𑀺 𑀞𑀧𑀺𑀢𑀭𑀓𑁆𑀔𑀁. 𑀲𑀁𑀯𑀼𑀢𑀦𑁆𑀢𑀺 𑀧𑀺𑀳𑀺𑀢𑀁. 𑀲𑀁𑀯𑀭𑀸𑀬𑀸𑀢𑀺 𑀧𑀺𑀥𑀸𑀦𑀢𑁆𑀣𑀸𑀬.

𑁨𑁧𑁦. 𑀧𑀭𑀺𑀘𑀸𑀭𑀺𑀢𑀧𑀼𑀩𑁆𑀩𑁄𑀢𑀺 𑀅𑀪𑀺𑀭𑀫𑀺𑀢𑀧𑀼𑀩𑁆𑀩𑁄. 𑀭𑀽𑀧𑀧𑀭𑀺𑀴𑀸𑀳𑀦𑁆𑀢𑀺 𑀭𑀽𑀧𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑀧𑀭𑀺𑀴𑀸𑀳𑀁. 𑀇𑀫𑀲𑁆𑀲 𑀧𑀦 𑀢𑁂, 𑀫𑀸𑀕𑀡𑁆𑀟𑀺𑀬, 𑀓𑀺𑀫𑀲𑁆𑀲 𑀯𑀘𑀦𑀻𑀬𑀦𑁆𑀢𑀺 𑀇𑀫𑀲𑁆𑀲 𑀭𑀽𑀧𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀢𑀬𑀸 𑀓𑀺𑀁 𑀯𑀘𑀦𑀁 𑀯𑀢𑁆𑀢𑀩𑁆𑀩𑀁 𑀅𑀲𑁆𑀲, 𑀯𑀼𑀟𑁆𑀠𑀺𑀳𑀢𑁄 𑀫𑀭𑀺𑀬𑀸𑀤𑀓𑀸𑀭𑀓𑁄𑀢𑀺 𑀇𑀤𑀁 𑀯𑀢𑁆𑀢𑀩𑁆𑀩𑀁, 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀦 𑀓𑀺𑀜𑁆𑀘𑀺, 𑀪𑁄 𑀕𑁄𑀢𑀫𑀸𑀢𑀺, 𑀪𑁄 𑀕𑁄𑀢𑀫, 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺. 𑀲𑁂𑀲𑀤𑁆𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁨𑁧𑁧. 𑀇𑀤𑀸𑀦𑀺 𑀬𑀲𑁆𑀫𑀸 𑀢𑀬𑀸 𑀧𑀜𑁆𑀘𑀓𑁆𑀔𑀦𑁆𑀥𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺, 𑀅𑀳𑀜𑁆𑀘 𑀧𑀜𑁆𑀘𑀓𑁆𑀔𑀦𑁆𑀥𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 ¶ 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄, 𑀢𑀲𑁆𑀫𑀸 𑀅𑀳𑀫𑁆𑀧𑀺 𑀢𑁂 𑀦 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 𑀅𑀳𑀁 𑀔𑁄 𑀧𑀦𑀸𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲 𑀫𑀬𑁆𑀳𑀁 𑀫𑀸𑀕𑀡𑁆𑀟𑀺𑀬𑀸𑀢𑀺 𑀕𑀺𑀳𑀺𑀓𑀸𑀮𑁂 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀢𑀢𑁆𑀣 𑀯𑀲𑁆𑀲𑀺𑀓𑁄𑀢𑀺𑀆𑀤𑀻𑀲𑀼 𑀬𑀢𑁆𑀣 𑀲𑀼𑀔𑀁 𑀳𑁄𑀢𑀺 𑀯𑀲𑁆𑀲𑀓𑀸𑀮𑁂 ¶ 𑀯𑀲𑀺𑀢𑀼𑀁, 𑀅𑀬𑀁 𑀯𑀲𑁆𑀲𑀺𑀓𑁄. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄 𑁋 𑀯𑀲𑁆𑀲𑀁 𑀯𑀸𑀲𑁄 𑀯𑀲𑁆𑀲𑀁, 𑀯𑀲𑁆𑀲𑀁 𑀅𑀭𑀳𑀢𑀻𑀢𑀺 𑀯𑀲𑁆𑀲𑀺𑀓𑁄. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 𑀯𑀲𑁆𑀲𑀺𑀓𑁄 𑀧𑀸𑀲𑀸𑀤𑁄 𑀦𑀸𑀢𑀺𑀉𑀘𑁆𑀘𑁄 𑀳𑁄𑀢𑀺 𑀦𑀸𑀢𑀺𑀦𑀻𑀘𑁄, 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀦𑀺𑀧𑀺𑀲𑁆𑀲 𑀦𑀸𑀢𑀺𑀢𑀦𑀽𑀦𑀺 𑀦𑀸𑀢𑀺𑀩𑀳𑀽𑀦𑀺, 𑀪𑀽𑀫𑀢𑁆𑀣𑀭𑀡𑀧𑀘𑁆𑀘𑀢𑁆𑀣𑀭𑀡𑀔𑀚𑁆𑀚𑀪𑁄𑀚𑁆𑀚𑀸𑀦𑀺𑀧𑁂𑀢𑁆𑀣 𑀫𑀺𑀲𑁆𑀲𑀓𑀸𑀦𑁂𑀯 𑀯𑀝𑁆𑀝𑀦𑁆𑀢𑀺. 𑀳𑁂𑀫𑀦𑁆𑀢𑀺𑀓𑁂 𑀣𑀫𑁆𑀪𑀸𑀧𑀺 𑀪𑀺𑀢𑁆𑀢𑀺𑀬𑁄𑀧𑀺 𑀦𑀻𑀘𑀸 𑀳𑁄𑀦𑁆𑀢𑀺, 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀦𑀺 𑀢𑀦𑀼𑀓𑀸𑀦𑀺 𑀲𑀼𑀔𑀼𑀫𑀘𑁆𑀙𑀺𑀤𑁆𑀤𑀸𑀦𑀺. 𑀉𑀡𑁆𑀳𑀧𑀯𑁂𑀲𑀦𑀢𑁆𑀣𑀸𑀬 𑀪𑀺𑀢𑁆𑀢𑀺𑀦𑀺𑀬𑀽𑀳𑀸𑀦𑀺 𑀦𑀻𑀳𑀭𑀻𑀬𑀦𑁆𑀢𑀺. 𑀪𑀽𑀫𑀢𑁆𑀣𑀭𑀡𑀧𑀘𑁆𑀘𑀢𑁆𑀣𑀭𑀡𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀸𑀦𑀺 𑀧𑀦𑁂𑀢𑁆𑀣 𑀉𑀡𑁆𑀳𑀯𑀻𑀭𑀺𑀬𑀸𑀦𑀺 𑀓𑀫𑁆𑀩𑀮𑀸𑀤𑀻𑀦𑀺 𑀯𑀝𑁆𑀝𑀦𑁆𑀢𑀺. 𑀔𑀚𑁆𑀚𑀪𑁄𑀚𑁆𑀚𑀁 𑀲𑀺𑀦𑀺𑀤𑁆𑀥𑀁 𑀓𑀝𑀼𑀓𑀲𑀦𑁆𑀦𑀺𑀲𑁆𑀲𑀺𑀢𑀜𑁆𑀘. 𑀕𑀺𑀫𑁆𑀳𑀺𑀓𑁂 𑀣𑀫𑁆𑀪𑀸𑀧𑀺 𑀪𑀺𑀢𑁆𑀢𑀺𑀬𑁄𑀧𑀺 𑀉𑀘𑁆𑀘𑀸 𑀳𑁄𑀦𑁆𑀢𑀺. 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀦𑀺 𑀧𑀦𑁂𑀢𑁆𑀣 𑀩𑀳𑀽𑀦𑀺 𑀯𑀺𑀧𑀼𑀮𑀚𑀸𑀮𑀸𑀦𑀺 𑀪𑀯𑀦𑁆𑀢𑀺. 𑀪𑀽𑀫𑀢𑁆𑀣𑀭𑀡𑀸𑀤𑀻𑀦𑀺 𑀤𑀼𑀓𑀽𑀮𑀫𑀬𑀸𑀦𑀺 𑀯𑀝𑁆𑀝𑀦𑁆𑀢𑀺, 𑀔𑀚𑁆𑀚𑀪𑁄𑀚𑁆𑀚𑀸𑀦𑀺 𑀫𑀥𑀼𑀭𑀭𑀲𑀲𑀻𑀢𑀯𑀻𑀭𑀺𑀬𑀸𑀦𑀺. 𑀯𑀸𑀢𑀧𑀸𑀦𑀲𑀫𑀻𑀧𑁂𑀲𑀼 𑀘𑁂𑀢𑁆𑀣 𑀦𑀯 𑀘𑀸𑀝𑀺𑀬𑁄 𑀞𑀧𑁂𑀢𑁆𑀯𑀸 𑀉𑀤𑀓𑀲𑁆𑀲 𑀧𑀽𑀭𑁂𑀢𑁆𑀯𑀸 𑀦𑀻𑀮𑀼𑀧𑁆𑀧𑀮𑀸𑀤𑀻𑀳𑀺 𑀲𑀜𑁆𑀙𑀸𑀤𑁂𑀦𑁆𑀢𑀺. 𑀢𑁂𑀲𑀼 𑀢𑁂𑀲𑀼 𑀧𑀤𑁂𑀲𑁂𑀲𑀼 𑀉𑀤𑀓𑀬𑀦𑁆𑀢𑀸𑀦𑀺 ¶ 𑀓𑀭𑁄𑀦𑁆𑀢𑀺, 𑀬𑁂𑀳𑀺 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀯𑀺𑀬 𑀉𑀤𑀓𑀥𑀸𑀭𑀸 𑀦𑀺𑀓𑁆𑀔𑀫𑀦𑁆𑀢𑀺.

𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀦 𑀅𑀝𑁆𑀞𑀲𑀢𑀲𑀼𑀯𑀡𑁆𑀡𑀖𑀝𑁂 𑀘 𑀭𑀚𑀢𑀖𑀝𑁂 𑀘 𑀕𑀦𑁆𑀥𑁄𑀤𑀓𑀲𑁆𑀲 𑀧𑀽𑀭𑁂𑀢𑁆𑀯𑀸 𑀦𑀻𑀮𑀼𑀧𑁆𑀧𑀮𑀕𑀘𑁆𑀙𑀓𑁂 𑀓𑀢𑁆𑀯𑀸 𑀲𑀬𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀧𑀬𑀺𑀁𑀲𑀼. 𑀫𑀳𑀦𑁆𑀢𑁂𑀲𑀼 𑀮𑁄𑀳𑀓𑀝𑀸𑀳𑁂𑀲𑀼 ¶ 𑀕𑀦𑁆𑀥𑀓𑀮𑀮𑀁 𑀧𑀽𑀭𑁂𑀢𑁆𑀯𑀸 𑀦𑀻𑀮𑀼𑀧𑁆𑀧𑀮𑀧𑀤𑀼𑀫𑀧𑀼𑀡𑁆𑀟𑀭𑀻𑀓𑀸𑀦𑀺 𑀭𑁄𑀧𑁂𑀢𑁆𑀯𑀸 𑀉𑀢𑀼𑀕𑁆𑀕𑀳𑀡𑀢𑁆𑀣𑀸𑀬 𑀢𑀢𑁆𑀣 𑀢𑀢𑁆𑀣 𑀞𑀧𑁂𑀲𑀼𑀁. 𑀲𑀽𑀭𑀺𑀬𑀭𑀲𑁆𑀫𑀻𑀳𑀺 𑀧𑀼𑀧𑁆𑀨𑀸𑀦𑀺 𑀧𑀼𑀧𑁆𑀨𑀦𑁆𑀢𑀺. 𑀦𑀸𑀦𑀸𑀯𑀺𑀥𑀸 𑀪𑀫𑀭𑀕𑀡𑀸 𑀧𑀸𑀲𑀸𑀤𑀁 𑀧𑀯𑀺𑀲𑀺𑀢𑁆𑀯𑀸 𑀧𑀼𑀧𑁆𑀨𑁂𑀲𑀼 𑀭𑀲𑀁 𑀕𑀡𑁆𑀳𑀦𑁆𑀢𑀸 𑀯𑀺𑀘𑀭𑀦𑁆𑀢𑀺. 𑀧𑀸𑀲𑀸𑀤𑁄 𑀅𑀢𑀺𑀲𑀼𑀕𑀦𑁆𑀥𑁄 𑀳𑁄𑀢𑀺. 𑀬𑀫𑀓𑀪𑀺𑀢𑁆𑀢𑀺𑀬𑀸 𑀅𑀦𑁆𑀢𑀭𑁂 𑀮𑁄𑀳𑀦𑀸𑀴𑀺𑀁 𑀞𑀧𑁂𑀢𑁆𑀯𑀸 𑀦𑀯𑀪𑀽𑀫𑀺𑀓𑀧𑀸𑀲𑀸𑀤𑀲𑁆𑀲 𑀉𑀧𑀭𑀺 𑀆𑀓𑀸𑀲𑀗𑁆𑀕𑀡𑁂 𑀭𑀢𑀦𑀫𑀡𑁆𑀟𑀧𑀫𑀢𑁆𑀣𑀓𑁂 𑀲𑀼𑀔𑀼𑀫𑀘𑁆𑀙𑀺𑀤𑁆𑀤𑀓𑀁 𑀚𑀸𑀮𑀁 𑀩𑀤𑁆𑀥𑀁 𑀅𑀳𑁄𑀲𑀺. 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀲𑀼𑀓𑁆𑀔𑀫𑀳𑀺𑀁𑀲𑀘𑀫𑁆𑀫𑀁 𑀧𑀲𑀸𑀭𑁂𑀢𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀉𑀤𑀓𑀓𑀻𑀴𑀦𑀯𑁂𑀮𑀸𑀬 𑀫𑀳𑀺𑀁𑀲𑀘𑀫𑁆𑀫𑁂 𑀧𑀸𑀲𑀸𑀡𑀕𑀼𑀴𑁂 𑀔𑀺𑀧𑀦𑁆𑀢𑀺, 𑀫𑁂𑀖𑀣𑀦𑀺𑀢𑀲𑀤𑁆𑀤𑁄 𑀯𑀺𑀬 𑀳𑁄𑀢𑀺. 𑀳𑁂𑀝𑁆𑀞𑀸 𑀬𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀺, 𑀉𑀤𑀓𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀚𑀸𑀮𑀫𑀢𑁆𑀣𑀓𑁂 𑀧𑀢𑀢𑀺, 𑀯𑀲𑁆𑀲𑀧𑀢𑀦𑀲𑀮𑀺𑀮𑀁 𑀯𑀺𑀬 𑀳𑁄𑀢𑀺. 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀦𑀻𑀮𑀧𑀝𑀁 𑀦𑀺𑀯𑀸𑀲𑁂𑀢𑀺, 𑀦𑀻𑀮𑀧𑀝𑀁 𑀧𑀸𑀭𑀼𑀧𑀢𑀺, 𑀦𑀻𑀮𑀧𑀲𑀸𑀥𑀦𑀁 𑀧𑀲𑀸𑀥𑁂𑀢𑀺. 𑀧𑀭𑀺𑀯𑀸𑀭𑀸𑀧𑀺𑀲𑁆𑀲 𑀘𑀢𑁆𑀢𑀸𑀮𑀻𑀲𑀦𑀸𑀝𑀓𑀲𑀳𑀲𑁆𑀲𑀸𑀦𑀺 𑀦𑀻𑀮𑀯𑀢𑁆𑀣𑀸𑀪𑀭𑀡𑀸𑀦𑁂𑀯 𑀦𑀻𑀮𑀯𑀺𑀮𑁂𑀧𑀦𑀸𑀦𑀺 𑀳𑀼𑀢𑁆𑀯𑀸 𑀫𑀳𑀸𑀧𑀼𑀭𑀺𑀲𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀭𑀢𑀦𑀫𑀡𑁆𑀟𑀧𑀁 𑀕𑀘𑁆𑀙𑀦𑁆𑀢𑀺. 𑀤𑀺𑀯𑀲𑀪𑀸𑀕𑀁 𑀉𑀤𑀓𑀓𑀻𑀴𑀁 𑀓𑀻𑀴𑀦𑁆𑀢𑁄 𑀲𑀻𑀢𑀮𑀁 𑀉𑀢𑀼𑀲𑀼𑀔𑀁 𑀅𑀦𑀼𑀪𑁄𑀢𑀺.

𑀧𑀸𑀲𑀸𑀤𑀲𑁆𑀲 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀘𑀢𑁆𑀢𑀸𑀭𑁄 𑀲𑀭𑀸 𑀳𑁄𑀦𑁆𑀢𑀺. 𑀤𑀺𑀯𑀸𑀓𑀸𑀮𑁂 𑀦𑀸𑀦𑀸𑀯𑀡𑁆𑀡𑀲𑀓𑀼𑀡𑀕𑀡𑀸 𑀧𑀸𑀘𑀻𑀦𑀲𑀭𑀢𑁄 ¶ 𑀯𑀼𑀝𑁆𑀞𑀸𑀬 𑀯𑀺𑀭𑀯𑀫𑀸𑀦𑀸 𑀧𑀸𑀲𑀸𑀤𑀫𑀢𑁆𑀣𑀓𑁂𑀦 𑀧𑀘𑁆𑀙𑀺𑀫𑀲𑀭𑀁 𑀕𑀘𑁆𑀙𑀦𑁆𑀢𑀺. 𑀧𑀘𑁆𑀙𑀺𑀫𑀲𑀭𑀢𑁄 𑀯𑀼𑀝𑁆𑀞𑀸𑀬 𑀧𑀸𑀘𑀻𑀦𑀲𑀭𑀁, 𑀉𑀢𑁆𑀢𑀭𑀲𑀭𑀢𑁄 𑀤𑀓𑁆𑀔𑀺𑀡𑀲𑀭𑀁, 𑀤𑀓𑁆𑀔𑀺𑀡𑀲𑀭𑀢𑁄 𑀉𑀢𑁆𑀢𑀭𑀲𑀭𑀁 𑀕𑀘𑁆𑀙𑀦𑁆𑀢𑀺, 𑀅𑀦𑁆𑀢𑀭𑀯𑀲𑁆𑀲𑀲𑀫𑀬𑁄 𑀯𑀺𑀬 𑀳𑁄𑀢𑀺. 𑀳𑁂𑀫𑀦𑁆𑀢𑀺𑀓𑀧𑀸𑀲𑀸𑀤𑁄 𑀧𑀦 𑀧𑀜𑁆𑀘𑀪𑀽𑀫𑀺𑀓𑁄 𑀅𑀳𑁄𑀲𑀺, 𑀯𑀲𑁆𑀲𑀺𑀓𑀧𑀸𑀲𑀸𑀤𑁄 𑀲𑀢𑁆𑀢𑀪𑀽𑀫𑀺𑀓𑁄.

𑀦𑀺𑀧𑁆𑀧𑀼𑀭𑀺𑀲𑁂𑀳𑀻𑀢𑀺 𑀧𑀼𑀭𑀺𑀲𑀯𑀺𑀭𑀳𑀺𑀢𑁂𑀳𑀺. 𑀦 𑀓𑁂𑀯𑀮𑀜𑁆𑀘𑁂𑀢𑁆𑀣 𑀢𑀽𑀭𑀺𑀬𑀸𑀦𑁂𑀯 𑀦𑀺𑀧𑁆𑀧𑀼𑀭𑀺𑀲𑀸𑀦𑀺, 𑀲𑀩𑁆𑀩𑀝𑁆𑀞𑀸𑀦𑀸𑀦𑀺𑀧𑀺 𑀦𑀺𑀧𑁆𑀧𑀼𑀭𑀺𑀲𑀸𑀦𑁂𑀯 ¶ . 𑀤𑁄𑀯𑀸𑀭𑀺𑀓𑀸𑀧𑀺 𑀇𑀢𑁆𑀣𑀺𑀬𑁄𑀯, 𑀦𑁆𑀳𑀸𑀧𑀦𑀸𑀤𑀺𑀧𑀭𑀺𑀓𑀫𑁆𑀫𑀓𑀭𑀸𑀧𑀺 𑀇𑀢𑁆𑀣𑀺𑀬𑁄𑀯. 𑀭𑀸𑀚𑀸 𑀓𑀺𑀭 𑁋 ‘‘𑀢𑀣𑀸𑀭𑀽𑀧𑀁 𑀇𑀲𑁆𑀲𑀭𑀺𑀬𑀲𑀼𑀔𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑀲𑁆𑀲 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀧𑀭𑀺𑀲𑀗𑁆𑀓𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀸 𑀫𑁂 𑀧𑀼𑀢𑁆𑀢𑀲𑁆𑀲 ¶ 𑀫𑀸 𑀅𑀳𑁄𑀲𑀻’’𑀢𑀺 𑀲𑀩𑁆𑀩𑀓𑀺𑀘𑁆𑀘𑁂𑀲𑀼 𑀇𑀢𑁆𑀣𑀺𑀬𑁄𑀯 𑀞𑀧𑁂𑀲𑀺. 𑀢𑀸𑀬 𑀭𑀢𑀺𑀬𑀸 𑀭𑀫𑀫𑀸𑀦𑁄𑀢𑀺 𑀇𑀤𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀨𑀮𑀲𑀫𑀸𑀧𑀢𑁆𑀢𑀺𑀭𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁨𑁧𑁨. 𑀕𑀳𑀧𑀢𑀺 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁄 𑀯𑀸𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀔𑀢𑁆𑀢𑀺𑀬𑀸𑀦𑀁 𑀲𑁂𑀢𑀘𑁆𑀙𑀢𑁆𑀢𑀲𑁆𑀫𑀺𑀁𑀬𑁂𑀯 𑀧𑀢𑁆𑀣𑀦𑀸 𑀳𑁄𑀢𑀺, 𑀫𑀳𑀸 𑀘 𑀦𑁂𑀲𑀁 𑀧𑀧𑀜𑁆𑀘𑁄, 𑀩𑁆𑀭𑀸𑀳𑁆𑀫𑀡𑀸 𑀫𑀦𑁆𑀢𑁂𑀳𑀺 𑀅𑀢𑀺𑀢𑁆𑀢𑀸 𑀫𑀦𑁆𑀢𑁂 𑀕𑀯𑁂𑀲𑀦𑁆𑀢𑀸 𑀯𑀺𑀘𑀭𑀦𑁆𑀢𑀺, 𑀕𑀳𑀧𑀢𑀺𑀦𑁄 𑀧𑀦 𑀫𑀼𑀤𑁆𑀤𑀸𑀕𑀡𑀦𑀫𑀢𑁆𑀢𑀁 𑀉𑀕𑁆𑀕𑀳𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀫𑁆𑀧𑀢𑁆𑀢𑀺𑀁𑀬𑁂𑀯 𑀅𑀦𑀼𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑁂 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀕𑀳𑀧𑀢𑀺 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑁄 𑀯𑀸’’𑀢𑀺 𑀆𑀳. 𑀆𑀯𑀝𑁆𑀝𑁂𑀬𑁆𑀬𑀸𑀢𑀺 𑀫𑀸𑀦𑀼𑀲𑀓𑀓𑀸𑀫𑀳𑁂𑀢𑀼 𑀆𑀯𑀝𑁆𑀝𑁄 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀪𑀺𑀓𑁆𑀓𑀦𑁆𑀢𑀢𑀭𑀸𑀢𑀺 𑀯𑀺𑀲𑀺𑀝𑁆𑀞𑀢𑀭𑀸. 𑀧𑀡𑀻𑀢𑀢𑀭𑀸𑀢𑀺 𑀅𑀢𑀧𑁆𑀧𑀓𑀢𑀭𑀸. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀓𑀼𑀲𑀕𑁆𑀕𑁂𑀦𑀼𑀤𑀓𑀫𑀸𑀤𑀸𑀬, 𑀲𑀫𑀼𑀤𑁆𑀤𑁂 𑀉𑀤𑀓𑀁 𑀫𑀺𑀦𑁂;

𑀏𑀯𑀁 𑀫𑀸𑀦𑀼𑀲𑀓𑀸 𑀓𑀸𑀫𑀸, 𑀤𑀺𑀩𑁆𑀩𑀓𑀸𑀫𑀸𑀦 𑀲𑀦𑁆𑀢𑀺𑀓𑁂’’𑀢𑀺. (𑀚𑀸. 𑁨.𑁨𑁧.𑁩𑁮𑁯) 𑁋

𑀲𑀫𑀥𑀺𑀕𑀬𑁆𑀳 𑀢𑀺𑀝𑁆𑀞𑀢𑀻𑀢𑀺 𑀤𑀺𑀩𑁆𑀩𑀲𑀼𑀔𑀁 𑀕𑀡𑁆𑀳𑀺𑀢𑁆𑀯𑀸 𑀢𑀢𑁄 𑀯𑀺𑀲𑀺𑀝𑁆𑀞𑀢𑀭𑀸 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺.

𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀧𑀦𑁂𑀢𑁆𑀣 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀕𑀳𑀧𑀢𑀺𑀲𑁆𑀲 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀗𑁆𑀕𑀻𑀪𑀽𑀢𑀓𑀸𑀮𑁄 𑀯𑀺𑀬 𑀩𑁄𑀥𑀺𑀲𑀢𑁆𑀢𑀲𑁆𑀲 𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑀇𑀢𑁆𑀣𑀺𑀫𑀚𑁆𑀛𑁂 𑀫𑁄𑀤𑀦𑀓𑀸𑀮𑁄, 𑀢𑀲𑁆𑀲 𑀲𑀼𑀘𑀭𑀺𑀢𑀁 𑀧𑀽𑀭𑁂𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀓𑀸𑀮𑁄 𑀯𑀺𑀬 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀪𑀺𑀦𑀺𑀓𑁆𑀔𑀫𑀦𑀁 𑀓𑀢𑁆𑀯𑀸 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀲𑀩𑁆𑀩𑀜𑁆𑀜𑀼𑀢𑀁 𑀧𑀝𑀺𑀯𑀺𑀤𑁆𑀥𑀓𑀸𑀮𑁄 ¶ , 𑀢𑀲𑁆𑀲 𑀦𑀦𑁆𑀤𑀦𑀯𑀦𑁂 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑀓𑀸𑀮𑁄 𑀯𑀺𑀬 𑀢𑀣𑀸𑀕𑀢𑀲𑁆𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀨𑀮𑀲𑀫𑀸𑀧𑀢𑁆𑀢𑀺𑀭𑀢𑀺𑀬𑀸 𑀯𑀻𑀢𑀺𑀯𑀢𑁆𑀢𑀦𑀓𑀸𑀮𑁄, 𑀢𑀲𑁆𑀲 𑀫𑀸𑀦𑀼𑀲𑀓𑀸𑀦𑀁 𑀧𑀜𑁆𑀘𑀦𑁆𑀦𑀁 𑀓𑀸𑀫𑀕𑀼𑀡𑀸𑀦𑀁 ¶ 𑀅𑀧𑀢𑁆𑀣𑀦𑀓𑀸𑀮𑁄 𑀯𑀺𑀬 𑀢𑀣𑀸𑀕𑀢𑀲𑁆𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀨𑀮𑀲𑀫𑀸𑀧𑀢𑁆𑀢𑀺𑀭𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀦𑁆𑀢𑀲𑁆𑀲 𑀳𑀻𑀦𑀚𑀦𑀲𑀼𑀔𑀲𑁆𑀲 𑀅𑀧𑀢𑁆𑀣𑀦𑀓𑀸𑀮𑁄𑀢𑀺.

