📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀫𑀚𑁆𑀛𑀺𑀫𑀦𑀺𑀓𑀸𑀬𑁂

𑀉𑀧𑀭𑀺𑀧𑀡𑁆𑀡𑀸𑀲-𑀅𑀝𑁆𑀞𑀓𑀣𑀸

𑁧. 𑀤𑁂𑀯𑀤𑀳𑀯𑀕𑁆𑀕𑁄

𑁧. 𑀤𑁂𑀯𑀤𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀤𑁂𑀯𑀤𑀳𑀲𑀼𑀢𑁆𑀢𑀁. 𑀢𑀢𑁆𑀣 𑀤𑁂𑀯𑀤𑀳𑀁 𑀦𑀸𑀫𑀸𑀢𑀺 𑀤𑁂𑀯𑀸 𑀯𑀼𑀘𑁆𑀘𑀦𑁆𑀢𑀺 𑀭𑀸𑀚𑀸𑀦𑁄, 𑀢𑀢𑁆𑀣 𑀘 𑀲𑀓𑁆𑀬𑀭𑀸𑀚𑀽𑀦𑀁 𑀫𑀗𑁆𑀕𑀮𑀧𑁄𑀓𑁆𑀔𑀭𑀡𑀻 𑀅𑀳𑁄𑀲𑀺 𑀧𑀸𑀲𑀸𑀤𑀺𑀓𑀸 𑀆𑀭𑀓𑁆𑀔𑀲𑀫𑁆𑀧𑀦𑁆𑀦𑀸, 𑀲𑀸 𑀤𑁂𑀯𑀸𑀦𑀁 𑀤𑀳𑀢𑁆𑀢𑀸 ‘‘𑀤𑁂𑀯𑀤𑀳’’𑀦𑁆𑀢𑀺 𑀧𑀜𑁆𑀜𑀸𑀬𑀺𑀢𑁆𑀣. 𑀢𑀤𑀼𑀧𑀸𑀤𑀸𑀬 𑀲𑁄𑀧𑀺 𑀦𑀺𑀕𑀫𑁄 𑀤𑁂𑀯𑀤𑀳𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀢𑁄. 𑀪𑀕𑀯𑀸 𑀢𑀁 𑀦𑀺𑀕𑀫𑀁 𑀦𑀺𑀲𑁆𑀲𑀸𑀬 𑀮𑀼𑀫𑁆𑀩𑀺𑀦𑀺𑀯𑀦𑁂 𑀯𑀺𑀳𑀭𑀢𑀺. 𑀲𑀩𑁆𑀩𑀁 𑀢𑀁 𑀧𑀼𑀩𑁆𑀩𑁂𑀓𑀢𑀳𑁂𑀢𑀽𑀢𑀺 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀧𑀘𑁆𑀘𑀬𑀸. 𑀇𑀫𑀺𑀦𑀸 𑀓𑀫𑁆𑀫𑀯𑁂𑀤𑀦𑀜𑁆𑀘 𑀓𑀺𑀭𑀺𑀬𑀯𑁂𑀤𑀦𑀜𑁆𑀘 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀁 𑀯𑀺𑀧𑀸𑀓𑀯𑁂𑀤𑀦𑀫𑁂𑀯 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀁 𑀯𑀸𑀤𑀺𑀦𑁄, 𑀪𑀺𑀓𑁆𑀔𑀯𑁂, 𑀦𑀺𑀕𑀡𑁆𑀞𑀸𑀢𑀺 𑀇𑀫𑀺𑀦𑀸 𑀧𑀼𑀩𑁆𑀩𑁂 𑀅𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑀁 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀺.

𑀅𑀳𑀼𑀯𑀫𑁆𑀳𑁂𑀯 𑀫𑀬𑀦𑁆𑀢𑀺 𑀇𑀤𑀁 𑀪𑀕𑀯𑀸 𑀢𑁂𑀲𑀁 𑀅𑀚𑀸𑀦𑀦𑀪𑀸𑀯𑀁 𑀚𑀸𑀦𑀦𑁆𑀢𑁄𑀯 𑀓𑁂𑀯𑀮𑀁 𑀓𑀮𑀺𑀲𑀸𑀲𑀦𑀁 𑀆𑀭𑁄𑀧𑁂𑀢𑀼𑀓𑀸𑀫𑁄 𑀧𑀼𑀘𑁆𑀙𑀢𑀺. 𑀬𑁂 𑀳𑀺 ‘‘𑀫𑀬𑀁 𑀅𑀳𑀼𑀯𑀫𑁆𑀳𑀸’’𑀢𑀺𑀧𑀺 𑀦 𑀚𑀸𑀦𑀦𑁆𑀢𑀺, 𑀢𑁂 𑀓𑀣𑀁 𑀓𑀫𑁆𑀫𑀲𑁆𑀲 𑀓𑀢𑀪𑀸𑀯𑀁 𑀯𑀸 𑀅𑀓𑀢𑀪𑀸𑀯𑀁 𑀯𑀸 𑀚𑀸𑀦𑀺𑀲𑁆𑀲𑀦𑁆𑀢𑀺. 𑀉𑀢𑁆𑀢𑀭𑀺𑀧𑀼𑀘𑁆𑀙𑀸𑀬𑀧𑀺 𑀏𑀲𑁂𑀯 𑀦𑀬𑁄.

𑁨. 𑀏𑀯𑀁 𑀲𑀦𑁆𑀢𑁂𑀢𑀺 𑀘𑀽𑀴𑀤𑀼𑀓𑁆𑀔𑀓𑁆𑀔𑀦𑁆𑀥𑁂 (𑀫. 𑀦𑀺. 𑁧.𑁧𑁭𑁯-𑁧𑁮𑁦) 𑀫𑀳𑀸𑀦𑀺𑀕𑀡𑁆𑀞𑀲𑁆𑀲 𑀯𑀘𑀦𑁂 𑀲𑀘𑁆𑀘𑁂 𑀲𑀦𑁆𑀢𑁂𑀢𑀺 𑀅𑀢𑁆𑀣𑁄, 𑀇𑀥 𑀧𑀦 𑀏𑀢𑁆𑀢𑀓𑀲𑁆𑀲 𑀞𑀸𑀦𑀲𑁆𑀲 𑀢𑀼𑀫𑁆𑀳𑀸𑀓𑀁 𑀅𑀚𑀸𑀦𑀦𑀪𑀸𑀯𑁂 𑀲𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀦 𑀓𑀮𑁆𑀮𑀦𑁆𑀢𑀺 𑀦 𑀬𑀼𑀢𑁆𑀢𑀁.

𑁩. 𑀕𑀸𑀴𑁆𑀳𑀽𑀧𑀮𑁂𑀧𑀦𑁂𑀦𑀸𑀢𑀺 𑀩𑀳𑀮𑀽𑀧𑀮𑁂𑀧𑀦𑁂𑀦, 𑀧𑀼𑀦𑀧𑁆𑀧𑀼𑀦𑀁 𑀯𑀺𑀲𑀭𑀜𑁆𑀚𑀺𑀢𑁂𑀦, 𑀦 𑀧𑀦 𑀔𑀮𑀺𑀬𑀸 𑀮𑀺𑀢𑁆𑀢𑁂𑀦 𑀯𑀺𑀬. 𑀏𑀲𑀦𑀺𑀬𑀸𑀢𑀺 𑀏𑀲𑀦𑀺𑀲𑀮𑀸𑀓𑀸𑀬 𑀅𑀦𑁆𑀢𑀫𑀲𑁄 𑀦𑀦𑁆𑀢𑀓𑀯𑀝𑁆𑀝𑀺𑀬𑀸𑀧𑀺. 𑀏𑀲𑁂𑀬𑁆𑀬𑀸𑀢𑀺 𑀕𑀫𑁆𑀪𑀻𑀭𑀁 𑀯𑀸 𑀉𑀢𑁆𑀢𑀸𑀦𑀁 𑀯𑀸𑀢𑀺 𑀯𑀻𑀫𑀁𑀲𑁂𑀬𑁆𑀬. 𑀅𑀕𑀤𑀗𑁆𑀕𑀸𑀭𑀦𑁆𑀢𑀺 𑀛𑀸𑀫𑀳𑀭𑀻𑀢𑀓𑀲𑁆𑀲 𑀯𑀸 𑀆𑀫𑀮𑀓𑀲𑁆𑀲 𑀯𑀸 𑀘𑀼𑀡𑁆𑀡𑀁. 𑀑𑀤𑀳𑁂𑀬𑁆𑀬𑀸𑀢𑀺 𑀧𑀓𑁆𑀔𑀺𑀧𑁂𑀬𑁆𑀬. 𑀅𑀭𑁄𑀕𑁄𑀢𑀺𑀆𑀤𑀺 𑀫𑀸𑀕𑀡𑁆𑀟𑀺𑀬𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁨𑁧𑁩) 𑀯𑀼𑀢𑁆𑀢𑀫𑁂𑀯.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁, 𑀲𑀮𑁆𑀮𑁂𑀦 𑀯𑀺𑀤𑁆𑀥𑀲𑁆𑀲 𑀳𑀺 𑀯𑀺𑀤𑁆𑀥𑀓𑀸𑀮𑁂 𑀯𑁂𑀤𑀦𑀸𑀬 𑀧𑀸𑀓𑀝𑀓𑀸𑀮𑁄 𑀯𑀺𑀬 𑀇𑀫𑁂𑀲𑀁 ‘‘𑀫𑀬𑀁 𑀧𑀼𑀩𑁆𑀩𑁂 𑀅𑀳𑀼𑀯𑀫𑁆𑀳𑀸 𑀯𑀸 𑀦𑁄 𑀯𑀸, 𑀧𑀸𑀧𑀓𑀫𑁆𑀫𑀁 𑀅𑀓𑀭𑀫𑁆𑀳𑀸 𑀯𑀸 𑀦𑁄 𑀯𑀸, 𑀏𑀯𑀭𑀽𑀧𑀁 𑀯𑀸 𑀧𑀸𑀧𑀁 𑀓𑀭𑀫𑁆𑀳𑀸’’𑀢𑀺 𑀚𑀸𑀦𑀦𑀓𑀸𑀮𑁄 𑀲𑀺𑀬𑀸. 𑀯𑀡𑀫𑀼𑀔𑀲𑁆𑀲 𑀧𑀭𑀺𑀓𑀦𑁆𑀢𑀦𑀸𑀤𑀻𑀲𑀼 𑀘𑀢𑀽𑀲𑀼 𑀓𑀸𑀮𑁂𑀲𑀼 𑀯𑁂𑀤𑀦𑀸𑀬 𑀧𑀸𑀓𑀝𑀓𑀸𑀮𑁄 𑀯𑀺𑀬 ‘‘𑀏𑀢𑁆𑀢𑀓𑀁 𑀯𑀸 𑀦𑁄 𑀤𑀼𑀓𑁆𑀔𑀁 𑀦𑀺𑀚𑁆𑀚𑀺𑀡𑁆𑀡𑀁, 𑀏𑀢𑁆𑀢𑀓𑁂 𑀯𑀸 𑀦𑀺𑀚𑁆𑀚𑀺𑀡𑁆𑀡𑁂 𑀲𑀩𑁆𑀩𑀫𑁂𑀯 𑀤𑀼𑀓𑁆𑀔𑀁 𑀦𑀺𑀚𑁆𑀚𑀺𑀡𑁆𑀡𑀁 𑀪𑀯𑀺𑀲𑁆𑀲𑀢𑀺, 𑀲𑀼𑀤𑁆𑀥𑀦𑁆𑀢𑁂 𑀧𑀢𑀺𑀝𑁆𑀞𑀺𑀢𑀸 𑀦𑀸𑀫 𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀚𑀸𑀦𑀦𑀓𑀸𑀮𑁄 𑀲𑀺𑀬𑀸. 𑀅𑀧𑀭𑀪𑀸𑀕𑁂 𑀨𑀸𑀲𑀼𑀪𑀸𑀯𑀚𑀸𑀦𑀦𑀓𑀸𑀮𑁄 𑀯𑀺𑀬 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬 𑀚𑀸𑀦𑀦𑀓𑀸𑀮𑁄 𑀲𑀺𑀬𑀸. 𑀏𑀯𑀫𑁂𑀢𑁆𑀣 𑀏𑀓𑀸𑀬 𑀉𑀧𑀫𑀸𑀬 𑀢𑀬𑁄 𑀅𑀢𑁆𑀣𑀸, 𑀘𑀢𑀽𑀳𑀺 𑀉𑀧𑀫𑀸𑀳𑀺 𑀏𑀓𑁄 𑀅𑀢𑁆𑀣𑁄 𑀧𑀭𑀺𑀤𑀻𑀧𑀺𑀢𑁄.

𑁪. 𑀇𑀫𑁂 𑀧𑀦 𑀢𑀢𑁄 𑀏𑀓𑀫𑁆𑀧𑀺 𑀦 𑀚𑀸𑀦𑀦𑁆𑀢𑀺, 𑀯𑀺𑀭𑀚𑁆𑀛𑀺𑀢𑁆𑀯𑀸 𑀕𑀢𑁂 𑀲𑀮𑁆𑀮𑁂 𑀅𑀯𑀺𑀤𑁆𑀥𑁄𑀯 ‘‘𑀯𑀺𑀤𑁆𑀥𑁄𑀲𑀺 𑀫𑀬𑀸’’𑀢𑀺 𑀧𑀘𑁆𑀘𑀢𑁆𑀣𑀺𑀓𑀲𑁆𑀲 𑀯𑀘𑀦𑀧𑁆𑀧𑀫𑀸𑀡𑁂𑀦𑁂𑀯 ‘‘𑀯𑀺𑀤𑁆𑀥𑁄𑀲𑁆𑀫𑀻’’𑀢𑀺 𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀤𑀼𑀓𑁆𑀔𑀧𑁆𑀧𑀢𑁆𑀢𑀧𑀼𑀭𑀺𑀲𑁄 𑀯𑀺𑀬 𑀓𑁂𑀯𑀮𑀁 𑀫𑀳𑀸𑀦𑀺𑀕𑀡𑁆𑀞𑀲𑁆𑀲 𑀯𑀘𑀦𑀧𑁆𑀧𑀫𑀸𑀡𑁂𑀦 𑀲𑀩𑁆𑀩𑀫𑁂𑀢𑀁 𑀲𑀤𑁆𑀤𑀳𑀦𑁆𑀢𑀸 𑀏𑀯𑀁 𑀲𑀮𑁆𑀮𑁄𑀧𑀫𑀸𑀬 𑀪𑀕𑀯𑀢𑀸 𑀦𑀺𑀕𑁆𑀕𑀳𑀺𑀢𑀸 𑀧𑀘𑁆𑀘𑀸𑀳𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀬𑀣𑀸 𑀦𑀸𑀫 𑀤𑀼𑀩𑁆𑀩𑀮𑁄 𑀲𑀼𑀦𑀔𑁄 𑀫𑀺𑀕𑀁 𑀉𑀝𑁆𑀞𑀸𑀧𑁂𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀅𑀪𑀺𑀫𑀼𑀔𑀁 𑀓𑀭𑀺𑀢𑁆𑀯𑀸 𑀅𑀢𑁆𑀢𑀦𑀸 𑀑𑀲𑀓𑁆𑀓𑀢𑀺, 𑀏𑀯𑀁 𑀫𑀳𑀸𑀦𑀺𑀕𑀡𑁆𑀞𑀲𑁆𑀲 𑀫𑀢𑁆𑀣𑀓𑁂 𑀯𑀸𑀤𑀁 𑀧𑀓𑁆𑀔𑀺𑀧𑀦𑁆𑀢𑀸 𑀦𑀺𑀕𑀡𑁆𑀞𑁄, 𑀆𑀯𑀼𑀲𑁄𑀢𑀺𑀆𑀤𑀻𑀫𑀸𑀳𑀁𑀲𑀼.

𑁫. 𑀅𑀣 𑀦𑁂 𑀪𑀕𑀯𑀸 𑀲𑀸𑀘𑀭𑀺𑀬𑀓𑁂 𑀦𑀺𑀕𑁆𑀕𑀡𑁆𑀳𑀦𑁆𑀢𑁄 𑀧𑀜𑁆𑀘 𑀔𑁄 𑀇𑀫𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀬𑀲𑁆𑀫𑀦𑁆𑀢𑀸𑀦𑀦𑁆𑀢𑀺 𑀢𑁂𑀲𑀼 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀆𑀬𑀲𑁆𑀫𑀦𑁆𑀢𑀸𑀦𑀁. 𑀓𑀸 𑀅𑀢𑀻𑀢𑀁𑀲𑁂 𑀲𑀢𑁆𑀣𑀭𑀺 𑀲𑀤𑁆𑀥𑀸𑀢𑀺 𑀅𑀢𑀻𑀢𑀁𑀲𑀯𑀸𑀤𑀺𑀫𑁆𑀳𑀺 𑀲𑀢𑁆𑀣𑀭𑀺 𑀓𑀸 𑀲𑀤𑁆𑀥𑀸. 𑀬𑀸 𑀅𑀢𑀻𑀢𑀯𑀸𑀤𑀁 𑀲𑀤𑁆𑀤𑀳𑀦𑁆𑀢𑀸𑀦𑀁 𑀢𑀼𑀫𑁆𑀳𑀸𑀓𑀁 𑀫𑀳𑀸𑀦𑀺𑀕𑀡𑁆𑀞𑀲𑁆𑀲 𑀲𑀤𑁆𑀥𑀸, 𑀲𑀸 𑀓𑀢𑀫𑀸? 𑀓𑀺𑀁 𑀪𑀽𑀢𑀢𑁆𑀣𑀸 𑀅𑀪𑀽𑀢𑀢𑁆𑀣𑀸, 𑀪𑀽𑀢𑀯𑀺𑀧𑀸𑀓𑀸 𑀅𑀪𑀽𑀢𑀯𑀺𑀧𑀸𑀓𑀸𑀢𑀺 𑀧𑀼𑀘𑁆𑀙𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀳𑀥𑀫𑁆𑀫𑀺𑀓𑀦𑁆𑀢𑀺 𑀲𑀳𑁂𑀢𑀼𑀓𑀁 𑀲𑀓𑀸𑀭𑀡𑀁. 𑀯𑀸𑀤𑀧𑀝𑀺𑀳𑀸𑀭𑀦𑁆𑀢𑀺 𑀧𑀘𑁆𑀘𑀸𑀕𑀫𑀦𑀓𑀯𑀸𑀤𑀁. 𑀏𑀢𑁆𑀢𑀸𑀯𑀢𑀸 𑀢𑁂𑀲𑀁 ‘‘𑀅𑀧𑀦𑁂𑀣 𑀲𑀤𑁆𑀥𑀁, 𑀲𑀩𑁆𑀩𑀤𑀼𑀩𑁆𑀩𑀮𑀸 𑀏𑀲𑀸’’𑀢𑀺 𑀲𑀤𑁆𑀥𑀸𑀙𑁂𑀤𑀓𑀯𑀸𑀤𑀁 𑀦𑀸𑀫 𑀤𑀲𑁆𑀲𑁂𑀢𑀺.

𑁬. 𑀅𑀯𑀺𑀚𑁆𑀚𑀸 𑀅𑀜𑁆𑀜𑀸𑀡𑀸𑀢𑀺 𑀅𑀯𑀺𑀚𑁆𑀚𑀸𑀬 𑀅𑀜𑁆𑀜𑀸𑀡𑁂𑀦. 𑀲𑀫𑁆𑀫𑁄𑀳𑀸𑀢𑀺 𑀲𑀫𑁆𑀫𑁄𑀳𑁂𑀦. 𑀯𑀺𑀧𑀘𑁆𑀘𑁂𑀣𑀸𑀢𑀺 𑀯𑀺𑀧𑀭𑀻𑀢𑀢𑁄 𑀲𑀤𑁆𑀤𑀳𑀣, 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑀁 𑀯𑀸 𑀕𑀡𑁆𑀳𑀣𑀸𑀢𑀺 𑀅𑀢𑁆𑀣𑁄.

𑁭. 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀦𑁆𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀤𑀸𑀬𑀓𑀁. 𑀉𑀧𑀓𑁆𑀓𑀫𑁂𑀦𑀸𑀢𑀺 𑀧𑀬𑁄𑀕𑁂𑀦. 𑀧𑀥𑀸𑀦𑁂𑀦𑀸𑀢𑀺 𑀯𑀻𑀭𑀺𑀬𑁂𑀦. 𑀲𑀫𑁆𑀧𑀭𑀸𑀬𑀯𑁂𑀤𑀦𑀻𑀬𑀦𑁆𑀢𑀺 𑀤𑀼𑀢𑀺𑀬𑁂 𑀯𑀸 𑀢𑀢𑀺𑀬𑁂 𑀯𑀸 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀤𑀸𑀬𑀓𑀁. 𑀲𑀼𑀔𑀯𑁂𑀤𑀦𑀻𑀬𑀦𑁆𑀢𑀺 𑀇𑀝𑁆𑀞𑀸𑀭𑀫𑁆𑀫𑀡𑀯𑀺𑀧𑀸𑀓𑀤𑀸𑀬𑀓𑀁 𑀓𑀼𑀲𑀮𑀓𑀫𑁆𑀫𑀁. 𑀯𑀺𑀧𑀭𑀻𑀢𑀁 𑀤𑀼𑀓𑁆𑀔𑀯𑁂𑀤𑀦𑀻𑀬𑀁. 𑀧𑀭𑀺𑀧𑀓𑁆𑀓𑀯𑁂𑀤𑀦𑀻𑀬𑀦𑁆𑀢𑀺 𑀧𑀭𑀺𑀧𑀓𑁆𑀓𑁂 𑀦𑀺𑀧𑁆𑀨𑀦𑁆𑀦𑁂 𑀅𑀢𑁆𑀢𑀪𑀸𑀯𑁂 𑀯𑁂𑀤𑀦𑀻𑀬𑀁, 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀲𑁆𑀲𑁂𑀯𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀧𑀭𑀺𑀧𑀓𑁆𑀓𑀯𑁂𑀤𑀦𑀻𑀬𑀦𑁆𑀢𑀺 𑀅𑀧𑀭𑀺𑀧𑀓𑁆𑀓𑁂 𑀅𑀢𑁆𑀢𑀪𑀸𑀯𑁂 𑀯𑁂𑀤𑀦𑀻𑀬𑀁, 𑀲𑀫𑁆𑀧𑀭𑀸𑀬𑀯𑁂𑀤𑀦𑀻𑀬𑀲𑁆𑀲𑁂𑀯𑁂𑀢𑀁 𑀅𑀥𑀺𑀯𑀘𑀦𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄 𑁋 𑀬𑀁 𑀧𑀞𑀫𑀯𑀬𑁂 𑀓𑀢𑀁 𑀧𑀞𑀫𑀯𑀬𑁂 𑀯𑀸 𑀫𑀚𑁆𑀛𑀺𑀫𑀯𑀬𑁂 𑀯𑀸 𑀧𑀘𑁆𑀙𑀺𑀫𑀯𑀬𑁂 𑀯𑀸 𑀯𑀺𑀧𑀸𑀓𑀁 𑀤𑁂𑀢𑀺, 𑀫𑀚𑁆𑀛𑀺𑀫𑀯𑀬𑁂 𑀓𑀢𑀁 𑀫𑀚𑁆𑀛𑀺𑀫𑀯𑀬𑁂 𑀯𑀸 𑀧𑀘𑁆𑀙𑀺𑀫𑀯𑀬𑁂 𑀯𑀸 𑀯𑀺𑀧𑀸𑀓𑀁 𑀤𑁂𑀢𑀺, 𑀧𑀘𑁆𑀙𑀺𑀫𑀯𑀬𑁂 𑀓𑀢𑀁 𑀢𑀢𑁆𑀣𑁂𑀯 𑀯𑀺𑀧𑀸𑀓𑀁 𑀤𑁂𑀢𑀺, 𑀢𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀦𑀸𑀫. 𑀬𑀁 𑀧𑀦 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑁂 𑀯𑀺𑀧𑀸𑀓𑀁 𑀤𑁂𑀢𑀺, 𑀢𑀁 𑀧𑀭𑀺𑀧𑀓𑁆𑀓𑀯𑁂𑀤𑀦𑀻𑀬𑀁 𑀦𑀸𑀫. 𑀢𑀁 𑀓𑀼𑀲𑀮𑀫𑁆𑀧𑀺 𑀳𑁄𑀢𑀺 𑀅𑀓𑀼𑀲𑀮𑀫𑁆𑀧𑀺.

𑀢𑀢𑁆𑀭𑀺𑀫𑀸𑀦𑀺 𑀯𑀢𑁆𑀣𑀽𑀦𑀺 𑁋 𑀧𑀼𑀡𑁆𑀡𑁄 𑀦𑀸𑀫 𑀓𑀺𑀭 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑁄 𑀭𑀸𑀚𑀕𑀳𑁂 𑀲𑀼𑀫𑀦𑀲𑁂𑀝𑁆𑀞𑀺𑀁 𑀦𑀺𑀲𑁆𑀲𑀸𑀬 𑀯𑀲𑀢𑀺. 𑀢𑀫𑁂𑀦𑀁 𑀏𑀓𑀤𑀺𑀯𑀲𑀁 𑀦𑀕𑀭𑀫𑁆𑀳𑀺 𑀦𑀓𑁆𑀔𑀢𑁆𑀢𑁂 𑀲𑀗𑁆𑀖𑀼𑀝𑁆𑀞𑁂 𑀲𑁂𑀝𑁆𑀞𑀺 𑀆𑀳 𑁋 ‘‘𑀲𑀘𑁂 𑀅𑀚𑁆𑀚 𑀓𑀲𑀺𑀲𑁆𑀲𑀲𑀺, 𑀤𑁆𑀯𑁂 𑀘 𑀕𑁄𑀡𑁂 𑀦𑀗𑁆𑀕𑀮𑀜𑁆𑀘 𑀮𑀪𑀺𑀲𑁆𑀲𑀲𑀺. 𑀓𑀺𑀁 𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀲𑀺, 𑀓𑀲𑀺𑀲𑁆𑀲𑀲𑀻’’𑀢𑀺. 𑀓𑀺𑀁 𑀫𑁂 𑀦𑀓𑁆𑀔𑀢𑁆𑀢𑁂𑀦, 𑀓𑀲𑀺𑀲𑁆𑀲𑀸𑀫𑀻𑀢𑀺? 𑀢𑁂𑀦 𑀳𑀺 𑀬𑁂 𑀕𑁄𑀡𑁂 𑀇𑀘𑁆𑀙𑀲𑀺, 𑀢𑁂 𑀕𑀳𑁂𑀢𑁆𑀯𑀸 𑀓𑀲𑀸𑀳𑀻𑀢𑀺. 𑀲𑁄 𑀓𑀲𑀺𑀢𑀼𑀁 𑀕𑀢𑁄. 𑀢𑀁 𑀤𑀺𑀯𑀲𑀁 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀬 ‘‘𑀓𑀲𑁆𑀲 𑀲𑀗𑁆𑀕𑀳𑀁 𑀓𑀭𑁄𑀫𑀻’’𑀢𑀺? 𑀆𑀯𑀚𑁆𑀚𑀦𑁆𑀢𑁄 𑀧𑀼𑀡𑁆𑀡𑀁 𑀤𑀺𑀲𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀢𑀲𑁆𑀲 𑀓𑀲𑀦𑀝𑁆𑀞𑀸𑀦𑀁 𑀕𑀢𑁄. 𑀧𑀼𑀡𑁆𑀡𑁄 𑀓𑀲𑀺𑀁 𑀞𑀧𑁂𑀢𑁆𑀯𑀸 𑀣𑁂𑀭𑀲𑁆𑀲 𑀤𑀦𑁆𑀢𑀓𑀝𑁆𑀞𑀁 𑀤𑀢𑁆𑀯𑀸 𑀫𑀼𑀔𑁄𑀤𑀓𑀁 𑀅𑀤𑀸𑀲𑀺. 𑀣𑁂𑀭𑁄 𑀲𑀭𑀻𑀭𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀓𑀫𑁆𑀫𑀦𑁆𑀢𑀲𑁆𑀲 𑀅𑀯𑀺𑀤𑀽𑀭𑁂 𑀦𑀺𑀲𑀻𑀤𑀺 𑀪𑀢𑁆𑀢𑀸𑀪𑀺𑀳𑀸𑀭𑀁 𑀑𑀮𑁄𑀓𑁂𑀦𑁆𑀢𑁄. 𑀅𑀣𑀲𑁆𑀲 𑀪𑀭𑀺𑀬𑀁 𑀪𑀢𑁆𑀢𑀁 𑀆𑀳𑀭𑀦𑁆𑀢𑀺𑀁 𑀤𑀺𑀲𑁆𑀯𑀸 𑀅𑀦𑁆𑀢𑀭𑀸𑀫𑀕𑁆𑀕𑁂𑀬𑁂𑀯 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺.

𑀲𑀸 𑀲𑀸𑀫𑀺𑀓𑀲𑁆𑀲 𑀆𑀳𑀝𑀪𑀢𑁆𑀢𑀁 𑀣𑁂𑀭𑀲𑁆𑀲 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 𑀕𑀦𑁆𑀢𑁆𑀯𑀸 𑀅𑀜𑁆𑀜𑀁 𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀤𑀺𑀯𑀸 𑀅𑀕𑀫𑀸𑀲𑀺. 𑀧𑀼𑀡𑁆𑀡𑁄 𑀏𑀓𑀯𑀸𑀭𑀁 𑀓𑀲𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀲𑀸𑀧𑀺 𑀪𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀻 𑀆𑀳 𑁋 ‘‘𑀲𑀸𑀫𑀺 𑀧𑀸𑀢𑁄𑀯 𑀢𑁂 𑀪𑀢𑁆𑀢𑀁 𑀆𑀳𑀭𑀺𑀬𑀺𑀢𑁆𑀣, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀧𑀦 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀤𑀺𑀲𑁆𑀯𑀸 𑀢𑀁 𑀢𑀲𑁆𑀲 𑀤𑀢𑁆𑀯𑀸 𑀅𑀜𑁆𑀜𑀁 𑀧𑀘𑀺𑀢𑁆𑀯𑀸 𑀆𑀳𑀭𑀦𑁆𑀢𑀺𑀬𑀸 𑀫𑁂 𑀉𑀲𑁆𑀲𑀽𑀭𑁄 𑀚𑀸𑀢𑁄, 𑀫𑀸 𑀓𑀼𑀚𑁆𑀛𑀺 𑀲𑀸𑀫𑀻’’𑀢𑀺. 𑀪𑀤𑁆𑀤𑀓𑀁 𑀢𑁂 𑀪𑀤𑁆𑀤𑁂 𑀓𑀢𑀁, 𑀫𑀬𑀸 𑀣𑁂𑀭𑀲𑁆𑀲 𑀧𑀸𑀢𑁄𑀯 𑀤𑀦𑁆𑀢𑀓𑀝𑁆𑀞𑀜𑁆𑀘 𑀫𑀼𑀔𑁄𑀤𑀓𑀜𑁆𑀘 𑀤𑀺𑀦𑁆𑀦𑀁, 𑀅𑀫𑁆𑀳𑀸𑀓𑀁𑀬𑁂𑀯𑀸𑀦𑁂𑀦 𑀧𑀺𑀡𑁆𑀟𑀧𑀸𑀢𑁄𑀧𑀺 𑀧𑀭𑀺𑀪𑀼𑀢𑁆𑀢𑁄, 𑀅𑀚𑁆𑀚 𑀣𑁂𑀭𑁂𑀦 𑀓𑀢𑀲𑀫𑀡𑀥𑀫𑁆𑀫𑀲𑁆𑀲 𑀫𑀬𑀁 𑀪𑀸𑀕𑀺𑀦𑁄 𑀚𑀸𑀢𑀸𑀢𑀺 𑀘𑀺𑀢𑁆𑀢𑀁 𑀧𑀲𑀸𑀤𑁂𑀲𑀺. 𑀏𑀓𑀯𑀸𑀭𑀁 𑀓𑀲𑀺𑀢𑀝𑁆𑀞𑀸𑀦𑀁 𑀲𑀼𑀯𑀡𑁆𑀡𑀫𑁂𑀯 𑀅𑀳𑁄𑀲𑀺. 𑀲𑁄 𑀪𑀼𑀜𑁆𑀚𑀺𑀢𑁆𑀯𑀸 𑀓𑀲𑀺𑀢𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑁄 𑀯𑀺𑀚𑁆𑀚𑁄𑀢𑀫𑀸𑀦𑀁 𑀤𑀺𑀲𑁆𑀯𑀸 𑀉𑀝𑁆𑀞𑀸𑀬 𑀬𑀝𑁆𑀞𑀺𑀬𑀸 𑀧𑀳𑀭𑀺𑀢𑁆𑀯𑀸 𑀭𑀢𑁆𑀢𑀲𑀼𑀯𑀡𑁆𑀡𑀪𑀸𑀯𑀁 𑀚𑀸𑀦𑀺𑀢𑁆𑀯𑀸 ‘‘𑀭𑀜𑁆𑀜𑁄 𑀅𑀓𑀣𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀢𑀁 𑀲𑀩𑁆𑀩𑀁 𑀲𑀓𑀝𑁂𑀳𑀺 𑀆𑀳𑀭𑀸𑀧𑁂𑀢𑁆𑀯𑀸 𑀭𑀸𑀚𑀗𑁆𑀕𑀡𑁂 𑀭𑀸𑀲𑀺𑀁 𑀓𑀸𑀭𑁂𑀢𑁆𑀯𑀸 ‘‘𑀓𑀲𑁆𑀲𑀺𑀫𑀲𑁆𑀫𑀺𑀁 𑀦𑀕𑀭𑁂 𑀏𑀢𑁆𑀢𑀓𑀁 𑀲𑀼𑀯𑀡𑁆𑀡𑀁 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀺. 𑀓𑀲𑁆𑀲𑀘𑀺 𑀦𑀢𑁆𑀣𑀻𑀢𑀺 𑀘 𑀯𑀼𑀢𑁆𑀢𑁂 𑀲𑁂𑀝𑁆𑀞𑀺𑀝𑁆𑀞𑀸𑀦𑀫𑀲𑁆𑀲 𑀅𑀤𑀸𑀲𑀺. 𑀲𑁄 𑀧𑀼𑀡𑁆𑀡𑀲𑁂𑀝𑁆𑀞𑀺 𑀦𑀸𑀫 𑀚𑀸𑀢𑁄.

𑀅𑀧𑀭𑀫𑁆𑀧𑀺 𑀯𑀢𑁆𑀣𑀼 𑁋 𑀢𑀲𑁆𑀫𑀺𑀁𑀬𑁂𑀯 𑀭𑀸𑀚𑀕𑀳𑁂 𑀓𑀸𑀴𑀯𑁂𑀴𑀺𑀬𑁄 𑀦𑀸𑀫 𑀤𑀼𑀕𑁆𑀕𑀢𑁄 𑀅𑀢𑁆𑀣𑀺. 𑀢𑀲𑁆𑀲 𑀪𑀭𑀺𑀬𑀸 𑀧𑀡𑁆𑀡𑀫𑁆𑀩𑀺𑀮𑀬𑀸𑀕𑀼𑀁 𑀧𑀘𑀺. 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀬 ‘‘𑀓𑀲𑁆𑀲 𑀲𑀗𑁆𑀕𑀳𑀁 𑀓𑀭𑁄𑀫𑀻’’𑀢𑀺 𑀆𑀯𑀚𑁆𑀚𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀕𑀦𑁆𑀢𑁆𑀯𑀸 𑀕𑁂𑀳𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀲𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀩𑁆𑀩𑀁 𑀢𑀢𑁆𑀣 𑀧𑀓𑁆𑀔𑀺𑀧𑀺𑀢𑁆𑀯𑀸 𑀣𑁂𑀭𑀲𑁆𑀲 𑀅𑀤𑀸𑀲𑀺, 𑀣𑁂𑀭𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀉𑀧𑀦𑀸𑀫𑁂𑀲𑀺. 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀬𑀸𑀧𑀦𑀫𑀢𑁆𑀢𑀁 𑀕𑀡𑁆𑀳𑀺, 𑀲𑁂𑀲𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀧𑀳𑁄𑀲𑀺. 𑀓𑀸𑀴𑀯𑀴𑀺𑀬𑁄𑀧𑀺 𑀢𑀁 𑀞𑀸𑀦𑀁 𑀧𑀢𑁆𑀢𑁄 𑀘𑀽𑀴𑀓𑀁 𑀮𑀪𑀺. 𑀫𑀳𑀸𑀓𑀲𑁆𑀲𑀧𑁄 𑀲𑀢𑁆𑀣𑀸𑀭𑀁 𑀓𑀸𑀴𑀯𑀴𑀺𑀬𑀲𑁆𑀲 𑀯𑀺𑀧𑀸𑀓𑀁 𑀧𑀼𑀘𑁆𑀙𑀺. 𑀲𑀢𑁆𑀣𑀸 ‘‘𑀇𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑁂𑀝𑁆𑀞𑀺𑀘𑁆𑀙𑀢𑁆𑀢𑀁 𑀮𑀪𑀺𑀲𑁆𑀲𑀢𑀻’’𑀢𑀺 𑀆𑀳. 𑀓𑀸𑀴𑀯𑀴𑀺𑀬𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀕𑀦𑁆𑀢𑁆𑀯𑀸 𑀪𑀭𑀺𑀬𑀸𑀬 𑀆𑀭𑁄𑀘𑁂𑀲𑀺.

𑀢𑀤𑀸 𑀘 𑀭𑀸𑀚𑀸 𑀦𑀕𑀭𑀁 𑀅𑀦𑀼𑀲𑀜𑁆𑀘𑀭𑀦𑁆𑀢𑁄 𑀩𑀳𑀺𑀦𑀕𑀭𑁂 𑀚𑀻𑀯𑀲𑀽𑀮𑁂 𑀦𑀺𑀲𑀺𑀦𑁆𑀦𑀁 𑀧𑀼𑀭𑀺𑀲𑀁 𑀅𑀤𑁆𑀤𑀲. 𑀧𑀼𑀭𑀺𑀲𑁄 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀉𑀘𑁆𑀘𑀸𑀲𑀤𑁆𑀤𑀁 𑀅𑀓𑀸𑀲𑀺 ‘‘𑀢𑀼𑀫𑁆𑀳𑀸𑀓𑀁 𑀫𑁂 𑀪𑀼𑀜𑁆𑀚𑀦𑀪𑀢𑁆𑀢𑀁 𑀧𑀳𑀺𑀡𑀣 𑀤𑁂𑀯𑀸’’𑀢𑀺. 𑀭𑀸𑀚𑀸 ‘‘𑀧𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀲𑀸𑀬𑀫𑀸𑀲𑀪𑀢𑁆𑀢𑁂 𑀉𑀧𑀦𑀻𑀢𑁂 𑀲𑀭𑀺𑀢𑁆𑀯𑀸 ‘‘𑀇𑀫𑀁 𑀳𑀭𑀺𑀢𑀼𑀁 𑀲𑀫𑀢𑁆𑀣𑀁 𑀚𑀸𑀦𑀸𑀣𑀸’’𑀢𑀺 𑀆𑀳, 𑀦𑀕𑀭𑁂 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀘𑀸𑀭𑁂𑀲𑀼𑀁. 𑀢𑀢𑀺𑀬𑀯𑀸𑀭𑁂 𑀓𑀸𑀴𑀯𑀴𑀺𑀬𑀲𑁆𑀲 𑀪𑀭𑀺𑀬𑀸 𑀅𑀕𑁆𑀕𑀳𑁂𑀲𑀺. 𑀅𑀣 𑀦𑀁 𑀭𑀜𑁆𑀜𑁄 𑀤𑀲𑁆𑀲𑁂𑀲𑀼𑀁, 𑀲𑀸 𑀧𑀼𑀭𑀺𑀲𑀯𑁂𑀲𑀁 𑀕𑀳𑁂𑀢𑁆𑀯𑀸 𑀧𑀜𑁆𑀘𑀸𑀯𑀼𑀥𑀲𑀦𑁆𑀦𑀤𑁆𑀥𑀸 𑀪𑀢𑁆𑀢𑀧𑀸𑀢𑀺𑀁 𑀕𑀳𑁂𑀢𑁆𑀯𑀸 𑀦𑀕𑀭𑀸 𑀦𑀺𑀓𑁆𑀔𑀫𑀺. 𑀩𑀳𑀺𑀦𑀕𑀭𑁂 𑀢𑀸𑀮𑁂 𑀅𑀥𑀺𑀯𑀢𑁆𑀣𑁄 𑀤𑀻𑀖𑀢𑀸𑀮𑁄 𑀦𑀸𑀫 𑀬𑀓𑁆𑀔𑁄 𑀢𑀁 𑀭𑀼𑀓𑁆𑀔𑀫𑀽𑀮𑁂𑀦 𑀕𑀘𑁆𑀙𑀦𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀢𑀺𑀝𑁆𑀞 𑀢𑀺𑀝𑁆𑀞 𑀪𑀓𑁆𑀔𑁄𑀲𑀺 𑀫𑁂’’𑀢𑀺 𑀆𑀳. 𑀦𑀸𑀳𑀁 𑀢𑀯 𑀪𑀓𑁆𑀔𑁄, 𑀭𑀸𑀚𑀤𑀽𑀢𑁄 𑀅𑀳𑀦𑁆𑀢𑀺. 𑀓𑀢𑁆𑀣 𑀕𑀘𑁆𑀙𑀲𑀻𑀢𑀺. 𑀚𑀻𑀯𑀲𑀽𑀮𑁂 𑀦𑀺𑀲𑀺𑀦𑁆𑀦𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀦𑁆𑀢𑀺𑀓𑀦𑁆𑀢𑀺. 𑀫𑀫𑀧𑀺 𑀏𑀓𑀁 𑀲𑀸𑀲𑀦𑀁 𑀳𑀭𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻𑀢𑀺. 𑀆𑀫 𑀲𑀓𑁆𑀔𑀺𑀲𑁆𑀲𑀸𑀫𑀻𑀢𑀺. ‘‘𑀤𑀻𑀖𑀢𑀸𑀮𑀲𑁆𑀲 𑀪𑀭𑀺𑀬𑀸 𑀲𑀼𑀫𑀦𑀤𑁂𑀯𑀭𑀸𑀚𑀥𑀻𑀢𑀸 𑀓𑀸𑀴𑀻 𑀧𑀼𑀢𑁆𑀢𑀁 𑀯𑀺𑀚𑀸𑀢𑀸’’𑀢𑀺 𑀆𑀭𑁄𑀘𑁂𑀬𑁆𑀬𑀸𑀲𑀺. 𑀇𑀫𑀲𑁆𑀫𑀺𑀁 𑀢𑀸𑀮𑀫𑀽𑀮𑁂 𑀲𑀢𑁆𑀢 𑀦𑀺𑀥𑀺𑀓𑀼𑀫𑁆𑀪𑀺𑀬𑁄 𑀅𑀢𑁆𑀣𑀺, 𑀢𑀸 𑀢𑁆𑀯𑀁 𑀕𑀡𑁆𑀳𑁂𑀬𑁆𑀬𑀸𑀲𑀻𑀢𑀺. 𑀲𑀸 ‘‘𑀤𑀻𑀖𑀢𑀸𑀮𑀲𑁆𑀲 𑀪𑀭𑀺𑀬𑀸 𑀲𑀼𑀫𑀦𑀤𑁂𑀯𑀭𑀸𑀚𑀥𑀻𑀢𑀸 𑀓𑀸𑀴𑀻 𑀧𑀼𑀢𑁆𑀢𑀁 𑀯𑀺𑀚𑀸𑀢𑀸’’𑀢𑀺 𑀉𑀕𑁆𑀖𑁄𑀲𑁂𑀦𑁆𑀢𑀻 𑀅𑀕𑀫𑀸𑀲𑀺.

𑀲𑀼𑀫𑀦𑀤𑁂𑀯𑁄 𑀬𑀓𑁆𑀔𑀲𑀫𑀸𑀕𑀫𑁂 𑀦𑀺𑀲𑀺𑀦𑁆𑀦𑁄 𑀲𑀼𑀢𑁆𑀯𑀸 ‘‘𑀏𑀓𑁄 𑀫𑀦𑀼𑀲𑁆𑀲𑁄 𑀅𑀫𑁆𑀳𑀸𑀓𑀁 𑀧𑀺𑀬𑀧𑀯𑀢𑁆𑀢𑀺𑀁 𑀆𑀳𑀭𑀢𑀺, 𑀧𑀓𑁆𑀓𑁄𑀲𑀣 𑀦’’𑀦𑁆𑀢𑀺 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑁄 ‘‘𑀇𑀫𑀲𑁆𑀲 𑀭𑀼𑀓𑁆𑀔𑀲𑁆𑀲 𑀧𑀭𑀺𑀫𑀡𑁆𑀟𑀮𑀘𑁆𑀙𑀸𑀬𑀸𑀬 𑀨𑀭𑀡𑀝𑁆𑀞𑀸𑀦𑁂 𑀦𑀺𑀥𑀺𑀓𑀼𑀫𑁆𑀪𑀺𑀬𑁄 𑀢𑀼𑀬𑁆𑀳𑀁 𑀤𑀫𑁆𑀫𑀻’’𑀢𑀺 𑀆𑀳. 𑀚𑀻𑀯𑀲𑀽𑀮𑁂 𑀦𑀺𑀲𑀺𑀦𑁆𑀦𑀧𑀼𑀭𑀺𑀲𑁄 𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀫𑀼𑀔𑀧𑀼𑀜𑁆𑀙𑀦𑀓𑀸𑀮𑁂 𑀇𑀢𑁆𑀣𑀺𑀨𑀲𑁆𑀲𑁄𑀢𑀺 𑀜𑀢𑁆𑀯𑀸 𑀘𑀽𑀴𑀸𑀬 𑀟𑀁𑀲𑀺, 𑀲𑀸 𑀅𑀲𑀺𑀦𑀸 𑀅𑀢𑁆𑀢𑀦𑁄 𑀘𑀽𑀴𑀁 𑀙𑀺𑀦𑁆𑀤𑀺𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁𑀬𑁂𑀯 𑀕𑀢𑀸. 𑀭𑀸𑀚𑀸 𑀪𑀢𑁆𑀢𑀪𑁄𑀚𑀺𑀢𑀪𑀸𑀯𑁄 𑀓𑀣𑀁 𑀚𑀸𑀦𑀺𑀢𑀩𑁆𑀩𑁄𑀢𑀺? 𑀘𑀽𑀴𑀲𑀜𑁆𑀜𑀸𑀬𑀸𑀢𑀺 𑀯𑀢𑁆𑀯𑀸 𑀭𑀜𑁆𑀜𑁄 𑀆𑀘𑀺𑀓𑁆𑀔𑀺𑀢𑁆𑀯𑀸 𑀢𑀁 𑀥𑀦𑀁 𑀆𑀳𑀭𑀸𑀧𑁂𑀲𑀺. 𑀭𑀸𑀚𑀸 𑀅𑀜𑁆𑀜𑀲𑁆𑀲 𑀏𑀢𑁆𑀢𑀓𑀁 𑀥𑀦𑀁 𑀦𑀸𑀫 𑀅𑀢𑁆𑀣𑀻𑀢𑀺. 𑀦𑀢𑁆𑀣𑀺 𑀤𑁂𑀯𑀸𑀢𑀺. 𑀭𑀸𑀚𑀸 𑀢𑀲𑁆𑀲𑀸 𑀧𑀢𑀺𑀁 𑀢𑀲𑁆𑀫𑀺𑀁 𑀦𑀕𑀭𑁂 𑀥𑀦𑀲𑁂𑀝𑁆𑀞𑀺𑀁 𑀅𑀓𑀸𑀲𑀺. 𑀫𑀮𑁆𑀮𑀺𑀓𑀸𑀬𑀧𑀺 𑀤𑁂𑀯𑀺𑀬𑀸 𑀯𑀢𑁆𑀣𑀼 𑀓𑀣𑁂𑀢𑀩𑁆𑀩𑀁. 𑀇𑀫𑀸𑀦𑀺 𑀢𑀸𑀯 𑀓𑀼𑀲𑀮𑀓𑀫𑁆𑀫𑁂 𑀯𑀢𑁆𑀣𑀽𑀦𑀺.

𑀦𑀦𑁆𑀤𑀫𑀸𑀡𑀯𑀓𑁄 𑀧𑀦 𑀉𑀧𑁆𑀧𑀮𑀯𑀡𑁆𑀡𑀸𑀬 𑀣𑁂𑀭𑀺𑀬𑀸 𑀯𑀺𑀧𑁆𑀧𑀝𑀺𑀧𑀚𑁆𑀚𑀺, 𑀢𑀲𑁆𑀲 𑀫𑀜𑁆𑀘𑀢𑁄 𑀉𑀝𑁆𑀞𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀫𑀳𑀸𑀧𑀣𑀯𑀻 𑀪𑀺𑀚𑁆𑀚𑀺𑀢𑁆𑀯𑀸 𑀑𑀓𑀸𑀲𑀫𑀤𑀸𑀲𑀺, 𑀢𑀢𑁆𑀣𑁂𑀯 𑀫𑀳𑀸𑀦𑀭𑀓𑀁 𑀧𑀯𑀺𑀝𑁆𑀞𑁄. 𑀦𑀦𑁆𑀤𑁄𑀧𑀺 𑀕𑁄𑀖𑀸𑀢𑀓𑁄 𑀧𑀡𑁆𑀡𑀸𑀲 𑀯𑀲𑁆𑀲𑀸𑀦𑀺 𑀕𑁄𑀖𑀸𑀢𑀓𑀓𑀫𑁆𑀫𑀁 𑀓𑀢𑁆𑀯𑀸 𑀏𑀓𑀤𑀺𑀯𑀲𑀁 𑀪𑁄𑀚𑀦𑀓𑀸𑀮𑁂 𑀫𑀁𑀲𑀁 𑀅𑀮𑀪𑀦𑁆𑀢𑁄 𑀏𑀓𑀲𑁆𑀲 𑀚𑀻𑀯𑀫𑀸𑀦𑀓𑀕𑁄𑀡𑀲𑁆𑀲 𑀚𑀺𑀯𑁆𑀳𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀗𑁆𑀕𑀸𑀭𑁂𑀲𑀼 𑀧𑀘𑀸𑀧𑁂𑀢𑁆𑀯𑀸 𑀔𑀸𑀤𑀺𑀢𑀼𑀁 𑀆𑀭𑀤𑁆𑀥𑁄. 𑀅𑀣𑀲𑁆𑀲 𑀚𑀺𑀯𑁆𑀳𑀸 𑀫𑀽𑀮𑁂 𑀙𑀺𑀚𑁆𑀚𑀺𑀢𑁆𑀯𑀸 𑀪𑀢𑁆𑀢𑀧𑀸𑀢𑀺𑀬𑀁𑀬𑁂𑀯 𑀧𑀢𑀺𑀢𑀸, 𑀲𑁄 𑀯𑀺𑀭𑀯𑀦𑁆𑀢𑁄 𑀓𑀸𑀮𑀁 𑀓𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺. 𑀦𑀦𑁆𑀤𑁄𑀧𑀺 𑀬𑀓𑁆𑀔𑁄 𑀅𑀜𑁆𑀜𑁂𑀦 𑀬𑀓𑁆𑀔𑁂𑀦 𑀲𑀤𑁆𑀥𑀺𑀁 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀦𑀯𑁄𑀭𑁄𑀧𑀺𑀢𑁂𑀳𑀺 𑀓𑁂𑀲𑁂𑀳𑀺 𑀭𑀢𑁆𑀢𑀺𑀪𑀸𑀕𑁂 𑀅𑀩𑁆𑀪𑁄𑀓𑀸𑀲𑁂 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸 𑀲𑀻𑀲𑁂 𑀧𑀳𑀭𑀺𑀢𑀼𑀓𑀸𑀫𑁄 𑀇𑀢𑀭𑀲𑁆𑀲 𑀬𑀓𑁆𑀔𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀢𑁂𑀦 𑀯𑀸𑀭𑀺𑀬𑀫𑀸𑀦𑁄𑀧𑀺 𑀧𑀳𑀸𑀭𑀁 𑀤𑀢𑁆𑀯𑀸 𑀟𑀬𑁆𑀳𑀸𑀫𑀺 𑀟𑀬𑁆𑀳𑀸𑀫𑀻𑀢𑀺 𑀯𑀺𑀭𑀯𑀦𑁆𑀢𑁄 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀪𑀽𑀫𑀺𑀁 𑀧𑀯𑀺𑀲𑀺𑀢𑁆𑀯𑀸 𑀫𑀳𑀸𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄𑀢𑀺 𑀇𑀫𑀸𑀦𑀺 𑀅𑀓𑀼𑀲𑀮𑀓𑀫𑁆𑀫𑁂 𑀯𑀢𑁆𑀣𑀽𑀦𑀺.

𑀬𑀁 𑀧𑀦 𑀅𑀦𑁆𑀢𑀫𑀲𑁄 𑀫𑀭𑀡𑀲𑀦𑁆𑀢𑀺𑀓𑁂𑀧𑀺 𑀓𑀢𑀁 𑀓𑀫𑁆𑀫𑀁 𑀪𑀯𑀦𑁆𑀢𑀭𑁂 𑀯𑀺𑀧𑀸𑀓𑀁 𑀤𑁂𑀢𑀺, 𑀢𑀁 𑀲𑀩𑁆𑀩𑀁 𑀲𑀫𑁆𑀧𑀭𑀸𑀬𑀯𑁂𑀤𑀦𑀻𑀬𑀁 𑀦𑀸𑀫. 𑀢𑀢𑁆𑀣 𑀬𑁄 𑀅𑀧𑀭𑀺𑀳𑀻𑀦𑀲𑁆𑀲 𑀛𑀸𑀦𑀲𑁆𑀲 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀲𑁄 𑀇𑀥 𑀦𑀺𑀩𑁆𑀩𑀢𑁆𑀢𑀺𑀢𑀯𑀺𑀧𑀸𑀓𑁄𑀢𑀺 𑀯𑀼𑀢𑁆𑀢𑁄. 𑀢𑀲𑁆𑀲 𑀫𑀽𑀮𑀪𑀽𑀢𑀁 𑀓𑀫𑁆𑀫𑀁 𑀦𑁂𑀯 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀦 𑀲𑀫𑁆𑀧𑀭𑀸𑀬𑀯𑁂𑀤𑀦𑀻𑀬𑀦𑁆𑀢𑀺, 𑀦 𑀯𑀺𑀘𑀸𑀭𑀺𑀢𑀁, 𑀓𑀺𑀜𑁆𑀘𑀸𑀧𑀺 𑀦 𑀯𑀺𑀘𑀸𑀭𑀺𑀢𑀁, 𑀲𑀫𑁆𑀧𑀭𑀸𑀬𑀯𑁂𑀤𑀦𑀻𑀬𑀫𑁂𑀯 𑀧𑀦𑁂𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑁄 𑀧𑀞𑀫𑀫𑀕𑁆𑀕𑀸𑀤𑀻𑀦𑀁 𑀪𑀯𑀦𑁆𑀢𑀭𑁂 𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀧𑀸𑀓𑁄, 𑀲𑁄 𑀇𑀥 𑀦𑀺𑀩𑁆𑀩𑀢𑁆𑀢𑀺𑀢𑀕𑀼𑀡𑁄𑀢𑁆𑀯𑁂𑀯 𑀯𑀼𑀢𑁆𑀢𑁄. 𑀓𑀺𑀜𑁆𑀘𑀸𑀧𑀺 𑀏𑀯𑀁 𑀯𑀼𑀢𑁆𑀢𑁄, 𑀫𑀕𑁆𑀕𑀓𑀫𑁆𑀫𑀁 𑀧𑀦 𑀧𑀭𑀺𑀧𑀓𑁆𑀓𑀯𑁂𑀤𑀦𑀻𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀕𑁆𑀕𑀘𑁂𑀢𑀦𑀸𑀬𑁂𑀯 𑀳𑀺 𑀲𑀩𑁆𑀩𑀮𑀳𑀼𑀁 𑀨𑀮𑀤𑀸𑀬𑀺𑀓𑀸 𑀅𑀦𑀦𑁆𑀢𑀭𑀨𑀮𑀢𑁆𑀢𑀸𑀢𑀺.

𑁮. 𑀩𑀳𑀼𑀯𑁂𑀤𑀦𑀻𑀬𑀦𑁆𑀢𑀺 𑀲𑀜𑁆𑀜𑀸𑀪𑀯𑀽𑀧𑀕𑀁. 𑀅𑀧𑁆𑀧𑀯𑁂𑀤𑀦𑀻𑀬𑀦𑁆𑀢𑀺 𑀅𑀲𑀜𑁆𑀜𑀸𑀪𑀯𑀽𑀧𑀕𑀁. 𑀲𑀯𑁂𑀤𑀦𑀻𑀬𑀦𑁆𑀢𑀺 𑀲𑀯𑀺𑀧𑀸𑀓𑀁 𑀓𑀫𑁆𑀫𑀁. 𑀅𑀯𑁂𑀤𑀦𑀻𑀬𑀦𑁆𑀢𑀺 𑀅𑀯𑀺𑀧𑀸𑀓𑀁 𑀓𑀫𑁆𑀫𑀁. 𑀏𑀯𑀁 𑀲𑀦𑁆𑀢𑁂𑀢𑀺 𑀇𑀫𑁂𑀲𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀤𑀻𑀦𑀁 𑀓𑀫𑁆𑀫𑀸𑀦𑀁 𑀉𑀧𑀓𑁆𑀓𑀫𑁂𑀦 𑀲𑀫𑁆𑀧𑀭𑀸𑀬𑀯𑁂𑀤𑀦𑀻𑀬𑀸𑀤𑀺 𑀪𑀸𑀯𑀓𑀸𑀭𑀡𑀲𑁆𑀲 𑀅𑀮𑀸𑀪𑁂 𑀲𑀢𑀺. 𑀅𑀨𑀮𑁄𑀢𑀺 𑀦𑀺𑀧𑁆𑀨𑀮𑁄 𑀦𑀺𑀭𑀢𑁆𑀣𑀓𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀅𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀬𑁄𑀕𑀲𑁆𑀲 𑀅𑀨𑀮𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀥𑀸𑀦𑀘𑁆𑀙𑁂𑀤𑀓𑀯𑀸𑀤𑁄 𑀦𑀸𑀫 𑀤𑀲𑁆𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀳𑀥𑀫𑁆𑀫𑀺𑀓𑀸 𑀯𑀸𑀤𑀸𑀦𑀼𑀯𑀸𑀤𑀸𑀢𑀺 𑀧𑀭𑁂𑀳𑀺 𑀯𑀼𑀢𑁆𑀢𑀓𑀸𑀭𑀡𑁂𑀦 𑀲𑀓𑀸𑀭𑀡𑀸 𑀳𑀼𑀢𑁆𑀯𑀸 𑀦𑀺𑀕𑀡𑁆𑀞𑀸𑀦𑀁 𑀯𑀸𑀤𑀸 𑀘 𑀅𑀦𑀼𑀯𑀸𑀤𑀸 𑀘. 𑀕𑀸𑀭𑀬𑁆𑀳𑀁 𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀻𑀢𑀺 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀢𑀩𑁆𑀩𑀁 𑀓𑀸𑀭𑀡𑀁 𑀆𑀕𑀘𑁆𑀙𑀦𑁆𑀢𑀺. ‘‘𑀯𑀸𑀤𑀸𑀦𑀼𑀧𑁆𑀧𑀢𑁆𑀢𑀸 𑀕𑀸𑀭𑀬𑁆𑀳𑀝𑁆𑀞𑀸𑀦𑀸’’𑀢𑀺𑀧𑀺 𑀧𑀸𑀞𑁄. 𑀢𑀲𑁆𑀲𑀢𑁆𑀣𑁄 𑁋 𑀧𑀭𑁂𑀳𑀺 𑀯𑀼𑀢𑁆𑀢𑁂𑀦 𑀓𑀸𑀭𑀡𑁂𑀦 𑀲𑀓𑀸𑀭𑀡𑀸 𑀦𑀺𑀕𑀡𑁆𑀞𑀸𑀦𑀁 𑀯𑀸𑀤𑀁 𑀅𑀦𑀼𑀧𑁆𑀧𑀢𑁆𑀢𑀸 𑀢𑀁 𑀯𑀸𑀤𑀁 𑀲𑁄𑀲𑁂𑀦𑁆𑀢𑀸 𑀫𑀺𑀮𑀸𑀧𑁂𑀦𑁆𑀢𑀸 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀺𑀦𑁄𑀢𑀺𑀆𑀤𑀬𑁄 𑀤𑀲 𑀕𑀸𑀭𑀬𑁆𑀳𑀝𑁆𑀞𑀸𑀦𑀸 𑀆𑀕𑀘𑁆𑀙𑀦𑁆𑀢𑀺.

𑁯. 𑀲𑀗𑁆𑀕𑀢𑀺𑀪𑀸𑀯𑀳𑁂𑀢𑀽𑀢𑀺 𑀦𑀺𑀬𑀢𑀺𑀪𑀸𑀯𑀓𑀸𑀭𑀡𑀸. 𑀧𑀸𑀧𑀲𑀗𑁆𑀕𑀢𑀺𑀓𑀸𑀢𑀺 𑀧𑀸𑀧𑀦𑀺𑀬𑀢𑀺𑀦𑁄. 𑀅𑀪𑀺𑀚𑀸𑀢𑀺𑀳𑁂𑀢𑀽𑀢𑀺 𑀙𑀴𑀪𑀺𑀚𑀸𑀢𑀺𑀳𑁂𑀢𑀼.

𑁧𑁦. 𑀏𑀯𑀁 𑀦𑀺𑀕𑀡𑁆𑀞𑀸𑀦𑀁 𑀉𑀧𑀓𑁆𑀓𑀫𑀲𑁆𑀲 𑀅𑀨𑀮𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀉𑀧𑀓𑁆𑀓𑀫𑀲𑁆𑀲 𑀯𑀻𑀭𑀺𑀬𑀲𑁆𑀲 𑀘 𑀲𑀨𑀮𑀢𑀁 𑀤𑀲𑁆𑀲𑁂𑀢𑀼𑀁 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀤𑁆𑀥𑀪𑀽𑀢𑀦𑁆𑀢𑀺 𑀅𑀦𑀥𑀺𑀪𑀽𑀢𑀁. 𑀤𑀼𑀓𑁆𑀔𑁂𑀦 𑀅𑀦𑀥𑀺𑀪𑀽𑀢𑁄 𑀦𑀸𑀫 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁄 𑀯𑀼𑀘𑁆𑀘𑀢𑀺, 𑀦 𑀢𑀁 𑀅𑀤𑁆𑀥𑀪𑀸𑀯𑁂𑀢𑀺 𑀦𑀸𑀪𑀺𑀪𑀯𑀢𑀻𑀢𑀺 𑀅𑀢𑁆𑀣𑁄. 𑀢𑀫𑁆𑀧𑀺 𑀦𑀸𑀦𑀧𑁆𑀧𑀓𑀸𑀭𑀸𑀬 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬 𑀧𑀬𑁄𑀚𑁂𑀦𑁆𑀢𑁄 𑀤𑀼𑀓𑁆𑀔𑁂𑀦 𑀅𑀤𑁆𑀥𑀪𑀸𑀯𑁂𑀢𑀺 𑀦𑀸𑀫. 𑀬𑁂 𑀧𑀦 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀆𑀭𑀜𑁆𑀜𑀓𑀸 𑀯𑀸 𑀳𑁄𑀦𑁆𑀢𑀺 𑀭𑀼𑀓𑁆𑀔𑀫𑀽𑀮𑀺𑀓𑀸𑀤𑀬𑁄 𑀯𑀸, 𑀢𑁂 𑀤𑀼𑀓𑁆𑀔𑁂𑀦 𑀦 𑀅𑀤𑁆𑀥𑀪𑀸𑀯𑁂𑀦𑁆𑀢𑀺 𑀦𑀸𑀫. 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑀲𑁆𑀫𑀺𑀜𑁆𑀳𑀺 𑀯𑀻𑀭𑀺𑀬𑀁 𑀲𑀫𑁆𑀫𑀸𑀯𑀸𑀬𑀸𑀫𑁄 𑀦𑀸𑀫 𑀳𑁄𑀢𑀺.

𑀣𑁂𑀭𑁄 𑀧𑀦𑀸𑀳 𑁋 𑀬𑁄 𑀇𑀲𑁆𑀲𑀭𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄 𑀲𑀢𑁆𑀢𑀯𑀲𑁆𑀲𑀺𑀓𑁄 𑀳𑀼𑀢𑁆𑀯𑀸 𑀅𑀮𑀗𑁆𑀓𑀢𑀧𑁆𑀧𑀝𑀺𑀬𑀢𑁆𑀢𑁄 𑀧𑀺𑀢𑀼𑀅𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀖𑀭𑁂 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀦𑀺𑀲𑀺𑀦𑁆𑀦𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀅𑀦𑀼𑀫𑁄𑀤𑀦𑀸𑀬 𑀓𑀭𑀺𑀬𑀫𑀸𑀦𑀸𑀬 𑀢𑀺𑀲𑁆𑀲𑁄 𑀲𑀫𑁆𑀧𑀢𑁆𑀢𑀺𑀬𑁄 𑀤𑀲𑁆𑀲𑁂𑀢𑁆𑀯𑀸 𑀲𑀘𑁆𑀘𑁂𑀲𑀼 𑀧𑀓𑀸𑀲𑀺𑀢𑁂𑀲𑀼 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀫𑀸𑀢𑀸𑀧𑀺𑀢𑀽𑀳𑀺 𑀯𑀸 ‘‘𑀧𑀩𑁆𑀩𑀚𑀺𑀲𑁆𑀲𑀲𑀺 𑀢𑀸𑀢𑀸’’𑀢𑀺 𑀯𑀼𑀢𑁆𑀢𑁄 ‘‘𑀆𑀫 𑀧𑀩𑁆𑀩𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀦𑁆𑀳𑀸𑀧𑁂𑀢𑁆𑀯𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀯𑀺𑀳𑀸𑀭𑀁 𑀦𑀻𑀢𑁄 𑀢𑀘𑀧𑀜𑁆𑀘𑀓𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀓𑁂𑀲𑁂𑀲𑀼 𑀑𑀳𑀸𑀭𑀺𑀬𑀫𑀸𑀦𑁂𑀲𑀼 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀦𑀯𑀧𑀩𑁆𑀩𑀚𑀺𑀢𑁄 𑀯𑀸 𑀧𑀦 𑀫𑀦𑁄𑀲𑀺𑀮𑀸𑀢𑁂𑀮𑀫𑀓𑁆𑀔𑀺𑀢𑁂𑀦 𑀲𑀻𑀲𑁂𑀦 𑀧𑀼𑀦𑀤𑀺𑀯𑀲𑁂 𑀫𑀸𑀢𑀸𑀧𑀺𑀢𑀽𑀳𑀺 𑀧𑁂𑀲𑀺𑀢𑀁 𑀓𑀸𑀚𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑁄𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀦 𑀤𑀼𑀓𑁆𑀔𑁂𑀦 𑀅𑀢𑁆𑀢𑀸𑀦𑀁 𑀅𑀤𑁆𑀥𑀪𑀸𑀯𑁂𑀢𑀺 𑀦𑀸𑀫. 𑀅𑀬𑀁 𑀧𑀦 𑀉𑀓𑁆𑀓𑀝𑁆𑀞𑀲𑀓𑁆𑀓𑀸𑀭𑁄. 𑀬𑁄 𑀤𑀸𑀲𑀺𑀓𑀼𑀘𑁆𑀙𑀺𑀬𑀁 𑀦𑀺𑀩𑁆𑀩𑀢𑁆𑀢𑁄 𑀅𑀦𑁆𑀢𑀫𑀲𑁄 𑀭𑀚𑀢𑀫𑀼𑀤𑁆𑀤𑀺𑀓𑀫𑁆𑀧𑀺 𑀧𑀺𑀴𑀦𑁆𑀥𑀺𑀢𑁆𑀯𑀸 𑀕𑁄𑀭𑀓𑀧𑀺𑀬𑀗𑁆𑀕𑀼𑀫𑀢𑁆𑀢𑁂𑀦𑀸𑀧𑀺 𑀲𑀭𑀻𑀭𑀁 𑀯𑀺𑀮𑀺𑀫𑁆𑀧𑁂𑀢𑁆𑀯𑀸 ‘‘𑀧𑀩𑁆𑀩𑀸𑀚𑁂𑀣 𑀦’’𑀦𑁆𑀢𑀺 𑀦𑀻𑀢𑁄 𑀔𑀼𑀭𑀕𑁆𑀕𑁂 𑀯𑀸 𑀧𑀼𑀦𑀤𑀺𑀯𑀲𑁂 𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀫𑁆𑀧𑀺 𑀦 𑀅𑀦𑀤𑁆𑀥𑀪𑀽𑀢𑀁 𑀅𑀢𑁆𑀢𑀸𑀦𑀁 𑀤𑀼𑀓𑁆𑀔𑁂𑀦 𑀅𑀤𑁆𑀥𑀪𑀸𑀯𑁂𑀢𑀺 𑀦𑀸𑀫.

𑀥𑀫𑁆𑀫𑀺𑀓𑀁 𑀲𑀼𑀔𑀁 𑀦𑀸𑀫 𑀲𑀗𑁆𑀖𑀢𑁄 𑀯𑀸 𑀕𑀡𑀢𑁄 𑀯𑀸 𑀉𑀧𑁆𑀧𑀦𑁆𑀦𑀁 𑀘𑀢𑀼𑀧𑀘𑁆𑀘𑀬𑀲𑀼𑀔𑀁. 𑀅𑀦𑀥𑀺𑀫𑀼𑀘𑁆𑀙𑀺𑀢𑁄𑀢𑀺 𑀢𑀡𑁆𑀳𑀸𑀫𑀼𑀘𑁆𑀙𑀦𑀸𑀬 𑀅𑀫𑀼𑀘𑁆𑀙𑀺𑀢𑁄. 𑀥𑀫𑁆𑀫𑀺𑀓𑀜𑁆𑀳𑀺 𑀲𑀼𑀔𑀁 𑀦 𑀧𑀭𑀺𑀘𑁆𑀘𑀚𑀸𑀫𑀻𑀢𑀺 𑀦 𑀢𑀢𑁆𑀣 𑀕𑁂𑀥𑁄 𑀓𑀸𑀢𑀩𑁆𑀩𑁄. 𑀲𑀗𑁆𑀖𑀢𑁄 𑀳𑀺 𑀉𑀧𑁆𑀧𑀦𑁆𑀦𑀁 𑀲𑀮𑀸𑀓𑀪𑀢𑁆𑀢𑀁 𑀯𑀸 𑀯𑀲𑁆𑀲𑀸𑀯𑀸𑀲𑀺𑀓𑀁 𑀯𑀸 ‘‘𑀇𑀤𑀫𑀢𑁆𑀣𑀁 𑀏𑀢’’𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀗𑁆𑀖𑀫𑀚𑁆𑀛𑁂 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀧𑀢𑁆𑀢𑀦𑁆𑀢𑀭𑁂 𑀧𑀤𑀼𑀫𑀁 𑀯𑀺𑀬 𑀲𑀻𑀮𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑁂𑀳𑀺 𑀯𑀟𑁆𑀠𑀢𑀺. 𑀇𑀫𑀲𑁆𑀲𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀫𑀽𑀮𑀪𑀽𑀢𑀲𑁆𑀲. 𑀤𑀼𑀓𑁆𑀔𑀦𑀺𑀤𑀸𑀦𑀲𑁆𑀲𑀸𑀢𑀺 𑀢𑀡𑁆𑀳𑀸𑀬. 𑀲𑀸 𑀳𑀺 𑀧𑀜𑁆𑀘𑀓𑁆𑀔𑀦𑁆𑀥𑀤𑀼𑀓𑁆𑀔𑀲𑁆𑀲 𑀦𑀺𑀤𑀸𑀦𑀁. 𑀲𑀗𑁆𑀔𑀸𑀭𑀁 𑀧𑀤𑀳𑀢𑁄𑀢𑀺 𑀲𑀫𑁆𑀧𑀬𑁄𑀕𑀯𑀻𑀭𑀺𑀬𑀁 𑀓𑀭𑁄𑀦𑁆𑀢𑀲𑁆𑀲. 𑀯𑀺𑀭𑀸𑀕𑁄 𑀳𑁄𑀢𑀻𑀢𑀺 𑀫𑀕𑁆𑀕𑁂𑀦 𑀯𑀺𑀭𑀸𑀕𑁄 𑀳𑁄𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀲𑀗𑁆𑀔𑀸𑀭𑀧𑀥𑀸𑀦𑁂𑀦 𑀫𑁂 𑀇𑀫𑀲𑁆𑀲 𑀤𑀼𑀓𑁆𑀔𑀦𑀺𑀤𑀸𑀦𑀲𑁆𑀲 𑀯𑀺𑀭𑀸𑀕𑁄 𑀳𑁄𑀢𑀻’’𑀢𑀺 𑀏𑀯𑀁 𑀧𑀚𑀸𑀦𑀸𑀢𑀻𑀢𑀺 𑀇𑀫𑀺𑀦𑀸 𑀲𑀼𑀔𑀸𑀧𑀝𑀺𑀧𑀤𑀸 𑀔𑀺𑀧𑁆𑀧𑀸𑀪𑀺𑀜𑁆𑀜𑀸 𑀓𑀣𑀺𑀢𑀸. 𑀤𑀼𑀢𑀺𑀬𑀯𑀸𑀭𑁂𑀦 𑀢𑀲𑁆𑀲 𑀲𑀫𑁆𑀧𑀬𑁄𑀕𑀯𑀻𑀭𑀺𑀬𑀲𑁆𑀲 𑀫𑀚𑁆𑀛𑀢𑁆𑀢𑀢𑀸𑀓𑀸𑀭𑁄 𑀓𑀣𑀺𑀢𑁄. 𑀲𑁄 𑀬𑀲𑁆𑀲 𑀳𑀺 𑀔𑁆𑀯𑀸𑀲𑁆𑀲𑀸𑀢𑀺 𑀏𑀢𑁆𑀣 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀲𑁄 𑀧𑀼𑀕𑁆𑀕𑀮𑁄 𑀬𑀲𑁆𑀲 𑀤𑀼𑀓𑁆𑀔𑀦𑀺𑀤𑀸𑀦𑀲𑁆𑀲 𑀲𑀗𑁆𑀔𑀸𑀭𑀧𑀥𑀸𑀦𑁂𑀦 𑀯𑀺𑀭𑀸𑀕𑁄 𑀳𑁄𑀢𑀺, 𑀲𑀗𑁆𑀔𑀸𑀭𑀁 𑀢𑀢𑁆𑀣 𑀧𑀤𑀳𑀢𑀺, 𑀫𑀕𑁆𑀕𑀧𑀥𑀸𑀦𑁂𑀦 𑀧𑀤𑀳𑀢𑀺. 𑀬𑀲𑁆𑀲 𑀧𑀦 𑀤𑀼𑀓𑁆𑀔𑀦𑀺𑀤𑀸𑀦𑀲𑁆𑀲 𑀅𑀚𑁆𑀛𑀼𑀧𑁂𑀓𑁆𑀔𑀢𑁄 𑀉𑀧𑁂𑀓𑁆𑀔𑀁 𑀪𑀸𑀯𑁂𑀦𑁆𑀢𑀲𑁆𑀲 𑀯𑀺𑀭𑀸𑀕𑁄 𑀳𑁄𑀢𑀺, 𑀉𑀧𑁂𑀓𑁆𑀔𑀁 𑀢𑀢𑁆𑀣 𑀪𑀸𑀯𑁂𑀢𑀺, 𑀫𑀕𑁆𑀕𑀪𑀸𑀯𑀦𑀸𑀬 𑀪𑀸𑀯𑁂𑀢𑀺. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲.

𑁧𑁧. 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄𑀢𑀺 𑀙𑀦𑁆𑀤𑀭𑀸𑀕𑁂𑀦 𑀩𑀤𑁆𑀥𑀘𑀺𑀢𑁆𑀢𑁄. 𑀢𑀺𑀩𑁆𑀩𑀘𑁆𑀙𑀦𑁆𑀤𑁄𑀢𑀺 𑀩𑀳𑀮𑀘𑁆𑀙𑀦𑁆𑀤𑁄. 𑀢𑀺𑀩𑁆𑀩𑀸𑀧𑁂𑀓𑁆𑀔𑁄𑀢𑀺 𑀩𑀳𑀮𑀧𑀢𑁆𑀣𑀦𑁄. 𑀲𑀦𑁆𑀢𑀺𑀝𑁆𑀞𑀦𑁆𑀢𑀺𑀦𑁆𑀢𑀺 𑀏𑀓𑀢𑁄 𑀢𑀺𑀝𑁆𑀞𑀦𑁆𑀢𑀺𑀁. 𑀲𑀜𑁆𑀚𑀕𑁆𑀖𑀦𑁆𑀢𑀺𑀦𑁆𑀢𑀺 𑀫𑀳𑀸𑀳𑀲𑀺𑀢𑀁 𑀳𑀲𑀫𑀸𑀦𑀁. 𑀲𑀁𑀳𑀲𑀦𑁆𑀢𑀺𑀦𑁆𑀢𑀺 𑀲𑀺𑀢𑀁 𑀓𑀼𑀭𑀼𑀫𑀸𑀦𑀁.

𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂𑀢𑀺 𑀏𑀢𑁆𑀣 𑀇𑀤𑀁 𑀑𑀧𑀫𑁆𑀫𑀯𑀺𑀪𑀸𑀯𑀦𑀁 𑁋 𑀏𑀓𑁄 𑀳𑀺 𑀧𑀼𑀭𑀺𑀲𑁄 𑀏𑀓𑀺𑀲𑁆𑀲𑀸 𑀇𑀢𑁆𑀣𑀺𑀬𑀸 𑀲𑀸𑀭𑀢𑁆𑀢𑁄 𑀖𑀸𑀲𑀘𑁆𑀙𑀸𑀤𑀦𑀫𑀸𑀮𑀸𑀮𑀗𑁆𑀓𑀸𑀭𑀸𑀤𑀻𑀦𑀺 𑀤𑀢𑁆𑀯𑀸 𑀖𑀭𑁂 𑀯𑀸𑀲𑁂𑀢𑀺. 𑀲𑀸 𑀢𑀁 𑀅𑀢𑀺𑀘𑀭𑀺𑀢𑁆𑀯𑀸 𑀅𑀜𑁆𑀜𑀁 𑀲𑁂𑀯𑀢𑀺. 𑀲𑁄 ‘‘𑀦𑀽𑀦 𑀅𑀳𑀁 𑀅𑀲𑁆𑀲𑀸 𑀅𑀦𑀼𑀭𑀽𑀧𑀁 𑀲𑀓𑁆𑀓𑀸𑀭𑀁 𑀦 𑀓𑀭𑁄𑀫𑀻’’𑀢𑀺 𑀲𑀓𑁆𑀓𑀸𑀭𑀁 𑀯𑀟𑁆𑀠𑁂𑀲𑀺. 𑀲𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀅𑀢𑀺𑀘𑀭𑀢𑀺𑀬𑁂𑀯. 𑀲𑁄 𑁋 ‘‘𑀅𑀬𑀁 𑀲𑀓𑁆𑀓𑀭𑀺𑀬𑀫𑀸𑀦𑀸𑀧𑀺 𑀅𑀢𑀺𑀘𑀭𑀢𑁂𑀯, 𑀖𑀭𑁂 𑀫𑁂 𑀯𑀲𑀫𑀸𑀦𑀸 𑀅𑀦𑀢𑁆𑀣𑀫𑁆𑀧𑀺 𑀓𑀭𑁂𑀬𑁆𑀬, 𑀦𑀻𑀳𑀭𑀸𑀫𑀺 𑀦’’𑀦𑁆𑀢𑀺 𑀧𑀭𑀺𑀲𑀫𑀚𑁆𑀛𑁂 𑀅𑀮𑀁𑀯𑀘𑀦𑀻𑀬𑀁 𑀓𑀢𑁆𑀯𑀸 ‘‘𑀫𑀸 𑀧𑀼𑀦 𑀕𑁂𑀳𑀁 𑀧𑀸𑀯𑀺𑀲𑀻’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑀸 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀢𑁂𑀦 𑀲𑀤𑁆𑀥𑀺𑀁 𑀲𑀦𑁆𑀣𑀯𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀦𑀝𑀦𑀘𑁆𑀘𑀓𑀸𑀤𑀻𑀳𑀺 𑀲𑀤𑁆𑀥𑀺𑀁 𑀯𑀺𑀘𑀭𑀢𑀺. 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀁 𑀤𑀺𑀲𑁆𑀯𑀸 𑀦𑁂𑀯 𑀉𑀧𑁆𑀧𑀚𑁆𑀚𑀢𑀺 𑀤𑁄𑀫𑀦𑀲𑁆𑀲𑀁, 𑀲𑁄𑀫𑀦𑀲𑁆𑀲𑀁 𑀧𑀦 𑀉𑀧𑁆𑀧𑀚𑁆𑀚𑀢𑀺.

𑀢𑀢𑁆𑀣 𑀧𑀼𑀭𑀺𑀲𑀲𑁆𑀲 𑀇𑀢𑁆𑀣𑀺𑀬𑀸 𑀲𑀸𑀭𑀢𑁆𑀢𑀓𑀸𑀮𑁄 𑀯𑀺𑀬 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀢𑁆𑀢𑀪𑀸𑀯𑁂 𑀆𑀮𑀬𑁄. 𑀖𑀸𑀲𑀘𑁆𑀙𑀸𑀤𑀦𑀸𑀤𑀻𑀦𑀺 𑀤𑀢𑁆𑀯𑀸 𑀖𑀭𑁂 𑀯𑀲𑀸𑀧𑀦𑀓𑀸𑀮𑁄 𑀯𑀺𑀬 𑀅𑀢𑁆𑀢𑀪𑀸𑀯𑀲𑁆𑀲 𑀧𑀝𑀺𑀚𑀕𑁆𑀕𑀦𑀓𑀸𑀮𑁄. 𑀢𑀲𑁆𑀲𑀸 𑀅𑀢𑀺𑀘𑀭𑀡𑀓𑀸𑀮𑁄 𑀯𑀺𑀬 𑀚𑀕𑁆𑀕𑀺𑀬𑀫𑀸𑀦𑀲𑁆𑀲𑁂𑀯 𑀅𑀢𑁆𑀢𑀪𑀸𑀯𑀲𑁆𑀲 𑀧𑀺𑀢𑁆𑀢𑀧𑀓𑁄𑀧𑀸𑀤𑀻𑀦𑀁 𑀯𑀲𑁂𑀦 𑀲𑀸𑀩𑀸𑀥𑀢𑀸. ‘‘𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑀁 𑀲𑀓𑁆𑀓𑀸𑀭𑀁 𑀅𑀮𑀪𑀦𑁆𑀢𑀻 𑀅𑀢𑀺𑀘𑀭𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀓𑁆𑀓𑀸𑀭𑀯𑀟𑁆𑀠𑀦𑀁 𑀯𑀺𑀬 ‘‘𑀪𑁂𑀲𑀚𑁆𑀚𑀁 𑀅𑀮𑀪𑀦𑁆𑀢𑁄 𑀏𑀯𑀁 𑀳𑁄𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀪𑁂𑀲𑀚𑁆𑀚𑀓𑀭𑀡𑀓𑀸𑀮𑁄. 𑀲𑀓𑁆𑀓𑀸𑀭𑁂 𑀯𑀟𑁆𑀠𑀺𑀢𑁂𑀧𑀺 𑀧𑀼𑀦 𑀅𑀢𑀺𑀘𑀭𑀡𑀁 𑀯𑀺𑀬 𑀧𑀺𑀢𑁆𑀢𑀸𑀤𑀻𑀲𑀼 𑀏𑀓𑀲𑁆𑀲 𑀪𑁂𑀲𑀚𑁆𑀚𑁂 𑀓𑀭𑀺𑀬𑀫𑀸𑀦𑁂 𑀲𑁂𑀲𑀸𑀦𑀁 𑀧𑀓𑁄𑀧𑀯𑀲𑁂𑀦 𑀧𑀼𑀦 𑀲𑀸𑀩𑀸𑀥𑀢𑀸. 𑀧𑀭𑀺𑀲𑀫𑀚𑁆𑀛𑁂 𑀅𑀮𑀁𑀯𑀘𑀦𑀻𑀬𑀁 𑀓𑀢𑁆𑀯𑀸 𑀕𑁂𑀳𑀸 𑀦𑀺𑀓𑁆𑀓𑀟𑁆𑀠𑀦𑀁 𑀯𑀺𑀬 ‘‘𑀇𑀤𑀸𑀦𑀺 𑀢𑁂 𑀦𑀸𑀳𑀁 𑀤𑀸𑀲𑁄 𑀦 𑀓𑀫𑁆𑀫𑀓𑀭𑁄, 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀢𑀁𑀬𑁂𑀯 𑀉𑀧𑀝𑁆𑀞𑀳𑀦𑁆𑀢𑁄 𑀯𑀺𑀘𑀭𑀺𑀁, 𑀓𑁄 𑀫𑁂 𑀢𑀬𑀸 𑀅𑀢𑁆𑀣𑁄, 𑀙𑀺𑀚𑁆𑀚 𑀯𑀸 𑀪𑀺𑀚𑁆𑀚 𑀯𑀸’’𑀢𑀺 𑀢𑀲𑁆𑀫𑀺𑀁 𑀅𑀦𑀧𑁂𑀓𑁆𑀔𑀢𑀁 𑀆𑀧𑀚𑁆𑀚𑀺𑀢𑁆𑀯𑀸 𑀯𑀻𑀭𑀺𑀬𑀁 𑀣𑀺𑀭𑀁 𑀓𑀢𑁆𑀯𑀸 𑀫𑀕𑁆𑀕𑁂𑀦 𑀓𑀺𑀮𑁂𑀲𑀲𑀫𑀼𑀕𑁆𑀖𑀸𑀢𑀦𑀁. 𑀦𑀝𑀦𑀘𑁆𑀘𑀓𑀸𑀤𑀻𑀳𑀺 𑀦𑀘𑁆𑀘𑀫𑀸𑀦𑀁 𑀯𑀺𑀘𑀭𑀦𑁆𑀢𑀺𑀁 𑀤𑀺𑀲𑁆𑀯𑀸 𑀬𑀣𑀸 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀤𑁄𑀫𑀦𑀲𑁆𑀲𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀲𑁄𑀫𑀦𑀲𑁆𑀲𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀫𑁂𑀯 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑀲𑁆𑀲 𑀧𑀺𑀢𑁆𑀢𑀧𑀓𑁄𑀧𑀸𑀤𑀻𑀦𑀁 𑀯𑀲𑁂𑀦 𑀆𑀩𑀸𑀥𑀺𑀓𑀁 𑀅𑀢𑁆𑀢𑀪𑀸𑀯𑀁 𑀤𑀺𑀲𑁆𑀯𑀸 𑀤𑁄𑀫𑀦𑀲𑁆𑀲𑀁 𑀦 𑀉𑀧𑁆𑀧𑀚𑁆𑀚𑀢𑀺, ‘‘𑀫𑀼𑀘𑁆𑀘𑀺𑀲𑁆𑀲𑀸𑀫𑀺 𑀯𑀢 𑀔𑀦𑁆𑀥𑀧𑀭𑀺𑀳𑀸𑀭𑀤𑀼𑀓𑁆𑀔𑀢𑁄’’𑀢𑀺 𑀲𑁄𑀫𑀦𑀲𑁆𑀲𑀫𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀅𑀬𑀁 𑀧𑀦 𑀉𑀧𑀫𑀸 ‘‘𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀲𑁆𑀲 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀧𑁆𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀲𑁆𑀲 𑀦𑀢𑁆𑀣𑁂𑀢𑀦𑁆𑀢𑀺 𑀜𑀢𑁆𑀯𑀸 𑀇𑀢𑁆𑀣𑀺𑀬𑀸 𑀙𑀦𑁆𑀤𑀭𑀸𑀕𑀁 𑀧𑀚𑀳𑀢𑀺, 𑀏𑀯𑀫𑀬𑀁 𑀪𑀺𑀓𑁆𑀔𑀼 𑀲𑀗𑁆𑀔𑀸𑀭𑀁 𑀯𑀸 𑀧𑀤𑀳𑀦𑁆𑀢𑀲𑁆𑀲 𑀉𑀧𑁂𑀓𑁆𑀔𑀁 𑀯𑀸 𑀪𑀸𑀯𑁂𑀦𑁆𑀢𑀲𑁆𑀲 𑀤𑀼𑀓𑁆𑀔𑀦𑀺𑀤𑀸𑀦𑀁 𑀧𑀳𑀻𑀬𑀢𑀺, 𑀦𑁄 𑀅𑀜𑁆𑀜𑀣𑀸𑀢𑀺 𑀜𑀢𑁆𑀯𑀸 𑀢𑀤𑀼𑀪𑀬𑀁 𑀲𑀫𑁆𑀧𑀸𑀤𑁂𑀦𑁆𑀢𑁄 𑀤𑀼𑀓𑁆𑀔𑀦𑀺𑀤𑀸𑀦𑀁 𑀧𑀚𑀳𑀢𑀻’’𑀢𑀺 𑀏𑀢𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 𑀆𑀕𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁧𑁨. 𑀬𑀣𑀸 𑀲𑀼𑀔𑀁 𑀔𑁄 𑀫𑁂 𑀯𑀺𑀳𑀭𑀢𑁄𑀢𑀺 𑀬𑁂𑀦 𑀲𑀼𑀔𑁂𑀦 𑀯𑀺𑀳𑀭𑀺𑀢𑀼𑀁 𑀇𑀘𑁆𑀙𑀸𑀫𑀺 𑀢𑁂𑀦, 𑀫𑁂 𑀯𑀺𑀳𑀭𑀢𑁄. 𑀧𑀤𑀳𑀢𑁄𑀢𑀺 𑀧𑁂𑀲𑁂𑀦𑁆𑀢𑀲𑁆𑀲. 𑀏𑀢𑁆𑀣 𑀘 𑀬𑀲𑁆𑀲 𑀲𑀼𑀔𑀸 𑀧𑀝𑀺𑀧𑀤𑀸 𑀅𑀲𑀧𑁆𑀧𑀸𑀬𑀸, 𑀲𑀼𑀔𑀼𑀫𑀘𑀻𑀯𑀭𑀸𑀦𑀺 𑀥𑀸𑀭𑁂𑀦𑁆𑀢𑀲𑁆𑀲 𑀧𑀸𑀲𑀸𑀤𑀺𑀓𑁂 𑀲𑁂𑀦𑀸𑀲𑀦𑁂 𑀯𑀲𑀦𑁆𑀢𑀲𑁆𑀲 𑀘𑀺𑀢𑁆𑀢𑀁 𑀯𑀺𑀓𑁆𑀔𑀺𑀧𑀢𑀺, 𑀤𑀼𑀓𑁆𑀔𑀸 𑀧𑀝𑀺𑀧𑀤𑀸 𑀲𑀧𑁆𑀧𑀸𑀬𑀸, 𑀙𑀺𑀦𑁆𑀦𑀪𑀺𑀦𑁆𑀦𑀸𑀦𑀺 𑀣𑀽𑀮𑀘𑀻𑀯𑀭𑀸𑀦𑀺 𑀥𑀸𑀭𑁂𑀦𑁆𑀢𑀲𑁆𑀲 𑀲𑀼𑀲𑀸𑀦𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼 𑀯𑀲𑀦𑁆𑀢𑀲𑁆𑀲 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁, 𑀉𑀲𑀼𑀓𑀸𑀭𑁄 𑀯𑀺𑀬 𑀳𑀺 𑀚𑀸𑀢𑀺𑀚𑀭𑀸𑀫𑀭𑀡𑀪𑀻𑀢𑁄 𑀬𑁄𑀕𑀻 𑀤𑀝𑁆𑀞𑀩𑁆𑀩𑁄, 𑀯𑀗𑁆𑀓𑀓𑀼𑀝𑀺𑀮𑀚𑀺𑀫𑁆𑀳𑀢𑁂𑀚𑀦𑀁 𑀯𑀺𑀬 𑀯𑀗𑁆𑀓𑀓𑀼𑀝𑀺𑀮𑀚𑀺𑀫𑁆𑀳𑀘𑀺𑀢𑁆𑀢𑀁, 𑀤𑁆𑀯𑁂 𑀅𑀮𑀸𑀢𑀸 𑀯𑀺𑀬 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑀁, 𑀢𑁂𑀚𑀦𑀁 𑀉𑀚𑀼𑀁 𑀓𑀭𑁄𑀦𑁆𑀢𑀲𑁆𑀲 𑀓𑀜𑁆𑀚𑀺𑀓𑀢𑁂𑀮𑀁 𑀯𑀺𑀬 𑀲𑀤𑁆𑀥𑀸, 𑀦𑀫𑀦𑀤𑀡𑁆𑀟𑀓𑁄 𑀯𑀺𑀬 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄, 𑀉𑀲𑁆𑀲𑀼𑀓𑀸𑀭𑀲𑁆𑀲 𑀯𑀗𑁆𑀓𑀓𑀼𑀝𑀺𑀮𑀚𑀺𑀫𑁆𑀳𑀢𑁂𑀚𑀦𑀁 𑀓𑀜𑁆𑀚𑀺𑀓𑀢𑁂𑀮𑁂𑀦 𑀲𑀺𑀦𑁂𑀳𑁂𑀢𑁆𑀯𑀸 𑀅𑀮𑀸𑀢𑁂𑀲𑀼 𑀢𑀸𑀧𑁂𑀢𑁆𑀯𑀸 𑀦𑀫𑀦𑀤𑀡𑁆𑀟𑀓𑁂𑀦 𑀉𑀚𑀼𑀓𑀭𑀡𑀁 𑀯𑀺𑀬 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀗𑁆𑀓𑀓𑀼𑀝𑀺𑀮𑀚𑀺𑀫𑁆𑀳𑀘𑀺𑀢𑁆𑀢𑀁 𑀲𑀤𑁆𑀥𑀸𑀬 𑀲𑀺𑀦𑁂𑀳𑁂𑀢𑁆𑀯𑀸 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑁂𑀦 𑀢𑀸𑀧𑁂𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁂𑀦 𑀉𑀚𑀼𑀓𑀭𑀡𑀁, 𑀉𑀲𑀼𑀓𑀸𑀭𑀲𑁆𑀲𑁂𑀯 𑀏𑀯𑀁 𑀉𑀚𑀼𑀓𑀢𑁂𑀦 𑀢𑁂𑀚𑀦𑁂𑀦 𑀲𑀧𑀢𑁆𑀢𑀁 𑀯𑀺𑀚𑁆𑀛𑀺𑀢𑁆𑀯𑀸 𑀲𑀫𑁆𑀧𑀢𑁆𑀢𑀺𑀅𑀦𑀼𑀪𑀯𑀦𑀁 𑀯𑀺𑀬 𑀇𑀫𑀲𑁆𑀲 𑀬𑁄𑀕𑀺𑀦𑁄 𑀢𑀣𑀸 𑀉𑀚𑀼𑀓𑀢𑁂𑀦 𑀘𑀺𑀢𑁆𑀢𑁂𑀦 𑀓𑀺𑀮𑁂𑀲𑀕𑀡𑀁 𑀯𑀺𑀚𑁆𑀛𑀺𑀢𑁆𑀯𑀸 𑀧𑀸𑀲𑀸𑀤𑀺𑀓𑁂 𑀲𑁂𑀦𑀸𑀲𑀦𑁂 𑀦𑀺𑀭𑁄𑀥𑀯𑀭𑀢𑀮𑀕𑀢𑀲𑁆𑀲 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀸𑀦𑀼𑀪𑀯𑀦𑀁 𑀤𑀝𑁆𑀞𑀩𑁆𑀩𑀁. 𑀇𑀥 𑀢𑀣𑀸𑀕𑀢𑁄 𑀲𑀼𑀔𑀸𑀧𑀝𑀺𑀧𑀤𑀸𑀔𑀺𑀧𑁆𑀧𑀸𑀪𑀺𑀜𑁆𑀜𑀪𑀺𑀓𑁆𑀔𑀼𑀦𑁄, 𑀤𑀼𑀓𑁆𑀔𑀸𑀧𑀝𑀺𑀧𑀤𑀸𑀤𑀦𑁆𑀥𑀸𑀪𑀺𑀜𑁆𑀜𑀪𑀺𑀓𑁆𑀔𑀼𑀦𑁄 𑀘 𑀧𑀝𑀺𑀧𑀢𑁆𑀢𑀺𑀬𑁄 𑀓𑀣𑀺𑀢𑀸, 𑀇𑀢𑀭𑁂𑀲𑀁 𑀤𑁆𑀯𑀺𑀦𑁆𑀦𑀁 𑀦 𑀓𑀣𑀺𑀢𑀸, 𑀢𑀸 𑀓𑀣𑁂𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀇𑀫𑀸𑀲𑀼 𑀯𑀸 𑀤𑁆𑀯𑀻𑀲𑀼 𑀓𑀣𑀺𑀢𑀸𑀲𑀼 𑀇𑀢𑀭𑀸𑀧𑀺 𑀓𑀣𑀺𑀢𑀸𑀯 𑀳𑁄𑀦𑁆𑀢𑀺, 𑀆𑀕𑀫𑀦𑀻𑀬𑀧𑀝𑀺𑀧𑀤𑀸 𑀧𑀦 𑀦 𑀓𑀣𑀺𑀢𑀸, 𑀢𑀁 𑀓𑀣𑁂𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀲𑀳𑀸𑀕𑀫𑀦𑀻𑀬𑀸𑀧𑀺 𑀯𑀸 𑀧𑀝𑀺𑀧𑀤𑀸 𑀓𑀣𑀺𑀢𑀸𑀯, 𑀅𑀤𑀲𑁆𑀲𑀺𑀢𑀁 𑀧𑀦 𑀏𑀓𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀤𑀲𑁆𑀲𑁂𑀢𑁆𑀯𑀸 𑀏𑀓𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀦𑀺𑀓𑁆𑀔𑀫𑀦𑀤𑁂𑀲𑀦𑀁 𑀅𑀭𑀳𑀢𑁆𑀢𑁂𑀦 𑀯𑀺𑀦𑀺𑀯𑀝𑁆𑀝𑁂𑀲𑁆𑀲𑀸𑀫𑀻𑀢𑀺 𑀤𑀲𑁆𑀲𑁂𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀤𑁂𑀯𑀤𑀳𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀜𑁆𑀘𑀢𑁆𑀢𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀧𑀜𑁆𑀘𑀢𑁆𑀢𑀬𑀲𑀼𑀢𑁆𑀢𑀁. 𑀢𑀢𑁆𑀣 𑀏𑀓𑁂𑀢𑀺 𑀏𑀓𑀘𑁆𑀘𑁂. 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺 𑀧𑀭𑀺𑀩𑁆𑀩𑀚𑀼𑀧𑀕𑀢𑀪𑀸𑀯𑁂𑀦 𑀲𑀫𑀡𑀸 𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸, 𑀮𑁄𑀓𑁂𑀦 𑀯𑀸 𑀲𑀫𑀡𑀸𑀢𑀺 𑀘 𑀩𑁆𑀭𑀸𑀳𑁆𑀫𑀡𑀸𑀢𑀺 𑀘 𑀏𑀯𑀁 𑀲𑀫𑁆𑀫𑀢𑀸. 𑀅𑀧𑀭𑀦𑁆𑀢𑀁 𑀓𑀧𑁆𑀧𑁂𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀻𑀢𑀺 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀸. 𑀅𑀧𑀭𑀦𑁆𑀢𑀓𑀧𑁆𑀧𑁄 𑀯𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺𑀧𑀺 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀸. 𑀏𑀢𑁆𑀣 𑀘 𑀅𑀦𑁆𑀢𑁄𑀢𑀺 ‘‘𑀲𑀓𑁆𑀓𑀸𑀬𑁄 𑀔𑁄, 𑀆𑀯𑀼𑀲𑁄, 𑀏𑀓𑁄 𑀅𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁬.𑁬𑁧) 𑀯𑀺𑀬 𑀇𑀥 𑀓𑁄𑀝𑁆𑀞𑀸𑀲𑁄 𑀅𑀥𑀺𑀧𑁆𑀧𑁂𑀢𑁄. 𑀓𑀧𑁆𑀧𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀓𑀧𑁆𑀧𑁄𑀢𑀺 𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀧𑁆𑀧𑀸 𑀢𑀡𑁆𑀳𑀸𑀓𑀧𑁆𑀧𑁄 𑀘 𑀤𑀺𑀝𑁆𑀞𑀺𑀓𑀧𑁆𑀧𑁄 𑀘𑀸’’𑀢𑀺. 𑀢𑀲𑁆𑀫𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀅𑀦𑀸𑀕𑀢𑀁 𑀔𑀦𑁆𑀥𑀓𑁄𑀝𑁆𑀞𑀸𑀲𑀁 𑀓𑀧𑁆𑀧𑁂𑀢𑁆𑀯𑀸 𑀞𑀺𑀢𑀸𑀢𑀺 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀲𑀁 𑀏𑀯𑀁 𑀅𑀧𑀭𑀦𑁆𑀢𑀁 𑀓𑀧𑁆𑀧𑁂𑀢𑁆𑀯𑀸 𑀞𑀺𑀢𑀸𑀦𑀁 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑀯𑀲𑁂𑀦 𑀅𑀧𑀭𑀦𑁆𑀢𑀫𑁂𑀯 𑀅𑀦𑀼𑀕𑀢𑀸 𑀤𑀺𑀝𑁆𑀞𑀻𑀢𑀺 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁄. 𑀢𑁂 𑀏𑀯𑀁𑀤𑀺𑀝𑁆𑀞𑀺𑀦𑁄 𑀢𑀁 𑀅𑀧𑀭𑀦𑁆𑀢𑀁 𑀆𑀭𑀩𑁆𑀪 𑀆𑀕𑀫𑁆𑀫 𑀧𑀝𑀺𑀘𑁆𑀘 𑀅𑀜𑁆𑀜𑀫𑁆𑀧𑀺 𑀚𑀦𑀁 𑀤𑀺𑀝𑁆𑀞𑀺𑀕𑀢𑀺𑀓𑀁 𑀓𑀭𑁄𑀦𑁆𑀢𑀸 𑀅𑀦𑁂𑀓𑀯𑀺𑀳𑀺𑀢𑀸𑀦𑀺 𑀅𑀥𑀺𑀯𑀼𑀢𑁆𑀢𑀺𑀧𑀤𑀸𑀦𑀺 𑀅𑀪𑀺𑀯𑀤𑀦𑁆𑀢𑀺. 𑀅𑀦𑁂𑀓𑀯𑀺𑀳𑀺𑀢𑀸𑀦𑀻𑀢𑀺 𑀅𑀦𑁂𑀓𑀯𑀺𑀥𑀸𑀦𑀺. 𑀅𑀥𑀺𑀯𑀼𑀢𑁆𑀢𑀺𑀧𑀤𑀸𑀦𑀻𑀢𑀺 𑀅𑀥𑀺𑀯𑀘𑀦𑀧𑀤𑀸𑀦𑀺. 𑀅𑀣 𑀯𑀸 𑀪𑀽𑀢𑀫𑀢𑁆𑀣𑀁 𑀅𑀥𑀺𑀪𑀯𑀺𑀢𑁆𑀯𑀸 𑀬𑀣𑀸𑀲𑀪𑀸𑀯𑀢𑁄 𑀅𑀕𑁆𑀕𑀳𑁂𑀢𑁆𑀯𑀸 𑀯𑀢𑁆𑀢𑀦𑀢𑁄 𑀅𑀥𑀺𑀯𑀼𑀢𑁆𑀢𑀺𑀬𑁄𑀢𑀺 𑀤𑀺𑀝𑁆𑀞𑀺𑀬𑁄 𑀯𑀼𑀘𑁆𑀘𑀦𑁆𑀢𑀺, 𑀅𑀥𑀺𑀯𑀼𑀢𑁆𑀢𑀻𑀦𑀁 𑀧𑀤𑀸𑀦𑀺 𑀅𑀥𑀺𑀯𑀼𑀢𑁆𑀢𑀺𑀧𑀤𑀸𑀦𑀺, 𑀤𑀺𑀝𑁆𑀞𑀺𑀤𑀻𑀧𑀓𑀸𑀦𑀺 𑀯𑀘𑀦𑀸𑀦𑀻𑀢𑀺 𑀅𑀢𑁆𑀣𑁄.

𑀲𑀜𑁆𑀜𑀻𑀢𑀺 𑀲𑀜𑁆𑀜𑀸𑀲𑀫𑀗𑁆𑀕𑀻. 𑀅𑀭𑁄𑀕𑁄𑀢𑀺 𑀦𑀺𑀘𑁆𑀘𑁄. 𑀇𑀢𑁆𑀣𑁂𑀓𑁂𑀢𑀺 𑀇𑀢𑁆𑀣𑀁 𑀏𑀓𑁂, 𑀏𑀯𑀫𑁂𑀓𑁂𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀲𑁄𑀴𑀲 𑀲𑀜𑁆𑀜𑀻𑀯𑀸𑀤𑀸 𑀓𑀣𑀺𑀢𑀸, 𑀅𑀲𑀜𑁆𑀜𑀻𑀢𑀺 𑀇𑀫𑀺𑀦𑀸 𑀅𑀝𑁆𑀞 𑀅𑀲𑀜𑁆𑀜𑀻𑀯𑀸𑀤𑀸, 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀢𑀺 𑀇𑀫𑀺𑀦𑀸 𑀅𑀝𑁆𑀞 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸, 𑀲𑀢𑁄 𑀯𑀸 𑀧𑀦 𑀲𑀢𑁆𑀢𑀲𑁆𑀲𑀸𑀢𑀺 𑀇𑀫𑀺𑀦𑀸 𑀲𑀢𑁆𑀢 𑀉𑀘𑁆𑀙𑁂𑀤𑀯𑀸𑀤𑀸. 𑀢𑀢𑁆𑀣 𑀲𑀢𑁄𑀢𑀺 𑀯𑀺𑀚𑁆𑀚𑀫𑀸𑀦𑀲𑁆𑀲. 𑀉𑀘𑁆𑀙𑁂𑀤𑀦𑁆𑀢𑀺 𑀉𑀧𑀘𑁆𑀙𑁂𑀤𑀁. 𑀯𑀺𑀦𑀸𑀲𑀦𑁆𑀢𑀺 𑀅𑀤𑀲𑁆𑀲𑀦𑀁. 𑀯𑀺𑀪𑀯𑀦𑁆𑀢𑀺 𑀪𑀯𑀯𑀺𑀕𑀫𑀁. 𑀲𑀩𑁆𑀩𑀸𑀦𑁂𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑁂𑀯. 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀯𑀸𑀢𑀺 𑀇𑀫𑀺𑀦𑀸 𑀧𑀜𑁆𑀘 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸 𑀓𑀣𑀺𑀢𑀸. 𑀢𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑁄𑀢𑀺 𑀧𑀘𑁆𑀘𑀓𑁆𑀔𑀥𑀫𑁆𑀫𑁄 𑀯𑀼𑀘𑁆𑀘𑀢𑀺, 𑀢𑀢𑁆𑀣 𑀢𑀢𑁆𑀣 𑀧𑀝𑀺𑀮𑀤𑁆𑀥𑀅𑀢𑁆𑀢𑀪𑀸𑀯𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀤𑀺𑀝𑁆𑀞𑀥𑀫𑁆𑀫𑁂 𑀦𑀺𑀩𑁆𑀩𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁, 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀤𑀼𑀓𑁆𑀔𑀯𑀽𑀧𑀲𑀫𑀦𑁆𑀢𑀺 𑀅𑀢𑁆𑀣𑁄. 𑀲𑀦𑁆𑀢𑀁 𑀯𑀸𑀢𑀺 𑀲𑀜𑁆𑀜𑀻𑀢𑀺𑀆𑀤𑀺𑀯𑀲𑁂𑀦 𑀢𑀻𑀳𑀸𑀓𑀸𑀭𑁂𑀳𑀺 𑀲𑀦𑁆𑀢𑀁. 𑀢𑀻𑀡𑀺 𑀳𑁄𑀦𑁆𑀢𑀻𑀢𑀺 𑀲𑀜𑁆𑀜𑀻 𑀅𑀢𑁆𑀢𑀸𑀢𑀺𑀆𑀤𑀻𑀦𑀺 𑀲𑀦𑁆𑀢𑀅𑀢𑁆𑀢𑀯𑀲𑁂𑀦 𑀏𑀓𑀁, 𑀇𑀢𑀭𑀸𑀦𑀺 𑀤𑁆𑀯𑁂𑀢𑀺 𑀏𑀯𑀁 𑀢𑀻𑀡𑀺.

𑁨𑁨. 𑀭𑀽𑀧𑀺𑀁 𑀯𑀸𑀢𑀺 𑀓𑀭𑀚𑀭𑀽𑀧𑁂𑀦 𑀯𑀸 𑀓𑀲𑀺𑀡𑀭𑀽𑀧𑁂𑀦 𑀯𑀸 𑀭𑀽𑀧𑀺𑀁. 𑀢𑀢𑁆𑀣 𑀮𑀸𑀪𑀻 𑀓𑀲𑀺𑀡𑀭𑀽𑀧𑀁 𑀅𑀢𑁆𑀢𑀸𑀢𑀺 𑀕𑀡𑁆𑀳𑀸𑀢𑀺, 𑀢𑀓𑁆𑀓𑀻 𑀉𑀪𑁄𑀧𑀺 𑀭𑀽𑀧𑀸𑀦𑀺 𑀕𑀡𑁆𑀳𑀸𑀢𑀺𑀬𑁂𑀯. 𑀅𑀭𑀽𑀧𑀺𑀦𑁆𑀢𑀺 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀯𑀸, 𑀞𑀧𑁂𑀢𑁆𑀯𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑀁 𑀲𑁂𑀲𑀅𑀭𑀽𑀧𑀥𑀫𑁆𑀫𑁂 𑀯𑀸 𑀅𑀢𑁆𑀢𑀸𑀢𑀺 𑀧𑀜𑁆𑀜𑀧𑁂𑀦𑁆𑀢𑀸 𑀮𑀸𑀪𑀺𑀦𑁄𑀧𑀺 𑀢𑀓𑁆𑀓𑀺𑀓𑀸𑀧𑀺 𑀏𑀯𑀁 𑀧𑀜𑁆𑀜𑀧𑁂𑀦𑁆𑀢𑀺. 𑀢𑀢𑀺𑀬𑀤𑀺𑀝𑁆𑀞𑀺 𑀧𑀦 𑀫𑀺𑀲𑁆𑀲𑀓𑀕𑀸𑀳𑀯𑀲𑁂𑀦 𑀧𑀯𑀢𑁆𑀢𑀸, 𑀘𑀢𑀼𑀢𑁆𑀣𑀸 𑀢𑀓𑁆𑀓𑀕𑀸𑀳𑁂𑀦𑁂𑀯. 𑀤𑀼𑀢𑀺𑀬𑀘𑀢𑀼𑀓𑁆𑀓𑁂 𑀧𑀞𑀫𑀤𑀺𑀝𑁆𑀞𑀺 𑀲𑀫𑀸𑀧𑀦𑁆𑀦𑀓𑀯𑀸𑀭𑁂𑀦 𑀓𑀣𑀺𑀢𑀸, 𑀤𑀼𑀢𑀺𑀬𑀤𑀺𑀝𑁆𑀞𑀺 𑀅𑀲𑀫𑀸𑀧𑀦𑁆𑀦𑀓𑀯𑀸𑀭𑁂𑀦, 𑀢𑀢𑀺𑀬𑀤𑀺𑀝𑁆𑀞𑀺 𑀲𑀼𑀧𑁆𑀧𑀫𑀢𑁆𑀢𑁂𑀦 𑀯𑀸 𑀲𑀭𑀸𑀯𑀫𑀢𑁆𑀢𑁂𑀦 𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀯𑀲𑁂𑀦, 𑀘𑀢𑀼𑀢𑁆𑀣𑀤𑀺𑀝𑁆𑀞𑀺 𑀯𑀺𑀧𑀼𑀮𑀓𑀲𑀺𑀡𑀯𑀲𑁂𑀦 𑀓𑀣𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀢𑀁 𑀯𑀸 𑀧𑀦𑁂𑀓𑁂𑀲𑀁 𑀉𑀧𑀸𑀢𑀺𑀯𑀢𑁆𑀢𑀢𑀦𑁆𑀢𑀺 𑀲𑀜𑁆𑀜𑀻𑀢𑀺𑀧𑀤𑁂𑀦 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀁 𑀲𑀜𑁆𑀜𑀸𑀲𑀢𑁆𑀢𑀓𑀁 𑀅𑀢𑀺𑀓𑁆𑀓𑀦𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀧𑀭𑁂 𑀅𑀝𑁆𑀞𑀓𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀤𑀼𑀪𑀬𑀁 𑀧𑀭𑀢𑁄 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀓𑁂𑀘𑀺 𑀳𑀺 𑀏𑀢𑀸 𑀲𑀢𑁆𑀢 𑀯𑀸 𑀅𑀝𑁆𑀞 𑀯𑀸 𑀲𑀜𑁆𑀜𑀸 𑀲𑀫𑀢𑀺𑀓𑁆𑀓𑀫𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀓𑁂𑀘𑀺 𑀧𑀦 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑀢𑁆𑀣 𑀬𑁂 𑀲𑀓𑁆𑀓𑁄𑀦𑁆𑀢𑀺, 𑀢𑁂𑀯 𑀕𑀳𑀺𑀢𑀸. 𑀢𑁂𑀲𑀁 𑀧𑀦 𑀏𑀓𑁂𑀲𑀁 𑀉𑀧𑀸𑀢𑀺𑀯𑀢𑁆𑀢𑀢𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀸𑀦𑀁 𑀬𑀣𑀸𑀧𑀺 𑀦𑀸𑀫 𑀕𑀗𑁆𑀕𑀁 𑀉𑀢𑁆𑀢𑀺𑀡𑁆𑀡𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀏𑀓𑁄 𑀤𑀻𑀖𑀯𑀸𑀧𑀺𑀁 𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑁂𑀬𑁆𑀬, 𑀏𑀓𑁄 𑀢𑀢𑁄 𑀧𑀭𑀁 𑀫𑀳𑀸𑀕𑀸𑀫𑀁; 𑀏𑀯𑀫𑁂𑀯 𑀏𑀓𑁂 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀅𑀧𑁆𑀧𑀫𑀸𑀡𑀁 𑀆𑀦𑁂𑀜𑁆𑀚𑀦𑁆𑀢𑀺 𑀯𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺, 𑀏𑀓𑁂 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁. 𑀢𑀢𑁆𑀣 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀢𑀸𑀯 𑀤𑀲𑁆𑀲𑁂𑀢𑀼𑀁 𑀯𑀺𑀜𑁆𑀜𑀸𑀡𑀓𑀲𑀺𑀡𑀫𑁂𑀓𑁂𑀢𑀺 𑀯𑀼𑀢𑁆𑀢𑀁. 𑀧𑀭𑀢𑁄 ‘‘𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀫𑁂𑀓𑁂’’𑀢𑀺 𑀯𑀓𑁆𑀔𑀢𑀺. 𑀢𑀬𑀺𑀤𑀦𑁆𑀢𑀺 𑀢𑀁 𑀇𑀤𑀁 𑀤𑀺𑀝𑁆𑀞𑀺𑀕𑀢𑀜𑁆𑀘 𑀤𑀺𑀝𑁆𑀞𑀺𑀧𑀘𑁆𑀘𑀬𑀜𑁆𑀘 𑀤𑀺𑀝𑁆𑀞𑀸𑀭𑀫𑁆𑀫𑀡𑀜𑁆𑀘. 𑀢𑀣𑀸𑀕𑀢𑁄 𑀅𑀪𑀺𑀚𑀸𑀦𑀸𑀢𑀻𑀢𑀺. 𑀇𑀫𑀺𑀦𑀸 𑀧𑀘𑁆𑀘𑀬𑁂𑀦 𑀇𑀤𑀁 𑀦𑀸𑀫 𑀤𑀲𑁆𑀲𑀦𑀁 𑀕𑀳𑀺𑀢𑀦𑁆𑀢𑀺 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦 𑀚𑀸𑀦𑀸𑀢𑀺.

𑀇𑀤𑀸𑀦𑀺 𑀢𑀤𑁂𑀯 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀬𑁂 𑀔𑁄 𑀢𑁂 𑀪𑁄𑀦𑁆𑀢𑁄𑀢𑀺𑀆𑀤𑀺𑀫𑀸𑀳. 𑀬𑀸 𑀯𑀸 𑀧𑀦 𑀏𑀢𑀸𑀲𑀁 𑀲𑀜𑁆𑀜𑀸𑀦𑀦𑁆𑀢𑀺 𑀬𑀸 𑀯𑀸 𑀧𑀦 𑀏𑀢𑀸𑀲𑀁 ‘‘𑀬𑀤𑀺 𑀭𑀽𑀧𑀲𑀜𑁆𑀜𑀸𑀦’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀲𑀜𑁆𑀜𑀸𑀦𑀁. 𑀧𑀭𑀺𑀲𑀼𑀤𑁆𑀥𑀸𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀸. 𑀧𑀭𑀫𑀸𑀢𑀺 𑀉𑀢𑁆𑀢𑀫𑀸. 𑀅𑀕𑁆𑀕𑀸𑀢𑀺 𑀲𑁂𑀝𑁆𑀞𑀸. 𑀅𑀦𑀼𑀢𑁆𑀢𑀭𑀺𑀬𑀸 𑀅𑀓𑁆𑀔𑀸𑀬𑀢𑀻𑀢𑀺 𑀅𑀲𑀤𑀺𑀲𑀸 𑀓𑀣𑀻𑀬𑀢𑀺. 𑀬𑀤𑀺 𑀭𑀽𑀧𑀲𑀜𑁆𑀜𑀸𑀦𑀦𑁆𑀢𑀺 𑀇𑀫𑀺𑀦𑀸 𑀘𑀢𑀲𑁆𑀲𑁄 𑀭𑀽𑀧𑀸𑀯𑀘𑀭𑀲𑀜𑁆𑀜𑀸 𑀓𑀣𑀺𑀢𑀸. 𑀬𑀤𑀺 𑀅𑀭𑀽𑀧𑀲𑀜𑁆𑀜𑀸𑀦𑀦𑁆𑀢𑀺 𑀇𑀫𑀺𑀦𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑀜𑁆𑀜𑀸. 𑀇𑀢𑀭𑁂𑀳𑀺 𑀧𑀦 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀫𑀸𑀧𑀦𑁆𑀦𑀓𑀯𑀸𑀭𑁄 𑀘 𑀅𑀲𑀫𑀸𑀧𑀦𑁆𑀦𑀓𑀯𑀸𑀭𑁄 𑀘 𑀓𑀣𑀺𑀢𑁄𑀢𑀺 𑀏𑀯𑀫𑁂𑀢𑀸 𑀓𑁄𑀝𑁆𑀞𑀸𑀲𑀢𑁄 𑀅𑀝𑁆𑀞, 𑀅𑀢𑁆𑀣𑀢𑁄 𑀧𑀦 𑀲𑀢𑁆𑀢 𑀲𑀜𑁆𑀜𑀸 𑀳𑁄𑀦𑁆𑀢𑀺. 𑀲𑀫𑀸𑀧𑀦𑁆𑀦𑀓𑀯𑀸𑀭𑁄 𑀳𑀺 𑀧𑀼𑀭𑀺𑀫𑀸𑀳𑀺 𑀙𑀳𑀺𑀲𑀗𑁆𑀕𑀳𑀺𑀢𑁄𑀬𑁂𑀯. 𑀢𑀬𑀺𑀤𑀁 𑀲𑀗𑁆𑀔𑀢𑀦𑁆𑀢𑀺 𑀢𑀁 𑀇𑀤𑀁 𑀲𑀩𑁆𑀩𑀫𑁆𑀧𑀺 𑀲𑀜𑁆𑀜𑀸𑀕𑀢𑀁 𑀲𑀤𑁆𑀥𑀺𑀁 𑀤𑀺𑀝𑁆𑀞𑀺𑀕𑀢𑁂𑀦 𑀲𑀗𑁆𑀔𑀢𑀁 𑀧𑀘𑁆𑀘𑀬𑁂𑀳𑀺 𑀲𑀫𑀸𑀕𑀦𑁆𑀢𑁆𑀯𑀸 𑀓𑀢𑀁. 𑀑𑀴𑀸𑀭𑀺𑀓𑀦𑁆𑀢𑀺 𑀲𑀗𑁆𑀔𑀢𑀢𑁆𑀢𑀸𑀯 𑀑𑀴𑀸𑀭𑀺𑀓𑀁. 𑀅𑀢𑁆𑀣𑀺 𑀔𑁄 𑀧𑀦 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑁄𑀢𑀺 𑀏𑀢𑁂𑀲𑀁 𑀧𑀦 𑀲𑀗𑁆𑀔𑀢𑀦𑁆𑀢𑀺 𑀯𑀼𑀢𑁆𑀢𑀸𑀦𑀁 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀅𑀢𑁆𑀣𑀺. 𑀅𑀢𑁆𑀣𑁂𑀢𑀦𑁆𑀢𑀺 𑀇𑀢𑀺 𑀯𑀺𑀤𑀺𑀢𑁆𑀯𑀸𑀢𑀺 𑀢𑀁 𑀔𑁄 𑀧𑀦 𑀦𑀺𑀩𑁆𑀩𑀸𑀦𑀁 ‘‘𑀅𑀢𑁆𑀣𑀺 𑀏𑀢’’𑀦𑁆𑀢𑀺 𑀏𑀯𑀁 𑀚𑀸𑀦𑀺𑀢𑁆𑀯𑀸. 𑀢𑀲𑁆𑀲 𑀦𑀺𑀲𑁆𑀲𑀭𑀡𑀤𑀲𑁆𑀲𑀸𑀯𑀻𑀢𑀺 𑀢𑀲𑁆𑀲 𑀲𑀗𑁆𑀔𑀢𑀲𑁆𑀲 𑀦𑀺𑀲𑁆𑀲𑀭𑀡𑀤𑀲𑁆𑀲𑀻 𑀦𑀺𑀩𑁆𑀩𑀸𑀦𑀤𑀲𑁆𑀲𑀻. 𑀢𑀣𑀸𑀕𑀢𑁄 𑀢𑀤𑀼𑀧𑀸𑀢𑀺𑀯𑀢𑁆𑀢𑁄𑀢𑀺 𑀢𑀁 𑀲𑀗𑁆𑀔𑀢𑀁 𑀅𑀢𑀺𑀓𑁆𑀓𑀦𑁆𑀢𑁄 𑀲𑀫𑀢𑀺𑀓𑁆𑀓𑀦𑁆𑀢𑁄𑀢𑀺 𑀅𑀢𑁆𑀣𑁄.

𑁨𑁩. 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀅𑀝𑁆𑀞𑀲𑀼 𑀅𑀲𑀜𑁆𑀜𑀻𑀯𑀸𑀤𑁂𑀲𑀼. 𑀭𑀽𑀧𑀺𑀁 𑀯𑀸𑀢𑀺𑀆𑀤𑀻𑀦𑀺 𑀲𑀜𑁆𑀜𑀻𑀯𑀸𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀬𑀜𑁆𑀘 𑀬𑀲𑁆𑀫𑀸 𑀅𑀲𑀜𑁆𑀜𑀻𑀯𑀸𑀤𑁄, 𑀢𑀲𑁆𑀫𑀸 𑀇𑀥 𑀤𑀼𑀢𑀺𑀬𑀘𑀢𑀼𑀓𑁆𑀓𑀁 𑀦 𑀯𑀼𑀢𑁆𑀢𑀁. 𑀧𑀝𑀺𑀓𑁆𑀓𑁄𑀲𑀦𑁆𑀢𑀻𑀢𑀺 𑀧𑀝𑀺𑀩𑀸𑀳𑀦𑁆𑀢𑀺 𑀧𑀝𑀺𑀲𑁂𑀥𑁂𑀦𑁆𑀢𑀺. 𑀲𑀜𑁆𑀜𑀸 𑀭𑁄𑀕𑁄𑀢𑀺𑀆𑀤𑀻𑀲𑀼 𑀆𑀩𑀸𑀥𑀝𑁆𑀞𑁂𑀦 𑀭𑁄𑀕𑁄, 𑀲𑀤𑁄𑀲𑀝𑁆𑀞𑁂𑀦 𑀕𑀡𑁆𑀟𑁄, 𑀅𑀦𑀼𑀧𑀯𑀺𑀝𑁆𑀞𑀝𑁆𑀞𑁂𑀦 𑀲𑀮𑁆𑀮𑀁. 𑀆𑀕𑀢𑀺𑀁 𑀯𑀸 𑀕𑀢𑀺𑀁 𑀯𑀸𑀢𑀺𑀆𑀤𑀻𑀲𑀼 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀆𑀕𑀢𑀺𑀁, 𑀘𑀼𑀢𑀺𑀯𑀲𑁂𑀦 𑀕𑀢𑀺𑀁, 𑀘𑀯𑀦𑀯𑀲𑁂𑀦 𑀘𑀼𑀢𑀺𑀁, 𑀉𑀧𑀧𑀚𑁆𑀚𑀦𑀯𑀲𑁂𑀦 𑀉𑀧𑀧𑀢𑁆𑀢𑀺𑀁, 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀅𑀧𑀭𑀸𑀧𑀭𑀁 𑀯𑀟𑁆𑀠𑀦𑀯𑀲𑁂𑀦 𑀯𑀼𑀟𑁆𑀠𑀺𑀁 𑀯𑀺𑀭𑀽𑀴𑁆𑀳𑀺𑀁 𑀯𑁂𑀧𑀼𑀮𑁆𑀮𑀁. 𑀓𑀸𑀫𑀜𑁆𑀘 𑀘𑀢𑀼𑀯𑁄𑀓𑀸𑀭𑀪𑀯𑁂 𑀭𑀽𑀧𑀁 𑀯𑀺𑀦𑀸𑀧𑀺 𑀯𑀺𑀜𑁆𑀜𑀸𑀡𑀲𑁆𑀲 𑀧𑀯𑀢𑁆𑀢𑀺 𑀅𑀢𑁆𑀣𑀺, 𑀲𑁂𑀲𑁂 𑀧𑀦 𑀢𑀬𑁄 𑀔𑀦𑁆𑀥𑁂 𑀯𑀺𑀦𑀸 𑀦𑀢𑁆𑀣𑀺. 𑀅𑀬𑀁 𑀧𑀦 𑀧𑀜𑁆𑀳𑁄 𑀧𑀜𑁆𑀘𑀯𑁄𑀓𑀸𑀭𑀪𑀯𑀯𑀲𑁂𑀦 𑀓𑀣𑀺𑀢𑁄. 𑀧𑀜𑁆𑀘𑀯𑁄𑀓𑀸𑀭𑁂 𑀳𑀺 𑀏𑀢𑁆𑀢𑀓𑁂 𑀔𑀦𑁆𑀥𑁂 𑀯𑀺𑀦𑀸 𑀯𑀺𑀜𑁆𑀜𑀸𑀡𑀲𑁆𑀲 𑀧𑀯𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀯𑀺𑀢𑀡𑁆𑀟𑀯𑀸𑀤𑀻 𑀧𑀦𑁂𑀢𑁆𑀣 ‘‘𑀅𑀜𑁆𑀜𑀢𑁆𑀭 𑀭𑀽𑀧𑀸𑀢𑀺𑀆𑀤𑀺𑀯𑀘𑀦𑀢𑁄 𑀅𑀭𑀽𑀧𑀪𑀯𑁂𑀧𑀺 𑀭𑀽𑀧𑀁, 𑀅𑀲𑀜𑁆𑀜𑀸𑀪𑀯𑁂 𑀘 𑀯𑀺𑀜𑁆𑀜𑀸𑀡𑀁 𑀅𑀢𑁆𑀣𑀺, 𑀢𑀣𑀸 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀲𑁆𑀲𑀸’’𑀢𑀺 𑀯𑀤𑀢𑀺. 𑀲𑁄 𑀯𑀢𑁆𑀢𑀩𑁆𑀩𑁄 𑁋 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬 𑀘𑁂 𑀅𑀢𑁆𑀣𑀁 𑀧𑀝𑀺𑀩𑀸𑀳𑀲𑀺, 𑀆𑀕𑀢𑀺𑀁 𑀯𑀸𑀢𑀺𑀆𑀤𑀺𑀯𑀘𑀦𑀢𑁄 𑀢𑀁 𑀯𑀺𑀜𑁆𑀜𑀸𑀡𑀁 𑀧𑀓𑁆𑀔𑀺𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀸 𑀯𑀺𑀬 𑀉𑀧𑁆𑀧𑀢𑀺𑀢𑁆𑀯𑀸𑀧𑀺 𑀕𑀘𑁆𑀙𑀢𑀺, 𑀧𑀤𑀲𑀸𑀧𑀺 𑀕𑀘𑁆𑀙𑀢𑀺, 𑀕𑁄𑀯𑀺𑀲𑀸𑀡𑀯𑀮𑁆𑀮𑀺𑀆𑀤𑀻𑀦𑀺 𑀯𑀺𑀬 𑀘 𑀯𑀟𑁆𑀠𑀢𑀻𑀢𑀺 𑀆𑀧𑀚𑁆𑀚𑀢𑀺. 𑀬𑁂 𑀘 𑀪𑀕𑀯𑀢𑀸 𑀅𑀦𑁂𑀓𑀲𑀢𑁂𑀲𑀼 𑀲𑀼𑀢𑁆𑀢𑁂𑀲𑀼 𑀢𑀬𑁄 𑀪𑀯𑀸 𑀯𑀼𑀢𑁆𑀢𑀸, 𑀢𑁂 𑀅𑀭𑀽𑀧𑀪𑀯𑀲𑁆𑀲 𑀅𑀪𑀸𑀯𑀸 𑀤𑁆𑀯𑁂𑀯 𑀆𑀧𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀫𑀸 𑀏𑀯𑀁 𑀅𑀯𑀘, 𑀬𑀣𑀸 𑀯𑀼𑀢𑁆𑀢𑀫𑀢𑁆𑀣𑀁 𑀥𑀸𑀭𑁂𑀳𑀻𑀢𑀺.

𑁨𑁪. 𑀢𑀢𑁆𑀭𑀸𑀢𑀺 𑀅𑀝𑁆𑀞𑀲𑀼 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑁂𑀲𑀼 𑀪𑀼𑀫𑁆𑀫𑀁. 𑀇𑀥𑀸𑀧𑀺 𑀭𑀽𑀧𑀺𑀁 𑀯𑀸𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀲𑀜𑁆𑀜𑀸 𑀲𑀫𑁆𑀫𑁄𑀳𑁄𑀢𑀺 𑀦𑀺𑀲𑁆𑀲𑀜𑁆𑀜𑀪𑀸𑀯𑁄 𑀦𑀸𑀫𑁂𑀲 𑀲𑀫𑁆𑀫𑁄𑀳𑀝𑁆𑀞𑀸𑀦𑀁. 𑀬𑁄 𑀳𑀺 𑀓𑀺𑀜𑁆𑀘𑀺 𑀦 𑀚𑀸𑀦𑀸𑀢𑀺, 𑀢𑀁 𑀅𑀲𑀜𑁆𑀜𑀻 𑀏𑀲𑁄𑀢𑀺 𑀯𑀤𑀦𑁆𑀢𑀺. 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑀲𑀗𑁆𑀔𑀸𑀭𑀫𑀢𑁆𑀢𑁂𑀦𑀸𑀢𑀺 𑀤𑀺𑀝𑁆𑀞𑀯𑀺𑀜𑁆𑀜𑀸𑀢𑀩𑁆𑀩𑀫𑀢𑁆𑀢𑁂𑀦 𑀲𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑀫𑀢𑁆𑀢𑁂𑀦 𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑀫𑀢𑁆𑀢𑁂𑀦. 𑀏𑀢𑁆𑀣 𑀘 𑀯𑀺𑀚𑀸𑀦𑀸𑀢𑀻𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀁, 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀩𑁆𑀩𑀫𑀢𑁆𑀢𑁂𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑀲𑀜𑁆𑀜𑀸𑀧𑀯𑀢𑁆𑀢𑀺𑀫𑀢𑁆𑀢𑁂𑀦𑀸𑀢𑀺 𑀅𑀬𑀜𑁆𑀳𑀺 𑀏𑀢𑁆𑀣 𑀅𑀢𑁆𑀣𑁄. 𑀲𑀗𑁆𑀔𑀸𑀭𑀫𑀢𑁆𑀢𑁂𑀦𑀸𑀢𑀺 𑀑𑀴𑀸𑀭𑀺𑀓𑀲𑀗𑁆𑀔𑀸𑀭𑀧𑀯𑀢𑁆𑀢𑀺𑀫𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀏𑀢𑀲𑁆𑀲 𑀆𑀬𑀢𑀦𑀲𑁆𑀲𑀸𑀢𑀺 𑀏𑀢𑀲𑁆𑀲 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑁆𑀲. 𑀉𑀧𑀲𑀫𑁆𑀧𑀤𑀦𑁆𑀢𑀺 𑀧𑀝𑀺𑀮𑀸𑀪𑀁. 𑀩𑁆𑀬𑀲𑀦𑀁 𑀳𑁂𑀢𑀦𑁆𑀢𑀺 𑀯𑀺𑀦𑀸𑀲𑁄 𑀳𑁂𑀲, 𑀯𑀼𑀝𑁆𑀞𑀸𑀦𑀁 𑀳𑁂𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀤𑁆𑀯𑀸𑀭𑀺𑀓𑀲𑀜𑁆𑀜𑀸𑀧𑀯𑀢𑁆𑀢𑀜𑁆𑀳𑀺 𑀑𑀴𑀸𑀭𑀺𑀓𑀲𑀗𑁆𑀔𑀸𑀭𑀧𑀯𑀢𑁆𑀢𑀁 𑀯𑀸 𑀅𑀧𑁆𑀧𑀯𑀢𑁆𑀢𑀁 𑀓𑀢𑁆𑀯𑀸 𑀢𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁. 𑀢𑀲𑁆𑀲 𑀧𑀦 𑀧𑀯𑀢𑁆𑀢𑁂𑀦 𑀢𑀢𑁄 𑀯𑀼𑀝𑁆𑀞𑀸𑀦𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀗𑁆𑀔𑀸𑀭𑀲𑀫𑀸𑀧𑀢𑁆𑀢𑀺𑀧𑀢𑁆𑀢𑀩𑁆𑀩𑀫𑀓𑁆𑀔𑀸𑀬𑀢𑀻𑀢𑀺 𑀑𑀴𑀸𑀭𑀺𑀓𑀲𑀗𑁆𑀔𑀸𑀭𑀧𑀯𑀢𑁆𑀢𑀺𑀬𑀸 𑀧𑀢𑁆𑀢𑀩𑁆𑀩𑀦𑁆𑀢𑀺 𑀦 𑀅𑀓𑁆𑀔𑀸𑀬𑀢𑀺. 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀫𑀸𑀧𑀢𑁆𑀢𑀺𑀧𑀢𑁆𑀢𑀩𑁆𑀩𑀦𑁆𑀢𑀺 𑀲𑀗𑁆𑀔𑀸𑀭𑀸𑀦𑀁𑀬𑁂𑀯 𑀅𑀯𑀲𑁂𑀲𑀸 𑀪𑀸𑀯𑀦𑀸𑀯𑀲𑁂𑀦 𑀲𑀩𑁆𑀩𑀲𑀼𑀔𑀼𑀫𑀪𑀸𑀯𑀁 𑀧𑀢𑁆𑀢𑀸 𑀲𑀗𑁆𑀔𑀸𑀭𑀸, 𑀢𑁂𑀲𑀁 𑀧𑀯𑀢𑁆𑀢𑀺𑀬𑀸 𑀏𑀢𑀁 𑀧𑀢𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀭𑀽𑀧𑁂𑀲𑀼 𑀳𑀺 𑀲𑀗𑁆𑀔𑀸𑀭𑁂𑀲𑀼 𑀧𑀯𑀢𑁆𑀢𑁂𑀲𑀼 𑀏𑀢𑀁 𑀧𑀢𑁆𑀢𑀩𑁆𑀩𑀁 𑀦𑀸𑀫 𑀳𑁄𑀢𑀺. 𑀢𑀬𑀺𑀤𑀦𑁆𑀢𑀺 𑀢𑀁 𑀇𑀤𑀁 𑀏𑀢𑀁 𑀲𑀼𑀔𑀼𑀫𑀫𑁆𑀧𑀺 𑀲𑀫𑀸𑀦𑀁 𑀲𑀗𑁆𑀔𑀢𑀁 𑀲𑀗𑁆𑀔𑀢𑀢𑁆𑀢𑀸 𑀘 𑀑𑀴𑀸𑀭𑀺𑀓𑀁.

𑁨𑁫. 𑀢𑀢𑁆𑀭𑀸𑀢𑀺 𑀲𑀢𑁆𑀢𑀲𑀼 𑀉𑀘𑁆𑀙𑁂𑀤𑀯𑀸𑀤𑁂𑀲𑀼 𑀪𑀼𑀫𑁆𑀫𑀁. 𑀉𑀤𑁆𑀥𑀁 𑀲𑀭𑀦𑁆𑀢𑀺 𑀉𑀤𑁆𑀥𑀁 𑀯𑀼𑀘𑁆𑀘𑀢𑀺 𑀅𑀦𑀸𑀕𑀢𑀲𑀁𑀲𑀸𑀭𑀯𑀸𑀤𑁄, 𑀅𑀦𑀸𑀕𑀢𑀁 𑀲𑀁𑀲𑀸𑀭𑀯𑀸𑀤𑀁 𑀲𑀭𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀆𑀲𑀢𑁆𑀢𑀺𑀁𑀬𑁂𑀯 𑀅𑀪𑀺𑀯𑀤𑀦𑁆𑀢𑀺 𑀮𑀕𑁆𑀕𑀦𑀓𑀁𑀬𑁂𑀯 𑀯𑀤𑀦𑁆𑀢𑀺. ‘‘𑀆𑀲𑀢𑁆𑀢’’𑀦𑁆𑀢𑀺𑀧𑀺 𑀧𑀸𑀞𑁄, 𑀢𑀡𑁆𑀳𑀁𑀬𑁂𑀯 𑀯𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀺 𑀧𑁂𑀘𑁆𑀘 𑀪𑀯𑀺𑀲𑁆𑀲𑀸𑀫𑀸𑀢𑀺 𑀏𑀯𑀁 𑀧𑁂𑀘𑁆𑀘 𑀪𑀯𑀺𑀲𑁆𑀲𑀸𑀫. 𑀔𑀢𑁆𑀢𑀺𑀬𑀸 𑀪𑀯𑀺𑀲𑁆𑀲𑀸𑀫, 𑀩𑁆𑀭𑀸𑀳𑁆𑀫𑀡𑀸 𑀪𑀯𑀺𑀲𑁆𑀲𑀸𑀫𑀸𑀢𑀺 𑀏𑀯𑀫𑁂𑀢𑁆𑀣 𑀦𑀬𑁄 𑀦𑁂𑀢𑀩𑁆𑀩𑁄. 𑀯𑀸𑀡𑀺𑀚𑀽𑀧𑀫𑀸 𑀫𑀜𑁆𑀜𑁂𑀢𑀺 𑀯𑀸𑀡𑀺𑀚𑀽𑀧𑀫𑀸 𑀯𑀺𑀬 𑀯𑀸𑀡𑀺𑀚𑀧𑀝𑀺𑀪𑀸𑀕𑀸 𑀯𑀸𑀡𑀺𑀚𑀲𑀤𑀺𑀲𑀸 𑀫𑀬𑁆𑀳𑀁 𑀉𑀧𑀝𑁆𑀞𑀳𑀦𑁆𑀢𑀺. 𑀲𑀓𑁆𑀓𑀸𑀬𑀪𑀬𑀸𑀢𑀺 𑀲𑀓𑁆𑀓𑀸𑀬𑀲𑁆𑀲 𑀪𑀬𑀸. 𑀢𑁂 𑀳𑀺 𑀬𑀣𑁂𑀯 ‘‘𑀘𑀢𑁆𑀢𑀸𑀭𑁄 𑀔𑁄, 𑀫𑀳𑀸𑀭𑀸𑀚, 𑀅𑀪𑀬𑀲𑁆𑀲 𑀪𑀸𑀬𑀦𑁆𑀢𑀺. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀕𑀡𑁆𑀟𑀼𑀧𑁆𑀧𑀸𑀤𑁄 𑀔𑁄, 𑀫𑀳𑀸𑀭𑀸𑀚, 𑀪𑀬𑀸 𑀧𑀣𑀯𑀺𑀁 𑀦 𑀔𑀸𑀤𑀢𑀺 ‘𑀫𑀸 𑀧𑀣𑀯𑀻 𑀔𑀺𑀬𑀻’𑀢𑀺, 𑀓𑁄𑀦𑁆𑀢𑁄 𑀔𑁄, 𑀫𑀳𑀸𑀭𑀸𑀚, 𑀏𑀓𑀧𑀸𑀤𑁂𑀦 𑀢𑀺𑀝𑁆𑀞𑀢𑀺 ‘𑀫𑀸 𑀧𑀣𑀯𑀻 𑀑𑀲𑀻𑀤𑀻’𑀢𑀺, 𑀓𑀺𑀓𑀻 𑀔𑁄, 𑀫𑀳𑀸𑀭𑀸𑀚, 𑀉𑀢𑁆𑀢𑀸𑀦𑀸 𑀲𑁂𑀢𑀺 ‘𑀫𑀸 𑀅𑀫𑁆𑀪𑀸 𑀉𑀦𑁆𑀤𑁆𑀭𑀺𑀬𑀻’𑀢𑀺, 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀺𑀓𑁄 𑀔𑁄, 𑀫𑀳𑀸𑀭𑀸𑀚, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦 𑀘𑀭𑀢𑀺 ‘𑀫𑀸 𑀮𑁄𑀓𑁄 𑀉𑀘𑁆𑀙𑀺𑀚𑁆𑀚𑀻’𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀅𑀪𑀬𑀲𑁆𑀲 𑀪𑀸𑀬𑀦𑁆𑀢𑀺, 𑀏𑀯𑀁 𑀲𑀓𑁆𑀓𑀸𑀬𑀲𑁆𑀲 𑀪𑀸𑀬𑀦𑁆𑀢𑀺’’. 𑀲𑀓𑁆𑀓𑀸𑀬𑀧𑀭𑀺𑀚𑁂𑀕𑀼𑀘𑁆𑀙𑀸𑀢𑀺 𑀢𑀫𑁂𑀯 𑀢𑁂𑀪𑀽𑀫𑀓𑀲𑀗𑁆𑀔𑀸𑀢𑀁 𑀲𑀓𑁆𑀓𑀸𑀬𑀁 𑀧𑀭𑀺𑀚𑀺𑀕𑀼𑀘𑁆𑀙𑀫𑀸𑀦𑀸. 𑀲𑀸 𑀕𑀤𑁆𑀤𑀼𑀮𑀩𑀤𑁆𑀥𑁄𑀢𑀺 𑀤𑀡𑁆𑀟𑀓𑁂 𑀭𑀚𑁆𑀚𑀼𑀁 𑀧𑀯𑁂𑀲𑁂𑀢𑁆𑀯𑀸 𑀩𑀤𑁆𑀥𑀲𑀼𑀦𑀔𑁄. 𑀏𑀯𑀫𑁂𑀯𑀺𑀫𑁂𑀢𑀺 𑀏𑀢𑁆𑀣 𑀤𑀴𑁆𑀳𑀢𑁆𑀣𑀫𑁆𑀪𑁄 𑀯𑀺𑀬 𑀔𑀻𑀮𑁄 𑀯𑀺𑀬 𑀘 𑀢𑁂𑀪𑀽𑀫𑀓𑀥𑀫𑁆𑀫𑀲𑀗𑁆𑀔𑀸𑀢𑁄 𑀲𑀓𑁆𑀓𑀸𑀬𑁄 𑀤𑀝𑁆𑀞𑀩𑁆𑀩𑁄, 𑀲𑀸 𑀯𑀺𑀬 𑀤𑀺𑀝𑁆𑀞𑀺𑀕𑀢𑀺𑀓𑁄, 𑀤𑀡𑁆𑀟𑀓𑁄 𑀯𑀺𑀬 𑀤𑀺𑀝𑁆𑀞𑀺, 𑀭𑀚𑁆𑀚𑀼 𑀯𑀺𑀬 𑀢𑀡𑁆𑀳𑀸, 𑀕𑀤𑁆𑀤𑀼𑀮𑁂𑀦 𑀩𑀦𑁆𑀥𑀺𑀢𑁆𑀯𑀸 𑀣𑀫𑁆𑀪𑁂 𑀯𑀸 𑀔𑀻𑀮𑁂 𑀯𑀸 𑀉𑀧𑀦𑀺𑀩𑀤𑁆𑀥𑀲𑀼𑀦𑀔𑀲𑁆𑀲 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀙𑀺𑀦𑁆𑀤𑀺𑀢𑁆𑀯𑀸 𑀕𑀦𑁆𑀢𑀼𑀁 𑀅𑀲𑀫𑀢𑁆𑀣𑀲𑁆𑀲 𑀅𑀦𑀼𑀧𑀭𑀺𑀥𑀸𑀯𑀦𑀁 𑀯𑀺𑀬 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀤𑀺𑀝𑁆𑀞𑀺𑀤𑀡𑁆𑀟𑀓𑁂 𑀧𑀯𑁂𑀲𑀺𑀢𑀸𑀬 𑀢𑀡𑁆𑀳𑀸𑀭𑀚𑁆𑀚𑀼𑀬𑀸 𑀩𑀦𑁆𑀥𑀺𑀢𑁆𑀯𑀸 𑀲𑀓𑁆𑀓𑀸𑀬𑁂 𑀉𑀧𑀦𑀺𑀩𑀤𑁆𑀥𑀲𑁆𑀲 𑀅𑀦𑀼𑀧𑀭𑀺𑀥𑀸𑀯𑀦𑀁 𑀯𑁂𑀤𑀺𑀢𑀩𑁆𑀩𑀁.

𑁨𑁬. 𑀇𑀫𑀸𑀦𑁂𑀯 𑀧𑀜𑁆𑀘𑀸𑀬𑀢𑀦𑀸𑀦𑀻𑀢𑀺 𑀇𑀫𑀸𑀦𑁂𑀯 𑀧𑀜𑁆𑀘 𑀓𑀸𑀭𑀡𑀸𑀦𑀺. 𑀇𑀢𑀺 𑀫𑀸𑀢𑀺𑀓𑀁 𑀞𑀧𑁂𑀦𑁆𑀢𑁂𑀦𑀧𑀺 𑀧𑀜𑁆𑀘𑁂𑀯 𑀞𑀧𑀺𑀢𑀸𑀦𑀺, 𑀦𑀺𑀕𑀫𑁂𑀦𑁆𑀢𑁂𑀦𑀧𑀺 𑀧𑀜𑁆𑀘𑁂𑀯 𑀦𑀺𑀕𑀫𑀺𑀢𑀸𑀦𑀺, 𑀪𑀸𑀚𑁂𑀦𑁆𑀢𑁂𑀦 𑀧𑀦 𑀘𑀢𑁆𑀢𑀸𑀭𑀺 𑀪𑀸𑀚𑀺𑀢𑀸𑀦𑀺. 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀓𑀼𑀳𑀺𑀁 𑀧𑀯𑀺𑀝𑁆𑀞𑀦𑁆𑀢𑀺. 𑀏𑀓𑀢𑁆𑀢𑀦𑀸𑀦𑀢𑁆𑀢𑀯𑀲𑁂𑀦 𑀤𑁆𑀯𑀻𑀲𑀼 𑀧𑀤𑁂𑀲𑀼 𑀧𑀯𑀺𑀝𑁆𑀞𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁨𑁭. 𑀏𑀯𑀜𑁆𑀘 𑀘𑀢𑀼𑀘𑀢𑁆𑀢𑀸𑀮𑀻𑀲 𑀅𑀧𑀭𑀦𑁆𑀢𑀓𑀧𑁆𑀧𑀺𑀓𑁂 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀝𑁆𑀞𑀸𑀭𑀲 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑁂 𑀤𑀲𑁆𑀲𑁂𑀢𑀼𑀁 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀢𑀻𑀢𑀓𑁄𑀝𑁆𑀞𑀸𑀲𑀲𑀗𑁆𑀔𑀸𑀢𑀁 𑀧𑀼𑀩𑁆𑀩𑀦𑁆𑀢𑀁 𑀓𑀧𑁆𑀧𑁂𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀻𑀢𑀺 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸. 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑁄 𑀯𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸. 𑀏𑀯𑀁 𑀲𑁂𑀲𑀫𑁆𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸𑀢𑀺 𑀭𑀽𑀧𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀅𑀢𑁆𑀢𑀸𑀢𑀺 𑀘 𑀮𑁄𑀓𑁄𑀢𑀺 𑀘 𑀕𑀳𑁂𑀢𑁆𑀯𑀸 𑀲𑀲𑁆𑀲𑀢𑁄 𑀅𑀫𑀭𑁄 𑀦𑀺𑀘𑁆𑀘𑁄 𑀥𑀼𑀯𑁄𑀢𑀺 𑀅𑀪𑀺𑀯𑀤𑀦𑁆𑀢𑀺. 𑀬𑀣𑀸𑀳 ‘‘𑀭𑀽𑀧𑀁 𑀅𑀢𑁆𑀢𑀸 𑀘𑁂𑀯 𑀮𑁄𑀓𑁄 𑀘 𑀲𑀲𑁆𑀲𑀢𑁄 𑀘𑀸𑀢𑀺 𑀅𑀢𑁆𑀢𑀸𑀦𑀜𑁆𑀘 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀦𑁆𑀢𑀻’’𑀢𑀺 𑀯𑀺𑀢𑁆𑀣𑀸𑀭𑁄. 𑀅𑀲𑀲𑁆𑀲𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀧𑀞𑀫𑀯𑀸𑀤𑁂𑀦 𑀘𑀢𑁆𑀢𑀸𑀭𑁄 𑀲𑀲𑁆𑀲𑀢𑀯𑀸𑀤𑀸 𑀯𑀼𑀢𑁆𑀢𑀸, 𑀤𑀼𑀢𑀺𑀬𑀯𑀸𑀤𑁂𑀦 𑀲𑀢𑁆𑀢 𑀉𑀘𑁆𑀙𑁂𑀤𑀯𑀸𑀤𑀸.

𑀦𑀦𑀼 𑀘𑁂𑀢𑁂 𑀳𑁂𑀝𑁆𑀞𑀸 𑀆𑀕𑀢𑀸, 𑀇𑀥 𑀓𑀲𑁆𑀫𑀸 𑀧𑀼𑀦 𑀕𑀳𑀺𑀢𑀸𑀢𑀺. 𑀳𑁂𑀝𑁆𑀞𑀸 𑀢𑀢𑁆𑀣 𑀢𑀢𑁆𑀣 𑀫𑀢𑁄 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀆𑀕𑀢𑀸. 𑀇𑀥 𑀧𑀦 𑀧𑀼𑀩𑁆𑀩𑁂𑀦𑀺𑀯𑀸𑀲𑀮𑀸𑀪𑀻 𑀤𑀺𑀝𑁆𑀞𑀺𑀕𑀢𑀺𑀓𑁄 𑀅𑀢𑀻𑀢𑀁 𑀧𑀲𑁆𑀲𑀢𑀺, 𑀦 𑀅𑀦𑀸𑀕𑀢𑀁, 𑀢𑀲𑁆𑀲 𑀏𑀯𑀁 𑀳𑁄𑀢𑀺 ‘‘𑀧𑀼𑀩𑁆𑀩𑀦𑁆𑀢𑀢𑁄 𑀆𑀕𑀢𑁄 𑀅𑀢𑁆𑀢𑀸 𑀇𑀥𑁂𑀯 𑀉𑀘𑁆𑀙𑀺𑀚𑁆𑀚𑀢𑀺, 𑀇𑀢𑁄 𑀧𑀭𑀁 𑀦 𑀕𑀘𑁆𑀙𑀢𑀻’’𑀢𑀺 𑀇𑀫𑀲𑁆𑀲𑀢𑁆𑀣𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀕𑀳𑀺𑀢𑀸. 𑀢𑀢𑀺𑀬𑀯𑀸𑀤𑁂𑀦 𑀘𑀢𑁆𑀢𑀸𑀭𑁄 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀸 𑀯𑀼𑀢𑁆𑀢𑀸, 𑀘𑀢𑀼𑀢𑁆𑀣𑀯𑀸𑀤𑁂𑀦 𑀘𑀢𑁆𑀢𑀸𑀭𑁄 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸 𑀯𑀼𑀢𑁆𑀢𑀸. 𑀅𑀦𑁆𑀢𑀯𑀸𑀢𑀺 𑀲𑀧𑀭𑀺𑀬𑀦𑁆𑀢𑁄 𑀧𑀭𑀺𑀘𑁆𑀙𑀺𑀦𑁆𑀦𑁄 𑀧𑀭𑀺𑀯𑀝𑀼𑀫𑁄. 𑀅𑀯𑀟𑁆𑀠𑀺𑀢𑀓𑀲𑀺𑀡𑀲𑁆𑀲 𑀢𑀁 𑀓𑀲𑀺𑀡𑀁 𑀅𑀢𑁆𑀢𑀸𑀢𑀺 𑀘 𑀮𑁄𑀓𑁄𑀢𑀺 𑀘 𑀕𑀳𑁂𑀢𑁆𑀯𑀸 𑀏𑀯𑀁 𑀳𑁄𑀢𑀺. 𑀤𑀼𑀢𑀺𑀬𑀯𑀸𑀤𑁄 𑀯𑀟𑁆𑀠𑀺𑀢𑀓𑀲𑀺𑀡𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑁄, 𑀢𑀢𑀺𑀬𑀯𑀸𑀤𑁄 𑀢𑀺𑀭𑀺𑀬𑀁 𑀯𑀟𑁆𑀠𑁂𑀢𑁆𑀯𑀸 𑀉𑀤𑁆𑀥𑀫𑀥𑁄 𑀅𑀯𑀟𑁆𑀠𑀺𑀢𑀓𑀲𑀺𑀡𑀲𑁆𑀲, 𑀘𑀢𑀼𑀢𑁆𑀣𑀯𑀸𑀤𑁄 𑀢𑀓𑁆𑀓𑀺𑀯𑀲𑁂𑀦 𑀯𑀼𑀢𑁆𑀢𑁄. 𑀅𑀦𑀦𑁆𑀢𑀭𑀘𑀢𑀼𑀓𑁆𑀓𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀓𑀦𑁆𑀢𑀲𑀼𑀔𑀻𑀢𑀺 𑀦𑀺𑀭𑀦𑁆𑀢𑀭𑀲𑀼𑀔𑀻. 𑀅𑀬𑀁 𑀤𑀺𑀝𑁆𑀞𑀺 𑀮𑀸𑀪𑀻𑀚𑀸𑀢𑀺𑀲𑁆𑀲𑀭𑀢𑀓𑁆𑀓𑀻𑀦𑀁 𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺. 𑀮𑀸𑀪𑀺𑀦𑁄 𑀳𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀔𑀢𑁆𑀢𑀺𑀬𑀸𑀤𑀺𑀓𑀼𑀮𑁂 𑀏𑀓𑀦𑁆𑀢𑀲𑀼𑀔𑀫𑁂𑀯 𑀅𑀢𑁆𑀢𑀦𑁄 𑀚𑀸𑀢𑀺𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀏𑀯𑀁 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺. 𑀢𑀣𑀸 𑀚𑀸𑀢𑀺𑀲𑁆𑀲𑀭𑀲𑁆𑀲 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀲𑀼𑀔𑀫𑀦𑀼𑀪𑀯𑀢𑁄 𑀅𑀢𑀻𑀢𑀸𑀲𑀼 𑀲𑀢𑁆𑀢𑀲𑀼 𑀚𑀸𑀢𑀻𑀲𑀼 𑀢𑀸𑀤𑀺𑀲𑀫𑁂𑀯 𑀅𑀢𑁆𑀢𑀪𑀸𑀯𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲. 𑀢𑀓𑁆𑀓𑀺𑀲𑁆𑀲 𑀧𑀦 𑀇𑀥 𑀲𑀼𑀔𑀲𑀫𑀗𑁆𑀕𑀺𑀦𑁄 ‘‘𑀅𑀢𑀻𑀢𑁂𑀧𑀸𑀳𑀁 𑀏𑀯𑀫𑁂𑀯 𑀅𑀳𑁄𑀲𑀺’’𑀦𑁆𑀢𑀺 𑀢𑀓𑁆𑀓𑁂𑀦𑁂𑀯 𑀉𑀧𑁆𑀧𑀚𑁆𑀚𑀢𑀺.

𑀏𑀓𑀦𑁆𑀢𑀤𑀼𑀓𑁆𑀔𑀻𑀢𑀺 𑀅𑀬𑀁 𑀤𑀺𑀝𑁆𑀞𑀺 𑀮𑀸𑀪𑀺𑀦𑁄 𑀦𑀼𑀧𑁆𑀧𑀚𑁆𑀚𑀢𑀺. 𑀲𑁄 𑀳𑀺 𑀏𑀓𑀦𑁆𑀢𑁂𑀦𑁂𑀯 𑀇𑀥 𑀛𑀸𑀦𑀲𑀼𑀔𑁂𑀦 𑀲𑀼𑀔𑀻 𑀳𑁄𑀢𑀺. 𑀇𑀥 𑀤𑀼𑀓𑁆𑀔𑁂𑀦 𑀨𑀼𑀝𑁆𑀞𑀲𑁆𑀲 𑀧𑀦 𑀚𑀸𑀢𑀺𑀲𑁆𑀲𑀭𑀲𑁆𑀲 𑀢𑀓𑁆𑀓𑀺𑀲𑁆𑀲𑁂𑀯 𑀘 𑀲𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀢𑀺𑀬𑀸 𑀇𑀥 𑀯𑁄𑀓𑀺𑀡𑁆𑀡𑀲𑀼𑀔𑀤𑀼𑀓𑁆𑀔𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀢𑁂𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀣𑀸 𑀘𑀢𑀼𑀢𑁆𑀣𑀸 𑀤𑀺𑀝𑁆𑀞𑀺. 𑀮𑀸𑀪𑀺𑀦𑁄 𑀳𑀺 𑀇𑀤𑀸𑀦𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀲𑁂𑀦 𑀅𑀤𑀼𑀓𑁆𑀔𑀫𑀲𑀼𑀔𑀲𑁆𑀲, 𑀧𑀼𑀩𑁆𑀩𑁂 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀫𑁂𑀯 𑀩𑁆𑀭𑀳𑁆𑀫𑀮𑁄𑀓𑀁 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲. 𑀚𑀸𑀢𑀺𑀲𑁆𑀲𑀭𑀲𑁆𑀲𑀸𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀫𑀚𑁆𑀛𑀢𑁆𑀢𑀲𑁆𑀲, 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲𑀸𑀧𑀺 𑀫𑀚𑁆𑀛𑀢𑁆𑀢𑀪𑀽𑀢𑀝𑁆𑀞𑀸𑀦𑀫𑁂𑀯 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲, 𑀢𑀓𑁆𑀓𑀺𑀦𑁄𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀫𑀚𑁆𑀛𑀢𑁆𑀢𑀲𑁆𑀲, 𑀅𑀢𑀻𑀢𑁂𑀧𑀺 𑀏𑀯𑀁 𑀪𑀯𑀺𑀲𑁆𑀲𑀢𑀻𑀢𑀺 𑀢𑀓𑁆𑀓𑁂𑀦𑁂𑀯 𑀕𑀡𑁆𑀳𑀦𑁆𑀢𑀲𑁆𑀲 𑀏𑀲𑀸 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺. 𑀏𑀢𑁆𑀢𑀸𑀯𑀢𑀸 𑀘𑀢𑁆𑀢𑀸𑀭𑁄 𑀲𑀲𑁆𑀲𑀢𑀯𑀸𑀤𑀸, 𑀘𑀢𑁆𑀢𑀸𑀭𑁄 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸, 𑀘𑀢𑁆𑀢𑀸𑀭𑁄 𑀅𑀦𑁆𑀢𑀸𑀦𑀦𑁆𑀢𑀺𑀓𑀸, 𑀘𑀢𑁆𑀢𑀸𑀭𑁄 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸, 𑀤𑁆𑀯𑁂 𑀅𑀥𑀺𑀘𑁆𑀘-𑀲𑀫𑀼𑀧𑁆𑀧𑀦𑁆𑀦𑀺𑀓𑀸𑀢𑀺 𑀅𑀝𑁆𑀞𑀸𑀭𑀲𑀧𑀺 𑀧𑀼𑀩𑁆𑀩𑀦𑁆𑀢𑀓𑀧𑁆𑀧𑀺𑀓𑀸 𑀓𑀣𑀺𑀢𑀸 𑀳𑁄𑀦𑁆𑀢𑀺.

𑁨𑁮. 𑀇𑀤𑀸𑀦𑀺 𑀤𑀺𑀝𑁆𑀞𑀼𑀤𑁆𑀥𑀸𑀭𑀁 𑀉𑀤𑁆𑀥𑀭𑀦𑁆𑀢𑁄 𑀢𑀢𑁆𑀭, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀘𑁆𑀘𑀢𑁆𑀢𑀁𑀬𑁂𑀯 𑀜𑀸𑀡𑀦𑁆𑀢𑀺 𑀧𑀘𑁆𑀘𑀓𑁆𑀔𑀜𑀸𑀡𑀁. 𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁. 𑀧𑀭𑀺𑀬𑁄𑀤𑀸𑀢𑀦𑁆𑀢𑀺 𑀧𑀪𑀲𑁆𑀲𑀭𑀁. 𑀲𑀩𑁆𑀩𑀧𑀤𑁂𑀳𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀁𑀬𑁂𑀯 𑀓𑀣𑀺𑀢𑀁. 𑀲𑀤𑁆𑀥𑀸𑀤𑀬𑁄 𑀳𑀺 𑀧𑀜𑁆𑀘 𑀥𑀫𑁆𑀫𑀸 𑀩𑀸𑀳𑀺𑀭𑀲𑀫𑀬𑀲𑁆𑀫𑀺𑀫𑁆𑀧𑀺 𑀳𑁄𑀦𑁆𑀢𑀺, 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀲𑀸𑀲𑀦𑀲𑁆𑀫𑀺𑀁𑀬𑁂𑀯. 𑀢𑀢𑁆𑀣 𑀜𑀸𑀡𑀪𑀸𑀕𑀫𑀢𑁆𑀢𑀫𑁂𑀯 𑀧𑀭𑀺𑀬𑁄𑀤𑀧𑁂𑀦𑁆𑀢𑀻𑀢𑀺 𑀫𑀬𑀫𑀺𑀤𑀁 𑀚𑀸𑀦𑀸𑀫𑀸𑀢𑀺 𑀏𑀯𑀁 𑀢𑀢𑁆𑀣 𑀜𑀸𑀡𑀓𑁄𑀝𑁆𑀞𑀸𑀲𑀁 𑀑𑀢𑀸𑀭𑁂𑀦𑁆𑀢𑀺𑀬𑁂𑀯. 𑀉𑀧𑀸𑀤𑀸𑀦𑀫𑀓𑁆𑀔𑀸𑀬𑀢𑀻𑀢𑀺 𑀦 𑀢𑀁 𑀜𑀸𑀡𑀁, 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀦𑀸𑀫𑁂𑀢𑀁, 𑀢𑀲𑁆𑀫𑀸 𑀢𑀤𑀧𑀺 𑀢𑁂𑀲𑀁 𑀪𑀯𑀦𑁆𑀢𑀸𑀦𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀅𑀓𑁆𑀔𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀅𑀣𑀸𑀧𑀺 𑀢𑀁 𑀚𑀸𑀦𑀦𑀫𑀢𑁆𑀢𑀮𑀓𑁆𑀔𑀡𑀢𑁆𑀢𑀸 𑀜𑀸𑀡𑀪𑀸𑀕𑀫𑀢𑁆𑀢𑀫𑁂𑀯, 𑀢𑀣𑀸𑀧𑀺 𑀢𑀲𑁆𑀲 𑀤𑀲𑁆𑀲𑀦𑀲𑁆𑀲 𑀅𑀦𑀼𑀧𑀸𑀢𑀺𑀯𑀢𑁆𑀢𑀦𑀢𑁄 𑀉𑀧𑀸𑀤𑀸𑀦𑀧𑀘𑁆𑀘𑀬𑀢𑁄 𑀘 𑀉𑀧𑀸𑀤𑀸𑀦𑀫𑁂𑀯. 𑀢𑀤𑀼𑀧𑀸𑀢𑀺𑀯𑀢𑁆𑀢𑁄𑀢𑀺 𑀢𑀁 𑀤𑀺𑀝𑁆𑀞𑀺𑀁 𑀅𑀢𑀺𑀓𑁆𑀓𑀦𑁆𑀢𑁄. 𑀏𑀢𑁆𑀢𑀸𑀯𑀢𑀸 𑀘𑀢𑁆𑀢𑀸𑀭𑁄 𑀲𑀲𑁆𑀲𑀢𑀯𑀸𑀤𑀸, 𑀘𑀢𑁆𑀢𑀸𑀭𑁄 𑀏𑀓𑀘𑁆𑀘𑀲𑀲𑁆𑀲𑀢𑀺𑀓𑀸, 𑀘𑀢𑁆𑀢𑀸𑀭𑁄 𑀅𑀦𑁆𑀢𑀸𑀦𑀦𑁆𑀢𑀺𑀓𑀸, 𑀘𑀢𑁆𑀢𑀸𑀭𑁄 𑀅𑀫𑀭𑀸𑀯𑀺𑀓𑁆𑀔𑁂𑀧𑀺𑀓𑀸, 𑀤𑁆𑀯𑁂 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀺𑀓𑀸, 𑀲𑁄𑀴𑀲 𑀲𑀜𑁆𑀜𑀻𑀯𑀸𑀤𑀸, 𑀅𑀝𑁆𑀞 𑀅𑀲𑀜𑁆𑀜𑀻𑀯𑀸𑀤𑀸, 𑀅𑀝𑁆𑀞 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸, 𑀲𑀢𑁆𑀢 𑀉𑀘𑁆𑀙𑁂𑀤𑀯𑀸𑀤𑀸, 𑀧𑀜𑁆𑀘 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸𑀢𑀺 𑀩𑁆𑀭𑀳𑁆𑀫𑀚𑀸𑀮𑁂 𑀆𑀕𑀢𑀸 𑀤𑁆𑀯𑀸𑀲𑀝𑁆𑀞𑀺𑀧𑀺 𑀤𑀺𑀝𑁆𑀞𑀺𑀬𑁄 𑀓𑀣𑀺𑀢𑀸 𑀳𑁄𑀦𑁆𑀢𑀺. 𑀩𑁆𑀭𑀳𑁆𑀫𑀚𑀸𑀮𑁂 𑀧𑀦 𑀓𑀣𑀺𑀢𑁂 𑀇𑀤𑀁 𑀲𑀼𑀢𑁆𑀢𑀁 𑀅𑀓𑀣𑀺𑀢𑀫𑁂𑀯 𑀳𑁄𑀢𑀺. 𑀓𑀲𑁆𑀫𑀸? 𑀇𑀥 𑀢𑀢𑁄 𑀅𑀢𑀺𑀭𑁂𑀓𑀸𑀬 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀆𑀕𑀢𑀢𑁆𑀢𑀸. 𑀇𑀫𑀲𑁆𑀫𑀺𑀁 𑀧𑀦 𑀓𑀣𑀺𑀢𑁂 𑀩𑁆𑀭𑀳𑁆𑀫𑀚𑀸𑀮𑀁 𑀓𑀣𑀺𑀢𑀫𑁂𑀯 𑀳𑁄𑀢𑀺.

𑁩𑁦. 𑀇𑀤𑀸𑀦𑀺 𑀇𑀫𑀸 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑀫𑀼𑀔𑁂𑀦𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀢𑀺 𑀧𑀭𑀺𑀘𑁆𑀘𑀸𑀕𑁂𑀦. 𑀓𑀸𑀫𑀲𑀁𑀬𑁄𑀚𑀦𑀸𑀦𑀁 𑀅𑀦𑀥𑀺𑀝𑁆𑀞𑀸𑀦𑀸𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀢𑀡𑁆𑀳𑀸𑀦𑀁 𑀦𑀺𑀲𑁆𑀲𑀝𑁆𑀞𑀢𑁆𑀢𑀸. 𑀧𑀯𑀺𑀯𑁂𑀓𑀁 𑀧𑀻𑀢𑀺𑀦𑁆𑀢𑀺 𑀲𑀧𑁆𑀧𑀻𑀢𑀺𑀓𑀚𑁆𑀛𑀸𑀦𑀤𑁆𑀯𑀬𑀧𑀻𑀢𑀺𑀁. 𑀦𑀺𑀭𑀼𑀚𑁆𑀛𑀢𑀻𑀢𑀺 𑀛𑀸𑀦𑀦𑀺𑀭𑁄𑀥𑁂𑀦 𑀦𑀺𑀭𑀼𑀚𑁆𑀛𑀢𑀺. 𑀲𑀫𑀸𑀧𑀢𑁆𑀢𑀺𑀢𑁄 𑀧𑀦 𑀯𑀼𑀝𑁆𑀞𑀺𑀢𑀲𑁆𑀲 𑀦𑀺𑀭𑀼𑀤𑁆𑀥𑀸 𑀦𑀸𑀫 𑀳𑁄𑀢𑀺. 𑀬𑀣𑁂𑀯 𑀳𑀺 ‘‘𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀦𑀺𑀭𑁄𑀥𑀸 𑀉𑀧𑁆𑀧𑀚𑁆𑀚𑀢𑀺 𑀦𑀺𑀭𑀸𑀫𑀺𑀲𑀁 𑀲𑀼𑀔𑀁, 𑀦𑀺𑀭𑀸𑀫𑀺𑀲𑀲𑀼𑀔𑀲𑁆𑀲 𑀦𑀺𑀭𑁄𑀥𑀸 𑀉𑀧𑁆𑀧𑀚𑁆𑀚𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸’’𑀢𑀺 𑀏𑀢𑁆𑀣 𑀦 𑀅𑀬𑀫𑀢𑁆𑀣𑁄 𑀳𑁄𑀢𑀺 𑁋 𑀘𑀢𑀼𑀢𑁆𑀣𑀚𑁆𑀛𑀸𑀦𑀦𑀺𑀭𑁄𑀥𑀸 𑀢𑀢𑀺𑀬𑀚𑁆𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 𑀘𑀢𑀼𑀢𑁆𑀣𑀚𑁆𑀛𑀸𑀦𑀸 𑀯𑀼𑀝𑁆𑀞𑀸𑀬 𑀢𑀢𑀺𑀬𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀢𑀺, 𑀢𑀢𑀺𑀬𑀚𑁆𑀛𑀸𑀦𑀸 𑀯𑀼𑀝𑁆𑀞𑀸𑀬 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀲𑀫𑀸𑀧𑀚𑁆𑀚𑀢𑀻𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀉𑀧𑁆𑀧𑀚𑁆𑀚𑀢𑀺 𑀤𑁄𑀫𑀦𑀲𑁆𑀲𑀦𑁆𑀢𑀺 𑀳𑀻𑀦𑀚𑁆𑀛𑀸𑀦𑀧𑀭𑀺𑀬𑀸𑀤𑀸𑀦𑀓𑀤𑁄𑀫𑀦𑀲𑁆𑀲𑀁. 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀘𑀺𑀢𑁆𑀢𑀲𑁆𑀲 𑀧𑀦 𑀓𑀫𑁆𑀫𑀦𑀻𑀬𑀪𑀸𑀯𑁄 𑀓𑀣𑀺𑀢𑁄.

𑀧𑀯𑀺𑀯𑁂𑀓𑀸 𑀧𑀻𑀢𑀻𑀢𑀺 𑀲𑀸 𑀏𑀯 𑀛𑀸𑀦𑀤𑁆𑀯𑀬𑀧𑀻𑀢𑀺. 𑀬𑀁 𑀙𑀸𑀬𑀸 𑀚𑀳𑀢𑀻𑀢𑀺 𑀬𑀁 𑀞𑀸𑀦𑀁 𑀙𑀸𑀬𑀸 𑀚𑀳𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀲𑁆𑀫𑀺𑀁 𑀞𑀸𑀦𑁂 𑀙𑀸𑀬𑀸 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀆𑀢𑀧𑁄 𑀦𑀢𑁆𑀣𑀺. 𑀬𑀲𑁆𑀫𑀺𑀁 𑀆𑀢𑀧𑁄 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀙𑀸𑀬𑀸 𑀦𑀢𑁆𑀣𑀻𑀢𑀺.

𑁩𑁧. 𑀦𑀺𑀭𑀸𑀫𑀺𑀲𑀁 𑀲𑀼𑀔𑀦𑁆𑀢𑀺 𑀢𑀢𑀺𑀬𑀚𑁆𑀛𑀸𑀦𑀲𑀼𑀔𑀁.

𑁩𑁨. 𑀅𑀤𑀼𑀓𑁆𑀔𑀫𑀲𑀼𑀔𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑁂𑀤𑀦𑀁.

𑁩𑁩. 𑀅𑀦𑀼𑀧𑀸𑀤𑀸𑀦𑁄𑀳𑀫𑀲𑁆𑀫𑀻𑀢𑀺 𑀦𑀺𑀕𑁆𑀕𑀳𑀡𑁄 𑀅𑀳𑀫𑀲𑁆𑀫𑀺. 𑀦𑀺𑀩𑁆𑀩𑀸𑀦𑀲𑀧𑁆𑀧𑀸𑀬𑀦𑁆𑀢𑀺 𑀦𑀺𑀩𑁆𑀩𑀸𑀦𑀲𑁆𑀲 𑀲𑀧𑁆𑀧𑀸𑀬𑀁 𑀉𑀧𑀓𑀸𑀭𑀪𑀽𑀢𑀁. 𑀦𑀦𑀼 𑀘 𑀫𑀕𑁆𑀕𑀤𑀲𑁆𑀲𑀦𑀁 𑀦𑀸𑀫 𑀲𑀩𑁆𑀩𑀢𑁆𑀣 𑀦𑀺𑀓𑀦𑁆𑀢𑀺𑀬𑀸 𑀲𑀼𑀓𑁆𑀔𑀸𑀧𑀺𑀢𑀸𑀬 𑀉𑀧𑁆𑀧𑀚𑁆𑀚𑀢𑀺, 𑀓𑀣𑀫𑁂𑀢𑀁 𑀦𑀺𑀩𑁆𑀩𑀸𑀦𑀲𑁆𑀲 𑀉𑀧𑀓𑀸𑀭𑀧𑀝𑀺𑀧𑀤𑀸 𑀦𑀸𑀫 𑀚𑀸𑀢𑀦𑁆𑀢𑀺, 𑀲𑀩𑁆𑀩𑀢𑁆𑀣 𑀅𑀦𑀼𑀧𑀸𑀤𑀺𑀬𑀦𑀯𑀲𑁂𑀦 𑀅𑀕𑁆𑀕𑀡𑁆𑀳𑀦𑀯𑀲𑁂𑀦 𑀉𑀧𑀓𑀸𑀭𑀧𑀝𑀺𑀧𑀤𑀸 𑀦𑀸𑀫 𑀚𑀸𑀢𑀁. 𑀅𑀪𑀺𑀯𑀤𑀢𑀻𑀢𑀺 𑀅𑀪𑀺𑀫𑀸𑀦𑁂𑀦 𑀉𑀧𑀯𑀤𑀢𑀺. 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁆𑀢𑀺 𑀅𑀝𑁆𑀞𑀸𑀭𑀲𑀯𑀺𑀥𑀫𑁆𑀧𑀺 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀁. 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀦𑁆𑀢𑀺 𑀘𑀢𑀼𑀘𑀢𑁆𑀢𑀸𑀭𑀻𑀲𑀯𑀺𑀥𑀫𑁆𑀧𑀺 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀁. 𑀉𑀧𑀸𑀤𑀸𑀦𑀫𑀓𑁆𑀔𑀸𑀬𑀢𑀻𑀢𑀺 𑀅𑀳𑀫𑀲𑁆𑀫𑀻𑀢𑀺 𑀕𑀳𑀡𑀲𑁆𑀲 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀤𑀺𑀝𑁆𑀞𑀼𑀧𑀸𑀤𑀸𑀦𑀁 𑀅𑀓𑁆𑀔𑀸𑀬𑀢𑀺.

𑀲𑀦𑁆𑀢𑀺𑀯𑀭𑀧𑀤𑀦𑁆𑀢𑀺 𑀯𑀽𑀧𑀲𑀦𑁆𑀢𑀓𑀺𑀮𑁂𑀲𑀢𑁆𑀢𑀸 𑀲𑀦𑁆𑀢𑀁 𑀉𑀢𑁆𑀢𑀫𑀧𑀤𑀁. 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀦𑁆𑀢𑀺 𑀪𑀕𑀯𑀢𑀸 ‘‘𑀬𑀢𑁆𑀣 𑀘𑀓𑁆𑀔𑀼 𑀘 𑀦𑀺𑀭𑀼𑀚𑁆𑀛𑀢𑀺 𑀭𑀽𑀧𑀲𑀜𑁆𑀜𑀸 𑀘 𑀦𑀺𑀭𑀼𑀚𑁆𑀛𑀢𑀺 𑀲𑁄 𑀆𑀬𑀢𑀦𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀏𑀢𑁆𑀣 𑀤𑁆𑀯𑀺𑀦𑁆𑀦𑀁 𑀆𑀬𑀢𑀦𑀸𑀦𑀁 𑀧𑀝𑀺𑀓𑁆𑀔𑁂𑀧𑁂𑀦 𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑀺𑀢𑀁.

‘‘𑀬𑀢𑁆𑀣 𑀆𑀧𑁄 𑀘 𑀧𑀣𑀯𑀻, 𑀢𑁂𑀚𑁄 𑀯𑀸𑀬𑁄 𑀦 𑀕𑀸𑀥𑀢𑀺;

𑀅𑀢𑁄 𑀲𑀭𑀸 𑀦𑀺𑀯𑀢𑁆𑀢𑀦𑁆𑀢𑀺, 𑀏𑀢𑁆𑀣 𑀯𑀝𑁆𑀝𑀁 𑀦 𑀯𑀢𑁆𑀢𑀢𑀺;

𑀏𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺. (𑀲𑀁. 𑀦𑀺. 𑁧.𑁨𑁭) 𑁋

𑀏𑀢𑁆𑀣 𑀧𑀦 𑀲𑀗𑁆𑀔𑀸𑀭𑀧𑀝𑀺𑀓𑁆𑀔𑁂𑀧𑁂𑀦 𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑀺𑀢𑀁.

‘‘𑀓𑀢𑁆𑀣 𑀆𑀧𑁄 𑀘 𑀧𑀣𑀯𑀻, 𑀢𑁂𑀚𑁄 𑀯𑀸𑀬𑁄 𑀦 𑀕𑀸𑀥𑀢𑀺;

𑀓𑀢𑁆𑀣 𑀤𑀻𑀖𑀜𑁆𑀘 𑀭𑀲𑁆𑀲𑀜𑁆𑀘, 𑀅𑀡𑀼𑀁 𑀣𑀽𑀮𑀁 𑀲𑀼𑀪𑀸𑀲𑀼𑀪𑀁;

𑀓𑀢𑁆𑀣 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘, 𑀅𑀲𑁂𑀲𑀁 𑀉𑀧𑀭𑀼𑀚𑁆𑀛𑀢𑀻’’𑀢𑀺. (𑀤𑀻. 𑀦𑀺. 𑁧.𑁪𑁯𑁮);

𑀢𑀢𑁆𑀭 𑀯𑁂𑀬𑁆𑀬𑀸𑀓𑀭𑀡𑀁 𑀪𑀯𑀢𑀺 𑁋

‘‘𑀯𑀺𑀜𑁆𑀜𑀸𑀡𑀁 𑀅𑀦𑀺𑀤𑀲𑁆𑀲𑀦𑀁, 𑀅𑀦𑀦𑁆𑀢𑀁 𑀲𑀩𑁆𑀩𑀢𑁄 𑀧𑀪’’𑀦𑁆𑀢𑀺 𑁋

𑀏𑀢𑁆𑀣 𑀲𑀗𑁆𑀔𑀸𑀭𑀧𑀝𑀺𑀓𑁆𑀔𑁂𑀧𑁂𑀦 𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑀺𑀢𑀁. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀙𑀆𑀬𑀢𑀦𑀧𑀝𑀺𑀓𑁆𑀔𑁂𑀧𑁂𑀦 𑀤𑀲𑁆𑀲𑀺𑀢𑀁. 𑀅𑀜𑁆𑀜𑀢𑁆𑀣 𑀘 𑀅𑀦𑀼𑀧𑀸𑀤𑀸𑀯𑀺𑀫𑁄𑀓𑁆𑀔𑁄𑀢𑀺 𑀦𑀺𑀩𑁆𑀩𑀸𑀦𑀫𑁂𑀯 𑀤𑀲𑁆𑀲𑀺𑀢𑀁, 𑀇𑀥 𑀧𑀦 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀧𑀜𑁆𑀘𑀢𑁆𑀢𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀓𑀺𑀦𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀓𑀺𑀦𑁆𑀢𑀺𑀲𑀼𑀢𑁆𑀢𑀁. 𑀢𑀢𑁆𑀣 𑀧𑀺𑀲𑀺𑀦𑀸𑀭𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀫𑀡𑁆𑀟𑀮𑀧𑀤𑁂𑀲𑁂. 𑀩𑀮𑀺𑀳𑀭𑀡𑁂𑀢𑀺 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀪𑀽𑀢𑀸𑀦𑀁 𑀩𑀮𑀺𑀁 𑀆𑀳𑀭𑀦𑁆𑀢𑀺, 𑀢𑀲𑁆𑀫𑀸 𑀲𑁄 𑀩𑀮𑀺𑀳𑀭𑀡𑀦𑁆𑀢𑀺 𑀯𑀼𑀢𑁆𑀢𑁄. 𑀘𑀻𑀯𑀭𑀳𑁂𑀢𑀽𑀢𑀺 𑀘𑀻𑀯𑀭𑀓𑀸𑀭𑀡𑀸, 𑀘𑀻𑀯𑀭𑀁 𑀧𑀘𑁆𑀘𑀸𑀲𑀻𑀲𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀇𑀢𑀺𑀪𑀯𑀸𑀪𑀯𑀳𑁂𑀢𑀽𑀢𑀺 𑀏𑀯𑀁 𑀇𑀫𑀁 𑀤𑁂𑀲𑀦𑀸𑀫𑀬𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀁 𑀦𑀺𑀲𑁆𑀲𑀸𑀬 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑁂 𑀲𑀼𑀔𑀁 𑀯𑁂𑀤𑀺𑀲𑁆𑀲𑀸𑀫𑀻𑀢𑀺 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀓𑀺𑀁 𑀢𑀼𑀫𑁆𑀳𑀸𑀓𑀁 𑀏𑀯𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁩𑁫. 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸𑀢𑀺𑀆𑀤𑀬𑁄 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀯 𑀓𑀣𑀺𑀢𑀸. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀲𑀢𑁆𑀢𑀢𑀺𑀁𑀲𑀸𑀬 𑀥𑀫𑁆𑀫𑁂𑀲𑀼. 𑀲𑀺𑀬𑀁𑀲𑀽𑀢𑀺 𑀪𑀯𑁂𑀬𑁆𑀬𑀼𑀁. 𑀅𑀪𑀺𑀥𑀫𑁆𑀫𑁂𑀢𑀺 𑀯𑀺𑀲𑀺𑀝𑁆𑀞𑁂 𑀥𑀫𑁆𑀫𑁂, 𑀇𑀫𑁂𑀲𑀼 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂𑀲𑀽𑀢𑀺 𑀅𑀢𑁆𑀣𑁄. 𑀢𑀢𑁆𑀭 𑀘𑁂𑀢𑀺 𑀇𑀤𑀫𑁆𑀧𑀺 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂𑀲𑁆𑀯𑁂𑀯 𑀪𑀼𑀫𑁆𑀫𑀁. 𑀅𑀢𑁆𑀣𑀢𑁄 𑀘𑁂𑀯 𑀦𑀸𑀦𑀁 𑀩𑁆𑀬𑀜𑁆𑀚𑀦𑀢𑁄 𑀘𑀸𑀢𑀺 𑀏𑀢𑁆𑀣 ‘‘𑀓𑀸𑀬𑁄𑀯 𑀲𑀢𑀺𑀧𑀝𑁆𑀞𑀸𑀦𑀁 𑀯𑁂𑀤𑀦𑀸𑀯 𑀲𑀢𑀺𑀧𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀢𑁆𑀣𑀢𑁄 𑀦𑀸𑀦𑀁 𑀳𑁄𑀢𑀺, ‘‘𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀩𑁆𑀬𑀜𑁆𑀚𑀦𑀢𑁄 𑀦𑀸𑀦𑀁 𑀦𑀸𑀫 𑀳𑁄𑀢𑀺. 𑀢𑀤𑀫𑀺𑀦𑀸𑀧𑀻𑀢𑀺 𑀢𑀁 𑀢𑀼𑀫𑁆𑀳𑁂 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦 𑀚𑀸𑀦𑀸𑀣𑀸𑀢𑀺 𑀅𑀢𑁆𑀣𑀜𑁆𑀘 𑀩𑁆𑀬𑀜𑁆𑀚𑀦𑀜𑁆𑀘 𑀲𑀫𑀸𑀦𑁂𑀢𑁆𑀯𑀸 𑀅𑀣𑀲𑁆𑀲 𑀘 𑀅𑀜𑁆𑀜𑀣𑀸 𑀕𑀳𑀺𑀢𑀪𑀸𑀯𑁄 𑀩𑁆𑀬𑀜𑁆𑀚𑀦𑀲𑁆𑀲 𑀘 𑀫𑀺𑀘𑁆𑀙𑀸 𑀭𑁄𑀧𑀺𑀢𑀪𑀸𑀯𑁄 𑀤𑀲𑁆𑀲𑁂𑀢𑀩𑁆𑀩𑁄. 𑀬𑁄 𑀥𑀫𑁆𑀫𑁄 𑀬𑁄 𑀯𑀺𑀦𑀬𑁄𑀢𑀺 𑀏𑀢𑁆𑀣 𑀅𑀢𑁆𑀣𑀜𑁆𑀘 𑀩𑁆𑀬𑀜𑁆𑀚𑀦𑀜𑁆𑀘 𑀯𑀺𑀜𑁆𑀜𑀸𑀧𑀦𑀓𑀸𑀭𑀡𑀫𑁂𑀯 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘.

𑁩𑁭. 𑀅𑀢𑁆𑀣𑀢𑁄 𑀳𑀺 𑀔𑁄 𑀲𑀫𑁂𑀢𑀻𑀢𑀺 𑀲𑀢𑀺𑀬𑁂𑀯 𑀲𑀢𑀺𑀧𑀝𑁆𑀞𑀸𑀦𑀦𑁆𑀢𑀺 𑀕𑀳𑀺𑀢𑀸. 𑀩𑁆𑀬𑀜𑁆𑀚𑀦𑀢𑁄 𑀦𑀸𑀦𑀦𑁆𑀢𑀺 𑀓𑁂𑀯𑀮𑀁 𑀩𑁆𑀬𑀜𑁆𑀚𑀦𑀫𑁂𑀯 𑀲𑀢𑀺𑀧𑀝𑁆𑀞𑀸𑀦𑁄𑀢𑀺 𑀯𑀸 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀯𑀸 𑀫𑀺𑀘𑁆𑀙𑀸 𑀭𑁄𑀧𑁂𑀣. 𑀅𑀧𑁆𑀧𑀫𑀢𑁆𑀢𑀓𑀁 𑀔𑁄𑀢𑀺 𑀲𑀼𑀢𑁆𑀢𑀦𑁆𑀢𑀁 𑀧𑀢𑁆𑀯𑀸 𑀩𑁆𑀬𑀜𑁆𑀚𑀦𑀁 𑀅𑀧𑁆𑀧𑀫𑀢𑁆𑀢𑀓𑀁 𑀦𑀸𑀫 𑀳𑁄𑀢𑀺. 𑀧𑀭𑀺𑀢𑁆𑀢𑀫𑀢𑁆𑀢𑀁 𑀥𑀦𑀺𑀢𑀁 𑀓𑀢𑁆𑀯𑀸 𑀭𑁄𑀧𑀺𑀢𑁂𑀧𑀺 𑀳𑀺 𑀦𑀺𑀩𑁆𑀩𑀼𑀢𑀺𑀁 𑀧𑀢𑁆𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺.

𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀯𑀺𑀚𑀬𑀸𑀭𑀸𑀫𑀯𑀺𑀳𑀸𑀭𑀯𑀸𑀲𑀻 𑀓𑀺𑀭𑁂𑀓𑁄 𑀔𑀻𑀡𑀸𑀲𑀯𑀢𑁆𑀣𑁂𑀭𑁄 𑀤𑁆𑀯𑀺𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀲𑀼𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀦𑁆𑀢𑁄 𑁋 ‘‘𑀲𑀫𑀼𑀤𑁆𑀥𑁄 𑀲𑀫𑀼𑀤𑁆𑀥𑁄𑀢𑀺, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀪𑀸𑀲𑀢𑀻’’𑀢𑀺 𑀥𑀦𑀺𑀢𑀁 𑀓𑀢𑁆𑀯𑀸 𑀆𑀳. 𑀏𑀓𑁄 𑀪𑀺𑀓𑁆𑀔𑀼 ‘‘𑀲𑀫𑀼𑀤𑁆𑀥𑁄 𑀦𑀸𑀫, 𑀪𑀦𑁆𑀢𑁂’’𑀢𑀺 𑀆𑀳. 𑀆𑀯𑀼𑀲𑁄, 𑀲𑀫𑀼𑀤𑁆𑀥𑁄𑀢𑀺 𑀯𑀼𑀢𑁆𑀢𑁂𑀧𑀺 𑀲𑀫𑀼𑀤𑁆𑀤𑁄𑀢𑀺 𑀯𑀼𑀢𑁆𑀢𑁂𑀧𑀺 𑀫𑀬𑀁 𑀮𑁄𑀡𑀲𑀸𑀕𑀭𑀫𑁂𑀯 𑀚𑀸𑀦𑀸𑀫, 𑀢𑀼𑀫𑁆𑀳𑁂 𑀧𑀦 𑀦𑁄 𑀅𑀢𑁆𑀣𑀕𑀯𑁂𑀲𑀓𑀸, 𑀩𑁆𑀬𑀜𑁆𑀚𑀦𑀕𑀯𑁂𑀲𑀓𑀸, 𑀕𑀘𑁆𑀙𑀣 𑀫𑀳𑀸𑀯𑀺𑀳𑀸𑀭𑁂 𑀧𑀕𑀼𑀡𑀩𑁆𑀬𑀜𑁆𑀚𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀩𑁆𑀬𑀜𑁆𑀚𑀦𑀁 𑀲𑁄𑀥𑀸𑀧𑁂𑀣𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀅𑀓𑀣𑁂𑀢𑁆𑀯𑀸𑀯 𑀉𑀝𑁆𑀞𑀸𑀧𑁂𑀲𑀺. 𑀲𑁄 𑀅𑀧𑀭𑀪𑀸𑀕𑁂 𑀫𑀳𑀸𑀯𑀺𑀳𑀸𑀭𑁂 𑀪𑁂𑀭𑀺𑀁 𑀧𑀳𑀭𑀸𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀧𑀜𑁆𑀳𑀁 𑀓𑀣𑁂𑀢𑁆𑀯𑀸𑀯 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀏𑀯𑀁 𑀲𑀼𑀢𑁆𑀢𑀦𑁆𑀢𑀁 𑀧𑀢𑁆𑀯𑀸 𑀩𑁆𑀬𑀜𑁆𑀚𑀦𑀁 𑀅𑀧𑁆𑀧𑀫𑀢𑁆𑀢𑀓𑀁 𑀦𑀸𑀫 𑀳𑁄𑀢𑀺.

𑀯𑀺𑀦𑀬𑀁 𑀧𑀦 𑀧𑀢𑁆𑀯𑀸 𑀦𑁄 𑀅𑀧𑁆𑀧𑀫𑀢𑁆𑀢𑀓𑀁. 𑀲𑀸𑀫𑀡𑁂𑀭𑀧𑀩𑁆𑀩𑀚𑁆𑀚𑀸𑀧𑀺 𑀳𑀺 𑀉𑀪𑀢𑁄𑀲𑀼𑀤𑁆𑀥𑀺𑀢𑁄 𑀯𑀝𑁆𑀝𑀢𑀺, 𑀉𑀧𑀲𑀫𑁆𑀧𑀤𑀸𑀤𑀺𑀓𑀫𑁆𑀫𑀸𑀦𑀺𑀧𑀺 𑀲𑀺𑀣𑀺𑀮𑀸𑀤𑀻𑀦𑀁 𑀥𑀦𑀺𑀢𑀸𑀤𑀺𑀓𑀭𑀡𑀫𑀢𑁆𑀢𑁂𑀦𑁂𑀯 𑀓𑀼𑀧𑁆𑀧𑀦𑁆𑀢𑀺. 𑀇𑀥 𑀧𑀦 𑀲𑀼𑀢𑁆𑀢𑀦𑁆𑀢𑀩𑁆𑀬𑀜𑁆𑀚𑀦𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑁩𑁮. 𑀅𑀣 𑀘𑀢𑀼𑀢𑁆𑀣𑀯𑀸𑀭𑁂 𑀯𑀺𑀯𑀸𑀤𑁄 𑀓𑀲𑁆𑀫𑀸? 𑀲𑀜𑁆𑀜𑀸𑀬 𑀯𑀺𑀯𑀸𑀤𑁄. ‘‘𑀅𑀳𑀁 𑀲𑀢𑀺𑀫𑁂𑀯 𑀲𑀢𑀺𑀧𑀝𑁆𑀞𑀸𑀦𑀁 𑀯𑀤𑀸𑀫𑀺, 𑀅𑀬𑀁 ‘𑀓𑀸𑀬𑁄 𑀲𑀢𑀺𑀧𑀝𑁆𑀞𑀸𑀦’𑀦𑁆𑀢𑀺 𑀯𑀤𑀢𑀻’’𑀢𑀺 𑀳𑀺 𑀦𑁂𑀲𑀁 𑀲𑀜𑁆𑀜𑀸 𑀳𑁄𑀢𑀺. 𑀩𑁆𑀬𑀜𑁆𑀚𑀦𑁂𑀧𑀺 𑀏𑀲𑁂𑀯 𑀦𑀬𑁄.

𑁩𑁯. 𑀦 𑀘𑁄𑀤𑀦𑀸𑀬 𑀢𑀭𑀺𑀢𑀩𑁆𑀩𑀦𑁆𑀢𑀺 𑀦 𑀘𑁄𑀤𑀦𑀢𑁆𑀣𑀸𑀬 𑀯𑁂𑀕𑀸𑀬𑀺𑀢𑀩𑁆𑀩𑀁. 𑀏𑀓𑀘𑁆𑀘𑁄 𑀳𑀺 𑀧𑀼𑀕𑁆𑀕𑀮𑁄 ‘‘𑀦𑀮𑀸𑀝𑁂 𑀢𑁂 𑀲𑀸𑀲𑀧𑀫𑀢𑁆𑀢𑀸 𑀧𑀺𑀴𑀓𑀸’’𑀢𑀺 𑀯𑀼𑀢𑁆𑀢𑁄 ‘‘𑀫𑀬𑁆𑀳𑀁 𑀦𑀮𑀸𑀝𑁂 𑀲𑀸𑀲𑀧𑀫𑀢𑁆𑀢𑀁 𑀧𑀺𑀴𑀓𑀁 𑀧𑀲𑁆𑀲𑀲𑀺, 𑀅𑀢𑁆𑀢𑀦𑁄 𑀦𑀮𑀸𑀝𑁂 𑀢𑀸𑀮𑀧𑀓𑁆𑀓𑀫𑀢𑁆𑀢𑀁 𑀫𑀳𑀸𑀕𑀡𑁆𑀟𑀁 𑀦 𑀧𑀲𑁆𑀲𑀲𑀻’’𑀢𑀺 𑀯𑀤𑀢𑀺. 𑀢𑀲𑁆𑀫𑀸 𑀧𑀼𑀕𑁆𑀕𑀮𑁄 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄. 𑀅𑀤𑀴𑁆𑀳𑀤𑀺𑀝𑁆𑀞𑀻𑀢𑀺 𑀅𑀦𑀸𑀤𑀸𑀦𑀤𑀺𑀝𑁆𑀞𑀻 𑀲𑀼𑀁𑀲𑀼𑀫𑀸𑀭𑀁 𑀳𑀤𑀬𑁂 𑀧𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀤𑀴𑁆𑀳𑀁 𑀦 𑀕𑀡𑁆𑀳𑀸𑀢𑀺.

𑀉𑀧𑀖𑀸𑀢𑁄𑀢𑀺 𑀘𑀡𑁆𑀟𑀪𑀸𑀯𑁂𑀦 𑀯𑀡𑀖𑀝𑁆𑀝𑀺𑀢𑀲𑁆𑀲 𑀯𑀺𑀬 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺. 𑀲𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀻𑀢𑀺 ‘‘𑀓𑀺𑀁 𑀦𑀸𑀫 𑀅𑀳𑀁 𑀆𑀧𑀦𑁆𑀦𑁄, 𑀓𑀤𑀸 𑀆𑀧𑀦𑁆𑀦𑁄’’𑀢𑀺 𑀯𑀸 ‘‘𑀢𑁆𑀯𑀁 𑀆𑀧𑀦𑁆𑀦𑁄, 𑀢𑀯 𑀉𑀧𑀚𑁆𑀛𑀸𑀬𑁄 𑀆𑀧𑀦𑁆𑀦𑁄’’𑀢𑀺 𑀯𑀸 𑀏𑀓𑀁 𑀤𑁆𑀯𑁂 𑀯𑀸𑀭𑁂 𑀯𑀢𑁆𑀯𑀸𑀧𑀺 ‘‘𑀅𑀲𑀼𑀓𑀁 𑀦𑀸𑀫 𑀅𑀲𑀼𑀓𑀤𑀺𑀯𑀲𑁂 𑀦𑀸𑀫, 𑀪𑀦𑁆𑀢𑁂, 𑀆𑀧𑀦𑁆𑀦𑀢𑁆𑀣, 𑀲𑀡𑀺𑀓𑀁 𑀅𑀦𑀼𑀲𑁆𑀲𑀭𑀣𑀸’’𑀢𑀺 𑀲𑀭𑀺𑀢𑁆𑀯𑀸 𑀢𑀸𑀯𑀤𑁂𑀯 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀯𑀺𑀳𑁂𑀲𑀸𑀢𑀺 𑀩𑀳𑀼𑀁 𑀅𑀢𑁆𑀣𑀜𑁆𑀘 𑀓𑀸𑀭𑀡𑀜𑁆𑀘 𑀆𑀳𑀭𑀦𑁆𑀢𑀲𑁆𑀲 𑀓𑀸𑀬𑀘𑀺𑀢𑁆𑀢𑀓𑀺𑀮𑀫𑀣𑁄. 𑀲𑀓𑁆𑀓𑁄𑀫𑀻𑀢𑀺 𑀏𑀯𑀭𑀽𑀧𑁄 𑀳𑀺 𑀧𑀼𑀕𑁆𑀕𑀮𑁄 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 ‘‘𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀢𑁆𑀣, 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑁄 ‘‘𑀓𑀤𑀸 𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺 𑀯𑀢𑁆𑀯𑀸 ‘‘𑀅𑀲𑀼𑀓𑀤𑀺𑀯𑀲𑁂 𑀅𑀲𑀼𑀓𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀦 𑀲𑀭𑀸𑀫𑀺, 𑀆𑀯𑀼𑀲𑁄’’𑀢𑀺 𑀯𑀤𑀢𑀺, 𑀢𑀢𑁄 ‘‘𑀲𑀡𑀺𑀓𑀁, 𑀪𑀦𑁆𑀢𑁂, 𑀲𑀭𑀣𑀸’’𑀢𑀺 𑀩𑀳𑀼𑀁 𑀯𑀢𑁆𑀯𑀸 𑀲𑀸𑀭𑀺𑀢𑁄 𑀲𑀭𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀢𑁂𑀦𑀸𑀳 ‘‘𑀲𑀓𑁆𑀓𑁄𑀫𑀻’’𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀉𑀧𑁂𑀓𑁆𑀔𑀸 𑀦𑀸𑀢𑀺𑀫𑀜𑁆𑀜𑀺𑀢𑀩𑁆𑀩𑀸𑀢𑀺 𑀉𑀧𑁂𑀓𑁆𑀔𑀸 𑀦 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀸, 𑀓𑀢𑁆𑀢𑀩𑁆𑀩𑀸 𑀚𑀦𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀬𑁄 𑀳𑀺 𑀏𑀯𑀭𑀽𑀧𑀁 𑀧𑀼𑀕𑁆𑀕𑀮𑀁 𑀞𑀺𑀢𑀓𑀁𑀬𑁂𑀯 𑀧𑀲𑁆𑀲𑀸𑀯𑀁 𑀓𑀭𑁄𑀦𑁆𑀢𑀁 𑀤𑀺𑀲𑁆𑀯𑀸𑀧𑀺 ‘‘𑀦𑀦𑀼, 𑀆𑀯𑀼𑀲𑁄, 𑀦𑀺𑀲𑀻𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀤𑀢𑀺, 𑀲𑁄 𑀉𑀧𑁂𑀓𑁆𑀔𑀁 𑀅𑀢𑀺𑀫𑀜𑁆𑀜𑀢𑀺 𑀦𑀸𑀫.

𑁪𑁦. 𑀯𑀘𑀻𑀲𑀁𑀳𑀸𑀭𑁄𑀢𑀺 𑀯𑀘𑀦𑀲𑀜𑁆𑀘𑀸𑀭𑁄. 𑀇𑀫𑁂𑀳𑀺 𑀓𑀣𑀺𑀢𑀁 𑀅𑀫𑀽𑀲𑀁 𑀅𑀦𑁆𑀢𑀭𑀁 𑀧𑀯𑁂𑀲𑁂𑀬𑁆𑀬, 𑀢𑀼𑀫𑁆𑀳𑁂 𑀇𑀫𑁂𑀳𑀺 𑀇𑀤𑀜𑁆𑀘𑀺𑀤𑀜𑁆𑀘 𑀯𑀼𑀢𑁆𑀢𑀸𑀢𑀺 𑀅𑀫𑀽𑀳𑀺 𑀓𑀣𑀺𑀢𑀁 𑀇𑀫𑁂𑀲𑀁 𑀅𑀦𑁆𑀢𑀭𑀁 𑀧𑀯𑁂𑀲𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀺𑀧𑀴𑀸𑀲𑁄𑀢𑀺𑀆𑀤𑀻𑀳𑀺 𑀘𑀺𑀢𑁆𑀢𑀲𑁆𑀲 𑀅𑀦𑀸𑀭𑀸𑀥𑀦𑀺𑀬𑀪𑀸𑀯𑁄 𑀓𑀣𑀺𑀢𑁄. 𑀢𑀁 𑀚𑀸𑀦𑀫𑀸𑀦𑁄 𑀲𑀫𑀸𑀦𑁄 𑀕𑀭𑀳𑁂𑀬𑁆𑀬𑀸𑀢𑀺 𑀢𑀁 𑀲𑀢𑁆𑀣𑀸 𑀚𑀸𑀦𑀫𑀸𑀦𑁄 𑀲𑀫𑀸𑀦𑁄 𑀦𑀺𑀦𑁆𑀤𑁂𑀬𑁆𑀬 𑀅𑀫𑁆𑀳𑁂𑀢𑀺. 𑀏𑀢𑀁 𑀧𑀦𑀸𑀯𑀼𑀲𑁄, 𑀥𑀫𑁆𑀫𑀦𑁆𑀢𑀺 𑀏𑀢𑀁 𑀓𑀮𑀳𑀪𑀡𑁆𑀟𑀦𑀥𑀫𑁆𑀫𑀁.

𑀢𑀜𑁆𑀘𑁂𑀢𑀺 𑀢𑀁 𑀲𑀜𑁆𑀜𑀢𑁆𑀢𑀺𑀓𑀸𑀭𑀓𑀁 𑀪𑀺𑀓𑁆𑀔𑀼𑀁. 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀢𑀺 𑀫𑀬𑀸 𑀏𑀢𑁂 𑀲𑀼𑀤𑁆𑀥𑀦𑁆𑀢𑁂 𑀧𑀢𑀺𑀝𑁆𑀞𑀸𑀧𑀺𑀢𑀸𑀢𑀺 𑀅𑀯𑀢𑁆𑀯𑀸 𑀬𑁂𑀦 𑀓𑀸𑀭𑀡𑁂𑀦 𑀲𑀜𑁆𑀜𑀢𑁆𑀢𑀺 𑀓𑀢𑀸, 𑀢𑀤𑁂𑀯 𑀤𑀲𑁆𑀲𑁂𑀦𑁆𑀢𑁄 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬. 𑀢𑀸𑀳𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸𑀢𑀺 𑀏𑀢𑁆𑀣 𑀥𑀫𑁆𑀫𑁄𑀢𑀺 𑀲𑀸𑀭𑀡𑀻𑀬𑀥𑀫𑁆𑀫𑁄 𑀅𑀥𑀺𑀧𑁆𑀧𑁂𑀢𑁄. 𑀦 𑀘𑁂𑀯 𑀅𑀢𑁆𑀢𑀸𑀦𑀦𑁆𑀢𑀺𑀆𑀤𑀻𑀲𑀼 ‘‘𑀩𑁆𑀭𑀳𑁆𑀫𑀮𑁄𑀓𑀧𑁆𑀧𑀫𑀸𑀡𑁄 𑀳𑁂𑀲 𑀅𑀕𑁆𑀕𑀺 𑀉𑀝𑁆𑀞𑀸𑀲𑀺, 𑀓𑁄 𑀏𑀢𑀫𑀜𑁆𑀜𑀢𑁆𑀭 𑀫𑀬𑀸 𑀦𑀺𑀩𑁆𑀩𑀸𑀧𑁂𑀢𑀼𑀁 𑀲𑀫𑀢𑁆𑀣𑁄’’𑀢𑀺 𑀳𑀺 𑀯𑀤𑀦𑁆𑀢𑁄 𑀅𑀢𑁆𑀢𑀸𑀦𑀁 𑀉𑀓𑁆𑀓𑀁𑀲𑁂𑀢𑀺 𑀦𑀸𑀫. ‘‘𑀏𑀢𑁆𑀢𑀓𑀸 𑀚𑀦𑀸 𑀯𑀺𑀘𑀭𑀦𑁆𑀢𑀺, 𑀑𑀓𑀸𑀲𑁄 𑀮𑀤𑁆𑀥𑀼𑀁 𑀦 𑀲𑀓𑁆𑀓𑀸, 𑀏𑀓𑁄𑀧𑀺 𑀏𑀢𑁆𑀢𑀓𑀫𑀢𑁆𑀢𑀁 𑀦𑀺𑀩𑁆𑀩𑀸𑀧𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀤𑀫𑀸𑀦𑁄 𑀧𑀭𑀁 𑀯𑀫𑁆𑀪𑁂𑀢𑀺 𑀦𑀸𑀫. 𑀢𑀤𑀼𑀪𑀬𑀫𑁆𑀧𑁂𑀲 𑀦 𑀓𑀭𑁄𑀢𑀺. 𑀥𑀫𑁆𑀫𑁄 𑀧𑀦𑁂𑀢𑁆𑀣 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀩𑁆𑀬𑀸𑀓𑀭𑀡𑀁, 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀜𑁆𑀜𑀢𑁆𑀢𑀺𑀓𑀭𑀡𑀁 𑀅𑀦𑀼𑀥𑀫𑁆𑀫𑁄, 𑀢𑀤𑁂𑀯 𑀩𑁆𑀬𑀸𑀓𑀭𑁄𑀢𑀺 𑀦𑀸𑀫. 𑀦 𑀘 𑀓𑁄𑀘𑀺 𑀲𑀳𑀥𑀫𑁆𑀫𑀺𑀓𑁄𑀢𑀺 𑀅𑀜𑁆𑀜𑁄 𑀘𑀲𑁆𑀲 𑀓𑁄𑀘𑀺 𑀲𑀳𑁂𑀢𑀼𑀓𑁄 𑀧𑀭𑁂𑀳𑀺 𑀯𑀼𑀢𑁆𑀢𑁄 𑀯𑀸𑀤𑁄 𑀯𑀸 𑀅𑀦𑀼𑀯𑀸𑀤𑁄 𑀯𑀸 𑀕𑀭𑀳𑀺𑀢𑀩𑁆𑀩𑀪𑀸𑀯𑀁 𑀆𑀕𑀘𑁆𑀙𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀓𑀺𑀦𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀸𑀫𑀕𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀲𑀸𑀫𑀕𑀸𑀫𑀲𑀼𑀢𑁆𑀢𑀁. 𑀢𑀢𑁆𑀣 𑀲𑀸𑀫𑀕𑀸𑀫𑁂𑀢𑀺 𑀲𑀸𑀫𑀸𑀓𑀸𑀦𑀁 𑀉𑀲𑁆𑀲𑀦𑁆𑀦𑀢𑁆𑀢𑀸 𑀏𑀯𑀁𑀮𑀤𑁆𑀥𑀦𑀸𑀫𑁂 𑀕𑀸𑀫𑁂. 𑀅𑀥𑀼𑀦𑀸 𑀓𑀸𑀮𑀗𑁆𑀓𑀢𑁄𑀢𑀺 𑀲𑀫𑁆𑀧𑀢𑀺 𑀓𑀸𑀮𑀁 𑀓𑀢𑁄. 𑀤𑁆𑀯𑁂𑀥𑀺𑀓𑀚𑀸𑀢𑀸𑀢𑀺 𑀤𑁆𑀯𑁂𑀚𑁆𑀛𑀚𑀸𑀢𑀸 𑀤𑁆𑀯𑁂𑀪𑀸𑀕𑀚𑀸𑀢𑀸. 𑀪𑀡𑁆𑀟𑀦𑀸𑀤𑀻𑀲𑀼 𑀪𑀡𑁆𑀟𑀦𑀁 𑀧𑀼𑀩𑁆𑀩𑀪𑀸𑀕𑀓𑀮𑀳𑁄, 𑀢𑀁 𑀤𑀡𑁆𑀟𑀸𑀤𑀸𑀦𑀸𑀤𑀺𑀯𑀲𑁂𑀦 𑀧𑀡𑁆𑀡𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀘 𑀯𑀤𑁆𑀥𑀺𑀢𑀁 𑀓𑀮𑀳𑁄, ‘‘𑀦 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁 𑀆𑀚𑀸𑀦𑀸𑀲𑀻’’𑀢𑀺𑀆𑀤𑀺𑀓𑀁 𑀯𑀺𑀭𑀼𑀤𑁆𑀥𑀯𑀘𑀦𑀁 𑀯𑀺𑀯𑀸𑀤𑁄. 𑀯𑀺𑀢𑀼𑀤𑀦𑁆𑀢𑀸𑀢𑀺 𑀯𑀺𑀢𑀼𑀚𑁆𑀚𑀦𑁆𑀢𑀸. 𑀲𑀳𑀺𑀢𑀁 𑀫𑁂𑀢𑀺 𑀫𑀫 𑀯𑀘𑀦𑀁 𑀅𑀢𑁆𑀣𑀲𑀁𑀳𑀺𑀢𑀁. 𑀅𑀥𑀺𑀘𑀺𑀡𑁆𑀡𑀁 𑀢𑁂 𑀯𑀺𑀧𑀭𑀸𑀯𑀢𑁆𑀢𑀦𑁆𑀢𑀺 𑀬𑀁 𑀢𑀯 𑀅𑀥𑀺𑀘𑀺𑀡𑁆𑀡𑀁 𑀘𑀺𑀭𑀓𑀸𑀮𑀲𑁂𑀯𑀦𑀯𑀲𑁂𑀦 𑀧𑀕𑀼𑀡𑀁, 𑀢𑀁 𑀫𑀫 𑀯𑀸𑀤𑀁 𑀆𑀕𑀫𑁆𑀫 𑀦𑀺𑀯𑀢𑁆𑀢𑀁. 𑀆𑀭𑁄𑀧𑀺𑀢𑁄 𑀢𑁂 𑀯𑀸𑀤𑁄𑀢𑀺 𑀢𑀼𑀬𑁆𑀳𑀁 𑀉𑀧𑀭𑀺 𑀫𑀬𑀸 𑀤𑁄𑀲𑁄 𑀆𑀭𑁄𑀧𑀺𑀢𑁄. 𑀘𑀭 𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀬𑀸𑀢𑀺 𑀪𑀢𑁆𑀢𑀧𑀼𑀝𑀁 𑀆𑀤𑀸𑀬 𑀢𑀁 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀸𑀤𑀧𑁆𑀧𑀫𑁄𑀓𑁆𑀔𑀢𑁆𑀣𑀸𑀬 𑀉𑀢𑁆𑀢𑀭𑀺 𑀧𑀭𑀺𑀬𑁂𑀲𑀫𑀸𑀦𑁄 𑀘𑀭. 𑀦𑀺𑀩𑁆𑀩𑁂𑀞𑁂𑀳𑀺 𑀯𑀸𑀢𑀺 𑀅𑀣 𑀫𑀬𑀸 𑀆𑀭𑁄𑀧𑀺𑀢𑀯𑀸𑀤𑀢𑁄 𑀅𑀢𑁆𑀢𑀸𑀦𑀁 𑀫𑁄𑀘𑁂𑀳𑀺. 𑀲𑀘𑁂 𑀧𑀳𑁄𑀲𑀻𑀢𑀺 𑀲𑀘𑁂 𑀲𑀓𑁆𑀓𑁄𑀲𑀺. 𑀯𑀥𑁄𑀬𑁂𑀯𑀸𑀢𑀺 𑀫𑀭𑀡𑀫𑁂𑀯.

𑀦𑀸𑀝𑀧𑀼𑀢𑁆𑀢𑀺𑀬𑁂𑀲𑀽𑀢𑀺 𑀦𑀸𑀝𑀧𑀼𑀢𑁆𑀢𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼. 𑀦𑀺𑀩𑁆𑀩𑀺𑀦𑁆𑀦𑀭𑀽𑀧𑀸𑀢𑀺 𑀉𑀓𑁆𑀓𑀡𑁆𑀞𑀺𑀢𑀲𑀪𑀸𑀯𑀸, 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀦 𑀓𑀭𑁄𑀦𑁆𑀢𑀺. 𑀯𑀺𑀭𑀢𑁆𑀢𑀭𑀽𑀧𑀸𑀢𑀺 𑀯𑀺𑀕𑀢𑀧𑁂𑀫𑀸. 𑀧𑀝𑀺𑀯𑀸𑀦𑀭𑀽𑀧𑀸𑀢𑀺 𑀢𑁂𑀲𑀁 𑀦𑀺𑀧𑀘𑁆𑀘𑀓𑀺𑀭𑀺𑀬𑀢𑁄 𑀦𑀺𑀯𑀢𑁆𑀢𑀲𑀪𑀸𑀯𑀸. 𑀬𑀣𑀸 𑀢𑀦𑁆𑀢𑀺 𑀬𑀣𑀸 𑀘 𑀤𑀼𑀭𑀓𑁆𑀔𑀸𑀢𑀸𑀤𑀺𑀲𑀪𑀸𑀯𑁂 𑀥𑀫𑁆𑀫𑀯𑀺𑀦𑀬𑁂 𑀦𑀺𑀩𑁆𑀩𑀺𑀦𑁆𑀦𑀯𑀺𑀭𑀢𑁆𑀢𑀧𑀝𑀺𑀯𑀸𑀦𑀭𑀽𑀧𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀢𑀣𑁂𑀯 𑀚𑀸𑀢𑀸𑀢𑀺 𑀅𑀢𑁆𑀣𑁄. 𑀤𑀼𑀭𑀓𑁆𑀔𑀸𑀢𑁂𑀢𑀺 𑀤𑀼𑀓𑁆𑀓𑀣𑀺𑀢𑁂. 𑀤𑀼𑀧𑁆𑀧𑀯𑁂𑀤𑀺𑀢𑁂𑀢𑀺 𑀤𑀼𑀯𑀺𑀜𑁆𑀜𑀸𑀧𑀺𑀢𑁂. 𑀅𑀦𑀼𑀧𑀲𑀫𑀲𑀁𑀯𑀢𑁆𑀢𑀦𑀺𑀓𑁂𑀢𑀺 𑀭𑀸𑀕𑀸𑀤𑀻𑀦𑀁 𑀉𑀧𑀲𑀫𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑁄. 𑀪𑀺𑀦𑁆𑀦𑀣𑀽𑀧𑁂𑀢𑀺 𑀪𑀺𑀦𑁆𑀦𑀧𑀢𑀺𑀝𑁆𑀞𑁂. 𑀏𑀢𑁆𑀣 𑀳𑀺 𑀦𑀸𑀝𑀧𑀼𑀢𑁆𑀢𑁄𑀯 𑀦𑁂𑀲𑀁 𑀧𑀢𑀺𑀝𑁆𑀞𑁂𑀦 𑀣𑀽𑀧𑁄, 𑀲𑁄 𑀧𑀦 𑀪𑀺𑀦𑁆𑀦𑁄 𑀫𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀪𑀺𑀦𑁆𑀦𑀣𑀽𑀧𑁂’’𑀢𑀺. 𑀅𑀧𑁆𑀧𑀝𑀺𑀲𑀭𑀡𑁂𑀢𑀺 𑀢𑀲𑁆𑀲𑁂𑀯 𑀅𑀪𑀸𑀯𑁂𑀦 𑀧𑀝𑀺𑀲𑀭𑀡𑀯𑀺𑀭𑀳𑀺𑀢𑁂.

𑀦𑀦𑀼 𑀘𑀸𑀬𑀁 𑀦𑀸𑀝𑀧𑀼𑀢𑁆𑀢𑁄 𑀦𑀸𑀴𑀦𑁆𑀤𑀯𑀸𑀲𑀺𑀓𑁄, 𑀲𑁄 𑀓𑀲𑁆𑀫𑀸 𑀧𑀸𑀯𑀸𑀬𑀁 𑀓𑀸𑀮𑀁𑀓𑀢𑁄𑀢𑀺. 𑀲𑁄 𑀓𑀺𑀭 𑀉𑀧𑀸𑀮𑀺𑀦𑀸 𑀕𑀳𑀧𑀢𑀺𑀦𑀸 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑁂𑀦 𑀤𑀲𑀳𑀺 𑀕𑀸𑀣𑀸𑀳𑀺 𑀪𑀸𑀲𑀺𑀢𑁂 𑀩𑀼𑀤𑁆𑀥𑀕𑀼𑀡𑁂 𑀲𑀼𑀢𑁆𑀯𑀸 𑀉𑀡𑁆𑀳𑀁 𑀮𑁄𑀳𑀺𑀢𑀁 𑀙𑀟𑁆𑀟𑁂𑀲𑀺. 𑀅𑀣 𑀦𑀁 𑀅𑀨𑀸𑀲𑀼𑀓𑀁 𑀕𑀳𑁂𑀢𑁆𑀯𑀸 𑀧𑀸𑀯𑀁 𑀅𑀕𑀫𑀁𑀲𑀼, 𑀲𑁄 𑀢𑀢𑁆𑀣 𑀓𑀸𑀮𑀫𑀓𑀸𑀲𑀺. 𑀓𑀸𑀮𑀁 𑀓𑀼𑀭𑀼𑀫𑀸𑀦𑁄 𑀘 ‘‘𑀫𑀫 𑀮𑀤𑁆𑀥𑀺 𑀅𑀦𑀺𑀬𑁆𑀬𑀸𑀦𑀺𑀓𑀸 𑀲𑀸𑀭𑀭𑀳𑀺𑀢𑀸, 𑀫𑀬𑀁 𑀢𑀸𑀯 𑀦𑀝𑁆𑀞𑀸, 𑀅𑀯𑀲𑁂𑀲𑀚𑀦𑁄 𑀫𑀸 𑀅𑀧𑀸𑀬𑀧𑀽𑀭𑀓𑁄 𑀅𑀳𑁄𑀲𑀺. 𑀲𑀘𑁂 𑀧𑀦𑀸𑀳𑀁 ‘𑀫𑀫 𑀲𑀸𑀲𑀦𑀁 𑀅𑀦𑀺𑀬𑁆𑀬𑀸𑀦𑀺𑀓’𑀦𑁆𑀢𑀺 𑀯𑀓𑁆𑀔𑀸𑀫𑀺, 𑀦 𑀲𑀤𑁆𑀤𑀳𑀺𑀲𑁆𑀲𑀦𑁆𑀢𑀺. 𑀬𑀁𑀦𑀽𑀦𑀸𑀳𑀁 𑀤𑁆𑀯𑁂𑀧𑀺 𑀚𑀦𑁂 𑀦 𑀏𑀓𑀦𑀻𑀳𑀸𑀭𑁂𑀦 𑀉𑀕𑁆𑀕𑀡𑁆𑀳𑀸𑀧𑁂𑀬𑁆𑀬𑀁, 𑀢𑁂 𑀫𑀫𑀘𑁆𑀘𑀬𑁂𑀦 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀤𑀺𑀲𑁆𑀲𑀦𑁆𑀢𑀺. 𑀲𑀢𑁆𑀣𑀸 𑀢𑀁 𑀯𑀺𑀯𑀸𑀤𑀁 𑀧𑀝𑀺𑀘𑁆𑀘 𑀏𑀓𑀁 𑀥𑀫𑁆𑀫𑀓𑀣𑀁 𑀓𑀣𑁂𑀲𑁆𑀲𑀢𑀺, 𑀢𑀢𑁄 𑀢𑁂 𑀲𑀸𑀲𑀦𑀲𑁆𑀲 𑀫𑀳𑀦𑁆𑀢𑀪𑀸𑀯𑀁 𑀚𑀸𑀢𑀺𑀲𑁆𑀲𑀦𑁆𑀢𑀻’’𑀢𑀺.

𑀅𑀣 𑀦𑀁 𑀏𑀓𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀳 ‘‘𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀤𑀼𑀩𑁆𑀩𑀮𑀸, 𑀫𑀬𑁆𑀳𑀁 𑀇𑀫𑀲𑁆𑀫𑀺𑀁 𑀥𑀫𑁆𑀫𑁂 𑀲𑀸𑀭𑀁 𑀆𑀘𑀺𑀓𑁆𑀔𑀣 𑀆𑀘𑀭𑀺𑀬𑀧𑁆𑀧𑀫𑀸𑀡’’𑀦𑁆𑀢𑀺. 𑀆𑀯𑀼𑀲𑁄, 𑀢𑁆𑀯𑀁 𑀫𑀫𑀘𑁆𑀘𑀬𑁂𑀦 𑀲𑀲𑁆𑀲𑀢𑀦𑁆𑀢𑀺 𑀕𑀡𑁆𑀳𑁂𑀬𑁆𑀬𑀸𑀲𑀻𑀢𑀺. 𑀅𑀧𑀭𑁄𑀧𑀺 𑀢𑀁 𑀉𑀧𑀲𑀗𑁆𑀓𑀫𑀺, 𑀢𑀁 𑀉𑀘𑁆𑀙𑁂𑀤𑀁 𑀕𑀡𑁆𑀳𑀸𑀧𑁂𑀲𑀺. 𑀏𑀯𑀁 𑀤𑁆𑀯𑁂𑀧𑀺 𑀚𑀦𑁂 𑀏𑀓𑀮𑀤𑁆𑀥𑀺𑀓𑁂 𑀅𑀓𑀢𑁆𑀯𑀸 𑀩𑀳𑀽 𑀦𑀸𑀦𑀸𑀦𑀻𑀳𑀸𑀭𑁂𑀦 𑀉𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 𑀓𑀸𑀮𑀫𑀓𑀸𑀲𑀺. 𑀢𑁂 𑀢𑀲𑁆𑀲 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀧𑀼𑀘𑁆𑀙𑀺𑀁𑀲𑀼 ‘‘𑀓𑀲𑁆𑀲𑀸𑀯𑀼𑀲𑁄, 𑀆𑀘𑀭𑀺𑀬𑁄 𑀲𑀸𑀭𑀫𑀸𑀘𑀺𑀓𑁆𑀔𑀻’’𑀢𑀺? 𑀏𑀓𑁄 𑀉𑀝𑁆𑀞𑀳𑀺𑀢𑁆𑀯𑀸 𑀫𑀬𑁆𑀳𑀦𑁆𑀢𑀺 𑀆𑀳. 𑀓𑀺𑀁 𑀆𑀘𑀺𑀓𑁆𑀔𑀻𑀢𑀺? 𑀲𑀲𑁆𑀲𑀢𑀦𑁆𑀢𑀺. 𑀅𑀧𑀭𑁄 𑀢𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀫𑀬𑁆𑀳𑀁 𑀲𑀸𑀭𑀁 𑀆𑀘𑀺𑀓𑁆𑀔𑀻𑀢𑀺 𑀆𑀳. 𑀏𑀯𑀁 𑀲𑀩𑁆𑀩𑁂 ‘‘𑀫𑀬𑁆𑀳𑀁 𑀲𑀸𑀭𑀁 𑀆𑀘𑀺𑀓𑁆𑀔𑀺, 𑀅𑀳𑀁 𑀚𑁂𑀝𑁆𑀞𑀓𑁄’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀸𑀤𑀁 𑀯𑀟𑁆𑀠𑁂𑀢𑁆𑀯𑀸 𑀅𑀓𑁆𑀓𑁄𑀲𑁂 𑀘𑁂𑀯 𑀧𑀭𑀺𑀪𑀸𑀲𑁂 𑀘 𑀳𑀢𑁆𑀣𑀧𑀸𑀤𑀧𑀳𑀸𑀭𑀸𑀤𑀻𑀦𑀺 𑀘 𑀧𑀯𑀢𑁆𑀢𑁂𑀢𑁆𑀯𑀸 𑀏𑀓𑀫𑀕𑁆𑀕𑁂𑀦 𑀤𑁆𑀯𑁂 𑀅𑀕𑀘𑁆𑀙𑀦𑁆𑀢𑀸 𑀦𑀸𑀦𑀸𑀤𑀺𑀲𑀸𑀲𑀼 𑀧𑀓𑁆𑀓𑀫𑀺𑀁𑀲𑀼, 𑀏𑀓𑀘𑁆𑀘𑁂 𑀕𑀺𑀳𑀻 𑀅𑀳𑁂𑀲𑀼𑀁.

𑀪𑀕𑀯𑀢𑁄 𑀧𑀦 𑀥𑀭𑀫𑀸𑀦𑀓𑀸𑀮𑁂𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑁂 𑀯𑀺𑀯𑀸𑀤𑁄 𑀦 𑀉𑀧𑁆𑀧𑀚𑁆𑀚𑀺. 𑀲𑀢𑁆𑀣𑀸 𑀳𑀺 𑀢𑁂𑀲𑀁 𑀯𑀺𑀯𑀸𑀤𑀓𑀸𑀭𑀡𑁂 𑀉𑀧𑁆𑀧𑀦𑁆𑀦𑀫𑀢𑁆𑀢𑁂𑀬𑁂𑀯 𑀲𑀬𑀁 𑀯𑀸 𑀕𑀦𑁆𑀢𑁆𑀯𑀸 𑀢𑁂 𑀯𑀸 𑀪𑀺𑀓𑁆𑀔𑀽 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀔𑀦𑁆𑀢𑀺 𑀫𑁂𑀢𑁆𑀢𑀸 𑀧𑀝𑀺𑀲𑀗𑁆𑀔𑀸 𑀅𑀯𑀺𑀳𑀺𑀁𑀲𑀸 𑀲𑀸𑀭𑀡𑀻𑀬𑀥𑀫𑁆𑀫𑁂𑀲𑀼 𑀏𑀓𑀁 𑀓𑀸𑀭𑀡𑀁 𑀓𑀣𑁂𑀢𑁆𑀯𑀸 𑀯𑀺𑀯𑀸𑀤𑀁 𑀯𑀽𑀧𑀲𑀫𑁂𑀢𑀺. 𑀏𑀯𑀁 𑀥𑀭𑀫𑀸𑀦𑁄𑀧𑀺 𑀲𑀗𑁆𑀖𑀲𑁆𑀲 𑀧𑀢𑀺𑀝𑁆𑀞𑀸𑀯 𑀅𑀳𑁄𑀲𑀺. 𑀧𑀭𑀺𑀦𑀺𑀩𑁆𑀩𑀸𑀬𑀫𑀸𑀦𑁄𑀧𑀺 𑀅𑀯𑀺𑀯𑀸𑀤𑀓𑀸𑀭𑀡𑀁 𑀓𑀢𑁆𑀯𑀸𑀯 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀪𑀕𑀯𑀢𑀸 𑀳𑀺 𑀲𑀼𑀢𑁆𑀢𑁂 𑀤𑁂𑀲𑀺𑀢𑀸 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸 (𑀅. 𑀦𑀺. 𑁪.𑁧𑁮𑁦; 𑀤𑀻. 𑀦𑀺. 𑁨.𑁧𑁮𑁭) 𑀬𑀸𑀯𑀚𑁆𑀚𑀤𑀺𑀯𑀲𑀸 𑀪𑀺𑀓𑁆𑀔𑀽𑀦𑀁 𑀧𑀢𑀺𑀝𑁆𑀞𑀸 𑀘 𑀅𑀯𑀲𑁆𑀲𑀬𑁄 𑀘. 𑀢𑀣𑀸 𑀔𑀦𑁆𑀥𑀓𑁂 𑀤𑁂𑀲𑀺𑀢𑀸 𑀘𑀢𑁆𑀢𑀸𑀭𑁄 𑀫𑀳𑀸𑀧𑀤𑁂𑀲𑀸 (𑀫𑀳𑀸𑀯. 𑁩𑁦𑁫) 𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀺 𑀧𑀜𑁆𑀳𑀩𑁆𑀬𑀸𑀓𑀭𑀡𑀸𑀦𑀺 (𑀅. 𑀦𑀺. 𑁪.𑁪𑁨) 𑀘. 𑀢𑁂𑀦𑁂𑀯𑀸𑀳 𑁋 ‘‘𑀬𑁄 𑀯𑁄 𑀫𑀬𑀸, 𑀆𑀦𑀦𑁆𑀤, 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄, 𑀲𑁄 𑀯𑁄 𑀫𑀫𑀘𑁆𑀘𑀬𑁂𑀦 𑀲𑀢𑁆𑀣𑀸’’𑀢𑀺 (𑀤𑀻. 𑀦𑀺. 𑁨.𑁨𑁧𑁬).

𑁪𑁨. 𑀅𑀣 𑀔𑁄 𑀘𑀼𑀦𑁆𑀤𑁄 𑀲𑀫𑀡𑀼𑀤𑁆𑀤𑁂𑀲𑁄𑀢𑀺 𑀅𑀬𑀁 𑀣𑁂𑀭𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀺𑀓𑁄. 𑀢𑀁 𑀪𑀺𑀓𑁆𑀔𑀽 𑀅𑀦𑀼𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀘𑀼𑀦𑁆𑀤𑁄 𑀲𑀫𑀡𑀼𑀤𑁆𑀤𑁂𑀲𑁄𑀢𑀺 𑀲𑀫𑀼𑀤𑀸𑀘𑀭𑀺𑀢𑁆𑀯𑀸 𑀣𑁂𑀭𑀓𑀸𑀮𑁂𑀧𑀺 𑀢𑀣𑁂𑀯 𑀲𑀫𑀼𑀤𑀸𑀘𑀭𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀼𑀦𑁆𑀤𑁄 𑀲𑀫𑀡𑀼𑀤𑁆𑀤𑁂𑀲𑁄’’𑀢𑀺. 𑀉𑀧𑀲𑀗𑁆𑀓𑀫𑀻𑀢𑀺 𑀓𑀲𑁆𑀫𑀸 𑀉𑀧𑀲𑀗𑁆𑀓𑀫𑀺? 𑀦𑀸𑀝𑀧𑀼𑀢𑁆𑀢𑁂 𑀓𑀺𑀭 𑀓𑀸𑀮𑀁𑀓𑀢𑁂 𑀚𑀫𑁆𑀩𑀼𑀤𑀻𑀧𑁂 𑀫𑀦𑀼𑀲𑁆𑀲𑀸 𑀢𑀢𑁆𑀣 𑀢𑀢𑁆𑀣 𑀓𑀣𑀁 𑀧𑀯𑀢𑁆𑀢𑀬𑀺𑀁𑀲𑀼 𑁋 ‘‘𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀏𑀓𑁄 𑀲𑀢𑁆𑀣𑀸𑀢𑀺 𑀧𑀜𑁆𑀜𑀸𑀬𑀺𑀢𑁆𑀣, 𑀢𑀲𑁆𑀲 𑀓𑀸𑀮𑀓𑀺𑀭𑀺𑀬𑀸𑀬 𑀲𑀸𑀯𑀓𑀸𑀦𑀁 𑀏𑀯𑀭𑀽𑀧𑁄 𑀯𑀺𑀯𑀸𑀤𑁄 𑀚𑀸𑀢𑁄, 𑀲𑀫𑀡𑁄 𑀧𑀦 𑀕𑁄𑀢𑀫𑁄 𑀚𑀫𑁆𑀩𑀼𑀤𑀻𑀧𑁂 𑀘𑀦𑁆𑀤𑁄 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀘 𑀧𑀸𑀓𑀝𑁄𑀬𑁂𑀯, 𑀓𑀻𑀤𑀺𑀲𑁄 𑀦𑀼 𑀔𑁄 𑀲𑀫𑀡𑁂 𑀕𑁄𑀢𑀫𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀸𑀯𑀓𑀸𑀦𑀁 𑀯𑀺𑀯𑀸𑀤𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀣𑁂𑀭𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀁 𑀓𑀣𑀁 𑀕𑀳𑁂𑀢𑁆𑀯𑀸 𑀤𑀲𑀩𑀮𑀲𑁆𑀲 𑀆𑀭𑁄𑀘𑁂𑀲𑁆𑀲𑀸𑀫𑀺, 𑀲𑀢𑁆𑀣𑀸 𑀘 𑀏𑀢𑀁 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀏𑀓𑀁 𑀤𑁂𑀲𑀦𑀁 𑀓𑀣𑁂𑀲𑁆𑀲𑀢𑀻’’𑀢𑀺. 𑀲𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑁂𑀦 𑀲𑀸𑀫𑀕𑀸𑀫𑁄, 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀉𑀚𑀼𑀫𑁂𑀯 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀦𑁆𑀢𑁆𑀯𑀸 𑀬𑁂𑀦𑀲𑁆𑀲 𑀉𑀧𑀚𑁆𑀛𑀸𑀬𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀉𑀧𑀚𑁆𑀛𑀸𑀬𑁄 𑀫𑁂 𑀫𑀳𑀸𑀧𑀜𑁆𑀜𑁄, 𑀲𑁄 𑀇𑀫𑀁 𑀲𑀸𑀲𑀦𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑁆𑀲𑀢𑀺, 𑀅𑀣 𑀲𑀢𑁆𑀣𑀸 𑀢𑀤𑀦𑀼𑀭𑀽𑀧𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀢𑀻’’𑀢𑀺. 𑀓𑀣𑀸𑀧𑀸𑀪𑀢𑀦𑁆𑀢𑀺 𑀓𑀣𑀸𑀫𑀽𑀮𑀁, 𑀫𑀽𑀮𑀜𑁆𑀳𑀺 𑀧𑀸𑀪𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋

‘‘𑀅𑀧𑁆𑀧𑀓𑁂𑀦𑀧𑀺 𑀫𑁂𑀥𑀸𑀯𑀻, 𑀧𑀸𑀪𑀢𑁂𑀦 𑀯𑀺𑀘𑀓𑁆𑀔𑀡𑁄;

𑀲𑀫𑀼𑀝𑁆𑀞𑀸𑀧𑁂𑀢𑀺 𑀅𑀢𑁆𑀢𑀸𑀦𑀁, 𑀅𑀡𑀼𑀁 𑀅𑀕𑁆𑀕𑀺𑀁𑀯 𑀲𑀦𑁆𑀥𑀫’’𑀦𑁆𑀢𑀺. (𑀚𑀸. 𑁨.𑁧.𑁪);

𑀤𑀲𑁆𑀲𑀦𑀸𑀬𑀸𑀢𑀺 𑀤𑀲𑁆𑀲𑀦𑀢𑁆𑀣𑀸𑀬. 𑀓𑀺𑀁 𑀧𑀦𑀺𑀫𑀺𑀦𑀸 𑀪𑀕𑀯𑀸 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄𑀢𑀺? 𑀦𑁄 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀅𑀬𑀜𑁆𑀳𑀺 𑀆𑀬𑀲𑁆𑀫𑀸 𑀤𑀺𑀯𑀸 𑀦𑀯 𑀯𑀸𑀭𑁂 𑀭𑀢𑁆𑀢𑀺𑀁 𑀦𑀯 𑀯𑀸𑀭𑁂𑀢𑀺 𑀏𑀓𑀸𑀳𑀁 𑀅𑀝𑁆𑀞𑀸𑀭𑀲 𑀯𑀸𑀭𑁂 𑀉𑀧𑀝𑁆𑀞𑀸𑀦𑀫𑁂𑀯 𑀕𑀘𑁆𑀙𑀢𑀺. 𑀤𑀺𑀯𑀲𑀲𑁆𑀲 𑀧𑀦 𑀲𑀢𑀓𑁆𑀔𑀢𑁆𑀢𑀼𑀁 𑀯𑀸 𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀯𑀸 𑀕𑀦𑁆𑀢𑀼𑀓𑀸𑀫𑁄 𑀲𑀫𑀸𑀦𑁄𑀧𑀺 𑀦 𑀅𑀓𑀸𑀭𑀡𑀸 𑀕𑀘𑁆𑀙𑀢𑀺, 𑀏𑀓𑀁 𑀧𑀜𑁆𑀳𑀼𑀤𑁆𑀥𑀸𑀭𑀁 𑀕𑀳𑁂𑀢𑁆𑀯𑀸𑀯 𑀕𑀘𑁆𑀙𑀢𑀺. 𑀲𑁄 𑀢𑀁𑀤𑀺𑀯𑀲𑀁 𑀢𑁂𑀦 𑀕𑀦𑁆𑀢𑀼𑀓𑀸𑀫𑁄 𑀏𑀯𑀫𑀸𑀳.

𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑀗𑁆𑀖𑀫𑀚𑁆𑀛𑁂 𑀉𑀧𑁆𑀧𑀦𑁆𑀦𑁄 𑀯𑀺𑀯𑀸𑀤𑁄 𑀓𑀣𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀢𑀺? 𑀓𑁄𑀲𑀫𑁆𑀩𑀓𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁪𑁫𑁧) 𑀯𑀺𑀬 𑀳𑀺 𑀤𑁆𑀯𑀻𑀲𑀼 𑀪𑀺𑀓𑁆𑀔𑀽𑀲𑀼 𑀯𑀺𑀯𑀸𑀤𑀁 𑀆𑀧𑀦𑁆𑀦𑁂𑀲𑀼 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀢𑁂𑀲𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀯𑀺𑀯𑀤𑀦𑁆𑀢𑀺, 𑀢𑁂𑀲𑀁 𑀑𑀯𑀸𑀤𑀁 𑀕𑀡𑁆𑀳𑀦𑁆𑀢𑁄 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀯𑀺𑀯𑀤𑀢𑀺, 𑀢𑀢𑁄 𑀢𑁂𑀲𑀁 𑀉𑀧𑀝𑁆𑀞𑀸𑀓𑀸 𑀯𑀺𑀯𑀤𑀦𑁆𑀢𑀺, 𑀅𑀣 𑀫𑀦𑀼𑀲𑁆𑀲𑀸𑀦𑀁 𑀆𑀭𑀓𑁆𑀔𑀤𑁂𑀯𑀢𑀸 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀥𑀫𑁆𑀫𑀯𑀸𑀤𑀻𑀦𑀁 𑀆𑀭𑀓𑁆𑀔𑀤𑁂𑀯𑀢𑀸 𑀥𑀫𑁆𑀫𑀯𑀸𑀤𑀺𑀦𑀺𑀬𑁄 𑀳𑁄𑀦𑁆𑀢𑀺, 𑀅𑀥𑀫𑁆𑀫𑀯𑀸𑀤𑀻𑀦𑀁 𑀅𑀥𑀫𑁆𑀫𑀯𑀸𑀤𑀺𑀦𑀺𑀬𑁄 𑀳𑁄𑀦𑁆𑀢𑀺. 𑀢𑀢𑁄 𑀢𑀸𑀲𑀁 𑀆𑀭𑀓𑁆𑀔𑀤𑁂𑀯𑀢𑀸𑀦𑀁 𑀫𑀺𑀢𑁆𑀢𑀸 𑀪𑀼𑀫𑁆𑀫𑀤𑁂𑀯𑀢𑀸 𑀪𑀺𑀚𑁆𑀚𑀦𑁆𑀢𑀺. 𑀏𑀯𑀁 𑀧𑀭𑀫𑁆𑀧𑀭𑀸𑀬 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀞𑀧𑁂𑀢𑁆𑀯𑀸 𑀅𑀭𑀺𑀬𑀲𑀸𑀯𑀓𑁂 𑀲𑀩𑁆𑀩𑁂 𑀤𑁂𑀯𑀫𑀦𑀼𑀲𑁆𑀲𑀸 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀳𑁄𑀦𑁆𑀢𑀺. 𑀥𑀫𑁆𑀫𑀯𑀸𑀤𑀻𑀳𑀺 𑀧𑀦 𑀅𑀥𑀫𑁆𑀫𑀯𑀸𑀤𑀺𑀦𑁄𑀯 𑀩𑀳𑀼𑀢𑀭𑀸 𑀳𑁄𑀦𑁆𑀢𑀺, 𑀢𑀢𑁄 𑀬𑀁 𑀩𑀳𑀽𑀳𑀺 𑀕𑀳𑀺𑀢𑀁, 𑀢𑀁 𑀕𑀡𑁆𑀳𑀦𑁆𑀢𑀺. 𑀥𑀫𑁆𑀫𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀩𑀳𑀼𑀢𑀭𑀸𑀯 𑀅𑀥𑀫𑁆𑀫𑀁 𑀕𑀡𑁆𑀳𑀦𑁆𑀢𑀺. 𑀢𑁂 𑀅𑀥𑀫𑁆𑀫𑀁 𑀧𑀽𑀭𑁂𑀢𑁆𑀯𑀸 𑀯𑀺𑀳𑀭𑀦𑁆𑀢𑀸 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀏𑀯𑀁 𑀏𑀓𑀲𑁆𑀫𑀺𑀁 𑀯𑀺𑀳𑀸𑀭𑁂 𑀲𑀗𑁆𑀖𑀫𑀚𑁆𑀛𑁂 𑀉𑀧𑁆𑀧𑀦𑁆𑀦𑁄 𑀯𑀺𑀯𑀸𑀤𑁄 𑀩𑀳𑀽𑀦𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀳𑁄𑀢𑀺.

𑁪𑁩. 𑀅𑀪𑀺𑀜𑁆𑀜𑀸 𑀤𑁂𑀲𑀺𑀢𑀸𑀢𑀺 𑀫𑀳𑀸𑀩𑁄𑀥𑀺𑀫𑀽𑀮𑁂 𑀦𑀺𑀲𑀺𑀦𑁆𑀦𑁂𑀦 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸 𑀧𑀯𑁂𑀤𑀺𑀢𑀸. 𑀧𑀢𑀺𑀲𑁆𑀲𑀬𑀫𑀸𑀦𑀭𑀽𑀧𑀸 𑀯𑀺𑀳𑀭𑀦𑁆𑀢𑀻𑀢𑀺 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑀺. 𑀪𑀕𑀯𑀢𑁄 𑀅𑀘𑁆𑀘𑀬𑁂𑀦𑀸𑀢𑀺 𑀏𑀢𑀭𑀳𑀺 𑀪𑀕𑀯𑀦𑁆𑀢𑀁 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸 𑀲𑀕𑀸𑀭𑀯𑀸 𑀯𑀺𑀳𑀭𑀦𑁆𑀢𑀺, 𑀢𑀼𑀫𑁆𑀳𑀸𑀓𑀁, 𑀪𑀦𑁆𑀢𑁂, 𑀉𑀕𑁆𑀕𑀢𑁂𑀚𑀢𑀸𑀬 𑀤𑀼𑀭𑀸𑀲𑀤𑀢𑀸𑀬 𑀯𑀺𑀯𑀸𑀤𑀁 𑀚𑀦𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀪𑀕𑀯𑀢𑁄 𑀧𑀦 𑀅𑀘𑁆𑀘𑀬𑁂𑀦 𑀯𑀺𑀯𑀸𑀤𑀁 𑀚𑀦𑁂𑀬𑁆𑀬𑀼𑀦𑁆𑀢𑀺 𑀯𑀤𑀢𑀺. 𑀬𑀢𑁆𑀣 𑀧𑀦 𑀢𑀁 𑀯𑀺𑀯𑀸𑀤𑀁 𑀚𑀦𑁂𑀬𑁆𑀬𑀼𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀅𑀚𑁆𑀛𑀸𑀚𑀻𑀯𑁂 𑀯𑀸 𑀅𑀥𑀺𑀧𑀸𑀢𑀺𑀫𑁄𑀓𑁆𑀔𑁂 𑀯𑀸𑀢𑀺 𑀆𑀳. 𑀢𑀢𑁆𑀣 𑀅𑀚𑁆𑀛𑀸𑀚𑀻𑀯𑁂𑀢𑀺 𑀆𑀚𑀻𑀯𑀳𑁂𑀢𑀼 𑀆𑀚𑀻𑀯𑀓𑀸𑀭𑀡𑀸 𑁋 ‘‘𑀪𑀺𑀓𑁆𑀔𑀼 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀉𑀮𑁆𑀮𑀧𑀢𑀺 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀧𑀭𑀺. 𑁨𑁮𑁭) 𑀦𑀬𑁂𑀦 𑀧𑀭𑀺𑀯𑀸𑀭𑁂 𑀧𑀜𑁆𑀜𑀢𑁆𑀢𑀸𑀦𑀺 𑀙 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀢𑀸𑀦𑀺 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀺 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀺 𑀅𑀥𑀺𑀧𑀸𑀢𑀺𑀫𑁄𑀓𑁆𑀔𑀁 𑀦𑀸𑀫. 𑀅𑀧𑁆𑀧𑀫𑀢𑁆𑀢𑀓𑁄 𑀲𑁄 𑀆𑀦𑀦𑁆𑀤𑀸𑀢𑀺 𑀅𑀚𑁆𑀛𑀸𑀚𑀻𑀯𑀁 𑀅𑀥𑀺𑀧𑀸𑀢𑀺𑀫𑁄𑀓𑁆𑀔𑀜𑁆𑀘 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀯𑀺𑀯𑀸𑀤𑁄 𑀦𑀸𑀫 𑀬𑀲𑁆𑀫𑀸 𑀧𑀭𑀲𑁆𑀲 𑀓𑀣𑀸𑀬𑀧𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑀧𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀼𑀧𑁆𑀧𑀚𑀳𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀅𑀧𑁆𑀧𑀫𑀢𑁆𑀢𑀓𑁄’’𑀢𑀺 𑀯𑀼𑀢𑁆𑀢𑁄.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀇𑀥𑁂𑀓𑀘𑁆𑀘𑁄 ‘‘𑀦 𑀲𑀓𑁆𑀓𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀅𑀦𑀼𑀮𑁆𑀮𑀧𑀦𑁆𑀢𑁂𑀦 𑀓𑀺𑀜𑁆𑀘𑀺 𑀮𑀤𑁆𑀥𑀼’’𑀦𑁆𑀢𑀺𑀆𑀤𑀻𑀦𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀚𑀻𑀯𑀳𑁂𑀢𑀼 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀯𑀸 𑀉𑀮𑁆𑀮𑀧𑀢𑀺 𑀲𑀜𑁆𑀘𑀭𑀺𑀢𑁆𑀢𑀁 𑀯𑀸 𑀆𑀧𑀚𑁆𑀚𑀢𑀺, 𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀺, 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀸𑀫𑀦𑁆𑀢𑀚𑀧𑁆𑀧𑀦𑀁 𑀯𑀸 𑀓𑀭𑁄𑀢𑀺, 𑀅𑀕𑀺𑀮𑀸𑀦𑁄 𑀯𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀧𑀡𑀻𑀢𑀪𑁄𑀚𑀦𑀸𑀦𑀺 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀪𑀺𑀓𑁆𑀔𑀼𑀦𑀻 𑀯𑀸 𑀧𑀦 𑀢𑀸𑀦𑀺 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀧𑀸𑀝𑀺𑀤𑁂𑀲𑀦𑀻𑀬𑀁 𑀆𑀧𑀚𑁆𑀚𑀢𑀺, 𑀬𑁄 𑀓𑁄𑀘𑀺 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀁 𑀬𑀁𑀓𑀺𑀜𑁆𑀘𑀺 𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀫𑁂𑀯 𑀯𑀸 𑀓𑀭𑁄𑀢𑀺, 𑀅𑀜𑁆𑀜𑀢𑀭𑀁 𑀯𑀸 𑀧𑀦 𑀧𑀡𑁆𑀡𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀦𑁆𑀢𑁄 𑀯𑀺𑀳𑀭𑀢𑀺, 𑀢𑀫𑁂𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻 𑀏𑀯𑀁 𑀲𑀜𑁆𑀚𑀸𑀦𑀦𑁆𑀢𑀺 𑁋 ‘‘𑀓𑀺𑀁 𑀇𑀫𑀲𑁆𑀲 𑀇𑀫𑀺𑀦𑀸 𑀮𑀸𑀪𑁂𑀦 𑀮𑀤𑁆𑀥𑁂𑀦, 𑀬𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀺, 𑀧𑀡𑁆𑀡𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀢𑀻’’𑀢𑀺. 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑀧𑀺𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀓𑀺𑀲𑁆𑀲 𑀫𑀬𑁆𑀳𑀁 𑀇𑀫𑀺𑀦𑀸 𑀮𑀸𑀪𑁂𑀦, 𑀬𑁆𑀯𑀸𑀳𑀁 𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀧𑀩𑁆𑀩𑀚𑀺𑀢𑁆𑀯𑀸 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀫𑀺, 𑀧𑀡𑁆𑀡𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀁 𑀓𑀭𑁄𑀫𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀢𑁄 𑀑𑀭𑀫𑀢𑀺. 𑀏𑀯𑀁 𑀧𑀭𑀲𑁆𑀲 𑀓𑀣𑀸𑀬𑀧𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑀧𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀼𑀧𑁆𑀧𑀚𑀳𑁄 𑀳𑁄𑀢𑀺. 𑀢𑁂𑀦 𑀪𑀕𑀯𑀸 ‘‘𑀅𑀧𑁆𑀧𑀫𑀢𑁆𑀢𑀓𑁄’’𑀢𑀺 𑀆𑀳.

𑀫𑀕𑁆𑀕𑁂 𑀯𑀸 𑀳𑀺, 𑀆𑀦𑀦𑁆𑀤, 𑀧𑀝𑀺𑀧𑀤𑀸𑀬 𑀯𑀸𑀢𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀁 𑀧𑀢𑁆𑀯𑀸 𑀯𑀺𑀯𑀸𑀤𑁄 𑀦𑀸𑀫 𑀲𑀩𑁆𑀩𑀲𑁄 𑀯𑀽𑀧𑀲𑀫𑁆𑀫𑀢𑀺, 𑀦𑀢𑁆𑀣𑀺 𑀅𑀥𑀺𑀕𑀢𑀫𑀕𑁆𑀕𑀸𑀦𑀁 𑀯𑀺𑀯𑀸𑀤𑁄. 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑀁 𑀧𑀦 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀜𑁆𑀘 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀏𑀯𑀁 𑀪𑀺𑀓𑁆𑀔𑀼𑀁 𑀫𑀦𑀼𑀲𑁆𑀲𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀲𑀫𑁆𑀪𑀸𑀯𑁂𑀦𑁆𑀢𑀺. 𑀲𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀬𑁄 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑁂 𑀧𑀼𑀘𑁆𑀙𑀢𑀺 ‘‘𑀓𑀺𑀁 𑀆𑀕𑀢𑀢𑁆𑀣𑀸’’𑀢𑀺. 𑀫𑀦𑀲𑀺𑀓𑀸𑀢𑀩𑁆𑀩𑀓𑀫𑁆𑀫𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀢𑀼𑀁, 𑀪𑀦𑁆𑀢𑁂𑀢𑀺. 𑀦𑀺𑀲𑀻𑀤𑀣, 𑀔𑀡𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑀼𑀁 𑀲𑀫𑀢𑁆𑀣𑀓𑀫𑁆𑀫𑀝𑁆𑀞𑀸𑀦𑀓𑀣𑀁 𑀆𑀘𑀺𑀓𑁆𑀔𑀺𑀲𑁆𑀲𑀸𑀫𑀻𑀢𑀺 𑀯𑀢𑁆𑀯𑀸 𑀯𑀤𑀢𑀺 𑁋 ‘‘𑀇𑀥 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀢𑀺, 𑀢𑀲𑁆𑀲 𑀢𑀁 𑀫𑀦𑀲𑀺𑀓𑀭𑁄𑀢𑁄 𑀑𑀪𑀸𑀲𑁄 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀧𑀞𑀫𑀫𑀕𑁆𑀕𑁄 𑀦𑀸𑀫. 𑀲𑁄 𑀤𑀼𑀢𑀺𑀬𑀁 𑀑𑀪𑀸𑀲𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀤𑀼𑀢𑀺𑀬𑀫𑀕𑁆𑀕𑁄 𑀅𑀥𑀺𑀕𑀢𑁄 𑀳𑁄𑀢𑀺, 𑀏𑀯𑀁 𑀢𑀢𑀺𑀬𑀜𑁆𑀘 𑀘𑀢𑀼𑀢𑁆𑀣𑀜𑁆𑀘. 𑀏𑀢𑁆𑀢𑀸𑀯𑀢𑀸 𑀫𑀕𑁆𑀕𑀧𑁆𑀧𑀢𑁆𑀢𑁄 𑀘𑁂𑀯 𑀨𑀮𑀧𑁆𑀧𑀢𑁆𑀢𑁄 𑀘 𑀳𑁄𑀢𑀻’’𑀢𑀺. 𑀅𑀣 𑀢𑁂 𑀪𑀺𑀓𑁆𑀔𑀽 ‘‘𑀅𑀔𑀻𑀡𑀸𑀲𑀯𑁄 𑀦𑀸𑀫 𑀏𑀯𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀤𑁆𑀥𑀸𑀬𑀁 𑀔𑀻𑀡𑀸𑀲𑀯𑁄’’𑀢𑀺 𑀦𑀺𑀝𑁆𑀞𑀁 𑀕𑀘𑁆𑀙𑀦𑁆𑀢𑀺.

𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀓𑀸𑀮𑀁 𑀓𑀭𑁄𑀢𑀺. 𑀲𑀫𑀦𑁆𑀢𑀸 𑀪𑀺𑀓𑁆𑀔𑀸𑀘𑀸𑀭𑀕𑀸𑀫𑁂𑀳𑀺 𑀫𑀦𑀼𑀲𑁆𑀲𑀸 𑀆𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑀺 ‘‘𑀓𑁂𑀦𑀘𑀺, 𑀪𑀦𑁆𑀢𑁂, 𑀣𑁂𑀭𑁄 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁄’’𑀢𑀺. 𑀉𑀧𑀸𑀲𑀓𑀸 𑀧𑀼𑀩𑁆𑀩𑁂𑀯 𑀣𑁂𑀭𑁂𑀦 𑀧𑀜𑁆𑀳𑁄 𑀓𑀣𑀺𑀢𑁄 𑀅𑀫𑁆𑀳𑀸𑀓𑀦𑁆𑀢𑀺. 𑀢𑁂 𑀧𑀼𑀧𑁆𑀨𑀫𑀡𑁆𑀟𑀧𑀁 𑀧𑀼𑀧𑁆𑀨𑀓𑀽𑀝𑀸𑀕𑀸𑀭𑀁 𑀲𑀚𑁆𑀚𑁂𑀢𑁆𑀯𑀸 𑀲𑀼𑀯𑀡𑁆𑀡𑁂𑀦 𑀅𑀓𑁆𑀔𑀺𑀧𑀺𑀥𑀸𑀦𑀫𑀼𑀔𑀧𑀺𑀥𑀸𑀦𑀸𑀤𑀺𑀁 𑀓𑀭𑀺𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀲𑀸𑀥𑀼𑀓𑀻𑀴𑀺𑀓𑀁 𑀓𑀻𑀴𑁂𑀢𑁆𑀯𑀸 𑀛𑀸𑀧𑁂𑀢𑁆𑀯𑀸 𑀅𑀝𑁆𑀞𑀻𑀦𑀺 𑀆𑀤𑀸𑀬 𑀘𑁂𑀢𑀺𑀬𑀁 𑀓𑀭𑁄𑀦𑁆𑀢𑀺. 𑀅𑀜𑁆𑀜𑁂 𑀆𑀕𑀦𑁆𑀢𑀼𑀓𑀸 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 ‘‘𑀫𑀳𑀸𑀣𑁂𑀭𑀁 𑀧𑀲𑁆𑀲𑀺𑀲𑁆𑀲𑀸𑀫, 𑀓𑀳𑀁, 𑀆𑀯𑀼𑀲𑁄, 𑀫𑀳𑀸𑀣𑁂𑀭𑁄’’𑀢𑀺 𑀧𑀼𑀘𑁆𑀙𑀦𑁆𑀢𑀺. 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀪𑀦𑁆𑀢𑁂𑀢𑀺. 𑀤𑀼𑀓𑁆𑀓𑀭𑀁, 𑀆𑀯𑀼𑀲𑁄, 𑀣𑁂𑀭𑁂𑀦 𑀓𑀢𑀁 𑀫𑀕𑁆𑀕𑀨𑀮𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁂𑀦, 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀣, 𑀆𑀯𑀼𑀲𑁄𑀢𑀺. 𑀪𑀺𑀓𑁆𑀔𑀽𑀦𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀦𑁆𑀢𑁄 𑀇𑀫𑀺𑀦𑀸 𑀦𑀺𑀬𑀸𑀫𑁂𑀦 𑀓𑀣𑁂𑀲𑀺, 𑀪𑀦𑁆𑀢𑁂𑀢𑀺. 𑀦 𑀏𑀲𑁄, 𑀆𑀯𑀼𑀲𑁄, 𑀫𑀕𑁆𑀕𑁄, 𑀯𑀺𑀧𑀲𑁆𑀲𑀦𑀼𑀧𑀓𑁆𑀓𑀺𑀮𑁂𑀲𑁄 𑀦𑀸𑀫𑁂𑀲, 𑀦 𑀢𑀼𑀫𑁆𑀳𑁂 𑀚𑀸𑀦𑀺𑀢𑁆𑀣, 𑀧𑀼𑀣𑀼𑀚𑁆𑀚𑀦𑁄, 𑀆𑀯𑀼𑀲𑁄, 𑀣𑁂𑀭𑁄𑀢𑀺. 𑀢𑁂 𑀓𑀮𑀳𑀁 𑀓𑀭𑁄𑀦𑁆𑀢𑀸 𑀉𑀝𑁆𑀞𑀳𑀺𑀢𑁆𑀯𑀸 ‘‘𑀲𑀓𑀮𑀯𑀺𑀳𑀸𑀭𑁂 𑀪𑀺𑀓𑁆𑀔𑀽 𑀘 𑀪𑀺𑀓𑁆𑀔𑀸𑀘𑀸𑀭𑀕𑀸𑀫𑁂𑀲𑀼 𑀫𑀦𑀼𑀲𑁆𑀲𑀸 𑀘 𑀦 𑀚𑀸𑀦𑀦𑁆𑀢𑀺, 𑀢𑀼𑀫𑁆𑀳𑁂𑀬𑁂𑀯 𑀚𑀸𑀦𑀸𑀣. 𑀓𑀢𑀭𑀫𑀕𑁆𑀕𑁂𑀦 𑀢𑀼𑀫𑁆𑀳𑁂 𑀆𑀕𑀢𑀸, 𑀓𑀺𑀁 𑀯𑁄 𑀯𑀺𑀳𑀸𑀭𑀤𑁆𑀯𑀸𑀭𑁂 𑀘𑁂𑀢𑀺𑀬𑀁 𑀦 𑀤𑀺𑀝𑁆𑀞’’𑀦𑁆𑀢𑀺. 𑀏𑀯𑀁𑀯𑀸𑀤𑀻𑀦𑀁 𑀧𑀦 𑀪𑀺𑀓𑁆𑀔𑀽𑀦𑀁 𑀲𑀢𑀁 𑀯𑀸, 𑀳𑁄𑀢𑀼 𑀲𑀳𑀲𑁆𑀲𑀁 𑀯𑀸, 𑀬𑀸𑀯 𑀢𑀁 𑀮𑀤𑁆𑀥𑀺𑀁 𑀦𑀧𑁆𑀧𑀚𑀳𑀦𑁆𑀢𑀺, 𑀲𑀕𑁆𑀕𑁄𑀧𑀺 𑀫𑀕𑁆𑀕𑁄𑀧𑀺 𑀯𑀸𑀭𑀺𑀢𑁄𑀬𑁂𑀯.

𑀅𑀧𑀭𑁄𑀧𑀺 𑀢𑀸𑀤𑀺𑀲𑁄𑀯 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀦𑁆𑀢𑁄 𑀏𑀯𑀁 𑀓𑀣𑁂𑀢𑀺 𑁋 𑀘𑀺𑀢𑁆𑀢𑁂𑀦𑁂𑀯 𑀢𑀻𑀲𑀼 𑀉𑀤𑁆𑀥𑀦𑁂𑀲𑀼 𑀢𑀻𑀡𑀺 𑀓𑀧𑀮𑁆𑀮𑀸𑀦𑀺 𑀆𑀭𑁄𑀧𑁂𑀢𑁆𑀯𑀸 𑀳𑁂𑀝𑁆𑀞𑀸 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀘𑀺𑀢𑁆𑀢𑁂𑀦𑁂𑀯 𑀅𑀢𑁆𑀢𑀦𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀓𑀧𑀮𑁆𑀮𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀘𑀺𑀢𑁆𑀢𑁂𑀦𑁂𑀯 𑀤𑀡𑁆𑀟𑀓𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀪𑀚𑁆𑀚𑀺𑀢𑀩𑁆𑀩𑀁, 𑀬𑀸 𑀛𑀸𑀬𑀫𑀸𑀦𑁂 𑀙𑀸𑀭𑀺𑀓𑀸 𑀳𑁄𑀢𑀺, 𑀲𑀸 𑀫𑀼𑀔𑀯𑀸𑀢𑁂𑀦 𑀧𑀮𑀸𑀲𑁂𑀢𑀩𑁆𑀩𑀸. 𑀏𑀢𑁆𑀢𑀓𑁂𑀦 𑀥𑀽𑀢𑀧𑀸𑀧𑁄 𑀦𑀸𑀫𑁂𑀲 𑀲𑀫𑀡𑁄 𑀳𑁄𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀅𑀧𑀭𑁄 𑀏𑀯𑀁 𑀓𑀣𑁂𑀢𑀺 𑁋 𑀘𑀺𑀢𑁆𑀢𑁂𑀦𑁂𑀯 𑀫𑀳𑀸𑀘𑀸𑀝𑀺𑀁 𑀞𑀧𑁂𑀢𑁆𑀯𑀸 𑀫𑀢𑁆𑀣𑀼𑀁 𑀬𑁄𑀚𑁂𑀢𑁆𑀯𑀸 𑀘𑀺𑀢𑁆𑀢𑁂𑀦𑁂𑀯 𑀅𑀢𑁆𑀢𑀦𑁄 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀢𑀢𑁆𑀣 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀢𑁆𑀣𑀼𑀁 𑀑𑀢𑀸𑀭𑁂𑀢𑁆𑀯𑀸 𑀫𑀦𑁆𑀣𑀺𑀢𑀩𑁆𑀩𑀁. 𑀫𑀣𑀺𑀬𑀫𑀸𑀦𑀁 𑀯𑀺𑀮𑀻𑀬𑀢𑀺, 𑀯𑀺𑀮𑀻𑀦𑁂 𑀉𑀧𑀭𑀺 𑀨𑁂𑀡𑁄 𑀉𑀕𑁆𑀕𑀘𑁆𑀙𑀢𑀺. 𑀲𑁄 𑀨𑁂𑀡𑁄 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄. 𑀏𑀢𑁆𑀢𑀸𑀯𑀢𑀸 𑀯𑁄 𑀅𑀫𑀢𑀁 𑀧𑀭𑀺𑀪𑀼𑀢𑁆𑀢𑀁 𑀦𑀸𑀫 𑀪𑀯𑀺𑀲𑁆𑀲𑀢𑀺. 𑀇𑀢𑁄 𑀧𑀭𑀁 ‘‘𑀅𑀣 𑀢𑁂 𑀪𑀺𑀓𑁆𑀔𑀽’’𑀢𑀺𑀆𑀤𑀺 𑀲𑀩𑁆𑀩𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑁪𑁪. 𑀇𑀤𑀸𑀦𑀺 𑀬𑁄 𑀏𑀯𑀁 𑀯𑀺𑀯𑀸𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀲 𑀫𑀽𑀮𑀁 𑀤𑀲𑁆𑀲𑁂𑀦𑁆𑀢𑁄 𑀙𑀬𑀺𑀫𑀸𑀦𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀕𑀸𑀭𑀯𑁄𑀢𑀺 𑀕𑀸𑀭𑀯𑀯𑀺𑀭𑀳𑀺𑀢𑁄. 𑀅𑀧𑁆𑀧𑀢𑀺𑀲𑁆𑀲𑁄𑀢𑀺 𑀅𑀧𑁆𑀧𑀢𑀺𑀲𑁆𑀲𑀬𑁄 𑀅𑀦𑀻𑀘𑀯𑀼𑀢𑁆𑀢𑀺. 𑀏𑀢𑁆𑀣 𑀧𑀦 𑀬𑁄 𑀪𑀺𑀓𑁆𑀔𑀼 𑀲𑀢𑁆𑀣𑀭𑀺 𑀥𑀭𑀫𑀸𑀦𑁂 𑀢𑀻𑀲𑀼 𑀓𑀸𑀮𑁂𑀲𑀼 𑀉𑀧𑀝𑁆𑀞𑀸𑀦𑀁 𑀦 𑀬𑀸𑀢𑀺, 𑀲𑀢𑁆𑀣𑀭𑀺 𑀅𑀦𑀼𑀧𑀸𑀳𑀦𑁂 𑀘𑀗𑁆𑀓𑀫𑀦𑁆𑀢𑁂 𑀲𑀉𑀧𑀸𑀳𑀦𑁄 𑀘𑀗𑁆𑀓𑀫𑀢𑀺, 𑀦𑀻𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀦𑁆𑀢𑁂 𑀉𑀘𑁆𑀘𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀢𑀺, 𑀳𑁂𑀝𑁆𑀞𑀸 𑀯𑀲𑀦𑁆𑀢𑁂 𑀉𑀧𑀭𑀺 𑀯𑀲𑀢𑀺, 𑀲𑀢𑁆𑀣𑀼 𑀤𑀲𑁆𑀲𑀦𑀝𑁆𑀞𑀸𑀦𑁂 𑀉𑀪𑁄 𑀅𑀁𑀲𑁂 𑀧𑀸𑀭𑀼𑀧𑀢𑀺, 𑀙𑀢𑁆𑀢𑀁 𑀥𑀸𑀭𑁂𑀢𑀺, 𑀉𑀧𑀸𑀳𑀦𑀁 𑀥𑀸𑀭𑁂𑀢𑀺, 𑀦𑁆𑀳𑀸𑀦𑀢𑀺𑀢𑁆𑀣𑁂 𑀉𑀘𑁆𑀘𑀸𑀭𑀁 𑀯𑀸 𑀧𑀲𑁆𑀲𑀸𑀯𑀁 𑀯𑀸 𑀓𑀭𑁄𑀢𑀺, 𑀧𑀭𑀺𑀦𑀺𑀩𑁆𑀩𑀼𑀢𑁂 𑀯𑀸 𑀧𑀦 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑀼𑀁 𑀦 𑀕𑀘𑁆𑀙𑀢𑀺, 𑀘𑁂𑀢𑀺𑀬𑀲𑁆𑀲 𑀧𑀜𑁆𑀜𑀸𑀬𑀦𑀝𑁆𑀞𑀸𑀦𑁂 𑀲𑀢𑁆𑀣𑀼𑀤𑀲𑁆𑀲𑀦𑀝𑁆𑀞𑀸𑀦𑁂 𑀯𑀼𑀢𑁆𑀢𑀁 𑀲𑀩𑁆𑀩𑀁 𑀓𑀭𑁄𑀢𑀺, 𑀅𑀜𑁆𑀜𑁂𑀳𑀺 𑀘 𑀪𑀺𑀓𑁆𑀔𑀽𑀳𑀺 ‘‘𑀓𑀲𑁆𑀫𑀸 𑀏𑀯𑀁 𑀓𑀭𑁄𑀲𑀺, 𑀦 𑀇𑀤𑀁 𑀯𑀝𑁆𑀝𑀢𑀺, 𑀲𑀫𑁆𑀫𑀸𑀲𑀩𑀼𑀤𑁆𑀥𑀲𑁆𑀲 𑀦𑀸𑀫 𑀮𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀢𑀽𑀡𑁆𑀳𑀻 𑀳𑁄𑀢𑀺, 𑀓𑀺𑀁 𑀩𑀼𑀤𑁆𑀥𑁄 𑀩𑀼𑀤𑁆𑀥𑁄𑀢𑀺 𑀯𑀤𑀲𑀻’’𑀢𑀺 𑀪𑀡𑀢𑀺, 𑀅𑀬𑀁 𑀲𑀢𑁆𑀣𑀭𑀺 𑀅𑀕𑀸𑀭𑀯𑁄 𑀦𑀸𑀫.

𑀬𑁄 𑀧𑀦 𑀥𑀫𑁆𑀫𑀲𑁆𑀲𑀯𑀦𑁂 𑀲𑀗𑁆𑀖𑀼𑀝𑁆𑀞𑁂 𑀲𑀓𑁆𑀓𑀘𑁆𑀘𑀁 𑀦 𑀕𑀘𑁆𑀙𑀢𑀺, 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑀁 𑀦 𑀲𑀼𑀡𑀸𑀢𑀺, 𑀦𑀺𑀤𑁆𑀤𑀸𑀬𑀢𑀺 𑀯𑀸 𑀲𑀮𑁆𑀮𑀧𑁂𑀦𑁆𑀢𑁄 𑀯𑀸 𑀦𑀺𑀲𑀻𑀤𑀢𑀺, 𑀲𑀓𑁆𑀓𑀘𑁆𑀘𑀁 𑀦 𑀕𑀡𑁆𑀳𑀸𑀢𑀺 𑀦 𑀥𑀸𑀭𑁂𑀢𑀺, ‘‘𑀓𑀺𑀁 𑀥𑀫𑁆𑀫𑁂 𑀅𑀕𑀸𑀭𑀯𑀁 𑀓𑀭𑁄𑀲𑀻’’𑀢𑀺 𑀯𑀼𑀢𑁆𑀢𑁂 ‘‘𑀢𑀼𑀡𑁆𑀳𑀻 𑀳𑁄𑀢𑀺, 𑀥𑀫𑁆𑀫𑁄 𑀥𑀫𑁆𑀫𑁄𑀢𑀺 𑀯𑀤𑀲𑀺, 𑀓𑀺𑀁 𑀥𑀫𑁆𑀫𑁄 𑀦𑀸𑀫𑀸’’𑀢𑀺 𑀯𑀤𑀢𑀺, 𑀅𑀬𑀁 𑀥𑀫𑁆𑀫𑁂 𑀅𑀕𑀸𑀭𑀯𑁄 𑀦𑀸𑀫.

𑀬𑁄 𑀧𑀦 𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀸 𑀅𑀦𑀚𑁆𑀛𑀺𑀝𑁆𑀞𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀦𑀺𑀲𑀻𑀤𑀢𑀺 𑀧𑀜𑁆𑀳𑀁 𑀓𑀣𑁂𑀢𑀺, 𑀯𑀼𑀟𑁆𑀠𑁂 𑀪𑀺𑀓𑁆𑀔𑀽 𑀖𑀝𑁆𑀝𑁂𑀦𑁆𑀢𑁄 𑀕𑀘𑁆𑀙𑀢𑀺, 𑀢𑀺𑀝𑁆𑀞𑀢𑀺 𑀦𑀺𑀲𑀻𑀤𑀢𑀺, 𑀤𑀼𑀲𑁆𑀲𑀧𑀮𑁆𑀮𑀢𑁆𑀣𑀺𑀓𑀁 𑀯𑀸 𑀳𑀢𑁆𑀣𑀧𑀮𑁆𑀮𑀢𑁆𑀣𑀺𑀓𑀁 𑀯𑀸 𑀓𑀭𑁄𑀢𑀺, 𑀲𑀗𑁆𑀖𑀫𑀚𑁆𑀛𑁂 𑀉𑀪𑁄 𑀅𑀁𑀲𑁂 𑀧𑀸𑀭𑀼𑀧𑀢𑀺, 𑀙𑀢𑁆𑀢𑀼𑀧𑀸𑀳𑀦𑀁 𑀥𑀸𑀭𑁂𑀢𑀺, ‘‘𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀮𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑁂𑀧𑀺 ‘‘𑀢𑀼𑀡𑁆𑀳𑀻 𑀳𑁄𑀢𑀺, 𑀲𑀗𑁆𑀖𑁄 𑀲𑀗𑁆𑀖𑁄𑀢𑀺 𑀯𑀤𑀲𑀺, 𑀓𑀺𑀁 𑀲𑀗𑁆𑀖𑁄, 𑀫𑀺𑀕𑀲𑀗𑁆𑀖𑁄 𑀅𑀚𑀲𑀗𑁆𑀖𑁄’’𑀢𑀺𑀆𑀤𑀻𑀦𑀺 𑀯𑀤𑀢𑀺, 𑀅𑀬𑀁 𑀲𑀗𑁆𑀖𑁂 𑀅𑀕𑀸𑀭𑀯𑁄 𑀦𑀸𑀫. 𑀏𑀓𑀪𑀺𑀓𑁆𑀔𑀼𑀲𑁆𑀫𑀺𑀫𑁆𑀧𑀺 𑀳𑀺 𑀅𑀕𑀸𑀭𑀯𑁂 𑀓𑀢𑁂 𑀲𑀗𑁆𑀖𑁂 𑀓𑀢𑁄𑀬𑁂𑀯 𑀳𑁄𑀢𑀺. 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀧𑀦 𑀅𑀧𑀭𑀺𑀧𑀽𑀭𑀬𑀫𑀸𑀦𑁄𑀯 𑀲𑀺𑀓𑁆𑀔𑀸𑀬 𑀦 𑀧𑀭𑀺𑀧𑀽𑀭𑀓𑀸𑀭𑀻 𑀦𑀸𑀫.

𑀅𑀚𑁆𑀛𑀢𑁆𑀢𑀁 𑀯𑀸𑀢𑀺 𑀅𑀢𑁆𑀢𑀦𑀺 𑀯𑀸 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬 𑀯𑀸. 𑀩𑀸𑀳𑀺𑀤𑁆𑀥𑀸𑀢𑀺 𑀧𑀭𑀲𑁆𑀫𑀺𑀁 𑀯𑀸 𑀧𑀭𑀲𑁆𑀲 𑀧𑀭𑀺𑀲𑀸𑀬 𑀯𑀸.

𑁪𑁬. 𑀇𑀤𑀸𑀦𑀺 𑀅𑀬𑀁 𑀙 𑀞𑀸𑀦𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀯𑀺𑀯𑀸𑀤𑁄 𑀯𑀟𑁆𑀠𑀦𑁆𑀢𑁄 𑀬𑀸𑀦𑀺 𑀅𑀥𑀺𑀓𑀭𑀡𑀸𑀦𑀺 𑀧𑀸𑀧𑀼𑀡𑀸𑀢𑀺, 𑀢𑀸𑀦𑀺 𑀤𑀲𑁆𑀲𑁂𑀢𑀼𑀁 𑀘𑀢𑁆𑀢𑀸𑀭𑀺𑀫𑀸𑀦𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀽𑀧𑀲𑀫𑀦𑀢𑁆𑀣𑀸𑀬 𑀧𑀯𑀢𑁆𑀢𑀫𑀸𑀦𑁂𑀳𑀺 𑀲𑀫𑀣𑁂𑀳𑀺 𑀅𑀥𑀺𑀓𑀸𑀢𑀩𑁆𑀩𑀸𑀦𑀻𑀢𑀺 𑀅𑀥𑀺𑀓𑀭𑀡𑀸𑀦𑀺. 𑀯𑀺𑀯𑀸𑀤𑁄𑀯 𑀅𑀥𑀺𑀓𑀭𑀡𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁. 𑀇𑀢𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀇𑀤𑀸𑀦𑀺 𑀇𑀫𑀸𑀦𑀺𑀧𑀺 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀺 𑀧𑀢𑁆𑀯𑀸 𑀉𑀧𑀭𑀺 𑀯𑀟𑁆𑀠𑁂𑀦𑁆𑀢𑁄 𑀲𑁄 𑀯𑀺𑀯𑀸𑀤𑁄 𑀬𑁂𑀳𑀺 𑀲𑀫𑀣𑁂𑀳𑀺 𑀯𑀽𑀧𑀲𑀫𑁆𑀫𑀢𑀺, 𑀢𑁂𑀲𑀁 𑀤𑀲𑁆𑀲𑀦𑀢𑁆𑀣𑀁 𑀲𑀢𑁆𑀢 𑀔𑁄 𑀧𑀦𑀺𑀫𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀥𑀺𑀓𑀭𑀡𑀸𑀦𑀺 𑀲𑀫𑁂𑀦𑁆𑀢𑀺 𑀯𑀽𑀧𑀲𑀫𑁂𑀦𑁆𑀢𑀻𑀢𑀺 𑀅𑀥𑀺𑀓𑀭𑀡𑀲𑀫𑀣𑀸. 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀉𑀧𑁆𑀧𑀦𑁆𑀦𑀸𑀦𑀁 𑀉𑀧𑁆𑀧𑀦𑁆𑀦𑀸𑀦𑀁. 𑀅𑀥𑀺𑀓𑀭𑀡𑀸𑀦𑀦𑁆𑀢𑀺 𑀏𑀢𑁂𑀲𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀸𑀤𑀻𑀦𑀁 𑀘𑀢𑀼𑀦𑁆𑀦𑀁. 𑀲𑀫𑀣𑀸𑀬 𑀯𑀽𑀧𑀲𑀫𑀸𑀬𑀸𑀢𑀺 𑀲𑀫𑀦𑀢𑁆𑀣𑀜𑁆𑀘𑁂𑀯 𑀯𑀽𑀧𑀲𑀫𑀦𑀢𑁆𑀣𑀜𑁆𑀘. 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀤𑀸𑀢𑀩𑁆𑀩𑁄…𑀧𑁂… 𑀢𑀺𑀡𑀯𑀢𑁆𑀣𑀸𑀭𑀓𑁄𑀢𑀺 𑀇𑀫𑁂 𑀲𑀢𑁆𑀢 𑀲𑀫𑀣𑀸 𑀤𑀸𑀢𑀩𑁆𑀩𑀸.

𑀢𑀢𑁆𑀭𑀸𑀬𑀁 𑀯𑀺𑀦𑀺𑀘𑁆𑀙𑀬𑀓𑀣𑀸 𑁋 𑀅𑀥𑀺𑀓𑀭𑀡𑁂𑀲𑀼 𑀢𑀸𑀯 𑀥𑀫𑁆𑀫𑁄𑀢𑀺 𑀯𑀸 𑀅𑀥𑀫𑁆𑀫𑁄𑀢𑀺 𑀯𑀸𑀢𑀺 𑀅𑀝𑁆𑀞𑀸𑀭𑀲𑀳𑀺 𑀯𑀢𑁆𑀣𑀽𑀳𑀺 𑀯𑀺𑀯𑀤𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀬𑁄 𑀯𑀺𑀯𑀸𑀤𑁄, 𑀇𑀤𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀦𑀸𑀫. 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸 𑀆𑀘𑀸𑀭𑀤𑀺𑀝𑁆𑀞𑀺𑀆𑀚𑀻𑀯𑀯𑀺𑀧𑀢𑁆𑀢𑀺𑀬𑀸 𑀯𑀸 𑀅𑀦𑀼𑀯𑀤𑀦𑁆𑀢𑀸𑀦𑀁 𑀬𑁄 𑀅𑀦𑀼𑀯𑀸𑀤𑁄 𑀉𑀧𑀯𑀤𑀦𑀸 𑀘𑁂𑀯 𑀘𑁄𑀤𑀦𑀸 𑀘, 𑀇𑀤𑀁 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀦𑀸𑀫. 𑀫𑀸𑀢𑀺𑀓𑀸𑀬𑀁 𑀆𑀕𑀢𑀸 𑀧𑀜𑁆𑀘 𑀯𑀺𑀪𑀗𑁆𑀕𑁂 𑀤𑁆𑀯𑁂𑀢𑀺 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀦𑀸𑀫. 𑀬𑀁 𑀲𑀗𑁆𑀖𑀲𑁆𑀲 𑀅𑀧𑀮𑁄𑀓𑀦𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀓𑀫𑁆𑀫𑀸𑀦𑀁 𑀓𑀭𑀡𑀁, 𑀇𑀤𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀦𑀸𑀫.

𑀢𑀢𑁆𑀣 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀤𑁆𑀯𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀬𑁂𑀪𑀼𑀬𑁆𑀬𑀲𑀺𑀓𑀸𑀬 𑀘. 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦𑁂𑀯 𑀲𑀫𑁆𑀫𑀫𑀸𑀦𑀁 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀉𑀧𑁆𑀧𑀦𑁆𑀦𑀁, 𑀢𑀲𑁆𑀫𑀺𑀁𑀬𑁂𑀯 𑀯𑀸, 𑀅𑀜𑁆𑀜𑀢𑁆𑀣 𑀯𑀽𑀧𑀲𑀫𑁂𑀢𑀼𑀁 𑀕𑀘𑁆𑀙𑀦𑁆𑀢𑀸𑀦𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀸, 𑀬𑀢𑁆𑀣 𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀢𑀺𑀢𑀁, 𑀢𑀢𑁆𑀣 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀯𑀽𑀧𑀲𑀫𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂 𑀢𑀢𑁆𑀣𑁂𑀯 𑀉𑀩𑁆𑀩𑀸𑀳𑀺𑀓𑀸𑀬 𑀲𑀫𑁆𑀫𑀢𑀧𑀼𑀕𑁆𑀕𑀮𑁂𑀳𑀺 𑀯𑀸 𑀯𑀺𑀦𑀺𑀘𑁆𑀙𑀺𑀢𑀁 𑀲𑀫𑁆𑀫𑀢𑀺. 𑀏𑀯𑀁 𑀲𑀫𑁆𑀫𑀫𑀸𑀦𑁂 𑀧𑀦 𑀢𑀲𑁆𑀫𑀺𑀁 𑀬𑀸 𑀲𑀗𑁆𑀖𑀲𑀫𑁆𑀫𑀼𑀔𑀢𑀸 𑀥𑀫𑁆𑀫𑀲𑀫𑁆𑀫𑀼𑀔𑀢𑀸, 𑀯𑀺𑀦𑀬𑀲𑀫𑁆𑀫𑀼𑀔𑀢𑀸, 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸, 𑀅𑀬𑀁 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀦𑀸𑀫.

𑀢𑀢𑁆𑀣 𑀘 𑀓𑀸𑀭𑀓𑀲𑀗𑁆𑀖𑀲𑁆𑀲 𑀲𑀸𑀫𑀕𑁆𑀕𑀺𑀯𑀲𑁂𑀦 𑀲𑀫𑁆𑀫𑀼𑀔𑀻𑀪𑀸𑀯𑁄 𑀲𑀗𑁆𑀖𑀲𑀫𑁆𑀫𑀼𑀔𑀢𑀸. 𑀲𑀫𑁂𑀢𑀩𑁆𑀩𑀲𑁆𑀲 𑀯𑀢𑁆𑀣𑀼𑀦𑁄 𑀪𑀽𑀢𑀢𑀸 𑀥𑀫𑁆𑀫𑀲𑀫𑁆𑀫𑀼𑀔𑀢𑀸. 𑀬𑀣𑀸 𑀢𑀁 𑀲𑀫𑁂𑀢𑀩𑁆𑀩𑀁, 𑀢𑀣𑁂𑀯 𑀲𑀫𑀦𑀁 𑀯𑀺𑀦𑀬𑀲𑀫𑁆𑀫𑀼𑀔𑀢𑀸. 𑀬𑁄 𑀘 𑀯𑀺𑀯𑀤𑀢𑀺, 𑀬𑁂𑀦 𑀘 𑀯𑀺𑀯𑀤𑀢𑀺, 𑀢𑁂𑀲𑀁 𑀉𑀪𑀺𑀦𑁆𑀦𑀁 𑀅𑀢𑁆𑀢𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑁄 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸. 𑀉𑀩𑁆𑀩𑀸𑀳𑀺𑀓𑀸𑀬 𑀯𑀽𑀧𑀲𑀫𑁂 𑀧𑀦𑁂𑀢𑁆𑀣 𑀲𑀗𑁆𑀖𑀲𑀫𑁆𑀫𑀼𑀔𑀢𑀸 𑀧𑀭𑀺𑀳𑀸𑀬𑀢𑀺. 𑀏𑀯𑀁 𑀢𑀸𑀯 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦𑁂𑀯 𑀲𑀫𑁆𑀫𑀢𑀺.

𑀲𑀘𑁂 𑀧𑀦𑁂𑀯𑀫𑁆𑀧𑀺 𑀦 𑀲𑀫𑁆𑀫𑀢𑀺, 𑀅𑀣 𑀦𑀁 𑀉𑀩𑁆𑀩𑀸𑀳𑀺𑀓𑀸𑀬 𑀲𑀫𑁆𑀫𑀢𑀸 𑀪𑀺𑀓𑁆𑀔𑀽 ‘‘𑀦 𑀫𑀬𑀁 𑀲𑀓𑁆𑀓𑁄𑀫 𑀯𑀽𑀧𑀲𑀫𑁂𑀢𑀼’’𑀦𑁆𑀢𑀺 𑀲𑀗𑁆𑀖𑀲𑁆𑀲𑁂𑀯 𑀦𑀺𑀬𑁆𑀬𑀸𑀢𑁂𑀦𑁆𑀢𑀺. 𑀢𑀢𑁄 𑀲𑀗𑁆𑀖𑁄 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀪𑀺𑀓𑁆𑀔𑀼𑀁 𑀲𑀮𑀸𑀓𑀕𑁆𑀕𑀸𑀳𑀓𑀁 𑀲𑀫𑁆𑀫𑀦𑁆𑀦𑀺𑀢𑁆𑀯𑀸 𑀢𑁂𑀦 𑀕𑀼𑀴𑁆𑀳𑀓𑀯𑀺𑀯𑀝𑀓𑀲𑀓𑀡𑁆𑀡𑀚𑀧𑁆𑀧𑀓𑁂𑀲𑀼 𑀢𑀻𑀲𑀼 𑀲𑀮𑀸𑀓𑀕𑁆𑀕𑀸𑀳𑁂𑀲𑀼 𑀅𑀜𑁆𑀜𑀢𑀭𑀯𑀲𑁂𑀦 𑀲𑀮𑀸𑀓𑀁 𑀕𑀸𑀳𑁂𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑀧𑀭𑀺𑀲𑀸𑀬 𑀥𑀫𑁆𑀫𑀯𑀸𑀤𑀻𑀦𑀁 𑀬𑁂𑀪𑀼𑀬𑁆𑀬𑀢𑀸𑀬 𑀬𑀣𑀸 𑀢𑁂 𑀥𑀫𑁆𑀫𑀯𑀸𑀤𑀺𑀦𑁄 𑀯𑀤𑀦𑁆𑀢𑀺, 𑀏𑀯𑀁 𑀯𑀽𑀧𑀲𑀦𑁆𑀢𑀁 𑀅𑀥𑀺𑀓𑀭𑀡𑀁 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀬𑁂𑀪𑀼𑀬𑁆𑀬𑀲𑀺𑀓𑀸𑀬 𑀘 𑀯𑀽𑀧𑀲𑀦𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀯𑀼𑀢𑁆𑀢𑀦𑀬𑁄 𑀏𑀯. 𑀬𑀁 𑀧𑀦 𑀬𑁂𑀪𑀼𑀬𑁆𑀬𑀲𑀺𑀓𑀸𑀬 𑀓𑀫𑁆𑀫𑀲𑁆𑀲 𑀓𑀭𑀡𑀁, 𑀅𑀬𑀁 𑀬𑁂𑀪𑀼𑀬𑁆𑀬𑀲𑀺𑀓𑀸 𑀦𑀸𑀫. 𑀏𑀯𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀤𑁆𑀯𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺.

𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀘𑀢𑀽𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀲𑀢𑀺𑀯𑀺𑀦𑀬𑁂𑀦 𑀘 𑀅𑀫𑀽𑀴𑁆𑀳𑀯𑀺𑀦𑀬𑁂𑀦 𑀘 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀬 𑀘. 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦𑁂𑀯 𑀲𑀫𑁆𑀫𑀫𑀸𑀦𑀁 𑀬𑁄 𑀘 𑀅𑀦𑀼𑀯𑀤𑀢𑀺, 𑀬𑀜𑁆𑀘 𑀅𑀦𑀼𑀯𑀤𑀢𑀺, 𑀢𑁂𑀲𑀁 𑀯𑀘𑀦𑀁 𑀲𑀼𑀢𑁆𑀯𑀸, 𑀲𑀘𑁂 𑀓𑀸𑀘𑀺 𑀆𑀧𑀢𑁆𑀢𑀺 𑀦𑀢𑁆𑀣𑀺, 𑀉𑀪𑁄 𑀔𑀫𑀸𑀧𑁂𑀢𑁆𑀯𑀸, 𑀲𑀘𑁂 𑀅𑀢𑁆𑀣𑀺, 𑀅𑀬𑀁 𑀦𑀸𑀫𑁂𑀢𑁆𑀣 𑀆𑀧𑀢𑁆𑀢𑀻𑀢𑀺 𑀏𑀯𑀁 𑀯𑀺𑀦𑀺𑀘𑁆𑀙𑀺𑀢𑀁 𑀯𑀽𑀧𑀲𑀫𑁆𑀫𑀢𑀺. 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑀮𑀓𑁆𑀔𑀡𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀬𑀤𑀸 𑀧𑀦 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀫𑀽𑀮𑀺𑀓𑀸𑀬 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑀺𑀢𑀲𑁆𑀲 𑀲𑀢𑀺𑀯𑀺𑀦𑀬𑀁 𑀬𑀸𑀘𑀫𑀸𑀦𑀲𑁆𑀲 𑀲𑀗𑁆𑀖𑁄 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀲𑀢𑀺𑀯𑀺𑀦𑀬𑀁 𑀤𑁂𑀢𑀺, 𑀢𑀤𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀲𑀢𑀺𑀯𑀺𑀦𑀬𑁂𑀦 𑀘 𑀯𑀽𑀧𑀲𑀦𑁆𑀢𑀁 𑀳𑁄𑀢𑀺. 𑀤𑀺𑀦𑁆𑀦𑁂 𑀧𑀦 𑀲𑀢𑀺𑀯𑀺𑀦𑀬𑁂 𑀧𑀼𑀦 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀓𑀲𑁆𑀲𑀘𑀺 𑀅𑀦𑀼𑀯𑀸𑀤𑁄 𑀦 𑀭𑀼𑀳𑀢𑀺.

𑀬𑀤𑀸 𑀉𑀫𑁆𑀫𑀢𑁆𑀢𑀓𑁄 𑀪𑀺𑀓𑁆𑀔𑀼 𑀉𑀫𑁆𑀫𑀸𑀤𑀯𑀲𑁂𑀦 𑀓𑀢𑁂 𑀅𑀲𑁆𑀲𑀸𑀫𑀡𑀓𑁂 𑀅𑀚𑁆𑀛𑀸𑀘𑀸𑀭𑁂 ‘‘𑀲𑀭𑀢𑀸𑀬𑀲𑁆𑀫𑀸 𑀏𑀯𑀭𑀽𑀧𑀺𑀁 𑀆𑀧𑀢𑁆𑀢𑀺’’𑀦𑁆𑀢𑀺 𑀪𑀺𑀓𑁆𑀔𑀽𑀳𑀺 𑀯𑀼𑀘𑁆𑀘𑀫𑀸𑀦𑁄 𑁋 ‘‘𑀉𑀫𑁆𑀫𑀢𑁆𑀢𑀓𑁂𑀦 𑀫𑁂, 𑀆𑀯𑀼𑀲𑁄, 𑀏𑀢𑀁 𑀓𑀢𑀁, 𑀦𑀸𑀳𑀁 𑀢𑀁 𑀲𑀭𑀸𑀫𑀻’’𑀢𑀺 𑀪𑀡𑀦𑁆𑀢𑁄𑀧𑀺 𑀪𑀺𑀓𑁆𑀔𑀽𑀳𑀺 𑀘𑁄𑀤𑀺𑀬𑀫𑀸𑀦𑁄𑀯 𑀧𑀼𑀦 𑀅𑀘𑁄𑀤𑀦𑀢𑁆𑀣𑀸𑀬 𑀅𑀫𑀽𑀴𑁆𑀳𑀯𑀺𑀦𑀬𑀁 𑀬𑀸𑀘𑀢𑀺, 𑀲𑀗𑁆𑀖𑁄 𑀘𑀲𑁆𑀲 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀺, 𑀢𑀤𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀅𑀫𑀽𑀴𑁆𑀳𑀯𑀺𑀦𑀬𑁂𑀦 𑀘 𑀯𑀽𑀧𑀲𑀦𑁆𑀢𑀁 𑀳𑁄𑀢𑀺. 𑀤𑀺𑀦𑁆𑀦𑁂 𑀧𑀦 𑀅𑀫𑀽𑀴𑁆𑀳𑀯𑀺𑀦𑀬𑁂 𑀧𑀼𑀦 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀓𑀲𑁆𑀲𑀘𑀺 𑀢𑀧𑁆𑀧𑀘𑁆𑀘𑀬𑀸 𑀅𑀦𑀼𑀯𑀸𑀤𑁄 𑀦 𑀭𑀼𑀳𑀢𑀺.

𑀬𑀤𑀸 𑀧𑀦 𑀧𑀸𑀭𑀸𑀚𑀺𑀓𑁂𑀦 𑀯𑀸 𑀧𑀸𑀭𑀸𑀚𑀺𑀓𑀲𑀸𑀫𑀦𑁆𑀢𑁂𑀦 𑀯𑀸 𑀘𑁄𑀤𑀺𑀬𑀫𑀸𑀦𑀲𑁆𑀲 𑀅𑀜𑁆𑀜𑁂𑀦𑀸𑀜𑁆𑀜𑀁 𑀧𑀝𑀺𑀘𑀭𑀢𑁄 𑀧𑀸𑀧𑀼𑀲𑁆𑀲𑀦𑁆𑀦𑀢𑀸𑀬 𑀧𑀸𑀧𑀺𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑁋 ‘‘𑀲𑀘𑀸𑀬𑀁 𑀅𑀘𑁆𑀙𑀺𑀦𑁆𑀦𑀫𑀽𑀮𑁄 𑀪𑀯𑀺𑀲𑁆𑀲𑀢𑀺, 𑀲𑀫𑁆𑀫𑀸 𑀯𑀢𑁆𑀢𑀺𑀢𑁆𑀯𑀸 𑀑𑀲𑀸𑀭𑀡𑀁 𑀮𑀪𑀺𑀲𑁆𑀲𑀢𑀺, 𑀲𑀘𑁂 𑀙𑀺𑀦𑁆𑀦𑀫𑀽𑀮𑁄, 𑀅𑀬𑀫𑁂𑀯𑀲𑁆𑀲 𑀦𑀸𑀲𑀦𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀲𑀗𑁆𑀖𑁄 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀁 𑀓𑀭𑁄𑀢𑀺, 𑀢𑀤𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀲𑁆𑀲 𑀧𑀸𑀧𑀺𑀬𑀲𑀺𑀓𑀸𑀬 𑀘 𑀯𑀽𑀧𑀲𑀦𑁆𑀢𑀁 𑀳𑁄𑀢𑀺. 𑀏𑀯𑀁 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁 𑀘𑀢𑀽𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺.

𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘. 𑀢𑀲𑁆𑀲 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦𑁂𑀯 𑀯𑀽𑀧𑀲𑀫𑁄 𑀦𑀢𑁆𑀣𑀺. 𑀬𑀤𑀸 𑀧𑀦 𑀏𑀓𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑁂 𑀲𑀗𑁆𑀖𑀕𑀡𑀫𑀚𑁆𑀛𑁂𑀲𑀼 𑀯𑀸 𑀪𑀺𑀓𑁆𑀔𑀼 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁 𑀤𑁂𑀲𑁂𑀢𑀺, 𑀢𑀤𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘 𑀯𑀽𑀧𑀲𑀫𑁆𑀫𑀢𑀺. 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀢𑀸𑀯 𑀬𑁄 𑀘 𑀤𑁂𑀲𑁂𑀢𑀺, 𑀬𑀲𑁆𑀲 𑀘 𑀤𑁂𑀲𑁂𑀢𑀺, 𑀢𑁂𑀲𑀁 𑀲𑀫𑁆𑀫𑀼𑀔𑀢𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀧𑀼𑀕𑁆𑀕𑀮𑀲𑁆𑀲 𑀘 𑀕𑀡𑀲𑁆𑀲 𑀘 𑀤𑁂𑀲𑀦𑀸𑀓𑀸𑀮𑁂 𑀲𑀗𑁆𑀖𑀲𑀫𑁆𑀫𑀼𑀔𑀢𑀸 𑀧𑀭𑀺𑀳𑀸𑀬𑀢𑀺. 𑀬𑀁 𑀧𑀦𑁂𑀢𑁆𑀣 ‘‘𑀅𑀳𑀁, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑀁 𑀆𑀧𑀢𑁆𑀢𑀺𑀁 𑀅𑀧𑀦𑁆𑀦𑁄’’𑀢𑀺 𑀘, 𑀆𑀫 ‘‘𑀧𑀲𑁆𑀲𑀸𑀫𑀻’’𑀢𑀺 𑀘 𑀧𑀝𑀺𑀜𑁆𑀜𑀸𑀢𑀸𑀬 ‘‘𑀆𑀬𑀢𑀺𑀁 𑀲𑀁𑀯𑀭𑁂𑀬𑁆𑀬𑀸𑀲𑀻’’𑀢𑀺 𑀓𑀭𑀡𑀁, 𑀢𑀁 𑀧𑀝𑀺𑀜𑁆𑀜𑀸𑀢𑀓𑀭𑀡𑀁 𑀦𑀸𑀫. 𑀲𑀗𑁆𑀖𑀸𑀤𑀺𑀲𑁂𑀲𑁂 𑀧𑀭𑀺𑀯𑀸𑀲𑀸𑀤𑀺𑀬𑀸𑀘𑀦𑀸 𑀧𑀝𑀺𑀜𑁆𑀜𑀸, 𑀧𑀭𑀺𑀯𑀸𑀲𑀸𑀤𑀻𑀦𑀁 𑀤𑀸𑀦𑀁 𑀧𑀝𑀺𑀜𑁆𑀜𑀸𑀢𑀓𑀭𑀡𑀁 𑀦𑀸𑀫.

