📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂

𑀲𑀕𑀸𑀣𑀸𑀯𑀕𑁆𑀕-𑀅𑀝𑁆𑀞𑀓𑀣𑀸

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑀁, 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫𑀁;

𑀲𑀦𑀭𑀸𑀫𑀭𑀮𑁄𑀓𑀕𑀭𑀼𑀁, 𑀯𑀦𑁆𑀤𑁂 𑀲𑀼𑀕𑀢𑀁 𑀕𑀢𑀺𑀯𑀺𑀫𑀼𑀢𑁆𑀢𑀁.

𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀪𑀸𑀯𑀁, 𑀪𑀸𑀯𑁂𑀢𑁆𑀯𑀸 𑀘𑁂𑀯 𑀲𑀘𑁆𑀙𑀺𑀓𑀢𑁆𑀯𑀸 𑀘;

𑀬𑀁 𑀉𑀧𑀕𑀢𑁄 𑀕𑀢𑀫𑀮𑀁, 𑀯𑀦𑁆𑀤𑁂 𑀢𑀫𑀦𑀼𑀢𑁆𑀢𑀭𑀁 𑀥𑀫𑁆𑀫𑀁.

𑀲𑀼𑀕𑀢𑀲𑁆𑀲 𑀑𑀭𑀲𑀸𑀦𑀁, 𑀧𑀼𑀢𑁆𑀢𑀸𑀦𑀁 𑀫𑀸𑀭𑀲𑁂𑀦𑀫𑀣𑀦𑀸𑀦𑀁;

𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀽𑀳𑀁, 𑀲𑀺𑀭𑀲𑀸 𑀯𑀦𑁆𑀤𑁂 𑀅𑀭𑀺𑀬𑀲𑀗𑁆𑀖𑀁.

𑀇𑀢𑀺 𑀫𑁂 𑀧𑀲𑀦𑁆𑀦𑀫𑀢𑀺𑀦𑁄, 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸𑀫𑀬𑀁 𑀧𑀼𑀜𑁆𑀜𑀁;

𑀬𑀁 𑀲𑀼𑀯𑀺𑀳𑀢𑀦𑁆𑀢𑀭𑀸𑀬𑁄, 𑀳𑀼𑀢𑁆𑀯𑀸 𑀢𑀲𑁆𑀲𑀸𑀦𑀼𑀪𑀸𑀯𑁂𑀦.

𑀲𑀁𑀬𑀼𑀢𑁆𑀢𑀯𑀕𑁆𑀕𑀧𑀝𑀺𑀫𑀡𑁆𑀟𑀺𑀢𑀲𑁆𑀲, 𑀲𑀁𑀬𑀼𑀢𑁆𑀢𑀆𑀕𑀫𑀯𑀭𑀲𑁆𑀲;

𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀲𑀁𑀯𑀡𑁆𑀡𑀺𑀢𑀲𑁆𑀲, 𑀜𑀸𑀡𑀧𑁆𑀧𑀪𑁂𑀤𑀚𑀦𑀦𑀲𑁆𑀲.

𑀅𑀢𑁆𑀣𑀧𑁆𑀧𑀓𑀸𑀲𑀦𑀢𑁆𑀣𑀁, 𑀅𑀝𑁆𑀞𑀓𑀣𑀸 𑀆𑀤𑀺𑀢𑁄 𑀯𑀲𑀺𑀲𑀢𑁂𑀳𑀺;

𑀧𑀜𑁆𑀘𑀳𑀺 𑀬𑀸 𑀲𑀗𑁆𑀕𑀻𑀢𑀸, 𑀅𑀦𑀼𑀲𑀗𑁆𑀕𑀻𑀢𑀸 𑀘 𑀧𑀘𑁆𑀙𑀸𑀧𑀺.

𑀲𑀻𑀳𑀴𑀤𑀻𑀧𑀁 𑀧𑀦 𑀆𑀪𑀢𑀸𑀣, 𑀯𑀲𑀺𑀦𑀸 𑀫𑀳𑀸𑀫𑀳𑀺𑀦𑁆𑀤𑁂𑀦;

𑀞𑀧𑀺𑀢𑀸 𑀲𑀻𑀳𑀴𑀪𑀸𑀲𑀸𑀬, 𑀤𑀻𑀧𑀯𑀸𑀲𑀻𑀦𑀫𑀢𑁆𑀣𑀸𑀬.

𑀅𑀧𑀦𑁂𑀢𑁆𑀯𑀸𑀦 𑀢𑀢𑁄𑀳𑀁, 𑀲𑀻𑀳𑀴𑀪𑀸𑀲𑀁 𑀫𑀦𑁄𑀭𑀫𑀁 𑀪𑀸𑀲𑀁;

𑀢𑀦𑁆𑀢𑀺𑀦𑀬𑀸𑀦𑀼𑀘𑁆𑀙𑀯𑀺𑀓𑀁, 𑀆𑀭𑁄𑀧𑁂𑀦𑁆𑀢𑁄 𑀯𑀺𑀕𑀢𑀤𑁄𑀲𑀁.

𑀲𑀫𑀬𑀁 𑀅𑀯𑀺𑀮𑁄𑀫𑁂𑀦𑁆𑀢𑁄, 𑀣𑁂𑀭𑀸𑀦𑀁 𑀣𑁂𑀭𑀯𑀁𑀲𑀤𑀻𑀧𑀸𑀦𑀁;

𑀲𑀼𑀦𑀺𑀧𑀼𑀡𑀯𑀺𑀦𑀺𑀘𑁆𑀙𑀬𑀸𑀦𑀁, 𑀫𑀳𑀸𑀯𑀺𑀳𑀸𑀭𑁂 𑀦𑀺𑀯𑀸𑀲𑀻𑀦𑀁.

𑀳𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀸𑀕𑀢-𑀫𑀢𑁆𑀣𑀁, 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀺;

𑀲𑀼𑀚𑀦𑀲𑁆𑀲 𑀘 𑀢𑀼𑀝𑁆𑀞𑀢𑁆𑀣𑀁, 𑀘𑀺𑀭𑀝𑁆𑀞𑀺𑀢𑀢𑁆𑀣𑀜𑁆𑀘 𑀥𑀫𑁆𑀫𑀲𑁆𑀲.

𑀲𑀸𑀯𑀢𑁆𑀣𑀺𑀧𑀪𑀽𑀢𑀻𑀦𑀁, 𑀦𑀕𑀭𑀸𑀦𑀁 𑀯𑀡𑁆𑀡𑀦𑀸 𑀓𑀢𑀸 𑀳𑁂𑀝𑁆𑀞𑀸;

𑀲𑀗𑁆𑀕𑀻𑀢𑀻𑀦𑀁 𑀤𑁆𑀯𑀺𑀦𑁆𑀦𑀁, 𑀬𑀸 𑀫𑁂 𑀅𑀢𑁆𑀣𑀁 𑀯𑀤𑀦𑁆𑀢𑁂𑀦.

𑀯𑀺𑀢𑁆𑀣𑀸𑀭𑀯𑀲𑁂𑀦 𑀲𑀼𑀤𑀁, 𑀯𑀢𑁆𑀣𑀽𑀦𑀺 𑀘 𑀬𑀸𑀦𑀺 𑀢𑀢𑁆𑀣 𑀯𑀼𑀢𑁆𑀢𑀸𑀦𑀺;

𑀢𑁂𑀲𑀫𑁆𑀧𑀺 𑀦 𑀇𑀥 𑀪𑀺𑀬𑁆𑀬𑁄, 𑀯𑀺𑀢𑁆𑀣𑀸𑀭𑀓𑀣𑀁 𑀓𑀭𑀺𑀲𑁆𑀲𑀸𑀫𑀺.

𑀲𑀼𑀢𑁆𑀢𑀸𑀦𑀁 𑀧𑀦 𑀅𑀢𑁆𑀣𑀸, 𑀦 𑀯𑀺𑀦𑀸 𑀯𑀢𑁆𑀣𑀽𑀳𑀺 𑀬𑁂 𑀧𑀓𑀸𑀲𑀦𑁆𑀢𑀺;

𑀢𑁂𑀲𑀁 𑀧𑀓𑀸𑀲𑀦𑀢𑁆𑀣𑀁, 𑀯𑀢𑁆𑀣𑀽𑀦𑀺𑀧𑀺 𑀤𑀲𑁆𑀲𑀬𑀺𑀲𑁆𑀲𑀸𑀫𑀺.

𑀲𑀻𑀮𑀓𑀣𑀸 𑀥𑀼𑀢𑀥𑀫𑁆𑀫𑀸, 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀘𑁂𑀯 𑀲𑀩𑁆𑀩𑀸𑀦𑀺;

𑀘𑀭𑀺𑀬𑀸𑀯𑀺𑀥𑀸𑀦𑀲𑀳𑀺𑀢𑁄, 𑀛𑀸𑀦𑀲𑀫𑀸𑀧𑀢𑁆𑀢𑀺𑀯𑀺𑀢𑁆𑀣𑀸𑀭𑁄.

𑀲𑀩𑁆𑀩𑀸 𑀘 𑀅𑀪𑀺𑀜𑁆𑀜𑀸𑀬𑁄, 𑀧𑀜𑁆𑀜𑀸𑀲𑀗𑁆𑀓𑀮𑀦𑀦𑀺𑀘𑁆𑀙𑀬𑁄 𑀘𑁂𑀯;

𑀔𑀦𑁆𑀥𑀸𑀥𑀸𑀢𑀸𑀬𑀢𑀦𑀺𑀦𑁆𑀤𑁆𑀭𑀺𑀬𑀸𑀦𑀺, 𑀅𑀭𑀺𑀬𑀸𑀦𑀺 𑀘𑁂𑀯 𑀘𑀢𑁆𑀢𑀸𑀭𑀺.

𑀲𑀘𑁆𑀘𑀸𑀦𑀺 𑀧𑀘𑁆𑀘𑀬𑀸𑀓𑀸𑀭𑀤𑁂𑀲𑀦𑀸, 𑀲𑀼𑀧𑀭𑀺𑀲𑀼𑀤𑁆𑀥𑀦𑀺𑀧𑀼𑀡𑀦𑀬𑀸;

𑀅𑀯𑀺𑀫𑀼𑀢𑁆𑀢𑀢𑀦𑁆𑀢𑀺𑀫𑀕𑁆𑀕𑀸, 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸 𑀘𑁂𑀯.

𑀇𑀢𑀺 𑀧𑀦 𑀲𑀩𑁆𑀩𑀁 𑀬𑀲𑁆𑀫𑀸, 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀫𑀬𑀸 𑀲𑀼𑀧𑀭𑀺𑀲𑀼𑀤𑁆𑀥𑀁;

𑀯𑀼𑀢𑁆𑀢𑀁 𑀢𑀲𑁆𑀫𑀸 𑀪𑀺𑀬𑁆𑀬𑁄, 𑀦 𑀢𑀁 𑀇𑀥 𑀯𑀺𑀘𑀸𑀭𑀬𑀺𑀲𑁆𑀲𑀸𑀫𑀺.

‘‘𑀫𑀚𑁆𑀛𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄, 𑀏𑀲 𑀘𑀢𑀼𑀦𑁆𑀦𑀫𑁆𑀧𑀺 𑀆𑀕𑀫𑀸𑀦𑀜𑁆𑀳𑀺;

𑀞𑀢𑁆𑀯𑀸 𑀧𑀓𑀸𑀲𑀬𑀺𑀲𑁆𑀲𑀢𑀺, 𑀢𑀢𑁆𑀣 𑀬𑀣𑀸𑀪𑀸𑀲𑀺𑀢𑀫𑀢𑁆𑀣𑀁’’.

𑀇𑀘𑁆𑀘𑁂𑀯 𑀓𑀢𑁄 𑀢𑀲𑁆𑀫𑀸, 𑀢𑀫𑁆𑀧𑀺 𑀕𑀳𑁂𑀢𑁆𑀯𑀸𑀦 𑀲𑀤𑁆𑀥𑀺𑀫𑁂𑀢𑀸𑀬;

𑀅𑀝𑁆𑀞𑀓𑀣𑀸𑀬 𑀯𑀺𑀚𑀸𑀦𑀣, 𑀲𑀁𑀬𑀼𑀢𑁆𑀢𑀯𑀺𑀦𑀺𑀲𑁆𑀲𑀺𑀢𑀁 𑀅𑀢𑁆𑀣𑀦𑁆𑀢𑀺.

𑁧. 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀁

𑁧. 𑀦𑀴𑀯𑀕𑁆𑀕𑁄

𑁧. 𑀑𑀖𑀢𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑀢𑀢𑁆𑀣 𑀲𑀁𑀬𑀼𑀢𑁆𑀢𑀸𑀕𑀫𑁄 𑀦𑀸𑀫 𑀲𑀕𑀸𑀣𑀸𑀯𑀕𑁆𑀕𑁄, 𑀦𑀺𑀤𑀸𑀦𑀯𑀕𑁆𑀕𑁄, 𑀔𑀦𑁆𑀥𑀓𑀯𑀕𑁆𑀕𑁄, 𑀲𑀴𑀸𑀬𑀢𑀦𑀯𑀕𑁆𑀕𑁄, 𑀫𑀳𑀸𑀯𑀕𑁆𑀕𑁄𑀢𑀺 𑀧𑀜𑁆𑀘𑀯𑀕𑁆𑀕𑁄 𑀳𑁄𑀢𑀺. 𑀲𑀼𑀢𑁆𑀢𑀢𑁄 𑁋

‘‘𑀲𑀢𑁆𑀢 𑀲𑀼𑀢𑁆𑀢𑀲𑀳𑀲𑁆𑀲𑀸𑀦𑀺, 𑀲𑀢𑁆𑀢 𑀲𑀼𑀢𑁆𑀢𑀲𑀢𑀸𑀦𑀺 𑀘;

𑀤𑁆𑀯𑀸𑀲𑀝𑁆𑀞𑀺 𑀘𑁂𑀯 𑀲𑀼𑀢𑁆𑀢𑀸𑀦𑀺, 𑀏𑀲𑁄 𑀲𑀁𑀬𑀼𑀢𑁆𑀢𑀲𑀗𑁆𑀕𑀳𑁄’’.

𑀪𑀸𑀡𑀯𑀸𑀭𑀢𑁄 𑀪𑀸𑀡𑀯𑀸𑀭𑀲𑀢𑀁 𑀳𑁄𑀢𑀺. 𑀢𑀲𑁆𑀲 𑀯𑀕𑁆𑀕𑁂𑀲𑀼 𑀲𑀕𑀸𑀣𑀸𑀯𑀕𑁆𑀕𑁄 𑀆𑀤𑀺, 𑀲𑀼𑀢𑁆𑀢𑁂𑀲𑀼 𑀑𑀖𑀢𑀭𑀡𑀲𑀼𑀢𑁆𑀢𑀁. 𑀢𑀲𑁆𑀲𑀸𑀧𑀺 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂 𑀯𑀼𑀢𑁆𑀢𑀁 𑀦𑀺𑀤𑀸𑀦𑀫𑀸𑀤𑀺. 𑀲𑀸 𑀧𑀦𑁂𑀲𑀸 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀆𑀤𑀺𑀫𑁆𑀳𑀺 𑀯𑀺𑀢𑁆𑀣𑀸𑀭𑀺𑀢𑀸, 𑀢𑀲𑁆𑀫𑀸 𑀲𑀸 𑀢𑀢𑁆𑀣 𑀯𑀺𑀢𑁆𑀣𑀸𑀭𑀺𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑁧. 𑀬𑀁 𑀧𑀦𑁂𑀢𑀁 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀺𑀓𑀁 𑀦𑀺𑀤𑀸𑀦𑀁, 𑀢𑀢𑁆𑀣 𑀏𑀯𑀦𑁆𑀢𑀺 𑀦𑀺𑀧𑀸𑀢𑀧𑀤𑀁. 𑀫𑁂𑀢𑀺𑀆𑀤𑀻𑀦𑀺 𑀦𑀸𑀫𑀧𑀤𑀸𑀦𑀺. 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀻𑀢𑀺 𑀏𑀢𑁆𑀣 𑀯𑀻𑀢𑀺 𑀉𑀧𑀲𑀕𑁆𑀕𑀧𑀤𑀁, 𑀳𑀭𑀢𑀻𑀢𑀺 𑀆𑀔𑁆𑀬𑀸𑀢𑀧𑀤𑀦𑁆𑀢𑀺 𑀇𑀫𑀺𑀦𑀸 𑀢𑀸𑀯 𑀦𑀬𑁂𑀦 𑀧𑀤𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀢𑁆𑀣𑀢𑁄 𑀧𑀦 𑀏𑀯𑀁𑀲𑀤𑁆𑀤𑁄 𑀢𑀸𑀯 𑀉𑀧𑀫𑀽𑀧𑀤𑁂𑀲-𑀲𑀫𑁆𑀧𑀳𑀁𑀲𑀦-𑀕𑀭𑀳𑀡-𑀯𑀘𑀦𑀲𑀫𑁆𑀧𑀝𑀺𑀕𑁆𑀕𑀳𑀸𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑀸𑀤𑀺-𑀅𑀦𑁂𑀓𑀢𑁆𑀣𑀧𑁆𑀧𑀪𑁂𑀤𑁄. 𑀢𑀣𑀸 𑀳𑁂𑀲 𑁋 ‘‘𑀏𑀯𑀁 𑀚𑀸𑀢𑁂𑀦 𑀫𑀘𑁆𑀘𑁂𑀦, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁 𑀩𑀳𑀼’’𑀦𑁆𑀢𑀺 (𑀥. 𑀧. 𑁫𑁩) 𑀏𑀯𑀫𑀸𑀤𑀻𑀲𑀼 𑀉𑀧𑀫𑀸𑀬𑀁 𑀆𑀕𑀢𑁄. ‘‘𑀏𑀯𑀁 𑀢𑁂 𑀅𑀪𑀺𑀓𑁆𑀓𑀫𑀺𑀢𑀩𑁆𑀩𑀁, 𑀏𑀯𑀁 𑀢𑁂 𑀧𑀝𑀺𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁧𑁨𑁨) 𑀉𑀧𑀤𑁂𑀲𑁂. ‘‘𑀏𑀯𑀫𑁂𑀢𑀁 𑀪𑀕𑀯𑀸, 𑀏𑀯𑀫𑁂𑀢𑀁 𑀲𑀼𑀕𑀢𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁬𑁬) 𑀲𑀫𑁆𑀧𑀳𑀁𑀲𑀦𑁂. ‘‘𑀏𑀯𑀫𑁂𑀯𑀁 𑀧𑀦𑀸𑀬𑀁 𑀯𑀲𑀮𑀻 𑀬𑀲𑁆𑀫𑀺𑀁 𑀯𑀸 𑀢𑀲𑁆𑀫𑀺𑀁 𑀯𑀸 𑀢𑀲𑁆𑀲 𑀫𑀼𑀡𑁆𑀟𑀓𑀲𑁆𑀲 𑀲𑀫𑀡𑀓𑀲𑁆𑀲 𑀯𑀡𑁆𑀡𑀁 𑀪𑀸𑀲𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁮𑁭) 𑀕𑀭𑀳𑀡𑁂. ‘‘𑀏𑀯𑀁, 𑀪𑀦𑁆𑀢𑁂𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧) 𑀯𑀘𑀦𑀲𑀫𑁆𑀧𑀝𑀺𑀕𑁆𑀕𑀳𑁂. ‘‘𑀏𑀯𑀁 𑀩𑁆𑀬𑀸 𑀔𑁄 𑀅𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑀸 𑀥𑀫𑁆𑀫𑀁 𑀤𑁂𑀲𑀺𑀢𑀁 𑀆𑀚𑀸𑀦𑀸𑀫𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁯𑁮) 𑀆𑀓𑀸𑀭𑁂. ‘‘𑀏𑀳𑀺 𑀢𑁆𑀯𑀁 𑀫𑀸𑀡𑀯𑀓, 𑀬𑁂𑀦 𑀲𑀫𑀡𑁄 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀫 𑀯𑀘𑀦𑁂𑀦 𑀲𑀫𑀡𑀁 𑀆𑀦𑀦𑁆𑀤𑀁 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙 𑁋 ‘𑀲𑀼𑀪𑁄 𑀫𑀸𑀡𑀯𑁄 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑁄 𑀪𑀯𑀦𑁆𑀢𑀁 𑀆𑀦𑀦𑁆𑀤𑀁 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙𑀢𑀻’𑀢𑀺. 𑀏𑀯𑀜𑁆𑀘 𑀯𑀤𑁂𑀳𑀺 𑁋 ‘𑀲𑀸𑀥𑀼 𑀓𑀺𑀭 𑀪𑀯𑀁 𑀆𑀦𑀦𑁆𑀤𑁄 𑀬𑁂𑀦 𑀲𑀼𑀪𑀲𑁆𑀲 𑀫𑀸𑀡𑀯𑀲𑁆𑀲 𑀢𑁄𑀤𑁂𑀬𑁆𑀬𑀧𑀼𑀢𑁆𑀢𑀲𑁆𑀲 𑀦𑀺𑀯𑁂𑀲𑀦𑀁, 𑀢𑁂𑀦𑀼𑀧𑀲𑀗𑁆𑀓𑀫𑀢𑀼 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸’𑀢𑀺’’𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁪𑁪𑁫) 𑀦𑀺𑀤𑀲𑁆𑀲𑀦𑁂. ‘‘𑀢𑀁 𑀓𑀺𑀁 𑀫𑀜𑁆𑀜𑀣 𑀓𑀸𑀮𑀸𑀫𑀸, 𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸 𑀯𑀸 𑀅𑀓𑀼𑀲𑀮𑀸 𑀯𑀸𑀢𑀺? 𑀅𑀓𑀼𑀲𑀮𑀸, 𑀪𑀦𑁆𑀢𑁂. 𑀲𑀸𑀯𑀚𑁆𑀚𑀸 𑀯𑀸 𑀅𑀦𑀯𑀚𑁆𑀚𑀸 𑀯𑀸𑀢𑀺? 𑀲𑀸𑀯𑀚𑁆𑀚𑀸, 𑀪𑀦𑁆𑀢𑁂. 𑀯𑀺𑀜𑁆𑀜𑀼𑀕𑀭𑀳𑀺𑀢𑀸 𑀯𑀸 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸 𑀯𑀸𑀢𑀺? 𑀯𑀺𑀜𑁆𑀜𑀼𑀕𑀭𑀳𑀺𑀢𑀸, 𑀪𑀦𑁆𑀢𑁂. 𑀲𑀫𑀢𑁆𑀢𑀸 𑀲𑀫𑀸𑀤𑀺𑀦𑁆𑀦𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀯𑀸 𑀦𑁄 𑀯𑀸, 𑀓𑀣𑀁 𑀯𑁄 𑀏𑀢𑁆𑀣 𑀳𑁄𑀢𑀻𑀢𑀺? 𑀲𑀫𑀢𑁆𑀢𑀸, 𑀪𑀦𑁆𑀢𑁂, 𑀲𑀫𑀸𑀤𑀺𑀦𑁆𑀦𑀸 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁬𑁬) 𑀅𑀯𑀥𑀸𑀭𑀡𑁂. 𑀲𑁆𑀯𑀸𑀬𑀫𑀺𑀥 𑀆𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑁂𑀲𑀼 𑀤𑀝𑁆𑀞𑀩𑁆𑀩𑁄.

𑀢𑀢𑁆𑀣 𑀆𑀓𑀸𑀭𑀢𑁆𑀣𑁂𑀦 𑀏𑀯𑀁𑀲𑀤𑁆𑀤𑁂𑀦 𑀏𑀢𑀫𑀢𑁆𑀣𑀁 𑀤𑀻𑀧𑁂𑀢𑀺 𑁋 𑀦𑀸𑀦𑀸𑀦𑀬𑀦𑀺𑀧𑀼𑀡𑀁 𑀅𑀦𑁂𑀓𑀚𑁆𑀛𑀸𑀲𑀬𑀲𑀫𑀼𑀝𑁆𑀞𑀸𑀦𑀁 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀁 𑀯𑀺𑀯𑀺𑀥𑀧𑀸𑀝𑀺𑀳𑀸𑀭𑀺𑀬𑀁 𑀥𑀫𑁆𑀫𑀢𑁆𑀣𑀤𑁂𑀲𑀦𑀸 𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀓𑀲𑀓𑀪𑀸𑀲𑀸𑀦𑀼𑀭𑀽𑀧𑀢𑁄 𑀲𑁄𑀢𑀧𑀣𑀫𑀸𑀕𑀘𑁆𑀙𑀦𑁆𑀢𑀁 𑀢𑀲𑁆𑀲 𑀪𑀕𑀯𑀢𑁄 𑀯𑀘𑀦𑀁 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀓𑁄 𑀲𑀫𑀢𑁆𑀣𑁄 𑀯𑀺𑀜𑁆𑀜𑀸𑀢𑀼𑀁? 𑀲𑀩𑁆𑀩𑀣𑀸𑀫𑁂𑀦 𑀧𑀦 𑀲𑁄𑀢𑀼𑀓𑀸𑀫𑀢𑀁 𑀚𑀦𑁂𑀢𑁆𑀯𑀸𑀧𑀺 𑀏𑀯𑀁 𑀫𑁂 𑀲𑀼𑀢𑀁, 𑀫𑀬𑀸𑀧𑀺 𑀏𑀓𑁂𑀦𑀸𑀓𑀸𑀭𑁂𑀦 𑀲𑀼𑀢𑀦𑁆𑀢𑀺.

𑀦𑀺𑀤𑀲𑁆𑀲𑀦𑀢𑁆𑀣𑁂𑀦 𑁋 ‘‘𑀦𑀸𑀳𑀁 𑀲𑀬𑀫𑁆𑀪𑀽, 𑀦 𑀫𑀬𑀸 𑀇𑀤𑀁 𑀲𑀘𑁆𑀙𑀺𑀓𑀢’’𑀦𑁆𑀢𑀺 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑁂𑀦𑁆𑀢𑁄 𑁋 ‘‘𑀏𑀯𑀁 𑀫𑁂 𑀲𑀼𑀢𑀁, 𑀫𑀬𑀸𑀧𑀺 𑀏𑀯𑀁 𑀲𑀼𑀢’’𑀦𑁆𑀢𑀺 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀲𑀓𑀮𑀲𑀼𑀢𑁆𑀢𑀁 𑀦𑀺𑀤𑀲𑁆𑀲𑁂𑀢𑀺.

𑀅𑀯𑀥𑀸𑀭𑀡𑀢𑁆𑀣𑁂𑀦 𑁋 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄, 𑀕𑀢𑀺𑀫𑀦𑁆𑀢𑀸𑀦𑀁, 𑀲𑀢𑀺𑀫𑀦𑁆𑀢𑀸𑀦𑀁, 𑀥𑀺𑀢𑀺𑀫𑀦𑁆𑀢𑀸𑀦𑀁, 𑀉𑀧𑀝𑁆𑀞𑀸𑀓𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄’’𑀢𑀺 (𑀅. 𑀦𑀺. 𑁧.𑁨𑁨𑁦-𑁨𑁨𑁩) 𑀏𑀯𑀁 𑀪𑀕𑀯𑀢𑀸 𑁋 ‘‘𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀅𑀢𑁆𑀣𑀓𑀼𑀲𑀮𑁄 𑀥𑀫𑁆𑀫𑀓𑀼𑀲𑀮𑁄 𑀩𑁆𑀬𑀜𑁆𑀚𑀦𑀓𑀼𑀲𑀮𑁄 𑀦𑀺𑀭𑀼𑀢𑁆𑀢𑀺𑀓𑀼𑀲𑀮𑁄 𑀧𑀼𑀩𑁆𑀩𑀸𑀧𑀭𑀓𑀼𑀲𑀮𑁄’’𑀢𑀺 (𑀅. 𑀦𑀺. 𑁫.𑁧𑁬𑁯) 𑀏𑀯𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀘 𑀧𑀲𑀢𑁆𑀣𑀪𑀸𑀯𑀸𑀦𑀼𑀭𑀽𑀧𑀁 𑀅𑀢𑁆𑀢𑀦𑁄 𑀥𑀸𑀭𑀡𑀩𑀮𑀁 𑀤𑀲𑁆𑀲𑁂𑀦𑁆𑀢𑁄 𑀲𑀢𑁆𑀢𑀸𑀦𑀁 𑀲𑁄𑀢𑀼𑀓𑀸𑀫𑀢𑀁 𑀚𑀦𑁂𑀢𑀺 𑁋 ‘‘𑀏𑀯𑀁 𑀫𑁂 𑀲𑀼𑀢𑀁, 𑀢𑀜𑁆𑀘 𑀔𑁄 𑀅𑀢𑁆𑀣𑀢𑁄 𑀯𑀸 𑀩𑁆𑀬𑀜𑁆𑀚𑀦𑀢𑁄 𑀯𑀸 𑀅𑀦𑀽𑀦𑀫𑀦𑀥𑀺𑀓𑀁, 𑀏𑀯𑀫𑁂𑀯 𑀦 𑀅𑀜𑁆𑀜𑀣𑀸 𑀤𑀝𑁆𑀞𑀩𑁆𑀩’’𑀦𑁆𑀢𑀺.

𑀫𑁂𑀲𑀤𑁆𑀤𑁄 𑀢𑀻𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺𑀲𑁆𑀲 𑁋 ‘‘𑀕𑀸𑀣𑀸𑀪𑀺𑀕𑀻𑀢𑀁 𑀫𑁂 𑀅𑀪𑁄𑀚𑀦𑁂𑀬𑁆𑀬’’𑀦𑁆𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁮𑁧) 𑀫𑀬𑀸𑀢𑀺 𑀅𑀢𑁆𑀣𑁄. ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀽 ’’ 𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁪.𑁮𑁮) 𑀫𑀬𑁆𑀳𑀦𑁆𑀢𑀺 𑀅𑀢𑁆𑀣𑁄. ‘‘𑀥𑀫𑁆𑀫𑀤𑀸𑀬𑀸𑀤𑀸 𑀫𑁂, 𑀪𑀺𑀓𑁆𑀔𑀯𑁂, 𑀪𑀯𑀣𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁯) 𑀫𑀫𑀸𑀢𑀺 𑀅𑀢𑁆𑀣𑁄. 𑀇𑀥 𑀧𑀦 ‘‘𑀫𑀬𑀸 𑀲𑀼𑀢’’𑀦𑁆𑀢𑀺 𑀘 ‘‘𑀫𑀫 𑀲𑀼𑀢’’𑀦𑁆𑀢𑀺 𑀘 𑀅𑀢𑁆𑀣𑀤𑁆𑀯𑀬𑁂 𑀬𑀼𑀚𑁆𑀚𑀢𑀺.

𑀲𑀼𑀢𑀦𑁆𑀢𑀺 𑀅𑀬𑀁 𑀲𑀼𑀢𑀲𑀤𑁆𑀤𑁄 𑀲𑀉𑀧𑀲𑀕𑁆𑀕𑁄 𑀅𑀦𑀼𑀧𑀲𑀕𑁆𑀕𑁄 𑀘 𑀕𑀫𑀦-𑀯𑀺𑀲𑁆𑀲𑀼𑀢-𑀓𑀺𑀮𑀺𑀦𑁆𑀦𑀉𑀧𑀘𑀺𑀢𑀸𑀦𑀼𑀬𑁄𑀕-𑀲𑁄𑀢𑀯𑀺𑀜𑁆𑀜𑁂𑀬𑁆𑀬-𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑀯𑀺𑀜𑁆𑀜𑀸𑀢𑀸𑀤𑀺𑀅𑀦𑁂𑀓𑀢𑁆𑀣𑀧𑁆𑀧𑀪𑁂𑀤𑁄. 𑀢𑀣𑀸 𑀳𑀺𑀲𑁆𑀲 𑁋 ‘‘𑀲𑁂𑀦𑀸𑀬 𑀧𑀲𑀼𑀢𑁄’’𑀢𑀺𑀆𑀤𑀻𑀲𑀼 𑀕𑀘𑁆𑀙𑀦𑁆𑀢𑁄𑀢𑀺 𑀅𑀢𑁆𑀣𑁄. ‘‘𑀲𑀼𑀢𑀥𑀫𑁆𑀫𑀲𑁆𑀲 𑀧𑀲𑁆𑀲𑀢𑁄’’𑀢𑀺𑀆𑀤𑀻𑀲𑀼 (𑀉𑀤𑀸. 𑁧𑁧) 𑀯𑀺𑀲𑁆𑀲𑀼𑀢𑀥𑀫𑁆𑀫𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀅𑀯𑀲𑁆𑀲𑀼𑀢𑀸 𑀅𑀯𑀲𑁆𑀲𑀼𑀢𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁬𑁫𑁭) 𑀓𑀺𑀮𑀺𑀦𑁆𑀦𑀸𑀓𑀺𑀮𑀺𑀦𑁆𑀦𑀲𑁆𑀲𑀸𑀢𑀺 𑀅𑀢𑁆𑀣𑁄. ‘‘𑀢𑀼𑀫𑁆𑀳𑁂𑀳𑀺 𑀧𑀼𑀜𑁆𑀜𑀁 𑀧𑀲𑀼𑀢𑀁 𑀅𑀦𑀧𑁆𑀧𑀓’’𑀦𑁆𑀢𑀺𑀆𑀤𑀻𑀲𑀼 (𑀔𑀼. 𑀧𑀸. 𑁭.𑁧𑁨) 𑀉𑀧𑀘𑀺𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀬𑁂 𑀛𑀸𑀦𑀧𑀲𑀼𑀢𑀸 𑀥𑀻𑀭𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁧𑁮𑁧) 𑀛𑀸𑀦𑀸𑀦𑀼𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. ‘‘𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁪𑁧) 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. ‘‘𑀲𑀼𑀢𑀥𑀭𑁄 𑀲𑀼𑀢𑀲𑀦𑁆𑀦𑀺𑀘𑀬𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁩𑁯) 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑀯𑀺𑀜𑁆𑀜𑀸𑀢𑀥𑀭𑁄𑀢𑀺 𑀅𑀢𑁆𑀣𑁄. 𑀇𑀥 𑀧𑀦𑀲𑁆𑀲 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀉𑀧𑀥𑀸𑀭𑀺𑀢𑀦𑁆𑀢𑀺 𑀯𑀸 𑀉𑀧𑀥𑀸𑀭𑀡𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀫𑁂-𑀲𑀤𑁆𑀤𑀲𑁆𑀲 𑀳𑀺 𑀫𑀬𑀸𑀢𑀺 𑀅𑀢𑁆𑀣𑁂 𑀲𑀢𑀺 𑁋 ‘‘𑀏𑀯𑀁 𑀫𑀬𑀸 𑀲𑀼𑀢𑀁, 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀉𑀧𑀥𑀸𑀭𑀺𑀢’’𑀦𑁆𑀢𑀺 𑀬𑀼𑀚𑁆𑀚𑀢𑀺. 𑀫𑀫𑀸𑀢𑀺 𑀅𑀢𑁆𑀣𑁂 𑀲𑀢𑀺 𑁋 ‘‘𑀏𑀯𑀁 𑀫𑀫 𑀲𑀼𑀢𑀁, 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀉𑀧𑀥𑀸𑀭𑀡’’𑀦𑁆𑀢𑀺 𑀬𑀼𑀚𑁆𑀚𑀢𑀺.

𑀏𑀯𑀫𑁂𑀢𑁂𑀲𑀼 𑀢𑀻𑀲𑀼 𑀧𑀤𑁂𑀲𑀼 𑀏𑀯𑀦𑁆𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀺𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑀲𑁆𑀲𑀦𑀁. 𑀫𑁂𑀢𑀺 𑀯𑀼𑀢𑁆𑀢𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀧𑀼𑀕𑁆𑀕𑀮𑀦𑀺𑀤𑀲𑁆𑀲𑀦𑀁. 𑀲𑀼𑀢𑀦𑁆𑀢𑀺 𑀅𑀲𑁆𑀲𑀯𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀢𑁄 𑀅𑀦𑀽𑀦𑀸𑀦𑀥𑀺𑀓𑀸𑀯𑀺𑀧𑀭𑀻𑀢𑀕𑁆𑀕𑀳𑀡𑀦𑀺𑀤𑀲𑁆𑀲𑀦𑀁. 𑀢𑀣𑀸 𑀏𑀯𑀦𑁆𑀢𑀺 𑀢𑀲𑁆𑀲 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀧𑀯𑀢𑁆𑀢𑀸𑀬 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀦𑀸𑀦𑀧𑁆𑀧𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀪𑀸𑀯𑀧𑁆𑀧𑀓𑀸𑀲𑀦𑀁. 𑀫𑁂𑀢𑀺 𑀅𑀢𑁆𑀢𑀧𑁆𑀧𑀓𑀸𑀲𑀦𑀁. 𑀲𑀼𑀢𑀦𑁆𑀢𑀺 𑀥𑀫𑁆𑀫𑀧𑁆𑀧𑀓𑀸𑀲𑀦𑀁. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 ‘‘𑀦𑀸𑀦𑀧𑁆𑀧𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀸𑀬 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀫𑀬𑀸 𑀦 𑀅𑀜𑁆𑀜𑀁 𑀓𑀢𑀁, 𑀇𑀤𑀁 𑀧𑀦 𑀓𑀢𑀁, 𑀅𑀬𑀁 𑀥𑀫𑁆𑀫𑁄 𑀲𑀼𑀢𑁄’’𑀢𑀺.

𑀢𑀣𑀸 𑀏𑀯𑀦𑁆𑀢𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀧𑁆𑀧𑀓𑀸𑀲𑀦𑀁. 𑀫𑁂𑀢𑀺 𑀧𑀼𑀕𑁆𑀕𑀮𑀧𑁆𑀧𑀓𑀸𑀲𑀦𑀁. 𑀲𑀼𑀢𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀧𑁆𑀧𑀓𑀸𑀲𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀬𑀁 𑀲𑀼𑀢𑁆𑀢𑀁 𑀦𑀺𑀤𑁆𑀤𑀺𑀲𑀺𑀲𑁆𑀲𑀸𑀫𑀺, 𑀢𑀁 𑀫𑀬𑀸 𑀏𑀯𑀁 𑀲𑀼𑀢’’𑀦𑁆𑀢𑀺.

𑀢𑀣𑀸 𑀏𑀯𑀦𑁆𑀢𑀺 𑀬𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀦𑀸𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀦𑀸𑀦𑀢𑁆𑀣𑀩𑁆𑀬𑀜𑁆𑀚𑀦𑀕𑀳𑀡𑀁 𑀳𑁄𑀢𑀺, 𑀢𑀲𑁆𑀲 𑀦𑀸𑀦𑀸𑀓𑀸𑀭𑀦𑀺𑀤𑁆𑀤𑁂𑀲𑁄. 𑀏𑀯𑀦𑁆𑀢𑀺 𑀳𑀺 𑀅𑀬𑀁 𑀆𑀓𑀸𑀭𑀧𑀜𑁆𑀜𑀢𑁆𑀢𑀺. 𑀫𑁂𑀢𑀺 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄. 𑀲𑀼𑀢𑀦𑁆𑀢𑀺 𑀯𑀺𑀲𑀬𑀦𑀺𑀤𑁆𑀤𑁂𑀲𑁄. 𑀏𑀢𑁆𑀢𑀸𑀯𑀢𑀸 𑀦𑀸𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑁂𑀦 𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀦 𑀢𑀁𑀲𑀫𑀗𑁆𑀕𑀺𑀦𑁄 𑀓𑀢𑁆𑀢𑀼𑀯𑀺𑀲𑀬𑁂 𑀕𑀳𑀡𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑀁 𑀳𑁄𑀢𑀺.

𑀅𑀣 𑀯𑀸 𑀏𑀯𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄. 𑀲𑀼𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄. 𑀫𑁂𑀢𑀺 𑀉𑀪𑀬𑀓𑀺𑀘𑁆𑀘𑀬𑀼𑀢𑁆𑀢𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑁄. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 ‘‘𑀫𑀬𑀸 𑀲𑀯𑀦𑀓𑀺𑀘𑁆𑀘𑀯𑀺𑀜𑁆𑀜𑀸𑀡𑀲𑀫𑀗𑁆𑀕𑀺𑀦𑀸 𑀧𑀼𑀕𑁆𑀕𑀮𑁂𑀦 𑀯𑀺𑀜𑁆𑀜𑀸𑀡𑀯𑀲𑁂𑀦 𑀮𑀤𑁆𑀥𑀲𑀯𑀦𑀓𑀺𑀘𑁆𑀘𑀯𑁄𑀳𑀸𑀭𑁂𑀦 𑀲𑀼𑀢’’𑀦𑁆𑀢𑀺.

𑀢𑀢𑁆𑀣 𑀏𑀯𑀦𑁆𑀢𑀺 𑀘 𑀫𑁂𑀢𑀺 𑀘 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀓𑀺𑀜𑁆𑀳𑁂𑀢𑁆𑀣 𑀢𑀁 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺, 𑀬𑀁 𑀏𑀯𑀦𑁆𑀢𑀺 𑀯𑀸 𑀫𑁂𑀢𑀺 𑀯𑀸 𑀦𑀺𑀤𑁆𑀤𑁂𑀲𑀁 𑀮𑀪𑁂𑀣. 𑀲𑀼𑀢𑀦𑁆𑀢𑀺 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺. 𑀬𑀜𑁆𑀳𑀺 𑀢𑀁 𑀏𑀢𑁆𑀣 𑀲𑁄𑀢𑁂𑀦 𑀉𑀧𑀮𑀤𑁆𑀥𑀁, 𑀢𑀁 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀦𑁆𑀢𑀺. 𑀢𑀣𑀸 𑀏𑀯𑀦𑁆𑀢𑀺 𑀘 𑀫𑁂𑀢𑀺 𑀘 𑀢𑀁 𑀢𑀁 𑀉𑀧𑀸𑀤𑀸𑀬 𑀯𑀢𑁆𑀢𑀩𑁆𑀩𑀢𑁄 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺. 𑀲𑀼𑀢𑀦𑁆𑀢𑀺 𑀤𑀺𑀝𑁆𑀞𑀸𑀤𑀻𑀦𑀺 𑀉𑀧𑀦𑀺𑀥𑀸𑀬 𑀯𑀢𑁆𑀢𑀩𑁆𑀩𑀢𑁄 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺.

𑀏𑀢𑁆𑀣 𑀘 𑀏𑀯𑀦𑁆𑀢𑀺 𑀯𑀘𑀦𑁂𑀦 𑀅𑀲𑀫𑁆𑀫𑁄𑀳𑀁 𑀤𑀻𑀧𑁂𑀢𑀺. 𑀦 𑀳𑀺 𑀲𑀫𑁆𑀫𑀽𑀴𑁆𑀳𑁄 𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀲𑀫𑀢𑁆𑀣𑁄 𑀳𑁄𑀢𑀺. 𑀲𑀼𑀢𑀦𑁆𑀢𑀺 𑀯𑀘𑀦𑁂𑀦 𑀲𑀼𑀢𑀲𑁆𑀲 𑀅𑀲𑀫𑁆𑀫𑁄𑀲𑀁 𑀤𑀻𑀧𑁂𑀢𑀺. 𑀬𑀲𑁆𑀲 𑀳𑀺 𑀲𑀼𑀢𑀁 𑀲𑀫𑁆𑀫𑀼𑀝𑁆𑀞𑀁 𑀳𑁄𑀢𑀺, 𑀦 𑀲𑁄 𑀓𑀸𑀮𑀦𑁆𑀢𑀭𑁂𑀦 𑀫𑀬𑀸 𑀲𑀼𑀢𑀦𑁆𑀢𑀺 𑀧𑀝𑀺𑀚𑀸𑀦𑀸𑀢𑀺. 𑀇𑀘𑁆𑀘𑀲𑁆𑀲 𑀅𑀲𑀫𑁆𑀫𑁄𑀳𑁂𑀦 𑀧𑀜𑁆𑀜𑀸𑀲𑀺𑀤𑁆𑀥𑀺, 𑀅𑀲𑀫𑁆𑀫𑁄𑀲𑁂𑀦 𑀧𑀦 𑀲𑀢𑀺𑀲𑀺𑀤𑁆𑀥𑀺. 𑀢𑀢𑁆𑀣 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀸𑀬 𑀲𑀢𑀺𑀬𑀸 𑀩𑁆𑀬𑀜𑁆𑀚𑀦𑀸𑀯𑀥𑀸𑀭𑀡𑀲𑀫𑀢𑁆𑀣𑀢𑀸, 𑀲𑀢𑀺𑀧𑀼𑀩𑁆𑀩𑀗𑁆𑀕𑀫𑀸𑀬 𑀧𑀜𑁆𑀜𑀸𑀬 𑀅𑀢𑁆𑀣𑀧𑀝𑀺𑀯𑁂𑀥𑀲𑀫𑀢𑁆𑀣𑀢𑀸. 𑀢𑀤𑀼𑀪𑀬𑀲𑀫𑀢𑁆𑀣𑀢𑀸𑀬𑁄𑀕𑁂𑀦 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀲𑁆𑀲 𑀥𑀫𑁆𑀫𑀓𑁄𑀲𑀲𑁆𑀲 𑀅𑀦𑀼𑀧𑀸𑀮𑀦𑀲𑀫𑀢𑁆𑀣𑀢𑁄 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀢𑁆𑀢𑀲𑀺𑀤𑁆𑀥𑀺.

𑀅𑀧𑀭𑁄 𑀦𑀬𑁄 𑁋 𑀏𑀯𑀦𑁆𑀢𑀺 𑀯𑀘𑀦𑁂𑀦 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀁 𑀤𑀻𑀧𑁂𑀢𑀺, 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄 𑀳𑀺 𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀸𑀪𑀸𑀯𑀢𑁄. 𑀲𑀼𑀢𑀦𑁆𑀢𑀺 𑀯𑀘𑀦𑁂𑀦 𑀅𑀯𑀺𑀓𑁆𑀔𑁂𑀧𑀁 𑀤𑀻𑀧𑁂𑀢𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲 𑀲𑀯𑀦𑀸𑀪𑀸𑀯𑀢𑁄. 𑀢𑀣𑀸 𑀳𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀼𑀕𑁆𑀕𑀮𑁄 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸 𑀯𑀼𑀘𑁆𑀘𑀫𑀸𑀦𑁄𑀧𑀺 ‘‘𑀦 𑀫𑀬𑀸 𑀲𑀼𑀢𑀁, 𑀧𑀼𑀦 𑀪𑀡𑀣𑀸’’𑀢𑀺 𑀪𑀡𑀢𑀺. 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦 𑀘𑁂𑀢𑁆𑀣 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀁 𑀧𑀼𑀩𑁆𑀩𑁂 𑀘 𑀓𑀢𑀧𑀼𑀜𑁆𑀜𑀢𑀁 𑀲𑀸𑀥𑁂𑀢𑀺, 𑀲𑀫𑁆𑀫𑀸 𑀅𑀧𑁆𑀧𑀡𑀺𑀳𑀺𑀢𑀢𑁆𑀢𑀲𑁆𑀲 𑀧𑀼𑀩𑁆𑀩𑁂 𑀅𑀓𑀢𑀧𑀼𑀜𑁆𑀜𑀲𑁆𑀲 𑀯𑀸 𑀢𑀤𑀪𑀸𑀯𑀢𑁄. 𑀅𑀯𑀺𑀓𑁆𑀔𑁂𑀧𑁂𑀦 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀜𑁆𑀘 𑀲𑀸𑀥𑁂𑀢𑀺. 𑀦 𑀳𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀲𑁄𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀘 𑀲𑀧𑁆𑀧𑀼𑀭𑀺𑀲𑁂 𑀅𑀦𑀼𑀧𑀦𑀺𑀲𑁆𑀲𑀬𑀫𑀸𑀦𑀲𑁆𑀲 𑀲𑀯𑀦𑀁 𑀅𑀢𑁆𑀣𑀻𑀢𑀺.

𑀅𑀧𑀭𑁄 𑀦𑀬𑁄 𑁋 𑀬𑀲𑁆𑀫𑀸 ‘‘𑀏𑀯𑀦𑁆𑀢𑀺 𑀬𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀦𑀸𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀦𑀸𑀦𑀢𑁆𑀣𑀩𑁆𑀬𑀜𑁆𑀚𑀦𑀕𑁆𑀕𑀳𑀡𑀁 𑀳𑁄𑀢𑀺, 𑀢𑀲𑁆𑀲 𑀦𑀸𑀦𑀸𑀓𑀸𑀭𑀦𑀺𑀤𑁆𑀤𑁂𑀲𑁄’’𑀢𑀺 𑀯𑀼𑀢𑁆𑀢𑀁, 𑀲𑁄 𑀘 𑀏𑀯𑀁 𑀪𑀤𑁆𑀤𑀓𑁄 𑀆𑀓𑀸𑀭𑁄 𑀦 𑀲𑀫𑁆𑀫𑀸 𑀅𑀧𑁆𑀧𑀡𑀺𑀳𑀺𑀢𑀢𑁆𑀢𑀦𑁄 𑀧𑀼𑀩𑁆𑀩𑁂 𑀅𑀓𑀢𑀧𑀼𑀜𑁆𑀜𑀲𑁆𑀲 𑀯𑀸 𑀳𑁄𑀢𑀺, 𑀢𑀲𑁆𑀫𑀸 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀪𑀤𑁆𑀤𑀓𑁂𑀦 𑀆𑀓𑀸𑀭𑁂𑀦 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑀫𑁆𑀧𑀢𑁆𑀢𑀺𑀫𑀢𑁆𑀢𑀦𑁄 𑀤𑀻𑀧𑁂𑀢𑀺. 𑀲𑀼𑀢𑀦𑁆𑀢𑀺 𑀲𑀯𑀦𑀬𑁄𑀕𑁂𑀦 𑀧𑀼𑀭𑀺𑀫𑀘𑀓𑁆𑀓𑀤𑁆𑀯𑀬𑀲𑀫𑁆𑀧𑀢𑁆𑀢𑀺𑀁. 𑀦 𑀳𑀺 𑀅𑀧𑁆𑀧𑀢𑀺𑀭𑀽𑀧𑀤𑁂𑀲𑁂 𑀯𑀲𑀢𑁄 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀯𑀺𑀭𑀳𑀺𑀢𑀲𑁆𑀲 𑀯𑀸 𑀲𑀯𑀦𑀁 𑀅𑀢𑁆𑀣𑀺. 𑀇𑀘𑁆𑀘𑀲𑁆𑀲 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑀺𑀤𑁆𑀥𑀺𑀬𑀸 𑀆𑀲𑀬𑀲𑀼𑀤𑁆𑀥𑀺 𑀲𑀺𑀤𑁆𑀥𑀸 𑀳𑁄𑀢𑀺, 𑀧𑀼𑀭𑀺𑀫𑀘𑀓𑁆𑀓𑀤𑁆𑀯𑀬𑀲𑀺𑀤𑁆𑀥𑀺𑀬𑀸 𑀧𑀬𑁄𑀕𑀲𑀼𑀤𑁆𑀥𑀺, 𑀢𑀸𑀬 𑀘 𑀆𑀲𑀬𑀲𑀼𑀤𑁆𑀥𑀺𑀬𑀸 𑀅𑀥𑀺𑀕𑀫𑀩𑁆𑀬𑀢𑁆𑀢𑀺𑀲𑀺𑀤𑁆𑀥𑀺, 𑀧𑀬𑁄𑀕𑀲𑀼𑀤𑁆𑀥𑀺𑀬𑀸 𑀆𑀕𑀫𑀩𑁆𑀬𑀢𑁆𑀢𑀺𑀲𑀺𑀤𑁆𑀥𑀺. 𑀇𑀢𑀺 𑀧𑀬𑁄𑀕𑀸𑀲𑀬𑀲𑀼𑀤𑁆𑀥𑀲𑁆𑀲 𑀆𑀕𑀫𑀸𑀥𑀺𑀕𑀫𑀲𑀫𑁆𑀧𑀦𑁆𑀦𑀲𑁆𑀲 𑀯𑀘𑀦𑀁 𑀅𑀭𑀼𑀡𑀼𑀕𑁆𑀕𑀁 𑀯𑀺𑀬 𑀲𑀽𑀭𑀺𑀬𑀲𑁆𑀲 𑀉𑀤𑀬𑀢𑁄, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄 𑀯𑀺𑀬 𑀘 𑀓𑀼𑀲𑀮𑀓𑀫𑁆𑀫𑀲𑁆𑀲, 𑀅𑀭𑀳𑀢𑀺 𑀪𑀕𑀯𑀢𑁄 𑀯𑀘𑀦𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑀁 𑀪𑀯𑀺𑀢𑀼𑀦𑁆𑀢𑀺 𑀞𑀸𑀦𑁂 𑀦𑀺𑀤𑀸𑀦𑀁 𑀞𑀧𑁂𑀦𑁆𑀢𑁄 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺𑀆𑀤𑀺𑀫𑀸𑀳.

𑀅𑀧𑀭𑁄 𑀦𑀬𑁄 𑁋 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀤𑀻𑀧𑀓𑁂𑀦 𑀯𑀘𑀦𑁂𑀦 𑀅𑀢𑁆𑀢𑀦𑁄 𑀅𑀢𑁆𑀣𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸𑀲𑀫𑁆𑀧𑀢𑁆𑀢𑀺𑀲𑀩𑁆𑀪𑀸𑀯𑀁 𑀤𑀻𑀧𑁂𑀢𑀺. 𑀲𑀼𑀢𑀦𑁆𑀢𑀺 𑀇𑀫𑀺𑀦𑀸 𑀲𑁄𑀢𑀩𑁆𑀩𑀪𑁂𑀤𑀧𑀝𑀺𑀯𑁂𑀥𑀤𑀻𑀧𑀓𑁂𑀦 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀲𑀫𑁆𑀧𑀢𑁆𑀢𑀺𑀲𑀩𑁆𑀪𑀸𑀯𑀁. 𑀏𑀯𑀦𑁆𑀢𑀺 𑀘 𑀇𑀤𑀁 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀤𑀻𑀧𑀓𑀯𑀘𑀦𑀁 𑀪𑀸𑀲𑀫𑀸𑀦𑁄 𑁋 ‘‘𑀏𑀢𑁂 𑀫𑀬𑀸 𑀥𑀫𑁆𑀫𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸’’𑀢𑀺 𑀤𑀻𑀧𑁂𑀢𑀺. 𑀲𑀼𑀢𑀦𑁆𑀢𑀺 𑀇𑀤𑀁 𑀲𑀯𑀦𑀬𑁄𑀕𑀤𑀻𑀧𑀓𑀯𑀘𑀦𑀁 𑀪𑀸𑀲𑀫𑀸𑀦𑁄 𑁋 ‘‘𑀩𑀳𑀽 𑀫𑀬𑀸 𑀥𑀫𑁆𑀫𑀸 𑀲𑀼𑀢𑀸 𑀥𑀸𑀢𑀸 𑀯𑀘𑀲𑀸 𑀧𑀭𑀺𑀘𑀺𑀢𑀸’’𑀢𑀺 𑀤𑀻𑀧𑁂𑀢𑀺. 𑀢𑀤𑀼𑀪𑀬𑁂𑀦𑀧𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀸𑀭𑀺𑀧𑀽𑀭𑀺𑀁 𑀤𑀻𑀧𑁂𑀦𑁆𑀢𑁄 𑀲𑀯𑀦𑁂 𑀆𑀤𑀭𑀁 𑀚𑀦𑁂𑀢𑀺. 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀭𑀺𑀧𑀼𑀡𑁆𑀡𑀜𑁆𑀳𑀺 𑀥𑀫𑁆𑀫𑀁 𑀆𑀤𑀭𑁂𑀦 𑀅𑀲𑁆𑀲𑀼𑀡𑀦𑁆𑀢𑁄 𑀫𑀳𑀢𑀸 𑀳𑀺𑀢𑀸 𑀧𑀭𑀺𑀩𑀸𑀳𑀺𑀭𑁄 𑀳𑁄𑀢𑀻𑀢𑀺 𑀆𑀤𑀭𑀁 𑀚𑀦𑁂𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑁄 𑀲𑁄𑀢𑀩𑁆𑀩𑁄𑀢𑀺.

𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀲𑀓𑀮𑁂𑀦 𑀯𑀘𑀦𑁂𑀦 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀁 𑀅𑀢𑁆𑀢𑀦𑁄 𑀅𑀤𑀳𑀦𑁆𑀢𑁄 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀁 𑀅𑀢𑀺𑀓𑁆𑀓𑀫𑀢𑀺, 𑀲𑀸𑀯𑀓𑀢𑁆𑀢𑀁 𑀧𑀝𑀺𑀚𑀸𑀦𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀁 𑀑𑀓𑁆𑀓𑀫𑀢𑀺. 𑀢𑀣𑀸 𑀅𑀲𑀤𑁆𑀥𑀫𑁆𑀫𑀸 𑀘𑀺𑀢𑁆𑀢𑀁 𑀯𑀼𑀝𑁆𑀞𑀸𑀧𑁂𑀢𑀺, 𑀲𑀤𑁆𑀥𑀫𑁆𑀫𑁂 𑀘𑀺𑀢𑁆𑀢𑀁 𑀧𑀢𑀺𑀝𑁆𑀞𑀸𑀧𑁂𑀢𑀺. ‘‘𑀓𑁂𑀯𑀮𑀁 𑀲𑀼𑀢𑀫𑁂𑀯𑁂𑀢𑀁 𑀫𑀬𑀸, 𑀢𑀲𑁆𑀲𑁂𑀯 𑀧𑀦 𑀪𑀕𑀯𑀢𑁄 𑀯𑀘𑀦’’𑀦𑁆𑀢𑀺 𑀤𑀻𑀧𑁂𑀦𑁆𑀢𑁄 𑀅𑀢𑁆𑀢𑀸𑀦𑀁 𑀧𑀭𑀺𑀫𑁄𑀘𑁂𑀢𑀺, 𑀲𑀢𑁆𑀣𑀸𑀭𑀁 𑀅𑀧𑀤𑀺𑀲𑀢𑀺, 𑀚𑀺𑀦𑀯𑀘𑀦𑀁 𑀅𑀧𑁆𑀧𑁂𑀢𑀺, 𑀥𑀫𑁆𑀫𑀦𑁂𑀢𑁆𑀢𑀺𑀁 𑀧𑀢𑀺𑀝𑁆𑀞𑀸𑀧𑁂𑀢𑀺.

𑀅𑀧𑀺𑀘 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺 𑀅𑀢𑁆𑀢𑀦𑀸 𑀉𑀧𑁆𑀧𑀸𑀤𑀺𑀢𑀪𑀸𑀯𑀁 𑀅𑀧𑁆𑀧𑀝𑀺𑀚𑀸𑀦𑀦𑁆𑀢𑁄 𑀧𑀼𑀭𑀺𑀫𑀯𑀘𑀦𑀁 𑀯𑀺𑀯𑀭𑀦𑁆𑀢𑁄 𑁋 ‘‘𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀫𑀺𑀤𑀁 𑀫𑀬𑀸 𑀢𑀲𑁆𑀲 𑀪𑀕𑀯𑀢𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀯𑀺𑀲𑀸𑀭𑀤𑀲𑁆𑀲 𑀤𑀲𑀩𑀮𑀥𑀭𑀲𑁆𑀲 𑀆𑀲𑀪𑀝𑁆𑀞𑀸𑀦𑀝𑁆𑀞𑀸𑀬𑀺𑀦𑁄 𑀲𑀻𑀳𑀦𑀸𑀤𑀦𑀸𑀤𑀺𑀦𑁄 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑀲𑁆𑀲 𑀥𑀫𑁆𑀫𑀺𑀲𑁆𑀲𑀭𑀲𑁆𑀲 𑀥𑀫𑁆𑀫𑀭𑀸𑀚𑀲𑁆𑀲 𑀥𑀫𑁆𑀫𑀸𑀥𑀺𑀧𑀢𑀺𑀦𑁄 𑀥𑀫𑁆𑀫𑀤𑀻𑀧𑀲𑁆𑀲 𑀥𑀫𑁆𑀫𑀲𑀭𑀡𑀲𑁆𑀲 𑀲𑀤𑁆𑀥𑀫𑁆𑀫𑀯𑀭𑀘𑀓𑁆𑀓𑀯𑀢𑁆𑀢𑀺𑀦𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀯𑀘𑀦𑀁, 𑀦 𑀏𑀢𑁆𑀣 𑀅𑀢𑁆𑀣𑁂 𑀯𑀸 𑀥𑀫𑁆𑀫𑁂 𑀯𑀸 𑀧𑀤𑁂 𑀯𑀸 𑀩𑁆𑀬𑀜𑁆𑀚𑀦𑁂 𑀯𑀸 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸 𑀓𑀢𑁆𑀢𑀩𑁆𑀩𑀸’’𑀢𑀺 𑀲𑀩𑁆𑀩𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀇𑀫𑀲𑁆𑀫𑀺𑀁 𑀥𑀫𑁆𑀫𑁂 𑀅𑀲𑁆𑀲𑀤𑁆𑀥𑀺𑀬𑀁 𑀯𑀺𑀦𑀸𑀲𑁂𑀢𑀺, 𑀲𑀤𑁆𑀥𑀸𑀲𑀫𑁆𑀧𑀤𑀁 𑀉𑀧𑁆𑀧𑀸𑀤𑁂𑀢𑀻𑀢𑀺. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀯𑀺𑀦𑀸𑀲𑀬𑀢𑀺 𑀅𑀲𑁆𑀲𑀤𑁆𑀥𑀁, 𑀲𑀤𑁆𑀥𑀁 𑀯𑀟𑁆𑀠𑁂𑀢𑀺 𑀲𑀸𑀲𑀦𑁂;

𑀏𑀯𑀁 𑀫𑁂 𑀲𑀼𑀢𑀫𑀺𑀘𑁆𑀘𑁂𑀯𑀁, 𑀯𑀤𑀁 𑀕𑁄𑀢𑀫𑀲𑀸𑀯𑀓𑁄’’𑀢𑀺.

𑀏𑀓𑀦𑁆𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑀦𑀺𑀤𑁆𑀤𑁂𑀲𑁄. 𑀲𑀫𑀬𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀦𑀺𑀤𑁆𑀤𑁂𑀲𑁄. 𑀏𑀓𑀁 𑀲𑀫𑀬𑀦𑁆𑀢𑀺 𑀅𑀦𑀺𑀬𑀫𑀺𑀢𑀧𑀭𑀺𑀤𑀻𑀧𑀦𑀁. 𑀢𑀢𑁆𑀣 𑀲𑀫𑀬𑀲𑀤𑁆𑀤𑁄 𑁋

‘‘𑀲𑀫𑀯𑀸𑀬𑁂 𑀔𑀡𑁂 𑀓𑀸𑀮𑁂, 𑀲𑀫𑀽𑀳𑁂 𑀳𑁂𑀢𑀼𑀤𑀺𑀝𑁆𑀞𑀺𑀲𑀼;

𑀧𑀝𑀺𑀮𑀸𑀪𑁂 𑀧𑀳𑀸𑀦𑁂 𑀘, 𑀧𑀝𑀺𑀯𑁂𑀥𑁂 𑀘 𑀤𑀺𑀲𑁆𑀲𑀢𑀺’’.

𑀢𑀣𑀸 𑀳𑀺𑀲𑁆𑀲 ‘‘𑀅𑀧𑁆𑀧𑁂𑀯 𑀦𑀸𑀫 𑀲𑁆𑀯𑁂𑀧𑀺 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘 𑀉𑀧𑀸𑀤𑀸𑀬𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁧.𑁪𑁪𑁭) 𑀲𑀫𑀯𑀸𑀬𑁄 𑀅𑀢𑁆𑀣𑁄. ‘‘𑀏𑀓𑁄𑀯 𑀔𑁄, 𑀪𑀺𑀓𑁆𑀔𑀯𑁂, 𑀔𑀡𑁄 𑀘 𑀲𑀫𑀬𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁨𑁯) 𑀔𑀡𑁄. ‘‘𑀉𑀡𑁆𑀳𑀲𑀫𑀬𑁄 𑀧𑀭𑀺𑀴𑀸𑀳𑀲𑀫𑀬𑁄’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁩𑁫𑁮) 𑀓𑀸𑀮𑁄. ‘‘𑀫𑀳𑀸𑀲𑀫𑀬𑁄 𑀧𑀯𑀦𑀲𑁆𑀫𑀺’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁩𑁨) 𑀲𑀫𑀽𑀳𑁄. ‘‘𑀲𑀫𑀬𑁄𑀧𑀺 𑀔𑁄 𑀢𑁂, 𑀪𑀤𑁆𑀤𑀸𑀮𑀺, 𑀅𑀧𑁆𑀧𑀝𑀺𑀯𑀺𑀤𑁆𑀥𑁄 𑀅𑀳𑁄𑀲𑀺, 𑀪𑀕𑀯𑀸 𑀔𑁄 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺, 𑀪𑀕𑀯𑀸𑀧𑀺 𑀫𑀁 𑀚𑀸𑀦𑀺𑀲𑁆𑀲𑀢𑀺 𑁋 ‘𑀪𑀤𑁆𑀤𑀸𑀮𑀺, 𑀦𑀸𑀫 𑀪𑀺𑀓𑁆𑀔𑀼 𑀲𑀢𑁆𑀣𑀼𑀲𑀸𑀲𑀦𑁂 𑀲𑀺𑀓𑁆𑀔𑀸𑀬 𑀅𑀧𑀭𑀺𑀧𑀽𑀭𑀓𑀸𑀭𑀻’𑀢𑀺. 𑀅𑀬𑀫𑁆𑀧𑀺 𑀔𑁄 𑀢𑁂, 𑀪𑀤𑁆𑀤𑀸𑀮𑀺, 𑀲𑀫𑀬𑁄 𑀅𑀧𑁆𑀧𑀝𑀺𑀯𑀺𑀤𑁆𑀥𑁄 𑀅𑀳𑁄𑀲𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁩𑁫) 𑀳𑁂𑀢𑀼. ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀕𑁆𑀕𑀸𑀳𑀫𑀸𑀦𑁄 𑀧𑀭𑀺𑀩𑁆𑀩𑀸𑀚𑀓𑁄 𑀲𑀫𑀡𑀫𑀼𑀡𑁆𑀟𑀺𑀓𑀸𑀧𑀼𑀢𑁆𑀢𑁄 𑀲𑀫𑀬𑀧𑁆𑀧𑀯𑀸𑀤𑀓𑁂 𑀢𑀺𑀦𑁆𑀤𑀼𑀓𑀸𑀘𑀻𑀭𑁂 𑀏𑀓𑀲𑀸𑀮𑀓𑁂 𑀫𑀮𑁆𑀮𑀺𑀓𑀸𑀬 𑀆𑀭𑀸𑀫𑁂 𑀧𑀝𑀺𑀯𑀲𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁨𑁬𑁦) 𑀤𑀺𑀝𑁆𑀞𑀺.