𑁨𑁧𑁩. 𑀲𑀼𑀔𑀻𑀢𑀺 𑀧𑀞𑀫𑀁 𑀤𑀼𑀓𑁆𑀔𑀺𑀢𑁄 𑀧𑀘𑁆𑀙𑀸 𑀲𑀼𑀔𑀺𑀢𑁄 𑀅𑀲𑁆𑀲. 𑀲𑁂𑀭𑀻𑀢𑀺 𑀧𑀞𑀫𑀁 𑀯𑁂𑀚𑁆𑀚𑀤𑀼𑀢𑀺𑀬𑀓𑁄 𑀧𑀘𑁆𑀙𑀸 𑀲𑁂𑀭𑀻 𑀏𑀓𑀓𑁄 𑀪𑀯𑁂𑀬𑁆𑀬. 𑀲𑀬𑀁𑀯𑀲𑀻𑀢𑀺 𑀧𑀞𑀫𑀁 𑀯𑁂𑀚𑁆𑀚𑀲𑁆𑀲 𑀯𑀲𑁂 𑀯𑀢𑁆𑀢𑀫𑀸𑀦𑁄 𑀯𑁂𑀚𑁆𑀚𑁂𑀦 𑀦𑀺𑀲𑀻𑀤𑀸𑀢𑀺 𑀯𑀼𑀢𑁆𑀢𑁂 𑀦𑀺𑀲𑀻𑀤𑀺, 𑀦𑀺𑀧𑀚𑁆𑀚𑀸𑀢𑀺 𑀯𑀼𑀢𑁆𑀢𑁂 𑀦𑀺𑀧𑀚𑁆𑀚𑀺, 𑀪𑀼𑀜𑁆𑀚𑀸𑀢𑀺 𑀯𑀼𑀢𑁆𑀢𑁂 𑀪𑀼𑀜𑁆𑀚𑀺, 𑀧𑀺𑀯𑀸𑀢𑀺 𑀯𑀼𑀢𑁆𑀢𑁂 𑀧𑀺𑀯𑀺, 𑀧𑀘𑁆𑀙𑀸 𑀲𑀬𑀁𑀯𑀲𑀻 𑀚𑀸𑀢𑁄. 𑀬𑁂𑀦 𑀓𑀸𑀫𑀁 ¶ 𑀕𑀫𑁄𑀢𑀺 𑀧𑀞𑀫𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑀼𑀁 𑀦𑀸𑀮𑀢𑁆𑀣, 𑀧𑀘𑁆𑀙𑀸 𑀭𑁄𑀕𑁂 𑀯𑀽𑀧𑀲𑀦𑁆𑀢𑁂 𑀯𑀦𑀤𑀲𑁆𑀲𑀦-𑀕𑀺𑀭𑀺𑀤𑀲𑁆𑀲𑀦-𑀧𑀩𑁆𑀩𑀢𑀤𑀲𑁆𑀲𑀦𑀸𑀤𑀻𑀲𑀼𑀧𑀺 𑀬𑁂𑀦𑀓𑀸𑀫𑀁 𑀕𑀫𑁄 𑀚𑀸𑀢𑁄, 𑀬𑀢𑁆𑀣 𑀬𑀢𑁆𑀣𑁂𑀯 𑀕𑀦𑁆𑀢𑀼𑀁 𑀇𑀘𑁆𑀙𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀕𑀘𑁆𑀙𑁂𑀬𑁆𑀬.

𑀏𑀢𑁆𑀣𑀸𑀧𑀺 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀧𑀼𑀭𑀺𑀲𑀲𑁆𑀲 𑀓𑀼𑀝𑁆𑀞𑀺𑀓𑀸𑀮𑁄 𑀯𑀺𑀬 𑀳𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑀓𑀸𑀮𑁄, 𑀅𑀗𑁆𑀕𑀸𑀭𑀓𑀧𑀮𑁆𑀮𑀁 𑀯𑀺𑀬 𑀏𑀓𑀁 𑀓𑀸𑀫𑀯𑀢𑁆𑀣𑀼, 𑀤𑁆𑀯𑁂 𑀓𑀧𑀮𑁆𑀮𑀸𑀦𑀺 𑀯𑀺𑀬 𑀤𑁆𑀯𑁂 𑀯𑀢𑁆𑀣𑀽𑀦𑀺, 𑀲𑀓𑁆𑀓𑀲𑁆𑀲 𑀧𑀦 𑀤𑁂𑀯𑀭𑀜𑁆𑀜𑁄 𑀅𑀟𑁆𑀠𑀢𑁂𑀬𑁆𑀬𑀓𑁄𑀝𑀺𑀬𑀸𑀦𑀺 𑀅𑀗𑁆𑀕𑀸𑀭𑀓𑀧𑀮𑁆𑀮𑀸𑀦𑀺 𑀯𑀺𑀬 𑀅𑀟𑁆𑀠𑀢𑀺𑀬𑀦𑀸𑀝𑀓𑀓𑁄𑀝𑀺𑀬𑁄, 𑀦𑀔𑁂𑀳𑀺 𑀯𑀡𑀫𑀼𑀔𑀸𑀦𑀺 𑀢𑀘𑁆𑀙𑁂𑀢𑁆𑀯𑀸 𑀅𑀗𑁆𑀕𑀸𑀭𑀓𑀧𑀮𑁆𑀮𑁂 𑀧𑀭𑀺𑀢𑀸𑀧𑀦𑀁 𑀯𑀺𑀬 𑀯𑀢𑁆𑀣𑀼𑀧𑀝𑀺𑀲𑁂𑀯𑀦𑀁, 𑀪𑁂𑀲𑀚𑁆𑀚𑀁 𑀆𑀕𑀫𑁆𑀫 𑀅𑀭𑁄𑀕𑀓𑀸𑀮𑁄 𑀯𑀺𑀬 𑀓𑀸𑀫𑁂𑀲𑀼 𑀆𑀤𑀻𑀦𑀯𑀁 𑀦𑁂𑀓𑁆𑀔𑀫𑁆𑀫𑁂 𑀘 𑀆𑀦𑀺𑀲𑀁𑀲𑀁 𑀤𑀺𑀲𑁆𑀯𑀸 𑀦𑀺𑀓𑁆𑀔𑀫𑁆𑀫 𑀩𑀼𑀤𑁆𑀥𑀪𑀽𑀢𑀓𑀸𑀮𑁂 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀨𑀮𑀲𑀫𑀸𑀧𑀢𑁆𑀢𑀺𑀭𑀢𑀺𑀬𑀸 𑀯𑀻𑀢𑀺𑀯𑀢𑁆𑀢𑀦𑀓𑀸𑀮𑁄, 𑀅𑀜𑁆𑀜𑀁 𑀓𑀼𑀝𑁆𑀞𑀺𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀅𑀧𑀢𑁆𑀣𑀦𑀓𑀸𑀮𑁄 𑀯𑀺𑀬 𑀢𑀸𑀬 𑀭𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀦𑁆𑀢𑀲𑁆𑀲 𑀳𑀻𑀦𑀚𑀦𑀭𑀢𑀺𑀬𑀸 𑀅𑀧𑀢𑁆𑀣𑀦𑀓𑀸𑀮𑁄𑀢𑀺.

𑁨𑁧𑁪. 𑀉𑀧𑀳𑀢𑀺𑀦𑁆𑀤𑁆𑀭𑀺𑀬𑁄𑀢𑀺 ¶ 𑀓𑀺𑀫𑀺𑀭𑀓𑀼𑀝𑁆𑀞𑁂𑀦 𑀦𑀸𑀫 𑀉𑀧𑀳𑀢𑀓𑀸𑀬𑀧𑁆𑀧𑀲𑀸𑀤𑁄. 𑀉𑀧𑀳𑀢𑀺𑀦𑁆𑀤𑁆𑀭𑀺𑀬𑀸𑀢𑀺 𑀉𑀧𑀳𑀢𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸. 𑀢𑁂 𑀬𑀣𑀸 𑀲𑁄 𑀉𑀧𑀳𑀢𑀓𑀸𑀬𑀺𑀦𑁆𑀤𑁆𑀭𑀺𑀬𑁄 𑀓𑀼𑀝𑁆𑀞𑀻 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑀲𑁆𑀫𑀺𑀁𑀬𑁂𑀯 𑀅𑀕𑁆𑀕𑀺𑀲𑁆𑀫𑀺𑀁 𑀲𑀼𑀔𑀫𑀺𑀢𑀺 𑀯𑀺𑀧𑀭𑀻𑀢𑀲𑀜𑁆𑀜𑀁 𑀧𑀘𑁆𑀘𑀮𑀢𑁆𑀣, 𑀏𑀯𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀳𑀢𑀢𑁆𑀢𑀸 𑀤𑀼𑀓𑁆𑀔𑀲𑀫𑁆𑀨𑀲𑁆𑀲𑁂𑀲𑁆𑀯𑁂𑀯 𑀓𑀸𑀫𑁂𑀲𑀼 𑀲𑀼𑀔𑀫𑀺𑀢𑀺 𑀯𑀺𑀧𑀭𑀻𑀢𑀲𑀜𑁆𑀜𑀁 𑀧𑀘𑁆𑀘𑀮𑀢𑁆𑀣𑀼𑀁.

𑁨𑁧𑁫. 𑀅𑀲𑀼𑀘𑀺𑀢𑀭𑀸𑀦𑀺 𑀘𑁂𑀯𑀸𑀢𑀺𑀆𑀤𑀻𑀲𑀼 𑀧𑀓𑀢𑀺𑀬𑀸𑀯 𑀢𑀸𑀦𑀺 𑀅𑀲𑀼𑀘𑀻𑀦𑀺 𑀘 𑀤𑀼𑀕𑁆𑀕𑀦𑁆𑀥𑀸𑀦𑀺 𑀘 𑀧𑀽𑀢𑀻𑀦𑀺 𑀘, 𑀇𑀤𑀸𑀦𑀺 𑀧𑀦 𑀅𑀲𑀼𑀘𑀺𑀢𑀭𑀸𑀦𑀺 𑀘𑁂𑀯 𑀤𑀼𑀕𑁆𑀕𑀦𑁆𑀥𑀢𑀭𑀸𑀦𑀺 𑀘 𑀧𑀽𑀢𑀺𑀢𑀭𑀸𑀦𑀺 𑀘 𑀳𑁄𑀦𑁆𑀢𑀺. 𑀓𑀸𑀘𑀻𑀢𑀺 𑀢𑀲𑁆𑀲 𑀳𑀺 𑀧𑀭𑀺𑀢𑀸𑀧𑁂𑀦𑁆𑀢𑀲𑁆𑀲 𑀘 𑀓𑀡𑁆𑀟𑀽𑀯𑀦𑁆𑀢𑀲𑁆𑀲 𑀘 𑀧𑀸𑀡𑀓𑀸 𑀅𑀦𑁆𑀢𑁄 𑀧𑀯𑀺𑀲𑀦𑁆𑀢𑀺, 𑀤𑀼𑀝𑁆𑀞𑀮𑁄𑀳𑀺𑀢𑀤𑀼𑀝𑁆𑀞𑀧𑀼𑀩𑁆𑀩𑀸 𑀧𑀕𑁆𑀖𑀭𑀦𑁆𑀢𑀺. 𑀏𑀯𑀫𑀲𑁆𑀲 𑀓𑀸𑀘𑀺 𑀅𑀲𑁆𑀲𑀸𑀤𑀫𑀢𑁆𑀢𑀸 𑀳𑁄𑀢𑀺.

𑀆𑀭𑁄𑀕𑁆𑀬𑀧𑀭𑀫𑀸𑀢𑀺 ¶ 𑀕𑀸𑀣𑀸𑀬 𑀬𑁂 𑀓𑁂𑀘𑀺 𑀥𑀦𑀮𑀸𑀪𑀸 𑀯𑀸 𑀬𑀲𑀮𑀸𑀪𑀸 𑀯𑀸 𑀧𑀼𑀢𑁆𑀢𑀮𑀸𑀪𑀸 𑀯𑀸 𑀅𑀢𑁆𑀣𑀺, 𑀆𑀭𑁄𑀕𑁆𑀬𑀁 𑀢𑁂𑀲𑀁 𑀧𑀭𑀫𑀁 𑀉𑀢𑁆𑀢𑀫𑀁, 𑀦𑀢𑁆𑀣𑀺 𑀢𑀢𑁄 𑀉𑀢𑁆𑀢𑀭𑀺𑀢𑀭𑁄 𑀮𑀸𑀪𑁄𑀢𑀺, 𑀆𑀭𑁄𑀕𑁆𑀬𑀧𑀭𑀫𑀸 𑀮𑀸𑀪𑀸. 𑀬𑀁𑀓𑀺𑀜𑁆𑀘𑀺 𑀛𑀸𑀦𑀲𑀼𑀔𑀁 𑀯𑀸 𑀫𑀕𑁆𑀕𑀲𑀼𑀔𑀁 𑀯𑀸 𑀨𑀮𑀲𑀼𑀔𑀁 𑀯𑀸 𑀅𑀢𑁆𑀣𑀺, 𑀦𑀺𑀩𑁆𑀩𑀸𑀦𑀁 𑀢𑀢𑁆𑀣 𑀧𑀭𑀫𑀁, 𑀦𑀢𑁆𑀣𑀺 𑀢𑀢𑁄 𑀉𑀢𑁆𑀢𑀭𑀺𑀢𑀭𑀁 𑀲𑀼𑀔𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀲𑀼𑀔𑀁. 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑀸𑀦𑀦𑁆𑀢𑀺 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀸𑀦𑀁 𑀧𑀼𑀩𑁆𑀩𑀪𑀸𑀕𑀕𑀫𑀦𑁂𑀦𑁂𑀯 𑀅𑀫𑀢𑀕𑀸𑀫𑀻𑀦𑀁 𑀅𑀝𑁆𑀞𑀗𑁆𑀕𑀺𑀓𑁄 𑀔𑁂𑀫𑁄, 𑀦𑀢𑁆𑀣𑀺 𑀢𑀢𑁄 𑀔𑁂𑀫𑀢𑀭𑁄 ¶ 𑀅𑀜𑁆𑀜𑁄 𑀫𑀕𑁆𑀕𑁄. 𑀅𑀣 𑀯𑀸 𑀔𑁂𑀫𑀁 𑀅𑀫𑀢𑀕𑀸𑀫𑀺𑀦𑀦𑁆𑀢𑀺 𑀏𑀢𑁆𑀣 𑀔𑁂𑀫𑀦𑁆𑀢𑀺𑀧𑀺 𑀅𑀫𑀢𑀦𑁆𑀢𑀺𑀧𑀺 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀦𑀸𑀫𑀁. 𑀬𑀸𑀯𑀢𑀸 𑀧𑀼𑀣𑀼𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀭𑀧𑁆𑀧𑀯𑀸𑀤𑀸 𑀔𑁂𑀫𑀕𑀸𑀫𑀺𑀦𑁄 𑀘 𑀅𑀫𑀢𑀕𑀸𑀫𑀺𑀦𑁄 𑀘𑀸𑀢𑀺 𑀮𑀤𑁆𑀥𑀺𑀯𑀲𑁂𑀦 𑀕𑀳𑀺𑀢𑀸, 𑀲𑀩𑁆𑀩𑁂𑀲𑀁 𑀢𑁂𑀲𑀁 𑀔𑁂𑀫𑀅𑀫𑀢𑀕𑀸𑀫𑀻𑀦𑀁 𑀫𑀕𑁆𑀕𑀸𑀦𑀁 𑀅𑀝𑁆𑀞𑀗𑁆𑀕𑀺𑀓𑁄 𑀧𑀭𑀫𑁄 𑀉𑀢𑁆𑀢𑀫𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑁨𑁧𑁬. 𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀦𑁆𑀢𑀺 𑀆𑀘𑀭𑀺𑀬𑀸𑀦𑀜𑁆𑀘𑁂𑀯 𑀆𑀘𑀭𑀺𑀬𑀸𑀘𑀭𑀺𑀬𑀸𑀦𑀜𑁆𑀘. 𑀲𑀫𑁂𑀢𑀻𑀢𑀺 ¶ 𑀏𑀓𑀦𑀸𑀴𑀺𑀬𑀸 𑀫𑀺𑀢𑀁 𑀯𑀺𑀬 𑀏𑀓𑀢𑀼𑀮𑀸𑀬 𑀢𑀼𑀮𑀺𑀢𑀁 𑀯𑀺𑀬 𑀲𑀤𑀺𑀲𑀁 𑀳𑁄𑀢𑀺 𑀦𑀺𑀦𑁆𑀦𑀸𑀦𑀸𑀓𑀭𑀡𑀁. 𑀅𑀦𑁄𑀫𑀚𑁆𑀚𑀢𑀻𑀢𑀺 𑀧𑀸𑀡𑀺𑀁 𑀳𑁂𑀝𑁆𑀞𑀸 𑀑𑀢𑀸𑀭𑁂𑀦𑁆𑀢𑁄 𑀫𑀚𑁆𑀚𑀢𑀺 𑁋 ‘‘𑀇𑀤𑀁 𑀢𑀁, 𑀪𑁄 𑀕𑁄𑀢𑀫, 𑀆𑀭𑁄𑀕𑁆𑀬𑀁, 𑀇𑀤𑀁 𑀢𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀓𑀸𑀮𑁂𑀦 𑀲𑀻𑀲𑀁 𑀓𑀸𑀮𑁂𑀦 𑀉𑀭𑀁 𑀧𑀭𑀺𑀫𑀚𑁆𑀚𑀦𑁆𑀢𑁄 𑀏𑀯𑀫𑀸𑀳.

𑁨𑁧𑁭. 𑀙𑁂𑀓𑀦𑁆𑀢𑀺 𑀲𑀫𑁆𑀧𑀦𑁆𑀦𑀁. 𑀲𑀸𑀳𑀼𑀴𑀺𑀘𑀻𑀭𑁂𑀦𑀸𑀢𑀺 𑀓𑀸𑀴𑀓𑁂𑀳𑀺 𑀏𑀴𑀓𑀮𑁄𑀫𑁂𑀳𑀺 𑀓𑀢𑀣𑀽𑀮𑀘𑀻𑀭𑁂𑀦. 𑀲𑀗𑁆𑀓𑀸𑀭𑀘𑁄𑀴𑀓𑁂𑀦𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀬𑁆𑀬𑀸𑀢𑀺 𑀓𑀸𑀮𑁂𑀦 𑀤𑀲𑀸𑀬 𑀓𑀸𑀮𑁂𑀦 𑀅𑀦𑁆𑀢𑁂 𑀓𑀸𑀮𑁂𑀦 𑀫𑀚𑁆𑀛𑁂 𑀧𑀭𑀺𑀫𑀚𑁆𑀚𑀦𑁆𑀢𑁄 𑀦𑀺𑀘𑁆𑀙𑀸𑀭𑁂𑀬𑁆𑀬, 𑀯𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑀓𑁂𑀳𑁂𑀲𑀸𑀢𑀺 𑀧𑀼𑀩𑁆𑀩𑀓𑁂𑀳𑀺 𑀏𑀲𑀸. 𑀯𑀺𑀧𑀲𑁆𑀲𑀻𑀧𑀺 𑀳𑀺 𑀪𑀕𑀯𑀸…𑀧𑁂… 𑀓𑀲𑁆𑀲𑀧𑁄𑀧𑀺 𑀪𑀕𑀯𑀸 𑀘𑀢𑀼𑀧𑀭𑀺𑀲𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺, ‘‘𑀅𑀢𑁆𑀣𑀦𑀺𑀲𑁆𑀲𑀺𑀢𑀕𑀸𑀣𑀸’’𑀢𑀺 𑀫𑀳𑀸𑀚𑀦𑁄 𑀉𑀕𑁆𑀕𑀡𑁆𑀳𑀺. 𑀲𑀢𑁆𑀣𑀭𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀅𑀧𑀭𑀪𑀸𑀕𑁂 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀅𑀦𑁆𑀢𑀭𑀁 𑀧𑀯𑀺𑀝𑁆𑀞𑀸. 𑀢𑁂 𑀧𑁄𑀢𑁆𑀣𑀓𑀕𑀢𑀁 𑀓𑀢𑁆𑀯𑀸 𑀧𑀤𑀤𑁆𑀯𑀬𑀫𑁂𑀯 𑀭𑀓𑁆𑀔𑀺𑀢𑀼𑀁 𑀲𑀓𑁆𑀔𑀺𑀁𑀲𑀼. 𑀢𑁂𑀦𑀸𑀳 𑁋 𑀲𑀸 𑀏𑀢𑀭𑀳𑀺 𑀅𑀦𑀼𑀧𑀼𑀩𑁆𑀩𑁂𑀦 𑀧𑀼𑀣𑀼𑀚𑁆𑀚𑀦𑀕𑀸𑀣𑀸𑀢𑀺.

𑁨𑁧𑁮. 𑀭𑁄𑀕𑁄𑀯 𑀪𑀽𑀢𑁄𑀢𑀺 𑀭𑁄𑀕𑀪𑀽𑀢𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀭𑀺𑀬𑀁 𑀘𑀓𑁆𑀔𑀼𑀦𑁆𑀢𑀺 𑀧𑀭𑀺𑀲𑀼𑀤𑁆𑀥𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀜𑁆𑀘𑁂𑀯 𑀫𑀕𑁆𑀕𑀜𑀸𑀡𑀜𑁆𑀘. 𑀧𑀳𑁄𑀢𑀻𑀢𑀺 𑀲𑀫𑀢𑁆𑀣𑁄. 𑀪𑁂𑀲𑀚𑁆𑀚𑀁 𑀓𑀭𑁂𑀬𑁆𑀬𑀸𑀢𑀺 𑀉𑀤𑁆𑀥𑀁𑀯𑀺𑀭𑁂𑀘𑀦𑀁 𑀅𑀥𑁄𑀯𑀺𑀭𑁂𑀘𑀦𑀁 𑀅𑀜𑁆𑀚𑀦𑀜𑁆𑀘𑀸𑀢𑀺 𑀪𑁂𑀲𑀚𑁆𑀚𑀁 𑀓𑀭𑁂𑀬𑁆𑀬.

𑁨𑁧𑁯. 𑀦 𑀘𑀓𑁆𑀔𑀽𑀦𑀺 𑀉𑀧𑁆𑀧𑀸𑀤𑁂𑀬𑁆𑀬𑀸𑀢𑀺 𑀬𑀲𑁆𑀲 𑀳𑀺 𑀅𑀦𑁆𑀢𑀭𑀸 𑀧𑀺𑀢𑁆𑀢𑀲𑁂𑀫𑁆𑀳𑀸𑀤𑀺𑀧𑀮𑀺𑀯𑁂𑀞𑁂𑀦 ¶ 𑀘𑀓𑁆𑀔𑀼𑀧𑀲𑀸𑀤𑁄 ¶ 𑀉𑀧𑀳𑀢𑁄 𑀳𑁄𑀢𑀺, 𑀲𑁄 𑀙𑁂𑀓𑀁 𑀯𑁂𑀚𑁆𑀚𑀁 𑀆𑀕𑀫𑁆𑀫 𑀲𑀧𑁆𑀧𑀸𑀬𑀪𑁂𑀲𑀚𑁆𑀚𑀁 𑀲𑁂𑀯𑀦𑁆𑀢𑁄 𑀘𑀓𑁆𑀔𑀽𑀦𑀺 𑀉𑀧𑁆𑀧𑀸𑀤𑁂𑀢𑀺 𑀦𑀸𑀫. 𑀚𑀘𑁆𑀘𑀦𑁆𑀥𑀲𑁆𑀲 𑀧𑀦 ¶ 𑀫𑀸𑀢𑀼𑀓𑀼𑀘𑁆𑀙𑀺𑀬𑀁𑀬𑁂𑀯 𑀯𑀺𑀦𑀝𑁆𑀞𑀸𑀦𑀺, 𑀢𑀲𑁆𑀫𑀸 𑀲𑁄 𑀦 𑀮𑀪𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦 𑀘𑀓𑁆𑀔𑀽𑀦𑀺 𑀉𑀧𑁆𑀧𑀸𑀤𑁂𑀬𑁆𑀬𑀸’’𑀢𑀺.

𑁨𑁨𑁦. 𑀤𑀼𑀢𑀺𑀬𑀯𑀸𑀭𑁂 𑀚𑀘𑁆𑀘𑀦𑁆𑀥𑁄𑀢𑀺 𑀚𑀸𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀺𑀢𑁆𑀢𑀸𑀤𑀺𑀧𑀮𑀺𑀯𑁂𑀞𑁂𑀦 𑀅𑀦𑁆𑀥𑁄. 𑀅𑀫𑀼𑀲𑁆𑀫𑀺𑀦𑁆𑀢𑀺 𑀢𑀲𑁆𑀫𑀺𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂. 𑀅𑀫𑀺𑀢𑁆𑀢𑀢𑁄𑀧𑀺 𑀤𑀳𑁂𑀬𑁆𑀬𑀸𑀢𑀺 𑀅𑀫𑀺𑀢𑁆𑀢𑁄 𑀫𑁂 𑀅𑀬𑀦𑁆𑀢𑀺 𑀏𑀯𑀁 𑀅𑀫𑀺𑀢𑁆𑀢𑀢𑁄 𑀞𑀧𑁂𑀬𑁆𑀬. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀺𑀦𑀸 𑀘𑀺𑀢𑁆𑀢𑁂𑀦𑀸𑀢𑀺 𑀯𑀝𑁆𑀝𑁂 𑀅𑀦𑀼𑀕𑀢𑀘𑀺𑀢𑁆𑀢𑁂𑀦. 𑀢𑀲𑁆𑀲 𑀫𑁂 𑀉𑀧𑀸𑀤𑀸𑀦𑀧𑀘𑁆𑀘𑀬𑀸𑀢𑀺 𑀏𑀓𑀲𑀦𑁆𑀥𑀺 𑀤𑁆𑀯𑀺𑀲𑀗𑁆𑀔𑁂𑀧𑁄 𑀧𑀘𑁆𑀘𑀬𑀸𑀓𑀸𑀭𑁄 𑀓𑀣𑀺𑀢𑁄, 𑀯𑀝𑁆𑀝𑀁 𑀯𑀺𑀪𑀸𑀯𑀺𑀢𑀁.