𑀤𑁆𑀯𑁂𑀧𑀓𑁆𑀔𑀚𑀸𑀢𑀸 𑀧𑀦 𑀪𑀡𑁆𑀟𑀦𑀓𑀸𑀭𑀓𑀸 𑀪𑀺𑀓𑁆𑀔𑀽 𑀩𑀳𑀼𑀁 𑀅𑀲𑁆𑀲𑀸𑀫𑀡𑀓𑀁 𑀅𑀚𑁆𑀛𑀸𑀘𑀸𑀭𑀁 𑀘𑀭𑀺𑀢𑁆𑀯𑀸 𑀧𑀼𑀦 𑀮𑀚𑁆𑀚𑀺𑀥𑀫𑁆𑀫𑁂 𑀉𑀧𑁆𑀧𑀦𑁆𑀦𑁂 ‘‘𑀲𑀘𑁂 𑀫𑀬𑀁 𑀇𑀫𑀸𑀳𑀺 𑀆𑀧𑀢𑁆𑀢𑀻𑀳𑀺 𑀅𑀜𑁆𑀜𑀫𑀜𑁆𑀜𑀁 𑀓𑀸𑀭𑁂𑀲𑁆𑀲𑀸𑀫, 𑀲𑀺𑀬𑀸𑀧𑀺 𑀢𑀁 𑀅𑀥𑀺𑀓𑀭𑀡𑀁 𑀓𑀓𑁆𑀔𑀴𑀢𑁆𑀢𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀸’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀆𑀧𑀢𑁆𑀢𑀺𑀬𑀸 𑀓𑀸𑀭𑀸𑀧𑀦𑁂 𑀤𑁄𑀲𑀁 𑀤𑀺𑀲𑁆𑀯𑀸 𑀬𑀤𑀸 𑀢𑀺𑀡𑀯𑀢𑁆𑀣𑀸𑀭𑀓𑀓𑀫𑁆𑀫𑀁 𑀓𑀭𑁄𑀦𑁆𑀢𑀺, 𑀢𑀤𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀘 𑀲𑀫𑁆𑀫𑀢𑀺. 𑀢𑀢𑁆𑀭 𑀳𑀺 𑀬𑀢𑁆𑀢𑀓𑀸 𑀳𑀢𑁆𑀣𑀧𑀸𑀲𑀼𑀧𑀕𑀢𑀸 ‘‘𑀦 𑀫𑁂 𑀢𑀁 𑀔𑀫𑀢𑀻’’𑀢𑀺 𑀏𑀯𑀁 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀁 𑀅𑀓𑀢𑁆𑀯𑀸 ‘‘𑀤𑀼𑀓𑁆𑀓𑀝𑀁 𑀓𑀫𑁆𑀫𑀁 𑀧𑀼𑀦 𑀓𑀸𑀢𑀩𑁆𑀩𑀁 𑀓𑀫𑁆𑀫’’𑀦𑁆𑀢𑀺 𑀦 𑀉𑀓𑁆𑀓𑁄𑀝𑁂𑀦𑁆𑀢𑀺, 𑀦𑀺𑀤𑁆𑀤𑀫𑁆𑀧𑀺 𑀑𑀓𑁆𑀓𑀦𑁆𑀢𑀸 𑀳𑁄𑀦𑁆𑀢𑀺, 𑀲𑀩𑁆𑀩𑁂𑀲𑀫𑁆𑀧𑀺 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀜𑁆𑀘 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀜𑁆𑀘 𑀲𑀩𑁆𑀩𑀸𑀧𑀢𑁆𑀢𑀺𑀬𑁄 𑀯𑀼𑀝𑁆𑀞𑀳𑀦𑁆𑀢𑀺. 𑀏𑀯𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺. 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀏𑀓𑁂𑀦 𑀲𑀫𑀣𑁂𑀦 𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦𑁂𑀯.

𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀥𑀺𑀓𑀭𑀡𑀸𑀦𑀺 𑀬𑀣𑀸𑀦𑀼𑀭𑀽𑀧𑀁 𑀇𑀫𑁂𑀳𑀺 𑀲𑀢𑁆𑀢𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀸𑀦𑀁 𑀅𑀥𑀺𑀓𑀭𑀡𑀸𑀦𑀁 𑀲𑀫𑀣𑀸𑀬 𑀯𑀽𑀧𑀲𑀫𑀸𑀬 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀤𑀸𑀢𑀩𑁆𑀩𑁄…𑀧𑁂… 𑀢𑀺𑀡𑀯𑀢𑁆𑀣𑀸𑀭𑀓𑁄’’𑀢𑀺. 𑀅𑀬𑀫𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑀦𑀬𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀫𑀣𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁧𑁮𑁫) 𑀆𑀕𑀢𑁄𑀬𑁂𑀯. 𑀯𑀺𑀦𑀺𑀘𑁆𑀙𑀬𑁄𑀧𑀺𑀲𑁆𑀲 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀼𑀢𑁆𑀢𑁄.

𑁪𑁭. 𑀬𑁄 𑀧𑀦𑀸𑀬𑀁 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 ‘‘𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀽 𑀯𑀺𑀯𑀤𑀦𑁆𑀢𑀻’’𑀢𑀺𑀆𑀤𑀺𑀓𑁄 𑀯𑀺𑀢𑁆𑀣𑀸𑀭𑁄 𑀯𑀼𑀢𑁆𑀢𑁄, 𑀲𑁄 𑀏𑀢𑁂𑀦 𑀦𑀬𑁂𑀦 𑀲𑀗𑁆𑀔𑁂𑀧𑀢𑁄𑀯 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀥𑀫𑁆𑀫𑁄𑀢𑀺𑀆𑀤𑀻𑀲𑀼 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀢𑀸𑀯 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸 𑀥𑀫𑁆𑀫𑁄, 𑀅𑀓𑀼𑀲𑀮𑀓𑀫𑁆𑀫𑀧𑀣𑀸 𑀅𑀥𑀫𑁆𑀫𑁄. 𑀢𑀣𑀸 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀳𑁂𑀝𑁆𑀞𑀸 𑀆𑀕𑀢𑀸 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸, 𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸 𑀢𑀬𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀢𑀬𑁄 𑀇𑀤𑁆𑀥𑀺𑀧𑀸𑀤𑀸 𑀙 𑀇𑀦𑁆𑀤𑁆𑀭𑀺𑀬𑀸𑀦𑀺 𑀙 𑀩𑀮𑀸𑀦𑀺 𑀅𑀝𑁆𑀞 𑀩𑁄𑀚𑁆𑀛𑀗𑁆𑀕𑀸 𑀦𑀯𑀗𑁆𑀕𑀺𑀓𑁄 𑀫𑀕𑁆𑀕𑁄 𑀘𑀸𑀢𑀺, 𑀘𑀢𑁆𑀢𑀸𑀭𑁄 𑀉𑀧𑀸𑀤𑀸𑀦𑀸 𑀧𑀜𑁆𑀘 𑀦𑀻𑀯𑀭𑀡𑀸𑀦𑀻𑀢𑀺𑀆𑀤𑀬𑁄 𑀲𑀗𑁆𑀓𑀮𑀺𑀝𑁆𑀞𑀥𑀫𑁆𑀫𑀸 𑀘𑀸𑀢𑀺 𑀅𑀬𑀁 𑀅𑀥𑀫𑁆𑀫𑁄.

𑀢𑀢𑁆𑀣 𑀬𑀁𑀓𑀺𑀜𑁆𑀘𑀺 𑀏𑀓𑀁 𑀅𑀥𑀫𑁆𑀫𑀓𑁄𑀝𑁆𑀞𑀸𑀲𑀁 𑀕𑀳𑁂𑀢𑁆𑀯𑀸 ‘‘𑀇𑀫𑀁 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀓𑀭𑀺𑀲𑁆𑀲𑀸𑀫, 𑀏𑀯𑀁 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀓𑀼𑀮𑀁 𑀦𑀺𑀬𑁆𑀬𑀸𑀦𑀺𑀓𑀁 𑀪𑀯𑀺𑀲𑁆𑀲𑀢𑀺, 𑀫𑀬𑀜𑁆𑀘 𑀮𑁄𑀓𑁂 𑀧𑀸𑀓𑀝𑀸 𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀢𑀁 𑀅𑀥𑀫𑁆𑀫𑀁 ‘‘𑀥𑀫𑁆𑀫𑁄 𑀅𑀬’’𑀦𑁆𑀢𑀺 𑀓𑀣𑁂𑀦𑁆𑀢𑀸 𑀥𑀫𑁆𑀫𑁄𑀢𑀺 𑀯𑀺𑀯𑀤𑀦𑁆𑀢𑀺. 𑀢𑀢𑁆𑀣𑁂𑀯 𑀥𑀫𑁆𑀫𑀓𑁄𑀝𑁆𑀞𑀸𑀲𑁂𑀲𑀼 𑀏𑀓𑀁 𑀕𑀳𑁂𑀢𑁆𑀯𑀸 ‘‘𑀅𑀥𑀫𑁆𑀫𑁄 𑀅𑀬’’𑀦𑁆𑀢𑀺 𑀓𑀣𑁂𑀦𑁆𑀢𑀸 𑀅𑀥𑀫𑁆𑀫𑁄𑀢𑀺 𑀯𑀺𑀯𑀤𑀦𑁆𑀢𑀺.

𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀧𑀦 𑀪𑀽𑀢𑁂𑀦 𑀯𑀢𑁆𑀣𑀼𑀦𑀸 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸 𑀬𑀣𑀸𑀧𑀝𑀺𑀜𑁆𑀜𑀸𑀬 𑀓𑀸𑀢𑀩𑁆𑀩𑀓𑀫𑁆𑀫𑀁 𑀥𑀫𑁆𑀫𑁄 𑀦𑀸𑀫, 𑀅𑀪𑀽𑀢𑁂𑀦 𑀧𑀦 𑀯𑀢𑁆𑀣𑀼𑀦𑀸 𑀅𑀘𑁄𑀤𑁂𑀢𑁆𑀯𑀸 𑀅𑀲𑀸𑀭𑁂𑀢𑁆𑀯𑀸 𑀅𑀧𑀝𑀺𑀜𑁆𑀜𑀸𑀬 𑀓𑀢𑀩𑁆𑀩𑀓𑀫𑁆𑀫𑀁 𑀅𑀥𑀫𑁆𑀫𑁄 𑀦𑀸𑀫. 𑀢𑁂𑀲𑀼𑀧𑀺 𑀅𑀥𑀫𑁆𑀫𑀁 ‘‘𑀥𑀫𑁆𑀫𑁄 𑀅𑀬’’𑀦𑁆𑀢𑀺 𑀓𑀣𑁂𑀦𑁆𑀢𑀸 𑀥𑀫𑁆𑀫𑁄𑀢𑀺 𑀯𑀺𑀯𑀤𑀦𑁆𑀢𑀺, ‘‘𑀅𑀥𑀫𑁆𑀫𑁄 𑀅𑀬’’𑀦𑁆𑀢𑀺 𑀓𑀣𑁂𑀦𑁆𑀢𑀸 𑀅𑀥𑀫𑁆𑀫𑁄𑀢𑀺 𑀯𑀺𑀯𑀤𑀦𑁆𑀢𑀺.

𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀧𑀦 𑀭𑀸𑀕𑀯𑀺𑀦𑀬𑁄 𑀤𑁄𑀲𑀯𑀺𑀦𑀬𑁄 𑀫𑁄𑀳𑀯𑀺𑀦𑀬𑁄 𑀲𑀁𑀯𑀭𑁄 𑀧𑀳𑀸𑀦𑀁 𑀧𑀝𑀺𑀲𑀗𑁆𑀔𑀸𑀢𑀺 𑀅𑀬𑀁 𑀯𑀺𑀦𑀬𑁄 𑀦𑀸𑀫, 𑀭𑀸𑀕𑀸𑀤𑀻𑀦𑀁 𑀅𑀯𑀺𑀦𑀬𑁄 𑀅𑀲𑀁𑀯𑀭𑁄 𑀅𑀧𑁆𑀧𑀳𑀸𑀦𑀁 𑀅𑀧𑁆𑀧𑀝𑀺𑀲𑀗𑁆𑀔𑀸𑀢𑀺 𑀅𑀬𑀁 𑀅𑀯𑀺𑀦𑀬𑁄 𑀦𑀸𑀫. 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀯𑀢𑁆𑀣𑀼𑀲𑀫𑁆𑀧𑀢𑁆𑀢𑀺 𑀜𑀢𑁆𑀢𑀺𑀲𑀫𑁆𑀧𑀢𑁆𑀢𑀺 𑀅𑀦𑀼𑀲𑀸𑀯𑀦𑀲𑀫𑁆𑀧𑀢𑁆𑀢𑀺 𑀲𑀻𑀫𑀲𑀫𑁆𑀧𑀢𑀺 𑀧𑀭𑀺𑀲𑀲𑀫𑁆𑀧𑀢𑁆𑀢𑀻𑀢𑀺 𑀅𑀬𑀁 𑀯𑀺𑀦𑀬𑁄 𑀦𑀸𑀫, 𑀯𑀢𑁆𑀣𑀼𑀯𑀺𑀧𑀢𑁆𑀢𑀺…𑀧𑁂… 𑀧𑀭𑀺𑀲𑀯𑀺𑀧𑀢𑁆𑀢𑀻𑀢𑀺 𑀅𑀬𑀁 𑀅𑀯𑀺𑀦𑀬𑁄 𑀦𑀸𑀫. 𑀢𑁂𑀲𑀼𑀧𑀺 𑀬𑀁𑀓𑀺𑀜𑁆𑀘𑀺 𑀅𑀯𑀺𑀦𑀬𑀁 ‘‘𑀯𑀺𑀦𑀬𑁄 𑀅𑀬’’𑀦𑁆𑀢𑀺 𑀓𑀣𑁂𑀦𑁆𑀢𑀸 𑀯𑀺𑀦𑀬𑁄𑀢𑀺 𑀯𑀺𑀯𑀤𑀦𑁆𑀢𑀺, 𑀯𑀺𑀦𑀬𑀁 𑀅𑀯𑀺𑀦𑀬𑁄𑀢𑀺 𑀓𑀣𑁂𑀦𑁆𑀢𑀸 𑀅𑀯𑀺𑀦𑀬𑁄𑀢𑀺 𑀯𑀺𑀯𑀤𑀦𑁆𑀢𑀺.

𑀥𑀫𑁆𑀫𑀦𑁂𑀢𑁆𑀢𑀺 𑀲𑀫𑀦𑀼𑀫𑀚𑁆𑀚𑀺𑀢𑀩𑁆𑀩𑀸𑀢𑀺 𑀥𑀫𑁆𑀫𑀭𑀚𑁆𑀚𑀼 𑀅𑀦𑀼𑀫𑀚𑁆𑀚𑀺𑀢𑀩𑁆𑀩𑀸 𑀜𑀸𑀡𑁂𑀦 𑀖𑀁𑀲𑀺𑀢𑀩𑁆𑀩𑀸 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀸. 𑀲𑀸 𑀧𑀦𑁂𑀲𑀸 𑀥𑀫𑁆𑀫𑀦𑁂𑀢𑁆𑀢𑀺 ‘‘𑀇𑀢𑀺 𑀔𑁄 𑀯𑀘𑁆𑀙 𑀇𑀫𑁂 𑀤𑀲 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀤𑀲 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺 𑀏𑀯𑀁 𑀫𑀳𑀸𑀯𑀘𑁆𑀙𑀕𑁄𑀢𑁆𑀢𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁧𑁯𑁪) 𑀆𑀕𑀢𑀸𑀢𑀺 𑀯𑀼𑀢𑁆𑀢𑀸. 𑀲𑀸 𑀏𑀯 𑀯𑀸 𑀳𑁄𑀢𑀼, 𑀬𑁄 𑀯𑀸 𑀇𑀥 𑀥𑀫𑁆𑀫𑁄𑀢𑀺 𑀘 𑀯𑀺𑀦𑀬𑁄 𑀘 𑀯𑀼𑀢𑁆𑀢𑁄. 𑀬𑀣𑀸 𑀢𑀢𑁆𑀣 𑀲𑀫𑁂𑀢𑀻𑀢𑀺 𑀬𑀣𑀸 𑀢𑀸𑀬 𑀥𑀫𑁆𑀫𑀦𑁂𑀢𑁆𑀢𑀺𑀬𑀸 𑀲𑀫𑁂𑀢𑀺, ‘‘𑀥𑀫𑁆𑀫𑁄 𑀥𑀫𑁆𑀫𑁄𑀯 𑀳𑁄𑀢𑀺, 𑀅𑀥𑀫𑁆𑀫𑁄 𑀅𑀥𑀫𑁆𑀫𑁄𑀯, 𑀯𑀺𑀦𑀬𑁄 𑀯𑀺𑀦𑀬𑁄𑀯 𑀳𑁄𑀢𑀺, 𑀅𑀯𑀺𑀦𑀬𑁄 𑀅𑀯𑀺𑀦𑀬𑁄𑀯’’. 𑀢𑀣𑀸 𑀢𑀦𑁆𑀢𑀺 𑀏𑀯𑀁 𑀢𑀁 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁂𑀢𑀩𑁆𑀩𑀁. 𑀏𑀓𑀘𑁆𑀘𑀸𑀦𑀁 𑀅𑀥𑀺𑀓𑀭𑀡𑀸𑀦𑀦𑁆𑀢𑀺 𑀇𑀥 𑀯𑀺𑀯𑀸𑀤𑀸𑀥𑀺𑀓𑀭𑀡𑀫𑁂𑀯 𑀤𑀲𑁆𑀲𑀺𑀢𑀁, 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀧𑀦 𑀦 𑀓𑀺𑀲𑁆𑀫𑀺𑀜𑁆𑀘𑀺 𑀅𑀥𑀺𑀓𑀭𑀡𑁂 𑀦 𑀮𑀩𑁆𑀪𑀢𑀺.

𑁪𑁮. 𑀢𑀁 𑀧𑀦𑁂𑀢𑀁 𑀬𑀲𑁆𑀫𑀸 𑀤𑁆𑀯𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀬𑁂𑀪𑀼𑀬𑁆𑀬𑀲𑀺𑀓𑀸𑀬 𑀘, 𑀢𑀲𑁆𑀫𑀸 𑀳𑁂𑀝𑁆𑀞𑀸 𑀫𑀸𑀢𑀺𑀓𑀸𑀬 𑀞𑀧𑀺𑀢𑀸𑀦𑀼𑀓𑁆𑀓𑀫𑁂𑀦 𑀇𑀤𑀸𑀦𑀺 𑀲𑀢𑀺𑀯𑀺𑀦𑀬𑀲𑁆𑀲 𑀯𑀸𑀭𑁂 𑀧𑀢𑁆𑀢𑁂𑀧𑀺 𑀢𑀁 𑀅𑀯𑀢𑁆𑀯𑀸 𑀯𑀺𑀯𑀸𑀤𑀸𑀥𑀺𑀓𑀭𑀡𑀬𑁂𑀯 𑀢𑀸𑀯 𑀤𑀼𑀢𑀺𑀬𑀲𑀫𑀣𑀁 𑀤𑀲𑁆𑀲𑁂𑀦𑁆𑀢𑁄 𑀓𑀣𑀜𑁆𑀘𑀸𑀦𑀦𑁆𑀤, 𑀬𑁂𑀪𑀼𑀬𑁆𑀬𑀲𑀺𑀓𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑀳𑀼𑀢𑀭𑀸𑀢𑀺 𑀅𑀦𑁆𑀢𑀫𑀲𑁄 𑀤𑁆𑀯𑀻𑀳𑀺 𑀢𑀻𑀳𑀺𑀧𑀺 𑀅𑀢𑀺𑀭𑁂𑀓𑀢𑀭𑀸. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁪𑁯. 𑀇𑀤𑀸𑀦𑀺 𑀳𑁂𑀝𑁆𑀞𑀸 𑀅𑀯𑀺𑀢𑁆𑀣𑀸𑀭𑀺𑀢𑀁 𑀲𑀢𑀺𑀯𑀺𑀦𑀬𑀁 𑀆𑀤𑀺𑀁 𑀓𑀢𑁆𑀯𑀸 𑀯𑀺𑀢𑁆𑀣𑀸𑀭𑀺𑀢𑀸𑀯𑀲𑁂𑀲𑀲𑀫𑀣𑁂 𑀧𑀝𑀺𑀧𑀸𑀝𑀺𑀬𑀸 𑀯𑀺𑀢𑁆𑀣𑀸𑀭𑁂𑀢𑀼𑀁 𑀓𑀣𑀜𑁆𑀘𑀸𑀦𑀦𑁆𑀤, 𑀲𑀢𑀺𑀯𑀺𑀦𑀬𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀸𑀭𑀸𑀚𑀺𑀓𑀲𑀸𑀫𑀦𑁆𑀢𑁂𑀦 𑀯𑀸𑀢𑀺 𑀤𑁆𑀯𑁂 𑀲𑀸𑀫𑀦𑁆𑀢𑀸𑀦𑀺 𑀔𑀦𑁆𑀥𑀲𑀸𑀫𑀦𑁆𑀢𑀜𑁆𑀘 𑀆𑀧𑀢𑁆𑀢𑀺𑀲𑀸𑀫𑀦𑁆𑀢𑀜𑁆𑀘. 𑀢𑀢𑁆𑀣 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁄 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁄 𑀣𑀼𑀮𑁆𑀮𑀘𑁆𑀘𑀬-𑀧𑀸𑀘𑀺𑀢𑁆𑀢𑀺𑀬-𑀧𑀸𑀝𑀺𑀤𑁂𑀲𑀦𑀻𑀬-𑀤𑀼𑀓𑁆𑀓𑀝-𑀤𑀼𑀩𑁆𑀪𑀸𑀲𑀺𑀢𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑁄𑀢𑀺 𑀏𑀯𑀁 𑀧𑀼𑀭𑀺𑀫𑀲𑁆𑀲 𑀧𑀘𑁆𑀙𑀺𑀫𑀔𑀦𑁆𑀥𑀁 𑀔𑀦𑁆𑀥𑀲𑀸𑀫𑀦𑁆𑀢𑀁 𑀦𑀸𑀫 𑀳𑁄𑀢𑀺. 𑀧𑀞𑀫𑀧𑀸𑀭𑀸𑀚𑀺𑀓𑀲𑁆𑀲 𑀧𑀦 𑀧𑀼𑀩𑁆𑀩𑀪𑀸𑀕𑁂 𑀤𑀼𑀓𑁆𑀓𑀝𑀁, 𑀲𑁂𑀲𑀸𑀦𑀁 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀇𑀤𑀁 𑀆𑀧𑀢𑁆𑀢𑀺𑀲𑀸𑀫𑀦𑁆𑀢𑀁 𑀦𑀸𑀫. 𑀢𑀢𑁆𑀣 𑀔𑀦𑁆𑀥𑀲𑀸𑀫𑀦𑁆𑀢𑁂 𑀧𑀸𑀭𑀸𑀚𑀺𑀓𑀲𑀸𑀫𑀦𑁆𑀢𑀁 𑀕𑀭𑀼𑀓𑀸𑀧𑀢𑁆𑀢𑀺 𑀦𑀸𑀫 𑀳𑁄𑀢𑀺. 𑀲𑀭𑀢𑀸𑀬𑀲𑁆𑀫𑀸𑀢𑀺 𑀲𑀭𑀢𑀼 𑀆𑀬𑀲𑁆𑀫𑀸. 𑀏𑀓𑀘𑁆𑀘𑀸𑀦𑀁 𑀅𑀥𑀺𑀓𑀭𑀡𑀸𑀦𑀦𑁆𑀢𑀺 𑀇𑀥 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀫𑁂𑀯 𑀤𑀲𑁆𑀲𑀺𑀢𑀁.

𑁫𑁦. 𑀪𑀸𑀲𑀺𑀢𑀧𑀭𑀺𑀓𑁆𑀓𑀦𑁆𑀢𑀦𑁆𑀢𑀺 𑀯𑀸𑀘𑀸𑀬 𑀪𑀸𑀲𑀺𑀢𑀁 𑀓𑀸𑀬𑁂𑀦 𑀘 𑀧𑀭𑀺𑀓𑁆𑀓𑀦𑁆𑀢𑀁, 𑀧𑀭𑀓𑁆𑀓𑀫𑀺𑀢𑁆𑀯𑀸 𑀓𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀓𑀘𑁆𑀘𑀸𑀦𑀦𑁆𑀢𑀺 𑀇𑀥𑀸𑀧𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀧𑀝𑀺𑀜𑁆𑀜𑀸𑀢𑀓𑀭𑀡𑁂 ‘‘𑀏𑀓𑀘𑁆𑀘𑀸𑀦’’𑀦𑁆𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀤𑀲𑁆𑀲𑀺𑀢𑀁.

𑁫𑁨. 𑀤𑀯𑀸𑀢𑀺 𑀲𑀳𑀲𑀸. 𑀭𑀯𑀸𑀢𑀺 𑀅𑀜𑁆𑀜𑀁 𑀪𑀡𑀺𑀢𑀼𑀓𑀸𑀫𑁂𑀦 𑀅𑀜𑁆𑀜𑀁 𑀯𑀼𑀢𑁆𑀢𑀁. 𑀏𑀯𑀁 𑀔𑁄, 𑀆𑀦𑀦𑁆𑀤, 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸 𑀳𑁄𑀢𑀻𑀢𑀺 𑀢𑀲𑁆𑀲𑀧𑀼𑀕𑁆𑀕𑀮𑀲𑁆𑀲 𑀧𑀸𑀧𑀼𑀲𑁆𑀲𑀦𑁆𑀦𑀢𑀸 𑀧𑀸𑀧𑀺𑀬𑀲𑀺𑀓𑀸 𑀳𑁄𑀢𑀺. 𑀇𑀫𑀺𑀦𑀸 𑀓𑀫𑁆𑀫𑀲𑁆𑀲 𑀯𑀢𑁆𑀣𑀼 𑀤𑀲𑁆𑀲𑀺𑀢𑀁. 𑀏𑀯𑀭𑀽𑀧𑀲𑁆𑀲 𑀳𑀺 𑀧𑀼𑀕𑁆𑀕𑀮𑀲𑁆𑀲 𑀓𑀫𑁆𑀫𑀁 𑀓𑀸𑀢𑁆𑀢𑀩𑁆𑀩𑀁. 𑀓𑀫𑁆𑀫𑁂𑀦 𑀳𑀺 𑀅𑀥𑀺𑀓𑀭𑀡𑀲𑁆𑀲 𑀯𑀽𑀧𑀲𑀫𑁄 𑀳𑁄𑀢𑀺, 𑀦 𑀧𑀼𑀕𑁆𑀕𑀮𑀲𑁆𑀲 𑀧𑀸𑀧𑀼𑀲𑁆𑀲𑀦𑁆𑀦𑀢𑀸𑀬. 𑀇𑀥𑀸𑀧𑀺 𑀘 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀫𑁂𑀯 𑀅𑀥𑀺𑀓𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁫𑁩. 𑀓𑀣𑀜𑁆𑀘𑀸𑀦𑀦𑁆𑀤, 𑀢𑀺𑀡𑀯𑀢𑁆𑀣𑀸𑀭𑀓𑁄𑀢𑀺 𑀏𑀢𑁆𑀣 𑀇𑀤𑀁 𑀓𑀫𑁆𑀫𑀁 𑀢𑀺𑀡𑀯𑀢𑁆𑀣𑀸𑀭𑀓𑀲𑀤𑀺𑀲𑀢𑁆𑀢𑀸 𑀢𑀺𑀡𑀯𑀢𑁆𑀣𑀸𑀭𑀓𑁄𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀕𑀽𑀣𑀁 𑀯𑀸 𑀫𑀼𑀢𑁆𑀢𑀁 𑀯𑀸 𑀖𑀝𑁆𑀝𑀺𑀬𑀫𑀸𑀦𑀁 𑀤𑀼𑀕𑁆𑀕𑀦𑁆𑀥𑀢𑀸𑀬 𑀩𑀸𑀥𑀢𑀺, 𑀢𑀺𑀡𑁂𑀳𑀺 𑀅𑀯𑀢𑁆𑀣𑀭𑀺𑀢𑁆𑀯𑀸 𑀲𑀼𑀧𑁆𑀧𑀝𑀺𑀘𑁆𑀙𑀸𑀤𑀺𑀢𑀲𑁆𑀲 𑀧𑀦𑀲𑁆𑀲 𑀲𑁄 𑀕𑀦𑁆𑀥𑁄 𑀦 𑀩𑀸𑀥𑀢𑀺, 𑀏𑀯𑀫𑁂𑀯 𑀬𑀁 𑀅𑀥𑀺𑀓𑀭𑀡𑀁 𑀫𑀽𑀮𑀸𑀦𑀼𑀫𑀽𑀮𑀁 𑀕𑀦𑁆𑀢𑁆𑀯𑀸 𑀯𑀽𑀧𑀲𑀫𑀺𑀬𑀫𑀸𑀦𑀁 𑀓𑀓𑁆𑀔𑀴𑀢𑁆𑀢𑀸𑀬 𑀯𑀸𑀴𑀢𑁆𑀢𑀸𑀬 𑀪𑁂𑀤𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀁 𑀇𑀫𑀺𑀦𑀸 𑀓𑀫𑁆𑀫𑁂𑀦 𑀯𑀽𑀧𑀲𑀦𑁆𑀢𑀁 𑀕𑀽𑀣𑀁 𑀯𑀺𑀬 𑀢𑀺𑀡𑀯𑀢𑁆𑀣𑀸𑀭𑀓𑁂𑀦 𑀧𑀝𑀺𑀘𑁆𑀙𑀦𑁆𑀦𑀁 𑀯𑀽𑀧𑀲𑀦𑁆𑀢𑀁 𑀳𑁄𑀢𑀻𑀢𑀺 𑀇𑀤𑀁 𑀓𑀫𑁆𑀫𑀁 𑀢𑀺𑀡𑀯𑀢𑁆𑀣𑀸𑀭𑀓𑀲𑀤𑀺𑀲𑀢𑁆𑀢𑀸 𑀢𑀺𑀡𑀯𑀢𑁆𑀣𑀸𑀭𑀓𑁄𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀽𑀦𑀁 𑀪𑀡𑁆𑀟𑀦𑀚𑀸𑀢𑀸𑀦𑀦𑁆𑀢𑀺𑀆𑀤𑀺𑀯𑀘𑀦𑁂𑀦 𑀆𑀓𑀸𑀭𑀫𑀢𑁆𑀢𑀫𑁂𑀯 𑀤𑀲𑁆𑀲𑀺𑀢𑀁, 𑀔𑀦𑁆𑀥𑀓𑁂 𑀆𑀕𑀢𑀸𑀬𑁂𑀯 𑀧𑀦𑁂𑀢𑁆𑀣 𑀓𑀫𑁆𑀫𑀯𑀸𑀘𑀸 𑀧𑀫𑀸𑀡𑀁. 𑀞𑀧𑁂𑀢𑁆𑀯𑀸 𑀣𑀼𑀮𑁆𑀮𑀯𑀚𑁆𑀚𑀁 𑀞𑀧𑁂𑀢𑁆𑀯𑀸 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀦𑁆𑀢𑀺. 𑀏𑀢𑁆𑀣 𑀧𑀦 𑀣𑀼𑀮𑁆𑀮𑀯𑀚𑁆𑀚𑀦𑁆𑀢𑀺 𑀣𑀽𑀮𑁆𑀮𑀯𑀚𑁆𑀚𑀁 𑀧𑀸𑀭𑀸𑀚𑀺𑀓𑀜𑁆𑀘𑁂𑀯 𑀲𑀗𑁆𑀖𑀸𑀤𑀺𑀲𑁂𑀲𑀜𑁆𑀘. 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀕𑀺𑀳𑀻𑀦𑀁 𑀳𑀻𑀦𑁂𑀦 𑀔𑀼𑀁𑀲𑀦𑀯𑀫𑁆𑀪𑀦𑀥𑀫𑁆𑀫𑀺𑀓𑀧𑀝𑀺𑀲𑁆𑀲𑀯𑁂𑀲𑀼 𑀆𑀧𑀦𑁆𑀦𑀸 𑀆𑀧𑀢𑁆𑀢𑀺. 𑀅𑀥𑀺𑀓𑀭𑀡𑀸𑀦𑀦𑁆𑀢𑀺 𑀇𑀥 𑀆𑀧𑀢𑁆𑀢𑀸𑀥𑀺𑀓𑀭𑀡𑀫𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀓𑀺𑀘𑁆𑀘𑀸𑀥𑀺𑀓𑀭𑀡𑀲𑁆𑀲 𑀧𑀦 𑀯𑀲𑁂𑀦 𑀇𑀥 𑀦 𑀓𑀺𑀜𑁆𑀘𑀺 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀦 𑀯𑀼𑀢𑁆𑀢𑀁, 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦𑁂𑀯 𑀧𑀦𑀲𑁆𑀲 𑀯𑀽𑀧𑀲𑀫𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁫𑁪. 𑀙𑀬𑀺𑀫𑁂, 𑀆𑀦𑀦𑁆𑀤, 𑀥𑀫𑁆𑀫𑀸 𑀲𑀸𑀭𑀡𑀻𑀬𑀸𑀢𑀺 𑀳𑁂𑀝𑁆𑀞𑀸 𑀓𑀮𑀳𑀯𑀲𑁂𑀦 𑀲𑀼𑀢𑁆𑀢𑀁 𑀆𑀭𑀤𑁆𑀥𑀁, 𑀉𑀧𑀭𑀺 𑀲𑀸𑀭𑀡𑀻𑀬𑀥𑀫𑁆𑀫𑀸 𑀆𑀕𑀢𑀸. 𑀇𑀢𑀺 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀤𑁂𑀲𑀦𑀸 𑀕𑀢𑀸 𑀳𑁄𑀢𑀺. 𑀳𑁂𑀝𑁆𑀞𑀸 𑀓𑁄𑀲𑀫𑁆𑀩𑀺𑀬𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁪𑁯𑁮-𑁫𑁦𑁦) 𑀧𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺 𑀓𑀣𑀺𑀢𑀸, 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀫𑁆𑀫𑀸𑀤𑀺𑀝𑁆𑀞𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀡𑀼𑀦𑁆𑀢𑀺 𑀅𑀧𑁆𑀧𑀲𑀸𑀯𑀚𑁆𑀚𑀁. 𑀣𑀽𑀮𑀦𑁆𑀢𑀺 𑀫𑀳𑀸𑀲𑀸𑀯𑀚𑁆𑀚𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀲𑀸𑀫𑀕𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀼𑀦𑀓𑁆𑀔𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁫. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀲𑀼𑀦𑀓𑁆𑀔𑀢𑁆𑀢𑀲𑀼𑀢𑁆𑀢𑀁. 𑀢𑀢𑁆𑀣 𑀅𑀜𑁆𑀜𑀸𑀢𑀺 𑀅𑀭𑀳𑀢𑁆𑀢𑀁. 𑀩𑁆𑀬𑀸𑀓𑀢𑀸𑀢𑀺 𑀔𑀻𑀡𑀸 𑀚𑀸𑀢𑀻𑀢𑀺𑀆𑀤𑀻𑀳𑀺 𑀘𑀢𑀽𑀳𑀺 𑀧𑀤𑁂𑀳𑀺 𑀓𑀣𑀺𑀢𑀸. 𑀅𑀥𑀺𑀫𑀸𑀦𑁂𑀦𑀸𑀢𑀺 𑀅𑀧𑁆𑀧𑀢𑁆𑀢𑁂 𑀧𑀢𑁆𑀢𑀲𑀜𑁆𑀜𑀺𑀦𑁄, 𑀅𑀦𑀥𑀺𑀕𑀢𑁂 𑀅𑀥𑀺𑀕𑀢𑀲𑀜𑁆𑀜𑀺𑀦𑁄 𑀳𑀼𑀢𑁆𑀯𑀸 𑀅𑀥𑀺𑀕𑀢𑀁 𑀅𑀫𑁆𑀳𑁂𑀳𑀻𑀢𑀺 𑀫𑀸𑀦𑁂𑀦 𑀩𑁆𑀬𑀸𑀓𑀭𑀺𑀁𑀲𑀼.

𑁫𑁬. 𑀏𑀯𑀜𑁆𑀘𑁂𑀢𑁆𑀣 𑀲𑀼𑀦𑀓𑁆𑀔𑀢𑁆𑀢 𑀢𑀣𑀸𑀕𑀢𑀲𑁆𑀲 𑀳𑁄𑀢𑀻𑀢𑀺 𑀲𑀼𑀦𑀓𑁆𑀔𑀢𑁆𑀢 𑀏𑀢𑁆𑀣 𑀏𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀧𑀜𑁆𑀳𑀩𑁆𑀬𑀸𑀓𑀭𑀡𑁂 𑁋 ‘‘𑀇𑀤𑀁 𑀞𑀸𑀦𑀁 𑀏𑀢𑁂𑀲𑀁 𑀅𑀯𑀺𑀪𑀽𑀢𑀁 𑀅𑀦𑁆𑀥𑀓𑀸𑀭𑀁, 𑀢𑁂𑀦𑀺𑀫𑁂 𑀅𑀦𑀥𑀺𑀕𑀢𑁂 𑀅𑀥𑀺𑀕𑀢𑀲𑀜𑁆𑀜𑀺𑀦𑁄, 𑀳𑀦𑁆𑀤 𑀦𑁂𑀲𑀁 𑀯𑀺𑀲𑁄𑀥𑁂𑀢𑁆𑀯𑀸 𑀧𑀸𑀓𑀝𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀫𑀻’’𑀢𑀺, 𑀏𑀯𑀜𑁆𑀘 𑀢𑀣𑀸𑀕𑀢𑀲𑁆𑀲 𑀳𑁄𑀢𑀺. 𑀅𑀣 𑀘 𑀧𑀦𑀺𑀥𑁂𑀓𑀘𑁆𑀘𑁂…𑀧𑁂… 𑀢𑀲𑁆𑀲𑀧𑀺 𑀳𑁄𑀢𑀺 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀪𑀕𑀯𑀸 𑀧𑀝𑀺𑀧𑀦𑁆𑀦𑀓𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀬𑀢𑁆𑀣 𑀧𑀦 𑀇𑀘𑁆𑀙𑀸𑀘𑀸𑀭𑁂 𑀞𑀺𑀢𑀸 𑀏𑀓𑀘𑁆𑀘𑁂 𑀫𑁄𑀖𑀧𑀼𑀭𑀺𑀲𑀸 𑀳𑁄𑀦𑁆𑀢𑀺, 𑀢𑀢𑁆𑀭 𑀪𑀕𑀯𑀸 𑀧𑀲𑁆𑀲𑀢𑀺 𑁋 ‘‘𑀇𑀫𑁂 𑀇𑀫𑀁 𑀧𑀜𑁆𑀳𑀁 𑀉𑀕𑁆𑀕𑀳𑁂𑀢𑁆𑀯𑀸 𑀅𑀚𑀸𑀦𑀺𑀢𑁆𑀯𑀸𑀯 𑀚𑀸𑀦𑀦𑁆𑀢𑀸 𑀯𑀺𑀬 𑀅𑀧𑁆𑀧𑀢𑁆𑀢𑁂 𑀧𑀢𑁆𑀢𑀲𑀜𑁆𑀜𑀺𑀦𑁄 𑀳𑀼𑀢𑁆𑀯𑀸 𑀕𑀸𑀫𑀦𑀺𑀕𑀫𑀸𑀤𑀻𑀲𑀼 𑀯𑀺𑀲𑁂𑀯𑀫𑀸𑀦𑀸 𑀯𑀺𑀘𑀭𑀺𑀲𑁆𑀲𑀦𑁆𑀢𑀺, 𑀢𑀁 𑀦𑁂𑀲𑀁 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’’𑀢𑀺 𑀏𑀯𑀫𑀲𑁆𑀲𑀸𑀬𑀁 𑀇𑀘𑁆𑀙𑀸𑀘𑀸𑀭𑁂 𑀞𑀺𑀢𑀸𑀦𑀁 𑀓𑀸𑀭𑀡𑀸 𑀧𑀝𑀺𑀧𑀦𑁆𑀦𑀓𑀸𑀦𑀫𑁆𑀧𑀺 𑀅𑀢𑁆𑀣𑀸𑀬 ‘‘𑀥𑀫𑁆𑀫𑀁 𑀤𑁂𑀲𑀺𑀲𑁆𑀲𑀸𑀫𑀻’’𑀢𑀺 𑀉𑀧𑁆𑀧𑀦𑁆𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀸𑀪𑀸𑀯𑁄 𑀳𑁄𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑁫𑁮. 𑀮𑁄𑀓𑀸𑀫𑀺𑀲𑀸𑀥𑀺𑀫𑀼𑀢𑁆𑀢𑁄𑀢𑀺 𑀯𑀝𑁆𑀝𑀸𑀫𑀺𑀲-𑀓𑀸𑀫𑀸𑀫𑀺𑀲-𑀮𑁄𑀓𑀸𑀫𑀺𑀲𑀪𑀽𑀢𑁂𑀲𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀅𑀥𑀺𑀫𑀼𑀢𑁆𑀢𑁄 𑀢𑀦𑁆𑀦𑀺𑀦𑁆𑀦𑁄 𑀢𑀕𑁆𑀕𑀭𑀼𑀓𑁄 𑀢𑀧𑁆𑀧𑀩𑁆𑀪𑀸𑀭𑁄. 𑀢𑀧𑁆𑀧𑀢𑀺𑀭𑀽𑀧𑀻𑀢𑀺 𑀓𑀸𑀫𑀕𑀼𑀡𑀲𑀪𑀸𑀕𑀸. 𑀆𑀦𑁂𑀜𑁆𑀚𑀧𑀝𑀺𑀲𑀁𑀬𑀼𑀢𑁆𑀢𑀸𑀬𑀸𑀢𑀺 𑀆𑀦𑁂𑀜𑁆𑀚𑀲𑀫𑀸𑀧𑀢𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑀸𑀬. 𑀲𑀁𑀲𑁂𑀬𑁆𑀬𑀸𑀢𑀺 𑀓𑀣𑁂𑀬𑁆𑀬. 𑀆𑀦𑁂𑀜𑁆𑀚𑀲𑀁𑀬𑁄𑀚𑀦𑁂𑀦 𑀳𑀺 𑀔𑁄 𑀯𑀺𑀲𑀁𑀬𑀼𑀢𑁆𑀢𑁄𑀢𑀺 𑀆𑀦𑁂𑀜𑁆𑀚𑀲𑀫𑀸𑀧𑀢𑁆𑀢𑀺𑀲𑀁𑀬𑁄𑀚𑀦𑁂𑀦 𑀯𑀺𑀲𑀁𑀲𑀝𑁆𑀞𑁄. 𑀮𑁄𑀓𑀸𑀫𑀺𑀲𑀸𑀥𑀺𑀫𑀼𑀢𑁆𑀢𑁄𑀢𑀺 𑀏𑀯𑀭𑀽𑀧𑁄 𑀳𑀺 𑀮𑀽𑀔𑀘𑀻𑀯𑀭𑀥𑀭𑁄 𑀫𑀢𑁆𑀢𑀺𑀓𑀸𑀧𑀢𑁆𑀢𑀁 𑀆𑀤𑀸𑀬 𑀅𑀢𑁆𑀢𑀦𑁄 𑀲𑀤𑀺𑀲𑁂𑀳𑀺 𑀓𑀢𑀺𑀧𑀬𑁂𑀳𑀺 𑀲𑀤𑁆𑀥𑀺𑀁 𑀧𑀘𑁆𑀘𑀦𑁆𑀢𑀚𑀦𑀧𑀤𑀁 𑀕𑀘𑁆𑀙𑀢𑀺, 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀓𑀸𑀮𑁂 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 ‘‘𑀫𑀳𑀸𑀧𑀁𑀲𑀼𑀓𑀼𑀮𑀺𑀓𑀸 𑀆𑀕𑀢𑀸’’𑀢𑀺 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀤𑁂𑀦𑁆𑀢𑀺, 𑀪𑀢𑁆𑀢𑀓𑀺𑀘𑁆𑀘𑁂 𑀦𑀺𑀝𑁆𑀞𑀺𑀢𑁂 𑀅𑀦𑀼𑀫𑁄𑀤𑀦𑀁 𑀲𑀼𑀢𑁆𑀯𑀸 𑁋 ‘‘𑀲𑁆𑀯𑁂𑀧𑀺, 𑀪𑀦𑁆𑀢𑁂, 𑀇𑀥𑁂𑀯 𑀧𑀺𑀡𑁆𑀟𑀸𑀬 𑀧𑀯𑀺𑀲𑀣𑀸’’𑀢𑀺 𑀯𑀤𑀦𑁆𑀢𑀺. 𑀅𑀮𑀁 𑀉𑀧𑀸𑀲𑀓𑀸, 𑀅𑀚𑁆𑀚𑀸𑀧𑀺 𑀯𑁄 𑀩𑀳𑀽𑀦𑀁 𑀤𑀺𑀦𑁆𑀦𑀦𑁆𑀢𑀺. 𑀢𑁂𑀦 𑀳𑀺, 𑀪𑀦𑁆𑀢𑁂, 𑀅𑀦𑁆𑀢𑁄𑀯𑀲𑁆𑀲𑀁 𑀇𑀥 𑀯𑀲𑁂𑀬𑁆𑀬𑀸𑀣𑀸𑀢𑀺 𑀅𑀥𑀺𑀯𑀸𑀲𑁂𑀢𑁆𑀯𑀸 𑀯𑀺𑀳𑀸𑀭𑀫𑀕𑁆𑀕𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀲𑁂𑀦𑀸𑀲𑀦𑀁 𑀕𑀳𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀲𑀸𑀫𑁂𑀦𑁆𑀢𑀺. 𑀲𑀸𑀬𑀁 𑀏𑀓𑁄 𑀆𑀯𑀸𑀲𑀺𑀓𑁄 𑀢𑁂 𑀪𑀺𑀓𑁆𑀔𑀽 𑀧𑀼𑀘𑁆𑀙𑀢𑀺 ‘‘𑀓𑀢𑁆𑀣 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀣𑀸’’𑀢𑀺? 𑀅𑀲𑀼𑀓𑀕𑀸𑀫𑁂𑀢𑀺. 𑀪𑀺𑀓𑁆𑀔𑀸𑀲𑀫𑁆𑀧𑀦𑁆𑀦𑀸𑀢𑀺? 𑀆𑀫 𑀏𑀯𑀭𑀽𑀧𑀸 𑀦𑀸𑀫 𑀫𑀦𑀼𑀲𑁆𑀲𑀸𑀦𑀁 𑀲𑀤𑁆𑀥𑀸 𑀳𑁄𑀢𑀺. ‘‘𑀅𑀚𑁆𑀚𑁂𑀯 𑀦𑀼 𑀔𑁄 𑀏𑀢𑁂 𑀏𑀤𑀺𑀲𑀸, 𑀦𑀺𑀘𑁆𑀘𑀫𑁆𑀧𑀺 𑀏𑀤𑀺𑀲𑀸’’𑀢𑀺? 𑀲𑀤𑁆𑀥𑀸 𑀢𑁂 𑀫𑀦𑀼𑀲𑁆𑀲𑀸 𑀦𑀺𑀘𑁆𑀘𑀫𑁆𑀧𑀺 𑀏𑀤𑀺𑀲𑀸, 𑀢𑁂 𑀦𑀺𑀲𑁆𑀲𑀸𑀬𑁂𑀯 𑀅𑀬𑀁 𑀯𑀺𑀳𑀸𑀭𑁄 𑀯𑀟𑁆𑀠𑀢𑀻𑀢𑀺. 𑀢𑀢𑁄 𑀢𑁂 𑀧𑀁𑀲𑀼𑀓𑀼𑀮𑀺𑀓𑀸 𑀧𑀼𑀦𑀧𑁆𑀧𑀼𑀦𑀁 𑀢𑁂𑀲𑀁 𑀯𑀡𑁆𑀡𑀁 𑀓𑀣𑁂𑀦𑁆𑀢𑀺, 𑀤𑀺𑀯𑀲𑀸𑀯𑀲𑁂𑀲𑀁 𑀓𑀣𑁂𑀢𑁆𑀯𑀸 𑀭𑀢𑁆𑀢𑀺𑀫𑁆𑀧𑀺 𑀓𑀣𑁂𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀇𑀘𑁆𑀙𑀸𑀘𑀸𑀭𑁂 𑀞𑀺𑀢𑀲𑁆𑀲 𑀲𑀻𑀲𑀁 𑀦𑀺𑀓𑁆𑀔𑀦𑁆𑀢𑀁 𑀳𑁄𑀢𑀺 𑀉𑀤𑀭𑀁 𑀨𑀸𑀮𑀺𑀢𑀁. 𑀏𑀯𑀁 𑀮𑁄𑀓𑀸𑀫𑀺𑀲𑀸𑀥𑀺𑀫𑀼𑀢𑁆𑀢𑁄 𑀯𑁂𑀤𑀺𑀢𑀩𑁆𑀩𑁄.

𑁫𑁯. 𑀇𑀤𑀸𑀦𑀺 𑀆𑀦𑁂𑀜𑁆𑀚𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀁 𑀅𑀥𑀺𑀫𑀸𑀦𑀺𑀓𑀁 𑀤𑀲𑁆𑀲𑁂𑀦𑁆𑀢𑁄 𑀞𑀸𑀦𑀁 𑀔𑁄 𑀧𑀦𑁂𑀢𑀦𑁆𑀢𑀺𑀆𑀤𑀺𑀫𑀸𑀳. 𑀆𑀦𑁂𑀜𑁆𑀚𑀸𑀥𑀺𑀫𑀼𑀢𑁆𑀢𑀲𑁆𑀲𑀸𑀢𑀺 𑀓𑀺𑀮𑁂𑀲𑀲𑀺𑀜𑁆𑀘𑀦𑀯𑀺𑀭𑀳𑀺𑀢𑀸𑀲𑀼 𑀳𑁂𑀝𑁆𑀞𑀺𑀫𑀸𑀲𑀼 𑀙𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀅𑀥𑀺𑀫𑀼𑀢𑁆𑀢𑀲𑁆𑀲 𑀢𑀦𑁆𑀦𑀺𑀦𑁆𑀦𑀲𑁆𑀲 𑀢𑀕𑁆𑀕𑀭𑀼𑀦𑁄 𑀢𑀧𑁆𑀧𑀩𑁆𑀪𑀸𑀭𑀲𑁆𑀲. 𑀲𑁂 𑀧𑀯𑀼𑀢𑁆𑀢𑁂𑀢𑀺 𑀢𑀁 𑀧𑀯𑀼𑀢𑁆𑀢𑀁. 𑀙 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀳𑀺 𑀅𑀥𑀺𑀫𑀸𑀦𑀺𑀓𑀲𑁆𑀲 𑀧𑀜𑁆𑀘𑀓𑀸𑀫𑀕𑀼𑀡𑀸𑀫𑀺𑀲𑀩𑀦𑁆𑀥𑀦𑀸 𑀧𑀢𑀺𑀢𑀧𑀡𑁆𑀟𑀼𑀧𑀮𑀸𑀲𑁄 𑀯𑀺𑀬 𑀉𑀧𑀝𑁆𑀞𑀸𑀢𑀺. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁.

𑁬𑁦. 𑀇𑀤𑀸𑀦𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀮𑀸𑀪𑀺𑀦𑁄 𑀅𑀥𑀺𑀫𑀸𑀦𑀺𑀓𑀲𑁆𑀲 𑀦𑀺𑀖𑀁𑀲𑀁 𑀤𑀲𑁆𑀲𑁂𑀢𑀼𑀁 𑀞𑀸𑀦𑀁 𑀔𑁄 𑀧𑀦𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑁆𑀯𑁂𑀥𑀸 𑀪𑀺𑀦𑁆𑀦𑀸𑀢𑀺 𑀫𑀚𑁆𑀛𑁂 𑀪𑀺𑀦𑁆𑀦𑀸. 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸𑀢𑀺 𑀔𑀼𑀤𑁆𑀤𑀓𑀸 𑀫𑀼𑀝𑁆𑀞𑀺𑀧𑀸𑀲𑀸𑀡𑀫𑀢𑁆𑀢𑀸 𑀚𑀢𑀼𑀦𑀸 𑀯𑀸 𑀲𑀺𑀮𑁂𑀲𑁂𑀦 𑀯𑀸 𑀅𑀮𑁆𑀮𑀻𑀬𑀸𑀧𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀸𑀢𑀼𑀁 𑀲𑀓𑁆𑀓𑀸. 𑀫𑀳𑀦𑁆𑀢𑀁 𑀧𑀦 𑀓𑀼𑀝𑀸𑀕𑀸𑀭𑀧𑁆𑀧𑀫𑀸𑀡𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀲𑁂 𑀪𑀺𑀦𑁆𑀦𑁂𑀢𑀺 𑀢𑀁 𑀪𑀺𑀦𑁆𑀦𑀁. 𑀉𑀧𑀭𑀺 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀳𑀺 𑀳𑁂𑀝𑁆𑀞𑀸𑀲𑀫𑀸𑀧𑀢𑁆𑀢𑀺 𑀤𑁆𑀯𑁂𑀥𑀸𑀪𑀺𑀦𑁆𑀦𑀸 𑀲𑁂𑀮𑀸 𑀯𑀺𑀬 𑀳𑁄𑀢𑀺, 𑀢𑀁 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁.

𑁬𑁧. 𑀇𑀤𑀸𑀦𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀮𑀸𑀪𑀺𑀦𑁄 𑀅𑀥𑀺𑀫𑀸𑀦𑀺𑀓𑀲𑁆𑀲 𑀘 𑀦𑀺𑀖𑀁𑀲𑀁 𑀤𑀲𑁆𑀲𑁂𑀦𑁆𑀢𑁄 𑀞𑀸𑀦𑀁 𑀔𑁄 𑀧𑀦𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁂 𑀯𑀦𑁆𑀢𑁂𑀢𑀺 𑀢𑀁 𑀯𑀦𑁆𑀢𑀁. 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀳𑀺 𑀳𑁂𑀝𑁆𑀞𑀸𑀲𑀫𑀸𑀧𑀢𑁆𑀢𑀺𑀬𑁄 𑀯𑀦𑁆𑀢𑀲𑀤𑀺𑀲𑀸 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀧𑀼𑀦 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁.

𑁬𑁨. 𑀇𑀤𑀸𑀦𑀺 𑀔𑀻𑀡𑀸𑀲𑀯𑀲𑁆𑀲 𑀦𑀺𑀖𑀁𑀲𑀁 𑀤𑀲𑁆𑀲𑁂𑀦𑁆𑀢𑁄 𑀞𑀸𑀦𑀁 𑀔𑁄 𑀧𑀦𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁂 𑀉𑀘𑁆𑀙𑀺𑀦𑁆𑀦𑀫𑀽𑀮𑁂𑀢𑀺 𑀲𑁄 𑀉𑀘𑁆𑀙𑀺𑀦𑁆𑀦𑀫𑀽𑀮𑁄. 𑀉𑀧𑀭𑀺 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀳𑀺 𑀳𑁂𑀝𑁆𑀞𑀸𑀲𑀫𑀸𑀧𑀢𑁆𑀢𑀺 𑀫𑀽𑀮𑀘𑁆𑀙𑀺𑀦𑁆𑀦𑀢𑀸𑀮𑁄 𑀯𑀺𑀬 𑀉𑀧𑀝𑁆𑀞𑀸𑀢𑀺, 𑀢𑀁 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁.

𑁬𑁩. 𑀞𑀸𑀦𑀁 𑀔𑁄 𑀧𑀦𑀸𑀢𑀺 𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀺. 𑀳𑁂𑀝𑁆𑀞𑀸 𑀳𑀺 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀅𑀥𑀺𑀫𑀸𑀦𑀺𑀓𑀲𑁆𑀲𑀧𑀺 𑀔𑀻𑀡𑀸𑀲𑀯𑀲𑁆𑀲𑀧𑀺 𑀦𑀺𑀖𑀁𑀲𑁄 𑀓𑀣𑀺𑀢𑁄, 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲 𑀧𑀦 𑀅𑀥𑀺𑀫𑀸𑀦𑀺𑀓𑀲𑁆𑀲𑀧𑀺 𑀔𑀻𑀡𑀸𑀲𑀯𑀲𑁆𑀲𑀧𑀺 𑀦 𑀓𑀣𑀺𑀢𑁄. 𑀢𑁂𑀲𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀦𑀺𑀖𑀁𑀲𑀁 𑀤𑀲𑁆𑀲𑁂𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀁 𑀧𑀦 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀳𑀺 𑀅𑀥𑀺𑀫𑀸𑀦𑀺𑀓𑀲𑁆𑀲 𑀦𑀺𑀖𑀁𑀲𑁂 𑀓𑀣𑀺𑀢𑁂 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲𑀧𑀺 𑀅𑀥𑀺𑀫𑀸𑀦𑀺𑀓𑀲𑁆𑀲 𑀓𑀣𑀺𑀢𑁄𑀯 𑀳𑁄𑀢𑀺, 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀘 𑀔𑀻𑀡𑀸𑀲𑀯𑀲𑁆𑀲 𑀓𑀣𑀺𑀢𑁂 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀔𑀻𑀡𑀸𑀲𑀯𑀲𑁆𑀲 𑀓𑀣𑀺𑀢𑁄𑀯 𑀳𑁄𑀢𑀺. 𑀏𑀢𑁂𑀲𑀁 𑀧𑀦 𑀤𑁆𑀯𑀺𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀓𑀣𑁂𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺.

𑀢𑀢𑁆𑀣 𑀲𑀺𑀬𑀸 𑁋 𑀧𑀼𑀣𑀼𑀚𑁆𑀚𑀦𑀲𑁆𑀲 𑀢𑀸𑀯 𑀆𑀭𑀫𑁆𑀫𑀡𑀁 𑀅𑀲𑀧𑁆𑀧𑀸𑀬𑀁 𑀳𑁄𑀢𑀼, 𑀔𑀻𑀡𑀸𑀲𑀯𑀲𑁆𑀲 𑀓𑀣𑀁 𑀅𑀲𑀧𑁆𑀧𑀸𑀬𑀦𑁆𑀢𑀺. 𑀬𑀤𑀕𑁆𑀕𑁂𑀦 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀲𑀧𑁆𑀧𑀸𑀬𑀁, 𑀢𑀤𑀕𑁆𑀕𑁂𑀦 𑀔𑀻𑀡𑀸𑀲𑀯𑀲𑁆𑀲𑀸𑀧𑀺 𑀅𑀲𑀧𑁆𑀧𑀸𑀬𑀫𑁂𑀯. 𑀯𑀺𑀲𑀁 𑀦𑀸𑀫 𑀚𑀸𑀦𑀺𑀢𑁆𑀯𑀸 𑀔𑀸𑀤𑀺𑀢𑀫𑁆𑀧𑀺 𑀅𑀚𑀸𑀦𑀺𑀢𑁆𑀯𑀸 𑀔𑀸𑀤𑀺𑀢𑀫𑁆𑀧𑀺 𑀯𑀺𑀲𑀫𑁂𑀯. 𑀦 𑀳𑀺 𑀔𑀻𑀡𑀸𑀲𑀯𑁂𑀦𑀧𑀺 ‘‘𑀅𑀳𑀁 𑀔𑀻𑀡𑀸𑀲𑀯𑁄’’𑀢𑀺 𑀅𑀲𑀁𑀯𑀼𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀔𑀻𑀡𑀸𑀲𑀯𑁂𑀦𑀧𑀺 𑀬𑀼𑀢𑁆𑀢𑀧𑀬𑀼𑀢𑁆𑀢𑁂𑀦𑁂𑀯 𑀪𑀯𑀺𑀢𑀼𑀁 𑀯𑀝𑁆𑀝𑀢𑀺.

𑁬𑁪. 𑀢𑀢𑁆𑀣 𑀲𑀫𑀡𑁂𑀦𑀸𑀢𑀺 𑀩𑀼𑀤𑁆𑀥𑀲𑀫𑀡𑁂𑀦. 𑀙𑀦𑁆𑀤𑀭𑀸𑀕𑀩𑁆𑀬𑀸𑀧𑀸𑀤𑁂𑀦𑀸𑀢𑀺 𑀲𑁄 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑁄 𑀯𑀺𑀲𑀤𑁄𑀲𑁄 𑀙𑀦𑁆𑀤𑀭𑀸𑀕𑁂𑀦 𑀘 𑀩𑁆𑀬𑀸𑀧𑀸𑀤𑁂𑀦 𑀘 𑀭𑀼𑀧𑁆𑀧𑀢𑀺 𑀓𑀼𑀧𑁆𑀧𑀢𑀺. 𑀅𑀲𑀧𑁆𑀧𑀸𑀬𑀸𑀦𑀻𑀢𑀺 𑀅𑀯𑀟𑁆𑀠𑀺𑀓𑀭𑀸𑀦𑀺 𑀆𑀭𑀫𑁆𑀫𑀡𑀸𑀦𑀺. 𑀅𑀦𑀼𑀤𑁆𑀥𑀁𑀲𑁂𑀬𑁆𑀬𑀸𑀢𑀺 𑀲𑁄𑀲𑁂𑀬𑁆𑀬 𑀫𑀺𑀮𑀸𑀧𑁂𑀬𑁆𑀬. 𑀲𑀉𑀧𑀸𑀤𑀺𑀲𑁂𑀲𑀦𑁆𑀢𑀺 𑀲𑀕𑀳𑀡𑀲𑁂𑀲𑀁, 𑀉𑀧𑀸𑀤𑀺𑀢𑀩𑁆𑀩𑀁 𑀕𑀡𑁆𑀳𑀺𑀢𑀩𑁆𑀩𑀁 𑀇𑀥 𑀉𑀧𑀸𑀤𑀻𑀢𑀺 𑀯𑀼𑀢𑁆𑀢𑀁. 𑀅𑀦𑀮𑀜𑁆𑀘 𑀢𑁂 𑀅𑀦𑁆𑀢𑀭𑀸𑀬𑀸𑀬𑀸𑀢𑀺 𑀚𑀻𑀯𑀺𑀢𑀦𑁆𑀢𑀭𑀸𑀬𑀁 𑀢𑁂 𑀓𑀸𑀢𑀼𑀁 𑀅𑀲𑀫𑀢𑁆𑀣𑀁. 𑀭𑀚𑁄𑀲𑀽𑀓𑀦𑁆𑀢𑀺 𑀭𑀚𑁄 𑀘 𑀯𑀻𑀳𑀺𑀲𑀼𑀓𑀸𑀤𑀺 𑀘 𑀲𑀽𑀓𑀁. 𑀅𑀲𑀼 𑀘 𑀯𑀺𑀲𑀤𑁄𑀲𑁄𑀢𑀺 𑀲𑁄 𑀘 𑀯𑀺𑀲𑀤𑁄𑀲𑁄. 𑀢𑀤𑀼𑀪𑀬𑁂𑀦𑀸𑀢𑀺 𑀬𑀸 𑀲𑀸 𑀅𑀲𑀧𑁆𑀧𑀸𑀬𑀓𑀺𑀭𑀺𑀬𑀸 𑀘 𑀬𑁄 𑀯𑀺𑀲𑀤𑁄𑀲𑁄 𑀘, 𑀢𑁂𑀦 𑀉𑀪𑀬𑁂𑀦. 𑀧𑀼𑀣𑀼𑀢𑁆𑀢𑀦𑁆𑀢𑀺 𑀫𑀳𑀦𑁆𑀢𑀪𑀸𑀯𑀁.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀲𑀉𑀧𑀸𑀤𑀸𑀦𑀲𑀮𑁆𑀮𑀼𑀤𑁆𑀥𑀸𑀭𑁄 𑀯𑀺𑀬 𑀅𑀧𑁆𑀧𑀳𑀻𑀦𑁄 𑀅𑀯𑀺𑀚𑁆𑀚𑀸𑀯𑀺𑀲𑀤𑁄𑀲𑁄 𑀤𑀝𑁆𑀞𑀩𑁆𑀩𑁄, 𑀅𑀲𑀧𑁆𑀧𑀸𑀬𑀓𑀺𑀭𑀺𑀬𑀸𑀬 𑀞𑀺𑀢𑀪𑀸𑀯𑁄 𑀯𑀺𑀬 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀅𑀲𑀁𑀯𑀼𑀢𑀓𑀸𑀮𑁄, 𑀢𑀤𑀼𑀪𑀬𑁂𑀦 𑀯𑀡𑁂 𑀧𑀼𑀣𑀼𑀢𑁆𑀢𑀁 𑀕𑀢𑁂 𑀫𑀭𑀡𑀁 𑀯𑀺𑀬 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀦𑀁, 𑀫𑀭𑀡𑀫𑀢𑁆𑀢𑀁 𑀤𑀼𑀓𑁆𑀔𑀁 𑀯𑀺𑀬 𑀅𑀜𑁆𑀜𑀢𑀭𑀸𑀬 𑀕𑀭𑀼𑀓𑀸𑀬 𑀲𑀁𑀓𑀺𑀮𑀺𑀝𑁆𑀞𑀸𑀬 𑀆𑀧𑀢𑁆𑀢𑀺𑀬𑀸 𑀆𑀧𑀚𑁆𑀚𑀦𑀁 𑀤𑀝𑁆𑀞𑀩𑁆𑀩𑀁. 𑀲𑀼𑀓𑁆𑀓𑀧𑀓𑁆𑀔𑁂𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁.

𑁬𑁫. 𑀲𑀢𑀺𑀬𑀸𑀬𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀏𑀢𑁆𑀣 𑀲𑀢𑀺 𑀧𑀜𑁆𑀜𑀸𑀕𑀢𑀺𑀓𑀸. 𑀮𑁄𑀓𑀺𑀓𑀸𑀬 𑀧𑀜𑁆𑀜𑀸𑀬 𑀮𑁄𑀓𑀺𑀓𑀸 𑀳𑁄𑀢𑀺, 𑀮𑁄𑀓𑀼𑀢𑁆𑀢𑀭𑀸𑀬 𑀮𑁄𑀓𑀼𑀢𑁆𑀢𑀭𑀸. 𑀅𑀭𑀺𑀬𑀸𑀬𑁂𑀢𑀁 𑀧𑀜𑁆𑀜𑀸𑀬𑀸𑀢𑀺 𑀧𑀭𑀺𑀲𑀼𑀤𑁆𑀥𑀸𑀬 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬.

𑀇𑀤𑀸𑀦𑀺 𑀔𑀻𑀡𑀸𑀲𑀯𑀲𑁆𑀲 𑀩𑀮𑀁 𑀤𑀲𑁆𑀲𑁂𑀦𑁆𑀢𑁄 𑀲𑁄 𑀯𑀢𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀁𑀯𑀼𑀢𑀓𑀸𑀭𑀻𑀢𑀺 𑀧𑀺𑀳𑀺𑀢𑀓𑀸𑀭𑀻. 𑀇𑀢𑀺 𑀯𑀺𑀤𑀺𑀢𑁆𑀯𑀸 𑀦𑀺𑀭𑀼𑀧𑀥𑀻𑀢𑀺 𑀏𑀯𑀁 𑀚𑀸𑀦𑀺𑀢𑁆𑀯𑀸 𑀓𑀺𑀮𑁂𑀲𑀼𑀧𑀥𑀺𑀧𑀳𑀸𑀦𑀸 𑀦𑀺𑀭𑀼𑀧𑀥𑀺 𑀳𑁄𑀢𑀺, 𑀦𑀺𑀭𑀼𑀧𑀸𑀤𑀸𑀦𑁄𑀢𑀺 𑀅𑀢𑁆𑀣𑁄. 𑀉𑀧𑀥𑀺𑀲𑀗𑁆𑀔𑀬𑁂 𑀯𑀺𑀫𑀼𑀢𑁆𑀢𑁄𑀢𑀺 𑀉𑀧𑀥𑀻𑀦𑀁 𑀲𑀗𑁆𑀔𑀬𑀪𑀽𑀢𑁂 𑀦𑀺𑀩𑁆𑀩𑀸𑀦𑁂 𑀆𑀭𑀫𑁆𑀫𑀡𑀢𑁄 𑀯𑀺𑀫𑀼𑀢𑁆𑀢𑁄. 𑀉𑀧𑀥𑀺𑀲𑁆𑀫𑀺𑀦𑁆𑀢𑀺 𑀓𑀸𑀫𑀼𑀧𑀥𑀺𑀲𑁆𑀫𑀺𑀁. 𑀓𑀸𑀬𑀁 𑀉𑀧𑀲𑀁𑀳𑀭𑀺𑀲𑁆𑀲𑀢𑀻𑀢𑀺 𑀓𑀸𑀬𑀁 𑀅𑀮𑁆𑀮𑀻𑀬𑀸𑀧𑁂𑀲𑁆𑀲𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀡𑁆𑀳𑀓𑁆𑀔𑀬𑁂 𑀦𑀺𑀩𑁆𑀩𑀸𑀦𑁂 𑀆𑀭𑀫𑁆𑀫𑀡𑀢𑁄 𑀯𑀺𑀫𑀼𑀢𑁆𑀢𑁄 𑀔𑀻𑀡𑀸𑀲𑀯𑁄 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀲𑁂𑀯𑀺𑀢𑀼𑀁, 𑀓𑀸𑀬𑀁 𑀯𑀸 𑀉𑀧𑀲𑀁𑀳𑀭𑀺𑀲𑁆𑀲𑀢𑀺 𑀘𑀺𑀢𑁆𑀢𑀁 𑀯𑀸 𑀉𑀧𑁆𑀧𑀸𑀤𑁂𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀲𑀼𑀦𑀓𑁆𑀔𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀆𑀦𑁂𑀜𑁆𑀚𑀲𑀧𑁆𑀧𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁬. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀆𑀦𑁂𑀜𑁆𑀚𑀲𑀧𑁆𑀧𑀸𑀬𑀲𑀼𑀢𑁆𑀢𑀁. 𑀢𑀢𑁆𑀣 𑀅𑀦𑀺𑀘𑁆𑀘𑀸𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀸. 𑀓𑀸𑀫𑀸𑀢𑀺 𑀯𑀢𑁆𑀣𑀼𑀓𑀸𑀫𑀸𑀧𑀺 𑀓𑀺𑀮𑁂𑀲𑀓𑀸𑀫𑀸𑀧𑀺. 𑀢𑀼𑀘𑁆𑀙𑀸𑀢𑀺 𑀦𑀺𑀘𑁆𑀘𑀲𑀸𑀭𑀥𑀼𑀯𑀲𑀸𑀭𑀅𑀢𑁆𑀢𑀲𑀸𑀭𑀯𑀺𑀭𑀳𑀺𑀢𑀢𑁆𑀢𑀸 𑀭𑀺𑀢𑁆𑀢𑀸, 𑀦 𑀧𑀦 𑀦𑀢𑁆𑀣𑀻𑀢𑀺 𑀕𑀳𑁂𑀢𑀩𑁆𑀩𑀸. 𑀦 𑀳𑀺 𑀢𑀼𑀘𑁆𑀙𑀫𑀼𑀝𑁆𑀞𑀻𑀢𑀺 𑀯𑀼𑀢𑁆𑀢𑁂 𑀫𑀼𑀝𑁆𑀞𑀺 𑀦𑀸𑀫 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀲𑁆𑀲 𑀧𑀦 𑀅𑀩𑁆𑀪𑀦𑁆𑀢𑀭𑁂 𑀓𑀺𑀜𑁆𑀘𑀺 𑀦𑀢𑁆𑀣𑀺, 𑀲𑁄 𑀯𑀼𑀘𑁆𑀘𑀢𑀺 𑀢𑀼𑀘𑁆𑀙𑁄. 𑀫𑀼𑀲𑀸𑀢𑀺 𑀦𑀸𑀲𑀦𑀓𑀸. 𑀫𑁄𑀲𑀥𑀫𑁆𑀫𑀸𑀢𑀺 𑀦𑀲𑁆𑀲𑀦𑀲𑀪𑀸𑀯𑀸, 𑀔𑁂𑀢𑁆𑀢𑀁 𑀯𑀺𑀬 𑀯𑀢𑁆𑀣𑀼 𑀯𑀺𑀬 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀯𑀺𑀬 𑀘 𑀦 𑀧𑀜𑁆𑀜𑀸𑀬𑀺𑀢𑁆𑀣, 𑀓𑀢𑀺𑀧𑀸𑀳𑁂𑀦𑁂𑀯 𑀲𑀼𑀧𑀺𑀦𑀓𑁂 𑀤𑀺𑀝𑁆𑀞𑀸 𑀯𑀺𑀬 𑀦𑀲𑁆𑀲𑀦𑁆𑀢𑀺 𑀦 𑀧𑀜𑁆𑀜𑀸𑀬𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑁄𑀲𑀥𑀫𑁆𑀫𑀸’’𑀢𑀺, 𑀫𑀸𑀬𑀸𑀓𑀢𑀫𑁂𑀢𑀦𑁆𑀢𑀺 𑀬𑀣𑀸 𑀫𑀸𑀬𑀸𑀬 𑀉𑀤𑀓𑀁 𑀫𑀡𑀻𑀢𑀺 𑀓𑀢𑁆𑀯𑀸 𑀤𑀲𑁆𑀲𑀺𑀢𑀁, 𑀩𑀤𑀭𑀺𑀧𑀡𑁆𑀡𑀁 𑀓𑀳𑀸𑀧𑀡𑁄𑀢𑀺 𑀓𑀢𑁆𑀯𑀸 𑀤𑀲𑁆𑀲𑀺𑀢𑀁, 𑀅𑀜𑁆𑀜𑀁 𑀯𑀸 𑀧𑀦 𑀏𑀯𑀭𑀽𑀧𑀁 𑀤𑀲𑁆𑀲𑀦𑀽𑀧𑀘𑀸𑀭𑁂 𑀞𑀺𑀢𑀲𑁆𑀲𑁂𑀯 𑀢𑀣𑀸 𑀧𑀜𑁆𑀜𑀸𑀬𑀢𑀺, 𑀉𑀧𑀘𑀸𑀭𑀸𑀢𑀺𑀓𑁆𑀓𑀫𑀢𑁄 𑀧𑀝𑁆𑀞𑀸𑀬 𑀧𑀸𑀓𑀢𑀺𑀓𑀫𑁂𑀯 𑀧𑀜𑁆𑀜𑀸𑀬𑀢𑀺. 𑀏𑀯𑀁 𑀓𑀸𑀫𑀸𑀧𑀺 𑀇𑀢𑁆𑀢𑀭𑀧𑀘𑁆𑀘𑀼𑀧𑀝𑁆𑀞𑀸𑀦𑀝𑁆𑀞𑁂𑀦 ‘‘𑀫𑀸𑀬𑀸𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀸. 𑀬𑀣𑀸 𑀘 𑀫𑀸𑀬𑀸𑀓𑀸𑀭𑁄 𑀉𑀤𑀓𑀸𑀤𑀻𑀦𑀺 𑀫𑀡𑀺𑀆𑀤𑀻𑀦𑀁 𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 𑀯𑀜𑁆𑀘𑁂𑀢𑀺, 𑀏𑀯𑀁 𑀓𑀸𑀫𑀸𑀧𑀺 𑀅𑀦𑀺𑀘𑁆𑀘𑀸𑀤𑀻𑀦𑀺 𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑀸 𑀯𑀜𑁆𑀘𑁂𑀦𑁆𑀢𑀻𑀢𑀺 𑀯𑀜𑁆𑀘𑀦𑀓𑀝𑁆𑀞𑁂𑀦𑀧𑀺 ‘‘𑀫𑀸𑀬𑀸𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀸. 𑀩𑀸𑀮𑀮𑀸𑀧𑀦𑀦𑁆𑀢𑀺 𑀫𑀬𑁆𑀳𑀁 𑀧𑀼𑀢𑁆𑀢𑁄, 𑀫𑀬𑁆𑀳𑀁 𑀥𑀻𑀢𑀸, 𑀫𑀬𑁆𑀳𑀁 𑀳𑀺𑀭𑀜𑁆𑀜𑀁 𑀫𑀬𑁆𑀳𑀁 𑀲𑀼𑀯𑀡𑁆𑀡𑀦𑁆𑀢𑀺 𑀏𑀯𑀁 𑀩𑀸𑀮𑀸𑀦𑀁 𑀮𑀸𑀧𑀦𑀢𑁄 𑀩𑀸𑀮𑀮𑀸𑀧𑀦𑀁. 𑀤𑀺𑀝𑁆𑀞𑀥𑀫𑁆𑀫𑀺𑀓𑀸 𑀓𑀸𑀫𑀸𑀢𑀺 𑀫𑀸𑀦𑀼𑀲𑀓𑀸 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀲𑀫𑁆𑀧𑀭𑀸𑀬𑀺𑀓𑀸𑀢𑀺 𑀢𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸. 𑀤𑀺𑀝𑁆𑀞𑀥𑀫𑁆𑀫𑀺𑀓𑀸. 𑀓𑀸𑀫𑀲𑀜𑁆𑀜𑀸𑀢𑀺 𑀫𑀸𑀦𑀼𑀲𑀓𑁂 𑀓𑀸𑀫𑁂 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀲𑀜𑁆𑀜𑀸. 𑀉𑀪𑀬𑀫𑁂𑀢𑀁 𑀫𑀸𑀭𑀥𑁂𑀬𑁆𑀬𑀦𑁆𑀢𑀺 𑀏𑀢𑁂 𑀓𑀸𑀫𑀸 𑀘 𑀓𑀸𑀫𑀲𑀜𑁆𑀜𑀸 𑀘 𑀉𑀪𑀬𑀫𑁆𑀧𑀺 𑀫𑀸𑀭𑀥𑁂𑀬𑁆𑀬𑀁. 𑀬𑁂𑀳𑀺 𑀉𑀪𑀬𑀫𑁂𑀢𑀁 𑀕𑀳𑀺𑀢𑀁, 𑀢𑁂𑀲𑀜𑁆𑀳𑀺 𑀉𑀧𑀭𑀺 𑀫𑀸𑀭𑁄 𑀯𑀲𑀁 𑀯𑀢𑁆𑀢𑁂𑀢𑀺. 𑀢𑀁 𑀲𑀦𑁆𑀥𑀸𑀬 ‘‘𑀉𑀪𑀬𑀫𑁂𑀢𑀁 𑀫𑀸𑀭𑀥𑁂𑀬𑁆𑀬’’𑀦𑁆𑀢𑀺 𑀯𑀼𑀢𑁆𑀢𑀁.

𑀫𑀸𑀭𑀲𑁆𑀲𑁂𑀲 𑀯𑀺𑀲𑀬𑁄𑀢𑀺𑀆𑀤𑀻𑀲𑀼𑀧𑀺 𑀬𑀣𑀸 𑀘𑁄𑀴𑀲𑁆𑀲 𑀯𑀺𑀲𑀬𑁄 𑀘𑁄𑀴𑀯𑀺𑀲𑀬𑁄, 𑀧𑀡𑁆𑀟𑀲𑁆𑀲 𑀯𑀺𑀲𑀬𑁄 𑀧𑀡𑁆𑀟𑀯𑀺𑀲𑀬𑁄, 𑀲𑀁𑀯𑀭𑀸𑀦𑀁 𑀯𑀺𑀲𑀬𑁄 𑀲𑀁𑀯𑀭𑀯𑀺𑀲𑀬𑁄𑀢𑀺 𑀧𑀯𑀢𑁆𑀢𑀦𑀝𑁆𑀞𑀸𑀦𑀁 𑀯𑀺𑀲𑀬𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀬𑁂𑀳𑀺 𑀏𑀢𑁂 𑀓𑀸𑀫𑀸 𑀕𑀳𑀺𑀢𑀸, 𑀢𑁂𑀲𑀁 𑀉𑀧𑀭𑀺 𑀫𑀸𑀭𑁄 𑀯𑀲𑀁 𑀯𑀢𑁆𑀢𑁂𑀢𑀺. 𑀢𑀁 𑀲𑀦𑁆𑀥𑀸𑀬 𑀫𑀸𑀭𑀲𑁆𑀲𑁂𑀲 𑀯𑀺𑀲𑀬𑁄𑀢𑀺 𑀯𑀼𑀢𑁆𑀢𑀁. 𑀧𑀜𑁆𑀘 𑀧𑀦 𑀓𑀸𑀫𑀕𑀼𑀡𑁂 𑀦𑀺𑀯𑀸𑀧𑀩𑀻𑀚𑀁 𑀯𑀺𑀬 𑀯𑀺𑀧𑁆𑀧𑀓𑀺𑀭𑀦𑁆𑀢𑁄 𑀫𑀸𑀭𑁄 𑀕𑀘𑁆𑀙𑀢𑀺. 𑀬𑁂𑀳𑀺 𑀧𑀦 𑀢𑁂 𑀕𑀳𑀺𑀢𑀸, 𑀢𑁂𑀲𑀁 𑀉𑀧𑀭𑀺 𑀫𑀸𑀭𑁄 𑀯𑀲𑀁 𑀯𑀢𑁆𑀢𑁂𑀢𑀺. 𑀢𑀁 𑀲𑀦𑁆𑀥𑀸𑀬 𑀫𑀸𑀭𑀲𑁆𑀲𑁂𑀲 𑀦𑀺𑀯𑀸𑀧𑁄𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀘 𑀬𑀢𑁆𑀣 𑀳𑀢𑁆𑀣𑀺𑀆𑀤𑀬𑁄 𑀯𑀲𑀁 𑀯𑀢𑁆𑀢𑁂𑀦𑁆𑀢𑀺, 𑀲𑁄 𑀳𑀢𑁆𑀣𑀺𑀕𑁄𑀘𑀭𑁄 𑀅𑀲𑁆𑀲𑀕𑁄𑀘𑀭𑁄 𑀅𑀚𑀕𑁄𑀘𑀭𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀬𑁂𑀳𑀺 𑀏𑀢𑁂 𑀓𑀸𑀫𑀸 𑀕𑀳𑀺𑀢𑀸, 𑀢𑁂𑀲𑀼 𑀫𑀸𑀭𑁄 𑀯𑀲𑀁 𑀯𑀢𑁆𑀢𑁂𑀢𑀺. 𑀢𑀁 𑀲𑀦𑁆𑀥𑀸𑀬 𑀫𑀸𑀭𑀲𑁆𑀲𑁂𑀲 𑀕𑁄𑀘𑀭𑁄𑀢𑀺 𑀯𑀼𑀢𑁆𑀢𑀁.

𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀓𑀸𑀫𑁂𑀲𑀼. 𑀫𑀸𑀦𑀲𑀸𑀢𑀺 𑀘𑀺𑀢𑁆𑀢𑀲𑀫𑁆𑀪𑀽𑀢𑀸. 𑀢𑀢𑁆𑀣 𑀲𑀺𑀬𑀸 𑁋 𑀤𑀼𑀯𑀺𑀥𑁂 𑀢𑀸𑀯 𑀓𑀸𑀫𑁂 𑀆𑀭𑀩𑁆𑀪 𑀅𑀪𑀺𑀚𑁆𑀛𑀸𑀦𑀮𑀓𑁆𑀔𑀡𑀸 𑀅𑀪𑀺𑀚𑁆𑀛𑀸, 𑀓𑀭𑀡𑀼𑀢𑁆𑀢𑀭𑀺𑀬𑀮𑀓𑁆𑀔𑀡𑁄 𑀲𑀸𑀭𑀫𑁆𑀪𑁄 𑀘 𑀉𑀧𑁆𑀧𑀚𑁆𑀚𑀢𑀼, 𑀩𑁆𑀬𑀸𑀧𑀸𑀤𑁄 𑀓𑀣𑀁 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀫𑀫𑀸𑀬𑀺𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀘𑁆𑀙𑀺𑀦𑁆𑀦𑁂𑀧𑀺 𑀲𑁄𑀘𑀦𑁆𑀢𑀺, 𑀅𑀘𑁆𑀙𑀺𑀚𑁆𑀚𑀦𑁆𑀢𑁂𑀧𑀺 𑀲𑁄𑀘𑀦𑁆𑀢𑀺, 𑀅𑀘𑁆𑀙𑀺𑀦𑁆𑀦𑀲𑀗𑁆𑀓𑀺𑀦𑁄𑀧𑀺 𑀲𑁄𑀘𑀦𑁆𑀢𑀺, 𑀬𑁄 𑀏𑀯𑀭𑀽𑀧𑁄 𑀘𑀺𑀢𑁆𑀢𑀲𑁆𑀲 𑀆𑀖𑀸𑀢𑁄𑀢𑀺 𑀏𑀯𑀁 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀯 𑀅𑀭𑀺𑀬𑀲𑀸𑀯𑀓𑀲𑁆𑀲𑀸𑀢𑀺 𑀢𑁂 𑀅𑀭𑀺𑀬𑀲𑀸𑀯𑀓𑀲𑁆𑀲. 𑀯𑀓𑀸𑀭𑁄 𑀆𑀕𑀫𑀲𑀦𑁆𑀥𑀺𑀫𑀢𑁆𑀢𑀁 𑀳𑁄𑀢𑀺. 𑀇𑀥 𑀫𑀦𑀼𑀲𑀺𑀓𑁆𑀔𑀢𑁄𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀲𑀺𑀓𑁆𑀔𑀦𑁆𑀢𑀲𑁆𑀲 𑀢𑁂 𑀢𑀬𑁄𑀧𑀺 𑀓𑀺𑀮𑁂𑀲𑀸 𑀅𑀦𑁆𑀢𑀭𑀸𑀬𑀓𑀭𑀸 𑀳𑁄𑀦𑁆𑀢𑀺. 𑀅𑀪𑀺𑀪𑀼𑀬𑁆𑀬 𑀮𑁄𑀓𑀦𑁆𑀢𑀺 𑀓𑀸𑀫𑀮𑁄𑀓𑀁 𑀅𑀪𑀺𑀪𑀯𑀺𑀢𑁆𑀯𑀸. 𑀅𑀥𑀺𑀝𑁆𑀞𑀸𑀬 𑀫𑀦𑀲𑀸𑀢𑀺 𑀛𑀸𑀦𑀸𑀭𑀫𑁆𑀫𑀡𑀘𑀺𑀢𑁆𑀢𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸. 𑀅𑀧𑀭𑀺𑀢𑁆𑀢𑀦𑁆𑀢𑀺 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀁 𑀧𑀭𑀺𑀢𑁆𑀢𑀁 𑀦𑀸𑀫, 𑀢𑀲𑁆𑀲 𑀧𑀝𑀺𑀓𑁆𑀔𑁂𑀧𑁂𑀦 𑀫𑀳𑀕𑁆𑀕𑀢𑀁 𑀅𑀧𑀭𑀺𑀢𑁆𑀢𑀁 𑀦𑀸𑀫. 𑀧𑀫𑀸𑀡𑀦𑁆𑀢𑀺𑀧𑀺 𑀓𑀸𑀫𑀸𑀯𑀘𑀭𑀫𑁂𑀯, 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀁 𑀅𑀧𑁆𑀧𑀫𑀸𑀡𑀁. 𑀲𑀼𑀪𑀸𑀯𑀺𑀢𑀦𑁆𑀢𑀺 𑀧𑀦 𑀏𑀢𑀁 𑀓𑀸𑀫𑀸𑀯𑀘𑀭𑀸𑀤𑀻𑀦𑀁 𑀦𑀸𑀫𑀁 𑀦 𑀳𑁄𑀢𑀺, 𑀮𑁄𑀓𑀼𑀢𑁆𑀢𑀭𑀲𑁆𑀲𑁂𑀯𑁂𑀢𑀁 𑀦𑀸𑀫𑀁. 𑀢𑀲𑁆𑀫𑀸 𑀏𑀢𑀲𑁆𑀲 𑀯𑀲𑁂𑀦 𑀅𑀧𑀭𑀺𑀢𑁆𑀢𑀁 𑀅𑀧𑁆𑀧𑀫𑀸𑀡𑀁 𑀲𑀼𑀪𑀸𑀯𑀺𑀢𑀦𑁆𑀢𑀺 𑀲𑀩𑁆𑀩𑀁 𑀮𑁄𑀓𑀼𑀢𑁆𑀢𑀭𑀫𑁂𑀯 𑀯𑀝𑁆𑀝𑀢𑀺.

𑀢𑀩𑁆𑀩𑀳𑀼𑀮𑀯𑀺𑀳𑀸𑀭𑀺𑀦𑁄𑀢𑀺 𑀓𑀸𑀫𑀧𑀝𑀺𑀩𑀸𑀳𑀦𑁂𑀦 𑀢𑀫𑁂𑀯 𑀧𑀝𑀺𑀧𑀤𑀁 𑀩𑀳𑀼𑀮𑀁 𑀓𑀢𑁆𑀯𑀸 𑀯𑀺𑀳𑀭𑀦𑁆𑀢𑀲𑁆𑀲. 𑀆𑀬𑀢𑀦𑁂 𑀘𑀺𑀢𑁆𑀢𑀁 𑀧𑀲𑀻𑀤𑀢𑀻𑀢𑀺 𑀓𑀸𑀭𑀡𑁂 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺. 𑀓𑀺𑀁 𑀧𑀦𑁂𑀢𑁆𑀣 𑀓𑀸𑀭𑀡𑀁? 𑀅𑀭𑀳𑀢𑁆𑀢𑀁 𑀯𑀸, 𑀅𑀭𑀳𑀢𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀁 𑀯𑀸, 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀯𑀸, 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀉𑀧𑀘𑀸𑀭𑀁 𑀯𑀸. 𑀲𑀫𑁆𑀧𑀲𑀸𑀤𑁂 𑀲𑀢𑀻𑀢𑀺 𑀏𑀢𑁆𑀣 𑀤𑀼𑀯𑀺𑀥𑁄 𑀲𑀫𑁆𑀧𑀲𑀸𑀤𑁄 𑀅𑀥𑀺𑀫𑁄𑀓𑁆𑀔𑀲𑀫𑁆𑀧𑀲𑀸𑀤𑁄 𑀘 𑀧𑀝𑀺𑀮𑀸𑀪𑀲𑀫𑁆𑀧𑀲𑀸𑀤𑁄 𑀘. 𑀅𑀭𑀳𑀢𑁆𑀢𑀲𑁆𑀲 𑀳𑀺 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀯𑀺𑀳𑀭𑀢𑁄 𑀫𑀳𑀸𑀪𑀽𑀢𑀸𑀤𑀻𑀲𑀼 𑀉𑀧𑀝𑁆𑀞𑀳𑀦𑁆𑀢𑁂𑀲𑀼 𑀬𑁂𑀦𑀺𑀫𑁂 𑀦𑀻𑀳𑀸𑀭𑁂𑀦 𑀫𑀳𑀸𑀪𑀽𑀢𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀉𑀧𑀸𑀤𑀸𑀭𑀽𑀧𑀸 𑀉𑀧𑀝𑁆𑀞𑀳𑀦𑁆𑀢𑀺 𑀦𑀸𑀫𑀭𑀽𑀧𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀧𑀘𑁆𑀘𑀬𑀸 𑀲𑀩𑁆𑀩𑀣𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀮𑀓𑁆𑀔𑀡𑀸𑀭𑀫𑁆𑀫𑀡𑀸 𑀯𑀺𑀧𑀲𑁆𑀲𑀦𑀸 𑀉𑀧𑀝𑁆𑀞𑀳𑀢𑀺, 𑀅𑀚𑁆𑀚𑁂𑀯 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀅𑀧𑁆𑀧𑀝𑀺𑀮𑀤𑁆𑀥𑁂𑀬𑁂𑀯 𑀆𑀲𑀸 𑀲𑀦𑁆𑀢𑀺𑀝𑁆𑀞𑀢𑀺, 𑀅𑀥𑀺𑀫𑁄𑀓𑁆𑀔𑀁 𑀧𑀝𑀺𑀮𑀪𑀢𑀺. 𑀢𑀢𑀺𑀬𑀚𑁆𑀛𑀸𑀦𑀁 𑀯𑀸 𑀧𑀸𑀤𑀓𑀁 𑀓𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁆𑀣𑀸𑀬 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀸𑀤𑀻𑀦𑀺 𑀲𑀫𑀦𑀼𑀧𑀲𑁆𑀲𑀢𑁄 𑀬𑁂𑀦𑀺𑀫𑁂 𑀦𑀻𑀳𑀸𑀭𑁂𑀦 𑀦𑀻𑀯𑀭𑀡𑀸 𑀯𑀺𑀓𑁆𑀔𑀫𑁆𑀪𑀦𑁆𑀢𑀺, 𑀓𑀺𑀮𑁂𑀲𑀸 𑀲𑀦𑁆𑀦𑀺𑀲𑀻𑀤𑀦𑁆𑀢𑀺, 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀺, 𑀲𑀗𑁆𑀔𑀸𑀭𑀕𑀢𑀁 𑀯𑀸 𑀯𑀺𑀪𑀽𑀢𑀁 𑀧𑀸𑀓𑀝𑀁 𑀳𑀼𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀓𑀲𑁆𑀲 𑀧𑀭𑀮𑁄𑀓𑁄 𑀯𑀺𑀬 𑀉𑀧𑀝𑁆𑀞𑀸𑀢𑀺, 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀮𑁂𑀧𑀧𑀺𑀡𑁆𑀟𑁂 𑀮𑀕𑁆𑀕𑀫𑀸𑀦𑁄 𑀯𑀺𑀬 𑀉𑀧𑀘𑀸𑀭𑁂𑀦 𑀲𑀫𑀸𑀥𑀺𑀬𑀢𑀺, 𑀅𑀚𑁆𑀚𑁂𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀻𑀢𑀺 𑀅𑀧𑀝𑀺𑀮𑀤𑁆𑀥𑁂𑀬𑁂𑀯 𑀆𑀲𑀸 𑀲𑀦𑁆𑀢𑀺𑀝𑁆𑀞𑀢𑀺, 𑀅𑀥𑀺𑀫𑁄𑀓𑁆𑀔𑀁 𑀧𑀝𑀺𑀮𑀪𑀢𑀺. 𑀅𑀬𑀁 𑀅𑀥𑀺𑀫𑁄𑀓𑁆𑀔𑀲𑀫𑁆𑀧𑀲𑀸𑀤𑁄 𑀦𑀸𑀫. 𑀢𑀲𑁆𑀫𑀺𑀁 𑀲𑀫𑁆𑀧𑀲𑀸𑀤𑁂 𑀲𑀢𑀺. 𑀬𑁄 𑀧𑀦 𑀅𑀭𑀳𑀢𑁆𑀢𑀁 𑀯𑀸 𑀧𑀝𑀺𑀮𑀪𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀯𑀸, 𑀢𑀲𑁆𑀲 𑀘𑀺𑀢𑁆𑀢𑀁 𑀯𑀺𑀧𑁆𑀧𑀲𑀦𑁆𑀦𑀁 𑀳𑁄𑀢𑀺𑀬𑁂𑀯. 𑀇𑀥 𑀧𑀦 ‘‘𑀆𑀬𑀢𑀦𑁂 𑀘𑀺𑀢𑁆𑀢𑀁 𑀧𑀲𑀻𑀤𑀢𑀻’’𑀢𑀺 𑀯𑀘𑀦𑀢𑁄 𑀅𑀭𑀳𑀢𑁆𑀢𑀯𑀺𑀧𑀲𑁆𑀲𑀦𑀸𑀬 𑀘𑁂𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑀽𑀧𑀘𑀸𑀭𑀲𑁆𑀲 𑀘 𑀧𑀝𑀺𑀮𑀸𑀪𑁄 𑀧𑀝𑀺𑀮𑀸𑀪𑀲𑀫𑁆𑀧𑀲𑀸𑀤𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀧𑀲𑁆𑀲𑀦𑀸 𑀳𑀺 𑀧𑀜𑁆𑀜𑀸𑀬 𑀅𑀥𑀺𑀫𑀼𑀘𑁆𑀘𑀦𑀲𑁆𑀲 𑀓𑀸𑀭𑀡𑀁, 𑀉𑀧𑀘𑀸𑀭𑀁 𑀆𑀦𑁂𑀜𑁆𑀚𑀲𑀫𑀸𑀧𑀢𑁆𑀢𑀺𑀬𑀸.

𑀏𑀢𑀭𑀳𑀺 𑀯𑀸 𑀆𑀦𑁂𑀜𑁆𑀚𑀁 𑀲𑀫𑀸𑀧𑀚𑁆𑀚𑀢𑀺. 𑀧𑀜𑁆𑀜𑀸𑀬 𑀯𑀸 𑀅𑀥𑀺𑀫𑀼𑀘𑁆𑀘𑀢𑀻𑀢𑀺 𑀏𑀢𑁆𑀣 𑀏𑀢𑀭𑀳𑀺 𑀯𑀸 𑀧𑀜𑁆𑀜𑀸𑀬 𑀅𑀥𑀺𑀫𑀼𑀘𑁆𑀘𑀢𑀺, 𑀆𑀦𑁂𑀜𑁆𑀚𑀁 𑀯𑀸 𑀲𑀫𑀸𑀧𑀚𑁆𑀚𑀢𑀻𑀢𑀺 𑀏𑀯𑀁 𑀧𑀤𑀧𑀭𑀺𑀯𑀢𑁆𑀢𑀦𑀁 𑀓𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀜𑁆𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀲𑁆𑀫𑀺𑀁 𑀲𑀫𑁆𑀧𑀲𑀸𑀤𑁂 𑀲𑀢𑀺 𑀏𑀢𑀭𑀳𑀺 𑀯𑀸 𑀧𑀜𑁆𑀜𑀸𑀬 𑀅𑀥𑀺𑀫𑀼𑀘𑁆𑀘𑀢𑀺, 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀁 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁄 𑀆𑀦𑁂𑀜𑁆𑀚𑀁 𑀯𑀸 𑀲𑀫𑀸𑀧𑀚𑁆𑀚𑀢𑀺, 𑀅𑀣 𑀯𑀸 𑀧𑀜𑁆𑀜𑀸𑀬 𑀯𑀸 𑀅𑀥𑀺𑀫𑀼𑀘𑁆𑀘𑀢𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀁 𑀪𑀸𑀯𑁂𑀢𑀺, 𑀢𑀁 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁄 𑀆𑀦𑁂𑀜𑁆𑀚𑀁 𑀯𑀸 𑀲𑀫𑀸𑀧𑀚𑁆𑀚𑀢𑀺. 𑀅𑀭𑀳𑀢𑁆𑀢𑀫𑀕𑁆𑀕𑀁 𑀪𑀸𑀯𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀏𑀢𑀭𑀳𑀺 𑀘𑀢𑀼𑀲𑀘𑁆𑀘𑀁 𑀯𑀸 𑀲𑀘𑁆𑀙𑀺𑀓𑀭𑁄𑀢𑀺. 𑀢𑀁 𑀅𑀦𑀪𑀺𑀲𑀫𑁆𑀪𑀼𑀡𑀦𑁆𑀢𑁄 𑀆𑀦𑁂𑀜𑁆𑀚𑀁 𑀯𑀸 𑀲𑀫𑀸𑀧𑀚𑁆𑀚𑀢𑀻𑀢𑀺.

𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀇𑀥 𑀪𑀺𑀓𑁆𑀔𑀼 𑀢𑀢𑀺𑀬𑀚𑁆𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀭𑁄𑀢𑀺. 𑀢𑀲𑁆𑀲 𑀦𑀻𑀯𑀭𑀡𑀸 𑀯𑀺𑀓𑁆𑀔𑀫𑁆𑀪𑀦𑁆𑀢𑀺, 𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀺, 𑀉𑀧𑀘𑀸𑀭𑁂𑀦 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺. 𑀲𑁄 𑀭𑀽𑀧𑀸𑀭𑀽𑀧𑀁 𑀧𑀭𑀺𑀕𑀡𑁆𑀳𑀸𑀢𑀺, 𑀧𑀘𑁆𑀘𑀬𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀁 𑀯𑀺𑀧𑀲𑁆𑀲𑀦𑀁 𑀯𑀯𑀢𑁆𑀣𑀧𑁂𑀢𑀺, 𑀢𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀉𑀧𑀘𑀸𑀭𑁂𑀦 𑀫𑁂 𑀛𑀸𑀦𑀁 𑀯𑀺𑀲𑁂𑀲𑀪𑀸𑀕𑀺𑀬𑀁 𑀪𑀯𑁂𑀬𑁆𑀬, 𑀢𑀺𑀝𑁆𑀞𑀢𑀼 𑀯𑀺𑀲𑁂𑀲𑀪𑀸𑀕𑀺𑀬𑀢𑀸, 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀭𑁄𑀢𑀺. 𑀏𑀢𑁆𑀢𑀓𑁂𑀦𑀲𑁆𑀲 𑀓𑀺𑀘𑁆𑀘𑀁 𑀓𑀢𑀁 𑀦𑀸𑀫 𑀳𑁄𑀢𑀺. 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀦 𑀢𑀢𑁄 𑀑𑀲𑀓𑁆𑀓𑀺𑀢𑀫𑀸𑀦𑀲𑁄 𑀅𑀦𑁆𑀢𑀭𑀸 𑀦 𑀢𑀺𑀝𑁆𑀞𑀢𑀺, 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀢𑀺𑀬𑁂𑀯. 𑀬𑀣𑀸 𑀓𑀺𑀁? 𑀬𑀣𑀸 𑀧𑀼𑀭𑀺𑀲𑁄 ‘‘𑀯𑀦𑀫𑀳𑀺𑀁𑀲𑀁 𑀖𑀸𑀢𑁂𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀅𑀦𑀼𑀩𑀦𑁆𑀥𑀦𑁆𑀢𑁄 𑀲𑀘𑁂 𑀢𑀁 𑀖𑀸𑀢𑁂𑀢𑀺, 𑀲𑀓𑀮𑀕𑀸𑀫𑀯𑀸𑀲𑀺𑀦𑁄 𑀢𑁄𑀲𑁂𑀲𑁆𑀲𑀢𑀺, 𑀅𑀲𑀓𑁆𑀓𑁄𑀦𑁆𑀢𑁄 𑀧𑀦 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀲𑀕𑁄𑀥𑀸𑀤𑀬𑁄 𑀔𑀼𑀤𑁆𑀤𑀓𑀫𑀺𑀕𑁂 𑀖𑀸𑀢𑁂𑀢𑁆𑀯𑀸 𑀓𑀸𑀚𑀁 𑀧𑀽𑀭𑁂𑀢𑁆𑀯𑀸 𑀏𑀢𑀺𑀬𑁂𑀯.

𑀢𑀢𑁆𑀣 𑀧𑀼𑀭𑀺𑀲𑀲𑁆𑀲 𑀲𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀯𑀦𑀫𑀳𑀺𑀁𑀲𑀸𑀦𑀼𑀩𑀦𑁆𑀥𑀦𑀁 𑀯𑀺𑀬 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀢𑀺𑀬𑀚𑁆𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀧𑀭𑀺𑀓𑀫𑁆𑀫𑀓𑀭𑀡𑀁, 𑀯𑀦𑀫𑀳𑀺𑀁𑀲𑀖𑀸𑀢𑀦𑀁 𑀯𑀺𑀬 𑁋 ‘‘𑀦𑀻𑀯𑀭𑀡𑀯𑀺𑀓𑁆𑀔𑀫𑁆𑀪𑀦𑀸𑀤𑀻𑀦𑀺 𑀲𑀫𑀦𑀼𑀧𑀲𑁆𑀲𑀢𑁄 𑀯𑀺𑀲𑁂𑀲𑀪𑀸𑀕𑀺𑀬𑀁 𑀪𑀯𑁂𑀬𑁆𑀬, 𑀢𑀺𑀝𑁆𑀞𑀢𑀼 𑀯𑀺𑀲𑁂𑀲𑀪𑀸𑀕𑀺𑀬𑀢𑀸, 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀲𑁆𑀲 𑀲𑀘𑁆𑀙𑀺𑀓𑀭𑀡𑀁, 𑀫𑀳𑀺𑀁𑀲𑀁 𑀖𑀸𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀲𑀕𑁄𑀥𑀸𑀤𑀬𑁄 𑀔𑀼𑀤𑁆𑀤𑀓𑀫𑀺𑀕𑁂 𑀖𑀸𑀢𑁂𑀢𑁆𑀯𑀸 𑀓𑀸𑀚𑀁 𑀧𑀽𑀭𑁂𑀢𑁆𑀯𑀸 𑀕𑀫𑀦𑀁 𑀯𑀺𑀬 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲, 𑀢𑀢𑁄 𑀑𑀲𑀓𑁆𑀓𑀺𑀢𑁆𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀚𑁆𑀚𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀫𑀕𑁆𑀕𑀪𑀸𑀯𑀦𑀸 𑀘𑀢𑀼𑀲𑀘𑁆𑀘𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑁄𑀚𑀦𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀇𑀤𑀸𑀦𑀺 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀓𑀸𑀬𑀲𑁆𑀲 𑀪𑁂𑀤𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀢𑀁 𑀲𑀁𑀯𑀢𑁆𑀢𑀦𑀺𑀓𑀁 𑀯𑀺𑀜𑁆𑀜𑀸𑀡𑀁 𑀅𑀲𑁆𑀲 𑀆𑀦𑁂𑀜𑁆𑀚𑀽𑀧𑀕𑀁, 𑀢𑀁 𑀓𑀸𑀭𑀡𑀁 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀢𑀁𑀲𑀁𑀯𑀢𑁆𑀢𑀦𑀺𑀓𑀦𑁆𑀢𑀺 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀁𑀯𑀢𑁆𑀢𑀦𑀺𑀓𑀁. 𑀬𑁂𑀦 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑁂𑀦 𑀲𑁄 𑀪𑀺𑀓𑁆𑀔𑀼 𑀲𑀁𑀯𑀢𑁆𑀢𑀢𑀺 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀁 𑀯𑀺𑀜𑁆𑀜𑀸𑀡𑀁. 𑀆𑀦𑁂𑀜𑁆𑀚𑀽𑀧𑀕𑀦𑁆𑀢𑀺 𑀓𑀼𑀲𑀮𑀸𑀦𑁂𑀜𑁆𑀚𑀲𑀪𑀸𑀯𑀽𑀧𑀕𑀢𑀁 𑀅𑀲𑁆𑀲, 𑀢𑀸𑀤𑀺𑀲𑀫𑁂𑀯 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀓𑀼𑀲𑀮𑀯𑀺𑀜𑁆𑀜𑀸𑀡𑀁 𑀯𑀤𑀦𑁆𑀢𑀺. 𑀬𑀁 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀁𑀯𑀢𑁆𑀢𑀦𑀺𑀓𑀁 𑀉𑀧𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀓𑀼𑀲𑀮𑀯𑀺𑀜𑁆𑀜𑀸𑀡𑀁 𑀆𑀦𑁂𑀜𑁆𑀚𑀽𑀧𑀕𑀢𑀁 𑀅𑀲𑁆𑀲, 𑀯𑀺𑀧𑀸𑀓𑀓𑀸𑀮𑁂𑀧𑀺 𑀢𑀦𑁆𑀦𑀸𑀫𑀓𑀫𑁂𑀯 𑀅𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀲𑁄 𑀧𑀦𑀸𑀬𑀫𑀢𑁆𑀣𑁄 𑁋 ‘‘𑀧𑀼𑀜𑁆𑀜𑀁 𑀘𑁂 𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀧𑀼𑀜𑁆𑀜𑀽𑀧𑀕𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀁. 𑀅𑀧𑀼𑀜𑁆𑀜𑀁 𑀘𑁂 𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀸𑀭𑁄𑀢𑀺, 𑀅𑀧𑀼𑀜𑁆𑀜𑀼𑀧𑀕𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀁. 𑀆𑀦𑁂𑀜𑁆𑀚𑀁 𑀘𑁂 𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺, 𑀆𑀦𑁂𑀜𑁆𑀚𑀽𑀧𑀕𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡’’𑀦𑁆𑀢𑀺 (𑀲𑀁. 𑀦𑀺. 𑁨.𑁫𑁧) 𑀇𑀫𑀺𑀦𑀸 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀆𑀦𑁂𑀜𑁆𑀚𑀲𑀧𑁆𑀧𑀸𑀬𑀸𑀢𑀺 𑀆𑀦𑁂𑀜𑁆𑀚𑀲𑁆𑀲 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲 𑀲𑀧𑁆𑀧𑀸𑀬𑀸. 𑀦 𑀓𑁂𑀯𑀮𑀜𑁆𑀘 𑀲𑀸 𑀆𑀦𑁂𑀜𑁆𑀚𑀲𑁆𑀲𑁂𑀯, 𑀉𑀧𑀭𑀺 𑀅𑀭𑀳𑀢𑁆𑀢𑀲𑁆𑀲𑀸𑀧𑀺 𑀲𑀧𑁆𑀧𑀸𑀬𑀸𑀯 𑀉𑀧𑀓𑀸𑀭𑀪𑀽𑀢𑀸𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀢𑀺 𑀇𑀫𑀲𑁆𑀫𑀺𑀁 𑀧𑀞𑀫𑀓𑀆𑀦𑁂𑀜𑁆𑀚𑁂 𑀲𑀫𑀸𑀥𑀺𑀯𑀲𑁂𑀦 𑀑𑀲𑀓𑁆𑀓𑀦𑀸 𑀓𑀣𑀺𑀢𑀸.

𑁬𑁭. 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀻𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀧𑀢𑁆𑀯𑀸 𑀏𑀯𑀁 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺. 𑀅𑀬𑀜𑁆𑀳𑀺 𑀪𑀺𑀓𑁆𑀔𑀼 𑀳𑁂𑀝𑁆𑀞𑀺𑀫𑁂𑀦 𑀪𑀺𑀓𑁆𑀔𑀼𑀦𑀸 𑀧𑀜𑁆𑀜𑀯𑀦𑁆𑀢𑀢𑀭𑁄 𑀢𑀲𑁆𑀲 𑀘 𑀪𑀺𑀓𑁆𑀔𑀼𑀦𑁄 𑀅𑀢𑁆𑀢𑀦𑁄 𑀘𑀸𑀢𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀏𑀓𑀢𑁄 𑀓𑀢𑁆𑀯𑀸 𑀲𑀫𑁆𑀫𑀲𑀢𑀺. 𑀢𑀩𑁆𑀩𑀳𑀼𑀮𑀯𑀺𑀳𑀸𑀭𑀺𑀦𑁄𑀢𑀺 𑀭𑀽𑀧𑀧𑀝𑀺𑀩𑀸𑀳𑀦𑁂𑀦 𑀢𑀫𑁂𑀯 𑀧𑀝𑀺𑀧𑀤𑀁 𑀩𑀳𑀼𑀮𑀁 𑀓𑀢𑁆𑀯𑀸 𑀯𑀺𑀳𑀭𑀦𑁆𑀢𑀲𑁆𑀲. 𑀆𑀦𑁂𑀜𑁆𑀚𑀁 𑀲𑀫𑀸𑀧𑀚𑁆𑀚𑀢𑀻𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀸𑀦𑀸𑀦𑁂𑀜𑁆𑀚𑀁 𑀲𑀫𑀸𑀧𑀚𑁆𑀚𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀬𑀣𑀸 𑀘 𑀇𑀥, 𑀏𑀯𑀁 𑀲𑀩𑁆𑀩𑀢𑁆𑀣 𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀧𑀦 𑀯𑀓𑁆𑀔𑀸𑀫. 𑀇𑀢𑀺 𑀇𑀫𑀲𑁆𑀫𑀺𑀁 𑀤𑀼𑀢𑀺𑀬𑀆𑀦𑁂𑀜𑁆𑀚𑁂 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀑𑀲𑀓𑁆𑀓𑀦𑀸 𑀓𑀣𑀺𑀢𑀸, ‘‘𑀬𑀁𑀓𑀺𑀜𑁆𑀘𑀺 𑀭𑀽𑀧’’𑀦𑁆𑀢𑀺 𑀏𑀯𑀁 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀁 𑀤𑀲𑁆𑀲𑁂𑀦𑁆𑀢𑁂𑀦 𑀓𑀣𑀺𑀢𑀸𑀢𑀺 𑀅𑀢𑁆𑀣𑁄.

𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀻𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀧𑀢𑁆𑀯𑀸 𑀏𑀯𑀁 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺. 𑀅𑀬𑀜𑁆𑀳𑀺 𑀳𑁂𑀝𑁆𑀞𑀸 𑀤𑁆𑀯𑀻𑀳𑀺 𑀪𑀺𑀓𑁆𑀔𑀽𑀳𑀺 𑀧𑀜𑁆𑀜𑀯𑀦𑁆𑀢𑀢𑀭𑁄 𑀢𑁂𑀲𑀜𑁆𑀘 𑀪𑀺𑀓𑁆𑀔𑀽𑀦𑀁 𑀅𑀢𑁆𑀢𑀦𑁄 𑀘𑀸𑀢𑀺 𑀢𑀺𑀡𑁆𑀡𑀫𑁆𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀏𑀓𑀢𑁄 𑀓𑀢𑁆𑀯𑀸 𑀲𑀫𑁆𑀫𑀲𑀢𑀺. 𑀉𑀪𑀬𑀫𑁂𑀢𑀁 𑀅𑀦𑀺𑀘𑁆𑀘𑀦𑁆𑀢𑀺 𑀏𑀢𑁆𑀣 𑀅𑀝𑁆𑀞 𑀏𑀓𑁂𑀓𑀓𑁄𑀝𑁆𑀞𑀸𑀲𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀯𑀲𑁂𑀦 𑀧𑀦 𑀲𑀗𑁆𑀔𑀺𑀧𑀺𑀢𑁆𑀯𑀸 𑀉𑀪𑀬𑀦𑁆𑀢𑀺 𑀯𑀼𑀢𑁆𑀢𑀁. 𑀦𑀸𑀮𑀁 𑀅𑀪𑀺𑀦𑀦𑁆𑀤𑀺𑀢𑀼𑀦𑁆𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀅𑀪𑀺𑀦𑀦𑁆𑀤𑀺𑀢𑀼𑀁 𑀦 𑀬𑀼𑀢𑁆𑀢𑀁. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀩𑁆𑀩𑀳𑀼𑀮𑀯𑀺𑀳𑀸𑀭𑀺𑀦𑁄𑀢𑀺 𑀓𑀸𑀫𑀧𑀝𑀺𑀩𑀸𑀳𑀦𑁂𑀦 𑀘 𑀭𑀽𑀧𑀧𑀝𑀺𑀩𑀸𑀳𑀦𑁂𑀦 𑀘 𑀢𑀫𑁂𑀯 𑀧𑀝𑀺𑀧𑀤𑀁 𑀩𑀳𑀼𑀮𑀁 𑀓𑀢𑁆𑀯𑀸 𑀯𑀺𑀳𑀭𑀦𑁆𑀢𑀲𑁆𑀲. 𑀆𑀦𑁂𑀜𑁆𑀚𑀁 𑀲𑀫𑀸𑀧𑀚𑁆𑀚𑀢𑀻𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀸𑀦𑁂𑀜𑁆𑀚𑀁 𑀲𑀫𑀸𑀧𑀚𑁆𑀚𑀢𑀺. 𑀇𑀫𑀲𑁆𑀫𑀺𑀁 𑀢𑀢𑀺𑀬𑀆𑀦𑁂𑀜𑁆𑀚𑁂 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀑𑀲𑀓𑁆𑀓𑀦𑀸 𑀓𑀣𑀺𑀢𑀸.

𑁬𑁮. 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀻𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀧𑀢𑁆𑀯𑀸 𑀏𑀯𑀁 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺. 𑀅𑀬𑀜𑁆𑀳𑀺 𑀳𑁂𑀝𑁆𑀞𑀸 𑀢𑀻𑀳𑀺 𑀪𑀺𑀓𑁆𑀔𑀽𑀳𑀺 𑀧𑀜𑁆𑀜𑀯𑀦𑁆𑀢𑀢𑀭𑁄 𑀢𑁂𑀲𑀜𑁆𑀘 𑀪𑀺𑀓𑁆𑀔𑀽𑀦𑀁 𑀅𑀢𑁆𑀢𑀦𑁄 𑀘𑀸𑀢𑀺 𑀘𑀢𑀼𑀦𑁆𑀦𑀫𑁆𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀏𑀓𑀢𑁄 𑀓𑀢𑁆𑀯𑀸 𑀲𑀫𑁆𑀫𑀲𑀢𑀺. 𑀬𑀢𑁆𑀣𑁂𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀬𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀧𑀢𑁆𑀯𑀸 𑀏𑀢𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸 𑀲𑀩𑁆𑀩𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀢𑀁 𑀲𑀦𑁆𑀢𑀁 𑀏𑀢𑀁 𑀧𑀡𑀻𑀢𑀦𑁆𑀢𑀺 𑀏𑀢𑀁 𑀅𑀗𑁆𑀕𑀲𑀦𑁆𑀢𑀢𑀸𑀬 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬 𑀘 𑀲𑀦𑁆𑀢𑀁, 𑀅𑀢𑀧𑁆𑀧𑀓𑀝𑁆𑀞𑁂𑀦 𑀧𑀡𑀻𑀢𑀁. 𑀢𑀩𑁆𑀩𑀳𑀼𑀮𑀯𑀺𑀳𑀸𑀭𑀺𑀦𑁄𑀢𑀺 𑀢𑀸𑀲𑀁 𑀲𑀜𑁆𑀜𑀸𑀦𑀁 𑀧𑀝𑀺𑀩𑀸𑀳𑀦𑁂𑀦 𑀢𑀫𑁂𑀯 𑀧𑀝𑀺𑀧𑀤𑀁 𑀩𑀳𑀼𑀮𑀁 𑀓𑀢𑁆𑀯𑀸 𑀯𑀺𑀳𑀭𑀦𑁆𑀢𑀲𑁆𑀲. 𑀇𑀫𑀲𑁆𑀫𑀺𑀁 𑀧𑀞𑀫𑀸𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀲𑀫𑀸𑀥𑀺𑀯𑀲𑁂𑀦 𑀑𑀲𑀓𑁆𑀓𑀦𑀸 𑀓𑀣𑀺𑀢𑀸.

𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀻𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀫𑁂𑀯 𑀧𑀢𑁆𑀯𑀸 𑀏𑀯𑀁 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺. 𑀅𑀬𑀜𑁆𑀳𑀺 𑀳𑁂𑀝𑁆𑀞𑀸 𑀘𑀢𑀽𑀳𑀺 𑀪𑀺𑀓𑁆𑀔𑀽𑀳𑀺 𑀧𑀜𑁆𑀜𑀯𑀦𑁆𑀢𑀢𑀭𑁄 𑀢𑁂𑀲𑀜𑁆𑀘 𑀪𑀺𑀓𑁆𑀔𑀽𑀦𑀁 𑀅𑀢𑁆𑀢𑀦𑁄 𑀘𑀸𑀢𑀺 𑀧𑀜𑁆𑀘𑀦𑁆𑀦𑀫𑁆𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀏𑀓𑀢𑁄 𑀓𑀢𑁆𑀯𑀸 𑀲𑀫𑁆𑀫𑀲𑀢𑀺. 𑀅𑀢𑁆𑀢𑁂𑀦 𑀯𑀸 𑀅𑀢𑁆𑀢𑀦𑀺𑀬𑁂𑀦 𑀯𑀸𑀢𑀺 𑀅𑀳𑀁 𑀫𑀫𑀸𑀢𑀺 𑀕𑀳𑁂𑀢𑀩𑁆𑀩𑁂𑀦 𑀲𑀼𑀜𑁆𑀜𑀁 𑀢𑀼𑀘𑁆𑀙𑀁 𑀭𑀺𑀢𑁆𑀢𑀁. 𑀏𑀯𑀫𑁂𑀢𑁆𑀣 𑀤𑁆𑀯𑀺𑀓𑁄𑀝𑀺𑀓𑀸 𑀲𑀼𑀜𑁆𑀜𑀢𑀸 𑀤𑀲𑁆𑀲𑀺𑀢𑀸. 𑀢𑀩𑁆𑀩𑀳𑀼𑀮𑀯𑀺𑀳𑀸𑀭𑀺𑀦𑁄𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑀝𑀺𑀧𑀤𑀜𑁆𑀘 𑀇𑀫𑀜𑁆𑀘 𑀲𑀼𑀜𑁆𑀜𑀢𑀧𑀝𑀺𑀧𑀤𑀁 𑀩𑀳𑀼𑀮𑀁 𑀓𑀢𑁆𑀯𑀸 𑀯𑀺𑀳𑀭𑀦𑁆𑀢𑀲𑁆𑀲. 𑀇𑀫𑀲𑁆𑀫𑀺𑀁 𑀤𑀼𑀢𑀺𑀬𑀸𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀑𑀲𑀓𑁆𑀓𑀦𑀸 𑀓𑀣𑀺𑀢𑀸.

𑁭𑁦. 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀻𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀫𑁂𑀯 𑀧𑀢𑁆𑀯𑀸 𑀏𑀯𑀁 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺. 𑀅𑀬𑀜𑁆𑀳𑀺 𑀳𑁂𑀝𑁆𑀞𑀸 𑀧𑀜𑁆𑀘𑀳𑀺 𑀪𑀺𑀓𑁆𑀔𑀽𑀳𑀺 𑀧𑀜𑁆𑀜𑀯𑀦𑁆𑀢𑀢𑀭𑁄 𑀢𑁂𑀲𑀜𑁆𑀘 𑀪𑀺𑀓𑁆𑀔𑀽𑀦𑀁 𑀅𑀢𑁆𑀢𑀦𑁄 𑀘𑀸𑀢𑀺 𑀙𑀦𑁆𑀦𑀫𑁆𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀏𑀓𑀢𑁄 𑀓𑀢𑁆𑀯𑀸 𑀲𑀫𑁆𑀫𑀲𑀢𑀺. 𑀦𑀸𑀳𑀁 𑀓𑁆𑀯𑀘𑀦𑀺 𑀓𑀲𑁆𑀲𑀘𑀺 𑀓𑀺𑀜𑁆𑀘𑀦𑀢𑀲𑁆𑀫𑀺𑀁, 𑀦 𑀘 𑀫𑀫 𑀓𑁆𑀯𑀘𑀦𑀺 𑀓𑀺𑀲𑁆𑀫𑀺𑀜𑁆𑀘𑀺 𑀓𑀺𑀜𑁆𑀘𑀦𑀁 𑀦𑀢𑁆𑀣𑀻𑀢𑀺 𑀏𑀢𑁆𑀣 𑀧𑀦 𑀘𑀢𑀼𑀓𑁄𑀝𑀺𑀓𑀸 𑀲𑀼𑀜𑁆𑀜𑀢𑀸 𑀓𑀣𑀺𑀢𑀸. 𑀓𑀣𑀁? 𑀅𑀬𑀜𑁆𑀳𑀺 𑀦𑀸𑀳𑀁 𑀓𑁆𑀯𑀘𑀦𑀻𑀢𑀺 𑀓𑁆𑀯𑀘𑀺 𑀅𑀢𑁆𑀢𑀸𑀦𑀁 𑀦 𑀧𑀲𑁆𑀲𑀢𑀺, 𑀓𑀲𑁆𑀲𑀘𑀺 𑀓𑀺𑀜𑁆𑀘𑀦𑀢𑀲𑁆𑀫𑀺𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀸𑀦𑀁 𑀓𑀲𑁆𑀲𑀘𑀺 𑀧𑀭𑀲𑁆𑀲 𑀓𑀺𑀜𑁆𑀘𑀦𑀪𑀸𑀯𑁂 𑀉𑀧𑀦𑁂𑀢𑀩𑁆𑀩𑀁 𑀦 𑀧𑀲𑁆𑀲𑀢𑀺, 𑀅𑀢𑁆𑀢𑀦𑁄 𑀪𑀸𑀢𑀺𑀝𑁆𑀞𑀸𑀦𑁂 𑀪𑀸𑀢𑀭𑀁 𑀲𑀳𑀸𑀬𑀝𑁆𑀞𑀸𑀦𑁂 𑀲𑀳𑀸𑀬𑀁 𑀧𑀭𑀺𑀓𑁆𑀔𑀸𑀭𑀝𑁆𑀞𑀸𑀦𑁂 𑀯𑀸 𑀧𑀭𑀺𑀓𑁆𑀔𑀸𑀭𑀁 𑀫𑀜𑁆𑀜𑀺𑀢𑁆𑀯𑀸 𑀉𑀧𑀕𑀦𑁆𑀢𑁆𑀯𑀸 𑀉𑀧𑀦𑁂𑀢𑀩𑁆𑀩𑀁 𑀦 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀦 𑀘 𑀫𑀫 𑀓𑁆𑀯𑀘𑀦𑀻𑀢𑀺 𑀏𑀢𑁆𑀣 𑀫𑀫 𑁋 𑀲𑀤𑁆𑀤𑀁 𑀢𑀸𑀯 𑀞𑀧𑁂𑀢𑁆𑀯𑀸 𑀦 𑀘 𑀓𑁆𑀯𑀘𑀦𑀺 𑀧𑀭𑀲𑁆𑀲 𑀘 𑀅𑀢𑁆𑀢𑀸𑀦𑀁 𑀓𑁆𑀯𑀘𑀺 𑀦 𑀧𑀲𑁆𑀲𑀢𑀻𑀢𑀺 𑀅𑀬𑀫𑀢𑁆𑀣𑁄. 𑀇𑀤𑀸𑀦𑀺 𑀫𑀫 𑁋 𑀲𑀤𑁆𑀤𑀁 𑀆𑀳𑀭𑀺𑀢𑁆𑀯𑀸 𑀫𑀫 𑀓𑀺𑀲𑁆𑀫𑀺𑀜𑁆𑀘𑀺 𑀓𑀺𑀜𑁆𑀘𑀦𑀁 𑀦𑀢𑁆𑀣𑀻𑀢𑀺 𑀲𑁄 𑀧𑀭𑀲𑁆𑀲 𑀅𑀢𑁆𑀢𑀸 𑀫𑀫 𑀓𑀺𑀲𑁆𑀫𑀺𑀜𑁆𑀘𑀺 𑀓𑀺𑀜𑁆𑀘𑀦𑀪𑀸𑀯𑁂 𑀅𑀢𑁆𑀣𑀻𑀢𑀺 𑀦 𑀧𑀲𑁆𑀲𑀢𑀺. 𑀅𑀢𑁆𑀢𑀦𑁄 𑀪𑀸𑀢𑀺𑀝𑁆𑀞𑀸𑀦𑁂 𑀪𑀸𑀢𑀭𑀁 𑀲𑀳𑀸𑀬𑀝𑁆𑀞𑀸𑀦𑁂 𑀲𑀳𑀸𑀬𑀁 𑀧𑀭𑀺𑀓𑁆𑀔𑀸𑀭𑀝𑁆𑀞𑀸𑀦𑁂 𑀯𑀸 𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀞𑀸𑀦𑁂 𑀧𑀭𑀲𑁆𑀲 𑀅𑀢𑁆𑀢𑀸𑀦𑀁 𑀇𑀫𑀺𑀦𑀸 𑀓𑀺𑀜𑁆𑀘𑀦𑀪𑀸𑀯𑁂𑀦 𑀉𑀧𑀦𑁂𑀢𑀩𑁆𑀩𑀁 𑀦 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀫𑀬𑀁 𑀬𑀲𑁆𑀫𑀸 𑀦𑁂𑀯 𑀓𑀢𑁆𑀣𑀘𑀺 𑀅𑀢𑁆𑀢𑀸𑀦𑀁 𑀧𑀲𑁆𑀲𑀢𑀺, 𑀦 𑀢𑀁 𑀧𑀭𑀲𑁆𑀲 𑀓𑀺𑀜𑁆𑀘𑀦𑀪𑀸𑀯𑁂 𑀉𑀧𑀦𑁂𑀢𑀩𑁆𑀩𑀁 𑀧𑀲𑁆𑀲𑀢𑀺, 𑀦 𑀧𑀭𑀲𑁆𑀲 𑀅𑀢𑁆𑀢𑀸𑀦𑀁 𑀧𑀲𑁆𑀲𑀢𑀺, 𑀦 𑀧𑀭𑀲𑁆𑀲 𑀅𑀢𑁆𑀢𑀸𑀦𑀁 𑀅𑀢𑁆𑀢𑀦𑁄 𑀓𑀺𑀜𑁆𑀘𑀦𑀪𑀸𑀯𑁂 𑀉𑀧𑀦𑁂𑀢𑀩𑁆𑀩𑀁 𑀧𑀲𑁆𑀲𑀢𑀺, 𑀢𑀲𑁆𑀫𑀸 𑀅𑀬𑀁 𑀲𑀼𑀜𑁆𑀜𑀢𑀸 𑀘𑀢𑀼𑀓𑁄𑀝𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀩𑁆𑀩𑀳𑀼𑀮𑀯𑀺𑀳𑀸𑀭𑀺𑀦𑁄𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀝𑀺𑀧𑀤𑀁 𑀇𑀫𑀁 𑀘𑀢𑀼𑀓𑁄𑀝𑀺𑀲𑀼𑀜𑁆𑀜𑀢𑀜𑁆𑀘 𑀩𑀳𑀼𑀮𑀁 𑀓𑀢𑁆𑀯𑀸 𑀯𑀺𑀳𑀭𑀦𑁆𑀢𑀲𑁆𑀲. 𑀇𑀫𑀲𑁆𑀫𑀺𑀁 𑀢𑀢𑀺𑀬𑀸𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂𑀧𑀺 𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑁂𑀯 𑀑𑀲𑀓𑁆𑀓𑀦𑀸 𑀓𑀣𑀺𑀢𑀸.

𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀻𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀧𑀢𑁆𑀯𑀸 𑀏𑀯𑀁 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺. 𑀅𑀬𑀜𑁆𑀳𑀺 𑀳𑁂𑀝𑁆𑀞𑀸 𑀙𑀳𑀺 𑀪𑀺𑀓𑁆𑀔𑀽𑀳𑀺 𑀧𑀜𑁆𑀜𑀯𑀦𑁆𑀢𑀢𑀭𑁄 𑀢𑁂𑀲𑀜𑁆𑀘 𑀪𑀺𑀓𑁆𑀔𑀽𑀦𑀁 𑀅𑀢𑁆𑀢𑀦𑁄 𑀘𑀸𑀢𑀺 𑀲𑀢𑁆𑀢𑀦𑁆𑀦𑀫𑁆𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀏𑀓𑀢𑁄 𑀓𑀢𑁆𑀯𑀸 𑀲𑀫𑁆𑀫𑀲𑀢𑀺. 𑀬𑀢𑁆𑀣𑁂𑀢𑀸 𑀅𑀧𑀭𑀺𑀲𑁂𑀲𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀬𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀧𑀢𑁆𑀯𑀸 𑀏𑀢𑁆𑀣 𑀏𑀢𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸 𑀲𑀩𑁆𑀩𑀲𑀜𑁆𑀜𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀢𑀩𑁆𑀩𑀳𑀼𑀮𑀯𑀺𑀳𑀸𑀭𑀺𑀦𑁄𑀢𑀺 𑀢𑀸𑀲𑀁 𑀲𑀜𑁆𑀜𑀸𑀦𑀁 𑀧𑀝𑀺𑀩𑀸𑀳𑀦𑁂𑀦 𑀢𑀫𑁂𑀯 𑀧𑀝𑀺𑀧𑀤𑀁 𑀩𑀳𑀼𑀮𑀁 𑀓𑀢𑁆𑀯𑀸 𑀯𑀺𑀳𑀭𑀦𑁆𑀢𑀲𑁆𑀲. 𑀇𑀫𑀲𑁆𑀫𑀺𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀲𑀫𑀸𑀥𑀺𑀯𑀲𑁂𑀦 𑀑𑀲𑀓𑁆𑀓𑀦𑀸 𑀓𑀣𑀺𑀢𑀸.

𑁭𑁧. 𑀦𑁄 𑀘𑀲𑁆𑀲 𑀦𑁄 𑀘 𑀫𑁂 𑀲𑀺𑀬𑀸𑀢𑀺 𑀲𑀘𑁂 𑀫𑀬𑁆𑀳𑀁 𑀧𑀼𑀩𑁆𑀩𑁂 𑀧𑀜𑁆𑀘𑀯𑀺𑀥𑀁 𑀓𑀫𑁆𑀫𑀯𑀝𑁆𑀝𑀁 𑀦 𑀆𑀬𑀽𑀳𑀺𑀢𑀁 𑀅𑀲𑁆𑀲, 𑀬𑀁 𑀫𑁂 𑀇𑀤𑀁 𑀏𑀢𑀭𑀳𑀺 𑀏𑀯𑀁 𑀧𑀜𑁆𑀘𑀯𑀺𑀥𑀁 𑀯𑀺𑀧𑀸𑀓𑀯𑀝𑁆𑀝𑀁 𑀏𑀢𑀁 𑀫𑁂 𑀦 𑀲𑀺𑀬𑀸 𑀦𑀧𑁆𑀧𑀯𑀢𑁆𑀢𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀲𑀘𑁂 𑀏𑀢𑀭𑀳𑀺 𑀧𑀜𑁆𑀘𑀯𑀺𑀥𑀁 𑀓𑀫𑁆𑀫𑀯𑀝𑁆𑀝𑀁 𑀆𑀬𑀽𑀳𑀺𑀢𑀁 𑀦 𑀪𑀯𑀺𑀲𑁆𑀲𑀢𑀺. 𑀦 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀢𑀲𑁆𑀫𑀺𑀁 𑀅𑀲𑀢𑀺 𑀅𑀦𑀸𑀕𑀢𑁂 𑀫𑁂 𑀧𑀜𑁆𑀘𑀯𑀺𑀥𑀁 𑀯𑀺𑀧𑀸𑀓𑀯𑀝𑁆𑀝𑀁 𑀦 𑀪𑀯𑀺𑀲𑁆𑀲𑀢𑀺. 𑀬𑀤𑀢𑁆𑀣𑀺 𑀬𑀁 𑀪𑀽𑀢𑀁 𑀢𑀁 𑀧𑀚𑀳𑀸𑀫𑀻𑀢𑀺 𑀬𑀁 𑀅𑀢𑁆𑀣𑀺 𑀬𑀁 𑀪𑀽𑀢𑀁 𑀏𑀢𑀭𑀳𑀺 𑀔𑀦𑁆𑀥𑀧𑀜𑁆𑀘𑀓𑀁, 𑀢𑀁 𑀧𑀚𑀳𑀸𑀫𑀺. 𑀏𑀯𑀁 𑀉𑀧𑁂𑀓𑁆𑀔𑀁 𑀧𑀝𑀺𑀮𑀪𑀢𑀻𑀢𑀺 𑀲𑁄 𑀪𑀺𑀓𑁆𑀔𑀼 𑀏𑀯𑀁 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀁 𑀮𑀪𑀢𑀻𑀢𑀺 𑀅𑀢𑁆𑀣𑁄.

𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬 𑀦𑀼 𑀔𑁄 𑀲𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀦 𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬𑀸𑀢𑀺 𑀓𑀺𑀁 𑀧𑀼𑀘𑁆𑀙𑀸𑀫𑀻𑀢𑀺 𑀧𑀼𑀘𑁆𑀙𑀢𑀺, 𑀢𑀢𑀺𑀬𑀚𑁆𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀞𑀺𑀢𑀲𑁆𑀲 𑀅𑀭𑀳𑀢𑁆𑀢𑀫𑁆𑀧𑀺 𑀑𑀲𑀓𑁆𑀓𑀦𑀸𑀧𑀺 𑀧𑀝𑀺𑀧𑀤𑀸𑀧𑀺 𑀧𑀝𑀺𑀲𑀦𑁆𑀥𑀺𑀧𑀺 𑀓𑀣𑀺𑀢𑀸, 𑀢𑀣𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀤𑀻𑀦𑀺 𑀧𑀸𑀤𑀓𑀸𑀦𑀺 𑀓𑀢𑁆𑀯𑀸 𑀞𑀺𑀢𑀸𑀦𑀁, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀞𑀺𑀢𑀲𑁆𑀲 𑀦 𑀓𑀺𑀜𑁆𑀘𑀺 𑀓𑀣𑀺𑀢𑀁, 𑀢𑀁 𑀧𑀼𑀘𑁆𑀙𑀸𑀫𑀻𑀢𑀺 𑀧𑀼𑀘𑁆𑀙𑀢𑀺. 𑀅𑀧𑁂𑀢𑁆𑀣𑀸𑀢𑀺 𑀅𑀧𑀺 𑀏𑀢𑁆𑀣. 𑀲𑁄 𑀢𑀁 𑀉𑀧𑁂𑀓𑁆𑀔𑀁 𑀅𑀪𑀺𑀦𑀦𑁆𑀤𑀢𑀻𑀢𑀺 𑀲𑁄 𑀢𑀁 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀁 𑀢𑀡𑁆𑀳𑀸𑀤𑀺𑀝𑁆𑀞𑀺𑀅𑀪𑀺𑀦𑀦𑁆𑀤𑀦𑀸𑀳𑀺 𑀅𑀪𑀺𑀦𑀦𑁆𑀤𑀢𑀺. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀦𑁆𑀦𑀺𑀲𑁆𑀲𑀺𑀢𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀜𑁆𑀜𑀸𑀡𑀁 𑀯𑀺𑀧𑀲𑁆𑀲𑀦𑀸𑀦𑀺𑀲𑁆𑀲𑀺𑀢𑀁 𑀳𑁄𑀢𑀺. 𑀢𑀤𑀼𑀧𑀸𑀤𑀸𑀦𑀦𑁆𑀢𑀺 𑀬𑀁 𑀦𑀺𑀓𑀦𑁆𑀢𑀺𑀯𑀺𑀜𑁆𑀜𑀸𑀡𑀁, 𑀢𑀁 𑀢𑀲𑁆𑀲 𑀉𑀧𑀸𑀤𑀸𑀦𑀁 𑀦𑀸𑀫 𑀕𑀳𑀡𑀁 𑀦𑀸𑀫 𑀳𑁄𑀢𑀺. 𑀲𑀉𑀧𑀸𑀤𑀸𑀦𑁄𑀢𑀺 𑀲𑀕𑀳𑀡𑁄. 𑀦 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀬 𑀲𑀸𑀮𑀬𑁄 𑀪𑀺𑀓𑁆𑀔𑀼 𑀫𑀫 𑀲𑀸𑀲𑀦𑁂 𑀦 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀬𑁄 𑀧𑀦 𑀯𑀺𑀳𑀸𑀭𑀧𑀭𑀺𑀯𑁂𑀡𑀉𑀧𑀝𑁆𑀞𑀸𑀓𑀸𑀤𑀻𑀲𑀼 𑀲𑀸𑀮𑀬𑁄, 𑀢𑀲𑁆𑀫𑀺𑀁 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀳𑀁 𑀧𑀦𑀸𑀢𑀺? 𑀓𑀢𑁆𑀣 𑀧𑀦? 𑀉𑀧𑀸𑀤𑀺𑀬𑀫𑀸𑀦𑁄 𑀉𑀧𑀸𑀤𑀺𑀬𑀢𑀻𑀢𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀫𑀸𑀦𑁄 𑀕𑀡𑁆𑀳𑀸𑀢𑀺. 𑀉𑀧𑀸𑀤𑀸𑀦𑀲𑁂𑀝𑁆𑀞𑀁 𑀓𑀺𑀭 𑀲𑁄, 𑀪𑀦𑁆𑀢𑁂𑀢𑀺, 𑀪𑀦𑁆𑀢𑁂, 𑀲𑁄 𑀓𑀺𑀭 𑀪𑀺𑀓𑁆𑀔𑀼 𑀕𑀳𑁂𑀢𑀩𑁆𑀩𑀝𑁆𑀞𑀸𑀦𑀁 𑀲𑁂𑀝𑁆𑀞𑀁 𑀉𑀢𑁆𑀢𑀫𑀁 𑀪𑀯𑀁 𑀉𑀧𑀸𑀤𑀺𑀬𑀢𑀺, 𑀲𑁂𑀝𑁆𑀞𑀪𑀯𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀸𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀲𑀦𑁆𑀥𑀺 𑀓𑀣𑀺𑀢𑀸. 𑀇𑀤𑀸𑀦𑀺𑀲𑁆𑀲 𑀅𑀭𑀳𑀢𑁆𑀢𑀁 𑀓𑀣𑁂𑀢𑀼𑀁 𑀇𑀥𑀸𑀦𑀦𑁆𑀤𑀸𑀢𑀺𑀆𑀤𑀺𑀫𑀸𑀳.

𑁭𑁩. 𑀦𑀺𑀲𑁆𑀲𑀸𑀬 𑀦𑀺𑀲𑁆𑀲𑀸𑀬𑀸𑀢𑀺 𑀢𑀁 𑀢𑀁 𑀲𑀫𑀸𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬. 𑀑𑀖𑀲𑁆𑀲 𑀦𑀺𑀢𑁆𑀣𑀭𑀡𑀸 𑀅𑀓𑁆𑀔𑀸𑀢𑀸𑀢𑀺 𑀑𑀖𑀢𑀭𑀡𑀁 𑀓𑀣𑀺𑀢𑀁, 𑀢𑀢𑀺𑀬𑀚𑁆𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀞𑀺𑀢𑀪𑀺𑀓𑁆𑀔𑀼𑀦𑁄 𑀑𑀖𑀦𑀺𑀢𑁆𑀣𑀭𑀡𑀸 𑀓𑀣𑀺𑀢𑀸…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀞𑀺𑀢𑀪𑀺𑀓𑁆𑀔𑀼𑀦𑁄 𑀑𑀖𑀦𑀺𑀢𑁆𑀣𑀭𑀡𑀸 𑀓𑀣𑀺𑀢𑀸𑀢𑀺 𑀯𑀤𑀢𑀺.

𑀓𑀢𑀫𑁄 𑀧𑀦, 𑀪𑀦𑁆𑀢𑁂, 𑀅𑀭𑀺𑀬𑁄 𑀯𑀺𑀫𑁄𑀓𑁆𑀔𑁄𑀢𑀺 𑀇𑀥 𑀓𑀺𑀁 𑀧𑀼𑀘𑁆𑀙𑀢𑀺? 𑀲𑀫𑀸𑀧𑀢𑁆𑀢𑀺𑀁 𑀢𑀸𑀯 𑀧𑀤𑀝𑁆𑀞𑀸𑀦𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀦𑁆𑀢𑁄 𑀪𑀺𑀓𑁆𑀔𑀼 𑀦𑀸𑀯𑀁 𑀯𑀸 𑀉𑀴𑀼𑀫𑁆𑀧𑀸𑀤𑀻𑀦𑀺 𑀯𑀸 𑀦𑀺𑀲𑁆𑀲𑀸𑀬 𑀫𑀳𑁄𑀖𑀁 𑀢𑀭𑀺𑀢𑁆𑀯𑀸 𑀧𑀸𑀭𑀁 𑀕𑀘𑁆𑀙𑀦𑁆𑀢𑁄 𑀯𑀺𑀬 𑀦 𑀓𑀺𑀮𑀫𑀢𑀺. 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀧𑀦 𑀧𑀓𑀺𑀡𑁆𑀡𑀓𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀦𑁆𑀢𑁄 𑀩𑀸𑀳𑀼𑀩𑀮𑁂𑀦 𑀲𑁄𑀢𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀭𑀁 𑀕𑀘𑁆𑀙𑀦𑁆𑀢𑁄 𑀯𑀺𑀬 𑀓𑀺𑀮𑀫𑀢𑀺. 𑀇𑀢𑀺 𑀇𑀫𑀲𑁆𑀲 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲 𑀅𑀭𑀳𑀢𑁆𑀢𑀁 𑀧𑀼𑀘𑁆𑀙𑀸𑀫𑀻𑀢𑀺 𑀧𑀼𑀘𑁆𑀙𑀢𑀺. 𑀅𑀭𑀺𑀬𑀲𑀸𑀯𑀓𑁄𑀢𑀺 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄 𑀅𑀭𑀺𑀬𑀲𑀸𑀯𑀓𑁄. 𑀅𑀬𑀜𑁆𑀳𑀺 𑀳𑁂𑀝𑁆𑀞𑀸 𑀅𑀝𑁆𑀞𑀳𑀺 𑀪𑀺𑀓𑁆𑀔𑀽𑀳𑀺 𑀧𑀜𑁆𑀜𑀯𑀦𑁆𑀢𑀢𑀭𑁄 𑀢𑁂𑀲𑀜𑁆𑀘 𑀪𑀺𑀓𑁆𑀔𑀽𑀦𑀁 𑀅𑀢𑁆𑀢𑀦𑁄 𑀘𑀸𑀢𑀺 𑀦𑀯𑀦𑁆𑀦𑀫𑁆𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀏𑀓𑀢𑁄 𑀓𑀢𑁆𑀯𑀸 𑀲𑀫𑁆𑀫𑀲𑀢𑀺. 𑀏𑀲 𑀲𑀓𑁆𑀓𑀸𑀬𑁄 𑀬𑀸𑀯𑀢𑀸 𑀲𑀓𑁆𑀓𑀸𑀬𑁄𑀢𑀺 𑀬𑀢𑁆𑀢𑀓𑁄 𑀢𑁂𑀪𑀽𑀫𑀓𑀯𑀝𑁆𑀝𑀲𑀗𑁆𑀔𑀸𑀢𑁄 𑀲𑀓𑁆𑀓𑀸𑀬𑁄 𑀦𑀸𑀫 𑀅𑀢𑁆𑀣𑀺, 𑀲𑀩𑁆𑀩𑁄𑀧𑀺 𑀲𑁄 𑀏𑀲 𑀲𑀓𑁆𑀓𑀸𑀬𑁄, 𑀦 𑀇𑀢𑁄 𑀧𑀭𑀁 𑀲𑀓𑁆𑀓𑀸𑀬𑁄 𑀅𑀢𑁆𑀣𑀻𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺.

𑀏𑀢𑀁 𑀅𑀫𑀢𑀁 𑀬𑀤𑀺𑀤𑀁 𑀅𑀦𑀼𑀧𑀸𑀤𑀸 𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄𑀢𑀺 𑀬𑁄 𑀧𑀦𑁂𑀲 𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑀸𑀤𑀸𑀯𑀺𑀫𑁄𑀓𑁆𑀔𑁄 𑀦𑀸𑀫, 𑀏𑀢𑀁 𑀅𑀫𑀢𑀁 𑀏𑀢𑀁 𑀲𑀦𑁆𑀢𑀁 𑀏𑀢𑀁 𑀧𑀡𑀻𑀢𑀦𑁆𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺. 𑀅𑀜𑁆𑀜𑀢𑁆𑀣 𑀘 ‘‘𑀅𑀦𑀼𑀧𑀸𑀤𑀸 𑀘𑀺𑀢𑁆𑀢𑀲𑁆𑀲 𑀯𑀺𑀫𑁄𑀓𑁆𑀔𑁄’’𑀢𑀺 𑀦𑀺𑀩𑁆𑀩𑀸𑀦𑀁 𑀯𑀼𑀘𑁆𑀘𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲 𑀅𑀭𑀳𑀢𑁆𑀢𑀁 𑀓𑀣𑀺𑀢𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀓𑁂𑀯𑀮𑀁 𑀧𑀦 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀑𑀲𑀓𑁆𑀓𑀦𑀸 𑀓𑀣𑀺𑀢𑀸, 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀧𑀝𑀺𑀲𑀦𑁆𑀥𑀺, 𑀦𑀯𑀲𑀼 𑀞𑀸𑀦𑁂𑀲𑀼 𑀅𑀭𑀳𑀢𑁆𑀢𑀁 𑀓𑀣𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀣𑀁? 𑀢𑀢𑀺𑀬𑀁 𑀛𑀸𑀦𑀁 𑀢𑀸𑀯 𑀧𑀸𑀤𑀓𑀁 𑀓𑀢𑁆𑀯𑀸 𑀞𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀑𑀲𑀓𑁆𑀓𑀦𑀸 𑀓𑀣𑀺𑀢𑀸, 𑀧𑀝𑀺𑀲𑀦𑁆𑀥𑀺 𑀓𑀣𑀺𑀢𑀸, 𑀅𑀭𑀳𑀢𑁆𑀢𑀁 𑀓𑀣𑀺𑀢𑀁, 𑀢𑀣𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁, 𑀢𑀣𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀧𑀦 𑀧𑀤𑀝𑁆𑀞𑀸𑀦𑀁 𑀓𑀢𑁆𑀯𑀸 𑀞𑀺𑀢𑀸𑀦𑀁 𑀢𑀺𑀡𑁆𑀡𑀁 𑀪𑀺𑀓𑁆𑀔𑀽𑀦𑀁 𑀑𑀲𑀓𑁆𑀓𑀦𑀸 𑀓𑀣𑀺𑀢𑀸, 𑀧𑀝𑀺𑀲𑀦𑁆𑀥𑀺 𑀓𑀣𑀺𑀢𑀸, 𑀅𑀭𑀳𑀢𑁆𑀢𑀁 𑀓𑀣𑀺𑀢𑀁. 𑀢𑀣𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀞𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀞𑀺𑀢𑀲𑁆𑀲 𑀧𑀦 𑀑𑀲𑀓𑁆𑀓𑀦𑀸 𑀦𑀢𑁆𑀣𑀺, 𑀧𑀝𑀺𑀲𑀦𑁆𑀥𑀺 𑀧𑀦 𑀅𑀭𑀳𑀢𑁆𑀢𑀜𑁆𑀘 𑀓𑀣𑀺𑀢𑀁. 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲 𑀅𑀭𑀳𑀢𑁆𑀢𑀫𑁂𑀯 𑀓𑀣𑀺𑀢𑀦𑁆𑀢𑀺. 𑀏𑀯𑀁 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀑𑀲𑀓𑁆𑀓𑀦𑀸 𑀓𑀣𑀺𑀢𑀸, 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀧𑀝𑀺𑀲𑀦𑁆𑀥𑀺, 𑀦𑀯𑀲𑀼 𑀞𑀸𑀦𑁂𑀲𑀼 𑀅𑀭𑀳𑀢𑁆𑀢𑀁 𑀓𑀣𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀜𑁆𑀘 𑀧𑀦 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀑𑀲𑀓𑁆𑀓𑀦𑀁 𑀅𑀝𑁆𑀞𑀲𑀼 𑀧𑀝𑀺𑀲𑀦𑁆𑀥𑀺𑀁 𑀦𑀯𑀲𑀼 𑀅𑀭𑀳𑀢𑁆𑀢𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀓𑀣𑁂𑀦𑁆𑀢𑁂𑀦 𑀇𑀫𑀁 𑀆𑀦𑁂𑀜𑁆𑀚𑀲𑀧𑁆𑀧𑀸𑀬𑀲𑀼𑀢𑁆𑀢𑀁 𑀲𑀼𑀓𑀣𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀆𑀦𑁂𑀜𑁆𑀚𑀲𑀧𑁆𑀧𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀕𑀡𑀓𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁪. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀕𑀡𑀓𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀁. 𑀢𑀢𑁆𑀣 𑀬𑀸𑀯 𑀧𑀘𑁆𑀙𑀺𑀫𑀲𑁄𑀧𑀸𑀦𑀓𑀴𑁂𑀯𑀭𑀸𑀢𑀺 𑀬𑀸𑀯 𑀧𑀞𑀫𑀲𑁄𑀧𑀸𑀦𑀨𑀮𑀓𑀸 𑀏𑀓𑀤𑀺𑀯𑀲𑁂𑀦𑁂𑀯 𑀲𑀢𑁆𑀢𑀪𑀽𑀫𑀺𑀓𑁄 𑀧𑀸𑀲𑀸𑀤𑁄 𑀦 𑀲𑀓𑁆𑀓𑀸 𑀓𑀸𑀢𑀼𑀁, 𑀯𑀢𑁆𑀣𑀼𑀁 𑀲𑁄𑀥𑁂𑀢𑁆𑀯𑀸 𑀣𑀫𑁆𑀪𑀼𑀲𑁆𑀲𑀸𑀧𑀦𑀢𑁄 𑀧𑀝𑁆𑀞𑀸𑀬 𑀧𑀦 𑀬𑀸𑀯 𑀘𑀺𑀢𑁆𑀢𑀓𑀫𑁆𑀫𑀓𑀭𑀡𑀸 𑀅𑀦𑀼𑀧𑀼𑀩𑁆𑀩𑀓𑀺𑀭𑀺𑀬𑀸 𑀘𑁂𑀢𑁆𑀣 𑀧𑀜𑁆𑀜𑀸𑀬𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀬𑀤𑀺𑀤𑀁 𑀅𑀚𑁆𑀛𑁂𑀦𑁂𑀢𑀺 𑀢𑀬𑁄𑀧𑀺 𑀯𑁂𑀤𑀸 𑀦 𑀲𑀓𑁆𑀓𑀸 𑀏𑀓𑀤𑀺𑀯𑀲𑁂𑀦𑁂𑀯 𑀅𑀥𑀻𑀬𑀺𑀢𑀼𑀁, 𑀏𑀢𑁂𑀲𑀁 𑀅𑀚𑁆𑀛𑁂𑀦𑁂𑀧𑀺 𑀧𑀦 𑀅𑀦𑀼𑀧𑀼𑀩𑁆𑀩𑀓𑀺𑀭𑀺𑀬𑀸𑀯 𑀧𑀜𑁆𑀜𑀸𑀬𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀲𑁆𑀲𑀢𑁆𑀣𑁂𑀢𑀺 𑀆𑀯𑀼𑀥𑀯𑀺𑀚𑁆𑀚𑀸𑀬𑀧𑀺 𑀏𑀓𑀤𑀺𑀯𑀲𑁂𑀦𑁂𑀯 𑀯𑀸𑀮𑀯𑁂𑀥𑀺 𑀦𑀸𑀫 𑀦 𑀲𑀓𑁆𑀓𑀸 𑀓𑀸𑀢𑀼𑀁, 𑀞𑀸𑀦𑀲𑀫𑁆𑀧𑀸𑀤𑀦𑀫𑀼𑀝𑁆𑀞𑀺𑀓𑀭𑀡𑀸𑀤𑀻𑀳𑀺 𑀧𑀦 𑀏𑀢𑁆𑀣𑀸𑀧𑀺 𑀅𑀦𑀼𑀧𑀼𑀩𑁆𑀩𑀓𑀺𑀭𑀺𑀬𑀸 𑀧𑀜𑁆𑀜𑀸𑀬𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀗𑁆𑀔𑀸𑀦𑁂𑀢𑀺 𑀕𑀡𑀦𑀸𑀬. 𑀢𑀢𑁆𑀣 𑀅𑀦𑀼𑀧𑀼𑀩𑁆𑀩𑀓𑀺𑀭𑀺𑀬𑀁 𑀅𑀢𑁆𑀢𑀦𑀸𑀯 𑀤𑀲𑁆𑀲𑁂𑀦𑁆𑀢𑁄 𑀏𑀯𑀁 𑀕𑀡𑀸𑀧𑁂𑀫𑀸𑀢𑀺𑀆𑀤𑀺𑀫𑀸𑀳.

𑁭𑁫. 𑀲𑁂𑀬𑁆𑀬𑀣𑀸𑀧𑀺 𑀩𑁆𑀭𑀸𑀳𑁆𑀫𑀡𑀸𑀢𑀺 𑀇𑀥 𑀪𑀕𑀯𑀸 𑀬𑀲𑁆𑀫𑀸 𑀩𑀸𑀳𑀺𑀭𑀲𑀫𑀬𑁂 𑀬𑀣𑀸 𑀬𑀣𑀸 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀦𑁆𑀢𑀺, 𑀢𑀣𑀸 𑀢𑀣𑀸 𑀓𑁂𑀭𑀸𑀝𑀺𑀓𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀲𑀸𑀲𑀦𑀁 𑀩𑀸𑀳𑀺𑀭𑀲𑀫𑀬𑁂𑀦 𑀅𑀦𑀼𑀧𑀫𑁂𑀢𑁆𑀯𑀸 𑀪𑀤𑁆𑀭𑀅𑀲𑁆𑀲𑀸𑀚𑀸𑀦𑀻𑀬𑁂𑀦 𑀉𑀧𑀫𑁂𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀻𑀢𑀺𑀆𑀤𑀺𑀫𑀸𑀳. 𑀪𑀤𑁆𑀭𑁄 𑀳𑀺 𑀅𑀲𑁆𑀲𑀸𑀚𑀸𑀦𑀻𑀬𑁄 𑀬𑀲𑁆𑀫𑀺𑀁 𑀓𑀸𑀭𑀡𑁂 𑀤𑀫𑀺𑀢𑁄 𑀳𑁄𑀢𑀺, 𑀢𑀁 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦𑀸𑀢𑀺𑀓𑁆𑀓𑀫𑀢𑀺. 𑀏𑀯𑀫𑁂𑀯 𑀲𑀸𑀲𑀦𑁂 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀓𑀼𑀮𑀧𑀼𑀢𑁆𑀢𑁄 𑀲𑀻𑀮𑀯𑁂𑀮𑀁 𑀦𑀸𑀢𑀺𑀓𑁆𑀓𑀫𑀢𑀺. 𑀫𑀼𑀔𑀸𑀥𑀸𑀦𑁂𑀢𑀺 𑀫𑀼𑀔𑀝𑁆𑀞𑀧𑀦𑁂.

𑁭𑁬. 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀬 𑀘𑀸𑀢𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀳𑀺 𑀲𑀫𑀗𑁆𑀕𑀺𑀪𑀸𑀯𑀢𑁆𑀣𑀸𑀬. 𑀤𑁆𑀯𑁂 𑀳𑀺 𑀔𑀻𑀡𑀸𑀲𑀯𑀸 𑀲𑀢𑀢𑀯𑀺𑀳𑀸𑀭𑀻 𑀘 𑀦𑁄𑀲𑀢𑀢𑀯𑀺𑀳𑀸𑀭𑀻 𑀘. 𑀢𑀢𑁆𑀣 𑀲𑀢𑀢𑀯𑀺𑀳𑀸𑀭𑀻 𑀬𑀁𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀢𑁆𑀯𑀸𑀧𑀺 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀦𑁄 𑀲𑀢𑀢𑀯𑀺𑀳𑀸𑀭𑀻 𑀧𑀦 𑀅𑀧𑁆𑀧𑀫𑀢𑁆𑀢𑀓𑁂𑀧𑀺 𑀓𑀺𑀘𑁆𑀘𑁂 𑀓𑀺𑀘𑁆𑀘𑀧𑁆𑀧𑀲𑀼𑀢𑁄 𑀳𑀼𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀔𑀻𑀡𑀸𑀲𑀯𑀢𑁆𑀣𑁂𑀭𑁄 𑀔𑀻𑀡𑀸𑀲𑀯𑀲𑀸𑀫𑀡𑁂𑀭𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑀯𑀸𑀲𑀁 𑀕𑀢𑁄, 𑀢𑀢𑁆𑀣 𑀫𑀳𑀸𑀣𑁂𑀭𑀲𑁆𑀲 𑀲𑁂𑀦𑀸𑀲𑀦𑀁 𑀧𑀢𑁆𑀢𑀁, 𑀲𑀸𑀫𑀡𑁂𑀭𑀲𑁆𑀲 𑀦 𑀧𑀸𑀧𑀼𑀡𑀸𑀢𑀺, 𑀢𑀁 𑀯𑀺𑀢𑀓𑁆𑀓𑁂𑀦𑁆𑀢𑁄 𑀣𑁂𑀭𑁄 𑀏𑀓𑀤𑀺𑀯𑀲𑀫𑁆𑀧𑀺 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀲𑀸𑀫𑀡𑁂𑀭𑁄 𑀧𑀦 𑀢𑁂𑀫𑀸𑀲𑀁 𑀨𑀮𑀲𑀫𑀸𑀧𑀢𑁆𑀢𑀺𑀭𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 ‘‘𑀲𑀧𑁆𑀧𑀸𑀬𑁄, 𑀪𑀦𑁆𑀢𑁂, 𑀅𑀭𑀜𑁆𑀜𑀯𑀸𑀲𑁄 𑀚𑀸𑀢𑁄’’𑀢𑀺 𑀣𑁂𑀭𑀁 𑀧𑀼𑀘𑁆𑀙𑀺. 𑀣𑁂𑀭𑁄 ‘‘𑀦 𑀚𑀸𑀢𑁄, 𑀆𑀯𑀼𑀲𑁄’’𑀢𑀺 𑀆𑀳. 𑀇𑀢𑀺 𑀬𑁄 𑀏𑀯𑀭𑀽𑀧𑁄 𑀔𑀻𑀡𑀸𑀲𑀯𑁄, 𑀲𑁄 𑀇𑀫𑁂 𑀥𑀫𑁆𑀫𑁂 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀆𑀯𑀚𑁆𑀚𑀺𑀢𑁆𑀯𑀸𑀯 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀬 𑀘𑀸’’𑀢𑀺 𑀆𑀳.

𑁭𑁮. 𑀬𑁂𑀫𑁂, 𑀪𑁄 𑀕𑁄𑀢𑀫𑀸𑀢𑀺 𑀢𑀣𑀸𑀕𑀢𑁂 𑀓𑀺𑀭 𑀓𑀣𑀬𑀦𑁆𑀢𑁂𑀯 𑀩𑁆𑀭𑀸𑀳𑁆𑀫𑀡𑀲𑁆𑀲 ‘‘𑀇𑀫𑁂 𑀧𑀼𑀕𑁆𑀕𑀮𑀸 𑀦 𑀆𑀭𑀸𑀥𑁂𑀦𑁆𑀢𑀺, 𑀇𑀫𑁂 𑀆𑀭𑀸𑀥𑁂𑀦𑁆𑀢𑀻’’𑀢𑀺 𑀦𑀬𑁄 𑀉𑀤𑀧𑀸𑀤𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀁 𑀯𑀢𑁆𑀢𑀼𑀫𑀸𑀭𑀤𑁆𑀥𑁄.

𑀧𑀭𑀫𑀚𑁆𑀚𑀥𑀫𑁆𑀫𑁂𑀲𑀽𑀢𑀺 𑀅𑀚𑁆𑀚𑀥𑀫𑁆𑀫𑀸 𑀦𑀸𑀫 𑀙𑀲𑀢𑁆𑀣𑀸𑀭𑀥𑀫𑁆𑀫𑀸, 𑀢𑁂𑀲𑀼 𑀕𑁄𑀢𑀫𑀯𑀸𑀤𑁄𑀯, 𑀧𑀭𑀫𑁄 𑀉𑀢𑁆𑀢𑀫𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀕𑀡𑀓𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀕𑁄𑀧𑀓𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁯. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀕𑁄𑀧𑀓𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀁. 𑀢𑀢𑁆𑀣 𑀅𑀘𑀺𑀭𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀻𑀢𑀺 𑀪𑀕𑀯𑀢𑀺 𑀅𑀘𑀺𑀭𑀧𑀭𑀺𑀦𑀺𑀩𑁆𑀩𑀼𑀢𑁂, 𑀥𑀸𑀢𑀼𑀪𑀸𑀚𑀦𑀻𑀬𑀁 𑀓𑀢𑁆𑀯𑀸 𑀥𑀫𑁆𑀫𑀲𑀗𑁆𑀕𑀻𑀢𑀺𑀁 𑀓𑀸𑀢𑀼𑀁 𑀭𑀸𑀚𑀕𑀳𑀁 𑀆𑀕𑀢𑀓𑀸𑀮𑁂. 𑀭𑀜𑁆𑀜𑁄 𑀧𑀚𑁆𑀚𑁄𑀢𑀲𑁆𑀲 𑀆𑀲𑀗𑁆𑀓𑀫𑀸𑀦𑁄𑀢𑀺 𑀘𑀡𑁆𑀟𑀧𑀚𑁆𑀚𑁄𑀢𑁄 𑀦𑀸𑀫𑁂𑀲 𑀭𑀸𑀚𑀸 𑀩𑀺𑀫𑁆𑀩𑀺𑀲𑀸𑀭𑀫𑀳𑀸𑀭𑀸𑀚𑀲𑁆𑀲 𑀲𑀳𑀸𑀬𑁄 𑀅𑀳𑁄𑀲𑀺, 𑀚𑀻𑀯𑀓𑀁 𑀧𑁂𑀲𑁂𑀢𑁆𑀯𑀸 𑀪𑁂𑀲𑀚𑁆𑀚𑀓𑀸𑀭𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀦 𑀤𑀴𑁆𑀳𑀫𑀺𑀢𑁆𑀢𑁄𑀯 𑀚𑀸𑀢𑁄, 𑀲𑁄 ‘‘𑀅𑀚𑀸𑀢𑀲𑀢𑁆𑀢𑀼𑀦𑀸 𑀤𑁂𑀯𑀤𑀢𑁆𑀢𑀲𑁆𑀲 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀧𑀺𑀢𑀸 𑀖𑀸𑀢𑀺𑀢𑁄’’𑀢𑀺 𑀲𑀼𑀢𑁆𑀯𑀸 ‘‘𑀫𑀫 𑀧𑀺𑀬𑀫𑀺𑀢𑁆𑀢𑀁 𑀖𑀸𑀢𑁂𑀢𑁆𑀯𑀸 𑀏𑀲 𑀭𑀚𑁆𑀚𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀫𑀜𑁆𑀜𑀢𑀺, 𑀫𑀬𑁆𑀳𑀁 𑀲𑀳𑀸𑀬𑀲𑁆𑀲 𑀲𑀳𑀸𑀬𑀸𑀦𑀁 𑀅𑀢𑁆𑀣𑀺𑀓𑀪𑀸𑀯𑀁 𑀚𑀸𑀦𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀲𑀢𑀺 𑀯𑀸𑀘𑀁 𑀅𑀪𑀸𑀲𑀺. 𑀢𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀆𑀲𑀗𑁆𑀓𑀸 𑀉𑀧𑁆𑀧𑀦𑁆𑀦𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀭𑀜𑁆𑀜𑁄 𑀧𑀚𑁆𑀚𑁄𑀢𑀲𑁆𑀲 𑀆𑀲𑀗𑁆𑀓𑀫𑀸𑀦𑁄’’𑀢𑀺. 𑀓𑀫𑁆𑀫𑀦𑁆𑀢𑁄𑀢𑀺 𑀩𑀳𑀺𑀦𑀕𑀭𑁂 𑀦𑀕𑀭𑀧𑀝𑀺𑀲𑀗𑁆𑀔𑀸𑀭𑀸𑀧𑀦𑀢𑁆𑀣𑀸𑀬 𑀓𑀫𑁆𑀫𑀦𑁆𑀢𑀝𑁆𑀞𑀸𑀦𑀁.

𑀉𑀧𑀲𑀗𑁆𑀓𑀫𑀻𑀢𑀺 𑀫𑀬𑀁 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀻𑀢𑀺𑀁 𑀓𑀸𑀭𑁂𑀲𑁆𑀲𑀸𑀫𑀸𑀢𑀺 𑀯𑀺𑀘𑀭𑀸𑀫, 𑀅𑀬𑀜𑁆𑀘 𑀫𑀳𑁂𑀲𑀓𑁆𑀔𑁄 𑀭𑀸𑀚𑀯𑀮𑁆𑀮𑀪𑁄 𑀲𑀗𑁆𑀕𑀳𑁂 𑀓𑀢𑁂 𑀯𑁂𑀴𑀼𑀯𑀦𑀲𑁆𑀲 𑀆𑀭𑀓𑁆𑀔𑀁 𑀓𑀭𑁂𑀬𑁆𑀬𑀸𑀢𑀺 𑀫𑀜𑁆𑀜𑀫𑀸𑀦𑁄 𑀉𑀧𑀲𑀗𑁆𑀓𑀫𑀺. 𑀢𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀢𑁂𑀳𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀥𑀫𑁆𑀫𑁂𑀳𑀺. 𑀲𑀩𑁆𑀩𑁂𑀦 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀲𑀩𑁆𑀩𑀁. 𑀲𑀩𑁆𑀩𑀣𑀸 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑀓𑁄𑀝𑁆𑀞𑀸𑀲𑁂𑀳𑀺 𑀲𑀩𑁆𑀩𑀁. 𑀓𑀺𑀁 𑀧𑀼𑀘𑁆𑀙𑀸𑀫𑀻𑀢𑀺 𑀧𑀼𑀘𑁆𑀙𑀢𑀺? 𑀙 𑀳𑀺 𑀲𑀢𑁆𑀣𑀸𑀭𑁄 𑀧𑀞𑀫𑀢𑀭𑀁 𑀅𑀧𑁆𑀧𑀜𑁆𑀜𑀸𑀢𑀓𑀼𑀮𑁂𑀳𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀸, 𑀢𑁂 𑀢𑀣𑀸𑀕𑀢𑁂 𑀥𑀭𑀫𑀸𑀦𑁂𑀬𑁂𑀯 𑀓𑀸𑀮𑀁𑀓𑀢𑀸, 𑀲𑀸𑀯𑀓𑀸𑀧𑀺 𑀦𑁂𑀲𑀁 𑀅𑀧𑁆𑀧𑀜𑁆𑀜𑀸𑀢𑀓𑀼𑀮𑁂𑀳𑁂𑀯 𑀧𑀩𑁆𑀩𑀚𑀺𑀢𑀸. 𑀢𑁂 𑀢𑁂𑀲𑀁 𑀅𑀘𑁆𑀘𑀬𑁂𑀦 𑀫𑀳𑀸𑀯𑀺𑀯𑀸𑀤𑀁 𑀅𑀓𑀁𑀲𑀼. 𑀲𑀫𑀡𑁄 𑀧𑀦 𑀕𑁄𑀢𑀫𑁄 𑀫𑀳𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑁄, 𑀢𑀲𑁆𑀲 𑀅𑀘𑁆𑀘𑀬𑁂𑀦 𑀲𑀸𑀯𑀓𑀸𑀦𑀁 𑀫𑀳𑀸𑀯𑀺𑀯𑀸𑀤𑁄 𑀪𑀯𑀺𑀲𑁆𑀲𑀢𑀻𑀢𑀺 𑀅𑀬𑀁 𑀓𑀣𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀧𑀢𑁆𑀣𑀭𑀫𑀸𑀦𑀸 𑀉𑀤𑀧𑀸𑀤𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀘 𑀥𑀭𑀦𑁆𑀢𑁂 𑀪𑀺𑀓𑁆𑀔𑀽𑀦𑀁 𑀯𑀺𑀯𑀸𑀤𑁄 𑀦𑀸𑀳𑁄𑀲𑀺. 𑀬𑁄𑀧𑀺 𑀅𑀳𑁄𑀲𑀺, 𑀲𑁄𑀧𑀺 𑀢𑀢𑁆𑀣𑁂𑀯 𑀯𑀽𑀧𑀲𑀫𑀺𑀢𑁄. 𑀧𑀭𑀺𑀦𑀺𑀩𑁆𑀩𑀼𑀢𑀓𑀸𑀮𑁂 𑀧𑀦𑀲𑁆𑀲 𑁋 ‘‘𑀅𑀝𑁆𑀞𑀲𑀝𑁆𑀞𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀼𑀩𑁆𑀩𑁂𑀥𑀁 𑀲𑀺𑀦𑁂𑀭𑀼𑀁 𑀅𑀧𑀯𑀸𑀳𑀺𑀢𑀼𑀁 𑀲𑀫𑀢𑁆𑀣𑀲𑁆𑀲 𑀯𑀸𑀢𑀲𑁆𑀲 𑀧𑀼𑀭𑀢𑁄 𑀧𑀼𑀭𑀸𑀡𑀧𑀡𑁆𑀡𑀁 𑀓𑀺𑀁 𑀞𑀲𑁆𑀲𑀢𑀺, 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀢𑁆𑀢𑀲𑁆𑀲 𑀲𑀢𑁆𑀣𑀼 𑀅𑀮𑀚𑁆𑀚𑀫𑀸𑀦𑁄 𑀫𑀘𑁆𑀘𑀼𑀭𑀸𑀚𑀸 𑀓𑀲𑁆𑀲 𑀮𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀫𑀳𑀸𑀲𑀁𑀯𑁂𑀕𑀁 𑀚𑀦𑁂𑀢𑁆𑀯𑀸 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀪𑀺𑀓𑁆𑀔𑀽 𑀲𑀫𑀕𑁆𑀕𑀸 𑀚𑀸𑀢𑀸 𑀅𑀢𑀺𑀯𑀺𑀬 𑀉𑀧𑀲𑀦𑁆𑀢𑀼𑀧𑀲𑀦𑁆𑀢𑀸, 𑀓𑀺𑀁 𑀦𑀼 𑀔𑁄 𑀏𑀢𑀦𑁆𑀢𑀺 𑀇𑀤𑀁 𑀧𑀼𑀘𑁆𑀙𑀸𑀫𑀻𑀢𑀺 𑀧𑀼𑀘𑁆𑀙𑀢𑀺. 𑀅𑀦𑀼𑀲𑀜𑁆𑀜𑀸𑀬𑀫𑀸𑀦𑁄𑀢𑀺 𑀅𑀦𑀼𑀲𑀜𑁆𑀚𑀸𑀬𑀫𑀸𑀦𑁄, 𑀓𑀢𑀸𑀓𑀢𑀁 𑀚𑀦𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀦𑀼𑀯𑀺𑀘𑀭𑀫𑀸𑀦𑁄 𑀯𑀸.

𑁮𑁦. 𑀅𑀢𑁆𑀣𑀺 𑀦𑀼 𑀔𑁄𑀢𑀺 𑀅𑀬𑀫𑁆𑀧𑀺 𑀳𑁂𑀝𑁆𑀞𑀺𑀫𑀧𑀼𑀘𑁆𑀙𑀫𑁂𑀯 𑀧𑀼𑀘𑁆𑀙𑀢𑀺. 𑀅𑀧𑁆𑀧𑀝𑀺𑀲𑀭𑀡𑁂𑀢𑀺 𑀅𑀧𑁆𑀧𑀝𑀺𑀲𑀭𑀡𑁂 𑀥𑀫𑁆𑀫𑀯𑀺𑀦𑀬𑁂. 𑀓𑁄 𑀳𑁂𑀢𑀼 𑀲𑀸𑀫𑀕𑁆𑀕𑀺𑀬𑀸𑀢𑀺 𑀢𑀼𑀫𑁆𑀳𑀸𑀓𑀁 𑀲𑀫𑀕𑁆𑀕𑀪𑀸𑀯𑀲𑁆𑀲 𑀓𑁄 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄. 𑀥𑀫𑁆𑀫𑀧𑁆𑀧𑀝𑀺𑀲𑀭𑀡𑀸𑀢𑀺 𑀥𑀫𑁆𑀫𑁄 𑀅𑀫𑁆𑀳𑀸𑀓𑀁 𑀧𑀝𑀺𑀲𑀭𑀡𑀁, 𑀥𑀫𑁆𑀫𑁄 𑀅𑀯𑀲𑁆𑀲𑀬𑁄𑀢𑀺 𑀤𑀻𑀧𑁂𑀢𑀺.

𑁮𑁧. 𑀧𑀯𑀢𑁆𑀢𑀢𑀻𑀢𑀺 𑀧𑀕𑀼𑀡𑀁 𑀳𑀼𑀢𑁆𑀯𑀸 𑀆𑀕𑀘𑁆𑀙𑀢𑀺. 𑀆𑀧𑀢𑁆𑀢𑀺 𑀳𑁄𑀢𑀺 𑀯𑀻𑀢𑀺𑀓𑁆𑀓𑀫𑁄𑀢𑀺 𑀉𑀪𑀬𑀫𑁂𑀢𑀁 𑀩𑀼𑀤𑁆𑀥𑀲𑁆𑀲 𑀆𑀡𑀸𑀢𑀺𑀓𑁆𑀓𑀫𑀦𑀫𑁂𑀯. 𑀬𑀣𑀸𑀥𑀫𑁆𑀫𑀁 𑀬𑀣𑀸𑀦𑀼𑀲𑀺𑀝𑁆𑀞𑀁 𑀓𑀸𑀭𑁂𑀫𑀸𑀢𑀺 𑀬𑀣𑀸 𑀥𑀫𑁆𑀫𑁄 𑀘 𑀅𑀦𑀼𑀲𑀺𑀝𑁆𑀞𑀺 𑀘 𑀞𑀺𑀢𑀸, 𑀏𑀯𑀁 𑀓𑀸𑀭𑁂𑀫𑀸𑀢𑀺 𑀅𑀢𑁆𑀣𑁄.

𑀦 𑀓𑀺𑀭 𑀦𑁄 𑀪𑀯𑀦𑁆𑀢𑁄 𑀓𑀸𑀭𑁂𑀦𑁆𑀢𑀺 𑀥𑀫𑁆𑀫𑁄 𑀦𑁄 𑀓𑀸𑀭𑁂𑀢𑀻𑀢𑀺 𑀧𑀤𑀤𑁆𑀯𑀬𑁂𑀧𑀺 𑀦𑁄 𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂 𑀦 𑀓𑀺𑀭 𑀪𑀯𑀦𑁆𑀢𑁄 𑀓𑀸𑀭𑁂𑀦𑁆𑀢𑀺, 𑀥𑀫𑁆𑀫𑁄𑀯 𑀓𑀸𑀭𑁂𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑁮𑁩. 𑀢𑀕𑁆𑀖𑀸𑀢𑀺 𑀏𑀓𑀁𑀲𑁂 𑀦𑀺𑀧𑀸𑀢𑁄. 𑀓𑀳𑀁 𑀧𑀦 𑀪𑀯𑀁 𑀆𑀦𑀦𑁆𑀤𑁄𑀢𑀺 𑀓𑀺𑀁 𑀣𑁂𑀭𑀲𑁆𑀲 𑀯𑁂𑀴𑀼𑀯𑀦𑁂 𑀯𑀲𑀦𑀪𑀸𑀯𑀁 𑀦 𑀚𑀸𑀦𑀸𑀢𑀻𑀢𑀺? 𑀚𑀸𑀦𑀸𑀢𑀺. 𑀯𑁂𑀴𑀼𑀯𑀦𑀲𑁆𑀲 𑀧𑀦 𑀅𑀦𑁂𑀦 𑀆𑀭𑀓𑁆𑀔𑀸 𑀤𑀺𑀦𑁆𑀦𑀸, 𑀢𑀲𑁆𑀫𑀸 𑀅𑀢𑁆𑀢𑀸𑀦𑀁 𑀉𑀓𑁆𑀓𑀁𑀲𑀸𑀧𑁂𑀢𑀼𑀓𑀸𑀫𑁄 𑀧𑀼𑀘𑁆𑀙𑀢𑀺. 𑀓𑀲𑁆𑀫𑀸 𑀧𑀦 𑀢𑁂𑀦 𑀢𑀢𑁆𑀣 𑀆𑀭𑀓𑁆𑀔𑀸 𑀤𑀺𑀦𑁆𑀦𑀸? 𑀲𑁄 𑀓𑀺𑀭 𑀏𑀓𑀤𑀺𑀯𑀲𑀁 𑀫𑀳𑀸𑀓𑀘𑁆𑀘𑀸𑀬𑀦𑀢𑁆𑀣𑁂𑀭𑀁 𑀕𑀺𑀚𑁆𑀛𑀓𑀽𑀝𑀸 𑀑𑀢𑀭𑀦𑁆𑀢𑀁 𑀤𑀺𑀲𑁆𑀯𑀸 𑁋 ‘‘𑀫𑀓𑁆𑀓𑀝𑁄 𑀯𑀺𑀬 𑀏𑀲𑁄’’𑀢𑀺 𑀆𑀳. 𑀪𑀕𑀯𑀸 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑁋 ‘‘𑀲𑀘𑁂 𑀔𑀫𑀸𑀧𑁂𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀦𑁄 𑀘𑁂 𑀔𑀫𑀸𑀧𑁂𑀢𑀺, 𑀇𑀫𑀲𑁆𑀫𑀺𑀁 𑀯𑁂𑀴𑀼𑀯𑀦𑁂 𑀕𑁄𑀦𑀗𑁆𑀕𑀮𑀫𑀓𑁆𑀓𑀝𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀳. 𑀲𑁄 𑀢𑀁 𑀓𑀣𑀁 𑀲𑀼𑀢𑁆𑀯𑀸 𑁋 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀓𑀣𑀸𑀬 𑀤𑁆𑀯𑁂𑀥𑀸𑀪𑀸𑀯𑁄 𑀦𑀸𑀫 𑀦𑀢𑁆𑀣𑀺, 𑀧𑀘𑁆𑀙𑀸 𑀫𑁂 𑀫𑀓𑁆𑀓𑀝𑀪𑀽𑀢𑀓𑀸𑀮𑁂 𑀕𑁄𑀘𑀭𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑁂𑀴𑀼𑀯𑀦𑁂 𑀦𑀸𑀦𑀸𑀯𑀺𑀥𑁂 𑀭𑀼𑀓𑁆𑀔𑁂 𑀭𑁄𑀧𑁂𑀢𑁆𑀯𑀸 𑀆𑀭𑀓𑁆𑀔𑀁 𑀅𑀤𑀸𑀲𑀺. 𑀅𑀧𑀭𑀪𑀸𑀕𑁂 𑀓𑀸𑀮𑀁 𑀓𑀢𑁆𑀯𑀸 𑀫𑀓𑁆𑀓𑀝𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. ‘‘𑀯𑀲𑁆𑀲𑀓𑀸𑀭𑀸’’𑀢𑀺 𑀯𑀼𑀢𑁆𑀢𑁂 𑀆𑀕𑀦𑁆𑀢𑁆𑀯𑀸 𑀲𑀫𑀻𑀧𑁂 𑀅𑀝𑁆𑀞𑀸𑀲𑀺. 𑀢𑀕𑁆𑀖𑀸𑀢𑀺 𑀲𑀩𑁆𑀩𑀯𑀸𑀭𑁂𑀲𑀼 𑀏𑀓𑀁𑀲𑀯𑀘𑀦𑁂𑀬𑁂𑀯 𑀦𑀺𑀧𑀸𑀢𑁄. 𑀢𑀕𑁆𑀖, 𑀪𑁄 𑀆𑀦𑀦𑁆𑀤𑀸𑀢𑀺 𑀏𑀯𑀁 𑀣𑁂𑀭𑁂𑀦 𑀧𑀭𑀺𑀲𑀫𑀚𑁆𑀛𑁂 𑀅𑀢𑁆𑀢𑀦𑁄 𑀉𑀓𑁆𑀓𑀁𑀲𑀺𑀢𑀪𑀸𑀯𑀁 𑀜𑀢𑁆𑀯𑀸 𑀅𑀳𑀫𑁆𑀧𑀺 𑀣𑁂𑀭𑀁 𑀉𑀓𑁆𑀓𑀁𑀲𑀺𑀲𑁆𑀲𑀸𑀫𑀻𑀢𑀺 𑀏𑀯𑀫𑀸𑀳.

𑁮𑁪. 𑀦 𑀘 𑀔𑁄, 𑀩𑁆𑀭𑀸𑀳𑁆𑀫𑀡𑀸𑀢𑀺 𑀣𑁂𑀭𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀯𑀡𑁆𑀡𑀺𑀢𑀚𑁆𑀛𑀸𑀦𑀫𑁆𑀧𑀺 𑀅𑀢𑁆𑀣𑀺, 𑀅𑀯𑀡𑁆𑀡𑀺𑀢𑀚𑁆𑀛𑀸𑀦𑀫𑁆𑀧𑀺 𑀅𑀢𑁆𑀣𑀺, 𑀅𑀬𑀁 𑀧𑀦 𑀩𑁆𑀭𑀸𑀳𑁆𑀫𑀡𑁄 𑀲𑀩𑁆𑀩𑀫𑁂𑀯 𑀯𑀡𑁆𑀡𑁂𑀢𑀻𑀢𑀺 𑀧𑀜𑁆𑀳𑀁 𑀯𑀺𑀲𑀁𑀯𑀸𑀤𑁂𑀢𑀺, 𑀦 𑀔𑁄 𑀧𑀦 𑀲𑀓𑁆𑀓𑀸 𑀇𑀫𑀲𑁆𑀲 𑀫𑀼𑀔𑀁 𑀉𑀮𑁆𑀮𑁄𑀓𑁂𑀢𑀼𑀁 𑀦 𑀧𑀺𑀡𑁆𑀟𑀧𑀸𑀢𑀁 𑀭𑀓𑁆𑀔𑀺𑀢𑀼𑀁, 𑀧𑀜𑁆𑀳𑀁 𑀉𑀚𑀼𑀁 𑀓𑀢𑁆𑀯𑀸 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀇𑀤𑀁 𑀯𑀢𑁆𑀢𑀼𑀁 𑀆𑀭𑀤𑁆𑀥𑀁. 𑀅𑀦𑁆𑀢𑀭𑀁 𑀓𑀭𑀺𑀢𑁆𑀯𑀸𑀢𑀺 𑀅𑀩𑁆𑀪𑀦𑁆𑀢𑀭𑀁 𑀓𑀭𑀺𑀢𑁆𑀯𑀸. 𑀏𑀯𑀭𑀽𑀧𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀲𑁄 𑀪𑀕𑀯𑀸 𑀛𑀸𑀦𑀁 𑀯𑀡𑁆𑀡𑁂𑀲𑀻𑀢𑀺 𑀇𑀥 𑀲𑀩𑁆𑀩𑀲𑀗𑁆𑀕𑀸𑀳𑀓𑀚𑁆𑀛𑀸𑀦𑀁 𑀦𑀸𑀫 𑀓𑀣𑀺𑀢𑀁.

𑀬𑀁 𑀦𑁄 𑀫𑀬𑀦𑁆𑀢𑀺 𑀅𑀬𑀁 𑀓𑀺𑀭 𑀩𑁆𑀭𑀸𑀳𑁆𑀫𑀡𑁄 𑀯𑀲𑁆𑀲𑀓𑀸𑀭𑀩𑁆𑀭𑀸𑀳𑁆𑀫𑀡𑀁 𑀉𑀲𑀽𑀬𑀢𑀺, 𑀢𑁂𑀦 𑀧𑀼𑀘𑁆𑀙𑀺𑀢𑀧𑀜𑁆𑀳𑀲𑁆𑀲 𑀅𑀓𑀣𑀦𑀁 𑀧𑀘𑁆𑀘𑀸𑀲𑀻𑀲𑀫𑀸𑀦𑁄 𑀓𑀣𑀺𑀢𑀪𑀸𑀯𑀁 𑀜𑀢𑁆𑀯𑀸 ‘‘𑀯𑀲𑁆𑀲𑀓𑀸𑀭𑁂𑀦 𑀧𑀼𑀘𑁆𑀙𑀺𑀢𑀁 𑀧𑀜𑁆𑀳𑀁 𑀧𑀼𑀦𑀧𑁆𑀧𑀼𑀦𑀁 𑀢𑀲𑁆𑀲 𑀦𑀸𑀫𑀁 𑀕𑀡𑁆𑀳𑀦𑁆𑀢𑁄 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀲𑀺, 𑀫𑀬𑀸 𑀧𑀼𑀘𑁆𑀙𑀺𑀢𑀧𑀜𑁆𑀳𑀁 𑀧𑀦 𑀬𑀝𑁆𑀞𑀺𑀓𑁄𑀝𑀺𑀬𑀸 𑀉𑀧𑁆𑀧𑀻𑀴𑁂𑀦𑁆𑀢𑁄 𑀯𑀺𑀬 𑀏𑀓𑀤𑁂𑀲𑀫𑁂𑀯 𑀓𑀣𑁂𑀲𑀻’’𑀢𑀺 𑀅𑀦𑀢𑁆𑀢𑀫𑀦𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀕𑁄𑀧𑀓𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀫𑀳𑀸𑀧𑀼𑀡𑁆𑀡𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁫. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀧𑀼𑀡𑁆𑀡𑀫𑀲𑀼𑀢𑁆𑀢𑀁. 𑀢𑀢𑁆𑀣 𑀢𑀤𑀳𑀽𑀢𑀺 𑀢𑀲𑁆𑀫𑀺𑀁 𑀅𑀳𑀼, 𑀢𑀲𑁆𑀫𑀺𑀁 𑀤𑀺𑀯𑀲𑁂𑀢𑀺 𑀅𑀢𑁆𑀣𑁄. 𑀉𑀧𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀉𑀧𑁄𑀲𑀣𑁄. 𑀉𑀧𑀯𑀲𑀦𑁆𑀢𑀻𑀢𑀺 𑀲𑀻𑀮𑁂𑀦 𑀯𑀸 𑀅𑀦𑀲𑀦𑁂𑀦 𑀯𑀸 𑀉𑀧𑁂𑀢𑀸 𑀳𑀼𑀢𑁆𑀯𑀸 𑀯𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀼𑀤𑁆𑀥𑀸𑀭𑁄 𑁋 ‘‘𑀆𑀬𑀸𑀫, 𑀆𑀯𑀼𑀲𑁄, 𑀓𑀧𑁆𑀧𑀺𑀦, 𑀉𑀧𑁄𑀲𑀣𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺𑀆𑀤𑀻𑀲𑀼 𑀳𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀉𑀧𑁄𑀲𑀣𑁄. ‘‘𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁄 𑀔𑁄 𑀯𑀺𑀲𑀸𑀔𑁂 𑀉𑀧𑁄𑀲𑀣𑁄 𑀉𑀧𑀯𑀼𑀢𑁆𑀣𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁫𑁩) 𑀲𑀻𑀮𑀁. ‘‘𑀲𑀼𑀤𑁆𑀥𑀲𑁆𑀲 𑀯𑁂 𑀲𑀤𑀸 𑀨𑀕𑁆𑀕𑀼, 𑀲𑀼𑀤𑁆𑀥𑀲𑁆𑀲𑀼𑀧𑁄𑀲𑀣𑁄 𑀲𑀤𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁭𑁯) 𑀉𑀧𑀯𑀸𑀲𑁄. ‘‘𑀉𑀧𑁄𑀲𑀣𑁄 𑀦𑀸𑀫 𑀦𑀸𑀕𑀭𑀸𑀚𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁪𑁬) 𑀧𑀜𑁆𑀜𑀢𑁆𑀢𑀺. ‘‘𑀦, 𑀪𑀺𑀓𑁆𑀔𑀯𑁂, 𑀢𑀤𑀳𑀼𑀧𑁄𑀲𑀣𑁂 𑀲𑀪𑀺𑀓𑁆𑀔𑀼𑀓𑀸 𑀆𑀯𑀸𑀲𑀸’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁧𑁮𑁧) 𑀉𑀧𑀯𑀲𑀺𑀢𑀩𑁆𑀩𑀤𑀺𑀯𑀲𑁄. 𑀇𑀥𑀸𑀧𑀺 𑀲𑁄𑀬𑁂𑀯 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀧𑀦𑁂𑀲 𑀅𑀝𑁆𑀞𑀫𑀻𑀘𑀸𑀢𑀼𑀤𑁆𑀤𑀲𑀻𑀧𑀦𑁆𑀦𑀭𑀲𑀻𑀪𑁂𑀤𑁂𑀦 𑀢𑀺𑀯𑀺𑀥𑁄. 𑀢𑀲𑁆𑀫𑀸 𑀲𑁂𑀲𑀤𑁆𑀯𑀬𑀦𑀺𑀯𑀸𑀭𑀡𑀢𑁆𑀣𑀁 𑀧𑀦𑁆𑀦𑀭𑀲𑁂𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀧𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀉𑀧𑁄𑀲𑀣𑁄’’𑀢𑀺. 𑀫𑀸𑀲𑀧𑀼𑀡𑁆𑀡𑀢𑀸𑀬 𑀧𑀼𑀡𑁆𑀡𑀸 𑀲𑀁𑀧𑀼𑀡𑁆𑀡𑀸𑀢𑀺 𑀧𑀼𑀡𑁆𑀡𑀸. 𑀫𑀸-𑀇𑀢𑀺 𑀘𑀦𑁆𑀤𑁄 𑀯𑀼𑀘𑁆𑀘𑀢𑀺, 𑀲𑁄 𑀏𑀢𑁆𑀣 𑀧𑀼𑀡𑁆𑀡𑁄𑀢𑀺 𑀧𑀼𑀡𑁆𑀡𑀫𑀸. 𑀏𑀯𑀁 𑀧𑀼𑀡𑁆𑀡𑀸𑀬 𑀧𑀼𑀡𑁆𑀡𑀫𑀸𑀬𑀸𑀢𑀺 𑀇𑀫𑀲𑁆𑀫𑀺𑀁 𑀧𑀤𑀤𑁆𑀯𑀬𑁂 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀤𑁂𑀲𑀦𑁆𑀢𑀺 𑀓𑀸𑀭𑀡𑀁. 𑀢𑁂𑀦 𑀳𑀺 𑀢𑁆𑀯𑀁 𑀪𑀺𑀓𑁆𑀔𑀼 𑀲𑀓𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀼𑀘𑁆𑀙𑀸𑀢𑀺 𑀓𑀲𑁆𑀫𑀸 𑀪𑀕𑀯𑀸 𑀞𑀺𑀢𑀲𑁆𑀲 𑀅𑀓𑀣𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀲𑀻𑀢𑀺. 𑀅𑀬𑀁 𑀓𑀺𑀭 𑀪𑀺𑀓𑁆𑀔𑀼 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀧𑀥𑀸𑀦𑀺𑀬𑀪𑀺𑀓𑁆𑀔𑀽𑀦𑀁 𑀲𑀗𑁆𑀖𑀢𑁆𑀣𑁂𑀭𑁄 𑀲𑀝𑁆𑀞𑀺 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀯𑀲𑀢𑀺, 𑀢𑁂 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀖𑀝𑁂𑀦𑁆𑀢𑀺 𑀯𑀸𑀬𑀫𑀦𑁆𑀢𑀺. 𑀫𑀳𑀸𑀪𑀽𑀢𑀸𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺 𑀉𑀧𑀸𑀤𑀸𑀭𑀽𑀧𑀸𑀦𑀺, 𑀦𑀸𑀫𑀭𑀽𑀧𑀧𑀘𑁆𑀘𑀬𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺. 𑀅𑀣 𑀦𑁂 𑀆𑀘𑀭𑀺𑀬𑀼𑀧𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀣𑁂𑀭𑁄 𑀫𑀳𑀸𑀪𑀽𑀢𑀧𑀭𑀺𑀕𑁆𑀕𑀳𑀸𑀤𑀻𑀦𑀺 𑀧𑀼𑀘𑁆𑀙𑀢𑀺. 𑀢𑁂 𑀲𑀩𑁆𑀩𑀁 𑀓𑀣𑁂𑀦𑁆𑀢𑀺, 𑀫𑀕𑁆𑀕𑀨𑀮𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀸 𑀧𑀦 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀣 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀫 𑀲𑀦𑁆𑀢𑀺𑀓𑁂 𑀏𑀢𑁂𑀲𑀁 𑀑𑀯𑀸𑀤𑀲𑁆𑀲 𑀧𑀭𑀺𑀳𑀸𑀦𑀺 𑀦𑀢𑁆𑀣𑀺, 𑀇𑀫𑁂 𑀘 𑀆𑀭𑀤𑁆𑀥𑀯𑀻𑀭𑀺𑀬𑀸 𑀯𑀺𑀳𑀭𑀦𑁆𑀢𑀺. 𑀓𑀼𑀓𑁆𑀓𑀼𑀝𑀲𑁆𑀲 𑀧𑀸𑀦𑀻𑀬𑀧𑀺𑀯𑀦𑀓𑀸𑀮𑀫𑀢𑁆𑀢𑀫𑁆𑀧𑀺 𑀦𑁂𑀲𑀁 𑀧𑀫𑀸𑀤𑀓𑀺𑀭𑀺𑀬𑀸 𑀦𑀢𑁆𑀣𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀫𑀕𑁆𑀕𑀨𑀮𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀅𑀳𑀁 𑀇𑀫𑁂𑀲𑀁 𑀅𑀚𑁆𑀛𑀸𑀲𑀬𑀁 𑀦 𑀚𑀸𑀦𑀸𑀫𑀺, 𑀩𑀼𑀤𑁆𑀥𑀯𑁂𑀦𑁂𑀬𑁆𑀬𑀸 𑀏𑀢𑁂 𑀪𑀯𑀺𑀲𑁆𑀲𑀦𑁆𑀢𑀺, 𑀕𑀳𑁂𑀢𑁆𑀯𑀸 𑀦𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀺, 𑀅𑀣 𑀦𑁂𑀲𑀁 𑀲𑀢𑁆𑀣𑀸 𑀘𑀭𑀺𑀬𑀯𑀲𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀢𑀻’’𑀢𑀺, 𑀢𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀢𑁄.

𑀲𑀢𑁆𑀣𑀸𑀧𑀺 𑀲𑀸𑀬𑀦𑁆𑀳𑀲𑀫𑀬𑁂 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀉𑀧𑀦𑀻𑀢𑀁 𑀉𑀤𑀓𑀁 𑀆𑀤𑀸𑀬 𑀲𑀭𑀻𑀭𑀁 𑀉𑀢𑀼𑀁 𑀕𑀡𑁆𑀳𑀸𑀧𑁂𑀢𑁆𑀯𑀸 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑀧𑀭𑀺𑀯𑁂𑀡𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺, 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀲𑀽𑀭𑀺𑀬𑁄 𑀅𑀢𑁆𑀣𑀗𑁆𑀕𑀫𑁂𑀢𑀺, 𑀘𑀦𑁆𑀤𑁄 𑀉𑀕𑁆𑀕𑀘𑁆𑀙𑀢𑀺, 𑀫𑀚𑁆𑀛𑀝𑁆𑀞𑀸𑀦𑁂 𑀘 𑀪𑀕𑀯𑀸 𑀦𑀺𑀲𑀺𑀦𑁆𑀦𑁄. 𑀘𑀦𑁆𑀤𑀲𑁆𑀲 𑀧𑀪𑀸 𑀦𑀢𑁆𑀣𑀺, 𑀲𑀽𑀭𑀺𑀬𑀲𑁆𑀲 𑀧𑀪𑀸 𑀦𑀢𑁆𑀣𑀺, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀧𑀪𑀁 𑀫𑀓𑁆𑀔𑁂𑀢𑁆𑀯𑀸 𑀙𑀩𑁆𑀩𑀡𑁆𑀡𑀸 𑀬𑀫𑀓𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀚𑁆𑀚𑁄𑀢𑀫𑀸𑀦𑀸 𑀧𑀼𑀜𑁆𑀚𑀸 𑀧𑀼𑀜𑁆𑀚𑀸 𑀳𑀼𑀢𑁆𑀯𑀸 𑀤𑀺𑀲𑀸𑀯𑀺𑀤𑀺𑀲𑀸𑀲𑀼 𑀥𑀸𑀯𑀦𑁆𑀢𑀻𑀢𑀺 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀯𑀡𑁆𑀡𑀪𑀽𑀫𑀺 𑀦𑀸𑀫𑁂𑀲𑀸, 𑀥𑀫𑁆𑀫𑀓𑀣𑀺𑀓𑀲𑁆𑀲𑁂𑀯𑁂𑀢𑁆𑀣 𑀣𑀸𑀫𑁄 𑀧𑀫𑀸𑀡𑀁, 𑀬𑀢𑁆𑀢𑀓𑀁 𑀲𑀓𑁆𑀓𑁄𑀢𑀺, 𑀢𑀢𑁆𑀢𑀓𑀁 𑀓𑀣𑁂𑀢𑀩𑁆𑀩𑀁. 𑀤𑀼𑀓𑁆𑀓𑀣𑀺𑀢𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀏𑀯𑀁 𑀲𑀦𑁆𑀦𑀺𑀲𑀺𑀦𑁆𑀦𑀸𑀬 𑀧𑀭𑀺𑀲𑀸𑀬 𑀣𑁂𑀭𑁄 𑀉𑀝𑁆𑀞𑀳𑀺𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀜𑁆𑀳𑀲𑁆𑀲 𑀑𑀓𑀸𑀲𑀁 𑀓𑀸𑀭𑁂𑀲𑀺. 𑀢𑀢𑁄 𑀪𑀕𑀯𑀸 𑁋 ‘‘𑀲𑀘𑁂 𑀇𑀫𑀲𑁆𑀫𑀺𑀁 𑀞𑀺𑀢𑀓𑁂 𑀧𑀼𑀘𑁆𑀙𑀦𑁆𑀢𑁂 ‘𑀆𑀘𑀭𑀺𑀬𑁄 𑀦𑁄 𑀉𑀝𑁆𑀞𑀺𑀢𑁄’𑀢𑀺 𑀲𑁂𑀲𑀪𑀺𑀓𑁆𑀔𑀽 𑀉𑀝𑁆𑀞𑀳𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀢𑀣𑀸𑀕𑀢𑁂 𑀅𑀕𑀸𑀭𑀯𑁄 𑀓𑀢𑁄 𑀪𑀯𑀺𑀲𑁆𑀲𑀢𑀺. 𑀅𑀣 𑀦𑀺𑀲𑀺𑀦𑁆𑀦𑀸𑀯 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺, 𑀆𑀘𑀭𑀺𑀬𑁂 𑀅𑀕𑀸𑀭𑀯𑁄 𑀓𑀢𑁄 𑀪𑀯𑀺𑀲𑁆𑀲𑀢𑀺, 𑀏𑀓𑀕𑁆𑀕𑀸 𑀳𑀼𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀁 𑀧𑀝𑀺𑀘𑁆𑀙𑀺𑀢𑀼𑀁 𑀦 𑀲𑀓𑁆𑀓𑀼𑀡𑀺𑀲𑁆𑀲𑀦𑁆𑀢𑀺. 𑀆𑀘𑀭𑀺𑀬𑁂 𑀧𑀦 𑀦𑀺𑀲𑀺𑀦𑁆𑀦𑁂 𑀢𑁂𑀧𑀺 𑀦𑀺𑀲𑀻𑀤𑀺𑀲𑁆𑀲𑀦𑁆𑀢𑀺. 𑀢𑀢𑁄 𑀏𑀓𑀕𑁆𑀕𑀸 𑀥𑀫𑁆𑀫𑀤𑁂𑀲𑀦𑀁 𑀧𑀝𑀺𑀘𑁆𑀙𑀺𑀢𑀼𑀁 𑀲𑀓𑁆𑀓𑀼𑀡𑀺𑀲𑁆𑀲𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀪𑀕𑀯𑀸 𑀞𑀺𑀢𑀲𑁆𑀲 𑀅𑀓𑀣𑁂𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀢𑀻𑀢𑀺.

𑀇𑀫𑁂 𑀦𑀼 𑀔𑁄, 𑀪𑀦𑁆𑀢𑁂𑀢𑀺 𑀯𑀺𑀫𑀢𑀺𑀧𑀼𑀘𑁆𑀙𑀸 𑀯𑀺𑀬 𑀓𑀣𑀺𑀢𑀸. 𑀣𑁂𑀭𑁄 𑀧𑀦 𑀧𑀜𑁆𑀘𑀓𑁆𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀫𑀳𑀸𑀔𑀻𑀡𑀸𑀲𑀯𑁄, 𑀦𑀢𑁆𑀣𑀺 𑀏𑀢𑀲𑁆𑀲 𑀯𑀺𑀫𑀢𑀺. 𑀚𑀸𑀦𑀦𑁆𑀢𑁂𑀦𑀧𑀺 𑀧𑀦 𑀅𑀚𑀸𑀦𑀦𑁆𑀢𑁂𑀦 𑀯𑀺𑀬 𑀳𑀼𑀢𑁆𑀯𑀸 𑀧𑀼𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂 𑀳𑀺 𑀚𑀸𑀦𑀦𑁆𑀢𑁄 𑀯𑀺𑀬 𑀧𑀼𑀘𑁆𑀙𑀢𑀺, ‘‘𑀚𑀸𑀦𑀸𑀢𑀺 𑀅𑀬’’𑀦𑁆𑀢𑀺 𑀢𑀲𑁆𑀲 𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀏𑀓𑀤𑁂𑀲𑀫𑁂𑀯 𑀓𑀣𑁂𑀢𑀺. 𑀅𑀚𑀸𑀦𑀦𑁆𑀢𑁂𑀦 𑀯𑀺𑀬 𑀧𑀼𑀘𑁆𑀙𑀺𑀢𑁂 𑀧𑀦 𑀓𑀣𑁂𑀦𑁆𑀢𑁄 𑀇𑀢𑁄 𑀘 𑀏𑀢𑁆𑀢𑁄 𑀘 𑀓𑀸𑀭𑀡𑀁 𑀆𑀳𑀭𑀺𑀢𑁆𑀯𑀸 𑀧𑀸𑀓𑀝𑀁 𑀓𑀢𑁆𑀯𑀸 𑀓𑀣𑁂𑀢𑀺. 𑀓𑁄𑀘𑀺 𑀧𑀦 𑀅𑀚𑀸𑀦𑀦𑁆𑀢𑁄𑀧𑀺 𑀚𑀸𑀦𑀦𑁆𑀢𑁄 𑀯𑀺𑀬 𑀧𑀼𑀘𑁆𑀙𑀢𑀺. 𑀣𑁂𑀭𑁄 𑀏𑀯𑀭𑀽𑀧𑀁 𑀯𑀘𑀦𑀁 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀚𑀸𑀦𑀦𑁆𑀢𑁄𑀬𑁂𑀯 𑀧𑀦 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀧𑀼𑀘𑁆𑀙𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀙𑀦𑁆𑀤𑀫𑀽𑀮𑀓𑀸𑀢𑀺 𑀢𑀡𑁆𑀳𑀸𑀫𑀽𑀮𑀓𑀸. 𑀏𑀯𑀁𑀭𑀽𑀧𑁄 𑀲𑀺𑀬𑀦𑁆𑀢𑀺 𑀲𑀘𑁂 𑀑𑀤𑀸𑀢𑁄 𑀳𑁄𑀢𑀼𑀓𑀸𑀫𑁄, 𑀳𑀭𑀺𑀢𑀸𑀮𑀯𑀡𑁆𑀡𑁄 𑀯𑀸 𑀫𑀦𑁄𑀲𑀺𑀮𑀸𑀯𑀡𑁆𑀡𑁄 𑀯𑀸 𑀲𑀺𑀬𑀦𑁆𑀢𑀺 𑀧𑀢𑁆𑀣𑁂𑀢𑀺. 𑀲𑀘𑁂 𑀓𑀸𑀴𑁄 𑀳𑁄𑀢𑀼𑀓𑀸𑀫𑁄, 𑀦𑀻𑀮𑀼𑀧𑁆𑀧𑀮𑀯𑀡𑁆𑀡𑁄 𑀯𑀸 𑀅𑀜𑁆𑀚𑀦𑀯𑀡𑁆𑀡𑁄 𑀯𑀸 𑀅𑀢𑀲𑀻𑀧𑀼𑀧𑁆𑀨𑀯𑀡𑁆𑀡𑁄 𑀯𑀸 𑀲𑀺𑀬𑀦𑁆𑀢𑀺 𑀧𑀢𑁆𑀣𑁂𑀢𑀺. 𑀏𑀯𑀁𑀯𑁂𑀤𑀦𑁄𑀢𑀺 𑀓𑀼𑀲𑀮𑀯𑁂𑀤𑀦𑁄 𑀯𑀸 𑀲𑀼𑀔𑀯𑁂𑀤𑀦𑁄 𑀯𑀸 𑀲𑀺𑀬𑀦𑁆𑀢𑀺 𑀧𑀢𑁆𑀣𑁂𑀢𑀺. 𑀲𑀜𑁆𑀜𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀲𑁆𑀫𑀸 𑀧𑀦 𑀅𑀢𑀻𑀢𑁂 𑀧𑀢𑁆𑀣𑀦𑀸 𑀦𑀸𑀫 𑀦𑀢𑁆𑀣𑀺, 𑀧𑀢𑁆𑀣𑁂𑀦𑁆𑀢𑁂𑀦𑀸𑀧𑀺 𑀘 𑀦 𑀲𑀓𑁆𑀓𑀸 𑀢𑀁 𑀮𑀤𑁆𑀥𑀼𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀧𑀺 𑀦 𑀳𑁄𑀢𑀺, 𑀦 𑀳𑀺 𑀑𑀤𑀸𑀢𑁄 𑀓𑀸𑀴𑀪𑀸𑀯𑀁 𑀧𑀢𑁆𑀣𑁂𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀸𑀴𑁄 𑀳𑁄𑀢𑀺, 𑀦 𑀓𑀸𑀴𑁄 𑀯𑀸 𑀑𑀤𑀸𑀢𑁄, 𑀤𑀻𑀖𑁄 𑀯𑀸 𑀭𑀲𑁆𑀲𑁄, 𑀭𑀲𑁆𑀲𑁄 𑀯𑀸 𑀤𑀻𑀖𑁄, 𑀤𑀸𑀦𑀁 𑀧𑀦 𑀤𑀢𑁆𑀯𑀸 𑀲𑀻𑀮𑀁 𑀯𑀸 𑀲𑀫𑀸𑀤𑀺𑀬𑀺𑀢𑁆𑀯𑀸 ‘‘𑀅𑀦𑀸𑀕𑀢𑁂 𑀔𑀢𑁆𑀢𑀺𑀬𑁄 𑀯𑀸 𑀳𑁄𑀫𑀺 𑀩𑁆𑀭𑀸𑀳𑁆𑀫𑀡𑁄 𑀯𑀸’’𑀢𑀺 𑀧𑀢𑁆𑀣𑁂𑀦𑁆𑀢𑀲𑁆𑀲 𑀧𑀢𑁆𑀣𑀦𑀸 𑀲𑀫𑀺𑀚𑁆𑀛𑀢𑀺. 𑀢𑀲𑁆𑀫𑀸 𑀅𑀦𑀸𑀕𑀢𑀫𑁂𑀯 𑀕𑀳𑀺𑀢𑀁.

𑀔𑀦𑁆𑀥𑀸𑀥𑀺𑀯𑀘𑀦𑀦𑁆𑀢𑀺 𑀔𑀦𑁆𑀥𑀸𑀦𑀁 𑀔𑀦𑁆𑀥𑀧𑀡𑁆𑀡𑀢𑁆𑀢𑀺 𑀓𑀺𑀢𑁆𑀢𑀓𑁂𑀦 𑀳𑁄𑀢𑀻𑀢𑀺 𑀧𑀼𑀘𑁆𑀙𑀢𑀺.

𑀫𑀳𑀸𑀪𑀽𑀢𑀸 𑀳𑁂𑀢𑀽𑀢𑀺 ‘‘𑀢𑀬𑁄 𑀓𑀼𑀲𑀮𑀳𑁂𑀢𑀽’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁪𑁪𑁧) 𑀳𑀺 𑀳𑁂𑀢𑀼𑀳𑁂𑀢𑀼 𑀯𑀼𑀢𑁆𑀢𑁄. 𑀅𑀯𑀺𑀚𑁆𑀚𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁 𑀲𑀸𑀥𑀸𑀭𑀡𑀢𑁆𑀢𑀸 𑀲𑀸𑀥𑀸𑀭𑀡𑀳𑁂𑀢𑀼. 𑀓𑀼𑀲𑀮𑀸𑀓𑀼𑀲𑀮𑀁 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀧𑀸𑀓𑀤𑀸𑀦𑁂 𑀉𑀢𑁆𑀢𑀫𑀳𑁂𑀢𑀼. 𑀇𑀥 𑀧𑀘𑁆𑀘𑀬𑀳𑁂𑀢𑀼 𑀅𑀥𑀺𑀧𑁆𑀧𑁂𑀢𑁄. 𑀢𑀢𑁆𑀣 𑀧𑀣𑀯𑀻𑀥𑀸𑀢𑀼 𑀫𑀳𑀸𑀪𑀽𑀢𑀁 𑀇𑀢𑀭𑁂𑀲𑀁 𑀢𑀺𑀡𑁆𑀡𑀁 𑀪𑀽𑀢𑀸𑀦𑀁 𑀉𑀧𑀸𑀤𑀸𑀭𑀽𑀧𑀲𑁆𑀲 𑀘 𑀧𑀜𑁆𑀜𑀸𑀧𑀦𑀸𑀬 𑀤𑀲𑁆𑀲𑀦𑀢𑁆𑀣𑀸𑀬 𑀳𑁂𑀢𑀼 𑀘𑁂𑀯 𑀧𑀘𑁆𑀘𑀬𑁄 𑀘. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀨𑀲𑁆𑀲𑁄𑀢𑀺 ‘‘𑀨𑀼𑀝𑁆𑀞𑁄, 𑀪𑀺𑀓𑁆𑀔𑀯𑁂, 𑀯𑁂𑀤𑁂𑀢𑀺, 𑀨𑀼𑀝𑁆𑀞𑁄 𑀲𑀜𑁆𑀚𑀸𑀦𑀸𑀢𑀺, 𑀨𑀼𑀝𑁆𑀞𑁄 𑀘𑁂𑀢𑁂𑀢𑀻’’𑀢𑀺 (𑀲𑀁. 𑀦𑀺. 𑁪.𑁯𑁩) 𑀯𑀘𑀦𑀢𑁄 𑀨𑀲𑁆𑀲𑁄 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁 𑀧𑀜𑁆𑀜𑀸𑀧𑀦𑀸𑀬 𑀳𑁂𑀢𑀼 𑀘𑁂𑀯 𑀧𑀘𑁆𑀘𑀬𑁄 𑀘. 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲𑀸𑀢𑀺 𑀏𑀢𑁆𑀣 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂𑀦 𑀢𑀸𑀯 𑀲𑀤𑁆𑀥𑀺𑀁 𑀕𑀩𑁆𑀪𑀲𑁂𑀬𑁆𑀬𑀓𑀸𑀦𑀁 𑀉𑀧𑀭𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀲𑀫𑀢𑀺𑀁𑀲 𑀭𑀽𑀧𑀸𑀦𑀺 𑀲𑀫𑁆𑀧𑀬𑀼𑀢𑁆𑀢𑀸 𑀘 𑀢𑀬𑁄 𑀔𑀦𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀁 𑀦𑀸𑀫𑀭𑀽𑀧𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀧𑀜𑁆𑀜𑀸𑀧𑀦𑀸𑀬 𑀳𑁂𑀢𑀼 𑀘𑁂𑀯 𑀧𑀘𑁆𑀘𑀬𑁄 𑀘. 𑀘𑀓𑁆𑀔𑀼𑀤𑁆𑀯𑀸𑀭𑁂 𑀘𑀓𑁆𑀔𑀼𑀧𑀲𑀸𑀤𑁄 𑀘𑁂𑀯 𑀭𑀽𑀧𑀸𑀭𑀫𑁆𑀫𑀡𑀜𑁆𑀘 𑀭𑀽𑀧𑀁, 𑀲𑀫𑁆𑀧𑀬𑀼𑀢𑁆𑀢𑀸 𑀢𑀬𑁄 𑀔𑀦𑁆𑀥𑀸 𑀦𑀸𑀫𑀁. 𑀢𑀁 𑀦𑀸𑀫𑀭𑀽𑀧𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀧𑀜𑁆𑀜𑀸𑀧𑀦𑀸𑀬 𑀳𑁂𑀢𑀼 𑀘𑁂𑀯 𑀧𑀘𑁆𑀘𑀬𑁄 𑀘. 𑀏𑀲𑁂𑀯 𑀦𑀬𑁄 𑀲𑁂𑀲𑀯𑀺𑀜𑁆𑀜𑀸𑀡𑁂𑀲𑀼.

𑁮𑁭. 𑀓𑀣𑀁 𑀧𑀦, 𑀪𑀦𑁆𑀢𑁂𑀢𑀺 𑀇𑀤𑀁 𑀓𑀺𑀢𑁆𑀢𑀓𑁂𑀦 𑀦𑀼 𑀔𑁄𑀢𑀺 𑀯𑀝𑁆𑀝𑀁 𑀧𑀼𑀘𑁆𑀙𑀦𑁆𑀢𑁄 𑀏𑀯𑀫𑀸𑀳. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺 𑀦 𑀳𑁄𑀢𑀻𑀢𑀺 𑀇𑀤𑀁 𑀯𑀺𑀯𑀝𑁆𑀝𑀁 𑀧𑀼𑀘𑁆𑀙𑀦𑁆𑀢𑁄 𑀏𑀯𑀫𑀸𑀳.

𑁮𑁮. 𑀅𑀬𑀁 𑀭𑀽𑀧𑁂 𑀅𑀲𑁆𑀲𑀸𑀤𑁄𑀢𑀺 𑀇𑀫𑀺𑀦𑀸 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑁄 𑀘𑁂𑀯 𑀤𑀼𑀓𑁆𑀔𑀲𑀘𑁆𑀘𑀜𑁆𑀘 𑀓𑀣𑀺𑀢𑀁. 𑀅𑀬𑀁 𑀭𑀽𑀧𑁂 𑀆𑀤𑀻𑀦𑀯𑁄𑀢𑀺 𑀇𑀫𑀺𑀦𑀸 𑀧𑀳𑀸𑀦𑀧𑀝𑀺𑀯𑁂𑀥𑁄 𑀘𑁂𑀯 𑀲𑀫𑀼𑀤𑀬𑀲𑀘𑁆𑀘𑀜𑁆𑀘. 𑀇𑀤𑀁 𑀭𑀽𑀧𑁂 𑀦𑀺𑀲𑁆𑀲𑀭𑀡𑀦𑁆𑀢𑀺 𑀇𑀫𑀺𑀦𑀸 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀝𑀺𑀯𑁂𑀥𑁄 𑀘𑁂𑀯 𑀦𑀺𑀭𑁄𑀥𑀲𑀘𑁆𑀘𑀜𑁆𑀘. 𑀬𑁂 𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄 𑀥𑀫𑁆𑀫𑀸, 𑀅𑀬𑀁 𑀪𑀸𑀯𑀦𑀸𑀧𑀝𑀺𑀯𑁂𑀥𑁄 𑀫𑀕𑁆𑀕𑀲𑀘𑁆𑀘𑀁. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁮𑁯. 𑀩𑀳𑀺𑀤𑁆𑀥𑀸𑀢𑀺 𑀧𑀭𑀲𑁆𑀲 𑀲𑀯𑀺𑀜𑁆𑀜𑀸𑀡𑀓𑁂 𑀓𑀸𑀬𑁂. 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀽𑀢𑀺 𑀇𑀫𑀺𑀦𑀸 𑀧𑀦 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀫𑁆𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀲𑀯𑀺𑀜𑁆𑀜𑀸𑀡𑀓𑁂 𑀓𑀸𑀬𑁂’’𑀢𑀺 𑀯𑀘𑀦𑁂𑀦 𑀯𑀸 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀓𑀸𑀬𑁄 𑀕𑀳𑀺𑀢𑁄𑀯, 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑁂𑀦 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀁 𑀕𑀡𑁆𑀳𑀸𑀢𑀺.

𑁯𑁦. 𑀅𑀦𑀢𑁆𑀢𑀓𑀢𑀸𑀦𑀻𑀢𑀺 𑀅𑀦𑀢𑁆𑀢𑀦𑀺 𑀞𑀢𑁆𑀯𑀸 𑀓𑀢𑀸𑀦𑀺. 𑀓𑀫𑀢𑁆𑀢𑀸𑀦𑀁 𑀨𑀼𑀲𑀺𑀲𑁆𑀲𑀦𑁆𑀢𑀻𑀢𑀺 𑀓𑀢𑀭𑀲𑁆𑀫𑀺𑀁 𑀅𑀢𑁆𑀢𑀦𑀺 𑀞𑀢𑁆𑀯𑀸 𑀯𑀺𑀧𑀸𑀓𑀁 𑀤𑀲𑁆𑀲𑁂𑀦𑁆𑀢𑀻𑀢𑀺 𑀲𑀲𑁆𑀲𑀢𑀤𑀲𑁆𑀲𑀦𑀁 𑀑𑀓𑁆𑀓𑀫𑀦𑁆𑀢𑁄 𑀏𑀯𑀫𑀸𑀳. 𑀢𑀡𑁆𑀳𑀸𑀥𑀺𑀧𑀢𑁂𑀬𑁆𑀬𑁂𑀦𑀸𑀢𑀺 𑀢𑀡𑁆𑀳𑀸𑀚𑁂𑀝𑁆𑀞𑀓𑁂𑀦. 𑀢𑀢𑁆𑀭 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀢𑁂𑀲𑀼 𑀥𑀫𑁆𑀫𑁂𑀲𑀼. 𑀲𑀝𑁆𑀞𑀺𑀫𑀢𑁆𑀢𑀸𑀦𑀦𑁆𑀢𑀺 𑀇𑀫𑁂 𑀪𑀺𑀓𑁆𑀔𑀽 𑀧𑀓𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀚𑀳𑀺𑀢𑁆𑀯𑀸 𑀅𑀜𑁆𑀜𑀁 𑀦𑀯𑀓𑀫𑁆𑀫𑀝𑁆𑀞𑀸𑀦𑀁 𑀲𑀫𑁆𑀫𑀲𑀦𑁆𑀢𑀸 𑀧𑀮𑁆𑀮𑀗𑁆𑀓𑀁 𑀅𑀪𑀺𑀦𑁆𑀤𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀳𑀸𑀧𑀼𑀡𑁆𑀡𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀘𑀽𑀴𑀧𑀼𑀡𑁆𑀡𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁧. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀘𑀽𑀴𑀧𑀼𑀡𑁆𑀡𑀫𑀲𑀼𑀢𑁆𑀢𑀁. 𑀢𑀢𑁆𑀣 𑀢𑀼𑀡𑁆𑀳𑀻𑀪𑀽𑀢𑀁 𑀢𑀼𑀡𑁆𑀳𑀻𑀪𑀽𑀢𑀦𑁆𑀢𑀺 𑀬𑀁 𑀬𑀁 𑀤𑀺𑀲𑀁 𑀅𑀦𑀼𑀯𑀺𑀮𑁄𑀓𑁂𑀢𑀺, 𑀢𑀢𑁆𑀣 𑀢𑀢𑁆𑀣 𑀢𑀼𑀡𑁆𑀳𑀻𑀪𑀽𑀢𑀫𑁂𑀯. 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸𑀢𑀺 𑀧𑀜𑁆𑀘𑀧𑀲𑀸𑀤𑀧𑀝𑀺𑀫𑀡𑁆𑀟𑀺𑀢𑀸𑀦𑀺 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀢𑀢𑁄 𑀢𑀢𑁄 𑀯𑀺𑀮𑁄𑀓𑁂𑀢𑁆𑀯𑀸 𑀅𑀦𑁆𑀢𑀫𑀲𑁄 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀸𑀦𑀫𑁆𑀧𑀺 𑀅𑀪𑀸𑀯𑀁 𑀤𑀺𑀲𑁆𑀯𑀸. 𑀅𑀲𑀧𑁆𑀧𑀼𑀭𑀺𑀲𑁄𑀢𑀺 𑀧𑀸𑀧𑀧𑀼𑀭𑀺𑀲𑁄. 𑀦𑁄 𑀳𑁂𑀢𑀁, 𑀪𑀦𑁆𑀢𑁂𑀢𑀺 𑀬𑀲𑁆𑀫𑀸 𑀅𑀦𑁆𑀥𑁄 𑀅𑀦𑁆𑀥𑀁 𑀯𑀺𑀬 𑀲𑁄 𑀢𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳𑀁𑀲𑀼. 𑀏𑀢𑁂𑀦𑁂𑀯 𑀦𑀬𑁂𑀦 𑀇𑀢𑁄 𑀧𑀭𑁂𑀲𑀼𑀧𑀺 𑀯𑀸𑀭𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀲𑁆𑀲𑀤𑁆𑀥𑀲𑀫𑀦𑁆𑀦𑀸𑀕𑀢𑁄𑀢𑀺 𑀧𑀸𑀧𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁄. 𑀅𑀲𑀧𑁆𑀧𑀼𑀭𑀺𑀲𑀪𑀢𑁆𑀢𑀻𑀢𑀺 𑀅𑀲𑀧𑁆𑀧𑀼𑀭𑀺𑀲𑀲𑁂𑀯𑀦𑁄. 𑀅𑀲𑀧𑁆𑀧𑀼𑀭𑀺𑀲𑀘𑀺𑀦𑁆𑀢𑀻𑀢𑀺 𑀅𑀲𑀧𑁆𑀧𑀼𑀭𑀺𑀲𑀘𑀺𑀦𑁆𑀢𑀸𑀬 𑀘𑀺𑀦𑁆𑀢𑀓𑁄. 𑀅𑀲𑀧𑁆𑀧𑀼𑀭𑀺𑀲𑀫𑀦𑁆𑀢𑀻𑀢𑀺 𑀅𑀲𑀧𑁆𑀧𑀼𑀭𑀺𑀲𑀫𑀦𑁆𑀢𑀦𑀁 𑀫𑀦𑁆𑀢𑁂𑀢𑀸. 𑀅𑀲𑀧𑁆𑀧𑀼𑀭𑀺𑀲𑀯𑀸𑀘𑁄𑀢𑀺 𑀅𑀲𑀧𑁆𑀧𑀼𑀭𑀺𑀲𑀯𑀸𑀘𑀁 𑀪𑀸𑀲𑀺𑀢𑀸. 𑀅𑀲𑀧𑁆𑀧𑀼𑀭𑀺𑀲𑀓𑀫𑁆𑀫𑀦𑁆𑀢𑁄𑀢𑀺 𑀅𑀲𑀧𑁆𑀧𑀼𑀭𑀺𑀲𑀓𑀫𑁆𑀫𑀸𑀦𑀁 𑀓𑀢𑁆𑀢𑀸. 𑀅𑀲𑀧𑁆𑀧𑀼𑀭𑀺𑀲𑀤𑀺𑀝𑁆𑀞𑀻𑀢𑀺 𑀅𑀲𑀧𑁆𑀧𑀼𑀭𑀺𑀲𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀅𑀲𑀧𑁆𑀧𑀼𑀭𑀺𑀲𑀤𑀸𑀦𑀦𑁆𑀢𑀺 𑀅𑀲𑀧𑁆𑀧𑀼𑀭𑀺𑀲𑁂𑀳𑀺 𑀤𑀸𑀢𑀩𑁆𑀩𑀁 𑀤𑀸𑀦𑀁. 𑀢𑁆𑀬𑀸𑀲𑁆𑀲 𑀫𑀺𑀢𑁆𑀢𑀸𑀢𑀺 𑀢𑁂 𑀅𑀲𑁆𑀲 𑀫𑀺𑀢𑁆𑀢𑀸. 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀘𑁂𑀢𑁂𑀢𑀻𑀢𑀺 𑀧𑀸𑀡𑀁 𑀳𑀦𑀺𑀲𑁆𑀲𑀸𑀫𑀺, 𑀅𑀤𑀺𑀦𑁆𑀦𑀁 𑀆𑀤𑀺𑀬𑀺𑀲𑁆𑀲𑀸𑀫𑀺, 𑀫𑀺𑀘𑁆𑀙𑀸 𑀘𑀭𑀺𑀲𑁆𑀲𑀸𑀫𑀺, 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑁂 𑀲𑀫𑀸𑀤𑀸𑀬 𑀯𑀢𑁆𑀢𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀤𑀼𑀓𑁆𑀔𑀢𑁆𑀣𑀸𑀬 𑀘𑀺𑀦𑁆𑀢𑁂𑀢𑀺. 𑀧𑀭𑀩𑁆𑀬𑀸𑀩𑀸𑀥𑀸𑀬𑀸𑀢𑀺 𑀬𑀣𑀸 𑀅𑀲𑀼𑀓𑁄 𑀅𑀲𑀼𑀓𑀁 𑀧𑀸𑀡𑀁 𑀳𑀦𑁆𑀢𑀺, 𑀅𑀲𑀼𑀓𑀲𑁆𑀲 𑀲𑀦𑁆𑀢𑀓𑀁 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺, 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑁂 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺, 𑀏𑀯𑀁 𑀦𑀁 𑀆𑀡𑀸𑀧𑁂𑀲𑁆𑀲𑀸𑀫𑀻𑀢𑀺 𑀏𑀯𑀁 𑀧𑀭𑀲𑁆𑀲 𑀤𑀼𑀓𑁆𑀔𑀢𑁆𑀣𑀸𑀬 𑀘𑀺𑀦𑁆𑀢𑁂𑀢𑀺. 𑀉𑀪𑀬𑀩𑁆𑀬𑀸𑀩𑀸𑀥𑀸𑀬𑀸𑀢𑀺 𑀅𑀳𑀁 𑀅𑀲𑀼𑀓𑀜𑁆𑀘 𑀅𑀲𑀼𑀓𑀜𑁆𑀘 𑀕𑀳𑁂𑀢𑁆𑀯𑀸 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑁂 𑀲𑀫𑀸𑀤𑀸𑀬 𑀯𑀢𑁆𑀢𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀉𑀪𑀬𑀤𑀼𑀓𑁆𑀔𑀢𑁆𑀣𑀸𑀬 𑀘𑀺𑀦𑁆𑀢𑁂𑀢𑀻𑀢𑀺.

𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬𑀧𑀺 𑀫𑀦𑁆𑀢𑁂𑀢𑀻𑀢𑀺𑀆𑀤𑀻𑀲𑀼 𑀅𑀳𑀁 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑁂 𑀲𑀫𑀸𑀤𑀸𑀬 𑀯𑀢𑁆𑀢𑀺𑀲𑁆𑀲𑀸𑀫𑀻𑀢𑀺 𑀫𑀦𑁆𑀢𑁂𑀦𑁆𑀢𑁄 𑀅𑀢𑁆𑀢𑀩𑁆𑀬𑀸𑀩𑀸𑀥𑀸𑀬 𑀫𑀦𑁆𑀢𑁂𑀢𑀺 𑀦𑀸𑀫. 𑀅𑀲𑀼𑀓𑀁 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑁂 𑀲𑀫𑀸𑀤𑀧𑁂𑀲𑁆𑀲𑀸𑀫𑀻𑀢𑀺 𑀫𑀦𑁆𑀢𑁂𑀦𑁆𑀢𑁄 𑀧𑀭𑀩𑁆𑀬𑀸𑀩𑀸𑀥𑀸𑀬 𑀫𑀦𑁆𑀢𑁂𑀢𑀺 𑀦𑀸𑀫. 𑀅𑀜𑁆𑀜𑁂𑀦 𑀲𑀤𑁆𑀥𑀺𑀁 𑁋 ‘‘𑀫𑀬𑀁 𑀉𑀪𑁄𑀧𑀺 𑀏𑀓𑀢𑁄 𑀳𑀼𑀢𑁆𑀯𑀸 𑀤𑀲 𑀅𑀓𑀼𑀲𑀮𑀓𑀫𑁆𑀫𑀧𑀣𑁂 𑀲𑀫𑀸𑀤𑀸𑀬 𑀯𑀢𑁆𑀢𑀺𑀲𑁆𑀲𑀸𑀫𑀸’’𑀢𑀺 𑀫𑀦𑁆𑀢𑁂𑀦𑁆𑀢𑁄 𑀉𑀪𑀬𑀩𑁆𑀬𑀸𑀩𑀸𑀥𑀸𑀬 𑀫𑀦𑁆𑀢𑁂𑀢𑀺 𑀦𑀸𑀫.

𑀅𑀲𑀓𑁆𑀓𑀘𑁆𑀘𑀁 𑀤𑀸𑀦𑀁 𑀤𑁂𑀢𑀻𑀢𑀺 𑀤𑁂𑀬𑁆𑀬𑀥𑀫𑁆𑀫𑀫𑁆𑀧𑀺 𑀧𑀼𑀕𑁆𑀕𑀮𑀫𑁆𑀧𑀺 𑀦 𑀲𑀓𑁆𑀓𑀭𑁄𑀢𑀺. 𑀤𑁂𑀬𑁆𑀬𑀥𑀫𑁆𑀫𑀁 𑀦 𑀲𑀓𑁆𑀓𑀭𑁄𑀢𑀺 𑀦𑀸𑀫 𑀉𑀢𑁆𑀢𑀡𑁆𑀟𑀼𑀮𑀸𑀤𑀺𑀤𑁄𑀲𑀲𑀫𑀦𑁆𑀦𑀸𑀕𑀢𑀁 𑀆𑀳𑀸𑀭𑀁 𑀤𑁂𑀢𑀺, 𑀦 𑀧𑀲𑀦𑁆𑀦𑀁 𑀓𑀭𑁄𑀢𑀺. 𑀧𑀼𑀕𑁆𑀕𑀮𑀁 𑀦 𑀲𑀓𑁆𑀓𑀭𑁄𑀢𑀺 𑀦𑀸𑀫 𑀦𑀺𑀲𑀻𑀤𑀦𑀝𑁆𑀞𑀸𑀦𑀁 𑀅𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀁 𑀯𑀸 𑀢𑀁 𑀯𑀸 𑀆𑀥𑀸𑀭𑀓𑀁 𑀞𑀧𑁂𑀢𑁆𑀯𑀸 𑀤𑀸𑀦𑀁 𑀤𑁂𑀢𑀺. 𑀅𑀲𑀳𑀢𑁆𑀣𑀸𑀢𑀺 𑀅𑀢𑁆𑀢𑀦𑁄 𑀳𑀢𑁆𑀣𑁂𑀦, 𑀦 𑀤𑁂𑀢𑀺, 𑀤𑀸𑀲𑀓𑀫𑁆𑀫𑀓𑀸𑀭𑀸𑀤𑀻𑀳𑀺 𑀤𑀸𑀧𑁂𑀢𑀺. 𑀅𑀘𑀺𑀢𑁆𑀢𑀺𑀓𑀢𑁆𑀯𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀤𑁂𑀬𑁆𑀬𑀥𑀫𑁆𑀫𑁂𑀧𑀺 𑀧𑀼𑀕𑁆𑀕𑀮𑁂𑀧𑀺 𑀦 𑀘𑀺𑀢𑁆𑀢𑀻𑀓𑀸𑀭𑀁 𑀓𑀢𑁆𑀯𑀸 𑀤𑁂𑀢𑀺. 𑀅𑀧𑀯𑀺𑀤𑁆𑀥𑀦𑁆𑀢𑀺 𑀙𑀟𑁆𑀟𑁂𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀯𑀫𑁆𑀫𑀺𑀓𑁂 𑀉𑀭𑀕𑀁 𑀧𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀤𑁂𑀢𑀺. 𑀅𑀦𑀸𑀕𑀫𑀦𑀤𑀺𑀝𑁆𑀞𑀺𑀓𑁄𑀢𑀺 𑀦𑁄 𑀨𑀮𑀧𑀸𑀝𑀺𑀓𑀗𑁆𑀔𑀻 𑀳𑀼𑀢𑁆𑀯𑀸 𑀤𑁂𑀢𑀺.

𑀢𑀢𑁆𑀣 𑀉𑀧𑀧𑀚𑁆𑀚𑀢𑀻𑀢𑀺 𑀦 𑀤𑀸𑀦𑀁 𑀤𑀢𑁆𑀯𑀸 𑀦𑀺𑀭𑀬𑁂 𑀉𑀧𑀧𑀚𑁆𑀚𑀢𑀺. 𑀬𑀁 𑀧𑀦 𑀢𑁂𑀦 𑀧𑀸𑀧𑀮𑀤𑁆𑀥𑀺𑀓𑀸𑀬 𑀫𑀺𑀘𑁆𑀙𑀸𑀤𑀲𑁆𑀲𑀦𑀁 𑀕𑀳𑀺𑀢𑀁, 𑀢𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀦𑀺𑀭𑀬𑁂 𑀉𑀧𑀧𑀚𑁆𑀚𑀢𑀺. 𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀤𑁂𑀯𑀫𑀳𑀢𑁆𑀢𑀢𑀸𑀢𑀺 𑀙𑀓𑀸𑀫𑀸𑀯𑀘𑀭𑀤𑁂𑀯𑀸. 𑀫𑀦𑀼𑀲𑁆𑀲𑀫𑀳𑀢𑁆𑀢𑀢𑀸𑀢𑀺 𑀢𑀺𑀡𑁆𑀡𑀁 𑀓𑀼𑀮𑀸𑀦𑀁 𑀲𑀫𑁆𑀧𑀢𑁆𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀇𑀤𑀁 𑀧𑀦 𑀲𑀼𑀢𑁆𑀢𑀁 𑀲𑀼𑀤𑁆𑀥𑀯𑀝𑁆𑀝𑀯𑀲𑁂𑀦𑁂𑀯 𑀓𑀣𑀺𑀢𑀦𑁆𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀘𑀽𑀴𑀧𑀼𑀡𑁆𑀡𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀦𑀼𑀧𑀤𑀯𑀕𑁆𑀕𑁄

𑁧. 𑀅𑀦𑀼𑀧𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁩. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀅𑀦𑀼𑀧𑀤𑀲𑀼𑀢𑁆𑀢𑀁. 𑀢𑀢𑁆𑀣 𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 (𑀧𑀝𑀺. 𑀫. 𑁩.𑁪) ‘‘𑀧𑀡𑁆𑀟𑀺𑀢𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀕𑀼𑀡𑀓𑀣𑀁 𑀅𑀯𑁄𑀘. 𑀓𑀲𑁆𑀫𑀸? 𑀅𑀯𑀲𑁂𑀲𑀢𑁆𑀣𑁂𑀭𑁂𑀲𑀼 𑀳𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀇𑀤𑁆𑀥𑀺𑀫𑀸𑀢𑀺 𑀕𑀼𑀡𑁄 𑀧𑀸𑀓𑀝𑁄, 𑀫𑀳𑀸𑀓𑀲𑁆𑀲𑀧𑀲𑁆𑀲 𑀥𑀼𑀢𑀯𑀸𑀤𑁄𑀢𑀺, 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀲𑁆𑀲 𑀤𑀺𑀩𑁆𑀩𑀘𑀓𑁆𑀔𑀼𑀓𑁄𑀢𑀺, 𑀉𑀧𑀸𑀮𑀺𑀢𑁆𑀣𑁂𑀭𑀲𑁆𑀲 𑀯𑀺𑀦𑀬𑀥𑀭𑁄𑀢𑀺, 𑀭𑁂𑀯𑀢𑀢𑁆𑀣𑁂𑀭𑀲𑁆𑀲 𑀛𑀸𑀬𑀻 𑀛𑀸𑀦𑀸𑀪𑀺𑀭𑀢𑁄𑀢𑀺, 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀩𑀳𑀼𑀲𑁆𑀲𑀼𑀢𑁄𑀢𑀺. 𑀏𑀯𑀁 𑀢𑁂𑀲𑀁 𑀢𑁂𑀲𑀁 𑀣𑁂𑀭𑀸𑀦𑀁 𑀢𑁂 𑀢𑁂 𑀕𑀼𑀡𑀸 𑀧𑀸𑀓𑀝𑀸, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀧𑀦 𑀅𑀧𑀸𑀓𑀝𑀸. 𑀓𑀲𑁆𑀫𑀸? 𑀧𑀜𑁆𑀜𑀯𑀢𑁄 𑀳𑀺 𑀕𑀼𑀡𑀸 𑀦 𑀲𑀓𑁆𑀓𑀸 𑀅𑀓𑀣𑀺𑀢𑀸 𑀚𑀸𑀦𑀺𑀢𑀼𑀁. 𑀇𑀢𑀺 𑀪𑀕𑀯𑀸 ‘‘𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀕𑀼𑀡𑁂 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀲𑀪𑀸𑀕𑀧𑀭𑀺𑀲𑀸𑀬 𑀲𑀦𑁆𑀦𑀺𑀧𑀸𑀢𑀁 𑀆𑀕𑀫𑁂𑀲𑀺. 𑀯𑀺𑀲𑀪𑀸𑀕𑀧𑀼𑀕𑁆𑀕𑀮𑀸𑀦𑀜𑁆𑀳𑀺 𑀲𑀦𑁆𑀢𑀺𑀓𑁂 𑀯𑀡𑁆𑀡𑀁 𑀓𑀣𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑁂 𑀯𑀡𑁆𑀡𑁂 𑀓𑀣𑀺𑀬𑀫𑀸𑀦𑁂 𑀅𑀯𑀡𑁆𑀡𑀫𑁂𑀯 𑀓𑀣𑁂𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀤𑀺𑀯𑀲𑁂 𑀣𑁂𑀭𑀲𑁆𑀲 𑀲𑀪𑀸𑀕𑀧𑀭𑀺𑀲𑀸 𑀲𑀦𑁆𑀦𑀺𑀧𑀢𑀺, 𑀢𑀲𑁆𑀲𑀸 𑀲𑀦𑁆𑀦𑀺𑀧𑀢𑀺𑀢𑀪𑀸𑀯𑀁 𑀤𑀺𑀲𑁆𑀯𑀸 𑀲𑀢𑁆𑀣𑀸 𑀯𑀡𑁆𑀡𑀁 𑀓𑀣𑁂𑀦𑁆𑀢𑁄 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺.

𑀢𑀢𑁆𑀣 𑀧𑀡𑁆𑀟𑀺𑀢𑁄𑀢𑀺 𑀥𑀸𑀢𑀼𑀓𑀼𑀲𑀮𑀢𑀸 𑀆𑀬𑀢𑀦𑀓𑀼𑀲𑀮𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑀢𑀸 𑀞𑀸𑀦𑀸𑀝𑁆𑀞𑀸𑀦𑀓𑀼𑀲𑀮𑀢𑀸𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀧𑀡𑁆𑀟𑀺𑀢𑁄. 𑀫𑀳𑀸𑀧𑀜𑁆𑀜𑁄𑀢𑀺𑀆𑀤𑀻𑀲𑀼 𑀫𑀳𑀸𑀧𑀜𑁆𑀜𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄.

𑀢𑀢𑁆𑀭𑀺𑀤𑀁 𑀫𑀳𑀸𑀧𑀜𑁆𑀜𑀸𑀤𑀻𑀦𑀁 𑀦𑀸𑀦𑀢𑁆𑀢𑀁 𑁋 𑀢𑀢𑁆𑀣 𑀓𑀢𑀫𑀸 𑀫𑀳𑀸𑀧𑀜𑁆𑀜𑀸? 𑀫𑀳𑀦𑁆𑀢𑁂 𑀲𑀻𑀮𑀓𑁆𑀔𑀦𑁆𑀥𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀫𑀳𑀸𑀧𑀜𑁆𑀜𑀸, 𑀫𑀳𑀦𑁆𑀢𑁂 𑀲𑀫𑀸𑀥𑀺𑀓𑁆𑀔𑀦𑁆𑀥𑁂, 𑀧𑀜𑁆𑀜𑀸𑀓𑁆𑀔𑀦𑁆𑀥𑁂, 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀫𑀳𑀸𑀧𑀜𑁆𑀜𑀸, 𑀫𑀳𑀦𑁆𑀢𑀸𑀦𑀺 𑀞𑀸𑀦𑀸𑀝𑁆𑀞𑀸𑀦𑀸𑀦𑀺, 𑀫𑀳𑀦𑁆𑀢𑀸 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑁄, 𑀫𑀳𑀦𑁆𑀢𑀸𑀦𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀫𑀳𑀦𑁆𑀢𑁂 𑀲𑀢𑀺𑀧𑀝𑁆𑀞𑀸𑀦𑁂, 𑀲𑀫𑁆𑀫𑀧𑁆𑀧𑀥𑀸𑀦𑁂, 𑀇𑀤𑁆𑀥𑀺𑀧𑀸𑀤𑁂, 𑀫𑀳𑀦𑁆𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀩𑀮𑀸𑀦𑀺, 𑀩𑁄𑀚𑁆𑀛𑀗𑁆𑀕𑀸𑀦𑀺, 𑀫𑀳𑀦𑁆𑀢𑁂 𑀅𑀭𑀺𑀬𑀫𑀕𑁆𑀕𑁂, 𑀫𑀳𑀦𑁆𑀢𑀸𑀦𑀺 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀫𑀳𑀦𑁆𑀢𑀸 𑀅𑀪𑀺𑀜𑁆𑀜𑀸𑀬𑁄, 𑀫𑀳𑀦𑁆𑀢𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀫𑀳𑀸𑀧𑀜𑁆𑀜𑀸.

𑀓𑀢𑀫𑀸 𑀧𑀼𑀣𑀼𑀧𑀜𑁆𑀜𑀸, 𑀧𑀼𑀣𑀼 𑀦𑀸𑀦𑀸𑀔𑀦𑁆𑀥𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀧𑀼𑀣𑀼𑀧𑀜𑁆𑀜𑀸. 𑀧𑀼𑀣𑀼 𑀦𑀸𑀦𑀸𑀥𑀸𑀢𑀽𑀲𑀼, 𑀧𑀼𑀣𑀼 𑀦𑀸𑀦𑀸𑀆𑀬𑀢𑀦𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀅𑀢𑁆𑀣𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀲𑀼𑀜𑁆𑀜𑀢𑀫𑀦𑀼𑀧𑀮𑀩𑁆𑀪𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀅𑀢𑁆𑀣𑁂𑀲𑀼, 𑀥𑀫𑁆𑀫𑁂𑀲𑀼, 𑀦𑀺𑀭𑀼𑀢𑁆𑀢𑀻𑀲𑀼, 𑀧𑀝𑀺𑀪𑀸𑀦𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀲𑀻𑀮𑀓𑁆𑀔𑀦𑁆𑀥𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀲𑀫𑀸𑀥𑀺-𑀧𑀜𑁆𑀜𑀸-𑀯𑀺𑀫𑀼𑀢𑁆𑀢𑀺-𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀞𑀸𑀦𑀸𑀝𑁆𑀞𑀸𑀦𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀲𑀼, 𑀧𑀼𑀣𑀼 𑀦𑀸𑀦𑀸𑀅𑀭𑀺𑀬𑀲𑀘𑁆𑀘𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀲𑀢𑀺𑀧𑀝𑁆𑀞𑀸𑀦𑁂𑀲𑀼, 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀼, 𑀇𑀤𑁆𑀥𑀺𑀧𑀸𑀤𑁂𑀲𑀼, 𑀇𑀦𑁆𑀤𑁆𑀭𑀺𑀬𑁂𑀲𑀼, 𑀩𑀮𑁂𑀲𑀼, 𑀩𑁄𑀚𑁆𑀛𑀗𑁆𑀕𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀅𑀭𑀺𑀬𑀫𑀕𑁆𑀕𑁂𑀲𑀼, 𑀲𑀸𑀫𑀜𑁆𑀜𑀨𑀮𑁂𑀲𑀼, 𑀅𑀪𑀺𑀜𑁆𑀜𑀸𑀲𑀼, 𑀧𑀼𑀣𑀼 𑀦𑀸𑀦𑀸𑀚𑀦𑀲𑀸𑀥𑀸𑀭𑀡𑁂 𑀥𑀫𑁆𑀫𑁂 𑀲𑀫𑀢𑀺𑀓𑁆𑀓𑀫𑁆𑀫 𑀧𑀭𑀫𑀢𑁆𑀣𑁂 𑀦𑀺𑀩𑁆𑀩𑀸𑀦𑁂 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀧𑀼𑀣𑀼𑀧𑀜𑁆𑀜𑀸.

𑀓𑀢𑀫𑀸 𑀳𑀸𑀲𑀧𑀜𑁆𑀜𑀸, 𑀇𑀥𑁂𑀓𑀘𑁆𑀘𑁄 𑀳𑀸𑀲𑀩𑀳𑀼𑀮𑁄 𑀯𑁂𑀤𑀩𑀳𑀼𑀮𑁄 𑀢𑀼𑀝𑁆𑀞𑀺𑀩𑀳𑀼𑀮𑁄 𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀲𑀻𑀮𑀁 𑀧𑀭𑀺𑀧𑀽𑀭𑁂𑀢𑀺, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀁, 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀁, 𑀲𑀻𑀮𑀓𑁆𑀔𑀦𑁆𑀥𑀁, 𑀲𑀫𑀸𑀥𑀺𑀓𑁆𑀔𑀦𑁆𑀥𑀁, 𑀧𑀜𑁆𑀜𑀸𑀓𑁆𑀔𑀦𑁆𑀥𑀁, 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀁, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑀳𑀸𑀲𑀧𑀜𑁆𑀜𑀸. 𑀳𑀸𑀲𑀩𑀳𑀼𑀮𑁄 𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀞𑀸𑀦𑀸𑀝𑁆𑀞𑀸𑀦𑀁 𑀧𑀝𑀺𑀯𑀺𑀚𑁆𑀛𑀢𑀺, 𑀳𑀸𑀲𑀩𑀳𑀼𑀮𑁄 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑁄 𑀧𑀭𑀺𑀧𑀽𑀭𑁂𑀢𑀻𑀢𑀺 𑀳𑀸𑀲𑀧𑀜𑁆𑀜𑀸, 𑀳𑀸𑀲𑀩𑀳𑀼𑀮𑁄 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀲𑀢𑀺𑀧𑀝𑁆𑀞𑀸𑀦𑁂, 𑀲𑀫𑁆𑀫𑀧𑁆𑀧𑀥𑀸𑀦𑁂, 𑀇𑀤𑁆𑀥𑀺𑀧𑀸𑀤𑁂, 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀩𑀮𑀸𑀦𑀺, 𑀩𑁄𑀚𑁆𑀛𑀗𑁆𑀕𑀸𑀦𑀺, 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺 𑀳𑀸𑀲𑀧𑀜𑁆𑀜𑀸, 𑀳𑀸𑀲𑀩𑀳𑀼𑀮𑁄 𑀲𑀸𑀫𑀜𑁆𑀜𑀨𑀮𑀸𑀦𑀺 𑀲𑀘𑁆𑀙𑀺𑀓𑀭𑁄𑀢𑀺, 𑀅𑀪𑀺𑀜𑁆𑀜𑀸𑀬𑁄 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀳𑀸𑀲𑀧𑀜𑁆𑀜𑀸, 𑀳𑀸𑀲𑀩𑀳𑀼𑀮𑁄 𑀯𑁂𑀤𑀢𑀼𑀝𑁆𑀞𑀺𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀳𑀸𑀲𑀧𑀜𑁆𑀜𑀸.

𑀓𑀢𑀫𑀸 𑀚𑀯𑀦𑀧𑀜𑁆𑀜𑀸, 𑀬𑀁𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁…𑀧𑁂… 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀭𑀽𑀧𑀁 𑀅𑀦𑀺𑀘𑁆𑀘𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀤𑀼𑀓𑁆𑀔𑀢𑁄 𑀔𑀺𑀧𑁆𑀧𑀁… 𑀅𑀦𑀢𑁆𑀢𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀬𑀸 𑀓𑀸𑀘𑀺 𑀯𑁂𑀤𑀦𑀸…𑀧𑁂… 𑀬𑀁𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁…𑀧𑁂… 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀘𑀓𑁆𑀔𑀼…𑀧𑁂… 𑀚𑀭𑀸𑀫𑀭𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦, 𑀤𑀼𑀓𑁆𑀔𑀁 𑀪𑀬𑀝𑁆𑀞𑁂𑀦, 𑀅𑀦𑀢𑁆𑀢𑀸 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀭𑀽𑀧𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑁂 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀯𑁂𑀤𑀦𑀸, 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸, 𑀯𑀺𑀜𑁆𑀜𑀸𑀡𑀁, 𑀘𑀓𑁆𑀔𑀼…𑀧𑁂… 𑀚𑀭𑀸𑀫𑀭𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦…𑀧𑁂… 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑁂 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁…𑀧𑁂… 𑀯𑀺𑀜𑁆𑀜𑀸𑀡𑀁. 𑀘𑀓𑁆𑀔𑀼…𑀧𑁂… 𑀚𑀭𑀸𑀫𑀭𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑁂 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸.

𑀓𑀢𑀫𑀸 𑀢𑀺𑀓𑁆𑀔𑀧𑀜𑁆𑀜𑀸, 𑀔𑀺𑀧𑁆𑀧𑀁 𑀓𑀺𑀮𑁂𑀲𑁂 𑀙𑀺𑀦𑁆𑀤𑀢𑀻𑀢𑀺 𑀢𑀺𑀓𑁆𑀔𑀧𑀜𑁆𑀜𑀸. 𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀺, 𑀉𑀧𑁆𑀧𑀦𑁆𑀦𑀁 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁, 𑀉𑀧𑁆𑀧𑀦𑁆𑀦𑀁 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁, 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂, 𑀉𑀧𑁆𑀧𑀦𑁆𑀦𑀁 𑀭𑀸𑀕𑀁, 𑀤𑁄𑀲𑀁, 𑀫𑁄𑀳𑀁, 𑀓𑁄𑀥𑀁, 𑀉𑀧𑀦𑀸𑀳𑀁, 𑀫𑀓𑁆𑀔𑀁, 𑀧𑀴𑀸𑀲𑀁, 𑀇𑀲𑁆𑀲𑀁, 𑀫𑀘𑁆𑀙𑀭𑀺𑀬𑀁, 𑀫𑀸𑀬𑀁, 𑀲𑀸𑀞𑁂𑀬𑁆𑀬𑀁, 𑀣𑀫𑁆𑀪𑀁, 𑀲𑀸𑀭𑀫𑁆𑀪𑀁, 𑀫𑀸𑀦𑀁, 𑀅𑀢𑀺𑀫𑀸𑀦𑀁, 𑀫𑀤𑀁, 𑀧𑀫𑀸𑀤𑀁, 𑀲𑀩𑁆𑀩𑁂 𑀓𑀺𑀮𑁂𑀲𑁂, 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑁂, 𑀲𑀩𑁆𑀩𑁂 𑀅𑀪𑀺𑀲𑀗𑁆𑀔𑀸𑀭𑁂, 𑀲𑀩𑁆𑀩𑁂 𑀪𑀯𑀕𑀸𑀫𑀺𑀓𑀫𑁆𑀫𑁂 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀅𑀦𑀪𑀸𑀯𑀁 𑀕𑀫𑁂𑀢𑀻𑀢𑀺 𑀢𑀺𑀓𑁆𑀔𑀧𑀜𑁆𑀜𑀸. 𑀏𑀓𑀲𑁆𑀫𑀺𑀁 𑀆𑀲𑀦𑁂 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀬𑁄, 𑀙 𑀘 𑀅𑀪𑀺𑀜𑁆𑀜𑀸𑀬𑁄 𑀅𑀥𑀺𑀕𑀢𑀸 𑀳𑁄𑀦𑁆𑀢𑀺 𑀲𑀘𑁆𑀙𑀺𑀓𑀢𑀸 𑀧𑀲𑁆𑀲𑀺𑀢𑀸 𑀧𑀜𑁆𑀜𑀸𑀬𑀸𑀢𑀺 𑀢𑀺𑀓𑁆𑀔𑀧𑀜𑁆𑀜𑀸.

𑀓𑀢𑀫𑀸 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸, 𑀇𑀥𑁂𑀓𑀘𑁆𑀘𑁄 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀉𑀩𑁆𑀩𑁂𑀕𑀩𑀳𑀼𑀮𑁄 𑀳𑁄𑀢𑀺 𑀉𑀢𑁆𑀢𑀸𑀲𑀩𑀳𑀼𑀮𑁄 𑀉𑀓𑁆𑀓𑀡𑁆𑀞𑀦𑀩𑀳𑀼𑀮𑁄 𑀅𑀭𑀢𑀺𑀩𑀳𑀼𑀮𑁄 𑀅𑀦𑀪𑀺𑀭𑀢𑀺𑀩𑀳𑀼𑀮𑁄 𑀩𑀳𑀺𑀫𑀼𑀔𑁄 𑀦 𑀭𑀫𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼, 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑁆𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀮𑁄𑀪𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀺𑀚𑁆𑀛𑀢𑀺 𑀧𑀤𑀸𑀮𑁂𑀢𑀻𑀢𑀺 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸. 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑁆𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀤𑁄𑀲𑀓𑁆𑀔𑀦𑁆𑀥𑀁, 𑀫𑁄𑀳𑀓𑁆𑀔𑀦𑁆𑀥𑀁, 𑀓𑁄𑀥𑀁, 𑀉𑀧𑀦𑀸𑀳𑀁…𑀧𑁂… 𑀲𑀩𑁆𑀩𑁂 𑀪𑀯𑀕𑀸𑀫𑀺𑀓𑀫𑁆𑀫𑁂 𑀦𑀺𑀩𑁆𑀩𑀺𑀚𑁆𑀛𑀢𑀺 𑀧𑀤𑀸𑀮𑁂𑀢𑀻𑀢𑀺 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸.

𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀦𑁆𑀢𑀺 𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀯𑀸 𑀛𑀸𑀦𑀗𑁆𑀕𑀯𑀲𑁂𑀦 𑀯𑀸 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀥𑀫𑁆𑀫𑀯𑀺𑀧𑀲𑁆𑀲𑀦𑀁 𑀯𑀺𑀧𑀲𑁆𑀲𑀢𑀺, 𑀏𑀯𑀁 𑀯𑀺𑀧𑀲𑁆𑀲𑀦𑁆𑀢𑁄 𑀅𑀤𑁆𑀥𑀫𑀸𑀲𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀧𑀦 𑀲𑀢𑁆𑀢𑀳𑀺 𑀤𑀺𑀯𑀲𑁂𑀳𑀺. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀫𑀳𑀸𑀧𑀜𑁆𑀜𑀯𑀦𑁆𑀢𑀢𑀭𑁄. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄 𑀳𑀺 𑀲𑀸𑀯𑀓𑀸𑀦𑀁 𑀲𑀫𑁆𑀫𑀲𑀦𑀘𑀸𑀭𑀁 𑀬𑀝𑁆𑀞𑀺𑀓𑁄𑀝𑀺𑀬𑀸 𑀉𑀧𑁆𑀧𑀻𑀴𑁂𑀦𑁆𑀢𑁄 𑀯𑀺𑀬 𑀏𑀓𑀤𑁂𑀲𑀫𑁂𑀯 𑀲𑀫𑁆𑀫𑀲𑀦𑁆𑀢𑁄 𑀲𑀢𑁆𑀢 𑀤𑀺𑀯𑀲𑁂 𑀯𑀸𑀬𑀫𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀞𑀧𑁂𑀢𑁆𑀯𑀸 𑀩𑀼𑀤𑁆𑀥𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀜𑁆𑀘 𑀲𑀫𑁆𑀫𑀲𑀦𑀘𑀸𑀭𑀁 𑀲𑀸𑀯𑀓𑀸𑀦𑀁 𑀲𑀫𑁆𑀫𑀲𑀦𑀘𑀸𑀭𑀁 𑀦𑀺𑀧𑁆𑀧𑀤𑁂𑀲𑀁 𑀲𑀫𑁆𑀫𑀲𑀺. 𑀏𑀯𑀁 𑀲𑀫𑁆𑀫𑀲𑀦𑁆𑀢𑁄 𑀅𑀤𑁆𑀥𑀫𑀸𑀲𑀁 𑀯𑀸𑀬𑀫𑀺. 𑀅𑀭𑀳𑀢𑁆𑀢𑀜𑁆𑀘 𑀓𑀺𑀭 𑀧𑀢𑁆𑀯𑀸 𑀅𑀜𑁆𑀜𑀸𑀲𑀺 𑁋 ‘‘𑀞𑀧𑁂𑀢𑁆𑀯𑀸 𑀩𑀼𑀤𑁆𑀥𑁂 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀘 𑀅𑀜𑁆𑀜𑁄 𑀲𑀸𑀯𑀓𑁄 𑀦𑀸𑀫 𑀧𑀜𑁆𑀜𑀸𑀬 𑀫𑀬𑀸 𑀧𑀢𑁆𑀢𑀩𑁆𑀩𑀁 𑀧𑀢𑁆𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦 𑀪𑀯𑀺𑀲𑁆𑀲𑀢𑀻’’𑀢𑀺. 𑀬𑀣𑀸 𑀳𑀺 𑀧𑀼𑀭𑀺𑀲𑁄 𑀯𑁂𑀴𑀼𑀬𑀝𑁆𑀞𑀺𑀁 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀫𑀳𑀸𑀚𑀝𑀁 𑀯𑁂𑀴𑀼𑀁 𑀤𑀺𑀲𑁆𑀯𑀸 𑀚𑀝𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 𑀧𑀧𑀜𑁆𑀘𑁄 𑀪𑀯𑀺𑀲𑁆𑀲𑀢𑀻𑀢𑀺 𑀅𑀦𑁆𑀢𑀭𑁂𑀦 𑀳𑀢𑁆𑀣𑀁 𑀧𑀯𑁂𑀲𑁂𑀢𑁆𑀯𑀸 𑀲𑀫𑁆𑀧𑀢𑁆𑀢𑀫𑁂𑀯 𑀬𑀝𑁆𑀞𑀺𑀁 𑀫𑀽𑀮𑁂 𑀘 𑀅𑀕𑁆𑀕𑁂 𑀘 𑀙𑀺𑀦𑁆𑀤𑀺𑀢𑁆𑀯𑀸 𑀆𑀤𑀸𑀬 𑀧𑀓𑁆𑀓𑀫𑁂𑀬𑁆𑀬, 𑀲𑁄 𑀓𑀺𑀜𑁆𑀘𑀸𑀧𑀺 𑀧𑀞𑀫𑀢𑀭𑀁 𑀕𑀘𑁆𑀙𑀢𑀺, 𑀬𑀝𑁆𑀞𑀺𑀁 𑀧𑀦 𑀲𑀸𑀭𑀁 𑀯𑀸 𑀉𑀚𑀼𑀁 𑀯𑀸 𑀦 𑀮𑀪𑀢𑀺. 𑀅𑀧𑀭𑁄 𑀘 𑀢𑀣𑀸𑀭𑀽𑀧𑀫𑁂𑀯 𑀯𑁂𑀡𑀼𑀁 𑀤𑀺𑀲𑁆𑀯𑀸 ‘‘𑀲𑀘𑁂 𑀲𑀫𑁆𑀧𑀢𑁆𑀢𑀁 𑀬𑀝𑁆𑀞𑀺𑀁 𑀕𑀡𑁆𑀳𑀺𑀲𑁆𑀲𑀸𑀫𑀺, 𑀲𑀸𑀭𑀁 𑀯𑀸 𑀉𑀚𑀼𑀁 𑀯𑀸 𑀦 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀓𑀘𑁆𑀙𑀁 𑀩𑀦𑁆𑀥𑀺𑀢𑁆𑀯𑀸 𑀫𑀳𑀦𑁆𑀢𑁂𑀦 𑀲𑀢𑁆𑀣𑁂𑀦 𑀯𑁂𑀡𑀼𑀚𑀝𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀸𑀭𑀸 𑀘𑁂𑀯 𑀉𑀚𑀽 𑀘 𑀬𑀝𑁆𑀞𑀺𑀬𑁄 𑀉𑀘𑁆𑀘𑀺𑀦𑀺𑀢𑁆𑀯𑀸 𑀆𑀤𑀸𑀬 𑀧𑀓𑁆𑀓𑀫𑁂𑀬𑁆𑀬. 𑀅𑀬𑀁 𑀓𑀺𑀜𑁆𑀘𑀸𑀧𑀺 𑀧𑀘𑁆𑀙𑀸 𑀕𑀘𑁆𑀙𑀢𑀺, 𑀬𑀝𑁆𑀞𑀺𑀬𑁄 𑀧𑀦 𑀲𑀸𑀭𑀸 𑀘𑁂𑀯 𑀉𑀚𑀽 𑀘 𑀮𑀪𑀢𑀺. 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀣𑁂𑀭𑀸𑀦𑀁 𑀧𑀥𑀸𑀦𑀁.

𑀏𑀯𑀁 𑀧𑀦 𑀅𑀤𑁆𑀥𑀫𑀸𑀲𑀁 𑀯𑀸𑀬𑀫𑀺𑀢𑁆𑀯𑀸 𑀥𑀫𑁆𑀫𑀲𑁂𑀦𑀸𑀧𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀲𑀽𑀓𑀭𑀔𑀢𑀮𑁂𑀡𑀤𑁆𑀯𑀸𑀭𑁂 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀤𑀻𑀖𑀦𑀔𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑀲𑀼𑀢𑁆𑀢𑀦𑁆𑀢𑁂 𑀤𑁂𑀲𑀺𑀬𑀫𑀸𑀦𑁂 𑀤𑀲𑀩𑀮𑀁 𑀩𑀻𑀚𑀬𑀫𑀸𑀦𑁄 𑀞𑀺𑀢𑁄 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀦𑁆𑀦𑀭𑀲𑀫𑁂 𑀤𑀺𑀯𑀲𑁂 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀲𑁆𑀲 𑀫𑀢𑁆𑀣𑀓𑀁 𑀧𑀢𑁆𑀯𑀸 𑀲𑀢𑁆𑀢𑀲𑀝𑁆𑀞𑀺 𑀜𑀸𑀡𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀲𑁄𑀴𑀲𑀯𑀺𑀥𑀁 𑀧𑀜𑁆𑀜𑀁 𑀅𑀦𑀼𑀧𑁆𑀧𑀢𑁆𑀢𑁄.

𑀢𑀢𑁆𑀭𑀺𑀤𑀁, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬𑀸𑀢𑀺 𑀬𑀸 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀁 𑀯𑀺𑀧𑀲𑁆𑀲𑀢𑀻𑀢𑀺 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀸 𑀯𑀼𑀢𑁆𑀢𑀸, 𑀢𑀢𑁆𑀭 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀇𑀤𑀁 𑀳𑁄𑀢𑀺. 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀢𑀁 𑀢𑀁 𑀯𑀺𑀧𑀲𑁆𑀲𑀦𑀸𑀓𑁄𑀝𑁆𑀞𑀸𑀲𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑁯𑁪. 𑀧𑀞𑀫𑁂 𑀛𑀸𑀦𑁂𑀢𑀺 𑀬𑁂 𑀧𑀞𑀫𑁂 𑀛𑀸𑀦𑁂 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀥𑀫𑁆𑀫𑀸. 𑀢𑁆𑀬𑀸𑀲𑁆𑀲𑀸𑀢𑀺 𑀢𑁂 𑀅𑀲𑁆𑀲. 𑀅𑀦𑀼𑀧𑀤𑀯𑀯𑀢𑁆𑀣𑀺𑀢𑀸 𑀳𑁄𑀦𑁆𑀢𑀻𑀢𑀺 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀯𑀯𑀢𑁆𑀣𑀺𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸 𑀜𑀸𑀢𑀸 𑀯𑀺𑀤𑀺𑀢𑀸 𑀳𑁄𑀦𑁆𑀢𑀺. 𑀓𑀣𑀁? 𑀣𑁂𑀭𑁄 𑀳𑀺 𑀢𑁂 𑀥𑀫𑁆𑀫𑁂 𑀑𑀮𑁄𑀓𑁂𑀦𑁆𑀢𑁄 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄 𑀯𑀺𑀢𑀓𑁆𑀓𑁄 𑀯𑀢𑁆𑀢𑀢𑀻𑀢𑀺 𑀚𑀸𑀦𑀸𑀢𑀺. 𑀢𑀣𑀸 𑀅𑀦𑀼𑀫𑀚𑁆𑀚𑀦𑀮𑀓𑁆𑀔𑀡𑁄 𑀯𑀺𑀘𑀸𑀭𑁄, 𑀨𑀭𑀡𑀮𑀓𑁆𑀔𑀡𑀸 𑀧𑀻𑀢𑀺, 𑀲𑀸𑀢𑀮𑀓𑁆𑀔𑀡𑀁 𑀲𑀼𑀔𑀁, 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸, 𑀨𑀼𑀲𑀦𑀮𑀓𑁆𑀔𑀡𑁄 𑀨𑀲𑁆𑀲𑁄 𑀯𑁂𑀤𑀬𑀺𑀢𑀮𑀓𑁆𑀔𑀡𑀸 𑀯𑁂𑀤𑀦𑀸, 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸 𑀲𑀜𑁆𑀜𑀸, 𑀘𑁂𑀢𑀬𑀺𑀢𑀮𑀓𑁆𑀔𑀡𑀸 𑀘𑁂𑀢𑀦𑀸, 𑀯𑀺𑀚𑀸𑀦𑀦𑀮𑀓𑁆𑀔𑀡𑀁 𑀯𑀺𑀜𑁆𑀜𑀸𑀡𑀁, 𑀓𑀢𑁆𑀢𑀼𑀓𑀫𑁆𑀬𑀢𑀸𑀮𑀓𑁆𑀔𑀡𑁄 𑀙𑀦𑁆𑀤𑁄, 𑀅𑀥𑀺𑀫𑁄𑀓𑁆𑀔𑀮𑀓𑁆𑀔𑀡𑁄 𑀅𑀥𑀺𑀫𑁄𑀓𑁆𑀔𑁄, 𑀧𑀕𑁆𑀕𑀸𑀳𑀮𑀓𑁆𑀔𑀡𑀁 𑀯𑀻𑀭𑀺𑀬𑀁 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑀸 𑀲𑀢𑀺, 𑀫𑀚𑁆𑀛𑀢𑁆𑀢𑀮𑀓𑁆𑀔𑀡𑀸 𑀉𑀧𑁂𑀓𑁆𑀔𑀸, 𑀅𑀦𑀼𑀦𑀬𑀫𑀦𑀲𑀺𑀓𑀸𑀭𑀮𑀓𑁆𑀔𑀡𑁄 𑀫𑀦𑀲𑀺𑀓𑀸𑀭𑁄 𑀯𑀢𑁆𑀢𑀢𑀻𑀢𑀺 𑀚𑀸𑀦𑀸𑀢𑀺. 𑀏𑀯𑀁 𑀚𑀸𑀦𑀁 𑀅𑀪𑀺𑀦𑀺𑀭𑁄𑀧𑀦𑀝𑁆𑀞𑁂𑀦 𑀯𑀺𑀢𑀓𑁆𑀓𑀁 𑀲𑀪𑀸𑀯𑀢𑁄 𑀯𑀯𑀢𑁆𑀣𑀧𑁂𑀢𑀺…𑀧𑁂… 𑀅𑀦𑀼𑀦𑀬𑀫𑀦𑀲𑀺𑀓𑀸𑀭𑀡𑀝𑁆𑀞𑁂𑀦 𑀫𑀦𑀲𑀺𑀓𑀸𑀭𑀁 𑀲𑀪𑀸𑀯𑀪𑀸𑀯𑀢𑁄 𑀯𑀯𑀢𑁆𑀣𑀧𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑁆𑀬𑀸𑀲𑁆𑀲 𑀥𑀫𑁆𑀫𑀸 𑀅𑀦𑀼𑀧𑀤𑀯𑀯𑀢𑁆𑀣𑀺𑀢𑀸 𑀳𑁄𑀦𑁆𑀢𑀻’’𑀢𑀺.

𑀯𑀺𑀤𑀺𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀯𑀺𑀤𑀺𑀢𑀸 𑀧𑀸𑀓𑀝𑀸𑀯 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀯𑀺𑀤𑀺𑀢𑀸 𑀉𑀧𑀝𑁆𑀞𑀳𑀦𑁆𑀢𑀻𑀢𑀺 𑀢𑀺𑀝𑁆𑀞𑀫𑀸𑀦𑀸𑀧𑀺 𑀯𑀺𑀤𑀺𑀢𑀸 𑀧𑀸𑀓𑀝𑀸𑀯 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀯𑀺𑀤𑀺𑀢𑀸 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀻𑀢𑀺 𑀦𑀺𑀭𑀼𑀚𑁆𑀛𑀫𑀸𑀦𑀸𑀧𑀺 𑀯𑀺𑀤𑀺𑀢𑀸 𑀧𑀸𑀓𑀝𑀸𑀯 𑀳𑀼𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀏𑀢𑁆𑀣 𑀧𑀦 𑀢𑀁𑀜𑀸𑀡𑀢𑀸 𑀘𑁂𑀯 𑀜𑀸𑀡𑀩𑀳𑀼𑀢𑀸 𑀘 𑀫𑁄𑀘𑁂𑀢𑀩𑁆𑀩𑀸. 𑀬𑀣𑀸 𑀳𑀺 𑀢𑁂𑀦𑁂𑀯 𑀅𑀗𑁆𑀕𑀼𑀮𑀕𑁆𑀕𑁂𑀦 𑀢𑀁 𑀅𑀗𑁆𑀕𑀼𑀮𑀕𑁆𑀕𑀁 𑀦 𑀲𑀓𑁆𑀓𑀸 𑀨𑀼𑀲𑀺𑀢𑀼𑀁, 𑀏𑀯𑀫𑁂𑀯 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑁄 𑀯𑀸 𑀞𑀺𑀢𑀺 𑀯𑀸 𑀪𑀗𑁆𑀕𑁄 𑀯𑀸 𑀦 𑀲𑀓𑁆𑀓𑀸 𑀚𑀸𑀦𑀺𑀢𑀼𑀦𑁆𑀢𑀺. 𑀏𑀯𑀁 𑀢𑀸𑀯 𑀢𑀁𑀜𑀸𑀡𑀢𑀸 𑀫𑁄𑀘𑁂𑀢𑀩𑁆𑀩𑀸. 𑀬𑀤𑀺 𑀧𑀦 𑀤𑁆𑀯𑁂 𑀘𑀺𑀢𑁆𑀢𑀸𑀦𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀏𑀓𑁂𑀦 𑀘𑀺𑀢𑁆𑀢𑁂𑀦 𑀏𑀓𑀲𑁆𑀲 𑀉𑀧𑁆𑀧𑀸𑀤𑁄 𑀯𑀸 𑀞𑀺𑀢𑀺 𑀯𑀸 𑀪𑀗𑁆𑀕𑁄 𑀯𑀸 𑀲𑀓𑁆𑀓𑀸 𑀪𑀯𑁂𑀬𑁆𑀬 𑀚𑀸𑀦𑀺𑀢𑀼𑀁. 𑀤𑁆𑀯𑁂 𑀧𑀦 𑀨𑀲𑁆𑀲𑀸 𑀯𑀸 𑀯𑁂𑀤𑀦𑀸 𑀯𑀸 𑀲𑀜𑁆𑀜𑀸 𑀯𑀸 𑀘𑁂𑀢𑀦𑀸 𑀯𑀸 𑀘𑀺𑀢𑁆𑀢𑀸𑀦𑀺 𑀯𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑀦𑀓𑀸𑀦𑀺 𑀦𑀸𑀫 𑀦𑀢𑁆𑀣𑀺, 𑀏𑀓𑁂𑀓𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀜𑀸𑀡𑀩𑀳𑀼𑀢𑀸 𑀫𑁄𑀘𑁂𑀢𑀩𑁆𑀩𑀸. 𑀏𑀯𑀁 𑀲𑀦𑁆𑀢𑁂 𑀓𑀣𑀁? 𑀫𑀳𑀸𑀣𑁂𑀭𑀲𑁆𑀲 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀲𑁄𑀴𑀲 𑀥𑀫𑁆𑀫𑀸 𑀯𑀺𑀤𑀺𑀢𑀸 𑀧𑀸𑀓𑀝𑀸 𑀳𑁄𑀦𑁆𑀢𑀻𑀢𑀺. 𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀁 𑀧𑀭𑀺𑀕𑁆𑀕𑀳𑀺𑀢𑀢𑀸𑀬. 𑀣𑁂𑀭𑁂𑀦 𑀳𑀺 𑀯𑀢𑁆𑀣𑀼 𑀘𑁂𑀯 𑀆𑀭𑀫𑁆𑀫𑀡𑀜𑁆𑀘 𑀧𑀭𑀺𑀕𑁆𑀕𑀳𑀺𑀢𑀁, 𑀢𑁂𑀦𑀲𑁆𑀲 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀁 𑀆𑀯𑀚𑁆𑀚𑀦𑁆𑀢𑀲𑁆𑀲 𑀉𑀧𑁆𑀧𑀸𑀤𑁄 𑀧𑀸𑀓𑀝𑁄 𑀳𑁄𑀢𑀺, 𑀞𑀸𑀦𑀁 𑀆𑀯𑀚𑁆𑀚𑀦𑁆𑀢𑀲𑁆𑀲 𑀞𑀸𑀦𑀁 𑀧𑀸𑀓𑀝𑀁 𑀳𑁄𑀢𑀺, 𑀪𑁂𑀤𑀁 𑀆𑀯𑀚𑁆𑀚𑀦𑁆𑀢𑀲𑁆𑀲 𑀪𑁂𑀤𑁄 𑀧𑀸𑀓𑀝𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀺𑀤𑀺𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀯𑀺𑀤𑀺𑀢𑀸 𑀉𑀧𑀝𑁆𑀞𑀳𑀦𑁆𑀢𑀺 𑀯𑀺𑀤𑀺𑀢𑀸 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀻’’𑀢𑀺. 𑀅𑀳𑀼𑀢𑁆𑀯𑀸 𑀲𑀫𑁆𑀪𑁄𑀦𑁆𑀢𑀻𑀢𑀺 𑀇𑀫𑀺𑀦𑀸 𑀉𑀤𑀬𑀁 𑀧𑀲𑁆𑀲𑀢𑀺. 𑀳𑀼𑀢𑁆𑀯𑀸 𑀧𑀝𑀺𑀯𑁂𑀦𑁆𑀢𑀻𑀢𑀺 𑀇𑀫𑀺𑀦𑀸 𑀯𑀬𑀁 𑀧𑀲𑁆𑀲𑀢𑀺.

𑀅𑀦𑀼𑀧𑀸𑀬𑁄𑀢𑀺 𑀭𑀸𑀕𑀯𑀲𑁂𑀦 𑀅𑀦𑀼𑀧𑀕𑀫𑀦𑁄 𑀳𑀼𑀢𑁆𑀯𑀸. 𑀅𑀦𑀧𑀸𑀬𑁄𑀢𑀺 𑀧𑀝𑀺𑀖𑀯𑀲𑁂𑀦 𑀅𑀦𑀧𑀕𑀢𑁄. 𑀅𑀦𑀺𑀲𑁆𑀲𑀺𑀢𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁂𑀳𑀺 𑀅𑀦𑀺𑀲𑁆𑀲𑀺𑀢𑁄. 𑀅𑀧𑁆𑀧𑀝𑀺𑀩𑀤𑁆𑀥𑁄𑀢𑀺 𑀙𑀦𑁆𑀤𑀭𑀸𑀕𑁂𑀦 𑀅𑀩𑀤𑁆𑀥𑁄. 𑀯𑀺𑀧𑁆𑀧𑀫𑀼𑀢𑁆𑀢𑁄𑀢𑀺 𑀓𑀸𑀫𑀭𑀸𑀕𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑁄. 𑀯𑀺𑀲𑀁𑀬𑀼𑀢𑁆𑀢𑁄𑀢𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀯𑀸 𑀯𑀺𑀲𑀁𑀬𑀼𑀢𑁆𑀢𑁄. 𑀯𑀺𑀫𑀭𑀺𑀬𑀸𑀤𑀻𑀓𑀢𑁂𑀦𑀸𑀢𑀺 𑀦𑀺𑀫𑁆𑀫𑀭𑀺𑀬𑀸𑀤𑀻𑀓𑀢𑁂𑀦. 𑀘𑁂𑀢𑀲𑀸𑀢𑀺 𑀏𑀯𑀁𑀯𑀺𑀥𑁂𑀦 𑀘𑀺𑀢𑁆𑀢𑁂𑀦 𑀯𑀺𑀳𑀭𑀢𑀺.

𑀢𑀢𑁆𑀣 𑀤𑁆𑀯𑁂 𑀫𑀭𑀺𑀬𑀸𑀤𑀸 𑀓𑀺𑀮𑁂𑀲𑀫𑀭𑀺𑀬𑀸𑀤𑀸 𑀘 𑀆𑀭𑀫𑁆𑀫𑀡𑀫𑀭𑀺𑀬𑀸𑀤𑀸 𑀘. 𑀲𑀘𑁂 𑀳𑀺𑀲𑁆𑀲 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀧𑀯𑀢𑁆𑀢𑁂 𑀲𑁄𑀴𑀲 𑀥𑀫𑁆𑀫𑁂 𑀆𑀭𑀩𑁆𑀪 𑀭𑀸𑀕𑀸𑀤𑀬𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀓𑀺𑀮𑁂𑀲𑀫𑀭𑀺𑀬𑀸𑀤𑀸 𑀢𑁂𑀦 𑀓𑀢𑀸 𑀪𑀯𑁂𑀬𑁆𑀬, 𑀢𑁂𑀲𑀼 𑀧𑀦𑀲𑁆𑀲 𑀏𑀓𑁄𑀧𑀺 𑀦 𑀉𑀧𑁆𑀧𑀦𑁆𑀦𑁄𑀢𑀺 𑀓𑀺𑀮𑁂𑀲𑀫𑀭𑀺𑀬𑀸𑀤𑀸 𑀦𑀢𑁆𑀣𑀺. 𑀲𑀘𑁂 𑀧𑀦𑀲𑁆𑀲 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀧𑀯𑀢𑁆𑀢𑁂 𑀲𑁄𑀴𑀲 𑀥𑀫𑁆𑀫𑁂 𑀆𑀯𑀚𑁆𑀚𑀦𑁆𑀢𑀲𑁆𑀲 𑀏𑀓𑀘𑁆𑀘𑁂 𑀆𑀧𑀸𑀣𑀁 𑀦𑀸𑀕𑀘𑁆𑀙𑁂𑀬𑁆𑀬𑀼𑀁. 𑀏𑀯𑀫𑀲𑁆𑀲 𑀆𑀭𑀫𑁆𑀫𑀡𑀫𑀭𑀺𑀬𑀸𑀤𑀸 𑀪𑀯𑁂𑀬𑁆𑀬𑀼𑀁. 𑀢𑁂 𑀧𑀦𑀲𑁆𑀲 𑀲𑁄𑀴𑀲 𑀥𑀫𑁆𑀫𑁂 𑀆𑀯𑀚𑁆𑀚𑀦𑁆𑀢𑀲𑁆𑀲 𑀆𑀧𑀸𑀣𑀁 𑀅𑀦𑀸𑀕𑀢𑀥𑀫𑁆𑀫𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀆𑀭𑀫𑁆𑀫𑀡𑀫𑀭𑀺𑀬𑀸𑀤𑀸𑀧𑀺 𑀦𑀢𑁆𑀣𑀺.

𑀅𑀧𑀭𑀸𑀧𑀺 𑀤𑁆𑀯𑁂 𑀫𑀭𑀺𑀬𑀸𑀤𑀸 𑀯𑀺𑀓𑁆𑀔𑀫𑁆𑀪𑀦𑀫𑀭𑀺𑀬𑀸𑀤𑀸 𑀘 𑀲𑀫𑀼𑀘𑁆𑀙𑁂𑀤𑀫𑀭𑀺𑀬𑀸𑀤𑀸 𑀘. 𑀢𑀸𑀲𑀼 𑀲𑀫𑀼𑀘𑁆𑀙𑁂𑀤𑀫𑀭𑀺𑀬𑀸𑀤𑀸 𑀉𑀧𑀭𑀺 𑀆𑀕𑀫𑀺𑀲𑁆𑀲𑀢𑀺, 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀯𑀺𑀓𑁆𑀔𑀫𑁆𑀪𑀦𑀫𑀭𑀺𑀬𑀸𑀤𑀸 𑀅𑀥𑀺𑀧𑁆𑀧𑁂𑀢𑀸. 𑀢𑀲𑁆𑀲 𑀯𑀺𑀓𑁆𑀔𑀫𑁆𑀪𑀺𑀢𑀧𑀘𑁆𑀘𑀦𑀻𑀓𑀢𑁆𑀢𑀸 𑀦𑀢𑁆𑀣𑀻𑀢𑀺 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀺.

𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡𑀦𑁆𑀢𑀺 𑀇𑀢𑁄 𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡𑀁. 𑀅𑀜𑁆𑀜𑁂𑀲𑀼 𑀘 𑀲𑀼𑀢𑁆𑀢𑁂𑀲𑀼 ‘‘𑀉𑀢𑁆𑀢𑀭𑀺 𑀦𑀺𑀲𑁆𑀲𑀭𑀡’’𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀯𑀼𑀢𑁆𑀢𑀁, 𑀇𑀥 𑀧𑀦 𑀅𑀦𑀦𑁆𑀢𑀭𑁄 𑀯𑀺𑀲𑁂𑀲𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀩𑁆𑀩𑀳𑀼𑀮𑀻𑀓𑀸𑀭𑀸𑀢𑀺 𑀢𑀲𑁆𑀲 𑀧𑀚𑀸𑀦𑀦𑀲𑁆𑀲 𑀩𑀳𑀼𑀮𑀻𑀓𑀭𑀡𑁂𑀦. 𑀅𑀢𑁆𑀣𑀺𑀢𑁆𑀯𑁂𑀯𑀲𑁆𑀲 𑀳𑁄𑀢𑀻𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀅𑀢𑁆𑀣𑀻𑀢𑀺𑀬𑁂𑀯 𑀤𑀴𑁆𑀳𑀢𑀭𑀁 𑀳𑁄𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀯𑀸𑀭𑁂𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀤𑀼𑀢𑀺𑀬𑀯𑀸𑀭𑁂 𑀧𑀦 𑀲𑀫𑁆𑀧𑀲𑀸𑀤𑀦𑀝𑁆𑀞𑁂𑀦 𑀲𑀫𑁆𑀧𑀲𑀸𑀤𑁄. 𑀲𑀪𑀸𑀯𑀢𑁄 𑀯𑀯𑀢𑁆𑀣𑀧𑁂𑀢𑀺.

𑀘𑀢𑀼𑀢𑁆𑀣𑀯𑀸𑀭𑁂 𑀉𑀧𑁂𑀓𑁆𑀔𑀸𑀢𑀺 𑀲𑀼𑀔𑀝𑁆𑀞𑀸𑀦𑁂 𑀯𑁂𑀤𑀦𑀼𑀧𑁂𑀓𑁆𑀔𑀸𑀯. 𑀧𑀲𑁆𑀲𑀤𑁆𑀥𑀢𑁆𑀢𑀸 𑀘𑁂𑀢𑀲𑁄 𑀅𑀦𑀸𑀪𑁄𑀕𑁄𑀢𑀺 𑀬𑁄 𑀲𑁄 ‘‘𑀬𑀤𑁂𑀯 𑀢𑀢𑁆𑀣 𑀲𑀼𑀔’’𑀦𑁆𑀢𑀺 𑀘𑁂𑀢𑀲𑁄 𑀆𑀪𑁄𑀕𑁄, 𑀏𑀢𑁂𑀦𑁂𑀢𑀁 𑀑𑀴𑀸𑀭𑀺𑀓𑀫𑀓𑁆𑀔𑀸𑀬𑀢𑀻𑀢𑀺 𑀏𑀯𑀁 𑀧𑀲𑁆𑀲𑀤𑁆𑀥𑀢𑁆𑀢𑀸 𑀘𑁂𑀢𑀲𑁄 𑀅𑀦𑀸𑀪𑁄𑀕𑁄 𑀯𑀼𑀢𑁆𑀢𑁄, 𑀢𑀲𑁆𑀲 𑀅𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀻𑀢𑀺 𑀧𑀭𑀺𑀲𑀼𑀤𑁆𑀥𑀸𑀲𑀢𑀺𑀬𑁂𑀯. 𑀉𑀧𑁂𑀓𑁆𑀔𑀸𑀧𑀺 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁂𑀓𑁆𑀔𑀸.

𑁯𑁫. 𑀲𑀢𑁄 𑀯𑀼𑀝𑁆𑀞𑀳𑀢𑀻𑀢𑀺 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀜𑀸𑀡𑁂𑀦 𑀲𑀫𑁆𑀧𑀚𑀸𑀦𑁄 𑀳𑀼𑀢𑁆𑀯𑀸 𑀯𑀼𑀝𑁆𑀞𑀸𑀢𑀺. 𑀢𑁂 𑀥𑀫𑁆𑀫𑁂 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀬𑀲𑁆𑀫𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑁂 𑀩𑀼𑀤𑁆𑀥𑀸𑀦𑀁𑀬𑁂𑀯 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀸 𑀳𑁄𑀢𑀺, 𑀦 𑀲𑀸𑀯𑀓𑀸𑀦𑀁, 𑀢𑀲𑁆𑀫𑀸 𑀏𑀢𑁆𑀣 𑀓𑀮𑀸𑀧𑀯𑀺𑀧𑀲𑁆𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳.

𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻𑀢𑀺 𑀫𑀕𑁆𑀕𑀧𑀜𑁆𑀜𑀸𑀬 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀤𑀺𑀲𑁆𑀯𑀸 𑀘𑀢𑁆𑀢𑀸𑀭𑁄 𑀆𑀲𑀯𑀸 𑀔𑀻𑀡𑀸 𑀳𑁄𑀦𑁆𑀢𑀺. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀆𑀳𑀭𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀯𑀸𑀭𑁄𑀧𑀺 𑀅𑀢𑁆𑀣𑀺, 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀦𑁆𑀦𑀯𑀸𑀭𑁄𑀧𑀺. 𑀅𑀭𑀳𑀢𑁆𑀢𑀁 𑀧𑀢𑁆𑀢𑀯𑀸𑀭𑁄 𑀇𑀥 𑀕𑀳𑀺𑀢𑁄, 𑀦𑀺𑀭𑁄𑀥𑀁 𑀧𑀦 𑀘𑀺𑀡𑁆𑀡𑀯𑀲𑀺𑀢𑀸𑀬 𑀅𑀧𑀭𑀸𑀧𑀭𑀁 𑀲𑀫𑀸𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀯𑀤𑀦𑁆𑀢𑀺.

𑀢𑀢𑁆𑀣𑀲𑁆𑀲 𑀬𑀲𑁆𑀫𑀺𑀁 𑀓𑀸𑀮𑁂 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀲𑀻𑀲𑀁 𑀳𑁄𑀢𑀺, 𑀦𑀺𑀭𑁄𑀥𑀲𑁆𑀲 𑀯𑀸𑀭𑁄 𑀆𑀕𑀘𑁆𑀙𑀢𑀺, 𑀨𑀮𑀲𑀫𑀸𑀧𑀢𑁆𑀢𑀺 𑀕𑀽𑀴𑁆𑀳𑀸 𑀳𑁄𑀢𑀺. 𑀬𑀲𑁆𑀫𑀺𑀁 𑀓𑀸𑀮𑁂 𑀨𑀮𑀲𑀫𑀸𑀧𑀢𑁆𑀢𑀺 𑀲𑀻𑀲𑀁 𑀳𑁄𑀢𑀺, 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀯𑀸𑀭𑁄 𑀆𑀕𑀘𑁆𑀙𑀢𑀺, 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀕𑀽𑀴𑁆𑀳𑀸 𑀳𑁄𑀢𑀺. 𑀚𑀫𑁆𑀩𑀼𑀤𑀻𑀧𑀯𑀸𑀲𑀺𑀦𑁄 𑀣𑁂𑀭𑀸 𑀧𑀦 𑀯𑀤𑀦𑁆𑀢𑀺 ‘‘𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀆𑀳𑀭𑀺𑀢𑁆𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀲𑀘𑁆𑀙𑀺𑀓𑀢𑁆𑀯𑀸 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀺, 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀬 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄’’𑀢𑀺. 𑀢𑁂 𑀥𑀫𑁆𑀫𑁂𑀢𑀺 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀧𑀯𑀢𑁆𑀢𑁂 𑀢𑀺𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀥𑀫𑁆𑀫𑁂, 𑀳𑁂𑀝𑁆𑀞𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀁 𑀧𑀯𑀢𑁆𑀢𑀥𑀫𑁆𑀫𑁂 𑀯𑀸. 𑀢𑁂𑀧𑀺 𑀳𑀺 𑀇𑀫𑀲𑁆𑀫𑀺𑀁 𑀯𑀸𑀭𑁂 𑀯𑀺𑀧𑀲𑁆𑀲𑀺𑀢𑀩𑁆𑀩𑀥𑀫𑁆𑀫𑀸𑀯, 𑀢𑀲𑁆𑀫𑀸 𑀢𑁂 𑀯𑀸 𑀯𑀺𑀧𑀲𑁆𑀲𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁯𑁭. 𑀯𑀲𑀺𑀧𑁆𑀧𑀢𑁄𑀢𑀺 𑀘𑀺𑀡𑁆𑀡𑀯𑀲𑀺𑀢𑀁 𑀧𑀢𑁆𑀢𑁄. 𑀧𑀸𑀭𑀫𑀺𑀧𑁆𑀧𑀢𑁆𑀢𑁄𑀢𑀺 𑀦𑀺𑀧𑁆𑀨𑀢𑁆𑀢𑀺𑀁 𑀧𑀢𑁆𑀢𑁄. 𑀑𑀭𑀲𑁄𑀢𑀺𑀆𑀤𑀻𑀲𑀼 𑀣𑁂𑀭𑁄 𑀪𑀕𑀯𑀢𑁄 𑀉𑀭𑁂 𑀦𑀺𑀩𑁆𑀩𑀢𑁆𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 𑀚𑀸𑀢𑁄𑀢𑀺 𑀑𑀭𑀲𑁄, 𑀫𑀼𑀔𑁂𑀦 𑀧𑀪𑀸𑀯𑀺𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀚𑀸𑀢𑁄𑀢𑀺 𑀫𑀼𑀔𑀢𑁄 𑀚𑀸𑀢𑁄, 𑀥𑀫𑁆𑀫𑁂𑀦 𑀧𑀦 𑀚𑀸𑀢𑀢𑁆𑀢𑀸 𑀦𑀺𑀫𑁆𑀫𑀺𑀢𑀢𑁆𑀢𑀸 𑀥𑀫𑁆𑀫𑀚𑁄 𑀥𑀫𑁆𑀫𑀦𑀺𑀫𑁆𑀫𑀺𑀢𑁄, 𑀥𑀫𑁆𑀫𑀤𑀸𑀬𑀲𑁆𑀲 𑀆𑀤𑀺𑀬𑀦𑀢𑁄 𑀥𑀫𑁆𑀫𑀤𑀸𑀬𑀸𑀤𑁄, 𑀆𑀫𑀺𑀲𑀤𑀸𑀬𑀲𑁆𑀲 𑀅𑀦𑀸𑀤𑀺𑀬𑀦𑀢𑁄 𑀦𑁄 𑀆𑀫𑀺𑀲𑀤𑀸𑀬𑀸𑀤𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀅𑀦𑀼𑀧𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀙𑀩𑁆𑀩𑀺𑀲𑁄𑀥𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁮. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀙𑀩𑁆𑀩𑀺𑀲𑁄𑀥𑀦𑀲𑀼𑀢𑁆𑀢𑀁. 𑀢𑀢𑁆𑀣 𑀔𑀻𑀡𑀸 𑀚𑀸𑀢𑀻𑀢𑀺𑀆𑀤𑀻𑀲𑀼 𑀏𑀓𑁂𑀦𑀸𑀧𑀺 𑀧𑀤𑁂𑀦 𑀅𑀜𑁆𑀜𑀸 𑀩𑁆𑀬𑀸𑀓𑀢𑀸𑀯 𑀳𑁄𑀢𑀺, 𑀤𑁆𑀯𑀻𑀳𑀺𑀧𑀺. 𑀇𑀥 𑀧𑀦 𑀘𑀢𑀽𑀳𑀺 𑀧𑀤𑁂𑀳𑀺 𑀅𑀜𑁆𑀜𑀩𑁆𑀬𑀸𑀓𑀭𑀡𑀁 𑀆𑀕𑀢𑀁. 𑀤𑀺𑀝𑁆𑀞𑁂 𑀤𑀺𑀝𑁆𑀞𑀯𑀸𑀤𑀺𑀢𑀸𑀢𑀺𑀆𑀤𑀻𑀲𑀼 𑀬𑀸𑀬 𑀘𑁂𑀢𑀦𑀸𑀬 𑀤𑀺𑀝𑁆𑀞𑁂 𑀤𑀺𑀝𑁆𑀞𑀁 𑀫𑁂𑀢𑀺 𑀯𑀤𑀢𑀺, 𑀲𑀸 𑀤𑀺𑀝𑁆𑀞𑁂 𑀤𑀺𑀝𑁆𑀞𑀯𑀸𑀤𑀺𑀢𑀸 𑀦𑀸𑀫. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀫𑀦𑀼𑀥𑀫𑁆𑀫𑁄𑀢𑀺 𑀅𑀬𑀁 𑀲𑀪𑀸𑀯𑁄. 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀦𑁆𑀢𑀺 𑀦 𑀓𑁂𑀯𑀮𑀁 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀁, 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀧𑀦𑀲𑁆𑀲 𑀲𑀩𑁆𑀩𑁄𑀧𑀺 𑀔𑀻𑀡𑀸𑀲𑀯𑀲𑁆𑀲 𑀲𑀓𑁆𑀓𑀸𑀭𑁄 𑀓𑀸𑀢𑀩𑁆𑀩𑁄. 𑀉𑀢𑁆𑀢𑀭𑀺𑀁 𑀧𑀜𑁆𑀳𑁄𑀢𑀺 𑀲𑀘𑁂 𑀧𑀦𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑁂𑀦 𑀅𑀲𑀦𑁆𑀢𑀼𑀝𑁆𑀞𑀸 𑀳𑁄𑀣, 𑀉𑀢𑁆𑀢𑀭𑀺𑀫𑁆𑀧𑀺 𑀅𑀬𑀁 𑀧𑀜𑁆𑀳𑁄 𑀧𑀼𑀘𑁆𑀙𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀇𑀢𑁄 𑀧𑀭𑁂𑀲𑀼𑀧𑀺 𑀢𑀻𑀲𑀼 𑀯𑀸𑀭𑁂𑀲𑀼 𑀅𑀬𑀫𑁂𑀯 𑀦𑀬𑁄.

𑁯𑁯. 𑀅𑀩𑀮𑀦𑁆𑀢𑀺 𑀤𑀼𑀩𑁆𑀩𑀮𑀁. 𑀯𑀺𑀭𑀸𑀕𑀼𑀦𑀦𑁆𑀢𑀺 𑀯𑀺𑀕𑀘𑁆𑀙𑀦𑀲𑀪𑀸𑀯𑀁. 𑀅𑀦𑀲𑁆𑀲𑀸𑀲𑀺𑀓𑀦𑁆𑀢𑀺 𑀅𑀲𑁆𑀲𑀸𑀲𑀯𑀺𑀭𑀳𑀺𑀢𑀁. 𑀉𑀧𑀸𑀬𑀽𑀧𑀸𑀤𑀸𑀦𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄 𑀳𑀺 𑀢𑁂𑀪𑀽𑀫𑀓𑀥𑀫𑁆𑀫𑁂 𑀉𑀧𑁂𑀦𑁆𑀢𑀻𑀢𑀺 𑀉𑀧𑀸𑀬𑀸, 𑀉𑀧𑀸𑀤𑀺𑀬𑀦𑁆𑀢𑀻𑀢𑀺 𑀉𑀧𑀸𑀤𑀸𑀦𑀸. 𑀘𑁂𑀢𑀲𑁄 𑀅𑀤𑀺𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸𑀢𑀺𑀧𑀺 𑀢𑀸𑀲𑀁𑀬𑁂𑀯 𑀦𑀸𑀫𑀁. 𑀘𑀺𑀢𑁆𑀢𑀜𑁆𑀳𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀲𑀓𑁆𑀓𑀸𑀬𑀥𑀫𑁆𑀫𑁂𑀲𑀼 𑀢𑀺𑀝𑁆𑀞𑀢𑀺 𑀅𑀥𑀺𑀢𑀺𑀝𑁆𑀞𑀢𑀻𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀸, 𑀢𑀸𑀳𑀺 𑀢𑀁 𑀅𑀪𑀺𑀦𑀺𑀯𑀺𑀲𑀢𑀻𑀢𑀺 𑀅𑀪𑀺𑀦𑀺𑀯𑁂𑀲𑀸, 𑀢𑀸𑀳𑀺𑀬𑁂𑀯 𑀢𑀁 𑀅𑀦𑀼𑀲𑁂𑀢𑀻𑀢𑀺 𑀅𑀦𑀼𑀲𑀬𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀔𑀬𑀸 𑀯𑀺𑀭𑀸𑀕𑀸𑀢𑀺𑀆𑀤𑀻𑀲𑀼 𑀔𑀬𑁂𑀦 𑀯𑀺𑀭𑀸𑀕𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀸𑀦𑀺 𑀘𑁂𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑁂𑀯.

𑁧𑁦𑁦. 𑀧𑀣𑀯𑀻𑀥𑀸𑀢𑀽𑀢𑀺 𑀧𑀢𑀺𑀝𑁆𑀞𑀸𑀦𑀥𑀸𑀢𑀼. 𑀆𑀧𑁄𑀥𑀸𑀢𑀽𑀢𑀺 𑀆𑀩𑀦𑁆𑀥𑀦𑀥𑀸𑀢𑀼. 𑀢𑁂𑀚𑁄𑀥𑀸𑀢𑀽𑀢𑀺 𑀧𑀭𑀺𑀧𑀸𑀘𑀦𑀥𑀸𑀢𑀼. 𑀯𑀸𑀬𑁄𑀥𑀸𑀢𑀽𑀢𑀺 𑀯𑀺𑀢𑁆𑀣𑀫𑁆𑀪𑀦𑀥𑀸𑀢𑀼. 𑀆𑀓𑀸𑀲𑀥𑀸𑀢𑀽𑀢𑀺 𑀅𑀲𑀫𑁆𑀨𑀼𑀝𑁆𑀞𑀥𑀸𑀢𑀼. 𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀯𑀺𑀚𑀸𑀦𑀦𑀥𑀸𑀢𑀼. 𑀦 𑀅𑀦𑀢𑁆𑀢𑀢𑁄 𑀉𑀧𑀕𑀘𑁆𑀙𑀺𑀦𑁆𑀢𑀺 𑀅𑀳𑀁 𑀅𑀢𑁆𑀢𑀸𑀢𑀺 𑀅𑀢𑁆𑀢𑀓𑁄𑀝𑁆𑀞𑀸𑀲𑁂𑀦 𑀦 𑀉𑀧𑀕𑀫𑀺𑀁. 𑀦 𑀘 𑀧𑀣𑀯𑀻𑀥𑀸𑀢𑀼𑀦𑀺𑀲𑁆𑀲𑀺𑀢𑀦𑁆𑀢𑀺 𑀧𑀣𑀯𑀻𑀥𑀸𑀢𑀼𑀦𑀺𑀲𑁆𑀲𑀺𑀢𑀸 𑀲𑁂𑀲𑀥𑀸𑀢𑀼𑀬𑁄 𑀘 𑀉𑀧𑀸𑀤𑀸𑀭𑀽𑀧𑀜𑁆𑀘 𑀅𑀭𑀽𑀧𑀓𑁆𑀔𑀦𑁆𑀥𑀸 𑀘. 𑀢𑁂𑀧𑀺 𑀳𑀺 𑀦𑀺𑀲𑁆𑀲𑀺𑀢𑀯𑀢𑁆𑀣𑀼𑀭𑀽𑀧𑀸𑀦𑀁 𑀧𑀣𑀯𑀻𑀥𑀸𑀢𑀼𑀦𑀺𑀲𑁆𑀲𑀺𑀢𑀢𑁆𑀢𑀸 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀧𑀣𑀯𑀻𑀥𑀸𑀢𑀼𑀦𑀺𑀲𑁆𑀲𑀺𑀢𑀸𑀯. 𑀢𑀲𑁆𑀫𑀸 ‘‘𑀦 𑀘 𑀧𑀣𑀯𑀻𑀥𑀸𑀢𑀼𑀦𑀺𑀲𑁆𑀲𑀺𑀢’’𑀦𑁆𑀢𑀺 𑀯𑀤𑀦𑁆𑀢𑁄 𑀲𑁂𑀲𑀭𑀽𑀧𑀸𑀭𑀽𑀧𑀥𑀫𑁆𑀫𑁂𑀧𑀺 𑀅𑀢𑁆𑀢𑀢𑁄 𑀦 𑀉𑀧𑀕𑀘𑁆𑀙𑀺𑀦𑁆𑀢𑀺 𑀯𑀤𑀢𑀺. 𑀆𑀓𑀸𑀲𑀥𑀸𑀢𑀼𑀦𑀺𑀲𑁆𑀲𑀺𑀢𑀧𑀤𑁂 𑀧𑀦 𑀅𑀯𑀺𑀦𑀺𑀩𑁆𑀪𑁄𑀕𑀯𑀲𑁂𑀦 𑀲𑀩𑁆𑀩𑀫𑁆𑀧𑀺 𑀪𑀽𑀢𑀼𑀧𑀸𑀤𑀸𑀭𑀽𑀧𑀁 𑀆𑀓𑀸𑀲𑀥𑀸𑀢𑀼𑀦𑀺𑀲𑁆𑀲𑀺𑀢𑀁 𑀦𑀸𑀫, 𑀢𑀣𑀸 𑀢𑀁𑀦𑀺𑀲𑁆𑀲𑀺𑀢𑀭𑀽𑀧𑀯𑀢𑁆𑀣𑀼𑀓𑀸 𑀅𑀭𑀽𑀧𑀓𑁆𑀔𑀦𑁆𑀥𑀸. 𑀏𑀯𑀁 𑀇𑀥𑀸𑀧𑀺 𑀭𑀽𑀧𑀸𑀭𑀽𑀧𑀁 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀯𑀺𑀜𑁆𑀜𑀸𑀡𑀥𑀸𑀢𑀼𑀦𑀺𑀲𑁆𑀲𑀺𑀢𑀧𑀤𑁂 𑀧𑀦 𑀲𑀳𑀚𑀸𑀢𑀸 𑀢𑀬𑁄 𑀔𑀦𑁆𑀥𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀜𑁆𑀘 𑀯𑀺𑀜𑁆𑀜𑀸𑀡𑀥𑀸𑀢𑀼𑀦𑀺𑀲𑁆𑀲𑀺𑀢𑀦𑁆𑀢𑀺 𑀭𑀽𑀧𑀸𑀭𑀽𑀧𑀁 𑀕𑀳𑀺𑀢𑀫𑁂𑀯 𑀳𑁄𑀢𑀺.