‘‘𑀤𑀺𑀝𑁆𑀞𑁂 𑀥𑀫𑁆𑀫𑁂 𑀘 𑀬𑁄 𑀅𑀢𑁆𑀣𑁄, 𑀬𑁄 𑀘𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄;

𑀅𑀢𑁆𑀣𑀸𑀪𑀺𑀲𑀫𑀬𑀸 𑀥𑀻𑀭𑁄, 𑀧𑀡𑁆𑀟𑀺𑀢𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺. 𑁋

𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁨𑁯) 𑀧𑀝𑀺𑀮𑀸𑀪𑁄. ‘‘𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸 𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁮) 𑀧𑀳𑀸𑀦𑀁. ‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄 𑀲𑀗𑁆𑀔𑀢𑀝𑁆𑀞𑁄 𑀲𑀦𑁆𑀢𑀸𑀧𑀝𑁆𑀞𑁄 𑀯𑀺𑀧𑀭𑀺𑀡𑀸𑀫𑀝𑁆𑀞𑁄 𑀅𑀪𑀺𑀲𑀫𑀬𑀝𑁆𑀞𑁄’’𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁨.𑁮) 𑀧𑀝𑀺𑀯𑁂𑀥𑁄. 𑀇𑀥 𑀧𑀦𑀲𑁆𑀲 𑀓𑀸𑀮𑁄 𑀅𑀢𑁆𑀣𑁄. 𑀢𑁂𑀦 𑀲𑀁𑀯𑀘𑁆𑀙𑀭-𑀉𑀢𑀼-𑀫𑀸𑀲𑀟𑁆𑀠𑀫𑀸𑀲-𑀭𑀢𑁆𑀢𑀺-𑀤𑀺𑀯-𑀧𑀼𑀩𑁆𑀩𑀡𑁆𑀳-𑀫𑀚𑁆𑀛𑀦𑁆𑀳𑀺𑀓-𑀲𑀸𑀬𑀦𑁆𑀳-𑀧𑀞𑀫𑀫𑀚𑁆𑀛𑀺𑀫𑀧𑀘𑁆𑀙𑀺𑀫𑀬𑀸𑀫-𑀫𑀼𑀳𑀼𑀢𑁆𑀢𑀸𑀤𑀻𑀲𑀼 𑀓𑀸𑀮𑀧𑁆𑀧𑀪𑁂𑀤𑀪𑀽𑀢𑁂𑀲𑀼 𑀲𑀫𑀬𑁂𑀲𑀼 𑀏𑀓𑀁 𑀲𑀫𑀬𑀦𑁆𑀢𑀺 𑀤𑀻𑀧𑁂𑀢𑀺.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀏𑀢𑁂𑀲𑀼 𑀲𑀁𑀯𑀘𑁆𑀙𑀭𑀸𑀤𑀻𑀲𑀼 𑀲𑀫𑀬𑁂𑀲𑀼 𑀬𑀁 𑀬𑀁 𑀲𑀼𑀢𑁆𑀢𑀁 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀲𑀁𑀯𑀘𑁆𑀙𑀭𑁂 𑀉𑀢𑀼𑀫𑁆𑀳𑀺 𑀫𑀸𑀲𑁂 𑀧𑀓𑁆𑀔𑁂 𑀭𑀢𑁆𑀢𑀺𑀪𑀸𑀕𑁂 𑀤𑀺𑀯𑀲𑀪𑀸𑀕𑁂 𑀯𑀸 𑀯𑀼𑀢𑁆𑀢𑀁, 𑀲𑀩𑁆𑀩𑀁 𑀢𑀁 𑀣𑁂𑀭𑀲𑁆𑀲 𑀲𑀼𑀯𑀺𑀤𑀺𑀢𑀁 𑀲𑀼𑀯𑀯𑀢𑁆𑀣𑀸𑀧𑀺𑀢𑀁 𑀧𑀜𑁆𑀜𑀸𑀬. 𑀬𑀲𑁆𑀫𑀸 𑀧𑀦 ‘‘𑀏𑀯𑀁 𑀫𑁂 𑀲𑀼𑀢𑀁 𑀅𑀲𑀼𑀓𑀲𑀁𑀯𑀘𑁆𑀙𑀭𑁂 𑀅𑀲𑀼𑀓𑀉𑀢𑀼𑀫𑁆𑀳𑀺 𑀅𑀲𑀼𑀓𑀫𑀸𑀲𑁂 𑀅𑀲𑀼𑀓𑀧𑀓𑁆𑀔𑁂 𑀅𑀲𑀼𑀓𑀭𑀢𑁆𑀢𑀺𑀪𑀸𑀕𑁂 𑀅𑀲𑀼𑀓𑀤𑀺𑀯𑀲𑀪𑀸𑀕𑁂 𑀯𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁂 𑀦 𑀲𑀓𑁆𑀓𑀸 𑀲𑀼𑀔𑁂𑀦 𑀥𑀸𑀭𑁂𑀢𑀼𑀁 𑀯𑀸 𑀉𑀤𑁆𑀤𑀺𑀲𑀺𑀢𑀼𑀁 𑀯𑀸 𑀉𑀤𑁆𑀤𑀺𑀲𑀸𑀧𑁂𑀢𑀼𑀁 𑀯𑀸, 𑀩𑀳𑀼 𑀘 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺, 𑀢𑀲𑁆𑀫𑀸 𑀏𑀓𑁂𑀦𑁂𑀯 𑀧𑀤𑁂𑀦 𑀢𑀫𑀢𑁆𑀣𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀆𑀳.

𑀬𑁂 𑀯𑀸 𑀇𑀫𑁂 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀲𑀫𑀬𑁄 𑀚𑀸𑀢𑀺𑀲𑀫𑀬𑁄 𑀲𑀁𑀯𑁂𑀕𑀲𑀫𑀬𑁄 𑀅𑀪𑀺𑀦𑀺𑀓𑁆𑀔𑀫𑀦𑀲𑀫𑀬𑁄 𑀤𑀼𑀓𑁆𑀓𑀭𑀓𑀸𑀭𑀺𑀓𑀲𑀫𑀬𑁄 𑀫𑀸𑀭𑀯𑀺𑀚𑀬𑀲𑀫𑀬𑁄 𑀅𑀪𑀺𑀲𑀫𑁆𑀩𑁄𑀥𑀺𑀲𑀫𑀬𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑀫𑀬𑁄 𑀤𑁂𑀲𑀦𑀸𑀲𑀫𑀬𑁄 𑀧𑀭𑀺𑀦𑀺𑀩𑁆𑀩𑀸𑀦𑀲𑀫𑀬𑁄𑀢𑀺 𑀏𑀯𑀫𑀸𑀤𑀬𑁄 𑀪𑀕𑀯𑀢𑁄 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀅𑀢𑀺𑀯𑀺𑀬 𑀲𑀼𑀧𑁆𑀧𑀓𑀸𑀲𑀸 𑀅𑀦𑁂𑀓𑀓𑀸𑀮𑀧𑁆𑀧𑀪𑁂𑀤𑀸 𑀏𑀯 𑀲𑀫𑀬𑀸. 𑀢𑁂𑀲𑀼 𑀲𑀫𑀬𑁂𑀲𑀼 𑀤𑁂𑀲𑀦𑀸𑀲𑀫𑀬𑀲𑀗𑁆𑀔𑀸𑀢𑀁 𑀏𑀓𑀁 𑀲𑀫𑀬𑀦𑁆𑀢𑀺 𑀤𑀻𑀧𑁂𑀢𑀺. 𑀬𑁄 𑀘𑀸𑀬𑀁 𑀜𑀸𑀡𑀓𑀭𑀼𑀡𑀸𑀓𑀺𑀘𑁆𑀘𑀲𑀫𑀬𑁂𑀲𑀼 𑀓𑀭𑀼𑀡𑀸𑀓𑀺𑀘𑁆𑀘𑀲𑀫𑀬𑁄, 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀲𑀫𑀬𑁂𑀲𑀼 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀲𑀫𑀬𑁄, 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀓𑀭𑀡𑀻𑀬𑀤𑁆𑀯𑀬𑀲𑀫𑀬𑁂𑀲𑀼 𑀥𑀫𑁆𑀫𑀺𑀓𑀣𑀸𑀲𑀫𑀬𑁄, 𑀤𑁂𑀲𑀦𑀸𑀧𑀝𑀺𑀧𑀢𑁆𑀢𑀺𑀲𑀫𑀬𑁂𑀲𑀼 𑀤𑁂𑀲𑀦𑀸𑀲𑀫𑀬𑁄, 𑀢𑁂𑀲𑀼𑀧𑀺 𑀲𑀫𑀬𑁂𑀲𑀼 𑀅𑀜𑁆𑀜𑀢𑀭𑀁 𑀲𑀦𑁆𑀥𑀸𑀬 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀆𑀳.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀬𑀣𑀸 𑀅𑀪𑀺𑀥𑀫𑁆𑀫𑁂 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭’’𑀦𑁆𑀢𑀺 𑀘 𑀇𑀢𑁄 𑀅𑀜𑁆𑀜𑁂𑀲𑀼 𑀲𑀼𑀢𑁆𑀢𑀧𑀤𑁂𑀲𑀼 ‘‘𑀬𑀲𑁆𑀫𑀺𑀁 𑀲𑀫𑀬𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺 𑀘 𑀪𑀼𑀫𑁆𑀫𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀯𑀺𑀦𑀬𑁂 𑀘 ‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺 𑀓𑀭𑀡𑀯𑀘𑀦𑁂𑀦, 𑀢𑀣𑀸 𑀅𑀓𑀢𑁆𑀯𑀸 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀉𑀧𑀬𑁄𑀕𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺. 𑀢𑀢𑁆𑀣 𑀢𑀣𑀸, 𑀇𑀥 𑀘 𑀅𑀜𑁆𑀜𑀣𑀸 𑀅𑀢𑁆𑀣𑀲𑀫𑁆𑀪𑀯𑀢𑁄. 𑀢𑀢𑁆𑀣 𑀳𑀺 𑀅𑀪𑀺𑀥𑀫𑁆𑀫𑁂 𑀇𑀢𑁄 𑀅𑀜𑁆𑀜𑁂𑀲𑀼 𑀲𑀼𑀢𑁆𑀢𑀧𑀤𑁂𑀲𑀼 𑀘 𑀅𑀥𑀺𑀓𑀭𑀡𑀢𑁆𑀣𑁄 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀺. 𑀅𑀥𑀺𑀓𑀭𑀡𑀜𑁆𑀳𑀺 𑀓𑀸𑀮𑀢𑁆𑀣𑁄 𑀲𑀫𑀽𑀳𑀢𑁆𑀣𑁄 𑀘 𑀲𑀫𑀬𑁄, 𑀢𑀢𑁆𑀣 𑀯𑀼𑀢𑁆𑀢𑀸𑀦𑀁 𑀨𑀲𑁆𑀲𑀸𑀤𑀺𑀥𑀫𑁆𑀫𑀸𑀦𑀁 𑀔𑀡𑀲𑀫𑀯𑀸𑀬𑀳𑁂𑀢𑀼𑀲𑀗𑁆𑀔𑀸𑀢𑀲𑁆𑀲 𑀘 𑀲𑀫𑀬𑀲𑁆𑀲 𑀪𑀸𑀯𑁂𑀦 𑀢𑁂𑀲𑀁 𑀪𑀸𑀯𑁄 𑀮𑀓𑁆𑀔𑀻𑀬𑀢𑀺. 𑀢𑀲𑁆𑀫𑀸 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀢𑀢𑁆𑀣 𑀪𑀼𑀫𑁆𑀫𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄.

𑀯𑀺𑀦𑀬𑁂 𑀘 𑀳𑁂𑀢𑀼𑀅𑀢𑁆𑀣𑁄 𑀓𑀭𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀺. 𑀬𑁄 𑀳𑀺 𑀲𑁄 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀲𑀫𑀬𑁄 𑀲𑀸𑀭𑀺𑀧𑀼𑀢𑁆𑀢𑀸𑀤𑀻𑀳𑀺𑀧𑀺 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑁄, 𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦 𑀓𑀭𑀡𑀪𑀽𑀢𑁂𑀦 𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀸𑀧𑀬𑀦𑁆𑀢𑁄 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀜𑁆𑀘 𑀅𑀧𑁂𑀓𑁆𑀔𑀫𑀸𑀦𑁄 𑀪𑀕𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀳𑀸𑀲𑀺. 𑀢𑀲𑁆𑀫𑀸 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀢𑀢𑁆𑀣 𑀓𑀭𑀡𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄.

𑀇𑀥 𑀧𑀦 𑀅𑀜𑁆𑀜𑀲𑁆𑀫𑀺𑀁 𑀘 𑀏𑀯𑀁𑀚𑀸𑀢𑀺𑀓𑁂 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀬𑀜𑁆𑀳𑀺 𑀲𑀫𑀬𑀁 𑀪𑀕𑀯𑀸 𑀇𑀫𑀁 𑀅𑀜𑁆𑀜𑀁 𑀯𑀸 𑀲𑀼𑀢𑁆𑀢𑀦𑁆𑀢𑀁 𑀤𑁂𑀲𑁂𑀲𑀺, 𑀅𑀘𑁆𑀘𑀦𑁆𑀢𑀫𑁂𑀯 𑀢𑀁 𑀲𑀫𑀬𑀁 𑀓𑀭𑀼𑀡𑀸𑀯𑀺𑀳𑀸𑀭𑁂𑀦 𑀯𑀺𑀳𑀸𑀲𑀺. 𑀢𑀲𑁆𑀫𑀸 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀁 𑀇𑀥 𑀉𑀧𑀬𑁄𑀕𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺.

𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀢𑀁 𑀢𑀁 𑀅𑀢𑁆𑀣𑀫𑀧𑁂𑀓𑁆𑀔𑀺𑀢𑁆𑀯𑀸, 𑀪𑀼𑀫𑁆𑀫𑁂𑀦 𑀓𑀭𑀡𑁂𑀦 𑀘;

𑀅𑀜𑁆𑀜𑀢𑁆𑀭 𑀲𑀫𑀬𑁄 𑀯𑀼𑀢𑁆𑀢𑁄, 𑀉𑀧𑀬𑁄𑀕𑁂𑀦 𑀲𑁄 𑀇𑀥𑀸’’𑀢𑀺.

𑀧𑁄𑀭𑀸𑀡𑀸 𑀧𑀦 𑀯𑀡𑁆𑀡𑀬𑀦𑁆𑀢𑀺 𑁋 ‘‘𑀢𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀯𑀸 ‘‘𑀢𑁂𑀦 𑀲𑀫𑀬𑁂𑀦𑀸’’𑀢𑀺 𑀯𑀸 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀯𑀸 𑀅𑀪𑀺𑀮𑀸𑀧𑀫𑀢𑁆𑀢𑀪𑁂𑀤𑁄 𑀏𑀲, 𑀲𑀩𑁆𑀩𑀢𑁆𑀣 𑀪𑀼𑀫𑁆𑀫𑀫𑁂𑀯 𑀅𑀢𑁆𑀣𑁄𑀢𑀺. 𑀢𑀲𑁆𑀫𑀸 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀯𑀼𑀢𑁆𑀢𑁂𑀧𑀺 ‘‘𑀏𑀓𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀪𑀕𑀯𑀸𑀢𑀺 𑀕𑀭𑀼. 𑀕𑀭𑀼𑀁 𑀳𑀺 𑀮𑁄𑀓𑁂 ‘‘𑀪𑀕𑀯𑀸’’𑀢𑀺 𑀯𑀤𑀦𑁆𑀢𑀺. 𑀅𑀬𑀜𑁆𑀘 𑀲𑀩𑁆𑀩𑀕𑀼𑀡𑀯𑀺𑀲𑀺𑀝𑁆𑀞𑀢𑀸𑀬 𑀲𑀩𑁆𑀩𑀲𑀢𑁆𑀢𑀸𑀦𑀁 𑀕𑀭𑀼, 𑀢𑀲𑁆𑀫𑀸 ‘‘𑀪𑀕𑀯𑀸’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑁄𑀭𑀸𑀡𑁂𑀳𑀺𑀧𑀺 𑀯𑀼𑀢𑁆𑀢𑀁 𑁋

‘‘𑀪𑀕𑀯𑀸𑀢𑀺 𑀯𑀘𑀦𑀁 𑀲𑁂𑀝𑁆𑀞𑀁, 𑀪𑀕𑀯𑀸𑀢𑀺 𑀯𑀘𑀦𑀫𑀼𑀢𑁆𑀢𑀫𑀁;

𑀕𑀭𑀼 𑀕𑀸𑀭𑀯𑀬𑀼𑀢𑁆𑀢𑁄 𑀲𑁄, 𑀪𑀕𑀯𑀸 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁧𑁪𑁨);

𑀅𑀧𑀺𑀘 𑁋

‘‘𑀪𑀕𑁆𑀬𑀯𑀸 𑀪𑀕𑁆𑀕𑀯𑀸 𑀬𑀼𑀢𑁆𑀢𑁄, 𑀪𑀕𑁂𑀳𑀺 𑀘 𑀯𑀺𑀪𑀢𑁆𑀢𑀯𑀸;

𑀪𑀢𑁆𑀢𑀯𑀸 𑀯𑀦𑁆𑀢𑀕𑀫𑀦𑁄, 𑀪𑀯𑁂𑀲𑀼 𑀪𑀕𑀯𑀸 𑀢𑀢𑁄’’𑀢𑀺. 𑁋

𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀯𑀲𑁂𑀦𑀲𑁆𑀲 𑀧𑀤𑀲𑁆𑀲 𑀯𑀺𑀢𑁆𑀣𑀸𑀭𑀢𑁄 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁪𑁪) 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑁄𑀬𑁂𑀯.

𑀏𑀢𑁆𑀢𑀸𑀯𑀢𑀸 𑀘𑁂𑀢𑁆𑀣 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑀯𑀘𑀦𑁂𑀦 𑀬𑀣𑀸𑀲𑀼𑀢𑀁 𑀥𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀢𑁄 𑀥𑀫𑁆𑀫𑀲𑀭𑀻𑀭𑀁 𑀧𑀘𑁆𑀘𑀓𑁆𑀔𑀁 𑀓𑀭𑁄𑀢𑀺. 𑀢𑁂𑀦 ‘‘𑀦𑀬𑀺𑀤𑀁 𑀅𑀢𑀺𑀓𑁆𑀓𑀦𑁆𑀢𑀲𑀢𑁆𑀣𑀼𑀓𑀁 𑀧𑀸𑀯𑀘𑀦𑀁, 𑀅𑀬𑀁 𑀯𑁄 𑀲𑀢𑁆𑀣𑀸’’𑀢𑀺 𑀲𑀢𑁆𑀣𑀼 𑀅𑀤𑀲𑁆𑀲𑀦𑁂𑀦 𑀉𑀓𑁆𑀓𑀡𑁆𑀞𑀺𑀢𑀁 𑀚𑀦𑀁 𑀲𑀫𑀲𑁆𑀲𑀸𑀲𑁂𑀢𑀺. 𑀏𑀓𑀁 𑀲𑀫𑀬𑀁 𑀪𑀕𑀯𑀸𑀢𑀺 𑀯𑀘𑀦𑁂𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀕𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀭𑀽𑀧𑀓𑀸𑀬𑀧𑀭𑀺𑀦𑀺𑀩𑁆𑀩𑀸𑀦𑀁 𑀲𑀸𑀥𑁂𑀢𑀺. 𑀢𑁂𑀦 ‘‘𑀏𑀯𑀁𑀯𑀺𑀥𑀲𑁆𑀲 𑀦𑀸𑀫 𑀅𑀭𑀺𑀬𑀥𑀫𑁆𑀫𑀲𑁆𑀲 𑀤𑁂𑀲𑀓𑁄 𑀤𑀲𑀩𑀮𑀥𑀭𑁄 𑀯𑀚𑀺𑀭𑀲𑀗𑁆𑀖𑀸𑀢𑀲𑀫𑀸𑀦𑀓𑀸𑀬𑁄 𑀲𑁄𑀧𑀺 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀓𑁂𑀦 𑀅𑀜𑁆𑀜𑁂𑀦 𑀚𑀻𑀯𑀺𑀢𑁂 𑀆𑀲𑀸 𑀚𑀦𑁂𑀢𑀩𑁆𑀩𑀸’’𑀢𑀺 𑀚𑀻𑀯𑀺𑀢𑀫𑀤𑀫𑀢𑁆𑀢𑀁 𑀚𑀦𑀁 𑀲𑀁𑀯𑁂𑀚𑁂𑀢𑀺, 𑀲𑀤𑁆𑀥𑀫𑁆𑀫𑁂 𑀘𑀲𑁆𑀲 𑀉𑀲𑁆𑀲𑀸𑀳𑀁 𑀚𑀦𑁂𑀢𑀺. 𑀏𑀯𑀦𑁆𑀢𑀺 𑀘 𑀪𑀡𑀦𑁆𑀢𑁄 𑀤𑁂𑀲𑀦𑀸𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺. 𑀫𑁂 𑀲𑀼𑀢𑀦𑁆𑀢𑀺 𑀲𑀸𑀯𑀓𑀲𑀫𑁆𑀧𑀢𑁆𑀢𑀺𑀁. 𑀏𑀓𑀁 𑀲𑀫𑀬𑀦𑁆𑀢𑀺 𑀓𑀸𑀮𑀲𑀫𑁆𑀧𑀢𑁆𑀢𑀺𑀁. 𑀪𑀕𑀯𑀸𑀢𑀺 𑀤𑁂𑀲𑀓𑀲𑀫𑁆𑀧𑀢𑁆𑀢𑀺𑀁.

𑀲𑀸𑀯𑀢𑁆𑀣𑀺𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀲𑀫𑀻𑀧𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀯𑀺𑀳𑀭𑀢𑀻𑀢𑀺 𑀅𑀯𑀺𑀲𑁂𑀲𑁂𑀦 𑀇𑀭𑀺𑀬𑀸𑀧𑀣𑀤𑀺𑀩𑁆𑀩𑀩𑁆𑀭𑀳𑁆𑀫𑀅𑀭𑀺𑀬𑀯𑀺𑀳𑀸𑀭𑁂𑀲𑀼 𑀅𑀜𑁆𑀜𑀢𑀭𑀯𑀺𑀳𑀸𑀭𑀲𑀫𑀗𑁆𑀕𑀻𑀧𑀭𑀺𑀤𑀻𑀧𑀦𑀫𑁂𑀢𑀁. 𑀇𑀥 𑀧𑀦 𑀞𑀸𑀦𑀕𑀫𑀦𑀦𑀺𑀲𑀚𑁆𑀚𑀸𑀲𑀬𑀦𑀧𑁆𑀧𑀪𑁂𑀤𑁂𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀅𑀜𑁆𑀜𑀢𑀭𑀇𑀭𑀺𑀬𑀸𑀧𑀣𑀲𑀫𑀸𑀬𑁄𑀕𑀧𑀭𑀺𑀤𑀻𑀧𑀦𑀁, 𑀢𑁂𑀦 𑀞𑀺𑀢𑁄𑀧𑀺 𑀕𑀘𑁆𑀙𑀦𑁆𑀢𑁄𑀧𑀺 𑀦𑀺𑀲𑀺𑀦𑁆𑀦𑁄𑀧𑀺 𑀲𑀬𑀸𑀦𑁄𑀧𑀺 𑀪𑀕𑀯𑀸 𑀯𑀺𑀳𑀭𑀢𑀺𑀘𑁆𑀘𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀳𑀺 𑀏𑀓𑀁 𑀇𑀭𑀺𑀬𑀸𑀧𑀣𑀩𑀸𑀥𑀦𑀁 𑀅𑀜𑁆𑀜𑁂𑀦 𑀇𑀭𑀺𑀬𑀸𑀧𑀣𑁂𑀦 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑀭𑀺𑀧𑀢𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀳𑀭𑀢𑀺 𑀧𑀯𑀢𑁆𑀢𑁂𑀢𑀺, 𑀢𑀲𑁆𑀫𑀸 ‘‘𑀯𑀺𑀳𑀭𑀢𑀻’’𑀢𑀺 𑀯𑀼𑀘𑁆𑀘𑀢𑀺.

𑀚𑁂𑀢𑀯𑀦𑁂𑀢𑀺 𑀚𑁂𑀢𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀯𑀦𑁂. 𑀢𑀜𑁆𑀳𑀺 𑀢𑁂𑀦 𑀭𑁄𑀧𑀺𑀢𑀁 𑀲𑀁𑀯𑀟𑁆𑀠𑀺𑀢𑀁 𑀧𑀭𑀺𑀧𑀸𑀮𑀺𑀢𑀁 𑀅𑀳𑁄𑀲𑀺, 𑀢𑀲𑁆𑀫𑀸 ‘‘𑀚𑁂𑀢𑀯𑀦’’𑀦𑁆𑀢𑀺 𑀲𑀗𑁆𑀔𑀁 𑀕𑀢𑀁. 𑀢𑀲𑁆𑀫𑀺𑀁 𑀚𑁂𑀢𑀯𑀦𑁂. 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀕𑀳𑀧𑀢𑀺𑀦𑀸 𑀘𑀢𑀼𑀧𑀜𑁆𑀜𑀸𑀲𑀳𑀺𑀭𑀜𑁆𑀜𑀓𑁄𑀝𑀺𑀧𑀭𑀺𑀘𑁆𑀘𑀸𑀕𑁂𑀦 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀢𑀺𑀢𑀢𑁆𑀢𑀸 ‘‘𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁄’’𑀢𑀺 𑀲𑀗𑁆𑀔𑀁 𑀕𑀢𑁂 𑀆𑀭𑀸𑀫𑁂. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬 𑀲𑀩𑁆𑀩𑀸𑀲𑀯𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁧.𑁧𑁪) 𑀯𑀼𑀢𑁆𑀢𑁄.

𑀢𑀢𑁆𑀣 𑀲𑀺𑀬𑀸 𑁋 𑀬𑀤𑀺 𑀢𑀸𑀯 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺, ‘‘𑀚𑁂𑀢𑀯𑀦𑁂’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀅𑀣 𑀢𑀢𑁆𑀣 𑀯𑀺𑀳𑀭𑀢𑀺, ‘‘𑀲𑀸𑀯𑀢𑁆𑀣𑀺𑀬’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀦 𑀳𑀺 𑀲𑀓𑁆𑀓𑀸 𑀉𑀪𑀬𑀢𑁆𑀣 𑀏𑀓𑀁 𑀲𑀫𑀬𑀁 𑀯𑀺𑀳𑀭𑀺𑀢𑀼𑀦𑁆𑀢𑀺. 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁.

𑀦𑀦𑀼 𑀅𑀯𑁄𑀘𑀼𑀫𑁆𑀳 ‘‘𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀯𑀘𑀦’’𑀦𑁆𑀢𑀺. 𑀢𑀲𑁆𑀫𑀸 𑀬𑀣𑀸 𑀕𑀗𑁆𑀕𑀸𑀬𑀫𑀼𑀦𑀸𑀤𑀻𑀦𑀁 𑀲𑀫𑀻𑀧𑁂 𑀕𑁄𑀬𑀽𑀣𑀸𑀦𑀺 𑀘𑀭𑀦𑁆𑀢𑀸𑀦𑀺 ‘‘𑀕𑀗𑁆𑀕𑀸𑀬𑀁 𑀘𑀭𑀦𑁆𑀢𑀺, 𑀬𑀫𑀼𑀦𑀸𑀬𑀁 𑀘𑀭𑀦𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀥𑀸𑀧𑀺 𑀬𑀤𑀺𑀤𑀁 𑀲𑀸𑀯𑀢𑁆𑀣𑀺𑀬𑀸 𑀲𑀫𑀻𑀧𑁂 𑀚𑁂𑀢𑀯𑀦𑀁, 𑀢𑀢𑁆𑀣 𑀯𑀺𑀳𑀭𑀦𑁆𑀢𑁄 𑀯𑀼𑀘𑁆𑀘𑀢𑀺 ‘‘𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂’’𑀢𑀺. 𑀕𑁄𑀘𑀭𑀕𑀸𑀫𑀦𑀺𑀤𑀲𑁆𑀲𑀦𑀢𑁆𑀣𑀁 𑀳𑀺𑀲𑁆𑀲 𑀲𑀸𑀯𑀢𑁆𑀣𑀺𑀯𑀘𑀦𑀁, 𑀧𑀩𑁆𑀩𑀚𑀺𑀢𑀸𑀦𑀼𑀭𑀽𑀧𑀦𑀺𑀯𑀸𑀲𑀝𑁆𑀞𑀸𑀦𑀦𑀺𑀤𑀲𑁆𑀲𑀦𑀢𑁆𑀣𑀁 𑀲𑁂𑀲𑀯𑀘𑀦𑀁.

𑀅𑀜𑁆𑀜𑀢𑀭𑀸 𑀤𑁂𑀯𑀢𑀸𑀢𑀺 𑀦𑀸𑀫𑀕𑁄𑀢𑁆𑀢𑀯𑀲𑁂𑀦 𑀅𑀧𑀸𑀓𑀝𑀸 𑀏𑀓𑀸 𑀤𑁂𑀯𑀢𑀸𑀢𑀺 𑀅𑀢𑁆𑀣𑁄. ‘‘𑀅𑀪𑀺𑀚𑀸𑀦𑀸𑀢𑀺 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀅𑀳𑀼 𑀜𑀸𑀢𑀜𑁆𑀜𑀢𑀭𑀲𑁆𑀲 𑀫𑀳𑁂𑀲𑀓𑁆𑀔𑀲𑁆𑀲 𑀬𑀓𑁆𑀔𑀲𑁆𑀲 𑀲𑀁𑀔𑀺𑀢𑁆𑀢𑁂𑀦 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀺𑀁 𑀪𑀸𑀲𑀺𑀢𑀸’’𑀢𑀺 𑀏𑀢𑁆𑀣 𑀧𑀦 𑀅𑀪𑀺𑀜𑁆𑀜𑀸𑀢𑁄 𑀲𑀓𑁆𑀓𑁄𑀧𑀺 𑀤𑁂𑀯𑀭𑀸𑀚𑀸 ‘‘𑀅𑀜𑁆𑀜𑀢𑀭𑁄’’𑀢𑀺 𑀯𑀼𑀢𑁆𑀢𑁄. ‘‘𑀤𑁂𑀯𑀢𑀸’’𑀢𑀺 𑀘 𑀇𑀤𑀁 𑀤𑁂𑀯𑀸𑀦𑀫𑁆𑀧𑀺 𑀤𑁂𑀯𑀥𑀻𑀢𑀸𑀦𑀫𑁆𑀧𑀺 𑀲𑀸𑀥𑀸𑀭𑀡𑀯𑀘𑀦𑀁. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀤𑁂𑀯𑁄 𑀅𑀥𑀺𑀧𑁆𑀧𑁂𑀢𑁄, 𑀲𑁄 𑀘 𑀔𑁄 𑀭𑀽𑀧𑀸𑀯𑀘𑀭𑀸𑀦𑀁 𑀤𑁂𑀯𑀸𑀦𑀁 𑀅𑀜𑁆𑀜𑀢𑀭𑁄.

𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀅𑀪𑀺𑀓𑁆𑀓𑀦𑁆𑀢-𑀲𑀤𑁆𑀤𑁄 𑀔𑀬𑀲𑀼𑀦𑁆𑀤𑀭𑀸𑀪𑀺𑀭𑀽𑀧𑀅𑀩𑁆𑀪𑀸𑀦𑀼𑀫𑁄𑀤𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀢𑁆𑀣 ‘‘𑀅𑀪𑀺𑀓𑁆𑀓𑀦𑁆𑀢𑀸, 𑀪𑀦𑁆𑀢𑁂, 𑀭𑀢𑁆𑀢𑀺, 𑀦𑀺𑀓𑁆𑀔𑀦𑁆𑀢𑁄 𑀧𑀞𑀫𑁄 𑀬𑀸𑀫𑁄, 𑀘𑀺𑀭𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀉𑀤𑁆𑀤𑀺𑀲𑀢𑀼, 𑀪𑀦𑁆𑀢𑁂, 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁮.𑁨𑁦; 𑀘𑀽𑀴𑀯. 𑁩𑁮𑁩) 𑀔𑀬𑁂 𑀤𑀺𑀲𑁆𑀲𑀢𑀺. ‘‘𑀅𑀬𑀁 𑀇𑀫𑁂𑀲𑀁 𑀘𑀢𑀼𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀪𑀺𑀓𑁆𑀓𑀦𑁆𑀢𑀢𑀭𑁄 𑀘 𑀧𑀡𑀻𑀢𑀢𑀭𑁄 𑀘𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁪.𑁧𑁦𑁦) 𑀲𑀼𑀦𑁆𑀤𑀭𑁂.

‘‘𑀓𑁄 𑀫𑁂 𑀯𑀦𑁆𑀤𑀢𑀺 𑀧𑀸𑀤𑀸𑀦𑀺, 𑀇𑀤𑁆𑀥𑀺𑀬𑀸 𑀬𑀲𑀲𑀸 𑀚𑀮𑀁;

𑀅𑀪𑀺𑀓𑁆𑀓𑀦𑁆𑀢𑁂𑀦 𑀯𑀡𑁆𑀡𑁂𑀦, 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸’’𑀢𑀺. 𑁋

𑀏𑀯𑀫𑀸𑀤𑀻𑀲𑀼 (𑀯𑀺. 𑀯. 𑁮𑁫𑁭) 𑀅𑀪𑀺𑀭𑀽𑀧𑁂. ‘‘𑀅𑀪𑀺𑀓𑁆𑀓𑀦𑁆𑀢𑀁 𑀪𑁄 𑀕𑁄𑀢𑀫, 𑀅𑀪𑀺𑀓𑁆𑀓𑀦𑁆𑀢𑀁 𑀪𑁄 𑀕𑁄𑀢𑀫𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀧𑀸𑀭𑀸. 𑁧𑁫) 𑀅𑀩𑁆𑀪𑀸𑀦𑀼𑀫𑁄𑀤𑀦𑁂. 𑀇𑀥 𑀧𑀦 𑀔𑀬𑁂. 𑀢𑁂𑀦 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸, 𑀧𑀭𑀺𑀓𑁆𑀔𑀻𑀡𑀸𑀬 𑀭𑀢𑁆𑀢𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣𑀸𑀬𑀁 𑀤𑁂𑀯𑀧𑀼𑀢𑁆𑀢𑁄 𑀫𑀚𑁆𑀛𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀆𑀕𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀦𑀺𑀬𑀸𑀫𑁄 𑀳𑀺 𑀓𑀺𑀭𑁂𑀲 𑀤𑁂𑀯𑀢𑀸𑀦𑀁 𑀬𑀤𑀺𑀤𑀁 𑀩𑀼𑀤𑁆𑀥𑀸𑀦𑀁 𑀯𑀸 𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀯𑀸 𑀉𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀸 𑀫𑀚𑁆𑀛𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂𑀬𑁂𑀯 𑀆𑀕𑀘𑁆𑀙𑀦𑁆𑀢𑀺.

𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸𑀢𑀺 𑀇𑀥 𑀅𑀪𑀺𑀓𑁆𑀓𑀦𑁆𑀢-𑀲𑀤𑁆𑀤𑁄 𑀅𑀪𑀺𑀭𑀽𑀧𑁂, 𑀯𑀡𑁆𑀡-𑀲𑀤𑁆𑀤𑁄 𑀧𑀦 𑀙𑀯𑀺𑀣𑀼𑀢𑀺-𑀓𑀼𑀮𑀯𑀕𑁆𑀕-𑀓𑀸𑀭𑀡-𑀲𑀡𑁆𑀞𑀸𑀦𑀧𑁆𑀧𑀫𑀸𑀡-𑀭𑀽𑀧𑀸𑀬𑀢𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀢𑁆𑀣 ‘‘𑀲𑀼𑀯𑀡𑁆𑀡𑀯𑀡𑁆𑀡𑁄𑀲𑀺 𑀪𑀕𑀯𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀼. 𑀦𑀺. 𑁫𑁫𑁩) 𑀙𑀯𑀺𑀬𑀸. ‘‘𑀓𑀤𑀸 𑀲𑀜𑁆𑀜𑀽𑀴𑁆𑀳𑀸 𑀧𑀦 𑀢𑁂, 𑀕𑀳𑀧𑀢𑀺, 𑀇𑀫𑁂 𑀲𑀫𑀡𑀲𑁆𑀲 𑀯𑀡𑁆𑀡𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁨.𑁭𑁭) 𑀣𑀼𑀢𑀺𑀬𑀁. ‘‘𑀘𑀢𑁆𑀢𑀸𑀭𑁄𑀫𑁂, 𑀪𑁄 𑀕𑁄𑀢𑀫, 𑀯𑀡𑁆𑀡𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁩.𑁧𑁧𑁫) 𑀓𑀼𑀮𑀯𑀕𑁆𑀕𑁂. ‘‘𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀕𑀦𑁆𑀥𑀣𑁂𑀦𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁧.𑁨𑁩𑁪) 𑀓𑀸𑀭𑀡𑁂. ‘‘𑀫𑀳𑀦𑁆𑀢𑀁 𑀳𑀢𑁆𑀣𑀺𑀭𑀸𑀚𑀯𑀡𑁆𑀡𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀢𑁆𑀯𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁩𑁮) 𑀲𑀡𑁆𑀞𑀸𑀦𑁂. ‘‘𑀢𑀬𑁄 𑀧𑀢𑁆𑀢𑀲𑁆𑀲 𑀯𑀡𑁆𑀡𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀧𑀸𑀭𑀸. 𑁬𑁦𑁨) 𑀧𑀫𑀸𑀡𑁂. ‘‘𑀯𑀡𑁆𑀡𑁄 𑀕𑀦𑁆𑀥𑁄 𑀭𑀲𑁄 𑀑𑀚𑀸’’𑀢𑀺 𑀏𑀯𑀫𑀸𑀤𑀻𑀲𑀼 𑀭𑀽𑀧𑀸𑀬𑀢𑀦𑁂. 𑀲𑁄 𑀇𑀥 𑀙𑀯𑀺𑀬𑀸 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀅𑀪𑀺𑀭𑀽𑀧𑀘𑁆𑀙𑀯𑀺, 𑀇𑀝𑁆𑀞𑀯𑀡𑁆𑀡𑀸 𑀫𑀦𑀸𑀧𑀯𑀡𑁆𑀡𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀤𑁂𑀯𑀢𑀸 𑀳𑀺 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀘𑁆𑀙𑀫𑀸𑀦𑀸 𑀧𑀓𑀢𑀺𑀯𑀡𑁆𑀡𑀁 𑀧𑀓𑀢𑀺𑀇𑀤𑁆𑀥𑀺𑀁 𑀚𑀳𑀺𑀢𑁆𑀯𑀸 𑀑𑀴𑀸𑀭𑀺𑀓𑀁 𑀅𑀢𑁆𑀢𑀪𑀸𑀯𑀁 𑀓𑀢𑁆𑀯𑀸 𑀅𑀢𑀺𑀭𑁂𑀓𑀯𑀡𑁆𑀡𑀁 𑀅𑀢𑀺𑀭𑁂𑀓𑀇𑀤𑁆𑀥𑀺𑀁 𑀫𑀸𑀧𑁂𑀢𑁆𑀯𑀸 𑀦𑀝𑀲𑀫𑀚𑁆𑀚𑀸𑀤𑀻𑀦𑀺 𑀕𑀘𑁆𑀙𑀦𑁆𑀢𑀸 𑀫𑀦𑀼𑀲𑁆𑀲𑀸 𑀯𑀺𑀬 𑀅𑀪𑀺𑀲𑀗𑁆𑀔𑀢𑁂𑀦 𑀓𑀸𑀬𑁂𑀦 𑀆𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀓𑀸𑀫𑀸𑀯𑀘𑀭𑀸 𑀅𑀦𑀪𑀺𑀲𑀗𑁆𑀔𑀢𑁂𑀦𑀧𑀺 𑀆𑀕𑀦𑁆𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀭𑀽𑀧𑀸𑀯𑀘𑀭𑀸 𑀧𑀦 𑀦 𑀲𑀓𑁆𑀓𑁄𑀦𑁆𑀢𑀺. 𑀢𑁂𑀲𑀜𑁆𑀳𑀺 𑀅𑀢𑀺𑀲𑀼𑀔𑀼𑀫𑁄 𑀅𑀢𑁆𑀢𑀪𑀸𑀯𑁄, 𑀦 𑀢𑁂𑀦 𑀇𑀭𑀺𑀬𑀸𑀧𑀣𑀓𑀧𑁆𑀧𑀦𑀁 𑀳𑁄𑀢𑀺. 𑀢𑀲𑁆𑀫𑀸 𑀅𑀬𑀁 𑀤𑁂𑀯𑀧𑀼𑀢𑁆𑀢𑁄 𑀅𑀪𑀺𑀲𑀗𑁆𑀔𑀢𑁂𑀦𑁂𑀯 𑀆𑀕𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸’’𑀢𑀺.

𑀓𑁂𑀯𑀮𑀓𑀧𑁆𑀧𑀦𑁆𑀢𑀺 𑀏𑀢𑁆𑀣 𑀓𑁂𑀯𑀮-𑀲𑀤𑁆𑀤𑁄 𑀅𑀦𑀯𑀲𑁂𑀲-𑀬𑁂𑀪𑀼𑀬𑁆𑀬𑀸𑀩𑁆𑀬𑀸𑀫𑀺𑀲𑁆𑀲𑀸𑀦𑀢𑀺𑀭𑁂𑀓𑀤𑀴𑁆𑀳𑀢𑁆𑀣𑀯𑀺𑀲𑀁𑀬𑁄𑀕𑀸𑀤𑀺𑀅𑀦𑁂𑀓𑀢𑁆𑀣𑁄. 𑀢𑀣𑀸 𑀳𑀺𑀲𑁆𑀲 ‘‘𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀧𑀸𑀭𑀸. 𑁧) 𑀅𑀦𑀯𑀲𑁂𑀲𑀢𑁆𑀣𑀫𑀢𑁆𑀣𑁄. ‘‘𑀓𑁂𑀯𑀮𑀓𑀧𑁆𑀧𑀸 𑀘 𑀅𑀗𑁆𑀕𑀫𑀕𑀥𑀸 𑀧𑀳𑀽𑀢𑀁 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁 𑀆𑀤𑀸𑀬 𑀉𑀧𑀲𑀗𑁆𑀓𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀫𑀳𑀸𑀯. 𑁪𑁩) 𑀬𑁂𑀪𑀼𑀬𑁆𑀬𑀢𑀸. ‘‘𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀯𑀺𑀪. 𑁨𑁨𑁫) 𑀅𑀩𑁆𑀬𑀸𑀫𑀺𑀲𑁆𑀲𑀢𑀸. ‘‘𑀓𑁂𑀯𑀮𑀁 𑀲𑀤𑁆𑀥𑀸𑀫𑀢𑁆𑀢𑀓𑀁 𑀦𑀽𑀦 𑀅𑀬𑀫𑀸𑀬𑀲𑁆𑀫𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫𑀳𑀸𑀯. 𑁨𑁪𑁪) 𑀅𑀦𑀢𑀺𑀭𑁂𑀓𑀢𑀸. ‘‘𑀆𑀬𑀲𑁆𑀫𑀢𑁄, 𑀪𑀦𑁆𑀢𑁂, 𑀅𑀦𑀼𑀭𑀼𑀤𑁆𑀥𑀲𑁆𑀲 𑀩𑀸𑀳𑀺𑀬𑁄 𑀦𑀸𑀫 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀓𑁂𑀯𑀮𑀓𑀧𑁆𑀧𑀁 𑀲𑀗𑁆𑀖𑀪𑁂𑀤𑀸𑀬 𑀞𑀺𑀢𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁪.𑁨𑁪𑁩) 𑀤𑀴𑁆𑀳𑀢𑁆𑀣𑀢𑀸. ‘‘𑀓𑁂𑀯𑀮𑀻 𑀯𑀼𑀲𑀺𑀢𑀯𑀸 𑀉𑀢𑁆𑀢𑀫𑀧𑀼𑀭𑀺𑀲𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁩.𑁫𑁭) 𑀯𑀺𑀲𑀁𑀬𑁄𑀕𑁄 𑀅𑀢𑁆𑀣𑁄. 𑀇𑀥 𑀧𑀦𑀲𑁆𑀲 𑀅𑀦𑀯𑀲𑁂𑀲𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄.

𑀓𑀧𑁆𑀧-𑀲𑀤𑁆𑀤𑁄 𑀧𑀦𑀸𑀬𑀁 𑀅𑀪𑀺𑀲𑀤𑁆𑀤𑀳𑀦-𑀯𑁄𑀳𑀸𑀭-𑀓𑀸𑀮-𑀧𑀜𑁆𑀜𑀢𑁆𑀢𑀺-𑀙𑁂𑀤𑀦-𑀯𑀺𑀓𑀧𑁆𑀧-𑀮𑁂𑀲𑀲𑀫𑀦𑁆𑀢𑀪𑀸𑀯𑀸𑀤𑀺𑀅𑀦𑁂𑀓𑀢𑁆𑀣𑁄. 𑀢𑀣𑀸 𑀳𑀺𑀲𑁆𑀲 ‘‘𑀑𑀓𑀧𑁆𑀧𑀦𑀺𑀬𑀫𑁂𑀢𑀁 𑀪𑁄𑀢𑁄 𑀕𑁄𑀢𑀫𑀲𑁆𑀲, 𑀬𑀣𑀸 𑀢𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁩𑁮𑁭) 𑀅𑀪𑀺𑀲𑀤𑁆𑀤𑀳𑀦𑀫𑀢𑁆𑀣𑁄. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀺 𑀨𑀮𑀁 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀘𑀽𑀴𑀯. 𑁨𑁫𑁦) 𑀯𑁄𑀳𑀸𑀭𑁄. ‘‘𑀬𑁂𑀦 𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’𑀢𑀺 𑀏𑀯𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁩𑁮𑁭) 𑀓𑀸𑀮𑁄. ‘‘𑀇𑀘𑁆𑀘𑀸𑀬𑀲𑁆𑀫𑀸 𑀓𑀧𑁆𑀧𑁄’’𑀢𑀺 𑀏𑀯𑀫𑀸𑀤𑀻𑀲𑀼 𑀧𑀜𑁆𑀜𑀢𑁆𑀢𑀺. ‘‘𑀅𑀮𑀗𑁆𑀓𑀢𑁄 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽’’𑀢𑀺 𑀏𑀯𑀫𑀸𑀤𑀻𑀲𑀼 (𑀯𑀺. 𑀯. 𑁧𑁦𑁯𑁪, 𑁧𑁧𑁦𑁧) 𑀙𑁂𑀤𑀦𑀁. ‘‘𑀓𑀧𑁆𑀧𑀢𑀺 𑀤𑁆𑀯𑀗𑁆𑀕𑀼𑀮𑀓𑀧𑁆𑀧𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀘𑀽𑀴𑀯. 𑁪𑁪𑁬) 𑀯𑀺𑀓𑀧𑁆𑀧𑁄. ‘‘𑀆𑀢𑁆𑀣𑀺 𑀓𑀧𑁆𑀧𑁄 𑀦𑀺𑀧𑀚𑁆𑀚𑀺𑀢𑀼’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 (𑀅. 𑀦𑀺. 𑁮.𑁮𑁦) 𑀮𑁂𑀲𑁄. ‘‘𑀓𑁂𑀯𑀮𑀓𑀧𑁆𑀧𑀁 𑀯𑁂𑀴𑀼𑀯𑀦𑀁 𑀑𑀪𑀸𑀲𑁂𑀢𑁆𑀯𑀸’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁧.𑁯𑁪) 𑀲𑀫𑀦𑁆𑀢𑀪𑀸𑀯𑁄. 𑀇𑀥 𑀧𑀦𑀲𑁆𑀲 𑀲𑀫𑀦𑁆𑀢𑀪𑀸𑀯𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄. 𑀢𑀲𑁆𑀫𑀸 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀦𑁆𑀢𑀺 𑀏𑀢𑁆𑀣 ‘‘𑀅𑀦𑀯𑀲𑁂𑀲𑀁 𑀲𑀫𑀦𑁆𑀢𑀢𑁄 𑀚𑁂𑀢𑀯𑀦’’𑀦𑁆𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀑𑀪𑀸𑀲𑁂𑀢𑁆𑀯𑀸𑀢𑀺 𑀯𑀢𑁆𑀣𑀸𑀮𑀗𑁆𑀓𑀸𑀭𑀲𑀭𑀻𑀭𑀲𑀫𑀼𑀝𑁆𑀞𑀺𑀢𑀸𑀬 𑀆𑀪𑀸𑀬 𑀨𑀭𑀺𑀢𑁆𑀯𑀸, 𑀘𑀦𑁆𑀤𑀺𑀫𑀸 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀘 𑀏𑀓𑁄𑀪𑀸𑀲𑀁 𑀏𑀓𑀧𑀚𑁆𑀚𑁄𑀢𑀁 𑀓𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀬𑁂𑀦𑀸𑀢𑀺 𑀪𑀼𑀫𑁆𑀫𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀢𑀲𑁆𑀫𑀸 ‘‘𑀬𑀢𑁆𑀣 𑀪𑀕𑀯𑀸, 𑀢𑀢𑁆𑀣 𑀉𑀧𑀲𑀗𑁆𑀓𑀫𑀻’’𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑁂𑀦 𑀯𑀸 𑀓𑀸𑀭𑀡𑁂𑀦 𑀪𑀕𑀯𑀸 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄, 𑀢𑁂𑀦 𑀓𑀸𑀭𑀡𑁂𑀦 𑀉𑀧𑀲𑀗𑁆𑀓𑀫𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀓𑁂𑀦 𑀘 𑀓𑀸𑀭𑀡𑁂𑀦 𑀪𑀕𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄? 𑀦𑀸𑀦𑀧𑁆𑀧𑀓𑀸𑀭𑀕𑀼𑀡𑀯𑀺𑀲𑁂𑀲𑀸𑀥𑀺𑀕𑀫𑀸𑀥𑀺𑀧𑁆𑀧𑀸𑀬𑁂𑀦, 𑀲𑀸𑀤𑀼𑀨𑀮𑀽𑀧𑀪𑁄𑀕𑀸𑀥𑀺𑀧𑁆𑀧𑀸𑀬𑁂𑀦 𑀤𑀺𑀚𑀕𑀡𑁂𑀳𑀺 𑀦𑀺𑀘𑁆𑀘𑀨𑀮𑀺𑀢𑀫𑀳𑀸𑀭𑀼𑀓𑁆𑀔𑁄 𑀯𑀺𑀬. 𑀉𑀧𑀲𑀗𑁆𑀓𑀫𑀻𑀢𑀺 𑀘 𑀕𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸𑀢𑀺 𑀉𑀧𑀲𑀗𑁆𑀓𑀫𑀦𑀧𑀭𑀺𑀬𑁄𑀲𑀸𑀦𑀤𑀻𑀧𑀦𑀁. 𑀅𑀣 𑀯𑀸 𑀏𑀯𑀁 𑀕𑀢𑀸 𑀢𑀢𑁄 𑀆𑀲𑀦𑁆𑀦𑀢𑀭𑀁 𑀞𑀸𑀦𑀁 𑀪𑀕𑀯𑀢𑁄 𑀲𑀫𑀻𑀧𑀲𑀗𑁆𑀔𑀸𑀢𑀁 𑀕𑀦𑁆𑀢𑁆𑀯𑀸𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀇𑀤𑀸𑀦𑀺 𑀬𑁂𑀦𑀢𑁆𑀣𑁂𑀦 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑀲𑁆𑀲 𑀉𑀧𑀝𑁆𑀞𑀸𑀦𑀁 𑀆𑀕𑀢𑀸, 𑀢𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑀸 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀅𑀜𑁆𑀚𑀼𑀮𑀺𑀁 𑀲𑀺𑀭𑀲𑀺 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄 𑁋 ‘‘𑀯𑀺𑀲𑀫𑀁 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀭𑀺𑀯𑀢𑁆𑀢𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁭𑁦) 𑀯𑀺𑀬. 𑀢𑀲𑁆𑀫𑀸 𑀬𑀣𑀸 𑀞𑀺𑀢𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀳𑁄𑀢𑀺, 𑀢𑀣𑀸 𑀅𑀝𑁆𑀞𑀸𑀲𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀏𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀅𑀝𑁆𑀞𑀸𑀲𑀻𑀢𑀺 𑀞𑀸𑀦𑀁 𑀓𑀧𑁆𑀧𑁂𑀲𑀺. 𑀧𑀡𑁆𑀟𑀺𑀢𑀸 𑀳𑀺 𑀤𑁂𑀯𑀫𑀦𑀼𑀲𑁆𑀲𑀸 𑀕𑀭𑀼𑀝𑁆𑀞𑀸𑀦𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀲𑀦𑀓𑀼𑀲𑀮𑀢𑀸𑀬 𑀏𑀓𑀫𑀦𑁆𑀢𑀁 𑀢𑀺𑀝𑁆𑀞𑀦𑁆𑀢𑀺, 𑀅𑀬𑀜𑁆𑀘 𑀤𑁂𑀯𑁄 𑀢𑁂𑀲𑀁 𑀅𑀜𑁆𑀜𑀢𑀭𑁄, 𑀢𑀲𑁆𑀫𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺.

𑀓𑀣𑀁 𑀞𑀺𑀢𑁄 𑀧𑀦 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀳𑁄𑀢𑀻𑀢𑀺? 𑀙 𑀞𑀸𑀦𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀢𑀺𑀤𑀽𑀭𑀁, 𑀅𑀘𑁆𑀘𑀸𑀲𑀦𑁆𑀦𑀁, 𑀉𑀧𑀭𑀺𑀯𑀸𑀢𑀁, 𑀉𑀦𑁆𑀦𑀢𑀧𑁆𑀧𑀤𑁂𑀲𑀁, 𑀅𑀢𑀺𑀲𑀫𑁆𑀫𑀼𑀔𑀁, 𑀅𑀢𑀺𑀧𑀘𑁆𑀙𑀸𑀢𑀺. 𑀅𑀢𑀺𑀤𑀽𑀭𑁂 𑀞𑀺𑀢𑁄 𑀳𑀺 𑀲𑀘𑁂 𑀓𑀣𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀉𑀘𑁆𑀘𑀸𑀲𑀤𑁆𑀤𑁂𑀦 𑀓𑀣𑁂𑀢𑀩𑁆𑀩𑀁 𑀳𑁄𑀢𑀺. 𑀅𑀘𑁆𑀘𑀸𑀲𑀦𑁆𑀦𑁂 𑀞𑀺𑀢𑁄 𑀲𑀗𑁆𑀖𑀝𑁆𑀝𑀦𑀁 𑀓𑀭𑁄𑀢𑀺. 𑀉𑀧𑀭𑀺𑀯𑀸𑀢𑁂 𑀞𑀺𑀢𑁄 𑀲𑀭𑀻𑀭𑀕𑀦𑁆𑀥𑁂𑀦 𑀩𑀸𑀥𑀢𑀺. 𑀉𑀦𑁆𑀦𑀢𑀧𑁆𑀧𑀤𑁂𑀲𑁂 𑀞𑀺𑀢𑁄 𑀅𑀕𑀸𑀭𑀯𑀁 𑀧𑀓𑀸𑀲𑁂𑀢𑀺. 𑀅𑀢𑀺𑀲𑀫𑁆𑀫𑀼𑀔𑀸 𑀞𑀺𑀢𑁄 𑀲𑀘𑁂 𑀤𑀝𑁆𑀞𑀼𑀓𑀸𑀫𑁄 𑀳𑁄𑀢𑀺, 𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀁 𑀆𑀳𑀘𑁆𑀘 𑀤𑀝𑁆𑀞𑀩𑁆𑀩𑀁 𑀳𑁄𑀢𑀺. 𑀅𑀢𑀺𑀧𑀘𑁆𑀙𑀸 𑀞𑀺𑀢𑁄 𑀲𑀘𑁂 𑀤𑀝𑁆𑀞𑀼𑀓𑀸𑀫𑁄 𑀳𑁄𑀢𑀺, 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸 𑀤𑀝𑁆𑀞𑀩𑁆𑀩𑀁 𑀳𑁄𑀢𑀺. 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀏𑀢𑁂 𑀙 𑀞𑀸𑀦𑀤𑁄𑀲𑁂 𑀯𑀚𑁆𑀚𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀻’’𑀢𑀺.

𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 𑀅𑀯𑁄𑀘. 𑀓𑀣𑀁 𑀦𑀽𑀢𑀺 𑀓𑀸𑀭𑀡𑀧𑀼𑀘𑁆𑀙𑀸. 𑀪𑀕𑀯𑀢𑁄 𑀳𑀺 𑀢𑀺𑀡𑁆𑀡𑁄𑀖𑀪𑀸𑀯𑁄 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸 𑀧𑀸𑀓𑀝𑁄, 𑀢𑁂𑀦𑀺𑀫𑀺𑀲𑁆𑀲𑀸 𑀤𑁂𑀯𑀢𑀸𑀬 𑀢𑀢𑁆𑀣 𑀓𑀗𑁆𑀔𑀸 𑀦𑀢𑁆𑀣𑀺, 𑀇𑀫𑀺𑀦𑀸 𑀧𑀦 𑀓𑀸𑀭𑀡𑁂𑀦 ‘‘𑀢𑀺𑀡𑁆𑀡𑁄’’𑀢𑀺 𑀦 𑀚𑀸𑀦𑀸𑀢𑀺, 𑀢𑁂𑀦 𑀲𑀸 𑀢𑀁 𑀓𑀸𑀭𑀡𑀁 𑀧𑀼𑀘𑁆𑀙𑀫𑀸𑀦𑀸 𑀏𑀯𑀫𑀸𑀳.

𑀫𑀸𑀭𑀺𑀲𑀸𑀢𑀺 𑀤𑁂𑀯𑀢𑀸𑀦𑀁 𑀧𑀺𑀬𑀲𑀫𑀼𑀤𑀸𑀘𑀸𑀭𑀯𑀘𑀦𑀫𑁂𑀢𑀁. 𑀦𑀺𑀤𑁆𑀤𑀼𑀓𑁆𑀔𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀤𑀺 𑀏𑀯𑀁 ‘‘𑀬𑀤𑀸 𑀔𑁄 𑀢𑁂, 𑀫𑀸𑀭𑀺𑀲, 𑀲𑀗𑁆𑀓𑀼𑀦𑀸 𑀲𑀗𑁆𑀓𑀼 𑀳𑀤𑀬𑁂 𑀲𑀫𑀸𑀕𑀘𑁆𑀙𑁂𑀬𑁆𑀬, 𑀅𑀣 𑀦𑀁 𑀢𑁆𑀯𑀁 𑀚𑀸𑀦𑁂𑀬𑁆𑀬𑀸𑀲𑀺 ‘𑀯𑀲𑁆𑀲𑀲𑀳𑀲𑁆𑀲𑀁 𑀫𑁂 𑀦𑀺𑀭𑀬𑁂 𑀧𑀘𑁆𑀘𑀫𑀸𑀦𑀲𑁆𑀲𑀸’’’𑀢𑀺 (𑀫. 𑀦𑀺. 𑁧.𑁫𑁧𑁨) 𑀇𑀤𑀁 𑀯𑀺𑀭𑀼𑀚𑁆𑀛𑀢𑀺. 𑀦 𑀳𑀺 𑀦𑁂𑀭𑀬𑀺𑀓𑀲𑀢𑁆𑀢𑁄 𑀦𑀺𑀤𑁆𑀤𑀼𑀓𑁆𑀔𑁄 𑀦𑀸𑀫 𑀳𑁄𑀢𑀺. 𑀓𑀺𑀜𑁆𑀘𑀸𑀧𑀺 𑀦 𑀦𑀺𑀤𑁆𑀤𑀼𑀓𑁆𑀔𑁄, 𑀭𑀼𑀴𑁆𑀳𑀻𑀲𑀤𑁆𑀤𑁂𑀦 𑀧𑀦 𑀏𑀯𑀁 𑀯𑀼𑀘𑁆𑀘𑀢𑀺. 𑀧𑀼𑀩𑁆𑀩𑁂 𑀓𑀺𑀭 𑀧𑀞𑀫𑀓𑀧𑁆𑀧𑀺𑀓𑀸𑀦𑀁 𑀦𑀺𑀤𑁆𑀤𑀼𑀓𑁆𑀔𑀸𑀦𑀁 𑀲𑀼𑀔𑀲𑀫𑀧𑁆𑀧𑀺𑀢𑀸𑀦𑀁 𑀏𑀲 𑀯𑁄𑀳𑀸𑀭𑁄, 𑀅𑀧𑀭𑀪𑀸𑀕𑁂 𑀤𑀼𑀓𑁆𑀔𑀁 𑀳𑁄𑀢𑀼 𑀯𑀸 𑀫𑀸 𑀯𑀸, 𑀭𑀼𑀴𑁆𑀳𑀻𑀲𑀤𑁆𑀤𑁂𑀦 𑀅𑀬𑀁 𑀯𑁄𑀳𑀸𑀭𑁄 𑀯𑀼𑀘𑁆𑀘𑀢𑁂𑀯 𑀦𑀺𑀧𑁆𑀧𑀤𑀼𑀫𑀸𑀧𑀺 𑀦𑀺𑀭𑀼𑀤𑀓𑀸𑀧𑀺 𑀯𑀸 𑀧𑁄𑀓𑁆𑀔𑀭𑀡𑀻 𑀧𑁄𑀓𑁆𑀔𑀭𑀡𑀻 𑀯𑀺𑀬.

𑀑𑀖𑀫𑀢𑀭𑀻𑀢𑀺 𑀏𑀢𑁆𑀣 𑀘𑀢𑁆𑀢𑀸𑀭𑁄 𑀑𑀖𑀸, 𑀓𑀸𑀫𑁄𑀖𑁄 𑀪𑀯𑁄𑀖𑁄 𑀤𑀺𑀝𑁆𑀞𑁄𑀖𑁄 𑀅𑀯𑀺𑀚𑁆𑀚𑁄𑀖𑁄𑀢𑀺. 𑀢𑀢𑁆𑀣 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀙𑀦𑁆𑀤𑀭𑀸𑀕𑁄 𑀓𑀸𑀫𑁄𑀖𑁄 𑀦𑀸𑀫. 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀙𑀦𑁆𑀤𑀭𑀸𑀕𑁄 𑀛𑀸𑀦𑀦𑀺𑀓𑀦𑁆𑀢𑀺 𑀘 𑀪𑀯𑁄𑀖𑁄 𑀦𑀸𑀫. 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀤𑀺𑀝𑁆𑀞𑁄𑀖𑁄 𑀦𑀸𑀫. 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀅𑀜𑁆𑀜𑀸𑀡𑀁 𑀅𑀯𑀺𑀚𑁆𑀚𑁄𑀖𑁄 𑀦𑀸𑀫. 𑀢𑀢𑁆𑀣 𑀓𑀸𑀫𑁄𑀖𑁄 𑀅𑀝𑁆𑀞𑀲𑀼 𑀮𑁄𑀪𑀲𑀳𑀕𑀢𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀪𑀯𑁄𑀖𑁄 𑀘𑀢𑀽𑀲𑀼 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑀲𑀳𑀕𑀢𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑁄𑀖𑁄 𑀘𑀢𑀽𑀲𑀼 𑀤𑀺𑀝𑁆𑀞𑀺𑀕𑀢𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀅𑀯𑀺𑀚𑁆𑀚𑁄𑀖𑁄 𑀲𑀩𑁆𑀩𑀸𑀓𑀼𑀲𑀮𑁂𑀲𑀼 𑀉𑀧𑁆𑀧𑀚𑁆𑀚𑀢𑀺.