𑁨𑁨𑁧. 𑀥𑀫𑁆𑀫𑀸𑀦𑀼𑀥𑀫𑁆𑀫𑀦𑁆𑀢𑀺 𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫𑀁 𑀅𑀦𑀼𑀘𑁆𑀙𑀯𑀺𑀓𑀁 𑀧𑀝𑀺𑀧𑀤𑀁. 𑀇𑀫𑁂 𑀭𑁄𑀕𑀸 𑀕𑀡𑁆𑀟𑀸 𑀲𑀮𑁆𑀮𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑁂 𑀤𑀲𑁆𑀲𑁂𑀢𑀺. 𑀉𑀧𑀸𑀤𑀸𑀦𑀦𑀺𑀭𑁄𑀥𑀸𑀢𑀺 𑀯𑀺𑀯𑀝𑁆𑀝𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀦𑁆𑀤𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁩. 𑀏𑀯𑀁 ¶ 𑀫𑁂 𑀲𑀼𑀢𑀦𑁆𑀢𑀺 𑀲𑀦𑁆𑀤𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀧𑀺𑀮𑀓𑁆𑀔𑀕𑀼𑀳𑀸𑀬𑀦𑁆𑀢𑀺 𑀢𑀲𑁆𑀲𑀸 𑀕𑀼𑀳𑀸𑀬 𑀤𑁆𑀯𑀸𑀭𑁂 𑀧𑀺𑀮𑀓𑁆𑀔𑀭𑀼𑀓𑁆𑀔𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀧𑀺𑀮𑀓𑁆𑀔𑀕𑀼𑀳𑀸𑀢𑁆𑀯𑁂𑀯 𑀲𑀗𑁆𑀔𑀁 𑀕𑀢𑀸. 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀯𑀺𑀯𑁂𑀓𑀢𑁄 𑀯𑀼𑀝𑁆𑀞𑀺𑀢𑁄. 𑀤𑁂𑀯𑀓𑀢𑀲𑁄𑀩𑁆𑀪𑁄𑀢𑀺 𑀯𑀲𑁆𑀲𑁄𑀤𑀓𑁂𑀦𑁂𑀯 𑀢𑀺𑀦𑁆𑀦𑀝𑁆𑀞𑀸𑀦𑁂 𑀚𑀸𑀢𑁄 𑀫𑀳𑀸𑀉𑀤𑀓𑀭𑀳𑀤𑁄. 𑀕𑀼𑀳𑀸𑀤𑀲𑁆𑀲𑀦𑀸𑀬𑀸𑀢𑀺 𑀏𑀢𑁆𑀣 𑀕𑀼𑀳𑀸𑀢𑀺 𑀧𑀁𑀲𑀼𑀕𑀼𑀳𑀸. 𑀲𑀸 𑀉𑀦𑁆𑀦𑀫𑁂 ¶ 𑀉𑀤𑀓𑀫𑀼𑀢𑁆𑀢𑀝𑁆𑀞𑀸𑀦𑁂 𑀅𑀳𑁄𑀲𑀺, 𑀏𑀓𑀢𑁄 𑀉𑀫𑀗𑁆𑀕𑀁 𑀓𑀢𑁆𑀯𑀸 𑀔𑀸𑀡𑀼𑀓𑁂 𑀘 𑀧𑀁𑀲𑀼𑀜𑁆𑀘 𑀦𑀻𑀳𑀭𑀺𑀢𑁆𑀯𑀸 𑀅𑀦𑁆𑀢𑁄 𑀣𑀫𑁆𑀪𑁂 𑀉𑀲𑁆𑀲𑀸𑀧𑁂𑀢𑁆𑀯𑀸 𑀫𑀢𑁆𑀣𑀓𑁂 𑀧𑀤𑀭𑀘𑁆𑀙𑀦𑁆𑀦𑀕𑁂𑀳𑀲𑀗𑁆𑀔𑁂𑀧𑁂𑀦 𑀓𑀢𑀸, 𑀢𑀢𑁆𑀣 𑀢𑁂 𑀧𑀭𑀺𑀩𑁆𑀩𑀸𑀚𑀓𑀸 𑀯𑀲𑀦𑁆𑀢𑀺. 𑀲𑀸 𑀯𑀲𑁆𑀲𑀸𑀦𑁂 𑀉𑀤𑀓𑀧𑀼𑀡𑁆𑀡𑀸 𑀢𑀺𑀝𑁆𑀞𑀢𑀺, 𑀦𑀺𑀤𑀸𑀖𑁂 𑀢𑀢𑁆𑀣 𑀯𑀲𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬 ‘‘𑀕𑀼𑀳𑀸𑀤𑀲𑁆𑀲𑀦𑀸𑀬𑀸’’𑀢𑀺 𑀆𑀳. 𑀯𑀺𑀳𑀸𑀭𑀤𑀲𑁆𑀲𑀦𑀢𑁆𑀣𑀜𑁆𑀳𑀺 𑀅𑀦𑀫𑀢𑀕𑁆𑀕𑀺𑀬𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀲𑀫𑀼𑀤𑁆𑀤𑀧𑀩𑁆𑀩𑀢𑀤𑀲𑁆𑀲𑀦𑀢𑁆𑀣𑀁 𑀯𑀸𑀧𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺.

𑀉𑀦𑁆𑀦𑀸𑀤𑀺𑀦𑀺𑀬𑀸𑀢𑀺 ¶ 𑀉𑀘𑁆𑀘𑀁 𑀦𑀤𑀫𑀸𑀦𑀸𑀬. 𑀏𑀯𑀁 𑀦𑀤𑀫𑀸𑀦𑀸𑀬 𑀘𑀲𑁆𑀲𑀸 𑀉𑀤𑁆𑀥𑀗𑁆𑀕𑀫𑀦𑀯𑀲𑁂𑀦 𑀉𑀘𑁆𑀘𑁄, 𑀤𑀺𑀲𑀸𑀲𑀼 𑀧𑀢𑁆𑀣𑀝𑀯𑀲𑁂𑀦 𑀫𑀳𑀸𑀲𑀤𑁆𑀤𑁄𑀢𑀺 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑁄, 𑀢𑀸𑀬 𑀉𑀘𑁆𑀘𑀸𑀲𑀤𑁆𑀤𑀫𑀳𑀸𑀲𑀤𑁆𑀤𑀸𑀬. 𑀢𑁂𑀲𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀓𑀢𑁆𑀢𑀩𑁆𑀩𑀁 𑀦𑀸𑀫 𑀘𑁂𑀢𑀺𑀬𑀯𑀢𑁆𑀢𑀁 𑀯𑀸 𑀩𑁄𑀥𑀺𑀯𑀢𑁆𑀢𑀁 𑀯𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀯𑀢𑁆𑀢𑀁 𑀯𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀯𑀸 𑀦𑀢𑁆𑀣𑀺. 𑀢𑁂𑀦 𑀢𑁂 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀩𑀸𑀮𑀸𑀢𑀧𑁂 𑀦𑀺𑀲𑀺𑀦𑁆𑀦𑀸, 𑀲𑀸𑀬𑀁 𑀯𑀸 𑀓𑀣𑀸𑀬 𑀨𑀸𑀲𑀼𑀓𑀢𑁆𑀣𑀸𑀬 𑀲𑀦𑁆𑀦𑀺𑀧𑀢𑀺𑀢𑀸 ‘‘𑀇𑀫𑀲𑁆𑀲 𑀳𑀢𑁆𑀣𑁄 𑀲𑁄𑀪𑀡𑁄 𑀇𑀫𑀲𑁆𑀲 𑀧𑀸𑀤𑁄’’𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀢𑁆𑀣𑀧𑀸𑀤𑀸𑀤𑀻𑀦𑀺 𑀯𑀸 𑀆𑀭𑀩𑁆𑀪 𑀇𑀢𑁆𑀣𑀺𑀧𑀼𑀭𑀺𑀲𑀤𑀸𑀭𑀓𑀤𑀸𑀭𑀺𑀓𑀸𑀯𑀡𑁆𑀡𑁂 𑀯𑀸 𑀅𑀜𑁆𑀜𑀁 𑀯𑀸 𑀓𑀸𑀫𑀲𑁆𑀲𑀸𑀤𑀪𑀯𑀲𑁆𑀲𑀸𑀤𑀸𑀤𑀺𑀯𑀢𑁆𑀣𑀼𑀁 𑀆𑀭𑀩𑁆𑀪 𑀓𑀣𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀭𑀸𑀚𑀓𑀣𑀸𑀤𑀺𑀅𑀦𑁂𑀓𑀯𑀺𑀥𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀓𑀣𑁂𑀦𑁆𑀢𑀺. 𑀲𑀸 𑀳𑀺 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸 𑀲𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑀸𑀦𑀁 𑀢𑀺𑀭𑀘𑁆𑀙𑀸𑀦𑀪𑀽𑀢𑀸 𑀓𑀣𑀸𑀢𑀺 𑀢𑀺𑀭𑀘𑁆𑀙𑀸𑀦𑀓𑀣𑀸. 𑀢𑀢𑁆𑀣 𑀭𑀸𑀚𑀸𑀦𑀁 𑀆𑀭𑀩𑁆𑀪 ‘‘𑀫𑀳𑀸𑀲𑀫𑁆𑀫𑀢𑁄 𑀫𑀦𑁆𑀥𑀸𑀢𑀸 𑀥𑀫𑁆𑀫𑀸𑀲𑁄𑀓𑁄 𑀏𑀯𑀁𑀫𑀳𑀸𑀦𑀼𑀪𑀸𑀯𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀸 𑀓𑀣𑀸 𑀭𑀸𑀚𑀓𑀣𑀸. 𑀏𑀲 𑀦𑀬𑁄 𑀘𑁄𑀭𑀓𑀣𑀸𑀤𑀻𑀲𑀼.

𑀢𑁂𑀲𑀼 ‘‘𑀅𑀲𑀼𑀓𑁄 𑀭𑀸𑀚𑀸 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄’’𑀢𑀺𑀆𑀤𑀺𑀦𑀸 ¶ 𑀦𑀬𑁂𑀦 𑀕𑁂𑀳𑀲𑁆𑀲𑀺𑀢𑀓𑀣𑀸𑀯 𑀢𑀺𑀭𑀘𑁆𑀙𑀸𑀦𑀓𑀣𑀸 𑀳𑁄𑀢𑀺. ‘‘𑀲𑁄𑀧𑀺 𑀦𑀸𑀫 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄 𑀔𑀬𑀁 𑀕𑀢𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀧𑀦 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑁂 𑀢𑀺𑀝𑁆𑀞𑀢𑀺. 𑀘𑁄𑀭𑁂𑀲𑀼𑀧𑀺 ‘‘𑀫𑀽𑀮𑀤𑁂𑀯𑁄 𑀏𑀯𑀁𑀫𑀳𑀸𑀦𑀼𑀪𑀸𑀯𑁄, 𑀫𑁂𑀖𑀫𑀸𑀮𑁄 𑀏𑀯𑀁𑀫𑀳𑀸𑀦𑀼𑀪𑀸𑀯𑁄’’𑀢𑀺 𑀢𑁂𑀲𑀁 ¶ 𑀓𑀫𑁆𑀫𑀁 𑀧𑀝𑀺𑀘𑁆𑀘 𑀅𑀳𑁄 𑀲𑀽𑀭𑀸𑀢𑀺 𑀕𑁂𑀳𑀲𑁆𑀲𑀺𑀢𑀓𑀣𑀸𑀯 𑀢𑀺𑀭𑀘𑁆𑀙𑀸𑀦𑀓𑀣𑀸. 𑀬𑀼𑀤𑁆𑀥𑁂𑀧𑀺 𑀪𑀸𑀭𑀢𑀬𑀼𑀤𑁆𑀥𑀸𑀤𑀻𑀲𑀼 ‘‘𑀅𑀲𑀼𑀓𑁂𑀦 𑀅𑀲𑀼𑀓𑁄 𑀏𑀯𑀁 𑀫𑀸𑀭𑀺𑀢𑁄 𑀏𑀯𑀁 𑀯𑀺𑀤𑁆𑀥𑁄’’𑀢𑀺 𑀓𑀸𑀫𑀲𑁆𑀲𑀸𑀤𑀯𑀲𑁂𑀦𑁂𑀯 𑀓𑀣𑀸 𑀢𑀺𑀭𑀘𑁆𑀙𑀸𑀦𑀓𑀣𑀸. ‘‘𑀢𑁂𑀧𑀺 𑀦𑀸𑀫 𑀔𑀬𑀁 𑀕𑀢𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀧𑀦 𑀲𑀩𑁆𑀩𑀢𑁆𑀣 𑀓𑀣𑀸 𑀓𑀫𑁆𑀫𑀝𑁆𑀞𑀸𑀦𑀫𑁂𑀯 𑀳𑁄𑀢𑀺. 𑀅𑀧𑀺𑀘 𑀅𑀦𑁆𑀦𑀸𑀤𑀻𑀲𑀼 ‘‘𑀏𑀯𑀁 𑀯𑀡𑁆𑀡𑀯𑀦𑁆𑀢𑀁 𑀕𑀦𑁆𑀥𑀯𑀦𑁆𑀢𑀁 𑀭𑀲𑀯𑀦𑁆𑀢𑀁 𑀨𑀲𑁆𑀲𑀲𑀫𑁆𑀧𑀦𑁆𑀦𑀁 𑀔𑀸𑀤𑀺𑀫𑁆𑀳 𑀪𑀼𑀜𑁆𑀚𑀺𑀫𑁆𑀳 𑀧𑀺𑀯𑀺𑀫𑁆𑀳 𑀧𑀭𑀺𑀪𑀼𑀜𑁆𑀚𑀺𑀫𑁆𑀳𑀸’’𑀢𑀺 𑀓𑀸𑀫𑀲𑁆𑀲𑀸𑀤𑀯𑀲𑁂𑀦 𑀓𑀣𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀸𑀢𑁆𑀣𑀓𑀁 𑀧𑀦 𑀓𑀢𑁆𑀯𑀸 𑁋 ‘‘𑀧𑀼𑀩𑁆𑀩𑁂 𑀏𑀯𑀁 𑀯𑀡𑁆𑀡𑀸𑀤𑀺𑀲𑀫𑁆𑀧𑀦𑁆𑀦𑀁 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀲𑀬𑀦𑀁 𑀫𑀸𑀮𑀁 𑀕𑀦𑁆𑀥𑀁 𑀲𑀻𑀮𑀯𑀦𑁆𑀢𑀸𑀦𑀁 𑀅𑀤𑀫𑁆𑀳, 𑀘𑁂𑀢𑀺𑀬𑁂 𑀧𑀽𑀚𑀁 𑀅𑀓𑀭𑀺𑀫𑁆𑀳𑀸’’𑀢𑀺 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺.

𑀜𑀸𑀢𑀺𑀓𑀣𑀸𑀤𑀻𑀲𑀼𑀧𑀺 ‘‘𑀅𑀫𑁆𑀳𑀸𑀓𑀁 𑀜𑀸𑀢𑀓𑀸 𑀲𑀽𑀭𑀸 𑀲𑀫𑀢𑁆𑀣𑀸’’𑀢𑀺 𑀯𑀸 ‘‘𑀧𑀼𑀩𑁆𑀩𑁂 𑀫𑀬𑀁 𑀏𑀯𑀁 𑀯𑀺𑀘𑀺𑀢𑁆𑀭𑁂𑀳𑀺 𑀬𑀸𑀦𑁂𑀳𑀺 𑀘𑀭𑀺𑀫𑁆𑀳𑀸’’𑀢𑀺 𑀯𑀸 𑀅𑀲𑁆𑀲𑀸𑀤𑀯𑀲𑁂𑀦 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀸𑀢𑁆𑀣𑀓𑀁 𑀧𑀦 𑀓𑀢𑁆𑀯𑀸 ‘‘𑀢𑁂𑀧𑀺 𑀦𑁄 𑀜𑀸𑀢𑀓𑀸 𑀔𑀬𑀁 𑀕𑀢𑀸’’𑀢𑀺 𑀯𑀸 ‘‘𑀧𑀼𑀩𑁆𑀩𑁂 𑀫𑀬𑀁 𑀏𑀯𑀭𑀽𑀧𑀸 𑀉𑀧𑀸𑀳𑀦𑀸 𑀲𑀗𑁆𑀖𑀲𑁆𑀲 𑀅𑀤𑀫𑁆𑀳𑀸’’𑀢𑀺 𑀯𑀸 𑀓𑀣𑁂𑀢𑀩𑁆𑀩𑀸. 𑀕𑀸𑀫𑀓𑀣𑀸𑀧𑀺 𑀲𑀼𑀦𑀺𑀯𑀺𑀝𑁆𑀞𑀤𑀼𑀦𑁆𑀦𑀺𑀯𑀺𑀝𑁆𑀞𑀲𑀼𑀪𑀺𑀓𑁆𑀔𑀤𑀼𑀩𑁆𑀪𑀺𑀓𑁆𑀔𑀸𑀤𑀺𑀯𑀲𑁂𑀦 𑀯𑀸 ‘‘𑀅𑀲𑀼𑀓𑀕𑀸𑀫𑀯𑀸𑀲𑀺𑀦𑁄 𑀲𑀽𑀭𑀸 𑀲𑀫𑀢𑁆𑀣𑀸’’𑀢𑀺 𑀯𑀸 𑀏𑀯𑀁 𑀅𑀲𑁆𑀲𑀸𑀤𑀯𑀲𑁂𑀦 𑀦 𑀯𑀝𑁆𑀝𑀢𑀺, 𑀲𑀸𑀢𑁆𑀣𑀓𑀁 𑀧𑀦 𑀓𑀢𑁆𑀯𑀸 𑀲𑀤𑁆𑀥𑀸 𑀧𑀲𑀦𑁆𑀦𑀸𑀢𑀺 ¶ 𑀯𑀸 𑀔𑀬𑀯𑀬𑀁 𑀕𑀢𑀸𑀢𑀺 𑀯𑀸 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀦𑀺𑀕𑀫𑀦𑀕𑀭𑀚𑀦𑀧𑀤𑀓𑀣𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑁆𑀣𑀺𑀓𑀣𑀸𑀧𑀺 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀻𑀦𑀺 𑀧𑀝𑀺𑀘𑁆𑀘 𑀅𑀲𑁆𑀲𑀸𑀤𑀯𑀲𑁂𑀦 𑀦 𑀯𑀝𑁆𑀝𑀢𑀺, 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀔𑀬𑀁 𑀕𑀢𑀸𑀢𑀺 𑀏𑀯𑀫𑁂𑀯 𑀯𑀝𑁆𑀝𑀢𑀺. 𑀲𑀽𑀭𑀓𑀣𑀸𑀧𑀺 ¶ 𑀦𑀦𑁆𑀤𑀺𑀫𑀺𑀢𑁆𑀢𑁄 𑀦𑀸𑀫 𑀬𑁄𑀥𑁄 𑀲𑀽𑀭𑁄 𑀅𑀳𑁄𑀲𑀻𑀢𑀺 𑀅𑀲𑁆𑀲𑀸𑀤𑀯𑀲𑁂𑀦𑁂𑀯 𑀦 𑀯𑀝𑁆𑀝𑀢𑀺, 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀅𑀳𑁄𑀲𑀺 𑀔𑀬𑀁 𑀕𑀢𑁄𑀢𑀺 𑀏𑀯𑀫𑁂𑀯 𑀯𑀝𑁆𑀝𑀢𑀺. 𑀯𑀺𑀲𑀺𑀔𑀸𑀓𑀣𑀸𑀧𑀺 𑀅𑀲𑀼𑀓𑀸 𑀯𑀺𑀲𑀺𑀔𑀸 𑀲𑀼𑀦𑀺𑀯𑀺𑀝𑁆𑀞𑀸 𑀤𑀼𑀦𑁆𑀦𑀺𑀯𑀺𑀝𑁆𑀞𑀸 𑀲𑀽𑀭𑀸 𑀲𑀫𑀢𑁆𑀣𑀸𑀢𑀺 𑀅𑀲𑁆𑀲𑀸𑀤𑀯𑀲𑁂𑀦𑁂𑀯 𑀦 𑀯𑀝𑁆𑀝𑀢𑀺, 𑀲𑀤𑁆𑀥𑀸 𑀧𑀲𑀦𑁆𑀦𑀸 𑀔𑀬𑀁 𑀕𑀢𑀸 𑀇𑀘𑁆𑀘𑁂𑀯𑀁 𑀯𑀝𑁆𑀝𑀢𑀺.

𑀓𑀼𑀫𑁆𑀪𑀝𑁆𑀞𑀸𑀦𑀓𑀣𑀸𑀢𑀺 𑀓𑀼𑀫𑁆𑀪𑀝𑁆𑀞𑀸𑀦𑀉𑀤𑀓𑀢𑀺𑀢𑁆𑀣𑀓𑀣𑀸 𑀯𑀸 𑀯𑀼𑀘𑁆𑀘𑀢𑀺 𑀓𑀼𑀫𑁆𑀪𑀤𑀸𑀲𑀺𑀓𑀣𑀸 𑀯𑀸. 𑀲𑀸𑀧𑀺 ‘‘𑀧𑀸𑀲𑀸𑀤𑀺𑀓𑀸 𑀦𑀘𑁆𑀘𑀺𑀢𑀼𑀁 𑀕𑀸𑀬𑀺𑀢𑀼𑀁 𑀙𑁂𑀓𑀸’’𑀢𑀺 𑀅𑀲𑁆𑀲𑀸𑀤𑀯𑀲𑁂𑀦 𑀦 𑀯𑀝𑁆𑀝𑀢𑀺, 𑀲𑀤𑁆𑀥𑀸 𑀧𑀲𑀦𑁆𑀦𑀸𑀢𑀺𑀆𑀤𑀺𑀦𑀸 𑀦𑀬𑁂𑀦𑁂𑀯 𑀯𑀝𑁆𑀝𑀢𑀺. 𑀧𑀼𑀩𑁆𑀩𑀧𑁂𑀢𑀓𑀣𑀸𑀢𑀺 𑀅𑀢𑀻𑀢𑀜𑀸𑀢𑀺𑀓𑀣𑀸. 𑀢𑀢𑁆𑀣 𑀯𑀢𑁆𑀢𑀫𑀸𑀦𑀜𑀸𑀢𑀺𑀓𑀣𑀸𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄.

𑀦𑀸𑀦𑀢𑁆𑀢𑀓𑀣𑀸𑀢𑀺 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑀣𑀸𑀯𑀺𑀫𑀼𑀢𑁆𑀢𑀸 𑀅𑀯𑀲𑁂𑀲𑀸 𑀦𑀸𑀦𑀸𑀲𑀪𑀸𑀯𑀸 𑀦𑀺𑀭𑀢𑁆𑀣𑀓𑀓𑀣𑀸. 𑀮𑁄𑀓𑀓𑁆𑀔𑀸𑀬𑀺𑀓𑀸𑀢𑀺 ¶ 𑀅𑀬𑀁 𑀮𑁄𑀓𑁄 𑀓𑁂𑀦 𑀦𑀺𑀫𑁆𑀫𑀺𑀢𑁄, 𑀅𑀲𑀼𑀓𑁂𑀦 𑀦𑀸𑀫 𑀦𑀺𑀫𑁆𑀫𑀺𑀢𑁄, 𑀓𑀸𑀓𑀸 𑀲𑁂𑀢𑀸 𑀅𑀝𑁆𑀞𑀻𑀦𑀁 𑀲𑁂𑀢𑀢𑁆𑀢𑀸, 𑀩𑀓𑀸 𑀭𑀢𑁆𑀢𑀸 𑀮𑁄𑀳𑀺𑀢𑀲𑁆𑀲 𑀭𑀢𑁆𑀢𑀢𑁆𑀢𑀸𑀢𑀺 𑀏𑀯𑀫𑀸𑀤𑀺𑀓𑀸 𑀮𑁄𑀓𑀸𑀬𑀢𑀯𑀺𑀢𑀡𑁆𑀟𑀲𑀮𑁆𑀮𑀸𑀧𑀓𑀣𑀸.

𑀲𑀫𑀼𑀤𑁆𑀤𑀓𑁆𑀔𑀸𑀬𑀺𑀓𑀸 𑀦𑀸𑀫 𑀓𑀲𑁆𑀫𑀸 𑀲𑀫𑀼𑀤𑁆𑀤𑁄 𑀲𑀸𑀕𑀭𑁄, 𑀲𑀸𑀕𑀭𑀤𑁂𑀯𑁂𑀦 𑀔𑀡𑀺𑀢𑀢𑁆𑀢𑀸 𑀲𑀸𑀕𑀭𑁄, 𑀔𑀢𑁄 𑀫𑁂𑀢𑀺 𑀳𑀢𑁆𑀣𑀫𑀼𑀤𑁆𑀤𑀸𑀬 𑀦𑀺𑀯𑁂𑀤𑀺𑀢𑀢𑁆𑀢𑀸 𑀲𑀫𑀼𑀤𑁆𑀤𑁄𑀢𑀺 𑀏𑀯𑀫𑀸𑀤𑀺𑀓𑀸 𑀦𑀺𑀭𑀢𑁆𑀣𑀓𑀸 𑀲𑀫𑀼𑀤𑁆𑀤𑀓𑁆𑀔𑀸𑀬𑀺𑀓𑀓𑀣𑀸. 𑀇𑀢𑀺 𑀪𑀯𑁄, 𑀇𑀢𑀺 𑀅𑀪𑀯𑁄𑀢𑀺 𑀬𑀁 𑀯𑀸 𑀢𑀁 𑀯𑀸 𑀦𑀺𑀭𑀢𑁆𑀣𑀓𑀓𑀸𑀭𑀡𑀁 𑀯𑀢𑁆𑀯𑀸 𑀧𑀯𑀢𑁆𑀢𑀺𑀢𑀓𑀣𑀸 𑀇𑀢𑀺𑀪𑀯𑀸𑀪𑀯𑀓𑀣𑀸. 𑀏𑀢𑁆𑀣 𑀘 𑀪𑀯𑁄𑀢𑀺 𑀲𑀲𑁆𑀲𑀢𑀁, 𑀅𑀪𑀯𑁄𑀢𑀺 𑀉𑀘𑁆𑀙𑁂𑀤𑀁. 𑀪𑀯𑁄𑀢𑀺 𑀯𑀟𑁆𑀠𑀺, 𑀅𑀪𑀯𑁄𑀢𑀺 ¶ 𑀳𑀸𑀦𑀺. 𑀪𑀯𑁄𑀢𑀺 𑀓𑀸𑀫𑀲𑀼𑀔𑀁, 𑀅𑀪𑀯𑁄𑀢𑀺 𑀅𑀢𑁆𑀢𑀓𑀺𑀮𑀫𑀣𑁄. 𑀇𑀢𑀺 𑀇𑀫𑀸𑀬 𑀙𑀩𑁆𑀩𑀺𑀥𑀸𑀬 𑀇𑀢𑀺𑀪𑀯𑀸𑀪𑀯𑀓𑀣𑀸𑀬 𑀲𑀤𑁆𑀥𑀺𑀁 𑀩𑀸𑀢𑁆𑀢𑀺𑀁𑀲𑀢𑀺𑀭𑀘𑁆𑀙𑀸𑀦𑀓𑀣𑀸 𑀦𑀸𑀫 𑀳𑁄𑀢𑀺. 𑀏𑀯𑀭𑀽𑀧𑀺𑀁 𑀢𑀺𑀭𑀘𑁆𑀙𑀸𑀦𑀓𑀣𑀁 𑀓𑀣𑁂𑀦𑁆𑀢𑀺𑀬𑀸 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺.