𑁧𑁦𑁧. 𑀭𑀽𑀧𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀏𑀢𑁆𑀣 𑀬𑀁 𑀅𑀢𑀻𑀢𑁂 𑀘𑀓𑁆𑀔𑀼𑀤𑁆𑀯𑀸𑀭𑀲𑁆𑀲 𑀆𑀧𑀸𑀣𑀁 𑀆𑀕𑀦𑁆𑀢𑁆𑀯𑀸 𑀦𑀺𑀭𑀼𑀤𑁆𑀥𑀁, 𑀬𑀜𑁆𑀘 𑀅𑀦𑀸𑀕𑀢𑁂 𑀆𑀧𑀸𑀣𑀁 𑀆𑀕𑀦𑁆𑀢𑁆𑀯𑀸 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀬𑀫𑁆𑀧𑀺 𑀏𑀢𑀭𑀳𑀺 𑀆𑀕𑀦𑁆𑀢𑁆𑀯𑀸 𑀦𑀺𑀭𑀼𑀤𑁆𑀥𑀁, 𑀢𑀁 𑀲𑀩𑁆𑀩𑀁 𑀭𑀽𑀧𑀁 𑀦𑀸𑀫. 𑀬𑀁 𑀧𑀦 𑀅𑀢𑀻𑀢𑁂𑀧𑀺 𑀆𑀧𑀸𑀣𑀁 𑀅𑀦𑀸𑀕𑀦𑁆𑀢𑁆𑀯𑀸 𑀦𑀺𑀭𑀼𑀤𑁆𑀥𑀁, 𑀅𑀦𑀸𑀕𑀢𑁂𑀧𑀺 𑀅𑀦𑀸𑀕𑀦𑁆𑀢𑁆𑀯𑀸 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀏𑀢𑀭𑀳𑀺𑀧𑀺 𑀅𑀦𑀸𑀕𑀦𑁆𑀢𑁆𑀯𑀸 𑀦𑀺𑀭𑀼𑀤𑁆𑀥𑀁, 𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑀥𑀫𑁆𑀫𑁂𑀲𑀼 𑀲𑀗𑁆𑀕𑀳𑀺𑀢𑀦𑁆𑀢𑀺 𑀯𑀼𑀢𑁆𑀢𑁂 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁄 𑀆𑀳 𑁋 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀤𑁆𑀯𑀺𑀥𑀸 𑀓𑀭𑁄𑀣, 𑀉𑀧𑀭𑀺 𑀙𑀦𑁆𑀤𑁄𑀯𑀸𑀭𑁂 𑀓𑀺𑀦𑁆𑀢𑀺 𑀓𑀭𑀺𑀲𑁆𑀲𑀣, 𑀦𑀬𑀺𑀤𑀁 𑀮𑀩𑁆𑀪𑀢𑀻’’𑀢𑀺. 𑀢𑀲𑁆𑀫𑀸 𑀢𑀻𑀲𑀼 𑀓𑀸𑀮𑁂𑀲𑀼 𑀆𑀧𑀸𑀣𑀁 𑀆𑀕𑀢𑀁 𑀯𑀸 𑀅𑀦𑀸𑀕𑀢𑀁 𑀯𑀸 𑀲𑀩𑁆𑀩𑀫𑁆𑀧𑀺 𑀢𑀁 𑀭𑀽𑀧𑀫𑁂𑀯, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀢𑀬𑁄 𑀔𑀦𑁆𑀥𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑀥𑀫𑁆𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀯𑀺𑀜𑁆𑀜𑀸𑀢𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀽’’𑀢𑀺. 𑀙𑀦𑁆𑀤𑁄𑀢𑀺 𑀢𑀡𑁆𑀳𑀸𑀙𑀦𑁆𑀤𑁄. 𑀭𑀸𑀕𑁄𑀢𑀺 𑀲𑁆𑀯𑁂𑀯 𑀭𑀚𑁆𑀚𑀦𑀯𑀲𑁂𑀦 𑀭𑀸𑀕𑁄. 𑀦𑀦𑁆𑀤𑀻𑀢𑀺 𑀲𑁆𑀯𑁂𑀯 𑀅𑀪𑀺𑀦𑀦𑁆𑀤𑀦𑀯𑀲𑁂𑀦 𑀦𑀦𑁆𑀤𑀻. 𑀢𑀡𑁆𑀳𑀸𑀢𑀺 𑀲𑁆𑀯𑁂𑀯 𑀢𑀡𑁆𑀳𑀸𑀬𑀦𑀯𑀲𑁂𑀦 𑀢𑀡𑁆𑀳𑀸. 𑀲𑁂𑀲𑀤𑁆𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁧𑁦𑁨. 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀦𑀼𑀲𑀬𑀸𑀢𑀺 𑀏𑀢𑁆𑀣 𑀅𑀳𑀗𑁆𑀓𑀸𑀭𑁄 𑀫𑀸𑀦𑁄, 𑀫𑀫𑀗𑁆𑀓𑀸𑀭𑁄 𑀢𑀡𑁆𑀳𑀸, 𑀲𑁆𑀯𑁂𑀯 𑀫𑀸𑀦𑀸𑀦𑀼𑀲𑀬𑁄. 𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬𑀸𑀢𑀺 𑀇𑀤𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑁆𑀘 𑀅𑀯𑀢𑁆𑀯𑀸 𑀓𑀲𑁆𑀫𑀸 𑀯𑀼𑀢𑁆𑀢𑀁? 𑀪𑀺𑀓𑁆𑀔𑀽 𑀮𑁄𑀓𑀺𑀬𑀥𑀫𑁆𑀫𑀁 𑀦 𑀧𑀼𑀘𑁆𑀙𑀦𑁆𑀢𑀺, 𑀮𑁄𑀓𑀼𑀢𑁆𑀢𑀭𑀫𑁂𑀯 𑀧𑀼𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀧𑀼𑀘𑁆𑀙𑀺𑀢𑀧𑀜𑁆𑀳𑀁𑀬𑁂𑀯 𑀓𑀣𑁂𑀦𑁆𑀢𑁄 𑀏𑀯𑀫𑀸𑀳. 𑀏𑀓𑀯𑀺𑀲𑁆𑀲𑀚𑁆𑀚𑀺𑀢𑀲𑀼𑀢𑁆𑀢𑀁 𑀦𑀸𑀫𑁂𑀢𑀁, 𑀙𑀩𑁆𑀩𑀺𑀲𑁄𑀥𑀦𑀦𑁆𑀢𑀺𑀧𑀺𑀲𑁆𑀲 𑀦𑀸𑀫𑀁. 𑀏𑀢𑁆𑀣 𑀳𑀺 𑀘𑀢𑁆𑀢𑀸𑀭𑁄 𑀯𑁄𑀳𑀸𑀭𑀸 𑀧𑀜𑁆𑀘 𑀔𑀦𑁆𑀥𑀸 𑀙 𑀥𑀸𑀢𑀼𑀬𑁄 𑀙 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺 𑀅𑀢𑁆𑀢𑀦𑁄 𑀲𑀯𑀺𑀜𑁆𑀜𑀸𑀡𑀓𑀓𑀸𑀬𑁄 𑀧𑀭𑁂𑀲𑀁 𑀲𑀯𑀺𑀜𑁆𑀜𑀸𑀡𑀓𑀓𑀸𑀬𑁄𑀢𑀺 𑀇𑀫𑁂 𑀙 𑀓𑁄𑀝𑁆𑀞𑀸𑀲𑀸 𑀯𑀺𑀲𑀼𑀤𑁆𑀥𑀸, 𑀢𑀲𑁆𑀫𑀸 ‘‘𑀙𑀩𑁆𑀩𑀺𑀲𑁄𑀥𑀦𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀭𑀲𑀫𑀼𑀤𑁆𑀤𑀯𑀸𑀲𑀺𑀢𑁆𑀣𑁂𑀭𑀸 𑀧𑀦 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀯𑀺𑀜𑁆𑀜𑀸𑀡𑀓𑀓𑀸𑀬𑀁 𑀏𑀓𑀫𑁂𑀯 𑀓𑀢𑁆𑀯𑀸 𑀘𑀢𑀽𑀳𑀺 𑀆𑀳𑀸𑀭𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀙 𑀓𑁄𑀝𑁆𑀞𑀸𑀲𑁂 𑀯𑀤𑀦𑁆𑀢𑀺.

𑀇𑀫𑁂 𑀧𑀦 𑀙 𑀓𑁄𑀝𑁆𑀞𑀸𑀲𑀸 ‘‘𑀓𑀺𑀁 𑀢𑁂 𑀅𑀥𑀺𑀕𑀢𑀁, 𑀓𑀺𑀦𑁆𑀢𑀺 𑀢𑁂 𑀅𑀥𑀺𑀕𑀢𑀁, 𑀓𑀤𑀸 𑀢𑁂 𑀅𑀥𑀺𑀕𑀢𑀁, 𑀓𑀢𑁆𑀣 𑀢𑁂 𑀅𑀥𑀺𑀕𑀢𑀁, 𑀓𑀢𑀫𑁂 𑀢𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀓𑀢𑀫𑁂𑀲𑀁 𑀢𑁆𑀯𑀁 𑀥𑀫𑁆𑀫𑀸𑀦𑀁 𑀮𑀸𑀪𑀻’’𑀢𑀺 (𑀧𑀸𑀭𑀸. 𑁧𑁯𑁮) 𑀏𑀯𑀁 𑀯𑀺𑀦𑀬𑀦𑀺𑀤𑁆𑀤𑁂𑀲𑀧𑀭𑀺𑀬𑀸𑀬𑁂𑀦 𑀲𑁄𑀥𑁂𑀢𑀩𑁆𑀩𑀸.

𑀏𑀢𑁆𑀣 𑀳𑀺 𑀓𑀺𑀁 𑀢𑁂 𑀅𑀥𑀺𑀕𑀢𑀦𑁆𑀢𑀺 𑀅𑀥𑀺𑀕𑀫𑀧𑀼𑀘𑁆𑀙𑀸, 𑀛𑀸𑀦𑀯𑀺𑀫𑁄𑀓𑁆𑀔𑀸𑀤𑀻𑀲𑀼 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀻𑀲𑀼 𑀯𑀸 𑀓𑀺𑀁 𑀢𑀬𑀸 𑀅𑀥𑀺𑀕𑀢𑀁. 𑀓𑀺𑀦𑁆𑀢𑀺 𑀢𑁂 𑀅𑀥𑀺𑀕𑀢𑀦𑁆𑀢𑀺 𑀉𑀧𑀸𑀬𑀧𑀼𑀘𑁆𑀙𑀸. 𑀅𑀬𑀜𑁆𑀳𑀺 𑀏𑀢𑁆𑀣𑀸𑀥𑀺𑀧𑁆𑀧𑀸𑀬𑁄 𑁋 𑀓𑀺𑀁 𑀢𑀬𑀸 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀥𑀼𑀭𑀁 𑀓𑀢𑁆𑀯𑀸 𑀅𑀥𑀺𑀕𑀢𑀁, 𑀤𑀼𑀓𑁆𑀔𑀸𑀦𑀢𑁆𑀢𑀮𑀓𑁆𑀔𑀡𑁂𑀲𑀼 𑀅𑀜𑁆𑀜𑀢𑀭𑀁 𑀯𑀸, 𑀓𑀺𑀁 𑀯𑀸 𑀲𑀫𑀸𑀥𑀺𑀯𑀲𑁂𑀦 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸, 𑀉𑀤𑀸𑀳𑀼 𑀯𑀺𑀧𑀲𑁆𑀲𑀦𑀸𑀯𑀲𑁂𑀦, 𑀢𑀣𑀸 𑀓𑀺𑀁 𑀭𑀽𑀧𑁂 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸, 𑀉𑀤𑀸𑀳𑀼 𑀅𑀭𑀽𑀧𑁂, 𑀓𑀺𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸, 𑀉𑀤𑀸𑀳𑀼 𑀩𑀳𑀺𑀤𑁆𑀥𑀸𑀢𑀺. 𑀓𑀤𑀸 𑀢𑁂 𑀅𑀥𑀺𑀕𑀢𑀦𑁆𑀢𑀺 𑀓𑀸𑀮𑀧𑀼𑀘𑁆𑀙𑀸, 𑀧𑀼𑀩𑁆𑀩𑀡𑁆𑀳𑀫𑀚𑁆𑀛𑀦𑁆𑀳𑀺𑀓𑀸𑀤𑀻𑀲𑀼 𑀓𑀢𑀭𑀲𑁆𑀫𑀺𑀁 𑀓𑀸𑀮𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀢𑁆𑀣 𑀢𑁂 𑀅𑀥𑀺𑀕𑀢𑀦𑁆𑀢𑀺 𑀑𑀓𑀸𑀲𑀧𑀼𑀘𑁆𑀙𑀸, 𑀓𑀺𑀲𑁆𑀫𑀺𑀁 𑀑𑀓𑀸𑀲𑁂, 𑀓𑀺𑀁 𑀭𑀢𑁆𑀢𑀺𑀝𑁆𑀞𑀸𑀦𑁂 𑀤𑀺𑀯𑀸𑀝𑁆𑀞𑀸𑀦𑁂 𑀭𑀼𑀓𑁆𑀔𑀫𑀽𑀮𑁂 𑀫𑀡𑁆𑀟𑀧𑁂 𑀓𑀢𑀭𑀲𑁆𑀫𑀺𑀁 𑀯𑀸 𑀯𑀺𑀳𑀸𑀭𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀢𑀫𑁂 𑀢𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸𑀢𑀺 𑀧𑀳𑀻𑀦𑀓𑀺𑀮𑁂𑀲𑁂 𑀧𑀼𑀘𑁆𑀙𑀢𑀺, 𑀓𑀢𑀭𑀫𑀕𑁆𑀕𑀯𑀚𑁆𑀛𑀸 𑀢𑀯 𑀓𑀺𑀮𑁂𑀲𑀸 𑀧𑀳𑀻𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀓𑀢𑀫𑁂𑀲𑀁 𑀢𑁆𑀯𑀁 𑀥𑀫𑁆𑀫𑀸𑀦𑀁 𑀮𑀸𑀪𑀻𑀢𑀺 𑀧𑀝𑀺𑀮𑀤𑁆𑀥𑀥𑀫𑁆𑀫𑀧𑀼𑀘𑁆𑀙𑀸, 𑀧𑀞𑀫𑀫𑀕𑁆𑀕𑀸𑀤𑀻𑀲𑀼 𑀓𑀢𑀫𑁂𑀲𑀁 𑀢𑁆𑀯𑀁 𑀥𑀫𑁆𑀫𑀸𑀦𑀁 𑀮𑀸𑀪𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀲𑁆𑀫𑀸 𑀇𑀤𑀸𑀦𑀺 𑀘𑁂𑀧𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀥𑀺𑀕𑀫𑀁 𑀩𑁆𑀬𑀸𑀓𑀭𑁂𑀬𑁆𑀬, 𑀦 𑀲𑁄 𑀏𑀢𑁆𑀢𑀸𑀯𑀢𑀸𑀯 𑀲𑀓𑁆𑀓𑀸𑀢𑀩𑁆𑀩𑁄. 𑀇𑀫𑁂𑀲𑀼 𑀧𑀦 𑀙𑀲𑀼 𑀞𑀸𑀦𑁂𑀲𑀼 𑀲𑁄𑀥𑀦𑀢𑁆𑀣𑀁 𑀯𑀢𑁆𑀢𑀩𑁆𑀩𑁄 ‘‘𑀓𑀺𑀁 𑀢𑁂 𑀅𑀥𑀺𑀕𑀢𑀁, 𑀓𑀺𑀁 𑀛𑀸𑀦𑀁 𑀉𑀤𑀸𑀳𑀼 𑀯𑀺𑀫𑁄𑀓𑁆𑀔𑀸𑀤𑀻𑀲𑀼 𑀅𑀜𑁆𑀜𑀢𑀭’’𑀦𑁆𑀢𑀺? 𑀬𑁄 𑀳𑀺 𑀬𑁂𑀦 𑀅𑀥𑀺𑀕𑀢𑁄 𑀥𑀫𑁆𑀫𑁄, 𑀲𑁄 𑀢𑀲𑁆𑀲 𑀧𑀸𑀓𑀝𑁄 𑀳𑁄𑀢𑀺. 𑀲𑀘𑁂 ‘‘𑀇𑀤𑀁 𑀦𑀸𑀫 𑀫𑁂 𑀅𑀥𑀺𑀕𑀢’’𑀦𑁆𑀢𑀺 𑀯𑀤𑀢𑀺, 𑀢𑀢𑁄 ‘‘𑀓𑀺𑀦𑁆𑀢𑀺 𑀢𑁂 𑀅𑀥𑀺𑀕𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄. 𑀅𑀦𑀺𑀘𑁆𑀘𑀮𑀓𑁆𑀔𑀡𑀸𑀤𑀻𑀲𑀼 𑀓𑀺𑀁 𑀥𑀼𑀭𑀁 𑀓𑀢𑁆𑀯𑀸, 𑀅𑀝𑁆𑀞𑀢𑀺𑀁𑀲𑀸𑀬 𑀯𑀸 𑀆𑀭𑀫𑁆𑀫𑀡𑁂𑀲𑀼 𑀭𑀽𑀧𑀸𑀭𑀽𑀧𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀤𑀺𑀪𑁂𑀤𑁂𑀲𑀼 𑀯𑀸 𑀥𑀫𑁆𑀫𑁂𑀲𑀼 𑀓𑁂𑀦 𑀫𑀼𑀔𑁂𑀦 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸𑀢𑀺? 𑀬𑁄 𑀳𑀺 𑀬𑀲𑁆𑀲𑀸𑀪𑀺𑀦𑀺𑀯𑁂𑀲𑁄, 𑀲𑁄 𑀢𑀲𑁆𑀲 𑀧𑀸𑀓𑀝𑁄 𑀳𑁄𑀢𑀺.

𑀲𑀘𑁂 𑀧𑀦 ‘‘𑀅𑀬𑀁 𑀦𑀸𑀫 𑀫𑁂 𑀅𑀪𑀺𑀦𑀺𑀯𑁂𑀲𑁄, 𑀏𑀯𑀁 𑀫𑀬𑀸 𑀅𑀥𑀺𑀕𑀢’’𑀦𑁆𑀢𑀺 𑀯𑀤𑀢𑀺, 𑀢𑀢𑁄 ‘‘𑀓𑀤𑀸 𑀢𑁂 𑀅𑀥𑀺𑀕𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄, ‘‘𑀓𑀺𑀁 𑀧𑀼𑀩𑁆𑀩𑀡𑁆𑀳𑁂, 𑀉𑀤𑀸𑀳𑀼 𑀫𑀚𑁆𑀛𑀦𑁆𑀳𑀺𑀓𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀸𑀮𑁂’’𑀢𑀺? 𑀲𑀩𑁆𑀩𑁂𑀲𑀜𑁆𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀓𑀸𑀮𑁄 𑀧𑀸𑀓𑀝𑁄 𑀳𑁄𑀢𑀺. 𑀲𑀘𑁂 ‘‘𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀫𑁂 𑀓𑀸𑀮𑁂 𑀅𑀥𑀺𑀕𑀢’’𑀦𑁆𑀢𑀺 𑀯𑀤𑀢𑀺, 𑀢𑀢𑁄 ‘‘𑀓𑀢𑁆𑀣 𑀢𑁂 𑀅𑀥𑀺𑀕𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄, ‘‘𑀓𑀺𑀁 𑀤𑀺𑀯𑀸𑀝𑁆𑀞𑀸𑀦𑁂, 𑀉𑀤𑀸𑀳𑀼 𑀭𑀢𑁆𑀢𑀺𑀝𑁆𑀞𑀸𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀑𑀓𑀸𑀲𑁂’’𑀢𑀺? 𑀲𑀩𑁆𑀩𑁂𑀲𑀜𑁆𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑁄𑀓𑀸𑀲𑁄 𑀧𑀸𑀓𑀝𑁄 𑀳𑁄𑀢𑀺. 𑀲𑀘𑁂 ‘‘𑀅𑀫𑀼𑀓𑀲𑁆𑀫𑀺𑀁 𑀦𑀸𑀫 𑀫𑁂 𑀑𑀓𑀸𑀲𑁂 𑀅𑀥𑀺𑀕𑀢’’𑀦𑁆𑀢𑀺 𑀯𑀤𑀢𑀺, 𑀢𑀢𑁄 ‘‘𑀓𑀢𑀫𑁂 𑀢𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄, ‘‘𑀓𑀺𑀁 𑀧𑀞𑀫𑀫𑀕𑁆𑀕𑀯𑀚𑁆𑀛𑀸, 𑀉𑀤𑀸𑀳𑀼 𑀤𑀼𑀢𑀺𑀬𑀸𑀤𑀺𑀫𑀕𑁆𑀕𑀯𑀚𑁆𑀛𑀸’’𑀢𑀺? 𑀲𑀩𑁆𑀩𑁂𑀲𑀜𑁆𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀫𑀕𑁆𑀕𑁂𑀦 𑀧𑀳𑀻𑀦𑀓𑀺𑀮𑁂𑀲𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺.

𑀲𑀘𑁂 ‘‘𑀇𑀫𑁂 𑀦𑀸𑀫 𑀫𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸’’𑀢𑀺 𑀯𑀤𑀢𑀺, 𑀢𑀢𑁄 ‘‘𑀓𑀢𑀫𑁂𑀲𑀁 𑀢𑁆𑀯𑀁 𑀥𑀫𑁆𑀫𑀸𑀦𑀁 𑀮𑀸𑀪𑀻’’𑀢𑀺 𑀧𑀼𑀘𑁆𑀙𑀺𑀢𑀩𑁆𑀩𑁄, ‘‘𑀓𑀺𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲, 𑀉𑀤𑀸𑀳𑀼 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀲𑀸’’𑀢𑀺? 𑀲𑀩𑁆𑀩𑁂𑀲𑀜𑁆𑀳𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀥𑀫𑁆𑀫𑁄 𑀧𑀸𑀓𑀝𑁄 𑀳𑁄𑀢𑀺. 𑀲𑀘𑁂 ‘‘𑀇𑀫𑁂𑀲𑀁 𑀦𑀸𑀫𑀸𑀳𑀁 𑀥𑀫𑁆𑀫𑀸𑀦𑀁 𑀮𑀸𑀪𑀻’’𑀢𑀺 𑀯𑀤𑀢𑀺, 𑀏𑀢𑁆𑀢𑀸𑀯𑀢𑀸𑀧𑀺𑀲𑁆𑀲 𑀯𑀘𑀦𑀁 𑀦 𑀲𑀤𑁆𑀥𑀸𑀢𑀩𑁆𑀩𑀁. 𑀩𑀳𑀼𑀲𑁆𑀲𑀼𑀢𑀸 𑀳𑀺 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀓𑀼𑀲𑀮𑀸 𑀪𑀺𑀓𑁆𑀔𑀽 𑀇𑀫𑀸𑀦𑀺 𑀙 𑀞𑀸𑀦𑀸𑀦𑀺 𑀲𑁄𑀥𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀕𑀫𑀦𑀧𑀝𑀺𑀧𑀤𑀸 𑀲𑁄𑀥𑁂𑀢𑀩𑁆𑀩𑀸, 𑀬𑀤𑀺 𑀆𑀕𑀫𑀦𑀧𑀝𑀺𑀧𑀤𑀸 𑀦 𑀲𑀼𑀚𑁆𑀛𑀢𑀺, ‘‘𑀇𑀫𑀸𑀬 𑀧𑀝𑀺𑀧𑀤𑀸𑀬 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀦𑀸𑀫 𑀦 𑀮𑀩𑁆𑀪𑀦𑁆𑀢𑀻’’𑀢𑀺 𑀅𑀧𑀦𑁂𑀢𑀩𑁆𑀩𑁄.

𑀬𑀤𑀺 𑀧𑀦𑀲𑁆𑀲 𑀆𑀕𑀫𑀦𑀧𑀝𑀺𑀧𑀤𑀸 𑀲𑀼𑀚𑁆𑀛𑀢𑀺, ‘‘𑀤𑀻𑀖𑀭𑀢𑁆𑀢𑀁 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀅𑀧𑁆𑀧𑀫𑀢𑁆𑀢𑁄 𑀚𑀸𑀕𑀭𑀺𑀬𑀫𑀦𑀼𑀬𑀼𑀢𑁆𑀢𑁄 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀅𑀮𑀕𑁆𑀕𑁄 𑀆𑀓𑀸𑀲𑁂 𑀧𑀸𑀡𑀺𑀲𑀫𑁂𑀦 𑀘𑁂𑀢𑀲𑀸 𑀯𑀺𑀳𑀭𑀢𑀻’’𑀢𑀺 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑁆𑀬𑀸𑀓𑀭𑀡𑀁 𑀧𑀝𑀺𑀧𑀤𑀸𑀬 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺. ‘‘𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀕𑀗𑁆𑀕𑁄𑀤𑀓𑀁 𑀬𑀫𑀼𑀦𑁄𑀤𑀓𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺, 𑀏𑀯𑀫𑁂𑀯 𑀲𑀼𑀧𑀜𑁆𑀜𑀢𑁆𑀢𑀸 𑀢𑁂𑀦 𑀪𑀕𑀯𑀢𑀸 𑀲𑀸𑀯𑀓𑀸𑀦𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺 𑀦𑀺𑀩𑁆𑀩𑀸𑀦𑀜𑁆𑀘 𑀧𑀝𑀺𑀧𑀤𑀸 𑀘𑀸’’𑀢𑀺 (𑀤𑀻. 𑀦𑀺. 𑁨.𑁨𑁯𑁬) 𑀯𑀼𑀢𑁆𑀢𑀲𑀤𑀺𑀲𑀁 𑀳𑁄𑀢𑀺.

𑀅𑀧𑀺𑀘 𑀔𑁄 𑀏𑀢𑁆𑀢𑀓𑁂𑀦𑀸𑀧𑀺 𑀲𑀓𑁆𑀓𑀸𑀭𑁄 𑀦 𑀓𑀸𑀢𑀩𑁆𑀩𑁄. 𑀓𑀲𑁆𑀫𑀸? 𑀏𑀓𑀘𑁆𑀘𑀲𑁆𑀲 𑀳𑀺 𑀧𑀼𑀣𑀼𑀚𑁆𑀚𑀦𑀲𑁆𑀲𑀸𑀧𑀺 𑀲𑀢𑁄 𑀔𑀻𑀡𑀸𑀲𑀯𑀧𑀝𑀺𑀧𑀢𑁆𑀢𑀺𑀲𑀤𑀺𑀲𑀸 𑀧𑀝𑀺𑀧𑀤𑀸 𑀳𑁄𑀢𑀺. 𑀢𑀲𑁆𑀫𑀸 𑀲𑁄 𑀪𑀺𑀓𑁆𑀔𑀼 𑀢𑁂𑀳𑀺 𑀢𑁂𑀳𑀺 𑀉𑀧𑀸𑀬𑁂𑀳𑀺 𑀉𑀢𑁆𑀢𑀸𑀲𑁂𑀢𑀩𑁆𑀩𑁄. 𑀔𑀻𑀡𑀸𑀲𑀯𑀲𑁆𑀲 𑀦𑀸𑀫 𑀅𑀲𑀦𑀺𑀬𑀸𑀧𑀺 𑀫𑀢𑁆𑀣𑀓𑁂 𑀧𑀢𑀫𑀸𑀦𑀸𑀬 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀮𑁄𑀫𑀳𑀁𑀲𑁄 𑀯𑀸 𑀦 𑀳𑁄𑀢𑀺, 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀧𑁆𑀧𑀫𑀢𑁆𑀢𑀓𑁂𑀦𑀸𑀧𑀺 𑀳𑁄𑀢𑀺.

𑀢𑀢𑁆𑀭𑀺𑀫𑀸𑀦𑀺 𑀯𑀢𑁆𑀣𑀽𑀦𑀺 𑁋 𑀤𑀻𑀖𑀪𑀸𑀡𑀓𑀅𑀪𑀬𑀢𑁆𑀣𑁂𑀭𑁄 𑀓𑀺𑀭 𑀏𑀓𑀁 𑀧𑀺𑀡𑁆𑀟𑀧𑀸𑀢𑀺𑀓𑀁 𑀧𑀭𑀺𑀕𑁆𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀤𑀳𑀭𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺. 𑀲𑁄 𑀢𑀁 𑀦𑁆𑀳𑀸𑀬𑀫𑀸𑀦𑀁 𑀓𑀮𑁆𑀬𑀸𑀡𑀻𑀦𑀤𑀻𑀫𑀼𑀔𑀤𑁆𑀯𑀸𑀭𑁂 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀧𑀸𑀤𑁂 𑀅𑀕𑁆𑀕𑀳𑁂𑀲𑀺. 𑀧𑀺𑀡𑁆𑀟𑀧𑀸𑀢𑀺𑀓𑁄 𑀓𑀼𑀫𑁆𑀪𑀻𑀮𑁄𑀢𑀺 𑀲𑀜𑁆𑀜𑀸𑀬 𑀫𑀳𑀸𑀲𑀤𑁆𑀤𑀫𑀓𑀸𑀲𑀺, 𑀢𑀤𑀸 𑀦𑀁 𑀧𑀼𑀣𑀼𑀚𑁆𑀚𑀦𑁄𑀢𑀺 𑀲𑀜𑁆𑀚𑀸𑀦𑀺𑀁𑀲𑀼. 𑀘𑀦𑁆𑀤𑀫𑀼𑀔𑀢𑀺𑀲𑁆𑀲𑀭𑀸𑀚𑀓𑀸𑀮𑁂 𑀧𑀦 𑀫𑀳𑀸𑀯𑀺𑀳𑀸𑀭𑁂 𑀲𑀗𑁆𑀖𑀢𑁆𑀣𑁂𑀭𑁄 𑀔𑀻𑀡𑀸𑀲𑀯𑁄 𑀤𑀼𑀩𑁆𑀩𑀮𑀘𑀓𑁆𑀔𑀼𑀓𑁄 𑀯𑀺𑀳𑀸𑀭𑁂𑀬𑁂𑀯 𑀅𑀘𑁆𑀙𑀺. 𑀭𑀸𑀚𑀸 𑀣𑁂𑀭𑀁 𑀧𑀭𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀪𑀺𑀓𑁆𑀔𑀽𑀲𑀼 𑀪𑀺𑀓𑁆𑀔𑀸𑀘𑀸𑀭𑀁 𑀕𑀢𑁂𑀲𑀼 𑀅𑀧𑁆𑀧𑀲𑀤𑁆𑀤𑁄 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀲𑀧𑁆𑀧𑁄 𑀯𑀺𑀬 𑀧𑀸𑀤𑁂 𑀅𑀕𑁆𑀕𑀳𑁂𑀲𑀺. 𑀣𑁂𑀭𑁄 𑀲𑀺𑀮𑀸𑀣𑀫𑁆𑀪𑁄 𑀯𑀺𑀬 𑀦𑀺𑀘𑁆𑀘𑀮𑁄 𑀳𑀼𑀢𑁆𑀯𑀸 𑀓𑁄 𑀏𑀢𑁆𑀣𑀸𑀢𑀺 𑀆𑀳? 𑀅𑀳𑀁, 𑀪𑀦𑁆𑀢𑁂, 𑀢𑀺𑀲𑁆𑀲𑁄𑀢𑀺. 𑀲𑀼𑀕𑀦𑁆𑀥𑀁 𑀯𑀸𑀬𑀲𑀺 𑀦𑁄 𑀢𑀺𑀲𑁆𑀲𑀸𑀢𑀺? 𑀏𑀯𑀁 𑀔𑀻𑀡𑀸𑀲𑀯𑀲𑁆𑀲 𑀪𑀬𑀁 𑀦𑀸𑀫 𑀦𑀢𑁆𑀣𑀻𑀢𑀺.

𑀏𑀓𑀘𑁆𑀘𑁄 𑀧𑀦 𑀧𑀼𑀣𑀼𑀚𑁆𑀚𑀦𑁄𑀧𑀺 𑀅𑀢𑀺𑀲𑀽𑀭𑁄 𑀳𑁄𑀢𑀺 𑀦𑀺𑀩𑁆𑀪𑀬𑁄. 𑀲𑁄 𑀭𑀜𑁆𑀚𑀦𑀻𑀬𑁂𑀦 𑀆𑀭𑀫𑁆𑀫𑀡𑁂𑀦 𑀧𑀭𑀺𑀕𑁆𑀕𑀡𑁆𑀳𑀺𑀢𑀩𑁆𑀩𑁄. 𑀯𑀲𑀪𑀭𑀸𑀚𑀸𑀧𑀺 𑀳𑀺 𑀏𑀓𑀁 𑀣𑁂𑀭𑀁 𑀧𑀭𑀺𑀕𑁆𑀕𑀡𑁆𑀳𑀫𑀸𑀦𑁄 𑀖𑀭𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀩𑀤𑀭𑀲𑀸𑀴𑀯𑀁 𑀫𑀤𑁆𑀤𑀫𑀸𑀦𑁄 𑀦𑀺𑀲𑀻𑀤𑀺. 𑀫𑀳𑀸𑀣𑁂𑀭𑀲𑁆𑀲 𑀔𑁂𑀴𑁄 𑀘𑀮𑀺, 𑀢𑀢𑁄 𑀣𑁂𑀭𑀲𑁆𑀲 𑀧𑀼𑀣𑀼𑀚𑁆𑀚𑀦𑀪𑀸𑀯𑁄 𑀆𑀯𑀺𑀪𑀽𑀢𑁄. 𑀔𑀻𑀡𑀸𑀲𑀯𑀲𑁆𑀲 𑀳𑀺 𑀭𑀲𑀢𑀡𑁆𑀳𑀸 𑀦𑀸𑀫 𑀲𑀼𑀧𑁆𑀧𑀳𑀻𑀦𑀸, 𑀤𑀺𑀩𑁆𑀩𑁂𑀲𑀼𑀧𑀺 𑀭𑀲𑁂𑀲𑀼 𑀦𑀺𑀓𑀦𑁆𑀢𑀺 𑀦𑀸𑀫 𑀦 𑀳𑁄𑀢𑀺. 𑀢𑀲𑁆𑀫𑀸 𑀇𑀫𑁂𑀳𑀺 𑀉𑀧𑀸𑀬𑁂𑀳𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀘𑀲𑁆𑀲 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀮𑁄𑀫𑀳𑀁𑀲𑁄 𑀯𑀸 𑀭𑀲𑀢𑀡𑁆𑀳𑀸 𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀦 𑀢𑁆𑀯𑀁 𑀅𑀭𑀳𑀸𑀢𑀺 𑀅𑀧𑀦𑁂𑀢𑀩𑁆𑀩𑁄. 𑀲𑀘𑁂 𑀧𑀦 𑀅𑀪𑀻𑀭𑀽 𑀅𑀘𑁆𑀙𑀫𑁆𑀪𑀻 𑀅𑀦𑀼𑀢𑁆𑀭𑀸𑀲𑀻 𑀳𑀼𑀢𑁆𑀯𑀸 𑀲𑀻𑀳𑁄 𑀯𑀺𑀬 𑀦𑀺𑀲𑀻𑀤𑀢𑀺, 𑀤𑀺𑀩𑁆𑀩𑀸𑀭𑀫𑁆𑀫𑀡𑁂𑀧𑀺 𑀦𑀺𑀓𑀦𑁆𑀢𑀺𑀁 𑀦 𑀚𑀦𑁂𑀢𑀺. 𑀅𑀬𑀁 𑀪𑀺𑀓𑁆𑀔𑀼 𑀲𑀫𑁆𑀧𑀦𑁆𑀦𑀯𑁂𑀬𑁆𑀬𑀸𑀓𑀭𑀡𑁄 𑀲𑀫𑀦𑁆𑀢𑀸 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀳𑀺 𑀧𑁂𑀲𑀺𑀢𑀁 𑀲𑀓𑁆𑀓𑀸𑀭𑀁 𑀅𑀭𑀳𑀢𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀙𑀩𑁆𑀩𑀺𑀲𑁄𑀥𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁫. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑀼𑀢𑁆𑀢𑀁. 𑀢𑀢𑁆𑀣 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀦𑁆𑀢𑀺 𑀲𑀧𑁆𑀧𑀼𑀭𑀺𑀲𑀸𑀦𑀁 𑀥𑀫𑁆𑀫𑀁. 𑀅𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀦𑁆𑀢𑀺 𑀧𑀸𑀧𑀧𑀼𑀭𑀺𑀲𑀸𑀦𑀁 𑀥𑀫𑁆𑀫𑀁. 𑀏𑀯𑀁 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸𑀧𑀺 𑀧𑀼𑀦 𑀬𑀣𑀸 𑀦𑀸𑀫 𑀫𑀕𑁆𑀕𑀓𑀼𑀲𑀮𑁄 𑀧𑀼𑀭𑀺𑀲𑁄 𑀯𑀸𑀫𑀁 𑀫𑀼𑀜𑁆𑀘𑀺𑀢𑁆𑀯𑀸 𑀤𑀓𑁆𑀔𑀺𑀡𑀁 𑀕𑀡𑁆𑀳𑀸𑀢𑀺. 𑀧𑀞𑀫𑀁 𑀫𑀼𑀜𑁆𑀘𑀺𑀢𑀩𑁆𑀩𑀁 𑀓𑀣𑁂𑀢𑀺, 𑀏𑀯𑀁 𑀧𑀳𑀸𑀢𑀩𑁆𑀩𑀁 𑀥𑀫𑁆𑀫𑀁 𑀧𑀞𑀫𑀁 𑀤𑁂𑀲𑁂𑀦𑁆𑀢𑁄 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀅𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀘𑁆𑀘𑀸𑀓𑀼𑀮𑀸𑀢𑀺 𑀔𑀢𑁆𑀢𑀺𑀬𑀓𑀼𑀮𑀸 𑀯𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑀸 𑀯𑀸. 𑀏𑀢𑀤𑁂𑀯 𑀳𑀺 𑀓𑀼𑀮𑀤𑁆𑀯𑀬𑀁 ‘‘𑀉𑀘𑁆𑀘𑀸𑀓𑀼𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀢𑀢𑁆𑀣 𑀧𑀼𑀚𑁆𑀚𑁄𑀢𑀺 𑀲𑁄 𑀪𑀺𑀓𑁆𑀔𑀼 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀧𑀽𑀚𑀸𑀭𑀳𑁄. 𑀅𑀦𑁆𑀢𑀭𑀁 𑀓𑀭𑀺𑀢𑁆𑀯𑀸𑀢𑀺 𑀅𑀩𑁆𑀪𑀦𑁆𑀢𑀭𑀁 𑀓𑀢𑁆𑀯𑀸.

𑀫𑀳𑀸𑀓𑀼𑀮𑀸𑀢𑀺 𑀔𑀢𑁆𑀢𑀺𑀬𑀓𑀼𑀮𑀸 𑀯𑀸 𑀩𑁆𑀭𑀸𑀳𑁆𑀫𑀡𑀓𑀼𑀮𑀸 𑀯𑀸 𑀯𑁂𑀲𑁆𑀲𑀓𑀼𑀮𑀸 𑀯𑀸. 𑀇𑀤𑀫𑁂𑀯 𑀳𑀺 𑀓𑀼𑀮𑀢𑁆𑀢𑀬𑀁 ‘‘𑀫𑀳𑀸𑀓𑀼𑀮’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀫𑀳𑀸𑀪𑁄𑀕𑀓𑀼𑀮𑀸𑀢𑀺 𑀫𑀳𑀦𑁆𑀢𑁂𑀳𑀺 𑀪𑁄𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀓𑀼𑀮𑀸. 𑀉𑀴𑀸𑀭𑀪𑁄𑀕𑀓𑀼𑀮𑀸𑀢𑀺 𑀉𑀴𑀸𑀭𑁂𑀳𑀺 𑀧𑀡𑀻𑀢𑁂𑀳𑀺 𑀪𑁄𑀕𑁂𑀳𑀺 𑀲𑀫𑁆𑀧𑀦𑁆𑀦𑀓𑀼𑀮𑀸. 𑀇𑀫𑀲𑁆𑀫𑀺𑀁 𑀧𑀤𑀤𑁆𑀯𑀬𑁂 𑀘𑀢𑁆𑀢𑀸𑀭𑀺𑀧𑀺 𑀓𑀼𑀮𑀸𑀦𑀺 𑀮𑀩𑁆𑀪𑀦𑁆𑀢𑀺. 𑀬𑀢𑁆𑀣 𑀓𑀢𑁆𑀣𑀘𑀺 𑀓𑀼𑀮𑁂 𑀚𑀸𑀢𑁄 𑀳𑀺 𑀧𑀼𑀜𑁆𑀜𑀩𑀮𑁂𑀳𑀺 𑀫𑀳𑀸𑀪𑁄𑀕𑁄𑀧𑀺 𑀉𑀴𑀸𑀭𑀪𑁄𑀕𑁄𑀧𑀺 𑀳𑁄𑀢𑀺𑀬𑁂𑀯.

𑁧𑁦𑁬. 𑀬𑀲𑀲𑁆𑀲𑀻𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑁄. 𑀅𑀧𑁆𑀧𑀜𑁆𑀜𑀸𑀢𑀸𑀢𑀺 𑀭𑀢𑁆𑀢𑀺𑀁 𑀔𑀺𑀢𑁆𑀢𑀲𑀭𑀸 𑀯𑀺𑀬 𑀲𑀗𑁆𑀖𑀫𑀚𑁆𑀛𑀸𑀤𑀻𑀲𑀼 𑀦 𑀧𑀜𑁆𑀜𑀸𑀬𑀦𑁆𑀢𑀺. 𑀅𑀧𑁆𑀧𑁂𑀲𑀓𑁆𑀔𑀸𑀢𑀺 𑀅𑀧𑁆𑀧𑀧𑀭𑀺𑀯𑀸𑀭𑀸.

𑁧𑁦𑁭. 𑀆𑀭𑀜𑁆𑀜𑀺𑀓𑁄𑀢𑀺 𑀲𑀫𑀸𑀤𑀺𑀦𑁆𑀦𑀆𑀭𑀜𑁆𑀜𑀺𑀓𑀥𑀼𑀢𑀗𑁆𑀕𑁄. 𑀲𑁂𑀲𑀥𑀼𑀢𑀗𑁆𑀕𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀲𑁆𑀫𑀺𑀜𑁆𑀘 𑀲𑀼𑀢𑁆𑀢𑁂 𑀧𑀸𑀴𑀺𑀬𑀁 𑀦𑀯𑁂𑀯 𑀥𑀼𑀢𑀗𑁆𑀕𑀸𑀦𑀺 𑀆𑀕𑀢𑀸𑀦𑀺, 𑀯𑀺𑀢𑁆𑀣𑀸𑀭𑁂𑀦 𑀧𑀦𑁂𑀢𑀸𑀦𑀺 𑀢𑁂𑀭𑀲 𑀳𑁄𑀦𑁆𑀢𑀺. 𑀢𑁂𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀥𑀼𑀢𑀗𑁆𑀕𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀫𑁂𑀯.

𑁧𑁦𑁮. 𑀅𑀢𑀫𑁆𑀫𑀬𑀢𑀸𑀢𑀺 𑀢𑀫𑁆𑀫𑀬𑀢𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸, 𑀦𑀺𑀢𑁆𑀢𑀡𑁆𑀳𑀸𑀢𑀺 𑀅𑀢𑁆𑀣𑁄. 𑀅𑀢𑀫𑁆𑀫𑀬𑀢𑀜𑁆𑀜𑁂𑀯 𑀅𑀦𑁆𑀢𑀭𑀁 𑀓𑀭𑀺𑀢𑁆𑀯𑀸𑀢𑀺 𑀦𑀺𑀢𑁆𑀢𑀡𑁆𑀳𑀢𑀁𑀬𑁂𑀯 𑀓𑀸𑀭𑀡𑀁 𑀓𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑀁 𑀯𑀸 𑀓𑀢𑁆𑀯𑀸, 𑀘𑀺𑀢𑁆𑀢𑁂 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀦𑀺𑀭𑁄𑀥𑀯𑀸𑀭𑁂 𑀬𑀲𑁆𑀫𑀸 𑀅𑀦𑀸𑀕𑀸𑀫𑀺𑀔𑀻𑀡𑀸𑀲𑀯𑀸𑀯 𑀢𑀁 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀺, 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀲𑀧𑁆𑀧𑀼𑀭𑀺𑀲𑀯𑀸𑀭𑁄 𑀧𑀭𑀺𑀳𑀻𑀦𑁄. 𑀦 𑀓𑀜𑁆𑀘𑀺 𑀫𑀜𑁆𑀜𑀢𑀻𑀢𑀺 𑀓𑀜𑁆𑀘𑀺 𑀧𑀼𑀕𑁆𑀕𑀮𑀁 𑀢𑀻𑀳𑀺 𑀫𑀜𑁆𑀜𑀦𑀸𑀳𑀺 𑀦 𑀫𑀜𑁆𑀜𑀢𑀺. 𑀦 𑀓𑀼𑀳𑀺𑀜𑁆𑀘𑀺 𑀫𑀜𑁆𑀜𑀢𑀻𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀑𑀓𑀸𑀲𑁂 𑀦 𑀫𑀜𑁆𑀜𑀢𑀺. 𑀦 𑀓𑁂𑀦𑀘𑀺 𑀫𑀜𑁆𑀜𑀢𑀻𑀢𑀺 𑀓𑁂𑀦𑀘𑀺 𑀯𑀢𑁆𑀣𑀼𑀦𑀸𑀧𑀺 𑀢𑀁 𑀧𑀼𑀕𑁆𑀕𑀮𑀁 𑀦 𑀫𑀜𑁆𑀜𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁯. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀲𑀼𑀢𑁆𑀢𑀁. 𑀢𑀢𑁆𑀣 𑀢𑀜𑁆𑀘 𑀅𑀜𑁆𑀜𑀫𑀜𑁆𑀜𑀁 𑀓𑀸𑀬𑀲𑀫𑀸𑀘𑀸𑀭𑀦𑁆𑀢𑀺 𑀅𑀜𑁆𑀜𑀁 𑀲𑁂𑀯𑀺𑀢𑀩𑁆𑀩𑀁 𑀓𑀸𑀬𑀲𑀫𑀸𑀘𑀸𑀭𑀁, 𑀅𑀜𑁆𑀜𑀁 𑀅𑀲𑁂𑀯𑀺𑀢𑀩𑁆𑀩𑀁 𑀯𑀤𑀸𑀫𑀺, 𑀲𑁂𑀯𑀺𑀢𑀩𑁆𑀩𑀫𑁂𑀯 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀅𑀲𑁂𑀯𑀺𑀢𑀩𑁆𑀩𑀦𑁆𑀢𑀺, 𑀅𑀲𑁂𑀯𑀺𑀢𑀩𑁆𑀩𑀁 𑀯𑀸 𑀲𑁂𑀯𑀺𑀢𑀩𑁆𑀩𑀦𑁆𑀢𑀺 𑀘 𑀦 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀯𑀘𑀻𑀲𑀫𑀸𑀘𑀸𑀭𑀸𑀤𑀻𑀲𑀼 𑀏𑀲𑁂𑀯 𑀦𑀬𑁄. 𑀇𑀢𑀺 𑀪𑀕𑀯𑀸 𑀲𑀢𑁆𑀢𑀳𑀺 𑀧𑀤𑁂𑀳𑀺 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑀢𑁄 𑀅𑀯𑀺𑀪𑀚𑀺𑀢𑁆𑀯𑀸𑀯 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀓𑀲𑁆𑀫𑀸? 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀑𑀓𑀸𑀲𑀓𑀭𑀡𑀢𑁆𑀣𑀁.

𑁧𑁧𑁩. 𑀫𑀦𑁄𑀲𑀫𑀸𑀘𑀸𑀭𑁂 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑁄 𑀤𑀺𑀝𑁆𑀞𑀺𑀧𑀝𑀺𑀮𑀸𑀪𑀯𑀲𑁂𑀦 𑀯𑀺𑀲𑀼𑀁 𑀅𑀗𑁆𑀕𑀁 𑀳𑀼𑀢𑁆𑀯𑀸 𑀞𑀺𑀢𑀸𑀢𑀺 𑀦 𑀕𑀳𑀺𑀢𑀸.

𑁧𑁧𑁪. 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀅𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸 𑀅𑀪𑀺𑀚𑁆𑀛𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸.

𑁧𑁧𑁫. 𑀲𑀜𑁆𑀜𑀸𑀧𑀝𑀺𑀮𑀸𑀪𑀯𑀸𑀭𑁂 𑀅𑀪𑀺𑀚𑁆𑀛𑀸𑀲𑀳𑀕𑀢𑀸𑀬 𑀲𑀜𑁆𑀜𑀸𑀬𑀸𑀢𑀺𑀆𑀤𑀻𑀦𑀺 𑀓𑀸𑀫𑀲𑀜𑁆𑀜𑀸𑀤𑀻𑀦𑀁 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺.

𑁧𑁧𑁭. 𑀲𑀩𑁆𑀬𑀸𑀩𑀚𑁆𑀛𑀦𑁆𑀢𑀺 𑀲𑀤𑀼𑀓𑁆𑀔𑀁. 𑀅𑀧𑀭𑀺𑀦𑀺𑀝𑁆𑀞𑀺𑀢𑀪𑀸𑀯𑀸𑀬𑀸𑀢𑀺 𑀪𑀯𑀸𑀦𑀁 𑀅𑀧𑀭𑀺𑀦𑀺𑀝𑁆𑀞𑀺𑀢𑀪𑀸𑀯𑀸𑀬. 𑀏𑀢𑁆𑀣 𑀘 𑀲𑀩𑁆𑀬𑀸𑀩𑀚𑁆𑀛𑀢𑁆𑀢𑀪𑀸𑀯𑀸 𑀦𑀸𑀫 𑀘𑀢𑁆𑀢𑀸𑀭𑁄 𑀳𑁄𑀦𑁆𑀢𑀺. 𑀧𑀼𑀣𑀼𑀚𑁆𑀚𑀦𑁄𑀧𑀺 𑀳𑀺 𑀬𑁄 𑀢𑁂𑀦𑀢𑁆𑀢𑀪𑀸𑀯𑁂𑀦 𑀪𑀯𑀁 𑀧𑀭𑀺𑀦𑀺𑀝𑁆𑀞𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀢𑁄 𑀧𑀝𑁆𑀞𑀸𑀬 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀘 𑀧𑀭𑀺𑀳𑀸𑀬𑀦𑁆𑀢𑀺, 𑀲𑀤𑀼𑀓𑁆𑀔𑀫𑁂𑀯 𑀅𑀢𑁆𑀢𑀪𑀸𑀯𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺 𑀦𑀸𑀫. 𑀢𑀣𑀸 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀦𑁄. 𑀧𑀼𑀣𑀼𑀚𑁆𑀚𑀦𑀸𑀤𑀬𑁄 𑀢𑀸𑀯 𑀳𑁄𑀦𑁆𑀢𑀼, 𑀅𑀦𑀸𑀕𑀸𑀫𑀻 𑀓𑀣𑀁 𑀲𑀩𑁆𑀬𑀸𑀩𑀚𑁆𑀛𑀁 𑀅𑀢𑁆𑀢𑀪𑀸𑀯𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺, 𑀓𑀣𑀜𑁆𑀘𑀲𑁆𑀲 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀻𑀢𑀺. 𑀅𑀦𑀸𑀕𑀸𑀫𑀻𑀧𑀺 𑀳𑀺 𑀲𑀼𑀤𑁆𑀥𑀸𑀯𑀸𑀲𑁂 𑀦𑀺𑀩𑁆𑀩𑀢𑁆𑀢𑁄 𑀉𑀬𑁆𑀬𑀸𑀦𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑁂 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀳𑁄 𑀲𑀼𑀔𑀁 𑀅𑀳𑁄 𑀲𑀼𑀔’’𑀦𑁆𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀢𑀺, 𑀅𑀦𑀸𑀕𑀸𑀫𑀺𑀦𑁄 𑀪𑀯𑀮𑁄𑀪𑁄 𑀪𑀯𑀢𑀡𑁆𑀳𑀸 𑀅𑀧𑁆𑀧𑀳𑀻𑀦𑀸𑀯 𑀳𑁄𑀦𑁆𑀢𑀺, 𑀢𑀲𑁆𑀲 𑀅𑀧𑁆𑀧𑀳𑀻𑀦𑀢𑀡𑁆𑀳𑀢𑀸𑀬 𑀅𑀓𑀼𑀲𑀮𑀸 𑀯𑀟𑁆𑀠𑀦𑁆𑀢𑀺 𑀦𑀸𑀫, 𑀓𑀼𑀲𑀮𑀸 𑀧𑀭𑀺𑀳𑀸𑀬𑀦𑁆𑀢𑀺 𑀦𑀸𑀫, 𑀲𑀤𑀼𑀓𑁆𑀔𑀫𑁂𑀯 𑀅𑀢𑁆𑀢𑀪𑀸𑀯𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀺, 𑀅𑀧𑀭𑀺𑀦𑀺𑀝𑁆𑀞𑀺𑀢𑀪𑀯𑁄𑀬𑁂𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀩𑁆𑀬𑀸𑀩𑀚𑁆𑀛𑀦𑁆𑀢𑀺 𑀅𑀤𑀼𑀓𑁆𑀔𑀁. 𑀅𑀬𑀫𑁆𑀧𑀺 𑀘𑀢𑀼𑀦𑁆𑀦𑀁 𑀚𑀦𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀬𑁄 𑀳𑀺 𑀧𑀼𑀣𑀼𑀚𑁆𑀚𑀦𑁄𑀧𑀺 𑀢𑁂𑀦𑀢𑁆𑀢𑀪𑀸𑀯𑁂𑀦 𑀪𑀯𑀁 𑀧𑀭𑀺𑀦𑀺𑀝𑁆𑀞𑀸𑀧𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀧𑀼𑀦 𑀧𑀝𑀺𑀲𑀦𑁆𑀥𑀺𑀁 𑀦 𑀕𑀡𑁆𑀳𑀸𑀢𑀺, 𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀅𑀓𑀼𑀲𑀮𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸𑀬𑁂𑀯 𑀯𑀟𑁆𑀠𑀦𑁆𑀢𑀺, 𑀅𑀤𑀼𑀓𑁆𑀔𑀫𑁂𑀯 𑀅𑀢𑁆𑀢𑀪𑀸𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀧𑀭𑀺𑀦𑀺𑀝𑁆𑀞𑀺𑀢𑀪𑀯𑁄𑀬𑁂𑀯 𑀦𑀸𑀫 𑀳𑁄𑀢𑀺. 𑀢𑀣𑀸 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀦𑁄. 𑀲𑁄𑀢𑀸𑀧𑀦𑁆𑀦𑀸𑀤𑀬𑁄 𑀢𑀸𑀯 𑀳𑁄𑀦𑁆𑀢𑀼, 𑀧𑀼𑀣𑀼𑀚𑁆𑀚𑀦𑁄 𑀓𑀣𑀁 𑀅𑀩𑁆𑀬𑀸𑀩𑀚𑁆𑀛𑀅𑀢𑁆𑀢𑀪𑀸𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀓𑀣𑀜𑁆𑀘𑀲𑁆𑀲 𑀅𑀓𑀼𑀲𑀮𑀧𑀭𑀺𑀳𑀸𑀦𑀺𑀆𑀤𑀻𑀦𑀺 𑀳𑁄𑀦𑁆𑀢𑀻𑀢𑀺. 𑀧𑀼𑀣𑀼𑀚𑁆𑀚𑀦𑁄𑀧𑀺 𑀧𑀘𑁆𑀙𑀺𑀫𑀪𑀯𑀺𑀓𑁄 𑀢𑁂𑀦𑀢𑁆𑀢𑀪𑀸𑀯𑁂𑀦 𑀪𑀯𑀁 𑀧𑀭𑀺𑀦𑀺𑀝𑁆𑀞𑀸𑀧𑁂𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺. 𑀢𑀲𑁆𑀲 𑀅𑀗𑁆𑀕𑀼𑀮𑀺𑀫𑀸𑀮𑀲𑁆𑀲 𑀯𑀺𑀬 𑀏𑀓𑁂𑀦𑀽𑀦𑀧𑀸𑀡𑀲𑀳𑀲𑁆𑀲𑀁 𑀖𑀸𑀢𑁂𑀦𑁆𑀢𑀲𑁆𑀲𑀸𑀧𑀺 𑀅𑀢𑁆𑀢𑀪𑀸𑀯𑁄 𑀅𑀩𑁆𑀬𑀸𑀩𑀚𑁆𑀛𑁄𑀬𑁂𑀯 𑀦𑀸𑀫, 𑀪𑀯𑀁 𑀧𑀭𑀺𑀦𑀺𑀝𑁆𑀞𑀸𑀧𑁂𑀢𑀺𑀬𑁂𑀯 𑀦𑀸𑀫. 𑀅𑀓𑀼𑀲𑀮𑀫𑁂𑀯 𑀳𑀸𑀬𑀢𑀺, 𑀯𑀺𑀧𑀲𑁆𑀲𑀦𑀫𑁂𑀯 𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀢𑀺 𑀦𑀸𑀫.

𑁧𑁧𑁯. 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺𑀆𑀤𑀻𑀲𑀼 𑀬𑀲𑁆𑀫𑀸 𑀏𑀓𑀘𑁆𑀘𑀲𑁆𑀲 𑀢𑀲𑁆𑀫𑀺𑀁𑀬𑁂𑀯 𑀭𑀽𑀧𑁂 𑀭𑀸𑀕𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀪𑀺𑀦𑀦𑁆𑀤𑀢𑀺 𑀅𑀲𑁆𑀲𑀸𑀤𑁂𑀢𑀺, 𑀅𑀪𑀺𑀦𑀦𑁆𑀤𑀦𑁆𑀢𑁄 𑀅𑀲𑁆𑀲𑀸𑀤𑁂𑀦𑁆𑀢𑁄 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑀸𑀢𑀺, 𑀏𑀓𑀘𑁆𑀘𑀲𑁆𑀲 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀦𑀺𑀩𑁆𑀩𑀺𑀦𑁆𑀤𑀢𑀺 𑀯𑀺𑀭𑀚𑁆𑀚𑀢𑀺, 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀯𑀺𑀭𑀚𑁆𑀚𑀦𑁆𑀢𑁄 𑀦𑀺𑀩𑁆𑀩𑀼𑀢𑀺𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀸 ‘‘𑀢𑀜𑁆𑀘 𑀅𑀜𑁆𑀜𑀫𑀜𑁆𑀜’’𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀏𑀯𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀆𑀚𑀸𑀦𑁂𑀬𑁆𑀬𑀼𑀦𑁆𑀢𑀺 𑀏𑀢𑁆𑀣 𑀓𑁂 𑀪𑀕𑀯𑀢𑁄 𑀇𑀫𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀦𑁆𑀢𑀺, 𑀓𑁂 𑀦 𑀆𑀚𑀸𑀦𑀦𑁆𑀢𑀻𑀢𑀺? 𑀬𑁂 𑀢𑀸𑀯 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀧𑀸𑀴𑀺𑀜𑁆𑀘 𑀅𑀝𑁆𑀞𑀓𑀣𑀜𑁆𑀘 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑀓𑁆𑀓𑀭𑀸 𑀦 𑀳𑁄𑀦𑁆𑀢𑀺, 𑀬𑀣𑀸𑀯𑀼𑀢𑁆𑀢𑀁 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀦 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑁂 𑀦 𑀆𑀚𑀸𑀦𑀦𑁆𑀢𑀺 𑀦𑀸𑀫. 𑀬𑁂 𑀧𑀦 𑀢𑀓𑁆𑀓𑀭𑀸 𑀳𑁄𑀦𑁆𑀢𑀺, 𑀬𑀣𑀸𑀯𑀼𑀢𑁆𑀢𑀁 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀢𑁂 𑀆𑀚𑀸𑀦𑀦𑁆𑀢𑀺 𑀦𑀸𑀫. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀧𑀝𑀺𑀲𑀦𑁆𑀥𑀺𑀓𑀸𑀦𑀁 𑀢𑀸𑀯 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀼, 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸𑀦𑀁 𑀓𑀣𑀁 𑀳𑁄𑀢𑀻𑀢𑀺. 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸 𑀅𑀦𑀼𑀧𑀸𑀤𑀸𑀦𑀸 𑀯𑀺𑀬 𑀚𑀸𑀢𑀯𑁂𑀤𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺, 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀦𑀫𑁆𑀧𑀺 𑀅𑀘𑁆𑀘𑀬𑁂𑀦 𑀢𑁂𑀲𑀁 𑀧𑀼𑀦 𑀤𑀼𑀓𑁆𑀔𑀁 𑀦𑀸𑀫 𑀦𑀢𑁆𑀣𑀺. 𑀇𑀢𑀺 𑀏𑀓𑀁𑀲𑁂𑀦 𑀢𑁂𑀲𑀁𑀬𑁂𑀯 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀳𑁄𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀲𑁂𑀯𑀺𑀢𑀩𑁆𑀩𑀸𑀲𑁂𑀯𑀺𑀢𑀩𑁆𑀩𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀩𑀳𑀼𑀥𑀸𑀢𑀼𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁪. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀩𑀳𑀼𑀥𑀸𑀢𑀼𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀪𑀬𑀸𑀦𑀻𑀢𑀺𑀆𑀤𑀻𑀲𑀼 𑀪𑀬𑀦𑁆𑀢𑀺 𑀘𑀺𑀢𑁆𑀢𑀼𑀢𑁆𑀭𑀸𑀲𑁄. 𑀉𑀧𑀤𑁆𑀤𑀯𑁄𑀢𑀺 𑀅𑀦𑁂𑀓𑀕𑁆𑀕𑀢𑀸𑀓𑀸𑀭𑁄. 𑀉𑀧𑀲𑀕𑁆𑀕𑁄𑀢𑀺 𑀉𑀧𑀲𑀝𑁆𑀞𑀸𑀓𑀸𑀭𑁄 𑀢𑀢𑁆𑀣 𑀢𑀢𑁆𑀣 𑀮𑀕𑁆𑀕𑀦𑀸𑀓𑀸𑀭𑁄. 𑀢𑁂𑀲𑀁 𑀏𑀯𑀁 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀧𑀩𑁆𑀩𑀢𑀸𑀤𑀺𑀯𑀺𑀲𑀫𑀦𑀺𑀲𑁆𑀲𑀺𑀢𑀸 𑀘𑁄𑀭𑀸 𑀚𑀦𑀧𑀤𑀯𑀸𑀲𑀻𑀦𑀁 𑀧𑁂𑀲𑁂𑀦𑁆𑀢𑀺 ‘‘𑀫𑀬𑀁 𑀅𑀲𑀼𑀓𑀤𑀺𑀯𑀲𑁂 𑀦𑀸𑀫 𑀢𑀼𑀫𑁆𑀳𑀸𑀓𑀁 𑀕𑀸𑀫𑀁 𑀧𑀳𑀭𑀺𑀲𑁆𑀲𑀸𑀫𑀸’’𑀢𑀺. 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀪𑀬𑀁 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀦𑁆𑀢𑀺. 𑀅𑀬𑀁 𑀘𑀺𑀢𑁆𑀢𑀼𑀢𑁆𑀭𑀸𑀲𑁄 𑀦𑀸𑀫. ‘‘𑀇𑀥 𑀦𑁄 𑀘𑁄𑀭𑀸 𑀓𑀼𑀧𑀺𑀢𑀸 𑀅𑀦𑀢𑁆𑀣𑀫𑁆𑀧𑀺 𑀆𑀯𑀳𑁂𑀬𑁆𑀬𑀼’’𑀦𑁆𑀢𑀺 𑀳𑀢𑁆𑀣𑀲𑀸𑀭𑀁 𑀕𑀳𑁂𑀢𑁆𑀯𑀸 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑁂𑀳𑀺 𑀲𑀤𑁆𑀥𑀺𑀁 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀪𑀽𑀫𑀺𑀬𑀁 𑀦𑀺𑀧𑀚𑁆𑀚𑀦𑁆𑀢𑀺, 𑀟𑀁𑀲𑀫𑀓𑀲𑀸𑀤𑀻𑀳𑀺 𑀔𑀚𑁆𑀚𑀫𑀸𑀦𑀸 𑀕𑀼𑀫𑁆𑀩𑀦𑁆𑀢𑀭𑀸𑀦𑀺 𑀧𑀯𑀺𑀲𑀦𑁆𑀢𑀺, 𑀔𑀸𑀡𑀼𑀓𑀡𑁆𑀝𑀓𑁂 𑀫𑀤𑁆𑀤𑀦𑁆𑀢𑀺. 𑀢𑁂𑀲𑀁 𑀏𑀯𑀁 𑀯𑀺𑀘𑀭𑀦𑁆𑀢𑀸𑀦𑀁 𑀯𑀺𑀓𑁆𑀔𑀺𑀢𑁆𑀢𑀪𑀸𑀯𑁄 𑀅𑀦𑁂𑀓𑀕𑁆𑀕𑀢𑀸𑀓𑀸𑀭𑁄 𑀦𑀸𑀫. 𑀢𑀢𑁄 𑀘𑁄𑀭𑁂𑀲𑀼 𑀬𑀣𑀸𑀯𑀼𑀢𑁆𑀢𑁂 𑀤𑀺𑀯𑀲𑁂 𑀅𑀦𑀸𑀕𑀘𑁆𑀙𑀦𑁆𑀢𑁂𑀲𑀼 ‘‘𑀢𑀼𑀘𑁆𑀙𑀓𑀲𑀸𑀲𑀦𑀁 𑀢𑀁 𑀪𑀯𑀺𑀲𑁆𑀲𑀢𑀺, 𑀕𑀸𑀫𑀁 𑀧𑀯𑀺𑀲𑀺𑀲𑁆𑀲𑀸𑀫𑀸’’𑀢𑀺 𑀲𑀧𑀭𑀺𑀓𑁆𑀔𑀸𑀭𑀸 𑀕𑀸𑀫𑀁 𑀧𑀯𑀺𑀲𑀦𑁆𑀢𑀺, 𑀅𑀣 𑀢𑁂𑀲𑀁 𑀧𑀯𑀺𑀝𑁆𑀞𑀪𑀸𑀯𑀁 𑀜𑀢𑁆𑀯𑀸 𑀕𑀸𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑁆𑀯𑀸𑀭𑁂 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀫𑀦𑀼𑀲𑁆𑀲𑁂 𑀖𑀸𑀢𑁂𑀢𑁆𑀯𑀸 𑀘𑁄𑀭𑀸 𑀲𑀩𑁆𑀩𑀁 𑀯𑀺𑀪𑀯𑀁 𑀯𑀺𑀮𑀼𑀫𑁆𑀧𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀼 𑀖𑀸𑀢𑀺𑀢𑀸𑀯𑀲𑁂𑀲𑀸 𑀅𑀕𑁆𑀕𑀺𑀁 𑀦𑀺𑀩𑁆𑀩𑀸𑀧𑁂𑀢𑁆𑀯𑀸 𑀓𑁄𑀝𑁆𑀞𑀘𑁆𑀙𑀸𑀬𑀪𑀺𑀢𑁆𑀢𑀺𑀘𑁆𑀙𑀸𑀬𑀸𑀤𑀻𑀲𑀼 𑀢𑀢𑁆𑀣 𑀢𑀢𑁆𑀣 𑀮𑀕𑁆𑀕𑀺𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺 𑀦𑀝𑁆𑀞𑀁 𑀅𑀦𑀼𑀲𑁄𑀘𑀫𑀸𑀦𑀸. 𑀅𑀬𑀁 𑀉𑀧𑀲𑀝𑁆𑀞𑀸𑀓𑀸𑀭𑁄 𑀮𑀕𑁆𑀕𑀦𑀸𑀓𑀸𑀭𑁄 𑀦𑀸𑀫.

𑀦𑀴𑀸𑀕𑀸𑀭𑀸𑀢𑀺 𑀦𑀴𑁂𑀳𑀺 𑀧𑀭𑀺𑀘𑁆𑀙𑀦𑁆𑀦𑀸 𑀅𑀕𑀸𑀭𑀸, 𑀲𑁂𑀲𑀲𑀫𑁆𑀪𑀸𑀭𑀸 𑀧𑀦𑁂𑀢𑁆𑀣 𑀭𑀼𑀓𑁆𑀔𑀫𑀬𑀸 𑀳𑁄𑀦𑁆𑀢𑀺. 𑀢𑀺𑀡𑀸𑀕𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀩𑀸𑀮𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀩𑀸𑀮𑀫𑁂𑀯 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀩𑀸𑀮𑁄 𑀳𑀺 𑀅𑀧𑀡𑁆𑀟𑀺𑀢𑀧𑀼𑀭𑀺𑀲𑁄 𑀭𑀚𑁆𑀚𑀁 𑀯𑀸 𑀉𑀧𑀭𑀚𑁆𑀚𑀁 𑀯𑀸 𑀅𑀜𑁆𑀜𑀁 𑀯𑀸 𑀧𑀦 𑀫𑀳𑀦𑁆𑀢𑀁 𑀞𑀸𑀦𑀁 𑀧𑀢𑁆𑀣𑁂𑀦𑁆𑀢𑁄 𑀓𑀢𑀺𑀧𑀬𑁂 𑀅𑀢𑁆𑀢𑀦𑀸 𑀲𑀤𑀺𑀲𑁂 𑀯𑀺𑀥𑀯𑀸𑀧𑀼𑀢𑁆𑀢𑁂 𑀫𑀳𑀸𑀥𑀼𑀢𑁆𑀢𑁂 𑀕𑀳𑁂𑀢𑁆𑀯𑀸 ‘‘𑀏𑀣 𑀅𑀳𑀁 𑀢𑀼𑀫𑁆𑀳𑁂 𑀇𑀲𑁆𑀲𑀭𑁂 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀩𑁆𑀩𑀢𑀕𑀳𑀦𑀸𑀤𑀻𑀦𑀺 𑀦𑀺𑀲𑁆𑀲𑀸𑀬 𑀅𑀦𑁆𑀢𑀦𑁆𑀢𑁂 𑀕𑀸𑀫𑁂 𑀧𑀳𑀭𑀦𑁆𑀢𑁄 𑀤𑀸𑀫𑀭𑀺𑀓𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀦𑀺𑀕𑀫𑁂𑀧𑀺 𑀚𑀦𑀧𑀤𑁂𑀧𑀺 𑀧𑀳𑀭𑀢𑀺, 𑀫𑀦𑀼𑀲𑁆𑀲𑀸 𑀕𑁂𑀳𑀸𑀦𑀺 𑀙𑀟𑁆𑀟𑁂𑀢𑁆𑀯𑀸 𑀔𑁂𑀫𑀦𑁆𑀢𑀝𑁆𑀞𑀸𑀦𑀁 𑀧𑀢𑁆𑀣𑀬𑀫𑀸𑀦𑀸 𑀧𑀓𑁆𑀓𑀫𑀦𑁆𑀢𑀺, 𑀢𑁂 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑀸 𑀪𑀺𑀓𑁆𑀔𑀽𑀧𑀺 𑀪𑀺𑀓𑁆𑀔𑀼𑀦𑀺𑀬𑁄𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀸𑀦𑀺 𑀧𑀳𑀸𑀬 𑀧𑀓𑁆𑀓𑀫𑀦𑁆𑀢𑀺. 𑀕𑀢𑀕𑀢𑀝𑁆𑀞𑀸𑀦𑁂 𑀪𑀺𑀓𑁆𑀔𑀸𑀧𑀺 𑀲𑁂𑀦𑀸𑀲𑀦𑀫𑁆𑀧𑀺 𑀤𑀼𑀮𑁆𑀮𑀪𑀁 𑀳𑁄𑀢𑀺. 𑀏𑀯𑀁 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀪𑀬𑀁 𑀆𑀕𑀢𑀫𑁂𑀯 𑀳𑁄𑀢𑀺. 𑀧𑀩𑁆𑀩𑀚𑀺𑀢𑁂𑀲𑀼𑀧𑀺 𑀤𑁆𑀯𑁂 𑀩𑀸𑀮𑀸 𑀪𑀺𑀓𑁆𑀔𑀽 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀸𑀤𑀁 𑀧𑀝𑁆𑀞𑀧𑁂𑀢𑁆𑀯𑀸 𑀘𑁄𑀤𑀦𑀁 𑀆𑀭𑀪𑀦𑁆𑀢𑀺. 𑀇𑀢𑀺 𑀓𑁄𑀲𑀫𑁆𑀩𑀺𑀯𑀸𑀲𑀺𑀓𑀸𑀦𑀁 𑀯𑀺𑀬 𑀫𑀳𑀸𑀓𑀮𑀳𑁄 𑀉𑀧𑁆𑀧𑀚𑁆𑀚𑀢𑀺, 𑀘𑀢𑀼𑀦𑁆𑀦𑀁 𑀧𑀭𑀺𑀲𑀸𑀦𑀁 𑀪𑀬𑀁 𑀆𑀕𑀢𑀫𑁂𑀯 𑀳𑁄𑀢𑀻𑀢𑀺 𑀏𑀯𑀁 𑀬𑀸𑀦𑀺 𑀓𑀸𑀦𑀺𑀘𑀺 𑀪𑀬𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀩𑀸𑀮𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀏𑀢𑀤𑀯𑁄𑀘𑀸𑀢𑀺 𑀪𑀕𑀯𑀢𑀸 𑀥𑀫𑁆𑀫𑀤𑁂𑀲𑀦𑀸 𑀫𑀢𑁆𑀣𑀓𑀁 𑀅𑀧𑀸𑀧𑁂𑀢𑁆𑀯𑀸𑀯 𑀦𑀺𑀝𑁆𑀞𑀸𑀧𑀺𑀢𑀸. 𑀬𑀁𑀦𑀽𑀦𑀸𑀳𑀁 𑀤𑀲𑀩𑀮𑀁 𑀧𑀼𑀘𑁆𑀙𑀺𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦𑁂𑀯𑀲𑁆𑀲 𑀤𑁂𑀲𑀦𑀸𑀬 𑀧𑀸𑀭𑀺𑀧𑀽𑀭𑀺𑀁 𑀓𑀭𑁂𑀬𑁆𑀬𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀢𑀁 ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘.

𑁧𑁨𑁫. 𑀅𑀝𑁆𑀞𑀸𑀭𑀲𑀲𑀼 𑀥𑀸𑀢𑀽𑀲𑀼 𑀅𑀟𑁆𑀠𑁂𑀓𑀸𑀤𑀲𑀥𑀸𑀢𑀼𑀬𑁄 𑀭𑀽𑀧𑀧𑀭𑀺𑀕𑁆𑀕𑀳𑁄, 𑀅𑀟𑁆𑀠𑀝𑁆𑀞𑀫𑀓𑀥𑀸𑀢𑀼𑀬𑁄 𑀅𑀭𑀽𑀧𑀧𑀭𑀺𑀕𑁆𑀕𑀳𑁄𑀢𑀺 𑀭𑀽𑀧𑀸𑀭𑀽𑀧𑀧𑀭𑀺𑀕𑁆𑀕𑀳𑁄𑀯 𑀓𑀣𑀺𑀢𑁄. 𑀲𑀩𑁆𑀩𑀸𑀧𑀺 𑀔𑀦𑁆𑀥𑀯𑀲𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑀸 𑀳𑁄𑀦𑁆𑀢𑀺. 𑀧𑀜𑁆𑀘𑀧𑀺 𑀔𑀦𑁆𑀥𑀸 𑀤𑀼𑀓𑁆𑀔𑀲𑀘𑁆𑀘𑀁, 𑀢𑁂𑀲𑀁 𑀲𑀫𑀼𑀝𑁆𑀞𑀸𑀧𑀺𑀓𑀸 𑀢𑀡𑁆𑀳𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀉𑀪𑀺𑀦𑁆𑀦𑀁 𑀅𑀧𑁆𑀧𑀯𑀢𑁆𑀢𑀺 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑀚𑀸𑀦𑀦𑀸 𑀧𑀝𑀺𑀧𑀤𑀸 𑀫𑀕𑁆𑀕𑀲𑀘𑁆𑀘𑀁. 𑀇𑀢𑀺 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀁 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀕𑁆𑀕𑀫𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀓𑀣𑀺𑀢𑀁 𑀳𑁄𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑀸 𑀥𑀸𑀢𑀼𑀬𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀓𑀣𑀺𑀢𑀸𑀯. 𑀚𑀸𑀦𑀸𑀢𑀺 𑀧𑀲𑁆𑀲𑀢𑀻𑀢𑀺 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁄 𑀯𑀼𑀢𑁆𑀢𑁄.

𑀧𑀣𑀯𑀻𑀥𑀸𑀢𑀼𑀆𑀤𑀬𑁄 𑀲𑀯𑀺𑀜𑁆𑀜𑀸𑀡𑀓𑀓𑀸𑀬𑀁 𑀲𑀼𑀜𑁆𑀜𑀢𑁄 𑀦𑀺𑀲𑁆𑀲𑀢𑁆𑀢𑀢𑁄 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀸. 𑀢𑀸𑀧𑀺 𑀧𑀼𑀭𑀺𑀫𑀸𑀳𑀺 𑀅𑀝𑁆𑀞𑀸𑀭𑀲𑀳𑀺 𑀥𑀸𑀢𑀽𑀳𑀺 𑀧𑀽𑀭𑁂𑀢𑀩𑁆𑀩𑀸. 𑀧𑀽𑀭𑁂𑀦𑁆𑀢𑁂𑀦 𑀯𑀺𑀜𑁆𑀜𑀸𑀡𑀥𑀸𑀢𑀼𑀢𑁄 𑀦𑀻𑀳𑀭𑀺𑀢𑁆𑀯𑀸 𑀧𑀽𑀭𑁂𑀢𑀩𑁆𑀩𑀸. 𑀯𑀺𑀜𑁆𑀜𑀸𑀡𑀥𑀸𑀢𑀼 𑀳𑁂𑀲𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀯𑀲𑁂𑀦 𑀙𑀩𑁆𑀩𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀧𑀭𑀺𑀕𑁆𑀕𑀳𑀺𑀢𑀸𑀬 𑀢𑀲𑁆𑀲𑀸 𑀯𑀢𑁆𑀣𑀼 𑀘𑀓𑁆𑀔𑀼𑀥𑀸𑀢𑀼, 𑀆𑀭𑀫𑁆𑀫𑀡𑀁 𑀭𑀽𑀧𑀥𑀸𑀢𑀽𑀢𑀺 𑀤𑁆𑀯𑁂 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀧𑀦 𑀧𑀭𑀺𑀕𑁆𑀕𑀳𑀺𑀢𑀸𑀬 𑀢𑀲𑁆𑀲𑀸 𑀧𑀼𑀭𑀺𑀫𑀧𑀘𑁆𑀙𑀺𑀫𑀯𑀲𑁂𑀦 𑀫𑀦𑁄𑀥𑀸𑀢𑀼, 𑀆𑀭𑀫𑁆𑀫𑀡𑀯𑀲𑁂𑀦 𑀥𑀫𑁆𑀫𑀥𑀸𑀢𑀽𑀢𑀺 𑀤𑁆𑀯𑁂 𑀥𑀸𑀢𑀼𑀬𑁄 𑀧𑀭𑀺𑀕𑁆𑀕𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀇𑀢𑀺 𑀇𑀫𑀸𑀲𑀼 𑀅𑀝𑁆𑀞𑀸𑀭𑀲𑀲𑀼 𑀥𑀸𑀢𑀽𑀲𑀼 𑀅𑀟𑁆𑀠𑁂𑀓𑀸𑀤𑀲𑀥𑀸𑀢𑀼𑀬𑁄 𑀭𑀽𑀧𑀧𑀭𑀺𑀕𑁆𑀕𑀳𑁄𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀇𑀤𑀫𑁆𑀧𑀺 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀕𑁆𑀕𑀫𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀓𑀣𑀺𑀢𑀁 𑀳𑁄𑀢𑀺.

𑀲𑀼𑀔𑀥𑀸𑀢𑀽𑀢𑀺𑀆𑀤𑀻𑀲𑀼 𑀲𑀼𑀔𑀜𑁆𑀘 𑀢𑀁 𑀦𑀺𑀲𑁆𑀲𑀢𑁆𑀢𑀲𑀼𑀜𑁆𑀜𑀢𑀝𑁆𑀞𑁂𑀦 𑀥𑀸𑀢𑀼 𑀘𑀸𑀢𑀺 𑀲𑀼𑀔𑀥𑀸𑀢𑀼. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀏𑀢𑁆𑀣 𑀘 𑀧𑀼𑀭𑀺𑀫𑀸 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀲𑀧𑁆𑀧𑀝𑀺𑀧𑀓𑁆𑀔𑀯𑀲𑁂𑀦 𑀕𑀳𑀺𑀢𑀸, 𑀧𑀘𑁆𑀙𑀺𑀫𑀸 𑀤𑁆𑀯𑁂 𑀲𑀭𑀺𑀓𑁆𑀔𑀓𑀯𑀲𑁂𑀦. 𑀅𑀯𑀺𑀪𑀽𑀢𑀪𑀸𑀯𑁂𑀦 𑀳𑀺 𑀉𑀧𑁂𑀓𑁆𑀔𑀸𑀥𑀸𑀢𑀼 𑀅𑀯𑀺𑀚𑁆𑀚𑀸𑀥𑀸𑀢𑀼𑀬𑀸 𑀲𑀭𑀺𑀓𑁆𑀔𑀸. 𑀏𑀢𑁆𑀣 𑀘 𑀲𑀼𑀔𑀤𑀼𑀓𑁆𑀔𑀥𑀸𑀢𑀽𑀲𑀼 𑀧𑀭𑀺𑀕𑁆𑀕𑀳𑀺𑀢𑀸𑀲𑀼 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼 𑀧𑀭𑀺𑀕𑁆𑀕𑀳𑀺𑀢𑀸𑀯 𑀳𑁄𑀢𑀺, 𑀲𑁂𑀲𑀸𑀲𑀼 𑀧𑀭𑀺𑀕𑁆𑀕𑀳𑀺𑀢𑀸𑀲𑀼 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀧𑀭𑀺𑀕𑁆𑀕𑀳𑀺𑀢𑀸𑀯 𑀳𑁄𑀢𑀺. 𑀇𑀫𑀸𑀧𑀺 𑀙 𑀥𑀸𑀢𑀼𑀬𑁄 𑀳𑁂𑀝𑁆𑀞𑀸 𑀅𑀝𑁆𑀞𑀸𑀭𑀲𑀳𑀺𑀬𑁂𑀯 𑀧𑀽𑀭𑁂𑀢𑀩𑁆𑀩𑀸. 𑀧𑀽𑀭𑁂𑀦𑁆𑀢𑁂𑀦 𑀉𑀧𑁂𑀓𑁆𑀔𑀸𑀥𑀸𑀢𑀼𑀢𑁄 𑀦𑀻𑀳𑀭𑀺𑀢𑁆𑀯𑀸 𑀧𑀽𑀭𑁂𑀢𑀩𑁆𑀩𑀸. 𑀇𑀢𑀺 𑀇𑀫𑀸𑀲𑀼 𑀅𑀝𑁆𑀞𑀸𑀭𑀲𑀲𑀼 𑀥𑀸𑀢𑀽𑀲𑀼 𑀅𑀟𑁆𑀠𑁂𑀓𑀸𑀤𑀲𑀥𑀸𑀢𑀼𑀬𑁄 𑀭𑀽𑀧𑀧𑀭𑀺𑀕𑁆𑀕𑀳𑁄𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀇𑀤𑀫𑁆𑀧𑀺 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀕𑁆𑀕𑀫𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀓𑀣𑀺𑀢𑀁 𑀳𑁄𑀢𑀺.

𑀓𑀸𑀫𑀥𑀸𑀢𑀼𑀆𑀤𑀻𑀦𑀁 𑀤𑁆𑀯𑁂𑀥𑀸𑀯𑀺𑀢𑀓𑁆𑀓𑁂 (𑀫. 𑀦𑀺. 𑁧.𑁨𑁦𑁬) 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀪𑀺𑀥𑀫𑁆𑀫𑁂𑀧𑀺 ‘‘𑀢𑀢𑁆𑀣 𑀓𑀢𑀫𑀸 𑀓𑀸𑀫𑀥𑀸𑀢𑀼, 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑁄 𑀢𑀓𑁆𑀓𑁄 𑀯𑀺𑀢𑀓𑁆𑀓𑁄’’𑀢𑀺𑀆𑀤𑀺𑀦𑀸 (𑀯𑀺𑀪. 𑁧𑁮𑁨) 𑀦𑀬𑁂𑀦𑁂𑀯 𑀏𑀢𑀸𑀲𑀁 𑀯𑀺𑀢𑁆𑀣𑀸𑀭𑁄 𑀆𑀕𑀢𑁄𑀬𑁂𑀯. 𑀇𑀫𑀸𑀧𑀺 𑀙 𑀥𑀸𑀢𑀼𑀬𑁄 𑀳𑁂𑀝𑁆𑀞𑀸 𑀅𑀝𑁆𑀞𑀸𑀭𑀲𑀳𑀺𑀬𑁂𑀯 𑀧𑀽𑀭𑁂𑀢𑀩𑁆𑀩𑀸. 𑀧𑀽𑀭𑁂𑀦𑁆𑀢𑁂𑀦 𑀓𑀸𑀫𑀥𑀸𑀢𑀼𑀢𑁄 𑀦𑀻𑀳𑀭𑀺𑀢𑁆𑀯𑀸 𑀧𑀽𑀭𑁂𑀢𑀩𑁆𑀩𑀸. 𑀇𑀢𑀺 𑀇𑀫𑀸𑀲𑀼 𑀅𑀝𑁆𑀞𑀸𑀭𑀲𑀲𑀼 𑀥𑀸𑀢𑀽𑀲𑀼 𑀅𑀟𑁆𑀠𑁂𑀓𑀸𑀤𑀲𑀥𑀸𑀢𑀼𑀬𑁄 𑀭𑀽𑀧𑀧𑀭𑀺𑀕𑁆𑀕𑀳𑁄𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀇𑀤𑀫𑁆𑀧𑀺 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀕𑁆𑀕𑀫𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀓𑀣𑀺𑀢𑀁 𑀳𑁄𑀢𑀺.

𑀓𑀸𑀫𑀥𑀸𑀢𑀼𑀆𑀤𑀻𑀲𑀼 𑀧𑀜𑁆𑀘 𑀓𑀸𑀫𑀸𑀯𑀘𑀭𑀓𑁆𑀔𑀦𑁆𑀥𑀸 𑀓𑀸𑀫𑀥𑀸𑀢𑀼 𑀦𑀸𑀫, 𑀧𑀜𑁆𑀘 𑀭𑀽𑀧𑀸𑀯𑀘𑀭𑀓𑁆𑀔𑀦𑁆𑀥𑀸 𑀭𑀽𑀧𑀥𑀸𑀢𑀼 𑀦𑀸𑀫, 𑀘𑀢𑁆𑀢𑀸𑀭𑁄 𑀅𑀭𑀽𑀧𑀸𑀯𑀘𑀭𑀓𑁆𑀔𑀦𑁆𑀥𑀸 𑀅𑀭𑀽𑀧𑀥𑀸𑀢𑀼 𑀦𑀸𑀫. 𑀅𑀪𑀺𑀥𑀫𑁆𑀫𑁂 𑀧𑀦 ‘‘𑀢𑀢𑁆𑀣 𑀓𑀢𑀫𑀸 𑀓𑀸𑀫𑀥𑀸𑀢𑀼, 𑀳𑁂𑀝𑁆𑀞𑀢𑁄 𑀅𑀯𑀻𑀘𑀺𑀦𑀺𑀭𑀬𑀁 𑀧𑀭𑀺𑀬𑀦𑁆𑀢𑀁 𑀓𑀭𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁧𑁮𑁨) 𑀦𑀬𑁂𑀦 𑀏𑀢𑀸𑀲𑀁 𑀯𑀺𑀢𑁆𑀣𑀸𑀭𑁄 𑀆𑀕𑀢𑁄𑀬𑁂𑀯. 𑀇𑀫𑀸𑀧𑀺 𑀢𑀺𑀲𑁆𑀲𑁄 𑀥𑀸𑀢𑀼𑀬𑁄 𑀳𑁂𑀝𑁆𑀞𑀸 𑀅𑀝𑁆𑀞𑀸𑀭𑀲𑀳𑀺𑀬𑁂𑀯 𑀧𑀽𑀭𑁂𑀢𑀩𑁆𑀩𑀸. 𑀧𑀽𑀭𑁂𑀦𑁆𑀢𑁂𑀦 𑀓𑀸𑀫𑀥𑀸𑀢𑀼𑀢𑁄 𑀦𑀻𑀳𑀭𑀺𑀢𑁆𑀯𑀸 𑀧𑀽𑀭𑁂𑀢𑀩𑁆𑀩𑀸. 𑀇𑀢𑀺 𑀇𑀫𑀸𑀲𑀼 𑀅𑀝𑁆𑀞𑀸𑀭𑀲𑀲𑀼 𑀥𑀸𑀢𑀽𑀲𑀼 𑀅𑀟𑁆𑀠𑁂𑀓𑀸𑀤𑀲𑀥𑀸𑀢𑀼𑀬𑁄 𑀭𑀽𑀧𑀧𑀭𑀺𑀕𑁆𑀕𑀳𑁄𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀇𑀤𑀫𑁆𑀧𑀺 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀕𑁆𑀕𑀫𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀓𑀣𑀺𑀢𑀁 𑀳𑁄𑀢𑀺.

𑀲𑀗𑁆𑀔𑀢𑀸𑀢𑀺 𑀧𑀘𑁆𑀘𑀬𑁂𑀳𑀺 𑀲𑀫𑀸𑀕𑀦𑁆𑀢𑁆𑀯𑀸 𑀓𑀢𑀸, 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀦 𑀲𑀗𑁆𑀔𑀢𑀸 𑀅𑀲𑀗𑁆𑀔𑀢𑀸. 𑀦𑀺𑀩𑁆𑀩𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀫𑀸𑀧𑀺 𑀤𑁆𑀯𑁂 𑀥𑀸𑀢𑀼𑀬𑁄 𑀳𑁂𑀝𑁆𑀞𑀸 𑀅𑀝𑁆𑀞𑀸𑀭𑀲𑀳𑀺𑀬𑁂𑀯 𑀧𑀽𑀭𑁂𑀢𑀩𑁆𑀩𑀸. 𑀧𑀽𑀭𑁂𑀦𑁆𑀢𑁂𑀦 𑀲𑀗𑁆𑀔𑀢𑀥𑀸𑀢𑀼𑀢𑁄 𑀦𑀻𑀳𑀭𑀺𑀢𑁆𑀯𑀸 𑀧𑀽𑀭𑁂𑀢𑀩𑁆𑀩𑀸. 𑀇𑀢𑀺 𑀇𑀫𑀸𑀲𑀼 𑀅𑀝𑁆𑀞𑀸𑀭𑀲𑀲𑀼 𑀥𑀸𑀢𑀽𑀲𑀼 𑀅𑀟𑁆𑀠𑁂𑀓𑀸𑀤𑀲𑀥𑀸𑀢𑀼𑀬𑁄 𑀭𑀽𑀧𑀧𑀭𑀺𑀕𑁆𑀕𑀳𑁄𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀇𑀤𑀫𑁆𑀧𑀺 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀕𑁆𑀕𑀫𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀓𑀣𑀺𑀢𑀁 𑀳𑁄𑀢𑀺.

𑁧𑁨𑁬. 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀻𑀢𑀺 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀘 𑀩𑀸𑀳𑀺𑀭𑀸𑀦𑀺 𑀘. 𑀏𑀢𑁆𑀣 𑀳𑀺 𑀘𑀓𑁆𑀔𑀼𑀆𑀤𑀻𑀦𑀺 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀙, 𑀭𑀽𑀧𑀸𑀤𑀻𑀦𑀺 𑀩𑀸𑀳𑀺𑀭𑀸𑀦𑀺 𑀙. 𑀇𑀥𑀸𑀧𑀺 𑀚𑀸𑀦𑀸𑀢𑀺 𑀧𑀲𑁆𑀲𑀢𑀻𑀢𑀺 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁄 𑀓𑀣𑀺𑀢𑁄.

𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀦𑁆𑀢𑀺𑀆𑀤𑀺 𑀫𑀳𑀸𑀢𑀡𑁆𑀳𑀸𑀲𑀗𑁆𑀔𑀬𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯.

𑁧𑁨𑁭. 𑀅𑀝𑁆𑀞𑀸𑀦𑀦𑁆𑀢𑀺 𑀳𑁂𑀢𑀼𑀧𑀝𑀺𑀓𑁆𑀔𑁂𑀧𑁄. 𑀅𑀦𑀯𑀓𑀸𑀲𑁄𑀢𑀺 𑀧𑀘𑁆𑀘𑀬𑀧𑀝𑀺𑀓𑁆𑀔𑁂𑀧𑁄. 𑀉𑀪𑀬𑁂𑀦𑀸𑀧𑀺 𑀓𑀸𑀭𑀡𑀫𑁂𑀯 𑀧𑀝𑀺𑀓𑁆𑀔𑀺𑀧𑀢𑀺. 𑀓𑀸𑀭𑀡𑀜𑁆𑀳𑀺 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀞𑀸𑀦𑀦𑁆𑀢𑀺 𑀘 𑀅𑀯𑀓𑀸𑀲𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀬𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦. 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄𑀢𑀺 𑀫𑀕𑁆𑀕𑀤𑀺𑀝𑁆𑀞𑀺𑀬𑀸 𑀲𑀫𑁆𑀧𑀦𑁆𑀦𑁄 𑀲𑁄𑀢𑀸𑀧𑀦𑁆𑀦𑁄 𑀅𑀭𑀺𑀬𑀲𑀸𑀯𑀓𑁄. 𑀓𑀜𑁆𑀘𑀺 𑀲𑀗𑁆𑀔𑀸𑀭𑀦𑁆𑀢𑀺 𑀘𑀢𑀼𑀪𑀽𑀫𑀓𑁂𑀲𑀼 𑀲𑀗𑁆𑀔𑀢𑀲𑀗𑁆𑀔𑀸𑀭𑁂𑀲𑀼 𑀓𑀜𑁆𑀘𑀺 𑀏𑀓𑀲𑀗𑁆𑀔𑀸𑀭𑀫𑁆𑀧𑀺. 𑀦𑀺𑀘𑁆𑀘𑀢𑁄 𑀉𑀧𑀕𑀘𑁆𑀙𑁂𑀬𑁆𑀬𑀸𑀢𑀺 𑀦𑀺𑀘𑁆𑀘𑁄𑀢𑀺 𑀕𑀡𑁆𑀳𑁂𑀬𑁆𑀬. 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺 𑀏𑀢𑀁 𑀓𑀸𑀭𑀡𑀁 𑀦𑀢𑁆𑀣𑀺 𑀦 𑀉𑀧𑀮𑀩𑁆𑀪𑀢𑀺. 𑀬𑀁 𑀧𑀼𑀣𑀼𑀚𑁆𑀚𑀦𑁄𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀧𑀼𑀣𑀼𑀚𑁆𑀚𑀦𑁄. 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀻𑀢𑀺 𑀏𑀢𑀁 𑀓𑀸𑀭𑀡𑀁 𑀅𑀢𑁆𑀣𑀺. 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀳𑀺 𑀲𑁄 𑀢𑁂𑀪𑀽𑀫𑀓𑁂𑀲𑀼 𑀲𑀗𑁆𑀔𑀢𑀲𑀗𑁆𑀔𑀸𑀭𑁂𑀲𑀼 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀦𑀺𑀘𑁆𑀘𑀢𑁄 𑀕𑀡𑁆𑀳𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀘𑀢𑀼𑀢𑁆𑀣𑀪𑀽𑀫𑀓𑀲𑀗𑁆𑀔𑀸𑀭𑀸 𑀧𑀦 𑀢𑁂𑀚𑀼𑀲𑁆𑀲𑀤𑀢𑁆𑀢𑀸 𑀤𑀺𑀯𑀲𑀁 𑀲𑀦𑁆𑀢𑀢𑁆𑀢𑁄 𑀅𑀬𑁄𑀕𑀼𑀴𑁄 𑀯𑀺𑀬 𑀫𑀓𑁆𑀔𑀺𑀓𑀸𑀦𑀁 𑀤𑀺𑀝𑁆𑀞𑀺𑀬𑀸 𑀯𑀸 𑀅𑀜𑁆𑀜𑁂𑀲𑀁 𑀯𑀸 𑀅𑀓𑀼𑀲𑀮𑀸𑀦𑀁 𑀆𑀭𑀫𑁆𑀫𑀡𑀁 𑀦 𑀳𑁄𑀦𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀲𑀼𑀔𑀢𑁄𑀢𑀺𑀆𑀤𑀻𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀼𑀔𑀢𑁄 𑀉𑀧𑀕𑀘𑁆𑀙𑁂𑀬𑁆𑀬𑀸𑀢𑀺 ‘‘𑀏𑀓𑀦𑁆𑀢𑀲𑀼𑀔𑀻 𑀅𑀢𑁆𑀢𑀸 𑀳𑁄𑀢𑀺 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸’’𑀢𑀺 (𑀫. 𑀦𑀺. 𑁩.𑁨𑁧, 𑁨𑁨) 𑀏𑀯𑀁 𑀅𑀢𑁆𑀢𑀤𑀺𑀝𑁆𑀞𑀺𑀯𑀲𑁂𑀦 𑀲𑀼𑀔𑀢𑁄 𑀕𑀸𑀳𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀧𑀦 𑀅𑀭𑀺𑀬𑀲𑀸𑀯𑀓𑁄 𑀧𑀭𑀺𑀴𑀸𑀳𑀸𑀪𑀺𑀪𑀽𑀢𑁄 𑀧𑀭𑀺𑀴𑀸𑀳𑀯𑀽𑀧𑀲𑀫𑀢𑁆𑀣𑀁 𑀫𑀢𑁆𑀢𑀳𑀢𑁆𑀣𑀺𑀁 𑀧𑀭𑀺𑀢𑁆𑀢𑀸𑀲𑀺𑀢𑁄 𑀯𑀺𑀬, 𑀘𑁄𑀓𑁆𑀔𑀩𑁆𑀭𑀸𑀳𑁆𑀫𑀡𑁄 𑀯𑀺𑀬 𑀘 𑀕𑀽𑀣𑀁 𑀓𑀜𑁆𑀘𑀺 𑀲𑀗𑁆𑀔𑀸𑀭𑀁 𑀲𑀼𑀔𑀢𑁄 𑀉𑀧𑀕𑀘𑁆𑀙𑀢𑀺. 𑀅𑀢𑁆𑀢𑀯𑀸𑀭𑁂 𑀓𑀲𑀺𑀡𑀸𑀤𑀺𑀧𑀡𑁆𑀡𑀢𑁆𑀢𑀺𑀲𑀗𑁆𑀕𑀳𑀢𑁆𑀣𑀁 𑀲𑀗𑁆𑀔𑀸𑀭𑀦𑁆𑀢𑀺 𑀅𑀯𑀢𑁆𑀯𑀸 𑀓𑀜𑁆𑀘𑀺 𑀥𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀥𑀸𑀧𑀺 𑀅𑀭𑀺𑀬𑀲𑀸𑀯𑀓𑀲𑁆𑀲 𑀘𑀢𑀼𑀪𑀽𑀫𑀓𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄, 𑀧𑀼𑀣𑀼𑀚𑁆𑀚𑀦𑀲𑁆𑀲 𑀢𑁂𑀪𑀽𑀫𑀓𑀯𑀲𑁂𑀦. 𑀲𑀩𑁆𑀩𑀯𑀸𑀭𑁂𑀲𑀼 𑀅𑀭𑀺𑀬𑀲𑀸𑀯𑀓𑀲𑁆𑀲𑀸𑀧𑀺 𑀢𑁂𑀪𑀽𑀫𑀓𑀯𑀲𑁂𑀦𑁂𑀯 𑀧𑀭𑀺𑀘𑁆𑀙𑁂𑀤𑁄 𑀯𑀝𑁆𑀝𑀢𑀺. 𑀬𑀁 𑀬𑀜𑁆𑀳𑀺 𑀧𑀼𑀣𑀼𑀚𑁆𑀚𑀦𑁄 𑀕𑀡𑁆𑀳𑀸𑀢𑀺, 𑀢𑀢𑁄 𑀢𑀢𑁄 𑀅𑀭𑀺𑀬𑀲𑀸𑀯𑀓𑁄 𑀕𑀸𑀳𑀁 𑀯𑀺𑀦𑀺𑀯𑁂𑀞𑁂𑀢𑀺. 𑀧𑀼𑀣𑀼𑀚𑁆𑀚𑀦𑁄 𑀳𑀺 𑀬𑀁 𑀬𑀁 𑀦𑀺𑀘𑁆𑀘𑀁 𑀲𑀼𑀔𑀁 𑀅𑀢𑁆𑀢𑀸𑀢𑀺 𑀕𑀡𑁆𑀳𑀸𑀢𑀺, 𑀢𑀁 𑀢𑀁 𑀅𑀭𑀺𑀬𑀲𑀸𑀯𑀓𑁄 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀕𑀡𑁆𑀳𑀦𑁆𑀢𑁄 𑀢𑀁 𑀕𑀸𑀳𑀁 𑀯𑀺𑀦𑀺𑀯𑁂𑀞𑁂𑀢𑀺.

𑁧𑁨𑁮. 𑀫𑀸𑀢𑀭𑀦𑁆𑀢𑀺𑀆𑀤𑀻𑀲𑀼 𑀚𑀦𑀺𑀓𑀸𑀯 𑀫𑀸𑀢𑀸, 𑀚𑀦𑀓𑁄 𑀧𑀺𑀢𑀸, 𑀫𑀦𑀼𑀲𑁆𑀲𑀪𑀽𑀢𑁄𑀯 𑀔𑀻𑀡𑀸𑀲𑀯𑁄 𑀅𑀭𑀳𑀸𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀓𑀺𑀁 𑀧𑀦 𑀅𑀭𑀺𑀬𑀲𑀸𑀯𑀓𑁄 𑀅𑀜𑁆𑀜𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸𑀢𑀺? 𑀏𑀢𑀫𑁆𑀧𑀺 𑀅𑀝𑁆𑀞𑀸𑀦𑀁. 𑀲𑀘𑁂𑀧𑀺 𑀳𑀺 𑀪𑀯𑀦𑁆𑀢𑀭𑀕𑀢𑀁 𑀅𑀭𑀺𑀬𑀲𑀸𑀯𑀓𑀁 𑀅𑀢𑁆𑀢𑀦𑁄 𑀅𑀭𑀺𑀬𑀪𑀸𑀯𑀁 𑀅𑀚𑀸𑀦𑀦𑁆𑀢𑀫𑁆𑀧𑀺 𑀓𑁄𑀘𑀺 𑀏𑀯𑀁 𑀯𑀤𑁂𑀬𑁆𑀬 ‘‘𑀇𑀫𑀁 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑁂 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀧𑀝𑀺𑀧𑀚𑁆𑀚𑀸𑀳𑀻’’𑀢𑀺, 𑀦𑁂𑀯 𑀲𑁄 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬. 𑀅𑀣𑀸𑀧𑀺 𑀦𑀁 𑀏𑀯𑀁 𑀯𑀤𑁂𑀬𑁆𑀬 ‘‘𑀲𑀘𑁂 𑀇𑀫𑀁 𑀦 𑀖𑀸𑀢𑁂𑀲𑁆𑀲𑀲𑀺, 𑀲𑀻𑀲𑀁 𑀢𑁂 𑀙𑀺𑀦𑁆𑀤𑀺𑀲𑁆𑀲𑀸𑀫𑀸’’𑀢𑀺. 𑀲𑀻𑀲𑀫𑁂𑀯𑀲𑁆𑀲 𑀙𑀺𑀦𑁆𑀤𑁂𑀬𑁆𑀬, 𑀦 𑀘 𑀲𑁄 𑀢𑀁 𑀖𑀸𑀢𑁂𑀬𑁆𑀬. 𑀧𑀼𑀣𑀼𑀚𑁆𑀚𑀦𑀪𑀸𑀯𑀲𑁆𑀲 𑀧𑀦 𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀅𑀭𑀺𑀬𑀲𑀸𑀯𑀓𑀲𑁆𑀲 𑀘 𑀩𑀮𑀤𑀻𑀧𑀦𑀢𑁆𑀣𑀫𑁂𑀢𑀁 𑀯𑀼𑀢𑁆𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀲𑀸𑀯𑀚𑁆𑀚𑁄 𑀧𑀼𑀣𑀼𑀚𑁆𑀚𑀦𑀪𑀸𑀯𑁄, 𑀬𑀢𑁆𑀭 𑀳𑀺 𑀦𑀸𑀫 𑀧𑀼𑀣𑀼𑀚𑁆𑀚𑀦𑁄 𑀫𑀸𑀢𑀼𑀖𑀸𑀢𑀸𑀤𑀻𑀦𑀺𑀧𑀺 𑀆𑀦𑀦𑁆𑀢𑀭𑀺𑀬𑀸𑀦𑀺 𑀓𑀭𑀺𑀲𑁆𑀲𑀢𑀺. 𑀫𑀳𑀸𑀩𑀮𑁄 𑀘 𑀅𑀭𑀺𑀬𑀲𑀸𑀯𑀓𑁄, 𑀬𑁄 𑀏𑀢𑀸𑀦𑀺 𑀓𑀫𑁆𑀫𑀸𑀦𑀺 𑀦 𑀓𑀭𑁄𑀢𑀻𑀢𑀺.

𑀤𑀼𑀝𑁆𑀞𑀘𑀺𑀢𑁆𑀢𑁄𑀢𑀺 𑀯𑀥𑀓𑀘𑀺𑀢𑁆𑀢𑁂𑀦 𑀧𑀤𑀼𑀝𑁆𑀞𑀘𑀺𑀢𑁆𑀢𑁄. 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀬𑁆𑀬𑀸𑀢𑀺 𑀚𑀻𑀯𑀫𑀸𑀦𑀓𑀲𑀭𑀻𑀭𑁂 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸𑀬 𑀧𑀺𑀯𑀦𑀫𑀢𑁆𑀢𑀫𑁆𑀧𑀺 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀬𑁆𑀬. 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬𑀸𑀢𑀺 𑀲𑀫𑀸𑀦𑀲𑀁𑀯𑀸𑀲𑀓𑀁 𑀲𑀫𑀸𑀦𑀲𑀻𑀫𑀸𑀬 𑀞𑀺𑀢𑀁 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀧𑀜𑁆𑀘𑀳𑀼𑀧𑀸𑀮𑀺 𑀆𑀓𑀸𑀭𑁂𑀳𑀺 𑀲𑀗𑁆𑀖𑁄 𑀪𑀺𑀚𑁆𑀚𑀢𑀺. 𑀓𑀫𑁆𑀫𑁂𑀦 𑀉𑀤𑁆𑀤𑁂𑀲𑁂𑀦 𑀯𑁄𑀳𑀭𑀦𑁆𑀢𑁄 𑀅𑀦𑀼𑀲𑁆𑀲𑀸𑀯𑀦𑁂𑀦 𑀲𑀮𑀸𑀓𑀕𑁆𑀕𑀸𑀳𑁂𑀦𑀸’’𑀢𑀺 (𑀧𑀭𑀺. 𑁪𑁫𑁮).

𑀢𑀢𑁆𑀣 𑀓𑀫𑁆𑀫𑁂𑀦𑀸𑀢𑀺 𑀅𑀧𑀮𑁄𑀓𑀦𑀸𑀤𑀻𑀲𑀼 𑀘𑀢𑀽𑀲𑀼 𑀓𑀫𑁆𑀫𑁂𑀲𑀼 𑀅𑀜𑁆𑀜𑀢𑀭𑁂𑀦 𑀓𑀫𑁆𑀫𑁂𑀦. 𑀉𑀤𑁆𑀤𑁂𑀲𑁂𑀦𑀸𑀢𑀺 𑀧𑀜𑁆𑀘𑀲𑀼 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂𑀲𑀼 𑀅𑀜𑁆𑀜𑀢𑀭𑁂𑀦 𑀉𑀤𑁆𑀤𑁂𑀲𑁂𑀦. 𑀯𑁄𑀳𑀭𑀦𑁆𑀢𑁄𑀢𑀺 𑀓𑀣𑀬𑀦𑁆𑀢𑁄, 𑀢𑀸𑀳𑀺 𑀢𑀸𑀳𑀺 𑀉𑀧𑁆𑀧𑀢𑁆𑀢𑀻𑀳𑀺 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺𑀆𑀤𑀻𑀦𑀺 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀤𑀻𑀧𑁂𑀦𑁆𑀢𑁄. 𑀅𑀦𑀼𑀲𑁆𑀲𑀸𑀯𑀦𑁂𑀦𑀸𑀢𑀺 𑀦𑀦𑀼 𑀢𑀼𑀫𑁆𑀳𑁂 𑀚𑀸𑀦𑀸𑀣 𑀫𑀬𑁆𑀳𑀁 𑀉𑀘𑁆𑀘𑀸𑀓𑀼𑀮𑀸 𑀧𑀩𑁆𑀩𑀚𑀺𑀢𑀪𑀸𑀯𑀁 𑀩𑀳𑀼𑀲𑁆𑀲𑀼𑀢𑀪𑀸𑀯𑀜𑁆𑀘, 𑀫𑀸𑀤𑀺𑀲𑁄 𑀦𑀸𑀫 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀲𑀢𑁆𑀣𑀼𑀲𑀸𑀲𑀦𑀁 𑀕𑀸𑀳𑁂𑀬𑁆𑀬𑀸𑀢𑀺 𑀘𑀺𑀢𑁆𑀢𑀫𑁆𑀧𑀺 𑀉𑀧𑁆𑀧𑀸𑀤𑁂𑀢𑀼𑀁 𑀢𑀼𑀫𑁆𑀳𑀸𑀓𑀁 𑀬𑀼𑀢𑁆𑀢𑀁, 𑀓𑀺𑀁 𑀫𑀬𑁆𑀳𑀁 𑀅𑀯𑀻𑀘𑀺 𑀦𑀻𑀮𑀼𑀧𑁆𑀧𑀮𑀯𑀦𑀁 𑀯𑀺𑀬 𑀲𑀻𑀢𑀮𑁄, 𑀓𑀺𑀁 𑀅𑀳𑀁 𑀅𑀧𑀸𑀬𑀢𑁄 𑀦 𑀪𑀸𑀬𑀸𑀫𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀡𑁆𑀡𑀫𑀽𑀮𑁂 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸 𑀅𑀦𑀼𑀲𑁆𑀲𑀸𑀯𑀦𑁂𑀦. 𑀲𑀮𑀸𑀓𑀕𑁆𑀕𑀸𑀳𑁂𑀦𑀸𑀢𑀺 𑀏𑀯𑀁 𑀅𑀦𑀼𑀲𑁆𑀲𑀸𑀯𑁂𑀢𑁆𑀯𑀸 𑀢𑁂𑀲𑀁 𑀘𑀺𑀢𑁆𑀢𑀁 𑀉𑀧𑀢𑁆𑀣𑀫𑁆𑀪𑁂𑀢𑁆𑀯𑀸 𑀅𑀦𑀺𑀯𑀢𑁆𑀢𑀺𑀥𑀫𑁆𑀫𑁂 𑀓𑀢𑁆𑀯𑀸 ‘‘𑀕𑀡𑁆𑀳𑀣 𑀇𑀫𑀁 𑀲𑀮𑀸𑀓’’𑀦𑁆𑀢𑀺 𑀲𑀮𑀸𑀓𑀕𑁆𑀕𑀸𑀳𑁂𑀦.

𑀏𑀢𑁆𑀣 𑀘 𑀓𑀫𑁆𑀫𑀫𑁂𑀯 𑀉𑀤𑁆𑀤𑁂𑀲𑁄 𑀯𑀸 𑀧𑀫𑀸𑀡𑀁, 𑀯𑁄𑀳𑀸𑀭𑀸𑀦𑀼𑀲𑁆𑀲𑀸𑀯𑀦𑀲𑀮𑀸𑀓𑀕𑁆𑀕𑀸𑀳𑀸 𑀧𑀦 𑀧𑀼𑀩𑁆𑀩𑀪𑀸𑀕𑀸. 𑀅𑀝𑁆𑀞𑀸𑀭𑀲𑀯𑀢𑁆𑀣𑀼𑀤𑀻𑀧𑀦𑀯𑀲𑁂𑀦 𑀳𑀺 𑀯𑁄𑀳𑀭𑀦𑁆𑀢𑁂𑀦 𑀢𑀢𑁆𑀣 𑀭𑀼𑀘𑀺𑀚𑀦𑀦𑀢𑁆𑀣𑀁 𑀅𑀦𑀼𑀲𑁆𑀲𑀸𑀯𑁂𑀢𑁆𑀯𑀸 𑀲𑀮𑀸𑀓𑀸𑀬 𑀕𑀸𑀳𑀺𑀢𑀸𑀬𑀧𑀺 𑀅𑀪𑀺𑀦𑁆𑀦𑁄𑀯 𑀳𑁄𑀢𑀺 𑀲𑀗𑁆𑀖𑁄. 𑀬𑀤𑀸 𑀧𑀦 𑀏𑀯𑀁 𑀘𑀢𑁆𑀢𑀸𑀭𑁄 𑀯𑀸 𑀅𑀢𑀺𑀭𑁂𑀓𑀸 𑀯𑀸 𑀲𑀮𑀸𑀓𑀁 𑀕𑀸𑀳𑁂𑀢𑁆𑀯𑀸 𑀆𑀯𑁂𑀡𑀺𑀓𑀁 𑀓𑀫𑁆𑀫𑀁 𑀯𑀸 𑀉𑀤𑁆𑀤𑁂𑀲𑀁 𑀯𑀸 𑀓𑀭𑁄𑀦𑁆𑀢𑀺, 𑀢𑀤𑀸 𑀲𑀗𑁆𑀖𑁄 𑀪𑀺𑀦𑁆𑀦𑁄 𑀦𑀸𑀫 𑀳𑁄𑀢𑀺. 𑀏𑀯𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬𑀸𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀏𑀢𑁆𑀢𑀸𑀯𑀢𑀸 𑀫𑀸𑀢𑀼𑀖𑀸𑀢𑀸𑀤𑀻𑀦𑀺 𑀧𑀜𑁆𑀘 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀦𑀺 𑀤𑀲𑁆𑀲𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀬𑀸𑀦𑀺 𑀧𑀼𑀣𑀼𑀚𑁆𑀚𑀦𑁄 𑀓𑀭𑁄𑀢𑀺, 𑀦 𑀅𑀭𑀺𑀬𑀲𑀸𑀯𑀓𑁄, 𑀢𑁂𑀲𑀁 𑀆𑀯𑀺𑀪𑀸𑀯𑀢𑁆𑀣𑀁 𑁋

𑀓𑀫𑁆𑀫𑀢𑁄 𑀤𑁆𑀯𑀸𑀭𑀢𑁄 𑀘𑁂𑀯, 𑀓𑀧𑁆𑀧𑀝𑁆𑀞𑀺𑀢𑀺𑀬𑀢𑁄 𑀢𑀣𑀸;

𑀧𑀸𑀓𑀲𑀸𑀥𑀸𑀭𑀡𑀸𑀤𑀻𑀳𑀺, 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀢𑀢𑁆𑀣 𑀓𑀫𑁆𑀫𑀢𑁄 𑀢𑀸𑀯 𑁋 𑀏𑀢𑁆𑀣 𑀳𑀺 𑀫𑀦𑀼𑀲𑁆𑀲𑀪𑀽𑀢𑀲𑁆𑀲𑁂𑀯 𑀫𑀦𑀼𑀲𑁆𑀲𑀪𑀽𑀢𑀁 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀅𑀧𑀺 𑀧𑀭𑀺𑀯𑀢𑁆𑀢𑀮𑀺𑀗𑁆𑀕𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀲𑁆𑀲 𑀓𑀫𑁆𑀫𑀁 𑀆𑀦𑀦𑁆𑀢𑀭𑀺𑀬𑀁 𑀳𑁄𑀢𑀺, 𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀲𑁆𑀲𑀸𑀫𑀻𑀢𑀺 𑀲𑀓𑀮𑀘𑀓𑁆𑀓𑀯𑀸𑀴𑀁 𑀫𑀳𑀸𑀘𑁂𑀢𑀺𑀬𑀧𑁆𑀧𑀫𑀸𑀡𑁂𑀳𑀺 𑀓𑀜𑁆𑀘𑀦𑀣𑀽𑀧𑁂𑀳𑀺 𑀧𑀽𑀭𑁂𑀢𑁆𑀯𑀸𑀧𑀺 𑀲𑀓𑀮𑀘𑀓𑁆𑀓𑀯𑀸𑀴𑀁 𑀧𑀽𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸𑀧𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀗𑁆𑀖𑀸𑀝𑀺𑀓𑀡𑁆𑀡𑀁 𑀅𑀫𑀼𑀜𑁆𑀘𑀦𑁆𑀢𑁄 𑀯𑀺𑀘𑀭𑀺𑀢𑁆𑀯𑀸𑀧𑀺 𑀓𑀸𑀬𑀲𑁆𑀲 𑀪𑁂𑀤𑀸 𑀦𑀺𑀭𑀬𑀫𑁂𑀯 𑀉𑀧𑀧𑀚𑁆𑀚𑀢𑀺. 𑀬𑁄 𑀧𑀦 𑀲𑀬𑀁 𑀫𑀦𑀼𑀲𑁆𑀲𑀪𑀽𑀢𑁄 𑀢𑀺𑀭𑀘𑁆𑀙𑀸𑀦𑀪𑀽𑀢𑀁 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸, 𑀲𑀬𑀁 𑀯𑀸 𑀢𑀺𑀭𑀘𑁆𑀙𑀸𑀦𑀪𑀽𑀢𑁄 𑀫𑀦𑀼𑀲𑁆𑀲𑀪𑀽𑀢𑀁, 𑀢𑀺𑀭𑀘𑁆𑀙𑀸𑀦𑁄𑀬𑁂𑀯 𑀯𑀸 𑀢𑀺𑀭𑀘𑁆𑀙𑀸𑀦𑀪𑀽𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀺, 𑀢𑀲𑁆𑀲 𑀓𑀫𑁆𑀫𑀁 𑀆𑀦𑀦𑁆𑀢𑀭𑀺𑀬𑀁 𑀦 𑀳𑁄𑀢𑀺, 𑀪𑀸𑀭𑀺𑀬𑀁 𑀧𑀦 𑀳𑁄𑀢𑀺, 𑀆𑀦𑀦𑁆𑀢𑀭𑀺𑀬𑀁 𑀆𑀳𑀘𑁆𑀘𑁂𑀯 𑀢𑀺𑀝𑁆𑀞𑀢𑀺. 𑀫𑀦𑀼𑀲𑁆𑀲𑀚𑀸𑀢𑀺𑀓𑀸𑀦𑀁 𑀧𑀦 𑀯𑀲𑁂𑀦 𑀅𑀬𑀁 𑀧𑀜𑁆𑀳𑁄 𑀓𑀣𑀺𑀢𑁄.

𑀢𑀢𑁆𑀣 𑀏𑀴𑀓𑀘𑀢𑀼𑀓𑁆𑀓𑀁 𑀲𑀗𑁆𑀕𑀸𑀫𑀘𑀢𑀼𑀓𑁆𑀓𑀁 𑀘𑁄𑀭𑀘𑀢𑀼𑀓𑁆𑀓𑀜𑁆𑀘 𑀓𑀣𑁂𑀢𑀩𑁆𑀩𑀁. 𑀏𑀴𑀓𑀁 𑀫𑀸𑀭𑁂𑀫𑀻𑀢𑀺 𑀅𑀪𑀺𑀲𑀦𑁆𑀥𑀺𑀦𑀸𑀧𑀺 𑀳𑀺 𑀏𑀴𑀓𑀝𑁆𑀞𑀸𑀦𑁂 𑀞𑀺𑀢𑀁 𑀫𑀦𑀼𑀲𑁆𑀲𑁄 𑀫𑀦𑀼𑀲𑁆𑀲𑀪𑀽𑀢𑀁 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸 𑀫𑀸𑀭𑁂𑀦𑁆𑀢𑁄 𑀆𑀦𑀦𑁆𑀢𑀭𑀺𑀬𑀁 𑀨𑀼𑀲𑀢𑀺. 𑀏𑀴𑀓𑀸𑀪𑀺𑀲𑀦𑁆𑀥𑀺𑀦𑀸 𑀧𑀦 𑀫𑀸𑀢𑀸𑀧𑀺𑀢𑀸𑀅𑀪𑀺𑀲𑀦𑁆𑀥𑀺𑀦𑀸 𑀯𑀸 𑀏𑀴𑀓𑀁 𑀫𑀸𑀭𑁂𑀦𑁆𑀢𑁄 𑀆𑀦𑀦𑁆𑀢𑀭𑀺𑀬𑀁 𑀦 𑀨𑀼𑀲𑀢𑀺. 𑀫𑀸𑀢𑀸𑀧𑀺𑀢𑀸𑀅𑀪𑀺𑀲𑀦𑁆𑀥𑀺𑀦𑀸 𑀫𑀸𑀢𑀸𑀧𑀺𑀢𑀭𑁄 𑀫𑀸𑀭𑁂𑀦𑁆𑀢𑁄 𑀨𑀼𑀲𑀢𑁂𑀯. 𑀏𑀲𑁂𑀯 𑀦𑀬𑁄 𑀇𑀢𑀭𑀲𑁆𑀫𑀺𑀫𑁆𑀧𑀺 𑀘𑀢𑀼𑀓𑁆𑀓𑀤𑁆𑀯𑀬𑁂. 𑀬𑀣𑀸 𑀘 𑀫𑀸𑀢𑀸𑀧𑀺𑀢𑀽𑀲𑀼, 𑀏𑀯𑀁 𑀅𑀭𑀳𑀦𑁆𑀢𑁂𑀧𑀺 𑀏𑀢𑀸𑀦𑀺 𑀘𑀢𑀼𑀓𑁆𑀓𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀫𑀦𑀼𑀲𑁆𑀲𑀅𑀭𑀳𑀦𑁆𑀢𑀫𑁂𑀯 𑀫𑀸𑀭𑁂𑀢𑁆𑀯𑀸 𑀆𑀦𑀦𑁆𑀢𑀭𑀺𑀬𑀁 𑀨𑀼𑀲𑀢𑀺, 𑀦 𑀬𑀓𑁆𑀔𑀪𑀽𑀢𑀁. 𑀓𑀫𑁆𑀫𑀁 𑀧𑀦 𑀪𑀸𑀭𑀺𑀬𑀁, 𑀆𑀦𑀦𑁆𑀢𑀭𑀺𑀬𑀲𑀤𑀺𑀲𑀫𑁂𑀯. 𑀫𑀦𑀼𑀲𑁆𑀲𑀅𑀭𑀳𑀦𑁆𑀢𑀲𑁆𑀲 𑀘 𑀧𑀼𑀣𑀼𑀚𑁆𑀚𑀦𑀓𑀸𑀮𑁂𑀬𑁂𑀯 𑀲𑀢𑁆𑀣𑀧𑁆𑀧𑀳𑀸𑀭𑁂 𑀯𑀸 𑀯𑀺𑀲𑁂 𑀯𑀸 𑀤𑀺𑀦𑁆𑀦𑁂𑀧𑀺 𑀬𑀤𑀺 𑀲𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑁂𑀦𑁂𑀯 𑀫𑀭𑀢𑀺, 𑀅𑀭𑀳𑀦𑁆𑀢𑀖𑀸𑀢𑁄 𑀳𑁄𑀢𑀺𑀬𑁂𑀯. 𑀬𑀁 𑀧𑀦 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀤𑀺𑀦𑁆𑀦𑀁 𑀤𑀸𑀦𑀁 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀧𑀼𑀣𑀼𑀚𑁆𑀚𑀦𑀲𑁆𑀲𑁂𑀯 𑀤𑀺𑀦𑁆𑀦𑀁 𑀳𑁄𑀢𑀺. 𑀲𑁂𑀲𑀅𑀭𑀺𑀬𑀧𑀼𑀕𑁆𑀕𑀮𑁂 𑀫𑀸𑀭𑁂𑀦𑁆𑀢𑀲𑁆𑀲 𑀆𑀦𑀦𑁆𑀢𑀭𑀺𑀬𑀁 𑀦𑀢𑁆𑀣𑀺. 𑀓𑀫𑁆𑀫𑀁 𑀧𑀦 𑀪𑀸𑀭𑀺𑀬𑀁, 𑀆𑀦𑀦𑁆𑀢𑀭𑀺𑀬𑀲𑀤𑀺𑀲𑀫𑁂𑀯.

𑀮𑁄𑀳𑀺𑀢𑀼𑀧𑁆𑀧𑀸𑀤𑁂 𑀢𑀣𑀸𑀕𑀢𑀲𑁆𑀲 𑀅𑀪𑁂𑀚𑁆𑀚𑀓𑀸𑀬𑀢𑀸𑀬 𑀧𑀭𑀽𑀧𑀓𑁆𑀓𑀫𑁂𑀦 𑀘𑀫𑁆𑀫𑀘𑁆𑀙𑁂𑀤𑀁 𑀓𑀢𑁆𑀯𑀸 𑀮𑁄𑀳𑀺𑀢𑀧𑀕𑁆𑀖𑀭𑀡𑀁 𑀦𑀸𑀫 𑀦𑀢𑁆𑀣𑀺. 𑀲𑀭𑀻𑀭𑀲𑁆𑀲 𑀧𑀦 𑀅𑀦𑁆𑀢𑁄𑀬𑁂𑀯 𑀏𑀓𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀮𑁄𑀳𑀺𑀢𑀁 𑀲𑀫𑁄𑀲𑀭𑀢𑀺. 𑀤𑁂𑀯𑀤𑀢𑁆𑀢𑁂𑀦 𑀧𑀯𑀺𑀤𑁆𑀥𑀲𑀺𑀮𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀕𑀢𑀸 𑀲𑀓𑀮𑀺𑀓𑀸𑀧𑀺 𑀢𑀣𑀸𑀕𑀢𑀲𑁆𑀲 𑀧𑀸𑀤𑀦𑁆𑀢𑀁 𑀧𑀳𑀭𑀺, 𑀨𑀭𑀲𑀼𑀦𑀸 𑀧𑀳𑀝𑁄 𑀯𑀺𑀬 𑀧𑀸𑀤𑁄 𑀅𑀦𑁆𑀢𑁄𑀮𑁄𑀳𑀺𑀢𑁄𑀬𑁂𑀯 𑀅𑀳𑁄𑀲𑀺. 𑀢𑀣𑀸 𑀓𑀭𑁄𑀦𑁆𑀢𑀲𑁆𑀲 𑀆𑀦𑀦𑁆𑀢𑀭𑀺𑀬𑀁 𑀳𑁄𑀢𑀺. 𑀚𑀻𑀯𑀓𑁄 𑀧𑀦 𑀢𑀣𑀸𑀕𑀢𑀲𑁆𑀲 𑀭𑀼𑀘𑀺𑀬𑀸 𑀲𑀢𑁆𑀣𑀓𑁂𑀦 𑀘𑀫𑁆𑀫𑀁 𑀙𑀺𑀦𑁆𑀤𑀺𑀢𑁆𑀯𑀸 𑀢𑀫𑁆𑀳𑀸 𑀞𑀸𑀦𑀸 𑀤𑀼𑀝𑁆𑀞𑀮𑁄𑀳𑀺𑀢𑀁 𑀦𑀻𑀳𑀭𑀺𑀢𑁆𑀯𑀸 𑀨𑀸𑀲𑀼𑀫𑀓𑀸𑀲𑀺, 𑀢𑀣𑀸 𑀓𑀭𑁄𑀦𑁆𑀢𑀲𑁆𑀲 𑀧𑀼𑀜𑁆𑀜𑀓𑀫𑁆𑀫𑀫𑁂𑀯 𑀳𑁄𑀢𑀺.

𑀅𑀣 𑀬𑁂 𑀘 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀣𑀸𑀕𑀢𑁂 𑀘𑁂𑀢𑀺𑀬𑀁 𑀪𑀺𑀦𑁆𑀤𑀦𑁆𑀢𑀺, 𑀩𑁄𑀥𑀺𑀁 𑀙𑀺𑀦𑁆𑀤𑀦𑁆𑀢𑀺 𑀥𑀸𑀢𑀼𑀫𑁆𑀳𑀺 𑀉𑀧𑀓𑁆𑀓𑀫𑀦𑁆𑀢𑀺, 𑀢𑁂𑀲𑀁 𑀓𑀺𑀁 𑀳𑁄𑀢𑀻𑀢𑀺? 𑀪𑀸𑀭𑀺𑀬𑀁 𑀓𑀫𑁆𑀫𑀁 𑀳𑁄𑀢𑀺 𑀆𑀦𑀦𑁆𑀢𑀭𑀺𑀬𑀲𑀤𑀺𑀲𑀁. 𑀲𑀥𑀸𑀢𑀼𑀓𑀁 𑀧𑀦 𑀣𑀽𑀧𑀁 𑀯𑀸 𑀧𑀝𑀺𑀫𑀁 𑀯𑀸 𑀩𑀸𑀥𑀫𑀸𑀦𑀁 𑀩𑁄𑀥𑀺𑀲𑀸𑀔𑀁 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀲𑀘𑁂𑀧𑀺 𑀢𑀢𑁆𑀣 𑀦𑀺𑀮𑀻𑀦𑀸 𑀲𑀓𑀼𑀡𑀸 𑀘𑁂𑀢𑀺𑀬𑁂 𑀯𑀘𑁆𑀘𑀁 𑀧𑀸𑀢𑁂𑀦𑁆𑀢𑀺, 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀧𑀭𑀺𑀪𑁄𑀕𑀘𑁂𑀢𑀺𑀬𑀢𑁄 𑀳𑀺 𑀲𑀭𑀻𑀭𑀘𑁂𑀢𑀺𑀬𑀁 𑀫𑀳𑀦𑁆𑀢𑀢𑀭𑀁. 𑀘𑁂𑀢𑀺𑀬𑀯𑀢𑁆𑀣𑀼𑀁 𑀪𑀺𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀁 𑀩𑁄𑀥𑀺𑀫𑀽𑀮𑀫𑁆𑀧𑀺 𑀙𑀺𑀦𑁆𑀤𑀺𑀢𑁆𑀯𑀸 𑀳𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀬𑀸 𑀧𑀦 𑀩𑁄𑀥𑀺𑀲𑀸𑀔𑀸 𑀩𑁄𑀥𑀺𑀖𑀭𑀁 𑀩𑀸𑀥𑀢𑀺, 𑀢𑀁 𑀕𑁂𑀳𑀭𑀓𑁆𑀔𑀡𑀢𑁆𑀣𑀁 𑀙𑀺𑀦𑁆𑀤𑀺𑀢𑀼𑀁 𑀦 𑀮𑀪𑀢𑀺, 𑀩𑁄𑀥𑀺𑀅𑀢𑁆𑀣𑀜𑁆𑀳𑀺 𑀕𑁂𑀳𑀁, 𑀦 𑀕𑁂𑀳𑀢𑁆𑀣𑀸𑀬 𑀩𑁄𑀥𑀺. 𑀆𑀲𑀦𑀖𑀭𑁂𑀧𑀺 𑀏𑀲𑁂𑀯 𑀦𑀬𑁄. 𑀬𑀲𑁆𑀫𑀺𑀁 𑀧𑀦 𑀆𑀲𑀦𑀖𑀭𑁂 𑀥𑀸𑀢𑀼 𑀦𑀺𑀳𑀺𑀢𑀸 𑀳𑁄𑀢𑀺, 𑀢𑀲𑁆𑀲 𑀭𑀓𑁆𑀔𑀡𑀢𑁆𑀣𑀸𑀬 𑀩𑁄𑀥𑀺𑀲𑀸𑀔𑀁 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺. 𑀩𑁄𑀥𑀺𑀚𑀕𑁆𑀕𑀦𑀢𑁆𑀣𑀁 𑀑𑀚𑁄𑀳𑀭𑀡𑀲𑀸𑀔𑀁 𑀯𑀸 𑀧𑀽𑀢𑀺𑀝𑁆𑀞𑀸𑀦𑀁 𑀯𑀸 𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺𑀬𑁂𑀯, 𑀪𑀕𑀯𑀢𑁄 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑁂 𑀯𑀺𑀬 𑀧𑀼𑀜𑁆𑀜𑀫𑁆𑀧𑀺 𑀳𑁄𑀢𑀺.

𑀲𑀗𑁆𑀖𑀪𑁂𑀤𑁂 𑀲𑀻𑀫𑀝𑁆𑀞𑀓𑀲𑀗𑁆𑀖𑁂 𑀅𑀲𑀦𑁆𑀦𑀺𑀧𑀢𑀺𑀢𑁂 𑀯𑀺𑀲𑀼𑀁 𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀓𑀢𑀯𑁄𑀳𑀸𑀭𑀸𑀦𑀼𑀲𑁆𑀲𑀸𑀯𑀦-𑀲𑀮𑀸𑀓𑀕𑁆𑀕𑀸𑀳𑀲𑁆𑀲 𑀓𑀫𑁆𑀫𑀁 𑀯𑀸 𑀓𑀭𑁄𑀦𑁆𑀢𑀲𑁆𑀲, 𑀉𑀤𑁆𑀤𑁂𑀲𑀁 𑀯𑀸 𑀉𑀤𑁆𑀤𑀺𑀲𑀦𑁆𑀢𑀲𑁆𑀲 𑀪𑁂𑀤𑁄 𑀘 𑀳𑁄𑀢𑀺 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀜𑁆𑀘. 𑀲𑀫𑀕𑁆𑀕𑀲𑀜𑁆𑀜𑀸𑀬 𑀧𑀦 𑀯𑀝𑁆𑀝𑀢𑀻𑀢𑀺 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀪𑁂𑀤𑁄𑀯 𑀳𑁄𑀢𑀺, 𑀦 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀁, 𑀢𑀣𑀸 𑀦𑀯𑀢𑁄 𑀊𑀦𑀧𑀭𑀺𑀲𑀸𑀬𑀁. 𑀲𑀩𑁆𑀩𑀦𑁆𑀢𑀺𑀫𑁂𑀦 𑀧𑀭𑀺𑀘𑁆𑀙𑁂𑀤𑁂𑀦 𑀦𑀯𑀦𑁆𑀦𑀁 𑀚𑀦𑀸𑀦𑀁 𑀬𑁄 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺, 𑀢𑀲𑁆𑀲 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀁 𑀳𑁄𑀢𑀺. 𑀅𑀦𑀼𑀯𑀢𑁆𑀢𑀓𑀸𑀦𑀁 𑀅𑀥𑀫𑁆𑀫𑀯𑀸𑀤𑀻𑀦𑀁 𑀫𑀳𑀸𑀲𑀸𑀯𑀚𑁆𑀚𑀓𑀫𑁆𑀫𑀁. 𑀥𑀫𑁆𑀫𑀯𑀸𑀤𑀺𑀦𑁄 𑀧𑀦 𑀅𑀦𑀯𑀚𑁆𑀚𑀸.

𑀢𑀢𑁆𑀣 𑀦𑀯𑀦𑁆𑀦𑀫𑁂𑀯 𑀲𑀗𑁆𑀖𑀪𑁂𑀤𑁂 𑀇𑀤𑀁 𑀲𑀼𑀢𑁆𑀢𑀁 𑁋 ‘‘𑀏𑀓𑀢𑁄 𑀉𑀧𑀸𑀮𑀺 𑀘𑀢𑁆𑀢𑀸𑀭𑁄 𑀳𑁄𑀦𑁆𑀢𑀺, 𑀏𑀓𑀢𑁄 𑀘𑀢𑁆𑀢𑀸𑀭𑁄, 𑀦𑀯𑀫𑁄 𑀅𑀦𑀼𑀲𑁆𑀲𑀸𑀯𑁂𑀢𑀺, 𑀲𑀮𑀸𑀓𑀁 𑀕𑀸𑀳𑁂𑀢𑀺 ‘𑀅𑀬𑀁 𑀥𑀫𑁆𑀫𑁄 𑀅𑀬𑀁 𑀯𑀺𑀦𑀬𑁄 𑀇𑀤𑀁 𑀲𑀢𑁆𑀣𑀼𑀲𑀸𑀲𑀦𑀁, 𑀇𑀤𑀁 𑀕𑀡𑁆𑀳𑀣, 𑀇𑀫𑀁 𑀭𑁄𑀘𑁂𑀣𑀸’𑀢𑀺, 𑀏𑀯𑀁 𑀔𑁄, 𑀉𑀧𑀸𑀮𑀺, 𑀲𑀗𑁆𑀖𑀭𑀸𑀚𑀺 𑀘𑁂𑀯 𑀳𑁄𑀢𑀺 𑀲𑀗𑁆𑀖𑀪𑁂𑀤𑁄 𑀘. 𑀦𑀯𑀦𑁆𑀦𑀁 𑀯𑀸, 𑀉𑀧𑀸𑀮𑀺, 𑀅𑀢𑀺𑀭𑁂𑀓𑀦𑀯𑀦𑁆𑀦𑀁 𑀯𑀸 𑀲𑀗𑁆𑀖𑀭𑀸𑀚𑀺 𑀘𑁂𑀯 𑀳𑁄𑀢𑀺 𑀲𑀗𑁆𑀖𑀪𑁂𑀤𑁄 𑀘𑀸’’𑀢𑀺 (𑀘𑀽𑀴𑀯. 𑁩𑁫𑁧). 𑀏𑀢𑁂𑀲𑀼 𑀧𑀦 𑀧𑀜𑁆𑀘𑀲𑀼 𑀲𑀗𑁆𑀖𑀪𑁂𑀤𑁄 𑀯𑀘𑀻𑀓𑀫𑁆𑀫𑀁, 𑀲𑁂𑀲𑀸𑀦𑀺 𑀓𑀸𑀬𑀓𑀫𑁆𑀫𑀸𑀦𑀻𑀢𑀺. 𑀏𑀯𑀁 𑀓𑀫𑁆𑀫𑀢𑁄 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀤𑁆𑀯𑀸𑀭𑀢𑁄𑀢𑀺 𑀲𑀩𑁆𑀩𑀸𑀦𑁂𑀯 𑀘𑁂𑀢𑀸𑀦𑀺 𑀓𑀸𑀬𑀤𑁆𑀯𑀸𑀭𑀢𑁄𑀧𑀺 𑀯𑀘𑀻𑀤𑁆𑀯𑀸𑀭𑀢𑁄𑀧𑀺 𑀲𑀫𑀼𑀝𑁆𑀞𑀳𑀦𑁆𑀢𑀺. 𑀧𑀼𑀭𑀺𑀫𑀸𑀦𑀺 𑀧𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀆𑀡𑀢𑁆𑀢𑀺𑀓𑀯𑀺𑀚𑁆𑀚𑀸𑀫𑀬𑀧𑀬𑁄𑀕𑀯𑀲𑁂𑀦 𑀯𑀘𑀻𑀤𑁆𑀯𑀸𑀭𑀢𑁄 𑀲𑀫𑀼𑀝𑁆𑀞𑀳𑀺𑀢𑁆𑀯𑀸𑀧𑀺 𑀓𑀸𑀬𑀤𑁆𑀯𑀸𑀭𑀫𑁂𑀯 𑀧𑀽𑀭𑁂𑀦𑁆𑀢𑀺, 𑀲𑀗𑁆𑀖𑀪𑁂𑀤𑁄 𑀳𑀢𑁆𑀣𑀫𑀼𑀤𑁆𑀤𑀸𑀬 𑀪𑁂𑀤𑀁 𑀓𑀭𑁄𑀦𑁆𑀢𑀲𑁆𑀲 𑀓𑀸𑀬𑀤𑁆𑀯𑀸𑀭𑀢𑁄 𑀲𑀫𑀼𑀝𑁆𑀞𑀳𑀺𑀢𑁆𑀯𑀸𑀧𑀺 𑀯𑀘𑀻𑀤𑁆𑀯𑀸𑀭𑀫𑁂𑀯 𑀧𑀽𑀭𑁂𑀢𑀻𑀢𑀺. 𑀏𑀯𑀫𑁂𑀢𑁆𑀣 𑀤𑁆𑀯𑀸𑀭𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀓𑀧𑁆𑀧𑀝𑁆𑀞𑀺𑀢𑀺𑀬𑀢𑁄𑀢𑀺 𑀲𑀗𑁆𑀖𑀪𑁂𑀤𑁄𑀬𑁂𑀯 𑀘𑁂𑀢𑁆𑀣 𑀓𑀧𑁆𑀧𑀝𑁆𑀞𑀺𑀢𑀺𑀬𑁄. 𑀲𑀡𑁆𑀞𑀳𑀦𑁆𑀢𑁂 𑀳𑀺 𑀓𑀧𑁆𑀧𑁂 𑀓𑀧𑁆𑀧𑀯𑁂𑀫𑀚𑁆𑀛𑁂 𑀯𑀸 𑀲𑀗𑁆𑀖𑀪𑁂𑀤𑀁 𑀓𑀢𑁆𑀯𑀸 𑀓𑀧𑁆𑀧𑀯𑀺𑀦𑀸𑀲𑁂𑀬𑁂𑀯 𑀫𑀼𑀘𑁆𑀘𑀢𑀺. 𑀲𑀘𑁂𑀧𑀺 𑀳𑀺 𑀲𑁆𑀯𑁂𑀯 𑀓𑀧𑁆𑀧𑁄 𑀯𑀺𑀦𑀲𑁆𑀲𑀺𑀲𑁆𑀲𑀢𑀻𑀢𑀺 𑀅𑀚𑁆𑀚 𑀲𑀗𑁆𑀖𑀪𑁂𑀤𑀁 𑀓𑀭𑁄𑀢𑀺, 𑀲𑁆𑀯𑁂𑀯 𑀫𑀼𑀘𑁆𑀘𑀢𑀺, 𑀏𑀓𑀤𑀺𑀯𑀲𑀫𑁂𑀯 𑀦𑀺𑀭𑀬𑁂 𑀧𑀘𑁆𑀘𑀢𑀺. 𑀏𑀯𑀁 𑀓𑀭𑀡𑀁 𑀧𑀦 𑀦𑀢𑁆𑀣𑀺. 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀆𑀦𑀦𑁆𑀢𑀭𑀺𑀬𑀸𑀦𑁂𑀯 𑀳𑁄𑀦𑁆𑀢𑀺, 𑀦 𑀓𑀧𑁆𑀧𑀝𑁆𑀞𑀺𑀢𑀺𑀬𑀸𑀦𑀻𑀢𑀺 𑀏𑀯𑀫𑁂𑀢𑁆𑀣 𑀓𑀧𑁆𑀧𑀝𑁆𑀞𑀺𑀢𑀺𑀬𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀧𑀸𑀓𑀢𑁄𑀢𑀺 𑀬𑁂𑀦 𑀘 𑀧𑀜𑁆𑀘𑀧𑁂’𑀢𑀸𑀦𑀺 𑀓𑀫𑁆𑀫𑀸𑀦𑀺 𑀓𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀲 𑀲𑀗𑁆𑀖𑀪𑁂𑀤𑁄𑀬𑁂𑀯 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀧𑀘𑁆𑀘𑀢𑀺, 𑀲𑁂𑀲𑀸𑀦𑀺 ‘‘𑀅𑀳𑁄𑀲𑀺𑀓𑀫𑁆𑀫𑀁, 𑀦𑀸𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 𑀏𑀯𑀫𑀸𑀤𑀻𑀲𑀼 𑀲𑀗𑁆𑀔𑁆𑀬𑀁 𑀕𑀘𑁆𑀙𑀦𑁆𑀢𑀺. 𑀲𑀗𑁆𑀖𑀲𑁆𑀲 𑀪𑁂𑀤𑀸𑀪𑀸𑀯𑁂 𑀮𑁄𑀳𑀺𑀢𑀼𑀧𑁆𑀧𑀸𑀤𑁄, 𑀢𑀤𑀪𑀸𑀯𑁂 𑀅𑀭𑀳𑀦𑁆𑀢𑀖𑀸𑀢𑁄, 𑀢𑀤𑀪𑀸𑀯𑁂 𑀘 𑀲𑀘𑁂 𑀧𑀺𑀢𑀸 𑀲𑀻𑀮𑀯𑀸 𑀳𑁄𑀢𑀺, 𑀫𑀸𑀢𑀸 𑀤𑀼𑀲𑁆𑀲𑀻𑀮𑀸, 𑀦𑁄 𑀯𑀸 𑀢𑀣𑀸 𑀲𑀻𑀮𑀯𑀢𑀻, 𑀧𑀺𑀢𑀼𑀖𑀸𑀢𑁄 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀧𑀘𑁆𑀘𑀢𑀺. 𑀲𑀘𑁂 𑀫𑀸𑀢𑀸𑀧𑀺𑀢𑀼𑀖𑀸𑀢𑁄, 𑀤𑁆𑀯𑀻𑀲𑀼𑀧𑀺 𑀲𑀻𑀮𑁂𑀦 𑀯𑀸 𑀤𑀼𑀲𑁆𑀲𑀻𑀮𑁂𑀦 𑀯𑀸 𑀲𑀫𑀸𑀦𑁂𑀲𑀼 𑀫𑀸𑀢𑀼𑀖𑀸𑀢𑁄𑀯 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀧𑀘𑁆𑀘𑀢𑀺. 𑀫𑀸𑀢𑀸 𑀳𑀺 𑀤𑀼𑀓𑁆𑀓𑀭𑀓𑀸𑀭𑀺𑀦𑀻 𑀩𑀳𑀽𑀧𑀓𑀸𑀭𑀸 𑀘 𑀧𑀼𑀢𑁆𑀢𑀸𑀦𑀦𑁆𑀢𑀺 𑀏𑀯𑀫𑁂𑀢𑁆𑀣 𑀧𑀸𑀓𑀢𑁄𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀲𑀸𑀥𑀸𑀭𑀡𑀸𑀤𑀻𑀳𑀻𑀢𑀺 𑀧𑀼𑀭𑀺𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀩𑁆𑀩𑁂𑀲𑀫𑁆𑀧𑀺 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀁 𑀲𑀸𑀥𑀸𑀭𑀡𑀸𑀦𑀺. 𑀲𑀗𑁆𑀖𑀪𑁂𑀤𑁄 𑀧𑀦 ‘‘𑀦 𑀔𑁄, 𑀉𑀧𑀸𑀮𑀺 𑀪𑀺𑀓𑁆𑀔𑀼𑀦𑀻, 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺, 𑀦 𑀲𑀺𑀓𑁆𑀔𑀫𑀸𑀦𑀸, 𑀦 𑀲𑀸𑀫𑀡𑁂𑀭𑁄, 𑀦 𑀲𑀸𑀫𑀡𑁂𑀭𑀻, 𑀦 𑀉𑀧𑀸𑀲𑀓𑁄, 𑀦 𑀉𑀧𑀸𑀲𑀺𑀓𑀸 𑀲𑀗𑁆𑀖𑀁 𑀪𑀺𑀦𑁆𑀤𑀢𑀺, 𑀪𑀺𑀓𑁆𑀔𑀼 𑀔𑁄, 𑀉𑀧𑀸𑀮𑀺, 𑀧𑀓𑀢𑀢𑁆𑀢𑁄 𑀲𑀫𑀸𑀦𑀲𑀁𑀯𑀸𑀲𑀓𑁄 𑀲𑀫𑀸𑀦𑀲𑀻𑀫𑀸𑀬𑀁 𑀞𑀺𑀢𑁄 𑀲𑀗𑁆𑀖𑀁 𑀪𑀺𑀦𑁆𑀤𑀢𑀻’’𑀢𑀺 (𑀘𑀽𑀴𑀯. 𑁩𑁫𑁧) 𑀯𑀘𑀦𑀢𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀪𑀺𑀓𑁆𑀔𑀼𑀦𑁄𑀯 𑀳𑁄𑀢𑀺, 𑀦 𑀅𑀜𑁆𑀜𑀲𑁆𑀲, 𑀢𑀲𑁆𑀫𑀸 𑀅𑀲𑀸𑀥𑀸𑀭𑀡𑁄. 𑀆𑀤𑀺𑀲𑀤𑁆𑀤𑁂𑀦 𑀲𑀩𑁆𑀩𑁂𑀧𑀺 𑀢𑁂 𑀤𑀼𑀓𑁆𑀔𑀯𑁂𑀤𑀦𑀸𑀲𑀳𑀕𑀢𑀸 𑀤𑁄𑀲𑀫𑁄𑀳𑀲𑀫𑁆𑀧𑀬𑀼𑀢𑁆𑀢𑀸 𑀘𑀸𑀢𑀺 𑀏𑀯𑀫𑁂𑀢𑁆𑀣 𑀲𑀸𑀥𑀸𑀭𑀡𑀸𑀤𑀻𑀳𑀺𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑁄 𑀯𑀺𑀦𑀺𑀘𑁆𑀙𑀬𑁄.

𑀅𑀜𑁆𑀜𑀁 𑀲𑀢𑁆𑀣𑀸𑀭𑀦𑁆𑀢𑀺 ‘‘𑀅𑀬𑀁 𑀫𑁂 𑀲𑀢𑁆𑀣𑀸 𑀲𑀢𑁆𑀣𑀼𑀓𑀺𑀘𑁆𑀘𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑁄’’𑀢𑀺 𑀪𑀯𑀦𑁆𑀢𑀭𑁂𑀧𑀺 𑀅𑀜𑁆𑀜𑀁 𑀢𑀺𑀢𑁆𑀣𑀓𑀭𑀁 ‘‘𑀅𑀬𑀁 𑀫𑁂 𑀲𑀢𑁆𑀣𑀸’’𑀢𑀺 𑀏𑀯𑀁 𑀕𑀡𑁆𑀳𑁂𑀬𑁆𑀬, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑁧𑁨𑁯. 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸𑀢𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸. 𑀢𑀻𑀡𑀺 𑀳𑀺 𑀔𑁂𑀢𑁆𑀢𑀸𑀦𑀺 𑀚𑀸𑀢𑀺𑀔𑁂𑀢𑁆𑀢𑀁 𑀆𑀡𑀸𑀔𑁂𑀢𑁆𑀢𑀁 𑀯𑀺𑀲𑀬𑀔𑁂𑀢𑁆𑀢𑀁. 𑀢𑀢𑁆𑀣 𑀚𑀸𑀢𑀺𑀔𑁂𑀢𑁆𑀢𑀁 𑀦𑀸𑀫 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼. 𑀲𑀸 𑀳𑀺 𑀢𑀣𑀸𑀕𑀢𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀑𑀓𑁆𑀓𑀫𑀦𑀓𑀸𑀮𑁂 𑀦𑀺𑀓𑁆𑀔𑀫𑀦𑀓𑀸𑀮𑁂 𑀲𑀫𑁆𑀩𑁄𑀥𑀺𑀓𑀸𑀮𑁂 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂 𑀆𑀬𑀼𑀲𑀗𑁆𑀔𑀸𑀭𑁄𑀲𑁆𑀲𑀚𑁆𑀚𑀦𑁂 𑀧𑀭𑀺𑀦𑀺𑀩𑁆𑀩𑀸𑀦𑁂 𑀘 𑀓𑀫𑁆𑀧𑀢𑀺. 𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀁 𑀧𑀦 𑀆𑀡𑀸𑀔𑁂𑀢𑁆𑀢𑀁 𑀦𑀸𑀫. 𑀆𑀝𑀸𑀦𑀸𑀝𑀺𑀬𑀫𑁄𑀭𑀧𑀭𑀺𑀢𑁆𑀢𑀥𑀚𑀕𑁆𑀕𑀧𑀭𑀺𑀢𑁆𑀢𑀭𑀢𑀦𑀧𑀭𑀺𑀢𑁆𑀢𑀸𑀤𑀻𑀦𑀜𑁆𑀳𑀺 𑀏𑀢𑁆𑀣 𑀆𑀡𑀸 𑀯𑀢𑁆𑀢𑀢𑀺. 𑀯𑀺𑀲𑀬𑀔𑁂𑀢𑁆𑀢𑀲𑁆𑀲 𑀧𑀦 𑀧𑀭𑀺𑀫𑀸𑀡𑀁 𑀦𑀢𑁆𑀣𑀺. 𑀩𑀼𑀤𑁆𑀥𑀸𑀦𑀜𑁆𑀳𑀺 ‘‘𑀬𑀸𑀯𑀢𑀓𑀁 𑀜𑀸𑀡𑀁 𑀢𑀸𑀯𑀢𑀓𑀁 𑀦𑁂𑀬𑁆𑀬𑀁, 𑀬𑀸𑀯𑀢𑀓𑀁 𑀦𑁂𑀬𑁆𑀬𑀁 𑀢𑀸𑀯𑀢𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀦𑁂𑀬𑁆𑀬𑀁 𑀦𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑁩.𑁫) 𑀯𑀘𑀦𑀢𑁄 𑀅𑀯𑀺𑀲𑀬𑁄 𑀦𑀸𑀫 𑀦𑀢𑁆𑀣𑀺.

𑀇𑀫𑁂𑀲𑀼 𑀧𑀦 𑀢𑀻𑀲𑀼 𑀔𑁂𑀢𑁆𑀢𑁂𑀲𑀼 𑀞𑀧𑁂𑀢𑁆𑀯𑀸 𑀇𑀫𑀁 𑀘𑀓𑁆𑀓𑀯𑀸𑀴𑀁 𑀅𑀜𑁆𑀜𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀼𑀢𑁆𑀢𑀁 𑀦𑀢𑁆𑀣𑀺, 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀦 𑀅𑀢𑁆𑀣𑀺. 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀯𑀺𑀦𑀬𑀧𑀺𑀝𑀓𑀁 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁, 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀲𑀗𑁆𑀕𑀻𑀢𑀺, 𑀬𑀲𑀢𑁆𑀣𑁂𑀭𑀲𑁆𑀲 𑀲𑀗𑁆𑀕𑀻𑀢𑀺, 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀲𑀗𑁆𑀕𑀻𑀢𑀻𑀢𑀺. 𑀇𑀫𑀸 𑀢𑀺𑀲𑁆𑀲𑁄 𑀲𑀗𑁆𑀕𑀻𑀢𑀺𑀬𑁄 𑀆𑀭𑀼𑀴𑁆𑀳𑁂 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀇𑀫𑀁 𑀘𑀓𑁆𑀓𑀯𑀸𑀴𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀼𑀢𑁆𑀢𑀁 𑀦𑀢𑁆𑀣𑀺, 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀦 𑀅𑀢𑁆𑀣𑀺.

𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀦𑁆𑀢𑀺 𑀅𑀧𑀼𑀭𑁂 𑀅𑀧𑀘𑁆𑀙𑀸. 𑀏𑀓𑀢𑁄 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀧𑀼𑀭𑁂 𑀯𑀸 𑀧𑀘𑁆𑀙𑀸 𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀳𑀺 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀩𑁄𑀥𑀺𑀁 𑀅𑀧𑁆𑀧𑀢𑁆𑀯𑀸 𑀦 𑀉𑀝𑁆𑀞𑀳𑀺𑀲𑁆𑀲𑀸𑀫𑀻𑀢𑀺 𑀦𑀺𑀲𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀁, 𑀢𑀸𑀯 𑀧𑀼𑀩𑁆𑀩𑁂𑀢𑀺 𑀦 𑀯𑁂𑀤𑀺𑀢𑀩𑁆𑀩𑀁. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀳𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂𑀦 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀓𑀫𑁆𑀧𑀦𑁂𑀦𑁂𑀯 𑀔𑁂𑀢𑁆𑀢𑀧𑀭𑀺𑀕𑁆𑀕𑀳𑁄 𑀓𑀢𑁄, 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦𑀺𑀯𑀸𑀭𑀺𑀢𑀸𑀯 𑀳𑁄𑀢𑀺. 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀸𑀲𑀧𑀫𑀢𑁆𑀢𑀸 𑀥𑀸𑀢𑀼 𑀢𑀺𑀝𑁆𑀞𑀢𑀺, 𑀢𑀸𑀯 𑀧𑀘𑁆𑀙𑀸𑀢𑀺 𑀦 𑀯𑁂𑀤𑀺𑀢𑀩𑁆𑀩𑀁. 𑀥𑀸𑀢𑀽𑀲𑀼 𑀳𑀺 𑀞𑀺𑀢𑀸𑀲𑀼 𑀩𑀼𑀤𑁆𑀥𑀸 𑀞𑀺𑀢𑀸𑀯 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀏𑀢𑁆𑀣𑀦𑁆𑀢𑀭𑁂 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦𑀺𑀯𑀸𑀭𑀺𑀢𑀸𑀯 𑀳𑁄𑀢𑀺. 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑁂 𑀧𑀦 𑀚𑀸𑀢𑁂 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦 𑀦𑀺𑀯𑀸𑀭𑀺𑀢𑀸.

𑀢𑀻𑀡𑀺 𑀳𑀺 𑀅𑀦𑁆𑀢𑀭𑀥𑀸𑀦𑀸𑀦𑀺 𑀦𑀸𑀫 𑀧𑀭𑀺𑀬𑀢𑁆𑀢𑀺𑀅𑀦𑁆𑀢𑀭𑀥𑀸𑀦𑀁, 𑀧𑀝𑀺𑀯𑁂𑀥𑀅𑀦𑁆𑀢𑀭𑀥𑀸𑀦𑀁, 𑀧𑀝𑀺𑀧𑀢𑁆𑀢𑀺𑀅𑀦𑁆𑀢𑀭𑀥𑀸𑀦𑀦𑁆𑀢𑀺. 𑀢𑀢𑁆𑀣 𑀧𑀭𑀺𑀬𑀢𑁆𑀢𑀻𑀢𑀺 𑀢𑀻𑀡𑀺 𑀧𑀺𑀝𑀓𑀸𑀦𑀺. 𑀧𑀝𑀺𑀯𑁂𑀥𑁄𑀢𑀺 𑀲𑀘𑁆𑀘𑀧𑀝𑀺𑀯𑁂𑀥𑁄. 𑀧𑀝𑀺𑀧𑀢𑁆𑀢𑀻𑀢𑀺 𑀧𑀝𑀺𑀧𑀤𑀸. 𑀢𑀢𑁆𑀣 𑀧𑀝𑀺𑀯𑁂𑀥𑁄 𑀘 𑀧𑀝𑀺𑀧𑀢𑁆𑀢𑀺 𑀘 𑀳𑁄𑀢𑀺𑀧𑀺 𑀦 𑀳𑁄𑀢𑀺𑀧𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀧𑀝𑀺𑀯𑁂𑀥𑀥𑀭𑀸 𑀪𑀺𑀓𑁆𑀔𑀽 𑀩𑀳𑀽 𑀳𑁄𑀦𑁆𑀢𑀺, 𑀏𑀲𑁄 𑀪𑀺𑀓𑁆𑀔𑀼 𑀧𑀼𑀣𑀼𑀚𑁆𑀚𑀦𑁄𑀢𑀺 𑀅𑀗𑁆𑀕𑀼𑀮𑀺𑀁 𑀧𑀲𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑁄 𑀳𑁄𑀢𑀺. 𑀇𑀫𑀲𑁆𑀫𑀺𑀁𑀬𑁂𑀯 𑀤𑀻𑀧𑁂 𑀏𑀓𑀯𑀸𑀭𑁂 𑀧𑀼𑀣𑀼𑀚𑁆𑀚𑀦𑀪𑀺𑀓𑁆𑀔𑀼 𑀦𑀸𑀫 𑀦𑀸𑀳𑁄𑀲𑀺. 𑀧𑀝𑀺𑀧𑀢𑁆𑀢𑀺𑀧𑀽𑀭𑀺𑀓𑀸𑀧𑀺 𑀓𑀤𑀸𑀘𑀺 𑀩𑀳𑀽 𑀳𑁄𑀦𑁆𑀢𑀺 𑀓𑀤𑀸𑀘𑀺 𑀅𑀧𑁆𑀧𑀸. 𑀇𑀢𑀺 𑀧𑀝𑀺𑀯𑁂𑀥𑁄 𑀘 𑀧𑀝𑀺𑀧𑀢𑁆𑀢𑀺 𑀘 𑀳𑁄𑀢𑀺𑀧𑀺 𑀦 𑀳𑁄𑀢𑀺𑀧𑀺, 𑀲𑀸𑀲𑀦𑀝𑁆𑀞𑀺𑀢𑀺𑀬𑀸 𑀧𑀦 𑀧𑀭𑀺𑀬𑀢𑁆𑀢𑀺 𑀧𑀫𑀸𑀡𑀁.

𑀧𑀡𑁆𑀟𑀺𑀢𑁄 𑀳𑀺 𑀢𑁂𑀧𑀺𑀝𑀓𑀁 𑀲𑀼𑀢𑁆𑀯𑀸 𑀤𑁆𑀯𑁂𑀧𑀺 𑀧𑀽𑀭𑁂𑀢𑀺. 𑀬𑀣𑀸 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀆𑀴𑀸𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀜𑁆𑀘𑀸𑀪𑀺𑀜𑁆𑀜𑀸 𑀲𑀢𑁆𑀢 𑀘 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀧𑀭𑀺𑀓𑀫𑁆𑀫𑀁 𑀧𑀼𑀘𑁆𑀙𑀺, 𑀲𑁄 𑀦 𑀚𑀸𑀦𑀸𑀫𑀻𑀢𑀺 𑀆𑀳. 𑀢𑀢𑁄 𑀉𑀤𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀥𑀺𑀕𑀢𑀁 𑀯𑀺𑀲𑁂𑀲𑀁 𑀲𑀁𑀲𑀦𑁆𑀤𑁂𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑁆𑀲 𑀧𑀭𑀺𑀓𑀫𑁆𑀫𑀁 𑀧𑀼𑀘𑁆𑀙𑀺, 𑀲𑁄 𑀆𑀘𑀺𑀓𑁆𑀔𑀺, 𑀢𑀲𑁆𑀲 𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯 𑀫𑀳𑀸𑀲𑀢𑁆𑀢𑁄 𑀢𑀁 𑀲𑀫𑁆𑀧𑀸𑀤𑁂𑀲𑀺, 𑀏𑀯𑀫𑁂𑀯 𑀧𑀜𑁆𑀜𑀯𑀸 𑀪𑀺𑀓𑁆𑀔𑀼 𑀧𑀭𑀺𑀬𑀢𑁆𑀢𑀺𑀁 𑀲𑀼𑀢𑁆𑀯𑀸 𑀤𑁆𑀯𑁂𑀧𑀺 𑀧𑀽𑀭𑁂𑀢𑀺. 𑀢𑀲𑁆𑀫𑀸 𑀧𑀭𑀺𑀬𑀢𑁆𑀢𑀺𑀬𑀸 𑀞𑀺𑀢𑀸𑀬 𑀲𑀸𑀲𑀦𑀁 𑀞𑀺𑀢𑀁 𑀳𑁄𑀢𑀺.

𑀬𑀤𑀸 𑀧𑀦 𑀲𑀸 𑀅𑀦𑁆𑀢𑀭𑀥𑀸𑀬𑀢𑀺, 𑀢𑀤𑀸 𑀧𑀞𑀫𑀁 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀦𑀲𑁆𑀲𑀢𑀺. 𑀢𑀢𑁆𑀣 𑀧𑀝𑁆𑀞𑀸𑀦𑀁 𑀲𑀩𑁆𑀩𑀧𑀞𑀫𑀁 𑀅𑀦𑁆𑀢𑀭𑀥𑀸𑀬𑀢𑀺, 𑀅𑀦𑀼𑀓𑁆𑀓𑀫𑁂𑀦 𑀧𑀘𑁆𑀙𑀸 𑀥𑀫𑁆𑀫𑀲𑀗𑁆𑀕𑀳𑁄, 𑀢𑀲𑁆𑀫𑀺𑀁 𑀅𑀦𑁆𑀢𑀭𑀳𑀺𑀢𑁂 𑀇𑀢𑀭𑁂𑀲𑀼 𑀤𑁆𑀯𑀻𑀲𑀼 𑀧𑀺𑀝𑀓𑁂𑀲𑀼 𑀞𑀺𑀢𑁂𑀲𑀼 𑀲𑀸𑀲𑀦𑀁 𑀞𑀺𑀢𑀫𑁂𑀯 𑀳𑁄𑀢𑀺. 𑀢𑀢𑁆𑀣 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂 𑀅𑀦𑁆𑀢𑀭𑀥𑀸𑀬𑀫𑀸𑀦𑁂 𑀧𑀞𑀫𑀁 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁄 𑀏𑀓𑀸𑀤𑀲𑀓𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀏𑀓𑀓𑀸 𑀅𑀦𑁆𑀢𑀭𑀥𑀸𑀬𑀢𑀺, 𑀢𑀤𑀦𑀦𑁆𑀢𑀭𑀁 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁄 𑀘𑀓𑁆𑀓𑀧𑁂𑀬𑁆𑀬𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀑𑀖𑀢𑀭𑀡𑀸 𑀅𑀦𑁆𑀢𑀭𑀥𑀸𑀬𑀢𑀺, 𑀢𑀤𑀦𑀦𑁆𑀢𑀭𑀁 𑀫𑀚𑁆𑀛𑀺𑀫𑀦𑀺𑀓𑀸𑀬𑁄 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀫𑀽𑀮𑀧𑀭𑀺𑀬𑀸𑀬𑀸 𑀅𑀦𑁆𑀢𑀭𑀥𑀸𑀬𑀢𑀺, 𑀢𑀤𑀦𑀦𑁆𑀢𑀭𑀁 𑀤𑀻𑀖𑀦𑀺𑀓𑀸𑀬𑁄 𑀤𑀲𑀼𑀢𑁆𑀢𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀩𑁆𑀭𑀳𑁆𑀫𑀚𑀸𑀮𑀸 𑀅𑀦𑁆𑀢𑀭𑀥𑀸𑀬𑀢𑀺. 𑀏𑀓𑀺𑀲𑁆𑀲𑀸𑀧𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀕𑀸𑀣𑀸𑀦𑀁 𑀧𑀼𑀘𑁆𑀙𑀸 𑀅𑀤𑁆𑀥𑀸𑀦𑀁 𑀕𑀘𑁆𑀙𑀢𑀺, 𑀲𑀸𑀲𑀦𑀁 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀲𑀪𑀺𑀬𑀧𑀼𑀘𑁆𑀙𑀸 (𑀲𑀼. 𑀦𑀺. 𑀲𑀪𑀺𑀬𑀲𑀼𑀢𑁆𑀢𑀁) 𑀯𑀺𑀬 𑀆𑀴𑀯𑀓𑀧𑀼𑀘𑁆𑀙𑀸 (𑀲𑀼. 𑀦𑀺. 𑀆𑀴𑀯𑀓𑀲𑀼𑀢𑁆𑀢𑀁; 𑀲𑀁. 𑀦𑀺. 𑁧.𑁨𑁪𑁬) 𑀯𑀺𑀬 𑀘. 𑀏𑀢𑀸 𑀓𑀺𑀭 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑀺𑀓𑀸 𑀅𑀦𑁆𑀢𑀭𑀸 𑀲𑀸𑀲𑀦𑀁 𑀥𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼.

𑀤𑁆𑀯𑀻𑀲𑀼 𑀧𑀦 𑀧𑀺𑀝𑀓𑁂𑀲𑀼 𑀅𑀦𑁆𑀢𑀭𑀳𑀺𑀢𑁂𑀲𑀼𑀧𑀺 𑀯𑀺𑀦𑀬𑀧𑀺𑀝𑀓𑁂 𑀞𑀺𑀢𑁂 𑀲𑀸𑀲𑀦𑀁 𑀢𑀺𑀝𑁆𑀞𑀢𑀺, 𑀧𑀭𑀺𑀯𑀸𑀭𑀔𑀦𑁆𑀥𑀓𑁂𑀲𑀼 𑀅𑀦𑁆𑀢𑀭𑀳𑀺𑀢𑁂𑀲𑀼 𑀉𑀪𑀢𑁄𑀯𑀺𑀪𑀗𑁆𑀕𑁂 𑀞𑀺𑀢𑁂 𑀞𑀺𑀢𑀫𑁂𑀯 𑀳𑁄𑀢𑀺. 𑀉𑀪𑀢𑁄𑀯𑀺𑀪𑀗𑁆𑀕𑁂 𑀅𑀦𑁆𑀢𑀭𑀳𑀺𑀢𑁂 𑀫𑀸𑀢𑀺𑀓𑀸𑀬 𑀞𑀺𑀢𑀸𑀬𑀧𑀺 𑀞𑀺𑀢𑀫𑁂𑀯 𑀳𑁄𑀢𑀺. 𑀫𑀸𑀢𑀺𑀓𑀸𑀬 𑀅𑀦𑁆𑀢𑀭𑀳𑀺𑀢𑀸𑀬 𑀧𑀸𑀢𑀺𑀫𑁄𑀓𑁆𑀔𑀧𑀩𑁆𑀩𑀚𑁆𑀚𑀉𑀧𑀲𑀫𑁆𑀧𑀤𑀸𑀲𑀼 𑀞𑀺𑀢𑀸𑀲𑀼 𑀲𑀸𑀲𑀦𑀁 𑀢𑀺𑀝𑁆𑀞𑀢𑀺. 𑀮𑀺𑀗𑁆𑀕𑀫𑀤𑁆𑀥𑀸𑀦𑀁 𑀕𑀘𑁆𑀙𑀢𑀺, 𑀲𑁂𑀢𑀯𑀢𑁆𑀣𑀲𑀫𑀡𑀯𑀁𑀲𑁄 𑀧𑀦 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀸𑀲𑀦𑀁 𑀥𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀧𑀘𑁆𑀙𑀺𑀫𑀓𑀲𑁆𑀲 𑀧𑀦 𑀲𑀘𑁆𑀘𑀧𑀝𑀺𑀯𑁂𑀥𑀢𑁄 𑀧𑀘𑁆𑀙𑀺𑀫𑀓𑀲𑁆𑀲 𑀲𑀻𑀮𑀪𑁂𑀤𑀢𑁄 𑀘 𑀧𑀝𑁆𑀞𑀸𑀬 𑀲𑀸𑀲𑀦𑀁 𑀑𑀲𑀓𑁆𑀓𑀺𑀢𑀁 𑀦𑀸𑀫 𑀳𑁄𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦 𑀯𑀸𑀭𑀺𑀢𑀸𑀢𑀺.

𑀢𑀻𑀡𑀺 𑀧𑀭𑀺𑀦𑀺𑀩𑁆𑀩𑀸𑀦𑀸𑀦𑀺 𑀦𑀸𑀫 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀁 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀁 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺. 𑀢𑀢𑁆𑀣 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀁 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀅𑀳𑁄𑀲𑀺, 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑀁 𑀓𑀼𑀲𑀺𑀦𑀸𑀭𑀸𑀬𑀁, 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀦𑀸𑀕𑀢𑁂 𑀪𑀯𑀺𑀲𑁆𑀲𑀢𑀺. 𑀲𑀸𑀲𑀦𑀲𑁆𑀲 𑀓𑀺𑀭 𑀑𑀲𑀓𑁆𑀓𑀦𑀓𑀸𑀮𑁂 𑀇𑀫𑀲𑁆𑀫𑀺𑀁 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀥𑀸𑀢𑀼𑀬𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀫𑀳𑀸𑀘𑁂𑀢𑀺𑀬𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀫𑀳𑀸𑀘𑁂𑀢𑀺𑀬𑀢𑁄 𑀦𑀸𑀕𑀤𑀻𑀧𑁂 𑀭𑀸𑀚𑀸𑀬𑀢𑀦𑀘𑁂𑀢𑀺𑀬𑀁, 𑀢𑀢𑁄 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀦𑀸𑀕𑀪𑀯𑀦𑀢𑁄𑀧𑀺 𑀤𑁂𑀯𑀮𑁄𑀓𑀢𑁄𑀧𑀺 𑀩𑁆𑀭𑀳𑁆𑀫𑀮𑁄𑀓𑀢𑁄𑀧𑀺 𑀥𑀸𑀢𑀼𑀬𑁄 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑀫𑁂𑀯 𑀕𑀫𑀺𑀲𑁆𑀲𑀦𑁆𑀢𑀺. 𑀲𑀸𑀲𑀧𑀫𑀢𑁆𑀢𑀸𑀧𑀺 𑀥𑀸𑀢𑀼 𑀅𑀦𑁆𑀢𑀭𑀸 𑀦 𑀦𑀲𑁆𑀲𑀺𑀲𑁆𑀲𑀢𑀺. 𑀲𑀩𑁆𑀩𑀸 𑀥𑀸𑀢𑀼𑀬𑁄 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀭𑀸𑀲𑀺𑀪𑀽𑀢𑀸 𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑁄 𑀯𑀺𑀬 𑀏𑀓𑀕𑁆𑀖𑀦𑀸 𑀳𑀼𑀢𑁆𑀯𑀸 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀦𑁆𑀢𑀺, 𑀢𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀨𑀭𑀺𑀲𑁆𑀲𑀦𑁆𑀢𑀺.

𑀢𑀢𑁄 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀤𑁂𑀯𑀢𑀸 𑀬𑁄 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 ‘‘𑀅𑀚𑁆𑀚 𑀲𑀢𑁆𑀣𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀅𑀚𑁆𑀚 𑀲𑀸𑀲𑀦𑀁 𑀑𑀲𑀓𑁆𑀓𑀢𑀺, 𑀧𑀘𑁆𑀙𑀺𑀫𑀤𑀲𑁆𑀲𑀦𑀁 𑀤𑀸𑀦𑀺 𑀇𑀤𑀁 𑀅𑀫𑁆𑀳𑀸𑀓’’𑀦𑁆𑀢𑀺 𑀤𑀲𑀩𑀮𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀤𑀺𑀯𑀲𑀢𑁄 𑀫𑀳𑀦𑁆𑀢𑀢𑀭𑀁 𑀓𑀸𑀭𑀼𑀜𑁆𑀜𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀞𑀧𑁂𑀢𑁆𑀯𑀸 𑀅𑀦𑀸𑀕𑀸𑀫𑀺𑀔𑀻𑀡𑀸𑀲𑀯𑁂 𑀅𑀯𑀲𑁂𑀲𑀸 𑀲𑀓𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀥𑀸𑀢𑀽𑀲𑀼 𑀢𑁂𑀚𑁄𑀥𑀸𑀢𑀼 𑀉𑀝𑁆𑀞𑀳𑀺𑀢𑁆𑀯𑀸 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀉𑀕𑁆𑀕𑀘𑁆𑀙𑀺𑀲𑁆𑀲𑀢𑀺, 𑀲𑀸𑀲𑀧𑀫𑀢𑁆𑀢𑀸𑀬𑀧𑀺 𑀥𑀸𑀢𑀼𑀬𑀸 𑀲𑀢𑀺 𑀏𑀓𑀚𑀸𑀮𑀸𑀯 𑀪𑀯𑀺𑀲𑁆𑀲𑀢𑀺, 𑀥𑀸𑀢𑀽𑀲𑀼 𑀧𑀭𑀺𑀬𑀸𑀤𑀸𑀦𑀁 𑀕𑀢𑀸𑀲𑀼 𑀧𑀘𑁆𑀙𑀺𑀚𑁆𑀚𑀺𑀲𑁆𑀲𑀢𑀺. 𑀏𑀯𑀁 𑀫𑀳𑀦𑁆𑀢𑀁 𑀆𑀦𑀼𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀥𑀸𑀢𑀽𑀲𑀼 𑀅𑀦𑁆𑀢𑀭𑀳𑀺𑀢𑀸𑀲𑀼 𑀲𑀸𑀲𑀦𑀁 𑀅𑀦𑁆𑀢𑀭𑀳𑀺𑀢𑀁 𑀦𑀸𑀫 𑀳𑁄𑀢𑀺. 𑀬𑀸𑀯 𑀏𑀯𑀁 𑀦 𑀅𑀦𑀦𑁆𑀢𑀭𑀥𑀸𑀬𑀢𑀺, 𑀢𑀸𑀯 𑀅𑀘𑀭𑀺𑀫𑀁 𑀦𑀸𑀫 𑀳𑁄𑀢𑀺. 𑀏𑀯𑀁 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺.

𑀓𑀲𑁆𑀫𑀸 𑀧𑀦 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀅𑀦𑀘𑁆𑀙𑀭𑀺𑀬𑀢𑁆𑀢𑀸. 𑀩𑀼𑀤𑁆𑀥𑀸 𑀳𑀺 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑀸. 𑀬𑀣𑀸𑀳 𑁋 ‘‘𑀏𑀓𑀧𑀼𑀕𑁆𑀕𑀮𑁄, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀉𑀧𑁆𑀧𑀚𑁆𑀚𑀢𑀺 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑁄, 𑀓𑀢𑀫𑁄 𑀏𑀓𑀧𑀼𑀕𑁆𑀕𑀮𑁄, 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 (𑀅. 𑀦𑀺. 𑁧.𑁧𑁭𑁧-𑁧𑁭𑁪).

𑀬𑀤𑀺 𑀘 𑀤𑁆𑀯𑁂 𑀯𑀸 𑀘𑀢𑁆𑀢𑀸𑀭𑁄 𑀯𑀸 𑀅𑀝𑁆𑀞 𑀯𑀸 𑀲𑁄𑀴𑀲 𑀯𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀦 𑀅𑀘𑁆𑀙𑀭𑀺𑀬𑀸 𑀪𑀯𑁂𑀬𑁆𑀬𑀼𑀁. 𑀏𑀓𑀲𑁆𑀫𑀺𑀜𑁆𑀳𑀺 𑀯𑀺𑀳𑀸𑀭𑁂 𑀤𑁆𑀯𑀺𑀦𑁆𑀦𑀁 𑀘𑁂𑀢𑀺𑀬𑀸𑀦𑀫𑁆𑀧𑀺 𑀮𑀸𑀪𑀲𑀓𑁆𑀓𑀸𑀭𑁄 𑀉𑀴𑀸𑀭𑁄 𑀦 𑀳𑁄𑀢𑀺 𑀪𑀺𑀓𑁆𑀔𑀽𑀧𑀺 𑀩𑀳𑀼𑀢𑀸𑀬 𑀦 𑀅𑀘𑁆𑀙𑀭𑀺𑀬𑀸 𑀚𑀸𑀢𑀸, 𑀏𑀯𑀁 𑀩𑀼𑀤𑁆𑀥𑀸𑀧𑀺 𑀪𑀯𑁂𑀬𑁆𑀬𑀼𑀁. 𑀢𑀲𑁆𑀫𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀤𑁂𑀲𑀦𑀸𑀬 𑀘 𑀯𑀺𑀲𑁂𑀲𑀸𑀪𑀸𑀯𑀢𑁄. 𑀬𑀜𑁆𑀳𑀺 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑀁 𑀥𑀫𑁆𑀫𑀁 𑀏𑀓𑁄 𑀤𑁂𑀲𑁂𑀢𑀺, 𑀅𑀜𑁆𑀜𑁂𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀧𑀺 𑀲𑁄𑀯 𑀤𑁂𑀲𑁂𑀢𑀩𑁆𑀩𑁄 𑀲𑀺𑀬𑀸. 𑀢𑀢𑁄 𑀦 𑀅𑀘𑁆𑀙𑀭𑀺𑀬𑁄 𑀲𑀺𑀬𑀸, 𑀏𑀓𑀲𑁆𑀫𑀺𑀁 𑀧𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀤𑁂𑀲𑀦𑀸𑀧𑀺 𑀅𑀘𑁆𑀙𑀭𑀺𑀬𑀸 𑀳𑁄𑀢𑀺.

𑀯𑀺𑀯𑀸𑀤𑀸𑀪𑀸𑀯𑀢𑁄 𑀘. 𑀩𑀳𑀽𑀲𑀼 𑀘 𑀩𑀼𑀤𑁆𑀥𑁂𑀲𑀼 𑀉𑀧𑁆𑀧𑀚𑁆𑀚𑀦𑁆𑀢𑁂𑀲𑀼 𑀩𑀳𑀽𑀦𑀁 𑀆𑀘𑀭𑀺𑀬𑀸𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀯𑀺𑀬 ‘‘𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄 𑀧𑀸𑀲𑀸𑀤𑀺𑀓𑁄, 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄 𑀫𑀥𑀼𑀭𑀲𑁆𑀲𑀭𑁄 𑀮𑀸𑀪𑀻 𑀧𑀼𑀜𑁆𑀜𑀯𑀸’’𑀢𑀺 𑀯𑀺𑀯𑀤𑁂𑀬𑁆𑀬𑀼𑀁, 𑀢𑀲𑁆𑀫𑀸𑀧𑀺 𑀏𑀯𑀁 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀅𑀧𑀺𑀘𑁂𑀢𑀁 𑀓𑀸𑀭𑀡𑀁 𑀫𑀺𑀮𑀺𑀦𑁆𑀤𑀭𑀜𑁆𑀜𑀸 𑀧𑀼𑀝𑁆𑀞𑁂𑀦 𑀦𑀸𑀕𑀲𑁂𑀦𑀢𑁆𑀣𑁂𑀭𑁂𑀦 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀯𑀼𑀢𑁆𑀢𑀜𑁆𑀳𑀺 (𑀫𑀺. 𑀧. 𑁫.𑁧.𑁧) 𑁋

‘‘𑀢𑀢𑁆𑀣, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀸𑀲𑀺𑀢𑀫𑁆𑀧𑁂𑀢𑀁 𑀪𑀕𑀯𑀢𑀸 ‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’𑀢𑀺. 𑀤𑁂𑀲𑁂𑀦𑁆𑀢𑀸 𑀘, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀩𑁆𑀩𑁂𑀧𑀺 𑀢𑀣𑀸𑀕𑀢𑀸 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀤𑁂𑀲𑁂𑀦𑁆𑀢𑀺, 𑀓𑀣𑀬𑀫𑀸𑀦𑀸 𑀘 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀓𑀣𑁂𑀦𑁆𑀢𑀺, 𑀲𑀺𑀓𑁆𑀔𑀸𑀧𑁂𑀦𑁆𑀢𑀸 𑀘 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀲𑀺𑀓𑁆𑀔𑀸𑀧𑁂𑀦𑁆𑀢𑀺, 𑀅𑀦𑀼𑀲𑀸𑀲𑀫𑀸𑀦𑀸 𑀘 𑀅𑀧𑁆𑀧𑀫𑀸𑀤𑀧𑀝𑀺𑀧𑀢𑁆𑀢𑀺𑀬𑀁 𑀅𑀦𑀼𑀲𑀸𑀲𑀦𑁆𑀢𑀺. 𑀬𑀤𑀺, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀲𑀩𑁆𑀩𑁂𑀲𑀫𑁆𑀧𑀺 𑀢𑀣𑀸𑀕𑀢𑀸𑀦𑀁 𑀏𑀓𑀸 𑀤𑁂𑀲𑀦𑀸 𑀏𑀓𑀸 𑀓𑀣𑀸 𑀏𑀓𑀸 𑀲𑀺𑀓𑁆𑀔𑀸 𑀏𑀓𑀸 𑀅𑀦𑀼𑀲𑀺𑀝𑁆𑀞𑀺, 𑀓𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀢𑀣𑀸𑀕𑀢𑀸 𑀏𑀓𑀓𑁆𑀔𑀡𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺? 𑀏𑀓𑁂𑀦𑀧𑀺 𑀢𑀸𑀯 𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀦 𑀅𑀬𑀁 𑀮𑁄𑀓𑁄 𑀑𑀪𑀸𑀲𑀚𑀸𑀢𑁄. 𑀬𑀤𑀺 𑀤𑀼𑀢𑀺𑀬𑁄 𑀩𑀼𑀤𑁆𑀥𑁄 𑀪𑀯𑁂𑀬𑁆𑀬, 𑀤𑁆𑀯𑀺𑀦𑁆𑀦𑀁 𑀧𑀪𑀸𑀬 𑀅𑀬𑀁 𑀮𑁄𑀓𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀑𑀪𑀸𑀲𑀚𑀸𑀢𑁄 𑀪𑀯𑁂𑀬𑁆𑀬. 𑀑𑀯𑀤𑀫𑀸𑀦𑀸 𑀘 𑀤𑁆𑀯𑁂 𑀢𑀣𑀸𑀕𑀢𑀸 𑀲𑀼𑀔𑀁 𑀑𑀯𑀤𑁂𑀬𑁆𑀬𑀼𑀁, 𑀅𑀦𑀼𑀲𑀸𑀲𑀫𑀸𑀦𑀸 𑀘 𑀲𑀼𑀔𑀁 𑀅𑀦𑀼𑀲𑀸𑀲𑁂𑀬𑁆𑀬𑀼𑀁, 𑀢𑀢𑁆𑀣 𑀫𑁂 𑀓𑀸𑀭𑀡𑀁 𑀩𑁆𑀭𑀽𑀳𑀺, 𑀬𑀣𑀸𑀳𑀁 𑀦𑀺𑀲𑁆𑀲𑀁𑀲𑀬𑁄 𑀪𑀯𑁂𑀬𑁆𑀬𑀦𑁆𑀢𑀺.

𑀅𑀬𑀁 𑀫𑀳𑀸𑀭𑀸𑀚 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀏𑀓𑀩𑀼𑀤𑁆𑀥𑀥𑀸𑀭𑀡𑀻, 𑀏𑀓𑀲𑁆𑀲𑁂𑀯 𑀢𑀣𑀸𑀕𑀢𑀲𑁆𑀲 𑀕𑀼𑀡𑀁 𑀥𑀸𑀭𑁂𑀢𑀺, 𑀬𑀤𑀺 𑀤𑀼𑀢𑀺𑀬𑁄 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀦𑀸𑀬𑀁 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀥𑀸𑀭𑁂𑀬𑁆𑀬, 𑀘𑀮𑁂𑀬𑁆𑀬 𑀓𑀫𑁆𑀧𑁂𑀬𑁆𑀬 𑀦𑀫𑁂𑀬𑁆𑀬 𑀑𑀦𑀫𑁂𑀬𑁆𑀬 𑀯𑀺𑀦𑀫𑁂𑀬𑁆𑀬 𑀯𑀺𑀓𑀺𑀭𑁂𑀬𑁆𑀬 𑀯𑀺𑀥𑀫𑁂𑀬𑁆𑀬 𑀯𑀺𑀤𑁆𑀥𑀁𑀲𑁂𑀬𑁆𑀬, 𑀦 𑀞𑀸𑀦𑀫𑀼𑀧𑀕𑀘𑁆𑀙𑁂𑀬𑁆𑀬.

𑀬𑀣𑀸, 𑀫𑀳𑀸𑀭𑀸𑀚, 𑀦𑀸𑀯𑀸 𑀏𑀓𑀧𑀼𑀭𑀺𑀲𑀲𑀦𑁆𑀥𑀸𑀭𑀡𑀻 𑀪𑀯𑁂𑀬𑁆𑀬. 𑀏𑀓𑀲𑁆𑀫𑀺𑀁 𑀧𑀼𑀭𑀺𑀲𑁂 𑀅𑀪𑀺𑀭𑀽𑀴𑁆𑀳𑁂 𑀲𑀸 𑀦𑀸𑀯𑀸 𑀲𑀫𑀼𑀧𑀸𑀤𑀺𑀓𑀸 𑀪𑀯𑁂𑀬𑁆𑀬. 𑀅𑀣 𑀤𑀼𑀢𑀺𑀬𑁄 𑀧𑀼𑀭𑀺𑀲𑁄 𑀆𑀕𑀘𑁆𑀙𑁂𑀬𑁆𑀬 𑀢𑀸𑀤𑀺𑀲𑁄 𑀆𑀬𑀼𑀦𑀸 𑀯𑀡𑁆𑀡𑁂𑀦 𑀯𑀬𑁂𑀦 𑀧𑀫𑀸𑀡𑁂𑀦 𑀓𑀺𑀲𑀣𑀽𑀮𑁂𑀦 𑀲𑀩𑁆𑀩𑀗𑁆𑀕𑀧𑀘𑁆𑀘𑀗𑁆𑀕𑁂𑀦, 𑀲𑁄 𑀢𑀁 𑀦𑀸𑀯𑀁 𑀅𑀪𑀺𑀭𑀽𑀳𑁂𑀬𑁆𑀬. 𑀅𑀧𑀺𑀦𑀼 𑀲𑀸 𑀫𑀳𑀸𑀭𑀸𑀚, 𑀦𑀸𑀯𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀥𑀸𑀭𑁂𑀬𑁆𑀬𑀸𑀢𑀺? 𑀦 𑀳𑀺, 𑀪𑀦𑁆𑀢𑁂, 𑀘𑀮𑁂𑀬𑁆𑀬 𑀓𑀫𑁆𑀧𑁂𑀬𑁆𑀬 𑀦𑀫𑁂𑀬𑁆𑀬 𑀑𑀦𑀫𑁂𑀬𑁆𑀬 𑀯𑀺𑀦𑀫𑁂𑀬𑁆𑀬 𑀯𑀺𑀓𑀺𑀭𑁂𑀬𑁆𑀬 𑀯𑀺𑀥𑀫𑁂𑀬𑁆𑀬 𑀯𑀺𑀤𑁆𑀥𑀁𑀲𑁂𑀬𑁆𑀬, 𑀦 𑀞𑀸𑀦𑀫𑀼𑀧𑀕𑀘𑁆𑀙𑁂𑀬𑁆𑀬, 𑀑𑀲𑀻𑀤𑁂𑀬𑁆𑀬 𑀉𑀤𑀓𑁂𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀬𑀁 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀏𑀓𑀩𑀼𑀤𑁆𑀥𑀥𑀸𑀭𑀡𑀻, 𑀏𑀓𑀲𑁆𑀲𑁂𑀯 𑀢𑀣𑀸𑀕𑀢𑀲𑁆𑀲 𑀕𑀼𑀡𑀁 𑀥𑀸𑀭𑁂𑀢𑀺, 𑀬𑀤𑀺 𑀤𑀼𑀢𑀺𑀬𑁄 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀦𑀸𑀬𑀁 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀥𑀸𑀭𑁂𑀬𑁆𑀬, 𑀘𑀮𑁂𑀬𑁆𑀬…𑀧𑁂… 𑀦 𑀞𑀸𑀦𑀫𑀼𑀧𑀕𑀘𑁆𑀙𑁂𑀬𑁆𑀬.

𑀬𑀣𑀸 𑀯𑀸 𑀧𑀦 𑀫𑀳𑀸𑀭𑀸𑀚 𑀧𑀼𑀭𑀺𑀲𑁄 𑀬𑀸𑀯𑀤𑀢𑁆𑀣𑀁 𑀪𑁄𑀚𑀦𑀁 𑀪𑀼𑀜𑁆𑀚𑁂𑀬𑁆𑀬 𑀙𑀸𑀤𑁂𑀦𑁆𑀢𑀁 𑀬𑀸𑀯𑀓𑀡𑁆𑀞𑀫𑀪𑀺𑀧𑀽𑀭𑀬𑀺𑀢𑁆𑀯𑀸, 𑀲𑁄 𑀥𑀸𑀢𑁄 𑀧𑀻𑀡𑀺𑀢𑁄 𑀧𑀭𑀺𑀧𑀼𑀡𑁆𑀡𑁄 𑀦𑀺𑀭𑀦𑁆𑀢𑀭𑁄 𑀢𑀦𑁆𑀤𑀺𑀓𑀢𑁄 𑀅𑀦𑁄𑀦𑀫𑀺𑀢𑀤𑀡𑁆𑀟𑀚𑀸𑀢𑁄 𑀧𑀼𑀦𑀤𑁂𑀯 𑀢𑀢𑁆𑀢𑀓𑀁 𑀪𑁄𑀚𑀦𑀁 𑀪𑀼𑀜𑁆𑀚𑁂𑀬𑁆𑀬, 𑀅𑀧𑀺𑀦𑀼 𑀔𑁄, 𑀫𑀳𑀸𑀭𑀸𑀚, 𑀧𑀼𑀭𑀺𑀲𑁄 𑀲𑀼𑀔𑀺𑀢𑁄 𑀪𑀯𑁂𑀬𑁆𑀬𑀸𑀢𑀺? 𑀦 𑀳𑀺, 𑀪𑀦𑁆𑀢𑁂, 𑀲𑀓𑀺𑀁 𑀪𑀼𑀢𑁆𑀢𑁄𑀯 𑀫𑀭𑁂𑀬𑁆𑀬𑀸𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀬𑀁 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼 𑀏𑀓𑀩𑀼𑀤𑁆𑀥𑀥𑀸𑀭𑀡𑀻 …𑀧𑁂… 𑀦 𑀞𑀸𑀦𑀫𑀼𑀧𑀕𑀘𑁆𑀙𑁂𑀬𑁆𑀬𑀸𑀢𑀺.

𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀅𑀢𑀺𑀥𑀫𑁆𑀫𑀪𑀸𑀭𑁂𑀦 𑀧𑀣𑀯𑀻 𑀘𑀮𑀢𑀻𑀢𑀺? 𑀇𑀥, 𑀫𑀳𑀸𑀭𑀸𑀚, 𑀤𑁆𑀯𑁂 𑀲𑀓𑀝𑀸 𑀭𑀢𑀦𑀧𑀭𑀺𑀧𑀽𑀭𑀺𑀢𑀸 𑀪𑀯𑁂𑀬𑁆𑀬𑀼𑀁 𑀬𑀸𑀯 𑀫𑀼𑀔𑀲𑀫𑀸. 𑀏𑀓𑀲𑁆𑀫𑀸 𑀲𑀓𑀝𑀢𑁄 𑀭𑀢𑀦𑀁 𑀕𑀳𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀲𑀓𑀝𑁂 𑀆𑀓𑀺𑀭𑁂𑀬𑁆𑀬𑀼𑀁, 𑀅𑀧𑀺𑀦𑀼 𑀔𑁄 𑀢𑀁, 𑀫𑀳𑀸𑀭𑀸𑀚, 𑀲𑀓𑀝𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀓𑀝𑀸𑀦𑀁 𑀭𑀢𑀦𑀁 𑀥𑀸𑀭𑁂𑀬𑁆𑀬𑀸𑀢𑀺? 𑀦 𑀳𑀺, 𑀪𑀦𑁆𑀢𑁂, 𑀦𑀸𑀪𑀺𑀧𑀺 𑀢𑀲𑁆𑀲 𑀨𑀮𑁂𑀬𑁆𑀬, 𑀅𑀭𑀸𑀧𑀺 𑀢𑀲𑁆𑀲 𑀪𑀺𑀚𑁆𑀚𑁂𑀬𑁆𑀬𑀼𑀁, 𑀦𑁂𑀫𑀺𑀧𑀺 𑀢𑀲𑁆𑀲 𑀑𑀧𑀢𑁂𑀬𑁆𑀬, 𑀅𑀓𑁆𑀔𑁄𑀧𑀺 𑀢𑀲𑁆𑀲 𑀪𑀺𑀚𑁆𑀚𑁂𑀬𑁆𑀬𑀸𑀢𑀺. 𑀓𑀺𑀁 𑀦𑀼 𑀔𑁄, 𑀫𑀳𑀸𑀭𑀸𑀚, 𑀅𑀢𑀺𑀭𑀢𑀦𑀪𑀸𑀭𑁂𑀦 𑀲𑀓𑀝𑀁 𑀪𑀺𑀚𑁆𑀚𑀢𑀻𑀢𑀺? 𑀆𑀫, 𑀪𑀦𑁆𑀢𑁂𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀢𑀺𑀥𑀫𑁆𑀫𑀪𑀸𑀭𑁂𑀦 𑀧𑀣𑀯𑀻 𑀘𑀮𑀢𑀻𑀢𑀺.

𑀅𑀧𑀺𑀘 𑀫𑀳𑀸𑀭𑀸𑀚 𑀇𑀫𑀁 𑀓𑀸𑀭𑀡𑀁 𑀩𑀼𑀤𑁆𑀥𑀩𑀮𑀧𑀭𑀺𑀤𑀻𑀧𑀦𑀸𑀬 𑀑𑀲𑀸𑀭𑀺𑀢𑀁, 𑀅𑀜𑁆𑀜𑀫𑁆𑀧𑀺 𑀢𑀢𑁆𑀣 𑀅𑀪𑀺𑀭𑀽𑀧𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺, 𑀬𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀬𑀤𑀺, 𑀫𑀳𑀸𑀭𑀸𑀚, 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁂𑀲𑀁 𑀧𑀭𑀺𑀲𑀸𑀬 𑀯𑀺𑀯𑀸𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑁋 ‘‘𑀢𑀼𑀫𑁆𑀳𑀸𑀓𑀁 𑀩𑀼𑀤𑁆𑀥𑁄 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄’’𑀢𑀺 𑀉𑀪𑀢𑁄𑀧𑀓𑁆𑀔𑀚𑀸𑀢𑀸 𑀪𑀯𑁂𑀬𑁆𑀬𑀼𑀁. 𑀬𑀣𑀸, 𑀫𑀳𑀸𑀭𑀸𑀚, 𑀤𑁆𑀯𑀺𑀦𑁆𑀦𑀁 𑀩𑀮𑀯𑀸𑀫𑀘𑁆𑀘𑀸𑀦𑀁 𑀧𑀭𑀺𑀲𑀸𑀬 𑀯𑀺𑀯𑀸𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 ‘𑀢𑀼𑀫𑁆𑀳𑀸𑀓𑀁 𑀅𑀫𑀘𑁆𑀘𑁄 𑀅𑀫𑁆𑀳𑀸𑀓𑀁 𑀅𑀫𑀘𑁆𑀘𑁄’𑀢𑀺 𑀉𑀪𑀢𑁄𑀧𑀓𑁆𑀔𑀚𑀸𑀢𑀸 𑀳𑁄𑀦𑁆𑀢𑀺, 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀬𑀤𑀺, 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁂𑀲𑀁 𑀧𑀭𑀺𑀲𑀸𑀬 𑀯𑀺𑀯𑀸𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 ‘𑀢𑀼𑀫𑁆𑀳𑀸𑀓𑀁 𑀩𑀼𑀤𑁆𑀥𑁄 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄’𑀢𑀺 𑀉𑀪𑀢𑁄𑀧𑀓𑁆𑀔𑀚𑀸𑀢𑀸 𑀪𑀯𑁂𑀬𑁆𑀬𑀼𑀁. 𑀇𑀤𑀁 𑀢𑀸𑀯, 𑀫𑀳𑀸𑀭𑀸𑀚, 𑀏𑀓𑀁 𑀓𑀸𑀭𑀡𑀁, 𑀬𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺.

𑀅𑀧𑀭𑀫𑁆𑀧𑀺, 𑀫𑀳𑀸𑀭𑀸𑀚, 𑀉𑀢𑁆𑀢𑀭𑀺𑀁 𑀓𑀸𑀭𑀡𑀁 𑀲𑀼𑀡𑁄𑀳𑀺, 𑀬𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺. 𑀬𑀤𑀺, 𑀫𑀳𑀸𑀭𑀸𑀚, 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀅𑀕𑁆𑀕𑁄 𑀩𑀼𑀤𑁆𑀥𑁄𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸 𑀪𑀯𑁂𑀬𑁆𑀬. 𑀚𑁂𑀝𑁆𑀞𑁄 𑀩𑀼𑀤𑁆𑀥𑁄𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸 𑀪𑀯𑁂𑀬𑁆𑀬. 𑀲𑁂𑀝𑁆𑀞𑁄 𑀩𑀼𑀤𑁆𑀥𑁄𑀢𑀺, 𑀯𑀺𑀲𑀺𑀝𑁆𑀞𑁄 𑀩𑀼𑀤𑁆𑀥𑁄𑀢𑀺, 𑀉𑀢𑁆𑀢𑀫𑁄 𑀩𑀼𑀤𑁆𑀥𑁄𑀢𑀺, 𑀧𑀯𑀭𑁄 𑀩𑀼𑀤𑁆𑀥𑁄𑀢𑀺, 𑀅𑀲𑀫𑁄 𑀩𑀼𑀤𑁆𑀥𑁄𑀢𑀺, 𑀅𑀲𑀫𑀲𑀫𑁄 𑀩𑀼𑀤𑁆𑀥𑁄𑀢𑀺, 𑀅𑀧𑁆𑀧𑀝𑀺𑀲𑀫𑁄 𑀩𑀼𑀤𑁆𑀥𑁄𑀢𑀺, 𑀅𑀧𑁆𑀧𑀝𑀺𑀪𑀸𑀕𑁄 𑀩𑀼𑀤𑁆𑀥𑁄𑀢𑀺, 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄 𑀩𑀼𑀤𑁆𑀥𑁄𑀢𑀺 𑀬𑀁 𑀯𑀘𑀦𑀁, 𑀢𑀁 𑀫𑀺𑀘𑁆𑀙𑀸 𑀪𑀯𑁂𑀬𑁆𑀬. 𑀇𑀤𑀫𑁆𑀧𑀺 𑀔𑁄 𑀢𑁆𑀯𑀁, 𑀫𑀳𑀸𑀭𑀸𑀚, 𑀓𑀸𑀭𑀡𑀁 𑀅𑀢𑁆𑀣𑀢𑁄 𑀲𑀫𑁆𑀧𑀝𑀺𑀘𑁆𑀙, 𑀬𑁂𑀦 𑀓𑀸𑀭𑀡𑁂𑀦 𑀤𑁆𑀯𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀓𑀓𑁆𑀔𑀡𑁂 𑀦𑀼𑀧𑁆𑀧𑀚𑁆𑀚𑀦𑁆𑀢𑀺.

𑀅𑀧𑀺𑀘 𑀔𑁄 𑀫𑀳𑀸𑀭𑀸𑀚 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀪𑀸𑀯𑀧𑀓𑀢𑀺 𑀏𑀲𑀸, 𑀬𑀁 𑀏𑀓𑁄𑀬𑁂𑀯 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺. 𑀓𑀲𑁆𑀫𑀸 𑀓𑀸𑀭𑀡𑀸? 𑀫𑀳𑀦𑁆𑀢𑀢𑀸𑀬 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀕𑀼𑀡𑀸𑀦𑀁. 𑀅𑀜𑁆𑀜𑀫𑁆𑀧𑀺 𑀫𑀳𑀸𑀭𑀸𑀚 𑀬𑀁 𑀮𑁄𑀓𑁂 𑀫𑀳𑀦𑁆𑀢𑀁, 𑀢𑀁 𑀏𑀓𑀁𑀬𑁂𑀯 𑀳𑁄𑀢𑀺. 𑀧𑀣𑀯𑀻, 𑀫𑀳𑀸𑀭𑀸𑀚, 𑀫𑀳𑀦𑁆𑀢𑀻, 𑀲𑀸 𑀏𑀓𑀸𑀬𑁂𑀯. 𑀲𑀸𑀕𑀭𑁄 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯. 𑀲𑀺𑀦𑁂𑀭𑀼 𑀕𑀺𑀭𑀺𑀭𑀸𑀚𑀸 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯. 𑀆𑀓𑀸𑀲𑁄 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯. 𑀲𑀓𑁆𑀓𑁄 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯. 𑀫𑀸𑀭𑁄 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯. 𑀩𑁆𑀭𑀳𑁆𑀫𑀸 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯. 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀫𑀳𑀦𑁆𑀢𑁄, 𑀲𑁄 𑀏𑀓𑁄𑀬𑁂𑀯 𑀮𑁄𑀓𑀲𑁆𑀫𑀺𑀁. 𑀬𑀢𑁆𑀣 𑀢𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀅𑀜𑁆𑀜𑀲𑁆𑀲 𑀑𑀓𑀸𑀲𑁄 𑀦 𑀳𑁄𑀢𑀺. 𑀢𑀲𑁆𑀫𑀸, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀏𑀓𑁄𑀬𑁂𑀯 𑀮𑁄𑀓𑀲𑁆𑀫𑀺𑀁 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀲𑀼𑀓𑀣𑀺𑀢𑁄, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀧𑀜𑁆𑀳𑁄 𑀑𑀧𑀫𑁆𑀫𑁂𑀳𑀺 𑀓𑀸𑀭𑀡𑁂𑀳𑀻’’𑀢𑀺.

𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸𑀢𑀺 𑀏𑀓𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂. 𑀳𑁂𑀝𑁆𑀞𑀸 𑀇𑀫𑀺𑀦𑀸𑀯 𑀧𑀤𑁂𑀦 𑀤𑀲𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀸𑀦𑀺 𑀕𑀳𑀺𑀢𑀸𑀦𑀺 𑀢𑀸𑀦𑀺𑀧𑀺, 𑀏𑀓𑀘𑀓𑁆𑀓𑀯𑀸𑀴𑁂𑀦𑁂𑀯 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀦𑁆𑀢𑀺. 𑀩𑀼𑀤𑁆𑀥𑀸 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀇𑀫𑀲𑁆𑀫𑀺𑀁𑀬𑁂𑀯 𑀘𑀓𑁆𑀓𑀯𑀸𑀴𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑁂 𑀧𑀦 𑀯𑀸𑀭𑀺𑀢𑁂 𑀇𑀢𑁄 𑀅𑀜𑁆𑀜𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀸𑀭𑀺𑀢𑀫𑁂𑀯 𑀳𑁄𑀢𑀺.

𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀦𑁆𑀢𑀺 𑀏𑀢𑁆𑀣 𑀘𑀓𑁆𑀓𑀭𑀢𑀦𑀧𑀸𑀢𑀼𑀪𑀸𑀯𑀢𑁄 𑀧𑀼𑀩𑁆𑀩𑁂 𑀧𑀼𑀩𑁆𑀩𑀁, 𑀢𑀲𑁆𑀲𑁂𑀯 𑀅𑀦𑁆𑀢𑀭𑀥𑀸𑀦𑀢𑁄 𑀧𑀘𑁆𑀙𑀸 𑀘𑀭𑀺𑀫𑀁. 𑀢𑀢𑁆𑀣 𑀤𑁆𑀯𑀺𑀥𑀸 𑀘𑀓𑁆𑀓𑀭𑀢𑀦𑀲𑁆𑀲 𑀅𑀦𑁆𑀢𑀭𑀥𑀸𑀦𑀁 𑀳𑁄𑀢𑀺, 𑀘𑀓𑁆𑀓𑀯𑀢𑁆𑀢𑀺𑀦𑁄 𑀓𑀸𑀮𑀁𑀓𑀺𑀭𑀺𑀬𑀢𑁄 𑀯𑀸 𑀧𑀩𑁆𑀩𑀚𑁆𑀚𑀸𑀬 𑀯𑀸. 𑀅𑀦𑁆𑀢𑀭𑀥𑀸𑀬𑀫𑀸𑀦𑀜𑁆𑀘 𑀧𑀦 𑀢𑀁 𑀓𑀸𑀮𑀁𑀓𑀺𑀭𑀺𑀬𑀢𑁄 𑀯𑀸 𑀧𑀩𑁆𑀩𑀚𑁆𑀚𑀢𑁄 𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀅𑀦𑁆𑀢𑀭𑀥𑀸𑀬𑀢𑀺, 𑀢𑀢𑁄 𑀧𑀭𑀁 𑀘𑀓𑁆𑀓𑀯𑀢𑁆𑀢𑀺𑀦𑁄 𑀧𑀸𑀢𑀼𑀪𑀸𑀯𑁄 𑀅𑀯𑀸𑀭𑀺𑀢𑁄.

𑀓𑀲𑁆𑀫𑀸 𑀧𑀦 𑀏𑀓𑀘𑀓𑁆𑀓𑀯𑀸𑀴𑁂 𑀤𑁆𑀯𑁂 𑀘𑀓𑁆𑀓𑀯𑀢𑁆𑀢𑀺𑀦𑁄 𑀦𑀼𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀯𑀺𑀯𑀸𑀤𑀼𑀧𑀘𑁆𑀙𑁂𑀤𑀢𑁄 𑀅𑀘𑁆𑀙𑀭𑀺𑀬𑀪𑀸𑀯𑀢𑁄 𑀘𑀓𑁆𑀓𑀭𑀢𑀦𑀲𑁆𑀲 𑀫𑀳𑀸𑀦𑀼𑀪𑀸𑀯𑀢𑁄 𑀘. 𑀤𑁆𑀯𑀻𑀲𑀼 𑀳𑀺 𑀉𑀧𑁆𑀧𑀚𑁆𑀚𑀦𑁆𑀢𑁂𑀲𑀼 ‘‘𑀅𑀫𑁆𑀳𑀸𑀓𑀁 𑀭𑀸𑀚𑀸 𑀫𑀳𑀦𑁆𑀢𑁄 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀫𑀳𑀦𑁆𑀢𑁄’’𑀢𑀺 𑀯𑀺𑀯𑀸𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀏𑀓𑀲𑁆𑀫𑀺𑀁 𑀤𑀻𑀧𑁂 𑀘𑀓𑁆𑀓𑀯𑀢𑁆𑀢𑀻𑀢𑀺 𑀘 𑀏𑀓𑀲𑁆𑀫𑀺𑀁 𑀤𑀻𑀧𑁂 𑀘𑀓𑁆𑀓𑀯𑀢𑁆𑀢𑀻𑀢𑀺 𑀘 𑀅𑀦𑀘𑁆𑀙𑀭𑀺𑀬𑀸 𑀪𑀯𑁂𑀬𑁆𑀬𑀼𑀁. 𑀬𑁄 𑀘𑀸𑀬𑀁 𑀘𑀓𑁆𑀓𑀭𑀢𑀦𑀲𑁆𑀲 𑀤𑁆𑀯𑀺𑀲𑀳𑀲𑁆𑀲𑀤𑀻𑀧𑀧𑀭𑀺𑀯𑀸𑀭𑁂𑀲𑀼 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀇𑀲𑁆𑀲𑀭𑀺𑀬𑀸𑀦𑀼𑀧𑁆𑀧𑀤𑀸𑀦𑀲𑀫𑀢𑁆𑀣𑁄 𑀫𑀳𑀸𑀦𑀼𑀪𑀸𑀯𑁄, 𑀲𑁄 𑀧𑀭𑀺𑀳𑀸𑀬𑁂𑀣. 𑀇𑀢𑀺 𑀯𑀺𑀯𑀸𑀤𑀼𑀧𑀘𑁆𑀙𑁂𑀤𑀢𑁄 𑀅𑀘𑁆𑀙𑀭𑀺𑀬𑀪𑀸𑀯𑀢𑁄 𑀘𑀓𑁆𑀓𑀭𑀢𑀦𑀲𑁆𑀲 𑀫𑀳𑀸𑀦𑀼𑀪𑀸𑀯𑀢𑁄 𑀘 𑀦 𑀏𑀓𑀘𑀓𑁆𑀓𑀯𑀸𑀴𑁂 𑀤𑁆𑀯𑁂 𑀉𑀧𑁆𑀧𑀚𑁆𑀚𑀦𑁆𑀢𑀺.

𑁧𑁩𑁦. 𑀬𑀁 𑀇𑀢𑁆𑀣𑀻 𑀅𑀲𑁆𑀲 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺 𑀏𑀢𑁆𑀣 𑀢𑀺𑀝𑁆𑀞𑀢𑀼 𑀢𑀸𑀯 𑀲𑀩𑁆𑀩𑀜𑁆𑀜𑀼𑀕𑀼𑀡𑁂 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀮𑁄𑀓𑀼𑀢𑁆𑀢𑀸𑀭𑀡𑀲𑀫𑀢𑁆𑀣𑁄 𑀩𑀼𑀤𑁆𑀥𑀪𑀸𑀯𑁄, 𑀧𑀡𑀺𑀥𑀸𑀦𑀫𑀢𑁆𑀢𑀫𑁆𑀧𑀺 𑀇𑀢𑁆𑀣𑀺𑀬𑀸 𑀦 𑀲𑀫𑁆𑀧𑀚𑁆𑀚𑀢𑀺.

𑀫𑀦𑀼𑀲𑁆𑀲𑀢𑁆𑀢𑀁 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀺, 𑀳𑁂𑀢𑀼 𑀲𑀢𑁆𑀣𑀸𑀭𑀤𑀲𑁆𑀲𑀦𑀁;

𑀧𑀩𑁆𑀩𑀚𑁆𑀚𑀸 𑀕𑀼𑀡𑀲𑀫𑁆𑀧𑀢𑁆𑀢𑀺, 𑀅𑀥𑀺𑀓𑀸𑀭𑁄 𑀘 𑀙𑀦𑁆𑀤𑀢𑀸;

𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑀸, 𑀅𑀪𑀺𑀦𑀻𑀳𑀸𑀭𑁄 𑀲𑀫𑀺𑀚𑁆𑀛𑀢𑀻𑀢𑀺. (𑀩𑀼. 𑀯𑀁. 𑁨.𑁫𑁯) 𑁋

𑀇𑀫𑀸𑀦𑀺 𑀳𑀺 𑀧𑀡𑀺𑀥𑀸𑀦𑀲𑀫𑁆𑀧𑀢𑁆𑀢𑀺𑀓𑀸𑀭𑀡𑀸𑀦𑀺. 𑀇𑀢𑀺 𑀧𑀡𑀺𑀥𑀸𑀦𑀫𑁆𑀧𑀺 𑀲𑀫𑁆𑀧𑀸𑀤𑁂𑀢𑀼𑀁 𑀅𑀲𑀫𑀢𑁆𑀣𑀸𑀬 𑀇𑀢𑁆𑀣𑀺𑀬𑀸 𑀓𑀼𑀢𑁄 𑀩𑀼𑀤𑁆𑀥𑀪𑀸𑀯𑁄𑀢𑀺 ‘‘𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄 𑀬𑀁 𑀇𑀢𑁆𑀣𑀻 𑀅𑀲𑁆𑀲 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑁄 𑀘 𑀧𑀼𑀜𑁆𑀜𑀼𑀲𑁆𑀲𑀬𑁄 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀫𑁂𑀯 𑀅𑀢𑁆𑀢𑀪𑀸𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀧𑀼𑀭𑀺𑀲𑁄𑀯 𑀅𑀭𑀳𑀁 𑀳𑁄𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄.

𑀬𑀁 𑀇𑀢𑁆𑀣𑀻 𑀭𑀸𑀚𑀸 𑀅𑀲𑁆𑀲 𑀘𑀓𑁆𑀓𑀯𑀢𑁆𑀢𑀻𑀢𑀺𑀆𑀤𑀻𑀲𑀼𑀧𑀺 𑀬𑀲𑁆𑀫𑀸 𑀇𑀢𑁆𑀣𑀺𑀬𑀸 𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑀢𑀸𑀤𑀻𑀦𑀁 𑀅𑀪𑀸𑀯𑁂𑀦 𑀮𑀓𑁆𑀔𑀡𑀸𑀦𑀺 𑀦 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀇𑀢𑁆𑀣𑀺𑀭𑀢𑀦𑀸𑀪𑀸𑀯𑁂𑀦 𑀲𑀢𑁆𑀢𑀭𑀢𑀦𑀲𑀫𑀗𑁆𑀕𑀺𑀢𑀸 𑀦 𑀲𑀫𑁆𑀧𑀚𑁆𑀚𑀢𑀺, 𑀲𑀩𑁆𑀩𑀫𑀦𑀼𑀲𑁆𑀲𑁂𑀳𑀺 𑀘 𑀅𑀥𑀺𑀓𑁄 𑀅𑀢𑁆𑀢𑀪𑀸𑀯𑁄 𑀦 𑀳𑁄𑀢𑀺, 𑀢𑀲𑁆𑀫𑀸 ‘‘𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄 𑀬𑀁 𑀇𑀢𑁆𑀣𑀻 𑀭𑀸𑀚𑀸 𑀅𑀲𑁆𑀲 𑀘𑀓𑁆𑀓𑀯𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀘 𑀲𑀓𑁆𑀓𑀢𑁆𑀢𑀸𑀤𑀻𑀦𑀺 𑀢𑀻𑀡𑀺 𑀞𑀸𑀦𑀸𑀦𑀺 𑀉𑀢𑁆𑀢𑀫𑀸𑀦𑀺, 𑀇𑀢𑁆𑀣𑀺𑀮𑀺𑀗𑁆𑀕𑀜𑁆𑀘 𑀳𑀻𑀦𑀁, 𑀢𑀲𑁆𑀫𑀸 𑀢𑀲𑁆𑀲𑀸 𑀲𑀓𑁆𑀓𑀢𑁆𑀢𑀸𑀤𑀻𑀦𑀺𑀧𑀺 𑀧𑀝𑀺𑀲𑀺𑀤𑁆𑀥𑀸𑀦𑀺.

𑀦𑀦𑀼 𑀘 𑀬𑀣𑀸 𑀇𑀢𑁆𑀣𑀺𑀮𑀺𑀗𑁆𑀕𑀁, 𑀏𑀯𑀁 𑀧𑀼𑀭𑀺𑀲𑀮𑀺𑀗𑁆𑀕𑀫𑁆𑀧𑀺 𑀩𑁆𑀭𑀳𑁆𑀫𑀮𑁄𑀓𑁂 𑀦𑀢𑁆𑀣𑀺? 𑀢𑀲𑁆𑀫𑀸 ‘‘𑀬𑀁 𑀧𑀼𑀭𑀺𑀲𑁄 𑀩𑁆𑀭𑀳𑁆𑀫𑀢𑁆𑀢𑀁 𑀓𑀭𑁂𑀬𑁆𑀬, 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀻’’𑀢𑀺𑀧𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺. 𑀦𑁄 𑀦 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀇𑀥 𑀧𑀼𑀭𑀺𑀲𑀲𑁆𑀲 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑀢𑁄. 𑀩𑁆𑀭𑀳𑁆𑀫𑀢𑁆𑀢𑀦𑁆𑀢𑀺 𑀳𑀺 𑀫𑀳𑀸𑀩𑁆𑀭𑀳𑁆𑀫𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁. 𑀇𑀢𑁆𑀣𑀻 𑀘 𑀇𑀥 𑀛𑀸𑀦𑀁 𑀪𑀸𑀯𑁂𑀢𑁆𑀯𑀸 𑀓𑀸𑀮𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺, 𑀦 𑀫𑀳𑀸𑀩𑁆𑀭𑀳𑁆𑀫𑀸𑀦𑀁, 𑀧𑀼𑀭𑀺𑀲𑁄 𑀧𑀦 𑀢𑀢𑁆𑀣 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀲𑀫𑀸𑀦𑁂𑀧𑀺 𑀘𑁂𑀢𑁆𑀣 𑀉𑀪𑀬𑀮𑀺𑀗𑁆𑀕𑀸𑀪𑀸𑀯𑁂 𑀧𑀼𑀭𑀺𑀲𑀲𑀡𑁆𑀞𑀸𑀦𑀸𑀯 𑀩𑁆𑀭𑀳𑁆𑀫𑀸𑀦𑁄, 𑀦 𑀇𑀢𑁆𑀣𑀺𑀲𑀡𑁆𑀞𑀸𑀦𑀸, 𑀢𑀲𑁆𑀫𑀸 𑀲𑀼𑀯𑀼𑀢𑁆𑀢𑀫𑁂𑀯𑁂𑀢𑀁.

𑁧𑁩𑁧. 𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑁆𑀲𑀸𑀢𑀺𑀆𑀤𑀻𑀲𑀼 𑀬𑀣𑀸 𑀦𑀺𑀫𑁆𑀩𑀩𑀻𑀚𑀓𑁄𑀲𑀸𑀢𑀓𑀻𑀩𑀻𑀚𑀸𑀤𑀻𑀦𑀺 𑀫𑀥𑀼𑀭𑀨𑀮𑀁 𑀦 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀅𑀲𑀸𑀢𑀁 𑀅𑀫𑀥𑀼𑀭𑀫𑁂𑀯 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀏𑀯𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀺 𑀫𑀥𑀼𑀭𑀯𑀺𑀧𑀸𑀓𑀁 𑀦 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀅𑀫𑀥𑀼𑀭𑀫𑁂𑀯 𑀯𑀺𑀧𑀸𑀓𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺. 𑀬𑀣𑀸 𑀘 𑀉𑀘𑁆𑀙𑀼𑀩𑀻𑀚𑀲𑀸𑀮𑀺𑀩𑀻𑀚𑀸𑀤𑀻𑀦𑀺 𑀫𑀥𑀼𑀭𑀁 𑀲𑀸𑀤𑀼𑀭𑀲𑀫𑁂𑀯 𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀦 𑀅𑀲𑀸𑀢𑀁 𑀓𑀝𑀼𑀓𑀁, 𑀏𑀯𑀁 𑀓𑀸𑀬𑀲𑀼𑀘𑀭𑀺𑀢𑀸𑀤𑀻𑀦𑀺 𑀫𑀥𑀼𑀭𑀫𑁂𑀯 𑀯𑀺𑀧𑀸𑀓𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀦 𑀅𑀫𑀥𑀼𑀭𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀬𑀸𑀤𑀺𑀲𑀁 𑀯𑀧𑀢𑁂 𑀩𑀻𑀚𑀁, 𑀢𑀸𑀤𑀺𑀲𑀁 𑀳𑀭𑀢𑁂 𑀨𑀮𑀁;

𑀓𑀮𑁆𑀬𑀸𑀡𑀓𑀸𑀭𑀻 𑀓𑀮𑁆𑀬𑀸𑀡𑀁, 𑀧𑀸𑀧𑀓𑀸𑀭𑀻 𑀘 𑀧𑀸𑀧𑀓’’𑀦𑁆𑀢𑀺. (𑀲𑀁. 𑀦𑀺. 𑁧.𑁨𑁫𑁬);

𑀢𑀲𑁆𑀫𑀸 ‘‘𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄 𑀬𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑀫𑀗𑁆𑀕𑀻𑀢𑀺𑀆𑀤𑀻𑀲𑀼 𑀲𑀫𑀗𑁆𑀕𑀻𑀢𑀺 𑀧𑀜𑁆𑀘𑀯𑀺𑀥𑀸 𑀲𑀫𑀗𑁆𑀕𑀺𑀢𑀸 𑀆𑀬𑀽𑀳𑀦𑀲𑀫𑀗𑁆𑀕𑀺𑀢𑀸 𑀘𑁂𑀢𑀦𑀸𑀲𑀫𑀗𑁆𑀕𑀺𑀢𑀸 𑀓𑀫𑁆𑀫𑀲𑀫𑀗𑁆𑀕𑀺𑀢𑀸 𑀯𑀺𑀧𑀸𑀓𑀲𑀫𑀗𑁆𑀕𑀺𑀢𑀸, 𑀉𑀧𑀝𑁆𑀞𑀸𑀦𑀲𑀫𑀗𑁆𑀕𑀺𑀢𑀸𑀢𑀺. 𑀢𑀢𑁆𑀣 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂 𑀆𑀬𑀽𑀳𑀦𑀲𑀫𑀗𑁆𑀕𑀺𑀢𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀘𑁂𑀢𑀦𑀸𑀲𑀫𑀗𑁆𑀕𑀺𑀢𑀸. 𑀬𑀸𑀯 𑀧𑀦 𑀅𑀭𑀳𑀢𑁆𑀢𑀁 𑀦 𑀧𑀸𑀧𑀼𑀡𑀦𑁆𑀢𑀺, 𑀢𑀸𑀯 𑀲𑀩𑁆𑀩𑁂𑀧𑀺 𑀲𑀢𑁆𑀢𑀸 𑀧𑀼𑀩𑁆𑀩𑁂 𑀉𑀧𑀘𑀺𑀢𑀁 𑀯𑀺𑀧𑀸𑀓𑀸𑀭𑀳𑀁 𑀓𑀫𑁆𑀫𑀁 𑀲𑀦𑁆𑀥𑀸𑀬 ‘‘𑀓𑀫𑁆𑀫𑀲𑀫𑀗𑁆𑀕𑀺𑀦𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀲𑀸 𑀓𑀫𑁆𑀫𑀲𑀫𑀗𑁆𑀕𑀺𑀢𑀸. 𑀯𑀺𑀧𑀸𑀓𑀲𑀫𑀗𑁆𑀕𑀺𑀢𑀸 𑀯𑀺𑀧𑀸𑀓𑀓𑁆𑀔𑀡𑁂𑀬𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀬𑀸𑀯 𑀧𑀦 𑀲𑀢𑁆𑀢𑀸 𑀅𑀭𑀳𑀢𑁆𑀢𑀁 𑀦 𑀧𑀸𑀧𑀼𑀡𑀦𑁆𑀢𑀺, 𑀢𑀸𑀯 𑀦𑁂𑀲𑀁 𑀢𑀢𑁄 𑀢𑀢𑁄 𑀘𑀯𑀺𑀢𑁆𑀯𑀸 𑀦𑀺𑀭𑀬𑁂 𑀢𑀸𑀯 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀅𑀕𑁆𑀕𑀺𑀚𑀸𑀮𑀮𑁄𑀳𑀓𑀼𑀫𑁆𑀪𑀺𑀆𑀤𑀻𑀳𑀺 𑀉𑀧𑀝𑁆𑀞𑀸𑀦𑀸𑀓𑀸𑀭𑁂𑀳𑀺 𑀦𑀺𑀭𑀬𑁄, 𑀕𑀩𑁆𑀪𑀲𑁂𑀬𑁆𑀬𑀓𑀢𑁆𑀢𑀁 𑀆𑀧𑀚𑁆𑀚𑀫𑀸𑀦𑀸𑀦𑀁 𑀫𑀸𑀢𑀼𑀓𑀼𑀘𑁆𑀙𑀺, 𑀤𑁂𑀯𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀓𑀧𑁆𑀧𑀭𑀼𑀓𑁆𑀔𑀯𑀺𑀫𑀸𑀦𑀸𑀤𑀻𑀳𑀺 𑀉𑀧𑀝𑁆𑀞𑀸𑀦𑀸𑀓𑀸𑀭𑁂𑀳𑀺 𑀤𑁂𑀯𑀮𑁄𑀓𑁄𑀢𑀺 𑀏𑀯𑀁 𑀉𑀧𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀉𑀧𑀝𑁆𑀞𑀸𑀢𑀺, 𑀇𑀢𑀺 𑀦𑁂𑀲𑀁 𑀇𑀫𑀺𑀦𑀸 𑀉𑀧𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀉𑀧𑀝𑁆𑀞𑀸𑀦𑁂𑀦 𑀅𑀧𑀭𑀺𑀫𑀼𑀢𑁆𑀢𑀢𑀸 𑀉𑀧𑀝𑁆𑀞𑀸𑀦𑀲𑀫𑀗𑁆𑀕𑀺𑀢𑀸 𑀦𑀸𑀫. 𑀲𑀸 𑀘𑀮𑀢𑀺 𑀲𑁂𑀲𑀸 𑀦𑀺𑀘𑁆𑀘𑀮𑀸. 𑀦𑀺𑀭𑀬𑁂 𑀳𑀺 𑀉𑀧𑀝𑁆𑀞𑀺𑀢𑁂𑀧𑀺 𑀤𑁂𑀯𑀮𑁄𑀓𑁄 𑀉𑀧𑀝𑁆𑀞𑀸𑀢𑀺, 𑀤𑁂𑀯𑀮𑁄𑀓𑁂 𑀉𑀧𑀝𑁆𑀞𑀺𑀢𑁂𑀧𑀺 𑀦𑀺𑀭𑀬𑁄 𑀉𑀧𑀝𑁆𑀞𑀸𑀢𑀺, 𑀫𑀦𑀼𑀲𑁆𑀲𑀮𑁄𑀓𑁂 𑀉𑀧𑀝𑁆𑀞𑀺𑀢𑁂𑀧𑀺 𑀢𑀺𑀭𑀘𑁆𑀙𑀸𑀦𑀬𑁄𑀦𑀺 𑀉𑀧𑀝𑁆𑀞𑀸𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀘 𑀉𑀧𑀝𑁆𑀞𑀺𑀢𑀸𑀬𑀧𑀺 𑀫𑀦𑀼𑀲𑁆𑀲𑀮𑁄𑀓𑁄 𑀉𑀧𑀝𑁆𑀞𑀸𑀢𑀺𑀬𑁂𑀯.

𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀲𑁄𑀡𑀕𑀺𑀭𑀺𑀧𑀸𑀤𑁂 𑀓𑀺𑀭 𑀅𑀘𑁂𑀮𑀯𑀺𑀳𑀸𑀭𑁂 𑀲𑁄𑀡𑀢𑁆𑀣𑁂𑀭𑁄 𑀦𑀸𑀫 𑀏𑀓𑁄 𑀥𑀫𑁆𑀫𑀓𑀣𑀺𑀓𑁄, 𑀢𑀲𑁆𑀲 𑀧𑀺𑀢𑀸 𑀲𑀼𑀦𑀔𑀚𑀻𑀯𑀺𑀓𑁄 𑀅𑀳𑁄𑀲𑀺. 𑀣𑁂𑀭𑁄 𑀢𑀁 𑀧𑀝𑀺𑀩𑀸𑀳𑀦𑁆𑀢𑁄𑀧𑀺 𑀲𑀁𑀯𑀭𑁂 𑀞𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀫𑀸 𑀦𑀲𑁆𑀲𑀺 𑀚𑀭𑀓𑁄’’𑀢𑀺 𑀫𑀳𑀮𑁆𑀮𑀓𑀓𑀸𑀮𑁂 𑀅𑀓𑀸𑀫𑀓𑀁 𑀧𑀩𑁆𑀩𑀸𑀚𑁂𑀲𑀺. 𑀢𑀲𑁆𑀲 𑀕𑀺𑀮𑀸𑀦𑀲𑁂𑀬𑁆𑀬𑀸𑀬 𑀦𑀺𑀧𑀦𑁆𑀦𑀲𑁆𑀲 𑀦𑀺𑀭𑀬𑁄 𑀉𑀧𑀝𑁆𑀞𑀸𑀢𑀺, 𑀲𑁄𑀡𑀕𑀺𑀭𑀺𑀧𑀸𑀤𑀢𑁄 𑀫𑀳𑀦𑁆𑀢𑀸 𑀫𑀳𑀦𑁆𑀢𑀸 𑀲𑀼𑀦𑀔𑀸 𑀆𑀕𑀦𑁆𑀢𑁆𑀯𑀸 𑀔𑀸𑀤𑀺𑀢𑀼𑀓𑀸𑀫𑀸 𑀯𑀺𑀬 𑀲𑀫𑁆𑀧𑀭𑀺𑀯𑀸𑀭𑁂𑀲𑀼𑀁. 𑀲𑁄 𑀫𑀳𑀸𑀪𑀬𑀪𑀻𑀢𑁄 𑁋 ‘‘𑀯𑀸𑀭𑁂𑀳𑀺, 𑀢𑀸𑀢 𑀲𑁄𑀡, 𑀯𑀸𑀭𑁂𑀳𑀺, 𑀢𑀸𑀢 𑀲𑁄𑀡𑀸’’𑀢𑀺 𑀆𑀳. 𑀓𑀺𑀁 𑀫𑀳𑀸𑀣𑁂𑀭𑀸𑀢𑀺. 𑀦 𑀧𑀲𑁆𑀲𑀲𑀺 𑀢𑀸𑀢𑀸𑀢𑀺 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺. 𑀲𑁄𑀡𑀢𑁆𑀣𑁂𑀭𑁄 𑁋 ‘‘𑀓𑀣𑀜𑁆𑀳𑀺 𑀦𑀸𑀫 𑀫𑀸𑀤𑀺𑀲𑀲𑁆𑀲 𑀧𑀺𑀢𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀺, 𑀧𑀢𑀺𑀝𑁆𑀞𑀸’𑀲𑁆𑀲 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀲𑀸𑀫𑀡𑁂𑀭𑁂𑀳𑀺 𑀦𑀸𑀦𑀸𑀧𑀼𑀧𑁆𑀨𑀸𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑁂𑀲𑀼 𑀢𑀮𑀲𑀦𑁆𑀣𑀭𑀡𑀧𑀽𑀚𑀁 𑀆𑀲𑀦𑀧𑀽𑀚𑀜𑁆𑀘 𑀓𑀸𑀭𑁂𑀢𑁆𑀯𑀸 𑀧𑀺𑀢𑀭𑀁 𑀫𑀜𑁆𑀘𑁂𑀦 𑀘𑁂𑀢𑀺𑀬𑀗𑁆𑀕𑀡𑀁 𑀆𑀳𑀭𑀺𑀢𑁆𑀯𑀸 𑀫𑀜𑁆𑀘𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑁋 ‘‘𑀅𑀬𑀁 𑀫𑀳𑀸𑀣𑁂𑀭-𑀧𑀽𑀚𑀸 𑀢𑀼𑀫𑁆𑀳𑀸𑀓𑀁 𑀅𑀢𑁆𑀣𑀸𑀬 𑀓𑀢𑀸 ‘𑀅𑀬𑀁 𑀫𑁂 𑀪𑀕𑀯𑀸 𑀤𑀼𑀕𑁆𑀕𑀢𑀧𑀡𑁆𑀡𑀸𑀓𑀸𑀭𑁄’𑀢𑀺 𑀯𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀘𑀺𑀢𑁆𑀢𑀁 𑀧𑀲𑀸𑀤𑁂𑀳𑀻’’𑀢𑀺 𑀆𑀳. 𑀲𑁄 𑀫𑀳𑀸𑀣𑁂𑀭𑁄 𑀧𑀽𑀚𑀁 𑀤𑀺𑀲𑁆𑀯𑀸 𑀢𑀣𑀸 𑀓𑀭𑁄𑀦𑁆𑀢𑁄 𑀘𑀺𑀢𑁆𑀢𑀁 𑀧𑀲𑀸𑀤𑁂𑀲𑀺, 𑀢𑀸𑀯𑀤𑁂𑀯𑀲𑁆𑀲 𑀤𑁂𑀯𑀮𑁄𑀓𑁄 𑀉𑀧𑀝𑁆𑀞𑀸𑀲𑀺, 𑀦𑀦𑁆𑀤𑀦𑀯𑀦-𑀘𑀺𑀢𑁆𑀢𑀮𑀢𑀸𑀯𑀦-𑀫𑀺𑀲𑁆𑀲𑀓𑀯𑀦-𑀨𑀸𑀭𑀼𑀲𑀓𑀯𑀦𑀯𑀺𑀫𑀸𑀦𑀸𑀦𑀺 𑀘𑁂𑀯 𑀦𑀸𑀝𑀓𑀸𑀦𑀺 𑀘 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸𑀦𑀺 𑀯𑀺𑀬 𑀅𑀳𑁂𑀲𑀼𑀁. 𑀲𑁄 ‘‘𑀅𑀧𑁂𑀣 𑀅𑀧𑁂𑀣 𑀲𑁄𑀡𑀸’’𑀢𑀺 𑀆𑀳. 𑀓𑀺𑀫𑀺𑀤𑀁 𑀣𑁂𑀭𑀸𑀢𑀺? 𑀏𑀢𑀸 𑀢𑁂, 𑀢𑀸𑀢, 𑀫𑀸𑀢𑀭𑁄 𑀆𑀕𑀘𑁆𑀙𑀦𑁆𑀢𑀻𑀢𑀺. 𑀣𑁂𑀭𑁄 ‘‘𑀲𑀕𑁆𑀕𑁄 𑀉𑀧𑀝𑁆𑀞𑀺𑀢𑁄 𑀫𑀳𑀸𑀣𑁂𑀭𑀲𑁆𑀲𑀸’’𑀢𑀺 𑀘𑀺𑀦𑁆𑀢𑁂𑀲𑀺. 𑀏𑀯𑀁 𑀉𑀧𑀝𑁆𑀞𑀸𑀦𑀲𑀫𑀗𑁆𑀕𑀺𑀢𑀸 𑀘𑀮𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑀸𑀲𑀼 𑀲𑀫𑀗𑁆𑀕𑀺𑀢𑀸𑀲𑀼 𑀇𑀥 𑀆𑀬𑀽𑀳𑀦𑀘𑁂𑀢𑀦𑀸𑀓𑀫𑁆𑀫𑀲𑀫𑀗𑁆𑀕𑀺𑀢𑀸𑀯𑀲𑁂𑀦 𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑀫𑀗𑁆𑀕𑀻𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁧𑁩𑁨. 𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄𑀢𑀺 ‘‘𑀏𑀯𑀁 𑀪𑀕𑀯𑀢𑀸 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀼𑀢𑁆𑀢𑁂 𑀣𑁂𑀭𑁄 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀲𑀼𑀢𑁆𑀢𑀁 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀏𑀯𑀁 𑀲𑀲𑁆𑀲𑀺𑀭𑀺𑀓𑀁 𑀓𑀢𑁆𑀯𑀸 𑀤𑁂𑀲𑀺𑀢𑀲𑀼𑀢𑁆𑀢𑀲𑁆𑀲 𑀦𑀸𑀫 𑀪𑀕𑀯𑀢𑀸 𑀦𑀸𑀫𑀁 𑀦 𑀕𑀳𑀺𑀢𑀁. 𑀳𑀦𑁆𑀤𑀲𑁆𑀲 𑀦𑀸𑀫𑀁 𑀕𑀡𑁆𑀳𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘.

𑀢𑀲𑁆𑀫𑀸 𑀢𑀺𑀳 𑀢𑁆𑀯𑀦𑁆𑀢𑀺𑀆𑀤𑀻𑀲𑀼 𑀅𑀬𑀁 𑀅𑀢𑁆𑀣𑀬𑁄𑀚𑀦𑀸 𑁋

𑀆𑀦𑀦𑁆𑀤, 𑀬𑀲𑁆𑀫𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀧𑀭𑀺𑀬𑀸𑀬𑁂 ‘‘𑀅𑀝𑁆𑀞𑀸𑀭𑀲 𑀔𑁄 𑀇𑀫𑀸, 𑀆𑀦𑀦𑁆𑀤, 𑀥𑀸𑀢𑀼𑀬𑁄, 𑀙 𑀇𑀫𑀸, 𑀆𑀦𑀦𑁆𑀤, 𑀥𑀸𑀢𑀼𑀬𑁄’’𑀢𑀺 𑀏𑀯𑀁 𑀩𑀳𑀼𑀥𑀸𑀢𑀼𑀬𑁄 𑀯𑀺𑀪𑀢𑁆𑀢𑀸, 𑀢𑀲𑁆𑀫𑀸 𑀢𑀺𑀳 𑀢𑁆𑀯𑀁 𑀇𑀫𑀁 𑀥𑀫𑁆𑀫𑀧𑀭𑀺𑀬𑀸𑀬𑀁 𑀩𑀳𑀼𑀥𑀸𑀢𑀼𑀓𑁄𑀢𑀺𑀧𑀺 𑀦𑀁 𑀥𑀸𑀭𑁂𑀳𑀺. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀥𑀸𑀢𑀼𑀆𑀬𑀢𑀦𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀝𑁆𑀞𑀸𑀦𑀸𑀝𑁆𑀞𑀸𑀦𑀯𑀲𑁂𑀦 𑀘𑀢𑁆𑀢𑀸𑀭𑁄 𑀧𑀭𑀺𑀯𑀝𑁆𑀝𑀸 𑀓𑀣𑀺𑀢𑀸, 𑀢𑀲𑁆𑀫𑀸 𑀘𑀢𑀼𑀧𑀭𑀺𑀯𑀝𑁆𑀝𑁄𑀢𑀺𑀧𑀺 𑀦𑀁 𑀥𑀸𑀭𑁂𑀳𑀺. 𑀬𑀲𑁆𑀫𑀸 𑀘 𑀆𑀤𑀸𑀲𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀺𑀬 𑀇𑀫𑀁 𑀥𑀫𑁆𑀫𑀧𑀭𑀺𑀬𑀸𑀬𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀏𑀢𑁂 𑀥𑀸𑀢𑀼𑀆𑀤𑀬𑁄 𑀅𑀢𑁆𑀣𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀥𑀫𑁆𑀫𑀸𑀤𑀸𑀲𑁄𑀢𑀺𑀧𑀺 𑀦𑀁 𑀥𑀸𑀭𑁂𑀳𑀺. 𑀬𑀲𑁆𑀫𑀸 𑀘 𑀬𑀣𑀸 𑀦𑀸𑀫 𑀧𑀭𑀲𑁂𑀦𑀫𑀤𑁆𑀤𑀦𑀸 𑀬𑁄𑀥𑀸 𑀲𑀗𑁆𑀕𑀸𑀫𑀢𑀽𑀭𑀺𑀬𑀁 𑀧𑀕𑁆𑀕𑀳𑁂𑀢𑁆𑀯𑀸 𑀧𑀭𑀲𑁂𑀦𑀁 𑀧𑀯𑀺𑀲𑀺𑀢𑁆𑀯𑀸 𑀲𑀧𑀢𑁆𑀢𑁂 𑀫𑀤𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀚𑀬𑀁 𑀕𑀡𑁆𑀳𑀦𑁆𑀢𑀺, 𑀏𑀯𑀫𑁂𑀯 𑀓𑀺𑀮𑁂𑀲𑀲𑁂𑀦𑀫𑀤𑁆𑀤𑀦𑀸 𑀬𑁄𑀕𑀺𑀦𑁄 𑀇𑀥 𑀯𑀼𑀢𑁆𑀢𑀯𑀲𑁂𑀦 𑀯𑀺𑀧𑀲𑁆𑀲𑀦𑀁 𑀧𑀕𑁆𑀕𑀳𑁂𑀢𑁆𑀯𑀸 𑀓𑀺𑀮𑁂𑀲𑁂 𑀫𑀤𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀭𑀳𑀢𑁆𑀢𑀚𑀬𑀁 𑀕𑀡𑁆𑀳𑀦𑁆𑀢𑀺, 𑀢𑀲𑁆𑀫𑀸 𑀅𑀫𑀢𑀤𑀼𑀦𑁆𑀤𑀼𑀪𑀻𑀢𑀺𑀧𑀺 𑀦𑀁 𑀥𑀸𑀭𑁂𑀳𑀺. 𑀬𑀲𑁆𑀫𑀸 𑀘 𑀬𑀣𑀸 𑀲𑀗𑁆𑀕𑀸𑀫𑀬𑁄𑀥𑀸 𑀧𑀜𑁆𑀘𑀸𑀯𑀼𑀥𑀁 𑀕𑀳𑁂𑀢𑁆𑀯𑀸 𑀧𑀭𑀲𑁂𑀦𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀚𑀬𑀁 𑀕𑀡𑁆𑀳𑀦𑁆𑀢𑀺, 𑀏𑀯𑀁 𑀬𑁄𑀕𑀺𑀦𑁄𑀧𑀺 𑀇𑀥 𑀯𑀼𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀯𑀼𑀥𑀁 𑀕𑀳𑁂𑀢𑁆𑀯𑀸 𑀓𑀺𑀮𑁂𑀲𑀲𑁂𑀦𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀅𑀭𑀳𑀢𑁆𑀢𑀚𑀬𑀁 𑀕𑀡𑁆𑀳𑀦𑁆𑀢𑀺. 𑀢𑀲𑁆𑀫𑀸 𑀅𑀦𑀼𑀢𑁆𑀢𑀭𑁄 𑀲𑀗𑁆𑀕𑀸𑀫𑀯𑀺𑀚𑀬𑁄𑀢𑀺𑀧𑀺 𑀦𑀁 𑀥𑀸𑀭𑁂𑀳𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀩𑀳𑀼𑀥𑀸𑀢𑀼𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀇𑀲𑀺𑀕𑀺𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁩. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀇𑀲𑀺𑀕𑀺𑀮𑀺𑀲𑀼𑀢𑁆𑀢𑀁. 𑀢𑀢𑁆𑀣 𑀅𑀜𑁆𑀜𑀸𑀯 𑀲𑀫𑀜𑁆𑀜𑀸 𑀅𑀳𑁄𑀲𑀻𑀢𑀺 𑀇𑀲𑀺𑀕𑀺𑀮𑀺𑀲𑁆𑀲 𑀇𑀲𑀺𑀕𑀺𑀮𑀻𑀢𑀺 𑀲𑀫𑀜𑁆𑀜𑀸𑀬 𑀉𑀧𑁆𑀧𑀦𑁆𑀦𑀓𑀸𑀮𑁂 𑀯𑁂𑀪𑀸𑀭𑁄 𑀦 𑀯𑁂𑀪𑀸𑀭𑁄𑀢𑀺 𑀧𑀜𑁆𑀜𑀸𑀬𑀺𑀢𑁆𑀣, 𑀅𑀜𑁆𑀜𑀸𑀬𑁂𑀯𑀲𑁆𑀲 𑀲𑀫𑀜𑁆𑀜𑀸 𑀅𑀳𑁄𑀲𑀺. 𑀅𑀜𑁆𑀜𑀸 𑀧𑀜𑁆𑀜𑀢𑁆𑀢𑀻𑀢𑀺 𑀇𑀤𑀁 𑀧𑀼𑀭𑀺𑀫𑀧𑀤𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀤𑀸 𑀓𑀺𑀭 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑀲𑁆𑀫𑀺𑀁 𑀞𑀸𑀦𑁂 𑀦𑀺𑀲𑀺𑀦𑁆𑀦𑀸𑀦𑀁 𑀧𑀜𑁆𑀘 𑀧𑀩𑁆𑀩𑀢𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀢𑀢𑁆𑀣 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀇𑀫𑁂 𑀧𑀜𑁆𑀘 𑀧𑀩𑁆𑀩𑀢𑁂 𑀧𑀝𑀺𑀧𑀸𑀝𑀺𑀬𑀸 𑀆𑀘𑀺𑀓𑁆𑀔𑀺. 𑀢𑀢𑁆𑀣 𑀦 𑀪𑀕𑀯𑀢𑁄 𑀧𑀩𑁆𑀩𑀢𑁂𑀳𑀺 𑀅𑀢𑁆𑀣𑁄 𑀅𑀢𑁆𑀣𑀺, 𑀇𑀢𑀺 𑀇𑀫𑁂𑀲𑀼 𑀧𑀦 𑀧𑀩𑁆𑀩𑀢𑁂𑀲𑀼 𑀧𑀝𑀺𑀧𑀸𑀝𑀺𑀬𑀸 𑀓𑀣𑀺𑀬𑀫𑀸𑀦𑁂𑀲𑀼 𑀇𑀲𑀺𑀕𑀺𑀮𑀺𑀲𑁆𑀲 𑀇𑀲𑀺𑀕𑀺𑀮𑀺𑀪𑀸𑀯𑁄 𑀓𑀣𑁂𑀢𑀩𑁆𑀩𑁄 𑀳𑁄𑀢𑀺. 𑀢𑀲𑁆𑀫𑀺𑀁 𑀓𑀣𑀺𑀬𑀫𑀸𑀦𑁂 𑀧𑀤𑀼𑀫𑀯𑀢𑀺𑀬𑀸 𑀧𑀼𑀢𑁆𑀢𑀸𑀦𑀁 𑀧𑀜𑁆𑀘𑀲𑀢𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀦𑀸𑀫𑀸𑀦𑀺 𑀘𑁂𑀯 𑀧𑀤𑀼𑀫𑀯𑀢𑀺𑀬𑀸 𑀘 𑀧𑀢𑁆𑀣𑀦𑀸 𑀓𑀣𑁂𑀢𑀩𑁆𑀩𑀸 𑀪𑀯𑀺𑀲𑁆𑀲𑀢𑀻𑀢𑀺 𑀪𑀕𑀯𑀸 𑀇𑀫𑀁 𑀧𑀜𑁆𑀘 𑀧𑀩𑁆𑀩𑀢𑀧𑀝𑀺𑀧𑀸𑀝𑀺𑀁 𑀆𑀘𑀺𑀓𑁆𑀔𑀺.

𑀧𑀯𑀺𑀲𑀦𑁆𑀢𑀸 𑀤𑀺𑀲𑁆𑀲𑀦𑁆𑀢𑀺 𑀧𑀯𑀺𑀝𑁆𑀞𑀸 𑀦 𑀤𑀺𑀲𑁆𑀲𑀦𑁆𑀢𑀻𑀢𑀺 𑀬𑀣𑀸𑀨𑀸𑀲𑀼𑀓𑀝𑁆𑀞𑀸𑀦𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀸 𑀆𑀕𑀦𑁆𑀢𑁆𑀯𑀸 𑀘𑁂𑀢𑀺𑀬𑀕𑀩𑁆𑀪𑁂 𑀬𑀫𑀓𑀫𑀳𑀸𑀤𑁆𑀯𑀸𑀭𑀁 𑀯𑀺𑀯𑀭𑀦𑁆𑀢𑀸 𑀯𑀺𑀬 𑀢𑀁 𑀧𑀩𑁆𑀩𑀢𑀁 𑀤𑁆𑀯𑁂𑀥𑀸 𑀓𑀢𑁆𑀯𑀸 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀦𑀺 𑀫𑀸𑀧𑁂𑀢𑁆𑀯𑀸 𑀢𑀢𑁆𑀣 𑀯𑀲𑀺𑀁𑀲𑀼, 𑀢𑀲𑁆𑀫𑀸 𑀏𑀯𑀫𑀸𑀳. 𑀇𑀫𑁂 𑀇𑀲𑀻𑀢𑀺 𑀇𑀫𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀇𑀲𑀻.

𑀓𑀤𑀸 𑀧𑀦 𑀢𑁂 𑀢𑀢𑁆𑀣 𑀯𑀲𑀺𑀁𑀲𑀼? 𑀅𑀢𑀻𑀢𑁂 𑀓𑀺𑀭 𑀅𑀦𑀼𑀧𑁆𑀧𑀦𑁆𑀦𑁂 𑀢𑀣𑀸𑀕𑀢𑁂 𑀩𑀸𑀭𑀸𑀡𑀲𑀺𑀁 𑀉𑀧𑀦𑀺𑀲𑁆𑀲𑀸𑀬 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂 𑀏𑀓𑀸 𑀓𑀼𑀮𑀥𑀻𑀢𑀸 𑀔𑁂𑀢𑁆𑀢𑀁 𑀭𑀓𑁆𑀔𑀫𑀸𑀦𑀸 𑀏𑀓𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀧𑀜𑁆𑀘𑀳𑀺 𑀮𑀸𑀚𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀏𑀓𑀁 𑀧𑀤𑀼𑀫𑀧𑀼𑀧𑁆𑀨𑀁 𑀤𑀢𑁆𑀯𑀸 𑀧𑀜𑁆𑀘 𑀧𑀼𑀢𑁆𑀢𑀲𑀢𑀸𑀦𑀺 𑀧𑀢𑁆𑀣𑁂𑀲𑀺. 𑀢𑀲𑁆𑀫𑀺𑀁𑀬𑁂𑀯 𑀘 𑀔𑀡𑁂 𑀧𑀜𑁆𑀘𑀲𑀢𑀸 𑀫𑀺𑀕𑀮𑀼𑀤𑁆𑀤𑀓𑀸 𑀫𑀥𑀼𑀭𑀫𑀁𑀲𑀁 𑀤𑀢𑁆𑀯𑀸 ‘‘𑀏𑀢𑀺𑀲𑁆𑀲𑀸 𑀧𑀼𑀢𑁆𑀢𑀸 𑀪𑀯𑁂𑀬𑁆𑀬𑀸𑀫𑀸’’𑀢𑀺 𑀧𑀢𑁆𑀣𑀬𑀺𑀁𑀲𑀼. 𑀲𑀸 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸, 𑀢𑀢𑁄 𑀘𑀼𑀢𑀸 𑀚𑀸𑀢𑀲𑁆𑀲𑀭𑁂 𑀧𑀤𑀼𑀫𑀕𑀩𑁆𑀪𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀫𑁂𑀓𑁄 𑀢𑀸𑀧𑀲𑁄 𑀤𑀺𑀲𑁆𑀯𑀸 𑀧𑀝𑀺𑀚𑀕𑁆𑀕𑀺, 𑀢𑀲𑁆𑀲𑀸 𑀯𑀺𑀘𑀭𑀦𑁆𑀢𑀺𑀬𑀸𑀯 𑀧𑀸𑀤𑀼𑀤𑁆𑀥𑀸𑀭𑁂 𑀧𑀸𑀤𑀼𑀤𑁆𑀥𑀸𑀭𑁂 𑀪𑀽𑀫𑀺𑀢𑁄 𑀧𑀤𑀼𑀫𑀸𑀦𑀺 𑀉𑀝𑁆𑀞𑀳𑀦𑁆𑀢𑀺. 𑀏𑀓𑁄 𑀯𑀦𑀘𑀭𑀓𑁄 𑀤𑀺𑀲𑁆𑀯𑀸 𑀩𑀸𑀭𑀸𑀡𑀲𑀺𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀦𑀁 𑀆𑀳𑀭𑀸𑀧𑁂𑀢𑁆𑀯𑀸 𑀅𑀕𑁆𑀕𑀫𑀳𑁂𑀲𑀺𑀁 𑀅𑀓𑀸𑀲𑀺, 𑀢𑀲𑁆𑀲𑀸 𑀕𑀩𑁆𑀪𑁄 𑀲𑀡𑁆𑀞𑀸𑀲𑀺. 𑀫𑀳𑀸𑀧𑀤𑀼𑀫𑀓𑀼𑀫𑀸𑀭𑁄 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀯𑀲𑀺, 𑀲𑁂𑀲𑀸 𑀕𑀩𑁆𑀪𑀫𑀮𑀁 𑀦𑀺𑀲𑁆𑀲𑀸 𑀦𑀺𑀩𑁆𑀩𑀢𑁆𑀢𑀸. 𑀯𑀬𑀧𑁆𑀧𑀢𑁆𑀢𑀸 𑀉𑀬𑁆𑀬𑀸𑀦𑁂 𑀧𑀤𑀼𑀫𑀲𑁆𑀲𑀭𑁂 𑀓𑀻𑀴𑀦𑁆𑀢𑀸 𑀏𑀓𑁂𑀓𑀲𑁆𑀫𑀺𑀁 𑀧𑀤𑀼𑀫𑁂 𑀦𑀺𑀲𑀻𑀤𑀺𑀢𑁆𑀯𑀸 𑀔𑀬𑀯𑀬𑀁 𑀧𑀝𑁆𑀞𑀧𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑀬𑀺𑀁𑀲𑀼. 𑀅𑀬𑀁 𑀢𑁂𑀲𑀁 𑀩𑁆𑀬𑀸𑀓𑀭𑀡𑀕𑀸𑀣𑀸 𑀅𑀳𑁄𑀲𑀺 𑁋

‘‘𑀲𑀭𑁄𑀭𑀼𑀳𑀁 𑀧𑀤𑀼𑀫𑀧𑀮𑀸𑀲𑀧𑀢𑁆𑀢𑀚𑀁, 𑀲𑀼𑀧𑀼𑀧𑁆𑀨𑀺𑀢𑀁 𑀪𑀫𑀭𑀕𑀡𑀸𑀦𑀼𑀘𑀺𑀡𑁆𑀡𑀁;

𑀅𑀦𑀺𑀘𑁆𑀘𑀢𑀸𑀬𑀼𑀧𑀕𑀢𑀁 𑀯𑀺𑀤𑀺𑀢𑁆𑀯𑀸, 𑀏𑀓𑁄 𑀘𑀭𑁂 𑀔𑀕𑁆𑀕𑀯𑀺𑀲𑀸𑀡𑀓𑀧𑁆𑀧𑁄’’𑀢𑀺.

𑀢𑀲𑁆𑀫𑀺𑀁 𑀓𑀸𑀮𑁂 𑀢𑁂 𑀢𑀢𑁆𑀣 𑀯𑀲𑀺𑀁𑀲𑀼, 𑀢𑀤𑀸 𑀘𑀲𑁆𑀲 𑀧𑀩𑁆𑀩𑀢𑀲𑁆𑀲 𑀇𑀲𑀺𑀕𑀺𑀮𑀻𑀢𑀺 𑀲𑀫𑀜𑁆𑀜𑀸 𑀉𑀤𑀧𑀸𑀤𑀺.

𑁧𑁩𑁫. 𑀬𑁂 𑀲𑀢𑁆𑀢𑀲𑀸𑀭𑀸𑀢𑀺 𑀅𑀭𑀺𑀝𑁆𑀞𑁄 𑀉𑀧𑀭𑀺𑀝𑁆𑀞𑁄 𑀢𑀕𑀭𑀲𑀺𑀔𑀻 𑀬𑀲𑀲𑁆𑀲𑀻 𑀲𑀼𑀤𑀲𑁆𑀲𑀦𑁄 𑀧𑀺𑀬𑀤𑀲𑁆𑀲𑀻 𑀕𑀦𑁆𑀥𑀸𑀭𑁄 𑀧𑀺𑀡𑁆𑀟𑁄𑀮𑁄 𑀉𑀧𑀸𑀲𑀪𑁄 𑀦𑀻𑀢𑁄 𑀢𑀣𑁄 𑀲𑀼𑀢𑀯𑀸 𑀪𑀸𑀯𑀺𑀢𑀢𑁆𑀢𑁄𑀢𑀺 𑀢𑁂𑀭𑀲𑀦𑁆𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀦𑀸𑀫𑀸𑀦𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀜𑁆𑀘 𑀅𑀜𑁆𑀜𑁂𑀲𑀜𑁆𑀘 𑀕𑀸𑀣𑀸𑀩𑀦𑁆𑀥𑁂𑀦 𑀦𑀸𑀫𑀸𑀦𑀺 𑀆𑀘𑀺𑀓𑁆𑀔𑀦𑁆𑀢𑁄 𑀬𑁂 𑀲𑀢𑁆𑀢𑀲𑀸𑀭𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀢𑁆𑀢𑀲𑀸𑀭𑀸𑀢𑀺 𑀲𑀢𑁆𑀢𑀸𑀦𑀁 𑀲𑀸𑀭𑀪𑀽𑀢𑀸. 𑀅𑀦𑀻𑀖𑀸𑀢𑀺 𑀦𑀺𑀤𑁆𑀤𑀼𑀓𑁆𑀔𑀸. 𑀦𑀺𑀭𑀸𑀲𑀸𑀢𑀺 𑀦𑀺𑀢𑁆𑀢𑀡𑁆𑀳𑀸.

𑀤𑁆𑀯𑁂 𑀚𑀸𑀮𑀺𑀦𑁄𑀢𑀺 𑀘𑀽𑀴𑀚𑀸𑀮𑀺 𑀫𑀳𑀸𑀚𑀸𑀮𑀻𑀢𑀺 𑀤𑁆𑀯𑁂 𑀚𑀸𑀮𑀺𑀦𑀸𑀫𑀓𑀸. 𑀲𑀦𑁆𑀢𑀘𑀺𑀢𑁆𑀢𑁄𑀢𑀺 𑀇𑀤𑀫𑁆𑀧𑀺 𑀏𑀓𑀲𑁆𑀲 𑀦𑀸𑀫𑀫𑁂𑀯. 𑀧𑀲𑁆𑀲𑀺 𑀚𑀳𑀺 𑀉𑀧𑀥𑀺𑀤𑀼𑀓𑁆𑀔𑀫𑀽𑀮𑀦𑁆𑀢𑀺 𑀏𑀢𑁆𑀣 𑀧𑀲𑁆𑀲𑀺 𑀦𑀸𑀫 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄, 𑀤𑀼𑀓𑁆𑀔𑀲𑁆𑀲 𑀧𑀦 𑀫𑀽𑀮𑀁 𑀉𑀧𑀥𑀺𑀁 𑀚𑀳𑀻𑀢𑀺 𑀅𑀬𑀫𑀲𑁆𑀲 𑀣𑀼𑀢𑀺. 𑀅𑀧𑀭𑀸𑀚𑀺𑀢𑁄𑀢𑀺𑀧𑀺 𑀏𑀓𑀲𑁆𑀲 𑀦𑀸𑀫𑀫𑁂𑀯.

𑀲𑀢𑁆𑀣𑀸 𑀧𑀯𑀢𑁆𑀢𑀸 𑀲𑀭𑀪𑀗𑁆𑀕𑁄 𑀮𑁄𑀫𑀳𑀁𑀲𑁄 𑀉𑀘𑁆𑀘𑀗𑁆𑀕𑀫𑀸𑀬𑁄𑀢𑀺 𑀇𑀫𑁂 𑀧𑀜𑁆𑀘 𑀚𑀦𑀸. 𑀅𑀲𑀺𑀢𑁄 𑀅𑀦𑀸𑀲𑀯𑁄 𑀫𑀦𑁄𑀫𑀬𑁄𑀢𑀺 𑀇𑀫𑁂𑀧𑀺 𑀢𑀬𑁄 𑀚𑀦𑀸. 𑀫𑀸𑀦𑀘𑁆𑀙𑀺𑀤𑁄 𑀘 𑀩𑀦𑁆𑀥𑀼𑀫𑀸𑀢𑀺 𑀩𑀦𑁆𑀥𑀼𑀫𑀸 𑀦𑀸𑀫 𑀏𑀓𑁄, 𑀫𑀸𑀦𑀲𑁆𑀲 𑀧𑀦 𑀙𑀺𑀦𑁆𑀦𑀢𑁆𑀢𑀸 𑀫𑀸𑀦𑀘𑁆𑀙𑀺𑀤𑁄𑀢𑀺 𑀯𑀼𑀢𑁆𑀢𑁄. 𑀢𑀤𑀸𑀥𑀺𑀫𑀼𑀢𑁆𑀢𑁄𑀢𑀺𑀧𑀺 𑀦𑀸𑀫𑀫𑁂𑀯.

𑀓𑁂𑀢𑀼𑀫𑁆𑀪𑀭𑀸𑀕𑁄 𑀘 𑀫𑀸𑀢𑀗𑁆𑀕𑁄 𑀅𑀭𑀺𑀬𑁄𑀢𑀺 𑀇𑀫𑁂 𑀢𑀬𑁄 𑀚𑀦𑀸. 𑀅𑀣𑀘𑁆𑀘𑀼𑀢𑁄𑀢𑀺 𑀅𑀣 𑀅𑀘𑁆𑀘𑀼𑀢𑁄. 𑀅𑀘𑁆𑀘𑀼𑀢𑀕𑀸𑀫𑀩𑁆𑀬𑀸𑀫𑀗𑁆𑀓𑁄𑀢𑀺 𑀇𑀫𑁂 𑀤𑁆𑀯𑁂 𑀚𑀦𑀸. 𑀔𑁂𑀫𑀸𑀪𑀺𑀭𑀢𑁄 𑀘 𑀲𑁄𑀭𑀢𑁄𑀢𑀺 𑀇𑀫𑁂 𑀤𑁆𑀯𑁂𑀬𑁂𑀯.

𑀲𑀬𑁆𑀳𑁄 𑀅𑀦𑁄𑀫𑀦𑀺𑀓𑁆𑀓𑀫𑁄𑀢𑀺 𑀲𑀬𑁆𑀳𑁄 𑀦𑀸𑀫 𑀲𑁄 𑀩𑀼𑀤𑁆𑀥𑁄, 𑀅𑀦𑁄𑀫𑀯𑀻𑀭𑀺𑀬𑀢𑁆𑀢𑀸 𑀧𑀦 𑀅𑀦𑁄𑀫𑀦𑀺𑀓𑁆𑀓𑀫𑁄𑀢𑀺 𑀯𑀼𑀢𑁆𑀢𑁄. 𑀆𑀦𑀦𑁆𑀤𑁄 𑀦𑀦𑁆𑀤𑁄 𑀉𑀧𑀦𑀦𑁆𑀤𑁄 𑀤𑁆𑀯𑀸𑀤𑀲𑀸𑀢𑀺 𑀘𑀢𑁆𑀢𑀸𑀭𑁄 𑀆𑀦𑀦𑁆𑀤𑀸, 𑀘𑀢𑁆𑀢𑀸𑀭𑁄 𑀦𑀦𑁆𑀤𑀸 𑀘𑀢𑁆𑀢𑀸𑀭𑁄 𑀉𑀧𑀦𑀦𑁆𑀤𑀸𑀢𑀺 𑀏𑀯𑀁 𑀤𑁆𑀯𑀸𑀤𑀲. 𑀪𑀸𑀭𑀤𑁆𑀯𑀸𑀚𑁄 𑀅𑀦𑁆𑀢𑀺𑀫𑀤𑁂𑀳𑀥𑀸𑀭𑀻𑀢𑀺 𑀪𑀸𑀭𑀤𑁆𑀯𑀸𑀚𑁄 𑀦𑀸𑀫 𑀲𑁄 𑀩𑀼𑀤𑁆𑀥𑁄. 𑀅𑀦𑁆𑀢𑀺𑀫𑀤𑁂𑀳𑀥𑀸𑀭𑀻𑀢𑀺 𑀣𑀼𑀢𑀺.

𑀢𑀡𑁆𑀳𑀘𑁆𑀙𑀺𑀤𑁄𑀢𑀺 𑀲𑀺𑀔𑀭𑀺𑀲𑁆𑀲𑀸𑀬𑀁 𑀣𑀼𑀢𑀺. 𑀯𑀻𑀢𑀭𑀸𑀕𑁄𑀢𑀺 𑀫𑀗𑁆𑀕𑀮𑀲𑁆𑀲 𑀣𑀼𑀢𑀺. 𑀉𑀲𑀪𑀘𑁆𑀙𑀺𑀤𑀸 𑀚𑀸𑀮𑀺𑀦𑀺𑀁 𑀤𑀼𑀓𑁆𑀔𑀫𑀽𑀮𑀦𑁆𑀢𑀺 𑀉𑀲𑀪𑁄 𑀦𑀸𑀫 𑀲𑁄 𑀩𑀼𑀤𑁆𑀥𑁄 𑀤𑀼𑀓𑁆𑀔𑀫𑀽𑀮𑀪𑀽𑀢𑀁 𑀚𑀸𑀮𑀺𑀦𑀺𑀁 𑀅𑀘𑁆𑀙𑀺𑀤𑀸𑀢𑀺 𑀅𑀢𑁆𑀣𑁄. 𑀲𑀦𑁆𑀢𑀁 𑀧𑀤𑀁 𑀅𑀚𑁆𑀛𑀕𑀫𑁄𑀧𑀦𑀻𑀢𑁄𑀢𑀺 𑀉𑀧𑀦𑀻𑀢𑁄 𑀦𑀸𑀫 𑀲𑁄 𑀩𑀼𑀤𑁆𑀥𑁄 𑀲𑀦𑁆𑀢𑀁 𑀧𑀤𑀁 𑀅𑀚𑁆𑀛𑀕𑀫𑀸. 𑀯𑀻𑀢𑀭𑀸𑀕𑁄𑀢𑀺𑀧𑀺 𑀏𑀓𑀲𑁆𑀲 𑀦𑀸𑀫𑀫𑁂𑀯. 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄𑀢𑀺 𑀅𑀬𑀁 𑀓𑀡𑁆𑀳𑀲𑁆𑀲 𑀣𑀼𑀢𑀺.

𑀏𑀢𑁂 𑀘 𑀅𑀜𑁆𑀜𑁂 𑀘𑀸𑀢𑀺 𑀏𑀢𑁂 𑀧𑀸𑀴𑀺𑀬𑀁 𑀆𑀕𑀢𑀸 𑀘 𑀧𑀸𑀴𑀺𑀬𑀁 𑀅𑀦𑀸𑀕𑀢𑀸 𑀅𑀜𑁆𑀜𑁂 𑀘 𑀏𑀢𑁂𑀲𑀁 𑀏𑀓𑀦𑀸𑀫𑀓𑀸𑀬𑁂𑀯. 𑀇𑀫𑁂𑀲𑀼 𑀳𑀺 𑀧𑀜𑁆𑀘𑀲𑀼 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑀢𑁂𑀲𑀼 𑀤𑁆𑀯𑁂𑀧𑀺 𑀢𑀬𑁄𑀧𑀺 𑀤𑀲𑀧𑀺 𑀤𑁆𑀯𑀸𑀤𑀲𑀧𑀺 𑀆𑀦𑀦𑁆𑀤𑀸𑀤𑀬𑁄 𑀯𑀺𑀬 𑀏𑀓𑀦𑀸𑀫𑀓𑀸 𑀅𑀳𑁂𑀲𑀼𑀁. 𑀇𑀢𑀺 𑀧𑀸𑀴𑀺𑀬𑀁 𑀆𑀕𑀢𑀦𑀸𑀫𑁂𑀳𑁂𑀯 𑀲𑀩𑁆𑀩𑁂𑀲𑀁 𑀦𑀸𑀫𑀸𑀦𑀺 𑀯𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀻𑀢𑀺 𑀇𑀢𑁄 𑀧𑀭𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀯𑀢𑁆𑀯𑀸 ‘‘𑀏𑀢𑁂 𑀘 𑀅𑀜𑁆𑀜𑁂 𑀘𑀸’’𑀢𑀺 𑀆𑀳. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀇𑀲𑀺𑀕𑀺𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀫𑀳𑀸𑀘𑀢𑁆𑀢𑀸𑀭𑀻𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁬. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀘𑀢𑁆𑀢𑀸𑀭𑀻𑀲𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀅𑀭𑀺𑀬𑀦𑁆𑀢𑀺 𑀦𑀺𑀤𑁆𑀤𑁄𑀲𑀁 𑀮𑁄𑀓𑀼𑀢𑁆𑀢𑀭𑀁, 𑀦𑀺𑀤𑁆𑀤𑁄𑀲𑀜𑁆𑀳𑀺 ‘‘𑀅𑀭𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀫𑁆𑀫𑀸𑀲𑀫𑀸𑀥𑀺𑀦𑁆𑀢𑀺 𑀫𑀕𑁆𑀕𑀲𑀫𑀸𑀥𑀺𑀁. 𑀲𑀉𑀧𑀦𑀺𑀲𑀦𑁆𑀢𑀺 𑀲𑀧𑀘𑁆𑀘𑀬𑀁. 𑀲𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀲𑀧𑀭𑀺𑀯𑀸𑀭𑀁.

𑀧𑀭𑀺𑀓𑁆𑀔𑀢𑀸𑀢𑀺 𑀧𑀭𑀺𑀯𑀸𑀭𑀺𑀢𑀸. 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀼𑀩𑁆𑀩𑀗𑁆𑀕𑀫𑀸 𑀳𑁄𑀢𑀻𑀢𑀺 𑀤𑁆𑀯𑀺𑀥𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀼𑀩𑁆𑀩𑀗𑁆𑀕𑀫𑀸 𑀳𑁄𑀢𑀺 𑀧𑀼𑀭𑁂𑀘𑀸𑀭𑀺𑀓𑀸 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺 𑀘 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺 𑀘. 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀭𑀺𑀯𑀻𑀫𑀁𑀲𑀢𑀺; 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀦 𑀧𑀭𑀺𑀯𑀻𑀫𑀁𑀲𑀦𑀧𑀭𑀺𑀬𑁄𑀲𑀸𑀦𑁂 𑀪𑀽𑀫𑀺𑀮𑀤𑁆𑀥𑀁 𑀯𑀝𑁆𑀝𑀁 𑀲𑀫𑀼𑀕𑁆𑀖𑀸𑀝𑀬𑀫𑀸𑀦𑀸 𑀯𑀽𑀧𑀲𑀫𑀬𑀫𑀸𑀦𑀸 𑀲𑀻𑀢𑀼𑀤𑀓𑀖𑀝𑀲𑀳𑀲𑁆𑀲𑀁 𑀫𑀢𑁆𑀣𑀓𑁂 𑀆𑀲𑀺𑀜𑁆𑀘𑀫𑀸𑀦𑀸 𑀯𑀺𑀬 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸 𑀳𑀺 𑀔𑁂𑀢𑁆𑀢𑀁 𑀓𑀼𑀭𑀼𑀫𑀸𑀦𑁄 𑀓𑀲𑁆𑀲𑀓𑁄 𑀧𑀞𑀫𑀁 𑀅𑀭𑀜𑁆𑀜𑁂 𑀭𑀼𑀓𑁆𑀔𑁂 𑀙𑀺𑀦𑁆𑀤𑀢𑀺, 𑀧𑀘𑁆𑀙𑀸 𑀅𑀕𑁆𑀕𑀺𑀁 𑀤𑁂𑀢𑀺, 𑀲𑁄 𑀅𑀕𑁆𑀕𑀺 𑀧𑀞𑀫𑀁 𑀙𑀺𑀦𑁆𑀦𑁂 𑀭𑀼𑀓𑁆𑀔𑁂 𑀅𑀦𑀯𑀲𑁂𑀲𑁂 𑀛𑀸𑀧𑁂𑀢𑀺, 𑀏𑀯𑀫𑁂𑀯 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀞𑀫𑀁 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑀗𑁆𑀔𑀸𑀭𑁂 𑀯𑀻𑀫𑀁𑀲𑀢𑀺, 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺 𑀢𑀸𑀬 𑀯𑀻𑀫𑀁𑀲𑀦𑀢𑁆𑀣𑀁 𑀲𑀗𑁆𑀔𑀸𑀭𑁂 𑀧𑀼𑀦 𑀅𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀲𑀫𑀼𑀕𑁆𑀖𑀸𑀝𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀸 𑀤𑀼𑀯𑀺𑀥𑀸𑀧𑀺 𑀇𑀥 𑀅𑀥𑀺𑀧𑁆𑀧𑁂𑀢𑀸.

𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀧𑀚𑀸𑀦𑀸𑀢𑀻𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀮𑀓𑁆𑀔𑀡𑀧𑀝𑀺𑀯𑁂𑀥𑁂𑀦 𑀆𑀭𑀫𑁆𑀫𑀡𑀢𑁄 𑀧𑀚𑀸𑀦𑀸𑀢𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀓𑀺𑀘𑁆𑀘𑀢𑁄 𑀅𑀲𑀫𑁆𑀫𑁄𑀳𑀢𑁄 𑀧𑀚𑀸𑀦𑀸𑀢𑀺. 𑀲𑀸𑀲𑁆𑀲 𑀳𑁄𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀲𑀸 𑀏𑀯𑀁 𑀧𑀚𑀸𑀦𑀦𑀸 𑀅𑀲𑁆𑀲 𑀲𑀫𑁆𑀫𑀸𑀤𑀺𑀝𑁆𑀞𑀺 𑀦𑀸𑀫 𑀳𑁄𑀢𑀺.

𑀤𑁆𑀯𑀸𑀬𑀁 𑀯𑀤𑀸𑀫𑀻𑀢𑀺 𑀤𑁆𑀯𑀬𑀁 𑀯𑀤𑀸𑀫𑀺, 𑀤𑀼𑀯𑀺𑀥𑀓𑁄𑀝𑁆𑀞𑀸𑀲𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀧𑀼𑀜𑁆𑀜𑀪𑀸𑀕𑀺𑀬𑀸𑀢𑀺 𑀧𑀼𑀜𑁆𑀜𑀓𑁄𑀝𑁆𑀞𑀸𑀲𑀪𑀽𑀢𑀸. 𑀉𑀧𑀥𑀺𑀯𑁂𑀧𑀓𑁆𑀓𑀸𑀢𑀺 𑀉𑀧𑀥𑀺𑀲𑀗𑁆𑀔𑀸𑀢𑀲𑁆𑀲 𑀯𑀺𑀧𑀸𑀓𑀲𑁆𑀲 𑀤𑀸𑀬𑀺𑀓𑀸.

𑀧𑀜𑁆𑀜𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺𑀆𑀤𑀻𑀲𑀼 𑀯𑀺𑀪𑀚𑀺𑀢𑁆𑀯𑀸 𑀯𑀺𑀪𑀚𑀺𑀢𑁆𑀯𑀸 𑀅𑀫𑀢𑀤𑁆𑀯𑀸𑀭𑀁 𑀧𑀜𑁆𑀜𑀧𑁂𑀢𑀺 𑀤𑀲𑁆𑀲𑁂𑀢𑀻𑀢𑀺 𑀧𑀜𑁆𑀜𑀸. 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀇𑀦𑁆𑀤𑀢𑁆𑀢𑀁 𑀓𑀭𑁄𑀢𑀻𑀢𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀅𑀯𑀺𑀚𑁆𑀚𑀸𑀬 𑀦 𑀓𑀫𑁆𑀧𑀢𑀻𑀢𑀺 𑀧𑀜𑁆𑀜𑀸𑀩𑀮𑀁. 𑀩𑁄𑀚𑁆𑀛𑀗𑁆𑀕𑀧𑁆𑀧𑀢𑁆𑀢𑀸 𑀳𑀼𑀢𑁆𑀯𑀸 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀯𑀺𑀘𑀺𑀦𑀸𑀢𑀻𑀢𑀺 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀫𑀕𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀧𑀲𑀝𑁆𑀞𑀸 𑀲𑁄𑀪𑀦𑀸 𑀤𑀺𑀝𑁆𑀞𑀻𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀗𑁆𑀕𑀦𑁆𑀢𑀺 𑀫𑀕𑁆𑀕𑀗𑁆𑀕𑀁. 𑀲𑁄𑀢𑀺 𑀲𑁄 𑀪𑀺𑀓𑁆𑀔𑀼. 𑀧𑀳𑀸𑀦𑀸𑀬𑀸𑀢𑀺 𑀧𑀚𑀳𑀦𑀢𑁆𑀣𑀸𑀬. 𑀉𑀧𑀲𑀫𑁆𑀧𑀤𑀸𑀬𑀸𑀢𑀺 𑀧𑀝𑀺𑀮𑀸𑀪𑀢𑁆𑀣𑀸𑀬. 𑀲𑀫𑁆𑀫𑀸𑀯𑀸𑀬𑀸𑀫𑁄𑀢𑀺 𑀦𑀺𑀬𑁆𑀬𑀸𑀦𑀺𑀓𑁄 𑀓𑀼𑀲𑀮𑀯𑀸𑀬𑀸𑀫𑁄. 𑀲𑀢𑁄𑀢𑀺 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸. 𑀅𑀦𑀼𑀧𑀭𑀺𑀥𑀸𑀯𑀦𑁆𑀢𑀺 𑀅𑀦𑀼𑀧𑀭𑀺𑀯𑀢𑁆𑀢𑀦𑁆𑀢𑀻𑀢𑀺 𑀲𑀳𑀚𑀸𑀢𑀸 𑀘 𑀧𑀼𑀭𑁂𑀚𑀸𑀢𑀸 𑀘 𑀳𑀼𑀢𑁆𑀯𑀸 𑀧𑀭𑀺𑀯𑀸𑀭𑁂𑀦𑁆𑀢𑀺. 𑀏𑀢𑁆𑀣 𑀳𑀺 𑀲𑀫𑁆𑀫𑀸𑀯𑀸𑀬𑀸𑀫𑁄 𑀘 𑀲𑀫𑁆𑀫𑀸𑀲𑀢𑀺 𑀘 𑀮𑁄𑀓𑀼𑀢𑁆𑀢𑀭𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀲𑀳𑀚𑀸𑀢𑀸 𑀧𑀭𑀺𑀯𑀸𑀭𑁂𑀦𑁆𑀢𑀺 𑀭𑀸𑀚𑀸𑀦𑀁 𑀯𑀺𑀬 𑀏𑀓𑀭𑀣𑁂 𑀞𑀺𑀢𑀸 𑀅𑀲𑀺𑀕𑁆𑀕𑀸𑀳𑀙𑀢𑁆𑀢𑀕𑁆𑀕𑀸𑀳𑀸. 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀦 𑀧𑀼𑀭𑁂𑀚𑀸𑀢𑀸 𑀳𑀼𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑀺 𑀭𑀣𑀲𑁆𑀲 𑀧𑀼𑀭𑀢𑁄 𑀧𑀢𑁆𑀢𑀺𑀓𑀸𑀤𑀬𑁄 𑀯𑀺𑀬. 𑀤𑀼𑀢𑀺𑀬𑀧𑀩𑁆𑀩𑀢𑁄 𑀧𑀝𑁆𑀞𑀸𑀬 𑀧𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀻𑀦𑀁 𑀢𑀬𑁄𑀧𑀺 𑀲𑀳𑀚𑀸𑀢𑀧𑀭𑀺𑀯𑀸𑀭𑀸𑀯 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁧𑁩𑁭. 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄𑀢𑀺 𑀧𑀚𑀸𑀦𑀸𑀢𑀻𑀢𑀺 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀮𑀓𑁆𑀔𑀡𑀧𑀝𑀺𑀯𑁂𑀥𑁂𑀦 𑀆𑀭𑀫𑁆𑀫𑀡𑀢𑁄 𑀧𑀚𑀸𑀦𑀸𑀢𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀁 𑀓𑀺𑀘𑁆𑀘𑀢𑁄 𑀅𑀲𑀫𑁆𑀫𑁄𑀳𑀢𑁄 𑀧𑀚𑀸𑀦𑀸𑀢𑀺. 𑀇𑀢𑁄 𑀅𑀧𑀭𑁂𑀲𑀼 𑀲𑀫𑁆𑀫𑀸𑀯𑀸𑀘𑀸𑀤𑀻𑀲𑀼𑀧𑀺 𑀏𑀯𑀫𑁂𑀯 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀸𑀫𑀲𑀗𑁆𑀓𑀧𑁆𑀧𑀸𑀤𑀬𑁄 𑀤𑁆𑀯𑁂𑀥𑀸𑀯𑀺𑀢𑀓𑁆𑀓𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁨𑁦𑁬) 𑀯𑀼𑀢𑁆𑀢𑀸𑀬𑁂𑀯.

𑀢𑀓𑁆𑀓𑁄𑀢𑀺𑀆𑀤𑀻𑀲𑀼 𑀢𑀓𑁆𑀓𑀦𑀯𑀲𑁂𑀦 𑀢𑀓𑁆𑀓𑁄. 𑀲𑁆𑀯𑁂𑀯 𑀘 𑀉𑀧𑀲𑀕𑁆𑀕𑁂𑀦 𑀧𑀤𑀁 𑀯𑀟𑁆𑀠𑁂𑀢𑁆𑀯𑀸 𑀯𑀺𑀢𑀓𑁆𑀓𑁄𑀢𑀺 𑀯𑀼𑀢𑁆𑀢𑁄, 𑀲𑁆𑀯𑁂𑀯 𑀲𑀗𑁆𑀓𑀧𑁆𑀧𑀦𑀯𑀲𑁂𑀦 𑀲𑀗𑁆𑀓𑀧𑁆𑀧𑁄. 𑀏𑀓𑀕𑁆𑀕𑁄 𑀳𑀼𑀢𑁆𑀯𑀸 𑀆𑀭𑀫𑁆𑀫𑀡𑁂 𑀅𑀧𑁆𑀧𑁂𑀢𑀻𑀢𑀺 𑀅𑀧𑁆𑀧𑀦𑀸. 𑀉𑀧𑀲𑀕𑁆𑀕𑁂𑀦 𑀧𑀦 𑀧𑀤𑀁 𑀯𑀟𑁆𑀠𑁂𑀢𑁆𑀯𑀸 𑀩𑁆𑀬𑀧𑁆𑀧𑀦𑀸𑀢𑀺 𑀯𑀼𑀢𑁆𑀢𑀁. 𑀘𑁂𑀢𑀲𑁄 𑀅𑀪𑀺𑀦𑀺𑀭𑁄𑀧𑀦𑀸𑀢𑀺 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀺𑀭𑁄𑀧𑀦𑀸. 𑀯𑀺𑀢𑀓𑁆𑀓𑀲𑁆𑀫𑀺𑀜𑁆𑀳𑀺 𑀲𑀢𑀺 𑀯𑀺𑀢𑀓𑁆𑀓𑁄 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀅𑀪𑀺𑀦𑀺𑀭𑁄𑀧𑁂𑀢𑀺 𑀯𑀺𑀢𑀓𑁆𑀓𑁂 𑀧𑀦 𑀅𑀲𑀢𑀺 𑀅𑀢𑁆𑀢𑀦𑁄𑀬𑁂𑀯 𑀥𑀫𑁆𑀫𑀢𑀸𑀬 𑀘𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀅𑀪𑀺𑀭𑀼𑀳𑀢𑀺 𑀚𑀸𑀢𑀺𑀲𑀫𑁆𑀧𑀦𑁆𑀦𑁄 𑀅𑀪𑀺𑀜𑁆𑀜𑀸𑀢𑀧𑀼𑀭𑀺𑀲𑁄 𑀯𑀺𑀬 𑀭𑀸𑀚𑀕𑁂𑀳𑀁. 𑀅𑀦𑀪𑀺𑀜𑁆𑀜𑀸𑀢𑀲𑁆𑀲 𑀳𑀺 𑀧𑀝𑀺𑀳𑀸𑀭𑁂𑀦 𑀯𑀸 𑀤𑁄𑀯𑀸𑀭𑀺𑀓𑁂𑀦 𑀯𑀸 𑀅𑀢𑁆𑀣𑁄 𑀳𑁄𑀢𑀺, 𑀅𑀪𑀺𑀜𑁆𑀜𑀸𑀢𑀁 𑀚𑀸𑀢𑀺𑀲𑀫𑁆𑀧𑀦𑁆𑀦𑀁 𑀲𑀩𑁆𑀩𑁂 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸 𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀢𑀦𑁄𑀯 𑀥𑀫𑁆𑀫𑀢𑀸𑀬 𑀦𑀺𑀓𑁆𑀔𑀫𑀢𑀺 𑀘𑁂𑀯 𑀧𑀯𑀺𑀲𑀢𑀺 𑀘, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀸𑀘𑀁 𑀲𑀗𑁆𑀔𑀭𑁄𑀢𑀻𑀢𑀺 𑀯𑀘𑀻𑀲𑀗𑁆𑀔𑀸𑀭𑁄. 𑀏𑀢𑁆𑀣 𑀘 𑀮𑁄𑀓𑀺𑀬𑀯𑀺𑀢𑀓𑁆𑀓𑁄 𑀯𑀸𑀘𑀁 𑀲𑀗𑁆𑀔𑀭𑁄𑀢𑀺, 𑀦 𑀮𑁄𑀓𑀼𑀢𑁆𑀢𑀭𑁄. 𑀓𑀺𑀜𑁆𑀘𑀸𑀧𑀺 𑀦 𑀲𑀗𑁆𑀔𑀭𑁄𑀢𑀺, 𑀯𑀘𑀻𑀲𑀗𑁆𑀔𑀸𑀭𑁄𑀢𑁆𑀯𑁂𑀯 𑀘 𑀧𑀦𑀲𑁆𑀲 𑀦𑀸𑀫𑀁 𑀳𑁄𑀢𑀺. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀁 𑀅𑀦𑀼𑀧𑀭𑀺𑀥𑀸𑀯𑀦𑁆𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀁 𑀧𑀭𑀺𑀯𑀸𑀭𑁂𑀦𑁆𑀢𑀺. 𑀏𑀢𑁆𑀣 𑀘 𑀢𑀬𑁄𑀧𑀺 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀸𑀤𑀬𑁄 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀘𑀺𑀢𑁆𑀢𑁂𑀲𑀼 𑀮𑀩𑁆𑀪𑀦𑁆𑀢𑀺, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀢𑀺𑀡𑁆𑀡𑀫𑁆𑀧𑀺 𑀓𑀸𑀫𑀲𑀗𑁆𑀓𑀧𑁆𑀧𑀸𑀤𑀻𑀦𑀜𑁆𑀘 𑀧𑀤𑀘𑁆𑀙𑁂𑀤𑀁 𑀲𑀫𑀼𑀕𑁆𑀖𑀸𑀢𑀁 𑀓𑀭𑁄𑀦𑁆𑀢𑁄 𑀫𑀕𑁆𑀕𑀗𑁆𑀕𑀁 𑀧𑀽𑀭𑀬𑀫𑀸𑀦𑁄 𑀏𑀓𑁄𑀯 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀸𑀤𑀺𑀯𑀲𑁂𑀦 𑀢𑀻𑀡𑀺 𑀦𑀸𑀫𑀸𑀦𑀺 𑀮𑀪𑀢𑀺. 𑀧𑀭𑀢𑁄 𑀲𑀫𑁆𑀫𑀸𑀯𑀸𑀘𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁧𑁩𑁮. 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻𑀢𑀺𑀆𑀤𑀻𑀲𑀼 𑀯𑀺𑀭𑀢𑀺𑀧𑀺 𑀘𑁂𑀢𑀦𑀸𑀧𑀺 𑀯𑀝𑁆𑀝𑀢𑀺. 𑀆𑀭𑀢𑀻𑀢𑀺𑀆𑀤𑀻𑀲𑀼 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀳𑀺 𑀆𑀭𑀓𑀸 𑀭𑀫𑀢𑀻𑀢𑀺 𑀆𑀭𑀢𑀺. 𑀯𑀺𑀦𑀸 𑀢𑁂𑀳𑀺 𑀭𑀫𑀢𑀻𑀢𑀺 𑀯𑀺𑀭𑀢𑀺. 𑀢𑀢𑁄 𑀢𑀢𑁄 𑀧𑀝𑀺𑀦𑀺𑀯𑀢𑁆𑀢𑀸𑀯 𑀳𑀼𑀢𑁆𑀯𑀸 𑀢𑁂𑀳𑀺 𑀯𑀺𑀦𑀸 𑀭𑀫𑀢𑀻𑀢𑀺 𑀧𑀝𑀺𑀯𑀺𑀭𑀢𑀺. 𑀉𑀧𑀲𑀕𑁆𑀕𑀯𑀲𑁂𑀦 𑀯𑀸 𑀧𑀤𑀁 𑀯𑀟𑁆𑀠𑀺𑀢𑀁, 𑀲𑀩𑁆𑀩𑀫𑀺𑀤𑀁 𑀑𑀭𑀫𑀦𑀪𑀸𑀯𑀲𑁆𑀲𑁂𑀯 𑀅𑀥𑀺𑀯𑀘𑀦𑀁. 𑀯𑁂𑀭𑀁 𑀫𑀡𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀯𑁂𑀭𑀫𑀡𑀺. 𑀇𑀤𑀫𑁆𑀧𑀺 𑀑𑀭𑀫𑀦𑀲𑁆𑀲𑁂𑀯 𑀯𑁂𑀯𑀘𑀦𑀁.

𑁧𑁩𑁯. 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻𑀢𑀺𑀆𑀤𑀻𑀲𑀼𑀧𑀺 𑀘𑁂𑀢𑀦𑀸 𑀯𑀺𑀭𑀢𑀻𑀢𑀺 𑀉𑀪𑀬𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯.

𑁧𑁪𑁦. 𑀓𑀼𑀳𑀦𑀸𑀢𑀺𑀆𑀤𑀻𑀲𑀼 𑀢𑀺𑀯𑀺𑀥𑁂𑀦 𑀓𑀼𑀳𑀦𑀯𑀢𑁆𑀣𑀼𑀦𑀸 𑀮𑁄𑀓𑀁 𑀏𑀢𑀸𑀬 𑀓𑀼𑀳𑀬𑀦𑁆𑀢𑀺 𑀯𑀺𑀫𑁆𑀳𑀸𑀧𑀬𑀦𑁆𑀢𑀻𑀢𑀺 𑀓𑀼𑀳𑀦𑀸. 𑀮𑀸𑀪𑀲𑀓𑁆𑀓𑀸𑀭𑀢𑁆𑀣𑀺𑀓𑀸 𑀳𑀼𑀢𑁆𑀯𑀸 𑀏𑀢𑀸𑀬 𑀮𑀧𑀦𑁆𑀢𑀻𑀢𑀺 𑀮𑀧𑀦𑀸. 𑀦𑀺𑀫𑀺𑀢𑁆𑀢𑀁 𑀲𑀻𑀮𑀫𑁂𑀢𑁂𑀲𑀦𑁆𑀢𑀺 𑀦𑁂𑀫𑀺𑀢𑁆𑀢𑀺𑀓𑀸, 𑀢𑁂𑀲𑀁 𑀪𑀸𑀯𑁄 𑀦𑁂𑀫𑀺𑀢𑁆𑀢𑀺𑀓𑀢𑀸. 𑀦𑀺𑀧𑁆𑀧𑁂𑀲𑁄 𑀲𑀻𑀮𑀫𑁂𑀢𑁂𑀲𑀦𑁆𑀢𑀺 𑀦𑀺𑀧𑁆𑀧𑁂𑀲𑀺𑀓𑀸, 𑀢𑁂𑀲𑀁 𑀪𑀸𑀯𑁄 𑀦𑀺𑀧𑁆𑀧𑁂𑀲𑀺𑀓𑀢𑀸. 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑁆𑀢𑀺 𑀫𑀕𑁆𑀕𑀦𑁆𑀢𑀺 𑀧𑀭𑀺𑀬𑁂𑀲𑀦𑁆𑀢𑀻𑀢𑀺 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀸, 𑀢𑁂𑀲𑀁 𑀪𑀸𑀯𑁄 𑀮𑀸𑀪𑁂𑀦 𑀮𑀸𑀪𑀁 𑀦𑀺𑀚𑀺𑀕𑀻𑀲𑀦𑀢𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁂𑀦 𑀧𑀦𑁂𑀢𑀸 𑀓𑀼𑀳𑀦𑀸𑀤𑀺𑀓𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀲𑀻𑀮𑀦𑀺𑀤𑁆𑀤𑁂𑀲𑁂𑀬𑁂𑀯 𑀧𑀸𑀴𑀺𑀜𑁆𑀘 𑀅𑀝𑁆𑀞𑀓𑀣𑀜𑁆𑀘 𑀆𑀳𑀭𑀺𑀢𑁆𑀯𑀸 𑀧𑀓𑀸𑀲𑀺𑀢𑀸. 𑀫𑀺𑀘𑁆𑀙𑀸𑀆𑀚𑀻𑀯𑀲𑁆𑀲 𑀧𑀳𑀸𑀦𑀸𑀬𑀸𑀢𑀺 𑀏𑀢𑁆𑀣 𑀦 𑀓𑁂𑀯𑀮𑀁 𑀧𑀸𑀴𑀺𑀬𑀁 𑀆𑀕𑀢𑁄𑀯 𑀫𑀺𑀘𑁆𑀙𑀸𑀆𑀚𑀻𑀯𑁄, 𑀆𑀚𑀻𑀯𑀳𑁂𑀢𑀼 𑀧𑀦 𑀧𑀯𑀢𑁆𑀢𑀺𑀢𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀲𑀢𑁆𑀢𑀓𑀫𑁆𑀫𑀧𑀣𑀘𑁂𑀢𑀦𑀸𑀧𑀺 𑀫𑀺𑀘𑁆𑀙𑀸𑀆𑀚𑀻𑀯𑁄𑀯. 𑀢𑀸𑀲𑀁𑀬𑁂𑀯 𑀲𑀢𑁆𑀢𑀦𑁆𑀦𑀁 𑀘𑁂𑀢𑀦𑀸𑀦𑀁 𑀧𑀤𑀧𑀘𑁆𑀙𑁂𑀤𑀁 𑀲𑀫𑀼𑀕𑁆𑀖𑀸𑀢𑀁 𑀓𑀼𑀭𑀼𑀫𑀸𑀦𑀁 𑀫𑀕𑁆𑀕𑀗𑁆𑀕𑀁 𑀧𑀽𑀭𑀬𑀫𑀸𑀦𑀸 𑀉𑀧𑁆𑀧𑀦𑁆𑀦𑀸 𑀯𑀺𑀭𑀢𑀺 𑀲𑀫𑁆𑀫𑀸𑀆𑀚𑀻𑀯𑁄 𑀦𑀸𑀫.

𑁧𑁪𑁧. 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑁆𑀲𑀸𑀢𑀺 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀁 𑀞𑀺𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀳𑁄𑀢𑀻𑀢𑀺 𑀫𑀕𑁆𑀕𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀳𑁄𑀢𑀺, 𑀨𑀮𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑁆𑀲𑀧𑀺 𑀨𑀮𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀳𑁄𑀢𑀻𑀢𑀺 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀫𑁆𑀫𑀸𑀜𑀸𑀡𑀲𑁆𑀲 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀻𑀢𑀺 𑀏𑀢𑁆𑀣 𑀧𑀦 𑀫𑀕𑁆𑀕𑀲𑀫𑁆𑀫𑀸𑀲𑀫𑀸𑀥𑀺𑀫𑁆𑀳𑀺 𑀞𑀺𑀢𑀲𑁆𑀲 𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀡𑀁 𑀲𑀫𑁆𑀫𑀸𑀜𑀸𑀡𑀁 𑀧𑀳𑁄𑀢𑀺, 𑀨𑀮𑀲𑀫𑁆𑀫𑀸𑀲𑀫𑀸𑀥𑀺𑀫𑁆𑀳𑀺 𑀞𑀺𑀢𑀲𑁆𑀲 𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀁 𑀲𑀫𑁆𑀫𑀸𑀜𑀸𑀡𑀁 𑀧𑀳𑁄𑀢𑀺. 𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀡𑀲𑀫𑁆𑀫𑀸𑀜𑀸𑀡𑁂 𑀘 𑀞𑀺𑀢𑀲𑁆𑀲 𑀫𑀕𑁆𑀕𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑀧𑀳𑁄𑀢𑀺, 𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀲𑀫𑁆𑀫𑀸𑀜𑀸𑀡𑁂 𑀞𑀺𑀢𑀲𑁆𑀲 𑀨𑀮𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺 𑀧𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀞𑀧𑁂𑀢𑁆𑀯𑀸 𑀅𑀝𑁆𑀞 𑀨𑀮𑀗𑁆𑀕𑀸𑀦𑀺 𑀲𑀫𑁆𑀫𑀸𑀜𑀸𑀡𑀁 𑀧𑀘𑁆𑀘𑀯𑁂𑀓𑁆𑀔𑀡𑀁 𑀓𑀢𑁆𑀯𑀸 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀁 𑀨𑀮𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁.

𑁧𑁪𑁨. 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀢𑀻𑀢𑀺𑀆𑀤𑀻𑀲𑀼 𑀅𑀯𑀲𑁂𑀲𑀦𑀺𑀓𑀸𑀬𑀪𑀸𑀡𑀓𑀸 𑀨𑀮𑀁 𑀓𑀣𑀺𑀢𑀦𑁆𑀢𑀺 𑀯𑀤𑀦𑁆𑀢𑀺, 𑀫𑀚𑁆𑀛𑀺𑀫𑀪𑀸𑀡𑀓𑀸 𑀧𑀦 𑀤𑀲𑀦𑁆𑀦𑀁 𑀦𑀺𑀚𑁆𑀚𑀭𑀯𑀢𑁆𑀣𑀽𑀦𑀁 𑀆𑀕𑀢𑀝𑁆𑀞𑀸𑀦𑁂 𑀫𑀕𑁆𑀕𑁄 𑀓𑀣𑀺𑀢𑁄𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀤𑀲𑁆𑀲𑀦𑀝𑁆𑀞𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺 𑀯𑁂𑀤𑀺𑀢𑀩𑁆𑀩𑀸, 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦 𑀲𑀫𑁆𑀫𑀸𑀜𑀸𑀡𑀁, 𑀢𑀤𑀥𑀺𑀫𑀼𑀢𑁆𑀢𑀝𑁆𑀞𑁂𑀦 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺.

𑀯𑀻𑀲𑀢𑀺 𑀓𑀼𑀲𑀮𑀧𑀓𑁆𑀔𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄 𑀤𑀲, ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀘 𑀅𑀦𑁂𑀓𑁂 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸 𑀤𑀲𑀸𑀢𑀺 𑀏𑀯𑀁 𑀯𑀻𑀲𑀢𑀺 𑀓𑀼𑀲𑀮𑀧𑀓𑁆𑀔𑀸 𑀳𑁄𑀦𑁆𑀢𑀺. 𑀯𑀻𑀲𑀢𑀺 𑀅𑀓𑀼𑀲𑀮𑀧𑀓𑁆𑀔𑀸𑀢𑀺 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀦𑀺𑀚𑁆𑀚𑀺𑀡𑁆𑀡𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀬𑁄 𑀤𑀲, ‘‘𑀬𑁂 𑀘 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀅𑀦𑁂𑀓𑁂 𑀧𑀸𑀧𑀓𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸 𑀤𑀲 𑀘𑀸𑀢𑀺 𑀏𑀯𑀁 𑀯𑀻𑀲𑀢𑀺 𑀅𑀓𑀼𑀲𑀮𑀧𑀓𑁆𑀔𑀸 𑀯𑁂𑀤𑀺𑀢𑀩𑁆𑀩𑀸. 𑀫𑀳𑀸𑀘𑀢𑁆𑀢𑀸𑀭𑀻𑀲𑀓𑁄𑀢𑀺 𑀫𑀳𑀸𑀯𑀺𑀧𑀸𑀓𑀤𑀸𑀦𑁂𑀦 𑀫𑀳𑀦𑁆𑀢𑀸𑀦𑀁 𑀓𑀼𑀲𑀮𑀧𑀓𑁆𑀔𑀺𑀓𑀸𑀦𑀜𑁆𑀘𑁂𑀯 𑀅𑀓𑀼𑀲𑀮𑀧𑀓𑁆𑀔𑀺𑀓𑀸𑀦𑀜𑁆𑀘 𑀘𑀢𑁆𑀢𑀸𑀭𑀻𑀲𑀸𑀬 𑀥𑀫𑁆𑀫𑀸𑀦𑀁 𑀧𑀓𑀸𑀲𑀺𑀢𑀢𑁆𑀢𑀸 𑀫𑀳𑀸𑀘𑀢𑁆𑀢𑀸𑀭𑀻𑀲𑀓𑁄𑀢𑀺.