𑀲𑀩𑁆𑀩𑁄𑀧𑀺 𑀘𑁂𑀲 𑀅𑀯𑀳𑀦𑀦𑀝𑁆𑀞𑁂𑀦 𑀭𑀸𑀲𑀝𑁆𑀞𑁂𑀦 𑀘 𑀑𑀖𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀯𑀳𑀦𑀦𑀝𑁆𑀞𑁂𑀦𑀸𑀢𑀺 𑀅𑀥𑁄𑀕𑀫𑀦𑀝𑁆𑀞𑁂𑀦. 𑀅𑀬𑀜𑁆𑀳𑀺 𑀅𑀢𑁆𑀢𑀦𑁄 𑀯𑀲𑀁 𑀕𑀢𑁂 𑀲𑀢𑁆𑀢𑁂 𑀅𑀥𑁄 𑀕𑀫𑁂𑀢𑀺, 𑀦𑀺𑀭𑀬𑀸𑀤𑀺𑀪𑁂𑀤𑀸𑀬 𑀤𑀼𑀕𑁆𑀕𑀢𑀺𑀬𑀁𑀬𑁂𑀯 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀉𑀧𑀭𑀺𑀪𑀸𑀯𑀁 𑀯𑀸 𑀦𑀺𑀩𑁆𑀩𑀸𑀦𑀁 𑀕𑀦𑁆𑀢𑀼𑀁 𑀅𑀤𑁂𑀦𑁆𑀢𑁄 𑀅𑀥𑁄 𑀢𑀻𑀲𑀼 𑀪𑀯𑁂𑀲𑀼 𑀘𑀢𑀽𑀲𑀼 𑀬𑁄𑀦𑀻𑀲𑀼 𑀧𑀜𑁆𑀘𑀲𑀼 𑀕𑀢𑀻𑀲𑀼 𑀲𑀢𑁆𑀢𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑀦𑀯𑀲𑀼 𑀲𑀢𑁆𑀢𑀸𑀯𑀸𑀲𑁂𑀲𑀼 𑀘 𑀕𑀫𑁂𑀢𑀻𑀢𑀺𑀧𑀺 𑀅𑀢𑁆𑀣𑁄. 𑀭𑀸𑀲𑀝𑁆𑀞𑁂𑀦𑀸𑀢𑀺 𑀫𑀳𑀦𑁆𑀢𑀝𑁆𑀞𑁂𑀦. 𑀫𑀳𑀸 𑀳𑁂𑀲𑁄 𑀓𑀺𑀮𑁂𑀲𑀭𑀸𑀲𑀺 𑀅𑀯𑀻𑀘𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀪𑀯𑀕𑁆𑀕𑀸 𑀧𑀢𑁆𑀣𑀝𑁄, 𑀬𑀤𑀺𑀤𑀁 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀙𑀦𑁆𑀤𑀭𑀸𑀕𑁄 𑀦𑀸𑀫. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀫𑀬𑀁 𑀭𑀸𑀲𑀝𑁆𑀞𑁂𑀦𑀸𑀧𑀺 𑀑𑀖𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀢𑀭𑀻𑀢𑀺 𑀇𑀫𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀑𑀖𑀁 𑀓𑁂𑀦 𑀦𑀼 𑀢𑁆𑀯𑀁, 𑀫𑀸𑀭𑀺𑀲, 𑀓𑀸𑀭𑀡𑁂𑀦 𑀢𑀺𑀡𑁆𑀡𑁄𑀢𑀺 𑀧𑀼𑀘𑁆𑀙𑀢𑀺.

𑀅𑀣𑀲𑁆𑀲𑀸 𑀪𑀕𑀯𑀸 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀅𑀧𑁆𑀧𑀢𑀺𑀝𑁆𑀞𑀁 𑀔𑁆𑀯𑀸𑀳𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀧𑁆𑀧𑀢𑀺𑀝𑁆𑀞𑀦𑁆𑀢𑀺 𑀅𑀧𑁆𑀧𑀢𑀺𑀝𑁆𑀞𑀳𑀦𑁆𑀢𑁄. 𑀅𑀦𑀸𑀬𑀽𑀳𑀦𑁆𑀢𑀺 𑀅𑀦𑀸𑀬𑀽𑀳𑀦𑁆𑀢𑁄, 𑀅𑀯𑀸𑀬𑀫𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀇𑀢𑀺 𑀪𑀕𑀯𑀸 𑀕𑀽𑀴𑁆𑀳𑀁 𑀧𑀝𑀺𑀘𑁆𑀙𑀦𑁆𑀦𑀁 𑀓𑀢𑁆𑀯𑀸 𑀧𑀜𑁆𑀳𑀁 𑀓𑀣𑁂𑀲𑀺. 𑀤𑁂𑀯𑀢𑀸𑀧𑀺 𑀦𑀁 𑀲𑀼𑀢𑁆𑀯𑀸 ‘‘𑀩𑀸𑀳𑀺𑀭𑀓𑀁 𑀢𑀸𑀯 𑀑𑀖𑀁 𑀢𑀭𑀦𑁆𑀢𑀸 𑀦𑀸𑀫 𑀞𑀸𑀢𑀩𑁆𑀩𑀝𑁆𑀞𑀸𑀦𑁂 𑀢𑀺𑀝𑁆𑀞𑀦𑁆𑀢𑀸 𑀢𑀭𑀺𑀢𑀩𑁆𑀩𑀝𑁆𑀞𑀸𑀦𑁂 𑀆𑀬𑀽𑀳𑀦𑁆𑀢𑀸 𑀢𑀭𑀦𑁆𑀢𑀺, 𑀅𑀬𑀁 𑀧𑀦 𑀅𑀯𑀻𑀘𑀺𑀢𑁄 𑀬𑀸𑀯 𑀪𑀯𑀕𑁆𑀕𑀸 𑀧𑀢𑁆𑀣𑀝𑀁 𑀓𑀺𑀮𑁂𑀲𑁄𑀖𑀁 𑀓𑀺𑀮𑁂𑀲𑀭𑀸𑀲𑀺𑀁 𑀅𑀧𑁆𑀧𑀢𑀺𑀝𑁆𑀞𑀳𑀦𑁆𑀢𑁄 𑀅𑀦𑀸𑀬𑀽𑀳𑀦𑁆𑀢𑁄 𑀅𑀢𑀭𑀺𑀦𑁆𑀢𑀺 𑀆𑀳. 𑀓𑀺𑀁 𑀦𑀼 𑀔𑁄 𑀏𑀢𑀁? 𑀓𑀣𑀁 𑀦𑀼 𑀔𑁄 𑀏𑀢’’𑀦𑁆𑀢𑀺? 𑀯𑀺𑀫𑀢𑀺𑀁 𑀧𑀓𑁆𑀔𑀦𑁆𑀢𑀸 𑀧𑀜𑁆𑀳𑀲𑁆𑀲 𑀅𑀢𑁆𑀣𑀁 𑀦 𑀅𑀜𑁆𑀜𑀸𑀲𑀺.

𑀓𑀺𑀁 𑀧𑀦 𑀪𑀕𑀯𑀢𑀸 𑀬𑀣𑀸 𑀲𑀢𑁆𑀢𑀸 𑀦 𑀚𑀸𑀦𑀦𑁆𑀢𑀺, 𑀏𑀯𑀁 𑀓𑀣𑀦𑀢𑁆𑀣𑀸𑀬 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀸 𑀧𑀝𑀺𑀯𑀺𑀤𑁆𑀥𑀸𑀢𑀺? 𑀦 𑀏𑀢𑀤𑀢𑁆𑀣𑀸𑀬 𑀧𑀝𑀺𑀯𑀺𑀤𑁆𑀥𑀸. 𑀤𑁆𑀯𑁂 𑀧𑀦 𑀪𑀕𑀯𑀢𑁄 𑀤𑁂𑀲𑀦𑀸 𑀦𑀺𑀕𑁆𑀕𑀳𑀫𑀼𑀔𑁂𑀦 𑀘 𑀅𑀦𑀼𑀕𑁆𑀕𑀳𑀫𑀼𑀔𑁂𑀦 𑀘. 𑀢𑀢𑁆𑀣 𑀬𑁂 𑀧𑀡𑁆𑀟𑀺𑀢𑀫𑀸𑀦𑀺𑀦𑁄 𑀳𑁄𑀦𑁆𑀢𑀺 𑀅𑀜𑁆𑀜𑀸𑀢𑁂𑀧𑀺 𑀜𑀸𑀢𑀲𑀜𑁆𑀜𑀺𑀦𑁄 𑀧𑀜𑁆𑀘𑀲𑀢𑀸 𑀩𑁆𑀭𑀸𑀳𑁆𑀫𑀡𑀧𑀩𑁆𑀩𑀚𑀺𑀢𑀸 𑀯𑀺𑀬, 𑀢𑁂𑀲𑀁 𑀫𑀸𑀦𑀦𑀺𑀕𑁆𑀕𑀳𑀢𑁆𑀣𑀁 𑀬𑀣𑀸 𑀦 𑀚𑀸𑀦𑀦𑁆𑀢𑀺, 𑀏𑀯𑀁 𑀫𑀽𑀮𑀧𑀭𑀺𑀬𑀸𑀬𑀸𑀤𑀺𑀲𑀤𑀺𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀅𑀬𑀁 𑀦𑀺𑀕𑁆𑀕𑀳𑀫𑀼𑀔𑁂𑀦 𑀤𑁂𑀲𑀦𑀸. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀦𑀺𑀕𑁆𑀕𑀬𑁆𑀳 𑀦𑀺𑀕𑁆𑀕𑀬𑁆𑀳𑀸𑀳𑀁, 𑀆𑀦𑀦𑁆𑀤, 𑀯𑀓𑁆𑀔𑀸𑀫𑀺, 𑀧𑀯𑀬𑁆𑀳 𑀧𑀯𑀬𑁆𑀳, 𑀆𑀦𑀦𑁆𑀤, 𑀯𑀓𑁆𑀔𑀸𑀫𑀺, 𑀬𑁄 𑀲𑀸𑀭𑁄, 𑀲𑁄 𑀞𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁩.𑁧𑁯𑁬). 𑀬𑁂 𑀧𑀦 𑀉𑀚𑀼𑀓𑀸 𑀲𑀺𑀓𑁆𑀔𑀸𑀓𑀸𑀫𑀸, 𑀢𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀁 𑀓𑀢𑁆𑀯𑀸 𑀆𑀓𑀗𑁆𑀔𑁂𑀬𑁆𑀬𑀲𑀼𑀢𑁆𑀢𑀸𑀤𑀺𑀲𑀤𑀺𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, ‘‘𑀅𑀪𑀺𑀭𑀫, 𑀢𑀺𑀲𑁆𑀲, 𑀅𑀪𑀺𑀭𑀫, 𑀢𑀺𑀲𑁆𑀲, 𑀅𑀳𑀫𑁄𑀯𑀸𑀤𑁂𑀦 𑀅𑀳𑀫𑀦𑀼𑀕𑁆𑀕𑀳𑁂𑀦 𑀅𑀳𑀫𑀦𑀼𑀲𑀸𑀲𑀦𑀺𑀬𑀸’’𑀢𑀺 (𑀲𑀁. 𑀦𑀺. 𑁩.𑁮𑁪) 𑀘 𑀦𑁂 𑀲𑀫𑀲𑁆𑀲𑀸𑀲𑁂𑀢𑀺. 𑀅𑀬𑀁 𑀅𑀦𑀼𑀕𑁆𑀕𑀳𑀫𑀼𑀔𑁂𑀦 𑀤𑁂𑀲𑀦𑀸.

𑀅𑀬𑀁 𑀧𑀦 𑀤𑁂𑀯𑀧𑀼𑀢𑁆𑀢𑁄 𑀫𑀸𑀦𑀢𑁆𑀣𑀤𑁆𑀥𑁄 𑀧𑀡𑁆𑀟𑀺𑀢𑀫𑀸𑀦𑀻, 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 𑀅𑀳𑀁 𑀑𑀖𑀁 𑀚𑀸𑀦𑀸𑀫𑀺, 𑀢𑀣𑀸𑀕𑀢𑀲𑁆𑀲 𑀑𑀖𑀢𑀺𑀡𑁆𑀡𑀪𑀸𑀯𑀁 𑀚𑀸𑀦𑀸𑀫𑀺, ‘‘𑀇𑀫𑀺𑀦𑀸 𑀧𑀦 𑀓𑀸𑀭𑀡𑁂𑀦 𑀢𑀺𑀡𑁆𑀡𑁄’’𑀢𑀺 𑀏𑀢𑁆𑀢𑀓𑀫𑀢𑁆𑀢𑀁 𑀦 𑀚𑀸𑀦𑀸𑀫𑀺. 𑀇𑀢𑀺 𑀫𑀬𑁆𑀳𑀁 𑀜𑀸𑀢𑀫𑁂𑀯 𑀩𑀳𑀼, 𑀅𑀧𑁆𑀧𑀁 𑀅𑀜𑁆𑀜𑀸𑀢𑀁, 𑀢𑀫𑀳𑀁 𑀓𑀣𑀺𑀢𑀫𑀢𑁆𑀢𑀫𑁂𑀯 𑀚𑀸𑀦𑀺𑀲𑁆𑀲𑀸𑀫𑀺. 𑀓𑀺𑀜𑁆𑀳𑀺 𑀦𑀸𑀫 𑀢𑀁 𑀪𑀕𑀯𑀸 𑀯𑀤𑁂𑀬𑁆𑀬, 𑀬𑀲𑁆𑀲𑀸𑀳𑀁 𑀅𑀢𑁆𑀣𑀁 𑀦 𑀚𑀸𑀦𑁂𑀬𑁆𑀬𑀦𑁆𑀢𑀺. 𑀅𑀣 𑀲𑀢𑁆𑀣𑀸 ‘‘𑀅𑀬𑀁 𑀓𑀺𑀮𑀺𑀝𑁆𑀞𑀯𑀢𑁆𑀣𑀁 𑀯𑀺𑀬 𑀭𑀗𑁆𑀕𑀚𑀸𑀢𑀁 𑀅𑀪𑀩𑁆𑀩𑁄 𑀇𑀫𑀁 𑀫𑀸𑀦𑀁 𑀅𑀧𑁆𑀧𑀳𑀸𑀬 𑀤𑁂𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁, 𑀫𑀸𑀦𑀦𑀺𑀕𑁆𑀕𑀳𑀁 𑀢𑀸𑀯𑀲𑁆𑀲 𑀓𑀢𑁆𑀯𑀸 𑀧𑀼𑀦 𑀦𑀻𑀘𑀘𑀺𑀢𑁆𑀢𑁂𑀦 𑀧𑀼𑀘𑁆𑀙𑀦𑁆𑀢𑀲𑁆𑀲 𑀧𑀓𑀸𑀲𑁂𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀘𑁆𑀙𑀦𑁆𑀦𑀁 𑀓𑀢𑁆𑀯𑀸 𑀧𑀜𑁆𑀳𑀁 𑀓𑀣𑁂𑀲𑀺. 𑀲𑁄𑀧𑀺 𑀦𑀺𑀳𑀢𑀫𑀸𑀦𑁄 𑀅𑀳𑁄𑀲𑀺, 𑀲𑀸 𑀘𑀲𑁆𑀲 𑀦𑀺𑀳𑀢𑀫𑀸𑀦𑀢𑀸 𑀉𑀢𑁆𑀢𑀭𑀺𑀧𑀜𑁆𑀳𑀧𑀼𑀘𑁆𑀙𑀦𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀢𑀲𑁆𑀲 𑀧𑀦 𑀧𑀜𑁆𑀳𑀧𑀼𑀘𑁆𑀙𑀦𑀲𑁆𑀲 𑀅𑀬𑀫𑀢𑁆𑀣𑁄 𑁋 𑀓𑀣𑀁 𑀧𑀦 𑀢𑁆𑀯𑀁, 𑀫𑀸𑀭𑀺𑀲, 𑀅𑀧𑁆𑀧𑀢𑀺𑀝𑁆𑀞𑀁 𑀅𑀦𑀸𑀬𑀽𑀳𑀁 𑀑𑀖𑀫𑀢𑀭𑀺, 𑀬𑀣𑀸𑀳𑀁 𑀚𑀸𑀦𑀸𑀫𑀺, 𑀏𑀯𑀁 𑀫𑁂 𑀓𑀣𑁂𑀳𑀻𑀢𑀺.

𑀅𑀣𑀲𑁆𑀲 𑀪𑀕𑀯𑀸 𑀓𑀣𑁂𑀦𑁆𑀢𑁄 𑀬𑀤𑀸𑀲𑁆𑀯𑀸𑀳𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀤𑀸 𑀲𑁆𑀯𑀸𑀳𑀦𑁆𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂 𑀅𑀳𑀁. 𑀲𑀼𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀬𑀣𑀸 𑀘 𑀏𑀢𑁆𑀣, 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼. 𑀲𑀁𑀲𑀻𑀤𑀸𑀫𑀻𑀢𑀺 𑀧𑀝𑀺𑀘𑁆𑀙𑀦𑁆𑀦𑀁 𑀓𑀢𑁆𑀯𑀸 𑀅𑀢𑀭𑀦𑁆𑀢𑁄 𑀢𑀢𑁆𑀣𑁂𑀯 𑀑𑀲𑀻𑀤𑀸𑀫𑀺. 𑀦𑀺𑀩𑁆𑀩𑀼𑀬𑁆𑀳𑀸𑀫𑀻𑀢𑀺 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀢𑀺𑀯𑀢𑁆𑀢𑀸𑀫𑀺. 𑀇𑀢𑀺 𑀞𑀸𑀦𑁂 𑀘 𑀯𑀸𑀬𑀸𑀫𑁂 𑀘 𑀤𑁄𑀲𑀁 𑀤𑀺𑀲𑁆𑀯𑀸 𑀅𑀢𑀺𑀝𑁆𑀞𑀦𑁆𑀢𑁄 𑀅𑀯𑀸𑀬𑀫𑀦𑁆𑀢𑁄 𑀑𑀖𑀫𑀢𑀭𑀺𑀦𑁆𑀢𑀺 𑀏𑀯𑀁 𑀪𑀕𑀯𑀢𑀸 𑀧𑀜𑁆𑀳𑁄 𑀓𑀣𑀺𑀢𑁄. 𑀤𑁂𑀯𑀢𑀸𑀬𑀧𑀺 𑀧𑀝𑀺𑀯𑀺𑀤𑁆𑀥𑁄, 𑀦 𑀧𑀦 𑀧𑀸𑀓𑀝𑁄, 𑀢𑀲𑁆𑀲 𑀧𑀸𑀓𑀝𑀻𑀓𑀭𑀡𑀢𑁆𑀣𑀁 𑀲𑀢𑁆𑀢 𑀤𑀼𑀓𑀸 𑀤𑀲𑁆𑀲𑀺𑀢𑀸. 𑀓𑀺𑀮𑁂𑀲𑀯𑀲𑁂𑀦 𑀳𑀺 𑀲𑀦𑁆𑀢𑀺𑀝𑁆𑀞𑀦𑁆𑀢𑁄 𑀲𑀁𑀲𑀻𑀤𑀢𑀺 𑀦𑀸𑀫, 𑀅𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀆𑀬𑀽𑀳𑀦𑁆𑀢𑁄 𑀦𑀺𑀩𑁆𑀩𑀼𑀬𑁆𑀳𑀢𑀺 𑀦𑀸𑀫. 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀯𑀸 𑀲𑀦𑁆𑀢𑀺𑀝𑁆𑀞𑀦𑁆𑀢𑁄 𑀲𑀁𑀲𑀻𑀤𑀢𑀺 𑀦𑀸𑀫, 𑀅𑀯𑀲𑁂𑀲𑀓𑀺𑀮𑁂𑀲𑀸𑀦𑀜𑁆𑀘𑁂𑀯 𑀅𑀪𑀺𑀲𑀗𑁆𑀔𑀸𑀭𑀸𑀦𑀜𑁆𑀘 𑀯𑀲𑁂𑀦 𑀆𑀬𑀽𑀳𑀦𑁆𑀢𑁄 𑀦𑀺𑀩𑁆𑀩𑀼𑀬𑁆𑀳𑀢𑀺 𑀦𑀸𑀫. 𑀢𑀡𑁆𑀳𑀸𑀯𑀲𑁂𑀦 𑀯𑀸 𑀲𑀦𑁆𑀢𑀺𑀝𑁆𑀞𑀦𑁆𑀢𑁄 𑀲𑀁𑀲𑀻𑀤𑀢𑀺 𑀦𑀸𑀫, 𑀤𑀺𑀝𑁆𑀞𑀺𑀯𑀲𑁂𑀦 𑀆𑀬𑀽𑀳𑀦𑁆𑀢𑁄 𑀦𑀺𑀩𑁆𑀩𑀼𑀬𑁆𑀳𑀢𑀺 𑀦𑀸𑀫. 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀯𑀸 𑀲𑀦𑁆𑀢𑀺𑀝𑁆𑀞𑀦𑁆𑀢𑁄 𑀲𑀁𑀲𑀻𑀤𑀢𑀺 𑀦𑀸𑀫, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀆𑀬𑀽𑀳𑀦𑁆𑀢𑁄 𑀦𑀺𑀩𑁆𑀩𑀼𑀬𑁆𑀳𑀢𑀺 𑀦𑀸𑀫. 𑀑𑀮𑀻𑀬𑀦𑀸𑀪𑀺𑀦𑀺𑀯𑁂𑀲𑀸 𑀳𑀺 𑀪𑀯𑀤𑀺𑀝𑁆𑀞𑀺, 𑀅𑀢𑀺𑀥𑀸𑀯𑀦𑀸𑀪𑀺𑀦𑀺𑀯𑁂𑀲𑀸 𑀯𑀺𑀪𑀯𑀤𑀺𑀝𑁆𑀞𑀺. 𑀮𑀻𑀦𑀯𑀲𑁂𑀦 𑀯𑀸 𑀲𑀦𑁆𑀢𑀺𑀝𑁆𑀞𑀦𑁆𑀢𑁄 𑀲𑀁𑀲𑀻𑀤𑀢𑀺 𑀦𑀸𑀫, 𑀉𑀤𑁆𑀥𑀘𑁆𑀘𑀯𑀲𑁂𑀦 𑀆𑀬𑀽𑀳𑀦𑁆𑀢𑁄 𑀦𑀺𑀩𑁆𑀩𑀼𑀬𑁆𑀳𑀢𑀺 𑀦𑀸𑀫. 𑀢𑀣𑀸 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀯𑀲𑁂𑀦 𑀲𑀦𑁆𑀢𑀺𑀝𑁆𑀞𑀦𑁆𑀢𑁄 𑀲𑀁𑀲𑀻𑀤𑀢𑀺 𑀦𑀸𑀫, 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀯𑀲𑁂𑀦 𑀆𑀬𑀽𑀳𑀦𑁆𑀢𑁄 𑀦𑀺𑀩𑁆𑀩𑀼𑀬𑁆𑀳𑀢𑀺 𑀦𑀸𑀫. 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀲𑀦𑁆𑀢𑀺𑀝𑁆𑀞𑀦𑁆𑀢𑁄 𑀲𑀁𑀲𑀻𑀤𑀢𑀺 𑀦𑀸𑀫, 𑀲𑀩𑁆𑀩𑀮𑁄𑀓𑀺𑀬𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀆𑀬𑀽𑀳𑀦𑁆𑀢𑁄 𑀦𑀺𑀩𑁆𑀩𑀼𑀬𑁆𑀳𑀢𑀺 𑀦𑀸𑀫. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀘𑀼𑀦𑁆𑀤, 𑀬𑁂 𑀓𑁂𑀘𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀅𑀥𑁄𑀪𑀸𑀕𑀗𑁆𑀕𑀫𑀦𑀻𑀬𑀸, 𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀉𑀧𑀭𑀺𑀪𑀸𑀕𑀗𑁆𑀕𑀫𑀦𑀻𑀬𑀸’’𑀢𑀺 (𑀫. 𑀦𑀺. 𑁧.𑁮𑁬).

𑀇𑀫𑀁 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀁 𑀲𑀼𑀢𑁆𑀯𑀸𑀯 𑀤𑁂𑀯𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀢𑀼𑀝𑁆𑀞𑀸 𑀧𑀲𑀦𑁆𑀦𑀸 𑀅𑀢𑁆𑀢𑀦𑁄 𑀢𑀼𑀝𑁆𑀞𑀺𑀜𑁆𑀘 𑀧𑀲𑀸𑀤𑀜𑁆𑀘 𑀧𑀓𑀸𑀲𑀬𑀦𑁆𑀢𑀻 𑀘𑀺𑀭𑀲𑁆𑀲𑀁 𑀯𑀢𑀸𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀘𑀺𑀭𑀲𑁆𑀲𑀦𑁆𑀢𑀺 𑀘𑀺𑀭𑀲𑁆𑀲 𑀓𑀸𑀮𑀲𑁆𑀲 𑀅𑀘𑁆𑀘𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀓𑀺𑀭 𑀤𑁂𑀯𑀢𑀸 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑀭𑀸 𑀅𑀜𑁆𑀜𑀁 𑀩𑀼𑀤𑁆𑀥𑀁 𑀦 𑀤𑀺𑀝𑁆𑀞𑀧𑀼𑀩𑁆𑀩𑀸, 𑀢𑀲𑁆𑀫𑀸 𑀅𑀚𑁆𑀚 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀏𑀯𑀫𑀸𑀳. 𑀓𑀺𑀁 𑀧𑀦𑀺𑀫𑀸𑀬 𑀤𑁂𑀯𑀢𑀸𑀬 𑀇𑀢𑁄 𑀧𑀼𑀩𑁆𑀩𑁂 𑀲𑀢𑁆𑀣𑀸 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄𑀢𑀺. 𑀤𑀺𑀝𑁆𑀞𑀧𑀼𑀩𑁆𑀩𑁄 𑀯𑀸 𑀳𑁄𑀢𑀼 𑀅𑀤𑀺𑀝𑁆𑀞𑀧𑀼𑀩𑁆𑀩𑁄 𑀯𑀸, 𑀤𑀲𑁆𑀲𑀦𑀁 𑀉𑀧𑀸𑀤𑀸𑀬 𑀏𑀯𑀁 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀩𑁆𑀭𑀸𑀳𑁆𑀫𑀡𑀦𑁆𑀢𑀺 𑀩𑀸𑀳𑀺𑀢𑀧𑀸𑀧𑀁 𑀔𑀻𑀡𑀸𑀲𑀯𑀩𑁆𑀭𑀸𑀳𑁆𑀫𑀡𑀁. 𑀧𑀭𑀺𑀦𑀺𑀩𑁆𑀩𑀼𑀢𑀦𑁆𑀢𑀺 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀼𑀢𑀁. 𑀮𑁄𑀓𑁂𑀢𑀺 𑀲𑀢𑁆𑀢𑀮𑁄𑀓𑁂. 𑀯𑀺𑀲𑀢𑁆𑀢𑀺𑀓𑀦𑁆𑀢𑀺 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀆𑀲𑀢𑁆𑀢𑀯𑀺𑀲𑀢𑁆𑀢𑀢𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀯𑀺𑀲𑀢𑁆𑀢𑀺𑀓𑀸 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸, 𑀢𑀁 𑀯𑀺𑀲𑀢𑁆𑀢𑀺𑀓𑀁 𑀅𑀧𑁆𑀧𑀢𑀺𑀝𑁆𑀞𑀫𑀸𑀦𑀁 𑀅𑀦𑀸𑀬𑀽𑀳𑀫𑀸𑀦𑀁 𑀢𑀺𑀡𑁆𑀡𑀁 𑀦𑀺𑀢𑁆𑀢𑀺𑀡𑁆𑀡𑀁 𑀉𑀢𑁆𑀢𑀺𑀡𑁆𑀡𑀁 𑀘𑀺𑀭𑀲𑁆𑀲𑀁 𑀯𑀢 𑀔𑀻𑀡𑀸𑀲𑀯𑀩𑁆𑀭𑀸𑀳𑁆𑀫𑀡𑀁 𑀧𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄.

𑀲𑀫𑀦𑀼𑀜𑁆𑀜𑁄 𑀲𑀢𑁆𑀣𑀸 𑀅𑀳𑁄𑀲𑀻𑀢𑀺 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀯𑀘𑀦𑀁 𑀘𑀺𑀢𑁆𑀢𑁂𑀦𑁂𑀯 𑀲𑀫𑀦𑀼𑀫𑁄𑀤𑀺, 𑀏𑀓𑀚𑁆𑀛𑀸𑀲𑀬𑁄 𑀅𑀳𑁄𑀲𑀺. 𑀅𑀦𑁆𑀢𑀭𑀥𑀸𑀬𑀻𑀢𑀺 𑀅𑀪𑀺𑀲𑀗𑁆𑀔𑀢𑀓𑀸𑀬𑀁 𑀚𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀧𑀓𑀢𑀺𑀉𑀧𑀸𑀤𑀺𑀡𑁆𑀡𑀓𑀓𑀸𑀬𑀲𑁆𑀫𑀺𑀁𑀬𑁂𑀯 𑀞𑀢𑁆𑀯𑀸 𑀮𑀤𑁆𑀥𑀸𑀲𑀸 𑀮𑀤𑁆𑀥𑀧𑀢𑀺𑀝𑁆𑀞𑀸 𑀳𑀼𑀢𑁆𑀯𑀸 𑀤𑀲𑀩𑀮𑀁 𑀕𑀦𑁆𑀥𑁂𑀳𑀺 𑀘 𑀫𑀸𑀮𑁂𑀳𑀺 𑀘 𑀧𑀽𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀪𑀯𑀦𑀁𑀬𑁂𑀯 𑀅𑀕𑀫𑀸𑀲𑀻𑀢𑀺.

𑀑𑀖𑀢𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀦𑀺𑀫𑁄𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁨. 𑀇𑀤𑀸𑀦𑀺 𑀤𑀼𑀢𑀺𑀬𑀲𑀼𑀢𑁆𑀢𑀢𑁄 𑀧𑀝𑁆𑀞𑀸𑀬 𑀧𑀞𑀫𑀫𑀸𑀕𑀢𑀜𑁆𑀘 𑀉𑀢𑁆𑀢𑀸𑀦𑀢𑁆𑀣𑀜𑁆𑀘 𑀧𑀳𑀸𑀬 𑀬𑀁 𑀬𑀁 𑀅𑀦𑀼𑀢𑁆𑀢𑀸𑀦𑀁, 𑀢𑀁 𑀢𑀤𑁂𑀯 𑀯𑀡𑁆𑀡𑀬𑀺𑀲𑁆𑀲𑀸𑀫. 𑀚𑀸𑀦𑀸𑀲𑀺 𑀦𑁄𑀢𑀺 𑀚𑀸𑀦𑀸𑀲𑀺 𑀦𑀼. 𑀦𑀺𑀫𑁄𑀓𑁆𑀔𑀦𑁆𑀢𑀺𑀆𑀤𑀻𑀦𑀺 𑀫𑀕𑁆𑀕𑀸𑀤𑀻𑀦𑀁 𑀦𑀸𑀫𑀸𑀦𑀺. 𑀫𑀕𑁆𑀕𑁂𑀦 𑀳𑀺 𑀲𑀢𑁆𑀢𑀸 𑀓𑀺𑀮𑁂𑀲𑀩𑀦𑁆𑀥𑀦𑀢𑁄 𑀦𑀺𑀫𑀼𑀘𑁆𑀘𑀦𑁆𑀢𑀺, 𑀢𑀲𑁆𑀫𑀸 𑀫𑀕𑁆𑀕𑁄 𑀲𑀢𑁆𑀢𑀸𑀦𑀁 𑀦𑀺𑀫𑁄𑀓𑁆𑀔𑁄𑀢𑀺 𑀯𑀼𑀢𑁆𑀢𑁄. 𑀨𑀮𑀓𑁆𑀔𑀡𑁂 𑀧𑀦 𑀢𑁂 𑀓𑀺𑀮𑁂𑀲𑀩𑀦𑁆𑀥𑀦𑀢𑁄 𑀧𑀫𑀼𑀢𑁆𑀢𑀸, 𑀢𑀲𑁆𑀫𑀸 𑀨𑀮𑀁 𑀲𑀢𑁆𑀢𑀸𑀦𑀁 𑀧𑀫𑁄𑀓𑁆𑀔𑁄𑀢𑀺 𑀯𑀼𑀢𑁆𑀢𑀁. 𑀦𑀺𑀩𑁆𑀩𑀸𑀦𑀁 𑀧𑀢𑁆𑀯𑀸 𑀲𑀢𑁆𑀢𑀸𑀦𑀁 𑀲𑀩𑁆𑀩𑀤𑀼𑀓𑁆𑀔𑀁 𑀯𑀺𑀯𑀺𑀘𑁆𑀘𑀢𑀺, 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑀁 𑀯𑀺𑀯𑁂𑀓𑁄𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀸𑀦𑀺 𑀯𑀸 𑀏𑀢𑀸𑀦𑀺 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀦𑀸𑀫𑀸𑀦𑀺. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀧𑀢𑁆𑀯𑀸 𑀲𑀢𑁆𑀢𑀸 𑀲𑀩𑁆𑀩𑀤𑀼𑀓𑁆𑀔𑀢𑁄 𑀦𑀺𑀫𑀼𑀘𑁆𑀘𑀦𑁆𑀢𑀺 𑀧𑀫𑀼𑀘𑁆𑀘𑀦𑁆𑀢𑀺 𑀯𑀺𑀯𑀺𑀘𑁆𑀘𑀦𑁆𑀢𑀺, 𑀢𑀲𑁆𑀫𑀸 𑀢𑀤𑁂𑀯 ‘‘𑀦𑀺𑀫𑁄𑀓𑁆𑀔𑁄 𑀧𑀫𑁄𑀓𑁆𑀔𑁄 𑀯𑀺𑀯𑁂𑀓𑁄’’𑀢𑀺 𑀯𑀼𑀢𑁆𑀢𑀁. 𑀚𑀸𑀦𑀸𑀫𑀺 𑀔𑁆𑀯𑀸𑀳𑀦𑁆𑀢𑀺 𑀚𑀸𑀦𑀸𑀫𑀺 𑀔𑁄 𑀅𑀳𑀁. 𑀅𑀯𑀥𑀸𑀭𑀡𑀢𑁆𑀣𑁄 𑀔𑁄𑀓𑀸𑀭𑁄. 𑀅𑀳𑀁 𑀚𑀸𑀦𑀸𑀫𑀺𑀬𑁂𑀯. 𑀲𑀢𑁆𑀢𑀸𑀦𑀁 𑀦𑀺𑀫𑁄𑀓𑁆𑀔𑀸𑀤𑀺𑀚𑀸𑀦𑀦𑀢𑁆𑀣𑀫𑁂𑀯 𑀳𑀺 𑀫𑀬𑀸 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀤𑁆𑀥𑀦𑁆𑀢𑀺 𑀲𑀻𑀳𑀦𑀸𑀤𑀁 𑀦𑀤𑀢𑀺. 𑀩𑀼𑀤𑁆𑀥𑀲𑀻𑀳𑀦𑀸𑀤𑀁 𑀦𑀸𑀫 𑀓𑀺𑀭 𑀏𑀢𑀁 𑀲𑀼𑀢𑁆𑀢𑀁.

𑀦𑀦𑁆𑀤𑀻𑀪𑀯𑀧𑀭𑀺𑀓𑁆𑀔𑀬𑀸𑀢𑀺 𑀦𑀦𑁆𑀤𑀻𑀫𑀽𑀮𑀓𑀲𑁆𑀲 𑀓𑀫𑁆𑀫𑀪𑀯𑀲𑁆𑀲 𑀧𑀭𑀺𑀓𑁆𑀔𑀬𑁂𑀦. 𑀦𑀦𑁆𑀤𑀺𑀬𑀸 𑀘 𑀪𑀯𑀲𑁆𑀲 𑀘𑀸𑀢𑀺𑀧𑀺 𑀯𑀝𑁆𑀝𑀢𑀺. 𑀢𑀢𑁆𑀣 𑀳𑀺 𑀧𑀼𑀭𑀺𑀫𑀦𑀬𑁂 𑀦𑀦𑁆𑀤𑀻𑀪𑀯𑁂𑀦 𑀢𑀺𑀯𑀺𑀥𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀕𑀳𑀺𑀢𑁄, 𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑁂𑀳𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘 𑀤𑁆𑀯𑁂 𑀔𑀦𑁆𑀥𑀸. 𑀢𑁂𑀳𑀺 𑀧𑀦 𑀢𑀻𑀳𑀺 𑀔𑀦𑁆𑀥𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸 𑀢𑁂𑀲𑀁 𑀕𑀳𑀡𑁂𑀦 𑀕𑀳𑀺𑀢𑀸𑀯𑀸𑀢𑀺 𑀅𑀦𑀼𑀧𑀸𑀤𑀺𑀡𑁆𑀡𑀓𑀸𑀦𑀁 𑀘𑀢𑀼𑀦𑁆𑀦𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀲𑀉𑀧𑀸𑀤𑀺𑀲𑁂𑀲𑀁 𑀦𑀺𑀩𑁆𑀩𑀸𑀦𑀁 𑀓𑀣𑀺𑀢𑀁 𑀳𑁄𑀢𑀺. 𑀯𑁂𑀤𑀦𑀸𑀦𑀁 𑀦𑀺𑀭𑁄𑀥𑀸 𑀉𑀧𑀲𑀫𑀸𑀢𑀺 𑀉𑀧𑀸𑀤𑀺𑀡𑁆𑀡𑀓𑀯𑁂𑀤𑀦𑀸𑀦𑀁 𑀦𑀺𑀭𑁄𑀥𑁂𑀦 𑀘 𑀉𑀧𑀲𑀫𑁂𑀦 𑀘. 𑀢𑀢𑁆𑀣 𑀯𑁂𑀤𑀦𑀸𑀕𑀳𑀡𑁂𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀢𑀬𑁄 𑀔𑀦𑁆𑀥𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺, 𑀢𑁂𑀲𑀁 𑀯𑀢𑁆𑀣𑀸𑀭𑀫𑁆𑀫𑀡𑀯𑀲𑁂𑀦 𑀭𑀽𑀧𑀓𑁆𑀔𑀦𑁆𑀥𑁄𑀧𑀺. 𑀏𑀯𑀁 𑀇𑀫𑁂𑀲𑀁 𑀉𑀧𑀸𑀤𑀺𑀡𑁆𑀡𑀓𑀸𑀦𑀁 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀅𑀦𑀼𑀧𑀸𑀤𑀺𑀲𑁂𑀲𑀁 𑀦𑀺𑀩𑁆𑀩𑀸𑀦𑀁 𑀓𑀣𑀺𑀢𑀁 𑀳𑁄𑀢𑀺. 𑀤𑀼𑀢𑀺𑀬𑀦𑀬𑁂 𑀧𑀦 𑀦𑀦𑁆𑀤𑀺𑀕𑁆𑀕𑀳𑀡𑁂𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀕𑀳𑀺𑀢𑁄, 𑀪𑀯𑀕𑁆𑀕𑀳𑀡𑁂𑀦 𑀉𑀧𑀧𑀢𑁆𑀢𑀺𑀪𑀯𑀲𑀗𑁆𑀔𑀸𑀢𑁄 𑀭𑀽𑀧𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸𑀤𑀻𑀳𑀺 𑀲𑀭𑀽𑀧𑁂𑀦𑁂𑀯 𑀢𑀬𑁄 𑀔𑀦𑁆𑀥𑀸. 𑀏𑀯𑀁 𑀇𑀫𑁂𑀲𑀁 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀦𑀺𑀩𑁆𑀩𑀸𑀦𑀁 𑀓𑀣𑀺𑀢𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀫𑁂𑀯 𑀘 𑀦𑀬𑀁 𑀘𑀢𑀼𑀦𑀺𑀓𑀸𑀬𑀺𑀓𑀪𑀡𑁆𑀟𑀺𑀓𑀢𑁆𑀣𑁂𑀭𑁄 𑀭𑁄𑀘𑁂𑀢𑀺. 𑀇𑀢𑀺 𑀦𑀺𑀩𑁆𑀩𑀸𑀦𑀯𑀲𑁂𑀦𑁂𑀯 𑀪𑀕𑀯𑀸 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀻𑀢𑀺.

𑀦𑀺𑀫𑁄𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀉𑀧𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩. 𑀢𑀢𑀺𑀬𑁂 𑀉𑀧𑀦𑀻𑀬𑀢𑀻𑀢𑀺 𑀧𑀭𑀺𑀓𑁆𑀔𑀻𑀬𑀢𑀺 𑀦𑀺𑀭𑀼𑀚𑁆𑀛𑀢𑀺, 𑀉𑀧𑀕𑀘𑁆𑀙𑀢𑀺 𑀯𑀸, 𑀅𑀦𑀼𑀧𑀼𑀩𑁆𑀩𑁂𑀦 𑀫𑀭𑀡𑀁 𑀉𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀯𑀸 𑀕𑁄𑀧𑀸𑀮𑁂𑀦 𑀕𑁄𑀕𑀡𑁄 𑀦𑀻𑀬𑀢𑀺, 𑀏𑀯𑀁 𑀚𑀭𑀸𑀬 𑀫𑀭𑀡𑀲𑀦𑁆𑀢𑀺𑀓𑀁 𑀉𑀧𑀦𑀻𑀬𑀢𑀻𑀢𑀺 𑀅𑀢𑁆𑀣𑁄. 𑀚𑀻𑀯𑀺𑀢𑀦𑁆𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀅𑀧𑁆𑀧𑀦𑁆𑀢𑀺 𑀧𑀭𑀺𑀢𑁆𑀢𑀁 𑀣𑁄𑀓𑀁. 𑀢𑀲𑁆𑀲 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀧𑀭𑀺𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸 𑀲𑀭𑀲𑀧𑀭𑀺𑀢𑁆𑀢𑀢𑀸𑀬 𑀘 𑀔𑀡𑀧𑀭𑀺𑀢𑁆𑀢𑀢𑀸𑀬 𑀘. 𑀲𑀭𑀲𑀧𑀭𑀺𑀢𑁆𑀢𑀢𑀸𑀬𑀧𑀺 𑀳𑀺 ‘‘𑀬𑁄, 𑀪𑀺𑀓𑁆𑀔𑀯𑁂, 𑀘𑀺𑀭𑀁 𑀚𑀻𑀯𑀢𑀺, 𑀲𑁄 𑀯𑀲𑁆𑀲𑀲𑀢𑀁 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄’’𑀢𑀺 (𑀤𑀻. 𑀦𑀺. 𑁨.𑁭; 𑀲𑀁. 𑀦𑀺. 𑁨.𑁧𑁪𑁩) 𑀯𑀘𑀦𑀢𑁄 𑀧𑀭𑀺𑀢𑁆𑀢𑀁. 𑀔𑀡𑀧𑀭𑀺𑀢𑁆𑀢𑀢𑀸𑀬𑀧𑀺. 𑀧𑀭𑀫𑀢𑁆𑀣𑀢𑁄 𑀳𑀺 𑀅𑀢𑀺𑀧𑀭𑀺𑀢𑁆𑀢𑁄 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀓𑁆𑀔𑀡𑁄 𑀏𑀓𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑁄𑀬𑁂𑀯. 𑀬𑀣𑀸 𑀦𑀸𑀫 𑀭𑀣𑀘𑀓𑁆𑀓𑀁 𑀧𑀯𑀢𑁆𑀢𑀫𑀸𑀦𑀫𑁆𑀧𑀺 𑀏𑀓𑁂𑀦𑁂𑀯 𑀦𑁂𑀫𑀺𑀧𑁆𑀧𑀤𑁂𑀲𑁂𑀦 𑀧𑀯𑀢𑁆𑀢𑀢𑀺, 𑀢𑀺𑀝𑁆𑀞𑀫𑀸𑀦𑀫𑁆𑀧𑀺 𑀏𑀓𑁂𑀦𑁂𑀯 𑀢𑀺𑀝𑁆𑀞𑀢𑀺, 𑀏𑀯𑀫𑁂𑀯𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀁, 𑀢𑀲𑁆𑀫𑀺𑀁 𑀘𑀺𑀢𑁆𑀢𑁂 𑀦𑀺𑀭𑀼𑀤𑁆𑀥𑀫𑀢𑁆𑀢𑁂 𑀲𑀢𑁆𑀢𑁄 𑀦𑀺𑀭𑀼𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋 𑀅𑀢𑀻𑀢𑁂 𑀘𑀺𑀢𑁆𑀢𑀓𑁆𑀔𑀡𑁂 𑀚𑀻𑀯𑀺𑀢𑁆𑀣 𑀦 𑀚𑀻𑀯𑀢𑀺 𑀦 𑀚𑀻𑀯𑀺𑀲𑁆𑀲𑀢𑀺, 𑀅𑀦𑀸𑀕𑀢𑁂 𑀘𑀺𑀢𑁆𑀢𑀓𑁆𑀔𑀡𑁂 𑀚𑀻𑀯𑀺𑀲𑁆𑀲𑀢𑀺 𑀦 𑀚𑀻𑀯𑀢𑀺 𑀦 𑀚𑀻𑀯𑀺𑀢𑁆𑀣, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀘𑀺𑀢𑁆𑀢𑀓𑁆𑀔𑀡𑁂 𑀚𑀻𑀯𑀢𑀺 𑀦 𑀚𑀻𑀯𑀺𑀢𑁆𑀣 𑀦 𑀚𑀻𑀯𑀺𑀲𑁆𑀲𑀢𑀺.

‘‘𑀚𑀻𑀯𑀺𑀢𑀁 𑀅𑀢𑁆𑀢𑀪𑀸𑀯𑁄 𑀘, 𑀲𑀼𑀔𑀤𑀼𑀓𑁆𑀔𑀸 𑀘 𑀓𑁂𑀯𑀮𑀸;

𑀏𑀓𑀘𑀺𑀢𑁆𑀢𑀲𑀫𑀸𑀬𑀼𑀢𑁆𑀢𑀸, 𑀮𑀳𑀼𑀲𑁄 𑀯𑀢𑁆𑀢𑀢𑁂 𑀔𑀡𑁄.

‘‘𑀬𑁂 𑀦𑀺𑀭𑀼𑀤𑁆𑀥𑀸 𑀫𑀭𑀦𑁆𑀢𑀲𑁆𑀲, 𑀢𑀺𑀝𑁆𑀞𑀫𑀸𑀦𑀲𑁆𑀲 𑀯𑀸 𑀇𑀥;

𑀲𑀩𑁆𑀩𑁂𑀧𑀺 𑀲𑀤𑀺𑀲𑀸 𑀔𑀦𑁆𑀥𑀸, 𑀕𑀢𑀸 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸.

‘‘𑀅𑀦𑀺𑀩𑁆𑀩𑀢𑁆𑀢𑁂𑀦 𑀦 𑀚𑀸𑀢𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀚𑀻𑀯𑀢𑀺;

𑀘𑀺𑀢𑁆𑀢𑀪𑀗𑁆𑀕𑀸 𑀫𑀢𑁄 𑀮𑁄𑀓𑁄, 𑀧𑀜𑁆𑀜𑀢𑁆𑀢𑀺 𑀧𑀭𑀫𑀢𑁆𑀣𑀺𑀬𑀸’’𑀢𑀺. (𑀫𑀳𑀸𑀦𑀺. 𑁧𑁦);

𑀚𑀭𑀽𑀧𑀦𑀻𑀢𑀲𑁆𑀲𑀸𑀢𑀺 𑀚𑀭𑀁 𑀉𑀧𑀕𑀢𑀲𑁆𑀲, 𑀚𑀭𑀸𑀬 𑀯𑀸 𑀫𑀭𑀡𑀲𑀦𑁆𑀢𑀺𑀓𑀁 𑀉𑀧𑀦𑀻𑀢𑀲𑁆𑀲. 𑀦 𑀲𑀦𑁆𑀢𑀺 𑀢𑀸𑀡𑀸𑀢𑀺 𑀢𑀸𑀡𑀁 𑀮𑁂𑀡𑀁 𑀲𑀭𑀡𑀁 𑀪𑀯𑀺𑀢𑀼𑀁 𑀲𑀫𑀢𑁆𑀣𑀸 𑀦𑀸𑀫 𑀓𑁂𑀘𑀺 𑀦𑀢𑁆𑀣𑀺. 𑀏𑀢𑀁 𑀪𑀬𑀦𑁆𑀢𑀺 𑀏𑀢𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀫𑀭𑀡𑀽𑀧𑀕𑀫𑀦𑀁, 𑀆𑀬𑀼𑀧𑀭𑀺𑀢𑁆𑀢𑀢𑀸, 𑀚𑀭𑀽𑀧𑀦𑀻𑀢𑀲𑁆𑀲 𑀢𑀸𑀡𑀸𑀪𑀸𑀯𑁄𑀢𑀺 𑀢𑀺𑀯𑀺𑀥𑀁 𑀪𑀬𑀁 𑀪𑀬𑀯𑀢𑁆𑀣𑀼 𑀪𑀬𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀜𑁆𑀜𑀸𑀦𑀺 𑀓𑀬𑀺𑀭𑀸𑀣 𑀲𑀼𑀔𑀸𑀯𑀳𑀸𑀦𑀻𑀢𑀺 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀲𑀼𑀔𑀸𑀯𑀳𑀸𑀦𑀺 𑀲𑀼𑀔𑀤𑀸𑀬𑀓𑀸𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁂𑀬𑁆𑀬. 𑀇𑀢𑀺 𑀤𑁂𑀯𑀢𑀸 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀁 𑀲𑀦𑁆𑀥𑀸𑀬 𑀧𑀼𑀩𑁆𑀩𑀘𑁂𑀢𑀦𑀁 𑀅𑀧𑀭𑀘𑁂𑀢𑀦𑀁 𑀫𑀼𑀜𑁆𑀘𑀘𑁂𑀢𑀦𑀜𑁆𑀘 𑀕𑀳𑁂𑀢𑁆𑀯𑀸 𑀩𑀳𑀼𑀯𑀘𑀦𑀯𑀲𑁂𑀦 ‘‘𑀧𑀼𑀜𑁆𑀜𑀸𑀦𑀻’’𑀢𑀺 𑀆𑀳. 𑀛𑀸𑀦𑀲𑁆𑀲𑀸𑀤𑀁 𑀛𑀸𑀦𑀦𑀺𑀓𑀦𑁆𑀢𑀺𑀁 𑀛𑀸𑀦𑀲𑀼𑀔𑀜𑁆𑀘 𑀕𑀳𑁂𑀢𑁆𑀯𑀸 ‘‘𑀲𑀼𑀔𑀸𑀯𑀳𑀸𑀦𑀻’’𑀢𑀺 𑀆𑀳. 𑀢𑀲𑁆𑀲𑀸 𑀓𑀺𑀭 𑀤𑁂𑀯𑀢𑀸𑀬 𑀲𑀬𑀁 𑀤𑀻𑀖𑀸𑀬𑀼𑀓𑀝𑁆𑀞𑀸𑀦𑁂 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀳𑁂𑀝𑁆𑀞𑀸 𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀼 𑀧𑀭𑀺𑀢𑁆𑀢𑀸𑀬𑀼𑀓𑀝𑁆𑀞𑀸𑀦𑁂 𑀘𑀯𑀫𑀸𑀦𑁂 𑀉𑀧𑀧𑀚𑁆𑀚𑀫𑀸𑀦𑁂 𑀘 𑀣𑀼𑀮𑁆𑀮𑀨𑀼𑀲𑀺𑀢𑀓𑁂 𑀯𑀼𑀝𑁆𑀞𑀺𑀧𑀸𑀢𑀲𑀤𑀺𑀲𑁂 𑀲𑀢𑁆𑀢𑁂 𑀤𑀺𑀲𑁆𑀯𑀸 𑀏𑀢𑀤𑀳𑁄𑀲𑀺 ‘‘𑀅𑀳𑁄𑀯𑀢𑀺𑀫𑁂 𑀲𑀢𑁆𑀢𑀸 𑀛𑀸𑀦𑀁 𑀪𑀸𑀯𑁂𑀢𑁆𑀯𑀸 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀸 𑀓𑀸𑀮𑀁 𑀓𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀏𑀓𑀓𑀧𑁆𑀧-𑀤𑁆𑀯𑁂𑀓𑀧𑁆𑀧-𑀘𑀢𑀼𑀓𑀧𑁆𑀧-𑀅𑀝𑁆𑀞𑀓𑀧𑁆𑀧-𑀲𑁄𑀴𑀲𑀓𑀧𑁆𑀧-𑀤𑁆𑀯𑀢𑁆𑀢𑀺𑀁𑀲𑀓𑀧𑁆𑀧-𑀘𑀢𑀼𑀲𑀝𑁆𑀞𑀺𑀓𑀧𑁆𑀧𑀧𑁆𑀧𑀫𑀸𑀡𑀁 𑀅𑀤𑁆𑀥𑀸𑀦𑀁 𑀢𑀺𑀝𑁆𑀞𑁂𑀬𑁆𑀬𑀼’’𑀦𑁆𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳.

𑀅𑀣 𑀪𑀕𑀯𑀸 𑁋 ‘‘𑀅𑀬𑀁 𑀤𑁂𑀯𑀢𑀸 𑀅𑀦𑀺𑀬𑁆𑀬𑀸𑀦𑀺𑀓𑀁 𑀯𑀝𑁆𑀝𑀓𑀣𑀁 𑀓𑀣𑁂𑀢𑀻’’𑀢𑀺 𑀯𑀺𑀯𑀝𑁆𑀝𑀫𑀲𑁆𑀲𑀸 𑀤𑀲𑁆𑀲𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀮𑁄𑀓𑀸𑀫𑀺𑀲𑀦𑁆𑀢𑀺 𑀤𑁆𑀯𑁂 𑀮𑁄𑀓𑀸𑀫𑀺𑀲𑀸 𑀧𑀭𑀺𑀬𑀸𑀬𑁂𑀦 𑀘 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀘. 𑀧𑀭𑀺𑀬𑀸𑀬𑁂𑀦 𑀢𑁂𑀪𑀽𑀫𑀓𑀯𑀝𑁆𑀝𑀁 𑀮𑁄𑀓𑀸𑀫𑀺𑀲𑀁, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸. 𑀇𑀥 𑀧𑀭𑀺𑀬𑀸𑀬𑀮𑁄𑀓𑀸𑀫𑀺𑀲𑀁 𑀅𑀥𑀺𑀧𑁆𑀧𑁂𑀢𑀁. 𑀦𑀺𑀧𑁆𑀧𑀭𑀺𑀬𑀸𑀬𑀮𑁄𑀓𑀸𑀫𑀺𑀲𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀲𑀦𑁆𑀢𑀺𑀧𑁂𑀓𑁆𑀔𑁄𑀢𑀺 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀅𑀘𑁆𑀘𑀦𑁆𑀢𑀲𑀦𑁆𑀢𑀺𑀁 𑀧𑁂𑀓𑁆𑀔𑀦𑁆𑀢𑁄 𑀇𑀘𑁆𑀙𑀦𑁆𑀢𑁄 𑀧𑀢𑁆𑀣𑀬𑀦𑁆𑀢𑁄𑀢𑀺.

𑀉𑀧𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀘𑁆𑀘𑁂𑀦𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪. 𑀘𑀢𑀼𑀢𑁆𑀣𑁂 𑀅𑀘𑁆𑀘𑁂𑀦𑁆𑀢𑀻𑀢𑀺 𑀅𑀢𑀺𑀓𑁆𑀓𑀫𑀦𑁆𑀢𑀺. 𑀓𑀸𑀮𑀸𑀢𑀺 𑀧𑀼𑀭𑁂𑀪𑀢𑁆𑀢𑀸𑀤𑀬𑁄 𑀓𑀸𑀮𑀸. 𑀢𑀭𑀬𑀦𑁆𑀢𑀺 𑀭𑀢𑁆𑀢𑀺𑀬𑁄𑀢𑀺 𑀭𑀢𑁆𑀢𑀺𑀬𑁄 𑀅𑀢𑀺𑀓𑁆𑀓𑀫𑀫𑀸𑀦𑀸 𑀧𑀼𑀕𑁆𑀕𑀮𑀁 𑀫𑀭𑀡𑀽𑀧𑀕𑀫𑀦𑀸𑀬 𑀢𑀭𑀬𑀦𑁆𑀢𑀺 𑀲𑀻𑀖𑀁 𑀲𑀻𑀖𑀁 𑀕𑀫𑀬𑀦𑁆𑀢𑀺. 𑀯𑀬𑁄𑀕𑀼𑀡𑀸𑀢𑀺 𑀧𑀞𑀫𑀫𑀚𑁆𑀛𑀺𑀫𑀧𑀘𑁆𑀙𑀺𑀫𑀯𑀬𑀸𑀦𑀁 𑀕𑀼𑀡𑀸, 𑀭𑀸𑀲𑀬𑁄𑀢𑀺 𑀅𑀢𑁆𑀣𑁄. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀳𑀢𑀸𑀦𑀁 𑀯𑀢𑁆𑀣𑀸𑀦𑀁 𑀤𑀺𑀕𑀼𑀡𑀁 𑀲𑀗𑁆𑀖𑀸𑀝𑀺’’𑀦𑁆𑀢𑀺 (𑀫𑀳𑀸𑀯. 𑁩𑁪𑁮) 𑀏𑀢𑁆𑀣 𑀳𑀺 𑀧𑀝𑀮𑀝𑁆𑀞𑁄 𑀕𑀼𑀡𑀝𑁆𑀞𑁄. ‘‘𑀲𑀢𑀕𑀼𑀡𑀸 𑀤𑀓𑁆𑀔𑀺𑀡𑀸 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸’’𑀢𑀺 (𑀫. 𑀦𑀺. 𑁩.𑁩𑁭𑁯) 𑀏𑀢𑁆𑀣 𑀆𑀦𑀺𑀲𑀁𑀲𑀝𑁆𑀞𑁄. ‘‘𑀅𑀦𑁆𑀢𑀁 𑀅𑀦𑁆𑀢𑀕𑀼𑀡’’𑀦𑁆𑀢𑀺 𑀏𑀢𑁆𑀣 𑀓𑁄𑀝𑁆𑀞𑀸𑀲𑀝𑁆𑀞𑁄. ‘‘𑀓𑀬𑀺𑀭𑀸 𑀫𑀸𑀮𑀸𑀕𑀼𑀡𑁂 𑀩𑀳𑀽’’𑀢𑀺 (𑀥. 𑀧. 𑁫𑁩) 𑀏𑀢𑁆𑀣 𑀭𑀸𑀲𑀝𑁆𑀞𑁄. ‘‘𑀧𑀜𑁆𑀘 𑀓𑀸𑀫𑀕𑀼𑀡𑀸’’𑀢𑀺 𑀏𑀢𑁆𑀣 𑀩𑀦𑁆𑀥𑀦𑀝𑁆𑀞𑁄. 𑀇𑀥 𑀧𑀦 𑀭𑀸𑀲𑀝𑁆𑀞𑁄 𑀕𑀼𑀡𑀝𑁆𑀞𑁄. 𑀢𑀲𑁆𑀫𑀸 𑀯𑀬𑁄𑀕𑀼𑀡𑀸𑀢𑀺 𑀯𑀬𑁄𑀭𑀸𑀲𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀅𑀦𑀼𑀧𑀼𑀩𑁆𑀩𑀁 𑀚𑀳𑀦𑁆𑀢𑀻𑀢𑀺 𑀅𑀦𑀼𑀧𑀝𑀺𑀧𑀸𑀝𑀺𑀬𑀸 𑀧𑀼𑀕𑁆𑀕𑀮𑀁 𑀚𑀳𑀦𑁆𑀢𑀺. 𑀫𑀚𑁆𑀛𑀺𑀫𑀯𑀬𑁂 𑀞𑀺𑀢𑀁 𑀳𑀺 𑀧𑀞𑀫𑀯𑀬𑁄 𑀚𑀳𑀢𑀺, 𑀧𑀘𑁆𑀙𑀺𑀫𑀯𑀬𑁂 𑀞𑀺𑀢𑀁 𑀤𑁆𑀯𑁂 𑀧𑀞𑀫𑀫𑀚𑁆𑀛𑀺𑀫𑀸 𑀚𑀳𑀦𑁆𑀢𑀺, 𑀫𑀭𑀡𑀓𑁆𑀔𑀡𑁂 𑀧𑀦 𑀢𑀬𑁄𑀧𑀺 𑀯𑀬𑀸 𑀚𑀳𑀦𑁆𑀢𑁂𑀯. 𑀏𑀢𑀁 𑀪𑀬𑀦𑁆𑀢𑀺 𑀏𑀢𑀁 𑀓𑀸𑀮𑀸𑀦𑀁 𑀅𑀢𑀺𑀓𑁆𑀓𑀫𑀦𑀁, 𑀭𑀢𑁆𑀢𑀺𑀤𑀺𑀯𑀸𑀦𑀁 𑀢𑀭𑀺𑀢𑀪𑀸𑀯𑁄, 𑀯𑀬𑁄𑀕𑀼𑀡𑀸𑀦𑀁 𑀚𑀳𑀦𑀪𑀸𑀯𑁄𑀢𑀺 𑀢𑀺𑀯𑀺𑀥𑀁 𑀪𑀬𑀁. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺.

𑀅𑀘𑁆𑀘𑁂𑀦𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀓𑀢𑀺𑀙𑀺𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁫. 𑀧𑀜𑁆𑀘𑀫𑁂 𑀓𑀢𑀺 𑀙𑀺𑀦𑁆𑀤𑁂𑀢𑀺 𑀙𑀺𑀦𑁆𑀤𑀦𑁆𑀢𑁄 𑀓𑀢𑀺 𑀙𑀺𑀦𑁆𑀤𑁂𑀬𑁆𑀬. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 ‘‘𑀙𑀺𑀦𑁆𑀤𑁂 𑀚𑀳𑁂’’𑀢𑀺 𑀅𑀢𑁆𑀣𑀢𑁄 𑀏𑀓𑀁. 𑀕𑀸𑀣𑀸𑀩𑀦𑁆𑀥𑀲𑁆𑀲 𑀧𑀦 𑀫𑀝𑁆𑀞𑀪𑀸𑀯𑀢𑁆𑀣𑀁 𑀅𑀬𑀁 𑀤𑁂𑀯𑀢𑀸 𑀲𑀤𑁆𑀤𑀧𑀼𑀦𑀭𑀼𑀢𑁆𑀢𑀺𑀁 𑀯𑀚𑁆𑀚𑀬𑀦𑁆𑀢𑀻 𑀏𑀯𑀫𑀸𑀳. 𑀓𑀢𑀺 𑀲𑀗𑁆𑀕𑀸𑀢𑀺𑀕𑁄𑀢𑀺 𑀓𑀢𑀺 𑀲𑀗𑁆𑀕𑁂 𑀅𑀢𑀺𑀕𑀢𑁄, 𑀅𑀢𑀺𑀓𑁆𑀓𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀲𑀗𑁆𑀕𑀸𑀢𑀺𑀓𑁄𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯 𑀅𑀢𑁆𑀣𑁄. 𑀧𑀜𑁆𑀘 𑀙𑀺𑀦𑁆𑀤𑁂𑀢𑀺 𑀙𑀺𑀦𑁆𑀤𑀦𑁆𑀢𑁄 𑀧𑀜𑁆𑀘 𑀑𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀙𑀺𑀦𑁆𑀤𑁂𑀬𑁆𑀬. 𑀧𑀜𑁆𑀘 𑀚𑀳𑁂𑀢𑀺 𑀚𑀳𑀦𑁆𑀢𑁄 𑀧𑀜𑁆𑀘𑀼𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀚𑀳𑁂𑀬𑁆𑀬. 𑀇𑀥𑀸𑀧𑀺 𑀙𑀺𑀦𑁆𑀤𑀦𑀜𑁆𑀘 𑀚𑀳𑀦𑀜𑁆𑀘 𑀅𑀢𑁆𑀣𑀢𑁄 𑀏𑀓𑀫𑁂𑀯, 𑀪𑀕𑀯𑀸 𑀧𑀦 𑀤𑁂𑀯𑀢𑀸𑀬 𑀆𑀭𑁄𑀧𑀺𑀢𑀯𑀘𑀦𑀸𑀦𑀼𑀭𑀽𑀧𑁂𑀦𑁂𑀯 𑀏𑀯𑀫𑀸𑀳. 𑀅𑀣 𑀯𑀸 𑀧𑀸𑀤𑁂𑀲𑀼 𑀩𑀤𑁆𑀥𑀧𑀸𑀲𑀲𑀓𑀼𑀡𑁄 𑀯𑀺𑀬 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀳𑁂𑀝𑁆𑀞𑀸 𑀆𑀓𑀟𑁆𑀠𑀫𑀸𑀦𑀸𑀓𑀸𑀭𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀙𑀺𑀦𑁆𑀤𑁂𑀬𑁆𑀬𑀸𑀢𑀺 𑀯𑀤𑀢𑀺. 𑀳𑀢𑁆𑀣𑁂𑀳𑀺 𑀕𑀳𑀺𑀢𑀭𑀼𑀓𑁆𑀔𑀲𑀸𑀔𑀸 𑀯𑀺𑀬 𑀧𑀜𑁆𑀘𑀼𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀉𑀧𑀭𑀺 𑀆𑀓𑀟𑁆𑀠𑀫𑀸𑀦𑀸𑀓𑀸𑀭𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀚𑀳𑁂𑀬𑁆𑀬𑀸𑀢𑀺 𑀯𑀤𑀢𑀺. 𑀧𑀜𑁆𑀘 𑀘𑀼𑀢𑁆𑀢𑀭𑀺 𑀪𑀸𑀯𑀬𑁂𑀢𑀺 𑀏𑀢𑁂𑀲𑀁 𑀲𑀁𑀬𑁄𑀚𑀦𑀸𑀦𑀁 𑀙𑀺𑀦𑁆𑀤𑀦𑀢𑁆𑀣𑀸𑀬 𑀘𑁂𑀯 𑀧𑀳𑀸𑀦𑀢𑁆𑀣𑀸𑀬 𑀘 𑀉𑀢𑁆𑀢𑀭𑀺 𑀅𑀢𑀺𑀭𑁂𑀓𑀁 𑀯𑀺𑀲𑁂𑀲𑀁 𑀪𑀸𑀯𑁂𑀦𑁆𑀢𑁄 𑀲𑀤𑁆𑀥𑀸𑀧𑀜𑁆𑀘𑀫𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀪𑀸𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀧𑀜𑁆𑀘 𑀲𑀗𑁆𑀕𑀸𑀢𑀺𑀕𑁄𑀢𑀺 𑀭𑀸𑀕𑀲𑀗𑁆𑀕𑁄 𑀤𑁄𑀲𑀲𑀗𑁆𑀕𑁄 𑀫𑁄𑀳𑀲𑀗𑁆𑀕𑁄 𑀫𑀸𑀦𑀲𑀗𑁆𑀕𑁄 𑀤𑀺𑀝𑁆𑀞𑀺𑀲𑀗𑁆𑀕𑁄𑀢𑀺 𑀇𑀫𑁂 𑀧𑀜𑁆𑀘 𑀲𑀗𑁆𑀕𑁂 𑀅𑀢𑀺𑀓𑁆𑀓𑀦𑁆𑀢𑁄. 𑀑𑀖𑀢𑀺𑀡𑁆𑀡𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀘𑀢𑀼𑀭𑁄𑀖𑀢𑀺𑀡𑁆𑀡𑁄𑀢𑀺 𑀓𑀣𑀻𑀬𑀢𑀺. 𑀇𑀫𑀸𑀬 𑀧𑀦 𑀕𑀸𑀣𑀸𑀬 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀦𑀺 𑀓𑀣𑀺𑀢𑀸𑀦𑀻𑀢𑀺.