𑀢𑀢𑁄 𑀲𑀦𑁆𑀤𑀓𑁄 𑀧𑀭𑀺𑀩𑁆𑀩𑀸𑀚𑀓𑁄 𑀢𑁂 𑀧𑀭𑀺𑀩𑁆𑀩𑀸𑀚𑀓𑁂 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀇𑀫𑁂 𑀧𑀭𑀺𑀩𑁆𑀩𑀸𑀚𑀓𑀸 𑀅𑀢𑀺𑀯𑀺𑀬 𑀅𑀜𑁆𑀜𑀫𑀜𑁆𑀜𑀁 𑀅𑀕𑀸𑀭𑀯𑀸 𑀅𑀧𑁆𑀧𑀢𑀺𑀲𑁆𑀲𑀸, 𑀫𑀬𑀜𑁆𑀘 𑀲𑀫𑀡𑀲𑁆𑀲 ¶ 𑀕𑁄𑀢𑀫𑀲𑁆𑀲 𑀧𑀸𑀢𑀼𑀪𑀸𑀯𑀢𑁄 𑀧𑀝𑁆𑀞𑀸𑀬 𑀲𑀽𑀭𑀺𑀬𑀼𑀕𑁆𑀕𑀫𑀦𑁂 𑀔𑀚𑁆𑀚𑁄𑀧𑀦𑀓𑀽𑀧𑀫𑀸 𑀚𑀸𑀢𑀸, 𑀮𑀸𑀪𑀲𑀓𑁆𑀓𑀸𑀭𑁄𑀧𑀺 𑀦𑁄 𑀧𑀭𑀺𑀳𑀻𑀦𑁄. 𑀲𑀘𑁂 𑀧𑀦 𑀇𑀫𑀁 𑀞𑀸𑀦𑀁 𑀲𑀫𑀡𑁄 𑀕𑁄𑀢𑀫𑁄 𑀕𑁄𑀢𑀫𑀲𑀸𑀯𑀓𑁄 𑀯𑀸 𑀕𑀺𑀳𑀺𑀉𑀧𑀝𑁆𑀞𑀸𑀓𑁄𑀧𑀺 𑀯𑀸𑀲𑁆𑀲 𑀆𑀕𑀘𑁆𑀙𑁂𑀬𑁆𑀬, 𑀅𑀢𑀺𑀯𑀺𑀬 𑀮𑀚𑁆𑀚𑀦𑀻𑀬𑀁 𑀪𑀯𑀺𑀲𑁆𑀲𑀢𑀺. 𑀧𑀭𑀺𑀲𑀤𑁄𑀲𑁄 𑀔𑁄 𑀧𑀦 𑀧𑀭𑀺𑀲𑀚𑁂𑀝𑁆𑀞𑀓𑀲𑁆𑀲𑁂𑀯 𑀉𑀧𑀭𑀺 𑀆𑀭𑁄𑀳𑀢𑀻’’𑀢𑀺 𑀇𑀢𑁄 𑀘𑀺𑀢𑁄 𑀘 𑀯𑀺𑀮𑁄𑀓𑁂𑀦𑁆𑀢𑁄 𑀣𑁂𑀭𑀁 𑀅𑀤𑁆𑀤𑀲. 𑀢𑁂𑀦 𑀯𑀼𑀢𑁆𑀢𑀁 𑀅𑀤𑁆𑀤𑀲𑀸 𑀔𑁄 𑀲𑀦𑁆𑀤𑀓𑁄 𑀧𑀭𑀺𑀩𑁆𑀩𑀸𑀚𑀓𑁄…𑀧𑁂… 𑀢𑀼𑀡𑁆𑀳𑀻 𑀅𑀳𑁂𑀲𑀼𑀦𑁆𑀢𑀺.

𑀢𑀢𑁆𑀣 𑀲𑀡𑁆𑀞𑀧𑁂𑀲𑀻𑀢𑀺 𑀲𑀺𑀓𑁆𑀔𑀸𑀧𑁂𑀲𑀺, 𑀯𑀚𑁆𑀚𑀫𑀲𑁆𑀲𑀸 𑀧𑀝𑀺𑀘𑁆𑀙𑀸𑀤𑁂𑀲𑀺. 𑀬𑀣𑀸 𑀲𑀼𑀝𑁆𑀞𑀧𑀺𑀢𑀸 𑀳𑁄𑀢𑀺, 𑀢𑀣𑀸 𑀦𑀁 𑀞𑀧𑁂𑀲𑀺. 𑀬𑀣𑀸 𑀦𑀸𑀫 𑀧𑀭𑀺𑀲𑀫𑀚𑁆𑀛𑀁 𑀧𑀯𑀺𑀲𑀦𑁆𑀢𑁄 𑀧𑀼𑀭𑀺𑀲𑁄 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁 𑀦𑀺𑀯𑀸𑀲𑀦𑀁 𑀲𑀡𑁆𑀞𑀧𑁂𑀢𑀺, 𑀧𑀸𑀭𑀼𑀧𑀦𑀁 𑀲𑀡𑁆𑀞𑀧𑁂𑀢𑀺, 𑀭𑀚𑁄𑀓𑀺𑀡𑁆𑀡𑀝𑁆𑀞𑀸𑀦𑀁 𑀧𑀼𑀜𑁆𑀙𑀢𑀺, 𑀏𑀯𑀫𑀲𑁆𑀲𑀸 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁 ‘‘𑀅𑀧𑁆𑀧𑀲𑀤𑁆𑀤𑀸 𑀪𑁄𑀦𑁆𑀢𑁄’’𑀢𑀺 𑀲𑀺𑀓𑁆𑀔𑀸𑀧𑁂𑀦𑁆𑀢𑁄 𑀬𑀣𑀸 𑀲𑀼𑀝𑁆𑀞𑀧𑀺𑀢𑀸 𑀳𑁄𑀢𑀺, 𑀢𑀣𑀸 𑀦𑀁 𑀞𑀧𑁂𑀲𑀻𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀲𑀤𑁆𑀤𑀓𑀸𑀫𑀸𑀢𑀺 𑀅𑀧𑁆𑀧𑀲𑀤𑁆𑀤𑀁 𑀇𑀘𑁆𑀙𑀦𑁆𑀢𑀺, 𑀏𑀓𑀓𑀸 𑀦𑀺𑀲𑀻𑀤𑀦𑁆𑀢𑀺, 𑀏𑀓𑀓𑀸 𑀢𑀺𑀝𑁆𑀞𑀦𑁆𑀢𑀺, 𑀦 𑀕𑀡𑀲𑀗𑁆𑀕𑀡𑀺𑀓𑀸𑀬 𑀬𑀸𑀧𑁂𑀦𑁆𑀢𑀺. 𑀅𑀧𑁆𑀧𑀲𑀤𑁆𑀤𑀯𑀺𑀦𑀻𑀢𑀸𑀢𑀺 𑀅𑀧𑁆𑀧𑀲𑀤𑁆𑀤𑁂𑀦 𑀦𑀺𑀭𑀯𑁂𑀦 𑀩𑀼𑀤𑁆𑀥𑁂𑀦 𑀯𑀺𑀦𑀻𑀢𑀸. 𑀅𑀧𑁆𑀧𑀲𑀤𑁆𑀤𑀲𑁆𑀲 ¶ 𑀯𑀡𑁆𑀡𑀯𑀸𑀤𑀺𑀦𑁄𑀢𑀺 𑀬𑀁 𑀞𑀸𑀦𑀁 𑀅𑀧𑁆𑀧𑀲𑀤𑁆𑀤𑀁 𑀦𑀺𑀲𑁆𑀲𑀤𑁆𑀤𑀁. 𑀢𑀲𑁆𑀲 𑀯𑀡𑁆𑀡𑀯𑀸𑀤𑀺𑀦𑁄. 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸𑀢𑀺 𑀇𑀥𑀸𑀕𑀦𑁆𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬.

𑀓𑀲𑁆𑀫𑀸 𑀧𑀦𑁂𑀲 𑀣𑁂𑀭𑀲𑁆𑀲 𑀉𑀧𑀲𑀗𑁆𑀓𑀫𑀦𑀁 𑀧𑀘𑁆𑀘𑀸𑀲𑀻𑀲𑀢𑀻𑀢𑀺. 𑀅𑀢𑁆𑀢𑀦𑁄 𑀯𑀼𑀤𑁆𑀥𑀺𑀁 𑀧𑀢𑁆𑀣𑀬𑀫𑀸𑀦𑁄. 𑀧𑀭𑀺𑀩𑁆𑀩𑀸𑀚𑀓𑀸 ¶ 𑀓𑀺𑀭 𑀩𑀼𑀤𑁆𑀥𑁂𑀲𑀼 𑀯𑀸 𑀩𑀼𑀤𑁆𑀥𑀲𑀸𑀯𑀓𑁂𑀲𑀼 𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑁂𑀲𑀼 𑁋 ‘‘𑀅𑀚𑁆𑀚 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀲𑀫𑀡𑁄 𑀕𑁄𑀢𑀫𑁄 𑀆𑀕𑀢𑁄, 𑀲𑀸𑀭𑀺𑀧𑀼𑀢𑁆𑀢𑁄 𑀆𑀕𑀢𑁄, 𑀦 𑀔𑁄 𑀧𑀦𑁂𑀢𑁂 𑀬𑀲𑁆𑀲 𑀯𑀸 𑀢𑀲𑁆𑀲 𑀯𑀸 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑀺, 𑀧𑀲𑁆𑀲𑀣 𑀅𑀫𑁆𑀳𑀸𑀓𑀁 𑀉𑀢𑁆𑀢𑀫𑀪𑀸𑀯’’𑀦𑁆𑀢𑀺 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀸𑀦𑀁 𑀲𑀦𑁆𑀢𑀺𑀓𑁂 𑀅𑀢𑁆𑀢𑀸𑀦𑀁 𑀉𑀓𑁆𑀔𑀺𑀧𑀦𑁆𑀢𑀺 𑀉𑀘𑁆𑀘𑁂 𑀞𑀸𑀦𑁂 𑀞𑀧𑁂𑀦𑁆𑀢𑀺. 𑀪𑀕𑀯𑀢𑁄𑀧𑀺 𑀉𑀧𑀝𑁆𑀞𑀸𑀓𑁂 𑀕𑀡𑁆𑀳𑀺𑀢𑀼𑀁 𑀯𑀸𑀬𑀫𑀦𑁆𑀢𑀺. 𑀢𑁂 𑀓𑀺𑀭 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑁂 𑀤𑀺𑀲𑁆𑀯𑀸 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀢𑀼𑀫𑁆𑀳𑀸𑀓𑀁 𑀲𑀢𑁆𑀣𑀸 𑀪𑀯𑀁 𑀕𑁄𑀢𑀫𑁄𑀧𑀺 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸𑀧𑀺 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑀺, 𑀫𑀬𑀁 𑀅𑀜𑁆𑀜𑀫𑀜𑁆𑀜𑀁 𑀲𑀫𑀕𑁆𑀕𑀸. 𑀢𑀼𑀫𑁆𑀳𑁂 𑀧𑀦 𑀅𑀫𑁆𑀳𑁂 𑀅𑀓𑁆𑀔𑀻𑀳𑀺 𑀧𑀲𑁆𑀲𑀺𑀢𑀼𑀁 𑀦 𑀇𑀘𑁆𑀙𑀣, 𑀲𑀸𑀫𑀻𑀘𑀺𑀓𑀫𑁆𑀫𑀁 𑀦 𑀓𑀭𑁄𑀣, 𑀓𑀺𑀁 𑀯𑁄 𑀅𑀫𑁆𑀳𑁂𑀳𑀺 𑀅𑀧𑀭𑀤𑁆𑀥’’𑀦𑁆𑀢𑀺. 𑀅𑀧𑁆𑀧𑁂𑀓𑀘𑁆𑀘𑁂 𑀫𑀦𑀼𑀲𑁆𑀲𑀸 𑁋 ‘‘𑀩𑀼𑀤𑁆𑀥𑀸𑀧𑀺 𑀏𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑀺, 𑀓𑀺𑀁 𑀅𑀫𑁆𑀳𑀸𑀓’’𑀦𑁆𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀢𑁂 𑀤𑀺𑀲𑁆𑀯𑀸 𑀦𑀧𑁆𑀧𑀫𑀚𑁆𑀚𑀦𑁆𑀢𑀺. 𑀢𑀼𑀡𑁆𑀳𑀻 𑀅𑀳𑁂𑀲𑀼𑀦𑁆𑀢𑀺 𑀲𑀦𑁆𑀤𑀓𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑁆𑀲𑀤𑁆𑀤𑀸 𑀦𑀺𑀲𑀻𑀤𑀺𑀁𑀲𑀼.

𑁨𑁨𑁪. 𑀲𑁆𑀯𑀸𑀕𑀢𑀁 𑀪𑁄𑀢𑁄 𑀆𑀦𑀦𑁆𑀤𑀲𑁆𑀲𑀸𑀢𑀺 𑀲𑀼𑀆𑀕𑀫𑀦𑀁 𑀪𑁄𑀢𑁄 𑀆𑀦𑀦𑁆𑀤𑀲𑁆𑀲. 𑀪𑀯𑀦𑁆𑀢𑁂 𑀳𑀺 𑀦𑁄 𑀆𑀕𑀢𑁂 𑀆𑀦𑀦𑁆𑀤𑁄 𑀳𑁄𑀢𑀺, 𑀕𑀢𑁂 𑀲𑁄𑀓𑁄𑀢𑀺 ¶ 𑀤𑀻𑀧𑁂𑀢𑀺. 𑀘𑀺𑀭𑀲𑁆𑀲𑀁 𑀔𑁄𑀢𑀺 𑀧𑀺𑀬𑀲𑀫𑀼𑀤𑀸𑀘𑀸𑀭𑀯𑀘𑀦𑀫𑁂𑀢𑀁. 𑀣𑁂𑀭𑁄 𑀧𑀦 𑀓𑀸𑀮𑁂𑀦 𑀓𑀸𑀮𑀁 𑀧𑀭𑀺𑀩𑁆𑀩𑀸𑀚𑀓𑀸𑀭𑀸𑀫𑀁 𑀘𑀸𑀭𑀺𑀓𑀢𑁆𑀣𑀸𑀬 𑀕𑀘𑁆𑀙𑀢𑀻𑀢𑀺 𑀧𑀼𑀭𑀺𑀫𑀕𑀫𑀦𑀁 𑀕𑀳𑁂𑀢𑁆𑀯𑀸 𑀏𑀯𑀫𑀸𑀳. 𑀏𑀯𑀜𑁆𑀘 𑀧𑀦 𑀯𑀢𑁆𑀯𑀸 𑀦 𑀫𑀸𑀦𑀢𑁆𑀣𑀤𑁆𑀥𑁄 𑀳𑀼𑀢𑁆𑀯𑀸 𑀦𑀺𑀲𑀻𑀤𑀺, 𑀅𑀢𑁆𑀢𑀦𑁄 𑀧𑀦 𑀆𑀲𑀦𑀸 𑀯𑀼𑀝𑁆𑀞𑀸𑀬 𑀢𑀁 𑀆𑀲𑀦𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀣𑁂𑀭𑀁 𑀆𑀲𑀦𑁂𑀦 𑀦𑀺𑀫𑀦𑁆𑀢𑁂𑀦𑁆𑀢𑁄 𑀦𑀺𑀲𑀻𑀤𑀢𑀼 𑀪𑀯𑀁 𑀆𑀦𑀦𑁆𑀤𑁄, 𑀇𑀤𑀫𑀸𑀲𑀦𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀆𑀳.

𑀅𑀦𑁆𑀢𑀭𑀸𑀓𑀣𑀸 ¶ 𑀯𑀺𑀧𑁆𑀧𑀓𑀢𑀸𑀢𑀺 𑀦𑀺𑀲𑀺𑀦𑁆𑀦𑀸𑀦𑀁 𑀯𑁄 𑀆𑀭𑀫𑁆𑀪𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀫𑀸𑀕𑀫𑀦𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀓𑀸 𑀦𑀸𑀫 𑀓𑀣𑀸 𑀯𑀺𑀧𑁆𑀧𑀓𑀢𑀸, 𑀫𑀫𑀸𑀕𑀫𑀦𑀧𑀘𑁆𑀘𑀬𑀸 𑀓𑀢𑀫𑀸 𑀓𑀣𑀸 𑀧𑀭𑀺𑀬𑀦𑁆𑀢𑀁 𑀦 𑀕𑀢𑀸𑀢𑀺 𑀧𑀼𑀘𑁆𑀙𑀢𑀺.

𑀅𑀣 𑀧𑀭𑀺𑀩𑁆𑀩𑀸𑀚𑀓𑁄 ‘‘𑀦𑀺𑀭𑀢𑁆𑀣𑀓𑀓𑀣𑀸𑀯 𑀏𑀲𑀸 𑀦𑀺𑀲𑁆𑀲𑀸𑀭𑀸 𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀸, 𑀦 𑀢𑀼𑀫𑁆𑀳𑀸𑀓𑀁 𑀧𑀼𑀭𑀢𑁄 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻’’𑀢𑀺 𑀤𑀻𑀧𑁂𑀦𑁆𑀢𑁄 𑀢𑀺𑀝𑁆𑀞𑀢𑁂𑀲𑀸, 𑀪𑁄𑀢𑀺𑀆𑀤𑀺𑀫𑀸𑀳. 𑀦𑁂𑀲𑀸 𑀪𑁄𑀢𑁄𑀢𑀺 𑀲𑀘𑁂 𑀪𑀯𑀁 𑀲𑁄𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀺, 𑀧𑀘𑁆𑀙𑀸𑀧𑁂𑀲𑀸 𑀓𑀣𑀸 𑀦 𑀤𑀼𑀮𑁆𑀮𑀪𑀸 𑀪𑀯𑀺𑀲𑁆𑀲𑀢𑀺, 𑀅𑀫𑁆𑀳𑀸𑀓𑀁 𑀧𑀦𑀺𑀫𑀸𑀬 𑀅𑀢𑁆𑀣𑁄 𑀦𑀢𑁆𑀣𑀺. 𑀪𑁄𑀢𑁄 𑀧𑀦 𑀆𑀕𑀫𑀦𑀁 𑀮𑀪𑀺𑀢𑁆𑀯𑀸 𑀅𑀜𑁆𑀜𑀤𑁂𑀯 𑀲𑀼𑀓𑀸𑀭𑀡𑀁 𑀓𑀣𑀁 𑀲𑁄𑀢𑀼𑀓𑀸𑀫𑀫𑁆𑀳𑀸𑀢𑀺 𑀤𑀻𑀧𑁂𑀢𑀺. 𑀢𑀢𑁄 𑀥𑀫𑁆𑀫𑀤𑁂𑀲𑀦𑀁 𑀬𑀸𑀘𑀦𑁆𑀢𑁄 𑀲𑀸𑀥𑀼 𑀯𑀢 𑀪𑀯𑀦𑁆𑀢𑀁 𑀬𑁂 𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀘𑀭𑀺𑀬𑀓𑁂𑀢𑀺 𑀆𑀘𑀭𑀺𑀬𑀲𑀫𑀬𑁂. 𑀅𑀦𑀲𑁆𑀲𑀸𑀲𑀺𑀓𑀸𑀦𑀻𑀢𑀺 𑀅𑀲𑁆𑀲𑀸𑀲𑀯𑀺𑀭𑀳𑀺𑀢𑀸𑀦𑀺. 𑀲𑀲𑀓𑁆𑀓𑀦𑁆𑀢𑀺 𑀏𑀓𑀁𑀲𑀢𑁆𑀣𑁂 𑀦𑀺𑀧𑀸𑀢𑁄, 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀏𑀓𑀁𑀲𑁂𑀦𑁂𑀯 ¶ 𑀦 𑀯𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀯𑀲𑀦𑁆𑀢𑁄 𑀘 𑀦𑀸𑀭𑀸𑀥𑁂𑀬𑁆𑀬𑀸𑀢𑀺 𑀦 𑀲𑀫𑁆𑀧𑀸𑀤𑁂𑀬𑁆𑀬, 𑀦 𑀧𑀭𑀺𑀧𑀽𑀭𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀜𑀸𑀬𑀁 𑀥𑀫𑁆𑀫𑀁 𑀓𑀼𑀲𑀮𑀦𑁆𑀢𑀺 𑀓𑀸𑀭𑀡𑀪𑀽𑀢𑀁 𑀅𑀦𑀯𑀚𑁆𑀚𑀝𑁆𑀞𑁂𑀦 𑀓𑀼𑀲𑀮𑀁 𑀥𑀫𑁆𑀫𑀁.

𑁨𑁨𑁫. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂. 𑀦𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺𑀆𑀤𑀻𑀦𑀺 𑀲𑀸𑀮𑁂𑀬𑁆𑀬𑀓𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁪𑁪𑁦) 𑀯𑀼𑀢𑁆𑀢𑀸𑀦𑀺. 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄𑀢𑀺 𑀘𑀢𑀼𑀫𑀳𑀸𑀪𑀽𑀢𑀫𑀬𑁄. 𑀧𑀣𑀯𑀻 𑀧𑀣𑀯𑀻𑀓𑀸𑀬𑀦𑁆𑀢𑀺 𑀅𑀚𑁆𑀛𑀢𑁆𑀢𑀺𑀓𑀸 𑀧𑀣𑀯𑀻𑀥𑀸𑀢𑀼 𑀩𑀸𑀳𑀺𑀭𑀧𑀣𑀯𑀻𑀥𑀸𑀢𑀼𑀁. 𑀅𑀦𑀼𑀧𑁂𑀢𑀻𑀢𑀺 ¶ 𑀅𑀦𑀼𑀬𑀸𑀢𑀺. 𑀅𑀦𑀼𑀧𑀕𑀘𑁆𑀙𑀢𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀅𑀦𑀼𑀕𑀘𑁆𑀙𑀢𑀻𑀢𑀺𑀧𑀺 𑀅𑀢𑁆𑀣𑁄, 𑀉𑀪𑀬𑁂𑀦𑀸𑀧𑀺 𑀉𑀧𑁂𑀢𑀺 𑀉𑀧𑀕𑀘𑁆𑀙𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀆𑀧𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀫𑀦𑀘𑁆𑀙𑀝𑁆𑀞𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀦𑁆𑀢𑀺. 𑀆𑀲𑀦𑁆𑀤𑀺𑀧𑀜𑁆𑀘𑀫𑀸𑀢𑀺 𑀦𑀺𑀧𑀦𑁆𑀦𑀫𑀜𑁆𑀘𑁂𑀦 𑀧𑀜𑁆𑀘𑀫𑀸, 𑀫𑀜𑁆𑀘𑁄 𑀘𑁂𑀯, 𑀘𑀢𑁆𑀢𑀸𑀭𑁄 𑀫𑀜𑁆𑀘𑀧𑀸𑀤𑁂 𑀕𑀳𑁂𑀢𑁆𑀯𑀸 𑀞𑀺𑀢𑀸 𑀘𑀢𑁆𑀢𑀸𑀭𑁄 𑀧𑀼𑀭𑀺𑀲𑀸 𑀘𑀸𑀢𑀺 𑀅𑀢𑁆𑀣𑁄. 𑀬𑀸𑀯𑀸𑀴𑀸𑀳𑀦𑀸𑀢𑀺 𑀬𑀸𑀯 𑀲𑀼𑀲𑀸𑀦𑀸. 𑀧𑀤𑀸𑀦𑀻𑀢𑀺 𑀅𑀬𑀁 𑀏𑀯𑀁 𑀲𑀻𑀮𑀯𑀸 𑀅𑀳𑁄𑀲𑀺, 𑀏𑀯𑀁 𑀤𑀼𑀲𑁆𑀲𑀻𑀮𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀸𑀦𑀺 ¶ 𑀕𑀼𑀡𑀧𑀤𑀸𑀦𑀺. 𑀲𑀭𑀻𑀭𑀫𑁂𑀯 𑀯𑀸 𑀏𑀢𑁆𑀣 𑀧𑀤𑀸𑀦𑀻𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀓𑀸𑀧𑁄𑀢𑀓𑀸𑀦𑀻𑀢𑀺 𑀓𑀧𑁄𑀢𑀓𑀯𑀡𑁆𑀡𑀸𑀦𑀺, 𑀧𑀸𑀭𑀸𑀯𑀢𑀧𑀓𑁆𑀔𑀯𑀡𑁆𑀡𑀸𑀦𑀻𑀢𑀺 𑀅𑀢𑁆𑀣𑁄.

𑀪𑀲𑁆𑀲𑀦𑁆𑀢𑀸𑀢𑀺 𑀪𑀲𑁆𑀫𑀦𑁆𑀢𑀸, 𑀅𑀬𑀫𑁂𑀯 𑀯𑀸 𑀧𑀸𑀴𑀺. 𑀆𑀳𑀼𑀢𑀺𑀬𑁄𑀢𑀺 𑀬𑀁 𑀧𑀳𑁂𑀡𑀓𑀲𑀓𑁆𑀓𑀸𑀭𑀸𑀤𑀺𑀪𑁂𑀤𑀁 𑀤𑀺𑀦𑁆𑀦𑀤𑀸𑀦𑀁, 𑀲𑀩𑁆𑀩𑀁 𑀢𑀁 𑀙𑀸𑀭𑀺𑀓𑀸𑀯𑀲𑀸𑀦𑀫𑁂𑀯 𑀳𑁄𑀢𑀺, 𑀦 𑀢𑀢𑁄 𑀧𑀭𑀁 𑀨𑀮𑀤𑀸𑀬𑀓𑀁 𑀳𑀼𑀢𑁆𑀯𑀸 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀤𑀢𑁆𑀢𑀼𑀧𑀜𑁆𑀜𑀢𑁆𑀢𑀦𑁆𑀢𑀺 𑀤𑀢𑁆𑀢𑀽𑀳𑀺 𑀩𑀸𑀮𑀫𑀦𑀼𑀲𑁆𑀲𑁂𑀳𑀺 𑀧𑀜𑁆𑀜𑀢𑁆𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀩𑀸𑀮𑁂𑀳𑀺 𑀅𑀩𑀼𑀤𑁆𑀥𑀻𑀳𑀺 𑀧𑀜𑁆𑀜𑀢𑁆𑀢𑀫𑀺𑀤𑀁 𑀤𑀸𑀦𑀁, 𑀦 𑀧𑀡𑁆𑀟𑀺𑀢𑁂𑀳𑀺. 𑀩𑀸𑀮𑀸 𑀤𑁂𑀦𑁆𑀢𑀺, 𑀧𑀡𑁆𑀟𑀺𑀢𑀸 𑀕𑀡𑁆𑀳𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀢𑁆𑀣𑀺𑀓𑀯𑀸𑀤𑀦𑁆𑀢𑀺 𑀅𑀢𑁆𑀣𑀺 𑀤𑀺𑀦𑁆𑀦𑀁 𑀤𑀺𑀦𑁆𑀦𑀨𑀮𑀦𑁆𑀢𑀺 𑀇𑀫𑀁 𑀅𑀢𑁆𑀣𑀺𑀓𑀯𑀸𑀤𑀁𑀬𑁂𑀯 𑀯𑀤𑀦𑁆𑀢𑀺 𑀢𑁂𑀲𑀁 𑀢𑀼𑀘𑁆𑀙𑀁 𑀯𑀘𑀦𑀁 𑀫𑀼𑀲𑀸𑀯𑀺𑀮𑀸𑀧𑁄. 𑀩𑀸𑀮𑁂 ¶ 𑀘 𑀧𑀡𑁆𑀟𑀺𑀢𑁂 𑀘𑀸𑀢𑀺 𑀩𑀸𑀮𑀸 𑀘 𑀧𑀡𑁆𑀟𑀺𑀢𑀸 𑀘.