𑀇𑀫𑀲𑁆𑀫𑀺𑀜𑁆𑀘 𑀧𑀦 𑀲𑀼𑀢𑁆𑀢𑁂 𑀧𑀜𑁆𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑁄 𑀓𑀣𑀺𑀢𑀸 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺 𑀓𑀫𑁆𑀫𑀲𑁆𑀲𑀓𑀢𑀸𑀲𑀫𑁆𑀫𑀸𑀤𑀺𑀝𑁆𑀞𑀺 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺 𑀨𑀮𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺. 𑀢𑀢𑁆𑀣 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺 𑀦𑀸𑀫. ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸 𑀓𑀫𑁆𑀫𑀲𑁆𑀲𑀓𑀢𑀸𑀲𑀫𑁆𑀫𑀸𑀤𑀺𑀝𑁆𑀞𑀺 𑀦𑀸𑀫. ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑁆𑀲, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀧𑀳𑁄𑀢𑀻’’𑀢𑀺 𑀏𑀢𑁆𑀣 𑀧𑀦 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺 𑀨𑀮𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀤𑁆𑀯𑁂𑀧𑀺 𑀓𑀣𑀺𑀢𑀸. ‘‘𑀲𑀫𑁆𑀫𑀸𑀜𑀸𑀡𑀁 𑀧𑀳𑁄𑀢𑀻’’𑀢𑀺. 𑀏𑀢𑁆𑀣 𑀧𑀦 𑀧𑀘𑁆𑀘𑀯𑁂𑀓𑁆𑀔𑀡𑀸𑀲𑀫𑁆𑀫𑀸𑀤𑀺𑀝𑁆𑀞𑀺 𑀓𑀣𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁧𑁪𑁩. 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀘𑁂 𑀪𑀯𑀁 𑀕𑀭𑀳𑀢𑀻𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀦𑀸𑀫𑀸𑀬𑀁 𑀲𑁄𑀪𑀦𑀸𑀢𑀺 𑀯𑀤𑀦𑁆𑀢𑁄𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀦𑀸𑀫𑀸𑀬𑀁 𑀦 𑀲𑁄𑀪𑀦𑀸𑀢𑀺 𑀯𑀤𑀦𑁆𑀢𑁄𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀕𑀭𑀳𑀢𑀺 𑀦𑀸𑀫. 𑀑𑀓𑁆𑀓𑀮𑀸𑀢𑀺 𑀑𑀓𑁆𑀓𑀮𑀚𑀦𑀧𑀤𑀯𑀸𑀲𑀺𑀦𑁄. 𑀯𑀲𑁆𑀲𑀪𑀜𑁆𑀜𑀸𑀢𑀺 𑀯𑀲𑁆𑀲𑁄 𑀘 𑀪𑀜𑁆𑀜𑁄 𑀘𑀸𑀢𑀺 𑀤𑁆𑀯𑁂 𑀚𑀦𑀸. 𑀅𑀳𑁂𑀢𑀼𑀯𑀸𑀤𑀸𑀢𑀺 𑀦𑀢𑁆𑀣𑀺 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀏𑀯𑀫𑀸𑀤𑀺𑀯𑀸𑀤𑀺𑀦𑁄. 𑀅𑀓𑀺𑀭𑀺𑀬𑀯𑀸𑀤𑀸𑀢𑀺 𑀓𑀭𑁄𑀢𑁄 𑀦 𑀓𑀭𑀻𑀬𑀢𑀺 𑀧𑀸𑀧𑀦𑁆𑀢𑀺 𑀏𑀯𑀁 𑀓𑀺𑀭𑀺𑀬𑀧𑀝𑀺𑀓𑁆𑀔𑁂𑀧𑀯𑀸𑀤𑀺𑀦𑁄. 𑀦𑀢𑁆𑀣𑀺𑀓𑀯𑀸𑀤𑀸𑀢𑀺 𑀦𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺𑀆𑀤𑀺𑀯𑀸𑀤𑀺𑀦𑁄. 𑀢𑁂 𑀇𑀫𑁂𑀲𑀼 𑀢𑀻𑀲𑀼𑀧𑀺 𑀤𑀲𑁆𑀲𑀦𑁂𑀲𑀼 𑀑𑀓𑁆𑀓𑀦𑁆𑀢𑀦𑀺𑀬𑀸𑀫𑀸 𑀅𑀳𑁂𑀲𑀼𑀁. 𑀓𑀣𑀁 𑀧𑀦𑁂𑀢𑁂𑀲𑀼 𑀦𑀺𑀬𑀸𑀫𑁄 𑀳𑁄𑀢𑀻𑀢𑀺. 𑀬𑁄 𑀳𑀺 𑀏𑀯𑀭𑀽𑀧𑀁 𑀮𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄 𑀲𑀚𑁆𑀛𑀸𑀬𑀢𑀺 𑀯𑀻𑀫𑀁𑀲𑀢𑀺, 𑀢𑀲𑁆𑀲 ‘‘𑀦𑀢𑁆𑀣𑀺 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀓𑀭𑁄𑀢𑁄 𑀦 𑀓𑀭𑀻𑀬𑀢𑀺 𑀧𑀸𑀧𑀁, 𑀦𑀢𑁆𑀣𑀺 𑀤𑀺𑀦𑁆𑀦𑀁, 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀫𑀺𑀘𑁆𑀙𑀸𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀺, 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺, 𑀚𑀯𑀦𑀸𑀦𑀺 𑀚𑀯𑀦𑁆𑀢𑀺. 𑀧𑀞𑀫𑀚𑀯𑀦𑁂 𑀲𑀢𑁂𑀓𑀺𑀘𑁆𑀙𑁄 𑀳𑁄𑀢𑀺, 𑀢𑀣𑀸 𑀤𑀼𑀢𑀺𑀬𑀸𑀤𑀻𑀲𑀼. 𑀲𑀢𑁆𑀢𑀫𑁂 𑀩𑀼𑀤𑁆𑀥𑀸𑀦𑀫𑁆𑀧𑀺 𑀅𑀢𑁂𑀓𑀺𑀘𑁆𑀙𑁄 𑀅𑀦𑀺𑀯𑀢𑁆𑀢𑀻 𑀅𑀭𑀺𑀝𑁆𑀞𑀓𑀡𑁆𑀟𑀓𑀲𑀤𑀺𑀲𑁄 𑀳𑁄𑀢𑀺.

𑀢𑀢𑁆𑀣 𑀓𑁄𑀘𑀺 𑀏𑀓𑀁 𑀤𑀲𑁆𑀲𑀦𑀁 𑀑𑀓𑁆𑀓𑀫𑀢𑀺, 𑀓𑁄𑀘𑀺 𑀤𑁆𑀯𑁂, 𑀓𑁄𑀘𑀺 𑀢𑀻𑀡𑀺𑀧𑀺, 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄𑀯 𑀳𑁄𑀢𑀺, 𑀧𑀢𑁆𑀢𑁄 𑀲𑀕𑁆𑀕𑀫𑀕𑁆𑀕𑀸𑀯𑀭𑀡𑀜𑁆𑀘𑁂𑀯 𑀫𑁄𑀓𑁆𑀔𑀫𑀕𑁆𑀕𑀸𑀯𑀭𑀡𑀜𑁆𑀘. 𑀅𑀪𑀩𑁆𑀩𑁄 𑀢𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀅𑀦𑀦𑁆𑀢𑀭𑀁 𑀲𑀕𑁆𑀕𑀫𑁆𑀧𑀺 𑀕𑀦𑁆𑀢𑀼𑀁, 𑀧𑀕𑁂𑀯 𑀫𑁄𑀓𑁆𑀔𑀁, 𑀯𑀝𑁆𑀝𑀔𑀸𑀡𑀼 𑀦𑀸𑀫𑁂𑀲 𑀲𑀢𑁆𑀢𑁄 𑀧𑀣𑀯𑀻𑀕𑁄𑀧𑀓𑁄, 𑀬𑁂𑀪𑀼𑀬𑁆𑀬𑁂𑀦 𑀏𑀯𑀭𑀽𑀧𑀲𑁆𑀲 𑀪𑀯𑀢𑁄 𑀯𑀼𑀝𑁆𑀞𑀸𑀦𑀁 𑀦𑀢𑁆𑀣𑀺. 𑀯𑀲𑁆𑀲𑀪𑀜𑁆𑀜𑀸𑀧𑀺 𑀏𑀤𑀺𑀲𑀸 𑀅𑀳𑁂𑀲𑀼𑀁. 𑀦𑀺𑀦𑁆𑀤𑀸𑀩𑁆𑀬𑀸𑀭𑁄𑀲𑀉𑀧𑀸𑀭𑀫𑁆𑀪𑀪𑀬𑀸𑀢𑀺 𑀅𑀢𑁆𑀢𑀦𑁄 𑀦𑀺𑀦𑁆𑀤𑀸𑀪𑀬𑁂𑀦 𑀖𑀝𑁆𑀝𑀦𑀪𑀬𑁂𑀦 𑀉𑀧𑀯𑀸𑀤𑀪𑀬𑁂𑀦 𑀘𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀳𑀸𑀘𑀢𑁆𑀢𑀸𑀭𑀻𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁪. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀼𑀢𑁆𑀢𑀁. 𑀢𑀢𑁆𑀣 𑀅𑀜𑁆𑀜𑁂𑀳𑀺 𑀘𑀸𑀢𑀺 𑀞𑀧𑁂𑀢𑁆𑀯𑀸 𑀧𑀸𑀴𑀺𑀬𑀁 𑀆𑀕𑀢𑁂 𑀤𑀲 𑀣𑁂𑀭𑁂 𑀅𑀜𑁆𑀜𑁂𑀳𑀺𑀧𑀺 𑀅𑀪𑀺𑀜𑁆𑀜𑀸𑀢𑁂𑀳𑀺 𑀩𑀳𑀽𑀳𑀺 𑀲𑀸𑀯𑀓𑁂𑀳𑀺 𑀲𑀤𑁆𑀥𑀺𑀁. 𑀢𑀤𑀸 𑀓𑀺𑀭 𑀫𑀳𑀸 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀳𑁄𑀲𑀺 𑀅𑀧𑀭𑀺𑀘𑁆𑀙𑀺𑀦𑁆𑀦𑀕𑀡𑀦𑁄.

𑀑𑀯𑀤𑀦𑁆𑀢𑀺 𑀅𑀦𑀼𑀲𑀸𑀲𑀦𑁆𑀢𑀻𑀢𑀺 𑀆𑀫𑀺𑀲𑀲𑀗𑁆𑀕𑀳𑁂𑀦 𑀥𑀫𑁆𑀫𑀲𑀗𑁆𑀕𑀳𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑁄𑀯𑀸𑀤𑀸𑀦𑀼𑀲𑀸𑀲𑀦𑀻𑀳𑀺 𑀑𑀯𑀤𑀦𑁆𑀢𑀺 𑀘 𑀅𑀦𑀼𑀲𑀸𑀲𑀦𑁆𑀢𑀺 𑀘. 𑀢𑁂 𑀘𑀸𑀢𑀺 𑀘𑀓𑀸𑀭𑁄 𑀆𑀕𑀫𑀲𑀦𑁆𑀥𑀺𑀫𑀢𑁆𑀢𑀁. 𑀉𑀴𑀸𑀭𑀁 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀁 𑀚𑀸𑀦𑀦𑁆𑀢𑀻𑀢𑀺 𑀲𑀻𑀮𑀧𑀭𑀺𑀧𑀽𑀭𑀡𑀸𑀤𑀺𑀢𑁄 𑀧𑀼𑀩𑁆𑀩𑀯𑀺𑀲𑁂𑀲𑀢𑁄 𑀉𑀴𑀸𑀭𑀢𑀭𑀁 𑀅𑀧𑀭𑀁 𑀓𑀲𑀺𑀡𑀧𑀭𑀺𑀓𑀫𑁆𑀫𑀸𑀤𑀺𑀯𑀺𑀲𑁂𑀲𑀁 𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁪𑁫. 𑀆𑀭𑀤𑁆𑀥𑁄𑀢𑀺 𑀢𑀼𑀝𑁆𑀞𑁄. 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸𑀢𑀺 𑀅𑀧𑁆𑀧𑀢𑁆𑀢𑀲𑁆𑀲 𑀅𑀭𑀳𑀢𑁆𑀢𑀲𑁆𑀲 𑀧𑀸𑀧𑀼𑀡𑀦𑀢𑁆𑀣𑀁. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀅𑀬𑀫𑁂𑀯 𑀅𑀢𑁆𑀣𑁄. 𑀓𑁄𑀫𑀼𑀤𑀺𑀁 𑀘𑀸𑀢𑀼𑀫𑀸𑀲𑀺𑀦𑀺𑀦𑁆𑀢𑀺 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀘𑀸𑀢𑀼𑀫𑀸𑀲𑀧𑀼𑀡𑁆𑀡𑀫𑀁. 𑀲𑀸 𑀳𑀺 𑀓𑀼𑀫𑀼𑀤𑀸𑀦𑀁 𑀅𑀢𑁆𑀣𑀺𑀢𑀸𑀬 𑀓𑁄𑀫𑀼𑀤𑀻, 𑀘𑀢𑀼𑀦𑁆𑀦𑀁 𑀯𑀲𑁆𑀲𑀺𑀓𑀸𑀦𑀁 𑀫𑀸𑀲𑀸𑀦𑀁 𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀘𑀸𑀢𑀼𑀫𑀸𑀲𑀺𑀦𑀻𑀢𑀺 𑀯𑀼𑀘𑁆𑀘𑀢𑀺. 𑀆𑀕𑀫𑁂𑀲𑁆𑀲𑀸𑀫𑀻𑀢𑀺 𑀉𑀤𑀺𑀓𑁆𑀔𑀺𑀲𑁆𑀲𑀸𑀫𑀺, 𑀅𑀚𑁆𑀚 𑀅𑀧𑀯𑀸𑀭𑁂𑀢𑁆𑀯𑀸 𑀬𑀸𑀯 𑀲𑀸 𑀆𑀕𑀘𑁆𑀙𑀢𑀺, 𑀢𑀸𑀯 𑀓𑀢𑁆𑀣𑀘𑀺 𑀅𑀕𑀦𑁆𑀢𑁆𑀯𑀸 𑀇𑀥𑁂𑀯 𑀯𑀲𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀇𑀢𑀺 𑀪𑀺𑀓𑁆𑀔𑀽𑀦𑀁 𑀧𑀯𑀸𑀭𑀡𑀲𑀗𑁆𑀕𑀳𑀁 𑀅𑀦𑀼𑀚𑀸𑀦𑀦𑁆𑀢𑁄 𑀏𑀯𑀫𑀸𑀳.

𑀧𑀯𑀸𑀭𑀡𑀲𑀗𑁆𑀕𑀳𑁄 𑀦𑀸𑀫 𑀜𑀢𑁆𑀢𑀺𑀤𑀼𑀢𑀺𑀬𑁂𑀦 𑀓𑀫𑁆𑀫𑁂𑀦 𑀤𑀺𑀬𑁆𑀬𑀢𑀺 𑀓𑀲𑁆𑀲 𑀧𑀦𑁂𑀲 𑀤𑀺𑀬𑁆𑀬𑀢𑀺, 𑀓𑀲𑁆𑀲 𑀦 𑀤𑀺𑀬𑁆𑀬𑀢𑀻𑀢𑀺. 𑀅𑀓𑀸𑀭𑀓𑀲𑁆𑀲 𑀢𑀸𑀯 𑀩𑀸𑀮𑀧𑀼𑀣𑀼𑀚𑁆𑀚𑀦𑀲𑁆𑀲 𑀦 𑀤𑀺𑀬𑁆𑀬𑀢𑀺, 𑀢𑀣𑀸 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀘𑁂𑀯 𑀅𑀭𑀺𑀬𑀲𑀸𑀯𑀓𑀲𑁆𑀲 𑀘. 𑀬𑀲𑁆𑀲 𑀧𑀦 𑀲𑀫𑀣𑁄 𑀯𑀸 𑀢𑀭𑀼𑀡𑁄 𑀳𑁄𑀢𑀺 𑀯𑀺𑀧𑀲𑁆𑀲𑀦𑀸 𑀯𑀸, 𑀢𑀲𑁆𑀲 𑀤𑀺𑀬𑁆𑀬𑀢𑀺. 𑀪𑀕𑀯𑀸𑀧𑀺 𑀢𑀤𑀸 𑀪𑀺𑀓𑁆𑀔𑀽𑀦𑀁 𑀘𑀺𑀢𑁆𑀢𑀸𑀘𑀸𑀭𑀁 𑀧𑀭𑀺𑀯𑀻𑀫𑀁𑀲𑀦𑁆𑀢𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀢𑀭𑀼𑀡𑀪𑀸𑀯𑀁 𑀜𑀢𑁆𑀯𑀸 𑁋 ‘‘𑀫𑀬𑀺 𑀅𑀚𑁆𑀚 𑀧𑀯𑀸𑀭𑁂𑀦𑁆𑀢𑁂 𑀤𑀺𑀲𑀸𑀲𑀼 𑀯𑀲𑁆𑀲𑀁𑀯𑀼𑀝𑁆𑀞𑀸 𑀪𑀺𑀓𑁆𑀔𑀽 𑀇𑀥 𑀑𑀲𑀭𑀺𑀲𑁆𑀲𑀦𑁆𑀢𑀺. 𑀢𑀢𑁄 𑀇𑀫𑁂 𑀪𑀺𑀓𑁆𑀔𑀽 𑀯𑀼𑀟𑁆𑀠𑀢𑀭𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑁂𑀦𑀸𑀲𑀦𑁂 𑀕𑀳𑀺𑀢𑁂 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀲𑀘𑁂𑀧𑀺 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀲𑁆𑀲𑀸𑀫𑀺, 𑀇𑀫𑁂𑀲𑀁 𑀯𑀲𑀦𑀝𑁆𑀞𑀸𑀦𑀁 𑀤𑀼𑀮𑁆𑀮𑀪𑀫𑁂𑀯 𑀪𑀯𑀺𑀲𑁆𑀲𑀢𑀺. 𑀫𑀬𑀺 𑀧𑀦 𑀅𑀧𑀯𑀸𑀭𑁂𑀦𑁆𑀢𑁂 𑀪𑀺𑀓𑁆𑀔𑀽𑀧𑀺 𑀇𑀫𑀁 𑀲𑀸𑀯𑀢𑁆𑀣𑀺𑀁 𑀦 𑀑𑀲𑀭𑀺𑀲𑁆𑀲𑀦𑁆𑀢𑀺, 𑀅𑀳𑀫𑁆𑀧𑀺 𑀘𑀸𑀭𑀺𑀓𑀁 𑀦 𑀧𑀓𑁆𑀓𑀫𑀺𑀲𑁆𑀲𑀸𑀫𑀺, 𑀏𑀯𑀁 𑀇𑀫𑁂𑀲𑀁 𑀪𑀺𑀓𑁆𑀔𑀽𑀦𑀁 𑀯𑀲𑀦𑀝𑁆𑀞𑀸𑀦𑀁 𑀅𑀧𑀮𑀺𑀩𑀼𑀤𑁆𑀥𑀁 𑀪𑀯𑀺𑀲𑁆𑀲𑀢𑀺. 𑀢𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀨𑀸𑀲𑀼 𑀯𑀺𑀳𑀭𑀦𑁆𑀢𑀸 𑀲𑀫𑀣𑀯𑀺𑀧𑀲𑁆𑀲𑀦𑀸 𑀣𑀸𑀫𑀚𑀸𑀢𑀸 𑀓𑀢𑁆𑀯𑀸 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺 𑀲𑁄 𑀢𑀁𑀤𑀺𑀯𑀲𑀁 𑀅𑀧𑀯𑀸𑀭𑁂𑀢𑁆𑀯𑀸 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬𑀁 𑀧𑀯𑀸𑀭𑁂𑀲𑁆𑀲𑀸𑀫𑀻𑀢𑀺 𑀪𑀺𑀓𑁆𑀔𑀽𑀦𑀁 𑀧𑀯𑀸𑀭𑀡𑀲𑀗𑁆𑀕𑀳𑀁 𑀅𑀦𑀼𑀚𑀸𑀦𑀺. 𑀧𑀯𑀸𑀭𑀡𑀲𑀗𑁆𑀕𑀳𑀲𑁆𑀫𑀺𑀜𑁆𑀳𑀺 𑀮𑀤𑁆𑀥𑁂 𑀬𑀲𑁆𑀲 𑀦𑀺𑀲𑁆𑀲𑀬𑀧𑀝𑀺𑀧𑀦𑁆𑀦𑀲𑁆𑀲 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀧𑀓𑁆𑀓𑀫𑀦𑁆𑀢𑀺, 𑀲𑁄𑀧𑀺 ‘‘𑀲𑀘𑁂 𑀧𑀢𑀺𑀭𑀽𑀧𑁄 𑀦𑀺𑀲𑁆𑀲𑀬𑀤𑀸𑀬𑀓𑁄 𑀆𑀕𑀫𑀺𑀲𑁆𑀲𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑁆𑀲𑀬𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀬𑀸𑀯 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑀫𑀸𑀲𑀸 𑀯𑀲𑀺𑀢𑀼𑀁 𑀮𑀪𑀢𑀺. 𑀲𑀘𑁂𑀧𑀺 𑀲𑀝𑁆𑀞𑀺𑀯𑀲𑁆𑀲𑀸 𑀪𑀺𑀓𑁆𑀔𑀽 𑀆𑀕𑀘𑁆𑀙𑀦𑁆𑀢𑀺, 𑀢𑀲𑁆𑀲 𑀲𑁂𑀦𑀸𑀲𑀦𑀁 𑀕𑀳𑁂𑀢𑀼𑀁 𑀦 𑀮𑀪𑀦𑁆𑀢𑀺. 𑀅𑀬𑀜𑁆𑀘 𑀧𑀦 𑀧𑀯𑀸𑀭𑀡𑀲𑀗𑁆𑀕𑀳𑁄 𑀏𑀓𑀲𑁆𑀲 𑀤𑀺𑀦𑁆𑀦𑁄𑀧𑀺 𑀲𑀩𑁆𑀩𑁂𑀲𑀁 𑀤𑀺𑀦𑁆𑀦𑁄𑀬𑁂𑀯 𑀳𑁄𑀢𑀺.

𑀲𑀸𑀯𑀢𑁆𑀣𑀺𑀁 𑀑𑀲𑀭𑀦𑁆𑀢𑀻𑀢𑀺 𑀪𑀕𑀯𑀢𑀸 𑀧𑀯𑀸𑀭𑀡𑀲𑀗𑁆𑀕𑀳𑁄 𑀤𑀺𑀦𑁆𑀦𑁄𑀢𑀺 𑀲𑀼𑀢𑀲𑀼𑀢𑀝𑁆𑀞𑀸𑀦𑁂𑀬𑁂𑀯 𑀬𑀣𑀸𑀲𑀪𑀸𑀯𑁂𑀦 𑀏𑀓𑀁 𑀫𑀸𑀲𑀁 𑀯𑀲𑀺𑀢𑁆𑀯𑀸 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬 𑀉𑀧𑁄𑀲𑀣𑀁 𑀓𑀢𑁆𑀯𑀸 𑀑𑀲𑀭𑀦𑁆𑀢𑁂 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁. 𑀧𑀼𑀩𑁆𑀩𑁂𑀦𑀸𑀧𑀭𑀦𑁆𑀢𑀺 𑀇𑀥 𑀢𑀭𑀼𑀡𑀲𑀫𑀣𑀯𑀺𑀧𑀲𑁆𑀲𑀦𑀸𑀲𑀼 𑀓𑀫𑁆𑀫𑀁 𑀓𑀢𑁆𑀯𑀸 𑀲𑀫𑀣𑀯𑀺𑀧𑀲𑁆𑀲𑀦𑀸 𑀣𑀸𑀫𑀚𑀸𑀢𑀸 𑀅𑀓𑀁𑀲𑀼, 𑀅𑀬𑀁 𑀧𑀼𑀩𑁆𑀩𑁂 𑀯𑀺𑀲𑁂𑀲𑁄 𑀦𑀸𑀫. 𑀢𑀢𑁄 𑀲𑀫𑀸𑀳𑀺𑀢𑁂𑀦 𑀘𑀺𑀢𑁆𑀢𑁂𑀦 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀓𑁂𑀘𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀁…𑀧𑁂… 𑀓𑁂𑀘𑀺 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀭𑀺𑀁𑀲𑀼. 𑀅𑀬𑀁 𑀅𑀧𑀭𑁄 𑀉𑀴𑀸𑀭𑁄 𑀯𑀺𑀲𑁂𑀲𑁄 𑀦𑀸𑀫.

𑁧𑁪𑁬. 𑀅𑀮𑀦𑁆𑀢𑀺 𑀬𑀼𑀢𑁆𑀢𑀁. 𑀬𑁄𑀚𑀦𑀕𑀡𑀦𑀸𑀦𑀻𑀢𑀺 𑀏𑀓𑀁 𑀬𑁄𑀚𑀦𑀁 𑀬𑁄𑀚𑀦𑀫𑁂𑀯, 𑀤𑀲𑀧𑀺 𑀬𑁄𑀚𑀦𑀸𑀦𑀺 𑀬𑁄𑀚𑀦𑀸𑀦𑁂𑀯, 𑀢𑀢𑁄 𑀉𑀤𑁆𑀥𑀁 𑀬𑁄𑀚𑀦𑀕𑀡𑀦𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀥 𑀧𑀦 𑀬𑁄𑀚𑀦𑀲𑀢𑀫𑁆𑀧𑀺 𑀬𑁄𑀚𑀦𑀲𑀳𑀲𑁆𑀲𑀫𑁆𑀧𑀺 𑀅𑀥𑀺𑀧𑁆𑀧𑁂𑀢𑀁. 𑀧𑀼𑀝𑁄𑀲𑁂𑀦𑀸𑀧𑀻𑀢𑀺 𑀧𑀼𑀝𑁄𑀲𑀁 𑀯𑀼𑀘𑁆𑀘𑀢𑀺 𑀧𑀸𑀣𑁂𑀬𑁆𑀬𑀁. 𑀢𑀁 𑀧𑀸𑀣𑁂𑀬𑁆𑀬𑀁 𑀕𑀳𑁂𑀢𑁆𑀯𑀸𑀧𑀺 𑀉𑀧𑀲𑀗𑁆𑀓𑀫𑀺𑀢𑀼𑀁 𑀬𑀼𑀢𑁆𑀢𑀫𑁂𑀯𑀸𑀢𑀺 𑀅𑀢𑁆𑀣𑁄. ‘‘𑀧𑀼𑀝𑀁𑀲𑁂𑀦𑀸’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲𑀢𑁆𑀣𑁄 𑁋 𑀧𑀼𑀝𑁄 𑀅𑀁𑀲𑁂 𑀅𑀲𑁆𑀲𑀸𑀢𑀺 𑀧𑀼𑀝𑀁𑀲𑁄, 𑀢𑁂𑀦 𑀧𑀼𑀝𑀁𑀲𑁂𑀦, 𑀅𑀁𑀲𑁂 𑀧𑀸𑀣𑁂𑀬𑁆𑀬𑀧𑀼𑀝𑀁 𑀯𑀳𑀦𑁆𑀢𑁂𑀦𑀸𑀧𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁪𑁭. 𑀇𑀤𑀸𑀦𑀺 𑀏𑀯𑀭𑀽𑀧𑁂𑀳𑀺 𑀘𑀭𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀏𑀢𑁆𑀣 𑀪𑀺𑀓𑁆𑀔𑀽 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀦𑁆𑀢𑀺𑀆𑀤𑀻𑀦𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀪𑀺𑀦𑀺𑀯𑀺𑀝𑁆𑀞𑀓𑀫𑁆𑀫𑀝𑁆𑀞𑀸𑀦𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀓𑀣𑀺𑀢𑀸. 𑀢𑀢𑁆𑀭 𑀳𑀺 𑀬𑁂 𑀪𑀺𑀓𑁆𑀔𑀽 𑀢𑀲𑁆𑀫𑀺𑀁 𑀔𑀡𑁂 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑀺, 𑀢𑁂𑀲𑀁 𑀮𑁄𑀓𑀼𑀢𑁆𑀢𑀭𑀸 𑀳𑁄𑀦𑁆𑀢𑀺. 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀸𑀦𑀁 𑀮𑁄𑀓𑀺𑀬𑀸. 𑀅𑀦𑀺𑀘𑁆𑀘𑀲𑀜𑁆𑀜𑀸𑀪𑀸𑀯𑀦𑀸𑀦𑀼𑀬𑁄𑀕𑀦𑁆𑀢𑀺 𑀏𑀢𑁆𑀣 𑀲𑀜𑁆𑀜𑀸𑀲𑀻𑀲𑁂𑀦 𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀆𑀦𑀸𑀧𑀸𑀦𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑀸𑀯 𑀩𑀳𑀽 𑀪𑀺𑀓𑁆𑀔𑀽, 𑀢𑀲𑁆𑀫𑀸 𑀲𑁂𑀲𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀲𑀗𑁆𑀔𑁂𑀧𑁂𑀦 𑀓𑀣𑁂𑀢𑁆𑀯𑀸 𑀆𑀦𑀸𑀧𑀸𑀦𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀦𑁆𑀢𑁄 𑀆𑀦𑀸𑀧𑀸𑀦𑀲𑁆𑀲𑀢𑀺, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀇𑀤𑀁 𑀧𑀦 𑀆𑀦𑀸𑀧𑀸𑀦𑀓𑀫𑁆𑀫𑀝𑁆𑀞𑀸𑀦𑀁 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀁, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯𑀲𑁆𑀲 𑀧𑀸𑀴𑀺𑀢𑁆𑀣𑁄 𑀘 𑀪𑀸𑀯𑀦𑀸𑀦𑀬𑁄 𑀘 𑀯𑁂𑀤𑀺𑀢𑀩𑁆𑀩𑁄.

𑁧𑁪𑁯. 𑀓𑀸𑀬𑀜𑁆𑀜𑀢𑀭𑀦𑁆𑀢𑀺 𑀧𑀣𑀯𑀻𑀓𑀸𑀬𑀸𑀤𑀻𑀲𑀼 𑀘𑀢𑀽𑀲𑀼 𑀓𑀸𑀬𑁂𑀲𑀼 𑀅𑀜𑁆𑀜𑀢𑀭𑀁 𑀯𑀤𑀸𑀫𑀺, 𑀯𑀸𑀬𑁄 𑀓𑀸𑀬𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀭𑀽𑀧𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄𑀢𑀺 𑀧𑀜𑁆𑀘𑀯𑀻𑀲𑀢𑀺 𑀭𑀽𑀧𑀓𑁄𑀝𑁆𑀞𑀸𑀲𑀸 𑀭𑀽𑀧𑀓𑀸𑀬𑁄 𑀦𑀸𑀫. 𑀢𑁂𑀲𑀼 𑀆𑀦𑀸𑀧𑀸𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑁂 𑀲𑀗𑁆𑀕𑀳𑀺𑀢𑀢𑁆𑀢𑀸 𑀓𑀸𑀬𑀜𑁆𑀜𑀢𑀭𑀁 𑀳𑁄𑀢𑀺, 𑀢𑀲𑁆𑀫𑀸𑀧𑀺 𑀏𑀯𑀫𑀸𑀳. 𑀢𑀲𑁆𑀫𑀸𑀢𑀺𑀳𑀸𑀢𑀺 𑀬𑀲𑁆𑀫𑀸 𑀘𑀢𑀽𑀲𑀼 𑀓𑀸𑀬𑁂𑀲𑀼 𑀅𑀜𑁆𑀜𑀢𑀭𑀁 𑀯𑀸𑀬𑁄𑀓𑀸𑀬𑀁, 𑀧𑀜𑁆𑀘𑀯𑀻𑀲𑀢𑀺𑀭𑀽𑀧𑀓𑁄𑀝𑁆𑀞𑀸𑀲𑁂 𑀯𑀸 𑀭𑀽𑀧𑀓𑀸𑀬𑁂 𑀅𑀜𑁆𑀜𑀢𑀭𑀁 𑀆𑀦𑀸𑀧𑀸𑀦𑀁 𑀅𑀦𑀼𑀧𑀲𑁆𑀲𑀢𑀺, 𑀢𑀲𑁆𑀫𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀯𑁂𑀤𑀦𑀸𑀜𑁆𑀜𑀢𑀭𑀦𑁆𑀢𑀺 𑀢𑀻𑀲𑀼 𑀯𑁂𑀤𑀦𑀸𑀲𑀼 𑀅𑀜𑁆𑀜𑀢𑀭𑀁, 𑀲𑀼𑀔𑀯𑁂𑀤𑀦𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀲𑀸𑀥𑀼𑀓𑀁 𑀫𑀦𑀲𑀺𑀓𑀸𑀭𑀦𑁆𑀢𑀺 𑀧𑀻𑀢𑀺𑀧𑀝𑀺𑀲𑀁𑀯𑁂𑀤𑀺𑀢𑀸𑀤𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀲𑀼𑀦𑁆𑀤𑀭𑀫𑀦𑀲𑀺𑀓𑀸𑀭𑀁. 𑀓𑀺𑀁 𑀧𑀦 𑀫𑀦𑀲𑀺𑀓𑀸𑀭𑁄 𑀲𑀼𑀔𑀯𑁂𑀤𑀦𑀸 𑀳𑁄𑀢𑀻𑀢𑀺. 𑀦 𑀳𑁄𑀢𑀺, 𑀤𑁂𑀲𑀦𑀸𑀲𑀻𑀲𑀁 𑀧𑀦𑁂𑀢𑀁. 𑀬𑀣𑁂𑀯 𑀳𑀺 ‘‘𑀅𑀦𑀺𑀘𑁆𑀘𑀲𑀜𑁆𑀜𑀸𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸’’𑀢𑀺 𑀏𑀢𑁆𑀣 𑀲𑀜𑁆𑀜𑀸𑀦𑀸𑀫𑁂𑀦 𑀧𑀜𑁆𑀜𑀸 𑀯𑀼𑀢𑁆𑀢𑀸, 𑀏𑀯𑀫𑀺𑀥𑀸𑀧𑀺 𑀫𑀦𑀲𑀺𑀓𑀸𑀭𑀦𑀸𑀫𑁂𑀦 𑀯𑁂𑀤𑀦𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑀲𑁆𑀫𑀺𑀁 𑀘𑀢𑀼𑀓𑁆𑀓𑁂 𑀧𑀞𑀫𑀧𑀤𑁂 𑀧𑀻𑀢𑀺𑀲𑀻𑀲𑁂𑀦 𑀯𑁂𑀤𑀦𑀸 𑀯𑀼𑀢𑁆𑀢𑀸, 𑀤𑀼𑀢𑀺𑀬𑀧𑀤𑁂 𑀲𑀼𑀔𑀦𑁆𑀢𑀺 𑀲𑀭𑀽𑀧𑁂𑀦𑁂𑀯 𑀯𑀼𑀢𑁆𑀢𑀸. 𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑀤𑀤𑁆𑀯𑀬𑁂 ‘‘𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀘𑁂𑀢𑀲𑀺𑀓𑀸, 𑀏𑀢𑁂 𑀥𑀫𑁆𑀫𑀸 𑀘𑀺𑀢𑁆𑀢𑀧𑀝𑀺𑀩𑀤𑁆𑀥𑀸 𑀘𑀺𑀢𑁆𑀢𑀲𑀗𑁆𑀔𑀸𑀭𑀸’’𑀢𑀺 (𑀧𑀝𑀺. 𑀫. 𑁧.𑁧𑁭𑁪) 𑀯𑀘𑀦𑀢𑁄 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑁂 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂𑀧𑀺 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸 𑀘𑀺𑀢𑁆𑀢𑀲𑀗𑁆𑀔𑀸𑀭𑁂 𑀲𑀗𑁆𑀕𑀳𑀺𑀢𑀸’’𑀢𑀺 𑀯𑀘𑀦𑀢𑁄 𑀘𑀺𑀢𑁆𑀢𑀲𑀗𑁆𑀔𑀸𑀭𑀦𑀸𑀫𑁂𑀦 𑀯𑁂𑀤𑀦𑀸 𑀯𑀼𑀢𑁆𑀢𑀸. 𑀢𑀁 𑀲𑀩𑁆𑀩𑀁 𑀫𑀦𑀲𑀺𑀓𑀸𑀭𑀦𑀸𑀫𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀇𑀥 ‘‘𑀲𑀸𑀥𑀼𑀓𑀁 𑀫𑀦𑀲𑀺𑀓𑀸𑀭’’𑀦𑁆𑀢𑀺 𑀆𑀳.

𑀏𑀯𑀁 𑀲𑀦𑁆𑀢𑁂𑀧𑀺 𑀬𑀲𑁆𑀫𑀸 𑀏𑀲𑀸 𑀯𑁂𑀤𑀦𑀸 𑀆𑀭𑀫𑁆𑀫𑀡𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸 𑀦 𑀬𑀼𑀚𑁆𑀚𑀢𑀻𑀢𑀺. 𑀦𑁄 𑀦 𑀬𑀼𑀚𑁆𑀚𑀢𑀺, 𑀲𑀢𑀺𑀧𑀝𑁆𑀞𑀸𑀦𑀯𑀡𑁆𑀡𑀦𑀸𑀬𑀫𑁆𑀧𑀺 𑀳𑀺 ‘‘𑀢𑀁𑀢𑀁𑀲𑀼𑀔𑀸𑀤𑀻𑀦𑀁 𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑁂𑀤𑀦𑀸𑀯 𑀯𑁂𑀤𑀬𑀢𑀺, 𑀢𑀁 𑀧𑀦 𑀯𑁂𑀤𑀦𑀸𑀧𑀯𑀢𑁆𑀢𑀺𑀁 𑀉𑀧𑀸𑀤𑀸𑀬 ‘𑀅𑀳𑀁 𑀯𑁂𑀤𑀬𑀸𑀫𑀻’𑀢𑀺 𑀯𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀧𑀺𑀘 𑀧𑀻𑀢𑀺𑀧𑀝𑀺𑀲𑀁𑀯𑁂𑀤𑀻𑀢𑀺𑀆𑀤𑀻𑀦𑀁 𑀅𑀢𑁆𑀣𑀯𑀡𑁆𑀡𑀦𑀸𑀬𑀫𑁂𑀢𑀲𑁆𑀲 𑀧𑀭𑀺𑀳𑀸𑀭𑁄 𑀯𑀼𑀢𑁆𑀢𑁄𑀬𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑁋

‘‘𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺 𑀆𑀭𑀫𑁆𑀫𑀡𑀢𑁄 𑀘 𑀅𑀲𑀫𑁆𑀫𑁄𑀳𑀢𑁄 𑀘. 𑀓𑀣𑀁 𑀆𑀭𑀫𑁆𑀫𑀡𑀢𑁄 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺? 𑀲𑀧𑁆𑀧𑀻𑀢𑀺𑀓𑁂 𑀤𑁆𑀯𑁂 𑀛𑀸𑀦𑁂 𑀲𑀫𑀸𑀧𑀚𑁆𑀚𑀢𑀺, 𑀢𑀲𑁆𑀲 𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂 𑀛𑀸𑀦𑀧𑀝𑀺𑀮𑀸𑀪𑁂𑀦 𑀆𑀭𑀫𑁆𑀫𑀡𑀢𑁄 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺 𑀆𑀭𑀫𑁆𑀫𑀡𑀲𑁆𑀲 𑀧𑀝𑀺𑀲𑀁𑀯𑀺𑀤𑀺𑀢𑀢𑁆𑀢𑀸. 𑀓𑀣𑀁 𑀅𑀲𑀫𑁆𑀫𑁄𑀳𑀢𑁄 (𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺)? 𑀲𑀧𑁆𑀧𑀻𑀢𑀺𑀓𑁂 𑀤𑁆𑀯𑁂 𑀛𑀸𑀦𑁂 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀁 𑀧𑀻𑀢𑀺𑀁 𑀔𑀬𑀢𑁄 𑀯𑀬𑀢𑁄 𑀲𑀫𑁆𑀫𑀲𑀢𑀺, 𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀮𑀓𑁆𑀔𑀡𑀧𑀝𑀺𑀯𑁂𑀥𑀸 𑀅𑀲𑀫𑁆𑀫𑁄𑀳𑀢𑁄 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 ‘𑀤𑀻𑀖𑀁 𑀅𑀲𑁆𑀲𑀸𑀲𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁 𑀅𑀯𑀺𑀓𑁆𑀔𑁂𑀧𑀁 𑀧𑀚𑀸𑀦𑀢𑁄 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺, 𑀢𑀸𑀬 𑀲𑀢𑀺𑀬𑀸, 𑀢𑁂𑀦 𑀜𑀸𑀡𑁂𑀦 𑀲𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀻’𑀢𑀺. 𑀏𑀢𑁂𑀦𑁂𑀯 𑀦𑀬𑁂𑀦 𑀅𑀯𑀲𑁂𑀲𑀧𑀤𑀸𑀦𑀺𑀧𑀺 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀻’’𑀢𑀺.

𑀇𑀢𑀺 𑀬𑀣𑁂𑀯 𑀛𑀸𑀦𑀧𑀝𑀺𑀮𑀸𑀪𑁂𑀦 𑀆𑀭𑀫𑁆𑀫𑀡𑀢𑁄 𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀦𑁆𑀢𑀺, 𑀏𑀯𑀁 𑀇𑀫𑀺𑀦𑀸𑀧𑀺 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑁂𑀦 𑀯𑁂𑀤𑀦𑀸𑀲𑀗𑁆𑀔𑀸𑀢𑀫𑀦𑀲𑀺𑀓𑀸𑀭𑀧𑀝𑀺𑀮𑀸𑀪𑁂𑀦 𑀆𑀭𑀫𑁆𑀫𑀡𑀢𑁄 𑀯𑁂𑀤𑀦𑀸 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺. 𑀢𑀲𑁆𑀫𑀸 𑀲𑀼𑀯𑀼𑀢𑁆𑀢𑀫𑁂𑀢𑀁 𑀳𑁄𑀢𑀺 ‘‘𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀺𑀓𑁆𑀔𑀼 𑀯𑀺𑀳𑀭𑀢𑀻’’𑀢𑀺.

𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲 𑀅𑀲𑀫𑁆𑀧𑀚𑀸𑀦𑀲𑁆𑀲𑀸𑀢𑀺 𑀏𑀢𑁆𑀣 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀲𑁆𑀫𑀸 𑀘𑀺𑀢𑁆𑀢𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑁄 𑀪𑀺𑀓𑁆𑀔𑀼 𑀓𑀺𑀜𑁆𑀘𑀸𑀧𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀫𑀺𑀢𑁆𑀢𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀢𑀲𑁆𑀲 𑀧𑀦 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑁂 𑀲𑀢𑀺𑀜𑁆𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀉𑀧𑀝𑁆𑀞𑀧𑁂𑀢𑁆𑀯𑀸 𑀧𑀯𑀢𑁆𑀢𑀦𑀢𑁄 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻𑀬𑁂𑀯 𑀦𑀸𑀫𑁂𑀲 𑀳𑁄𑀢𑀺. 𑀦 𑀳𑀺 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲 𑀅𑀲𑀫𑁆𑀧𑀚𑀸𑀦𑀲𑁆𑀲 𑀆𑀦𑀸𑀧𑀸𑀦𑀲𑁆𑀲𑀢𑀺𑀪𑀸𑀯𑀦𑀸 𑀅𑀢𑁆𑀣𑀺. 𑀢𑀲𑁆𑀫𑀸 𑀆𑀭𑀫𑁆𑀫𑀡𑀢𑁄 𑀘𑀺𑀢𑁆𑀢𑀧𑀝𑀺𑀲𑀁𑀯𑀺𑀤𑀺𑀢𑀸𑀤𑀺𑀯𑀲𑁂𑀦 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀺𑀓𑁆𑀔𑀼 𑀯𑀺𑀳𑀭𑀢𑀻𑀢𑀺. 𑀲𑁄 𑀬𑀁 𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸𑀦𑀁 𑀧𑀳𑀸𑀦𑀁, 𑀢𑀁 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀲𑀸𑀥𑀼𑀓𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀸 𑀳𑁄𑀢𑀻𑀢𑀺 𑀏𑀢𑁆𑀣 𑀅𑀪𑀺𑀚𑁆𑀛𑀸𑀬 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁, 𑀤𑁄𑀫𑀦𑀲𑁆𑀲𑀯𑀲𑁂𑀦 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁 𑀤𑀲𑁆𑀲𑀺𑀢𑀁. 𑀇𑀤𑀜𑁆𑀳𑀺 𑀘𑀢𑀼𑀓𑁆𑀓𑀁 𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑁂𑀯 𑀯𑀼𑀢𑁆𑀢𑀁, 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀘 𑀦𑀻𑀯𑀭𑀡𑀧𑀩𑁆𑀩𑀸𑀤𑀺𑀯𑀲𑁂𑀦 𑀙𑀩𑁆𑀩𑀺𑀥𑀸 𑀳𑁄𑀢𑀺, 𑀢𑀲𑁆𑀲𑀸 𑀦𑀻𑀯𑀭𑀡𑀧𑀩𑁆𑀩𑀁 𑀆𑀤𑀺, 𑀢𑀲𑁆𑀲𑀧𑀺 𑀇𑀤𑀁 𑀦𑀻𑀯𑀭𑀡𑀤𑁆𑀯𑀬𑀁 𑀆𑀤𑀺, 𑀇𑀢𑀺 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀬 𑀆𑀤𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸𑀦’’𑀦𑁆𑀢𑀺 𑀆𑀳. 𑀧𑀳𑀸𑀦𑀦𑁆𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀻𑀢𑀺 𑀏𑀯𑀁 𑀧𑀳𑀸𑀦𑀓𑀭𑀜𑀸𑀡𑀁 𑀅𑀥𑀺𑀧𑁆𑀧𑁂𑀢𑀁. 𑀢𑀁 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸𑀢𑀺 𑀢𑀁 𑀅𑀦𑀺𑀘𑁆𑀘𑀯𑀺𑀭𑀸𑀕𑀦𑀺𑀭𑁄𑀥𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀜𑀸𑀡𑀲𑀗𑁆𑀔𑀸𑀢𑀁 𑀧𑀳𑀸𑀦𑀜𑀸𑀡𑀁 𑀅𑀧𑀭𑀸𑀬 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬, 𑀢𑀫𑁆𑀧𑀺 𑀅𑀧𑀭𑀸𑀬𑀸𑀢𑀺 𑀏𑀯𑀁 𑀯𑀺𑀧𑀲𑁆𑀲𑀦𑀸𑀧𑀭𑀫𑁆𑀧𑀭𑀁 𑀤𑀲𑁆𑀲𑁂𑀢𑀺. 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀸 𑀳𑁄𑀢𑀻𑀢𑀺 𑀬𑀜𑁆𑀘 𑀲𑀫𑀣𑀧𑀝𑀺𑀧𑀦𑁆𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀬𑀜𑁆𑀘 𑀏𑀓𑀢𑁄 𑀉𑀧𑀝𑁆𑀞𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀻𑀢𑀺 𑀤𑁆𑀯𑀺𑀥𑀸 𑀅𑀚𑁆𑀛𑀼𑀧𑁂𑀓𑁆𑀔𑀢𑀺 𑀦𑀸𑀫. 𑀢𑀢𑁆𑀣 𑀲𑀳𑀚𑀸𑀢𑀸𑀦𑀫𑁆𑀧𑀺 𑀅𑀚𑁆𑀛𑀼𑀧𑁂𑀓𑁆𑀔𑀦𑀸 𑀳𑁄𑀢𑀺 𑀆𑀭𑀫𑁆𑀫𑀡𑀲𑁆𑀲𑀧𑀺 𑀅𑀚𑁆𑀛𑀼𑀧𑁂𑀓𑁆𑀔𑀦𑀸, 𑀇𑀥 𑀆𑀭𑀫𑁆𑀫𑀡𑀅𑀚𑁆𑀛𑀼𑀧𑁂𑀓𑁆𑀔𑀦𑀸 𑀅𑀥𑀺𑀧𑁆𑀧𑁂𑀢𑀸. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂𑀢𑀺 𑀬𑀲𑁆𑀫𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 𑀅𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑁄 𑀦 𑀓𑁂𑀯𑀮𑀁 𑀦𑀻𑀯𑀭𑀡𑀸𑀤𑀺𑀥𑀫𑁆𑀫𑁂, 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀲𑀻𑀲𑁂𑀦 𑀧𑀦 𑀯𑀼𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀜𑀸𑀡𑀫𑁆𑀧𑀺 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀸 𑀳𑁄𑀢𑀺, 𑀢𑀲𑁆𑀫𑀸 ‘‘𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀺𑀓𑁆𑀔𑀼 𑀯𑀺𑀳𑀭𑀢𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁫𑁦. 𑀧𑀯𑀺𑀘𑀺𑀦𑀢𑀻𑀢𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀯𑀺𑀘𑀺𑀦𑀢𑀺. 𑀇𑀢𑀭𑀁 𑀧𑀤𑀤𑁆𑀯𑀬𑀁 𑀏𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀦𑀺𑀭𑀸𑀫𑀺𑀲𑀸𑀢𑀺 𑀦𑀺𑀓𑁆𑀓𑀺𑀮𑁂𑀲𑀸. 𑀧𑀲𑁆𑀲𑀫𑁆𑀪𑀢𑀻𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀭𑀣𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀧𑀲𑁆𑀲𑀫𑁆𑀪𑀢𑀺. 𑀲𑀫𑀸𑀥𑀺𑀬𑀢𑀻𑀢𑀺 𑀲𑀫𑁆𑀫𑀸 𑀞𑀧𑀺𑀬𑀢𑀺, 𑀅𑀧𑁆𑀧𑀦𑀸𑀧𑀢𑁆𑀢𑀁 𑀯𑀺𑀬 𑀳𑁄𑀢𑀺. 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀸 𑀳𑁄𑀢𑀻𑀢𑀺 𑀲𑀳𑀚𑀸𑀢𑀅𑀚𑁆𑀛𑀼𑀧𑁂𑀓𑁆𑀔𑀦𑀸𑀬 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀸 𑀳𑁄𑀢𑀺.

𑀏𑀯𑀁 𑀘𑀼𑀤𑁆𑀤𑀲𑀯𑀺𑀥𑁂𑀦 𑀓𑀸𑀬𑀧𑀭𑀺𑀕𑁆𑀕𑀸𑀳𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀲𑁆𑀫𑀺𑀁 𑀓𑀸𑀬𑁂 𑀲𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀲𑀢𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀁 𑀜𑀸𑀡𑀁 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑀁 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀧𑀻𑀢𑀺, 𑀧𑀲𑁆𑀲𑀤𑁆𑀥𑀺, 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀇𑀫𑁂𑀲𑀁 𑀙𑀦𑁆𑀦𑀁 𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀦𑁄𑀲𑀓𑁆𑀓𑀦𑀅𑀦𑀢𑀺𑀯𑀢𑁆𑀢𑀦𑀲𑀗𑁆𑀔𑀸𑀢𑁄 𑀫𑀚𑁆𑀛𑀢𑁆𑀢𑀸𑀓𑀸𑀭𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀬𑀣𑁂𑀯 𑀳𑀺 𑀲𑀫𑀧𑁆𑀧𑀯𑀢𑁆𑀢𑁂𑀲𑀼 𑀅𑀲𑁆𑀲𑁂𑀲𑀼 𑀲𑀸𑀭𑀣𑀺𑀦𑁄 ‘‘𑀅𑀬𑀁 𑀑𑀮𑀻𑀬𑀢𑀻’’𑀢𑀺 𑀢𑀼𑀤𑀦𑀁 𑀯𑀸, ‘‘𑀅𑀬𑀁 𑀅𑀢𑀺𑀥𑀸𑀯𑀢𑀻’’𑀢𑀺 𑀆𑀓𑀟𑁆𑀠𑀦𑀁 𑀯𑀸 𑀦𑀢𑁆𑀣𑀺, 𑀓𑁂𑀯𑀮𑀁 𑀏𑀯𑀁 𑀧𑀲𑁆𑀲𑀫𑀸𑀦𑀲𑁆𑀲 𑀞𑀺𑀢𑀸𑀓𑀸𑀭𑁄𑀯 𑀳𑁄𑀢𑀺, 𑀏𑀯𑀫𑁂𑀯 𑀇𑀫𑁂𑀲𑀁 𑀙𑀦𑁆𑀦𑀁 𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀦𑁄𑀲𑀓𑁆𑀓𑀦𑀅𑀦𑀢𑀺𑀯𑀢𑁆𑀢𑀦𑀲𑀗𑁆𑀔𑀸𑀢𑁄 𑀫𑀚𑁆𑀛𑀢𑁆𑀢𑀸𑀓𑀸𑀭𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀦𑀸𑀫 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀓𑀺𑀁 𑀓𑀣𑀺𑀢𑀁? 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸 𑀦𑀸𑀦𑀸𑀭𑀲𑀮𑀓𑁆𑀔𑀡𑀸 𑀯𑀺𑀧𑀲𑁆𑀲𑀦𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀸 𑀦𑀸𑀫 𑀓𑀣𑀺𑀢𑀸.

𑁧𑁫𑁨. 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀦𑁆𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀏𑀢𑁆𑀣 𑀧𑀦 𑀆𑀦𑀸𑀧𑀸𑀦𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺 𑀮𑁄𑀓𑀺𑀬𑀸 𑀳𑁄𑀢𑀺, 𑀮𑁄𑀓𑀺𑀬𑀸 𑀆𑀦𑀸𑀧𑀸𑀦𑀸 𑀮𑁄𑀓𑀺𑀬𑀲𑀢𑀺𑀧𑀝𑁆𑀞𑀸𑀦𑀁 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀮𑁄𑀓𑀺𑀬𑀸 𑀲𑀢𑀺𑀧𑀝𑁆𑀞𑀸𑀦𑀸 𑀮𑁄𑀓𑀼𑀢𑁆𑀢𑀭𑀩𑁄𑀚𑁆𑀛𑀗𑁆𑀕𑁂 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀮𑁄𑀓𑀼𑀢𑁆𑀢𑀭𑀸 𑀩𑁄𑀚𑁆𑀛𑀗𑁆𑀕𑀸 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀦𑀺𑀩𑁆𑀩𑀸𑀦𑀁 𑀧𑀭𑀺𑀧𑀽𑀭𑁂𑀦𑁆𑀢𑀺. 𑀇𑀢𑀺 𑀮𑁄𑀓𑀺𑀬𑀲𑁆𑀲 𑀆𑀕𑀢𑀝𑁆𑀞𑀸𑀦𑁂 𑀮𑁄𑀓𑀺𑀬𑀁 𑀓𑀣𑀺𑀢𑀁, 𑀮𑁄𑀓𑀼𑀢𑁆𑀢𑀭𑀲𑁆𑀲 𑀆𑀕𑀢𑀝𑁆𑀞𑀸𑀦𑁂 𑀮𑁄𑀓𑀼𑀢𑁆𑀢𑀭𑀁 𑀓𑀣𑀺𑀢𑀦𑁆𑀢𑀺. 𑀣𑁂𑀭𑁄 𑀧𑀦𑀸𑀳 ‘‘𑀅𑀜𑁆𑀜𑀢𑁆𑀣 𑀏𑀯𑀁 𑀳𑁄𑀢𑀺, 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀮𑁄𑀓𑀼𑀢𑁆𑀢𑀭𑀁 𑀉𑀧𑀭𑀺 𑀆𑀕𑀢𑀁, 𑀮𑁄𑀓𑀺𑀬𑀸 𑀆𑀦𑀸𑀧𑀸𑀦𑀸 𑀮𑁄𑀓𑀺𑀬𑀲𑀢𑀺𑀧𑀝𑁆𑀞𑀸𑀦𑁂 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀮𑁄𑀓𑀺𑀬𑀸 𑀲𑀢𑀺𑀧𑀝𑁆𑀞𑀸𑀦𑀸 𑀮𑁄𑀓𑀺𑀬𑁂 𑀩𑁄𑀚𑁆𑀛𑀗𑁆𑀕𑁂 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀮𑁄𑀓𑀺𑀬𑀸 𑀩𑁄𑀚𑁆𑀛𑀗𑁆𑀕𑀸 𑀮𑁄𑀓𑀼𑀢𑁆𑀢𑀭𑀁 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀦𑀺𑀩𑁆𑀩𑀸𑀦𑀁 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀧𑀤𑁂𑀦 𑀳𑀺 𑀇𑀥 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀦𑀺𑀩𑁆𑀩𑀸𑀦𑀁 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀓𑀸𑀬𑀕𑀢𑀸𑀲𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁩-𑁪. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀓𑀸𑀬𑀕𑀢𑀸𑀲𑀢𑀺𑀲𑀼𑀢𑁆𑀢𑀁. 𑀢𑀢𑁆𑀣 𑀕𑁂𑀳𑀲𑀺𑀢𑀸𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀦𑀺𑀲𑁆𑀲𑀺𑀢𑀸. 𑀲𑀭𑀲𑀗𑁆𑀓𑀧𑁆𑀧𑀸𑀢𑀺 𑀥𑀸𑀯𑀦𑀲𑀗𑁆𑀓𑀧𑁆𑀧𑀸. 𑀲𑀭𑀦𑁆𑀢𑀻𑀢𑀺 𑀳𑀺 𑀲𑀭𑀸, 𑀥𑀸𑀯𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀚𑁆𑀛𑀢𑁆𑀢𑀫𑁂𑀯𑀸𑀢𑀺 𑀕𑁄𑀘𑀭𑀚𑁆𑀛𑀢𑁆𑀢𑀲𑁆𑀫𑀺𑀁𑀬𑁂𑀯. 𑀓𑀸𑀬𑀕𑀢𑀸𑀲𑀢𑀺𑀦𑁆𑀢𑀺 𑀓𑀸𑀬𑀧𑀭𑀺𑀕𑁆𑀕𑀸𑀳𑀺𑀓𑀫𑁆𑀧𑀺 𑀓𑀸𑀬𑀸𑀭𑀫𑁆𑀫𑀡𑀫𑁆𑀧𑀺 𑀲𑀢𑀺𑀁. 𑀓𑀸𑀬𑀧𑀭𑀺𑀕𑁆𑀕𑀸𑀳𑀺𑀓𑀦𑁆𑀢𑀺 𑀯𑀼𑀢𑁆𑀢𑁂 𑀲𑀫𑀣𑁄 𑀓𑀣𑀺𑀢𑁄 𑀳𑁄𑀢𑀺, 𑀓𑀸𑀬𑀸𑀭𑀫𑁆𑀫𑀡𑀦𑁆𑀢𑀺 𑀯𑀼𑀢𑁆𑀢𑁂 𑀯𑀺𑀧𑀲𑁆𑀲𑀦𑀸. 𑀉𑀪𑀬𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸 𑀳𑁄𑀦𑁆𑀢𑀺.

𑀧𑀼𑀦 𑀘𑀧𑀭𑀁…𑀧𑁂… 𑀏𑀯𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑀸𑀬𑀕𑀢𑀸𑀲𑀢𑀺𑀁 𑀪𑀸𑀯𑁂𑀢𑀻𑀢𑀺 𑀲𑀢𑀺𑀧𑀝𑁆𑀞𑀸𑀦𑁂 𑀘𑀼𑀤𑁆𑀤𑀲𑀯𑀺𑀥𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀸 𑀓𑀣𑀺𑀢𑀸.

𑁧𑁫𑁬. 𑀅𑀦𑁆𑀢𑁄𑀕𑀥𑀸𑀯𑀸𑀲𑁆𑀲𑀸𑀢𑀺 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀸𑀯𑀦𑀸𑀬 𑀅𑀩𑁆𑀪𑀦𑁆𑀢𑀭𑀕𑀢𑀸𑀯 𑀳𑁄𑀦𑁆𑀢𑀺. 𑀯𑀺𑀚𑁆𑀚𑀸𑀪𑀸𑀕𑀺𑀬𑀸𑀢𑀺 𑀏𑀢𑁆𑀣 𑀲𑀫𑁆𑀧𑀬𑁄𑀕𑀯𑀲𑁂𑀦 𑀯𑀺𑀚𑁆𑀚𑀁 𑀪𑀚𑀦𑁆𑀢𑀻𑀢𑀺 𑀯𑀺𑀚𑁆𑀚𑀸𑀪𑀸𑀕𑀺𑀬𑀸. 𑀯𑀺𑀚𑁆𑀚𑀸𑀪𑀸𑀕𑁂 𑀯𑀺𑀚𑁆𑀚𑀸𑀓𑁄𑀝𑁆𑀞𑀸𑀲𑁂 𑀯𑀢𑁆𑀢𑀦𑁆𑀢𑀻𑀢𑀺𑀧𑀺 𑀯𑀺𑀚𑁆𑀚𑀸𑀪𑀸𑀕𑀺𑀬𑀸. 𑀢𑀢𑁆𑀣 𑀯𑀺𑀧𑀲𑁆𑀲𑀦𑀸𑀜𑀸𑀡𑀁, 𑀫𑀦𑁄𑀫𑀬𑀺𑀤𑁆𑀥𑀺, 𑀙 𑀅𑀪𑀺𑀜𑁆𑀜𑀸𑀢𑀺 𑀅𑀝𑁆𑀞 𑀯𑀺𑀚𑁆𑀚𑀸. 𑀧𑀼𑀭𑀺𑀫𑁂𑀦 𑀅𑀢𑁆𑀣𑁂𑀦 𑀢𑀸𑀳𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀧𑀺 𑀯𑀺𑀚𑁆𑀚𑀸𑀪𑀸𑀕𑀺𑀬𑀸. 𑀧𑀘𑁆𑀙𑀺𑀫𑁂𑀦 𑀅𑀢𑁆𑀣𑁂𑀦 𑀢𑀸𑀲𑀼 𑀬𑀸 𑀓𑀸𑀘𑀺 𑀏𑀓𑀸 𑀯𑀺𑀚𑁆𑀚𑀸 𑀯𑀺𑀚𑁆𑀚𑀸, 𑀲𑁂𑀲𑀸 𑀯𑀺𑀚𑁆𑀚𑀸𑀪𑀸𑀕𑀺𑀬𑀸𑀢𑀺 𑀏𑀯𑀁 𑀯𑀺𑀚𑁆𑀚𑀸𑀧𑀺 𑀯𑀺𑀚𑁆𑀚𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸𑀧𑀺 𑀯𑀺𑀚𑁆𑀚𑀸𑀪𑀸𑀕𑀺𑀬𑀸𑀢𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀘𑁂𑀢𑀲𑀸 𑀨𑀼𑀝𑁄𑀢𑀺 𑀏𑀢𑁆𑀣 𑀤𑀼𑀯𑀺𑀥𑀁 𑀨𑀭𑀡𑀁 𑀆𑀧𑁄𑀨𑀭𑀡𑀜𑁆𑀘, 𑀤𑀺𑀩𑁆𑀩𑀘𑀓𑁆𑀔𑀼𑀨𑀭𑀡𑀜𑁆𑀘, 𑀢𑀢𑁆𑀣 𑀆𑀧𑁄𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀆𑀧𑁂𑀦 𑀨𑀭𑀡𑀁 𑀆𑀧𑁄𑀨𑀭𑀡𑀁 𑀦𑀸𑀫. 𑀏𑀯𑀁 𑀨𑀼𑀝𑁂𑀧𑀺 𑀫𑀳𑀸𑀲𑀫𑀼𑀤𑁆𑀤𑁂 𑀲𑀩𑁆𑀩𑀸 𑀲𑀫𑀼𑀤𑁆𑀤𑀗𑁆𑀕𑀫𑀸 𑀓𑀼𑀦𑁆𑀦𑀤𑀺𑀬𑁄 𑀅𑀦𑁆𑀢𑁄𑀕𑀥𑀸𑀯 𑀳𑁄𑀦𑁆𑀢𑀺, 𑀆𑀮𑁄𑀓𑀁 𑀧𑀦 𑀯𑀟𑁆𑀠𑁂𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀲𑀓𑀮𑀲𑀫𑀼𑀤𑁆𑀤𑀲𑁆𑀲 𑀤𑀲𑁆𑀲𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀨𑀭𑀡𑀁 𑀦𑀸𑀫. 𑀏𑀯𑀁 𑀨𑀭𑀡𑁂𑀧𑀺 𑀫𑀳𑀸𑀲𑀫𑀼𑀤𑁆𑀤𑁂 𑀲𑀩𑁆𑀩𑀸 𑀲𑀫𑀼𑀤𑁆𑀤𑀗𑁆𑀕𑀫𑀸 𑀓𑀼𑀦𑁆𑀦𑀤𑀺𑀬𑁄 𑀅𑀦𑁆𑀢𑁄𑀕𑀥𑀸𑀯 𑀳𑁄𑀦𑁆𑀢𑀺.

𑀑𑀢𑀸𑀭𑀦𑁆𑀢𑀺 𑀯𑀺𑀯𑀭𑀁 𑀙𑀺𑀤𑁆𑀤𑀁. 𑀆𑀭𑀫𑁆𑀫𑀡𑀦𑁆𑀢𑀺 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑀁. 𑀮𑀪𑁂𑀣 𑀑𑀢𑀸𑀭𑀦𑁆𑀢𑀺 𑀮𑀪𑁂𑀬𑁆𑀬 𑀧𑀯𑁂𑀲𑀦𑀁, 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀕𑀘𑁆𑀙𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀦𑀺𑀓𑁆𑀔𑁂𑀧𑀦𑀦𑁆𑀢𑀺 𑀦𑀺𑀓𑁆𑀔𑀺𑀧𑀦𑀝𑁆𑀞𑀸𑀦𑀁.

𑁧𑁫𑁭. 𑀏𑀯𑀁 𑀅𑀪𑀸𑀯𑀺𑀢𑀓𑀸𑀬𑀕𑀢𑀸𑀲𑀢𑀺𑀁 𑀧𑀼𑀕𑁆𑀕𑀮𑀁 𑀅𑀮𑁆𑀮𑀫𑀢𑁆𑀢𑀺𑀓𑀧𑀼𑀜𑁆𑀚𑀸𑀤𑀻𑀳𑀺 𑀉𑀧𑀫𑁂𑀢𑁆𑀯𑀸 𑀇𑀤𑀸𑀦𑀺 𑀪𑀸𑀯𑀺𑀢𑀓𑀸𑀬𑀕𑀢𑀸𑀲𑀢𑀺𑀁 𑀲𑀸𑀭𑀨𑀮𑀓𑀸𑀤𑀻𑀳𑀺 𑀉𑀧𑀫𑁂𑀢𑀼𑀁 𑀲𑁂𑀬𑁆𑀬𑀣𑀸𑀧𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀕𑁆𑀕𑀴𑀨𑀮𑀓𑀦𑁆𑀢𑀺 𑀓𑀯𑀸𑀝𑀁.

𑁧𑁫𑁮. 𑀓𑀸𑀓𑀧𑁂𑀬𑁆𑀬𑁄𑀢𑀺 𑀫𑀼𑀔𑀯𑀝𑁆𑀝𑀺𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀓𑀸𑀓𑁂𑀦 𑀕𑀻𑀯𑀁 𑀅𑀦𑀸𑀫𑁂𑀢𑁆𑀯𑀸𑀯 𑀧𑀸𑀢𑀩𑁆𑀩𑁄. 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀭𑀡𑀻𑀬𑀲𑁆𑀲𑀸𑀢𑀺 𑀅𑀪𑀺𑀜𑁆𑀜𑀸𑀬 𑀲𑀘𑁆𑀙𑀺𑀓𑀸𑀢𑀩𑁆𑀩𑀲𑁆𑀲. 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀻𑀢𑀺 𑀧𑀘𑁆𑀘𑀓𑁆𑀔𑀪𑀸𑀯𑀁 𑀧𑀸𑀧𑀼𑀡𑀸𑀢𑀺. 𑀲𑀢𑀺 𑀲𑀢𑀺 𑀆𑀬𑀢𑀦𑁂𑀢𑀺 𑀲𑀢𑀺𑀲𑀢𑀺 𑀓𑀸𑀭𑀡𑁂. 𑀓𑀺𑀁 𑀧𑀦𑁂𑀢𑁆𑀣 𑀓𑀸𑀭𑀡𑀦𑁆𑀢𑀺? 𑀅𑀪𑀺𑀜𑁆𑀜𑀸𑀯 𑀓𑀸𑀭𑀡𑀁. 𑀆𑀴𑀺𑀩𑀦𑁆𑀥𑀸𑀢𑀺 𑀫𑀭𑀺𑀬𑀸𑀤𑀩𑀤𑁆𑀥𑀸.

𑀬𑀸𑀦𑀻𑀓𑀢𑀸𑀬𑀸𑀢𑀺 𑀬𑀼𑀢𑁆𑀢𑀬𑀸𑀦𑀁 𑀯𑀺𑀬 𑀓𑀢𑀸𑀬. 𑀯𑀢𑁆𑀣𑀼𑀓𑀢𑀸𑀬𑀸𑀢𑀺 𑀧𑀢𑀺𑀝𑁆𑀞𑀸𑀓𑀢𑀸𑀬. 𑀅𑀦𑀼𑀝𑁆𑀞𑀺𑀢𑀸𑀬𑀸𑀢𑀺 𑀅𑀦𑀼𑀧𑁆𑀧𑀯𑀢𑁆𑀢𑀺𑀢𑀸𑀬. 𑀧𑀭𑀺𑀘𑀺𑀢𑀸𑀬𑀸𑀢𑀺 𑀧𑀭𑀺𑀘𑀬𑀓𑀢𑀸𑀬. 𑀲𑀼𑀲𑀫𑀸𑀭𑀤𑁆𑀥𑀸𑀬𑀸𑀢𑀺 𑀲𑀼𑀝𑁆𑀞𑀼 𑀲𑀫𑀸𑀭𑀤𑁆𑀥𑀸𑀬 𑀲𑀼𑀲𑀫𑁆𑀧𑀕𑁆𑀕𑀳𑀺𑀢𑀸𑀬. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀓𑀸𑀬𑀕𑀢𑀸𑀲𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀗𑁆𑀔𑀸𑀭𑀼𑀧𑀧𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁦. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀲𑀗𑁆𑀔𑀸𑀭𑀼𑀧𑀧𑀢𑁆𑀢𑀺𑀲𑀼𑀢𑁆𑀢𑀁. 𑀢𑀢𑁆𑀣 𑀲𑀗𑁆𑀔𑀸𑀭𑀼𑀧𑀧𑀢𑁆𑀢𑀺𑀦𑁆𑀢𑀺 𑀲𑀗𑁆𑀔𑀸𑀭𑀸𑀦𑀁𑀬𑁂𑀯 𑀉𑀧𑀧𑀢𑁆𑀢𑀺𑀁, 𑀦 𑀲𑀢𑁆𑀢𑀲𑁆𑀲, 𑀦 𑀧𑁄𑀲𑀲𑁆𑀲, 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁂𑀦 𑀯𑀸 𑀪𑀯𑀽𑀧𑀕𑀓𑁆𑀔𑀦𑁆𑀥𑀸𑀦𑀁 𑀉𑀧𑀧𑀢𑁆𑀢𑀺𑀁.

𑁧𑁬𑁧. 𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑀲𑀤𑁆𑀥𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀸 𑀮𑁄𑀓𑀺𑀓𑀸 𑀯𑀝𑁆𑀝𑀦𑁆𑀢𑀺. 𑀤𑀳𑀢𑀻𑀢𑀺 𑀞𑀧𑁂𑀢𑀺. 𑀅𑀥𑀺𑀝𑁆𑀞𑀸𑀢𑀻𑀢𑀺 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀲𑀗𑁆𑀔𑀸𑀭𑀸 𑀘 𑀯𑀺𑀳𑀸𑀭𑀸 𑀘𑀸𑀢𑀺 𑀲𑀳 𑀧𑀢𑁆𑀣𑀦𑀸𑀬 𑀲𑀤𑁆𑀥𑀸𑀤𑀬𑁄𑀯 𑀧𑀜𑁆𑀘 𑀥𑀫𑁆𑀫𑀸. 𑀢𑀢𑁆𑀭𑀼𑀧𑀧𑀢𑁆𑀢𑀺𑀬𑀸𑀢𑀺 𑀢𑀲𑁆𑀫𑀺𑀁 𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀸𑀬. 𑀅𑀬𑀁 𑀫𑀕𑁆𑀕𑁄 𑀅𑀬𑀁 𑀧𑀝𑀺𑀧𑀤𑀸𑀢𑀺 𑀲𑀳 𑀧𑀢𑁆𑀣𑀦𑀸𑀬 𑀧𑀜𑁆𑀘 𑀥𑀫𑁆𑀫𑀸𑀯. 𑀬𑀲𑁆𑀲 𑀳𑀺 𑀧𑀜𑁆𑀘 𑀥𑀫𑁆𑀫𑀸 𑀅𑀢𑁆𑀣𑀺, 𑀦 𑀧𑀢𑁆𑀣𑀦𑀸, 𑀢𑀲𑁆𑀲 𑀕𑀢𑀺 𑀅𑀦𑀺𑀩𑀤𑁆𑀥𑀸. 𑀬𑀲𑁆𑀲 𑀧𑀢𑁆𑀣𑀦𑀸 𑀅𑀢𑁆𑀣𑀺, 𑀦 𑀧𑀜𑁆𑀘 𑀥𑀫𑁆𑀫𑀸, 𑀢𑀲𑁆𑀲𑀧𑀺 𑀅𑀦𑀺𑀩𑀤𑁆𑀥𑀸. 𑀬𑁂𑀲𑀁 𑀉𑀪𑀬𑀁 𑀅𑀢𑁆𑀣𑀺, 𑀢𑁂𑀲𑀁 𑀕𑀢𑀺 𑀦𑀺𑀩𑀤𑁆𑀥𑀸. 𑀬𑀣𑀸 𑀳𑀺 𑀆𑀓𑀸𑀲𑁂 𑀔𑀺𑀢𑁆𑀢𑀤𑀡𑁆𑀟𑁄 𑀅𑀕𑁆𑀕𑁂𑀦 𑀯𑀸 𑀫𑀚𑁆𑀛𑁂𑀦 𑀯𑀸 𑀫𑀽𑀮𑁂𑀦 𑀯𑀸 𑀦𑀺𑀧𑀢𑀺𑀲𑁆𑀲𑀢𑀻𑀢𑀺 𑀦𑀺𑀬𑀫𑁄 𑀦𑀢𑁆𑀣𑀺, 𑀏𑀯𑀁 𑀲𑀢𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀁 𑀅𑀦𑀺𑀬𑀢𑀁. 𑀢𑀲𑁆𑀫𑀸 𑀓𑀼𑀲𑀮𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀧𑀢𑁆𑀣𑀦𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺.

𑁧𑁬𑁫. 𑀆𑀫𑀡𑁆𑀟𑀦𑁆𑀢𑀺 𑀆𑀫𑀮𑀓𑀁. 𑀬𑀣𑀸 𑀢𑀁 𑀧𑀭𑀺𑀲𑀼𑀤𑁆𑀥𑀘𑀓𑁆𑀔𑀼𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀩𑁆𑀩𑀲𑁄𑀯 𑀧𑀸𑀓𑀝𑀁 𑀳𑁄𑀢𑀺, 𑀏𑀯𑀁 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀲𑀤𑁆𑀥𑀺𑀁 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑁂𑀳𑀺 𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑁧𑁬𑁭. 𑀲𑀼𑀪𑁄𑀢𑀺 𑀲𑀼𑀦𑁆𑀤𑀭𑁄. 𑀚𑀸𑀢𑀺𑀫𑀸𑀢𑀺 𑀆𑀓𑀭𑀲𑀫𑁆𑀧𑀦𑁆𑀦𑁄. 𑀲𑀼𑀧𑀭𑀺𑀓𑀫𑁆𑀫𑀓𑀢𑁄𑀢𑀺 𑀥𑁄𑀯𑀦𑀸𑀤𑀻𑀳𑀺 𑀲𑀼𑀝𑁆𑀞𑀼𑀓𑀢𑀧𑀭𑀺𑀓𑀫𑁆𑀫𑁄. 𑀧𑀡𑁆𑀟𑀼𑀓𑀫𑁆𑀩𑀮𑁂 𑀦𑀺𑀓𑁆𑀔𑀺𑀢𑁆𑀢𑁄𑀢𑀺 𑀭𑀢𑁆𑀢𑀓𑀫𑁆𑀩𑀮𑁂 𑀞𑀧𑀺𑀢𑁄.

𑁧𑁬𑁮. 𑀲𑀢𑀲𑀳𑀲𑁆𑀲𑁄𑀢𑀺 𑀮𑁄𑀓𑀥𑀸𑀢𑀼𑀲𑀢𑀲𑀳𑀲𑁆𑀲𑀫𑁆𑀳𑀺 𑀆𑀮𑁄𑀓𑀨𑀭𑀡𑀩𑁆𑀭𑀳𑁆𑀫𑀸. 𑀦𑀺𑀓𑁆𑀔𑀦𑁆𑀢𑀺 𑀦𑀺𑀓𑁆𑀔𑁂𑀦 𑀓𑀢𑀁 𑀧𑀺𑀴𑀦𑁆𑀥𑀦𑀁, 𑀦𑀺𑀓𑁆𑀔𑀁 𑀦𑀸𑀫 𑀧𑀜𑁆𑀘𑀲𑀼𑀯𑀡𑁆𑀡𑀁, 𑀊𑀦𑀓𑀦𑀺𑀓𑁆𑀔𑁂𑀦 𑀓𑀢𑀁 𑀧𑀲𑀸𑀥𑀦𑀜𑁆𑀳𑀺 𑀖𑀝𑁆𑀝𑀦𑀫𑀚𑁆𑀚𑀦𑀓𑁆𑀔𑀫𑀁 𑀦 𑀳𑁄𑀢𑀺, 𑀅𑀢𑀺𑀭𑁂𑀓𑁂𑀦 𑀓𑀢𑀁 𑀖𑀝𑁆𑀝𑀦𑀫𑀚𑁆𑀚𑀦𑀁 𑀔𑀫𑀢𑀺, 𑀯𑀡𑁆𑀡𑀯𑀦𑁆𑀢𑀁 𑀧𑀦 𑀦 𑀳𑁄𑀢𑀺, 𑀨𑀭𑀼𑀲𑀥𑀸𑀢𑀼𑀓𑀁 𑀔𑀸𑀬𑀢𑀺. 𑀦𑀺𑀓𑁆𑀔𑁂𑀦 𑀓𑀢𑀁 𑀖𑀝𑁆𑀝𑀦𑀫𑀚𑁆𑀚𑀦𑀜𑁆𑀘𑁂𑀯 𑀔𑀫𑀢𑀺, 𑀯𑀡𑁆𑀡𑀯𑀦𑁆𑀢𑀜𑁆𑀘 𑀳𑁄𑀢𑀺. 𑀚𑀫𑁆𑀩𑁄𑀦𑀤𑀦𑁆𑀢𑀺 𑀚𑀫𑁆𑀩𑀼𑀦𑀤𑀺𑀬𑀁 𑀦𑀺𑀩𑁆𑀩𑀢𑁆𑀢𑀁. 𑀫𑀳𑀸𑀚𑀫𑁆𑀩𑀼𑀭𑀼𑀓𑁆𑀔𑀲𑁆𑀲 𑀳𑀺 𑀏𑀓𑁂𑀓𑀸 𑀲𑀸𑀔𑀸 𑀧𑀡𑁆𑀡𑀸𑀲 𑀧𑀡𑁆𑀡𑀸𑀲 𑀬𑁄𑀚𑀦𑀸𑀦𑀺 𑀯𑀟𑁆𑀠𑀺𑀢𑀸, 𑀢𑀸𑀲𑀼 𑀫𑀳𑀦𑁆𑀢𑀸 𑀦𑀤𑀺𑀬𑁄 𑀲𑀦𑁆𑀤𑀦𑁆𑀢𑀺, 𑀢𑀸𑀲𑀁 𑀦𑀤𑀻𑀦𑀁 𑀉𑀪𑀬𑀢𑀻𑀭𑁂𑀲𑀼 𑀚𑀫𑁆𑀩𑀼𑀧𑀓𑁆𑀓𑀸𑀦𑀁 𑀧𑀢𑀺𑀢𑀝𑁆𑀞𑀸𑀦𑁂 𑀲𑀼𑀯𑀡𑁆𑀡𑀗𑁆𑀓𑀼𑀭𑀸 𑀉𑀝𑁆𑀞𑀳𑀦𑁆𑀢𑀺, 𑀢𑁂 𑀦𑀤𑀻𑀚𑀮𑁂𑀦 𑀯𑀼𑀬𑁆𑀳𑀫𑀸𑀦𑀸 𑀅𑀦𑀼𑀧𑀼𑀩𑁆𑀩𑁂𑀦 𑀫𑀳𑀸𑀲𑀫𑀼𑀤𑁆𑀤𑀁 𑀧𑀯𑀺𑀲𑀦𑁆𑀢𑀺. 𑀢𑀁 𑀲𑀦𑁆𑀥𑀸𑀬 𑀚𑀫𑁆𑀩𑁄𑀦𑀤𑀦𑁆𑀢𑀺 𑀯𑀼𑀢𑁆𑀢𑀁. 𑀤𑀓𑁆𑀔𑀓𑀫𑁆𑀫𑀸𑀭𑀧𑀼𑀢𑁆𑀢𑀉𑀓𑁆𑀓𑀸𑀫𑀼𑀔𑀲𑀼𑀓𑀼𑀲𑀮𑀲𑀫𑁆𑀧𑀳𑀝𑁆𑀞𑀦𑁆𑀢𑀺 𑀤𑀓𑁆𑀔𑁂𑀦 𑀲𑀼𑀓𑀼𑀲𑀮𑁂𑀦 𑀓𑀫𑁆𑀫𑀸𑀭𑀧𑀼𑀢𑁆𑀢𑁂𑀦 𑀉𑀓𑁆𑀓𑀸𑀫𑀼𑀔𑁂 𑀧𑀘𑀺𑀢𑁆𑀯𑀸 𑀲𑀫𑁆𑀧𑀳𑀝𑁆𑀞𑀁. 𑀉𑀓𑁆𑀓𑀸𑀫𑀼𑀔𑁂𑀢𑀺 𑀉𑀤𑁆𑀥𑀦𑁂. 𑀲𑀫𑁆𑀧𑀳𑀝𑁆𑀞𑀦𑁆𑀢𑀺 𑀥𑁄𑀢𑀖𑀝𑁆𑀝𑀺𑀢𑀫𑀚𑁆𑀚𑀺𑀢𑀁. 𑀯𑀢𑁆𑀣𑁄𑀧𑀫𑁂 (𑀫. 𑀦𑀺. 𑁧.𑁭𑁫-𑁭𑁬) 𑀘 𑀥𑀸𑀢𑀼𑀯𑀺𑀪𑀗𑁆𑀕𑁂 (𑀫. 𑀦𑀺. 𑁩.𑁩𑁫𑁭-𑁩𑁬𑁦) 𑀘 𑀧𑀺𑀡𑁆𑀟𑀲𑁄𑀥𑀦𑀁 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀓𑀢𑀪𑀡𑁆𑀟𑀲𑁄𑀥𑀦𑀁 𑀯𑀼𑀢𑁆𑀢𑀁.

𑀬𑀁 𑀧𑀦 𑀲𑀩𑁆𑀩𑀯𑀸𑀭𑁂𑀲𑀼 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀧𑀜𑁆𑀘𑀯𑀺𑀥𑀁 𑀨𑀭𑀡𑀁 𑀘𑁂𑀢𑁄𑀨𑀭𑀡𑀁 𑀓𑀲𑀺𑀡𑀨𑀭𑀡𑀁 𑀤𑀺𑀩𑁆𑀩𑀘𑀓𑁆𑀔𑀼𑀨𑀭𑀡𑀁 𑀆𑀮𑁄𑀓𑀨𑀭𑀡𑀁 𑀲𑀭𑀻𑀭𑀨𑀭𑀡𑀦𑁆𑀢𑀺. 𑀢𑀢𑁆𑀣 𑀘𑁂𑀢𑁄𑀨𑀭𑀡𑀁 𑀦𑀸𑀫 𑀮𑁄𑀓𑀥𑀸𑀢𑀼𑀲𑀳𑀲𑁆𑀲𑁂 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀚𑀸𑀦𑀦𑀁. 𑀓𑀲𑀺𑀡𑀨𑀭𑀡𑀁 𑀦𑀸𑀫 𑀮𑁄𑀓𑀥𑀸𑀢𑀼𑀲𑀳𑀲𑁆𑀲𑁂 𑀓𑀲𑀺𑀡𑀧𑀢𑁆𑀣𑀭𑀡𑀁. 𑀤𑀺𑀩𑁆𑀩𑀘𑀓𑁆𑀔𑀼𑀨𑀭𑀡𑀁 𑀦𑀸𑀫 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀲𑀳𑀲𑁆𑀲𑀮𑁄𑀓𑀥𑀸𑀢𑀼𑀤𑀲𑁆𑀲𑀦𑀁. 𑀆𑀮𑁄𑀓𑀨𑀭𑀡𑀫𑁆𑀧𑀺 𑀏𑀢𑀤𑁂𑀯. 𑀲𑀭𑀻𑀭𑀨𑀭𑀡𑀁 𑀦𑀸𑀫 𑀮𑁄𑀓𑀥𑀸𑀢𑀼𑀲𑀳𑀲𑁆𑀲𑁂 𑀲𑀭𑀻𑀭𑀧𑀪𑀸𑀬 𑀧𑀢𑁆𑀣𑀭𑀡𑀁. 𑀲𑀩𑁆𑀩𑀢𑁆𑀣 𑀇𑀫𑀸𑀦𑀺 𑀧𑀜𑁆𑀘 𑀨𑀭𑀡𑀸𑀦𑀺 𑀅𑀯𑀺𑀦𑀸𑀲𑁂𑀦𑁆𑀢𑁂𑀦 𑀓𑀣𑁂𑀢𑀩𑁆𑀩𑀦𑁆𑀢𑀺.

𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀫𑀡𑀺𑀑𑀧𑀫𑁆𑀫𑁂 𑀓𑀲𑀺𑀡𑀨𑀭𑀡𑀁 𑀯𑀺𑀬 𑀦𑀺𑀓𑁆𑀔𑁄𑀧𑀫𑁆𑀫𑁂 𑀲𑀭𑀻𑀭𑀨𑀭𑀡𑀁 𑀯𑀺𑀬 𑀤𑀺𑀲𑁆𑀲𑀢𑀻’’𑀢𑀺. 𑀢𑀲𑁆𑀲 𑀯𑀸𑀤𑀁 𑀯𑀺𑀬 𑀅𑀝𑁆𑀞𑀓𑀣𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀧𑀝𑀺𑀓𑁆𑀔𑀺𑀢𑁆𑀯𑀸 𑀲𑀭𑀻𑀭𑀨𑀭𑀡𑀁 𑀦 𑀲𑀩𑁆𑀩𑀓𑀸𑀮𑀺𑀓𑀁, 𑀘𑀢𑁆𑀢𑀸𑀭𑀺𑀫𑀸𑀦𑀺 𑀨𑀭𑀡𑀸𑀦𑀺 𑀅𑀯𑀺𑀦𑀸𑀲𑁂𑀢𑁆𑀯𑀸𑀯 𑀓𑀣𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀥𑀺𑀫𑀼𑀘𑁆𑀘𑀢𑀻𑀢𑀺 𑀧𑀤𑀁 𑀨𑀭𑀡𑀧𑀤𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀅𑀣 𑀯𑀸 𑀨𑀭𑀢𑀻𑀢𑀺 𑀧𑀢𑁆𑀣𑀭𑀢𑀺. 𑀅𑀥𑀺𑀫𑀼𑀘𑁆𑀘𑀢𑀻𑀢𑀺 𑀚𑀸𑀦𑀸𑀢𑀺.

𑁧𑁬𑁯. 𑀆𑀪𑀸𑀢𑀺𑀆𑀤𑀻𑀲𑀼 𑀆𑀪𑀸𑀤𑀬𑁄 𑀦𑀸𑀫 𑀧𑀸𑀝𑀺𑀬𑁂𑀓𑁆𑀓𑀸 𑀤𑁂𑀯𑀸 𑀦𑀢𑁆𑀣𑀺, 𑀢𑀬𑁄 𑀧𑀭𑀺𑀢𑁆𑀢𑀸𑀪𑀸𑀤𑀬𑁄 𑀤𑁂𑀯𑀸 𑀆𑀪𑀸 𑀦𑀸𑀫, 𑀧𑀭𑀺𑀢𑁆𑀢𑀸𑀲𑀼𑀪𑀸𑀤𑀬𑁄 𑀘. 𑀲𑀼𑀪𑀓𑀺𑀡𑁆𑀳𑀸𑀤𑀬𑁄 𑀘 𑀲𑀼𑀪𑀸 𑀦𑀸𑀫. 𑀯𑁂𑀳𑀧𑁆𑀨𑀮𑀸𑀤𑀺𑀯𑀸𑀭𑀸 𑀧𑀸𑀓𑀝𑀸𑀬𑁂𑀯.

𑀇𑀫𑁂 𑀢𑀸𑀯 𑀧𑀜𑁆𑀘 𑀥𑀫𑁆𑀫𑁂 𑀪𑀸𑀯𑁂𑀢𑁆𑀯𑀸 𑀓𑀸𑀫𑀸𑀯𑀘𑀭𑁂𑀲𑀼 𑀦𑀺𑀩𑁆𑀩𑀢𑁆𑀢𑀢𑀼. 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀁 𑀧𑀦 𑀆𑀲𑀯𑀓𑁆𑀔𑀬𑀜𑁆𑀘 𑀓𑀣𑀁 𑀧𑀸𑀧𑀼𑀡𑀸𑀢𑀻𑀢𑀺? 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀲𑀻𑀮𑀁, 𑀲𑁄 𑀇𑀫𑀲𑁆𑀫𑀺𑀁 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀢𑀸 𑀢𑀸 𑀲𑀫𑀸𑀧𑀢𑁆𑀢𑀺𑀬𑁄 𑀪𑀸𑀯𑁂𑀢𑁆𑀯𑀸 𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀅𑀭𑀽𑀧𑀚𑁆𑀛𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀅𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑁂, 𑀲𑀫𑀸𑀧𑀢𑁆𑀢𑀺𑀧𑀤𑀝𑁆𑀞𑀸𑀦𑀁 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀲𑀘𑁆𑀙𑀺𑀓𑀢𑁆𑀯𑀸 𑀧𑀜𑁆𑀘𑀲𑀼 𑀲𑀼𑀤𑁆𑀥𑀸𑀯𑀸𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀢𑀺. 𑀉𑀧𑀭𑀺𑀫𑀕𑁆𑀕𑀁 𑀪𑀸𑀯𑁂𑀢𑁆𑀯𑀸 𑀆𑀲𑀯𑀓𑁆𑀔𑀬𑀁 𑀧𑀸𑀧𑀼𑀡𑀸𑀢𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀲𑀗𑁆𑀔𑀸𑀭𑀼𑀧𑀧𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀼𑀜𑁆𑀜𑀢𑀯𑀕𑁆𑀕𑁄

𑁧. 𑀘𑀽𑀴𑀲𑀼𑀜𑁆𑀜𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁬. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀘𑀽𑀴𑀲𑀼𑀜𑁆𑀜𑀢𑀲𑀼𑀢𑁆𑀢𑀁. 𑀢𑀢𑁆𑀣 𑀏𑀓𑀫𑀺𑀤𑀦𑁆𑀢𑀺 𑀣𑁂𑀭𑁄 𑀓𑀺𑀭 𑀪𑀕𑀯𑀢𑁄 𑀯𑀢𑁆𑀢𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀤𑀺𑀯𑀸𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀲𑀼𑀜𑁆𑀜𑀢𑀸𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦 𑀯𑀼𑀝𑁆𑀞𑀸𑀲𑀺. 𑀅𑀣𑀲𑁆𑀲 𑀲𑀗𑁆𑀔𑀸𑀭𑀸 𑀲𑀼𑀜𑁆𑀜𑀢𑁄 𑀉𑀧𑀝𑁆𑀞𑀳𑀺𑀁𑀲𑀼. 𑀲𑁄 𑀲𑀼𑀜𑁆𑀜𑀢𑀸𑀓𑀣𑀁 𑀲𑁄𑀢𑀼𑀓𑀸𑀫𑁄 𑀚𑀸𑀢𑁄. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀦 𑀔𑁄 𑀧𑀦 𑀲𑀓𑁆𑀓𑀸 𑀥𑀼𑀭𑁂𑀦 𑀥𑀼𑀭𑀁 𑀧𑀳𑀭𑀦𑁆𑀢𑁂𑀦 𑀯𑀺𑀬 𑀕𑀦𑁆𑀢𑁆𑀯𑀸 ‘𑀲𑀼𑀜𑁆𑀜𑀢𑀸𑀓𑀣𑀁 𑀫𑁂, 𑀪𑀦𑁆𑀢𑁂, 𑀓𑀣𑁂𑀣𑀸’𑀢𑀺 𑀪𑀕𑀯𑀦𑁆𑀢𑀁 𑀯𑀢𑁆𑀢𑀼𑀁, 𑀳𑀦𑁆𑀤𑀸𑀳𑀁 𑀬𑀁 𑀫𑁂 𑀪𑀕𑀯𑀸 𑀦𑀕𑀭𑀓𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁄 𑀏𑀓𑀁 𑀓𑀣𑀁 𑀓𑀣𑁂𑀲𑀺, 𑀢𑀁 𑀲𑀸𑀭𑁂𑀫𑀺, 𑀏𑀯𑀁 𑀫𑁂 𑀪𑀕𑀯𑀸 𑀲𑀼𑀜𑁆𑀜𑀢𑀸𑀓𑀣𑀁 𑀓𑀣𑁂𑀲𑁆𑀲𑀢𑀻’’𑀢𑀺 𑀤𑀲𑀩𑀮𑀁 𑀲𑀸𑀭𑁂𑀦𑁆𑀢𑁄 𑀏𑀓𑀫𑀺𑀤𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀇𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀫𑁂𑀯. 𑀓𑀘𑁆𑀘𑀺𑀫𑁂𑀢𑀁, 𑀪𑀦𑁆𑀢𑁂𑀢𑀺 𑀣𑁂𑀭𑁄 𑀏𑀓𑀧𑀤𑁂 𑀞𑀢𑁆𑀯𑀸 𑀲𑀝𑁆𑀞𑀺𑀧𑀤𑀲𑀳𑀲𑁆𑀲𑀸𑀦𑀺 𑀉𑀕𑁆𑀕𑀳𑁂𑀢𑁆𑀯𑀸 𑀥𑀸𑀭𑁂𑀢𑀼𑀁 𑀲𑀫𑀢𑁆𑀣𑁄, 𑀓𑀺𑀁 𑀲𑁄 ‘‘𑀲𑀼𑀜𑁆𑀜𑀢𑀸𑀯𑀺𑀳𑀸𑀭𑁂𑀦𑀸’’𑀢𑀺 𑀏𑀓𑀁 𑀧𑀤𑀁 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀲𑁄𑀢𑀼𑀓𑀸𑀫𑁂𑀦 𑀧𑀦 𑀚𑀸𑀦𑀦𑁆𑀢𑁂𑀦 𑀯𑀺𑀬 𑀧𑀼𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀧𑀸𑀓𑀝𑀁 𑀓𑀢𑁆𑀯𑀸 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑀁 𑀲𑀼𑀜𑁆𑀜𑀢𑀸𑀓𑀣𑀁 𑀲𑁄𑀢𑀼𑀓𑀸𑀫𑁄 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀏𑀯𑀫𑀸𑀳. 𑀏𑀓𑁄 𑀅𑀚𑀸𑀦𑀦𑁆𑀢𑁄𑀧𑀺 𑀚𑀸𑀦𑀦𑁆𑀢𑁄 𑀯𑀺𑀬 𑀳𑁄𑀢𑀺, 𑀣𑁂𑀭𑁄 𑀏𑀯𑀭𑀽𑀧𑀁 𑀓𑁄𑀳𑀜𑁆𑀜𑀁 𑀓𑀺𑀁 𑀓𑀭𑀺𑀲𑁆𑀲𑀢𑀺, 𑀅𑀢𑁆𑀢𑀦𑁄 𑀚𑀸𑀦𑀦𑀝𑁆𑀞𑀸𑀦𑁂𑀧𑀺 𑀪𑀕𑀯𑀢𑁄 𑀅𑀧𑀘𑀺𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀓𑀘𑁆𑀘𑀺𑀫𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳.

𑀧𑀼𑀩𑁆𑀩𑁂𑀧𑀻𑀢𑀺 𑀧𑀞𑀫𑀩𑁄𑀥𑀺𑀬𑀁 𑀦𑀕𑀭𑀓𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀡𑀓𑀸𑀮𑁂𑀧𑀺. 𑀏𑀢𑀭𑀳𑀺𑀧𑀻𑀢𑀺 𑀇𑀤𑀸𑀦𑀺𑀧𑀺. 𑀏𑀯𑀁 𑀧𑀦 𑀯𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀆𑀦𑀦𑁆𑀤𑁄 𑀲𑀼𑀜𑁆𑀜𑀢𑀸𑀓𑀣𑀁 𑀲𑁄𑀢𑀼𑀓𑀸𑀫𑁄, 𑀏𑀓𑁄 𑀧𑀦 𑀲𑁄𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀉𑀕𑁆𑀕𑀳𑁂𑀢𑀼𑀁, 𑀏𑀓𑁄 𑀲𑁄𑀢𑀼𑀫𑁆𑀧𑀺 𑀉𑀕𑁆𑀕𑀳𑁂𑀢𑀼𑀫𑁆𑀧𑀺 𑀲𑀓𑁆𑀓𑁄𑀢𑀺, 𑀦 𑀓𑀣𑁂𑀢𑀼𑀁, 𑀆𑀦𑀦𑁆𑀤𑁄 𑀧𑀦 𑀲𑁄𑀢𑀼𑀫𑁆𑀧𑀺 𑀲𑀓𑁆𑀓𑁄𑀢𑀺 𑀉𑀕𑁆𑀕𑀳𑁂𑀢𑀼𑀫𑁆𑀧𑀺 𑀓𑀣𑁂𑀢𑀼𑀫𑁆𑀧𑀺, (𑀓𑀣𑁂𑀫𑀺𑀲𑁆𑀲) 𑀲𑀼𑀜𑁆𑀜𑀢𑀸𑀓𑀣’’𑀦𑁆𑀢𑀺. 𑀇𑀢𑀺 𑀢𑀁 𑀓𑀣𑁂𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀜𑁆𑀜𑁄 𑀳𑀢𑁆𑀣𑀺𑀕𑀯𑀸𑀲𑁆𑀲𑀯𑀴𑀯𑁂𑀦𑀸𑀢𑀺 𑀢𑀢𑁆𑀣 𑀓𑀝𑁆𑀞𑀭𑀽𑀧𑀧𑁄𑀢𑁆𑀣𑀓𑀭𑀽𑀧𑀘𑀺𑀢𑁆𑀢𑀭𑀽𑀧𑀯𑀲𑁂𑀦 𑀓𑀢𑀸 𑀳𑀢𑁆𑀣𑀺𑀆𑀤𑀬𑁄 𑀅𑀢𑁆𑀣𑀺, 𑀯𑁂𑀲𑁆𑀲𑀯𑀡𑀫𑀦𑁆𑀥𑀸𑀢𑀸𑀤𑀻𑀦𑀁 𑀞𑀺𑀢𑀝𑁆𑀞𑀸𑀦𑁂 𑀘𑀺𑀢𑁆𑀢𑀓𑀫𑁆𑀫𑀯𑀲𑁂𑀦 𑀓𑀢𑀫𑁆𑀧𑀺, 𑀭𑀢𑀦𑀧𑀭𑀺𑀓𑁆𑀔𑀢𑀸𑀦𑀁 𑀯𑀸𑀢𑀧𑀸𑀦𑀤𑁆𑀯𑀸𑀭𑀩𑀦𑁆𑀥𑀫𑀜𑁆𑀘𑀧𑀻𑀞𑀸𑀤𑀻𑀦𑀁 𑀯𑀲𑁂𑀦 𑀲𑀡𑁆𑀞𑀺𑀢𑀫𑁆𑀧𑀺, 𑀚𑀺𑀡𑁆𑀡𑀧𑀝𑀺𑀲𑀗𑁆𑀔𑀭𑀡𑀢𑁆𑀣𑀁 𑀞𑀧𑀺𑀢𑀫𑁆𑀧𑀺 𑀚𑀸𑀢𑀭𑀽𑀧𑀭𑀚𑀢𑀁 𑀅𑀢𑁆𑀣𑀺, 𑀓𑀝𑁆𑀞𑀭𑀽𑀧𑀸𑀤𑀺𑀯𑀲𑁂𑀦 𑀓𑀢𑀸 𑀥𑀫𑁆𑀫𑀲𑀯𑀦𑀧𑀜𑁆𑀳𑀧𑀼𑀘𑁆𑀙𑀦𑀸𑀤𑀺𑀯𑀲𑁂𑀦 𑀆𑀕𑀘𑁆𑀙𑀦𑁆𑀢𑀸 𑀘 𑀇𑀢𑁆𑀣𑀺𑀧𑀼𑀭𑀺𑀲𑀸𑀧𑀺 𑀅𑀢𑁆𑀣𑀺, 𑀢𑀲𑁆𑀫𑀸 𑀦 𑀲𑁄 𑀢𑁂𑀳𑀺 𑀲𑀼𑀜𑁆𑀜𑁄. 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀸𑀦𑀁 𑀲𑀯𑀺𑀜𑁆𑀜𑀸𑀡𑀓𑀸𑀦𑀁 𑀳𑀢𑁆𑀣𑀺𑀆𑀤𑀻𑀦𑀁, 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀲𑁆𑀲 𑀚𑀸𑀢𑀭𑀽𑀧𑀭𑀚𑀢𑀲𑁆𑀲, 𑀦𑀺𑀩𑀤𑁆𑀥𑀯𑀸𑀲𑀁 𑀯𑀲𑀦𑁆𑀢𑀸𑀦𑀁 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀜𑁆𑀘 𑀅𑀪𑀸𑀯𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀝𑀺𑀘𑁆𑀘𑀸𑀢𑀺 𑀪𑀺𑀓𑁆𑀔𑀽𑀲𑀼 𑀳𑀺 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁂𑀲𑀼𑀧𑀺 𑀯𑀺𑀳𑀸𑀭𑀪𑀢𑁆𑀢𑀁 𑀲𑀸𑀤𑀺𑀬𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀘𑁂𑀯 𑀕𑀺𑀮𑀸𑀦𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀉𑀤𑁆𑀤𑁂𑀲𑀘𑀻𑀯𑀭𑀓𑀫𑁆𑀫𑀧𑀲𑀼𑀢𑀸𑀤𑀻𑀳𑀺 𑀘 𑀪𑀺𑀓𑁆𑀔𑀽𑀳𑀺 𑀲𑁄 𑀅𑀲𑀼𑀜𑁆𑀜𑁄𑀯 𑀳𑁄𑀢𑀺, 𑀇𑀢𑀺 𑀦𑀺𑀘𑁆𑀘𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀺𑀢𑀸𑀬 𑀏𑀯𑀫𑀸𑀳. 𑀏𑀓𑀢𑁆𑀢𑀦𑁆𑀢𑀺 𑀏𑀓𑀪𑀸𑀯𑀁, 𑀏𑀓𑀁 𑀅𑀲𑀼𑀜𑁆𑀜𑀢𑀁 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀏𑀓𑁄 𑀅𑀲𑀼𑀜𑁆𑀜𑀪𑀸𑀯𑁄 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀫𑀦𑀲𑀺𑀓𑀭𑀺𑀢𑁆𑀯𑀸𑀢𑀺 𑀘𑀺𑀢𑁆𑀢𑁂 𑀅𑀓𑀢𑁆𑀯𑀸 𑀅𑀦𑀸𑀯𑀚𑁆𑀚𑀺𑀢𑁆𑀯𑀸 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸. 𑀕𑀸𑀫𑀲𑀜𑁆𑀜𑀦𑁆𑀢𑀺 𑀕𑀸𑀫𑁄𑀢𑀺 𑀧𑀯𑀢𑁆𑀢𑀯𑀲𑁂𑀦 𑀯𑀸 𑀓𑀺𑀮𑁂𑀲𑀯𑀲𑁂𑀦 𑀯𑀸 𑀉𑀧𑁆𑀧𑀦𑁆𑀦𑀁 𑀕𑀸𑀫𑀲𑀜𑁆𑀜𑀁. 𑀫𑀦𑀼𑀲𑁆𑀲𑀲𑀜𑁆𑀜𑀸𑀬𑀧𑀺 𑀏𑀲𑁂𑀯 𑀦𑀬𑁄. 𑀅𑀭𑀜𑁆𑀜𑀲𑀜𑁆𑀜𑀁 𑀧𑀝𑀺𑀘𑁆𑀘 𑀫𑀦𑀲𑀺 𑀓𑀭𑁄𑀢𑀺 𑀏𑀓𑀢𑁆𑀢𑀦𑁆𑀢𑀺 𑀇𑀤𑀁 𑀅𑀭𑀜𑁆𑀜𑀁, 𑀅𑀬𑀁 𑀭𑀼𑀓𑁆𑀔𑁄, 𑀅𑀬𑀁 𑀧𑀩𑁆𑀩𑀢𑁄, 𑀅𑀬𑀁 𑀦𑀻𑀮𑁄𑀪𑀸𑀲𑁄 𑀯𑀦𑀲𑀡𑁆𑀟𑁄𑀢𑀺 𑀏𑀯𑀁 𑀏𑀓𑀁 𑀅𑀭𑀜𑁆𑀜𑀁𑀬𑁂𑀯 𑀧𑀝𑀺𑀘𑁆𑀘 𑀅𑀭𑀜𑁆𑀜𑀲𑀜𑁆𑀜𑀁 𑀫𑀦𑀲𑀺 𑀓𑀭𑁄𑀢𑀺. 𑀧𑀓𑁆𑀔𑀦𑁆𑀤𑀢𑀻𑀢𑀺 𑀑𑀢𑀭𑀢𑀺. 𑀅𑀥𑀺𑀫𑀼𑀘𑁆𑀘𑀢𑀻𑀢𑀺 𑀏𑀯𑀦𑁆𑀢𑀺 𑀅𑀥𑀺𑀫𑀼𑀘𑁆𑀘𑀢𑀺. 𑀬𑁂 𑀅𑀲𑁆𑀲𑀼 𑀤𑀭𑀣𑀸𑀢𑀺 𑀬𑁂 𑀘 𑀧𑀯𑀢𑁆𑀢𑀤𑀭𑀣𑀸 𑀯𑀸 𑀓𑀺𑀮𑁂𑀲𑀤𑀭𑀣𑀸 𑀯𑀸 𑀕𑀸𑀫𑀲𑀜𑁆𑀜𑀁 𑀧𑀝𑀺𑀘𑁆𑀘 𑀪𑀯𑁂𑀬𑁆𑀬𑀼𑀁, 𑀢𑁂 𑀇𑀥 𑀅𑀭𑀜𑁆𑀜𑀲𑀜𑁆𑀜𑀸𑀬 𑀦 𑀲𑀦𑁆𑀢𑀺. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀢𑁆𑀣𑀺 𑀘𑁂𑀯𑀸𑀬𑀦𑁆𑀢𑀺 𑀅𑀬𑀁 𑀧𑀦 𑀏𑀓𑀁 𑀅𑀭𑀜𑁆𑀜𑀲𑀜𑁆𑀜𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀫𑀸𑀦𑀸 𑀧𑀯𑀢𑁆𑀢𑀤𑀭𑀣𑀫𑀢𑁆𑀢𑀸 𑀅𑀢𑁆𑀣𑀺.

𑀬𑀜𑁆𑀳𑀺 𑀔𑁄 𑀢𑀢𑁆𑀣 𑀦 𑀳𑁄𑀢𑀻𑀢𑀺 𑀬𑀁 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂 𑀳𑀢𑁆𑀣𑀺𑀆𑀤𑀬𑁄 𑀯𑀺𑀬 𑀇𑀫𑀺𑀲𑁆𑀲𑀸 𑀅𑀭𑀜𑁆𑀜𑀲𑀜𑁆𑀜𑀸𑀬 𑀕𑀸𑀫𑀲𑀜𑁆𑀜𑀸𑀫𑀦𑀼𑀲𑁆𑀲𑀲𑀜𑁆𑀜𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀯𑀢𑁆𑀢𑀤𑀭𑀣𑀓𑀺𑀮𑁂𑀲𑀤𑀭𑀣𑀚𑀸𑀢𑀁, 𑀢𑀁 𑀦 𑀳𑁄𑀢𑀺. 𑀬𑀁 𑀧𑀦 𑀢𑀢𑁆𑀣 𑀅𑀯𑀲𑀺𑀝𑁆𑀞𑀦𑁆𑀢𑀺 𑀬𑀁 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂 𑀪𑀺𑀓𑁆𑀔𑀼𑀲𑀗𑁆𑀖𑁄 𑀯𑀺𑀬 𑀢𑀢𑁆𑀣 𑀅𑀭𑀜𑁆𑀜𑀲𑀜𑁆𑀜𑀸𑀬 𑀧𑀯𑀢𑁆𑀢𑀤𑀭𑀣𑀫𑀢𑁆𑀢𑀁 𑀅𑀯𑀲𑀺𑀝𑁆𑀞𑀁 𑀳𑁄𑀢𑀺. 𑀢𑀁 𑀲𑀦𑁆𑀢𑀫𑀺𑀤𑀁 𑀅𑀢𑁆𑀣𑀻𑀢𑀺 𑀧𑀚𑀸𑀦𑀸𑀢𑀻𑀢𑀺 𑀢𑀁 𑀯𑀺𑀚𑁆𑀚𑀫𑀸𑀦𑀫𑁂𑀯 ‘‘𑀅𑀢𑁆𑀣𑀺 𑀇𑀤’’𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀲𑀼𑀜𑁆𑀜𑀢𑀸𑀯𑀓𑁆𑀓𑀦𑁆𑀢𑀻𑀢𑀺 𑀲𑀼𑀜𑁆𑀜𑀢𑀸𑀦𑀺𑀩𑁆𑀩𑀢𑁆𑀢𑀺.

𑁧𑁭𑁭. 𑀅𑀫𑀦𑀲𑀺𑀓𑀭𑀺𑀢𑁆𑀯𑀸 𑀫𑀦𑀼𑀲𑁆𑀲𑀲𑀜𑁆𑀜𑀦𑁆𑀢𑀺 𑀇𑀥 𑀕𑀸𑀫𑀲𑀜𑁆𑀜𑀁 𑀦 𑀕𑀡𑁆𑀳𑀸𑀢𑀺. 𑀓𑀲𑁆𑀫𑀸? 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀫𑀦𑀼𑀲𑁆𑀲𑀲𑀜𑁆𑀜𑀸𑀬 𑀕𑀸𑀫𑀲𑀜𑁆𑀜𑀁 𑀦𑀺𑀯𑀢𑁆𑀢𑁂𑀢𑁆𑀯𑀸, 𑀅𑀭𑀜𑁆𑀜𑀲𑀜𑁆𑀜𑀸𑀬 𑀫𑀦𑀼𑀲𑁆𑀲𑀲𑀜𑁆𑀜𑀁, 𑀧𑀣𑀯𑀻𑀲𑀜𑁆𑀜𑀸𑀬 𑀅𑀭𑀜𑁆𑀜𑀲𑀜𑁆𑀜𑀁, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀬 𑀧𑀣𑀯𑀻𑀲𑀜𑁆𑀜𑀁…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀬 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑀜𑁆𑀜𑀁, 𑀯𑀺𑀧𑀲𑁆𑀲𑀦𑀸𑀬 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀁, 𑀫𑀕𑁆𑀕𑁂𑀦 𑀯𑀺𑀧𑀲𑁆𑀲𑀦𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀅𑀘𑁆𑀘𑀦𑁆𑀢𑀲𑀼𑀜𑁆𑀜𑀢𑀁 𑀦𑀸𑀫 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀸 𑀏𑀯𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀧𑀣𑀯𑀻𑀲𑀜𑁆𑀜𑀦𑁆𑀢𑀺 𑀓𑀲𑁆𑀫𑀸 𑀅𑀭𑀜𑁆𑀜𑀲𑀜𑁆𑀜𑀁 𑀧𑀳𑀸𑀬 𑀧𑀣𑀯𑀻𑀲𑀜𑁆𑀜𑀁 𑀫𑀦𑀲𑀺 𑀓𑀭𑁄𑀢𑀺? 𑀅𑀭𑀜𑁆𑀜𑀲𑀜𑁆𑀜𑀸𑀬 𑀯𑀺𑀲𑁂𑀲𑀸𑀦𑀥𑀺𑀕𑀫𑀦𑀢𑁄. 𑀬𑀣𑀸 𑀳𑀺 𑀧𑀼𑀭𑀺𑀲𑀲𑁆𑀲 𑀭𑀫𑀡𑀻𑀬𑀁 𑀔𑁂𑀢𑁆𑀢𑀝𑁆𑀞𑀸𑀦𑀁 𑀤𑀺𑀲𑁆𑀯𑀸 𑁋 ‘‘𑀇𑀥 𑀯𑀼𑀢𑁆𑀢𑀸 𑀲𑀸𑀮𑀺𑀆𑀤𑀬𑁄 𑀲𑀼𑀝𑁆𑀞𑀼 𑀲𑀫𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀫𑀳𑀸𑀮𑀸𑀪𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀫𑁆𑀧𑀺 𑀔𑁂𑀢𑁆𑀢𑀝𑁆𑀞𑀸𑀦𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀲𑀸𑀮𑀺𑀆𑀤𑀬𑁄 𑀦 𑀲𑀫𑁆𑀧𑀚𑁆𑀚𑀦𑁆𑀢𑁂𑀯, 𑀲𑀘𑁂 𑀧𑀦 𑀢𑀁 𑀞𑀸𑀦𑀁 𑀯𑀺𑀳𑀢𑀔𑀸𑀡𑀼𑀓𑀓𑀡𑁆𑀝𑀓𑀁 𑀓𑀢𑁆𑀯𑀸 𑀓𑀲𑀺𑀢𑁆𑀯𑀸 𑀯𑀧𑀢𑀺, 𑀏𑀯𑀁 𑀲𑀦𑁆𑀢𑁂 𑀲𑀫𑁆𑀧𑀚𑁆𑀚𑀦𑁆𑀢𑀺, 𑀏𑀯𑀫𑁂𑀯 𑁋 ‘‘𑀇𑀤𑀁 𑀅𑀭𑀜𑁆𑀜𑀁, 𑀅𑀬𑀁 𑀭𑀼𑀓𑁆𑀔𑁄, 𑀅𑀬𑀁 𑀧𑀩𑁆𑀩𑀢𑁄, 𑀅𑀬𑀁 𑀦𑀻𑀮𑁄𑀪𑀸𑀲𑁄 𑀯𑀦𑀲𑀡𑁆𑀟𑁄’’𑀢𑀺 𑀲𑀘𑁂𑀧𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀅𑀭𑀜𑁆𑀜𑀲𑀜𑁆𑀜𑀁 𑀫𑀦𑀲𑀺 𑀓𑀭𑁄𑀢𑀺, 𑀦𑁂𑀯𑀽𑀧𑀘𑀸𑀭𑀁 𑀦 𑀲𑀫𑀸𑀥𑀺𑀁 𑀧𑀸𑀧𑀼𑀡𑀸𑀢𑀺, 𑀧𑀣𑀯𑀻𑀲𑀜𑁆𑀜𑀸𑀬 𑀧𑀦𑀲𑁆𑀲 𑀥𑀼𑀯𑀲𑁂𑀯𑀦𑀁 𑀓𑀫𑁆𑀫𑀝𑁆𑀞𑀸𑀦𑀁 𑀧𑀣𑀯𑀻𑀓𑀲𑀺𑀡𑀁 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀛𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀧𑀤𑀝𑁆𑀞𑀸𑀦𑀫𑁆𑀧𑀺 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑀓𑁆𑀓𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁. 𑀢𑀲𑁆𑀫𑀸 𑀅𑀭𑀜𑁆𑀜𑀲𑀜𑁆𑀜𑀁 𑀧𑀳𑀸𑀬 𑀧𑀣𑀯𑀻𑀲𑀜𑁆𑀜𑀁 𑀫𑀦𑀲𑀺 𑀓𑀭𑁄𑀢𑀺. 𑀧𑀝𑀺𑀘𑁆𑀘𑀸𑀢𑀺 𑀧𑀝𑀺𑀘𑁆𑀘 𑀲𑀫𑁆𑀪𑀽𑀢𑀁.

𑀇𑀤𑀸𑀦𑀺 𑀬𑀲𑁆𑀫𑀺𑀁 𑀧𑀣𑀯𑀻𑀓𑀲𑀺𑀡𑁂 𑀲𑁄 𑀧𑀣𑀯𑀻𑀲𑀜𑁆𑀜𑀻 𑀳𑁄𑀢𑀺, 𑀢𑀲𑁆𑀲 𑀑𑀧𑀫𑁆𑀫𑀤𑀲𑁆𑀲𑀦𑀢𑁆𑀣𑀁 𑀲𑁂𑀬𑁆𑀬𑀣𑀸𑀧𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀲𑀪𑀲𑁆𑀲 𑀏𑀢𑀦𑁆𑀢𑀺 𑀆𑀲𑀪𑀁. 𑀅𑀜𑁆𑀜𑁂𑀲𑀁 𑀧𑀦 𑀕𑀼𑀦𑁆𑀦𑀁 𑀕𑀡𑁆𑀟𑀸𑀧𑀺 𑀳𑁄𑀦𑁆𑀢𑀺 𑀧𑀳𑀸𑀭𑀸𑀧𑀺. 𑀢𑁂𑀲𑀜𑁆𑀳𑀺 𑀘𑀫𑁆𑀫𑀁 𑀧𑀲𑀸𑀭𑀺𑀬𑀫𑀸𑀦𑀁 𑀦𑀺𑀩𑁆𑀩𑀮𑀺𑀓𑀁 𑀦 𑀳𑁄𑀢𑀺, 𑀉𑀲𑀪𑀲𑁆𑀲 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀢𑀸𑀬 𑀢𑁂 𑀤𑁄𑀲𑀸 𑀦𑀢𑁆𑀣𑀺. 𑀢𑀲𑁆𑀫𑀸 𑀢𑀲𑁆𑀲 𑀘𑀫𑁆𑀫𑀁 𑀕𑀳𑀺𑀢𑀁. 𑀲𑀗𑁆𑀓𑀼𑀲𑀢𑁂𑀦𑀸𑀢𑀺 𑀔𑀺𑀮𑀲𑀢𑁂𑀦. 𑀲𑀼𑀯𑀺𑀳𑀢𑀦𑁆𑀢𑀺 𑀧𑀲𑀸𑀭𑁂𑀢𑁆𑀯𑀸 𑀲𑀼𑀝𑁆𑀞𑀼 𑀯𑀺𑀳𑀢𑀁. 𑀊𑀦𑀓𑀲𑀢𑀲𑀗𑁆𑀓𑀼𑀯𑀺𑀳𑀢𑀜𑁆𑀳𑀺 𑀦𑀺𑀩𑁆𑀩𑀮𑀺𑀓𑀁 𑀦 𑀳𑁄𑀢𑀺, 𑀲𑀗𑁆𑀓𑀼𑀲𑀢𑁂𑀦 𑀯𑀺𑀳𑀢𑀁 𑀪𑁂𑀭𑀺𑀢𑀮𑀁 𑀯𑀺𑀬 𑀦𑀺𑀩𑁆𑀩𑀮𑀺𑀓𑀁 𑀳𑁄𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀉𑀓𑁆𑀓𑀽𑀮𑀯𑀺𑀓𑁆𑀓𑀽𑀮𑀦𑁆𑀢𑀺 𑀉𑀘𑁆𑀘𑀦𑀻𑀘𑀁 𑀣𑀮𑀝𑁆𑀞𑀸𑀦𑀁 𑀦𑀺𑀦𑁆𑀦𑀝𑁆𑀞𑀸𑀦𑀁. 𑀦𑀤𑀻𑀯𑀺𑀤𑀼𑀕𑁆𑀕𑀦𑁆𑀢𑀺 𑀦𑀤𑀺𑀬𑁄 𑀘𑁂𑀯 𑀤𑀼𑀕𑁆𑀕𑀫𑀝𑁆𑀞𑀸𑀦𑀜𑁆𑀘. 𑀧𑀣𑀯𑀻𑀲𑀜𑁆𑀜𑀁 𑀧𑀝𑀺𑀘𑁆𑀘 𑀫𑀦𑀲𑀺 𑀓𑀭𑁄𑀢𑀺 𑀏𑀓𑀢𑁆𑀢𑀦𑁆𑀢𑀺 𑀓𑀲𑀺𑀡𑀧𑀣𑀯𑀺𑀬𑀁𑀬𑁂𑀯 𑀧𑀝𑀺𑀘𑁆𑀘 𑀲𑀫𑁆𑀪𑀽𑀢𑀁 𑀏𑀓𑀁 𑀲𑀜𑁆𑀜𑀁 𑀫𑀦𑀲𑀺 𑀓𑀭𑁄𑀢𑀺. 𑀤𑀭𑀣𑀫𑀢𑁆𑀢𑀸𑀢𑀺 𑀇𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀯𑀸𑀭𑁂𑀲𑀼 𑀧𑀯𑀢𑁆𑀢𑀤𑀭𑀣𑀯𑀲𑁂𑀦 𑀤𑀭𑀣𑀫𑀢𑁆𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁧𑁮𑁨. 𑀅𑀦𑀺𑀫𑀺𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀲𑀫𑀸𑀥𑀺𑀁. 𑀲𑁄 𑀳𑀺 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀸𑀤𑀺𑀯𑀺𑀭𑀳𑀺𑀢𑁄 𑀅𑀦𑀺𑀫𑀺𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀫𑁂𑀯 𑀓𑀸𑀬𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀬 𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀇𑀫𑀫𑁂𑀯𑀸𑀢𑀺 𑀇𑀫𑀁 𑀏𑀯 𑀘𑀢𑀼𑀫𑀳𑀸𑀪𑀽𑀢𑀺𑀓𑀁. 𑀲𑀴𑀸𑀬𑀢𑀦𑀺𑀓𑀦𑁆𑀢𑀺 𑀲𑀴𑀸𑀬𑀢𑀦𑀧𑀝𑀺𑀲𑀁𑀬𑀼𑀢𑁆𑀢𑀁. 𑀚𑀻𑀯𑀺𑀢𑀧𑀘𑁆𑀘𑀬𑀸𑀢𑀺 𑀬𑀸𑀯 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀦𑀁 𑀧𑀯𑀢𑁆𑀢𑀺, 𑀢𑀸𑀯 𑀚𑀻𑀯𑀺𑀢𑀧𑀘𑁆𑀘𑀬𑀸 𑀧𑀯𑀢𑁆𑀢𑀤𑀭𑀣𑀫𑀢𑁆𑀢𑀸 𑀅𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁧𑁮𑁩. 𑀧𑀼𑀦 𑀅𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀬 𑀧𑀝𑀺𑀯𑀺𑀧𑀲𑁆𑀲𑀦𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀓𑀸𑀫𑀸𑀲𑀯𑀁 𑀧𑀝𑀺𑀘𑁆𑀘𑀸𑀢𑀺 𑀓𑀸𑀫𑀸𑀲𑀯𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀧𑀯𑀢𑁆𑀢𑀤𑀭𑀣𑀸 𑀇𑀥 𑀦 𑀲𑀦𑁆𑀢𑀺, 𑀅𑀭𑀺𑀬𑀫𑀕𑁆𑀕𑁂 𑀘𑁂𑀯 𑀅𑀭𑀺𑀬𑀨𑀮𑁂 𑀘 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀫𑁂𑀯 𑀓𑀸𑀬𑀦𑁆𑀢𑀺 𑀇𑀫𑀁 𑀉𑀧𑀸𑀤𑀺𑀲𑁂𑀲𑀤𑀭𑀣𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀇𑀢𑀺 𑀫𑀦𑀼𑀲𑁆𑀲𑀲𑀜𑁆𑀜𑀸𑀬 𑀕𑀸𑀫𑀲𑀜𑁆𑀜𑀁 𑀦𑀺𑀯𑀢𑁆𑀢𑁂𑀢𑁆𑀯𑀸…𑀧𑁂… 𑀫𑀕𑁆𑀕𑁂𑀦 𑀯𑀺𑀧𑀲𑁆𑀲𑀦𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀅𑀘𑁆𑀘𑀦𑁆𑀢𑀲𑀼𑀜𑁆𑀜𑀢𑀸 𑀦𑀸𑀫 𑀤𑀲𑁆𑀲𑀺𑀢𑀸 𑀳𑁄𑀢𑀺.

𑁧𑁮𑁪. 𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀉𑀢𑁆𑀢𑀭𑀯𑀺𑀭𑀳𑀺𑀢𑀁 𑀲𑀩𑁆𑀩𑀲𑁂𑀝𑁆𑀞𑀁. 𑀲𑀼𑀜𑁆𑀜𑀢𑀦𑁆𑀢𑀺 𑀲𑀼𑀜𑁆𑀜𑀢𑀨𑀮𑀲𑀫𑀸𑀧𑀢𑁆𑀢𑀺𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀢𑀻𑀢𑁂𑀧𑀺, 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀲𑀗𑁆𑀔𑀸𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸. 𑀅𑀦𑀸𑀕𑀢𑁂𑀧𑀺, 𑀏𑀢𑀭𑀳𑀺𑀧𑀺 𑀩𑀼𑀤𑁆𑀥𑀩𑀼𑀤𑁆𑀥𑀲𑀸𑀯𑀓𑀲𑀗𑁆𑀔𑀸𑀢𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀇𑀫𑀁𑀬𑁂𑀯 𑀧𑀭𑀺𑀲𑀼𑀤𑁆𑀥𑀁 𑀧𑀭𑀫𑀁 𑀅𑀦𑀼𑀢𑁆𑀢𑀭𑀁 𑀲𑀼𑀜𑁆𑀜𑀢𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀁𑀲𑀼 𑀯𑀺𑀳𑀭𑀺𑀲𑁆𑀲𑀦𑁆𑀢𑀺 𑀯𑀺𑀳𑀭𑀦𑁆𑀢𑀺 𑀘, 𑀢𑀲𑁆𑀫𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀘𑀽𑀴𑀲𑀼𑀜𑁆𑀜𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀫𑀳𑀸𑀲𑀼𑀜𑁆𑀜𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁫. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀲𑀼𑀜𑁆𑀜𑀢𑀲𑀼𑀢𑁆𑀢𑀁. 𑀢𑀢𑁆𑀣 𑀓𑀸𑀴𑀔𑁂𑀫𑀓𑀲𑁆𑀲𑀸𑀢𑀺 𑀙𑀯𑀺𑀯𑀡𑁆𑀡𑁂𑀦 𑀲𑁄 𑀓𑀸𑀴𑁄, 𑀔𑁂𑀫𑀓𑁄𑀢𑀺 𑀧𑀦𑀲𑁆𑀲 𑀦𑀸𑀫𑀁. 𑀯𑀺𑀳𑀸𑀭𑁄𑀢𑀺 𑀢𑀲𑁆𑀫𑀺𑀁𑀬𑁂𑀯 𑀦𑀺𑀕𑁆𑀭𑁄𑀥𑀸𑀭𑀸𑀫𑁂 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑀁 𑀫𑀸𑀧𑁂𑀢𑁆𑀯𑀸 𑀳𑀁𑀲𑀯𑀝𑁆𑀝𑀓𑀸𑀤𑀺𑀲𑁂𑀦𑀸𑀲𑀦𑀸𑀦𑀺 𑀘𑁂𑀯 𑀫𑀡𑁆𑀟𑀮𑀫𑀸𑀴𑀪𑁄𑀚𑀦𑀲𑀸𑀮𑀸𑀤𑀻𑀦𑀺 𑀘 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀓𑀢𑁄 𑀯𑀺𑀳𑀸𑀭𑁄. 𑀲𑀫𑁆𑀩𑀳𑀼𑀮𑀸𑀦𑀺 𑀲𑁂𑀦𑀸𑀲𑀦𑀸𑀦𑀻𑀢𑀺 𑀫𑀜𑁆𑀘𑁄 𑀧𑀻𑀞𑀁 𑀪𑀺𑀲𑀺𑀩𑀺𑀫𑁆𑀩𑁄𑀳𑀦𑀁 𑀢𑀝𑁆𑀝𑀺𑀓𑀸 𑀘𑀫𑁆𑀫𑀔𑀡𑁆𑀟𑁄 𑀢𑀺𑀡𑀲𑀦𑁆𑀣𑀸𑀭𑁄 𑀧𑀡𑁆𑀡𑀲𑀦𑁆𑀣𑀸𑀭𑁄 𑀧𑀮𑀸𑀮𑀲𑀦𑁆𑀣𑀸𑀭𑁄𑀢𑀺𑀆𑀤𑀻𑀦𑀺 𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀫𑀜𑁆𑀘𑁂𑀦 𑀫𑀜𑁆𑀘𑀁…𑀧𑁂… 𑀧𑀮𑀸𑀮𑀲𑀦𑁆𑀣𑀸𑀭𑁂𑀦𑁂𑀯 𑀧𑀮𑀸𑀮𑀲𑀦𑁆𑀣𑀸𑀭𑀁 𑀆𑀳𑀘𑁆𑀘 𑀞𑀧𑀺𑀢𑀸𑀦𑀺, 𑀕𑀡𑀪𑀺𑀓𑁆𑀔𑀽𑀦𑀁 𑀯𑀲𑀦𑀝𑁆𑀞𑀸𑀦𑀲𑀤𑀺𑀲𑀁 𑀅𑀳𑁄𑀲𑀺.

𑀲𑀫𑁆𑀩𑀳𑀼𑀮𑀸 𑀦𑀼 𑀔𑁄𑀢𑀺 𑀪𑀕𑀯𑀢𑁄 𑀩𑁄𑀥𑀺𑀧𑀮𑁆𑀮𑀗𑁆𑀓𑁂𑀬𑁂𑀯 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀲𑀫𑀼𑀕𑁆𑀖𑀸𑀝𑀺𑀢𑀢𑁆𑀢𑀸 𑀲𑀁𑀲𑀬𑁄 𑀦𑀸𑀫 𑀦𑀢𑁆𑀣𑀺, 𑀯𑀺𑀢𑀓𑁆𑀓𑀧𑀼𑀩𑁆𑀩𑀪𑀸𑀕𑀸 𑀧𑀼𑀘𑁆𑀙𑀸, 𑀯𑀺𑀢𑀓𑁆𑀓𑀧𑀼𑀩𑁆𑀩𑀪𑀸𑀕𑁂 𑀘𑀸𑀬𑀁 𑀦𑀼𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑁄. 𑀧𑀸𑀝𑀺𑀫𑀢𑁆𑀣𑀓𑀁 𑀕𑀘𑁆𑀙𑀦𑁆𑀢𑁂 𑀅𑀯𑀺𑀦𑀺𑀘𑁆𑀙𑀺𑀢𑁄 𑀦𑀸𑀫 𑀦 𑀳𑁄𑀢𑀺. 𑀇𑀢𑁄 𑀓𑀺𑀭 𑀧𑀼𑀩𑁆𑀩𑁂 𑀪𑀕𑀯𑀢𑀸 𑀤𑀲 𑀤𑁆𑀯𑀸𑀤𑀲 𑀪𑀺𑀓𑁆𑀔𑀽 𑀏𑀓𑀝𑁆𑀞𑀸𑀦𑁂 𑀯𑀲𑀦𑁆𑀢𑀸 𑀦 𑀤𑀺𑀝𑁆𑀞𑀧𑀼𑀩𑁆𑀩𑀸.

𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 𑀕𑀡𑀯𑀸𑀲𑁄 𑀦𑀸𑀫𑀸𑀬𑀁 𑀯𑀝𑁆𑀝𑁂 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑁄 𑀦𑀤𑀻𑀑𑀢𑀺𑀡𑁆𑀡𑀉𑀤𑀓𑀲𑀤𑀺𑀲𑁄, 𑀦𑀺𑀭𑀬𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀧𑁂𑀢𑁆𑀢𑀺𑀯𑀺𑀲𑀬𑀸𑀲𑀼𑀭𑀓𑀸𑀬𑁂𑀲𑀼𑀧𑀺, 𑀫𑀦𑀼𑀲𑁆𑀲𑀮𑁄𑀓-𑀤𑁂𑀯𑀮𑁄𑀓𑀩𑁆𑀭𑀳𑁆𑀫𑀮𑁄𑀓𑁂𑀲𑀼𑀧𑀺 𑀕𑀡𑀯𑀸𑀲𑁄𑀯 𑀆𑀘𑀺𑀡𑁆𑀡𑁄. 𑀤𑀲𑀬𑁄𑀚𑀦𑀲𑀳𑀲𑁆𑀲𑁄 𑀳𑀺 𑀦𑀺𑀭𑀬𑁄 𑀢𑀺𑀧𑀼𑀘𑀼𑀡𑁆𑀡𑀪𑀭𑀺𑀢𑀸 𑀦𑀸𑀴𑀺 𑀯𑀺𑀬 𑀲𑀢𑁆𑀢𑁂𑀳𑀺 𑀦𑀺𑀭𑀦𑁆𑀢𑀭𑁄, 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀓𑀫𑁆𑀫𑀓𑀸𑀭𑀡𑀓𑀭𑀡𑀝𑁆𑀞𑀸𑀦𑁂 𑀲𑀢𑁆𑀢𑀸𑀦𑀁 𑀧𑀫𑀸𑀡𑀁 𑀯𑀸 𑀧𑀭𑀺𑀘𑁆𑀙𑁂𑀤𑁄 𑀯𑀸 𑀦𑀢𑁆𑀣𑀺, 𑀢𑀣𑀸 𑀯𑀸𑀲𑀻𑀳𑀺 𑀢𑀘𑁆𑀙𑀦𑀸𑀤𑀺𑀞𑀸𑀦𑁂𑀲𑀼, 𑀇𑀢𑀺 𑀕𑀡𑀪𑀽𑀢𑀸𑀯 𑀧𑀘𑁆𑀘𑀦𑁆𑀢𑀺. 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀏𑀓𑀲𑁆𑀫𑀺𑀁 𑀯𑀫𑁆𑀫𑀺𑀓𑁂 𑀉𑀧𑀲𑀺𑀓𑀸𑀦𑀁 𑀧𑀫𑀸𑀡𑀁 𑀯𑀸 𑀧𑀭𑀺𑀘𑁆𑀙𑁂𑀤𑁄 𑀯𑀸 𑀦𑀢𑁆𑀣𑀺, 𑀢𑀣𑀸 𑀏𑀓𑁂𑀓𑀩𑀺𑀮𑀸𑀤𑀻𑀲𑀼𑀧𑀺 𑀓𑀺𑀧𑀺𑀮𑁆𑀮𑀺𑀓𑀸𑀤𑀻𑀦𑀁. 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀫𑁆𑀧𑀺 𑀕𑀡𑀯𑀸𑀲𑁄𑀯. 𑀧𑁂𑀢𑀦𑀕𑀭𑀸𑀦𑀺 𑀘 𑀕𑀸𑀯𑀼𑀢𑀺𑀓𑀸𑀦𑀺 𑀅𑀟𑁆𑀠𑀬𑁄𑀚𑀦𑀺𑀓𑀸𑀦𑀺𑀧𑀺 𑀧𑁂𑀢𑀪𑀭𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀏𑀯𑀁 𑀧𑁂𑀢𑁆𑀢𑀺𑀯𑀺𑀲𑀬𑁂𑀧𑀺 𑀕𑀡𑀯𑀸𑀲𑁄𑀯. 𑀅𑀲𑀼𑀭𑀪𑀯𑀦𑀁 𑀤𑀲𑀬𑁄𑀚𑀦𑀲𑀳𑀲𑁆𑀲𑀁 𑀓𑀡𑁆𑀡𑁂 𑀧𑀓𑁆𑀔𑀺𑀢𑁆𑀢𑀲𑀽𑀘𑀺𑀬𑀸 𑀓𑀡𑁆𑀡𑀩𑀺𑀮𑀁 𑀯𑀺𑀬 𑀳𑁄𑀢𑀺. 𑀇𑀢𑀺 𑀅𑀲𑀼𑀭𑀓𑀸𑀬𑁂𑀧𑀺 𑀕𑀡𑀯𑀸𑀲𑁄𑀯. 𑀫𑀦𑀼𑀲𑁆𑀲𑀮𑁄𑀓𑁂 𑀲𑀸𑀯𑀢𑁆𑀣𑀺𑀬𑀁 𑀲𑀢𑁆𑀢𑀧𑀡𑁆𑀡𑀸𑀲 𑀓𑀼𑀮𑀲𑀢𑀲𑀳𑀲𑁆𑀲𑀸𑀦𑀺, 𑀭𑀸𑀚𑀕𑀳𑁂 𑀅𑀦𑁆𑀢𑁄 𑀘 𑀩𑀳𑀺 𑀘 𑀅𑀝𑁆𑀞𑀸𑀭𑀲 𑀫𑀦𑀼𑀲𑁆𑀲𑀓𑁄𑀝𑀺𑀬𑁄 𑀯𑀲𑀺𑀁𑀲𑀼. 𑀏𑀯𑀁 𑀅𑀜𑁆𑀜𑁂𑀲𑀼𑀧𑀺 𑀞𑀸𑀦𑁂𑀲𑀽𑀢𑀺 𑀫𑀦𑀼𑀲𑁆𑀲𑀮𑁄𑀓𑁂𑀧𑀺 𑀕𑀡𑀯𑀸𑀲𑁄𑀯. 𑀪𑀼𑀫𑁆𑀫𑀤𑁂𑀯𑀢𑀸 𑀆𑀤𑀺𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑀩𑁆𑀭𑀳𑁆𑀫𑀮𑁄𑀓𑁂𑀲𑀼𑀧𑀺 𑀕𑀡𑀯𑀸𑀲𑁄𑀯. 𑀏𑀓𑁂𑀓𑀲𑁆𑀲 𑀳𑀺 𑀤𑁂𑀯𑀧𑀼𑀢𑁆𑀢𑀲𑁆𑀲 𑀅𑀟𑁆𑀠𑀢𑀺𑀬𑀸 𑀦𑀸𑀝𑀓𑀓𑁄𑀝𑀺𑀬𑁄 𑀳𑁄𑀦𑁆𑀢𑀺, 𑀦𑀯𑀧𑀺 𑀓𑁄𑀝𑀺𑀬𑁄 𑀳𑁄𑀦𑁆𑀢𑀺, 𑀏𑀓𑀝𑁆𑀞𑀸𑀦𑁂 𑀤𑀲𑀲𑀳𑀲𑁆𑀲𑀸𑀧𑀺 𑀩𑁆𑀭𑀳𑁆𑀫𑀸𑀦𑁄 𑀯𑀲𑀦𑁆𑀢𑀺.

𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀸 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀕𑀡𑀯𑀸𑀲𑀯𑀺𑀤𑁆𑀥𑀁𑀲𑀦𑀢𑁆𑀣𑀁 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸, 𑀇𑀫𑁂 𑀘 𑀪𑀺𑀓𑁆𑀔𑀽 𑀇𑀢𑁄 𑀧𑀝𑁆𑀞𑀸𑀬𑁂𑀯 𑀕𑀡𑀁 𑀩𑀦𑁆𑀥𑀺𑀢𑁆𑀯𑀸 𑀕𑀡𑀸𑀪𑀺𑀭𑀢𑀸 𑀚𑀸𑀢𑀸 𑀅𑀦𑀦𑀼𑀘𑁆𑀙𑀯𑀺𑀓𑀁 𑀓𑀭𑁄𑀦𑁆𑀢𑀻’’𑀢𑀺. 𑀲𑁄 𑀥𑀫𑁆𑀫𑀲𑀁𑀯𑁂𑀕𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀼𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 ‘𑀏𑀓𑀝𑁆𑀞𑀸𑀦𑁂 𑀤𑁆𑀯𑀻𑀳𑀺 𑀪𑀺𑀓𑁆𑀔𑀽𑀳𑀺 𑀦 𑀯𑀲𑀺𑀢𑀩𑁆𑀩’𑀦𑁆𑀢𑀺 𑀲𑀓𑁆𑀓𑀸 𑀪𑀯𑁂𑀬𑁆𑀬 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀼𑀁, 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀬𑁆𑀬𑀁, 𑀦 𑀔𑁄 𑀧𑀦𑁂𑀢𑀁 𑀲𑀓𑁆𑀓𑀸. 𑀳𑀦𑁆𑀤𑀸𑀳𑀁 𑀫𑀳𑀸𑀲𑀼𑀜𑁆𑀜𑀢𑀸𑀧𑀝𑀺𑀧𑀢𑁆𑀢𑀺𑀁 𑀦𑀸𑀫 𑀲𑀼𑀢𑁆𑀢𑀦𑁆𑀢𑀁 𑀤𑁂𑀲𑁂𑀫𑀺, 𑀬𑀁 𑀲𑀺𑀓𑁆𑀔𑀸𑀓𑀸𑀫𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺 𑀯𑀺𑀬 𑀦𑀕𑀭𑀤𑁆𑀯𑀸𑀭𑁂 𑀦𑀺𑀓𑁆𑀔𑀺𑀢𑁆𑀢𑀲𑀩𑁆𑀩𑀓𑀸𑀬𑀺𑀓𑀆𑀤𑀸𑀲𑁄 𑀯𑀺𑀬 𑀘 𑀪𑀯𑀺𑀲𑁆𑀲𑀢𑀺. 𑀢𑀢𑁄 𑀬𑀣𑀸 𑀦𑀸𑀫𑁂𑀓𑀲𑁆𑀫𑀺𑀁 𑀆𑀤𑀸𑀲𑁂 𑀔𑀢𑁆𑀢𑀺𑀬𑀸𑀤𑀬𑁄 𑀅𑀢𑁆𑀢𑀦𑁄 𑀯𑀚𑁆𑀚𑀁 𑀤𑀺𑀲𑁆𑀯𑀸 𑀢𑀁 𑀧𑀳𑀸𑀬 𑀅𑀦𑀯𑀚𑁆𑀚𑀸 𑀳𑁄𑀦𑁆𑀢𑀺, 𑀏𑀯𑀫𑁂𑀯𑀁 𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂𑀧𑀺 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀇𑀫𑀁 𑀲𑀼𑀢𑁆𑀢𑀁 𑀆𑀯𑀚𑁆𑀚𑀺𑀢𑁆𑀯𑀸 𑀕𑀡𑀁 𑀯𑀺𑀦𑁄𑀤𑁂𑀢𑁆𑀯𑀸 𑀏𑀓𑀻𑀪𑀸𑀯𑀸𑀪𑀺𑀭𑀢𑀸 𑀓𑀼𑀮𑀧𑀼𑀢𑁆𑀢𑀸 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺. 𑀪𑀕𑀯𑀢𑁄 𑀘 𑀫𑀦𑁄𑀭𑀣𑀁 𑀧𑀽𑀭𑁂𑀦𑁆𑀢𑀸 𑀯𑀺𑀬 𑀇𑀫𑀁 𑀲𑀼𑀢𑁆𑀢𑀁 𑀆𑀯𑀚𑁆𑀚𑀺𑀢𑁆𑀯𑀸 𑀕𑀡𑀁 𑀯𑀺𑀦𑁄𑀤𑁂𑀢𑁆𑀯𑀸 𑀯𑀝𑁆𑀝𑀤𑀼𑀓𑁆𑀔𑀁 𑀔𑁂𑀧𑁂𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑀸 𑀓𑀼𑀮𑀧𑀼𑀢𑁆𑀢𑀸 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸. 𑀯𑀸𑀮𑀺𑀓𑀧𑀺𑀝𑁆𑀞𑀺𑀯𑀺𑀳𑀸𑀭𑁂𑀧𑀺 𑀳𑀺 𑀆𑀪𑀺𑀥𑀫𑁆𑀫𑀺𑀓𑀅𑀪𑀬𑀢𑁆𑀣𑁂𑀭𑁄 𑀦𑀸𑀫 𑀯𑀲𑁆𑀲𑀽𑀧𑀦𑀸𑀬𑀺𑀓𑀲𑀫𑀬𑁂 𑀲𑀫𑁆𑀩𑀳𑀼𑀮𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀇𑀫𑀁 𑀲𑀼𑀢𑁆𑀢𑀁 𑀲𑀜𑁆𑀛𑀸𑀬𑀺𑀢𑁆𑀯𑀸 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀏𑀯𑀁 𑀓𑀸𑀭𑁂𑀢𑀺, 𑀫𑀬𑀁 𑀓𑀺𑀁 𑀓𑀭𑁄𑀫𑀸’’𑀢𑀺 𑀆𑀳. 𑀢𑁂 𑀲𑀩𑁆𑀩𑁂𑀧𑀺 𑀅𑀦𑁆𑀢𑁄𑀯𑀲𑁆𑀲𑁂 𑀕𑀡𑀁 𑀯𑀺𑀦𑁄𑀤𑁂𑀢𑁆𑀯𑀸 𑀏𑀓𑀻𑀪𑀸𑀯𑀸𑀪𑀺𑀭𑀢𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀕𑀡𑀪𑁂𑀤𑀦𑀁 𑀦𑀸𑀫 𑀇𑀤𑀁 𑀲𑀼𑀢𑁆𑀢𑀦𑁆𑀢𑀺.

𑁧𑁮𑁬. 𑀖𑀝𑀸𑀬𑀸𑀢𑀺 𑀏𑀯𑀁𑀦𑀸𑀫𑀓𑀲𑁆𑀲 𑀲𑀓𑁆𑀓𑀲𑁆𑀲. 𑀯𑀺𑀳𑀸𑀭𑁂𑀢𑀺 𑀅𑀬𑀫𑁆𑀧𑀺 𑀯𑀺𑀳𑀸𑀭𑁄 𑀦𑀺𑀕𑁆𑀭𑁄𑀥𑀸𑀭𑀸𑀫𑀲𑁆𑀲𑁂𑀯 𑀏𑀓𑀤𑁂𑀲𑁂 𑀓𑀸𑀴𑀔𑁂𑀫𑀓𑀲𑁆𑀲 𑀯𑀺𑀳𑀸𑀭𑁄 𑀯𑀺𑀬 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀘𑀻𑀯𑀭𑀓𑀫𑁆𑀫𑀦𑁆𑀢𑀺 𑀚𑀺𑀡𑁆𑀡𑀫𑀮𑀺𑀦𑀸𑀦𑀁 𑀅𑀕𑁆𑀕𑀴𑀝𑁆𑀞𑀸𑀦𑀼𑀧𑁆𑀧𑀸𑀤𑀦𑀥𑁄𑀯𑀦𑀸𑀤𑀻𑀳𑀺 𑀓𑀢𑀧𑀭𑀺𑀪𑀡𑁆𑀟𑀫𑁆𑀧𑀺, 𑀘𑀻𑀯𑀭𑀢𑁆𑀣𑀸𑀬 𑀉𑀧𑁆𑀧𑀦𑁆𑀦𑀯𑀢𑁆𑀣𑀸𑀦𑀁 𑀯𑀺𑀘𑀸𑀭𑀡𑀲𑀺𑀩𑁆𑀩𑀦𑀸𑀤𑀻𑀳𑀺 𑀅𑀓𑀢𑀁 𑀲𑀁𑀯𑀺𑀥𑀸𑀦𑀫𑁆𑀧𑀺 𑀯𑀝𑁆𑀝𑀢𑀺, 𑀇𑀥 𑀧𑀦 𑀅𑀓𑀢𑀁 𑀲𑀁𑀯𑀺𑀥𑀸𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀫𑀦𑀼𑀲𑁆𑀲𑀸 𑀳𑀺 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀘𑀻𑀯𑀭𑀲𑀸𑀝𑀓𑁂 𑀅𑀤𑀁𑀲𑀼. 𑀢𑀲𑁆𑀫𑀸 𑀣𑁂𑀭𑁄 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀘𑀻𑀯𑀭𑀓𑀫𑁆𑀫𑀁 𑀅𑀓𑀸𑀲𑀺. 𑀢𑁂𑀧𑀺 𑀪𑀺𑀓𑁆𑀔𑀽 𑀧𑀸𑀢𑁄𑀯 𑀲𑀽𑀘𑀺𑀧𑀸𑀲𑀓𑀲𑁆𑀲 𑀧𑀜𑁆𑀜𑀸𑀬𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦𑀺𑀲𑀺𑀦𑁆𑀦𑀸 𑀅𑀧𑀜𑁆𑀜𑀸𑀬𑀦𑀓𑀸𑀮𑁂 𑀉𑀝𑁆𑀞𑀳𑀦𑁆𑀢𑀺. 𑀲𑀽𑀘𑀺𑀓𑀫𑁆𑀫𑁂 𑀦𑀺𑀝𑁆𑀞𑀺𑀢𑁂𑀬𑁂𑀯 𑀲𑁂𑀦𑀸𑀲𑀦𑀸𑀦𑀺 𑀲𑀁𑀯𑀺𑀤𑀳𑀺𑀲𑁆𑀲𑀸𑀫𑀸𑀢𑀺 𑀦 𑀲𑀁𑀯𑀺𑀤𑀳𑀺𑀁𑀲𑀼. 𑀘𑀻𑀯𑀭𑀓𑀸𑀭𑀲𑀫𑀬𑁄 𑀦𑁄𑀢𑀺 𑀣𑁂𑀭𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀤𑁆𑀥𑀸 𑀏𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀦 𑀧𑀝𑀺𑀲𑀸𑀫𑀺𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺, 𑀪𑀕𑀯𑀢𑀸 𑀘 𑀤𑀺𑀝𑁆𑀞𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺. 𑀇𑀢𑀺 𑀅𑀦𑀢𑁆𑀢𑀫𑀦𑁄 𑀲𑀢𑁆𑀣𑀸 𑀲𑀼𑀝𑁆𑀞𑀼 𑀦𑀺𑀕𑁆𑀕𑀳𑁂𑀢𑀼𑀓𑀸𑀫𑁄, 𑀇𑀫𑁂𑀲𑀁 𑀪𑀺𑀓𑁆𑀔𑀽𑀦𑀁 𑀉𑀧𑀢𑁆𑀣𑀫𑁆𑀪𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺; 𑀢𑀲𑁆𑀫𑀸 𑀏𑀯𑀫𑀸𑀳. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 ‘‘𑀦, 𑀪𑀦𑁆𑀢𑁂, 𑀇𑀫𑁂 𑀪𑀺𑀓𑁆𑀔𑀽 𑀓𑀫𑁆𑀫𑀸𑀭𑀸𑀫𑀸 𑀏𑀯, 𑀘𑀻𑀯𑀭𑀓𑀺𑀘𑁆𑀘𑀯𑀲𑁂𑀦 𑀧𑀦 𑀏𑀯𑀁 𑀯𑀲𑀦𑁆𑀢𑀻’’𑀢𑀺.

𑀦 𑀔𑁄, 𑀆𑀦𑀦𑁆𑀤𑀸𑀢𑀺, 𑀆𑀦𑀦𑁆𑀤, 𑀓𑀫𑁆𑀫𑀲𑀫𑀬𑁄 𑀯𑀸 𑀳𑁄𑀢𑀼 𑀅𑀓𑀫𑁆𑀫𑀲𑀫𑀬𑁄 𑀯𑀸, 𑀘𑀻𑀯𑀭𑀓𑀸𑀭𑀲𑀫𑀬𑁄 𑀯𑀸 𑀳𑁄𑀢𑀼 𑀅𑀘𑀻𑀯𑀭𑀓𑀸𑀭𑀲𑀫𑀬𑁄 𑀯𑀸, 𑀅𑀣 𑀔𑁄 𑀲𑀗𑁆𑀕𑀡𑀺𑀓𑀸𑀭𑀸𑀫𑁄 𑀪𑀺𑀓𑁆𑀔𑀼 𑀦 𑀲𑁄𑀪𑀢𑀺𑀬𑁂𑀯. 𑀫𑀸 𑀢𑁆𑀯𑀁 𑀅𑀦𑀼𑀧𑀢𑁆𑀣𑀫𑁆𑀪𑀝𑁆𑀞𑀸𑀦𑁂 𑀉𑀧𑀢𑁆𑀣𑀫𑁆𑀪𑁄 𑀅𑀳𑁄𑀲𑀻𑀢𑀺. 𑀢𑀢𑁆𑀣 𑀲𑀗𑁆𑀕𑀡𑀺𑀓𑀸𑀢𑀺 𑀲𑀓𑀧𑀭𑀺𑀲𑀲𑀫𑁄𑀥𑀸𑀦𑀁. 𑀕𑀡𑁄𑀢𑀺 𑀦𑀸𑀦𑀸𑀚𑀦𑀲𑀫𑁄𑀥𑀸𑀦𑀁. 𑀇𑀢𑀺 𑀲𑀗𑁆𑀕𑀡𑀺𑀓𑀸𑀭𑀸𑀫𑁄 𑀯𑀸 𑀳𑁄𑀢𑀼 𑀕𑀡𑀸𑀭𑀸𑀫𑁄 𑀯𑀸, 𑀲𑀩𑁆𑀩𑀣𑀸𑀧𑀺 𑀕𑀡𑀩𑀸𑀳𑀼𑀮𑁆𑀮𑀸𑀪𑀺𑀭𑀢𑁄 𑀕𑀡𑀩𑀦𑁆𑀥𑀦𑀩𑀤𑁆𑀥𑁄 𑀪𑀺𑀓𑁆𑀔𑀼 𑀦 𑀲𑁄𑀪𑀢𑀺. 𑀧𑀘𑁆𑀙𑀸𑀪𑀢𑁆𑀢𑁂 𑀧𑀦 𑀤𑀺𑀯𑀸𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀲𑀼𑀥𑁄𑀢𑀳𑀢𑁆𑀣𑀧𑀸𑀤𑁄 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀏𑀓𑀸𑀭𑀸𑀫𑀢𑀫𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀩𑀼𑀤𑁆𑀥𑀲𑀸𑀲𑀦𑁂 𑀲𑁄𑀪𑀢𑀺. 𑀦𑁂𑀓𑁆𑀔𑀫𑁆𑀫𑀲𑀼𑀔𑀦𑁆𑀢𑀺 𑀓𑀸𑀫𑀢𑁄 𑀦𑀺𑀓𑁆𑀔𑀦𑁆𑀢𑀲𑁆𑀲 𑀲𑀼𑀔𑀁. 𑀧𑀯𑀺𑀯𑁂𑀓𑀲𑀼𑀔𑀫𑁆𑀧𑀺 𑀓𑀸𑀫𑀧𑀯𑀺𑀯𑁂𑀓𑀲𑀼𑀔𑀫𑁂𑀯. 𑀭𑀸𑀕𑀸𑀤𑀻𑀦𑀁 𑀧𑀦 𑀯𑀽𑀧𑀲𑀫𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀉𑀧𑀲𑀫𑀲𑀼𑀔𑀁. 𑀫𑀕𑁆𑀕𑀲𑀫𑁆𑀩𑁄𑀥𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀲𑀫𑁆𑀩𑁄𑀥𑀺𑀲𑀼𑀔𑀁. 𑀦𑀺𑀓𑀸𑀫𑀮𑀸𑀪𑀻𑀢𑀺 𑀓𑀸𑀫𑀮𑀸𑀪𑀻 𑀇𑀘𑁆𑀙𑀺𑀢𑀮𑀸𑀪𑀻. 𑀅𑀓𑀺𑀘𑁆𑀙𑀮𑀸𑀪𑀻𑀢𑀺 𑀅𑀤𑀼𑀓𑁆𑀔𑀮𑀸𑀪𑀻. 𑀅𑀓𑀲𑀺𑀭𑀮𑀸𑀪𑀻𑀢𑀺 𑀯𑀺𑀧𑀼𑀮𑀮𑀸𑀪𑀻.

𑀲𑀸𑀫𑀸𑀬𑀺𑀓𑀦𑁆𑀢𑀺 𑀅𑀧𑁆𑀧𑀺𑀢𑀧𑁆𑀧𑀺𑀢𑀲𑀫𑀬𑁂 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀁. 𑀓𑀦𑁆𑀢𑀦𑁆𑀢𑀺 𑀫𑀦𑀸𑀧𑀁. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀭𑀽𑀧𑀸𑀭𑀽𑀧𑀸𑀯𑀘𑀭𑀘𑀺𑀢𑁆𑀢𑀯𑀺𑀫𑀼𑀢𑁆𑀢𑀺𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀘𑀢𑁆𑀢𑀸𑀭𑀺 𑀘 𑀛𑀸𑀦𑀸𑀦𑀺 𑀘𑀢𑀲𑁆𑀲𑁄 𑀘 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄, 𑀅𑀬𑀁 𑀲𑀸𑀫𑀸𑀬𑀺𑀓𑁄 𑀯𑀺𑀫𑁄𑀓𑁆𑀔𑁄’’𑀢𑀺 (𑀧𑀝𑀺. 𑀫. 𑁧.𑁨𑁧𑁩). 𑀅𑀲𑀸𑀫𑀸𑀬𑀺𑀓𑀦𑁆𑀢𑀺 𑀦 𑀲𑀫𑀬𑀯𑀲𑁂𑀦 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀁, 𑀅𑀣 𑀔𑁄 𑀅𑀘𑁆𑀘𑀦𑁆𑀢𑀯𑀺𑀫𑀼𑀢𑁆𑀢𑀁 𑀮𑁄𑀓𑀼𑀢𑁆𑀢𑀭𑀁 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀘𑀢𑁆𑀢𑀸𑀭𑁄 𑀘 𑀅𑀭𑀺𑀬𑀫𑀕𑁆𑀕𑀸 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀅𑀬𑀁 𑀅𑀲𑀸𑀫𑀸𑀬𑀺𑀓𑁄 𑀯𑀺𑀫𑁄𑀓𑁆𑀔𑁄’’𑀢𑀺. 𑀅𑀓𑀼𑀧𑁆𑀧𑀦𑁆𑀢𑀺 𑀓𑀺𑀮𑁂𑀲𑁂𑀳𑀺 𑀅𑀓𑁄𑀧𑁂𑀢𑀩𑁆𑀩𑀁.

𑀏𑀢𑁆𑀢𑀸𑀯𑀢𑀸 𑀓𑀺𑀁 𑀓𑀣𑀺𑀢𑀁 𑀳𑁄𑀢𑀺? 𑀲𑀗𑁆𑀕𑀡𑀺𑀓𑀸𑀭𑀸𑀫𑁄 𑀪𑀺𑀓𑁆𑀔𑀼 𑀕𑀡𑀩𑀦𑁆𑀥𑀦𑀩𑀤𑁆𑀥𑁄 𑀦𑁂𑀯 𑀮𑁄𑀓𑀺𑀬𑀕𑀼𑀡𑀁, 𑀦 𑀘 𑀮𑁄𑀓𑀼𑀢𑁆𑀢𑀭𑀕𑀼𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀕𑀡𑀁 𑀯𑀺𑀦𑁄𑀤𑁂𑀢𑁆𑀯𑀸 𑀧𑀦 𑀏𑀓𑀸𑀪𑀺𑀭𑀢𑁄 𑀲𑀓𑁆𑀓𑁄𑀢𑀺. 𑀢𑀣𑀸 𑀳𑀺 𑀯𑀺𑀧𑀲𑁆𑀲𑀻 𑀩𑁄𑀥𑀺𑀲𑀢𑁆𑀢𑁄 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀩𑁆𑀩𑀚𑀺𑀢𑀲𑀳𑀲𑁆𑀲𑁂𑀳𑀺 𑀧𑀭𑀺𑀯𑀼𑀢𑁄 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀯𑀺𑀘𑀭𑀦𑁆𑀢𑁄 𑀲𑀩𑁆𑀩𑀜𑁆𑀜𑀼𑀕𑀼𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀕𑀡𑀁 𑀯𑀺𑀦𑁄𑀤𑁂𑀢𑁆𑀯𑀸 𑀲𑀢𑁆𑀢𑀤𑀺𑀯𑀲𑁂 𑀏𑀓𑀻𑀪𑀸𑀯𑀸𑀪𑀺𑀭𑀢𑁄 𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀲𑀩𑁆𑀩𑀜𑁆𑀜𑀼𑀕𑀼𑀡𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀧𑀜𑁆𑀘𑀯𑀕𑁆𑀕𑀺𑀬𑁂𑀳𑀺 𑀲𑀤𑁆𑀥𑀺𑀁 𑀙𑀩𑁆𑀩𑀲𑁆𑀲𑀸𑀦𑀺 𑀯𑀺𑀘𑀭𑀦𑁆𑀢𑁄 𑀲𑀩𑁆𑀩𑀜𑁆𑀜𑀼𑀕𑀼𑀡𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀢𑁂𑀲𑀼 𑀧𑀓𑁆𑀓𑀦𑁆𑀢𑁂𑀲𑀼 𑀏𑀓𑀻𑀪𑀸𑀯𑀸𑀪𑀺𑀭𑀢𑁄 𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀲𑀩𑁆𑀩𑀜𑁆𑀜𑀼𑀕𑀼𑀡𑀁 𑀦𑀺𑀩𑁆𑀩𑀢𑁆𑀢𑁂𑀲𑀺.

𑀏𑀯𑀁 𑀲𑀗𑁆𑀕𑀡𑀺𑀓𑀸𑀭𑀸𑀫𑀲𑁆𑀲 𑀕𑀼𑀡𑀸𑀥𑀺𑀕𑀫𑀸𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀤𑁄𑀲𑀼𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀦𑀸𑀳𑀁 𑀆𑀦𑀦𑁆𑀤𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀭𑀽𑀧𑀦𑁆𑀢𑀺 𑀲𑀭𑀻𑀭𑀁. 𑀬𑀢𑁆𑀣 𑀭𑀢𑁆𑀢𑀲𑁆𑀲𑀸𑀢𑀺 𑀬𑀲𑁆𑀫𑀺𑀁 𑀭𑀽𑀧𑁂 𑀭𑀸𑀕𑀯𑀲𑁂𑀦 𑀭𑀢𑁆𑀢𑀲𑁆𑀲. 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀬𑀲𑁆𑀫𑀺𑀁 𑀭𑀽𑀧𑁂 𑀭𑀢𑁆𑀢𑀲𑁆𑀲 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑀁 𑀭𑀽𑀧𑀁 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀅𑀣 𑀔𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀦𑀁 𑀤𑀲𑀩𑀮𑀲𑀸𑀯𑀓𑀢𑁆𑀢𑀼𑀧𑀕𑀫𑀦𑀲𑀗𑁆𑀔𑀸𑀢𑁂𑀦 𑀅𑀜𑁆𑀜𑀣𑀸𑀪𑀸𑀯𑁂𑀦 𑀲𑀜𑁆𑀘𑀬𑀲𑁆𑀲 𑀯𑀺𑀬, 𑀉𑀧𑀸𑀮𑀺𑀕𑀳𑀧𑀢𑀺𑀦𑁄 𑀅𑀜𑁆𑀜𑀣𑀸𑀪𑀸𑀯𑁂𑀦 𑀦𑀸𑀝𑀧𑀼𑀢𑁆𑀢𑀲𑁆𑀲 𑀯𑀺𑀬, 𑀧𑀺𑀬𑀚𑀸𑀢𑀺𑀓𑀲𑀼𑀢𑁆𑀢𑁂 𑀲𑁂𑀝𑁆𑀞𑀺𑀆𑀤𑀻𑀦𑀁 𑀯𑀺𑀬 𑀘 𑀉𑀧𑁆𑀧𑀚𑁆𑀚𑀦𑁆𑀢𑀺𑀬𑁂𑀯.

𑁧𑁮𑁭. 𑀅𑀬𑀁 𑀔𑁄 𑀧𑀦𑀸𑀦𑀦𑁆𑀤𑀸𑀢𑀺 𑀓𑁄 𑀅𑀦𑀼𑀲𑀦𑁆𑀥𑀺? 𑀲𑀘𑁂 𑀳𑀺 𑀓𑁄𑀘𑀺 𑀤𑀼𑀩𑁆𑀩𑀼𑀤𑁆𑀥𑀻 𑀦𑀯𑀧𑀩𑁆𑀩𑀚𑀺𑀢𑁄 𑀯𑀤𑁂𑀬𑁆𑀬 𑁋 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀔𑁂𑀢𑁆𑀢𑀁 𑀧𑀯𑀺𑀝𑁆𑀞𑀸 𑀕𑀸𑀯𑀺𑀬𑁄 𑀯𑀺𑀬 𑀅𑀫𑁆𑀳𑁂𑀬𑁂𑀯 𑀕𑀡𑀢𑁄 𑀦𑀻𑀳𑀭𑀢𑀺, 𑀏𑀓𑀻𑀪𑀸𑀯𑁂 𑀦𑀺𑀬𑁄𑀚𑁂𑀢𑀺, 𑀲𑀬𑀁 𑀧𑀦 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀳𑀺 𑀧𑀭𑀺𑀯𑀼𑀢𑁄 𑀯𑀺𑀳𑀭𑀢𑀻’’𑀢𑀺, 𑀢𑀲𑁆𑀲 𑀯𑀘𑀦𑁄𑀓𑀸𑀲𑀼𑀧𑀘𑁆𑀙𑁂𑀤𑀦𑀢𑁆𑀣𑀁 𑁋 ‘‘𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀸𑀬 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄𑀧𑀺 𑀢𑀣𑀸𑀕𑀢𑁄 𑀏𑀓𑀓𑁄𑀯𑀸’’𑀢𑀺 𑀤𑀲𑁆𑀲𑁂𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀦𑁆𑀢𑀺 𑀭𑀽𑀧𑀸𑀤𑀻𑀦𑀁 𑀲𑀗𑁆𑀔𑀦𑀺𑀫𑀺𑀢𑁆𑀢𑀸𑀦𑀁. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀯𑀺𑀲𑀬𑀚𑁆𑀛𑀢𑁆𑀢𑀁. 𑀲𑀼𑀜𑁆𑀜𑀢𑀦𑁆𑀢𑀺 𑀲𑀼𑀜𑁆𑀜𑀢𑀨𑀮𑀲𑀫𑀸𑀧𑀢𑁆𑀢𑀺𑀁. 𑀢𑀢𑁆𑀭 𑀘𑁂𑀢𑀺 𑀉𑀧𑀬𑁄𑀕𑀢𑁆𑀣𑁂 𑀪𑀼𑀫𑁆𑀫𑀁, 𑀢𑀁 𑀘𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀼𑀦 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀧𑀭𑀺𑀲𑀫𑀚𑁆𑀛𑁂 𑀞𑀺𑀢𑁄. 𑀯𑀺𑀯𑁂𑀓𑀦𑀺𑀦𑁆𑀦𑁂𑀦𑀸𑀢𑀺 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑁂𑀦. 𑀩𑁆𑀬𑀦𑁆𑀢𑀻𑀪𑀽𑀢𑁂𑀦𑀸𑀢𑀺 𑀆𑀲𑀯𑀝𑁆𑀞𑀸𑀦𑀻𑀬𑀥𑀫𑁆𑀫𑁂𑀳𑀺 𑀯𑀺𑀕𑀢𑀦𑁆𑀢𑁂𑀦 𑀦𑀺𑀲𑁆𑀲𑀝𑁂𑀦 𑀯𑀺𑀲𑀁𑀬𑀼𑀢𑁆𑀢𑁂𑀦. 𑀉𑀬𑁆𑀬𑁄𑀚𑀦𑀺𑀓𑀧𑀝𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀕𑀘𑁆𑀙𑀣 𑀢𑀼𑀫𑁆𑀳𑁂𑀢𑀺 𑀏𑀯𑀁 𑀉𑀬𑁆𑀬𑁄𑀚𑀦𑀺𑀓𑁂𑀦 𑀯𑀘𑀦𑁂𑀦 𑀧𑀝𑀺𑀲𑀁𑀬𑀼𑀢𑁆𑀢𑀁.

𑀓𑀸𑀬 𑀧𑀦 𑀯𑁂𑀮𑀸𑀬 𑀪𑀕𑀯𑀸 𑀏𑀯𑀁 𑀓𑀣𑁂𑀢𑀺? 𑀧𑀘𑁆𑀙𑀸𑀪𑀢𑁆𑀢𑀓𑀺𑀘𑁆𑀘𑀯𑁂𑀮𑀸𑀬, 𑀯𑀸 𑀧𑀼𑀭𑀺𑀫𑀬𑀸𑀫𑀓𑀺𑀘𑁆𑀘𑀯𑁂𑀮𑀸𑀬 𑀯𑀸. 𑀪𑀕𑀯𑀸 𑀳𑀺 𑀧𑀘𑁆𑀙𑀸𑀪𑀢𑁆𑀢𑁂 𑀕𑀦𑁆𑀥𑀓𑀼𑀝𑀺𑀬𑀁 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑁆𑀯𑀸 𑀯𑀼𑀝𑁆𑀞𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀻𑀤𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀧𑀭𑀺𑀲𑀸 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀅𑀣 𑀪𑀕𑀯𑀸 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀼𑀤𑁆𑀥𑀸𑀲𑀦𑀯𑀭𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 𑀪𑁂𑀲𑀚𑁆𑀚𑀢𑁂𑀮𑀧𑀸𑀓𑀁 𑀕𑀡𑁆𑀳𑀦𑁆𑀢𑁄 𑀯𑀺𑀬 𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀺𑀯𑁂𑀓𑀦𑀺𑀦𑁆𑀦𑁂𑀦 𑀘𑀺𑀢𑁆𑀢𑁂𑀦 𑀧𑀭𑀺𑀲𑀁 𑀉𑀬𑁆𑀬𑁄𑀚𑁂𑀢𑀺. 𑀧𑀼𑀭𑀺𑀫𑀬𑀸𑀫𑁂𑀧𑀺 ‘‘𑀅𑀪𑀺𑀓𑁆𑀓𑀦𑁆𑀢𑀸 𑀔𑁄 𑀯𑀸𑀲𑁂𑀝𑁆𑀞𑀸 𑀭𑀢𑁆𑀢𑀺, 𑀬𑀲𑁆𑀲 𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀣𑀸’’𑀢𑀺 (𑀤𑀻. 𑀦𑀺. 𑁩.𑁨𑁯𑁯) 𑀏𑀯𑀁 𑀉𑀬𑁆𑀬𑁄𑀚𑁂𑀢𑀺. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀩𑁄𑀥𑀺𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀤𑁆𑀯𑁂 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺𑀧𑀺 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀸𑀦𑁂𑀯. 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤𑀸𑀢𑀺 𑀬𑀲𑁆𑀫𑀸 𑀲𑀼𑀜𑁆𑀜𑀢𑀸𑀯𑀺𑀳𑀸𑀭𑁄 𑀲𑀦𑁆𑀢𑁄 𑀧𑀡𑀻𑀢𑁄, 𑀢𑀲𑁆𑀫𑀸.

𑁧𑁮𑁮. 𑀅𑀚𑁆𑀛𑀢𑁆𑀢𑀫𑁂𑀯𑀸𑀢𑀺 𑀕𑁄𑀘𑀭𑀚𑁆𑀛𑀢𑁆𑀢𑀫𑁂𑀯. 𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀦𑁆𑀢𑀺 𑀇𑀥 𑀦𑀺𑀬𑀓𑀚𑁆𑀛𑀢𑁆𑀢𑀁, 𑀅𑀢𑁆𑀢𑀦𑁄 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀦𑀺𑀲𑁆𑀲𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀧𑀚𑀸𑀦𑁄 𑀳𑁄𑀢𑀻𑀢𑀺 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀅𑀲𑀫𑁆𑀧𑀚𑁆𑀚𑀦𑀪𑀸𑀯𑀚𑀸𑀦𑀦𑁂𑀦 𑀲𑀫𑁆𑀧𑀚𑀸𑀦𑁄. 𑀩𑀳𑀺𑀤𑁆𑀥𑀸𑀢𑀺 𑀧𑀭𑀲𑁆𑀲 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼. 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀢𑀺 𑀓𑀸𑀮𑁂𑀦 𑀅𑀚𑁆𑀛𑀢𑁆𑀢𑀁 𑀓𑀸𑀮𑁂𑀦 𑀩𑀳𑀺𑀤𑁆𑀥𑀸. 𑀆𑀦𑁂𑀜𑁆𑀚𑀦𑁆𑀢𑀺 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀪𑀯𑀺𑀲𑁆𑀲𑀸𑀫𑀸𑀢𑀺 𑀆𑀦𑁂𑀜𑁆𑀚𑀁 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀁 𑀫𑀦𑀲𑀺 𑀓𑀭𑁄𑀢𑀺.

𑀢𑀲𑁆𑀫𑀺𑀁𑀬𑁂𑀯 𑀧𑀼𑀭𑀺𑀫𑀲𑁆𑀫𑀺𑀦𑁆𑀢𑀺 𑀧𑀸𑀤𑀓𑀚𑁆𑀛𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀧𑀕𑀼𑀡𑀧𑀸𑀤𑀓𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀳𑀺 𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀁 𑀫𑀦𑀲𑀺𑀓𑀭𑁄𑀢𑁄 𑀢𑀢𑁆𑀣 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺. 𑀢𑀢𑁄 ‘‘𑀧𑀭𑀲𑁆𑀲 𑀲𑀦𑁆𑀢𑀸𑀦𑁂 𑀦𑀼 𑀔𑁄 𑀓𑀣’’𑀦𑁆𑀢𑀺 𑀩𑀳𑀺𑀤𑁆𑀥𑀸 𑀫𑀦𑀲𑀺 𑀓𑀭𑁄𑀢𑀺, 𑀢𑀢𑁆𑀣𑀧𑀺 𑀦 𑀧𑀓𑁆𑀔𑀦𑁆𑀤𑀢𑀺. 𑀢𑀢𑁄 𑁋 ‘‘𑀓𑀸𑀮𑁂𑀦 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂, 𑀓𑀸𑀮𑁂𑀦 𑀧𑀭𑀲𑁆𑀲 𑀲𑀦𑁆𑀢𑀸𑀦𑁂 𑀦𑀼 𑀔𑁄 𑀓𑀣’’𑀦𑁆𑀢𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀫𑀦𑀲𑀺 𑀓𑀭𑁄𑀢𑀺, 𑀢𑀢𑁆𑀣𑀧𑀺 𑀦 𑀧𑀓𑁆𑀔𑀦𑁆𑀤𑀢𑀺. 𑀢𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀳𑁄𑀢𑀼𑀓𑀸𑀫𑁄 ‘‘𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀁 𑀦𑀼 𑀔𑁄 𑀓𑀣’’𑀦𑁆𑀢𑀺 𑀆𑀦𑁂𑀜𑁆𑀚𑀁 𑀫𑀦𑀲𑀺 𑀓𑀭𑁄𑀢𑀺, 𑀢𑀢𑁆𑀣𑀧𑀺 𑀦 𑀧𑀓𑁆𑀔𑀦𑁆𑀤𑀢𑀺. 𑀇𑀤𑀸𑀦𑀺 𑁋 ‘‘𑀦 𑀫𑁂 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀻𑀢𑀺 𑀯𑀺𑀲𑁆𑀲𑀝𑁆𑀞𑀯𑀻𑀭𑀺𑀬𑁂𑀦 𑀉𑀧𑀝𑁆𑀞𑀸𑀓𑀸𑀤𑀻𑀦𑀁 𑀧𑀘𑁆𑀙𑀢𑁄 𑀦 𑀘𑀭𑀺𑀢𑀩𑁆𑀩𑀁, 𑀧𑀸𑀤𑀓𑀚𑁆𑀛𑀸𑀦𑀫𑁂𑀯 𑀧𑀦 𑀲𑀸𑀥𑀼𑀓𑀁 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺𑀓𑀸𑀢𑀩𑁆𑀩𑀁. 𑀏𑀯𑀫𑀲𑁆𑀲 𑀭𑀼𑀓𑁆𑀔𑁂 𑀙𑀺𑀦𑁆𑀤𑀢𑁄 𑀨𑀭𑀲𑀼𑀫𑁆𑀳𑀺 𑀅𑀯𑀳𑀦𑁆𑀢𑁂 𑀧𑀼𑀦 𑀦𑀺𑀲𑀺𑀢𑀁 𑀓𑀸𑀭𑁂𑀢𑁆𑀯𑀸 𑀙𑀺𑀦𑁆𑀤𑀦𑁆𑀢𑀲𑁆𑀲 𑀙𑀺𑀚𑁆𑀚𑁂𑀲𑀼 𑀨𑀭𑀲𑀼 𑀯𑀺𑀬 𑀓𑀫𑁆𑀫𑀝𑁆𑀞𑀸𑀦𑁂 𑀫𑀦𑀲𑀺𑀓𑀸𑀭𑁄 𑀯𑀳𑀢𑀻’’𑀢𑀺 𑀤𑀲𑁆𑀲𑁂𑀢𑀼𑀁 𑀢𑀲𑁆𑀫𑀺𑀁𑀬𑁂𑀯𑀸𑀢𑀺𑀆𑀤𑀺𑀫𑀸𑀳. 𑀇𑀤𑀸𑀦𑀺𑀲𑁆𑀲 𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀬𑀁 𑀬𑀁 𑀫𑀦𑀲𑀺 𑀓𑀭𑁄𑀢𑀺, 𑀢𑀢𑁆𑀣 𑀢𑀢𑁆𑀣 𑀫𑀦𑀲𑀺𑀓𑀸𑀭𑁄 𑀲𑀫𑁆𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀧𑀓𑁆𑀔𑀦𑁆𑀤𑀢𑀻𑀢𑀺 𑀆𑀳.

𑁧𑁮𑁯. 𑀇𑀫𑀺𑀦𑀸 𑀯𑀺𑀳𑀸𑀭𑁂𑀦𑀸𑀢𑀺 𑀇𑀫𑀺𑀦𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀺𑀳𑀸𑀭𑁂𑀦. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄𑀢𑀺 𑀇𑀢𑀺 𑀘𑀗𑁆𑀓𑀫𑀦𑁆𑀢𑁄𑀧𑀺 𑀢𑀲𑁆𑀫𑀺𑀁 𑀓𑀫𑁆𑀫𑀝𑁆𑀞𑀸𑀦𑁂 𑀲𑀫𑁆𑀧𑀚𑁆𑀚𑀫𑀸𑀦𑁂 ‘‘𑀲𑀫𑁆𑀧𑀚𑁆𑀚𑀢𑀺 𑀫𑁂 𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀚𑀸𑀦𑀦𑁂𑀦 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀲𑀬𑀢𑀻𑀢𑀺 𑀦𑀺𑀧𑀚𑁆𑀚𑀢𑀺. 𑀏𑀢𑁆𑀣 𑀓𑀜𑁆𑀘𑀺 𑀓𑀸𑀮𑀁 𑀘𑀗𑁆𑀓𑀫𑀺𑀢𑁆𑀯𑀸 𑁋 ‘‘𑀇𑀤𑀸𑀦𑀺 𑀏𑀢𑁆𑀢𑀓𑀁 𑀓𑀸𑀮𑀁 𑀘𑀗𑁆𑀓𑀫𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀜𑀢𑁆𑀯𑀸 𑀇𑀭𑀺𑀬𑀸𑀧𑀣𑀁 𑀅𑀳𑀸𑀧𑁂𑀢𑁆𑀯𑀸 𑀞𑀸𑀢𑀩𑁆𑀩𑀁. 𑀏𑀲 𑀦𑀬𑁄 𑀲𑀩𑁆𑀩𑀯𑀸𑀭𑁂𑀲𑀼. 𑀦 𑀓𑀣𑁂𑀲𑁆𑀲𑀸𑀫𑀻𑀢𑀺, 𑀇𑀢𑀺𑀳 𑀢𑀢𑁆𑀣𑀸𑀢𑀺 𑀏𑀯𑀁 𑀦 𑀓𑀣𑁂𑀲𑁆𑀲𑀸𑀫𑀻𑀢𑀺 𑀚𑀸𑀦𑀦𑁂𑀦 𑀢𑀢𑁆𑀣 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺.

𑀧𑀼𑀦 𑀤𑀼𑀢𑀺𑀬𑀯𑀸𑀭𑁂 𑀏𑀯𑀭𑀽𑀧𑀺𑀁 𑀓𑀣𑀁 𑀓𑀣𑁂𑀲𑁆𑀲𑀸𑀫𑀻𑀢𑀺 𑀚𑀸𑀦𑀦𑁂𑀦 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀫𑀣𑀯𑀺𑀧𑀲𑁆𑀲𑀦𑀸 𑀢𑀭𑀼𑀡𑀸𑀯, 𑀢𑀸𑀲𑀁 𑀅𑀦𑀼𑀭𑀓𑁆𑀔𑀡𑀢𑁆𑀣𑀁 𑁋

‘‘𑀆𑀯𑀸𑀲𑁄 𑀕𑁄𑀘𑀭𑁄 𑀪𑀲𑁆𑀲𑀁, 𑀧𑀼𑀕𑁆𑀕𑀮𑁄 𑀅𑀣 𑀪𑁄𑀚𑀦𑀁;

𑀉𑀢𑀼 𑀇𑀭𑀺𑀬𑀸𑀧𑀣𑁄 𑀘𑁂𑀯, 𑀲𑀧𑁆𑀧𑀸𑀬𑁄 𑀲𑁂𑀯𑀺𑀢𑀩𑁆𑀩𑀓𑁄’’𑀢𑀺.

𑀲𑀢𑁆𑀢 𑀲𑀧𑁆𑀧𑀸𑀬𑀸𑀦𑀺 𑀇𑀘𑁆𑀙𑀺𑀢𑀩𑁆𑀩𑀸𑀦𑀺. 𑀢𑁂𑀲𑀁 𑀤𑀲𑁆𑀲𑀦𑀢𑁆𑀣𑀫𑀺𑀤𑀁 𑀯𑀼𑀢𑁆𑀢𑀁. 𑀯𑀺𑀢𑀓𑁆𑀓𑀯𑀸𑀭𑁂𑀲𑀼 𑀅𑀯𑀺𑀢𑀓𑁆𑀓𑀦𑀲𑁆𑀲 𑀘 𑀯𑀺𑀢𑀓𑁆𑀓𑀦𑀲𑁆𑀲 𑀘 𑀚𑀸𑀦𑀦𑁂𑀦 𑀲𑀫𑁆𑀧𑀚𑀸𑀦𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁧𑁯𑁦. 𑀇𑀢𑀺 𑀯𑀺𑀢𑀓𑁆𑀓𑀧𑀳𑀸𑀦𑁂𑀦 𑀤𑁆𑀯𑁂 𑀫𑀕𑁆𑀕𑁂 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀢𑀢𑀺𑀬𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀁 𑀆𑀘𑀺𑀓𑁆𑀔𑀦𑁆𑀢𑁄 𑀧𑀜𑁆𑀘 𑀔𑁄 𑀇𑀫𑁂, 𑀆𑀦𑀦𑁆𑀤, 𑀓𑀸𑀫𑀕𑀼𑀡𑀸𑀢𑀺𑀆𑀤𑀺𑀫𑀸𑀳. 𑀆𑀬𑀢𑀦𑁂𑀢𑀺 𑀢𑁂𑀲𑀼𑀬𑁂𑀯 𑀓𑀸𑀫𑀕𑀼𑀡𑁂𑀲𑀼 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑁂. 𑀲𑀫𑀼𑀤𑀸𑀘𑀸𑀭𑁄𑀢𑀺 𑀲𑀫𑀼𑀤𑀸𑀘𑀭𑀡𑀢𑁄 𑀅𑀧𑁆𑀧𑀳𑀻𑀦𑀓𑀺𑀮𑁂𑀲𑁄. 𑀏𑀯𑀁 𑀲𑀦𑁆𑀢𑀦𑁆𑀢𑀺 𑀏𑀯𑀁 𑀯𑀺𑀚𑁆𑀚𑀫𑀸𑀦𑀫𑁂𑀯. 𑀲𑀫𑁆𑀧𑀚𑀸𑀦𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀅𑀲𑀫𑁆𑀧𑀢𑁆𑀢𑀺𑀚𑀸𑀦𑀦𑁂𑀦 𑀲𑀫𑁆𑀧𑀚𑀸𑀦𑁄. 𑀤𑀼𑀢𑀺𑀬𑀯𑀸𑀭𑁂 𑀏𑀯𑀁 𑀲𑀦𑁆𑀢𑀫𑁂𑀢𑀦𑁆𑀢𑀺 𑀏𑀯𑀁 𑀲𑀦𑁆𑀢𑁂 𑀏𑀢𑀁. 𑀲𑀫𑁆𑀧𑀚𑀸𑀦𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀚𑀸𑀦𑀦𑁂𑀦 𑀲𑀫𑁆𑀧𑀚𑀸𑀦𑁄. 𑀅𑀬𑀜𑁆𑀳𑀺 ‘‘𑀧𑀳𑀻𑀦𑁄 𑀦𑀼 𑀔𑁄 𑀫𑁂 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀙𑀦𑁆𑀤𑀭𑀸𑀕𑁄 𑀦𑁄’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀅𑀧𑀳𑀻𑀦𑀪𑀸𑀯𑀁 𑀜𑀢𑁆𑀯𑀸 𑀯𑀻𑀭𑀺𑀬𑀁 𑀧𑀕𑁆𑀕𑀳𑁂𑀢𑁆𑀯𑀸 𑀢𑀁 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀝𑁂𑀢𑀺, 𑀢𑀢𑁄 𑀫𑀕𑁆𑀕𑀸𑀦𑀦𑁆𑀢𑀭𑀁 𑀨𑀮𑀁, 𑀨𑀮𑀢𑁄 𑀯𑀼𑀝𑁆𑀞𑀸𑀬 𑀧𑀘𑁆𑀘𑀯𑁂𑀓𑁆𑀔𑀫𑀸𑀦𑁄 𑀧𑀳𑀻𑀦𑀪𑀸𑀯𑀁 𑀚𑀸𑀦𑀸𑀢𑀺, 𑀢𑀲𑁆𑀲 𑀚𑀸𑀦𑀦𑁂𑀦 ‘‘𑀲𑀫𑁆𑀧𑀚𑀸𑀦𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁.

𑁧𑁯𑁧. 𑀇𑀤𑀸𑀦𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀁 𑀆𑀘𑀺𑀓𑁆𑀔𑀦𑁆𑀢𑁄 𑀧𑀜𑁆𑀘 𑀔𑁄 𑀇𑀫𑁂, 𑀆𑀦𑀦𑁆𑀤, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁄 𑀧𑀳𑀻𑀬𑀢𑀻𑀢𑀺 𑀭𑀽𑀧𑁂 𑀅𑀲𑁆𑀫𑀻𑀢𑀺 𑀫𑀸𑀦𑁄 𑀅𑀲𑁆𑀫𑀻𑀢𑀺 𑀙𑀦𑁆𑀤𑁄 𑀅𑀲𑁆𑀫𑀻𑀢𑀺 𑀅𑀦𑀼𑀲𑀬𑁄 𑀧𑀳𑀻𑀬𑀢𑀺. 𑀢𑀣𑀸 𑀯𑁂𑀤𑀦𑀸𑀤𑀻𑀲𑀼 𑀲𑀫𑁆𑀧𑀚𑀸𑀦𑀢𑀸 𑀯𑀼𑀢𑁆𑀢𑀦𑀸𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀇𑀫𑁂 𑀔𑁄 𑀢𑁂, 𑀆𑀦𑀦𑁆𑀤, 𑀥𑀫𑁆𑀫𑀸𑀢𑀺 𑀳𑁂𑀝𑁆𑀞𑀸 𑀓𑀣𑀺𑀢𑁂 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀥𑀫𑁆𑀫𑁂 𑀲𑀦𑁆𑀥𑀸𑀬𑀸𑀳. 𑀓𑀼𑀲𑀮𑀸𑀬𑀢𑀺𑀓𑀸𑀢𑀺 𑀓𑀼𑀲𑀮𑀢𑁄 𑀆𑀕𑀢𑀸. 𑀓𑀼𑀲𑀮𑀸 𑀳𑀺 𑀓𑀼𑀲𑀮𑀸𑀧𑀺 𑀳𑁄𑀦𑁆𑀢𑀺 𑀓𑀼𑀲𑀮𑀸𑀬𑀢𑀺𑀓𑀸𑀧𑀺, 𑀲𑁂𑀬𑁆𑀬𑀣𑀺𑀤𑀁, 𑀧𑀞𑀫𑀚𑁆𑀛𑀸𑀦𑀁 𑀓𑀼𑀲𑀮𑀁, 𑀤𑀼𑀢𑀺𑀬𑀚𑁆𑀛𑀸𑀦𑀁 𑀓𑀼𑀲𑀮𑀜𑁆𑀘𑁂𑀯 𑀓𑀼𑀲𑀮𑀸𑀬𑀢𑀺𑀓𑀜𑁆𑀘…𑀧𑁂… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀓𑀼𑀲𑀮𑀁, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀓𑀼𑀲𑀮𑀜𑁆𑀘𑁂𑀯 𑀓𑀼𑀲𑀮𑀸𑀬𑀢𑀺𑀓𑀜𑁆𑀘, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀓𑀼𑀲𑀮𑀁, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀓𑀼𑀲𑀮𑁄 𑀘𑁂𑀯 𑀓𑀼𑀲𑀮𑀸𑀬𑀢𑀺𑀓𑁄 𑀘…𑀧𑁂… 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀓𑀼𑀲𑀮𑁄, 𑀅𑀭𑀳𑀢𑁆𑀢𑀫𑀕𑁆𑀕𑁄 𑀓𑀼𑀲𑀮𑁄 𑀘𑁂𑀯 𑀓𑀼𑀲𑀮𑀸𑀬𑀢𑀺𑀓𑁄 𑀘. 𑀢𑀣𑀸 𑀧𑀞𑀫𑀚𑁆𑀛𑀸𑀦𑀁 𑀓𑀼𑀲𑀮𑀁, 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸 𑀓𑀼𑀲𑀮𑀸 𑀘𑁂𑀯 𑀓𑀼𑀲𑀮𑀸𑀬𑀢𑀺𑀓𑀸 𑀘…𑀧𑁂… 𑀅𑀭𑀳𑀢𑁆𑀢𑀫𑀕𑁆𑀕𑁄 𑀓𑀼𑀲𑀮𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸 𑀓𑀼𑀲𑀮𑀸 𑀘𑁂𑀯 𑀓𑀼𑀲𑀮𑀸𑀬𑀢𑀺𑀓𑀸 𑀘.

𑀅𑀭𑀺𑀬𑀸𑀢𑀺 𑀦𑀺𑀓𑁆𑀓𑀺𑀮𑁂𑀲𑀸 𑀯𑀺𑀲𑀼𑀤𑁆𑀥𑀸. 𑀮𑁄𑀓𑀼𑀢𑁆𑀢𑀭𑀸𑀢𑀺 𑀮𑁄𑀓𑁂 𑀉𑀢𑁆𑀢𑀭𑀸 𑀯𑀺𑀲𑀺𑀝𑁆𑀞𑀸. 𑀅𑀦𑀯𑀓𑁆𑀓𑀦𑁆𑀢𑀸 𑀧𑀸𑀧𑀺𑀫𑀢𑀸𑀢𑀺 𑀧𑀸𑀧𑀺𑀫𑀦𑁆𑀢𑁂𑀦 𑀫𑀸𑀭𑁂𑀦 𑀅𑀦𑁄𑀓𑁆𑀓𑀦𑁆𑀢𑀸. 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄 𑀘𑀺𑀢𑁆𑀢𑀁 𑀫𑀸𑀭𑁄 𑀦 𑀧𑀲𑁆𑀲𑀢𑀺, ‘‘𑀇𑀤𑀁 𑀦𑀸𑀫 𑀆𑀭𑀫𑁆𑀫𑀡𑀁 𑀦𑀺𑀲𑁆𑀲𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺 𑀚𑀸𑀢𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 ‘‘𑀅𑀦𑀯𑀓𑁆𑀓𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑀢𑀁 𑀓𑀺𑀁 𑀫𑀜𑁆𑀜𑀲𑀻𑀢𑀺 𑀇𑀤𑀁 𑀓𑀲𑁆𑀫𑀸 𑀆𑀳? 𑀕𑀡𑁂𑀧𑀺 𑀏𑀓𑁄 𑀆𑀦𑀺𑀲𑀁𑀲𑁄 𑀅𑀢𑁆𑀣𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀇𑀤𑀫𑀸𑀳. 𑀅𑀦𑀼𑀩𑀦𑁆𑀥𑀺𑀢𑀼𑀦𑁆𑀢𑀺 𑀅𑀦𑀼𑀕𑀘𑁆𑀙𑀺𑀢𑀼𑀁 𑀧𑀭𑀺𑀘𑀭𑀺𑀢𑀼𑀁.

𑀦 𑀔𑁄, 𑀆𑀦𑀦𑁆𑀤𑀸𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀪𑀕𑀯𑀢𑀸 𑁋 ‘‘𑀲𑀼𑀢𑀸𑀯𑀼𑀥𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀓𑀼𑀲𑀮𑀁 𑀧𑀚𑀳𑀢𑀺, 𑀓𑀼𑀲𑀮𑀁 𑀪𑀸𑀯𑁂𑀢𑀺, 𑀲𑀸𑀯𑀚𑁆𑀚𑀁 𑀧𑀚𑀳𑀢𑀺, 𑀅𑀦𑀯𑀚𑁆𑀚𑀁 𑀪𑀸𑀯𑁂𑀢𑀺, 𑀲𑀼𑀤𑁆𑀥𑀁 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀢𑀻’’𑀢𑀺 (𑀅. 𑀦𑀺. 𑁭.𑁬𑁭) 𑀩𑀳𑀼𑀲𑁆𑀲𑀼𑀢𑁄 𑀧𑀜𑁆𑀘𑀸𑀯𑀼𑀥𑀲𑀫𑁆𑀧𑀦𑁆𑀦𑁄 𑀬𑁄𑀥𑁄 𑀯𑀺𑀬 𑀓𑀢𑁄. 𑀬𑀲𑁆𑀫𑀸 𑀧𑀦 𑀲𑁄 𑀲𑀼𑀢𑀧𑀭𑀺𑀬𑀢𑁆𑀢𑀺𑀁 𑀉𑀕𑁆𑀕𑀳𑁂𑀢𑁆𑀯𑀸𑀧𑀺 𑀢𑀤𑀦𑀼𑀘𑁆𑀙𑀯𑀺𑀓𑀁 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀦 𑀧𑀝𑀺𑀧𑀚𑁆𑀚𑀢𑀺, 𑀦 𑀢𑀲𑁆𑀲 𑀢𑀁 𑀆𑀯𑀼𑀥𑀁 𑀳𑁄𑀢𑀺. 𑀬𑁄 𑀧𑀝𑀺𑀧𑀚𑁆𑀚𑀢𑀺, 𑀢𑀲𑁆𑀲𑁂𑀯 𑀳𑁄𑀢𑀺. 𑀢𑀲𑁆𑀫𑀸 𑀏𑀢𑀤𑀢𑁆𑀣𑀁 𑀅𑀦𑀼𑀩𑀦𑁆𑀥𑀺𑀢𑀼𑀁 𑀦𑀸𑀭𑀳𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀦 𑀔𑁄, 𑀆𑀦𑀦𑁆𑀤𑀸𑀢𑀺 𑀆𑀳.

𑀇𑀤𑀸𑀦𑀺 𑀬𑀤𑀢𑁆𑀣𑀁 𑀅𑀦𑀼𑀩𑀦𑁆𑀥𑀺𑀢𑀩𑁆𑀩𑁄, 𑀢𑀁 𑀤𑀲𑁆𑀲𑁂𑀢𑀼𑀁 𑀬𑀸 𑀘 𑀔𑁄𑀢𑀺𑀆𑀤𑀺𑀫𑀸𑀳. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀢𑀻𑀲𑀼 𑀞𑀸𑀦𑁂𑀲𑀼 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺 𑀆𑀕𑀢𑀸𑀦𑀺. ‘‘𑀇𑀢𑀺 𑀏𑀯𑀭𑀽𑀧𑀁 𑀓𑀣𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀯𑀲𑁂𑀦 𑀆𑀕𑀢𑀸𑀦𑀺, ‘‘𑀬𑀤𑀺𑀤𑀁 𑀲𑀼𑀢𑁆𑀢𑀁 𑀕𑁂𑀬𑁆𑀬’’𑀦𑁆𑀢𑀺 𑀏𑀢𑁆𑀣 𑀲𑀼𑀢𑀧𑀭𑀺𑀬𑀢𑁆𑀢𑀺𑀯𑀲𑁂𑀦 𑀆𑀕𑀢𑀸𑀦𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀭𑀺𑀧𑀽𑀭𑀡𑀯𑀲𑁂𑀦 𑀆𑀕𑀢𑀸𑀦𑀺. 𑀢𑀲𑁆𑀫𑀸 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀤𑀲 𑀓𑀣𑀸𑀯𑀢𑁆𑀣𑀽𑀦𑀺 𑀓𑀣𑁂𑀦𑁆𑀢𑁂𑀦 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀞𑀢𑁆𑀯𑀸 𑀓𑀣𑁂𑀢𑀩𑁆𑀩𑀸𑀦𑀺.

𑀇𑀤𑀸𑀦𑀺 𑀬𑀲𑁆𑀫𑀸 𑀏𑀓𑀘𑁆𑀘𑀲𑁆𑀲 𑀏𑀓𑀓𑀲𑁆𑀲 𑀯𑀺𑀳𑀭𑀢𑁄𑀧𑀺 𑀅𑀢𑁆𑀣𑁄 𑀦 𑀲𑀫𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀁 𑀲𑀦𑁆𑀥𑀸𑀬 𑀏𑀓𑀻𑀪𑀸𑀯𑁂 𑀆𑀤𑀻𑀦𑀯𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀁 𑀲𑀦𑁆𑀢𑁂 𑀔𑁄, 𑀆𑀦𑀦𑁆𑀤𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀯𑀁 𑀲𑀦𑁆𑀢𑁂𑀢𑀺 𑀏𑀯𑀁 𑀏𑀓𑀻𑀪𑀸𑀯𑁂 𑀲𑀦𑁆𑀢𑁂.

𑁧𑁯𑁩. 𑀲𑀢𑁆𑀣𑀸𑀢𑀺 𑀩𑀸𑀳𑀺𑀭𑀓𑁄 𑀢𑀺𑀢𑁆𑀣𑀓𑀭𑀲𑀢𑁆𑀣𑀸. 𑀅𑀦𑁆𑀯𑀸𑀯𑀢𑁆𑀢𑀦𑁆𑀢𑀻𑀢𑀺 𑀅𑀦𑀼𑀆𑀯𑀢𑁆𑀢𑀦𑁆𑀢𑀺 𑀉𑀧𑀲𑀗𑁆𑀓𑀫𑀦𑁆𑀢𑀺. 𑀫𑀼𑀘𑁆𑀙𑀁 𑀓𑀸𑀫𑀬𑀢𑀻𑀢𑀺 𑀫𑀼𑀘𑁆𑀙𑀦𑀢𑀡𑁆𑀳𑀁 𑀧𑀢𑁆𑀣𑁂𑀢𑀺, 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀆𑀘𑀭𑀺𑀬𑀽𑀧𑀤𑁆𑀤𑀯𑁂𑀦𑀸𑀢𑀺 𑀅𑀩𑁆𑀪𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑁂𑀦 𑀓𑀺𑀮𑁂𑀲𑀽𑀧𑀤𑁆𑀤𑀯𑁂𑀦 𑀆𑀘𑀭𑀺𑀬𑀲𑁆𑀲𑀼𑀧𑀤𑁆𑀤𑀯𑁄. 𑀲𑁂𑀲𑀼𑀧𑀤𑁆𑀤𑀯𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀯𑀥𑀺𑀁𑀲𑀼 𑀦𑀦𑁆𑀢𑀺 𑀫𑀸𑀭𑀬𑀺𑀁𑀲𑀼 𑀦𑀁. 𑀏𑀢𑁂𑀦 𑀳𑀺 𑀕𑀼𑀡𑀫𑀭𑀡𑀁 𑀓𑀣𑀺𑀢𑀁.

𑀯𑀺𑀦𑀺𑀧𑀸𑀢𑀸𑀬𑀸𑀢𑀺 𑀲𑀼𑀝𑁆𑀞𑀼 𑀦𑀺𑀧𑀢𑀦𑀸𑀬. 𑀓𑀲𑁆𑀫𑀸 𑀧𑀦 𑀩𑁆𑀭𑀳𑁆𑀫𑀘𑀸𑀭𑀼𑀧𑀤𑁆𑀤𑀯𑁄𑀯 𑁋 ‘‘𑀤𑀼𑀓𑁆𑀔𑀯𑀺𑀧𑀸𑀓𑀢𑀭𑁄 𑀘 𑀓𑀝𑀼𑀓𑀯𑀺𑀧𑀸𑀓𑀢𑀭𑁄 𑀘 𑀯𑀺𑀦𑀺𑀧𑀸𑀢𑀸𑀬 𑀘 𑀲𑀁𑀯𑀢𑁆𑀢𑀢𑀻’’𑀢𑀺 𑀯𑀼𑀢𑁆𑀢𑁄𑀢𑀺. 𑀩𑀸𑀳𑀺𑀭𑀧𑀩𑁆𑀩𑀚𑁆𑀚𑀸 𑀳𑀺 𑀅𑀧𑁆𑀧𑀮𑀸𑀪𑀸, 𑀢𑀢𑁆𑀣 𑀫𑀳𑀦𑁆𑀢𑁄 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀕𑀼𑀡𑁄 𑀦𑀢𑁆𑀣𑀺, 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀧𑀜𑁆𑀘𑀸𑀪𑀺𑀜𑁆𑀜𑀸𑀫𑀢𑁆𑀢𑀓𑀫𑁂𑀯 𑀳𑁄𑀢𑀺. 𑀇𑀢𑀺 𑀬𑀣𑀸 𑀕𑀤𑁆𑀭𑀪𑀧𑀺𑀝𑁆𑀞𑀺𑀢𑁄 𑀧𑀢𑀺𑀢𑀲𑁆𑀲 𑀫𑀳𑀦𑁆𑀢𑀁 𑀤𑀼𑀓𑁆𑀔𑀁 𑀦 𑀳𑁄𑀢𑀺, 𑀲𑀭𑀻𑀭𑀲𑁆𑀲 𑀧𑀁𑀲𑀼𑀫𑀓𑁆𑀔𑀦𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀏𑀯𑀁 𑀩𑀸𑀳𑀺𑀭𑀲𑀫𑀬𑁂 𑀮𑁄𑀓𑀺𑀬𑀕𑀼𑀡𑀫𑀢𑁆𑀢𑀢𑁄𑀯 𑀧𑀭𑀺𑀳𑀸𑀬𑀢𑀺, 𑀢𑁂𑀦 𑀧𑀼𑀭𑀺𑀫𑀁 𑀉𑀧𑀤𑁆𑀤𑀯𑀤𑁆𑀯𑀬𑀁 𑀦 𑀏𑀯𑀁 𑀯𑀼𑀢𑁆𑀢𑀁. 𑀲𑀸𑀲𑀦𑁂 𑀧𑀦 𑀧𑀩𑁆𑀩𑀚𑁆𑀚𑀸 𑀫𑀳𑀸𑀮𑀸𑀪𑀸, 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺 𑀦𑀺𑀩𑁆𑀩𑀸𑀦𑀦𑁆𑀢𑀺 𑀫𑀳𑀦𑁆𑀢𑀸 𑀅𑀥𑀺𑀕𑀦𑁆𑀢𑀩𑁆𑀩𑀕𑀼𑀡𑀸. 𑀇𑀢𑀺 𑀬𑀣𑀸 𑀉𑀪𑀢𑁄 𑀲𑀼𑀚𑀸𑀢𑁄 𑀔𑀢𑁆𑀢𑀺𑀬𑀓𑀼𑀫𑀸𑀭𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀦𑀕𑀭𑀁 𑀅𑀦𑀼𑀲𑀜𑁆𑀘𑀭𑀦𑁆𑀢𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑀢𑁄 𑀧𑀢𑀺𑀢𑁄 𑀫𑀳𑀸𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀺, 𑀏𑀯𑀁 𑀲𑀸𑀲𑀦𑀢𑁄 𑀧𑀭𑀺𑀳𑀸𑀬𑀫𑀸𑀦𑁄 𑀦𑀯𑀳𑀺 𑀮𑁄𑀓𑀼𑀢𑁆𑀢𑀭𑀕𑀼𑀡𑁂𑀳𑀺 𑀧𑀭𑀺𑀳𑀸𑀬𑀢𑀺. 𑀢𑁂𑀦𑀸𑀬𑀁 𑀩𑁆𑀭𑀳𑁆𑀫𑀘𑀸𑀭𑀼𑀧𑀤𑁆𑀤𑀯𑁄 𑀏𑀯𑀁 𑀯𑀼𑀢𑁆𑀢𑁄.

𑁧𑁯𑁬. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑁂𑀲𑀼𑀧𑀤𑁆𑀤𑀯𑁂𑀳𑀺 𑀩𑁆𑀭𑀳𑁆𑀫𑀘𑀸𑀭𑀼𑀧𑀤𑁆𑀤𑀯𑁄 𑀤𑀼𑀓𑁆𑀔𑀯𑀺𑀧𑀸𑀓𑀢𑀭𑁄, 𑀬𑀲𑁆𑀫𑀸 𑀯𑀸 𑀲𑀧𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀢𑀺, 𑀫𑀺𑀢𑁆𑀢𑀧𑀝𑀺𑀧𑀢𑁆𑀢𑀺 𑀳𑀺𑀢𑀸𑀬, 𑀢𑀲𑁆𑀫𑀸. 𑀏𑀯𑀁 𑀉𑀧𑀭𑀺𑀫𑁂𑀦𑀧𑀺 𑀳𑁂𑀝𑁆𑀞𑀺𑀫𑁂𑀦𑀧𑀺 𑀅𑀢𑁆𑀣𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀫𑀺𑀢𑁆𑀢𑀯𑀢𑀸𑀬𑀸𑀢𑀺 𑀫𑀺𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸. 𑀲𑀧𑀢𑁆𑀢𑀯𑀢𑀸𑀬𑀸𑀢𑀺 𑀯𑁂𑀭𑀧𑀝𑀺𑀧𑀢𑁆𑀢𑀺𑀬𑀸.

𑀯𑁄𑀓𑁆𑀓𑀫𑁆𑀫 𑀘 𑀲𑀢𑁆𑀣𑀼𑀲𑀸𑀲𑀦𑀸𑀢𑀺 𑀤𑀼𑀓𑁆𑀓𑀝𑀤𑀼𑀩𑁆𑀪𑀸𑀲𑀺𑀢𑀫𑀢𑁆𑀢𑀫𑁆𑀧𑀺 𑀳𑀺 𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀯𑁄𑀓𑁆𑀓𑀫𑁆𑀫 𑀯𑀢𑁆𑀢𑀢𑀺 𑀦𑀸𑀫. 𑀢𑀤𑁂𑀯 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑁄 𑀦 𑀯𑁄𑀓𑁆𑀓𑀫𑁆𑀫 𑀯𑀢𑁆𑀢𑀢𑀺 𑀦𑀸𑀫.

𑀦 𑀯𑁄 𑀅𑀳𑀁, 𑀆𑀦𑀦𑁆𑀤, 𑀢𑀣𑀸 𑀧𑀭𑀓𑁆𑀓𑀫𑀺𑀲𑁆𑀲𑀸𑀫𑀻𑀢𑀺 𑀅𑀳𑀁 𑀢𑀼𑀫𑁆𑀳𑁂𑀲𑀼 𑀢𑀣𑀸 𑀦 𑀧𑀝𑀺𑀧𑀚𑁆𑀚𑀺𑀲𑁆𑀲𑀸𑀫𑀺. 𑀆𑀫𑀓𑁂𑀢𑀺 𑀅𑀧𑀓𑁆𑀓𑁂. 𑀆𑀫𑀓𑀫𑀢𑁆𑀢𑁂𑀢𑀺 𑀆𑀫𑀓𑁂 𑀦𑀸𑀢𑀺𑀲𑀼𑀓𑁆𑀔𑁂 𑀪𑀸𑀚𑀦𑁂. 𑀓𑀼𑀫𑁆𑀪𑀓𑀸𑀭𑁄 𑀳𑀺 𑀆𑀫𑀓𑀁 𑀦𑀸𑀢𑀺𑀲𑀼𑀓𑁆𑀔𑀁 𑀅𑀧𑀓𑁆𑀓𑀁 𑀉𑀪𑁄𑀳𑀺 𑀳𑀢𑁆𑀣𑁂𑀳𑀺 𑀲𑀡𑁆𑀳𑀺𑀓𑀁 𑀕𑀡𑁆𑀳𑀸𑀢𑀺 ‘‘𑀫𑀸 𑀪𑀺𑀚𑁆𑀚𑀢𑀽’’𑀢𑀺. 𑀇𑀢𑀺 𑀬𑀣𑀸 𑀓𑀼𑀫𑁆𑀪𑀓𑀸𑀭𑁄 𑀢𑀢𑁆𑀣 𑀧𑀝𑀺𑀧𑀚𑁆𑀚𑀢𑀺, 𑀦𑀸𑀳𑀁 𑀢𑀼𑀫𑁆𑀳𑁂𑀲𑀼 𑀢𑀣𑀸 𑀧𑀝𑀺𑀧𑀚𑁆𑀚𑀺𑀲𑁆𑀲𑀸𑀫𑀺. 𑀦𑀺𑀕𑁆𑀕𑀬𑁆𑀳 𑀦𑀺𑀕𑁆𑀕𑀬𑁆𑀳𑀸𑀢𑀺 𑀲𑀓𑀺𑀁 𑀑𑀯𑀤𑀺𑀢𑁆𑀯𑀸 𑀢𑀼𑀡𑁆𑀳𑀻 𑀦 𑀪𑀯𑀺𑀲𑁆𑀲𑀸𑀫𑀺, 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀑𑀯𑀤𑀺𑀲𑁆𑀲𑀸𑀫𑀺 𑀅𑀦𑀼𑀲𑀸𑀲𑀺𑀲𑁆𑀲𑀸𑀫𑀺. 𑀧𑀯𑀬𑁆𑀳 𑀧𑀯𑀬𑁆𑀳𑀸𑀢𑀺 𑀤𑁄𑀲𑁂 𑀧𑀯𑀸𑀳𑁂𑀢𑁆𑀯𑀸 𑀧𑀯𑀸𑀳𑁂𑀢𑁆𑀯𑀸. 𑀬𑀣𑀸 𑀧𑀓𑁆𑀓𑀪𑀸𑀚𑀦𑁂𑀲𑀼 𑀓𑀼𑀫𑁆𑀪𑀓𑀸𑀭𑁄 𑀪𑀺𑀦𑁆𑀦𑀙𑀺𑀦𑁆𑀦𑀚𑀚𑁆𑀚𑀭𑀸𑀦𑀺 𑀧𑀯𑀸𑀳𑁂𑀢𑁆𑀯𑀸 𑀏𑀓𑀢𑁄 𑀓𑀢𑁆𑀯𑀸 𑀲𑀼𑀧𑀓𑁆𑀓𑀸𑀦𑁂𑀯 𑀆𑀓𑁄𑀝𑁂𑀢𑁆𑀯𑀸 𑀆𑀓𑁄𑀝𑁂𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀏𑀯𑀫𑁂𑀯 𑀅𑀳𑀫𑁆𑀧𑀺 𑀧𑀯𑀸𑀳𑁂𑀢𑁆𑀯𑀸 𑀧𑀯𑀸𑀳𑁂𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀑𑀯𑀤𑀺𑀲𑁆𑀲𑀸𑀫𑀺 𑀅𑀦𑀼𑀲𑀸𑀲𑀺𑀲𑁆𑀲𑀸𑀫𑀺. 𑀬𑁄 𑀲𑀸𑀭𑁄 𑀲𑁄 𑀞𑀲𑁆𑀲𑀢𑀻𑀢𑀺 𑀏𑀯𑀁 𑀯𑁄 𑀫𑀬𑀸 𑀑𑀯𑀤𑀺𑀬𑀫𑀸𑀦𑀸𑀦𑀁 𑀬𑁄 𑀫𑀕𑁆𑀕𑀨𑀮𑀲𑀸𑀭𑁄, 𑀲𑁄 𑀞𑀲𑁆𑀲𑀢𑀺. 𑀅𑀧𑀺𑀘 𑀮𑁄𑀓𑀺𑀬𑀕𑀼𑀡𑀸𑀧𑀺 𑀇𑀥 𑀲𑀸𑀭𑁄𑀢𑁆𑀯𑁂𑀯 𑀅𑀥𑀺𑀧𑁆𑀧𑁂𑀢𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀳𑀸𑀲𑀼𑀜𑁆𑀜𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁭. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀲𑀼𑀢𑁆𑀢𑀁. 𑀢𑀢𑁆𑀣 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀅𑀘𑁆𑀙𑀭𑀺𑀬𑀢𑁆𑀣𑁂 𑀦𑀺𑀧𑀸𑀢𑁄. 𑀬𑁄 𑀦𑀸𑀫 𑀢𑀣𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀙𑀺𑀦𑁆𑀦𑀧𑀧𑀜𑁆𑀘𑁂𑀢𑀺 𑀏𑀢𑁆𑀣 𑀧𑀧𑀜𑁆𑀘𑀸 𑀦𑀸𑀫 𑀢𑀡𑁆𑀳𑀸 𑀫𑀸𑀦𑁄 𑀤𑀺𑀝𑁆𑀞𑀻𑀢𑀺 𑀇𑀫𑁂 𑀢𑀬𑁄 𑀓𑀺𑀮𑁂𑀲𑀸. 𑀙𑀺𑀦𑁆𑀦𑀯𑀝𑀼𑀫𑁂𑀢𑀺 𑀏𑀢𑁆𑀣 𑀯𑀝𑀼𑀫𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀯𑀝𑁆𑀝𑀁 𑀯𑀼𑀘𑁆𑀘𑀢𑀺. 𑀧𑀭𑀺𑀬𑀸𑀤𑀺𑀦𑁆𑀦𑀯𑀝𑁆𑀝𑁂𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑀩𑁆𑀩𑀤𑀼𑀓𑁆𑀔𑀯𑀻𑀢𑀺𑀯𑀢𑁆𑀢𑁂𑀢𑀺 𑀲𑀩𑁆𑀩𑀁 𑀯𑀺𑀧𑀸𑀓𑀯𑀝𑁆𑀝𑀲𑀗𑁆𑀔𑀸𑀢𑀁 𑀤𑀼𑀓𑁆𑀔𑀁 𑀯𑀻𑀢𑀺𑀯𑀢𑁆𑀢𑁂. 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀻𑀢𑀺 𑀇𑀤𑀁 𑀬𑀢𑁆𑀭𑀸𑀢𑀺 𑀦𑀺𑀧𑀸𑀢𑀯𑀲𑁂𑀦 𑀅𑀦𑀸𑀕𑀢𑀯𑀘𑀦𑀁, 𑀅𑀢𑁆𑀣𑁄 𑀧𑀦𑁂𑀢𑁆𑀣 𑀅𑀢𑀻𑀢𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀪𑀕𑀯𑀸 𑀳𑀺 𑀢𑁂 𑀩𑀼𑀤𑁆𑀥𑁂 𑀅𑀦𑀼𑀲𑁆𑀲𑀭𑀺, 𑀦 𑀇𑀤𑀸𑀦𑀺 𑀅𑀦𑀼𑀲𑁆𑀲𑀭𑀺𑀲𑁆𑀲𑀢𑀺. 𑀏𑀯𑀁𑀚𑀘𑁆𑀘𑀸𑀢𑀺 𑀯𑀺𑀧𑀲𑁆𑀲𑀻𑀆𑀤𑀬𑁄 𑀔𑀢𑁆𑀢𑀺𑀬𑀚𑀘𑁆𑀘𑀸, 𑀓𑀓𑀼𑀲𑀦𑁆𑀥𑀸𑀤𑀬𑁄 𑀩𑁆𑀭𑀸𑀳𑁆𑀫𑀡𑀚𑀘𑁆𑀘𑀸𑀢𑀺. 𑀏𑀯𑀁𑀕𑁄𑀢𑁆𑀢𑀸𑀢𑀺 𑀯𑀺𑀧𑀲𑁆𑀲𑀻𑀆𑀤𑀬𑁄 𑀓𑁄𑀡𑁆𑀟𑀜𑁆𑀜𑀕𑁄𑀢𑁆𑀢𑀸, 𑀓𑀓𑀼𑀲𑀦𑁆𑀥𑀸𑀤𑀬𑁄 𑀓𑀲𑁆𑀲𑀧𑀕𑁄𑀢𑁆𑀢𑀸𑀢𑀺. 𑀏𑀯𑀁𑀲𑀻𑀮𑀸𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀻𑀮𑁂𑀦 𑀏𑀯𑀁𑀲𑀻𑀮𑀸. 𑀏𑀯𑀁𑀥𑀫𑁆𑀫𑀸𑀢𑀺 𑀏𑀢𑁆𑀣 𑀲𑀫𑀸𑀥𑀺𑀧𑀓𑁆𑀔𑀸 𑀥𑀫𑁆𑀫𑀸 𑀅𑀥𑀺𑀧𑁆𑀧𑁂𑀢𑀸. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂𑀦 𑀲𑀫𑀸𑀥𑀺𑀦𑀸 𑀏𑀯𑀁𑀲𑀫𑀸𑀥𑀺𑀦𑁄𑀢𑀺 𑀅𑀢𑁆𑀣𑁄. 𑀏𑀯𑀁𑀧𑀜𑁆𑀜𑀸𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸𑀬 𑀏𑀯𑀁𑀧𑀜𑁆𑀜𑀸. 𑀏𑀯𑀁𑀯𑀺𑀳𑀸𑀭𑀻𑀢𑀺 𑀏𑀢𑁆𑀣 𑀧𑀦 𑀳𑁂𑀝𑁆𑀞𑀸 𑀲𑀫𑀸𑀥𑀺𑀧𑀓𑁆𑀔𑀸𑀦𑀁 𑀥𑀫𑁆𑀫𑀸𑀦𑀁 𑀕𑀳𑀺𑀢𑀢𑁆𑀢𑀸 𑀯𑀺𑀳𑀸𑀭𑁄 𑀕𑀳𑀺𑀢𑁄𑀯, 𑀧𑀼𑀦 𑀓𑀲𑁆𑀫𑀸 𑀕𑀳𑀺𑀢𑀫𑁂𑀯 𑀕𑀡𑁆𑀳𑀸𑀢𑀻𑀢𑀺 𑀘𑁂, 𑀦 𑀇𑀤𑀁 𑀕𑀳𑀺𑀢𑀫𑁂𑀯. 𑀇𑀤𑀜𑁆𑀳𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀤𑀻𑀧𑀦𑀢𑁆𑀣𑀁, 𑀢𑀲𑁆𑀫𑀸 𑀏𑀯𑀁𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀏𑀯𑀁𑀯𑀺𑀫𑀼𑀢𑁆𑀢𑀸𑀢𑀺 𑀏𑀢𑁆𑀣 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀺 𑀢𑀤𑀗𑁆𑀕𑀯𑀺𑀫𑀼𑀢𑁆𑀢𑀺 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀺 𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀻𑀢𑀺 𑀧𑀜𑁆𑀘𑀯𑀺𑀥𑀸 𑀯𑀺𑀫𑀼𑀢𑁆𑀢𑀺𑀬𑁄. 𑀢𑀢𑁆𑀣 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀲𑀬𑀁 𑀯𑀺𑀓𑁆𑀔𑀫𑁆𑀪𑀺𑀢𑁂𑀳𑀺 𑀦𑀻𑀯𑀭𑀡𑀸𑀤𑀻𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀻𑀢𑀺 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺𑀓𑀸 𑀲𑀢𑁆𑀢 𑀅𑀦𑀼𑀧𑀲𑁆𑀲𑀦𑀸 𑀲𑀬𑀁 𑀢𑀲𑁆𑀲 𑀢𑀲𑁆𑀲 𑀧𑀘𑁆𑀘𑀦𑀻𑀓𑀗𑁆𑀕𑀯𑀲𑁂𑀦 𑀧𑀭𑀺𑀘𑀢𑁆𑀢𑀸𑀳𑀺 𑀦𑀺𑀘𑁆𑀘𑀲𑀜𑁆𑀜𑀸𑀤𑀻𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀢𑀤𑀗𑁆𑀕𑀯𑀺𑀫𑀼𑀢𑁆𑀢𑀻𑀢𑀺 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺. 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸 𑀲𑀬𑀁 𑀲𑀫𑀼𑀘𑁆𑀙𑀺𑀦𑁆𑀦𑁂𑀳𑀺 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀻𑀢𑀺 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺. 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀫𑀕𑁆𑀕𑀸𑀦𑀼𑀪𑀸𑀯𑁂𑀦 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀻𑀢𑀺 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺. 𑀦𑀺𑀩𑁆𑀩𑀸𑀦𑀁 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀦𑀺𑀲𑁆𑀲𑀝𑀢𑁆𑀢𑀸 𑀅𑀧𑀕𑀢𑀢𑁆𑀢𑀸 𑀤𑀽𑀭𑁂 𑀞𑀺𑀢𑀢𑁆𑀢𑀸 𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀻𑀢𑀺 𑀲𑀗𑁆𑀔𑀁 𑀕𑀢𑀁. 𑀇𑀢𑀺 𑀇𑀫𑀸𑀲𑀁 𑀧𑀜𑁆𑀘𑀦𑁆𑀦𑀁 𑀯𑀺𑀫𑀼𑀢𑁆𑀢𑀻𑀦𑀁 𑀯𑀲𑁂𑀦 𑀏𑀯𑀁𑀯𑀺𑀫𑀼𑀢𑁆𑀢𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁯𑁯. 𑀢𑀲𑁆𑀫𑀸𑀢𑀺𑀳𑀸𑀢𑀺 𑀬𑀲𑁆𑀫𑀸 𑀢𑁆𑀯𑀁 ‘‘𑀢𑀣𑀸𑀕𑀢𑀸 𑀅𑀘𑁆𑀙𑀭𑀺𑀬𑀸’’𑀢𑀺 𑀯𑀤𑀲𑀺, 𑀢𑀲𑁆𑀫𑀸 𑀢𑀁 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬 𑀧𑀝𑀺𑀪𑀦𑁆𑀢𑀼 𑀢𑀣𑀸𑀕𑀢𑀲𑁆𑀲 𑀅𑀘𑁆𑀙𑀭𑀺𑀬𑀸 𑀅𑀩𑁆𑀪𑀼𑀢𑀥𑀫𑁆𑀫𑀸𑀢𑀺. 𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺 𑀏𑀢𑁆𑀣 𑀤𑁆𑀯𑁂𑀲𑀫𑁆𑀧𑀚𑀜𑁆𑀜𑀸𑀦𑀺 𑀫𑀦𑀼𑀲𑁆𑀲𑀮𑁄𑀓𑁂 𑀤𑁂𑀯𑀮𑁄𑀓𑁂 𑀘. 𑀢𑀢𑁆𑀣 𑀯𑁂𑀲𑁆𑀲𑀦𑁆𑀢𑀭𑀚𑀸𑀢𑀓𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑁆𑀯𑁂 𑀧𑀼𑀢𑁆𑀢𑁂 𑀤𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀓𑁆𑀓𑀲𑁆𑀲 𑀤𑁂𑀯𑀺𑀁 𑀤𑀢𑁆𑀯𑀸 𑀲𑀓𑁆𑀓𑁂𑀦 𑀧𑀲𑀻𑀤𑀺𑀢𑁆𑀯𑀸 𑀤𑀺𑀦𑁆𑀦𑁂 𑀅𑀝𑁆𑀞 𑀯𑀭𑁂 𑀕𑀡𑁆𑀳𑀦𑁆𑀢𑁄 𑁋

‘‘𑀇𑀢𑁄 𑀯𑀺𑀫𑀼𑀘𑁆𑀘𑀫𑀸𑀦𑀸𑀳𑀁, 𑀲𑀕𑁆𑀕𑀕𑀸𑀫𑀻 𑀯𑀺𑀲𑁂𑀲𑀕𑀽;

𑀅𑀦𑀺𑀯𑀢𑁆𑀢𑀻 𑀢𑀢𑁄 𑀅𑀲𑁆𑀲𑀁, 𑀅𑀝𑁆𑀞𑀫𑁂𑀢𑀁 𑀯𑀭𑀁 𑀯𑀭𑁂’’𑀢𑀺. (𑀚𑀸. 𑁨.𑁨𑁨.𑁨𑁩𑁦𑁦) 𑁋

𑀏𑀯𑀁 𑀢𑀼𑀲𑀺𑀢𑀪𑀯𑀦𑁂 𑀫𑁂 𑀧𑀝𑀺𑀲𑀦𑁆𑀥𑀺 𑀳𑁄𑀢𑀽𑀢𑀺 𑀯𑀭𑀁 𑀅𑀕𑁆𑀕𑀳𑁂𑀲𑀺, 𑀢𑀢𑁄 𑀧𑀝𑁆𑀞𑀸𑀬 𑀢𑀼𑀲𑀺𑀢𑀪𑀯𑀦𑁂 𑀉𑀧𑁆𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀚𑀸𑀦𑀸𑀢𑀺, 𑀇𑀤𑀁 𑀫𑀦𑀼𑀲𑁆𑀲𑀮𑁄𑀓𑁂 𑀲𑀫𑁆𑀧𑀚𑀜𑁆𑀜𑀁. 𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑀢𑁄 𑀧𑀦 𑀘𑀼𑀢𑁄 𑀧𑀼𑀦 𑀢𑀼𑀲𑀺𑀢𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄𑀲𑁆𑀫𑀻𑀢𑀺 𑀅𑀜𑁆𑀜𑀸𑀲𑀺, 𑀇𑀤𑀁 𑀤𑁂𑀯𑀮𑁄𑀓𑁂 𑀲𑀫𑁆𑀧𑀚𑀜𑁆𑀜𑀁.

𑀓𑀺𑀁 𑀧𑀦 𑀲𑁂𑀲𑀤𑁂𑀯𑀢𑀸 𑀦 𑀚𑀸𑀦𑀦𑁆𑀢𑀻𑀢𑀺? 𑀦𑁄 𑀦 𑀚𑀸𑀦𑀦𑁆𑀢𑀺. 𑀢𑀸 𑀧𑀦 𑀉𑀬𑁆𑀬𑀸𑀦𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑁂 𑀑𑀮𑁄𑀓𑁂𑀢𑁆𑀯𑀸 𑀤𑁂𑀯𑀦𑀸𑀝𑀓𑁂𑀳𑀺 𑀢𑀽𑀭𑀺𑀬𑀲𑀤𑁆𑀤𑁂𑀦 𑀧𑀩𑁄𑀥𑀺𑀢𑀸 ‘‘𑀫𑀸𑀭𑀺𑀲 𑀅𑀬𑀁 𑀤𑁂𑀯𑀮𑁄𑀓𑁄 𑀢𑀼𑀫𑁆𑀳𑁂 𑀇𑀥 𑀦𑀺𑀩𑁆𑀩𑀢𑁆𑀢𑀸’’𑀢𑀺 𑀲𑀸𑀭𑀺𑀢𑀸 𑀚𑀸𑀦𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄 𑀧𑀞𑀫𑀚𑀯𑀦𑀯𑀸𑀭𑁂 𑀦 𑀚𑀸𑀦𑀸𑀢𑀺, 𑀤𑀼𑀢𑀺𑀬𑀚𑀯𑀦𑀢𑁄 𑀧𑀝𑁆𑀞𑀸𑀬 𑀚𑀸𑀦𑀸𑀢𑀺. 𑀇𑀘𑁆𑀘𑀲𑁆𑀲 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀚𑀸𑀦𑀦𑀁 𑀳𑁄𑀢𑀺.

𑀅𑀝𑁆𑀞𑀸𑀲𑀻𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀜𑁆𑀜𑁂𑀧𑀺 𑀤𑁂𑀯𑀸 𑀢𑀢𑁆𑀣 𑀞𑀺𑀢𑀸 𑀞𑀺𑀢𑀫𑁆𑀳𑀸𑀢𑀺 𑀚𑀸𑀦𑀦𑁆𑀢𑀺, 𑀢𑁂 𑀧𑀦 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀩𑀮𑀯𑀢𑀸 𑀇𑀝𑁆𑀞𑀸𑀭𑀫𑁆𑀫𑀡𑁂𑀦 𑀅𑀪𑀺𑀪𑀼𑀬𑁆𑀬𑀫𑀸𑀦𑀸 𑀲𑀢𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀪𑀼𑀢𑁆𑀢𑀧𑀻𑀢𑀪𑀸𑀯𑀫𑁆𑀧𑀺 𑀅𑀚𑀸𑀦𑀦𑁆𑀢𑀸 𑀆𑀳𑀸𑀭𑀽𑀧𑀘𑁆𑀙𑁂𑀤𑁂𑀦 𑀓𑀸𑀮𑀁 𑀓𑀭𑁄𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀺𑀁 𑀢𑀣𑀸𑀭𑀽𑀧𑀁 𑀆𑀭𑀫𑁆𑀫𑀡𑀁 𑀦𑀢𑁆𑀣𑀻𑀢𑀺? 𑀦𑁄 𑀦𑀢𑁆𑀣𑀺. 𑀲𑁄 𑀳𑀺 𑀲𑁂𑀲𑀤𑁂𑀯𑁂 𑀤𑀲𑀳𑀺 𑀞𑀸𑀦𑁂𑀳𑀺 𑀅𑀥𑀺𑀕𑁆𑀕𑀡𑁆𑀳𑀸𑀢𑀺, 𑀆𑀭𑀫𑁆𑀫𑀡𑁂𑀦 𑀧𑀦 𑀅𑀢𑁆𑀢𑀸𑀦𑀁 𑀫𑀤𑁆𑀤𑀺𑀢𑀼𑀁 𑀦 𑀤𑁂𑀢𑀺, 𑀢𑀁 𑀆𑀭𑀫𑁆𑀫𑀡𑀁 𑀅𑀪𑀺𑀪𑀯𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀢𑁄 𑀲𑀫𑁆𑀧𑀚𑀸𑀦𑁄, 𑀆𑀦𑀦𑁆𑀤, 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑁂 𑀓𑀸𑀬𑁂 𑀅𑀝𑁆𑀞𑀸𑀲𑀻’’𑀢𑀺.

𑁨𑁦𑁦. 𑀬𑀸𑀯𑀢𑀸𑀬𑀼𑀓𑀦𑁆𑀢𑀺 𑀲𑁂𑀲𑀢𑁆𑀢𑀪𑀸𑀯𑁂𑀲𑀼 𑀓𑀺𑀁 𑀬𑀸𑀯𑀢𑀸𑀬𑀼𑀓𑀁 𑀦 𑀢𑀺𑀝𑁆𑀞𑀢𑁆𑀢𑀻𑀢𑀺? 𑀆𑀫 𑀦 𑀢𑀺𑀝𑁆𑀞𑀢𑀺. 𑀅𑀜𑁆𑀜𑀤𑀸 𑀳𑀺 𑀤𑀻𑀖𑀸𑀬𑀼𑀓𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀢𑀢𑁆𑀣 𑀧𑀸𑀭𑀫𑀺𑀬𑁄 𑀦 𑀲𑀓𑁆𑀓𑀸 𑀧𑀽𑀭𑁂𑀢𑀼𑀦𑁆𑀢𑀺 𑀅𑀓𑁆𑀔𑀻𑀦𑀺 𑀦𑀺𑀫𑀻𑀮𑁂𑀢𑁆𑀯𑀸 𑀅𑀥𑀺𑀫𑀼𑀢𑁆𑀢𑀺𑀓𑀸𑀮𑀁𑀓𑀺𑀭𑀺𑀬𑀁 𑀦𑀸𑀫 𑀓𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀢𑀺. 𑀅𑀬𑀁 𑀓𑀸𑀮𑀗𑁆𑀓𑀺𑀭𑀺𑀬𑀸 𑀅𑀜𑁆𑀜𑁂𑀲𑀁 𑀦 𑀳𑁄𑀢𑀺. 𑀢𑀤𑀸 𑀧𑀦 𑀅𑀤𑀺𑀦𑁆𑀦𑀤𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀅𑀭𑀓𑁆𑀔𑀺𑀢𑀲𑀻𑀮𑀁 𑀦𑀸𑀫 𑀦𑀢𑁆𑀣𑀺, 𑀲𑀩𑁆𑀩𑀧𑀸𑀭𑀫𑀻𑀦𑀁 𑀧𑀽𑀭𑀺𑀢𑀢𑁆𑀢𑀸 𑀬𑀸𑀯𑀢𑀸𑀬𑀼𑀓𑀁 𑀅𑀝𑁆𑀞𑀸𑀲𑀺.

𑀲𑀢𑁄 𑀲𑀫𑁆𑀧𑀚𑀸𑀦𑁄 𑀢𑀼𑀲𑀺𑀢𑀸 𑀓𑀸𑀬𑀸 𑀘𑀯𑀺𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀢𑀻𑀢𑀺 𑀏𑀯𑀁 𑀢𑀸𑀯 𑀲𑀩𑁆𑀩𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀤𑀸 𑀩𑁄𑀥𑀺𑀲𑀢𑁆𑀢𑁄 𑀬𑀸𑀯𑀢𑀸𑀬𑀼𑀓𑀁 𑀅𑀝𑁆𑀞𑀸𑀲𑀺. 𑀤𑁂𑀯𑀢𑀸𑀦𑀁 𑀧𑀦 𑁋 ‘‘𑀫𑀦𑀼𑀲𑁆𑀲𑀕𑀡𑀦𑀸𑀯𑀲𑁂𑀦 𑀇𑀤𑀸𑀦𑀺 𑀲𑀢𑁆𑀢𑀳𑀺 𑀤𑀺𑀯𑀲𑁂𑀳𑀺 𑀘𑀼𑀢𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀜𑁆𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑁋 𑀫𑀸𑀮𑀸 𑀫𑀺𑀮𑀸𑀬𑀦𑁆𑀢𑀺, 𑀯𑀢𑁆𑀣𑀸𑀦𑀺 𑀓𑀺𑀮𑀺𑀲𑁆𑀲𑀦𑁆𑀢𑀺, 𑀓𑀘𑁆𑀙𑁂𑀳𑀺 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀓𑀸𑀬𑁂 𑀤𑀼𑀩𑁆𑀩𑀡𑁆𑀡𑀺𑀬𑀁 𑀑𑀓𑁆𑀓𑀫𑀢𑀺, 𑀤𑁂𑀯𑁄 𑀤𑁂𑀯𑀸𑀲𑀦𑁂 𑀦 𑀲𑀡𑁆𑀞𑀸𑀢𑀺.

𑀢𑀢𑁆𑀣 𑀫𑀸𑀮𑀸𑀢𑀺 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀤𑀺𑀯𑀲𑁂 𑀧𑀺𑀴𑀦𑁆𑀥𑀦𑀫𑀸𑀮𑀸. 𑀢𑀸 𑀓𑀺𑀭 𑀲𑀝𑁆𑀞𑀺𑀲𑀢𑀲𑀳𑀲𑁆𑀲𑀸𑀥𑀺𑀓𑀸 𑀲𑀢𑁆𑀢𑀧𑀡𑁆𑀡𑀸𑀲-𑀯𑀲𑁆𑀲𑀓𑁄𑀝𑀺𑀬𑁄 𑀅𑀫𑀺𑀮𑀸𑀬𑀺𑀢𑁆𑀯𑀸 𑀢𑀤𑀸 𑀫𑀺𑀮𑀸𑀬𑀦𑁆𑀢𑀺. 𑀯𑀢𑁆𑀣𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀢𑀓𑀁 𑀧𑀦 𑀓𑀸𑀮𑀁 𑀤𑁂𑀯𑀸𑀦𑀁 𑀦𑁂𑀯 𑀲𑀻𑀢𑀁 𑀦 𑀉𑀡𑁆𑀳𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀭𑀻𑀭𑀢𑁄 𑀩𑀺𑀦𑁆𑀤𑀼𑀩𑀺𑀦𑁆𑀤𑀼𑀯𑀲𑁂𑀦 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺. 𑀏𑀢𑁆𑀢𑀓𑀜𑁆𑀘 𑀓𑀸𑀮𑀁 𑀢𑁂𑀲𑀁 𑀲𑀭𑀻𑀭𑁂 𑀔𑀡𑁆𑀟𑀺𑀘𑁆𑀘𑀧𑀸𑀮𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀯𑀡𑁆𑀡𑀢𑀸 𑀦 𑀧𑀜𑁆𑀜𑀸𑀬𑀢𑀺, 𑀤𑁂𑀯𑀥𑀻𑀢𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀯𑀺𑀬, 𑀤𑁂𑀯𑀧𑀼𑀢𑁆𑀢𑀸 𑀯𑀻𑀲𑀢𑀺𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀯𑀺𑀬 𑀔𑀸𑀬𑀦𑁆𑀢𑀺. 𑀫𑀭𑀡𑀓𑀸𑀮𑁂 𑀧𑀦 𑀦𑁂𑀲𑀁 𑀓𑀺𑀮𑀦𑁆𑀢𑀭𑀽𑀧𑁄 𑀅𑀢𑁆𑀢𑀪𑀸𑀯𑁄 𑀳𑁄𑀢𑀺. 𑀏𑀢𑁆𑀢𑀓𑀜𑁆𑀘 𑀦𑁂𑀲𑀁 𑀓𑀸𑀮𑀁 𑀤𑁂𑀯𑀮𑁄𑀓𑁂 𑀉𑀓𑁆𑀓𑀡𑁆𑀞𑀺𑀢𑀸 𑀦𑀸𑀫 𑀦𑀢𑁆𑀣𑀺, 𑀫𑀭𑀡𑀓𑀸𑀮𑁂 𑀧𑀦 𑀦𑀺𑀲𑁆𑀲𑀲𑀦𑁆𑀢𑀺 𑀯𑀺𑀚𑀫𑁆𑀪𑀦𑁆𑀢𑀺, 𑀲𑀓𑁂 𑀆𑀲𑀦𑁂 𑀦𑀸𑀪𑀺𑀭𑀫𑀦𑁆𑀢𑀺.

𑀇𑀫𑀸𑀦𑀺 𑀧𑀦 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺, 𑀬𑀣𑀸 𑀮𑁄𑀓𑁂 𑀫𑀳𑀸𑀧𑀼𑀜𑁆𑀜𑀸𑀦𑀁 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀦𑀁𑀬𑁂𑀯 𑀉𑀓𑁆𑀓𑀸𑀧𑀸𑀢𑀪𑀽𑀫𑀺𑀘𑀸𑀮𑀘𑀦𑁆𑀤𑀕𑁆𑀕𑀸𑀳𑀸𑀤𑀻𑀦𑀺 𑀦𑀺𑀫𑀺𑀢𑁆𑀢𑀸𑀦𑀺 𑀧𑀜𑁆𑀜𑀸𑀬𑀦𑁆𑀢𑀺, 𑀦 𑀲𑀩𑁆𑀩𑁂𑀲𑀁, 𑀏𑀯𑀫𑁂𑀯 𑀫𑀳𑁂𑀲𑀓𑁆𑀔𑀸𑀦𑀁 𑀤𑁂𑀯𑀢𑀸𑀦𑀁𑀬𑁂𑀯 𑀧𑀜𑁆𑀜𑀸𑀬𑀦𑁆𑀢𑀺, 𑀦 𑀲𑀩𑁆𑀩𑁂𑀲𑀁. 𑀬𑀣𑀸 𑀘 𑀫𑀦𑀼𑀲𑁆𑀲𑁂𑀲𑀼 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀦𑀓𑁆𑀔𑀢𑁆𑀢𑀧𑀸𑀞𑀓𑀸𑀤𑀬𑁄𑀯 𑀚𑀸𑀦𑀦𑁆𑀢𑀺, 𑀦 𑀲𑀩𑁆𑀩𑁂, 𑀏𑀯𑀫𑁂𑀯 𑀢𑀸𑀦𑀺𑀧𑀺 𑀲𑀩𑁆𑀩𑁂 𑀤𑁂𑀯𑀸 𑀦 𑀚𑀸𑀦𑀦𑁆𑀢𑀺, 𑀧𑀡𑁆𑀟𑀺𑀢𑀸 𑀏𑀯 𑀧𑀦 𑀚𑀸𑀦𑀦𑁆𑀢𑀺. 𑀢𑀢𑁆𑀣 𑀬𑁂 𑀘 𑀫𑀦𑁆𑀤𑁂𑀦 𑀓𑀼𑀲𑀮𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀸 𑀤𑁂𑀯𑀧𑀼𑀢𑁆𑀢𑀸, 𑀢𑁂 𑀢𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑁋 ‘‘𑀇𑀤𑀸𑀦𑀺 𑀓𑁄 𑀚𑀸𑀦𑀸𑀢𑀺, 𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀸’’𑀢𑀺 𑀪𑀸𑀬𑀦𑁆𑀢𑀺. 𑀬𑁂 𑀫𑀳𑀸𑀧𑀼𑀜𑁆𑀜𑀸, 𑀢𑁂 𑁋 ‘‘𑀅𑀫𑁆𑀳𑁂𑀳𑀺 𑀤𑀺𑀦𑁆𑀦𑀁 𑀤𑀸𑀦𑀁 𑀭𑀓𑁆𑀔𑀺𑀢𑀁 𑀲𑀻𑀮𑀁 𑀪𑀸𑀯𑀺𑀢𑀁 𑀪𑀸𑀯𑀦𑀁 𑀆𑀕𑀫𑁆𑀫 𑀉𑀧𑀭𑀺𑀤𑁂𑀯𑀮𑁄𑀓𑁂𑀲𑀼 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀦 𑀪𑀸𑀬𑀦𑁆𑀢𑀺. 𑀩𑁄𑀥𑀺𑀲𑀢𑁆𑀢𑁄𑀧𑀺 𑀢𑀸𑀦𑀺 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀤𑀺𑀲𑁆𑀯𑀸 ‘‘𑀇𑀤𑀸𑀦𑀺 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀦 𑀪𑀸𑀬𑀺. 𑀅𑀣𑀲𑁆𑀲 𑀢𑁂𑀲𑀼 𑀦𑀺𑀫𑀺𑀢𑁆𑀢𑁂𑀲𑀼 𑀧𑀸𑀢𑀼𑀪𑀽𑀢𑁂𑀲𑀼 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑁋 ‘‘𑀫𑀸𑀭𑀺𑀲 𑀢𑀼𑀫𑁆𑀳𑁂𑀳𑀺 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁂𑀳𑀺 𑀦 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀁 𑀦 𑀫𑀸𑀭𑀩𑁆𑀭𑀳𑁆𑀫𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀣𑁂𑀦𑁆𑀢𑁂𑀳𑀺 𑀧𑀽𑀭𑀺𑀢𑀸, 𑀮𑁄𑀓𑀦𑀺𑀢𑁆𑀣𑀭𑀡𑀢𑁆𑀣𑀸𑀬 𑀧𑀦 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀣𑀬𑀫𑀸𑀦𑁂𑀳𑀺 𑀧𑀽𑀭𑀺𑀢𑀸. 𑀲𑁄 𑀯𑁄 𑀇𑀤𑀸𑀦𑀺 𑀓𑀸𑀮𑁄 𑀫𑀸𑀭𑀺𑀲 𑀩𑀼𑀤𑁆𑀥𑀢𑁆𑀢𑀸𑀬, 𑀲𑀫𑀬𑁄 𑀫𑀸𑀭𑀺𑀲 𑀩𑀼𑀤𑁆𑀥𑀢𑁆𑀢𑀸𑀬𑀸’’𑀢𑀺 𑀬𑀸𑀘𑀦𑁆𑀢𑀺.

𑀅𑀣 𑀫𑀳𑀸𑀲𑀢𑁆𑀢𑁄 𑀤𑁂𑀯𑀢𑀸𑀦𑀁 𑀧𑀝𑀺𑀜𑁆𑀜𑀁 𑀅𑀤𑀢𑁆𑀯𑀸𑀯 𑀓𑀸𑀮𑀤𑀻𑀧𑀤𑁂𑀲𑀓𑀼𑀮𑀚𑀦𑁂𑀢𑁆𑀢𑀺𑀆𑀬𑀼𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀧𑀜𑁆𑀘𑀫𑀳𑀸𑀯𑀺𑀮𑁄𑀓𑀦𑀁 𑀦𑀸𑀫 𑀯𑀺𑀮𑁄𑀓𑁂𑀲𑀺. 𑀢𑀢𑁆𑀣 ‘‘𑀓𑀸𑀮𑁄 𑀦𑀼 𑀔𑁄, 𑀦 𑀓𑀸𑀮𑁄’’𑀢𑀺 𑀧𑀞𑀫𑀁 𑀓𑀸𑀮𑀁 𑀯𑀺𑀮𑁄𑀓𑁂𑀲𑀺. 𑀢𑀢𑁆𑀣 𑀯𑀲𑁆𑀲𑀲𑀢𑀲𑀳𑀲𑁆𑀲𑀢𑁄 𑀉𑀤𑁆𑀥𑀁 𑀯𑀟𑁆𑀠𑀺𑀢𑀆𑀬𑀼𑀓𑀸𑀮𑁄 𑀓𑀸𑀮𑁄 𑀦𑀸𑀫 𑀦 𑀳𑁄𑀢𑀺. 𑀓𑀲𑁆𑀫𑀸? 𑀢𑀤𑀸 𑀳𑀺 𑀲𑀢𑁆𑀢𑀸𑀦𑀁 𑀚𑀸𑀢𑀺𑀚𑀭𑀸𑀫𑀭𑀡𑀸𑀦𑀺 𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀩𑀼𑀤𑁆𑀥𑀸𑀦𑀜𑁆𑀘 𑀥𑀫𑁆𑀫𑀤𑁂𑀲𑀦𑀸 𑀦𑀸𑀫 𑀢𑀺𑀮𑀓𑁆𑀔𑀡𑀫𑀼𑀢𑁆𑀢𑀸 𑀦𑀢𑁆𑀣𑀺, 𑀢𑁂𑀲𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀓𑀣𑁂𑀦𑁆𑀢𑀸𑀦𑀁 ‘‘𑀓𑀺𑀁 𑀦𑀸𑀫𑁂𑀢𑀁 𑀓𑀣𑁂𑀦𑁆𑀢𑀻’’𑀢𑀺 𑀦𑁂𑀯 𑀲𑁄𑀢𑀼𑀁 𑀦 𑀲𑀤𑁆𑀥𑀸𑀢𑀼𑀁 𑀫𑀜𑁆𑀜𑀦𑁆𑀢𑀺, 𑀢𑀢𑁄 𑀅𑀪𑀺𑀲𑀫𑀬𑁄 𑀦 𑀳𑁄𑀢𑀺, 𑀢𑀲𑁆𑀫𑀺𑀁 𑀅𑀲𑀢𑀺 𑀅𑀦𑀺𑀬𑁆𑀬𑀸𑀦𑀺𑀓𑀁 𑀲𑀸𑀲𑀦𑀁 𑀳𑁄𑀢𑀺. 𑀢𑀲𑁆𑀫𑀸 𑀲𑁄 𑀅𑀓𑀸𑀮𑁄. 𑀯𑀲𑁆𑀲𑀲𑀢𑀢𑁄 𑀊𑀦𑀆𑀬𑀼𑀓𑀸𑀮𑁄𑀧𑀺 𑀓𑀸𑀮𑁄 𑀦𑀸𑀫 𑀦 𑀳𑁄𑀢𑀺. 𑀓𑀲𑁆𑀫𑀸? 𑀢𑀤𑀸 𑀳𑀺 𑀲𑀢𑁆𑀢𑀸 𑀉𑀲𑁆𑀲𑀦𑁆𑀦𑀓𑀺𑀮𑁂𑀲𑀸 𑀳𑁄𑀦𑁆𑀢𑀺, 𑀉𑀲𑁆𑀲𑀦𑁆𑀦𑀓𑀺𑀮𑁂𑀲𑀸𑀦𑀜𑁆𑀘 𑀤𑀺𑀦𑁆𑀦𑁄𑀯𑀸𑀤𑁄 𑀑𑀯𑀸𑀤𑀝𑁆𑀞𑀸𑀦𑁂 𑀦 𑀢𑀺𑀝𑁆𑀞𑀢𑀺. 𑀉𑀤𑀓𑁂 𑀤𑀡𑁆𑀟𑀭𑀸𑀚𑀺 𑀯𑀺𑀬 𑀔𑀺𑀧𑁆𑀧𑀁 𑀯𑀺𑀕𑀘𑁆𑀙𑀢𑀺. 𑀢𑀲𑁆𑀫𑀸 𑀲𑁄𑀧𑀺 𑀅𑀓𑀸𑀮𑁄. 𑀲𑀢𑀲𑀳𑀲𑁆𑀲𑀢𑁄 𑀧𑀦 𑀧𑀝𑁆𑀞𑀸𑀬 𑀳𑁂𑀝𑁆𑀞𑀸 𑀯𑀲𑁆𑀲𑀲𑀢𑀢𑁄 𑀧𑀝𑁆𑀞𑀸𑀬 𑀉𑀤𑁆𑀥𑀁 𑀆𑀬𑀼𑀓𑀸𑀮𑁄 𑀓𑀸𑀮𑁄 𑀦𑀸𑀫. 𑀢𑀤𑀸 𑀘 𑀯𑀲𑁆𑀲𑀲𑀢𑀓𑀸𑀮𑁄 𑀳𑁄𑀢𑀺. 𑀅𑀣 𑀫𑀳𑀸𑀲𑀢𑁆𑀢𑁄 ‘‘𑀦𑀺𑀩𑁆𑀩𑀢𑁆𑀢𑀺𑀢𑀩𑁆𑀩𑀓𑀸𑀮𑁄’’𑀢𑀺 𑀓𑀸𑀮𑀁 𑀧𑀲𑁆𑀲𑀺.

𑀢𑀢𑁄 𑀤𑀻𑀧𑀁 𑀯𑀺𑀮𑁄𑀓𑁂𑀦𑁆𑀢𑁄 𑀲𑀧𑀭𑀺𑀯𑀸𑀭𑁂 𑀘𑀢𑁆𑀢𑀸𑀭𑁄 𑀤𑀻𑀧𑁂 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀢𑀻𑀲𑀼 𑀤𑀻𑀧𑁂𑀲𑀼 𑀩𑀼𑀤𑁆𑀥𑀸 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀚𑀫𑁆𑀩𑀼𑀤𑀻𑀧𑁂𑀬𑁂𑀯 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’’𑀢𑀺 𑀤𑀻𑀧𑀁 𑀧𑀲𑁆𑀲𑀺.

𑀢𑀢𑁄 𑁋 ‘‘𑀚𑀫𑁆𑀩𑀼𑀤𑀻𑀧𑁄 𑀦𑀸𑀫 𑀫𑀳𑀸, 𑀤𑀲𑀬𑁄𑀚𑀦𑀲𑀳𑀲𑁆𑀲𑀧𑀭𑀺𑀫𑀸𑀡𑁄, 𑀓𑀢𑀭𑀲𑁆𑀫𑀺𑀁 𑀦𑀼 𑀔𑁄 𑀧𑀤𑁂𑀲𑁂 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀻’’𑀢𑀺 𑀤𑁂𑀲𑀁 𑀯𑀺𑀮𑁄𑀓𑁂𑀦𑁆𑀢𑁄 𑀫𑀚𑁆𑀛𑀺𑀫𑀤𑁂𑀲𑀁 𑀧𑀲𑁆𑀲𑀺. 𑀫𑀚𑁆𑀛𑀺𑀫𑀤𑁂𑀲𑁄 𑀦𑀸𑀫 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀕𑀚𑀗𑁆𑀕𑀮𑀁 𑀦𑀸𑀫 𑀦𑀺𑀕𑀫𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀦𑀬𑁂 (𑀫𑀳𑀸𑀯. 𑁨𑁫𑁯) 𑀯𑀼𑀢𑁆𑀢𑁄𑀯. 𑀲𑁄 𑀧𑀦 𑀆𑀬𑀸𑀫𑀢𑁄 𑀢𑀻𑀡𑀺 𑀬𑁄𑀚𑀦𑀲𑀢𑀸𑀦𑀺. 𑀯𑀺𑀢𑁆𑀣𑀸𑀭𑀢𑁄 𑀅𑀟𑁆𑀠𑀢𑀺𑀬𑀸𑀦𑀺, 𑀧𑀭𑀺𑀓𑁆𑀔𑁂𑀧𑀢𑁄 𑀦𑀯𑀬𑁄𑀚𑀦𑀲𑀢𑀸𑀦𑀻𑀢𑀺. 𑀏𑀢𑀲𑁆𑀫𑀺𑀜𑁆𑀳𑀺 𑀧𑀤𑁂𑀲𑁂 𑀘𑀢𑁆𑀢𑀸𑀭𑀺 𑀅𑀝𑁆𑀞 𑀲𑁄𑀴𑀲 𑀯𑀸 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺, 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺, 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁, 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀬𑁄 𑀫𑀳𑀸𑀲𑀸𑀯𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀘𑀢𑀼𑀦𑁆𑀦𑀁 𑀫𑀳𑀸𑀤𑀻𑀧𑀸𑀦𑀁 𑀤𑁆𑀯𑀺𑀲𑀳𑀲𑁆𑀲𑀸𑀦𑀁 𑀧𑀭𑀺𑀢𑁆𑀢𑀤𑀻𑀧𑀸𑀦𑀜𑁆𑀘 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀓𑀸𑀭𑀓𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸𑀦𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀜𑁆𑀜𑁂 𑀘 𑀫𑀳𑁂𑀲𑀓𑁆𑀔𑀸 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀫𑀳𑀸𑀲𑀸𑀮𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀇𑀤𑀜𑁆𑀘𑁂𑀢𑁆𑀣 𑀓𑀧𑀺𑀮𑀯𑀢𑁆𑀣𑀼 𑀦𑀸𑀫 𑀦𑀕𑀭𑀁, 𑀢𑀢𑁆𑀣 𑀫𑀬𑀸 𑀦𑀺𑀩𑁆𑀩𑀢𑁆𑀢𑀺𑀢𑀩𑁆𑀩𑀦𑁆𑀢𑀺 𑀦𑀺𑀝𑁆𑀞𑀫𑀕𑀫𑀸𑀲𑀺.

𑀢𑀢𑁄 𑀓𑀼𑀮𑀁 𑀯𑀺𑀮𑁄𑀓𑁂𑀦𑁆𑀢𑁄 𑁋 ‘‘𑀩𑀼𑀤𑁆𑀥𑀸 𑀦𑀸𑀫 𑀮𑁄𑀓𑀲𑀫𑁆𑀫𑀢𑁂 𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀇𑀤𑀸𑀦𑀺 𑀘 𑀔𑀢𑁆𑀢𑀺𑀬𑀓𑀼𑀮𑀁 𑀮𑁄𑀓𑀲𑀫𑁆𑀫𑀢𑀁, 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀸𑀫𑀺, 𑀲𑀼𑀤𑁆𑀥𑁄𑀤𑀦𑁄 𑀦𑀸𑀫 𑀭𑀸𑀚𑀸 𑀫𑁂 𑀧𑀺𑀢𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀼𑀮𑀁 𑀧𑀲𑁆𑀲𑀺.

𑀢𑀢𑁄 𑀫𑀸𑀢𑀭𑀁 𑀯𑀺𑀮𑁄𑀓𑁂𑀦𑁆𑀢𑁄 𑁋 ‘‘𑀩𑀼𑀤𑁆𑀥𑀫𑀸𑀢𑀸 𑀦𑀸𑀫 𑀮𑁄𑀮𑀸 𑀲𑀼𑀭𑀸𑀥𑀼𑀢𑁆𑀢𑀸 𑀦 𑀳𑁄𑀢𑀺, 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀽𑀭𑀺𑀢𑀧𑀸𑀭𑀫𑀻 𑀚𑀸𑀢𑀺𑀢𑁄 𑀧𑀝𑁆𑀞𑀸𑀬 𑀅𑀔𑀡𑁆𑀟𑀧𑀜𑁆𑀘𑀲𑀻𑀮𑀸 𑀳𑁄𑀢𑀺, 𑀅𑀬𑀜𑁆𑀘 𑀫𑀳𑀸𑀫𑀸𑀬𑀸 𑀦𑀸𑀫 𑀤𑁂𑀯𑀻 𑀏𑀤𑀺𑀲𑀸. 𑀅𑀬𑀁 𑀫𑁂 𑀫𑀸𑀢𑀸 𑀪𑀯𑀺𑀲𑁆𑀲𑀢𑀺. 𑀓𑀺𑀢𑁆𑀢𑀓𑀁 𑀧𑀦𑀲𑁆𑀲𑀸 𑀆𑀬𑀽’’𑀢𑀺 𑀆𑀯𑀚𑁆𑀚𑀦𑁆𑀢𑁄 𑁋 ‘‘𑀤𑀲𑀦𑁆𑀦𑀁 𑀫𑀸𑀲𑀸𑀦𑀁 𑀉𑀧𑀭𑀺 𑀲𑀢𑁆𑀢 𑀤𑀺𑀯𑀲𑀸𑀦𑀻’’𑀢𑀺 𑀧𑀲𑁆𑀲𑀺.

𑀇𑀢𑀺 𑀇𑀫𑀁 𑀧𑀜𑁆𑀘𑀫𑀳𑀸𑀯𑀺𑀮𑁄𑀓𑀦𑀁 𑀯𑀺𑀮𑁄𑀓𑁂𑀢𑁆𑀯𑀸 𑁋 ‘‘𑀓𑀸𑀮𑁄 𑀫𑁂 𑀫𑀸𑀭𑀺𑀲𑀸 𑀩𑀼𑀤𑁆𑀥𑀪𑀸𑀯𑀸𑀬𑀸’’𑀢𑀺 𑀤𑁂𑀯𑀢𑀸𑀦𑀁 𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑁄 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂’’𑀢𑀺 𑀢𑀸 𑀤𑁂𑀯𑀢𑀸 𑀉𑀬𑁆𑀬𑁄𑀚𑁂𑀢𑁆𑀯𑀸 𑀢𑀼𑀲𑀺𑀢𑀤𑁂𑀯𑀢𑀸𑀳𑀺 𑀧𑀭𑀺𑀯𑀼𑀢𑁄 𑀢𑀼𑀲𑀺𑀢𑀧𑀼𑀭𑁂 𑀦𑀦𑁆𑀤𑀦𑀯𑀦𑀁 𑀧𑀸𑀯𑀺𑀲𑀺. 𑀲𑀩𑁆𑀩𑀤𑁂𑀯𑀮𑁄𑀓𑁂𑀲𑀼 𑀳𑀺 𑀦𑀦𑁆𑀤𑀦𑀯𑀦𑀁 𑀅𑀢𑁆𑀣𑀺𑀬𑁂𑀯. 𑀢𑀢𑁆𑀣 𑀦𑀁 𑀤𑁂𑀯𑀢𑀸 𑁋 ‘‘𑀇𑀢𑁄 𑀘𑀼𑀢𑁄 𑀲𑀼𑀕𑀢𑀺𑀁 𑀕𑀘𑁆𑀙, 𑀇𑀢𑁄 𑀘𑀼𑀢𑁄 𑀲𑀼𑀕𑀢𑀺𑀁 𑀕𑀘𑁆𑀙𑀸’’𑀢𑀺 𑀧𑀼𑀩𑁆𑀩𑁂𑀓𑀢𑀓𑀼𑀲𑀮𑀓𑀫𑁆𑀫𑁄𑀓𑀸𑀲𑀁 𑀲𑀸𑀭𑀬𑀫𑀸𑀦𑀸 𑀯𑀺𑀘𑀭𑀦𑁆𑀢𑀺. 𑀲𑁄 𑀏𑀯𑀁 𑀤𑁂𑀯𑀢𑀸𑀳𑀺 𑀓𑀼𑀲𑀮𑀁 𑀲𑀸𑀭𑀬𑀫𑀸𑀦𑀸𑀳𑀺 𑀧𑀭𑀺𑀯𑀼𑀢𑁄 𑀢𑀢𑁆𑀣 𑀯𑀺𑀘𑀭𑀦𑁆𑀢𑁄𑀯 𑀘𑀯𑀺.

𑀏𑀯𑀁 𑀘𑀼𑀢𑁄 𑀘𑀯𑀸𑀫𑀻𑀢𑀺 𑀧𑀚𑀸𑀦𑀸𑀢𑀺, 𑀘𑀼𑀢𑀺𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺. 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸𑀧𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺, 𑀇𑀫𑀲𑁆𑀫𑀺𑀁 𑀫𑁂 𑀞𑀸𑀦𑁂 𑀧𑀝𑀺𑀲𑀦𑁆𑀥𑀺 𑀕𑀳𑀺𑀢𑀸𑀢𑀺 𑀏𑀯𑀁 𑀧𑀦 𑀚𑀸𑀦𑀸𑀢𑀺. 𑀓𑁂𑀘𑀺 𑀧𑀦 𑀣𑁂𑀭𑀸 ‘‘𑀆𑀯𑀚𑁆𑀚𑀦𑀧𑀭𑀺𑀬𑀸𑀬𑁄 𑀦𑀸𑀫 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀤𑀼𑀢𑀺𑀬𑀢𑀢𑀺𑀬𑀘𑀺𑀢𑁆𑀢𑀯𑀸𑀭𑁂𑀬𑁂𑀯 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑀺𑀧𑀺𑀝𑀓𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀫𑀳𑀸𑀲𑀢𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺 𑀦 𑀅𑀜𑁆𑀜𑁂𑀲𑀁 𑀧𑀝𑀺𑀲𑀦𑁆𑀥𑀺𑀲𑀤𑀺𑀲𑀸, 𑀓𑁄𑀝𑀺𑀧𑁆𑀧𑀢𑁆𑀢𑀁 𑀢𑁂𑀲𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀁. 𑀬𑀲𑁆𑀫𑀸 𑀧𑀦 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀢𑀁 𑀘𑀺𑀢𑁆𑀢𑀁 𑀜𑀸𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀘𑀼𑀢𑀺𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺. 𑀘𑀼𑀢𑀺𑀓𑁆𑀔𑀡𑁂𑀧𑀺 𑀘𑀯𑀸𑀫𑀻𑀢𑀺 𑀧𑀚𑀸𑀦𑀸𑀢𑀺, 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸𑀧𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀦 𑀚𑀸𑀦𑀸𑀢𑀺, 𑀅𑀲𑀼𑀓𑀲𑁆𑀫𑀺𑀁 𑀞𑀸𑀦𑁂 𑀧𑀝𑀺𑀲𑀦𑁆𑀥𑀺 𑀕𑀳𑀺𑀢𑀸𑀢𑀺 𑀧𑀚𑀸𑀦𑀸𑀢𑀺, 𑀢𑀲𑁆𑀫𑀺𑀁 𑀓𑀸𑀮𑁂 𑀤𑀲𑀲𑀳𑀲𑁆𑀲𑀻 𑀓𑀫𑁆𑀧𑀢𑀻’’𑀢𑀺. 𑀏𑀯𑀁 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀦𑁆𑀢𑁄 𑀧𑀦 𑀏𑀓𑀽𑀦𑀯𑀻𑀲𑀢𑀺𑀬𑀸 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑀲𑁆𑀲 𑀲𑁄𑀫𑀦𑀲𑁆𑀲-𑀲𑀳𑀕𑀢-𑀜𑀸𑀡𑀲𑀫𑁆𑀧𑀬𑀼𑀢𑁆𑀢-𑀅𑀲𑀗𑁆𑀔𑀸𑀭𑀺𑀓-𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀲𑀤𑀺𑀲𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑁂𑀦 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦 ‘‘𑀉𑀧𑁂𑀓𑁆𑀔𑀸𑀲𑀳𑀕𑀢𑁂𑀦𑀸’’𑀢𑀺 𑀆𑀳.

𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑁄 𑀧𑀦 𑀆𑀲𑀸𑀴𑁆𑀳𑀻𑀧𑀼𑀡𑁆𑀡𑀫𑀸𑀬𑀁 𑀉𑀢𑁆𑀢𑀭𑀸𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑁂𑀦 𑀅𑀕𑁆𑀕𑀳𑁂𑀲𑀺. 𑀢𑀤𑀸 𑀓𑀺𑀭 𑀫𑀳𑀸𑀫𑀸𑀬𑀸 𑀧𑀼𑀭𑁂 𑀧𑀼𑀡𑁆𑀡𑀫𑀸𑀬 𑀲𑀢𑁆𑀢𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀯𑀺𑀕𑀢𑀲𑀼𑀭𑀸𑀧𑀸𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀪𑀽𑀲𑀦𑀲𑀫𑁆𑀧𑀦𑁆𑀦𑀁 𑀦𑀓𑁆𑀔𑀢𑁆𑀢𑀓𑀻𑀴𑀁 𑀅𑀦𑀼𑀪𑀯𑀫𑀸𑀦𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀧𑀸𑀢𑁄 𑀯𑀼𑀝𑁆𑀞𑀸𑀬 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀬𑀺𑀢𑁆𑀯𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀯𑀺𑀪𑀽𑀲𑀺𑀢𑀸 𑀯𑀭𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀲𑀺𑀭𑀻𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀲𑀺𑀭𑀻𑀲𑀬𑀦𑁂 𑀦𑀺𑀧𑀦𑁆𑀦𑀸 𑀦𑀺𑀤𑁆𑀤𑀁 𑀑𑀓𑁆𑀓𑀫𑀫𑀸𑀦𑀸 𑀇𑀤𑀁 𑀲𑀼𑀧𑀺𑀦𑀁 𑀅𑀤𑁆𑀤𑀲 𑁋 ‘‘𑀘𑀢𑁆𑀢𑀸𑀭𑁄 𑀓𑀺𑀭 𑀦𑀁 𑀫𑀳𑀸𑀭𑀸𑀚𑀸𑀦𑁄 𑀲𑀬𑀦𑁂𑀦𑁂𑀯 𑀲𑀤𑁆𑀥𑀺𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁄𑀢𑀢𑁆𑀢𑀤𑀳𑀁 𑀦𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀅𑀣 𑀦𑁂𑀲𑀁 𑀤𑁂𑀯𑀺𑀬𑁄 𑀆𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀫𑀮𑀳𑀭𑀡𑀢𑁆𑀣𑀁 𑀦𑁆𑀳𑀸𑀧𑁂𑀢𑁆𑀯𑀸 𑀤𑀺𑀩𑁆𑀩𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀕𑀦𑁆𑀥𑁂𑀳𑀺 𑀯𑀺𑀮𑀺𑀫𑁆𑀧𑁂𑀢𑁆𑀯𑀸 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀧𑀺𑀴𑀦𑁆𑀥𑀺𑀢𑁆𑀯𑀸 𑀢𑀢𑁄 𑀅𑀯𑀺𑀤𑀽𑀭𑁂 𑀭𑀚𑀢𑀧𑀩𑁆𑀩𑀢𑁄, 𑀢𑀲𑁆𑀲 𑀅𑀦𑁆𑀢𑁄 𑀓𑀦𑀓𑀯𑀺𑀫𑀸𑀦𑀁 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀧𑀸𑀘𑀻𑀦𑀢𑁄 𑀲𑀻𑀲𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀸𑀧𑁂𑀲𑀼𑀁. 𑀅𑀣 𑀩𑁄𑀥𑀺𑀲𑀢𑁆𑀢𑁄 𑀲𑁂𑀢𑀯𑀭𑀯𑀸𑀭𑀡𑁄 𑀳𑀼𑀢𑁆𑀯𑀸 𑀢𑀢𑁄 𑀅𑀯𑀺𑀤𑀽𑀭𑁂 𑀏𑀓𑁄 𑀲𑀼𑀯𑀡𑁆𑀡𑀧𑀩𑁆𑀩𑀢𑁄, 𑀢𑀢𑁆𑀣 𑀘𑀭𑀺𑀢𑁆𑀯𑀸 𑀢𑀢𑁄 𑀑𑀭𑀼𑀬𑁆𑀳 𑀭𑀚𑀢𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀉𑀢𑁆𑀢𑀭𑀤𑀺𑀲𑀢𑁄 𑀆𑀕𑀫𑁆𑀫 𑀓𑀦𑀓𑀯𑀺𑀫𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀫𑀸𑀢𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀤𑀓𑁆𑀔𑀺𑀡𑀧𑀲𑁆𑀲𑀁 𑀨𑀸𑀮𑁂𑀢𑁆𑀯𑀸 𑀓𑀼𑀘𑁆𑀙𑀺𑀁 𑀧𑀯𑀺𑀝𑁆𑀞𑀲𑀤𑀺𑀲𑁄 𑀅𑀳𑁄𑀲𑀺.

𑀅𑀣 𑀧𑀩𑀼𑀤𑁆𑀥𑀸 𑀤𑁂𑀯𑀻 𑀢𑀁 𑀲𑀼𑀧𑀺𑀦𑀁 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀧𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀘𑀢𑀼𑀲𑀝𑁆𑀞𑀺𑀫𑀢𑁆𑀢𑁂 𑀩𑁆𑀭𑀸𑀳𑁆𑀫𑀡𑀧𑀸𑀫𑁄𑀓𑁆𑀔𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀳𑀭𑀺𑀢𑀽𑀧𑀮𑀺𑀢𑁆𑀢𑀸𑀬 𑀮𑀸𑀚𑀸𑀤𑀻𑀳𑀺 𑀓𑀢𑀫𑀗𑁆𑀕𑀮𑀲𑀓𑁆𑀓𑀸𑀭𑀸𑀬 𑀪𑀽𑀫𑀺𑀬𑀸 𑀫𑀳𑀸𑀭𑀳𑀸𑀦𑀺 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀧𑁆𑀧𑀺𑀫𑀥𑀼𑀲𑀓𑁆𑀓𑀭𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀯𑀭𑀧𑀸𑀬𑀸𑀲𑀲𑁆𑀲 𑀲𑀼𑀯𑀡𑁆𑀡𑀭𑀚𑀢𑀧𑀸𑀢𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀼𑀯𑀡𑁆𑀡𑀭𑀚𑀢𑀧𑀸𑀢𑀻𑀢𑀺𑀳𑁂𑀯 𑀧𑀝𑀺𑀓𑀼𑀚𑁆𑀚𑀺𑀢𑁆𑀯𑀸 𑀅𑀤𑀸𑀲𑀺, 𑀅𑀜𑁆𑀜𑁂𑀳𑀺 𑀘 𑀅𑀳𑀢𑀯𑀢𑁆𑀣𑀓𑀧𑀺𑀮𑀕𑀸𑀯𑀻𑀤𑀸𑀦𑀸𑀤𑀻𑀳𑀺 𑀢𑁂 𑀲𑀦𑁆𑀢𑀧𑁆𑀧𑁂𑀲𑀺. 𑀅𑀣 𑀦𑁂𑀲𑀁 𑀲𑀩𑁆𑀩𑀓𑀸𑀫𑀲𑀦𑁆𑀢𑀧𑁆𑀧𑀺𑀢𑀸𑀦𑀁 𑀲𑀼𑀧𑀺𑀦𑀁 𑀆𑀭𑁄𑀘𑀸𑀧𑁂𑀢𑁆𑀯𑀸 𑁋 ‘‘𑀓𑀺𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀺. 𑀩𑁆𑀭𑀸𑀳𑁆𑀫𑀡𑀸 𑀆𑀳𑀁𑀲𑀼 𑁋 ‘‘𑀫𑀸 𑀘𑀺𑀦𑁆𑀢𑀬𑀺 𑀫𑀳𑀸𑀭𑀸𑀚, 𑀤𑁂𑀯𑀺𑀬𑀸 𑀢𑁂 𑀓𑀼𑀘𑁆𑀙𑀺𑀫𑁆𑀳𑀺 𑀕𑀩𑁆𑀪𑁄 𑀧𑀢𑀺𑀝𑁆𑀞𑀺𑀢𑁄, 𑀲𑁄 𑀘 𑀔𑁄 𑀧𑀼𑀭𑀺𑀲𑀕𑀩𑁆𑀪𑁄, 𑀦 𑀇𑀢𑁆𑀣𑀺𑀕𑀩𑁆𑀪𑁄, 𑀧𑀼𑀢𑁆𑀢𑁄 𑀢𑁂 𑀪𑀯𑀺𑀲𑁆𑀲𑀢𑀺. 𑀲𑁄 𑀲𑀘𑁂 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀺𑀲𑁆𑀲𑀢𑀺, 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺 𑀘𑀓𑁆𑀓𑀯𑀢𑁆𑀢𑀻. 𑀲𑀘𑁂 𑀅𑀕𑀸𑀭𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀲𑁆𑀲𑀢𑀺, 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺 𑀮𑁄𑀓𑁂 𑀯𑀺𑀯𑀝𑁆𑀝𑀘𑁆𑀙𑀤𑁄’’𑀢𑀺. 𑀏𑀯𑀁 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀩𑁄𑀥𑀺𑀲𑀢𑁆𑀢𑁄 𑀢𑀼𑀲𑀺𑀢𑀓𑀸𑀬𑀸 𑀘𑀯𑀺𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀢𑀺.

𑀢𑀢𑁆𑀣 𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺 𑀇𑀫𑀺𑀦𑀸 𑀘𑀢𑀼𑀢𑁆𑀣𑀸𑀬 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺𑀬𑀸 𑀑𑀓𑁆𑀓𑀫𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀘𑀢𑀲𑁆𑀲𑁄 𑀳𑀺 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺𑀬𑁄.

‘‘𑀘𑀢𑀲𑁆𑀲𑁄 𑀇𑀫𑀸, 𑀪𑀦𑁆𑀢𑁂, 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺𑀬𑁄. 𑀇𑀥, 𑀪𑀦𑁆𑀢𑁂, 𑀏𑀓𑀘𑁆𑀘𑁄 𑀅𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀢𑀺, 𑀅𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀞𑀸𑀢𑀺, 𑀅𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀺, 𑀅𑀬𑀁 𑀧𑀞𑀫𑀸 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺.

𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀇𑀥𑁂𑀓𑀘𑁆𑀘𑁄 𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀢𑀺, 𑀅𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀞𑀸𑀢𑀺, 𑀅𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀺, 𑀅𑀬𑀁 𑀤𑀼𑀢𑀺𑀬𑀸 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺.

𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀇𑀥𑁂𑀓𑀘𑁆𑀘𑁄 𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀢𑀺, 𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀞𑀸𑀢𑀺, 𑀅𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀺, 𑀅𑀬𑀁 𑀢𑀢𑀺𑀬𑀸 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀺.

𑀧𑀼𑀦 𑀘𑀧𑀭𑀁, 𑀪𑀦𑁆𑀢𑁂, 𑀇𑀥𑁂𑀓𑀘𑁆𑀘𑁄 𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀢𑀺, 𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀞𑀸𑀢𑀺, 𑀲𑀫𑁆𑀧𑀚𑀸𑀦𑁄 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀸 𑀦𑀺𑀓𑁆𑀔𑀫𑀢𑀺, 𑀅𑀬𑀁 𑀘𑀢𑀼𑀢𑁆𑀣𑀸 𑀕𑀩𑁆𑀪𑀸𑀯𑀓𑁆𑀓𑀦𑁆𑀢𑀻’’𑀢𑀺 (𑀤𑀻. 𑀦𑀺. 𑁩.𑁧𑁪𑁭).

𑀏𑀢𑀸𑀲𑀼 𑀧𑀞𑀫𑀸 𑀮𑁄𑀓𑀺𑀬𑀫𑀦𑀼𑀲𑁆𑀲𑀸𑀦𑀁 𑀳𑁄𑀢𑀺, 𑀤𑀼𑀢𑀺𑀬𑀸 𑀅𑀲𑀻𑀢𑀺𑀫𑀳𑀸𑀲𑀸𑀯𑀓𑀸𑀦𑀁, 𑀢𑀢𑀺𑀬𑀸 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀘. 𑀢𑁂 𑀓𑀺𑀭 𑀓𑀫𑁆𑀫𑀚𑀯𑀸𑀢𑁂𑀳𑀺 𑀉𑀤𑁆𑀥𑀁𑀧𑀸𑀤𑀸 𑀅𑀥𑁄𑀲𑀺𑀭𑀸 𑀅𑀦𑁂𑀓𑀲𑀢𑀧𑁄𑀭𑀺𑀲𑁂 𑀧𑀧𑀸𑀢𑁂 𑀯𑀺𑀬 𑀬𑁄𑀦𑀺𑀫𑀼𑀔𑁂 𑀢𑀸𑀴𑀘𑁆𑀙𑀺𑀕𑁆𑀕𑀮𑁂𑀦 𑀳𑀢𑁆𑀣𑀻 𑀯𑀺𑀬 𑀅𑀢𑀺𑀯𑀺𑀬 𑀲𑀫𑁆𑀩𑀸𑀥𑁂𑀦 𑀬𑁄𑀦𑀺𑀫𑀼𑀔𑁂𑀦 𑀦𑀺𑀓𑁆𑀔𑀫𑀫𑀸𑀦𑀸 𑀅𑀦𑀦𑁆𑀢𑀁 𑀤𑀼𑀓𑁆𑀔𑀁 𑀧𑀸𑀧𑀼𑀡𑀦𑁆𑀢𑀺. 𑀢𑁂𑀦 𑀦𑁂𑀲𑀁 ‘‘𑀫𑀬𑀁 𑀦𑀺𑀓𑁆𑀔𑀫𑀸𑀫𑀸’’𑀢𑀺 𑀲𑀫𑁆𑀧𑀚𑀸𑀦𑀢𑀸 𑀦 𑀳𑁄𑀢𑀺. 𑀘𑀢𑀼𑀢𑁆𑀣𑀸 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑀸𑀦𑀁. 𑀢𑁂 𑀳𑀺 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀸𑀧𑀺 𑀚𑀸𑀦𑀦𑁆𑀢𑀺, 𑀢𑀢𑁆𑀣 𑀯𑀲𑀦𑁆𑀢𑀸𑀧𑀺 𑀚𑀸𑀦𑀦𑁆𑀢𑀺. 𑀦𑀺𑀓𑁆𑀔𑀫𑀦𑀓𑀸𑀮𑁂𑀧𑀺 𑀦𑁂𑀲𑀁 𑀓𑀫𑁆𑀫𑀚𑀯𑀸𑀢𑀸 𑀉𑀤𑁆𑀥𑀁𑀧𑀸𑀤𑁂 𑀅𑀥𑁄𑀲𑀺𑀭𑁂 𑀓𑀢𑁆𑀯𑀸 𑀔𑀺𑀧𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀤𑁆𑀯𑁂 𑀳𑀢𑁆𑀣𑁂 𑀧𑀲𑀸𑀭𑁂𑀢𑁆𑀯𑀸 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀞𑀺𑀢𑀓𑀸𑀯 𑀦𑀺𑀓𑁆𑀔𑀫𑀦𑁆𑀢𑀺.

𑁨𑁦𑁧. 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀫𑀢𑀻𑀢𑀺 𑀏𑀢𑁆𑀣 𑀫𑀸𑀢𑀼𑀓𑀼𑀘𑁆𑀙𑀺𑀁 𑀑𑀓𑁆𑀓𑀦𑁆𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀑𑀓𑁆𑀓𑀦𑁆𑀢𑁂 𑀳𑀺 𑀢𑀲𑁆𑀫𑀺𑀁 𑀏𑀯𑀁 𑀳𑁄𑀢𑀺, 𑀦 𑀑𑀓𑁆𑀓𑀫𑀫𑀸𑀦𑁂. 𑀅𑀧𑁆𑀧𑀫𑀸𑀡𑁄𑀢𑀺 𑀩𑀼𑀤𑁆𑀥𑀧𑁆𑀧𑀫𑀸𑀡𑁄, 𑀯𑀺𑀧𑀼𑀮𑁄𑀢𑀺 𑀅𑀢𑁆𑀣𑁄. 𑀉𑀴𑀸𑀭𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀤𑁂𑀯𑀸𑀦𑀼𑀪𑀸𑀯𑀦𑁆𑀢𑀺 𑀏𑀢𑁆𑀣 𑀤𑁂𑀯𑀸𑀦𑀁 𑀅𑀬𑀫𑀸𑀦𑀼𑀪𑀸𑀯𑁄 𑁋 𑀦𑀺𑀯𑀢𑁆𑀣𑀯𑀢𑁆𑀣𑀲𑁆𑀲 𑀧𑀪𑀸 𑀤𑁆𑀯𑀸𑀤𑀲 𑀬𑁄𑀚𑀦𑀸𑀦𑀺 𑀨𑀭𑀢𑀺, 𑀢𑀣𑀸 𑀲𑀭𑀻𑀭𑀲𑁆𑀲, 𑀢𑀣𑀸 𑀅𑀮𑀗𑁆𑀓𑀸𑀭𑀲𑁆𑀲, 𑀢𑀣𑀸 𑀯𑀺𑀫𑀸𑀦𑀲𑁆𑀲, 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀮𑁄𑀓𑀦𑁆𑀢𑀭𑀺𑀓𑀸𑀢𑀺 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀘𑀓𑁆𑀓𑀯𑀸𑀴𑀸𑀦𑀁 𑀅𑀦𑁆𑀢𑀭𑀸 𑀏𑀓𑁂𑀓𑁄 𑀮𑁄𑀓𑀦𑁆𑀢𑀭𑀺𑀓𑀸 𑀳𑁄𑀢𑀺, 𑀢𑀺𑀡𑁆𑀡𑀁 𑀲𑀓𑀝𑀘𑀓𑁆𑀓𑀸𑀦𑀁 𑀧𑀢𑁆𑀢𑀸𑀦𑀁 𑀯𑀸 𑀅𑀜𑁆𑀜𑀫𑀜𑁆𑀜𑀁 𑀆𑀳𑀘𑁆𑀘 𑀞𑀧𑀺𑀢𑀸𑀦𑀁 𑀫𑀚𑁆𑀛𑁂 𑀑𑀓𑀸𑀲𑁄 𑀯𑀺𑀬. 𑀲𑁄 𑀧𑀦 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑁄 𑀧𑀭𑀺𑀫𑀸𑀡𑀢𑁄 𑀅𑀝𑁆𑀞𑀬𑁄𑀚𑀦𑀲𑀳𑀲𑁆𑀲𑁄 𑀳𑁄𑀢𑀺. 𑀅𑀖𑀸𑀢𑀺 𑀦𑀺𑀘𑁆𑀘𑀯𑀺𑀯𑀝𑀸. 𑀅𑀲𑀁𑀯𑀼𑀢𑀸𑀢𑀺 𑀳𑁂𑀝𑁆𑀞𑀸𑀧𑀺 𑀅𑀧𑁆𑀧𑀢𑀺𑀝𑁆𑀞𑀸. 𑀅𑀦𑁆𑀥𑀓𑀸𑀭𑀸𑀢𑀺 𑀢𑀫𑀪𑀽𑀢𑀸. 𑀅𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑀢𑁄 𑀅𑀦𑁆𑀥𑀪𑀸𑀯𑀓𑀭𑀡𑀢𑀺𑀫𑀺𑀲𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀢𑀢𑁆𑀣 𑀓𑀺𑀭 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦 𑀚𑀸𑀬𑀢𑀺. 𑀏𑀯𑀁𑀫𑀳𑀺𑀤𑁆𑀥𑀺𑀓𑀸𑀢𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀓𑀺𑀭 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀢𑀻𑀲𑀼 𑀤𑀻𑀧𑁂𑀲𑀼 𑀧𑀜𑁆𑀜𑀸𑀬𑀦𑁆𑀢𑀺, 𑀏𑀯𑀁𑀫𑀳𑀺𑀤𑁆𑀥𑀺𑀓𑀸. 𑀏𑀓𑁂𑀓𑀸𑀬 𑀤𑀺𑀲𑀸𑀬 𑀦𑀯𑀦𑀯𑀬𑁄𑀚𑀦𑀲𑀢𑀲𑀳𑀲𑁆𑀲𑀸𑀦𑀺 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀆𑀮𑁄𑀓𑀁 𑀤𑀲𑁆𑀲𑁂𑀦𑁆𑀢𑀺, 𑀏𑀯𑀁 𑀫𑀳𑀸𑀦𑀼𑀪𑀸𑀯𑀸. 𑀆𑀪𑀸𑀬 𑀦𑀸𑀦𑀼𑀪𑁄𑀦𑁆𑀢𑀻𑀢𑀺 𑀅𑀢𑁆𑀢𑀦𑁄 𑀧𑀪𑀸𑀬 𑀦𑀧𑁆𑀧𑀳𑁄𑀦𑁆𑀢𑀺. 𑀢𑁂 𑀓𑀺𑀭 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀲𑁆𑀲 𑀯𑁂𑀫𑀚𑁆𑀛𑁂𑀦 𑀘𑀭𑀦𑁆𑀢𑀺, 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀜𑁆𑀘 𑀅𑀢𑀺𑀓𑁆𑀓𑀫𑁆𑀫 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑁄, 𑀢𑀲𑁆𑀫𑀸 𑀢𑁂 𑀢𑀢𑁆𑀣 𑀆𑀪𑀸𑀬 𑀦𑀧𑁆𑀧𑀳𑁄𑀦𑁆𑀢𑀺.

𑀬𑁂𑀧𑀺 𑀢𑀢𑁆𑀣 𑀲𑀢𑁆𑀢𑀸𑀢𑀺 𑀬𑁂𑀧𑀺 𑀢𑀲𑁆𑀫𑀺𑀁 𑀮𑁄𑀓𑀦𑁆𑀢𑀭𑀫𑀳𑀸𑀦𑀺𑀭𑀬𑁂 𑀲𑀢𑁆𑀢𑀸 𑀉𑀧𑀧𑀦𑁆𑀦𑀸. 𑀓𑀺𑀁 𑀧𑀦 𑀓𑀫𑁆𑀫𑀁 𑀓𑀢𑁆𑀯𑀸 𑀢𑁂 𑀢𑀢𑁆𑀣 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺? 𑀪𑀸𑀭𑀺𑀬𑀁 𑀤𑀸𑀭𑀼𑀡𑀁 𑀫𑀸𑀢𑀸𑀧𑀺𑀢𑀽𑀦𑀁 𑀥𑀫𑁆𑀫𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀜𑁆𑀘 𑀉𑀧𑀭𑀺 𑀅𑀧𑀭𑀸𑀥𑀁 𑀅𑀜𑁆𑀜𑀜𑁆𑀘 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀸𑀡𑀯𑀥𑀸𑀤𑀺𑀲𑀸𑀳𑀲𑀺𑀓𑀓𑀫𑁆𑀫𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀅𑀪𑀬𑀘𑁄𑀭𑀦𑀸𑀕𑀘𑁄𑀭𑀸𑀤𑀬𑁄 𑀯𑀺𑀬. 𑀢𑁂𑀲𑀁 𑀅𑀢𑁆𑀢𑀪𑀸𑀯𑁄 𑀢𑀺𑀕𑀸𑀯𑀼𑀢𑀺𑀓𑁄 𑀳𑁄𑀢𑀺, 𑀯𑀕𑁆𑀕𑀼𑀮𑀻𑀦𑀁 𑀯𑀺𑀬 𑀤𑀻𑀖𑀦𑀔𑀸 𑀳𑁄𑀦𑁆𑀢𑀺. 𑀢𑁂 𑀭𑀼𑀓𑁆𑀔𑁂 𑀯𑀕𑁆𑀕𑀼𑀮𑀺𑀬𑁄 𑀯𑀺𑀬 𑀦𑀔𑁂𑀳𑀺 𑀘𑀓𑁆𑀓𑀯𑀸𑀴𑀧𑀸𑀤𑁂 𑀮𑀕𑁆𑀕𑀦𑁆𑀢𑀺. 𑀬𑀤𑀸 𑀧𑀦 𑀲𑀁𑀲𑀧𑁆𑀧𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀢𑁆𑀣𑀧𑀸𑀲𑀁 𑀕𑀢𑀸 𑀳𑁄𑀦𑁆𑀢𑀺, 𑀅𑀣 ‘‘𑀪𑀓𑁆𑀔𑁄 𑀦𑁄 𑀮𑀤𑁆𑀥𑁄’’𑀢𑀺 𑀫𑀜𑁆𑀜𑀫𑀸𑀦𑀸 𑀢𑀢𑁆𑀣 𑀯𑀸𑀯𑀝𑀸 𑀯𑀺𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀮𑁄𑀓𑀲𑀦𑁆𑀥𑀸𑀭𑀓𑀉𑀤𑀓𑁂 𑀧𑀢𑀦𑁆𑀢𑀺. 𑀯𑀸𑀢𑁂 𑀧𑀳𑀭𑀦𑁆𑀢𑁂 𑀫𑀥𑀼𑀓𑀨𑀮𑀸𑀦𑀺 𑀯𑀺𑀬 𑀙𑀺𑀚𑁆𑀚𑀺𑀢𑁆𑀯𑀸 𑀉𑀤𑀓𑁂 𑀧𑀢𑀦𑁆𑀢𑀺. 𑀧𑀢𑀺𑀢𑀫𑀢𑁆𑀢𑀸 𑀘 𑀅𑀘𑁆𑀘𑀦𑁆𑀢𑀔𑀸𑀭𑁂 𑀉𑀤𑀓𑁂 𑀧𑀺𑀝𑁆𑀞𑀧𑀺𑀡𑁆𑀟𑀺 𑀯𑀺𑀬 𑀯𑀺𑀮𑀻𑀬𑀦𑁆𑀢𑀺.

𑀅𑀜𑁆𑀜𑁂𑀧𑀺 𑀓𑀺𑀭 𑀪𑁄 𑀲𑀦𑁆𑀢𑀺 𑀲𑀢𑁆𑀢𑀸𑀢𑀺 𑁋 ‘‘𑀬𑀣𑀸 𑀫𑀬𑀁 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀸𑀫, 𑀏𑀯𑀁 𑀅𑀜𑁆𑀜𑁂𑀧𑀺 𑀓𑀺𑀭 𑀲𑀢𑁆𑀢𑀸 𑀇𑀤𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀸 𑀇𑀥𑀽𑀧𑀧𑀦𑁆𑀦𑀸’’𑀢𑀺 𑀢𑀁 𑀤𑀺𑀯𑀲𑀁 𑀧𑀲𑁆𑀲𑀦𑁆𑀢𑀺. 𑀅𑀬𑀁 𑀧𑀦 𑀑𑀪𑀸𑀲𑁄 𑀏𑀓𑀬𑀸𑀕𑀼𑀧𑀸𑀦𑀫𑀢𑁆𑀢𑀫𑁆𑀧𑀺 𑀦 𑀢𑀺𑀝𑁆𑀞𑀢𑀺, 𑀬𑀸𑀯𑀢𑀸 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀧𑀩𑀼𑀤𑁆𑀥𑁄 𑀆𑀭𑀫𑁆𑀫𑀡𑀁 𑀯𑀺𑀪𑀸𑀯𑁂𑀢𑀺, 𑀢𑀢𑁆𑀢𑀓𑀁 𑀓𑀸𑀮𑀁 𑀳𑁄𑀢𑀺. 𑀤𑀻𑀖𑀪𑀸𑀡𑀓𑀸 𑀧𑀦 ‘‘𑀅𑀘𑁆𑀙𑀭𑀸𑀲𑀗𑁆𑀖𑀸𑀝𑀫𑀢𑁆𑀢𑀫𑁂𑀯 𑀯𑀺𑀚𑁆𑀚𑀼𑀪𑀸𑀲𑁄 𑀯𑀺𑀬 𑀦𑀺𑀘𑁆𑀙𑀭𑀺𑀢𑁆𑀯𑀸 𑀓𑀺𑀁 𑀇𑀤𑀦𑁆𑀢𑀺 𑀪𑀡𑀦𑁆𑀢𑀸𑀦𑀁𑀬𑁂𑀯 𑀅𑀦𑁆𑀢𑀭𑀥𑀸𑀬𑀢𑀻’’𑀢𑀺 𑀯𑀤𑀦𑁆𑀢𑀺. 𑀲𑀗𑁆𑀓𑀫𑁆𑀧𑀢𑀻𑀢𑀺 𑀲𑀫𑀦𑁆𑀢𑀢𑁄 𑀓𑀫𑁆𑀧𑀢𑀺. 𑀇𑀢𑀭𑀤𑁆𑀯𑀬𑀁 𑀧𑀼𑀭𑀺𑀫𑀧𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀼𑀦 𑀅𑀧𑁆𑀧𑀫𑀸𑀡𑁄 𑀘𑀸𑀢𑀺𑀆𑀤𑀺 𑀦𑀺𑀕𑀫𑀦𑀢𑁆𑀣𑀁 𑀯𑀼𑀢𑁆𑀢𑀁.

𑁨𑁦𑁨. 𑀘𑀢𑁆𑀢𑀸𑀭𑁄 𑀤𑁂𑀯𑀧𑀼𑀢𑁆𑀢𑀸 𑀘𑀢𑀼𑀤𑁆𑀤𑀺𑀲𑀁 𑀆𑀭𑀓𑁆𑀔𑀸𑀬 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀏𑀢𑁆𑀣 𑀘𑀢𑁆𑀢𑀸𑀭𑁄𑀢𑀺 𑀘𑀢𑀼𑀦𑁆𑀦𑀁 𑀫𑀳𑀸𑀭𑀸𑀚𑀽𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀧𑀦 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀓𑀢𑁆𑀯𑀸 𑀘𑀢𑁆𑀢𑀸𑀮𑀻𑀲𑀤𑀲𑀲𑀳𑀲𑁆𑀲𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀇𑀫𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀫𑀳𑀸𑀭𑀸𑀚𑀸𑀦𑁄 𑀔𑀕𑁆𑀕𑀳𑀢𑁆𑀣𑀸 𑀆𑀕𑀦𑁆𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀆𑀭𑀓𑁆𑀔𑀡𑀢𑁆𑀣𑀸𑀬 𑀉𑀧𑀕𑀦𑁆𑀢𑁆𑀯𑀸 𑀲𑀺𑀭𑀻𑀕𑀩𑁆𑀪𑀁 𑀧𑀯𑀺𑀝𑁆𑀞𑀸, 𑀇𑀢𑀭𑁂 𑀕𑀩𑁆𑀪𑀤𑁆𑀯𑀸𑀭𑀢𑁄 𑀧𑀝𑁆𑀞𑀸𑀬 𑀅𑀯𑀭𑀼𑀤𑁆𑀥𑀧𑀁𑀲𑀼𑀧𑀺𑀲𑀸𑀘𑀓𑀸𑀤𑀺𑀬𑀓𑁆𑀔𑀕𑀡𑁂 𑀧𑀝𑀺𑀓𑁆𑀓𑀫𑀸𑀧𑁂𑀢𑁆𑀯𑀸 𑀬𑀸𑀯 𑀘𑀓𑁆𑀓𑀯𑀸𑀴𑀸 𑀆𑀭𑀓𑁆𑀔𑀁 𑀕𑀡𑁆𑀳𑀺𑀁𑀲𑀼.

𑀓𑀺𑀫𑀢𑁆𑀣𑀁 𑀧𑀦𑀸𑀬𑀁 𑀭𑀓𑁆𑀔𑀸 𑀆𑀕𑀢𑀸? 𑀦𑀦𑀼 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀓𑀮𑀮𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀘𑁂𑀧𑀺 𑀓𑁄𑀝𑀺𑀲𑀢𑀲𑀳𑀲𑁆𑀲𑀸 𑀫𑀸𑀭𑀸 𑀓𑁄𑀝𑀺𑀲𑀢𑀲𑀳𑀲𑁆𑀲𑀁 𑀲𑀺𑀦𑁂𑀭𑀼𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀸 𑀩𑁄𑀥𑀺𑀲𑀢𑁆𑀢𑀫𑀸𑀢𑀼𑀬𑀸 𑀯𑀸 𑀅𑀦𑁆𑀢𑀭𑀸𑀬𑀓𑀭𑀡𑀢𑁆𑀣𑀁 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀲𑀩𑁆𑀩𑁂 𑀅𑀦𑁆𑀢𑀭𑀸𑀯 𑀅𑀦𑁆𑀢𑀭𑀥𑀸𑀬𑁂𑀬𑁆𑀬𑀼𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀪𑀕𑀯𑀢𑀸 𑀭𑀼𑀳𑀺𑀭𑀼𑀧𑁆𑀧𑀸𑀤𑀯𑀢𑁆𑀣𑀼𑀲𑁆𑀫𑀺𑀁 𑁋 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀧𑀭𑀽𑀧𑀓𑁆𑀓𑀫𑁂𑀦 𑀢𑀣𑀸𑀕𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬. 𑀅𑀦𑀼𑀧𑀓𑁆𑀓𑀫𑁂𑀦, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺. 𑀕𑀘𑁆𑀙𑀣 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀬𑀣𑀸𑀯𑀺𑀳𑀸𑀭𑀁, 𑀅𑀭𑀓𑁆𑀔𑀺𑀬𑀸, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀸’’𑀢𑀺 (𑀘𑀽𑀴𑀯. 𑁩𑁪𑁧). 𑀏𑀯𑀫𑁂𑀢𑀁, 𑀦 𑀧𑀭𑀽𑀧𑀓𑁆𑀓𑀫𑁂𑀦 𑀢𑁂𑀲𑀁 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀅𑀢𑁆𑀣𑀺. 𑀲𑀦𑁆𑀢𑀺 𑀔𑁄 𑀧𑀦 𑀅𑀫𑀦𑀼𑀲𑁆𑀲𑀸 𑀯𑀺𑀭𑀽𑀧𑀸 𑀤𑀼𑀤𑁆𑀤𑀲𑀺𑀓𑀸, 𑀪𑁂𑀭𑀯𑀭𑀼𑀧𑀸 𑀧𑀓𑁆𑀔𑀺𑀦𑁄, 𑀬𑁂𑀲𑀁 𑀭𑀽𑀧𑀁 𑀤𑀺𑀲𑁆𑀯𑀸 𑀲𑀤𑁆𑀤𑀁 𑀯𑀸 𑀲𑀼𑀢𑁆𑀯𑀸 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀪𑀬𑀁 𑀯𑀸 𑀲𑀦𑁆𑀢𑀸𑀲𑁄 𑀯𑀸 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑁂𑀲𑀁 𑀦𑀺𑀯𑀸𑀭𑀡𑀢𑁆𑀣𑀸𑀬 𑀭𑀓𑁆𑀔𑀁 𑀅𑀕𑁆𑀕𑀳𑁂𑀲𑀼𑀁. 𑀅𑀧𑀺𑀘 𑀔𑁄 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀼𑀜𑁆𑀜𑀢𑁂𑀚𑁂𑀦 𑀲𑀜𑁆𑀚𑀸𑀢𑀕𑀸𑀭𑀯𑀸 𑀅𑀢𑁆𑀢𑀦𑁄 𑀕𑀸𑀭𑀯𑀘𑁄𑀤𑀺𑀢𑀸𑀧𑀺 𑀢𑁂 𑀏𑀯𑀫𑀓𑀁𑀲𑀼.

𑀓𑀺𑀁 𑀧𑀦 𑀢𑁂 𑀅𑀦𑁆𑀢𑁄𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑀸 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀩𑁄𑀥𑀺𑀲𑀢𑁆𑀢𑀫𑀸𑀢𑀼𑀬𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑀺 𑀦 𑀤𑀲𑁆𑀲𑁂𑀦𑁆𑀢𑀻𑀢𑀺? 𑀦𑀳𑀸𑀦𑀫𑀡𑁆𑀟𑀦𑀪𑁄𑀚𑀦𑀸𑀤𑀺𑀲𑀭𑀻𑀭𑀓𑀺𑀘𑁆𑀘𑀓𑀸𑀮𑁂 𑀦 𑀤𑀲𑁆𑀲𑁂𑀦𑁆𑀢𑀺, 𑀲𑀺𑀭𑀻𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀯𑀭𑀲𑀬𑀦𑁂 𑀦𑀺𑀧𑀦𑁆𑀦𑀓𑀸𑀮𑁂 𑀧𑀦 𑀤𑀲𑁆𑀲𑁂𑀦𑁆𑀢𑀺. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀫𑀦𑀼𑀲𑁆𑀲𑀤𑀲𑁆𑀲𑀦𑀁 𑀦𑀸𑀫 𑀫𑀦𑀼𑀲𑁆𑀲𑀸𑀦𑀁 𑀲𑀧𑁆𑀧𑀝𑀺𑀪𑀬𑀁 𑀳𑁄𑀢𑀺, 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀧𑀦 𑀅𑀢𑁆𑀢𑀦𑁄 𑀘𑁂𑀯 𑀧𑀼𑀢𑁆𑀢𑀲𑁆𑀲 𑀘 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀢𑁂 𑀤𑀺𑀲𑁆𑀯𑀸 𑀦 𑀪𑀸𑀬𑀢𑀺, 𑀧𑀓𑀢𑀺𑀅𑀦𑁆𑀢𑁂𑀧𑀼𑀭𑀧𑀸𑀮𑀓𑁂𑀲𑀼 𑀯𑀺𑀬 𑀅𑀲𑁆𑀲𑀸 𑀢𑁂𑀲𑀼 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺.