𑀓𑀢𑀺𑀙𑀺𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀚𑀸𑀕𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁬. 𑀙𑀝𑁆𑀞𑁂 𑀚𑀸𑀕𑀭𑀢𑀦𑁆𑀢𑀺 𑀚𑀸𑀕𑀭𑀦𑁆𑀢𑀸𑀦𑀁. 𑀧𑀜𑁆𑀘 𑀚𑀸𑀕𑀭𑀢𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸𑀬𑀁 𑀧𑀦 𑀲𑀤𑁆𑀥𑀸𑀤𑀻𑀲𑀼 𑀧𑀜𑁆𑀘𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀚𑀸𑀕𑀭𑀦𑁆𑀢𑁂𑀲𑀼 𑀧𑀜𑁆𑀘 𑀦𑀻𑀯𑀭𑀡𑀸 𑀲𑀼𑀢𑁆𑀢𑀸 𑀦𑀸𑀫. 𑀓𑀲𑁆𑀫𑀸? 𑀬𑀲𑁆𑀫𑀸 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀲𑀺𑀦𑁆𑀦𑁄 𑀯𑀸 𑀞𑀺𑀢𑁄 𑀯𑀸 𑀅𑀭𑀼𑀡𑀁 𑀉𑀝𑁆𑀞𑀧𑁂𑀦𑁆𑀢𑁄𑀧𑀺 𑀧𑀫𑀸𑀤𑀢𑀸𑀬 𑀅𑀓𑀼𑀲𑀮𑀲𑀫𑀗𑁆𑀕𑀺𑀢𑀸𑀬 𑀲𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀏𑀯𑀁 𑀲𑀼𑀢𑁆𑀢𑁂𑀲𑀼 𑀧𑀜𑁆𑀘𑀲𑀼 𑀦𑀻𑀯𑀭𑀡𑁂𑀲𑀼 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀚𑀸𑀕𑀭𑀸𑀦𑀺 𑀦𑀸𑀫. 𑀓𑀲𑁆𑀫𑀸? 𑀬𑀲𑁆𑀫𑀸 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑁄𑀧𑀺 𑀅𑀧𑁆𑀧𑀫𑀸𑀤𑀢𑀸𑀬 𑀓𑀼𑀲𑀮𑀲𑀫𑀗𑁆𑀕𑀺𑀢𑀸𑀬 𑀚𑀸𑀕𑀭𑁄 𑀦𑀸𑀫 𑀳𑁄𑀢𑀺. 𑀧𑀜𑁆𑀘𑀳𑀺 𑀧𑀦 𑀦𑀻𑀯𑀭𑀡𑁂𑀳𑁂𑀯 𑀓𑀺𑀮𑁂𑀲𑀭𑀚𑀁 𑀆𑀤𑀺𑀬𑀢𑀺 𑀕𑀡𑁆𑀳𑀸𑀢𑀺 𑀧𑀭𑀸𑀫𑀲𑀢𑀺. 𑀧𑀼𑀭𑀺𑀫𑀸 𑀳𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄 𑀧𑀘𑁆𑀙𑀺𑀫𑀸𑀦𑀁 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀧𑀜𑁆𑀘𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀧𑀭𑀺𑀲𑀼𑀚𑁆𑀛𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀥𑀸𑀧𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀦𑁂𑀯 𑀓𑀣𑀺𑀢𑀸𑀦𑀻𑀢𑀺.

𑀚𑀸𑀕𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀧𑁆𑀧𑀝𑀺𑀯𑀺𑀤𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁭. 𑀲𑀢𑁆𑀢𑀫𑁂 𑀥𑀫𑁆𑀫𑀸𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀸. 𑀅𑀧𑁆𑀧𑀝𑀺𑀯𑀺𑀤𑀺𑀢𑀸𑀢𑀺 𑀜𑀸𑀡𑁂𑀦 𑀅𑀧𑁆𑀧𑀝𑀺𑀯𑀺𑀤𑁆𑀥𑀸. 𑀧𑀭𑀯𑀸𑀤𑁂𑀲𑀽𑀢𑀺 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀯𑀸𑀤𑁂𑀲𑀼. 𑀢𑁂 𑀳𑀺 𑀇𑀢𑁄 𑀧𑀭𑁂𑀲𑀁 𑀢𑀺𑀢𑁆𑀣𑀺𑀬𑀸𑀦𑀁 𑀯𑀸𑀤𑀢𑁆𑀢𑀸 𑀧𑀭𑀯𑀸𑀤𑀸 𑀦𑀸𑀫. 𑀦𑀻𑀬𑀭𑁂𑀢𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑀧𑀺 𑀕𑀘𑁆𑀙𑀦𑁆𑀢𑀺, 𑀧𑀭𑁂𑀦𑀧𑀺 𑀦𑀻𑀬𑀦𑁆𑀢𑀺. 𑀢𑀢𑁆𑀣 𑀲𑀬𑀫𑁂𑀯 𑀲𑀲𑁆𑀲𑀢𑀸𑀤𑀻𑀦𑀺 𑀕𑀡𑁆𑀳𑀦𑁆𑀢𑀸 𑀕𑀘𑁆𑀙𑀦𑁆𑀢𑀺 𑀦𑀸𑀫, 𑀧𑀭𑀲𑁆𑀲 𑀯𑀘𑀦𑁂𑀦 𑀢𑀸𑀦𑀺 𑀕𑀡𑁆𑀳𑀦𑁆𑀢𑀸 𑀦𑀻𑀬𑀦𑁆𑀢𑀺 𑀦𑀸𑀫. 𑀓𑀸𑀮𑁄 𑀢𑁂𑀲𑀁 𑀧𑀩𑀼𑀚𑁆𑀛𑀺𑀢𑀼𑀦𑁆𑀢𑀺 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀧𑀩𑀼𑀚𑁆𑀛𑀺𑀢𑀼𑀁 𑀅𑀬𑀁 𑀓𑀸𑀮𑁄. 𑀮𑁄𑀓𑀲𑁆𑀫𑀺𑀜𑁆𑀳𑀺 𑀩𑀼𑀤𑁆𑀥𑁄 𑀉𑀧𑁆𑀧𑀦𑁆𑀦𑁄, 𑀥𑀫𑁆𑀫𑁄 𑀤𑁂𑀲𑀺𑀬𑀢𑀺, 𑀲𑀗𑁆𑀖𑁄 𑀲𑀼𑀧𑁆𑀧𑀝𑀺𑀧𑀦𑁆𑀦𑁄, 𑀧𑀝𑀺𑀧𑀤𑀸 𑀪𑀤𑁆𑀤𑀺𑀓𑀸, 𑀇𑀫𑁂 𑀘 𑀧𑀦 𑀫𑀳𑀸𑀚𑀦𑀸 𑀯𑀝𑁆𑀝𑁂 𑀲𑀼𑀢𑁆𑀢𑀸 𑀦𑀧𑁆𑀧𑀩𑀼𑀚𑁆𑀛𑀦𑁆𑀢𑀻𑀢𑀺 𑀤𑁂𑀯𑀢𑀸 𑀆𑀳. 𑀲𑀫𑁆𑀩𑀼𑀤𑁆𑀥𑀸𑀢𑀺 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀓𑀸𑀭𑀡𑁂𑀦 𑀩𑀼𑀤𑁆𑀥𑀸. 𑀘𑀢𑁆𑀢𑀸𑀭𑁄 𑀳𑀺 𑀩𑀼𑀤𑁆𑀥𑀸 𑁋 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄, 𑀧𑀘𑁆𑀘𑁂𑀓𑀩𑀼𑀤𑁆𑀥𑁄, 𑀘𑀢𑀼𑀲𑀘𑁆𑀘𑀩𑀼𑀤𑁆𑀥𑁄, 𑀲𑀼𑀢𑀩𑀼𑀤𑁆𑀥𑁄𑀢𑀺. 𑀢𑀢𑁆𑀣 𑀲𑀫𑀢𑀺𑀁𑀲𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀢𑁄 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄 𑀦𑀸𑀫. 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑀬𑀫𑁆𑀪𑀼𑀢𑀁 𑀧𑀢𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀦𑀸𑀫. 𑀅𑀯𑀲𑁂𑀲𑀸 𑀔𑀻𑀡𑀸𑀲𑀯𑀸 𑀘𑀢𑀼𑀲𑀘𑁆𑀘𑀩𑀼𑀤𑁆𑀥𑀸 𑀦𑀸𑀫. 𑀩𑀳𑀼𑀲𑁆𑀲𑀼𑀢𑁄 𑀲𑀼𑀢𑀩𑀼𑀤𑁆𑀥𑁄 𑀦𑀸𑀫. 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀢𑀬𑁄𑀧𑀺 𑀧𑀼𑀭𑀺𑀫𑀸 𑀯𑀝𑁆𑀝𑀦𑁆𑀢𑀺. 𑀲𑀫𑁆𑀫𑀤𑀜𑁆𑀜𑀸𑀢𑀺 𑀲𑀫𑁆𑀫𑀸 𑀳𑁂𑀢𑀼𑀦𑀸 𑀓𑀸𑀭𑀡𑁂𑀦 𑀚𑀸𑀦𑀺𑀢𑁆𑀯𑀸. 𑀘𑀭𑀦𑁆𑀢𑀺 𑀯𑀺𑀲𑀫𑁂 𑀲𑀫𑀦𑁆𑀢𑀺 𑀯𑀺𑀲𑀫𑁂 𑀯𑀸 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀯𑀺𑀲𑀫𑁂 𑀯𑀸 𑀲𑀢𑁆𑀢𑀦𑀺𑀓𑀸𑀬𑁂 𑀯𑀺𑀲𑀫𑁂 𑀯𑀸 𑀓𑀺𑀮𑁂𑀲𑀚𑀸𑀢𑁂 𑀲𑀫𑀁 𑀘𑀭𑀦𑁆𑀢𑀻𑀢𑀺.

𑀅𑀧𑁆𑀧𑀝𑀺𑀯𑀺𑀤𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀼𑀲𑀫𑁆𑀫𑀼𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸

𑁮. 𑀅𑀝𑁆𑀞𑀫𑁂 𑀲𑀼𑀲𑀫𑁆𑀫𑀼𑀝𑁆𑀞𑀸𑀢𑀺 𑀧𑀜𑁆𑀜𑀸𑀬 𑀅𑀧𑁆𑀧𑀝𑀺𑀯𑀺𑀤𑁆𑀥𑀪𑀸𑀯𑁂𑀦𑁂𑀯 𑀲𑀼𑀦𑀝𑁆𑀞𑀸. 𑀬𑀣𑀸 𑀳𑀺 𑀤𑁆𑀯𑁂 𑀔𑁂𑀢𑁆𑀢𑀸𑀦𑀺 𑀓𑀲𑀺𑀢𑁆𑀯𑀸, 𑀏𑀓𑀁 𑀯𑀧𑀺𑀢𑁆𑀯𑀸, 𑀩𑀳𑀼𑀥𑀜𑁆𑀜𑀁 𑀅𑀥𑀺𑀕𑀢𑀲𑁆𑀲 𑀅𑀯𑀸𑀧𑀺𑀢𑀔𑁂𑀢𑁆𑀢𑀢𑁄 𑀅𑀮𑀤𑁆𑀥𑀁 𑀲𑀦𑁆𑀥𑀸𑀬 ‘‘𑀩𑀳𑀼𑀁 𑀫𑁂 𑀥𑀜𑁆𑀜𑀁 𑀦𑀝𑁆𑀞’’𑀦𑁆𑀢𑀺 𑀯𑀤𑀦𑁆𑀢𑁄 𑀅𑀮𑀤𑁆𑀥𑀫𑁂𑀯 ‘‘𑀦𑀝𑁆𑀞’’𑀦𑁆𑀢𑀺 𑀯𑀤𑀢𑀺, 𑀏𑀯𑀫𑀺𑀥𑀸𑀧𑀺 𑀅𑀧𑁆𑀧𑀝𑀺𑀯𑀺𑀤𑀺𑀢𑀸𑀯 𑀲𑀼𑀲𑀫𑁆𑀫𑀼𑀝𑁆𑀞𑀸 𑀦𑀸𑀫. 𑀅𑀲𑀫𑁆𑀫𑀼𑀝𑁆𑀞𑀸𑀢𑀺 𑀧𑀜𑁆𑀜𑀸𑀬 𑀧𑀝𑀺𑀯𑀺𑀤𑁆𑀥𑀪𑀸𑀯𑁂𑀦𑁂𑀯 𑀅𑀦𑀝𑁆𑀞𑀸. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺.

𑀲𑀼𑀲𑀫𑁆𑀫𑀼𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀫𑀸𑀦𑀓𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁯. 𑀦𑀯𑀫𑁂 𑀫𑀸𑀦𑀓𑀸𑀫𑀲𑁆𑀲𑀸𑀢𑀺 𑀫𑀸𑀦𑀁 𑀓𑀸𑀫𑁂𑀦𑁆𑀢𑀲𑁆𑀲 𑀇𑀘𑁆𑀙𑀦𑁆𑀢𑀲𑁆𑀲. 𑀤𑀫𑁄𑀢𑀺 𑀏𑀯𑀭𑀽𑀧𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀫𑀸𑀥𑀺𑀧𑀓𑁆𑀔𑀺𑀓𑁄 𑀤𑀫𑁄 𑀦𑀢𑁆𑀣𑀻𑀢𑀺 𑀯𑀤𑀢𑀺. ‘‘𑀲𑀘𑁆𑀘𑁂𑀦 𑀤𑀦𑁆𑀢𑁄 𑀤𑀫𑀲𑀸 𑀉𑀧𑁂𑀢𑁄, 𑀯𑁂𑀤𑀦𑁆𑀢𑀕𑀽 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄’’𑀢𑀺 (𑀲𑀁. 𑀦𑀺. 𑁧.𑁧𑁯𑁫) 𑀏𑀢𑁆𑀣 𑀳𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀤𑀫𑁄𑀢𑀺 𑀯𑀼𑀢𑁆𑀢𑁄. ‘‘𑀬𑀤𑀺 𑀲𑀘𑁆𑀘𑀸 𑀤𑀫𑀸 𑀘𑀸𑀕𑀸, 𑀔𑀦𑁆𑀢𑁆𑀬𑀸 𑀪𑀺𑀬𑁆𑀬𑁄𑀥 𑀯𑀺𑀚𑁆𑀚𑀢𑀻’’𑀢𑀺 (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁯𑁧) 𑀏𑀢𑁆𑀣 𑀧𑀜𑁆𑀜𑀸. ‘‘𑀤𑀸𑀦𑁂𑀦 𑀤𑀫𑁂𑀦 𑀲𑀁𑀬𑀫𑁂𑀦 𑀲𑀘𑁆𑀘𑀯𑀚𑁆𑀚𑁂𑀦 𑀅𑀢𑁆𑀣𑀺 𑀧𑀼𑀜𑁆𑀜𑀁, 𑀅𑀢𑁆𑀣𑀺 𑀧𑀼𑀜𑁆𑀜𑀲𑁆𑀲 𑀆𑀕𑀫𑁄’’𑀢𑀺 (𑀲𑀁. 𑀦𑀺. 𑁪.𑁩𑁬𑁫) 𑀏𑀢𑁆𑀣 𑀉𑀧𑁄𑀲𑀣𑀓𑀫𑁆𑀫𑀁. ‘‘𑀲𑀓𑁆𑀔𑀺𑀲𑁆𑀲𑀲𑀺 𑀔𑁄 𑀢𑁆𑀯𑀁, 𑀧𑀼𑀡𑁆𑀡, 𑀇𑀫𑀺𑀦𑀸 𑀤𑀫𑀽𑀧𑀲𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀼𑀦𑀸𑀧𑀭𑀦𑁆𑀢𑀲𑁆𑀫𑀺𑀁 𑀚𑀦𑀧𑀤𑁂 𑀯𑀺𑀳𑀭𑀺𑀢𑀼’’𑀦𑁆𑀢𑀺 (𑀲𑀁. 𑀦𑀺. 𑁪.𑁮𑁮; 𑀫. 𑀦𑀺. 𑁩.𑁩𑁯𑁬) 𑀏𑀢𑁆𑀣 𑀅𑀥𑀺𑀯𑀸𑀲𑀦𑀔𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀤𑀫𑁄𑀢𑀺 𑀲𑀫𑀸𑀥𑀺𑀧𑀓𑁆𑀔𑀺𑀓𑀥𑀫𑁆𑀫𑀸𑀦𑀁 𑀏𑀢𑀁 𑀦𑀸𑀫𑀁. 𑀢𑁂𑀦𑁂𑀯𑀸𑀳 𑁋 ‘‘𑀦 𑀫𑁄𑀦𑀫𑀢𑁆𑀣𑀺 𑀅𑀲𑀫𑀸𑀳𑀺𑀢𑀲𑁆𑀲𑀸’’𑀢𑀺. 𑀢𑀢𑁆𑀣 𑀫𑁄𑀦𑀦𑁆𑀢𑀺 𑀘𑀢𑀼𑀫𑀕𑁆𑀕𑀜𑀸𑀡𑀁, 𑀢𑀜𑁆𑀳𑀺 𑀫𑀼𑀦𑀸𑀢𑀻𑀢𑀺 𑀫𑁄𑀦𑀁, 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲𑀸𑀢𑀺 𑀢𑁂𑀪𑀽𑀫𑀓𑀯𑀝𑁆𑀝𑀲𑁆𑀲. 𑀢𑀜𑁆𑀳𑀺 𑀫𑀘𑁆𑀘𑀼𑀦𑁄 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀫𑀘𑁆𑀘𑀼𑀥𑁂𑀬𑁆𑀬𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀸𑀭𑀦𑁆𑀢𑀺 𑀢𑀲𑁆𑀲𑁂𑀯 𑀧𑀸𑀭𑀁 𑀦𑀺𑀩𑁆𑀩𑀸𑀦𑀁. 𑀢𑀭𑁂𑀬𑁆𑀬𑀸𑀢𑀺 𑀧𑀝𑀺𑀯𑀺𑀚𑁆𑀛𑁂𑀬𑁆𑀬 𑀧𑀸𑀧𑀼𑀡𑁂𑀬𑁆𑀬 𑀯𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀏𑀓𑁄 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑁄 𑀧𑀫𑀢𑁆𑀢𑁄 𑀧𑀼𑀕𑁆𑀕𑀮𑁄 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲 𑀧𑀸𑀭𑀁 𑀦 𑀢𑀭𑁂𑀬𑁆𑀬 𑀦 𑀧𑀝𑀺𑀯𑀺𑀚𑁆𑀛𑁂𑀬𑁆𑀬 𑀦 𑀧𑀸𑀧𑀼𑀡𑁂𑀬𑁆𑀬𑀸𑀢𑀺.

𑀫𑀸𑀦𑀁 𑀧𑀳𑀸𑀬𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀦𑀯𑀯𑀺𑀥𑀫𑀸𑀦𑀁 𑀧𑀚𑀳𑀺𑀢𑁆𑀯𑀸. 𑀲𑀼𑀲𑀫𑀸𑀳𑀺𑀢𑀢𑁆𑀢𑁄𑀢𑀺 𑀉𑀧𑀘𑀸𑀭𑀧𑁆𑀧𑀦𑀸𑀲𑀫𑀸𑀥𑀻𑀳𑀺 𑀲𑀼𑀝𑁆𑀞𑀼 𑀲𑀫𑀸𑀳𑀺𑀢𑀢𑁆𑀢𑁄. 𑀲𑀼𑀘𑁂𑀢𑀲𑁄𑀢𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀢𑀸𑀬 𑀲𑀼𑀦𑁆𑀤𑀭𑀘𑀺𑀢𑁆𑀢𑁄. 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀳𑀺 𑀲𑀼𑀘𑁂𑀢𑀲𑁄𑀢𑀺 𑀦 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂𑀦 𑀲𑀼𑀘𑁂𑀢𑀲𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀥𑀺 𑀯𑀺𑀧𑁆𑀧𑀫𑀼𑀢𑁆𑀢𑁄𑀢𑀺 𑀲𑀩𑁆𑀩𑁂𑀲𑀼 𑀔𑀦𑁆𑀥𑀸𑀬𑀢𑀦𑀸𑀤𑀻𑀲𑀼 𑀯𑀺𑀧𑁆𑀧𑀫𑀼𑀢𑁆𑀢𑁄 𑀳𑀼𑀢𑁆𑀯𑀸. 𑀢𑀭𑁂𑀬𑁆𑀬𑀸𑀢𑀺 𑀏𑀢𑁆𑀣 𑀢𑁂𑀪𑀽𑀫𑀓𑀯𑀝𑁆𑀝𑀁 𑀲𑀫𑀢𑀺𑀓𑁆𑀓𑀫𑀦𑁆𑀢𑁄 𑀦𑀺𑀩𑁆𑀩𑀸𑀦𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀢𑀭𑀢𑀻𑀢𑀺 𑀧𑀝𑀺𑀯𑁂𑀥𑀢𑀭𑀡𑀁 𑀦𑀸𑀫 𑀯𑀼𑀢𑁆𑀢𑀁. 𑀇𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀓𑀣𑀺𑀢𑀸 𑀳𑁄𑀦𑁆𑀢𑀺. 𑀓𑀣𑀁 𑁋 𑀫𑀸𑀦𑁄 𑀦𑀸𑀫𑀸𑀬𑀁 𑀲𑀻𑀮𑀪𑁂𑀤𑀦𑁄, 𑀢𑀲𑁆𑀫𑀸 ‘‘𑀫𑀸𑀦𑀁 𑀧𑀳𑀸𑀬𑀸’’𑀢𑀺 𑀇𑀫𑀺𑀦𑀸 𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀓𑀣𑀺𑀢𑀸 𑀳𑁄𑀢𑀺. ‘‘𑀲𑀼𑀲𑀫𑀸𑀳𑀺𑀢𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸. ‘‘𑀲𑀼𑀘𑁂𑀢𑀲𑁄’’𑀢𑀺 𑀏𑀢𑁆𑀣 𑀘𑀺𑀢𑁆𑀢𑁂𑀦 𑀧𑀜𑁆𑀜𑀸 𑀤𑀲𑁆𑀲𑀺𑀢𑀸, 𑀢𑀲𑁆𑀫𑀸 𑀇𑀫𑀺𑀦𑀸 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸 𑀓𑀣𑀺𑀢𑀸. 𑀅𑀥𑀺𑀲𑀻𑀮𑀜𑁆𑀘 𑀦𑀸𑀫 𑀲𑀻𑀮𑁂 𑀲𑀢𑀺 𑀳𑁄𑀢𑀺, 𑀅𑀥𑀺𑀘𑀺𑀢𑁆𑀢𑀁 𑀘𑀺𑀢𑁆𑀢𑁂 𑀲𑀢𑀺, 𑀅𑀥𑀺𑀧𑀜𑁆𑀜𑀸 𑀧𑀜𑁆𑀜𑀸𑀬 𑀲𑀢𑀺. 𑀢𑀲𑁆𑀫𑀸 𑀲𑀻𑀮𑀁 𑀦𑀸𑀫 𑀧𑀜𑁆𑀘𑀧𑀺 𑀤𑀲𑀧𑀺 𑀲𑀻𑀮𑀸𑀦𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄 𑀅𑀥𑀺𑀲𑀻𑀮𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀘𑀺𑀢𑁆𑀢𑀁, 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀚𑁆𑀛𑀸𑀦𑀁 𑀅𑀥𑀺𑀘𑀺𑀢𑁆𑀢𑀁. 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀁 𑀧𑀜𑁆𑀜𑀸, 𑀯𑀺𑀧𑀲𑁆𑀲𑀦𑀸 𑀅𑀥𑀺𑀧𑀜𑁆𑀜𑀸. 𑀅𑀦𑀼𑀧𑁆𑀧𑀦𑁆𑀦𑁂𑀧𑀺 𑀳𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀧𑀯𑀢𑁆𑀢𑀢𑀻𑀢𑀺 𑀧𑀜𑁆𑀘𑀲𑀻𑀮𑀁 𑀤𑀲𑀲𑀻𑀮𑀁 𑀲𑀻𑀮𑀫𑁂𑀯, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀬𑁂𑀯 𑀧𑀯𑀢𑁆𑀢𑀢𑀻𑀢𑀺 𑀅𑀥𑀺𑀲𑀻𑀮𑀁. 𑀘𑀺𑀢𑁆𑀢𑀧𑀜𑁆𑀜𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀧𑀺𑀘 𑀦𑀺𑀩𑁆𑀩𑀸𑀦𑀁 𑀧𑀢𑁆𑀣𑀬𑀦𑁆𑀢𑁂𑀦 𑀲𑀫𑀸𑀤𑀺𑀦𑁆𑀦𑀁 𑀧𑀜𑁆𑀘𑀲𑀻𑀮𑀫𑁆𑀧𑀺 𑀤𑀲𑀲𑀻𑀮𑀫𑁆𑀧𑀺 𑀅𑀥𑀺𑀲𑀻𑀮𑀫𑁂𑀯. 𑀲𑀫𑀸𑀧𑀦𑁆𑀦𑀸 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄𑀧𑀺 𑀅𑀥𑀺𑀘𑀺𑀢𑁆𑀢𑀫𑁂𑀯. 𑀲𑀩𑁆𑀩𑀫𑁆𑀧𑀺 𑀯𑀸 𑀮𑁄𑀓𑀺𑀬𑀲𑀻𑀮𑀁 𑀲𑀻𑀮𑀫𑁂𑀯, 𑀮𑁄𑀓𑀼𑀢𑁆𑀢𑀭𑀁 𑀅𑀥𑀺𑀲𑀻𑀮𑀁. 𑀘𑀺𑀢𑁆𑀢𑀧𑀜𑁆𑀜𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺. 𑀇𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀲𑀫𑁄𑀥𑀸𑀦𑁂𑀢𑁆𑀯𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀓𑀮𑀲𑀸𑀲𑀦𑀁 𑀓𑀣𑀺𑀢𑀁 𑀳𑁄𑀢𑀻𑀢𑀺.

𑀫𑀸𑀦𑀓𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀅𑀭𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦. 𑀤𑀲𑀫𑁂 𑀲𑀦𑁆𑀢𑀸𑀦𑀦𑁆𑀢𑀺 𑀲𑀦𑁆𑀢𑀓𑀺𑀮𑁂𑀲𑀸𑀦𑀁, 𑀧𑀡𑁆𑀟𑀺𑀢𑀸𑀦𑀁 𑀯𑀸. ‘‘𑀲𑀦𑁆𑀢𑁄 𑀳𑀯𑁂 𑀲𑀩𑁆𑀪𑀺 𑀧𑀯𑁂𑀤𑀬𑀦𑁆𑀢𑀺 (𑀚𑀸. 𑁨.𑁨𑁧.𑁪𑁧𑁩), 𑀤𑀽𑀭𑁂 𑀲𑀦𑁆𑀢𑁄 𑀧𑀓𑀸𑀲𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀥. 𑀧. 𑁩𑁦𑁪) 𑀳𑀺 𑀧𑀡𑁆𑀟𑀺𑀢𑀸𑀧𑀺 𑀲𑀦𑁆𑀢𑁄𑀢𑀺 𑀯𑀼𑀢𑁆𑀢𑀸. 𑀩𑁆𑀭𑀳𑁆𑀫𑀘𑀸𑀭𑀺𑀦𑀦𑁆𑀢𑀺 𑀲𑁂𑀝𑁆𑀞𑀘𑀸𑀭𑀻𑀦𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀯𑀲𑀦𑁆𑀢𑀸𑀦𑀁. 𑀓𑁂𑀦 𑀯𑀡𑁆𑀡𑁄 𑀧𑀲𑀻𑀤𑀢𑀻𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀙𑀯𑀺𑀯𑀡𑁆𑀡𑁄 𑀧𑀲𑀻𑀤𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀓𑀲𑁆𑀫𑀸 𑀧𑀦𑁂𑀲𑀸 𑀏𑀯𑀁 𑀧𑀼𑀘𑁆𑀙𑀢𑀺? 𑀏𑀲𑀸 𑀓𑀺𑀭 𑀯𑀦𑀲𑀡𑁆𑀟𑀯𑀸𑀲𑀺𑀓𑀸 𑀪𑀼𑀫𑁆𑀫𑀤𑁂𑀯𑀢𑀸 𑀆𑀭𑀜𑁆𑀜𑀓𑁂 𑀪𑀺𑀓𑁆𑀔𑀽 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁂 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑁂𑀲𑀼 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀧𑀲𑁆𑀲𑀢𑀺. 𑀢𑁂𑀲𑀜𑁆𑀘 𑀏𑀯𑀁 𑀦𑀺𑀲𑀺𑀦𑁆𑀦𑀸𑀦𑀁 𑀩𑀮𑀯𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁄 𑀯𑀺𑀲𑀪𑀸𑀕𑀲𑀦𑁆𑀢𑀢𑀺 𑀯𑀽𑀧𑀲𑀫𑁆𑀫𑀢𑀺, 𑀲𑀪𑀸𑀕𑀲𑀦𑁆𑀢𑀢𑀺 𑀑𑀓𑁆𑀓𑀫𑀢𑀺, 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺. 𑀘𑀺𑀢𑁆𑀢𑁂 𑀧𑀲𑀦𑁆𑀦𑁂 𑀮𑁄𑀳𑀺𑀢𑀁 𑀧𑀲𑀻𑀤𑀢𑀺, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀺 𑀉𑀧𑀸𑀤𑀸𑀭𑀽𑀧𑀸𑀦𑀺 𑀧𑀭𑀺𑀲𑀼𑀤𑁆𑀥𑀸𑀦𑀺 𑀳𑁄𑀦𑁆𑀢𑀺, 𑀯𑀡𑁆𑀝𑀸 𑀧𑀫𑀼𑀢𑁆𑀢𑀢𑀸𑀮𑀨𑀮𑀲𑁆𑀲 𑀯𑀺𑀬 𑀫𑀼𑀔𑀲𑁆𑀲 𑀯𑀡𑁆𑀡𑁄 𑀳𑁄𑀢𑀺. 𑀢𑀁 𑀤𑀺𑀲𑁆𑀯𑀸 𑀤𑁂𑀯𑀢𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀭𑀻𑀭𑀯𑀡𑁆𑀡𑁄 𑀦𑀸𑀫𑀸𑀬𑀁 𑀧𑀡𑀻𑀢𑀸𑀦𑀺 𑀭𑀲𑀲𑀫𑁆𑀧𑀦𑁆𑀦𑀸𑀦𑀺 𑀪𑁄𑀚𑀦𑀸𑀦𑀺 𑀲𑀼𑀔𑀲𑀫𑁆𑀨𑀲𑁆𑀲𑀸𑀦𑀺 𑀦𑀺𑀯𑀸𑀲𑀦𑀧𑀸𑀧𑀼𑀭𑀡𑀲𑀬𑀦𑀸𑀦𑀺 𑀉𑀢𑀼𑀲𑀼𑀔𑁂 𑀢𑁂𑀪𑀽𑀫𑀺𑀓𑀸𑀤𑀺𑀪𑁂𑀤𑁂 𑀘 𑀧𑀸𑀲𑀸𑀤𑁂 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀻𑀦𑀺 𑀘 𑀮𑀪𑀦𑁆𑀢𑀸𑀦𑀁 𑀧𑀲𑀻𑀤𑀢𑀺, 𑀇𑀫𑁂 𑀧𑀦 𑀪𑀺𑀓𑁆𑀔𑀽 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀫𑀺𑀲𑁆𑀲𑀓𑀪𑀢𑁆𑀢𑀁 𑀪𑀼𑀜𑁆𑀚𑀦𑁆𑀢𑀺, 𑀯𑀺𑀭𑀴𑀫𑀜𑁆𑀘𑀓𑁂 𑀯𑀸 𑀨𑀮𑀓𑁂 𑀯𑀸 𑀲𑀺𑀮𑀸𑀬 𑀯𑀸 𑀲𑀬𑀦𑀸𑀦𑀺 𑀓𑀧𑁆𑀧𑁂𑀦𑁆𑀢𑀺, 𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼 𑀯𑀸 𑀅𑀩𑁆𑀪𑁄𑀓𑀸𑀲𑁂 𑀯𑀸 𑀯𑀲𑀦𑁆𑀢𑀺, 𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀏𑀢𑁂𑀲𑀁 𑀯𑀡𑁆𑀡𑁄 𑀧𑀲𑀻𑀤𑀢𑀻’’𑀢𑀺. 𑀢𑀲𑁆𑀫𑀸 𑀧𑀼𑀘𑁆𑀙𑀺.

𑀅𑀣𑀲𑁆𑀲𑀸 𑀪𑀕𑀯𑀸 𑀓𑀸𑀭𑀡𑀁 𑀓𑀣𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀁 𑀆𑀳. 𑀢𑀢𑁆𑀣 𑀅𑀢𑀻𑀢𑀦𑁆𑀢𑀺 𑀅𑀢𑀻𑀢𑁂 𑀅𑀲𑀼𑀓𑁄 𑀦𑀸𑀫 𑀭𑀸𑀚𑀸 𑀥𑀫𑁆𑀫𑀺𑀓𑁄 𑀅𑀳𑁄𑀲𑀺, 𑀲𑁄 𑀅𑀫𑁆𑀳𑀸𑀓𑀁 𑀧𑀡𑀻𑀢𑁂 𑀧𑀘𑁆𑀘𑀬𑁂 𑀅𑀤𑀸𑀲𑀺. 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀮𑀸𑀪𑀺𑀦𑁄 𑀅𑀳𑁂𑀲𑀼𑀁. 𑀅𑀣 𑀫𑀬𑀁 𑀏𑀯𑀭𑀽𑀧𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀫𑁆𑀳𑀸, 𑀘𑀻𑀯𑀭𑀸𑀦𑀺 𑀧𑀸𑀭𑀼𑀧𑀺𑀫𑁆𑀳𑀸𑀢𑀺 𑀏𑀯𑀁 𑀏𑀓𑀘𑁆𑀘𑁂 𑀧𑀘𑁆𑀘𑀬𑀩𑀸𑀳𑀼𑀮𑁆𑀮𑀺𑀓𑀸 𑀯𑀺𑀬 𑀇𑀫𑁂 𑀪𑀺𑀓𑁆𑀔𑀽 𑀅𑀢𑀻𑀢𑀁 𑀦𑀸𑀦𑀼𑀲𑁄𑀘𑀦𑁆𑀢𑀺. 𑀦𑀧𑁆𑀧𑀚𑀧𑁆𑀧𑀦𑁆𑀢𑀺 𑀦𑀸𑀕𑀢𑀦𑁆𑀢𑀺 𑀅𑀦𑀸𑀕𑀢𑁂 𑀥𑀫𑁆𑀫𑀺𑀓𑁄 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺, 𑀨𑀻𑀢𑀸 𑀚𑀦𑀧𑀤𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀩𑀳𑀽𑀦𑀺 𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀻𑀦𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, ‘‘𑀔𑀸𑀤𑀣 𑀪𑀼𑀜𑁆𑀚𑀣𑀸’’𑀢𑀺 𑀢𑀢𑁆𑀣 𑀢𑀢𑁆𑀣 𑀯𑀢𑁆𑀢𑀸𑀭𑁄 𑀪𑀯𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀫𑀬𑀁 𑀏𑀯𑀭𑀽𑀧𑀸𑀦𑀺 𑀪𑁄𑀚𑀦𑀸𑀦𑀺 𑀪𑀼𑀜𑁆𑀚𑀺𑀲𑁆𑀲𑀸𑀫, 𑀘𑀻𑀯𑀭𑀸𑀦𑀺 𑀧𑀸𑀭𑀼𑀧𑀺𑀲𑁆𑀲𑀸𑀫𑀸𑀢𑀺 𑀏𑀯𑀁 𑀅𑀦𑀸𑀕𑀢𑀁 𑀦 𑀧𑀢𑁆𑀣𑁂𑀦𑁆𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀢𑀗𑁆𑀔𑀡𑁂 𑀮𑀤𑁆𑀥𑁂𑀦 𑀬𑀸𑀧𑁂𑀦𑁆𑀢𑀺. 𑀢𑁂𑀦𑀸𑀢𑀺 𑀢𑁂𑀦 𑀢𑀺𑀯𑀺𑀥𑁂𑀦𑀸𑀧𑀺 𑀓𑀸𑀭𑀡𑁂𑀦.

𑀏𑀯𑀁 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲𑁂𑀯 𑀯𑀡𑁆𑀡𑀲𑁆𑀲 𑀯𑀺𑀦𑀸𑀲𑀁 𑀤𑀲𑁆𑀲𑁂𑀦𑁆𑀢𑁄 𑀅𑀦𑀦𑁆𑀢𑀭𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀦𑀸𑀕𑀢𑀧𑁆𑀧𑀚𑀧𑁆𑀧𑀸𑀬𑀸𑀢𑀺 𑀅𑀦𑀸𑀕𑀢𑀲𑁆𑀲 𑀧𑀢𑁆𑀣𑀦𑀸𑀬. 𑀏𑀢𑁂𑀦𑀸𑀢𑀺 𑀏𑀢𑁂𑀦 𑀓𑀸𑀭𑀡𑀤𑁆𑀯𑀬𑁂𑀦. 𑀦𑀴𑁄𑀯 𑀳𑀭𑀺𑀢𑁄 𑀮𑀼𑀢𑁄𑀢𑀺 𑀬𑀣𑀸 𑀳𑀭𑀺𑀢𑁄 𑀦𑀴𑁄 𑀮𑀸𑀬𑀺𑀢𑁆𑀯𑀸 𑀉𑀡𑁆𑀳𑀧𑀸𑀲𑀸𑀡𑁂 𑀧𑀓𑁆𑀔𑀺𑀢𑁆𑀢𑁄 𑀲𑀼𑀲𑁆𑀲𑀢𑀺, 𑀏𑀯𑀁 𑀲𑀼𑀲𑁆𑀲𑀦𑁆𑀢𑀻𑀢𑀺.

𑀅𑀭𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸. 𑀦𑀴𑀯𑀕𑁆𑀕𑁄 𑀧𑀞𑀫𑁄.

𑁨. 𑀦𑀦𑁆𑀤𑀦𑀯𑀕𑁆𑀕𑁄

𑁧. 𑀦𑀦𑁆𑀤𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧. 𑀦𑀦𑁆𑀤𑀦𑀯𑀕𑁆𑀕𑀲𑁆𑀲 𑀧𑀞𑀫𑁂 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀆𑀭𑀸𑀫𑁂. 𑀔𑁄𑀢𑀺 𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀯𑀲𑁂𑀦 𑀦𑀺𑀧𑀸𑀢𑀫𑀢𑁆𑀢𑀁. 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺 𑀧𑀭𑀺𑀲𑀚𑁂𑀝𑁆𑀞𑀓𑁂 𑀪𑀺𑀓𑁆𑀔𑀽 𑀚𑀸𑀦𑀸𑀧𑁂𑀲𑀺. 𑀪𑀺𑀓𑁆𑀔𑀯𑁄𑀢𑀺 𑀢𑁂𑀲𑀁 𑀆𑀫𑀦𑁆𑀢𑀦𑀸𑀓𑀸𑀭𑀤𑀻𑀧𑀦𑀁. 𑀪𑀤𑀦𑁆𑀢𑁂𑀢𑀺 𑀧𑀢𑀺𑀯𑀘𑀦𑀤𑀸𑀦𑀁. 𑀢𑁂 𑀪𑀺𑀓𑁆𑀔𑀽𑀢𑀺 𑀬𑁂 𑀢𑀢𑁆𑀣 𑀲𑀫𑁆𑀫𑀼𑀔𑀻𑀪𑀽𑀢𑀸 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸 𑀪𑀺𑀓𑁆𑀔𑀽. 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀦𑁆𑀢𑀺 𑀪𑀕𑀯𑀢𑁄 𑀯𑀘𑀦𑀁 𑀧𑀢𑀺𑀅𑀲𑁆𑀲𑁄𑀲𑀼𑀁, 𑀅𑀪𑀺𑀫𑀼𑀔𑀸 𑀳𑀼𑀢𑁆𑀯𑀸 𑀲𑀼𑀡𑀺𑀁𑀲𑀼 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 ‘‘𑀪𑀽𑀢𑀧𑀼𑀩𑁆𑀩’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀢𑀢𑁆𑀣 𑀢𑀸𑀯𑀢𑀺𑀁𑀲𑀓𑀸𑀬𑀺𑀓𑀸𑀢𑀺 𑀢𑀸𑀯𑀢𑀺𑀁𑀲𑀓𑀸𑀬𑁂 𑀦𑀺𑀩𑁆𑀩𑀢𑁆𑀢𑀸. 𑀢𑀸𑀯𑀢𑀺𑀁𑀲𑀓𑀸𑀬𑁄 𑀦𑀸𑀫 𑀤𑀼𑀢𑀺𑀬𑀤𑁂𑀯𑀮𑁄𑀓𑁄 𑀯𑀼𑀘𑁆𑀘𑀢𑀺. 𑀫𑀖𑁂𑀦 𑀫𑀸𑀡𑀯𑁂𑀦 𑀲𑀤𑁆𑀥𑀺𑀁 𑀫𑀘𑀮𑀕𑀸𑀫𑁂 𑀓𑀸𑀮𑀁 𑀓𑀢𑁆𑀯𑀸 𑀢𑀢𑁆𑀣 𑀉𑀧𑁆𑀧𑀦𑁆𑀦𑁂 𑀢𑁂𑀢𑁆𑀢𑀺𑀁𑀲 𑀤𑁂𑀯𑀧𑀼𑀢𑁆𑀢𑁂 𑀉𑀧𑀸𑀤𑀸𑀬 𑀓𑀺𑀭 𑀢𑀲𑁆𑀲 𑀤𑁂𑀯𑀮𑁄𑀓𑀲𑁆𑀲 𑀅𑀬𑀁 𑀧𑀡𑁆𑀡𑀢𑁆𑀢𑀺 𑀚𑀸𑀢𑀸𑀢𑀺 𑀯𑀤𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀲𑁂𑀲𑀘𑀓𑁆𑀓𑀯𑀸𑀴𑁂𑀲𑀼𑀧𑀺 𑀙 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑀸 𑀅𑀢𑁆𑀣𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀲𑀳𑀲𑁆𑀲𑀁 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀲𑀳𑀲𑁆𑀲𑀁 𑀢𑀸𑀯𑀢𑀺𑀁𑀲𑀸𑀦’’𑀦𑁆𑀢𑀺 (𑀅. 𑀦𑀺. 𑁧𑁦.𑁨𑁯), 𑀢𑀲𑁆𑀫𑀸 𑀦𑀸𑀫𑀧𑀡𑁆𑀡𑀢𑁆𑀢𑀺𑀬𑁂𑀯𑁂𑀲𑀸 𑀢𑀲𑁆𑀲 𑀤𑁂𑀯𑀮𑁄𑀓𑀲𑁆𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀯𑀜𑁆𑀳𑀺 𑀦𑀺𑀤𑁆𑀤𑁄𑀲𑀁 𑀧𑀤𑀁 𑀳𑁄𑀢𑀺.

𑀦𑀦𑁆𑀤𑀦𑁂 𑀯𑀦𑁂𑀢𑀺 𑀏𑀢𑁆𑀣 𑀢𑀁 𑀯𑀦𑀁 𑀧𑀯𑀺𑀝𑁆𑀞𑁂 𑀧𑀯𑀺𑀝𑁆𑀞𑁂 𑀦𑀦𑁆𑀤𑀬𑀢𑀺 𑀢𑁄𑀲𑁂𑀢𑀻𑀢𑀺 𑀦𑀦𑁆𑀤𑀦𑀁. 𑀧𑀜𑁆𑀘𑀲𑀼 𑀳𑀺 𑀫𑀭𑀡𑀦𑀺𑀫𑀺𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 ‘‘𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 𑀘𑀯𑀺𑀲𑁆𑀲𑀸𑀫𑀸’’𑀢𑀺 𑀧𑀭𑀺𑀤𑁂𑀯𑀫𑀸𑀦𑀸 𑀤𑁂𑀯𑀢𑀸 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄 ‘‘𑀫𑀸 𑀧𑀭𑀺𑀤𑁂𑀯𑀺𑀢𑁆𑀣, 𑀅𑀪𑀺𑀚𑁆𑀚𑀦𑀥𑀫𑁆𑀫𑀸 𑀦𑀸𑀫 𑀲𑀗𑁆𑀔𑀸𑀭𑀸 𑀦𑀢𑁆𑀣𑀻’’𑀢𑀺 𑀑𑀯𑀤𑀺𑀢𑁆𑀯𑀸 𑀢𑀢𑁆𑀣 𑀧𑀯𑁂𑀲𑀸𑀧𑁂𑀢𑀺. 𑀢𑀸𑀲𑀁 𑀅𑀜𑁆𑀜𑀸𑀳𑀺 𑀤𑁂𑀯𑀢𑀸𑀳𑀺 𑀩𑀸𑀳𑀸𑀲𑀼 𑀕𑀳𑁂𑀢𑁆𑀯𑀸 𑀧𑀯𑁂𑀲𑀺𑀢𑀸𑀦𑀫𑁆𑀧𑀺 𑀢𑀲𑁆𑀲 𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸𑀯 𑀫𑀭𑀡𑀲𑁄𑀓𑁄 𑀯𑀽𑀧𑀲𑀫𑁆𑀫𑀢𑀺, 𑀧𑀻𑀢𑀺𑀧𑀸𑀫𑁄𑀚𑁆𑀚𑀫𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀅𑀣 𑀢𑀲𑁆𑀫𑀺𑀁 𑀓𑀻𑀴𑀫𑀸𑀦𑀸 𑀏𑀯 𑀉𑀡𑁆𑀳𑀲𑀦𑁆𑀢𑀢𑁆𑀢𑁄 𑀳𑀺𑀫𑀧𑀺𑀡𑁆𑀟𑁄 𑀯𑀺𑀬 𑀯𑀺𑀮𑀻𑀬𑀦𑁆𑀢𑀺, 𑀯𑀸𑀢𑀸𑀧𑀳𑀢𑀤𑀻𑀧𑀲𑀺𑀔𑀸 𑀯𑀺𑀬 𑀯𑀺𑀚𑁆𑀛𑀸𑀬𑀦𑁆𑀢𑀻𑀢𑀺 𑀏𑀯𑀁 𑀬𑀁𑀓𑀺𑀜𑁆𑀘𑀺 𑀅𑀦𑁆𑀢𑁄 𑀧𑀯𑀺𑀝𑁆𑀞𑀁 𑀦𑀦𑁆𑀤𑀬𑀢𑀺 𑀢𑁄𑀲𑁂𑀢𑀺𑀬𑁂𑀯𑀸𑀢𑀺 𑀦𑀦𑁆𑀤𑀦𑀁, 𑀢𑀲𑁆𑀫𑀺𑀁 𑀦𑀦𑁆𑀤𑀦𑁂. 𑀅𑀘𑁆𑀙𑀭𑀸𑀲𑀗𑁆𑀖𑀧𑀭𑀺𑀯𑀼𑀢𑀸𑀢𑀺 𑀅𑀘𑁆𑀙𑀭𑀸𑀢𑀺 𑀤𑁂𑀯𑀥𑀻𑀢𑀸𑀦𑀁 𑀦𑀸𑀫𑀁, 𑀢𑀸𑀲𑀁 𑀲𑀫𑀽𑀳𑁂𑀦 𑀧𑀭𑀺𑀯𑀼𑀢𑀸.

𑀤𑀺𑀩𑁆𑀩𑁂𑀳𑀻𑀢𑀺 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁂𑀳𑀺. 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀻𑀢𑀺 𑀫𑀦𑀸𑀧𑀺𑀬𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀲𑀗𑁆𑀔𑀸𑀢𑁂𑀳𑀺 𑀧𑀜𑁆𑀘𑀳𑀺 𑀓𑀸𑀫𑀩𑀦𑁆𑀥𑀦𑁂𑀳𑀺 𑀓𑀸𑀫𑀓𑁄𑀝𑁆𑀞𑀸𑀲𑁂𑀳𑀺 𑀯𑀸. 𑀲𑀫𑀧𑁆𑀧𑀺𑀢𑀸𑀢𑀺 𑀉𑀧𑁂𑀢𑀸. 𑀇𑀢𑀭𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀭𑀺𑀘𑀸𑀭𑀬𑀫𑀸𑀦𑀸𑀢𑀺 𑀭𑀫𑀫𑀸𑀦𑀸, 𑀢𑁂𑀲𑀼 𑀢𑁂𑀲𑀼 𑀯𑀸 𑀭𑀽𑀧𑀸𑀤𑀻𑀲𑀼 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀜𑁆𑀘𑀸𑀭𑀬𑀫𑀸𑀦𑀸. 𑀢𑀸𑀬𑀁 𑀯𑁂𑀮𑀸𑀬𑀦𑁆𑀢𑀺 𑀢𑀲𑁆𑀫𑀺𑀁 𑀧𑀭𑀺𑀘𑀸𑀭𑀡𑀓𑀸𑀮𑁂. 𑀲𑁄 𑀧𑀦𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀅𑀥𑀼𑀦𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀲 𑀳𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂𑀬𑁂𑀯 𑀭𑀢𑁆𑀢𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑁄 𑀯𑀺𑀬 𑀯𑀺𑀭𑁄𑀘𑀬𑀫𑀸𑀦𑁄 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑁄 𑀅𑀢𑁆𑀢𑀪𑀸𑀯𑁄 𑀦𑀺𑀩𑁆𑀩𑀢𑁆𑀢𑀺. 𑀲𑁄 𑀤𑀺𑀩𑁆𑀩𑀯𑀢𑁆𑀣𑀦𑀺𑀯𑀢𑁆𑀣𑁄 𑀤𑀺𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁄 𑀤𑀺𑀩𑁆𑀩𑀫𑀸𑀮𑀸𑀯𑀺𑀮𑁂𑀧𑀦𑀥𑀭𑁄 𑀤𑀺𑀩𑁆𑀩𑁂𑀳𑀺 𑀘𑀦𑁆𑀤𑀦𑀘𑀼𑀡𑁆𑀡𑁂𑀳𑀺 𑀲𑀫𑀁 𑀯𑀺𑀓𑀺𑀭𑀺𑀬𑀫𑀸𑀦𑁄 𑀤𑀺𑀩𑁆𑀩𑁂𑀳𑀺 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀑𑀯𑀼𑀢𑁄 𑀦𑀺𑀯𑀼𑀢𑁄 𑀧𑀭𑀺𑀬𑁄𑀦𑀤𑁆𑀥𑁄 𑀮𑁄𑀪𑀸𑀪𑀺𑀪𑀽𑀢𑁄 𑀳𑀼𑀢𑁆𑀯𑀸 𑀮𑁄𑀪𑀦𑀺𑀲𑁆𑀲𑀭𑀡𑀁 𑀦𑀺𑀩𑁆𑀩𑀸𑀦𑀁 𑀅𑀧𑀲𑁆𑀲𑀦𑁆𑀢𑁄 𑀆𑀲𑀪𑀺𑀁 𑀯𑀸𑀘𑀁 𑀪𑀸𑀲𑀦𑁆𑀢𑁄 𑀯𑀺𑀬 𑀫𑀳𑀸𑀲𑀤𑁆𑀤𑁂𑀦 ‘‘𑀦 𑀢𑁂 𑀲𑀼𑀔𑀁 𑀧𑀚𑀸𑀦𑀦𑁆𑀢𑀻’’𑀢𑀺 𑀇𑀫𑀁 𑀕𑀸𑀣𑀁 𑀕𑀸𑀬𑀫𑀸𑀦𑁄 𑀦𑀦𑁆𑀤𑀦𑀯𑀦𑁂 𑀯𑀺𑀘𑀭𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀸𑀬𑀁 𑀯𑁂𑀮𑀸𑀬𑀁 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀻’’𑀢𑀺.

𑀬𑁂 𑀦 𑀧𑀲𑁆𑀲𑀦𑁆𑀢𑀺 𑀦𑀦𑁆𑀤𑀦𑀦𑁆𑀢𑀺 𑀬𑁂 𑀢𑀢𑁆𑀭 𑀧𑀜𑁆𑀘𑀓𑀸𑀫𑀕𑀼𑀡𑀸𑀦𑀼𑀪𑀯𑀦𑀯𑀲𑁂𑀦 𑀦𑀦𑁆𑀤𑀦𑀯𑀦𑀁 𑀦 𑀧𑀲𑁆𑀲𑀦𑁆𑀢𑀺. 𑀦𑀭𑀤𑁂𑀯𑀸𑀦𑀦𑁆𑀢𑀺 𑀤𑁂𑀯𑀦𑀭𑀸𑀦𑀁, 𑀤𑁂𑀯𑀧𑀼𑀭𑀺𑀲𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀺𑀤𑀲𑀸𑀦𑀦𑁆𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀤𑀲𑀦𑁆𑀦𑀁. 𑀬𑀲𑀲𑁆𑀲𑀺𑀦𑀦𑁆𑀢𑀺 𑀧𑀭𑀺𑀯𑀸𑀭𑀲𑀗𑁆𑀔𑀸𑀢𑁂𑀦 𑀬𑀲𑁂𑀦 𑀲𑀫𑁆𑀧𑀦𑁆𑀦𑀸𑀦𑀁.

𑀅𑀜𑁆𑀜𑀢𑀭𑀸 𑀤𑁂𑀯𑀢𑀸𑀢𑀺 𑀏𑀓𑀸 𑀅𑀭𑀺𑀬𑀲𑀸𑀯𑀺𑀓𑀸 𑀤𑁂𑀯𑀢𑀸. 𑀧𑀘𑁆𑀘𑀪𑀸𑀲𑀻𑀢𑀺 ‘‘𑀅𑀬𑀁 𑀩𑀸𑀮𑀤𑁂𑀯𑀢𑀸 𑀇𑀫𑀁 𑀲𑀫𑁆𑀧𑀢𑁆𑀢𑀺𑀁 𑀦𑀺𑀘𑁆𑀘𑀁 𑀅𑀘𑀮𑀁 𑀫𑀜𑁆𑀜𑀢𑀺, 𑀦𑀸𑀲𑁆𑀲𑀸 𑀙𑁂𑀤𑀦𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑀢𑀁 𑀚𑀸𑀦𑀸𑀢𑀻’’𑀢𑀺 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀝𑁆𑀝𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀻 ‘‘𑀦 𑀢𑁆𑀯𑀁 𑀩𑀸𑀮𑁂’’𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀧𑀢𑀺𑀅𑀪𑀸𑀲𑀺. 𑀬𑀣𑀸 𑀅𑀭𑀳𑀢𑀁 𑀯𑀘𑁄𑀢𑀺 𑀬𑀣𑀸 𑀅𑀭𑀳𑀦𑁆𑀢𑀸𑀦𑀁 𑀯𑀘𑀦𑀁, 𑀢𑀣𑀸 𑀢𑁆𑀯𑀁 𑀦 𑀚𑀸𑀦𑀸𑀲𑀻𑀢𑀺. 𑀏𑀯𑀁 𑀢𑀲𑁆𑀲𑀸 𑀅𑀥𑀺𑀧𑁆𑀧𑀸𑀬𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀤𑀸𑀦𑀺 𑀅𑀭𑀳𑀦𑁆𑀢𑀸𑀦𑀁 𑀯𑀘𑀦𑀁 𑀤𑀲𑁆𑀲𑁂𑀦𑁆𑀢𑀻 𑀅𑀦𑀺𑀘𑁆𑀘𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸𑀢𑀺 𑀲𑀩𑁆𑀩𑁂 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑀸 𑀳𑀼𑀢𑁆𑀯𑀸 𑀅𑀪𑀸𑀯𑀢𑁆𑀣𑁂𑀦 𑀅𑀦𑀺𑀘𑁆𑀘𑀸. 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄𑀢𑀺 𑀉𑀧𑁆𑀧𑀸𑀤𑀯𑀬𑀲𑀪𑀸𑀯𑀸. 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀇𑀤𑀁 𑀧𑀼𑀭𑀺𑀫𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀬𑀲𑁆𑀫𑀸 𑀯𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄𑀢𑀺. 𑀉𑀧𑁆𑀧𑀸𑀤𑀯𑀬𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀢𑀤𑀦𑀦𑁆𑀢𑀭𑀸 𑀯𑁂𑀫𑀚𑁆𑀛𑀝𑁆𑀞𑀸𑀦𑀁 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄𑀢𑀺 𑀢𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀯𑀽𑀧𑀲𑀫𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀫𑁂𑀯 𑀲𑀼𑀔𑀁. 𑀇𑀤𑀁 𑀅𑀭𑀳𑀢𑀁 𑀯𑀘𑁄𑀢𑀺.

𑀦𑀦𑁆𑀤𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀦𑀦𑁆𑀤𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨. 𑀤𑀼𑀢𑀺𑀬𑁂 𑀦𑀦𑁆𑀤𑀢𑀻𑀢𑀺 𑀢𑀼𑀲𑁆𑀲𑀢𑀺 𑀅𑀢𑁆𑀢𑀫𑀦𑁄 𑀳𑁄𑀢𑀺. 𑀧𑀼𑀢𑁆𑀢𑀺𑀫𑀸𑀢𑀺 𑀩𑀳𑀼𑀧𑀼𑀢𑁆𑀢𑁄. 𑀢𑀲𑁆𑀲 𑀳𑀺 𑀏𑀓𑀘𑁆𑀘𑁂 𑀧𑀼𑀢𑁆𑀢𑀸 𑀓𑀲𑀺𑀓𑀫𑁆𑀫𑀁 𑀓𑀢𑁆𑀯𑀸 𑀥𑀜𑁆𑀜𑀲𑁆𑀲 𑀓𑁄𑀝𑁆𑀞𑁂 𑀧𑀽𑀭𑁂𑀦𑁆𑀢𑀺, 𑀏𑀓𑀘𑁆𑀘𑁂 𑀯𑀡𑀺𑀚𑁆𑀚𑀁 𑀓𑀢𑁆𑀯𑀸 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀆𑀳𑀭𑀦𑁆𑀢𑀺, 𑀏𑀓𑀘𑁆𑀘𑁂 𑀭𑀸𑀚𑀸𑀦𑀁 𑀉𑀧𑀝𑁆𑀞𑀳𑀺𑀢𑁆𑀯𑀸 𑀬𑀸𑀦𑀯𑀸𑀳𑀦𑀕𑀸𑀫𑀦𑀺𑀕𑀫𑀸𑀤𑀻𑀦𑀺 𑀮𑀪𑀦𑁆𑀢𑀺. 𑀅𑀣 𑀢𑁂𑀲𑀁 𑀆𑀦𑀼𑀪𑀸𑀯𑀲𑀗𑁆𑀔𑀸𑀢𑀁 𑀲𑀺𑀭𑀺𑀁 𑀅𑀦𑀼𑀪𑀯𑀫𑀸𑀦𑀸 𑀫𑀸𑀢𑀸 𑀯𑀸 𑀧𑀺𑀢𑀸 𑀯𑀸 𑀦𑀦𑁆𑀤𑀢𑀺. 𑀙𑀡𑀤𑀺𑀯𑀲𑀸𑀤𑀻𑀲𑀼 𑀯𑀸 𑀫𑀡𑁆𑀟𑀺𑀢𑀧𑀲𑀸𑀥𑀺𑀢𑁂 𑀧𑀼𑀢𑁆𑀢𑁂 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁂 𑀤𑀺𑀲𑁆𑀯𑀸 𑀦𑀦𑁆𑀤𑀢𑀻𑀢𑀺, ‘‘𑀦𑀦𑁆𑀤𑀢𑀺 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸’’𑀢𑀺 𑀆𑀳. 𑀕𑁄𑀳𑀺 𑀢𑀣𑁂𑀯𑀸𑀢𑀺 𑀬𑀣𑀸 𑀧𑀼𑀢𑁆𑀢𑀺𑀫𑀸 𑀧𑀼𑀢𑁆𑀢𑁂𑀳𑀺, 𑀢𑀣𑀸 𑀕𑁄𑀲𑀸𑀫𑀺𑀓𑁄𑀧𑀺 𑀲𑀫𑁆𑀧𑀦𑁆𑀦𑀁 𑀕𑁄𑀫𑀡𑁆𑀟𑀮𑀁 𑀤𑀺𑀲𑁆𑀯𑀸 𑀕𑀸𑀯𑁄 𑀦𑀺𑀲𑁆𑀲𑀸𑀬 𑀕𑁄𑀭𑀲𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁄 𑀕𑁄𑀳𑀺 𑀦𑀦𑁆𑀤𑀢𑀺. 𑀉𑀧𑀥𑀻 𑀳𑀺 𑀦𑀭𑀲𑁆𑀲 𑀦𑀦𑁆𑀤𑀦𑀸𑀢𑀺, 𑀏𑀢𑁆𑀣 𑀉𑀧𑀥𑀻𑀢𑀺 𑀘𑀢𑁆𑀢𑀸𑀭𑁄 𑀉𑀧𑀥𑀻 𑁋 𑀓𑀸𑀫𑀽𑀧𑀥𑀺, 𑀔𑀦𑁆𑀥𑀽𑀧𑀥𑀺, 𑀓𑀺𑀮𑁂𑀲𑀽𑀧𑀥𑀺, 𑀅𑀪𑀺𑀲𑀗𑁆𑀔𑀸𑀭𑀽𑀧𑀥𑀻𑀢𑀺. 𑀓𑀸𑀫𑀸𑀧𑀺 𑀳𑀺 ‘‘𑀬𑀁 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀓𑀸𑀫𑀸𑀦𑀁 𑀅𑀲𑁆𑀲𑀸𑀤𑁄’’𑀢𑀺 (𑀫. 𑀦𑀺. 𑁧.𑁧𑁬𑁬) 𑀏𑀯𑀁 𑀯𑀼𑀢𑁆𑀢𑀲𑁆𑀲 𑀲𑀼𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 ‘‘𑀉𑀧𑀥𑀺𑀬𑀢𑀺 𑀏𑀢𑁆𑀣 𑀲𑀼𑀔’’𑀦𑁆𑀢𑀺 𑀇𑀫𑀺𑀦𑀸 𑀯𑀘𑀦𑀢𑁆𑀣𑁂𑀦 𑀉𑀧𑀥𑀻𑀢𑀺 𑀯𑀼𑀘𑁆𑀘𑀢𑀺. 𑀔𑀦𑁆𑀥𑀸𑀧𑀺 𑀔𑀦𑁆𑀥𑀫𑀽𑀮𑀓𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄, 𑀓𑀺𑀮𑁂𑀲𑀸𑀧𑀺 𑀅𑀧𑀸𑀬𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄, 𑀅𑀪𑀺𑀲𑀗𑁆𑀔𑀸𑀭𑀸𑀧𑀺 𑀪𑀯𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄𑀢𑀺. 𑀇𑀥 𑀧𑀦 𑀓𑀸𑀫𑀽𑀧𑀥𑀺 𑀅𑀥𑀺𑀧𑁆𑀧𑁂𑀢𑁄. 𑀧𑀜𑁆𑀘 𑀳𑀺 𑀓𑀸𑀫𑀕𑀼𑀡𑀸 𑀢𑁂𑀪𑀽𑀫𑀺𑀓𑀸𑀤𑀺𑀧𑀸𑀲𑀸𑀤-𑀉𑀴𑀸𑀭𑀲𑀬𑀦-𑀯𑀢𑁆𑀣𑀸𑀮𑀗𑁆𑀓𑀸𑀭-𑀦𑀸𑀝𑀓𑀧𑀭𑀺𑀯𑀸𑀭𑀸𑀤𑀺𑀯𑀲𑁂𑀦 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀉𑀧𑀲𑀁𑀳𑀭𑀫𑀸𑀦𑀸 𑀦𑀭𑀁 𑀦𑀦𑁆𑀤𑀬𑀦𑁆𑀢𑀺. 𑀢𑀲𑁆𑀫𑀸 𑀬𑀣𑀸 𑀧𑀼𑀢𑁆𑀢𑀸 𑀘 𑀕𑀸𑀯𑁄 𑀘, 𑀏𑀯𑀁 𑀇𑀫𑁂𑀧𑀺 𑀉𑀧𑀥𑀻 𑀳𑀺 𑀦𑀭𑀲𑁆𑀲 𑀦𑀦𑁆𑀤𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀦 𑀳𑀺 𑀲𑁄 𑀦𑀦𑁆𑀤𑀢𑀺 𑀬𑁄 𑀦𑀺𑀭𑀽𑀧𑀥𑀻𑀢𑀺 𑀬𑁄 𑀓𑀸𑀫𑀕𑀼𑀡𑀲𑀫𑁆𑀧𑀢𑁆𑀢𑀺𑀭𑀳𑀺𑀢𑁄 𑀤𑀮𑀺𑀤𑁆𑀤𑁄 𑀤𑀼𑀮𑁆𑀮𑀪𑀖𑀸𑀲𑀘𑁆𑀙𑀸𑀤𑀦𑁄, 𑀦 𑀳𑀺 𑀲𑁄 𑀦𑀦𑁆𑀤𑀢𑀺. 𑀏𑀯𑀭𑀽𑀧𑁄 𑀫𑀦𑀼𑀲𑁆𑀲𑀧𑁂𑀢𑁄 𑀘 𑀫𑀦𑀼𑀲𑁆𑀲𑀦𑁂𑀭𑀬𑀺𑀓𑁄 𑀘 𑀓𑀺𑀁 𑀦𑀦𑁆𑀤𑀺𑀲𑁆𑀲𑀢𑀺 𑀪𑀕𑀯𑀸𑀢𑀺 𑀆𑀳.