𑀅𑀓𑀢𑁂𑀦 𑀫𑁂 𑀏𑀢𑁆𑀣 𑀓𑀢𑀦𑁆𑀢𑀺 𑀫𑀬𑁆𑀳𑀁 𑀅𑀓𑀢𑁂𑀦𑁂𑀯 𑀲𑀫𑀡𑀓𑀫𑁆𑀫𑁂𑀦 𑀏𑀢𑁆𑀣 𑀏𑀢𑀲𑁆𑀲 𑀲𑀫𑀬𑁂 𑀓𑀫𑁆𑀫𑀁 𑀓𑀢𑀁 𑀦𑀸𑀫 𑀳𑁄𑀢𑀺, 𑀅𑀯𑀼𑀲𑀺𑀢𑁂𑀦𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀼𑀲𑀺𑀢𑀁 𑀦𑀸𑀫 𑀳𑁄𑀢𑀺. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀲𑀫𑀡𑀥𑀫𑁆𑀫𑁂. 𑀲𑀫𑀲𑀫𑀸𑀢𑀺 𑀅𑀢𑀺𑀯𑀺𑀬 𑀲𑀫𑀸, 𑀲𑀫𑁂𑀦 𑀯𑀸 𑀕𑀼𑀡𑁂𑀦 𑀲𑀫𑀸. 𑀲𑀸𑀫𑀜𑁆𑀜𑀁 𑀧𑀢𑁆𑀢𑀸𑀢𑀺 𑀲𑀫𑀸𑀦𑀪𑀸𑀯𑀁 𑀧𑀢𑁆𑀢𑀸.

𑁨𑁨𑁬. 𑀓𑀭𑀢𑁄𑀢𑀺𑀆𑀤𑀻𑀦𑀺 𑀅𑀧𑀡𑁆𑀡𑀓𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀦𑀺. 𑀢𑀣𑀸 𑀦𑀢𑁆𑀣𑀺 𑀳𑁂𑀢𑀽𑀢𑀺𑀆𑀤𑀻𑀦𑀺.

𑁨𑁨𑁮. 𑀘𑀢𑀼𑀢𑁆𑀣𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁂 ¶ 𑀅𑀓𑀝𑀸𑀢𑀺 𑀅𑀓𑀢𑀸. 𑀅𑀓𑀝𑀯𑀺𑀥𑀸𑀢𑀺 𑀅𑀓𑀢𑀯𑀺𑀥𑀸𑀦𑀸, 𑀏𑀯𑀁 𑀓𑀭𑁄𑀳𑀻𑀢𑀺 𑀓𑁂𑀦𑀘𑀺 𑀓𑀸𑀭𑀸𑀧𑀺𑀢𑀸 𑀦 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀺𑀫𑁆𑀫𑀺𑀢𑀸𑀢𑀺 𑀇𑀤𑁆𑀥𑀺𑀬𑀸𑀧𑀺 𑀦 𑀦𑀺𑀫𑁆𑀫𑀺𑀢𑀸. 𑀅𑀦𑀺𑀫𑁆𑀫𑀸𑀢𑀸𑀢𑀺 𑀅𑀦𑀺𑀫𑁆𑀫𑀸𑀧𑀺𑀢𑀸. 𑀓𑁂𑀘𑀺 𑀅𑀦𑀺𑀫𑁆𑀫𑀺𑀢𑀩𑁆𑀩𑀸𑀢𑀺 𑀧𑀤𑀁 𑀯𑀤𑀦𑁆𑀢𑀺, 𑀢𑀁 𑀦𑁂𑀯 𑀧𑀸𑀴𑀺𑀬𑀁, 𑀦 𑀅𑀝𑁆𑀞𑀓𑀣𑀸𑀬𑀁 𑀲𑀦𑁆𑀤𑀺𑀲𑁆𑀲𑀢𑀺. 𑀯𑀜𑁆𑀛𑀸𑀢𑀺 𑀯𑀜𑁆𑀛𑀧𑀲𑀼𑀯𑀜𑁆𑀛𑀢𑀸𑀮𑀸𑀤𑀬𑁄 𑀯𑀺𑀬 𑀅𑀨𑀮𑀸, 𑀓𑀲𑁆𑀲𑀘𑀺 𑀅𑀚𑀦𑀓𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀧𑀣𑀯𑀻𑀓𑀸𑀬𑀸𑀤𑀻𑀦𑀁 𑀭𑀽𑀧𑀸𑀤𑀺𑀚𑀦𑀓𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀧𑀩𑁆𑀩𑀢𑀓𑀽𑀝𑀸 𑀯𑀺𑀬 𑀞𑀺𑀢𑀸𑀢𑀺 𑀓𑀽𑀝𑀝𑁆𑀞𑀸. 𑀈𑀲𑀺𑀓𑀝𑁆𑀞𑀸𑀬𑀺𑀝𑁆𑀞𑀺𑀢𑀸𑀢𑀺 𑀫𑀼𑀜𑁆𑀚𑁂 𑀈𑀲𑀺𑀓𑀸 𑀯𑀺𑀬 𑀞𑀺𑀢𑀸. 𑀢𑀢𑁆𑀭𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀫𑀺𑀤𑀁 𑀚𑀸𑀬𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀫𑀼𑀜𑁆𑀚𑀢𑁄 𑀈𑀲𑀺𑀓𑀸 𑀯𑀺𑀬 𑀯𑀺𑀚𑁆𑀚𑀫𑀸𑀦𑀫𑁂𑀯 𑀦𑀺𑀓𑁆𑀔𑀫𑀢𑀻𑀢𑀺. ‘‘𑀏𑀲𑀺𑀓𑀝𑁆𑀞𑀸𑀬𑀺𑀝𑁆𑀞𑀺𑀢𑀸’’𑀢𑀺𑀧𑀺 ¶ 𑀧𑀸𑀞𑁄, 𑀲𑀼𑀦𑀺𑀔𑀸𑀢𑁄 𑀏𑀲𑀺𑀓𑀢𑁆𑀣𑀫𑁆𑀪𑁄 𑀦𑀺𑀘𑁆𑀘𑀮𑁄 𑀢𑀺𑀝𑁆𑀞𑀢𑀺, 𑀏𑀯𑀁 𑀞𑀺𑀢𑀸𑀢𑀺 𑀅𑀢𑁆𑀣𑁄. 𑀉𑀪𑀬𑁂𑀦𑀧𑀺 𑀢𑁂𑀲𑀁 𑀯𑀺𑀦𑀸𑀲𑀸𑀪𑀸𑀯𑀁 𑀤𑀻𑀧𑁂𑀢𑀺. 𑀦 𑀇𑀜𑁆𑀚𑀦𑁆𑀢𑀻𑀢𑀺 𑀏𑀲𑀺𑀓𑀢𑁆𑀣𑀫𑁆𑀪𑁄 𑀯𑀺𑀬 𑀞𑀺𑀢𑀢𑁆𑀢𑀸 𑀦 𑀘𑀮𑀦𑁆𑀢𑀺. 𑀦 𑀯𑀺𑀧𑀭𑀺𑀡𑀸𑀫𑁂𑀦𑁆𑀢𑀻𑀢𑀺 𑀧𑀓𑀢𑀺𑀁 𑀦 𑀚𑀳𑀦𑁆𑀢𑀺. 𑀦 𑀅𑀜𑁆𑀜𑀫𑀜𑁆𑀜𑀁 𑀩𑁆𑀬𑀸𑀩𑀸𑀥𑁂𑀦𑁆𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀁 𑀦 𑀉𑀧𑀳𑀦𑀦𑁆𑀢𑀺. 𑀦𑀸𑀮𑀦𑁆𑀢𑀺 𑀦 𑀲𑀫𑀢𑁆𑀣𑀸.

𑀧𑀣𑀯𑀻𑀓𑀸𑀬𑁄𑀢𑀺𑀆𑀤𑀻𑀲𑀼 ¶ 𑀧𑀣𑀯𑀻𑀬𑁂𑀯 𑀧𑀣𑀯𑀻𑀓𑀸𑀬𑁄, 𑀧𑀣𑀯𑀻𑀲𑀫𑀽𑀳𑁄 𑀯𑀸. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀚𑀻𑀯𑀲𑀢𑁆𑀢𑀫𑁂𑀲𑀼 𑀓𑀸𑀬𑁂𑀲𑀼. 𑀦𑀢𑁆𑀣𑀺 𑀳𑀦𑁆𑀢𑀸 𑀯𑀸𑀢𑀺 𑀳𑀦𑁆𑀢𑀼𑀁 𑀯𑀸 𑀖𑀸𑀢𑁂𑀢𑀼𑀁 𑀯𑀸 𑀲𑁄𑀢𑀼𑀁 𑀯𑀸 𑀲𑀸𑀯𑁂𑀢𑀼𑀁 𑀯𑀸 𑀚𑀸𑀦𑀺𑀢𑀼𑀁 𑀯𑀸 𑀚𑀸𑀦𑀸𑀧𑁂𑀢𑀼𑀁 𑀯𑀸 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. 𑀲𑀢𑁆𑀢𑀦𑁆𑀦𑀁𑀢𑁆𑀯𑁂𑀯 𑀓𑀸𑀬𑀸𑀦𑀦𑁆𑀢𑀺 𑀬𑀣𑀸 𑀫𑀼𑀕𑁆𑀕𑀭𑀸𑀲𑀺𑀆𑀤𑀻𑀲𑀼 𑀧𑀳𑀝𑀁 𑀲𑀢𑁆𑀣𑀁 𑀫𑀼𑀕𑁆𑀕𑀭𑀸𑀲𑀺𑀆𑀤𑀻𑀦𑀁 𑀅𑀦𑁆𑀢𑀭𑁂𑀦 𑀧𑀯𑀺𑀲𑀢𑀺, 𑀏𑀯𑀁 𑀲𑀢𑁆𑀢𑀦𑁆𑀦𑀁 𑀓𑀸𑀬𑀸𑀦𑀁 𑀅𑀦𑁆𑀢𑀭𑁂𑀦 𑀙𑀺𑀤𑁆𑀤𑁂𑀦 𑀯𑀺𑀯𑀭𑁂𑀦 𑀲𑀢𑁆𑀣𑀁 𑀧𑀯𑀺𑀲𑀢𑀺. 𑀢𑀢𑁆𑀣 ‘‘𑀅𑀳𑀁 𑀇𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀫𑀻’’𑀢𑀺 𑀓𑁂𑀯𑀮𑀁 𑀲𑀜𑁆𑀜𑀸𑀫𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀬𑁄𑀦𑀺𑀧𑀫𑀼𑀔𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀧𑀫𑀼𑀔𑀬𑁄𑀦𑀻𑀦𑀁 ¶ 𑀉𑀢𑁆𑀢𑀫𑀬𑁄𑀦𑀻𑀦𑀁 𑀘𑀼𑀤𑁆𑀤𑀲𑀲𑀢𑀲𑀳𑀲𑁆𑀲𑀸𑀦𑀺 𑀅𑀜𑁆𑀜𑀸𑀦𑀺 𑀘 𑀲𑀝𑁆𑀞𑀺𑀲𑀢𑀸𑀦𑀺 𑀅𑀜𑁆𑀜𑀸𑀦𑀺 𑀘 𑀙𑀲𑀢𑀸𑀦𑀺. 𑀧𑀜𑁆𑀘 𑀘 𑀓𑀫𑁆𑀫𑀼𑀦𑁄 𑀲𑀢𑀸𑀦𑀻𑀢𑀺 𑀧𑀜𑁆𑀘 𑀓𑀫𑁆𑀫𑀲𑀢𑀸𑀦𑀺 𑀘, 𑀓𑁂𑀯𑀮𑀁 𑀢𑀓𑁆𑀓𑀫𑀢𑁆𑀢𑀓𑁂𑀦 𑀦𑀺𑀭𑀢𑁆𑀣𑀓𑀁 𑀤𑀺𑀝𑁆𑀞𑀺𑀁 𑀤𑀻𑀧𑁂𑀢𑀺. 𑀧𑀜𑁆𑀘 𑀘 𑀓𑀫𑁆𑀫𑀸𑀦𑀺 𑀢𑀻𑀡𑀺 𑀘 𑀓𑀫𑁆𑀫𑀸𑀦𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑁂𑀘𑀺 𑀧𑀦𑀸𑀳𑀼 𑀧𑀜𑁆𑀘 𑀓𑀫𑁆𑀫𑀸𑀦𑀻𑀢𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀪𑀡𑀢𑀺. 𑀢𑀻𑀡𑀻𑀢𑀺 𑀓𑀸𑀬𑀓𑀫𑁆𑀫𑀸𑀤𑀺𑀯𑀲𑁂𑀦𑀸𑀢𑀺. 𑀓𑀫𑁆𑀫𑁂 𑀘 𑀅𑀟𑁆𑀠𑀓𑀫𑁆𑀫𑁂 𑀘𑀸𑀢𑀺 𑀏𑀢𑁆𑀣 𑀧𑀦𑀲𑁆𑀲 𑀓𑀸𑀬𑀓𑀫𑁆𑀫𑀜𑁆𑀘 𑀯𑀘𑀻𑀓𑀫𑁆𑀫𑀜𑁆𑀘 𑀓𑀫𑁆𑀫𑀦𑁆𑀢𑀺 𑀮𑀤𑁆𑀥𑀺, 𑀫𑀦𑁄𑀓𑀫𑁆𑀫𑀁 𑀉𑀧𑀟𑁆𑀠𑀓𑀫𑁆𑀫𑀦𑁆𑀢𑀺. 𑀤𑁆𑀯𑀝𑁆𑀞𑀺𑀧𑀝𑀺𑀧𑀤𑀸𑀢𑀺 𑀤𑁆𑀯𑀸𑀲𑀝𑁆𑀞𑀺 𑀧𑀝𑀺𑀧𑀤𑀸𑀢𑀺 𑀯𑀤𑀢𑀺. 𑀤𑁆𑀯𑀝𑁆𑀞𑀦𑁆𑀢𑀭𑀓𑀧𑁆𑀧𑀸𑀢𑀺 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀘𑀢𑀼𑀲𑀝𑁆𑀞𑀺 𑀅𑀦𑁆𑀢𑀭𑀓𑀧𑁆𑀧𑀸 𑀦𑀸𑀫 𑀳𑁄𑀦𑁆𑀢𑀺, 𑀅𑀬𑀁 𑀧𑀦 𑀅𑀜𑁆𑀜𑁂 𑀤𑁆𑀯𑁂 𑀅𑀚𑀸𑀦𑀦𑁆𑀢𑁄 𑀏𑀯𑀫𑀸𑀳. 𑀙𑀴𑀸𑀪𑀺𑀚𑀸𑀢𑀺𑀬𑁄 𑀅𑀧𑀡𑁆𑀡𑀓𑀲𑀼𑀢𑁆𑀢𑁂 𑀯𑀺𑀢𑁆𑀣𑀸𑀭𑀺𑀢𑀸.

𑀅𑀝𑁆𑀞 𑀧𑀼𑀭𑀺𑀲𑀪𑀽𑀫𑀺𑀬𑁄𑀢𑀺 𑀫𑀦𑁆𑀤𑀪𑀽𑀫𑀺 𑀔𑀺𑀟𑁆𑀟𑀸𑀪𑀽𑀫𑀺 𑀯𑀻𑀫𑀁𑀲𑀓𑀪𑀽𑀫𑀺 𑀉𑀚𑀼𑀕𑀢𑀪𑀽𑀫𑀺 𑀲𑁂𑀓𑁆𑀔𑀪𑀽𑀫𑀺 𑀲𑀫𑀡𑀪𑀽𑀫𑀺 ¶ 𑀚𑀺𑀦𑀪𑀽𑀫𑀺 𑀧𑀦𑁆𑀦𑀪𑀽𑀫𑀻𑀢𑀺 𑀇𑀫𑀸 𑀅𑀝𑁆𑀞 𑀧𑀼𑀭𑀺𑀲𑀪𑀽𑀫𑀺𑀬𑁄𑀢𑀺 𑀯𑀤𑀢𑀺. 𑀢𑀢𑁆𑀣 𑀚𑀸𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀤𑀺𑀯𑀲𑁂 𑀲𑀫𑁆𑀩𑀸𑀥𑀝𑁆𑀞𑀸𑀦𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀲𑀢𑁆𑀢𑀸 𑀫𑀦𑁆𑀤𑀸 𑀳𑁄𑀦𑁆𑀢𑀺 𑀫𑁄𑀫𑀽𑀳𑀸. 𑀅𑀬𑀁 𑀫𑀦𑁆𑀤𑀪𑀽𑀫𑀻𑀢𑀺 𑀯𑀤𑀢𑀺. 𑀬𑁂 𑀧𑀦 𑀤𑀼𑀕𑁆𑀕𑀢𑀺𑀢𑁄 𑀆𑀕𑀢𑀸 𑀳𑁄𑀦𑁆𑀢𑀺, 𑀢𑁂 𑀅𑀪𑀺𑀡𑁆𑀳𑀁 𑀭𑁄𑀤𑀦𑁆𑀢𑀺 𑀘𑁂𑀯 𑀯𑀺𑀭𑀯𑀦𑁆𑀢𑀺 ¶ 𑀘. 𑀲𑀼𑀕𑀢𑀺𑀢𑁄 𑀆𑀕𑀢𑀸 𑀢𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀳𑀲𑀦𑁆𑀢𑀺. 𑀅𑀬𑀁 𑀔𑀺𑀟𑁆𑀟𑀸𑀪𑀽𑀫𑀺 𑀦𑀸𑀫. 𑀫𑀸𑀢𑀸𑀧𑀺𑀢𑀽𑀦𑀁 𑀳𑀢𑁆𑀣𑀁 𑀯𑀸 𑀧𑀸𑀤𑀁 𑀯𑀸 𑀫𑀜𑁆𑀘𑀁 𑀯𑀸 𑀧𑀻𑀞𑀁 𑀯𑀸 𑀕𑀳𑁂𑀢𑁆𑀯𑀸 𑀪𑀽𑀫𑀺𑀬𑀁 𑀧𑀤𑀦𑀺𑀓𑁆𑀔𑀺𑀧𑀦𑀁 𑀯𑀻𑀫𑀁𑀲𑀓𑀪𑀽𑀫𑀺 𑀦𑀸𑀫. 𑀧𑀤𑀲𑀸𑀯 𑀕𑀦𑁆𑀢𑀼𑀁 𑀲𑀫𑀢𑁆𑀣𑀓𑀸𑀮𑁄 𑀉𑀚𑀼𑀕𑀢𑀪𑀽𑀫𑀺 𑀦𑀸𑀫. 𑀲𑀺𑀧𑁆𑀧𑀸𑀦𑀁 𑀲𑀺𑀓𑁆𑀔𑀦𑀓𑀸𑀮𑁄 𑀲𑁂𑀓𑁆𑀔𑀪𑀽𑀫𑀺 𑀦𑀸𑀫. 𑀖𑀭𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀦𑀓𑀸𑀮𑁄 𑀲𑀫𑀡𑀪𑀽𑀫𑀺 𑀦𑀸𑀫. 𑀆𑀘𑀭𑀺𑀬𑀁 𑀲𑁂𑀯𑀺𑀢𑁆𑀯𑀸 𑀚𑀸𑀦𑀦𑀓𑀸𑀮𑁄 𑀚𑀺𑀦𑀪𑀽𑀫𑀺 𑀦𑀸𑀫. 𑀪𑀺𑀓𑁆𑀔𑀼 𑀘 𑀧𑀦𑁆𑀦𑀓𑁄 𑀚𑀺𑀦𑁄 𑀦 𑀓𑀺𑀜𑁆𑀘𑀺 𑀆𑀳𑀸𑀢𑀺 𑀏𑀯𑀁 𑀅𑀮𑀸𑀪𑀺𑀁 𑀲𑀫𑀡𑀁 𑀧𑀦𑁆𑀦𑀪𑀽𑀫𑀻𑀢𑀺 𑀯𑀤𑀢𑀺.

𑀏𑀓𑀽𑀦𑀧𑀜𑁆𑀜𑀸𑀲 ¶ 𑀆𑀚𑀻𑀯𑀲𑀢𑁂𑀢𑀺 𑀏𑀓𑀽𑀦𑀧𑀜𑁆𑀜𑀸𑀲 𑀆𑀚𑀻𑀯𑀯𑀼𑀢𑁆𑀢𑀺𑀲𑀢𑀸𑀦𑀺. 𑀧𑀭𑀺𑀩𑁆𑀩𑀸𑀚𑀓𑀲𑀢𑁂𑀢𑀺 𑀧𑀭𑀺𑀩𑁆𑀩𑀸𑀚𑀓𑀧𑀩𑁆𑀩𑀚𑁆𑀚𑀲𑀢𑀸𑀦𑀺. 𑀦𑀸𑀕𑀸𑀯𑀸𑀲𑀲𑀢𑁂𑀢𑀺 𑀦𑀸𑀕𑀫𑀡𑁆𑀟𑀮𑀲𑀢𑀸𑀦𑀺. 𑀯𑀻𑀲𑁂 𑀇𑀦𑁆𑀤𑁆𑀭𑀺𑀬𑀲𑀢𑁂𑀢𑀺 𑀯𑀻𑀲 𑀇𑀦𑁆𑀤𑁆𑀭𑀺𑀬𑀲𑀢𑀸𑀦𑀺. 𑀢𑀺𑀁𑀲𑁂 𑀦𑀺𑀭𑀬𑀲𑀢𑁂𑀢𑀺 𑀢𑀺𑀁𑀲 𑀦𑀺𑀭𑀬𑀲𑀢𑀸𑀦𑀺. 𑀭𑀚𑁄𑀥𑀸𑀢𑀼𑀬𑁄𑀢𑀺 𑀭𑀚𑀑𑀓𑀺𑀭𑀡𑀝𑁆𑀞𑀸𑀦𑀸𑀦𑀺. 𑀳𑀢𑁆𑀣𑀧𑀺𑀝𑁆𑀞𑀺𑀧𑀸𑀤𑀧𑀺𑀝𑁆𑀞𑀸𑀤𑀻𑀦𑀺 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀢𑁆𑀢 𑀲𑀜𑁆𑀜𑀻𑀕𑀩𑁆𑀪𑀸𑀢𑀺 𑀑𑀝𑁆𑀞𑀕𑁄𑀡𑀕𑀤𑁆𑀭𑀪𑀅𑀚𑀧𑀲𑀼𑀫𑀺𑀕𑀫𑀳𑀺𑀁𑀲𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀲𑀜𑁆𑀜𑀻𑀕𑀩𑁆𑀪𑀸𑀢𑀺 𑀲𑀸𑀮𑀺𑀬𑀯𑀕𑁄𑀥𑀼𑀫𑀫𑀼𑀕𑁆𑀕𑀓𑀗𑁆𑀕𑀼𑀯𑀭𑀓𑀓𑀼𑀤𑁆𑀭𑀽𑀲𑀓𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀦𑀺𑀕𑀡𑁆𑀞𑀺𑀕𑀩𑁆𑀪𑀸𑀢𑀺 𑀦𑀺𑀕𑀡𑁆𑀞𑀺𑀫𑁆𑀳𑀺 𑀚𑀸𑀢𑀕𑀩𑁆𑀪𑀸, 𑀉𑀘𑁆𑀙𑀼𑀯𑁂𑀴𑀼𑀦𑀴𑀸𑀤𑀬𑁄 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀢𑁆𑀢 𑀤𑁂𑀯𑀸𑀢𑀺 𑀩𑀳𑀽 𑀤𑁂𑀯𑀸, 𑀲𑁄 𑀧𑀦 𑀲𑀢𑁆𑀢𑀸𑀢𑀺 𑀯𑀤𑀢𑀺. 𑀫𑀸𑀦𑀼𑀲𑀸𑀧𑀺 ¶ 𑀅𑀦𑀦𑁆𑀢𑀸, 𑀲𑁄 𑀲𑀢𑁆𑀢𑀸𑀢𑀺 𑀯𑀤𑀢𑀺. 𑀲𑀢𑁆𑀢 𑀧𑀺𑀲𑀸𑀘𑀸𑀢𑀺 𑀧𑀺𑀲𑀸𑀘𑀸 𑀫𑀳𑀦𑁆𑀢𑀸, 𑀲𑀢𑁆𑀢𑀸𑀢𑀺 𑀯𑀤𑀢𑀺.

𑀲𑀭𑀸𑀢𑀺 𑀫𑀳𑀸𑀲𑀭𑀸. 𑀓𑀡𑁆𑀡𑀫𑀼𑀡𑁆𑀟-𑀭𑀣𑀓𑀸𑀭-𑀅𑀦𑁄𑀢𑀢𑁆𑀢-𑀲𑀻𑀳𑀧𑀧𑀸𑀢𑀓𑀼𑀴𑀺𑀭-𑀫𑀼𑀘𑀮𑀺𑀦𑁆𑀤-𑀓𑀼𑀡𑀸𑀮𑀤𑀳𑁂 𑀕𑀳𑁂𑀢𑁆𑀯𑀸 𑀯𑀤𑀢𑀺. 𑀧𑀯𑀼𑀝𑀸𑀢𑀺 𑀕𑀡𑁆𑀞𑀺𑀓𑀸. 𑀧𑀧𑀸𑀢𑀸𑀢𑀺 𑀫𑀳𑀸𑀧𑀧𑀸𑀢𑀸. 𑀧𑀧𑀸𑀢𑀲𑀢𑀸𑀦𑀻𑀢𑀺 𑀔𑀼𑀤𑁆𑀤𑀓𑀧𑀧𑀸𑀢𑀲𑀢𑀸𑀦𑀺. 𑀲𑀼𑀧𑀺𑀦𑀸𑀢𑀺 𑀫𑀳𑀸𑀲𑀼𑀧𑀺𑀦𑀸. 𑀲𑀼𑀧𑀺𑀦𑀲𑀢𑀸𑀦𑀻𑀢𑀺 𑀔𑀼𑀤𑁆𑀤𑀓𑀲𑀼𑀧𑀺𑀦𑀲𑀢𑀸𑀦𑀺. 𑀫𑀳𑀸𑀓𑀧𑁆𑀧𑀺𑀦𑁄𑀢𑀺 𑀫𑀳𑀸𑀓𑀧𑁆𑀧𑀸𑀦𑀁. 𑀏𑀢𑁆𑀣 𑀏𑀓𑀫𑁆𑀳𑀸 𑀲𑀭𑀸 𑀯𑀲𑁆𑀲𑀲𑀢𑁂 𑀯𑀲𑁆𑀲𑀲𑀢𑁂 𑀓𑀼𑀲𑀕𑁆𑀕𑁂𑀦 𑀏𑀓𑀁 𑀉𑀤𑀓𑀩𑀺𑀦𑁆𑀤𑀼𑀁 𑀦𑀻𑀳𑀭𑀺𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀢𑀫𑁆𑀳𑀺 𑀲𑀭𑁂 𑀦𑀺𑀭𑀼𑀤𑀓𑁂 𑀓𑀢𑁂 𑀏𑀓𑁄 𑀫𑀳𑀸𑀓𑀧𑁆𑀧𑁄𑀢𑀺 𑀯𑀤𑀢𑀺. 𑀏𑀯𑀭𑀽𑀧𑀸𑀦𑀁 𑀫𑀳𑀸𑀓𑀧𑁆𑀧𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀲𑀢𑀲𑀳𑀲𑁆𑀲𑀸𑀦𑀺 𑀔𑁂𑀧𑁂𑀢𑁆𑀯𑀸 𑀩𑀸𑀮𑀸 𑀘 𑀧𑀡𑁆𑀟𑀺𑀢𑀸 𑀘 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀦𑁆𑀢𑀻𑀢𑀺 𑀅𑀬𑀫𑀲𑁆𑀲 𑀮𑀤𑁆𑀥𑀺. 𑀧𑀡𑁆𑀟𑀺𑀢𑁄𑀧𑀺 𑀓𑀺𑀭 𑀅𑀦𑁆𑀢𑀭𑀸 𑀲𑀼𑀚𑁆𑀛𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀩𑀸𑀮𑁄𑀧𑀺 𑀢𑀢𑁄 𑀉𑀤𑁆𑀥𑀁 𑀦 𑀕𑀘𑁆𑀙𑀢𑀺.