𑁨𑁦𑁩. 𑀧𑀓𑀢𑀺𑀬𑀸 𑀲𑀻𑀮𑀯𑀢𑀻𑀢𑀺 𑀲𑀪𑀸𑀯𑁂𑀦𑁂𑀯 𑀲𑀻𑀮𑀲𑀫𑁆𑀧𑀦𑁆𑀦𑀸. 𑀅𑀦𑀼𑀧𑁆𑀧𑀦𑁆𑀦𑁂 𑀓𑀺𑀭 𑀩𑀼𑀤𑁆𑀥𑁂 𑀫𑀦𑀼𑀲𑁆𑀲𑀸 𑀢𑀸𑀧𑀲𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀲𑀦𑁆𑀢𑀺𑀓𑁂 𑀯𑀦𑁆𑀤𑀺𑀢𑁆𑀯𑀸 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀲𑀻𑀮𑀁 𑀕𑀡𑁆𑀳𑀦𑁆𑀢𑀺, 𑀩𑁄𑀥𑀺𑀲𑀢𑁆𑀢𑀫𑀸𑀢𑀸𑀧𑀺 𑀓𑀸𑀮𑀤𑁂𑀯𑀺𑀮𑀲𑁆𑀲 𑀇𑀲𑀺𑀦𑁄 𑀲𑀦𑁆𑀢𑀺𑀓𑁂 𑀕𑀡𑁆𑀳𑀸𑀢𑀺. 𑀩𑁄𑀥𑀺𑀲𑀢𑁆𑀢𑁂 𑀧𑀦 𑀓𑀼𑀘𑁆𑀙𑀺𑀕𑀢𑁂 𑀅𑀜𑁆𑀜𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀲𑀻𑀤𑀺𑀢𑀼𑀁 𑀦𑀸𑀫 𑀦 𑀲𑀓𑁆𑀓𑀸, 𑀲𑀫𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀕𑀳𑀺𑀢𑀲𑀻𑀮𑀫𑁆𑀧𑀺 𑀅𑀯𑀜𑁆𑀜𑀸 𑀓𑀸𑀭𑀡𑀫𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀫𑀸 𑀲𑀬𑀫𑁂𑀯 𑀲𑀻𑀮𑀁 𑀅𑀕𑁆𑀕𑀳𑁂𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀧𑀼𑀭𑀺𑀲𑁂𑀲𑀽𑀢𑀺 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀺𑀢𑀭𑀁 𑀆𑀤𑀺𑀁 𑀓𑀢𑁆𑀯𑀸 𑀓𑁂𑀲𑀼𑀘𑀺 𑀫𑀦𑀼𑀲𑁆𑀲𑁂𑀲𑀼 𑀧𑀼𑀭𑀺𑀲𑀸𑀥𑀺𑀧𑁆𑀧𑀸𑀬𑀘𑀺𑀢𑁆𑀢𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀢𑀜𑁆𑀘 𑀔𑁄 𑀩𑁄𑀥𑀺𑀲𑀢𑁆𑀢𑁂 𑀕𑀸𑀭𑀯𑁂𑀦, 𑀦 𑀧𑀳𑀻𑀦𑀓𑀺𑀮𑁂𑀲𑀢𑀸𑀬. 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀭𑀽𑀧𑀁 𑀧𑀦 𑀲𑀼𑀓𑀼𑀲𑀮𑀸𑀧𑀺 𑀲𑀺𑀧𑁆𑀧𑀺𑀓𑀸 𑀧𑁄𑀢𑁆𑀣𑀓𑀫𑁆𑀫𑀸𑀤𑀻𑀲𑀼𑀧𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀁 𑀤𑀺𑀲𑁆𑀯𑀸 𑀧𑀼𑀭𑀺𑀲𑀲𑁆𑀲 𑀭𑀸𑀕𑁄 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀲𑀘𑁂 𑀧𑀦 𑀢𑀁 𑀭𑀢𑁆𑀢𑀘𑀺𑀢𑁆𑀢𑁄 𑀉𑀧𑀲𑀗𑁆𑀓𑀫𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀧𑀸𑀤𑀸 𑀦 𑀯𑀳𑀦𑁆𑀢𑀺, 𑀤𑀺𑀩𑁆𑀩𑀲𑀗𑁆𑀔𑀮𑀺𑀓𑀸 𑀯𑀺𑀬 𑀩𑀚𑁆𑀛𑀦𑁆𑀢𑀺. 𑀢𑀲𑁆𑀫𑀸 ‘‘𑀅𑀦𑀢𑀺𑀓𑁆𑀓𑀫𑀦𑀻𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀧𑀜𑁆𑀘𑀦𑁆𑀦𑀁 𑀓𑀸𑀫𑀕𑀼𑀡𑀸𑀦𑀦𑁆𑀢𑀺 𑀧𑀼𑀩𑁆𑀩𑁂 ‘‘𑀓𑀸𑀫𑀕𑀼𑀡𑀽𑀧𑀲𑀁𑀳𑀺𑀢’’𑀦𑁆𑀢𑀺 𑀧𑀼𑀭𑀺𑀲𑀸𑀥𑀺𑀧𑁆𑀧𑀸𑀬𑀯𑀲𑁂𑀦 𑀯𑀢𑁆𑀣𑀼𑀧𑀝𑀺𑀓𑁆𑀔𑁂𑀧𑁄 𑀓𑀣𑀺𑀢𑁄, 𑀇𑀥 𑀆𑀭𑀫𑁆𑀫𑀡𑀧𑁆𑀧𑀝𑀺𑀮𑀸𑀪𑁄 𑀤𑀲𑁆𑀲𑀺𑀢𑁄. 𑀢𑀤𑀸 𑀓𑀺𑀭 ‘‘𑀤𑁂𑀯𑀺𑀬𑀸 𑀏𑀯𑀭𑀽𑀧𑁄 𑀧𑀼𑀢𑁆𑀢𑁄 𑀓𑀼𑀘𑁆𑀙𑀺𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁄’’𑀢𑀺, 𑀲𑀼𑀢𑁆𑀯𑀸 𑀲𑀫𑀦𑁆𑀢𑀢𑁄 𑀭𑀸𑀚𑀸𑀦𑁄 𑀫𑀳𑀕𑁆𑀖𑀆𑀪𑀭𑀡𑀢𑀽𑀭𑀺𑀬𑀸𑀤𑀺𑀯𑀲𑁂𑀦 𑀧𑀜𑁆𑀘𑀤𑁆𑀯𑀸𑀭𑀸𑀭𑀫𑁆𑀫𑀡𑀯𑀢𑁆𑀣𑀼𑀪𑀽𑀢𑀁 𑀧𑀡𑁆𑀡𑀸𑀓𑀸𑀭𑀁 𑀧𑁂𑀲𑁂𑀦𑁆𑀢𑀺, 𑀩𑁄𑀥𑀺𑀲𑀢𑁆𑀢𑀲𑁆𑀲 𑀘 𑀩𑁄𑀥𑀺𑀲𑀢𑁆𑀢𑀫𑀸𑀢𑀼𑀬𑀸 𑀘 𑀓𑀢𑀓𑀫𑁆𑀫𑀲𑁆𑀲 𑀉𑀲𑁆𑀲𑀦𑁆𑀦𑀢𑁆𑀢𑀸 𑀮𑀸𑀪𑀲𑀓𑁆𑀓𑀸𑀭𑀲𑁆𑀲 𑀧𑀫𑀸𑀡𑀧𑀭𑀺𑀘𑁆𑀙𑁂𑀤𑁄 𑀦𑀸𑀫 𑀦𑀢𑁆𑀣𑀺.

𑁨𑁦𑁪. 𑀅𑀓𑀺𑀮𑀦𑁆𑀢𑀓𑀸𑀬𑀸𑀢𑀺 𑀬𑀣𑀸 𑀅𑀜𑁆𑀜𑀸 𑀇𑀢𑁆𑀣𑀺𑀬𑁄 𑀕𑀩𑁆𑀪𑀪𑀸𑀭𑁂𑀦 𑀓𑀺𑀮𑀫𑀦𑁆𑀢𑀺, 𑀳𑀢𑁆𑀣𑀧𑀸𑀤𑀸 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀦𑀺 𑀧𑀸𑀧𑀼𑀡𑀦𑁆𑀢𑀺, 𑀦 𑀏𑀯𑀁 𑀢𑀲𑁆𑀲𑀸 𑀓𑁄𑀘𑀺 𑀓𑀺𑀮𑀫𑀣𑁄 𑀅𑀳𑁄𑀲𑀺. 𑀢𑀺𑀭𑁄𑀓𑀼𑀘𑁆𑀙𑀺𑀕𑀢𑀦𑁆𑀢𑀺 𑀅𑀦𑁆𑀢𑁄𑀓𑀼𑀘𑁆𑀙𑀺𑀕𑀢𑀁. 𑀓𑀮𑀮𑀸𑀤𑀺𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀜𑁆𑀚𑀸𑀢𑀅𑀗𑁆𑀕𑀧𑀘𑁆𑀘𑀗𑁆𑀕𑀁 𑀅𑀳𑀻𑀦𑀺𑀦𑁆𑀤𑁆𑀭𑀺𑀬𑀪𑀸𑀯𑀁 𑀉𑀧𑀕𑀢𑀁𑀬𑁂𑀯 𑀧𑀲𑁆𑀲𑀢𑀺. 𑀓𑀺𑀫𑀢𑁆𑀣𑀁 𑀧𑀲𑁆𑀲𑀢𑀺? 𑀲𑀼𑀔𑀯𑀸𑀲𑀢𑁆𑀣𑀁. 𑀬𑀣𑁂𑀯 𑀳𑀺 𑀫𑀸𑀢𑀸 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀦𑀺𑀲𑀺𑀦𑁆𑀦𑀸 𑀯𑀸 𑀦𑀺𑀧𑀦𑁆𑀦𑀸 𑀯𑀸 ‘‘𑀳𑀢𑁆𑀣𑀁 𑀯𑀸 𑀧𑀸𑀤𑀁 𑀯𑀸 𑀑𑀮𑀫𑁆𑀩𑀦𑁆𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑀡𑁆𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀲𑀼𑀔𑀯𑀸𑀲𑀢𑁆𑀣𑀁 𑀧𑀼𑀢𑁆𑀢𑀁 𑀑𑀮𑁄𑀓𑁂𑀢𑀺, 𑀏𑀯𑀁 𑀩𑁄𑀥𑀺𑀲𑀢𑁆𑀢𑀫𑀸𑀢𑀸𑀧𑀺 𑀬𑀁 𑀢𑀁 𑀫𑀸𑀢𑀼 𑀉𑀝𑁆𑀞𑀸𑀦𑀕𑀫𑀦𑀧𑀭𑀺𑀯𑀢𑁆𑀢𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀉𑀡𑁆𑀳𑀲𑀻𑀢𑀮𑁄𑀡𑀺𑀓𑀢𑀺𑀢𑁆𑀢𑀓𑀓𑀝𑀼𑀓𑀸𑀳𑀸𑀭𑀅𑀚𑁆𑀛𑁄𑀳𑀭𑀡𑀓𑀸𑀮𑁂𑀲𑀼 𑀘 𑀕𑀩𑁆𑀪𑀲𑁆𑀲 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀢𑁆𑀣𑀺 𑀦𑀼 𑀔𑁄 𑀫𑁂 𑀢𑀁 𑀧𑀼𑀢𑁆𑀢𑀲𑁆𑀲𑀸𑀢𑀺 𑀲𑀼𑀔𑀯𑀸𑀲𑀢𑁆𑀣𑀁 𑀩𑁄𑀥𑀺𑀲𑀢𑁆𑀢𑀁 𑀑𑀮𑁄𑀓𑀬𑀫𑀸𑀦𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀩𑁄𑀥𑀺𑀲𑀢𑁆𑀢𑀁 𑀧𑀲𑁆𑀲𑀢𑀺. 𑀬𑀣𑀸 𑀳𑀺 𑀅𑀜𑁆𑀜𑁂 𑀅𑀦𑁆𑀢𑁄𑀓𑀼𑀘𑁆𑀙𑀺𑀕𑀢𑀸 𑀧𑀓𑁆𑀓𑀸𑀲𑀬𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀆𑀫𑀸𑀲𑀬𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑀭𑀧𑀝𑀮𑀁 𑀧𑀺𑀝𑁆𑀞𑀺𑀢𑁄 𑀓𑀢𑁆𑀯𑀸 𑀧𑀺𑀝𑁆𑀞𑀺𑀓𑀡𑁆𑀝𑀓𑀁 𑀦𑀺𑀲𑁆𑀲𑀸𑀬 𑀉𑀓𑁆𑀓𑀼𑀝𑀺𑀓𑀸 𑀤𑁆𑀯𑀻𑀲𑀼 𑀫𑀼𑀝𑁆𑀞𑀻𑀲𑀼 𑀳𑀦𑀼𑀓𑀁 𑀞𑀧𑁂𑀢𑁆𑀯𑀸 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀭𑀼𑀓𑁆𑀔𑀲𑀼𑀲𑀺𑀭𑁂 𑀫𑀓𑁆𑀓𑀝𑀸 𑀯𑀺𑀬 𑀦𑀺𑀲𑀻𑀤𑀦𑁆𑀢𑀺, 𑀦 𑀏𑀯𑀁 𑀩𑁄𑀥𑀺𑀲𑀢𑁆𑀢𑁄. 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀧𑀺𑀝𑁆𑀞𑀺𑀓𑀡𑁆𑀝𑀓𑀁 𑀧𑀺𑀝𑁆𑀞𑀺𑀢𑁄 𑀓𑀢𑁆𑀯𑀸 𑀥𑀫𑁆𑀫𑀸𑀲𑀦𑁂 𑀥𑀫𑁆𑀫𑀓𑀣𑀺𑀓𑁄 𑀯𑀺𑀬 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀦𑀺𑀲𑀻𑀤𑀢𑀺. 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀁 𑀧𑀦𑀲𑁆𑀲𑀸 𑀯𑀢𑁆𑀣𑀼𑀁 𑀲𑁄𑀥𑁂𑀢𑀺, 𑀲𑀼𑀤𑁆𑀥𑁂 𑀯𑀢𑁆𑀣𑀼𑀫𑁆𑀳𑀺 𑀲𑀼𑀔𑀼𑀫𑀘𑁆𑀙𑀯𑀺𑀮𑀓𑁆𑀔𑀡𑀁 𑀦𑀺𑀩𑁆𑀩𑀢𑁆𑀢𑀢𑀺. 𑀅𑀣 𑀦𑀁 𑀓𑀼𑀘𑁆𑀙𑀺𑀕𑀢𑀁 𑀢𑀘𑁄 𑀧𑀝𑀺𑀘𑁆𑀙𑀸𑀤𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀑𑀮𑁄𑀓𑁂𑀦𑁆𑀢𑀺𑀬𑀸 𑀩𑀳𑀺 𑀞𑀺𑀢𑁄 𑀯𑀺𑀬 𑀧𑀜𑁆𑀜𑀸𑀬𑀢𑀺. 𑀢𑀫𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀻𑀢𑀺𑀆𑀤𑀺𑀫𑀸𑀳. 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀅𑀦𑁆𑀢𑁄𑀓𑀼𑀘𑁆𑀙𑀺𑀕𑀢𑁄 𑀫𑀸𑀢𑀭𑀁 𑀦 𑀧𑀲𑁆𑀲𑀢𑀺. 𑀦 𑀳𑀺 𑀅𑀦𑁆𑀢𑁄𑀓𑀼𑀘𑁆𑀙𑀺𑀬𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺.

𑁨𑁦𑁫. 𑀓𑀸𑀮𑀁 𑀓𑀭𑁄𑀢𑀻𑀢𑀺 𑀦 𑀯𑀺𑀚𑀸𑀢𑀪𑀸𑀯𑀧𑀘𑁆𑀘𑀬𑀸, 𑀆𑀬𑀼𑀧𑀭𑀺𑀓𑁆𑀔𑀬𑁂𑀦𑁂𑀯. 𑀩𑁄𑀥𑀺𑀲𑀢𑁆𑀢𑁂𑀦 𑀯𑀲𑀺𑀢𑀝𑁆𑀞𑀸𑀦𑀜𑁆𑀳𑀺 𑀘𑁂𑀢𑀺𑀬𑀓𑀼𑀝𑀺𑀲𑀤𑀺𑀲𑀁 𑀳𑁄𑀢𑀺 𑀅𑀜𑁆𑀜𑁂𑀲𑀁 𑀅𑀧𑀭𑀺𑀪𑁄𑀕𑀁, 𑀦 𑀘 𑀲𑀓𑁆𑀓𑀸 𑀩𑁄𑀥𑀺𑀲𑀢𑁆𑀢𑀫𑀸𑀢𑀭𑀁 𑀅𑀧𑀦𑁂𑀢𑁆𑀯𑀸 𑀅𑀜𑁆𑀜𑀁 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀢𑀼𑀦𑁆𑀢𑀺 𑀢𑀢𑁆𑀢𑀓𑀁𑀬𑁂𑀯 𑀩𑁄𑀥𑀺𑀲𑀢𑁆𑀢𑀫𑀸𑀢𑀼 𑀆𑀬𑀼𑀧𑁆𑀧𑀫𑀸𑀡𑀁 𑀳𑁄𑀢𑀺, 𑀢𑀲𑁆𑀫𑀸 𑀢𑀤𑀸 𑀓𑀸𑀮𑀁 𑀓𑀭𑁄𑀢𑀺. 𑀓𑀢𑀭𑀲𑁆𑀫𑀺𑀁 𑀧𑀦 𑀯𑀬𑁂 𑀓𑀸𑀮𑀁 𑀓𑀭𑁄𑀢𑀻𑀢𑀺? 𑀫𑀚𑁆𑀛𑀺𑀫𑀯𑀬𑁂. 𑀧𑀞𑀫𑀯𑀬𑀲𑁆𑀫𑀺𑀜𑁆𑀳𑀺 𑀲𑀢𑁆𑀢𑀸𑀦𑀁 𑀅𑀢𑁆𑀢𑀪𑀸𑀯𑁂 𑀙𑀦𑁆𑀤𑀭𑀸𑀕𑁄 𑀩𑀮𑀯𑀸 𑀳𑁄𑀢𑀺, 𑀢𑁂𑀦 𑀢𑀤𑀸 𑀲𑀜𑁆𑀚𑀸𑀢𑀕𑀩𑁆𑀪𑀸 𑀇𑀢𑁆𑀣𑀻 𑀢𑀁 𑀕𑀩𑁆𑀪𑀁 𑀅𑀦𑀼𑀭𑀓𑁆𑀔𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀕𑀩𑁆𑀪𑁄 𑀩𑀳𑁆𑀯𑀸𑀩𑀸𑀥𑁄 𑀳𑁄𑀢𑀺. 𑀫𑀚𑁆𑀛𑀺𑀫𑀯𑀬𑀲𑁆𑀲 𑀧𑀦 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀅𑀢𑀺𑀓𑁆𑀓𑀫𑁆𑀫 𑀢𑀢𑀺𑀬𑀓𑁄𑀝𑁆𑀞𑀸𑀲𑁂 𑀯𑀢𑁆𑀣𑀼𑀁 𑀯𑀺𑀲𑀤𑀁 𑀳𑁄𑀢𑀺, 𑀯𑀺𑀲𑀤𑁂 𑀯𑀢𑁆𑀣𑀼𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀸 𑀤𑀸𑀭𑀓𑀸 𑀅𑀭𑁄𑀕𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀩𑁄𑀥𑀺𑀲𑀢𑁆𑀢𑀫𑀸𑀢𑀸𑀧𑀺 𑀧𑀞𑀫𑀯𑀬𑁂 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸 𑀫𑀚𑁆𑀛𑀺𑀫𑀯𑀬𑀲𑁆𑀲 𑀢𑀢𑀺𑀬𑀓𑁄𑀝𑁆𑀞𑀸𑀲𑁂 𑀯𑀺𑀚𑀸𑀬𑀺𑀢𑁆𑀯𑀸 𑀓𑀸𑀮𑀁 𑀓𑀭𑁄𑀢𑀺.

𑀦𑀯 𑀯𑀸 𑀤𑀲 𑀯𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁂𑀦 𑀯𑀺𑀓𑀧𑁆𑀧𑀦𑀯𑀲𑁂𑀦 𑀲𑀢𑁆𑀢 𑀯𑀸 𑀅𑀝𑁆𑀞 𑀯𑀸 𑀏𑀓𑀸𑀤𑀲 𑀯𑀸 𑀤𑁆𑀯𑀸𑀤𑀲 𑀯𑀸𑀢𑀺 𑀏𑀯𑀫𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀲𑀢𑁆𑀢𑀫𑀸𑀲𑀚𑀸𑀢𑁄 𑀚𑀻𑀯𑀢𑀺, 𑀲𑀻𑀢𑀼𑀡𑁆𑀳𑀓𑁆𑀔𑀫𑁄 𑀧𑀦 𑀦 𑀳𑁄𑀢𑀺. 𑀅𑀝𑁆𑀞𑀫𑀸𑀲𑀚𑀸𑀢𑁄 𑀦 𑀚𑀻𑀯𑀢𑀺, 𑀲𑁂𑀲𑀸 𑀚𑀻𑀯𑀦𑁆𑀢𑀺.

𑀞𑀺𑀢𑀸𑀯𑀸𑀢𑀺 𑀞𑀺𑀢𑀸𑀯 𑀳𑀼𑀢𑁆𑀯𑀸. 𑀫𑀳𑀸𑀫𑀸𑀬𑀸𑀧𑀺 𑀤𑁂𑀯𑀻 𑀉𑀧𑀯𑀺𑀚𑀜𑁆𑀜𑀸 𑀜𑀸𑀢𑀺𑀓𑀼𑀮𑀖𑀭𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀓𑀧𑀺𑀮𑀯𑀢𑁆𑀣𑀼𑀢𑁄 𑀤𑁂𑀯𑀤𑀳𑀦𑀕𑀭𑀕𑀸𑀫𑀺𑀫𑀕𑁆𑀕𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀤𑁂𑀯𑀺𑀁 𑀲𑀼𑀯𑀡𑁆𑀡𑀲𑀺𑀯𑀺𑀓𑀸𑀬 𑀦𑀺𑀲𑀻𑀤𑀸𑀧𑁂𑀲𑀺. 𑀲𑀓𑀮𑀦𑀕𑀭𑀯𑀸𑀲𑀺𑀦𑁄 𑀲𑀓𑁆𑀬𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑀸 𑀤𑁂𑀯𑀺𑀁 𑀕𑀳𑁂𑀢𑁆𑀯𑀸 𑀧𑀸𑀬𑀺𑀁𑀲𑀼. 𑀲𑀸 𑀤𑁂𑀯𑀤𑀳𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀮𑀼𑀫𑁆𑀩𑀺𑀦𑀺𑀲𑀸𑀮𑀯𑀦𑀼𑀬𑁆𑀬𑀸𑀦𑀁 𑀤𑀺𑀲𑁆𑀯𑀸 𑀉𑀬𑁆𑀬𑀸𑀦𑀯𑀺𑀘𑀭𑀡𑀢𑁆𑀣𑀸𑀬 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀭𑀜𑁆𑀜𑁄 𑀲𑀜𑁆𑀜𑀁 𑀅𑀤𑀸𑀲𑀺. 𑀭𑀸𑀚𑀸 𑀉𑀬𑁆𑀬𑀸𑀦𑀁 𑀧𑀝𑀺𑀚𑀕𑁆𑀕𑀸𑀧𑁂𑀢𑁆𑀯𑀸 𑀆𑀭𑀓𑁆𑀔𑀁 𑀲𑀁𑀯𑀺𑀤𑀳𑀸𑀧𑁂𑀲𑀺. 𑀤𑁂𑀯𑀺𑀬𑀸 𑀉𑀬𑁆𑀬𑀸𑀦𑀁 𑀧𑀯𑀺𑀝𑁆𑀞𑀫𑀢𑁆𑀢𑀸𑀬 𑀓𑀸𑀬𑀤𑀼𑀩𑁆𑀩𑀮𑁆𑀬𑀁 𑀅𑀳𑁄𑀲𑀺, 𑀅𑀣𑀲𑁆𑀲𑀸 𑀫𑀗𑁆𑀕𑀮𑀲𑀸𑀮𑀫𑀽𑀮𑁂 𑀲𑀺𑀭𑀻𑀲𑀬𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀧𑀺𑀁𑀲𑀼. 𑀲𑀸 𑀅𑀦𑁆𑀢𑁄𑀲𑀸𑀡𑀺𑀁 𑀧𑀯𑀺𑀲𑀺𑀢𑁆𑀯𑀸 𑀲𑀸𑀮𑀲𑀸𑀔𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲𑀸 𑀢𑀸𑀯𑀤𑁂𑀯 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺.

𑀤𑁂𑀯𑀸 𑀦𑀁 𑀧𑀞𑀫𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀻𑀢𑀺 𑀔𑀻𑀡𑀸𑀲𑀯𑀸 𑀲𑀼𑀤𑁆𑀥𑀸𑀯𑀸𑀲𑀩𑁆𑀭𑀳𑁆𑀫𑀸𑀦𑁄 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺. 𑀓𑀣𑀁? 𑀲𑀽𑀢𑀺𑀯𑁂𑀲𑀁 𑀕𑀡𑁆𑀳𑀺𑀢𑁆𑀯𑀸𑀢𑀺 𑀏𑀓𑁂. 𑀢𑀁 𑀧𑀦 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀤𑀁 𑀯𑀼𑀢𑁆𑀢𑀁 𑁋 𑀢𑀤𑀸 𑀩𑁄𑀥𑀺𑀲𑀢𑁆𑀢𑀫𑀸𑀢𑀸 𑀲𑀼𑀯𑀡𑁆𑀡𑀔𑀘𑀺𑀢𑀁 𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀫𑀘𑁆𑀙𑀓𑁆𑀔𑀺𑀲𑀤𑀺𑀲𑀁 𑀤𑀼𑀓𑀽𑀮𑀧𑀝𑀁 𑀬𑀸𑀯 𑀧𑀸𑀤𑀦𑁆𑀢𑀸𑀯 𑀧𑀸𑀭𑀼𑀧𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣𑀲𑁆𑀲𑀸 𑀲𑀮𑁆𑀮𑀳𑀼𑀓𑀁 𑀕𑀩𑁆𑀪𑀯𑀼𑀝𑁆𑀞𑀸𑀦𑀁 𑀅𑀳𑁄𑀲𑀺 𑀥𑀫𑁆𑀫𑀓𑀭𑀡𑀢𑁄 𑀉𑀤𑀓𑀦𑀺𑀓𑁆𑀔𑀫𑀦𑀲𑀤𑀺𑀲𑀁. 𑀅𑀣 𑀢𑁂 𑀧𑀓𑀢𑀺𑀩𑁆𑀭𑀳𑁆𑀫𑀯𑁂𑀲𑁂𑀦𑁂𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀞𑀫𑀁 𑀲𑀼𑀯𑀡𑁆𑀡𑀚𑀸𑀮𑁂𑀦 𑀧𑀝𑀺𑀕𑁆𑀕𑀳𑁂𑀲𑀼𑀁. 𑀢𑁂𑀲𑀁 𑀳𑀢𑁆𑀣𑀢𑁄 𑀫𑀦𑀼𑀲𑁆𑀲𑀸 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂𑀦 𑀧𑀝𑀺𑀕𑁆𑀕𑀳𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀤𑁂𑀯𑀸 𑀦𑀁 𑀧𑀞𑀫𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀺 𑀧𑀘𑁆𑀙𑀸 𑀫𑀦𑀼𑀲𑁆𑀲𑀸’’𑀢𑀺.

𑁨𑁦𑁬. 𑀘𑀢𑁆𑀢𑀸𑀭𑁄 𑀦𑀁 𑀤𑁂𑀯𑀧𑀼𑀢𑁆𑀢𑀸𑀢𑀺 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄. 𑀧𑀝𑀺𑀕𑁆𑀕𑀳𑁂𑀢𑁆𑀯𑀸𑀢𑀺 𑀅𑀚𑀺𑀦𑀧𑁆𑀧𑀯𑁂𑀡𑀺𑀬𑀸 𑀧𑀝𑀺𑀕𑁆𑀕𑀳𑁂𑀢𑁆𑀯𑀸. 𑀫𑀳𑁂𑀲𑀓𑁆𑀔𑁄𑀢𑀺 𑀫𑀳𑀸𑀢𑁂𑀚𑁄 𑀫𑀳𑀸𑀬𑀲𑁄 𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄.

𑀯𑀺𑀲𑀤𑁄𑀯 𑀦𑀺𑀓𑁆𑀔𑀫𑀢𑀻𑀢𑀺 𑀬𑀣𑀸 𑀅𑀜𑁆𑀜𑁂 𑀲𑀢𑁆𑀢𑀸 𑀬𑁄𑀦𑀺𑀫𑀕𑁆𑀕𑁂 𑀮𑀕𑁆𑀕𑀦𑁆𑀢𑀸 𑀪𑀕𑁆𑀕𑀯𑀺𑀪𑀕𑁆𑀕𑀸 𑀦𑀺𑀓𑁆𑀔𑀫𑀦𑁆𑀢𑀺, 𑀦 𑀏𑀯𑀁 𑀦𑀺𑀓𑁆𑀔𑀫𑀢𑀺, 𑀅𑀮𑀕𑁆𑀕𑁄 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀢𑀻𑀢𑀺 𑀅𑀢𑁆𑀣𑁄. 𑀉𑀤𑁂𑀦𑀸𑀢𑀺 𑀉𑀤𑀓𑁂𑀦. 𑀓𑁂𑀦𑀘𑀺 𑀅𑀲𑀼𑀘𑀺𑀦𑀸𑀢𑀺 𑀬𑀣𑀸 𑀅𑀜𑁆𑀜𑁂 𑀲𑀢𑁆𑀢𑀸 𑀓𑀫𑁆𑀫𑀚𑀯𑀸𑀢𑁂𑀳𑀺 𑀉𑀤𑁆𑀥𑀁𑀧𑀸𑀤𑀸 𑀅𑀥𑁄𑀲𑀺𑀭𑀸 𑀬𑁄𑀦𑀺𑀫𑀕𑁆𑀕𑁂 𑀧𑀓𑁆𑀔𑀺𑀢𑁆𑀢𑀸 𑀲𑀢𑀧𑁄𑀭𑀺𑀲𑀦𑀭𑀓𑀧𑀧𑀸𑀢𑀁 𑀧𑀢𑀦𑁆𑀢𑀸 𑀯𑀺𑀬 𑀢𑀸𑀴𑀘𑁆𑀙𑀺𑀤𑁆𑀤𑁂𑀦 𑀦𑀺𑀓𑁆𑀓𑀟𑁆𑀠𑀺𑀬𑀫𑀸𑀦𑀸 𑀳𑀢𑁆𑀣𑀻 𑀯𑀺𑀬 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀸 𑀦𑀸𑀦𑀸𑀅𑀲𑀼𑀘𑀺𑀫𑀓𑁆𑀔𑀺𑀢𑀸𑀯 𑀦𑀺𑀓𑁆𑀔𑀫𑀦𑁆𑀢𑀺, 𑀦 𑀏𑀯𑀁 𑀩𑁄𑀥𑀺𑀲𑀢𑁆𑀢𑁄. 𑀩𑁄𑀥𑀺𑀲𑀢𑁆𑀢𑀜𑁆𑀳𑀺 𑀓𑀫𑁆𑀫𑀚𑀯𑀸𑀢𑀸 𑀉𑀤𑁆𑀥𑀁𑀧𑀸𑀤𑀁 𑀅𑀥𑁄𑀲𑀺𑀭𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀲𑁄 𑀥𑀫𑁆𑀫𑀸𑀲𑀦𑀢𑁄 𑀑𑀢𑀭𑀦𑁆𑀢𑁄 𑀥𑀫𑁆𑀫𑀓𑀣𑀺𑀓𑁄 𑀯𑀺𑀬 𑀦𑀺𑀲𑁆𑀲𑁂𑀡𑀺𑀢𑁄 𑀑𑀢𑀭𑀦𑁆𑀢𑁄 𑀧𑀼𑀭𑀺𑀲𑁄 𑀯𑀺𑀬 𑀘 𑀤𑁆𑀯𑁂 𑀳𑀢𑁆𑀣𑁂 𑀘 𑀧𑀸𑀤𑁂 𑀘 𑀧𑀲𑀸𑀭𑁂𑀢𑁆𑀯𑀸 𑀞𑀺𑀢𑀓𑁄𑀯 𑀫𑀸𑀢𑀼𑀓𑀼𑀘𑁆𑀙𑀺𑀲𑀫𑁆𑀪𑀯𑁂𑀦 𑀓𑁂𑀦𑀘𑀺 𑀅𑀲𑀼𑀘𑀺𑀦𑀸 𑀅𑀫𑀓𑁆𑀔𑀺𑀢𑁄𑀯 𑀦𑀺𑀓𑁆𑀔𑀫𑀢𑀺.

𑀉𑀤𑀓𑀲𑁆𑀲 𑀥𑀸𑀭𑀸𑀢𑀺 𑀉𑀤𑀓𑀯𑀝𑁆𑀝𑀺𑀬𑁄. 𑀢𑀸𑀲𑀼 𑀲𑀻𑀢𑀸 𑀲𑀼𑀯𑀡𑁆𑀡𑀓𑀝𑀸𑀳𑁂 𑀧𑀢𑀢𑀺, 𑀉𑀡𑁆𑀳𑀸 𑀭𑀚𑀢𑀓𑀝𑀸𑀳𑁂. 𑀇𑀤𑀜𑁆𑀘 𑀧𑀣𑀯𑀻𑀢𑀮𑁂 𑀓𑁂𑀦𑀘𑀺 𑀅𑀲𑀼𑀘𑀺𑀦𑀸 𑀅𑀲𑀫𑁆𑀫𑀺𑀲𑁆𑀲𑀁 𑀢𑁂𑀲𑀁 𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬𑀉𑀤𑀓𑀜𑁆𑀘𑁂𑀯 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 𑀓𑀻𑀴𑀦𑀉𑀤𑀓𑀜𑁆𑀘 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀅𑀜𑁆𑀜𑀲𑁆𑀲 𑀧𑀦 𑀲𑀼𑀯𑀡𑁆𑀡𑀭𑀚𑀢𑀖𑀝𑁂𑀳𑀺 𑀆𑀳𑀭𑀺𑀬𑀫𑀸𑀦𑀉𑀤𑀓𑀲𑁆𑀲 𑀘𑁂𑀯 𑀳𑀁𑀲𑀯𑀝𑁆𑀝𑀓𑀸𑀤𑀺𑀧𑁄𑀓𑁆𑀔𑀭𑀡𑀺𑀕𑀢𑀲𑁆𑀲 𑀘 𑀉𑀤𑀓𑀲𑁆𑀲 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺.

𑁨𑁦𑁭. 𑀲𑀫𑁆𑀧𑀢𑀺𑀚𑀸𑀢𑁄𑀢𑀺 𑀫𑀼𑀳𑀼𑀢𑁆𑀢𑀚𑀸𑀢𑁄. 𑀧𑀸𑀴𑀺𑀬𑀁 𑀧𑀦 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁄 𑀯𑀺𑀬 𑀤𑀲𑁆𑀲𑀺𑀢𑁄, 𑀦 𑀧𑀦 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑀜𑁆𑀳𑀺 𑀢𑀁 𑀧𑀞𑀫𑀁 𑀩𑁆𑀭𑀳𑁆𑀫𑀸𑀦𑁄 𑀲𑀼𑀯𑀡𑁆𑀡𑀚𑀸𑀮𑁂𑀦 𑀧𑀝𑀺𑀕𑁆𑀕𑀡𑁆𑀳𑀺𑀁𑀲𑀼, 𑀢𑁂𑀲𑀁 𑀳𑀢𑁆𑀣𑀢𑁄 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀫𑀗𑁆𑀕𑀮𑀲𑀫𑁆𑀫𑀢𑀸𑀬 𑀲𑀼𑀔𑀲𑀫𑁆𑀨𑀲𑁆𑀲𑀸𑀬 𑀅𑀚𑀺𑀦𑀧𑁆𑀧𑀯𑁂𑀡𑀺𑀬𑀸, 𑀢𑁂𑀲𑀁 𑀳𑀢𑁆𑀣𑀢𑁄 𑀫𑀦𑀼𑀲𑁆𑀲𑀸 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂𑀦, 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑁄.

𑀲𑁂𑀢𑀫𑁆𑀳𑀺 𑀙𑀢𑁆𑀢𑁂 𑀅𑀦𑀼𑀥𑀸𑀭𑀺𑀬𑀫𑀸𑀦𑁂𑀢𑀺 𑀤𑀺𑀩𑁆𑀩𑀲𑁂𑀢𑀘𑁆𑀙𑀢𑁆𑀢𑁂 𑀅𑀦𑀼𑀥𑀸𑀭𑀺𑀬𑀫𑀸𑀦𑁂. 𑀏𑀢𑁆𑀣 𑀘 𑀙𑀢𑁆𑀢𑀲𑁆𑀲 𑀧𑀭𑀺𑀯𑀸𑀭𑀸𑀦𑀺 𑀔𑀕𑁆𑀕𑀸𑀤𑀻𑀦𑀺 𑀧𑀜𑁆𑀘 𑀭𑀸𑀚𑀓𑀓𑀼𑀥𑀪𑀡𑁆𑀟𑀸𑀦𑀺𑀧𑀺 𑀆𑀕𑀢𑀸𑀦𑁂𑀯. 𑀧𑀸𑀴𑀺𑀬𑀁 𑀧𑀦 𑀭𑀸𑀚𑀕𑀫𑀦𑁂 𑀭𑀸𑀚𑀸 𑀯𑀺𑀬 𑀙𑀢𑁆𑀢𑀫𑁂𑀯 𑀯𑀼𑀢𑁆𑀢𑀁. 𑀢𑁂𑀲𑀼 𑀙𑀢𑁆𑀢𑀫𑁂𑀯 𑀧𑀜𑁆𑀜𑀸𑀬𑀢𑀺, 𑀦 𑀙𑀢𑁆𑀢𑀕𑁆𑀕𑀸𑀳𑀓𑀸. 𑀢𑀣𑀸 𑀔𑀕𑁆𑀕-𑀢𑀸𑀮𑀯𑀡𑁆𑀝-𑀫𑁄𑀭𑀳𑀢𑁆𑀣𑀓-𑀯𑀸𑀴𑀩𑀻𑀚𑀦𑀺-𑀉𑀡𑁆𑀳𑀻𑀲𑀫𑀢𑁆𑀢𑀸𑀬𑁂𑀯 𑀧𑀜𑁆𑀜𑀸𑀬𑀦𑁆𑀢𑀺, 𑀦 𑀢𑁂𑀲𑀁 𑀕𑀸𑀳𑀓𑀸. 𑀲𑀩𑁆𑀩𑀸𑀦𑀺 𑀓𑀺𑀭 𑀢𑀸𑀦𑀺 𑀅𑀤𑀺𑀲𑁆𑀲𑀫𑀸𑀦𑀭𑀽𑀧𑀸 𑀤𑁂𑀯𑀢𑀸 𑀕𑀡𑁆𑀳𑀺𑀁𑀲𑀼. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀅𑀦𑁂𑀓𑀲𑀸𑀔𑀜𑁆𑀘 𑀲𑀳𑀲𑁆𑀲𑀫𑀡𑁆𑀟𑀮𑀁,

𑀙𑀢𑁆𑀢𑀁 𑀫𑀭𑀽 𑀥𑀸𑀭𑀬𑀼𑀫𑀦𑁆𑀢𑀮𑀺𑀓𑁆𑀔𑁂;

𑀲𑀼𑀯𑀡𑁆𑀡𑀤𑀡𑁆𑀟𑀸 𑀯𑀺𑀧𑀢𑀦𑁆𑀢𑀺 𑀘𑀸𑀫𑀭𑀸,

𑀦 𑀤𑀺𑀲𑁆𑀲𑀭𑁂 𑀘𑀸𑀫𑀭𑀙𑀢𑁆𑀢𑀕𑀸𑀳𑀓𑀸’’𑀢𑀺. (𑀲𑀼. 𑀦𑀺. 𑁬𑁯𑁩);

𑀲𑀩𑁆𑀩𑀸 𑀘 𑀤𑀺𑀲𑀸𑀢𑀺 𑀇𑀤𑀁 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑀽𑀧𑀭𑀺 𑀞𑀺𑀢𑀲𑁆𑀲 𑀯𑀺𑀬 𑀲𑀩𑁆𑀩𑀤𑀺𑀲𑀸𑀦𑀼𑀯𑀺𑀮𑁄𑀓𑀦𑀁 𑀯𑀼𑀢𑁆𑀢𑀁, 𑀦 𑀔𑁄 𑀧𑀦𑁂𑀯𑀁 𑀤𑀝𑁆𑀞𑀩𑁆𑀩𑀁. 𑀫𑀳𑀸𑀲𑀢𑁆𑀢𑁄 𑀳𑀺 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀤𑀺𑀲𑀁 𑀑𑀮𑁄𑀓𑁂𑀲𑀺, 𑀅𑀦𑁂𑀓𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀸𑀦𑀺 𑀏𑀓𑀗𑁆𑀕𑀡𑀸𑀦𑀺 𑀅𑀳𑁂𑀲𑀼𑀁. 𑀢𑀢𑁆𑀣 𑀤𑁂𑀯𑀫𑀦𑀼𑀲𑁆𑀲𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑀸 𑁋 ‘‘𑀫𑀳𑀸𑀧𑀼𑀭𑀺𑀲 𑀇𑀥 𑀢𑀼𑀫𑁆𑀳𑁂𑀳𑀺 𑀲𑀤𑀺𑀲𑁄𑀧𑀺 𑀦𑀢𑁆𑀣𑀺, 𑀓𑀼𑀢𑁄 𑀉𑀢𑁆𑀢𑀭𑀺𑀢𑀭𑁄’’𑀢𑀺 𑀆𑀳𑀁𑀲𑀼. 𑀏𑀯𑀁 𑀘𑀢𑀲𑁆𑀲𑁄 𑀤𑀺𑀲𑀸, 𑀘𑀢𑀲𑁆𑀲𑁄 𑀅𑀦𑀼𑀤𑀺𑀲𑀸, 𑀳𑁂𑀝𑁆𑀞𑀸, 𑀉𑀧𑀭𑀻𑀢𑀺 𑀤𑀲𑀧𑀺 𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑀸 𑀲𑀤𑀺𑀲𑀁 𑀅𑀤𑀺𑀲𑁆𑀯𑀸 𑀅𑀬𑀁 𑀉𑀢𑁆𑀢𑀭𑀸 𑀤𑀺𑀲𑀸𑀢𑀺 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀅𑀕𑀫𑀸𑀲𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀆𑀲𑀪𑀺𑀦𑁆𑀢𑀺 𑀉𑀢𑁆𑀢𑀫𑀁. 𑀅𑀕𑁆𑀕𑁄𑀢𑀺 𑀕𑀼𑀡𑁂𑀳𑀺 𑀲𑀩𑁆𑀩𑀧𑀞𑀫𑁄. 𑀇𑀢𑀭𑀸𑀦𑀺 𑀤𑁆𑀯𑁂 𑀧𑀤𑀸𑀦𑀺 𑀏𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄𑀢𑀺 𑀧𑀤𑀤𑁆𑀯𑀬𑁂𑀦 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀧𑀢𑁆𑀢𑀩𑁆𑀩𑀁 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀸𑀲𑀺.

𑀏𑀢𑁆𑀣 𑀘 𑀲𑀫𑁂𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀦𑀁 𑀘𑀢𑀼𑀇𑀤𑁆𑀥𑀺𑀧𑀸𑀤𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀉𑀢𑁆𑀢𑀭𑀸𑀪𑀺𑀫𑀼𑀔𑀪𑀸𑀯𑁄 𑀫𑀳𑀸𑀚𑀦𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀕𑀫𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀲𑀢𑁆𑀢𑀧𑀤𑀕𑀫𑀦𑀁 𑀲𑀢𑁆𑀢𑀩𑁄𑀚𑁆𑀛𑀗𑁆𑀕𑀭𑀢𑀦𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀤𑀺𑀩𑁆𑀩𑀲𑁂𑀢𑀘𑁆𑀙𑀢𑁆𑀢𑀥𑀸𑀭𑀡𑀁 𑀯𑀺𑀫𑀼𑀢𑁆𑀢𑀺𑀘𑁆𑀙𑀢𑁆𑀢𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀧𑀜𑁆𑀘𑀭𑀸𑀚𑀓𑀓𑀼𑀥𑀪𑀡𑁆𑀟𑀸𑀦𑀺 𑀧𑀜𑁆𑀘𑀳𑀺 𑀯𑀺𑀫𑀼𑀢𑁆𑀢𑀻𑀳𑀺 𑀯𑀺𑀫𑀼𑀘𑁆𑀘𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀤𑀺𑀲𑀸𑀦𑀼𑀯𑀺𑀮𑁄𑀓𑀦𑀁 𑀅𑀦𑀸𑀯𑀭𑀡𑀜𑀸𑀡𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀆𑀲𑀪𑀻𑀯𑀸𑀘𑀸𑀪𑀸𑀲𑀦𑀁 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. ‘‘𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀻’’𑀢𑀺 𑀲𑀻𑀳𑀦𑀸𑀤𑁄 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑁂 𑀯𑀸𑀭𑀸 𑀧𑀸𑀴𑀺𑀬𑀁 𑀆𑀕𑀢𑀸, 𑀲𑀫𑁆𑀩𑀳𑀼𑀮𑀯𑀸𑀭𑁄 𑀧𑀦 𑀆𑀕𑀢𑁄, 𑀆𑀳𑀭𑀺𑀢𑁆𑀯𑀸 𑀤𑀻𑀧𑁂𑀢𑀩𑁆𑀩𑁄.

𑀫𑀳𑀸𑀧𑀼𑀭𑀺𑀲𑀲𑁆𑀲 𑀳𑀺 𑀚𑀸𑀢𑀤𑀺𑀯𑀲𑁂 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀓𑀫𑁆𑀧𑀺. 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀫𑁆𑀳𑀺 𑀤𑁂𑀯𑀢𑀸 𑀏𑀓𑀘𑀓𑁆𑀓𑀯𑀸𑀴𑁂 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀧𑀞𑀫𑀁 𑀤𑁂𑀯𑀸 𑀧𑀝𑀺𑀕𑁆𑀕𑀳𑀺𑀁𑀲𑀼, 𑀧𑀘𑁆𑀙𑀸 𑀫𑀦𑀼𑀲𑁆𑀲𑀸. 𑀢𑀦𑁆𑀢𑀺𑀩𑀤𑁆𑀥𑀸 𑀯𑀻𑀡𑀸 𑀘𑀫𑁆𑀫𑀩𑀤𑁆𑀥𑀸 𑀪𑁂𑀭𑀺𑀬𑁄 𑀘 𑀓𑁂𑀦𑀘𑀺 𑀅𑀯𑀸𑀤𑀺𑀢𑀸 𑀲𑀬𑀫𑁂𑀯 𑀯𑀚𑁆𑀚𑀺𑀁𑀲𑀼, 𑀫𑀦𑀼𑀲𑁆𑀲𑀸𑀦𑀁 𑀅𑀦𑁆𑀤𑀼𑀩𑀦𑁆𑀥𑀦𑀸𑀤𑀻𑀦𑀺 𑀔𑀡𑁆𑀟𑀸𑀔𑀡𑁆𑀟𑀁 𑀪𑀺𑀚𑁆𑀚𑀺𑀁𑀲𑀼. 𑀲𑀩𑁆𑀩𑀭𑁄𑀕𑀸 𑀅𑀫𑁆𑀩𑀺𑀮𑁂𑀦 𑀥𑁄𑀢𑀢𑀫𑁆𑀩𑀫𑀮𑀁 𑀯𑀺𑀬 𑀯𑀺𑀕𑀘𑁆𑀙𑀺𑀁𑀲𑀼, 𑀚𑀘𑁆𑀘𑀦𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀺𑀁𑀲𑀼. 𑀚𑀘𑁆𑀘𑀩𑀥𑀺𑀭𑀸 𑀲𑀤𑁆𑀤𑀁 𑀲𑀼𑀡𑀺𑀁𑀲𑀼, 𑀧𑀻𑀞𑀲𑀧𑁆𑀧𑀻 𑀚𑀯𑀦𑀲𑀫𑁆𑀧𑀦𑁆𑀦𑀸 𑀅𑀳𑁂𑀲𑀼𑀁, 𑀚𑀸𑀢𑀺𑀚𑀴𑀸𑀦𑀫𑁆𑀧𑀺 𑀏𑀴𑀫𑀽𑀕𑀸𑀦𑀁 𑀲𑀢𑀺 𑀧𑀢𑀺𑀝𑁆𑀞𑀸𑀲𑀺, 𑀯𑀺𑀤𑁂𑀲𑁂 𑀧𑀓𑁆𑀔𑀦𑁆𑀤𑀦𑀸𑀯𑀸 𑀲𑀼𑀧𑀝𑁆𑀝𑀦𑀁 𑀧𑀸𑀧𑀼𑀡𑀺𑀁𑀲𑀼, 𑀆𑀓𑀸𑀲𑀝𑁆𑀞𑀓𑀪𑀽𑀫𑀝𑁆𑀞𑀓𑀭𑀢𑀦𑀸𑀦𑀺 𑀲𑀓𑀢𑁂𑀚𑁄𑀪𑀸𑀲𑀺𑀢𑀸𑀦𑀺 𑀅𑀳𑁂𑀲𑀼𑀁, 𑀯𑁂𑀭𑀺𑀦𑁄 𑀫𑁂𑀢𑁆𑀢𑀘𑀺𑀢𑁆𑀢𑀁 𑀧𑀝𑀺𑀮𑀪𑀺𑀁𑀲𑀼, 𑀅𑀯𑀻𑀘𑀺𑀫𑁆𑀳𑀺 𑀅𑀕𑁆𑀕𑀺 𑀦𑀺𑀩𑁆𑀩𑀸𑀬𑀺. 𑀮𑁄𑀓𑀦𑁆𑀢𑀭𑁂 𑀆𑀮𑁄𑀓𑁄 𑀉𑀤𑀧𑀸𑀤𑀺, 𑀦𑀤𑀻𑀲𑀼 𑀚𑀮𑀁 𑀦 𑀧𑀯𑀢𑁆𑀢𑀺, 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀫𑀥𑀼𑀭𑀲𑀤𑀺𑀲𑀁 𑀉𑀤𑀓𑀁 𑀅𑀳𑁄𑀲𑀺, 𑀯𑀸𑀢𑁄 𑀦 𑀯𑀸𑀬𑀺, 𑀆𑀓𑀸𑀲𑀧𑀩𑁆𑀩𑀢𑀭𑀼𑀓𑁆𑀔𑀕𑀢𑀸 𑀲𑀓𑀼𑀡𑀸 𑀪𑀲𑁆𑀲𑀺𑀢𑁆𑀯𑀸 𑀧𑀣𑀯𑀻𑀕𑀢𑀸 𑀅𑀳𑁂𑀲𑀼𑀁, 𑀘𑀦𑁆𑀤𑁄 𑀅𑀢𑀺𑀭𑁄𑀘𑀺, 𑀲𑀽𑀭𑀺𑀬𑁄 𑀦 𑀉𑀡𑁆𑀳𑁄 𑀦 𑀲𑀻𑀢𑀮𑁄 𑀦𑀺𑀫𑁆𑀫𑀮𑁄 𑀉𑀢𑀼𑀲𑀫𑁆𑀧𑀦𑁆𑀦𑁄 𑀅𑀳𑁄𑀲𑀺, 𑀤𑁂𑀯𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀫𑀸𑀦𑀤𑁆𑀯𑀸𑀭𑁂 𑀞𑀢𑁆𑀯𑀸 𑀅𑀧𑁆𑀨𑁄𑀝𑀦𑀲𑁂𑀴𑀦𑀘𑁂𑀮𑀼𑀓𑁆𑀔𑁂𑀧𑀸𑀤𑀻𑀳𑀺 𑀫𑀳𑀸𑀓𑀻𑀴𑀁 𑀓𑀻𑀴𑀺𑀁𑀲𑀼, 𑀘𑀸𑀢𑀼𑀤𑁆𑀤𑀻𑀧𑀺𑀓𑀫𑀳𑀸𑀫𑁂𑀖𑁄 𑀯𑀲𑁆𑀲𑀺, 𑀫𑀳𑀸𑀚𑀦𑀁 𑀦𑁂𑀯 𑀔𑀼𑀤𑀸 𑀦 𑀧𑀺𑀧𑀸𑀲𑀸 𑀧𑀻𑀴𑁂𑀲𑀺, 𑀤𑁆𑀯𑀸𑀭𑀓𑀯𑀸𑀝𑀸𑀦𑀺 𑀲𑀬𑀫𑁂𑀯 𑀯𑀺𑀯𑀭𑀺𑀁𑀲𑀼, 𑀧𑀼𑀧𑁆𑀨𑀽𑀧𑀕𑀨𑀮𑀽𑀧𑀕𑀸 𑀭𑀼𑀓𑁆𑀔𑀸 𑀧𑀼𑀧𑁆𑀨𑀨𑀮𑀸𑀦𑀺 𑀕𑀡𑁆𑀳𑀺𑀁𑀲𑀼, 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀏𑀓𑀤𑁆𑀥𑀚𑀫𑀸𑀮𑀸 𑀅𑀳𑁄𑀲𑀻𑀢𑀺.

𑀢𑀢𑁆𑀭𑀸𑀧𑀺𑀲𑁆𑀲 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀓𑀫𑁆𑀧𑁄 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀤𑁂𑀯𑀢𑀸𑀦𑀁 𑀏𑀓𑀘𑀓𑁆𑀓𑀯𑀸𑀴𑁂 𑀲𑀦𑁆𑀦𑀺𑀧𑀸𑀢𑁄 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀓𑀸𑀮𑁂 𑀏𑀓𑀧𑁆𑀧𑀳𑀸𑀭𑁂𑀦 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀥𑀫𑁆𑀫𑀧𑀝𑀺𑀕𑁆𑀕𑀡𑁆𑀳𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀧𑀞𑀫𑀁 𑀤𑁂𑀯𑀢𑀸𑀦𑀁 𑀧𑀝𑀺𑀕𑁆𑀕𑀳𑀡𑀁 𑀘𑀢𑀼𑀦𑁆𑀦𑀁 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁 𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁. 𑀧𑀘𑁆𑀙𑀸 𑀫𑀦𑀼𑀲𑁆𑀲𑀸𑀦𑀁 𑀧𑀝𑀺𑀕𑁆𑀕𑀳𑀡𑀁 𑀘𑀢𑀼𑀦𑁆𑀦𑀁 𑀅𑀭𑀽𑀧𑀚𑁆𑀛𑀸𑀦𑀸𑀦𑀁 𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀢𑀦𑁆𑀢𑀺𑀩𑀤𑁆𑀥𑀯𑀻𑀡𑀸𑀦𑀁 𑀲𑀬𑀁 𑀯𑀚𑁆𑀚𑀦𑀁 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀘𑀫𑁆𑀫𑀩𑀤𑁆𑀥𑀪𑁂𑀭𑀻𑀦𑀁 𑀯𑀚𑁆𑀚𑀦𑀁 𑀫𑀳𑀢𑀺𑀬𑀸 𑀥𑀫𑁆𑀫𑀪𑁂𑀭𑀺𑀬𑀸 𑀅𑀦𑀼𑀲𑁆𑀲𑀸𑀯𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀅𑀦𑁆𑀤𑀼𑀩𑀦𑁆𑀥𑀦𑀸𑀤𑀻𑀦𑀁 𑀙𑁂𑀤𑁄 𑀅𑀲𑁆𑀫𑀺𑀫𑀸𑀦𑀲𑀫𑀼𑀘𑁆𑀙𑁂𑀤𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀲𑀩𑁆𑀩𑀭𑁄𑀕𑀯𑀺𑀕𑀫𑁄 𑀲𑀩𑁆𑀩𑀓𑀺𑀮𑁂𑀲𑀯𑀺𑀕𑀫𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀚𑀘𑁆𑀘𑀦𑁆𑀥𑀸𑀦𑀁 𑀭𑀽𑀧𑀤𑀲𑁆𑀲𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀚𑀘𑁆𑀘𑀩𑀥𑀺𑀭𑀸𑀦𑀁 𑀲𑀤𑁆𑀤𑀲𑁆𑀲𑀯𑀦𑀁 𑀤𑀺𑀩𑁆𑀩𑀲𑁄𑀢𑀥𑀸𑀢𑀼𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀧𑀻𑀞𑀲𑀧𑁆𑀧𑀻𑀦𑀁 𑀚𑀯𑀦𑀲𑀫𑁆𑀧𑀤𑀸 𑀘𑀢𑀼𑀇𑀤𑁆𑀥𑀺𑀧𑀸𑀤𑀸𑀥𑀺𑀕𑀫𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀚𑀴𑀸𑀦𑀁 𑀲𑀢𑀺𑀧𑀢𑀺𑀝𑁆𑀞𑀸𑀦𑀁 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀯𑀺𑀤𑁂𑀲𑀧𑀓𑁆𑀔𑀦𑁆𑀤𑀦𑀸𑀯𑀸𑀦𑀁 𑀲𑀼𑀧𑀝𑁆𑀝𑀦𑀲𑀫𑁆𑀧𑀸𑀧𑀼𑀡𑀦𑀁 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀥𑀺𑀕𑀫𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀭𑀢𑀦𑀸𑀦𑀁 𑀲𑀓𑀢𑁂𑀚𑁄𑀪𑀸𑀲𑀺𑀢𑀢𑁆𑀢𑀁 𑀬𑀁 𑀮𑁄𑀓𑀲𑁆𑀲 𑀥𑀫𑁆𑀫𑁄𑀪𑀸𑀲𑀁 𑀤𑀲𑁆𑀲𑁂𑀲𑁆𑀲𑀢𑀺 𑀢𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁.

𑀯𑁂𑀭𑀻𑀦𑀁 𑀫𑁂𑀢𑁆𑀢𑀘𑀺𑀢𑁆𑀢𑀧𑀝𑀺𑀮𑀸𑀪𑁄 𑀘𑀢𑀼𑀩𑁆𑀭𑀳𑁆𑀫𑀯𑀺𑀳𑀸𑀭𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀅𑀯𑀻𑀘𑀺𑀫𑁆𑀳𑀺 𑀅𑀕𑁆𑀕𑀺𑀦𑀺𑀩𑁆𑀩𑀸𑀦𑀁 𑀏𑀓𑀸𑀤𑀲𑀅𑀕𑁆𑀕𑀺𑀦𑀺𑀩𑁆𑀩𑀸𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀮𑁄𑀓𑀦𑁆𑀢𑀭𑀸𑀮𑁄𑀓𑁄 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀜𑀸𑀡𑀸𑀮𑁄𑀓𑀤𑀲𑁆𑀲𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀫𑀥𑀼𑀭𑀢𑀸 𑀦𑀺𑀩𑁆𑀩𑀸𑀦𑀭𑀲𑁂𑀦 𑀏𑀓𑀭𑀲𑀪𑀸𑀯𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀯𑀸𑀢𑀲𑁆𑀲 𑀅𑀯𑀸𑀬𑀦𑀁 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀪𑀺𑀦𑁆𑀤𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀲𑀓𑀼𑀡𑀸𑀦𑀁 𑀧𑀣𑀯𑀻𑀕𑀫𑀦𑀁 𑀫𑀳𑀸𑀚𑀦𑀲𑁆𑀲 𑀑𑀯𑀸𑀤𑀁 𑀲𑀼𑀢𑁆𑀯𑀸 𑀧𑀸𑀡𑁂𑀳𑀺 𑀲𑀭𑀡𑀕𑀫𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀘𑀦𑁆𑀤𑀲𑁆𑀲 𑀅𑀢𑀺𑀯𑀺𑀭𑁄𑀘𑀦𑀁 𑀩𑀳𑀼𑀚𑀦𑀓𑀦𑁆𑀢𑀢𑀸𑀬 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀲𑀽𑀭𑀺𑀬𑀲𑁆𑀲 𑀉𑀡𑁆𑀳𑀲𑀻𑀢𑀯𑀺𑀯𑀚𑁆𑀚𑀦𑀉𑀢𑀼𑀲𑀼𑀔𑀢𑀸 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀼𑀧𑁆𑀧𑀢𑁆𑀢𑀺𑀬𑀸 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀤𑁂𑀯𑀢𑀸𑀦𑀁 𑀯𑀺𑀫𑀸𑀦𑀤𑁆𑀯𑀸𑀭𑁂𑀲𑀼 𑀅𑀧𑁆𑀨𑁄𑀝𑀦𑀸𑀤𑀻𑀳𑀺 𑀓𑀻𑀴𑀦𑀁 𑀩𑀼𑀤𑁆𑀥𑀪𑀸𑀯𑀁 𑀧𑀢𑁆𑀯𑀸 𑀉𑀤𑀸𑀦𑀁 𑀉𑀤𑀸𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀘𑀸𑀢𑀼𑀤𑁆𑀤𑀻𑀧𑀺𑀓𑀫𑀳𑀸𑀫𑁂𑀖𑀯𑀲𑁆𑀲𑀦𑀁 𑀫𑀳𑀢𑁄 𑀥𑀫𑁆𑀫𑀫𑁂𑀖𑀯𑀲𑁆𑀲𑀦𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀔𑀼𑀤𑀸𑀧𑀻𑀴𑀦𑀲𑁆𑀲 𑀅𑀪𑀸𑀯𑁄 𑀓𑀸𑀬𑀕𑀢𑀸𑀲𑀢𑀺𑀅𑀫𑀢𑀧𑀝𑀺𑀮𑀸𑀪𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀧𑀺𑀧𑀸𑀲𑀸𑀧𑀻𑀴𑀦𑀲𑁆𑀲 𑀅𑀪𑀸𑀯𑁄 𑀯𑀺𑀫𑀼𑀢𑁆𑀢𑀺𑀲𑀼𑀔𑁂𑀦 𑀲𑀼𑀔𑀺𑀢𑀪𑀸𑀯𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀤𑁆𑀯𑀸𑀭𑀓𑀯𑀸𑀝𑀸𑀦𑀁 𑀲𑀬𑀫𑁂𑀯 𑀯𑀺𑀯𑀭𑀡𑀁 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀤𑁆𑀯𑀸𑀭𑀯𑀺𑀯𑀭𑀡𑀲𑁆𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀭𑀼𑀓𑁆𑀔𑀸𑀦𑀁 𑀧𑀼𑀧𑁆𑀨𑀨𑀮𑀕𑀳𑀡𑀁 𑀯𑀺𑀫𑀼𑀢𑁆𑀢𑀺𑀧𑀼𑀧𑁆𑀨𑁂𑀳𑀺 𑀧𑀼𑀧𑁆𑀨𑀺𑀢𑀲𑁆𑀲 𑀘 𑀲𑀸𑀫𑀜𑁆𑀜𑀨𑀮𑀪𑀸𑀭𑀪𑀭𑀺𑀢𑀪𑀸𑀯𑀲𑁆𑀲 𑀘 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸 𑀏𑀓𑀤𑁆𑀥𑀚𑀫𑀸𑀮𑀢𑀸 𑀅𑀭𑀺𑀬𑀤𑁆𑀥𑀚𑀫𑀸𑀮𑀸𑀫𑀸𑀮𑀺𑀢𑀸𑀬 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀲𑀫𑁆𑀩𑀳𑀼𑀮𑀯𑀸𑀭𑁄 𑀦𑀸𑀫.

𑀏𑀢𑁆𑀣 𑀧𑀜𑁆𑀳𑁂 𑀧𑀼𑀘𑁆𑀙𑀦𑁆𑀢𑀺 𑁋 ‘‘𑀬𑀤𑀸 𑀫𑀳𑀸𑀧𑀼𑀭𑀺𑀲𑁄 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀕𑀦𑁆𑀢𑁆𑀯𑀸 𑀆𑀲𑀪𑀺𑀁 𑀯𑀸𑀘𑀁 𑀪𑀸𑀲𑀢𑀺, 𑀢𑀤𑀸 𑀓𑀺𑀁 𑀧𑀣𑀯𑀺𑀬𑀸 𑀕𑀢𑁄, 𑀉𑀤𑀸𑀳𑀼 𑀆𑀓𑀸𑀲𑁂𑀦? 𑀤𑀺𑀲𑁆𑀲𑀫𑀸𑀦𑁄 𑀕𑀢𑁄, 𑀉𑀤𑀸𑀳𑀼 𑀅𑀤𑀺𑀲𑁆𑀲𑀫𑀸𑀦𑁄? 𑀅𑀘𑁂𑀮𑀓𑁄 𑀕𑀢𑁄, 𑀉𑀤𑀸𑀳𑀼 𑀅𑀮𑀗𑁆𑀓𑀢𑀧𑁆𑀧𑀝𑀺𑀬𑀢𑁆𑀢𑁄? 𑀤𑀳𑀭𑁄 𑀳𑀼𑀢𑁆𑀯𑀸 𑀕𑀢𑁄, 𑀉𑀤𑀸𑀳𑀼 𑀫𑀳𑀮𑁆𑀮𑀓𑁄? 𑀧𑀘𑁆𑀙𑀸𑀧𑀺 𑀓𑀺𑀁 𑀢𑀸𑀤𑀺𑀲𑁄𑀯 𑀅𑀳𑁄𑀲𑀺, 𑀉𑀤𑀸𑀳𑀼 𑀧𑀼𑀦 𑀩𑀸𑀮𑀤𑀸𑀭𑀓𑁄’’𑀢𑀺? 𑀅𑀬𑀁 𑀧𑀦 𑀧𑀜𑁆𑀳𑁄 𑀳𑁂𑀝𑁆𑀞𑀸 𑀮𑁄𑀳𑀧𑀸𑀲𑀸𑀤𑁂 𑀲𑀗𑁆𑀖𑀲𑀦𑁆𑀦𑀺𑀧𑀸𑀢𑁂 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑁄𑀯. 𑀣𑁂𑀭𑁄 𑀓𑀺𑀭𑁂𑀢𑁆𑀣 𑀦𑀺𑀬𑀢𑀺 𑀧𑀼𑀩𑁆𑀩𑁂𑀓𑀢𑀓𑀫𑁆𑀫-𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀯𑀸𑀤𑀯𑀲𑁂𑀦 𑀢𑀁 𑀢𑀁 𑀩𑀳𑀼𑀁 𑀯𑀢𑁆𑀯𑀸 𑀅𑀯𑀲𑀸𑀦𑁂 𑀏𑀯𑀁 𑀩𑁆𑀬𑀸𑀓𑀸𑀲𑀺 𑁋 ‘‘𑀫𑀳𑀸𑀧𑀼𑀭𑀺𑀲𑁄 𑀧𑀣𑀯𑀺𑀬𑀁 𑀕𑀢𑁄, 𑀫𑀳𑀸𑀚𑀦𑀲𑁆𑀲 𑀧𑀦 𑀆𑀓𑀸𑀲𑁂 𑀕𑀘𑁆𑀙𑀦𑁆𑀢𑁄 𑀯𑀺𑀬 𑀅𑀳𑁄𑀲𑀺. 𑀤𑀺𑀲𑁆𑀲𑀫𑀸𑀦𑁄 𑀕𑀢𑁄, 𑀫𑀳𑀸𑀚𑀦𑀲𑁆𑀲 𑀧𑀦 𑀅𑀤𑀺𑀲𑁆𑀲𑀫𑀸𑀦𑁄 𑀯𑀺𑀬 𑀅𑀳𑁄𑀲𑀺. 𑀅𑀘𑁂𑀮𑀓𑁄 𑀕𑀢𑁄, 𑀫𑀳𑀸𑀚𑀦𑀲𑁆𑀲 𑀧𑀦 𑀅𑀮𑀗𑁆𑀓𑀢𑀧𑁆𑀧𑀝𑀺𑀬𑀢𑁆𑀢𑁄𑀯 𑀉𑀧𑀝𑁆𑀞𑀸𑀲𑀺. 𑀤𑀳𑀭𑁄𑀯 𑀕𑀢𑁄, 𑀫𑀳𑀸𑀚𑀦𑀲𑁆𑀲 𑀧𑀦 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑁄 𑀯𑀺𑀬 𑀅𑀳𑁄𑀲𑀺. 𑀧𑀘𑁆𑀙𑀸 𑀧𑀦 𑀩𑀸𑀮𑀤𑀸𑀭𑀓𑁄𑀯 𑀅𑀳𑁄𑀲𑀺, 𑀦 𑀢𑀸𑀤𑀺𑀲𑁄’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀧𑀭𑀺𑀲𑀸 𑀘𑀲𑁆𑀲 ‘‘𑀩𑀼𑀤𑁆𑀥𑁂𑀦 𑀯𑀺𑀬 𑀳𑀼𑀢𑁆𑀯𑀸 𑀪𑁄 𑀣𑁂𑀭𑁂𑀦 𑀧𑀜𑁆𑀳𑁄 𑀓𑀣𑀺𑀢𑁄’’𑀢𑀺 𑀅𑀢𑁆𑀢𑀫𑀦𑀸 𑀅𑀳𑁄𑀲𑀺. 𑀮𑁄𑀓𑀦𑁆𑀢𑀭𑀺𑀓𑀯𑀸𑀭𑁄 𑀯𑀼𑀢𑁆𑀢𑀦𑀬𑁄 𑀏𑀯.

𑀯𑀺𑀤𑀺𑀢𑀸𑀢𑀺 𑀧𑀸𑀓𑀝𑀸 𑀳𑀼𑀢𑁆𑀯𑀸. 𑀬𑀣𑀸 𑀳𑀺 𑀲𑀸𑀯𑀓𑀸 𑀦𑀳𑀸𑀦𑀫𑀼𑀔𑀥𑁄𑀯𑀦𑀔𑀸𑀤𑀦𑀧𑀺𑀯𑀦𑀸𑀤𑀺𑀓𑀸𑀮𑁂 𑀅𑀦𑁄𑀓𑀸𑀲𑀕𑀢𑁂 𑀅𑀢𑀻𑀢𑀲𑀗𑁆𑀔𑀸𑀭𑁂 𑀦𑀺𑀧𑁆𑀧𑀤𑁂𑀲𑁂 𑀲𑀫𑁆𑀫𑀲𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀑𑀓𑀸𑀲𑀧𑀢𑁆𑀢𑀬𑁂𑀯 𑀲𑀫𑁆𑀫𑀲𑀦𑁆𑀢𑀺, 𑀦 𑀏𑀯𑀁 𑀩𑀼𑀤𑁆𑀥𑀸. 𑀩𑀼𑀤𑁆𑀥𑀸 𑀳𑀺 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑁂 𑀯𑀯𑀢𑁆𑀣𑀺𑀢𑀲𑀗𑁆𑀔𑀸𑀭𑁂 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀫𑁆𑀫𑀲𑀺𑀢𑁆𑀯𑀸 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸𑀯 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, 𑀢𑁂𑀲𑀁 𑀅𑀯𑀺𑀧𑀲𑁆𑀲𑀺𑀢𑀥𑀫𑁆𑀫𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀯𑀺𑀤𑀺𑀢𑀸’’𑀢𑀺 𑀆𑀳. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀅𑀘𑁆𑀙𑀭𑀺𑀬𑀅𑀩𑁆𑀪𑀼𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀩𑀸𑀓𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁯. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀩𑀸𑀓𑀼𑀮𑀲𑀼𑀢𑁆𑀢𑀁. 𑀢𑀢𑁆𑀣 𑀩𑀸𑀓𑀼𑀮𑁄𑀢𑀺 𑀬𑀣𑀸 𑀤𑁆𑀯𑀸𑀯𑀻𑀲𑀢𑀺 𑀤𑁆𑀯𑀢𑁆𑀢𑀺𑀁𑀲𑀸𑀢𑀺𑀆𑀤𑀺𑀫𑁆𑀳𑀺 𑀯𑀢𑁆𑀢𑀩𑁆𑀩𑁂 𑀩𑀸𑀯𑀻𑀲𑀢𑀺 𑀩𑀸𑀢𑁆𑀢𑀺𑀁𑀲𑀸𑀢𑀺𑀆𑀤𑀻𑀦𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀫𑁂𑀯 𑀤𑁆𑀯𑀺𑀓𑀼𑀮𑁄𑀢𑀺 𑀯𑀢𑁆𑀢𑀩𑁆𑀩𑁂 𑀩𑀸𑀓𑀼𑀮𑁄𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀳𑀺 𑀣𑁂𑀭𑀲𑁆𑀲 𑀤𑁆𑀯𑁂 𑀓𑀼𑀮𑀸𑀦𑀺 𑀅𑀳𑁂𑀲𑀼𑀁. 𑀲𑁄 𑀓𑀺𑀭 𑀤𑁂𑀯𑀮𑁄𑀓𑁄 𑀘𑀯𑀺𑀢𑁆𑀯𑀸 𑀓𑁄𑀲𑀫𑁆𑀩𑀺𑀦𑀕𑀭𑁂 𑀦𑀸𑀫 𑀫𑀳𑀸𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄, 𑀢𑀫𑁂𑀦𑀁 𑀧𑀜𑁆𑀘𑀫𑁂 𑀤𑀺𑀯𑀲𑁂 𑀲𑀻𑀲𑀁 𑀦𑁆𑀳𑀸𑀧𑁂𑀢𑁆𑀯𑀸 𑀕𑀗𑁆𑀕𑀸𑀓𑀻𑀴𑀁 𑀅𑀓𑀁𑀲𑀼. 𑀥𑀸𑀢𑀺𑀬𑀸 𑀤𑀸𑀭𑀓𑀁 𑀉𑀤𑀓𑁂 𑀦𑀺𑀫𑀼𑀚𑁆𑀚𑀦𑀼𑀫𑁆𑀫𑀼𑀚𑁆𑀚𑀦𑀯𑀲𑁂𑀦 𑀓𑀻𑀴𑀸𑀧𑁂𑀦𑁆𑀢𑀺𑀬𑀸 𑀏𑀓𑁄 𑀫𑀘𑁆𑀙𑁄 𑀤𑀸𑀭𑀓𑀁 𑀤𑀺𑀲𑁆𑀯𑀸 ‘‘𑀪𑀓𑁆𑀔𑁄 𑀫𑁂 𑀅𑀬’’𑀦𑁆𑀢𑀺 𑀫𑀜𑁆𑀜𑀫𑀸𑀦𑁄 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀉𑀧𑀕𑀢𑁄. 𑀥𑀸𑀢𑀻 𑀤𑀸𑀭𑀓𑀁 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀢𑀸. 𑀫𑀘𑁆𑀙𑁄 𑀢𑀁 𑀕𑀺𑀮𑀺. 𑀧𑀼𑀜𑁆𑀜𑀯𑀸 𑀲𑀢𑁆𑀢𑁄 𑀤𑀼𑀓𑁆𑀔𑀁 𑀦 𑀧𑀸𑀧𑀼𑀡𑀺, 𑀲𑀬𑀦𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 𑀯𑀺𑀬 𑀅𑀳𑁄𑀲𑀺. 𑀫𑀘𑁆𑀙𑁄 𑀤𑀸𑀭𑀓𑀲𑁆𑀲 𑀢𑁂𑀚𑁂𑀦 𑀢𑀢𑁆𑀢𑀓𑀧𑀮𑁆𑀮𑀁 𑀕𑀺𑀮𑀺𑀢𑁆𑀯𑀸 𑀤𑀬𑁆𑀳𑀫𑀸𑀦𑁄 𑀯𑀺𑀬 𑀯𑁂𑀕𑁂𑀦 𑀢𑀺𑀁𑀲𑀬𑁄𑀚𑀦𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀩𑀸𑀭𑀸𑀡𑀲𑀺𑀦𑀕𑀭𑀯𑀸𑀲𑀺𑀦𑁄 𑀫𑀘𑁆𑀙𑀩𑀦𑁆𑀥𑀲𑁆𑀲 𑀚𑀸𑀮𑀁 𑀧𑀸𑀯𑀺𑀲𑀺, 𑀫𑀳𑀸𑀫𑀘𑁆𑀙𑀸 𑀦𑀸𑀫 𑀚𑀸𑀮𑀩𑀤𑁆𑀥𑀸 𑀧𑀳𑀭𑀺𑀬𑀫𑀸𑀦𑀸 𑀫𑀭𑀦𑁆𑀢𑀺. 𑀅𑀬𑀁 𑀧𑀦 𑀤𑀸𑀭𑀓𑀲𑁆𑀲 𑀢𑁂𑀚𑁂𑀦 𑀚𑀸𑀮𑀢𑁄 𑀦𑀻𑀳𑀝𑀫𑀢𑁆𑀢𑁄𑀯 𑀫𑀢𑁄. 𑀫𑀘𑁆𑀙𑀩𑀦𑁆𑀥𑀸 𑀘 𑀫𑀳𑀦𑁆𑀢𑀁 𑀫𑀘𑁆𑀙𑀁 𑀮𑀪𑀺𑀢𑁆𑀯𑀸 𑀨𑀸𑀮𑁂𑀢𑁆𑀯𑀸 𑀯𑀺𑀓𑁆𑀓𑀺𑀡𑀦𑁆𑀢𑀺. 𑀢𑀁 𑀧𑀦 𑀤𑀸𑀭𑀓𑀲𑁆𑀲 𑀆𑀦𑀼𑀪𑀸𑀯𑁂𑀦 𑀅𑀨𑀸𑀮𑁂𑀢𑁆𑀯𑀸 𑀲𑀓𑀮𑀫𑁂𑀯 𑀓𑀸𑀚𑁂𑀦 𑀳𑀭𑀺𑀢𑁆𑀯𑀸 𑀲𑀳𑀲𑁆𑀲𑁂𑀦 𑀤𑁂𑀫𑀸𑀢𑀺 𑀯𑀤𑀦𑁆𑀢𑀸 𑀦𑀕𑀭𑁂 𑀯𑀺𑀘𑀭𑀺𑀁𑀲𑀼. 𑀓𑁄𑀘𑀺 𑀦 𑀕𑀡𑁆𑀳𑀸𑀢𑀺.

𑀢𑀲𑁆𑀫𑀺𑀁 𑀧𑀦 𑀦𑀕𑀭𑁂 𑀅𑀧𑀼𑀢𑁆𑀢𑀓𑀁 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑀁 𑀲𑁂𑀝𑁆𑀞𑀺𑀓𑀼𑀮𑀁 𑀅𑀢𑁆𑀣𑀺, 𑀢𑀲𑁆𑀲 𑀤𑁆𑀯𑀸𑀭𑀫𑀽𑀮𑀁 𑀧𑀢𑁆𑀯𑀸 ‘‘𑀓𑀺𑀁 𑀕𑀳𑁂𑀢𑁆𑀯𑀸 𑀤𑁂𑀣𑀸’’𑀢𑀺 𑀯𑀼𑀢𑁆𑀢𑀸 𑀓𑀳𑀸𑀧𑀡𑀦𑁆𑀢𑀺 𑀆𑀳𑀁𑀲𑀼. 𑀢𑁂𑀳𑀺 𑀓𑀳𑀸𑀧𑀡𑀁 𑀤𑀢𑁆𑀯𑀸 𑀕𑀳𑀺𑀢𑁄. 𑀲𑁂𑀝𑁆𑀞𑀺𑀪𑀭𑀺𑀬𑀸𑀧𑀺 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀫𑀘𑁆𑀙𑁂 𑀦 𑀓𑁂𑀮𑀸𑀬𑀢𑀺, 𑀢𑀁 𑀤𑀺𑀯𑀲𑀁 𑀧𑀦 𑀫𑀘𑁆𑀙𑀁 𑀨𑀮𑀓𑁂 𑀞𑀧𑁂𑀢𑁆𑀯𑀸 𑀲𑀬𑀫𑁂𑀯 𑀨𑀸𑀮𑁂𑀲𑀺. 𑀫𑀘𑁆𑀙𑀜𑁆𑀘 𑀦𑀸𑀫 𑀓𑀼𑀘𑁆𑀙𑀺𑀢𑁄 𑀨𑀸𑀮𑁂𑀦𑁆𑀢𑀺, 𑀲𑀸 𑀧𑀦 𑀧𑀺𑀝𑁆𑀞𑀺𑀢𑁄 𑀨𑀸𑀮𑁂𑀦𑁆𑀢𑀻 𑀫𑀘𑁆𑀙𑀓𑀼𑀘𑁆𑀙𑀺𑀬𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀤𑀸𑀭𑀓𑀁 𑀤𑀺𑀲𑁆𑀯𑀸 𑁋 ‘‘𑀫𑀘𑁆𑀙𑀓𑀼𑀘𑁆𑀙𑀺𑀬𑀁 𑀫𑁂 𑀧𑀼𑀢𑁆𑀢𑁄 𑀮𑀤𑁆𑀥𑁄’’𑀢𑀺 𑀦𑀸𑀤𑀁 𑀦𑀤𑀺𑀢𑁆𑀯𑀸 𑀤𑀸𑀭𑀓𑀁 𑀆𑀤𑀸𑀬 𑀲𑀸𑀫𑀺𑀓𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑁂𑀝𑁆𑀞𑀺 𑀢𑀸𑀯𑀤𑁂𑀯 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀤𑀸𑀭𑀓𑀁 𑀆𑀤𑀸𑀬 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑁋 ‘‘𑀫𑀘𑁆𑀙𑀓𑀼𑀘𑁆𑀙𑀺𑀬𑀁 𑀫𑁂 𑀤𑁂𑀯 𑀤𑀸𑀭𑀓𑁄 𑀮𑀤𑁆𑀥𑁄, 𑀓𑀺𑀁 𑀓𑀭𑁄𑀫𑀻’’𑀢𑀺 𑀆𑀳. 𑀧𑀼𑀜𑁆𑀜𑀯𑀸 𑀏𑀲, 𑀬𑁄 𑀫𑀘𑁆𑀙𑀓𑀼𑀘𑁆𑀙𑀺𑀬𑀁 𑀅𑀭𑁄𑀕𑁄 𑀯𑀲𑀺, 𑀧𑁄𑀲𑁂𑀳𑀺 𑀦𑀦𑁆𑀢𑀺.

𑀅𑀲𑁆𑀲𑁄𑀲𑀺 𑀔𑁄 𑀇𑀢𑀭𑀁 𑀓𑀼𑀮𑀁 𑁋 ‘‘𑀩𑀸𑀭𑀸𑀡𑀲𑀺𑀬𑀁 𑀓𑀺𑀭 𑀏𑀓𑀁 𑀲𑁂𑀝𑁆𑀞𑀺𑀓𑀼𑀮𑀁 𑀫𑀘𑁆𑀙𑀓𑀼𑀘𑁆𑀙𑀺𑀬𑀁 𑀤𑀸𑀭𑀓𑀁 𑀮𑀪𑀢𑀻’’𑀢𑀺, 𑀢𑁂 𑀢𑀢𑁆𑀣 𑀅𑀕𑀫𑀁𑀲𑀼. 𑀅𑀣𑀲𑁆𑀲 𑀫𑀸𑀢𑀸 𑀤𑀸𑀭𑀓𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀓𑀻𑀴𑀸𑀧𑀺𑀬𑀫𑀸𑀦𑀁 𑀤𑀺𑀲𑁆𑀯𑀸𑀯 ‘‘𑀫𑀦𑀸𑀧𑁄 𑀯𑀢𑀸𑀬𑀁 𑀤𑀸𑀭𑀓𑁄’’𑀢𑀺 𑀕𑀦𑁆𑀢𑁆𑀯𑀸 𑀧𑀯𑀢𑀺𑀁 𑀆𑀘𑀺𑀓𑁆𑀔𑀺. 𑀇𑀢𑀭𑀸 𑀫𑀬𑁆𑀳𑀁 𑀧𑀼𑀢𑁆𑀢𑁄𑀢𑀺𑀆𑀤𑀺𑀫𑀸𑀳. 𑀓𑀳𑀁 𑀢𑁂 𑀮𑀤𑁆𑀥𑁄𑀢𑀺? 𑀫𑀘𑁆𑀙𑀓𑀼𑀘𑁆𑀙𑀺𑀬𑀦𑁆𑀢𑀺. 𑀦𑁄 𑀢𑀼𑀬𑁆𑀳𑀁 𑀧𑀼𑀢𑁆𑀢𑁄, 𑀫𑀬𑁆𑀳𑀁 𑀧𑀼𑀢𑁆𑀢𑁄𑀢𑀺. 𑀓𑀳𑀁 𑀢𑁂 𑀮𑀤𑁆𑀥𑁄𑀢𑀺? 𑀫𑀬𑀸 𑀤𑀲𑀫𑀸𑀲𑁂 𑀓𑀼𑀘𑁆𑀙𑀺𑀬𑀸 𑀥𑀸𑀭𑀺𑀢𑁄, 𑀅𑀣 𑀦𑀁 𑀦𑀤𑀺𑀬𑀸 𑀓𑀻𑀴𑀸𑀧𑀺𑀬𑀫𑀸𑀦𑀁 𑀫𑀘𑁆𑀙𑁄 𑀕𑀺𑀮𑀻𑀢𑀺. 𑀢𑀼𑀬𑁆𑀳𑀁 𑀧𑀼𑀢𑁆𑀢𑁄 𑀅𑀜𑁆𑀜𑁂𑀦 𑀫𑀘𑁆𑀙𑁂𑀦 𑀕𑀺𑀮𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀅𑀬𑀁 𑀧𑀦 𑀫𑀬𑀸 𑀫𑀘𑁆𑀙𑀓𑀼𑀘𑁆𑀙𑀺𑀬𑀁 𑀮𑀤𑁆𑀥𑁄𑀢𑀺, 𑀉𑀪𑁄𑀧𑀺 𑀭𑀸𑀚𑀓𑀼𑀮𑀁 𑀅𑀕𑀫𑀁𑀲𑀼. 𑀭𑀸𑀚𑀸 𑀆𑀳 𑁋 ‘‘𑀅𑀬𑀁 𑀤𑀲 𑀫𑀸𑀲𑁂 𑀓𑀼𑀘𑁆𑀙𑀺𑀬𑀸 𑀥𑀸𑀭𑀺𑀢𑀢𑁆𑀢𑀸 𑀅𑀫𑀸𑀢𑀸 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀫𑀘𑁆𑀙𑀁 𑀕𑀡𑁆𑀳𑀦𑁆𑀢𑀸𑀧𑀺 𑀯𑀓𑁆𑀓𑀬𑀓𑀦𑀸𑀤𑀻𑀦𑀺 𑀩𑀳𑀺 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀫𑀘𑁆𑀙𑀓𑀼𑀘𑁆𑀙𑀺𑀬𑀁 𑀮𑀤𑁆𑀥𑀢𑁆𑀢𑀸 𑀅𑀬𑀫𑁆𑀧𑀺 𑀅𑀫𑀸𑀢𑀸 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀤𑀸𑀭𑀓𑁄 𑀉𑀪𑀺𑀦𑁆𑀦𑀫𑁆𑀧𑀺 𑀓𑀼𑀮𑀸𑀦𑀁 𑀤𑀸𑀬𑀸𑀤𑁄 𑀳𑁄𑀢𑀼, 𑀉𑀪𑁄𑀧𑀺 𑀦𑀁 𑀚𑀕𑁆𑀕𑀣𑀸’’𑀢𑀺 𑀉𑀪𑁄𑀧𑀺 𑀚𑀕𑁆𑀕𑀺𑀁𑀲𑀼.

𑀯𑀺𑀜𑁆𑀜𑀼𑀢𑀁 𑀧𑀢𑁆𑀢𑀲𑁆𑀲 𑀤𑁆𑀯𑀻𑀲𑀼𑀧𑀺 𑀦𑀕𑀭𑁂𑀲𑀼 𑀧𑀸𑀲𑀸𑀤𑀁 𑀓𑀸𑀭𑁂𑀢𑁆𑀯𑀸 𑀦𑀸𑀝𑀓𑀸𑀦𑀺 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀲𑀼𑀁. 𑀏𑀓𑁂𑀓𑀲𑁆𑀫𑀺𑀁 𑀦𑀕𑀭𑁂 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀯𑀲𑀢𑀺, 𑀏𑀓𑀲𑁆𑀫𑀺𑀁 𑀦𑀕𑀭𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀯𑀼𑀝𑁆𑀞𑀲𑁆𑀲 𑀲𑀗𑁆𑀖𑀸𑀝𑀦𑀸𑀯𑀸𑀬 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣 𑀦𑀁 𑀲𑀤𑁆𑀥𑀺𑀁 𑀦𑀸𑀝𑀓𑀸𑀳𑀺 𑀆𑀭𑁄𑀧𑁂𑀦𑁆𑀢𑀺. 𑀲𑁄 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁄 𑀇𑀢𑀭𑀁 𑀦𑀕𑀭𑀁 𑀕𑀘𑁆𑀙𑀢𑀺. 𑀢𑀁𑀦𑀕𑀭𑀯𑀸𑀲𑀺𑀦𑁄 𑀦𑀸𑀝𑀓𑀸𑀦𑀺 𑀉𑀧𑀟𑁆𑀠𑀫𑀕𑁆𑀕𑀁 𑀅𑀕𑀫𑀁𑀲𑀼. 𑀢𑁂 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀸𑀲𑀸𑀤𑀁 𑀦𑀬𑀦𑁆𑀢𑀺. 𑀇𑀢𑀭𑀸𑀦𑀺 𑀦𑀸𑀝𑀓𑀸𑀦𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀢𑁆𑀢𑀦𑁄 𑀦𑀕𑀭𑀫𑁂𑀯 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀯𑀲𑀺𑀢𑁆𑀯𑀸 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀧𑀼𑀦 𑀇𑀢𑀭𑀁 𑀦𑀕𑀭𑀁 𑀕𑀘𑁆𑀙𑀢𑀺. 𑀏𑀯𑀫𑀲𑁆𑀲 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑀲𑁆𑀲 𑀅𑀲𑀻𑀢𑀺 𑀯𑀲𑁆𑀲𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺.

𑀅𑀣 𑀪𑀕𑀯𑀸 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀩𑀸𑀭𑀸𑀡𑀲𑀺𑀁 𑀧𑀢𑁆𑀢𑁄. 𑀲𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁄. 𑀧𑀩𑁆𑀩𑀚𑀺𑀢𑁆𑀯𑀸 𑀲𑀢𑁆𑀢𑀸𑀳𑀫𑁂𑀯 𑀧𑀼𑀣𑀼𑀚𑁆𑀚𑀦𑁄 𑀅𑀳𑁄𑀲𑀺, 𑀅𑀝𑁆𑀞𑀫𑁂 𑀧𑀦 𑀲𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺 𑀏𑀯𑀫𑀲𑁆𑀲 𑀤𑁆𑀯𑁂 𑀓𑀼𑀮𑀸𑀦𑀺 𑀅𑀳𑁂𑀲𑀼𑀁. 𑀢𑀲𑁆𑀫𑀸 𑀩𑀸𑀓𑀼𑀮𑁄𑀢𑀺 𑀲𑀗𑁆𑀔𑀁 𑀅𑀕𑀫𑀸𑀲𑀻𑀢𑀺.

𑀧𑀼𑀭𑀸𑀡𑀕𑀺𑀳𑀺𑀲𑀳𑀸𑀬𑁄𑀢𑀺 𑀧𑀼𑀩𑁆𑀩𑁂 𑀕𑀺𑀳𑀺𑀓𑀸𑀮𑁂 𑀲𑀳𑀸𑀬𑁄. 𑀅𑀬𑀫𑁆𑀧𑀺 𑀤𑀻𑀖𑀸𑀬𑀼𑀓𑁄𑀯 𑀣𑁂𑀭𑀁 𑀧𑀩𑁆𑀩𑀚𑀺𑀢𑀁 𑀧𑀲𑁆𑀲𑀺𑀢𑀼𑀁 𑀕𑀘𑁆𑀙𑀦𑁆𑀢𑁄 𑀅𑀲𑀻𑀢𑀺𑀫𑁂 𑀯𑀲𑁆𑀲𑁂 𑀕𑀢𑁄. 𑀫𑁂𑀣𑀼𑀦𑁄 𑀥𑀫𑁆𑀫𑁄𑀢𑀺 𑀩𑀸𑀮𑁄 𑀦𑀕𑁆𑀕𑀲𑀫𑀡𑀓𑁄 𑀩𑀸𑀮𑀧𑀼𑀘𑁆𑀙𑀁 𑀧𑀼𑀘𑁆𑀙𑀢𑀺, 𑀦 𑀲𑀸𑀲𑀦𑀯𑀘𑀦𑀁, 𑀇𑀤𑀸𑀦𑀺 𑀣𑁂𑀭𑁂𑀦 𑀤𑀺𑀦𑁆𑀦𑀦𑀬𑁂 𑀞𑀺𑀢𑁄 𑀇𑀫𑁂𑀳𑀺 𑀧𑀦 𑀢𑁂𑀢𑀺 𑀧𑀼𑀘𑁆𑀙𑀺.

𑁨𑁧𑁦. 𑀬𑀁𑀧𑀸𑀬𑀲𑁆𑀫𑀸𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀲𑀩𑁆𑀩𑀯𑀸𑀭𑁂𑀲𑀼 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀦𑀺𑀬𑀫𑁂𑀢𑁆𑀯𑀸 𑀞𑀧𑀺𑀢𑀸𑀦𑀺. 𑀢𑀢𑁆𑀣 𑀲𑀜𑁆𑀜𑀸 𑀉𑀧𑁆𑀧𑀦𑁆𑀦𑀫𑀢𑁆𑀢𑀸𑀯, 𑀯𑀺𑀢𑀓𑁆𑀓𑁄 𑀓𑀫𑁆𑀫𑀧𑀣𑀪𑁂𑀤𑀓𑁄𑀢𑀺. 𑀣𑁂𑀭𑁄 𑀧𑀦𑀸𑀳 𑁋 ‘‘𑀓𑀲𑁆𑀫𑀸 𑀯𑀺𑀲𑀼𑀁 𑀓𑀭𑁄𑀣, 𑀉𑀪𑀬𑀫𑁆𑀧𑁂𑀢𑀁 𑀓𑀫𑁆𑀫𑀧𑀣𑀪𑁂𑀤𑀓𑀫𑁂𑀯𑀸’’𑀢𑀺.

𑁨𑁧𑁧. 𑀕𑀳𑀧𑀢𑀺𑀘𑀻𑀯𑀭𑀦𑁆𑀢𑀺 𑀯𑀲𑁆𑀲𑀸𑀯𑀸𑀲𑀺𑀓𑀁 𑀘𑀻𑀯𑀭𑀁. 𑀲𑀢𑁆𑀣𑁂𑀦𑀸𑀢𑀺 𑀧𑀺𑀧𑁆𑀨𑀮𑀓𑁂𑀦. 𑀲𑀽𑀘𑀺𑀬𑀸𑀢𑀺 𑀲𑀽𑀘𑀺𑀁 𑀕𑀳𑁂𑀢𑁆𑀯𑀸 𑀲𑀺𑀩𑁆𑀩𑀺𑀢𑀪𑀸𑀯𑀁 𑀦 𑀲𑀭𑀸𑀫𑀻𑀢𑀺 𑀅𑀢𑁆𑀣𑁄. 𑀓𑀣𑀺𑀦𑁂 𑀘𑀻𑀯𑀭𑀦𑁆𑀢𑀺 𑀓𑀣𑀺𑀦𑀘𑀻𑀯𑀭𑀁, 𑀓𑀣𑀺𑀦𑀘𑀻𑀯𑀭𑀫𑁆𑀧𑀺 𑀳𑀺 𑀯𑀲𑁆𑀲𑀸𑀯𑀸𑀲𑀺𑀓𑀕𑀢𑀺𑀓𑀫𑁂𑀯. 𑀢𑀲𑁆𑀫𑀸 𑀢𑀢𑁆𑀣 ‘‘𑀲𑀺𑀩𑁆𑀩𑀺𑀢𑀸 𑀦𑀸𑀪𑀺𑀚𑀸𑀦𑀸𑀫𑀻’’𑀢𑀺 𑀆𑀳.

𑀏𑀢𑁆𑀢𑀓𑀁 𑀧𑀦𑀲𑁆𑀲 𑀓𑀸𑀮𑀁 𑀕𑀳𑀧𑀢𑀺𑀘𑀻𑀯𑀭𑀁 𑀅𑀲𑀸𑀤𑀺𑀬𑀦𑁆𑀢𑀲𑁆𑀲 𑀙𑀺𑀦𑁆𑀤𑀦𑀲𑀺𑀩𑁆𑀩𑀦𑀸𑀤𑀻𑀦𑀺 𑀅𑀓𑀭𑁄𑀦𑁆𑀢𑀲𑁆𑀲 𑀓𑀼𑀢𑁄 𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀤𑁆𑀯𑀻𑀳𑀺 𑀦𑀕𑀭𑁂𑀳𑀺. 𑀣𑁂𑀭𑁄 𑀳𑀺 𑀫𑀳𑀸𑀬𑀲𑀲𑁆𑀲𑀻, 𑀢𑀲𑁆𑀲 𑀧𑀼𑀢𑁆𑀢𑀥𑀻𑀢𑀭𑁄 𑀦𑀢𑁆𑀢𑀧𑀦𑀢𑁆𑀢𑀓𑀸 𑀲𑀼𑀔𑀼𑀫𑀲𑀸𑀝𑀓𑁂𑀳𑀺 𑀘𑀻𑀯𑀭𑀸𑀦𑀺 𑀓𑀸𑀭𑁂𑀢𑁆𑀯𑀸 𑀭𑀚𑀸𑀧𑁂𑀢𑁆𑀯𑀸 𑀲𑀫𑀼𑀕𑁆𑀕𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀳𑀺𑀡𑀦𑁆𑀢𑀺. 𑀣𑁂𑀭𑀲𑁆𑀲 𑀦𑁆𑀳𑀸𑀦𑀓𑀸𑀮𑁂 𑀦𑁆𑀳𑀸𑀦𑀓𑁄𑀝𑁆𑀞𑀓𑁂 𑀞𑀧𑁂𑀦𑁆𑀢𑀺. 𑀣𑁂𑀭𑁄 𑀢𑀸𑀦𑀺 𑀦𑀺𑀯𑀸𑀲𑁂𑀢𑀺 𑀘𑁂𑀯 𑀧𑀸𑀭𑀼𑀧𑀢𑀺 𑀘, 𑀧𑀼𑀭𑀸𑀡𑀘𑀻𑀯𑀭𑀸𑀦𑀺 𑀲𑀫𑁆𑀧𑀢𑁆𑀢𑀧𑀩𑁆𑀩𑀚𑀺𑀢𑀸𑀦𑀁 𑀤𑁂𑀢𑀺. 𑀣𑁂𑀭𑁄 𑀢𑀸𑀦𑀺 𑀦𑀺𑀯𑀸𑀲𑁂𑀢𑁆𑀯𑀸 𑀘 𑀧𑀸𑀭𑀼𑀧𑀺𑀢𑁆𑀯𑀸 𑀘 𑀦𑀯𑀓𑀫𑁆𑀫𑀁 𑀦 𑀓𑀭𑁄𑀢𑀺, 𑀓𑀺𑀜𑁆𑀘𑀺 𑀆𑀬𑀽𑀳𑀦𑀓𑀫𑁆𑀫𑀁 𑀦𑀢𑁆𑀣𑀺. 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀻𑀤𑀢𑀺. 𑀘𑀢𑀽𑀲𑀼 𑀫𑀸𑀲𑁂𑀲𑀼 𑀧𑀢𑁆𑀢𑁂𑀲𑀼 𑀮𑁄𑀫𑀓𑀺𑀮𑀺𑀝𑁆𑀞𑀸𑀦𑀺 𑀳𑁄𑀦𑁆𑀢𑀺, 𑀅𑀣𑀲𑁆𑀲 𑀧𑀼𑀦 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀧𑀳𑀺𑀡𑀺𑀢𑁆𑀯𑀸 𑀤𑁂𑀦𑁆𑀢𑀺. 𑀅𑀟𑁆𑀠𑀫𑀸𑀲𑁂 𑀅𑀟𑁆𑀠𑀫𑀸𑀲𑁂 𑀧𑀭𑀺𑀯𑀢𑁆𑀢𑀢𑀻𑀢𑀺𑀧𑀺 𑀯𑀤𑀦𑁆𑀢𑀺𑀬𑁂𑀯.

𑀅𑀦𑀘𑁆𑀙𑀭𑀺𑀬𑀜𑁆𑀘𑁂𑀢𑀁 𑀣𑁂𑀭𑀲𑁆𑀲 𑀫𑀳𑀸𑀧𑀼𑀜𑁆𑀜𑀲𑁆𑀲 𑀫𑀳𑀸𑀪𑀺𑀜𑁆𑀜𑀲𑁆𑀲 𑀲𑀢𑀲𑀳𑀲𑁆𑀲𑀓𑀧𑁆𑀧𑁂 𑀧𑀽𑀭𑀺𑀢𑀧𑀸𑀭𑀫𑀺𑀲𑁆𑀲, 𑀅𑀲𑁄𑀓𑀥𑀫𑁆𑀫𑀭𑀜𑁆𑀜𑁄 𑀓𑀼𑀮𑀽𑀧𑀓𑁄 𑀦𑀺𑀕𑁆𑀭𑁄𑀥𑀢𑁆𑀣𑁂𑀭𑁄 𑀤𑀺𑀯𑀲𑀲𑁆𑀲 𑀦𑀺𑀓𑁆𑀔𑀢𑁆𑀢𑀼𑀁 𑀘𑀻𑀯𑀭𑀁 𑀧𑀭𑀺𑀯𑀢𑁆𑀢𑁂𑀲𑀺. 𑀢𑀲𑁆𑀲 𑀳𑀺 𑀢𑀺𑀘𑀻𑀯𑀭𑀁 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀞𑀧𑁂𑀢𑁆𑀯𑀸 𑀧𑀜𑁆𑀘𑀳𑀺 𑀘 𑀕𑀦𑁆𑀥𑀲𑀫𑀼𑀕𑁆𑀕𑀲𑀢𑁂𑀳𑀺 𑀧𑀜𑁆𑀘𑀳𑀺 𑀘 𑀫𑀸𑀮𑀸𑀲𑀫𑀼𑀕𑁆𑀕𑀲𑀢𑁂𑀳𑀺 𑀲𑀤𑁆𑀥𑀺𑀁 𑀧𑀸𑀢𑁄𑀯 𑀆𑀳𑀭𑀺𑀬𑀺𑀢𑁆𑀣, 𑀢𑀣𑀸 𑀤𑀺𑀯𑀸 𑀘𑁂𑀯 𑀲𑀸𑀬𑀜𑁆𑀘. 𑀭𑀸𑀚𑀸 𑀓𑀺𑀭 𑀤𑀺𑀯𑀲𑀲𑁆𑀲 𑀦𑀺𑀓𑁆𑀔𑀢𑁆𑀢𑀼𑀁 𑀲𑀸𑀝𑀓𑁂 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 ‘‘𑀣𑁂𑀭𑀲𑁆𑀲 𑀘𑀻𑀯𑀭𑀁 𑀦𑀻𑀢’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀆𑀫 𑀦𑀻𑀢’’𑀦𑁆𑀢𑀺 𑀲𑀼𑀢𑁆𑀯𑀸𑀯 𑀧𑀭𑀺𑀯𑀢𑁆𑀢𑁂𑀲𑀺. 𑀣𑁂𑀭𑁄𑀧𑀺 𑀦 𑀪𑀡𑁆𑀟𑀺𑀓𑀁 𑀩𑀦𑁆𑀥𑀺𑀢𑁆𑀯𑀸 𑀞𑀧𑁂𑀲𑀺, 𑀲𑀫𑁆𑀧𑀢𑁆𑀢𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀅𑀤𑀸𑀲𑀺. 𑀢𑀤𑀸 𑀓𑀺𑀭 𑀚𑀫𑁆𑀩𑀼𑀤𑀻𑀧𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀦𑀺𑀕𑁆𑀭𑁄𑀥𑀲𑁆𑀲𑁂𑀯 𑀲𑀦𑁆𑀢𑀓𑀁 𑀘𑀻𑀯𑀭𑀁 𑀅𑀳𑁄𑀲𑀺.

𑀅𑀳𑁄 𑀯𑀢 𑀫𑀁 𑀓𑁄𑀘𑀺 𑀦𑀺𑀫𑀦𑁆𑀢𑁂𑀬𑁆𑀬𑀸𑀢𑀺 𑀓𑀺𑀁 𑀧𑀦 𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑁆𑀧𑀸𑀤𑀦𑀁 𑀪𑀸𑀭𑀺𑀬𑀁, 𑀉𑀧𑁆𑀧𑀦𑁆𑀦𑀲𑁆𑀲 𑀧𑀳𑀸𑀦𑀦𑁆𑀢𑀺. 𑀘𑀺𑀢𑁆𑀢𑀁 𑀦𑀸𑀫 𑀮𑀳𑀼𑀓𑀧𑀭𑀺𑀯𑀢𑁆𑀢𑀁, 𑀢𑀲𑁆𑀫𑀸 𑀅𑀦𑀼𑀧𑁆𑀧𑀸𑀤𑀦𑀁 𑀪𑀸𑀭𑀺𑀬𑀁, 𑀉𑀧𑁆𑀧𑀦𑁆𑀦𑀲𑁆𑀲 𑀧𑀳𑀸𑀦𑀫𑁆𑀧𑀺 𑀪𑀸𑀭𑀺𑀬𑀫𑁂𑀯. 𑀅𑀦𑁆𑀢𑀭𑀖𑀭𑁂𑀢𑀺 𑀫𑀳𑀸𑀲𑀓𑀼𑀮𑀼𑀤𑀸𑀬𑀺𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁨𑁩𑁭) 𑀇𑀦𑁆𑀤𑀔𑀻𑀮𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑀭𑀖𑀭𑀁 𑀦𑀸𑀫 𑀇𑀥 𑀦𑀺𑀫𑁆𑀩𑁄𑀤𑀓𑀧𑀢𑀦𑀝𑁆𑀞𑀸𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀓𑀼𑀢𑁄 𑀧𑀦𑀲𑁆𑀲 𑀪𑀺𑀓𑁆𑀔𑀸 𑀉𑀧𑁆𑀧𑀚𑁆𑀚𑀺𑀢𑁆𑀣𑀸𑀢𑀺. 𑀣𑁂𑀭𑁄 𑀤𑁆𑀯𑀻𑀲𑀼 𑀦𑀕𑀭𑁂𑀲𑀼 𑀅𑀪𑀺𑀜𑁆𑀜𑀸𑀢𑁄, 𑀕𑁂𑀳𑀤𑁆𑀯𑀸𑀭𑀁 𑀆𑀕𑀢𑀲𑁆𑀲𑁂𑀯𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀦𑀸𑀦𑀸𑀭𑀲𑀪𑁄𑀚𑀦𑀲𑁆𑀲 𑀧𑀽𑀭𑁂𑀢𑁆𑀯𑀸 𑀤𑁂𑀦𑁆𑀢𑀺. 𑀲𑁄 𑀮𑀤𑁆𑀥𑀝𑁆𑀞𑀸𑀦𑀢𑁄 𑀦𑀺𑀯𑀢𑁆𑀢𑀢𑀺, 𑀪𑀢𑁆𑀢𑀓𑀺𑀘𑁆𑀘𑀓𑀭𑀡𑀝𑁆𑀞𑀸𑀦𑀁 𑀧𑀦𑀲𑁆𑀲 𑀦𑀺𑀩𑀤𑁆𑀥𑀫𑁂𑀯 𑀅𑀳𑁄𑀲𑀺. 𑀅𑀦𑀼𑀩𑁆𑀬𑀜𑁆𑀚𑀦𑀲𑁄𑀢𑀺 𑀣𑁂𑀭𑁂𑀦 𑀓𑀺𑀭 𑀭𑀽𑀧𑁂 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀫𑀸𑀢𑀼𑀕𑀸𑀫𑁄 𑀦 𑀑𑀮𑁄𑀓𑀺𑀢𑀧𑀼𑀩𑁆𑀩𑁄. 𑀫𑀸𑀢𑀼𑀕𑀸𑀫𑀲𑁆𑀲 𑀥𑀫𑁆𑀫𑀦𑁆𑀢𑀺 𑀫𑀸𑀢𑀼𑀕𑀸𑀫𑀲𑁆𑀲 𑀙𑀧𑁆𑀧𑀜𑁆𑀘𑀯𑀸𑀘𑀸𑀳𑀺 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀯𑀝𑁆𑀝𑀢𑀺, 𑀧𑀜𑁆𑀳𑀁 𑀧𑀼𑀝𑁆𑀞𑁂𑀦 𑀕𑀸𑀣𑀸𑀲𑀳𑀲𑁆𑀲𑀫𑁆𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀣𑁂𑀭𑁄 𑀧𑀦 𑀓𑀧𑁆𑀧𑀺𑀬𑀫𑁂𑀯 𑀦 𑀅𑀓𑀸𑀲𑀺. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀓𑀼𑀮𑀽𑀧𑀓𑀣𑁂𑀭𑀸𑀦𑀫𑁂𑀢𑀁 𑀓𑀫𑁆𑀫𑀁 𑀳𑁄𑀢𑀺. 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀦𑁆𑀢𑀺 𑀪𑀺𑀓𑁆𑀔𑀼𑀦𑀺𑀉𑀧𑀲𑁆𑀲𑀬𑀁. 𑀢𑀁 𑀧𑀦 𑀕𑀺𑀮𑀸𑀦𑀧𑀼𑀘𑁆𑀙𑀓𑁂𑀦 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀣𑁂𑀭𑁄 𑀧𑀦 𑀓𑀧𑁆𑀧𑀺𑀬𑀫𑁂𑀯 𑀦 𑀅𑀓𑀸𑀲𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀘𑀼𑀡𑁆𑀡𑁂𑀦𑀸𑀢𑀺 𑀓𑁄𑀲𑀫𑁆𑀩𑀘𑀼𑀡𑁆𑀡𑀸𑀤𑀺𑀦𑀸. 𑀕𑀢𑁆𑀢𑀧𑀭𑀺𑀓𑀫𑁆𑀫𑁂𑀢𑀺 𑀲𑀭𑀻𑀭𑀲𑀫𑁆𑀩𑀸𑀳𑀦𑀓𑀫𑁆𑀫𑁂. 𑀯𑀺𑀘𑀸𑀭𑀺𑀢𑀸𑀢𑀺 𑀧𑀬𑁄𑀚𑀬𑀺𑀢𑀸. 𑀕𑀤𑁆𑀤𑀽𑀳𑀦𑀫𑀢𑁆𑀢𑀦𑁆𑀢𑀺 𑀕𑀸𑀯𑀺𑀁 𑀣𑀦𑁂 𑀕𑀳𑁂𑀢𑁆𑀯𑀸 𑀏𑀓𑀁 𑀔𑀻𑀭𑀩𑀺𑀦𑁆𑀤𑀼𑀁 𑀤𑀽𑀳𑀦𑀓𑀸𑀮𑀫𑀢𑁆𑀢𑀫𑁆𑀧𑀺.

𑀓𑁂𑀦 𑀧𑀦 𑀓𑀸𑀭𑀡𑁂𑀦 𑀣𑁂𑀭𑁄 𑀦𑀺𑀭𑀸𑀩𑀸𑀥𑁄 𑀅𑀳𑁄𑀲𑀺. 𑀧𑀤𑀼𑀫𑀼𑀢𑁆𑀢𑀭𑁂 𑀓𑀺𑀭 𑀪𑀕𑀯𑀢𑀺 𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁂 𑀘𑀸𑀭𑀺𑀓𑀁 𑀘𑀭𑀫𑀸𑀦𑁂 𑀳𑀺𑀫𑀯𑀢𑀺 𑀯𑀺𑀲𑀭𑀼𑀓𑁆𑀔𑀸 𑀧𑀼𑀧𑁆𑀨𑀺𑀁𑀲𑀼. 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀸𑀦𑀫𑁆𑀧𑀺 𑀢𑀺𑀡𑀧𑀼𑀧𑁆𑀨𑀓𑀭𑁄𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀣𑁂𑀭𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀇𑀤𑁆𑀥𑀺𑀫𑀸 𑀢𑀸𑀧𑀲𑁄 𑀳𑁄𑀢𑀺, 𑀲𑁄 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀤𑀺𑀲𑁆𑀯𑀸 𑀑𑀢𑀭𑀺𑀢𑁆𑀯𑀸 𑀭𑁄𑀕𑀁 𑀧𑀼𑀘𑁆𑀙𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀢𑁄 𑀑𑀲𑀥𑀁 𑀆𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀉𑀧𑀲𑀺𑀗𑁆𑀖𑀦𑀫𑀢𑁆𑀢𑁂𑀦𑁂𑀯 𑀭𑁄𑀕𑁄 𑀯𑀽𑀧𑀲𑀫𑀺. 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂𑀧𑀺 𑀧𑀞𑀫𑀯𑀧𑁆𑀧𑀤𑀺𑀯𑀲𑁂 𑀯𑀧𑁆𑀧𑀁 𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀭𑀺𑀪𑁄𑀕𑀁 𑀅𑀕𑁆𑀕𑀺𑀲𑀸𑀮𑀜𑁆𑀘𑁂𑀯 𑀯𑀘𑁆𑀘𑀓𑀼𑀝𑀺𑀜𑁆𑀘 𑀓𑀸𑀭𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀪𑁂𑀲𑀚𑁆𑀚𑀯𑀢𑁆𑀢𑀁 𑀦𑀺𑀩𑀦𑁆𑀥𑀺, 𑀇𑀫𑀺𑀦𑀸 𑀓𑀫𑁆𑀫𑁂𑀦 𑀦𑀺𑀭𑀸𑀩𑀸𑀥𑁄 𑀅𑀳𑁄𑀲𑀺. 𑀉𑀓𑁆𑀓𑀝𑁆𑀞𑀦𑁂𑀲𑀚𑁆𑀚𑀺𑀓𑁄 𑀧𑀦𑁂𑀲 𑀉𑀓𑁆𑀓𑀝𑁆𑀞𑀸𑀭𑀜𑁆𑀜𑀓𑁄 𑀘 𑀢𑀲𑁆𑀫𑀸 ‘‘𑀦𑀸𑀪𑀺𑀚𑀸𑀦𑀸𑀫𑀺 𑀅𑀧𑀲𑁆𑀲𑁂𑀦𑀓𑀁 𑀅𑀧𑀲𑁆𑀲𑀬𑀺𑀢𑀸’’𑀢𑀺𑀆𑀤𑀺𑀫𑀸𑀳.

𑀲𑀭𑀡𑁄𑀢𑀺 𑀲𑀓𑀺𑀮𑁂𑀲𑁄. 𑀅𑀜𑁆𑀜𑀸 𑀉𑀤𑀧𑀸𑀤𑀻𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀅𑀜𑁆𑀜𑀁 𑀩𑁆𑀬𑀸𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺. 𑀣𑁂𑀭𑁄 𑀓𑀲𑁆𑀫𑀸 𑀩𑁆𑀬𑀸𑀓𑀸𑀲𑀺? 𑀦 𑀣𑁂𑀭𑁄 𑀅𑀳𑀁 𑀅𑀭𑀳𑀸𑀢𑀺 𑀆𑀳, 𑀅𑀜𑁆𑀜𑀸 𑀉𑀤𑀧𑀸𑀤𑀻𑀢𑀺 𑀧𑀦𑀸𑀳. 𑀅𑀧𑀺𑀘 𑀣𑁂𑀭𑁄 𑀅𑀭𑀳𑀸𑀢𑀺 𑀧𑀸𑀓𑀝𑁄, 𑀢𑀲𑁆𑀫𑀸 𑀏𑀯𑀫𑀸𑀳.

𑁨𑁧𑁨. 𑀧𑀩𑁆𑀩𑀚𑁆𑀚𑀦𑁆𑀢𑀺 𑀣𑁂𑀭𑁄 𑀲𑀬𑀁 𑀦𑁂𑀯 𑀧𑀩𑁆𑀩𑀸𑀚𑁂𑀲𑀺, 𑀦 𑀉𑀧𑀲𑀫𑁆𑀧𑀸𑀤𑁂𑀲𑀺 𑀅𑀜𑁆𑀜𑁂𑀳𑀺 𑀧𑀦 𑀪𑀺𑀓𑁆𑀔𑀽𑀳𑀺 𑀏𑀯𑀁 𑀓𑀸𑀭𑀸𑀧𑁂𑀲𑀺. 𑀅𑀯𑀸𑀧𑀼𑀭𑀡𑀁 𑀆𑀤𑀸𑀬𑀸𑀢𑀺 𑀓𑀼𑀜𑁆𑀘𑀺𑀓𑀁 𑀕𑀳𑁂𑀢𑁆𑀯𑀸.

𑀦𑀺𑀲𑀺𑀦𑁆𑀦𑀓𑁄𑀯 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀅𑀳𑀁 𑀥𑀭𑀫𑀸𑀦𑁄𑀧𑀺 𑀦 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀲𑁆𑀲 𑀪𑀸𑀭𑁄 𑀅𑀳𑁄𑀲𑀺𑀁, 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲𑀸𑀧𑀺 𑀫𑁂 𑀲𑀭𑀻𑀭𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀮𑀺𑀩𑁄𑀥𑁄 𑀫𑀸 𑀅𑀳𑁄𑀲𑀻𑀢𑀺 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀲𑀭𑀻𑀭𑀢𑁄 𑀚𑀸𑀮𑀸 𑀉𑀝𑁆𑀞𑀳𑀺, 𑀙𑀯𑀺𑀫𑀁𑀲𑀮𑁄𑀳𑀺𑀢𑀁 𑀲𑀧𑁆𑀧𑀺 𑀯𑀺𑀬 𑀛𑀸𑀬𑀫𑀸𑀦𑀁 𑀧𑀭𑀺𑀓𑁆𑀔𑀬𑀁 𑀕𑀢𑀁, 𑀲𑀼𑀫𑀦𑀫𑀓𑀼𑀮𑀲𑀤𑀺𑀲𑀸 𑀥𑀸𑀢𑀼𑀬𑁄𑀯 𑀅𑀯𑀲𑁂𑀲𑀺𑀁𑀲𑀼. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯. 𑀇𑀤𑀁 𑀧𑀦 𑀲𑀼𑀢𑁆𑀢𑀁 𑀤𑀼𑀢𑀺𑀬𑀲𑀗𑁆𑀕𑀳𑁂 𑀲𑀗𑁆𑀕𑀻𑀢𑀦𑁆𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀩𑀸𑀓𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀤𑀦𑁆𑀢𑀪𑀽𑀫𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁩. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀤𑀦𑁆𑀢𑀪𑀽𑀫𑀺𑀲𑀼𑀢𑁆𑀢𑀁. 𑀢𑀢𑁆𑀣 𑀅𑀭𑀜𑁆𑀜𑀓𑀼𑀝𑀺𑀓𑀸𑀬𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀴𑀼𑀯𑀦𑀲𑁆𑀲 𑀏𑀓𑀲𑁆𑀫𑀺𑀁 𑀯𑀺𑀯𑀺𑀢𑁆𑀢𑀝𑁆𑀞𑀸𑀦𑁂 𑀧𑀥𑀸𑀦𑀓𑀫𑁆𑀫𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀓𑀢𑀲𑁂𑀦𑀸𑀲𑀦𑁂. 𑀭𑀸𑀚𑀓𑀼𑀫𑀸𑀭𑁄𑀢𑀺 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀧𑀼𑀢𑁆𑀢𑁄 𑀑𑀭𑀲𑀓𑁄.

𑀨𑀼𑀲𑁂𑀬𑁆𑀬𑀸𑀢𑀺 𑀮𑀪𑁂𑀬𑁆𑀬. 𑀏𑀓𑀕𑁆𑀕𑀢𑀦𑁆𑀢𑀺 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀲𑀫𑀸𑀧𑀢𑁆𑀢𑀺𑀁 𑀦𑀸𑀫 𑀮𑀪𑀢𑀺, 𑀛𑀸𑀦𑀁 𑀦𑀸𑀫 𑀮𑀪𑀢𑀻𑀢𑀺 𑀇𑀤𑀁 𑀫𑀬𑀸 𑀲𑀼𑀢𑀦𑁆𑀢𑀺 𑀯𑀤𑀢𑀺. 𑀓𑀺𑀮𑀫𑀣𑁄𑀢𑀺 𑀓𑀸𑀬𑀓𑀺𑀮𑀫𑀣𑁄. 𑀯𑀺𑀳𑁂𑀲𑀸𑀢𑀺 𑀲𑁆𑀯𑁂𑀯 𑀓𑀺𑀮𑀫𑀣𑁄 𑀯𑀼𑀢𑁆𑀢𑁄. 𑀬𑀣𑀸𑀲𑀓𑁂 𑀢𑀺𑀝𑁆𑀞𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀢𑀦𑁄 𑀅𑀚𑀸𑀦𑀦𑀓𑁄𑀝𑁆𑀞𑀸𑀲𑁂𑀬𑁂𑀯 𑀢𑀺𑀝𑁆𑀞𑁂𑀬𑁆𑀬𑀸𑀲𑀻𑀢𑀺.

𑁨𑁧𑁪. 𑀤𑁂𑀲𑁂𑀲𑀻𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀁 𑀦𑀸𑀫 𑀏𑀯𑀁 𑀮𑀪𑀢𑀺, 𑀲𑀫𑀸𑀧𑀢𑁆𑀢𑀺𑀁 𑀏𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀅𑀧𑁆𑀧𑀦𑀸𑀉𑀧𑀘𑀸𑀭𑀁 𑀧𑀸𑀧𑁂𑀢𑁆𑀯𑀸 𑀏𑀓𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀣𑁂𑀲𑀺. 𑀧𑀯𑁂𑀤𑁂𑀢𑁆𑀯𑀸𑀢𑀺 𑀧𑀓𑀸𑀲𑁂𑀢𑁆𑀯𑀸.

𑀦𑁂𑀓𑁆𑀔𑀫𑁆𑀫𑁂𑀦 𑀜𑀸𑀢𑀩𑁆𑀩𑀦𑁆𑀢𑀺 𑀓𑀸𑀫𑀢𑁄 𑀦𑀺𑀲𑁆𑀲𑀝𑀕𑀼𑀡𑁂𑀦 𑀜𑀸𑀢𑀩𑁆𑀩𑀁. 𑀓𑀸𑀫𑀢𑁄 𑀦𑀺𑀲𑁆𑀲𑀝𑀕𑀼𑀡𑁂 𑀞𑀺𑀢𑁂𑀦 𑀧𑀼𑀕𑁆𑀕𑀮𑁂𑀦 𑀏𑀓𑀕𑁆𑀕𑀁 𑀦𑀸𑀫 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀲𑁂𑀲𑀸𑀦𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑁄𑀢𑀺 𑀤𑀼𑀯𑀺𑀥𑁂𑀧𑀺 𑀓𑀸𑀫𑁂 𑀪𑀼𑀜𑁆𑀚𑀫𑀸𑀦𑁄.

𑁨𑁧𑁫. 𑀳𑀢𑁆𑀣𑀺𑀤𑀫𑁆𑀫𑀸 𑀯𑀸 𑀅𑀲𑁆𑀲𑀤𑀫𑁆𑀫𑀸 𑀯𑀸 𑀕𑁄𑀤𑀫𑁆𑀫𑀸 𑀯𑀸𑀢𑀺 𑀏𑀢𑁆𑀣 𑀅𑀤𑀦𑁆𑀢𑀳𑀢𑁆𑀣𑀺𑀤𑀫𑁆𑀫𑀸𑀤𑀬𑁄 𑀯𑀺𑀬 𑀘𑀺𑀢𑁆𑀢𑁂𑀓𑀕𑁆𑀕𑀭𑀳𑀺𑀢𑀸 𑀧𑀼𑀕𑁆𑀕𑀮𑀸 𑀤𑀝𑁆𑀞𑀩𑁆𑀩𑀸. 𑀤𑀦𑁆𑀢𑀳𑀢𑁆𑀣𑀺𑀆𑀤𑀬𑁄 𑀯𑀺𑀬 𑀘𑀺𑀢𑁆𑀢𑁂𑀓𑀕𑁆𑀕𑀲𑀫𑁆𑀧𑀦𑁆𑀦𑀸. 𑀬𑀣𑀸 𑀅𑀤𑀦𑁆𑀢𑀳𑀢𑁆𑀣𑀺𑀤𑀫𑁆𑀫𑀸𑀤𑀬𑁄 𑀓𑀽𑀝𑀸𑀓𑀸𑀭𑀁 𑀅𑀓𑀢𑁆𑀯𑀸 𑀥𑀼𑀭𑀁 𑀅𑀙𑀟𑁆𑀟𑁂𑀢𑁆𑀯𑀸 𑀤𑀦𑁆𑀢𑀕𑀫𑀦𑀁 𑀯𑀸 𑀕𑀦𑁆𑀢𑀼𑀁, 𑀤𑀦𑁆𑀢𑁂𑀳𑀺 𑀯𑀸 𑀧𑀢𑁆𑀢𑀩𑁆𑀩𑀁 𑀪𑀽𑀫𑀺𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀏𑀯𑀫𑁂𑀯 𑀘𑀺𑀢𑁆𑀢𑁂𑀓𑀕𑁆𑀕𑀭𑀳𑀺𑀢𑀸 𑀲𑀫𑁆𑀧𑀦𑁆𑀦𑀘𑀺𑀢𑁆𑀢𑁂𑀓𑀕𑁆𑀕𑁂𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑀕𑀼𑀡𑀁 𑀯𑀸 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀧𑀢𑁆𑀢𑀪𑀽𑀫𑀺𑀁 𑀯𑀸 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺.

𑁨𑁧𑁬. 𑀳𑀢𑁆𑀣𑀯𑀺𑀮𑀗𑁆𑀖𑀓𑁂𑀦𑀸𑀢𑀺 𑀳𑀢𑁆𑀣𑁂𑀦 𑀳𑀢𑁆𑀣𑀁 𑀕𑀳𑁂𑀢𑁆𑀯𑀸.

𑀤𑀝𑁆𑀞𑁂𑀬𑁆𑀬𑀦𑁆𑀢𑀺 𑀧𑀲𑁆𑀲𑀺𑀢𑀩𑁆𑀩𑀬𑀼𑀢𑁆𑀢𑀓𑀁. 𑀆𑀯𑀼𑀢𑁄𑀢𑀺 𑀆𑀯𑀭𑀺𑀢𑁄. 𑀦𑀺𑀯𑀼𑀢𑁄𑀢𑀺 𑀦𑀺𑀯𑀸𑀭𑀺𑀢𑁄. 𑀑𑀨𑀼𑀝𑁄𑀢𑀺 𑀑𑀦𑀤𑁆𑀥𑁄.

𑁨𑁧𑁭. 𑀦𑀸𑀕𑀯𑀦𑀺𑀓𑀦𑁆𑀢𑀺 𑀳𑀢𑁆𑀣𑀺𑀧𑀤𑁄𑀧𑀫𑁂 (𑀫. 𑀦𑀺. 𑁧.𑁨𑁮𑁮 𑀆𑀤𑀬𑁄) 𑀦𑀸𑀕𑀯𑀦𑀘𑀭𑀓𑁄 𑀧𑀼𑀭𑀺𑀲𑁄 ‘‘𑀦𑀸𑀕𑀯𑀦𑀺𑀓𑁄’’𑀢𑀺 𑀯𑀼𑀢𑁆𑀢𑁄, 𑀇𑀥 𑀳𑀢𑁆𑀣𑀺𑀲𑀺𑀓𑁆𑀔𑀸𑀬 𑀓𑀼𑀲𑀮𑁄 𑀳𑀢𑁆𑀣𑀺𑀁 𑀕𑀳𑁂𑀢𑀼𑀁 𑀲𑀫𑀢𑁆𑀣𑁄. 𑀅𑀢𑀺𑀧𑀲𑁆𑀲𑀺𑀢𑁆𑀯𑀸𑀢𑀺 𑀤𑀺𑀲𑁆𑀯𑀸. 𑀏𑀢𑁆𑀣𑀕𑁂𑀥𑀸𑀢𑀺 𑀏𑀢𑀲𑁆𑀫𑀺𑀁 𑀧𑀯𑀢𑁆𑀢𑀕𑁂𑀥𑀸. 𑀲𑀭𑀲𑀗𑁆𑀓𑀧𑁆𑀧𑀸𑀦𑀦𑁆𑀢𑀺 𑀥𑀸𑀯𑀦𑀲𑀗𑁆𑀓𑀧𑁆𑀧𑀸𑀦𑀁. 𑀫𑀦𑀼𑀲𑁆𑀲𑀓𑀦𑁆𑀢𑁂𑀲𑀼 𑀲𑀻𑀮𑁂𑀲𑀼 𑀲𑀫𑀸𑀤𑀧𑀦𑀸𑀬𑀸𑀢𑀺 𑀏𑀢𑁆𑀣 𑀬𑀤𑀸 𑀦𑀸𑀕𑁄 𑀇𑀢𑁆𑀣𑀺𑀧𑀼𑀭𑀺𑀲𑁂𑀳𑀺 𑀓𑀼𑀫𑀸𑀭𑀓𑀼𑀫𑀸𑀭𑀺𑀓𑀸𑀳𑀺 𑀲𑁄𑀡𑁆𑀟𑀸𑀤𑀻𑀲𑀼 𑀕𑀳𑁂𑀢𑁆𑀯𑀸 𑀉𑀧𑀓𑁂𑀴𑀬𑀫𑀸𑀦𑁄 𑀯𑀺𑀓𑀸𑀭𑀁 𑀦 𑀓𑀭𑁄𑀢𑀺 𑀲𑀼𑀔𑀸𑀬𑀢𑀺, 𑀢𑀤𑀸𑀦𑁂𑀦 𑀫𑀦𑀼𑀲𑁆𑀲𑀓𑀦𑁆𑀢𑀸𑀦𑀺 𑀲𑀻𑀮𑀸𑀦𑀺 𑀲𑀫𑀸𑀤𑀺𑀦𑁆𑀦𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺.

𑀧𑁂𑀫𑀦𑀻𑀬𑀸𑀢𑀺 𑀢𑀸𑀢 𑀭𑀸𑀚𑀸 𑀢𑁂 𑀧𑀲𑀦𑁆𑀦𑁄 𑀫𑀗𑁆𑀕𑀮𑀳𑀢𑁆𑀣𑀺𑀝𑁆𑀞𑀸𑀦𑁂𑀯 𑀞𑀧𑁂𑀲𑁆𑀲𑀢𑀺, 𑀭𑀸𑀚𑀸𑀭𑀳𑀸𑀦𑀺 𑀪𑁄𑀚𑀦𑀸𑀤𑀻𑀦𑀺 𑀮𑀪𑀺𑀲𑁆𑀲𑀲𑀻𑀢𑀺 𑀏𑀯𑀭𑀽𑀧𑀻 𑀦𑀸𑀕𑁂𑀳𑀺 𑀧𑀺𑀬𑀸𑀧𑀺𑀢𑀩𑁆𑀩𑀸 𑀓𑀣𑀸. 𑀲𑀼𑀲𑁆𑀲𑀽𑀲𑀢𑀻𑀢𑀺 𑀢𑀁 𑀧𑁂𑀫𑀦𑀻𑀬𑀓𑀣𑀁 𑀲𑁄𑀢𑀼𑀓𑀸𑀫𑁄 𑀳𑁄𑀢𑀺. 𑀢𑀺𑀡𑀖𑀸𑀲𑁄𑀤𑀓𑀦𑁆𑀢𑀺 𑀢𑀺𑀡𑀖𑀸𑀲𑀜𑁆𑀘𑁂𑀯 𑀉𑀤𑀓𑀜𑁆𑀘, 𑀢𑀺𑀡𑀖𑀸𑀲𑀦𑁆𑀢𑀺 𑀖𑀸𑀲𑀺𑀢𑀩𑁆𑀩𑀁 𑀢𑀺𑀡𑀁, 𑀔𑀸𑀤𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀧𑀡𑀯𑁄𑀢𑀺 𑀟𑀺𑀡𑁆𑀟𑀺𑀫𑁄. 𑀲𑀩𑁆𑀩𑀯𑀗𑁆𑀓𑀤𑁄𑀲𑀦𑀺𑀳𑀺𑀢𑀦𑀺𑀦𑁆𑀦𑀻𑀢𑀓𑀲𑀸𑀯𑁄𑀢𑀺 𑀦𑀺𑀳𑀺𑀢𑀲𑀩𑁆𑀩𑀯𑀗𑁆𑀓𑀤𑁄𑀲𑁄 𑀘𑁂𑀯 𑀅𑀧𑀦𑀻𑀢𑀓𑀲𑀸𑀯𑁄 𑀘. 𑀅𑀗𑁆𑀕𑀦𑁆𑀢𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻𑀢𑀺 𑀅𑀗𑁆𑀕𑀲𑀫𑁄 𑀳𑁄𑀢𑀺.

𑁨𑁧𑁯. 𑀕𑁂𑀳𑀲𑀺𑀢𑀲𑀻𑀮𑀸𑀦𑀦𑁆𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀦𑀺𑀲𑁆𑀲𑀺𑀢𑀲𑀻𑀮𑀸𑀦𑀁. 𑀜𑀸𑀬𑀲𑁆𑀲𑀸𑀢𑀺 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀲𑁆𑀲.

𑁨𑁨𑁨. 𑀅𑀤𑀦𑁆𑀢𑀫𑀭𑀡𑀁 𑀫𑀳𑀮𑁆𑀮𑀓𑁄 𑀭𑀜𑁆𑀜𑁄 𑀦𑀸𑀕𑁄 𑀓𑀸𑀮𑀗𑁆𑀓𑀢𑁄𑀢𑀺 𑀭𑀜𑁆𑀜𑁄 𑀫𑀳𑀮𑁆𑀮𑀓𑁄 𑀦𑀸𑀕𑁄 𑀅𑀤𑀦𑁆𑀢𑀫𑀭𑀡𑀁 𑀫𑀢𑁄 𑀓𑀸𑀮𑀁 𑀓𑀢𑁄 𑀳𑁄𑀢𑀺, 𑀅𑀤𑀦𑁆𑀢𑀫𑀭𑀡𑀁 𑀓𑀸𑀮𑀁𑀓𑀺𑀭𑀺𑀬𑀁 𑀦𑀸𑀫 𑀓𑀭𑀺𑀬𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀤𑀦𑁆𑀢𑀪𑀽𑀫𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀪𑀽𑀫𑀺𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁩. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀪𑀽𑀫𑀺𑀚𑀲𑀼𑀢𑁆𑀢𑀁. 𑀢𑀢𑁆𑀣 𑀪𑀽𑀫𑀺𑀚𑁄𑀢𑀺 𑀅𑀬𑀁 𑀣𑁂𑀭𑁄 𑀚𑀬𑀲𑁂𑀦𑀭𑀸𑀚𑀓𑀼𑀫𑀸𑀭𑀲𑁆𑀲 𑀫𑀸𑀢𑀼𑀮𑁄. 𑀆𑀲𑀜𑁆𑀘 𑀅𑀦𑀸𑀲𑀜𑁆𑀘𑀸𑀢𑀺 𑀓𑀸𑀮𑁂𑀦 𑀆𑀲𑀁 𑀓𑀸𑀮𑁂𑀦 𑀅𑀦𑀸𑀲𑀁. 𑀲𑀓𑁂𑀦 𑀣𑀸𑀮𑀺𑀧𑀸𑀓𑁂𑀦𑀸𑀢𑀺 𑀧𑀓𑀢𑀺𑀧𑀯𑀢𑁆𑀢𑀸𑀬 𑀪𑀺𑀓𑁆𑀔𑀸𑀬 𑀅𑀢𑁆𑀢𑀦𑁄 𑀦𑀺𑀝𑁆𑀞𑀺𑀢𑀪𑀢𑁆𑀢𑀢𑁄𑀧𑀺 𑀪𑀢𑁆𑀢𑁂𑀦 𑀧𑀭𑀺𑀯𑀺𑀲𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀪𑀽𑀫𑀺𑀚𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀦𑀼𑀭𑀼𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁦. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀅𑀦𑀼𑀭𑀼𑀤𑁆𑀥𑀲𑀼𑀢𑁆𑀢𑀁. 𑀢𑀢𑁆𑀣 𑀏𑀯𑀫𑀸𑀳𑀁𑀲𑀽𑀢𑀺 𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀅𑀨𑀸𑀲𑀼𑀓𑀓𑀸𑀮𑁄 𑀅𑀳𑁄𑀲𑀺, 𑀢𑀤𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼. 𑀅𑀧𑀡𑁆𑀡𑀓𑀦𑁆𑀢𑀺 𑀅𑀯𑀺𑀭𑀸𑀥𑀺𑀢𑀁. 𑀏𑀓𑀢𑁆𑀣𑀸𑀢𑀺 𑀅𑀧𑁆𑀧𑀫𑀸𑀡𑀸𑀢𑀺 𑀯𑀸 𑀫𑀳𑀕𑁆𑀕𑀢𑀸𑀢𑀺 𑀯𑀸 𑀛𑀸𑀦𑀫𑁂𑀯 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬𑁂𑀯 𑀏𑀯𑀁 𑀯𑀼𑀘𑁆𑀘𑀢𑀻𑀢𑀺 𑀇𑀫𑀁 𑀲𑀦𑁆𑀥𑀸𑀬 𑀏𑀯𑀫𑀸𑀳.

𑁨𑁩𑁧. 𑀬𑀸𑀯𑀢𑀸 𑀏𑀓𑀁 𑀭𑀼𑀓𑁆𑀔𑀫𑀽𑀮𑀁 𑀫𑀳𑀕𑁆𑀕𑀢𑀦𑁆𑀢𑀺 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀏𑀓𑀭𑀼𑀓𑁆𑀔𑀫𑀽𑀮𑀧𑀫𑀸𑀡𑀝𑁆𑀞𑀸𑀦𑀁 𑀓𑀲𑀺𑀡𑀦𑀺𑀫𑀺𑀢𑁆𑀢𑁂𑀦 𑀑𑀢𑁆𑀣𑀭𑀺𑀢𑁆𑀯𑀸 𑀢𑀲𑁆𑀫𑀺𑀁 𑀓𑀲𑀺𑀡𑀦𑀺𑀫𑀺𑀢𑁆𑀢𑁂 𑀫𑀳𑀕𑁆𑀕𑀢𑀚𑁆𑀛𑀸𑀦𑀁 𑀨𑀭𑀺𑀢𑁆𑀯𑀸 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀫𑀳𑀕𑁆𑀕𑀢𑀦𑁆𑀢𑀺 𑀧𑀦𑀲𑁆𑀲 𑀆𑀪𑁄𑀕𑁄 𑀦𑀢𑁆𑀣𑀺, 𑀓𑁂𑀯𑀮𑀁 𑀫𑀳𑀕𑁆𑀕𑀢𑀚𑁆𑀛𑀸𑀦𑀧𑀯𑀢𑁆𑀢𑀺𑀯𑀲𑁂𑀦 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀇𑀫𑀺𑀦𑀸 𑀔𑁄 𑀏𑀢𑀁 𑀕𑀳𑀧𑀢𑀺 𑀧𑀭𑀺𑀬𑀸𑀬𑁂𑀦𑀸𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦. 𑀏𑀢𑁆𑀣 𑀳𑀺 𑀅𑀧𑁆𑀧𑀫𑀸𑀡𑀸𑀢𑀺 𑀯𑀼𑀢𑁆𑀢𑀸𑀦𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀦𑀁 𑀦𑀺𑀫𑀺𑀢𑁆𑀢𑀁 𑀦 𑀯𑀟𑁆𑀠𑀢𑀺, 𑀉𑀕𑁆𑀖𑀸𑀝𑀦𑀁 𑀦 𑀚𑀸𑀬𑀢𑀺, 𑀢𑀸𑀦𑀺 𑀛𑀸𑀦𑀸𑀦𑀺 𑀅𑀪𑀺𑀜𑁆𑀜𑀸𑀦𑀁 𑀯𑀸 𑀦𑀺𑀭𑁄𑀥𑀲𑁆𑀲 𑀯𑀸 𑀧𑀸𑀤𑀓𑀸𑀦𑀺 𑀦 𑀳𑁄𑀦𑁆𑀢𑀺, 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸𑀦𑀺 𑀧𑀦 𑀯𑀝𑁆𑀝𑀧𑀸𑀤𑀓𑀸𑀦𑀺 𑀪𑀯𑁄𑀓𑁆𑀓𑀫𑀦𑀸𑀦𑀺 𑀘 𑀳𑁄𑀦𑁆𑀢𑀺. ‘‘𑀫𑀳𑀕𑁆𑀕𑀢𑀸’’𑀢𑀺 𑀯𑀼𑀢𑁆𑀢𑀸𑀦𑀁 𑀧𑀦 𑀓𑀲𑀺𑀡𑀚𑁆𑀛𑀸𑀦𑀸𑀦𑀁 𑀦𑀺𑀫𑀺𑀢𑁆𑀢𑀁 𑀯𑀟𑁆𑀠𑀢𑀺, 𑀉𑀕𑁆𑀖𑀸𑀝𑀦𑀁 𑀚𑀸𑀬𑀢𑀺, 𑀲𑀫𑀢𑀺𑀓𑁆𑀓𑀫𑀸 𑀳𑁄𑀦𑁆𑀢𑀺, 𑀅𑀪𑀺𑀜𑁆𑀜𑀸𑀧𑀸𑀤𑀓𑀸𑀦𑀺 𑀦𑀺𑀭𑁄𑀥𑀧𑀸𑀤𑀓𑀸𑀦𑀺 𑀯𑀝𑁆𑀝𑀧𑀸𑀤𑀓𑀸𑀦𑀺 𑀪𑀯𑁄𑀓𑁆𑀓𑀫𑀦𑀸𑀦𑀺 𑀘 𑀳𑁄𑀦𑁆𑀢𑀺. 𑀏𑀯𑀫𑀺𑀫𑁂 𑀥𑀫𑁆𑀫𑀸 𑀦𑀸𑀦𑀢𑁆𑀣𑀸, 𑀅𑀧𑁆𑀧𑀫𑀸𑀡𑀸 𑀫𑀳𑀕𑁆𑀕𑀢𑀸𑀢𑀺 𑀏𑀯𑀁 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘.

𑁨𑁩𑁨. 𑀇𑀤𑀸𑀦𑀺 𑀫𑀳𑀕𑁆𑀕𑀢𑀲𑀫𑀸𑀧𑀢𑁆𑀢𑀺𑀢𑁄 𑀦𑀻𑀳𑀭𑀺𑀢𑁆𑀯𑀸 𑀪𑀯𑀽𑀧𑀧𑀢𑁆𑀢𑀺𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀘𑀢𑀲𑁆𑀲𑁄 𑀔𑁄 𑀇𑀫𑀸𑀢𑀺𑀆𑀤𑀺𑀫𑀸𑀳. 𑀧𑀭𑀺𑀢𑁆𑀢𑀸𑀪𑀸𑀢𑀺 𑀨𑀭𑀺𑀢𑁆𑀯𑀸 𑀚𑀸𑀦𑀦𑁆𑀢𑀲𑁆𑀲 𑀅𑀬𑀫𑀸𑀪𑁄𑀕𑁄 𑀅𑀢𑁆𑀣𑀺, 𑀧𑀭𑀺𑀢𑁆𑀢𑀸𑀪𑁂𑀲𑀼 𑀧𑀦 𑀤𑁂𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀓𑀸𑀭𑀡𑀁 𑀛𑀸𑀦𑀁 𑀪𑀸𑀯𑁂𑀦𑁆𑀢𑁄 𑀏𑀯𑀁 𑀯𑀼𑀢𑁆𑀢𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀧𑀭𑀺𑀢𑁆𑀢𑀸𑀪𑀸 𑀲𑀺𑀬𑀸 𑀲𑀁𑀓𑀺𑀮𑀺𑀝𑁆𑀞𑀸𑀪𑀸 𑀳𑁄𑀦𑁆𑀢𑀺 𑀲𑀺𑀬𑀸 𑀧𑀭𑀺𑀲𑀼𑀤𑁆𑀥𑀸𑀪𑀸, 𑀅𑀧𑁆𑀧𑀫𑀸𑀡𑀸𑀪𑀸 𑀲𑀺𑀬𑀸 𑀲𑀁𑀓𑀺𑀮𑀺𑀝𑁆𑀞𑀸𑀪𑀸 𑀳𑁄𑀦𑁆𑀢𑀺 𑀲𑀺𑀬𑀸 𑀧𑀭𑀺𑀲𑀼𑀤𑁆𑀥𑀸𑀪𑀸. 𑀓𑀣𑀁? 𑀲𑀼𑀧𑁆𑀧𑀫𑀢𑁆𑀢𑁂 𑀯𑀸 𑀲𑀭𑀸𑀯𑀫𑀢𑁆𑀢𑁂 𑀯𑀸 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀆𑀘𑀺𑀡𑁆𑀡𑀯𑀲𑀺𑀪𑀸𑀯𑁄 𑀧𑀘𑁆𑀘𑀦𑀻𑀓𑀥𑀫𑁆𑀫𑀸𑀦𑀁 𑀲𑀼𑀝𑁆𑀞𑀼 𑀅𑀧𑀭𑀺𑀲𑁄𑀥𑀺𑀢𑀢𑁆𑀢𑀸 𑀤𑀼𑀩𑁆𑀩𑀮𑀫𑁂𑀯 𑀲𑀫𑀸𑀧𑀢𑁆𑀢𑀺𑀁 𑀯𑀴𑀜𑁆𑀚𑀺𑀢𑁆𑀯𑀸 𑀅𑀧𑁆𑀧𑀕𑀼𑀡𑀚𑁆𑀛𑀸𑀦𑁂 𑀞𑀺𑀢𑁄 𑀓𑀸𑀮𑀁 𑀓𑀢𑁆𑀯𑀸 𑀧𑀭𑀺𑀢𑁆𑀢𑀸𑀪𑁂𑀲𑀼 𑀦𑀺𑀩𑁆𑀩𑀢𑁆𑀢𑀢𑀺, 𑀯𑀡𑁆𑀡𑁄 𑀧𑀦𑀲𑁆𑀲 𑀧𑀭𑀺𑀢𑁆𑀢𑁄 𑀘𑁂𑀯 𑀳𑁄𑀢𑀺 𑀲𑀁𑀓𑀺𑀮𑀺𑀝𑁆𑀞𑁄 𑀘. 𑀧𑀜𑁆𑀘𑀳𑀺 𑀧𑀦𑀸𑀓𑀸𑀭𑁂𑀳𑀺 𑀆𑀘𑀺𑀡𑁆𑀡𑀯𑀲𑀺𑀪𑀸𑀯𑁄 𑀧𑀘𑁆𑀘𑀦𑀻𑀓𑀥𑀫𑁆𑀫𑀸𑀦𑀁 𑀲𑀼𑀝𑁆𑀞𑀼 𑀧𑀭𑀺𑀲𑁄𑀥𑀺𑀢𑀢𑁆𑀢𑀸 𑀲𑀼𑀯𑀺𑀲𑀼𑀤𑁆𑀥𑀁 𑀲𑀫𑀸𑀧𑀢𑁆𑀢𑀺𑀁 𑀯𑀴𑀜𑁆𑀚𑀺𑀢𑁆𑀯𑀸 𑀧𑀕𑀼𑀡𑀚𑁆𑀛𑀸𑀦𑁂 𑀞𑀺𑀢𑁄 𑀓𑀸𑀮𑀁 𑀓𑀢𑁆𑀯𑀸 𑀧𑀭𑀺𑀢𑁆𑀢𑀸𑀪𑁂𑀲𑀼 𑀦𑀺𑀩𑁆𑀩𑀢𑁆𑀢𑀢𑀺, 𑀯𑀡𑁆𑀡𑁄 𑀧𑀦𑀲𑁆𑀲 𑀧𑀭𑀺𑀢𑁆𑀢𑁄 𑀘𑁂𑀯 𑀳𑁄𑀢𑀺 𑀧𑀭𑀺𑀲𑀼𑀤𑁆𑀥𑁄 𑀘. 𑀏𑀯𑀁 𑀧𑀭𑀺𑀢𑁆𑀢𑀸𑀪𑀸 𑀲𑀺𑀬𑀸 𑀲𑀁𑀓𑀺𑀮𑀺𑀝𑁆𑀞𑀸𑀪𑀸 𑀳𑁄𑀦𑁆𑀢𑀺 𑀲𑀺𑀬𑀸 𑀧𑀭𑀺𑀲𑀼𑀤𑁆𑀥𑀸𑀪𑀸. 𑀓𑀲𑀺𑀡𑁂 𑀧𑀦 𑀯𑀺𑀧𑀼𑀮𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀆𑀘𑀺𑀡𑁆𑀡𑀯𑀲𑀺𑀪𑀸𑀯𑁄𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀅𑀧𑁆𑀧𑀫𑀸𑀡𑀸𑀪𑀸 𑀲𑀺𑀬𑀸 𑀲𑀁𑀓𑀺𑀮𑀺𑀝𑁆𑀞𑀸𑀪𑀸 𑀳𑁄𑀦𑁆𑀢𑀺 𑀲𑀺𑀬𑀸 𑀧𑀭𑀺𑀲𑀼𑀤𑁆𑀥𑀸𑀪𑀸𑀢𑀺.

𑀯𑀡𑁆𑀡𑀦𑀸𑀦𑀢𑁆𑀢𑀦𑁆𑀢𑀺 𑀲𑀭𑀻𑀭𑀯𑀡𑁆𑀡𑀲𑁆𑀲 𑀦𑀸𑀦𑀢𑁆𑀢𑀁. 𑀦𑁄 𑀘 𑀆𑀪𑀸𑀦𑀸𑀦𑀢𑁆𑀢𑀦𑁆𑀢𑀺 𑀆𑀮𑁄𑀓𑁂 𑀦𑀸𑀦𑀢𑁆𑀢𑀁 𑀦 𑀧𑀜𑁆𑀜𑀸𑀬𑀢𑀺. 𑀅𑀘𑁆𑀘𑀺𑀦𑀸𑀦𑀢𑁆𑀢𑀦𑁆𑀢𑀺 𑀤𑀻𑀖𑀭𑀲𑁆𑀲𑀅𑀡𑀼𑀣𑀽𑀮𑀯𑀲𑁂𑀦 𑀅𑀘𑁆𑀘𑀺𑀬𑀸 𑀦𑀸𑀦𑀢𑁆𑀢𑀁.

𑀬𑀢𑁆𑀣 𑀬𑀢𑁆𑀣𑀸𑀢𑀺 𑀉𑀬𑁆𑀬𑀸𑀦𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑀦𑀤𑀻𑀢𑀻𑀭𑀧𑁄𑀓𑁆𑀔𑀭𑀡𑀻𑀢𑀻𑀭𑁂𑀲𑀼 𑀬𑀢𑁆𑀣 𑀬𑀢𑁆𑀣. 𑀅𑀪𑀺𑀦𑀺𑀯𑀺𑀲𑀦𑁆𑀢𑀻𑀢𑀺 𑀯𑀲𑀦𑁆𑀢𑀺. 𑀅𑀪𑀺𑀭𑀫𑀦𑁆𑀢𑀻𑀢𑀺 𑀭𑀫𑀦𑁆𑀢𑀺 𑀦 𑀉𑀓𑁆𑀓𑀡𑁆𑀞𑀦𑁆𑀢𑀺. 𑀓𑀸𑀚𑁂𑀦𑀸𑀢𑀺 𑀬𑀸𑀕𑀼𑀪𑀢𑁆𑀢𑀢𑁂𑀮𑀨𑀸𑀡𑀺𑀢𑀫𑀘𑁆𑀙𑀫𑀁𑀲𑀓𑀸𑀚𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀓𑀸𑀚𑁂𑀦. ‘‘𑀓𑀸𑀘𑁂𑀦𑀸𑀢𑀺’’𑀧𑀺 𑀧𑀸𑀞𑁄, 𑀅𑀬𑀫𑁂𑀯 𑀅𑀢𑁆𑀣𑁄. 𑀧𑀺𑀝𑀓𑁂𑀦𑀸𑀢𑀺 𑀧𑀘𑁆𑀙𑀺𑀬𑀸. 𑀢𑀢𑁆𑀣 𑀢𑀢𑁆𑀣𑁂𑀯𑀸𑀢𑀺 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀁 𑀲𑀼𑀮𑀪𑀝𑁆𑀞𑀸𑀦𑀢𑁄 𑀮𑁄𑀡𑀧𑀽𑀢𑀺𑀫𑀘𑁆𑀙𑀸𑀤𑀻𑀦𑀁 𑀉𑀲𑁆𑀲𑀦𑁆𑀦𑀝𑁆𑀞𑀸𑀦𑀁 𑀦𑀻𑀢𑀸 ‘‘𑀧𑀼𑀩𑁆𑀩𑁂 𑀅𑀫𑁆𑀳𑀸𑀓𑀁 𑀯𑀲𑀦𑀝𑁆𑀞𑀸𑀦𑀁 𑀨𑀸𑀲𑀼𑀓𑀁, 𑀢𑀢𑁆𑀣 𑀲𑀼𑀔𑀁 𑀯𑀲𑀺𑀫𑁆𑀳𑀸, 𑀇𑀥 𑀮𑁄𑀡𑀁 𑀯𑀸 𑀦𑁄 𑀩𑀸𑀥𑀢𑀺 𑀧𑀽𑀢𑀺𑀫𑀘𑁆𑀙𑀕𑀦𑁆𑀥𑁄 𑀯𑀸 𑀲𑀻𑀲𑀭𑁄𑀕𑀁 𑀉𑀧𑁆𑀧𑀸𑀤𑁂𑀢𑀻’’𑀢𑀺 𑀏𑀯𑀁 𑀘𑀺𑀢𑁆𑀢𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀭𑀫𑀦𑁆𑀢𑀺.

𑁨𑁩𑁪. 𑀆𑀪𑀸𑀢𑀺 𑀆𑀪𑀸𑀲𑀫𑁆𑀧𑀦𑁆𑀦𑀸. 𑀢𑀤𑀗𑁆𑀕𑁂𑀦𑀸𑀢𑀺 𑀢𑀲𑁆𑀲𑀸 𑀪𑀯𑀽𑀧𑀧𑀢𑁆𑀢𑀺𑀬𑀸 𑀅𑀗𑁆𑀕𑁂𑀦, 𑀪𑀯𑀽𑀧𑀧𑀢𑁆𑀢𑀺𑀓𑀸𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀢𑀁 𑀓𑀸𑀭𑀡𑀁 𑀧𑀼𑀘𑁆𑀙𑀦𑁆𑀢𑁄 𑀓𑁄 𑀦𑀼 𑀔𑁄, 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳.

𑀓𑀸𑀬𑀤𑀼𑀝𑁆𑀞𑀼𑀮𑁆𑀮𑀦𑁆𑀢𑀺 𑀓𑀸𑀬𑀸𑀮𑀲𑀺𑀬𑀪𑀸𑀯𑁄. 𑀛𑀸𑀬𑀢𑁄𑀢𑀺 𑀚𑀮𑀢𑁄.

𑁨𑁩𑁫. 𑀤𑀻𑀖𑀭𑀢𑁆𑀢𑀁 𑀔𑁄 𑀫𑁂𑀢𑀺 𑀣𑁂𑀭𑁄 𑀓𑀺𑀭 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁄 𑀇𑀲𑀺𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀦𑀺𑀭𑀦𑁆𑀢𑀭𑀁 𑀢𑀻𑀡𑀺 𑀅𑀢𑁆𑀢𑀪𑀸𑀯𑀲𑀢𑀸𑀦𑀺 𑀩𑁆𑀭𑀳𑁆𑀫𑀮𑁄𑀓𑁂 𑀧𑀝𑀺𑀮𑀪𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀆𑀳. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀅𑀯𑁄𑀓𑀺𑀡𑁆𑀡𑀁 𑀢𑀻𑀡𑀺 𑀲𑀢𑀁, 𑀬𑀁 𑀧𑀩𑁆𑀩𑀚𑀺𑀁 𑀇𑀲𑀺𑀧𑀩𑁆𑀩𑀚𑁆𑀚𑀁;

𑀅𑀲𑀗𑁆𑀔𑀢𑀁 𑀕𑀯𑁂𑀲𑀦𑁆𑀢𑁄, 𑀧𑀼𑀩𑁆𑀩𑁂 𑀲𑀜𑁆𑀘𑀭𑀺𑀢𑀁 𑀫𑀫’’𑀦𑁆𑀢𑀺.

𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀅𑀦𑀼𑀭𑀼𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁬. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑀁. 𑀢𑀢𑁆𑀣 𑀏𑀢𑀤𑀯𑁄𑀘𑀸𑀢𑀺 𑀦𑁂𑀯 𑀪𑁂𑀤𑀸𑀥𑀺𑀧𑁆𑀧𑀸𑀬𑁂𑀦 𑀦 𑀧𑀺𑀬𑀓𑀫𑁆𑀬𑀢𑀸𑀬, 𑀅𑀣 𑀔𑁆𑀯𑀸𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑁂 𑀪𑀺𑀓𑁆𑀔𑀽 𑀫𑀫 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀦 𑀑𑀭𑀫𑀺𑀲𑁆𑀲𑀦𑁆𑀢𑀺, 𑀩𑀼𑀤𑁆𑀥𑀸 𑀘 𑀦𑀸𑀫 𑀳𑀺𑀢𑀸𑀦𑀼𑀓𑀫𑁆𑀧𑀓𑀸, 𑀅𑀤𑁆𑀥𑀸 𑀦𑁂𑀲𑀁 𑀪𑀕𑀯𑀸 𑀏𑀓𑀁 𑀓𑀸𑀭𑀡𑀁 𑀓𑀣𑁂𑀲𑁆𑀲𑀢𑀺, 𑀢𑀁 𑀲𑀼𑀢𑁆𑀯𑀸 𑀏𑀢𑁂 𑀑𑀭𑀫𑀺𑀲𑁆𑀲𑀦𑁆𑀢𑀺, 𑀢𑀢𑁄 𑀢𑁂𑀲𑀁 𑀨𑀸𑀲𑀼𑀯𑀺𑀳𑀸𑀭𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀲𑁆𑀫𑀸 𑀏𑀢𑀁 ‘‘𑀇𑀥, 𑀪𑀦𑁆𑀢𑁂’’𑀢𑀺𑀆𑀤𑀺𑀯𑀘𑀦𑀫𑀯𑁄𑀘. 𑀫𑀸 𑀪𑀡𑁆𑀟𑀦𑀦𑁆𑀢𑀺𑀆𑀤𑀻𑀲𑀼 ‘‘𑀅𑀓𑀢𑁆𑀣𑀸’’𑀢𑀺 𑀧𑀸𑀞𑀲𑁂𑀲𑀁 𑀕𑀳𑁂𑀢𑁆𑀯𑀸 ‘‘𑀫𑀸 𑀪𑀡𑁆𑀟𑀦𑀁 𑀅𑀓𑀢𑁆𑀣𑀸’’𑀢𑀺 𑀏𑀯𑀁 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀅𑀜𑁆𑀜𑀢𑀭𑁄𑀢𑀺 𑀲𑁄 𑀓𑀺𑀭 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀅𑀢𑁆𑀣𑀓𑀸𑀫𑁄, 𑀅𑀬𑀁 𑀓𑀺𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄 𑁋 ‘‘𑀇𑀫𑁂 𑀪𑀺𑀓𑁆𑀔𑀽 𑀓𑁄𑀥𑀸𑀪𑀺𑀪𑀽𑀢𑀸 𑀲𑀢𑁆𑀣𑀼 𑀯𑀘𑀦𑀁 𑀦 𑀕𑀡𑁆𑀳𑀦𑁆𑀢𑀺, 𑀫𑀸 𑀪𑀕𑀯𑀸 𑀏𑀢𑁂 𑀑𑀯𑀤𑀦𑁆𑀢𑁄 𑀓𑀺𑀮𑀫𑀻’’𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳.

𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀻𑀢𑀺 𑀦 𑀓𑁂𑀯𑀮𑀁 𑀧𑀸𑀯𑀺𑀲𑀺, 𑀬𑁂𑀦𑀧𑀺 𑀚𑀦𑁂𑀦 𑀦 𑀤𑀺𑀝𑁆𑀞𑁄, 𑀲𑁄 𑀫𑀁 𑀧𑀲𑁆𑀲𑀢𑀽𑀢𑀺𑀧𑀺 𑀅𑀥𑀺𑀝𑁆𑀞𑀸𑀲𑀺. 𑀓𑀺𑀫𑀢𑁆𑀣𑀁 𑀅𑀥𑀺𑀝𑁆𑀞𑀸𑀲𑀻𑀢𑀺? 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀤𑀫𑀦𑀢𑁆𑀣𑀁. 𑀪𑀕𑀯𑀸 𑀳𑀺 𑀢𑀤𑀸 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑁄 ‘‘𑀧𑀼𑀣𑀼𑀲𑀤𑁆𑀤𑁄 𑀲𑀫𑀚𑀦𑁄’’𑀢𑀺𑀆𑀤𑀺𑀕𑀸𑀣𑀸 𑀪𑀸𑀲𑀺𑀢𑁆𑀯𑀸 𑀓𑁄𑀲𑀫𑁆𑀩𑀺𑀢𑁄 𑀩𑀸𑀮𑀓𑀮𑁄𑀡𑀓𑀸𑀭𑀕𑀸𑀫𑀁 𑀕𑀢𑁄. 𑀢𑀢𑁄 𑀧𑀸𑀘𑀻𑀦𑀯𑀁𑀲𑀤𑀸𑀬𑀁, 𑀢𑀢𑁄 𑀧𑀸𑀮𑀺𑀮𑁂𑀬𑁆𑀬𑀓𑀯𑀦𑀲𑀡𑁆𑀟𑀁 𑀕𑀦𑁆𑀢𑁆𑀯𑀸 𑀧𑀸𑀮𑀺𑀮𑁂𑀬𑁆𑀬𑀳𑀢𑁆𑀣𑀺𑀦𑀸𑀕𑁂𑀦 𑀉𑀧𑀝𑁆𑀞𑀳𑀺𑀬𑀫𑀸𑀦𑁄 𑀢𑁂𑀫𑀸𑀲𑀁 𑀯𑀲𑀺. 𑀦𑀕𑀭𑀯𑀸𑀲𑀺𑀦𑁄𑀧𑀺 𑁋 ‘‘𑀲𑀢𑁆𑀣𑀸 𑀯𑀺𑀳𑀸𑀭𑀁 𑀕𑀢𑁄, 𑀕𑀘𑁆𑀙𑀸𑀫 𑀥𑀫𑁆𑀫𑀲𑁆𑀲𑀯𑀦𑀸𑀬𑀸’’𑀢𑀺 𑀕𑀦𑁆𑀥𑀧𑀼𑀧𑁆𑀨𑀳𑀢𑁆𑀣𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀓𑀳𑀁, 𑀪𑀦𑁆𑀢𑁂, 𑀲𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀁𑀲𑀼. ‘‘𑀓𑀳𑀁 𑀢𑀼𑀫𑁆𑀳𑁂 𑀲𑀢𑁆𑀣𑀸𑀭𑀁 𑀤𑀓𑁆𑀔𑀣, 𑀲𑀢𑁆𑀣𑀸 ‘𑀇𑀫𑁂 𑀪𑀺𑀓𑁆𑀔𑀽 𑀲𑀫𑀕𑁆𑀕𑁂 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀆𑀕𑀢𑁄, 𑀲𑀫𑀕𑁆𑀕𑁂 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀢𑁄’’𑀢𑀺. ‘‘𑀫𑀬𑀁 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺 𑀤𑀢𑁆𑀯𑀸 𑀲𑀢𑁆𑀣𑀸𑀭𑀁 𑀆𑀦𑁂𑀢𑀼𑀁 𑀦 𑀲𑀓𑁆𑀓𑁄𑀫, 𑀲𑁄 𑀦𑁄 𑀅𑀬𑀸𑀘𑀺𑀢𑁄 𑀲𑀬𑀫𑁂𑀯 𑀆𑀕𑀢𑁄, 𑀫𑀬𑀁 𑀇𑀫𑁂 𑀪𑀺𑀓𑁆𑀔𑀽 𑀦𑀺𑀲𑁆𑀲𑀸𑀬 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀥𑀫𑁆𑀫𑀓𑀣𑀁 𑀲𑁄𑀢𑀼𑀁 𑀦 𑀮𑀪𑀺𑀫𑁆𑀳𑀸. 𑀇𑀫𑁂 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑀸, 𑀢𑀲𑁆𑀫𑀺𑀫𑁆𑀧𑀺 𑀲𑀸𑀫𑀕𑁆𑀕𑀺𑀁 𑀓𑀭𑁄𑀦𑁆𑀢𑁂 𑀲𑀫𑀕𑁆𑀕𑀸 𑀦 𑀚𑀸𑀢𑀸, 𑀓𑀲𑁆𑀲𑀸𑀜𑁆𑀜𑀲𑁆𑀲 𑀯𑀘𑀦𑀁 𑀓𑀭𑀺𑀲𑁆𑀲𑀦𑁆𑀢𑀺. 𑀅𑀮𑀁 𑀦 𑀇𑀫𑁂𑀲𑀁 𑀪𑀺𑀓𑁆𑀔𑀸 𑀤𑀸𑀢𑀩𑁆𑀩𑀸’’𑀢𑀺 𑀲𑀓𑀮𑀦𑀕𑀭𑁂 𑀤𑀡𑁆𑀟𑀁 𑀞𑀧𑀬𑀺𑀁𑀲𑀼. 𑀢𑁂 𑀧𑀼𑀦𑀤𑀺𑀯𑀲𑁂 𑀲𑀓𑀮𑀦𑀕𑀭𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀝𑀘𑁆𑀙𑀼𑀫𑀢𑁆𑀢𑀫𑁆𑀧𑀺 𑀪𑀺𑀓𑁆𑀔𑀁 𑀅𑀮𑀪𑀺𑀢𑁆𑀯𑀸 𑀯𑀺𑀳𑀸𑀭𑀁 𑀆𑀕𑀫𑀁𑀲𑀼. 𑀉𑀧𑀸𑀲𑀓𑀸𑀧𑀺 𑀢𑁂 𑀧𑀼𑀦 𑀆𑀳𑀁𑀲𑀼 𑁋 ‘‘𑀬𑀸𑀯 𑀲𑀢𑁆𑀣𑀸𑀭𑀁 𑀦 𑀔𑀫𑀸𑀧𑁂𑀣, 𑀢𑀸𑀯 𑀯𑁄 𑀢𑀫𑁂𑀯 𑀤𑀡𑁆𑀟𑀓𑀫𑁆𑀫’’𑀦𑁆𑀢𑀺. 𑀢𑁂 ‘‘𑀲𑀢𑁆𑀣𑀸𑀭𑀁 𑀔𑀫𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀪𑀕𑀯𑀢𑀺 𑀲𑀸𑀯𑀢𑁆𑀣𑀺𑀬𑀁 𑀅𑀦𑀼𑀧𑁆𑀧𑀢𑁆𑀢𑁂 𑀢𑀢𑁆𑀣 𑀅𑀕𑀫𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀅𑀝𑁆𑀞𑀸𑀭𑀲 𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀤𑁂𑀲𑁂𑀲𑀻𑀢𑀺 𑀅𑀬𑀫𑁂𑀢𑁆𑀣 𑀧𑀸𑀴𑀺𑀫𑀼𑀢𑁆𑀢𑀓𑀓𑀣𑀸.

𑁨𑁩𑁭. 𑀇𑀤𑀸𑀦𑀺 𑀧𑀼𑀣𑀼𑀲𑀤𑁆𑀤𑁄𑀢𑀺𑀆𑀤𑀺𑀕𑀸𑀣𑀸𑀲𑀼 𑀧𑀼𑀣𑀼 𑀫𑀳𑀸𑀲𑀤𑁆𑀤𑁄 𑀅𑀲𑁆𑀲𑀸𑀢𑀺 𑀧𑀼𑀣𑀼𑀲𑀤𑁆𑀤𑁄. 𑀲𑀫𑀚𑀦𑁄𑀢𑀺 𑀲𑀫𑀸𑀦𑁄 𑀏𑀓𑀲𑀤𑀺𑀲𑁄 𑀚𑀦𑁄, 𑀲𑀩𑁆𑀩𑁄𑀯𑀸𑀬𑀁 𑀪𑀡𑁆𑀟𑀦𑀓𑀸𑀭𑀓𑀚𑀦𑁄 𑀲𑀫𑀦𑁆𑀢𑀢𑁄 𑀲𑀤𑁆𑀤𑀦𑀺𑀘𑁆𑀙𑀭𑀡𑁂𑀦 𑀧𑀼𑀣𑀼𑀲𑀤𑁆𑀤𑁄 𑀘𑁂𑀯 𑀲𑀤𑀺𑀲𑁄 𑀘𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦 𑀩𑀸𑀮𑁄 𑀓𑁄𑀘𑀺 𑀫𑀜𑁆𑀜𑀣𑀸𑀢𑀺 𑀢𑀢𑁆𑀭 𑀓𑁄𑀘𑀺 𑀏𑀓𑁄𑀧𑀺 𑀅𑀳𑀁 𑀩𑀸𑀮𑁄𑀢𑀺 𑀦 𑀫𑀜𑁆𑀜𑀢𑀺, 𑀲𑀩𑁆𑀩𑁂𑀧𑀺 𑀧𑀡𑁆𑀟𑀺𑀢𑀫𑀸𑀦𑀺𑀦𑁄𑀬𑁂𑀯. 𑀦𑀸𑀜𑁆𑀜𑀁 𑀪𑀺𑀬𑁆𑀬𑁄 𑀅𑀫𑀜𑁆𑀜𑀭𑀼𑀦𑁆𑀢𑀺 𑀓𑁄𑀘𑀺 𑀏𑀓𑁄𑀧𑀺 𑀅𑀳𑀁 𑀩𑀸𑀮𑁄𑀢𑀺 𑀦 𑀘 𑀫𑀜𑁆𑀜𑀺, 𑀪𑀺𑀬𑁆𑀬𑁄 𑀘 𑀲𑀗𑁆𑀖𑀲𑁆𑀫𑀺𑀁 𑀪𑀺𑀚𑁆𑀚𑀫𑀸𑀦𑁂 𑀅𑀜𑁆𑀜𑀫𑁆𑀧𑀺 𑀏𑀓𑀁 ‘‘𑀫𑀬𑁆𑀳𑀁 𑀓𑀸𑀭𑀡𑀸 𑀲𑀗𑁆𑀖𑁄 𑀪𑀺𑀚𑁆𑀚𑀢𑀻’’𑀢𑀺 𑀇𑀤𑀁 𑀓𑀸𑀭𑀡𑀁 𑀦 𑀫𑀜𑁆𑀜𑀻𑀢𑀺 𑀅𑀢𑁆𑀣𑁄.

𑀧𑀭𑀺𑀫𑀼𑀝𑁆𑀞𑀸𑀢𑀺 𑀫𑀼𑀝𑁆𑀞𑀲𑁆𑀲𑀢𑀺𑀦𑁄. 𑀯𑀸𑀘𑀸𑀕𑁄𑀘𑀭𑀪𑀸𑀡𑀺𑀦𑁄𑀢𑀺 𑀭𑀸𑀓𑀸𑀭𑀲𑁆𑀲 𑀭𑀲𑁆𑀲𑀸𑀤𑁂𑀲𑁄 𑀓𑀢𑁄; 𑀯𑀸𑀘𑀸𑀕𑁄𑀘𑀭𑀸𑀯, 𑀦 𑀲𑀢𑀺𑀧𑀝𑁆𑀞𑀸𑀦𑀕𑁄𑀘𑀭𑀸, 𑀪𑀸𑀡𑀺𑀦𑁄 𑀘, 𑀓𑀣𑀁 𑀪𑀸𑀡𑀺𑀦𑁄? 𑀬𑀸𑀯𑀺𑀘𑁆𑀙𑀦𑁆𑀢𑀺 𑀫𑀼𑀔𑀸𑀬𑀸𑀫𑀁, 𑀬𑀸𑀯 𑀫𑀼𑀔𑀁 𑀧𑀲𑀸𑀭𑁂𑀢𑀼𑀁 𑀇𑀘𑁆𑀙𑀦𑁆𑀢𑀺, 𑀢𑀸𑀯 𑀧𑀲𑀸𑀭𑁂𑀢𑁆𑀯𑀸 𑀪𑀸𑀡𑀺𑀦𑁄, 𑀏𑀓𑁄𑀧𑀺 𑀲𑀗𑁆𑀖𑀕𑀸𑀭𑀯𑁂𑀦 𑀫𑀼𑀔𑀲𑀗𑁆𑀓𑁄𑀘𑀦𑀁 𑀦 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀬𑁂𑀦 𑀦𑀻𑀢𑀸𑀢𑀺 𑀬𑁂𑀦 𑀓𑀮𑀳𑁂𑀦 𑀇𑀫𑀁 𑀦𑀺𑀮𑁆𑀮𑀚𑁆𑀚𑀪𑀸𑀯𑀁 𑀦𑀻𑀢𑀸. 𑀦 𑀢𑀁 𑀯𑀺𑀤𑀽 𑀦 𑀢𑀁 𑀚𑀸𑀦𑀦𑁆𑀢𑀺 ‘‘𑀏𑀯𑀁 𑀲𑀸𑀤𑀻𑀦𑀯𑁄 𑀅𑀬’’𑀦𑁆𑀢𑀺.

𑀬𑁂 𑀘 𑀢𑀁 𑀉𑀧𑀦𑀬𑁆𑀳𑀦𑁆𑀢𑀻𑀢𑀺 𑀢𑀁 𑀅𑀓𑁆𑀓𑁄𑀘𑁆𑀙𑀺 𑀫𑀦𑁆𑀢𑀺𑀆𑀤𑀺𑀓𑀁 𑀆𑀓𑀸𑀭𑀁 𑀬𑁂 𑀉𑀧𑀦𑀬𑁆𑀳𑀦𑁆𑀢𑀺. 𑀲𑀦𑀦𑁆𑀢𑀦𑁄𑀢𑀺 𑀧𑁄𑀭𑀸𑀡𑁄.

𑀧𑀭𑁂𑀢𑀺 𑀧𑀡𑁆𑀟𑀺𑀢𑁂 𑀞𑀧𑁂𑀢𑁆𑀯𑀸 𑀢𑀢𑁄 𑀅𑀜𑁆𑀜𑁂 𑀪𑀡𑁆𑀟𑀦𑀓𑀸𑀭𑀓𑀸 𑀧𑀭𑁂 𑀦𑀸𑀫. 𑀢𑁂 𑀏𑀢𑁆𑀣 𑀲𑀗𑁆𑀖𑀫𑀚𑁆𑀛𑁂 𑀓𑀮𑀳𑀁 𑀓𑀭𑁄𑀦𑁆𑀢𑀸 ‘‘𑀫𑀬𑀁 𑀬𑀫𑀸𑀫𑀲𑁂 𑀉𑀧𑀬𑀫𑀸𑀫 𑀦𑀲𑁆𑀲𑀸𑀫 𑀲𑀢𑀢𑀁 𑀲𑀫𑀺𑀢𑀁 𑀫𑀘𑁆𑀘𑀼𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀸’’𑀢𑀺 𑀦 𑀚𑀸𑀦𑀦𑁆𑀢𑀺. 𑀬𑁂 𑀘 𑀢𑀢𑁆𑀣 𑀯𑀺𑀚𑀸𑀦𑀦𑁆𑀢𑀻𑀢𑀺 𑀬𑁂 𑀘 𑀢𑀢𑁆𑀣 𑀧𑀡𑁆𑀟𑀺𑀢𑀸 ‘‘𑀫𑀬𑀁 𑀫𑀘𑁆𑀘𑀼𑀦𑁄 𑀲𑀫𑀻𑀧𑀁 𑀕𑀘𑁆𑀙𑀸𑀫𑀸’’𑀢𑀺 𑀯𑀺𑀚𑀸𑀦𑀦𑁆𑀢𑀺. 𑀢𑀢𑁄 𑀲𑀫𑁆𑀫𑀦𑁆𑀢𑀺 𑀫𑁂𑀥𑀕𑀸𑀢𑀺 𑀏𑀯𑀜𑁆𑀳𑀺 𑀢𑁂 𑀚𑀸𑀦𑀦𑁆𑀢𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀫𑁂𑀥𑀕𑀸𑀦𑀁 𑀓𑀮𑀳𑀸𑀦𑀁 𑀯𑀽𑀧𑀲𑀫𑀸𑀬 𑀧𑀝𑀺𑀧𑀚𑁆𑀚𑀦𑁆𑀢𑀺.

𑀅𑀝𑁆𑀞𑀺𑀘𑁆𑀙𑀺𑀦𑁆𑀦𑀸𑀢𑀺 𑀅𑀬𑀁 𑀕𑀸𑀣𑀸 𑀚𑀸𑀢𑀓𑁂 (𑀚𑀸. 𑁧.𑁯.𑁧𑁬) 𑀆𑀕𑀢𑀸, 𑀩𑁆𑀭𑀳𑁆𑀫𑀤𑀢𑁆𑀢𑀜𑁆𑀘 𑀤𑀻𑀖𑀸𑀯𑀼𑀓𑀼𑀫𑀸𑀭𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀢𑁂𑀲𑀫𑁆𑀧𑀺 𑀢𑀣𑀸 𑀧𑀯𑀢𑁆𑀢𑀯𑁂𑀭𑀸𑀦𑀁 𑀳𑁄𑀢𑀺 𑀲𑀗𑁆𑀕𑀢𑀺, 𑀓𑀲𑁆𑀫𑀸 𑀢𑀼𑀫𑁆𑀳𑀸𑀓𑀁 𑀦 𑀳𑁄𑀢𑀺, 𑀬𑁂𑀲𑀁 𑀯𑁄 𑀦𑁂𑀯 𑀫𑀸𑀢𑀸𑀧𑀺𑀢𑀽𑀦𑀁 𑀅𑀝𑁆𑀞𑀻𑀦𑀺 𑀙𑀺𑀦𑁆𑀦𑀸𑀦𑀺, 𑀦 𑀧𑀸𑀡𑀸 𑀳𑀝𑀸 𑀦 𑀕𑀯𑀸𑀲𑁆𑀲𑀥𑀦𑀸𑀦𑀺 𑀳𑀝𑀸𑀦𑀻𑀢𑀺.

𑀲𑀘𑁂 𑀮𑀪𑁂𑀣𑀸𑀢𑀺𑀆𑀤𑀺𑀕𑀸𑀣𑀸 𑀧𑀡𑁆𑀟𑀺𑀢𑀲𑀳𑀸𑀬𑀲𑁆𑀲 𑀘 𑀩𑀸𑀮𑀲𑀳𑀸𑀬𑀲𑁆𑀲 𑀘 𑀯𑀡𑁆𑀡𑀸𑀯𑀡𑁆𑀡𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀸. 𑀅𑀪𑀺𑀪𑀼𑀬𑁆𑀬 𑀲𑀩𑁆𑀩𑀸𑀦𑀺 𑀧𑀭𑀺𑀲𑁆𑀲𑀬𑀸𑀦𑀻𑀢𑀺 𑀧𑀸𑀓𑀝𑀧𑀭𑀺𑀲𑁆𑀲𑀬𑁂 𑀘 𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀲𑁆𑀲𑀬𑁂 𑀘 𑀅𑀪𑀺𑀪𑀯𑀺𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀅𑀢𑁆𑀢𑀫𑀦𑁄 𑀲𑀢𑀺𑀫𑀸 𑀘𑀭𑁂𑀬𑁆𑀬𑀸𑀢𑀺.

𑀭𑀸𑀚𑀸𑀯 𑀭𑀝𑁆𑀞𑀁 𑀯𑀺𑀚𑀺𑀢𑀦𑁆𑀢𑀺 𑀬𑀣𑀸 𑀅𑀢𑁆𑀢𑀦𑁄 𑀯𑀺𑀚𑀺𑀢𑀭𑀝𑁆𑀞𑀁 𑀫𑀳𑀸𑀚𑀦𑀓𑀭𑀸𑀚𑀸 𑀘 𑀅𑀭𑀺𑀦𑁆𑀤𑀫𑀫𑀳𑀸𑀭𑀸𑀚𑀸 𑀘 𑀧𑀳𑀸𑀬 𑀏𑀓𑀓𑀸 𑀯𑀺𑀘𑀭𑀺𑀁𑀲𑀼, 𑀏𑀯𑀁 𑀯𑀺𑀘𑀭𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀫𑀸𑀢𑀗𑁆𑀕𑀭𑀜𑁆𑀜𑁂𑀯 𑀦𑀸𑀕𑁄𑀢𑀺 𑀫𑀸𑀢𑀗𑁆𑀕𑁄 𑀅𑀭𑀜𑁆𑀜𑁂 𑀦𑀸𑀕𑁄𑀯. 𑀫𑀸𑀢𑀗𑁆𑀕𑁄𑀢𑀺 𑀳𑀢𑁆𑀣𑀺 𑀯𑀼𑀘𑁆𑀘𑀢𑀺. 𑀦𑀸𑀕𑁄𑀢𑀺 𑀫𑀳𑀦𑁆𑀢𑀸𑀥𑀺𑀯𑀘𑀦𑀫𑁂𑀢𑀁. 𑀬𑀣𑀸 𑀳𑀺 𑀫𑀸𑀢𑀼𑀧𑁄𑀲𑀓𑁄 𑀫𑀸𑀢𑀗𑁆𑀕𑀦𑀸𑀕𑁄 𑀅𑀭𑀜𑁆𑀜𑁂 𑀏𑀓𑁄 𑀘𑀭𑀺, 𑀦 𑀘 𑀧𑀸𑀧𑀸𑀦𑀺 𑀅𑀓𑀸𑀲𑀺, 𑀬𑀣𑀸 𑀘 𑀧𑀸𑀮𑀺𑀮𑁂𑀬𑁆𑀬𑀓𑁄, 𑀏𑀯𑀁 𑀏𑀓𑁄 𑀘𑀭𑁂, 𑀦 𑀘 𑀧𑀸𑀧𑀸𑀦𑀺 𑀓𑀬𑀺𑀭𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁩𑁮. 𑀩𑀸𑀮𑀓𑀮𑁄𑀡𑀓𑀸𑀭𑀕𑀸𑀫𑁄𑀢𑀺 𑀉𑀧𑀸𑀮𑀺𑀕𑀳𑀧𑀢𑀺𑀲𑁆𑀲 𑀪𑁄𑀕𑀕𑀸𑀫𑁄. 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀓𑀲𑁆𑀫𑀸 𑀉𑀧𑀲𑀗𑁆𑀓𑀫𑀺? 𑀕𑀡𑁂 𑀓𑀺𑀭𑀲𑁆𑀲 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸 𑀏𑀓𑀯𑀺𑀳𑀸𑀭𑀺𑀁 𑀪𑀺𑀓𑁆𑀔𑀼𑀁 𑀧𑀲𑁆𑀲𑀺𑀢𑀼𑀓𑀸𑀫𑀢𑀸 𑀉𑀤𑀧𑀸𑀤𑀺, 𑀢𑀲𑁆𑀫𑀸 𑀲𑀻𑀢𑀸𑀤𑀻𑀳𑀺 𑀧𑀻𑀴𑀺𑀢𑁄 𑀉𑀡𑁆𑀳𑀸𑀤𑀻𑀦𑀺 𑀧𑀢𑁆𑀣𑀬𑀫𑀸𑀦𑁄 𑀯𑀺𑀬 𑀉𑀧𑀲𑀗𑁆𑀓𑀫𑀺. 𑀥𑀫𑁆𑀫𑀺𑀬𑀸 𑀓𑀣𑀸𑀬𑀸𑀢𑀺 𑀏𑀓𑀻𑀪𑀸𑀯𑁂 𑀆𑀦𑀺𑀲𑀁𑀲𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀬. 𑀬𑁂𑀦 𑀧𑀸𑀘𑀻𑀦𑀯𑀁𑀲𑀤𑀸𑀬𑁄, 𑀢𑀢𑁆𑀣 𑀓𑀲𑁆𑀫𑀸 𑀉𑀧𑀲𑀗𑁆𑀓𑀫𑀺? 𑀓𑀮𑀳𑀓𑀸𑀭𑀓𑁂 𑀓𑀺𑀭𑀲𑁆𑀲 𑀤𑀺𑀝𑁆𑀞𑀸𑀤𑀻𑀦𑀯𑀢𑁆𑀢𑀸 𑀲𑀫𑀕𑁆𑀕𑀯𑀸𑀲𑀺𑀦𑁄 𑀪𑀺𑀓𑁆𑀔𑀽 𑀧𑀲𑁆𑀲𑀺𑀢𑀼𑀓𑀸𑀫𑀢𑀸 𑀉𑀤𑀧𑀸𑀤𑀺, 𑀢𑀲𑁆𑀫𑀸 𑀲𑀻𑀢𑀸𑀤𑀻𑀳𑀺 𑀧𑀻𑀴𑀺𑀢𑁄 𑀉𑀡𑁆𑀳𑀸𑀤𑀻𑀦𑀺 𑀧𑀢𑁆𑀣𑀬𑀫𑀸𑀦𑁄 𑀯𑀺𑀬 𑀢𑀢𑁆𑀣 𑀉𑀧𑀲𑀗𑁆𑀓𑀫𑀺. 𑀆𑀬𑀲𑁆𑀫𑀸 𑀘 𑀅𑀦𑀼𑀭𑀼𑀤𑁆𑀥𑁄𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀫𑁂𑀯.

𑁨𑁪𑁧. 𑀅𑀢𑁆𑀣𑀺 𑀧𑀦 𑀯𑁄𑀢𑀺 𑀧𑀘𑁆𑀙𑀺𑀫𑀧𑀼𑀘𑁆𑀙𑀸𑀬 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀧𑀼𑀘𑁆𑀙𑁂𑀬𑁆𑀬. 𑀲𑁄 𑀧𑀦 𑀣𑁂𑀭𑀸𑀦𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀁 𑀧𑀼𑀘𑁆𑀙𑀺𑀢𑀼𑀁 𑀦 𑀬𑀼𑀢𑁆𑀢𑀦𑁆𑀢𑀺 𑀧𑀭𑀺𑀓𑀫𑁆𑀫𑁄𑀪𑀸𑀲𑀁 𑀧𑀼𑀘𑁆𑀙𑀢𑀺. 𑀑𑀪𑀸𑀲𑀜𑁆𑀘𑁂𑀯 𑀲𑀜𑁆𑀚𑀸𑀦𑀸𑀫𑀸𑀢𑀺 𑀧𑀭𑀺𑀓𑀫𑁆𑀫𑁄𑀪𑀸𑀲𑀁 𑀲𑀜𑁆𑀚𑀸𑀦𑀸𑀫. 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦𑀦𑁆𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀭𑀽𑀧𑀤𑀲𑁆𑀲𑀦𑀜𑁆𑀘 𑀲𑀜𑁆𑀚𑀸𑀦𑀸𑀫. 𑀢𑀜𑁆𑀘 𑀦𑀺𑀫𑀺𑀢𑁆𑀢𑀁 𑀦𑀧𑁆𑀧𑀝𑀺𑀯𑀺𑀚𑁆𑀛𑀸𑀫𑀸𑀢𑀺 𑀢𑀜𑁆𑀘 𑀓𑀸𑀭𑀡𑀁 𑀦 𑀚𑀸𑀦𑀸𑀫, 𑀬𑁂𑀦 𑀦𑁄 𑀑𑀪𑀸𑀲𑁄 𑀘 𑀭𑀽𑀧𑀤𑀲𑁆𑀲𑀦𑀜𑁆𑀘 𑀅𑀦𑁆𑀢𑀭𑀥𑀸𑀬𑀢𑀺.

𑀢𑀁 𑀔𑁄 𑀧𑀦 𑀯𑁄 𑀅𑀦𑀼𑀭𑀼𑀤𑁆𑀥𑀸 𑀦𑀺𑀫𑀺𑀢𑁆𑀢𑀁 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀦𑁆𑀢𑀺 𑀢𑀁 𑀯𑁄 𑀓𑀸𑀭𑀡𑀁 𑀚𑀸𑀦𑀺𑀢𑀩𑁆𑀩𑀁. 𑀅𑀳𑀫𑁆𑀧𑀺 𑀲𑀼𑀤𑀦𑁆𑀢𑀺 𑀅𑀦𑀼𑀭𑀼𑀤𑁆𑀥𑀸 𑀢𑀼𑀫𑁆𑀳𑁂 𑀓𑀺𑀁 𑀦 𑀆𑀴𑀼𑀮𑁂𑀲𑁆𑀲𑀦𑁆𑀢𑀺, 𑀅𑀳𑀫𑁆𑀧𑀺 𑀇𑀫𑁂𑀳𑀺 𑀏𑀓𑀸𑀤𑀲𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀆𑀴𑀼𑀮𑀺𑀢𑀧𑀼𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀯𑀺𑀘𑀺𑀓𑀺𑀘𑁆𑀙𑀸 𑀔𑁄 𑀫𑁂𑀢𑀺𑀆𑀤𑀻𑀲𑀼 𑀫𑀳𑀸𑀲𑀢𑁆𑀢𑀲𑁆𑀲 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀦𑀸𑀦𑀸𑀯𑀺𑀥𑀸𑀦𑀺 𑀭𑀽𑀧𑀸𑀦𑀺 𑀤𑀺𑀲𑁆𑀯𑀸 ‘‘𑀇𑀤𑀁 𑀔𑁄 𑀓𑀺’’𑀦𑁆𑀢𑀺 𑀯𑀺𑀘𑀺𑀓𑀺𑀘𑁆𑀙𑀸 𑀉𑀤𑀧𑀸𑀤𑀺. 𑀲𑀫𑀸𑀥𑀺 𑀘𑀯𑀻𑀢𑀺 𑀧𑀭𑀺𑀓𑀫𑁆𑀫𑀲𑀫𑀸𑀥𑀺 𑀘𑀯𑀺. 𑀑𑀪𑀸𑀲𑁄𑀢𑀺 𑀧𑀭𑀺𑀓𑀫𑁆𑀫𑁄𑀪𑀸𑀲𑁄𑀧𑀺 𑀅𑀦𑁆𑀢𑀭𑀥𑀸𑀬𑀺, 𑀤𑀺𑀩𑁆𑀩𑀘𑀓𑁆𑀔𑀼𑀦𑀸𑀧𑀺 𑀭𑀽𑀧𑀁 𑀦 𑀧𑀲𑁆𑀲𑀺. 𑀅𑀫𑀦𑀲𑀺𑀓𑀸𑀭𑁄𑀢𑀺 𑀭𑀽𑀧𑀸𑀦𑀺 𑀧𑀲𑁆𑀲𑀢𑁄 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺, 𑀇𑀤𑀸𑀦𑀺 𑀓𑀺𑀜𑁆𑀘𑀺 𑀦 𑀫𑀦𑀲𑀺𑀓𑀭𑀺𑀲𑁆𑀲𑀸𑀫𑀻𑀢𑀺 𑀅𑀫𑀦𑀲𑀺𑀓𑀸𑀭𑁄 𑀉𑀤𑀧𑀸𑀤𑀺.

𑀣𑀺𑀦𑀫𑀺𑀤𑁆𑀥𑀦𑁆𑀢𑀺 𑀓𑀺𑀜𑁆𑀘𑀺 𑀅𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀣𑀺𑀦𑀫𑀺𑀤𑁆𑀥𑀁 𑀉𑀤𑀧𑀸𑀤𑀺.

𑀙𑀫𑁆𑀪𑀺𑀢𑀢𑁆𑀢𑀦𑁆𑀢𑀺 𑀳𑀺𑀫𑀯𑀦𑁆𑀢𑀸𑀪𑀺𑀫𑀼𑀔𑀁 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀤𑀸𑀦𑀯𑀭𑀓𑁆𑀔𑀲𑀅𑀚𑀕𑀭𑀸𑀤𑀬𑁄 𑀅𑀤𑁆𑀤𑀲, 𑀅𑀣𑀲𑁆𑀲 𑀙𑀫𑁆𑀪𑀺𑀢𑀢𑁆𑀢𑀁 𑀉𑀤𑀧𑀸𑀤𑀺.

𑀉𑀧𑁆𑀧𑀺𑀮𑀦𑁆𑀢𑀺 ‘‘𑀫𑀬𑀸 𑀤𑀺𑀝𑁆𑀞𑀪𑀬𑀁 𑀧𑀓𑀢𑀺𑀬𑀸 𑀑𑀮𑁄𑀓𑀺𑀬𑀫𑀸𑀦𑀁 𑀦𑀢𑁆𑀣𑀺. 𑀅𑀤𑀺𑀝𑁆𑀞𑁂 𑀓𑀺𑀁 𑀦𑀸𑀫 𑀪𑀬’’𑀦𑁆𑀢𑀺 𑀘𑀺𑀦𑁆𑀢𑀬𑀢𑁄 𑀉𑀧𑁆𑀧𑀺𑀮𑀸𑀯𑀺𑀢𑀢𑁆𑀢𑀁 𑀉𑀤𑀧𑀸𑀤𑀺. 𑀲𑀓𑀺𑀤𑁂𑀯𑀸𑀢𑀺 𑀏𑀓𑀧𑀬𑁄𑀕𑁂𑀦𑁂𑀯 𑀧𑀜𑁆𑀘 𑀦𑀺𑀥𑀺𑀓𑀼𑀫𑁆𑀪𑀺𑀬𑁄𑀧𑀺 𑀧𑀲𑁆𑀲𑁂𑀬𑁆𑀬.

𑀤𑀼𑀝𑁆𑀞𑀼𑀮𑁆𑀮𑀦𑁆𑀢𑀺 𑀫𑀬𑀸 𑀯𑀻𑀭𑀺𑀬𑀁 𑀕𑀸𑀴𑁆𑀳𑀁 𑀧𑀕𑁆𑀕𑀳𑀺𑀢𑀁, 𑀢𑁂𑀦 𑀫𑁂 𑀉𑀧𑁆𑀧𑀺𑀮𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀯𑀻𑀭𑀺𑀬𑀁 𑀲𑀺𑀣𑀺𑀮𑀫𑀓𑀸𑀲𑀺, 𑀢𑀢𑁄 𑀓𑀸𑀬𑀤𑀭𑀣𑁄 𑀓𑀸𑀬𑀤𑀼𑀝𑁆𑀞𑀼𑀮𑁆𑀮𑀁 𑀓𑀸𑀬𑀸𑀮𑀲𑀺𑀬𑀁 𑀉𑀤𑀧𑀸𑀤𑀺.

𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀦𑁆𑀢𑀺 𑀫𑀫 𑀯𑀻𑀭𑀺𑀬𑀁 𑀲𑀺𑀣𑀺𑀮𑀁 𑀓𑀭𑁄𑀢𑁄 𑀤𑀼𑀝𑁆𑀞𑀼𑀮𑁆𑀮𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀧𑀼𑀦 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀢𑁄 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁 𑀉𑀤𑀧𑀸𑀤𑀺. 𑀧𑀢𑀫𑁂𑀬𑁆𑀬𑀸𑀢𑀺 𑀫𑀭𑁂𑀬𑁆𑀬.

𑀅𑀢𑀺𑀮𑀻𑀦𑀯𑀻𑀭𑀺𑀬𑀦𑁆𑀢𑀺 𑀫𑀫 𑀯𑀻𑀭𑀺𑀬𑀁 𑀧𑀕𑁆𑀕𑀡𑁆𑀳𑀢𑁄 𑀏𑀯𑀁 𑀚𑀸𑀢𑀦𑁆𑀢𑀺 𑀧𑀼𑀦 𑀯𑀻𑀭𑀺𑀬𑀁 𑀲𑀺𑀣𑀺𑀮𑀁 𑀓𑀭𑁄𑀢𑁄 𑀅𑀢𑀺𑀮𑀻𑀦𑀯𑀻𑀭𑀺𑀬𑀁 𑀉𑀤𑀧𑀸𑀤𑀺.

𑀅𑀪𑀺𑀚𑀧𑁆𑀧𑀸𑀢𑀺 𑀤𑁂𑀯𑀮𑁄𑀓𑀸𑀪𑀺𑀫𑀼𑀔𑀁 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀤𑁂𑀯𑀲𑀗𑁆𑀖𑀁 𑀧𑀲𑁆𑀲𑀢𑁄 𑀢𑀡𑁆𑀳𑀸 𑀉𑀤𑀧𑀸𑀤𑀺.

𑀦𑀸𑀦𑀢𑁆𑀢𑀲𑀜𑁆𑀜𑀸𑀢𑀺 𑀫𑀬𑁆𑀳𑀁 𑀏𑀓𑀚𑀸𑀢𑀺𑀓𑀁 𑀭𑀽𑀧𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀅𑀪𑀺𑀚𑀧𑁆𑀧𑀸 𑀉𑀧𑁆𑀧𑀦𑁆𑀦𑀸, 𑀦𑀸𑀦𑀸𑀯𑀺𑀥𑀭𑀽𑀧𑀁 𑀫𑀦𑀲𑀺 𑀓𑀭𑀺𑀲𑁆𑀲𑀸𑀫𑀻𑀢𑀺 𑀓𑀸𑀮𑁂𑀦 𑀤𑁂𑀯𑀮𑁄𑀓𑀸𑀪𑀺𑀫𑀼𑀔𑀁 𑀓𑀸𑀮𑁂𑀦 𑀫𑀦𑀼𑀲𑁆𑀲𑀮𑁄𑀓𑀸𑀪𑀺𑀫𑀼𑀔𑀁 𑀯𑀟𑁆𑀠𑁂𑀢𑁆𑀯𑀸 𑀦𑀸𑀦𑀸𑀯𑀺𑀥𑀸𑀦𑀺 𑀭𑀽𑀧𑀸𑀦𑀺 𑀫𑀦𑀲𑀺𑀓𑀭𑁄𑀢𑁄 𑀦𑀸𑀦𑀢𑁆𑀢𑀲𑀜𑁆𑀜𑀸 𑀉𑀤𑀧𑀸𑀤𑀺.

𑀅𑀢𑀺𑀦𑀺𑀚𑁆𑀛𑀸𑀬𑀺𑀢𑀢𑁆𑀢𑀦𑁆𑀢𑀺 𑀫𑀬𑁆𑀳𑀁 𑀦𑀸𑀦𑀸𑀯𑀺𑀥𑀸𑀦𑀺 𑀭𑀽𑀧𑀸𑀦𑀺 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀦𑀸𑀦𑀢𑁆𑀢𑀲𑀜𑁆𑀜𑀸 𑀉𑀤𑀧𑀸𑀤𑀺, 𑀇𑀝𑁆𑀞𑀁 𑀯𑀸 𑀅𑀦𑀺𑀝𑁆𑀞𑀁 𑀯𑀸 𑀏𑀓𑀚𑀸𑀢𑀺𑀓𑀫𑁂𑀯 𑀫𑀦𑀲𑀺 𑀓𑀭𑀺𑀲𑁆𑀲𑀸𑀫𑀻𑀢𑀺 𑀢𑀣𑀸 𑀫𑀦𑀲𑀺𑀓𑀭𑁄𑀢𑁄 𑀅𑀢𑀺𑀦𑀺𑀚𑁆𑀛𑀸𑀬𑀺𑀢𑀢𑁆𑀢𑀁 𑀭𑀽𑀧𑀸𑀦𑀁 𑀉𑀤𑀧𑀸𑀤𑀺.

𑁨𑁪𑁩. 𑀑𑀪𑀸𑀲𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀫𑀻𑀢𑀺 𑀧𑀭𑀺𑀓𑀫𑁆𑀫𑁄𑀪𑀸𑀲𑀫𑁂𑀯 𑀫𑀦𑀲𑀺 𑀓𑀭𑁄𑀫𑀺. 𑀦 𑀘 𑀭𑀽𑀧𑀸𑀦𑀺 𑀧𑀲𑁆𑀲𑀸𑀫𑀻𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀭𑀽𑀧𑀸𑀦𑀺 𑀦 𑀧𑀲𑁆𑀲𑀸𑀫𑀺. 𑀭𑀽𑀧𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀫𑀻𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀯𑀺𑀲𑀬𑀭𑀽𑀧𑀫𑁂𑀯 𑀫𑀦𑀲𑀺 𑀓𑀭𑁄𑀫𑀺.

𑀧𑀭𑀺𑀢𑁆𑀢𑀜𑁆𑀘𑁂𑀯 𑀑𑀪𑀸𑀲𑀦𑁆𑀢𑀺 𑀧𑀭𑀺𑀢𑁆𑀢𑀓𑀝𑁆𑀞𑀸𑀦𑁂 𑀑𑀪𑀸𑀲𑀁. 𑀧𑀭𑀺𑀢𑁆𑀢𑀸𑀦𑀺 𑀘 𑀭𑀽𑀧𑀸𑀦𑀻𑀢𑀺 𑀧𑀭𑀺𑀢𑁆𑀢𑀓𑀝𑁆𑀞𑀸𑀦𑁂 𑀭𑀽𑀧𑀸𑀦𑀺. 𑀯𑀺𑀧𑀭𑀺𑀬𑀸𑀬𑁂𑀦 𑀤𑀼𑀢𑀺𑀬𑀯𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀺𑀢𑁆𑀢𑁄 𑀲𑀫𑀸𑀥𑀻𑀢𑀺 𑀧𑀭𑀺𑀢𑁆𑀢𑀓𑁄 𑀧𑀭𑀺𑀓𑀫𑁆𑀫𑁄𑀪𑀸𑀲𑁄, 𑀑𑀪𑀸𑀲𑀧𑀭𑀺𑀢𑁆𑀢𑀢𑀜𑁆𑀳𑀺 𑀲𑀦𑁆𑀥𑀸𑀬 𑀇𑀥 𑀧𑀭𑀺𑀓𑀫𑁆𑀫𑀲𑀫𑀸𑀥𑀺 ‘‘𑀧𑀭𑀺𑀢𑁆𑀢𑁄’’𑀢𑀺 𑀯𑀼𑀢𑁆𑀢𑁄. 𑀧𑀭𑀺𑀢𑁆𑀢𑀁 𑀫𑁂 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀤𑀺𑀩𑁆𑀩𑀘𑀓𑁆𑀔𑀼𑀧𑀺 𑀧𑀭𑀺𑀢𑁆𑀢𑀓𑀁 𑀳𑁄𑀢𑀺. 𑀅𑀧𑁆𑀧𑀫𑀸𑀡𑀯𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄.

𑁨𑁪𑁫. 𑀅𑀯𑀺𑀢𑀓𑁆𑀓𑀫𑁆𑀧𑀺 𑀯𑀺𑀘𑀸𑀭𑀫𑀢𑁆𑀢𑀦𑁆𑀢𑀺 𑀧𑀜𑁆𑀘𑀓𑀦𑀬𑁂 𑀤𑀼𑀢𑀺𑀬𑀚𑁆𑀛𑀸𑀦𑀲𑀫𑀸𑀥𑀺𑀁. 𑀅𑀯𑀺𑀢𑀓𑁆𑀓𑀫𑁆𑀧𑀺 𑀅𑀯𑀺𑀘𑀸𑀭𑀦𑁆𑀢𑀺 𑀘𑀢𑀼𑀓𑁆𑀓𑀦𑀬𑁂𑀧𑀺 𑀧𑀜𑁆𑀘𑀓𑀦𑀬𑁂𑀧𑀺 𑀛𑀸𑀦𑀢𑁆𑀢𑀬𑀲𑀫𑀸𑀥𑀺𑀁. 𑀲𑀧𑁆𑀧𑀻𑀢𑀺𑀓𑀦𑁆𑀢𑀺 𑀤𑀼𑀓𑀢𑀺𑀓𑀚𑁆𑀛𑀸𑀦𑀲𑀫𑀸𑀥𑀺𑀁. 𑀦𑀺𑀧𑁆𑀧𑀻𑀢𑀺𑀓𑀦𑁆𑀢𑀺 𑀤𑀼𑀓𑀚𑁆𑀛𑀸𑀦𑀲𑀫𑀸𑀥𑀺𑀁. 𑀲𑀸𑀢𑀲𑀳𑀕𑀢𑀦𑁆𑀢𑀺 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀲𑀫𑀸𑀥𑀺𑀁. 𑀉𑀧𑁂𑀓𑁆𑀔𑀸𑀲𑀳𑀕𑀢𑀦𑁆𑀢𑀺 𑀘𑀢𑀼𑀓𑁆𑀓𑀦𑀬𑁂 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺𑀁 𑀧𑀜𑁆𑀘𑀓𑀦𑀬𑁂 𑀧𑀜𑁆𑀘𑀫𑀚𑁆𑀛𑀸𑀦𑀲𑀫𑀸𑀥𑀺𑀁.

𑀓𑀤𑀸 𑀧𑀦 𑀪𑀕𑀯𑀸 𑀇𑀫𑀁 𑀢𑀺𑀯𑀺𑀥𑀁 𑀲𑀫𑀸𑀥𑀺𑀁 𑀪𑀸𑀯𑁂𑀢𑀺? 𑀫𑀳𑀸𑀩𑁄𑀥𑀺𑀫𑀽𑀮𑁂 𑀦𑀺𑀲𑀺𑀦𑁆𑀦𑁄 𑀧𑀘𑁆𑀙𑀺𑀫𑀬𑀸𑀫𑁂. 𑀪𑀕𑀯𑀢𑁄 𑀳𑀺 𑀧𑀞𑀫𑀫𑀕𑁆𑀕𑁄 𑀧𑀞𑀫𑀚𑁆𑀛𑀸𑀦𑀺𑀓𑁄 𑀅𑀳𑁄𑀲𑀺, 𑀤𑀼𑀢𑀺𑀬𑀸𑀤𑀬𑁄 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀸. 𑀧𑀜𑁆𑀘𑀓𑀦𑀬𑁂 𑀧𑀜𑁆𑀘𑀫𑀚𑁆𑀛𑀸𑀦𑀲𑁆𑀲 𑀫𑀕𑁆𑀕𑁄 𑀦𑀢𑁆𑀣𑀻𑀢𑀺 𑀲𑁄 𑀮𑁄𑀓𑀺𑀬𑁄 𑀅𑀳𑁄𑀲𑀻𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀩𑀸𑀮𑀧𑀡𑁆𑀟𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁬. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀩𑀸𑀮𑀧𑀡𑁆𑀟𑀺𑀢𑀲𑀼𑀢𑁆𑀢𑀁. 𑀢𑀢𑁆𑀣 𑀩𑀸𑀮𑀮𑀓𑁆𑀔𑀡𑀸𑀦𑀻𑀢𑀺 𑀩𑀸𑀮𑁄 𑀅𑀬𑀦𑁆𑀢𑀺 𑀏𑀢𑁂𑀳𑀺 𑀮𑀓𑁆𑀔𑀺𑀬𑀢𑀺 𑀜𑀸𑀬𑀢𑀻𑀢𑀺 𑀩𑀸𑀮𑀮𑀓𑁆𑀔𑀡𑀸𑀦𑀺. 𑀢𑀸𑀦𑁂𑀯 𑀢𑀲𑁆𑀲 𑀲𑀜𑁆𑀚𑀸𑀦𑀦𑀓𑀸𑀭𑀡𑀸𑀦𑀻𑀢𑀺 𑀩𑀸𑀮𑀦𑀺𑀫𑀺𑀢𑁆𑀢𑀸𑀦𑀺. 𑀩𑀸𑀮𑀲𑁆𑀲 𑀅𑀧𑀤𑀸𑀦𑀸𑀦𑀻𑀢𑀺 𑀩𑀸𑀮𑀸𑀧𑀤𑀸𑀦𑀸𑀦𑀺. 𑀤𑀼𑀘𑁆𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻𑀢𑀺 𑀘𑀺𑀦𑁆𑀢𑀬𑀦𑁆𑀢𑁄 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀫𑀺𑀘𑁆𑀙𑀸𑀤𑀲𑁆𑀲𑀦𑀯𑀲𑁂𑀦 𑀤𑀼𑀘𑁆𑀘𑀺𑀦𑁆𑀢𑀺𑀢𑀫𑁂𑀯 𑀘𑀺𑀦𑁆𑀢𑁂𑀢𑀺. 𑀤𑀼𑀩𑁆𑀪𑀸𑀲𑀺𑀢𑀪𑀸𑀲𑀻𑀢𑀺 𑀪𑀸𑀲𑀫𑀸𑀦𑁄𑀧𑀺 𑀫𑀼𑀲𑀸𑀯𑀸𑀤𑀸𑀤𑀺𑀪𑁂𑀤𑀁 𑀤𑀼𑀩𑁆𑀪𑀸𑀲𑀺𑀢𑀫𑁂𑀯 𑀪𑀸𑀲𑀢𑀺. 𑀤𑀼𑀓𑁆𑀓𑀝𑀓𑀫𑁆𑀫𑀓𑀸𑀭𑀻𑀢𑀺 𑀓𑀭𑁄𑀦𑁆𑀢𑁄𑀧𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀲𑁂𑀦 𑀤𑀼𑀓𑁆𑀓𑀝𑀓𑀫𑁆𑀫𑀫𑁂𑀯 𑀓𑀭𑁄𑀢𑀺. 𑀢𑀢𑁆𑀭 𑀘𑁂𑀢𑀺 𑀬𑀢𑁆𑀣 𑀦𑀺𑀲𑀺𑀦𑁆𑀦𑁄, 𑀢𑀲𑁆𑀲𑀁 𑀧𑀭𑀺𑀲𑀢𑀺. 𑀢𑀚𑁆𑀚𑀁 𑀢𑀲𑁆𑀲𑀸𑀭𑀼𑀧𑁆𑀧𑀦𑁆𑀢𑀺 𑀢𑀚𑁆𑀚𑀸𑀢𑀺𑀓𑀁 𑀢𑀤𑀦𑀼𑀘𑁆𑀙𑀯𑀺𑀓𑀁, 𑀧𑀜𑁆𑀘𑀦𑁆𑀦𑀁 𑀯𑁂𑀭𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀓𑀲𑀫𑁆𑀧𑀭𑀸𑀬𑀺𑀓𑀆𑀤𑀻𑀦𑀯𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁆𑀭𑀸𑀢𑀺 𑀢𑀸𑀬 𑀓𑀣𑀸𑀬 𑀓𑀘𑁆𑀙𑀫𑀸𑀦𑀸𑀬. 𑀩𑀸𑀮𑀦𑁆𑀢𑀺𑀆𑀤𑀻𑀦𑀺 𑀲𑀸𑀫𑀺𑀅𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁.

𑁨𑁪𑁮. 𑀑𑀮𑀫𑁆𑀩𑀦𑁆𑀢𑀻𑀢𑀺 𑀉𑀧𑀝𑁆𑀞𑀳𑀦𑁆𑀢𑀺. 𑀲𑁂𑀲𑀧𑀤𑀤𑁆𑀯𑀬𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀑𑀮𑀫𑁆𑀩𑀦𑀸𑀤𑀺𑀆𑀓𑀸𑀭𑁂𑀦 𑀳𑀺 𑀢𑀸𑀦𑀺 𑀉𑀧𑀝𑁆𑀞𑀳𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁. 𑀧𑀣𑀯𑀺𑀬𑀸 𑀑𑀮𑀫𑁆𑀩𑀦𑁆𑀢𑀻𑀢𑀺 𑀧𑀣𑀯𑀺𑀢𑀮𑁂 𑀧𑀢𑁆𑀣𑀭𑀦𑁆𑀢𑀺. 𑀲𑁂𑀲𑀧𑀤𑀤𑁆𑀯𑀬𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀢𑁆𑀣𑀭𑀡𑀸𑀓𑀸𑀭𑁄𑀬𑁂𑀯 𑀳𑁂𑀲. 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀩𑀸𑀮𑀲𑁆𑀲𑀸𑀢𑀺 𑀢𑀲𑁆𑀫𑀺𑀁 𑀉𑀧𑀝𑁆𑀞𑀸𑀦𑀸𑀓𑀸𑀭𑁂 𑀆𑀧𑀸𑀣𑀕𑀢𑁂 𑀩𑀸𑀮𑀲𑁆𑀲 𑀏𑀯𑀁 𑀳𑁄𑀢𑀺.

𑁨𑁪𑁯. 𑀏𑀢𑀤𑀯𑁄𑀘𑀸𑀢𑀺 𑀅𑀦𑀼𑀲𑀦𑁆𑀥𑀺𑀓𑀼𑀲𑀮𑁄 𑀪𑀺𑀓𑁆𑀔𑀼 ‘‘𑀦𑀺𑀭𑀬𑀲𑁆𑀲 𑀉𑀧𑀫𑀸 𑀓𑀸𑀢𑀼𑀁 𑀦 𑀲𑀓𑁆𑀓𑀸’’𑀢𑀺 𑀦 𑀪𑀕𑀯𑀸 𑀯𑀤𑀢𑀺, ‘‘𑀦 𑀲𑀼𑀓𑀭𑀸’’𑀢𑀺 𑀧𑀦 𑀯𑀤𑀢𑀺, 𑀦 𑀲𑀼𑀓𑀭𑀁 𑀧𑀦 𑀲𑀓𑁆𑀓𑀸 𑀳𑁄𑀢𑀺 𑀓𑀸𑀢𑀼𑀁, 𑀳𑀦𑁆𑀤𑀸𑀳𑀁 𑀤𑀲𑀩𑀮𑀁 𑀉𑀧𑀫𑀁 𑀓𑀸𑀭𑀸𑀧𑁂𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀢𑀁 ‘‘𑀲𑀓𑁆𑀓𑀸, 𑀪𑀦𑁆𑀢𑁂’’𑀢𑀺 𑀯𑀘𑀦𑀁 𑀅𑀯𑁄𑀘. 𑀳𑀦𑁂𑀬𑁆𑀬𑀼𑀦𑁆𑀢𑀺 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀫𑀦𑀯𑀲𑁂𑀦 𑀬𑀣𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀤𑁆𑀯𑁂 𑀧𑀳𑀸𑀭𑀸 𑀦𑀺𑀧𑀢𑀦𑁆𑀢𑀺, 𑀏𑀯𑀁 𑀳𑀦𑁂𑀬𑁆𑀬𑀼𑀁. 𑀢𑁂𑀦𑀲𑁆𑀲 𑀤𑁆𑀯𑁂 𑀯𑀡𑀫𑀼𑀔𑀲𑀢𑀸𑀦𑀺 𑀳𑁄𑀦𑁆𑀢𑀺. 𑀇𑀢𑁄 𑀉𑀢𑁆𑀢𑀭𑀺𑀧𑀺 𑀏𑀲𑁂𑀯 𑀦𑀬𑁄.

𑁨𑁫𑁦. 𑀧𑀸𑀡𑀺𑀫𑀢𑁆𑀢𑀦𑁆𑀢𑀺 𑀅𑀦𑁆𑀢𑁄𑀫𑀼𑀝𑁆𑀞𑀺𑀬𑀁 𑀞𑀧𑀦𑀫𑀢𑁆𑀢𑀁. 𑀲𑀗𑁆𑀔𑀫𑁆𑀧𑀺 𑀦 𑀉𑀧𑁂𑀢𑀻𑀢𑀺 𑀕𑀡𑀦𑀫𑀢𑁆𑀢𑀫𑁆𑀧𑀺 𑀦 𑀕𑀘𑁆𑀙𑀢𑀺. 𑀓𑀮𑀪𑀸𑀕𑀫𑁆𑀧𑀻𑀢𑀺 𑀲𑀢𑀺𑀫𑀁 𑀓𑀮𑀁 𑀲𑀳𑀲𑁆𑀲𑀺𑀫𑀁 𑀓𑀮𑀁 𑀲𑀢𑀲𑀳𑀲𑁆𑀲𑀺𑀫𑀁 𑀯𑀸 𑀓𑀮𑀁 𑀉𑀧𑀕𑀘𑁆𑀙𑀢𑀻𑀢𑀺𑀧𑀺 𑀯𑀢𑁆𑀢𑀩𑁆𑀩𑀢𑀁 𑀦 𑀉𑀧𑁂𑀢𑀺. 𑀉𑀧𑀦𑀺𑀥𑀫𑁆𑀧𑀻𑀢𑀺 𑀉𑀧𑀦𑀺𑀓𑁆𑀔𑁂𑀧𑀦𑀫𑀢𑁆𑀢𑀫𑁆𑀧𑀺 𑀦 𑀉𑀧𑁂𑀢𑀺, 𑀑𑀮𑁄𑀓𑁂𑀦𑁆𑀢𑀲𑁆𑀲 𑀑𑀮𑁄𑀓𑀺𑀢𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺. 𑀢𑀢𑁆𑀢𑀁 𑀅𑀬𑁄𑀔𑀺𑀮𑀦𑁆𑀢𑀺 𑀢𑀺𑀕𑀸𑀯𑀼𑀢𑀁 𑀅𑀢𑁆𑀢𑀪𑀸𑀯𑀁 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀮𑁄𑀳𑀧𑀣𑀯𑀺𑀬𑀸 𑀉𑀢𑁆𑀢𑀸𑀦𑀓𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀢𑀲𑁆𑀲 𑀤𑀓𑁆𑀔𑀺𑀡𑀳𑀢𑁆𑀣𑁂 𑀢𑀸𑀮𑀧𑁆𑀧𑀫𑀸𑀡𑀁 𑀅𑀬𑀲𑀽𑀮𑀁 𑀧𑀯𑁂𑀲𑁂𑀦𑁆𑀢𑀺, 𑀢𑀣𑀸 𑀯𑀸𑀫𑀳𑀢𑁆𑀣𑀸𑀤𑀻𑀲𑀼. 𑀬𑀣𑀸 𑀘 𑀉𑀢𑁆𑀢𑀸𑀦𑀓𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸, 𑀏𑀯𑀁 𑀉𑀭𑁂𑀦𑀧𑀺 𑀤𑀓𑁆𑀔𑀺𑀡𑀧𑀲𑁆𑀲𑁂𑀦𑀧𑀺 𑀯𑀸𑀫𑀧𑀲𑁆𑀲𑁂𑀦𑀧𑀺 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀢𑀁 𑀓𑀫𑁆𑀫𑀓𑀸𑀭𑀡𑀁 𑀓𑀭𑁄𑀦𑁆𑀢𑀺𑀬𑁂𑀯. 𑀲𑀁𑀯𑁂𑀲𑁂𑀢𑁆𑀯𑀸𑀢𑀺 𑀲𑀫𑁆𑀧𑀚𑁆𑀚𑀮𑀺𑀢𑀸𑀬 𑀮𑁄𑀳𑀧𑀣𑀯𑀺𑀬𑀸 𑀢𑀺𑀕𑀸𑀯𑀼𑀢𑀁 𑀅𑀢𑁆𑀢𑀪𑀸𑀯𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸. 𑀓𑀼𑀞𑀸𑀭𑀻𑀳𑀻𑀢𑀺 𑀫𑀳𑀢𑀻𑀳𑀺 𑀕𑁂𑀳𑀲𑁆𑀲 𑀏𑀓𑀧𑀓𑁆𑀔𑀙𑀤𑀦𑀫𑀢𑁆𑀢𑀸𑀳𑀺 𑀓𑀼𑀞𑀸𑀭𑀻𑀳𑀺 𑀢𑀘𑁆𑀙𑀦𑁆𑀢𑀺. 𑀮𑁄𑀳𑀺𑀢𑀁 𑀦𑀤𑀻 𑀳𑀼𑀢𑁆𑀯𑀸 𑀲𑀦𑁆𑀤𑀢𑀺, 𑀮𑁄𑀳𑀧𑀣𑀯𑀺𑀢𑁄 𑀚𑀸𑀮𑀸 𑀉𑀝𑁆𑀞𑀳𑀺𑀢𑁆𑀯𑀸 𑀢𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀡𑁆𑀳𑀦𑁆𑀢𑀺. 𑀫𑀳𑀸𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀘𑁆𑀙𑀦𑁆𑀢𑀸 𑀧𑀦 𑀲𑀼𑀢𑁆𑀢𑀸𑀳𑀢𑀁 𑀓𑀭𑀺𑀢𑁆𑀯𑀸 𑀤𑀸𑀭𑀽 𑀯𑀺𑀬 𑀅𑀝𑁆𑀞𑀁𑀲𑀫𑁆𑀧𑀺 𑀙𑀴𑀁𑀲𑀫𑁆𑀧𑀺 𑀓𑀭𑁄𑀦𑁆𑀢𑀺. 𑀯𑀸𑀲𑀻𑀳𑀻𑀢𑀺 𑀫𑀳𑀸𑀲𑀼𑀧𑁆𑀧𑀧𑀫𑀸𑀡𑀸𑀳𑀺 𑀯𑀸𑀲𑀻𑀳𑀺. 𑀢𑀸𑀳𑀺 𑀢𑀘𑁆𑀙𑀦𑁆𑀢𑀸 𑀢𑀘𑀢𑁄 𑀬𑀸𑀯 𑀅𑀝𑁆𑀞𑀻𑀦𑀺 𑀲𑀡𑀺𑀓𑀁 𑀢𑀘𑁆𑀙𑀦𑁆𑀢𑀺, 𑀢𑀘𑁆𑀙𑀺𑀢𑀁 𑀢𑀘𑁆𑀙𑀺𑀢𑀁 𑀧𑀝𑀺𑀧𑀸𑀓𑀢𑀺𑀓𑀁 𑀳𑁄𑀢𑀺. 𑀭𑀣𑁂 𑀬𑁄𑀚𑁂𑀢𑁆𑀯𑀸𑀢𑀺 𑀲𑀤𑁆𑀥𑀺𑀁 𑀬𑀼𑀕𑀬𑁄𑀢𑁆𑀢𑀧𑀜𑁆𑀘𑀭𑀘𑀓𑁆𑀓𑀓𑀼𑀩𑁆𑀩𑀭𑀧𑀸𑀘𑀦𑁂𑀳𑀺 𑀲𑀩𑁆𑀩𑀢𑁄 𑀲𑀫𑁆𑀧𑀚𑁆𑀚𑀮𑀺𑀢𑁂 𑀭𑀣𑁂 𑀬𑁄𑀚𑁂𑀢𑁆𑀯𑀸. 𑀫𑀳𑀦𑁆𑀢𑀦𑁆𑀢𑀺 𑀫𑀳𑀸𑀓𑀽𑀝𑀸𑀕𑀸𑀭𑀧𑁆𑀧𑀫𑀸𑀡𑀁. 𑀆𑀭𑁄𑀧𑁂𑀦𑁆𑀢𑀻𑀢𑀺 𑀲𑀫𑁆𑀧𑀚𑁆𑀚𑀮𑀺𑀢𑁂𑀳𑀺 𑀅𑀬𑀫𑀼𑀕𑁆𑀕𑀭𑁂𑀳𑀺 𑀧𑁄𑀣𑁂𑀦𑁆𑀢𑀸 𑀆𑀭𑁄𑀧𑁂𑀦𑁆𑀢𑀺. 𑀲𑀓𑀺𑀫𑁆𑀧𑀺 𑀉𑀤𑁆𑀥𑀦𑁆𑀢𑀺 𑀲𑀼𑀧𑀓𑁆𑀓𑀼𑀣𑀺𑀢𑀸𑀬 𑀉𑀓𑁆𑀔𑀮𑀺𑀬𑀸 𑀧𑀓𑁆𑀔𑀺𑀢𑁆𑀢𑀢𑀡𑁆𑀟𑀼𑀮𑀸 𑀯𑀺𑀬 𑀉𑀤𑁆𑀥𑀁 𑀅𑀥𑁄 𑀢𑀺𑀭𑀺𑀬𑀜𑁆𑀘 𑀕𑀘𑁆𑀙𑀢𑀺.

𑀪𑀸𑀕𑀲𑁄 𑀫𑀺𑀢𑁄𑀢𑀺 𑀪𑀸𑀕𑁂 𑀞𑀧𑁂𑀢𑁆𑀯𑀸 𑀞𑀧𑁂𑀢𑁆𑀯𑀸 𑀯𑀺𑀪𑀢𑁆𑀢𑁄. 𑀧𑀭𑀺𑀬𑀦𑁆𑀢𑁄𑀢𑀺 𑀧𑀭𑀺𑀓𑁆𑀔𑀺𑀢𑁆𑀢𑁄. 𑀅𑀬𑀲𑀸𑀢𑀺 𑀉𑀧𑀭𑀺 𑀅𑀬𑀧𑀝𑁆𑀝𑁂𑀦 𑀙𑀸𑀤𑀺𑀢𑁄.

𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑀁 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀻𑀢𑀺 𑀏𑀯𑀁 𑀨𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀬𑀣𑀸 𑀲𑀫𑀦𑁆𑀢𑀸 𑀬𑁄𑀚𑀦𑀲𑀢𑁂 𑀞𑀸𑀦𑁂 𑀞𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀲𑁆𑀲 𑀅𑀓𑁆𑀔𑀻𑀦𑀺 𑀬𑀫𑀓𑀕𑁄𑀴𑀓𑀸 𑀯𑀺𑀬 𑀦𑀺𑀓𑁆𑀔𑀫𑀦𑁆𑀢𑀺.

𑀦 𑀲𑀼𑀓𑀭𑀸 𑀅𑀓𑁆𑀔𑀸𑀦𑁂𑀦 𑀧𑀸𑀧𑀼𑀡𑀺𑀢𑀼𑀦𑁆𑀢𑀺 𑀦𑀺𑀭𑀬𑁄 𑀦𑀸𑀫 𑀏𑀯𑀫𑁆𑀧𑀺 𑀤𑀼𑀓𑁆𑀔𑁄 𑀏𑀯𑀫𑁆𑀧𑀺 𑀤𑀼𑀓𑁆𑀔𑁄𑀢𑀺 𑀯𑀲𑁆𑀲𑀲𑀢𑀁 𑀯𑀲𑁆𑀲𑀲𑀳𑀲𑁆𑀲𑀁 𑀓𑀣𑁂𑀦𑁆𑀢𑁂𑀦𑀸𑀧𑀺 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀓𑀣𑁂𑀢𑀼𑀁 𑀦 𑀲𑀼𑀓𑀭𑀸𑀢𑀺 𑀅𑀢𑁆𑀣𑁄.

𑁨𑁫𑁧. 𑀤𑀦𑁆𑀢𑀼𑀮𑁆𑀮𑁂𑀳𑀓𑀦𑁆𑀢𑀺 𑀤𑀦𑁆𑀢𑁂𑀳𑀺 𑀉𑀮𑁆𑀮𑁂𑀳𑀺𑀢𑁆𑀯𑀸, 𑀮𑀼𑀜𑁆𑀘𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀭𑀲𑀸𑀤𑁄𑀢𑀺 𑀭𑀲𑀕𑁂𑀥𑁂𑀦 𑀧𑀭𑀺𑀪𑀼𑀢𑁆𑀢𑀭𑀲𑁄.

𑁨𑁫𑁨. 𑀅𑀜𑁆𑀜𑀫𑀜𑁆𑀜𑀔𑀸𑀤𑀺𑀓𑀸𑀢𑀺 𑀅𑀜𑁆𑀜𑀫𑀜𑁆𑀜𑀔𑀸𑀤𑀦𑀁.

𑀤𑀼𑀩𑁆𑀩𑀡𑁆𑀡𑁄𑀢𑀺 𑀤𑀼𑀭𑀽𑀧𑁄. 𑀤𑀼𑀤𑁆𑀤𑀲𑀺𑀓𑁄𑀢𑀺 𑀤𑀸𑀭𑀓𑀸𑀦𑀁 𑀪𑀬𑀸𑀧𑀦𑀢𑁆𑀣𑀁 𑀓𑀢𑀬𑀓𑁆𑀔𑁄 𑀯𑀺𑀬 𑀤𑀼𑀤𑁆𑀤𑀲𑁄. 𑀑𑀓𑁄𑀝𑀺𑀫𑀓𑁄𑀢𑀺 𑀮𑀓𑀼𑀡𑁆𑀟𑀓𑁄 𑀧𑀯𑀺𑀝𑁆𑀞𑀕𑀻𑀯𑁄 𑀫𑀳𑁄𑀤𑀭𑁄. 𑀓𑀸𑀡𑁄𑀢𑀺 𑀏𑀓𑀓𑁆𑀔𑀺𑀓𑀸𑀡𑁄 𑀯𑀸 𑀉𑀪𑀬𑀓𑁆𑀔𑀺𑀓𑀸𑀡𑁄 𑀯𑀸. 𑀓𑀼𑀡𑀻𑀢𑀺 𑀏𑀓𑀳𑀢𑁆𑀣𑀓𑀼𑀡𑀻 𑀯𑀸 𑀉𑀪𑀬𑀳𑀢𑁆𑀣𑀓𑀼𑀡𑀻 𑀯𑀸. 𑀧𑀓𑁆𑀔𑀳𑀢𑁄𑀢𑀺 𑀧𑀻𑀞𑀲𑀧𑁆𑀧𑀻. 𑀲𑁄 𑀓𑀸𑀬𑁂𑀦𑀸𑀢𑀺 𑀇𑀤𑀫𑀲𑁆𑀲 𑀤𑀼𑀓𑁆𑀔𑀸𑀦𑀼𑀧𑀩𑀦𑁆𑀥𑀤𑀲𑁆𑀲𑀦𑀢𑁆𑀣𑀁 𑀆𑀭𑀤𑁆𑀥𑀁.

𑀓𑀮𑀺𑀕𑁆𑀕𑀳𑁂𑀦𑀸𑀢𑀺 𑀧𑀭𑀸𑀚𑀬𑁂𑀦. 𑀅𑀥𑀺𑀩𑀦𑁆𑀥𑀁 𑀦𑀺𑀕𑀘𑁆𑀙𑁂𑀬𑁆𑀬𑀸𑀢𑀺 𑀬𑀲𑁆𑀫𑀸 𑀩𑀳𑀼𑀁 𑀚𑀺𑀢𑁄 𑀲𑀩𑁆𑀩𑀲𑀸𑀧𑀢𑁂𑀬𑁆𑀬𑀫𑁆𑀧𑀺𑀲𑁆𑀲 𑀦𑀧𑁆𑀧𑀳𑁄𑀢𑀺, 𑀢𑀲𑁆𑀫𑀸 𑀅𑀢𑁆𑀢𑀦𑀸𑀧𑀺 𑀩𑀦𑁆𑀥𑀁 𑀦𑀺𑀕𑀘𑁆𑀙𑁂𑀬𑁆𑀬. 𑀓𑁂𑀯𑀮𑀸 𑀧𑀭𑀺𑀧𑀽𑀭𑀸 𑀩𑀸𑀮𑀪𑀽𑀫𑀻𑀢𑀺 𑀩𑀸𑀮𑁄 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀢𑁆𑀣 𑀧𑀓𑁆𑀓𑀸𑀯𑀲𑁂𑀲𑁂𑀦 𑀫𑀦𑀼𑀲𑁆𑀲𑀢𑁆𑀢𑀁 𑀆𑀕𑀢𑁄 𑀧𑀜𑁆𑀘𑀲𑀼 𑀦𑀻𑀘𑀓𑀼𑀮𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀼𑀦 𑀢𑀻𑀡𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀅𑀬𑀁 𑀲𑀓𑀮𑀸 𑀧𑀭𑀺𑀧𑀼𑀡𑁆𑀡𑀸 𑀩𑀸𑀮𑀪𑀽𑀫𑀺.

𑁨𑁫𑁩. 𑀧𑀡𑁆𑀟𑀺𑀢𑀮𑀓𑁆𑀔𑀡𑀸𑀦𑀻𑀢𑀺𑀆𑀤𑀺 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑀼𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀻𑀢𑀺𑀆𑀤𑀻𑀦𑀺 𑀘𑁂𑀢𑁆𑀣 𑀫𑀦𑁄𑀲𑀼𑀘𑀭𑀺𑀢𑀸𑀤𑀻𑀦𑀁 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀺.

𑀘𑀓𑁆𑀓𑀭𑀢𑀦𑀯𑀡𑁆𑀡𑀦𑀸

𑁨𑁫𑁬. 𑀲𑀻𑀲𑀁 𑀦𑁆𑀳𑀸𑀢𑀲𑁆𑀲𑀸𑀢𑀺 𑀲𑀻𑀲𑁂𑀦 𑀲𑀤𑁆𑀥𑀺𑀁 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀢𑀲𑁆𑀲. 𑀉𑀧𑁄𑀲𑀣𑀺𑀓𑀲𑁆𑀲𑀸𑀢𑀺 𑀲𑀫𑀸𑀤𑀺𑀦𑁆𑀦𑀉𑀧𑁄𑀲𑀣𑀗𑁆𑀕𑀲𑁆𑀲. 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑀲𑁆𑀲𑀸𑀢𑀺 𑀧𑀸𑀲𑀸𑀤𑀯𑀭𑀲𑁆𑀲 𑀉𑀧𑀭𑀺 𑀕𑀢𑀲𑁆𑀲 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀧𑀸𑀲𑀸𑀤𑀯𑀭𑀲𑁆𑀲 𑀉𑀧𑀭𑀺 𑀫𑀳𑀸𑀢𑀮𑁂 𑀲𑀺𑀭𑀻𑀕𑀩𑁆𑀪𑀁 𑀧𑀯𑀺𑀲𑀺𑀢𑁆𑀯𑀸 𑀲𑀻𑀮𑀸𑀦𑀺 𑀆𑀯𑀚𑁆𑀚𑀦𑁆𑀢𑀲𑁆𑀲. 𑀢𑀤𑀸 𑀓𑀺𑀭 𑀭𑀸𑀚𑀸 𑀧𑀸𑀢𑁄𑀯 𑀲𑀢𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀧𑀼𑀦𑀧𑀺 𑀲𑁄𑀴𑀲𑀳𑀺 𑀕𑀦𑁆𑀥𑁄𑀤𑀓𑀖𑀝𑁂𑀳𑀺 𑀲𑀻𑀲𑀁 𑀦𑁆𑀳𑀸𑀬𑀺𑀢𑁆𑀯𑀸 𑀓𑀢𑀧𑀸𑀢𑀭𑀸𑀲𑁄 𑀲𑀼𑀤𑁆𑀥𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀏𑀓𑀁𑀲𑀁 𑀓𑀢𑁆𑀯𑀸 𑀉𑀧𑀭𑀺𑀧𑀸𑀲𑀸𑀤𑀲𑁆𑀲 𑀲𑀺𑀭𑀻𑀲𑀬𑀦𑁂 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀅𑀢𑁆𑀢𑀦𑁄 𑀤𑀸𑀦𑀫𑀬𑀧𑀼𑀜𑁆𑀜𑀲𑀫𑀼𑀤𑀬𑀁 𑀆𑀯𑀚𑁆𑀚𑁂𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀅𑀬𑀁 𑀲𑀩𑁆𑀩𑀘𑀓𑁆𑀓𑀯𑀢𑁆𑀢𑀻𑀦𑀁 𑀥𑀫𑁆𑀫𑀢𑀸.

𑀢𑁂𑀲𑀁 𑀢𑀁 𑀆𑀯𑀚𑁆𑀚𑀦𑁆𑀢𑀸𑀦𑀁𑀬𑁂𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀼𑀜𑁆𑀜𑀓𑀫𑁆𑀫𑀧𑀘𑁆𑀘𑀬𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀁 𑀦𑀻𑀮𑀫𑀡𑀺𑀲𑀗𑁆𑀖𑀸𑀝𑀲𑀤𑀺𑀲𑀁 𑀧𑀸𑀘𑀻𑀦𑀲𑀫𑀼𑀤𑁆𑀤𑀚𑀮𑀢𑀮𑀁 𑀙𑀺𑀦𑁆𑀤𑀫𑀸𑀦𑀁 𑀯𑀺𑀬 𑀆𑀓𑀸𑀲𑀁 𑀅𑀮𑀗𑁆𑀓𑀼𑀭𑀼𑀫𑀸𑀦𑀁 𑀯𑀺𑀬 𑀤𑀺𑀩𑁆𑀩𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀪𑀯𑀢𑀺. 𑀢𑀬𑀺𑀤𑀁 𑀤𑀺𑀩𑁆𑀩𑀸𑀦𑀼𑀪𑀸𑀯𑀬𑀼𑀢𑁆𑀢𑀢𑁆𑀢𑀸 𑀤𑀺𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀳𑀲𑁆𑀲𑀁 𑀅𑀲𑁆𑀲 𑀅𑀭𑀸𑀦𑀦𑁆𑀢𑀺 𑀲𑀳𑀲𑁆𑀲𑀸𑀭𑀁. 𑀲𑀳 𑀦𑁂𑀫𑀺𑀬𑀸 𑀲𑀳 𑀦𑀸𑀪𑀺𑀬𑀸 𑀘𑀸𑀢𑀺 𑀲𑀦𑁂𑀫𑀺𑀓𑀁 𑀲𑀦𑀸𑀪𑀺𑀓𑀁. 𑀲𑀩𑁆𑀩𑁂𑀳𑀺 𑀆𑀓𑀸𑀭𑁂𑀳𑀺 𑀧𑀭𑀺𑀧𑀽𑀭𑀦𑁆𑀢𑀺 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁.

𑀢𑀢𑁆𑀣 𑀘𑀓𑁆𑀓𑀜𑁆𑀘 𑀢𑀁 𑀭𑀢𑀺𑀚𑀦𑀦𑀝𑁆𑀞𑁂𑀦 𑀭𑀢𑀦𑀜𑁆𑀘𑀸𑀢𑀺 𑀘𑀓𑁆𑀓𑀭𑀢𑀦𑀁. 𑀬𑀸𑀬 𑀧𑀦 𑀢𑀁 𑀦𑀸𑀪𑀺𑀬𑀸 ‘‘𑀲𑀦𑀸𑀪𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁, 𑀲𑀸 𑀇𑀦𑁆𑀤𑀦𑀻𑀮𑀫𑀡𑀺𑀫𑀬𑀸 𑀳𑁄𑀢𑀺. 𑀫𑀚𑁆𑀛𑁂 𑀧𑀦𑀲𑁆𑀲𑀸 𑀭𑀚𑀢𑀫𑀬𑀸 𑀧𑀦𑀸𑀴𑀺, 𑀬𑀸𑀬 𑀲𑀼𑀤𑁆𑀥𑀲𑀺𑀦𑀺𑀤𑁆𑀥𑀤𑀦𑁆𑀢𑀧𑀦𑁆𑀢𑀺𑀬𑀸 𑀳𑀲𑀫𑀸𑀦𑀁 𑀯𑀺𑀬 𑀯𑀺𑀭𑁄𑀘𑀢𑀺. 𑀫𑀚𑁆𑀛𑁂 𑀙𑀺𑀤𑁆𑀤𑁂𑀦 𑀯𑀺𑀬 𑀘𑀦𑁆𑀤𑀫𑀡𑁆𑀟𑀮𑁂𑀦 𑀉𑀪𑁄𑀲𑀼𑀧𑀺 𑀩𑀸𑀳𑀺𑀭𑀦𑁆𑀢𑁂𑀲𑀼 𑀭𑀚𑀢𑀧𑀝𑁆𑀝𑁂𑀦 𑀓𑀢𑀧𑀭𑀺𑀓𑁆𑀔𑁂𑀧𑁄 𑀳𑁄𑀢𑀺. 𑀢𑁂𑀲𑀼 𑀧𑀦𑀲𑁆𑀲𑀸 𑀦𑀸𑀪𑀺𑀧𑀦𑀸𑀴𑀺 𑀧𑀭𑀺𑀓𑁆𑀔𑁂𑀧𑀧𑀝𑁆𑀝𑁂𑀲𑀼 𑀬𑀼𑀢𑁆𑀢𑀝𑁆𑀞𑀸𑀦𑁂 𑀧𑀭𑀺𑀘𑁆𑀙𑁂𑀤𑀮𑁂𑀔𑀸 𑀲𑀼𑀯𑀺𑀪𑀢𑁆𑀢𑀸𑀯 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀦𑁆𑀢𑀺. 𑀅𑀬𑀁 𑀢𑀸𑀯𑀲𑁆𑀲 𑀦𑀸𑀪𑀺𑀬𑀸 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀢𑀸.

𑀬𑁂𑀳𑀺 𑀧𑀦 𑀢𑀁 𑀅𑀭𑁂𑀳𑀺 ‘‘𑀲𑀳𑀲𑁆𑀲𑀸𑀭’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑁂 𑀲𑀢𑁆𑀢𑀭𑀢𑀦𑀫𑀬𑀸 𑀲𑀽𑀭𑀺𑀬𑀭𑀲𑁆𑀫𑀺𑀬𑁄 𑀯𑀺𑀬 𑀧𑀪𑀸𑀲𑀫𑁆𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂𑀲𑀫𑁆𑀧𑀺 𑀖𑀝𑀫𑀡𑀺𑀓𑀧𑀭𑀺𑀘𑁆𑀙𑁂𑀤𑀮𑁂𑀔𑀸𑀤𑀻𑀦𑀺 𑀲𑀼𑀯𑀺𑀪𑀢𑁆𑀢𑀸𑀦𑁂𑀯 𑀧𑀜𑁆𑀜𑀸𑀬𑀦𑁆𑀢𑀺. 𑀅𑀬𑀫𑀲𑁆𑀲 𑀅𑀭𑀸𑀦𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀢𑀸.

𑀬𑀸𑀬 𑀧𑀦 𑀢𑀁 𑀦𑁂𑀫𑀺𑀬𑀸 𑀲𑀳 ‘‘𑀲𑀦𑁂𑀫𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁, 𑀲𑀸 𑀩𑀸𑀮𑀲𑀽𑀭𑀺𑀬𑀭𑀲𑁆𑀫𑀺𑀓𑀮𑀸𑀧𑀲𑀺𑀭𑀺𑀁 𑀅𑀯𑀳𑀲𑀫𑀸𑀦𑀸 𑀯𑀺𑀬 𑀲𑀼𑀭𑀢𑁆𑀢𑀲𑀼𑀤𑁆𑀥𑀲𑀺𑀦𑀺𑀤𑁆𑀥𑀧𑀯𑀸𑀴𑀫𑀬𑀸 𑀳𑁄𑀢𑀺. 𑀲𑀦𑁆𑀥𑀻𑀲𑀼 𑀧𑀦𑀲𑁆𑀲𑀸 𑀲𑀜𑁆𑀛𑀸𑀭𑀸𑀕𑀲𑀲𑁆𑀲𑀺𑀭𑀺𑀓𑀭𑀢𑁆𑀢𑀚𑀫𑁆𑀩𑁄𑀦𑀤𑀧𑀝𑁆𑀝𑀸 𑀯𑀝𑁆𑀝𑀧𑀭𑀺𑀘𑁆𑀙𑁂𑀤𑀮𑁂𑀔𑀸 𑀘 𑀲𑀼𑀯𑀺𑀪𑀢𑁆𑀢𑀸 𑀧𑀜𑁆𑀜𑀸𑀬𑀦𑁆𑀢𑀺. 𑀅𑀬𑀫𑀲𑁆𑀲 𑀦𑁂𑀫𑀺𑀬𑀸 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀢𑀸.

𑀦𑁂𑀫𑀺𑀫𑀡𑁆𑀟𑀮𑀧𑀺𑀝𑁆𑀞𑀺𑀬𑀁 𑀧𑀦𑀲𑁆𑀲 𑀤𑀲𑀦𑁆𑀦𑀁 𑀤𑀲𑀦𑁆𑀦𑀁 𑀅𑀭𑀸𑀦𑀫𑀦𑁆𑀢𑀭𑁂 𑀥𑀫𑀦𑀯𑀁𑀲𑁄 𑀯𑀺𑀬 𑀅𑀦𑁆𑀢𑁄𑀲𑀼𑀲𑀺𑀭𑁄 𑀙𑀺𑀤𑁆𑀤𑀫𑀡𑁆𑀟𑀮𑀘𑀺𑀢𑁆𑀢𑁄 𑀯𑀸𑀢𑀕𑀸𑀳𑀻 𑀧𑀯𑀸𑀴𑀤𑀡𑁆𑀟𑁄 𑀳𑁄𑀢𑀺, 𑀬𑀲𑁆𑀲 𑀯𑀸𑀢𑁂𑀦 𑀧𑀳𑀭𑀺𑀢𑀲𑁆𑀲 𑀲𑀼𑀓𑀼𑀲𑀮𑀲𑀫𑀦𑁆𑀦𑀸𑀳𑀢𑀲𑁆𑀲 𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀲𑁆𑀲 𑀯𑀺𑀬 𑀲𑀤𑁆𑀤𑁄 𑀯𑀕𑁆𑀕𑀼 𑀘 𑀭𑀚𑀦𑀻𑀬𑁄 𑀘 𑀓𑀫𑀦𑀻𑀬𑁄 𑀘 𑀳𑁄𑀢𑀺. 𑀢𑀲𑁆𑀲 𑀔𑁄 𑀧𑀦 𑀧𑀯𑀸𑀴𑀤𑀡𑁆𑀟𑀲𑁆𑀲 𑀉𑀧𑀭𑀺 𑀲𑁂𑀢𑀘𑁆𑀙𑀢𑁆𑀢𑀁, 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀲𑀫𑁄𑀲𑀭𑀺𑀢𑀓𑀼𑀲𑀼𑀫𑀤𑀸𑀫𑀧𑀦𑁆𑀢𑀺𑀬𑁄𑀢𑀺 𑀏𑀯𑀁 𑀲𑀫𑁄𑀲𑀭𑀺𑀢𑀓𑀼𑀲𑀼𑀫𑀤𑀸𑀫𑀧𑀦𑁆𑀢𑀺𑀲𑀢𑀤𑁆𑀯𑀬𑀧𑀭𑀺𑀯𑀸𑀭𑁂𑀦 𑀲𑁂𑀢𑀘𑁆𑀙𑀢𑁆𑀢𑀲𑀢𑀥𑀸𑀭𑀺𑀦𑀸 𑀧𑀯𑀸𑀴𑀤𑀡𑁆𑀟𑀲𑀢𑁂𑀦 𑀲𑀫𑀼𑀧𑀲𑁄𑀪𑀺𑀢𑀦𑁂𑀫𑀺𑀧𑀭𑀺𑀓𑁆𑀔𑁂𑀧𑀲𑁆𑀲 𑀤𑁆𑀯𑀺𑀦𑁆𑀦𑀫𑁆𑀧𑀺 𑀦𑀸𑀪𑀺𑀧𑀦𑀸𑀴𑀻𑀦𑀁 𑀅𑀦𑁆𑀢𑁄 𑀤𑁆𑀯𑁂 𑀲𑀻𑀳𑀫𑀼𑀔𑀸𑀦𑀺 𑀳𑁄𑀦𑁆𑀢𑀺, 𑀬𑁂𑀳𑀺 𑀢𑀸𑀮𑀓𑁆𑀔𑀦𑁆𑀥𑀧𑁆𑀧𑀫𑀸𑀡𑀸 𑀧𑀼𑀡𑁆𑀡𑀘𑀦𑁆𑀤𑀓𑀺𑀭𑀡𑀓𑀮𑀸𑀧𑀲𑀲𑁆𑀲𑀺𑀭𑀺𑀓𑀸 𑀢𑀭𑀼𑀡𑀭𑀯𑀺𑀲𑀫𑀸𑀦𑀭𑀢𑁆𑀢𑀓𑀫𑁆𑀩𑀮𑀕𑁂𑀡𑁆𑀟𑀼𑀓𑀧𑀭𑀺𑀬𑀦𑁆𑀢𑀸 𑀆𑀓𑀸𑀲𑀕𑀗𑁆𑀕𑀸𑀕𑀢𑀺𑀲𑁄𑀪𑀁 𑀅𑀪𑀺𑀪𑀯𑀫𑀸𑀦𑀸 𑀯𑀺𑀬 𑀤𑁆𑀯𑁂 𑀫𑀼𑀢𑁆𑀢𑀓𑀮𑀸𑀧𑀸 𑀑𑀮𑀫𑁆𑀩𑀦𑁆𑀢𑀺, 𑀬𑁂𑀳𑀺 𑀘𑀓𑁆𑀓𑀭𑀢𑀦𑁂𑀦 𑀲𑀤𑁆𑀥𑀺𑀁 𑀆𑀓𑀸𑀲𑁂 𑀲𑀫𑁆𑀧𑀭𑀺𑀯𑀢𑁆𑀢𑀫𑀸𑀦𑁂𑀳𑀺 𑀢𑀻𑀡𑀺 𑀘𑀓𑁆𑀓𑀸𑀦𑀺 𑀏𑀓𑀢𑁄 𑀧𑀭𑀺𑀯𑀢𑁆𑀢𑀦𑁆𑀢𑀸𑀦𑀺 𑀯𑀺𑀬 𑀔𑀸𑀬𑀦𑁆𑀢𑀺. 𑀅𑀬𑀫𑀲𑁆𑀲 𑀲𑀩𑁆𑀩𑀲𑁄 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀢𑀸.

𑀢𑀁 𑀧𑀦𑁂𑀢𑀁 𑀏𑀯𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀁 𑀧𑀓𑀢𑀺𑀬𑀸 𑀲𑀸𑀬𑀫𑀸𑀲𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀖𑀭𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀸𑀲𑀦𑁂𑀲𑀼 𑀦𑀺𑀲𑀻𑀤𑀺𑀢𑁆𑀯𑀸 𑀧𑀯𑀢𑁆𑀢𑀓𑀣𑀸𑀲𑀮𑁆𑀮𑀸𑀧𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀯𑀻𑀣𑀺𑀘𑀢𑀼𑀓𑁆𑀓𑀸𑀤𑀻𑀲𑀼 𑀓𑀻𑀴𑀫𑀸𑀦𑁂 𑀤𑀸𑀭𑀓𑀚𑀦𑁂 𑀦𑀸𑀢𑀺𑀉𑀘𑁆𑀘𑁂𑀦 𑀦𑀸𑀢𑀺𑀦𑀻𑀘𑁂𑀦 𑀯𑀦𑀲𑀡𑁆𑀟𑀫𑀢𑁆𑀣𑀓𑀸𑀲𑀦𑁆𑀦𑁂𑀦 𑀆𑀓𑀸𑀲𑀧𑁆𑀧𑀤𑁂𑀲𑁂𑀦 𑀉𑀧𑀲𑁄𑀪𑀬𑀫𑀸𑀦𑀁 𑀯𑀺𑀬 𑀭𑀼𑀓𑁆𑀔𑀲𑀸𑀔𑀕𑁆𑀕𑀸𑀦𑀺, 𑀤𑁆𑀯𑀸𑀤𑀲𑀬𑁄𑀚𑀦𑀢𑁄 𑀧𑀝𑁆𑀞𑀸𑀬 𑀲𑀼𑀬𑁆𑀬𑀫𑀸𑀦𑁂𑀦 𑀫𑀥𑀼𑀭𑀲𑁆𑀲𑀭𑁂𑀦 𑀲𑀢𑁆𑀢𑀸𑀦𑀁 𑀲𑁄𑀢𑀸𑀦𑀺 𑀑𑀥𑀸𑀧𑀬𑀫𑀸𑀦𑀁 𑀬𑁄𑀚𑀦𑀢𑁄 𑀧𑀝𑁆𑀞𑀸𑀬 𑀦𑀸𑀦𑀧𑁆𑀧𑀪𑀸𑀲𑀫𑀼𑀤𑀬𑀲𑀫𑀼𑀚𑁆𑀚𑀮𑁂𑀦 𑀯𑀡𑁆𑀡𑁂𑀦 𑀦𑀬𑀦𑀸𑀦𑀺 𑀲𑀫𑀸𑀓𑀟𑁆𑀠𑀦𑁆𑀢𑀁 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀼𑀜𑁆𑀜𑀸𑀦𑀼𑀪𑀸𑀯𑀁 𑀉𑀕𑁆𑀖𑁄𑀲𑀬𑀦𑁆𑀢𑀁 𑀯𑀺𑀬 𑀭𑀸𑀚𑀥𑀸𑀦𑀺𑀅𑀪𑀺𑀫𑀼𑀔𑀁 𑀆𑀕𑀘𑁆𑀙𑀢𑀺.

𑀅𑀣 𑀢𑀲𑁆𑀲 𑀘𑀓𑁆𑀓𑀭𑀢𑀦𑀲𑁆𑀲 𑀲𑀤𑁆𑀤𑀲𑁆𑀲𑀯𑀦𑁂𑀦𑁂𑀯 ‘‘𑀓𑀼𑀢𑁄 𑀦𑀼 𑀔𑁄, 𑀓𑀲𑁆𑀲 𑀦𑀼 𑀔𑁄 𑀅𑀬𑀁 𑀲𑀤𑁆𑀤𑁄’’𑀢𑀺 𑀆𑀯𑀚𑁆𑀚𑀺𑀢𑀳𑀤𑀬𑀸𑀦𑀁 𑀧𑀼𑀭𑀢𑁆𑀣𑀺𑀫𑀤𑀺𑀲𑀁 𑀑𑀮𑁄𑀓𑀬𑀫𑀸𑀦𑀸𑀦𑀁 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀅𑀜𑁆𑀜𑀢𑀭𑁄 𑀅𑀜𑁆𑀜𑀢𑀭𑀁 𑀏𑀯𑀫𑀸𑀳 𑁋 ‘‘𑀧𑀲𑁆𑀲 𑀪𑁄 𑀅𑀘𑁆𑀙𑀭𑀺𑀬𑀁, 𑀅𑀬𑀁 𑀧𑀼𑀡𑁆𑀡𑀘𑀦𑁆𑀤𑁄 𑀧𑀼𑀩𑁆𑀩𑁂 𑀏𑀓𑁄 𑀉𑀕𑁆𑀕𑀘𑁆𑀙𑀢𑀺, 𑀅𑀚𑁆𑀚 𑀧𑀦 𑀅𑀢𑁆𑀢𑀤𑀼𑀢𑀺𑀬𑁄 𑀉𑀕𑁆𑀕𑀢𑁄, 𑀏𑀢𑀜𑁆𑀳𑀺 𑀭𑀸𑀚𑀳𑀁𑀲𑀫𑀺𑀣𑀼𑀦𑀁 𑀯𑀺𑀬 𑀧𑀼𑀡𑁆𑀡𑀘𑀦𑁆𑀤𑀫𑀺𑀣𑀼𑀦𑀁 𑀧𑀼𑀩𑁆𑀩𑀸𑀧𑀭𑀺𑀬𑁂𑀦 𑀕𑀕𑀦𑀢𑀮𑀁 𑀅𑀪𑀺𑀮𑀗𑁆𑀖𑀢𑀻’’𑀢𑀺. 𑀢𑀫𑀜𑁆𑀜𑁄 𑀆𑀳 𑁋 ‘‘𑀓𑀺𑀁 𑀓𑀣𑁂𑀲𑀺 𑀲𑀫𑁆𑀫 𑀓𑀳𑀁 𑀦𑀸𑀫 𑀢𑀬𑀸 𑀤𑁆𑀯𑁂 𑀧𑀼𑀡𑁆𑀡𑀘𑀦𑁆𑀤𑀸 𑀏𑀓𑀢𑁄 𑀉𑀕𑁆𑀕𑀘𑁆𑀙𑀦𑁆𑀢𑀸 𑀤𑀺𑀝𑁆𑀞𑀧𑀼𑀩𑁆𑀩𑀸, 𑀦𑀦𑀼 𑀏𑀲 𑀢𑀧𑀦𑀻𑀬𑀭𑀁𑀲𑀺𑀥𑀸𑀭𑁄 𑀧𑀺𑀜𑁆𑀙𑀭𑀓𑀺𑀭𑀡𑁄 𑀤𑀺𑀯𑀸𑀓𑀭𑁄 𑀉𑀕𑁆𑀕𑀢𑁄’’𑀢𑀺. 𑀢𑀫𑀜𑁆𑀜𑁄 𑀲𑀺𑀢𑀁 𑀓𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀓𑀺𑀁 𑀉𑀫𑁆𑀫𑀢𑁆𑀢𑁄𑀲𑀺, 𑀦𑀦𑀼 𑀔𑁄 𑀇𑀤𑀸𑀦𑀺𑀫𑁂𑀯 𑀤𑀺𑀯𑀸𑀓𑀭𑁄 𑀅𑀢𑁆𑀣𑀗𑁆𑀕𑀢𑁄, 𑀲𑁄 𑀓𑀣𑀁 𑀇𑀫𑀁 𑀧𑀼𑀡𑁆𑀡𑀘𑀦𑁆𑀤𑀁 𑀅𑀦𑀼𑀩𑀦𑁆𑀥𑀫𑀸𑀦𑁄 𑀉𑀕𑁆𑀕𑀘𑁆𑀙𑀺𑀲𑁆𑀲𑀢𑀺, 𑀅𑀤𑁆𑀥𑀸 𑀧𑀦𑁂𑀢𑀁 𑀅𑀦𑁂𑀓𑀭𑀢𑀦𑀧𑁆𑀧𑀪𑀸𑀲𑀫𑀼𑀚𑁆𑀚𑀮𑀁 𑀏𑀓𑀲𑁆𑀲 𑀧𑀼𑀜𑁆𑀜𑀯𑀢𑁄 𑀯𑀺𑀫𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀅𑀧𑀲𑀸𑀤𑀬𑀦𑁆𑀢𑀸 𑀅𑀜𑁆𑀜𑁂 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑀺𑀁 𑀩𑀳𑀼𑀁 𑀯𑀺𑀧𑁆𑀧𑀮𑀧𑀣, 𑀦𑁂𑀯𑁂𑀲 𑀧𑀼𑀡𑁆𑀡𑀘𑀦𑁆𑀤𑁄, 𑀦 𑀲𑀽𑀭𑀺𑀬𑁄 𑀦 𑀤𑁂𑀯𑀯𑀺𑀫𑀸𑀦𑀁. 𑀦 𑀳𑁂𑀢𑁂𑀲𑀁 𑀏𑀯𑀭𑀽𑀧𑀸 𑀲𑀺𑀭𑀺𑀲𑀫𑁆𑀧𑀢𑁆𑀢𑀺 𑀅𑀢𑁆𑀣𑀺, 𑀘𑀓𑁆𑀓𑀭𑀢𑀦𑁂𑀦 𑀧𑀦𑁂𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺.

𑀏𑀯𑀁 𑀧𑀯𑀢𑁆𑀢𑀲𑀮𑁆𑀮𑀸𑀧𑀲𑁆𑀲𑁂𑀯 𑀢𑀲𑁆𑀲 𑀚𑀦𑀲𑁆𑀲 𑀘𑀦𑁆𑀤𑀫𑀡𑁆𑀟𑀮𑀁 𑀑𑀳𑀸𑀬 𑀢𑀁 𑀘𑀓𑁆𑀓𑀭𑀢𑀦𑀁 𑀅𑀪𑀺𑀫𑀼𑀔𑀁 𑀳𑁄𑀢𑀺. 𑀢𑀢𑁄 𑀢𑁂𑀳𑀺 ‘‘𑀓𑀲𑁆𑀲 𑀦𑀼 𑀔𑁄 𑀇𑀤𑀁 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑁂 𑀪𑀯𑀦𑁆𑀢𑀺 𑀯𑀢𑁆𑀢𑀸𑀭𑁄 𑁋 ‘‘𑀦 𑀓𑀲𑁆𑀲𑀘𑀺 𑀅𑀜𑁆𑀜𑀲𑁆𑀲, 𑀦𑀦𑀼 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀧𑀽𑀭𑀺𑀢𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑁄, 𑀢𑀲𑁆𑀲𑁂𑀢𑀁 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺. 𑀅𑀣 𑀲𑁄 𑀘 𑀫𑀳𑀸𑀚𑀦𑁄, 𑀬𑁄 𑀘 𑀅𑀜𑁆𑀜𑁄 𑀧𑀲𑁆𑀲𑀢𑀺, 𑀲𑀩𑁆𑀩𑁄 𑀘𑀓𑁆𑀓𑀭𑀢𑀦𑀫𑁂𑀯 𑀅𑀦𑀼𑀕𑀘𑁆𑀙𑀢𑀺. 𑀢𑀫𑁆𑀧𑀺 𑀘𑀓𑁆𑀓𑀭𑀢𑀦𑀁 𑀭𑀜𑁆𑀜𑁄𑀬𑁂𑀯 𑀅𑀢𑁆𑀣𑀸𑀬 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀜𑀸𑀧𑁂𑀢𑀼𑀓𑀸𑀫𑀁 𑀯𑀺𑀬 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀸𑀓𑀸𑀭𑀫𑀢𑁆𑀣𑀓𑁂𑀦𑁂𑀯 𑀦𑀕𑀭𑀁 𑀅𑀦𑀼𑀲𑀁𑀬𑀸𑀬𑀺𑀢𑁆𑀯𑀸 𑀭𑀜𑁆𑀜𑁄 𑀅𑀦𑁆𑀢𑁂𑀧𑀼𑀭𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀦𑁆𑀢𑁂𑀧𑀼𑀭𑀲𑁆𑀲 𑀉𑀢𑁆𑀢𑀭𑀲𑀻𑀳𑀧𑀜𑁆𑀚𑀭𑀆𑀲𑀦𑁆𑀦𑁂 𑀞𑀸𑀦𑁂 𑀬𑀣𑀸 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀲𑀼𑀔𑁂𑀦 𑀲𑀓𑁆𑀓𑀸 𑀳𑁄𑀢𑀺 𑀧𑀽𑀚𑁂𑀢𑀼𑀁, 𑀏𑀯𑀁 𑀅𑀓𑁆𑀔𑀸𑀳𑀢𑀁 𑀯𑀺𑀬 𑀢𑀺𑀝𑁆𑀞𑀢𑀺.

𑀏𑀯𑀁 𑀞𑀺𑀢𑀲𑁆𑀲 𑀧𑀦𑀲𑁆𑀲 𑀯𑀸𑀢𑀧𑀸𑀦𑀘𑁆𑀙𑀺𑀤𑁆𑀤𑀸𑀤𑀻𑀳𑀺 𑀧𑀯𑀺𑀲𑀺𑀢𑁆𑀯𑀸 𑀦𑀸𑀦𑀸𑀯𑀺𑀭𑀸𑀕𑀭𑀢𑀦𑀧𑁆𑀧𑀪𑀸𑀲𑀫𑀼𑀚𑁆𑀚𑀮𑀁 𑀅𑀦𑁆𑀢𑁄 𑀧𑀸𑀲𑀸𑀤𑀁 𑀅𑀮𑀗𑁆𑀓𑀼𑀭𑀼𑀫𑀸𑀦𑀁 𑀧𑀪𑀸𑀲𑀫𑀽𑀳𑀁 𑀤𑀺𑀲𑁆𑀯𑀸 𑀤𑀲𑁆𑀲𑀦𑀢𑁆𑀣𑀸𑀬 𑀲𑀜𑁆𑀚𑀸𑀢𑀸𑀪𑀺𑀮𑀸𑀲𑁄 𑀭𑀸𑀚𑀸 𑀳𑁄𑀢𑀺. 𑀧𑀭𑀺𑀚𑀦𑁄𑀧𑀺𑀲𑁆𑀲 𑀧𑀺𑀬𑀯𑀘𑀦𑀧𑀸𑀪𑀢𑁂𑀦 𑀆𑀕𑀦𑁆𑀢𑁆𑀯𑀸 𑀢𑀫𑀢𑁆𑀣𑀁 𑀦𑀺𑀯𑁂𑀤𑁂𑀢𑀺. 𑀅𑀣 𑀭𑀸𑀚𑀸 𑀩𑀮𑀯𑀧𑀻𑀢𑀺𑀧𑀸𑀫𑁄𑀚𑁆𑀚𑀨𑀼𑀝𑀲𑀭𑀻𑀭𑁄 𑀧𑀮𑁆𑀮𑀗𑁆𑀓𑀁 𑀫𑁄𑀘𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀲𑀻𑀳𑀧𑀜𑁆𑀚𑀭𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀢𑀁 𑀘𑀓𑁆𑀓𑀭𑀢𑀦𑀁 𑀤𑀺𑀲𑁆𑀯𑀸 ‘‘𑀲𑀼𑀢𑀁 𑀔𑁄 𑀧𑀦 𑀫𑁂𑀢’’𑀦𑁆𑀢𑀺𑀆𑀤𑀺𑀓𑀁 𑀘𑀺𑀦𑁆𑀢𑀦𑀁 𑀘𑀺𑀦𑁆𑀢𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀤𑀺𑀲𑁆𑀯𑀸𑀦 𑀭𑀜𑁆𑀜𑁄 𑀔𑀢𑁆𑀢𑀺𑀬𑀲𑁆𑀲…𑀧𑁂… 𑀅𑀲𑁆𑀲𑀁 𑀦𑀼 𑀔𑁄 𑀅𑀳𑀁 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻’’𑀢𑀺. 𑀢𑀢𑁆𑀣 𑀲𑁄 𑀳𑁄𑀢𑀺 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻𑀢𑀺 𑀓𑀺𑀢𑁆𑀢𑀸𑀯𑀢𑀸 𑀘𑀓𑁆𑀓𑀯𑀢𑁆𑀢𑀻 𑀳𑁄𑀢𑀺? 𑀏𑀓𑀗𑁆𑀕𑀼𑀮𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀘𑀓𑁆𑀓𑀭𑀢𑀦𑁂 𑀆𑀓𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀯𑀢𑁆𑀢𑁂.

𑀇𑀤𑀸𑀦𑀺 𑀢𑀲𑁆𑀲 𑀧𑀯𑀢𑁆𑀢𑀸𑀧𑀦𑀢𑁆𑀣𑀁 𑀬𑀁 𑀓𑀸𑀢𑀩𑁆𑀩𑀁 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀅𑀣 𑀔𑁄, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀝𑁆𑀞𑀸𑀬𑀸𑀲𑀦𑀸𑀢𑀺 𑀦𑀺𑀲𑀺𑀦𑁆𑀦𑀸𑀲𑀦𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀘𑀓𑁆𑀓𑀭𑀢𑀦𑀲𑀫𑀻𑀧𑀁 𑀆𑀕𑀦𑁆𑀢𑁆𑀯𑀸. 𑀪𑀺𑀗𑁆𑀓𑀸𑀭𑀁 𑀕𑀳𑁂𑀢𑁆𑀯𑀸𑀢𑀺 𑀳𑀢𑁆𑀣𑀺𑀲𑁄𑀡𑁆𑀟𑀲𑀤𑀺𑀲𑀧𑀦𑀸𑀴𑀺𑀁 𑀲𑀼𑀯𑀡𑁆𑀡𑀪𑀺𑀗𑁆𑀓𑀸𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀸𑀫𑀳𑀢𑁆𑀣𑁂𑀦 𑀉𑀤𑀓𑀁 𑀕𑀳𑁂𑀢𑁆𑀯𑀸. 𑀧𑀯𑀢𑁆𑀢𑀢𑀼 𑀪𑀯𑀁 𑀘𑀓𑁆𑀓𑀭𑀢𑀦𑀁, 𑀅𑀪𑀺𑀯𑀺𑀚𑀺𑀦𑀸𑀢𑀼 𑀪𑀯𑀁 𑀘𑀓𑁆𑀓𑀭𑀢𑀦𑀦𑁆𑀢𑀺. 𑀅𑀦𑁆𑀯𑀤𑁂𑀯 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬𑀸𑀢𑀺 𑀲𑀩𑁆𑀩𑀘𑀓𑁆𑀓𑀯𑀢𑁆𑀢𑀻𑀦𑀜𑁆𑀳𑀺 𑀉𑀤𑀓𑁂𑀦 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 ‘‘𑀅𑀪𑀺𑀯𑀺𑀚𑀸𑀦𑀸𑀢𑀼 𑀪𑀯𑀁 𑀘𑀓𑁆𑀓𑀭𑀢𑀦’’𑀦𑁆𑀢𑀺 𑀯𑀘𑀦𑀲𑀫𑀦𑀦𑁆𑀢𑀭𑀫𑁂𑀯 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀘𑀓𑁆𑀓𑀭𑀢𑀦𑀁 𑀧𑀯𑀢𑁆𑀢𑀢𑀺, 𑀬𑀲𑁆𑀲 𑀧𑀯𑀢𑁆𑀢𑀺𑀲𑀫𑀓𑀸𑀮𑀫𑁂𑀯 𑀲𑁄 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀦𑀸𑀫 𑀳𑁄𑀢𑀺.

𑀧𑀯𑀢𑁆𑀢𑁂 𑀧𑀦 𑀘𑀓𑁆𑀓𑀭𑀢𑀦𑁂 𑀢𑀁 𑀅𑀦𑀼𑀩𑀦𑁆𑀥𑀫𑀸𑀦𑁄𑀯 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀬𑀸𑀦𑀯𑀭𑀁 𑀆𑀭𑀼𑀬𑁆𑀳 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺, 𑀅𑀣𑀲𑁆𑀲 𑀙𑀢𑁆𑀢𑀘𑀸𑀫𑀭𑀸𑀤𑀺𑀳𑀢𑁆𑀣𑁄 𑀧𑀭𑀺𑀚𑀦𑁄 𑀘𑁂𑀯 𑀅𑀦𑁆𑀢𑁂𑀧𑀼𑀭𑀚𑀦𑁄 𑀘. 𑀢𑀢𑁄 𑀦𑀸𑀦𑀧𑁆𑀧𑀓𑀸𑀭𑀓𑀜𑁆𑀘𑀼𑀓𑀓𑀯𑀘𑀸𑀤𑀺𑀲𑀦𑁆𑀦𑀸𑀳𑀯𑀺𑀪𑀽𑀲𑀺𑀢𑁂𑀦 𑀯𑀺𑀯𑀺𑀥𑀸𑀳𑀭𑀡𑀧𑁆𑀧𑀪𑀸𑀲𑀫𑀼𑀚𑁆𑀚𑀮𑀺𑀢𑁂𑀦 𑀲𑀫𑀼𑀲𑁆𑀲𑀺𑀢𑀤𑁆𑀥𑀚𑀧𑀝𑀸𑀓𑀧𑀝𑀺𑀫𑀡𑁆𑀟𑀺𑀢𑁂𑀦 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀩𑀮𑀓𑀸𑀬𑁂𑀦 𑀲𑀤𑁆𑀥𑀺𑀁 𑀉𑀧𑀭𑀸𑀚𑀲𑁂𑀦𑀸𑀧𑀢𑀺 𑀧𑀪𑀽𑀢𑀬𑁄𑀧𑀺 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀫𑁂𑀯 𑀧𑀭𑀺𑀯𑀸𑀭𑁂𑀦𑁆𑀢𑀺. 𑀭𑀸𑀚𑀬𑀼𑀢𑁆𑀢𑀸 𑀧𑀦 𑀚𑀦𑀲𑀗𑁆𑀕𑀳𑀢𑁆𑀣𑀁 𑀦𑀕𑀭𑀯𑀻𑀣𑀻𑀲𑀼 𑀪𑁂𑀭𑀺𑀬𑁄 𑀘𑀭𑀸𑀧𑁂𑀦𑁆𑀢𑀺 ‘‘𑀢𑀸𑀢𑀸 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀘𑀓𑁆𑀓𑀭𑀢𑀦𑀁 𑀦𑀺𑀩𑁆𑀩𑀢𑁆𑀢𑀁, 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀪𑀯𑀸𑀦𑀼𑀭𑀽𑀧𑁂𑀦 𑀫𑀡𑁆𑀟𑀺𑀢𑀧𑁆𑀧𑀲𑀸𑀥𑀺𑀢𑀸 𑀲𑀦𑁆𑀦𑀺𑀧𑀢𑀣𑀸’’𑀢𑀺. 𑀫𑀳𑀸𑀚𑀦𑁄 𑀧𑀦 𑀧𑀓𑀢𑀺𑀬𑀸 𑀘𑀓𑁆𑀓𑀭𑀢𑀦𑀲𑀤𑁆𑀤𑁂𑀦𑁂𑀯 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀧𑀳𑀸𑀬 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀆𑀤𑀸𑀬 𑀲𑀦𑁆𑀦𑀺𑀧𑀢𑀺𑀢𑁄𑀯, 𑀲𑁄𑀧𑀺 𑀲𑀩𑁆𑀩𑁄 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀫𑁂𑀯 𑀧𑀭𑀺𑀯𑀸𑀭𑁂𑀢𑀺. 𑀬𑀲𑁆𑀲 𑀬𑀲𑁆𑀲 𑀳𑀺 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀕𑀦𑁆𑀢𑀼𑀓𑀸𑀫𑀢𑀸 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀲𑁄 𑀆𑀓𑀸𑀲𑀕𑀢𑁄𑀯 𑀳𑁄𑀢𑀺. 𑀏𑀯𑀁 𑀤𑁆𑀯𑀸𑀤𑀲𑀬𑁄𑀚𑀦𑀸𑀬𑀸𑀫𑀯𑀺𑀢𑁆𑀣𑀸𑀭𑀸 𑀧𑀭𑀺𑀲𑀸 𑀳𑁄𑀢𑀺. 𑀢𑀢𑁆𑀣 𑀏𑀓𑀧𑀼𑀭𑀺𑀲𑁄𑀧𑀺 𑀙𑀺𑀦𑁆𑀦𑀪𑀺𑀦𑁆𑀦𑀲𑀭𑀻𑀭𑁄 𑀯𑀸 𑀓𑀺𑀮𑀺𑀝𑁆𑀞𑀯𑀢𑁆𑀣𑁄 𑀯𑀸 𑀦𑀢𑁆𑀣𑀺. 𑀲𑀼𑀘𑀺𑀧𑀭𑀺𑀯𑀸𑀭𑁄 𑀳𑀺 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻. 𑀘𑀓𑁆𑀓𑀯𑀢𑁆𑀢𑀺𑀧𑀭𑀺𑀲𑀸 𑀦𑀸𑀫 𑀯𑀺𑀚𑁆𑀚𑀸𑀥𑀭𑀧𑀭𑀺𑀲𑀸 𑀯𑀺𑀬 𑀆𑀓𑀸𑀲𑁂 𑀕𑀘𑁆𑀙𑀫𑀸𑀦𑀸 𑀇𑀦𑁆𑀤𑀦𑀻𑀮𑀫𑀡𑀺𑀢𑀮𑁂 𑀯𑀺𑀧𑁆𑀧𑀓𑀺𑀡𑁆𑀡𑀭𑀢𑀦𑀲𑀤𑀺𑀲𑀸 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀦𑁆𑀯𑀤𑁂𑀯 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬𑀸’’𑀢𑀺.

𑀢𑀫𑁆𑀧𑀺 𑀘𑀓𑁆𑀓𑀭𑀢𑀦𑀁 𑀭𑀼𑀓𑁆𑀔𑀕𑁆𑀕𑀸𑀦𑀁 𑀉𑀧𑀭𑀽𑀧𑀭𑀺 𑀦𑀸𑀢𑀺𑀉𑀘𑁆𑀘𑁂𑀦 𑀕𑀕𑀦𑀧𑀤𑁂𑀲𑁂𑀦 𑀧𑀯𑀢𑁆𑀢𑀢𑀺, 𑀬𑀣𑀸 𑀭𑀼𑀓𑁆𑀔𑀸𑀦𑀁 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑁂𑀳𑀺 𑀅𑀢𑁆𑀣𑀺𑀓𑀸 𑀢𑀸𑀦𑀺 𑀲𑀼𑀔𑁂𑀦 𑀕𑀳𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀪𑀽𑀫𑀺𑀬𑀁 𑀞𑀺𑀢𑀸 ‘‘𑀏𑀲 𑀭𑀸𑀚𑀸, 𑀏𑀲 𑀉𑀧𑀭𑀸𑀚𑀸, 𑀏𑀲 𑀲𑁂𑀦𑀸𑀧𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀞𑀸𑀦𑀸𑀤𑀻𑀲𑀼𑀧𑀺 𑀇𑀭𑀺𑀬𑀸𑀧𑀣𑁂𑀲𑀼 𑀬𑁄 𑀬𑁂𑀦 𑀇𑀘𑁆𑀙𑀢𑀺, 𑀲𑁄 𑀢𑁂𑀦𑁂𑀯 𑀕𑀘𑁆𑀙𑀢𑀺. 𑀘𑀺𑀢𑁆𑀢𑀓𑀫𑁆𑀫𑀸𑀤𑀺𑀲𑀺𑀧𑁆𑀧𑀧𑀲𑀼𑀢𑀸 𑀘𑁂𑀢𑁆𑀣 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀸𑀬𑁂𑀯 𑀕𑀘𑁆𑀙𑀦𑁆𑀢𑀺. 𑀬𑀣𑁂𑀯 𑀳𑀺 𑀪𑀽𑀫𑀺𑀬𑀁, 𑀢𑀣𑀸 𑀦𑁂𑀲𑀁 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀆𑀓𑀸𑀲𑁂 𑀇𑀚𑁆𑀛𑀦𑁆𑀢𑀺. 𑀏𑀯𑀁 𑀘𑀓𑁆𑀓𑀯𑀢𑁆𑀢𑀺𑀧𑀭𑀺𑀲𑀁 𑀕𑀳𑁂𑀢𑁆𑀯𑀸 𑀢𑀁 𑀘𑀓𑁆𑀓𑀭𑀢𑀦𑀁 𑀯𑀸𑀫𑀧𑀲𑁆𑀲𑁂𑀦 𑀲𑀺𑀦𑁂𑀭𑀼𑀁 𑀧𑀳𑀸𑀬 𑀲𑀫𑀼𑀤𑁆𑀤𑀲𑁆𑀲 𑀉𑀧𑀭𑀺𑀪𑀸𑀕𑁂𑀦 𑀅𑀝𑁆𑀞𑀬𑁄𑀚𑀦𑀲𑀳𑀲𑁆𑀲𑀧𑁆𑀧𑀫𑀸𑀡𑀁 𑀧𑀼𑀩𑁆𑀩𑀯𑀺𑀤𑁂𑀳𑀁 𑀕𑀘𑁆𑀙𑀢𑀺.

𑀢𑀢𑁆𑀣 𑀬𑁄 𑀯𑀺𑀦𑀺𑀩𑁆𑀩𑁂𑀥𑁂𑀦 𑀤𑁆𑀯𑀸𑀤𑀲𑀬𑁄𑀚𑀦𑀸𑀬 𑀧𑀭𑀺𑀓𑁆𑀔𑁂𑀧𑀢𑁄 𑀙𑀢𑁆𑀢𑀺𑀁𑀲𑀬𑁄𑀚𑀦𑀧𑀭𑀺𑀲𑀸𑀬 𑀲𑀦𑁆𑀦𑀺𑀯𑁂𑀲𑀓𑁆𑀔𑀫𑁄 𑀲𑀼𑀮𑀪𑀸𑀳𑀸𑀭𑀽𑀧𑀓𑀭𑀡𑁄 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑁄 𑀲𑀼𑀘𑀺𑀲𑀫𑀢𑀮𑁄 𑀭𑀫𑀡𑀻𑀬𑁄 𑀪𑀽𑀫𑀺𑀪𑀸𑀕𑁄, 𑀢𑀲𑁆𑀲 𑀉𑀧𑀭𑀺𑀪𑀸𑀕𑁂 𑀢𑀁 𑀘𑀓𑁆𑀓𑀭𑀢𑀦𑀁 𑀆𑀓𑀸𑀲𑁂 𑀅𑀓𑁆𑀔𑀸𑀳𑀢𑀁 𑀯𑀺𑀬 𑀢𑀺𑀝𑁆𑀞𑀢𑀺. 𑀅𑀣 𑀢𑁂𑀦 𑀲𑀜𑁆𑀜𑀸𑀡𑁂𑀦 𑀲𑁄 𑀫𑀳𑀸𑀚𑀦𑁄 𑀑𑀢𑀭𑀺𑀢𑁆𑀯𑀸 𑀬𑀣𑀸𑀭𑀼𑀘𑀺 𑀦𑁆𑀳𑀸𑀦𑀪𑁄𑀚𑀦𑀸𑀤𑀻𑀦𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀦𑁆𑀢𑁄 𑀯𑀸𑀲𑀁 𑀓𑀧𑁆𑀧𑁂𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀲𑁆𑀫𑀺𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀧𑀤𑁂𑀲𑁂 𑀢𑀁 𑀘𑀓𑁆𑀓𑀭𑀢𑀦𑀁 𑀧𑀢𑀺𑀝𑁆𑀞𑀸𑀢𑀺, 𑀢𑀢𑁆𑀣 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀯𑀸𑀲𑀁 𑀉𑀧𑁂𑀢𑀺 𑀲𑀤𑁆𑀥𑀺𑀁 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬𑀸’’𑀢𑀺.

𑀏𑀯𑀁 𑀯𑀸𑀲𑀁 𑀉𑀧𑀕𑀢𑁂 𑀘𑀓𑁆𑀓𑀯𑀢𑁆𑀢𑀺𑀫𑁆𑀳𑀺 𑀬𑁂 𑀢𑀢𑁆𑀣 𑀭𑀸𑀚𑀸𑀦𑁄, 𑀢𑁂 ‘‘𑀧𑀭𑀘𑀓𑁆𑀓𑀁 𑀆𑀕𑀢’’𑀦𑁆𑀢𑀺 𑀲𑀼𑀢𑁆𑀯𑀸𑀧𑀺 𑀦 𑀩𑀮𑀓𑀸𑀬𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀬𑀼𑀤𑁆𑀥𑀲𑀚𑁆𑀚𑀸 𑀳𑁄𑀦𑁆𑀢𑀺. 𑀘𑀓𑁆𑀓𑀭𑀢𑀦𑀲𑁆𑀲 𑀉𑀧𑁆𑀧𑀢𑁆𑀢𑀺𑀲𑀫𑀦𑀦𑁆𑀢𑀭𑀫𑁂𑀯 𑀦𑀢𑁆𑀣𑀺 𑀲𑁄 𑀲𑀢𑁆𑀢𑁄 𑀦𑀸𑀫, 𑀬𑁄 𑀧𑀘𑁆𑀘𑀢𑁆𑀣𑀺𑀓𑀲𑀜𑁆𑀜𑀸𑀬 𑀭𑀸𑀚𑀸𑀦𑀁 𑀆𑀭𑀩𑁆𑀪 𑀆𑀯𑀼𑀥𑀁 𑀉𑀓𑁆𑀔𑀺𑀧𑀺𑀢𑀼𑀁 𑀯𑀺𑀲𑀳𑁂𑀬𑁆𑀬. 𑀅𑀬𑀫𑀦𑀼𑀪𑀸𑀯𑁄 𑀘𑀓𑁆𑀓𑀭𑀢𑀦𑀲𑁆𑀲.

𑀘𑀓𑁆𑀓𑀸𑀦𑀼𑀪𑀸𑀯𑁂𑀦 𑀳𑀺 𑀢𑀲𑁆𑀲 𑀭𑀜𑁆𑀜𑁄,

𑀅𑀭𑀻 𑀅𑀲𑁂𑀲𑀸 𑀤𑀫𑀣𑀁 𑀉𑀧𑁂𑀦𑁆𑀢𑀺;

𑀅𑀭𑀺𑀦𑁆𑀤𑀫𑀁 𑀦𑀸𑀫 𑀦𑀭𑀸𑀥𑀺𑀧𑀲𑁆𑀲,

𑀢𑁂𑀦𑁂𑀯 𑀢𑀁 𑀯𑀼𑀘𑁆𑀘𑀢𑀺 𑀢𑀲𑁆𑀲 𑀘𑀓𑁆𑀓𑀁.

𑀢𑀲𑁆𑀫𑀸 𑀲𑀩𑁆𑀩𑁂𑀧𑀺 𑀢𑁂 𑀭𑀸𑀚𑀸𑀦𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀭𑀚𑁆𑀚𑀲𑀺𑀭𑀺𑀯𑀺𑀪𑀯𑀸𑀦𑀼𑀭𑀽𑀧𑀁 𑀧𑀸𑀪𑀢𑀁 𑀕𑀳𑁂𑀢𑁆𑀯𑀸 𑀢𑀁 𑀭𑀸𑀚𑀸𑀦𑀁 𑀉𑀧𑀕𑀫𑁆𑀫 𑀑𑀦𑀢𑀲𑀺𑀭𑀸 𑀅𑀢𑁆𑀢𑀦𑁄 𑀫𑁄𑀴𑀺𑀬𑀫𑀡𑀺𑀧𑁆𑀧𑀪𑀸𑀪𑀺𑀲𑁂𑀓𑁂𑀦𑀲𑁆𑀲 𑀧𑀸𑀤𑀧𑀽𑀚𑀁 𑀓𑀭𑁄𑀦𑁆𑀢𑁄 ‘‘𑀏𑀳𑀺 𑀔𑁄 𑀫𑀳𑀸𑀭𑀸𑀚𑀸’’𑀢𑀺𑀆𑀤𑀻𑀳𑀺 𑀯𑀘𑀦𑁂𑀳𑀺 𑀢𑀲𑁆𑀲 𑀓𑀺𑀗𑁆𑀓𑀸𑀭𑀧𑁆𑀧𑀝𑀺𑀲𑁆𑀲𑀸𑀯𑀺𑀢𑀁 𑀆𑀧𑀚𑁆𑀚𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀬𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀧𑀼𑀭𑀢𑁆𑀣𑀺𑀫𑀸𑀬…𑀧𑁂… 𑀅𑀦𑀼𑀲𑀸𑀲 𑀫𑀳𑀸𑀭𑀸𑀚𑀸𑀢𑀺.

𑀢𑀢𑁆𑀣 𑀲𑁆𑀯𑀸𑀕𑀢𑀦𑁆𑀢𑀺 𑀲𑀼𑀆𑀕𑀫𑀦𑀁. 𑀏𑀓𑀲𑁆𑀫𑀺𑀜𑁆𑀳𑀺 𑀆𑀕𑀢𑁂 𑀲𑁄𑀘𑀦𑁆𑀢𑀺, 𑀕𑀢𑁂 𑀦𑀦𑁆𑀤𑀦𑁆𑀢𑀺. 𑀏𑀓𑀲𑁆𑀫𑀺𑀁 𑀆𑀕𑀢𑁂 𑀦𑀦𑁆𑀤𑀦𑁆𑀢𑀺, 𑀕𑀢𑁂 𑀲𑁄𑀘𑀦𑁆𑀢𑀺. 𑀢𑀸𑀤𑀺𑀲𑁄 𑀢𑁆𑀯𑀁 𑀆𑀕𑀢𑀦𑀦𑁆𑀤𑀦𑁄 𑀕𑀫𑀦𑀲𑁄𑀘𑀦𑁄, 𑀢𑀲𑁆𑀫𑀸 𑀢𑀯 𑀆𑀕𑀫𑀦𑀁 𑀲𑀼𑀆𑀕𑀫𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀧𑀦 𑀘𑀓𑁆𑀓𑀯𑀢𑁆𑀢𑀻 𑀦𑀸𑀧𑀺 ‘‘𑀏𑀢𑁆𑀢𑀓𑀁 𑀦𑀸𑀫 𑀫𑁂 𑀅𑀦𑀼𑀯𑀲𑁆𑀲𑀁 𑀩𑀮𑀺𑀁 𑀉𑀧𑀓𑀧𑁆𑀧𑁂𑀣𑀸’’𑀢𑀺 𑀯𑀤𑀢𑀺, 𑀦𑀸𑀧𑀺 𑀅𑀜𑁆𑀜𑀲𑁆𑀲 𑀪𑁄𑀕𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀜𑁆𑀜𑀲𑁆𑀲 𑀤𑁂𑀢𑀺. 𑀅𑀢𑁆𑀢𑀦𑁄 𑀧𑀦 𑀥𑀫𑁆𑀫𑀭𑀸𑀚𑀪𑀸𑀯𑀲𑁆𑀲 𑀅𑀦𑀼𑀭𑀽𑀧𑀸𑀬 𑀧𑀜𑁆𑀜𑀸𑀬 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀧𑁂𑀫𑀦𑀻𑀬𑁂𑀦 𑀫𑀜𑁆𑀚𑀼𑀦𑀸 𑀲𑀭𑁂𑀦 ‘‘𑀧𑀲𑁆𑀲𑀣 𑀢𑀸𑀢𑀸, 𑀧𑀸𑀡𑀸𑀢𑀺𑀧𑀸𑀢𑁄 𑀦𑀸𑀫𑁂𑀲 𑀆𑀲𑁂𑀯𑀺𑀢𑁄 𑀪𑀸𑀯𑀺𑀢𑁄 𑀩𑀳𑀼𑀮𑀻𑀓𑀢𑁄 𑀦𑀺𑀭𑀬𑀲𑀁𑀯𑀢𑁆𑀢𑀦𑀺𑀓𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸 ‘‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄’’𑀢𑀺𑀆𑀤𑀺𑀓𑀁 𑀑𑀯𑀸𑀤𑀁 𑀤𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀏𑀯𑀫𑀸𑀳 𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄…𑀧𑁂… 𑀬𑀣𑀸𑀪𑀼𑀢𑁆𑀢𑀜𑁆𑀘 𑀪𑀼𑀜𑁆𑀚𑀣𑀸𑀢𑀺.

𑀓𑀺𑀁 𑀧𑀦 𑀲𑀩𑁆𑀩𑁂𑀧𑀺 𑀭𑀜𑁆𑀜𑁄 𑀇𑀫𑀁 𑀑𑀯𑀸𑀤𑀁 𑀕𑀡𑁆𑀳𑀦𑁆𑀢𑀻𑀢𑀺. 𑀩𑀼𑀤𑁆𑀥𑀲𑁆𑀲𑀧𑀺 𑀢𑀸𑀯 𑀲𑀩𑁆𑀩𑁂 𑀦 𑀕𑀡𑁆𑀳𑀦𑁆𑀢𑀺, 𑀭𑀜𑁆𑀜𑁄 𑀓𑀺𑀁 𑀕𑀡𑁆𑀳𑀺𑀲𑁆𑀲𑀦𑁆𑀢𑀺. 𑀢𑀲𑁆𑀫𑀸 𑀬𑁂 𑀧𑀡𑁆𑀟𑀺𑀢𑀸 𑀯𑀺𑀪𑀸𑀯𑀺𑀦𑁄, 𑀢𑁂 𑀕𑀡𑁆𑀳𑀦𑁆𑀢𑀺. 𑀲𑀩𑁆𑀩𑁂 𑀧𑀦 𑀅𑀦𑀼𑀬𑀦𑁆𑀢𑀸 𑀪𑀯𑀦𑁆𑀢𑀺. 𑀢𑀲𑁆𑀫𑀸 ‘‘𑀬𑁂 𑀔𑁄 𑀧𑀦, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳.

𑀅𑀣 𑀢𑀁 𑀘𑀓𑁆𑀓𑀭𑀢𑀦𑀁 𑀏𑀯𑀁 𑀧𑀼𑀩𑁆𑀩𑀯𑀺𑀤𑁂𑀳𑀯𑀸𑀲𑀻𑀦𑀁 𑀑𑀯𑀸𑀤𑁂 𑀤𑀺𑀦𑁆𑀦𑁂 𑀓𑀢𑀧𑀸𑀢𑀭𑀸𑀲𑁂 𑀘𑀓𑁆𑀓𑀯𑀢𑁆𑀢𑀻𑀩𑀮𑁂𑀦 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀁 𑀲𑀫𑀼𑀤𑁆𑀤𑀁 𑀅𑀚𑁆𑀛𑁄𑀕𑀸𑀳𑀢𑀺. 𑀬𑀣𑀸 𑀬𑀣𑀸 𑀘 𑀢𑀁 𑀅𑀚𑁆𑀛𑁄𑀕𑀸𑀳𑀢𑀺, 𑀢𑀣𑀸 𑀢𑀣𑀸 𑀅𑀕𑀤𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀲𑀁𑀔𑀺𑀢𑁆𑀢𑀨𑀡𑁄 𑀦𑀸𑀕𑀭𑀸𑀚𑀸 𑀯𑀺𑀬 𑀲𑀁𑀔𑀺𑀢𑁆𑀢𑀊𑀫𑀺𑀯𑀺𑀧𑁆𑀨𑀸𑀭𑀁 𑀳𑀼𑀢𑁆𑀯𑀸 𑀑𑀕𑀘𑁆𑀙𑀫𑀸𑀦𑀁 𑀫𑀳𑀸𑀲𑀫𑀼𑀤𑁆𑀤𑀲𑀮𑀺𑀮𑀁 𑀬𑁄𑀚𑀦𑀫𑀢𑁆𑀢𑀁 𑀑𑀕𑀦𑁆𑀢𑁆𑀯𑀸 𑀅𑀦𑁆𑀢𑁄𑀲𑀫𑀼𑀤𑁆𑀤𑁂 𑀯𑁂𑀴𑀼𑀭𑀺𑀬𑀪𑀺𑀢𑁆𑀢𑀺 𑀯𑀺𑀬 𑀢𑀺𑀝𑁆𑀞𑀢𑀺. 𑀢𑀗𑁆𑀔𑀡𑀜𑁆𑀜𑁂𑀯 𑀘 𑀢𑀲𑁆𑀲 𑀭𑀜𑁆𑀜𑁄 𑀧𑀼𑀜𑁆𑀜𑀲𑀺𑀭𑀺𑀁 𑀤𑀝𑁆𑀞𑀼𑀓𑀸𑀫𑀸𑀦𑀺 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑀢𑀮𑁂 𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀺 𑀦𑀸𑀦𑀸𑀭𑀢𑀦𑀸𑀦𑀺 𑀢𑀢𑁄 𑀢𑀢𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀧𑀤𑁂𑀲𑀁 𑀧𑀽𑀭𑀬𑀦𑁆𑀢𑀺. 𑀅𑀣 𑀲𑀸 𑀭𑀸𑀚𑀧𑀭𑀺𑀲𑀸 𑀢𑀁 𑀦𑀸𑀦𑀸𑀭𑀢𑀦𑀧𑀭𑀺𑀧𑀽𑀭𑀁 𑀫𑀳𑀸𑀲𑀫𑀼𑀤𑁆𑀤𑀢𑀮𑀁 𑀤𑀺𑀲𑁆𑀯𑀸 𑀬𑀣𑀸𑀭𑀼𑀘𑀺 𑀉𑀘𑁆𑀙𑀗𑁆𑀕𑀸𑀤𑀻𑀳𑀺 𑀆𑀤𑀺𑀬𑀢𑀺, 𑀬𑀣𑀸𑀭𑀼𑀘𑀺 𑀆𑀤𑀺𑀦𑁆𑀦𑀭𑀢𑀦𑀸𑀬 𑀧𑀦 𑀧𑀭𑀺𑀲𑀸𑀬 𑀢𑀁 𑀘𑀓𑁆𑀓𑀭𑀢𑀦𑀁 𑀧𑀝𑀺𑀦𑀺𑀯𑀢𑁆𑀢𑀢𑀺. 𑀧𑀝𑀺𑀦𑀺𑀯𑀢𑁆𑀢𑀫𑀸𑀦𑁂 𑀘 𑀢𑀲𑁆𑀫𑀺𑀁 𑀧𑀭𑀺𑀲𑀸 𑀅𑀕𑁆𑀕𑀢𑁄 𑀳𑁄𑀢𑀺, 𑀫𑀚𑁆𑀛𑁂 𑀭𑀸𑀚𑀸, 𑀅𑀦𑁆𑀢𑁂 𑀘𑀓𑁆𑀓𑀭𑀢𑀦𑀁. 𑀢𑀫𑁆𑀧𑀺 𑀚𑀮𑀦𑀺𑀥𑀺𑀚𑀮𑀁 𑀧𑀮𑁄𑀪𑀺𑀬𑀫𑀸𑀦𑀫𑀺𑀯 𑀘𑀓𑁆𑀓𑀭𑀢𑀦𑀲𑀺𑀭𑀺𑀬𑀸, 𑀅𑀲𑀳𑀫𑀸𑀦𑀫𑀺𑀯 𑀘 𑀢𑁂𑀦 𑀯𑀺𑀬𑁄𑀕𑀁, 𑀦𑁂𑀫𑀺𑀫𑀡𑁆𑀟𑀮𑀧𑀭𑀺𑀬𑀦𑁆𑀢𑀁 𑀅𑀪𑀺𑀳𑀦𑀦𑁆𑀢𑀁 𑀦𑀺𑀭𑀦𑁆𑀢𑀭𑀫𑁂𑀯 𑀉𑀧𑀕𑀘𑁆𑀙𑀢𑀺.

𑁨𑁫𑁭. 𑀏𑀯𑀁 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻 𑀧𑀼𑀭𑀢𑁆𑀣𑀺𑀫𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀧𑀼𑀩𑁆𑀩𑀯𑀺𑀤𑁂𑀳𑀁 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸 𑀤𑀓𑁆𑀔𑀺𑀡𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀚𑀫𑁆𑀩𑀼𑀤𑀻𑀧𑀁 𑀯𑀺𑀚𑁂𑀢𑀼𑀓𑀸𑀫𑁄 𑀘𑀓𑁆𑀓𑀭𑀢𑀦𑀤𑁂𑀲𑀺𑀢𑁂𑀦 𑀫𑀕𑁆𑀕𑁂𑀦 𑀤𑀓𑁆𑀔𑀺𑀡𑀲𑀫𑀼𑀤𑁆𑀤𑀸𑀪𑀺𑀫𑀼𑀔𑁄 𑀕𑀘𑁆𑀙𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀣 𑀔𑁄 𑀢𑀁, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀭𑀢𑀦𑀁 𑀧𑀼𑀭𑀢𑁆𑀣𑀺𑀫𑀲𑀫𑀼𑀤𑁆𑀤𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀤𑀓𑁆𑀔𑀺𑀡𑀁 𑀤𑀺𑀲𑀁 𑀧𑀯𑀢𑁆𑀢𑀢𑀻𑀢𑀺. 𑀏𑀯𑀁 𑀧𑀯𑀢𑁆𑀢𑀫𑀸𑀦𑀲𑁆𑀲 𑀧𑀦 𑀢𑀲𑁆𑀲 𑀧𑀯𑀢𑁆𑀢𑀦𑀯𑀺𑀥𑀸𑀦𑀁 𑀲𑁂𑀦𑀸𑀲𑀦𑁆𑀦𑀺𑀯𑁂𑀲𑁄 𑀧𑀝𑀺𑀭𑀸𑀚𑀕𑀫𑀦𑀁 𑀢𑁂𑀲𑀁 𑀅𑀦𑀼𑀲𑀸𑀲𑀦𑀺𑀧𑁆𑀧𑀤𑀸𑀦𑀁 𑀤𑀓𑁆𑀔𑀺𑀡𑀲𑀫𑀼𑀤𑁆𑀤𑀁 𑀅𑀚𑁆𑀛𑁄𑀕𑀸𑀳𑀦𑀁 𑀲𑀫𑀼𑀤𑁆𑀤𑀲𑀮𑀺𑀮𑀲𑁆𑀲 𑀑𑀕𑀘𑁆𑀙𑀦𑀁 𑀭𑀢𑀦𑀸𑀤𑀸𑀦𑀦𑁆𑀢𑀺 𑀲𑀩𑁆𑀩𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀚𑀺𑀦𑀺𑀢𑁆𑀯𑀸 𑀧𑀦 𑀢𑀁 𑀤𑀲𑀲𑀳𑀲𑁆𑀲𑀬𑁄𑀚𑀦𑀧𑁆𑀧𑀫𑀸𑀡𑀁 𑀚𑀫𑁆𑀩𑀼𑀤𑀻𑀧𑀁 𑀤𑀓𑁆𑀔𑀺𑀡𑀲𑀫𑀼𑀤𑁆𑀤𑀢𑁄𑀧𑀺 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀲𑀢𑁆𑀢𑀬𑁄𑀚𑀦𑀲𑀳𑀲𑁆𑀲𑀧𑁆𑀧𑀫𑀸𑀡𑀁 𑀅𑀧𑀭𑀕𑁄𑀬𑀸𑀦𑀁 𑀯𑀺𑀚𑁂𑀢𑀼𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀦𑁆𑀢𑁆𑀯𑀸 𑀢𑀫𑁆𑀧𑀺 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀢𑀣𑁂𑀯 𑀅𑀪𑀺𑀯𑀺𑀚𑀺𑀦𑀺𑀢𑁆𑀯𑀸 𑀧𑀘𑁆𑀙𑀺𑀫𑀲𑀫𑀼𑀤𑁆𑀤𑀢𑁄𑀧𑀺 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀅𑀝𑁆𑀞𑀬𑁄𑀚𑀦𑀲𑀳𑀲𑁆𑀲𑀧𑁆𑀧𑀫𑀸𑀡𑀁 𑀉𑀢𑁆𑀢𑀭𑀓𑀼𑀭𑀼𑀁 𑀯𑀺𑀚𑁂𑀢𑀼𑀁 𑀢𑀣𑁂𑀯 𑀕𑀦𑁆𑀢𑁆𑀯𑀸 𑀢𑀫𑁆𑀧𑀺 𑀲𑀫𑀼𑀤𑁆𑀤𑀧𑀭𑀺𑀬𑀦𑁆𑀢𑀁 𑀢𑀣𑁂𑀯 𑀅𑀪𑀺𑀯𑀺𑀚𑀺𑀬 𑀉𑀢𑁆𑀢𑀭𑀲𑀫𑀼𑀤𑁆𑀤𑀢𑁄𑀧𑀺 𑀧𑀘𑁆𑀘𑀼𑀢𑁆𑀢𑀭𑀢𑀺.