𑀇𑀤𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀤𑁂𑀯𑀢𑀸 𑀲𑁄𑀓𑀯𑀢𑁆𑀣𑀼𑀫𑁂𑀯 𑀦𑀦𑁆𑀤𑀯𑀢𑁆𑀣𑀼𑀁 𑀓𑀭𑁄𑀢𑀺, 𑀲𑁄𑀓𑀯𑀢𑁆𑀣𑀼𑀪𑀸𑀯𑀫𑀲𑁆𑀲𑀸 𑀤𑀻𑀧𑁂𑀲𑁆𑀲𑀸𑀫𑀻’’𑀢𑀺 𑀨𑀮𑁂𑀦 𑀨𑀮𑀁 𑀧𑀸𑀢𑁂𑀦𑁆𑀢𑁄 𑀯𑀺𑀬 𑀢𑀸𑀬𑁂𑀯 𑀉𑀧𑀫𑀸𑀬 𑀢𑀲𑁆𑀲𑀸 𑀯𑀸𑀤𑀁 𑀪𑀺𑀦𑁆𑀤𑀦𑁆𑀢𑁄 𑀢𑀫𑁂𑀯 𑀕𑀸𑀣𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀲𑁄𑀘𑀢𑀻𑀢𑀺 𑀆𑀳. 𑀢𑀢𑁆𑀣 𑀲𑁄𑀘𑀢𑀺 𑀧𑀼𑀢𑁆𑀢𑁂𑀳𑀻𑀢𑀺 𑀯𑀺𑀤𑁂𑀲𑀕𑀫𑀦𑀸𑀤𑀺𑀯𑀲𑁂𑀦 𑀧𑀼𑀢𑁆𑀢𑁂𑀲𑀼 𑀦𑀝𑁆𑀞𑁂𑀲𑀼𑀧𑀺 𑀦𑀲𑁆𑀲𑀦𑁆𑀢𑁂𑀲𑀼𑀧𑀺 𑀇𑀤𑀸𑀦𑀺 𑀦𑀲𑁆𑀲𑀺𑀲𑁆𑀲𑀦𑁆𑀢𑀻𑀢𑀺 𑀦𑀸𑀲𑀲𑀗𑁆𑀓𑀻𑀧𑀺 𑀲𑁄𑀘𑀢𑀺, 𑀢𑀣𑀸 𑀫𑀢𑁂𑀲𑀼𑀧𑀺 𑀫𑀭𑀦𑁆𑀢𑁂𑀲𑀼𑀧𑀺 𑀘𑁄𑀭𑁂𑀳𑀺 𑀭𑀸𑀚𑀧𑀼𑀭𑀺𑀲𑁂𑀳𑀺 𑀕𑀳𑀺𑀢𑁂𑀲𑀼 𑀯𑀸 𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀳𑀢𑁆𑀣𑀁 𑀉𑀧𑀕𑀢𑁂𑀲𑀼 𑀯𑀸 𑀫𑀭𑀡𑀲𑀗𑁆𑀓𑀻𑀧𑀺 𑀳𑀼𑀢𑁆𑀯𑀸 𑀲𑁄𑀘𑀢𑀺. 𑀭𑀼𑀓𑁆𑀔𑀧𑀩𑁆𑀩𑀢𑀸𑀤𑀻𑀳𑀺 𑀧𑀢𑀺𑀢𑁆𑀯𑀸 𑀳𑀢𑁆𑀣𑀧𑀸𑀤𑀸𑀤𑀻𑀦𑀁 𑀪𑁂𑀤𑀯𑀲𑁂𑀦 𑀪𑀺𑀦𑁆𑀦𑁂𑀲𑀼𑀧𑀺 𑀪𑀺𑀚𑁆𑀚𑀦𑁆𑀢𑁂𑀲𑀼𑀧𑀺 𑀪𑁂𑀤𑀲𑀗𑁆𑀓𑀻𑀧𑀺 𑀳𑀼𑀢𑁆𑀯𑀸 𑀲𑁄𑀘𑀢𑀺. 𑀬𑀣𑀸 𑀘 𑀧𑀼𑀢𑁆𑀢𑁂𑀳𑀺 𑀧𑀼𑀢𑁆𑀢𑀺𑀫𑀸, 𑀕𑁄𑀲𑀸𑀫𑀺𑀓𑁄𑀧𑀺 𑀢𑀣𑁂𑀯 𑀦𑀯𑀳𑀸𑀓𑀸𑀭𑁂𑀳𑀺 𑀕𑁄𑀳𑀺 𑀲𑁄𑀘𑀢𑀺. 𑀉𑀧𑀥𑀻 𑀳𑀺 𑀦𑀭𑀲𑁆𑀲 𑀲𑁄𑀘𑀦𑀸𑀢𑀺 𑀬𑀣𑀸 𑀘 𑀧𑀼𑀢𑁆𑀢𑀕𑀸𑀯𑁄, 𑀏𑀯𑀁 𑀧𑀜𑁆𑀘 𑀓𑀸𑀫𑀕𑀼𑀡𑁄𑀧𑀥𑀻𑀧𑀺 𑁋

‘‘𑀢𑀲𑁆𑀲 𑀘𑁂 𑀓𑀸𑀫𑀬𑀸𑀦𑀲𑁆𑀲, 𑀙𑀦𑁆𑀤𑀚𑀸𑀢𑀲𑁆𑀲 𑀚𑀦𑁆𑀢𑀼𑀦𑁄;

𑀢𑁂 𑀓𑀸𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀲𑀮𑁆𑀮𑀯𑀺𑀤𑁆𑀥𑁄𑀯 𑀭𑀼𑀧𑁆𑀧𑀢𑀻’’𑀢𑀺. (𑀲𑀼. 𑀦𑀺. 𑁭𑁭𑁩) 𑁋

𑀯𑀼𑀢𑁆𑀢𑀦𑀬𑁂𑀦 𑀦𑀭𑀁 𑀲𑁄𑀘𑀦𑁆𑀢𑀺. 𑀢𑀲𑁆𑀫𑀸 𑀦𑀭𑀲𑁆𑀲 𑀲𑁄𑀘𑀦𑀸 𑀲𑁄𑀓𑀯𑀢𑁆𑀣𑀼𑀓𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀦 𑀳𑀺 𑀲𑁄 𑀲𑁄𑀘𑀢𑀺, 𑀬𑁄 𑀦𑀺𑀭𑀽𑀧𑀥𑀻𑀢𑀺 𑀬𑀲𑁆𑀲 𑀧𑀦 𑀘𑀢𑀼𑀩𑁆𑀩𑀺𑀥𑀸𑀧𑁂𑀢𑁂 𑀉𑀧𑀥𑀺𑀬𑁄 𑀦𑀢𑁆𑀣𑀺, 𑀲𑁄 𑀦𑀺𑀭𑀼𑀧𑀥𑀺 𑀫𑀳𑀸𑀔𑀻𑀡𑀸𑀲𑀯𑁄 𑀓𑀺𑀁 𑀲𑁄𑀘𑀺𑀲𑁆𑀲𑀢𑀺, 𑀦 𑀲𑁄𑀘𑀢𑀺 𑀤𑁂𑀯𑀢𑁂𑀢𑀺.

𑀦𑀦𑁆𑀤𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀦𑀢𑁆𑀣𑀺𑀧𑀼𑀢𑁆𑀢𑀲𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩. 𑀢𑀢𑀺𑀬𑁂 𑀦𑀢𑁆𑀣𑀺 𑀧𑀼𑀢𑁆𑀢𑀲𑀫𑀁 𑀧𑁂𑀫𑀦𑁆𑀢𑀺 𑀯𑀺𑀭𑀽𑀧𑁂𑀧𑀺 𑀳𑀺 𑀅𑀢𑁆𑀢𑀦𑁄 𑀧𑀼𑀢𑁆𑀢𑀓𑁂 𑀲𑀼𑀯𑀡𑁆𑀡𑀩𑀺𑀫𑁆𑀩𑀓𑀁 𑀯𑀺𑀬 𑀫𑀜𑁆𑀜𑀦𑁆𑀢𑀺, 𑀫𑀸𑀮𑀸𑀕𑀼𑀴𑁂 𑀯𑀺𑀬 𑀲𑀻𑀲𑀸𑀤𑀻𑀲𑀼 𑀓𑀢𑁆𑀯𑀸 𑀧𑀭𑀺𑀳𑀭𑀫𑀸𑀦𑀸 𑀢𑁂𑀳𑀺 𑀑𑀳𑀤𑀺𑀢𑀸𑀧𑀺 𑀑𑀫𑀼𑀢𑁆𑀢𑀺𑀓𑀸𑀧𑀺 𑀕𑀦𑁆𑀥𑀯𑀺𑀮𑁂𑀧𑀦𑀧𑀢𑀺𑀢𑀸 𑀯𑀺𑀬 𑀲𑁄𑀫𑀦𑀲𑁆𑀲𑀁 𑀆𑀧𑀚𑁆𑀚𑀦𑁆𑀢𑀺. 𑀢𑁂𑀦𑀸𑀳 𑁋 ‘‘𑀦𑀢𑁆𑀣𑀺 𑀧𑀼𑀢𑁆𑀢𑀲𑀫𑀁 𑀧𑁂𑀫’’𑀦𑁆𑀢𑀺. 𑀧𑀼𑀢𑁆𑀢𑀧𑁂𑀫𑀲𑀫𑀁 𑀧𑁂𑀫𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀕𑁄𑀲𑀫𑀺𑀢𑀁 𑀥𑀦𑀦𑁆𑀢𑀺 𑀕𑁄𑀳𑀺 𑀲𑀫𑀁 𑀕𑁄𑀥𑀦𑀲𑀫𑀁 𑀕𑁄𑀥𑀦𑀲𑀤𑀺𑀲𑀁 𑀅𑀜𑁆𑀜𑀁 𑀥𑀦𑀁 𑀦𑀸𑀫 𑀦𑀢𑁆𑀣𑀺 𑀪𑀕𑀯𑀸𑀢𑀺 𑀆𑀳. 𑀲𑀽𑀭𑀺𑀬𑀲𑀫𑀸 𑀆𑀪𑀸𑀢𑀺 𑀲𑀽𑀭𑀺𑀬𑀸𑀪𑀸𑀬 𑀲𑀫𑀸 𑀅𑀜𑁆𑀜𑀸 𑀆𑀪𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀫𑀼𑀤𑁆𑀤𑀧𑀭𑀫𑀸𑀢𑀺 𑀬𑁂 𑀓𑁂𑀘𑀺 𑀅𑀜𑁆𑀜𑁂 𑀲𑀭𑀸 𑀦𑀸𑀫, 𑀲𑀩𑁆𑀩𑁂 𑀢𑁂 𑀲𑀫𑀼𑀤𑁆𑀤𑀧𑀭𑀫𑀸, 𑀲𑀫𑀼𑀤𑁆𑀤𑁄 𑀢𑁂𑀲𑀁 𑀉𑀢𑁆𑀢𑀫𑁄, 𑀲𑀫𑀼𑀤𑁆𑀤𑀲𑀤𑀺𑀲𑀁 𑀅𑀜𑁆𑀜𑀁 𑀉𑀤𑀓𑀦𑀺𑀥𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀪𑀕𑀯𑀸𑀢𑀺.

𑀬𑀲𑁆𑀫𑀸 𑀧𑀦 𑀅𑀢𑁆𑀢𑀧𑁂𑀫𑁂𑀦 𑀲𑀫𑀁 𑀧𑁂𑀫𑀁 𑀦𑀸𑀫 𑀦𑀢𑁆𑀣𑀺. 𑀫𑀸𑀢𑀸𑀧𑀺𑀢𑀸𑀤𑀬𑁄 𑀳𑀺 𑀙𑀟𑁆𑀟𑁂𑀢𑁆𑀯𑀸𑀧𑀺 𑀧𑀼𑀢𑁆𑀢𑀥𑀻𑀢𑀸𑀤𑀬𑁄 𑀘 𑀅𑀧𑁄𑀲𑁂𑀢𑁆𑀯𑀸𑀧𑀺 𑀲𑀢𑁆𑀢𑀸 𑀅𑀢𑁆𑀢𑀸𑀦𑀫𑁂𑀯 𑀧𑁄𑀲𑁂𑀦𑁆𑀢𑀺. 𑀥𑀜𑁆𑀜𑁂𑀦 𑀘 𑀲𑀫𑀁 𑀥𑀦𑀁 𑀦𑀸𑀫 𑀦𑀢𑁆𑀣𑀺. (𑀬𑀤𑀸 𑀳𑀺 𑀲𑀢𑁆𑀢𑀸 𑀤𑀼𑀩𑁆𑀪𑀺𑀓𑁆𑀔𑀸 𑀳𑁄𑀦𑁆𑀢𑀺), 𑀢𑀣𑀸𑀭𑀽𑀧𑁂 𑀳𑀺 𑀓𑀸𑀮𑁂 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀻𑀦𑀺 𑀕𑁄𑀫𑀳𑀺𑀁𑀲𑀸𑀤𑀻𑀦𑀺𑀧𑀺 𑀥𑀜𑁆𑀜𑀕𑁆𑀕𑀳𑀡𑀢𑁆𑀣𑀁 𑀥𑀜𑁆𑀜𑀲𑀸𑀫𑀺𑀓𑀸𑀦𑀫𑁂𑀯 𑀲𑀦𑁆𑀢𑀺𑀓𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀧𑀜𑁆𑀜𑀸𑀬 𑀘 𑀲𑀫𑀸 𑀆𑀪𑀸 𑀦𑀸𑀫 𑀦𑀢𑁆𑀣𑀺. 𑀲𑀽𑀭𑀺𑀬𑀸𑀤𑀬𑁄 𑀳𑀺 𑀏𑀓𑀤𑁂𑀲𑀁𑀬𑁂𑀯 𑀑𑀪𑀸𑀲𑀦𑁆𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯 𑀘 𑀢𑀫𑀁 𑀯𑀺𑀦𑁄𑀤𑁂𑀦𑁆𑀢𑀺. 𑀧𑀜𑁆𑀜𑀸 𑀧𑀦 𑀤𑀲𑀲𑀳𑀲𑁆𑀲𑀺𑀫𑁆𑀧𑀺 𑀮𑁄𑀓𑀥𑀸𑀢𑀼𑀁 𑀏𑀓𑀧𑁆𑀧𑀚𑁆𑀚𑁄𑀢𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀅𑀢𑀻𑀢𑀁𑀲𑀸𑀤𑀺𑀧𑀝𑀺𑀘𑁆𑀙𑀸𑀤𑀓𑀜𑁆𑀘 𑀢𑀫𑀁 𑀯𑀺𑀥𑀫𑀢𑀺. 𑀫𑁂𑀖𑀯𑀼𑀝𑁆𑀞𑀺𑀬𑀸 𑀘 𑀲𑀫𑁄 𑀲𑀭𑁄 𑀦𑀸𑀫 𑀦𑀢𑁆𑀣𑀺. 𑀦𑀤𑀻𑀯𑀸𑀧𑀺 𑀳𑁄𑀢𑀼 𑀢𑀮𑀸𑀓𑀸𑀤𑀻𑀦𑀺 𑀯𑀸, 𑀯𑀼𑀝𑁆𑀞𑀺𑀲𑀫𑁄 𑀲𑀭𑁄 𑀦𑀸𑀫 𑀦𑀢𑁆𑀣𑀺. 𑀫𑁂𑀖𑀯𑀼𑀝𑁆𑀞𑀺𑀬𑀸 𑀳𑀺 𑀧𑀘𑁆𑀙𑀺𑀦𑁆𑀦𑀸𑀬 𑀫𑀳𑀸𑀲𑀫𑀼𑀤𑁆𑀤𑁄 𑀅𑀗𑁆𑀕𑀼𑀮𑀺𑀧𑀩𑁆𑀩𑀢𑁂𑀫𑀦𑀫𑀢𑁆𑀢𑀫𑁆𑀧𑀺 𑀉𑀤𑀓𑀁 𑀦 𑀳𑁄𑀢𑀺, 𑀯𑀼𑀝𑁆𑀞𑀺𑀬𑀸 𑀧𑀦 𑀧𑀯𑀢𑁆𑀢𑀫𑀸𑀦𑀸𑀬 𑀬𑀸𑀯 𑀆𑀪𑀲𑁆𑀲𑀭𑀪𑀯𑀦𑀸𑀧𑀺 𑀏𑀓𑁄𑀤𑀓𑀁 𑀳𑁄𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀤𑁂𑀯𑀢𑀸𑀬 𑀧𑀝𑀺𑀕𑀸𑀣𑀁 𑀯𑀤𑀦𑁆𑀢𑁄 𑀦𑀢𑁆𑀣𑀺 𑀅𑀢𑁆𑀢𑀲𑀫𑀁 𑀧𑁂𑀫𑀦𑁆𑀢𑀺𑀆𑀤𑀺𑀫𑀸𑀳𑀸𑀢𑀺.

𑀦𑀢𑁆𑀣𑀺𑀧𑀼𑀢𑁆𑀢𑀲𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀔𑀢𑁆𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪. 𑀘𑀢𑀼𑀢𑁆𑀣𑁂 𑀔𑀢𑁆𑀢𑀺𑀬𑁄 𑀤𑁆𑀯𑀺𑀧𑀤𑀦𑁆𑀢𑀺 𑀤𑁆𑀯𑀺𑀧𑀤𑀸𑀦𑀁 𑀭𑀸𑀚𑀸 𑀲𑁂𑀝𑁆𑀞𑁄. 𑀓𑁄𑀫𑀸𑀭𑀻𑀢𑀺 𑀓𑀼𑀫𑀸𑀭𑀺𑀓𑀸𑀮𑁂 𑀕𑀳𑀺𑀢𑀸. 𑀅𑀬𑀁 𑀲𑁂𑀲𑀪𑀭𑀺𑀬𑀸𑀦𑀁 𑀲𑁂𑀝𑁆𑀞𑀸𑀢𑀺 𑀯𑀤𑀢𑀺. 𑀧𑀼𑀩𑁆𑀩𑀚𑁄𑀢𑀺 𑀧𑀞𑀫𑀁 𑀚𑀸𑀢𑁄 𑀓𑀸𑀡𑁄 𑀯𑀸𑀧𑀺 𑀳𑁄𑀢𑀼 𑀓𑀼𑀡𑀺𑀆𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑁄, 𑀬𑁄 𑀧𑀞𑀫𑀁 𑀚𑀸𑀢𑁄, 𑀅𑀬𑀫𑁂𑀯 𑀧𑀼𑀢𑁆𑀢𑁄 𑀇𑀫𑀺𑀲𑁆𑀲𑀸 𑀤𑁂𑀯𑀢𑀸𑀬 𑀯𑀸𑀤𑁂 𑀲𑁂𑀝𑁆𑀞𑁄 𑀦𑀸𑀫 𑀳𑁄𑀢𑀺. 𑀬𑀲𑁆𑀫𑀸 𑀧𑀦 𑀤𑁆𑀯𑀺𑀧𑀤𑀸𑀤𑀻𑀦𑀁 𑀩𑀼𑀤𑁆𑀥𑀸𑀤𑀬𑁄 𑀲𑁂𑀝𑁆𑀞𑀸, 𑀢𑀲𑁆𑀫𑀸 𑀪𑀕𑀯𑀸 𑀧𑀝𑀺𑀕𑀸𑀣𑀁 𑀆𑀳. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀪𑀕𑀯𑀸 𑀲𑀩𑁆𑀩𑁂𑀲𑀁𑀬𑁂𑀯 𑀅𑀧𑀤𑀸𑀤𑀺𑀪𑁂𑀤𑀸𑀦𑀁 𑀲𑀢𑁆𑀢𑀸𑀦𑀁 𑀲𑁂𑀝𑁆𑀞𑁄, 𑀉𑀧𑁆𑀧𑀚𑁆𑀚𑀫𑀸𑀦𑁄 𑀧𑀦𑁂𑀲 𑀲𑀩𑁆𑀩𑀲𑀢𑁆𑀢𑀲𑁂𑀝𑁆𑀞𑁄 𑀤𑁆𑀯𑀺𑀧𑀤𑁂𑀲𑀼𑀬𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑀁 𑀲𑁂𑀝𑁆𑀞𑁄𑀢𑀺 𑀆𑀳. 𑀤𑁆𑀯𑀺𑀧𑀤𑁂𑀲𑀼 𑀉𑀧𑁆𑀧𑀦𑁆𑀦𑀲𑁆𑀲 𑀘𑀲𑁆𑀲 𑀲𑀩𑁆𑀩𑀲𑀢𑁆𑀢𑀲𑁂𑀝𑁆𑀞𑀪𑀸𑀯𑁄 𑀅𑀧𑁆𑀧𑀝𑀺𑀳𑀢𑁄𑀯 𑀳𑁄𑀢𑀺. 𑀆𑀚𑀸𑀦𑀻𑀬𑁄𑀢𑀺 𑀳𑀢𑁆𑀣𑀻 𑀯𑀸 𑀳𑁄𑀢𑀼 𑀅𑀲𑁆𑀲𑀸𑀤𑀻𑀲𑀼 𑀅𑀜𑁆𑀜𑀢𑀭𑁄 𑀯𑀸, 𑀬𑁄 𑀓𑀸𑀭𑀡𑀁 𑀚𑀸𑀦𑀸𑀢𑀺, 𑀅𑀬𑀁 𑀆𑀚𑀸𑀦𑀻𑀬𑁄𑀯 𑀘𑀢𑀼𑀧𑁆𑀧𑀤𑀸𑀦𑀁 𑀲𑁂𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀓𑀽𑀝𑀓𑀡𑁆𑀡𑀭𑀜𑁆𑀜𑁄 𑀕𑀼𑀴𑀯𑀡𑁆𑀡𑀅𑀲𑁆𑀲𑁄 𑀯𑀺𑀬. 𑀭𑀸𑀚𑀸 𑀓𑀺𑀭 𑀧𑀸𑀘𑀻𑀦𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑁂𑀢𑀺𑀬𑀧𑀩𑁆𑀩𑀢𑀁 𑀕𑀫𑀺𑀲𑁆𑀲𑀸𑀫𑀻𑀢𑀺 𑀓𑀮𑀫𑁆𑀩𑀦𑀤𑀻𑀢𑀻𑀭𑀁 𑀲𑀫𑁆𑀧𑀢𑁆𑀢𑁄, 𑀅𑀲𑁆𑀲𑁄 𑀢𑀻𑀭𑁂 𑀞𑀢𑁆𑀯𑀸 𑀉𑀤𑀓𑀁 𑀑𑀢𑀭𑀺𑀢𑀼𑀁 𑀦 𑀇𑀘𑁆𑀙𑀢𑀺, 𑀭𑀸𑀚𑀸 𑀅𑀲𑁆𑀲𑀸𑀘𑀭𑀺𑀬𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀅𑀳𑁄 𑀯𑀢 𑀢𑀬𑀸 𑀅𑀲𑁆𑀲𑁄 𑀲𑀺𑀓𑁆𑀔𑀸𑀧𑀺𑀢𑁄 𑀉𑀤𑀓𑀁 𑀑𑀢𑀭𑀺𑀢𑀼𑀁 𑀦 𑀇𑀘𑁆𑀙𑀢𑀻’’𑀢𑀺 𑀆𑀳. 𑀆𑀘𑀭𑀺𑀬𑁄 ‘‘𑀲𑀼𑀲𑀺𑀓𑁆𑀔𑀸𑀧𑀺𑀢𑁄 𑀤𑁂𑀯 𑀅𑀲𑁆𑀲𑁄, 𑀏𑀢𑀲𑁆𑀲 𑀳𑀺 𑀘𑀺𑀢𑁆𑀢𑀁 𑁋 ‘𑀲𑀘𑀸𑀳𑀁 𑀉𑀤𑀓𑀁 𑀑𑀢𑀭𑀺𑀲𑁆𑀲𑀸𑀫𑀺, 𑀯𑀸𑀮𑀁 𑀢𑁂𑀫𑀺𑀲𑁆𑀲𑀢𑀺, 𑀯𑀸𑀮𑁂 𑀢𑀺𑀦𑁆𑀢𑁂 𑀭𑀜𑁆𑀜𑁄 𑀅𑀗𑁆𑀕𑁂 𑀉𑀤𑀓𑀁 𑀧𑀸𑀢𑁂𑀬𑁆𑀬𑀸’𑀢𑀺, 𑀏𑀯𑀁 𑀢𑀼𑀫𑁆𑀳𑀸𑀓𑀁 𑀲𑀭𑀻𑀭𑁂 𑀉𑀤𑀓𑀧𑀸𑀢𑀦𑀪𑀬𑁂𑀦 𑀦 𑀑𑀢𑀭𑀢𑀺, 𑀯𑀸𑀮𑀁 𑀕𑀡𑁆𑀳𑀸𑀧𑁂𑀣𑀸’’𑀢𑀺 𑀆𑀳. 𑀭𑀸𑀚𑀸 𑀢𑀣𑀸 𑀓𑀸𑀭𑁂𑀲𑀺. 𑀅𑀲𑁆𑀲𑁄 𑀯𑁂𑀕𑁂𑀦 𑀑𑀢𑀭𑀺𑀢𑁆𑀯𑀸 𑀧𑀸𑀭𑀁 𑀕𑀢𑁄. 𑀲𑀼𑀲𑁆𑀲𑀽𑀲𑀸𑀢𑀺 𑀲𑀼𑀲𑁆𑀲𑀽𑀲𑀫𑀸𑀦𑀸. 𑀓𑀼𑀫𑀸𑀭𑀺𑀓𑀸𑀮𑁂 𑀯𑀸 𑀕𑀳𑀺𑀢𑀸 𑀳𑁄𑀢𑀼 𑀧𑀘𑁆𑀙𑀸 𑀯𑀸, 𑀲𑀼𑀭𑀽𑀧𑀸 𑀯𑀸 𑀯𑀺𑀭𑀽𑀧𑀸 𑀯𑀸, 𑀬𑀸 𑀲𑀸𑀫𑀺𑀓𑀁 𑀲𑀼𑀲𑁆𑀲𑀽𑀲𑀢𑀺 𑀧𑀭𑀺𑀘𑀭𑀢𑀺 𑀢𑁄𑀲𑁂𑀢𑀺, 𑀲𑀸 𑀪𑀭𑀺𑀬𑀸𑀦𑀁 𑀲𑁂𑀝𑁆𑀞𑀸. 𑀅𑀲𑁆𑀲𑀯𑁄𑀢𑀺 𑀆𑀲𑀼𑀡𑀫𑀸𑀦𑁄. 𑀚𑁂𑀝𑁆𑀞𑁄 𑀯𑀸 𑀳𑀺 𑀳𑁄𑀢𑀼 𑀓𑀦𑀺𑀝𑁆𑀞𑁄 𑀯𑀸, 𑀬𑁄 𑀫𑀸𑀢𑀸𑀧𑀺𑀢𑀽𑀦𑀁 𑀯𑀘𑀦𑀁 𑀲𑀼𑀡𑀸𑀢𑀺, 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀑𑀯𑀸𑀤𑀧𑀝𑀺𑀓𑀭𑁄 𑀳𑁄𑀢𑀺, 𑀅𑀬𑀁 𑀧𑀼𑀢𑁆𑀢𑀸𑀦𑀁 𑀲𑁂𑀝𑁆𑀞𑁄, 𑀅𑀜𑁆𑀜𑁂𑀳𑀺 𑀲𑀦𑁆𑀥𑀺𑀘𑁆𑀙𑁂𑀤𑀓𑀸𑀤𑀺𑀘𑁄𑀭𑁂𑀳𑀺 𑀧𑀼𑀢𑁆𑀢𑁂𑀳𑀺 𑀓𑁄 𑀅𑀢𑁆𑀣𑁄 𑀤𑁂𑀯𑀢𑁂𑀢𑀺.

𑀔𑀢𑁆𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀡𑀫𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫. 𑀧𑀜𑁆𑀘𑀫𑁂 𑀞𑀺𑀢𑁂 𑀫𑀚𑁆𑀛𑀦𑁆𑀳𑀺𑀓𑁂𑀢𑀺 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑁂. 𑀲𑀦𑁆𑀦𑀺𑀲𑀻𑀯𑁂𑀲𑀽𑀢𑀺 𑀬𑀣𑀸 𑀨𑀸𑀲𑀼𑀓𑀝𑁆𑀞𑀸𑀦𑀁 𑀉𑀧𑀕𑀦𑁆𑀢𑁆𑀯𑀸 𑀲𑀦𑁆𑀦𑀺𑀲𑀺𑀦𑁆𑀦𑁂𑀲𑀼 𑀯𑀺𑀲𑁆𑀲𑀫𑀫𑀸𑀦𑁂𑀲𑀼. 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑀓𑀸𑀮𑁄 𑀦𑀸𑀫𑁂𑀲 𑀲𑀩𑁆𑀩𑀲𑀢𑁆𑀢𑀸𑀦𑀁 𑀇𑀭𑀺𑀬𑀸𑀧𑀣𑀤𑀼𑀩𑁆𑀩𑀮𑁆𑀬𑀓𑀸𑀮𑁄. 𑀇𑀥 𑀧𑀦 𑀧𑀓𑁆𑀔𑀻𑀦𑀁𑀬𑁂𑀯 𑀯𑀲𑁂𑀦 𑀤𑀲𑁆𑀲𑀺𑀢𑁄. 𑀲𑀡𑀢𑁂𑀯𑀸𑀢𑀺 𑀲𑀡𑀢𑀺 𑀯𑀺𑀬 𑀫𑀳𑀸𑀯𑀺𑀭𑀯𑀁 𑀯𑀺𑀬 𑀫𑀼𑀘𑁆𑀘𑀢𑀺. 𑀲𑀡𑀫𑀸𑀦𑀫𑁂𑀯 𑀘𑁂𑀢𑁆𑀣 ‘‘𑀲𑀡𑀢𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀧𑁆𑀧𑀝𑀺𑀪𑀸𑀕𑀁 𑀦𑀸𑀫𑁂𑀢𑀁. 𑀦𑀺𑀤𑀸𑀖𑀲𑀫𑀬𑀲𑁆𑀫𑀺𑀜𑁆𑀳𑀺 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑀓𑀸𑀮𑁂 𑀘𑀢𑀼𑀧𑁆𑀧𑀤𑀕𑀡𑁂𑀲𑀼 𑀘𑁂𑀯 𑀧𑀓𑁆𑀔𑀻𑀕𑀡𑁂𑀲𑀼 𑀘 𑀲𑀦𑁆𑀦𑀺𑀲𑀺𑀦𑁆𑀦𑁂𑀲𑀼 𑀯𑀸𑀢𑀧𑀽𑀭𑀺𑀢𑀸𑀦𑀁 𑀲𑀼𑀲𑀺𑀭𑀭𑀼𑀓𑁆𑀔𑀸𑀦𑀜𑁆𑀘𑁂𑀯 𑀙𑀺𑀤𑁆𑀤𑀯𑁂𑀡𑀼𑀧𑀩𑁆𑀩𑀸𑀦𑀜𑁆𑀘 𑀔𑀦𑁆𑀥𑁂𑀦 𑀔𑀦𑁆𑀥𑀁 𑀲𑀸𑀔𑀸𑀬 𑀲𑀸𑀔𑀁 𑀲𑀗𑁆𑀖𑀝𑁆𑀝𑀬𑀦𑁆𑀢𑀸𑀦𑀁 𑀧𑀸𑀤𑀧𑀸𑀦𑀜𑁆𑀘 𑀅𑀭𑀜𑁆𑀜𑀫𑀚𑁆𑀛𑁂 𑀫𑀳𑀸𑀲𑀤𑁆𑀤𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀢𑀁 𑀪𑀬𑀁 𑀧𑀝𑀺𑀪𑀸𑀢𑀺 𑀫𑀦𑁆𑀢𑀺 𑀢𑀁 𑀏𑀯𑀭𑀽𑀧𑁂 𑀓𑀸𑀮𑁂 𑀫𑀳𑀸𑀅𑀭𑀜𑁆𑀜𑀲𑁆𑀲 𑀲𑀡𑀫𑀸𑀦𑀁 𑀫𑀬𑁆𑀳𑀁 𑀪𑀬𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀤𑀦𑁆𑀥𑀧𑀜𑁆𑀜𑀸 𑀓𑀺𑀭𑁂𑀲𑀸 𑀤𑁂𑀯𑀢𑀸 𑀢𑀲𑁆𑀫𑀺𑀁 𑀔𑀡𑁂 𑀅𑀢𑁆𑀢𑀦𑁄 𑀦𑀺𑀲𑀚𑁆𑀚𑀨𑀸𑀲𑀼𑀓𑀁 𑀓𑀣𑀸𑀨𑀸𑀲𑀼𑀓𑀁 𑀤𑀼𑀢𑀺𑀬𑀓𑀁 𑀅𑀮𑀪𑀦𑁆𑀢𑀻 𑀏𑀯𑀫𑀸𑀳. 𑀬𑀲𑁆𑀫𑀸 𑀧𑀦 𑀢𑀸𑀤𑀺𑀲𑁂 𑀓𑀸𑀮𑁂 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑀲𑁆𑀲 𑀯𑀺𑀯𑀺𑀢𑁆𑀢𑁂 𑀅𑀭𑀜𑁆𑀜𑀸𑀬𑀢𑀦𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑀧𑁆𑀧𑀓𑀁 𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀲𑀼𑀜𑁆𑀜𑀸𑀕𑀸𑀭𑀁 𑀧𑀯𑀺𑀝𑁆𑀞𑀲𑁆𑀲, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀅𑀫𑀸𑀦𑀼𑀲𑀻 𑀭𑀢𑀻 𑀳𑁄𑀢𑀺, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄’’𑀢𑀺. (𑀥. 𑀧. 𑁩𑁭𑁩) 𑀘,

‘‘𑀧𑀼𑀭𑀢𑁄 𑀧𑀘𑁆𑀙𑀢𑁄 𑀯𑀸𑀧𑀺, 𑀅𑀧𑀭𑁄 𑀘𑁂 𑀦 𑀯𑀺𑀚𑁆𑀚𑀢𑀺;

𑀅𑀢𑀻𑀯 𑀨𑀸𑀲𑀼 𑀪𑀯𑀢𑀺, 𑀏𑀓𑀲𑁆𑀲 𑀯𑀲𑀢𑁄 𑀯𑀦𑁂’’𑀢𑀺. (𑀣𑁂𑀭𑀕𑀸. 𑁫𑁩𑁭) 𑀘;

𑀢𑀲𑁆𑀫𑀸 𑀪𑀕𑀯𑀸 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳. 𑀢𑀢𑁆𑀣 𑀲𑀸 𑀭𑀢𑀺 𑀧𑀝𑀺𑀪𑀸𑀢𑀺 𑀫𑀦𑁆𑀢𑀺 𑀬𑀸 𑀏𑀯𑀭𑀽𑀧𑁂 𑀓𑀸𑀮𑁂 𑀏𑀓𑀓𑀲𑁆𑀲 𑀦𑀺𑀲𑀚𑁆𑀚𑀸 𑀦𑀸𑀫, 𑀲𑀸 𑀭𑀢𑀺 𑀫𑀬𑁆𑀳𑀁 𑀉𑀧𑀝𑁆𑀞𑀸𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺.

𑀲𑀡𑀫𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀦𑀺𑀤𑁆𑀤𑀸𑀢𑀦𑁆𑀤𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬. 𑀙𑀝𑁆𑀞𑁂 𑀦𑀺𑀤𑁆𑀤𑀸𑀢𑀺, ‘‘𑀅𑀪𑀺𑀚𑀸𑀦𑀸𑀫𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺𑀢𑀸’’𑀢𑀺 (𑀫. 𑀦𑀺. 𑁧.𑁩𑁮𑁭) 𑀏𑀯𑀭𑀽𑀧𑀸𑀬 𑀅𑀩𑁆𑀬𑀸𑀓𑀢𑀦𑀺𑀤𑁆𑀤𑀸𑀬 𑀧𑀼𑀩𑁆𑀩𑀪𑀸𑀕𑀸𑀧𑀭𑀪𑀸𑀕𑁂𑀲𑀼 𑀲𑁂𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀲𑀲𑀗𑁆𑀔𑀸𑀭𑀺𑀓𑀅𑀓𑀼𑀲𑀮𑁂 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑀁 𑀣𑀺𑀦𑀫𑀺𑀤𑁆𑀥𑀁. 𑀢𑀦𑁆𑀤𑀻𑀢𑀺 𑀅𑀢𑀺𑀘𑁆𑀙𑀸𑀢𑀸𑀢𑀺𑀲𑀻𑀢𑀸𑀤𑀺𑀓𑀸𑀮𑁂𑀲𑀼 𑀉𑀧𑁆𑀧𑀦𑁆𑀦𑀁 𑀆𑀕𑀦𑁆𑀢𑀼𑀓𑀁 𑀆𑀮𑀲𑀺𑀬𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀢𑀢𑁆𑀣 𑀓𑀢𑀫𑀸 𑀢𑀦𑁆𑀤𑀻? 𑀬𑀸 𑀢𑀦𑁆𑀤𑀻 𑀢𑀦𑁆𑀤𑀺𑀬𑀦𑀸 𑀢𑀦𑁆𑀤𑀺𑀫𑀦𑀢𑀸 𑀆𑀮𑀲𑁆𑀬𑀁 𑀆𑀮𑀲𑁆𑀬𑀸𑀬𑀦𑀸 𑀆𑀮𑀲𑁆𑀬𑀸𑀬𑀺𑀢𑀢𑁆𑀢𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀢𑀦𑁆𑀤𑀻’’𑀢𑀺 (𑀯𑀺𑀪. 𑁮𑁫𑁭). 𑀯𑀺𑀚𑀫𑁆𑀪𑀺𑀢𑀸𑀢𑀺 𑀓𑀸𑀬𑀯𑀺𑀚𑀫𑁆𑀪𑀦𑀸. 𑀅𑀭𑀢𑀻𑀢𑀺 𑀅𑀓𑀼𑀲𑀮𑀧𑀓𑁆𑀔𑀸 𑀉𑀓𑁆𑀓𑀡𑁆𑀞𑀺𑀢𑀢𑀸. 𑀪𑀢𑁆𑀢𑀲𑀫𑁆𑀫𑀤𑁄𑀢𑀺 𑀪𑀢𑁆𑀢𑀫𑀼𑀘𑁆𑀙𑀸 𑀪𑀢𑁆𑀢𑀓𑀺𑀮𑀫𑀣𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀢𑁂𑀲𑀁 𑁋 ‘‘𑀢𑀢𑁆𑀣 𑀓𑀢𑀫𑀸 𑀯𑀺𑀚𑀫𑁆𑀪𑀺𑀢𑀸? 𑀬𑀸 𑀓𑀸𑀬𑀲𑁆𑀲 𑀚𑀫𑁆𑀪𑀦𑀸 𑀯𑀺𑀚𑀫𑁆𑀪𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀪𑀺𑀥𑀫𑁆𑀫𑁂 𑀆𑀕𑀢𑁄𑀯. 𑀏𑀢𑁂𑀦𑀸𑀢𑀺 𑀏𑀢𑁂𑀦 𑀦𑀺𑀤𑁆𑀤𑀸𑀤𑀺𑀦𑀸 𑀉𑀧𑀓𑁆𑀓𑀺𑀮𑁂𑀲𑁂𑀦 𑀉𑀧𑀓𑁆𑀓𑀺𑀮𑀺𑀝𑁆𑀞𑁄 𑀦𑀺𑀯𑀸𑀭𑀺𑀢𑀧𑀸𑀢𑀼𑀪𑀸𑀯𑁄. 𑀦𑀧𑁆𑀧𑀓𑀸𑀲𑀢𑀻𑀢𑀺 𑀦 𑀚𑁄𑀢𑀢𑀺, 𑀦 𑀧𑀸𑀢𑀼𑀪𑀯𑀢𑀻𑀢𑀺 𑀅𑀢𑁆𑀣𑁄. 𑀅𑀭𑀺𑀬𑀫𑀕𑁆𑀕𑁄𑀢𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂. 𑀧𑀸𑀡𑀺𑀦𑀦𑁆𑀢𑀺 𑀲𑀢𑁆𑀢𑀸𑀦𑀁. 𑀯𑀻𑀭𑀺𑀬𑁂𑀦𑀸𑀢𑀺 𑀫𑀕𑁆𑀕𑀲𑀳𑀚𑀸𑀢𑀯𑀻𑀭𑀺𑀬𑁂𑀦. 𑀦𑀁 𑀧𑀡𑀸𑀫𑁂𑀢𑁆𑀯𑀸𑀢𑀺 𑀏𑀢𑀁 𑀓𑀺𑀮𑁂𑀲𑀚𑀸𑀢𑀁 𑀦𑀻𑀳𑀭𑀺𑀢𑁆𑀯𑀸. 𑀅𑀭𑀺𑀬𑀫𑀕𑁆𑀕𑁄𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄. 𑀇𑀢𑀺 𑀫𑀕𑁆𑀕𑁂𑀦𑁂𑀯 𑀉𑀧𑀓𑁆𑀓𑀺𑀮𑁂𑀲𑁂 𑀦𑀻𑀳𑀭𑀺𑀢𑁆𑀯𑀸 𑀫𑀕𑁆𑀕𑀲𑁆𑀲 𑀯𑀺𑀲𑀼𑀤𑁆𑀥𑀺 𑀯𑀼𑀢𑁆𑀢𑀸𑀢𑀺.

𑀦𑀺𑀤𑁆𑀤𑀸𑀢𑀦𑁆𑀤𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀤𑀼𑀓𑁆𑀓𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭. 𑀲𑀢𑁆𑀢𑀫𑁂 𑀤𑀼𑀢𑁆𑀢𑀺𑀢𑀺𑀓𑁆𑀔𑀦𑁆𑀢𑀺 𑀤𑀼𑀓𑁆𑀔𑀫𑀁 𑀤𑀼𑀅𑀥𑀺𑀯𑀸𑀲𑀺𑀬𑀁. 𑀅𑀩𑁆𑀬𑀢𑁆𑀢𑁂𑀦𑀸𑀢𑀺 𑀩𑀸𑀮𑁂𑀦. 𑀲𑀸𑀫𑀜𑁆𑀜𑀦𑁆𑀢𑀺 𑀲𑀫𑀡𑀥𑀫𑁆𑀫𑁄. 𑀇𑀫𑀺𑀦𑀸 𑀤𑁂𑀯𑀢𑀸 𑀇𑀤𑀁 𑀤𑀲𑁆𑀲𑁂𑀢𑀺 𑁋 𑀬𑀁 𑀧𑀡𑁆𑀟𑀺𑀢𑀸 𑀓𑀼𑀮𑀧𑀼𑀢𑁆𑀢𑀸 𑀤𑀲𑀧𑀺 𑀯𑀲𑁆𑀲𑀸𑀦𑀺 𑀯𑀻𑀲𑀢𑀺𑀧𑀺 𑀲𑀝𑁆𑀞𑀺𑀧𑀺 𑀯𑀲𑁆𑀲𑀸𑀦𑀺 𑀤𑀦𑁆𑀢𑁂 𑀅𑀪𑀺𑀤𑀦𑁆𑀢𑀫𑀸𑀥𑀸𑀬 𑀚𑀺𑀯𑁆𑀳𑀸𑀬 𑀢𑀸𑀮𑀼𑀁 𑀆𑀳𑀘𑁆𑀘𑀧𑀺 𑀘𑁂𑀢𑀲𑀸 𑀘𑀺𑀢𑁆𑀢𑀁 𑀅𑀪𑀺𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸𑀧𑀺 𑀏𑀓𑀸𑀲𑀦𑀁 𑀏𑀓𑀪𑀢𑁆𑀢𑀁 𑀧𑀝𑀺𑀲𑁂𑀯𑀫𑀸𑀦𑀸 𑀆𑀧𑀸𑀡𑀓𑁄𑀝𑀺𑀓𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀸 𑀲𑀸𑀫𑀜𑁆𑀜𑀁 𑀓𑀭𑁄𑀦𑁆𑀢𑀺. 𑀢𑀁 𑀪𑀕𑀯𑀸 𑀩𑀸𑀮𑁄 𑀅𑀩𑁆𑀬𑀢𑁆𑀢𑁄 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺. 𑀩𑀳𑀽 𑀳𑀺 𑀢𑀢𑁆𑀣 𑀲𑀫𑁆𑀩𑀸𑀥𑀸𑀢𑀺 𑀢𑀲𑁆𑀫𑀺𑀁 𑀲𑀸𑀫𑀜𑁆𑀜𑀲𑀗𑁆𑀔𑀸𑀢𑁂 𑀅𑀭𑀺𑀬𑀫𑀕𑁆𑀕𑁂 𑀩𑀳𑀽 𑀲𑀫𑁆𑀩𑀸𑀥𑀸 𑀫𑀕𑁆𑀕𑀸𑀥𑀺𑀕𑀫𑀸𑀬 𑀧𑀝𑀺𑀧𑀦𑁆𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀩𑀳𑀽 𑀧𑀭𑀺𑀲𑁆𑀲𑀬𑀸𑀢𑀺 𑀤𑀲𑁆𑀲𑁂𑀢𑀺.

𑀘𑀺𑀢𑁆𑀢𑀜𑁆𑀘𑁂 𑀦 𑀦𑀺𑀯𑀸𑀭𑀬𑁂𑀢𑀺 𑀬𑀤𑀺 𑀅𑀬𑁄𑀦𑀺𑀲𑁄 𑀉𑀧𑁆𑀧𑀦𑁆𑀦𑀁 𑀘𑀺𑀢𑁆𑀢𑀁 𑀦 𑀦𑀺𑀯𑀸𑀭𑁂𑀬𑁆𑀬, 𑀓𑀢𑀺 𑀅𑀳𑀸𑀦𑀺 𑀲𑀸𑀫𑀜𑁆𑀜𑀁 𑀘𑀭𑁂𑀬𑁆𑀬? 𑀏𑀓𑀤𑀺𑀯𑀲𑀫𑁆𑀧𑀺 𑀦 𑀘𑀭𑁂𑀬𑁆𑀬. 𑀘𑀺𑀢𑁆𑀢𑀯𑀲𑀺𑀓𑁄 𑀳𑀺 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀧𑀤𑁂 𑀧𑀤𑁂𑀢𑀺 𑀆𑀭𑀫𑁆𑀫𑀡𑁂 𑀆𑀭𑀫𑁆𑀫𑀡𑁂. 𑀆𑀭𑀫𑁆𑀫𑀡𑀜𑁆𑀳𑀺 𑀇𑀥 𑀧𑀤𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀳𑀺 𑀆𑀭𑀫𑁆𑀫𑀡𑁂 𑀓𑀺𑀮𑁂𑀲𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀢𑀢𑁆𑀣 𑀩𑀸𑀮𑁄 𑀯𑀺𑀲𑀻𑀤𑀢𑀺 𑀦𑀸𑀫. 𑀇𑀭𑀺𑀬𑀸𑀧𑀣𑀧𑀤𑀫𑁆𑀧𑀺 𑀯𑀝𑁆𑀝𑀢𑀺. 𑀕𑀫𑀦𑀸𑀤𑀻𑀲𑀼 𑀳𑀺 𑀬𑀢𑁆𑀣 𑀬𑀢𑁆𑀣 𑀓𑀺𑀮𑁂𑀲𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀯𑀺𑀲𑀻𑀤𑀢𑀺 𑀦𑀸𑀫. 𑀲𑀗𑁆𑀓𑀧𑁆𑀧𑀸𑀦𑀦𑁆𑀢𑀺 𑀓𑀸𑀫𑀲𑀗𑁆𑀓𑀧𑁆𑀧𑀸𑀤𑀻𑀦𑀁.

𑀓𑀼𑀫𑁆𑀫𑁄 𑀯𑀸𑀢𑀺 𑀓𑀘𑁆𑀙𑀧𑁄 𑀯𑀺𑀬. 𑀅𑀗𑁆𑀕𑀸𑀦𑀻𑀢𑀺 𑀕𑀻𑀯𑀧𑀜𑁆𑀘𑀫𑀸𑀦𑀺 𑀅𑀗𑁆𑀕𑀸𑀦𑀺. 𑀲𑀫𑁄𑀤𑀳𑀦𑁆𑀢𑀺 𑀲𑀫𑁄𑀤𑀳𑀦𑁆𑀢𑁄, 𑀲𑀫𑁄𑀤𑀳𑀺𑀢𑁆𑀯𑀸 𑀯𑀸. 𑀫𑀦𑁄𑀯𑀺𑀢𑀓𑁆𑀓𑁂𑀢𑀺 𑀫𑀦𑀫𑁆𑀳𑀺 𑀉𑀧𑁆𑀧𑀦𑁆𑀦𑀯𑀺𑀢𑀓𑁆𑀓𑁂. 𑀏𑀢𑁆𑀢𑀸𑀯𑀢𑀸 𑀇𑀤𑀁 𑀤𑀲𑁆𑀲𑁂𑀢𑀺 𑁋 𑀬𑀣𑀸 𑀓𑀼𑀫𑁆𑀫𑁄 𑀲𑁄𑀡𑁆𑀟𑀺𑀧𑀜𑁆𑀘𑀫𑀸𑀦𑀺 𑀅𑀗𑁆𑀕𑀸𑀦𑀺 𑀲𑀓𑁂 𑀓𑀧𑀸𑀮𑁂 𑀲𑀫𑁄𑀤𑀳𑀦𑁆𑀢𑁄 𑀲𑀺𑀗𑁆𑀕𑀸𑀮𑀲𑁆𑀲 𑀑𑀢𑀸𑀭𑀁 𑀦 𑀤𑁂𑀢𑀺, 𑀲𑀫𑁄𑀤𑀳𑀺𑀢𑁆𑀯𑀸 𑀘𑀲𑁆𑀲 𑀅𑀧𑁆𑀧𑀲𑀬𑁆𑀳𑀢𑀁 𑀆𑀧𑀚𑁆𑀚𑀢𑀺, 𑀏𑀯𑀫𑁂𑀯𑀁 𑀪𑀺𑀓𑁆𑀔𑀼 𑀫𑀦𑀫𑁆𑀳𑀺 𑀉𑀧𑁆𑀧𑀦𑁆𑀦𑀯𑀺𑀢𑀓𑁆𑀓𑁂 𑀲𑀓𑁂 𑀆𑀭𑀫𑁆𑀫𑀡𑀓𑀧𑀸𑀮𑁂 𑀲𑀫𑁄𑀤𑀳𑀁 𑀫𑀸𑀭𑀲𑁆𑀲 𑀑𑀢𑀸𑀭𑀁 𑀦 𑀤𑁂𑀢𑀺, 𑀲𑀫𑁄𑀤𑀳𑀺𑀢𑁆𑀯𑀸 𑀘𑀲𑁆𑀲 𑀅𑀧𑁆𑀧𑀲𑀬𑁆𑀳𑀢𑀁 𑀆𑀧𑀚𑁆𑀚𑀢𑀻𑀢𑀺. 𑀅𑀦𑀺𑀲𑁆𑀲𑀺𑀢𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁂𑀳𑀺 𑀅𑀦𑀺𑀲𑁆𑀲𑀺𑀢𑁄 𑀳𑀼𑀢𑁆𑀯𑀸. 𑀅𑀳𑁂𑀞𑀬𑀸𑀦𑁄𑀢𑀺 𑀅𑀯𑀺𑀳𑀺𑀁𑀲𑀫𑀸𑀦𑁄. 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀦𑀽𑀧𑀯𑀤𑁂𑀬𑁆𑀬 𑀓𑀜𑁆𑀘𑀻𑀢𑀺 𑀬𑀁𑀓𑀺𑀜𑁆𑀘𑀺 𑀧𑀼𑀕𑁆𑀕𑀮𑀁 𑀆𑀘𑀸𑀭𑀯𑀺𑀧𑀢𑁆𑀢𑀺𑀆𑀤𑀻𑀲𑀼 𑀬𑀸𑀬 𑀓𑀸𑀬𑀘𑀺 𑀫𑀗𑁆𑀓𑀼𑀁 𑀓𑀸𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀦 𑀯𑀤𑁂𑀬𑁆𑀬, ‘‘𑀓𑀸𑀮𑁂𑀦 𑀯𑀓𑁆𑀔𑀸𑀫𑀺 𑀦𑁄 𑀅𑀓𑀸𑀮𑁂𑀦𑀸’’𑀢𑀺𑀆𑀤𑀬𑁄 𑀧𑀦 𑀧𑀜𑁆𑀘 𑀥𑀫𑁆𑀫𑁂 𑀅𑀚𑁆𑀛𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀉𑀮𑁆𑀮𑀼𑀫𑁆𑀧𑀦𑀲𑀪𑀸𑀯𑀲𑀡𑁆𑀞𑀺𑀢𑁂𑀦 𑀘𑀺𑀢𑁆𑀢𑁂𑀦 𑀓𑀸𑀭𑀼𑀜𑁆𑀜𑀢𑀁 𑀧𑀝𑀺𑀘𑁆𑀘 𑀯𑀤𑁂𑀬𑁆𑀬𑀸𑀢𑀺.

𑀤𑀼𑀓𑁆𑀓𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀳𑀺𑀭𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮. 𑀅𑀝𑁆𑀞𑀫𑁂 𑀳𑀺𑀭𑀻𑀦𑀺𑀲𑁂𑀥𑁄𑀢𑀺 𑀳𑀺𑀭𑀺𑀬𑀸 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀦𑀺𑀲𑁂𑀥𑁂𑀢𑀻𑀢𑀺 𑀳𑀺𑀭𑀻𑀦𑀺𑀲𑁂𑀥𑁄. 𑀓𑁄𑀘𑀺 𑀮𑁄𑀓𑀲𑁆𑀫𑀺𑀁 𑀯𑀺𑀚𑁆𑀚𑀢𑀻𑀢𑀺 𑀓𑁄𑀘𑀺 𑀏𑀯𑀭𑀽𑀧𑁄 𑀯𑀺𑀚𑁆𑀚𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀬𑁄 𑀦𑀺𑀦𑁆𑀤𑀁 𑀅𑀧𑀩𑁄𑀥𑀢𑀻𑀢𑀺 𑀬𑁄 𑀕𑀭𑀳𑀁 𑀅𑀧𑀳𑀭𑀦𑁆𑀢𑁄 𑀩𑀼𑀚𑁆𑀛𑀢𑀺. 𑀅𑀲𑁆𑀲𑁄 𑀪𑀤𑁆𑀭𑁄 𑀓𑀲𑀸𑀫𑀺𑀯𑀸𑀢𑀺 𑀬𑀣𑀸 𑀪𑀤𑁆𑀭𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀓𑀲𑀁 𑀅𑀧𑀳𑀭𑀦𑁆𑀢𑁄 𑀩𑀼𑀚𑁆𑀛𑀢𑀺, 𑀧𑀢𑁄𑀤𑀘𑁆𑀙𑀸𑀬𑀁 𑀤𑀺𑀲𑁆𑀯𑀸 𑀲𑀁𑀯𑀺𑀚𑁆𑀛𑀦𑁆𑀢𑁄 𑀯𑀺𑀬 𑀓𑀲𑀸𑀬 𑀅𑀢𑁆𑀢𑀦𑀺 𑀦𑀺𑀧𑀸𑀢𑀁 𑀦 𑀤𑁂𑀢𑀺, 𑀏𑀯𑀫𑁂𑀯 𑀬𑁄 𑀪𑀺𑀓𑁆𑀔𑀼 𑀪𑀽𑀢𑀲𑁆𑀲 𑀤𑀲𑀅𑀓𑁆𑀓𑁄𑀲𑀯𑀢𑁆𑀣𑀼𑀦𑁄 𑀅𑀢𑁆𑀢𑀦𑀺 𑀦𑀺𑀧𑀸𑀢𑀁 𑀅𑀤𑀤𑀦𑁆𑀢𑁄 𑀦𑀺𑀦𑁆𑀤𑀁 𑀅𑀧𑀩𑁄𑀥𑀢𑀺 𑀅𑀧𑀳𑀭𑀦𑁆𑀢𑁄 𑀩𑀼𑀚𑁆𑀛𑀢𑀺, 𑀏𑀯𑀭𑀽𑀧𑁄 𑀓𑁄𑀘𑀺 𑀔𑀻𑀡𑀸𑀲𑀯𑁄 𑀯𑀺𑀚𑁆𑀚𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀅𑀪𑀽𑀢𑀓𑁆𑀓𑁄𑀲𑁂𑀦 𑀧𑀦 𑀧𑀭𑀺𑀫𑀼𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀢𑀦𑀼𑀬𑀸𑀢𑀺 𑀢𑀦𑀼𑀓𑀸, 𑀳𑀺𑀭𑀺𑀬𑀸 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀦𑀺𑀲𑁂𑀥𑁂𑀢𑁆𑀯𑀸 𑀘𑀭𑀦𑁆𑀢𑀸 𑀔𑀻𑀡𑀸𑀲𑀯𑀸 𑀦𑀸𑀫 𑀅𑀧𑁆𑀧𑀓𑀸𑀢𑀺 𑀅𑀢𑁆𑀣𑁄. 𑀲𑀤𑀸 𑀲𑀢𑀸𑀢𑀺 𑀦𑀺𑀘𑁆𑀘𑀓𑀸𑀮𑀁 𑀲𑀢𑀺𑀯𑁂𑀧𑀼𑀮𑁆𑀮𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀅𑀦𑁆𑀢𑀁 𑀤𑀼𑀓𑁆𑀔𑀲𑁆𑀲 𑀧𑀧𑁆𑀧𑀼𑀬𑁆𑀬𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀓𑁄𑀝𑀺𑀁 𑀅𑀦𑁆𑀢𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀺𑀢𑁆𑀯𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀳𑀺𑀭𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀓𑀼𑀝𑀺𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯. 𑀦𑀯𑀫𑁂 𑀓𑀘𑁆𑀘𑀺 𑀢𑁂 𑀓𑀼𑀝𑀺𑀓𑀸𑀢𑀺 𑀅𑀬𑀁 𑀤𑁂𑀯𑀢𑀸 𑀤𑀲 𑀫𑀸𑀲𑁂 𑀅𑀦𑁆𑀢𑁄𑀯𑀲𑀦𑀝𑁆𑀞𑀸𑀦𑀝𑁆𑀞𑁂𑀦 𑀫𑀸𑀢𑀭𑀁 𑀓𑀼𑀝𑀺𑀓𑀁 𑀓𑀢𑁆𑀯𑀸, 𑀬𑀣𑀸 𑀲𑀓𑀼𑀡𑀸 𑀤𑀺𑀯𑀲𑀁 𑀕𑁄𑀘𑀭𑀧𑀲𑀼𑀢𑀸 𑀭𑀢𑁆𑀢𑀺𑀁 𑀓𑀼𑀮𑀸𑀯𑀓𑀁 𑀅𑀮𑁆𑀮𑀻𑀬𑀦𑁆𑀢𑀺, 𑀏𑀯𑀫𑁂𑀯𑀁 𑀲𑀢𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸𑀧𑀺 𑀫𑀸𑀢𑀼𑀕𑀸𑀫𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑀺, 𑀆𑀮𑀬𑀯𑀲𑁂𑀦 𑀪𑀭𑀺𑀬𑀁 𑀓𑀼𑀮𑀸𑀯𑀓𑀁 𑀓𑀢𑁆𑀯𑀸. 𑀓𑀼𑀮𑀧𑀯𑁂𑀡𑀺𑀁 𑀲𑀦𑁆𑀢𑀸𑀦𑀓𑀝𑁆𑀞𑁂𑀦 𑀧𑀼𑀢𑁆𑀢𑁂 𑀲𑀦𑁆𑀢𑀸𑀦𑀓𑁂 𑀓𑀢𑁆𑀯𑀸, 𑀢𑀡𑁆𑀳𑀁 𑀩𑀦𑁆𑀥𑀦𑀁 𑀓𑀢𑁆𑀯𑀸, 𑀕𑀸𑀣𑀸𑀩𑀦𑁆𑀥𑀦𑁂𑀦 𑀇𑀫𑁂 𑀧𑀜𑁆𑀳𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺, 𑀪𑀕𑀯𑀸𑀧𑀺𑀲𑁆𑀲𑀸 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀢𑀕𑁆𑀖𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀕𑁆𑀖𑀸𑀢𑀺 𑀏𑀓𑀁𑀲𑀯𑀘𑀦𑁂 𑀦𑀺𑀧𑀸𑀢𑁄. 𑀦𑀢𑁆𑀣𑀻𑀢𑀺 𑀧𑀳𑀸𑀬 𑀧𑀩𑁆𑀩𑀚𑀺𑀢𑀢𑁆𑀢𑀸 𑀯𑀝𑁆𑀝𑀲𑁆𑀫𑀺𑀁 𑀯𑀸 𑀧𑀼𑀦 𑀫𑀸𑀢𑀼𑀓𑀼𑀘𑁆𑀙𑀺𑀯𑀸𑀲𑀲𑁆𑀲 𑀤𑀸𑀭𑀪𑀭𑀡𑀲𑁆𑀲 𑀧𑀼𑀢𑁆𑀢𑀦𑀺𑀩𑁆𑀩𑀢𑁆𑀢𑀺𑀬𑀸 𑀯𑀸 𑀅𑀪𑀸𑀯𑀢𑁄 𑀦𑀢𑁆𑀣𑀺.