𑀲𑀻𑀮𑁂𑀦𑀸𑀢𑀺 ¶ 𑀅𑀘𑁂𑀮𑀓𑀲𑀻𑀮𑁂𑀦 𑀯𑀸 𑀅𑀜𑁆𑀜𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺. 𑀯𑀢𑁂𑀦𑀸𑀢𑀺 𑀢𑀸𑀤𑀺𑀲𑁂𑀦 𑀯𑀢𑁂𑀦. 𑀢𑀧𑁂𑀦𑀸𑀢𑀺 𑀢𑀧𑁄𑀓𑀫𑁆𑀫𑁂𑀦. 𑀅𑀧𑀭𑀺𑀧𑀓𑁆𑀓𑀁 𑀧𑀭𑀺𑀧𑀸𑀘𑁂𑀢𑀺 𑀦𑀸𑀫 𑀬𑁄 ‘‘𑀅𑀳𑀁 𑀧𑀡𑁆𑀟𑀺𑀢𑁄’’𑀢𑀺 𑀅𑀦𑁆𑀢𑀭𑀸 𑀯𑀺𑀲𑀼𑀚𑁆𑀛𑀢𑀺. 𑀧𑀭𑀺𑀧𑀓𑁆𑀓𑀁 ¶ 𑀨𑀼𑀲𑁆𑀲 𑀨𑀼𑀲𑁆𑀲 𑀩𑁆𑀬𑀦𑁆𑀢𑀺𑀁 𑀓𑀭𑁄𑀢𑀺 𑀦𑀸𑀫 𑀬𑁄 ‘‘𑀅𑀳𑀁 𑀩𑀸𑀮𑁄’’𑀢𑀺 𑀯𑀼𑀢𑁆𑀢𑀧𑀭𑀺𑀫𑀸𑀡𑀁 𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀬𑀸𑀢𑀺. 𑀳𑁂𑀯𑀁 𑀦𑀢𑁆𑀣𑀻𑀢𑀺 𑀏𑀯𑀁 𑀦𑀢𑁆𑀣𑀺. 𑀢𑀜𑁆𑀳𑀺 𑀉𑀪𑀬𑀫𑁆𑀧𑀺 𑀦 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀤𑀻𑀧𑁂𑀢𑀺. 𑀤𑁄𑀡𑀫𑀺𑀢𑁂𑀢𑀺 𑀤𑁄𑀡𑁂𑀦 𑀫𑀺𑀢𑀁 𑀯𑀺𑀬. 𑀲𑀼𑀔𑀤𑀼𑀓𑁆𑀔𑁂𑀢𑀺 𑀲𑀼𑀔𑀤𑀼𑀓𑁆𑀔𑀁. 𑀧𑀭𑀺𑀬𑀦𑁆𑀢𑀓𑀢𑁂𑀢𑀺 𑀯𑀼𑀢𑁆𑀢𑀧𑀭𑀺𑀫𑀸𑀡𑁂𑀦 𑀓𑀸𑀮𑁂𑀦 𑀓𑀢𑀧𑀭𑀺𑀬𑀦𑁆𑀢𑁄. 𑀦𑀢𑁆𑀣𑀺 𑀳𑀸𑀬𑀦𑀯𑀟𑁆𑀠𑀦𑁂𑀢𑀺 𑀦𑀢𑁆𑀣𑀺 𑀳𑀸𑀬𑀦𑀯𑀟𑁆𑀠𑀦𑀸𑀦𑀺. 𑀦 𑀲𑀁𑀲𑀸𑀭𑁄 𑀧𑀡𑁆𑀟𑀺𑀢𑀲𑁆𑀲 𑀳𑀸𑀬𑀢𑀺, 𑀦 𑀩𑀸𑀮𑀲𑁆𑀲 𑀯𑀟𑁆𑀠𑀢𑀻𑀢𑀺 𑀅𑀢𑁆𑀣𑁄. 𑀉𑀓𑁆𑀓𑀁𑀲𑀸𑀯𑀓𑀁𑀲𑁂𑀢𑀺 𑀉𑀓𑁆𑀓𑀁𑀲𑀸𑀯𑀓𑀁𑀲𑀸, 𑀳𑀸𑀧𑀦𑀯𑀟𑁆𑀠𑀦𑀸𑀦𑀫𑁂𑀯𑁂𑀢𑀁 𑀯𑁂𑀯𑀘𑀦𑀁. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀉𑀧𑀫𑀸𑀬 𑀲𑀸𑀥𑁂𑀦𑁆𑀢𑁄 ¶ 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀢𑁆𑀢𑀕𑀼𑀴𑁂𑀢𑀺 𑀯𑁂𑀞𑁂𑀢𑁆𑀯𑀸 𑀓𑀢𑀲𑀼𑀢𑁆𑀢𑀕𑀼𑀴𑀁. 𑀦𑀺𑀩𑁆𑀩𑁂𑀞𑀺𑀬𑀫𑀸𑀦𑀫𑁂𑀯 𑀧𑀮𑁂𑀢𑀻𑀢𑀺 𑀧𑀩𑁆𑀩𑀢𑁂 𑀯𑀸 𑀭𑀼𑀓𑁆𑀔𑀕𑁆𑀕𑁂 𑀯𑀸 𑀞𑀢𑁆𑀯𑀸 𑀔𑀺𑀢𑁆𑀢𑀁 𑀲𑀼𑀢𑁆𑀢𑀧𑀫𑀸𑀡𑁂𑀦 𑀦𑀺𑀩𑁆𑀩𑁂𑀞𑀺𑀬𑀫𑀸𑀦𑀁 𑀕𑀘𑁆𑀙𑀢𑀺, 𑀲𑀼𑀢𑁆𑀢𑁂 𑀔𑀻𑀡𑁂 𑀢𑀢𑁆𑀣 𑀢𑀺𑀝𑁆𑀞𑀢𑀺 𑀦 𑀕𑀘𑁆𑀙𑀢𑀺. 𑀏𑀯𑀫𑁂𑀯𑀁 𑀯𑀼𑀢𑁆𑀢𑀓𑀸𑀮𑀢𑁄 𑀉𑀤𑁆𑀥𑀁 𑀦 𑀕𑀘𑁆𑀙𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁨𑁨𑁯. 𑀓𑀺𑀫𑀺𑀤𑀦𑁆𑀢𑀺 𑀓𑀺𑀫𑀺𑀤𑀁 𑀢𑀯 𑀅𑀜𑁆𑀜𑀸𑀡𑀁, 𑀓𑀺𑀁 𑀲𑀩𑁆𑀩𑀜𑁆𑀜𑀼 𑀦𑀸𑀫 𑀢𑁆𑀯𑀦𑁆𑀢𑀺 𑀏𑀯𑀁 𑀧𑀼𑀝𑁆𑀞𑁄 𑀲𑀫𑀸𑀦𑁄 𑀦𑀺𑀬𑀢𑀺𑀯𑀸𑀤𑁂 𑀧𑀓𑁆𑀔𑀺𑀧𑀦𑁆𑀢𑁄 𑀲𑀼𑀜𑁆𑀜𑀁 𑀫𑁂 𑀅𑀕𑀸𑀭𑀦𑁆𑀢𑀺𑀆𑀤𑀺𑀫𑀸𑀳.

𑁨𑁩𑁦. 𑀅𑀦𑀼𑀲𑁆𑀲𑀯𑀺𑀓𑁄 𑀳𑁄𑀢𑀻𑀢𑀺 𑀅𑀦𑀼𑀲𑁆𑀲𑀯𑀦𑀺𑀲𑁆𑀲𑀺𑀢𑁄 𑀳𑁄𑀢𑀺. 𑀅𑀦𑀼𑀲𑁆𑀲𑀯𑀲𑀘𑁆𑀘𑁄𑀢𑀺 𑀲𑀯𑀦𑀁 𑀲𑀘𑁆𑀘𑀢𑁄 𑀕𑀳𑁂𑀢𑁆𑀯𑀸 𑀞𑀺𑀢𑁄. 𑀧𑀺𑀝𑀓𑀲𑀫𑁆𑀧𑀤𑀸𑀬𑀸𑀢𑀺 𑀯𑀕𑁆𑀕𑀧𑀡𑁆𑀡𑀸𑀲𑀓𑀸𑀬 𑀧𑀺𑀝𑀓𑀕𑀦𑁆𑀣𑀲𑀫𑁆𑀧𑀢𑁆𑀢𑀺𑀬𑀸.

𑁨𑁩𑁨. 𑀫𑀦𑁆𑀤𑁄𑀢𑀺 𑀫𑀦𑁆𑀤𑀧𑀜𑁆𑀜𑁄. 𑀫𑁄𑀫𑀽𑀳𑁄𑀢𑀺 𑀅𑀢𑀺𑀫𑀽𑀴𑁆𑀳𑁄. 𑀯𑀸𑀘𑀸𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀢𑀻𑀢𑀺 𑀯𑀸𑀘𑀸𑀬 𑀯𑀺𑀓𑁆𑀔𑁂𑀧𑀁 𑀆𑀧𑀚𑁆𑀚𑀢𑀺. 𑀓𑀻𑀤𑀺𑀲𑀁? 𑀅𑀫𑀭𑀸𑀯𑀺𑀓𑁆𑀔𑁂𑀧𑀁, 𑀅𑀧𑀭𑀺𑀬𑀦𑁆𑀢𑀯𑀺𑀓𑁆𑀔𑁂𑀧𑀦𑁆𑀢𑀺 𑀅𑀢𑁆𑀣𑁄. 𑀅𑀣 ¶ 𑀯𑀸 𑀅𑀫𑀭𑀸 𑀦𑀸𑀫 𑀫𑀘𑁆𑀙𑀚𑀸𑀢𑀺. 𑀲𑀸 𑀉𑀫𑁆𑀫𑀼𑀚𑁆𑀚𑀦𑀦𑀺𑀫𑁆𑀫𑀼𑀚𑁆𑀚𑀦𑀸𑀤𑀺𑀯𑀲𑁂𑀦 𑀉𑀤𑀓𑁂 𑀲𑀦𑁆𑀥𑀸𑀯𑀫𑀸𑀦𑀸 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀏𑀯𑀫𑁂𑀯 𑀅𑀬𑀫𑁆𑀧𑀺 𑀯𑀸𑀤𑁄 𑀇𑀢𑁄 𑀘𑀺𑀢𑁄 𑀘 𑀲𑀦𑁆𑀥𑀸𑀯𑀢𑀺, 𑀕𑀸𑀳𑀁 𑀦 𑀉𑀧𑀕𑀘𑁆𑀙𑀢𑀻𑀢𑀺 𑀅𑀫𑀭𑀸𑀯𑀺𑀓𑁆𑀔𑁂𑀧𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀅𑀫𑀭𑀸𑀯𑀺𑀓𑁆𑀔𑁂𑀧𑀁.

𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄𑀢𑀺𑀆𑀤𑀻𑀲𑀼 𑀇𑀤𑀁 𑀓𑀼𑀲𑀮𑀦𑁆𑀢𑀺 𑀧𑀼𑀝𑁆𑀞𑁄 ‘‘𑀏𑀯𑀦𑁆𑀢𑀺𑀧𑀺 𑀫𑁂 𑀦𑁄’’𑀢𑀺 𑀯𑀤𑀢𑀺, 𑀢𑀢𑁄 𑀓𑀺𑀁 𑀅𑀓𑀼𑀲𑀮𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀢𑀣𑀸𑀢𑀺𑀧𑀺 𑀫𑁂 𑀦𑁄’’𑀢𑀺 𑀯𑀤𑀢𑀺, 𑀓𑀺𑀁 𑀉𑀪𑀬𑀢𑁄 𑀅𑀜𑁆𑀜𑀣𑀸𑀢𑀺 𑀯𑀼𑀢𑁆𑀢𑁂 ‘‘𑀅𑀜𑁆𑀜𑀣𑀸𑀢𑀺𑀧𑀺 𑀫𑁂 𑀦𑁄’’𑀢𑀺 𑀯𑀤𑀢𑀺, 𑀢𑀢𑁄 𑀢𑀺𑀯𑀺𑀥𑁂𑀦𑀸𑀧𑀺 𑀦 𑀳𑁄𑀢𑀻𑀢𑀺 𑀢𑁂 𑀮𑀤𑁆𑀥𑀻𑀢𑀺 𑀯𑀼𑀢𑁆𑀢𑁂 ‘‘𑀦𑁄𑀢𑀺𑀧𑀺 𑀫𑁂 ¶ 𑀦𑁄’’𑀢𑀺 𑀯𑀤𑀢𑀺, 𑀢𑀢𑁄 𑀓𑀺𑀁 𑀦𑁄 𑀦𑁄𑀢𑀺 𑀢𑁂 𑀮𑀤𑁆𑀥𑀻𑀢𑀺 𑀯𑀼𑀢𑁆𑀢𑁂 ‘‘𑀦𑁄 𑀦𑁄𑀢𑀺𑀧𑀺 𑀫𑁂 𑀦𑁄’’𑀢𑀺 𑀯𑀺𑀓𑁆𑀔𑁂𑀧𑀫𑀸𑀧𑀚𑁆𑀚𑀢𑀺, 𑀏𑀓𑀲𑁆𑀫𑀺𑀫𑁆𑀧𑀺 𑀧𑀓𑁆𑀔𑁂 𑀦 𑀢𑀺𑀝𑁆𑀞𑀢𑀺. 𑀦𑀺𑀩𑁆𑀩𑀺𑀚𑁆𑀚 𑀧𑀓𑁆𑀓𑀫𑀢𑀻𑀢𑀺 𑀅𑀢𑁆𑀢𑀦𑁄𑀧𑀺 𑀏𑀲 𑀲𑀢𑁆𑀣𑀸 𑀅𑀯𑀲𑁆𑀲𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀫𑀬𑁆𑀳𑀁 𑀓𑀺𑀁 𑀲𑀓𑁆𑀔𑀺𑀲𑁆𑀲𑀢𑀻𑀢𑀺 𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀫𑀢𑀺. 𑀧𑀼𑀭𑀺𑀫𑁂𑀲𑀼𑀧𑀺 𑀅𑀦𑀲𑁆𑀲𑀸𑀲𑀺𑀓𑁂𑀲𑀼 𑀏𑀲𑁂𑀯 𑀦𑀬𑁄.

𑁨𑁩𑁪. 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺 𑀬𑀣𑀸 𑀧𑀼𑀩𑁆𑀩𑁂 𑀕𑀺𑀳𑀺𑀪𑀽𑀢𑁄 𑀲𑀦𑁆𑀦𑀺𑀥𑀺𑀁 𑀓𑀢𑁆𑀯𑀸 𑀯𑀢𑁆𑀣𑀼𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀢𑀺, 𑀏𑀯𑀁 𑀢𑀺𑀮𑀢𑀡𑁆𑀟𑀼𑀮𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀻𑀦𑀺 𑀲𑀦𑁆𑀦𑀺𑀥𑀺𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀅𑀪𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀦𑀦𑀼 𑀘 𑀔𑀻𑀡𑀸𑀲𑀯𑀲𑁆𑀲 𑀯𑀲𑀦𑀝𑁆𑀞𑀸𑀦𑁂 ¶ 𑀢𑀺𑀮𑀢𑀡𑁆𑀟𑀼𑀮𑀸𑀤𑀬𑁄 𑀧𑀜𑁆𑀜𑀸𑀬𑀦𑁆𑀢𑀻𑀢𑀺. 𑀦𑁄 𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀦 𑀧𑀦𑁂𑀲 𑀢𑁂 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀞𑀧𑁂𑀢𑀺, 𑀅𑀨𑀸𑀲𑀼𑀓𑀧𑀩𑁆𑀩𑀚𑀺𑀢𑀸𑀤𑀻𑀦𑀁 𑀅𑀢𑁆𑀣𑀸𑀬 𑀞𑀧𑁂𑀢𑀺. 𑀅𑀦𑀸𑀕𑀸𑀫𑀺𑀲𑁆𑀲 ¶ 𑀓𑀣𑀦𑁆𑀢𑀺. 𑀢𑀲𑁆𑀲𑀸𑀧𑀺 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀲𑀩𑁆𑀩𑀲𑁄𑀯 𑀧𑀳𑀻𑀦𑀸, 𑀥𑀫𑁆𑀫𑁂𑀦 𑀧𑀦 𑀮𑀤𑁆𑀥𑀁 𑀯𑀺𑀘𑀸𑀭𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺.

𑁨𑁩𑁬. 𑀧𑀼𑀢𑁆𑀢𑀫𑀢𑀸𑀬 𑀧𑀼𑀢𑁆𑀢𑀸𑀢𑀺 𑀲𑁄 𑀓𑀺𑀭 𑀇𑀫𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀆𑀚𑀻𑀯𑀓𑀸 𑀫𑀢𑀸 𑀦𑀸𑀫𑀸𑀢𑀺 𑀲𑀜𑁆𑀜𑀻 𑀳𑀼𑀢𑁆𑀯𑀸 𑀏𑀯𑀫𑀸𑀳. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀆𑀚𑀻𑀯𑀓𑀸 𑀫𑀢𑀸 𑀦𑀸𑀫, 𑀢𑁂𑀲𑀁 𑀫𑀸𑀢𑀸 𑀧𑀼𑀢𑁆𑀢𑀫𑀢𑀸 𑀳𑁄𑀢𑀺, 𑀇𑀢𑀺 𑀆𑀚𑀻𑀯𑀓𑀸 𑀧𑀼𑀢𑁆𑀢𑀫𑀢𑀸𑀬 𑀧𑀼𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀲𑀫𑀡𑁂 𑀕𑁄𑀢𑀫𑁂𑀢𑀺 𑀲𑀫𑀡𑁂 𑀕𑁄𑀢𑀫𑁂 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀅𑀢𑁆𑀣𑀺, 𑀅𑀜𑁆𑀜𑀢𑁆𑀣 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀲𑀦𑁆𑀤𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀫𑀳𑀸𑀲𑀓𑀼𑀮𑀼𑀤𑀸𑀬𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁭. 𑀏𑀯𑀁 ¶ 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀲𑀓𑀼𑀮𑀼𑀤𑀸𑀬𑀺𑀲𑀼𑀢𑁆𑀢𑀁. 𑀢𑀢𑁆𑀣 𑀫𑁄𑀭𑀦𑀺𑀯𑀸𑀧𑁂𑀢𑀺 𑀢𑀲𑁆𑀫𑀺𑀁 𑀞𑀸𑀦𑁂 𑀫𑁄𑀭𑀸𑀦𑀁 𑀅𑀪𑀬𑀁 𑀖𑁄𑀲𑁂𑀢𑁆𑀯𑀸 𑀪𑁄𑀚𑀦𑀁 𑀅𑀤𑀁𑀲𑀼. 𑀢𑀲𑁆𑀫𑀸 𑀢𑀁 𑀞𑀸𑀦𑀁 𑀫𑁄𑀭𑀦𑀺𑀯𑀸𑀧𑁄𑀢𑀺 𑀲𑀗𑁆𑀔𑀁 𑀕𑀢𑀁. 𑀅𑀦𑁆𑀦𑀪𑀸𑀭𑁄𑀢𑀺 𑀏𑀓𑀲𑁆𑀲 𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀦𑀸𑀫𑀁. 𑀢𑀣𑀸 𑀯𑀭𑀥𑀭𑁄𑀢𑀺. 𑀅𑀜𑁆𑀜𑁂 𑀘𑀸𑀢𑀺 𑀦 𑀓𑁂𑀯𑀮𑀁 𑀇𑀫𑁂 𑀢𑀬𑁄, 𑀅𑀜𑁆𑀜𑁂𑀧𑀺 𑀅𑀪𑀺𑀜𑁆𑀜𑀸𑀢𑀸 𑀩𑀳𑀽 𑀧𑀭𑀺𑀩𑁆𑀩𑀸𑀚𑀓𑀸. 𑀅𑀧𑁆𑀧𑀲𑀤𑁆𑀤𑀲𑁆𑀲 𑀯𑀡𑁆𑀡𑀯𑀸𑀤𑀻𑀢𑀺 𑀇𑀥 𑀅𑀧𑁆𑀧𑀲𑀤𑁆𑀤𑀯𑀺𑀦𑀻𑀢𑁄𑀢𑀺 𑀅𑀯𑀢𑁆𑀯𑀸𑀯 𑀇𑀤𑀁 𑀯𑀼𑀢𑁆𑀢𑀁. 𑀓𑀲𑁆𑀫𑀸? 𑀦 𑀳𑀺 𑀪𑀕𑀯𑀸 𑀅𑀜𑁆𑀜𑁂𑀦 𑀯𑀺𑀦𑀻𑀢𑁄𑀢𑀺.

𑁨𑁩𑁮. 𑀧𑀼𑀭𑀺𑀫𑀸𑀦𑀻𑀢𑀺 𑀳𑀺𑀬𑁆𑀬𑁄𑀤𑀺𑀯𑀲𑀁 𑀉𑀧𑀸𑀤𑀸𑀬 𑀧𑀼𑀭𑀺𑀫𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀢𑀢𑁄 𑀧𑀭𑀁 𑀧𑀼𑀭𑀺𑀫𑀢𑀭𑀸𑀦𑀺. 𑀓𑀼𑀢𑀽𑀳𑀮𑀲𑀸𑀮𑀸𑀬𑀦𑁆𑀢𑀺 𑀓𑀼𑀢𑀽𑀳𑀮𑀲𑀸𑀮𑀸 𑀦𑀸𑀫 𑀧𑀘𑁆𑀘𑁂𑀓𑀲𑀸𑀮𑀸 𑀦𑀢𑁆𑀣𑀺, 𑀬𑀢𑁆𑀣 𑀧𑀦 𑀦𑀸𑀦𑀸𑀢𑀺𑀢𑁆𑀣𑀺𑀬𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦𑀸𑀦𑀸𑀯𑀺𑀥𑀁 𑀓𑀣𑀁 𑀧𑀯𑀢𑁆𑀢𑁂𑀦𑁆𑀢𑀺, 𑀲𑀸 𑀩𑀳𑀽𑀦𑀁 𑁋 ‘‘𑀅𑀬𑀁 𑀓𑀺𑀁 𑀯𑀤𑀢𑀺 ¶ , 𑀅𑀬𑀁 𑀓𑀺𑀁 𑀯𑀤𑀢𑀻’’𑀢𑀺 𑀓𑀼𑀢𑀽𑀳𑀮𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑁄 ‘‘𑀓𑀼𑀢𑀽𑀳𑀮𑀲𑀸𑀮𑀸’’𑀢𑀺 𑀯𑀼𑀘𑁆𑀘𑀢𑀺. ‘‘𑀓𑁄𑀢𑀽𑀳𑀮𑀲𑀸𑀮𑀸’’𑀢𑀺𑀧𑀺 𑀧𑀸𑀞𑁄. 𑀮𑀸𑀪𑀸𑀢𑀺 𑀬𑁂 𑀏𑀯𑀭𑀽𑀧𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀤𑀝𑁆𑀞𑀼𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 ¶ 𑀥𑀫𑁆𑀫𑀓𑀣𑀁 𑀯𑀸 𑀦𑁂𑀲𑀁 𑀲𑁄𑀢𑀼𑀁 𑀮𑀪𑀦𑁆𑀢𑀺, 𑀢𑁂𑀲𑀁 𑀅𑀗𑁆𑀕𑀫𑀕𑀥𑀸𑀦𑀁 𑀇𑀫𑁂 𑀮𑀸𑀪𑀸𑀢𑀺 𑀅𑀢𑁆𑀣𑁄.