𑀏𑀢𑁆𑀢𑀸𑀯𑀢𑀸 𑀭𑀜𑁆𑀜𑀸 𑀘𑀓𑁆𑀓𑀯𑀢𑁆𑀢𑀺𑀦𑀸 𑀘𑀸𑀢𑀼𑀭𑀦𑁆𑀢𑀸𑀬 𑀧𑀣𑀯𑀺𑀬𑀸 𑀆𑀥𑀺𑀧𑀘𑁆𑀘𑀁 𑀅𑀥𑀺𑀕𑀢𑀁 𑀳𑁄𑀢𑀺. 𑀲𑁄 𑀏𑀯𑀁 𑀯𑀺𑀚𑀺𑀢𑀯𑀺𑀚𑀬𑁄 𑀅𑀢𑁆𑀢𑀦𑁄 𑀭𑀚𑁆𑀚𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀲𑀧𑀭𑀺𑀲𑁄 𑀉𑀤𑁆𑀥𑀁 𑀕𑀕𑀦𑀢𑀮𑀁 𑀅𑀪𑀺𑀮𑀗𑁆𑀖𑀺𑀢𑁆𑀯𑀸 𑀲𑀼𑀯𑀺𑀓𑀲𑀺𑀢𑀧𑀤𑀼𑀫𑀼𑀧𑁆𑀧𑀮𑀧𑀼𑀡𑁆𑀟𑀭𑀻𑀓𑀯𑀦𑀯𑀺𑀘𑀺𑀢𑁆𑀢𑁂 𑀘𑀢𑁆𑀢𑀸𑀭𑁄 𑀚𑀸𑀢𑀲𑁆𑀲𑀭𑁂 𑀯𑀺𑀬 𑀧𑀜𑁆𑀘𑀲𑀢𑀧𑀜𑁆𑀘𑀲𑀢𑀧𑀭𑀺𑀢𑁆𑀢𑀤𑀻𑀧𑀧𑀭𑀺𑀯𑀸𑀭𑁂 𑀘𑀢𑁆𑀢𑀸𑀭𑁄 𑀫𑀳𑀸𑀤𑀻𑀧𑁂 𑀑𑀮𑁄𑀓𑁂𑀢𑁆𑀯𑀸 𑀘𑀓𑁆𑀓𑀭𑀢𑀦𑀤𑁂𑀲𑀺𑀢𑁂𑀦𑁂𑀯 𑀫𑀕𑁆𑀕𑁂𑀦 𑀬𑀣𑀸𑀦𑀼𑀓𑁆𑀓𑀫𑀁 𑀅𑀢𑁆𑀢𑀦𑁄 𑀭𑀸𑀚𑀥𑀸𑀦𑀺𑀫𑁂𑀯 𑀧𑀘𑁆𑀘𑀸𑀕𑀘𑁆𑀙𑀢𑀺. 𑀅𑀣 𑀢𑀁 𑀘𑀓𑁆𑀓𑀭𑀢𑀦𑀁 𑀅𑀦𑁆𑀢𑁂𑀧𑀼𑀭𑀤𑁆𑀯𑀸𑀭𑀁 𑀲𑁄𑀪𑀬𑀫𑀸𑀦𑀁 𑀯𑀺𑀬 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺.

𑀏𑀯𑀁 𑀧𑀢𑀺𑀝𑁆𑀞𑀺𑀢𑁂 𑀧𑀦 𑀢𑀲𑁆𑀫𑀺𑀁 𑀘𑀓𑁆𑀓𑀭𑀢𑀦𑁂 𑀭𑀸𑀚𑀦𑁆𑀢𑁂𑀧𑀼𑀭𑁂 𑀉𑀓𑁆𑀓𑀸𑀳𑀺 𑀯𑀸 𑀤𑀻𑀧𑀺𑀓𑀸𑀳𑀺 𑀯𑀸 𑀓𑀺𑀜𑁆𑀘𑀺 𑀓𑀭𑀡𑀻𑀬𑀁 𑀦 𑀳𑁄𑀢𑀺, 𑀘𑀓𑁆𑀓𑀭𑀢𑀦𑁄𑀪𑀸𑀲𑁄𑀬𑁂𑀯 𑀭𑀢𑁆𑀢𑀺𑀁 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀢𑀺. 𑀬𑁂 𑀘 𑀧𑀦 𑀭𑀢𑁆𑀢𑀺𑀁 𑀅𑀦𑁆𑀥𑀓𑀸𑀭𑀢𑁆𑀣𑀺𑀓𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀅𑀦𑁆𑀥𑀓𑀸𑀭𑀫𑁂𑀯 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀤𑀓𑁆𑀔𑀺𑀡𑀲𑀫𑀼𑀤𑁆𑀤𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸…𑀧𑁂… 𑀏𑀯𑀭𑀽𑀧𑀁 𑀘𑀓𑁆𑀓𑀭𑀢𑀦𑀁 𑀧𑀸𑀢𑀼𑀪𑀯𑀢𑀻𑀢𑀺.

𑀳𑀢𑁆𑀣𑀺𑀭𑀢𑀦𑀯𑀡𑁆𑀡𑀦𑀸

𑁨𑁫𑁮. 𑀏𑀯𑀁 𑀧𑀸𑀢𑀼𑀪𑀽𑀢𑀘𑀓𑁆𑀓𑀭𑀢𑀦𑀲𑁆𑀲 𑀧𑀦𑀲𑁆𑀲 𑀘𑀓𑁆𑀓𑀯𑀢𑁆𑀢𑀺𑀦𑁄 𑀅𑀫𑀘𑁆𑀘𑀸 𑀧𑀓𑀢𑀺𑀫𑀗𑁆𑀕𑀮𑀳𑀢𑁆𑀣𑀺𑀝𑁆𑀞𑀸𑀦𑀁 𑀲𑀼𑀘𑀺𑀪𑀽𑀫𑀺𑀪𑀸𑀕𑀁 𑀓𑀸𑀭𑁂𑀢𑁆𑀯𑀸 𑀳𑀭𑀺𑀘𑀦𑁆𑀤𑀦𑀸𑀤𑀻𑀳𑀺 𑀲𑀼𑀭𑀪𑀺𑀕𑀦𑁆𑀥𑁂𑀳𑀺 𑀉𑀧𑀮𑀺𑀫𑁆𑀧𑀸𑀧𑁂𑀢𑁆𑀯𑀸 𑀳𑁂𑀝𑁆𑀞𑀸 𑀯𑀺𑀘𑀺𑀢𑁆𑀢𑀯𑀡𑁆𑀡𑀲𑀼𑀭𑀪𑀺𑀓𑀼𑀲𑀼𑀫𑀲𑀫𑀸𑀓𑀺𑀡𑁆𑀡𑀁 𑀉𑀧𑀭𑀺 𑀲𑀼𑀯𑀡𑁆𑀡𑀢𑀸𑀭𑀓𑀸𑀦𑀁 𑀅𑀦𑁆𑀢𑀭𑀦𑁆𑀢𑀭𑀸 𑀲𑀫𑁄𑀲𑀭𑀺𑀢𑀫𑀦𑀼𑀜𑁆𑀜-𑀓𑀼𑀲𑀼𑀫𑀤𑀸𑀫𑀧𑁆𑀧𑀝𑀺𑀫𑀡𑁆𑀟𑀺𑀢𑀯𑀺𑀢𑀸𑀦𑀁 𑀤𑁂𑀯𑀯𑀺𑀫𑀸𑀦𑀁 𑀯𑀺𑀬 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 ‘‘𑀏𑀯𑀭𑀽𑀧𑀲𑁆𑀲 𑀦𑀸𑀫 𑀤𑁂𑀯 𑀳𑀢𑁆𑀣𑀺𑀭𑀢𑀦𑀲𑁆𑀲 𑀆𑀕𑀫𑀦𑀁 𑀘𑀺𑀦𑁆𑀢𑁂𑀣𑀸’’𑀢𑀺 𑀯𑀤𑀦𑁆𑀢𑀺. 𑀲𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀸𑀦𑀺 𑀲𑀫𑀸𑀤𑀸𑀬 𑀢𑀁 𑀧𑀼𑀜𑁆𑀜𑀲𑀫𑁆𑀧𑀢𑁆𑀢𑀺𑀁 𑀆𑀯𑀚𑁆𑀚𑀦𑁆𑀢𑁄 𑀦𑀺𑀲𑀻𑀤𑀢𑀺, 𑀅𑀣𑀲𑁆𑀲 𑀧𑀼𑀜𑁆𑀜𑀸𑀦𑀼𑀪𑀸𑀯𑀘𑁄𑀤𑀺𑀢𑁄 𑀙𑀤𑁆𑀤𑀦𑁆𑀢𑀓𑀼𑀮𑀸 𑀯𑀸 𑀉𑀧𑁄𑀲𑀣𑀓𑀼𑀮𑀸 𑀯𑀸 𑀢𑀁 𑀲𑀓𑁆𑀓𑀸𑀭𑀯𑀺𑀲𑁂𑀲𑀁 𑀅𑀦𑀼𑀪𑀯𑀺𑀢𑀼𑀓𑀸𑀫𑁄 𑀢𑀭𑀼𑀡𑀭𑀯𑀺𑀫𑀡𑁆𑀟𑀮𑀸𑀪𑀺𑀭𑀢𑁆𑀢𑀘𑀭𑀡-𑀕𑀻𑀯𑀫𑀼𑀔𑀧𑁆𑀧𑀝𑀺𑀫𑀡𑁆𑀟𑀺𑀢𑀯𑀺𑀲𑀼𑀤𑁆𑀥𑀲𑁂𑀢𑀲𑀭𑀻𑀭𑁄 𑀲𑀢𑁆𑀢𑀧𑁆𑀧𑀢𑀺𑀝𑁆𑀞𑁄 𑀲𑀼𑀲𑀡𑁆𑀞𑀺𑀢𑀗𑁆𑀕𑀧𑀘𑁆𑀘𑀗𑁆𑀕𑀲𑀦𑁆𑀦𑀺𑀯𑁂𑀲𑁄 𑀯𑀺𑀓𑀲𑀺𑀢𑀭𑀢𑁆𑀢-𑀧𑀤𑀼𑀫𑀘𑀸𑀭𑀼𑀧𑁄𑀓𑁆𑀔𑀭𑁄 𑀇𑀤𑁆𑀥𑀺𑀫𑀸 𑀬𑁄𑀕𑀻 𑀯𑀺𑀬 𑀯𑁂𑀳𑀸𑀲𑀁 𑀕𑀫𑀦𑀲𑀫𑀢𑁆𑀣𑁄 𑀫𑀦𑁄𑀲𑀺𑀮𑀸𑀘𑀼𑀡𑁆𑀡𑀭𑀜𑁆𑀚𑀺𑀢𑀧𑀭𑀺𑀬𑀦𑁆𑀢𑁄 𑀯𑀺𑀬 𑀭𑀚𑀢𑀧𑀩𑁆𑀩𑀢𑁄 𑀳𑀢𑁆𑀣𑀺𑀲𑁂𑀝𑁆𑀞𑁄 𑀢𑀲𑁆𑀫𑀺𑀁 𑀧𑀤𑁂𑀲𑁂 𑀧𑀢𑀺𑀝𑁆𑀞𑀸𑀢𑀺. 𑀲𑁄 𑀙𑀤𑁆𑀤𑀦𑁆𑀢𑀓𑀼𑀮𑀸 𑀆𑀕𑀘𑁆𑀙𑀦𑁆𑀢𑁄 𑀲𑀩𑁆𑀩𑀓𑀦𑀺𑀝𑁆𑀞𑁄 𑀆𑀕𑀘𑁆𑀙𑀢𑀺, 𑀉𑀧𑁄𑀲𑀣𑀓𑀼𑀮𑀸 𑀲𑀩𑁆𑀩𑀚𑁂𑀝𑁆𑀞𑁄. 𑀧𑀸𑀴𑀺𑀬𑀁 𑀧𑀦 ‘‘𑀉𑀧𑁄𑀲𑀣𑁄 𑀦𑀸𑀕𑀭𑀸𑀚𑀸’’ 𑀇𑀘𑁆𑀘𑁂𑀯 𑀆𑀕𑀘𑁆𑀙𑀢𑀺. 𑀲𑁆𑀯𑀸𑀬𑀁 𑀧𑀽𑀭𑀺𑀢𑀘𑀓𑁆𑀓𑀯𑀢𑁆𑀢𑀺𑀯𑀢𑁆𑀢𑀸𑀦𑀁 𑀘𑀓𑁆𑀓𑀯𑀢𑁆𑀢𑀻𑀦𑀁 𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑀺𑀦𑁆𑀢𑀬𑀦𑁆𑀢𑀸𑀦𑀁 𑀆𑀕𑀘𑁆𑀙𑀢𑀺, 𑀦 𑀇𑀢𑀭𑁂𑀲𑀁. 𑀲𑀬𑀫𑁂𑀯 𑀧𑀓𑀢𑀺𑀫𑀗𑁆𑀕𑀮𑀳𑀢𑁆𑀣𑀺𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀫𑀗𑁆𑀕𑀮𑀳𑀢𑁆𑀣𑀺𑀁 𑀅𑀧𑀦𑁂𑀢𑁆𑀯𑀸 𑀢𑀢𑁆𑀣 𑀢𑀺𑀝𑁆𑀞𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂…𑀧𑁂… 𑀦𑀸𑀕𑀭𑀸𑀚𑀸𑀢𑀺.

𑀏𑀯𑀁 𑀧𑀸𑀢𑀼𑀪𑀽𑀢𑀁 𑀧𑀦 𑀢𑀁 𑀳𑀢𑁆𑀣𑀺𑀭𑀢𑀦𑀁 𑀤𑀺𑀲𑁆𑀯𑀸 𑀳𑀢𑁆𑀣𑀺𑀕𑁄𑀧𑀓𑀸𑀤𑀬𑁄 𑀳𑀝𑁆𑀞𑀢𑀼𑀝𑁆𑀞𑀸 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀦𑁆𑀢𑀺. 𑀭𑀸𑀚𑀸 𑀢𑀼𑀭𑀺𑀢𑀢𑀼𑀭𑀺𑀢𑀁 𑀆𑀕𑀦𑁆𑀢𑁆𑀯𑀸 𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁄 ‘‘𑀪𑀤𑁆𑀤𑀓𑀁 𑀯𑀢 𑀪𑁄 𑀳𑀢𑁆𑀣𑀺𑀬𑀸𑀦𑀁, 𑀲𑀘𑁂 𑀤𑀫𑀣𑀁 𑀉𑀧𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑀬𑀦𑁆𑀢𑁄 𑀳𑀢𑁆𑀣𑀁 𑀧𑀲𑀸𑀭𑁂𑀢𑀺. 𑀅𑀣 𑀲𑁄 𑀖𑀭𑀥𑁂𑀦𑀼𑀯𑀘𑁆𑀙𑀓𑁄 𑀯𑀺𑀬 𑀓𑀡𑁆𑀡𑁂 𑀑𑀮𑀫𑁆𑀩𑁂𑀢𑁆𑀯𑀸 𑀲𑀽𑀭𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀢𑀺, 𑀭𑀸𑀚𑀸 𑀢𑀁 𑀅𑀪𑀺𑀭𑀼𑀳𑀺𑀢𑀼𑀓𑀸𑀫𑁄 𑀳𑁄𑀢𑀺. 𑀅𑀣𑀲𑁆𑀲 𑀧𑀭𑀺𑀚𑀦𑀸 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸 𑀢𑀁 𑀳𑀢𑁆𑀣𑀺𑀭𑀢𑀦𑀁 𑀲𑁄𑀯𑀡𑁆𑀡𑀤𑁆𑀥𑀚𑀁 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀁 𑀳𑁂𑀫𑀚𑀸𑀮𑀧𑀝𑀺𑀘𑁆𑀙𑀦𑁆𑀦𑀁 𑀓𑀢𑁆𑀯𑀸 𑀉𑀧𑀦𑁂𑀦𑁆𑀢𑀺. 𑀭𑀸𑀚𑀸 𑀢𑀁 𑀅𑀦𑀺𑀲𑀻𑀤𑀸𑀧𑁂𑀢𑁆𑀯𑀸𑀯 𑀲𑀢𑁆𑀢𑀭𑀢𑀦𑀫𑀬𑀸𑀬 𑀦𑀺𑀲𑁆𑀲𑁂𑀡𑀺𑀬𑀸 𑀅𑀪𑀺𑀭𑀼𑀬𑁆𑀳 𑀆𑀓𑀸𑀲𑀁 𑀕𑀫𑀦𑀦𑀺𑀦𑁆𑀦𑀘𑀺𑀢𑁆𑀢𑁄 𑀳𑁄𑀢𑀺. 𑀢𑀲𑁆𑀲 𑀲𑀳 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯 𑀲𑁄 𑀳𑀢𑁆𑀣𑀺𑀭𑀸𑀚𑀸 𑀭𑀸𑀚𑀳𑀁𑀲𑁄 𑀯𑀺𑀬 𑀇𑀦𑁆𑀤𑀦𑀻𑀮𑀫𑀡𑀺𑀧𑁆𑀧𑀪𑀸𑀚𑀸𑀮𑀦𑀻𑀮𑀕𑀕𑀦𑀢𑀮𑀁 𑀅𑀪𑀺𑀮𑀗𑁆𑀖𑀢𑀺, 𑀢𑀢𑁄 𑀘𑀓𑁆𑀓𑀘𑀸𑀭𑀺𑀓𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀓𑀮𑀭𑀸𑀚𑀧𑀭𑀺𑀲𑀸. 𑀇𑀢𑀺 𑀲𑀧𑀭𑀺𑀲𑁄 𑀭𑀸𑀚𑀸 𑀅𑀦𑁆𑀢𑁄𑀧𑀸𑀢𑀭𑀸𑀲𑁂𑀬𑁂𑀯 𑀲𑀓𑀮𑀧𑀣𑀯𑀺𑀁 𑀅𑀦𑀼𑀲𑀁𑀬𑀸𑀬𑀺𑀢𑁆𑀯𑀸 𑀭𑀸𑀚𑀥𑀸𑀦𑀺𑀁 𑀧𑀘𑁆𑀘𑀸𑀕𑀘𑁆𑀙𑀢𑀺, 𑀏𑀯𑀁 𑀫𑀳𑀺𑀤𑁆𑀥𑀺𑀓𑀁 𑀘𑀓𑁆𑀓𑀯𑀢𑁆𑀢𑀺𑀦𑁄 𑀳𑀢𑁆𑀣𑀺𑀭𑀢𑀦𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀤𑀺𑀲𑁆𑀯𑀸𑀦 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲…𑀧𑁂… 𑀏𑀯𑀭𑀽𑀧𑀁 𑀳𑀢𑁆𑀣𑀺𑀭𑀢𑀦𑀁 𑀧𑀸𑀢𑀼𑀪𑀯𑀢𑀻𑀢𑀺.

𑀅𑀲𑁆𑀲𑀭𑀢𑀦𑀯𑀡𑁆𑀡𑀦𑀸

𑀏𑀯𑀁 𑀧𑀸𑀢𑀼𑀪𑀽𑀢𑀳𑀢𑁆𑀣𑀺𑀭𑀢𑀦𑀲𑁆𑀲 𑀧𑀦 𑀘𑀓𑁆𑀓𑀯𑀢𑁆𑀢𑀺𑀦𑁄 𑀧𑀭𑀺𑀲𑀸 𑀧𑀓𑀢𑀺𑀫𑀗𑁆𑀕𑀮𑀅𑀲𑁆𑀲𑀝𑁆𑀞𑀸𑀦𑀁 𑀲𑀼𑀘𑀺𑀲𑀫𑀢𑀮𑀁 𑀓𑀸𑀭𑁂𑀢𑁆𑀯𑀸 𑀅𑀮𑀗𑁆𑀓𑀭𑀺𑀢𑁆𑀯𑀸 𑀘 𑀧𑀼𑀭𑀺𑀫𑀦𑀬𑁂𑀦𑁂𑀯 𑀭𑀜𑁆𑀜𑁄 𑀢𑀲𑁆𑀲 𑀆𑀕𑀫𑀦𑀘𑀺𑀦𑁆𑀢𑀦𑀢𑁆𑀣𑀁 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑀺. 𑀲𑁄 𑀧𑀼𑀭𑀺𑀫𑀦𑀬𑁂𑀦𑁂𑀯 𑀓𑀢𑀤𑀸𑀦𑀲𑀓𑁆𑀓𑀸𑀭𑁄 𑀲𑀫𑀸𑀤𑀺𑀦𑁆𑀦𑀲𑀻𑀮𑁄𑀯 𑀧𑀸𑀲𑀸𑀤𑀢𑀮𑁂 𑀦𑀺𑀲𑀺𑀦𑁆𑀦𑁄 𑀧𑀼𑀜𑁆𑀜𑀲𑀫𑁆𑀧𑀢𑁆𑀢𑀺𑀁 𑀲𑀫𑀦𑀼𑀲𑁆𑀲𑀭𑀢𑀺, 𑀅𑀣𑀲𑁆𑀲 𑀧𑀼𑀜𑁆𑀜𑀸𑀦𑀼𑀪𑀸𑀯𑀘𑁄𑀤𑀺𑀢𑁄 𑀲𑀺𑀦𑁆𑀥𑀯𑀓𑀼𑀮𑀢𑁄 𑀯𑀺𑀚𑁆𑀚𑀼𑀮𑁆𑀮𑀢𑀸𑀯𑀺𑀦𑀤𑁆𑀥𑀲𑀭𑀤𑀓𑀸𑀮𑀲𑁂𑀢𑀯𑀮𑀸𑀳𑀓𑀭𑀸𑀲𑀺𑀲𑀲𑁆𑀲𑀺𑀭𑀺𑀓𑁄 𑀭𑀢𑁆𑀢𑀧𑀸𑀤𑁄 𑀭𑀢𑁆𑀢𑀢𑀼𑀡𑁆𑀟𑁄 𑀘𑀦𑁆𑀤𑀧𑁆𑀧𑀪𑀸𑀧𑀼𑀜𑁆𑀚𑀲𑀤𑀺𑀲𑀲𑀼𑀤𑁆𑀥𑀲𑀺𑀦𑀺𑀤𑁆𑀥𑀖𑀦𑀲𑀗𑁆𑀖𑀸𑀢𑀲𑀭𑀻𑀭𑁄 𑀓𑀸𑀓𑀕𑀻𑀯𑀸 𑀯𑀺𑀬 𑀇𑀦𑁆𑀤𑀦𑀻𑀮𑀫𑀡𑀺 𑀯𑀺𑀬 𑀘 𑀓𑀸𑀴𑀯𑀡𑁆𑀡𑁂𑀦 𑀲𑀻𑀲𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀓𑀸𑀴𑀲𑀻𑀲𑁄 𑀲𑀼𑀝𑁆𑀞𑀼 𑀓𑀧𑁆𑀧𑁂𑀢𑁆𑀯𑀸 𑀞𑀧𑀺𑀢𑁂𑀳𑀺 𑀯𑀺𑀬 𑀫𑀼𑀜𑁆𑀚𑀲𑀤𑀺𑀲𑁂𑀳𑀺 𑀲𑀡𑁆𑀳𑀯𑀝𑁆𑀝𑀉𑀚𑀼𑀕𑀢𑀺𑀕𑀢𑁂𑀳𑀺 𑀓𑁂𑀲𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀫𑀼𑀜𑁆𑀚𑀓𑁂𑀲𑁄 𑀯𑁂𑀳𑀸𑀲𑀗𑁆𑀕𑀫𑁄 𑀯𑀮𑀸𑀳𑀓𑁄 𑀦𑀸𑀫 𑀅𑀲𑁆𑀲𑀭𑀸𑀚𑀸 𑀆𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀢𑀺𑀝𑁆𑀞𑀸𑀢𑀺. 𑀲𑁂𑀲𑀁 𑀲𑀩𑁆𑀩𑀁 𑀳𑀢𑁆𑀣𑀺𑀭𑀢𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀭𑀽𑀧𑀁 𑀅𑀲𑁆𑀲𑀭𑀢𑀦𑀁 𑀲𑀦𑁆𑀥𑀸𑀬 𑀪𑀕𑀯𑀸 𑀧𑀼𑀦 𑀘𑀧𑀭𑀦𑁆𑀢𑀺𑀆𑀤𑀺𑀫𑀸𑀳.

𑀫𑀡𑀺𑀭𑀢𑀦𑀯𑀡𑁆𑀡𑀦𑀸

𑀏𑀯𑀁 𑀧𑀸𑀢𑀼𑀪𑀽𑀢𑀅𑀲𑁆𑀲𑀭𑀢𑀦𑀲𑁆𑀲 𑀧𑀦 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀘𑀢𑀼𑀳𑀢𑁆𑀣𑀸𑀬𑀸𑀫𑀁 𑀲𑀓𑀝𑀦𑀸𑀪𑀺𑀲𑀫𑀧𑁆𑀧𑀫𑀸𑀡𑀁 𑀉𑀪𑁄𑀲𑀼 𑀅𑀦𑁆𑀢𑁂𑀲𑀼 𑀓𑀡𑁆𑀡𑀺𑀓𑀧𑀭𑀺𑀬𑀦𑁆𑀢𑀢𑁄 𑀯𑀺𑀦𑀺𑀕𑁆𑀕𑀢𑀲𑀼𑀧𑀭𑀺𑀲𑀼𑀤𑁆𑀥𑀫𑀼𑀢𑁆𑀢𑀸𑀓𑀮𑀸𑀧𑁂𑀳𑀺 𑀤𑁆𑀯𑀻𑀳𑀺 𑀓𑀜𑁆𑀘𑀦𑀧𑀤𑀼𑀫𑁂𑀳𑀺 𑀅𑀮𑀗𑁆𑀓𑀢𑀁 𑀘𑀢𑀼𑀭𑀸𑀲𑀻𑀢𑀺𑀫𑀡𑀺𑀲𑀳𑀲𑁆𑀲𑀧𑀭𑀺𑀯𑀸𑀭𑀁 𑀢𑀸𑀭𑀸𑀕𑀡𑀧𑀭𑀺𑀯𑀼𑀢𑀲𑁆𑀲 𑀧𑀼𑀡𑁆𑀡𑀘𑀦𑁆𑀤𑀲𑁆𑀲 𑀲𑀺𑀭𑀺𑀁 𑀧𑀝𑀺𑀧𑁆𑀨𑀭𑀫𑀸𑀦𑀁 𑀯𑀺𑀬 𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑀢𑁄 𑀫𑀡𑀺𑀭𑀢𑀦𑀁 𑀆𑀕𑀘𑁆𑀙𑀢𑀺. 𑀢𑀲𑁆𑀲𑁂𑀯𑀁 𑀆𑀕𑀢𑀲𑁆𑀲 𑀫𑀼𑀢𑁆𑀢𑀸𑀚𑀸𑀮𑀓𑁂 𑀞𑀧𑁂𑀢𑁆𑀯𑀸 𑀯𑁂𑀴𑀼𑀧𑀭𑀫𑁆𑀧𑀭𑀸𑀬 𑀲𑀝𑁆𑀞𑀺𑀳𑀢𑁆𑀣𑀧𑁆𑀧𑀫𑀸𑀡𑀁 𑀆𑀓𑀸𑀲𑀁 𑀆𑀭𑁄𑀧𑀺𑀢𑀲𑁆𑀲 𑀭𑀢𑁆𑀢𑀺𑀪𑀸𑀕𑁂 𑀲𑀫𑀦𑁆𑀢𑀸 𑀬𑁄𑀚𑀦𑀧𑁆𑀧𑀫𑀸𑀡𑀁 𑀑𑀓𑀸𑀲𑀁 𑀆𑀪𑀸 𑀨𑀭𑀢𑀺, 𑀬𑀸𑀬 𑀲𑀩𑁆𑀩𑁄 𑀲𑁄 𑀑𑀓𑀸𑀲𑁄 𑀅𑀭𑀼𑀡𑀼𑀕𑁆𑀕𑀫𑀦𑀯𑁂𑀮𑀸 𑀯𑀺𑀬 𑀲𑀜𑁆𑀚𑀸𑀢𑀸𑀮𑁄𑀓𑁄 𑀳𑁄𑀢𑀺. 𑀢𑀢𑁄 𑀓𑀲𑁆𑀲𑀓𑀸 𑀓𑀲𑀺𑀓𑀫𑁆𑀫𑀁, 𑀯𑀸𑀡𑀺𑀚𑀸 𑀆𑀧𑀡𑀼𑀕𑁆𑀖𑀸𑀝𑀦𑀁, 𑀢𑁂 𑀢𑁂 𑀘 𑀲𑀺𑀧𑁆𑀧𑀺𑀦𑁄 𑀢𑀁 𑀢𑀁 𑀓𑀫𑁆𑀫𑀦𑁆𑀢𑀁 𑀧𑀬𑁄𑀚𑁂𑀦𑁆𑀢𑀺 𑀤𑀺𑀯𑀸𑀢𑀺 𑀫𑀜𑁆𑀜𑀫𑀸𑀦𑀸. 𑀢𑁂𑀦 𑀯𑀼𑀢𑁆𑀢𑀁 𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂…𑀧𑁂… 𑀫𑀡𑀺𑀭𑀢𑀦𑀁 𑀧𑀸𑀢𑀼𑀪𑀯𑀢𑀻𑀢𑀺.

𑀇𑀢𑁆𑀣𑀺𑀭𑀢𑀦𑀯𑀡𑁆𑀡𑀦𑀸

𑀏𑀯𑀁 𑀧𑀸𑀢𑀼𑀪𑀽𑀢𑀫𑀡𑀺𑀭𑀢𑀦𑀲𑁆𑀲 𑀧𑀦 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀯𑀺𑀲𑀬𑀲𑀼𑀔𑀯𑀺𑀲𑁂𑀲𑀓𑀸𑀭𑀡𑀁 𑀇𑀢𑁆𑀣𑀺𑀭𑀢𑀦𑀁 𑀧𑀸𑀢𑀼𑀪𑀯𑀢𑀺. 𑀫𑀤𑁆𑀤𑀭𑀸𑀚𑀓𑀼𑀮𑀢𑁄 𑀯𑀸 𑀳𑀺𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀁 𑀆𑀦𑁂𑀦𑁆𑀢𑀺, 𑀉𑀢𑁆𑀢𑀭𑀓𑀼𑀭𑀼𑀢𑁄 𑀯𑀸 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀲𑀬𑀁 𑀆𑀕𑀘𑁆𑀙𑀢𑀺. 𑀅𑀯𑀲𑁂𑀲𑀸 𑀧𑀦𑀲𑁆𑀲𑀸 𑀲𑀫𑁆𑀧𑀢𑁆𑀢𑀺 ‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀇𑀢𑁆𑀣𑀺𑀭𑀢𑀦𑀁 𑀧𑀸𑀢𑀼𑀪𑀯𑀢𑀺 𑀅𑀪𑀺𑀭𑀽𑀧𑀸 𑀤𑀲𑁆𑀲𑀦𑀻𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀸𑀴𑀺𑀬𑀁𑀬𑁂𑀯 𑀆𑀕𑀢𑀸.

𑀢𑀢𑁆𑀣 𑀲𑀡𑁆𑀞𑀸𑀦𑀧𑀸𑀭𑀺𑀧𑀽𑀭𑀺𑀬𑀸 𑀅𑀥𑀺𑀓𑀁 𑀭𑀽𑀧𑀁 𑀅𑀲𑁆𑀲𑀸𑀢𑀺 𑀅𑀪𑀺𑀭𑀽𑀧𑀸. 𑀤𑀺𑀲𑁆𑀲𑀫𑀸𑀦𑀸 𑀘 𑀘𑀓𑁆𑀔𑀽𑀦𑀺 𑀧𑀻𑀡𑀬𑀢𑀺, 𑀢𑀲𑁆𑀫𑀸 𑀅𑀜𑁆𑀜𑀁 𑀓𑀺𑀘𑁆𑀘𑀯𑀺𑀓𑁆𑀔𑁂𑀧𑀁 𑀳𑀺𑀢𑁆𑀯𑀸𑀧𑀺 𑀤𑀝𑁆𑀞𑀩𑁆𑀩𑀸𑀢𑀺 𑀤𑀲𑁆𑀲𑀦𑀻𑀬𑀸. 𑀤𑀺𑀲𑁆𑀲𑀫𑀸𑀦𑀸 𑀘 𑀲𑁄𑀫𑀦𑀲𑁆𑀲𑀯𑀲𑁂𑀦 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑀻𑀢𑀺 𑀧𑀸𑀲𑀸𑀤𑀺𑀓𑀸. 𑀧𑀭𑀫𑀸𑀬𑀸𑀢𑀺 𑀏𑀯𑀁 𑀧𑀲𑀸𑀤𑀸𑀯𑀳𑀢𑁆𑀢𑀸 𑀉𑀢𑁆𑀢𑀫𑀸𑀬. 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬𑀸𑀢𑀺 𑀯𑀡𑁆𑀡𑀲𑀼𑀦𑁆𑀤𑀭𑀢𑀸𑀬. 𑀲𑀫𑀦𑁆𑀦𑀸𑀕𑀢𑀸𑀢𑀺 𑀉𑀧𑁂𑀢𑀸. 𑀅𑀪𑀺𑀭𑀽𑀧𑀸 𑀯𑀸 𑀬𑀲𑁆𑀫𑀸 𑀦𑀸𑀢𑀺𑀤𑀻𑀖𑀸 𑀦𑀸𑀢𑀺𑀭𑀲𑁆𑀲𑀸 𑀤𑀲𑁆𑀲𑀦𑀻𑀬𑀸 𑀬𑀲𑁆𑀫𑀸 𑀦𑀸𑀢𑀺𑀓𑀺𑀲𑀸 𑀦𑀸𑀢𑀺𑀣𑀽𑀮𑀸, 𑀧𑀸𑀲𑀸𑀤𑀺𑀓𑀸 𑀬𑀲𑁆𑀫𑀸 𑀦𑀸𑀢𑀺𑀓𑀸𑀴𑀺𑀓𑀸 𑀦𑀘𑁆𑀘𑁄𑀤𑀸𑀢𑀸. 𑀧𑀭𑀫𑀸𑀬 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀲𑀫𑀦𑁆𑀦𑀸𑀕𑀢𑀸 𑀬𑀲𑁆𑀫𑀸 𑀅𑀢𑀺𑀓𑁆𑀓𑀦𑁆𑀢𑀸 𑀫𑀸𑀦𑀼𑀲𑀁 𑀯𑀡𑁆𑀡𑀁 𑀅𑀧𑁆𑀧𑀢𑁆𑀢𑀸 𑀤𑀺𑀩𑁆𑀩𑀯𑀡𑁆𑀡𑀁. 𑀫𑀦𑀼𑀲𑁆𑀲𑀸𑀦𑀜𑁆𑀳𑀺 𑀯𑀡𑁆𑀡𑀸𑀪𑀸 𑀩𑀳𑀺 𑀦 𑀦𑀺𑀘𑁆𑀙𑀭𑀢𑀺, 𑀤𑁂𑀯𑀸𑀦𑀁 𑀅𑀢𑀺𑀤𑀽𑀭𑀁 𑀦𑀺𑀘𑁆𑀙𑀭𑀢𑀺, 𑀢𑀲𑁆𑀲𑀸 𑀧𑀦 𑀤𑁆𑀯𑀸𑀤𑀲𑀳𑀢𑁆𑀣𑀧𑁆𑀧𑀫𑀸𑀡𑀁 𑀧𑀤𑁂𑀲𑀁 𑀲𑀭𑀻𑀭𑀸𑀪𑀸 𑀑𑀪𑀸𑀲𑁂𑀢𑀺.

𑀦𑀸𑀢𑀺𑀤𑀻𑀖𑀸𑀤𑀻𑀲𑀼 𑀘𑀲𑁆𑀲𑀸 𑀧𑀞𑀫𑀬𑀼𑀕𑀴𑁂𑀦 𑀆𑀭𑁄𑀳𑀲𑀫𑁆𑀧𑀢𑁆𑀢𑀺, 𑀤𑀼𑀢𑀺𑀬𑀬𑀼𑀕𑀴𑁂𑀦 𑀧𑀭𑀺𑀡𑀸𑀳𑀲𑀫𑁆𑀧𑀢𑁆𑀢𑀺, 𑀢𑀢𑀺𑀬𑀬𑀼𑀕𑀴𑁂𑀦 𑀯𑀡𑁆𑀡𑀲𑀫𑁆𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀙𑀳𑀺 𑀯𑀸𑀧𑀺 𑀏𑀢𑁂𑀳𑀺 𑀓𑀸𑀬𑀯𑀺𑀧𑀢𑁆𑀢𑀺𑀬𑀸 𑀅𑀪𑀸𑀯𑁄, 𑀅𑀢𑀺𑀓𑁆𑀓𑀦𑁆𑀢𑀸 𑀫𑀸𑀦𑀼𑀲𑀁 𑀯𑀡𑁆𑀡𑀦𑁆𑀢𑀺 𑀇𑀫𑀺𑀦𑀸 𑀓𑀸𑀬𑀲𑀫𑁆𑀧𑀢𑁆𑀢𑀺 𑀯𑀼𑀢𑁆𑀢𑀸.

𑀢𑀽𑀮𑀧𑀺𑀘𑀼𑀦𑁄 𑀯𑀸 𑀓𑀧𑁆𑀧𑀸𑀲𑀧𑀺𑀘𑀼𑀦𑁄 𑀯𑀸𑀢𑀺 𑀲𑀧𑁆𑀧𑀺𑀫𑀡𑁆𑀟𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀞𑀧𑀺𑀢𑀲𑁆𑀲 𑀲𑀢𑀯𑀺𑀳𑀢𑀲𑁆𑀲 𑀢𑀽𑀮𑀧𑀺𑀘𑀼𑀦𑁄 𑀯𑀸 𑀲𑀢𑀯𑀺𑀳𑀢𑀲𑁆𑀲 𑀓𑀧𑁆𑀧𑀸𑀲𑀧𑀺𑀘𑀼𑀦𑁄 𑀯𑀸 𑀓𑀸𑀬𑀲𑀫𑁆𑀨𑀲𑁆𑀲𑁄 𑀳𑁄𑀢𑀺. 𑀲𑀻𑀢𑁂𑀢𑀺 𑀭𑀜𑁆𑀜𑁄 𑀲𑀻𑀢𑀓𑀸𑀮𑁂. 𑀉𑀡𑁆𑀳𑁂𑀢𑀺 𑀭𑀜𑁆𑀜𑁄 𑀉𑀡𑁆𑀳𑀓𑀸𑀮𑁂. 𑀘𑀦𑁆𑀤𑀦𑀕𑀦𑁆𑀥𑁄𑀢𑀺 𑀦𑀺𑀘𑁆𑀘𑀓𑀸𑀮𑀫𑁂𑀯 𑀲𑀼𑀧𑀺𑀲𑀺𑀢𑀲𑁆𑀲 𑀅𑀪𑀺𑀦𑀯𑀲𑁆𑀲 𑀘𑀢𑀼𑀚𑁆𑀚𑀸𑀢𑀺𑀲𑀫𑀸𑀬𑁄𑀚𑀺𑀢𑀲𑁆𑀲 𑀳𑀭𑀺𑀘𑀦𑁆𑀤𑀦𑀲𑁆𑀲 𑀕𑀦𑁆𑀥𑁄 𑀓𑀸𑀬𑀢𑁄 𑀯𑀸𑀬𑀢𑀺. 𑀉𑀧𑁆𑀧𑀮𑀕𑀦𑁆𑀥𑁄𑀢𑀺 𑀳𑀲𑀺𑀢𑀓𑀣𑀺𑀢𑀓𑀸𑀮𑁂𑀲𑀼 𑀫𑀼𑀔𑀢𑁄 𑀦𑀺𑀓𑁆𑀔𑀦𑁆𑀢𑁄 𑀢𑀗𑁆𑀔𑀡𑀁 𑀯𑀺𑀓𑀲𑀺𑀢𑀲𑁆𑀲𑁂𑀯 𑀦𑀻𑀮𑀼𑀧𑁆𑀧𑀮𑀲𑁆𑀲 𑀅𑀢𑀺𑀲𑀼𑀭𑀪𑀺𑀕𑀦𑁆𑀥𑁄 𑀯𑀸𑀬𑀢𑀺.

𑀏𑀯𑀁 𑀭𑀽𑀧𑀲𑀫𑁆𑀨𑀲𑁆𑀲𑀕𑀦𑁆𑀥𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑀸𑀬 𑀧𑀦𑀲𑁆𑀲𑀸 𑀲𑀭𑀻𑀭𑀲𑀫𑁆𑀧𑀢𑁆𑀢𑀺𑀬𑀸 𑀅𑀦𑀼𑀭𑀽𑀧𑀁 𑀆𑀘𑀸𑀭𑀁 𑀤𑀲𑁆𑀲𑁂𑀢𑀼𑀁 𑀢𑀁 𑀔𑁄 𑀧𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀦𑀺𑀲𑀺𑀦𑁆𑀦𑀸𑀲𑀦𑀢𑁄 𑀅𑀕𑁆𑀕𑀺𑀤𑀟𑁆𑀠𑀸 𑀯𑀺𑀬 𑀧𑀞𑀫𑀫𑁂𑀯 𑀉𑀝𑁆𑀞𑀸𑀢𑀻𑀢𑀺 𑀧𑀼𑀩𑁆𑀩𑀼𑀝𑁆𑀞𑀸𑀬𑀺𑀦𑀻. 𑀢𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑁂 𑀢𑀲𑁆𑀲 𑀭𑀜𑁆𑀜𑁄 𑀢𑀸𑀮𑀯𑀡𑁆𑀝𑁂𑀦 𑀩𑀻𑀚𑀦𑀸𑀤𑀺𑀓𑀺𑀘𑁆𑀘𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀦𑀺𑀧𑀢𑀢𑀺 𑀦𑀺𑀲𑀻𑀤𑀢𑀻𑀢𑀺 𑀧𑀘𑁆𑀙𑀸𑀦𑀺𑀧𑀸𑀢𑀺𑀦𑀻. 𑀓𑀺𑀁 𑀓𑀭𑁄𑀫𑀺 𑀤𑁂𑀯𑀸𑀢𑀺 𑀢𑀲𑁆𑀲 𑀓𑀺𑀁𑀓𑀸𑀭𑀁 𑀧𑀝𑀺𑀲𑁆𑀲𑀸𑀯𑁂𑀢𑀻𑀢𑀺 𑀓𑀺𑀁𑀓𑀸𑀭𑀧𑀝𑀺𑀲𑁆𑀲𑀸𑀯𑀺𑀦𑀻. 𑀭𑀜𑁆𑀜𑁄 𑀫𑀦𑀸𑀧𑀫𑁂𑀯 𑀘𑀭𑀢𑀺 𑀓𑀭𑁄𑀢𑀻𑀢𑀺 𑀫𑀦𑀸𑀧𑀘𑀸𑀭𑀺𑀦𑀻. 𑀬𑀁 𑀭𑀜𑁆𑀜𑁄 𑀧𑀺𑀬𑀁, 𑀢𑀤𑁂𑀯 𑀯𑀤𑀢𑀻𑀢𑀺 𑀧𑀺𑀬𑀯𑀸𑀤𑀺𑀦𑀻.

𑀇𑀤𑀸𑀦𑀺 𑀲𑁆𑀯𑀸𑀲𑁆𑀲𑀸 𑀆𑀘𑀸𑀭𑁄 𑀪𑀸𑀯𑀲𑀼𑀤𑁆𑀥𑀺𑀬𑀸 𑀏𑀯, 𑀦 𑀲𑀸𑀞𑁂𑀬𑁆𑀬𑁂𑀦𑀸𑀢𑀺 𑀤𑀲𑁆𑀲𑁂𑀢𑀼𑀁 𑀢𑀁 𑀔𑁄 𑀧𑀦𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑁄 𑀅𑀢𑀺𑀘𑀭𑀢𑀻𑀢𑀺 𑀦 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀘𑀭𑀢𑀺, 𑀅𑀜𑁆𑀜𑀁 𑀧𑀼𑀭𑀺𑀲𑀁 𑀘𑀺𑀢𑁆𑀢𑁂𑀦𑀧𑀺 𑀦 𑀧𑀢𑁆𑀣𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀬𑁂 𑀢𑀲𑁆𑀲𑀸 𑀆𑀤𑀺𑀫𑁆𑀳𑀺 ‘‘𑀅𑀪𑀺𑀭𑀽𑀧𑀸’’𑀢𑀺𑀆𑀤𑀬𑁄 𑀅𑀦𑁆𑀢𑁂 ‘‘𑀧𑀼𑀩𑁆𑀩𑀼𑀝𑁆𑀞𑀸𑀬𑀺𑀦𑀻’’𑀢𑀺𑀆𑀤𑀬𑁄 𑀕𑀼𑀡𑀸 𑀯𑀼𑀢𑁆𑀢𑀸, 𑀢𑁂 𑀧𑀓𑀢𑀺𑀕𑀼𑀡𑀸 𑀏𑀯 ‘‘𑀅𑀢𑀺𑀓𑁆𑀓𑀦𑁆𑀢𑀸 𑀫𑀸𑀦𑀼𑀲𑀁 𑀯𑀡𑁆𑀡’’𑀦𑁆𑀢𑀺𑀆𑀤𑀬𑁄 𑀧𑀦 𑀘𑀓𑁆𑀓𑀯𑀢𑁆𑀢𑀺𑀦𑁄 𑀧𑀼𑀜𑁆𑀜𑀁 𑀉𑀧𑀦𑀺𑀲𑁆𑀲𑀸𑀬 𑀘𑀓𑁆𑀓𑀭𑀢𑀦𑀧𑀸𑀢𑀼𑀪𑀸𑀯𑀢𑁄 𑀧𑀝𑁆𑀞𑀸𑀬 𑀧𑀼𑀭𑀺𑀫𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀪𑀺𑀭𑀽𑀧𑀢𑀸𑀤𑀺𑀓𑀸𑀧𑀺 𑀯𑀸 𑀘𑀓𑁆𑀓𑀭𑀢𑀦𑀧𑀸𑀢𑀼𑀪𑀸𑀯𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀸𑀓𑀸𑀭𑀧𑀸𑀭𑀺𑀧𑀽𑀭𑀸 𑀚𑀸𑀢𑀸. 𑀢𑁂𑀦𑀸𑀳 𑀏𑀯𑀭𑀽𑀧𑀁 𑀇𑀢𑁆𑀣𑀺𑀭𑀢𑀦𑀁 𑀧𑀸𑀢𑀼𑀪𑀯𑀢𑀻𑀢𑀺.

𑀕𑀳𑀧𑀢𑀺𑀭𑀢𑀦𑀯𑀡𑁆𑀡𑀦𑀸

𑀏𑀯𑀁 𑀧𑀸𑀢𑀼𑀪𑀽𑀢𑀇𑀢𑁆𑀣𑀺𑀭𑀢𑀦𑀲𑁆𑀲 𑀧𑀦 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀥𑀦𑀓𑀭𑀡𑀻𑀬𑀸𑀦𑀁 𑀓𑀺𑀘𑁆𑀘𑀸𑀦𑀁 𑀬𑀣𑀸𑀲𑀼𑀔𑀧𑁆𑀧𑀯𑀢𑁆𑀢𑀦𑀢𑁆𑀣𑀁 𑀕𑀳𑀧𑀢𑀺𑀭𑀢𑀦𑀁 𑀧𑀸𑀢𑀼𑀪𑀯𑀢𑀺. 𑀲𑁄 𑀧𑀓𑀢𑀺𑀬𑀸𑀯 𑀫𑀳𑀸𑀪𑁄𑀕𑁄 𑀫𑀳𑀸𑀪𑁄𑀕𑀓𑀼𑀮𑁂 𑀚𑀸𑀢𑁄 𑀭𑀜𑁆𑀜𑁄 𑀥𑀦𑀭𑀸𑀲𑀺𑀯𑀟𑁆𑀠𑀓𑁄 𑀲𑁂𑀝𑁆𑀞𑀺 𑀕𑀳𑀧𑀢𑀺 𑀳𑁄𑀢𑀺, 𑀘𑀓𑁆𑀓𑀭𑀢𑀦𑀸𑀦𑀼𑀪𑀸𑀯𑀲𑀳𑀺𑀢𑀁 𑀧𑀦𑀲𑁆𑀲 𑀓𑀫𑁆𑀫𑀯𑀺𑀧𑀸𑀓𑀚𑀁 𑀤𑀺𑀩𑁆𑀩𑀘𑀓𑁆𑀔𑀼 𑀧𑀸𑀢𑀼𑀪𑀯𑀢𑀺, 𑀬𑁂𑀦 𑀅𑀦𑁆𑀢𑁄𑀧𑀣𑀯𑀺𑀬𑀁 𑀬𑁄𑀚𑀦𑀩𑁆𑀪𑀦𑁆𑀢𑀭𑁂 𑀦𑀺𑀥𑀺𑀁 𑀧𑀲𑁆𑀲𑀢𑀺. 𑀲𑁄 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑀳𑀤𑀬𑁄 𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀥𑀦𑁂𑀦 𑀧𑀯𑀸𑀭𑁂𑀢𑁆𑀯𑀸 𑀲𑀩𑁆𑀩𑀸𑀦𑀺 𑀥𑀦𑀓𑀭𑀡𑀻𑀬𑀸𑀦𑀺 𑀲𑀫𑁆𑀧𑀸𑀤𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂…𑀧𑁂… 𑀏𑀯𑀭𑀽𑀧𑀁 𑀕𑀳𑀧𑀢𑀺𑀭𑀢𑀦𑀁 𑀧𑀸𑀢𑀼𑀪𑀯𑀢𑀻𑀢𑀺.

𑀧𑀭𑀺𑀡𑀸𑀬𑀓𑀭𑀢𑀦𑀯𑀡𑁆𑀡𑀦𑀸

𑀏𑀯𑀁 𑀧𑀸𑀢𑀼𑀪𑀽𑀢𑀕𑀳𑀧𑀢𑀺𑀭𑀢𑀦𑀲𑁆𑀲 𑀧𑀦 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀲𑀩𑁆𑀩𑀓𑀺𑀘𑁆𑀘𑀲𑀁𑀯𑀺𑀥𑀸𑀦𑀲𑀫𑀢𑁆𑀣𑀁 𑀧𑀭𑀺𑀡𑀸𑀬𑀓𑀭𑀢𑀦𑀁 𑀧𑀸𑀢𑀼𑀪𑀯𑀢𑀺. 𑀲𑁄 𑀭𑀜𑁆𑀜𑁄 𑀚𑁂𑀝𑁆𑀞𑀧𑀼𑀢𑁆𑀢𑁄𑀯 𑀳𑁄𑀢𑀺. 𑀧𑀓𑀢𑀺𑀬𑀸 𑀏𑀯 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀫𑁂𑀥𑀸𑀯𑀻, 𑀭𑀜𑁆𑀜𑁄 𑀧𑀼𑀜𑁆𑀜𑀸𑀦𑀼𑀪𑀸𑀯𑀁 𑀦𑀺𑀲𑁆𑀲𑀸𑀬 𑀧𑀦𑀲𑁆𑀲 𑀅𑀢𑁆𑀢𑀦𑁄 𑀓𑀫𑁆𑀫𑀸𑀦𑀼𑀪𑀸𑀯𑁂𑀦 𑀧𑀭𑀘𑀺𑀢𑁆𑀢𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺. 𑀬𑁂𑀦 𑀤𑁆𑀯𑀸𑀤𑀲𑀬𑁄𑀚𑀦𑀸𑀬 𑀭𑀸𑀚𑀧𑀭𑀺𑀲𑀸𑀬 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸 𑀭𑀜𑁆𑀜𑁄 𑀅𑀳𑀺𑀢𑁂 𑀳𑀺𑀢𑁂 𑀘 𑀯𑀯𑀢𑁆𑀣𑀧𑁂𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺. 𑀲𑁄𑀧𑀺 𑀢𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀁 𑀤𑀺𑀲𑁆𑀯𑀸 𑀢𑀼𑀝𑁆𑀞𑀳𑀤𑀬𑁄 𑀭𑀸𑀚𑀸𑀦𑀁 𑀲𑀩𑁆𑀩𑀓𑀺𑀘𑁆𑀘𑀸𑀦𑀼𑀲𑀸𑀲𑀦𑁂𑀦 𑀧𑀯𑀸𑀭𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀧𑀼𑀦 𑀘𑀧𑀭𑀁…𑀧𑁂… 𑀧𑀭𑀺𑀡𑀸𑀬𑀓𑀭𑀢𑀦𑀁 𑀧𑀸𑀢𑀼𑀪𑀯𑀢𑀻𑀢𑀺. 𑀢𑀢𑁆𑀣 𑀞𑀧𑁂𑀢𑀩𑁆𑀩𑀁 𑀞𑀧𑁂𑀢𑀼𑀦𑁆𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑀦𑁆𑀢𑀭𑁂 𑀞𑀧𑁂𑀢𑀩𑁆𑀩𑀁 𑀞𑀧𑁂𑀢𑀼𑀁.

𑁨𑁫𑁯. 𑀲𑀫𑀯𑁂𑀧𑀸𑀓𑀺𑀦𑀺𑀬𑀸𑀢𑀺𑀆𑀤𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑁨𑁬𑁦. 𑀓𑀝𑀕𑁆𑀕𑀳𑁂𑀦𑀸𑀢𑀺 𑀚𑀬𑀕𑁆𑀕𑀸𑀳𑁂𑀦. 𑀫𑀳𑀦𑁆𑀢𑀁 𑀪𑁄𑀕𑀓𑁆𑀔𑀦𑁆𑀥𑀦𑁆𑀢𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀲𑀢𑀲𑀳𑀲𑁆𑀲𑀸𑀦𑀺. 𑀓𑁂𑀯𑀮𑀸 𑀧𑀭𑀺𑀧𑀽𑀭𑀸 𑀧𑀡𑁆𑀟𑀺𑀢𑀪𑀽𑀫𑀻𑀢𑀺 𑀧𑀡𑁆𑀟𑀺𑀢𑁄 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀢𑁄 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀘𑁆𑀙𑀦𑁆𑀢𑁄 𑀓𑀼𑀮𑀭𑀽𑀧𑀪𑁄𑀕𑀲𑀫𑁆𑀧𑀢𑁆𑀢𑀺𑀬𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀢𑁆𑀣 𑀞𑀺𑀢𑁄 𑀢𑀻𑀡𑀺 𑀘 𑀲𑀼𑀘𑀭𑀺𑀢𑀸𑀦𑀺 𑀧𑀽𑀭𑁂𑀢𑁆𑀯𑀸 𑀧𑀼𑀦 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀅𑀬𑀁 𑀲𑀓𑀮𑀸 𑀧𑀭𑀺𑀧𑀼𑀡𑁆𑀡𑀸 𑀧𑀡𑁆𑀟𑀺𑀢𑀪𑀽𑀫𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀩𑀸𑀮𑀧𑀡𑁆𑀟𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑁂𑀯𑀤𑀽𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁧. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀤𑁂𑀯𑀤𑀽𑀢𑀲𑀼𑀢𑁆𑀢𑀁. 𑀢𑀢𑁆𑀣 𑀤𑁆𑀯𑁂 𑀅𑀕𑀸𑀭𑀸𑀢𑀺𑀆𑀤𑀺 𑀅𑀲𑁆𑀲𑀧𑀼𑀭𑀲𑀼𑀢𑁆𑀢𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯.

𑁨𑁬𑁨. 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸𑀢𑀺 𑀪𑀕𑀯𑀸 𑀓𑀢𑁆𑀣𑀘𑀺 𑀦𑀺𑀭𑀬𑀢𑁄 𑀧𑀝𑁆𑀞𑀸𑀬 𑀤𑁂𑀲𑀦𑀁 𑀤𑁂𑀯𑀮𑁄𑀓𑁂𑀦 𑀑𑀲𑀸𑀧𑁂𑀢𑀺, 𑀓𑀢𑁆𑀣𑀘𑀺 𑀤𑁂𑀯𑀮𑁄𑀓𑀢𑁄 𑀧𑀝𑁆𑀞𑀸𑀬 𑀦𑀺𑀭𑀬𑁂𑀦 𑀑𑀲𑀸𑀧𑁂𑀢𑀺. 𑀲𑀘𑁂 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀦𑀺𑀭𑀬𑀤𑀼𑀓𑁆𑀔𑀁 𑀏𑀓𑀤𑁂𑀲𑀢𑁄 𑀓𑀣𑁂𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀤𑀼𑀓𑁆𑀔𑀁 𑀧𑁂𑀢𑁆𑀢𑀺𑀯𑀺𑀲𑀬𑀤𑀼𑀓𑁆𑀔𑀁 𑀫𑀦𑀼𑀲𑁆𑀲𑀮𑁄𑀓𑀲𑀫𑁆𑀧𑀢𑁆𑀢𑀺𑀁 𑀏𑀓𑀤𑁂𑀲𑀢𑁄 𑀓𑀣𑁂𑀢𑀺, 𑀲𑀕𑁆𑀕𑀲𑀫𑁆𑀧𑀢𑁆𑀢𑀺𑀫𑁂𑀯 𑀯𑀺𑀢𑁆𑀣𑀸𑀭𑁂𑀢𑀺. 𑀲𑀘𑁂 𑀦𑀺𑀭𑀬𑀤𑀼𑀓𑁆𑀔𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀓𑀣𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀤𑁂𑀯𑀮𑁄𑀓𑀫𑀦𑀼𑀲𑁆𑀲𑀮𑁄𑀓𑁂𑀲𑀼 𑀲𑀫𑁆𑀧𑀢𑁆𑀢𑀺𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀧𑁂𑀢𑁆𑀢𑀺𑀯𑀺𑀲𑀬𑁂𑀲𑀼 𑀘 𑀤𑀼𑀓𑁆𑀔𑀁 𑀏𑀓𑀤𑁂𑀲𑀢𑁄 𑀓𑀣𑁂𑀢𑀺, 𑀦𑀺𑀭𑀬𑀤𑀼𑀓𑁆𑀔𑀫𑁂𑀯 𑀯𑀺𑀢𑁆𑀣𑀸𑀭𑁂𑀢𑀺. 𑀲𑁄 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀦𑀺𑀭𑀬𑀤𑀼𑀓𑁆𑀔𑀁 𑀯𑀺𑀢𑁆𑀣𑀸𑀭𑁂𑀢𑀼𑀓𑀸𑀫𑁄, 𑀢𑀲𑁆𑀫𑀸 𑀤𑁂𑀯𑀮𑁄𑀓𑀢𑁄 𑀧𑀝𑁆𑀞𑀸𑀬 𑀤𑁂𑀲𑀦𑀁 𑀦𑀺𑀭𑀬𑁂𑀦 𑀑𑀲𑀸𑀧𑁂𑀢𑀺. 𑀤𑁂𑀯𑀮𑁄𑀓𑀫𑀦𑀼𑀲𑁆𑀲𑀮𑁄𑀓𑀲𑀫𑁆𑀧𑀢𑁆𑀢𑀺𑀬𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀧𑁂𑀢𑁆𑀢𑀺𑀯𑀺𑀲𑀬𑀤𑀼𑀓𑁆𑀔𑀸𑀦𑀺 𑀘 𑀏𑀓𑀤𑁂𑀲𑀢𑁄 𑀓𑀣𑁂𑀢𑁆𑀯𑀸 𑀦𑀺𑀭𑀬𑀤𑀼𑀓𑁆𑀔𑀫𑁂𑀯 𑀯𑀺𑀢𑁆𑀣𑀸𑀭𑁂𑀦 𑀓𑀣𑁂𑀢𑀼𑀁 𑀢𑀫𑁂𑀦𑀁, 𑀪𑀺𑀓𑁆𑀔𑀯𑁂, 𑀦𑀺𑀭𑀬𑀧𑀸𑀮𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀏𑀓𑀘𑁆𑀘𑁂 𑀣𑁂𑀭𑀸 ‘‘𑀦𑀺𑀭𑀬𑀧𑀸𑀮𑀸 𑀦𑀸𑀫 𑀦𑀢𑁆𑀣𑀺, 𑀬𑀦𑁆𑀢𑀭𑀽𑀧𑀁 𑀯𑀺𑀬 𑀓𑀫𑁆𑀫𑀫𑁂𑀯 𑀓𑀸𑀭𑀡𑀁 𑀓𑀸𑀭𑁂𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑁂𑀲𑀁 𑀢𑀁 ‘‘𑀅𑀢𑁆𑀣𑀺 𑀦𑀺𑀭𑀬𑁂 𑀦𑀺𑀭𑀬𑀧𑀸𑀮𑀸𑀢𑀺, 𑀆𑀫𑀦𑁆𑀢𑀸, 𑀅𑀢𑁆𑀣𑀺 𑀘 𑀓𑀸𑀭𑀡𑀺𑀓𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 (𑀓𑀣𑀸. 𑁮𑁬𑁬) 𑀧𑀝𑀺𑀲𑁂𑀥𑀺𑀢𑀫𑁂𑀯. 𑀬𑀣𑀸 𑀳𑀺 𑀫𑀦𑀼𑀲𑁆𑀲𑀮𑁄𑀓𑁂 𑀓𑀫𑁆𑀫𑀓𑀸𑀭𑀡𑀓𑀸𑀭𑀓𑀸 𑀅𑀢𑁆𑀣𑀺, 𑀏𑀯𑀫𑁂𑀯 𑀦𑀺𑀭𑀬𑁂 𑀦𑀺𑀭𑀬𑀧𑀸𑀮𑀸 𑀅𑀢𑁆𑀣𑀻𑀢𑀺. 𑀬𑀫𑀲𑁆𑀲 𑀭𑀜𑁆𑀜𑁄𑀢𑀺 𑀬𑀫𑀭𑀸𑀚𑀸 𑀦𑀸𑀫 𑀯𑁂𑀫𑀸𑀦𑀺𑀓𑀧𑁂𑀢𑀭𑀸𑀚𑀸, 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀤𑀺𑀩𑁆𑀩𑀯𑀺𑀫𑀸𑀦𑁂 𑀤𑀺𑀩𑁆𑀩𑀓𑀧𑁆𑀧𑀭𑀼𑀓𑁆𑀔𑀤𑀺𑀩𑁆𑀩𑀉𑀬𑁆𑀬𑀸𑀦𑀤𑀺𑀩𑁆𑀩𑀦𑀸𑀝𑀓𑀸𑀤𑀺𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀢𑀺, 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀓𑀫𑁆𑀫𑀯𑀺𑀧𑀸𑀓𑀁, 𑀥𑀫𑁆𑀫𑀺𑀓𑁄 𑀭𑀸𑀚𑀸. 𑀦 𑀘𑁂𑀲 𑀏𑀓𑁄𑀯 𑀳𑁄𑀢𑀺, 𑀘𑀢𑀽𑀲𑀼 𑀧𑀦 𑀤𑁆𑀯𑀸𑀭𑁂𑀲𑀼 𑀘𑀢𑁆𑀢𑀸𑀭𑁄 𑀚𑀦𑀸 𑀳𑁄𑀦𑁆𑀢𑀺. 𑀦𑀸𑀤𑁆𑀤𑀲𑀦𑁆𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑁂 𑀧𑁂𑀲𑀺𑀢𑀲𑁆𑀲 𑀓𑀲𑁆𑀲𑀘𑀺 𑀤𑁂𑀯𑀤𑀽𑀢𑀲𑁆𑀲 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀏𑀯𑀁 𑀯𑀤𑀢𑀺. 𑀅𑀣 𑀦𑀁 𑀬𑀫𑁄 ‘‘𑀦𑀸𑀬𑀁 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀲𑀮𑁆𑀮𑀓𑁆𑀔𑁂𑀢𑀻’’𑀢𑀺 𑀜𑀢𑁆𑀯𑀸 𑀲𑀮𑁆𑀮𑀓𑁆𑀔𑀸𑀧𑁂𑀢𑀼𑀓𑀸𑀫𑁄 𑀅𑀫𑁆𑀪𑁄𑀢𑀺𑀆𑀤𑀺𑀫𑀸𑀳.

𑀚𑀸𑀢𑀺𑀥𑀫𑁆𑀫𑁄𑀢𑀺 𑀚𑀸𑀢𑀺𑀲𑀪𑀸𑀯𑁄, 𑀅𑀧𑀭𑀺𑀫𑀼𑀢𑁆𑀢𑁄 𑀚𑀸𑀢𑀺𑀬𑀸, 𑀚𑀸𑀢𑀺 𑀦𑀸𑀫 𑀫𑀬𑁆𑀳𑀁 𑀅𑀩𑁆𑀪𑀦𑁆𑀢𑀭𑁂𑀬𑁂𑀯 𑀅𑀢𑁆𑀣𑀻𑀢𑀺. 𑀧𑀭𑀢𑁄 𑀚𑀭𑀸𑀥𑀫𑁆𑀫𑁄𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁨𑁬𑁩. 𑀧𑀞𑀫𑀁 𑀤𑁂𑀯𑀤𑀽𑀢𑀁 𑀲𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸𑀢𑀺 𑀏𑀢𑁆𑀣 𑀤𑀳𑀭𑀓𑀼𑀫𑀸𑀭𑁄 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀢𑀺 𑀦𑀸𑀫 ‘‘𑀧𑀲𑁆𑀲𑀣, 𑀪𑁄, 𑀫𑀬𑁆𑀳𑀫𑁆𑀧𑀺 𑀢𑀼𑀫𑁆𑀳𑀸𑀓𑀁 𑀯𑀺𑀬 𑀳𑀢𑁆𑀣𑀧𑀸𑀤𑀸 𑀅𑀢𑁆𑀣𑀺, 𑀲𑀓𑁂 𑀧𑀦𑀫𑁆𑀳𑀺 𑀫𑀼𑀢𑁆𑀢𑀓𑀭𑀻𑀲𑁂 𑀧𑀮𑀺𑀧𑀦𑁆𑀦𑁄, 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀉𑀝𑁆𑀞𑀳𑀺𑀢𑁆𑀯𑀸 𑀦𑁆𑀳𑀸𑀬𑀺𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀅𑀳𑀁 𑀓𑀺𑀮𑀺𑀝𑁆𑀞𑀕𑀢𑁆𑀢𑁄𑀫𑁆𑀳𑀺, 𑀦𑁆𑀳𑀸𑀧𑁂𑀣 𑀫𑀦𑁆𑀢𑀺 𑀯𑀢𑁆𑀢𑀼𑀫𑁆𑀧𑀺 𑀦 𑀲𑀓𑁆𑀓𑁄𑀫𑀺, 𑀚𑀸𑀢𑀺𑀢𑁄𑀫𑁆𑀳𑀺 𑀅𑀧𑀭𑀺𑀫𑀼𑀢𑁆𑀢𑀢𑀸𑀬 𑀏𑀤𑀺𑀲𑁄 𑀚𑀸𑀢𑁄. 𑀦 𑀔𑁄 𑀧𑀦𑀸𑀳𑀫𑁂𑀯, 𑀢𑀼𑀫𑁆𑀳𑁂𑀧𑀺 𑀚𑀸𑀢𑀺𑀢𑁄 𑀅𑀧𑀭𑀺𑀫𑀼𑀢𑁆𑀢𑀸𑀯. 𑀬𑀣𑁂𑀯 𑀳𑀺 𑀫𑀬𑁆𑀳𑀁, 𑀏𑀯𑀁 𑀢𑀼𑀫𑁆𑀳𑀸𑀓𑀫𑁆𑀧𑀺 𑀚𑀸𑀢𑀺 𑀆𑀕𑀫𑀺𑀲𑁆𑀲𑀢𑀺, 𑀇𑀢𑀺 𑀢𑀲𑁆𑀲𑀸 𑀧𑀼𑀭𑁂 𑀆𑀕𑀫𑀦𑀸𑀯 𑀓𑀮𑁆𑀬𑀸𑀡𑀁 𑀓𑀭𑁄𑀣𑀸’’𑀢𑀺. 𑀢𑁂𑀦𑁂𑀲 𑀤𑁂𑀯𑀤𑀽𑀢𑁄 𑀦𑀸𑀫 𑀚𑀸𑀢𑁄, 𑀯𑀘𑀦𑀢𑁆𑀣𑁄 𑀧𑀦 𑀫𑀖𑀤𑁂𑀯𑀲𑀼𑀢𑁆𑀢𑁂 𑀯𑀼𑀢𑁆𑀢𑁄𑀯.

𑀤𑀼𑀢𑀺𑀬𑀁 𑀤𑁂𑀯𑀤𑀽𑀢𑀦𑁆𑀢𑀺 𑀏𑀢𑁆𑀣𑀸𑀧𑀺 𑀚𑀭𑀸𑀚𑀺𑀡𑁆𑀡𑀲𑀢𑁆𑀢𑁄 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀢𑀺 𑀦𑀸𑀫 𑁋 ‘‘𑀧𑀲𑁆𑀲𑀣, 𑀪𑁄, 𑀅𑀳𑀫𑁆𑀧𑀺 𑀢𑀼𑀫𑁆𑀳𑁂 𑀯𑀺𑀬 𑀢𑀭𑀼𑀡𑁄 𑀅𑀳𑁄𑀲𑀺𑀁 𑀊𑀭𑀼𑀩𑀮𑀩𑀸𑀳𑀼𑀩𑀮𑀚𑀯𑀦𑀲𑀫𑁆𑀧𑀦𑁆𑀦𑁄, 𑀢𑀲𑁆𑀲 𑀫𑁂 𑀢𑀸 𑀩𑀮𑀚𑀯𑀦𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑁆𑀢𑀭𑀳𑀺𑀢𑀸, 𑀯𑀺𑀚𑁆𑀚𑀫𑀸𑀦𑀸𑀧𑀺 𑀫𑁂 𑀳𑀢𑁆𑀣𑀧𑀸𑀤𑀸 𑀳𑀢𑁆𑀣𑀧𑀸𑀤𑀓𑀺𑀘𑁆𑀘𑀁 𑀦 𑀓𑀭𑁄𑀦𑁆𑀢𑀺, 𑀚𑀭𑀸𑀬𑀫𑁆𑀳𑀺 𑀅𑀧𑀭𑀺𑀫𑀼𑀢𑁆𑀢𑀢𑀸𑀬 𑀏𑀤𑀺𑀲𑁄 𑀚𑀸𑀢𑁄. 𑀦 𑀔𑁄 𑀧𑀦𑀸𑀳𑀫𑁂𑀯, 𑀢𑀼𑀫𑁆𑀳𑁂𑀧𑀺 𑀚𑀭𑀸𑀬 𑀅𑀧𑀭𑀺𑀫𑀼𑀢𑁆𑀢𑀸𑀯. 𑀬𑀣𑁂𑀯 𑀳𑀺 𑀫𑀬𑁆𑀳𑀁, 𑀏𑀯𑀁 𑀢𑀼𑀫𑁆𑀳𑀸𑀓𑀫𑁆𑀧𑀺 𑀚𑀭𑀸 𑀆𑀕𑀫𑀺𑀲𑁆𑀲𑀢𑀺, 𑀇𑀢𑀺 𑀢𑀲𑁆𑀲𑀸 𑀧𑀼𑀭𑁂 𑀆𑀕𑀫𑀦𑀸𑀯 𑀓𑀮𑁆𑀬𑀸𑀡𑀁 𑀓𑀭𑁄𑀣𑀸’’𑀢𑀺. 𑀢𑁂𑀦𑁂𑀲 𑀤𑁂𑀯𑀤𑀽𑀢𑁄 𑀦𑀸𑀫 𑀚𑀸𑀢𑁄.

𑀢𑀢𑀺𑀬𑀁 𑀤𑁂𑀯𑀤𑀽𑀢𑀦𑁆𑀢𑀺 𑀏𑀢𑁆𑀣𑀸𑀧𑀺 𑀕𑀺𑀮𑀸𑀦𑀲𑀢𑁆𑀢𑁄 𑀅𑀢𑁆𑀣𑀢𑁄 𑀏𑀯 𑀯𑀤𑀢𑀺 𑀦𑀸𑀫 𑁋 ‘‘𑀧𑀲𑁆𑀲𑀣, 𑀪𑁄, 𑀅𑀳𑀫𑁆𑀧𑀺 𑀢𑀼𑀫𑁆𑀳𑁂 𑀯𑀺𑀬 𑀦𑀺𑀭𑁄𑀕𑁄 𑀅𑀳𑁄𑀲𑀺𑀁, 𑀲𑁄𑀫𑁆𑀳𑀺 𑀏𑀢𑀭𑀳𑀺 𑀩𑁆𑀬𑀸𑀥𑀺𑀦𑀸 𑀅𑀪𑀺𑀳𑀢𑁄 𑀲𑀓𑁂 𑀫𑀼𑀢𑁆𑀢𑀓𑀭𑀻𑀲𑁂 𑀧𑀮𑀺𑀧𑀦𑁆𑀦𑁄, 𑀉𑀝𑁆𑀞𑀸𑀢𑀼𑀫𑁆𑀧𑀺 𑀦 𑀲𑀓𑁆𑀓𑁄𑀫𑀺, 𑀯𑀺𑀚𑁆𑀚𑀫𑀸𑀦𑀸𑀧𑀺 𑀫𑁂 𑀳𑀢𑁆𑀣𑀧𑀸𑀤𑀸 𑀳𑀢𑁆𑀣𑀧𑀸𑀤𑀓𑀺𑀘𑁆𑀘𑀁 𑀦 𑀓𑀭𑁄𑀦𑁆𑀢𑀺, 𑀩𑁆𑀬𑀸𑀥𑀺𑀢𑁄𑀫𑁆𑀳𑀺 𑀅𑀧𑀭𑀺𑀫𑀼𑀢𑁆𑀢𑀢𑀸𑀬 𑀏𑀤𑀺𑀲𑁄 𑀚𑀸𑀢𑁄. 𑀦 𑀔𑁄 𑀧𑀦𑀸𑀳𑀫𑁂𑀯, 𑀢𑀼𑀫𑁆𑀳𑁂𑀧𑀺 𑀩𑁆𑀬𑀸𑀥𑀺𑀢𑁄 𑀅𑀧𑀭𑀺𑀫𑀼𑀢𑁆𑀢𑀸𑀯. 𑀬𑀣𑁂𑀯 𑀳𑀺 𑀫𑀬𑁆𑀳𑀁, 𑀏𑀯𑀁 𑀢𑀼𑀫𑁆𑀳𑀸𑀓𑀁 𑀩𑁆𑀬𑀸𑀥𑀺 𑀆𑀕𑀫𑀺𑀲𑁆𑀲𑀢𑀺, 𑀇𑀢𑀺 𑀢𑀲𑁆𑀲 𑀧𑀼𑀭𑁂 𑀆𑀕𑀫𑀦𑀸𑀯 𑀓𑀮𑁆𑀬𑀸𑀡𑀁 𑀓𑀭𑁄𑀣𑀸’’𑀢𑀺. 𑀢𑁂𑀦𑁂𑀲 𑀤𑁂𑀯𑀤𑀽𑀢𑁄 𑀦𑀸𑀫 𑀚𑀸𑀢𑁄.

𑁨𑁬𑁫. 𑀘𑀢𑀼𑀢𑁆𑀣𑀁 𑀤𑁂𑀯𑀤𑀽𑀢𑀦𑁆𑀢𑀺 𑀏𑀢𑁆𑀣 𑀧𑀦 𑀓𑀫𑁆𑀫𑀓𑀸𑀭𑀡𑀸 𑀯𑀸 𑀤𑁂𑀯𑀤𑀽𑀢𑀸𑀢𑀺 𑀓𑀸𑀢𑀩𑁆𑀩𑀸 𑀓𑀫𑁆𑀫𑀓𑀸𑀭𑀡𑀺𑀓𑀸 𑀯𑀸. 𑀢𑀢𑁆𑀣 𑀧𑀦 𑀓𑀫𑁆𑀫𑀓𑀸𑀭𑀡𑀧𑀓𑁆𑀔𑁂 𑀩𑀸𑀢𑁆𑀢𑀺𑀁𑀲 𑀢𑀸𑀯 𑀓𑀫𑁆𑀫𑀓𑀸𑀭𑀡𑀸 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀦𑁆𑀢𑀺 𑀦𑀸𑀫 𑁋 ‘‘𑀫𑀬𑀁 𑀦𑀺𑀩𑁆𑀩𑀢𑁆𑀢𑀫𑀸𑀦𑀸 𑀦 𑀭𑀼𑀓𑁆𑀔𑁂 𑀯𑀸 𑀧𑀸𑀲𑀸𑀡𑁂 𑀯𑀸 𑀦𑀺𑀩𑁆𑀩𑀢𑁆𑀢𑀸𑀫, 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀲𑀭𑀻𑀭𑁂 𑀦𑀺𑀩𑁆𑀩𑀢𑁆𑀢𑀸𑀫, 𑀇𑀢𑀺 𑀅𑀫𑁆𑀳𑀸𑀓𑀁 𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁄𑀯 𑀓𑀮𑁆𑀬𑀸𑀡𑀁 𑀓𑀭𑁄𑀣𑀸’’𑀢𑀺. 𑀢𑁂𑀦𑁂𑀢𑁂 𑀤𑁂𑀯𑀤𑀽𑀢𑀸 𑀦𑀸𑀫 𑀚𑀸𑀢𑀸. 𑀓𑀫𑁆𑀫𑀓𑀸𑀭𑀡𑀺𑀓𑀸𑀧𑀺 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀦𑁆𑀢𑀺 𑀦𑀸𑀫 𑁋 ‘‘𑀫𑀬𑀁 𑀤𑁆𑀯𑀢𑁆𑀢𑀺𑀁𑀲 𑀓𑀫𑁆𑀫𑀓𑀸𑀭𑀡𑀸 𑀓𑀭𑁄𑀦𑁆𑀢𑀸 𑀦 𑀭𑀼𑀓𑁆𑀔𑀸𑀤𑀻𑀲𑀼 𑀓𑀭𑁄𑀫, 𑀢𑀼𑀫𑁆𑀳𑀸𑀤𑀺𑀲𑁂𑀲𑀼 𑀲𑀢𑁆𑀢𑁂𑀲𑀼𑀬𑁂𑀯 𑀓𑀭𑁄𑀫, 𑀇𑀢𑀺 𑀅𑀫𑁆𑀳𑀸𑀓𑀁 𑀢𑀼𑀫𑁆𑀳𑁂𑀲𑀼 𑀧𑀼𑀭𑁂 𑀓𑀫𑁆𑀫𑀓𑀸𑀭𑀡𑀸𑀓𑀭𑀡𑀢𑁄𑀯 𑀓𑀮𑁆𑀬𑀸𑀡𑀁 𑀓𑀭𑁄𑀣𑀸’’𑀢𑀺. 𑀢𑁂𑀦𑁂𑀢𑁂𑀧𑀺 𑀤𑁂𑀯𑀤𑀽𑀢𑀸 𑀦𑀸𑀫 𑀚𑀸𑀢𑀸.

𑁨𑁬𑁬. 𑀧𑀜𑁆𑀘𑀫𑀁 𑀤𑁂𑀯𑀤𑀽𑀢𑀦𑁆𑀢𑀺 𑀏𑀢𑁆𑀣 𑀫𑀢𑀓𑀲𑀢𑁆𑀢𑁄 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀢𑀺 𑀦𑀸𑀫 𑁋 ‘‘𑀧𑀲𑁆𑀲𑀣 𑀪𑁄 𑀫𑀁 𑀆𑀫𑀓𑀲𑀼𑀲𑀸𑀦𑁂 𑀙𑀟𑁆𑀟𑀺𑀢𑀁 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀪𑀸𑀯𑀁 𑀧𑀢𑁆𑀢𑀁, 𑀫𑀭𑀡𑀢𑁄𑀫𑁆𑀳𑀺 𑀅𑀧𑀭𑀺𑀫𑀼𑀢𑁆𑀢𑀢𑀸𑀬 𑀏𑀤𑀺𑀲𑁄 𑀚𑀸𑀢𑁄. 𑀦 𑀔𑁄 𑀧𑀦𑀸𑀳𑀫𑁂𑀯, 𑀢𑀼𑀫𑁆𑀳𑁂𑀧𑀺 𑀫𑀭𑀡𑀢𑁄 𑀅𑀧𑀭𑀺𑀫𑀼𑀢𑁆𑀢𑀸𑀯. 𑀬𑀣𑁂𑀯 𑀳𑀺 𑀫𑀬𑁆𑀳𑀁, 𑀏𑀯𑀁 𑀢𑀼𑀫𑁆𑀳𑀸𑀓𑀫𑁆𑀧𑀺 𑀫𑀭𑀡𑀁 𑀆𑀕𑀫𑀺𑀲𑁆𑀲𑀢𑀺, 𑀇𑀢𑀺 𑀢𑀲𑁆𑀲 𑀧𑀼𑀭𑁂 𑀆𑀕𑀫𑀦𑀸𑀯 𑀓𑀮𑁆𑀬𑀸𑀡𑀁 𑀓𑀭𑁄𑀣𑀸’’𑀢𑀺. 𑀢𑁂𑀦𑁂𑀲 𑀤𑁂𑀯𑀤𑀽𑀢𑁄 𑀦𑀸𑀫 𑀚𑀸𑀢𑁄.

𑀇𑀫𑀁 𑀧𑀦 𑀤𑁂𑀯𑀤𑀽𑀢𑀸𑀦𑀼𑀬𑁄𑀕𑀁 𑀓𑁄 𑀮𑀪𑀢𑀺, 𑀓𑁄 𑀦 𑀮𑀪𑀢𑀻𑀢𑀺? 𑀬𑁂𑀦 𑀢𑀸𑀯 𑀩𑀳𑀼𑀁 𑀧𑀸𑀧𑀁 𑀓𑀢𑀁, 𑀲𑁄 𑀕𑀦𑁆𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺𑀬𑁂𑀯. 𑀬𑁂𑀦 𑀧𑀦 𑀧𑀭𑀺𑀢𑁆𑀢𑀁 𑀧𑀸𑀧𑀓𑀫𑁆𑀫𑀁 𑀓𑀢𑀁, 𑀲𑁄 𑀮𑀪𑀢𑀺. 𑀬𑀣𑀸 𑀳𑀺 𑀲𑀪𑀡𑁆𑀟𑀁 𑀘𑁄𑀭𑀁 𑀕𑀳𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑀫𑁂𑀯 𑀓𑀭𑁄𑀦𑁆𑀢𑀺, 𑀦 𑀯𑀺𑀦𑀺𑀘𑁆𑀙𑀺𑀦𑀦𑁆𑀢𑀺. 𑀅𑀦𑀼𑀯𑀺𑀚𑁆𑀚𑀺𑀢𑁆𑀯𑀸 𑀕𑀳𑀺𑀢𑀁 𑀧𑀦 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀁 𑀦𑀬𑀦𑁆𑀢𑀺, 𑀲𑁄 𑀯𑀺𑀦𑀺𑀘𑁆𑀙𑀬𑀁 𑀮𑀪𑀢𑀺. 𑀏𑀯𑀁𑀲𑀫𑁆𑀧𑀤𑀫𑁂𑀢𑀁. 𑀧𑀭𑀺𑀢𑁆𑀢𑀧𑀸𑀧𑀓𑀫𑁆𑀫𑀸 𑀳𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑀧𑀺 𑀲𑀭𑀦𑁆𑀢𑀺, 𑀲𑀸𑀭𑀺𑀬𑀫𑀸𑀦𑀸𑀧𑀺 𑀲𑀭𑀦𑁆𑀢𑀺.

𑀢𑀢𑁆𑀣 𑀤𑀻𑀖𑀚𑀬𑀦𑁆𑀢𑀤𑀫𑀺𑀴𑁄 𑀦𑀸𑀫 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀲𑀭𑀺. 𑀲𑁄 𑀓𑀺𑀭 𑀤𑀫𑀺𑀴𑁄 𑀲𑀼𑀫𑀦𑀕𑀺𑀭𑀺𑀯𑀺𑀳𑀸𑀭𑁂 𑀆𑀓𑀸𑀲𑀘𑁂𑀢𑀺𑀬𑀁 𑀭𑀢𑁆𑀢𑀧𑀝𑁂𑀦 𑀧𑀽𑀚𑁂𑀲𑀺. 𑀅𑀣 𑀦𑀺𑀭𑀬𑁂 𑀉𑀲𑁆𑀲𑀤𑀲𑀸𑀫𑀦𑁆𑀢𑁂 𑀦𑀺𑀩𑁆𑀩𑀢𑁆𑀢𑁄 𑀅𑀕𑁆𑀕𑀺𑀚𑀸𑀮𑀲𑀤𑁆𑀤𑀁 𑀲𑀼𑀢𑁆𑀯𑀸𑀯 𑀅𑀢𑁆𑀢𑀦𑁄 𑀧𑀽𑀚𑀺𑀢𑀧𑀝𑀁 𑀅𑀦𑀼𑀲𑁆𑀲𑀭𑀺, 𑀲𑁄 𑀕𑀦𑁆𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁄. 𑀅𑀧𑀭𑁄𑀧𑀺 𑀧𑀼𑀢𑁆𑀢𑀲𑁆𑀲 𑀤𑀳𑀭𑀪𑀺𑀓𑁆𑀔𑀼𑀦𑁄 𑀔𑀮𑀺𑀲𑀸𑀝𑀓𑀁 𑀤𑁂𑀦𑁆𑀢𑁄 𑀧𑀸𑀤𑀫𑀽𑀮𑁂 𑀞𑀧𑁂𑀲𑀺, 𑀫𑀭𑀡𑀓𑀸𑀮𑀫𑁆𑀳𑀺 𑀧𑀝𑀧𑀝𑀸𑀢𑀺 𑀲𑀤𑁆𑀤𑁂 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺, 𑀲𑁄𑀧𑀺 𑀉𑀲𑁆𑀲𑀤𑀲𑀸𑀫𑀦𑁆𑀢𑁂 𑀦𑀺𑀩𑁆𑀩𑀢𑁆𑀢𑁄 𑀚𑀸𑀮𑀲𑀤𑁆𑀤𑁂𑀦 𑀢𑀁 𑀲𑀸𑀝𑀓𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁄. 𑀏𑀯𑀁 𑀢𑀸𑀯 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀓𑀼𑀲𑀮𑀁 𑀓𑀫𑁆𑀫𑀁 𑀲𑀭𑀺𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀢𑀻𑀢𑀺.

𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀅𑀲𑀭𑀦𑁆𑀢𑁂 𑀧𑀦 𑀧𑀜𑁆𑀘 𑀤𑁂𑀯𑀤𑀽𑀢𑁂 𑀧𑀼𑀘𑁆𑀙𑀢𑀺. 𑀢𑀢𑁆𑀣 𑀓𑁄𑀘𑀺 𑀧𑀞𑀫𑁂𑀦 𑀤𑁂𑀯𑀤𑀽𑀢𑁂𑀦 𑀲𑀭𑀢𑀺, 𑀓𑁄𑀘𑀺 𑀤𑀼𑀢𑀺𑀬𑀸𑀤𑀻𑀳𑀺. 𑀬𑁄 𑀧𑀦 𑀧𑀜𑁆𑀘𑀳𑀺𑀧𑀺 𑀦 𑀲𑀭𑀢𑀺, 𑀢𑀁 𑀬𑀫𑁄 𑀭𑀸𑀚𑀸 𑀲𑀬𑀁 𑀲𑀸𑀭𑁂𑀢𑀺. 𑀏𑀓𑁄 𑀓𑀺𑀭 𑀅𑀫𑀘𑁆𑀘𑁄 𑀲𑀼𑀫𑀦𑀧𑀼𑀧𑁆𑀨𑀓𑀼𑀫𑁆𑀪𑁂𑀦 𑀫𑀳𑀸𑀘𑁂𑀢𑀺𑀬𑀁 𑀧𑀽𑀚𑁂𑀢𑁆𑀯𑀸 𑀬𑀫𑀲𑁆𑀲 𑀧𑀢𑁆𑀢𑀺𑀁 𑀅𑀤𑀸𑀲𑀺, 𑀢𑀁 𑀅𑀓𑀼𑀲𑀮𑀓𑀫𑁆𑀫𑁂𑀦 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀁 𑀬𑀫𑀲𑁆𑀲 𑀲𑀦𑁆𑀢𑀺𑀓𑀁 𑀦𑀬𑀺𑀁𑀲𑀼. 𑀢𑀲𑁆𑀫𑀺𑀁 𑀧𑀜𑁆𑀘𑀳𑀺𑀧𑀺 𑀤𑁂𑀯𑀤𑀽𑀢𑁂𑀳𑀺 𑀓𑀼𑀲𑀮𑁂 𑀅𑀲𑀭𑀦𑁆𑀢𑁂 𑀬𑀫𑁄 𑀲𑀬𑀁 𑀑𑀮𑁄𑀓𑁂𑀦𑁆𑀢𑁄 𑀤𑀺𑀲𑁆𑀯𑀸 𑁋 ‘‘𑀦𑀦𑀼 𑀢𑁆𑀯𑀁 𑀫𑀳𑀸𑀘𑁂𑀢𑀺𑀬𑀁 𑀲𑀼𑀫𑀦𑀧𑀼𑀧𑁆𑀨𑀓𑀼𑀫𑁆𑀪𑁂𑀦 𑀧𑀽𑀚𑁂𑀢𑁆𑀯𑀸 𑀫𑀬𑁆𑀳𑀁 𑀧𑀢𑁆𑀢𑀺𑀁 𑀅𑀤𑀸𑀲𑀻’’𑀢𑀺 𑀲𑀸𑀭𑁂𑀲𑀺, 𑀲𑁄 𑀢𑀲𑁆𑀫𑀺𑀁 𑀓𑀸𑀮𑁂 𑀲𑀭𑀺𑀢𑁆𑀯𑀸 𑀤𑁂𑀯𑀮𑁄𑀓𑀁 𑀕𑀢𑁄. 𑀬𑀫𑁄 𑀧𑀦 𑀲𑀬𑀁 𑀑𑀮𑁄𑀓𑁂𑀢𑁆𑀯𑀸𑀧𑀺 𑀅𑀧𑀲𑁆𑀲𑀦𑁆𑀢𑁄 𑁋 ‘‘𑀫𑀳𑀸𑀤𑀼𑀓𑁆𑀔𑀁 𑀦𑀸𑀫 𑀅𑀦𑀼𑀪𑀯𑀺𑀲𑁆𑀲𑀢𑀺 𑀅𑀬𑀁 𑀲𑀢𑁆𑀢𑁄’’𑀢𑀺 𑀢𑀼𑀡𑁆𑀳𑀻 𑀳𑁄𑀢𑀺.

𑁨𑁬𑁭. 𑀫𑀳𑀸𑀦𑀺𑀭𑀬𑁂𑀢𑀺 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀫𑁆𑀳𑀺. 𑀓𑀺𑀁 𑀧𑀦𑀲𑁆𑀲 𑀧𑀫𑀸𑀡𑀁? 𑀅𑀩𑁆𑀪𑀦𑁆𑀢𑀭𑀁 𑀆𑀬𑀸𑀫𑁂𑀦 𑀘 𑀯𑀺𑀢𑁆𑀣𑀸𑀭𑁂𑀦 𑀘 𑀬𑁄𑀚𑀦𑀲𑀢𑀁 𑀳𑁄𑀢𑀺. 𑀮𑁄𑀳𑀧𑀣𑀯𑀻 𑀮𑁄𑀳𑀙𑀤𑀦𑀁 𑀏𑀓𑁂𑀓𑀸 𑀘 𑀪𑀺𑀢𑁆𑀢𑀺 𑀦𑀯𑀦𑀯𑀬𑁄𑀚𑀦𑀺𑀓𑀸 𑀳𑁄𑀢𑀺. 𑀧𑀼𑀭𑀢𑁆𑀣𑀺𑀫𑀸𑀬 𑀪𑀺𑀢𑁆𑀢𑀺𑀬𑀸 𑀅𑀘𑁆𑀘𑀺 𑀉𑀝𑁆𑀞𑀺𑀢𑀸 𑀧𑀘𑁆𑀙𑀺𑀫𑀁 𑀪𑀺𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀢𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀭𑀢𑁄 𑀬𑁄𑀚𑀦𑀲𑀢𑀁 𑀕𑀘𑁆𑀙𑀢𑀺. 𑀲𑁂𑀲𑀤𑀺𑀲𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀚𑀸𑀮𑀧𑀭𑀺𑀬𑀦𑁆𑀢𑀯𑀲𑁂𑀦 𑀆𑀬𑀸𑀫𑀯𑀺𑀢𑁆𑀣𑀸𑀭𑀢𑁄 𑀅𑀝𑁆𑀞𑀸𑀭𑀲𑀬𑁄𑀚𑀦𑀸𑀥𑀺𑀓𑀸𑀦𑀺 𑀢𑀻𑀡𑀺 𑀬𑁄𑀚𑀦𑀲𑀢𑀸𑀦𑀺, 𑀧𑀭𑀺𑀓𑁆𑀔𑁂𑀧𑀢𑁄 𑀧𑀦 𑀦𑀯𑀬𑁄𑀚𑀦𑀲𑀢𑀸𑀦𑀺 𑀘𑀢𑀼𑀧𑀡𑁆𑀡𑀸𑀲𑀬𑁄𑀚𑀦𑀸𑀦𑀺, 𑀲𑀫𑀦𑁆𑀢𑀸 𑀧𑀦 𑀉𑀲𑁆𑀲𑀤𑁂𑀳𑀺 𑀲𑀤𑁆𑀥𑀺𑀁 𑀤𑀲𑀬𑁄𑀚𑀦𑀲𑀳𑀲𑁆𑀲𑀁 𑀳𑁄𑀢𑀺.

𑁨𑁬𑁮. 𑀉𑀩𑁆𑀪𑀢𑀁 𑀢𑀸𑀤𑀺𑀲𑀫𑁂𑀯 𑀳𑁄𑀢𑀻𑀢𑀺 𑀏𑀢𑁆𑀣 𑀅𑀓𑁆𑀓𑀦𑁆𑀢𑀧𑀤𑀁 𑀬𑀸𑀯 𑀅𑀝𑁆𑀞𑀺𑀢𑁄 𑀤𑀴𑁆𑀳𑀁 𑀉𑀤𑁆𑀥𑀭𑀺𑀢𑀼𑀫𑁂𑀯 𑀦 𑀲𑀓𑁆𑀓𑀸. 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 𑀳𑁂𑀝𑁆𑀞𑀢𑁄 𑀧𑀝𑁆𑀞𑀸𑀬 𑀟𑀬𑁆𑀳𑀢𑀺, 𑀉𑀧𑀭𑀺𑀢𑁄 𑀧𑀝𑁆𑀞𑀸𑀬 𑀛𑀸𑀬𑀢𑀺, 𑀇𑀢𑀺 𑀅𑀓𑁆𑀓𑀫𑀦𑀓𑀸𑀮𑁂 𑀟𑀬𑁆𑀳𑀫𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀉𑀤𑁆𑀥𑀭𑀡𑀓𑀸𑀮𑁂 𑀢𑀸𑀤𑀺𑀲𑀫𑁂𑀯, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁. 𑀩𑀳𑀼𑀲𑀫𑁆𑀧𑀢𑁆𑀢𑁄𑀢𑀺 𑀩𑀳𑀽𑀦𑀺 𑀯𑀲𑁆𑀲𑀲𑀢𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑀫𑁆𑀧𑀢𑁆𑀢𑁄.

𑀓𑀲𑁆𑀫𑀸 𑀧𑀦𑁂𑀲 𑀦𑀭𑀓𑁄 𑀅𑀯𑀻𑀘𑀻𑀢𑀺 𑀲𑀗𑁆𑀔𑀁 𑀕𑀢𑁄𑀢𑀺. 𑀯𑀻𑀘𑀺 𑀦𑀸𑀫 𑀅𑀦𑁆𑀢𑀭𑀁 𑀯𑀼𑀘𑁆𑀘𑀢𑀺, 𑀢𑀢𑁆𑀣 𑀘 𑀅𑀕𑁆𑀕𑀺𑀚𑀸𑀮𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀯𑀸 𑀤𑀼𑀓𑁆𑀔𑀲𑁆𑀲 𑀯𑀸 𑀅𑀦𑁆𑀢𑀭𑀁 𑀦𑀢𑁆𑀣𑀺. 𑀢𑀲𑁆𑀫𑀸 𑀲𑁄 𑀅𑀯𑀻𑀘𑀻𑀢𑀺 𑀲𑀗𑁆𑀔𑀁 𑀕𑀢𑁄𑀢𑀺. 𑀢𑀲𑁆𑀲 𑀳𑀺 𑀧𑀼𑀭𑀢𑁆𑀣𑀺𑀫𑀪𑀺𑀢𑁆𑀢𑀺𑀢𑁄 𑀚𑀸𑀮𑀸 𑀉𑀝𑁆𑀞𑀺𑀢𑀸 𑀲𑀁𑀲𑀺𑀩𑁆𑀩𑀫𑀸𑀦𑀸 𑀬𑁄𑀚𑀦𑀲𑀢𑀁 𑀕𑀦𑁆𑀢𑁆𑀯𑀸 𑀧𑀘𑁆𑀙𑀺𑀫𑀪𑀺𑀢𑁆𑀢𑀺𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀭𑀢𑁄 𑀬𑁄𑀚𑀦𑀲𑀢𑀁 𑀕𑀘𑁆𑀙𑀢𑀺. 𑀲𑁂𑀲𑀤𑀺𑀲𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀇𑀫𑁂𑀲𑀁 𑀙𑀦𑁆𑀦𑀁 𑀚𑀸𑀮𑀸𑀦𑀁 𑀫𑀚𑁆𑀛𑁂 𑀦𑀺𑀩𑁆𑀩𑀢𑁆𑀢𑁄 𑀤𑁂𑀯𑀤𑀢𑁆𑀢𑁄, 𑀢𑀲𑁆𑀲 𑀬𑁄𑀚𑀦𑀲𑀢𑀧𑁆𑀧𑀫𑀸𑀡𑁄 𑀅𑀢𑁆𑀢𑀪𑀸𑀯𑁄, 𑀤𑁆𑀯𑁂 𑀧𑀸𑀤𑀸 𑀬𑀸𑀯 𑀕𑁄𑀧𑁆𑀨𑀓𑀸 𑀮𑁄𑀳𑀧𑀣𑀯𑀺𑀁 𑀧𑀯𑀺𑀝𑁆𑀞𑀸, 𑀤𑁆𑀯𑁂 𑀳𑀢𑁆𑀣𑀸 𑀬𑀸𑀯 𑀫𑀡𑀺𑀩𑀦𑁆𑀥𑀸 𑀮𑁄𑀳𑀪𑀺𑀢𑁆𑀢𑀺𑀬𑁄 𑀧𑀯𑀺𑀝𑁆𑀞𑀸, 𑀲𑀻𑀲𑀁 𑀬𑀸𑀯 𑀪𑀫𑀼𑀓𑀝𑁆𑀞𑀺𑀢𑁄 𑀮𑁄𑀳𑀙𑀤𑀦𑁂 𑀧𑀯𑀺𑀝𑁆𑀞𑀁, 𑀅𑀥𑁄𑀪𑀸𑀕𑁂𑀦 𑀏𑀓𑀁 𑀮𑁄𑀳𑀲𑀽𑀮𑀁 𑀧𑀯𑀺𑀲𑀺𑀢𑁆𑀯𑀸 𑀓𑀸𑀬𑀁 𑀯𑀺𑀦𑀺𑀯𑀺𑀚𑁆𑀛𑀦𑁆𑀢𑀁 𑀙𑀤𑀦𑁂 𑀧𑀯𑀺𑀝𑁆𑀞𑀁, 𑀧𑀸𑀘𑀻𑀦𑀪𑀺𑀢𑁆𑀢𑀺𑀢𑁄 𑀦𑀺𑀓𑁆𑀔𑀦𑁆𑀢𑀲𑀽𑀮𑀁 𑀳𑀤𑀬𑀁 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀘𑁆𑀙𑀺𑀫𑀪𑀺𑀢𑁆𑀢𑀺𑀁 𑀧𑀯𑀺𑀝𑁆𑀞𑀁, 𑀉𑀢𑁆𑀢𑀭𑀪𑀺𑀢𑁆𑀢𑀺𑀢𑁄 𑀦𑀺𑀓𑁆𑀔𑀦𑁆𑀢𑀲𑀽𑀮𑀁 𑀨𑀸𑀲𑀼𑀓𑀸 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀤𑀓𑁆𑀔𑀺𑀡𑀪𑀺𑀢𑁆𑀢𑀺𑀁 𑀧𑀯𑀺𑀝𑁆𑀞𑀁. 𑀦𑀺𑀘𑁆𑀘𑀮𑁂 𑀢𑀣𑀸𑀕𑀢𑀫𑁆𑀳𑀺 𑀅𑀧𑀭𑀤𑁆𑀥𑀢𑁆𑀢𑀸 𑀦𑀺𑀘𑁆𑀘𑀮𑁄𑀯 𑀳𑀼𑀢𑁆𑀯𑀸 𑀧𑀘𑁆𑀘𑀢𑀻𑀢𑀺 𑀓𑀫𑁆𑀫𑀲𑀭𑀺𑀓𑁆𑀔𑀢𑀸𑀬 𑀏𑀤𑀺𑀲𑁄 𑀚𑀸𑀢𑁄. 𑀏𑀯𑀁 𑀚𑀸𑀮𑀸𑀦𑀁 𑀦𑀺𑀭𑀦𑁆𑀢𑀭𑀢𑀸𑀬 𑀅𑀯𑀻𑀘𑀺 𑀦𑀸𑀫.

𑀅𑀩𑁆𑀪𑀦𑁆𑀢𑀭𑁂 𑀧𑀦𑀲𑁆𑀲 𑀬𑁄𑀚𑀦𑀲𑀢𑀺𑀓𑁂 𑀞𑀸𑀦𑁂 𑀦𑀸𑀴𑀺𑀬𑀁 𑀓𑁄𑀝𑁆𑀝𑁂𑀢𑁆𑀯𑀸 𑀧𑀽𑀭𑀺𑀢𑀧𑀺𑀝𑁆𑀞𑀁 𑀯𑀺𑀬 𑀲𑀢𑁆𑀢𑀸 𑀦𑀺𑀭𑀦𑁆𑀢𑀭𑀸, ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀢𑁆𑀢𑁄 𑀅𑀢𑁆𑀣𑀺, 𑀇𑀫𑀲𑁆𑀫𑀺𑀁 𑀦𑀢𑁆𑀣𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀕𑀘𑁆𑀙𑀦𑁆𑀢𑀸𑀦𑀁 𑀞𑀺𑀢𑀸𑀦𑀁 𑀦𑀺𑀲𑀺𑀦𑁆𑀦𑀸𑀦𑀁 𑀦𑀺𑀧𑀦𑁆𑀦𑀸𑀦𑀁 𑀅𑀦𑁆𑀢𑁄 𑀦𑀢𑁆𑀣𑀺, 𑀕𑀘𑁆𑀙𑀦𑁆𑀢𑁂 𑀯𑀸 𑀞𑀺𑀢𑁂 𑀯𑀸 𑀦𑀺𑀲𑀺𑀦𑁆𑀦𑁂 𑀯𑀸 𑀦𑀺𑀧𑀦𑁆𑀦𑁂 𑀯𑀸 𑀅𑀜𑁆𑀜𑀫𑀜𑁆𑀜𑀁 𑀦 𑀩𑀸𑀥𑀦𑁆𑀢𑀺. 𑀏𑀯𑀁 𑀲𑀢𑁆𑀢𑀸𑀦𑀁 𑀦𑀺𑀭𑀦𑁆𑀢𑀭𑀢𑀸𑀬 𑀅𑀯𑀻𑀘𑀺.

𑀓𑀸𑀬𑀤𑁆𑀯𑀸𑀭𑁂 𑀧𑀦 𑀙 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀦𑀺 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀏𑀓𑀁 𑀤𑀼𑀓𑁆𑀔𑀲𑀳𑀕𑀢𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀣𑀸 𑀚𑀺𑀯𑁆𑀳𑀕𑁆𑀕𑁂 𑀙 𑀫𑀥𑀼𑀩𑀺𑀦𑁆𑀤𑀽𑀦𑀺 𑀞𑀧𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀢𑀫𑁆𑀩𑀮𑁄𑀳𑀩𑀺𑀦𑁆𑀤𑀼𑀫𑁆𑀳𑀺 𑀞𑀧𑀺𑀢𑁂 𑀅𑀦𑀼𑀤𑀳𑀦𑀩𑀮𑀯𑀢𑀸𑀬 𑀢𑀤𑁂𑀯 𑀧𑀜𑁆𑀜𑀸𑀬𑀢𑀺, 𑀇𑀢𑀭𑀸𑀦𑀺 𑀅𑀩𑁆𑀩𑁄𑀳𑀸𑀭𑀺𑀓𑀸𑀦𑀺 𑀳𑁄𑀦𑁆𑀢𑀺, 𑀏𑀯𑀁 𑀅𑀦𑀼𑀤𑀳𑀦𑀩𑀮𑀯𑀢𑀸𑀬 𑀤𑀼𑀓𑁆𑀔𑀫𑁂𑀯𑁂𑀢𑁆𑀣 𑀦𑀺𑀭𑀦𑁆𑀢𑀭𑀁, 𑀇𑀢𑀭𑀸𑀦𑀺 𑀅𑀩𑁆𑀩𑁄𑀳𑀸𑀭𑀺𑀓𑀸𑀦𑀻𑀢𑀺. 𑀏𑀯𑀁 𑀤𑀼𑀓𑁆𑀔𑀲𑁆𑀲 𑀦𑀺𑀭𑀦𑁆𑀢𑀭𑀢𑀸𑀬 𑀅𑀯𑀻𑀘𑀺.

𑁨𑁬𑁯. 𑀫𑀳𑀦𑁆𑀢𑁄𑀢𑀺 𑀬𑁄𑀚𑀦𑀲𑀢𑀺𑀓𑁄. 𑀲𑁄 𑀢𑀢𑁆𑀣 𑀧𑀢𑀢𑀻𑀢𑀺 𑀏𑀓𑁄 𑀧𑀸𑀤𑁄 𑀫𑀳𑀸𑀦𑀺𑀭𑀬𑁂 𑀳𑁄𑀢𑀺, 𑀏𑀓𑁄 𑀕𑀽𑀣𑀦𑀺𑀭𑀬𑁂 𑀦𑀺𑀧𑀢𑀢𑀺. 𑀲𑀽𑀘𑀺𑀫𑀼𑀔𑀸𑀢𑀺 𑀲𑀽𑀘𑀺𑀲𑀤𑀺𑀲𑀫𑀼𑀔𑀸, 𑀢𑁂 𑀳𑀢𑁆𑀣𑀺𑀕𑀻𑀯𑀧𑁆𑀧𑀫𑀸𑀡𑀸 𑀏𑀓𑀤𑁄𑀡𑀺𑀓𑀦𑀸𑀯𑀸𑀧𑁆𑀧𑀫𑀸𑀡𑀸 𑀯𑀸 𑀳𑁄𑀦𑁆𑀢𑀺.

𑀓𑀼𑀓𑁆𑀓𑀼𑀮𑀦𑀺𑀭𑀬𑁄𑀢𑀺 𑀬𑁄𑀚𑀦𑀲𑀢𑀧𑁆𑀧𑀫𑀸𑀡𑁄𑀯 𑀅𑀦𑁆𑀢𑁄 𑀓𑀽𑀝𑀸𑀕𑀸𑀭𑀫𑀢𑁆𑀢𑀯𑀺𑀢𑀘𑁆𑀘𑀺𑀢𑀅𑀗𑁆𑀕𑀸𑀭𑀧𑀼𑀡𑁆𑀡𑁄 𑀆𑀤𑀺𑀢𑁆𑀢𑀙𑀸𑀭𑀺𑀓𑀦𑀺𑀭𑀬𑁄, 𑀬𑀢𑁆𑀣 𑀧𑀢𑀺𑀢𑀧𑀢𑀺𑀢𑀸 𑀓𑀼𑀤𑁆𑀭𑀽𑀲𑀓𑀭𑀸𑀲𑀺𑀫𑁆𑀳𑀺 𑀔𑀺𑀢𑁆𑀢𑀨𑀸𑀮𑀯𑀸𑀲𑀺𑀲𑀺𑀮𑀸𑀤𑀻𑀦𑀺 𑀯𑀺𑀬 𑀳𑁂𑀝𑁆𑀞𑀺𑀫𑀢𑀮𑀫𑁂𑀯 𑀕𑀡𑁆𑀳𑀦𑁆𑀢𑀺.

𑀆𑀭𑁄𑀧𑁂𑀦𑁆𑀢𑀻𑀢𑀺 𑀅𑀬𑀤𑀡𑁆𑀟𑁂𑀳𑀺 𑀧𑁄𑀣𑁂𑀦𑁆𑀢𑀸 𑀆𑀭𑁄𑀧𑁂𑀦𑁆𑀢𑀺. 𑀢𑁂𑀲𑀁 𑀆𑀭𑁄𑀳𑀦𑀓𑀸𑀮𑁂 𑀢𑁂 𑀓𑀡𑁆𑀝𑀓𑀸 𑀅𑀥𑁄𑀫𑀼𑀔𑀸 𑀳𑁄𑀦𑁆𑀢𑀺, 𑀑𑀭𑁄𑀳𑀦𑀓𑀸𑀮𑁂 𑀉𑀤𑁆𑀥𑀁𑀫𑀼𑀔𑀸.

𑀯𑀸𑀢𑁂𑀭𑀺𑀢𑀸𑀦𑀻𑀢𑀺 𑀓𑀫𑁆𑀫𑀫𑀬𑁂𑀦 𑀯𑀸𑀢𑁂𑀦 𑀘𑀮𑀺𑀢𑀸𑀦𑀺. 𑀳𑀢𑁆𑀣𑀫𑁆𑀧𑀺 𑀙𑀺𑀦𑁆𑀤𑀦𑁆𑀢𑀻𑀢𑀺 𑀨𑀮𑀓𑁂 𑀫𑀁𑀲𑀁 𑀯𑀺𑀬 𑀓𑁄𑀝𑁆𑀝𑀬𑀫𑀸𑀦𑀸𑀦𑀺 𑀙𑀺𑀦𑁆𑀤𑀦𑁆𑀢𑀺. 𑀲𑀘𑁂 𑀉𑀝𑁆𑀞𑀸𑀬 𑀧𑀮𑀸𑀬𑀢𑀺, 𑀅𑀬𑁄𑀧𑀸𑀓𑀸𑀭𑁄 𑀲𑀫𑀼𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀓𑁆𑀔𑀺𑀧𑀢𑀺, 𑀳𑁂𑀝𑁆𑀞𑀸 𑀔𑀼𑀭𑀥𑀸𑀭𑀸 𑀲𑀫𑀼𑀝𑁆𑀞𑀸𑀢𑀺.

𑀔𑀸𑀭𑁄𑀤𑀓𑀸 𑀦𑀤𑀻𑀢𑀺 𑀯𑁂𑀢𑀭𑀡𑀻 𑀦𑀸𑀫 𑀢𑀫𑁆𑀩𑀮𑁄𑀳𑀦𑀤𑀻. 𑀢𑀢𑁆𑀣 𑀅𑀬𑁄𑀫𑀬𑀸𑀦𑀺 𑀔𑀭𑀯𑀸𑀮𑀺𑀓-𑀧𑁄𑀓𑁆𑀔𑀭𑀧𑀢𑁆𑀢𑀸𑀦𑀺, 𑀳𑁂𑀝𑁆𑀞𑀸 𑀔𑀼𑀭𑀥𑀸𑀭𑀸 𑀉𑀪𑁄𑀲𑀼 𑀢𑀻𑀭𑁂𑀲𑀼 𑀯𑁂𑀢𑁆𑀢𑀮𑀢𑀸 𑀘 𑀓𑀼𑀲𑀢𑀺𑀡𑀸𑀦𑀺 𑀘. 𑀲𑁄 𑀢𑀢𑁆𑀣 𑀤𑀼𑀓𑁆𑀔𑀸 𑀢𑀺𑀩𑁆𑀩𑀸 𑀔𑀭𑀸𑀢𑀺 𑀲𑁄 𑀢𑀢𑁆𑀣 𑀉𑀤𑁆𑀥𑀜𑁆𑀘 𑀅𑀥𑁄 𑀘 𑀯𑀼𑀬𑁆𑀳𑀫𑀸𑀦𑁄 𑀧𑁄𑀓𑁆𑀔𑀭𑀧𑀢𑁆𑀢𑁂𑀲𑀼 𑀙𑀺𑀚𑁆𑀚𑀢𑀺. 𑀲𑀺𑀗𑁆𑀖𑀸𑀝𑀓𑀲𑀡𑁆𑀞𑀸𑀦𑀸𑀬 𑀔𑀭𑀯𑀸𑀮𑀺𑀓𑀸𑀬 𑀓𑀡𑁆𑀝𑀓𑁂𑀳𑀺 𑀯𑀺𑀚𑁆𑀛𑀺𑀬𑀢𑀺, 𑀔𑀼𑀭𑀥𑀸𑀭𑀸𑀳𑀺 𑀨𑀸𑀮𑀺𑀬𑀢𑀺, 𑀉𑀪𑁄𑀲𑀼 𑀢𑀻𑀭𑁂𑀲𑀼 𑀓𑀼𑀲𑀢𑀺𑀡𑁂𑀳𑀺 𑀯𑀺𑀮𑁂𑀔𑀢𑀺, 𑀯𑁂𑀢𑁆𑀢𑀮𑀢𑀸𑀳𑀺 𑀆𑀓𑀟𑁆𑀠𑀺𑀬𑀢𑀺, 𑀢𑀺𑀓𑁆𑀔𑀲𑀢𑁆𑀢𑀻𑀳𑀺 𑀨𑀸𑀮𑀺𑀬𑀢𑀺.

𑁨𑁭𑁦. 𑀢𑀢𑁆𑀢𑁂𑀦 𑀅𑀬𑁄𑀲𑀗𑁆𑀓𑀼𑀦𑀸𑀢𑀺 𑀢𑁂𑀦 𑀚𑀺𑀕𑀘𑁆𑀙𑀺𑀢𑁄𑀫𑁆𑀳𑀻𑀢𑀺 𑀯𑀼𑀢𑁆𑀢𑁂 𑀫𑀳𑀦𑁆𑀢𑀁 𑀮𑁄𑀳𑀧𑀘𑁆𑀙𑀺𑀁 𑀮𑁄𑀳𑀕𑀼𑀴𑀸𑀦𑀁 𑀧𑀽𑀭𑁂𑀢𑁆𑀯𑀸 𑀢𑀁 𑀉𑀧𑀕𑀘𑁆𑀙𑀦𑁆𑀢𑀺, 𑀲𑁄 𑀮𑁄𑀳𑀕𑀼𑀴𑀪𑀸𑀯𑀁 𑀜𑀢𑁆𑀯𑀸 𑀤𑀦𑁆𑀢𑁂 𑀲𑀫𑁆𑀨𑀼𑀲𑁂𑀢𑀺, 𑀅𑀣𑀲𑁆𑀲 𑀢𑁂 𑀢𑀢𑁆𑀢𑁂𑀦 𑀅𑀬𑁄𑀲𑀗𑁆𑀓𑀼𑀦𑀸 𑀫𑀼𑀔𑀁 𑀯𑀺𑀯𑀭𑀦𑁆𑀢𑀺, 𑀢𑀫𑁆𑀩𑀮𑁄𑀳𑀥𑀸𑀭𑁂𑀳𑀺 𑀫𑀳𑀦𑁆𑀢𑁂𑀦 𑀮𑁄𑀳𑀓𑀝𑀸𑀳𑁂𑀦 𑀢𑀫𑁆𑀩𑀮𑁄𑀳𑀁 𑀉𑀧𑀦𑁂𑀢𑁆𑀯𑀸 𑀏𑀯𑀫𑁂𑀯𑀁 𑀓𑀭𑁄𑀦𑁆𑀢𑀺. 𑀧𑀼𑀦 𑀫𑀳𑀸𑀦𑀺𑀭𑀬𑁂𑀢𑀺 𑀏𑀯𑀁 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀢𑀫𑁆𑀩𑀮𑁄𑀳𑀧𑀸𑀦𑀸 𑀢𑀫𑁆𑀩𑀮𑁄𑀳𑀧𑀸𑀦𑀢𑁄 𑀧𑀝𑁆𑀞𑀸𑀬 𑀧𑀼𑀦 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀸𑀤𑀻𑀦𑀺 𑀓𑀸𑀭𑁂𑀢𑁆𑀯𑀸 𑀫𑀳𑀸𑀦𑀺𑀭𑀬𑁂 𑀧𑀓𑁆𑀔𑀺𑀧𑀦𑁆𑀢𑀺. 𑀢𑀢𑁆𑀣 𑀓𑁄𑀘𑀺 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑁂𑀦𑁂𑀯 𑀫𑀼𑀘𑁆𑀘𑀢𑀺, 𑀓𑁄𑀘𑀺 𑀤𑀼𑀢𑀺𑀬𑁂𑀦, 𑀓𑁄𑀘𑀺 𑀢𑀢𑀺𑀬𑁂𑀦, 𑀓𑁄𑀘𑀺 𑀢𑀫𑁆𑀩𑀮𑁄𑀳𑀧𑀸𑀦𑁂𑀦 𑀫𑀼𑀘𑁆𑀘𑀢𑀺, 𑀓𑀫𑁆𑀫𑁂 𑀧𑀦 𑀅𑀧𑀭𑀺𑀓𑁆𑀔𑀻𑀡𑁂 𑀧𑀼𑀦 𑀫𑀳𑀸𑀦𑀺𑀭𑀬𑁂 𑀧𑀓𑁆𑀔𑀺𑀧𑀦𑁆𑀢𑀺.

𑀇𑀤𑀁 𑀧𑀦 𑀲𑀼𑀢𑁆𑀢𑀁 𑀕𑀡𑁆𑀳𑀦𑁆𑀢𑁄 𑀏𑀓𑁄 𑀤𑀳𑀭𑀪𑀺𑀓𑁆𑀔𑀼, 𑁋 ‘‘𑀪𑀦𑁆𑀢𑁂, 𑀏𑀢𑁆𑀢𑀓𑀁 𑀤𑀼𑀓𑁆𑀔𑀫𑀦𑀼𑀪𑀯𑀺𑀢𑀲𑀢𑁆𑀢𑀁 𑀧𑀼𑀦𑀧𑀺 𑀫𑀳𑀸𑀦𑀺𑀭𑀬𑁂 𑀧𑀓𑁆𑀔𑀺𑀧𑀦𑁆𑀢𑀻’’𑀢𑀺 𑀆𑀳. 𑀆𑀫, 𑀆𑀯𑀼𑀲𑁄, 𑀓𑀫𑁆𑀫𑁂 𑀅𑀧𑀭𑀺𑀓𑁆𑀔𑀻𑀡𑁂 𑀧𑀼𑀦𑀧𑁆𑀧𑀼𑀦𑀁 𑀏𑀯𑀁 𑀓𑀭𑁄𑀦𑁆𑀢𑀻𑀢𑀺. 𑀢𑀺𑀝𑁆𑀞𑀢𑀼, 𑀪𑀦𑁆𑀢𑁂, 𑀉𑀤𑁆𑀤𑁂𑀲𑁄, 𑀓𑀫𑁆𑀫𑀝𑁆𑀞𑀸𑀦𑀫𑁂𑀯 𑀓𑀣𑁂𑀣𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀸𑀧𑁂𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀆𑀕𑀫𑁆𑀫 𑀉𑀤𑁆𑀤𑁂𑀲𑀁 𑀅𑀕𑁆𑀕𑀳𑁂𑀲𑀺. 𑀅𑀜𑁆𑀜𑁂𑀲𑀫𑁆𑀧𑀺 𑀇𑀫𑀲𑁆𑀫𑀺𑀁 𑀧𑀤𑁂𑀲𑁂 𑀉𑀤𑁆𑀤𑁂𑀲𑀁 𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸𑀦𑀁 𑀕𑀡𑀦𑀸 𑀦𑀢𑁆𑀣𑀺. 𑀲𑀩𑁆𑀩𑀩𑀼𑀤𑁆𑀥𑀸𑀦𑀜𑁆𑀘𑁂𑀢𑀁 𑀲𑀼𑀢𑁆𑀢𑀁 𑀅𑀯𑀺𑀚𑀳𑀺𑀢𑀫𑁂𑀯 𑀳𑁄𑀢𑀺.

𑁨𑁭𑁧. 𑀳𑀻𑀦𑀓𑀸𑀬𑀽𑀧𑀕𑀸𑀢𑀺 𑀳𑀻𑀦𑀓𑀸𑀬𑀁 𑀉𑀧𑀕𑀢𑀸 𑀳𑀼𑀢𑁆𑀯𑀸. 𑀉𑀧𑀸𑀤𑀸𑀦𑁂𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀕𑀳𑀡𑁂. 𑀚𑀸𑀢𑀺𑀫𑀭𑀡𑀲𑀫𑁆𑀪𑀯𑁂𑀢𑀺 𑀚𑀸𑀢𑀺𑀬𑀸 𑀘 𑀫𑀭𑀡𑀲𑁆𑀲 𑀘 𑀓𑀸𑀭𑀡𑀪𑀽𑀢𑁂. 𑀅𑀦𑀼𑀧𑀸𑀤𑀸𑀢𑀺 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀅𑀦𑀼𑀧𑀸𑀤𑀺𑀬𑀺𑀢𑁆𑀯𑀸. 𑀚𑀸𑀢𑀺𑀫𑀭𑀡𑀲𑀗𑁆𑀔𑀬𑁂𑀢𑀺 𑀚𑀸𑀢𑀺𑀫𑀭𑀡𑀲𑀗𑁆𑀔𑀬𑀲𑀗𑁆𑀔𑀸𑀢𑁂 𑀦𑀺𑀩𑁆𑀩𑀸𑀦𑁂 𑀯𑀺𑀫𑀼𑀘𑁆𑀘𑀦𑁆𑀢𑀺.

𑀤𑀺𑀝𑁆𑀞𑀥𑀫𑁆𑀫𑀸𑀪𑀺𑀦𑀺𑀩𑁆𑀩𑀼𑀢𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑁂 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀲𑀩𑁆𑀩𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀼𑀢𑀸. 𑀲𑀩𑁆𑀩𑀤𑀼𑀓𑁆𑀔𑀁 𑀉𑀧𑀘𑁆𑀘𑀕𑀼𑀦𑁆𑀢𑀺 𑀲𑀩𑁆𑀩𑀤𑀼𑀓𑁆𑀔𑀸𑀢𑀺𑀓𑁆𑀓𑀦𑁆𑀢𑀸 𑀦𑀸𑀫 𑀳𑁄𑀦𑁆𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀤𑁂𑀯𑀤𑀽𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀯𑀺𑀪𑀗𑁆𑀕𑀯𑀕𑁆𑀕𑁄

𑁧. 𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭𑁨. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀁. 𑀢𑀢𑁆𑀣 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲𑀸𑀢𑀺 𑀯𑀺𑀧𑀲𑁆𑀲𑀦𑀸𑀦𑀼𑀬𑁄𑀕𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀪𑀤𑁆𑀤𑀓𑀲𑁆𑀲 𑀏𑀓𑀭𑀢𑁆𑀢𑀲𑁆𑀲. 𑀉𑀤𑁆𑀤𑁂𑀲𑀦𑁆𑀢𑀺 𑀫𑀸𑀢𑀺𑀓𑀁. 𑀯𑀺𑀪𑀗𑁆𑀕𑀦𑁆𑀢𑀺 𑀯𑀺𑀢𑁆𑀣𑀸𑀭𑀪𑀸𑀚𑀦𑀻𑀬𑀁.

𑀅𑀢𑀻𑀢𑀦𑁆𑀢𑀺 𑀅𑀢𑀻𑀢𑁂 𑀧𑀜𑁆𑀘𑀓𑁆𑀔𑀦𑁆𑀥𑁂. 𑀦𑀸𑀦𑁆𑀯𑀸𑀕𑀫𑁂𑀬𑁆𑀬𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀦𑀸𑀦𑀼𑀕𑀘𑁆𑀙𑁂𑀬𑁆𑀬. 𑀦𑀧𑁆𑀧𑀝𑀺𑀓𑀗𑁆𑀔𑁂𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀦 𑀧𑀢𑁆𑀣𑁂𑀬𑁆𑀬. 𑀬𑀤𑀢𑀻𑀢𑀦𑁆𑀢𑀺 𑀇𑀤𑀫𑁂𑀢𑁆𑀣 𑀓𑀸𑀭𑀡𑀯𑀘𑀦𑀁. 𑀬𑀲𑁆𑀫𑀸 𑀬𑀁 𑀅𑀢𑀻𑀢𑀁, 𑀢𑀁 𑀧𑀳𑀻𑀦𑀁 𑀦𑀺𑀭𑀼𑀤𑁆𑀥𑀁 𑀅𑀢𑁆𑀣𑀗𑁆𑀕𑀢𑀁, 𑀢𑀲𑁆𑀫𑀸 𑀢𑀁 𑀧𑀼𑀦 𑀦𑀸𑀦𑀼𑀕𑀘𑁆𑀙𑁂𑀬𑁆𑀬. 𑀬𑀲𑁆𑀫𑀸 𑀘 𑀬𑀁 𑀅𑀦𑀸𑀕𑀢𑀁, 𑀢𑀁 𑀅𑀧𑁆𑀧𑀢𑁆𑀢𑀁 𑀅𑀚𑀸𑀢𑀁 𑀅𑀦𑀺𑀩𑁆𑀩𑀢𑁆𑀢𑀁, 𑀢𑀲𑁆𑀫𑀸 𑀢𑀫𑁆𑀧𑀺 𑀦 𑀧𑀢𑁆𑀣𑁂𑀬𑁆𑀬.

𑀢𑀢𑁆𑀣 𑀢𑀢𑁆𑀣𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀧𑀺 𑀥𑀫𑁆𑀫𑀁 𑀬𑀢𑁆𑀣 𑀬𑀢𑁆𑀣𑁂𑀯 𑀉𑀧𑁆𑀧𑀦𑁆𑀦𑁄, 𑀢𑀢𑁆𑀣 𑀢𑀢𑁆𑀣𑁂𑀯 𑀘 𑀦𑀁 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀳𑀺 𑀲𑀢𑁆𑀢𑀳𑀺 𑀅𑀦𑀼𑀧𑀲𑁆𑀲𑀦𑀸𑀳𑀺 𑀬𑁄 𑀯𑀺𑀧𑀲𑁆𑀲𑀢𑀺 𑀅𑀭𑀜𑁆𑀜𑀸𑀤𑀻𑀲𑀼 𑀯𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀯𑀺𑀧𑀲𑁆𑀲𑀢𑀺. 𑀅𑀲𑀁𑀳𑀻𑀭𑀁 𑀅𑀲𑀁𑀓𑀼𑀧𑁆𑀧𑀦𑁆𑀢𑀺 𑀇𑀤𑀁 𑀯𑀺𑀧𑀲𑁆𑀲𑀦𑀸𑀧𑀝𑀺𑀯𑀺𑀧𑀲𑁆𑀲𑀦𑀸𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀯𑀺𑀧𑀲𑁆𑀲𑀦𑀸 𑀳𑀺 𑀭𑀸𑀕𑀸𑀤𑀻𑀳𑀺 𑀦 𑀲𑀁𑀳𑀻𑀭𑀢𑀺 𑀦 𑀲𑀁𑀓𑀼𑀧𑁆𑀧𑀢𑀻𑀢𑀺 𑀅𑀲𑀁𑀳𑀻𑀭𑀁 𑀅𑀲𑀁𑀓𑀼𑀧𑁆𑀧𑀁, 𑀢𑀁 𑀅𑀦𑀼𑀩𑁆𑀭𑀽𑀳𑀬𑁂 𑀯𑀟𑁆𑀠𑁂𑀬𑁆𑀬, 𑀧𑀝𑀺𑀯𑀺𑀧𑀲𑁆𑀲𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀦𑀺𑀩𑁆𑀩𑀸𑀦𑀁 𑀭𑀸𑀕𑀸𑀤𑀻𑀳𑀺 𑀦 𑀲𑀁𑀳𑀻𑀭𑀢𑀺 𑀦 𑀲𑀁𑀓𑀼𑀧𑁆𑀧𑀢𑀻𑀢𑀺 𑀅𑀲𑀁𑀳𑀻𑀭𑀁 𑀅𑀲𑀁𑀓𑀼𑀧𑁆𑀧𑀁. 𑀢𑀁 𑀯𑀺𑀤𑁆𑀯𑀸 𑀧𑀡𑁆𑀟𑀺𑀢𑁄 𑀪𑀺𑀓𑁆𑀔𑀼 𑀅𑀦𑀼𑀩𑁆𑀭𑀽𑀳𑀬𑁂, 𑀧𑀼𑀦𑀧𑁆𑀧𑀼𑀦𑀁 𑀢𑀤𑀸𑀭𑀫𑁆𑀫𑀡𑀁 𑀢𑀁 𑀢𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀦𑁆𑀢𑁄 𑀯𑀟𑁆𑀠𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀢𑀲𑁆𑀲 𑀧𑀦 𑀅𑀦𑀼𑀩𑁆𑀭𑀽𑀳𑀦𑁆𑀢𑀲𑁆𑀲 𑀅𑀢𑁆𑀣𑀸𑀬 𑁋 𑀅𑀚𑁆𑀚𑁂𑀯 𑀓𑀺𑀘𑁆𑀘𑀫𑀸𑀢𑀧𑁆𑀧𑀦𑁆𑀢𑀺 𑀓𑀺𑀮𑁂𑀲𑀸𑀦𑀁 𑀆𑀢𑀸𑀧𑀦𑀧𑀭𑀺𑀢𑀸𑀧𑀦𑁂𑀦 𑀆𑀢𑀧𑁆𑀧𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀯𑀻𑀭𑀺𑀬𑀁 𑀅𑀚𑁆𑀚𑁂𑀯 𑀓𑀸𑀢𑀩𑁆𑀩𑀁. 𑀓𑁄 𑀚𑀜𑁆𑀜𑀸 𑀫𑀭𑀡𑀁 𑀲𑀼𑀯𑁂𑀢𑀺 𑀲𑁆𑀯𑁂 𑀚𑀻𑀯𑀺𑀢𑀁 𑀯𑀸 𑀫𑀭𑀡𑀁 𑀯𑀸 𑀓𑁄 𑀚𑀸𑀦𑀸𑀢𑀺. 𑀅𑀚𑁆𑀚𑁂𑀯 𑀤𑀸𑀦𑀁 𑀯𑀸 𑀤𑀲𑁆𑀲𑀸𑀫𑀺, 𑀲𑀻𑀮𑀁 𑀯𑀸 𑀭𑀓𑁆𑀔𑀺𑀲𑁆𑀲𑀸𑀫𑀺, 𑀅𑀜𑁆𑀜𑀢𑀭𑀁 𑀯𑀸 𑀧𑀦 𑀓𑀼𑀲𑀮𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀳𑀺 ‘‘𑀅𑀚𑁆𑀚 𑀢𑀸𑀯 𑀧𑀧𑀜𑁆𑀘𑁄 𑀅𑀢𑁆𑀣𑀺, 𑀲𑁆𑀯𑁂 𑀯𑀸 𑀧𑀼𑀦𑀤𑀺𑀯𑀲𑁂 𑀯𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀅𑀚𑁆𑀚𑁂𑀯 𑀓𑀭𑀺𑀲𑁆𑀲𑀸𑀫𑀻𑀢𑀺 𑀏𑀯𑀁 𑀯𑀻𑀭𑀺𑀬𑀁 𑀓𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀫𑀳𑀸𑀲𑁂𑀦𑁂𑀦𑀸𑀢𑀺 𑀅𑀕𑁆𑀕𑀺𑀯𑀺𑀲𑀲𑀢𑁆𑀣𑀸𑀤𑀻𑀦𑀺 𑀅𑀦𑁂𑀓𑀸𑀦𑀺 𑀫𑀭𑀡𑀓𑀸𑀭𑀡𑀸𑀦𑀺 𑀢𑀲𑁆𑀲 𑀲𑁂𑀦𑀸, 𑀢𑀸𑀬 𑀫𑀳𑀢𑀺𑀬𑀸 𑀲𑁂𑀦𑀸𑀬 𑀯𑀲𑁂𑀦 𑀫𑀳𑀸𑀲𑁂𑀦𑁂𑀦 𑀏𑀯𑀭𑀽𑀧𑁂𑀦 𑀫𑀘𑁆𑀘𑀼𑀦𑀸 𑀲𑀤𑁆𑀥𑀺𑀁 ‘‘𑀓𑀢𑀺𑀧𑀸𑀳𑀁 𑀢𑀸𑀯 𑀆𑀕𑀫𑁂𑀳𑀺 𑀬𑀸𑀯𑀸𑀳𑀁 𑀩𑀼𑀤𑁆𑀥𑀧𑀽𑀚𑀸𑀤𑀺𑀁 𑀅𑀢𑁆𑀢𑀦𑁄 𑀅𑀯𑀲𑁆𑀲𑀬𑀓𑀫𑁆𑀫𑀁 𑀓𑀭𑁄𑀫𑀻’’𑀢𑀺. 𑀏𑀯𑀁 𑀫𑀺𑀢𑁆𑀢𑀲𑀦𑁆𑀣𑀯𑀸𑀓𑀸𑀭𑀲𑀗𑁆𑀔𑀸𑀢𑁄 𑀯𑀸, ‘‘𑀇𑀤𑀁 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀕𑀳𑁂𑀢𑁆𑀯𑀸 𑀓𑀢𑀺𑀧𑀸𑀳𑀁 𑀆𑀕𑀫𑁂𑀳𑀻’’𑀢𑀺 𑀏𑀯𑀁 𑀮𑀜𑁆𑀚𑀸𑀦𑀼𑀧𑁆𑀧𑀤𑀸𑀦𑀲𑀗𑁆𑀔𑀸𑀢𑁄 𑀯𑀸, ‘‘𑀇𑀫𑀺𑀦𑀸𑀳𑀁 𑀩𑀮𑀭𑀸𑀲𑀺𑀦𑀸 𑀧𑀝𑀺𑀩𑀸𑀳𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀩𑀮𑀭𑀸𑀲𑀺𑀲𑀗𑁆𑀔𑀸𑀢𑁄 𑀯𑀸 𑀲𑀗𑁆𑀕𑀭𑁄 𑀦𑀢𑁆𑀣𑀺. 𑀲𑀗𑁆𑀕𑀭𑁄𑀢𑀺 𑀳𑀺 𑀫𑀺𑀢𑁆𑀢𑀲𑀦𑁆𑀣𑀯𑀸𑀓𑀸𑀭𑀮𑀜𑁆𑀚𑀸𑀦𑀼𑀧𑁆𑀧𑀤𑀸𑀦𑀩𑀮𑀭𑀸𑀲𑀻𑀦𑀁 𑀦𑀸𑀫𑀁, 𑀢𑀲𑁆𑀫𑀸 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄.

𑀅𑀢𑀦𑁆𑀤𑀺𑀢𑀦𑁆𑀢𑀺 𑀅𑀦𑀮𑀲𑀁 𑀉𑀝𑁆𑀞𑀸𑀳𑀓𑀁. 𑀏𑀯𑀁 𑀧𑀝𑀺𑀧𑀦𑁆𑀦𑀢𑁆𑀢𑀸 𑀪𑀤𑁆𑀤𑁄 𑀏𑀓𑀭𑀢𑁆𑀢𑁄 𑀅𑀲𑁆𑀲𑀸𑀢𑀺 𑀪𑀤𑁆𑀤𑁂𑀓𑀭𑀢𑁆𑀢𑁄. 𑀇𑀢𑀺 𑀢𑀁 𑀏𑀯𑀁 𑀧𑀝𑀺𑀧𑀦𑁆𑀦𑀧𑀼𑀕𑁆𑀕𑀮𑀁 ‘‘𑀪𑀤𑁆𑀤𑁂𑀓𑀭𑀢𑁆𑀢𑁄 𑀅𑀬’’𑀦𑁆𑀢𑀺. 𑀭𑀸𑀕𑀸𑀤𑀻𑀦𑀁 𑀲𑀦𑁆𑀢𑀢𑀸𑀬 𑀲𑀦𑁆𑀢𑁄 𑀩𑀼𑀤𑁆𑀥𑀫𑀼𑀦𑀺 𑀆𑀘𑀺𑀓𑁆𑀔𑀢𑀺.

𑁨𑁭𑁩. 𑀏𑀯𑀁𑀭𑀽𑀧𑁄𑀢𑀺𑀆𑀤𑀻𑀲𑀼 𑀓𑀸𑀴𑁄𑀧𑀺 𑀲𑀫𑀸𑀦𑁄 𑀇𑀦𑁆𑀤𑀦𑀻𑀮𑀫𑀡𑀺𑀯𑀡𑁆𑀡𑁄 𑀅𑀳𑁄𑀲𑀺𑀦𑁆𑀢𑀺 𑀏𑀯𑀁 𑀫𑀦𑀼𑀜𑁆𑀜𑀭𑀽𑀧𑀯𑀲𑁂𑀦𑁂𑀯 𑀏𑀯𑀁𑀭𑀽𑀧𑁄 𑀅𑀳𑁄𑀲𑀺𑀁. 𑀓𑀼𑀲𑀮𑀲𑀼𑀔𑀲𑁄𑀫𑀦𑀲𑁆𑀲𑀯𑁂𑀤𑀦𑀸𑀯𑀲𑁂𑀦𑁂𑀯 𑀏𑀯𑀁𑀯𑁂𑀤𑀦𑁄. 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀁𑀬𑁂𑀯 𑀲𑀜𑁆𑀜𑀸𑀤𑀻𑀦𑀁 𑀯𑀲𑁂𑀦 𑀏𑀯𑀁𑀲𑀜𑁆𑀜𑁄 𑀏𑀯𑀁𑀲𑀗𑁆𑀔𑀸𑀭𑁄 𑀏𑀯𑀁𑀯𑀺𑀜𑁆𑀜𑀸𑀡𑁄 𑀅𑀳𑁄𑀲𑀺𑀁 𑀅𑀢𑀻𑀢𑀫𑀤𑁆𑀥𑀸𑀦𑀦𑁆𑀢𑀺.

𑀢𑀢𑁆𑀣 𑀦𑀦𑁆𑀤𑀺𑀁 𑀲𑀫𑀦𑁆𑀯𑀸𑀦𑁂𑀢𑀻𑀢𑀺 𑀢𑁂𑀲𑀼 𑀭𑀽𑀧𑀸𑀤𑀻𑀲𑀼 𑀢𑀡𑁆𑀳𑀁 𑀲𑀫𑀦𑁆𑀯𑀸𑀦𑁂𑀢𑀺 𑀅𑀦𑀼𑀧𑀯𑀢𑁆𑀢𑁂𑀢𑀺. 𑀳𑀻𑀦𑀭𑀽𑀧𑀸𑀤𑀺𑀯𑀲𑁂𑀦 𑀧𑀦 𑀏𑀯𑀁𑀭𑀽𑀧𑁄 𑀅𑀳𑁄𑀲𑀺𑀁…𑀧𑁂… 𑀏𑀯𑀁𑀯𑀺𑀜𑁆𑀜𑀸𑀡𑁄 𑀅𑀳𑁄𑀲𑀺𑀦𑁆𑀢𑀺 𑀦 𑀫𑀜𑁆𑀜𑀢𑀺.

𑀦𑀦𑁆𑀤𑀺𑀁 𑀦 𑀲𑀫𑀦𑁆𑀯𑀸𑀦𑁂𑀢𑀻𑀢𑀺 𑀢𑀡𑁆𑀳𑀁 𑀯𑀸 𑀢𑀡𑁆𑀳𑀸𑀲𑀫𑁆𑀧𑀬𑀼𑀢𑁆𑀢𑀤𑀺𑀝𑁆𑀞𑀺𑀁 𑀯𑀸 𑀦𑀸𑀦𑀼𑀧𑀯𑀢𑁆𑀢𑀬𑀢𑀺.

𑁨𑁭𑁪. 𑀏𑀯𑀁𑀭𑀽𑀧𑁄 𑀲𑀺𑀬𑀦𑁆𑀢𑀺𑀆𑀤𑀻𑀲𑀼𑀧𑀺 𑀢𑀁𑀫𑀦𑀼𑀜𑁆𑀜𑀭𑀽𑀧𑀸𑀤𑀺𑀯𑀲𑁂𑀦𑁂𑀯 𑀢𑀡𑁆𑀳𑀸𑀤𑀺𑀝𑁆𑀞𑀺𑀧𑀯𑀢𑁆𑀢𑀲𑀗𑁆𑀔𑀸𑀢𑀸 𑀦𑀦𑁆𑀤𑀺𑀲𑀫𑀦𑁆𑀯𑀸𑀦𑀬𑀦𑀸𑀯 𑀯𑁂𑀤𑀺𑀢𑀩𑁆𑀩𑀸.

𑁨𑁭𑁫. 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀲𑀁𑀳𑀻𑀭𑀢𑀻𑀢𑀺 𑀇𑀤𑀁 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀜𑁆𑀘 𑀬𑁄 𑀥𑀫𑁆𑀫𑀁, 𑀢𑀢𑁆𑀣 𑀢𑀢𑁆𑀣 𑀯𑀺𑀧𑀲𑁆𑀲𑀢𑀺. 𑀅𑀲𑀁𑀳𑀻𑀭𑀁 𑀅𑀲𑀁𑀓𑀼𑀧𑁆𑀧’’𑀦𑁆𑀢𑀺 𑀉𑀤𑁆𑀤𑁂𑀲𑀲𑁆𑀲 𑀦𑀺𑀤𑁆𑀤𑁂𑀲𑀢𑁆𑀣𑀁 𑀯𑀼𑀢𑁆𑀢𑀁. 𑀓𑀸𑀫𑀜𑁆𑀘𑁂𑀢𑁆𑀣 ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀥𑀫𑁆𑀫𑀁 𑀦 𑀯𑀺𑀧𑀲𑁆𑀲𑀢𑀻’’𑀢𑀺𑀆𑀤𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀬𑀲𑁆𑀫𑀸 𑀧𑀦 𑀅𑀲𑀁𑀳𑀻𑀭𑀸𑀢𑀺 𑀘 𑀅𑀲𑀁𑀓𑀼𑀧𑁆𑀧𑀸𑀢𑀺 𑀘 𑀯𑀺𑀧𑀲𑁆𑀲𑀦𑀸 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀢𑀲𑁆𑀲𑀸 𑀏𑀯 𑀅𑀪𑀸𑀯𑀜𑁆𑀘 𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀼𑀁 𑀲𑀁𑀳𑀻𑀭𑀢𑀻𑀢𑀺 𑀫𑀸𑀢𑀺𑀓𑀁 𑀉𑀤𑁆𑀥𑀭𑀺𑀢𑁆𑀯𑀸 𑀯𑀺𑀢𑁆𑀣𑀸𑀭𑁄 𑀯𑀼𑀢𑁆𑀢𑁄. 𑀢𑀢𑁆𑀣 𑀲𑀁𑀳𑀻𑀭𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀬 𑀅𑀪𑀸𑀯𑀢𑁄 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀆𑀓𑀟𑁆𑀠𑀺𑀬𑀢𑀺. 𑀦 𑀲𑀁𑀳𑀻𑀭𑀢𑀻𑀢𑀺 𑀯𑀺𑀧𑀲𑁆𑀲𑀦𑀸𑀬 𑀪𑀸𑀯𑁂𑀦 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀦𑀸𑀓𑀟𑁆𑀠𑀺𑀬𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀆𑀦𑀦𑁆𑀤𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭𑁬. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀆𑀦𑀦𑁆𑀤𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀁. 𑀢𑀢𑁆𑀣 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑁄. 𑀓𑁄 𑀦𑀼 𑀔𑁄, 𑀪𑀺𑀓𑁆𑀔𑀯𑁂𑀢𑀺 𑀚𑀸𑀦𑀦𑁆𑀢𑁄𑀯 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀧𑀼𑀘𑁆𑀙𑀺.

𑁨𑁭𑁮. 𑀲𑀸𑀥𑀼 𑀲𑀸𑀥𑀽𑀢𑀺 𑀣𑁂𑀭𑀲𑁆𑀲 𑀲𑀸𑀥𑀼𑀓𑀸𑀭𑀫𑀤𑀸𑀲𑀺. 𑀲𑀸𑀥𑀼 𑀔𑁄 𑀢𑁆𑀯𑀦𑁆𑀢𑀺 𑀧𑀭𑀺𑀫𑀡𑁆𑀟𑀮𑁂𑀳𑀺 𑀧𑀤𑀩𑁆𑀬𑀜𑁆𑀚𑀦𑁂𑀳𑀺 𑀧𑀭𑀺𑀲𑀼𑀤𑁆𑀥𑁂𑀳𑀺 𑀓𑀣𑀺𑀢𑀢𑁆𑀢𑀸 𑀤𑁂𑀲𑀦𑀁 𑀧𑀲𑀁𑀲𑀦𑁆𑀢𑁄 𑀆𑀳. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀆𑀦𑀦𑁆𑀤𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑀳𑀸𑀓𑀘𑁆𑀘𑀸𑀦𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭𑁯. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀓𑀘𑁆𑀘𑀸𑀦𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀁. 𑀢𑀢𑁆𑀣 𑀢𑀧𑁄𑀤𑀸𑀭𑀸𑀫𑁂𑀢𑀺 𑀢𑀢𑁆𑀢𑁄𑀤𑀓𑀲𑁆𑀲 𑀭𑀳𑀤𑀲𑁆𑀲 𑀯𑀲𑁂𑀦 𑀏𑀯𑀁𑀮𑀤𑁆𑀥𑀦𑀸𑀫𑁂 𑀆𑀭𑀸𑀫𑁂. 𑀯𑁂𑀪𑀸𑀭𑀧𑀩𑁆𑀩𑀢𑀲𑁆𑀲 𑀓𑀺𑀭 𑀳𑁂𑀝𑁆𑀞𑀸 𑀪𑀽𑀫𑀝𑁆𑀞𑀓𑀦𑀸𑀕𑀸𑀦𑀁 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀁 𑀦𑀸𑀕𑀪𑀯𑀦𑀁 𑀤𑁂𑀯𑀮𑁄𑀓𑀲𑀤𑀺𑀲𑀁 𑀫𑀡𑀺𑀫𑀬𑁂𑀦 𑀢𑀮𑁂𑀦 𑀆𑀭𑀸𑀫𑀉𑀬𑁆𑀬𑀸𑀦𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑀁, 𑀢𑀢𑁆𑀣 𑀦𑀸𑀕𑀸𑀦𑀁 𑀓𑀻𑀴𑀦𑀝𑁆𑀞𑀸𑀦𑁂 𑀫𑀳𑀸𑀉𑀤𑀓𑀭𑀳𑀤𑁄, 𑀢𑀢𑁄 𑀢𑀧𑁄𑀤𑀸 𑀦𑀸𑀫 𑀦𑀤𑀻 𑀲𑀦𑁆𑀤𑀢𑀺 𑀓𑀼𑀣𑀺𑀢𑀸 𑀉𑀡𑁆𑀳𑁄𑀤𑀓𑀸. 𑀓𑀲𑁆𑀫𑀸 𑀧𑀦𑁂𑀲𑀸 𑀏𑀤𑀺𑀲𑀸 𑀚𑀸𑀢𑀸? 𑀭𑀸𑀚𑀕𑀳𑀁 𑀓𑀺𑀭 𑀧𑀭𑀺𑀯𑀸𑀭𑁂𑀢𑁆𑀯𑀸 𑀫𑀳𑀸 𑀧𑁂𑀢𑀮𑁄𑀓𑁄, 𑀢𑀢𑁆𑀣 𑀤𑁆𑀯𑀺𑀦𑁆𑀦𑀁 𑀫𑀳𑀸𑀮𑁄𑀳𑀓𑀼𑀫𑁆𑀪𑀺𑀦𑀺𑀭𑀬𑀸𑀦𑀁 𑀅𑀦𑁆𑀢𑀭𑁂𑀦 𑀅𑀬𑀁 𑀢𑀧𑁄𑀤𑀸 𑀆𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀲𑀸 𑀓𑀼𑀣𑀺𑀢𑀸 𑀲𑀦𑁆𑀤𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀬𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀢𑀧𑁄𑀤𑀸 𑀲𑀦𑁆𑀤𑀢𑀺, 𑀲𑁄 𑀤𑀳𑁄 𑀅𑀘𑁆𑀙𑁄𑀤𑀓𑁄 𑀲𑀻𑀢𑁄𑀤𑀓𑁄 𑀲𑀸𑀢𑁄𑀤𑀓𑁄 𑀲𑁂𑀢𑁄𑀤𑀓𑁄 𑀲𑀼𑀧𑁆𑀧𑀢𑀺𑀢𑁆𑀣𑁄 𑀭𑀫𑀡𑀻𑀬𑁄 𑀧𑀳𑀽𑀢𑀫𑀘𑁆𑀙𑀓𑀘𑁆𑀙𑀧𑁄, 𑀘𑀓𑁆𑀓𑀫𑀢𑁆𑀢𑀸𑀦𑀺 𑀘 𑀧𑀤𑀼𑀫𑀸𑀦𑀺 𑀧𑀼𑀧𑁆𑀨𑀦𑁆𑀢𑀺. 𑀅𑀧𑀺𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀢𑀧𑁄𑀤𑀸 𑀤𑁆𑀯𑀺𑀦𑁆𑀦𑀁 𑀫𑀳𑀸𑀦𑀺𑀭𑀬𑀸𑀦𑀁 𑀅𑀦𑁆𑀢𑀭𑀺𑀓𑀸𑀬 𑀆𑀕𑀘𑁆𑀙𑀢𑀺, 𑀢𑁂𑀦𑀸𑀬𑀁 𑀢𑀧𑁄𑀤𑀸 𑀓𑀼𑀣𑀺𑀢𑀸 𑀲𑀦𑁆𑀤𑀢𑀻’’𑀢𑀺 (𑀧𑀸𑀭𑀸. 𑁨𑁩𑁧). 𑀇𑀫𑀲𑁆𑀲 𑀧𑀦 𑀆𑀭𑀸𑀫𑀲𑁆𑀲 𑀅𑀪𑀺𑀲𑀫𑁆𑀫𑀼𑀔𑀝𑁆𑀞𑀸𑀦𑁂 𑀢𑀢𑁄 𑀫𑀳𑀸𑀉𑀤𑀓𑀭𑀳𑀤𑁄 𑀚𑀸𑀢𑁄, 𑀢𑀲𑁆𑀲 𑀦𑀸𑀫𑀯𑀲𑁂𑀦𑀸𑀬𑀁 𑀯𑀺𑀳𑀸𑀭𑁄 𑀢𑀧𑁄𑀤𑀸𑀭𑀸𑀫𑁄𑀢𑀺 𑀯𑀼𑀘𑁆𑀘𑀢𑀺.

𑁨𑁮𑁦. 𑀲𑀫𑀺𑀤𑁆𑀥𑀻𑀢𑀺 𑀢𑀲𑁆𑀲 𑀓𑀺𑀭 𑀣𑁂𑀭𑀲𑁆𑀲 𑀅𑀢𑁆𑀢𑀪𑀸𑀯𑁄 𑀲𑀫𑀺𑀤𑁆𑀥𑁄 𑀅𑀪𑀺𑀭𑀽𑀧𑁄 𑀧𑀸𑀲𑀸𑀤𑀺𑀓𑁄, 𑀢𑀲𑁆𑀫𑀸 𑀲𑀫𑀺𑀤𑁆𑀥𑀺𑀢𑁆𑀯𑁂𑀯 𑀲𑀗𑁆𑀔𑀁 𑀕𑀢𑁄. 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑁄𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀢𑁆𑀢𑀺𑀪𑀽𑀢𑁄. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀉𑀝𑁆𑀞𑀸𑀬𑀸𑀲𑀦𑀸𑀢𑀺 𑀫𑀥𑀼𑀧𑀺𑀡𑁆𑀟𑀺𑀓𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁧𑁯𑁯 𑀆𑀤𑀬𑁄) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑁨𑁮𑁨. 𑀇𑀢𑀺 𑀫𑁂 𑀘𑀓𑁆𑀔𑀼𑀦𑁆𑀢𑀺 𑀇𑀫𑀲𑁆𑀫𑀺𑀁 𑀓𑀺𑀭 𑀲𑀼𑀢𑁆𑀢𑁂 𑀪𑀕𑀯𑀸 𑀤𑁆𑀯𑀸𑀤𑀲𑀸𑀬𑀢𑀦𑀯𑀲𑁂𑀦𑁂𑀯 𑀫𑀸𑀢𑀺𑀓𑀁 𑀞𑀧𑁂𑀲𑀺. 𑀣𑁂𑀭𑁄𑀧𑀺 ‘‘𑀪𑀕𑀯𑀢𑀸 𑀳𑁂𑀝𑁆𑀞𑀸 𑀤𑁆𑀯𑀻𑀲𑀼, 𑀉𑀧𑀭𑀺 𑀘𑀢𑀼𑀢𑁆𑀣𑁂 𑀘𑀸𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀲𑀼𑀢𑁆𑀢𑁂𑀲𑀼 𑀧𑀜𑁆𑀘𑀓𑁆𑀔𑀦𑁆𑀥𑀯𑀲𑁂𑀦 𑀫𑀸𑀢𑀺𑀓𑀸 𑀘 𑀯𑀺𑀪𑀗𑁆𑀕𑁄 𑀘 𑀓𑀢𑁄, 𑀇𑀥 𑀧𑀦 𑀤𑁆𑀯𑀸𑀤𑀲𑀸𑀬𑀢𑀦𑀯𑀲𑁂𑀦𑁂𑀯 𑀯𑀺𑀪𑀚𑀦𑀢𑁆𑀣𑀁 𑀫𑀸𑀢𑀺𑀓𑀸 𑀞𑀧𑀺𑀢𑀸’’𑀢𑀺 𑀦𑀬𑀁 𑀧𑀝𑀺𑀮𑀪𑀺𑀢𑁆𑀯𑀸 𑀏𑀯𑀫𑀸𑀳. 𑀇𑀫𑀁 𑀧𑀦 𑀦𑀬𑀁 𑀮𑀪𑀦𑁆𑀢𑁂𑀦 𑀣𑁂𑀭𑁂𑀦 𑀪𑀸𑀭𑀺𑀬𑀁 𑀓𑀢𑀁, 𑀅𑀧𑀤𑁂 𑀧𑀤𑀁 𑀤𑀲𑁆𑀲𑀺𑀢𑀁, 𑀆𑀓𑀸𑀲𑁂 𑀧𑀤𑀁 𑀓𑀢𑀁, 𑀢𑁂𑀦 𑀦𑀁 𑀪𑀕𑀯𑀸 𑀇𑀫𑀫𑁂𑀯 𑀲𑀼𑀢𑁆𑀢𑀁 𑀲𑀦𑁆𑀥𑀸𑀬 𑁋 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀯𑀺𑀪𑀚𑀦𑁆𑀢𑀸𑀦𑀁 𑀬𑀤𑀺𑀤𑀁 𑀫𑀳𑀸𑀓𑀘𑁆𑀘𑀸𑀦𑁄’’𑀢𑀺 (𑀅. 𑀦𑀺. 𑁧.𑁧𑁯𑁭) 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺. 𑀏𑀢𑁆𑀣 𑀧𑀦 𑀘𑀓𑁆𑀔𑀽𑀢𑀺 𑀘𑀓𑁆𑀔𑀼𑀧𑀲𑀸𑀤𑁄. 𑀭𑀽𑀧𑀸𑀢𑀺 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀸. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀸𑀬𑀢𑀦𑀸𑀦𑀺𑀧𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀯𑀺𑀜𑁆𑀜𑀸𑀡𑀦𑁆𑀢𑀺 𑀦𑀺𑀓𑀦𑁆𑀢𑀺𑀯𑀺𑀜𑁆𑀜𑀸𑀡𑀁. 𑀢𑀤𑀪𑀺𑀦𑀦𑁆𑀤𑀢𑀻𑀢𑀺 𑀢𑀁 𑀘𑀓𑁆𑀔𑀼𑀜𑁆𑀘𑁂𑀯 𑀭𑀽𑀧𑀜𑁆𑀘 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀅𑀪𑀺𑀦𑀦𑁆𑀤𑀢𑀺. 𑀅𑀦𑁆𑀯𑀸𑀕𑀫𑁂𑀢𑀻𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀅𑀦𑀼𑀕𑀘𑁆𑀙𑀢𑀺.

𑀇𑀢𑀺 𑀫𑁂 𑀫𑀦𑁄 𑀅𑀳𑁄𑀲𑀺 𑀅𑀢𑀻𑀢𑀫𑀤𑁆𑀥𑀸𑀦𑀁 𑀇𑀢𑀺 𑀥𑀫𑁆𑀫𑀸𑀢𑀺 𑀏𑀢𑁆𑀣 𑀧𑀦 𑀫𑀦𑁄𑀢𑀺 𑀪𑀯𑀗𑁆𑀕𑀘𑀺𑀢𑁆𑀢𑀁. 𑀥𑀫𑁆𑀫𑀸𑀢𑀺 𑀢𑁂𑀪𑀽𑀫𑀓𑀥𑀫𑁆𑀫𑀸𑀭𑀫𑁆𑀫𑀡𑀁.

𑁨𑁮𑁩. 𑀧𑀡𑀺𑀤𑀳𑀢𑀻𑀢𑀺 𑀧𑀢𑁆𑀣𑀦𑀸𑀯𑀲𑁂𑀦 𑀞𑀧𑁂𑀲𑀺. 𑀧𑀡𑀺𑀥𑀸𑀦𑀧𑀘𑁆𑀘𑀬𑀸𑀢𑀺 𑀧𑀢𑁆𑀣𑀦𑀸𑀝𑁆𑀞𑀧𑀦𑀓𑀸𑀭𑀡𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀳𑀸𑀓𑀘𑁆𑀘𑀸𑀦𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀮𑁄𑀫𑀲𑀓𑀗𑁆𑀕𑀺𑀬𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮𑁬. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀮𑁄𑀫𑀲𑀓𑀗𑁆𑀕𑀺𑀬𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀁. 𑀢𑀢𑁆𑀣 𑀮𑁄𑀫𑀲𑀓𑀗𑁆𑀕𑀺𑀬𑁄𑀢𑀺 𑀅𑀗𑁆𑀕𑀣𑁂𑀭𑁄 𑀓𑀺𑀭 𑀦𑀸𑀫𑁂𑀲, 𑀓𑀸𑀬𑀲𑁆𑀲 𑀧𑀦 𑀈𑀲𑀓𑀮𑁄𑀫𑀲𑀸𑀓𑀸𑀭𑀢𑀸𑀬 𑀮𑁄𑀫𑀲𑀓𑀗𑁆𑀕𑀺𑀬𑁄𑀢𑀺 𑀧𑀸𑀓𑀝𑁄 𑀚𑀸𑀢𑁄. 𑀘𑀦𑁆𑀤𑀦𑁄 𑀤𑁂𑀯𑀧𑀼𑀢𑁆𑀢𑁄𑀢𑀺 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀓𑀺𑀭𑁂𑀲 𑀘𑀦𑁆𑀤𑀦𑁄 𑀦𑀸𑀫 𑀉𑀧𑀸𑀲𑀓𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀢𑀻𑀡𑀺 𑀭𑀢𑀦𑀸𑀦𑀺 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀧𑀽𑀚𑁂𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄, 𑀧𑀼𑀭𑀺𑀫𑀦𑀸𑀫𑁂𑀦 𑀘𑀦𑁆𑀤𑀦𑁄 𑀤𑁂𑀯𑀧𑀼𑀢𑁆𑀢𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀢𑁄. 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀦𑁆𑀢𑀺 𑀭𑀢𑁆𑀢𑀓𑀫𑁆𑀩𑀮𑀲𑀺𑀮𑀸𑀬𑀁. 𑀢𑀲𑁆𑀲𑀸 𑀓𑀺𑀭 𑀭𑀢𑁆𑀢𑀓𑀫𑁆𑀩𑀮𑀲𑁆𑀲𑁂𑀯 𑀚𑀬𑀲𑀼𑀫𑀦𑀧𑀼𑀧𑁆𑀨𑀭𑀸𑀲𑀺 𑀯𑀺𑀬 𑀯𑀡𑁆𑀡𑁄, 𑀢𑀲𑁆𑀫𑀸 ‘‘𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸’’𑀢𑀺 𑀯𑀼𑀘𑁆𑀘𑀢𑀺.

𑀓𑀤𑀸 𑀧𑀦 𑀢𑀢𑁆𑀣 𑀪𑀕𑀯𑀸 𑀯𑀺𑀳𑀸𑀲𑀻𑀢𑀺? 𑀩𑁄𑀥𑀺𑀧𑀢𑁆𑀢𑀺𑀢𑁄 𑀲𑀢𑁆𑀢𑀫𑁂 𑀲𑀁𑀯𑀘𑁆𑀙𑀭𑁂 𑀲𑀸𑀯𑀢𑁆𑀣𑀺𑀬𑀁 𑀆𑀲𑀸𑀴𑁆𑀳𑀻𑀫𑀸𑀲𑀧𑀼𑀡𑁆𑀡𑀫𑀸𑀬 𑀤𑁆𑀯𑀸𑀤𑀲𑀬𑁄𑀚𑀦𑀸𑀬 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀑𑀭𑀼𑀬𑁆𑀳 𑀓𑀡𑁆𑀟𑀫𑁆𑀩𑀫𑀽𑀮𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀬 𑀫𑀳𑀸𑀚𑀦𑀁 𑀫𑀳𑀸𑀯𑀺𑀤𑀼𑀕𑁆𑀕𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀩𑀼𑀤𑁆𑀥𑀸 𑀦𑀸𑀫 𑀬𑀲𑁆𑀫𑀸 𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀫𑀦𑀼𑀲𑁆𑀲𑀧𑀣𑁂 𑀦 𑀯𑀲𑀦𑁆𑀢𑀺, 𑀢𑀲𑁆𑀫𑀸 𑀧𑀲𑁆𑀲𑀫𑀸𑀦𑀲𑁆𑀲𑁂𑀯 𑀢𑀲𑁆𑀲 𑀚𑀦𑀲𑁆𑀲 𑀧𑀤𑀯𑀻𑀓𑁆𑀓𑀫𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀬𑀁 𑀯𑀲𑁆𑀲𑀁 𑀉𑀧𑀕𑀢𑁄, 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀳𑀸𑀲𑀺.

𑀢𑀢𑁆𑀭 𑀪𑀕𑀯𑀸𑀢𑀺 𑀢𑀢𑁆𑀭 𑀯𑀺𑀳𑀭𑀦𑁆𑀢𑁄 𑀪𑀕𑀯𑀸 𑀬𑁂𑀪𑀼𑀬𑁆𑀬𑁂𑀦 𑀤𑀲𑀳𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀳𑀺 𑀲𑀦𑁆𑀦𑀺𑀧𑀢𑀺𑀢𑀸𑀳𑀺 𑀤𑁂𑀯𑀢𑀸𑀳𑀺 𑀧𑀭𑀺𑀯𑀼𑀢𑁄 𑀫𑀸𑀢𑀭𑀁 𑀓𑀸𑀬𑀲𑀓𑁆𑀔𑀺𑀁 𑀓𑀢𑁆𑀯𑀸 𑀅𑀪𑀺𑀥𑀫𑁆𑀫𑀧𑀺𑀝𑀓𑀁 𑀓𑀣𑁂𑀦𑁆𑀢𑁄 𑀕𑀫𑁆𑀪𑀻𑀭𑀁 𑀦𑀺𑀧𑀼𑀡𑀁 𑀢𑀺𑀮𑀓𑁆𑀔𑀡𑀸𑀳𑀢𑀁 𑀭𑀽𑀧𑀸𑀭𑀽𑀧𑀧𑀭𑀺𑀘𑁆𑀙𑁂𑀤𑀓𑀣𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀁 𑀤𑁂𑀯𑀸𑀦𑀁 𑀲𑀁𑀯𑁂𑀕𑀚𑀦𑀦𑀢𑁆𑀣𑀁 𑀅𑀦𑁆𑀢𑀭𑀦𑁆𑀢𑀭𑀸 𑀪𑀤𑁆𑀤𑁂𑀓𑀭𑀢𑁆𑀢𑀲𑁆𑀲 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘 𑀅𑀪𑀸𑀲𑀺. 𑀢𑀢𑁆𑀭𑀸𑀬𑀁 𑀤𑁂𑀯𑀧𑀼𑀢𑁆𑀢𑁄 𑀉𑀕𑁆𑀕𑀡𑁆𑀳𑀦𑁆𑀢𑁄 𑀇𑀫𑀸 𑀕𑀸𑀣𑀸 𑀲𑀤𑁆𑀥𑀺𑀁 𑀯𑀺𑀪𑀗𑁆𑀕𑁂𑀦 𑀉𑀕𑁆𑀕𑀡𑁆𑀳𑀺, 𑀤𑁂𑀯𑀢𑁆𑀢𑀲𑁆𑀲 𑀧𑀦 𑀧𑀫𑀸𑀤𑀸𑀥𑀺𑀝𑁆𑀞𑀸𑀦𑀢𑁆𑀢𑀸 𑀤𑀺𑀩𑁆𑀩𑁂𑀳𑀺 𑀆𑀭𑀫𑁆𑀫𑀡𑁂𑀳𑀺 𑀦𑀺𑀧𑁆𑀧𑀻𑀴𑀺𑀬𑀫𑀸𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀲𑀼𑀢𑁆𑀢𑀁 𑀲𑀫𑁆𑀫𑀼𑀝𑁆𑀞𑁄 𑀕𑀸𑀣𑀸𑀫𑀢𑁆𑀢𑀫𑁂𑀯 𑀥𑀸𑀭𑁂𑀲𑀺. 𑀢𑁂𑀦𑀸𑀳 ‘‘𑀏𑀯𑀁 𑀔𑁄 𑀅𑀳𑀁 𑀪𑀺𑀓𑁆𑀔𑀼 𑀥𑀸𑀭𑁂𑀫𑀺 𑀪𑀤𑁆𑀤𑁂𑀓𑀭𑀢𑁆𑀢𑀺𑀬𑁄 𑀕𑀸𑀣𑀸’’𑀢𑀺.

𑀉𑀕𑁆𑀕𑀡𑁆𑀳𑀸𑀳𑀺 𑀢𑁆𑀯𑀦𑁆𑀢𑀺𑀆𑀤𑀻𑀲𑀼 𑀢𑀼𑀡𑁆𑀳𑀻𑀪𑀽𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀡𑀦𑁆𑀢𑁄 𑀉𑀕𑁆𑀕𑀡𑁆𑀳𑀸𑀢𑀺 𑀦𑀸𑀫, 𑀯𑀸𑀘𑀸𑀬 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑁄 𑀧𑀭𑀺𑀬𑀸𑀧𑀼𑀡𑀸𑀢𑀺 𑀦𑀸𑀫, 𑀅𑀜𑁆𑀜𑁂𑀲𑀁 𑀯𑀸𑀘𑁂𑀦𑁆𑀢𑁄 𑀥𑀸𑀭𑁂𑀢𑀺 𑀦𑀸𑀫. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀮𑁄𑀫𑀲𑀓𑀗𑁆𑀕𑀺𑀬𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀽𑀴𑀓𑀫𑁆𑀫𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮𑁯. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀘𑀽𑀴𑀓𑀫𑁆𑀫𑀯𑀺𑀪𑀗𑁆𑀕𑀲𑀼𑀢𑁆𑀢𑀁. 𑀢𑀢𑁆𑀣 𑀲𑀼𑀪𑁄𑀢𑀺 𑀲𑁄 𑀓𑀺𑀭 𑀤𑀲𑁆𑀲𑀦𑀻𑀬𑁄 𑀅𑀳𑁄𑀲𑀺 𑀧𑀸𑀲𑀸𑀤𑀺𑀓𑁄, 𑀢𑁂𑀦𑀲𑁆𑀲 𑀅𑀗𑁆𑀕𑀲𑀼𑀪𑀢𑀸𑀬 𑀲𑀼𑀪𑁄𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀫𑀸𑀡𑀯𑁄𑀢𑀺 𑀧𑀦 𑀢𑀁 𑀢𑀭𑀼𑀡𑀓𑀸𑀮𑁂 𑀯𑁄𑀳𑀭𑀺𑀁𑀲𑀼, 𑀲𑁄 𑀫𑀳𑀮𑁆𑀮𑀓𑀓𑀸𑀮𑁂𑀧𑀺 𑀢𑁂𑀦𑁂𑀯 𑀯𑁄𑀳𑀸𑀭𑁂𑀦 𑀯𑁄𑀳𑀭𑀺𑀬𑀢𑀺. 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑁄𑀢𑀺 𑀢𑁄𑀤𑁂𑀬𑁆𑀬𑀲𑁆𑀲 𑀦𑀸𑀫 𑀧𑀲𑁂𑀦𑀤𑀺𑀭𑀜𑁆𑀜𑁄 𑀧𑀼𑀭𑁄𑀳𑀺𑀢𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀢𑁆𑀢𑁄. 𑀲𑁄 𑀓𑀺𑀭 𑀲𑀸𑀯𑀢𑁆𑀣𑀺𑀬𑀸 𑀅𑀯𑀺𑀤𑀽𑀭𑁂 𑀢𑀼𑀤𑀺𑀕𑀸𑀫𑁄 𑀦𑀸𑀫 𑀅𑀢𑁆𑀣𑀺, 𑀢𑀲𑁆𑀲 𑀅𑀥𑀺𑀧𑀢𑀺𑀢𑁆𑀢𑀸 𑀢𑁄𑀤𑁂𑀬𑁆𑀬𑁄𑀢𑀺 𑀲𑀗𑁆𑀔𑀁 𑀕𑀢𑁄. 𑀫𑀳𑀸𑀥𑀦𑁄 𑀧𑀦 𑀳𑁄𑀢𑀺 𑀲𑀢𑁆𑀢𑀸𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁄 𑀧𑀭𑀫𑀫𑀘𑁆𑀙𑀭𑀻, ‘‘𑀤𑀤𑀢𑁄 𑀪𑁄𑀕𑀸𑀦𑀁 𑀅𑀧𑀭𑀺𑀓𑁆𑀔𑀬𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀦 𑀤𑁂𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀅𑀜𑁆𑀚𑀦𑀸𑀦𑀁 𑀔𑀬𑀁 𑀤𑀺𑀲𑁆𑀯𑀸, 𑀯𑀫𑁆𑀫𑀺𑀓𑀸𑀦𑀜𑁆𑀘 𑀲𑀜𑁆𑀘𑀬𑀁;

𑀫𑀥𑀽𑀦𑀜𑁆𑀘 𑀲𑀫𑀸𑀳𑀸𑀭𑀁, 𑀧𑀡𑁆𑀟𑀺𑀢𑁄 𑀖𑀭𑀫𑀸𑀯𑀲𑁂’’𑀢𑀺.

𑀏𑀯𑀁 𑀅𑀤𑀸𑀦𑀫𑁂𑀯 𑀲𑀺𑀓𑁆𑀔𑀸𑀧𑁂𑀲𑀺. 𑀥𑀼𑀭𑀯𑀺𑀳𑀸𑀭𑁂 𑀯𑀲𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀬𑀸𑀕𑀼𑀉𑀴𑀼𑀗𑁆𑀕𑀫𑀢𑁆𑀢𑀁 𑀯𑀸 𑀪𑀢𑁆𑀢𑀓𑀝𑀘𑁆𑀙𑀼𑀫𑀢𑁆𑀢𑀁 𑀯𑀸 𑀅𑀤𑀢𑁆𑀯𑀸 𑀥𑀦𑀮𑁄𑀪𑁂𑀦 𑀓𑀸𑀮𑀁 𑀓𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀖𑀭𑁂 𑀲𑀼𑀦𑀔𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄. 𑀲𑀼𑀪𑁄 𑀢𑀁 𑀲𑀼𑀦𑀔𑀁 𑀅𑀢𑀺𑀯𑀺𑀬 𑀧𑀺𑀬𑀸𑀬𑀢𑀺, 𑀅𑀢𑁆𑀢𑀦𑁄 𑀪𑀼𑀜𑁆𑀚𑀦𑀓𑀪𑀢𑁆𑀢𑀁𑀬𑁂𑀯 𑀪𑁄𑀚𑁂𑀢𑀺, 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀭𑀲𑀬𑀦𑁂 𑀲𑀬𑀸𑀧𑁂𑀢𑀺. 𑀅𑀣 𑀪𑀕𑀯𑀸 𑀏𑀓𑀤𑀺𑀯𑀲𑀁 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀢𑀁 𑀲𑀼𑀦𑀔𑀁 𑀤𑀺𑀲𑁆𑀯𑀸 𑁋 ‘‘𑀢𑁄𑀤𑁂𑀬𑁆𑀬𑀩𑁆𑀭𑀸𑀳𑁆𑀫𑀡𑁄 𑀥𑀦𑀮𑁄𑀪𑁂𑀦 𑀅𑀢𑁆𑀢𑀦𑁄𑀯 𑀖𑀭𑁂 𑀲𑀼𑀦𑀔𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑁄, 𑀅𑀚𑁆𑀚 𑀫𑀬𑀺 𑀲𑀼𑀪𑀲𑁆𑀲 𑀖𑀭𑀁 𑀕𑀢𑁂 𑀫𑀁 𑀤𑀺𑀲𑁆𑀯𑀸 𑀲𑀼𑀦𑀔𑁄 𑀪𑀼𑀓𑁆𑀓𑀸𑀭𑀁 𑀓𑀭𑀺𑀲𑁆𑀲𑀢𑀺, 𑀅𑀣𑀲𑁆𑀲𑀸𑀳𑀁 𑀏𑀓𑀁 𑀯𑀘𑀦𑀁 𑀯𑀓𑁆𑀔𑀸𑀫𑀺, 𑀲𑁄 ‘𑀚𑀸𑀦𑀸𑀢𑀺 𑀫𑀁 𑀲𑀫𑀡𑁄 𑀕𑁄𑀢𑀫𑁄’𑀢𑀺 𑀕𑀦𑁆𑀢𑁆𑀯𑀸 𑀉𑀤𑁆𑀥𑀦𑀝𑁆𑀞𑀸𑀦𑁂 𑀦𑀺𑀧𑀚𑁆𑀚𑀺𑀲𑁆𑀲𑀢𑀺. 𑀢𑀢𑁄𑀦𑀺𑀤𑀸𑀦𑀁 𑀲𑀼𑀪𑀲𑁆𑀲 𑀫𑀬𑀸 𑀲𑀤𑁆𑀥𑀺𑀁 𑀏𑀓𑁄 𑀓𑀣𑀸𑀲𑀮𑁆𑀮𑀸𑀧𑁄 𑀪𑀯𑀺𑀲𑁆𑀲𑀢𑀺, 𑀲𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀺, 𑀲𑀼𑀦𑀔𑁄 𑀧𑀦 𑀓𑀸𑀮𑀁 𑀓𑀢𑁆𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀲𑁆𑀲𑀢𑀻’’𑀢𑀺 𑀇𑀫𑀁 𑀫𑀸𑀡𑀯𑀲𑁆𑀲 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀦𑀪𑀸𑀯𑀁 𑀜𑀢𑁆𑀯𑀸 𑀪𑀕𑀯𑀸 𑀢𑀁 𑀤𑀺𑀯𑀲𑀁 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀏𑀓𑀓𑁄𑀯 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁂 𑀫𑀸𑀡𑀯𑁂 𑀢𑀁 𑀖𑀭𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺.

𑀲𑀼𑀦𑀔𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀪𑀼𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑁄 𑀪𑀕𑀯𑀢𑁄 𑀲𑀫𑀻𑀧𑀁 𑀕𑀢𑁄. 𑀢𑀢𑁄 𑀦𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀢𑁄𑀤𑁂𑀬𑁆𑀬 𑀢𑁆𑀯𑀁 𑀧𑀼𑀩𑁆𑀩𑁂𑀧𑀺 𑀫𑀁 𑀪𑁄 𑀪𑁄𑀢𑀺 𑀧𑀭𑀺𑀪𑀯𑀺𑀢𑁆𑀯𑀸 𑀲𑀼𑀦𑀔𑁄 𑀚𑀸𑀢𑁄, 𑀇𑀤𑀸𑀦𑀺𑀧𑀺 𑀪𑀼𑀓𑁆𑀓𑀸𑀭𑀁 𑀓𑀢𑁆𑀯𑀸 𑀅𑀯𑀻𑀘𑀺𑀁 𑀕𑀫𑀺𑀲𑁆𑀲𑀲𑀻’’𑀢𑀺. 𑀲𑀼𑀦𑀔𑁄 𑀢𑀁 𑀲𑀼𑀢𑁆𑀯𑀸 𑁋 ‘‘𑀚𑀸𑀦𑀸𑀢𑀺 𑀫𑀁 𑀲𑀫𑀡𑁄 𑀕𑁄𑀢𑀫𑁄’’𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀻 𑀳𑀼𑀢𑁆𑀯𑀸 𑀕𑀻𑀯𑀁 𑀑𑀦𑀸𑀫𑁂𑀢𑁆𑀯𑀸 𑀉𑀤𑁆𑀥𑀦𑀦𑁆𑀢𑀭𑁂 𑀙𑀸𑀭𑀺𑀓𑀸𑀬𑀁 𑀦𑀺𑀧𑀦𑁆𑀦𑁄. 𑀫𑀦𑀼𑀲𑁆𑀲𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑀬𑀦𑁂 𑀲𑀬𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀲𑀼𑀪𑁄 𑀆𑀕𑀦𑁆𑀢𑁆𑀯𑀸 𑁋 ‘‘𑀓𑁂𑀦𑀸𑀬𑀁 𑀲𑀼𑀦𑀔𑁄 𑀲𑀬𑀦𑀸 𑀑𑀭𑁄𑀧𑀺𑀢𑁄’’𑀢𑀺 𑀆𑀳. 𑀫𑀦𑀼𑀲𑁆𑀲𑀸 𑀦 𑀓𑁂𑀦𑀘𑀻𑀢𑀺 𑀯𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. 𑀫𑀸𑀡𑀯𑁄 𑀲𑀼𑀢𑁆𑀯𑀸 𑁋 ‘‘𑀫𑀫 𑀧𑀺𑀢𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄, 𑀢𑁄𑀤𑁂𑀬𑁆𑀬𑁄 𑀦𑀸𑀫 𑀲𑀼𑀦𑀔𑁄 𑀦𑀢𑁆𑀣𑀺. 𑀲𑀫𑀡𑁄 𑀧𑀦 𑀕𑁄𑀢𑀫𑁄 𑀧𑀺𑀢𑀭𑀁 𑀲𑀼𑀦𑀔𑀁 𑀓𑀭𑁄𑀢𑀺, 𑀬𑀁𑀓𑀺𑀜𑁆𑀘𑀺 𑀏𑀲 𑀫𑀼𑀔𑀸𑀭𑀼𑀴𑁆𑀳𑀁 𑀪𑀸𑀲𑀢𑀻’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀫𑀼𑀲𑀸𑀯𑀸𑀤𑁂𑀦 𑀦𑀺𑀕𑁆𑀕𑀳𑁂𑀢𑀼𑀓𑀸𑀫𑁄 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀺.

𑀪𑀕𑀯𑀸𑀧𑀺 𑀢𑀲𑁆𑀲 𑀢𑀣𑁂𑀯 𑀯𑀢𑁆𑀯𑀸 𑀅𑀯𑀺𑀲𑀁𑀯𑀸𑀤𑀦𑀢𑁆𑀣𑀁 𑀆𑀳 𑁋 ‘‘𑀅𑀢𑁆𑀣𑀺 𑀧𑀦 𑀢𑁂 𑀫𑀸𑀡𑀯 𑀧𑀺𑀢𑀭𑀸 𑀅𑀦𑀓𑁆𑀔𑀸𑀢𑀁 𑀥𑀦’’𑀦𑁆𑀢𑀺. 𑀅𑀢𑁆𑀣𑀺, 𑀪𑁄 𑀕𑁄𑀢𑀫, 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸 𑀲𑀼𑀯𑀡𑁆𑀡𑀫𑀸𑀮𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸 𑀲𑀼𑀯𑀡𑁆𑀡𑀧𑀸𑀤𑀼𑀓𑀸 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀸 𑀲𑀼𑀯𑀡𑁆𑀡𑀧𑀸𑀢𑀺 𑀲𑀢𑀲𑀳𑀲𑁆𑀲𑀜𑁆𑀘 𑀓𑀳𑀸𑀧𑀡𑀦𑁆𑀢𑀺. 𑀕𑀘𑁆𑀙 𑀢𑀁 𑀲𑀼𑀦𑀔𑀁 𑀅𑀧𑁆𑀧𑁄𑀤𑀓𑀧𑀸𑀬𑀸𑀲𑀁 𑀪𑁄𑀚𑀸𑀧𑁂𑀢𑁆𑀯𑀸 𑀲𑀬𑀦𑁂 𑀆𑀭𑁄𑀧𑁂𑀢𑁆𑀯𑀸 𑀈𑀲𑀓𑀁 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑀓𑀸𑀮𑁂 𑀧𑀼𑀘𑁆𑀙, 𑀲𑀩𑁆𑀩𑀁 𑀢𑁂 𑀆𑀘𑀺𑀓𑁆𑀔𑀺𑀲𑁆𑀲𑀢𑀺. 𑀅𑀣 𑀦𑀁 𑀚𑀸𑀦𑁂𑀬𑁆𑀬𑀸𑀲𑀺 ‘‘𑀧𑀺𑀢𑀸 𑀫𑁂 𑀏𑀲𑁄’’𑀢𑀺. 𑀫𑀸𑀡𑀯𑁄 𑁋 ‘‘𑀲𑀘𑁂 𑀲𑀘𑁆𑀘𑀁 𑀪𑀯𑀺𑀲𑁆𑀲𑀢𑀺, 𑀥𑀦𑀁 𑀮𑀘𑁆𑀙𑀸𑀫𑀺, 𑀦𑁄 𑀘𑁂, 𑀲𑀫𑀡𑀁 𑀕𑁄𑀢𑀫𑀁 𑀫𑀼𑀲𑀸𑀯𑀸𑀤𑁂𑀦 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀤𑁆𑀯𑀻𑀳𑀺𑀧𑀺 𑀓𑀸𑀭𑀡𑁂𑀳𑀺 𑀢𑀼𑀝𑁆𑀞𑁄 𑀕𑀦𑁆𑀢𑁆𑀯𑀸 𑀢𑀣𑀸 𑀅𑀓𑀸𑀲𑀺. 𑀲𑀼𑀦𑀔𑁄 𑁋 ‘‘𑀜𑀸𑀢𑁄𑀫𑁆𑀳𑀺 𑀇𑀫𑀺𑀦𑀸’’𑀢𑀺 𑀭𑁄𑀤𑀺𑀢𑁆𑀯𑀸 𑀳𑀼𑀁 𑀳𑀼𑀦𑁆𑀢𑀺 𑀓𑀭𑁄𑀦𑁆𑀢𑁄 𑀥𑀦𑀦𑀺𑀥𑀸𑀦𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀸𑀤𑁂𑀦 𑀧𑀣𑀯𑀺𑀁 𑀔𑀡𑀺𑀢𑁆𑀯𑀸 𑀲𑀜𑁆𑀜𑀁 𑀅𑀤𑀸𑀲𑀺, 𑀫𑀸𑀡𑀯𑁄 𑀥𑀦𑀁 𑀕𑀳𑁂𑀢𑁆𑀯𑀸 𑁋 ‘‘𑀪𑀯𑀧𑀝𑀺𑀘𑁆𑀙𑀦𑁆𑀦𑀁 𑀦𑀸𑀫 𑀏𑀯𑀁 𑀲𑀼𑀔𑀼𑀫𑀁 𑀧𑀝𑀺𑀲𑀦𑁆𑀥𑀺𑀅𑀦𑁆𑀢𑀭𑀁 𑀧𑀸𑀓𑀝𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲, 𑀅𑀤𑁆𑀥𑀸 𑀏𑀲 𑀲𑀩𑁆𑀩𑀜𑁆𑀜𑀽’’𑀢𑀺 𑀪𑀕𑀯𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑁄 𑀘𑀼𑀤𑁆𑀤𑀲 𑀧𑀜𑁆𑀳𑁂 𑀅𑀪𑀺𑀲𑀗𑁆𑀔𑀭𑀺. 𑀅𑀗𑁆𑀕𑀯𑀺𑀚𑁆𑀚𑀸𑀧𑀸𑀞𑀓𑁄 𑀓𑀺𑀭𑁂𑀲, 𑀢𑁂𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀤𑀁 𑀥𑀫𑁆𑀫𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀲𑀫𑀡𑀁 𑀕𑁄𑀢𑀫𑀁 𑀧𑀜𑁆𑀳𑁂 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀤𑀼𑀢𑀺𑀬𑀕𑀫𑀦𑁂𑀦 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺, 𑀢𑁂𑀦 𑀧𑀼𑀝𑁆𑀞𑀧𑀜𑁆𑀳𑁂 𑀧𑀦 𑀪𑀕𑀯𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀓𑀫𑁆𑀫𑀲𑁆𑀲𑀓𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀓𑀫𑁆𑀫𑀁 𑀏𑀢𑁂𑀲𑀁 𑀲𑀓𑀁 𑀅𑀢𑁆𑀢𑀦𑁄 𑀪𑀡𑁆𑀟𑀓𑀦𑁆𑀢𑀺 𑀓𑀫𑁆𑀫𑀲𑁆𑀲𑀓𑀸. 𑀓𑀫𑁆𑀫𑀲𑁆𑀲 𑀤𑀸𑀬𑀸𑀤𑀸𑀢𑀺 𑀓𑀫𑁆𑀫𑀤𑀸𑀬𑀸𑀤𑀸, 𑀓𑀫𑁆𑀫𑀁 𑀏𑀢𑁂𑀲𑀁 𑀤𑀸𑀬𑀚𑁆𑀚𑀁 𑀪𑀡𑁆𑀟𑀓𑀦𑁆𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀁 𑀏𑀢𑁂𑀲𑀁 𑀬𑁄𑀦𑀺 𑀓𑀸𑀭𑀡𑀦𑁆𑀢𑀺 𑀓𑀫𑁆𑀫𑀬𑁄𑀦𑀻. 𑀓𑀫𑁆𑀫𑀁 𑀏𑀢𑁂𑀲𑀁 𑀩𑀦𑁆𑀥𑀽𑀢𑀺 𑀓𑀫𑁆𑀫𑀩𑀦𑁆𑀥𑀽, 𑀓𑀫𑁆𑀫𑀜𑀸𑀢𑀓𑀸𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀁 𑀏𑀢𑁂𑀲𑀁 𑀧𑀝𑀺𑀲𑀭𑀡𑀁 𑀧𑀢𑀺𑀝𑁆𑀞𑀸𑀢𑀺 𑀓𑀫𑁆𑀫𑀧𑀝𑀺𑀲𑀭𑀡𑀸. 𑀬𑀤𑀺𑀤𑀁 𑀳𑀻𑀦𑀧𑁆𑀧𑀡𑀻𑀢𑀢𑀸𑀬𑀸𑀢𑀺 𑀬𑀁 𑀇𑀤𑀁 ‘‘𑀢𑁆𑀯𑀁 𑀳𑀻𑀦𑁄 𑀪𑀯, 𑀢𑁆𑀯𑀁 𑀧𑀡𑀻𑀢𑁄, 𑀢𑁆𑀯𑀁 𑀅𑀧𑁆𑀧𑀸𑀬𑀼𑀓𑁄, 𑀢𑁆𑀯𑀁 𑀤𑀻𑀖𑀸𑀬𑀼𑀓𑁄…𑀧𑁂… 𑀢𑁆𑀯𑀁 𑀤𑀼𑀧𑁆𑀧𑀜𑁆𑀜𑁄 𑀪𑀯, 𑀢𑁆𑀯𑀁 𑀧𑀜𑁆𑀜𑀯𑀸’’𑀢𑀺 𑀏𑀯𑀁 𑀳𑀻𑀦𑀧𑁆𑀧𑀡𑀻𑀢𑀢𑀸𑀬 𑀯𑀺𑀪𑀚𑀦𑀁, 𑀢𑀁 𑀦 𑀅𑀜𑁆𑀜𑁄 𑀓𑁄𑀘𑀺 𑀓𑀭𑁄𑀢𑀺, 𑀓𑀫𑁆𑀫𑀫𑁂𑀯 𑀏𑀯𑀁 𑀲𑀢𑁆𑀢𑁂 𑀯𑀺𑀪𑀚𑀢𑀻𑀢𑀺 𑀅𑀢𑁆𑀣𑁄. 𑀦 𑀫𑀸𑀡𑀯𑁄 𑀓𑀣𑀺𑀢𑀲𑁆𑀲 𑀅𑀢𑁆𑀣𑀁 𑀲𑀜𑁆𑀚𑀸𑀦𑀸𑀲𑀺, 𑀖𑀦𑀤𑀼𑀲𑁆𑀲𑀧𑀝𑁆𑀝𑁂𑀦𑀲𑁆𑀲 𑀫𑀼𑀔𑀁 𑀩𑀦𑁆𑀥𑀺𑀢𑁆𑀯𑀸 𑀫𑀥𑀼𑀭𑀁 𑀧𑀼𑀭𑀢𑁄 𑀞𑀧𑀺𑀢𑀁 𑀯𑀺𑀬 𑀅𑀳𑁄𑀲𑀺. 𑀫𑀸𑀦𑀦𑀺𑀲𑁆𑀲𑀺𑀢𑁄 𑀓𑀺𑀭𑁂𑀲 𑀧𑀡𑁆𑀟𑀺𑀢𑀫𑀸𑀦𑀻, 𑀅𑀢𑁆𑀢𑀦𑀸 𑀲𑀫𑀁 𑀦 𑀧𑀲𑁆𑀲𑀢𑀺. 𑀅𑀣𑀲𑁆𑀲 ‘‘𑀓𑀺𑀁 𑀲𑀫𑀡𑁄 𑀕𑁄𑀢𑀫𑁄 𑀓𑀣𑁂𑀢𑀺, 𑀬𑀫𑀳𑀁 𑀚𑀸𑀦𑀸𑀫𑀺, 𑀢𑀤𑁂𑀯 𑀓𑀣𑁂𑀢𑀻𑀢𑀺 𑀅𑀬𑀁 𑀫𑀸𑀦𑁄 𑀫𑀸 𑀅𑀳𑁄𑀲𑀻’’𑀢𑀺 𑀫𑀸𑀦𑀪𑀜𑁆𑀚𑀦𑀢𑁆𑀣𑀁 𑀪𑀕𑀯𑀸 ‘‘𑀆𑀤𑀺𑀢𑁄𑀯 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀁 𑀓𑀢𑁆𑀯𑀸 𑀓𑀣𑁂𑀲𑁆𑀲𑀸𑀫𑀺, 𑀢𑀢𑁄 ‘𑀦𑀸𑀳𑀁 𑀪𑁄 𑀕𑁄𑀢𑀫 𑀚𑀸𑀦𑀸𑀫𑀺, 𑀯𑀺𑀢𑁆𑀣𑀸𑀭𑁂𑀦 𑀫𑁂 𑀧𑀸𑀓𑀝𑀁 𑀓𑀢𑁆𑀯𑀸 𑀓𑀣𑁂𑀣𑀸’𑀢𑀺 𑀫𑀁 𑀬𑀸𑀘𑀺𑀲𑁆𑀲𑀢𑀺, 𑀅𑀣𑀲𑁆𑀲𑀸𑀳𑀁 𑀬𑀸𑀘𑀺𑀢𑀓𑀸𑀮𑁂 𑀓𑀣𑁂𑀲𑁆𑀲𑀸𑀫𑀺, 𑀏𑀯𑀜𑁆𑀘𑀲𑁆𑀲 𑀲𑀸𑀢𑁆𑀣𑀓𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀁 𑀓𑀢𑁆𑀯𑀸 𑀓𑀣𑁂𑀲𑀺.

𑀇𑀤𑀸𑀦𑀺 𑀲𑁄 𑀅𑀢𑁆𑀢𑀦𑁄 𑀅𑀧𑁆𑀧𑀝𑀺𑀯𑀺𑀤𑁆𑀥𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀦 𑀔𑁄 𑀅𑀳𑀦𑁆𑀢𑀺𑀆𑀤𑀺𑀫𑀸𑀳.

𑁨𑁯𑁦. 𑀲𑀫𑀢𑁆𑀢𑁂𑀦𑀸𑀢𑀺 𑀧𑀭𑀺𑀧𑀼𑀡𑁆𑀡𑁂𑀦. 𑀲𑀫𑀸𑀤𑀺𑀦𑁆𑀦𑁂𑀦𑀸𑀢𑀺 𑀕𑀳𑀺𑀢𑁂𑀦 𑀧𑀭𑀸𑀫𑀝𑁆𑀞𑁂𑀦. 𑀅𑀧𑁆𑀧𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀓𑀸 𑀏𑀲𑀸, 𑀫𑀸𑀡𑀯, 𑀧𑀝𑀺𑀧𑀤𑀸 𑀬𑀤𑀺𑀤𑀁 𑀧𑀸𑀡𑀸𑀢𑀺𑀧𑀸𑀢𑀻𑀢𑀺 𑀬𑀁 𑀇𑀤𑀁 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀁, 𑀏𑀲𑀸 𑀅𑀧𑁆𑀧𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀓𑀸 𑀧𑀝𑀺𑀧𑀤𑀸𑀢𑀺.

𑀓𑀣𑀁 𑀧𑀦𑁂𑀲𑀸 𑀅𑀧𑁆𑀧𑀸𑀬𑀼𑀓𑀢𑀁 𑀓𑀭𑁄𑀢𑀺? 𑀘𑀢𑁆𑀢𑀸𑀭𑀺 𑀳𑀺 𑀓𑀫𑁆𑀫𑀸𑀦𑀺 𑀉𑀧𑀧𑀻𑀴𑀓𑀁 𑀉𑀧𑀘𑁆𑀙𑁂𑀤𑀓𑀁 𑀚𑀦𑀓𑀁 𑀉𑀧𑀢𑁆𑀣𑀫𑁆𑀪𑀓𑀦𑁆𑀢𑀺. 𑀩𑀮𑀯𑀓𑀫𑁆𑀫𑁂𑀦 𑀳𑀺 𑀦𑀺𑀩𑁆𑀩𑀢𑁆𑀢𑀁 𑀧𑀯𑀢𑁆𑀢𑁂 𑀉𑀧𑀧𑀻𑀴𑀓𑀁 𑀆𑀕𑀦𑁆𑀢𑁆𑀯𑀸 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀢𑀺 𑀦𑀸𑀫 𑁋 ‘‘𑀲𑀘𑀸𑀳𑀁 𑀧𑀞𑀫𑀢𑀭𑀁 𑀚𑀸𑀦𑁂𑀬𑁆𑀬𑀁, 𑀦 𑀢𑁂 𑀇𑀥 𑀦𑀺𑀩𑁆𑀩𑀢𑁆𑀢𑀺𑀢𑀼𑀁 𑀤𑀤𑁂𑀬𑁆𑀬𑀁, 𑀘𑀢𑀽𑀲𑀼𑀬𑁂𑀯 𑀢𑀁 𑀅𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀸𑀧𑁂𑀬𑁆𑀬𑀁. 𑀳𑁄𑀢𑀼, 𑀢𑁆𑀯𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀩𑁆𑀩𑀢𑁆𑀢, 𑀅𑀳𑀁 𑀉𑀧𑀧𑀻𑀴𑀓𑀓𑀫𑁆𑀫𑀁 𑀦𑀸𑀫 𑀢𑀁 𑀧𑀻𑀴𑁂𑀢𑁆𑀯𑀸 𑀦𑀺𑀭𑁄𑀚𑀁 𑀦𑀺𑀬𑀽𑀲𑀁 𑀓𑀲𑀝𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀢𑀁 𑀢𑀸𑀤𑀺𑀲𑀁 𑀓𑀭𑁄𑀢𑀺. 𑀓𑀺𑀁 𑀓𑀭𑁄𑀢𑀺? 𑀧𑀭𑀺𑀲𑁆𑀲𑀬𑀁 𑀉𑀧𑀦𑁂𑀢𑀺, 𑀪𑁄𑀕𑁂 𑀯𑀺𑀦𑀸𑀲𑁂𑀢𑀺.

𑀢𑀢𑁆𑀣 𑀤𑀸𑀭𑀓𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀦𑀺𑀩𑁆𑀩𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀸𑀢𑀼 𑀅𑀲𑁆𑀲𑀸𑀤𑁄 𑀯𑀸 𑀲𑀼𑀔𑀁 𑀯𑀸 𑀦 𑀳𑁄𑀢𑀺, 𑀫𑀸𑀢𑀸𑀧𑀺𑀢𑀽𑀦𑀁 𑀧𑀻𑀴𑀸𑀯 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀧𑀭𑀺𑀲𑁆𑀲𑀬𑀁 𑀉𑀧𑀦𑁂𑀢𑀺. 𑀤𑀸𑀭𑀓𑀲𑁆𑀲 𑀧𑀦 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑁂𑀳𑁂 𑀪𑁄𑀕𑀸 𑀉𑀤𑀓𑀁 𑀧𑀢𑁆𑀯𑀸 𑀮𑁄𑀡𑀁 𑀯𑀺𑀬 𑀭𑀸𑀚𑀸𑀤𑀻𑀦𑀁 𑀯𑀲𑁂𑀦 𑀦𑀲𑁆𑀲𑀦𑁆𑀢𑀺, 𑀓𑀼𑀫𑁆𑀪𑀤𑁄𑀳𑀦𑀥𑁂𑀦𑀼𑀬𑁄 𑀔𑀻𑀭𑀁 𑀦 𑀤𑁂𑀦𑁆𑀢𑀺, 𑀲𑀽𑀭𑀢𑀸 𑀕𑁄𑀡𑀸 𑀘𑀡𑁆𑀟𑀸 𑀳𑁄𑀦𑁆𑀢𑀺, 𑀓𑀸𑀡𑀸 𑀳𑁄𑀦𑁆𑀢𑀺, 𑀔𑀼𑀚𑁆𑀚𑀸 𑀳𑁄𑀦𑁆𑀢𑀺, 𑀕𑁄𑀫𑀡𑁆𑀟𑀮𑁂 𑀭𑁄𑀕𑁄 𑀧𑀢𑀢𑀺, 𑀤𑀸𑀲𑀸𑀤𑀬𑁄 𑀯𑀘𑀦𑀁 𑀦 𑀓𑀭𑁄𑀦𑁆𑀢𑀺, 𑀯𑀸𑀧𑀺𑀢𑀁 𑀲𑀲𑁆𑀲𑀁 𑀦 𑀚𑀸𑀬𑀢𑀺, 𑀕𑁂𑀳𑀕𑀢𑀁 𑀕𑁂𑀳𑁂, 𑀅𑀭𑀜𑁆𑀜𑀕𑀢𑀁 𑀅𑀭𑀜𑁆𑀜𑁂 𑀦𑀲𑁆𑀲𑀢𑀺, 𑀅𑀦𑀼𑀧𑀼𑀩𑁆𑀩𑁂𑀦 𑀖𑀸𑀲𑀘𑁆𑀙𑀸𑀤𑀦𑀫𑀢𑁆𑀢𑀁 𑀤𑀼𑀮𑁆𑀮𑀪𑀁 𑀳𑁄𑀢𑀺, 𑀕𑀩𑁆𑀪𑀧𑀭𑀺𑀳𑀸𑀭𑁄 𑀦 𑀳𑁄𑀢𑀺, 𑀯𑀺𑀚𑀸𑀢𑀓𑀸𑀮𑁂 𑀫𑀸𑀢𑀼𑀣𑀜𑁆𑀜𑀁 𑀙𑀺𑀚𑁆𑀚𑀢𑀺, 𑀤𑀸𑀭𑀓𑁄 𑀧𑀭𑀺𑀳𑀸𑀭𑀁 𑀅𑀮𑀪𑀦𑁆𑀢𑁄 𑀧𑀻𑀴𑀺𑀢𑁄 𑀦𑀺𑀭𑁄𑀚𑁄 𑀦𑀺𑀬𑀽𑀲𑁄 𑀓𑀲𑀝𑁄 𑀳𑁄𑀢𑀺, 𑀇𑀤𑀁 𑀉𑀧𑀧𑀻𑀴𑀓𑀓𑀫𑁆𑀫𑀁 𑀦𑀸𑀫.

𑀤𑀻𑀖𑀸𑀬𑀼𑀓𑀓𑀫𑁆𑀫𑁂𑀦 𑀧𑀦 𑀦𑀺𑀩𑁆𑀩𑀢𑁆𑀢𑀲𑁆𑀲 𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑀁 𑀆𑀕𑀦𑁆𑀢𑁆𑀯𑀸 𑀆𑀬𑀼𑀁 𑀙𑀺𑀦𑁆𑀤𑀢𑀺. 𑀬𑀣𑀸 𑀳𑀺 𑀧𑀼𑀭𑀺𑀲𑁄 𑀅𑀝𑁆𑀞𑀼𑀲𑀪𑀕𑀫𑀦𑀁 𑀓𑀢𑁆𑀯𑀸 𑀲𑀭𑀁 𑀔𑀺𑀧𑁂𑀬𑁆𑀬 𑀢𑀫𑀜𑁆𑀜𑁄 𑀥𑀦𑀼𑀢𑁄 𑀯𑀺𑀫𑀼𑀢𑁆𑀢𑀫𑀢𑁆𑀢𑀁 𑀫𑀼𑀕𑁆𑀕𑀭𑁂𑀦 𑀧𑀳𑀭𑀺𑀢𑁆𑀯𑀸 𑀢𑀢𑁆𑀣𑁂𑀯 𑀧𑀸𑀢𑁂𑀬𑁆𑀬, 𑀏𑀯𑀁 𑀤𑀻𑀖𑀸𑀬𑀼𑀓𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀲𑁆𑀲 𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑀁 𑀆𑀬𑀼𑀁 𑀙𑀺𑀦𑁆𑀤𑀢𑀺. 𑀓𑀺𑀁 𑀓𑀭𑁄𑀢𑀺? 𑀘𑁄𑀭𑀸𑀦𑀁 𑀅𑀝𑀯𑀺𑀁 𑀧𑀯𑁂𑀲𑁂𑀢𑀺, 𑀯𑀸𑀴𑀫𑀘𑁆𑀙𑁄𑀤𑀓𑀁 𑀑𑀢𑀸𑀭𑁂𑀢𑀺, 𑀅𑀜𑁆𑀜𑀢𑀭𑀁 𑀯𑀸 𑀧𑀦 𑀲𑀧𑀭𑀺𑀲𑁆𑀲𑀬𑀝𑁆𑀞𑀸𑀦𑀁 𑀉𑀧𑀦𑁂𑀢𑀺, 𑀇𑀤𑀁 𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑀁 𑀦𑀸𑀫, ‘‘𑀉𑀧𑀖𑀸𑀢𑀓’’𑀦𑁆𑀢𑀺𑀧𑀺 𑀏𑀢𑀲𑁆𑀲𑁂𑀯 𑀦𑀸𑀫𑀁.

𑀧𑀝𑀺𑀲𑀦𑁆𑀥𑀺𑀦𑀺𑀩𑁆𑀩𑀢𑁆𑀢𑀓𑀁 𑀧𑀦 𑀓𑀫𑁆𑀫𑀁 𑀚𑀦𑀓𑀓𑀫𑁆𑀫𑀁 𑀦𑀸𑀫. 𑀅𑀧𑁆𑀧𑀪𑁄𑀕𑀓𑀼𑀮𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀲𑁆𑀲 𑀪𑁄𑀕𑀲𑀫𑁆𑀧𑀤𑀸𑀤𑀺𑀓𑀭𑀡𑁂𑀦 𑀉𑀧𑀢𑁆𑀣𑀫𑁆𑀪𑀓𑀓𑀫𑁆𑀫𑀁 𑀉𑀧𑀢𑁆𑀣𑀫𑁆𑀪𑀓𑀓𑀫𑁆𑀫𑀁 𑀦𑀸𑀫.

𑀇𑀫𑁂𑀲𑀼 𑀘𑀢𑀽𑀲𑀼 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀅𑀓𑀼𑀲𑀮𑀸𑀦𑁂𑀯, 𑀚𑀦𑀓𑀁 𑀓𑀼𑀲𑀮𑀫𑁆𑀧𑀺 𑀅𑀓𑀼𑀲𑀮𑀫𑁆𑀧𑀺, 𑀉𑀧𑀢𑁆𑀣𑀫𑁆𑀪𑀓𑀁 𑀓𑀼𑀲𑀮𑀫𑁂𑀯. 𑀢𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀁 𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑁂𑀦 𑀅𑀧𑁆𑀧𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀓𑀁 𑀳𑁄𑀢𑀺. 𑀧𑀸𑀡𑀸𑀢𑀺𑀧𑀸𑀢𑀺𑀦𑀸 𑀯𑀸 𑀓𑀢𑀁 𑀓𑀼𑀲𑀮𑀓𑀫𑁆𑀫𑀁 𑀉𑀴𑀸𑀭𑀁 𑀦 𑀳𑁄𑀢𑀺, 𑀤𑀻𑀖𑀸𑀬𑀼𑀓𑀧𑀝𑀺𑀲𑀦𑁆𑀥𑀺𑀁 𑀚𑀦𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀏𑀯𑀁 𑀧𑀸𑀡𑀸𑀢𑀺𑀧𑀸𑀢𑁄 𑀅𑀧𑁆𑀧𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀓𑁄 𑀳𑁄𑀢𑀺. 𑀧𑀝𑀺𑀲𑀦𑁆𑀥𑀺𑀫𑁂𑀯 𑀯𑀸 𑀦𑀺𑀬𑀸𑀫𑁂𑀢𑁆𑀯𑀸 𑀅𑀧𑁆𑀧𑀸𑀬𑀼𑀓𑀁 𑀓𑀭𑁄𑀢𑀺, 𑀲𑀦𑁆𑀦𑀺𑀝𑁆𑀞𑀸𑀦𑀘𑁂𑀢𑀦𑀸𑀬 𑀯𑀸 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀧𑀼𑀩𑁆𑀩𑀸𑀧𑀭𑀘𑁂𑀢𑀦𑀸𑀳𑀺 𑀯𑀼𑀢𑁆𑀢𑀦𑀬𑁂𑀦 𑀅𑀧𑁆𑀧𑀸𑀬𑀼𑀓𑁄 𑀳𑁄𑀢𑀺.

𑀤𑀻𑀖𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀓𑀸 𑀏𑀲𑀸 𑀫𑀸𑀡𑀯 𑀧𑀝𑀺𑀧𑀤𑀸𑀢𑀺 𑀏𑀢𑁆𑀣 𑀧𑀭𑀺𑀢𑁆𑀢𑀓𑀫𑁆𑀫𑁂𑀦𑀧𑀺 𑀦𑀺𑀩𑁆𑀩𑀢𑁆𑀢𑀁 𑀧𑀯𑀢𑁆𑀢𑁂 𑀏𑀢𑀁 𑀧𑀸𑀡𑀸𑀢𑀺𑀧𑀸𑀢𑀸 𑀯𑀺𑀭𑀢𑀺𑀓𑀫𑁆𑀫𑀁 𑀆𑀕𑀦𑁆𑀢𑁆𑀯𑀸 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀢𑀺 𑀦𑀸𑀫 𑁋 ‘‘𑀲𑀘𑀸𑀳𑀁 𑀧𑀞𑀫𑀢𑀭𑀁 𑀚𑀸𑀦𑁂𑀬𑁆𑀬𑀁, 𑀦 𑀢𑁂 𑀇𑀥 𑀦𑀺𑀩𑁆𑀩𑀢𑁆𑀢𑀺𑀢𑀼𑀁 𑀤𑀤𑁂𑀬𑁆𑀬𑀁, 𑀤𑁂𑀯𑀮𑁄𑀓𑁂𑀬𑁂𑀯 𑀢𑀁 𑀦𑀺𑀩𑁆𑀩𑀢𑁆𑀢𑀸𑀧𑁂𑀬𑁆𑀬𑀁. 𑀳𑁄𑀢𑀼, 𑀢𑁆𑀯𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀩𑁆𑀩𑀢𑁆𑀢𑀺, 𑀅𑀳𑀁 𑀉𑀧𑀢𑁆𑀣𑀫𑁆𑀪𑀓𑀓𑀫𑁆𑀫𑀁 𑀦𑀸𑀫 𑀣𑀫𑁆𑀪𑀁 𑀢𑁂 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀢𑁆𑀣𑀫𑁆𑀪𑀁 𑀓𑀭𑁄𑀢𑀺. 𑀓𑀺𑀁 𑀓𑀭𑁄𑀢𑀺? 𑀧𑀭𑀺𑀲𑁆𑀲𑀬𑀁 𑀦𑀸𑀲𑁂𑀢𑀺, 𑀪𑁄𑀕𑁂 𑀉𑀧𑁆𑀧𑀸𑀤𑁂𑀢𑀺.

𑀢𑀢𑁆𑀣 𑀤𑀸𑀭𑀓𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀦𑀺𑀩𑁆𑀩𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀸𑀢𑀸𑀧𑀺𑀢𑀽𑀦𑀁 𑀲𑀼𑀔𑀫𑁂𑀯 𑀲𑀸𑀢𑀫𑁂𑀯 𑀳𑁄𑀢𑀺. 𑀬𑁂𑀧𑀺 𑀧𑀓𑀢𑀺𑀬𑀸 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀧𑀭𑀺𑀲𑁆𑀲𑀬𑀸 𑀳𑁄𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀅𑀧𑀕𑀘𑁆𑀙𑀦𑁆𑀢𑀺. 𑀏𑀯𑀁 𑀧𑀭𑀺𑀲𑁆𑀲𑀬𑀁 𑀦𑀸𑀲𑁂𑀢𑀺. 𑀤𑀸𑀭𑀓𑀲𑁆𑀲 𑀧𑀦 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀕𑁂𑀳𑁂 𑀪𑁄𑀕𑀸𑀦𑀁 𑀧𑀫𑀸𑀡𑀁 𑀦 𑀳𑁄𑀢𑀺, 𑀦𑀺𑀥𑀺𑀓𑀼𑀫𑁆𑀪𑀺𑀬𑁄 𑀧𑀼𑀭𑀢𑁄𑀧𑀺 𑀧𑀘𑁆𑀙𑀢𑁄𑀧𑀺 𑀕𑁂𑀳𑀁 𑀧𑀯𑀝𑁆𑀝𑀫𑀸𑀦𑀸 𑀧𑀯𑀺𑀲𑀦𑁆𑀢𑀺. 𑀫𑀸𑀢𑀸𑀧𑀺𑀢𑀭𑁄 𑀧𑀭𑁂𑀳𑀺 𑀞𑀧𑀺𑀢𑀥𑀦𑀲𑁆𑀲𑀸𑀧𑀺 𑀲𑀫𑁆𑀫𑀼𑀔𑀻𑀪𑀸𑀯𑀁 𑀕𑀘𑁆𑀙𑀦𑁆𑀢𑀺. 𑀥𑁂𑀦𑀼𑀬𑁄 𑀩𑀳𑀼𑀔𑀻𑀭𑀸 𑀳𑁄𑀦𑁆𑀢𑀺, 𑀕𑁄𑀡𑀸 𑀲𑀼𑀔𑀲𑀻𑀮𑀸 𑀳𑁄𑀦𑁆𑀢𑀺, 𑀯𑀧𑁆𑀧𑀝𑁆𑀞𑀸𑀦𑁂 𑀲𑀲𑁆𑀲𑀸𑀦𑀺 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀯𑀟𑁆𑀠𑀺𑀬𑀸 𑀯𑀸 𑀲𑀫𑁆𑀧𑀬𑀼𑀢𑁆𑀢𑀁, 𑀢𑀸𑀯𑀓𑀸𑀮𑀺𑀓𑀁 𑀯𑀸 𑀤𑀺𑀦𑁆𑀦𑀁 𑀥𑀦𑀁 𑀅𑀘𑁄𑀤𑀺𑀢𑀸 𑀲𑀬𑀫𑁂𑀯 𑀆𑀳𑀭𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀤𑀸𑀲𑀸𑀤𑀬𑁄 𑀲𑀼𑀯𑀘𑀸 𑀳𑁄𑀦𑁆𑀢𑀺, 𑀓𑀫𑁆𑀫𑀦𑁆𑀢𑀸 𑀦 𑀧𑀭𑀺𑀳𑀸𑀬𑀦𑁆𑀢𑀺. 𑀤𑀸𑀭𑀓𑁄 𑀕𑀩𑁆𑀪𑀢𑁄 𑀧𑀝𑁆𑀞𑀸𑀬 𑀧𑀭𑀺𑀳𑀸𑀭𑀁 𑀮𑀪𑀢𑀺, 𑀓𑁄𑀫𑀸𑀭𑀺𑀓𑀯𑁂𑀚𑁆𑀚𑀸 𑀲𑀦𑁆𑀦𑀺𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀕𑀳𑀧𑀢𑀺𑀓𑀼𑀮𑁂 𑀚𑀸𑀢𑁄 𑀲𑁂𑀝𑁆𑀞𑀺𑀝𑁆𑀞𑀸𑀦𑀁, 𑀅𑀫𑀘𑁆𑀘𑀓𑀼𑀮𑀸𑀤𑀻𑀲𑀼 𑀚𑀸𑀢𑁄 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀸𑀤𑀻𑀦𑀺 𑀮𑀪𑀢𑀺. 𑀏𑀯𑀁 𑀪𑁄𑀕𑁂 𑀉𑀧𑁆𑀧𑀸𑀤𑁂𑀢𑀺. 𑀲𑁄 𑀅𑀧𑀭𑀺𑀲𑁆𑀲𑀬𑁄 𑀲𑀪𑁄𑀕𑁄 𑀘𑀺𑀭𑀁 𑀚𑀻𑀯𑀢𑀻𑀢𑀺. 𑀏𑀯𑀁 𑀅𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀁 𑀤𑀻𑀖𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀓𑀁 𑀳𑁄𑀢𑀺.

𑀅𑀧𑀸𑀡𑀸𑀢𑀺𑀧𑀸𑀢𑀺𑀦𑀸 𑀯𑀸 𑀓𑀢𑀁 𑀅𑀜𑁆𑀜𑀫𑁆𑀧𑀺 𑀓𑀼𑀲𑀮𑀁 𑀉𑀴𑀸𑀭𑀁 𑀳𑁄𑀢𑀺, 𑀤𑀻𑀖𑀸𑀬𑀼𑀓𑀧𑀝𑀺𑀲𑀦𑁆𑀥𑀺𑀁 𑀚𑀦𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀏𑀯𑀫𑁆𑀧𑀺 𑀤𑀻𑀖𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀓𑀁 𑀳𑁄𑀢𑀺. 𑀧𑀝𑀺𑀲𑀦𑁆𑀥𑀺𑀫𑁂𑀯 𑀯𑀸 𑀦𑀺𑀬𑀸𑀫𑁂𑀢𑁆𑀯𑀸 𑀤𑀻𑀖𑀸𑀬𑀼𑀓𑀁 𑀓𑀭𑁄𑀢𑀺. 𑀲𑀦𑁆𑀦𑀺𑀝𑁆𑀞𑀸𑀦𑀘𑁂𑀢𑀦𑀸𑀬 𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀧𑀼𑀩𑁆𑀩𑀸𑀧𑀭𑀘𑁂𑀢𑀦𑀸𑀳𑀺 𑀯𑀼𑀢𑁆𑀢𑀦𑀬𑁂𑀦 𑀤𑀻𑀖𑀸𑀬𑀼𑀓𑁄 𑀳𑁄𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀳𑁂𑀞𑀦𑀓𑀫𑁆𑀫𑀸𑀤𑀻𑀦𑀺𑀧𑀺 𑀳𑀺 𑀧𑀯𑀢𑁆𑀢𑁂 𑀆𑀕𑀦𑁆𑀢𑁆𑀯𑀸 𑀅𑀢𑁆𑀣𑀢𑁄 𑀢𑀣𑁂𑀯 𑀯𑀤𑀫𑀸𑀦𑀸𑀦𑀺 𑀯𑀺𑀬 𑀉𑀧𑀧𑀻𑀴𑀦𑁂𑀦 𑀦𑀺𑀩𑁆𑀪𑁄𑀕𑀢𑀁 𑀆𑀧𑀸𑀤𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀦𑀁 𑀅𑀮𑀪𑀦𑁆𑀢𑀲𑁆𑀲 𑀭𑁄𑀕𑀼𑀧𑁆𑀧𑀸𑀤𑀦𑀸𑀤𑀻𑀳𑀺 𑀯𑀸, 𑀯𑀺𑀳𑁂𑀞𑀓𑀸𑀤𑀻𑀳𑀺 𑀓𑀢𑀲𑁆𑀲 𑀓𑀼𑀲𑀮𑀲𑁆𑀲 𑀅𑀦𑀼𑀴𑀸𑀭𑀢𑀸𑀬 𑀯𑀸, 𑀆𑀤𑀺𑀢𑁄𑀯 𑀧𑀝𑀺𑀲𑀦𑁆𑀥𑀺𑀦𑀺𑀬𑀸𑀫𑀦𑁂𑀦 𑀯𑀸, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀼𑀩𑁆𑀩𑀸𑀧𑀭𑀘𑁂𑀢𑀦𑀸𑀯𑀲𑁂𑀦 𑀯𑀸 𑀩𑀳𑁆𑀯𑀸𑀩𑀸𑀥𑀢𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀅𑀧𑀸𑀡𑀸𑀢𑀺𑀧𑀸𑀢𑁄 𑀯𑀺𑀬 𑀘 𑀅𑀯𑀺𑀳𑁂𑀞𑀦𑀸𑀤𑀻𑀦𑀺𑀧𑀺 𑀅𑀧𑁆𑀧𑀸𑀩𑀸𑀥𑀢𑀸𑀤𑀻𑀦𑀻𑀢𑀺.

𑁨𑁯𑁩. 𑀏𑀢𑁆𑀣 𑀧𑀦 𑀇𑀲𑁆𑀲𑀸𑀫𑀦𑀓𑁄𑀢𑀺 𑀇𑀲𑁆𑀲𑀸𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁄. 𑀉𑀧𑀤𑀼𑀲𑁆𑀲𑀢𑀻𑀢𑀺 𑀇𑀲𑁆𑀲𑀸𑀯𑀲𑁂𑀦𑁂𑀯 𑀉𑀧𑀓𑁆𑀓𑁄𑀲𑀦𑁆𑀢𑁄 𑀤𑀼𑀲𑁆𑀲𑀢𑀺. 𑀇𑀲𑁆𑀲𑀁 𑀩𑀦𑁆𑀥𑀢𑀻𑀢𑀺 𑀬𑀯𑀓𑀮𑀸𑀧𑀁 𑀩𑀦𑁆𑀥𑀦𑁆𑀢𑁄 𑀯𑀺𑀬 𑀬𑀣𑀸 𑀦 𑀦𑀲𑁆𑀲𑀢𑀺 𑀏𑀯𑀁 𑀩𑀦𑁆𑀥𑀺𑀢𑁆𑀯𑀸 𑀯𑀺𑀬 𑀞𑀧𑁂𑀢𑀺. 𑀅𑀧𑁆𑀧𑁂𑀲𑀓𑁆𑀔𑁄𑀢𑀺 𑀅𑀧𑁆𑀧𑀧𑀭𑀺𑀯𑀸𑀭𑁄, 𑀭𑀢𑁆𑀢𑀺𑀁 𑀔𑀺𑀢𑁆𑀢𑁄 𑀯𑀺𑀬 𑀲𑀭𑁄 𑀦 𑀧𑀜𑁆𑀜𑀸𑀬𑀢𑀺, 𑀉𑀘𑁆𑀙𑀺𑀝𑁆𑀞𑀳𑀢𑁆𑀣𑁄 𑀦𑀺𑀲𑀻𑀤𑀺𑀢𑁆𑀯𑀸 𑀉𑀤𑀓𑀤𑀸𑀬𑀓𑀫𑁆𑀧𑀺 𑀦 𑀮𑀪𑀢𑀺.

𑁨𑁯𑁪. 𑀦 𑀤𑀸𑀢𑀸 𑀳𑁄𑀢𑀻𑀢𑀺 𑀫𑀘𑁆𑀙𑀭𑀺𑀬𑀯𑀲𑁂𑀦 𑀦 𑀤𑀸𑀢𑀸 𑀳𑁄𑀢𑀺. 𑀢𑁂𑀦 𑀓𑀫𑁆𑀫𑁂𑀦𑀸𑀢𑀺 𑀢𑁂𑀦 𑀫𑀘𑁆𑀙𑀭𑀺𑀬𑀓𑀫𑁆𑀫𑁂𑀦.

𑁨𑁯𑁫. 𑀅𑀪𑀺𑀯𑀸𑀤𑁂𑀢𑀩𑁆𑀩𑀦𑁆𑀢𑀺 𑀅𑀪𑀺𑀯𑀸𑀤𑀦𑀸𑀭𑀳𑀁 𑀩𑀼𑀤𑁆𑀥𑀁 𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀯𑀸 𑀅𑀭𑀺𑀬𑀲𑀸𑀯𑀓𑀁 𑀯𑀸. 𑀧𑀘𑁆𑀘𑀼𑀝𑁆𑀞𑀸𑀢𑀩𑁆𑀩𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀲𑁆𑀫𑀺𑀁 𑀧𑀦 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑁂 𑀉𑀧𑀧𑀻𑀴𑀓𑀉𑀧𑀢𑁆𑀣𑀫𑁆𑀪𑀓𑀓𑀫𑁆𑀫𑀸𑀦𑀺 𑀦 𑀕𑀳𑁂𑀢𑀩𑁆𑀩𑀸𑀦𑀺. 𑀦 𑀳𑀺 𑀧𑀯𑀢𑁆𑀢𑁂 𑀦𑀻𑀘𑀓𑀼𑀮𑀺𑀦𑀁 𑀯𑀸 𑀉𑀘𑁆𑀘𑀸𑀓𑀼𑀮𑀺𑀦𑀁 𑀯𑀸 𑀲𑀓𑁆𑀓𑀸 𑀓𑀸𑀢𑀼𑀁, 𑀧𑀝𑀺𑀲𑀦𑁆𑀥𑀺𑀫𑁂𑀯 𑀧𑀦 𑀦𑀺𑀬𑀸𑀫𑁂𑀢𑁆𑀯𑀸 𑀦𑀻𑀘𑀓𑀼𑀮𑀺𑀬𑀁 𑀓𑀫𑁆𑀫𑀁 𑀦𑀻𑀘𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀉𑀘𑁆𑀘𑀸𑀓𑀼𑀮𑀺𑀬𑀁 𑀓𑀫𑁆𑀫𑀁 𑀉𑀘𑁆𑀘𑀸𑀓𑀼𑀮𑁂.

𑁨𑁯𑁬. 𑀦 𑀧𑀭𑀺𑀧𑀼𑀘𑁆𑀙𑀺𑀢𑀸 𑀳𑁄𑀢𑀻𑀢𑀺 𑀏𑀢𑁆𑀣 𑀧𑀦 𑀅𑀧𑀭𑀺𑀧𑀼𑀘𑁆𑀙𑀦𑁂𑀦 𑀦𑀺𑀭𑀬𑁂 𑀦 𑀦𑀺𑀩𑁆𑀩𑀢𑁆𑀢𑀢𑀺. 𑀅𑀧𑀭𑀺𑀧𑀼𑀘𑁆𑀙𑀓𑁄 𑀧𑀦 ‘‘𑀇𑀤𑀁 𑀓𑀸𑀢𑀩𑁆𑀩𑀁, 𑀇𑀤𑀁 𑀦 𑀓𑀸𑀢𑀩𑁆𑀩’’𑀦𑁆𑀢𑀺 𑀦 𑀚𑀸𑀦𑀸𑀢𑀺, 𑀅𑀚𑀸𑀦𑀦𑁆𑀢𑁄 𑀓𑀸𑀢𑀩𑁆𑀩𑀁 𑀦 𑀓𑀭𑁄𑀢𑀺, 𑀅𑀓𑀸𑀢𑀩𑁆𑀩𑀁 𑀓𑀭𑁄𑀢𑀺. 𑀢𑁂𑀦 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀇𑀢𑀭𑁄 𑀲𑀕𑁆𑀕𑁂. 𑀇𑀢𑀺 𑀔𑁄, 𑀫𑀸𑀡𑀯…𑀧𑁂… 𑀬𑀤𑀺𑀤𑀁 𑀳𑀻𑀦𑀧𑁆𑀧𑀡𑀻𑀢𑀢𑀸𑀬𑀸𑀢𑀺 𑀲𑀢𑁆𑀣𑀸 𑀤𑁂𑀲𑀦𑀁 𑀬𑀣𑀸𑀦𑀼𑀲𑀦𑁆𑀥𑀺𑀁 𑀧𑀸𑀧𑁂𑀲𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀘𑀽𑀴𑀓𑀫𑁆𑀫𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀪𑀲𑀼𑀢𑁆𑀢𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺.

𑁬. 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯𑁮. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀲𑀼𑀢𑁆𑀢𑀁. 𑀢𑀢𑁆𑀣 𑀫𑁄𑀖𑀦𑁆𑀢𑀺 𑀢𑀼𑀘𑁆𑀙𑀁 𑀅𑀨𑀮𑀁. 𑀲𑀘𑁆𑀘𑀦𑁆𑀢𑀺 𑀢𑀣𑀁 𑀪𑀽𑀢𑀁. 𑀇𑀤𑀜𑁆𑀘 𑀏𑀢𑁂𑀦 𑀦 𑀲𑀫𑁆𑀫𑀼𑀔𑀸 𑀲𑀼𑀢𑀁, 𑀉𑀧𑀸𑀮𑀺𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁫𑁬) 𑀧𑀦 𑁋 ‘‘𑀫𑀦𑁄𑀓𑀫𑁆𑀫𑀁 𑀫𑀳𑀸𑀲𑀸𑀯𑀚𑁆𑀚𑀢𑀭𑀁 𑀧𑀜𑁆𑀜𑀧𑁂𑀫𑀺 𑀧𑀸𑀧𑀲𑁆𑀲 𑀓𑀫𑁆𑀫𑀲𑁆𑀲 𑀓𑀺𑀭𑀺𑀬𑀸𑀬 𑀧𑀸𑀧𑀲𑁆𑀲 𑀓𑀫𑁆𑀫𑀲𑁆𑀲 𑀧𑀯𑀢𑁆𑀢𑀺𑀬𑀸, 𑀦𑁄 𑀢𑀣𑀸 𑀓𑀸𑀬𑀓𑀫𑁆𑀫𑀁 𑀦𑁄 𑀢𑀣𑀸 𑀯𑀘𑀻𑀓𑀫𑁆𑀫’’𑀦𑁆𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀁 𑀅𑀢𑁆𑀣𑀺, 𑀲𑀸 𑀓𑀣𑀸 𑀢𑀺𑀢𑁆𑀣𑀺𑀬𑀸𑀦𑀁 𑀅𑀦𑁆𑀢𑀭𑁂 𑀧𑀸𑀓𑀝𑀸 𑀚𑀸𑀢𑀸, 𑀢𑀁 𑀕𑀳𑁂𑀢𑁆𑀯𑀸 𑀏𑀲 𑀯𑀤𑀢𑀺. 𑀅𑀢𑁆𑀣𑀺 𑀘 𑀲𑀸 𑀲𑀫𑀸𑀧𑀢𑁆𑀢𑀻𑀢𑀺 𑀇𑀤𑀁 𑁋 ‘‘𑀓𑀣𑀁 𑀦𑀼 𑀔𑁄, 𑀪𑁄, 𑀅𑀪𑀺𑀲𑀜𑁆𑀜𑀸𑀦𑀺𑀭𑁄𑀥𑁄 𑀳𑁄𑀢𑀻’’𑀢𑀺 𑀧𑁄𑀝𑁆𑀞𑀧𑀸𑀤𑀲𑀼𑀢𑁆𑀢𑁂 (𑀤𑀻. 𑀦𑀺. 𑁧.𑁪𑁦𑁬 𑀆𑀤𑀬𑁄) 𑀉𑀧𑁆𑀧𑀦𑁆𑀦𑀁 𑀅𑀪𑀺𑀲𑀜𑁆𑀜𑀸𑀦𑀺𑀭𑁄𑀥𑀓𑀣𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀦 𑀓𑀺𑀜𑁆𑀘𑀺 𑀯𑁂𑀤𑀺𑀬𑀢𑀻𑀢𑀺 𑀏𑀓𑀯𑁂𑀤𑀦𑀫𑁆𑀧𑀺 𑀦 𑀯𑁂𑀤𑀺𑀬𑀢𑀺. 𑀅𑀢𑁆𑀣𑀺 𑀘 𑀔𑁄𑀢𑀺 𑀣𑁂𑀭𑁄 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀅𑀦𑀼𑀚𑀸𑀦𑀸𑀢𑀺. 𑀧𑀭𑀺𑀭𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀕𑀭𑀳𑀢𑁄 𑀫𑁄𑀘𑀦𑁂𑀦 𑀭𑀓𑁆𑀔𑀺𑀢𑀩𑁆𑀩𑀁. 𑀲𑀜𑁆𑀘𑁂𑀢𑀦𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑀜𑁆𑀘𑁂𑀢𑀦𑀺𑀓𑀁, 𑀲𑀸𑀪𑀺𑀲𑀦𑁆𑀥𑀺𑀓𑀁 𑀲𑀜𑁆𑀘𑁂𑀢𑀦𑀺𑀓𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀁 𑀲𑁄𑀢𑀺 𑀣𑁂𑀭𑁄 ‘‘𑀅𑀓𑀼𑀲𑀮𑀫𑁂𑀯 𑀲𑀦𑁆𑀥𑀸𑀬 𑀧𑀭𑀺𑀩𑁆𑀩𑀸𑀚𑀓𑁄 𑀧𑀼𑀘𑁆𑀙𑀢𑀻’’𑀢𑀺 𑀲𑀜𑁆𑀜𑀸𑀬 𑀏𑀯𑀁 𑀯𑀤𑀢𑀺.

𑀤𑀲𑁆𑀲𑀦𑀫𑁆𑀧𑀺 𑀔𑁄 𑀅𑀳𑀦𑁆𑀢𑀺 𑀪𑀕𑀯𑀸 𑀘𑀢𑀼𑀭𑀗𑁆𑀕𑁂𑀧𑀺 𑀅𑀦𑁆𑀥𑀓𑀸𑀭𑁂 𑀲𑀫𑀦𑁆𑀢𑀸 𑀬𑁄𑀚𑀦𑀝𑁆𑀞𑀸𑀦𑁂 𑀢𑀺𑀮𑀫𑀢𑁆𑀢𑀫𑁆𑀧𑀺 𑀲𑀗𑁆𑀔𑀸𑀭𑀁 𑀫𑀁𑀲𑀘𑀓𑁆𑀔𑀼𑀦𑀸𑀯 𑀧𑀲𑁆𑀲𑀢𑀺, 𑀅𑀬𑀜𑁆𑀘 𑀧𑀭𑀺𑀩𑁆𑀩𑀸𑀚𑀓𑁄 𑀦 𑀤𑀽𑀭𑁂 𑀕𑀸𑀯𑀼𑀢𑀫𑀢𑁆𑀢𑀩𑁆𑀪𑀦𑁆𑀢𑀭𑁂 𑀯𑀲𑀢𑀺, 𑀓𑀲𑁆𑀫𑀸 𑀪𑀕𑀯𑀸 𑀏𑀯𑀫𑀸𑀳𑀸𑀢𑀺? 𑀲𑀫𑀸𑀕𑀫𑀤𑀲𑁆𑀲𑀦𑀁 𑀲𑀦𑁆𑀥𑀸𑀬𑁂𑀯𑀫𑀸𑀳.

𑁨𑁯𑁯. 𑀉𑀤𑀸𑀬𑀻𑀢𑀺 𑀮𑀸𑀮𑀼𑀤𑀸𑀬𑀻. 𑀢𑀁 𑀤𑀼𑀓𑁆𑀔𑀲𑁆𑀫𑀺𑀦𑁆𑀢𑀺 𑀲𑀩𑁆𑀩𑀁 𑀢𑀁 𑀤𑀼𑀓𑁆𑀔𑀫𑁂𑀯. 𑀇𑀢𑀺 𑀇𑀫𑀁 𑀯𑀝𑁆𑀝𑀤𑀼𑀓𑁆𑀔𑀁 𑀓𑀺𑀮𑁂𑀲𑀤𑀼𑀓𑁆𑀔𑀁 𑀲𑀗𑁆𑀔𑀸𑀭𑀤𑀼𑀓𑁆𑀔𑀁 𑀲𑀦𑁆𑀥𑀸𑀬 ‘‘𑀲𑀘𑁂 𑀪𑀸𑀲𑀺𑀢𑀁 𑀪𑀯𑁂𑀬𑁆𑀬 𑀪𑀕𑀯𑀸’’𑀢𑀺 𑀧𑀼𑀘𑁆𑀙𑀢𑀺.

𑁩𑁦𑁦. 𑀉𑀫𑁆𑀫𑀗𑁆𑀕𑀦𑁆𑀢𑀺 𑀧𑀜𑁆𑀳𑀸𑀉𑀫𑁆𑀫𑀗𑁆𑀕𑀁. 𑀉𑀫𑁆𑀫𑀼𑀚𑁆𑀚𑀫𑀸𑀦𑁄𑀢𑀺 𑀲𑀻𑀲𑀁 𑀦𑀻𑀳𑀭𑀫𑀸𑀦𑁄. 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀺𑀲𑁆𑀲𑀢𑀻𑀢𑀺 𑀅𑀦𑀼𑀧𑀸𑀬𑁂𑀦 𑀲𑀻𑀲𑀁 𑀦𑀻𑀳𑀭𑀺𑀲𑁆𑀲𑀢𑀺. 𑀇𑀤𑀜𑁆𑀘 𑀧𑀦 𑀪𑀕𑀯𑀸 𑀚𑀸𑀦𑀦𑁆𑀢𑁄 𑀦𑁂𑀯 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀦 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀦 𑀲𑀩𑁆𑀩𑀜𑁆𑀜𑀼𑀢𑀜𑀸𑀡𑁂𑀦 𑀚𑀸𑀦𑀺, 𑀅𑀥𑀺𑀧𑁆𑀧𑀸𑀬𑁂𑀦𑁂𑀯 𑀧𑀦 𑀅𑀜𑁆𑀜𑀸𑀲𑀺. 𑀓𑀣𑁂𑀦𑁆𑀢𑀲𑁆𑀲 𑀳𑀺 𑀅𑀥𑀺𑀧𑁆𑀧𑀸𑀬𑁄 𑀦𑀸𑀫 𑀲𑀼𑀯𑀺𑀚𑀸𑀦𑁄 𑀳𑁄𑀢𑀺, 𑀓𑀣𑁂𑀢𑀼𑀓𑀸𑀫𑁄 𑀕𑀻𑀯𑀁 𑀧𑀕𑁆𑀕𑀡𑁆𑀳𑀸𑀢𑀺, 𑀳𑀦𑀼𑀓𑀁 𑀘𑀸𑀮𑁂𑀢𑀺, 𑀫𑀼𑀔𑀫𑀲𑁆𑀲 𑀨𑀦𑁆𑀤𑀢𑀺, 𑀲𑀦𑁆𑀦𑀺𑀲𑀻𑀤𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀪𑀕𑀯𑀸 𑀢𑀲𑁆𑀲 𑀢𑀁 𑀆𑀓𑀸𑀭𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀉𑀤𑀸𑀬𑀻 𑀲𑀦𑁆𑀦𑀺𑀲𑀻𑀤𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀬𑀁 𑀅𑀪𑀽𑀢𑀁, 𑀢𑀤𑁂𑀯 𑀓𑀣𑁂𑀲𑁆𑀲𑀢𑀻’’𑀢𑀺 𑀑𑀮𑁄𑀓𑁂𑀢𑁆𑀯𑀸𑀯 𑀅𑀜𑁆𑀜𑀸𑀲𑀺. 𑀆𑀤𑀺𑀁 𑀬𑁂𑀯𑀸𑀢𑀺𑀆𑀤𑀺𑀫𑁆𑀳𑀺𑀬𑁂𑀯. 𑀢𑀺𑀲𑁆𑀲𑁄 𑀯𑁂𑀤𑀦𑀸𑀢𑀺 ‘‘𑀓𑀺𑀁 𑀲𑁄 𑀯𑁂𑀤𑀺𑀬𑀢𑀻’’𑀢𑀺? 𑀧𑀼𑀘𑁆𑀙𑀦𑁆𑀢𑁂𑀦 ‘‘𑀢𑀺𑀲𑁆𑀲𑁄 𑀯𑁂𑀤𑀦𑀸 𑀧𑀼𑀘𑁆𑀙𑀸𑀫𑀻’’𑀢𑀺 𑀏𑀯𑀁 𑀯𑀯𑀢𑁆𑀣𑀧𑁂𑀢𑁆𑀯𑀸𑀯 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀧𑀼𑀘𑁆𑀙𑀺𑀢𑀸. 𑀲𑀼𑀔𑀯𑁂𑀤𑀦𑀺𑀬𑀦𑁆𑀢𑀺 𑀲𑀼𑀔𑀯𑁂𑀤𑀦𑀸𑀬 𑀧𑀘𑁆𑀘𑀬𑀪𑀽𑀢𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀏𑀢𑁆𑀣 𑀘 𑀓𑀸𑀫𑀸𑀯𑀘𑀭𑀓𑀼𑀲𑀮𑀢𑁄 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀘𑀢𑀲𑁆𑀲𑁄 𑀘𑁂𑀢𑀦𑀸, 𑀳𑁂𑀝𑁆𑀞𑀸 𑀢𑀺𑀓𑀚𑁆𑀛𑀸𑀦𑀘𑁂𑀢𑀦𑀸𑀢𑀺 𑀏𑀯𑀁 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑁂𑀲𑀼 𑀲𑀼𑀔𑀯𑁂𑀤𑀦𑀸𑀬 𑀚𑀦𑀦𑀢𑁄 𑀲𑀼𑀔𑀯𑁂𑀤𑀦𑀺𑀬𑀁 𑀓𑀫𑁆𑀫𑀁 𑀦𑀸𑀫. 𑀓𑀸𑀫𑀸𑀯𑀘𑀭𑀜𑁆𑀘𑁂𑀢𑁆𑀣 𑀧𑀝𑀺𑀲𑀦𑁆𑀥𑀺𑀬𑀁𑀬𑁂𑀯 𑀏𑀓𑀦𑁆𑀢𑁂𑀦 𑀲𑀼𑀔𑀁 𑀚𑀦𑁂𑀢𑀺, 𑀧𑀯𑀢𑁆𑀢𑁂 𑀇𑀝𑁆𑀞𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂 𑀅𑀤𑀼𑀓𑁆𑀔𑀫𑀲𑀼𑀔𑀫𑁆𑀧𑀺.

𑀅𑀓𑀼𑀲𑀮𑀘𑁂𑀢𑀦𑀸 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑁂𑀲𑀼 𑀤𑀼𑀓𑁆𑀔𑀲𑁆𑀲𑁂𑀯 𑀚𑀦𑀦𑀢𑁄 𑀤𑀼𑀓𑁆𑀔𑀯𑁂𑀤𑀦𑀺𑀬𑀁 𑀓𑀫𑁆𑀫𑀁 𑀦𑀸𑀫. 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑁂𑀬𑁂𑀯 𑀘𑁂𑀢𑀁 𑀏𑀓𑀦𑁆𑀢𑁂𑀦 𑀤𑀼𑀓𑁆𑀔𑀁 𑀚𑀦𑁂𑀢𑀺, 𑀅𑀜𑁆𑀜𑀢𑁆𑀣 𑀅𑀤𑀼𑀓𑁆𑀔𑀫𑀲𑀼𑀔𑀫𑁆𑀧𑀺, 𑀲𑀸 𑀧𑀦 𑀯𑁂𑀤𑀦𑀸 𑀅𑀦𑀺𑀝𑁆𑀞𑀸𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑁂𑀲𑀼𑀬𑁂𑀯 𑀆𑀭𑀫𑁆𑀫𑀡𑁂𑀲𑀼 𑀉𑀧𑁆𑀧𑀚𑁆𑀚𑀦𑀢𑁄 𑀤𑀼𑀓𑁆𑀔𑀸𑀢𑁆𑀯𑁂𑀯 𑀲𑀗𑁆𑀔𑀁 𑀕𑀢𑀸.

𑀓𑀸𑀫𑀸𑀯𑀘𑀭𑀓𑀼𑀲𑀮𑀢𑁄 𑀧𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀘𑀢𑀲𑁆𑀲𑁄 𑀘𑁂𑀢𑀦𑀸, 𑀭𑀽𑀧𑀸𑀯𑀘𑀭𑀓𑀼𑀲𑀮𑀢𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑁂𑀢𑀦𑀸𑀢𑀺 𑀏𑀯𑀁 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑁂𑀲𑀼 𑀢𑀢𑀺𑀬𑀯𑁂𑀤𑀦𑀸𑀬 𑀚𑀦𑀦𑀢𑁄 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀺𑀬𑀁 𑀓𑀫𑁆𑀫𑀁 𑀦𑀸𑀫. 𑀏𑀢𑁆𑀣 𑀘 𑀓𑀸𑀫𑀸𑀯𑀘𑀭𑀁 𑀧𑀝𑀺𑀲𑀦𑁆𑀥𑀺𑀬𑀁𑀬𑁂𑀯 𑀏𑀓𑀦𑁆𑀢𑁂𑀦 𑀅𑀤𑀼𑀓𑁆𑀔𑀫𑀲𑀼𑀔𑀁 𑀚𑀦𑁂𑀢𑀺, 𑀧𑀯𑀢𑁆𑀢𑁂 𑀇𑀝𑁆𑀞𑀸𑀭𑀫𑁆𑀫𑀡𑁂 𑀲𑀼𑀔𑀫𑁆𑀧𑀺. 𑀅𑀧𑀺𑀘 𑀲𑀼𑀔𑀯𑁂𑀤𑀦𑀺𑀬𑀓𑀫𑁆𑀫𑀁 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀯𑀲𑁂𑀦 𑀯𑀝𑁆𑀝𑀢𑀺, 𑀢𑀣𑀸 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀺𑀬𑀁, 𑀤𑀼𑀓𑁆𑀔𑀯𑁂𑀤𑀦𑀺𑀬𑀁 𑀧𑀯𑀢𑁆𑀢𑀺𑀯𑀲𑁂𑀦𑁂𑀯 𑀯𑀝𑁆𑀝𑀢𑀺. 𑀏𑀢𑀲𑁆𑀲 𑀧𑀦 𑀯𑀲𑁂𑀦 𑀲𑀩𑁆𑀩𑀁 𑀧𑀯𑀢𑁆𑀢𑀺𑀯𑀲𑁂𑀦𑁂𑀯 𑀯𑀝𑁆𑀝𑀢𑀺.

𑀏𑀢𑀲𑁆𑀲 𑀪𑀕𑀯𑀸𑀢𑀺 𑀣𑁂𑀭𑁄 𑀢𑀣𑀸𑀕𑀢𑁂𑀦 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀓𑀣𑀦𑀢𑁆𑀣𑀁 𑀆𑀮𑀬𑁄 𑀤𑀲𑁆𑀲𑀺𑀢𑁄, 𑀢𑀣𑀸𑀕𑀢𑀁 𑀬𑀸𑀘𑀺𑀢𑁆𑀯𑀸 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀜𑀸𑀡𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀸𑀓𑀝𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀓𑀼𑀲𑀮𑀢𑀸𑀬 𑀏𑀯𑀫𑀸𑀳. 𑀢𑀢𑁆𑀣 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀦𑁆𑀢𑀺 𑀫𑀳𑀸𑀓𑀫𑁆𑀫𑀯𑀺𑀪𑀚𑀦𑀁. 𑀓𑀢𑀫𑁂 𑀘𑀢𑁆𑀢𑀸𑀭𑁄…𑀧𑁂… 𑀇𑀥𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄…𑀧𑁂… 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀻𑀢𑀺 𑀇𑀤𑀁 𑀦 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀜𑀸𑀡𑀪𑀸𑀚𑀦𑀁, 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀜𑀸𑀡𑀪𑀸𑀚𑀦𑀢𑁆𑀣𑀸𑀬 𑀧𑀦 𑀫𑀸𑀢𑀺𑀓𑀸𑀝𑁆𑀞𑀧𑀦𑀁.

𑁩𑁦𑁧. 𑀇𑀥𑀸𑀦𑀦𑁆𑀤, 𑀏𑀓𑀘𑁆𑀘𑁄 𑀲𑀫𑀡𑁄 𑀯𑀸𑀢𑀺 𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀺. 𑀇𑀤𑀜𑁆𑀳𑀺 𑀪𑀕𑀯𑀸 𑁋 ‘‘𑀤𑀺𑀩𑁆𑀩𑀘𑀓𑁆𑀔𑀼𑀓𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀇𑀤𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀇𑀫𑀁 𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸 𑀇𑀤𑀁 𑀤𑀲𑁆𑀲𑀦𑀁 𑀕𑀡𑁆𑀳𑀦𑁆𑀢𑀻’’𑀢𑀺 𑀧𑀓𑀸𑀲𑀦𑀢𑁆𑀣𑀁 𑀆𑀭𑀪𑀺. 𑀢𑀢𑁆𑀣 𑀆𑀢𑀧𑁆𑀧𑀦𑁆𑀢𑀺𑀆𑀤𑀻𑀦𑀺 𑀧𑀜𑁆𑀘𑀧𑀺 𑀯𑀻𑀭𑀺𑀬𑀲𑁆𑀲𑁂𑀯 𑀦𑀸𑀫𑀸𑀦𑀺. 𑀘𑁂𑀢𑁄𑀲𑀫𑀸𑀥𑀺𑀦𑁆𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀲𑀫𑀸𑀥𑀺𑀁. 𑀧𑀲𑁆𑀲𑀢𑀻𑀢𑀺 ‘‘𑀲𑁄 𑀲𑀢𑁆𑀢𑁄 𑀓𑀼𑀳𑀺𑀁 𑀦𑀺𑀩𑁆𑀩𑀢𑁆𑀢𑁄’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀧𑀲𑁆𑀲𑀢𑀺. 𑀬𑁂 𑀅𑀜𑁆𑀜𑀣𑀸𑀢𑀺 𑀬𑁂 ‘‘𑀤𑀲𑀦𑁆𑀦𑀁 𑀓𑀼𑀲𑀮𑀸𑀦𑀁 𑀓𑀫𑁆𑀫𑀧𑀣𑀸𑀦𑀁 𑀧𑀽𑀭𑀺𑀢𑀢𑁆𑀢𑀸 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀻’’𑀢𑀺 𑀚𑀸𑀦𑀦𑁆𑀢𑀺, 𑀫𑀺𑀘𑁆𑀙𑀸 𑀢𑁂𑀲𑀁 𑀜𑀸𑀡𑀦𑁆𑀢𑀺 𑀯𑀤𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀤𑀺𑀢𑀦𑁆𑀢𑀺 𑀧𑀸𑀓𑀝𑀁. 𑀣𑀸𑀫𑀲𑀸𑀢𑀺 𑀤𑀺𑀝𑁆𑀞𑀺𑀣𑀸𑀫𑁂𑀦. 𑀧𑀭𑀸𑀫𑀸𑀲𑀸𑀢𑀺 𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑁂𑀦. 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀢𑀻𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀆𑀤𑀺𑀬𑀺𑀢𑁆𑀯𑀸 𑀯𑁄𑀳𑀭𑀢𑀺.

𑁩𑁦𑁨. 𑀢𑀢𑁆𑀭𑀸𑀦𑀦𑁆𑀤𑀸𑀢𑀺 𑀇𑀤𑀫𑁆𑀧𑀺 𑀦 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀜𑀸𑀡𑀲𑁆𑀲 𑀪𑀸𑀚𑀦𑀁, 𑀅𑀣 𑀔𑁆𑀯𑀸𑀲𑁆𑀲 𑀫𑀸𑀢𑀺𑀓𑀸𑀝𑁆𑀞𑀧𑀦𑀫𑁂𑀯. 𑀏𑀢𑁆𑀣 𑀧𑀦 𑀏𑀢𑁂𑀲𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀯𑀘𑀦𑁂 𑀏𑀢𑁆𑀢𑀓𑀸 𑀅𑀦𑀼𑀜𑁆𑀜𑀸𑀢𑀸, 𑀏𑀢𑁆𑀢𑀓𑀸 𑀅𑀦𑀦𑀼𑀜𑁆𑀜𑀸𑀢𑀸𑀢𑀺 𑀇𑀤𑀁 𑀤𑀲𑁆𑀲𑀺𑀢𑀁. 𑀢𑀢𑁆𑀣 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀘𑀢𑀽𑀲𑀼 𑀲𑀫𑀡𑀩𑁆𑀭𑀸𑀳𑁆𑀫𑀡𑁂𑀲𑀼. 𑀇𑀤𑀫𑀲𑁆𑀲𑀸𑀢𑀺 𑀇𑀤𑀁 𑀯𑀘𑀦𑀁 𑀅𑀲𑁆𑀲. 𑀅𑀜𑁆𑀜𑀣𑀸𑀢𑀺 𑀅𑀜𑁆𑀜𑁂𑀦𑀸𑀓𑀸𑀭𑁂𑀦. 𑀇𑀢𑀺 𑀇𑀫𑁂𑀲𑀁 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀸𑀤𑁂 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀅𑀦𑀼𑀜𑁆𑀜𑀸𑀢𑀸, 𑀢𑀻𑀲𑀼 𑀅𑀦𑀦𑀼𑀜𑁆𑀜𑀸𑀢𑀸𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀦𑀼𑀜𑁆𑀜𑀸 𑀦𑀸𑀦𑀼𑀜𑁆𑀜𑀸 𑀯𑁂𑀤𑀺𑀢𑀩𑁆𑀩𑀸.

𑁩𑁦𑁩. 𑀏𑀯𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀯𑀘𑀦𑁂 𑀅𑀦𑀼𑀜𑁆𑀜𑀸 𑀘 𑀅𑀦𑀦𑀼𑀜𑁆𑀜𑀸 𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀜𑀸𑀡𑀁 𑀯𑀺𑀪𑀚𑀦𑁆𑀢𑁄 𑀢𑀢𑁆𑀭𑀸𑀦𑀦𑁆𑀤, 𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄𑀢𑀺𑀆𑀤𑀺𑀫𑀸𑀳.

𑀧𑀼𑀩𑁆𑀩𑁂 𑀯𑀸𑀲𑁆𑀲 𑀢𑀁 𑀓𑀢𑀁 𑀳𑁄𑀢𑀻𑀢𑀺 𑀬𑀁 𑀇𑀫𑀺𑀦𑀸 𑀤𑀺𑀩𑁆𑀩𑀘𑀓𑁆𑀔𑀼𑀓𑁂𑀦 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀤𑀺𑀝𑁆𑀞𑁄, 𑀢𑀢𑁄 𑀧𑀼𑀩𑁆𑀩𑁂 𑀓𑀢𑀁. 𑀧𑀼𑀩𑁆𑀩𑁂 𑀓𑀢𑁂𑀦𑀧𑀺 𑀳𑀺 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀧𑀘𑁆𑀙𑀸 𑀓𑀢𑁂𑀦𑀧𑀺 𑀦𑀺𑀩𑁆𑀩𑀢𑁆𑀢𑀢𑀺, 𑀫𑀭𑀡𑀓𑀸𑀮𑁂 𑀯𑀸 𑀧𑀦 𑁋 ‘‘𑀔𑀦𑁆𑀤𑁄 𑀲𑁂𑀝𑁆𑀞𑁄 𑀲𑀺𑀯𑁄 𑀲𑁂𑀝𑁆𑀞𑁄, 𑀧𑀺𑀢𑀸𑀫𑀳𑁄 𑀲𑁂𑀝𑁆𑀞𑁄, 𑀇𑀲𑁆𑀲𑀭𑀸𑀤𑀻𑀳𑀺 𑀯𑀸 𑀮𑁄𑀓𑁄 𑀯𑀺𑀲𑀝𑁆𑀞𑁄’’𑀢𑀺𑀆𑀤𑀺𑀦𑀸 𑀫𑀺𑀘𑁆𑀙𑀸𑀤𑀲𑁆𑀲𑀦𑁂𑀦𑀧𑀺 𑀦𑀺𑀩𑁆𑀩𑀢𑁆𑀢𑀢𑁂𑀯. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀬𑀁 𑀢𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀳𑁄𑀢𑀺, 𑀢𑀲𑁆𑀲 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂, 𑀬𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀁, 𑀢𑀲𑁆𑀲 𑀉𑀧𑀧𑀚𑁆𑀚𑀺𑀢𑁆𑀯𑀸, 𑀬𑀁 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁, 𑀢𑀲𑁆𑀲 𑀅𑀧𑀭𑀲𑁆𑀫𑀺𑀁 𑀧𑀭𑀺𑀬𑀸𑀬𑁂 𑀯𑀺𑀧𑀸𑀓𑀁 𑀧𑀝𑀺𑀲𑀁𑀯𑁂𑀤𑁂𑀢𑀺.

𑀇𑀢𑀺 𑀅𑀬𑀁 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀏𑀓𑀁 𑀓𑀫𑁆𑀫𑀭𑀸𑀲𑀺𑀁 𑀏𑀓𑀜𑁆𑀘 𑀯𑀺𑀧𑀸𑀓𑀭𑀸𑀲𑀺𑀁 𑀅𑀤𑁆𑀤𑀲, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀇𑀫𑀺𑀦𑀸 𑀅𑀤𑀺𑀝𑁆𑀞𑁂 𑀢𑀬𑁄 𑀓𑀫𑁆𑀫𑀭𑀸𑀲𑀻, 𑀤𑁆𑀯𑁂 𑀘 𑀯𑀺𑀧𑀸𑀓𑀭𑀸𑀲𑀻 𑀅𑀤𑁆𑀤𑀲. 𑀇𑀫𑀺𑀦𑀸 𑀧𑀦 𑀤𑀺𑀝𑁆𑀞𑁂 𑀅𑀤𑀺𑀝𑁆𑀞𑁂 𑀘 𑀘𑀢𑁆𑀢𑀸𑀭𑁄 𑀓𑀫𑁆𑀫𑀭𑀸𑀲𑀻 𑀢𑀬𑁄 𑀘 𑀯𑀺𑀧𑀸𑀓𑀭𑀸𑀲𑀻 𑀅𑀤𑁆𑀤𑀲. 𑀇𑀫𑀸𑀦𑀺 𑀲𑀢𑁆𑀢 𑀞𑀸𑀦𑀸𑀦𑀺 𑀚𑀸𑀦𑀦𑀜𑀸𑀡𑀁 𑀢𑀣𑀸𑀕𑀢𑀲𑁆𑀲 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀜𑀸𑀡𑀁 𑀦𑀸𑀫. 𑀤𑀼𑀢𑀺𑀬𑀯𑀸𑀭𑁂 𑀤𑀺𑀩𑁆𑀩𑀘𑀓𑁆𑀔𑀼𑀓𑁂𑀦 𑀓𑀺𑀜𑁆𑀘𑀺 𑀦 𑀤𑀺𑀝𑁆𑀞𑀁, 𑀢𑀣𑀸𑀕𑀢𑁂𑀦 𑀧𑀦 𑀢𑀬𑁄 𑀓𑀫𑁆𑀫𑀭𑀸𑀲𑀻, 𑀤𑁆𑀯𑁂 𑀘 𑀯𑀺𑀧𑀸𑀓𑀭𑀸𑀲𑀻 𑀤𑀺𑀝𑁆𑀞𑀸𑀢𑀺. 𑀇𑀫𑀸𑀦𑀺𑀧𑀺 𑀧𑀜𑁆𑀘 𑀧𑀘𑁆𑀘𑀢𑁆𑀢𑀝𑁆𑀞𑀸𑀦𑀸𑀦𑀺 𑀚𑀸𑀦𑀦𑀜𑀸𑀡𑀁 𑀢𑀣𑀸𑀕𑀢𑀲𑁆𑀲 𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀜𑀸𑀡𑀁 𑀦𑀸𑀫. 𑀲𑁂𑀲𑀯𑀸𑀭𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑀅𑀪𑀩𑁆𑀩𑀦𑁆𑀢𑀺 𑀪𑀽𑀢𑀯𑀺𑀭𑀳𑀺𑀢𑀁 𑀅𑀓𑀼𑀲𑀮𑀁. 𑀅𑀪𑀩𑁆𑀩𑀸𑀪𑀸𑀲𑀦𑁆𑀢𑀺 𑀅𑀪𑀩𑁆𑀩𑀁 𑀆𑀪𑀸𑀲𑀢𑀺 𑀅𑀪𑀺𑀪𑀯𑀢𑀺 𑀧𑀝𑀺𑀩𑀸𑀳𑀢𑀻𑀢𑀺 𑀅𑀢𑁆𑀣𑁄. 𑀩𑀳𑀼𑀓𑀲𑁆𑀫𑀺𑀜𑁆𑀳𑀺 𑀅𑀓𑀼𑀲𑀮𑀓𑀫𑁆𑀫𑁂 𑀆𑀬𑀽𑀳𑀺𑀢𑁂 𑀩𑀮𑀯𑀓𑀫𑁆𑀫𑀁 𑀤𑀼𑀩𑁆𑀩𑀮𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀁 𑀓𑀭𑁄𑀢𑀺 𑀇𑀤𑀁 𑀅𑀪𑀩𑁆𑀩𑀜𑁆𑀘𑁂𑀯 𑀅𑀪𑀩𑁆𑀩𑀸𑀪𑀸𑀲𑀜𑁆𑀘. 𑀓𑀼𑀲𑀮𑀁 𑀧𑀦 𑀆𑀬𑀽𑀳𑀺𑀢𑁆𑀯𑀸 𑀆𑀲𑀦𑁆𑀦𑁂 𑀅𑀓𑀼𑀲𑀮𑀁 𑀓𑀢𑀁 𑀳𑁄𑀢𑀺, 𑀢𑀁 𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀁 𑀓𑀭𑁄𑀢𑀺, 𑀇𑀤𑀁 𑀅𑀪𑀩𑁆𑀩𑀁 𑀪𑀩𑁆𑀩𑀸𑀪𑀸𑀲𑀁. 𑀩𑀳𑀼𑀫𑁆𑀳𑀺 𑀓𑀼𑀲𑀮𑁂 𑀆𑀬𑀽𑀳𑀺𑀢𑁂𑀧𑀺 𑀩𑀮𑀯𑀓𑀫𑁆𑀫𑀁 𑀤𑀼𑀩𑁆𑀩𑀮𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀁 𑀓𑀭𑁄𑀢𑀺, 𑀇𑀤𑀁 𑀪𑀩𑁆𑀩𑀜𑁆𑀘𑁂𑀯 𑀪𑀩𑁆𑀩𑀸𑀪𑀸𑀲𑀜𑁆𑀘. 𑀅𑀓𑀼𑀲𑀮𑀁 𑀧𑀦 𑀆𑀬𑀽𑀳𑀺𑀢𑁆𑀯𑀸 𑀆𑀲𑀦𑁆𑀦𑁂 𑀓𑀼𑀲𑀮𑀁 𑀓𑀢𑀁 𑀳𑁄𑀢𑀺, 𑀢𑀁 𑀅𑀓𑀼𑀲𑀮𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀁 𑀓𑀭𑁄𑀢𑀺, 𑀇𑀤𑀁 𑀪𑀩𑁆𑀩𑀁 𑀅𑀪𑀩𑁆𑀩𑀸𑀪𑀸𑀲𑀁.

𑀅𑀧𑀺𑀘 𑀉𑀧𑀝𑁆𑀞𑀸𑀦𑀸𑀓𑀸𑀭𑁂𑀦𑀧𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀜𑁆𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀅𑀪𑀩𑁆𑀩𑀢𑁄 𑀆𑀪𑀸𑀲𑀢𑀺 𑀉𑀧𑀝𑁆𑀞𑀸𑀢𑀻𑀢𑀺 𑀅𑀪𑀩𑁆𑀩𑀸𑀪𑀸𑀲𑀁. 𑀢𑀢𑁆𑀣 ‘‘𑀬𑁆𑀯𑀸𑀬𑀁 𑀧𑀼𑀕𑁆𑀕𑀮𑁄 𑀇𑀥 𑀧𑀸𑀡𑀸𑀢𑀺𑀧𑀸𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀯𑀼𑀢𑁆𑀢𑀸, 𑀢𑁂𑀲𑀼 𑀧𑀞𑀫𑀲𑁆𑀲 𑀓𑀫𑁆𑀫𑀁 𑀅𑀪𑀩𑁆𑀩𑀁 𑀅𑀪𑀩𑁆𑀩𑀸𑀪𑀸𑀲𑀁, 𑀢𑀜𑁆𑀳𑀺 𑀅𑀓𑀼𑀲𑀮𑀢𑁆𑀢𑀸 𑀅𑀪𑀩𑁆𑀩𑀁, 𑀢𑀲𑁆𑀲 𑀘 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀓𑀸𑀭𑀡𑀪𑀽𑀢𑀁 𑀅𑀓𑀼𑀲𑀮𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀤𑀼𑀢𑀺𑀬𑀲𑁆𑀲 𑀓𑀫𑁆𑀫𑀁 𑀅𑀪𑀩𑁆𑀩𑀁 𑀪𑀩𑁆𑀩𑀸𑀪𑀸𑀲𑀁, 𑀢𑀜𑁆𑀳𑀺 𑀅𑀓𑀼𑀲𑀮𑀢𑁆𑀢𑀸 𑀅𑀪𑀩𑁆𑀩𑀁. 𑀢𑀲𑁆𑀲 𑀧𑀦 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺𑀓𑀸𑀭𑀡𑀪𑀽𑀢𑀁 𑀓𑀼𑀲𑀮𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀇𑀢𑀭𑀲𑁆𑀫𑀺𑀫𑁆𑀧𑀺 𑀓𑀫𑁆𑀫𑀤𑁆𑀯𑀬𑁂 𑀏𑀲𑁂𑀯 𑀦𑀬𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀳𑀸𑀓𑀫𑁆𑀫𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀴𑀸𑀬𑀢𑀦𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦𑁪. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀲𑀴𑀸𑀬𑀢𑀦𑀯𑀺𑀪𑀗𑁆𑀕𑀲𑀼𑀢𑁆𑀢𑀁. 𑀢𑀢𑁆𑀣 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀲𑀳𑀯𑀺𑀧𑀲𑁆𑀲𑀦𑁂𑀦 𑀫𑀕𑁆𑀕𑁂𑀦 𑀚𑀸𑀦𑀺𑀢𑀩𑁆𑀩𑀸𑀦𑀺. 𑀫𑀦𑁄𑀧𑀯𑀺𑀘𑀸𑀭𑀸𑀢𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸. 𑀯𑀺𑀢𑀓𑁆𑀓𑀼𑀧𑁆𑀧𑀸𑀤𑀓𑀜𑁆𑀳𑀺 𑀫𑀦𑁄 𑀇𑀥 𑀫𑀦𑁄𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀫𑀦𑀲𑁆𑀲 𑀉𑀧𑀯𑀺𑀘𑀸𑀭𑀸𑀢𑀺 𑀫𑀦𑁄𑀧𑀯𑀺𑀘𑀸𑀭𑀸. 𑀲𑀢𑁆𑀢𑀧𑀤𑀸𑀢𑀺 𑀯𑀝𑁆𑀝𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀸𑀦𑀁 𑀲𑀢𑁆𑀢𑀸𑀦𑀁 𑀧𑀤𑀸. 𑀏𑀢𑁆𑀣 𑀳𑀺 𑀅𑀝𑁆𑀞𑀸𑀭𑀲 𑀯𑀝𑁆𑀝𑀧𑀤𑀸 𑀦𑀸𑀫, 𑀅𑀝𑁆𑀞𑀸𑀭𑀲 𑀯𑀺𑀯𑀝𑁆𑀝𑀧𑀤𑀸 𑀦𑀸𑀫, 𑀢𑁂𑀧𑀺 𑀲𑀳𑀯𑀺𑀧𑀲𑁆𑀲𑀦𑁂𑀦 𑀫𑀕𑁆𑀕𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀬𑁄𑀕𑁆𑀕𑀸𑀘𑀭𑀺𑀬𑀸𑀦𑀦𑁆𑀢𑀺 𑀳𑀢𑁆𑀣𑀺𑀬𑁄𑀕𑁆𑀕𑀸𑀤𑀺𑀆𑀘𑀸𑀭𑀲𑀺𑀓𑁆𑀔𑀸𑀧𑀓𑀸𑀦𑀁, 𑀤𑀫𑁂𑀢𑀩𑁆𑀩𑀤𑀫𑀓𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀯𑀺𑀪𑀗𑁆𑀕𑁂𑀬𑁂𑀯 𑀆𑀯𑀺𑀪𑀯𑀺𑀲𑁆𑀲𑀢𑀺. 𑀅𑀬𑀫𑀼𑀤𑁆𑀤𑁂𑀲𑁄𑀢𑀺 𑀇𑀤𑀁 𑀫𑀸𑀢𑀺𑀓𑀸𑀝𑁆𑀞𑀧𑀦𑀁.

𑁩𑁦𑁫. 𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀢𑁄 𑀤𑁆𑀯𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀦𑀺. 𑀲𑁂𑀲𑀧𑀲𑀸𑀤𑀯𑀺𑀜𑁆𑀜𑀸𑀡𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀸𑀦𑀺 𑀧𑀦 𑀤𑀲 𑀞𑀧𑁂𑀢𑁆𑀯𑀸 𑀲𑁂𑀲𑀁 𑀇𑀥 𑀫𑀦𑁄𑀯𑀺𑀜𑁆𑀜𑀸𑀡𑀁 𑀦𑀸𑀫.

𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄𑀢𑀺 𑀘𑀓𑁆𑀔𑀼𑀫𑁆𑀳𑀺 𑀲𑀫𑁆𑀨𑀲𑁆𑀲𑁄. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀲𑀫𑁆𑀨𑀲𑁆𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀭𑀽𑀧𑀁 𑀤𑀺𑀲𑁆𑀯𑀸. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣. 𑀲𑁄𑀫𑀦𑀲𑁆𑀲𑀝𑁆𑀞𑀸𑀦𑀺𑀬𑀦𑁆𑀢𑀺 𑀲𑁄𑀫𑀦𑀲𑁆𑀲𑀲𑁆𑀲 𑀆𑀭𑀫𑁆𑀫𑀡𑀯𑀲𑁂𑀦 𑀓𑀸𑀭𑀡𑀪𑀽𑀢𑀁. 𑀉𑀧𑀯𑀺𑀘𑀭𑀢𑀻𑀢𑀺 𑀢𑀢𑁆𑀣 𑀯𑀺𑀘𑀸𑀭𑀧𑀯𑀢𑁆𑀢𑀦𑁂𑀦 𑀉𑀧𑀯𑀺𑀘𑀭𑀢𑀺, 𑀯𑀺𑀢𑀓𑁆𑀓𑁄 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀘𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀝𑁆𑀞𑀸𑀭𑀲 𑀯𑀺𑀢𑀓𑁆𑀓𑀯𑀺𑀘𑀸𑀭𑀲𑀗𑁆𑀔𑀸𑀢𑀸 𑀫𑀦𑁄𑀧𑀯𑀺𑀘𑀸𑀭𑀸 𑀯𑁂𑀤𑀺𑀢𑀩𑁆𑀩𑀸. 𑀙 𑀲𑁄𑀫𑀦𑀲𑁆𑀲𑀽𑀧𑀯𑀺𑀘𑀸𑀭𑀸𑀢𑀺 𑀏𑀢𑁆𑀣 𑀧𑀦 𑀲𑁄𑀫𑀦𑀲𑁆𑀲𑁂𑀦 𑀲𑀤𑁆𑀥𑀺𑀁 𑀉𑀧𑀯𑀺𑀘𑀭𑀦𑁆𑀢𑀻𑀢𑀺 𑀲𑁄𑀫𑀦𑀲𑁆𑀲𑀽𑀧𑀯𑀺𑀘𑀸𑀭𑀸. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑁩𑁦𑁬. 𑀕𑁂𑀳𑀲𑀺𑀢𑀸𑀦𑀻𑀢𑀺 𑀓𑀸𑀫𑀕𑀼𑀡𑀦𑀺𑀲𑁆𑀲𑀺𑀢𑀸𑀦𑀺. 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀻𑀢𑀺 𑀯𑀺𑀧𑀲𑁆𑀲𑀦𑀸𑀦𑀺𑀲𑁆𑀲𑀺𑀢𑀸𑀦𑀺. 𑀇𑀝𑁆𑀞𑀸𑀦𑀦𑁆𑀢𑀺 𑀧𑀭𑀺𑀬𑁂𑀲𑀺𑀢𑀸𑀦𑀁. 𑀓𑀦𑁆𑀢𑀸𑀦𑀦𑁆𑀢𑀺 𑀓𑀸𑀫𑀺𑀢𑀸𑀦𑀁. 𑀫𑀦𑁄𑀭𑀫𑀸𑀦𑀦𑁆𑀢𑀺 𑀫𑀦𑁄 𑀏𑀢𑁂𑀲𑀼 𑀭𑀫𑀢𑀻𑀢𑀺 𑀫𑀦𑁄𑀭𑀫𑀸𑀦𑀺, 𑀢𑁂𑀲𑀁 𑀫𑀦𑁄𑀭𑀫𑀸𑀦𑀁. 𑀮𑁄𑀓𑀸𑀫𑀺𑀲𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀦𑁆𑀢𑀺 𑀢𑀡𑁆𑀳𑀸𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁. 𑀅𑀢𑀻𑀢𑀦𑁆𑀢𑀺 𑀧𑀝𑀺𑀮𑀤𑁆𑀥𑀁. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀢𑀸𑀯 𑀆𑀭𑀩𑁆𑀪 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀼, 𑀅𑀢𑀻𑀢𑁂 𑀓𑀣𑀁 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀅𑀢𑀻𑀢𑁂𑀧𑀺 𑁋 ‘‘𑀬𑀣𑀸𑀳𑀁 𑀏𑀢𑀭𑀳𑀺 𑀇𑀝𑁆𑀞𑀸𑀭𑀫𑁆𑀫𑀡𑀁 𑀅𑀦𑀼𑀪𑀯𑀸𑀫𑀺, 𑀏𑀯𑀁 𑀧𑀼𑀩𑁆𑀩𑁂𑀧𑀺 𑀅𑀦𑀼𑀪𑀯𑀺’’𑀦𑁆𑀢𑀺 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀩𑀮𑀯𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺.

𑀅𑀦𑀺𑀘𑁆𑀘𑀢𑀦𑁆𑀢𑀺 𑀅𑀦𑀺𑀘𑁆𑀘𑀸𑀓𑀸𑀭𑀁. 𑀯𑀺𑀧𑀭𑀺𑀡𑀸𑀫𑀯𑀺𑀭𑀸𑀕𑀦𑀺𑀭𑁄𑀥𑀦𑁆𑀢𑀺 𑀧𑀓𑀢𑀺𑀯𑀺𑀚𑀳𑀦𑁂𑀦 𑀯𑀺𑀧𑀭𑀺𑀡𑀸𑀫𑀁, 𑀯𑀺𑀕𑀘𑁆𑀙𑀦𑁂𑀦 𑀯𑀺𑀭𑀸𑀕𑀁, 𑀦𑀺𑀭𑀼𑀚𑁆𑀛𑀦𑁂𑀦 𑀦𑀺𑀭𑁄𑀥𑀁. 𑀲𑀫𑁆𑀫𑀧𑀜𑁆𑀜𑀸𑀬𑀸𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬. 𑀇𑀤𑀁 𑀯𑀼𑀘𑁆𑀘𑀢𑀺 𑀦𑁂𑀓𑁆𑀔𑀫𑁆𑀫𑀲𑀺𑀢𑀁 𑀲𑁄𑀫𑀦𑀲𑁆𑀲𑀦𑁆𑀢𑀺 𑀇𑀤𑀁 𑀭𑀜𑁆𑀜𑁄 𑀯𑀺𑀬 𑀅𑀢𑁆𑀢𑀦𑁄 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀲𑀗𑁆𑀔𑀸𑀭𑀸𑀦𑀁 𑀪𑁂𑀤𑀁 𑀧𑀲𑁆𑀲𑀢𑁄 𑀲𑀗𑁆𑀔𑀸𑀭𑀕𑀢𑀫𑁆𑀳𑀺 𑀢𑀺𑀓𑁆𑀔𑁂 𑀲𑀽𑀭𑁂 𑀯𑀺𑀧𑀲𑁆𑀲𑀦𑀸𑀜𑀸𑀡𑁂 𑀯𑀳𑀦𑁆𑀢𑁂 𑀉𑀧𑁆𑀧𑀦𑁆𑀦𑀲𑁄𑀫𑀦𑀲𑁆𑀲𑀁 ‘‘𑀦𑁂𑀓𑁆𑀔𑀫𑁆𑀫𑀲𑀺𑀢𑀁 𑀲𑁄𑀫𑀦𑀲𑁆𑀲’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀲𑀼𑀜𑁆𑀜𑀸𑀕𑀸𑀭𑀁 𑀧𑀯𑀺𑀝𑁆𑀞𑀲𑁆𑀲, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀅𑀫𑀸𑀦𑀼𑀲𑀻 𑀭𑀢𑀻 𑀳𑁄𑀢𑀺, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄.

𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀦𑁆𑀢𑀁 𑀯𑀺𑀚𑀸𑀦𑀢’’𑀦𑁆𑀢𑀺. (𑀥. 𑀧. 𑁩𑁭𑁩-𑁩𑁭𑁪);

𑀇𑀫𑀸𑀦𑀻𑀢𑀺 𑀇𑀫𑀸𑀦𑀺 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀉𑀧𑁆𑀧𑀦𑁆𑀦𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺.

𑁩𑁦𑁭. 𑀅𑀢𑀻𑀢𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀢𑀸𑀯 𑀧𑀢𑁆𑀣𑁂𑀢𑁆𑀯𑀸 𑀅𑀮𑀪𑀦𑁆𑀢𑀲𑁆𑀲 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀼, 𑀅𑀢𑀻𑀢𑁂 𑀓𑀣𑀁 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀅𑀢𑀻𑀢𑁂𑀧𑀺 ‘‘𑀬𑀣𑀸𑀳𑀁 𑀏𑀢𑀭𑀳𑀺 𑀇𑀝𑁆𑀞𑀸𑀭𑀫𑁆𑀫𑀡𑀁 𑀧𑀢𑁆𑀣𑁂𑀢𑁆𑀯𑀸 𑀦 𑀮𑀪𑀸𑀫𑀺, 𑀏𑀯𑀁 𑀧𑀼𑀩𑁆𑀩𑁂𑀧𑀺 𑀧𑀢𑁆𑀣𑁂𑀢𑁆𑀯𑀸 𑀦 𑀮𑀪𑀺’’𑀦𑁆𑀢𑀺 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀩𑀮𑀯𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺.

𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀽𑀢𑀺 𑀅𑀦𑀼𑀢𑁆𑀢𑀭𑀯𑀺𑀫𑁄𑀓𑁆𑀔𑁄 𑀦𑀸𑀫 𑀅𑀭𑀳𑀢𑁆𑀢𑀁, 𑀅𑀭𑀳𑀢𑁆𑀢𑁂 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀆𑀬𑀢𑀦𑀦𑁆𑀢𑀺 𑀅𑀭𑀳𑀢𑁆𑀢𑀸𑀬𑀢𑀦𑀁. 𑀧𑀺𑀳𑀁 𑀉𑀧𑀝𑁆𑀞𑀸𑀧𑀬𑀢𑁄𑀢𑀺 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀦𑁆𑀢𑀲𑁆𑀲. 𑀢𑀁 𑀧𑀦𑁂𑀢𑀁 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺, 𑀇𑀢𑀺 𑀧𑀢𑁆𑀣𑀦𑀸𑀫𑀽𑀮𑀓𑀢𑁆𑀢𑀸 ‘‘𑀧𑀺𑀳𑀁 𑀉𑀧𑀝𑁆𑀞𑀸𑀧𑀬𑀢𑁄’’𑀢𑀺 𑀯𑀼𑀢𑁆𑀢𑀁. 𑀇𑀫𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀻𑀢𑀺 𑀇𑀫𑀸𑀦𑀺 𑀏𑀯𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀅𑀭𑀳𑀢𑁆𑀢𑁂 𑀧𑀺𑀳𑀁 𑀧𑀝𑁆𑀞𑀧𑁂𑀢𑁆𑀯𑀸 𑀢𑀤𑀥𑀺𑀕𑀫𑀸𑀬 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑁋 ‘‘𑀇𑀫𑀫𑁆𑀧𑀺 𑀧𑀓𑁆𑀔𑀁 𑀇𑀫𑀫𑁆𑀧𑀺 𑀫𑀸𑀲𑀁 𑀇𑀫𑀫𑁆𑀧𑀺 𑀲𑀁𑀯𑀘𑁆𑀙𑀭𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀦𑀸𑀲𑀓𑁆𑀔𑀺’’𑀦𑁆𑀢𑀺 𑀅𑀦𑀼𑀲𑁄𑀘𑀢𑁄 𑀕𑀸𑀫𑀦𑁆𑀢𑀧𑀩𑁆𑀪𑀸𑀭𑀯𑀸𑀲𑀺𑀫𑀳𑀸𑀲𑀻𑀯𑀢𑁆𑀣𑁂𑀭𑀲𑁆𑀲 𑀯𑀺𑀬 𑀅𑀲𑁆𑀲𑀼𑀥𑀸𑀭𑀸𑀧𑀯𑀢𑁆𑀢𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀤𑁄𑀫𑀦𑀲𑁆𑀲𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀤𑁄𑀫𑀦𑀲𑁆𑀲𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀯𑀢𑁆𑀣𑀼 𑀧𑀦 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀲𑀓𑁆𑀓𑀧𑀜𑁆𑀳𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁬𑁧) 𑀯𑀺𑀢𑁆𑀣𑀸𑀭𑀺𑀢𑀁, 𑀇𑀘𑁆𑀙𑀦𑁆𑀢𑁂𑀦 𑀢𑀢𑁄 𑀕𑀳𑁂𑀢𑀩𑁆𑀩𑀁.

𑁩𑁦𑁮. 𑀉𑀧𑁆𑀧𑀚𑁆𑀚𑀢𑀺 𑀉𑀧𑁂𑀓𑁆𑀔𑀸𑀢𑀺 𑀏𑀢𑁆𑀣 𑀉𑀧𑁂𑀓𑁆𑀔𑀸 𑀦𑀸𑀫 𑀅𑀜𑁆𑀜𑀸𑀡𑀼𑀧𑁂𑀔𑀸. 𑀅𑀦𑁄𑀥𑀺𑀚𑀺𑀦𑀲𑁆𑀲𑀸𑀢𑀺 𑀓𑀺𑀮𑁂𑀲𑁄𑀥𑀺𑀁 𑀚𑀺𑀦𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀔𑀻𑀡𑀸𑀲𑀯𑁄 𑀑𑀥𑀺𑀚𑀺𑀦𑁄 𑀦𑀸𑀫, 𑀢𑀲𑁆𑀫𑀸 𑀅𑀔𑀻𑀡𑀸𑀲𑀯𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀯𑀺𑀧𑀸𑀓𑀚𑀺𑀦𑀲𑁆𑀲𑀸𑀢𑀺 𑀏𑀢𑁆𑀣𑀧𑀺 𑀆𑀬𑀢𑀺𑀁 𑀯𑀺𑀧𑀸𑀓𑀁 𑀚𑀺𑀦𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀔𑀻𑀡𑀸𑀲𑀯𑁄𑀯 𑀯𑀺𑀧𑀸𑀓𑀚𑀺𑀦𑁄 𑀦𑀸𑀫, 𑀢𑀲𑁆𑀫𑀸 𑀅𑀔𑀻𑀡𑀸𑀲𑀯𑀲𑁆𑀲𑁂𑀯𑀸𑀢𑀺 𑀅𑀢𑁆𑀣𑁄. 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄𑀢𑀺𑀆𑀤𑀻𑀦𑀯𑀢𑁄 𑀉𑀧𑀤𑁆𑀤𑀯𑀢𑁄 𑀅𑀧𑀲𑁆𑀲𑀦𑁆𑀢𑀲𑁆𑀲. 𑀇𑀫𑀸 𑀙 𑀕𑁂𑀳𑀲𑀺𑀢𑀸 𑀉𑀧𑁂𑀓𑁆𑀔𑀸𑀢𑀺 𑀇𑀫𑀸 𑀏𑀯𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀕𑀼𑀴𑀧𑀺𑀡𑁆𑀟𑀓𑁂 𑀦𑀺𑀮𑀻𑀦𑀫𑀓𑁆𑀔𑀺𑀓𑀸 𑀯𑀺𑀬 𑀭𑀽𑀧𑀸𑀤𑀻𑀦𑀺 𑀅𑀦𑀢𑀺𑀯𑀢𑁆𑀢𑀫𑀸𑀦𑀸 𑀢𑀢𑁆𑀣 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀳𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑀸 𑀉𑀧𑁂𑀓𑁆𑀔𑀸 𑀙 𑀕𑁂𑀳𑀲𑀺𑀢𑀸 𑀉𑀧𑁂𑀓𑁆𑀔𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀭𑀽𑀧𑀁 𑀲𑀸 𑀅𑀢𑀺𑀯𑀢𑁆𑀢𑀢𑀻𑀢𑀺 𑀭𑀽𑀧𑀁 𑀲𑀸 𑀅𑀦𑀢𑀺𑀓𑁆𑀓𑀫𑀢𑀺, 𑀢𑀢𑁆𑀣 𑀦𑀺𑀓𑀦𑁆𑀢𑀺𑀯𑀲𑁂𑀦 𑀦 𑀢𑀺𑀝𑁆𑀞𑀢𑀺. 𑀇𑀫𑀸 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸 𑀉𑀧𑁂𑀓𑁆𑀔𑀸𑀢𑀺 𑀇𑀫𑀸 𑀏𑀯𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀤𑀺𑀆𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀇𑀝𑁆𑀞𑁂 𑀅𑀭𑀚𑁆𑀚𑀦𑁆𑀢𑀲𑁆𑀲, 𑀅𑀦𑀺𑀝𑁆𑀞𑁂 𑀅𑀤𑀼𑀲𑁆𑀲𑀦𑁆𑀢𑀲𑁆𑀲, 𑀅𑀲𑀫𑀧𑁂𑀓𑁆𑀔𑀦𑁂 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑀲𑁆𑀲, 𑀉𑀧𑁆𑀧𑀦𑁆𑀦𑀯𑀺𑀧𑀲𑁆𑀲𑀦𑀸-𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸 𑀉𑀧𑁂𑀓𑁆𑀔𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁩𑁦𑁯. 𑀢𑀢𑁆𑀭 𑀇𑀤𑀁 𑀦𑀺𑀲𑁆𑀲𑀸𑀬 𑀇𑀤𑀁 𑀧𑀚𑀳𑀣𑀸𑀢𑀺 𑀢𑁂𑀲𑀼 𑀙𑀢𑁆𑀢𑀺𑀁𑀲𑀲𑀢𑁆𑀢𑀧𑀤𑁂𑀲𑀼 𑀅𑀝𑁆𑀞𑀸𑀭𑀲 𑀦𑀺𑀲𑁆𑀲𑀸𑀬 𑀅𑀝𑁆𑀞𑀸𑀭𑀲 𑀧𑀚𑀳𑀣𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 𑁋 ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀦𑀺𑀲𑁆𑀲𑀸𑀬 𑀆𑀕𑀫𑁆𑀫𑀸𑀢𑀺 𑀧𑀯𑀢𑁆𑀢𑀦𑀯𑀲𑁂𑀦 𑀦𑀺𑀲𑁆𑀲𑀸𑀬 𑀘𑁂𑀯 𑀆𑀕𑀫𑁆𑀫 𑀘. 𑀏𑀯𑀫𑁂𑀢𑁂𑀲𑀁 𑀲𑀫𑀢𑀺𑀓𑁆𑀓𑀫𑁄 𑀳𑁄𑀢𑀻𑀢𑀺 𑀏𑀯𑀁 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀁 𑀧𑀯𑀢𑁆𑀢𑀦𑁂𑀦 𑀕𑁂𑀳𑀲𑀺𑀢𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺.

𑀏𑀯𑀁 𑀲𑀭𑀺𑀓𑁆𑀔𑀓𑁂𑀦𑁂𑀯 𑀲𑀭𑀺𑀓𑁆𑀔𑀓𑀁 𑀚𑀳𑀸𑀧𑁂𑀢𑁆𑀯𑀸 𑀇𑀤𑀸𑀦𑀺 𑀩𑀮𑀯𑀢𑀸 𑀤𑀼𑀩𑁆𑀩𑀮𑀁 𑀚𑀳𑀸𑀧𑁂𑀦𑁆𑀢𑁄 𑁋 ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀬𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀻’’𑀢𑀺𑀆𑀤𑀺𑀫𑀸𑀳. 𑀏𑀯𑀁 𑀦𑁂𑀓𑁆𑀔𑀫𑁆𑀫𑀲𑀺𑀢𑀲𑁄𑀫𑀦𑀲𑁆𑀲𑁂𑀳𑀺 𑀦𑁂𑀓𑁆𑀔𑀫𑁆𑀫𑀲𑀺𑀢𑀤𑁄𑀫𑀦𑀲𑁆𑀲𑀸𑀦𑀺, 𑀦𑁂𑀓𑁆𑀔𑀫𑁆𑀫𑀲𑀺𑀢𑀉𑀧𑁂𑀓𑁆𑀔𑀸𑀳𑀺 𑀘 𑀦𑁂𑀓𑁆𑀔𑀫𑁆𑀫𑀲𑀺𑀢𑀲𑁄𑀫𑀦𑀲𑁆𑀲𑀸𑀦𑀺 𑀚𑀳𑀸𑀧𑁂𑀦𑁆𑀢𑁂𑀦 𑀩𑀮𑀯𑀢𑀸 𑀤𑀼𑀩𑁆𑀩𑀮𑀧𑁆𑀧𑀳𑀸𑀦𑀁 𑀓𑀣𑀺𑀢𑀁.

𑀏𑀢𑁆𑀣 𑀧𑀦 𑀞𑀢𑁆𑀯𑀸 𑀉𑀧𑁂𑀓𑁆𑀔𑀸𑀓𑀣𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀅𑀝𑁆𑀞𑀲𑀼 𑀳𑀺 𑀲𑀫𑀸𑀧𑀢𑁆𑀢𑀻𑀲𑀼 𑀧𑀞𑀫𑀸𑀤𑀻𑀦𑀺 𑀘 𑀢𑀻𑀡𑀺 𑀛𑀸𑀦𑀸𑀦𑀺, 𑀲𑀼𑀤𑁆𑀥𑀲𑀗𑁆𑀔𑀸𑀭𑁂 𑀘 𑀧𑀸𑀤𑀓𑁂 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀤𑁆𑀥𑀸𑀦𑀁 𑀘𑀢𑀼𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀯𑀸 𑀳𑁄𑀢𑀺 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀯𑀸, 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀧𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀯. 𑀘𑀢𑀼𑀢𑁆𑀣𑀚𑁆𑀛𑀸𑀦𑀸𑀤𑀻𑀦𑀺 𑀧𑀸𑀤𑀓𑀸𑀦𑀺 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀤𑁆𑀥𑀸𑀦𑀁 𑀧𑀜𑁆𑀘𑀦𑁆𑀦𑀁 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸 𑀧𑀼𑀭𑀺𑀫𑀲𑀤𑀺𑀲𑀸𑀯. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀧𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀸 𑀳𑁄𑀢𑀺. 𑀇𑀤𑀁 𑀲𑀦𑁆𑀥𑀸𑀬 𑁋 ‘‘𑀬𑀸 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸 𑀉𑀧𑁂𑀓𑁆𑀔𑀸, 𑀢𑀸 𑀦𑀺𑀲𑁆𑀲𑀸𑀬 𑀢𑀸 𑀆𑀕𑀫𑁆𑀫, 𑀬𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺, 𑀢𑀸𑀦𑀺 𑀧𑀚𑀳𑀣𑀸’’𑀢𑀺 𑀯𑀼𑀢𑁆𑀢𑀁. 𑀦 𑀓𑁂𑀯𑀮𑀜𑁆𑀘 𑀏𑀯𑀁𑀧𑀝𑀺𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀬𑀁 𑀯𑀺𑀧𑀲𑁆𑀲𑀦𑀸𑀬 𑀯𑁂𑀤𑀦𑀸𑀯𑀺𑀲𑁂𑀲𑁄𑀯 𑀳𑁄𑀢𑀺, 𑀅𑀭𑀺𑀬𑀫𑀕𑁆𑀕𑁂𑀧𑀺 𑀧𑀦 𑀛𑀸𑀦𑀗𑁆𑀕𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀸𑀦𑀫𑁆𑀧𑀺 𑀯𑀺𑀲𑁂𑀲𑁄 𑀳𑁄𑀢𑀺.

𑀓𑁄 𑀧𑀦𑁂𑀢𑀁 𑀯𑀺𑀲𑁂𑀲𑀁 𑀦𑀺𑀬𑀫𑁂𑀢𑀺? 𑀓𑁂𑀘𑀺 𑀢𑀸𑀯 𑀣𑁂𑀭𑀸 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀚𑁆𑀛𑀸𑀦𑀁 𑀦𑀺𑀬𑀫𑁂𑀢𑀻𑀢𑀺 𑀯𑀤𑀦𑁆𑀢𑀺, 𑀓𑁂𑀘𑀺 𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀸 𑀔𑀦𑁆𑀥𑀸 𑀦𑀺𑀬𑀫𑁂𑀦𑁆𑀢𑀻𑀢𑀺 𑀯𑀤𑀦𑁆𑀢𑀺, 𑀓𑁂𑀘𑀺 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁄 𑀦𑀺𑀬𑀫𑁂𑀢𑀻𑀢𑀺 𑀯𑀤𑀦𑁆𑀢𑀺. 𑀢𑁂𑀲𑀫𑁆𑀧𑀺 𑀯𑀸𑀤𑁂 𑀅𑀬𑀫𑁂𑀯 𑀧𑀼𑀩𑁆𑀩𑀪𑀸𑀕𑁂 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀯𑀺𑀧𑀲𑁆𑀲𑀦𑀸 𑀦𑀺𑀬𑀫𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀦𑀺𑀘𑁆𑀙𑀬𑀓𑀣𑀸 𑀧𑀦𑁂𑀢𑁆𑀣 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀸𑀯.

𑁩𑁧𑁦. 𑀦𑀸𑀦𑀢𑁆𑀢𑀸𑀢𑀺 𑀦𑀸𑀦𑀸 𑀩𑀳𑀽 𑀅𑀦𑁂𑀓𑀧𑁆𑀧𑀓𑀸𑀭𑀸. 𑀦𑀸𑀦𑀢𑁆𑀢𑀲𑀺𑀢𑀸𑀢𑀺 𑀦𑀸𑀦𑀸𑀭𑀫𑁆𑀫𑀡𑀦𑀺𑀲𑁆𑀲𑀺𑀢𑀸. 𑀏𑀓𑀢𑁆𑀢𑀸𑀢𑀺 𑀏𑀓𑀸. 𑀏𑀓𑀢𑁆𑀢𑀲𑀺𑀢𑀸𑀢𑀺 𑀏𑀓𑀸𑀭𑀫𑁆𑀫𑀡𑀦𑀺𑀲𑁆𑀲𑀺𑀢𑀸. 𑀓𑀢𑀫𑀸 𑀧𑀦𑀸𑀬𑀁 𑀉𑀧𑁂𑀓𑁆𑀔𑀸𑀢𑀺? 𑀳𑁂𑀝𑁆𑀞𑀸 𑀢𑀸𑀯 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸 𑀯𑀼𑀢𑁆𑀢𑀸, 𑀉𑀧𑀭𑀺 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀯𑀓𑁆𑀔𑀢𑀺, 𑀇𑀥 𑀲𑀫𑀣𑀉𑀧𑁂𑀓𑁆𑀔𑀸, 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸𑀢𑀺 𑀤𑁆𑀯𑁂 𑀉𑀧𑁂𑀓𑁆𑀔𑀸 𑀕𑀳𑀺𑀢𑀸.

𑀢𑀢𑁆𑀣 𑀬𑀲𑁆𑀫𑀸 𑀅𑀜𑁆𑀜𑀸𑀯 𑀭𑀽𑀧𑁂𑀲𑀼 𑀉𑀧𑁂𑀓𑁆𑀔𑀸, 𑀅𑀜𑁆𑀜𑀸𑀯 𑀲𑀤𑁆𑀤𑀸𑀤𑀻𑀲𑀼, 𑀦 𑀳𑀺 𑀬𑀸 𑀭𑀽𑀧𑁂 𑀉𑀧𑁂𑀓𑁆𑀔𑀸, 𑀲𑀸 𑀲𑀤𑁆𑀤𑀸𑀤𑀻𑀲𑀼 𑀳𑁄𑀢𑀺. 𑀭𑀽𑀧𑁂 𑀉𑀧𑁂𑀓𑁆𑀔𑀸 𑀘 𑀭𑀽𑀧𑀫𑁂𑀯 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀦 𑀲𑀤𑁆𑀤𑀸𑀤𑀬𑁄. 𑀭𑀽𑀧𑁂 𑀉𑀧𑁂𑀓𑁆𑀔𑀸𑀪𑀸𑀯𑀜𑁆𑀘 𑀅𑀜𑁆𑀜𑀸 𑀲𑀫𑀣𑀉𑀧𑁂𑀓𑁆𑀔𑀸 𑀧𑀣𑀯𑀻𑀓𑀲𑀺𑀡𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀅𑀜𑁆𑀜𑀸 𑀆𑀧𑁄𑀓𑀲𑀺𑀡𑀸𑀤𑀻𑀦𑀺. 𑀢𑀲𑁆𑀫𑀸 𑀦𑀸𑀦𑀢𑁆𑀢𑀁 𑀦𑀸𑀦𑀢𑁆𑀢𑀲𑀺𑀢𑀁 𑀯𑀺𑀪𑀚𑀦𑁆𑀢𑁄 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀉𑀧𑁂𑀓𑁆𑀔𑀸 𑀭𑀽𑀧𑁂𑀲𑀽𑀢𑀺𑀆𑀤𑀺𑀫𑀸𑀳. 𑀬𑀲𑁆𑀫𑀸 𑀧𑀦 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀦𑀺 𑀯𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀸𑀤𑀻𑀦𑀺 𑀯𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀏𑀓𑀢𑁆𑀢𑀁 𑀏𑀓𑀢𑁆𑀢𑀲𑀺𑀢𑀁 𑀯𑀺𑀪𑀚𑀦𑁆𑀢𑁄 𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀉𑀧𑁂𑀓𑁆𑀔𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀦𑀺𑀲𑁆𑀲𑀺𑀢𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀉𑀧𑁂𑀓𑁆𑀔𑀸 𑀲𑀫𑁆𑀧𑀬𑀼𑀢𑁆𑀢𑀯𑀲𑁂𑀦 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀦𑀺𑀲𑁆𑀲𑀺𑀢𑀸, 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀔𑀦𑁆𑀥𑁂 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸 𑀆𑀭𑀫𑁆𑀫𑀡𑀯𑀲𑁂𑀦 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀦𑀺𑀲𑁆𑀲𑀺𑀢𑀸. 𑀲𑁂𑀲𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀁 𑀧𑀚𑀳𑀣𑀸𑀢𑀺 𑀏𑀢𑁆𑀣 𑀅𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀉𑀧𑁂𑀓𑁆𑀔𑀸𑀬 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀉𑀧𑁂𑀓𑁆𑀔𑀁 𑀧𑀚𑀳𑀸𑀧𑁂𑀢𑀺, 𑀅𑀭𑀽𑀧𑀸𑀯𑀘𑀭𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸𑀬 𑀭𑀽𑀧𑀸𑀯𑀘𑀭𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀁.

𑀅𑀢𑀫𑁆𑀫𑀬𑀢𑀦𑁆𑀢𑀺 𑀏𑀢𑁆𑀣 𑀢𑀫𑁆𑀫𑀬𑀢𑀸 𑀦𑀸𑀫 𑀢𑀡𑁆𑀳𑀸, 𑀢𑀲𑁆𑀲𑀸 𑀧𑀭𑀺𑀬𑀸𑀤𑀸𑀦𑀢𑁄 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀯𑀺𑀧𑀲𑁆𑀲𑀦𑀸 𑀅𑀢𑀫𑁆𑀫𑀬𑀢𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀧𑀚𑀳𑀣𑀸𑀢𑀺 𑀇𑀥 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀯𑀺𑀧𑀲𑁆𑀲𑀦𑀸𑀬 𑀅𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀉𑀧𑁂𑀓𑁆𑀔𑀜𑁆𑀘 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀜𑁆𑀘 𑀧𑀚𑀳𑀸𑀧𑁂𑀢𑀺.

𑁩𑁧𑁧. 𑀬𑀤𑀭𑀺𑀬𑁄𑀢𑀺 𑀬𑁂 𑀲𑀢𑀺𑀧𑀝𑁆𑀞𑀸𑀦𑁂 𑀅𑀭𑀺𑀬𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀲𑁂𑀯𑀢𑀺. 𑀢𑀢𑁆𑀣 𑀢𑀻𑀲𑀼 𑀞𑀸𑀦𑁂𑀲𑀼 𑀲𑀢𑀺𑀁 𑀧𑀝𑁆𑀞𑀧𑁂𑀦𑁆𑀢𑁄 𑀲𑀢𑀺𑀧𑀝𑁆𑀞𑀸𑀦𑁂 𑀲𑁂𑀯𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀦 𑀲𑀼𑀲𑁆𑀲𑀽𑀲𑀦𑁆𑀢𑀻𑀢𑀺 𑀲𑀤𑁆𑀤𑀳𑀺𑀢𑁆𑀯𑀸 𑀲𑁄𑀢𑀼𑀁 𑀦 𑀇𑀘𑁆𑀙𑀦𑁆𑀢𑀺. 𑀦 𑀅𑀜𑁆𑀜𑀸𑀢𑀺 𑀚𑀸𑀦𑀦𑀢𑁆𑀣𑀸𑀬 𑀘𑀺𑀢𑁆𑀢𑀁 𑀦 𑀉𑀧𑀝𑁆𑀞𑀧𑁂𑀦𑁆𑀢𑀺. 𑀯𑁄𑀓𑁆𑀓𑀫𑁆𑀫𑀸𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀲𑀢𑁆𑀣𑀼 𑀲𑀸𑀲𑀦𑀸𑀢𑀺 𑀲𑀢𑁆𑀣𑀼 𑀑𑀯𑀸𑀤𑀁 𑀕𑀳𑁂𑀢𑀩𑁆𑀩𑀁 𑀧𑀽𑀭𑁂𑀢𑀩𑁆𑀩𑀁 𑀦 𑀫𑀜𑁆𑀜𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦 𑀘 𑀅𑀢𑁆𑀢𑀫𑀦𑁄𑀢𑀺 𑀦 𑀲𑀓𑀫𑀦𑁄. 𑀏𑀢𑁆𑀣 𑀘 𑀕𑁂𑀳𑀲𑀺𑀢𑀤𑁄𑀫𑀦𑀲𑁆𑀲𑀯𑀲𑁂𑀦 𑀅𑀧𑁆𑀧𑀢𑀻𑀢𑁄 𑀳𑁄𑀢𑀻𑀢𑀺 𑀦 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀅𑀧𑁆𑀧𑀝𑀺𑀧𑀦𑁆𑀦𑀓𑁂𑀲𑀼 𑀧𑀦 𑀅𑀢𑁆𑀢𑀫𑀦𑀢𑀸𑀓𑀸𑀭𑀡𑀲𑁆𑀲 𑀅𑀪𑀸𑀯𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀅𑀦𑀯𑀲𑁆𑀲𑀼𑀢𑁄𑀢𑀺 𑀧𑀝𑀺𑀖𑀅𑀯𑀲𑁆𑀲𑀯𑁂𑀦 𑀅𑀦𑀯𑀲𑁆𑀲𑀼𑀢𑁄. 𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺 𑀲𑀢𑀺𑀬𑀸 𑀘 𑀜𑀸𑀡𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄. 𑀉𑀧𑁂𑀓𑁆𑀔𑀓𑁄𑀢𑀺 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀬 𑀉𑀧𑁂𑀓𑁆𑀔𑀓𑁄. 𑀅𑀢𑁆𑀢𑀫𑀦𑁄𑀢𑀺 𑀇𑀥𑀸𑀧𑀺 𑀕𑁂𑀳𑀲𑀺𑀢𑀲𑁄𑀫𑀦𑀲𑁆𑀲𑀯𑀲𑁂𑀦 𑀉𑀧𑁆𑀧𑀺𑀮𑀸𑀯𑀺𑀢𑁄𑀢𑀺 𑀦 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄, 𑀧𑀝𑀺𑀧𑀦𑁆𑀦𑀓𑁂𑀲𑀼 𑀧𑀦 𑀅𑀦𑀢𑁆𑀢𑀫𑀦𑀢𑀸𑀓𑀸𑀭𑀡𑀲𑁆𑀲 𑀅𑀪𑀸𑀯𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀅𑀦𑀯𑀲𑁆𑀲𑀼𑀢𑁄𑀢𑀺 𑀭𑀸𑀕𑀸𑀯𑀲𑁆𑀲𑀯𑁂𑀦 𑀅𑀦𑀯𑀲𑁆𑀲𑀼𑀢𑁄.