𑀤𑁂𑀯𑀢𑀸 ‘‘𑀫𑀬𑀸 𑀲𑀦𑁆𑀦𑀸𑀳𑀁 𑀩𑀦𑁆𑀥𑀺𑀢𑁆𑀯𑀸 𑀕𑀼𑀴𑁆𑀳𑀸 𑀧𑀜𑁆𑀳𑀸 𑀧𑀼𑀘𑁆𑀙𑀺𑀢𑀸, 𑀅𑀬𑀜𑁆𑀘 𑀲𑀫𑀡𑁄 𑀧𑀼𑀘𑁆𑀙𑀺𑀢𑀫𑀢𑁆𑀢𑁂𑀬𑁂𑀯 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀚𑀸𑀦𑀁 𑀦𑀼 𑀔𑁄 𑀫𑁂 𑀅𑀚𑁆𑀛𑀸𑀲𑀬𑀁 𑀓𑀣𑁂𑀲𑀺, 𑀉𑀤𑀸𑀳𑀼 𑀅𑀚𑀸𑀦𑀁 𑀬𑀁 𑀯𑀸 𑀢𑀁 𑀯𑀸 𑀫𑀼𑀔𑀸𑀭𑀼𑀴𑁆𑀳𑀁 𑀓𑀣𑁂𑀲𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀦 𑀓𑀺𑀦𑁆𑀢𑀸𑀳𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀺𑀦𑁆𑀢𑀸𑀳𑀦𑁆𑀢𑀺 𑀓𑀺𑀁 𑀢𑁂 𑀅𑀳𑀁. 𑀅𑀣𑀲𑁆𑀲𑀸 𑀪𑀕𑀯𑀸 𑀆𑀘𑀺𑀓𑁆𑀔𑀦𑁆𑀢𑁄 𑀫𑀸𑀢𑀭𑀦𑁆𑀢𑀺𑀆𑀤𑀺𑀫𑀸𑀳. 𑀲𑀸𑀳𑀼 𑀢𑁂𑀢𑀺 𑀕𑀸𑀣𑀸𑀬 𑀅𑀦𑀼𑀫𑁄𑀤𑀺𑀢𑁆𑀯𑀸 𑀲𑀫𑁆𑀧𑀳𑀁𑀲𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀅𑀢𑁆𑀢𑀦𑁄 𑀤𑁂𑀯𑀝𑁆𑀞𑀸𑀦𑀫𑁂𑀯 𑀕𑀢𑀸𑀢𑀺.

𑀓𑀼𑀝𑀺𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀫𑀺𑀤𑁆𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦. 𑀤𑀲𑀫𑁂 𑀢𑀧𑁄𑀤𑀸𑀭𑀸𑀫𑁂𑀢𑀺 𑀢𑀧𑁄𑀤𑀲𑁆𑀲 𑀢𑀢𑁆𑀢𑁄𑀤𑀓𑀲𑁆𑀲 𑀭𑀳𑀤𑀲𑁆𑀲 𑀯𑀲𑁂𑀦 𑀏𑀯𑀁 𑀮𑀤𑁆𑀥𑀦𑀸𑀫𑁂 𑀆𑀭𑀸𑀫𑁂. 𑀯𑁂𑀪𑀸𑀭𑀧𑀩𑁆𑀩𑀢𑀲𑁆𑀲 𑀓𑀺𑀭 𑀳𑁂𑀝𑁆𑀞𑀸 𑀪𑀼𑀫𑁆𑀫𑀝𑁆𑀞𑀓𑀦𑀸𑀕𑀸𑀦𑀁 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑀁 𑀦𑀸𑀕𑀪𑀯𑀦𑀁 𑀤𑁂𑀯𑀮𑁄𑀓𑀲𑀤𑀺𑀲𑀁 𑀫𑀡𑀺𑀫𑀬𑁂𑀦 𑀢𑀮𑁂𑀦 𑀆𑀭𑀸𑀫𑀼𑀬𑁆𑀬𑀸𑀦𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑀁. 𑀢𑀢𑁆𑀣 𑀦𑀸𑀕𑀸𑀦𑀁 𑀓𑀻𑀴𑀦𑀝𑁆𑀞𑀸𑀦𑁂 𑀫𑀳𑀸𑀉𑀤𑀓𑀭𑀳𑀤𑁄, 𑀢𑀢𑁄 𑀢𑀧𑁄𑀤𑀸 𑀦𑀸𑀫 𑀦𑀤𑀻 𑀲𑀦𑁆𑀤𑀢𑀺 𑀓𑀼𑀣𑀺𑀢𑀸 𑀉𑀡𑁆𑀳𑁄𑀤𑀓𑀸. 𑀓𑀲𑁆𑀫𑀸 𑀧𑀦𑁂𑀲𑀸 𑀏𑀤𑀺𑀲𑀸? 𑀭𑀸𑀚𑀕𑀳𑀁 𑀓𑀺𑀭 𑀧𑀭𑀺𑀯𑀸𑀭𑁂𑀢𑁆𑀯𑀸 𑀫𑀳𑀸𑀧𑁂𑀢𑀮𑁄𑀓𑁄 𑀢𑀺𑀝𑁆𑀞𑀢𑀺, 𑀢𑀢𑁆𑀣 𑀤𑁆𑀯𑀺𑀦𑁆𑀦𑀁 𑀫𑀳𑀸𑀮𑁄𑀳𑀓𑀼𑀫𑁆𑀪𑀺𑀦𑀺𑀭𑀬𑀸𑀦𑀁 𑀅𑀦𑁆𑀢𑀭𑁂𑀦 𑀅𑀬𑀁 𑀢𑀧𑁄𑀤𑀸 𑀆𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀓𑀼𑀣𑀺𑀢𑀸 𑀲𑀦𑁆𑀤𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀬𑀢𑀸𑀬𑀁, 𑀪𑀺𑀓𑁆𑀔𑀯𑁂, 𑀢𑀧𑁄𑀤𑀸 𑀲𑀦𑁆𑀤𑀢𑀺, 𑀲𑁄 𑀤𑀳𑁄 𑀅𑀘𑁆𑀙𑁄𑀤𑀓𑁄 𑀲𑀻𑀢𑁄𑀤𑀓𑁄 𑀲𑀸𑀢𑁄𑀤𑀓𑁄 𑀲𑁂𑀢𑁄𑀤𑀓𑁄 𑀲𑀼𑀧𑁆𑀧𑀢𑀺𑀢𑁆𑀣𑁄 𑀭𑀫𑀡𑀻𑀬𑁄 𑀧𑀳𑀽𑀢𑀫𑀘𑁆𑀙𑀓𑀘𑁆𑀙𑀧𑁄, 𑀘𑀓𑁆𑀓𑀫𑀢𑁆𑀢𑀸𑀦𑀺 𑀘 𑀧𑀤𑀼𑀫𑀸𑀦𑀺 𑀧𑀼𑀧𑁆𑀨𑀦𑁆𑀢𑀺. 𑀅𑀧𑀺𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀢𑀧𑁄𑀤𑀸 𑀤𑁆𑀯𑀺𑀦𑁆𑀦𑀁 𑀫𑀳𑀸𑀦𑀺𑀭𑀬𑀸𑀦𑀁 𑀅𑀦𑁆𑀢𑀭𑀺𑀓𑀸𑀬 𑀆𑀕𑀘𑁆𑀙𑀢𑀺, 𑀢𑁂𑀦𑀸𑀬𑀁 𑀢𑀧𑁄𑀤𑀸 𑀓𑀼𑀣𑀺𑀢𑀸 𑀲𑀦𑁆𑀤𑀢𑀻’’𑀢𑀺 (𑀧𑀸𑀭𑀸. 𑁨𑁩𑁧).

𑀇𑀫𑀲𑁆𑀲 𑀧𑀦 𑀆𑀭𑀸𑀫𑀲𑁆𑀲 𑀅𑀪𑀺𑀫𑀼𑀔𑀝𑁆𑀞𑀸𑀦𑁂 𑀢𑀢𑁄 𑀫𑀳𑀸𑀉𑀤𑀓𑀭𑀳𑀤𑁄 𑀚𑀸𑀢𑁄, 𑀢𑀲𑁆𑀲 𑀯𑀲𑁂𑀦𑀸𑀬𑀁 𑀯𑀺𑀳𑀸𑀭𑁄 ‘‘𑀢𑀧𑁄𑀤𑀸𑀭𑀸𑀫𑁄’’𑀢𑀺 𑀯𑀼𑀘𑁆𑀘𑀢𑀺.

𑀲𑀫𑀺𑀤𑁆𑀥𑀻𑀢𑀺 𑀢𑀲𑁆𑀲 𑀓𑀺𑀭 𑀣𑁂𑀭𑀲𑁆𑀲 𑀅𑀢𑁆𑀢𑀪𑀸𑀯𑁄 𑀲𑀫𑀺𑀤𑁆𑀥𑁄 𑀅𑀪𑀺𑀭𑀽𑀧𑁄 𑀧𑀸𑀲𑀸𑀤𑀺𑀓𑁄, 𑀢𑀲𑁆𑀫𑀸 ‘‘𑀲𑀫𑀺𑀤𑁆𑀥𑀻’’𑀢𑁆𑀯𑁂𑀯 𑀲𑀗𑁆𑀔𑀁 𑀕𑀢𑁄. 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀺𑀢𑀼𑀦𑁆𑀢𑀺 𑀧𑀥𑀸𑀦𑀺𑀓𑀢𑁆𑀣𑁂𑀭𑁄 𑀏𑀲, 𑀩𑀮𑀯𑀧𑀘𑁆𑀘𑀽𑀲𑁂 𑀉𑀝𑁆𑀞𑀸𑀬𑀸𑀲𑀦𑀸 𑀲𑀭𑀻𑀭𑀁 𑀉𑀢𑀼𑀁 𑀕𑀸𑀳𑀸𑀧𑁂𑀢𑁆𑀯𑀸 𑀩𑀳𑀺 𑀲𑀝𑁆𑀞𑀺𑀳𑀢𑁆𑀣𑀫𑀢𑁆𑀢𑁂 𑀫𑀳𑀸𑀘𑀗𑁆𑀓𑀫𑁂 𑀅𑀧𑀭𑀸𑀧𑀭𑀁 𑀘𑀗𑁆𑀓𑀫𑀺𑀢𑁆𑀯𑀸 ‘‘𑀲𑁂𑀤𑀕𑀳𑀺𑀢𑁂𑀳𑀺 𑀕𑀢𑁆𑀢𑁂𑀳𑀺 𑀧𑀭𑀺𑀪𑀼𑀜𑁆𑀚𑀫𑀸𑀦𑀁 𑀲𑁂𑀦𑀸𑀲𑀦𑀁 𑀓𑀺𑀮𑀺𑀲𑁆𑀲𑀢𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀕𑀢𑁆𑀢𑀸𑀦𑀺 𑀧𑀭𑀺𑀲𑀺𑀜𑁆𑀘𑀦𑀢𑁆𑀣𑀁 𑀲𑀭𑀻𑀭𑀥𑁄𑀯𑀦𑀢𑁆𑀣𑀁 𑀉𑀧𑀲𑀗𑁆𑀓𑀫𑀺. 𑀏𑀓𑀘𑀻𑀯𑀭𑁄 𑀅𑀝𑁆𑀞𑀸𑀲𑀻𑀢𑀺 𑀦𑀺𑀯𑀸𑀲𑀦𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀘𑀻𑀯𑀭𑀁 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺.

𑀕𑀢𑁆𑀢𑀸𑀦𑀺 𑀧𑀼𑀩𑁆𑀩𑀸𑀧𑀬𑀫𑀸𑀦𑁄𑀢𑀺 𑀕𑀢𑁆𑀢𑀸𑀦𑀺 𑀧𑀼𑀩𑁆𑀩𑀲𑀤𑀺𑀲𑀸𑀦𑀺 𑀯𑁄𑀤𑀓𑀸𑀦𑀺 𑀓𑀼𑀭𑀼𑀫𑀸𑀦𑁄. 𑀅𑀮𑁆𑀮𑀲𑀭𑀻𑀭𑁂 𑀧𑀸𑀭𑀼𑀢𑀁 𑀳𑀺 𑀘𑀻𑀯𑀭𑀁 𑀓𑀺𑀮𑀺𑀲𑁆𑀲𑀢𑀺 𑀤𑀼𑀕𑁆𑀕𑀦𑁆𑀥𑀁 𑀳𑁄𑀢𑀺, 𑀦 𑀘𑁂𑀢𑀁 𑀯𑀢𑁆𑀢𑀁. 𑀣𑁂𑀭𑁄 𑀧𑀦 𑀯𑀢𑁆𑀢𑀲𑀫𑁆𑀧𑀦𑁆𑀦𑁄, 𑀢𑀲𑁆𑀫𑀸 𑀯𑀢𑁆𑀢𑁂 𑀞𑀺𑀢𑁄𑀯 𑀦𑁆𑀳𑀸𑀬𑀺𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀢𑁆𑀣 𑀇𑀤𑀁 𑀦𑁆𑀳𑀸𑀦𑀯𑀢𑁆𑀢𑀁 𑁋 𑀉𑀤𑀓𑀢𑀺𑀢𑁆𑀣𑀁 𑀕𑀦𑁆𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀘𑀻𑀯𑀭𑀸𑀦𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑁂𑀕𑁂𑀦 𑀞𑀺𑀢𑀓𑁂𑀦𑁂𑀯 𑀦 𑀑𑀢𑀭𑀺𑀢𑀩𑁆𑀩𑀁, 𑀲𑀩𑁆𑀩𑀤𑀺𑀲𑀸 𑀧𑀦 𑀑𑀮𑁄𑀓𑁂𑀢𑁆𑀯𑀸 𑀯𑀺𑀯𑀺𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀔𑀸𑀡𑀼𑀕𑀼𑀫𑁆𑀩𑀮𑀢𑀸𑀤𑀻𑀦𑀺 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀉𑀓𑁆𑀓𑀸𑀲𑀺𑀢𑁆𑀯𑀸 𑀅𑀯𑀓𑀼𑀚𑁆𑀚 𑀞𑀺𑀢𑁂𑀦 𑀉𑀢𑁆𑀢𑀭𑀸𑀲𑀗𑁆𑀕𑀘𑀻𑀯𑀭𑀁 𑀅𑀧𑀦𑁂𑀢𑁆𑀯𑀸 𑀧𑀲𑀸𑀭𑁂𑀢𑀩𑁆𑀩𑀁, 𑀓𑀸𑀬𑀩𑀦𑁆𑀥𑀦𑀁 𑀫𑁄𑀘𑁂𑀢𑁆𑀯𑀸 𑀘𑀻𑀯𑀭𑀧𑀺𑀝𑁆𑀞𑁂𑀬𑁂𑀯 𑀞𑀧𑁂𑀢𑀩𑁆𑀩𑀁. 𑀲𑀘𑁂 𑀉𑀤𑀓𑀲𑀸𑀝𑀺𑀓𑀸 𑀦𑀢𑁆𑀣𑀺, 𑀉𑀤𑀓𑀦𑁆𑀢𑁂 𑀉𑀓𑁆𑀓𑀼𑀝𑀺𑀓𑀁 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀯𑀸𑀲𑀦𑀁 𑀫𑁄𑀘𑁂𑀢𑁆𑀯𑀸 𑀲𑀘𑁂 𑀲𑀺𑀦𑁆𑀦𑀝𑁆𑀞𑀸𑀦𑀁 𑀅𑀢𑁆𑀣𑀺, 𑀧𑀲𑀸𑀭𑁂𑀢𑀩𑁆𑀩𑀁. 𑀦𑁄 𑀘𑁂 𑀅𑀢𑁆𑀣𑀺, 𑀲𑀁𑀳𑀭𑀺𑀢𑁆𑀯𑀸 𑀞𑀧𑁂𑀢𑀩𑁆𑀩𑀁. 𑀉𑀤𑀓𑀁 𑀑𑀢𑀭𑀦𑁆𑀢𑁂𑀦 𑀲𑀡𑀺𑀓𑀁 𑀦𑀸𑀪𑀺𑀧𑁆𑀧𑀫𑀸𑀡𑀫𑀢𑁆𑀢𑀁 𑀑𑀢𑀭𑀺𑀢𑁆𑀯𑀸 𑀯𑀻𑀘𑀺𑀁 𑀅𑀦𑀼𑀝𑁆𑀞𑀸𑀧𑁂𑀦𑁆𑀢𑁂𑀦 𑀲𑀤𑁆𑀤𑀁 𑀅𑀓𑀭𑁄𑀦𑁆𑀢𑁂𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀕𑀢𑀤𑀺𑀲𑀸𑀪𑀺𑀫𑀼𑀔𑁂𑀦 𑀦𑀺𑀫𑀼𑀚𑁆𑀚𑀺𑀢𑀩𑁆𑀩𑀁, 𑀏𑀯𑀁 𑀘𑀻𑀯𑀭𑀁 𑀭𑀓𑁆𑀔𑀺𑀢𑀁 𑀳𑁄𑀢𑀺. 𑀉𑀫𑁆𑀫𑀼𑀚𑁆𑀚𑀦𑁆𑀢𑁂𑀦𑀧𑀺 𑀲𑀤𑁆𑀤𑀁 𑀅𑀓𑀭𑁄𑀦𑁆𑀢𑁂𑀦 𑀲𑀡𑀺𑀓𑀁 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀦𑁆𑀳𑀸𑀦𑀧𑀭𑀺𑀬𑁄𑀲𑀸𑀦𑁂 𑀉𑀤𑀓𑀦𑁆𑀢𑁂 𑀉𑀓𑁆𑀓𑀼𑀝𑀺𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀯𑀸𑀲𑀦𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀉𑀝𑁆𑀞𑀸𑀬 𑀲𑀼𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀘𑀻𑀯𑀭𑀁 𑀅𑀧𑀸𑀭𑀼𑀧𑀺𑀢𑁆𑀯𑀸𑀯 𑀞𑀸𑀢𑀩𑁆𑀩𑀦𑁆𑀢𑀺.

𑀣𑁂𑀭𑁄𑀧𑀺 𑀢𑀣𑀸 𑀦𑁆𑀳𑀸𑀬𑀺𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀯𑀺𑀕𑀘𑁆𑀙𑀫𑀸𑀦𑀉𑀤𑀓𑀁 𑀓𑀸𑀬𑀁 𑀑𑀮𑁄𑀓𑀬𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀢𑀲𑁆𑀲 𑀧𑀓𑀢𑀺𑀬𑀸𑀧𑀺 𑀧𑀸𑀲𑀸𑀤𑀺𑀓𑀲𑁆𑀲 𑀧𑀘𑁆𑀘𑀽𑀲𑀲𑀫𑀬𑁂 𑀲𑀫𑁆𑀫𑀸 𑀧𑀭𑀺𑀡𑀢𑀸𑀳𑀸𑀭𑀲𑁆𑀲 𑀉𑀡𑁆𑀳𑁄𑀤𑀓𑁂𑀦 𑀦𑁆𑀳𑀸𑀢𑀲𑁆𑀲 𑀅𑀢𑀺𑀯𑀺𑀬 𑀫𑀼𑀔𑀯𑀡𑁆𑀡𑁄 𑀯𑀺𑀭𑁄𑀘𑀺, 𑀩𑀦𑁆𑀥𑀦𑀸 𑀧𑀯𑀼𑀢𑁆𑀢𑀢𑀸𑀮𑀨𑀮𑀁 𑀯𑀺𑀬 𑀧𑀪𑀸𑀲𑀫𑁆𑀧𑀦𑁆𑀦𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀢𑀗𑁆𑀔𑀡𑀯𑀺𑀓𑀲𑀺𑀢𑀧𑀤𑀼𑀫𑀁 𑀯𑀺𑀬 𑀫𑀼𑀔𑀁 𑀲𑀲𑁆𑀲𑀺𑀭𑀺𑀓𑀁 𑀅𑀳𑁄𑀲𑀺, 𑀲𑀭𑀻𑀭𑀯𑀡𑁆𑀡𑁄𑀧𑀺 𑀯𑀺𑀧𑁆𑀧𑀲𑀻𑀤𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀦𑀲𑀡𑁆𑀟𑁂 𑀅𑀥𑀺𑀯𑀢𑁆𑀣𑀸 𑀪𑀼𑀫𑁆𑀫𑀤𑁂𑀯𑀢𑀸 𑀧𑀸𑀲𑀸𑀤𑀺𑀓𑀁 𑀪𑀺𑀓𑁆𑀔𑀼𑀁 𑀑𑀮𑁄𑀓𑀬𑀫𑀸𑀦𑀸 𑀲𑀫𑀦𑀁 𑀦𑀺𑀕𑁆𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀓𑀸𑀫𑀧𑀭𑀺𑀴𑀸𑀳𑀸𑀪𑀺𑀪𑀽𑀢𑀸 𑀳𑀼𑀢𑁆𑀯𑀸, ‘‘𑀣𑁂𑀭𑀁 𑀧𑀮𑁄𑀪𑁂𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀪𑀸𑀯𑀁 𑀉𑀴𑀸𑀭𑁂𑀦 𑀅𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀳𑀲𑁆𑀲𑀯𑀝𑁆𑀝𑀺𑀧𑀤𑀻𑀧𑀁 𑀧𑀚𑁆𑀚𑀮𑀫𑀸𑀦𑀸 𑀯𑀺𑀬 𑀘𑀦𑁆𑀤𑀁 𑀉𑀝𑁆𑀞𑀸𑀧𑀬𑀫𑀸𑀦𑀸 𑀯𑀺𑀬 𑀲𑀓𑀮𑀸𑀭𑀸𑀫𑀁 𑀏𑀓𑁄𑀪𑀸𑀲𑀁 𑀓𑀢𑁆𑀯𑀸 𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀯𑀦𑁆𑀤𑀺𑀢𑁆𑀯𑀸𑀯 𑀯𑁂𑀳𑀸𑀲𑁂 𑀞𑀺𑀢𑀸 𑀕𑀸𑀣𑀁 𑀅𑀪𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀣 𑀔𑁄 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸…𑀧𑁂… 𑀅𑀚𑁆𑀛𑀪𑀸𑀲𑀻’’𑀢𑀺.

𑀅𑀪𑀼𑀢𑁆𑀯𑀸𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸. 𑀪𑀺𑀓𑁆𑀔𑀲𑀻𑀢𑀺 𑀧𑀺𑀡𑁆𑀟𑀸𑀬 𑀘𑀭𑀲𑀺. 𑀫𑀸 𑀢𑀁 𑀓𑀸𑀮𑁄 𑀉𑀧𑀘𑁆𑀘𑀕𑀸𑀢𑀺 𑀏𑀢𑁆𑀣 𑀓𑀸𑀮𑁄 𑀦𑀸𑀫 𑀧𑀜𑁆𑀘𑀓𑀸𑀫𑀕𑀼𑀡𑀧𑀝𑀺𑀲𑁂𑀯𑀦𑀓𑁆𑀔𑀫𑁄 𑀤𑀳𑀭𑀬𑁄𑀩𑁆𑀩𑀦𑀓𑀸𑀮𑁄. 𑀚𑀭𑀸𑀚𑀺𑀡𑁆𑀡𑁂𑀦 𑀳𑀺 𑀑𑀪𑀕𑁆𑀕𑁂𑀦 𑀤𑀡𑁆𑀟𑀧𑀭𑀸𑀬𑀡𑁂𑀦 𑀧𑀯𑁂𑀥𑀫𑀸𑀦𑁂𑀦 𑀓𑀸𑀲𑀲𑀸𑀲𑀸𑀪𑀺𑀪𑀽𑀢𑁂𑀦 𑀦 𑀲𑀓𑁆𑀓𑀸 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁. 𑀇𑀢𑀺 𑀇𑀫𑀁 𑀓𑀸𑀮𑀁 𑀲𑀦𑁆𑀥𑀸𑀬 𑀤𑁂𑀯𑀢𑀸 ‘‘𑀫𑀸 𑀢𑀁 𑀓𑀸𑀮𑁄 𑀉𑀧𑀘𑁆𑀘𑀕𑀸’’𑀢𑀺 𑀆𑀳. 𑀢𑀢𑁆𑀣 𑀫𑀸 𑀉𑀧𑀘𑁆𑀘𑀕𑀸𑀢𑀺 𑀫𑀸 𑀅𑀢𑀺𑀓𑁆𑀓𑀫𑀺.

𑀓𑀸𑀮𑀁 𑀯𑁄𑀳𑀁 𑀦 𑀚𑀸𑀦𑀸𑀫𑀻𑀢𑀺 𑀏𑀢𑁆𑀣 𑀯𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀓𑀸𑀮𑀁 𑀦 𑀚𑀸𑀦𑀸𑀫𑀻𑀢𑀺 𑀫𑀭𑀡𑀓𑀸𑀮𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀢𑁆𑀢𑀸𑀦𑀜𑁆𑀳𑀺 𑁋

‘‘𑀚𑀻𑀯𑀺𑀢𑀁 𑀩𑁆𑀬𑀸𑀥𑀺 𑀓𑀸𑀮𑁄 𑀘, 𑀤𑁂𑀳𑀦𑀺𑀓𑁆𑀔𑁂𑀧𑀦𑀁 𑀕𑀢𑀺;

𑀧𑀜𑁆𑀘𑁂𑀢𑁂 𑀚𑀻𑀯𑀮𑁄𑀓𑀲𑁆𑀫𑀺𑀁, 𑀅𑀦𑀺𑀫𑀺𑀢𑁆𑀢𑀸 𑀦 𑀦𑀸𑀬𑀭𑁂’’.

𑀢𑀢𑁆𑀣 𑀚𑀻𑀯𑀺𑀢𑀁 𑀢𑀸𑀯 ‘‘𑀏𑀢𑁆𑀢𑀓𑀫𑁂𑀯, 𑀦 𑀇𑀢𑁄 𑀧𑀭’’𑀦𑁆𑀢𑀺 𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄 𑀅𑀦𑀺𑀫𑀺𑀢𑁆𑀢𑀁. 𑀓𑀮𑀮𑀓𑀸𑀮𑁂𑀧𑀺 𑀳𑀺 𑀲𑀢𑁆𑀢𑀸 𑀫𑀭𑀦𑁆𑀢𑀺, 𑀅𑀩𑁆𑀩𑀼𑀤-𑀧𑁂𑀲𑀺-𑀖𑀦-𑀅𑀟𑁆𑀠𑀫𑀸𑀲-𑀏𑀓𑀫𑀸𑀲-𑀤𑁆𑀯𑁂𑀫𑀸𑀲-𑀢𑁂𑀫𑀸𑀲-𑀘𑀢𑀼𑀫𑀸𑀲𑀧𑀜𑁆𑀘𑀫𑀸𑀲…𑀧𑁂… 𑀤𑀲𑀫𑀸𑀲𑀓𑀸𑀮𑁂𑀧𑀺, 𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀦𑁆𑀢𑀲𑀫𑀬𑁂𑀧𑀺, 𑀢𑀢𑁄 𑀧𑀭𑀁 𑀯𑀲𑁆𑀲𑀲𑀢𑀲𑁆𑀲 𑀅𑀦𑁆𑀢𑁄𑀧𑀺 𑀩𑀳𑀺𑀧𑀺 𑀫𑀭𑀦𑁆𑀢𑀺𑀬𑁂𑀯. 𑀩𑁆𑀬𑀸𑀥𑀺𑀧𑀺 ‘‘𑀇𑀫𑀺𑀦𑀸𑀯 𑀩𑁆𑀬𑀸𑀥𑀺𑀦𑀸 𑀲𑀢𑁆𑀢𑀸 𑀫𑀭𑀦𑁆𑀢𑀺, 𑀦 𑀅𑀜𑁆𑀜𑁂𑀦𑀸’’𑀢𑀺 𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄 𑀅𑀦𑀺𑀫𑀺𑀢𑁆𑀢𑁄. 𑀘𑀓𑁆𑀔𑀼𑀭𑁄𑀕𑁂𑀦𑀧𑀺 𑀳𑀺 𑀲𑀢𑁆𑀢𑀸 𑀫𑀭𑀦𑁆𑀢𑀺 𑀲𑁄𑀢𑀭𑁄𑀕𑀸𑀤𑀻𑀦𑀁 𑀅𑀜𑁆𑀜𑀢𑀭𑁂𑀦𑀧𑀺. 𑀓𑀸𑀮𑁄𑀧𑀺, ‘‘𑀇𑀫𑀲𑁆𑀫𑀺𑀁 𑀬𑁂𑀯 𑀓𑀸𑀮𑁂 𑀫𑀭𑀺𑀢𑀩𑁆𑀩𑀁, 𑀦 𑀅𑀜𑁆𑀜𑀲𑁆𑀫𑀺’’𑀦𑁆𑀢𑀺 𑀏𑀯𑀁 𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄 𑀅𑀦𑀺𑀫𑀺𑀢𑁆𑀢𑁄. 𑀧𑀼𑀩𑁆𑀩𑀡𑁆𑀳𑁂𑀧𑀺 𑀳𑀺 𑀲𑀢𑁆𑀢𑀸 𑀫𑀭𑀦𑁆𑀢𑀺 𑀫𑀚𑁆𑀛𑀦𑁆𑀳𑀺𑀓𑀸𑀤𑀻𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀫𑁆𑀧𑀺. 𑀤𑁂𑀳𑀦𑀺𑀓𑁆𑀔𑁂𑀧𑀦𑀫𑁆𑀧𑀺, ‘‘𑀇𑀥𑁂𑀯 𑀫𑀻𑀬𑀫𑀸𑀦𑀸𑀦𑀁 𑀤𑁂𑀳𑁂𑀦 𑀧𑀢𑀺𑀢𑀩𑁆𑀩𑀁, 𑀦 𑀅𑀜𑁆𑀜𑀢𑁆𑀣𑀸’’𑀢𑀺 𑀏𑀯𑀁 𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄 𑀅𑀦𑀺𑀫𑀺𑀢𑁆𑀢𑀁. 𑀅𑀦𑁆𑀢𑁄𑀕𑀸𑀫𑁂 𑀚𑀸𑀢𑀸𑀦𑀜𑁆𑀳𑀺 𑀩𑀳𑀺𑀕𑀸𑀫𑁂𑀧𑀺 𑀅𑀢𑁆𑀢𑀪𑀸𑀯𑁄 𑀧𑀢𑀢𑀺, 𑀩𑀳𑀺𑀕𑀸𑀫𑁂𑀧𑀺 𑀚𑀸𑀢𑀸𑀦𑀁 𑀅𑀦𑁆𑀢𑁄𑀕𑀸𑀫𑁂𑀧𑀺. 𑀢𑀣𑀸 𑀣𑀮𑀚𑀸𑀦𑀁 𑀚𑀮𑁂, 𑀚𑀮𑀚𑀸𑀦𑀁 𑀣𑀮𑁂𑀢𑀺 𑀅𑀦𑁂𑀓𑀧𑁆𑀧𑀓𑀸𑀭𑀢𑁄 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀕𑀢𑀺𑀧𑀺, ‘‘𑀇𑀢𑁄 𑀘𑀼𑀢𑁂𑀦 𑀇𑀥 𑀦𑀺𑀩𑁆𑀩𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄 𑀅𑀦𑀺𑀫𑀺𑀢𑁆𑀢𑀸. 𑀤𑁂𑀯𑀮𑁄𑀓𑀢𑁄 𑀳𑀺 𑀘𑀼𑀢𑀸 𑀫𑀦𑀼𑀲𑁆𑀲𑁂𑀲𑀼𑀧𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀫𑀦𑀼𑀲𑁆𑀲𑀮𑁄𑀓𑀢𑁄 𑀘𑀼𑀢𑀸 𑀤𑁂𑀯𑀮𑁄𑀓𑀸𑀤𑀻𑀦𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 𑀏𑀯𑀁 𑀬𑀦𑁆𑀢𑁂 𑀬𑀼𑀢𑁆𑀢𑀕𑁄𑀡𑁄 𑀯𑀺𑀬 𑀕𑀢𑀺𑀧𑀜𑁆𑀘𑀓𑁂 𑀮𑁄𑀓𑁄 𑀲𑀫𑁆𑀧𑀭𑀺𑀯𑀢𑁆𑀢𑀢𑀺. 𑀢𑀲𑁆𑀲𑁂𑀯𑀁 𑀲𑀫𑁆𑀧𑀭𑀺𑀯𑀢𑁆𑀢𑀢𑁄 ‘‘𑀇𑀫𑀲𑁆𑀫𑀺𑀁 𑀦𑀸𑀫 𑀓𑀸𑀮𑁂 𑀫𑀭𑀡𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀇𑀫𑀁 𑀫𑀭𑀡𑀲𑁆𑀲 𑀓𑀸𑀮𑀁 𑀯𑁄𑀳𑀁 𑀦 𑀚𑀸𑀦𑀸𑀫𑀺.

𑀙𑀦𑁆𑀦𑁄 𑀓𑀸𑀮𑁄 𑀦 𑀤𑀺𑀲𑁆𑀲𑀢𑀻𑀢𑀺 𑀅𑀬𑀁 𑀓𑀸𑀮𑁄 𑀫𑀬𑁆𑀳𑀁 𑀧𑀝𑀺𑀘𑁆𑀙𑀦𑁆𑀦𑁄 𑀅𑀯𑀺𑀪𑀽𑀢𑁄 𑀦 𑀧𑀜𑁆𑀜𑀸𑀬𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀬𑀁 𑀓𑀸𑀮𑁄 𑀧𑀝𑀺𑀘𑁆𑀙𑀦𑁆𑀦𑁄 𑀦 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀅𑀪𑀼𑀢𑁆𑀯𑀸𑀯 𑀪𑀺𑀓𑁆𑀔𑀸𑀫𑀺. 𑀫𑀸 𑀫𑀁 𑀓𑀸𑀮𑁄 𑀉𑀧𑀘𑁆𑀘𑀕𑀸𑀢𑀺 𑀏𑀢𑁆𑀣 𑀲𑀫𑀡𑀥𑀫𑁆𑀫𑀓𑀭𑀡𑀓𑀸𑀮𑀁 𑀲𑀦𑁆𑀥𑀸𑀬 ‘‘𑀓𑀸𑀮𑁄’’𑀢𑀺 𑀆𑀳. 𑀅𑀬𑀜𑁆𑀳𑀺 𑀲𑀫𑀡𑀥𑀫𑁆𑀫𑁄 𑀦𑀸𑀫 𑀧𑀘𑁆𑀙𑀺𑀫𑁂 𑀓𑀸𑀮𑁂 𑀢𑀺𑀲𑁆𑀲𑁄 𑀯𑀬𑁄𑀲𑀻𑀫𑀸 𑀅𑀢𑀺𑀓𑁆𑀓𑀦𑁆𑀢𑁂𑀦 𑀑𑀪𑀕𑁆𑀕𑁂𑀦 𑀤𑀡𑁆𑀟𑀧𑀭𑀸𑀬𑀡𑁂𑀦 𑀧𑀯𑁂𑀥𑀫𑀸𑀦𑁂𑀦 𑀓𑀸𑀲𑀲𑀸𑀲𑀸𑀪𑀺𑀪𑀽𑀢𑁂𑀦 𑀦 𑀲𑀓𑁆𑀓𑀸 𑀓𑀸𑀢𑀼𑀁. 𑀢𑀤𑀸 𑀳𑀺 𑀦 𑀲𑀓𑁆𑀓𑀸 𑀳𑁄𑀢𑀺 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀩𑀼𑀤𑁆𑀥𑀯𑀘𑀦𑀁 𑀯𑀸 𑀕𑀡𑁆𑀳𑀺𑀢𑀼𑀁, 𑀥𑀼𑀢𑀗𑁆𑀕𑀁 𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀅𑀭𑀜𑁆𑀜𑀯𑀸𑀲𑀁 𑀯𑀸 𑀯𑀲𑀺𑀢𑀼𑀁, 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀲𑀫𑀸𑀧𑀢𑁆𑀢𑀺𑀁 𑀯𑀸 𑀲𑀫𑀸𑀧𑀚𑁆𑀚𑀺𑀢𑀼𑀁, 𑀧𑀤𑀪𑀸𑀡-𑀲𑀭𑀪𑀜𑁆𑀜𑀥𑀫𑁆𑀫𑀓𑀣𑀸-𑀅𑀦𑀼𑀫𑁄𑀤𑀦𑀸𑀤𑀻𑀦𑀺 𑀯𑀸 𑀓𑀸𑀢𑀼𑀁, 𑀢𑀭𑀼𑀡𑀬𑁄𑀩𑁆𑀩𑀦𑀓𑀸𑀮𑁂 𑀧𑀦𑁂𑀢𑀁 𑀲𑀩𑁆𑀩𑀁 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀅𑀬𑀁 𑀲𑀫𑀡𑀥𑀫𑁆𑀫𑀓𑀭𑀡𑀲𑁆𑀲 𑀓𑀸𑀮𑁄 𑀫𑀸 𑀫𑀁 𑀉𑀧𑀘𑁆𑀘𑀕𑀸, 𑀬𑀸𑀯 𑀫𑀁 𑀦𑀸𑀢𑀺𑀓𑁆𑀓𑀫𑀢𑀺, 𑀢𑀸𑀯 𑀓𑀸𑀫𑁂 𑀅𑀪𑀼𑀢𑁆𑀯𑀸𑀯 𑀲𑀫𑀡𑀥𑀫𑁆𑀫𑀁 𑀓𑀭𑁄𑀫𑀻𑀢𑀺 𑀆𑀳.

𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀳𑀺𑀢𑁆𑀯𑀸𑀢𑀺 𑀲𑀸 𑀓𑀺𑀭 𑀤𑁂𑀯𑀢𑀸 𑁋 ‘‘𑀅𑀬𑀁 𑀪𑀺𑀓𑁆𑀔𑀼 𑀲𑀫𑀡𑀥𑀫𑁆𑀫𑀓𑀭𑀡𑀲𑁆𑀲 𑀓𑀸𑀮𑀁 𑀦𑀸𑀫 𑀓𑀣𑁂𑀢𑀺, 𑀅𑀓𑀸𑀮𑀁 𑀦𑀸𑀫 𑀓𑀣𑁂𑀢𑀺, 𑀲𑀳𑁂𑀢𑀼𑀓𑀁 𑀓𑀣𑁂𑀢𑀺 𑀲𑀸𑀦𑀺𑀲𑀁𑀲’’𑀦𑁆𑀢𑀺 𑀏𑀢𑁆𑀢𑀸𑀯𑀢𑀸𑀯 𑀣𑁂𑀭𑁂 𑀮𑀚𑁆𑀚𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀢𑁆𑀯𑀸 𑀫𑀳𑀸𑀩𑁆𑀭𑀳𑁆𑀫𑀁 𑀯𑀺𑀬 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀯𑀺𑀬 𑀘 𑀦𑀁 𑀫𑀜𑁆𑀜𑀫𑀸𑀦𑀸 𑀕𑀸𑀭𑀯𑀚𑀸𑀢𑀸 𑀆𑀓𑀸𑀲𑀸 𑀑𑀭𑀼𑀬𑁆𑀳 𑀧𑀣𑀯𑀺𑀬𑀁 𑀅𑀝𑁆𑀞𑀸𑀲𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀧𑀣𑀯𑀺𑀬𑀁 𑀞𑀺𑀢𑀸, 𑀬𑁂𑀦 𑀧𑀦𑀢𑁆𑀣𑁂𑀦 𑀆𑀕𑀢𑀸, 𑀧𑀼𑀦𑀧𑀺 𑀢𑀫𑁂𑀯 𑀕𑀳𑁂𑀢𑁆𑀯𑀸 𑀤𑀳𑀭𑁄 𑀢𑁆𑀯𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀲𑀽𑀢𑀺 𑀢𑀭𑀼𑀡𑁄. 𑀓𑀸𑀴𑀓𑁂𑀲𑁄𑀢𑀺 𑀲𑀼𑀝𑁆𑀞𑀼 𑀓𑀸𑀴𑀓𑁂𑀲𑁄. 𑀪𑀤𑁆𑀭𑁂𑀦𑀸𑀢𑀺 𑀪𑀤𑁆𑀤𑀓𑁂𑀦. 𑀏𑀓𑀘𑁆𑀘𑁄 𑀳𑀺 𑀤𑀳𑀭𑁄𑀧𑀺 𑀲𑀫𑀸𑀦𑁄 𑀓𑀸𑀡𑁄 𑀯𑀸 𑀳𑁄𑀢𑀺 𑀓𑀼𑀡𑀺𑀆𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑁄, 𑀲𑁄 𑀪𑀤𑁆𑀭𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄 𑀦𑀸𑀫 𑀦 𑀳𑁄𑀢𑀺. 𑀬𑁄 𑀧𑀦 𑀅𑀪𑀺𑀭𑀽𑀧𑁄 𑀳𑁄𑀢𑀺 𑀤𑀲𑁆𑀲𑀦𑀻𑀬𑁄 𑀧𑀸𑀲𑀸𑀤𑀺𑀓𑁄 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀫𑁆𑀧𑀦𑁆𑀦𑁄, 𑀬𑀁 𑀬𑀤𑁂𑀯 𑀅𑀮𑀗𑁆𑀓𑀸𑀭𑀧𑀭𑀺𑀳𑀸𑀭𑀁 𑀇𑀘𑁆𑀙𑀢𑀺, 𑀢𑁂𑀦 𑀢𑁂𑀦 𑀅𑀮𑀗𑁆𑀓𑀢𑁄 𑀤𑁂𑀯𑀧𑀼𑀢𑁆𑀢𑁄 𑀯𑀺𑀬 𑀘𑀭𑀢𑀺, 𑀅𑀬𑀁 𑀪𑀤𑁆𑀭𑁂𑀦 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄 𑀦𑀸𑀫 𑀳𑁄𑀢𑀺. 𑀣𑁂𑀭𑁄 𑀘 𑀉𑀢𑁆𑀢𑀫𑀭𑀽𑀧𑀲𑀫𑁆𑀧𑀦𑁆𑀦𑁄, 𑀢𑁂𑀦 𑀦𑀁 𑀏𑀯𑀫𑀸𑀳.

𑀅𑀦𑀺𑀓𑁆𑀓𑀻𑀴𑀺𑀢𑀸𑀯𑀻 𑀓𑀸𑀫𑁂𑀲𑀽𑀢𑀺 𑀓𑀸𑀫𑁂𑀲𑀼 𑀅𑀓𑀻𑀴𑀺𑀢𑀓𑀻𑀴𑁄 𑀅𑀪𑀼𑀢𑁆𑀢𑀸𑀯𑀻, 𑀅𑀓𑀢𑀓𑀸𑀫𑀓𑀻𑀴𑁄𑀢𑀺 𑀅𑀢𑁆𑀣𑁄. 𑀫𑀸 𑀲𑀦𑁆𑀤𑀺𑀝𑁆𑀞𑀺𑀓𑀁 𑀳𑀺𑀢𑁆𑀯𑀸𑀢𑀺 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀢𑀸 𑀅𑀤𑀺𑀝𑁆𑀞𑀲𑀘𑁆𑀘𑀸 𑀅𑀯𑀻𑀢𑀭𑀸𑀕𑀸 𑀅𑀧𑀭𑀘𑀺𑀢𑁆𑀢𑀯𑀺𑀤𑀽𑀦𑀺𑀬𑁄 𑀤𑁂𑀯𑀢𑀸 𑀪𑀺𑀓𑁆𑀔𑀽 𑀤𑀲𑀧𑀺 𑀯𑀲𑁆𑀲𑀸𑀦𑀺 𑀯𑀻𑀲𑀢𑀺𑀫𑁆𑀧𑀺…𑀧𑁂… 𑀲𑀝𑁆𑀞𑀺𑀫𑁆𑀧𑀺 𑀯𑀲𑁆𑀲𑀸𑀦𑀺 𑀧𑀭𑀺𑀲𑀼𑀤𑁆𑀥𑀁 𑀅𑀔𑀡𑁆𑀟𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀫𑀸𑀦𑁂 𑀤𑀺𑀲𑁆𑀯𑀸 𑁋 ‘‘𑀇𑀫𑁂 𑀪𑀺𑀓𑁆𑀔𑀽 𑀫𑀸𑀦𑀼𑀲𑀓𑁂 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀳𑀸𑀬 𑀤𑀺𑀩𑁆𑀩𑁂 𑀓𑀸𑀫𑁂 𑀧𑀢𑁆𑀣𑀬𑀦𑁆𑀢𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀻’’𑀢𑀺 𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀦𑁆𑀢𑀺, 𑀅𑀬𑀫𑁆𑀧𑀺 𑀢𑀢𑁆𑀣𑁂𑀯 𑀉𑀧𑁆𑀧𑀸𑀤𑁂𑀲𑀺. 𑀢𑀲𑁆𑀫𑀸 𑀫𑀸𑀦𑀼𑀲𑀓𑁂 𑀓𑀸𑀫𑁂 𑀲𑀦𑁆𑀤𑀺𑀝𑁆𑀞𑀺𑀓𑁂, 𑀤𑀺𑀩𑁆𑀩𑁂 𑀘 𑀓𑀸𑀮𑀺𑀓𑁂 𑀓𑀢𑁆𑀯𑀸 𑀏𑀯𑀫𑀸𑀳.

𑀦 𑀔𑁄 𑀅𑀳𑀁, 𑀆𑀯𑀼𑀲𑁄𑀢𑀺, 𑀆𑀯𑀼𑀲𑁄, 𑀅𑀳𑀁 𑀲𑀦𑁆𑀤𑀺𑀝𑁆𑀞𑀺𑀓𑁂 𑀓𑀸𑀫𑁂 𑀳𑀺𑀢𑁆𑀯𑀸 𑀓𑀸𑀮𑀺𑀓𑁂 𑀓𑀸𑀫𑁂 𑀦 𑀅𑀦𑀼𑀥𑀸𑀯𑀸𑀫𑀺 𑀦 𑀧𑀢𑁆𑀣𑁂𑀫𑀺 𑀦 𑀧𑀺𑀳𑁂𑀫𑀺. 𑀓𑀮𑀺𑀓𑀜𑁆𑀘 𑀔𑁄 𑀅𑀳𑀁, 𑀆𑀯𑀼𑀲𑁄𑀢𑀺 𑀅𑀳𑀁 𑀔𑁄, 𑀆𑀯𑀼𑀲𑁄, 𑀓𑀸𑀮𑀺𑀓𑀁 𑀓𑀸𑀫𑀁 𑀳𑀺𑀢𑁆𑀯𑀸 𑀲𑀦𑁆𑀤𑀺𑀝𑁆𑀞𑀺𑀓𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀅𑀦𑀼𑀥𑀸𑀯𑀸𑀫𑀺. 𑀇𑀢𑀺 𑀣𑁂𑀭𑁄 𑀘𑀺𑀢𑁆𑀢𑀸𑀦𑀦𑁆𑀢𑀭𑀁 𑀅𑀮𑀤𑁆𑀥𑀩𑁆𑀩𑀢𑀸𑀬 𑀤𑀺𑀩𑁆𑀩𑁂𑀧𑀺 𑀫𑀸𑀦𑀼𑀲𑀓𑁂𑀧𑀺 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀓𑀸𑀮𑀺𑀓𑀸𑀢𑀺 𑀅𑀓𑀸𑀲𑀺, 𑀘𑀺𑀢𑁆𑀢𑀸𑀦𑀦𑁆𑀢𑀭𑀁 𑀮𑀤𑁆𑀥𑀩𑁆𑀩𑀢𑀸𑀬 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀲𑀦𑁆𑀤𑀺𑀝𑁆𑀞𑀺𑀓𑀦𑁆𑀢𑀺. 𑀧𑀜𑁆𑀘𑀓𑀸𑀫𑀕𑀼𑀡𑁂𑀲𑀼 𑀲𑀫𑁄𑀳𑀺𑀢𑁂𑀲𑀼𑀧𑀺 𑀲𑀫𑁆𑀧𑀦𑁆𑀦𑀓𑀸𑀫𑀲𑁆𑀲𑀸𑀧𑀺 𑀓𑀸𑀫𑀺𑀦𑁄 𑀘𑀺𑀢𑁆𑀢𑀸𑀦𑀦𑁆𑀢𑀭𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀁 𑀦 𑀲𑀫𑁆𑀧𑀚𑁆𑀚𑀢𑀺. 𑀘𑀓𑁆𑀔𑀼𑀤𑁆𑀯𑀸𑀭𑁂 𑀇𑀝𑁆𑀞𑀸𑀭𑀫𑁆𑀫𑀡𑀁 𑀅𑀦𑀼𑀪𑀯𑀺𑀢𑀼𑀓𑀸𑀫𑁂𑀦 𑀳𑀺 𑀘𑀺𑀢𑁆𑀢𑀓𑀸𑀭𑀧𑁄𑀢𑁆𑀣𑀓𑀸𑀭𑀭𑀽𑀧𑀓𑀸𑀭𑀸𑀤𑀬𑁄 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀇𑀤𑀁 𑀦𑀸𑀫 𑀲𑀚𑁆𑀚𑁂𑀣𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀳𑁄𑀢𑀺. 𑀏𑀢𑁆𑀣𑀦𑁆𑀢𑀭𑁂 𑀅𑀦𑁂𑀓𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀅𑀣 𑀧𑀘𑁆𑀙𑀸 𑀢𑀁 𑀆𑀭𑀫𑁆𑀫𑀡𑀁 𑀲𑀫𑁆𑀧𑀸𑀧𑀼𑀡𑀸𑀢𑀺. 𑀲𑁂𑀲𑀤𑁆𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸𑀦𑀦𑁆𑀢𑀭𑀁 𑀧𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀅𑀦𑁆𑀢𑀭𑀸 𑀅𑀜𑁆𑀜𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀸𑀭𑁄 𑀦𑀢𑁆𑀣𑀺. 𑀲𑁂𑀲𑀨𑀮𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺.

𑀲𑁄 𑀢𑀫𑁂𑀯𑀢𑁆𑀣𑀁 𑀕𑀳𑁂𑀢𑁆𑀯𑀸 𑀓𑀸𑀮𑀺𑀓𑀸 𑀳𑀺, 𑀆𑀯𑀼𑀲𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀸𑀮𑀺𑀓𑀸𑀢𑀺 𑀯𑀼𑀢𑁆𑀢𑀦𑀬𑁂𑀦 𑀲𑀫𑁄𑀳𑀺𑀢𑀲𑀫𑁆𑀧𑀢𑁆𑀢𑀺𑀦𑀸𑀧𑀺 𑀓𑀸𑀮𑀦𑁆𑀢𑀭𑁂 𑀧𑀢𑁆𑀢𑀩𑁆𑀩𑀸. 𑀩𑀳𑀼𑀤𑀼𑀓𑁆𑀔𑀸𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀦𑀺𑀲𑁆𑀲𑀸𑀬 𑀧𑀢𑁆𑀢𑀩𑁆𑀩𑀤𑀼𑀓𑁆𑀔𑀲𑁆𑀲 𑀩𑀳𑀼𑀢𑀸𑀬 𑀩𑀳𑀼𑀤𑀼𑀓𑁆𑀔𑀸. 𑀢𑀁𑀯𑀢𑁆𑀣𑀼𑀓𑀲𑁆𑀲𑁂𑀯 𑀉𑀧𑀸𑀬𑀸𑀲𑀲𑁆𑀲 𑀩𑀳𑀼𑀢𑀸𑀬 𑀩𑀳𑀼𑀧𑀸𑀬𑀸𑀲𑀸. 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄𑀢𑀺 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀦𑀺𑀲𑁆𑀲𑀸𑀬 𑀮𑀤𑁆𑀥𑀩𑁆𑀩𑀲𑀼𑀔𑀢𑁄 𑀆𑀤𑀻𑀦𑀯𑁄 𑀪𑀺𑀬𑁆𑀬𑁄, 𑀤𑀼𑀓𑁆𑀔𑀫𑁂𑀯 𑀩𑀳𑀼𑀢𑀭𑀦𑁆𑀢𑀺 𑀅𑀢𑁆𑀣𑁄. 𑀲𑀦𑁆𑀤𑀺𑀝𑁆𑀞𑀺𑀓𑁄 𑀅𑀬𑀁 𑀥𑀫𑁆𑀫𑁄𑀢𑀺 𑀅𑀬𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀬𑁂𑀦 𑀬𑁂𑀦 𑀅𑀥𑀺𑀕𑀢𑁄 𑀳𑁄𑀢𑀺, 𑀢𑁂𑀦 𑀢𑁂𑀦 𑀧𑀭𑀲𑀤𑁆𑀥𑀸𑀬 𑀕𑀦𑁆𑀢𑀩𑁆𑀩𑀢𑀁 𑀳𑀺𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦 𑀲𑀬𑀁 𑀤𑀝𑁆𑀞𑀩𑁆𑀩𑁄𑀢𑀺 𑀲𑀦𑁆𑀤𑀺𑀝𑁆𑀞𑀺𑀓𑁄. 𑀅𑀢𑁆𑀢𑀦𑁄 𑀨𑀮𑀤𑀸𑀦𑀁 𑀲𑀦𑁆𑀥𑀸𑀬 𑀦𑀸𑀲𑁆𑀲 𑀓𑀸𑀮𑁄𑀢𑀺 𑀅𑀓𑀸𑀮𑁄, 𑀅𑀓𑀸𑀮𑁄𑀬𑁂𑀯 𑀅𑀓𑀸𑀮𑀺𑀓𑁄. 𑀬𑁄 𑀏𑀢𑁆𑀣 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑁄, 𑀲𑁄 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀲𑀫𑀦𑀦𑁆𑀢𑀭𑀫𑁂𑀯 𑀨𑀮𑀁 𑀤𑁂𑀢𑀻𑀢𑀺 𑀅𑀢𑁆𑀣𑁄. ‘‘𑀏𑀳𑀺 𑀧𑀲𑁆𑀲 𑀇𑀫𑀁 𑀥𑀫𑁆𑀫’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀏𑀳𑀺𑀧𑀲𑁆𑀲𑀯𑀺𑀥𑀺𑀁 𑀅𑀭𑀳𑀢𑀻𑀢𑀺 𑀏𑀳𑀺𑀧𑀲𑁆𑀲𑀺𑀓𑁄. 𑀆𑀤𑀺𑀢𑁆𑀢𑀁 𑀘𑁂𑀮𑀁 𑀯𑀸 𑀲𑀻𑀲𑀁 𑀯𑀸 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸𑀧𑀺 𑀪𑀸𑀯𑀦𑀸𑀯𑀲𑁂𑀦 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀉𑀧𑀦𑀬𑀁 𑀅𑀭𑀳𑀢𑀻𑀢𑀺 𑀑𑀧𑀦𑁂𑀬𑁆𑀬𑀺𑀓𑁄. 𑀲𑀩𑁆𑀩𑁂𑀳𑀺 𑀉𑀕𑁆𑀖𑀝𑀺𑀢𑀜𑁆𑀜𑀽𑀆𑀤𑀻𑀳𑀺 𑀯𑀺𑀜𑁆𑀜𑀽𑀳𑀺 ‘‘𑀪𑀸𑀯𑀺𑀢𑁄 𑀫𑁂 𑀫𑀕𑁆𑀕𑁄, 𑀅𑀥𑀺𑀕𑀢𑀁 𑀨𑀮𑀁, 𑀲𑀘𑁆𑀙𑀺𑀓𑀢𑁄 𑀦𑀺𑀭𑁄𑀥𑁄’’𑀢𑀺 𑀅𑀢𑁆𑀢𑀦𑀺 𑀅𑀢𑁆𑀢𑀦𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑁄 𑀯𑀺𑀜𑁆𑀜𑀽𑀳𑀻𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁪𑁬 𑀆𑀤𑀬𑁄) 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑁄.

𑀇𑀤𑀸𑀦𑀺 𑀲𑀸 𑀤𑁂𑀯𑀢𑀸 𑀅𑀦𑁆𑀥𑁄 𑀯𑀺𑀬 𑀭𑀽𑀧𑀯𑀺𑀲𑁂𑀲𑀁 𑀣𑁂𑀭𑁂𑀦 𑀓𑀣𑀺𑀢𑀲𑁆𑀲 𑀅𑀢𑁆𑀣𑁂 𑀅𑀚𑀸𑀦𑀦𑁆𑀢𑀻 𑀓𑀣𑀜𑁆𑀘 𑀪𑀺𑀓𑁆𑀔𑀽𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀣𑀜𑁆𑀘𑀸𑀢𑀺𑀧𑀤𑀲𑁆𑀲 ‘‘𑀓𑀣𑀜𑁆𑀘 𑀪𑀺𑀓𑁆𑀔𑀼 𑀓𑀸𑀮𑀺𑀓𑀸 𑀓𑀸𑀫𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸, 𑀓𑀣𑀁 𑀩𑀳𑀼𑀤𑀼𑀓𑁆𑀔𑀸, 𑀓𑀣𑀁 𑀩𑀳𑀼𑀧𑀸𑀬𑀸𑀲𑀸’’𑀢𑀺? 𑀏𑀯𑀁 𑀲𑀩𑁆𑀩𑀧𑀤𑁂𑀳𑀺 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄.

𑀦𑀯𑁄𑀢𑀺 𑀅𑀧𑀭𑀺𑀧𑀼𑀡𑁆𑀡𑀧𑀜𑁆𑀘𑀯𑀲𑁆𑀲𑁄 𑀳𑀺 𑀪𑀺𑀓𑁆𑀔𑀼 𑀦𑀯𑁄 𑀦𑀸𑀫 𑀳𑁄𑀢𑀺, 𑀧𑀜𑁆𑀘𑀯𑀲𑁆𑀲𑀢𑁄 𑀧𑀝𑁆𑀞𑀸𑀬 𑀫𑀚𑁆𑀛𑀺𑀫𑁄, 𑀤𑀲𑀯𑀲𑁆𑀲𑀢𑁄 𑀧𑀝𑁆𑀞𑀸𑀬 𑀣𑁂𑀭𑁄. 𑀅𑀧𑀭𑁄 𑀦𑀬𑁄 𑁋 𑀅𑀧𑀭𑀺𑀧𑀼𑀡𑁆𑀡𑀤𑀲𑀯𑀲𑁆𑀲𑁄 𑀦𑀯𑁄, 𑀤𑀲𑀯𑀲𑁆𑀲𑀢𑁄 𑀧𑀝𑁆𑀞𑀸𑀬 𑀫𑀚𑁆𑀛𑀺𑀫𑁄, 𑀯𑀻𑀲𑀢𑀺𑀯𑀲𑁆𑀲𑀢𑁄 𑀧𑀝𑁆𑀞𑀸𑀬 𑀣𑁂𑀭𑁄. 𑀢𑁂𑀲𑀁 𑀅𑀳𑀁 𑀦𑀯𑁄𑀢𑀺 𑀯𑀤𑀢𑀺.

𑀦𑀯𑁄𑀧𑀺 𑀏𑀓𑀘𑁆𑀘𑁄 𑀲𑀢𑁆𑀢𑀝𑁆𑀞𑀯𑀲𑁆𑀲𑀓𑀸𑀮𑁂 𑀧𑀩𑁆𑀩𑀚𑀺𑀢𑁆𑀯𑀸 𑀤𑁆𑀯𑀸𑀤𑀲𑀢𑁂𑀭𑀲𑀯𑀲𑁆𑀲𑀸𑀦𑀺 𑀲𑀸𑀫𑀡𑁂𑀭𑀪𑀸𑀯𑁂𑀦𑁂𑀯 𑀅𑀢𑀺𑀓𑁆𑀓𑀦𑁆𑀢𑁄 𑀘𑀺𑀭𑀧𑀩𑁆𑀩𑀚𑀺𑀢𑁄 𑀳𑁄𑀢𑀺, 𑀅𑀳𑀁 𑀧𑀦 𑀅𑀘𑀺𑀭𑀧𑀩𑁆𑀩𑀚𑀺𑀢𑁄𑀢𑀺 𑀯𑀤𑀢𑀺. 𑀇𑀫𑀁 𑀥𑀫𑁆𑀫𑀯𑀺𑀦𑀬𑀦𑁆𑀢𑀺 𑀇𑀫𑀁 𑀥𑀫𑁆𑀫𑀜𑁆𑀘 𑀯𑀺𑀦𑀬𑀜𑁆𑀘. 𑀉𑀪𑀬𑀫𑁆𑀧𑁂𑀢𑀁 𑀲𑀸𑀲𑀦𑀲𑁆𑀲𑁂𑀯 𑀦𑀸𑀫𑀁. 𑀥𑀫𑁆𑀫𑁂𑀦 𑀳𑁂𑀢𑁆𑀣 𑀤𑁆𑀯𑁂 𑀧𑀺𑀝𑀓𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀯𑀺𑀦𑀬𑁂𑀦 𑀯𑀺𑀦𑀬𑀧𑀺𑀝𑀓𑀁, 𑀇𑀢𑀺 𑀢𑀻𑀳𑀺 𑀧𑀺𑀝𑀓𑁂𑀳𑀺 𑀧𑀓𑀸𑀲𑀺𑀢𑀁 𑀧𑀝𑀺𑀧𑀢𑁆𑀢𑀺𑀁 𑀅𑀥𑀼𑀦𑀸 𑀆𑀕𑀢𑁄𑀫𑁆𑀳𑀻𑀢𑀺 𑀯𑀤𑀢𑀺.

𑀫𑀳𑁂𑀲𑀓𑁆𑀔𑀸𑀳𑀻𑀢𑀺 𑀫𑀳𑀸𑀧𑀭𑀺𑀯𑀸𑀭𑀸𑀳𑀺. 𑀏𑀓𑁂𑀓𑀲𑁆𑀲 𑀳𑀺 𑀤𑁂𑀯𑀭𑀜𑁆𑀜𑁄 𑀓𑁄𑀝𑀺𑀲𑀢𑀫𑁆𑀧𑀺 𑀓𑁄𑀝𑀺𑀲𑀳𑀲𑁆𑀲𑀫𑁆𑀧𑀺 𑀧𑀭𑀺𑀯𑀸𑀭𑁄 𑀳𑁄𑀢𑀺, 𑀢𑁂 𑀅𑀢𑁆𑀢𑀸𑀦𑀁 𑀫𑀳𑀦𑁆𑀢𑁂 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀢𑀣𑀸𑀕𑀢𑀁 𑀧𑀲𑁆𑀲𑀦𑁆𑀢𑀺. 𑀢𑀢𑁆𑀣 𑀅𑀫𑁆𑀳𑀸𑀤𑀺𑀲𑀸𑀦𑀁 𑀅𑀧𑁆𑀧𑁂𑀲𑀓𑁆𑀔𑀸𑀦𑀁 𑀫𑀸𑀢𑀼𑀕𑀸𑀫𑀚𑀸𑀢𑀺𑀓𑀸𑀦𑀁 𑀓𑀼𑀢𑁄 𑀑𑀓𑀸𑀲𑁄𑀢𑀺 𑀤𑀲𑁆𑀲𑁂𑀢𑀺.

𑀫𑀬𑀫𑁆𑀧𑀺 𑀆𑀕𑀘𑁆𑀙𑁂𑀬𑁆𑀬𑀸𑀫𑀸𑀢𑀺 𑀇𑀤𑀁 𑀲𑀸 𑀤𑁂𑀯𑀢𑀸 ‘‘𑀲𑀘𑁂𑀧𑀺 𑀘𑀓𑁆𑀓𑀯𑀸𑀴𑀁 𑀧𑀽𑀭𑁂𑀢𑁆𑀯𑀸 𑀧𑀭𑀺𑀲𑀸 𑀦𑀺𑀲𑀺𑀦𑁆𑀦𑀸 𑀳𑁄𑀢𑀺, 𑀫𑀳𑀢𑀺𑀬𑀸 𑀩𑀼𑀤𑁆𑀥𑀯𑀻𑀣𑀺𑀬𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀁 𑀮𑀪𑀢𑀻’’𑀢𑀺 𑀜𑀢𑁆𑀯𑀸 𑀆𑀳. 𑀧𑀼𑀘𑁆𑀙 𑀪𑀺𑀓𑁆𑀔𑀼, 𑀧𑀼𑀘𑁆𑀙 𑀪𑀺𑀓𑁆𑀔𑀽𑀢𑀺 𑀣𑀺𑀭𑀓𑀭𑀡𑀯𑀲𑁂𑀦 𑀆𑀫𑁂𑀟𑀺𑀢𑀁 𑀓𑀢𑀁.