𑀲𑀗𑁆𑀖𑀺𑀦𑁄𑀢𑀺𑀆𑀤𑀻𑀲𑀼 𑀧𑀩𑁆𑀩𑀚𑀺𑀢𑀲𑀫𑀽𑀳𑀲𑀗𑁆𑀔𑀸𑀢𑁄 𑀲𑀗𑁆𑀖𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀲𑀗𑁆𑀖𑀺𑀦𑁄. 𑀲𑁆𑀯𑁂𑀯 𑀕𑀡𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀕𑀡𑀺𑀦𑁄. 𑀆𑀘𑀸𑀭𑀲𑀺𑀓𑁆𑀔𑀸𑀧𑀦𑀯𑀲𑁂𑀦 𑀢𑀲𑁆𑀲 𑀕𑀡𑀲𑁆𑀲 𑀆𑀘𑀭𑀺𑀬𑀸𑀢𑀺 𑀕𑀡𑀸𑀘𑀭𑀺𑀬𑀸. 𑀜𑀸𑀢𑀸𑀢𑀺 𑀧𑀜𑁆𑀜𑀸𑀢𑀸 𑀧𑀸𑀓𑀝𑀸. 𑀬𑀣𑀸𑀪𑀼𑀘𑁆𑀘𑀕𑀼𑀡𑁂𑀳𑀺 𑀘𑁂𑀯 𑀅𑀬𑀣𑀸𑀪𑀽𑀢𑀕𑀼𑀡𑁂𑀳𑀺 𑀘 𑀲𑀫𑀼𑀕𑁆𑀕𑀢𑁄 𑀬𑀲𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀬𑀲𑀲𑁆𑀲𑀺𑀦𑁄. 𑀧𑀽𑀭𑀡𑀸𑀤𑀻𑀦𑀜𑁆𑀳𑀺 ‘‘𑀅𑀧𑁆𑀧𑀺𑀘𑁆𑀙𑁄 𑀲𑀦𑁆𑀢𑀼𑀝𑁆𑀞𑁄, 𑀅𑀧𑁆𑀧𑀺𑀘𑁆𑀙𑀢𑀸𑀬 𑀯𑀢𑁆𑀣𑀫𑁆𑀧𑀺 𑀦 𑀦𑀺𑀯𑀸𑀲𑁂𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀲𑁄 𑀲𑀫𑀼𑀕𑁆𑀕𑀢𑁄, 𑀢𑀣𑀸𑀕𑀢𑀲𑁆𑀲 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀻𑀳𑀺 𑀬𑀣𑀸𑀪𑀽𑀢𑀕𑀼𑀡𑁂𑀳𑀺. 𑀢𑀺𑀢𑁆𑀣𑀓𑀭𑀸𑀢𑀺 𑀮𑀤𑁆𑀥𑀺𑀓𑀭𑀸. 𑀲𑀸𑀥𑀼𑀲𑀫𑁆𑀫𑀢𑀸𑀢𑀺 𑀇𑀫𑁂 𑀲𑀸𑀥𑀽 𑀲𑀼𑀦𑁆𑀤𑀭𑀸 𑀲𑀧𑁆𑀧𑀼𑀭𑀺𑀲𑀸𑀢𑀺 𑀏𑀯𑀁 𑀲𑀫𑁆𑀫𑀢𑀸. 𑀩𑀳𑀼𑀚𑀦𑀲𑁆𑀲𑀸𑀢𑀺 𑀅𑀲𑁆𑀲𑀼𑀢𑀯𑀢𑁄 𑀘𑁂𑀯 𑀅𑀦𑁆𑀥𑀩𑀸𑀮𑀧𑀼𑀣𑀼𑀚𑁆𑀚𑀦𑀲𑁆𑀲 𑀯𑀺𑀪𑀸𑀯𑀺𑀦𑁄 𑀘 𑀧𑀡𑁆𑀟𑀺𑀢𑀚𑀦𑀲𑁆𑀲. 𑀢𑀢𑁆𑀣 𑀢𑀺𑀢𑁆𑀣𑀺𑀬𑀸 𑀩𑀸𑀮𑀚𑀦𑀲𑁆𑀲 𑀏𑀯𑀁 𑀲𑀫𑁆𑀫𑀢𑀸, 𑀢𑀣𑀸𑀕𑀢𑁄 𑀧𑀡𑁆𑀟𑀺𑀢𑀚𑀦𑀲𑁆𑀲. 𑀇𑀫𑀺𑀦𑀸 𑀦𑀬𑁂𑀦 𑀧𑀽𑀭𑀡𑁄 𑀓𑀲𑁆𑀲𑀧𑁄 𑀲𑀗𑁆𑀖𑀻𑀢𑀺𑀆𑀤𑀻𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀪𑀕𑀯𑀸 𑀧𑀦 𑀬𑀲𑁆𑀫𑀸 𑀅𑀝𑁆𑀞𑀢𑀺𑀁𑀲 𑀆𑀭𑀫𑁆𑀫𑀡𑀸𑀦𑀺 𑀯𑀺𑀪𑀚𑀦𑁆𑀢𑁄 𑀩𑀳𑀽𑀦𑀺 𑀦𑀺𑀩𑁆𑀩𑀸𑀦𑀑𑀢𑀭𑀡𑀢𑀺𑀢𑁆𑀣𑀸𑀦𑀺 𑀅𑀓𑀸𑀲𑀺, 𑀢𑀲𑁆𑀫𑀸 ‘‘𑀢𑀺𑀢𑁆𑀣𑀓𑀭𑁄’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑀓𑀲𑁆𑀫𑀸 ¶ 𑀧𑀦𑁂𑀢𑁂 𑀲𑀩𑁆𑀩𑁂𑀧𑀺 𑀢𑀢𑁆𑀣 𑀑𑀲𑀝𑀸𑀢𑀺? 𑀉𑀧𑀝𑁆𑀞𑀸𑀓𑀭𑀓𑁆𑀔𑀡𑀢𑁆𑀣𑀜𑁆𑀘𑁂𑀯 𑀮𑀸𑀪𑀲𑀓𑁆𑀓𑀸𑀭𑀢𑁆𑀣𑀜𑁆𑀘. 𑀢𑁂𑀲𑀜𑁆𑀳𑀺 𑀏𑀯𑀁 𑀳𑁄𑀢𑀺 𑁋 ‘‘𑀅𑀫𑁆𑀳𑀸𑀓𑀁 𑀉𑀧𑀝𑁆𑀞𑀸𑀓𑀸 𑀲𑀫𑀡𑀁 𑀕𑁄𑀢𑀫𑀁 𑀲𑀭𑀡𑀁 𑀕𑀘𑁆𑀙𑁂𑀬𑁆𑀬𑀼𑀁, 𑀢𑁂 𑀘 𑀭𑀓𑁆𑀔𑀺𑀲𑁆𑀲𑀸𑀫. 𑀲𑀫𑀡𑀲𑁆𑀲 𑀘 𑀕𑁄𑀢𑀫𑀲𑁆𑀲 𑀉𑀧𑀝𑁆𑀞𑀸𑀓𑁂 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 𑀅𑀫𑁆𑀳𑀸𑀓𑀫𑁆𑀧𑀺 𑀉𑀧𑀝𑁆𑀞𑀸𑀓𑀸 𑀅𑀫𑁆𑀳𑀸𑀓𑀁 ¶ 𑀲𑀓𑁆𑀓𑀸𑀭𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀲𑁆𑀫𑀸 𑀬𑀢𑁆𑀣 𑀬𑀢𑁆𑀣 𑀪𑀕𑀯𑀸 𑀑𑀲𑀭𑀢𑀺, 𑀢𑀢𑁆𑀣 𑀢𑀢𑁆𑀣 𑀲𑀩𑁆𑀩𑁂 𑀑𑀲𑀭𑀦𑁆𑀢𑀺.

𑁨𑁩𑁯. 𑀯𑀸𑀤𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 𑀯𑀸𑀤𑁂 𑀤𑁄𑀲𑀁 𑀆𑀭𑁄𑀧𑁂𑀢𑁆𑀯𑀸. 𑀅𑀧𑀓𑁆𑀓𑀦𑁆𑀢𑀸𑀢𑀺, 𑀅𑀧𑀕𑀢𑀸, 𑀓𑁂𑀘𑀺 𑀤𑀺𑀲𑀁 𑀧𑀓𑁆𑀓𑀦𑁆𑀢𑀸, 𑀓𑁂𑀘𑀺 𑀕𑀺𑀳𑀺𑀪𑀸𑀯𑀁 𑀧𑀢𑁆𑀢𑀸, 𑀓𑁂𑀘𑀺 𑀇𑀫𑀁 𑀲𑀸𑀲𑀦𑀁 𑀆𑀕𑀢𑀸. 𑀲𑀳𑀺𑀢𑀁 𑀫𑁂𑀢𑀺 𑀫𑀬𑁆𑀳𑀁 𑀯𑀘𑀦𑀁 𑀲𑀳𑀺𑀢𑀁 𑀲𑀺𑀮𑀺𑀝𑁆𑀞𑀁, 𑀅𑀢𑁆𑀣𑀬𑀼𑀢𑁆𑀢𑀁 𑀓𑀸𑀭𑀡𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀲𑀳𑀺𑀢𑀁 𑀢𑁂𑀢𑀺 𑀢𑀼𑀬𑁆𑀳𑀁 𑀯𑀘𑀦𑀁 𑀅𑀲𑀳𑀺𑀢𑀁. 𑀅𑀥𑀺𑀘𑀺𑀡𑁆𑀡𑀁 𑀢𑁂 𑀯𑀺𑀧𑀭𑀸𑀯𑀢𑁆𑀢𑀦𑁆𑀢𑀺 𑀬𑀁 𑀢𑀼𑀬𑁆𑀳𑀁 𑀤𑀻𑀖𑀭𑀢𑁆𑀢𑀸𑀘𑀺𑀡𑁆𑀡𑀯𑀲𑁂𑀦 𑀲𑀼𑀧𑁆𑀧𑀕𑀼𑀡𑀁, 𑀢𑀁 𑀫𑀬𑁆𑀳𑀁 𑀏𑀓𑀯𑀘𑀦𑁂𑀦𑁂𑀯 𑀯𑀺𑀧𑀭𑀸𑀯𑀢𑁆𑀢𑀁 𑀯𑀺𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑀁, 𑀦 𑀓𑀺𑀜𑁆𑀘𑀺 𑀚𑀸𑀢𑀦𑁆𑀢𑀺 𑀅𑀢𑁆𑀣𑁄. 𑀆𑀭𑁄𑀧𑀺𑀢𑁄 𑀢𑁂 𑀯𑀸𑀤𑁄𑀢𑀺 𑀫𑀬𑀸 𑀢𑀯 𑀯𑀸𑀤𑁂 𑀤𑁄𑀲𑁄 ¶ 𑀆𑀭𑁄𑀧𑀺𑀢𑁄. 𑀘𑀭 𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀬𑀸𑀢𑀺 𑀤𑁄𑀲𑀫𑁄𑀘𑀦𑀢𑁆𑀣𑀁 𑀘𑀭 𑀯𑀺𑀘𑀭, 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀲𑀺𑀓𑁆𑀔𑀸𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑁂𑀞𑁂𑀳𑀺 𑀯𑀸 𑀲𑀘𑁂 𑀧𑀳𑁄𑀲𑀻𑀢𑀺 𑀅𑀣 𑀲𑀬𑀁 𑀧𑀳𑁄𑀲𑀺, 𑀇𑀤𑀸𑀦𑁂𑀯 𑀦𑀺𑀩𑁆𑀩𑁂𑀞𑁂𑀳𑀺. 𑀥𑀫𑁆𑀫𑀓𑁆𑀓𑁄𑀲𑁂𑀦𑀸𑀢𑀺 𑀲𑀪𑀸𑀯𑀓𑁆𑀓𑁄𑀲𑁂𑀦.

𑁨𑁪𑁦. 𑀢𑀁 𑀦𑁄 𑀲𑁄𑀲𑁆𑀲𑀸𑀫𑀸𑀢𑀺 𑀢𑀁 𑀅𑀫𑁆𑀳𑀸𑀓𑀁 𑀤𑁂𑀲𑀺𑀢𑀁 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫. 𑀔𑀼𑀤𑁆𑀤𑀫𑀥𑀼𑀦𑁆𑀢𑀺 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀳𑀺 𑀓𑀢𑀁 𑀤𑀡𑁆𑀟𑀓𑀫𑀥𑀼𑀁. 𑀅𑀦𑁂𑀮𑀓𑀦𑁆𑀢𑀺 𑀦𑀺𑀤𑁆𑀤𑁄𑀲𑀁 𑀅𑀧𑀕𑀢𑀫𑀘𑁆𑀙𑀺𑀓𑀡𑁆𑀟𑀓𑀁. 𑀧𑀻𑀴𑁂𑀬𑁆𑀬𑀸𑀢𑀺 𑀤𑀤𑁂𑀬𑁆𑀬. 𑀧𑀘𑁆𑀘𑀸𑀲𑀻𑀲𑀫𑀸𑀦𑀭𑀽𑀧𑁄𑀢𑀺 𑀧𑀽𑀭𑁂𑀢𑁆𑀯𑀸 𑀦𑀼 𑀔𑁄 𑀦𑁄 𑀪𑁄𑀚𑀦𑀁 𑀤𑀲𑁆𑀲𑀢𑀻𑀢𑀺 𑀪𑀸𑀚𑀦𑀳𑀢𑁆𑀣𑁄 𑀧𑀘𑁆𑀘𑀸𑀲𑀻𑀲𑀫𑀸𑀦𑁄 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀅𑀲𑁆𑀲. 𑀲𑀫𑁆𑀧𑀬𑁄𑀚𑁂𑀢𑁆𑀯𑀸𑀢𑀺 ¶ 𑀅𑀧𑁆𑀧𑀫𑀢𑁆𑀢𑀓𑀁 𑀯𑀺𑀯𑀸𑀤𑀁 𑀓𑀢𑁆𑀯𑀸.

𑁨𑁪𑁧. 𑀇𑀢𑀭𑀻𑀢𑀭𑁂𑀦𑀸𑀢𑀺 𑀮𑀸𑀫𑀓𑀮𑀸𑀫𑀓𑁂𑀦. 𑀧𑀯𑀺𑀯𑀺𑀢𑁆𑀢𑁄𑀢𑀺 𑀇𑀤𑀁 𑀧𑀭𑀺𑀩𑁆𑀩𑀸𑀚𑀓𑁄 𑀓𑀸𑀬𑀯𑀺𑀯𑁂𑀓𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺, 𑀪𑀕𑀯𑀸 𑀧𑀦 𑀢𑀻𑀳𑀺 𑀯𑀺𑀯𑁂𑀓𑁂𑀳𑀺 𑀯𑀺𑀯𑀺𑀢𑁆𑀢𑁄𑀯.

𑁨𑁪𑁨. 𑀓𑁄𑀲𑀓𑀸𑀳𑀸𑀭𑀸𑀧𑀻𑀢𑀺 𑀤𑀸𑀦𑀧𑀢𑀻𑀦𑀁 𑀖𑀭𑁂 𑀅𑀕𑁆𑀕𑀪𑀺𑀓𑁆𑀔𑀸𑀞𑀧𑀦𑀢𑁆𑀣𑀁 𑀔𑀼𑀤𑁆𑀤𑀓𑀲𑀭𑀸𑀯𑀸 𑀳𑁄𑀦𑁆𑀢𑀺, 𑀤𑀸𑀦𑀧𑀢𑀺𑀦𑁄 𑀅𑀕𑁆𑀕𑀪𑀢𑁆𑀢𑀁 𑀯𑀸 𑀢𑀢𑁆𑀣 𑀞𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺, 𑀧𑀩𑁆𑀩𑀚𑀺𑀢𑁂 𑀲𑀫𑁆𑀧𑀢𑁆𑀢𑁂 𑀢𑀁 𑀪𑀢𑁆𑀢𑀁 𑀢𑀲𑁆𑀲 𑀤𑁂𑀦𑁆𑀢𑀺. 𑀢𑀁 𑀲𑀭𑀸𑀯𑀓𑀁 𑀓𑁄𑀲𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀬𑁂 𑀘 𑀏𑀓𑁂𑀦𑁂𑀯 𑀪𑀢𑁆𑀢𑀓𑁄𑀲𑀓𑁂𑀦 𑀬𑀸𑀧𑁂𑀦𑁆𑀢𑀺, 𑀢𑁂 𑀓𑁄𑀲𑀓𑀸𑀳𑀸𑀭𑀸𑀢𑀺. 𑀩𑁂𑀮𑀼𑀯𑀸𑀳𑀸𑀭𑀸𑀢𑀺 𑀩𑁂𑀮𑀼𑀯𑀫𑀢𑁆𑀢𑀪𑀢𑁆𑀢𑀸𑀳𑀸𑀭𑀸. 𑀲𑀫𑀢𑀺𑀢𑁆𑀢𑀺𑀓𑀦𑁆𑀢𑀺 𑀑𑀝𑁆𑀞𑀯𑀝𑁆𑀝𑀺𑀬𑀸 𑀳𑁂𑀝𑁆𑀞𑀺𑀫𑀮𑁂𑀔𑀸𑀲𑀫𑀁 ¶ . 𑀇𑀫𑀺𑀦𑀸 𑀥𑀫𑁆𑀫𑁂𑀦𑀸𑀢𑀺 𑀇𑀫𑀺𑀦𑀸 𑀅𑀧𑁆𑀧𑀸𑀳𑀸𑀭𑀢𑀸𑀥𑀫𑁆𑀫𑁂𑀦. 𑀏𑀢𑁆𑀣 𑀧𑀦 𑀲𑀩𑁆𑀩𑀸𑀓𑀸𑀭𑁂𑀦𑁂𑀯 𑀪𑀕𑀯𑀸 𑀅𑀦𑀧𑁆𑀧𑀸𑀳𑀸𑀭𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀧𑀥𑀸𑀦𑀪𑀽𑀫𑀺𑀬𑀁 𑀙𑀩𑁆𑀩𑀲𑁆𑀲𑀸𑀦𑀺 𑀅𑀧𑁆𑀧𑀸𑀳𑀸𑀭𑁄𑀯 𑀅𑀳𑁄𑀲𑀺, 𑀯𑁂𑀭𑀜𑁆𑀚𑀸𑀬𑀁 𑀢𑀬𑁄 𑀫𑀸𑀲𑁂 𑀧𑀢𑁆𑀣𑁄𑀤𑀦𑁂𑀦𑁂𑀯 𑀬𑀸𑀧𑁂𑀲𑀺 𑀧𑀸𑀮𑀺𑀮𑁂𑀬𑁆𑀬𑀓𑀯𑀦𑀲𑀡𑁆𑀟𑁂 𑀢𑀬𑁄 𑀫𑀸𑀲𑁂 𑀪𑀺𑀲𑀫𑀼𑀴𑀸𑀮𑁂𑀳𑁂𑀯 𑀬𑀸𑀧𑁂𑀲𑀺. 𑀇𑀥 ¶ 𑀧𑀦 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 𑁋 ‘‘𑀅𑀳𑀁 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀅𑀧𑁆𑀧𑀸𑀳𑀸𑀭𑁄 𑀅𑀳𑁄𑀲𑀺𑀁, 𑀫𑀬𑁆𑀳𑀁 𑀧𑀦 𑀲𑀸𑀯𑀓𑀸 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯𑀚𑀻𑀯𑀁 𑀥𑀼𑀢𑀗𑁆𑀕𑀁 𑀦 𑀪𑀺𑀦𑁆𑀤𑀦𑁆𑀢𑀻’’𑀢𑀺. 𑀢𑀲𑁆𑀫𑀸 𑀬𑀤𑀺 𑀢𑁂 𑀇𑀫𑀺𑀦𑀸 𑀥𑀫𑁆𑀫𑁂𑀦 𑀲𑀓𑁆𑀓𑀭𑁂𑀬𑁆𑀬𑀼𑀁, 𑀫𑀬𑀸 𑀳𑀺 𑀢𑁂 𑀯𑀺𑀲𑁂𑀲𑀢𑀭𑀸. 𑀅𑀜𑁆𑀜𑁄 𑀘𑁂𑀯 𑀧𑀦 𑀥𑀫𑁆𑀫𑁄 𑀅𑀢𑁆𑀣𑀺, 𑀬𑁂𑀦 𑀫𑀁 𑀢𑁂 𑀲𑀓𑁆𑀓𑀭𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀧𑀁𑀲𑀼𑀓𑀽𑀮𑀺𑀓𑀸𑀢𑀺 ¶ 𑀲𑀫𑀸𑀤𑀺𑀦𑁆𑀦𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀸. 𑀮𑀽𑀔𑀘𑀻𑀯𑀭𑀥𑀭𑀸𑀢𑀺 𑀲𑀢𑁆𑀣𑀲𑀼𑀢𑁆𑀢𑀮𑀽𑀔𑀸𑀦𑀺 𑀘𑀻𑀯𑀭𑀸𑀦𑀺 𑀥𑀸𑀭𑀬𑀫𑀸𑀦𑀸. 𑀦𑀦𑁆𑀢𑀓𑀸𑀦𑀻𑀢𑀺 𑀅𑀦𑁆𑀢𑀯𑀺𑀭𑀳𑀺𑀢𑀸𑀦𑀺 𑀯𑀢𑁆𑀣𑀔𑀡𑁆𑀟𑀸𑀦𑀺, 𑀬𑀤𑀺 𑀳𑀺 𑀦𑁂𑀲𑀁 𑀅𑀦𑁆𑀢𑁄 𑀪𑀯𑁂𑀬𑁆𑀬, 𑀧𑀺𑀮𑁄𑀢𑀺𑀓𑀸𑀢𑀺 𑀲𑀗𑁆𑀔𑀁 𑀕𑀘𑁆𑀙𑁂𑀬𑁆𑀬𑀼𑀁. 𑀉𑀘𑁆𑀘𑀺𑀦𑀺𑀢𑁆𑀯𑀸𑀢𑀺 𑀨𑀸𑀮𑁂𑀢𑁆𑀯𑀸 𑀤𑀼𑀩𑁆𑀩𑀮𑀝𑁆𑀞𑀸𑀦𑀁 𑀧𑀳𑀸𑀬 𑀣𑀺𑀭𑀝𑁆𑀞𑀸𑀦𑀫𑁂𑀯 𑀕𑀳𑁂𑀢𑁆𑀯𑀸. 𑀅𑀮𑀸𑀩𑀼𑀮𑁄𑀫𑀲𑀸𑀦𑀻𑀢𑀺 𑀅𑀮𑀸𑀩𑀼𑀮𑁄𑀫𑀲𑀤𑀺𑀲𑀲𑀼𑀢𑁆𑀢𑀸𑀦𑀺 𑀲𑀼𑀔𑀼𑀫𑀸𑀦𑀻𑀢𑀺 𑀤𑀻𑀧𑁂𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑀲𑀢𑁆𑀣𑀸 𑀘𑀻𑀯𑀭𑀲𑀦𑁆𑀢𑁄𑀲𑁂𑀦 𑀅𑀲𑀦𑁆𑀢𑀼𑀝𑁆𑀞𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀅𑀢𑀺𑀫𑀼𑀢𑁆𑀢𑀓𑀲𑀼𑀲𑀸𑀦𑀢𑁄 𑀳𑀺𑀲𑁆𑀲 𑀧𑀼𑀡𑁆𑀡𑀤𑀸𑀲𑀺𑀬𑀸 𑀧𑀸𑀭𑀼𑀧𑀺𑀢𑁆𑀯𑀸 𑀧𑀸𑀢𑀺𑀢𑀲𑀸𑀡𑀧𑀁𑀲𑀼𑀓𑀽𑀮𑀁 𑀕𑀳𑀡𑀤𑀺𑀯𑀲𑁂 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀫𑀳𑀸𑀧𑀣𑀯𑀻 𑀅𑀓𑀫𑁆𑀧𑀺. 𑀇𑀥 𑀧𑀦 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 𑁋 ‘‘𑀅𑀳𑀁 𑀏𑀓𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀧𑀁𑀲𑀼𑀓𑀽𑀮𑀁 𑀕𑀡𑁆𑀳𑀺𑀁, 𑀫𑀬𑁆𑀳𑀁 𑀧𑀦 𑀲𑀸𑀯𑀓𑀸 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯𑀚𑀻𑀯𑀁 𑀥𑀼𑀢𑀗𑁆𑀕𑀁 𑀦 𑀪𑀺𑀦𑁆𑀤𑀦𑁆𑀢𑀻’’𑀢𑀺.

𑀧𑀺𑀡𑁆𑀟𑀧𑀸𑀢𑀺𑀓𑀸𑀢𑀺 ¶ 𑀅𑀢𑀺𑀭𑁂𑀓𑀮𑀸𑀪𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀫𑀸𑀤𑀺𑀦𑁆𑀦𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀸. 𑀲𑀧𑀤𑀸𑀦𑀘𑀸𑀭𑀺𑀦𑁄𑀢𑀺 𑀮𑁄𑀮𑀼𑀧𑁆𑀧𑀘𑀸𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀫𑀸𑀤𑀺𑀦𑁆𑀦𑀲𑀧𑀤𑀸𑀦𑀘𑀸𑀭𑀸. 𑀉𑀜𑁆𑀙𑀸𑀲𑀓𑁂 𑀯𑀢𑁂 𑀭𑀢𑀸𑀢𑀺 𑀉𑀜𑁆𑀙𑀸𑀘𑀭𑀺𑀬𑀲𑀗𑁆𑀔𑀸𑀢𑁂 𑀪𑀺𑀓𑁆𑀔𑀽𑀦𑀁 𑀧𑀓𑀢𑀺𑀯𑀢𑁂 𑀭𑀢𑀸, 𑀉𑀘𑁆𑀘𑀦𑀻𑀘𑀖𑀭𑀤𑁆𑀯𑀸𑀭𑀝𑁆𑀞𑀸𑀬𑀺𑀦𑁄 𑀳𑀼𑀢𑁆𑀯𑀸 𑀓𑀩𑀭𑀫𑀺𑀲𑁆𑀲𑀓𑀁 𑀪𑀢𑁆𑀢𑀁 𑀲𑀁𑀳𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀦𑁆𑀢𑀭𑀖𑀭𑀦𑁆𑀢𑀺 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑁂 𑀉𑀫𑁆𑀫𑀸𑀭𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑀭𑀖𑀭𑀁, 𑀇𑀥 𑀇𑀦𑁆𑀤𑀔𑀻𑀮𑀢𑁄 𑀧𑀝𑁆𑀞𑀸𑀬 𑀅𑀥𑀺𑀧𑁆𑀧𑁂𑀢𑀁. 𑀏𑀢𑁆𑀢𑀸𑀯𑀢𑀸 𑀘 𑀲𑀢𑁆𑀣𑀸 𑀧𑀺𑀡𑁆𑀟𑀧𑀸𑀢𑀲𑀦𑁆𑀢𑁄𑀲𑁂𑀦 𑀅𑀲𑀦𑁆𑀢𑀼𑀝𑁆𑀞𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄, 𑀅𑀧𑁆𑀧𑀸𑀳𑀸𑀭𑀢𑀸𑀬 𑀯𑀼𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀧𑀦 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀇𑀥 𑀧𑀦 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 𑁋 ‘‘𑀅𑀳𑀁 𑀏𑀓𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀦𑀺𑀫𑀦𑁆𑀢𑀦𑀁 𑀦 𑀲𑀸𑀤𑀬𑀺𑀁, 𑀫𑀬𑁆𑀳𑀁 𑀧𑀦 𑀲𑀸𑀯𑀓𑀸 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯𑀚𑀻𑀯𑀁 𑀥𑀼𑀢𑀗𑁆𑀕𑀁 𑀦 𑀪𑀺𑀦𑁆𑀤𑀦𑁆𑀢𑀻’’𑀢𑀺.

𑀭𑀼𑀓𑁆𑀔𑀫𑀽𑀮𑀺𑀓𑀸𑀢𑀺 𑀙𑀦𑁆𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀫𑀸𑀤𑀺𑀦𑁆𑀦𑀭𑀼𑀓𑁆𑀔𑀫𑀽𑀮𑀺𑀓𑀗𑁆𑀕𑀸. 𑀅𑀩𑁆𑀪𑁄𑀓𑀸𑀲𑀺𑀓𑀸𑀢𑀺 𑀙𑀦𑁆𑀦𑀜𑁆𑀘 𑀭𑀼𑀓𑁆𑀔𑀫𑀽𑀮𑀜𑁆𑀘 ¶ 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀫𑀸𑀤𑀺𑀦𑁆𑀦𑀅𑀩𑁆𑀪𑁄𑀓𑀸𑀲𑀺𑀓𑀗𑁆𑀕𑀸. 𑀅𑀝𑁆𑀞𑀫𑀸𑀲𑁂𑀢𑀺 𑀳𑁂𑀫𑀦𑁆𑀢𑀕𑀺𑀫𑁆𑀳𑀺𑀓𑁂 𑀫𑀸𑀲𑁂. 𑀅𑀦𑁆𑀢𑁄𑀯𑀲𑁆𑀲𑁂 𑀧𑀦 𑀘𑀻𑀯𑀭𑀸𑀦𑀼𑀕𑁆𑀕𑀳𑀢𑁆𑀣𑀁 𑀙𑀦𑁆𑀦𑀁 𑀧𑀯𑀺𑀲𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑀲𑀢𑁆𑀣𑀸 𑀲𑁂𑀦𑀸𑀲𑀦𑀲𑀦𑁆𑀢𑁄𑀲𑁂𑀦 𑀅𑀲𑀦𑁆𑀢𑀼𑀝𑁆𑀞𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄, 𑀲𑁂𑀦𑀸𑀲𑀦𑀲𑀦𑁆𑀢𑁄𑀲𑁄 ¶ 𑀧𑀦𑀲𑁆𑀲 𑀙𑀩𑁆𑀩𑀲𑁆𑀲𑀺𑀓𑀫𑀳𑀸𑀧𑀥𑀸𑀦𑁂𑀦 𑀘 𑀧𑀸𑀮𑀺𑀮𑁂𑀬𑁆𑀬𑀓𑀯𑀦𑀲𑀡𑁆𑀟𑁂𑀦 𑀘 𑀤𑀻𑀧𑁂𑀢𑀩𑁆𑀩𑁄. 𑀇𑀥 𑀧𑀦 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 𑁋 ‘‘𑀅𑀳𑀁 𑀏𑀓𑀲𑁆𑀫𑀺𑀁𑀬𑁂𑀯 𑀓𑀸𑀮𑁂 𑀙𑀦𑁆𑀦𑀁 𑀦 𑀧𑀸𑀯𑀺𑀲𑀺𑀁, 𑀫𑀬𑁆𑀳𑀁 𑀧𑀦 𑀲𑀸𑀯𑀓𑀸 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯𑀚𑀻𑀯𑀁 𑀥𑀼𑀢𑀗𑁆𑀕𑀁 𑀦 𑀪𑀺𑀦𑁆𑀤𑀦𑁆𑀢𑀻’’𑀢𑀺.