𑁩𑁧𑁨. 𑀲𑀸𑀭𑀺𑀢𑁄𑀢𑀺 𑀤𑀫𑀺𑀢𑁄. 𑀏𑀓𑀫𑁂𑀯 𑀤𑀺𑀲𑀁 𑀥𑀸𑀯𑀢𑀻𑀢𑀺 𑀅𑀦𑀺𑀯𑀢𑁆𑀢𑀺𑀢𑁆𑀯𑀸 𑀥𑀸𑀯𑀦𑁆𑀢𑁄 𑀏𑀓𑀁𑀬𑁂𑀯 𑀤𑀺𑀲𑀁 𑀥𑀸𑀯𑀢𑀺, 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀦 𑀅𑀧𑀭𑀁 𑀥𑀸𑀯𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀅𑀝𑁆𑀞 𑀤𑀺𑀲𑀸 𑀯𑀺𑀥𑀸𑀯𑀢𑀻𑀢𑀺 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑁄 𑀓𑀸𑀬𑁂𑀦 𑀅𑀦𑀺𑀯𑀢𑁆𑀢𑀺𑀢𑁆𑀯𑀸𑀯 𑀯𑀺𑀫𑁄𑀓𑁆𑀔𑀯𑀲𑁂𑀦 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀅𑀝𑁆𑀞 𑀤𑀺𑀲𑀸 𑀯𑀺𑀥𑀸𑀯𑀢𑀺, 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀯𑀸 𑀤𑀓𑁆𑀔𑀺𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑀤𑀺𑀲𑀸𑀪𑀺𑀫𑀼𑀔𑁄 𑀯𑀸 𑀦𑀺𑀲𑀻𑀤𑀺𑀢𑁆𑀯𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀲𑀴𑀸𑀬𑀢𑀦𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀉𑀤𑁆𑀤𑁂𑀲𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧𑁩. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀉𑀤𑁆𑀤𑁂𑀲𑀯𑀺𑀪𑀗𑁆𑀕𑀲𑀼𑀢𑁆𑀢𑀁. 𑀢𑀢𑁆𑀣 𑀉𑀤𑁆𑀤𑁂𑀲𑀯𑀺𑀪𑀗𑁆𑀕𑀦𑁆𑀢𑀺 𑀉𑀤𑁆𑀤𑁂𑀲𑀜𑁆𑀘 𑀯𑀺𑀪𑀗𑁆𑀕𑀜𑁆𑀘, 𑀫𑀸𑀢𑀺𑀓𑀜𑁆𑀘 𑀯𑀺𑀪𑀚𑀦𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀉𑀧𑀧𑀭𑀺𑀓𑁆𑀔𑁂𑀬𑁆𑀬𑀸𑀢𑀺 𑀢𑀼𑀮𑁂𑀬𑁆𑀬 𑀢𑀻𑀭𑁂𑀬𑁆𑀬 𑀧𑀭𑀺𑀕𑁆𑀕𑀡𑁆𑀳𑁂𑀬𑁆𑀬 𑀧𑀭𑀺𑀘𑁆𑀙𑀺𑀦𑁆𑀤𑁂𑀬𑁆𑀬. 𑀩𑀳𑀺𑀤𑁆𑀥𑀸𑀢𑀺 𑀩𑀳𑀺𑀤𑁆𑀥𑀸𑀆𑀭𑀫𑁆𑀫𑀡𑁂𑀲𑀼. 𑀅𑀯𑀺𑀓𑁆𑀔𑀺𑀢𑁆𑀢𑀁 𑀅𑀯𑀺𑀲𑀝𑀦𑁆𑀢𑀺 𑀦𑀺𑀓𑀦𑁆𑀢𑀺𑀯𑀲𑁂𑀦 𑀆𑀭𑀫𑁆𑀫𑀡𑁂 𑀢𑀺𑀝𑁆𑀞𑀫𑀸𑀦𑀁 𑀯𑀺𑀓𑁆𑀔𑀺𑀢𑁆𑀢𑀁 𑀯𑀺𑀲𑀝𑀁 𑀦𑀸𑀫 𑀳𑁄𑀢𑀺, 𑀢𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 𑀏𑀯𑀫𑀸𑀳. 𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢𑀦𑁆𑀢𑀺 𑀕𑁄𑀘𑀭𑀚𑁆𑀛𑀢𑁆𑀢𑁂 𑀦𑀺𑀓𑀦𑁆𑀢𑀺𑀯𑀲𑁂𑀦 𑀅𑀲𑀡𑁆𑀞𑀺𑀢𑀁. 𑀅𑀦𑀼𑀧𑀸𑀤𑀸𑀬 𑀦 𑀧𑀭𑀺𑀢𑀲𑁆𑀲𑁂𑀬𑁆𑀬𑀸𑀢𑀺 𑀅𑀦𑀼𑀧𑀸𑀤𑀺𑀬𑀺𑀢𑁆𑀯𑀸 𑀅𑀕𑁆𑀕𑀳𑁂𑀢𑁆𑀯𑀸 𑀢𑀁 𑀯𑀺𑀜𑁆𑀜𑀸𑀡𑀁 𑀦 𑀧𑀭𑀺𑀢𑀲𑁆𑀲𑁂𑀬𑁆𑀬. 𑀬𑀣𑀸 𑀯𑀺𑀜𑁆𑀜𑀸𑀡𑀁 𑀩𑀳𑀺𑀤𑁆𑀥𑀸 𑀅𑀯𑀺𑀓𑁆𑀔𑀺𑀢𑁆𑀢𑀁 𑀅𑀯𑀺𑀲𑀝𑀁, 𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢𑀁 𑀅𑀦𑀼𑀧𑀸𑀤𑀸𑀬 𑀦 𑀧𑀭𑀺𑀢𑀲𑁆𑀲𑁂𑀬𑁆𑀬, 𑀏𑀯𑀁 𑀪𑀺𑀓𑁆𑀔𑀼 𑀉𑀧𑀧𑀭𑀺𑀓𑁆𑀔𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀚𑀸𑀢𑀺𑀚𑀭𑀸𑀫𑀭𑀡𑀤𑀼𑀓𑁆𑀔𑀲𑀫𑀼𑀤𑀬𑀲𑀫𑁆𑀪𑀯𑁄𑀢𑀺 𑀚𑀸𑀢𑀺𑀚𑀭𑀸𑀫𑀭𑀡𑀲𑁆𑀲 𑀘𑁂𑀯 𑀅𑀯𑀲𑁂𑀲𑀲𑁆𑀲 𑀘 𑀤𑀼𑀓𑁆𑀔𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁩𑁧𑁬. 𑀭𑀽𑀧𑀦𑀺𑀫𑀺𑀢𑁆𑀢𑀸𑀦𑀼𑀲𑀸𑀭𑀻𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀁 𑀅𑀦𑀼𑀲𑁆𑀲𑀭𑀢𑀺 𑀅𑀦𑀼𑀥𑀸𑀯𑀢𑀻𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀸𑀦𑀼𑀲𑀸𑀭𑀻.

𑁩𑁧𑁮. 𑀏𑀯𑀁 𑀔𑁄, 𑀆𑀯𑀼𑀲𑁄, 𑀅𑀚𑁆𑀛𑀢𑁆𑀢𑀁 𑀅𑀲𑀡𑁆𑀞𑀺𑀢𑀦𑁆𑀢𑀺 𑀦𑀺𑀓𑀦𑁆𑀢𑀺𑀯𑀲𑁂𑀦 𑀅𑀲𑀡𑁆𑀞𑀺𑀢𑀁. 𑀦𑀺𑀓𑀦𑁆𑀢𑀺𑀯𑀲𑁂𑀦 𑀳𑀺 𑀅𑀢𑀺𑀝𑁆𑀞𑀫𑀸𑀦𑀁 𑀳𑀸𑀦𑀪𑀸𑀕𑀺𑀬𑀁 𑀦 𑀳𑁄𑀢𑀺, 𑀯𑀺𑀲𑁂𑀲𑀪𑀸𑀕𑀺𑀬𑀫𑁂𑀯 𑀳𑁄𑀢𑀺.

𑁩𑁨𑁦. 𑀅𑀦𑀼𑀧𑀸𑀤𑀸 𑀧𑀭𑀺𑀢𑀲𑁆𑀲𑀦𑀸𑀢𑀺 𑀲𑀢𑁆𑀣𑀸𑀭𑀸 𑀔𑀦𑁆𑀥𑀺𑀬𑀯𑀕𑁆𑀕𑁂 ‘‘𑀉𑀧𑀸𑀤𑀸𑀧𑀭𑀺𑀢𑀲𑁆𑀲𑀦𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀅𑀦𑀼𑀧𑀸𑀤𑀸𑀅𑀧𑀭𑀺𑀢𑀲𑁆𑀲𑀦𑀜𑁆𑀘𑀸’’𑀢𑀺 (𑀲𑀁. 𑀦𑀺. 𑁩.𑁭) 𑀏𑀯𑀁 𑀕𑀳𑁂𑀢𑁆𑀯𑀸 𑀧𑀭𑀺𑀢𑀲𑁆𑀲𑀦𑀸, 𑀅𑀕𑁆𑀕𑀳𑁂𑀢𑁆𑀯𑀸𑀯 𑀅𑀧𑀭𑀺𑀢𑀲𑁆𑀲𑀦𑀸 𑀘 𑀓𑀣𑀺𑀢𑀸, 𑀢𑀁 𑀫𑀳𑀸𑀣𑁂𑀭𑁄 𑀉𑀧𑀸𑀤𑀸𑀧𑀭𑀺𑀢𑀲𑁆𑀲𑀦𑀫𑁂𑀯 𑀅𑀦𑀼𑀧𑀸𑀤𑀸𑀧𑀭𑀺𑀢𑀲𑁆𑀲𑀦𑀦𑁆𑀢𑀺 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀓𑀣𑀁 𑀧𑀦𑁂𑀲𑀸 𑀅𑀦𑀼𑀧𑀸𑀤𑀸𑀧𑀭𑀺𑀢𑀲𑁆𑀲𑀦𑀸 𑀳𑁄𑀢𑀻𑀢𑀺. 𑀉𑀧𑀸𑀤𑀸𑀢𑀩𑁆𑀩𑀲𑁆𑀲 𑀅𑀪𑀸𑀯𑀢𑁄. 𑀬𑀤𑀺 𑀳𑀺 𑀓𑁄𑀘𑀺 𑀲𑀗𑁆𑀔𑀸𑀭𑁄 𑀦𑀺𑀘𑁆𑀘𑁄 𑀯𑀸 𑀥𑀼𑀯𑁄 𑀯𑀸 𑀅𑀢𑁆𑀢𑀸 𑀯𑀸 𑀅𑀢𑁆𑀢𑀦𑀺𑀬𑁄 𑀯𑀸𑀢𑀺 𑀕𑀳𑁂𑀢𑀩𑁆𑀩𑀬𑀼𑀢𑁆𑀢𑀓𑁄 𑀅𑀪𑀯𑀺𑀲𑁆𑀲, 𑀅𑀬𑀁 𑀧𑀭𑀺𑀢𑀲𑁆𑀲𑀦𑀸 𑀉𑀧𑀸𑀤𑀸𑀧𑀭𑀺𑀢𑀲𑁆𑀲𑀦𑀸𑀯 𑀅𑀲𑁆𑀲. 𑀬𑀲𑁆𑀫𑀸 𑀧𑀦 𑀏𑀯𑀁 𑀉𑀧𑀸𑀤𑀸𑀢𑀩𑁆𑀩𑁄 𑀲𑀗𑁆𑀔𑀸𑀭𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀭𑀽𑀧𑀁 𑀅𑀢𑁆𑀢𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀭𑀽𑀧𑀸𑀤𑀬𑁄 𑀉𑀧𑀸𑀤𑀺𑀦𑁆𑀦𑀸𑀧𑀺 𑀅𑀦𑀼𑀧𑀸𑀤𑀺𑀦𑁆𑀦𑀸𑀯 𑀳𑁄𑀦𑁆𑀢𑀺. 𑀏𑀯𑀫𑁂𑀲𑀸 𑀤𑀺𑀝𑁆𑀞𑀺𑀯𑀲𑁂𑀦 𑀉𑀧𑀸𑀤𑀸𑀧𑀭𑀺𑀢𑀲𑁆𑀲𑀦𑀸𑀧𑀺 𑀲𑀫𑀸𑀦𑀸 𑀅𑀢𑁆𑀣𑀢𑁄 𑀅𑀦𑀼𑀧𑀸𑀤𑀸𑀧𑀭𑀺𑀢𑀲𑁆𑀲𑀦𑀸𑀬𑁂𑀯 𑀦𑀸𑀫 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀜𑁆𑀜𑀣𑀸 𑀳𑁄𑀢𑀻𑀢𑀺 𑀧𑀭𑀺𑀯𑀢𑁆𑀢𑀢𑀺 𑀧𑀓𑀢𑀺𑀚𑀳𑀦𑁂𑀦 𑀦𑀲𑁆𑀲𑀢𑀺, 𑀭𑀽𑀧𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀭𑀺𑀯𑀢𑁆𑀢𑀻𑀢𑀺 ‘‘𑀫𑀫 𑀭𑀽𑀧𑀁 𑀯𑀺𑀧𑀭𑀺𑀡𑀢’’𑀦𑁆𑀢𑀺 𑀯𑀸, ‘‘𑀬𑀁 𑀅𑀳𑀼, 𑀢𑀁 𑀯𑀢 𑀫𑁂 𑀦𑀢𑁆𑀣𑀻’’𑀢𑀺 𑀯𑀸 𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁪𑁨) 𑀦𑀬𑁂𑀦 𑀓𑀫𑁆𑀫𑀯𑀺𑀜𑁆𑀜𑀸𑀡𑀁 𑀭𑀽𑀧𑀲𑁆𑀲 𑀪𑁂𑀤𑀸𑀦𑀼𑀧𑀭𑀺𑀯𑀢𑁆𑀢𑀺 𑀳𑁄𑀢𑀺. 𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀭𑀺𑀯𑀢𑁆𑀢𑀚𑀸𑀢𑀺 𑀯𑀺𑀧𑀭𑀺𑀡𑀸𑀫𑀲𑁆𑀲 𑀅𑀦𑀼𑀧𑀭𑀺𑀯𑀢𑁆𑀢𑀦𑀢𑁄 𑀯𑀺𑀧𑀭𑀺𑀡𑀸𑀫𑀸𑀭𑀫𑁆𑀫𑀡𑀘𑀺𑀢𑁆𑀢𑀢𑁄 𑀚𑀸𑀢𑀸. 𑀧𑀭𑀺𑀢𑀲𑁆𑀲𑀦𑀸 𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑀸𑀢𑀺 𑀢𑀡𑁆𑀳𑀸𑀧𑀭𑀺𑀢𑀲𑁆𑀲𑀦𑀸 𑀘 𑀅𑀓𑀼𑀲𑀮𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑀸 𑀘. 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀻𑀢𑀺 𑀓𑀼𑀲𑀮𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀕𑀳𑁂𑀢𑁆𑀯𑀸 𑀔𑁂𑀧𑁂𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀉𑀢𑁆𑀢𑀸𑀲𑀯𑀸𑀢𑀺 𑀪𑀬𑀢𑀸𑀲𑁂𑀦𑀧𑀺 𑀲𑀉𑀢𑁆𑀢𑀸𑀲𑁄 𑀢𑀡𑁆𑀳𑀸𑀢𑀸𑀲𑁂𑀦𑀧𑀺 𑀲𑀉𑀢𑁆𑀢𑀸𑀲𑁄. 𑀯𑀺𑀖𑀸𑀢𑀯𑀸𑀢𑀺 𑀲𑀯𑀺𑀖𑀸𑀢𑁄 𑀲𑀤𑀼𑀓𑁆𑀔𑁄. 𑀅𑀧𑁂𑀓𑁆𑀔𑀯𑀸𑀢𑀺 𑀲𑀸𑀮𑀬𑁄 𑀲𑀲𑀺𑀦𑁂𑀳𑁄. 𑀏𑀯𑀁 𑀔𑁄, 𑀆𑀯𑀼𑀲𑁄, 𑀅𑀦𑀼𑀧𑀸𑀤𑀸 𑀧𑀭𑀺𑀢𑀲𑁆𑀲𑀦𑀸 𑀳𑁄𑀢𑀻𑀢𑀺 𑀏𑀯𑀁 𑀫𑀡𑀺𑀓𑀭𑀡𑁆𑀟𑀓𑀲𑀜𑁆𑀜𑀸𑀬 𑀢𑀼𑀘𑁆𑀙𑀓𑀭𑀡𑁆𑀟𑀓𑀁 𑀕𑀳𑁂𑀢𑁆𑀯𑀸 𑀢𑀲𑁆𑀫𑀺𑀁 𑀦𑀝𑁆𑀞𑁂 𑀧𑀘𑁆𑀙𑀸 𑀯𑀺𑀖𑀸𑀢𑀁 𑀆𑀧𑀚𑁆𑀚𑀦𑁆𑀢𑀲𑁆𑀲 𑀯𑀺𑀬 𑀧𑀘𑁆𑀙𑀸 𑀅𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀢𑀲𑁆𑀲𑀦𑀸 𑀳𑁄𑀢𑀺.

𑁩𑁨𑁧. 𑀦 𑀘 𑀭𑀽𑀧𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀭𑀺𑀯𑀢𑁆𑀢𑀻𑀢𑀺 𑀔𑀻𑀡𑀸𑀲𑀯𑀲𑁆𑀲 𑀓𑀫𑁆𑀫𑀯𑀺𑀜𑁆𑀜𑀸𑀡𑀫𑁂𑀯 𑀦𑀢𑁆𑀣𑀺, 𑀢𑀲𑁆𑀫𑀸 𑀭𑀽𑀧𑀪𑁂𑀤𑀸𑀦𑀼𑀧𑀭𑀺𑀯𑀢𑁆𑀢𑀺 𑀦 𑀳𑁄𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀉𑀤𑁆𑀤𑁂𑀲𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀭𑀡𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨𑁩. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀅𑀭𑀡𑀯𑀺𑀪𑀗𑁆𑀕𑀲𑀼𑀢𑁆𑀢𑀁. 𑀢𑀢𑁆𑀣 𑀦𑁂𑀯𑀼𑀲𑁆𑀲𑀸𑀤𑁂𑀬𑁆𑀬 𑀦 𑀅𑀧𑀲𑀸𑀤𑁂𑀬𑁆𑀬𑀸𑀢𑀺 𑀕𑁂𑀳𑀲𑀺𑀢𑀯𑀲𑁂𑀦 𑀓𑀜𑁆𑀘𑀺 𑀧𑀼𑀕𑁆𑀕𑀮𑀁 𑀦𑁂𑀯 𑀉𑀓𑁆𑀔𑀺𑀧𑁂𑀬𑁆𑀬 𑀦 𑀅𑀯𑀓𑁆𑀔𑀺𑀧𑁂𑀬𑁆𑀬. 𑀥𑀫𑁆𑀫𑀫𑁂𑀯 𑀤𑁂𑀲𑁂𑀬𑁆𑀬𑀸𑀢𑀺 𑀲𑀪𑀸𑀯𑀫𑁂𑀯 𑀓𑀣𑁂𑀬𑁆𑀬. 𑀲𑀼𑀔𑀯𑀺𑀦𑀺𑀘𑁆𑀙𑀬𑀦𑁆𑀢𑀺 𑀯𑀺𑀦𑀺𑀘𑁆𑀙𑀺𑀢𑀲𑀼𑀔𑀁. 𑀭𑀳𑁄 𑀯𑀸𑀤𑀦𑁆𑀢𑀺 𑀧𑀭𑀫𑁆𑀫𑀼𑀔𑀸 𑀅𑀯𑀡𑁆𑀡𑀁, 𑀧𑀺𑀲𑀼𑀡𑀯𑀸𑀘𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀼𑀔𑀸 𑀦 𑀔𑀻𑀡𑀦𑁆𑀢𑀺 𑀲𑀫𑁆𑀫𑀼𑀔𑀸𑀧𑀺 𑀔𑀻𑀡𑀁 𑀆𑀓𑀺𑀡𑁆𑀡𑀁 𑀲𑀁𑀓𑀺𑀮𑀺𑀝𑁆𑀞𑀁 𑀯𑀸𑀘𑀁 𑀦 𑀪𑀡𑁂𑀬𑁆𑀬. 𑀦𑀸𑀪𑀺𑀦𑀺𑀯𑁂𑀲𑁂𑀬𑁆𑀬𑀸𑀢𑀺 𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀆𑀤𑀸𑀬 𑀯𑁄𑀳𑀭𑁂𑀬𑁆𑀬. 𑀲𑀫𑀜𑁆𑀜𑀦𑁆𑀢𑀺 𑀮𑁄𑀓𑀲𑀫𑀜𑁆𑀜𑀁 𑀮𑁄𑀓𑀧𑀡𑁆𑀡𑀢𑁆𑀢𑀺𑀁. 𑀦𑀸𑀢𑀺𑀥𑀸𑀯𑁂𑀬𑁆𑀬𑀸𑀢𑀺 𑀦𑀸𑀢𑀺𑀓𑁆𑀓𑀫𑁂𑀬𑁆𑀬.

𑁩𑁨𑁪. 𑀓𑀸𑀫𑀧𑀝𑀺𑀲𑀦𑁆𑀥𑀺𑀲𑀼𑀔𑀺𑀦𑁄𑀢𑀺 𑀓𑀸𑀫𑀧𑀝𑀺𑀲𑀦𑁆𑀥𑀺𑀦𑀸 𑀓𑀸𑀫𑀽𑀧𑀲𑀁𑀳𑀺𑀢𑁂𑀦 𑀲𑀼𑀔𑁂𑀦 𑀲𑀼𑀔𑀺𑀢𑀲𑁆𑀲. 𑀲𑀤𑀼𑀓𑁆𑀔𑁄𑀢𑀺 𑀯𑀺𑀧𑀸𑀓𑀤𑀼𑀓𑁆𑀔𑁂𑀦 𑀲𑀁𑀓𑀺𑀮𑁂𑀲𑀤𑀼𑀓𑁆𑀔𑁂𑀦𑀧𑀺 𑀲𑀤𑀼𑀓𑁆𑀔𑁄. 𑀲𑀉𑀧𑀖𑀸𑀢𑁄𑀢𑀺 𑀯𑀺𑀧𑀸𑀓𑀽𑀧𑀖𑀸𑀢𑀓𑀺𑀮𑁂𑀲𑀽𑀧𑀖𑀸𑀢𑁂𑀳𑁂𑀯 𑀲𑀉𑀧𑀖𑀸𑀢𑁄. 𑀢𑀣𑀸 𑀲𑀧𑀭𑀺𑀴𑀸𑀳𑁄. 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀢𑀺 𑀅𑀬𑀸𑀣𑀸𑀯𑀧𑀝𑀺𑀧𑀤𑀸 𑀅𑀓𑀼𑀲𑀮𑀧𑀝𑀺𑀧𑀤𑀸.

𑁩𑁨𑁬. 𑀇𑀢𑁆𑀣𑁂𑀓𑁂 𑀅𑀧𑀲𑀸𑀤𑁂𑀢𑀻𑀢𑀺 𑀏𑀯𑀁 𑀕𑁂𑀳𑀲𑀺𑀢𑀯𑀲𑁂𑀦 𑀏𑀓𑀘𑁆𑀘𑁂 𑀧𑀼𑀕𑁆𑀕𑀮𑁂 𑀅𑀧𑀲𑀸𑀤𑁂𑀢𑀺. 𑀉𑀲𑁆𑀲𑀸𑀤𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀪𑀯𑀲𑀁𑀬𑁄𑀚𑀦𑀦𑁆𑀢𑀺 𑀪𑀯𑀩𑀦𑁆𑀥𑀦𑀁, 𑀢𑀡𑁆𑀳𑀸𑀬𑁂𑀢𑀁 𑀦𑀸𑀫𑀁.

𑀲𑀼𑀪𑀽𑀢𑀺𑀢𑁆𑀣𑁂𑀭𑁄 𑀓𑀺𑀭 𑀇𑀫𑀁 𑀘𑀢𑀼𑀓𑁆𑀓𑀁 𑀦𑀺𑀲𑁆𑀲𑀸𑀬 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄. 𑀪𑀕𑀯𑀢𑁄 𑀳𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀧𑀼𑀕𑁆𑀕𑀮𑀸𑀦𑀁 𑀉𑀲𑁆𑀲𑀸𑀤𑀦𑀸𑀅𑀧𑀲𑀸𑀤𑀦𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀢𑀣𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀸𑀤𑀻𑀦𑀁. 𑀲𑀼𑀪𑀽𑀢𑀺𑀢𑁆𑀣𑁂𑀭𑀲𑁆𑀲 𑀧𑀦 𑀥𑀫𑁆𑀫𑀤𑁂𑀲𑀦𑀸𑀬 ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀅𑀧𑁆𑀧𑀝𑀺𑀧𑀦𑁆𑀦𑀓𑁄 𑀅𑀦𑀸𑀭𑀸𑀥𑀓𑁄’’𑀢𑀺 𑀯𑀸, ‘‘𑀅𑀬𑀁 𑀲𑀻𑀮𑀯𑀸 𑀕𑀼𑀡𑀯𑀸 𑀮𑀚𑁆𑀚𑀺𑀧𑁂𑀲𑀮𑁄 𑀆𑀘𑀸𑀭𑀲𑀫𑁆𑀧𑀦𑁆𑀦𑁄’’𑀢𑀺 𑀯𑀸 𑀦𑀢𑁆𑀣𑀺, 𑀥𑀫𑁆𑀫𑀤𑁂𑀲𑀦𑀸𑀬 𑀧𑀦𑀲𑁆𑀲 ‘‘𑀅𑀬𑀁 𑀫𑀺𑀘𑁆𑀙𑀸𑀧𑀝𑀺𑀧𑀤𑀸, 𑀅𑀬𑀁 𑀲𑀫𑁆𑀫𑀸𑀧𑀝𑀺𑀧𑀤𑀸’’𑀢𑁆𑀯𑁂𑀯 𑀧𑀜𑁆𑀜𑀸𑀬𑀢𑀺. 𑀢𑀲𑁆𑀫𑀸 𑀪𑀕𑀯𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀭𑀡𑀯𑀺𑀳𑀸𑀭𑀻𑀦𑀁 𑀬𑀤𑀺𑀤𑀁 𑀲𑀼𑀪𑀽𑀢𑀻’’𑀢𑀺 𑀆𑀳.

𑁩𑁨𑁯. 𑀓𑀸𑀮𑀜𑁆𑀜𑀽 𑀅𑀲𑁆𑀲𑀸𑀢𑀺 𑀅𑀲𑀫𑁆𑀧𑀢𑁆𑀢𑁂 𑀘 𑀅𑀢𑀺𑀓𑁆𑀓𑀦𑁆𑀢𑁂 𑀘 𑀓𑀸𑀮𑁂 𑀅𑀓𑀣𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀁 𑀫𑀳𑀸𑀚𑀦𑁄 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑀁 𑀜𑀢𑁆𑀯𑀸𑀯 𑀧𑀭𑀫𑁆𑀫𑀼𑀔𑀸 𑀅𑀯𑀡𑁆𑀡𑀁 𑀪𑀸𑀲𑁂𑀬𑁆𑀬. 𑀔𑀻𑀡𑀯𑀸𑀤𑁂𑀧𑀺 𑀏𑀲𑁂𑀯 𑀦𑀬𑁄.

𑁩𑁩𑁦. 𑀉𑀧𑀳𑀜𑁆𑀜𑀢𑀻𑀢𑀺 𑀖𑀸𑀢𑀺𑀬𑀢𑀺. 𑀲𑀭𑁄𑀧𑀺 𑀉𑀧𑀳𑀜𑁆𑀜𑀢𑀻𑀢𑀺 𑀲𑀤𑁆𑀤𑁄𑀧𑀺 𑀪𑀺𑀚𑁆𑀚𑀢𑀺. 𑀆𑀢𑀼𑀭𑀻𑀬𑀢𑀻𑀢𑀺 𑀆𑀢𑀼𑀭𑁄 𑀳𑁄𑀢𑀺 𑀕𑁂𑀮𑀜𑁆𑀜𑀧𑁆𑀧𑀢𑁆𑀢𑁄 𑀲𑀸𑀩𑀸𑀥𑁄. 𑀅𑀯𑀺𑀲𑁆𑀲𑀝𑁆𑀞𑀦𑁆𑀢𑀺 𑀯𑀺𑀲𑁆𑀲𑀝𑁆𑀞𑀁 𑀅𑀧𑀮𑀺𑀩𑀼𑀤𑁆𑀥𑀁 𑀦 𑀳𑁄𑀢𑀺.

𑁩𑁩𑁧. 𑀢𑀤𑁂𑀯𑀸𑀢𑀺 𑀢𑀁𑀬𑁂𑀯 𑀪𑀸𑀚𑀦𑀁. 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀢𑀻𑀢𑀺 𑀧𑀢𑁆𑀢𑀦𑁆𑀢𑀺 𑀲𑀜𑁆𑀚𑀸𑀦𑀦𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 ‘‘𑀧𑀢𑁆𑀢𑀁 𑀆𑀳𑀭𑀣 𑀥𑁄𑀯𑀣𑀸’’𑀢𑀺 𑀲𑀼𑀢𑁆𑀯𑀸 ‘‘𑀅𑀦𑁆𑀥𑀩𑀸𑀮𑀧𑀼𑀣𑀼𑀚𑁆𑀚𑀦𑁄, 𑀦𑀬𑀺𑀤𑀁 𑀧𑀢𑁆𑀢𑀁, 𑀧𑀸𑀢𑀺 𑀦𑀫𑁂𑀲𑀸, 𑀏𑀯𑀁 𑀯𑀤𑀸𑀳𑀻’’𑀢𑀺 𑀅𑀪𑀺𑀦𑀺𑀯𑀺𑀲𑁆𑀲 𑀯𑁄𑀳𑀭𑀢𑀺. 𑀏𑀯𑀁 𑀲𑀩𑁆𑀩𑀧𑀤𑁂𑀳𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀢𑀺𑀲𑀸𑀭𑁄𑀢𑀺 𑀅𑀢𑀺𑀥𑀸𑀯𑀦𑀁.

𑁩𑁩𑁨. 𑀢𑀣𑀸 𑀢𑀣𑀸 𑀯𑁄𑀳𑀭𑀢𑀺 𑀅𑀧𑀭𑀸𑀫𑀲𑀦𑁆𑀢𑀺 𑀅𑀫𑁆𑀳𑀸𑀓𑀁 𑀚𑀦𑀧𑀤𑁂 𑀪𑀸𑀚𑀦𑀁 𑀧𑀸𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀇𑀫𑁂 𑀧𑀦 𑀦𑀁 𑀧𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀻𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀚𑀦𑀧𑀤𑀯𑁄𑀳𑀸𑀭𑀁 𑀫𑀼𑀜𑁆𑀘𑀺𑀢𑁆𑀯𑀸 𑀧𑀢𑁆𑀢𑀁 𑀧𑀢𑁆𑀢𑀦𑁆𑀢𑁂𑀯 𑀅𑀧𑀭𑀸𑀫𑀲𑀦𑁆𑀢𑁄 𑀯𑁄𑀳𑀭𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁩𑁩𑁩. 𑀇𑀤𑀸𑀦𑀺 𑀫𑀭𑀺𑀬𑀸𑀤𑀪𑀸𑀚𑀦𑀻𑀬𑀁 𑀓𑀭𑁄𑀦𑁆𑀢𑁄 𑀢𑀢𑁆𑀭, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀭𑀡𑁄𑀢𑀺 𑀲𑀭𑀚𑁄 𑀲𑀓𑀺𑀮𑁂𑀲𑁄. 𑀅𑀭𑀡𑁄𑀢𑀺 𑀅𑀭𑀚𑁄 𑀦𑀺𑀓𑁆𑀓𑀺𑀮𑁂𑀲𑁄. 𑀲𑀼𑀪𑀽𑀢𑀺 𑀘 𑀧𑀦, 𑀪𑀺𑀓𑁆𑀔𑀯𑁂𑀢𑀺 𑀅𑀬𑀁 𑀣𑁂𑀭𑁄 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀏𑀢𑀤𑀕𑁆𑀕𑀁 𑀆𑀭𑀼𑀴𑁆𑀳𑁄 ‘‘𑀅𑀭𑀡𑀯𑀺𑀳𑀸𑀭𑀻𑀦𑀁 𑀬𑀤𑀺𑀤𑀁 𑀲𑀼𑀪𑀽𑀢𑀺, 𑀤𑀓𑁆𑀔𑀺𑀡𑁂𑀬𑁆𑀬𑀸𑀦𑀁 𑀬𑀤𑀺𑀤𑀁 𑀲𑀼𑀪𑀽𑀢𑀻’’𑀢𑀺 (𑀅. 𑀦𑀺. 𑁧.𑁨𑁦𑁨).

𑀥𑀫𑁆𑀫𑀲𑁂𑀦𑀸𑀧𑀢𑀺 𑀓𑀺𑀭 𑀯𑀢𑁆𑀣𑀼𑀁 𑀲𑁄𑀥𑁂𑀢𑀺, 𑀲𑀼𑀪𑀽𑀢𑀺𑀢𑁆𑀣𑁂𑀭𑁄 𑀤𑀓𑁆𑀔𑀺𑀡𑀁 𑀲𑁄𑀥𑁂𑀢𑀺. 𑀢𑀣𑀸 𑀳𑀺 𑀥𑀫𑁆𑀫𑀲𑁂𑀦𑀸𑀧𑀢𑀺 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀕𑁂𑀳𑀤𑁆𑀯𑀸𑀭𑁂 𑀞𑀺𑀢𑁄 𑀬𑀸𑀯 𑀪𑀺𑀓𑁆𑀔𑀁 𑀆𑀳𑀭𑀦𑁆𑀢𑀺, 𑀢𑀸𑀯 𑀧𑀼𑀩𑁆𑀩𑀪𑀸𑀕𑁂 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀦𑀺𑀭𑁄𑀥𑀁 𑀲𑀫𑀸𑀧𑀚𑁆𑀚𑀢𑀺, 𑀦𑀺𑀭𑁄𑀥𑀸 𑀯𑀼𑀝𑁆𑀞𑀸𑀬 𑀤𑁂𑀬𑁆𑀬𑀥𑀫𑁆𑀫𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀲𑀼𑀪𑀽𑀢𑀺𑀢𑁆𑀣𑁂𑀭𑁄 𑀘 𑀢𑀣𑁂𑀯 𑀫𑁂𑀢𑁆𑀢𑀸𑀛𑀸𑀦𑀁 𑀲𑀫𑀸𑀧𑀚𑁆𑀚𑀢𑀺, 𑀫𑁂𑀢𑁆𑀢𑀸𑀛𑀸𑀦𑀸 𑀯𑀼𑀝𑁆𑀞𑀸𑀬 𑀤𑁂𑀬𑁆𑀬𑀥𑀫𑁆𑀫𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀺. 𑀏𑀯𑀁 𑀧𑀦 𑀓𑀸𑀢𑀼𑀁 𑀲𑀓𑁆𑀓𑀸𑀢𑀺. 𑀆𑀫 𑀲𑀓𑁆𑀓𑀸, 𑀦𑁂𑀯 𑀅𑀘𑁆𑀙𑀭𑀺𑀬𑀜𑁆𑀘𑁂𑀢𑀁, 𑀬𑀁 𑀫𑀳𑀸𑀪𑀺𑀜𑁆𑀜𑀧𑁆𑀧𑀢𑁆𑀢𑀸 𑀲𑀸𑀯𑀓𑀸 𑀏𑀯𑀁 𑀓𑀭𑁂𑀬𑁆𑀬𑀼𑀁. 𑀇𑀫𑀲𑁆𑀫𑀺𑀫𑁆𑀧𑀺 𑀳𑀺 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀧𑁄𑀭𑀸𑀡𑀓𑀭𑀸𑀚𑀓𑀸𑀮𑁂 𑀧𑀺𑀗𑁆𑀕𑀮𑀩𑀼𑀤𑁆𑀥𑀭𑀓𑁆𑀔𑀺𑀢𑀢𑁆𑀣𑁂𑀭𑁄 𑀦𑀸𑀫 𑀉𑀢𑁆𑀢𑀭𑀕𑀸𑀫𑀁 𑀦𑀺𑀲𑁆𑀲𑀸𑀬 𑀯𑀺𑀳𑀸𑀲𑀺. 𑀢𑀢𑁆𑀣 𑀲𑀢𑁆𑀢 𑀓𑀼𑀮𑀲𑀢𑀸𑀦𑀺 𑀳𑁄𑀦𑁆𑀢𑀺, 𑀏𑀓𑀫𑁆𑀧𑀺 𑀢𑀁 𑀓𑀼𑀮𑀤𑁆𑀯𑀸𑀭𑀁 𑀦𑀢𑁆𑀣𑀺, 𑀬𑀢𑁆𑀣 𑀣𑁂𑀭𑁄 𑀲𑀫𑀸𑀧𑀢𑁆𑀢𑀺𑀁 𑀦 𑀲𑀫𑀸𑀧𑀚𑁆𑀚𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀅𑀭𑀡𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀥𑀸𑀢𑀼𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁨. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀥𑀸𑀢𑀼𑀯𑀺𑀪𑀗𑁆𑀕𑀲𑀼𑀢𑁆𑀢𑀁. 𑀢𑀢𑁆𑀣 𑀘𑀸𑀭𑀺𑀓𑀦𑁆𑀢𑀺 𑀢𑀼𑀭𑀺𑀢𑀕𑀫𑀦𑀘𑀸𑀭𑀺𑀓𑀁. 𑀲𑀘𑁂 𑀢𑁂 𑀪𑀕𑁆𑀕𑀯 𑀅𑀕𑀭𑀽𑀢𑀺 𑀲𑀘𑁂 𑀢𑀼𑀬𑁆𑀳𑀁 𑀪𑀸𑀭𑀺𑀬𑀁 𑀅𑀨𑀸𑀲𑀼𑀓𑀁 𑀓𑀺𑀜𑁆𑀘𑀺 𑀦𑀢𑁆𑀣𑀺. 𑀲𑀘𑁂 𑀲𑁄 𑀅𑀦𑀼𑀚𑀸𑀦𑀸𑀢𑀻𑀢𑀺 𑀪𑀕𑁆𑀕𑀯𑀲𑁆𑀲 𑀓𑀺𑀭 𑀏𑀢𑀤𑀳𑁄𑀲𑀺 𑁋 ‘‘𑀧𑀩𑁆𑀩𑀚𑀺𑀢𑀸 𑀦𑀸𑀫 𑀦𑀸𑀦𑀸𑀅𑀚𑁆𑀛𑀸𑀲𑀬𑀸, 𑀏𑀓𑁄 𑀕𑀡𑀸𑀪𑀺𑀭𑀢𑁄 𑀳𑁄𑀢𑀺, 𑀏𑀓𑁄 𑀏𑀓𑀸𑀪𑀺𑀭𑀢𑁄. 𑀲𑀘𑁂 𑀲𑁄 𑀏𑀓𑀸𑀪𑀺𑀭𑀢𑁄 𑀪𑀯𑀺𑀲𑁆𑀲𑀢𑀺, ‘𑀆𑀯𑀼𑀲𑁄, 𑀫𑀸 𑀧𑀸𑀯𑀺𑀲𑀺, 𑀫𑀬𑀸 𑀲𑀸𑀮𑀸 𑀮𑀤𑁆𑀥𑀸’𑀢𑀺 𑀯𑀓𑁆𑀔𑀢𑀺. 𑀲𑀘𑁂 𑀅𑀬𑀁 𑀏𑀓𑀸𑀪𑀺𑀭𑀢𑁄 𑀪𑀯𑀺𑀲𑁆𑀲𑀢𑀺, ‘𑀆𑀯𑀼𑀲𑁄, 𑀦𑀺𑀓𑁆𑀔𑀫, 𑀫𑀬𑀸 𑀲𑀸𑀮𑀸 𑀮𑀤𑁆𑀥𑀸’𑀢𑀺 𑀯𑀓𑁆𑀔𑀢𑀺. 𑀏𑀯𑀁 𑀲𑀦𑁆𑀢𑁂 𑀅𑀳𑀁 𑀉𑀪𑀺𑀦𑁆𑀦𑀁 𑀯𑀺𑀯𑀸𑀤𑀓𑀸𑀭𑁂𑀢𑀸 𑀦𑀸𑀫 𑀪𑀯𑀺𑀲𑁆𑀲𑀸𑀫𑀺, 𑀤𑀺𑀦𑁆𑀦𑀁 𑀦𑀸𑀫 𑀤𑀺𑀦𑁆𑀦𑀫𑁂𑀯 𑀯𑀝𑁆𑀝𑀢𑀺, 𑀓𑀢𑀁 𑀓𑀢𑀫𑁂𑀯𑀸’’𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳.

𑀓𑀼𑀮𑀧𑀼𑀢𑁆𑀢𑁄𑀢𑀺 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑁄𑀧𑀺 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑁄𑀧𑀺. 𑀯𑀸𑀲𑀽𑀧𑀕𑀢𑁄𑀢𑀺 𑀯𑀸𑀲𑀁 𑀉𑀧𑀕𑀢𑁄. 𑀓𑀼𑀢𑁄 𑀆𑀕𑀦𑁆𑀢𑁆𑀯𑀸𑀢𑀺? 𑀢𑀓𑁆𑀓𑀲𑀻𑀮𑀦𑀕𑀭𑀢𑁄.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀫𑀚𑁆𑀛𑀺𑀫𑀧𑁆𑀧𑀤𑁂𑀲𑁂 𑀓𑀺𑀭 𑀭𑀸𑀚𑀕𑀳𑀦𑀕𑀭𑁂 𑀩𑀺𑀫𑁆𑀩𑀺𑀲𑀸𑀭𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀧𑀘𑁆𑀘𑀦𑁆𑀢𑁂 𑀢𑀓𑁆𑀓𑀲𑀻𑀮𑀦𑀕𑀭𑁂 𑀧𑀼𑀓𑁆𑀓𑀼𑀲𑀸𑀢𑀺 𑀭𑀸𑀚𑀸 𑀭𑀚𑁆𑀚𑀁 𑀓𑀸𑀭𑁂𑀲𑀺. 𑀅𑀣 𑀢𑀓𑁆𑀓𑀲𑀻𑀮𑀢𑁄 𑀪𑀡𑁆𑀟𑀁 𑀕𑀳𑁂𑀢𑁆𑀯𑀸 𑀯𑀸𑀡𑀺𑀚𑀸 𑀭𑀸𑀚𑀕𑀳𑀁 𑀆𑀕𑀢𑀸 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀭𑀸𑀚𑀸𑀦𑀁 𑀅𑀤𑁆𑀤𑀲𑀁𑀲𑀼. 𑀭𑀸𑀚𑀸 𑀢𑁂 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑁂 ‘‘𑀓𑀢𑁆𑀣𑀯𑀸𑀲𑀺𑀦𑁄 𑀢𑀼𑀫𑁆𑀳𑁂’’𑀢𑀺 𑀧𑀼𑀘𑁆𑀙𑀺. 𑀢𑀓𑁆𑀓𑀲𑀻𑀮𑀯𑀸𑀲𑀺𑀦𑁄 𑀤𑁂𑀯𑀸𑀢𑀺. 𑀅𑀣 𑀦𑁂 𑀭𑀸𑀚𑀸 𑀚𑀦𑀧𑀤𑀲𑁆𑀲 𑀔𑁂𑀫𑀲𑀼𑀪𑀺𑀓𑁆𑀔𑀢𑀸𑀤𑀻𑀦𑀺 𑀦𑀕𑀭𑀲𑁆𑀲 𑀘 𑀧𑀯𑀢𑁆𑀢𑀺𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀓𑁄 𑀦𑀸𑀫 𑀢𑀼𑀫𑁆𑀳𑀸𑀓𑀁 𑀭𑀸𑀚𑀸’’𑀢𑀺 𑀧𑀼𑀘𑁆𑀙𑀺. 𑀧𑀼𑀓𑁆𑀓𑀼𑀲𑀸𑀢𑀺 𑀦𑀸𑀫 𑀤𑁂𑀯𑀸𑀢𑀺. 𑀥𑀫𑁆𑀫𑀺𑀓𑁄𑀢𑀺? 𑀆𑀫 𑀤𑁂𑀯 𑀥𑀫𑁆𑀫𑀺𑀓𑁄. 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀚𑀦𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀮𑁄𑀓𑀲𑁆𑀲 𑀫𑀸𑀢𑀸𑀧𑀺𑀢𑀺𑀝𑁆𑀞𑀸𑀦𑁂 𑀞𑀺𑀢𑁄, 𑀅𑀗𑁆𑀕𑁂 𑀦𑀺𑀧𑀦𑁆𑀦𑀤𑀸𑀭𑀓𑀁 𑀯𑀺𑀬 𑀚𑀦𑀁 𑀢𑁄𑀲𑁂𑀢𑀻𑀢𑀺. 𑀓𑀢𑀭𑀲𑁆𑀫𑀺𑀁 𑀯𑀬𑁂 𑀯𑀢𑁆𑀢𑀢𑀻𑀢𑀺? 𑀅𑀣𑀲𑁆𑀲 𑀯𑀬𑀁 𑀆𑀘𑀺𑀓𑁆𑀔𑀺𑀁𑀲𑀼. 𑀯𑀬𑁂𑀲𑀼𑀧𑀺 𑀩𑀺𑀫𑁆𑀩𑀺𑀲𑀸𑀭𑁂𑀦 𑀲𑀫𑀯𑀬𑁄 𑀚𑀸𑀢𑁄. 𑀅𑀣 𑀢𑁂 𑀭𑀸𑀚𑀸 𑀆𑀳 𑁋 ‘‘𑀢𑀸𑀢𑀸 𑀢𑀼𑀫𑁆𑀳𑀸𑀓𑀁 𑀭𑀸𑀚𑀸 𑀥𑀫𑁆𑀫𑀺𑀓𑁄, 𑀯𑀬𑁂𑀦 𑀘 𑀫𑁂 𑀲𑀫𑀸𑀦𑁄, 𑀲𑀓𑁆𑀓𑀼𑀡𑁂𑀬𑁆𑀬𑀸𑀣 𑀢𑀼𑀫𑁆𑀳𑀸𑀓𑀁 𑀭𑀸𑀚𑀸𑀦𑀁 𑀫𑀫 𑀫𑀺𑀢𑁆𑀢𑀁 𑀓𑀸𑀢𑀼’’𑀦𑁆𑀢𑀺. 𑀲𑀓𑁆𑀓𑁄𑀫 𑀤𑁂𑀯𑀸𑀢𑀺. 𑀭𑀸𑀚𑀸 𑀢𑁂𑀲𑀁 𑀲𑀼𑀗𑁆𑀓𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀕𑁂𑀳𑀜𑁆𑀘 𑀤𑀸𑀧𑁂𑀢𑁆𑀯𑀸 𑁋 ‘‘𑀕𑀘𑁆𑀙𑀣 𑀪𑀡𑁆𑀟𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀕𑀫𑀦𑀓𑀸𑀮𑁂 𑀫𑀁 𑀤𑀺𑀲𑁆𑀯𑀸 𑀕𑀘𑁆𑀙𑁂𑀬𑁆𑀬𑀸𑀣𑀸’’𑀢𑀺 𑀆𑀳. 𑀢𑁂 𑀢𑀣𑀸 𑀓𑀢𑁆𑀯𑀸 𑀕𑀫𑀦𑀓𑀸𑀮𑁂 𑀭𑀸𑀚𑀸𑀦𑀁 𑀅𑀤𑁆𑀤𑀲𑀁𑀲𑀼. ‘‘𑀕𑀘𑁆𑀙𑀣 𑀢𑀼𑀫𑁆𑀳𑀸𑀓𑀁 𑀭𑀸𑀚𑀸𑀦𑀁 𑀫𑀫 𑀯𑀘𑀦𑁂𑀦 𑀧𑀼𑀦𑀧𑁆𑀧𑀼𑀦𑀁 𑀆𑀭𑁄𑀕𑁆𑀬𑀁 𑀧𑀼𑀘𑁆𑀙𑀺𑀢𑁆𑀯𑀸 ‘𑀭𑀸𑀚𑀸 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀫𑀺𑀢𑁆𑀢𑀪𑀸𑀯𑀁 𑀇𑀘𑁆𑀙𑀢𑀻’𑀢𑀺 𑀯𑀤𑀣𑀸’’𑀢𑀺 𑀆𑀳.

𑀢𑁂 𑀲𑀸𑀥𑀽𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀪𑀡𑁆𑀟𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀁𑀲𑀼. 𑀭𑀸𑀚𑀸 ‘‘𑀓𑀳𑀁 𑀪𑀡𑁂 𑀢𑀼𑀫𑁆𑀳𑁂 𑀏𑀢𑁆𑀢𑀓𑁂 𑀇𑀫𑁂 𑀤𑀺𑀯𑀲𑁂 𑀦 𑀤𑀺𑀲𑁆𑀲𑀣𑀸’’𑀢𑀺 𑀧𑀼𑀘𑁆𑀙𑀺. 𑀢𑁂 𑀲𑀩𑁆𑀩𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑁋 ‘‘𑀲𑀸𑀥𑀼, 𑀢𑀸𑀢𑀸, 𑀢𑀼𑀫𑁆𑀳𑁂 𑀦𑀺𑀲𑁆𑀲𑀸𑀬 𑀫𑀬𑀸 𑀫𑀚𑁆𑀛𑀺𑀫𑀧𑁆𑀧𑀤𑁂𑀲𑁂 𑀭𑀸𑀚𑀸 𑀫𑀺𑀢𑁆𑀢𑁄 𑀮𑀤𑁆𑀥𑁄’’𑀢𑀺 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀅𑀧𑀭𑀪𑀸𑀕𑁂 𑀭𑀸𑀚𑀕𑀳𑀯𑀸𑀲𑀺𑀦𑁄𑀧𑀺 𑀯𑀸𑀡𑀺𑀚𑀸 𑀢𑀓𑁆𑀓𑀲𑀻𑀮𑀁 𑀅𑀕𑀫𑀁𑀲𑀼. 𑀢𑁂 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀆𑀕𑀢𑁂 𑀧𑀼𑀓𑁆𑀓𑀼𑀲𑀸𑀢𑀺 𑀭𑀸𑀚𑀸 ‘‘𑀓𑀼𑀢𑁄 𑀆𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀭𑀸𑀚𑀕𑀳𑀢𑁄’’𑀢𑀺 𑀲𑀼𑀢𑁆𑀯𑀸 ‘‘𑀫𑀬𑁆𑀳𑀁 𑀲𑀳𑀸𑀬𑀲𑁆𑀲 𑀦𑀕𑀭𑀢𑁄 𑀆𑀕𑀢𑀸 𑀢𑀼𑀫𑁆𑀳𑁂’’𑀢𑀺. 𑀆𑀫 𑀤𑁂𑀯𑀸𑀢𑀺. 𑀆𑀭𑁄𑀕𑁆𑀬𑀁 𑀫𑁂 𑀲𑀳𑀸𑀬𑀲𑁆𑀲𑀸𑀢𑀺 𑀆𑀭𑁄𑀕𑁆𑀬𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀚𑁆𑀚 𑀧𑀝𑁆𑀞𑀸𑀬 𑀬𑁂 𑀫𑀬𑁆𑀳𑀁 𑀲𑀳𑀸𑀬𑀲𑁆𑀲 𑀦𑀕𑀭𑀢𑁄 𑀚𑀗𑁆𑀖𑀲𑀢𑁆𑀣𑁂𑀦 𑀯𑀸 𑀲𑀓𑀝𑀲𑀢𑁆𑀣𑁂𑀦 𑀯𑀸 𑀯𑀸𑀡𑀺𑀚𑀸 𑀆𑀕𑀘𑁆𑀙𑀦𑁆𑀢𑀺, 𑀲𑀩𑁆𑀩𑁂𑀲𑀁 𑀫𑀫 𑀯𑀺𑀲𑀬𑀁 𑀧𑀯𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀯𑀲𑀦𑀕𑁂𑀳𑀸𑀦𑀺, 𑀭𑀸𑀚𑀓𑁄𑀝𑁆𑀞𑀸𑀕𑀸𑀭𑀢𑁄 𑀦𑀺𑀯𑀸𑀧𑀜𑁆𑀘 𑀤𑁂𑀦𑁆𑀢𑀼, 𑀲𑀼𑀗𑁆𑀓𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀼, 𑀓𑀺𑀜𑁆𑀘𑀺 𑀉𑀧𑀤𑁆𑀤𑀯𑀁 𑀫𑀸 𑀓𑀭𑁄𑀦𑁆𑀢𑀽’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀩𑀺𑀫𑁆𑀩𑀺𑀲𑀸𑀭𑁄𑀧𑀺 𑀅𑀢𑁆𑀢𑀦𑁄 𑀦𑀕𑀭𑁂 𑀢𑀣𑁂𑀯 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺.

𑀅𑀣 𑀩𑀺𑀫𑁆𑀩𑀺𑀲𑀸𑀭𑁄 𑀧𑀼𑀓𑁆𑀓𑀼𑀲𑀸𑀢𑀺𑀲𑁆𑀲 𑀧𑀡𑁆𑀡𑀁 𑀧𑀳𑀺𑀡𑀺 𑁋 ‘‘𑀧𑀘𑁆𑀘𑀦𑁆𑀢𑀤𑁂𑀲𑁂 𑀦𑀸𑀫 𑀫𑀡𑀺𑀫𑀼𑀢𑁆𑀢𑀸𑀤𑀻𑀦𑀺 𑀭𑀢𑀦𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀬𑀁 𑀫𑀬𑁆𑀳𑀁 𑀲𑀳𑀸𑀬𑀲𑁆𑀲 𑀭𑀚𑁆𑀚𑁂 𑀤𑀲𑁆𑀲𑀦𑀻𑀬𑀁 𑀯𑀸 𑀲𑀯𑀦𑀻𑀬𑀁 𑀯𑀸 𑀭𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀫𑁂 𑀫𑀸 𑀫𑀘𑁆𑀙𑀭𑀸𑀬𑀢𑀽’’𑀢𑀺. 𑀧𑀼𑀓𑁆𑀓𑀼𑀲𑀸𑀢𑀺𑀧𑀺 𑁋 ‘‘𑀫𑀚𑁆𑀛𑀺𑀫𑀤𑁂𑀲𑁄 𑀦𑀸𑀫 𑀫𑀳𑀸𑀚𑀦𑀧𑀤𑁄, 𑀬𑀁 𑀢𑀢𑁆𑀣 𑀏𑀯𑀭𑀽𑀧𑀁 𑀭𑀢𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀫𑁂 𑀲𑀳𑀸𑀬𑁄 𑀫𑀸 𑀫𑀘𑁆𑀙𑀭𑀸𑀬𑀢𑀽’’𑀢𑀺 𑀧𑀝𑀺𑀧𑀡𑁆𑀡𑀁 𑀧𑀳𑀺𑀡𑀺. 𑀏𑀯𑀁 𑀢𑁂 𑀕𑀘𑁆𑀙𑀦𑁆𑀢𑁂 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀅𑀜𑁆𑀜𑀫𑀜𑁆𑀜𑀁 𑀅𑀤𑀺𑀲𑁆𑀯𑀸𑀧𑀺 𑀤𑀴𑁆𑀳𑀫𑀺𑀢𑁆𑀢𑀸 𑀅𑀳𑁂𑀲𑀼𑀁.

𑀏𑀯𑀁 𑀢𑁂𑀲𑀁 𑀓𑀢𑀺𑀓𑀁 𑀓𑀢𑁆𑀯𑀸 𑀯𑀲𑀦𑁆𑀢𑀸𑀦𑀁 𑀧𑀞𑀫𑀢𑀭𑀁 𑀧𑀼𑀓𑁆𑀓𑀼𑀲𑀸𑀢𑀺𑀲𑁆𑀲 𑀧𑀡𑁆𑀡𑀸𑀓𑀸𑀭𑁄 𑀉𑀧𑁆𑀧𑀚𑁆𑀚𑀺. 𑀭𑀸𑀚𑀸 𑀓𑀺𑀭 𑀅𑀝𑁆𑀞 𑀧𑀜𑁆𑀘𑀯𑀡𑁆𑀡𑁂 𑀅𑀦𑀕𑁆𑀖𑀓𑀫𑁆𑀩𑀮𑁂 𑀮𑀪𑀺. 𑀲𑁄 𑁋 ‘‘𑀅𑀢𑀺𑀲𑀼𑀦𑁆𑀤𑀭𑀸 𑀇𑀫𑁂 𑀓𑀫𑁆𑀩𑀮𑀸, 𑀅𑀳𑀁 𑀲𑀳𑀸𑀬𑀲𑁆𑀲 𑀧𑁂𑀲𑀺𑀲𑁆𑀲𑀸𑀫𑀻’’𑀢𑀺 𑀮𑀸𑀔𑀸𑀕𑀼𑀴𑀫𑀢𑁆𑀢𑁂 𑀅𑀝𑁆𑀞 𑀲𑀸𑀭𑀓𑀭𑀡𑁆𑀟𑀓𑁂 𑀮𑀺𑀔𑀸𑀧𑁂𑀢𑁆𑀯𑀸 𑀢𑁂𑀲𑀼 𑀢𑁂 𑀓𑀫𑁆𑀩𑀮𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀮𑀸𑀔𑀸𑀬 𑀯𑀝𑁆𑀝𑀸𑀧𑁂𑀢𑁆𑀯𑀸 𑀲𑁂𑀢𑀯𑀢𑁆𑀣𑁂𑀦 𑀯𑁂𑀞𑁂𑀢𑁆𑀯𑀸 𑀲𑀫𑀼𑀕𑁆𑀕𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀢𑁆𑀣𑁂𑀦 𑀯𑁂𑀞𑁂𑀢𑁆𑀯𑀸 𑀭𑀸𑀚𑀫𑀼𑀤𑁆𑀤𑀺𑀓𑀸𑀬 𑀮𑀜𑁆𑀙𑁂𑀢𑁆𑀯𑀸 ‘‘𑀫𑀬𑁆𑀳𑀁 𑀲𑀳𑀸𑀬𑀲𑁆𑀲 𑀤𑁂𑀣𑀸’’𑀢𑀺 𑀅𑀫𑀘𑁆𑀘𑁂 𑀧𑁂𑀲𑁂𑀲𑀺. 𑀲𑀸𑀲𑀦𑀜𑁆𑀘 𑀅𑀤𑀸𑀲𑀺 𑁋 ‘‘𑀅𑀬𑀁 𑀧𑀡𑁆𑀡𑀸𑀓𑀸𑀭𑁄 𑀦𑀕𑀭𑀫𑀚𑁆𑀛𑁂 𑀅𑀫𑀘𑁆𑀘𑀸𑀤𑀺𑀧𑀭𑀺𑀯𑀼𑀢𑁂𑀦 𑀤𑀝𑁆𑀞𑀩𑁆𑀩𑁄’’𑀢𑀺. 𑀢𑁂 𑀕𑀦𑁆𑀢𑁆𑀯𑀸 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀅𑀤𑀁𑀲𑀼.

𑀲𑁄 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀅𑀫𑀘𑁆𑀘𑀸𑀤𑀬𑁄 𑀲𑀦𑁆𑀦𑀺𑀧𑀢𑀦𑁆𑀢𑀽𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀦𑀕𑀭𑀫𑀚𑁆𑀛𑁂 𑀅𑀫𑀘𑁆𑀘𑀸𑀤𑀺𑀧𑀭𑀺𑀯𑀼𑀢𑁄 𑀲𑁂𑀢𑀘𑁆𑀙𑀢𑁆𑀢𑁂𑀦 𑀥𑀸𑀭𑀺𑀬𑀫𑀸𑀦𑁂𑀦 𑀧𑀮𑁆𑀮𑀗𑁆𑀓𑀯𑀭𑁂 𑀦𑀺𑀲𑀺𑀦𑁆𑀦𑁄 𑀮𑀜𑁆𑀙𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀯𑀢𑁆𑀣𑀁 𑀅𑀧𑀦𑁂𑀢𑁆𑀯𑀸 𑀲𑀫𑀼𑀕𑁆𑀕𑀁 𑀯𑀺𑀯𑀭𑀺𑀢𑁆𑀯𑀸 𑀅𑀦𑁆𑀢𑁄 𑀪𑀡𑁆𑀟𑀺𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀮𑀸𑀔𑀸𑀕𑀼𑀴𑁂 𑀤𑀺𑀲𑁆𑀯𑀸 ‘‘𑀫𑀬𑁆𑀳𑀁 𑀲𑀳𑀸𑀬𑁄 𑀧𑀼𑀓𑁆𑀓𑀼𑀲𑀸𑀢𑀺 ‘𑀚𑀼𑀢𑀯𑀺𑀢𑁆𑀢𑀓𑁄 𑀫𑁂 𑀲𑀳𑀸𑀬𑁄’𑀢𑀺 𑀫𑀜𑁆𑀜𑀫𑀸𑀦𑁄 𑀫𑀜𑁆𑀜𑁂 𑀇𑀫𑀁 𑀧𑀡𑁆𑀡𑀸𑀓𑀸𑀭𑀁 𑀧𑀳𑀺𑀡𑀻’’𑀢𑀺 𑀏𑀓𑀁 𑀕𑀼𑀴𑀁 𑀕𑀳𑁂𑀢𑁆𑀯𑀸 𑀳𑀢𑁆𑀣𑁂𑀦 𑀯𑀝𑁆𑀝𑁂𑀢𑁆𑀯𑀸 𑀢𑀼𑀮𑀬𑀦𑁆𑀢𑁄𑀯 𑀅𑀦𑁆𑀢𑁄 𑀤𑀼𑀲𑁆𑀲𑀪𑀡𑁆𑀟𑀺𑀓𑀁 𑀅𑀢𑁆𑀣𑀻𑀢𑀺 𑀅𑀜𑁆𑀜𑀸𑀲𑀺. 𑀅𑀣 𑀦𑀁 𑀧𑀮𑁆𑀮𑀗𑁆𑀓𑀧𑀸𑀤𑁂 𑀧𑀳𑀭𑀺𑀢𑁆𑀯𑀸 𑀢𑀸𑀯𑀤𑁂𑀯 𑀮𑀸𑀔𑀸 𑀧𑀭𑀺𑀧𑀢𑀺, 𑀲𑁄 𑀦𑀔𑁂𑀦 𑀓𑀭𑀡𑁆𑀟𑀓𑀁 𑀯𑀺𑀯𑀭𑀺𑀢𑁆𑀯𑀸 𑀅𑀦𑁆𑀢𑁄 𑀓𑀫𑁆𑀩𑀮𑀭𑀢𑀦𑀁 𑀤𑀺𑀲𑁆𑀯𑀸 𑀇𑀢𑀭𑁂𑀧𑀺 𑀯𑀺𑀯𑀭𑀸𑀧𑁂𑀲𑀺, 𑀲𑀩𑁆𑀩𑁂𑀧𑀺 𑀓𑀫𑁆𑀩𑀮𑀸 𑀅𑀳𑁂𑀲𑀼𑀁. 𑀅𑀣 𑀦𑁂 𑀧𑀢𑁆𑀣𑀭𑀸𑀧𑁂𑀲𑀺, 𑀢𑁂 𑀯𑀡𑁆𑀡𑀲𑀫𑁆𑀧𑀦𑁆𑀦𑀸 𑀨𑀲𑁆𑀲𑀲𑀫𑁆𑀧𑀦𑁆𑀦𑀸 𑀤𑀻𑀖𑀢𑁄 𑀲𑁄𑀴𑀲𑀳𑀢𑁆𑀣𑀸 𑀢𑀺𑀭𑀺𑀬𑀁 𑀅𑀝𑁆𑀞𑀳𑀢𑁆𑀣𑀸 𑀅𑀳𑁂𑀲𑀼𑀁. 𑀫𑀳𑀸𑀚𑀦𑁄 𑀤𑀺𑀲𑁆𑀯𑀸 𑀅𑀗𑁆𑀕𑀼𑀮𑀺𑀬𑁄 𑀧𑁄𑀞𑁂𑀲𑀺, 𑀘𑁂𑀮𑀼𑀓𑁆𑀔𑁂𑀧𑀁 𑀅𑀓𑀸𑀲𑀺, 𑁋 ‘‘𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀅𑀤𑀺𑀝𑁆𑀞𑀲𑀳𑀸𑀬𑁄 𑀧𑀼𑀓𑁆𑀓𑀼𑀲𑀸𑀢𑀺 𑀅𑀤𑀺𑀲𑁆𑀯𑀸𑀯 𑀏𑀯𑀭𑀽𑀧𑀁 𑀧𑀡𑁆𑀡𑀸𑀓𑀸𑀭𑀁 𑀧𑁂𑀲𑁂𑀲𑀺, 𑀬𑀼𑀢𑁆𑀢𑀁 𑀏𑀯𑀭𑀽𑀧𑀁 𑀫𑀺𑀢𑁆𑀢𑀁 𑀓𑀸𑀢𑀼’’𑀦𑁆𑀢𑀺 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀭𑀸𑀚𑀸 𑀏𑀓𑀫𑁂𑀓𑀁 𑀓𑀫𑁆𑀩𑀮𑀁 𑀅𑀕𑁆𑀖𑀸𑀧𑁂𑀲𑀺, 𑀲𑀩𑁆𑀩𑁂 𑀅𑀦𑀕𑁆𑀖𑀸 𑀅𑀳𑁂𑀲𑀼𑀁. 𑀢𑁂𑀲𑀼 𑀘𑀢𑁆𑀢𑀸𑀭𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑁂𑀲𑁂𑀲𑀺, 𑀘𑀢𑁆𑀢𑀸𑀭𑁄 𑀅𑀢𑁆𑀢𑀦𑁄 𑀖𑀭𑁂 𑀅𑀓𑀸𑀲𑀺. 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀘𑁆𑀙𑀸 𑀧𑁂𑀲𑁂𑀦𑁆𑀢𑁂𑀦 𑀧𑀞𑀫𑀁 𑀧𑁂𑀲𑀺𑀢𑀧𑀡𑁆𑀡𑀸𑀓𑀸𑀭𑀢𑁄 𑀅𑀢𑀺𑀭𑁂𑀓𑀁 𑀧𑁂𑀲𑁂𑀢𑀼𑀁 𑀯𑀝𑁆𑀝𑀢𑀺, 𑀲𑀳𑀸𑀬𑁂𑀦 𑀘 𑀫𑁂 𑀅𑀦𑀕𑁆𑀖𑁄 𑀧𑀡𑁆𑀡𑀸𑀓𑀸𑀭𑁄 𑀧𑁂𑀲𑀺𑀢𑁄, 𑀓𑀺𑀁 𑀦𑀼 𑀔𑁄 𑀧𑁂𑀲𑁂𑀫𑀻’’𑀢𑀺?

𑀓𑀺𑀁 𑀧𑀦 𑀭𑀸𑀚𑀕𑀳𑁂 𑀢𑀢𑁄 𑀅𑀥𑀺𑀓𑀁 𑀭𑀢𑀦𑀁 𑀦𑀢𑁆𑀣𑀻𑀢𑀺? 𑀦𑁄 𑀦𑀢𑁆𑀣𑀺, 𑀫𑀳𑀸𑀧𑀼𑀜𑁆𑀜𑁄 𑀭𑀸𑀚𑀸, 𑀅𑀧𑀺𑀘 𑀔𑁄 𑀧𑀦𑀲𑁆𑀲 𑀲𑁄𑀢𑀸𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀞𑀧𑁂𑀢𑁆𑀯𑀸 𑀢𑀻𑀡𑀺 𑀭𑀢𑀦𑀸𑀦𑀺 𑀅𑀜𑁆𑀜𑀁 𑀭𑀢𑀦𑀁 𑀲𑁄𑀫𑀦𑀲𑁆𑀲𑀁 𑀚𑀦𑁂𑀢𑀼𑀁 𑀲𑀫𑀢𑁆𑀣𑀁 𑀦𑀸𑀫 𑀦𑀢𑁆𑀣𑀺. 𑀲𑁄 𑀭𑀢𑀦𑀁 𑀯𑀺𑀘𑀺𑀦𑀺𑀢𑀼𑀁 𑀆𑀭𑀤𑁆𑀥𑁄 𑁋 𑀭𑀢𑀦𑀁 𑀦𑀸𑀫 𑀲𑀯𑀺𑀜𑁆𑀜𑀸𑀡𑀓𑀁 𑀅𑀯𑀺𑀜𑁆𑀜𑀸𑀡𑀓𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀢𑁆𑀣 𑀅𑀯𑀺𑀜𑁆𑀜𑀸𑀡𑀓𑀁 𑀲𑀼𑀯𑀡𑁆𑀡𑀭𑀚𑀢𑀸𑀤𑀺, 𑀲𑀯𑀺𑀜𑁆𑀜𑀸𑀡𑀓𑀁 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀁. 𑀅𑀯𑀺𑀜𑁆𑀜𑀸𑀡𑀓𑀁 𑀲𑀯𑀺𑀜𑁆𑀜𑀸𑀡𑀓𑀲𑁆𑀲𑁂𑀯 𑀅𑀮𑀗𑁆𑀓𑀸𑀭𑀸𑀤𑀺𑀯𑀲𑁂𑀦 𑀧𑀭𑀺𑀪𑁄𑀕𑀁 𑀳𑁄𑀢𑀺, 𑀇𑀢𑀺 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀭𑀢𑀦𑁂𑀲𑀼 𑀲𑀯𑀺𑀜𑁆𑀜𑀸𑀡𑀓𑀁 𑀲𑁂𑀝𑁆𑀞𑀁. 𑀲𑀯𑀺𑀜𑁆𑀜𑀸𑀡𑀓𑀫𑁆𑀧𑀺 𑀤𑀼𑀯𑀺𑀥𑀁 𑀢𑀺𑀭𑀘𑁆𑀙𑀸𑀦𑀭𑀢𑀦𑀁 𑀫𑀦𑀼𑀲𑁆𑀲𑀭𑀢𑀦𑀦𑁆𑀢𑀺. 𑀢𑀢𑁆𑀣 𑀢𑀺𑀭𑀘𑁆𑀙𑀸𑀦𑀭𑀢𑀦𑀁 𑀳𑀢𑁆𑀣𑀺𑀅𑀲𑁆𑀲𑀭𑀢𑀦𑀁, 𑀢𑀫𑁆𑀧𑀺 𑀫𑀦𑀼𑀲𑁆𑀲𑀸𑀦𑀁 𑀉𑀧𑀪𑁄𑀕𑀢𑁆𑀣𑀫𑁂𑀯 𑀦𑀺𑀩𑁆𑀩𑀢𑁆𑀢𑀢𑀺, 𑀇𑀢𑀺 𑀇𑀫𑁂𑀲𑀼𑀧𑀺 𑀤𑁆𑀯𑀻𑀲𑀼 𑀫𑀦𑀼𑀲𑁆𑀲𑀭𑀢𑀦𑀁 𑀲𑁂𑀝𑁆𑀞𑀁. 𑀫𑀦𑀼𑀲𑁆𑀲𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀇𑀢𑁆𑀣𑀺𑀭𑀢𑀦𑀁 𑀧𑀼𑀭𑀺𑀲𑀭𑀢𑀦𑀦𑁆𑀢𑀺. 𑀢𑀢𑁆𑀣 𑀘𑀓𑁆𑀓𑀯𑀢𑁆𑀢𑀺𑀦𑁄 𑀭𑀜𑁆𑀜𑁄 𑀉𑀧𑁆𑀧𑀦𑁆𑀦𑀁 𑀇𑀢𑁆𑀣𑀺𑀭𑀢𑀦𑀫𑁆𑀧𑀺 𑀧𑀼𑀭𑀺𑀲𑀲𑁆𑀲𑁂𑀯 𑀉𑀧𑀪𑁄𑀕𑀁. 𑀇𑀢𑀺 𑀇𑀫𑁂𑀲𑀼𑀧𑀺 𑀤𑁆𑀯𑀻𑀲𑀼 𑀧𑀼𑀭𑀺𑀲𑀭𑀢𑀦𑀫𑁂𑀯 𑀲𑁂𑀝𑁆𑀞𑀁.

𑀧𑀼𑀭𑀺𑀲𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀅𑀕𑀸𑀭𑀺𑀬𑀭𑀢𑀦𑀁 𑀅𑀦𑀕𑀸𑀭𑀺𑀬𑀭𑀢𑀦𑀜𑁆𑀘. 𑀢𑀢𑁆𑀣 𑀅𑀕𑀸𑀭𑀺𑀬𑀭𑀢𑀦𑁂𑀲𑀼𑀧𑀺 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀅𑀚𑁆𑀚 𑀧𑀩𑁆𑀩𑀚𑀺𑀢𑀲𑀸𑀫𑀡𑁂𑀭𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀢𑀺, 𑀇𑀢𑀺 𑀇𑀫𑁂𑀲𑀼𑀧𑀺 𑀤𑁆𑀯𑀻𑀲𑀼 𑀅𑀦𑀕𑀸𑀭𑀺𑀬𑀭𑀢𑀦𑀫𑁂𑀯 𑀲𑁂𑀝𑁆𑀞𑀁. 𑀅𑀦𑀕𑀸𑀭𑀺𑀬𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀲𑁂𑀓𑁆𑀔𑀭𑀢𑀦𑀜𑁆𑀘 𑀅𑀲𑁂𑀓𑁆𑀔𑀭𑀢𑀦𑀜𑁆𑀘. 𑀢𑀢𑁆𑀣 𑀲𑀢𑀲𑀳𑀲𑁆𑀲𑀫𑁆𑀧𑀺 𑀲𑁂𑀓𑁆𑀔𑀸𑀦𑀁 𑀅𑀲𑁂𑀓𑁆𑀔𑀲𑁆𑀲 𑀧𑀤𑁂𑀲𑀁 𑀦 𑀧𑀸𑀧𑀼𑀡𑀸𑀢𑀺, 𑀇𑀢𑀺 𑀇𑀫𑁂𑀲𑀼𑀧𑀺 𑀤𑁆𑀯𑀻𑀲𑀼 𑀅𑀲𑁂𑀓𑁆𑀔𑀭𑀢𑀦𑀫𑁂𑀯 𑀲𑁂𑀝𑁆𑀞𑀁. 𑀢𑀫𑁆𑀧𑀺 𑀤𑀼𑀯𑀺𑀥𑀁 𑀩𑀼𑀤𑁆𑀥𑀭𑀢𑀦𑀁 𑀲𑀸𑀯𑀓𑀭𑀢𑀦𑀦𑁆𑀢𑀺. 𑀢𑀢𑁆𑀣 𑀲𑀢𑀲𑀳𑀲𑁆𑀲𑀫𑁆𑀧𑀺 𑀲𑀸𑀯𑀓𑀭𑀢𑀦𑀸𑀦𑀁 𑀩𑀼𑀤𑁆𑀥𑀭𑀢𑀦𑀲𑁆𑀲 𑀧𑀤𑁂𑀲𑀁 𑀦 𑀧𑀸𑀧𑀼𑀡𑀸𑀢𑀺, 𑀇𑀢𑀺 𑀇𑀫𑁂𑀲𑀼𑀧𑀺 𑀤𑁆𑀯𑀻𑀲𑀽 𑀩𑀼𑀤𑁆𑀥𑀭𑀢𑀦𑀫𑁂𑀯 𑀲𑁂𑀝𑁆𑀞𑀁.

𑀩𑀼𑀤𑁆𑀥𑀭𑀢𑀦𑀫𑁆𑀧𑀺 𑀤𑀼𑀯𑀺𑀥𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀭𑀢𑀦𑀁 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀭𑀢𑀦𑀦𑁆𑀢𑀺. 𑀢𑀢𑁆𑀣 𑀲𑀢𑀲𑀳𑀲𑁆𑀲𑀫𑁆𑀧𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑁆𑀲 𑀧𑀤𑁂𑀲𑀁 𑀦 𑀧𑀸𑀧𑀼𑀡𑀸𑀢𑀺, 𑀇𑀢𑀺 𑀇𑀫𑁂𑀲𑀼𑀧𑀺 𑀤𑁆𑀯𑀻𑀲𑀼 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀭𑀢𑀦𑀁𑀬𑁂𑀯 𑀲𑁂𑀝𑁆𑀞𑀁. 𑀲𑀤𑁂𑀯𑀓𑀲𑁆𑀫𑀺𑀜𑁆𑀳𑀺 𑀮𑁄𑀓𑁂 𑀩𑀼𑀤𑁆𑀥𑀭𑀢𑀦𑀲𑀫𑀁 𑀭𑀢𑀦𑀁 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀅𑀲𑀤𑀺𑀲𑀫𑁂𑀯 𑀭𑀢𑀦𑀁 𑀫𑀬𑁆𑀳𑀁 𑀲𑀳𑀸𑀬𑀲𑁆𑀲 𑀧𑁂𑀲𑁂𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀓𑁆𑀓𑀲𑀻𑀮𑀯𑀸𑀲𑀺𑀦𑁄 𑀧𑀼𑀘𑁆𑀙𑀺 𑁋 ‘‘𑀢𑀸𑀢𑀸 𑀢𑀼𑀫𑁆𑀳𑀸𑀓𑀁 𑀚𑀦𑀧𑀤𑁂 𑀩𑀼𑀤𑁆𑀥𑁄 𑀥𑀫𑁆𑀫𑁄 𑀲𑀗𑁆𑀖𑁄𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀭𑀢𑀦𑀸𑀦𑀺 𑀤𑀺𑀲𑁆𑀲𑀦𑁆𑀢𑀻’’𑀢𑀺. 𑀖𑁄𑀲𑁄𑀧𑀺 𑀲𑁄 𑀫𑀳𑀸𑀭𑀸𑀚 𑀢𑀸𑀯 𑀢𑀢𑁆𑀣 𑀦𑀢𑁆𑀣𑀺, 𑀤𑀲𑁆𑀲𑀦𑀁 𑀧𑀦 𑀓𑀼𑀢𑁄𑀢𑀺.

‘‘𑀲𑀼𑀦𑁆𑀤𑀭𑀁 𑀢𑀸𑀢𑀸’’𑀢𑀺 𑀭𑀸𑀚𑀸 𑀢𑀼𑀝𑁆𑀞𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀓𑁆𑀓𑀸 𑀪𑀯𑁂𑀬𑁆𑀬 𑀚𑀦𑀲𑀗𑁆𑀕𑀳𑀢𑁆𑀣𑀸𑀬 𑀫𑀬𑁆𑀳𑀁 𑀲𑀳𑀸𑀬𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀧𑁂𑀲𑁂𑀢𑀼𑀁, 𑀩𑀼𑀤𑁆𑀥𑀸 𑀧𑀦 𑀧𑀘𑁆𑀘𑀦𑁆𑀢𑀺𑀫𑁂𑀲𑀼 𑀚𑀦𑀧𑀤𑁂𑀲𑀼 𑀦 𑀅𑀭𑀼𑀡𑀁 𑀉𑀝𑁆𑀞𑀧𑁂𑀦𑁆𑀢𑀺. 𑀢𑀲𑁆𑀫𑀸 𑀲𑀢𑁆𑀣𑀸𑀭𑀸 𑀕𑀦𑁆𑀢𑀼𑀁 𑀦 𑀲𑀓𑁆𑀓𑀸. 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀬𑁄 𑀫𑀳𑀸𑀲𑀸𑀯𑀓𑁂 𑀧𑁂𑀲𑁂𑀢𑀼𑀁 𑀲𑀓𑁆𑀓𑀸 𑀪𑀯𑁂𑀬𑁆𑀬. 𑀫𑀬𑀸 𑀧𑀦 ‘𑀣𑁂𑀭𑀸 𑀧𑀘𑁆𑀘𑀦𑁆𑀢𑁂 𑀯𑀲𑀦𑁆𑀢𑀻’𑀢𑀺 𑀲𑀼𑀢𑁆𑀯𑀸𑀧𑀺 𑀫𑀦𑀼𑀲𑁆𑀲𑁂 𑀧𑁂𑀲𑁂𑀢𑁆𑀯𑀸 𑀢𑁂 𑀅𑀢𑁆𑀢𑀦𑁄 𑀲𑀫𑀻𑀧𑀁 𑀆𑀡𑀸𑀧𑁂𑀢𑁆𑀯𑀸 𑀉𑀧𑀝𑁆𑀞𑀸𑀢𑀼𑀫𑁂𑀯 𑀬𑀼𑀢𑁆𑀢𑀁. 𑀢𑀲𑁆𑀫𑀸 𑀦 𑀣𑁂𑀭𑁂𑀳𑀺𑀧𑀺 𑀲𑀓𑁆𑀓𑀸 𑀕𑀦𑁆𑀢𑀼𑀁. 𑀬𑁂𑀦 𑀧𑀦𑀸𑀓𑀸𑀭𑁂𑀦 𑀲𑀸𑀲𑀦𑁂 𑀧𑁂𑀲𑀺𑀢𑁂 𑀲𑀢𑁆𑀣𑀸 𑀘 𑀫𑀳𑀸𑀲𑀸𑀯𑀓𑀸 𑀘 𑀕𑀢𑀸 𑀯𑀺𑀬 𑀳𑁄𑀦𑁆𑀢𑀺, 𑀢𑁂𑀦𑀸𑀓𑀸𑀭𑁂𑀦 𑀲𑀸𑀲𑀦𑀁 𑀧𑀳𑀺𑀡𑀺𑀲𑁆𑀲𑀸𑀫𑀻’’𑀢𑀺. 𑀘𑀺𑀦𑁆𑀢𑁂𑀢𑁆𑀯𑀸 𑀘𑀢𑀼𑀭𑀢𑀦𑀸𑀬𑀸𑀫𑀁 𑀯𑀺𑀤𑀢𑁆𑀣𑀺𑀫𑀢𑁆𑀢𑀧𑀼𑀣𑀼𑀮𑀁 𑀦𑀸𑀢𑀺𑀢𑀦𑀼𑀁 𑀦𑀸𑀢𑀺𑀩𑀳𑀮𑀁 𑀲𑀼𑀯𑀡𑁆𑀡𑀧𑀝𑁆𑀝𑀁 𑀓𑀸𑀭𑀸𑀧𑁂𑀢𑁆𑀯𑀸 ‘‘𑀢𑀢𑁆𑀣 𑀅𑀚𑁆𑀚 𑀅𑀓𑁆𑀔𑀭𑀸𑀦𑀺 𑀮𑀺𑀔𑀺𑀲𑁆𑀲𑀸𑀫𑀻’’𑀢𑀺. 𑀧𑀸𑀢𑁄𑀯 𑀲𑀻𑀲𑀁 𑀦𑁆𑀳𑀸𑀬𑀺𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀅𑀧𑀦𑀻𑀢𑀕𑀦𑁆𑀥𑀫𑀸𑀮𑀸𑀪𑀭𑀡𑁄 𑀲𑀼𑀯𑀡𑁆𑀡𑀲𑀭𑀓𑁂𑀦 𑀚𑀸𑀢𑀺𑀳𑀺𑀗𑁆𑀕𑀼𑀮𑀺𑀓𑀁 𑀆𑀤𑀸𑀬 𑀳𑁂𑀝𑁆𑀞𑀢𑁄 𑀧𑀝𑁆𑀞𑀸𑀬 𑀤𑁆𑀯𑀸𑀭𑀸𑀦𑀺 𑀧𑀺𑀤𑀳𑀦𑁆𑀢𑁄 𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀧𑀼𑀩𑁆𑀩𑀤𑀺𑀲𑀸𑀫𑀼𑀔𑀁 𑀲𑀻𑀳𑀧𑀜𑁆𑀚𑀭𑀁 𑀯𑀺𑀯𑀭𑀺𑀢𑁆𑀯𑀸 𑀆𑀓𑀸𑀲𑀢𑀮𑁂 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀝𑁆𑀝𑁂 𑀅𑀓𑁆𑀔𑀭𑀸𑀦𑀺 𑀮𑀺𑀔𑀦𑁆𑀢𑁄 𑁋 ‘‘𑀇𑀥 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄 𑀲𑀼𑀕𑀢𑁄 𑀮𑁄𑀓𑀯𑀺𑀤𑀽 𑀅𑀦𑀼𑀢𑁆𑀢𑀭𑁄 𑀧𑀼𑀭𑀺𑀲𑀤𑀫𑁆𑀫𑀲𑀸𑀭𑀣𑀺 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺. 𑀩𑀼𑀤𑁆𑀥𑀕𑀼𑀡𑁂 𑀢𑀸𑀯 𑀏𑀓𑀤𑁂𑀲𑁂𑀦 𑀮𑀺𑀔𑀺.

𑀢𑀢𑁄 ‘‘𑀏𑀯𑀁 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀢𑀼𑀲𑀺𑀢𑀪𑀯𑀦𑀢𑁄 𑀘𑀯𑀺𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀫𑁆𑀳𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺, 𑀏𑀯𑀁 𑀮𑁄𑀓𑀯𑀺𑀯𑀭𑀡𑀁 𑀅𑀳𑁄𑀲𑀺, 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀯𑀲𑀫𑀸𑀦𑁂 𑀇𑀤𑀁 𑀦𑀸𑀫 𑀅𑀳𑁄𑀲𑀺, 𑀅𑀕𑀸𑀭𑀫𑀚𑁆𑀛𑁂 𑀯𑀲𑀫𑀸𑀦𑁂 𑀇𑀤𑀁 𑀦𑀸𑀫 𑀅𑀳𑁄𑀲𑀺, 𑀏𑀯𑀁 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀦𑁆𑀢𑁄 𑀏𑀯𑀁 𑀫𑀳𑀸𑀧𑀥𑀸𑀦𑀁 𑀧𑀤𑀳𑀺. 𑀏𑀯𑀁 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀓𑀢𑁆𑀯𑀸 𑀫𑀳𑀸𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀲𑁆𑀲 𑀏𑀯𑀁 𑀮𑁄𑀓𑀯𑀺𑀯𑀭𑀡𑀁 𑀅𑀳𑁄𑀲𑀺. 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀜𑁆𑀜𑀁 𑀏𑀯𑀭𑀽𑀧𑀁 𑀭𑀢𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺.

𑀬𑀁𑀓𑀺𑀜𑁆𑀘𑀺 𑀯𑀺𑀢𑁆𑀢𑀁 𑀇𑀥 𑀯𑀸 𑀳𑀼𑀭𑀁 𑀯𑀸,

𑀲𑀕𑁆𑀕𑁂𑀲𑀼 𑀯𑀸 𑀬𑀁 𑀭𑀢𑀦𑀁 𑀧𑀡𑀻𑀢𑀁;

𑀦 𑀦𑁄 𑀲𑀫𑀁 𑀅𑀢𑁆𑀣𑀺 𑀢𑀣𑀸𑀕𑀢𑁂𑀦,

𑀇𑀤𑀫𑁆𑀧𑀺 𑀩𑀼𑀤𑁆𑀥𑁂 𑀭𑀢𑀦𑀁 𑀧𑀡𑀻𑀢𑀁;

𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀽’’𑀢𑀺. (𑀔𑀼. 𑀧𑀸. 𑁬.𑁩; 𑀲𑀼. 𑀦𑀺. 𑁨𑁨𑁬) 𑁋

𑀏𑀯𑀁 𑀏𑀓𑀤𑁂𑀲𑁂𑀦 𑀩𑀼𑀤𑁆𑀥𑀕𑀼𑀡𑁂𑀧𑀺 𑀮𑀺𑀔𑀺𑀢𑁆𑀯𑀸 𑀤𑀼𑀢𑀺𑀬𑀁 𑀥𑀫𑁆𑀫𑀭𑀢𑀦𑀁 𑀣𑁄𑀫𑁂𑀦𑁆𑀢𑁄 𑁋 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄…𑀧𑁂… 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻’’𑀢𑀺. ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸…𑀧𑁂… 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺. ‘‘𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑀥𑀫𑁆𑀫𑁄 𑀦𑀸𑀫 𑀏𑀯𑀭𑀽𑀧𑁄 𑀘 𑀏𑀯𑀭𑀽𑀧𑁄 𑀘𑀸’’𑀢𑀺 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑁂 𑀏𑀓𑀤𑁂𑀲𑁂𑀦 𑀮𑀺𑀔𑀺𑀢𑁆𑀯𑀸 𑁋

‘‘𑀬𑀁 𑀩𑀼𑀤𑁆𑀥𑀲𑁂𑀝𑁆𑀞𑁄 𑀧𑀭𑀺𑀯𑀡𑁆𑀡𑀬𑀻 𑀲𑀼𑀘𑀺𑀁,

𑀲𑀫𑀸𑀥𑀺𑀫𑀸𑀦𑀦𑁆𑀢𑀭𑀺𑀓𑀜𑁆𑀜𑀫𑀸𑀳𑀼;

𑀲𑀫𑀸𑀥𑀺𑀦𑀸 𑀢𑁂𑀦 𑀲𑀫𑁄 𑀦 𑀯𑀺𑀚𑁆𑀚𑀢𑀺,

𑀇𑀤𑀫𑁆𑀧𑀺 𑀥𑀫𑁆𑀫𑁂 𑀭𑀢𑀦𑀁 𑀧𑀡𑀻𑀢𑀁;

𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀽’’𑀢𑀺. (𑀔𑀼. 𑀧𑀸. 𑁬.𑁫; 𑀲𑀼. 𑀦𑀺. 𑁨𑁨𑁮) 𑁋

𑀏𑀯𑀁 𑀏𑀓𑀤𑁂𑀲𑁂𑀦 𑀥𑀫𑁆𑀫𑀕𑀼𑀡𑁂 𑀮𑀺𑀔𑀺𑀢𑁆𑀯𑀸 𑀢𑀢𑀺𑀬𑀁 𑀲𑀗𑁆𑀖𑀭𑀢𑀦𑀁 𑀣𑁄𑀫𑁂𑀦𑁆𑀢𑁄 𑁋 ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄…𑀧𑁂… 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. ‘‘𑀓𑀼𑀮𑀧𑀼𑀢𑁆𑀢𑀸 𑀦𑀸𑀫 𑀲𑀢𑁆𑀣𑀼 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀏𑀯𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀦𑁆𑀢𑀺, 𑀓𑁂𑀘𑀺 𑀲𑁂𑀢𑀘𑁆𑀙𑀢𑁆𑀢𑀁 𑀧𑀳𑀸𑀬 𑀧𑀩𑁆𑀩𑀚𑀦𑁆𑀢𑀺, 𑀓𑁂𑀘𑀺 𑀉𑀧𑀭𑀚𑁆𑀚𑀁, 𑀓𑁂𑀘𑀺 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀸𑀤𑀻𑀦𑀺 𑀧𑀳𑀸𑀬 𑀧𑀩𑁆𑀩𑀚𑀦𑁆𑀢𑀺. 𑀧𑀩𑁆𑀩𑀚𑀺𑀢𑁆𑀯𑀸 𑀘 𑀧𑀦 𑀇𑀫𑀜𑁆𑀘 𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀦𑁆𑀢𑀻’’𑀢𑀺 𑀘𑀽𑀴𑀲𑀻𑀮𑀫𑀚𑁆𑀛𑀺𑀫𑀲𑀻𑀮𑀫𑀳𑀸𑀲𑀻𑀮𑀸𑀤𑀻𑀦𑀺 𑀏𑀓𑀤𑁂𑀲𑁂𑀦 𑀮𑀺𑀔𑀺𑀢𑁆𑀯𑀸 𑀙𑀤𑁆𑀯𑀸𑀭𑀲𑀁𑀯𑀭𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑀁 𑀦𑀯𑀯𑀺𑀥𑀁 𑀲𑁂𑀦𑀸𑀲𑀦𑀁, 𑀦𑀻𑀯𑀭𑀡𑀧𑁆𑀧𑀳𑀸𑀦𑀁 𑀧𑀭𑀺𑀓𑀫𑁆𑀫𑀁 𑀛𑀸𑀦𑀸𑀪𑀺𑀜𑁆𑀜𑀸 𑀅𑀝𑁆𑀞𑀢𑀺𑀁𑀲 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀬𑀸𑀯 𑀆𑀲𑀯𑀓𑁆𑀔𑀬𑀸 𑀏𑀓𑀤𑁂𑀲𑁂𑀦 𑀮𑀺𑀔𑀺, 𑀲𑁄𑀴𑀲𑀯𑀺𑀥𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀢𑁆𑀣𑀸𑀭𑁂𑀦𑁂𑀯 𑀮𑀺𑀔𑀺𑀢𑁆𑀯𑀸 ‘‘𑀲𑀢𑁆𑀣𑀼 𑀲𑀸𑀯𑀓𑀲𑀗𑁆𑀖𑁄 𑀦𑀸𑀫 𑀏𑀯𑀭𑀽𑀧𑁂𑀳𑀺 𑀘 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁄.

𑀬𑁂 𑀧𑀼𑀕𑁆𑀕𑀮𑀸 𑀅𑀝𑁆𑀞𑀲𑀢𑀁 𑀧𑀲𑀝𑁆𑀞𑀸,

𑀘𑀢𑁆𑀢𑀸𑀭𑀺 𑀏𑀢𑀸𑀦𑀺 𑀬𑀼𑀕𑀸𑀦𑀺 𑀳𑁄𑀦𑁆𑀢𑀺;

𑀢𑁂 𑀤𑀓𑁆𑀔𑀺𑀡𑁂𑀬𑁆𑀬𑀸 𑀲𑀼𑀕𑀢𑀲𑁆𑀲 𑀲𑀸𑀯𑀓𑀸,

𑀏𑀢𑁂𑀲𑀼 𑀤𑀺𑀦𑁆𑀦𑀸𑀦𑀺 𑀫𑀳𑀧𑁆𑀨𑀮𑀸𑀦𑀺;

𑀇𑀤𑀫𑁆𑀧𑀺 𑀲𑀗𑁆𑀖𑁂 𑀭𑀢𑀦𑀁 𑀧𑀡𑀻𑀢𑀁,

𑀏𑀢𑁂𑀦 𑀲𑀘𑁆𑀘𑁂𑀦 𑀲𑀼𑀯𑀢𑁆𑀣𑀺 𑀳𑁄𑀢𑀽’’𑀢𑀺. (𑀔𑀼. 𑀧𑀸. 𑁬.𑁬; 𑀲𑀼. 𑀦𑀺. 𑁨𑁨𑁯) 𑁋

𑀏𑀯𑀁 𑀏𑀓𑀤𑁂𑀲𑁂𑀦 𑀲𑀗𑁆𑀖𑀕𑀼𑀡𑁂 𑀮𑀺𑀔𑀺𑀢𑁆𑀯𑀸 𑁋 ‘‘𑀪𑀕𑀯𑀢𑁄 𑀲𑀸𑀲𑀦𑀁 𑀲𑁆𑀯𑀸𑀓𑁆𑀔𑀸𑀢𑀁 𑀦𑀺𑀬𑁆𑀬𑀸𑀦𑀺𑀓𑀁, 𑀲𑀘𑁂 𑀫𑀬𑁆𑀳𑀁 𑀲𑀳𑀸𑀬𑁄 𑀲𑀓𑁆𑀓𑁄𑀢𑀺, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀢𑀽’’𑀢𑀺 𑀮𑀺𑀔𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀝𑁆𑀝𑀁 𑀲𑀁𑀳𑀭𑀺𑀢𑁆𑀯𑀸 𑀲𑀼𑀔𑀼𑀫𑀓𑀫𑁆𑀩𑀮𑁂𑀦 𑀯𑁂𑀞𑁂𑀢𑁆𑀯𑀸 𑀲𑀸𑀭𑀲𑀫𑀼𑀕𑁆𑀕𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀁 𑀲𑀫𑀼𑀕𑁆𑀕𑀁 𑀲𑀼𑀯𑀡𑁆𑀡𑀫𑀬𑁂, 𑀲𑀼𑀯𑀡𑁆𑀡𑀫𑀬𑀁, 𑀭𑀚𑀢𑀫𑀬𑁂 𑀭𑀚𑀢𑀫𑀬𑀁 𑀫𑀡𑀺𑀫𑀬𑁂, 𑀫𑀡𑀺𑀫𑀬𑀁 𑀧𑀯𑀸𑀴𑀫𑀬𑁂, 𑀧𑀯𑀸𑀴𑀫𑀬𑀁 𑀮𑁄𑀳𑀺𑀢𑀗𑁆𑀓𑀫𑀬𑁂, 𑀮𑁄𑀳𑀺𑀢𑀗𑁆𑀓𑀫𑀬𑀁 𑀫𑀲𑀸𑀭𑀕𑀮𑁆𑀮𑀫𑀬𑁂, 𑀫𑀲𑀸𑀭𑀕𑀮𑁆𑀮𑀫𑀬𑀁 𑀨𑀮𑀺𑀓𑀫𑀬𑁂, 𑀨𑀮𑀺𑀓𑀫𑀬𑀁 𑀤𑀦𑁆𑀢𑀫𑀬𑁂, 𑀤𑀦𑁆𑀢𑀫𑀬𑀁 𑀲𑀩𑁆𑀩𑀭𑀢𑀦𑀫𑀬𑁂, 𑀲𑀩𑁆𑀩𑀭𑀢𑀦𑀫𑀬𑀁 𑀓𑀺𑀮𑀜𑁆𑀚𑀫𑀬𑁂, 𑀓𑀺𑀮𑀜𑁆𑀚𑀫𑀬𑀁 𑀲𑀫𑀼𑀕𑁆𑀕𑀁 𑀲𑀸𑀭𑀓𑀭𑀡𑁆𑀟𑀓𑁂 𑀞𑀧𑁂𑀲𑀺.

𑀧𑀼𑀦 𑀲𑀸𑀭𑀓𑀭𑀡𑁆𑀟𑀓𑀁 𑀲𑀼𑀯𑀡𑁆𑀡𑀓𑀭𑀡𑁆𑀟𑀓𑁂𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀳𑀭𑀺𑀢𑁆𑀯𑀸 𑀲𑀩𑁆𑀩𑀭𑀢𑀦𑀫𑀬𑀁 𑀓𑀭𑀡𑁆𑀟𑀓𑀁 𑀓𑀺𑀮𑀜𑁆𑀚𑀫𑀬𑁂 𑀓𑀭𑀡𑁆𑀟𑀓𑁂 𑀞𑀧𑁂𑀲𑀺. 𑀢𑀢𑁄 𑀓𑀺𑀮𑀜𑁆𑀚𑀫𑀬𑀁 𑀓𑀭𑀡𑁆𑀟𑀓𑀁 𑀲𑀸𑀭𑀫𑀬𑀧𑁂𑀴𑀸𑀬𑀸𑀢𑀺 𑀧𑀼𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀳𑀭𑀺𑀢𑁆𑀯𑀸 𑀲𑀩𑁆𑀩𑀭𑀢𑀦𑀫𑀬𑀁 𑀧𑁂𑀴𑀁 𑀓𑀺𑀮𑀜𑁆𑀚𑀫𑀬𑀧𑁂𑀴𑀸𑀬 𑀞𑀧𑁂𑀢𑁆𑀯𑀸 𑀩𑀳𑀺 𑀯𑀢𑁆𑀣𑁂𑀦 𑀯𑁂𑀞𑁂𑀢𑁆𑀯𑀸 𑀭𑀸𑀚𑀫𑀼𑀤𑁆𑀤𑀺𑀓𑀸𑀬 𑀮𑀜𑁆𑀙𑁂𑀢𑁆𑀯𑀸 𑀅𑀫𑀘𑁆𑀘𑁂 𑀆𑀡𑀸𑀧𑁂𑀲𑀺 𑁋 ‘‘𑀫𑀫 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑁂 𑀫𑀕𑁆𑀕𑀁 𑀅𑀮𑀗𑁆𑀓𑀸𑀭𑀸𑀧𑁂𑀣 𑀫𑀕𑁆𑀕𑁄 𑀅𑀝𑁆𑀞𑀼𑀲𑀪𑀯𑀺𑀢𑁆𑀣𑀢𑁄 𑀳𑁄𑀢𑀼, 𑀘𑀢𑀼𑀉𑀲𑀪𑀝𑁆𑀞𑀸𑀦𑀁 𑀲𑁄𑀥𑀺𑀢𑀫𑀢𑁆𑀢𑀓𑀫𑁂𑀯 𑀳𑁄𑀢𑀼, 𑀫𑀚𑁆𑀛𑁂 𑀘𑀢𑀼𑀉𑀲𑀪𑀁 𑀭𑀸𑀚𑀸𑀦𑀼𑀪𑀸𑀯𑁂𑀦 𑀧𑀝𑀺𑀬𑀸𑀤𑁂𑀣𑀸’’𑀢𑀺. 𑀢𑀢𑁄 𑀫𑀗𑁆𑀕𑀮𑀳𑀢𑁆𑀣𑀺𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀢𑀲𑁆𑀲 𑀉𑀧𑀭𑀺 𑀧𑀮𑁆𑀮𑀗𑁆𑀓𑀁 𑀧𑀜𑁆𑀜𑀧𑁂𑀢𑁆𑀯𑀸 𑀲𑁂𑀢𑀘𑁆𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀦𑀕𑀭𑀯𑀻𑀣𑀺𑀬𑁄 𑀲𑀺𑀢𑁆𑀢𑀲𑀫𑁆𑀫𑀝𑁆𑀞𑀸 𑀲𑀫𑀼𑀲𑁆𑀲𑀺𑀢𑀤𑁆𑀥𑀚𑀧𑀝𑀸𑀓𑀸 𑀓𑀤𑀮𑀺𑀧𑀼𑀡𑁆𑀡𑀖𑀝𑀕𑀦𑁆𑀥𑀥𑀽𑀫𑀧𑀼𑀧𑁆𑀨𑀸𑀤𑀻𑀳𑀺 𑀲𑀼𑀧𑁆𑀧𑀝𑀺𑀫𑀡𑁆𑀟𑀺𑀢𑀸 𑀓𑀸𑀭𑁂𑀢𑁆𑀯𑀸 ‘‘𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀲𑀬𑀧𑁆𑀧𑀤𑁂𑀲𑁂 𑀏𑀯𑀭𑀽𑀧𑀁 𑀧𑀽𑀚𑀁 𑀓𑀸𑀭𑁂𑀦𑁆𑀢𑀽’’𑀢𑀺 𑀅𑀦𑁆𑀢𑀭𑀪𑁄𑀕𑀺𑀓𑀸𑀦𑀁 𑀚𑀯𑀦𑀤𑀽𑀢𑁂 𑀧𑁂𑀲𑁂𑀢𑁆𑀯𑀸 𑀲𑀬𑀁 𑀲𑀩𑁆𑀩𑀸𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀭𑀺𑀢𑁆𑀯𑀸 𑁋 ‘‘𑀲𑀩𑁆𑀩𑀢𑀸𑀴𑀸𑀯𑀘𑀭𑀲𑀫𑁆𑀫𑀺𑀲𑁆𑀲𑀩𑀮𑀓𑀸𑀬𑀧𑀭𑀺𑀯𑀼𑀢𑁄 𑀧𑀡𑁆𑀡𑀸𑀓𑀸𑀭𑀁 𑀧𑁂𑀲𑁂𑀫𑀻’’𑀢𑀺 𑀅𑀢𑁆𑀢𑀦𑁄 𑀯𑀺𑀲𑀬𑀧𑀭𑀺𑀬𑀦𑁆𑀢𑀁 𑀕𑀦𑁆𑀢𑁆𑀯𑀸 𑀅𑀫𑀘𑁆𑀘𑀲𑁆𑀲 𑀫𑀼𑀔𑀲𑀸𑀲𑀦𑀁 𑀅𑀤𑀸𑀲𑀺 𑁋 ‘‘𑀢𑀸𑀢 𑀫𑀬𑁆𑀳𑀁 𑀲𑀳𑀸𑀬𑁄 𑀧𑀼𑀓𑁆𑀓𑀼𑀲𑀸𑀢𑀺 𑀇𑀫𑀁 𑀧𑀡𑁆𑀡𑀸𑀓𑀸𑀭𑀁 𑀧𑀝𑀺𑀘𑁆𑀙𑀦𑁆𑀢𑁄 𑀑𑀭𑁄𑀥𑀫𑀚𑁆𑀛𑁂 𑀅𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀧𑀝𑀺𑀘𑁆𑀙𑀢𑀽’’𑀢𑀺. 𑀏𑀯𑀁 𑀲𑀸𑀲𑀦𑀁 𑀤𑀢𑁆𑀯𑀸 𑀧𑀘𑁆𑀘𑀦𑁆𑀢𑀤𑁂𑀲𑀁 𑀲𑀢𑁆𑀣𑀸 𑀕𑀘𑁆𑀙𑀢𑀻𑀢𑀺 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀦𑀺𑀯𑀢𑁆𑀢𑀺. 𑀅𑀦𑁆𑀢𑀭𑀪𑁄𑀕𑀺𑀓𑀸 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀫𑀕𑁆𑀕𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀧𑀡𑁆𑀡𑀸𑀓𑀸𑀭𑀁 𑀦𑀬𑀺𑀁𑀲𑀼.

𑀧𑀼𑀓𑁆𑀓𑀼𑀲𑀸𑀢𑀺𑀧𑀺 𑀅𑀢𑁆𑀢𑀦𑁄 𑀭𑀚𑁆𑀚𑀲𑀻𑀫𑀢𑁄 𑀧𑀝𑁆𑀞𑀸𑀬 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀫𑀕𑁆𑀕𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀦𑀕𑀭𑀁 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀧𑀡𑁆𑀡𑀸𑀓𑀸𑀭𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀁 𑀅𑀓𑀸𑀲𑀺. 𑀧𑀡𑁆𑀡𑀸𑀓𑀸𑀭𑁄 𑀢𑀓𑁆𑀓𑀲𑀻𑀮𑀁 𑀧𑀸𑀧𑀼𑀡𑀦𑁆𑀢𑁄 𑀉𑀧𑁄𑀲𑀣𑀤𑀺𑀯𑀲𑁂 𑀧𑀸𑀧𑀼𑀡𑀺, 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀕𑀢𑀅𑀫𑀘𑁆𑀘𑁄𑀧𑀺 𑀭𑀜𑁆𑀜𑁄 𑀯𑀼𑀢𑁆𑀢𑀲𑀸𑀲𑀦𑀁 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 𑀧𑀡𑁆𑀡𑀸𑀓𑀸𑀭𑁂𑀦 𑀲𑀤𑁆𑀥𑀺𑀁 𑀆𑀕𑀢𑀸𑀦𑀁 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁 𑀯𑀺𑀘𑀸𑀭𑁂𑀢𑁆𑀯𑀸 𑀧𑀡𑁆𑀡𑀸𑀓𑀸𑀭𑀁 𑀆𑀤𑀸𑀬 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 ‘‘𑀫𑀸 𑀇𑀥 𑀓𑁄𑀘𑀺 𑀧𑀯𑀺𑀲𑀢𑀽’’𑀢𑀺 𑀤𑁆𑀯𑀸𑀭𑁂 𑀆𑀭𑀓𑁆𑀔𑀁 𑀓𑀸𑀭𑁂𑀢𑁆𑀯𑀸 𑀲𑀻𑀳𑀧𑀜𑁆𑀚𑀭𑀁 𑀯𑀺𑀯𑀭𑀺𑀢𑁆𑀯𑀸 𑀧𑀡𑁆𑀡𑀸𑀓𑀸𑀭𑀁 𑀉𑀘𑁆𑀘𑀸𑀲𑀦𑁂 𑀞𑀧𑁂𑀢𑁆𑀯𑀸 𑀲𑀬𑀁 𑀦𑀻𑀘𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀮𑀜𑁆𑀙𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀦𑀺𑀯𑀸𑀲𑀦𑀁 𑀅𑀧𑀦𑁂𑀢𑁆𑀯𑀸 𑀓𑀺𑀮𑀜𑁆𑀚𑀧𑁂𑀴𑀢𑁄 𑀧𑀝𑁆𑀞𑀸𑀬 𑀅𑀦𑀼𑀧𑀼𑀩𑁆𑀩𑁂𑀦 𑀯𑀺𑀯𑀭𑀦𑁆𑀢𑁄 𑀲𑀸𑀭𑀫𑀬𑀁 𑀲𑀫𑀼𑀕𑁆𑀕𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀳𑀸𑀧𑀭𑀺𑀳𑀸𑀭𑁄 𑀦𑀸𑀬𑀁 𑀅𑀜𑁆𑀜𑀲𑁆𑀲 𑀭𑀢𑀦𑀲𑁆𑀲 𑀪𑀯𑀺𑀲𑁆𑀲𑀢𑀺, 𑀅𑀤𑁆𑀥𑀸 𑀫𑀚𑁆𑀛𑀺𑀫𑀤𑁂𑀲𑁂 𑀲𑁄𑀢𑀩𑁆𑀩𑀬𑀼𑀢𑁆𑀢𑀓𑀁 𑀭𑀢𑀦𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺. 𑀅𑀣 𑀢𑀁 𑀲𑀫𑀼𑀕𑁆𑀕𑀁 𑀯𑀺𑀯𑀭𑀺𑀢𑁆𑀯𑀸 𑀭𑀸𑀚𑀮𑀜𑁆𑀙𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀼𑀔𑀼𑀫𑀓𑀫𑁆𑀩𑀮𑀁 𑀉𑀪𑀢𑁄 𑀯𑀺𑀬𑀽𑀳𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀝𑁆𑀝𑀁 𑀅𑀤𑁆𑀤𑀲.

𑀲𑁄 𑀢𑀁 𑀧𑀲𑀸𑀭𑁂𑀢𑁆𑀯𑀸 𑁋 ‘‘𑀫𑀦𑀸𑀧𑀸𑀦𑀺 𑀯𑀢 𑀅𑀓𑁆𑀔𑀭𑀸𑀦𑀺 𑀲𑀫𑀲𑀻𑀲𑀸𑀦𑀺 𑀲𑀫𑀧𑀦𑁆𑀢𑀻𑀦𑀺 𑀘𑀢𑀼𑀭𑀲𑁆𑀲𑀸𑀦𑀻’’𑀢𑀺𑀆𑀤𑀺𑀢𑁄 𑀧𑀝𑁆𑀞𑀸𑀬 𑀯𑀸𑀘𑁂𑀢𑀼𑀁 𑀆𑀭𑀪𑀺. 𑀢𑀲𑁆𑀲 𑁋 ‘‘𑀇𑀥 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄’’𑀢𑀺 𑀩𑀼𑀤𑁆𑀥𑀕𑀼𑀡𑁂 𑀯𑀸𑀘𑁂𑀦𑁆𑀢𑀲𑁆𑀲 𑀩𑀮𑀯𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀺, 𑀦𑀯𑀦𑀯𑀼𑀢𑀺𑀮𑁄𑀫𑀓𑀽𑀧𑀲𑀳𑀲𑁆𑀲𑀸𑀦𑀺 𑀉𑀤𑁆𑀥𑀕𑁆𑀕𑀮𑁄𑀫𑀸𑀦𑀺 𑀅𑀳𑁂𑀲𑀼𑀁. 𑀅𑀢𑁆𑀢𑀦𑁄 𑀞𑀺𑀢𑀪𑀸𑀯𑀁 𑀯𑀸 𑀦𑀺𑀲𑀺𑀦𑁆𑀦𑀪𑀸𑀯𑀁 𑀯𑀸 𑀦 𑀚𑀸𑀦𑀸𑀢𑀺. 𑀅𑀣𑀲𑁆𑀲 𑁋 ‘‘𑀓𑀧𑁆𑀧𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀳𑀺𑀧𑀺 𑀏𑀢𑀁 𑀤𑀼𑀮𑁆𑀮𑀪𑀲𑀸𑀲𑀦𑀁 𑀲𑀳𑀸𑀬𑀁 𑀦𑀺𑀲𑁆𑀲𑀸𑀬 𑀲𑁄𑀢𑀼𑀁 𑀮𑀪𑀸𑀫𑀻’’𑀢𑀺 𑀪𑀺𑀬𑁆𑀬𑁄 𑀩𑀮𑀯𑀧𑀻𑀢𑀺 𑀉𑀤𑀧𑀸𑀤𑀺. 𑀲𑁄 𑀳𑀺 𑀉𑀧𑀭𑀺 𑀯𑀸𑀘𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀬𑀸𑀯 𑀧𑀻𑀢𑀺𑀯𑁂𑀕𑀧𑀲𑁆𑀲𑀤𑁆𑀥𑀺𑀬𑀸 𑀦𑀺𑀲𑀻𑀤𑀺𑀢𑁆𑀯𑀸 𑀧𑀭𑀢𑁄 𑁋 ‘‘𑀲𑁆𑀯𑀸𑀓𑁆𑀔𑀸𑀢𑁄 𑀪𑀕𑀯𑀢𑀸 𑀥𑀫𑁆𑀫𑁄’’𑀢𑀺 𑀥𑀫𑁆𑀫𑀕𑀼𑀡𑁂 𑀆𑀭𑀪𑀺. 𑀢𑀢𑁆𑀭𑀸𑀧𑀺𑀲𑁆𑀲 𑀢𑀣𑁂𑀯 𑀅𑀳𑁄𑀲𑀺. 𑀲𑁄 𑀧𑀼𑀦 𑀬𑀸𑀯 𑀧𑀻𑀢𑀺𑀯𑁂𑀕𑀧𑀲𑁆𑀲𑀤𑁆𑀥𑀺𑀬𑀸 𑀦𑀺𑀲𑀻𑀤𑀺𑀢𑁆𑀯𑀸 𑀧𑀭𑀢𑁄 ‘‘𑀲𑀼𑀧𑁆𑀧𑀝𑀺𑀧𑀦𑁆𑀦𑁄’’𑀢𑀺 𑀲𑀗𑁆𑀖𑀕𑀼𑀡𑁂 𑀆𑀭𑀪𑀺. 𑀢𑀢𑁆𑀭𑀸𑀧𑀺𑀲𑁆𑀲 𑀢𑀣𑁂𑀯 𑀅𑀳𑁄𑀲𑀺. 𑀅𑀣 𑀲𑀩𑁆𑀩𑀧𑀭𑀺𑀬𑀦𑁆𑀢𑁂 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀯𑀸𑀘𑁂𑀢𑁆𑀯𑀸 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀲𑀺, 𑀲𑁄 𑀛𑀸𑀦𑀲𑀼𑀔𑁂𑀦𑁂𑀯 𑀯𑀻𑀢𑀺𑀦𑀸𑀫𑁂𑀲𑀺. 𑀅𑀜𑁆𑀜𑁄 𑀓𑁄𑀘𑀺 𑀤𑀝𑁆𑀞𑀼𑀁 𑀦 𑀮𑀪𑀢𑀺, 𑀏𑀓𑁄𑀯 𑀘𑀽𑀴𑀼𑀧𑀝𑁆𑀞𑀸𑀓𑁄 𑀧𑀯𑀺𑀲𑀢𑀺. 𑀏𑀯𑀁 𑀅𑀤𑁆𑀥𑀫𑀸𑀲𑀫𑀢𑁆𑀢𑀁 𑀯𑀻𑀢𑀺𑀦𑀸𑀫𑁂𑀲𑀺.

𑀦𑀸𑀕𑀭𑀸 𑀭𑀸𑀚𑀗𑁆𑀕𑀡𑁂 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀉𑀓𑁆𑀓𑀼𑀝𑁆𑀞𑀺𑀁 𑀅𑀓𑀁𑀲𑀼 ‘‘𑀧𑀡𑁆𑀡𑀸𑀓𑀸𑀭𑀁 𑀧𑀝𑀺𑀘𑁆𑀙𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀩𑀮𑀤𑀲𑁆𑀲𑀦𑀁 𑀯𑀸 𑀦𑀸𑀝𑀓𑀤𑀲𑁆𑀲𑀦𑀁 𑀯𑀸 𑀦𑀢𑁆𑀣𑀺, 𑀯𑀺𑀦𑀺𑀘𑁆𑀙𑀬𑀤𑀸𑀦𑀁 𑀦𑀢𑁆𑀣𑀺, 𑀭𑀸𑀚𑀸 𑀲𑀳𑀸𑀬𑁂𑀦 𑀧𑀳𑀺𑀢𑀁 𑀧𑀡𑁆𑀡𑀸𑀓𑀸𑀭𑀁 𑀬𑀲𑁆𑀲𑀺𑀘𑁆𑀙𑀢𑀺 𑀢𑀲𑁆𑀲 𑀤𑀲𑁆𑀲𑁂𑀢𑀼, 𑀭𑀸𑀚𑀸𑀦𑁄 𑀦𑀸𑀫 𑀏𑀓𑀘𑁆𑀘𑀲𑁆𑀲 𑀧𑀡𑁆𑀡𑀸𑀓𑀸𑀭𑀯𑀲𑁂𑀦𑀧𑀺 𑀯𑀜𑁆𑀘𑁂𑀢𑁆𑀯𑀸 𑀭𑀚𑁆𑀚𑀁 𑀅𑀢𑁆𑀢𑀦𑁄 𑀓𑀸𑀢𑀼𑀁 𑀯𑀸𑀬𑀫𑀦𑁆𑀢𑀺. 𑀓𑀺𑀁 𑀦𑀸𑀫 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀓𑀭𑁄𑀢𑀻’’𑀢𑀺? 𑀭𑀸𑀚𑀸 𑀉𑀓𑁆𑀓𑀼𑀝𑁆𑀞𑀺𑀲𑀤𑁆𑀤𑀁 𑀲𑀼𑀢𑁆𑀯𑀸 𑁋 ‘‘𑀭𑀚𑁆𑀚𑀁 𑀦𑀼 𑀔𑁄 𑀥𑀸𑀭𑁂𑀫𑀺, 𑀉𑀤𑀸𑀳𑀼 𑀲𑀢𑁆𑀣𑀸𑀭’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀭𑀚𑁆𑀚𑀓𑀸𑀭𑀺𑀢𑀅𑀢𑁆𑀢𑀪𑀸𑀯𑁄 𑀦𑀸𑀫 𑀦𑁂𑀯 𑀕𑀡𑀓𑁂𑀦, 𑀦 𑀕𑀡𑀓𑀫𑀳𑀸𑀫𑀢𑁆𑀢𑁂𑀦 𑀕𑀡𑁂𑀢𑀼𑀁 𑀲𑀓𑁆𑀓𑁄. 𑀲𑀢𑁆𑀣𑀼𑀲𑀸𑀲𑀦𑀁 𑀥𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀲𑀬𑀦𑁂 𑀞𑀧𑀺𑀢𑀁 𑀅𑀲𑀺𑀁 𑀕𑀳𑁂𑀢𑁆𑀯𑀸 𑀓𑁂𑀲𑁂 𑀙𑀺𑀦𑁆𑀤𑀺𑀢𑁆𑀯𑀸 𑀲𑀻𑀳𑀧𑀜𑁆𑀚𑀭𑀁 𑀯𑀺𑀯𑀭𑀺𑀢𑁆𑀯𑀸 𑁋 ‘‘𑀏𑀢𑀁 𑀕𑀳𑁂𑀢𑁆𑀯𑀸 𑀭𑀚𑁆𑀚𑀁 𑀓𑀸𑀭𑁂𑀣𑀸’’𑀢𑀺 𑀲𑀤𑁆𑀥𑀺𑀁 𑀘𑀽𑀴𑀸𑀫𑀡𑀺𑀦𑀸 𑀓𑁂𑀲𑀓𑀮𑀸𑀧𑀁 𑀧𑀭𑀺𑀲𑀫𑀚𑁆𑀛𑁂 𑀧𑀸𑀢𑁂𑀲𑀺, 𑀫𑀳𑀸𑀚𑀦𑁄 𑀢𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑁋 ‘‘𑀲𑀳𑀸𑀬𑀓𑀲𑀦𑁆𑀢𑀺𑀓𑀸 𑀮𑀤𑁆𑀥𑀧𑀡𑁆𑀡𑀸𑀓𑀸𑀭𑀸 𑀦𑀸𑀫 𑀭𑀸𑀚𑀸𑀦𑁄 𑀢𑀼𑀫𑁆𑀳𑀸𑀤𑀺𑀲𑀸 𑀳𑁄𑀦𑁆𑀢𑀺 𑀤𑁂𑀯𑀸’’𑀢𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀯𑀺𑀭𑀯𑀺. 𑀭𑀜𑁆𑀜𑁄𑀧𑀺 𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀁 𑀓𑁂𑀲𑀫𑀲𑁆𑀲𑀼 𑀅𑀳𑁄𑀲𑀺. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀧𑀩𑁆𑀩𑀚𑁆𑀚𑀸𑀲𑀤𑀺𑀲𑀫𑁂𑀯 𑀓𑀺𑀭 𑀚𑀸𑀢𑀁.

𑀢𑀢𑁄 𑀘𑀽𑀴𑀼𑀧𑀝𑁆𑀞𑀸𑀓𑀁 𑀧𑁂𑀲𑁂𑀢𑁆𑀯𑀸 𑀅𑀦𑁆𑀢𑀭𑀸𑀧𑀡𑀸 𑀤𑁆𑀯𑁂 𑀓𑀸𑀲𑀸𑀬𑀯𑀢𑁆𑀣𑀸𑀦𑀺 𑀫𑀢𑁆𑀢𑀺𑀓𑀸𑀧𑀢𑁆𑀢𑀜𑁆𑀘 𑀆𑀳𑀭𑀸𑀧𑁂𑀢𑁆𑀯𑀸 𑁋 ‘‘𑀬𑁂 𑀮𑁄𑀓𑁂 𑀅𑀭𑀳𑀦𑁆𑀢𑁄, 𑀢𑁂 𑀉𑀤𑁆𑀤𑀺𑀲𑁆𑀲 𑀫𑀬𑁆𑀳𑀁 𑀧𑀩𑁆𑀩𑀚𑁆𑀚𑀸’’𑀢𑀺 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑁆𑀲 𑀏𑀓𑀁 𑀓𑀸𑀲𑀸𑀯𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀁 𑀯𑀸𑀫𑀅𑀁𑀲𑀓𑀽𑀝𑁂 𑀓𑀢𑁆𑀯𑀸 𑀓𑀢𑁆𑀢𑀭𑀤𑀡𑁆𑀟𑀁 𑀕𑀳𑁂𑀢𑁆𑀯𑀸 𑁋 ‘‘𑀲𑁄𑀪𑀢𑀺 𑀦𑀼 𑀔𑁄 𑀫𑁂 𑀧𑀩𑁆𑀩𑀚𑁆𑀚𑀸 𑀦𑁄 𑀯𑀸’’𑀢𑀺 𑀫𑀳𑀸𑀢𑀮𑁂 𑀓𑀢𑀺𑀧𑀬𑀯𑀸𑀭𑁂 𑀅𑀧𑀭𑀸𑀧𑀭𑀁 𑀘𑀗𑁆𑀓𑀫𑀺𑀢𑁆𑀯𑀸 𑁋 ‘‘𑀲𑁄𑀪𑀢𑀺 𑀫𑁂 𑀧𑀩𑁆𑀩𑀚𑁆𑀚𑀸’’𑀢𑀺 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀧𑀸𑀲𑀸𑀤𑀸 𑀑𑀢𑀭𑀺. 𑀑𑀢𑀭𑀦𑁆𑀢𑀁 𑀧𑀦 𑀦𑀁 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀞𑀺𑀢𑀦𑀸𑀝𑀓𑀸𑀤𑀻𑀦𑀺 𑀤𑀺𑀲𑁆𑀯𑀸𑀧𑀺 𑀦 𑀲𑀜𑁆𑀚𑀸𑀦𑀺𑀁𑀲𑀼. ‘‘𑀏𑀓𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀅𑀫𑁆𑀳𑀸𑀓𑀁 𑀭𑀜𑁆𑀜𑁄 𑀥𑀫𑁆𑀫𑀓𑀣𑀁 𑀓𑀣𑁂𑀢𑀼𑀁 𑀆𑀕𑀢𑁄’’𑀢𑀺 𑀓𑀺𑀭 𑀘𑀺𑀦𑁆𑀢𑀬𑀺𑀁𑀲𑀼. 𑀉𑀧𑀭𑀺𑀧𑀸𑀲𑀸𑀤𑀁 𑀧𑀦 𑀆𑀭𑀼𑀬𑁆𑀳 𑀭𑀜𑁆𑀜𑁄 𑀞𑀺𑀢𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀸𑀦𑀺 𑀤𑀺𑀲𑁆𑀯𑀸 𑀭𑀸𑀚𑀸 𑀕𑀢𑁄𑀢𑀺 𑀜𑀢𑁆𑀯𑀸 𑀲𑀫𑀼𑀤𑁆𑀤𑀫𑀚𑁆𑀛𑁂 𑀑𑀲𑀻𑀤𑀫𑀸𑀦𑀸𑀬 𑀦𑀸𑀯𑀸𑀬 𑀚𑀦𑁄 𑀯𑀺𑀬 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀯𑀺𑀭𑀯𑀺𑀁𑀲𑀼. 𑀓𑀼𑀮𑀧𑀼𑀢𑁆𑀢𑀁 𑀪𑀽𑀫𑀺𑀢𑀮𑀁 𑀑𑀢𑀺𑀡𑁆𑀡𑀫𑀢𑁆𑀢𑀁 𑀅𑀝𑁆𑀞𑀸𑀭𑀲𑀲𑁂𑀦𑀺𑀬𑁄 𑀲𑀩𑁆𑀩𑁂 𑀦𑀸𑀕𑀭𑀸 𑀩𑀮𑀓𑀸𑀬𑀸 𑀘 𑀧𑀭𑀺𑀯𑀸𑀭𑁂𑀢𑁆𑀯𑀸 𑀫𑀳𑀸𑀯𑀺𑀭𑀯𑀁 𑀯𑀺𑀭𑀯𑀺𑀁𑀲𑀼. 𑀅𑀫𑀘𑁆𑀘𑀸𑀧𑀺 𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀤𑁂𑀯 𑀫𑀚𑁆𑀛𑀺𑀫𑀤𑁂𑀲𑀭𑀸𑀚𑀸𑀦𑁄 𑀦𑀸𑀫 𑀩𑀳𑀼𑀫𑀸𑀬𑀸, 𑀲𑀸𑀲𑀦𑀁 𑀧𑁂𑀲𑁂𑀢𑁆𑀯𑀸 𑀩𑀼𑀤𑁆𑀥𑀭𑀢𑀦𑀁 𑀦𑀸𑀫 𑀮𑁄𑀓𑁂 𑀉𑀧𑁆𑀧𑀦𑁆𑀦𑀁 𑀯𑀸 𑀦𑁄 𑀯𑀸𑀢𑀺 𑀜𑀢𑁆𑀯𑀸 𑀕𑀫𑀺𑀲𑁆𑀲𑀣, 𑀦𑀺𑀯𑀢𑁆𑀢𑀣 𑀤𑁂𑀯𑀸’’𑀢𑀺. 𑀲𑀤𑁆𑀤𑀳𑀸𑀫𑀳𑀁 𑀫𑀬𑁆𑀳𑀁 𑀲𑀳𑀸𑀬𑀓𑀲𑁆𑀲, 𑀢𑀲𑁆𑀲 𑀫𑀬𑀸 𑀲𑀤𑁆𑀥𑀺𑀁 𑀤𑁆𑀯𑁂𑀚𑁆𑀛𑀯𑀘𑀦𑀁 𑀦𑀸𑀫 𑀦𑀢𑁆𑀣𑀺, 𑀢𑀺𑀝𑁆𑀞𑀣 𑀢𑀼𑀫𑁆𑀳𑁂𑀢𑀺. 𑀢𑁂 𑀅𑀦𑀼𑀕𑀘𑁆𑀙𑀦𑁆𑀢𑀺𑀬𑁂𑀯.

𑀓𑀼𑀮𑀧𑀼𑀢𑁆𑀢𑁄 𑀓𑀢𑁆𑀢𑀭𑀤𑀡𑁆𑀟𑁂𑀦 𑀮𑁂𑀔𑀁 𑀓𑀢𑁆𑀯𑀸 𑁋 ‘‘𑀇𑀤𑀁 𑀭𑀚𑁆𑀚𑀁 𑀓𑀲𑁆𑀲𑀸’’𑀢𑀺 𑀆𑀳? 𑀢𑀼𑀫𑁆𑀳𑀸𑀓𑀁 𑀤𑁂𑀯𑀸𑀢𑀺. 𑀬𑁄 𑀇𑀫𑀁 𑀮𑁂𑀔𑀁 𑀅𑀦𑁆𑀢𑀭𑀁 𑀓𑀭𑁄𑀢𑀺, 𑀭𑀸𑀚𑀸𑀡𑀸𑀬 𑀓𑀸𑀭𑁂𑀢𑀩𑁆𑀩𑁄𑀢𑀺. 𑀫𑀳𑀸𑀚𑀦𑀓𑀚𑀸𑀢𑀓𑁂 𑀩𑁄𑀥𑀺𑀲𑀢𑁆𑀢𑁂𑀦 𑀓𑀢𑀮𑁂𑀔𑀁 𑀲𑀻𑀯𑀮𑀺𑀤𑁂𑀯𑀻 𑀅𑀦𑁆𑀢𑀭𑀁 𑀓𑀸𑀢𑀼𑀁 𑀅𑀯𑀺𑀲𑀳𑀦𑁆𑀢𑀻 𑀯𑀺𑀯𑀢𑁆𑀢𑀫𑀸𑀦𑀸 𑀅𑀕𑀫𑀸𑀲𑀺. 𑀢𑀲𑁆𑀲𑀸 𑀕𑀢𑀫𑀕𑁆𑀕𑁂𑀦 𑀫𑀳𑀸𑀚𑀦𑁄 𑀅𑀕𑀫𑀸𑀲𑀺. 𑀢𑀁 𑀧𑀦 𑀮𑁂𑀔𑀁 𑀫𑀳𑀸𑀚𑀦𑁄 𑀅𑀦𑁆𑀢𑀭𑀁 𑀓𑀸𑀢𑀼𑀁 𑀦 𑀯𑀺𑀲𑀳𑀺, 𑀮𑁂𑀔𑀁 𑀉𑀲𑁆𑀲𑀻𑀲𑀓𑀁 𑀓𑀢𑁆𑀯𑀸 𑀯𑀺𑀯𑀢𑁆𑀢𑀫𑀸𑀦𑀸 𑀯𑀺𑀭𑀯𑀺𑀁𑀲𑀼. 𑀓𑀼𑀮𑀧𑀼𑀢𑁆𑀢𑁄 ‘‘𑀅𑀬𑀁 𑀫𑁂 𑀕𑀢𑀝𑁆𑀞𑀸𑀦𑁂 𑀤𑀦𑁆𑀢𑀓𑀝𑁆𑀞𑀁 𑀯𑀸 𑀫𑀼𑀔𑁄𑀤𑀓𑀁 𑀯𑀸 𑀤𑀲𑁆𑀲𑀢𑀻’’𑀢𑀺 𑀅𑀦𑁆𑀢𑀫𑀲𑁄 𑀏𑀓𑀘𑁂𑀝𑀓𑀫𑁆𑀧𑀺 𑀅𑀕𑁆𑀕𑀳𑁂𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 ‘‘𑀫𑀫 𑀲𑀢𑁆𑀣𑀸 𑀘 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀏𑀓𑀓𑁄𑀯 𑀧𑀩𑁆𑀩𑀚𑀺𑀢𑁄’’𑀢𑀺 𑀏𑀓𑀓𑁄𑀯 𑀅𑀕𑀫𑀸𑀲𑀺. ‘‘𑀲𑀢𑁆𑀣𑀼 𑀮𑀚𑁆𑀚𑀸𑀫𑀻’’𑀢𑀺 𑀘 𑁋 ‘‘𑀲𑀢𑁆𑀣𑀸 𑀓𑀺𑀭 𑀫𑁂 𑀧𑀩𑁆𑀩𑀚𑀺𑀢𑁆𑀯𑀸 𑀬𑀸𑀦𑀁 𑀦𑀸𑀭𑀼𑀴𑁆𑀳𑁄’’𑀢𑀺 𑀘 𑀅𑀦𑁆𑀢𑀫𑀲𑁄 𑀏𑀓𑀧𑀝𑀮𑀺𑀓𑀫𑁆𑀧𑀺 𑀉𑀧𑀸𑀳𑀦𑀁 𑀦𑀸𑀭𑀼𑀳𑀺, 𑀧𑀡𑁆𑀡𑀘𑁆𑀙𑀢𑁆𑀢𑀓𑀫𑁆𑀧𑀺 𑀦 𑀥𑀸𑀭𑁂𑀲𑀺. 𑀫𑀳𑀸𑀚𑀦𑁄 𑀭𑀼𑀓𑁆𑀔𑀧𑀸𑀓𑀸𑀭𑀝𑁆𑀝𑀸𑀮𑀓𑀸𑀤𑀻𑀦𑀺 𑀆𑀭𑀼𑀬𑁆𑀳 𑀏𑀲 𑀅𑀫𑁆𑀳𑀸𑀓𑀁 𑀭𑀸𑀚𑀸 𑀕𑀘𑁆𑀙𑀢𑀻𑀢𑀺 𑀑𑀮𑁄𑀓𑁂𑀲𑀺. 𑀓𑀼𑀮𑀧𑀼𑀢𑁆𑀢𑁄 𑁋 ‘‘𑀤𑀽𑀭𑀁 𑀕𑀦𑁆𑀢𑀩𑁆𑀩𑀁, 𑀦 𑀲𑀓𑁆𑀓𑀸 𑀏𑀓𑁂𑀦 𑀫𑀕𑁆𑀕𑁄 𑀦𑀺𑀢𑁆𑀣𑀭𑀺𑀢𑀼’’𑀦𑁆𑀢𑀺 𑀏𑀓𑀁 𑀲𑀢𑁆𑀣𑀯𑀸𑀳𑀁 𑀅𑀦𑀼𑀩𑀦𑁆𑀥𑀺. 𑀲𑀼𑀔𑀼𑀫𑀸𑀮𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀓𑀞𑀺𑀦𑀢𑀢𑁆𑀢𑀸𑀬 𑀧𑀣𑀯𑀺𑀬𑀸 𑀕𑀙𑀦𑁆𑀢𑀲𑁆𑀲 𑀧𑀸𑀤𑀢𑀮𑁂𑀲𑀼 𑀨𑁄𑀝𑀸 𑀉𑀝𑁆𑀞𑀳𑀺𑀢𑁆𑀯𑀸 𑀪𑀺𑀚𑁆𑀚𑀦𑁆𑀢𑀺, 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑀢𑁆𑀣𑀯𑀸𑀳𑁂 𑀔𑀦𑁆𑀥𑀸𑀯𑀸𑀭𑀁 𑀩𑀦𑁆𑀥𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀓𑀼𑀮𑀧𑀼𑀢𑁆𑀢𑁄 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀏𑀓𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀢𑀺. 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂 𑀧𑀸𑀤𑀧𑀭𑀺𑀓𑀫𑁆𑀫𑀁 𑀯𑀸 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁 𑀯𑀸 𑀓𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺, 𑀓𑀼𑀮𑀧𑀼𑀢𑁆𑀢𑁄 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀫𑀕𑁆𑀕𑀤𑀭𑀣𑀓𑀺𑀮𑀫𑀣𑀧𑀭𑀺𑀴𑀸𑀳𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀛𑀸𑀦𑀭𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀢𑀺.

𑀧𑀼𑀦𑀤𑀺𑀯𑀲𑁂 𑀉𑀝𑁆𑀞𑀺𑀢𑁂 𑀅𑀭𑀼𑀡𑁂 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀧𑀼𑀦 𑀲𑀢𑁆𑀣𑀯𑀸𑀳𑀁 𑀅𑀦𑀼𑀩𑀦𑁆𑀥𑀢𑀺. 𑀧𑀸𑀢𑀭𑀸𑀲𑀓𑀸𑀮𑁂 𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑁂𑀦𑁆𑀢𑀺. 𑀢𑀁 𑀉𑀢𑁆𑀢𑀡𑁆𑀟𑀼𑀮𑀫𑁆𑀧𑀺 𑀳𑁄𑀢𑀺 𑀓𑀺𑀮𑀺𑀦𑁆𑀦𑀫𑁆𑀧𑀺 𑀲𑀫𑀲𑀓𑁆𑀔𑀭𑀫𑁆𑀧𑀺 𑀅𑀮𑁄𑀡𑀸𑀢𑀺𑀮𑁄𑀡𑀫𑁆𑀧𑀺, 𑀓𑀼𑀮𑀧𑀼𑀢𑁆𑀢𑁄 𑀧𑀯𑀺𑀲𑀦𑀝𑁆𑀞𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀅𑀫𑀢𑀁 𑀯𑀺𑀬 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀏𑀢𑁂𑀦 𑀦𑀺𑀬𑀸𑀫𑁂𑀦 𑀅𑀝𑁆𑀞𑀳𑀺 𑀊𑀦𑀓𑀸𑀦𑀺 𑀤𑁆𑀯𑁂 𑀬𑁄𑀚𑀦𑀲𑀢𑀸𑀦𑀺 𑀕𑀢𑁄. 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑁆𑀲 𑀧𑀦 𑀲𑀫𑀻𑀧𑁂𑀦 𑀕𑀘𑁆𑀙𑀦𑁆𑀢𑁄𑀧𑀺 𑁋 ‘‘𑀓𑀳𑀁 𑀲𑀢𑁆𑀣𑀸 𑀯𑀲𑀢𑀻’’𑀢𑀺 𑀦𑀸𑀧𑀼𑀘𑁆𑀙𑀺. 𑀓𑀲𑁆𑀫𑀸? 𑀲𑀢𑁆𑀣𑀼𑀕𑀸𑀭𑀯𑁂𑀦 𑀘𑁂𑀯 𑀭𑀜𑁆𑀜𑁄 𑀧𑁂𑀲𑀺𑀢𑀲𑀸𑀲𑀦𑀯𑀲𑁂𑀦 𑀘. 𑀭𑀜𑁆𑀜𑁄 𑀳𑀺 𑁋 ‘‘𑀇𑀥 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀲𑀢𑁆𑀣𑀸𑀭𑀁 𑀭𑀸𑀚𑀕𑀳𑁂 𑀉𑀧𑁆𑀧𑀦𑁆𑀦𑀁 𑀯𑀺𑀬 𑀓𑀢𑁆𑀯𑀸 𑀲𑀸𑀲𑀦𑀁 𑀧𑁂𑀲𑀺𑀢𑀁, 𑀢𑀲𑁆𑀫𑀸 𑀦𑀁 𑀅𑀧𑀼𑀘𑁆𑀙𑀺𑀢𑁆𑀯𑀸𑀯 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀫𑀢𑁆𑀢𑀁 𑀫𑀕𑁆𑀕𑀁 𑀅𑀢𑀺𑀓𑁆𑀓𑀦𑁆𑀢𑁄. 𑀲𑁄 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀯𑁂𑀮𑀸𑀬 𑀭𑀸𑀚𑀕𑀳𑀁 𑀧𑀢𑁆𑀯𑀸 𑀲𑀢𑁆𑀣𑀸 𑀓𑀳𑀁 𑀯𑀲𑀢𑀻𑀢𑀺 𑀧𑀼𑀘𑁆𑀙𑀺. 𑀓𑀼𑀢𑁄 𑀦𑀼, 𑀪𑀦𑁆𑀢𑁂, 𑀆𑀕𑀢𑁄𑀢𑀺? 𑀇𑀢𑁄 𑀉𑀢𑁆𑀢𑀭𑀢𑁄𑀢𑀺. 𑀲𑀢𑁆𑀣𑀸 𑀢𑀼𑀬𑁆𑀳𑀁 𑀆𑀕𑀢𑀫𑀕𑁆𑀕𑁂 𑀇𑀢𑁄 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀬𑁄𑀚𑀦𑀫𑀢𑁆𑀢𑁂 𑀲𑀸𑀯𑀢𑁆𑀣𑀺 𑀦𑀸𑀫 𑀅𑀢𑁆𑀣𑀺, 𑀢𑀢𑁆𑀣 𑀯𑀲𑀢𑀻𑀢𑀺. 𑀓𑀼𑀮𑀧𑀼𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀤𑀸𑀦𑀺 𑀅𑀓𑀸𑀮𑁄 𑀦 𑀲𑀓𑁆𑀓𑀸 𑀕𑀦𑁆𑀢𑀼𑀁, 𑀅𑀚𑁆𑀚 𑀇𑀥𑁂𑀯 𑀯𑀲𑀺𑀢𑁆𑀯𑀸 𑀲𑁆𑀯𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺. 𑀢𑀢𑁄 𑁋 ‘‘𑀯𑀺𑀓𑀸𑀮𑁂 𑀲𑀫𑁆𑀧𑀢𑁆𑀢𑀧𑀩𑁆𑀩𑀚𑀺𑀢𑀸 𑀓𑀳𑀁 𑀯𑀲𑀦𑁆𑀢𑀻’’𑀢𑀺 𑀧𑀼𑀘𑁆𑀙𑀺. 𑀇𑀫𑀸𑀬 𑀓𑀼𑀫𑁆𑀪𑀓𑀸𑀭𑀲𑀸𑀮𑀸𑀬, 𑀪𑀦𑁆𑀢𑁂𑀢𑀺. 𑀅𑀣 𑀲𑁄 𑀢𑀁 𑀓𑀼𑀫𑁆𑀪𑀓𑀸𑀭𑀁 𑀬𑀸𑀘𑀺𑀢𑁆𑀯𑀸 𑀢𑀢𑁆𑀣 𑀯𑀸𑀲𑀢𑁆𑀣𑀸𑀬 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀺.

𑀪𑀕𑀯𑀸𑀧𑀺 𑀢𑀁𑀤𑀺𑀯𑀲𑀁 𑀧𑀘𑁆𑀘𑀽𑀲𑀓𑀸𑀮𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀧𑀼𑀓𑁆𑀓𑀼𑀲𑀸𑀢𑀺𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀓𑀼𑀮𑀧𑀼𑀢𑁆𑀢𑁄 𑀲𑀳𑀸𑀬𑁂𑀦 𑀧𑁂𑀲𑀺𑀢𑀁 𑀲𑀸𑀲𑀦𑀫𑀢𑁆𑀢𑀓𑀁 𑀯𑀸𑀘𑁂𑀢𑁆𑀯𑀸 𑀅𑀢𑀺𑀭𑁂𑀓𑀢𑀺𑀬𑁄𑀚𑀦𑀲𑀢𑀺𑀓𑀁 𑀫𑀳𑀸𑀭𑀚𑁆𑀚𑀁 𑀧𑀳𑀸𑀬 𑀫𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑁆𑀯𑀸 𑀅𑀝𑁆𑀞𑀳𑀺 𑀊𑀦𑀓𑀸𑀦𑀺 𑀤𑁆𑀯𑁂 𑀬𑁄𑀚𑀦𑀲𑀢𑀸𑀦𑀺 𑀅𑀢𑀺𑀓𑁆𑀓𑀫𑁆𑀫 𑀭𑀸𑀚𑀕𑀳𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀫𑀬𑀺 𑀅𑀕𑀘𑁆𑀙𑀦𑁆𑀢𑁂 𑀧𑀦 𑀢𑀻𑀡𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀅𑀧𑁆𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀏𑀓𑀭𑀢𑁆𑀢𑀺𑀯𑀸𑀲𑁂𑀦 𑀅𑀦𑀸𑀣𑀓𑀸𑀮𑀓𑀺𑀭𑀺𑀬𑀁 𑀓𑀭𑀺𑀲𑁆𑀲𑀢𑀺, 𑀫𑀬𑀺 𑀧𑀦 𑀕𑀢𑁂 𑀢𑀻𑀡𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀢𑀺. 𑀚𑀦𑀲𑀗𑁆𑀕𑀳𑀢𑁆𑀣𑀸𑀬𑁂𑀯 𑀧𑀦 𑀫𑀬𑀸 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸, 𑀓𑀭𑀺𑀲𑁆𑀲𑀸𑀫𑀺 𑀢𑀲𑁆𑀲 𑀲𑀗𑁆𑀕𑀳’’𑀦𑁆𑀢𑀺 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑁄 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀅𑀢𑁆𑀢𑀤𑀭𑀣𑀓𑀺𑀮𑀫𑀣𑀁 𑀧𑀝𑀺𑀧𑀲𑁆𑀲𑀫𑁆𑀪𑁂𑀢𑁆𑀯𑀸 𑁋 ‘‘𑀓𑀼𑀮𑀧𑀼𑀢𑁆𑀢𑁄 𑀫𑀬𑀺 𑀕𑀸𑀭𑀯𑁂𑀦 𑀤𑀼𑀓𑁆𑀓𑀭𑀁 𑀅𑀓𑀸𑀲𑀺, 𑀅𑀢𑀺𑀭𑁂𑀓𑀬𑁄𑀚𑀦𑀲𑀢𑀁 𑀭𑀚𑁆𑀚𑀁 𑀧𑀳𑀸𑀬 𑀅𑀦𑁆𑀢𑀫𑀲𑁄 𑀫𑀼𑀔𑀥𑁄𑀯𑀦𑀤𑀸𑀬𑀓𑀫𑁆𑀧𑀺 𑀘𑁂𑀝𑀓𑀁 𑀅𑀕𑁆𑀕𑀳𑁂𑀢𑁆𑀯𑀸 𑀏𑀓𑀓𑁄𑀯 𑀦𑀺𑀓𑁆𑀔𑀦𑁆𑀢𑁄’’𑀢𑀺 𑀲𑀸𑀭𑀺𑀧𑀼𑀢𑁆𑀢𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀻𑀲𑀼 𑀓𑀜𑁆𑀘𑀺 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀏𑀓𑀓𑁄𑀯 𑀦𑀺𑀓𑁆𑀔𑀦𑁆𑀢𑁄. 𑀕𑀘𑁆𑀙𑀦𑁆𑀢𑁄 𑀘 𑀦𑁂𑀯 𑀆𑀓𑀸𑀲𑁂 𑀉𑀧𑁆𑀧𑀢𑀺, 𑀦 𑀧𑀣𑀯𑀺𑀁 𑀲𑀁𑀔𑀺𑀧𑀺, 𑁋 ‘‘𑀓𑀼𑀮𑀧𑀼𑀢𑁆𑀢𑁄 𑀫𑀫 𑀮𑀚𑁆𑀚𑀫𑀸𑀦𑁄 𑀳𑀢𑁆𑀣𑀺𑀅𑀲𑁆𑀲𑀭𑀣𑀲𑀼𑀯𑀡𑁆𑀡𑀲𑀺𑀯𑀺𑀓𑀸𑀤𑀻𑀲𑀼 𑀏𑀓𑀬𑀸𑀦𑁂𑀧𑀺 𑀅𑀦𑀺𑀲𑀻𑀤𑀺𑀢𑁆𑀯𑀸 𑀅𑀦𑁆𑀢𑀫𑀲𑁄 𑀏𑀓𑀧𑀝𑀮𑀺𑀓𑀁 𑀉𑀧𑀸𑀳𑀦𑀫𑁆𑀧𑀺 𑀅𑀦𑀸𑀭𑀼𑀬𑁆𑀳 𑀧𑀡𑁆𑀡𑀘𑁆𑀙𑀢𑁆𑀢𑀓𑀫𑁆𑀧𑀺 𑀅𑀕𑁆𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄, 𑀫𑀬𑀸𑀧𑀺 𑀧𑀤𑀲𑀸𑀯 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀧𑀦 𑀘𑀺𑀦𑁆𑀢𑁂𑀢𑁆𑀯𑀸 𑀧𑀤𑀲𑀸𑀯 𑀅𑀕𑀫𑀸𑀲𑀺.

𑀲𑁄 𑀅𑀲𑀻𑀢𑀺 𑀅𑀦𑀼𑀩𑁆𑀬𑀜𑁆𑀚𑀦𑀸𑀦𑀺 𑀩𑁆𑀬𑀸𑀫𑀧𑁆𑀧𑀪𑀸 𑀩𑀸𑀢𑁆𑀢𑀺𑀁𑀲 𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀸𑀦𑀻𑀢𑀺 𑀇𑀫𑀁 𑀩𑀼𑀤𑁆𑀥𑀲𑀺𑀭𑀺𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀯𑀮𑀸𑀳𑀓𑀧𑀝𑀺𑀘𑁆𑀙𑀦𑁆𑀦𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀅𑀜𑁆𑀜𑀢𑀭𑀪𑀺𑀓𑁆𑀔𑀼𑀯𑁂𑀲𑁂𑀦 𑀕𑀘𑁆𑀙𑀦𑁆𑀢𑁄 𑀏𑀓𑀧𑀘𑁆𑀙𑀸𑀪𑀢𑁆𑀢𑁂𑀦𑁂𑀯 𑀧𑀜𑁆𑀘𑀘𑀢𑁆𑀢𑀸𑀮𑀻𑀲 𑀬𑁄𑀚𑀦𑀸𑀦𑀺 𑀅𑀢𑀺𑀓𑁆𑀓𑀫𑁆𑀫 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀮𑀻𑀯𑁂𑀮𑀸𑀬 𑀓𑀼𑀮𑀧𑀼𑀢𑁆𑀢𑁂 𑀧𑀯𑀺𑀝𑁆𑀞𑀫𑀢𑁆𑀢𑁂𑀬𑁂𑀯 𑀢𑀁 𑀓𑀼𑀫𑁆𑀪𑀓𑀸𑀭𑀲𑀸𑀮𑀁 𑀧𑀸𑀧𑀼𑀡𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦, 𑀧𑀼𑀓𑁆𑀓𑀼𑀲𑀸𑀢𑀺, 𑀦𑀸𑀫 𑀓𑀼𑀮𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀲𑀤𑁆𑀥𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀲𑁄 𑀢𑀲𑁆𑀫𑀺𑀁 𑀓𑀼𑀫𑁆𑀪𑀓𑀸𑀭𑀸𑀯𑁂𑀲𑀦𑁂 𑀧𑀞𑀫𑀁 𑀯𑀸𑀲𑀽𑀧𑀕𑀢𑁄 𑀳𑁄𑀢𑀻’’𑀢𑀺.

𑀏𑀯𑀁 𑀕𑀦𑁆𑀢𑁆𑀯𑀸𑀧𑀺 𑀧𑀦 𑀪𑀕𑀯𑀸 𑁋 ‘‘𑀅𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀧𑀲𑀬𑁆𑀳 𑀓𑀼𑀫𑁆𑀪𑀓𑀸𑀭𑀲𑀸𑀮𑀁 𑀅𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑁂 𑀞𑀺𑀢𑁄𑀯 𑀓𑀼𑀮𑀧𑀼𑀢𑁆𑀢𑀁 𑀑𑀓𑀸𑀲𑀁 𑀓𑀸𑀭𑁂𑀦𑁆𑀢𑁄 𑀲𑀘𑁂 𑀢𑁂 𑀪𑀺𑀓𑁆𑀔𑀽𑀢𑀺𑀆𑀤𑀺𑀫𑀸𑀳. 𑀉𑀭𑀼𑀦𑁆𑀤𑀦𑁆𑀢𑀺 𑀯𑀺𑀯𑀺𑀢𑁆𑀢𑀁 𑀅𑀲𑀫𑁆𑀩𑀸𑀥𑀁. 𑀯𑀺𑀳𑀭𑀢𑀸𑀬𑀲𑁆𑀫𑀸 𑀬𑀣𑀸𑀲𑀼𑀔𑀦𑁆𑀢𑀺 𑀬𑁂𑀦 𑀬𑁂𑀦 𑀇𑀭𑀺𑀬𑀸𑀧𑀣𑁂𑀦 𑀨𑀸𑀲𑀼 𑀳𑁄𑀢𑀺, 𑀢𑁂𑀦 𑀢𑁂𑀦 𑀬𑀣𑀸𑀲𑀼𑀔𑀁 𑀆𑀬𑀲𑁆𑀫𑀸 𑀯𑀺𑀳𑀭𑀢𑀽𑀢𑀺 𑀑𑀓𑀸𑀲𑀁 𑀅𑀓𑀸𑀲𑀺. 𑀅𑀢𑀺𑀭𑁂𑀓𑀢𑀺𑀬𑁄𑀚𑀦𑀲𑀢𑀜𑁆𑀳𑀺 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁄 𑀓𑀼𑀮𑀧𑀼𑀢𑁆𑀢𑁄 𑀧𑀭𑀲𑁆𑀲 𑀙𑀟𑁆𑀟𑀺𑀢𑀧𑀢𑀺𑀢𑀁 𑀓𑀼𑀫𑁆𑀪𑀓𑀸𑀭𑀲𑀸𑀮𑀁 𑀓𑀺𑀁 𑀅𑀜𑁆𑀜𑀲𑁆𑀲 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑁄 𑀫𑀘𑁆𑀙𑀭𑀸𑀬𑀺𑀲𑁆𑀲𑀢𑀺. 𑀏𑀓𑀘𑁆𑀘𑁂 𑀧𑀦 𑀫𑁄𑀖𑀧𑀼𑀭𑀺𑀲𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀆𑀯𑀸𑀲𑀫𑀘𑁆𑀙𑀭𑀺𑀬𑀸𑀤𑀻𑀳𑀺 𑀅𑀪𑀺𑀪𑀽𑀢𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀫𑀬𑁆𑀳𑀁 𑀓𑀼𑀝𑀺 𑀫𑀬𑁆𑀳𑀁 𑀧𑀭𑀺𑀯𑁂𑀡𑀦𑁆𑀢𑀺 𑀅𑀜𑁆𑀜𑁂𑀲𑀁 𑀅𑀯𑀸𑀲𑀸𑀬 𑀧𑀭𑀓𑁆𑀓𑀫𑀦𑁆𑀢𑀺. 𑀦𑀺𑀲𑀻𑀤𑀻𑀢𑀺 𑀅𑀘𑁆𑀘𑀦𑁆𑀢𑀲𑀼𑀔𑀼𑀫𑀸𑀮𑁄 𑀮𑁄𑀓𑀦𑀸𑀣𑁄 𑀤𑁂𑀯𑀯𑀺𑀫𑀸𑀦𑀲𑀤𑀺𑀲𑀁 𑀕𑀦𑁆𑀥𑀓𑀼𑀝𑀺𑀁 𑀧𑀳𑀸𑀬 𑀢𑀢𑁆𑀣 𑀢𑀢𑁆𑀣 𑀯𑀺𑀧𑁆𑀧𑀓𑀺𑀡𑁆𑀡𑀙𑀸𑀭𑀺𑀓𑀸𑀬 𑀪𑀺𑀦𑁆𑀦𑀪𑀸𑀚𑀦𑀢𑀺𑀡𑀧𑀮𑀸𑀲𑀓𑀼𑀓𑁆𑀓𑀼𑀝𑀲𑀽𑀓𑀭𑀯𑀘𑁆𑀘𑀸𑀤𑀺𑀲𑀁𑀓𑀺𑀮𑀺𑀝𑁆𑀞𑀸𑀬 𑀲𑀗𑁆𑀓𑀸𑀭𑀝𑁆𑀞𑀸𑀦𑀲𑀤𑀺𑀲𑀸𑀬 𑀓𑀼𑀫𑁆𑀪𑀓𑀸𑀭𑀲𑀸𑀮𑀸𑀬 𑀢𑀺𑀡𑀲𑀦𑁆𑀣𑀸𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀧𑀁𑀲𑀼𑀓𑀽𑀮𑀘𑀻𑀯𑀭𑀁 𑀧𑀜𑁆𑀜𑀧𑁂𑀢𑁆𑀯𑀸 𑀤𑁂𑀯𑀯𑀺𑀫𑀸𑀦𑀲𑀤𑀺𑀲𑀁 𑀤𑀺𑀩𑁆𑀩𑀕𑀦𑁆𑀥𑀲𑀼𑀕𑀦𑁆𑀥𑀁 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑁄 𑀯𑀺𑀬 𑀦𑀺𑀲𑀻𑀤𑀺.

𑀇𑀢𑀺 𑀪𑀕𑀯𑀸𑀧𑀺 𑀅𑀲𑀫𑁆𑀪𑀺𑀦𑁆𑀦𑀫𑀳𑀸𑀲𑀫𑁆𑀫𑀢𑀯𑀁𑀲𑁂 𑀉𑀧𑁆𑀧𑀦𑁆𑀦𑁄, 𑀓𑀼𑀮𑀧𑀼𑀢𑁆𑀢𑁄𑀧𑀺 𑀔𑀢𑁆𑀢𑀺𑀬𑀕𑀩𑁆𑀪𑁂 𑀯𑀟𑁆𑀠𑀺𑀢𑁄. 𑀪𑀕𑀯𑀸𑀧𑀺 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑁄, 𑀓𑀼𑀮𑀧𑀼𑀢𑁆𑀢𑁄𑀧𑀺 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑁄. 𑀪𑀕𑀯𑀸𑀧𑀺 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑁄, 𑀓𑀼𑀮𑀧𑀼𑀢𑁆𑀢𑁄𑀧𑀺. 𑀪𑀕𑀯𑀸𑀧𑀺 𑀲𑀼𑀯𑀡𑁆𑀡𑀯𑀡𑁆𑀡𑁄, 𑀓𑀼𑀮𑀧𑀼𑀢𑁆𑀢𑁄𑀧𑀺. 𑀪𑀕𑀯𑀸𑀧𑀺 𑀲𑀫𑀸𑀧𑀢𑁆𑀢𑀺𑀮𑀸𑀪𑀻, 𑀓𑀼𑀮𑀧𑀼𑀢𑁆𑀢𑁄𑀧𑀺. 𑀇𑀢𑀺 𑀤𑁆𑀯𑁂𑀧𑀺 𑀔𑀢𑁆𑀢𑀺𑀬𑀸 𑀤𑁆𑀯𑁂𑀧𑀺 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑀸 𑀤𑁆𑀯𑁂𑀧𑀺 𑀭𑀸𑀚𑀧𑀩𑁆𑀩𑀚𑀺𑀢𑀸 𑀤𑁆𑀯𑁂𑀧𑀺 𑀲𑀼𑀯𑀡𑁆𑀡𑀯𑀡𑁆𑀡𑀸 𑀤𑁆𑀯𑁂𑀧𑀺 𑀲𑀫𑀸𑀧𑀢𑁆𑀢𑀺𑀮𑀸𑀪𑀺𑀦𑁄 𑀓𑀼𑀫𑁆𑀪𑀓𑀸𑀭𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀢𑀺 𑀢𑁂𑀳𑀺 𑀓𑀼𑀫𑁆𑀪𑀓𑀸𑀭𑀲𑀸𑀮𑀸 𑀅𑀢𑀺𑀯𑀺𑀬 𑀲𑁄𑀪𑀢𑀺, 𑀤𑁆𑀯𑀻𑀳𑀺 𑀲𑀻𑀳𑀸𑀤𑀻𑀳𑀺 𑀧𑀯𑀺𑀝𑁆𑀞𑀕𑀼𑀳𑀸𑀤𑀻𑀳𑀺 𑀆𑀳𑀭𑀺𑀢𑁆𑀯𑀸 𑀤𑀻𑀧𑁂𑀢𑀩𑁆𑀩𑀁. 𑀢𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀪𑀕𑀯𑀸 𑁋 ‘‘𑀲𑀼𑀔𑀼𑀫𑀸𑀮𑁄 𑀅𑀳𑀁 𑀧𑀭𑀫𑀲𑀼𑀔𑀼𑀫𑀸𑀮𑁄 𑀏𑀓𑀧𑀘𑁆𑀙𑀸𑀪𑀢𑁆𑀢𑁂𑀦 𑀧𑀜𑁆𑀘𑀘𑀢𑁆𑀢𑀸𑀮𑀻𑀲 𑀬𑁄𑀚𑀦𑀸𑀦𑀺 𑀆𑀕𑀢𑁄, 𑀫𑀼𑀳𑀼𑀢𑁆𑀢𑀁 𑀢𑀸𑀯 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑁆𑀯𑀸 𑀫𑀕𑁆𑀕𑀤𑀭𑀣𑀁 𑀧𑀝𑀺𑀧𑀲𑁆𑀲𑀫𑁆𑀪𑁂𑀫𑀻’’𑀢𑀺 𑀘𑀺𑀢𑁆𑀢𑀫𑁆𑀧𑀺 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑁄𑀯 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺. 𑀓𑀼𑀮𑀧𑀼𑀢𑁆𑀢𑁄𑀧𑀺 𑁋 ‘‘𑀤𑁆𑀯𑀸𑀦𑀯𑀼𑀢𑀺𑀬𑁄𑀚𑀦𑀲𑀢𑀁 𑀆𑀕𑀢𑁄𑀫𑁆𑀳𑀺, 𑀫𑀼𑀳𑀼𑀢𑁆𑀢𑀁 𑀢𑀸𑀯 𑀦𑀺𑀧𑀚𑁆𑀚𑀺𑀢𑁆𑀯𑀸 𑀫𑀕𑁆𑀕𑀤𑀭𑀣𑀁 𑀯𑀺𑀦𑁄𑀤𑁂𑀫𑀻’’𑀢𑀺 𑀘𑀺𑀢𑁆𑀢𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀦𑀺𑀲𑀻𑀤𑀫𑀸𑀦𑁄𑀯 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺. 𑀇𑀤𑀁 𑀲𑀦𑁆𑀥𑀸𑀬 𑀅𑀣 𑀔𑁄 𑀪𑀕𑀯𑀸 𑀩𑀳𑀼𑀤𑁂𑀯 𑀭𑀢𑁆𑀢𑀺𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀦𑀦𑀼 𑀘 𑀪𑀕𑀯𑀸 𑀓𑀼𑀮𑀧𑀼𑀢𑁆𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀆𑀕𑀢𑁄, 𑀓𑀲𑁆𑀫𑀸 𑀦 𑀤𑁂𑀲𑁂𑀲𑀻𑀢𑀺? 𑀓𑀼𑀮𑀧𑀼𑀢𑁆𑀢𑀲𑁆𑀲 𑀫𑀕𑁆𑀕𑀤𑀭𑀣𑁄 𑀅𑀧𑁆𑀧𑀝𑀺𑀧𑀲𑁆𑀲𑀤𑁆𑀥𑁄, 𑀦 𑀲𑀓𑁆𑀔𑀺𑀲𑁆𑀲𑀢𑀺 𑀥𑀫𑁆𑀫𑀤𑁂𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁, 𑀲𑁄 𑀢𑀸𑀯𑀲𑁆𑀲 𑀧𑀝𑀺𑀧𑀲𑁆𑀲𑀫𑁆𑀪𑀢𑀽𑀢𑀺 𑀦 𑀤𑁂𑀲𑁂𑀲𑀺. 𑀅𑀧𑀭𑁂 𑁋 ‘‘𑀭𑀸𑀚𑀕𑀳𑀁 𑀦𑀸𑀫 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀁 𑀅𑀯𑀺𑀯𑀺𑀢𑁆𑀢𑀁 𑀤𑀲𑀳𑀺 𑀲𑀤𑁆𑀤𑁂𑀳𑀺, 𑀲𑁄 𑀲𑀤𑁆𑀤𑁄 𑀤𑀺𑀬𑀟𑁆𑀠𑀬𑀸𑀫𑀫𑀢𑁆𑀢𑁂𑀦 𑀲𑀦𑁆𑀦𑀺𑀲𑀻𑀤𑀢𑀺, 𑀢𑀁 𑀆𑀕𑀫𑁂𑀦𑁆𑀢𑁄 𑀦 𑀤𑁂𑀲𑁂𑀲𑀻’’𑀢𑀺 𑀯𑀤𑀦𑁆𑀢𑀺. 𑀢𑀁 𑀅𑀓𑀸𑀭𑀡𑀁, 𑀩𑁆𑀭𑀳𑁆𑀫𑀮𑁄𑀓𑀧𑁆𑀧𑀫𑀸𑀡𑀫𑁆𑀧𑀺 𑀳𑀺 𑀲𑀤𑁆𑀤𑀁 𑀪𑀕𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀯𑀽𑀧𑀲𑀫𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀫𑀕𑁆𑀕𑀤𑀭𑀣𑀯𑀽𑀧𑀲𑀫𑀁 𑀆𑀕𑀫𑁂𑀦𑁆𑀢𑁄𑀬𑁂𑀯 𑀧𑀦 𑀦 𑀤𑁂𑀲𑁂𑀲𑀺.

𑀢𑀢𑁆𑀣 𑀩𑀳𑀼𑀤𑁂𑀯 𑀭𑀢𑁆𑀢𑀺𑀦𑁆𑀢𑀺 𑀤𑀺𑀬𑀟𑁆𑀠𑀬𑀸𑀫𑀫𑀢𑁆𑀢𑀁. 𑀏𑀢𑀤𑀳𑁄𑀲𑀻𑀢𑀺 𑀪𑀕𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀲𑀼𑀯𑀡𑁆𑀡𑀯𑀺𑀫𑀸𑀦𑁂 𑀫𑀡𑀺𑀲𑀻𑀳𑀧𑀜𑁆𑀚𑀭𑀁 𑀯𑀺𑀯𑀭𑀦𑁆𑀢𑁄 𑀯𑀺𑀬 𑀧𑀜𑁆𑀘𑀧𑀲𑀸𑀤𑀧𑁆𑀧𑀝𑀺𑀫𑀡𑁆𑀟𑀺𑀢𑀸𑀦𑀺 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑁂𑀲𑀺, 𑀅𑀣𑀲𑁆𑀲 𑀳𑀢𑁆𑀣𑀓𑀼𑀓𑁆𑀓𑀼𑀘𑁆𑀘𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀲𑀻𑀲𑀓𑀫𑁆𑀧𑀦𑀯𑀺𑀭𑀳𑀺𑀢𑀁 𑀲𑀼𑀦𑀺𑀔𑀸𑀢𑀇𑀦𑁆𑀤𑀔𑀻𑀮𑀁 𑀯𑀺𑀬 𑀦𑀺𑀘𑁆𑀘𑀮𑀁 𑀅𑀯𑀺𑀩𑁆𑀪𑀦𑁆𑀢𑀁 𑀲𑀼𑀯𑀡𑁆𑀡𑀧𑀝𑀺𑀫𑀁 𑀯𑀺𑀬 𑀦𑀺𑀲𑀺𑀦𑁆𑀦𑀁 𑀓𑀼𑀮𑀧𑀼𑀢𑁆𑀢𑀁 𑀤𑀺𑀲𑁆𑀯𑀸 𑀏𑀢𑀁 𑁋 ‘‘𑀧𑀸𑀲𑀸𑀤𑀺𑀓𑀁 𑀔𑁄’’𑀢𑀺𑀆𑀤𑀺 𑀅𑀳𑁄𑀲𑀺. 𑀢𑀢𑁆𑀣 𑀧𑀸𑀲𑀸𑀤𑀺𑀓𑀦𑁆𑀢𑀺 𑀧𑀲𑀸𑀤𑀸𑀯𑀳𑀁. 𑀪𑀸𑀯𑀦𑀧𑀼𑀁𑀲𑀓𑀁 𑀧𑀦𑁂𑀢𑀁, 𑀧𑀸𑀲𑀸𑀤𑀺𑀓𑁂𑀦 𑀇𑀭𑀺𑀬𑀸𑀧𑀣𑁂𑀦 𑀇𑀭𑀺𑀬𑀢𑀺. 𑀬𑀣𑀸 𑀇𑀭𑀺𑀬𑀢𑁄 𑀇𑀭𑀺𑀬𑀸𑀧𑀣𑁄 𑀧𑀸𑀲𑀸𑀤𑀺𑀓𑁄 𑀳𑁄𑀢𑀺, 𑀏𑀯𑀁 𑀇𑀭𑀺𑀬𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀘𑀢𑀽𑀲𑀼 𑀳𑀺 𑀇𑀭𑀺𑀬𑀸𑀧𑀣𑁂𑀲𑀼 𑀢𑀬𑁄 𑀇𑀭𑀺𑀬𑀸𑀧𑀣𑀸 𑀦 𑀲𑁄𑀪𑀦𑁆𑀢𑀺. 𑀕𑀘𑁆𑀙𑀦𑁆𑀢𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄 𑀳𑀢𑁆𑀣𑀸 𑀘𑀮𑀦𑁆𑀢𑀺, 𑀧𑀸𑀤𑀸 𑀘𑀮𑀦𑁆𑀢𑀺, 𑀲𑀻𑀲𑀁 𑀘𑀮𑀢𑀺, 𑀞𑀺𑀢𑀲𑁆𑀲 𑀓𑀸𑀬𑁄 𑀣𑀤𑁆𑀥𑁄 𑀳𑁄𑀢𑀺, 𑀦𑀺𑀧𑀦𑁆𑀦𑀲𑁆𑀲𑀸𑀧𑀺 𑀇𑀭𑀺𑀬𑀸𑀧𑀣𑁄 𑀅𑀫𑀦𑀸𑀧𑁄 𑀳𑁄𑀢𑀺, 𑀧𑀘𑁆𑀙𑀸𑀪𑀢𑁆𑀢𑁂 𑀧𑀦 𑀤𑀺𑀯𑀸𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀘𑀫𑁆𑀫𑀔𑀡𑁆𑀟𑀁 𑀧𑀜𑁆𑀜𑀧𑁂𑀢𑁆𑀯𑀸 𑀲𑀼𑀥𑁄𑀢𑀳𑀢𑁆𑀣𑀧𑀸𑀤𑀲𑁆𑀲 𑀘𑀢𑀼𑀲𑀦𑁆𑀥𑀺𑀓𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀧𑀦𑁆𑀦𑀲𑁆𑀲𑁂𑀯 𑀇𑀭𑀺𑀬𑀸𑀧𑀣𑁄 𑀲𑁄𑀪𑀢𑀺. 𑀅𑀬𑀜𑁆𑀘 𑀓𑀼𑀮𑀧𑀼𑀢𑁆𑀢𑁄 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀇𑀢𑀺𑀲𑁆𑀲 𑀇𑀭𑀺𑀬𑀸𑀧𑀣𑁂𑀦𑁂𑀯 𑀧𑀲𑀦𑁆𑀦𑁄 𑀪𑀕𑀯𑀸 𑁋 ‘‘𑀧𑀸𑀲𑀸𑀤𑀺𑀓𑀁 𑀔𑁄’’𑀢𑀺 𑀧𑀭𑀺𑀯𑀺𑀢𑀓𑁆𑀓𑁂𑀲𑀺.

𑀬𑀁𑀦𑀽𑀦𑀸𑀳𑀁 𑀧𑀼𑀘𑁆𑀙𑁂𑀬𑁆𑀬𑀦𑁆𑀢𑀺 𑀓𑀲𑁆𑀫𑀸 𑀧𑀼𑀘𑁆𑀙𑀢𑀺? 𑀓𑀺𑀁 𑀪𑀕𑀯𑀸 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑁆𑀲 𑀧𑀩𑁆𑀩𑀚𑀺𑀢𑀪𑀸𑀯𑀁 𑀦 𑀚𑀸𑀦𑀸𑀢𑀻𑀢𑀺? 𑀦𑁄 𑀦 𑀚𑀸𑀦𑀸𑀢𑀺, 𑀅𑀧𑀼𑀘𑁆𑀙𑀺𑀢𑁂 𑀧𑀦 𑀓𑀣𑀸 𑀦 𑀧𑀢𑀺𑀝𑁆𑀞𑀸𑀢𑀺, 𑀅𑀧𑀢𑀺𑀝𑁆𑀞𑀺𑀢𑀸𑀬 𑀓𑀣𑀸𑀬 𑀓𑀣𑀸 𑀦 𑀲𑀜𑁆𑀚𑀸𑀬𑀢𑀻𑀢𑀺 𑀓𑀣𑀸𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀁 𑀧𑀼𑀘𑁆𑀙𑀺.

𑀤𑀺𑀲𑁆𑀯𑀸 𑀘 𑀧𑀦 𑀚𑀸𑀦𑁂𑀬𑁆𑀬𑀸𑀲𑀻𑀢𑀺 𑀢𑀣𑀸𑀕𑀢𑀁 𑀩𑀼𑀤𑁆𑀥𑀲𑀺𑀭𑀺𑀬𑀸 𑀯𑀺𑀭𑁄𑀘𑀦𑁆𑀢𑀁 𑀅𑀬𑀁 𑀩𑀼𑀤𑁆𑀥𑁄𑀢𑀺 𑀲𑀩𑁆𑀩𑁂 𑀚𑀸𑀦𑀦𑁆𑀢𑀺. 𑀅𑀦𑀘𑁆𑀙𑀭𑀺𑀬𑀫𑁂𑀢𑀁 𑀚𑀸𑀦𑀦𑀁, 𑀩𑀼𑀤𑁆𑀥𑀲𑀺𑀭𑀺𑀁 𑀧𑀦 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀅𑀜𑁆𑀜𑀢𑀭𑀧𑀺𑀡𑁆𑀟𑀧𑀸𑀢𑀺𑀓𑀯𑁂𑀲𑁂𑀦 𑀘𑀭𑀦𑁆𑀢𑁄 𑀤𑀼𑀚𑁆𑀚𑀸𑀦𑁄 𑀳𑁄𑀢𑀺. 𑀇𑀘𑁆𑀘𑀸𑀬𑀲𑁆𑀫𑀸, 𑀧𑀼𑀓𑁆𑀓𑀼𑀲𑀸𑀢𑀺, ‘‘𑀦 𑀚𑀸𑀦𑁂𑀬𑁆𑀬’’𑀦𑁆𑀢𑀺 𑀲𑀪𑀸𑀯𑀫𑁂𑀯 𑀓𑀣𑁂𑀢𑀺. 𑀢𑀣𑀸 𑀳𑀺 𑀦𑀁 𑀏𑀓𑀓𑀼𑀫𑁆𑀪𑀓𑀸𑀭𑀲𑀸𑀮𑀸𑀬 𑀦𑀺𑀲𑀺𑀦𑁆𑀦𑀫𑁆𑀧𑀺 𑀦 𑀚𑀸𑀦𑀸𑀢𑀺.

𑀏𑀢𑀤𑀳𑁄𑀲𑀻𑀢𑀺 𑀫𑀕𑁆𑀕𑀤𑀭𑀣𑀲𑁆𑀲 𑀯𑀽𑀧𑀲𑀫𑀪𑀸𑀯𑀁 𑀜𑀢𑁆𑀯𑀸 𑀅𑀳𑁄𑀲𑀺. 𑀏𑀯𑀫𑀸𑀯𑀼𑀲𑁄𑀢𑀺 𑀓𑀼𑀮𑀧𑀼𑀢𑁆𑀢𑁄 𑀲𑀳𑀸𑀬𑁂𑀦 𑀧𑁂𑀲𑀺𑀢𑀁 𑀲𑀸𑀲𑀦𑀫𑀢𑁆𑀢𑀁 𑀯𑀸𑀘𑁂𑀢𑁆𑀯𑀸 𑀭𑀚𑁆𑀚𑀁 𑀧𑀳𑀸𑀬 𑀧𑀩𑁆𑀩𑀚𑀫𑀸𑀦𑁄 𑁋 ‘‘𑀤𑀲𑀩𑀮𑀲𑁆𑀲 𑀫𑀥𑀼𑀭𑀥𑀫𑁆𑀫𑀤𑁂𑀲𑀦𑀁 𑀲𑁄𑀢𑀼𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺. 𑀧𑀩𑁆𑀩𑀚𑀺𑀢𑁄, 𑀧𑀩𑁆𑀩𑀚𑀺𑀢𑁆𑀯𑀸 𑀏𑀢𑁆𑀢𑀓𑀁 𑀅𑀤𑁆𑀥𑀸𑀦𑀁 𑀆𑀕𑀘𑁆𑀙𑀦𑁆𑀢𑁄 𑁋 ‘‘𑀥𑀫𑁆𑀫𑀁 𑀢𑁂 𑀪𑀺𑀓𑁆𑀔𑀼 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀧𑀤𑀫𑀢𑁆𑀢𑀲𑁆𑀲 𑀯𑀢𑁆𑀢𑀸𑀭𑀁 𑀦𑀸𑀮𑀢𑁆𑀣, 𑀲𑁄 ‘‘𑀥𑀫𑁆𑀫𑀁 𑀢𑁂 𑀪𑀺𑀓𑁆𑀔𑀼 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀁 𑀓𑀺𑀁 𑀲𑀓𑁆𑀓𑀘𑁆𑀘𑀁 𑀦 𑀲𑀼𑀡𑀺𑀲𑁆𑀲𑀢𑀺. 𑀧𑀺𑀧𑀸𑀲𑀺𑀢𑀲𑁄𑀡𑁆𑀟𑁄 𑀯𑀺𑀬 𑀳𑀺 𑀧𑀺𑀧𑀸𑀲𑀺𑀢𑀳𑀢𑁆𑀣𑀻 𑀯𑀺𑀬 𑀘𑀸𑀬𑀁, 𑀢𑀲𑁆𑀫𑀸 𑀲𑀓𑁆𑀓𑀘𑁆𑀘𑀁 𑀲𑀯𑀦𑀁 𑀧𑀝𑀺𑀚𑀸𑀦𑀦𑁆𑀢𑁄 ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀆𑀳.

𑁩𑁪𑁩. 𑀙𑀥𑀸𑀢𑀼𑀭𑁄 𑀅𑀬𑀦𑁆𑀢𑀺 𑀪𑀕𑀯𑀸 𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀅𑀓𑀣𑁂𑀢𑁆𑀯𑀸 𑀆𑀤𑀺𑀢𑁄𑀯 𑀅𑀭𑀳𑀢𑁆𑀢𑀲𑁆𑀲 𑀧𑀤𑀝𑁆𑀞𑀸𑀦𑀪𑀽𑀢𑀁 𑀅𑀘𑁆𑀘𑀦𑁆𑀢𑀲𑀼𑀜𑁆𑀜𑀢𑀁 𑀯𑀺𑀧𑀲𑁆𑀲𑀦𑀸𑀮𑀓𑁆𑀔𑀡𑀫𑁂𑀯 𑀆𑀘𑀺𑀓𑁆𑀔𑀺𑀢𑀼𑀁 𑀆𑀭𑀤𑁆𑀥𑁄. 𑀬𑀲𑁆𑀲 𑀳𑀺 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀅𑀧𑀭𑀺𑀲𑀼𑀤𑁆𑀥𑀸 𑀳𑁄𑀢𑀺, 𑀢𑀲𑁆𑀲 𑀧𑀞𑀫𑀫𑁂𑀯 𑀲𑀻𑀮𑀲𑀁𑀯𑀭𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀁 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀁 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀁 𑀲𑀢𑁆𑀢 𑀲𑀤𑁆𑀥𑀫𑁆𑀫𑁂 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀻𑀢𑀺 𑀇𑀫𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀆𑀘𑀺𑀓𑁆𑀔𑀢𑀺. 𑀬𑀲𑁆𑀲 𑀧𑀦𑁂𑀲𑀸 𑀧𑀭𑀺𑀲𑀼𑀤𑁆𑀥𑀸, 𑀢𑀲𑁆𑀲 𑀢𑀁 𑀅𑀓𑀣𑁂𑀢𑁆𑀯𑀸 𑀅𑀭𑀳𑀢𑁆𑀢𑀲𑁆𑀲 𑀧𑀤𑀝𑁆𑀞𑀸𑀦𑀪𑀽𑀢𑀁 𑀯𑀺𑀧𑀲𑁆𑀲𑀦𑀫𑁂𑀯 𑀆𑀘𑀺𑀓𑁆𑀔𑀢𑀺. 𑀓𑀼𑀮𑀧𑀼𑀢𑁆𑀢𑀲𑁆𑀲 𑀘 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀧𑀭𑀺𑀲𑀼𑀤𑁆𑀥𑀸. 𑀢𑀣𑀸 𑀳𑀺 𑀅𑀦𑁂𑀦 𑀲𑀸𑀲𑀦𑀁 𑀯𑀸𑀘𑁂𑀢𑁆𑀯𑀸 𑀧𑀸𑀲𑀸𑀤𑀯𑀭𑀕𑀢𑁂𑀦𑁂𑀯 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀢𑀁, 𑀬𑀤𑀲𑁆𑀲 𑀤𑁆𑀯𑀸𑀦𑀯𑀼𑀢𑀺𑀬𑁄𑀚𑀦𑀲𑀪𑀁 𑀆𑀕𑀘𑁆𑀙𑀦𑁆𑀢𑀲𑁆𑀲 𑀬𑀸𑀦𑀓𑀺𑀘𑁆𑀘𑀁 𑀲𑀸𑀥𑁂𑀲𑀺, 𑀲𑀸𑀫𑀡𑁂𑀭𑀲𑀻𑀮𑀫𑁆𑀧𑀺𑀲𑁆𑀲 𑀧𑀭𑀺𑀧𑀼𑀡𑁆𑀡𑀁. 𑀢𑀲𑁆𑀫𑀸 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀅𑀓𑀣𑁂𑀢𑁆𑀯𑀸 𑀅𑀭𑀳𑀢𑁆𑀢𑀲𑁆𑀲 𑀧𑀤𑀝𑁆𑀞𑀸𑀦𑀪𑀽𑀢𑀁 𑀅𑀘𑁆𑀘𑀦𑁆𑀢𑀲𑀼𑀜𑁆𑀜𑀢𑀁 𑀯𑀺𑀧𑀲𑁆𑀲𑀦𑀸𑀮𑀓𑁆𑀔𑀡𑀫𑁂𑀯𑀲𑁆𑀲 𑀆𑀘𑀺𑀓𑁆𑀔𑀺𑀢𑀼𑀁 𑀆𑀭𑀤𑁆𑀥𑁄.

𑀢𑀢𑁆𑀣 𑀙𑀥𑀸𑀢𑀼𑀭𑁄𑀢𑀺 𑀥𑀸𑀢𑀼𑀬𑁄 𑀯𑀺𑀚𑁆𑀚𑀫𑀸𑀦𑀸, 𑀧𑀼𑀭𑀺𑀲𑁄 𑀅𑀯𑀺𑀚𑁆𑀚𑀫𑀸𑀦𑁄. 𑀪𑀕𑀯𑀸 𑀳𑀺 𑀓𑀢𑁆𑀣𑀘𑀺 𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀁 𑀤𑀲𑁆𑀲𑁂𑀢𑀺, 𑀓𑀢𑁆𑀣𑀘𑀺 𑀅𑀯𑀺𑀚𑁆𑀚𑀫𑀸𑀦𑁂𑀦 𑀯𑀺𑀚𑁆𑀚𑀫𑀸𑀦𑀁, 𑀓𑀢𑁆𑀣𑀘𑀺 𑀯𑀺𑀚𑁆𑀚𑀫𑀸𑀦𑁂𑀦 𑀯𑀺𑀚𑁆𑀚𑀫𑀸𑀦𑀁, 𑀓𑀢𑁆𑀣𑀘𑀺 𑀅𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀦𑁆𑀢𑀺 𑀲𑀩𑁆𑀩𑀸𑀲𑀯𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀇𑀥 𑀧𑀦 𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀲𑀘𑁂 𑀳𑀺 𑀪𑀕𑀯𑀸 𑀧𑀼𑀭𑀺𑀲𑁄𑀢𑀺 𑀧𑀡𑁆𑀡𑀢𑁆𑀢𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀥𑀸𑀢𑀼𑀬𑁄 𑀇𑀘𑁆𑀘𑁂𑀯 𑀯𑀢𑁆𑀯𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀬𑁆𑀬, 𑀓𑀼𑀮𑀧𑀼𑀢𑁆𑀢𑁄 𑀲𑀦𑁆𑀤𑁂𑀳𑀁 𑀓𑀭𑁂𑀬𑁆𑀬, 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑁂𑀬𑁆𑀬, 𑀤𑁂𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬. 𑀢𑀲𑁆𑀫𑀸 𑀢𑀣𑀸𑀕𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀧𑀼𑀭𑀺𑀲𑁄𑀢𑀺 𑀧𑀡𑁆𑀡𑀢𑁆𑀢𑀺𑀁 𑀧𑀳𑀸𑀬 ‘‘𑀲𑀢𑁆𑀢𑁄𑀢𑀺 𑀯𑀸 𑀧𑀼𑀭𑀺𑀲𑁄𑀢𑀺 𑀯𑀸 𑀧𑀼𑀕𑁆𑀕𑀮𑁄𑀢𑀺 𑀯𑀸 𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀫𑁂𑀯, 𑀧𑀭𑀫𑀢𑁆𑀣𑀢𑁄 𑀲𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀥𑀸𑀢𑀼𑀫𑀢𑁆𑀢𑁂𑀬𑁂𑀯 𑀘𑀺𑀢𑁆𑀢𑀁 𑀞𑀧𑀸𑀧𑁂𑀢𑁆𑀯𑀸 𑀢𑀻𑀡𑀺 𑀨𑀮𑀸𑀦𑀺 𑀧𑀝𑀺𑀯𑀺𑀚𑁆𑀛𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀅𑀦𑀗𑁆𑀕𑀡𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁫𑁭 𑀆𑀤𑀬𑁄) 𑀯𑀼𑀢𑁆𑀢𑀪𑀸𑀲𑀦𑁆𑀢𑀭𑀓𑀼𑀲𑀮𑁄 𑀢𑀸𑀬 𑀢𑀸𑀬 𑀪𑀸𑀲𑀸𑀬 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀸𑀧𑁂𑀦𑁆𑀢𑁄 𑀆𑀘𑀭𑀺𑀬𑁄 𑀯𑀺𑀬 𑀏𑀯𑀫𑀸𑀳.

𑀢𑀢𑁆𑀣 𑀙 𑀥𑀸𑀢𑀼𑀬𑁄 𑀅𑀲𑁆𑀲𑀸𑀢𑀺 𑀙𑀥𑀸𑀢𑀼𑀭𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀢𑁆𑀯𑀁 𑀧𑀼𑀭𑀺𑀲𑁄𑀢𑀺 𑀲𑀜𑁆𑀚𑀸𑀦𑀸𑀲𑀺, 𑀲𑁄 𑀙𑀥𑀸𑀢𑀼𑀓𑁄, 𑀦 𑀘𑁂𑀢𑁆𑀣 𑀧𑀭𑀫𑀢𑁆𑀣𑀢𑁄 𑀧𑀼𑀭𑀺𑀲𑁄 𑀅𑀢𑁆𑀣𑀺, 𑀧𑀼𑀭𑀺𑀲𑁄𑀢𑀺 𑀧𑀦 𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀫𑁂𑀯𑀸𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀘𑀢𑀼𑀭𑀸𑀥𑀺𑀝𑁆𑀞𑀸𑀦𑁄𑀢𑀺 𑀏𑀢𑁆𑀣 𑀅𑀥𑀺𑀝𑁆𑀞𑀸𑀦𑀁 𑀯𑀼𑀘𑁆𑀘𑀢𑀺 𑀧𑀢𑀺𑀝𑁆𑀞𑀸, 𑀘𑀢𑀼𑀧𑀢𑀺𑀝𑁆𑀞𑀸𑀦𑁄𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑁆𑀯𑀸𑀬𑀁 𑀪𑀺𑀓𑁆𑀔𑀼 𑀧𑀼𑀭𑀺𑀲𑁄 𑀙𑀥𑀸𑀢𑀼𑀭𑁄 𑀙𑀨𑀲𑁆𑀲𑀸𑀬𑀢𑀦𑁄 𑀅𑀝𑁆𑀞𑀸𑀭𑀲𑀫𑀦𑁄𑀧𑀯𑀺𑀘𑀸𑀭𑁄, 𑀲𑁄 𑀏𑀢𑁆𑀢𑁄𑀯 𑀯𑀺𑀯𑀝𑁆𑀝𑀺𑀢𑁆𑀯𑀸 𑀉𑀢𑁆𑀢𑀫𑀲𑀺𑀤𑁆𑀥𑀺𑀪𑀽𑀢𑀁 𑀅𑀭𑀳𑀢𑁆𑀢𑀁 𑀕𑀡𑁆𑀳𑀫𑀸𑀦𑁄 𑀇𑀫𑁂𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀧𑀢𑀺𑀝𑁆𑀞𑀸𑀬 𑀕𑀡𑁆𑀳𑀸𑀢𑀻𑀢𑀺 𑀘𑀢𑀼𑀭𑀸𑀥𑀺𑀝𑁆𑀞𑀸𑀦𑁄𑀢𑀺. 𑀬𑀢𑁆𑀣 𑀞𑀺𑀢𑀦𑁆𑀢𑀺 𑀬𑁂𑀲𑀼 𑀅𑀥𑀺𑀝𑁆𑀞𑀸𑀦𑁂𑀲𑀼 𑀧𑀢𑀺𑀝𑁆𑀞𑀺𑀢𑀁. 𑀫𑀜𑁆𑀜𑀲𑁆𑀲 𑀯𑀸 𑀦𑀧𑁆𑀧𑀯𑀢𑁆𑀢𑀦𑁆𑀢𑀻𑀢𑀺 𑀫𑀜𑁆𑀜𑀲𑁆𑀲 𑀯𑀸 𑀫𑀸𑀦𑀲𑁆𑀲 𑀯𑀸 𑀦𑀧𑁆𑀧𑀯𑀢𑁆𑀢𑀦𑁆𑀢𑀺. 𑀫𑀼𑀦𑀺 𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀔𑀻𑀡𑀸𑀲𑀯𑀫𑀼𑀦𑀺 𑀉𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀜𑁆𑀜𑀁 𑀦𑀧𑁆𑀧𑀫𑀚𑁆𑀚𑁂𑀬𑁆𑀬𑀸𑀢𑀺 𑀅𑀭𑀳𑀢𑁆𑀢𑀨𑀮𑀧𑀜𑁆𑀜𑀸𑀬 𑀧𑀝𑀺𑀯𑀺𑀚𑁆𑀛𑀦𑀢𑁆𑀣𑀁 𑀆𑀤𑀺𑀢𑁄𑀯 𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀁 𑀦𑀧𑁆𑀧𑀫𑀚𑁆𑀚𑁂𑀬𑁆𑀬. 𑀲𑀘𑁆𑀘𑀫𑀦𑀼𑀭𑀓𑁆𑀔𑁂𑀬𑁆𑀬𑀸𑀢𑀺 𑀧𑀭𑀫𑀢𑁆𑀣𑀲𑀘𑁆𑀘𑀲𑁆𑀲 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀢𑁆𑀣𑀁 𑀆𑀤𑀺𑀢𑁄𑀯 𑀯𑀘𑀻𑀲𑀘𑁆𑀘𑀁 𑀭𑀓𑁆𑀔𑁂𑀬𑁆𑀬. 𑀘𑀸𑀕𑀫𑀦𑀼𑀩𑁆𑀭𑀽𑀳𑁂𑀬𑁆𑀬𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑀧𑀭𑀺𑀘𑁆𑀘𑀸𑀕𑀓𑀭𑀡𑀢𑁆𑀣𑀁 𑀆𑀤𑀺𑀢𑁄𑀯 𑀓𑀺𑀮𑁂𑀲𑀧𑀭𑀺𑀘𑁆𑀘𑀸𑀕𑀁 𑀩𑁆𑀭𑀽𑀳𑁂𑀬𑁆𑀬. 𑀲𑀦𑁆𑀢𑀺𑀫𑁂𑀯 𑀲𑁄 𑀲𑀺𑀓𑁆𑀔𑁂𑀬𑁆𑀬𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑀯𑀽𑀧𑀲𑀫𑀦𑀢𑁆𑀣𑀁 𑀆𑀤𑀺𑀢𑁄𑀯 𑀓𑀺𑀮𑁂𑀲𑀯𑀽𑀧𑀲𑀫𑀦𑀁 𑀲𑀺𑀓𑁆𑀔𑁂𑀬𑁆𑀬. 𑀇𑀢𑀺 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀸𑀤𑀻𑀦𑀁 𑀅𑀥𑀺𑀕𑀫𑀢𑁆𑀣𑀸𑀬 𑀇𑀫𑀸𑀦𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀤𑀻𑀦𑀺 𑀧𑀼𑀩𑁆𑀩𑀪𑀸𑀕𑀸𑀥𑀺𑀝𑁆𑀞𑀸𑀦𑀸𑀦𑀺 𑀯𑀼𑀢𑁆𑀢𑀸𑀦𑀺.

𑁩𑁪𑁫. 𑀨𑀲𑁆𑀲𑀸𑀬𑀢𑀦𑀦𑁆𑀢𑀺 𑀨𑀲𑁆𑀲𑀲𑁆𑀲 𑀆𑀬𑀢𑀦𑀁, 𑀆𑀓𑀭𑁄𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀦𑁆𑀢𑀺𑀆𑀤𑀻𑀦𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸𑀦𑀁 𑀅𑀭𑀳𑀢𑁆𑀢𑀨𑀮𑀧𑀜𑁆𑀜𑀸𑀤𑀻𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁩𑁪𑁮. 𑀇𑀤𑀸𑀦𑀺 𑀦𑀺𑀓𑁆𑀔𑀺𑀢𑁆𑀢𑀫𑀸𑀢𑀺𑀓𑀸𑀯𑀲𑁂𑀦 ‘‘𑀬𑀢𑁆𑀣 𑀞𑀺𑀢𑀁 𑀫𑀜𑁆𑀜𑀲𑁆𑀲 𑀯𑀸 𑀦𑀧𑁆𑀧𑀯𑀢𑁆𑀢𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬, 𑀅𑀭𑀳𑀢𑁆𑀢𑁂 𑀧𑀦 𑀧𑀢𑁆𑀢𑁂 𑀧𑀼𑀦 ‘‘𑀧𑀜𑁆𑀜𑀁 𑀦𑀧𑁆𑀧𑀫𑀚𑁆𑀚𑁂𑀬𑁆𑀬𑀸’’𑀢𑀺𑀆𑀤𑀻𑀳𑀺 𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀇𑀢𑀺 𑀪𑀕𑀯𑀸 𑀫𑀸𑀢𑀺𑀓𑀁 𑀉𑀧𑁆𑀧𑀝𑀺𑀧𑀸𑀝𑀺𑀥𑀸𑀢𑀼𑀓𑀁 𑀞𑀧𑁂𑀢𑁆𑀯𑀸𑀧𑀺 𑀬𑀣𑀸𑀥𑀫𑁆𑀫𑀯𑀲𑁂𑀦𑁂𑀯 𑀯𑀺𑀪𑀗𑁆𑀕𑀁 𑀯𑀺𑀪𑀚𑀦𑁆𑀢𑁄 𑀧𑀜𑁆𑀜𑀁 𑀦𑀧𑁆𑀧𑀫𑀚𑁆𑀚𑁂𑀬𑁆𑀬𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑁄 𑀧𑀜𑁆𑀜𑀁 𑀧𑀫𑀚𑁆𑀚𑀢𑀺, 𑀓𑁄 𑀦𑀧𑁆𑀧𑀫𑀚𑁆𑀚𑀢𑀺? 𑀬𑁄 𑀢𑀸𑀯 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑁂𑀚𑁆𑀚𑀓𑀫𑁆𑀫𑀸𑀤𑀺𑀯𑀲𑁂𑀦 𑀏𑀓𑀯𑀻𑀲𑀢𑀺𑀯𑀺𑀥𑀸𑀬 𑀅𑀦𑁂𑀲𑀦𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁄 𑀧𑀩𑁆𑀩𑀚𑁆𑀚𑀸𑀦𑀼𑀭𑀽𑀧𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀁 𑀞𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀬𑀁 𑀧𑀜𑁆𑀜𑀁 𑀧𑀫𑀚𑁆𑀚𑀢𑀺 𑀦𑀸𑀫. 𑀬𑁄 𑀧𑀦 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑀧𑁆𑀧𑀸𑀬𑀁 𑀥𑀼𑀢𑀗𑁆𑀕𑀁 𑀲𑀫𑀸𑀤𑀸𑀬 𑀘𑀺𑀢𑁆𑀢𑀭𑀼𑀘𑀺𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀯𑀺𑀯𑀺𑀢𑁆𑀢𑀁 𑀲𑁂𑀦𑀸𑀲𑀦𑀁 𑀦𑀺𑀲𑁆𑀲𑀸𑀬 𑀓𑀲𑀺𑀡𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀁 𑀧𑀢𑁆𑀯𑀸 𑀅𑀚𑁆𑀚𑁂𑀯 𑀅𑀭𑀳𑀢𑁆𑀢𑀦𑁆𑀢𑀺 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀯𑀺𑀘𑀭𑀢𑀺, 𑀅𑀬𑀁 𑀧𑀜𑁆𑀜𑀁 𑀦𑀧𑁆𑀧𑀫𑀚𑁆𑀚𑀢𑀺 𑀦𑀸𑀫. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦 𑀏𑀲 𑀧𑀜𑁆𑀜𑀸𑀬 𑀅𑀧𑁆𑀧𑀫𑀸𑀤𑁄 𑀯𑀼𑀢𑁆𑀢𑁄. 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑁂 𑀧𑀦𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀳𑀢𑁆𑀣𑀺𑀧𑀤𑁄𑀧𑀫𑀲𑀼𑀢𑁆𑀢𑀸𑀤𑀻𑀲𑀼 𑀯𑀼𑀢𑁆𑀢𑀫𑁂𑀯.

𑁩𑁫𑁪. 𑀅𑀣𑀸𑀧𑀭𑀁 𑀯𑀺𑀜𑁆𑀜𑀸𑀡𑀁𑀬𑁂𑀯 𑀅𑀯𑀲𑀺𑀲𑁆𑀲𑀢𑀻𑀢𑀺 𑀅𑀬𑀫𑁆𑀧𑁂𑀢𑁆𑀣 𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀺. 𑀳𑁂𑀝𑁆𑀞𑀢𑁄 𑀳𑀺 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀺𑀢𑀁, 𑀇𑀤𑀸𑀦𑀺 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀁 𑀯𑁂𑀤𑀦𑀸𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀅𑀬𑀁 𑀤𑁂𑀲𑀦𑀸 𑀆𑀭𑀤𑁆𑀥𑀸. 𑀬𑀁 𑀯𑀸 𑀧𑀦𑁂𑀢𑀁 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀣𑀯𑀻𑀥𑀸𑀢𑀼𑀆𑀤𑀻𑀲𑀼 𑀆𑀕𑀫𑀦𑀺𑀬𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀓𑀫𑁆𑀫𑀓𑀸𑀭𑀓𑀯𑀺𑀜𑁆𑀜𑀸𑀡𑀁, 𑀢𑀁 𑀯𑀺𑀜𑁆𑀜𑀸𑀡𑀥𑀸𑀢𑀼𑀯𑀲𑁂𑀦 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄𑀧𑀺 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀅𑀯𑀲𑀺𑀲𑁆𑀲𑀢𑀻𑀢𑀺 𑀓𑀺𑀫𑀢𑁆𑀣𑀸𑀬 𑀅𑀯𑀲𑀺𑀲𑁆𑀲𑀢𑀺? 𑀲𑀢𑁆𑀣𑀼 𑀓𑀣𑀦𑀢𑁆𑀣𑀸𑀬 𑀓𑀼𑀮𑀧𑀼𑀢𑁆𑀢𑀲𑁆𑀲 𑀘 𑀧𑀝𑀺𑀯𑀺𑀚𑁆𑀛𑀦𑀢𑁆𑀣𑀸𑀬 𑀅𑀯𑀲𑀺𑀲𑁆𑀲𑀢𑀺. 𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁. 𑀧𑀭𑀺𑀬𑁄𑀤𑀸𑀢𑀦𑁆𑀢𑀺 𑀧𑀪𑀲𑁆𑀲𑀭𑀁. 𑀲𑀼𑀔𑀦𑁆𑀢𑀺𑀧𑀺 𑀯𑀺𑀚𑀸𑀦𑀸𑀢𑀻𑀢𑀺 𑀲𑀼𑀔𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 𑀲𑀼𑀔𑀯𑁂𑀤𑀦𑀁 𑀯𑁂𑀤𑀬𑀸𑀫𑀻𑀢𑀺 𑀧𑀚𑀸𑀦𑀸𑀢𑀺. 𑀲𑁂𑀲𑀧𑀤𑀤𑁆𑀯𑀬𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁂 𑀧𑀦𑀸𑀬𑀁 𑀯𑁂𑀤𑀦𑀸𑀓𑀣𑀸 𑀳𑁂𑀝𑁆𑀞𑀸 𑀦 𑀓𑀣𑀺𑀢𑀸 𑀪𑀯𑁂𑀬𑁆𑀬, 𑀇𑀥 𑀞𑀢𑁆𑀯𑀸 𑀓𑀣𑁂𑀢𑀼𑀁 𑀯𑀝𑁆𑀝𑁂𑀬𑁆𑀬. 𑀲𑀢𑀺𑀧𑀝𑁆𑀞𑀸𑀦𑁂 𑀧𑀦𑁂𑀲𑀸 𑀓𑀣𑀺𑀢𑀸𑀯𑀸𑀢𑀺 𑀢𑀢𑁆𑀣 𑀓𑀣𑀺𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀔𑀯𑁂𑀤𑀦𑀺𑀬𑀦𑁆𑀢𑀺 𑀏𑀯𑀫𑀸𑀤𑀺 𑀧𑀘𑁆𑀘𑀬𑀯𑀲𑁂𑀦 𑀉𑀤𑀬𑀢𑁆𑀣𑀗𑁆𑀕𑀫𑀦𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀼𑀔𑀯𑁂𑀤𑀦𑀺𑀬𑀦𑁆𑀢𑀺 𑀲𑀼𑀔𑀯𑁂𑀤𑀦𑀸𑀬 𑀧𑀘𑁆𑀘𑀬𑀪𑀽𑀢𑀁. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁩𑁬𑁦. 𑀉𑀧𑁂𑀓𑁆𑀔𑀸𑀬𑁂𑀯 𑀅𑀯𑀲𑀺𑀲𑁆𑀲𑀢𑀻𑀢𑀺 𑀏𑀢𑁆𑀢𑀸𑀯𑀢𑀸 𑀳𑀺 𑀬𑀣𑀸 𑀦𑀸𑀫 𑀙𑁂𑀓𑁂𑀦 𑀫𑀡𑀺𑀓𑀸𑀭𑀸𑀘𑀭𑀺𑀬𑁂𑀦 𑀯𑀚𑀺𑀭𑀲𑀽𑀘𑀺𑀬𑀸 𑀯𑀺𑀚𑁆𑀛𑀺𑀢𑁆𑀯𑀸 𑀘𑀫𑁆𑀫𑀔𑀡𑁆𑀟𑁂 𑀧𑀸𑀢𑁂𑀢𑁆𑀯𑀸 𑀧𑀸𑀢𑁂𑀢𑁆𑀯𑀸 𑀤𑀺𑀦𑁆𑀦𑀫𑀼𑀢𑁆𑀢𑀁 𑀅𑀦𑁆𑀢𑁂𑀯𑀸𑀲𑀺𑀓𑁄 𑀕𑀳𑁂𑀢𑁆𑀯𑀸 𑀕𑀳𑁂𑀢𑁆𑀯𑀸 𑀲𑀼𑀢𑁆𑀢𑀕𑀢𑀁 𑀓𑀭𑁄𑀦𑁆𑀢𑁄 𑀫𑀼𑀢𑁆𑀢𑁄𑀮𑀫𑁆𑀩𑀓𑀫𑀼𑀢𑁆𑀢𑀚𑀸𑀮𑀸𑀤𑀻𑀦𑀺 𑀓𑀭𑁄𑀢𑀺, 𑀏𑀯𑀫𑁂𑀯 𑀪𑀕𑀯𑀢𑀸 𑀓𑀣𑁂𑀢𑁆𑀯𑀸 𑀓𑀣𑁂𑀢𑁆𑀯𑀸 𑀤𑀺𑀦𑁆𑀦𑀁 𑀓𑀫𑁆𑀫𑀝𑁆𑀞𑀸𑀦𑀁 𑀅𑀬𑀁 𑀓𑀼𑀮𑀧𑀼𑀢𑁆𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀧𑀕𑀼𑀡𑀁 𑀅𑀓𑀸𑀲𑀻𑀢𑀺 𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀫𑁆𑀧𑀺𑀲𑁆𑀲 𑀅𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀫𑁆𑀧𑀺 𑀧𑀕𑀼𑀡𑀁 𑀚𑀸𑀢𑀁, 𑀅𑀣 𑀪𑀕𑀯𑀸 ‘‘𑀅𑀣𑀸𑀧𑀭𑀁 𑀉𑀧𑁂𑀓𑁆𑀔𑀸𑀬𑁂𑀯 𑀅𑀯𑀲𑀺𑀲𑁆𑀲𑀢𑀻’’𑀢𑀺 𑀆𑀳.

𑀓𑀺𑀫𑀢𑁆𑀣𑀁 𑀧𑀦 𑀅𑀯𑀲𑀺𑀲𑁆𑀲𑀢𑀻𑀢𑀺? 𑀲𑀢𑁆𑀣𑀼 𑀓𑀣𑀦𑀢𑁆𑀣𑀁. 𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑀢𑁆𑀣𑀦𑁆𑀢𑀺𑀧𑀺 𑀯𑀤𑀦𑁆𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀁. 𑀓𑀼𑀮𑀧𑀼𑀢𑁆𑀢𑁂𑀦 𑀳𑀺 𑀲𑀳𑀸𑀬𑀲𑁆𑀲 𑀲𑀸𑀲𑀦𑀁 𑀯𑀸𑀘𑁂𑀢𑁆𑀯𑀸 𑀧𑀸𑀲𑀸𑀤𑀢𑀮𑁂 𑀞𑀺𑀢𑁂𑀦𑁂𑀯 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀢𑀁, 𑀬𑀤𑀲𑁆𑀲 𑀏𑀢𑁆𑀢𑀓𑀁 𑀫𑀕𑁆𑀕𑀁 𑀆𑀕𑀘𑁆𑀙𑀦𑁆𑀢𑀲𑁆𑀲 𑀬𑀸𑀦𑀓𑀺𑀘𑁆𑀘𑀁 𑀲𑀸𑀥𑁂𑀢𑀺. 𑀲𑀢𑁆𑀣𑀼 𑀓𑀣𑀦𑀢𑁆𑀣𑀁𑀬𑁂𑀯 𑀅𑀯𑀲𑀺𑀲𑁆𑀲𑀢𑀺. 𑀇𑀫𑀲𑁆𑀫𑀺𑀜𑁆𑀳𑀺 𑀞𑀸𑀦𑁂 𑀲𑀢𑁆𑀣𑀸 𑀓𑀼𑀮𑀧𑀼𑀢𑁆𑀢𑀲𑁆𑀲 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂 𑀯𑀡𑁆𑀡𑀁 𑀓𑀣𑁂𑀲𑀺. 𑀇𑀤𑀜𑁆𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀪𑀺𑀓𑁆𑀔𑀼 𑀧𑀕𑀼𑀡𑀁 𑀢𑀯 𑀇𑀤𑀁 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦’’𑀦𑁆𑀢𑀺. 𑀧𑀭𑀺𑀲𑀼𑀤𑁆𑀥𑀸𑀢𑀺𑀆𑀤𑀺 𑀢𑀲𑁆𑀲𑀸𑀬𑁂𑀯 𑀉𑀧𑁂𑀓𑁆𑀔𑀸𑀬 𑀯𑀡𑁆𑀡𑀪𑀡𑀦𑀁. 𑀉𑀓𑁆𑀓𑀁 𑀩𑀦𑁆𑀥𑁂𑀬𑁆𑀬𑀸𑀢𑀺 𑀅𑀗𑁆𑀕𑀸𑀭𑀓𑀧𑀮𑁆𑀮𑀁 𑀲𑀚𑁆𑀚𑁂𑀬𑁆𑀬. 𑀆𑀮𑀺𑀫𑁆𑀧𑁂𑀬𑁆𑀬𑀸𑀢𑀺 𑀢𑀢𑁆𑀣 𑀅𑀗𑁆𑀕𑀸𑀭𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀦𑀸𑀴𑀺𑀓𑀸𑀬 𑀥𑀫𑁂𑀦𑁆𑀢𑁄 𑀅𑀕𑁆𑀕𑀺𑀁 𑀚𑀸𑀮𑁂𑀬𑁆𑀬. 𑀉𑀓𑁆𑀓𑀸𑀫𑀼𑀔𑁂 𑀧𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀅𑀗𑁆𑀕𑀸𑀭𑁂 𑀯𑀺𑀬𑀽𑀳𑀺𑀢𑁆𑀯𑀸 𑀅𑀗𑁆𑀕𑀸𑀭𑀫𑀢𑁆𑀣𑀓𑁂 𑀯𑀸 𑀞𑀧𑁂𑀬𑁆𑀬, 𑀢𑀢𑁆𑀢𑀓𑁂 𑀯𑀸 𑀧𑀓𑁆𑀔𑀺𑀧𑁂𑀬𑁆𑀬. 𑀦𑀻𑀳𑀝𑀦𑁆𑀢𑀺 𑀦𑀻𑀳𑀝𑀤𑁄𑀲𑀁. 𑀦𑀺𑀦𑁆𑀦𑀻𑀢𑀓𑀲𑀸𑀯𑀦𑁆𑀢𑀺 𑀅𑀧𑀦𑀻𑀢𑀓𑀲𑀸𑀯𑀁. 𑀏𑀯𑀫𑁂𑀯 𑀔𑁄𑀢𑀺 𑀬𑀣𑀸 𑀢𑀁 𑀲𑀼𑀯𑀡𑁆𑀡𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀸𑀬 𑀧𑀺𑀴𑀦𑁆𑀥𑀦𑀯𑀺𑀓𑀢𑀺𑀬𑀸 𑀲𑀁𑀯𑀢𑁆𑀢𑀢𑀺, 𑀏𑀯𑀫𑁂𑀯 𑀅𑀬𑀁 𑀢𑀸𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑁂𑀓𑁆𑀔𑀸 𑀯𑀺𑀧𑀲𑁆𑀲𑀦𑀸 𑀅𑀪𑀺𑀜𑁆𑀜𑀸 𑀦𑀺𑀭𑁄𑀥𑁄 𑀪𑀯𑁄𑀓𑁆𑀓𑀦𑁆𑀢𑀻𑀢𑀺 𑀇𑀫𑁂𑀲𑀼 𑀬𑀁 𑀇𑀘𑁆𑀙𑀢𑀺, 𑀢𑀲𑁆𑀲𑀢𑁆𑀣𑀸𑀬 𑀳𑁄𑀢𑀻𑀢𑀺 𑀯𑀡𑁆𑀡𑀁 𑀓𑀣𑁂𑀲𑀺.

𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀇𑀫𑀲𑁆𑀫𑀺𑀁 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀢𑁆𑀣𑀁 𑀅𑀯𑀡𑁆𑀡𑀁 𑀅𑀓𑀣𑁂𑀢𑁆𑀯𑀸 𑀯𑀡𑁆𑀡𑀁 𑀓𑀣𑁂𑀲𑀻𑀢𑀺. 𑀓𑀼𑀮𑀧𑀼𑀢𑁆𑀢𑀲𑁆𑀲 𑀳𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀦𑀺𑀓𑀦𑁆𑀢𑀺𑀧𑀭𑀺𑀬𑀼𑀝𑁆𑀞𑀸𑀦𑀁 𑀩𑀮𑀯𑀁. 𑀲𑀘𑁂 𑀅𑀯𑀡𑁆𑀡𑀁 𑀓𑀣𑁂𑀬𑁆𑀬, 𑁋 ‘‘𑀫𑀬𑁆𑀳𑀁 𑀧𑀩𑁆𑀩𑀚𑀺𑀢𑁆𑀯𑀸 𑀤𑁆𑀯𑀸𑀦𑀯𑀼𑀢𑀺𑀬𑁄𑀚𑀦𑀲𑀢𑀁 𑀆𑀕𑀘𑁆𑀙𑀦𑁆𑀢𑀲𑁆𑀲 𑀇𑀫𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀬𑀸𑀦𑀓𑀺𑀘𑁆𑀘𑀁 𑀲𑀸𑀥𑁂𑀲𑀺, 𑀅𑀳𑀁 𑀏𑀢𑁆𑀢𑀓𑀁 𑀫𑀕𑁆𑀕𑀁 𑀆𑀕𑀘𑁆𑀙𑀦𑁆𑀢𑁄 𑀛𑀸𑀦𑀲𑀼𑀔𑁂𑀦 𑀛𑀸𑀦𑀭𑀢𑀺𑀬𑀸 𑀆𑀕𑀢𑁄, 𑀏𑀯𑀭𑀽𑀧𑀲𑁆𑀲 𑀦𑀸𑀫 𑀧𑀡𑀻𑀢𑀥𑀫𑁆𑀫𑀲𑁆𑀲 𑀅𑀯𑀡𑁆𑀡𑀁 𑀓𑀣𑁂𑀢𑀺, 𑀚𑀸𑀦𑀁 𑀦𑀼 𑀔𑁄 𑀓𑀣𑁂𑀢𑀺 𑀅𑀚𑀸𑀦’’𑀦𑁆𑀢𑀺 𑀓𑀼𑀮𑀧𑀼𑀢𑁆𑀢𑁄 𑀲𑀁𑀲𑀬𑀁 𑀲𑀫𑁆𑀫𑁄𑀳𑀁 𑀆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀫𑀸 𑀪𑀕𑀯𑀸 𑀯𑀡𑁆𑀡𑀁 𑀓𑀣𑁂𑀲𑀺.

𑁩𑁬𑁧. 𑀢𑀤𑀦𑀼𑀥𑀫𑁆𑀫𑀦𑁆𑀢𑀺 𑀏𑀢𑁆𑀣 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁 𑀥𑀫𑁆𑀫𑁄 𑀦𑀸𑀫, 𑀢𑀁 𑀅𑀦𑀼𑀕𑀢𑀢𑁆𑀢𑀸 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁 𑀅𑀦𑀼𑀥𑀫𑁆𑀫𑁄𑀢𑀺 𑀯𑀼𑀢𑁆𑀢𑀁. 𑀯𑀺𑀧𑀸𑀓𑀚𑁆𑀛𑀸𑀦𑀁 𑀯𑀸 𑀥𑀫𑁆𑀫𑁄, 𑀓𑀼𑀲𑀮𑀚𑁆𑀛𑀸𑀦𑀁 𑀅𑀦𑀼𑀥𑀫𑁆𑀫𑁄. 𑀢𑀤𑀼𑀧𑀸𑀤𑀸𑀦𑀸𑀢𑀺 𑀢𑀕𑁆𑀕𑀳𑀡𑀸. 𑀘𑀺𑀭𑀁 𑀤𑀻𑀖𑀫𑀤𑁆𑀥𑀸𑀦𑀦𑁆𑀢𑀺 𑀯𑀻𑀲𑀢𑀺𑀓𑀧𑁆𑀧𑀲𑀳𑀲𑁆𑀲𑀸𑀦𑀺. 𑀯𑀺𑀧𑀸𑀓𑀯𑀲𑁂𑀦 𑀳𑁂𑀢𑀁 𑀯𑀼𑀢𑁆𑀢𑀁. 𑀇𑀢𑁄 𑀉𑀢𑁆𑀢𑀭𑀺𑀫𑁆𑀧𑀺 𑀏𑀲𑁂𑀯 𑀦𑀬𑁄.

𑁩𑁬𑁨. 𑀏𑀯𑀁 𑀘𑀢𑀽𑀳𑀺 𑀯𑀸𑀭𑁂𑀳𑀺 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲𑁂𑀯 𑀆𑀤𑀻𑀦𑀯𑀁 𑀤𑀲𑁆𑀲𑁂𑀦𑁆𑀢𑁄 𑀲𑁄 𑀏𑀯𑀁 𑀧𑀚𑀸𑀦𑀸𑀢𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀗𑁆𑀔𑀢𑀫𑁂𑀢𑀦𑁆𑀢𑀺 𑀓𑀺𑀜𑁆𑀘𑀸𑀧𑀺 𑀏𑀢𑁆𑀣 𑀯𑀻𑀲𑀢𑀺𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀆𑀬𑀼 𑀅𑀢𑁆𑀣𑀺, 𑀏𑀢𑀁 𑀧𑀦 𑀲𑀗𑁆𑀔𑀢𑀁 𑀧𑀓𑀧𑁆𑀧𑀺𑀢𑀁 𑀆𑀬𑀽𑀳𑀺𑀢𑀁, 𑀓𑀭𑁄𑀦𑁆𑀢𑁂𑀦 𑀓𑀭𑀻𑀬𑀢𑀺, 𑀅𑀦𑀺𑀘𑁆𑀘𑀁 𑀅𑀥𑀼𑀯𑀁 𑀅𑀲𑀲𑁆𑀲𑀢𑀁 𑀢𑀸𑀯𑀓𑀸𑀮𑀺𑀓𑀁, 𑀘𑀯𑀦𑀧𑀭𑀺𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑀁, 𑀚𑀸𑀢𑀺𑀬𑀸 𑀅𑀦𑀼𑀕𑀢𑀁, 𑀚𑀭𑀸𑀬 𑀅𑀦𑀼𑀲𑀝𑀁, 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑀁, 𑀤𑀼𑀓𑁆𑀔𑁂 𑀧𑀢𑀺𑀝𑁆𑀞𑀺𑀢𑀁, 𑀅𑀢𑀸𑀡𑀁 𑀅𑀮𑁂𑀡𑀁 𑀅𑀲𑀭𑀡𑀁 𑀅𑀲𑀭𑀡𑀻𑀪𑀽𑀢𑀦𑁆𑀢𑀺. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀇𑀤𑀸𑀦𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀕𑀡𑁆𑀳𑀦𑁆𑀢𑁄 𑀲𑁄 𑀦𑁂𑀯 𑀢𑀁 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺𑀆𑀤𑀺𑀫𑀸𑀳. 𑀬𑀣𑀸 𑀳𑀺 𑀙𑁂𑀓𑁄 𑀪𑀺𑀲𑀓𑁆𑀓𑁄 𑀯𑀺𑀲𑀯𑀺𑀓𑀸𑀭𑀁 𑀤𑀺𑀲𑁆𑀯𑀸 𑀯𑀫𑀦𑀁 𑀓𑀸𑀭𑁂𑀢𑁆𑀯𑀸 𑀯𑀺𑀲𑀁 𑀞𑀸𑀦𑀢𑁄 𑀘𑀸𑀯𑁂𑀢𑁆𑀯𑀸 𑀉𑀧𑀭𑀺 𑀆𑀭𑁄𑀧𑁂𑀢𑁆𑀯𑀸 𑀔𑀦𑁆𑀥𑀁 𑀯𑀸 𑀲𑀻𑀲𑀁 𑀯𑀸 𑀕𑀳𑁂𑀢𑀼𑀁 𑀅𑀤𑀢𑁆𑀯𑀸 𑀯𑀺𑀲𑀁 𑀑𑀢𑀸𑀭𑁂𑀢𑁆𑀯𑀸 𑀧𑀣𑀯𑀺𑀬𑀁 𑀧𑀸𑀢𑁂𑀬𑁆𑀬, 𑀏𑀯𑀫𑁂𑀯 𑀪𑀕𑀯𑀸 𑀓𑀼𑀮𑀧𑀼𑀢𑁆𑀢𑀲𑁆𑀲 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂 𑀯𑀡𑁆𑀡𑀁 𑀓𑀣𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀓𑀼𑀮𑀧𑀼𑀢𑁆𑀢𑁄 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀸𑀬 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂 𑀧𑀢𑁆𑀣𑀦𑀁 𑀞𑀧𑁂𑀲𑀺.

𑀪𑀕𑀯𑀸 𑀢𑀁 𑀜𑀢𑁆𑀯𑀸 𑀢𑀁 𑀅𑀲𑀫𑁆𑀧𑀢𑁆𑀢𑀲𑁆𑀲 𑀅𑀧𑁆𑀧𑀝𑀺𑀮𑀤𑁆𑀥𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄 ‘‘𑀅𑀢𑁆𑀣𑁂𑀲𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀸𑀤𑀻𑀲𑀼 𑀲𑀫𑁆𑀧𑀢𑁆𑀢𑀺 𑀦𑀸𑀫. 𑀢𑁂𑀲𑀜𑁆𑀳𑀺 𑀧𑀞𑀫𑀩𑁆𑀭𑀳𑁆𑀫𑀮𑁄𑀓𑁂 𑀯𑀻𑀲𑀢𑀺𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀆𑀬𑀼, 𑀤𑀼𑀢𑀺𑀬𑁂 𑀘𑀢𑁆𑀢𑀸𑀮𑀻𑀲𑀁, 𑀢𑀢𑀺𑀬𑁂 𑀲𑀝𑁆𑀞𑀺, 𑀘𑀢𑀼𑀢𑁆𑀣𑁂 𑀘𑀢𑀼𑀭𑀸𑀲𑀻𑀢𑀺 𑀓𑀧𑁆𑀧𑀲𑀳𑀲𑁆𑀲𑀸𑀦𑀺 𑀆𑀬𑀼. 𑀢𑀁 𑀧𑀦 𑀅𑀦𑀺𑀘𑁆𑀘𑀁 𑀅𑀥𑀼𑀯𑀁 𑀅𑀲𑀲𑁆𑀲𑀢𑀁 𑀢𑀸𑀯𑀓𑀸𑀮𑀺𑀓𑀁, 𑀘𑀯𑀦𑀧𑀭𑀺𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑀁, 𑀚𑀸𑀢𑀺𑀬𑀸 𑀅𑀦𑀼𑀕𑀢𑀁, 𑀚𑀭𑀸𑀬 𑀅𑀦𑀼𑀲𑀝𑀁, 𑀫𑀭𑀡𑁂𑀦 𑀅𑀩𑁆𑀪𑀸𑀳𑀢𑀁, 𑀤𑀼𑀓𑁆𑀔𑁂 𑀧𑀢𑀺𑀝𑁆𑀞𑀺𑀢𑀁, 𑀅𑀢𑀸𑀡𑀁 𑀅𑀮𑁂𑀡𑀁 𑀅𑀲𑀭𑀡𑀁 𑀅𑀲𑀭𑀡𑀻𑀪𑀽𑀢𑀁, 𑀏𑀢𑁆𑀢𑀓𑀁 𑀓𑀸𑀮𑀁 𑀢𑀢𑁆𑀣 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑁆𑀯𑀸𑀧𑀺 𑀧𑀼𑀣𑀼𑀚𑁆𑀚𑀦𑀓𑀸𑀮𑀓𑀺𑀭𑀺𑀬𑀁 𑀓𑀢𑁆𑀯𑀸 𑀧𑀼𑀦 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀧𑀢𑀺𑀢𑀩𑁆𑀩’’𑀦𑁆𑀢𑀺 𑀲𑀩𑁆𑀩𑀫𑁂𑀢𑀁 𑀆𑀤𑀻𑀦𑀯𑀁 𑀏𑀓𑀧𑀤𑁂𑀦𑁂𑀯 ‘‘𑀲𑀗𑁆𑀔𑀢𑀫𑁂𑀢’’𑀦𑁆𑀢𑀺 𑀓𑀣𑁂𑀲𑀺. 𑀓𑀼𑀮𑀧𑀼𑀢𑁆𑀢𑁄 𑀢𑀁 𑀲𑀼𑀢𑁆𑀯𑀸 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑁂 𑀦𑀺𑀓𑀦𑁆𑀢𑀺𑀁 𑀧𑀭𑀺𑀬𑀸𑀤𑀺𑀬𑀺, 𑀪𑀕𑀯𑀸 𑀢𑀲𑁆𑀲 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑁂𑀲𑀼 𑀦𑀺𑀓𑀦𑁆𑀢𑀺𑀬𑀸 𑀧𑀭𑀺𑀬𑀸𑀤𑀺𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑀁 𑀕𑀡𑁆𑀳𑀦𑁆𑀢𑁄 ‘‘𑀲𑁄 𑀦𑁂𑀯 𑀢𑀁 𑀅𑀪𑀺𑀲𑀗𑁆𑀔𑀭𑁄𑀢𑀻’’𑀢𑀺𑀆𑀤𑀺𑀫𑀸𑀳.

𑀬𑀣𑀸 𑀯𑀸 𑀧𑀦𑁂𑀓𑁄 𑀫𑀳𑀸𑀬𑁄𑀥𑁄 𑀏𑀓𑀁 𑀭𑀸𑀚𑀸𑀦𑀁 𑀆𑀭𑀸𑀥𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀼𑀝𑁆𑀞𑀸𑀦𑀓𑀁 𑀕𑀸𑀫𑀯𑀭𑀁 𑀮𑀪𑁂𑀬𑁆𑀬, 𑀧𑀼𑀦 𑀭𑀸𑀚𑀸 𑀢𑀲𑁆𑀲𑀸𑀦𑀼𑀪𑀸𑀯𑀁 𑀲𑀭𑀺𑀢𑁆𑀯𑀸 𑁋 ‘‘𑀫𑀳𑀸𑀦𑀼𑀪𑀸𑀯𑁄 𑀬𑁄𑀥𑁄, 𑀅𑀧𑁆𑀧𑀓𑀁 𑀢𑁂𑀦 𑀮𑀤𑁆𑀥’’𑀦𑁆𑀢𑀺 𑁋 ‘‘𑀦𑀸𑀬𑀁 𑀢𑀸𑀢 𑀕𑀸𑀫𑁄 𑀢𑀼𑀬𑁆𑀳𑀁 𑀅𑀦𑀼𑀘𑁆𑀙𑀯𑀺𑀓𑁄, 𑀅𑀜𑁆𑀜𑀁 𑀘𑀢𑀼𑀲𑀢𑀲𑀳𑀲𑁆𑀲𑀼𑀝𑁆𑀞𑀸𑀦𑀓𑀁 𑀕𑀡𑁆𑀳𑀸𑀳𑀻’’𑀢𑀺 𑀤𑀤𑁂𑀬𑁆𑀬 𑀲𑁄 𑀲𑀸𑀥𑀼 𑀤𑁂𑀯𑀸𑀢𑀺 𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀇𑀢𑀭𑀁 𑀕𑀸𑀫𑀁 𑀕𑀡𑁆𑀳𑁂𑀬𑁆𑀬. 𑀭𑀸𑀚𑀸 𑀅𑀲𑀫𑁆𑀧𑀢𑁆𑀢𑀫𑁂𑀯 𑀘 𑀦𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑁋 ‘‘𑀓𑀺𑀁 𑀢𑁂 𑀢𑁂𑀦, 𑀅𑀳𑀺𑀯𑀸𑀢𑀭𑁄𑀕𑁄 𑀏𑀢𑁆𑀣 𑀉𑀧𑁆𑀧𑀚𑁆𑀚𑀢𑀺? 𑀅𑀲𑀼𑀓𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀫𑀳𑀦𑁆𑀢𑀁 𑀦𑀕𑀭𑀁 𑀅𑀢𑁆𑀣𑀺, 𑀢𑀢𑁆𑀣 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀭𑀚𑁆𑀚𑀁 𑀓𑀸𑀭𑁂𑀳𑀻’’𑀢𑀺 𑀧𑀳𑀺𑀡𑁂𑀬𑁆𑀬, 𑀲𑁄 𑀢𑀣𑀸 𑀓𑀭𑁂𑀬𑁆𑀬.

𑀢𑀢𑁆𑀣 𑀭𑀸𑀚𑀸 𑀯𑀺𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀤𑀝𑁆𑀞𑀩𑁆𑀩𑁄, 𑀫𑀳𑀸𑀬𑁄𑀥𑁄 𑀯𑀺𑀬 𑀧𑀼𑀓𑁆𑀓𑀼𑀲𑀸𑀢𑀺 𑀓𑀼𑀮𑀧𑀼𑀢𑁆𑀢𑁄, 𑀧𑀞𑀫𑀮𑀤𑁆𑀥𑀕𑀸𑀫𑁄 𑀯𑀺𑀬 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀁, 𑀢𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀇𑀢𑀭𑀁 𑀕𑀸𑀫𑀁 𑀕𑀡𑁆𑀳𑀸𑀳𑀻𑀢𑀺 𑀯𑀼𑀢𑁆𑀢𑀓𑀸𑀮𑁄 𑀯𑀺𑀬 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀦𑀺𑀓𑀦𑁆𑀢𑀺𑀧𑀭𑀺𑀬𑀸𑀤𑀸𑀦𑀁 𑀓𑀢𑁆𑀯𑀸 𑀆𑀭𑀼𑀧𑁆𑀧𑀓𑀣𑀦𑀁, 𑀢𑀁 𑀕𑀸𑀫𑀁 𑀅𑀲𑀫𑁆𑀧𑀢𑁆𑀢𑀫𑁂𑀯 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀓𑀺𑀁 𑀢𑁂 𑀢𑁂𑀦, 𑀅𑀳𑀺𑀯𑀸𑀢𑀭𑁄𑀕𑁄 𑀏𑀢𑁆𑀣 𑀉𑀧𑁆𑀧𑀚𑁆𑀚𑀢𑀺? 𑀅𑀲𑀼𑀓𑀲𑁆𑀫𑀺𑀁 𑀞𑀸𑀦𑁂 𑀦𑀕𑀭𑀁 𑀅𑀢𑁆𑀣𑀺, 𑀢𑀢𑁆𑀣 𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀭𑀚𑁆𑀚𑀁 𑀓𑀸𑀭𑁂𑀳𑀻’’𑀢𑀺 𑀯𑀼𑀢𑁆𑀢𑀓𑀸𑀮𑁄 𑀯𑀺𑀬 𑀅𑀭𑀽𑀧𑁂 𑀲𑀗𑁆𑀔𑀢𑀫𑁂𑀢𑀦𑁆𑀢𑀺 𑀆𑀤𑀻𑀦𑀯𑀓𑀣𑀦𑁂𑀦 𑀅𑀧𑁆𑀧𑀢𑁆𑀢𑀸𑀲𑀼𑀬𑁂𑀯 𑀢𑀸𑀲𑀼 𑀲𑀫𑀸𑀧𑀢𑁆𑀢𑀻𑀲𑀼 𑀧𑀢𑁆𑀣𑀦𑀁 𑀦𑀺𑀯𑀢𑁆𑀣𑀸𑀧𑁂𑀢𑁆𑀯𑀸 𑀉𑀧𑀭𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀸𑀕𑀳𑀡𑀁.

𑀢𑀢𑁆𑀣 𑀦𑁂𑀯 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀦𑀸𑀬𑀽𑀳𑀢𑀺 𑀦 𑀭𑀸𑀲𑀺𑀁 𑀓𑀭𑁄𑀢𑀺. 𑀦 𑀅𑀪𑀺𑀲𑀜𑁆𑀘𑁂𑀢𑀬𑀢𑀻𑀢𑀺 𑀦 𑀓𑀧𑁆𑀧𑁂𑀢𑀺. 𑀪𑀯𑀸𑀬 𑀯𑀸 𑀯𑀺𑀪𑀯𑀸𑀬 𑀯𑀸𑀢𑀺 𑀯𑀼𑀤𑁆𑀥𑀺𑀬𑀸 𑀯𑀸 𑀧𑀭𑀺𑀳𑀸𑀦𑀺𑀬𑀸 𑀯𑀸, 𑀲𑀲𑁆𑀲𑀢𑀼𑀘𑁆𑀙𑁂𑀤𑀯𑀲𑁂𑀦𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀦 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀻𑀢𑀺 𑀮𑁄𑀓𑁂 𑀭𑀽𑀧𑀸𑀤𑀻𑀲𑀼 𑀓𑀺𑀜𑁆𑀘𑀺 𑀏𑀓𑀥𑀫𑁆𑀫𑀫𑁆𑀧𑀺 𑀢𑀡𑁆𑀳𑀸𑀬 𑀦 𑀕𑀡𑁆𑀳𑀸𑀢𑀺, 𑀦 𑀧𑀭𑀸𑀫𑀲𑀢𑀺. 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀧𑀚𑀸𑀦𑀸𑀢𑀻𑀢𑀺 𑀪𑀕𑀯𑀸 𑀅𑀢𑁆𑀢𑀦𑁄 𑀩𑀼𑀤𑁆𑀥𑀯𑀺𑀲𑀬𑁂 𑀞𑀢𑁆𑀯𑀸 𑀤𑁂𑀲𑀦𑀸𑀬 𑀅𑀭𑀳𑀢𑁆𑀢𑀦𑀺𑀓𑀽𑀝𑀁 𑀕𑀡𑁆𑀳𑀺. 𑀓𑀼𑀮𑀧𑀼𑀢𑁆𑀢𑁄 𑀧𑀦 𑀅𑀢𑁆𑀢𑀦𑁄 𑀬𑀣𑁄𑀧𑀦𑀺𑀲𑁆𑀲𑀬𑁂𑀦 𑀢𑀻𑀡𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀧𑀝𑀺𑀯𑀺𑀚𑁆𑀛𑀺. 𑀬𑀣𑀸 𑀦𑀸𑀫 𑀭𑀸𑀚𑀸 𑀲𑀼𑀯𑀡𑁆𑀡𑀪𑀸𑀚𑀦𑁂𑀦 𑀦𑀸𑀦𑀸𑀭𑀲𑀪𑁄𑀚𑀦𑀁 𑀪𑀼𑀜𑁆𑀚𑀦𑁆𑀢𑁄 𑀅𑀢𑁆𑀢𑀦𑁄 𑀧𑀫𑀸𑀡𑁂𑀦 𑀧𑀺𑀡𑁆𑀟𑀁 𑀯𑀝𑁆𑀝𑁂𑀢𑁆𑀯𑀸 𑀅𑀗𑁆𑀓𑁂 𑀦𑀺𑀲𑀺𑀦𑁆𑀦𑁂𑀦 𑀭𑀸𑀚𑀓𑀼𑀫𑀸𑀭𑁂𑀦 𑀧𑀺𑀡𑁆𑀟𑀫𑁆𑀳𑀺 𑀆𑀮𑀬𑁂 𑀤𑀲𑁆𑀲𑀺𑀢𑁂 𑀢𑀁 𑀧𑀺𑀡𑁆𑀟𑀁 𑀉𑀧𑀦𑀸𑀫𑁂𑀬𑁆𑀬, 𑀓𑀼𑀫𑀸𑀭𑁄 𑀅𑀢𑁆𑀢𑀦𑁄 𑀫𑀼𑀔𑀧𑁆𑀧𑀫𑀸𑀡𑁂𑀦𑁂𑀯 𑀓𑀩𑀴𑀁 𑀓𑀭𑁂𑀬𑁆𑀬, 𑀲𑁂𑀲𑀁 𑀭𑀸𑀚𑀸 𑀲𑀬𑀁 𑀯𑀸 𑀪𑀼𑀜𑁆𑀚𑁂𑀬𑁆𑀬, 𑀧𑀸𑀢𑀺𑀬𑀁 𑀯𑀸 𑀧𑀓𑁆𑀔𑀺𑀧𑁂𑀬𑁆𑀬, 𑀏𑀯𑀁 𑀥𑀫𑁆𑀫𑀭𑀸𑀚𑀸 𑀢𑀣𑀸𑀕𑀢𑁄 𑀅𑀢𑁆𑀢𑀦𑁄 𑀧𑀫𑀸𑀡𑁂𑀦 𑀅𑀭𑀳𑀢𑁆𑀢𑀦𑀺𑀓𑀽𑀝𑀁 𑀕𑀡𑁆𑀳𑀦𑁆𑀢𑁄 𑀤𑁂𑀲𑀦𑀁 𑀤𑁂𑀲𑁂𑀲𑀺, 𑀓𑀼𑀮𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀬𑀣𑁄𑀧𑀦𑀺𑀲𑁆𑀲𑀬𑁂𑀦 𑀢𑀻𑀡𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀧𑀝𑀺𑀯𑀺𑀚𑁆𑀛𑀺.

𑀇𑀢𑁄 𑀧𑀼𑀩𑁆𑀩𑁂 𑀧𑀦𑀲𑁆𑀲 𑀔𑀦𑁆𑀥𑀸 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀻𑀢𑀺 𑀏𑀯𑀭𑀽𑀧𑀁 𑀅𑀘𑁆𑀘𑀦𑁆𑀢𑀲𑀼𑀜𑁆𑀜𑀢𑀁 𑀢𑀺𑀮𑀓𑁆𑀔𑀡𑀸𑀳𑀢𑀁 𑀓𑀣𑀁 𑀓𑀣𑁂𑀦𑁆𑀢𑀲𑁆𑀲 𑀦𑁂𑀯 𑀓𑀗𑁆𑀔𑀸, 𑀦 𑀯𑀺𑀫𑀢𑀺, 𑀦𑀸𑀧𑀺 𑁋 ‘‘𑀏𑀯𑀁 𑀓𑀺𑀭 𑀢𑀁, 𑀏𑀯𑀁 𑀫𑁂 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀇𑀢𑀺 𑀓𑀺𑀭 𑀦 𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀦 𑀯𑀺𑀢𑁆𑀣𑀸𑀬𑀺𑀢𑀢𑁆𑀢𑀁 𑀅𑀢𑁆𑀣𑀺. 𑀏𑀓𑀘𑁆𑀘𑁂𑀲𑀼 𑀘 𑀓𑀺𑀭 𑀞𑀸𑀦𑁂𑀲𑀼 𑀩𑀼𑀤𑁆𑀥𑀸 𑀅𑀜𑁆𑀜𑀸𑀢𑀓𑀯𑁂𑀲𑁂𑀦 𑀯𑀺𑀘𑀭𑀦𑁆𑀢𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀦𑀼 𑀔𑁄 𑀏𑀲𑁄𑀢𑀺 𑀅𑀳𑀼𑀤𑁂𑀯 𑀲𑀁𑀲𑀬𑁄, 𑀅𑀳𑀼 𑀯𑀺𑀫𑀢𑀺. 𑀬𑀢𑁄 𑀅𑀦𑁂𑀦 𑀅𑀦𑀸𑀕𑀸𑀫𑀺𑀨𑀮𑀁 𑀧𑀝𑀺𑀯𑀺𑀤𑁆𑀥𑀁, 𑀅𑀣 𑀅𑀬𑀁 𑀫𑁂 𑀲𑀢𑁆𑀣𑀸𑀢𑀺 𑀦𑀺𑀝𑁆𑀞𑀁 𑀕𑀢𑁄. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀅𑀘𑁆𑀘𑀬𑀁 𑀦 𑀤𑁂𑀲𑁂𑀲𑀻𑀢𑀺. 𑀑𑀓𑀸𑀲𑀸𑀪𑀸𑀯𑀢𑁄. 𑀪𑀕𑀯𑀸 𑀳𑀺 𑀬𑀣𑀸𑀦𑀺𑀓𑁆𑀔𑀺𑀢𑁆𑀢𑀸𑀬 𑀫𑀸𑀢𑀺𑀓𑀸𑀬 𑀅𑀘𑁆𑀙𑀺𑀦𑁆𑀦𑀥𑀸𑀭𑀁 𑀓𑀢𑁆𑀯𑀸 𑀆𑀓𑀸𑀲𑀕𑀗𑁆𑀕𑀁 𑀑𑀢𑀸𑀭𑁂𑀦𑁆𑀢𑁄 𑀯𑀺𑀬 𑀤𑁂𑀲𑀦𑀁 𑀤𑁂𑀲𑁂𑀲𑀺𑀬𑁂𑀯.

𑁩𑁬𑁩. 𑀲𑁄𑀢𑀺 𑀅𑀭𑀳𑀸. 𑀅𑀦𑀚𑁆𑀛𑁄𑀲𑀺𑀢𑀸𑀢𑀺 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀕𑀳𑁂𑀢𑀼𑀁 𑀦 𑀬𑀼𑀢𑁆𑀣𑀸𑀢𑀺 𑀧𑀚𑀸𑀦𑀸𑀢𑀺. 𑀅𑀦𑀪𑀺𑀦𑀦𑁆𑀤𑀺𑀢𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀅𑀪𑀺𑀦𑀦𑁆𑀤𑀺𑀢𑀼𑀁 𑀦 𑀬𑀼𑀢𑁆𑀢𑀸𑀢𑀺 𑀧𑀚𑀸𑀦𑀸𑀢𑀺.

𑁩𑁬𑁪. 𑀯𑀺𑀲𑀁𑀬𑀼𑀢𑁆𑀢𑁄 𑀦𑀁 𑀯𑁂𑀤𑁂𑀢𑀻𑀢𑀺 𑀲𑀘𑁂 𑀳𑀺𑀲𑁆𑀲 𑀲𑀼𑀔𑀯𑁂𑀤𑀦𑀁 𑀆𑀭𑀩𑁆𑀪 𑀭𑀸𑀕𑀸𑀦𑀼𑀲𑀬𑁄, 𑀤𑀼𑀓𑁆𑀔𑀯𑁂𑀤𑀦𑀁 𑀆𑀭𑀩𑁆𑀪 𑀧𑀝𑀺𑀖𑀸𑀦𑀼𑀲𑀬𑁄, 𑀇𑀢𑀭𑀁 𑀆𑀭𑀩𑁆𑀪 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀲𑀁𑀬𑀼𑀢𑁆𑀢𑁄 𑀯𑁂𑀤𑀺𑀬𑁂𑀬𑁆𑀬 𑀦𑀸𑀫. 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀧𑀦 𑀯𑀺𑀲𑀁𑀬𑀼𑀢𑁆𑀢𑁄 𑀦𑀁 𑀯𑁂𑀤𑁂𑀢𑀺 𑀦𑀺𑀲𑁆𑀲𑀝𑁄 𑀯𑀺𑀧𑁆𑀧𑀫𑀼𑀢𑁆𑀢𑁄. 𑀓𑀸𑀬𑀧𑀭𑀺𑀬𑀦𑁆𑀢𑀺𑀓𑀦𑁆𑀢𑀺 𑀓𑀸𑀬𑀓𑁄𑀝𑀺𑀓𑀁. 𑀬𑀸𑀯 𑀓𑀸𑀬𑀧𑀯𑀢𑁆𑀢𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀧𑀭𑀁 𑀅𑀦𑀼𑀧𑁆𑀧𑀚𑁆𑀚𑀦𑀯𑁂𑀤𑀦𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑀪𑀺𑀦𑀦𑁆𑀤𑀺𑀢𑀸𑀦𑀺 𑀲𑀻𑀢𑀻𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀤𑁆𑀯𑀸𑀤𑀲𑀲𑀼 𑀆𑀬𑀢𑀦𑁂𑀲𑀼 𑀓𑀺𑀮𑁂𑀲𑀸𑀦𑀁 𑀯𑀺𑀲𑁂𑀯𑀦𑀲𑁆𑀲 𑀦𑀢𑁆𑀣𑀺𑀢𑀸𑀬 𑀅𑀦𑀪𑀺𑀦𑀦𑁆𑀤𑀺𑀢𑀸𑀦𑀺 𑀳𑀼𑀢𑁆𑀯𑀸 𑀇𑀥 𑀤𑁆𑀯𑀸𑀤𑀲𑀲𑀼𑀬𑁂𑀯 𑀆𑀬𑀢𑀦𑁂𑀲𑀼 𑀦𑀺𑀭𑀼𑀚𑁆𑀛𑀺𑀲𑁆𑀲𑀦𑁆𑀢𑀺. 𑀓𑀺𑀮𑁂𑀲𑀸 𑀳𑀺 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀦𑀺𑀭𑀼𑀤𑁆𑀥𑀸𑀧𑀺 𑀬𑀢𑁆𑀣 𑀦𑀢𑁆𑀣𑀺, 𑀢𑀢𑁆𑀣 𑀦𑀺𑀭𑀼𑀤𑁆𑀥𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑁋 ‘‘𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀦𑀺𑀭𑀼𑀚𑁆𑀛𑀫𑀸𑀦𑀸 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀲𑀫𑀼𑀤𑀬𑀧𑀜𑁆𑀳𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀢𑀲𑁆𑀫𑀸 𑀪𑀕𑀯𑀸 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀲𑀻𑀢𑀺𑀪𑀽𑀢𑀸𑀦𑀺𑀧𑀺 𑀇𑀥𑁂𑀯 𑀲𑀻𑀢𑀻𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀆𑀳. 𑀦𑀦𑀼 𑀘 𑀇𑀥 𑀯𑁂𑀤𑀬𑀺𑀢𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀦 𑀓𑀺𑀮𑁂𑀲𑀸𑀢𑀺. 𑀯𑁂𑀤𑀬𑀺𑀢𑀸𑀦𑀺𑀧𑀺 𑀓𑀺𑀮𑁂𑀲𑀸𑀪𑀸𑀯𑁂𑀦𑁂𑀯 𑀲𑀻𑀢𑀻𑀪𑀯𑀦𑁆𑀢𑀺. 𑀇𑀢𑀭𑀣𑀸 𑀦𑁂𑀲𑀁 𑀲𑀻𑀢𑀺𑀪𑀸𑀯𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀲𑀼𑀯𑀼𑀢𑁆𑀢𑀫𑁂𑀢𑀁.

𑁩𑁬𑁫. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀬𑀣𑀸 𑀳𑀺 𑀏𑀓𑁄 𑀧𑀼𑀭𑀺𑀲𑁄 𑀢𑁂𑀮𑀧𑀤𑀻𑀧𑀲𑁆𑀲 𑀛𑀸𑀬𑀢𑁄 𑀢𑁂𑀮𑁂 𑀔𑀻𑀡𑁂 𑀢𑁂𑀮𑀁 𑀆𑀲𑀺𑀜𑁆𑀘𑀢𑀺, 𑀯𑀝𑁆𑀝𑀺𑀬𑀸 𑀔𑀻𑀡𑀸𑀬 𑀯𑀝𑁆𑀝𑀺𑀁 𑀧𑀓𑁆𑀔𑀺𑀧𑀢𑀺, 𑀏𑀯𑀁 𑀤𑀻𑀧𑀲𑀺𑀔𑀸𑀬 𑀅𑀦𑀼𑀧𑀘𑁆𑀙𑁂𑀤𑁄𑀯 𑀳𑁄𑀢𑀺, 𑀏𑀯𑀫𑁂𑀯 𑀧𑀼𑀣𑀼𑀚𑁆𑀚𑀦𑁄 𑀏𑀓𑀲𑁆𑀫𑀺𑀁 𑀪𑀯𑁂 𑀞𑀺𑀢𑁄 𑀓𑀼𑀲𑀮𑀸𑀓𑀼𑀲𑀮𑀁 𑀓𑀭𑁄𑀢𑀺, 𑀲𑁄 𑀢𑁂𑀦 𑀲𑀼𑀕𑀢𑀺𑀬𑀜𑁆𑀘 𑀅𑀧𑀸𑀬𑁂𑀲𑀼 𑀘 𑀦𑀺𑀩𑁆𑀩𑀢𑁆𑀢𑀢𑀺𑀬𑁂𑀯, 𑀏𑀯𑀁 𑀯𑁂𑀤𑀦𑀸𑀦𑀁 𑀅𑀦𑀼𑀧𑀘𑁆𑀙𑁂𑀤𑁄𑀯 𑀳𑁄𑀢𑀺. 𑀬𑀣𑀸 𑀧𑀦𑁂𑀓𑁄 𑀤𑀻𑀧𑀲𑀺𑀔𑀸𑀬 𑀉𑀓𑁆𑀓𑀡𑁆𑀞𑀺𑀢𑁄 𑁋 ‘‘𑀇𑀫𑀁 𑀧𑀼𑀭𑀺𑀲𑀁 𑀆𑀕𑀫𑁆𑀫 𑀤𑀻𑀧𑀲𑀺𑀔𑀸 𑀦 𑀉𑀧𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀦𑀺𑀮𑀻𑀦𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑀻𑀲𑀁 𑀙𑀺𑀦𑁆𑀤𑁂𑀬𑁆𑀬, 𑀏𑀯𑀁 𑀯𑀝𑁆𑀝𑀺𑀬𑀸 𑀘 𑀢𑁂𑀮𑀲𑁆𑀲 𑀘 𑀅𑀦𑀼𑀧𑀳𑀸𑀭𑀸 𑀤𑀻𑀧𑀲𑀺𑀔𑀸 𑀅𑀦𑀸𑀳𑀸𑀭𑀸 𑀦𑀺𑀩𑁆𑀩𑀸𑀬𑀢𑀺, 𑀏𑀯𑀫𑁂𑀯 𑀯𑀝𑁆𑀝𑁂 𑀉𑀓𑁆𑀓𑀡𑁆𑀞𑀺𑀢𑁄 𑀬𑁄𑀕𑀸𑀯𑀘𑀭𑁄 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀓𑀼𑀲𑀮𑀸𑀓𑀼𑀲𑀮𑀁 𑀲𑀫𑀼𑀘𑁆𑀙𑀺𑀦𑁆𑀤𑀢𑀺, 𑀢𑀲𑁆𑀲 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀔𑀻𑀡𑀸𑀲𑀯𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀼𑀦 𑀯𑁂𑀤𑀬𑀺𑀢𑀸𑀦𑀺 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀆𑀤𑀺𑀫𑁆𑀳𑀺 𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀳𑀺 𑀅𑀭𑀳𑀢𑁆𑀢𑀨𑀮𑀧𑀜𑁆𑀜𑀸 𑀉𑀢𑁆𑀢𑀭𑀺𑀢𑀭𑀸, 𑀢𑀲𑁆𑀫𑀸. 𑀏𑀯𑀁 𑀲𑀫𑀦𑁆𑀦𑀸𑀕𑀢𑁄𑀢𑀺 𑀇𑀫𑀺𑀦𑀸 𑀉𑀢𑁆𑀢𑀫𑁂𑀦 𑀅𑀭𑀳𑀢𑁆𑀢𑀨𑀮𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑁂 𑀜𑀸𑀡𑀁 𑀦𑀸𑀫 𑀅𑀭𑀳𑀢𑁆𑀢𑀫𑀕𑁆𑀕𑁂 𑀜𑀸𑀡𑀁, 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀅𑀭𑀳𑀢𑁆𑀢𑀨𑀮𑁂 𑀜𑀸𑀡𑀁 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦𑁂𑀯𑀸𑀳 𑀢𑀲𑁆𑀲 𑀲𑀸 𑀯𑀺𑀫𑀼𑀢𑁆𑀢𑀺 𑀲𑀘𑁆𑀘𑁂 𑀞𑀺𑀢𑀸 𑀅𑀓𑀼𑀧𑁆𑀧𑀸 𑀳𑁄𑀢𑀻𑀢𑀺.

𑁩𑁬𑁬. 𑀏𑀢𑁆𑀣 𑀳𑀺 𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺, 𑀲𑀘𑁆𑀘𑀦𑁆𑀢𑀺 𑀧𑀭𑀫𑀢𑁆𑀣𑀲𑀘𑁆𑀘𑀁 𑀦𑀺𑀩𑁆𑀩𑀸𑀦𑀁. 𑀇𑀢𑀺 𑀅𑀓𑀼𑀧𑁆𑀧𑀸𑀭𑀫𑁆𑀫𑀡𑀓𑀭𑀡𑁂𑀦 𑀅𑀓𑀼𑀧𑁆𑀧𑀸𑀢𑀺 𑀯𑀼𑀢𑁆𑀢𑀸. 𑀫𑀼𑀲𑀸𑀢𑀺 𑀯𑀺𑀢𑀣𑀁. 𑀫𑁄𑀲𑀥𑀫𑁆𑀫𑀦𑁆𑀢𑀺 𑀦𑀲𑁆𑀲𑀦𑀲𑀪𑀸𑀯𑀁. 𑀢𑀁 𑀲𑀘𑁆𑀘𑀦𑁆𑀢𑀺 𑀢𑀁 𑀅𑀯𑀺𑀢𑀣𑀁 𑀲𑀪𑀸𑀯𑁄. 𑀅𑀫𑁄𑀲𑀥𑀫𑁆𑀫𑀦𑁆𑀢𑀺 𑀅𑀦𑀲𑁆𑀲𑀦𑀲𑀪𑀸𑀯𑀁.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀆𑀤𑀺𑀢𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀯𑀘𑀻𑀲𑀘𑁆𑀘𑀢𑁄 𑀤𑀼𑀓𑁆𑀔𑀲𑀘𑁆𑀘𑀲𑀫𑀼𑀤𑀬𑀲𑀘𑁆𑀘𑁂𑀳𑀺 𑀘 𑀧𑀭𑀫𑀢𑁆𑀣𑀲𑀘𑁆𑀘𑀁 𑀦𑀺𑀩𑁆𑀩𑀸𑀦𑀫𑁂𑀯 𑀉𑀢𑁆𑀢𑀭𑀺𑀢𑀭𑀁, 𑀢𑀲𑁆𑀫𑀸. 𑀏𑀯𑀁 𑀲𑀫𑀦𑁆𑀦𑀸𑀕𑀢𑁄𑀢𑀺 𑀇𑀫𑀺𑀦𑀸 𑀉𑀢𑁆𑀢𑀫𑁂𑀦 𑀧𑀭𑀫𑀢𑁆𑀣𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑁂𑀦 𑀲𑀫𑀦𑁆𑀦𑀸𑀕𑀢𑁄.

𑁩𑁬𑁭. 𑀧𑀼𑀩𑁆𑀩𑁂𑀢𑀺 𑀧𑀼𑀣𑀼𑀚𑁆𑀚𑀦𑀓𑀸𑀮𑁂. 𑀉𑀧𑀥𑀻 𑀳𑁄𑀦𑁆𑀢𑀻𑀢𑀺 𑀔𑀦𑁆𑀥𑀽𑀧𑀥𑀺 𑀓𑀺𑀮𑁂𑀲𑀽𑀧𑀥𑀺 𑀅𑀪𑀺𑀲𑀗𑁆𑀔𑀸𑀭𑀽𑀧𑀥𑀺 𑀧𑀜𑁆𑀘𑀓𑀸𑀫𑀕𑀼𑀡𑀽𑀧𑀥𑀻𑀢𑀺 𑀇𑀫𑁂 𑀉𑀧𑀥𑀬𑁄 𑀳𑁄𑀦𑁆𑀢𑀺. 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸𑀢𑀺 𑀧𑀭𑀺𑀧𑀽𑀭𑀸 𑀕𑀳𑀺𑀢𑀸 𑀧𑀭𑀫𑀝𑁆𑀞𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀆𑀤𑀺𑀢𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀓𑀺𑀮𑁂𑀲𑀧𑀭𑀺𑀘𑁆𑀘𑀸𑀕𑀢𑁄, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀻𑀳𑀺 𑀘 𑀓𑀺𑀮𑁂𑀲𑀧𑀭𑀺𑀘𑁆𑀘𑀸𑀕𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑁂𑀯 𑀓𑀺𑀮𑁂𑀲𑀧𑀭𑀺𑀘𑁆𑀘𑀸𑀕𑁄 𑀉𑀢𑁆𑀢𑀭𑀺𑀢𑀭𑁄, 𑀢𑀲𑁆𑀫𑀸. 𑀏𑀯𑀁 𑀲𑀫𑀦𑁆𑀦𑀸𑀕𑀢𑁄𑀢𑀺 𑀇𑀫𑀺𑀦𑀸 𑀉𑀢𑁆𑀢𑀫𑁂𑀦 𑀘𑀸𑀕𑀸𑀥𑀺𑀝𑁆𑀞𑀸𑀦𑁂𑀦 𑀲𑀫𑀦𑁆𑀦𑀸𑀕𑀢𑁄.

𑁩𑁬𑁮. 𑀆𑀖𑀸𑀢𑁄𑀢𑀺𑀆𑀤𑀻𑀲𑀼 𑀆𑀖𑀸𑀢𑀓𑀭𑀡𑀯𑀲𑁂𑀦 𑀆𑀖𑀸𑀢𑁄, 𑀩𑁆𑀬𑀸𑀧𑀚𑁆𑀚𑀦𑀯𑀲𑁂𑀦 𑀩𑁆𑀬𑀸𑀧𑀸𑀤𑁄, 𑀲𑀫𑁆𑀧𑀤𑀼𑀲𑁆𑀲𑀦𑀯𑀲𑁂𑀦 𑀲𑀫𑁆𑀧𑀤𑁄𑀲𑁄𑀢𑀺 𑀢𑀻𑀳𑀺 𑀧𑀤𑁂𑀳𑀺 𑀤𑁄𑀲𑀸𑀓𑀼𑀲𑀮𑀫𑀽𑀮𑀫𑁂𑀯 𑀯𑀼𑀢𑁆𑀢𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀆𑀤𑀺𑀢𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀓𑀺𑀮𑁂𑀲𑀯𑀽𑀧𑀲𑀫𑀢𑁄, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀤𑀻𑀳𑀺 𑀓𑀺𑀮𑁂𑀲𑀯𑀽𑀧𑀲𑀫𑀢𑁄 𑀘 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑁂𑀯 𑀓𑀺𑀮𑁂𑀲𑀯𑀽𑀧𑀲𑀫𑁄 𑀉𑀢𑁆𑀢𑀭𑀺𑀢𑀭𑁄, 𑀢𑀲𑁆𑀫𑀸. 𑀏𑀯𑀁 𑀲𑀫𑀦𑁆𑀦𑀸𑀕𑀢𑁄𑀢𑀺 𑀇𑀫𑀺𑀦𑀸 𑀉𑀢𑁆𑀢𑀫𑁂𑀦 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑁂𑀦 𑀲𑀫𑀦𑁆𑀦𑀸𑀕𑀢𑁄.

𑁩𑁬𑁯. 𑀫𑀜𑁆𑀜𑀺𑀢𑀫𑁂𑀢𑀦𑁆𑀢𑀺 𑀢𑀡𑁆𑀳𑀸𑀫𑀜𑁆𑀜𑀺𑀢𑀁 𑀫𑀸𑀦𑀫𑀜𑁆𑀜𑀺𑀢𑀁 𑀤𑀺𑀝𑁆𑀞𑀺𑀫𑀜𑁆𑀜𑀺𑀢𑀦𑁆𑀢𑀺 𑀢𑀺𑀯𑀺𑀥𑀫𑁆𑀧𑀺 𑀯𑀝𑁆𑀝𑀢𑀺. 𑀅𑀬𑀫𑀳𑀫𑀲𑁆𑀫𑀻𑀢𑀺 𑀏𑀢𑁆𑀣 𑀧𑀦 𑀅𑀬𑀫𑀳𑀦𑁆𑀢𑀺 𑀏𑀓𑀁 𑀢𑀡𑁆𑀳𑀸𑀫𑀜𑁆𑀜𑀺𑀢𑀫𑁂𑀯 𑀯𑀝𑁆𑀝𑀢𑀺. 𑀭𑁄𑀕𑁄𑀢𑀺𑀆𑀤𑀻𑀲𑀼 𑀆𑀩𑀸𑀥𑀝𑁆𑀞𑁂𑀦 𑀭𑁄𑀕𑁄, 𑀅𑀦𑁆𑀢𑁄𑀤𑁄𑀲𑀝𑁆𑀞𑁂𑀦 𑀕𑀡𑁆𑀟𑁄, 𑀅𑀦𑀼𑀧𑀯𑀺𑀝𑁆𑀞𑀝𑁆𑀞𑁂𑀦 𑀲𑀮𑁆𑀮𑀁. 𑀫𑀼𑀦𑀺 𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀔𑀻𑀡𑀸𑀲𑀯𑀫𑀼𑀦𑀺 𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀢𑁆𑀣 𑀞𑀺𑀢𑀦𑁆𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀞𑀺𑀢𑀁. 𑀲𑀁𑀔𑀺𑀢𑁆𑀢𑁂𑀦𑀸𑀢𑀺 𑀩𑀼𑀤𑁆𑀥𑀸𑀦𑀁 𑀓𑀺𑀭 𑀲𑀩𑁆𑀩𑀸𑀧𑀺 𑀥𑀫𑁆𑀫𑀤𑁂𑀲𑀦𑀸 𑀲𑀁𑀔𑀺𑀢𑁆𑀢𑀸𑀯, 𑀯𑀺𑀢𑁆𑀣𑀸𑀭𑀤𑁂𑀲𑀦𑀸 𑀦𑀸𑀫 𑀦𑀢𑁆𑀣𑀺, 𑀲𑀫𑀦𑁆𑀢𑀧𑀝𑁆𑀞𑀸𑀦𑀓𑀣𑀸𑀧𑀺 𑀲𑀁𑀔𑀺𑀢𑁆𑀢𑀸𑀬𑁂𑀯. 𑀇𑀢𑀺 𑀪𑀕𑀯𑀸 𑀤𑁂𑀲𑀦𑀁 𑀬𑀣𑀸𑀦𑀼𑀲𑀦𑁆𑀥𑀺𑀁 𑀧𑀸𑀧𑁂𑀲𑀺. 𑀉𑀕𑁆𑀖𑀸𑀝𑀺𑀢𑀜𑁆𑀜𑀽𑀢𑀺𑀆𑀤𑀻𑀲𑀼 𑀧𑀦 𑀘𑀢𑀽𑀲𑀼 𑀧𑀼𑀕𑁆𑀕𑀮𑁂𑀲𑀼 𑀧𑀼𑀓𑁆𑀓𑀼𑀲𑀸𑀢𑀺 𑀓𑀼𑀮𑀧𑀼𑀢𑁆𑀢𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀽, 𑀇𑀢𑀺 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀯𑀲𑁂𑀦 𑀪𑀕𑀯𑀸 𑀇𑀫𑀁 𑀥𑀸𑀢𑀼𑀯𑀺𑀪𑀗𑁆𑀕𑀲𑀼𑀢𑁆𑀢𑀁 𑀓𑀣𑁂𑀲𑀺.

𑁩𑁭𑁦. 𑀦 𑀔𑁄 𑀫𑁂, 𑀪𑀦𑁆𑀢𑁂, 𑀧𑀭𑀺𑀧𑀼𑀡𑁆𑀡𑀁 𑀧𑀢𑁆𑀢𑀘𑀻𑀯𑀭𑀦𑁆𑀢𑀺 𑀓𑀲𑁆𑀫𑀸 𑀓𑀼𑀮𑀧𑀼𑀢𑁆𑀢𑀲𑁆𑀲 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀁 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀧𑀼𑀩𑁆𑀩𑁂 𑀅𑀝𑁆𑀞𑀦𑁆𑀦𑀁 𑀧𑀭𑀺𑀓𑁆𑀔𑀸𑀭𑀸𑀦𑀁 𑀅𑀤𑀺𑀦𑁆𑀦𑀢𑁆𑀢𑀸. 𑀓𑀼𑀮𑀧𑀼𑀢𑁆𑀢𑁄 𑀳𑀺 𑀤𑀺𑀦𑁆𑀦𑀤𑀸𑀦𑁄 𑀓𑀢𑀸𑀪𑀺𑀦𑀻𑀳𑀸𑀭𑁄, 𑀦 𑀤𑀺𑀦𑁆𑀦𑀢𑁆𑀢𑀸𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀁 𑀧𑀦 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁𑀬𑁂𑀯 𑀦𑀺𑀩𑁆𑀩𑀢𑁆𑀢𑀢𑀺, 𑀅𑀬𑀜𑁆𑀘 𑀧𑀼𑀦𑀧𑀝𑀺𑀲𑀦𑁆𑀥𑀺𑀓𑁄, 𑀢𑀲𑁆𑀫𑀸 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀅𑀣 𑀪𑀕𑀯𑀸 𑀲𑀬𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀓𑀲𑁆𑀫𑀸 𑀦 𑀉𑀧𑀲𑀫𑁆𑀧𑀸𑀤𑁂𑀲𑀻𑀢𑀺. 𑀑𑀓𑀸𑀲𑀸𑀪𑀸𑀯𑀢𑁄. 𑀓𑀼𑀮𑀧𑀼𑀢𑁆𑀢𑀲𑁆𑀲 𑀆𑀬𑀼 𑀧𑀭𑀺𑀓𑁆𑀔𑀻𑀡𑀁, 𑀲𑀼𑀤𑁆𑀥𑀸𑀯𑀸𑀲𑀺𑀓𑁄 𑀅𑀦𑀸𑀕𑀸𑀫𑀻 𑀫𑀳𑀸𑀩𑁆𑀭𑀳𑁆𑀫𑀸 𑀓𑀼𑀫𑁆𑀪𑀓𑀸𑀭𑀲𑀸𑀮𑀁 𑀆𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀯𑀺𑀬 𑀅𑀳𑁄𑀲𑀺. 𑀢𑀲𑁆𑀫𑀸 𑀲𑀬𑀁 𑀦 𑀧𑀭𑀺𑀬𑁂𑀲𑀺.

𑀧𑀢𑁆𑀢𑀘𑀻𑀯𑀭𑀧𑀭𑀺𑀬𑁂𑀲𑀦𑀁 𑀧𑀓𑁆𑀓𑀸𑀫𑀻𑀢𑀺 𑀓𑀸𑀬 𑀯𑁂𑀮𑀸𑀬 𑀧𑀓𑁆𑀓𑀸𑀫𑀺? 𑀉𑀝𑁆𑀞𑀺𑀢𑁂 𑀅𑀭𑀼𑀡𑁂. 𑀪𑀕𑀯𑀢𑁄 𑀓𑀺𑀭 𑀥𑀫𑁆𑀫𑀤𑁂𑀲𑀦𑀸𑀧𑀭𑀺𑀦𑀺𑀝𑁆𑀞𑀸𑀦𑀜𑁆𑀘 𑀅𑀭𑀼𑀡𑀼𑀝𑁆𑀞𑀸𑀦𑀜𑁆𑀘 𑀭𑀲𑁆𑀫𑀺𑀯𑀺𑀲𑁆𑀲𑀚𑁆𑀚𑀦𑀜𑁆𑀘 𑀏𑀓𑀓𑁆𑀔𑀡𑁂 𑀅𑀳𑁄𑀲𑀺. 𑀪𑀕𑀯𑀸 𑀓𑀺𑀭 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀢𑁆𑀯𑀸𑀯 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑀺, 𑀲𑀓𑀮𑀓𑀼𑀫𑁆𑀪𑀓𑀸𑀭𑀦𑀺𑀯𑁂𑀲𑀦𑀁 𑀏𑀓𑀧𑀚𑁆𑀚𑁄𑀢𑀁 𑀅𑀳𑁄𑀲𑀺, 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀚𑀸𑀮𑀚𑀸𑀮𑀸 𑀧𑀼𑀜𑁆𑀚𑀧𑀼𑀜𑁆𑀚𑀸 𑀳𑀼𑀢𑁆𑀯𑀸 𑀯𑀺𑀥𑀸𑀯𑀦𑁆𑀢𑀺𑀬𑁄 𑀲𑀩𑁆𑀩𑀤𑀺𑀲𑀸𑀪𑀸𑀕𑁂 𑀲𑀼𑀯𑀡𑁆𑀡𑀧𑀝𑀧𑀭𑀺𑀬𑁄𑀦𑀤𑁆𑀥𑁂 𑀯𑀺𑀬 𑀘 𑀦𑀸𑀦𑀸𑀯𑀡𑁆𑀡𑀓𑀼𑀲𑀼𑀫𑀭𑀢𑀦𑀯𑀺𑀲𑀭𑀲𑀫𑀼𑀚𑁆𑀚𑀮𑁂 𑀯𑀺𑀬 𑀘 𑀅𑀓𑀁𑀲𑀼. 𑀪𑀕𑀯𑀸 ‘‘𑀦𑀕𑀭𑀯𑀸𑀲𑀺𑀦𑁄 𑀫𑀁 𑀧𑀲𑁆𑀲𑀦𑁆𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀦𑀕𑀭𑀯𑀸𑀲𑀺𑀦𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸𑀯 ‘‘𑀲𑀢𑁆𑀣𑀸 𑀓𑀺𑀭 𑀆𑀕𑀢𑁄, 𑀓𑀼𑀫𑁆𑀪𑀓𑀸𑀭𑀲𑀸𑀮𑀸𑀬 𑀓𑀺𑀭 𑀦𑀺𑀲𑀺𑀦𑁆𑀦𑁄’’𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁.

𑀭𑀸𑀚𑀸 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀓𑀸𑀬 𑀯𑁂𑀮𑀸𑀬 𑀆𑀕𑀢𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. 𑀳𑀺𑀬𑁆𑀬𑁄 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀯𑁂𑀮𑀸𑀬 𑀫𑀳𑀸𑀭𑀸𑀚𑀸𑀢𑀺. 𑀓𑁂𑀦 𑀓𑀫𑁆𑀫𑁂𑀦 𑀪𑀕𑀯𑀸𑀢𑀺? 𑀢𑀼𑀫𑁆𑀳𑀸𑀓𑀁 𑀲𑀳𑀸𑀬𑁄 𑀧𑀼𑀓𑁆𑀓𑀼𑀲𑀸𑀢𑀺 𑀭𑀸𑀚𑀸 𑀢𑀼𑀫𑁆𑀳𑁂𑀳𑀺 𑀧𑀳𑀺𑀢𑀁 𑀲𑀸𑀲𑀦𑀁 𑀲𑀼𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀫𑀁 𑀉𑀤𑁆𑀤𑀺𑀲𑁆𑀲 𑀆𑀕𑀘𑁆𑀙𑀦𑁆𑀢𑁄 𑀲𑀸𑀯𑀢𑁆𑀣𑀺𑀁 𑀅𑀢𑀺𑀓𑁆𑀓𑀫𑁆𑀫 𑀧𑀜𑁆𑀘𑀘𑀢𑁆𑀢𑀸𑀮𑀻𑀲 𑀬𑁄𑀚𑀦𑀸𑀦𑀺 𑀆𑀕𑀦𑁆𑀢𑁆𑀯𑀸 𑀇𑀫𑀁 𑀓𑀼𑀫𑁆𑀪𑀓𑀸𑀭𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀺, 𑀅𑀳𑀁 𑀢𑀲𑁆𑀲 𑀲𑀗𑁆𑀕𑀳𑀢𑁆𑀣𑀁 𑀆𑀕𑀦𑁆𑀢𑁆𑀯𑀸 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺𑀁, 𑀓𑀼𑀮𑀧𑀼𑀢𑁆𑀢𑁄 𑀢𑀻𑀡𑀺 𑀨𑀮𑀸𑀦𑀺 𑀧𑀝𑀺𑀯𑀺𑀚𑁆𑀛𑀺 𑀫𑀳𑀸𑀭𑀸𑀚𑀸𑀢𑀺. 𑀇𑀤𑀸𑀦𑀺 𑀓𑀳𑀁, 𑀪𑀦𑁆𑀢𑁂𑀢𑀺? 𑀉𑀧𑀲𑀫𑁆𑀧𑀤𑀁 𑀬𑀸𑀘𑀺𑀢𑁆𑀯𑀸 𑀅𑀧𑀭𑀺𑀧𑀼𑀡𑁆𑀡𑀧𑀢𑁆𑀢𑀘𑀻𑀯𑀭𑀢𑀸𑀬 𑀧𑀢𑁆𑀢𑀘𑀻𑀯𑀭𑀧𑀭𑀺𑀬𑁂𑀲𑀦𑀢𑁆𑀣𑀁 𑀕𑀢𑁄 𑀫𑀳𑀸𑀭𑀸𑀚𑀸𑀢𑀺. 𑀭𑀸𑀚𑀸 𑀓𑀼𑀮𑀧𑀼𑀢𑁆𑀢𑀲𑁆𑀲 𑀕𑀢𑀤𑀺𑀲𑀸𑀪𑀸𑀕𑁂𑀦 𑀅𑀕𑀫𑀸𑀲𑀺. 𑀪𑀕𑀯𑀸𑀧𑀺 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀚𑁂𑀢𑀯𑀦𑀕𑀦𑁆𑀥𑀓𑀼𑀝𑀺𑀫𑁆𑀳𑀺𑀬𑁂𑀯 𑀧𑀸𑀢𑀼𑀭𑀳𑁄𑀲𑀺.

𑀓𑀼𑀮𑀧𑀼𑀢𑁆𑀢𑁄𑀧𑀺 𑀧𑀢𑁆𑀢𑀘𑀻𑀯𑀭𑀁 𑀧𑀭𑀺𑀬𑁂𑀲𑀫𑀸𑀦𑁄 𑀦𑁂𑀯 𑀩𑀺𑀫𑁆𑀩𑀺𑀲𑀸𑀭𑀭𑀜𑁆𑀜𑁄 𑀦 𑀢𑀓𑁆𑀓𑀲𑀻𑀮𑀓𑀸𑀦𑀁 𑀚𑀗𑁆𑀖𑀯𑀸𑀡𑀺𑀚𑀸𑀦𑀁 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀦 𑀔𑁄 𑀫𑁂 𑀓𑀼𑀓𑁆𑀓𑀼𑀝𑀲𑁆𑀲 𑀯𑀺𑀬 𑀢𑀢𑁆𑀣 𑀢𑀢𑁆𑀣 𑀫𑀦𑀸𑀧𑀸𑀫𑀦𑀸𑀧𑀫𑁂𑀯 𑀯𑀺𑀘𑀺𑀦𑀺𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀧𑀭𑀺𑀬𑁂𑀲𑀺𑀢𑀼𑀁 𑀬𑀼𑀢𑁆𑀢𑀁, 𑀫𑀳𑀦𑁆𑀢𑀁 𑀦𑀕𑀭𑀁 𑀯𑀚𑁆𑀚𑀺𑀢𑁆𑀯𑀸 𑀉𑀤𑀓𑀢𑀺𑀢𑁆𑀣𑀲𑀼𑀲𑀸𑀦𑀲𑀗𑁆𑀓𑀸𑀭𑀝𑁆𑀞𑀸𑀦𑀅𑀦𑁆𑀢𑀭𑀯𑀻𑀣𑀻𑀲𑀼 𑀧𑀭𑀺𑀬𑁂𑀲𑀺𑀲𑁆𑀲𑀸𑀫𑀻’’𑀢𑀺 𑀅𑀦𑁆𑀢𑀭𑀯𑀻𑀣𑀺𑀬𑀁 𑀲𑀗𑁆𑀓𑀸𑀭𑀓𑀽𑀝𑁂𑀲𑀼 𑀢𑀸𑀯 𑀧𑀺𑀮𑁄𑀢𑀺𑀓𑀁 𑀧𑀭𑀺𑀬𑁂𑀲𑀺𑀢𑀼𑀁 𑀆𑀭𑀤𑁆𑀥𑁄.

𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀻𑀢𑀺 𑀏𑀢𑀲𑁆𑀫𑀺𑀁 𑀲𑀗𑁆𑀓𑀸𑀭𑀓𑀽𑀝𑁂 𑀧𑀺𑀮𑁄𑀢𑀺𑀓𑀁 𑀑𑀮𑁄𑀓𑁂𑀦𑁆𑀢𑀁 𑀯𑀺𑀩𑁆𑀪𑀦𑁆𑀢𑀸 𑀢𑀭𑀼𑀡𑀯𑀘𑁆𑀙𑀸 𑀕𑀸𑀯𑀻 𑀉𑀧𑀥𑀸𑀯𑀺𑀢𑁆𑀯𑀸 𑀲𑀺𑀗𑁆𑀕𑁂𑀦 𑀯𑀺𑀚𑁆𑀛𑀺𑀢𑁆𑀯𑀸 𑀖𑀸𑀢𑁂𑀲𑀺. 𑀙𑀸𑀢𑀓𑀚𑁆𑀛𑀢𑁆𑀢𑁄 𑀓𑀼𑀮𑀧𑀼𑀢𑁆𑀢𑁄 𑀆𑀓𑀸𑀲𑁂𑀬𑁂𑀯 𑀆𑀬𑀼𑀓𑁆𑀔𑀬𑀁 𑀧𑀢𑁆𑀯𑀸 𑀧𑀢𑀺𑀢𑁄. 𑀲𑀗𑁆𑀓𑀸𑀭𑀝𑁆𑀞𑀸𑀦𑁂 𑀅𑀥𑁄𑀫𑀼𑀔𑀝𑁆𑀞𑀧𑀺𑀢𑀸 𑀲𑀼𑀯𑀡𑁆𑀡𑀧𑀝𑀺𑀫𑀸 𑀯𑀺𑀬 𑀅𑀳𑁄𑀲𑀺, 𑀓𑀸𑀮𑀗𑁆𑀓𑀢𑁄 𑀘 𑀧𑀦 𑀅𑀯𑀺𑀳𑀸𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺, 𑀦𑀺𑀩𑁆𑀩𑀢𑁆𑀢𑀫𑀢𑁆𑀢𑁄𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀯𑀺𑀳𑀸𑀩𑁆𑀭𑀳𑁆𑀫𑀮𑁄𑀓𑁂 𑀓𑀺𑀭 𑀦𑀺𑀩𑁆𑀩𑀢𑁆𑀢𑀫𑀢𑁆𑀢𑀸𑀯 𑀲𑀢𑁆𑀢 𑀚𑀦𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀯𑀺𑀳𑀁 𑀉𑀧𑀧𑀦𑁆𑀦𑀸𑀲𑁂, 𑀯𑀺𑀫𑀼𑀢𑁆𑀢𑀸 𑀲𑀢𑁆𑀢 𑀪𑀺𑀓𑁆𑀔𑀯𑁄;

𑀭𑀸𑀕𑀤𑁄𑀲𑀧𑀭𑀺𑀓𑁆𑀔𑀻𑀡𑀸, 𑀢𑀺𑀡𑁆𑀡𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁.

𑀓𑁂 𑀘 𑀢𑁂 𑀅𑀢𑀭𑀼𑀁 𑀧𑀗𑁆𑀓𑀁, 𑀫𑀘𑁆𑀘𑀼𑀥𑁂𑀬𑁆𑀬𑀁 𑀲𑀼𑀤𑀼𑀢𑁆𑀢𑀭𑀁;

𑀓𑁂 𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀤𑀺𑀩𑁆𑀩𑀬𑁄𑀕𑀁 𑀉𑀧𑀘𑁆𑀘𑀕𑀼𑀁.

𑀉𑀧𑀓𑁄 𑀧𑀮𑀕𑀡𑁆𑀟𑁄 𑀘, 𑀧𑀼𑀓𑁆𑀓𑀼𑀲𑀸𑀢𑀺 𑀘 𑀢𑁂 𑀢𑀬𑁄;

𑀪𑀤𑁆𑀤𑀺𑀬𑁄 𑀔𑀡𑁆𑀟𑀤𑁂𑀯𑁄 𑀘, 𑀩𑀸𑀳𑀼𑀭𑀕𑁆𑀕𑀺 𑀘 𑀲𑀺𑀗𑁆𑀕𑀺𑀬𑁄;

𑀢𑁂 𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀤𑀺𑀩𑁆𑀩𑀬𑁄𑀕𑀁 𑀉𑀧𑀘𑁆𑀘𑀕𑀼’’𑀦𑁆𑀢𑀺. (𑀲𑀁. 𑀦𑀺. 𑁧.𑁫𑁦, 𑁧𑁦𑁫);

𑀩𑀺𑀫𑁆𑀩𑀺𑀲𑀸𑀭𑁄𑀧𑀺 ‘‘𑀫𑀬𑁆𑀳𑀁 𑀲𑀳𑀸𑀬𑁄 𑀫𑀬𑀸 𑀧𑁂𑀲𑀺𑀢𑀲𑀸𑀲𑀦𑀫𑀢𑁆𑀢𑀁 𑀯𑀸𑀘𑁂𑀢𑁆𑀯𑀸 𑀳𑀢𑁆𑀣𑀕𑀢𑀁 𑀭𑀚𑁆𑀚𑀁 𑀧𑀳𑀸𑀬 𑀏𑀢𑁆𑀢𑀓𑀁 𑀅𑀤𑁆𑀥𑀸𑀦𑀁 𑀆𑀕𑀢𑁄, 𑀤𑀼𑀓𑁆𑀓𑀭𑀁 𑀓𑀢𑀁 𑀓𑀼𑀮𑀧𑀼𑀢𑁆𑀢𑁂𑀦, 𑀧𑀩𑁆𑀩𑀚𑀺𑀢𑀲𑀓𑁆𑀓𑀸𑀭𑁂𑀦 𑀢𑀁 𑀲𑀓𑁆𑀓𑀭𑀺𑀲𑁆𑀲𑀸𑀫𑀻’’𑀢𑀺 ‘‘𑀧𑀭𑀺𑀬𑁂𑀲𑀣 𑀫𑁂 𑀲𑀳𑀸𑀬𑀓’’𑀦𑁆𑀢𑀺 𑀢𑀢𑁆𑀣 𑀢𑀢𑁆𑀣 𑀧𑁂𑀲𑁂𑀲𑀺. 𑀧𑁂𑀲𑀺𑀢𑀸 𑀢𑀁 𑀅𑀤𑁆𑀤𑀲𑀁𑀲𑀼 𑀲𑀗𑁆𑀓𑀸𑀭𑀝𑁆𑀞𑀸𑀦𑁂 𑀧𑀢𑀺𑀢𑀁, 𑀤𑀺𑀲𑁆𑀯𑀸 𑀆𑀕𑀫𑁆𑀫 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀕𑀦𑁆𑀢𑁆𑀯𑀸 𑀓𑀼𑀮𑀧𑀼𑀢𑁆𑀢𑀁 𑀤𑀺𑀲𑁆𑀯𑀸 𑁋 ‘‘𑀦 𑀯𑀢, 𑀪𑁄, 𑀮𑀪𑀺𑀫𑁆𑀳𑀸 𑀲𑀳𑀸𑀬𑀓𑀲𑁆𑀲 𑀲𑀓𑁆𑀓𑀸𑀭𑀁 𑀓𑀸𑀢𑀼𑀁, 𑀅𑀦𑀸𑀣𑁄 𑀫𑁂 𑀚𑀸𑀢𑁄 𑀲𑀳𑀸𑀬𑀓𑁄’’𑀢𑀺. 𑀧𑀭𑀺𑀤𑁂𑀯𑀺𑀢𑁆𑀯𑀸 𑀓𑀼𑀮𑀧𑀼𑀢𑁆𑀢𑀁 𑀫𑀜𑁆𑀘𑀓𑁂𑀦 𑀕𑀡𑁆𑀳𑀸𑀧𑁂𑀢𑁆𑀯𑀸 𑀬𑀼𑀢𑁆𑀢𑁄𑀓𑀸𑀲𑁂 𑀞𑀧𑁂𑀢𑁆𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀓𑁆𑀓𑀸𑀭𑀁 𑀓𑀸𑀢𑀼𑀁 𑀚𑀸𑀦𑀦𑀸𑀪𑀸𑀯𑁂𑀦 𑀦𑁆𑀳𑀸𑀧𑀓𑀓𑀧𑁆𑀧𑀓𑀸𑀤𑀬𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀓𑀼𑀮𑀧𑀼𑀢𑁆𑀢𑀁 𑀲𑀻𑀲𑀁 𑀦𑁆𑀳𑀸𑀧𑁂𑀢𑁆𑀯𑀸 𑀲𑀼𑀤𑁆𑀥𑀯𑀢𑁆𑀣𑀸𑀦𑀺 𑀦𑀺𑀯𑀸𑀲𑀸𑀧𑁂𑀢𑁆𑀯𑀸 𑀭𑀸𑀚𑀯𑁂𑀲𑁂𑀦 𑀅𑀮𑀗𑁆𑀓𑀸𑀭𑀸𑀧𑁂𑀢𑁆𑀯𑀸 𑀲𑁄𑀯𑀡𑁆𑀡𑀲𑀺𑀯𑀺𑀓𑀁 𑀆𑀭𑁄𑀧𑁂𑀢𑁆𑀯𑀸 𑀲𑀩𑁆𑀩𑀢𑀸𑀴𑀸𑀯𑀘𑀭𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀁 𑀓𑀭𑁄𑀦𑁆𑀢𑁄 𑀦𑀕𑀭𑀸 𑀦𑀻𑀳𑀭𑀺𑀢𑁆𑀯𑀸 𑀩𑀳𑀽𑀳𑀺 𑀕𑀦𑁆𑀥𑀓𑀝𑁆𑀞𑁂𑀳𑀺 𑀫𑀳𑀸𑀘𑀺𑀢𑀓𑀁 𑀓𑀸𑀭𑁂𑀢𑁆𑀯𑀸 𑀓𑀼𑀮𑀧𑀼𑀢𑁆𑀢𑀲𑁆𑀲 𑀲𑀭𑀻𑀭𑀓𑀺𑀘𑁆𑀘𑀁 𑀓𑀢𑁆𑀯𑀸 𑀥𑀸𑀢𑀼𑀬𑁄 𑀆𑀤𑀸𑀬 𑀘𑁂𑀢𑀺𑀬𑀁 𑀧𑀢𑀺𑀝𑁆𑀞𑀧𑁂𑀲𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀥𑀸𑀢𑀼𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀲𑀘𑁆𑀘𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭𑁧. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀲𑀘𑁆𑀘𑀯𑀺𑀪𑀗𑁆𑀕𑀲𑀼𑀢𑁆𑀢𑀁. 𑀢𑀢𑁆𑀣 𑀆𑀘𑀺𑀓𑁆𑀔𑀦𑀸𑀢𑀺 𑀇𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀦𑀸𑀫…𑀧𑁂… 𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀅𑀭𑀺𑀬𑀲𑀘𑁆𑀘𑀁 𑀦𑀸𑀫𑀸𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀧𑀺𑀘𑁂𑀢𑁆𑀣 𑀧𑀜𑁆𑀜𑀸𑀧𑀦𑀸 𑀦𑀸𑀫 𑀤𑀼𑀓𑁆𑀔𑀲𑀘𑁆𑀘𑀸𑀤𑀻𑀦𑀁 𑀞𑀧𑀦𑀸. 𑀆𑀲𑀦𑀁 𑀞𑀧𑁂𑀦𑁆𑀢𑁄 𑀳𑀺 𑀆𑀲𑀦𑀁 𑀧𑀜𑁆𑀜𑀧𑁂𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀧𑀝𑁆𑀞𑀧𑀦𑀸𑀢𑀺 𑀧𑀜𑁆𑀜𑀸𑀧𑀦𑀸. 𑀯𑀺𑀯𑀭𑀡𑀸𑀢𑀺 𑀯𑀺𑀯𑀝𑀓𑀭𑀡𑀸. 𑀯𑀺𑀪𑀚𑀦𑀸𑀢𑀺 𑀯𑀺𑀪𑀸𑀕𑀓𑀺𑀭𑀺𑀬𑀸. 𑀉𑀢𑁆𑀢𑀸𑀦𑀻𑀓𑀫𑁆𑀫𑀦𑁆𑀢𑀺 𑀧𑀸𑀓𑀝𑀪𑀸𑀯𑀓𑀭𑀡𑀁.

𑀅𑀦𑀼𑀕𑁆𑀕𑀸𑀳𑀓𑀸𑀢𑀺 𑀆𑀫𑀺𑀲𑀲𑀗𑁆𑀕𑀳𑁂𑀦 𑀥𑀫𑁆𑀫𑀲𑀗𑁆𑀕𑀳𑁂𑀦𑀸𑀢𑀺 𑀤𑁆𑀯𑀻𑀳𑀺𑀧𑀺 𑀲𑀗𑁆𑀕𑀳𑁂𑀳𑀺 𑀅𑀦𑀼𑀕𑁆𑀕𑀸𑀳𑀓𑀸. 𑀚𑀦𑁂𑀢𑀸𑀢𑀺 𑀚𑀦𑀺𑀓𑀸 𑀫𑀸𑀢𑀸. 𑀆𑀧𑀸𑀤𑁂𑀢𑀸𑀢𑀺 𑀧𑁄𑀲𑁂𑀢𑀸. 𑀧𑁄𑀲𑀺𑀓𑀫𑀸𑀢𑀸 𑀯𑀺𑀬 𑀫𑁄𑀕𑁆𑀕𑀮𑁆𑀮𑀸𑀦𑁄𑀢𑀺 𑀤𑀻𑀧𑁂𑀢𑀺. 𑀚𑀦𑀺𑀓𑀫𑀸𑀢𑀸 𑀳𑀺 𑀦𑀯 𑀯𑀸 𑀤𑀲 𑀯𑀸 𑀫𑀸𑀲𑁂 𑀮𑁄𑀡𑀫𑁆𑀩𑀺𑀮𑀸𑀤𑀻𑀦𑀺 𑀧𑀭𑀺𑀳𑀭𑀫𑀸𑀦𑀸 𑀓𑀼𑀘𑁆𑀙𑀺𑀬𑀸 𑀤𑀸𑀭𑀓𑀁 𑀥𑀸𑀭𑁂𑀢𑁆𑀯𑀸 𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀁 𑀧𑁄𑀲𑀺𑀓𑀫𑀸𑀢𑀭𑀁 𑀥𑀸𑀢𑀺𑀁 𑀧𑀝𑀺𑀘𑁆𑀙𑀸𑀧𑁂𑀢𑀺. 𑀲𑀸 𑀔𑀻𑀭𑀦𑀯𑀦𑀻𑀢𑀸𑀤𑀻𑀳𑀺 𑀤𑀸𑀭𑀓𑀁 𑀧𑁄𑀲𑁂𑀢𑁆𑀯𑀸 𑀯𑀟𑁆𑀠𑁂𑀢𑀺, 𑀲𑁄 𑀯𑀼𑀤𑁆𑀥𑀺𑀫𑀸𑀕𑀫𑁆𑀫 𑀬𑀣𑀸𑀲𑀼𑀔𑀁 𑀯𑀺𑀘𑀭𑀢𑀺. 𑀏𑀯𑀫𑁂𑀯 𑀲𑀸𑀭𑀺𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀯𑀸 𑀧𑀭𑁂𑀲𑀁 𑀯𑀸 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁂 𑀤𑁆𑀯𑀻𑀳𑀺 𑀲𑀗𑁆𑀕𑀳𑁂𑀳𑀺 𑀲𑀗𑁆𑀕𑀡𑁆𑀳𑀦𑁆𑀢𑁄 𑀕𑀺𑀮𑀸𑀦𑁂 𑀧𑀝𑀺𑀚𑀕𑁆𑀕𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑁂 𑀬𑁄𑀚𑁂𑀢𑁆𑀯𑀸 𑀲𑁄𑀢𑀸𑀧𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀅𑀧𑀸𑀬𑀪𑀬𑁂𑀳𑀺 𑀯𑀼𑀝𑁆𑀞𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑁋 ‘‘𑀇𑀤𑀸𑀦𑀺 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁂𑀦 𑀉𑀧𑀭𑀺𑀫𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀦𑁆𑀢𑀻’’𑀢𑀺 𑀢𑁂𑀲𑀼 𑀅𑀦𑀧𑁂𑀓𑁆𑀔𑁄 𑀳𑀼𑀢𑁆𑀯𑀸 𑀅𑀜𑁆𑀜𑁂 𑀦𑀯𑁂 𑀦𑀯𑁂 𑀑𑀯𑀤𑀢𑀺. 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄𑀧𑀺 𑀅𑀢𑁆𑀢𑀦𑁄 𑀯𑀸 𑀧𑀭𑁂𑀲𑀁 𑀯𑀸 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁂 𑀢𑀣𑁂𑀯 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑁂 𑀬𑁄𑀚𑁂𑀢𑁆𑀯𑀸 𑀳𑁂𑀝𑁆𑀞𑀸 𑀢𑀻𑀡𑀺 𑀨𑀮𑀸𑀦𑀺 𑀧𑀢𑁆𑀢𑁂𑀲𑀼𑀧𑀺 𑀅𑀦𑀧𑁂𑀓𑁆𑀔𑀢𑀁 𑀦 𑀆𑀧𑀚𑁆𑀚𑀢𑀺. 𑀓𑀲𑁆𑀫𑀸? 𑀏𑀯𑀁 𑀓𑀺𑀭𑀲𑁆𑀲 𑀳𑁄𑀢𑀺 𑁋 𑀯𑀼𑀢𑁆𑀢𑀁 𑀪𑀕𑀯𑀢𑀸 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀕𑀽𑀣𑁄 𑀤𑀼𑀕𑁆𑀕𑀦𑁆𑀥𑁄 𑀳𑁄𑀢𑀺…𑀧𑁂… 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀫𑀼𑀢𑁆𑀢𑀁… 𑀔𑁂𑀴𑁄… 𑀧𑀼𑀩𑁆𑀩𑁄… 𑀮𑁄𑀳𑀺𑀢𑀁 𑀤𑀼𑀕𑁆𑀕𑀦𑁆𑀥𑀁 𑀳𑁄𑀢𑀺, 𑀏𑀯𑀫𑁂𑀯 𑀔𑁄 𑀅𑀳𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀪𑀯𑀁 𑀦 𑀯𑀡𑁆𑀡𑁂𑀫𑀺 𑀅𑀦𑁆𑀢𑀫𑀲𑁄 𑀅𑀘𑁆𑀙𑀭𑀸𑀲𑀗𑁆𑀖𑀢𑀫𑀢𑁆𑀢𑀫𑁆𑀧𑀻’’𑀢𑀺 (𑀅. 𑀦𑀺. 𑁧.𑁩𑁨𑁦-𑁩𑁨𑁧). 𑀢𑀲𑁆𑀫𑀸 𑀬𑀸𑀯 𑀅𑀭𑀳𑀢𑁆𑀢𑀁 𑀦 𑀧𑀸𑀧𑀼𑀡𑀦𑁆𑀢𑀺, 𑀢𑀸𑀯 𑀢𑁂𑀲𑀼 𑀅𑀦𑀧𑁂𑀓𑁆𑀔𑀢𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁂𑀲𑀼𑀬𑁂𑀯 𑀆𑀧𑀚𑁆𑀚𑀢𑀻𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀚𑀦𑁂𑀢𑀸 𑀏𑀯𑀁 𑀲𑀸𑀭𑀺𑀧𑀼𑀢𑁆𑀢𑁄. 𑀲𑁂𑀬𑁆𑀬𑀣𑀸𑀧𑀺 𑀚𑀸𑀢𑀲𑁆𑀲 𑀆𑀧𑀸𑀤𑁂𑀢𑀸, 𑀏𑀯𑀁 𑀫𑁄𑀕𑁆𑀕𑀮𑁆𑀮𑀸𑀦𑁄. 𑀲𑀸𑀭𑀺𑀧𑀼𑀢𑁆𑀢𑁄, 𑀪𑀺𑀓𑁆𑀔𑀯𑁂, 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀯𑀺𑀦𑁂𑀢𑀺, 𑀫𑁄𑀕𑁆𑀕𑀮𑁆𑀮𑀸𑀦𑁄 𑀉𑀢𑁆𑀢𑀫𑀢𑁆𑀣𑁂’’𑀢𑀺. 𑀧𑀳𑁄𑀢𑀻𑀢𑀺 𑀲𑀓𑁆𑀓𑁄𑀢𑀺.

𑀤𑀼𑀓𑁆𑀔𑁂 𑀜𑀸𑀡𑀦𑁆𑀢𑀺 𑀲𑀯𑀦𑀲𑀫𑁆𑀫𑀲𑀦𑀧𑀝𑀺𑀯𑁂𑀥𑀜𑀸𑀡𑀁, 𑀢𑀣𑀸 𑀤𑀼𑀓𑁆𑀔𑀲𑀫𑀼𑀤𑀬𑁂. 𑀤𑀼𑀓𑁆𑀔𑀦𑀺𑀭𑁄𑀥𑁂 𑀲𑀯𑀦𑀧𑀝𑀺𑀯𑁂𑀥𑀜𑀸𑀡𑀦𑁆𑀢𑀺 𑀯𑀝𑁆𑀝𑀢𑀺, 𑀢𑀣𑀸 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬. 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀸𑀤𑀻𑀲𑀼 𑀓𑀸𑀫𑀧𑀘𑁆𑀘𑀦𑀻𑀓𑀝𑁆𑀞𑁂𑀦, 𑀓𑀸𑀫𑀢𑁄 𑀦𑀺𑀲𑁆𑀲𑀝𑀪𑀸𑀯𑁂𑀦 𑀯𑀸, 𑀓𑀸𑀫𑀁 𑀲𑀫𑁆𑀫𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑁄𑀢𑀺 𑀯𑀸, 𑀓𑀸𑀫𑀧𑀤𑀖𑀸𑀢𑀁 𑀓𑀸𑀫𑀯𑀽𑀧𑀲𑀫𑀁 𑀓𑀭𑁄𑀦𑁆𑀢𑁄 𑀉𑀧𑁆𑀧𑀦𑁆𑀦𑁄𑀢𑀺 𑀯𑀸, 𑀓𑀸𑀫𑀯𑀺𑀯𑀺𑀢𑁆𑀢𑀦𑁆𑀢𑁂 𑀉𑀧𑁆𑀧𑀦𑁆𑀦𑁄𑀢𑀺 𑀯𑀸 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀩𑁆𑀩𑁂𑀧𑀺 𑀘𑁂𑀢𑁂 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀘𑀺𑀢𑁆𑀢𑁂𑀲𑀼, 𑀫𑀕𑁆𑀕𑀓𑁆𑀔𑀡𑁂 𑀏𑀓𑀘𑀺𑀢𑁆𑀢𑁂 𑀮𑀩𑁆𑀪𑀦𑁆𑀢𑀺. 𑀢𑀢𑁆𑀭 𑀳𑀺 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀘𑁂𑀢𑀦𑀸𑀬 𑀲𑀫𑀼𑀕𑁆𑀖𑀸𑀢𑀓𑁄 𑀏𑀓𑁄𑀯 𑀲𑀗𑁆𑀓𑀧𑁆𑀧𑁄 𑀮𑀩𑁆𑀪𑀢𑀺, 𑀦 𑀦𑀸𑀦𑀸 𑀮𑀩𑁆𑀪𑀢𑀺. 𑀲𑀫𑁆𑀫𑀸𑀯𑀸𑀘𑀸𑀤𑀬𑁄𑀧𑀺 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀘𑀺𑀢𑁆𑀢𑁂𑀲𑀼, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀫𑀕𑁆𑀕𑀓𑁆𑀔𑀡𑁂 𑀏𑀓𑀘𑀺𑀢𑁆𑀢𑁂 𑀮𑀩𑁆𑀪𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁂𑀦 𑀧𑀦 𑀲𑀘𑁆𑀘𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁮𑁯 𑀆𑀤𑀬𑁄) 𑀘 𑀯𑀼𑀢𑁆𑀢𑀸𑀬𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀲𑀘𑁆𑀘𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀤𑀓𑁆𑀔𑀺𑀡𑀸𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭𑁬. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀤𑀓𑁆𑀔𑀺𑀡𑀸𑀯𑀺𑀪𑀗𑁆𑀕𑀲𑀼𑀢𑁆𑀢𑀁. 𑀢𑀢𑁆𑀣 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻𑀢𑀺 𑀕𑁄𑀢𑀫𑀻𑀢𑀺 𑀕𑁄𑀢𑁆𑀢𑀁. 𑀦𑀸𑀫𑀓𑀭𑀡𑀤𑀺𑀯𑀲𑁂 𑀧𑀦𑀲𑁆𑀲𑀸 𑀮𑀤𑁆𑀥𑀲𑀓𑁆𑀓𑀸𑀭𑀸 𑀩𑁆𑀭𑀸𑀳𑁆𑀫𑀡𑀸 𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑁋 ‘‘𑀲𑀘𑁂 𑀅𑀬𑀁 𑀥𑀻𑀢𑀭𑀁 𑀮𑀪𑀺𑀲𑁆𑀲𑀢𑀺, 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀻 𑀪𑀯𑀺𑀲𑁆𑀲𑀢𑀺. 𑀲𑀘𑁂 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀢𑀺, 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀪𑀯𑀺𑀲𑁆𑀲𑀢𑀻𑀢𑀺 𑀉𑀪𑀬𑀣𑀸𑀧𑀺 𑀫𑀳𑀢𑀻𑀬𑁂𑀯𑀲𑁆𑀲𑀸 𑀧𑀚𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀭𑀺𑀁𑀲𑀼. 𑀅𑀣𑀲𑁆𑀲𑀸 𑀫𑀳𑀸𑀧𑀚𑀸𑀧𑀢𑀻𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀇𑀥 𑀧𑀦 𑀕𑁄𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀢𑀺 𑀯𑀼𑀢𑁆𑀢𑀁. 𑀦𑀯𑀦𑁆𑀢𑀺 𑀅𑀳𑀢𑀁. 𑀲𑀸𑀫𑀁 𑀯𑀸𑀬𑀺𑀢𑀦𑁆𑀢𑀺 𑀦 𑀲𑀳𑀢𑁆𑀣𑁂𑀦𑁂𑀯 𑀯𑀸𑀬𑀺𑀢𑀁, 𑀏𑀓𑀤𑀺𑀯𑀲𑀁 𑀧𑀦 𑀥𑀸𑀢𑀺𑀕𑀡𑀧𑀭𑀺𑀯𑀼𑀢𑀸 𑀲𑀺𑀧𑁆𑀧𑀺𑀓𑀸𑀦𑀁 𑀯𑀸𑀬𑀦𑀝𑁆𑀞𑀸𑀦𑀁 𑀆𑀕𑀦𑁆𑀢𑁆𑀯𑀸 𑀯𑁂𑀫𑀓𑁄𑀝𑀺𑀁 𑀕𑀳𑁂𑀢𑁆𑀯𑀸 𑀯𑀸𑀬𑀦𑀸𑀓𑀸𑀭𑀁 𑀅𑀓𑀸𑀲𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀓𑀤𑀸 𑀧𑀦 𑀕𑁄𑀢𑀫𑀺𑀬𑀸 𑀪𑀕𑀯𑀢𑁄 𑀤𑀼𑀲𑁆𑀲𑀬𑀼𑀕𑀁 𑀤𑀸𑀢𑀼𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀦𑁆𑀢𑀺. 𑀅𑀪𑀺𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀞𑀫𑀕𑀫𑀦𑁂𑀦 𑀓𑀧𑀺𑀮𑀧𑀼𑀭𑀁 𑀆𑀕𑀢𑀓𑀸𑀮𑁂. 𑀢𑀤𑀸 𑀳𑀺 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀁 𑀲𑀢𑁆𑀣𑀸𑀭𑀁 𑀕𑀳𑁂𑀢𑁆𑀯𑀸 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀸 𑀲𑀓𑀁 𑀦𑀺𑀯𑁂𑀲𑀦𑀁 𑀧𑀯𑁂𑀲𑁂𑀲𑀺, 𑀅𑀣 𑀪𑀕𑀯𑀢𑁄 𑀭𑀽𑀧𑀲𑁄𑀪𑀕𑁆𑀕𑀁 𑀤𑀺𑀲𑁆𑀯𑀸 𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑁄𑀪𑀢𑀺 𑀯𑀢 𑀫𑁂 𑀧𑀼𑀢𑁆𑀢𑀲𑁆𑀲 𑀅𑀢𑁆𑀢𑀪𑀸𑀯𑁄’’𑀢𑀺. 𑀅𑀣𑀲𑁆𑀲𑀸 𑀩𑀮𑀯𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀺. 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀫 𑀧𑀼𑀢𑁆𑀢𑀲𑁆𑀲 𑀏𑀓𑀽𑀦𑀢𑀺𑀁𑀲 𑀯𑀲𑁆𑀲𑀸𑀦𑀺 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑀲𑁆𑀲 𑀅𑀦𑁆𑀢𑀫𑀲𑁄 𑀫𑁄𑀘𑀨𑀮𑀫𑀢𑁆𑀢𑀫𑁆𑀧𑀺 𑀫𑀬𑀸 𑀤𑀺𑀦𑁆𑀦𑀓𑀫𑁂𑀯 𑀅𑀳𑁄𑀲𑀺, 𑀇𑀤𑀸𑀦𑀺𑀧𑀺𑀲𑁆𑀲 𑀘𑀻𑀯𑀭𑀲𑀸𑀝𑀓𑀁 𑀤𑀲𑁆𑀲𑀸𑀫𑀻’’𑀢𑀺. ‘‘𑀇𑀫𑀲𑁆𑀫𑀺𑀁 𑀔𑁄 𑀧𑀦 𑀭𑀸𑀚𑀕𑁂𑀳𑁂 𑀩𑀳𑀽𑀦𑀺 𑀫𑀳𑀕𑁆𑀖𑀸𑀦𑀺 𑀯𑀢𑁆𑀣𑀸𑀦𑀺 𑀅𑀢𑁆𑀣𑀺, 𑀢𑀸𑀦𑀺 𑀫𑀁 𑀦 𑀢𑁄𑀲𑁂𑀦𑁆𑀢𑀺, 𑀲𑀳𑀢𑁆𑀣𑀸 𑀓𑀢𑀫𑁂𑀯 𑀫𑀁 𑀢𑁄𑀲𑁂𑀢𑀺, 𑀲𑀳𑀢𑁆𑀣𑀸 𑀓𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺.