𑀅𑀓𑁆𑀔𑁂𑀬𑁆𑀬𑀲𑀜𑁆𑀜𑀺𑀦𑁄𑀢𑀺 𑀏𑀢𑁆𑀣 ‘‘𑀤𑁂𑀯𑁄, 𑀫𑀦𑀼𑀲𑁆𑀲𑁄, 𑀕𑀳𑀝𑁆𑀞𑁄, 𑀧𑀩𑁆𑀩𑀚𑀺𑀢𑁄, 𑀲𑀢𑁆𑀢𑁄, 𑀧𑀼𑀕𑁆𑀕𑀮𑁄, 𑀢𑀺𑀲𑁆𑀲𑁄, 𑀨𑀼𑀲𑁆𑀲𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀓𑁆𑀔𑁂𑀬𑁆𑀬𑀢𑁄 𑀲𑀩𑁆𑀩𑁂𑀲𑀁 𑀅𑀓𑁆𑀔𑀸𑀦𑀸𑀦𑀁 𑀲𑀩𑁆𑀩𑀸𑀲𑀁 𑀓𑀣𑀸𑀦𑀁 𑀯𑀢𑁆𑀣𑀼𑀪𑀽𑀢𑀢𑁄 𑀧𑀜𑁆𑀘𑀓𑁆𑀔𑀦𑁆𑀥𑀸 ‘‘𑀅𑀓𑁆𑀔𑁂𑀬𑁆𑀬𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. ‘‘𑀲𑀢𑁆𑀢𑁄 𑀦𑀭𑁄 𑀧𑁄𑀲𑁄 𑀧𑀼𑀕𑁆𑀕𑀮𑁄 𑀇𑀢𑁆𑀣𑀻 𑀧𑀼𑀭𑀺𑀲𑁄’’𑀢𑀺 𑀏𑀯𑀁 𑀲𑀜𑁆𑀜𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀲𑀜𑁆𑀜𑀺𑀦𑁄, 𑀅𑀓𑁆𑀔𑁂𑀬𑁆𑀬𑁂𑀲𑁆𑀯𑁂𑀯 𑀲𑀜𑁆𑀜𑀺𑀦𑁄𑀢𑀺 𑀅𑀓𑁆𑀔𑁂𑀬𑁆𑀬𑀲𑀜𑁆𑀜𑀺𑀦𑁄, 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀲𑀢𑁆𑀢𑀧𑀼𑀕𑁆𑀕𑀮𑀸𑀤𑀺𑀲𑀜𑁆𑀜𑀺𑀦𑁄𑀢𑀺 𑀅𑀢𑁆𑀣𑁄. 𑀅𑀓𑁆𑀔𑁂𑀬𑁆𑀬𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑀸𑀢𑀺 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀧𑀢𑀺𑀝𑁆𑀞𑀺𑀢𑀸. 𑀭𑀢𑁆𑀢𑁄 𑀳𑀺 𑀭𑀸𑀕𑀯𑀲𑁂𑀦 𑀧𑀢𑀺𑀝𑁆𑀞𑀺𑀢𑁄 𑀳𑁄𑀢𑀺, 𑀤𑀼𑀝𑁆𑀞𑁄 𑀤𑁄𑀲𑀯𑀲𑁂𑀦, 𑀫𑀽𑀴𑁆𑀳𑁄 𑀫𑁄𑀳𑀯𑀲𑁂𑀦, 𑀧𑀭𑀸𑀫𑀝𑁆𑀞𑁄 𑀤𑀺𑀝𑁆𑀞𑀺𑀯𑀲𑁂𑀦, 𑀣𑀸𑀫𑀕𑀢𑁄 𑀅𑀦𑀼𑀲𑀬𑀯𑀲𑁂𑀦, 𑀯𑀺𑀦𑀺𑀩𑀤𑁆𑀥𑁄 𑀫𑀸𑀦𑀯𑀲𑁂𑀦, 𑀅𑀦𑀺𑀝𑁆𑀞𑀗𑁆𑀕𑀢𑁄 𑀯𑀺𑀘𑀺𑀓𑀺𑀘𑁆𑀙𑀸𑀯𑀲𑁂𑀦, 𑀯𑀺𑀓𑁆𑀔𑁂𑀧𑀕𑀢𑁄 𑀉𑀤𑁆𑀥𑀘𑁆𑀘𑀯𑀲𑁂𑀦 𑀧𑀢𑀺𑀝𑁆𑀞𑀺𑀢𑁄 𑀳𑁄𑀢𑀺. 𑀅𑀓𑁆𑀔𑁂𑀬𑁆𑀬𑀁 𑀅𑀧𑀭𑀺𑀜𑁆𑀜𑀸𑀬𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑁂 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀅𑀧𑀭𑀺𑀚𑀸𑀦𑀺𑀢𑁆𑀯𑀸. 𑀬𑁄𑀕𑀫𑀸𑀬𑀦𑁆𑀢𑀺 𑀫𑀘𑁆𑀘𑀼𑀦𑁄𑀢𑀺 𑀫𑀘𑁆𑀘𑀼𑀦𑁄 𑀬𑁄𑀕𑀁 𑀧𑀬𑁄𑀕𑀁 𑀧𑀓𑁆𑀔𑁂𑀧𑀁 𑀉𑀧𑀓𑁆𑀔𑁂𑀧𑀁 𑀉𑀧𑀓𑁆𑀓𑀫𑀁 𑀅𑀩𑁆𑀪𑀦𑁆𑀢𑀭𑀁 𑀆𑀕𑀘𑁆𑀙𑀦𑁆𑀢𑀺, 𑀫𑀭𑀡𑀯𑀲𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀫𑀺𑀫𑀸𑀬 𑀕𑀸𑀣𑀸𑀬 𑀓𑀸𑀮𑀺𑀓𑀸 𑀓𑀸𑀫𑀸 𑀓𑀣𑀺𑀢𑀸.

𑀧𑀭𑀺𑀜𑁆𑀜𑀸𑀬𑀸𑀢𑀺 𑀜𑀸𑀢𑀧𑀭𑀺𑀜𑁆𑀜𑀸, 𑀢𑀻𑀭𑀡𑀧𑀭𑀺𑀜𑁆𑀜𑀸, 𑀧𑀳𑀸𑀦𑀧𑀭𑀺𑀜𑁆𑀜𑀸𑀢𑀺 𑀇𑀫𑀸𑀳𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀢𑁆𑀯𑀸. 𑀢𑀢𑁆𑀣 𑀓𑀢𑀫𑀸 𑀜𑀸𑀢𑀧𑀭𑀺𑀜𑁆𑀜𑀸? 𑀧𑀜𑁆𑀘𑀓𑁆𑀔𑀦𑁆𑀥𑁂 𑀧𑀭𑀺𑀚𑀸𑀦𑀸𑀢𑀺 𑁋 ‘‘𑀅𑀬𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀅𑀬𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀅𑀬𑀁 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀅𑀬𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀅𑀬𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀇𑀫𑀸𑀦𑀺 𑀢𑁂𑀲𑀁 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀦𑀻’’𑀢𑀺, 𑀅𑀬𑀁 𑀜𑀸𑀢𑀧𑀭𑀺𑀜𑁆𑀜𑀸. 𑀓𑀢𑀫𑀸 𑀢𑀻𑀭𑀡𑀧𑀭𑀺𑀜𑁆𑀜𑀸? 𑀏𑀯𑀁 𑀜𑀸𑀢𑀁 𑀓𑀢𑁆𑀯𑀸 𑀧𑀜𑁆𑀘𑀓𑁆𑀔𑀦𑁆𑀥𑁂 𑀢𑀻𑀭𑁂𑀢𑀺 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀭𑁄𑀕𑀢𑁄𑀢𑀺 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀺. 𑀅𑀬𑀁 𑀢𑀻𑀭𑀡𑀧𑀭𑀺𑀜𑁆𑀜𑀸. 𑀓𑀢𑀫𑀸 𑀧𑀳𑀸𑀦𑀧𑀭𑀺𑀜𑁆𑀜𑀸? 𑀏𑀯𑀁 𑀢𑀻𑀭𑀬𑀺𑀢𑁆𑀯𑀸 𑀅𑀕𑁆𑀕𑀫𑀕𑁆𑀕𑁂𑀦 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀙𑀦𑁆𑀤𑀭𑀸𑀕𑀁 𑀧𑀚𑀳𑀢𑀺. 𑀅𑀬𑀁 𑀧𑀳𑀸𑀦𑀧𑀭𑀺𑀜𑁆𑀜𑀸.

𑀅𑀓𑁆𑀔𑀸𑀢𑀸𑀭𑀁 𑀦 𑀫𑀜𑁆𑀜𑀢𑀻𑀢𑀺 𑀏𑀯𑀁 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀜𑁆𑀘𑀓𑁆𑀔𑀦𑁆𑀥𑁂 𑀧𑀭𑀺𑀚𑀸𑀦𑀺𑀢𑁆𑀯𑀸 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀅𑀓𑁆𑀔𑀸𑀢𑀸𑀭𑀁 𑀧𑀼𑀕𑁆𑀕𑀮𑀁 𑀦 𑀫𑀜𑁆𑀜𑀢𑀺. 𑀅𑀓𑁆𑀔𑀸𑀢𑀸𑀭𑀦𑁆𑀢𑀺 𑀓𑀫𑁆𑀫𑀯𑀲𑁂𑀦 𑀓𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀅𑀓𑁆𑀔𑀸𑀢𑀩𑁆𑀩𑀁 𑀓𑀣𑁂𑀢𑀩𑁆𑀩𑀁 𑀧𑀼𑀕𑁆𑀕𑀮𑀁 𑀦 𑀫𑀜𑁆𑀜𑀢𑀺, 𑀦 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀦𑁆𑀢𑀺 𑀅𑀓𑁆𑀔𑀸𑀢𑀩𑁆𑀩𑀦𑁆𑀢𑀺? ‘‘𑀢𑀺𑀲𑁆𑀲𑁄’’𑀢𑀺 𑀯𑀸 ‘‘𑀨𑀼𑀲𑁆𑀲𑁄’’𑀢𑀺 𑀯𑀸 𑀏𑀯𑀁 𑀬𑁂𑀦 𑀓𑁂𑀦𑀘𑀺 𑀦𑀸𑀫𑁂𑀦 𑀯𑀸 𑀕𑁄𑀢𑁆𑀢𑁂𑀦 𑀯𑀸 𑀧𑀓𑀸𑀲𑁂𑀢𑀩𑁆𑀩𑀁. 𑀢𑀜𑁆𑀳𑀺 𑀢𑀲𑁆𑀲 𑀦 𑀳𑁄𑀢𑀻𑀢𑀺 𑀢𑀁 𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀦 𑀳𑁄𑀢𑀺. 𑀬𑁂𑀦 𑀦𑀁 𑀯𑀚𑁆𑀚𑀸𑀢𑀺 𑀬𑁂𑀦 𑀦𑀁 ‘‘𑀭𑀸𑀕𑁂𑀦 𑀭𑀢𑁆𑀢𑁄’’𑀢𑀺 𑀯𑀸 ‘‘𑀤𑁄𑀲𑁂𑀦 𑀤𑀼𑀝𑁆𑀞𑁄’’𑀢𑀺 𑀯𑀸 ‘‘𑀫𑁄𑀳𑁂𑀦 𑀫𑀽𑀴𑁆𑀳𑁄’’𑀢𑀺 𑀯𑀸𑀢𑀺 𑀓𑁄𑀘𑀺 𑀯𑀤𑁂𑀬𑁆𑀬, 𑀢𑀁 𑀓𑀸𑀭𑀡𑀁 𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀦𑀢𑁆𑀣𑀺.

𑀲𑀘𑁂 𑀯𑀺𑀚𑀸𑀦𑀸𑀲𑀺 𑀯𑀤𑁂𑀳𑀻𑀢𑀺 𑀲𑀘𑁂 𑀏𑀯𑀭𑀽𑀧𑀁 𑀔𑀻𑀡𑀸𑀲𑀯𑀁 𑀚𑀸𑀦𑀸𑀲𑀺, ‘‘𑀚𑀸𑀦𑀸𑀫𑀻’’𑀢𑀺 𑀯𑀤𑁂𑀳𑀺. 𑀦𑁄 𑀘𑁂 𑀚𑀸𑀦𑀸𑀲𑀺, 𑀅𑀣 ‘‘𑀦 𑀚𑀸𑀦𑀸𑀫𑀻’’𑀢𑀺 𑀯𑀤𑁂𑀳𑀺. 𑀬𑀓𑁆𑀔𑀸𑀢𑀺 𑀤𑁂𑀯𑀢𑀁 𑀆𑀮𑀧𑀦𑁆𑀢𑁄 𑀆𑀳. 𑀇𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀲𑀦𑁆𑀤𑀺𑀝𑁆𑀞𑀺𑀓𑁄 𑀦𑀯𑀯𑀺𑀥𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀓𑀣𑀺𑀢𑁄. 𑀲𑀸𑀥𑀽𑀢𑀺 𑀆𑀬𑀸𑀘𑀦𑀢𑁆𑀣𑁂 𑀦𑀺𑀧𑀸𑀢𑁄.

𑀬𑁄 𑀫𑀜𑁆𑀜𑀢𑀻𑀢𑀺 𑀬𑁄 𑀅𑀢𑁆𑀢𑀸𑀦𑀁 ‘‘𑀅𑀳𑀁 𑀲𑀫𑁄’’𑀢𑀺 𑀯𑀸 ‘‘𑀯𑀺𑀲𑁂𑀲𑀻’’𑀢𑀺 𑀯𑀸 ‘‘𑀦𑀺𑀳𑀻𑀦𑁄’’𑀢𑀺 𑀯𑀸 𑀫𑀜𑁆𑀜𑀢𑀺. 𑀏𑀢𑁂𑀦 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀬𑁄 𑀢𑀬𑁄 𑀫𑀸𑀦𑀸 𑀕𑀳𑀺𑀢𑀸𑀯. 𑀢𑁂𑀲𑀼 𑀕𑀳𑀺𑀢𑁂𑀲𑀼 𑀦𑀯 𑀫𑀸𑀦𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀲𑁄 𑀯𑀺𑀯𑀤𑁂𑀣 𑀢𑁂𑀦𑀸𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀢𑁂𑀦𑁂𑀯 𑀫𑀸𑀦𑁂𑀦 𑀬𑁂𑀦 𑀓𑁂𑀦𑀘𑀺 𑀧𑀼𑀕𑁆𑀕𑀮𑁂𑀦 𑀲𑀤𑁆𑀥𑀺𑀁 𑁋 ‘‘𑀓𑁂𑀦 𑀫𑀁 𑀢𑁆𑀯𑀁 𑀧𑀸𑀧𑀼𑀡𑀸𑀲𑀺, 𑀓𑀺𑀁 𑀚𑀸𑀢𑀺𑀬𑀸 𑀧𑀸𑀧𑀼𑀡𑀸𑀲𑀺, 𑀉𑀤𑀸𑀳𑀼 𑀕𑁄𑀢𑁆𑀢𑁂𑀦, 𑀓𑀼𑀮𑀧𑀤𑁂𑀲𑁂𑀦, 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬, 𑀩𑀸𑀳𑀼𑀲𑀘𑁆𑀘𑁂𑀦, 𑀥𑀼𑀢𑀕𑀼𑀡𑁂𑀦𑀸’’𑀢𑀺 𑀏𑀯𑀁 𑀯𑀺𑀯𑀤𑁂𑀬𑁆𑀬. 𑀇𑀢𑀺 𑀇𑀫𑀸𑀬𑀧𑀺 𑀉𑀧𑀟𑁆𑀠𑀕𑀸𑀣𑀸𑀬 𑀓𑀸𑀮𑀺𑀓𑀸 𑀓𑀸𑀫𑀸 𑀓𑀣𑀺𑀢𑀸.

𑀢𑀻𑀲𑀼 𑀯𑀺𑀥𑀸𑀲𑀽𑀢𑀺 𑀢𑀻𑀲𑀼 𑀫𑀸𑀦𑁂𑀲𑀼. ‘‘𑀏𑀓𑀯𑀺𑀥𑁂𑀦 𑀭𑀽𑀧𑀲𑀗𑁆𑀕𑀳𑁄’’𑀢𑀺𑀆𑀤𑀻𑀲𑀼 (𑀥. 𑀲. 𑁫𑁮𑁪) 𑀳𑀺 𑀓𑁄𑀝𑁆𑀞𑀸𑀲𑁄 ‘‘𑀯𑀺𑀥𑁄’’𑀢𑀺 𑀯𑀼𑀢𑁆𑀢𑁄. ‘‘𑀓𑀣𑀁𑀯𑀺𑀥𑀁 𑀲𑀻𑀮𑀯𑀦𑁆𑀢𑀁 𑀯𑀤𑀦𑁆𑀢𑀺, 𑀓𑀣𑀁𑀯𑀺𑀥𑀁 𑀧𑀜𑁆𑀜𑀯𑀦𑁆𑀢𑀁 𑀯𑀤𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁧.𑁯𑁫) 𑀆𑀓𑀸𑀭𑁄. ‘‘𑀢𑀺𑀲𑁆𑀲𑁄 𑀇𑀫𑀸, 𑀪𑀺𑀓𑁆𑀔𑀯𑁂, 𑀯𑀺𑀥𑀸. 𑀓𑀢𑀫𑀸 𑀢𑀺𑀲𑁆𑀲𑁄? 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀯𑀺𑀥𑀸, 𑀲𑀤𑀺𑀲𑁄𑀳𑀫𑀲𑁆𑀫𑀻𑀢𑀺 𑀯𑀺𑀥𑀸, 𑀳𑀻𑀦𑁄𑀳𑀫𑀲𑁆𑀫𑀻𑀢𑀺 𑀯𑀺𑀥𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁧𑁬𑁨) 𑀫𑀸𑀦𑁄 ‘‘𑀯𑀺𑀥𑀸’’𑀢𑀺 𑀯𑀼𑀢𑁆𑀢𑁄. 𑀇𑀥𑀸𑀧𑀺 𑀫𑀸𑀦𑁄𑀯. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀻𑀲𑀼 𑀯𑀺𑀥𑀸𑀲𑀽𑀢𑀺 𑀢𑀻𑀲𑀼 𑀫𑀸𑀦𑁂𑀲𑀽’’𑀢𑀺. 𑀅𑀯𑀺𑀓𑀫𑁆𑀧𑀫𑀸𑀦𑁄𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀏𑀢𑁂𑀲𑀼 𑀲𑀗𑁆𑀔𑁂𑀧𑀢𑁄 𑀢𑀻𑀲𑀼, 𑀯𑀺𑀢𑁆𑀣𑀸𑀭𑀢𑁄 𑀦𑀯𑀲𑀼 𑀫𑀸𑀦𑁂𑀲𑀼 𑀦 𑀓𑀫𑁆𑀧𑀢𑀺, 𑀦 𑀘𑀮𑀢𑀺. 𑀲𑀫𑁄 𑀯𑀺𑀲𑁂𑀲𑀻𑀢𑀺 𑀦 𑀢𑀲𑁆𑀲 𑀳𑁄𑀢𑀻𑀢𑀺 𑀢𑀲𑁆𑀲 𑀧𑀳𑀻𑀦𑀫𑀸𑀦𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 ‘‘𑀅𑀳𑀁 𑀲𑀤𑀺𑀲𑁄’’𑀢𑀺 𑀯𑀸 ‘‘𑀲𑁂𑀬𑁆𑀬𑁄’’𑀢𑀺 𑀯𑀸 ‘‘𑀳𑀻𑀦𑁄’’𑀢𑀺 𑀯𑀸 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀘𑁆𑀙𑀺𑀫𑀧𑀤𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀢𑀺 𑀇𑀫𑀸𑀬𑀧𑀺 𑀉𑀧𑀟𑁆𑀠𑀕𑀸𑀣𑀸𑀬 𑀦𑀯𑀯𑀺𑀥𑁄 𑀲𑀦𑁆𑀤𑀺𑀝𑁆𑀞𑀺𑀓𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀓𑀣𑀺𑀢𑁄.

𑀧𑀳𑀸𑀲𑀺 𑀲𑀗𑁆𑀔𑀦𑁆𑀢𑀺, ‘‘𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄 𑀆𑀳𑀸𑀭𑀁 𑀆𑀳𑀸𑀭𑁂𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁪.𑁧𑁨𑁦, 𑁨𑁩𑁯) 𑀧𑀜𑁆𑀜𑀸 ‘‘𑀲𑀗𑁆𑀔𑀸’’𑀢𑀺 𑀆𑀕𑀢𑀸. ‘‘𑀅𑀢𑁆𑀣𑀺 𑀢𑁂 𑀓𑁄𑀘𑀺 𑀕𑀡𑀓𑁄 𑀯𑀸 𑀫𑀼𑀤𑁆𑀤𑀺𑀓𑁄 𑀯𑀸 𑀲𑀗𑁆𑀔𑀸𑀬𑀓𑁄 𑀯𑀸, 𑀬𑁄 𑀧𑀳𑁄𑀢𑀺 𑀕𑀗𑁆𑀕𑀸𑀬 𑀯𑀸𑀮𑀼𑀓𑀁 𑀕𑀡𑁂𑀢𑀼’’𑀦𑁆𑀢𑀺 (𑀲𑀁. 𑀦𑀺. 𑁪.𑁪𑁧𑁦) 𑀏𑀢𑁆𑀣 𑀕𑀡𑀦𑀸. ‘‘𑀲𑀜𑁆𑀜𑀸𑀦𑀺𑀤𑀸𑀦𑀸 𑀳𑀺 𑀧𑀧𑀜𑁆𑀘𑀲𑀗𑁆𑀔𑀸’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁮𑁮𑁦) 𑀓𑁄𑀝𑁆𑀞𑀸𑀲𑁄. ‘‘𑀬𑀸 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀗𑁆𑀔𑀸 𑀲𑀫𑀜𑁆𑀜𑀸’’𑀢𑀺 (𑀥. 𑀲. 𑁧𑁩𑁧𑁩-𑁧𑁩𑁧𑁫) 𑀏𑀢𑁆𑀣 𑀧𑀡𑁆𑀡𑀢𑁆𑀢𑀺 ‘‘𑀲𑀗𑁆𑀔𑀸’’𑀢𑀺 𑀆𑀕𑀢𑀸. 𑀇𑀥𑀸𑀧𑀺 𑀅𑀬𑀫𑁂𑀯 𑀅𑀥𑀺𑀧𑁆𑀧𑁂𑀢𑀸. 𑀧𑀳𑀸𑀲𑀺 𑀲𑀗𑁆𑀔𑀦𑁆𑀢𑀺 𑀧𑀤𑀲𑁆𑀲 𑀳𑀺 𑀅𑀬𑀫𑁂𑀯𑀢𑁆𑀣𑁄 𑁋 𑀭𑀢𑁆𑀢𑁄 𑀤𑀼𑀝𑁆𑀞𑁄 𑀫𑀽𑀴𑁆𑀳𑁄 𑀇𑀢𑀺 𑀇𑀫𑀁 𑀧𑀡𑁆𑀡𑀢𑁆𑀢𑀺𑀁 𑀔𑀻𑀡𑀸𑀲𑀯𑁄 𑀧𑀳𑀸𑀲𑀺 𑀚𑀳𑀺 𑀧𑀚𑀳𑀻𑀢𑀺.

𑀦 𑀯𑀺𑀫𑀸𑀦𑀫𑀚𑁆𑀛𑀕𑀸𑀢𑀺 𑀦𑀯𑀪𑁂𑀤𑀁 𑀢𑀺𑀯𑀺𑀥𑀫𑀸𑀦𑀁 𑀦 𑀉𑀧𑀕𑀢𑁄. 𑀦𑀺𑀯𑀸𑀲𑀝𑁆𑀞𑁂𑀦 𑀯𑀸 𑀫𑀸𑀢𑀼𑀓𑀼𑀘𑁆𑀙𑀺 ‘‘𑀯𑀺𑀫𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀦 𑀉𑀧𑀕𑀘𑁆𑀙𑀻𑀢𑀺𑀧𑀺 𑀅𑀢𑁆𑀣𑁄. 𑀅𑀦𑀸𑀕𑀢𑀢𑁆𑀣𑁂 𑀅𑀢𑀻𑀢𑀯𑀘𑀦𑀁. 𑀅𑀘𑁆𑀙𑁂𑀘𑁆𑀙𑀻𑀢𑀺 𑀙𑀺𑀦𑁆𑀤𑀺. 𑀙𑀺𑀦𑁆𑀦𑀕𑀦𑁆𑀣𑀦𑁆𑀢𑀺 𑀘𑀢𑁆𑀢𑀸𑀭𑁄 𑀕𑀦𑁆𑀣𑁂 𑀙𑀺𑀦𑁆𑀤𑀺𑀢𑁆𑀯𑀸 𑀞𑀺𑀢𑀁. 𑀅𑀦𑀻𑀖𑀦𑁆𑀢𑀺 𑀦𑀺𑀤𑁆𑀤𑀼𑀓𑁆𑀔𑀁. 𑀦𑀺𑀭𑀸𑀲𑀦𑁆𑀢𑀺 𑀦𑀺𑀢𑁆𑀢𑀡𑁆𑀳𑀁. 𑀧𑀭𑀺𑀬𑁂𑀲𑀫𑀸𑀦𑀸𑀢𑀺 𑀑𑀮𑁄𑀓𑀬𑀫𑀸𑀦𑀸. 𑀦𑀸𑀚𑁆𑀛𑀕𑀫𑀼𑀦𑁆𑀢𑀺 𑀦 𑀅𑀥𑀺𑀕𑀘𑁆𑀙𑀦𑁆𑀢𑀺 𑀦 𑀯𑀺𑀦𑁆𑀤𑀦𑁆𑀢𑀺 𑀦 𑀧𑀲𑁆𑀲𑀦𑁆𑀢𑀺. 𑀯𑀢𑁆𑀢𑀫𑀸𑀦𑀢𑁆𑀣𑁂 𑀅𑀢𑀻𑀢𑀯𑀘𑀦𑀁. 𑀇𑀥 𑀯𑀸 𑀳𑀼𑀭𑀁 𑀯𑀸𑀢𑀺 𑀇𑀥𑀮𑁄𑀓𑁂 𑀯𑀸 𑀧𑀭𑀮𑁄𑀓𑁂 𑀯𑀸. 𑀲𑀩𑁆𑀩𑀦𑀺𑀯𑁂𑀲𑀦𑁂𑀲𑀽𑀢𑀺 𑀢𑀬𑁄 𑀪𑀯𑀸, 𑀘𑀢𑀲𑁆𑀲𑁄 𑀬𑁄𑀦𑀺𑀬𑁄, 𑀧𑀜𑁆𑀘 𑀕𑀢𑀺𑀬𑁄, 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄, 𑀦𑀯 𑀲𑀢𑁆𑀢𑀸𑀯𑀸𑀲𑀸, 𑀇𑀢𑀺 𑀇𑀫𑁂𑀲𑀼𑀧𑀺 𑀲𑀩𑁆𑀩𑁂𑀲𑀼 𑀲𑀢𑁆𑀢𑀦𑀺𑀯𑁂𑀲𑀦𑁂𑀲𑀼 𑀏𑀯𑀭𑀽𑀧𑀁 𑀔𑀻𑀡𑀸𑀲𑀯𑀁 𑀓𑀸𑀬𑀲𑁆𑀲 𑀪𑁂𑀤𑀸 𑀉𑀧𑁆𑀧𑀚𑁆𑀚𑀫𑀸𑀦𑀁 𑀯𑀸 𑀉𑀧𑁆𑀧𑀦𑁆𑀦𑀁 𑀯𑀸 𑀦 𑀧𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀸𑀬 𑀕𑀸𑀣𑀸𑀬 𑀲𑀦𑁆𑀤𑀺𑀝𑁆𑀞𑀺𑀓𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀫𑁂𑀯 𑀓𑀣𑁂𑀲𑀺.

𑀇𑀫𑀜𑁆𑀘 𑀕𑀸𑀣𑀁 𑀲𑀼𑀢𑁆𑀯𑀸 𑀲𑀸𑀧𑀺 𑀤𑁂𑀯𑀢𑀸 𑀅𑀢𑁆𑀣𑀁 𑀲𑀮𑁆𑀮𑀓𑁆𑀔𑁂𑀲𑀺, 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀇𑀫𑀲𑁆𑀲 𑀔𑁆𑀯𑀸𑀳𑀁, 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀸𑀧𑀁 𑀦 𑀓𑀬𑀺𑀭𑀸𑀢𑀺 𑀕𑀸𑀣𑀸𑀬 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦𑀧𑀺 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀯𑀲𑁂𑀦𑀧𑀺. 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀯𑀲𑁂𑀦 𑀢𑀸𑀯 𑀯𑀘𑀲𑀸𑀢𑀺 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀲𑀼𑀘𑀭𑀺𑀢𑀁 𑀕𑀳𑀺𑀢𑀁. 𑀫𑀦𑀲𑀸𑀢𑀺 𑀢𑀺𑀯𑀺𑀥𑀁 𑀫𑀦𑁄𑀲𑀼𑀘𑀭𑀺𑀢𑀁 𑀕𑀳𑀺𑀢𑀁. 𑀓𑀸𑀬𑁂𑀦 𑀯𑀸 𑀓𑀺𑀜𑁆𑀘𑀦 𑀲𑀩𑁆𑀩𑀮𑁄𑀓𑁂𑀢𑀺 𑀢𑀺𑀯𑀺𑀥𑀁 𑀓𑀸𑀬𑀲𑀼𑀘𑀭𑀺𑀢𑀁 𑀕𑀳𑀺𑀢𑀁. 𑀇𑀫𑁂 𑀢𑀸𑀯 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀸 𑀳𑁄𑀦𑁆𑀢𑀺. 𑀓𑀸𑀫𑁂 𑀧𑀳𑀸𑀬𑀸𑀢𑀺 𑀇𑀫𑀺𑀦𑀸 𑀧𑀦 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀲𑀢𑀺𑀫𑀸 𑀲𑀫𑁆𑀧𑀚𑀸𑀦𑁄𑀢𑀺 𑀇𑀫𑀺𑀦𑀸 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀓𑀸𑀭𑀡𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀕𑀳𑀺𑀢𑀁. 𑀤𑀼𑀓𑁆𑀔𑀁 𑀦 𑀲𑁂𑀯𑁂𑀣 𑀅𑀦𑀢𑁆𑀣𑀲𑀁𑀳𑀺𑀢𑀦𑁆𑀢𑀺 𑀇𑀫𑀺𑀦𑀸 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀧𑀝𑀺𑀲𑀺𑀤𑁆𑀥𑁄. 𑀇𑀢𑀺 𑀤𑁂𑀯𑀢𑀸 ‘‘𑀉𑀪𑁄 𑀅𑀦𑁆𑀢𑁂 𑀯𑀺𑀯𑀚𑁆𑀚𑁂𑀢𑁆𑀯𑀸 𑀓𑀸𑀭𑀡𑁂𑀳𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀳𑀺 𑀲𑀤𑁆𑀥𑀺𑀁 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁂 𑀢𑀼𑀫𑁆𑀳𑁂𑀳𑀺 𑀓𑀣𑀺𑀢𑁂 𑀆𑀚𑀸𑀦𑀸𑀫𑀺 𑀪𑀕𑀯𑀸’’𑀢𑀺 𑀯𑀤𑀢𑀺.

𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀯𑀲𑁂𑀦 𑀧𑀦 𑀅𑀬𑀁 𑀦𑀬𑁄 𑁋 𑀢𑀲𑁆𑀫𑀺𑀁 𑀓𑀺𑀭 𑀞𑀸𑀦𑁂 𑀫𑀳𑀢𑀻 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀤𑁂𑀯𑀢𑀸 𑀬𑀣𑀸𑀞𑀸𑀦𑁂 𑀞𑀺𑀢𑀸𑀯 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀅𑀢𑁆𑀢𑀦𑀸 𑀅𑀥𑀺𑀕𑀢𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀤𑀲𑁆𑀲𑁂𑀦𑁆𑀢𑀻 𑀏𑀯𑀫𑀸𑀳. 𑀢𑀢𑁆𑀣 𑀯𑀘𑀲𑀸𑀢𑀺 𑀲𑀫𑁆𑀫𑀸𑀯𑀸𑀘𑀸 𑀕𑀳𑀺𑀢𑀸, 𑀫𑀦𑁄 𑀧𑀦 𑀅𑀗𑁆𑀕𑀁 𑀦 𑀳𑁄𑀢𑀻𑀢𑀺 𑀫𑀦𑀲𑀸𑀢𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀓𑀁 𑀘𑀺𑀢𑁆𑀢𑀁 𑀕𑀳𑀺𑀢𑀁. 𑀓𑀸𑀬𑁂𑀦 𑀯𑀸 𑀓𑀺𑀜𑁆𑀘𑀦 𑀲𑀩𑁆𑀩𑀮𑁄𑀓𑁂𑀢𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀕𑀳𑀺𑀢𑁄, 𑀆𑀚𑀻𑀯𑁄 𑀧𑀦 𑀯𑀸𑀘𑀸𑀓𑀫𑁆𑀫𑀦𑁆𑀢𑀧𑀓𑁆𑀔𑀺𑀓𑀢𑁆𑀢𑀸 𑀕𑀳𑀺𑀢𑁄𑀯 𑀳𑁄𑀢𑀺. 𑀲𑀢𑀺𑀫𑀸𑀢𑀺 𑀇𑀫𑀺𑀦𑀸 𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀬𑁄 𑀕𑀳𑀺𑀢𑀸. 𑀲𑀫𑁆𑀧𑀚𑀸𑀦𑁄𑀢𑀺𑀧𑀤𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸. 𑀓𑀸𑀫𑁂 𑀧𑀳𑀸𑀬, 𑀤𑀼𑀓𑁆𑀔𑀁 𑀦 𑀲𑁂𑀯𑁂𑀣𑀸𑀢𑀺𑀧𑀤𑀤𑁆𑀯𑀬𑁂𑀦 𑀅𑀦𑁆𑀢𑀤𑁆𑀯𑀬𑀯𑀚𑁆𑀚𑀦𑀁. 𑀇𑀢𑀺 𑀇𑀫𑁂 𑀤𑁆𑀯𑁂 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑀺𑀫𑀁 𑀧𑀝𑀺𑀧𑀤𑀁 𑀢𑀼𑀫𑁆𑀳𑁂𑀳𑀺 𑀓𑀣𑀺𑀢𑀁, 𑀆𑀚𑀸𑀦𑀸𑀫𑀺 𑀪𑀕𑀯𑀸𑀢𑀺 𑀯𑀢𑁆𑀯𑀸 𑀢𑀣𑀸𑀕𑀢𑀁 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀻𑀢𑀺.

𑀲𑀫𑀺𑀤𑁆𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀦𑁆𑀤𑀦𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀲𑀢𑁆𑀢𑀺𑀯𑀕𑁆𑀕𑁄

𑁧. 𑀲𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧. 𑀲𑀢𑁆𑀢𑀺𑀯𑀕𑁆𑀕𑀲𑁆𑀲 𑀧𑀞𑀫𑁂 𑀲𑀢𑁆𑀢𑀺𑀬𑀸𑀢𑀺 𑀤𑁂𑀲𑀦𑀸𑀲𑀻𑀲𑀫𑁂𑀢𑀁. 𑀏𑀓𑀢𑁄𑀔𑀸𑀭𑀸𑀤𑀺𑀦𑀸 𑀲𑀢𑁆𑀣𑁂𑀦𑀸𑀢𑀺 𑀅𑀢𑁆𑀣𑁄. 𑀑𑀫𑀝𑁆𑀞𑁄𑀢𑀺 𑀧𑀳𑀢𑁄. 𑀘𑀢𑁆𑀢𑀸𑀭𑁄 𑀳𑀺 𑀧𑀳𑀸𑀭𑀸 𑀑𑀫𑀝𑁆𑀞𑁄 𑀉𑀫𑁆𑀫𑀝𑁆𑀞𑁄 𑀫𑀝𑁆𑀞𑁄 𑀯𑀺𑀫𑀝𑁆𑀞𑁄𑀢𑀺. 𑀢𑀢𑁆𑀣 𑀉𑀧𑀭𑀺 𑀞𑀢𑁆𑀯𑀸 𑀅𑀥𑁄𑀫𑀼𑀔𑀁 𑀤𑀺𑀦𑁆𑀦𑀧𑀳𑀸𑀭𑁄 𑀑𑀫𑀝𑁆𑀞𑁄 𑀦𑀸𑀫; 𑀳𑁂𑀝𑁆𑀞𑀸 𑀞𑀢𑁆𑀯𑀸 𑀉𑀤𑁆𑀥𑀁𑀫𑀼𑀔𑀁 𑀤𑀺𑀦𑁆𑀦𑁄 𑀉𑀫𑁆𑀫𑀝𑁆𑀞𑁄 𑀦𑀸𑀫; 𑀅𑀕𑁆𑀕𑀴𑀲𑀽𑀘𑀺 𑀯𑀺𑀬 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀢𑁄 𑀫𑀝𑁆𑀞𑁄 𑀦𑀸𑀫; 𑀲𑁂𑀲𑁄 𑀲𑀩𑁆𑀩𑁄𑀧𑀺 𑀯𑀺𑀫𑀝𑁆𑀞𑁄 𑀦𑀸𑀫. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀑𑀫𑀝𑁆𑀞𑁄 𑀕𑀳𑀺𑀢𑁄. 𑀲𑁄 𑀳𑀺 𑀲𑀩𑁆𑀩𑀤𑀸𑀭𑀼𑀡𑁄 𑀤𑀼𑀭𑀼𑀤𑁆𑀥𑀭𑀲𑀮𑁆𑀮𑁄 𑀤𑀼𑀢𑁆𑀢𑀺𑀓𑀺𑀘𑁆𑀙𑁄 𑀅𑀦𑁆𑀢𑁄𑀤𑁄𑀲𑁄 𑀅𑀦𑁆𑀢𑁄𑀧𑀼𑀩𑁆𑀩𑀮𑁄𑀳𑀺𑀢𑁄𑀯 𑀳𑁄𑀢𑀺, 𑀧𑀼𑀩𑁆𑀩𑀮𑁄𑀳𑀺𑀢𑀁 𑀅𑀦𑀺𑀓𑁆𑀔𑀫𑀺𑀢𑁆𑀯𑀸 𑀯𑀡𑀫𑀼𑀔𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀧𑀼𑀩𑁆𑀩𑀮𑁄𑀳𑀺𑀢𑀁 𑀦𑀺𑀳𑀭𑀺𑀢𑀼𑀓𑀸𑀫𑁂𑀳𑀺 𑀫𑀜𑁆𑀘𑁂𑀦 𑀲𑀤𑁆𑀥𑀺𑀁 𑀩𑀦𑁆𑀥𑀺𑀢𑁆𑀯𑀸 𑀅𑀥𑁄𑀲𑀺𑀭𑁄 𑀓𑀸𑀢𑀩𑁆𑀩𑁄 𑀳𑁄𑀢𑀺, 𑀫𑀭𑀡𑀁 𑀯𑀸 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁 𑀧𑀸𑀧𑀼𑀡𑀸𑀢𑀺. 𑀧𑀭𑀺𑀩𑁆𑀩𑀚𑁂𑀢𑀺 𑀯𑀺𑀳𑀭𑁂𑀬𑁆𑀬.

𑀇𑀫𑀸𑀬 𑀕𑀸𑀣𑀸𑀬 𑀓𑀺𑀁 𑀓𑀣𑁂𑀢𑀺? 𑀬𑀣𑀸 𑀲𑀢𑁆𑀢𑀺𑀬𑀸 𑀑𑀫𑀝𑁆𑀞𑁄 𑀧𑀼𑀭𑀺𑀲𑁄 𑀲𑀮𑁆𑀮𑀼𑀩𑁆𑀩𑀳𑀦-𑀯𑀡𑀢𑀺𑀓𑀺𑀘𑁆𑀙𑀦𑀸𑀦𑀁 𑀅𑀢𑁆𑀣𑀸𑀬 𑀯𑀻𑀭𑀺𑀬𑀁 𑀆𑀭𑀪𑀢𑀺, 𑀧𑀬𑁄𑀕𑀁 𑀓𑀭𑁄𑀢𑀺 𑀧𑀭𑀓𑁆𑀓𑀫𑀢𑀺. 𑀬𑀣𑀸 𑀘 𑀟𑀬𑁆𑀳𑀫𑀸𑀦𑁄 𑀫𑀢𑁆𑀣𑀓𑁂 𑀆𑀤𑀺𑀢𑁆𑀢𑀲𑀻𑀲𑁄 𑀢𑀲𑁆𑀲 𑀦𑀺𑀩𑁆𑀩𑀸𑀧𑀦𑀢𑁆𑀣𑀸𑀬 𑀯𑀻𑀭𑀺𑀬𑀁 𑀆𑀭𑀪𑀢𑀺, 𑀧𑀬𑁄𑀕𑀁 𑀓𑀭𑁄𑀢𑀺 𑀧𑀭𑀓𑁆𑀓𑀫𑀢𑀺, 𑀏𑀯𑀫𑁂𑀯 𑀪𑀺𑀓𑁆𑀔𑀼 𑀓𑀸𑀫𑀭𑀸𑀕𑀁 𑀧𑀳𑀸𑀦𑀸𑀬 𑀲𑀢𑁄 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀯𑀺𑀳𑀭𑁂𑀬𑁆𑀬 𑀪𑀕𑀯𑀸𑀢𑀺 𑀓𑀣𑁂𑀲𑀺.

𑀅𑀣 𑀪𑀕𑀯𑀸 𑀘𑀺𑀦𑁆𑀢𑁂𑀲𑀺 𑁋 𑀇𑀫𑀸𑀬 𑀤𑁂𑀯𑀢𑀸𑀬 𑀉𑀧𑀫𑀸 𑀢𑀸𑀯 𑀤𑀴𑁆𑀳𑀁 𑀓𑀢𑁆𑀯𑀸 𑀆𑀦𑀻𑀢𑀸, 𑀅𑀢𑁆𑀣𑀁 𑀧𑀦 𑀧𑀭𑀺𑀢𑁆𑀢𑀓𑀁 𑀕𑀳𑁂𑀢𑁆𑀯𑀸 𑀞𑀺𑀢𑀸, 𑀧𑀼𑀦𑀧𑁆𑀧𑀼𑀦𑀁 𑀓𑀣𑁂𑀦𑁆𑀢𑀻𑀧𑀺 𑀳𑁂𑀲𑀸 𑀓𑀸𑀫𑀭𑀸𑀕𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀧𑀳𑀸𑀦𑀫𑁂𑀯 𑀓𑀣𑁂𑀬𑁆𑀬. 𑀬𑀸𑀯 𑀘 𑀓𑀸𑀫𑀭𑀸𑀕𑁄 𑀫𑀕𑁆𑀕𑁂𑀦 𑀦 𑀲𑀫𑀼𑀕𑁆𑀖𑀸𑀝𑀺𑀬𑀢𑀺, 𑀢𑀸𑀯 𑀅𑀦𑀼𑀩𑀤𑁆𑀥𑁄𑀯 𑀳𑁄𑀢𑀺. 𑀇𑀢𑀺 𑀢𑀫𑁂𑀯 𑀑𑀧𑀫𑁆𑀫𑀁 𑀕𑀳𑁂𑀢𑁆𑀯𑀸 𑀧𑀞𑀫𑀫𑀕𑁆𑀕𑀯𑀲𑁂𑀦 𑀤𑁂𑀲𑀦𑀁 𑀯𑀺𑀦𑀺𑀯𑀝𑁆𑀝𑁂𑀢𑁆𑀯𑀸 𑀤𑁂𑀲𑁂𑀦𑁆𑀢𑁄 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀧𑀼𑀭𑀺𑀫𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀧𑀞𑀫𑀁.

𑁨. 𑀨𑀼𑀲𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨. 𑀤𑀼𑀢𑀺𑀬𑁂 𑀦𑀸𑀨𑀼𑀲𑀦𑁆𑀢𑀁 𑀨𑀼𑀲𑀢𑀻𑀢𑀺 𑀓𑀫𑁆𑀫𑀁 𑀅𑀨𑀼𑀲𑀦𑁆𑀢𑀁 𑀯𑀺𑀧𑀸𑀓𑁄 𑀦 𑀨𑀼𑀲𑀢𑀺, 𑀓𑀫𑁆𑀫𑀫𑁂𑀯 𑀯𑀸 𑀅𑀨𑀼𑀲𑀦𑁆𑀢𑀁 𑀓𑀫𑁆𑀫𑀁 𑀦 𑀨𑀼𑀲𑀢𑀺. 𑀓𑀫𑁆𑀫𑀜𑁆𑀳𑀺 𑀦𑀸𑀓𑀭𑁄𑀢𑁄 𑀓𑀭𑀺𑀬𑀢𑀺. 𑀨𑀼𑀲𑀦𑁆𑀢𑀜𑁆𑀘 𑀢𑀢𑁄 𑀨𑀼𑀲𑁂𑀢𑀺 𑀓𑀫𑁆𑀫𑀁 𑀨𑀼𑀲𑀦𑁆𑀢𑀁 𑀯𑀺𑀧𑀸𑀓𑁄 𑀨𑀼𑀲𑀢𑀺, 𑀓𑀫𑁆𑀫𑀫𑁂𑀯 𑀯𑀸 𑀨𑀼𑀲𑀢𑀺. 𑀓𑀫𑁆𑀫𑀜𑁆𑀳𑀺 𑀓𑀭𑁄𑀢𑁄 𑀓𑀭𑀺𑀬𑀢𑀺. 𑀢𑀲𑁆𑀫𑀸 𑀨𑀼𑀲𑀦𑁆𑀢𑀁 𑀨𑀼𑀲𑀢𑀺, 𑀅𑀧𑁆𑀧𑀤𑀼𑀝𑁆𑀞𑀧𑀤𑁄𑀲𑀺𑀦𑀦𑁆𑀢𑀺 𑀬𑀲𑁆𑀫𑀸 𑀦 𑀅𑀨𑀼𑀲𑀦𑁆𑀢𑀁 𑀨𑀼𑀲𑀢𑀺, 𑀨𑀼𑀲𑀦𑁆𑀢𑀜𑁆𑀘 𑀨𑀼𑀲𑀢𑀺, 𑀅𑀬𑀁 𑀓𑀫𑁆𑀫𑀯𑀺𑀧𑀸𑀓𑀸𑀦𑀁 𑀥𑀫𑁆𑀫𑀢𑀸, 𑀢𑀲𑁆𑀫𑀸 𑀬𑁄 ‘‘𑀅𑀧𑁆𑀧𑀤𑀼𑀝𑁆𑀞𑀲𑁆𑀲 𑀦𑀭𑀲𑁆𑀲 𑀤𑀼𑀲𑁆𑀲𑀢𑀺, 𑀲𑀼𑀤𑁆𑀥𑀲𑁆𑀲 𑀧𑁄𑀲𑀲𑁆𑀲 𑀅𑀦𑀗𑁆𑀕𑀡𑀲𑁆𑀲𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁄 𑀅𑀧𑁆𑀧𑀤𑀼𑀝𑁆𑀞𑀧𑀤𑁄𑀲𑀻 𑀧𑀼𑀕𑁆𑀕𑀮𑁄, 𑀢𑀁 𑀧𑀼𑀕𑁆𑀕𑀮𑀁 𑀓𑀫𑁆𑀫𑀁 𑀨𑀼𑀲𑀦𑁆𑀢𑀫𑁂𑀯 𑀓𑀫𑁆𑀫𑀁 𑀨𑀼𑀲𑀢𑀺, 𑀯𑀺𑀧𑀸𑀓𑁄 𑀯𑀸 𑀨𑀼𑀲𑀢𑀺. 𑀲𑁄 𑀳𑀺 𑀧𑀭𑀲𑁆𑀲 𑀉𑀧𑀖𑀸𑀢𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺 𑀯𑀸 𑀫𑀸 𑀯𑀸, 𑀅𑀢𑁆𑀢𑀸 𑀧𑀦𑀸𑀦𑁂𑀦 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀞𑀧𑀺𑀢𑁄 𑀦𑀸𑀫 𑀳𑁄𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀢𑀫𑁂𑀯 𑀩𑀸𑀮𑀁 𑀧𑀘𑁆𑀘𑁂𑀢𑀺 𑀧𑀸𑀧𑀁, 𑀲𑀼𑀔𑀼𑀫𑁄 𑀭𑀚𑁄 𑀧𑀝𑀺𑀯𑀸𑀢𑀁𑀯 𑀔𑀺𑀢𑁆𑀢𑁄’’𑀢𑀺. 𑀤𑀼𑀢𑀺𑀬𑀁.

𑁩. 𑀚𑀝𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩. 𑀢𑀢𑀺𑀬𑁂 𑀅𑀦𑁆𑀢𑁄𑀚𑀝𑀸𑀢𑀺 𑀕𑀸𑀣𑀸𑀬𑀁 𑀚𑀝𑀸𑀢𑀺 𑀢𑀡𑁆𑀳𑀸𑀬 𑀚𑀸𑀮𑀺𑀦𑀺𑀬𑀸 𑀅𑀥𑀺𑀯𑀘𑀦𑀁. 𑀲𑀸 𑀳𑀺 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀳𑁂𑀝𑁆𑀞𑀼𑀧𑀭𑀺𑀬𑀯𑀲𑁂𑀦 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑀢𑁄 𑀲𑀁𑀲𑀺𑀩𑁆𑀩𑀦𑀝𑁆𑀞𑁂𑀦 𑀯𑁂𑀴𑀼𑀕𑀼𑀫𑁆𑀩𑀸𑀤𑀻𑀦𑀁 𑀲𑀸𑀔𑀸𑀚𑀸𑀮𑀲𑀗𑁆𑀔𑀸𑀢𑀸 𑀚𑀝𑀸 𑀯𑀺𑀬𑀸𑀢𑀺 𑀚𑀝𑀸. 𑀲𑀸 𑀧𑀦𑁂𑀲𑀸 𑀲𑀓𑀧𑀭𑀺𑀓𑁆𑀔𑀸𑀭𑀧𑀭𑀧𑀭𑀺𑀓𑁆𑀔𑀸𑀭𑁂𑀲𑀼 𑀲𑀓𑀅𑀢𑁆𑀢𑀪𑀸𑀯-𑀧𑀭𑀅𑀢𑁆𑀢𑀪𑀸𑀯𑁂𑀲𑀼 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦-𑀩𑀸𑀳𑀺𑀭𑀸𑀬𑀢𑀦𑁂𑀲𑀼 𑀘 𑀉𑀧𑁆𑀧𑀚𑁆𑀚𑀦𑀢𑁄 𑀅𑀦𑁆𑀢𑁄𑀚𑀝𑀸 𑀩𑀳𑀺𑀚𑀝𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀸𑀬 𑀏𑀯𑀁 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀚𑀝𑀸𑀬 𑀚𑀝𑀺𑀢𑀸 𑀧𑀚𑀸. 𑀬𑀣𑀸 𑀦𑀸𑀫 𑀯𑁂𑀴𑀼𑀚𑀝𑀸𑀤𑀻𑀳𑀺 𑀯𑁂𑀴𑀼𑀆𑀤𑀬𑁄, 𑀏𑀯𑀁 𑀢𑀸𑀬 𑀢𑀡𑁆𑀳𑀸𑀚𑀝𑀸𑀬 𑀲𑀩𑁆𑀩𑀸𑀧𑀺 𑀅𑀬𑀁 𑀲𑀢𑁆𑀢𑀦𑀺𑀓𑀸𑀬𑀲𑀗𑁆𑀔𑀸𑀢𑀸 𑀧𑀚𑀸 𑀚𑀝𑀺𑀢𑀸 𑀯𑀺𑀦𑀤𑁆𑀥𑀸, 𑀲𑀁𑀲𑀺𑀩𑁆𑀩𑀺𑀢𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀘 𑀏𑀯𑀁 𑀚𑀝𑀺𑀢𑀸, 𑀢𑀁 𑀢𑀁 𑀕𑁄𑀢𑀫 𑀧𑀼𑀘𑁆𑀙𑀸𑀫𑀻𑀢𑀺 𑀢𑀲𑁆𑀫𑀸 𑀢𑀁 𑀧𑀼𑀘𑁆𑀙𑀸𑀫𑀺. 𑀕𑁄𑀢𑀫𑀸𑀢𑀺 𑀪𑀕𑀯𑀦𑁆𑀢𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺. 𑀓𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝𑀦𑁆𑀢𑀺 𑀇𑀫𑀁 𑀏𑀯𑀁 𑀢𑁂𑀥𑀸𑀢𑀼𑀓𑀁 𑀚𑀝𑁂𑀢𑁆𑀯𑀸 𑀞𑀺𑀢𑀁 𑀚𑀝𑀁 𑀓𑁄 𑀯𑀺𑀚𑀝𑁂𑀬𑁆𑀬, 𑀯𑀺𑀚𑀝𑁂𑀢𑀼𑀁 𑀓𑁄 𑀲𑀫𑀢𑁆𑀣𑁄𑀢𑀺 𑀧𑀼𑀘𑁆𑀙𑀢𑀺.

𑀅𑀣𑀲𑁆𑀲 𑀪𑀕𑀯𑀸 𑀢𑀫𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬𑀸𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂 𑀞𑀢𑁆𑀯𑀸. 𑀏𑀢𑁆𑀣 𑀘 𑀪𑀕𑀯𑀸 𑀚𑀝𑀸𑀯𑀺𑀚𑀝𑀦𑀁 𑀧𑀼𑀘𑁆𑀙𑀺𑀢𑁄 𑀲𑀻𑀮𑀁 𑀆𑀭𑀪𑀦𑁆𑀢𑁄 𑀦 ‘‘𑀅𑀜𑁆𑀜𑀁 𑀧𑀼𑀝𑁆𑀞𑁄 𑀅𑀜𑁆𑀜𑀁 𑀓𑀣𑁂𑀢𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀚𑀝𑀸𑀯𑀺𑀚𑀝𑀓𑀲𑁆𑀲 𑀳𑀺 𑀧𑀢𑀺𑀝𑁆𑀞𑀸𑀤𑀲𑁆𑀲𑀦𑀢𑁆𑀣𑀫𑁂𑀢𑁆𑀣 𑀲𑀻𑀮𑀁 𑀓𑀣𑀺𑀢𑀁.

𑀦𑀭𑁄𑀢𑀺 𑀲𑀢𑁆𑀢𑁄. 𑀲𑀧𑀜𑁆𑀜𑁄𑀢𑀺 𑀓𑀫𑁆𑀫𑀚𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀧𑀜𑁆𑀜𑀸𑀬 𑀧𑀜𑁆𑀜𑀯𑀸. 𑀘𑀺𑀢𑁆𑀢𑀁 𑀧𑀜𑁆𑀜𑀜𑁆𑀘 𑀪𑀸𑀯𑀬𑀦𑁆𑀢𑀺 𑀲𑀫𑀸𑀥𑀺𑀜𑁆𑀘𑁂𑀯 𑀯𑀺𑀧𑀲𑁆𑀲𑀦𑀜𑁆𑀘 𑀪𑀸𑀯𑀬𑀫𑀸𑀦𑁄. 𑀘𑀺𑀢𑁆𑀢𑀲𑀻𑀲𑁂𑀦 𑀳𑁂𑀢𑁆𑀣 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀓𑀣𑀺𑀢𑀸, 𑀧𑀜𑁆𑀜𑀸𑀦𑀸𑀫𑁂𑀦 𑀯𑀺𑀧𑀲𑁆𑀲𑀦𑀸. 𑀆𑀢𑀸𑀧𑀻𑀢𑀺 𑀯𑀻𑀭𑀺𑀬𑀯𑀸. 𑀯𑀻𑀭𑀺𑀬𑀜𑁆𑀳𑀺 𑀓𑀺𑀮𑁂𑀲𑀸𑀦𑀁 𑀆𑀢𑀸𑀧𑀦𑀧𑀭𑀺𑀢𑀸𑀧𑀦𑀝𑁆𑀞𑁂𑀦 ‘‘𑀆𑀢𑀸𑀧𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀤𑀲𑁆𑀲 𑀅𑀢𑁆𑀣𑀻𑀢𑀺 𑀆𑀢𑀸𑀧𑀻. 𑀦𑀺𑀧𑀓𑁄𑀢𑀺 𑀦𑁂𑀧𑀓𑁆𑀓𑀁 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀧𑀤𑁂𑀦 𑀧𑀸𑀭𑀺𑀳𑀸𑀭𑀺𑀬𑀧𑀜𑁆𑀜𑀁 𑀤𑀲𑁆𑀲𑁂𑀢𑀺. 𑀧𑀸𑀭𑀺𑀳𑀸𑀭𑀺𑀬𑀧𑀜𑁆𑀜𑀸 𑀦𑀸𑀫 ‘‘𑀅𑀬𑀁 𑀓𑀸𑀮𑁄 𑀉𑀤𑁆𑀤𑁂𑀲𑀲𑁆𑀲, 𑀅𑀬𑀁 𑀓𑀸𑀮𑁄 𑀧𑀭𑀺𑀧𑀼𑀘𑁆𑀙𑀸𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀓𑀸𑀭𑀸𑀧𑀺𑀢𑀸 𑀧𑀭𑀺𑀳𑀭𑀺𑀢𑀩𑁆𑀩𑀧𑀜𑁆𑀜𑀸. 𑀇𑀫𑀲𑁆𑀫𑀺𑀜𑁆𑀳𑀺 𑀧𑀜𑁆𑀳𑀸𑀩𑁆𑀬𑀸𑀓𑀭𑀡𑁂 𑀢𑀺𑀓𑁆𑀔𑀢𑁆𑀢𑀼𑀁 𑀧𑀜𑁆𑀜𑀸 𑀆𑀕𑀢𑀸. 𑀢𑀢𑁆𑀣 𑀧𑀞𑀫𑀸 𑀚𑀸𑀢𑀺𑀧𑀜𑁆𑀜𑀸, 𑀤𑀼𑀢𑀺𑀬𑀸 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸, 𑀢𑀢𑀺𑀬𑀸 𑀲𑀩𑁆𑀩𑀓𑀺𑀘𑁆𑀘𑀧𑀭𑀺𑀡𑀸𑀬𑀺𑀓𑀸 𑀧𑀸𑀭𑀺𑀳𑀸𑀭𑀺𑀬𑀧𑀜𑁆𑀜𑀸.

𑀲𑁄 𑀇𑀫𑀁 𑀯𑀺𑀚𑀝𑀬𑁂 𑀚𑀝𑀦𑁆𑀢𑀺 𑀲𑁄 𑀇𑀫𑁂𑀳𑀺 𑀲𑀻𑀮𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼. 𑀬𑀣𑀸 𑀦𑀸𑀫 𑀧𑀼𑀭𑀺𑀲𑁄 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀸𑀬 𑀲𑀼𑀦𑀺𑀲𑀺𑀢𑀁 𑀲𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀫𑀳𑀦𑁆𑀢𑀁 𑀯𑁂𑀴𑀼𑀕𑀼𑀫𑁆𑀩𑀁 𑀯𑀺𑀚𑀝𑁂𑀬𑁆𑀬, 𑀏𑀯𑀫𑁂𑀯𑀁 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀲𑀫𑀸𑀥𑀺𑀲𑀺𑀮𑀸𑀬𑀁 𑀲𑀼𑀦𑀺𑀲𑀺𑀢𑀁 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀲𑀢𑁆𑀣𑀁 𑀯𑀻𑀭𑀺𑀬𑀩𑀮𑀧𑀕𑁆𑀕𑀳𑀺𑀢𑁂𑀦 𑀧𑀸𑀭𑀺𑀳𑀸𑀭𑀺𑀬𑀧𑀜𑁆𑀜𑀸𑀳𑀢𑁆𑀣𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑀩𑁆𑀩𑀫𑁆𑀧𑀺 𑀢𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀧𑀢𑀺𑀢𑀁 𑀢𑀡𑁆𑀳𑀸𑀚𑀝𑀁 𑀯𑀺𑀚𑀝𑁂𑀬𑁆𑀬 𑀲𑀜𑁆𑀙𑀺𑀦𑁆𑀤𑁂𑀬𑁆𑀬 𑀲𑀫𑁆𑀧𑀤𑀸𑀮𑁂𑀬𑁆𑀬𑀸𑀢𑀺.

𑀏𑀢𑁆𑀢𑀸𑀯𑀢𑀸 𑀲𑁂𑀔𑀪𑀽𑀫𑀺𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀚𑀝𑀁 𑀯𑀺𑀚𑀝𑁂𑀢𑁆𑀯𑀸 𑀞𑀺𑀢𑀁 𑀫𑀳𑀸𑀔𑀻𑀡𑀸𑀲𑀯𑀁 𑀤𑀲𑁆𑀲𑁂𑀦𑁆𑀢𑁄 𑀬𑁂𑀲𑀦𑁆𑀢𑀺𑀆𑀤𑀺𑀫𑀸𑀳. 𑀏𑀯𑀁 𑀚𑀝𑀁 𑀯𑀺𑀚𑀝𑁂𑀢𑁆𑀯𑀸 𑀞𑀺𑀢𑀁 𑀔𑀻𑀡𑀸𑀲𑀯𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀚𑀝𑀸𑀬 𑀯𑀺𑀚𑀝𑀦𑁄𑀓𑀸𑀲𑀁 𑀤𑀲𑁆𑀲𑁂𑀦𑁆𑀢𑁄 𑀬𑀢𑁆𑀣 𑀦𑀸𑀫𑀜𑁆𑀘𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀸𑀫𑀦𑁆𑀢𑀺 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸. 𑀧𑀝𑀺𑀖𑀁 𑀭𑀽𑀧𑀲𑀜𑁆𑀜𑀸 𑀘𑀸𑀢𑀺 𑀏𑀢𑁆𑀣 𑀧𑀝𑀺𑀖𑀲𑀜𑁆𑀜𑀸𑀯𑀲𑁂𑀦 𑀓𑀸𑀫𑀪𑀯𑁄 𑀕𑀳𑀺𑀢𑁄, 𑀭𑀽𑀧𑀲𑀜𑁆𑀜𑀸𑀯𑀲𑁂𑀦 𑀭𑀽𑀧𑀪𑀯𑁄. 𑀢𑁂𑀲𑀼 𑀤𑁆𑀯𑀻𑀲𑀼 𑀕𑀳𑀺𑀢𑁂𑀲𑀼 𑀅𑀭𑀽𑀧𑀪𑀯𑁄 𑀕𑀳𑀺𑀢𑁄𑀯 𑀳𑁄𑀢𑀺 𑀪𑀯𑀲𑀗𑁆𑀔𑁂𑀧𑁂𑀦𑀸𑀢𑀺. 𑀏𑀢𑁆𑀣𑁂𑀲𑀸 𑀙𑀺𑀚𑁆𑀚𑀢𑁂 𑀚𑀝𑀸𑀢𑀺 𑀏𑀢𑁆𑀣 𑀢𑁂𑀪𑀽𑀫𑀓𑀯𑀝𑁆𑀝𑀲𑁆𑀲 𑀧𑀭𑀺𑀬𑀸𑀤𑀺𑀬𑀦𑀝𑁆𑀞𑀸𑀦𑁂 𑀏𑀲𑀸 𑀚𑀝𑀸 𑀙𑀺𑀚𑁆𑀚𑀢𑀺, 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀙𑀺𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀻𑀢𑀺 𑀅𑀬𑀁 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀢𑀢𑀺𑀬𑀁.