𑀆𑀭𑀜𑁆𑀜𑀺𑀓𑀸𑀢𑀺 ¶ 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀫𑀸𑀤𑀺𑀦𑁆𑀦𑀆𑀭𑀜𑁆𑀜𑀺𑀓𑀗𑁆𑀕𑀸. 𑀲𑀗𑁆𑀖𑀫𑀚𑁆𑀛𑁂 𑀑𑀲𑀭𑀦𑁆𑀢𑀻𑀢𑀺 𑀅𑀩𑀤𑁆𑀥𑀲𑀻𑀫𑀸𑀬 𑀓𑀣𑀺𑀢𑀁, 𑀩𑀤𑁆𑀥𑀲𑀻𑀫𑀸𑀬𑀁 𑀧𑀦 𑀯𑀲𑀦𑁆𑀢𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂𑀬𑁂𑀯 𑀉𑀧𑁄𑀲𑀣𑀁 𑀓𑀭𑁄𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀘 𑀲𑀢𑁆𑀣𑀸 𑀦𑁄 𑀧𑀯𑀺𑀯𑀺𑀢𑁆𑀢𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄, ‘‘𑀇𑀘𑁆𑀙𑀸𑀫𑀳𑀁, 𑀪𑀺𑀓𑁆𑀔𑀯𑁂, 𑀅𑀟𑁆𑀠𑀫𑀸𑀲𑀁 𑀧𑀝𑀺𑀲𑀮𑁆𑀮𑀺𑀬𑀺𑀢𑀼’’𑀦𑁆𑀢𑀺 (𑀧𑀸𑀭𑀸. 𑁧𑁬𑁨; 𑁫𑁬𑁫) 𑀏𑀯𑀜𑁆𑀳𑀺𑀲𑁆𑀲 𑀧𑀯𑀺𑀯𑁂𑀓𑁄 𑀧𑀜𑁆𑀜𑀸𑀬𑀢𑀺. 𑀇𑀥 𑀧𑀦 𑀏𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀅𑀳𑀁 𑀏𑀓𑀲𑁆𑀫𑀺𑀁𑀬𑁂𑀯 𑀢𑀣𑀸𑀭𑀽𑀧𑁂 𑀓𑀸𑀮𑁂 𑀧𑀝𑀺𑀲𑀮𑁆𑀮𑀺𑀬𑀺𑀁, 𑀫𑀬𑁆𑀳𑀁 𑀧𑀦 𑀲𑀸𑀯𑀓𑀸 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯𑀚𑀻𑀯𑀁 𑀥𑀼𑀢𑀗𑁆𑀕𑀁 𑀦 𑀪𑀺𑀦𑁆𑀤𑀦𑁆𑀢𑀻’’𑀢𑀺. 𑀫𑀫𑀁 𑀲𑀸𑀯𑀓𑀸𑀢𑀺 𑀫𑀁 𑀲𑀸𑀯𑀓𑀸.

𑁨𑁪𑁪. 𑀲𑀦𑀺𑀤𑀸𑀦𑀦𑁆𑀢𑀺 𑀲𑀧𑁆𑀧𑀘𑁆𑀘𑀬𑀁. 𑀓𑀺𑀁 𑀧𑀦 𑀅𑀧𑁆𑀧𑀘𑁆𑀘𑀬𑀁 𑀦𑀺𑀩𑁆𑀩𑀸𑀦𑀁 𑀦 𑀤𑁂𑀲𑁂𑀢𑀻𑀢𑀺. 𑀦𑁄 𑀦 𑀤𑁂𑀲𑁂𑀢𑀺, 𑀲𑀳𑁂𑀢𑀼𑀓𑀁 𑀧𑀦 𑀢𑀁 𑀤𑁂𑀲𑀦𑀁 𑀓𑀢𑁆𑀯𑀸 𑀤𑁂𑀲𑁂𑀢𑀺, 𑀦𑁄 𑀅𑀳𑁂𑀢𑀼𑀓𑀦𑁆𑀢𑀺. 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀧𑀼𑀭𑀺𑀫𑀲𑁆𑀲𑁂𑀯𑁂𑀢𑀁 𑀯𑁂𑀯𑀘𑀦𑀁, 𑀲𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀯𑀢𑀸𑀢𑀺 𑀏𑀢𑁆𑀣 𑀯𑀢𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁.

𑁨𑁪𑁫. 𑀅𑀦𑀸𑀕𑀢𑀁 𑀯𑀸𑀤𑀧𑀣𑀦𑁆𑀢𑀺 𑀅𑀚𑁆𑀚 𑀞𑀧𑁂𑀢𑁆𑀯𑀸 𑀲𑁆𑀯𑁂 𑀯𑀸 𑀧𑀼𑀦𑀤𑀺𑀯𑀲𑁂 𑀯𑀸 𑀅𑀟𑁆𑀠𑀫𑀸𑀲𑁂 𑀯𑀸 𑀫𑀸𑀲𑁂 𑀯𑀸 𑀲𑀁𑀯𑀘𑁆𑀙𑀭𑁂 𑀯𑀸 𑀢𑀲𑁆𑀲 𑀢𑀲𑁆𑀲 𑀧𑀜𑁆𑀳𑀲𑁆𑀲 𑀉𑀧𑀭𑀺 𑀆𑀕𑀫𑀦𑀯𑀸𑀤𑀧𑀣𑀁. 𑀦 ¶ 𑀤𑀓𑁆𑀔𑀢𑀻𑀢𑀺 𑀬𑀣𑀸 𑀲𑀘𑁆𑀘𑀓𑁄 𑀦𑀺𑀕𑀡𑁆𑀞𑁄 𑀅𑀢𑁆𑀢𑀦𑁄 𑀦𑀺𑀕𑁆𑀕𑀳𑀡𑀢𑁆𑀣𑀁 𑀆𑀕𑀢𑀓𑀸𑀭𑀡𑀁 𑀯𑀺𑀲𑁂𑀲𑁂𑀢𑁆𑀯𑀸 𑀯𑀤𑀦𑁆𑀢𑁄 𑀦 𑀅𑀤𑁆𑀤𑀲, 𑀏𑀯𑀁 𑀦 𑀤𑀓𑁆𑀔𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀲𑀳𑀥𑀫𑁆𑀫𑁂𑀦𑀸𑀢𑀺 𑀲𑀓𑀸𑀭𑀡𑁂𑀦. 𑀅𑀦𑁆𑀢𑀭𑀦𑁆𑀢𑀭𑀸 𑀓𑀣𑀁 𑀑𑀧𑀸𑀢𑁂𑀬𑁆𑀬𑀼𑀦𑁆𑀢𑀺 𑀫𑀫 𑀓𑀣𑀸𑀯𑀸𑀭𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑁆𑀢𑀭𑀦𑁆𑀢𑀭𑁂 𑀅𑀢𑁆𑀢𑀦𑁄 𑀓𑀣𑀁 𑀧𑀯𑁂𑀲𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀦 𑀔𑁄 𑀧𑀦𑀸𑀳𑀁, 𑀉𑀤𑀸𑀬𑀻𑀢𑀺, 𑀉𑀤𑀸𑀬𑀺, 𑀅𑀳𑀁 𑀅𑀫𑁆𑀩𑀝𑁆𑀞𑀲𑁄𑀡𑀤𑀡𑁆𑀟𑀓𑀽𑀝𑀤𑀦𑁆𑀢𑀲𑀘𑁆𑀘𑀓𑀦𑀺𑀕𑀡𑁆𑀞𑀸𑀤𑀻𑀳𑀺 𑀲𑀤𑁆𑀥𑀺𑀁 𑀫𑀳𑀸𑀯𑀸𑀤𑁂 𑀯𑀢𑁆𑀢𑀫𑀸𑀦𑁂𑀧𑀺 𑁋 ‘‘𑀅𑀳𑁄 𑀯𑀢 𑀫𑁂 𑀏𑀓𑀲𑀸𑀯𑀓𑁄𑀧𑀺 𑀉𑀧𑀫𑀁 𑀯𑀸 𑀓𑀸𑀭𑀡𑀁 𑀯𑀸 𑀆𑀳𑀭𑀺𑀢𑁆𑀯𑀸 𑀤𑀤𑁂𑀬𑁆𑀬𑀸’’𑀢𑀺 𑀏𑀯𑀁 𑀲𑀸𑀯𑀓𑁂𑀲𑀼 𑀅𑀦𑀼𑀲𑀸𑀲𑀦𑀺𑀁 𑀦 𑀧𑀘𑁆𑀘𑀸𑀲𑀻𑀲𑀸𑀫𑀺. 𑀫𑀫𑀬𑁂𑀯𑀸𑀢𑀺 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀲𑀸𑀯𑀓𑀸 𑀫𑀫𑀬𑁂𑀯 𑀅𑀦𑀼𑀲𑀸𑀲𑀦𑀺𑀁 𑀑𑀯𑀸𑀤𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀺.

𑁨𑁪𑁬. 𑀢𑁂𑀲𑀸𑀳𑀁 ¶ 𑀘𑀺𑀢𑁆𑀢𑀁 𑀆𑀭𑀸𑀥𑁂𑀫𑀻𑀢𑀺 𑀢𑁂𑀲𑀁 𑀅𑀳𑀁 𑀢𑀲𑁆𑀲 𑀧𑀜𑁆𑀳𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑁂𑀦 𑀘𑀺𑀢𑁆𑀢𑀁 𑀕𑀡𑁆𑀳𑀸𑀫𑀺 𑀲𑀫𑁆𑀧𑀸𑀤𑁂𑀫𑀺 𑀧𑀭𑀺𑀧𑀽𑀭𑁂𑀫𑀺, 𑀅𑀜𑁆𑀜𑀁 𑀧𑀼𑀝𑁆𑀞𑁄 𑀅𑀜𑁆𑀜𑀁 𑀦 𑀩𑁆𑀬𑀸𑀓𑀭𑁄𑀫𑀺, 𑀅𑀫𑁆𑀩𑀁 𑀧𑀼𑀝𑁆𑀞𑁄 𑀮𑀩𑀼𑀚𑀁 𑀯𑀺𑀬 𑀮𑀩𑀼𑀚𑀁 𑀯𑀸 𑀧𑀼𑀝𑁆𑀞𑁄 𑀅𑀫𑁆𑀩𑀁 𑀯𑀺𑀬. 𑀏𑀢𑁆𑀣 𑀘 ‘‘𑀅𑀥𑀺𑀲𑀻𑀮𑁂 𑀲𑀫𑁆𑀪𑀸𑀯𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀩𑀼𑀤𑁆𑀥𑀲𑀻𑀮𑀁 𑀦𑀸𑀫 𑀓𑀣𑀺𑀢𑀁, ‘‘𑀅𑀪𑀺𑀓𑁆𑀓𑀦𑁆𑀢𑁂 𑀜𑀸𑀡𑀤𑀲𑁆𑀲𑀦𑁂 ¶ 𑀲𑀫𑁆𑀪𑀸𑀯𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, ‘‘𑀅𑀥𑀺𑀧𑀜𑁆𑀜𑀸𑀬 𑀲𑀫𑁆𑀪𑀸𑀯𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀜𑁆𑀜𑀸, ‘‘𑀬𑁂𑀦 𑀤𑀼𑀓𑁆𑀔𑁂𑀦𑀸’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀲𑀘𑁆𑀘𑀩𑁆𑀬𑀸𑀓𑀭𑀡𑀧𑀜𑁆𑀜𑀸. 𑀢𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘 𑀲𑀘𑁆𑀘𑀩𑁆𑀬𑀸𑀓𑀭𑀡𑀧𑀜𑁆𑀜𑀜𑁆𑀘 𑀞𑀧𑁂𑀢𑁆𑀯𑀸 ¶ 𑀅𑀯𑀲𑁂𑀲𑀸 𑀧𑀜𑁆𑀜𑀸 𑀅𑀥𑀺𑀧𑀜𑁆𑀜𑀁 𑀪𑀚𑀢𑀺.

𑁨𑁪𑁭. 𑀇𑀤𑀸𑀦𑀺 𑀢𑁂𑀲𑀁 𑀢𑁂𑀲𑀁 𑀯𑀺𑀲𑁂𑀲𑀸𑀥𑀺𑀕𑀫𑀸𑀦𑀁 𑀧𑀝𑀺𑀧𑀤𑀁 𑀆𑀘𑀺𑀓𑁆𑀔𑀦𑁆𑀢𑁄 𑀧𑀼𑀦 𑀘𑀧𑀭𑀁 𑀉𑀤𑀸𑀬𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀪𑀺𑀜𑁆𑀜𑀸𑀯𑁄𑀲𑀸𑀦𑀧𑀸𑀭𑀫𑀺𑀧𑁆𑀧𑀢𑁆𑀢𑀸𑀢𑀺 𑀅𑀪𑀺𑀜𑁆𑀜𑀸𑀯𑁄𑀲𑀸𑀦𑀲𑀗𑁆𑀔𑀸𑀢𑀜𑁆𑀘𑁂𑀯 𑀅𑀪𑀺𑀜𑁆𑀜𑀸𑀧𑀸𑀭𑀫𑀻𑀲𑀗𑁆𑀔𑀸𑀢𑀜𑁆𑀘 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸.

𑀲𑀫𑁆𑀫𑀧𑁆𑀧𑀥𑀸𑀦𑁂𑀢𑀺 𑀉𑀧𑀸𑀬𑀧𑀥𑀸𑀦𑁂. 𑀙𑀦𑁆𑀤𑀁 𑀚𑀦𑁂𑀢𑀻𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀓𑀼𑀲𑀮𑀘𑁆𑀙𑀦𑁆𑀤𑀁 𑀚𑀦𑁂𑀢𑀺. 𑀯𑀸𑀬𑀫𑀢𑀻𑀢𑀺 𑀯𑀸𑀬𑀸𑀫𑀁 𑀓𑀭𑁄𑀢𑀺. 𑀯𑀻𑀭𑀺𑀬𑀁 𑀆𑀭𑀪𑀢𑀻𑀢𑀺 𑀯𑀻𑀭𑀺𑀬𑀁 𑀧𑀯𑀢𑁆𑀢𑁂𑀢𑀺. 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀻𑀢𑀺 𑀘𑀺𑀢𑁆𑀢𑀁 𑀉𑀓𑁆𑀔𑀺𑀧𑀢𑀺. 𑀧𑀤𑀳𑀢𑀻𑀢𑀺 𑀉𑀧𑀸𑀬𑀧𑀥𑀸𑀦𑀁 𑀓𑀭𑁄𑀢𑀺. 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀯𑀟𑁆𑀠𑀺𑀬𑀸 𑀧𑀭𑀺𑀧𑀽𑀭𑀡𑀢𑁆𑀣𑀁. 𑀅𑀧𑀺𑀘𑁂𑀢𑁆𑀣 𑁋 ‘‘𑀬𑀸 𑀞𑀺𑀢𑀺, 𑀲𑁄 𑀅𑀲𑀫𑁆𑀫𑁄𑀲𑁄…𑀧𑁂… 𑀬𑀁 𑀯𑁂𑀧𑀼𑀮𑁆𑀮𑀁, 𑀲𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀻’’𑀢𑀺 (𑀯𑀺𑀪. 𑁪𑁦𑁬) 𑀏𑀯𑀁 𑀧𑀼𑀭𑀺𑀫𑀁 𑀧𑀼𑀭𑀺𑀫𑀲𑁆𑀲 𑀧𑀘𑁆𑀙𑀺𑀫𑀁 𑀧𑀘𑁆𑀙𑀺𑀫𑀲𑁆𑀲 𑀅𑀢𑁆𑀣𑁄𑀢𑀺𑀧𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀫𑁂𑀳𑀺 𑀧𑀦 𑀲𑀫𑁆𑀫𑀧𑁆𑀧𑀥𑀸𑀦𑁂𑀳𑀺 𑀓𑀺𑀁 𑀓𑀣𑀺𑀢𑀁? 𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑀧𑀭𑀺𑀬𑀸𑀬𑁂𑀦 𑀲𑀸𑀯𑀓𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀓𑀣𑀺𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀢𑀢𑁆𑀣 𑁋

‘‘𑀘𑀢𑁆𑀢𑀸𑀭𑁄𑀫𑁂 ¶ , 𑀆𑀯𑀼𑀲𑁄, 𑀲𑀫𑁆𑀫𑀧𑁆𑀧𑀥𑀸𑀦𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼, 𑀅𑀦𑀼𑀧𑁆𑀧𑀦𑁆𑀦𑀸 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼𑀦𑁆𑀢𑀺 𑀆𑀢𑀧𑁆𑀧𑀁 𑀓𑀭𑁄𑀢𑀺. 𑀉𑀧𑁆𑀧𑀦𑁆𑀦𑀸 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑁆𑀧𑀳𑀻𑀬𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼𑀦𑁆𑀢𑀺 𑀆𑀢𑀧𑁆𑀧𑀁 𑀓𑀭𑁄𑀢𑀺. 𑀅𑀦𑀼𑀧𑁆𑀧𑀦𑁆𑀦𑀸 𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼𑀦𑁆𑀢𑀺 𑀆𑀢𑀧𑁆𑀧𑀁 𑀓𑀭𑁄𑀢𑀺. 𑀉𑀧𑁆𑀧𑀦𑁆𑀦𑀸 𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀦𑀺𑀭𑀼𑀚𑁆𑀛𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼𑀦𑁆𑀢𑀺 𑀆𑀢𑀧𑁆𑀧𑀁 𑀓𑀭𑁄𑀢𑀻’’𑀢𑀺 (𑀲𑀁. 𑀦𑀺. 𑁨.𑁧𑁪𑁫).

𑀏𑀢𑁆𑀣 ¶ 𑀘 𑀧𑀸𑀧𑀓𑀸 𑀅𑀓𑀼𑀲𑀮𑀸𑀢𑀺 𑀮𑁄𑀪𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀅𑀦𑀼𑀧𑁆𑀧𑀦𑁆𑀦𑀸 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸 𑀘𑁂𑀯 𑀫𑀕𑁆𑀕𑁄 𑀘, 𑀉𑀧𑁆𑀧𑀦𑁆𑀦𑀸 𑀓𑀼𑀲𑀮𑀸 𑀦𑀸𑀫 𑀲𑀫𑀣𑀯𑀺𑀧𑀲𑁆𑀲𑀦𑀸𑀯. 𑀫𑀕𑁆𑀕𑁄 𑀧𑀦 𑀲𑀓𑀺𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀫𑀸𑀦𑁄 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑀓𑁄 ¶ 𑀦𑀸𑀫 𑀦𑀢𑁆𑀣𑀺. 𑀲𑁄 𑀳𑀺 𑀨𑀮𑀲𑁆𑀲 𑀧𑀘𑁆𑀘𑀬𑀁 𑀤𑀢𑁆𑀯𑀸𑀯 𑀦𑀺𑀭𑀼𑀚𑁆𑀛𑀢𑀺. 𑀧𑀼𑀭𑀺𑀫𑀲𑁆𑀫𑀺𑀫𑁆𑀧𑀺 𑀯𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀯 𑀕𑀳𑁂𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀦 𑀦 𑀬𑀼𑀢𑁆𑀢𑀁.

𑀢𑀢𑁆𑀣 ‘‘𑀉𑀧𑁆𑀧𑀦𑁆𑀦𑀸 𑀲𑀫𑀣𑀯𑀺𑀧𑀲𑁆𑀲𑀦𑀸 𑀦𑀺𑀭𑀼𑀚𑁆𑀛𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺 𑀅𑀢𑁆𑀣𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀫𑀺𑀤𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀔𑀻𑀡𑀸𑀲𑀯𑀢𑁆𑀣𑁂𑀭𑁄 ‘‘𑀫𑀳𑀸𑀘𑁂𑀢𑀺𑀬𑀜𑁆𑀘 𑀫𑀳𑀸𑀩𑁄𑀥𑀺𑀜𑁆𑀘 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑀸 𑀪𑀡𑁆𑀟𑀕𑀸𑀳𑀓𑀲𑀸𑀫𑀡𑁂𑀭𑁂𑀦 𑀲𑀤𑁆𑀥𑀺𑀁 𑀚𑀦𑀧𑀤𑀢𑁄 𑀫𑀳𑀸𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑀧𑀭𑀺𑀯𑁂𑀡𑀁 𑀧𑀸𑀯𑀺𑀲𑀺. 𑀲𑀸𑀬𑀦𑁆𑀳𑀲𑀫𑀬𑁂 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁂 𑀘𑁂𑀢𑀺𑀬𑀁 𑀯𑀦𑁆𑀤𑀫𑀸𑀦𑁂 𑀘𑁂𑀢𑀺𑀬𑀁 𑀯𑀦𑁆𑀤𑀦𑀢𑁆𑀣𑀸𑀬 𑀦 𑀦𑀺𑀓𑁆𑀔𑀫𑀺. 𑀓𑀲𑁆𑀫𑀸? 𑀔𑀻𑀡𑀸𑀲𑀯𑀸𑀦𑀜𑁆𑀳𑀺 𑀢𑀻𑀲𑀼 𑀭𑀢𑀦𑁂𑀲𑀼 𑀫𑀳𑀦𑁆𑀢𑀁 𑀕𑀸𑀭𑀯𑀁 𑀳𑁄𑀢𑀺. 𑀢𑀲𑁆𑀫𑀸 𑀪𑀺𑀓𑁆𑀔𑀼𑀲𑀗𑁆𑀖𑁂 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀓𑁆𑀓𑀫𑀦𑁆𑀢𑁂 𑀫𑀦𑀼𑀲𑁆𑀲𑀸𑀦𑀁 𑀲𑀸𑀬𑀫𑀸𑀲𑀪𑀼𑀢𑁆𑀢𑀯𑁂𑀮𑀸𑀬𑀁 𑀲𑀸𑀫𑀡𑁂𑀭𑀫𑁆𑀧𑀺 𑀅𑀚𑀸𑀦𑀸𑀧𑁂𑀢𑁆𑀯𑀸 ‘‘𑀘𑁂𑀢𑀺𑀬𑀁 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀓𑁄𑀯 𑀦𑀺𑀓𑁆𑀔𑀫𑀺. 𑀲𑀸𑀫𑀡𑁂𑀭𑁄 ¶ 𑁋 ‘‘𑀓𑀺𑀁 𑀦𑀼 𑀔𑁄 𑀣𑁂𑀭𑁄 𑀅𑀯𑁂𑀮𑀸𑀬 𑀏𑀓𑀓𑁄𑀯 𑀕𑀘𑁆𑀙𑀢𑀺, 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀚𑁆𑀛𑀸𑀬𑀲𑁆𑀲 𑀧𑀤𑀸𑀦𑀼𑀧𑀤𑀺𑀓𑁄 𑀦𑀺𑀓𑁆𑀔𑀫𑀺. 𑀣𑁂𑀭𑁄 𑀅𑀦𑀸𑀯𑀚𑁆𑀚𑀦𑁂𑀦 𑀢𑀲𑁆𑀲 𑀆𑀕𑀫𑀦𑀁 𑀅𑀚𑀸𑀦𑀦𑁆𑀢𑁄 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀘𑁂𑀢𑀺𑀬𑀗𑁆𑀕𑀡𑀁 𑀆𑀭𑀼𑀳𑀺. 𑀲𑀸𑀫𑀡𑁂𑀭𑁄𑀧𑀺 𑀅𑀦𑀼𑀧𑀤𑀁𑀬𑁂𑀯 𑀆𑀭𑀼𑀴𑁆𑀳𑁄.

𑀫𑀳𑀸𑀣𑁂𑀭𑁄 𑀫𑀳𑀸𑀘𑁂𑀢𑀺𑀬𑀁 𑀉𑀮𑁆𑀮𑁄𑀓𑁂𑀢𑁆𑀯𑀸 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀳𑀝𑁆𑀞𑀧𑀳𑀝𑁆𑀞𑁄 𑀘𑁂𑀢𑀺𑀬𑀁 𑀯𑀦𑁆𑀤𑀢𑀺. 𑀲𑀸𑀫𑀡𑁂𑀭𑁄 𑀣𑁂𑀭𑀲𑁆𑀲 𑀯𑀦𑁆𑀤𑀦𑀸𑀓𑀸𑀭𑀁 𑀤𑀺𑀲𑁆𑀯𑀸 ‘‘𑀉𑀧𑀚𑁆𑀛𑀸𑀬𑁄 𑀫𑁂 𑀅𑀢𑀺𑀯𑀺𑀬 𑀧𑀲𑀦𑁆𑀦𑀘𑀺𑀢𑁆𑀢𑁄 𑀯𑀦𑁆𑀤𑀢𑀺, 𑀓𑀺𑀁 𑀦𑀼 𑀔𑁄 𑀧𑀼𑀧𑁆𑀨𑀸𑀦𑀺 𑀮𑀪𑀺𑀢𑁆𑀯𑀸 𑀧𑀽𑀚𑀁 𑀓𑀭𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀲𑀺. 𑀣𑁂𑀭𑁄 𑀯𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀸𑀬 𑀲𑀺𑀭𑀲𑀺 𑀅𑀜𑁆𑀚𑀮𑀺𑀁 𑀞𑀧𑁂𑀢𑁆𑀯𑀸 𑀫𑀳𑀸𑀘𑁂𑀢𑀺𑀬𑀁 𑀉𑀮𑁆𑀮𑁄𑀓𑁂𑀢𑁆𑀯𑀸 𑀞𑀺𑀢𑁄. 𑀲𑀸𑀫𑀡𑁂𑀭𑁄 𑀉𑀓𑁆𑀓𑀸𑀲𑀺𑀢𑁆𑀯𑀸 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀲𑀺. 𑀣𑁂𑀭𑁄 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 ‘‘𑀓𑀤𑀸 𑀆𑀕𑀢𑁄𑀲𑀻’’𑀢𑀺 𑀧𑀼𑀘𑁆𑀙𑀺. 𑀢𑀼𑀫𑁆𑀳𑀸𑀓𑀁 𑀘𑁂𑀢𑀺𑀬𑀁 𑀯𑀦𑁆𑀤𑀦𑀓𑀸𑀮𑁂, 𑀪𑀦𑁆𑀢𑁂. 𑀅𑀢𑀺𑀯𑀺𑀬 𑀧𑀲𑀦𑁆𑀦𑀸 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀣 𑀓𑀺𑀁 𑀦𑀼 𑀔𑁄 𑀧𑀼𑀧𑁆𑀨𑀸𑀦𑀺 𑀮𑀪𑀺𑀢𑁆𑀯𑀸 𑀧𑀽𑀚𑁂𑀬𑁆𑀬𑀸𑀣𑀸𑀢𑀺? 𑀆𑀫 𑀲𑀸𑀫𑀡𑁂𑀭 𑀇𑀫𑀲𑁆𑀫𑀺𑀁 𑀘𑁂𑀢𑀺𑀬𑁂 𑀯𑀺𑀬 𑀅𑀜𑁆𑀜𑀢𑁆𑀭 𑀏𑀢𑁆𑀢𑀓𑀁 𑀥𑀸𑀢𑀽𑀦𑀁 𑀦𑀺𑀥𑀸𑀦𑀁 𑀦𑀸𑀫 𑀦𑀢𑁆𑀣