𑀅𑀣𑀦𑁆𑀢𑀭𑀸𑀧𑀡𑀸 𑀓𑀧𑁆𑀧𑀸𑀲𑀁 𑀆𑀳𑀭𑀸𑀧𑁂𑀢𑁆𑀯𑀸 𑀲𑀳𑀢𑁆𑀣𑁂𑀦𑁂𑀯 𑀧𑀺𑀲𑀺𑀢𑁆𑀯𑀸 𑀧𑁄𑀣𑁂𑀢𑁆𑀯𑀸 𑀲𑀼𑀔𑀼𑀫𑀲𑀼𑀢𑁆𑀢𑀁 𑀓𑀦𑁆𑀢𑀺𑀢𑁆𑀯𑀸 𑀅𑀦𑁆𑀢𑁄𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 𑀲𑀸𑀮𑀁 𑀓𑀸𑀭𑀸𑀧𑁂𑀢𑁆𑀯𑀸 𑀲𑀺𑀧𑁆𑀧𑀺𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀺𑀧𑁆𑀧𑀺𑀓𑀸𑀦𑀁 𑀅𑀢𑁆𑀢𑀦𑁄 𑀧𑀭𑀺𑀪𑁄𑀕𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀫𑁂𑀯 𑀤𑀢𑁆𑀯𑀸 𑀯𑀸𑀬𑀸𑀧𑁂𑀲𑀺, 𑀓𑀸𑀮𑀸𑀦𑀼𑀓𑀸𑀮𑀜𑁆𑀘 𑀥𑀸𑀢𑀺𑀕𑀡𑀧𑀭𑀺𑀯𑀼𑀢𑀸 𑀕𑀦𑁆𑀢𑁆𑀯𑀸 𑀯𑁂𑀫𑀓𑁄𑀝𑀺𑀁 𑀅𑀕𑁆𑀕𑀳𑁂𑀲𑀺. 𑀦𑀺𑀝𑁆𑀞𑀺𑀢𑀓𑀸𑀮𑁂 𑀲𑀺𑀧𑁆𑀧𑀺𑀓𑀸𑀦𑀁 𑀫𑀳𑀸𑀲𑀓𑁆𑀓𑀸𑀭𑀁 𑀓𑀢𑁆𑀯𑀸 𑀤𑀼𑀲𑁆𑀲𑀬𑀼𑀕𑀁 𑀕𑀦𑁆𑀥𑀲𑀫𑀼𑀕𑁆𑀕𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀸𑀲𑀁 𑀕𑀸𑀳𑀸𑀧𑁂𑀢𑁆𑀯𑀸 𑁋 ‘‘𑀫𑀬𑁆𑀳𑀁 𑀧𑀼𑀢𑁆𑀢𑀲𑁆𑀲 𑀘𑀻𑀯𑀭𑀲𑀸𑀝𑀓𑀁 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀫𑀕𑁆𑀕𑀁 𑀧𑀝𑀺𑀬𑀸𑀤𑀸𑀧𑁂𑀲𑀺, 𑀯𑀻𑀣𑀺𑀬𑁄 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀧𑀼𑀡𑁆𑀡𑀖𑀝𑁂 𑀞𑀧𑁂𑀢𑁆𑀯𑀸 𑀥𑀚𑀧𑀝𑀸𑀓𑀸 𑀉𑀲𑁆𑀲𑀸𑀧𑁂𑀢𑁆𑀯𑀸 𑀭𑀸𑀚𑀖𑀭𑀤𑁆𑀯𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀦𑀺𑀕𑁆𑀭𑁄𑀥𑀸𑀭𑀸𑀫𑀸 𑀫𑀕𑁆𑀕𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑀁 𑀅𑀓𑀁𑀲𑀼. 𑀫𑀳𑀸𑀧𑀚𑀸𑀧𑀢𑀺𑀧𑀺 𑀲𑀩𑁆𑀩𑀸𑀮𑀗𑁆𑀓𑀸𑀭𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀥𑀸𑀢𑀺𑀕𑀡𑀧𑀭𑀺𑀯𑀼𑀢𑀸 𑀲𑀫𑀼𑀕𑁆𑀕𑀁 𑀲𑀻𑀲𑁂 𑀞𑀧𑁂𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀇𑀤𑀁 𑀫𑁂, 𑀪𑀦𑁆𑀢𑁂, 𑀦𑀯𑀁 𑀤𑀼𑀲𑁆𑀲𑀬𑀼𑀕𑀦𑁆𑀢𑀺𑀆𑀤𑀺𑀫𑀸𑀳.

𑀤𑀼𑀢𑀺𑀬𑀫𑁆𑀧𑀺 𑀔𑁄𑀢𑀺 ‘‘𑀲𑀗𑁆𑀖𑁂 𑀕𑁄𑀢𑀫𑀺 𑀤𑁂𑀳𑀻’’𑀢𑀺 𑀯𑀼𑀢𑁆𑀢𑁂 𑁋 ‘‘𑀧𑀳𑁄𑀫𑀳𑀁, 𑀪𑀦𑁆𑀢𑁂, 𑀤𑀼𑀲𑁆𑀲𑀓𑁄𑀝𑁆𑀞𑀸𑀕𑀸𑀭𑀢𑁄 𑀪𑀺𑀓𑁆𑀔𑀼𑀲𑀢𑀲𑁆𑀲𑀸𑀧𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀲𑁆𑀲𑀸𑀧𑀺 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀲𑁆𑀲𑀸𑀧𑀺 𑀘𑀻𑀯𑀭𑀤𑀼𑀲𑁆𑀲𑀸𑀦𑀺 𑀤𑀸𑀢𑀼𑀁, 𑀇𑀤𑀁 𑀧𑀦 𑀫𑁂 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀲𑀸𑀫𑀁 𑀓𑀦𑁆𑀢𑀁 𑀲𑀸𑀫𑀁 𑀯𑀸𑀬𑀺𑀢𑀁, 𑀢𑀁 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀽’’𑀢𑀺 𑀦𑀺𑀫𑀦𑁆𑀢𑀬𑀫𑀸𑀦𑀸 𑀆𑀳. 𑀏𑀯𑀁 𑀬𑀸𑀯𑀢𑀢𑀺𑀬𑀁 𑀬𑀸𑀘𑀺, 𑀪𑀕𑀯𑀸𑀧𑀺 𑀧𑀝𑀺𑀓𑁆𑀔𑀺𑀧𑀺𑀬𑁂𑀯.

𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀅𑀢𑁆𑀢𑀦𑁄 𑀤𑀺𑀬𑁆𑀬𑀫𑀸𑀦𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀧𑁂𑀢𑀻𑀢𑀺? 𑀫𑀸𑀢𑀭𑀺 𑀅𑀦𑀼𑀓𑀫𑁆𑀧𑀸𑀬. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀇𑀫𑀺𑀲𑁆𑀲𑀸 𑀫𑀁 𑀆𑀭𑀩𑁆𑀪 𑀧𑀼𑀩𑁆𑀩𑀘𑁂𑀢𑀦𑀸 𑀫𑀼𑀜𑁆𑀘𑀘𑁂𑀢𑀦𑀸 𑀧𑀭𑀘𑁂𑀢𑀦𑀸𑀢𑀺 𑀢𑀺𑀲𑁆𑀲𑁄 𑀘𑁂𑀢𑀦𑀸 𑀉𑀧𑁆𑀧𑀦𑁆𑀦𑀸, 𑀪𑀺𑀓𑁆𑀔𑀼𑀲𑀗𑁆𑀖𑀫𑁆𑀧𑀺𑀲𑁆𑀲𑀸 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑁆𑀢𑀼, 𑀏𑀯𑀫𑀲𑁆𑀲𑀸 𑀙 𑀘𑁂𑀢𑀦𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀧𑀯𑀢𑁆𑀢𑀺𑀲𑁆𑀲𑀦𑁆𑀢𑀻’’𑀢𑀺. 𑀯𑀺𑀢𑀡𑁆𑀟𑀯𑀸𑀤𑀻 𑀧𑀦𑀸𑀳 𑁋 ‘‘𑀲𑀗𑁆𑀖𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺. 𑀲𑁄 𑀯𑀢𑁆𑀢𑀩𑁆𑀩𑁄 𑁋 ‘‘𑀓𑀺𑀁 𑀢𑁆𑀯𑀁 𑀲𑀢𑁆𑀣𑀼 𑀤𑀺𑀦𑁆𑀦𑀢𑁄 𑀲𑀗𑁆𑀖𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀢𑀭𑀁 𑀯𑀤𑀲𑀻’’𑀢𑀺 𑀆𑀫 𑀯𑀤𑀸𑀫𑀻𑀢𑀺. 𑀲𑀼𑀢𑁆𑀢𑀁 𑀆𑀳𑀭𑀸𑀢𑀺. 𑀲𑀗𑁆𑀖𑁂 𑀕𑁄𑀢𑀫𑀺 𑀤𑁂𑀳𑀺, 𑀲𑀗𑁆𑀖𑁂 𑀢𑁂 𑀤𑀺𑀦𑁆𑀦𑁂 𑀅𑀳𑀜𑁆𑀘𑁂𑀯 𑀧𑀽𑀚𑀺𑀢𑁄 𑀪𑀯𑀺𑀲𑁆𑀲𑀸𑀫𑀺 𑀲𑀗𑁆𑀖𑁄 𑀘𑀸𑀢𑀺. 𑀓𑀺𑀁 𑀧𑀦𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀬𑀫𑁂𑀯 𑀅𑀢𑁆𑀣𑁄𑀢𑀺? 𑀆𑀫 𑀅𑀬𑀫𑁂𑀯𑀸𑀢𑀺. 𑀬𑀤𑀺 𑀏𑀯𑀁 ‘‘𑀢𑁂𑀦 𑀳𑀸𑀦𑀦𑁆𑀤, 𑀯𑀺𑀖𑀸𑀲𑀸𑀤𑀸𑀦𑀁 𑀧𑀽𑀯𑀁 𑀤𑁂𑀳𑀻’’𑀢𑀺 𑀘 (𑀧𑀸𑀘𑀺. 𑁨𑁬𑁯) ‘‘𑀢𑁂𑀦 𑀳𑀺 𑀢𑁆𑀯, 𑀓𑀘𑁆𑀘𑀸𑀦, 𑀯𑀺𑀖𑀸𑀲𑀸𑀤𑀸𑀦𑀁 𑀕𑀼𑀴𑀁 𑀤𑁂𑀳𑀻’’𑀢𑀺 (𑀫𑀳𑀸𑀯. 𑁨𑁮𑁪) 𑀘 𑀯𑀘𑀦𑀢𑁄 𑀯𑀺𑀖𑀸𑀲𑀸𑀤𑀸𑀦𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀢𑀭𑀜𑁆𑀘 𑀪𑀯𑁂𑀬𑁆𑀬. 𑀏𑀯𑀫𑁆𑀧𑀺 𑀳𑀺 ‘‘𑀲𑀢𑁆𑀣𑀸 𑀅𑀢𑁆𑀢𑀦𑁄 𑀤𑀺𑀬𑁆𑀬𑀫𑀸𑀦𑀁 𑀤𑀸𑀧𑁂𑀢𑀻’’𑀢𑀺. 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀬𑁄𑀧𑀺 𑀅𑀢𑁆𑀢𑀦𑁄 𑀆𑀕𑀢𑀁 𑀧𑀡𑁆𑀡𑀸𑀓𑀸𑀭𑀁 𑀳𑀢𑁆𑀣𑀺𑀕𑁄𑀧𑀓𑀸𑀤𑀻𑀦𑀁 𑀤𑀸𑀧𑁂𑀦𑁆𑀢𑀺, 𑀢𑁂 𑀭𑀸𑀚𑀸𑀤𑀻𑀳𑀺 𑀫𑀳𑀦𑁆𑀢𑀢𑀭𑀸 𑀪𑀯𑁂𑀬𑁆𑀬𑀼𑀁. 𑀢𑀲𑁆𑀫𑀸 𑀫𑀸 𑀏𑀯𑀁 𑀕𑀡𑁆𑀳 𑁋

‘‘𑀦𑀬𑀺𑀫𑀲𑁆𑀫𑀺𑀁 𑀮𑁄𑀓𑁂 𑀧𑀭𑀲𑁆𑀫𑀺𑀁 𑀯𑀸 𑀧𑀦,

𑀩𑀼𑀤𑁆𑀥𑁂𑀦 𑀲𑁂𑀝𑁆𑀞𑁄 𑀲𑀤𑀺𑀲𑁄 𑀯𑀸 𑀯𑀺𑀚𑁆𑀚𑀢𑀺;

𑀬𑀫𑀸𑀳𑀼𑀦𑁂𑀬𑁆𑀬𑀸𑀦𑀫𑀕𑁆𑀕𑀢𑀁 𑀕𑀢𑁄,

𑀧𑀼𑀜𑁆𑀜𑀢𑁆𑀣𑀺𑀓𑀸𑀦𑀁 𑀯𑀺𑀧𑀼𑀮𑀨𑀮𑁂𑀲𑀺𑀦’’𑀦𑁆𑀢𑀺. 𑁋

𑀯𑀘𑀦𑀢𑁄 𑀳𑀺 𑀲𑀢𑁆𑀣𑀸𑀭𑀸 𑀉𑀢𑁆𑀢𑀭𑀺𑀢𑀭𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀦𑀸𑀫 𑀦𑀢𑁆𑀣𑀺. 𑀏𑀯𑀫𑀲𑁆𑀲𑀸 𑀙 𑀘𑁂𑀢𑀦𑀸 𑀏𑀓𑀢𑁄 𑀳𑀼𑀢𑁆𑀯𑀸 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀲𑀦𑁆𑀥𑀸𑀬 𑀬𑀸𑀯𑀢𑀢𑀺𑀬𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀲𑀗𑁆𑀖𑀲𑁆𑀲 𑀤𑀸𑀧𑁂𑀲𑀺.

𑀧𑀘𑁆𑀙𑀺𑀫𑀸𑀬 𑀚𑀦𑀢𑀸𑀬 𑀲𑀗𑁆𑀖𑁂 𑀘𑀺𑀢𑁆𑀢𑀻𑀓𑀸𑀭𑀚𑀦𑀦𑀢𑁆𑀣𑀁 𑀘𑀸𑀧𑀺 𑀏𑀯𑀫𑀸𑀳. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀳𑀁 𑀦 𑀘𑀺𑀭𑀝𑁆𑀞𑀺𑀢𑀺𑀓𑁄, 𑀫𑀬𑁆𑀳𑀁 𑀧𑀦 𑀲𑀸𑀲𑀦𑀁 𑀪𑀺𑀓𑁆𑀔𑀼𑀲𑀗𑁆𑀖𑁂 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀺, 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀲𑀗𑁆𑀖𑁂 𑀘𑀺𑀢𑁆𑀢𑀻𑀓𑀸𑀭𑀁 𑀚𑀦𑁂𑀢𑀽’’𑀢𑀺 𑀬𑀸𑀯𑀢𑀢𑀺𑀬𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀲𑀗𑁆𑀖𑀲𑁆𑀲 𑀤𑀸𑀧𑁂𑀲𑀺. 𑀏𑀯𑀜𑁆𑀳𑀺 𑀲𑀢𑀺 𑁋 ‘‘𑀲𑀢𑁆𑀣𑀸 𑀅𑀢𑁆𑀢𑀦𑁄 𑀤𑀺𑀬𑁆𑀬𑀫𑀸𑀦𑀫𑁆𑀧𑀺 𑀲𑀗𑁆𑀖𑀲𑁆𑀲 𑀤𑀸𑀧𑁂𑀲𑀺, 𑀲𑀗𑁆𑀖𑁄 𑀦𑀸𑀫 𑀤𑀓𑁆𑀔𑀺𑀡𑁂𑀬𑁆𑀬𑁄’’𑀢𑀺 𑀧𑀘𑁆𑀙𑀺𑀫𑀸 𑀚𑀦𑀢𑀸 𑀲𑀗𑁆𑀖𑁂 𑀘𑀺𑀢𑁆𑀢𑀻𑀓𑀸𑀭𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀤𑀸𑀢𑀩𑁆𑀩𑁂 𑀫𑀜𑁆𑀜𑀺𑀲𑁆𑀲𑀢𑀺, 𑀲𑀗𑁆𑀖𑁄 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀅𑀓𑀺𑀮𑀫𑀦𑁆𑀢𑁄 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀳𑁂𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀢𑀺. 𑀏𑀯𑀁 𑀫𑀫 𑀲𑀸𑀲𑀦𑀁 𑀧𑀜𑁆𑀘 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀞𑀲𑁆𑀲𑀢𑀻𑀢𑀺. ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼, 𑀪𑀦𑁆𑀢𑁂, 𑀪𑀕𑀯𑀸’’𑀢𑀺 𑀯𑀘𑀦𑀢𑁄𑀧𑀺 𑀘𑁂𑀢𑀁 𑀯𑁂𑀤𑀺𑀢𑀩𑁆𑀩𑀁 ‘‘𑀲𑀢𑁆𑀣𑀸𑀭𑀸 𑀉𑀢𑁆𑀢𑀭𑀺𑀢𑀭𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀦𑀸𑀫 𑀦𑀢𑁆𑀣𑀻’’𑀢𑀺. 𑀦 𑀳𑀺 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀫𑀳𑀸𑀧𑀚𑀸𑀧𑀢𑀺𑀬𑀸 𑀆𑀖𑀸𑀢𑁄 𑀯𑀸 𑀯𑁂𑀭𑀁 𑀯𑀸 𑀅𑀢𑁆𑀣𑀺. 𑀦 𑀣𑁂𑀭𑁄 𑁋 ‘‘𑀢𑀲𑁆𑀲𑀸 𑀤𑀓𑁆𑀔𑀺𑀡𑀸 𑀫𑀸 𑀫𑀳𑀧𑁆𑀨𑀮𑀸 𑀅𑀳𑁄𑀲𑀻’’𑀢𑀺 𑀇𑀘𑁆𑀙𑀢𑀺. 𑀧𑀡𑁆𑀟𑀺𑀢𑁄 𑀳𑀺 𑀣𑁂𑀭𑁄 𑀩𑀳𑀼𑀲𑁆𑀲𑀼𑀢𑁄 𑀲𑁂𑀓𑁆𑀔𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄, 𑀲𑁄 𑀲𑀢𑁆𑀣𑀼 𑀤𑀺𑀦𑁆𑀦𑀲𑁆𑀲 𑀫𑀳𑀧𑁆𑀨𑀮𑀪𑀸𑀯𑁂 𑀲𑀫𑁆𑀧𑀲𑁆𑀲𑀫𑀸𑀦𑁄𑀯 𑀧𑀝𑀺𑀕𑁆𑀕𑀡𑁆𑀳𑀸𑀢𑀼, 𑀪𑀦𑁆𑀢𑁂, 𑀪𑀕𑀯𑀸𑀢𑀺 𑀕𑀳𑀡𑀢𑁆𑀣𑀁 𑀬𑀸𑀘𑀺.

𑀧𑀼𑀦 𑀯𑀺𑀢𑀡𑁆𑀟𑀯𑀸𑀤𑀻 𑀆𑀳 𑁋 ‘‘𑀲𑀗𑁆𑀖𑁂 𑀢𑁂 𑀤𑀺𑀦𑁆𑀦𑁂 𑀅𑀳𑀜𑁆𑀘𑁂𑀯 𑀧𑀽𑀚𑀺𑀢𑁄 𑀪𑀯𑀺𑀲𑁆𑀲𑀸𑀫𑀺 𑀲𑀗𑁆𑀖𑁄 𑀘𑀸’’𑀢𑀺 𑀯𑀘𑀦𑀢𑁄 𑀲𑀢𑁆𑀣𑀸 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑁄 𑀯𑀸𑀢𑀺. 𑀲𑁄 𑀯𑀢𑁆𑀢𑀩𑁆𑀩𑁄 𑁋 ‘‘𑀚𑀸𑀦𑀸𑀲𑀺 𑀧𑀦 𑀢𑁆𑀯𑀁 𑀓𑀢𑀺 𑀲𑀭𑀡𑀸𑀦𑀺, 𑀓𑀢𑀺 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀸’’𑀢𑀺 𑀚𑀸𑀦𑀦𑁆𑀢𑁄 𑀢𑀻𑀡𑀻𑀢𑀺 𑀯𑀓𑁆𑀔𑀢𑀺, 𑀢𑀢𑁄 𑀯𑀢𑁆𑀢𑀩𑁆𑀩𑁄 𑁋 𑀢𑀯 𑀮𑀤𑁆𑀥𑀺𑀬𑀸 𑀲𑀢𑁆𑀣𑀼 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀤𑁆𑀯𑁂𑀬𑁂𑀯 𑀳𑁄𑀦𑁆𑀢𑀺. 𑀏𑀯𑀁 𑀲𑀦𑁆𑀢𑁂 𑀘 𑁋 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀇𑀫𑁂𑀳𑀺 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀧𑀩𑁆𑀩𑀚𑁆𑀚𑀁 𑀉𑀧𑀲𑀫𑁆𑀧𑀤’’𑀦𑁆𑀢𑀺 (𑀫𑀳𑀸𑀯. 𑁩𑁪) 𑀏𑀯𑀁 𑀅𑀦𑀼𑀜𑁆𑀜𑀸𑀢𑀸 𑀧𑀩𑁆𑀩𑀚𑁆𑀚𑀸𑀧𑀺 𑀉𑀧𑀲𑀫𑁆𑀧𑀤𑀸𑀧𑀺 𑀦 𑀭𑀼𑀳𑀢𑀺. 𑀢𑀢𑁄 𑀢𑁆𑀯𑀁 𑀦𑁂𑀯 𑀧𑀩𑁆𑀩𑀚𑀺𑀢𑁄 𑀅𑀲𑀺, 𑀦 𑀕𑀺𑀳𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀘 𑀕𑀦𑁆𑀥𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑁂 𑀪𑀺𑀓𑁆𑀔𑀽 𑀉𑀧𑁄𑀲𑀣𑀫𑁆𑀧𑀺 𑀧𑀯𑀸𑀭𑀡𑀫𑁆𑀧𑀺 𑀲𑀗𑁆𑀖𑀓𑀫𑁆𑀫𑀸𑀦𑀺𑀧𑀺 𑀓𑀭𑁄𑀦𑁆𑀢𑀺, 𑀢𑀸𑀦𑀺 𑀲𑀢𑁆𑀣𑀼 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀓𑀼𑀧𑁆𑀧𑀸𑀦𑀺 𑀪𑀯𑁂𑀬𑁆𑀬𑀼𑀁, 𑀦 𑀘 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀦 𑀯𑀢𑁆𑀢𑀩𑁆𑀩𑀫𑁂𑀢𑀁 ‘‘𑀲𑀢𑁆𑀣𑀸 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑁄’’𑀢𑀺.

𑁩𑁭𑁭. 𑀆𑀧𑀸𑀤𑀺𑀓𑀸𑀢𑀺 𑀲𑀁𑀯𑀟𑁆𑀠𑀺𑀓𑀸, 𑀢𑀼𑀫𑁆𑀳𑀸𑀓𑀁 𑀳𑀢𑁆𑀣𑀧𑀸𑀤𑁂𑀲𑀼 𑀳𑀢𑁆𑀣𑀧𑀸𑀤𑀓𑀺𑀘𑁆𑀘𑀁 𑀅𑀲𑀸𑀥𑁂𑀦𑁆𑀢𑁂𑀲𑀼 𑀳𑀢𑁆𑀣𑁂 𑀘 𑀧𑀸𑀤𑁂 𑀘 𑀯𑀟𑁆𑀠𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀺𑀓𑀸𑀢𑀺 𑀅𑀢𑁆𑀣𑁄. 𑀧𑁄𑀲𑀺𑀓𑀸𑀢𑀺 𑀤𑀺𑀯𑀲𑀲𑁆𑀲 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀦𑁆𑀳𑀸𑀧𑁂𑀢𑁆𑀯𑀸 𑀪𑁄𑀚𑁂𑀢𑁆𑀯𑀸 𑀧𑀸𑀬𑁂𑀢𑁆𑀯𑀸 𑀢𑀼𑀫𑁆𑀳𑁂 𑀧𑁄𑀲𑁂𑀲𑀺. 𑀣𑀜𑁆𑀜𑀁 𑀧𑀸𑀬𑁂𑀲𑀻𑀢𑀺 𑀦𑀦𑁆𑀤𑀓𑀼𑀫𑀸𑀭𑁄 𑀓𑀺𑀭 𑀩𑁄𑀥𑀺𑀲𑀢𑁆𑀢𑀢𑁄 𑀓𑀢𑀺𑀧𑀸𑀳𑁂𑀦𑁂𑀯 𑀤𑀳𑀭𑁄, 𑀢𑀲𑁆𑀫𑀺𑀁 𑀚𑀸𑀢𑁂 𑀫𑀳𑀸𑀧𑀚𑀸𑀧𑀢𑀺 𑀅𑀢𑁆𑀢𑀦𑁄 𑀧𑀼𑀢𑁆𑀢𑀁 𑀥𑀸𑀢𑀻𑀦𑀁 𑀤𑀢𑁆𑀯𑀸 𑀲𑀬𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀥𑀸𑀢𑀺𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀅𑀢𑁆𑀢𑀦𑁄 𑀣𑀜𑁆𑀜𑀁 𑀧𑀸𑀬𑁂𑀲𑀺. 𑀢𑀁 𑀲𑀦𑁆𑀥𑀸𑀬 𑀣𑁂𑀭𑁄 𑀏𑀯𑀫𑀸𑀳. 𑀇𑀢𑀺 𑀫𑀳𑀸𑀧𑀚𑀸𑀧𑀢𑀺𑀬𑀸 𑀩𑀳𑀽𑀧𑀓𑀸𑀭𑀢𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀢𑀣𑀸𑀕𑀢𑀲𑁆𑀲 𑀩𑀳𑀽𑀧𑀓𑀸𑀭𑀢𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸𑀧𑀺, 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀕𑀯𑀦𑁆𑀢𑀁, 𑀪𑀦𑁆𑀢𑁂, 𑀆𑀕𑀫𑁆𑀫𑀸𑀢𑀺 𑀪𑀕𑀯𑀦𑁆𑀢𑀁 𑀧𑀝𑀺𑀘𑁆𑀘 𑀦𑀺𑀲𑁆𑀲𑀸𑀬 𑀲𑀦𑁆𑀥𑀸𑀬.

𑁩𑁭𑁮. 𑀅𑀣 𑀪𑀕𑀯𑀸 𑀤𑁆𑀯𑀻𑀲𑀼 𑀉𑀧𑀓𑀸𑀭𑁂𑀲𑀼 𑀅𑀢𑀺𑀭𑁂𑀓𑀢𑀭𑀁 𑀅𑀦𑀼𑀫𑁄𑀤𑀦𑁆𑀢𑁄 𑀏𑀯𑀫𑁂𑀢𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀁 𑀳𑀸𑀦𑀦𑁆𑀤, 𑀧𑀼𑀕𑁆𑀕𑀮𑁄 𑀧𑀼𑀕𑁆𑀕𑀮𑀁 𑀆𑀕𑀫𑁆𑀫𑀸𑀢𑀺 𑀬𑀁 𑀆𑀘𑀭𑀺𑀬𑀧𑀼𑀕𑁆𑀕𑀮𑀁 𑀅𑀦𑁆𑀢𑁂𑀯𑀸𑀲𑀺𑀓𑀧𑀼𑀕𑁆𑀕𑀮𑁄 𑀆𑀕𑀫𑁆𑀫. 𑀇𑀫𑀲𑁆𑀲𑀸𑀦𑀦𑁆𑀤, 𑀧𑀼𑀕𑁆𑀕𑀮𑀲𑁆𑀲 𑀇𑀫𑀺𑀦𑀸 𑀧𑀼𑀕𑁆𑀕𑀮𑁂𑀦𑀸𑀢𑀺 𑀇𑀫𑀲𑁆𑀲 𑀆𑀘𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀇𑀫𑀺𑀦𑀸 𑀅𑀦𑁆𑀢𑁂𑀯𑀸𑀲𑀺𑀓𑀧𑀼𑀕𑁆𑀕𑀮𑁂𑀦. 𑀦 𑀲𑀼𑀧𑁆𑀧𑀝𑀺𑀓𑀸𑀭𑀁 𑀯𑀤𑀸𑀫𑀻𑀢𑀺 𑀧𑀘𑁆𑀘𑀽𑀧𑀓𑀸𑀭𑀁 𑀦 𑀲𑀼𑀓𑀭𑀁 𑀯𑀤𑀸𑀫𑀺, 𑀅𑀪𑀺𑀯𑀸𑀤𑀦𑀸𑀤𑀻𑀲𑀼 𑀆𑀘𑀭𑀺𑀬𑀁 𑀤𑀺𑀲𑁆𑀯𑀸 𑀅𑀪𑀺𑀯𑀸𑀤𑀦𑀓𑀭𑀡𑀁 𑀅𑀪𑀺𑀯𑀸𑀤𑀦𑀁 𑀦𑀸𑀫. 𑀬𑀲𑁆𑀫𑀺𑀁 𑀯𑀸 𑀤𑀺𑀲𑀸𑀪𑀸𑀕𑁂 𑀆𑀘𑀭𑀺𑀬𑁄 𑀯𑀲𑀢𑀺, 𑀇𑀭𑀺𑀬𑀸𑀧𑀣𑁂 𑀯𑀸 𑀓𑀧𑁆𑀧𑁂𑀦𑁆𑀢𑁄 𑀢𑀤𑀪𑀺𑀫𑀼𑀔𑁄 𑀯𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀢𑀺, 𑀯𑀦𑁆𑀤𑀺𑀢𑁆𑀯𑀸 𑀦𑀺𑀧𑀚𑁆𑀚𑀢𑀺, 𑀆𑀘𑀭𑀺𑀬𑀁 𑀧𑀦 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 𑀧𑀘𑁆𑀘𑀼𑀝𑁆𑀞𑀸𑀬 𑀧𑀘𑁆𑀘𑀼𑀕𑁆𑀕𑀫𑀦𑀓𑀭𑀡𑀁 𑀧𑀘𑁆𑀘𑀼𑀝𑁆𑀞𑀸𑀦𑀁 𑀦𑀸𑀫. 𑀆𑀘𑀭𑀺𑀬𑀁 𑀧𑀦 𑀤𑀺𑀲𑁆𑀯𑀸 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀲𑀻𑀲𑁂 𑀞𑀧𑁂𑀢𑁆𑀯𑀸 𑀆𑀘𑀭𑀺𑀬𑀁 𑀦𑀫𑀲𑁆𑀲𑀢𑀺, 𑀬𑀲𑁆𑀫𑀺𑀁 𑀯𑀸 𑀤𑀺𑀲𑀸𑀪𑀸𑀕𑁂 𑀲𑁄 𑀯𑀲𑀢𑀺, 𑀢𑀤𑀪𑀺𑀫𑀼𑀔𑁄𑀧𑀺 𑀢𑀣𑁂𑀯 𑀦𑀫𑀲𑁆𑀲𑀢𑀺, 𑀕𑀘𑁆𑀙𑀦𑁆𑀢𑁄𑀧𑀺 𑀞𑀺𑀢𑁄𑀧𑀺 𑀦𑀺𑀲𑀺𑀦𑁆𑀦𑁄𑀧𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀦𑀫𑀲𑁆𑀲𑀢𑀺𑀬𑁂𑀯𑀸𑀢𑀺 𑀇𑀤𑀁 𑀅𑀜𑁆𑀚𑀮𑀺𑀓𑀫𑁆𑀫𑀁 𑀦𑀸𑀫. 𑀅𑀦𑀼𑀘𑁆𑀙𑀯𑀺𑀓𑀓𑀫𑁆𑀫𑀲𑁆𑀲 𑀧𑀦 𑀓𑀭𑀡𑀁 𑀲𑀸𑀫𑀻𑀘𑀺𑀓𑀫𑁆𑀫𑀁 𑀦𑀸𑀫. 𑀘𑀻𑀯𑀭𑀸𑀤𑀻𑀲𑀼 𑀘𑀻𑀯𑀭𑀁 𑀤𑁂𑀦𑁆𑀢𑁄 𑀦 𑀬𑀁 𑀯𑀸 𑀢𑀁 𑀯𑀸 𑀤𑁂𑀢𑀺, 𑀫𑀳𑀕𑁆𑀖𑀁 𑀲𑀢𑀫𑀽𑀮𑀺𑀓𑀫𑁆𑀧𑀺 𑀧𑀜𑁆𑀘𑀲𑀢𑀫𑀽𑀮𑀺𑀓𑀫𑁆𑀧𑀺 𑀲𑀳𑀲𑁆𑀲𑀫𑀽𑀮𑀺𑀓𑀫𑁆𑀧𑀺 𑀤𑁂𑀢𑀺𑀬𑁂𑀯. 𑀧𑀺𑀡𑁆𑀟𑀧𑀸𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑀺𑀁 𑀩𑀳𑀼𑀦𑀸, 𑀘𑀢𑀽𑀳𑀺 𑀧𑀡𑀻𑀢𑀧𑀘𑁆𑀘𑀬𑁂𑀳𑀺 𑀘𑀓𑁆𑀓𑀯𑀸𑀴𑀦𑁆𑀢𑀭𑀁 𑀧𑀽𑀭𑁂𑀢𑁆𑀯𑀸 𑀲𑀺𑀦𑁂𑀭𑀼𑀧𑀩𑁆𑀩𑀢𑁂𑀦 𑀓𑀽𑀝𑀁 𑀕𑀳𑁂𑀢𑁆𑀯𑀸 𑀤𑁂𑀦𑁆𑀢𑁄𑀧𑀺 𑀆𑀘𑀭𑀺𑀬𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀁 𑀓𑀺𑀭𑀺𑀬𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺𑀬𑁂𑀯.

𑁩𑁭𑁯. 𑀘𑀼𑀤𑁆𑀤𑀲 𑀔𑁄 𑀧𑀦𑀺𑀫𑀸𑀢𑀺 𑀓𑀲𑁆𑀫𑀸 𑀆𑀭𑀪𑀺? 𑀇𑀤𑀁 𑀲𑀼𑀢𑁆𑀢𑀁 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀁 𑀤𑀓𑁆𑀔𑀺𑀡𑀁 𑀆𑀭𑀩𑁆𑀪 𑀲𑀫𑀼𑀝𑁆𑀞𑀺𑀢𑀁. 𑀆𑀦𑀦𑁆𑀤𑀢𑁆𑀣𑁂𑀭𑁄𑀧𑀺 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀼, 𑀪𑀦𑁆𑀢𑁂, 𑀪𑀕𑀯𑀸’’𑀢𑀺 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀤𑀓𑁆𑀔𑀺𑀡𑀁𑀬𑁂𑀯 𑀲𑀫𑀸𑀤𑀧𑁂𑀢𑀺, 𑀘𑀼𑀤𑁆𑀤𑀲𑀲𑀼 𑀘 𑀞𑀸𑀦𑁂𑀲𑀼 𑀤𑀺𑀦𑁆𑀦𑀤𑀸𑀦𑀁 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀁 𑀦𑀸𑀫 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀅𑀬𑀁 𑀧𑀞𑀫𑀸𑀢𑀺 𑀅𑀬𑀁 𑀤𑀓𑁆𑀔𑀺𑀡𑀸 𑀕𑀼𑀡𑀯𑀲𑁂𑀦𑀧𑀺 𑀧𑀞𑀫𑀸 𑀚𑁂𑀝𑁆𑀞𑀓𑀯𑀲𑁂𑀦𑀧𑀺. 𑀅𑀬𑀜𑁆𑀳𑀺 𑀧𑀞𑀫𑀸 𑀅𑀕𑁆𑀕𑀸 𑀚𑁂𑀝𑁆𑀞𑀺𑀓𑀸, 𑀇𑀫𑀺𑀲𑁆𑀲𑀸 𑀤𑀓𑁆𑀔𑀺𑀡𑀸𑀬 𑀧𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺. 𑀤𑀼𑀢𑀺𑀬𑀢𑀢𑀺𑀬𑀸𑀧𑀺 𑀧𑀭𑀫𑀤𑀓𑁆𑀔𑀺𑀡𑀸𑀬𑁂𑀯, 𑀲𑁂𑀲𑀸 𑀧𑀭𑀫𑀤𑀓𑁆𑀔𑀺𑀡𑀪𑀸𑀯𑀁 𑀦 𑀧𑀸𑀧𑀼𑀡𑀦𑁆𑀢𑀺. 𑀩𑀸𑀳𑀺𑀭𑀓𑁂 𑀓𑀸𑀫𑁂𑀲𑀼 𑀯𑀻𑀢𑀭𑀸𑀕𑁂𑀢𑀺 𑀓𑀫𑁆𑀫𑀯𑀸𑀤𑀺𑀓𑀺𑀭𑀺𑀬𑀯𑀸𑀤𑀺𑀫𑁆𑀳𑀺 𑀮𑁄𑀓𑀺𑀬𑀧𑀜𑁆𑀘𑀸𑀪𑀺𑀜𑁆𑀜𑁂. 𑀧𑀼𑀣𑀼𑀚𑁆𑀚𑀦𑀲𑀻𑀮𑀯𑀦𑁆𑀢𑁂𑀢𑀺 𑀧𑀼𑀣𑀼𑀚𑁆𑀚𑀦𑀲𑀻𑀮𑀯𑀸 𑀦𑀸𑀫 𑀕𑁄𑀲𑀻𑀮𑀥𑀸𑀢𑀼𑀓𑁄 𑀳𑁄𑀢𑀺, 𑀅𑀲𑀞𑁄 𑀅𑀫𑀸𑀬𑀸𑀯𑀻 𑀧𑀭𑀁 𑀅𑀧𑀻𑀴𑁂𑀢𑁆𑀯𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀓𑀲𑀺𑀬𑀸 𑀯𑀸 𑀯𑀡𑀺𑀚𑁆𑀚𑀸𑀬 𑀯𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀸. 𑀧𑀼𑀣𑀼𑀚𑁆𑀚𑀦𑀤𑀼𑀲𑁆𑀲𑀻𑀮𑁂𑀢𑀺 𑀧𑀼𑀣𑀼𑀚𑁆𑀚𑀦𑀤𑀼𑀲𑁆𑀲𑀻𑀮𑀸 𑀦𑀸𑀫 𑀓𑁂𑀯𑀝𑁆𑀝𑀫𑀘𑁆𑀙𑀩𑀦𑁆𑀥𑀸𑀤𑀬𑁄 𑀧𑀭𑀁 𑀧𑀻𑀴𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀸.

𑀇𑀤𑀸𑀦𑀺 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀤𑀓𑁆𑀔𑀺𑀡𑀸𑀬 𑀯𑀺𑀧𑀸𑀓𑀁 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑁄 𑀢𑀢𑁆𑀭𑀸𑀦𑀦𑁆𑀤𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀺𑀭𑀘𑁆𑀙𑀸𑀦𑀕𑀢𑁂𑀢𑀺 𑀬𑀁 𑀕𑀼𑀡𑀯𑀲𑁂𑀦 𑀉𑀧𑀓𑀸𑀭𑀯𑀲𑁂𑀦 𑀧𑁄𑀲𑀦𑀢𑁆𑀣𑀁 𑀤𑀺𑀦𑁆𑀦𑀁, 𑀇𑀤𑀁 𑀦 𑀕𑀳𑀺𑀢𑀁. 𑀬𑀫𑁆𑀧𑀺 𑀆𑀮𑁄𑀧𑀅𑀟𑁆𑀠𑀆𑀮𑁄𑀧𑀫𑀢𑁆𑀢𑀁 𑀤𑀺𑀦𑁆𑀦𑀁, 𑀢𑀫𑁆𑀧𑀺 𑀦 𑀕𑀳𑀺𑀢𑀁. 𑀬𑀁 𑀧𑀦 𑀲𑀼𑀦𑀔𑀲𑀽𑀓𑀭𑀓𑀼𑀓𑁆𑀓𑀼𑀝𑀓𑀸𑀓𑀸𑀤𑀻𑀲𑀼 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀫𑁆𑀧𑀢𑁆𑀢𑀲𑁆𑀲 𑀨𑀮𑀁 𑀧𑀝𑀺𑀓𑀗𑁆𑀔𑀺𑀢𑁆𑀯𑀸 𑀬𑀸𑀯𑀤𑀢𑁆𑀣𑀁 𑀤𑀺𑀦𑁆𑀦𑀁, 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀢𑀺𑀭𑀘𑁆𑀙𑀸𑀦𑀕𑀢𑁂 𑀤𑀸𑀦𑀁 𑀤𑀢𑁆𑀯𑀸’’𑀢𑀺. 𑀲𑀢𑀕𑀼𑀡𑀸𑀢𑀺 𑀲𑀢𑀸𑀦𑀺𑀲𑀁𑀲𑀸. 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸𑀢𑀺 𑀇𑀘𑁆𑀙𑀺𑀢𑀩𑁆𑀩𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀬𑀁 𑀤𑀓𑁆𑀔𑀺𑀡𑀸 𑀆𑀬𑀼𑀲𑀢𑀁 𑀯𑀡𑁆𑀡𑀲𑀢𑀁 𑀲𑀼𑀔𑀲𑀢𑀁 𑀩𑀮𑀲𑀢𑀁 𑀧𑀝𑀺𑀪𑀸𑀦𑀲𑀢𑀦𑁆𑀢𑀺 𑀧𑀜𑁆𑀘 𑀆𑀦𑀺𑀲𑀁𑀲𑀲𑀢𑀸𑀦𑀺 𑀤𑁂𑀢𑀺, 𑀅𑀢𑁆𑀢𑀪𑀸𑀯𑀲𑀢𑁂 𑀆𑀬𑀼𑀁 𑀤𑁂𑀢𑀺, 𑀯𑀡𑁆𑀡𑀁, 𑀲𑀼𑀔𑀁, 𑀩𑀮𑀁, 𑀧𑀝𑀺𑀪𑀸𑀦𑀁 𑀤𑁂𑀢𑀺, 𑀦𑀺𑀧𑁆𑀧𑀭𑀺𑀢𑀲𑀁 𑀓𑀭𑁄𑀢𑀺. 𑀪𑀯𑀲𑀢𑁂𑀧𑀺 𑀯𑀼𑀢𑁆𑀢𑁂 𑀅𑀬𑀫𑁂𑀯 𑀅𑀢𑁆𑀣𑁄. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀦𑀬𑁄 𑀦𑁂𑀢𑀩𑁆𑀩𑁄.

𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁂𑀢𑀺 𑀏𑀢𑁆𑀣 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀢𑀺𑀲𑀭𑀡𑀁 𑀕𑀢𑁄 𑀉𑀧𑀸𑀲𑀓𑁄𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄 𑀦𑀸𑀫, 𑀢𑀲𑁆𑀫𑀺𑀁 𑀤𑀺𑀦𑁆𑀦𑀤𑀸𑀦𑀫𑁆𑀧𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀅𑀧𑁆𑀧𑀫𑁂𑀬𑁆𑀬𑀁. 𑀧𑀜𑁆𑀘𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀢𑀢𑁄 𑀉𑀢𑁆𑀢𑀭𑀺 𑀫𑀳𑀧𑁆𑀨𑀮𑀁, 𑀤𑀲𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀢𑀢𑁄 𑀉𑀢𑁆𑀢𑀭𑀺, 𑀢𑀤𑀳𑀼𑀧𑀩𑁆𑀩𑀚𑀺𑀢𑀲𑁆𑀲 𑀲𑀸𑀫𑀡𑁂𑀭𑀲𑁆𑀲 𑀢𑀢𑁄 𑀉𑀢𑁆𑀢𑀭𑀺, 𑀉𑀧𑀲𑀫𑁆𑀧𑀦𑁆𑀦𑀪𑀺𑀓𑁆𑀔𑀼𑀦𑁄 𑀢𑀢𑁄 𑀉𑀢𑁆𑀢𑀭𑀺, 𑀉𑀧𑀲𑀫𑁆𑀧𑀦𑁆𑀦𑀲𑁆𑀲𑁂𑀯 𑀯𑀢𑁆𑀢𑀲𑀫𑁆𑀧𑀦𑁆𑀦𑀲𑁆𑀲 𑀢𑀢𑁄 𑀉𑀢𑁆𑀢𑀭𑀺, 𑀯𑀺𑀧𑀲𑁆𑀲𑀓𑀲𑁆𑀲 𑀢𑀢𑁄 𑀉𑀢𑁆𑀢𑀭𑀺, 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀢𑀢𑁄 𑀉𑀢𑁆𑀢𑀭𑀺, 𑀉𑀢𑁆𑀢𑀫𑀓𑁄𑀝𑀺𑀬𑀸 𑀧𑀦 𑀫𑀕𑁆𑀕𑀲𑀫𑀗𑁆𑀕𑀻 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄 𑀦𑀸𑀫. 𑀏𑀢𑀲𑁆𑀲 𑀤𑀺𑀦𑁆𑀦𑀤𑀸𑀦𑀁 𑀢𑀢𑁄 𑀉𑀢𑁆𑀢𑀭𑀺 𑀫𑀳𑀧𑁆𑀨𑀮𑀫𑁂𑀯.

𑀓𑀺𑀁 𑀧𑀦 𑀫𑀕𑁆𑀕𑀲𑀫𑀗𑁆𑀕𑀺𑀲𑁆𑀲 𑀲𑀓𑁆𑀓𑀸 𑀤𑀸𑀦𑀁 𑀤𑀸𑀢𑀼𑀦𑁆𑀢𑀺? 𑀆𑀫 𑀲𑀓𑁆𑀓𑀸. 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑁄 𑀳𑀺 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺, 𑀢𑀲𑁆𑀲 𑀕𑁂𑀳𑀤𑁆𑀯𑀸𑀭𑁂 𑀞𑀺𑀢𑀲𑁆𑀲 𑀳𑀢𑁆𑀣𑀢𑁄 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀧𑀓𑁆𑀔𑀺𑀧𑀦𑁆𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀪𑀺𑀓𑁆𑀔𑀼𑀦𑁄 𑀫𑀕𑁆𑀕𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀇𑀤𑀁 𑀤𑀸𑀦𑀁 𑀫𑀕𑁆𑀕𑀲𑀫𑀗𑁆𑀕𑀺𑀦𑁄 𑀤𑀺𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀅𑀣 𑀯𑀸 𑀧𑀦𑁂𑀲 𑀆𑀲𑀦𑀲𑀸𑀮𑀸𑀬 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺, 𑀫𑀦𑀼𑀲𑁆𑀲𑀸 𑀕𑀦𑁆𑀢𑁆𑀯𑀸 𑀧𑀢𑁆𑀢𑁂 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀞𑀧𑁂𑀦𑁆𑀢𑀺, 𑀢𑀲𑁆𑀫𑀺𑀁 𑀔𑀡𑁂 𑀢𑀲𑁆𑀲 𑀫𑀕𑁆𑀕𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀇𑀤𑀫𑁆𑀧𑀺 𑀤𑀸𑀦𑀁 𑀫𑀕𑁆𑀕𑀲𑀫𑀗𑁆𑀕𑀺𑀦𑁄 𑀤𑀺𑀦𑁆𑀦𑀁 𑀦𑀸𑀫. 𑀅𑀣 𑀯𑀸 𑀧𑀦𑀲𑁆𑀲 𑀯𑀺𑀳𑀸𑀭𑁂 𑀯𑀸 𑀆𑀲𑀦𑀲𑀸𑀮𑀸𑀬 𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀉𑀧𑀸𑀲𑀓𑀸 𑀧𑀢𑁆𑀢𑀁 𑀆𑀤𑀸𑀬 𑀅𑀢𑁆𑀢𑀦𑁄 𑀖𑀭𑀁 𑀕𑀦𑁆𑀢𑁆𑀯𑀸 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀧𑀓𑁆𑀔𑀺𑀧𑀦𑁆𑀢𑀺, 𑀢𑀲𑁆𑀫𑀺𑀁 𑀔𑀡𑁂 𑀢𑀲𑁆𑀲 𑀫𑀕𑁆𑀕𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀇𑀤𑀫𑁆𑀧𑀺 𑀤𑀸𑀦𑀁 𑀫𑀕𑁆𑀕𑀲𑀫𑀗𑁆𑀕𑀺𑀦𑁄 𑀤𑀺𑀦𑁆𑀦𑀁 𑀦𑀸𑀫. 𑀢𑀢𑁆𑀣 𑀲𑁄𑀡𑁆𑀟𑀺𑀬𑀁 𑀉𑀤𑀓𑀲𑁆𑀲 𑀯𑀺𑀬 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁂 𑀤𑀺𑀦𑁆𑀦𑀤𑀸𑀦𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀸𑀲𑀼 𑀢𑀸𑀲𑀼 𑀫𑀳𑀸𑀦𑀤𑀻𑀲𑀼 𑀫𑀳𑀸𑀲𑀫𑀼𑀤𑁆𑀤𑁂 𑀘 𑀉𑀤𑀓𑀲𑁆𑀲 𑀯𑀺𑀬 𑀲𑁄𑀢𑀸𑀧𑀦𑁆𑀦𑀸𑀤𑀻𑀲𑀼 𑀤𑀺𑀦𑁆𑀦𑀤𑀸𑀦𑀲𑁆𑀲 𑀉𑀢𑁆𑀢𑀭𑀺𑀢𑀭𑀯𑀲𑁂𑀦 𑀅𑀲𑀗𑁆𑀔𑁆𑀬𑁂𑀬𑁆𑀬𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀣𑀯𑀺𑀬𑀸 𑀔𑀬𑀫𑀡𑁆𑀟𑀮𑀫𑀢𑁆𑀢𑁂 𑀧𑀤𑁂𑀲𑁂 𑀧𑀁𑀲𑀼𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀫𑀳𑀸𑀧𑀣𑀯𑀺𑀬𑀸 𑀧𑀁𑀲𑀼𑀦𑁄 𑀅𑀧𑁆𑀧𑀫𑁂𑀬𑁆𑀬𑀢𑀸𑀬𑀧𑀺 𑀅𑀬𑀫𑀢𑁆𑀣𑁄 𑀤𑀻𑀧𑁂𑀢𑀩𑁆𑀩𑁄.

𑁩𑁮𑁦. 𑀲𑀢𑁆𑀢 𑀔𑁄 𑀧𑀦𑀺𑀫𑀸𑀢𑀺 𑀓𑀲𑁆𑀫𑀸 𑀆𑀭𑀪𑀺? ‘‘𑀲𑀗𑁆𑀖𑁂 𑀕𑁄𑀢𑀫𑀺 𑀤𑁂𑀳𑀺, 𑀲𑀗𑁆𑀖𑁂 𑀢𑁂 𑀤𑀺𑀦𑁆𑀦𑁂 𑀅𑀳𑀜𑁆𑀘𑁂𑀯 𑀧𑀽𑀚𑀺𑀢𑁄 𑀪𑀯𑀺𑀲𑁆𑀲𑀸𑀫𑀺 𑀲𑀗𑁆𑀖𑁄 𑀘𑀸’’𑀢𑀺 𑀳𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀤𑀺𑀦𑁆𑀦𑀤𑀸𑀦𑀁 𑀲𑀗𑁆𑀖𑁂 𑀤𑀺𑀦𑁆𑀦𑀁 𑀦𑀸𑀫 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀩𑀼𑀤𑁆𑀥𑀧𑁆𑀧𑀫𑀼𑀔𑁂 𑀉𑀪𑀢𑁄𑀲𑀗𑁆𑀖𑁂𑀢𑀺 𑀏𑀓𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀏𑀓𑀢𑁄 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄, 𑀲𑀢𑁆𑀣𑀸 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺 𑀅𑀬𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀉𑀪𑀢𑁄𑀲𑀗𑁆𑀖𑁄 𑀦𑀸𑀫. 𑀅𑀬𑀁 𑀧𑀞𑀫𑀸𑀢𑀺 𑀇𑀫𑀸𑀬 𑀤𑀓𑁆𑀔𑀺𑀡𑀸𑀬 𑀲𑀫𑀧𑁆𑀧𑀫𑀸𑀡𑀸 𑀤𑀓𑁆𑀔𑀺𑀡𑀸 𑀦𑀸𑀫 𑀦𑀢𑁆𑀣𑀺. 𑀤𑀼𑀢𑀺𑀬𑀤𑀓𑁆𑀔𑀺𑀡𑀸𑀤𑀬𑁄 𑀧𑀦 𑀏𑀢𑀁 𑀧𑀭𑀫𑀤𑀓𑁆𑀔𑀺𑀡𑀁 𑀦 𑀧𑀸𑀧𑀼𑀡𑀦𑁆𑀢𑀺.

𑀓𑀺𑀁 𑀧𑀦 𑀢𑀣𑀸𑀕𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑀸𑀢𑀼𑀁 𑀲𑀓𑁆𑀓𑀸𑀢𑀺? 𑀲𑀓𑁆𑀓𑀸. 𑀓𑀣𑀁? 𑀉𑀪𑀢𑁄𑀲𑀗𑁆𑀖𑀲𑁆𑀲 𑀳𑀺 𑀧𑀫𑀼𑀔𑁂 𑀲𑀥𑀸𑀢𑀼𑀓𑀁 𑀧𑀝𑀺𑀫𑀁 𑀆𑀲𑀦𑁂 𑀞𑀧𑁂𑀢𑁆𑀯𑀸 𑀆𑀥𑀸𑀭𑀓𑀁 𑀞𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁄𑀤𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀩𑁆𑀩𑀁 𑀲𑀢𑁆𑀣𑀼 𑀧𑀞𑀫𑀁 𑀤𑀢𑁆𑀯𑀸 𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑀸𑀢𑀩𑁆𑀩𑀁, 𑀏𑀯𑀁 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑀺𑀦𑁆𑀦𑀁 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀬𑀁 𑀲𑀢𑁆𑀣𑀼 𑀤𑀺𑀦𑁆𑀦𑀁, 𑀢𑀁 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺? 𑀬𑁄 𑀲𑀢𑁆𑀣𑀸𑀭𑀁 𑀧𑀝𑀺𑀚𑀕𑁆𑀕𑀢𑀺 𑀯𑀢𑁆𑀢𑀲𑀫𑁆𑀧𑀦𑁆𑀦𑁄 𑀪𑀺𑀓𑁆𑀔𑀼, 𑀢𑀲𑁆𑀲 𑀤𑀸𑀢𑀩𑁆𑀩𑀁. 𑀧𑀺𑀢𑀼𑀲𑀦𑁆𑀢𑀓𑀜𑁆𑀳𑀺 𑀧𑀼𑀢𑁆𑀢𑀲𑁆𑀲 𑀧𑀸𑀧𑀼𑀡𑀸𑀢𑀺, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀺, 𑀲𑀧𑁆𑀧𑀺𑀢𑁂𑀮𑀸𑀦𑀺 𑀧𑀦 𑀕𑀳𑁂𑀢𑁆𑀯𑀸 𑀤𑀻𑀧𑀸 𑀚𑀮𑀺𑀢𑀩𑁆𑀩𑀸, 𑀲𑀸𑀝𑀓𑀁 𑀕𑀳𑁂𑀢𑁆𑀯𑀸 𑀧𑀝𑀸𑀓𑀸 𑀆𑀭𑁄𑀧𑁂𑀢𑀩𑁆𑀩𑀸𑀢𑀺. 𑀪𑀺𑀓𑁆𑀔𑀼𑀲𑀗𑁆𑀖𑁂𑀢𑀺 𑀅𑀧𑀭𑀺𑀘𑁆𑀙𑀺𑀦𑁆𑀦𑀓𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁂. 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁂𑀧𑀺 𑀏𑀲𑁂𑀯 𑀦𑀬𑁄.

𑀕𑁄𑀢𑁆𑀭𑀪𑀼𑀦𑁄𑀢𑀺 𑀕𑁄𑀢𑁆𑀢𑀫𑀢𑁆𑀢𑀓𑀫𑁂𑀯 𑀅𑀦𑀼𑀪𑀯𑀫𑀸𑀦𑀸, 𑀦𑀸𑀫𑀫𑀢𑁆𑀢𑀲𑀫𑀡𑀸𑀢𑀺 𑀅𑀢𑁆𑀣𑁄. 𑀓𑀸𑀲𑀸𑀯𑀓𑀡𑁆𑀞𑀸𑀢𑀺 𑀓𑀸𑀲𑀸𑀯𑀓𑀡𑁆𑀞𑀦𑀸𑀫𑀓𑀸. 𑀢𑁂 𑀓𑀺𑀭 𑀏𑀓𑀁 𑀓𑀸𑀲𑀸𑀯𑀔𑀡𑁆𑀟𑀁 𑀳𑀢𑁆𑀣𑁂 𑀯𑀸 𑀕𑀻𑀯𑀸𑀬 𑀯𑀸 𑀩𑀦𑁆𑀥𑀺𑀢𑁆𑀯𑀸 𑀯𑀺𑀘𑀭𑀺𑀲𑁆𑀲𑀦𑁆𑀢𑀺. 𑀖𑀭𑀤𑁆𑀯𑀸𑀭𑀁 𑀧𑀦 𑀢𑁂𑀲𑀁 𑀧𑀼𑀢𑁆𑀢𑀪𑀭𑀺𑀬𑀸 𑀓𑀲𑀺𑀯𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀸𑀦𑀺 𑀘 𑀧𑀸𑀓𑀢𑀺𑀓𑀸𑀦𑁂𑀯 𑀪𑀯𑀺𑀲𑁆𑀲𑀦𑁆𑀢𑀺. 𑀢𑁂𑀲𑀼 𑀤𑀼𑀲𑁆𑀲𑀻𑀮𑁂𑀲𑀼 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀤𑀸𑀦𑀁 𑀤𑀲𑁆𑀲𑀦𑁆𑀢𑀻𑀢𑀺 𑀏𑀢𑁆𑀣 𑀤𑀼𑀲𑁆𑀲𑀻𑀮𑀲𑀗𑁆𑀖𑀦𑁆𑀢𑀺 𑀦 𑀯𑀼𑀢𑁆𑀢𑀁. 𑀲𑀗𑁆𑀖𑁄 𑀳𑀺 𑀤𑀼𑀲𑁆𑀲𑀻𑀮𑁄 𑀦𑀸𑀫 𑀦𑀢𑁆𑀣𑀺. 𑀤𑀼𑀲𑁆𑀲𑀻𑀮𑀸 𑀧𑀦 𑀉𑀧𑀸𑀲𑀓𑀸 𑀢𑁂𑀲𑀼 𑀤𑀼𑀲𑁆𑀲𑀻𑀮𑁂𑀲𑀼 𑀪𑀺𑀓𑁆𑀔𑀼𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀲𑀗𑁆𑀖𑀲𑁆𑀲 𑀤𑁂𑀫𑀸𑀢𑀺 𑀤𑀸𑀦𑀁 𑀤𑀲𑁆𑀲𑀦𑁆𑀢𑀺. 𑀇𑀢𑀺 𑀪𑀕𑀯𑀢𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑁂 𑀲𑀗𑁆𑀖𑁂 𑀤𑀺𑀦𑁆𑀦𑀤𑀓𑁆𑀔𑀺𑀡𑀸𑀧𑀺 𑀕𑀼𑀡𑀲𑀗𑁆𑀔𑀸𑀬 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁. 𑀓𑀸𑀲𑀸𑀯𑀓𑀡𑁆𑀞𑀲𑀗𑁆𑀖𑁂 𑀤𑀺𑀦𑁆𑀦𑀤𑀓𑁆𑀔𑀺𑀡𑀸𑀧𑀺 𑀕𑀼𑀡𑀲𑀗𑁆𑀔𑀸𑀬𑁂𑀯 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀸. 𑀲𑀗𑁆𑀖𑀕𑀢𑀸 𑀤𑀓𑁆𑀔𑀺𑀡𑀸 𑀳𑀺 𑀲𑀗𑁆𑀖𑁂 𑀘𑀺𑀢𑁆𑀢𑀻𑀓𑀸𑀭𑀁 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀲𑁆𑀲 𑀳𑁄𑀢𑀺, 𑀲𑀗𑁆𑀖𑁂 𑀧𑀦 𑀘𑀺𑀢𑁆𑀢𑀻𑀓𑀸𑀭𑁄 𑀤𑀼𑀓𑁆𑀓𑀭𑁄 𑀳𑁄𑀢𑀺.

𑀬𑁄 𑀳𑀺 𑀲𑀗𑁆𑀖𑀕𑀢𑀁 𑀤𑀓𑁆𑀔𑀺𑀡𑀁 𑀤𑀲𑁆𑀲𑀸𑀫𑀻𑀢𑀺 𑀤𑁂𑀬𑁆𑀬𑀥𑀫𑁆𑀫𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸, 𑁋 ‘‘𑀪𑀦𑁆𑀢𑁂, 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀏𑀓𑀁 𑀣𑁂𑀭𑀁 𑀤𑁂𑀣𑀸’’𑀢𑀺 𑀯𑀤𑀢𑀺, 𑀅𑀣 𑀲𑀗𑁆𑀖𑀢𑁄 𑀲𑀸𑀫𑀡𑁂𑀭𑀁 𑀮𑀪𑀺𑀢𑁆𑀯𑀸 ‘‘𑀲𑀸𑀫𑀡𑁂𑀭𑁄 𑀫𑁂 𑀮𑀤𑁆𑀥𑁄’’𑀢𑀺 𑀅𑀜𑁆𑀜𑀣𑀢𑁆𑀢𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀲 𑀤𑀓𑁆𑀔𑀺𑀡𑀸 𑀲𑀗𑁆𑀖𑀕𑀢𑀸 𑀦 𑀳𑁄𑀢𑀺. 𑀫𑀳𑀸𑀣𑁂𑀭𑀁 𑀮𑀪𑀺𑀢𑁆𑀯𑀸𑀧𑀺 ‘‘𑀫𑀳𑀸𑀣𑁂𑀭𑁄 𑀫𑁂 𑀮𑀤𑁆𑀥𑁄’’𑀢𑀺 𑀲𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲𑀸𑀧𑀺 𑀦 𑀳𑁄𑀢𑀺𑀬𑁂𑀯. 𑀬𑁄 𑀧𑀦 𑀲𑀸𑀫𑀡𑁂𑀭𑀁 𑀯𑀸 𑀉𑀧𑀲𑀫𑁆𑀧𑀦𑁆𑀦𑀁 𑀯𑀸 𑀤𑀳𑀭𑀁 𑀯𑀸 𑀣𑁂𑀭𑀁 𑀯𑀸 𑀩𑀸𑀮𑀁 𑀯𑀸 𑀧𑀡𑁆𑀟𑀺𑀢𑀁 𑀯𑀸 𑀬𑀁𑀓𑀺𑀜𑁆𑀘𑀺 𑀲𑀗𑁆𑀖𑀢𑁄 𑀮𑀪𑀺𑀢𑁆𑀯𑀸 𑀦𑀺𑀩𑁆𑀩𑁂𑀫𑀢𑀺𑀓𑁄 𑀳𑀼𑀢𑁆𑀯𑀸 𑀲𑀗𑁆𑀖𑀲𑁆𑀲 𑀤𑁂𑀫𑀻𑀢𑀺 𑀲𑀗𑁆𑀖𑁂 𑀘𑀺𑀢𑁆𑀢𑀻𑀓𑀸𑀭𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀤𑀓𑁆𑀔𑀺𑀡𑀸 𑀲𑀗𑁆𑀖𑀕𑀢𑀸 𑀦𑀸𑀫 𑀳𑁄𑀢𑀺. 𑀧𑀭𑀲𑀫𑀼𑀤𑁆𑀤𑀯𑀸𑀲𑀺𑀦𑁄 𑀓𑀺𑀭 𑀏𑀯𑀁 𑀓𑀭𑁄𑀦𑁆𑀢𑀺.

𑀢𑀢𑁆𑀣 𑀳𑀺 𑀏𑀓𑁄 𑀯𑀺𑀳𑀸𑀭𑀲𑀸𑀫𑀺 𑀓𑀼𑀝𑀼𑀫𑁆𑀩𑀺𑀓𑁄 ‘‘𑀲𑀗𑁆𑀖𑀕𑀢𑀁 𑀤𑀓𑁆𑀔𑀺𑀡𑀁 𑀤𑀲𑁆𑀲𑀸𑀫𑀻’’𑀢𑀺 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀤𑁂𑀣𑀸𑀢𑀺 𑀬𑀸𑀘𑀺. 𑀲𑁄 𑀏𑀓𑀁 𑀤𑀼𑀲𑁆𑀲𑀻𑀮𑀪𑀺𑀓𑁆𑀔𑀼𑀁 𑀮𑀪𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀑𑀧𑀼𑀜𑁆𑀚𑀸𑀧𑁂𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀉𑀧𑀭𑀺 𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀕𑀦𑁆𑀥𑀥𑀽𑀫𑀧𑀼𑀧𑁆𑀨𑁂𑀳𑀺 𑀧𑀽𑀚𑁂𑀢𑁆𑀯𑀸 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀩𑀼𑀤𑁆𑀥𑀲𑁆𑀲 𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀲𑀗𑁆𑀖𑁂 𑀘𑀺𑀢𑁆𑀢𑀻𑀓𑀸𑀭𑁂𑀦 𑀤𑁂𑀬𑁆𑀬𑀥𑀫𑁆𑀫𑀁 𑀅𑀤𑀸𑀲𑀺. 𑀲𑁄 𑀪𑀺𑀓𑁆𑀔𑀼 𑀧𑀘𑁆𑀙𑀸𑀪𑀢𑁆𑀢𑀁 𑀯𑀺𑀳𑀸𑀭𑀚𑀕𑁆𑀕𑀦𑀢𑁆𑀣𑀸𑀬 𑀓𑀼𑀤𑀸𑀮𑀓𑀁 𑀤𑁂𑀣𑀸𑀢𑀺 𑀖𑀭𑀤𑁆𑀯𑀸𑀭𑀁 𑀆𑀕𑀢𑁄, 𑀉𑀧𑀸𑀲𑀓𑁄 𑀦𑀺𑀲𑀺𑀦𑁆𑀦𑁄𑀯 𑀓𑀼𑀤𑀸𑀮𑀁 𑀧𑀸𑀤𑁂𑀦 𑀔𑀺𑀧𑀺𑀢𑁆𑀯𑀸 ‘‘𑀕𑀡𑁆𑀳𑀸’’𑀢𑀺 𑀅𑀤𑀸𑀲𑀺. 𑀢𑀫𑁂𑀦𑀁 𑀫𑀦𑀼𑀲𑁆𑀲𑀸 𑀆𑀳𑀁𑀲𑀼 𑁋 ‘‘𑀢𑀼𑀫𑁆𑀳𑁂𑀳𑀺 𑀧𑀸𑀢𑁄𑀯 𑀏𑀢𑀲𑁆𑀲 𑀓𑀢𑀲𑀓𑁆𑀓𑀸𑀭𑁄 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸, 𑀇𑀤𑀸𑀦𑀺 𑀉𑀧𑀘𑀸𑀭𑀫𑀢𑁆𑀢𑀓𑀫𑁆𑀧𑀺 𑀦𑀢𑁆𑀣𑀺, 𑀓𑀺𑀁 𑀦𑀸𑀫𑁂𑀢’’𑀦𑁆𑀢𑀺. 𑀉𑀧𑀸𑀲𑀓𑁄 𑁋 ‘‘𑀲𑀗𑁆𑀖𑀲𑁆𑀲 𑀲𑁄 𑀅𑀬𑁆𑀬𑀸 𑀘𑀺𑀢𑁆𑀢𑀻𑀓𑀸𑀭𑁄, 𑀦 𑀏𑀢𑀲𑁆𑀲𑀸’’𑀢𑀺 𑀆𑀳. 𑀓𑀸𑀲𑀸𑀯𑀓𑀡𑁆𑀞𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀤𑀓𑁆𑀔𑀺𑀡𑀁 𑀧𑀦 𑀓𑁄 𑀲𑁄𑀥𑁂𑀢𑀻𑀢𑀺? 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀬𑁄 𑀅𑀲𑀻𑀢𑀺 𑀫𑀳𑀸𑀣𑁂𑀭𑀸 𑀲𑁄𑀥𑁂𑀦𑁆𑀢𑀻𑀢𑀺. 𑀅𑀧𑀺𑀘 𑀣𑁂𑀭𑀸 𑀘𑀺𑀭𑀧𑀭𑀺𑀦𑀺𑀩𑁆𑀩𑀼𑀢𑀸, 𑀣𑁂𑀭𑁂 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯𑀚𑁆𑀚 𑀥𑀭𑀫𑀸𑀦𑀸 𑀔𑀻𑀡𑀸𑀲𑀯𑀸 𑀲𑁄𑀥𑁂𑀦𑁆𑀢𑀺𑀬𑁂𑀯.

𑀦 𑀢𑁆𑀯𑁂𑀯𑀸𑀳𑀁, 𑀆𑀦𑀦𑁆𑀤, 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀲𑀗𑁆𑀖𑀕𑀢𑀸𑀬 𑀤𑀓𑁆𑀔𑀺𑀡𑀸𑀬𑀸𑀢𑀺 𑀏𑀢𑁆𑀣 𑀅𑀢𑁆𑀣𑀺 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀲𑀗𑁆𑀖𑁄, 𑀅𑀢𑁆𑀣𑀺 𑀏𑀢𑀭𑀳𑀺 𑀲𑀗𑁆𑀖𑁄, 𑀅𑀢𑁆𑀣𑀺 𑀅𑀦𑀸𑀕𑀢𑁂 𑀓𑀸𑀲𑀸𑀯𑀓𑀡𑁆𑀞𑀲𑀗𑁆𑀖𑁄. 𑀩𑀼𑀤𑁆𑀥𑀧𑁆𑀧𑀫𑀼𑀔𑁄 𑀲𑀗𑁆𑀖𑁄 𑀏𑀢𑀭𑀳𑀺 𑀲𑀗𑁆𑀖𑁂𑀦 𑀦 𑀉𑀧𑀦𑁂𑀢𑀩𑁆𑀩𑁄, 𑀏𑀢𑀭𑀳𑀺 𑀲𑀗𑁆𑀖𑁄 𑀅𑀦𑀸𑀕𑀢𑁂 𑀓𑀸𑀲𑀸𑀯𑀓𑀡𑁆𑀞𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀦 𑀉𑀧𑀦𑁂𑀢𑀩𑁆𑀩𑁄. 𑀢𑁂𑀦 𑀢𑁂𑀦𑁂𑀯 𑀲𑀫𑀬𑁂𑀦 𑀓𑀣𑁂𑀢𑀩𑁆𑀩𑀁. 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀕𑀳𑀺𑀢𑀲𑀫𑀡𑀧𑀼𑀣𑀼𑀚𑁆𑀚𑀦𑁄 𑀳𑀺 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑁄 𑀲𑁄𑀢𑀸𑀧𑀦𑁆𑀦𑁄, 𑀲𑀗𑁆𑀖𑁂 𑀘𑀺𑀢𑁆𑀢𑀻𑀓𑀸𑀭𑀁 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑀫𑀡𑁂 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀢𑀭𑀁. 𑀉𑀤𑁆𑀤𑀺𑀲𑀺𑀢𑁆𑀯𑀸 𑀕𑀳𑀺𑀢𑁄 𑀲𑁄𑀢𑀸𑀧𑀦𑁆𑀦𑁄 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑁄 𑀲𑀓𑀤𑀸𑀕𑀸𑀫𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀗𑁆𑀖𑁂 𑀘𑀺𑀢𑁆𑀢𑀻𑀓𑀸𑀭𑀁 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀲𑁆𑀲 𑀳𑀺 𑀔𑀻𑀡𑀸𑀲𑀯𑁂 𑀤𑀺𑀦𑁆𑀦𑀤𑀸𑀦𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀕𑀳𑀺𑀢𑁂 𑀤𑀼𑀲𑁆𑀲𑀻𑀮𑁂𑀧𑀺 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀢𑀭𑀫𑁂𑀯. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀲𑀻𑀮𑀯𑀢𑁄 𑀔𑁄, 𑀫𑀳𑀸𑀭𑀸𑀚, 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁, 𑀦𑁄 𑀢𑀣𑀸 𑀤𑀼𑀲𑁆𑀲𑀻𑀮𑁂’’𑀢𑀺, 𑀢𑀁 𑀇𑀫𑀁 𑀦𑀬𑀁 𑀧𑀳𑀸𑀬 ‘‘𑀘𑀢𑀲𑁆𑀲𑁄 𑀔𑁄 𑀇𑀫𑀸𑀦𑀦𑁆𑀤, 𑀤𑀓𑁆𑀔𑀺𑀡𑀸 𑀯𑀺𑀲𑀼𑀤𑁆𑀥𑀺𑀬𑁄’’𑀢𑀺 𑀇𑀫𑀲𑁆𑀫𑀺𑀁 𑀘𑀢𑀼𑀓𑁆𑀓𑁂 𑀤𑀝𑁆𑀞𑀩𑁆𑀩𑀁.

𑁩𑁮𑁧. 𑀤𑀸𑀬𑀓𑀢𑁄 𑀯𑀺𑀲𑀼𑀚𑁆𑀛𑀢𑀻𑀢𑀺 𑀫𑀳𑀧𑁆𑀨𑀮𑀪𑀸𑀯𑁂𑀦 𑀯𑀺𑀲𑀼𑀚𑁆𑀛𑀢𑀺, 𑀫𑀳𑀧𑁆𑀨𑀮𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀮𑁆𑀬𑀸𑀡𑀥𑀫𑁆𑀫𑁄𑀢𑀺 𑀲𑀼𑀘𑀺𑀥𑀫𑁆𑀫𑁄, 𑀦 𑀧𑀸𑀧𑀥𑀫𑁆𑀫𑁄. 𑀤𑀸𑀬𑀓𑀢𑁄 𑀯𑀺𑀲𑀼𑀚𑁆𑀛𑀢𑀻𑀢𑀺 𑀘𑁂𑀢𑁆𑀣 𑀯𑁂𑀲𑁆𑀲𑀦𑁆𑀢𑀭𑀫𑀳𑀸𑀭𑀸𑀚𑀸 𑀓𑀣𑁂𑀢𑀩𑁆𑀩𑁄. 𑀲𑁄 𑀳𑀺 𑀚𑀽𑀚𑀓𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑀸𑀭𑀓𑁂 𑀤𑀢𑁆𑀯𑀸 𑀧𑀣𑀯𑀺𑀁 𑀓𑀫𑁆𑀧𑁂𑀲𑀺.

𑀧𑀝𑀺𑀕𑁆𑀕𑀸𑀳𑀓𑀢𑁄 𑀯𑀺𑀲𑀼𑀚𑁆𑀛𑀢𑀻𑀢𑀺 𑀏𑀢𑁆𑀣 𑀓𑀮𑁆𑀬𑀸𑀡𑀻𑀦𑀤𑀻𑀫𑀼𑀔𑀤𑁆𑀯𑀸𑀭𑀯𑀸𑀲𑀺𑀓𑁂𑀯𑀝𑁆𑀝𑁄 𑀓𑀣𑁂𑀢𑀩𑁆𑀩𑁄. 𑀲𑁄 𑀓𑀺𑀭 𑀤𑀻𑀖𑀲𑁄𑀫𑀢𑁆𑀣𑁂𑀭𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀫𑁆𑀧𑀺 𑀧𑀺𑀡𑁆𑀟𑀧𑀸𑀢𑀁 𑀤𑀢𑁆𑀯𑀸 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑁄 ‘‘𑀅𑀬𑁆𑀬𑀲𑁆𑀲 𑀫𑀁 𑀤𑀻𑀖𑀲𑁄𑀫𑀢𑁆𑀣𑁂𑀭𑀲𑁆𑀲 𑀤𑀺𑀦𑁆𑀦𑀧𑀺𑀡𑁆𑀟𑀧𑀸𑀢𑁄 𑀉𑀤𑁆𑀥𑀭𑀢𑀻’’𑀢𑀺 𑀆𑀳.

𑀦𑁂𑀯 𑀤𑀸𑀬𑀓𑀢𑁄𑀢𑀺 𑀏𑀢𑁆𑀣 𑀯𑀟𑁆𑀠𑀫𑀸𑀦𑀯𑀸𑀲𑀺𑀮𑀼𑀤𑁆𑀤𑀓𑁄 𑀓𑀣𑁂𑀢𑀩𑁆𑀩𑁄. 𑀲𑁄 𑀓𑀺𑀭 𑀧𑁂𑀢𑀤𑀓𑁆𑀔𑀺𑀡𑀁 𑀤𑁂𑀦𑁆𑀢𑁄 𑀏𑀓𑀲𑁆𑀲 𑀤𑀼𑀲𑁆𑀲𑀻𑀮𑀲𑁆𑀲𑁂𑀯 𑀢𑀬𑁄 𑀯𑀸𑀭𑁂 𑀅𑀤𑀸𑀲𑀺, 𑀢𑀢𑀺𑀬𑀯𑀸𑀭𑁂 ‘‘𑀅𑀫𑀦𑀼𑀲𑁆𑀲𑁄 𑀤𑀼𑀲𑁆𑀲𑀻𑀮𑁄 𑀫𑀁 𑀯𑀺𑀮𑀼𑀫𑁆𑀧𑀢𑀻’’𑀢𑀺 𑀯𑀺𑀭𑀯𑀺, 𑀏𑀓𑀲𑁆𑀲 𑀲𑀻𑀮𑀯𑀦𑁆𑀢𑀪𑀺𑀓𑁆𑀔𑀼𑀦𑁄 𑀤𑀢𑁆𑀯𑀸 𑀧𑀸𑀧𑀺𑀢𑀓𑀸𑀮𑁂𑀬𑁂𑀯𑀲𑁆𑀲 𑀧𑀸𑀧𑀼𑀡𑀺.

𑀤𑀸𑀬𑀓𑀢𑁄 𑀘𑁂𑀯 𑀯𑀺𑀲𑀼𑀚𑁆𑀛𑀢𑀻𑀢𑀺 𑀏𑀢𑁆𑀣 𑀅𑀲𑀤𑀺𑀲𑀤𑀸𑀦𑀁 𑀓𑀣𑁂𑀢𑀩𑁆𑀩𑀁.

𑀲𑀸 𑀤𑀓𑁆𑀔𑀺𑀡𑀸 𑀤𑀸𑀬𑀓𑀢𑁄 𑀯𑀺𑀲𑀼𑀚𑁆𑀛𑀢𑀻𑀢𑀺 𑀏𑀢𑁆𑀣 𑀬𑀣𑀸 𑀦𑀸𑀫 𑀙𑁂𑀓𑁄 𑀓𑀲𑁆𑀲𑀓𑁄 𑀅𑀲𑀸𑀭𑀫𑁆𑀧𑀺 𑀔𑁂𑀢𑁆𑀢𑀁 𑀮𑀪𑀺𑀢𑁆𑀯𑀸 𑀲𑀫𑀬𑁂 𑀓𑀲𑀺𑀢𑁆𑀯𑀸 𑀧𑀁𑀲𑀼𑀁 𑀅𑀧𑀦𑁂𑀢𑁆𑀯𑀸 𑀲𑀸𑀭𑀩𑀻𑀚𑀸𑀦𑀺 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀭𑀢𑁆𑀢𑀺𑀦𑁆𑀤𑀺𑀯𑀁 𑀆𑀭𑀓𑁆𑀔𑁂 𑀧𑀫𑀸𑀤𑀁 𑀅𑀦𑀸𑀧𑀚𑁆𑀚𑀦𑁆𑀢𑁄 𑀅𑀜𑁆𑀜𑀲𑁆𑀲 𑀲𑀸𑀭𑀔𑁂𑀢𑁆𑀢𑀢𑁄 𑀅𑀥𑀺𑀓𑀢𑀭𑀁 𑀥𑀜𑁆𑀜𑀁 𑀮𑀪𑀢𑀺, 𑀏𑀯𑀁 𑀲𑀻𑀮𑀯𑀸 𑀤𑀼𑀲𑁆𑀲𑀻𑀮𑀲𑁆𑀲 𑀤𑀢𑁆𑀯𑀸𑀧𑀺 𑀨𑀮𑀁 𑀫𑀳𑀦𑁆𑀢𑀁 𑀅𑀥𑀺𑀕𑀘𑁆𑀙𑀢𑀻𑀢𑀺. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀯𑀺𑀲𑀼𑀚𑁆𑀛𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀯𑀻𑀢𑀭𑀸𑀕𑁄 𑀯𑀻𑀢𑀭𑀸𑀕𑁂𑀲𑀽𑀢𑀺 𑀏𑀢𑁆𑀣 𑀯𑀻𑀢𑀭𑀸𑀕𑁄 𑀦𑀸𑀫 𑀅𑀦𑀸𑀕𑀸𑀫𑀻, 𑀅𑀭𑀳𑀸 𑀧𑀦 𑀏𑀓𑀦𑁆𑀢𑀯𑀻𑀢𑀭𑀸𑀕𑁄𑀯, 𑀢𑀲𑁆𑀫𑀸 𑀅𑀭𑀳𑀢𑀸 𑀅𑀭𑀳𑀢𑁄 𑀤𑀺𑀦𑁆𑀦𑀤𑀸𑀦𑀫𑁂𑀯 𑀅𑀕𑁆𑀕𑀁. 𑀓𑀲𑁆𑀫𑀸? 𑀪𑀯𑀸𑀮𑀬𑀲𑁆𑀲 𑀪𑀯𑀧𑀢𑁆𑀣𑀦𑀸𑀬 𑀅𑀪𑀸𑀯𑀢𑁄. 𑀦𑀦𑀼 𑀔𑀻𑀡𑀸𑀲𑀯𑁄 𑀤𑀸𑀦𑀨𑀮𑀁 𑀦 𑀲𑀤𑁆𑀤𑀳𑀢𑀻𑀢𑀺? 𑀤𑀸𑀦𑀨𑀮𑀁 𑀲𑀤𑁆𑀤𑀳𑀦𑁆𑀢𑀸 𑀔𑀻𑀡𑀸𑀲𑀯𑀲𑀤𑀺𑀲𑀸 𑀦 𑀳𑁄𑀦𑁆𑀢𑀺. 𑀔𑀻𑀡𑀸𑀲𑀯𑁂𑀦 𑀓𑀢𑀓𑀫𑁆𑀫𑀁 𑀧𑀦 𑀦𑀺𑀘𑁆𑀙𑀦𑁆𑀤𑀭𑀸𑀕𑀢𑁆𑀢𑀸 𑀓𑀼𑀲𑀮𑀁 𑀯𑀸 𑀅𑀓𑀼𑀲𑀮𑀁 𑀯𑀸 𑀦 𑀳𑁄𑀢𑀺, 𑀓𑀺𑀭𑀺𑀬𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺, 𑀢𑁂𑀦𑁂𑀯𑀲𑁆𑀲 𑀤𑀸𑀦𑀁 𑀅𑀕𑁆𑀕𑀁 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺.

𑀓𑀺𑀁 𑀧𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁, 𑀉𑀤𑀸𑀳𑀼 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀤𑀺𑀦𑁆𑀦𑀦𑁆𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀦𑁆𑀢𑀺 𑀯𑀤𑀦𑁆𑀢𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀜𑁆𑀳𑀺 𑀞𑀧𑁂𑀢𑁆𑀯𑀸 𑀅𑀜𑁆𑀜𑁄 𑀤𑀸𑀦𑀲𑁆𑀲 𑀯𑀺𑀧𑀸𑀓𑀁 𑀚𑀸𑀦𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀤𑀸𑀦𑀜𑁆𑀳𑀺 𑀘𑀢𑀽𑀳𑀺 𑀲𑀫𑁆𑀧𑀤𑀸𑀳𑀺 𑀤𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀲𑁆𑀲 𑀢𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑁂𑀢𑀺. 𑀢𑀢𑁆𑀭𑀺𑀫𑀸 𑀲𑀫𑁆𑀧𑀤𑀸 𑁋 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀥𑀫𑁆𑀫𑁂𑀦 𑀲𑀫𑁂𑀦 𑀧𑀭𑀁 𑀅𑀧𑀻𑀴𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑀢𑀸, 𑀧𑀼𑀩𑁆𑀩𑀘𑁂𑀢𑀦𑀸𑀤𑀺𑀯𑀲𑁂𑀦 𑀘𑁂𑀢𑀦𑀸𑀬 𑀫𑀳𑀢𑁆𑀢𑀢𑀸, 𑀔𑀻𑀡𑀸𑀲𑀯𑀪𑀸𑀯𑁂𑀦 𑀕𑀼𑀡𑀸𑀢𑀺𑀭𑁂𑀓𑀢𑀸, 𑀢𑀁𑀤𑀺𑀯𑀲𑀁 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀺𑀢𑀪𑀸𑀯𑁂𑀦 𑀯𑀢𑁆𑀣𑀼𑀲𑀫𑁆𑀧𑀦𑁆𑀦𑀢𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀤𑀓𑁆𑀔𑀺𑀡𑀸𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀢𑁆𑀣𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀴𑀸𑀬𑀢𑀦𑀯𑀕𑁆𑀕𑁄

𑁧. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮𑁩. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑀯𑀸𑀤𑀲𑀼𑀢𑁆𑀢𑀁. 𑀢𑀢𑁆𑀣 𑀩𑀸𑀴𑁆𑀳𑀕𑀺𑀮𑀸𑀦𑁄𑀢𑀺 𑀅𑀥𑀺𑀫𑀢𑁆𑀢𑀕𑀺𑀮𑀸𑀦𑁄 𑀫𑀭𑀡𑀲𑁂𑀬𑁆𑀬𑀁 𑀉𑀧𑀕𑀢𑁄. 𑀆𑀫𑀦𑁆𑀢𑁂𑀲𑀻𑀢𑀺 𑀕𑀳𑀧𑀢𑀺𑀲𑁆𑀲 𑀓𑀺𑀭 𑀬𑀸𑀯 𑀧𑀸𑀤𑀸 𑀯𑀳𑀺𑀁𑀲𑀼, 𑀢𑀸𑀯 𑀤𑀺𑀯𑀲𑁂 𑀲𑀓𑀺𑀁 𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀯𑀸 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀅𑀔𑀡𑁆𑀟𑀁 𑀅𑀓𑀸𑀲𑀺. 𑀬𑀢𑁆𑀢𑀓𑀜𑁆𑀘𑀲𑁆𑀲 𑀲𑀢𑁆𑀣𑀼 𑀉𑀧𑀝𑁆𑀞𑀸𑀦𑀁 𑀅𑀳𑁄𑀲𑀺, 𑀢𑀢𑁆𑀢𑀓𑀁𑀬𑁂𑀯 𑀫𑀳𑀸𑀣𑁂𑀭𑀸𑀦𑀁. 𑀲𑁄 𑀅𑀚𑁆𑀚 𑀕𑀫𑀦𑀧𑀸𑀤𑀲𑁆𑀲 𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀅𑀦𑀼𑀝𑁆𑀞𑀸𑀦𑀲𑁂𑀬𑁆𑀬𑀁 𑀉𑀧𑀕𑀢𑁄 𑀲𑀸𑀲𑀦𑀁 𑀧𑁂𑀲𑁂𑀢𑀼𑀓𑀸𑀫𑁄 𑀅𑀜𑁆𑀜𑀢𑀭𑀁 𑀧𑀼𑀭𑀺𑀲𑀁 𑀆𑀫𑀦𑁆𑀢𑁂𑀲𑀺. 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀪𑀕𑀯𑀦𑁆𑀢𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀲𑀽𑀭𑀺𑀬𑀢𑁆𑀣𑀗𑁆𑀕𑀫𑀦𑀯𑁂𑀮𑀸𑀬 𑀉𑀧𑀲𑀗𑁆𑀓𑀫𑀺.

𑁩𑁮𑁪. 𑀧𑀝𑀺𑀓𑁆𑀓𑀫𑀦𑁆𑀢𑀻𑀢𑀺 𑀑𑀲𑀓𑁆𑀓𑀦𑁆𑀢𑀺, 𑀢𑀦𑀼𑀓𑀸 𑀪𑀯𑀦𑁆𑀢𑀺. 𑀅𑀪𑀺𑀓𑁆𑀓𑀫𑀦𑁆𑀢𑀻𑀢𑀺 𑀅𑀪𑀺𑀯𑀟𑁆𑀠𑀦𑁆𑀢𑀺 𑀑𑀢𑁆𑀣𑀭𑀦𑁆𑀢𑀺, 𑀩𑀮𑀯𑀢𑀺𑀬𑁄 𑀳𑁄𑀦𑁆𑀢𑀺.

𑀅𑀪𑀺𑀓𑁆𑀓𑀫𑁄𑀲𑀸𑀦𑀁 𑀧𑀜𑁆𑀜𑀸𑀬𑀢𑀺 𑀦𑁄 𑀧𑀝𑀺𑀓𑁆𑀓𑀫𑁄𑀢𑀺 𑀬𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀫𑀸𑀭𑀡𑀦𑁆𑀢𑀺𑀓𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀉𑀧𑀭𑀺𑀯𑀸𑀢𑁂 𑀚𑀮𑀺𑀢𑀕𑁆𑀕𑀺 𑀯𑀺𑀬 𑀳𑁄𑀢𑀺, 𑀬𑀸𑀯 𑀉𑀲𑁆𑀫𑀸 𑀦 𑀧𑀭𑀺𑀬𑀸𑀤𑀺𑀬𑀢𑀺, 𑀢𑀸𑀯 𑀫𑀳𑀢𑀸𑀧𑀺 𑀉𑀧𑀓𑁆𑀓𑀫𑁂𑀦 𑀦 𑀲𑀓𑁆𑀓𑀸 𑀯𑀽𑀧𑀲𑀫𑁂𑀢𑀼𑀁, 𑀉𑀲𑁆𑀫𑀸𑀬 𑀧𑀦 𑀧𑀭𑀺𑀬𑀸𑀤𑀺𑀦𑁆𑀦𑀸𑀬 𑀯𑀽𑀧𑀲𑀫𑁆𑀫𑀢𑀺.

𑁩𑁮𑁫. 𑀅𑀣𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀫𑀳𑀸𑀲𑁂𑀝𑁆𑀞𑀺𑀲𑁆𑀲 𑀯𑁂𑀤𑀦𑀸 𑀫𑀸𑀭𑀡𑀦𑁆𑀢𑀺𑀓𑀸, 𑀦 𑀲𑀓𑁆𑀓𑀸 𑀧𑀝𑀺𑀩𑀸𑀳𑀺𑀢𑀼𑀁, 𑀅𑀯𑀲𑁂𑀲𑀸 𑀓𑀣𑀸 𑀦𑀺𑀭𑀢𑁆𑀣𑀓𑀸, 𑀥𑀫𑁆𑀫𑀓𑀣𑀫𑀲𑁆𑀲 𑀓𑀣𑁂𑀲𑁆𑀲𑀸𑀫𑀻’’𑀢𑀺. 𑀅𑀣 𑀦𑀁 𑀢𑀁 𑀓𑀣𑁂𑀦𑁆𑀢𑁄 𑀢𑀲𑁆𑀫𑀸𑀢𑀺𑀳𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀘𑀓𑁆𑀔𑀼𑀁 𑀢𑀻𑀳𑀺 𑀕𑀸𑀳𑁂𑀳𑀺 𑀕𑀡𑁆𑀳𑀦𑁆𑀢𑁄 𑀉𑀧𑁆𑀧𑀦𑁆𑀦𑀁 𑀫𑀸𑀭𑀡𑀦𑁆𑀢𑀺𑀓𑀁 𑀯𑁂𑀤𑀦𑀁 𑀧𑀝𑀺𑀩𑀸𑀳𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸. 𑀦 𑀘𑀓𑁆𑀔𑀼𑀁 𑀉𑀧𑀸𑀤𑀺𑀬𑀺𑀲𑁆𑀲𑀸𑀫𑀻𑀢𑀺 𑀘𑀓𑁆𑀔𑀼𑀁 𑀢𑀻𑀳𑀺 𑀕𑀸𑀳𑁂𑀳𑀺 𑀦 𑀕𑀡𑁆𑀳𑀺𑀲𑁆𑀲𑀸𑀫𑀺. 𑀦 𑀘 𑀫𑁂 𑀘𑀓𑁆𑀔𑀼𑀦𑀺𑀲𑁆𑀲𑀺𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀧𑀺 𑀫𑁂 𑀘𑀓𑁆𑀔𑀼𑀦𑀺𑀲𑁆𑀲𑀺𑀢𑀁 𑀦 𑀪𑀯𑀺𑀲𑁆𑀲𑀢𑀺. 𑀦 𑀭𑀽𑀧𑀦𑁆𑀢𑀺 𑀳𑁂𑀝𑁆𑀞𑀸 𑀆𑀬𑀢𑀦𑀭𑀽𑀧𑀁 𑀓𑀣𑀺𑀢𑀁, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀩𑁆𑀩𑀫𑁆𑀧𑀺 𑀓𑀸𑀫𑀪𑀯𑀭𑀽𑀧𑀁 𑀓𑀣𑁂𑀦𑁆𑀢𑁄 𑀏𑀯𑀫𑀸𑀳.

𑁩𑁮𑁬. 𑀦 𑀇𑀥𑀮𑁄𑀓𑀦𑁆𑀢𑀺 𑀯𑀲𑀦𑀝𑁆𑀞𑀸𑀦𑀁 𑀯𑀸 𑀖𑀸𑀲𑀘𑁆𑀙𑀸𑀤𑀦𑀁 𑀯𑀸 𑀦 𑀉𑀧𑀸𑀤𑀺𑀬𑀺𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀳𑀺 𑀧𑀘𑁆𑀘𑀬𑁂𑀲𑀼 𑀅𑀧𑀭𑀺𑀢𑀲𑁆𑀲𑀦𑀢𑁆𑀣𑀁 𑀓𑀣𑀺𑀢𑀁. 𑀦 𑀧𑀭𑀮𑁄𑀓𑀦𑁆𑀢𑀺 𑀏𑀢𑁆𑀣 𑀧𑀦 𑀫𑀦𑀼𑀲𑁆𑀲𑀮𑁄𑀓𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀧𑀭𑀮𑁄𑀓𑀸 𑀦𑀸𑀫. 𑀇𑀤𑀁 𑁋 ‘‘𑀅𑀲𑀼𑀓𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀲𑀼𑀓𑀝𑁆𑀞𑀸𑀦𑁂 𑀪𑀯𑀺𑀲𑁆𑀲𑀸𑀫𑀺, 𑀇𑀤𑀁 𑀦𑀸𑀫 𑀔𑀸𑀤𑀺𑀲𑁆𑀲𑀸𑀫𑀺 𑀪𑀼𑀜𑁆𑀚𑀺𑀲𑁆𑀲𑀸𑀫𑀺 𑀦𑀺𑀯𑀸𑀲𑁂𑀲𑁆𑀲𑀸𑀫𑀺 𑀧𑀸𑀭𑀼𑀧𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀭𑀽𑀧𑀸𑀬 𑀧𑀭𑀺𑀢𑀲𑁆𑀲𑀦𑀸𑀬 𑀧𑀳𑀸𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀫𑁆𑀧𑀺 𑀦 𑀉𑀧𑀸𑀤𑀺𑀬𑀺𑀲𑁆𑀲𑀸𑀫𑀺, 𑀦 𑀘 𑀫𑁂 𑀢𑀦𑁆𑀦𑀺𑀲𑁆𑀲𑀺𑀢𑀁 𑀯𑀺𑀜𑁆𑀜𑀸𑀡𑀁 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀢𑀻𑀳𑀺 𑀕𑀸𑀳𑁂𑀳𑀺 𑀧𑀭𑀺𑀫𑁄𑀘𑁂𑀢𑁆𑀯𑀸 𑀣𑁂𑀭𑁄 𑀤𑁂𑀲𑀦𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀦𑀺𑀝𑁆𑀞𑀧𑁂𑀲𑀺.

𑁩𑁮𑁭. 𑀑𑀮𑀻𑀬𑀲𑀻𑀢𑀺 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀆𑀭𑀫𑁆𑀫𑀡𑁂𑀲𑀼 𑀩𑀚𑁆𑀛𑀲𑀺 𑀅𑀮𑁆𑀮𑀻𑀬𑀲𑀻𑀢𑀺. 𑀇𑀢𑀺 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑁋 ‘‘𑀅𑀬𑀫𑁆𑀧𑀺 𑀦𑀸𑀫 𑀕𑀳𑀧𑀢𑀺 𑀏𑀯𑀁 𑀲𑀤𑁆𑀥𑁄 𑀧𑀲𑀦𑁆𑀦𑁄 𑀫𑀭𑀡𑀪𑀬𑀲𑁆𑀲 𑀪𑀸𑀬𑀢𑀺, 𑀅𑀜𑁆𑀜𑁄 𑀓𑁄 𑀦 𑀪𑀸𑀬𑀺𑀲𑁆𑀲𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀢𑀲𑁆𑀲 𑀕𑀸𑀴𑁆𑀳𑀁 𑀓𑀢𑁆𑀯𑀸 𑀑𑀯𑀸𑀤𑀁 𑀤𑁂𑀦𑁆𑀢𑁄 𑀏𑀯𑀫𑀸𑀳. 𑀦 𑀘 𑀫𑁂 𑀏𑀯𑀭𑀽𑀧𑀻 𑀥𑀫𑁆𑀫𑀻𑀓𑀣𑀸 𑀲𑀼𑀢𑀧𑀼𑀩𑁆𑀩𑀸𑀢𑀺 𑀅𑀬𑀁 𑀉𑀧𑀸𑀲𑀓𑁄 𑁋 ‘‘𑀲𑀢𑁆𑀣𑀼 𑀲𑀦𑁆𑀢𑀺𑀓𑀸𑀧𑀺 𑀫𑁂 𑀏𑀯𑀭𑀽𑀧𑀻 𑀥𑀫𑁆𑀫𑀓𑀣𑀸 𑀦 𑀲𑀼𑀢𑀧𑀼𑀩𑁆𑀩𑀸’’𑀢𑀺 𑀯𑀤𑀢𑀺, 𑀓𑀺𑀁 𑀲𑀢𑁆𑀣𑀸 𑀏𑀯𑀭𑀽𑀧𑀺 𑀲𑀼𑀔𑀼𑀫𑀁 𑀕𑀫𑁆𑀪𑀻𑀭𑀓𑀣𑀁 𑀦 𑀓𑀣𑁂𑀢𑀻𑀢𑀺? 𑀦𑁄 𑀦 𑀓𑀣𑁂𑀢𑀺. 𑀏𑀯𑀁 𑀧𑀦 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺 𑀙 𑀩𑀸𑀳𑀺𑀭𑀸𑀦𑀺 𑀙 𑀯𑀺𑀜𑁆𑀜𑀸𑀡𑀓𑀸𑀬𑁂 𑀙 𑀨𑀲𑁆𑀲𑀓𑀸𑀬𑁂 𑀙 𑀯𑁂𑀤𑀦𑀸𑀓𑀸𑀬𑁂 𑀙 𑀥𑀸𑀢𑀼𑀬𑁄 𑀧𑀜𑁆𑀘𑀓𑁆𑀔𑀦𑁆𑀥𑁂 𑀘𑀢𑁆𑀢𑀸𑀭𑁄 𑀅𑀭𑀽𑀧𑁂 𑀇𑀥𑀮𑁄𑀓𑀜𑁆𑀘 𑀧𑀭𑀮𑁄𑀓𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀯𑀲𑁂𑀦 𑀅𑀭𑀳𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀣𑀺𑀢𑀓𑀣𑀸 𑀏𑀢𑁂𑀦 𑀦 𑀲𑀼𑀢𑀧𑀼𑀩𑁆𑀩𑀸, 𑀢𑀲𑁆𑀫𑀸 𑀏𑀯𑀁 𑀯𑀤𑀢𑀺.

𑀅𑀧𑀺𑀘𑀸𑀬𑀁 𑀉𑀧𑀸𑀲𑀓𑁄 𑀤𑀸𑀦𑀸𑀥𑀺𑀫𑀼𑀢𑁆𑀢𑁄 𑀤𑀸𑀦𑀸𑀪𑀺𑀭𑀢𑁄 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑁄 𑀢𑀼𑀘𑁆𑀙𑀳𑀢𑁆𑀣𑁄 𑀦 𑀕𑀢𑀧𑀼𑀩𑁆𑀩𑁄. 𑀧𑀼𑀭𑁂𑀪𑀢𑁆𑀢𑀁 𑀕𑀘𑁆𑀙𑀦𑁆𑀢𑁄 𑀬𑀸𑀕𑀼𑀔𑀚𑁆𑀚𑀓𑀸𑀤𑀻𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀧𑀘𑁆𑀙𑀸𑀪𑀢𑁆𑀢𑀁 𑀲𑀧𑁆𑀧𑀺𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺. 𑀢𑀲𑁆𑀫𑀺𑀁 𑀅𑀲𑀢𑀺 𑀯𑀸𑀮𑀺𑀓𑀁 𑀕𑀸𑀳𑀸𑀧𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀑𑀓𑀺𑀭𑀸𑀧𑁂𑀢𑀺, 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀭𑀓𑁆𑀔𑀺𑀢𑁆𑀯𑀸 𑀕𑁂𑀳𑀁 𑀕𑀢𑁄. 𑀩𑁄𑀥𑀺𑀲𑀢𑁆𑀢𑀕𑀢𑀺𑀓𑁄 𑀓𑀺𑀭𑁂𑀲 𑀉𑀧𑀸𑀲𑀓𑁄, 𑀢𑀲𑁆𑀫𑀸 𑀪𑀕𑀯𑀸 𑀘𑀢𑀼𑀯𑀻𑀲𑀢𑀺 𑀲𑀁𑀯𑀘𑁆𑀙𑀭𑀸𑀦𑀺 𑀉𑀧𑀸𑀲𑀓𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀤𑀸𑀦𑀓𑀣𑀫𑁂𑀯 𑀓𑀣𑁂𑀲𑀺 𑁋 ‘‘𑀉𑀧𑀸𑀲𑀓, 𑀇𑀤𑀁 𑀤𑀸𑀦𑀁 𑀦𑀸𑀫 𑀩𑁄𑀥𑀺𑀲𑀢𑁆𑀢𑀸𑀦𑀁 𑀕𑀢𑀫𑀕𑁆𑀕𑁄, 𑀫𑀬𑁆𑀳𑀫𑁆𑀧𑀺 𑀕𑀢𑀫𑀕𑁆𑀕𑁄, 𑀫𑀬𑀸 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀤𑀸𑀦𑀁 𑀤𑀺𑀦𑁆𑀦𑀁, 𑀢𑁆𑀯𑀁 𑀫𑀬𑀸 𑀕𑀢𑀫𑀕𑁆𑀕𑀫𑁂𑀯 𑀅𑀦𑀼𑀕𑀘𑁆𑀙𑀲𑀻’’𑀢𑀺. 𑀥𑀫𑁆𑀫𑀲𑁂𑀦𑀸𑀧𑀢𑀺𑀆𑀤𑀬𑁄 𑀫𑀳𑀸𑀲𑀸𑀯𑀓𑀸𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀓𑀸𑀮𑁂 𑀤𑀸𑀦𑀓𑀣𑀫𑁂𑀯𑀲𑁆𑀲 𑀓𑀣𑁂𑀦𑁆𑀢𑀺. 𑀢𑁂𑀦𑁂𑀯𑀸𑀳 𑀦 𑀔𑁄 𑀕𑀳𑀧𑀢𑀺 𑀕𑀺𑀳𑀻𑀦𑀁 𑀑𑀤𑀸𑀢𑀯𑀲𑀦𑀸𑀦𑀁 𑀏𑀯𑀭𑀽𑀧𑀻 𑀥𑀫𑁆𑀫𑀻𑀓𑀣𑀸 𑀧𑀝𑀺𑀪𑀸𑀢𑀻𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀕𑀳𑀧𑀢𑀺 𑀕𑀺𑀳𑀻𑀦𑀁 𑀦𑀸𑀫 𑀔𑁂𑀢𑁆𑀢𑀯𑀢𑁆𑀣𑀼𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀤𑀸𑀲𑀻𑀤𑀸𑀲𑀧𑀼𑀢𑁆𑀢𑀪𑀭𑀺𑀬𑀸𑀤𑀻𑀲𑀼 𑀢𑀺𑀩𑁆𑀩𑁄 𑀆𑀮𑀬𑁄 𑀢𑀺𑀩𑁆𑀩𑀁 𑀦𑀺𑀓𑀦𑁆𑀢𑀺𑀧𑀭𑀺𑀬𑀼𑀝𑁆𑀞𑀸𑀦𑀁, 𑀢𑁂𑀲𑀁 𑁋 ‘‘𑀏𑀢𑁆𑀣 𑀆𑀮𑀬𑁄 𑀦 𑀓𑀸𑀢𑀩𑁆𑀩𑁄, 𑀦𑀺𑀓𑀦𑁆𑀢𑀺 𑀦 𑀓𑀸𑀢𑀩𑁆𑀩𑀸’’𑀢𑀺 𑀓𑀣𑀸 𑀦 𑀧𑀝𑀺𑀪𑀸𑀢𑀺 𑀦 𑀭𑀼𑀘𑁆𑀘𑀢𑀻𑀢𑀺.

𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀓𑀲𑁆𑀫𑀸 𑀉𑀧𑀲𑀗𑁆𑀓𑀫𑀺? 𑀢𑀼𑀲𑀺𑀢𑀪𑀯𑀦𑁂 𑀓𑀺𑀭𑀲𑁆𑀲 𑀦𑀺𑀩𑁆𑀩𑀢𑁆𑀢𑀫𑀢𑁆𑀢𑀲𑁆𑀲𑁂𑀯 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑀁 𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑀁 𑀯𑀺𑀬 𑀯𑀺𑀚𑁆𑀚𑁄𑀢𑀫𑀸𑀦𑀁 𑀅𑀢𑁆𑀢𑀪𑀸𑀯𑀁 𑀉𑀬𑁆𑀬𑀸𑀦𑀯𑀺𑀫𑀸𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀜𑁆𑀘 𑀤𑀺𑀲𑁆𑀯𑀸 𑁋 ‘‘𑀫𑀳𑀢𑀻 𑀅𑀬𑀁 𑀫𑀬𑁆𑀳𑀁 𑀲𑀫𑁆𑀧𑀢𑁆𑀢𑀺, 𑀓𑀺𑀁 𑀦𑀼 𑀔𑁄 𑀫𑁂 𑀫𑀦𑀼𑀲𑁆𑀲𑀧𑀣𑁂 𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀑𑀮𑁄𑀓𑁂𑀦𑁆𑀢𑁄 𑀢𑀻𑀲𑀼 𑀭𑀢𑀦𑁂𑀲𑀼 𑀅𑀥𑀺𑀓𑀸𑀭𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀧𑀫𑀸𑀤𑀝𑁆𑀞𑀸𑀦𑀫𑀺𑀤𑀁 𑀤𑁂𑀯𑀢𑁆𑀢𑀁 𑀦𑀸𑀫, 𑀇𑀫𑀸𑀬 𑀳𑀺 𑀫𑁂 𑀲𑀫𑁆𑀧𑀢𑁆𑀢𑀺𑀬𑀸 𑀫𑁄𑀤𑀫𑀸𑀦𑀲𑁆𑀲 𑀲𑀢𑀺𑀲𑀫𑁆𑀫𑁄𑀲𑁄𑀧𑀺 𑀲𑀺𑀬𑀸, 𑀳𑀦𑁆𑀤𑀸𑀳𑀁 𑀕𑀦𑁆𑀢𑁆𑀯𑀸 𑀫𑀫 𑀚𑁂𑀢𑀯𑀦𑀲𑁆𑀲 𑀘𑁂𑀯 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀢𑀣𑀸𑀕𑀢𑀲𑁆𑀲 𑀘 𑀅𑀭𑀺𑀬𑀫𑀕𑁆𑀕𑀲𑁆𑀲 𑀘 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀘 𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀢𑀢𑁄 𑀆𑀕𑀦𑁆𑀢𑁆𑀯𑀸 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀢𑀁 𑀤𑀲𑁆𑀲𑁂𑀢𑀼𑀁 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀇𑀲𑀺𑀲𑀗𑁆𑀖𑀦𑀺𑀲𑁂𑀯𑀺𑀢𑀦𑁆𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀦𑀺𑀲𑁂𑀯𑀺𑀢𑀁. 𑀏𑀯𑀁 𑀧𑀞𑀫𑀕𑀸𑀣𑀸𑀬 𑀚𑁂𑀢𑀯𑀦𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀯𑀡𑁆𑀡𑀁 𑀓𑀣𑁂𑀦𑁆𑀢𑁄 𑀓𑀫𑁆𑀫𑀁 𑀯𑀺𑀚𑁆𑀚𑀸 𑀘𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀫𑁆𑀫𑀦𑁆𑀢𑀺 𑀫𑀕𑁆𑀕𑀘𑁂𑀢𑀦𑀸. 𑀯𑀺𑀚𑁆𑀚𑀸𑀢𑀺 𑀫𑀕𑁆𑀕𑀧𑀜𑁆𑀜𑀸. 𑀥𑀫𑁆𑀫𑁄𑀢𑀺 𑀲𑀫𑀸𑀥𑀺𑀧𑀓𑁆𑀔𑀺𑀓𑁄 𑀥𑀫𑁆𑀫𑁄. 𑀲𑀻𑀮𑀁 𑀚𑀻𑀯𑀺𑀢𑀫𑀼𑀢𑁆𑀢𑀫𑀦𑁆𑀢𑀺 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀚𑀻𑀯𑀺𑀢𑀁 𑀉𑀢𑁆𑀢𑀫𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀯𑀺𑀚𑁆𑀚𑀸𑀢𑀺 𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑁄. 𑀥𑀫𑁆𑀫𑁄𑀢𑀺 𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀬𑁄. 𑀲𑀻𑀮𑀦𑁆𑀢𑀺 𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸. 𑀚𑀻𑀯𑀺𑀢𑀫𑀼𑀢𑁆𑀢𑀫𑀦𑁆𑀢𑀺 𑀏𑀢𑀲𑁆𑀫𑀺𑀁 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀚𑀻𑀯𑀺𑀢𑀁 𑀦𑀸𑀫 𑀉𑀢𑁆𑀢𑀫𑀁. 𑀏𑀢𑁂𑀦 𑀫𑀘𑁆𑀘𑀸 𑀲𑀼𑀚𑁆𑀛𑀦𑁆𑀢𑀻𑀢𑀺 𑀏𑀢𑁂𑀦 𑀅𑀝𑁆𑀞𑀗𑁆𑀕𑀺𑀓𑁂𑀦 𑀫𑀕𑁆𑀕𑁂𑀦 𑀲𑀢𑁆𑀢𑀸 𑀯𑀺𑀲𑀼𑀚𑁆𑀛𑀦𑁆𑀢𑀺.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀫𑀕𑁆𑀕𑁂𑀦 𑀲𑀼𑀚𑁆𑀛𑀦𑁆𑀢𑀺, 𑀦 𑀕𑁄𑀢𑁆𑀢𑀥𑀦𑁂𑀳𑀺, 𑀢𑀲𑁆𑀫𑀸. 𑀬𑁄𑀦𑀺𑀲𑁄 𑀯𑀺𑀘𑀺𑀦𑁂 𑀥𑀫𑁆𑀫𑀦𑁆𑀢𑀺 𑀉𑀧𑀸𑀬𑁂𑀦 𑀲𑀫𑀸𑀥𑀺𑀧𑀓𑁆𑀔𑀺𑀬𑀁 𑀥𑀫𑁆𑀫𑀁 𑀯𑀺𑀘𑀺𑀦𑁂𑀬𑁆𑀬. 𑀏𑀯𑀁 𑀢𑀢𑁆𑀣 𑀯𑀺𑀲𑀼𑀚𑁆𑀛𑀢𑀻𑀢𑀺 𑀏𑀯𑀁 𑀢𑀲𑁆𑀫𑀺𑀁 𑀅𑀭𑀺𑀬𑀫𑀕𑁆𑀕𑁂 𑀯𑀺𑀲𑀼𑀚𑁆𑀛𑀢𑀺. 𑀅𑀣 𑀯𑀸 𑀬𑁄𑀦𑀺𑀲𑁄 𑀯𑀺𑀘𑀺𑀦𑁂 𑀥𑀫𑁆𑀫𑀦𑁆𑀢𑀺 𑀉𑀧𑀸𑀬𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑀥𑀫𑁆𑀫𑀁 𑀯𑀺𑀘𑀺𑀦𑁂𑀬𑁆𑀬. 𑀏𑀯𑀁 𑀢𑀢𑁆𑀣 𑀯𑀺𑀲𑀼𑀚𑁆𑀛𑀢𑀻𑀢𑀺 𑀏𑀯𑀁 𑀢𑁂𑀲𑀼 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀯𑀺𑀲𑀼𑀚𑁆𑀛𑀢𑀺.

𑀇𑀤𑀸𑀦𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀡𑁆𑀡𑀁 𑀓𑀣𑁂𑀦𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑁄 𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀸𑀭𑀺𑀧𑀼𑀢𑁆𑀢𑁄 𑀯𑀸𑀢𑀺 𑀅𑀯𑀥𑀸𑀭𑀡𑀯𑀘𑀦𑀁. 𑀏𑀢𑁂𑀳𑀺 𑀧𑀜𑁆𑀜𑀸𑀤𑀻𑀳𑀺 𑀲𑀸𑀭𑀺𑀧𑀼𑀢𑁆𑀢𑁄𑀯 𑀲𑁂𑀬𑁆𑀬𑁄𑀢𑀺 𑀯𑀤𑀢𑀺. 𑀉𑀧𑀲𑀫𑁂𑀦𑀸𑀢𑀺 𑀓𑀺𑀮𑁂𑀲𑀉𑀧𑀲𑀫𑁂𑀦. 𑀧𑀸𑀭𑀗𑁆𑀕𑀢𑁄𑀢𑀺 𑀦𑀺𑀩𑁆𑀩𑀸𑀦𑀁 𑀕𑀢𑁄. 𑀬𑁄 𑀓𑁄𑀘𑀺 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑁄 𑀪𑀺𑀓𑁆𑀔𑀼, 𑀲𑁄 𑀏𑀢𑀸𑀯𑀧𑀭𑀫𑁄 𑀲𑀺𑀬𑀸, 𑀦 𑀣𑁂𑀭𑁂𑀦 𑀉𑀢𑁆𑀢𑀭𑀺𑀢𑀭𑁄 𑀦𑀸𑀫 𑀅𑀢𑁆𑀣𑀻𑀢𑀺 𑀯𑀤𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀙𑀦𑁆𑀦𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮𑁯. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀙𑀦𑁆𑀦𑁄𑀯𑀸𑀤𑀲𑀼𑀢𑁆𑀢𑀁. 𑀢𑀢𑁆𑀣 𑀙𑀦𑁆𑀦𑁄𑀢𑀺 𑀏𑀯𑀁𑀦𑀸𑀫𑀓𑁄 𑀣𑁂𑀭𑁄, 𑀦 𑀅𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀦𑁆𑀢𑀢𑁆𑀣𑁂𑀭𑁄. 𑀧𑀝𑀺𑀲𑀮𑁆𑀮𑀸𑀦𑀸𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀢𑁄. 𑀕𑀺𑀮𑀸𑀦𑀧𑀼𑀘𑁆𑀙𑀓𑀸𑀢𑀺 𑀕𑀺𑀮𑀸𑀦𑀼𑀧𑀝𑁆𑀞𑀸𑀦𑀁 𑀦𑀸𑀫 𑀩𑀼𑀤𑁆𑀥𑀯𑀡𑁆𑀡𑀺𑀢𑀁, 𑀢𑀲𑁆𑀫𑀸 𑀏𑀯𑀫𑀸𑀳. 𑀲𑀢𑁆𑀣𑀦𑁆𑀢𑀺 𑀚𑀻𑀯𑀺𑀢𑀳𑀸𑀭𑀓𑀲𑀢𑁆𑀣𑀁. 𑀦𑀸𑀯𑀓𑀗𑁆𑀔𑀸𑀫𑀻𑀢𑀺 𑀇𑀘𑁆𑀙𑀸𑀫𑀺.

𑁩𑁯𑁦. 𑀅𑀦𑀼𑀧𑀯𑀚𑁆𑀚𑀦𑁆𑀢𑀺 𑀅𑀦𑀼𑀧𑁆𑀧𑀢𑁆𑀢𑀺𑀓𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀁.

𑁩𑁯𑁧. 𑀏𑀢𑀁 𑀫𑀫𑀸𑀢𑀺𑀆𑀤𑀻𑀦𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀕𑀸𑀳𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀦𑀺𑀭𑁄𑀥𑀁 𑀤𑀺𑀲𑁆𑀯𑀸𑀢𑀺 𑀔𑀬𑀯𑀬𑀁 𑀜𑀢𑁆𑀯𑀸. 𑀦𑁂𑀢𑀁 𑀫𑀫 𑀦𑁂𑀲𑁄𑀳𑀫𑀲𑁆𑀫𑀺 𑀦 𑀫𑁂𑀲𑁄 𑀅𑀢𑁆𑀢𑀸𑀢𑀺 𑀲𑀫𑀦𑀼𑀧𑀲𑁆𑀲𑀸𑀫𑀻𑀢𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀲𑀫𑀦𑀼𑀧𑀲𑁆𑀲𑀸𑀫𑀺.

𑁩𑁯𑁩. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀫𑀸𑀭𑀡𑀦𑁆𑀢𑀺𑀓𑀯𑁂𑀤𑀦𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀢𑁆𑀣𑀁 𑀆𑀳𑀭𑀸𑀫𑀻𑀢𑀺 𑀯𑀤𑀢𑀺, 𑀢𑀲𑁆𑀫𑀸. 𑀧𑀼𑀣𑀼𑀚𑁆𑀚𑀦𑁄 𑀆𑀬𑀲𑁆𑀫𑀸, 𑀢𑁂𑀦 𑀇𑀤𑀫𑁆𑀧𑀺 𑀫𑀦𑀲𑀺 𑀓𑀭𑁄𑀳𑀻𑀢𑀺 𑀤𑀻𑀧𑁂𑀢𑀺. 𑀦𑀺𑀘𑁆𑀘𑀓𑀧𑁆𑀧𑀦𑁆𑀢𑀺 𑀦𑀺𑀘𑁆𑀘𑀓𑀸𑀮𑀁. 𑀦𑀺𑀲𑁆𑀲𑀺𑀢𑀲𑁆𑀲𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀦𑀺𑀲𑁆𑀲𑀺𑀢𑀲𑁆𑀲. 𑀘𑀮𑀺𑀢𑀦𑁆𑀢𑀺 𑀯𑀺𑀧𑁆𑀨𑀦𑁆𑀤𑀺𑀢𑀁 𑀳𑁄𑀢𑀺. 𑀧𑀲𑁆𑀲𑀤𑁆𑀥𑀻𑀢𑀺 𑀓𑀸𑀬𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺, 𑀓𑀺𑀮𑁂𑀲𑀧𑀲𑁆𑀲𑀤𑁆𑀥𑀺 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀦𑀢𑀻𑀢𑀺 𑀢𑀡𑁆𑀳𑀸𑀦𑀢𑀺. 𑀦𑀢𑀺𑀬𑀸 𑀅𑀲𑀢𑀻𑀢𑀺 𑀪𑀯𑀢𑁆𑀣𑀸𑀬 𑀆𑀮𑀬𑀦𑀺𑀓𑀦𑁆𑀢𑀺𑀧𑀭𑀺𑀬𑀼𑀝𑁆𑀞𑀸𑀦𑁂𑀲𑀼 𑀅𑀲𑀢𑀺. 𑀆𑀕𑀢𑀺𑀕𑀢𑀺 𑀦 𑀳𑁄𑀢𑀻𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀆𑀕𑀢𑀺 𑀦𑀸𑀫 𑀦 𑀳𑁄𑀢𑀺, 𑀘𑀼𑀢𑀺𑀯𑀲𑁂𑀦 𑀕𑀫𑀦𑀁 𑀦𑀸𑀫 𑀦 𑀳𑁄𑀢𑀺. 𑀘𑀼𑀢𑀽𑀧𑀧𑀸𑀢𑁄𑀢𑀺 𑀘𑀯𑀦𑀯𑀲𑁂𑀦 𑀘𑀼𑀢𑀺, 𑀉𑀧𑀧𑀚𑁆𑀚𑀦𑀯𑀲𑁂𑀦 𑀉𑀧𑀧𑀸𑀢𑁄. 𑀦𑁂𑀯𑀺𑀥 𑀦 𑀳𑀼𑀭𑀁 𑀦 𑀉𑀪𑀬𑀫𑀦𑁆𑀢𑀭𑁂𑀦𑀸𑀢𑀺 𑀦𑀬𑀺𑀥 𑀮𑁄𑀓𑁂, 𑀦 𑀧𑀭𑀮𑁄𑀓𑁂, 𑀦 𑀉𑀪𑀬𑀢𑁆𑀣 𑀳𑁄𑀢𑀺. 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀓𑀺𑀮𑁂𑀲𑀤𑀼𑀓𑁆𑀔𑀲𑁆𑀲 𑀅𑀬𑀫𑁂𑀯 𑀅𑀦𑁆𑀢𑁄 𑀅𑀬𑀁 𑀧𑀭𑀺𑀘𑁆𑀙𑁂𑀤𑁄 𑀧𑀭𑀺𑀯𑀝𑀼𑀫𑀪𑀸𑀯𑁄 𑀳𑁄𑀢𑀺. 𑀅𑀬𑀫𑁂𑀯 𑀳𑀺 𑀏𑀢𑁆𑀣 𑀅𑀢𑁆𑀣𑁄. 𑀬𑁂 𑀧𑀦 ‘‘𑀦 𑀉𑀪𑀬𑀫𑀦𑁆𑀢𑀭𑁂𑀦𑀸’’𑀢𑀺 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑀭𑀸𑀪𑀯𑀁 𑀇𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀉𑀢𑁆𑀢𑀭𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑁩𑁯𑁪. 𑀲𑀢𑁆𑀣𑀁 𑀆𑀳𑀭𑁂𑀲𑀻𑀢𑀺 𑀚𑀻𑀯𑀺𑀢𑀳𑀸𑀭𑀓𑀁 𑀲𑀢𑁆𑀣𑀁 𑀆𑀳𑀭𑀺, 𑀓𑀡𑁆𑀞𑀦𑀸𑀴𑀺𑀁 𑀙𑀺𑀦𑁆𑀤𑀺. 𑀅𑀣𑀲𑁆𑀲 𑀢𑀲𑁆𑀫𑀺𑀁 𑀔𑀡𑁂 𑀫𑀭𑀡𑀪𑀬𑀁 𑀑𑀓𑁆𑀓𑀫𑀺, 𑀕𑀢𑀺𑀦𑀺𑀫𑀺𑀢𑁆𑀢𑀁 𑀉𑀧𑀝𑁆𑀞𑀸𑀲𑀺. 𑀲𑁄 𑀅𑀢𑁆𑀢𑀦𑁄 𑀧𑀼𑀣𑀼𑀚𑁆𑀚𑀦𑀪𑀸𑀯𑀁 𑀜𑀢𑁆𑀯𑀸 𑀲𑀁𑀯𑀺𑀕𑁆𑀕𑁄 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀲𑀗𑁆𑀔𑀸𑀭𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑀫𑀲𑀻𑀲𑀻 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀲𑀫𑁆𑀫𑀼𑀔𑀸𑀬𑁂𑀯 𑀅𑀦𑀼𑀧𑀯𑀚𑁆𑀚𑀢𑀸 𑀩𑁆𑀬𑀸𑀓𑀢𑀸𑀢𑀺 𑀓𑀺𑀜𑁆𑀘𑀸𑀧𑀺 𑀇𑀤𑀁 𑀣𑁂𑀭𑀲𑁆𑀲 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀩𑁆𑀬𑀸𑀓𑀭𑀡𑀁 𑀳𑁄𑀢𑀺, 𑀏𑀢𑁂𑀦 𑀧𑀦 𑀩𑁆𑀬𑀸𑀓𑀭𑀡𑁂𑀦 𑀅𑀦𑀦𑁆𑀢𑀭𑀸𑀬𑀫𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀳𑁄𑀲𑀺. 𑀢𑀲𑁆𑀫𑀸 𑀪𑀕𑀯𑀸 𑀢𑀫𑁂𑀯 𑀩𑁆𑀬𑀸𑀓𑀭𑀡𑀁 𑀕𑀳𑁂𑀢𑁆𑀯𑀸 𑀓𑀣𑁂𑀲𑀺. 𑀉𑀧𑀯𑀚𑁆𑀚𑀓𑀼𑀮𑀸𑀦𑀻𑀢𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀓𑀼𑀮𑀸𑀦𑀺. 𑀇𑀫𑀺𑀦𑀸 𑀣𑁂𑀭𑁄, 𑁋 ‘‘𑀪𑀦𑁆𑀢𑁂, 𑀏𑀯𑀁 𑀉𑀧𑀝𑁆𑀞𑀸𑀓𑁂𑀲𑀼 𑀘 𑀉𑀧𑀝𑁆𑀞𑀸𑀬𑀺𑀓𑀸𑀲𑀼 𑀘 𑀯𑀺𑀚𑁆𑀚𑀫𑀸𑀦𑀸𑀲𑀼 𑀲𑁄 𑀪𑀺𑀓𑁆𑀔𑀼 𑀢𑀼𑀫𑁆𑀳𑀸𑀓𑀁 𑀲𑀸𑀲𑀦𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀓𑀼𑀮𑁂𑀲𑀼 𑀲𑀁𑀲𑀕𑁆𑀕𑀸𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 𑀳𑁄𑀦𑁆𑀢𑀺 𑀳𑁂𑀢𑁂 𑀲𑀸𑀭𑀺𑀧𑀼𑀢𑁆𑀢𑀸𑀢𑀺𑀆𑀤𑀺𑀫𑀸𑀳. 𑀇𑀫𑀲𑁆𑀫𑀺𑀁 𑀓𑀺𑀭 𑀞𑀸𑀦𑁂 𑀣𑁂𑀭𑀲𑁆𑀲 𑀓𑀼𑀮𑁂𑀲𑀼 𑀅𑀲𑀁𑀲𑀝𑁆𑀞𑀪𑀸𑀯𑁄 𑀧𑀸𑀓𑀝𑁄 𑀅𑀳𑁄𑀲𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀙𑀦𑁆𑀦𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀼𑀡𑁆𑀡𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯𑁫. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀧𑀼𑀡𑁆𑀡𑁄𑀯𑀸𑀤𑀲𑀼𑀢𑁆𑀢𑀁. 𑀢𑀢𑁆𑀣 𑀧𑀝𑀺𑀲𑀮𑁆𑀮𑀸𑀦𑀸𑀢𑀺 𑀏𑀓𑀻𑀪𑀸𑀯𑀸. 𑀢𑀁 𑀘𑁂𑀢𑀺 𑀢𑀁 𑀘𑀓𑁆𑀔𑀼𑀜𑁆𑀘𑁂𑀯 𑀭𑀽𑀧𑀜𑁆𑀘. 𑀦𑀦𑁆𑀤𑀻𑀲𑀫𑀼𑀤𑀬𑀸 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀦𑀦𑁆𑀤𑀺𑀬𑀸 𑀢𑀡𑁆𑀳𑀸𑀬 𑀲𑀫𑁄𑀥𑀸𑀦𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑀤𑀼𑀓𑁆𑀔𑀲𑁆𑀲 𑀲𑀫𑁄𑀥𑀸𑀦𑀁 𑀳𑁄𑀢𑀺. 𑀇𑀢𑀺 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀤𑀼𑀓𑁆𑀔𑀁 𑀲𑀫𑀼𑀤𑀬𑁄𑀢𑀺 𑀤𑁆𑀯𑀺𑀦𑁆𑀦𑀁 𑀲𑀘𑁆𑀘𑀸𑀦𑀁 𑀯𑀲𑁂𑀦 𑀯𑀝𑁆𑀝𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀤𑀼𑀢𑀺𑀬𑀦𑀬𑁂 𑀦𑀺𑀭𑁄𑀥𑁄 𑀫𑀕𑁆𑀕𑁄𑀢𑀺 𑀤𑁆𑀯𑀺𑀦𑁆𑀦𑀁 𑀲𑀘𑁆𑀘𑀸𑀦𑀁 𑀯𑀲𑁂𑀦 𑀯𑀺𑀯𑀝𑁆𑀝𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀇𑀫𑀺𑀦𑀸 𑀘 𑀢𑁆𑀯𑀁 𑀧𑀼𑀡𑁆𑀡𑀸𑀢𑀺 𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀺. 𑀏𑀯𑀁 𑀢𑀸𑀯 𑀯𑀝𑁆𑀝𑀯𑀺𑀯𑀝𑁆𑀝𑀯𑀲𑁂𑀦 𑀤𑁂𑀲𑀦𑀁 𑀅𑀭𑀳𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀇𑀤𑀸𑀦𑀺 𑀧𑀼𑀡𑁆𑀡𑀢𑁆𑀣𑁂𑀭𑀁 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀲𑀻𑀳𑀦𑀸𑀤𑀁 𑀦𑀤𑀸𑀧𑁂𑀢𑀼𑀁 𑀇𑀫𑀺𑀦𑀸 𑀘 𑀢𑁆𑀯𑀦𑁆𑀢𑀺𑀆𑀤𑀺𑀫𑀸𑀳.

𑁩𑁯𑁬. 𑀘𑀡𑁆𑀟𑀸𑀢𑀺 𑀤𑀼𑀝𑁆𑀞𑀸 𑀓𑀺𑀩𑁆𑀩𑀺𑀲𑀸. 𑀨𑀭𑀼𑀲𑀸𑀢𑀺 𑀓𑀓𑁆𑀔𑀴𑀸. 𑀅𑀓𑁆𑀓𑁄𑀲𑀺𑀲𑁆𑀲𑀦𑁆𑀢𑀻𑀢𑀺 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀺𑀲𑁆𑀲𑀦𑁆𑀢𑀺. 𑀧𑀭𑀺𑀪𑀸𑀲𑀺𑀲𑁆𑀲𑀦𑁆𑀢𑀻𑀢𑀺 𑀓𑀺𑀁 𑀲𑀫𑀡𑁄 𑀦𑀸𑀫 𑀢𑁆𑀯𑀁, 𑀇𑀤𑀜𑁆𑀘 𑀇𑀤𑀜𑁆𑀘 𑀢𑁂 𑀓𑀭𑀺𑀲𑁆𑀲𑀸𑀫𑀸𑀢𑀺 𑀢𑀚𑁆𑀚𑁂𑀲𑁆𑀲𑀦𑁆𑀢𑀺. 𑀏𑀯𑀫𑁂𑀢𑁆𑀣𑀸𑀢𑀺 𑀏𑀯𑀁 𑀫𑀬𑁆𑀳𑀁 𑀏𑀢𑁆𑀣 𑀪𑀯𑀺𑀲𑁆𑀲𑀢𑀺.

𑀤𑀡𑁆𑀟𑁂𑀦𑀸𑀢𑀺 𑀘𑀢𑀼𑀳𑀢𑁆𑀣𑁂𑀦 𑀤𑀡𑁆𑀟𑁂𑀦 𑀯𑀸 𑀖𑀝𑀺𑀓𑀫𑀼𑀕𑁆𑀕𑀭𑁂𑀦 𑀯𑀸. 𑀲𑀢𑁆𑀣𑁂𑀦𑀸𑀢𑀺 𑀏𑀓𑀢𑁄𑀥𑀸𑀭𑀸𑀤𑀺𑀦𑀸. 𑀲𑀢𑁆𑀣𑀳𑀸𑀭𑀓𑀁 𑀧𑀭𑀺𑀬𑁂𑀲𑀦𑁆𑀢𑀻𑀢𑀺 𑀚𑀻𑀯𑀺𑀢𑀳𑀸𑀭𑀓𑀁 𑀲𑀢𑁆𑀣𑀁 𑀧𑀭𑀺𑀬𑁂𑀲𑀦𑁆𑀢𑀺. 𑀇𑀤𑀁 𑀣𑁂𑀭𑁄 𑀢𑀢𑀺𑀬𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀲𑁆𑀫𑀺𑀁 𑀅𑀲𑀼𑀪𑀓𑀣𑀁 𑀲𑀼𑀢𑁆𑀯𑀸 𑀅𑀢𑁆𑀢𑀪𑀸𑀯𑁂𑀦 𑀚𑀺𑀕𑀼𑀘𑁆𑀙𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀢𑁆𑀣𑀳𑀸𑀭𑀓𑀧𑀭𑀺𑀬𑁂𑀲𑀦𑀁 𑀲𑀦𑁆𑀥𑀸𑀬𑀸𑀳. 𑀤𑀫𑀽𑀧𑀲𑀫𑁂𑀦𑀸𑀢𑀺 𑀏𑀢𑁆𑀣 𑀤𑀫𑁄𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀻𑀦𑀁 𑀏𑀢𑀁 𑀦𑀸𑀫𑀁. ‘‘𑀲𑀘𑁆𑀘𑁂𑀦 𑀤𑀦𑁆𑀢𑁄 𑀤𑀫𑀲𑀸 𑀉𑀧𑁂𑀢𑁄, 𑀯𑁂𑀤𑀦𑁆𑀢𑀕𑀽 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄’’𑀢𑀺 (𑀲𑀁. 𑀦𑀺. 𑁧.𑁧𑁯𑁫; 𑀲𑀼. 𑀦𑀺. 𑁪𑁬𑁭) 𑀏𑀢𑁆𑀣 𑀳𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀤𑀫𑁄𑀢𑀺 𑀯𑀼𑀢𑁆𑀢𑁄. ‘‘𑀬𑀤𑀺 𑀲𑀘𑁆𑀘𑀸 𑀤𑀫𑀸 𑀘𑀸𑀕𑀸, 𑀔𑀦𑁆𑀢𑁆𑀬𑀸 𑀪𑀺𑀬𑁆𑀬𑁄𑀥 𑀯𑀺𑀚𑁆𑀚𑀢𑀻’’𑀢𑀺 (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁯𑁧) 𑀏𑀢𑁆𑀣 𑀧𑀜𑁆𑀜𑀸 𑀤𑀫𑁄𑀢𑀺 𑀯𑀼𑀢𑁆𑀢𑁄. ‘‘𑀤𑀸𑀦𑁂𑀦 𑀤𑀫𑁂𑀦 𑀲𑀁𑀬𑀫𑁂𑀦 𑀲𑀘𑁆𑀘𑀯𑀚𑁆𑀚𑁂𑀦𑀸’’𑀢𑀺 (𑀤𑀻. 𑀦𑀺. 𑁧.𑁧𑁬𑁬; 𑀫. 𑀦𑀺. 𑁨.𑁨𑁨𑁬) 𑀏𑀢𑁆𑀣 𑀉𑀧𑁄𑀲𑀣𑀓𑀫𑁆𑀫𑀁 𑀤𑀫𑁄𑀢𑀺 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀔𑀦𑁆𑀢𑀺 𑀤𑀫𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀉𑀧𑀲𑀫𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁.

𑁩𑁯𑁭. 𑀅𑀣 𑀔𑁄 𑀆𑀬𑀲𑁆𑀫𑀸 𑀧𑀼𑀡𑁆𑀡𑁄𑀢𑀺 𑀓𑁄 𑀧𑀦𑁂𑀲 𑀧𑀼𑀡𑁆𑀡𑁄, 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀕𑀦𑁆𑀢𑀼𑀓𑀸𑀫𑁄 𑀅𑀳𑁄𑀲𑀻𑀢𑀺. 𑀲𑀼𑀦𑀸𑀧𑀭𑀦𑁆𑀢𑀯𑀸𑀲𑀺𑀓𑁄 𑀏𑀯 𑀏𑀲𑁄, 𑀲𑀸𑀯𑀢𑁆𑀣𑀺𑀬𑀁 𑀧𑀦 𑀅𑀲𑀧𑁆𑀧𑀸𑀬𑀯𑀺𑀳𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑀼𑀓𑀸𑀫𑁄 𑀅𑀳𑁄𑀲𑀺.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀲𑀼𑀦𑀸𑀧𑀭𑀦𑁆𑀢𑀭𑀝𑁆𑀞𑁂 𑀓𑀺𑀭 𑀏𑀓𑀲𑁆𑀫𑀺𑀁 𑀯𑀸𑀡𑀺𑀚𑀓𑀕𑀸𑀫𑁂 𑀏𑀢𑁂 𑀤𑁆𑀯𑁂 𑀪𑀸𑀢𑀭𑁄. 𑀢𑁂𑀲𑀼 𑀓𑀤𑀸𑀘𑀺 𑀚𑁂𑀝𑁆𑀞𑁄 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀕𑀳𑁂𑀢𑁆𑀯𑀸 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀪𑀡𑁆𑀟𑀁 𑀆𑀳𑀭𑀢𑀺, 𑀓𑀤𑀸𑀘𑀺 𑀓𑀦𑀺𑀝𑁆𑀞𑁄. 𑀇𑀫𑀲𑁆𑀫𑀺𑀁 𑀧𑀦 𑀲𑀫𑀬𑁂 𑀓𑀦𑀺𑀝𑁆𑀞𑀁 𑀖𑀭𑁂 𑀞𑀧𑁂𑀢𑁆𑀯𑀸 𑀚𑁂𑀝𑁆𑀞𑀪𑀸𑀢𑀺𑀓𑁄 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀕𑀳𑁂𑀢𑁆𑀯𑀸 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀚𑁂𑀢𑀯𑀦𑀲𑁆𑀲 𑀦𑀸𑀢𑀺𑀤𑀽𑀭𑁂 𑀲𑀓𑀝𑀲𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀧𑀭𑀺𑀚𑀦𑀧𑀭𑀺𑀯𑀼𑀢𑁄 𑀨𑀸𑀲𑀼𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀺.

𑀢𑁂𑀦 𑀘 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀪𑀼𑀢𑁆𑀢𑀧𑀸𑀢𑀭𑀸𑀲𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀲𑀼𑀤𑁆𑀥𑀼𑀢𑁆𑀢𑀭𑀸𑀲𑀗𑁆𑀕𑀸 𑀕𑀦𑁆𑀥𑀧𑀼𑀧𑁆𑀨𑀸𑀤𑀺𑀳𑀢𑁆𑀣𑀸 𑀬𑁂𑀦 𑀩𑀼𑀤𑁆𑀥𑁄 𑀬𑁂𑀦 𑀥𑀫𑁆𑀫𑁄 𑀬𑁂𑀦 𑀲𑀗𑁆𑀖𑁄, 𑀢𑀦𑁆𑀦𑀺𑀦𑁆𑀦𑀸 𑀢𑀧𑁆𑀧𑁄𑀡𑀸 𑀢𑀧𑁆𑀧𑀸𑀩𑁆𑀪𑀸𑀭𑀸 𑀳𑀼𑀢𑁆𑀯𑀸 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀚𑁂𑀢𑀯𑀦𑀁 𑀕𑀘𑁆𑀙𑀦𑁆𑀢𑀺. 𑀲𑁄 𑀢𑁂 𑀤𑀺𑀲𑁆𑀯𑀸 ‘‘𑀓𑀳𑀁 𑀇𑀫𑁂 𑀕𑀘𑁆𑀙𑀦𑁆𑀢𑀺’’𑀢𑀺 𑀏𑀓𑀫𑀦𑀼𑀲𑁆𑀲𑀁 𑀧𑀼𑀘𑁆𑀙𑀺. 𑀓𑀺𑀁 𑀢𑁆𑀯𑀁 𑀅𑀬𑁆𑀬𑁄 𑀦 𑀚𑀸𑀦𑀸𑀲𑀺, 𑀮𑁄𑀓𑁂 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀭𑀢𑀦𑀸𑀦𑀺 𑀦𑀸𑀫 𑀉𑀧𑁆𑀧𑀦𑁆𑀦𑀸𑀦𑀺, 𑀇𑀘𑁆𑀘𑁂𑀲 𑀫𑀳𑀸𑀚𑀦𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀥𑀫𑁆𑀫𑀓𑀣𑀁 𑀲𑁄𑀢𑀼𑀁 𑀕𑀘𑁆𑀙𑀢𑀻𑀢𑀺. 𑀢𑀲𑁆𑀲 𑀩𑀼𑀤𑁆𑀥𑁄𑀢𑀺 𑀯𑀘𑀦𑀁 𑀙𑀯𑀺𑀘𑀫𑁆𑀫𑀸𑀤𑀻𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀅𑀝𑁆𑀞𑀸𑀲𑀺. 𑀅𑀣 𑀅𑀢𑁆𑀢𑀦𑁄 𑀧𑀭𑀺𑀚𑀦𑀧𑀭𑀺𑀯𑀼𑀢𑁄 𑀢𑀸𑀬 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀫𑀥𑀼𑀭𑀲𑁆𑀲𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀬 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀅𑀣 𑀢𑀣𑀸𑀕𑀢𑁂𑀦 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀧𑀭𑀺𑀲𑀸𑀬 𑀉𑀬𑁆𑀬𑁄𑀚𑀺𑀢𑀸𑀬 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀼𑀢𑀺𑀬𑀤𑀺𑀯𑀲𑁂 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀆𑀲𑀦𑀸𑀦𑀺 𑀧𑀜𑁆𑀜𑀧𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀪𑀡𑁆𑀟𑀸𑀕𑀸𑀭𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, 𑀏𑀢𑁆𑀢𑀓𑀁 𑀪𑀡𑁆𑀟𑀁 𑀯𑀺𑀲𑁆𑀲𑀚𑁆𑀚𑀺𑀢𑀁, 𑀏𑀢𑁆𑀢𑀓𑀁 𑀦 𑀯𑀺𑀲𑁆𑀲𑀚𑁆𑀚𑀺𑀢𑀦𑁆𑀢𑀺 𑀲𑀩𑁆𑀩𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑁋 ‘‘𑀇𑀫𑀁 𑀲𑀸𑀧𑀢𑁂𑀬𑁆𑀬𑀁 𑀫𑀬𑁆𑀳𑀁 𑀓𑀦𑀺𑀝𑁆𑀞𑀲𑁆𑀲 𑀤𑁂𑀳𑀻’’𑀢𑀺 𑀲𑀩𑁆𑀩𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀅𑀣𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀉𑀧𑀝𑁆𑀞𑀸𑀢𑀺. 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀚𑀦𑀧𑀤𑁄 𑀫𑀬𑁆𑀳𑀁 𑀅𑀲𑀧𑁆𑀧𑀸𑀬𑁄, 𑀬𑀁𑀦𑀽𑀦𑀸𑀳𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀅𑀣 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀸𑀧𑁂𑀢𑁆𑀯𑀸 𑀲𑀢𑁆𑀢 𑀲𑀻𑀳𑀦𑀸𑀤𑁂 𑀦𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀧𑀼𑀡𑁆𑀡𑁄…𑀧𑁂… 𑀯𑀺𑀳𑀭𑀢𑀻’’𑀢𑀺.

𑀓𑀢𑁆𑀣 𑀧𑀦𑀸𑀬𑀁 𑀯𑀺𑀳𑀸𑀲𑀻𑀢𑀺? 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀺𑀳𑀸𑀲𑀺, 𑀲𑀼𑀦𑀸𑀧𑀭𑀦𑁆𑀢𑀭𑀝𑁆𑀞𑀁 𑀢𑀸𑀯 𑀧𑀯𑀺𑀲𑀺𑀢𑁆𑀯𑀸 𑀅𑀚𑁆𑀚𑀼𑀳𑀢𑁆𑀣𑀧𑀩𑁆𑀩𑀢𑁂 𑀦𑀸𑀫 𑀧𑀯𑀺𑀲𑀺𑀢𑁆𑀯𑀸 𑀯𑀸𑀡𑀺𑀚𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀣 𑀦𑀁 𑀓𑀦𑀺𑀝𑁆𑀞𑀪𑀸𑀢𑀸 𑀲𑀜𑁆𑀚𑀸𑀦𑀺𑀢𑁆𑀯𑀸 𑀪𑀺𑀓𑁆𑀔𑀁 𑀤𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀜𑁆𑀜𑀢𑁆𑀣 𑀅𑀕𑀦𑁆𑀢𑁆𑀯𑀸 𑀇𑀥𑁂𑀯 𑀯𑀲𑀣𑀸’’𑀢𑀺 𑀧𑀝𑀺𑀜𑁆𑀜𑀁 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣𑁂𑀯 𑀯𑀲𑀸𑀧𑁂𑀲𑀺.

𑀢𑀢𑁄 𑀲𑀫𑀼𑀤𑁆𑀤𑀕𑀺𑀭𑀺𑀯𑀺𑀳𑀸𑀭𑀁 𑀦𑀸𑀫 𑀅𑀕𑀫𑀸𑀲𑀺. 𑀢𑀢𑁆𑀣 𑀅𑀬𑀓𑀦𑁆𑀢𑀧𑀸𑀲𑀸𑀡𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑀘𑀗𑁆𑀓𑀫𑁄 𑀅𑀢𑁆𑀣𑀺, 𑀢𑀁 𑀓𑁄𑀘𑀺 𑀘𑀗𑁆𑀓𑀫𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀢𑀢𑁆𑀣 𑀲𑀫𑀼𑀤𑁆𑀤𑀯𑀻𑀘𑀺𑀬𑁄 𑀆𑀕𑀦𑁆𑀢𑁆𑀯𑀸 𑀅𑀬𑀓𑀦𑁆𑀢𑀧𑀸𑀲𑀸𑀡𑁂𑀲𑀼 𑀧𑀳𑀭𑀺𑀢𑁆𑀯𑀸 𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑀺. 𑀣𑁂𑀭𑁄𑀦𑀁 𑁋 ‘‘𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑀸𑀦𑀁 𑀨𑀸𑀲𑀼𑀯𑀺𑀳𑀸𑀭𑁄 𑀳𑁄𑀢𑀽’’𑀢𑀺 𑀲𑀫𑀼𑀤𑁆𑀤𑀁 𑀦𑀺𑀲𑁆𑀲𑀤𑁆𑀤𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺.

𑀢𑀢𑁄 𑀫𑀸𑀢𑀼𑀮𑀕𑀺𑀭𑀺𑀁 𑀦𑀸𑀫 𑀅𑀕𑀫𑀸𑀲𑀺. 𑀢𑀢𑁆𑀣 𑀲𑀓𑀼𑀡𑀲𑀗𑁆𑀖𑁄 𑀉𑀲𑁆𑀲𑀦𑁆𑀦𑁄, 𑀭𑀢𑁆𑀢𑀺𑀜𑁆𑀘 𑀤𑀺𑀯𑀸 𑀘 𑀲𑀤𑁆𑀤𑁄 𑀏𑀓𑀸𑀩𑀤𑁆𑀥𑁄𑀯 𑀳𑁄𑀢𑀺, 𑀣𑁂𑀭𑁄 𑀇𑀫𑀁 𑀞𑀸𑀦𑀁 𑀅𑀨𑀸𑀲𑀼𑀓𑀦𑁆𑀢𑀺 𑀢𑀢𑁄 𑀫𑀓𑀼𑀮𑀓𑀸𑀭𑀸𑀫𑀯𑀺𑀳𑀸𑀭𑀁 𑀦𑀸𑀫 𑀕𑀢𑁄. 𑀲𑁄 𑀯𑀸𑀡𑀺𑀚𑀕𑀸𑀫𑀲𑁆𑀲 𑀦𑀸𑀢𑀺𑀤𑀽𑀭𑁄 𑀦𑀘𑁆𑀘𑀸𑀲𑀦𑁆𑀦𑁄 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑁄 𑀯𑀺𑀯𑀺𑀢𑁆𑀢𑁄 𑀅𑀧𑁆𑀧𑀲𑀤𑁆𑀤𑁄. 𑀣𑁂𑀭𑁄 𑀇𑀫𑀁 𑀞𑀸𑀦𑀁 𑀨𑀸𑀲𑀼𑀓𑀦𑁆𑀢𑀺 𑀢𑀢𑁆𑀣 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀘𑀗𑁆𑀓𑀫𑀦𑀸𑀤𑀻𑀦𑀺 𑀓𑀸𑀭𑁂𑀢𑁆𑀯𑀸 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺. 𑀏𑀯𑀁 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀺𑀳𑀸𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀢𑀲𑁆𑀫𑀺𑀁𑀬𑁂𑀯 𑀅𑀦𑁆𑀢𑁄𑀯𑀲𑁆𑀲𑁂 𑀧𑀜𑁆𑀘 𑀯𑀸𑀡𑀺𑀚𑀲𑀢𑀸𑀦𑀺 𑀧𑀭𑀲𑀫𑀼𑀤𑁆𑀤𑀁 𑀕𑀘𑁆𑀙𑀸𑀫𑀸𑀢𑀺 𑀦𑀸𑀯𑀸𑀬 𑀪𑀡𑁆𑀟𑀁 𑀧𑀓𑁆𑀔𑀺𑀧𑀺𑀁𑀲𑀼. 𑀦𑀸𑀯𑀸𑀭𑁄𑀳𑀦𑀤𑀺𑀯𑀲𑁂 𑀣𑁂𑀭𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀸 𑀣𑁂𑀭𑀁 𑀪𑁄𑀚𑁂𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀕𑀳𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄, 𑁋 ‘‘𑀪𑀦𑁆𑀢𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀦𑀸𑀫 𑀅𑀧𑁆𑀧𑀫𑁂𑀬𑁆𑀬𑁄 𑀅𑀦𑁂𑀓𑀦𑁆𑀢𑀭𑀸𑀬𑁄, 𑀅𑀫𑁆𑀳𑁂 𑀆𑀯𑀚𑁆𑀚𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀦𑀸𑀯𑀁 𑀆𑀭𑀼𑀳𑀺. 𑀦𑀸𑀯𑀸 𑀉𑀢𑁆𑀢𑀫𑀚𑀯𑁂𑀦 𑀕𑀘𑁆𑀙𑀫𑀸𑀦𑀸 𑀅𑀜𑁆𑀜𑀢𑀭𑀁 𑀤𑀻𑀧𑀓𑀁 𑀧𑀸𑀧𑀼𑀡𑀺. 𑀫𑀦𑀼𑀲𑁆𑀲𑀸 𑀧𑀸𑀢𑀭𑀸𑀲𑀁 𑀓𑀭𑀺𑀲𑁆𑀲𑀸𑀫𑀸𑀢𑀺 𑀤𑀻𑀧𑀓𑁂 𑀑𑀢𑀺𑀡𑁆𑀡𑀸. 𑀢𑀲𑁆𑀫𑀺𑀁 𑀤𑀻𑀧𑁂 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀦𑀢𑁆𑀣𑀺, 𑀘𑀦𑁆𑀤𑀦𑀯𑀦𑀫𑁂𑀯 𑀅𑀳𑁄𑀲𑀺.

𑀅𑀣𑁂𑀓𑁄 𑀯𑀸𑀲𑀺𑀬𑀸 𑀭𑀼𑀓𑁆𑀔𑀁 𑀆𑀓𑁄𑀝𑁂𑀢𑁆𑀯𑀸 𑀮𑁄𑀳𑀺𑀢𑀘𑀦𑁆𑀤𑀦𑀪𑀸𑀯𑀁 𑀜𑀢𑁆𑀯𑀸 𑀆𑀳 𑁋 ‘‘𑀪𑁄 𑀫𑀬𑀁 𑀮𑀸𑀪𑀢𑁆𑀣𑀸𑀬 𑀧𑀭𑀲𑀫𑀼𑀤𑁆𑀤𑀁 𑀕𑀘𑁆𑀙𑀸𑀫, 𑀇𑀢𑁄 𑀘 𑀉𑀢𑁆𑀢𑀭𑀺 𑀮𑀸𑀪𑁄 𑀦𑀸𑀫 𑀦𑀢𑁆𑀣𑀺, 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀸 𑀖𑀝𑀺𑀓𑀸 𑀲𑀢𑀲𑀳𑀲𑁆𑀲𑀁 𑀅𑀕𑁆𑀖𑀢𑀺, 𑀳𑀸𑀭𑁂𑀢𑀩𑁆𑀩𑀓𑀬𑀼𑀢𑁆𑀢𑀁 𑀪𑀡𑁆𑀟𑀁 𑀳𑀸𑀭𑁂𑀢𑁆𑀯𑀸 𑀘𑀦𑁆𑀤𑀦𑀲𑁆𑀲 𑀧𑀽𑀭𑁂𑀫𑀸’’𑀢𑀺. 𑀢𑁂 𑀢𑀣𑀸 𑀓𑀭𑀺𑀁𑀲𑀼. 𑀘𑀦𑁆𑀤𑀦𑀯𑀦𑁂 𑀅𑀥𑀺𑀯𑀢𑁆𑀣𑀸 𑀅𑀫𑀦𑀼𑀲𑁆𑀲𑀸 𑀓𑀼𑀚𑁆𑀛𑀺𑀢𑁆𑀯𑀸 𑁋 ‘‘𑀇𑀫𑁂𑀳𑀺 𑀅𑀫𑁆𑀳𑀸𑀓𑀁 𑀘𑀦𑁆𑀤𑀦𑀯𑀦𑀁 𑀦𑀸𑀲𑀺𑀢𑀁, 𑀖𑀸𑀢𑁂𑀲𑁆𑀲𑀸𑀫 𑀦𑁂’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀇𑀥𑁂𑀯 𑀖𑀸𑀢𑀺𑀢𑁂𑀲𑀼 𑀲𑀩𑁆𑀩𑀁 𑀯𑀦𑀁 𑀏𑀓𑀁 𑀓𑀼𑀡𑀧𑀁 𑀪𑀯𑀺𑀲𑁆𑀲𑀢𑀺, 𑀲𑀫𑀼𑀤𑁆𑀤𑀫𑀚𑁆𑀛𑁂 𑀦𑁂𑀲𑀁 𑀦𑀸𑀯𑀁 𑀑𑀲𑀻𑀤𑁂𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀅𑀣 𑀢𑁂𑀲𑀁 𑀦𑀸𑀯𑀁 𑀆𑀭𑀼𑀬𑁆𑀳 𑀫𑀼𑀳𑀼𑀢𑁆𑀢𑀁 𑀕𑀢𑀓𑀸𑀮𑁂𑀬𑁂𑀯 𑀉𑀧𑁆𑀧𑀸𑀤𑀺𑀓𑀁 𑀉𑀝𑁆𑀞𑀧𑁂𑀢𑁆𑀯𑀸 𑀲𑀬𑀫𑁆𑀧𑀺 𑀢𑁂 𑀅𑀫𑀦𑀼𑀲𑁆𑀲𑀸 𑀪𑀬𑀸𑀦𑀓𑀸𑀦𑀺 𑀭𑀽𑀧𑀸𑀦𑀺 𑀤𑀲𑁆𑀲𑀬𑀺𑀁𑀲𑀼. 𑀪𑀻𑀢𑀸 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀤𑁂𑀯𑀢𑀸 𑀦𑀫𑀲𑁆𑀲𑀦𑁆𑀢𑀺. 𑀣𑁂𑀭𑀲𑁆𑀲 𑀓𑀦𑀺𑀝𑁆𑀞𑁄 𑀘𑀽𑀴𑀧𑀼𑀡𑁆𑀡𑀓𑀼𑀝𑀼𑀫𑁆𑀩𑀺𑀓𑁄 𑁋 ‘‘𑀫𑀬𑁆𑀳𑀁 𑀪𑀸𑀢𑀸 𑀅𑀯𑀲𑁆𑀲𑀬𑁄 𑀳𑁄𑀢𑀽’’𑀢𑀺 𑀣𑁂𑀭𑀲𑁆𑀲 𑀦𑀫𑀲𑁆𑀲𑀫𑀸𑀦𑁄 𑀅𑀝𑁆𑀞𑀸𑀲𑀺.

𑀣𑁂𑀭𑁄𑀧𑀺 𑀓𑀺𑀭 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀆𑀯𑀚𑁆𑀚𑀺𑀢𑁆𑀯𑀸 𑀢𑁂𑀲𑀁 𑀩𑁆𑀬𑀲𑀦𑀼𑀧𑁆𑀧𑀢𑁆𑀢𑀺𑀁 𑀜𑀢𑁆𑀯𑀸 𑀯𑁂𑀳𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸 𑀲𑀫𑁆𑀫𑀼𑀔𑁂 𑀅𑀝𑁆𑀞𑀸𑀲𑀺. 𑀅𑀫𑀦𑀼𑀲𑁆𑀲𑀸 𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀅𑀬𑁆𑀬𑁄 𑀧𑀼𑀡𑁆𑀡𑀢𑁆𑀣𑁂𑀭𑁄 𑀏𑀢𑀻’’𑀢𑀺 𑀧𑀓𑁆𑀓𑀫𑀺𑀁𑀲𑀼, 𑀉𑀧𑁆𑀧𑀸𑀤𑀺𑀓𑀁 𑀲𑀦𑁆𑀦𑀺𑀲𑀻𑀤𑀺. 𑀣𑁂𑀭𑁄 𑀫𑀸 𑀪𑀸𑀬𑀣𑀸𑀢𑀺 𑀢𑁂 𑀅𑀲𑁆𑀲𑀸𑀲𑁂𑀢𑁆𑀯𑀸 ‘‘𑀓𑀳𑀁 𑀕𑀦𑁆𑀢𑀼𑀓𑀸𑀫𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀲𑀓𑀝𑁆𑀞𑀸𑀦𑀫𑁂𑀯 𑀕𑀘𑁆𑀙𑀸𑀫𑀸𑀢𑀺. 𑀣𑁂𑀭𑁄 𑀦𑀸𑀯𑀁 𑀨𑀮𑁂 𑀅𑀓𑁆𑀓𑀫𑀺𑀢𑁆𑀯𑀸 ‘‘𑀏𑀢𑁂𑀲𑀁 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀘𑁆𑀙𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀯𑀸𑀡𑀺𑀚𑀸 𑀲𑀓𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀯𑀢𑁆𑀢𑀺𑀁 𑀧𑀼𑀢𑁆𑀢𑀤𑀸𑀭𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 ‘‘𑀏𑀣 𑀣𑁂𑀭𑀁 𑀲𑀭𑀡𑀁 𑀕𑀘𑁆𑀙𑀸𑀫𑀸’’𑀢𑀺 𑀧𑀜𑁆𑀘𑀲𑀢𑀸 𑀅𑀢𑁆𑀢𑀦𑁄 𑀧𑀜𑁆𑀘𑀫𑀸𑀢𑀼𑀕𑀸𑀫𑀲𑀢𑁂𑀳𑀺 𑀲𑀤𑁆𑀥𑀺𑀁 𑀢𑀻𑀲𑀼 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀉𑀧𑀸𑀲𑀓𑀢𑁆𑀢𑀁 𑀧𑀝𑀺𑀯𑁂𑀤𑁂𑀲𑀼𑀁. 𑀢𑀢𑁄 𑀦𑀸𑀯𑀸𑀬 𑀪𑀡𑁆𑀟𑀁 𑀑𑀢𑀸𑀭𑁂𑀢𑁆𑀯𑀸 𑀣𑁂𑀭𑀲𑁆𑀲 𑀏𑀓𑀁 𑀓𑁄𑀝𑁆𑀞𑀸𑀲𑀁 𑀓𑀢𑁆𑀯𑀸 𑁋 ‘‘𑀅𑀬𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀓𑁄𑀝𑁆𑀞𑀸𑀲𑁄’’𑀢𑀺 𑀆𑀳𑀁𑀲𑀼. 𑀣𑁂𑀭𑁄 𑁋 ‘‘𑀫𑀬𑁆𑀳𑀁 𑀯𑀺𑀲𑀼𑀁 𑀓𑁄𑀝𑁆𑀞𑀸𑀲𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀲𑀢𑁆𑀣𑀸 𑀧𑀦 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀧𑀼𑀩𑁆𑀩𑁄’’𑀢𑀺. 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀪𑀦𑁆𑀢𑁂𑀢𑀺. 𑀢𑁂𑀦 𑀳𑀺 𑀇𑀫𑀺𑀦𑀸 𑀲𑀢𑁆𑀣𑀼 𑀫𑀡𑁆𑀟𑀮𑀫𑀸𑀴𑀁 𑀓𑀭𑁄𑀣, 𑀏𑀯𑀁 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀲𑁆𑀲𑀣𑀸𑀢𑀺. 𑀢𑁂 𑀲𑀸𑀥𑀼, 𑀪𑀦𑁆𑀢𑁂𑀢𑀺 𑀢𑁂𑀦 𑀘 𑀓𑁄𑀝𑁆𑀞𑀸𑀲𑁂𑀦 𑀅𑀢𑁆𑀢𑀦𑁄 𑀘 𑀓𑁄𑀝𑁆𑀞𑀸𑀲𑁂𑀳𑀺 𑀫𑀡𑁆𑀟𑀮𑀫𑀸𑀴𑀁 𑀓𑀸𑀢𑀼𑀁 𑀆𑀭𑀪𑀺𑀁𑀲𑀼.

𑀲𑀢𑁆𑀣𑀸𑀧𑀺 𑀓𑀺𑀭 𑀆𑀭𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀭𑀺𑀪𑁄𑀕𑀁 𑀅𑀓𑀸𑀲𑀺. 𑀆𑀭𑀓𑁆𑀔𑀫𑀦𑀼𑀲𑁆𑀲𑀸 𑀭𑀢𑁆𑀢𑀺𑀁 𑀑𑀪𑀸𑀲𑀁 𑀤𑀺𑀲𑁆𑀯𑀸 ‘‘𑀫𑀳𑁂𑀲𑀓𑁆𑀔𑀸 𑀤𑁂𑀯𑀢𑀸 𑀅𑀢𑁆𑀣𑀻’’𑀢𑀺 𑀲𑀜𑁆𑀜𑀁 𑀓𑀭𑀺𑀁𑀲𑀼. 𑀉𑀧𑀸𑀲𑀓𑀸 𑀫𑀡𑁆𑀟𑀮𑀫𑀸𑀴𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀲𑁂𑀦𑀸𑀲𑀦𑀸𑀦𑀺 𑀦𑀺𑀝𑁆𑀞𑀧𑁂𑀢𑁆𑀯𑀸 𑀤𑀸𑀦𑀲𑀫𑁆𑀪𑀸𑀭𑀁 𑀲𑀚𑁆𑀚𑁂𑀢𑁆𑀯𑀸 𑁋 ‘‘𑀓𑀢𑀁, 𑀪𑀦𑁆𑀢𑁂, 𑀅𑀫𑁆𑀳𑁂𑀳𑀺 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁, 𑀲𑀢𑁆𑀣𑀸𑀭𑀁 𑀧𑀓𑁆𑀓𑁄𑀲𑀣𑀸’’𑀢𑀺 𑀣𑁂𑀭𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀣𑁂𑀭𑁄 𑀲𑀸𑀬𑀦𑁆𑀳𑀲𑀫𑀬𑁂 𑀇𑀤𑁆𑀥𑀺𑀬𑀸 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸, ‘‘𑀪𑀦𑁆𑀢𑁂, 𑀯𑀸𑀡𑀺𑀚𑀕𑀸𑀫𑀯𑀸𑀲𑀺𑀦𑁄 𑀢𑀼𑀫𑁆𑀳𑁂 𑀤𑀝𑁆𑀞𑀼𑀓𑀸𑀫𑀸, 𑀢𑁂𑀲𑀁 𑀅𑀦𑀼𑀓𑀫𑁆𑀧𑀁 𑀓𑀭𑁄𑀣𑀸’’𑀢𑀺 𑀪𑀕𑀯𑀦𑁆𑀢𑀁 𑀬𑀸𑀘𑀺. 𑀪𑀕𑀯𑀸 𑀅𑀥𑀺𑀯𑀸𑀲𑁂𑀲𑀺. 𑀣𑁂𑀭𑁄 𑀪𑀕𑀯𑀢𑁄 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀲𑀓𑀝𑁆𑀞𑀸𑀦𑀫𑁂𑀯 𑀧𑀘𑁆𑀘𑀸𑀕𑀢𑁄.

𑀪𑀕𑀯𑀸𑀧𑀺 𑀆𑀦𑀦𑁆𑀤𑀣𑁂𑀭𑀁 𑀆𑀫𑀦𑁆𑀢𑁂𑀲𑀺, 𑁋 ‘‘𑀆𑀦𑀦𑁆𑀤, 𑀲𑁆𑀯𑁂 𑀲𑀼𑀦𑀸𑀧𑀭𑀦𑁆𑀢𑁂 𑀯𑀸𑀡𑀺𑀚𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫, 𑀢𑁆𑀯𑀁 𑀏𑀓𑀽𑀦𑀧𑀜𑁆𑀘𑀲𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀮𑀸𑀓𑀁 𑀤𑁂𑀳𑀻’’𑀢𑀺. 𑀣𑁂𑀭𑁄 𑀲𑀸𑀥𑀼, 𑀪𑀦𑁆𑀢𑁂𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 𑀦𑀪𑀘𑀸𑀭𑀺𑀓𑀸 𑀪𑀺𑀓𑁆𑀔𑀽 𑀲𑀮𑀸𑀓𑀁 𑀕𑀡𑁆𑀳𑀦𑁆𑀢𑀽𑀢𑀺 𑀆𑀳. 𑀢𑀁𑀤𑀺𑀯𑀲𑀁 𑀓𑀼𑀡𑁆𑀟𑀥𑀸𑀦𑀢𑁆𑀣𑁂𑀭𑁄 𑀧𑀞𑀫𑀁 𑀲𑀮𑀸𑀓𑀁 𑀅𑀕𑁆𑀕𑀳𑁂𑀲𑀺. 𑀯𑀸𑀡𑀺𑀚𑀕𑀸𑀫𑀯𑀸𑀲𑀺𑀦𑁄𑀧𑀺 ‘‘𑀲𑁆𑀯𑁂 𑀓𑀺𑀭 𑀲𑀢𑁆𑀣𑀸 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀕𑀸𑀫𑀫𑀚𑁆𑀛𑁂 𑀫𑀡𑁆𑀟𑀧𑀁 𑀓𑀢𑁆𑀯𑀸 𑀤𑀸𑀦𑀕𑁆𑀕𑀁 𑀲𑀚𑁆𑀚𑀬𑀺𑀁𑀲𑀼. 𑀪𑀕𑀯𑀸 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀻𑀤𑀺. 𑀲𑀓𑁆𑀓𑀲𑁆𑀲 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀉𑀡𑁆𑀳𑀁 𑀅𑀳𑁄𑀲𑀺. 𑀲𑁄 𑀓𑀺𑀁 𑀇𑀤𑀦𑁆𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀲𑀢𑁆𑀣𑀼 𑀲𑀼𑀦𑀸𑀧𑀭𑀦𑁆𑀢𑀕𑀫𑀦𑀁 𑀤𑀺𑀲𑁆𑀯𑀸 𑀯𑀺𑀲𑁆𑀲𑀓𑀫𑁆𑀫𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀸𑀢 𑀅𑀚𑁆𑀚 𑀪𑀕𑀯𑀸 𑀢𑀺𑀫𑀢𑁆𑀢𑀸𑀦𑀺 𑀬𑁄𑀚𑀦𑀲𑀢𑀸𑀦𑀺 𑀧𑀺𑀡𑁆𑀟𑀸𑀘𑀸𑀭𑀁 𑀓𑀭𑀺𑀲𑁆𑀲𑀢𑀺, 𑀧𑀜𑁆𑀘 𑀓𑀽𑀝𑀸𑀕𑀸𑀭𑀲𑀢𑀸𑀦𑀺 𑀫𑀸𑀧𑁂𑀢𑁆𑀯𑀸 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀫𑀢𑁆𑀣𑀓𑁂 𑀕𑀫𑀦𑀲𑀚𑁆𑀚𑀸𑀦𑀺 𑀓𑀢𑁆𑀯𑀸 𑀞𑀧𑁂𑀳𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀪𑀕𑀯𑀢𑁄 𑀓𑀽𑀝𑀸𑀕𑀸𑀭𑀁 𑀘𑀢𑀼𑀫𑀼𑀔𑀁 𑀅𑀳𑁄𑀲𑀺, 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀤𑁆𑀯𑀺𑀫𑀼𑀔𑀸𑀦𑀺, 𑀲𑁂𑀲𑀸𑀦𑀺 𑀏𑀓𑀫𑀼𑀔𑀸𑀦𑀺. 𑀲𑀢𑁆𑀣𑀸 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑁆𑀫 𑀧𑀝𑀺𑀧𑀸𑀝𑀺𑀬𑀸 𑀞𑀧𑀺𑀢𑀓𑀽𑀝𑀸𑀕𑀸𑀭𑁂𑀲𑀼 𑀥𑀼𑀭𑀓𑀽𑀝𑀸𑀕𑀸𑀭𑀁 𑀧𑀸𑀯𑀺𑀲𑀺. 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀆𑀤𑀺𑀁 𑀓𑀢𑁆𑀯𑀸 𑀏𑀓𑀽𑀦𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑀸𑀦𑀺𑀧𑀺 𑀓𑀽𑀝𑀸𑀕𑀸𑀭𑀁 𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀅𑀳𑁂𑀲𑀼𑀁. 𑀏𑀓𑀁 𑀢𑀼𑀘𑁆𑀙𑀓𑀽𑀝𑀸𑀕𑀸𑀭𑀁 𑀅𑀳𑁄𑀲𑀺, 𑀧𑀜𑁆𑀘𑀧𑀺 𑀓𑀽𑀝𑀸𑀕𑀸𑀭𑀲𑀢𑀸𑀦𑀺 𑀆𑀓𑀸𑀲𑁂 𑀉𑀧𑁆𑀧𑀢𑀺𑀁𑀲𑀼.

𑀲𑀢𑁆𑀣𑀸 𑀲𑀘𑁆𑀘𑀩𑀦𑁆𑀥𑀧𑀩𑁆𑀩𑀢𑀁 𑀦𑀸𑀫 𑀧𑀢𑁆𑀯𑀸 𑀓𑀽𑀝𑀸𑀕𑀸𑀭𑀁 𑀆𑀓𑀸𑀲𑁂 𑀞𑀧𑁂𑀲𑀺. 𑀢𑀲𑁆𑀫𑀺𑀁 𑀧𑀩𑁆𑀩𑀢𑁂 𑀲𑀘𑁆𑀘𑀩𑀦𑁆𑀥𑁄 𑀦𑀸𑀫 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀢𑀸𑀧𑀲𑁄 𑀫𑀳𑀸𑀚𑀦𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀉𑀕𑁆𑀕𑀡𑁆𑀳𑀸𑀧𑁂𑀦𑁆𑀢𑁄 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀯𑀲𑀢𑀺. 𑀅𑀩𑁆𑀪𑀦𑁆𑀢𑀭𑁂 𑀘𑀲𑁆𑀲 𑀅𑀦𑁆𑀢𑁄𑀘𑀸𑀝𑀺𑀬𑀁 𑀧𑀤𑀻𑀧𑁄 𑀯𑀺𑀬 𑀅𑀭𑀳𑀢𑁆𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀚𑀮𑀢𑀺. 𑀢𑀁 𑀤𑀺𑀲𑁆𑀯𑀸 𑀥𑀫𑁆𑀫𑀫𑀲𑁆𑀲 𑀓𑀣𑁂𑀲𑁆𑀲𑀸𑀫𑀻𑀢𑀺 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀸𑀧𑀲𑁄 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺, 𑀫𑀕𑁆𑀕𑁂𑀦𑁂𑀯𑀸𑀲𑁆𑀲 𑀅𑀪𑀺𑀜𑁆𑀜𑀸 𑀆𑀕𑀢𑀸. 𑀏𑀳𑀺𑀪𑀺𑀓𑁆𑀔𑀼 𑀳𑀼𑀢𑁆𑀯𑀸 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑁄 𑀳𑀼𑀢𑁆𑀯𑀸 𑀓𑀽𑀝𑀸𑀕𑀸𑀭𑀁 𑀧𑀸𑀯𑀺𑀲𑀺.

𑀪𑀕𑀯𑀸 𑀓𑀽𑀝𑀸𑀕𑀸𑀭𑀕𑀢𑁂𑀳𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀯𑀸𑀡𑀺𑀚𑀕𑀸𑀫𑀁 𑀕𑀦𑁆𑀢𑁆𑀯𑀸 𑀓𑀽𑀝𑀸𑀕𑀸𑀭𑀸𑀦𑀺 𑀅𑀤𑀺𑀲𑁆𑀲𑀫𑀸𑀦𑀸𑀦𑀺 𑀓𑀢𑁆𑀯𑀸 𑀯𑀸𑀡𑀺𑀚𑀕𑀸𑀫𑀁 𑀧𑀸𑀯𑀺𑀲𑀺. 𑀯𑀸𑀡𑀺𑀚𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀣𑀸𑀭𑀁 𑀫𑀓𑀼𑀮𑀓𑀸𑀭𑀸𑀫𑀁 𑀦𑀬𑀺𑀁𑀲𑀼. 𑀲𑀢𑁆𑀣𑀸 𑀫𑀡𑁆𑀟𑀮𑀫𑀸𑀴𑀁 𑀧𑀸𑀯𑀺𑀲𑀺. 𑀫𑀳𑀸𑀚𑀦𑁄 𑀬𑀸𑀯 𑀲𑀢𑁆𑀣𑀸 𑀪𑀢𑁆𑀢𑀤𑀭𑀣𑀁 𑀧𑀝𑀺𑀧𑀲𑁆𑀲𑀫𑁆𑀪𑁂𑀢𑀺, 𑀢𑀸𑀯 𑀧𑀸𑀢𑀭𑀸𑀲𑀁 𑀓𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀲𑀫𑀸𑀤𑀸𑀬 𑀩𑀳𑀼𑀁 𑀕𑀦𑁆𑀥𑀜𑁆𑀘 𑀧𑀼𑀧𑁆𑀨𑀜𑁆𑀘 𑀆𑀤𑀸𑀬 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀆𑀭𑀸𑀫𑀁 𑀧𑀘𑁆𑀘𑀸𑀕𑀫𑀸𑀲𑀺. 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀫𑀳𑀸𑀚𑀦𑀲𑁆𑀲 𑀩𑀦𑁆𑀥𑀦𑀫𑁄𑀓𑁆𑀔𑁄 𑀚𑀸𑀢𑁄, 𑀫𑀳𑀦𑁆𑀢𑀁 𑀩𑀼𑀤𑁆𑀥𑀓𑁄𑀮𑀸𑀳𑀮𑀁 𑀅𑀳𑁄𑀲𑀺.

𑀲𑀢𑁆𑀣𑀸 𑀫𑀳𑀸𑀚𑀦𑀲𑁆𑀲 𑀲𑀗𑁆𑀕𑀳𑀢𑁆𑀣𑀁 𑀓𑀢𑀺𑀧𑀸𑀳𑀁 𑀢𑀢𑁆𑀣𑁂𑀯 𑀯𑀲𑀺, 𑀅𑀭𑀼𑀡𑀁 𑀧𑀦 𑀫𑀳𑀸𑀕𑀦𑁆𑀥𑀓𑀼𑀝𑀺𑀬𑀁𑀬𑁂𑀯 𑀉𑀝𑁆𑀞𑀧𑁂𑀲𑀺. 𑀢𑀢𑁆𑀣 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸 𑀯𑀸𑀡𑀺𑀚𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 ‘‘𑀢𑁆𑀯𑀁 𑀇𑀥𑁂𑀯 𑀯𑀲𑀸𑀳𑀻’’𑀢𑀺 𑀧𑀼𑀡𑁆𑀡𑀢𑁆𑀣𑁂𑀭𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀦𑁆𑀢𑀭𑁂 𑀦𑀫𑁆𑀫𑀤𑀸𑀦𑀤𑀻 𑀦𑀸𑀫 𑀅𑀢𑁆𑀣𑀺, 𑀢𑀲𑁆𑀲𑀸 𑀢𑀻𑀭𑀁 𑀅𑀕𑀫𑀸𑀲𑀺. 𑀦𑀫𑁆𑀫𑀤𑀸𑀦𑀸𑀕𑀭𑀸𑀚𑀸 𑀲𑀢𑁆𑀣𑀼 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸 𑀦𑀸𑀕𑀪𑀯𑀦𑀁 𑀧𑀯𑁂𑀲𑁂𑀢𑁆𑀯𑀸 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀲𑀓𑁆𑀓𑀸𑀭𑀁 𑀅𑀓𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀦𑀸𑀕𑀪𑀯𑀦𑀸 𑀦𑀺𑀓𑁆𑀔𑀫𑀺. 𑀲𑁄 𑁋 ‘‘𑀫𑀬𑁆𑀳𑀁, 𑀪𑀦𑁆𑀢𑁂, 𑀧𑀭𑀺𑀘𑀭𑀺𑀢𑀩𑁆𑀩𑀁 𑀤𑁂𑀣𑀸’’𑀢𑀺 𑀬𑀸𑀘𑀺, 𑀪𑀕𑀯𑀸 𑀦𑀫𑁆𑀫𑀤𑀸𑀦𑀤𑀻𑀢𑀻𑀭𑁂 𑀧𑀤𑀘𑁂𑀢𑀺𑀬𑀁 𑀤𑀲𑁆𑀲𑁂𑀲𑀺. 𑀢𑀁 𑀯𑀻𑀘𑀻𑀲𑀼 𑀆𑀕𑀢𑀸𑀲𑀼 𑀧𑀺𑀥𑀻𑀬𑀢𑀺, 𑀕𑀢𑀸𑀲𑀼 𑀯𑀺𑀯𑀭𑀻𑀬𑀢𑀺, 𑀫𑀳𑀸𑀲𑀓𑁆𑀓𑀸𑀭𑀧𑁆𑀧𑀢𑁆𑀢𑀁 𑀅𑀳𑁄𑀲𑀺. 𑀲𑀢𑁆𑀣𑀸 𑀢𑀢𑁄 𑀦𑀺𑀓𑁆𑀔𑀫𑁆𑀫 𑀲𑀘𑁆𑀘𑀩𑀦𑁆𑀥𑀧𑀩𑁆𑀩𑀢𑀁 𑀕𑀦𑁆𑀢𑁆𑀯𑀸 𑀲𑀘𑁆𑀘𑀩𑀦𑁆𑀥𑀁 𑀆𑀳 𑁋 ‘‘𑀢𑀬𑀸 𑀫𑀳𑀸𑀚𑀦𑁄 𑀅𑀧𑀸𑀬𑀫𑀕𑁆𑀕𑁂 𑀑𑀢𑀸𑀭𑀺𑀢𑁄, 𑀢𑁆𑀯𑀁 𑀇𑀥𑁂𑀯 𑀯𑀲𑀺𑀢𑁆𑀯𑀸 𑀏𑀢𑁂𑀲𑀁 𑀮𑀤𑁆𑀥𑀺𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀫𑀕𑁆𑀕𑁂 𑀧𑀢𑀺𑀝𑁆𑀞𑀸𑀧𑁂𑀳𑀻’’𑀢𑀺. 𑀲𑁄𑀧𑀺 𑀧𑀭𑀺𑀘𑀭𑀺𑀢𑀩𑁆𑀩𑀁 𑀬𑀸𑀘𑀺. 𑀲𑀢𑁆𑀣𑀸 𑀖𑀦𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀅𑀮𑁆𑀮𑀫𑀢𑁆𑀢𑀺𑀓𑀧𑀺𑀡𑁆𑀟𑀫𑁆𑀳𑀺 𑀮𑀜𑁆𑀙𑀦𑀁 𑀯𑀺𑀬 𑀧𑀤𑀘𑁂𑀢𑀺𑀬𑀁 𑀤𑀲𑁆𑀲𑁂𑀲𑀺, 𑀢𑀢𑁄 𑀚𑁂𑀢𑀯𑀦𑀫𑁂𑀯 𑀕𑀢𑁄. 𑀏𑀢𑀫𑀢𑁆𑀣𑀁 𑀲𑀦𑁆𑀥𑀸𑀬 𑀢𑁂𑀦𑁂𑀯𑀦𑁆𑀢𑀭𑀯𑀲𑁆𑀲𑁂𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀫𑀳𑀸𑀚𑀦𑁄 𑀣𑁂𑀭𑀲𑁆𑀲 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀲𑀭𑀻𑀭𑀧𑀽𑀚𑀁 𑀓𑀢𑁆𑀯𑀸 𑀩𑀳𑀽𑀦𑀺 𑀕𑀦𑁆𑀥𑀓𑀝𑁆𑀞𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀲𑀭𑀻𑀭𑀁 𑀛𑀸𑀧𑁂𑀢𑁆𑀯𑀸 𑀥𑀸𑀢𑀼𑀬𑁄 𑀆𑀤𑀸𑀬 𑀘𑁂𑀢𑀺𑀬𑀁 𑀅𑀓𑀸𑀲𑀺. 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽𑀢𑀺 𑀣𑁂𑀭𑀲𑁆𑀲 𑀆𑀴𑀸𑀳𑀦𑁂 𑀞𑀺𑀢𑀪𑀺𑀓𑁆𑀔𑀽. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀧𑀼𑀡𑁆𑀡𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀦𑀦𑁆𑀤𑀓𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯𑁮. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀦𑀦𑁆𑀤𑀓𑁄𑀯𑀸𑀤𑀲𑀼𑀢𑁆𑀢𑀁. 𑀢𑀢𑁆𑀣 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸𑀢𑀺 𑀪𑀕𑀯𑀸 𑀫𑀳𑀸𑀧𑀚𑀸𑀧𑀢𑀺𑀬𑀸 𑀬𑀸𑀘𑀺𑀢𑁄 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑁋 ‘‘𑀣𑁂𑀭𑀸 𑀪𑀺𑀓𑁆𑀔𑀽 𑀯𑀸𑀭𑁂𑀦 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀦𑁆𑀢𑀽’’𑀢𑀺 𑀲𑀗𑁆𑀖𑀲𑁆𑀲 𑀪𑀸𑀭𑀁 𑀅𑀓𑀸𑀲𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀭𑀺𑀬𑀸𑀬𑁂𑀦𑀸𑀢𑀺 𑀯𑀸𑀭𑁂𑀦. 𑀦 𑀇𑀘𑁆𑀙𑀢𑀻𑀢𑀺 𑀅𑀢𑁆𑀢𑀦𑁄 𑀯𑀸𑀭𑁂 𑀲𑀫𑁆𑀧𑀢𑁆𑀢𑁂 𑀤𑀽𑀭𑀁 𑀕𑀸𑀫𑀁 𑀯𑀸 𑀕𑀦𑁆𑀢𑁆𑀯𑀸 𑀲𑀽𑀘𑀺𑀓𑀫𑁆𑀫𑀸𑀤𑀻𑀦𑀺 𑀯𑀸 𑀆𑀭𑀪𑀺𑀢𑁆𑀯𑀸 ‘‘𑀅𑀬𑀁 𑀦𑀸𑀫𑀲𑁆𑀲 𑀧𑀧𑀜𑁆𑀘𑁄’’𑀢𑀺 𑀯𑀤𑀸𑀧𑁂𑀲𑀺. 𑀇𑀫𑀁 𑀧𑀦 𑀧𑀭𑀺𑀬𑀸𑀬𑁂𑀦 𑀑𑀯𑀸𑀤𑀁 𑀪𑀕𑀯𑀸 𑀦𑀦𑁆𑀤𑀓𑀢𑁆𑀣𑁂𑀭𑀲𑁆𑀲𑁂𑀯 𑀓𑀸𑀭𑀡𑀸 𑀅𑀓𑀸𑀲𑀺. 𑀓𑀲𑁆𑀫𑀸? 𑀇𑀫𑀸𑀲𑀜𑁆𑀳𑀺 𑀪𑀺𑀓𑁆𑀔𑀼𑀦𑀻𑀦𑀁 𑀣𑁂𑀭𑀁 𑀤𑀺𑀲𑁆𑀯𑀸 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺 𑀧𑀲𑀻𑀤𑀢𑀺. 𑀢𑁂𑀦 𑀢𑀸 𑀢𑀲𑁆𑀲 𑀑𑀯𑀸𑀤𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀓𑀸𑀫𑀸, 𑀥𑀫𑁆𑀫𑀓𑀣𑀁 𑀲𑁄𑀢𑀼𑀓𑀸𑀫𑀸. 𑀢𑀲𑁆𑀫𑀸 𑀪𑀕𑀯𑀸 𑁋 ‘‘𑀦𑀦𑁆𑀤𑀓𑁄 𑀅𑀢𑁆𑀢𑀦𑁄 𑀯𑀸𑀭𑁂 𑀲𑀫𑁆𑀧𑀢𑁆𑀢𑁂 𑀑𑀯𑀸𑀤𑀁 𑀤𑀲𑁆𑀲𑀢𑀺, 𑀥𑀫𑁆𑀫𑀓𑀣𑀁 𑀓𑀣𑁂𑀲𑁆𑀲𑀢𑀻’’𑀢𑀺 𑀯𑀸𑀭𑁂𑀦 𑀑𑀯𑀸𑀤𑀁 𑀅𑀓𑀸𑀲𑀺. 𑀣𑁂𑀭𑁄 𑀧𑀦 𑀅𑀢𑁆𑀢𑀦𑁄 𑀯𑀸𑀭𑀁 𑀦 𑀓𑀭𑁄𑀢𑀺, 𑀓𑀲𑁆𑀫𑀸𑀢𑀺 𑀘𑁂? 𑀢𑀸 𑀓𑀺𑀭 𑀪𑀺𑀓𑁆𑀔𑀼𑀦𑀺𑀬𑁄 𑀧𑀼𑀩𑁆𑀩𑁂 𑀣𑁂𑀭𑀲𑁆𑀲 𑀚𑀫𑁆𑀩𑀼𑀤𑀻𑀧𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑀲𑁆𑀲 𑀑𑀭𑁄𑀥𑀸 𑀅𑀳𑁂𑀲𑀼𑀁. 𑀣𑁂𑀭𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦 𑀢𑀁 𑀓𑀸𑀭𑀡𑀁 𑀜𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀁 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑀁 𑀉𑀧𑀫𑀸𑀬𑁄 𑀘 𑀓𑀸𑀭𑀡𑀸𑀦𑀺 𑀘 𑀆𑀳𑀭𑀺𑀢𑁆𑀯𑀸 𑀥𑀫𑁆𑀫𑀁 𑀓𑀣𑀬𑀫𑀸𑀦𑀁 𑀤𑀺𑀲𑁆𑀯𑀸 𑀅𑀜𑁆𑀜𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀮𑀸𑀪𑀻 𑀪𑀺𑀓𑁆𑀔𑀼 𑀇𑀫𑀁 𑀓𑀸𑀭𑀡𑀁 𑀑𑀮𑁄𑀓𑁂𑀢𑁆𑀯𑀸 ‘𑀆𑀬𑀲𑁆𑀫𑀸 𑀦𑀦𑁆𑀤𑀓𑁄 𑀬𑀸𑀯𑀚𑁆𑀚𑀤𑀺𑀯𑀲𑀸 𑀑𑀭𑁄𑀥𑁂 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀲𑁄𑀪𑀢𑀸𑀬𑀫𑀸𑀬𑀲𑁆𑀫𑀸 𑀑𑀭𑁄𑀥𑀧𑀭𑀺𑀯𑀼𑀢𑁄’𑀢𑀺 𑀯𑀢𑁆𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸’’𑀢𑀺. 𑀏𑀢𑀫𑀢𑁆𑀣𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀣𑁂𑀭𑁄 𑀅𑀢𑁆𑀢𑀦𑁄 𑀯𑀸𑀭𑀁 𑀦 𑀓𑀭𑁄𑀢𑀺. 𑀇𑀫𑀸𑀲𑀜𑁆𑀘 𑀓𑀺𑀭 𑀪𑀺𑀓𑁆𑀔𑀼𑀦𑀻𑀦𑀁 𑀣𑁂𑀭𑀲𑁆𑀲𑁂𑀯 𑀤𑁂𑀲𑀦𑀸 𑀲𑀧𑁆𑀧𑀸𑀬𑀸 𑀪𑀯𑀺𑀲𑁆𑀲𑀢𑀻𑀢𑀺 𑀜𑀢𑁆𑀯𑀸 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀓𑀁 𑀆𑀫𑀦𑁆𑀢𑁂𑀲𑀺.

𑀢𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀧𑀼𑀩𑁆𑀩𑁂 𑀢𑀲𑁆𑀲 𑀑𑀭𑁄𑀥𑀪𑀸𑀯𑀚𑀸𑀦𑀦𑀢𑁆𑀣𑀁 𑀇𑀤𑀁 𑀯𑀢𑁆𑀣𑀼𑀁 𑁋 𑀧𑀼𑀩𑁆𑀩𑁂 𑀓𑀺𑀭 𑀩𑀸𑀭𑀸𑀡𑀲𑀺𑀬𑀁 𑀧𑀜𑁆𑀘 𑀤𑀸𑀲𑀲𑀢𑀸𑀦𑀺 𑀧𑀜𑁆𑀘 𑀤𑀸𑀲𑀺𑀲𑀢𑀸𑀦𑀺 𑀘𑀸𑀢𑀺 𑀚𑀗𑁆𑀖𑀲𑀳𑀲𑁆𑀲𑀁 𑀏𑀓𑀢𑁄𑀯 𑀓𑀫𑁆𑀫𑀁 𑀓𑀢𑁆𑀯𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀲𑀺. 𑀅𑀬𑀁 𑀦𑀦𑁆𑀤𑀓𑀢𑁆𑀣𑁂𑀭𑁄 𑀢𑀲𑁆𑀫𑀺𑀁 𑀓𑀸𑀮𑁂 𑀚𑁂𑀝𑁆𑀞𑀓𑀤𑀸𑀲𑁄 𑀳𑁄𑀢𑀺, 𑀕𑁄𑀢𑀫𑀻 𑀚𑁂𑀝𑁆𑀞𑀓𑀤𑀸𑀲𑀻. 𑀲𑀸 𑀚𑁂𑀝𑁆𑀞𑀓𑀤𑀸𑀲𑀲𑁆𑀲 𑀧𑀸𑀤𑀧𑀭𑀺𑀘𑀸𑀭𑀺𑀓𑀸 𑀅𑀳𑁄𑀲𑀺 𑀧𑀡𑁆𑀟𑀺𑀢𑀸 𑀩𑁆𑀬𑀢𑁆𑀢𑀸. 𑀚𑀗𑁆𑀖𑀲𑀳𑀲𑁆𑀲𑀫𑁆𑀧𑀺 𑀧𑀼𑀜𑁆𑀜𑀓𑀫𑁆𑀫𑀁 𑀓𑀭𑁄𑀦𑁆𑀢𑀁 𑀏𑀓𑀢𑁄 𑀓𑀭𑁄𑀢𑀺. 𑀅𑀣 𑀯𑀲𑁆𑀲𑀽𑀧𑀦𑀸𑀬𑀺𑀓𑀲𑀫𑀬𑁂 𑀧𑀜𑁆𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀢𑁄 𑀇𑀲𑀺𑀧𑀢𑀦𑁂 𑀑𑀢𑀭𑀺𑀢𑁆𑀯𑀸 𑀦𑀕𑀭𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀇𑀲𑀺𑀧𑀢𑀦𑀫𑁂𑀯 𑀕𑀦𑁆𑀢𑁆𑀯𑀸 𑁋 ‘‘𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑀼𑀝𑀺𑀬𑀸 𑀅𑀢𑁆𑀣𑀸𑀬 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀺𑀲𑁆𑀲𑀸𑀫𑀸’’𑀢𑀺 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑁂 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑁂𑀝𑁆𑀞𑀺𑀲𑁆𑀲 𑀖𑀭𑀤𑁆𑀯𑀸𑀭𑁂 𑀅𑀝𑁆𑀞𑀁𑀲𑀼. 𑀚𑁂𑀝𑁆𑀞𑀓𑀤𑀸𑀲𑀻 𑀓𑀼𑀝𑀁 𑀕𑀳𑁂𑀢𑁆𑀯𑀸 𑀉𑀤𑀓𑀢𑀺𑀢𑁆𑀣𑀁 𑀕𑀘𑁆𑀙𑀦𑁆𑀢𑀻 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀦𑀕𑀭𑀁 𑀧𑀯𑀺𑀲𑀦𑁆𑀢𑁂 𑀅𑀤𑁆𑀤𑀲. 𑀲𑁂𑀝𑁆𑀞𑀺 𑀢𑁂𑀲𑀁 𑀆𑀕𑀢𑀓𑀸𑀭𑀡𑀁 𑀲𑀼𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀑𑀓𑀸𑀲𑁄 𑀦𑀢𑁆𑀣𑀺, 𑀕𑀘𑁆𑀙𑀦𑁆𑀢𑀽’’𑀢𑀺 𑀆𑀳.

𑀅𑀣 𑀢𑁂 𑀦𑀕𑀭𑀸 𑀦𑀺𑀓𑁆𑀔𑀫𑀦𑁆𑀢𑁂 𑀚𑁂𑀝𑁆𑀞𑀓𑀤𑀸𑀲𑀻 𑀓𑀼𑀝𑀁 𑀕𑀳𑁂𑀢𑁆𑀯𑀸 𑀧𑀯𑀺𑀲𑀦𑁆𑀢𑀻 𑀤𑀺𑀲𑁆𑀯𑀸 𑀓𑀼𑀝𑀁 𑀑𑀢𑀸𑀭𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀑𑀦𑀫𑀺𑀢𑁆𑀯𑀸 𑀫𑀼𑀔𑀁 𑀧𑀺𑀥𑀸𑀬 𑁋 ‘‘𑀅𑀬𑁆𑀬𑀸 𑀦𑀕𑀭𑀁 𑀧𑀯𑀺𑀝𑁆𑀞𑀫𑀢𑁆𑀢𑀸𑀯 𑀦𑀺𑀓𑁆𑀔𑀦𑁆𑀢𑀸, 𑀓𑀺𑀁 𑀦𑀼 𑀔𑁄’’𑀢𑀺 𑀧𑀼𑀘𑁆𑀙𑀺. 𑀯𑀲𑁆𑀲𑀽𑀧𑀦𑀸𑀬𑀺𑀓𑀓𑀼𑀝𑀺𑀬𑀸 𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀺𑀢𑀼𑀁 𑀆𑀕𑀫𑀺𑀫𑁆𑀳𑀸𑀢𑀺. 𑀮𑀤𑁆𑀥𑀁, 𑀪𑀦𑁆𑀢𑁂𑀢𑀺. 𑀦 𑀮𑀤𑁆𑀥𑀁 𑀉𑀧𑀸𑀲𑀺𑀓𑁂𑀢𑀺? 𑀓𑀺𑀁 𑀧𑀦𑁂𑀲𑀸 𑀓𑀼𑀝𑀺 𑀇𑀲𑁆𑀲𑀭𑁂𑀳𑁂𑀯 𑀓𑀸𑀢𑀩𑁆𑀩𑀸, 𑀤𑀼𑀕𑁆𑀕𑀢𑁂𑀳𑀺𑀧𑀺 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺. 𑀬𑁂𑀦 𑀓𑁂𑀦𑀘𑀺 𑀲𑀓𑁆𑀓𑀸𑀢𑀺? 𑀲𑀸𑀥𑀼, 𑀪𑀦𑁆𑀢𑁂, 𑀫𑀬𑀁 𑀓𑀭𑀺𑀲𑁆𑀲𑀸𑀫. 𑀲𑁆𑀯𑁂 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸𑀢𑀺 𑀦𑀺𑀫𑀦𑁆𑀢𑁂𑀢𑁆𑀯𑀸 𑀉𑀤𑀓𑀁 𑀦𑁂𑀢𑁆𑀯𑀸 𑀧𑀼𑀦 𑀓𑀼𑀝𑀁 𑀕𑀳𑁂𑀢𑁆𑀯𑀸 𑀆𑀕𑀫𑁆𑀫 𑀢𑀺𑀢𑁆𑀣𑀫𑀕𑁆𑀕𑁂 𑀞𑀢𑁆𑀯𑀸 𑀆𑀕𑀢𑀸 𑀅𑀯𑀲𑁂𑀲𑀤𑀸𑀲𑀺𑀬𑁄 ‘‘𑀏𑀢𑁆𑀣𑁂𑀯 𑀳𑁄𑀣𑀸’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑀸𑀲𑀁 𑀆𑀕𑀢𑀓𑀸𑀮𑁂 𑀆𑀳 𑁋 ‘‘𑀅𑀫𑁆𑀫 𑀓𑀺𑀁 𑀦𑀺𑀘𑁆𑀘𑀫𑁂𑀯 𑀧𑀭𑀲𑁆𑀲 𑀤𑀸𑀲𑀓𑀫𑁆𑀫𑀁 𑀓𑀭𑀺𑀲𑁆𑀲𑀣, 𑀉𑀤𑀸𑀳𑀼 𑀤𑀸𑀲𑀪𑀸𑀯𑀢𑁄 𑀫𑀼𑀘𑁆𑀘𑀺𑀢𑀼𑀁 𑀇𑀘𑁆𑀙𑀣𑀸’’𑀢𑀺? 𑀅𑀚𑁆𑀚𑁂𑀯 𑀫𑀼𑀘𑁆𑀘𑀺𑀢𑀼𑀫𑀺𑀘𑁆𑀙𑀸𑀫 𑀅𑀬𑁆𑀬𑁂𑀢𑀺. 𑀬𑀤𑀺 𑀏𑀯𑀁 𑀫𑀬𑀸 𑀧𑀜𑁆𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀳𑀢𑁆𑀣𑀓𑀫𑁆𑀫𑀁 𑀅𑀮𑀪𑀦𑁆𑀢𑀸 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑀺𑀢𑀸, 𑀢𑀼𑀫𑁆𑀳𑀸𑀓𑀁 𑀲𑀸𑀫𑀺𑀓𑁂𑀳𑀺 𑀏𑀓𑀤𑀺𑀯𑀲𑀁 𑀳𑀢𑁆𑀣𑀓𑀫𑁆𑀫𑀁 𑀤𑀸𑀧𑁂𑀣𑀸𑀢𑀺. 𑀢𑀸 𑀲𑀸𑀥𑀽𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀸𑀬𑀁 𑀅𑀝𑀯𑀺𑀢𑁄 𑀆𑀕𑀢𑀓𑀸𑀮𑁂 𑀲𑀸𑀫𑀺𑀓𑀸𑀦𑀁 𑀆𑀭𑁄𑀘𑁂𑀲𑀼𑀁. 𑀢𑁂 𑀲𑀸𑀥𑀽𑀢𑀺 𑀚𑁂𑀝𑁆𑀞𑀓𑀤𑀸𑀲𑀲𑁆𑀲 𑀕𑁂𑀳𑀤𑁆𑀯𑀸𑀭𑁂 𑀲𑀦𑁆𑀦𑀺𑀧𑀢𑀺𑀁𑀲𑀼.

𑀅𑀣 𑀦𑁂 𑀚𑁂𑀝𑁆𑀞𑀓𑀤𑀸𑀲𑀻 𑀲𑁆𑀯𑁂 𑀢𑀸𑀢𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀳𑀢𑁆𑀣𑀓𑀫𑁆𑀫𑀁 𑀤𑁂𑀣𑀸𑀢𑀺 𑀆𑀦𑀺𑀲𑀁𑀲𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀬𑁂𑀧𑀺 𑀦 𑀓𑀸𑀢𑀼𑀓𑀸𑀫𑀸, 𑀢𑁂 𑀕𑀸𑀴𑁆𑀳𑁂𑀦 𑀑𑀯𑀸𑀤𑁂𑀦 𑀢𑀚𑁆𑀚𑁂𑀢𑁆𑀯𑀸 𑀧𑀝𑀺𑀘𑁆𑀙𑀸𑀧𑁂𑀲𑀺. 𑀲𑀸 𑀧𑀼𑀦𑀤𑀺𑀯𑀲𑁂 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀪𑀢𑁆𑀢𑀁 𑀤𑀢𑁆𑀯𑀸 𑀲𑀩𑁆𑀩𑁂𑀲𑀁 𑀤𑀸𑀲𑀧𑀼𑀢𑁆𑀢𑀸𑀦𑀁 𑀲𑀜𑁆𑀜𑀁 𑀅𑀤𑀸𑀲𑀺. 𑀢𑁂 𑀢𑀸𑀯𑀤𑁂𑀯 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀤𑀩𑁆𑀩𑀲𑀫𑁆𑀪𑀸𑀭𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀲𑀢𑀁 𑀲𑀢𑀁 𑀳𑀼𑀢𑁆𑀯𑀸 𑀏𑀓𑁂𑀓𑀓𑀼𑀝𑀺𑀁 𑀏𑀓𑁂𑀓𑀘𑀗𑁆𑀓𑀫𑀦𑀸𑀤𑀺𑀧𑀭𑀺𑀯𑀸𑀭𑀁 𑀓𑀢𑁆𑀯𑀸 𑀫𑀜𑁆𑀘𑀧𑀻𑀞𑀧𑀸𑀦𑀻𑀬𑀧𑀭𑀺𑀪𑁄𑀚𑀦𑀻𑀬𑀪𑀸𑀚𑀦𑀸𑀤𑀻𑀦𑀺 𑀞𑀧𑁂𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑁂 𑀢𑁂𑀫𑀸𑀲𑀁 𑀢𑀢𑁆𑀣 𑀯𑀲𑀦𑀢𑁆𑀣𑀸𑀬 𑀧𑀝𑀺𑀜𑁆𑀜𑀁 𑀓𑀸𑀭𑁂𑀢𑁆𑀯𑀸 𑀯𑀸𑀭𑀪𑀺𑀓𑁆𑀔𑀁 𑀧𑀝𑁆𑀞𑀧𑁂𑀲𑀼𑀁. 𑀬𑁄 𑀅𑀢𑁆𑀢𑀦𑁄 𑀯𑀸𑀭𑀤𑀺𑀯𑀲𑁂 𑀦 𑀲𑀓𑁆𑀓𑁄𑀢𑀺. 𑀢𑀲𑁆𑀲 𑀚𑁂𑀝𑁆𑀞𑀓𑀤𑀸𑀲𑀻 𑀲𑀓𑀕𑁂𑀳𑀢𑁄 𑀆𑀳𑀭𑀺𑀢𑁆𑀯𑀸 𑀤𑁂𑀢𑀺. 𑀏𑀯𑀁 𑀢𑁂𑀫𑀸𑀲𑀁 𑀚𑀕𑁆𑀕𑀺𑀢𑁆𑀯𑀸 𑀚𑁂𑀝𑁆𑀞𑀓𑀤𑀸𑀲𑀻 𑀏𑀓𑁂𑀓𑀁 𑀤𑀸𑀲𑀁 𑀏𑀓𑁂𑀓𑀁 𑀲𑀸𑀝𑀓𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺. 𑀧𑀜𑁆𑀘 𑀣𑀽𑀮𑀲𑀸𑀝𑀓𑀲𑀢𑀸𑀦𑀺 𑀅𑀳𑁂𑀲𑀼𑀁. 𑀢𑀸𑀦𑀺 𑀧𑀭𑀺𑀯𑀢𑁆𑀢𑀸𑀧𑁂𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀢𑀺𑀘𑀻𑀯𑀭𑀸𑀦𑀺 𑀓𑀢𑁆𑀯𑀸 𑀅𑀤𑀸𑀲𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀬𑀣𑀸𑀨𑀸𑀲𑀼𑀓𑀁 𑀅𑀕𑀫𑀁𑀲𑀼. 𑀢𑀫𑁆𑀧𑀺 𑀚𑀗𑁆𑀖𑀲𑀳𑀲𑁆𑀲𑀁 𑀏𑀓𑀢𑁄 𑀓𑀼𑀲𑀮𑀁 𑀓𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺. 𑀢𑀸𑀦𑀺 𑀧𑀜𑁆𑀘 𑀫𑀸𑀢𑀼𑀕𑀸𑀫𑀲𑀢𑀸𑀦𑀺 𑀓𑀸𑀮𑁂𑀦 𑀓𑀸𑀮𑀁 𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀧𑀼𑀭𑀺𑀲𑀲𑀢𑀸𑀦𑀁 𑀕𑁂𑀳𑁂 𑀳𑁄𑀦𑁆𑀢𑀺, 𑀓𑀸𑀮𑁂𑀦 𑀓𑀸𑀮𑀁 𑀲𑀩𑁆𑀩𑀸𑀧𑀺 𑀚𑁂𑀝𑁆𑀞𑀓𑀤𑀸𑀲𑀧𑀼𑀢𑁆𑀢𑀲𑁆𑀲𑁂𑀯 𑀕𑁂𑀳𑁂 𑀳𑁄𑀦𑁆𑀢𑀺. 𑀅𑀣 𑀏𑀓𑀲𑁆𑀫𑀺𑀁 𑀓𑀸𑀮𑁂 𑀚𑁂𑀝𑁆𑀞𑀓𑀤𑀸𑀲𑀧𑀼𑀢𑁆𑀢𑁄 𑀤𑁂𑀯𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀭𑀸𑀚𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄. 𑀢𑀸𑀧𑀺 𑀧𑀜𑁆𑀘𑀲𑀢𑀸 𑀤𑁂𑀯𑀓𑀜𑁆𑀜𑀸 𑀫𑀳𑀸𑀪𑁄𑀕𑀓𑀼𑀮𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀲𑁆𑀲 𑀭𑀚𑁆𑀚𑁂 𑀞𑀺𑀢𑀲𑁆𑀲 𑀕𑁂𑀳𑀁 𑀅𑀕𑀫𑀁𑀲𑀼. 𑀏𑀢𑁂𑀦 𑀦𑀺𑀬𑀸𑀫𑁂𑀦 𑀲𑀁𑀲𑀭𑀦𑁆𑀢𑀺𑀬𑁄 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀓𑁄𑀮𑀺𑀬𑀦𑀕𑀭𑁂 𑀤𑁂𑀯𑀤𑀳𑀦𑀕𑀭𑁂 𑀘 𑀔𑀢𑁆𑀢𑀺𑀬𑀓𑀼𑀮𑁂𑀲𑀼 𑀦𑀺𑀩𑁆𑀩𑀢𑁆𑀢𑀸.

𑀦𑀦𑁆𑀤𑀓𑀢𑁆𑀣𑁂𑀭𑁄𑀧𑀺 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄, 𑀚𑁂𑀝𑁆𑀞𑀓𑀤𑀸𑀲𑀺𑀥𑀻𑀢𑀸 𑀯𑀬𑀁 𑀆𑀕𑀫𑁆𑀫 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀺𑀢𑀸, 𑀇𑀢𑀭𑀸𑀧𑀺 𑀢𑁂𑀲𑀁 𑀢𑁂𑀲𑀁 𑀭𑀸𑀚𑀧𑀼𑀢𑁆𑀢𑀸𑀦𑀁𑀬𑁂𑀯 𑀖𑀭𑀁 𑀕𑀢𑀸. 𑀢𑀸𑀲𑀁 𑀲𑀸𑀫𑀺𑀓𑀸 𑀧𑀜𑁆𑀘𑀲𑀢𑀸 𑀭𑀸𑀚𑀓𑀼𑀫𑀸𑀭𑀸 𑀉𑀤𑀓𑀘𑀼𑀫𑁆𑀩𑀝𑀓𑀮𑀳𑁂 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑀺𑀢𑀸, 𑀭𑀸𑀚𑀥𑀻𑀢𑀭𑁄 𑀢𑁂𑀲𑀁 𑀉𑀓𑁆𑀓𑀡𑁆𑀞𑀦𑀢𑁆𑀣𑀁 𑀲𑀸𑀲𑀦𑀁 𑀧𑁂𑀲𑁂𑀲𑀼𑀁. 𑀢𑁂 𑀉𑀓𑁆𑀓𑀡𑁆𑀞𑀺𑀢𑁂 𑀪𑀕𑀯𑀸 𑀓𑀼𑀡𑀸𑀮𑀤𑀳𑀁 𑀦𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀫𑀳𑀸𑀲𑀫𑀬𑀤𑀺𑀯𑀲𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀢𑀸𑀧𑀺 𑀧𑀜𑁆𑀘𑀲𑀢𑀸 𑀭𑀸𑀚𑀥𑀻𑀢𑀭𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀳𑀸𑀧𑀚𑀸𑀧𑀢𑀺𑀬𑀸 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀁𑀲𑀼. 𑀅𑀬𑀫𑀸𑀬𑀲𑁆𑀫𑀸 𑀦𑀦𑁆𑀤𑀓𑁄 𑀏𑀢𑁆𑀢𑀸𑀯 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄𑀢𑀺 𑀏𑀯𑀫𑁂𑀢𑀁 𑀯𑀢𑁆𑀣𑀼 𑀤𑀻𑀧𑁂𑀢𑀩𑁆𑀩𑀁.

𑀭𑀸𑀚𑀓𑀸𑀭𑀸𑀫𑁄𑀢𑀺 𑀧𑀲𑁂𑀦𑀤𑀺𑀦𑀸 𑀓𑀸𑀭𑀺𑀢𑁄 𑀦𑀕𑀭𑀲𑁆𑀲 𑀤𑀓𑁆𑀔𑀺𑀡𑀤𑀺𑀲𑀸𑀪𑀸𑀕𑁂 𑀣𑀽𑀧𑀸𑀭𑀸𑀫𑀲𑀤𑀺𑀲𑁂 𑀞𑀸𑀦𑁂 𑀯𑀺𑀳𑀸𑀭𑁄.

𑁩𑁯𑁯. 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀦𑁆𑀢𑀺 𑀳𑁂𑀢𑀼𑀦𑀸 𑀓𑀸𑀭𑀡𑁂𑀦 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀬𑀸𑀣𑀸𑀯𑀲𑀭𑀲𑀢𑁄 𑀤𑀺𑀝𑁆𑀞𑀁.

𑁪𑁦𑁧. 𑀢𑀚𑁆𑀚𑀁 𑀢𑀚𑁆𑀚𑀦𑁆𑀢𑀺 𑀢𑀁𑀲𑀪𑀸𑀯𑀁 𑀢𑀁𑀲𑀪𑀸𑀯𑀁, 𑀅𑀢𑁆𑀣𑀢𑁄 𑀧𑀦 𑀢𑀁 𑀢𑀁 𑀧𑀘𑁆𑀘𑀬𑀁 𑀧𑀝𑀺𑀘𑁆𑀘 𑀢𑀸 𑀢𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁪𑁦𑁨. 𑀧𑀕𑁂𑀯𑀲𑁆𑀲 𑀙𑀸𑀬𑀸𑀢𑀺 𑀫𑀽𑀮𑀸𑀤𑀻𑀦𑀺 𑀦𑀺𑀲𑁆𑀲𑀸𑀬 𑀦𑀺𑀩𑁆𑀩𑀢𑁆𑀢𑀸 𑀙𑀸𑀬𑀸 𑀧𑀞𑀫𑀢𑀭𑀁𑀬𑁂𑀯 𑀅𑀦𑀺𑀘𑁆𑀘𑀸.

𑁪𑁧𑁩. 𑀅𑀦𑀼𑀧𑀳𑀘𑁆𑀘𑀸𑀢𑀺 𑀅𑀦𑀼𑀧𑀳𑀦𑀺𑀢𑁆𑀯𑀸. 𑀢𑀢𑁆𑀣 𑀫𑀁𑀲𑀁 𑀧𑀺𑀡𑁆𑀟𑀁 𑀧𑀺𑀡𑁆𑀟𑀁 𑀓𑀢𑁆𑀯𑀸 𑀘𑀫𑁆𑀫𑀁 𑀅𑀮𑁆𑀮𑀺𑀬𑀸𑀧𑁂𑀦𑁆𑀢𑁄 𑀫𑀁𑀲𑀓𑀸𑀬𑀁 𑀉𑀧𑀳𑀦𑀢𑀺 𑀦𑀸𑀫. 𑀘𑀫𑁆𑀫𑀁 𑀩𑀤𑁆𑀥𑀁 𑀩𑀤𑁆𑀥𑀁 𑀓𑀢𑁆𑀯𑀸 𑀫𑀁𑀲𑁂 𑀅𑀮𑁆𑀮𑀺𑀬𑀸𑀧𑁂𑀦𑁆𑀢𑁄 𑀫𑀁𑀲𑀓𑀸𑀬𑀁 𑀉𑀧𑀳𑀦𑀢𑀺 𑀦𑀸𑀫. 𑀏𑀯𑀁 𑀅𑀓𑀢𑁆𑀯𑀸. 𑀯𑀺𑀮𑀺𑀫𑀁𑀲𑀁 𑀦𑁆𑀳𑀸𑀭𑀼𑀩𑀦𑁆𑀥𑀦𑀦𑁆𑀢𑀺 𑀲𑀩𑁆𑀩𑀘𑀫𑁆𑀫𑁂 𑀮𑀕𑁆𑀕𑀯𑀺𑀮𑀻𑀧𑀦𑀫𑀁𑀲𑀫𑁂𑀯. 𑀅𑀦𑁆𑀢𑀭𑀸𑀓𑀺𑀮𑁂𑀲𑀲𑀁𑀬𑁄𑀚𑀦𑀩𑀦𑁆𑀥𑀦𑀦𑁆𑀢𑀺 𑀲𑀩𑁆𑀩𑀁 𑀅𑀦𑁆𑀢𑀭𑀓𑀺𑀮𑁂𑀲𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁪𑁧𑁪. 𑀲𑀢𑁆𑀢 𑀔𑁄 𑀧𑀦𑀺𑀫𑁂𑀢𑀺 𑀓𑀲𑁆𑀫𑀸 𑀆𑀳𑀸𑀢𑀺? 𑀬𑀸 𑀳𑀺 𑀏𑀲𑀸 𑀧𑀜𑁆𑀜𑀸 𑀓𑀺𑀮𑁂𑀲𑁂 𑀙𑀺𑀦𑁆𑀤𑀢𑀻𑀢𑀺 𑀯𑀼𑀢𑁆𑀢𑀸, 𑀲𑀸 𑀦 𑀏𑀓𑀺𑀓𑀸𑀯 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀙𑀺𑀦𑁆𑀤𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀬𑀣𑀸 𑀧𑀦 𑀓𑀼𑀞𑀸𑀭𑀻 𑀦 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀙𑁂𑀚𑁆𑀚𑀁 𑀙𑀺𑀦𑁆𑀤𑀢𑀺, 𑀧𑀼𑀭𑀺𑀲𑀲𑁆𑀲 𑀢𑀚𑁆𑀚𑀁 𑀯𑀸𑀬𑀸𑀫𑀁 𑀧𑀝𑀺𑀘𑁆𑀘𑁂𑀯 𑀙𑀺𑀦𑁆𑀤𑀢𑀺, 𑀏𑀯𑀁 𑀦 𑀯𑀺𑀦𑀸 𑀙𑀳𑀺 𑀩𑁄𑀚𑁆𑀛𑀗𑁆𑀕𑁂𑀳𑀺 𑀧𑀜𑁆𑀜𑀸 𑀓𑀺𑀮𑁂𑀲𑁂 𑀙𑀺𑀦𑁆𑀤𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀢𑁂𑀦 𑀳𑀻𑀢𑀺 𑀬𑁂𑀦 𑀓𑀸𑀭𑀡𑁂𑀦 𑀢𑀬𑀸 𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺, 𑀙 𑀩𑀸𑀳𑀺𑀭𑀸𑀦𑀺, 𑀙 𑀯𑀺𑀜𑁆𑀜𑀸𑀡𑀓𑀸𑀬𑁂, 𑀤𑀻𑀧𑁄𑀧𑀫𑀁, 𑀭𑀼𑀓𑁆𑀔𑁄𑀧𑀫𑀁, 𑀕𑀸𑀯𑀽𑀧𑀫𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀲𑀢𑁆𑀢𑀳𑀺 𑀩𑁄𑀚𑁆𑀛𑀗𑁆𑀕𑁂𑀳𑀺 𑀆𑀲𑀯𑀓𑁆𑀔𑀬𑁂𑀦 𑀤𑁂𑀲𑀦𑀸 𑀦𑀺𑀝𑁆𑀞𑀧𑀺𑀢𑀸, 𑀢𑁂𑀦 𑀓𑀸𑀭𑀡𑁂𑀦 𑀢𑁆𑀯𑀁 𑀲𑁆𑀯𑁂𑀧𑀺 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀢𑁂𑀦𑁂𑀯 𑀑𑀯𑀸𑀤𑁂𑀦 𑀑𑀯𑀤𑁂𑀬𑁆𑀬𑀸𑀲𑀻𑀢𑀺.

𑁪𑁧𑁫. 𑀲𑀸 𑀲𑁄𑀢𑀸𑀧𑀦𑁆𑀦𑀸𑀢𑀺 𑀬𑀸 𑀲𑀸 𑀕𑀼𑀡𑁂𑀳𑀺 𑀲𑀩𑁆𑀩𑀧𑀘𑁆𑀙𑀺𑀫𑀺𑀓𑀸, 𑀲𑀸 𑀲𑁄𑀢𑀸𑀧𑀦𑁆𑀦𑀸. 𑀲𑁂𑀲𑀸 𑀧𑀦 𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀦𑀺𑀬𑁄 𑀘 𑀔𑀻𑀡𑀸𑀲𑀯𑀸 𑀘. 𑀬𑀤𑀺 𑀏𑀯𑀁 𑀓𑀣𑀁 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑀸𑀢𑀺. 𑀅𑀚𑁆𑀛𑀸𑀲𑀬𑀧𑀸𑀭𑀺𑀧𑀽𑀭𑀺𑀬𑀸. 𑀬𑀲𑁆𑀲𑀸 𑀳𑀺 𑀪𑀺𑀓𑁆𑀔𑀼𑀦𑀺𑀬𑀸 𑀏𑀯𑀫𑀳𑁄𑀲𑀺 𑁋 ‘‘𑀓𑀤𑀸 𑀦𑀼 𑀔𑁄 𑀅𑀳𑀁 𑀅𑀬𑁆𑀬𑀲𑁆𑀲 𑀦𑀦𑁆𑀤𑀓𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑀻 𑀢𑀲𑁆𑀫𑀺𑀁𑀬𑁂𑀯 𑀆𑀲𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀭𑁂𑀬𑁆𑀬’’𑀦𑁆𑀢𑀺, 𑀲𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀸𑀓𑀸𑀲𑀺. 𑀬𑀲𑁆𑀲𑀸 𑀅𑀳𑁄𑀲𑀺 ‘‘𑀲𑀓𑀤𑀸𑀕𑀸𑀫𑀺𑀨𑀮𑀁 𑀅𑀦𑀸𑀕𑀸𑀫𑀺𑀨𑀮𑀁 𑀅𑀭𑀳𑀢𑁆𑀢’’𑀦𑁆𑀢𑀺, 𑀲𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀸𑀓𑀸𑀲𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀅𑀢𑁆𑀢𑀫𑀦𑀸 𑀘𑁂𑀯 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑀸 𑀘𑀸’’𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀦𑀦𑁆𑀤𑀓𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧𑁬. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀁. 𑀢𑀢𑁆𑀣 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸𑀢𑀺 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀧𑀸𑀘𑁂𑀦𑁆𑀢𑀻𑀢𑀺 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸. 𑀥𑀫𑁆𑀫𑀸𑀢𑀺 𑀧𑀦𑁆𑀦𑀭𑀲 𑀥𑀫𑁆𑀫𑀸. 𑀢𑁂 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀯𑀺𑀲𑀼𑀤𑁆𑀥𑀺𑀓𑀸𑀭𑀡𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀲𑁆𑀲𑀤𑁆𑀥𑁂 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀲𑀤𑁆𑀥𑁂 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄 𑀧𑀲𑀸𑀤𑀦𑀻𑀬𑁂 𑀲𑀼𑀢𑁆𑀢𑀦𑁆𑀢𑁂 𑀧𑀘𑁆𑀘𑀯𑁂𑀓𑁆𑀔𑀢𑁄 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺. 𑀓𑀼𑀲𑀻𑀢𑁂 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄 𑀆𑀭𑀤𑁆𑀥𑀯𑀻𑀭𑀺𑀬𑁂 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄 𑀲𑀫𑁆𑀫𑀧𑁆𑀧𑀥𑀸𑀦𑁂 𑀧𑀘𑁆𑀘𑀯𑁂𑀓𑁆𑀔𑀢𑁄 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺. 𑀫𑀼𑀝𑁆𑀞𑀲𑁆𑀲𑀢𑀻 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄 𑀉𑀧𑀝𑁆𑀞𑀺𑀢𑀲𑁆𑀲𑀢𑀻 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄 𑀲𑀢𑀺𑀧𑀝𑁆𑀞𑀸𑀦𑁂 𑀧𑀘𑁆𑀘𑀯𑁂𑀓𑁆𑀔𑀢𑁄 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀲𑀢𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺. 𑀅𑀲𑀫𑀸𑀳𑀺𑀢𑁂 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄 𑀲𑀫𑀸𑀳𑀺𑀢𑁂 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄 𑀛𑀸𑀦𑀯𑀺𑀫𑁄𑀓𑁆𑀔𑁂 𑀧𑀘𑁆𑀘𑀯𑁂𑀓𑁆𑀔𑀢𑁄 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺. 𑀤𑀼𑀧𑁆𑀧𑀜𑁆𑀜𑁂 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄 𑀧𑀜𑁆𑀜𑀯𑀦𑁆𑀢𑁂 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺. 𑀇𑀢𑀺 𑀇𑀫𑁂 𑀧𑀜𑁆𑀘 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄 𑀧𑀜𑁆𑀘 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄 𑀧𑀜𑁆𑀘 𑀲𑀼𑀢𑁆𑀢𑀦𑁆𑀢𑀓𑁆𑀔𑀦𑁆𑀥𑁂 𑀧𑀘𑁆𑀘𑀯𑁂𑀓𑁆𑀔𑀢𑁄 𑀇𑀫𑁂𑀳𑀺 𑀧𑀦𑁆𑀦𑀭𑀲𑀳𑀺 𑀆𑀓𑀸𑀭𑁂𑀳𑀺 𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀲𑀼𑀚𑁆𑀛𑀦𑁆𑀢𑀻’’𑀢𑀺 (𑀧𑀝𑀺. 𑀫. 𑁧.𑁧𑁮𑁫).

𑀅𑀧𑀭𑁂𑀧𑀺 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑁋 𑀲𑀤𑁆𑀥𑀸𑀤𑀻𑀦𑀺 𑀧𑀜𑁆𑀘𑀺𑀫𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑀲𑀜𑁆𑀜𑀸, 𑀤𑀼𑀓𑁆𑀔𑁂 𑀅𑀦𑀢𑁆𑀢𑀲𑀜𑁆𑀜𑀸, 𑀧𑀳𑀸𑀦𑀲𑀜𑁆𑀜𑀸, 𑀯𑀺𑀭𑀸𑀕𑀲𑀜𑁆𑀜𑀸𑀢𑀺, 𑀇𑀫𑀸 𑀧𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸 𑀲𑀜𑁆𑀜𑀸, 𑀫𑁂𑀖𑀺𑀬𑀢𑁆𑀣𑁂𑀭𑀲𑁆𑀲 𑀓𑀣𑀺𑀢𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀤𑀬𑁄 𑀧𑀜𑁆𑀘𑀥𑀫𑁆𑀫𑀸𑀢𑀺. 𑀓𑀸𑀬 𑀧𑀦 𑀯𑁂𑀮𑀸𑀬 𑀪𑀕𑀯𑀢𑁄 𑀏𑀢𑀤𑀳𑁄𑀲𑀻𑀢𑀺. 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑀲𑁆𑀲.

𑁪𑁧𑁯. 𑀅𑀦𑁂𑀓𑀸𑀦𑀁 𑀤𑁂𑀯𑀢𑀸𑀲𑀳𑀲𑁆𑀲𑀸𑀦𑀦𑁆𑀢𑀺 𑀆𑀬𑀲𑁆𑀫𑀢𑀸 𑀭𑀸𑀳𑀼𑀮𑁂𑀦 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀧𑀸𑀮𑀺𑀢𑀦𑀸𑀕𑀭𑀸𑀚𑀓𑀸𑀮𑁂 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀦𑁆𑀢𑁂𑀦 𑀲𑀤𑁆𑀥𑀺𑀁 𑀧𑀢𑁆𑀣𑀦𑀁 𑀧𑀝𑁆𑀞𑀧𑀺𑀢𑀤𑁂𑀯𑀢𑀸𑀬𑁂𑀯. 𑀢𑀸𑀲𑀼 𑀧𑀦 𑀓𑀸𑀘𑀺 𑀪𑀽𑀫𑀝𑁆𑀞𑀓𑀸 𑀤𑁂𑀯𑀢𑀸, 𑀓𑀸𑀘𑀺 𑀅𑀦𑁆𑀢𑀮𑀺𑀓𑁆𑀔𑀓𑀸, 𑀓𑀸𑀘𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸, 𑀓𑀸𑀘𑀺 𑀤𑁂𑀯𑀮𑁄𑀓𑁂, 𑀓𑀸𑀘𑀺 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸. 𑀇𑀫𑀲𑁆𑀫𑀺𑀁 𑀧𑀦 𑀤𑀺𑀯𑀲𑁂 𑀲𑀩𑁆𑀩𑀸 𑀏𑀓𑀝𑁆𑀞𑀸𑀦𑁂 𑀅𑀦𑁆𑀥𑀯𑀦𑀲𑁆𑀫𑀺𑀁𑀬𑁂𑀯 𑀲𑀦𑁆𑀦𑀺𑀧𑀢𑀺𑀢𑀸. 𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀉𑀧𑀸𑀮𑀺𑀑𑀯𑀸𑀤- (𑀫. 𑀦𑀺. 𑁨.𑁬𑁯) 𑀤𑀻𑀖𑀦𑀔𑀲𑀼𑀢𑁆𑀢𑁂𑀲𑀼 (𑀫. 𑀦𑀺. 𑁨.𑁨𑁦𑁬) 𑀧𑀞𑀫𑀫𑀕𑁆𑀕𑁄 𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀯𑀼𑀢𑁆𑀢𑁄, 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁩𑁯𑁫) 𑀢𑀻𑀡𑀺 𑀨𑀮𑀸𑀦𑀺, 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀘 𑀨𑀮𑀸𑀦𑀺 𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀳𑀺 𑀓𑀸𑀘𑀺 𑀤𑁂𑀯𑀢𑀸 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁, 𑀓𑀸𑀘𑀺 𑀲𑀓𑀤𑀸𑀕𑀸𑀫𑀻, 𑀅𑀦𑀸𑀕𑀸𑀫𑀻, 𑀔𑀻𑀡𑀸𑀲𑀯𑀸. 𑀢𑀸𑀲𑀜𑁆𑀘 𑀧𑀦 𑀤𑁂𑀯𑀢𑀸𑀦𑀁 𑀏𑀢𑁆𑀢𑀓𑀸𑀢𑀺 𑀕𑀡𑀦𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀙𑀙𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁨𑁦. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀙𑀙𑀓𑁆𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀆𑀤𑀺𑀓𑀮𑁆𑀬𑀸𑀡𑀦𑁆𑀢𑀺𑀆𑀤𑀺𑀫𑁆𑀳𑀺 𑀓𑀮𑁆𑀬𑀸𑀡𑀁 𑀪𑀤𑁆𑀤𑀓𑀁 𑀦𑀺𑀤𑁆𑀤𑁄𑀲𑀁 𑀓𑀢𑁆𑀯𑀸 𑀤𑁂𑀲𑁂𑀲𑁆𑀲𑀸𑀫𑀺. 𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀪𑀕𑀯𑀸 𑀅𑀭𑀺𑀬𑀯𑀁𑀲𑀁 𑀦𑀯𑀳𑀺, 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀁 𑀲𑀢𑁆𑀢𑀳𑀺, 𑀫𑀳𑀸𑀅𑀲𑁆𑀲𑀧𑀼𑀭𑀁 𑀲𑀢𑁆𑀢𑀳𑀺𑀬𑁂𑀯 𑀧𑀤𑁂𑀳𑀺 𑀣𑁄𑀫𑁂𑀲𑀺. 𑀇𑀤𑀁 𑀧𑀦 𑀲𑀼𑀢𑁆𑀢𑀁 𑀦𑀯𑀳𑀺 𑀧𑀤𑁂𑀳𑀺 𑀣𑁄𑀫𑁂𑀲𑀺.

𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀲𑀳𑀯𑀺𑀧𑀲𑁆𑀲𑀦𑁂𑀦 𑀫𑀕𑁆𑀕𑁂𑀦 𑀚𑀸𑀦𑀺𑀢𑀩𑁆𑀩𑀸𑀦𑀺. 𑀫𑀦𑀸𑀬𑀢𑀦𑁂𑀦 𑀢𑁂𑀪𑀽𑀫𑀓𑀘𑀺𑀢𑁆𑀢𑀫𑁂𑀯 𑀓𑀣𑀺𑀢𑀁, 𑀥𑀫𑁆𑀫𑀸𑀬𑀢𑀦𑁂𑀦 𑀩𑀳𑀺𑀤𑁆𑀥𑀸 𑀢𑁂𑀪𑀽𑀫𑀓𑀥𑀫𑁆𑀫𑀸 𑀘, 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀞𑀧𑁂𑀢𑁆𑀯𑀸 𑀤𑁆𑀯𑁂 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀲𑁂𑀲𑀁 𑀩𑀸𑀯𑀻𑀲𑀢𑀺𑀯𑀺𑀥𑀁 𑀮𑁄𑀓𑀺𑀬𑀯𑀺𑀧𑀸𑀓𑀘𑀺𑀢𑁆𑀢𑀁. 𑀨𑀲𑁆𑀲𑀯𑁂𑀤𑀦𑀸 𑀬𑀣𑀸𑀯𑀼𑀢𑁆𑀢𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀯. 𑀢𑀡𑁆𑀳𑀸𑀢𑀺 𑀯𑀺𑀧𑀸𑀓𑀯𑁂𑀤𑀦𑀸𑀧𑀘𑁆𑀘𑀬𑀸 𑀚𑀯𑀦𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀢𑀡𑁆𑀳𑀸.

𑁪𑁨𑁨. 𑀘𑀓𑁆𑀔𑀼 𑀅𑀢𑁆𑀢𑀸𑀢𑀺 𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀺. 𑀳𑁂𑀝𑁆𑀞𑀸 𑀓𑀣𑀺𑀢𑀸𑀦𑀜𑁆𑀳𑀺 𑀤𑁆𑀯𑀺𑀦𑁆𑀦𑀁 𑀲𑀘𑁆𑀘𑀸𑀦𑀁 𑀅𑀦𑀢𑁆𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀅𑀬𑀁 𑀤𑁂𑀲𑀦𑀸 𑀆𑀭𑀤𑁆𑀥𑀸. 𑀢𑀢𑁆𑀣 𑀦 𑀉𑀧𑀧𑀚𑁆𑀚𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺. 𑀯𑁂𑀢𑀻𑀢𑀺 𑀯𑀺𑀕𑀘𑁆𑀙𑀢𑀺 𑀦𑀺𑀭𑀼𑀚𑁆𑀛𑀢𑀺.

𑁪𑁨𑁪. 𑀅𑀬𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂𑀢𑀺 𑀅𑀬𑀫𑁆𑀧𑀺 𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀺. 𑀅𑀬𑀜𑁆𑀳𑀺 𑀤𑁂𑀲𑀦𑀸 𑀢𑀺𑀡𑁆𑀡𑀁 𑀕𑀸𑀳𑀸𑀦𑀁 𑀯𑀲𑁂𑀦 𑀯𑀝𑁆𑀝𑀁 𑀤𑀲𑁆𑀲𑁂𑀢𑀼𑀁 𑀆𑀭𑀤𑁆𑀥𑀸. 𑀤𑀼𑀓𑁆𑀔𑀁 𑀲𑀫𑀼𑀤𑀬𑁄𑀢𑀺 𑀤𑁆𑀯𑀺𑀦𑁆𑀦𑀁 𑀲𑀘𑁆𑀘𑀸𑀦𑀁 𑀯𑀲𑁂𑀦 𑀯𑀝𑁆𑀝𑀁 𑀤𑀲𑁆𑀲𑁂𑀢𑀼𑀦𑁆𑀢𑀺𑀧𑀺 𑀯𑀤𑀦𑁆𑀢𑀺𑀬𑁂𑀯. 𑀏𑀢𑀁 𑀫𑀫𑀸𑀢𑀺𑀆𑀤𑀻𑀲𑀼 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀕𑀸𑀳𑀸𑀯 𑀯𑁂𑀤𑀺𑀢𑀩𑁆𑀩𑀸. 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀕𑀸𑀳𑀢𑁆𑀢𑀬𑀯𑀲𑁂𑀦 𑀧𑀲𑁆𑀲𑀢𑀺.

𑀏𑀯𑀁 𑀯𑀝𑁆𑀝𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀺𑀡𑁆𑀡𑀁 𑀕𑀸𑀳𑀸𑀦𑀁 𑀧𑀝𑀺𑀧𑀓𑁆𑀔𑀯𑀲𑁂𑀦, 𑀦𑀺𑀭𑁄𑀥𑁄 𑀫𑀕𑁆𑀕𑁄𑀢𑀺 𑀇𑀫𑁂𑀲𑀁 𑀯𑀸 𑀤𑁆𑀯𑀺𑀦𑁆𑀦𑀁 𑀲𑀘𑁆𑀘𑀸𑀦𑀁 𑀯𑀲𑁂𑀦 𑀯𑀺𑀯𑀝𑁆𑀝𑀁 𑀤𑀲𑁆𑀲𑁂𑀢𑀼𑀁 𑀅𑀬𑀁 𑀔𑁄 𑀧𑀦𑀸𑀢𑀺𑀆𑀤𑀺𑀫𑀸𑀳. 𑀦𑁂𑀢𑀁 𑀫𑀫𑀸𑀢𑀺𑀆𑀤𑀻𑀦𑀺 𑀢𑀡𑁆𑀳𑀸𑀤𑀻𑀦𑀁 𑀧𑀝𑀺𑀲𑁂𑀥𑀯𑀘𑀦𑀸𑀦𑀺. 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸𑀢𑀺 𑀧𑀲𑁆𑀲𑀢𑀺.

𑁪𑁨𑁫. 𑀏𑀯𑀁 𑀯𑀺𑀯𑀝𑁆𑀝𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀺𑀡𑁆𑀡𑀁 𑀅𑀦𑀼𑀲𑀬𑀸𑀦𑀁 𑀯𑀲𑁂𑀦 𑀧𑀼𑀦 𑀯𑀝𑁆𑀝𑀁 𑀤𑀲𑁆𑀲𑁂𑀢𑀼𑀁 𑀘𑀓𑁆𑀔𑀼𑀜𑁆𑀘, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀪𑀺𑀦𑀦𑁆𑀤𑀢𑀻𑀢𑀺𑀆𑀤𑀻𑀦𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦𑁂𑀯 𑀯𑀼𑀢𑁆𑀢𑀸𑀦𑀺. 𑀅𑀦𑀼𑀲𑁂𑀢𑀻𑀢𑀺 𑀅𑀧𑁆𑀧𑀳𑀻𑀦𑁄 𑀳𑁄𑀢𑀺. 𑀤𑀼𑀓𑁆𑀔𑀲𑁆𑀲𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀓𑀺𑀮𑁂𑀲𑀤𑀼𑀓𑁆𑀔𑀲𑁆𑀲.

𑁪𑁨𑁬. 𑀏𑀯𑀁 𑀢𑀺𑀡𑁆𑀡𑀁 𑀅𑀦𑀼𑀲𑀬𑀸𑀦𑀁 𑀯𑀲𑁂𑀦 𑀯𑀝𑁆𑀝𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀁 𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀯𑀺𑀯𑀝𑁆𑀝𑀁 𑀤𑀲𑁆𑀲𑁂𑀦𑁆𑀢𑁄 𑀧𑀼𑀦 𑀘𑀓𑁆𑀔𑀼𑀜𑁆𑀘𑀸𑀢𑀺𑀆𑀤𑀺𑀫𑀸𑀳. 𑀅𑀯𑀺𑀚𑁆𑀚𑀁 𑀧𑀳𑀸𑀬𑀸𑀢𑀺 𑀯𑀝𑁆𑀝𑀫𑀽𑀮𑀺𑀓𑀁 𑀅𑀯𑀺𑀚𑁆𑀚𑀁 𑀧𑀚𑀳𑀺𑀢𑁆𑀯𑀸. 𑀯𑀺𑀚𑁆𑀚𑀦𑁆𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀯𑀺𑀚𑁆𑀚𑀁 𑀉𑀧𑁆𑀧𑀸𑀤𑁂𑀢𑁆𑀯𑀸.

𑁪𑁨𑁭. 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀻𑀢𑀺 𑀏𑀢𑁆𑀢𑀓𑁂𑀦𑁂𑀯 𑀓𑀣𑀸𑀫𑀕𑁆𑀕𑁂𑀦 𑀯𑀝𑁆𑀝𑀯𑀺𑀯𑀝𑁆𑀝𑀯𑀲𑁂𑀦 𑀤𑁂𑀲𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀧𑀼𑀦 𑀢𑀤𑁂𑀯 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀏𑀯𑀁 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀦𑁆𑀢𑀺 𑀏𑀢𑁆𑀣 𑀅𑀦𑀘𑁆𑀙𑀭𑀺𑀬𑀫𑁂𑀢𑀁, 𑀬𑀁 𑀲𑀬𑀫𑁂𑀯 𑀢𑀣𑀸𑀕𑀢𑁂 𑀤𑁂𑀲𑁂𑀦𑁆𑀢𑁂 𑀲𑀝𑁆𑀞𑀺 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸. 𑀇𑀫𑀜𑁆𑀳𑀺 𑀲𑀼𑀢𑁆𑀢𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀫𑁆𑀳𑀺 𑀓𑀣𑁂𑀦𑁆𑀢𑁂𑀧𑀺 𑀲𑀝𑁆𑀞𑀺 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁂 𑀓𑀣𑁂𑀦𑁆𑀢𑁂𑀧𑀺, 𑀅𑀲𑀻𑀢𑀺𑀫𑀳𑀸𑀣𑁂𑀭𑁂𑀲𑀼 𑀓𑀣𑁂𑀦𑁆𑀢𑁂𑀲𑀼𑀧𑀺 𑀧𑀢𑁆𑀢𑀸 𑀏𑀯. 𑀏𑀢𑀫𑁆𑀧𑀺 𑀅𑀦𑀘𑁆𑀙𑀭𑀺𑀬𑀁. 𑀫𑀳𑀸𑀪𑀺𑀜𑁆𑀜𑀧𑁆𑀧𑀢𑁆𑀢𑀸 𑀳𑀺 𑀢𑁂 𑀲𑀸𑀯𑀓𑀸.

𑀅𑀧𑀭𑀪𑀸𑀕𑁂 𑀧𑀦 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀫𑀸𑀮𑁂𑀬𑁆𑀬𑀤𑁂𑀯𑀢𑁆𑀣𑁂𑀭𑁄 𑀦𑀸𑀫 𑀳𑁂𑀝𑁆𑀞𑀸 𑀮𑁄𑀳𑀧𑀸𑀲𑀸𑀤𑁂 𑀇𑀤𑀁 𑀲𑀼𑀢𑁆𑀢𑀁 𑀓𑀣𑁂𑀲𑀺. 𑀢𑀤𑀸𑀧𑀺 𑀲𑀝𑁆𑀞𑀺 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸. 𑀬𑀣𑀸 𑀘 𑀮𑁄𑀳𑀧𑀸𑀲𑀸𑀤𑁂, 𑀏𑀯𑀁 𑀣𑁂𑀭𑁄 𑀫𑀳𑀸𑀫𑀡𑁆𑀟𑀧𑁂𑀧𑀺 𑀇𑀤𑀁 𑀲𑀼𑀢𑁆𑀢𑀁 𑀓𑀣𑁂𑀲𑀺. 𑀫𑀳𑀸𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑁂𑀢𑀺𑀬𑀧𑀩𑁆𑀩𑀢𑀁 𑀕𑀢𑁄, 𑀢𑀢𑁆𑀣𑀸𑀧𑀺 𑀓𑀣𑁂𑀲𑀺. 𑀢𑀢𑁄 𑀲𑀸𑀓𑀺𑀬𑀯𑀁𑀲𑀯𑀺𑀳𑀸𑀭𑁂, 𑀓𑀽𑀝𑀸𑀮𑀺𑀯𑀺𑀳𑀸𑀭𑁂, 𑀅𑀦𑁆𑀢𑀭𑀲𑁄𑀩𑁆𑀪𑁂, 𑀫𑀼𑀢𑁆𑀢𑀗𑁆𑀕𑀡𑁂, 𑀯𑀸𑀢𑀓𑀧𑀩𑁆𑀩𑀢𑁂, 𑀧𑀸𑀘𑀺𑀦𑀖𑀭𑀓𑁂, 𑀤𑀻𑀖𑀯𑀸𑀧𑀺𑀬𑀁, 𑀮𑁄𑀓𑀦𑁆𑀤𑀭𑁂, 𑀦𑁄𑀫𑀡𑁆𑀟𑀮𑀢𑀮𑁂 𑀓𑀣𑁂𑀲𑀺. 𑀢𑁂𑀲𑀼𑀧𑀺 𑀞𑀸𑀦𑁂𑀲𑀼 𑀲𑀝𑁆𑀞𑀺 𑀲𑀝𑁆𑀞𑀺 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸. 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀦 𑀣𑁂𑀭𑁄 𑀘𑀺𑀢𑁆𑀢𑀮𑀧𑀩𑁆𑀩𑀢𑀁 𑀕𑀢𑁄. 𑀢𑀤𑀸 𑀘 𑀘𑀺𑀢𑁆𑀢𑀮𑀧𑀩𑁆𑀩𑀢𑀯𑀺𑀳𑀸𑀭𑁂 𑀅𑀢𑀺𑀭𑁂𑀓𑀲𑀝𑁆𑀞𑀺𑀯𑀲𑁆𑀲𑁄 𑀫𑀳𑀸𑀣𑁂𑀭𑁄, 𑀧𑁄𑀓𑁆𑀔𑀭𑀡𑀺𑀬𑀁 𑀓𑀼𑀭𑀼𑀯𑀓𑀢𑀺𑀢𑁆𑀣𑀁 𑀦𑀸𑀫 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑀁 𑀅𑀢𑁆𑀣𑀺, 𑀢𑀢𑁆𑀣 𑀣𑁂𑀭𑁄 𑀦𑁆𑀳𑀸𑀬𑀺𑀲𑁆𑀲𑀸𑀫𑀻𑀢𑀺 𑀑𑀢𑀺𑀡𑁆𑀡𑁄. 𑀤𑁂𑀯𑀢𑁆𑀣𑁂𑀭𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀦𑁆𑀳𑀸𑀧𑁂𑀫𑀺, 𑀪𑀦𑁆𑀢𑁂𑀢𑀺 𑀆𑀳. 𑀣𑁂𑀭𑁄 𑀧𑀝𑀺𑀲𑀦𑁆𑀣𑀸𑀭𑁂𑀦𑁂𑀯 𑁋 ‘‘𑀫𑀸𑀮𑁂𑀬𑁆𑀬𑀤𑁂𑀯𑁄 𑀦𑀸𑀫 𑀅𑀢𑁆𑀣𑀻𑀢𑀺 𑀯𑀤𑀦𑁆𑀢𑀺, 𑀲𑁄 𑀅𑀬𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀢𑁆𑀯𑀁 𑀤𑁂𑀯𑁄𑀢𑀺 𑀆𑀳. 𑀆𑀫, 𑀪𑀦𑁆𑀢𑁂𑀢𑀺. 𑀲𑀝𑁆𑀞𑀺𑀯𑀲𑁆𑀲𑀤𑁆𑀥𑀸𑀦𑀁 𑀫𑁂, 𑀆𑀯𑀼𑀲𑁄, 𑀓𑁄𑀘𑀺 𑀲𑀭𑀻𑀭𑀁 𑀳𑀢𑁆𑀣𑁂𑀦 𑀨𑀼𑀲𑀺𑀢𑀼𑀁 𑀦𑀸𑀫 𑀦 𑀮𑀪𑀺, 𑀢𑁆𑀯𑀁 𑀧𑀦 𑀦𑁆𑀳𑀸𑀧𑁂𑀳𑀻𑀢𑀺 𑀉𑀢𑁆𑀢𑀭𑀺𑀢𑁆𑀯𑀸 𑀢𑀻𑀭𑁂 𑀦𑀺𑀲𑀻𑀤𑀺.

𑀣𑁂𑀭𑁄 𑀲𑀩𑁆𑀩𑀫𑁆𑀧𑀺 𑀳𑀢𑁆𑀣𑀧𑀸𑀤𑀸𑀤𑀺𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀫𑀳𑀸𑀣𑁂𑀭𑀁 𑀦𑁆𑀳𑀸𑀧𑁂𑀲𑀺. 𑀢𑀁 𑀤𑀺𑀯𑀲𑀜𑁆𑀘 𑀥𑀫𑁆𑀫𑀲𑁆𑀲𑀯𑀦𑀤𑀺𑀯𑀲𑁄 𑀳𑁄𑀢𑀺. 𑀅𑀣 𑀫𑀳𑀸𑀣𑁂𑀭𑁄 𑁋 ‘‘𑀤𑁂𑀯 𑀅𑀫𑁆𑀳𑀸𑀓𑀁 𑀥𑀫𑁆𑀫𑀤𑀸𑀦𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀆𑀳. 𑀣𑁂𑀭𑁄 𑀲𑀸𑀥𑀼, 𑀪𑀦𑁆𑀢𑁂𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀅𑀢𑁆𑀣𑀗𑁆𑀕𑀢𑁂 𑀲𑀽𑀭𑀺𑀬𑁂 𑀥𑀫𑁆𑀫𑀲𑁆𑀲𑀯𑀦𑀁 𑀖𑁄𑀲𑁂𑀲𑀼𑀁. 𑀅𑀢𑀺𑀓𑁆𑀓𑀦𑁆𑀢𑀲𑀝𑁆𑀞𑀺𑀯𑀲𑁆𑀲𑀸𑀯 𑀲𑀝𑁆𑀞𑀺 𑀫𑀳𑀸𑀣𑁂𑀭𑀸 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀁 𑀅𑀕𑀫𑀁𑀲𑀼. 𑀤𑁂𑀯𑀢𑁆𑀣𑁂𑀭𑁄 𑀲𑀭𑀪𑀸𑀡𑀸𑀯𑀲𑀸𑀦𑁂 𑀇𑀫𑀁 𑀲𑀼𑀢𑁆𑀢𑀁 𑀆𑀭𑀪𑀺, 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑁄𑀲𑀸𑀦𑁂 𑀘 𑀲𑀝𑁆𑀞𑀺 𑀫𑀳𑀸𑀣𑁂𑀭𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀢𑀢𑁄 𑀢𑀺𑀲𑁆𑀲𑀫𑀳𑀸𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀓𑀣𑁂𑀲𑀺, 𑀢𑀲𑁆𑀫𑀺𑀫𑁆𑀧𑀺 𑀲𑀝𑁆𑀞𑀺 𑀣𑁂𑀭𑀸. 𑀢𑀢𑁄 𑀦𑀸𑀕𑀫𑀳𑀸𑀯𑀺𑀳𑀸𑀭𑁂 𑀓𑀸𑀴𑀓𑀘𑁆𑀙𑀕𑀸𑀫𑁂 𑀓𑀣𑁂𑀲𑀺, 𑀢𑀲𑁆𑀫𑀺𑀫𑁆𑀧𑀺 𑀲𑀝𑁆𑀞𑀺 𑀣𑁂𑀭𑀸. 𑀢𑀢𑁄 𑀓𑀮𑁆𑀬𑀸𑀡𑀺𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀘𑀸𑀢𑀼𑀤𑁆𑀤𑀲𑁂 𑀳𑁂𑀝𑁆𑀞𑀸𑀧𑀸𑀲𑀸𑀤𑁂 𑀓𑀣𑁂𑀲𑀺, 𑀢𑀲𑁆𑀫𑀺𑀫𑁆𑀧𑀺 𑀲𑀝𑁆𑀞𑀺 𑀣𑁂𑀭𑀸. 𑀉𑀧𑁄𑀲𑀣𑀤𑀺𑀯𑀲𑁂 𑀉𑀧𑀭𑀺𑀧𑀸𑀲𑀸𑀤𑁂 𑀓𑀣𑁂𑀲𑀺, 𑀢𑀲𑁆𑀫𑀺𑀫𑁆𑀧𑀺 𑀲𑀝𑁆𑀞𑀺 𑀣𑁂𑀭𑀸𑀢𑀺 𑀏𑀯𑀁 𑀤𑁂𑀯𑀢𑁆𑀣𑁂𑀭𑁂𑀬𑁂𑀯 𑀇𑀤𑀁 𑀲𑀼𑀢𑁆𑀢𑀁 𑀓𑀣𑁂𑀦𑁆𑀢𑁂 𑀲𑀝𑁆𑀞𑀺𑀝𑁆𑀞𑀸𑀦𑁂𑀲𑀼 𑀲𑀝𑁆𑀞𑀺 𑀲𑀝𑁆𑀞𑀺 𑀚𑀦𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸.

𑀅𑀫𑁆𑀩𑀺𑀮𑀓𑀸𑀴𑀓𑀯𑀺𑀳𑀸𑀭𑁂 𑀧𑀦 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑁂 𑀇𑀫𑀁 𑀲𑀼𑀢𑁆𑀢𑀁 𑀓𑀣𑁂𑀦𑁆𑀢𑁂 𑀫𑀦𑀼𑀲𑁆𑀲𑀧𑀭𑀺𑀲𑀸 𑀕𑀸𑀯𑀼𑀢𑀁 𑀅𑀳𑁄𑀲𑀺, 𑀤𑁂𑀯𑀧𑀭𑀺𑀲𑀸 𑀬𑁄𑀚𑀦𑀺𑀓𑀸. 𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀲𑀳𑀲𑁆𑀲𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸, 𑀤𑁂𑀯𑁂𑀲𑀼 𑀧𑀦 𑀢𑀢𑁄 𑀢𑀢𑁄 𑀏𑀓𑁂𑀓𑁄𑀯 𑀧𑀼𑀣𑀼𑀚𑁆𑀚𑀦𑁄 𑀅𑀳𑁄𑀲𑀻𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀙𑀙𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀫𑀳𑀸𑀲𑀴𑀸𑀬𑀢𑀦𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁨𑁮. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀫𑀳𑀸𑀲𑀴𑀸𑀬𑀢𑀦𑀺𑀓𑀲𑀼𑀢𑁆𑀢𑀁. 𑀢𑀢𑁆𑀣 𑀫𑀳𑀸𑀲𑀴𑀸𑀬𑀢𑀦𑀺𑀓𑀦𑁆𑀢𑀺 𑀫𑀳𑀦𑁆𑀢𑀸𑀦𑀁 𑀙𑀦𑁆𑀦𑀁 𑀆𑀬𑀢𑀦𑀸𑀦𑀁 𑀚𑁄𑀢𑀓𑀁 𑀥𑀫𑁆𑀫𑀧𑀭𑀺𑀬𑀸𑀬𑀁.

𑁪𑁨𑁯. 𑀅𑀚𑀸𑀦𑀦𑁆𑀢𑀺 𑀲𑀳𑀯𑀺𑀧𑀲𑁆𑀲𑀦𑁂𑀦 𑀫𑀕𑁆𑀕𑁂𑀦 𑀅𑀚𑀸𑀦𑀦𑁆𑀢𑁄. 𑀉𑀧𑀘𑀬𑀁 𑀕𑀘𑁆𑀙𑀦𑁆𑀢𑀻𑀢𑀺 𑀯𑀼𑀟𑁆𑀠𑀺𑀁 𑀕𑀘𑁆𑀙𑀦𑁆𑀢𑀺, 𑀯𑀲𑀺𑀪𑀸𑀯𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀬𑀺𑀓𑀸𑀢𑀺 𑀧𑀜𑁆𑀘𑀤𑁆𑀯𑀸𑀭𑀺𑀓𑀤𑀭𑀣𑀸. 𑀘𑁂𑀢𑀲𑀺𑀓𑀸𑀢𑀺 𑀫𑀦𑁄𑀤𑁆𑀯𑀸𑀭𑀺𑀓𑀤𑀭𑀣𑀸. 𑀲𑀦𑁆𑀢𑀸𑀧𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁪𑁩𑁦. 𑀓𑀸𑀬𑀲𑀼𑀔𑀦𑁆𑀢𑀺 𑀧𑀜𑁆𑀘𑀤𑁆𑀯𑀸𑀭𑀺𑀓𑀲𑀼𑀔𑀁. 𑀘𑁂𑀢𑁄𑀲𑀼𑀔𑀦𑁆𑀢𑀺 𑀫𑀦𑁄𑀤𑁆𑀯𑀸𑀭𑀺𑀓𑀲𑀼𑀔𑀁. 𑀏𑀢𑁆𑀣 𑀘 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑁂𑀦 𑀲𑀫𑀸𑀧𑀚𑁆𑀚𑀦𑀁 𑀯𑀸 𑀯𑀼𑀝𑁆𑀞𑀸𑀦𑀁 𑀯𑀸 𑀦𑀢𑁆𑀣𑀺, 𑀉𑀧𑁆𑀧𑀦𑁆𑀦𑀫𑀢𑁆𑀢𑀓𑀫𑁂𑀯 𑀳𑁄𑀢𑀺. 𑀫𑀦𑁄𑀤𑁆𑀯𑀸𑀭𑀺𑀓𑁂𑀦 𑀲𑀩𑁆𑀩𑀁 𑀳𑁄𑀢𑀺. 𑀅𑀬𑀜𑁆𑀘 𑀫𑀕𑁆𑀕𑀯𑀼𑀝𑁆𑀞𑀸𑀦𑀲𑁆𑀲 𑀧𑀘𑁆𑀘𑀬𑀪𑀽𑀢𑀸 𑀩𑀮𑀯𑀯𑀺𑀧𑀲𑁆𑀲𑀦𑀸, 𑀲𑀸𑀧𑀺 𑀫𑀦𑁄𑀤𑁆𑀯𑀸𑀭𑀺𑀓𑁂𑀦𑁂𑀯 𑀳𑁄𑀢𑀺.

𑁪𑁩𑁧. 𑀢𑀣𑀸𑀪𑀽𑀢𑀲𑁆𑀲𑀸𑀢𑀺 𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀘𑁂𑀢𑁄𑀲𑀼𑀔𑀲𑀫𑀗𑁆𑀕𑀻𑀪𑀽𑀢𑀲𑁆𑀲. 𑀧𑀼𑀩𑁆𑀩𑁂𑀯 𑀔𑁄 𑀧𑀦𑀲𑁆𑀲𑀸𑀢𑀺 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸 𑀧𑀼𑀩𑁆𑀩𑀲𑀼𑀤𑁆𑀥𑀺𑀓𑀸 𑀦𑀸𑀫 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀭𑀺𑀲𑀼𑀤𑁆𑀥𑀸𑀯 𑀳𑁄𑀦𑁆𑀢𑀺. 𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀺𑀲𑀗𑁆𑀔𑀸𑀢𑀸𑀦𑀺 𑀧𑀦 𑀧𑀜𑁆𑀘𑀗𑁆𑀕𑀸𑀦𑀺 𑀲𑀩𑁆𑀩𑀢𑁆𑀣𑀓𑀓𑀸𑀭𑀸𑀧𑀓𑀗𑁆𑀕𑀸𑀦𑀺 𑀦𑀸𑀫. 𑀏𑀯𑀁 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀅𑀝𑁆𑀞𑀗𑁆𑀕𑀺𑀓𑁄 𑀯𑀸 𑀲𑀢𑁆𑀢𑀗𑁆𑀕𑀺𑀓𑁄 𑀯𑀸 𑀳𑁄𑀢𑀺.

𑀯𑀺𑀢𑀡𑁆𑀟𑀯𑀸𑀤𑀻 𑀧𑀦 ‘‘𑀬𑀸 𑀬𑀣𑀸𑀪𑀽𑀢𑀲𑁆𑀲 𑀤𑀺𑀝𑁆𑀞𑀻’’𑀢𑀺 𑀇𑀫𑀫𑁂𑀯 𑀲𑀼𑀢𑁆𑀢𑀧𑀤𑁂𑀲𑀁 𑀕𑀳𑁂𑀢𑁆𑀯𑀸 ‘‘𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀧𑀜𑁆𑀘𑀗𑁆𑀕𑀺𑀓𑁄’’𑀢𑀺 𑀯𑀤𑀢𑀺. 𑀲𑁄 𑁋 ‘‘𑀏𑀯𑀫𑀲𑁆𑀲𑀸𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀻’’𑀢𑀺 𑀇𑀫𑀺𑀦𑀸 𑀅𑀦𑀦𑁆𑀢𑀭𑀯𑀘𑀦𑁂𑀦𑁂𑀯 𑀧𑀝𑀺𑀲𑁂𑀥𑀺𑀢𑀩𑁆𑀩𑁄. 𑀉𑀢𑁆𑀢𑀭𑀺 𑀘 𑀏𑀯𑀁 𑀲𑀜𑁆𑀜𑀸𑀧𑁂𑀢𑀩𑁆𑀩𑁄 𑁋 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀧𑀜𑁆𑀘𑀗𑁆𑀕𑀺𑀓𑁄 𑀦𑀸𑀫 𑀦𑀢𑁆𑀣𑀺, 𑀇𑀫𑀸𑀦𑀺 𑀧𑀦 𑀧𑀜𑁆𑀘 𑀲𑀩𑁆𑀩𑀢𑁆𑀣𑀓𑀓𑀸𑀭𑀸𑀧𑀓𑀗𑁆𑀕𑀸𑀦𑀺 𑀫𑀕𑁆𑀕𑀓𑁆𑀔𑀡𑁂 𑀯𑀺𑀭𑀢𑀺𑀯𑀲𑁂𑀦 𑀧𑀽𑀭𑁂𑀦𑁆𑀢𑀺. ‘‘𑀬𑀸 𑀘𑀢𑀽𑀳𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀳𑀺 𑀆𑀭𑀢𑀺 𑀯𑀺𑀭𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀯𑀺𑀭𑀢𑀻𑀲𑀼 𑀳𑀺 𑀫𑀺𑀘𑁆𑀙𑀸𑀯𑀸𑀘𑀁 𑀧𑀚𑀳𑀢𑀺, 𑀲𑀫𑁆𑀫𑀸𑀯𑀸𑀘𑀁 𑀪𑀸𑀯𑁂𑀢𑀺, 𑀏𑀯𑀁 𑀲𑀫𑁆𑀫𑀸𑀯𑀸𑀘𑀁 𑀪𑀸𑀯𑁂𑀦𑁆𑀢𑀲𑁆𑀲 𑀇𑀫𑀸𑀦𑀺 𑀧𑀜𑁆𑀘𑀗𑁆𑀕𑀺𑀓𑀸𑀦𑀺 𑀦 𑀯𑀺𑀦𑀸, 𑀲𑀳𑁂𑀯 𑀯𑀺𑀭𑀢𑀺𑀬𑀸 𑀧𑀽𑀭𑁂𑀦𑁆𑀢𑀺. 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀯𑀘𑀻𑀓𑀫𑁆𑀫𑀸𑀤𑀻𑀦𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀭𑀺𑀲𑀼𑀤𑁆𑀥𑀸𑀦𑁂𑀯 𑀯𑀝𑁆𑀝𑀦𑁆𑀢𑀺. 𑀇𑀫𑀸𑀦𑀺 𑀧𑀦 𑀧𑀜𑁆𑀘 𑀲𑀩𑁆𑀩𑀢𑁆𑀣𑀓𑀓𑀸𑀭𑀸𑀧𑀓𑀗𑁆𑀕𑀸𑀦𑀺 𑀯𑀺𑀭𑀢𑀺𑀯𑀲𑁂𑀦 𑀧𑀭𑀺𑀧𑀽𑀭𑁂𑀦𑁆𑀢𑀻𑀢𑀺 𑀧𑀜𑁆𑀘𑀗𑁆𑀕𑀺𑀓𑁄 𑀫𑀕𑁆𑀕𑁄 𑀦𑀸𑀫 𑀦𑀢𑁆𑀣𑀺. 𑀲𑀼𑀪𑀤𑁆𑀤𑀲𑀼𑀢𑁆𑀢𑁂𑀧𑀺 (𑀤𑀻. 𑀦𑀺. 𑁨.𑁨𑁧𑁪) 𑀘𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀬𑀲𑁆𑀫𑀺𑀁 𑀔𑁄, 𑀲𑀼𑀪𑀤𑁆𑀤, 𑀥𑀫𑁆𑀫𑀯𑀺𑀦𑀬𑁂 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄’’𑀢𑀺. 𑀅𑀜𑁆𑀜𑁂𑀲𑀼 𑀘 𑀅𑀦𑁂𑀓𑁂𑀲𑀼 𑀲𑀼𑀢𑁆𑀢𑀲𑀢𑁂𑀲𑀼 𑀅𑀝𑁆𑀞𑀗𑁆𑀕𑀺𑀓𑁄𑀯 𑀫𑀕𑁆𑀕𑁄 𑀆𑀕𑀢𑁄𑀢𑀺.

𑁪𑁩𑁩. 𑀘𑀢𑁆𑀢𑀸𑀭𑁄𑀧𑀺 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀯 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸. 𑀲𑀫𑁆𑀫𑀧𑁆𑀧𑀥𑀸𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀼𑀕𑀦𑀦𑁆𑀥𑀸𑀢𑀺 𑀏𑀓𑀓𑁆𑀔𑀡𑀺𑀓𑀬𑀼𑀕𑀦𑀦𑁆𑀥𑀸. 𑀏𑀢𑁂𑀳𑀺 𑀅𑀜𑁆𑀜𑀲𑁆𑀫𑀺𑀁 𑀔𑀡𑁂 𑀲𑀫𑀸𑀧𑀢𑁆𑀢𑀺, 𑀅𑀜𑁆𑀜𑀲𑁆𑀫𑀺𑀁 𑀯𑀺𑀧𑀲𑁆𑀲𑀦𑀸𑀢𑀺. 𑀏𑀯𑀁 𑀦𑀸𑀦𑀸𑀔𑀡𑀺𑀓𑀸𑀧𑀺 𑀳𑁄𑀦𑁆𑀢𑀺, 𑀅𑀭𑀺𑀬𑀫𑀕𑁆𑀕𑁂 𑀧𑀦 𑀏𑀓𑀓𑁆𑀔𑀡𑀺𑀓𑀸.

𑀯𑀺𑀚𑁆𑀚𑀸 𑀘 𑀯𑀺𑀫𑀼𑀢𑁆𑀢𑀺 𑀘𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀯𑀺𑀚𑁆𑀚𑀸 𑀘 𑀨𑀮𑀯𑀺𑀫𑀼𑀢𑁆𑀢𑀺 𑀘. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀫𑀳𑀸𑀲𑀴𑀸𑀬𑀢𑀦𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀦𑀕𑀭𑀯𑀺𑀦𑁆𑀤𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁩𑁫. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀦𑀕𑀭𑀯𑀺𑀦𑁆𑀤𑁂𑀬𑁆𑀬𑀲𑀼𑀢𑁆𑀢𑀁. 𑀢𑀢𑁆𑀣 𑀲𑀫𑀯𑀺𑀲𑀫𑀁 𑀘𑀭𑀦𑁆𑀢𑀻𑀢𑀺 𑀓𑀸𑀮𑁂𑀦 𑀲𑀫𑀁 𑀘𑀭𑀦𑁆𑀢𑀺, 𑀓𑀸𑀮𑁂𑀦 𑀯𑀺𑀲𑀫𑀁. 𑀲𑀫𑀘𑀭𑀺𑀬𑀫𑁆𑀧𑀺 𑀳𑁂𑀢𑀦𑁆𑀢𑀺 𑀲𑀫𑀘𑀭𑀺𑀬𑀫𑁆𑀧𑀺 𑀳𑀺 𑀏𑀢𑀁.

𑁪𑁩𑁭. 𑀓𑁂 𑀆𑀓𑀸𑀭𑀸𑀢𑀺 𑀓𑀸𑀦𑀺 𑀓𑀸𑀭𑀡𑀸𑀦𑀺? 𑀓𑁂 𑀅𑀦𑁆𑀯𑀬𑀸𑀢𑀺 𑀓𑀸 𑀅𑀦𑀼𑀩𑀼𑀤𑁆𑀥𑀺𑀬𑁄? 𑀦𑀢𑁆𑀣𑀺 𑀔𑁄 𑀧𑀦 𑀢𑀢𑁆𑀣𑀸𑀢𑀺 𑀓𑀲𑁆𑀫𑀸 𑀆𑀳, 𑀦𑀦𑀼 𑀅𑀭𑀜𑁆𑀜𑁂 𑀳𑀭𑀺𑀢𑀢𑀺𑀡𑀘𑀫𑁆𑀧𑀓𑀯𑀦𑀸𑀤𑀺𑀯𑀲𑁂𑀦 𑀅𑀢𑀺𑀫𑀦𑀼𑀜𑁆𑀜𑀸 𑀭𑀽𑀧𑀸𑀤𑀬𑁄 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀅𑀢𑁆𑀣𑀻𑀢𑀺? 𑀦𑁄 𑀦𑀢𑁆𑀣𑀺. 𑀦 𑀧𑀦𑁂𑀢𑀁 𑀯𑀦𑀲𑀡𑁆𑀟𑁂𑀦 𑀓𑀣𑀺𑀢𑀁, 𑀇𑀢𑁆𑀣𑀺𑀭𑀽𑀧𑀸𑀤𑀻𑀦𑀺 𑀧𑀦 𑀲𑀦𑁆𑀥𑀸𑀬𑁂𑀢𑀁 𑀓𑀣𑀺𑀢𑀁. 𑀢𑀸𑀦𑀺 𑀳𑀺 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀺. 𑀬𑀣𑀸𑀳 𑁋 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀭𑀽𑀧𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀁 𑀏𑀯𑀁 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺, 𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀇𑀢𑁆𑀣𑀺𑀭𑀽𑀧𑀁. 𑀇𑀢𑁆𑀣𑀺𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻’’𑀢𑀺 (𑀅. 𑀦𑀺. 𑁧.𑁧) 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀦𑀕𑀭𑀯𑀺𑀦𑁆𑀤𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀺𑀡𑁆𑀟𑀧𑀸𑀢𑀧𑀸𑀭𑀺𑀲𑀼𑀤𑁆𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁩𑁮. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀧𑀺𑀡𑁆𑀟𑀧𑀸𑀢𑀧𑀸𑀭𑀺𑀲𑀼𑀤𑁆𑀥𑀺𑀲𑀼𑀢𑁆𑀢𑀁. 𑀢𑀢𑁆𑀣 𑀧𑀝𑀺𑀲𑀮𑁆𑀮𑀸𑀦𑀸𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀢𑁄.

𑀯𑀺𑀧𑁆𑀧𑀲𑀦𑁆𑀦𑀸𑀦𑀻𑀢𑀺 𑀑𑀓𑀸𑀲𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀳𑀺 𑀯𑀼𑀝𑁆𑀞𑀺𑀢𑀲𑁆𑀲 𑀧𑀜𑁆𑀘𑀳𑀺 𑀧𑀲𑀸𑀤𑁂𑀳𑀺 𑀧𑀢𑀺𑀝𑁆𑀞𑀺𑀢𑁄𑀓𑀸𑀲𑁄 𑀯𑀺𑀧𑁆𑀧𑀲𑀦𑁆𑀦𑁄 𑀳𑁄𑀢𑀺, 𑀙𑀯𑀺𑀯𑀡𑁆𑀡𑁄 𑀧𑀭𑀺𑀲𑀼𑀤𑁆𑀥𑁄. 𑀢𑀲𑁆𑀫𑀸 𑀏𑀯𑀫𑀸𑀳. 𑀲𑀼𑀜𑁆𑀜𑀢𑀯𑀺𑀳𑀸𑀭𑁂𑀦𑀸𑀢𑀺 𑀲𑀼𑀜𑁆𑀜𑀢𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑁂𑀦. 𑀫𑀳𑀸𑀧𑀼𑀭𑀺𑀲𑀯𑀺𑀳𑀸𑀭𑁄𑀢𑀺 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑀢𑀣𑀸𑀕𑀢𑀫𑀳𑀸𑀲𑀸𑀯𑀓𑀸𑀦𑀁 𑀫𑀳𑀸𑀧𑀼𑀭𑀺𑀲𑀸𑀦𑀁 𑀯𑀺𑀳𑀸𑀭𑁄. 𑀬𑁂𑀦 𑀘𑀸𑀳𑀁 𑀫𑀕𑁆𑀕𑁂𑀦𑀸𑀢𑀺𑀆𑀤𑀻𑀲𑀼 𑀯𑀺𑀳𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀕𑀸𑀫𑀲𑁆𑀲 𑀇𑀦𑁆𑀤𑀔𑀻𑀮𑀸 𑀏𑀲 𑀧𑀯𑀺𑀝𑁆𑀞𑀫𑀕𑁆𑀕𑁄 𑀦𑀸𑀫, 𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀕𑁂𑀳𑀧𑀝𑀺𑀧𑀸𑀝𑀺𑀬𑀸 𑀘𑀭𑀺𑀢𑁆𑀯𑀸 𑀬𑀸𑀯 𑀦𑀕𑀭𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀦𑀸 𑀏𑀲 𑀘𑀭𑀺𑀢𑀩𑁆𑀩𑀧𑀤𑁂𑀲𑁄 𑀦𑀸𑀫, 𑀩𑀳𑀺 𑀇𑀦𑁆𑀤𑀔𑀻𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀯𑀺𑀳𑀸𑀭𑀸 𑀏𑀲 𑀧𑀝𑀺𑀓𑁆𑀓𑀦𑁆𑀢𑀫𑀕𑁆𑀕𑁄 𑀦𑀸𑀫. 𑀧𑀝𑀺𑀖𑀁 𑀯𑀸𑀧𑀺 𑀘𑁂𑀢𑀲𑁄𑀢𑀺 𑀘𑀺𑀢𑁆𑀢𑁂 𑀧𑀝𑀺𑀳𑀜𑁆𑀜𑀦𑀓𑀺𑀮𑁂𑀲𑀚𑀸𑀢𑀁 𑀓𑀺𑀜𑁆𑀘𑀺 𑀅𑀢𑁆𑀣𑀺 𑀦𑀢𑁆𑀣𑀻𑀢𑀺. 𑀅𑀳𑁄𑀭𑀢𑁆𑀢𑀸𑀦𑀼𑀲𑀺𑀓𑁆𑀔𑀺𑀦𑀸𑀢𑀺 𑀤𑀺𑀯𑀲𑀜𑁆𑀘 𑀭𑀢𑁆𑀢𑀺𑀜𑁆𑀘 𑀅𑀦𑀼𑀲𑀺𑀓𑁆𑀔𑀦𑁆𑀢𑁂𑀦.

𑁪𑁪𑁦. 𑀧𑀳𑀻𑀦𑀸 𑀦𑀼 𑀔𑁄 𑀫𑁂 𑀧𑀜𑁆𑀘 𑀓𑀸𑀫𑀕𑀼𑀡𑀸𑀢𑀺𑀆𑀤𑀻𑀲𑀼 𑀏𑀓𑀪𑀺𑀓𑁆𑀔𑀼𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀸𑀦𑀸, 𑀦𑀸𑀦𑀸𑀪𑀺𑀓𑁆𑀔𑀽𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀸𑀦𑀸𑀢𑀺. 𑀓𑀣𑀁? 𑀏𑀓𑁄 𑀳𑀺 𑀪𑀺𑀓𑁆𑀔𑀼 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀧𑀢𑁆𑀢𑀘𑀻𑀯𑀭𑀁 𑀧𑀝𑀺𑀲𑀸𑀫𑁂𑀢𑁆𑀯𑀸 𑀯𑀺𑀯𑀺𑀢𑁆𑀢𑁄𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀧𑀘𑁆𑀘𑀯𑁂𑀓𑁆𑀔𑀢𑀺 ‘‘𑀧𑀳𑀻𑀦𑀸 𑀦𑀼 𑀔𑁄 𑀫𑁂 𑀧𑀜𑁆𑀘𑀓𑀸𑀫𑀕𑀼𑀡𑀸’’𑀢𑀺. 𑀲𑁄 ‘‘𑀅𑀧𑁆𑀧𑀳𑀻𑀦𑀸’’𑀢𑀺 𑀜𑀢𑁆𑀯𑀸 𑀯𑀻𑀭𑀺𑀬𑀁 𑀧𑀕𑁆𑀕𑀬𑁆𑀳 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀁 𑀲𑀫𑀼𑀕𑁆𑀖𑀸𑀝𑁂𑀢𑁆𑀯𑀸 𑀫𑀕𑁆𑀕𑀸𑀦𑀦𑁆𑀢𑀭𑀁 𑀨𑀮𑀁 𑀨𑀮𑀸𑀦𑀦𑁆𑀢𑀭𑀁 𑀫𑀕𑁆𑀕𑀁 𑀢𑀢𑁄 𑀯𑀼𑀝𑁆𑀞𑀸𑀬 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 ‘‘𑀧𑀳𑀻𑀦𑀸’’𑀢𑀺 𑀧𑀚𑀸𑀦𑀸𑀢𑀺. 𑀦𑀻𑀯𑀭𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁂𑀲𑀁 𑀧𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀧𑀳𑀸𑀦𑀸𑀤𑀻𑀦𑀺 𑀳𑁄𑀦𑁆𑀢𑀺, 𑀏𑀯𑀁 𑀏𑀓𑀪𑀺𑀓𑁆𑀔𑀼𑀲𑁆𑀲 𑀦𑀸𑀦𑀸𑀧𑀘𑁆𑀘𑀯𑁂𑀓𑁆𑀔𑀡𑀸 𑀳𑁄𑀢𑀺. 𑀏𑀢𑀸𑀲𑀼 𑀧𑀦 𑀧𑀘𑁆𑀘𑀯𑁂𑀓𑁆𑀔𑀡𑀸𑀲𑀼 𑀅𑀜𑁆𑀜𑁄 𑀪𑀺𑀓𑁆𑀔𑀼 𑀏𑀓𑀁 𑀧𑀘𑁆𑀘𑀯𑁂𑀓𑁆𑀔𑀡𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀅𑀜𑁆𑀜𑁄 𑀏𑀓𑀦𑁆𑀢𑀺 𑀏𑀯𑀁 𑀦𑀸𑀦𑀸𑀪𑀺𑀓𑁆𑀔𑀽𑀦𑀁 𑀦𑀸𑀦𑀸𑀧𑀘𑁆𑀘𑀯𑁂𑀓𑁆𑀔𑀡𑀸 𑀳𑁄𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀧𑀺𑀡𑁆𑀟𑀧𑀸𑀢𑀧𑀸𑀭𑀺𑀲𑀼𑀤𑁆𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁫𑁩. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸𑀲𑀼𑀢𑁆𑀢𑀁. 𑀢𑀢𑁆𑀣 𑀕𑀚𑀗𑁆𑀕𑀮𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀺𑀕𑀫𑁂. 𑀲𑀼𑀯𑁂𑀴𑀼𑀯𑀦𑁂𑀢𑀺 𑀲𑀼𑀯𑁂𑀴𑀼 𑀦𑀸𑀫 𑀏𑀓𑀸 𑀭𑀼𑀓𑁆𑀔𑀚𑀸𑀢𑀺, 𑀢𑁂𑀳𑀺 𑀲𑀜𑁆𑀙𑀦𑁆𑀦𑁄 𑀫𑀳𑀸𑀯𑀦𑀲𑀡𑁆𑀟𑁄, 𑀢𑀢𑁆𑀣 𑀯𑀺𑀳𑀭𑀢𑀺. 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀦 𑀧𑀲𑁆𑀲𑀢𑀺, 𑀲𑁄𑀢𑁂𑀦 𑀲𑀤𑁆𑀤𑀁 𑀦 𑀲𑀼𑀡𑀸𑀢𑀻𑀢𑀺 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀦 𑀧𑀲𑁆𑀲𑀺𑀢𑀩𑁆𑀩𑀁, 𑀲𑁄𑀢𑁂𑀦 𑀲𑀤𑁆𑀤𑁄 𑀦 𑀲𑁄𑀢𑀩𑁆𑀩𑁄𑀢𑀺 𑀏𑀯𑀁 𑀤𑁂𑀲𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺.

𑀅𑀜𑁆𑀜𑀣𑀸 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂𑀢𑀺 𑀇𑀫𑀺𑀦𑀸 𑀪𑀕𑀯𑀸 𑀅𑀢𑁆𑀢𑀦𑁄 𑀲𑀸𑀲𑀦𑁂 𑀅𑀲𑀤𑀺𑀲𑀸𑀬 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸𑀬 𑀓𑀣𑀦𑀢𑁆𑀣𑀁 𑀆𑀮𑀬𑀁 𑀅𑀓𑀸𑀲𑀺. 𑀅𑀣𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑁋 ‘‘𑀲𑀢𑁆𑀣𑀸 𑀆𑀮𑀬𑀁 𑀤𑀲𑁆𑀲𑁂𑀢𑀺, 𑀳𑀦𑁆𑀤𑀸𑀳𑀁 𑀇𑀫𑀺𑀲𑁆𑀲𑀁 𑀧𑀭𑀺𑀲𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸𑀓𑀣𑀁 𑀓𑀸𑀭𑁂𑀫𑀻’’𑀢𑀺 𑀲𑀢𑁆𑀣𑀸𑀭𑀁 𑀬𑀸𑀘𑀦𑁆𑀢𑁄 𑀏𑀢𑀲𑁆𑀲 𑀪𑀕𑀯𑀸𑀢𑀺𑀆𑀤𑀺𑀫𑀸𑀳. 𑀅𑀣𑀲𑁆𑀲 𑀪𑀕𑀯𑀸 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀁 𑀓𑀣𑁂𑀦𑁆𑀢𑁄 𑀢𑁂𑀦 𑀳𑀸𑀦𑀦𑁆𑀤𑀸𑀢𑀺𑀆𑀤𑀺𑀫𑀸𑀳.

𑁪𑁫𑁪. 𑀢𑀣 𑀬𑀤𑀺𑀤𑀁 𑀉𑀧𑁂𑀓𑁆𑀔𑀸𑀢𑀺 𑀬𑀸 𑀏𑀲𑀸 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸 𑀦𑀸𑀫, 𑀏𑀲𑀸 𑀲𑀦𑁆𑀢𑀸 𑀏𑀲𑀸 𑀧𑀡𑀻𑀢𑀸, 𑀅𑀢𑀧𑁆𑀧𑀺𑀓𑀸𑀢𑀺 𑀅𑀢𑁆𑀣𑁄. 𑀇𑀢𑀺 𑀅𑀬𑀁 𑀪𑀺𑀓𑁆𑀔𑀼 𑀘𑀓𑁆𑀔𑀼𑀤𑁆𑀯𑀸𑀭𑁂 𑀭𑀽𑀧𑀸𑀭𑀫𑁆𑀫𑀡𑀫𑁆𑀧𑀺 𑀇𑀝𑁆𑀞𑁂 𑀆𑀭𑀫𑁆𑀫𑀡𑁂 𑀫𑀦𑀸𑀧𑀁, 𑀅𑀦𑀺𑀝𑁆𑀞𑁂 𑀅𑀫𑀦𑀸𑀧𑀁, 𑀫𑀚𑁆𑀛𑀢𑁆𑀢𑁂 𑀫𑀦𑀸𑀧𑀸𑀫𑀦𑀸𑀧𑀜𑁆𑀘 𑀘𑀺𑀢𑁆𑀢𑀁, 𑀢𑀲𑁆𑀲 𑀭𑀚𑁆𑀚𑀺𑀢𑀼𑀁 𑀯𑀸 𑀤𑀼𑀲𑁆𑀲𑀺𑀢𑀼𑀁 𑀯𑀸 𑀫𑀼𑀬𑁆𑀳𑀺𑀢𑀼𑀁 𑀯𑀸 𑀅𑀤𑀢𑁆𑀯𑀸𑀯 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀫𑀚𑁆𑀛𑀢𑁆𑀢𑁂 𑀞𑀧𑁂𑀢𑀺. 𑀘𑀓𑁆𑀔𑀼𑀫𑀸𑀢𑀺 𑀲𑀫𑁆𑀧𑀦𑁆𑀦𑀘𑀓𑁆𑀔𑀼𑀯𑀺𑀲𑀼𑀤𑁆𑀥𑀦𑁂𑀢𑁆𑀢𑁄. 𑀘𑀓𑁆𑀔𑀸𑀩𑀸𑀥𑀺𑀓𑀲𑁆𑀲 𑀳𑀺 𑀉𑀤𑁆𑀥𑀁 𑀉𑀫𑁆𑀫𑀻𑀮𑀦𑀦𑀺𑀫𑁆𑀫𑀻𑀮𑀦𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀲𑁄 𑀦 𑀕𑀳𑀺𑀢𑁄.

𑁪𑁫𑁬. 𑀈𑀲𑀓𑀁𑀧𑁄𑀡𑁂𑀢𑀺 𑀭𑀣𑀻𑀲𑀸 𑀯𑀺𑀬 𑀉𑀝𑁆𑀞𑀳𑀺𑀢𑁆𑀯𑀸 𑀞𑀺𑀢𑁂.

𑁪𑁬𑁧. 𑀧𑀝𑀺𑀓𑀽𑀮𑁂 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻𑀢𑀺𑀆𑀤𑀻𑀲𑀼 𑀧𑀝𑀺𑀓𑀽𑀮𑁂 𑀫𑁂𑀢𑁆𑀢𑀸𑀨𑀭𑀡𑁂𑀦 𑀯𑀸 𑀥𑀸𑀢𑀼𑀲𑁄 𑀉𑀧𑀲𑀁𑀳𑀸𑀭𑁂𑀦 𑀯𑀸 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺. 𑀅𑀧𑁆𑀧𑀝𑀺𑀓𑀽𑀮𑁂 𑀅𑀲𑀼𑀪𑀨𑀭𑀡𑁂𑀦 𑀯𑀸 𑀅𑀦𑀺𑀘𑁆𑀘𑀢𑁄 𑀉𑀧𑀲𑀁𑀳𑀸𑀭𑁂𑀦 𑀯𑀸 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸𑀢𑀺 𑀫𑀚𑁆𑀛𑀢𑁆𑀢𑁄 𑀳𑀼𑀢𑁆𑀯𑀸 𑀯𑀺𑀳𑀭𑀺𑀢𑀼𑀓𑀸𑀫𑁄 𑀓𑀺𑀁 𑀓𑀭𑁄𑀢𑀻𑀢𑀺? 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀆𑀧𑀸𑀣𑀕𑀢𑁂𑀲𑀼 𑀦𑁂𑀯 𑀲𑁄𑀫𑀦𑀲𑁆𑀲𑀺𑀓𑁄 𑀦 𑀤𑁄𑀫𑀦𑀲𑁆𑀲𑀺𑀓𑁄 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀓𑀣𑀁 𑀧𑀝𑀺𑀓𑀽𑀮𑁂 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺? 𑀅𑀦𑀺𑀝𑁆𑀞𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀫𑁂𑀢𑁆𑀢𑀸𑀬 𑀯𑀸 𑀨𑀭𑀢𑀺, 𑀥𑀸𑀢𑀼𑀢𑁄 𑀯𑀸 𑀉𑀧𑀲𑀁𑀳𑀭𑀢𑀺, 𑀏𑀯𑀁 𑀧𑀝𑀺𑀓𑀽𑀮𑁂 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺. 𑀓𑀣𑀁 𑀅𑀧𑁆𑀧𑀝𑀺𑀓𑀽𑀮𑁂 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺? 𑀇𑀝𑁆𑀞𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀲𑀼𑀪𑀸𑀬 𑀯𑀸 𑀨𑀭𑀢𑀺, 𑀅𑀦𑀺𑀘𑁆𑀘𑀢𑁄 𑀯𑀸 𑀉𑀧𑀲𑀁𑀳𑀭𑀢𑀺, 𑀏𑀯𑀁 𑀅𑀧𑁆𑀧𑀝𑀺𑀓𑀽𑀮𑁂 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺. 𑀓𑀣𑀁 𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺? 𑀅𑀦𑀺𑀝𑁆𑀞𑀲𑁆𑀫𑀺𑀜𑁆𑀘 𑀇𑀝𑁆𑀞𑀲𑁆𑀫𑀺𑀜𑁆𑀘 𑀯𑀢𑁆𑀣𑀼𑀲𑁆𑀫𑀺𑀁 𑀫𑁂𑀢𑁆𑀢𑀸𑀬 𑀯𑀸 𑀨𑀭𑀢𑀺, 𑀥𑀸𑀢𑀼𑀢𑁄 𑀯𑀸 𑀉𑀧𑀲𑀁𑀳𑀭𑀢𑀺. 𑀏𑀯𑀁 𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺. 𑀓𑀣𑀁 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺? 𑀇𑀝𑁆𑀞𑀲𑁆𑀫𑀺𑀜𑁆𑀘 𑀅𑀦𑀺𑀝𑁆𑀞𑀲𑁆𑀫𑀺𑀜𑁆𑀘 𑀯𑀢𑁆𑀣𑀼𑀲𑁆𑀫𑀺𑀁 𑀅𑀲𑀼𑀪𑀸𑀬 𑀯𑀸 𑀨𑀭𑀢𑀺, 𑀅𑀦𑀺𑀘𑁆𑀘𑀢𑁄 𑀯𑀸 𑀉𑀧𑀲𑀁𑀳𑀭𑀢𑀺, 𑀏𑀯𑀁 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺. 𑀓𑀣𑀁 𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄? 𑀇𑀥 𑀪𑀺𑀓𑁆𑀔𑀼 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀦 𑀤𑀼𑀫𑁆𑀫𑀦𑁄, 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄…𑀧𑁂… 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀺 𑀦 𑀤𑀼𑀫𑁆𑀫𑀦𑁄, 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄. 𑀏𑀯𑀁 𑀧𑀝𑀺𑀓𑀽𑀮𑁂 𑀘 𑀅𑀧𑁆𑀧𑀝𑀺𑀓𑀽𑀮𑁂 𑀘 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄’’𑀢𑀺.

𑀇𑀫𑁂𑀲𑀼 𑀘 𑀢𑀻𑀲𑀼 𑀦𑀬𑁂𑀲𑀼 𑀧𑀞𑀫𑀦𑀬𑁂 𑀫𑀦𑀸𑀧𑀁 𑀅𑀫𑀦𑀸𑀧𑀁 𑀫𑀦𑀸𑀧𑀸𑀫𑀦𑀸𑀧𑀦𑁆𑀢𑀺 𑀲𑀁𑀓𑀺𑀮𑁂𑀲𑀁 𑀯𑀝𑁆𑀝𑀢𑀺, 𑀦𑀺𑀓𑁆𑀓𑀺𑀮𑁂𑀲𑀁 𑀯𑀝𑁆𑀝𑀢𑀺. 𑀤𑀼𑀢𑀺𑀬𑀦𑀬𑁂 𑀲𑀁𑀓𑀺𑀮𑁂𑀲𑀁, 𑀢𑀢𑀺𑀬𑀦𑀬𑁂 𑀲𑀁𑀓𑀺𑀮𑁂𑀲𑀦𑀺𑀓𑁆𑀓𑀺𑀮𑁂𑀲𑀁 𑀯𑀝𑁆𑀝𑀢𑀺. 𑀧𑀼𑀦 𑀯𑀼𑀢𑁆𑀢𑀁 𑁋 ‘‘𑀧𑀞𑀫𑀁 𑀲𑀁𑀓𑀺𑀮𑁂𑀲𑀁 𑀯𑀝𑁆𑀝𑀢𑀺, 𑀤𑀼𑀢𑀺𑀬𑀁 𑀲𑀁𑀓𑀺𑀮𑁂𑀲𑀫𑁆𑀧𑀺 𑀦𑀺𑀓𑁆𑀓𑀺𑀮𑁂𑀲𑀫𑁆𑀧𑀺, 𑀢𑀢𑀺𑀬𑀁 𑀦𑀺𑀓𑁆𑀓𑀺𑀮𑁂𑀲𑀫𑁂𑀯 𑀯𑀝𑁆𑀝𑀢𑀻’’𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬

𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀘𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀭𑀺𑀧𑀡𑁆𑀡𑀸𑀲𑀝𑁆𑀞𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀬𑁄 𑀘𑀸𑀬𑀁 ‘‘𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑀺𑀲𑁆𑀲𑀸𑀫𑀻’’𑀢𑀺 𑀆𑀭𑀤𑁆𑀥𑀢𑁆𑀢𑀸 𑀆𑀤𑀺𑀓𑀮𑁆𑀬𑀸𑀡𑁄, 𑀫𑀚𑁆𑀛𑁂 ‘‘𑀲𑀼𑀢𑁆𑀢𑀁 𑀕𑁂𑀬𑁆𑀬𑀁 𑀯𑁂𑀬𑁆𑀬𑀸𑀓𑀭𑀡𑀁 𑀕𑀸𑀣𑀸 𑀉𑀤𑀸𑀦𑀁 𑀇𑀢𑀺𑀯𑀼𑀢𑁆𑀢𑀓𑀁 𑀚𑀸𑀢𑀓𑀁 𑀅𑀩𑁆𑀪𑀼𑀢𑀥𑀫𑁆𑀫𑀁 𑀯𑁂𑀤𑀮𑁆𑀮’’𑀦𑁆𑀢𑀺 𑀯𑀘𑀦𑀢𑁄 𑀫𑀚𑁆𑀛𑁂𑀓𑀮𑁆𑀬𑀸𑀡𑁄, 𑀲𑀦𑁆𑀦𑀺𑀝𑁆𑀞𑀸𑀦𑁂 ‘‘𑀅𑀭𑀺𑀬𑁄 𑀪𑀸𑀯𑀺𑀢𑀺𑀦𑁆𑀤𑁆𑀭𑀺𑀬𑁄’’𑀢𑀺 𑀯𑀘𑀦𑀢𑁄 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑁄𑀢𑀺 𑀢𑀺𑀯𑀺𑀥𑀓𑀮𑁆𑀬𑀸𑀡𑁄 𑀫𑀚𑁆𑀛𑀺𑀫𑀦𑀺𑀓𑀸𑀬𑁄 ‘‘𑀫𑀳𑀸𑀯𑀺𑀧𑀲𑁆𑀲𑀦𑀸 𑀦𑀸𑀫𑀸𑀬’’𑀦𑁆𑀢𑀺 𑀯𑀼𑀢𑁆𑀢𑁄, 𑀲𑁄 𑀯𑀡𑁆𑀡𑀦𑀸𑀯𑀲𑁂𑀦 𑀲𑀫𑀢𑁆𑀢𑁄 𑀳𑁄𑀢𑀺.

𑀦𑀺𑀕𑀫𑀦𑀓𑀣𑀸

𑀏𑀢𑁆𑀢𑀸𑀯𑀢𑀸 𑀘 𑁋

𑀆𑀬𑀸𑀘𑀺𑀢𑁄 𑀲𑀼𑀫𑀢𑀺𑀦𑀸 𑀣𑁂𑀭𑁂𑀦 𑀪𑀤𑀦𑁆𑀢𑀩𑀼𑀤𑁆𑀥𑀫𑀺𑀢𑁆𑀢𑁂𑀦,

𑀧𑀼𑀩𑁆𑀩𑁂 𑀫𑀬𑀽𑀭𑀤𑀽𑀢𑀧𑀝𑁆𑀝𑀦𑀫𑁆𑀳𑀺 𑀲𑀤𑁆𑀥𑀺𑀁 𑀦𑀺𑀯𑀲𑀦𑁆𑀢𑁂𑀦.

𑀧𑀭𑀯𑀸𑀤𑀯𑀺𑀥𑀁𑀲𑀦𑀲𑁆𑀲 𑀫𑀚𑁆𑀛𑀺𑀫𑀦𑀺𑀓𑀸𑀬𑀲𑁂𑀝𑁆𑀞𑀲𑁆𑀲,

𑀬𑀫𑀳𑀁 𑀧𑀧𑀜𑁆𑀘𑀲𑀽𑀤𑀦𑀺𑀫𑀝𑁆𑀞𑀓𑀣𑀁 𑀓𑀸𑀢𑀼𑀫𑀸𑀭𑀪𑀺𑀁.

𑀲𑀸 𑀳𑀺 𑀫𑀳𑀸𑀅𑀝𑁆𑀞𑀓𑀣𑀸𑀬 𑀲𑀸𑀭𑀫𑀸𑀤𑀸𑀬 𑀦𑀺𑀝𑁆𑀞𑀺𑀢𑀸 𑀏𑀲𑀸,

𑀲𑀢𑁆𑀢𑀼𑀢𑁆𑀢𑀭𑀲𑀢𑀫𑀢𑁆𑀢𑀸𑀬 𑀧𑀸𑀴𑀺𑀬𑀸 𑀪𑀸𑀡𑀯𑀸𑀭𑁂𑀳𑀺.

𑀏𑀓𑀽𑀦𑀲𑀝𑁆𑀞𑀺𑀫𑀢𑁆𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄𑀧𑀺 𑀪𑀸𑀡𑀯𑀸𑀭𑁂𑀳𑀺,

𑀅𑀢𑁆𑀣𑀧𑁆𑀧𑀓𑀸𑀲𑀦𑀢𑁆𑀣𑀸𑀬 𑀆𑀕𑀫𑀸𑀦𑀁 𑀓𑀢𑁄 𑀬𑀲𑁆𑀫𑀸.

𑀢𑀲𑁆𑀫𑀸 𑀢𑁂𑀦 𑀲𑀳𑀸’𑀬𑀁 𑀕𑀸𑀣𑀸𑀕𑀡𑀦𑀸𑀦𑀬𑁂𑀦 𑀅𑀝𑁆𑀞𑀓𑀣𑀸,

𑀲𑀫𑀥𑀺𑀓𑀙𑀲𑀝𑁆𑀞𑀺𑀲𑀢𑀫𑀺𑀢𑀺 𑀯𑀺𑀜𑁆𑀜𑁂𑀬𑁆𑀬𑀸 𑀪𑀸𑀡𑀯𑀸𑀭𑀸𑀦𑀁.

𑀲𑀫𑀥𑀺𑀓𑀙𑀲𑀝𑁆𑀞𑀺𑀲𑀢𑀧𑀫𑀸𑀡𑀫𑀺𑀢𑀺 𑀪𑀸𑀡𑀯𑀸𑀭𑀢𑁄 𑀏𑀲𑀸,

𑀲𑀫𑀬𑀁 𑀧𑀓𑀸𑀲𑀬𑀦𑁆𑀢𑀻 𑀫𑀳𑀸𑀯𑀺𑀳𑀸𑀭𑀸𑀥𑀺𑀯𑀸𑀲𑀻𑀦𑀁.

𑀫𑀽𑀮𑀝𑁆𑀞𑀓𑀣𑀸𑀲𑀸𑀭𑀁 𑀆𑀤𑀸𑀬 𑀫𑀬𑀸 𑀇𑀫𑀁 𑀓𑀭𑁄𑀦𑁆𑀢𑁂𑀦,

𑀬𑀁 𑀧𑀜𑁆𑀜𑀫𑀼𑀧𑀘𑀺𑀢𑀁 𑀢𑁂𑀦 𑀳𑁄𑀢𑀼 𑀮𑁄𑀓𑁄 𑀲𑀤𑀸 𑀲𑀼𑀔𑀺𑀢𑁄𑀢𑀺.

𑀧𑀭𑀫𑀯𑀺𑀲𑀼𑀤𑁆𑀥𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀻𑀭𑀺𑀬𑀧𑁆𑀧𑀝𑀺𑀫𑀡𑁆𑀟𑀺𑀢𑁂𑀦 𑀲𑀻𑀮𑀸𑀘𑀸𑀭𑀚𑁆𑀚𑀯𑀫𑀤𑁆𑀤𑀯𑀸𑀤𑀺𑀕𑀼𑀡𑀲𑀫𑀼𑀤𑀬𑀲𑀫𑀼𑀤𑀺𑀢𑁂𑀦 𑀲𑀓𑀲𑀫𑀬𑀲𑀫𑀬𑀦𑁆𑀢𑀭𑀕𑀳𑀦𑀚𑁆𑀛𑁄𑀕𑀸𑀳𑀦𑀲𑀫𑀢𑁆𑀣𑁂𑀦 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀲𑀫𑀦𑁆𑀦𑀸𑀕𑀢𑁂𑀦 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀧𑁆𑀧𑀪𑁂𑀤𑁂 𑀲𑀸𑀝𑁆𑀞𑀓𑀣𑁂 𑀲𑀢𑁆𑀣𑀼 𑀲𑀸𑀲𑀦𑁂 𑀅𑀧𑁆𑀧𑀝𑀺𑀳𑀢𑀜𑀸𑀡𑀧𑁆𑀧𑀪𑀸𑀯𑁂𑀦 𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁂𑀦 𑀓𑀭𑀡𑀲𑀫𑁆𑀧𑀢𑁆𑀢𑀺𑀚𑀦𑀺𑀢𑀲𑀼𑀔𑀯𑀺𑀦𑀺𑀕𑁆𑀕𑀢𑀫𑀥𑀼𑀭𑁄𑀤𑀸𑀭𑀯𑀘𑀦𑀮𑀸𑀯𑀡𑁆𑀡𑀬𑀼𑀢𑁆𑀢𑁂𑀦 𑀬𑀼𑀢𑁆𑀢𑀫𑀼𑀢𑁆𑀢𑀯𑀸𑀤𑀺𑀦𑀸 𑀯𑀸𑀤𑀻𑀯𑀭𑁂𑀦 𑀫𑀳𑀸𑀓𑀯𑀺𑀦𑀸 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑀸𑀧𑀭𑀺𑀯𑀸𑀭𑁂 𑀙𑀴𑀪𑀺𑀜𑁆𑀜𑀸𑀤𑀺𑀧𑁆𑀧𑀪𑁂𑀤𑀕𑀼𑀡𑀧𑁆𑀧𑀝𑀺𑀫𑀡𑁆𑀟𑀺𑀢𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀩𑀼𑀤𑁆𑀥𑀻𑀦𑀁 𑀣𑁂𑀭𑀯𑀁𑀲𑀧𑁆𑀧𑀤𑀻𑀧𑀸𑀦𑀁 𑀣𑁂𑀭𑀸𑀦𑀁 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀯𑀁𑀲𑀸𑀮𑀗𑁆𑀓𑀸𑀭𑀪𑀽𑀢𑁂𑀦 𑀯𑀺𑀧𑀼𑀮𑀯𑀺𑀲𑀼𑀤𑁆𑀥𑀩𑀼𑀤𑁆𑀥𑀺𑀦𑀸 𑀩𑀼𑀤𑁆𑀥𑀖𑁄𑀲𑁄𑀢𑀺 𑀕𑀭𑀽𑀳𑀺 𑀕𑀳𑀺𑀢𑀦𑀸𑀫𑀥𑁂𑀬𑁆𑀬𑁂𑀦 𑀣𑁂𑀭𑁂𑀦 𑀓𑀢𑀸 𑀅𑀬𑀁 𑀧𑀧𑀜𑁆𑀘𑀲𑀽𑀤𑀦𑀻 𑀦𑀸𑀫 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸 𑁋

𑀢𑀸𑀯 𑀢𑀺𑀝𑁆𑀞𑀢𑀼 𑀮𑁄𑀓𑀲𑁆𑀫𑀺𑀁, 𑀮𑁄𑀓𑀦𑀺𑀢𑁆𑀣𑀭𑀡𑁂𑀲𑀺𑀦𑀁;

𑀤𑀲𑁆𑀲𑁂𑀦𑁆𑀢𑀻 𑀓𑀼𑀮𑀧𑀼𑀢𑁆𑀢𑀸𑀦𑀁, 𑀦𑀬𑀁 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺𑀬𑀸.

𑀩𑀼𑀤𑁆𑀥𑁄𑀢𑀺 𑀦𑀸𑀫𑀫𑁆𑀧𑀺, 𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀢𑀸𑀤𑀺𑀦𑁄;

𑀮𑁄𑀓𑀫𑁆𑀳𑀺 𑀮𑁄𑀓𑀚𑁂𑀝𑁆𑀞𑀲𑁆𑀲, 𑀧𑀯𑀢𑁆𑀢𑀢𑀺 𑀫𑀳𑁂𑀲𑀺𑀦𑁄𑀢𑀺.

𑀧𑀧𑀜𑁆𑀘𑀲𑀽𑀤𑀦𑀻 𑀦𑀸𑀫

𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸 𑀲𑀩𑁆𑀩𑀸𑀓𑀸𑀭𑁂𑀦 𑀦𑀺𑀝𑁆𑀞𑀺𑀢𑀸.