𑁪. 𑀫𑀦𑁄𑀦𑀺𑀯𑀸𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪. 𑀘𑀢𑀼𑀢𑁆𑀣𑁂 𑀬𑀢𑁄 𑀬𑀢𑁄𑀢𑀺 𑀧𑀸𑀧𑀢𑁄 𑀯𑀸 𑀓𑀮𑁆𑀬𑀸𑀡𑀢𑁄 𑀯𑀸. 𑀅𑀬𑀁 𑀓𑀺𑀭 𑀤𑁂𑀯𑀢𑀸 ‘‘𑀬𑀁𑀓𑀺𑀜𑁆𑀘𑀺 𑀓𑀼𑀲𑀮𑀸𑀤𑀺𑀪𑁂𑀤𑀁 𑀮𑁄𑀓𑀺𑀬𑀁 𑀯𑀸 𑀮𑁄𑀓𑀼𑀢𑁆𑀢𑀭𑀁 𑀯𑀸 𑀫𑀦𑁄, 𑀢𑀁 𑀦𑀺𑀯𑀸𑀭𑁂𑀢𑀩𑁆𑀩𑀫𑁂𑀯, 𑀦 𑀉𑀧𑁆𑀧𑀸𑀤𑁂𑀢𑀩𑁆𑀩’’𑀦𑁆𑀢𑀺 𑀏𑀯𑀁𑀮𑀤𑁆𑀥𑀺𑀓𑀸. 𑀲 𑀲𑀩𑁆𑀩𑀢𑁄𑀢𑀺 𑀲𑁄 𑀲𑀩𑁆𑀩𑀢𑁄. 𑀅𑀣 𑀪𑀕𑀯𑀸 𑁋 ‘‘𑀅𑀬𑀁 𑀤𑁂𑀯𑀢𑀸 𑀅𑀦𑀺𑀬𑁆𑀬𑀸𑀦𑀺𑀓𑀓𑀣𑀁 𑀓𑀣𑁂𑀢𑀺, 𑀫𑀦𑁄 𑀦𑀸𑀫 𑀦𑀺𑀯𑀸𑀭𑁂𑀢𑀩𑁆𑀩𑀫𑁆𑀧𑀺 𑀅𑀢𑁆𑀣𑀺 𑀪𑀸𑀯𑁂𑀢𑀩𑁆𑀩𑀫𑁆𑀧𑀺, 𑀯𑀺𑀪𑀚𑀺𑀢𑁆𑀯𑀸 𑀦𑀫𑀲𑁆𑀲𑀸 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀤𑀼𑀢𑀺𑀬𑀕𑀸𑀣𑀁 𑀆𑀳. 𑀢𑀢𑁆𑀣 𑀦 𑀫𑀦𑁄 𑀲𑀁𑀬𑀢𑀢𑁆𑀢𑀫𑀸𑀕𑀢𑀦𑁆𑀢𑀺, 𑀬𑀁 𑀯𑀼𑀢𑁆𑀢𑀁 ‘‘𑀦 𑀲𑀩𑁆𑀩𑀢𑁄 𑀫𑀦𑁄 𑀦𑀺𑀯𑀸𑀭𑀬𑁂’’𑀢𑀺, 𑀓𑀢𑀭𑀁 𑀢𑀁 𑀫𑀦𑁄, 𑀬𑀁 𑀢𑀁 𑀲𑀩𑁆𑀩𑀢𑁄 𑀦 𑀦𑀺𑀯𑀸𑀭𑁂𑀢𑀩𑁆𑀩𑀦𑁆𑀢𑀺 𑀘𑁂. 𑀫𑀦𑁄 𑀲𑀁𑀬𑀢𑀢𑁆𑀢𑀁 𑀆𑀕𑀢𑀁, 𑀬𑀁 𑀫𑀦𑁄 𑀬𑀢𑁆𑀣 𑀲𑀁𑀬𑀢𑀪𑀸𑀯𑀁 𑀆𑀕𑀢𑀁, ‘‘𑀤𑀸𑀦𑀁 𑀤𑀲𑁆𑀲𑀸𑀫𑀺, 𑀲𑀻𑀮𑀁 𑀭𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀉𑀧𑁆𑀧𑀦𑁆𑀦𑀁, 𑀏𑀢𑀁 𑀫𑀦𑁄 𑀦 𑀦𑀺𑀯𑀸𑀭𑁂𑀢𑀩𑁆𑀩𑀁, 𑀅𑀜𑁆𑀜𑀤𑀢𑁆𑀣𑀼 𑀩𑁆𑀭𑀽𑀳𑁂𑀢𑀩𑁆𑀩𑀁 𑀯𑀟𑁆𑀠𑁂𑀢𑀩𑁆𑀩𑀁. 𑀬𑀢𑁄 𑀬𑀢𑁄 𑀘 𑀧𑀸𑀧𑀓𑀦𑁆𑀢𑀺 𑀬𑀢𑁄 𑀬𑀢𑁄 𑀅𑀓𑀼𑀲𑀮𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁄 𑀢𑀢𑁄 𑀘 𑀢𑀁 𑀦𑀺𑀯𑀸𑀭𑁂𑀢𑀩𑁆𑀩𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀅𑀭𑀳𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫. 𑀧𑀜𑁆𑀘𑀫𑁂 𑀓𑀢𑀸𑀯𑀻𑀢𑀺 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀓𑀢𑀓𑀺𑀘𑁆𑀘𑁄. 𑀅𑀳𑀁 𑀯𑀤𑀸𑀫𑀻𑀢𑀺 𑀅𑀬𑀁 𑀤𑁂𑀯𑀢𑀸 𑀯𑀦𑀲𑀡𑁆𑀟𑀯𑀸𑀲𑀺𑀦𑀻, 𑀲𑀸 𑀆𑀭𑀜𑁆𑀜𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 ‘‘𑀅𑀳𑀁 𑀪𑀼𑀜𑁆𑀚𑀸𑀫𑀺, 𑀅𑀳𑀁 𑀦𑀺𑀲𑀻𑀤𑀸𑀫𑀺, 𑀫𑀫 𑀧𑀢𑁆𑀢𑁄, 𑀫𑀫 𑀘𑀻𑀯𑀭’’𑀦𑁆𑀢𑀺𑀆𑀤𑀺𑀓𑀣𑀸𑀯𑁄𑀳𑀸𑀭𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀇𑀫𑁂 𑀪𑀺𑀓𑁆𑀔𑀽 ‘𑀔𑀻𑀡𑀸𑀲𑀯𑀸’𑀢𑀺 𑀫𑀜𑁆𑀜𑀸𑀫𑀺, 𑀔𑀻𑀡𑀸𑀲𑀯𑀸𑀦𑀜𑁆𑀘 𑀦𑀸𑀫 𑀏𑀯𑀭𑀽𑀧𑀸 𑀅𑀢𑁆𑀢𑀼𑀧𑀮𑀤𑁆𑀥𑀺𑀦𑀺𑀲𑁆𑀲𑀺𑀢𑀓𑀣𑀸 𑀳𑁄𑀢𑀺, 𑀦 𑀳𑁄𑀢𑀺 𑀦𑀼 𑀔𑁄’’𑀢𑀺 𑀚𑀸𑀦𑀦𑀢𑁆𑀣𑀁 𑀏𑀯𑀁 𑀧𑀼𑀘𑁆𑀙𑀢𑀺.

𑀲𑀸𑀫𑀜𑁆𑀜𑀦𑁆𑀢𑀺 𑀮𑁄𑀓𑀦𑀺𑀭𑀼𑀢𑁆𑀢𑀺𑀁 𑀮𑁄𑀓𑀯𑁄𑀳𑀸𑀭𑀁. 𑀓𑀼𑀲𑀮𑁄𑀢𑀺 𑀔𑀦𑁆𑀥𑀸𑀤𑀻𑀲𑀼 𑀓𑀼𑀲𑀮𑁄. 𑀯𑁄𑀳𑀸𑀭𑀫𑀢𑁆𑀢𑁂𑀦𑀸𑀢𑀺 𑀉𑀧𑀮𑀤𑁆𑀥𑀺𑀦𑀺𑀲𑁆𑀲𑀺𑀢𑀓𑀣𑀁 𑀳𑀺𑀢𑁆𑀯𑀸 𑀯𑁄𑀳𑀸𑀭𑀪𑁂𑀤𑀁 𑀅𑀓𑀭𑁄𑀦𑁆𑀢𑁄 ‘‘𑀅𑀳𑀁, 𑀫𑀫𑀸’’𑀢𑀺 𑀯𑀤𑁂𑀬𑁆𑀬. ‘‘𑀔𑀦𑁆𑀥𑀸 𑀪𑀼𑀜𑁆𑀚𑀦𑁆𑀢𑀺, 𑀔𑀦𑁆𑀥𑀸 𑀦𑀺𑀲𑀻𑀤𑀦𑁆𑀢𑀺, 𑀔𑀦𑁆𑀥𑀸𑀦𑀁 𑀧𑀢𑁆𑀢𑁄, 𑀔𑀦𑁆𑀥𑀸𑀦𑀁 𑀘𑀻𑀯𑀭’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑁂 𑀯𑁄𑀳𑀸𑀭𑀪𑁂𑀤𑁄 𑀳𑁄𑀢𑀺, 𑀦 𑀓𑁄𑀘𑀺 𑀚𑀸𑀦𑀸𑀢𑀺. 𑀢𑀲𑁆𑀫𑀸 𑀏𑀯𑀁 𑀅𑀯𑀢𑁆𑀯𑀸 𑀮𑁄𑀓𑀯𑁄𑀳𑀸𑀭𑁂𑀦 𑀯𑁄𑀳𑀭𑀢𑀻𑀢𑀺.

𑀅𑀣 𑀤𑁂𑀯𑀢𑀸 𑁋 ‘‘𑀬𑀤𑀺 𑀤𑀺𑀝𑁆𑀞𑀺𑀬𑀸 𑀯𑀲𑁂𑀦 𑀦 𑀯𑀤𑀢𑀺, 𑀫𑀸𑀦𑀯𑀲𑁂𑀦 𑀦𑀼 𑀔𑁄 𑀯𑀤𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀦 𑀬𑁄 𑀳𑁄𑀢𑀻𑀢𑀺 𑀧𑀼𑀘𑁆𑀙𑀺. 𑀢𑀢𑁆𑀣 𑀫𑀸𑀦𑀁 𑀦𑀼 𑀔𑁄𑀢𑀺 𑀲𑁄 𑀪𑀺𑀓𑁆𑀔𑀼 𑀫𑀸𑀦𑀁 𑀉𑀧𑀕𑀦𑁆𑀢𑁆𑀯𑀸 𑀫𑀸𑀦𑀯𑀲𑁂𑀦 𑀯𑀤𑁂𑀬𑁆𑀬 𑀦𑀼 𑀔𑁄𑀢𑀺. 𑀅𑀣 𑀪𑀕𑀯𑀸 𑁋 ‘‘𑀅𑀬𑀁 𑀤𑁂𑀯𑀢𑀸 𑀔𑀻𑀡𑀸𑀲𑀯𑀁 𑀲𑀫𑀸𑀦𑀁 𑀯𑀺𑀬 𑀓𑀭𑁄𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀔𑀻𑀡𑀸𑀲𑀯𑀲𑁆𑀲 𑀦𑀯𑀯𑀺𑀥𑁄𑀧𑀺 𑀫𑀸𑀦𑁄 𑀧𑀳𑀻𑀦𑁄’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀧𑀝𑀺𑀕𑀸𑀣𑀁 𑀆𑀳. 𑀢𑀢𑁆𑀣 𑀯𑀺𑀥𑀽𑀧𑀺𑀢𑀸𑀢𑀺 𑀯𑀺𑀥𑀫𑀺𑀢𑀸. 𑀫𑀸𑀦𑀕𑀦𑁆𑀣𑀲𑁆𑀲𑀸𑀢𑀺 𑀫𑀸𑀦𑀸 𑀘 𑀕𑀦𑁆𑀣𑀸 𑀘 𑀅𑀲𑁆𑀲. 𑀫𑀜𑁆𑀜𑀢𑀦𑁆𑀢𑀺 𑀫𑀜𑁆𑀜𑀦𑀁. 𑀢𑀺𑀯𑀺𑀥𑀫𑁆𑀧𑀺 𑀢𑀡𑁆𑀳𑀸-𑀤𑀺𑀝𑁆𑀞𑀺-𑀫𑀸𑀦-𑀫𑀜𑁆𑀜𑀦𑀁 𑀲𑁄 𑀯𑀻𑀢𑀺𑀯𑀢𑁆𑀢𑁄, 𑀅𑀢𑀺𑀓𑁆𑀓𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺. 𑀧𑀜𑁆𑀘𑀫𑀁.

𑁬. 𑀧𑀚𑁆𑀚𑁄𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬. 𑀙𑀝𑁆𑀞𑁂 𑀧𑀼𑀝𑁆𑀞𑀼𑀦𑁆𑀢𑀺 𑀧𑀼𑀘𑁆𑀙𑀺𑀢𑀼𑀁. 𑀓𑀣𑀁 𑀚𑀸𑀦𑁂𑀫𑀽𑀢𑀺 𑀓𑀣𑀁 𑀚𑀸𑀦𑁂𑀬𑁆𑀬𑀸𑀫. 𑀤𑀺𑀯𑀸𑀭𑀢𑁆𑀢𑀺𑀦𑁆𑀢𑀺 𑀤𑀺𑀯𑀸 𑀘 𑀭𑀢𑁆𑀢𑀺𑀜𑁆𑀘. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀬𑀢𑁆𑀣 𑀬𑀢𑁆𑀣𑁂𑀯 𑀧𑀚𑁆𑀚𑀮𑀺𑀢𑁄 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣. 𑀏𑀲𑀸 𑀆𑀪𑀸𑀢𑀺 𑀏𑀲𑀸 𑀩𑀼𑀤𑁆𑀥𑀸𑀪𑀸. 𑀓𑀢𑀫𑀸 𑀧𑀦 𑀲𑀸𑀢𑀺? 𑀜𑀸𑀡𑀸𑀮𑁄𑀓𑁄 𑀯𑀸 𑀳𑁄𑀢𑀼 𑀧𑀻𑀢𑀺𑀆𑀮𑁄𑀓𑁄 𑀯𑀸 𑀧𑀲𑀸𑀤𑀸𑀮𑁄𑀓𑁄 𑀯𑀸 𑀥𑀫𑁆𑀫𑀓𑀣𑀸𑀆𑀮𑁄𑀓𑁄 𑀯𑀸, 𑀲𑀩𑁆𑀩𑁄𑀧𑀺 𑀩𑀼𑀤𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑀸 𑀉𑀧𑁆𑀧𑀦𑁆𑀦𑁄 𑀆𑀮𑁄𑀓𑁄 𑀩𑀼𑀤𑁆𑀥𑀸𑀪𑀸 𑀦𑀸𑀫. 𑀅𑀬𑀁 𑀅𑀦𑀼𑀢𑁆𑀢𑀭𑀸 𑀲𑀩𑁆𑀩𑀲𑁂𑀝𑁆𑀞𑀸 𑀅𑀲𑀤𑀺𑀲𑀸𑀢𑀺. 𑀙𑀝𑁆𑀞𑀁.

𑁭. 𑀲𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭. 𑀲𑀢𑁆𑀢𑀫𑁂 𑀓𑀼𑀢𑁄 𑀲𑀭𑀸 𑀦𑀺𑀯𑀢𑁆𑀢𑀦𑁆𑀢𑀻𑀢𑀺 𑀇𑀫𑁂 𑀲𑀁𑀲𑀸𑀭𑀲𑀭𑀸 𑀓𑀼𑀢𑁄 𑀦𑀺𑀯𑀢𑁆𑀢𑀦𑁆𑀢𑀺, 𑀓𑀺𑀁 𑀆𑀕𑀫𑁆𑀫 𑀦𑀧𑁆𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦 𑀕𑀸𑀥𑀢𑀻𑀢𑀺 𑀦 𑀧𑀢𑀺𑀝𑁆𑀞𑀸𑀢𑀺. 𑀅𑀢𑁄𑀢𑀺 𑀅𑀢𑁄 𑀦𑀺𑀩𑁆𑀩𑀸𑀦𑀢𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺. 𑀲𑀢𑁆𑀢𑀫𑀁.

𑁮. 𑀫𑀳𑀤𑁆𑀥𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮. 𑀅𑀝𑁆𑀞𑀫𑁂 𑀦𑀺𑀥𑀸𑀦𑀕𑀢𑀁 𑀫𑀼𑀢𑁆𑀢𑀲𑀸𑀭𑀸𑀤𑀺 𑀫𑀳𑀦𑁆𑀢𑀁 𑀥𑀦𑀫𑁂𑀢𑁂𑀲𑀦𑁆𑀢𑀺 𑀫𑀳𑀤𑁆𑀥𑀦𑀸. 𑀲𑀼𑀯𑀡𑁆𑀡𑀭𑀚𑀢𑀪𑀸𑀚𑀦𑀸𑀤𑀺 𑀫𑀳𑀸𑀪𑁄𑀕𑁄 𑀏𑀢𑁂𑀲𑀦𑁆𑀢𑀺 𑀫𑀳𑀸𑀪𑁄𑀕𑀸. 𑀅𑀜𑁆𑀜𑀫𑀜𑁆𑀜𑀸𑀪𑀺𑀕𑀺𑀚𑁆𑀛𑀦𑁆𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀁 𑀅𑀪𑀺𑀕𑀺𑀚𑁆𑀛𑀦𑁆𑀢𑀺 𑀧𑀢𑁆𑀣𑁂𑀦𑁆𑀢𑀺 𑀧𑀺𑀳𑁂𑀦𑁆𑀢𑀺. 𑀅𑀦𑀮𑀗𑁆𑀓𑀢𑀸𑀢𑀺 𑀅𑀢𑀺𑀢𑁆𑀢𑀸 𑀅𑀧𑀭𑀺𑀬𑀢𑁆𑀢𑀚𑀸𑀢𑀸. 𑀉𑀲𑁆𑀲𑀼𑀓𑁆𑀓𑀚𑀸𑀢𑁂𑀲𑀽𑀢𑀺 𑀦𑀸𑀦𑀸𑀓𑀺𑀘𑁆𑀘𑀚𑀸𑀢𑁂𑀲𑀼 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀭𑀽𑀧𑀸𑀤𑀻𑀦𑀁 𑀉𑀧𑁆𑀧𑀸𑀤𑀦𑀢𑁆𑀣𑀸𑀬 𑀉𑀧𑁆𑀧𑀦𑁆𑀦𑀸𑀦𑀁 𑀅𑀦𑀼𑀪𑀯𑀦𑀢𑁆𑀣𑀸𑀬 𑀉𑀲𑁆𑀲𑀼𑀓𑁆𑀓𑁂𑀲𑀼. 𑀪𑀯𑀲𑁄𑀢𑀸𑀦𑀼𑀲𑀸𑀭𑀻𑀲𑀽𑀢𑀺 𑀯𑀝𑁆𑀝𑀲𑁄𑀢𑀁 𑀅𑀦𑀼𑀲𑀭𑀦𑁆𑀢𑁂𑀲𑀼. 𑀅𑀦𑀼𑀲𑁆𑀲𑀼𑀓𑀸𑀢𑀺 𑀅𑀯𑀸𑀯𑀝𑀸. 𑀅𑀕𑀸𑀭𑀦𑁆𑀢𑀺 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀕𑁂𑀳𑀁. 𑀯𑀺𑀭𑀸𑀚𑀺𑀬𑀸𑀢𑀺 𑀯𑀺𑀭𑀸𑀚𑁂𑀢𑁆𑀯𑀸. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀅𑀝𑁆𑀞𑀫𑀁.

𑁯. 𑀘𑀢𑀼𑀘𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯. 𑀦𑀯𑀫𑁂 𑀘𑀢𑀼𑀘𑀓𑁆𑀓𑀦𑁆𑀢𑀺 𑀘𑀢𑀼𑀇𑀭𑀺𑀬𑀸𑀧𑀣𑀁. 𑀇𑀭𑀺𑀬𑀸𑀧𑀣𑁄 𑀳𑀺 𑀇𑀥 𑀘𑀓𑁆𑀓𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀦𑀯𑀤𑁆𑀯𑀸𑀭𑀦𑁆𑀢𑀺 𑀦𑀯𑀳𑀺 𑀯𑀡𑀫𑀼𑀔𑁂𑀳𑀺 𑀦𑀯𑀤𑁆𑀯𑀸𑀭𑀁. 𑀧𑀼𑀡𑁆𑀡𑀦𑁆𑀢𑀺 𑀅𑀲𑀼𑀘𑀺𑀧𑀽𑀭𑀁. 𑀮𑁄𑀪𑁂𑀦 𑀲𑀁𑀬𑀼𑀢𑀦𑁆𑀢𑀺 𑀢𑀡𑁆𑀳𑀸𑀬 𑀲𑀁𑀬𑀼𑀢𑁆𑀢𑀁. 𑀓𑀣𑀁 𑀬𑀸𑀢𑁆𑀭𑀸 𑀪𑀯𑀺𑀲𑁆𑀲𑀢𑀻𑀢𑀺 𑀏𑀢𑀲𑁆𑀲 𑀏𑀯𑀭𑀽𑀧𑀲𑁆𑀲 𑀲𑀭𑀻𑀭𑀲𑁆𑀲 𑀓𑀣𑀁 𑀦𑀺𑀕𑁆𑀕𑀫𑀦𑀁 𑀪𑀯𑀺𑀲𑁆𑀲𑀢𑀺, 𑀓𑀣𑀁 𑀫𑀼𑀢𑁆𑀢𑀺 𑀧𑀭𑀺𑀫𑀼𑀢𑁆𑀢𑀺 𑀲𑀫𑀢𑀺𑀓𑁆𑀓𑀫𑁄 𑀪𑀯𑀺𑀲𑁆𑀲𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀦𑀤𑁆𑀥𑀺𑀦𑁆𑀢𑀺 𑀉𑀧𑀦𑀸𑀳𑀁, 𑀧𑀼𑀩𑁆𑀩𑀓𑀸𑀮𑁂 𑀓𑁄𑀥𑁄, 𑀅𑀧𑀭𑀓𑀸𑀮𑁂 𑀉𑀧𑀦𑀸𑀳𑁄𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀩𑀮𑀯𑀓𑁄𑀥𑀦𑁆𑀢𑀺 𑀅𑀢𑁆𑀣𑁄. 𑀯𑀭𑀢𑁆𑀢𑀦𑁆𑀢𑀺 ‘‘𑀙𑁂𑀢𑁆𑀯𑀸 𑀦𑀤𑁆𑀥𑀺 𑀯𑀭𑀢𑁆𑀢𑀜𑁆𑀘, 𑀲𑀦𑁆𑀤𑀸𑀦𑀁 𑀲𑀳𑀦𑀼𑀓𑁆𑀓𑀫’’𑀦𑁆𑀢𑀺 𑀕𑀸𑀣𑀸𑀬 (𑀥. 𑀧. 𑁩𑁯𑁮; 𑀲𑀼. 𑀦𑀺. 𑁬𑁨𑁭) 𑀢𑀡𑁆𑀳𑀸 𑀯𑀭𑀢𑁆𑀢𑀸, 𑀤𑀺𑀝𑁆𑀞𑀺 𑀲𑀦𑁆𑀤𑀸𑀦𑀁 𑀦𑀸𑀫 𑀚𑀸𑀢𑀁. 𑀇𑀥 𑀧𑀦 𑀧𑀸𑀴𑀺𑀦𑀺𑀤𑁆𑀤𑀺𑀝𑁆𑀞𑁂 𑀓𑀺𑀮𑁂𑀲𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 ‘‘𑀯𑀭𑀢𑁆𑀢𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀇𑀢𑀺 𑀓𑀺𑀮𑁂𑀲𑀯𑀭𑀢𑁆𑀢𑀜𑁆𑀘 𑀙𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀇𑀘𑁆𑀙𑀸 𑀮𑁄𑀪𑀦𑁆𑀢𑀺 𑀏𑀓𑁄𑀬𑁂𑀯 𑀥𑀫𑁆𑀫𑁄 𑀇𑀘𑁆𑀙𑀦𑀝𑁆𑀞𑁂𑀦 𑀇𑀘𑁆𑀙𑀸, 𑀮𑀼𑀩𑁆𑀪𑀦𑀝𑁆𑀞𑁂𑀦 𑀮𑁄𑀪𑁄𑀢𑀺 𑀯𑀼𑀢𑁆𑀢𑁄. 𑀧𑀞𑀫𑀼𑀧𑁆𑀧𑀢𑁆𑀢𑀺𑀓𑀸 𑀯𑀸 𑀤𑀼𑀩𑁆𑀩𑀮𑀸 𑀇𑀘𑁆𑀙𑀸, 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀓𑁄 𑀩𑀮𑀯𑀸 𑀮𑁄𑀪𑁄. 𑀅𑀮𑀤𑁆𑀥𑀧𑀢𑁆𑀣𑀦𑀸 𑀯𑀸 𑀇𑀘𑁆𑀙𑀸, 𑀧𑀝𑀺𑀮𑀤𑁆𑀥𑀯𑀢𑁆𑀣𑀼𑀫𑁆𑀳𑀺 𑀮𑁄𑀪𑁄. 𑀲𑀫𑀽𑀮𑀁 𑀢𑀡𑁆𑀳𑀦𑁆𑀢𑀺 𑀅𑀯𑀺𑀚𑁆𑀚𑀸𑀫𑀽𑀮𑁂𑀦 𑀲𑀫𑀽𑀮𑀓𑀁 𑀢𑀡𑁆𑀳𑀁. 𑀅𑀩𑁆𑀩𑀼𑀬𑁆𑀳𑀸𑀢𑀺 𑀅𑀕𑁆𑀕𑀫𑀕𑁆𑀕𑁂𑀦 𑀉𑀧𑁆𑀧𑀸𑀝𑁂𑀢𑁆𑀯𑀸. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀦𑀯𑀫𑀁.

𑁧𑁦. 𑀏𑀡𑀺𑀚𑀗𑁆𑀖𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦. 𑀤𑀲𑀫𑁂 𑀏𑀡𑀺𑀚𑀗𑁆𑀖𑀦𑁆𑀢𑀺 𑀏𑀡𑀺𑀫𑀺𑀕𑀲𑁆𑀲 𑀯𑀺𑀬 𑀲𑀼𑀯𑀝𑁆𑀝𑀺𑀢𑀚𑀗𑁆𑀖𑀁. 𑀓𑀺𑀲𑀦𑁆𑀢𑀺 𑀅𑀣𑀽𑀮𑀁 𑀲𑀫𑀲𑀭𑀻𑀭𑀁. 𑀅𑀣 𑀯𑀸 𑀆𑀢𑀧𑁂𑀦 𑀫𑀺𑀮𑀸𑀢𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑁂𑀳𑀺 𑀅𑀦𑀼𑀧𑀩𑁆𑀭𑀽𑀳𑀺𑀢𑀲𑀭𑀻𑀭𑀦𑁆𑀢𑀺𑀧𑀺 𑀅𑀢𑁆𑀣𑁄. 𑀯𑀻𑀭𑀦𑁆𑀢𑀺 𑀯𑀻𑀭𑀺𑀬𑀯𑀦𑁆𑀢𑀁. 𑀅𑀧𑁆𑀧𑀸𑀳𑀸𑀭𑀦𑁆𑀢𑀺 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀬 𑀫𑀺𑀢𑀸𑀳𑀸𑀭𑀁, 𑀯𑀺𑀓𑀸𑀮𑀪𑁄𑀚𑀦𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀯𑀸 𑀧𑀭𑀺𑀢𑁆𑀢𑀸𑀳𑀸𑀭𑀁. 𑀅𑀮𑁄𑀮𑀼𑀧𑀦𑁆𑀢𑀺 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀮𑁄𑀮𑀼𑀧𑁆𑀧𑀯𑀺𑀭𑀳𑀺𑀢𑀁. 𑀭𑀲𑀢𑀡𑁆𑀳𑀸𑀧𑀝𑀺𑀓𑁆𑀔𑁂𑀧𑁄 𑀯𑀸 𑀏𑀲. 𑀲𑀻𑀳𑀁𑀯𑁂𑀓𑀘𑀭𑀁 𑀦𑀸𑀕𑀦𑁆𑀢𑀺 𑀏𑀓𑀘𑀭𑀁 𑀲𑀻𑀳𑀁 𑀯𑀺𑀬, 𑀏𑀓𑀘𑀭𑀁 𑀦𑀸𑀕𑀁 𑀯𑀺𑀬. 𑀕𑀡𑀯𑀸𑀲𑀺𑀦𑁄 𑀳𑀺 𑀧𑀫𑀢𑁆𑀢𑀸 𑀳𑁄𑀦𑁆𑀢𑀺, 𑀏𑀓𑀘𑀭𑀸 𑀅𑀧𑁆𑀧𑀫𑀢𑁆𑀢𑀸, 𑀢𑀲𑁆𑀫𑀸 𑀏𑀓𑀘𑀭𑀸𑀯 𑀕𑀳𑀺𑀢𑀸𑀢𑀺. 𑀧𑀯𑁂𑀤𑀺𑀢𑀸𑀢𑀺 𑀧𑀓𑀸𑀲𑀺𑀢𑀸 𑀓𑀣𑀺𑀢𑀸. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀦𑀸𑀫𑀭𑀽𑀧𑁂. 𑀧𑀜𑁆𑀘𑀓𑀸𑀫𑀕𑀼𑀡𑀯𑀲𑁂𑀦 𑀳𑀺 𑀭𑀽𑀧𑀁 𑀕𑀳𑀺𑀢𑀁, 𑀫𑀦𑁂𑀦 𑀦𑀸𑀫𑀁, 𑀉𑀪𑀬𑁂𑀳𑀺 𑀧𑀦 𑀅𑀯𑀺𑀦𑀺𑀪𑀼𑀢𑁆𑀢𑀥𑀫𑁆𑀫𑁂 𑀕𑀳𑁂𑀢𑁆𑀯𑀸 𑀧𑀜𑁆𑀘𑀓𑁆𑀔𑀦𑁆𑀥𑀸𑀤𑀺𑀯𑀲𑁂𑀦𑀧𑁂𑀢𑁆𑀣 𑀪𑀼𑀫𑁆𑀫𑀁 𑀬𑁄𑀚𑁂𑀢𑀩𑁆𑀩𑀦𑁆𑀢𑀺. 𑀤𑀲𑀫𑀁.

𑀲𑀢𑁆𑀢𑀺𑀯𑀕𑁆𑀕𑁄 𑀢𑀢𑀺𑀬𑁄.

𑁪. 𑀲𑀢𑀼𑀮𑁆𑀮𑀧𑀓𑀸𑀬𑀺𑀓𑀯𑀕𑁆𑀕𑁄

𑁧. 𑀲𑀩𑁆𑀪𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀲𑀢𑀼𑀮𑁆𑀮𑀧𑀓𑀸𑀬𑀺𑀓𑀯𑀕𑁆𑀕𑀲𑁆𑀲 𑀧𑀞𑀫𑁂 𑀲𑀢𑀼𑀮𑁆𑀮𑀧𑀓𑀸𑀬𑀺𑀓𑀸𑀢𑀺 𑀲𑀢𑀁 𑀥𑀫𑁆𑀫𑀁 𑀲𑀫𑀸𑀤𑀸𑀦𑀯𑀲𑁂𑀦 𑀉𑀮𑁆𑀮𑀧𑁂𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀸𑀢𑀺 𑀲𑀢𑀼𑀮𑁆𑀮𑀧𑀓𑀸𑀬𑀺𑀓𑀸. 𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀲𑀫𑁆𑀩𑀳𑀼𑀮𑀸 𑀓𑀺𑀭 𑀲𑀫𑀼𑀤𑁆𑀤𑀯𑀸𑀡𑀺𑀚𑀸 𑀦𑀸𑀯𑀸𑀬 𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀺𑀁𑀲𑀼. 𑀢𑁂𑀲𑀁 𑀔𑀺𑀢𑁆𑀢𑀲𑀭𑀯𑁂𑀕𑁂𑀦 𑀕𑀘𑁆𑀙𑀦𑁆𑀢𑀺𑀬𑀸 𑀦𑀸𑀯𑀸𑀬 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀫𑀼𑀤𑁆𑀤𑀫𑀚𑁆𑀛𑁂 𑀫𑀳𑀦𑁆𑀢𑀁 𑀉𑀧𑁆𑀧𑀸𑀢𑀺𑀓𑀁 𑀧𑀸𑀢𑀼𑀪𑀽𑀢𑀁, 𑀫𑀳𑀸𑀊𑀫𑀺𑀬𑁄 𑀉𑀝𑁆𑀞𑀳𑀺𑀢𑁆𑀯𑀸 𑀦𑀸𑀯𑀁 𑀉𑀤𑀓𑀲𑁆𑀲 𑀧𑀽𑀭𑁂𑀦𑁆𑀢𑀺. 𑀦𑀸𑀯𑀸𑀬 𑀦𑀺𑀫𑀼𑀚𑁆𑀚𑀫𑀸𑀦𑀸𑀬 𑀫𑀳𑀸𑀚𑀦𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀤𑁂𑀯𑀢𑀸𑀦𑀁 𑀦𑀸𑀫𑀸𑀦𑀺 𑀕𑀳𑁂𑀢𑁆𑀯𑀸 𑀆𑀬𑀸𑀘𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑁄 𑀧𑀭𑀺𑀤𑁂𑀯𑀺. 𑀢𑁂𑀲𑀁 𑀫𑀚𑁆𑀛𑁂 𑀏𑀓𑁄 𑀧𑀼𑀭𑀺𑀲𑁄 𑁋 ‘‘𑀅𑀢𑁆𑀣𑀺 𑀦𑀼 𑀔𑁄 𑀫𑁂 𑀏𑀯𑀭𑀽𑀧𑁂 𑀪𑀬𑁂 𑀧𑀢𑀺𑀝𑁆𑀞𑀸’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀅𑀢𑁆𑀢𑀦𑁄 𑀧𑀭𑀺𑀲𑀼𑀤𑁆𑀥𑀸𑀦𑀺 𑀲𑀭𑀡𑀸𑀦𑀺 𑀘𑁂𑀯 𑀲𑀻𑀮𑀸𑀦𑀺 𑀘 𑀤𑀺𑀲𑁆𑀯𑀸 𑀬𑁄𑀕𑀻 𑀯𑀺𑀬 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀢𑀫𑁂𑀦𑀁 𑀇𑀢𑀭𑁂 𑀲𑀪𑀬𑀓𑀸𑀭𑀡𑀁 𑀧𑀼𑀘𑁆𑀙𑀺𑀁𑀲𑀼. 𑀲𑁄 𑀢𑁂𑀲𑀁 𑀓𑀣𑁂𑀲𑀺 𑁋 ‘‘𑀅𑀫𑁆𑀪𑁄 𑀅𑀳𑀁 𑀦𑀸𑀯𑀁 𑀅𑀪𑀺𑀭𑀽𑀳𑀦𑀤𑀺𑀯𑀲𑁂 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀲𑀭𑀡𑀸𑀦𑀺 𑀘𑁂𑀯 𑀲𑀻𑀮𑀸𑀦𑀺 𑀘 𑀅𑀕𑁆𑀕𑀳𑁂𑀲𑀺𑀁, 𑀢𑁂𑀦 𑀫𑁂 𑀪𑀬𑀁 𑀦𑀢𑁆𑀣𑀻’’𑀢𑀺. 𑀓𑀺𑀁 𑀧𑀦 𑀲𑀸𑀫𑀺 𑀏𑀢𑀸𑀦𑀺 𑀅𑀜𑁆𑀜𑁂𑀲𑀫𑁆𑀧𑀺 𑀯𑀢𑁆𑀢𑀦𑁆𑀢𑀻𑀢𑀺? 𑀆𑀫 𑀯𑀢𑁆𑀢𑀦𑁆𑀢𑀻𑀢𑀺 𑀢𑁂𑀦 𑀳𑀺 𑀅𑀫𑁆𑀳𑀸𑀓𑀫𑁆𑀧𑀺 𑀤𑁂𑀣𑀸𑀢𑀺. 𑀲𑁄 𑀢𑁂 𑀫𑀦𑀼𑀲𑁆𑀲𑁂 𑀲𑀢𑀁 𑀲𑀢𑀁 𑀓𑀢𑁆𑀯𑀸 𑀲𑀢𑁆𑀢 𑀓𑁄𑀝𑁆𑀞𑀸𑀲𑁂 𑀅𑀓𑀸𑀲𑀺, 𑀢𑀢𑁄 𑀧𑀜𑁆𑀘𑀲𑀻𑀮𑀸𑀦𑀺 𑀅𑀤𑀸𑀲𑀺. 𑀢𑁂𑀲𑀼 𑀧𑀞𑀫𑀁 𑀚𑀗𑁆𑀖𑀲𑀢𑀁 𑀕𑁄𑀧𑁆𑀨𑀓𑀫𑀢𑁆𑀢𑁂 𑀉𑀤𑀓𑁂 𑀞𑀺𑀢𑀁 𑀅𑀕𑁆𑀕𑀳𑁂𑀲𑀺, 𑀤𑀼𑀢𑀺𑀬𑀁 𑀚𑀸𑀡𑀼𑀫𑀢𑁆𑀢𑁂, 𑀢𑀢𑀺𑀬𑀁 𑀓𑀝𑀺𑀫𑀢𑁆𑀢𑁂, 𑀘𑀢𑀼𑀢𑁆𑀣𑀁 𑀦𑀸𑀪𑀺𑀫𑀢𑁆𑀢𑁂, 𑀧𑀜𑁆𑀘𑀫𑀁 𑀣𑀦𑀫𑀢𑁆𑀢𑁂, 𑀙𑀝𑁆𑀞𑀁 𑀕𑀮𑀧𑁆𑀧𑀫𑀸𑀡𑁂, 𑀲𑀢𑁆𑀢𑀫𑀁 𑀫𑀼𑀔𑁂𑀦 𑀮𑁄𑀡𑁄𑀤𑀓𑁂 𑀧𑀯𑀺𑀲𑀦𑁆𑀢𑁂 𑀅𑀕𑁆𑀕𑀳𑁂𑀲𑀺. 𑀲𑁄 𑀢𑁂𑀲𑀁 𑀲𑀻𑀮𑀸𑀦𑀺 𑀤𑀢𑁆𑀯𑀸 𑁋 ‘‘𑀅𑀜𑁆𑀜𑀁 𑀢𑀼𑀫𑁆𑀳𑀸𑀓𑀁 𑀧𑀝𑀺𑀲𑀭𑀡𑀁 𑀦𑀢𑁆𑀣𑀺, 𑀲𑀻𑀮𑀫𑁂𑀯 𑀆𑀯𑀚𑁆𑀚𑁂𑀣𑀸’’𑀢𑀺 𑀉𑀕𑁆𑀖𑁄𑀲𑁂𑀲𑀺. 𑀢𑀸𑀦𑀺 𑀲𑀢𑁆𑀢𑀧𑀺 𑀚𑀗𑁆𑀖𑀲𑀢𑀸𑀦𑀺 𑀢𑀢𑁆𑀣 𑀓𑀸𑀮𑀁 𑀓𑀢𑁆𑀯𑀸 𑀆𑀲𑀦𑁆𑀦𑀓𑀸𑀮𑁂 𑀕𑀳𑀺𑀢𑀲𑀻𑀮𑀁 𑀦𑀺𑀲𑁆𑀲𑀸𑀬 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼, 𑀢𑁂𑀲𑀁 𑀖𑀝𑀸𑀯𑀲𑁂𑀦𑁂𑀯 𑀯𑀺𑀫𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀲𑀩𑁆𑀩𑁂𑀲𑀁 𑀫𑀚𑁆𑀛𑁂 𑀆𑀘𑀭𑀺𑀬𑀲𑁆𑀲 𑀬𑁄𑀚𑀦𑀲𑀢𑀺𑀓𑀁 𑀲𑀼𑀯𑀡𑁆𑀡𑀯𑀺𑀫𑀸𑀦𑀁 𑀦𑀺𑀩𑁆𑀩𑀢𑁆𑀢𑀺, 𑀅𑀯𑀲𑁂𑀦𑀸𑀦𑀺 𑀢𑀲𑁆𑀲 𑀧𑀭𑀺𑀯𑀸𑀭𑀸𑀦𑀺 𑀳𑀼𑀢𑁆𑀯𑀸 𑀲𑀩𑁆𑀩𑀳𑁂𑀝𑁆𑀞𑀺𑀫𑀁 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀁 𑀅𑀳𑁄𑀲𑀺. 𑀢𑁂 𑀦𑀺𑀩𑁆𑀩𑀢𑁆𑀢𑀓𑁆𑀔𑀡𑁂𑀬𑁂𑀯 𑀓𑀫𑁆𑀫𑀁 𑀆𑀯𑀚𑁆𑀚𑁂𑀦𑁆𑀢𑀸 𑀆𑀘𑀭𑀺𑀬𑀁 𑀦𑀺𑀲𑁆𑀲𑀸𑀬 𑀲𑀫𑁆𑀧𑀢𑁆𑀢𑀺𑀮𑀸𑀪𑀁 𑀜𑀢𑁆𑀯𑀸, ‘‘𑀕𑀘𑁆𑀙𑀸𑀫 𑀢𑀸𑀯, 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑁂 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀲𑁆𑀲 𑀯𑀡𑁆𑀡𑀁 𑀓𑀣𑁂𑀬𑁆𑀬𑀸𑀫𑀸’’𑀢𑀺 𑀫𑀚𑁆𑀛𑀺𑀫𑀬𑀸𑀫𑀲𑀫𑀦𑀦𑁆𑀢𑀭𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀁𑀲𑀼, 𑀢𑀸 𑀤𑁂𑀯𑀢𑀸 𑀆𑀘𑀭𑀺𑀬𑀲𑁆𑀲 𑀯𑀡𑁆𑀡𑀪𑀡𑀦𑀢𑁆𑀣𑀁 𑀏𑀓𑁂𑀓𑀁 𑀕𑀸𑀣𑀁 𑀅𑀪𑀸𑀲𑀺𑀁𑀲𑀼.

𑀢𑀢𑁆𑀣 𑀲𑀩𑁆𑀪𑀺𑀭𑁂𑀯𑀸𑀢𑀺 𑀧𑀡𑁆𑀟𑀺𑀢𑁂𑀳𑀺, 𑀲𑀧𑁆𑀧𑀼𑀭𑀺𑀲𑁂𑀳𑀺 𑀏𑀯. 𑀭-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀲𑀫𑀸𑀲𑁂𑀣𑀸𑀢𑀺 𑀲𑀳 𑀦𑀺𑀲𑀻𑀤𑁂𑀬𑁆𑀬. 𑀤𑁂𑀲𑀦𑀸𑀲𑀻𑀲𑀫𑁂𑀯 𑀘𑁂𑀢𑀁, 𑀲𑀩𑁆𑀩𑀇𑀭𑀺𑀬𑀸𑀧𑀣𑁂 𑀲𑀩𑁆𑀪𑀺𑀭𑁂𑀯 𑀲𑀳 𑀓𑀼𑀩𑁆𑀩𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀓𑀼𑀩𑁆𑀩𑁂𑀣𑀸𑀢𑀺 𑀓𑀭𑁂𑀬𑁆𑀬. 𑀲𑀦𑁆𑀣𑀯𑀦𑁆𑀢𑀺 𑀫𑀺𑀢𑁆𑀢𑀲𑀦𑁆𑀣𑀯𑀁. 𑀢𑀡𑁆𑀳𑀸𑀲𑀦𑁆𑀣𑀯𑁄 𑀧𑀦 𑀦 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀓𑀸𑀢𑀩𑁆𑀩𑁄, 𑀫𑀺𑀢𑁆𑀢𑀲𑀦𑁆𑀣𑀯𑁄 𑀩𑀼𑀤𑁆𑀥-𑀧𑀘𑁆𑀘𑁂𑀓𑀩𑀼𑀤𑁆𑀥-𑀩𑀼𑀤𑁆𑀥𑀲𑀸𑀯𑀓𑁂𑀳𑀺 𑀲𑀳 𑀓𑀸𑀢𑀩𑁆𑀩𑁄. 𑀇𑀤𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀲𑀢𑀦𑁆𑀢𑀺 𑀩𑀼𑀤𑁆𑀥𑀸𑀤𑀻𑀦𑀁 𑀲𑀧𑁆𑀧𑀼𑀭𑀺𑀲𑀸𑀦𑀁. 𑀲𑀤𑁆𑀥𑀫𑁆𑀫𑀦𑁆𑀢𑀺 𑀧𑀜𑁆𑀘𑀲𑀻𑀮𑀤𑀲𑀲𑀻𑀮𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑀁 𑀲𑀤𑁆𑀥𑀫𑁆𑀫𑀁, 𑀇𑀥 𑀧𑀦 𑀧𑀜𑁆𑀘𑀲𑀻𑀮𑀁 𑀅𑀥𑀺𑀧𑁆𑀧𑁂𑀢𑀁. 𑀲𑁂𑀬𑁆𑀬𑁄 𑀳𑁄𑀢𑀻𑀢𑀺 𑀯𑀟𑁆𑀠𑀺 𑀳𑁄𑀢𑀺. 𑀦 𑀧𑀸𑀧𑀺𑀬𑁄𑀢𑀺 𑀮𑀸𑀫𑀓𑀁 𑀓𑀺𑀜𑁆𑀘𑀺 𑀦 𑀳𑁄𑀢𑀺. 𑀦𑀸𑀜𑁆𑀜𑀢𑁄𑀢𑀺 𑀯𑀸𑀮𑀺𑀓𑀸𑀤𑀻𑀳𑀺 𑀢𑁂𑀮𑀸𑀤𑀻𑀦𑀺 𑀯𑀺𑀬 𑀅𑀜𑁆𑀜𑀢𑁄 𑀅𑀦𑁆𑀥𑀩𑀸𑀮𑀢𑁄 𑀧𑀜𑁆𑀜𑀸 𑀦𑀸𑀫 𑀦 𑀮𑀩𑁆𑀪𑀢𑀺, 𑀢𑀺𑀮𑀸𑀤𑀻𑀳𑀺 𑀧𑀦 𑀢𑁂𑀮𑀸𑀤𑀻𑀦𑀺 𑀯𑀺𑀬 𑀲𑀢𑀁 𑀥𑀫𑁆𑀫𑀁 𑀜𑀢𑁆𑀯𑀸 𑀧𑀡𑁆𑀟𑀺𑀢𑀫𑁂𑀯 𑀲𑁂𑀯𑀦𑁆𑀢𑁄 𑀪𑀚𑀦𑁆𑀢𑁄 𑀮𑀪𑀢𑀻𑀢𑀺. 𑀲𑁄𑀓𑀫𑀚𑁆𑀛𑁂𑀢𑀺 𑀲𑁄𑀓𑀯𑀢𑁆𑀣𑀽𑀦𑀁 𑀲𑁄𑀓𑀸𑀦𑀼𑀕𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀫𑀚𑁆𑀛𑀕𑀢𑁄 𑀦 𑀲𑁄𑀘𑀢𑀺 𑀩𑀦𑁆𑀥𑀼𑀮𑀫𑀮𑁆𑀮𑀲𑁂𑀦𑀸𑀧𑀢𑀺𑀲𑁆𑀲 𑀉𑀧𑀸𑀲𑀺𑀓𑀸 𑀯𑀺𑀬, 𑀧𑀜𑁆𑀘𑀦𑁆𑀦𑀁 𑀘𑁄𑀭𑀲𑀢𑀸𑀦𑀁 𑀫𑀚𑁆𑀛𑁂 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀲𑀁𑀓𑀺𑀘𑁆𑀘𑀲𑀸𑀫𑀡𑁂𑀭𑁄 𑀯𑀺𑀬 𑀘.

𑀜𑀸𑀢𑀺𑀫𑀚𑁆𑀛𑁂 𑀯𑀺𑀭𑁄𑀘𑀢𑀻𑀢𑀺 𑀜𑀸𑀢𑀺𑀕𑀡𑀫𑀚𑁆𑀛𑁂 𑀲𑀁𑀓𑀺𑀘𑁆𑀘𑀣𑁂𑀭𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀅𑀥𑀺𑀫𑀼𑀢𑁆𑀢𑀓𑀲𑀸𑀫𑀡𑁂𑀭𑁄 𑀯𑀺𑀬 𑀲𑁄𑀪𑀢𑀺. 𑀲𑁄 𑀓𑀺𑀭 𑀣𑁂𑀭𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑁄 𑀳𑁄𑀢𑀺, 𑀅𑀣 𑀦𑀁 𑀣𑁂𑀭𑁄 𑀆𑀳 𑁋 ‘‘𑀲𑀸𑀫𑀡𑁂𑀭, 𑀫𑀳𑀮𑁆𑀮𑀓𑁄𑀲𑀺 𑀚𑀸𑀢𑁄, 𑀕𑀘𑁆𑀙, 𑀯𑀲𑁆𑀲𑀸𑀦𑀺 𑀧𑀼𑀘𑁆𑀙𑀺𑀢𑁆𑀯𑀸 𑀏𑀳𑀺, 𑀉𑀧𑀲𑀫𑁆𑀧𑀸𑀤𑁂𑀲𑁆𑀲𑀸𑀫𑀺 𑀢’’𑀦𑁆𑀢𑀺. 𑀲𑁄 ‘‘𑀲𑀸𑀥𑀽’’𑀢𑀺 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀘𑁄𑀭𑀅𑀝𑀯𑀺𑀬𑀸 𑀑𑀭𑀪𑀸𑀕𑁂 𑀪𑀕𑀺𑀦𑀺𑀕𑀸𑀫𑀁 𑀕𑀦𑁆𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀺, 𑀢𑀁 𑀪𑀕𑀺𑀦𑀻 𑀤𑀺𑀲𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀕𑁂𑀳𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑁄𑀚𑁂𑀲𑀺. 𑀲𑁄 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀯𑀲𑁆𑀲𑀸𑀦𑀺 𑀧𑀼𑀘𑁆𑀙𑀺. 𑀲𑀸 ‘‘𑀅𑀳𑀁 𑀦 𑀚𑀸𑀦𑀸𑀫𑀺, 𑀫𑀸𑀢𑀸 𑀫𑁂 𑀚𑀸𑀦𑀸𑀢𑀻’’𑀢𑀺 𑀆𑀳. 𑀅𑀣 𑀲𑁄 ‘‘𑀢𑀺𑀝𑁆𑀞𑀣 𑀢𑀼𑀫𑁆𑀳𑁂, 𑀅𑀳𑀁 𑀫𑀸𑀢𑀼𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀅𑀝𑀯𑀺𑀁 𑀑𑀢𑀺𑀡𑁆𑀡𑁄. 𑀢𑀫𑁂𑀦𑀁 𑀤𑀽𑀭𑀢𑁄𑀯 𑀘𑁄𑀭𑀧𑀼𑀭𑀺𑀲𑁄 𑀤𑀺𑀲𑁆𑀯𑀸 𑀘𑁄𑀭𑀸𑀦𑀁 𑀆𑀭𑁄𑀘𑁂𑀲𑀺. 𑀘𑁄𑀭𑀸 ‘‘𑀲𑀸𑀫𑀡𑁂𑀭𑁄 𑀓𑀺𑀭𑁂𑀓𑁄 𑀅𑀝𑀯𑀺𑀁 𑀑𑀢𑀺𑀡𑁆𑀡𑁄, 𑀕𑀘𑁆𑀙𑀣 𑀦𑀁 𑀆𑀦𑁂𑀣𑀸’’𑀢𑀺 𑀆𑀡𑀸𑀧𑁂𑀢𑁆𑀯𑀸 𑀏𑀓𑀘𑁆𑀘𑁂 ‘‘𑀫𑀸𑀭𑁂𑀫 𑀦’’𑀦𑁆𑀢𑀺 𑀆𑀳𑀁𑀲𑀼, 𑀏𑀓𑀘𑁆𑀘𑁂 𑀯𑀺𑀲𑁆𑀲𑀚𑁆𑀚𑁂𑀫𑀸𑀢𑀺. 𑀲𑀸𑀫𑀡𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀲𑁂𑀔𑁄 𑀲𑀓𑀭𑀡𑀻𑀬𑁄, 𑀇𑀫𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀲𑁄𑀢𑁆𑀣𑀺𑀫𑀢𑁆𑀢𑀸𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑁄𑀭𑀚𑁂𑀝𑁆𑀞𑀓𑀁 𑀆𑀫𑀦𑁆𑀢𑁂𑀢𑁆𑀯𑀸, ‘‘𑀉𑀧𑀫𑀁 𑀢𑁂, 𑀆𑀯𑀼𑀲𑁄, 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀇𑀫𑀸 𑀕𑀸𑀣𑀸 𑀅𑀪𑀸𑀲𑀺 𑁋

‘‘𑀅𑀳𑀼 𑀅𑀢𑀻𑀢𑀫𑀤𑁆𑀥𑀸𑀦𑀁, 𑀅𑀭𑀜𑁆𑀜𑀲𑁆𑀫𑀺𑀁 𑀩𑁆𑀭𑀳𑀸𑀯𑀦𑁂;

𑀘𑁂𑀢𑁄 𑀓𑀽𑀝𑀸𑀦𑀺 𑀑𑀟𑁆𑀟𑁂𑀢𑁆𑀯𑀸, 𑀲𑀲𑀓𑀁 𑀅𑀯𑀥𑀻 𑀢𑀤𑀸.

‘‘𑀲𑀲𑀓𑀜𑁆𑀘 𑀫𑀢𑀁 𑀤𑀺𑀲𑁆𑀯𑀸, 𑀉𑀩𑁆𑀩𑀺𑀕𑁆𑀕𑀸 𑀫𑀺𑀕𑀧𑀓𑁆𑀔𑀺𑀦𑁄;

𑀏𑀓𑀭𑀢𑁆𑀢𑀺𑀁 𑀅𑀧𑀓𑁆𑀓𑀸𑀫𑀼𑀁, ‘𑀅𑀓𑀺𑀘𑁆𑀘𑀁 𑀯𑀢𑁆𑀢𑀢𑁂 𑀇𑀥’.

‘‘𑀢𑀣𑁂𑀯 𑀲𑀫𑀡𑀁 𑀳𑀦𑁆𑀢𑁆𑀯𑀸, 𑀅𑀥𑀺𑀫𑀼𑀢𑁆𑀢𑀁 𑀅𑀓𑀺𑀜𑁆𑀘𑀦𑀁;

𑀅𑀤𑁆𑀥𑀺𑀓𑀸 𑀦𑀸𑀕𑀫𑀺𑀲𑁆𑀲𑀦𑁆𑀢𑀺, 𑀥𑀦𑀚𑀸𑀦𑀺 𑀪𑀯𑀺𑀲𑁆𑀲𑀢𑀻’’𑀢𑀺.

‘‘𑀲𑀘𑁆𑀘𑀁 𑀔𑁄 𑀲𑀫𑀡𑁄 𑀆𑀳, 𑀅𑀥𑀺𑀫𑀼𑀢𑁆𑀢𑁄 𑀅𑀓𑀺𑀜𑁆𑀘𑀦𑁄;

𑀅𑀤𑁆𑀥𑀺𑀓𑀸 𑀦𑀸𑀕𑀫𑀺𑀲𑁆𑀲𑀦𑁆𑀢𑀺, 𑀥𑀦𑀚𑀸𑀦𑀺 𑀪𑀯𑀺𑀲𑁆𑀲𑀢𑀺.

‘‘𑀲𑀘𑁂 𑀧𑀝𑀺𑀧𑀣𑁂 𑀤𑀺𑀲𑁆𑀯𑀸, 𑀦𑀸𑀭𑁄𑀘𑁂𑀲𑁆𑀲𑀲𑀺 𑀓𑀲𑁆𑀲𑀘𑀺;

𑀢𑀯 𑀲𑀘𑁆𑀘𑀫𑀦𑀼𑀭𑀓𑁆𑀔𑀦𑁆𑀢𑁄, 𑀕𑀘𑁆𑀙 𑀪𑀦𑁆𑀢𑁂 𑀬𑀣𑀸𑀲𑀼𑀔’’𑀦𑁆𑀢𑀺.

𑀲𑁄 𑀢𑁂𑀳𑀺 𑀘𑁄𑀭𑁂𑀳𑀺 𑀯𑀺𑀲𑁆𑀲𑀚𑁆𑀚𑀺𑀢𑁄 𑀕𑀘𑁆𑀙𑀦𑁆𑀢𑁄 𑀜𑀸𑀢𑀬𑁄𑀧𑀺 𑀤𑀺𑀲𑁆𑀯𑀸 𑀢𑁂𑀲𑀫𑁆𑀧𑀺 𑀦 𑀆𑀭𑁄𑀘𑁂𑀲𑀺. 𑀅𑀣 𑀢𑁂 𑀅𑀦𑀼𑀧𑁆𑀧𑀢𑁆𑀢𑁂 𑀘𑁄𑀭𑀸 𑀕𑀳𑁂𑀢𑁆𑀯𑀸 𑀯𑀺𑀳𑁂𑀞𑀬𑀺𑀁𑀲𑀼, 𑀉𑀭𑀁 𑀧𑀳𑀭𑀺𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑀜𑁆𑀘𑀲𑁆𑀲 𑀫𑀸𑀢𑀭𑀁 𑀘𑁄𑀭𑀸 𑀏𑀢𑀤𑀯𑁄𑀘𑀼𑀁 𑁋

‘‘𑀓𑀺𑀁 𑀢𑁂 𑀳𑁄𑀢𑀺 𑀅𑀥𑀺𑀫𑀼𑀢𑁆𑀢𑁄, 𑀉𑀤𑀭𑁂 𑀯𑀲𑀺𑀓𑁄 𑀅𑀲𑀺;

𑀧𑀼𑀝𑁆𑀞𑀸 𑀫𑁂 𑀅𑀫𑁆𑀫 𑀅𑀓𑁆𑀔𑀸𑀳𑀺, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬’’𑀦𑁆𑀢𑀺.

‘‘𑀅𑀥𑀺𑀫𑀼𑀢𑁆𑀢𑀲𑁆𑀲 𑀅𑀳𑀁 𑀫𑀸𑀢𑀸, 𑀅𑀬𑀜𑁆𑀘 𑀚𑀦𑀓𑁄 𑀧𑀺𑀢𑀸;

𑀪𑀕𑀺𑀦𑀻 𑀪𑀸𑀢𑀭𑁄 𑀘𑀸𑀧𑀺, 𑀲𑀩𑁆𑀩𑁂𑀯 𑀇𑀥 𑀜𑀸𑀢𑀬𑁄.

‘‘𑀅𑀓𑀺𑀘𑁆𑀘𑀓𑀸𑀭𑀻 𑀅𑀥𑀺𑀫𑀼𑀢𑁆𑀢𑁄, 𑀬𑀁 𑀤𑀺𑀲𑁆𑀯𑀸 𑀦 𑀦𑀺𑀯𑀸𑀭𑀬𑁂;

𑀏𑀢𑀁 𑀔𑁄 𑀯𑀢𑁆𑀢𑀁 𑀲𑀫𑀡𑀸𑀦𑀁, 𑀅𑀭𑀺𑀬𑀸𑀦𑀁 𑀥𑀫𑁆𑀫𑀚𑀻𑀯𑀺𑀦𑀁.

‘‘𑀲𑀘𑁆𑀘𑀯𑀸𑀤𑀻 𑀅𑀥𑀺𑀫𑀼𑀢𑁆𑀢𑁄, 𑀬𑀁 𑀤𑀺𑀲𑁆𑀯𑀸 𑀦 𑀦𑀺𑀯𑀸𑀭𑀬𑁂;

𑀅𑀥𑀺𑀫𑀼𑀢𑁆𑀢𑀲𑁆𑀲 𑀲𑀼𑀘𑀺𑀡𑁆𑀡𑁂𑀦, 𑀲𑀘𑁆𑀘𑀯𑀸𑀤𑀺𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀲𑀩𑁆𑀩𑁂𑀯 𑀅𑀪𑀬𑀁 𑀧𑀢𑁆𑀢𑀸, 𑀲𑁄𑀢𑁆𑀣𑀺𑀁 𑀕𑀘𑁆𑀙𑀦𑁆𑀢𑀼 𑀜𑀸𑀢𑀬𑁄’’𑀢𑀺.

𑀏𑀯𑀁 𑀢𑁂 𑀘𑁄𑀭𑁂𑀳𑀺 𑀯𑀺𑀲𑁆𑀲𑀚𑁆𑀚𑀺𑀢𑀸 𑀕𑀦𑁆𑀢𑁆𑀯𑀸 𑀅𑀥𑀺𑀫𑀼𑀢𑁆𑀢𑀁 𑀆𑀳𑀁𑀲𑀼 𑁋

‘‘𑀢𑀯 𑀢𑀸𑀢 𑀲𑀼𑀘𑀺𑀡𑁆𑀡𑁂𑀦, 𑀲𑀘𑁆𑀘𑀯𑀸𑀤𑀺𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀲𑀩𑁆𑀩𑁂𑀯 𑀅𑀪𑀬𑀁 𑀧𑀢𑁆𑀢𑀸, 𑀲𑁄𑀢𑁆𑀣𑀺𑀁 𑀧𑀘𑁆𑀘𑀸𑀕𑀫𑀫𑁆𑀳𑀲𑁂’’𑀢𑀺.

𑀢𑁂𑀧𑀺 𑀧𑀜𑁆𑀘𑀲𑀢𑀸 𑀘𑁄𑀭𑀸 𑀧𑀲𑀸𑀤𑀁 𑀆𑀧𑀚𑁆𑀚𑀺𑀢𑁆𑀯𑀸 𑀅𑀥𑀺𑀫𑀼𑀢𑁆𑀢𑀲𑁆𑀲 𑀲𑀸𑀫𑀡𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀁𑀲𑀼. 𑀲𑁄 𑀢𑁂 𑀆𑀤𑀸𑀬 𑀉𑀧𑀚𑁆𑀛𑀸𑀬𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀧𑀞𑀫𑀁 𑀅𑀢𑁆𑀢𑀦𑀸 𑀉𑀧𑀲𑀫𑁆𑀧𑀦𑁆𑀦𑁄 𑀧𑀘𑁆𑀙𑀸 𑀢𑁂 𑀧𑀜𑁆𑀘𑀲𑀢𑁂 𑀅𑀢𑁆𑀢𑀦𑁄 𑀅𑀦𑁆𑀢𑁂𑀯𑀸𑀲𑀺𑀓𑁂 𑀓𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀲𑀺. 𑀢𑁂 𑀅𑀥𑀺𑀫𑀼𑀢𑁆𑀢𑀣𑁂𑀭𑀲𑁆𑀲 𑀑𑀯𑀸𑀤𑁂 𑀞𑀺𑀢𑀸 𑀲𑀩𑁆𑀩𑁂 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀇𑀫𑀫𑀢𑁆𑀣𑀁 𑀕𑀳𑁂𑀢𑁆𑀯𑀸 𑀤𑁂𑀯𑀢𑀸 ‘‘𑀲𑀢𑀁 𑀲𑀤𑁆𑀥𑀫𑁆𑀫𑀫𑀜𑁆𑀜𑀸𑀬 𑀜𑀸𑀢𑀺𑀫𑀚𑁆𑀛𑁂 𑀯𑀺𑀭𑁄𑀘𑀢𑀻’’𑀢𑀺 𑀆𑀳.

𑀲𑀸𑀢𑀢𑀦𑁆𑀢𑀺 𑀲𑀢𑀢𑀁 𑀲𑀼𑀔𑀁 𑀯𑀸 𑀘𑀺𑀭𑀁 𑀢𑀺𑀝𑁆𑀞𑀦𑁆𑀢𑀻𑀢𑀺 𑀯𑀤𑀢𑀺. 𑀲𑀩𑁆𑀩𑀸𑀲𑀁 𑀯𑁄𑀢𑀺 𑀲𑀩𑁆𑀩𑀸𑀲𑀁 𑀢𑀼𑀫𑁆𑀳𑀸𑀓𑀁. 𑀧𑀭𑀺𑀬𑀸𑀬𑁂𑀦𑀸𑀢𑀺 𑀓𑀸𑀭𑀡𑁂𑀦. 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻𑀢𑀺, 𑀦 𑀓𑁂𑀯𑀮𑀁 𑀲𑁂𑀬𑁆𑀬𑁄𑀯 𑀳𑁄𑀢𑀺, 𑀦 𑀘 𑀓𑁂𑀯𑀮𑀁 𑀧𑀜𑁆𑀜𑀁 𑀮𑀪𑀢𑀺, 𑀲𑁄𑀓𑀫𑀚𑁆𑀛𑁂 𑀦 𑀲𑁄𑀘𑀢𑀺, 𑀜𑀸𑀢𑀺𑀫𑀚𑁆𑀛𑁂 𑀯𑀺𑀭𑁄𑀘𑀢𑀺, 𑀲𑀼𑀕𑀢𑀺𑀬𑀁 𑀦𑀺𑀩𑁆𑀩𑀢𑁆𑀢𑀢𑀺, 𑀘𑀺𑀭𑀁 𑀲𑀼𑀔𑀁 𑀢𑀺𑀝𑁆𑀞𑀢𑀺, 𑀲𑀓𑀮𑀲𑁆𑀫𑀸 𑀧𑀦 𑀯𑀝𑁆𑀝𑀤𑀼𑀓𑁆𑀔𑀸𑀧𑀺 𑀫𑀼𑀘𑁆𑀘𑀢𑀻𑀢𑀺. 𑀧𑀞𑀫𑀁.

𑁨. 𑀫𑀘𑁆𑀙𑀭𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨. 𑀤𑀼𑀢𑀺𑀬𑁂 𑀫𑀘𑁆𑀙𑁂𑀭𑀸 𑀘 𑀧𑀫𑀸𑀤𑀸 𑀘𑀸𑀢𑀺 𑀅𑀢𑁆𑀢𑀲𑀫𑁆𑀧𑀢𑁆𑀢𑀺𑀦𑀺𑀕𑀽𑀳𑀦𑀮𑀓𑁆𑀔𑀡𑁂𑀦 𑀫𑀘𑁆𑀙𑁂𑀭𑁂𑀦 𑀘𑁂𑀯 𑀲𑀢𑀺𑀯𑀺𑀧𑁆𑀧𑀯𑀸𑀲𑀮𑀓𑁆𑀔𑀡𑁂𑀦 𑀧𑀫𑀸𑀤𑁂𑀦 𑀘. 𑀏𑀓𑀘𑁆𑀘𑁄 𑀳𑀺 ‘𑀇𑀤𑀁 𑀫𑁂 𑀤𑁂𑀦𑁆𑀢𑀲𑁆𑀲 𑀧𑀭𑀺𑀓𑁆𑀔𑀬𑀁 𑀕𑀫𑀺𑀲𑁆𑀲𑀢𑀺, 𑀫𑀬𑁆𑀳𑀁 𑀯𑀸 𑀖𑀭𑀫𑀸𑀦𑀼𑀲𑀓𑀸𑀦𑀁 𑀯𑀸 𑀦 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀘𑁆𑀙𑀭𑀺𑀬𑁂𑀦 𑀤𑀸𑀦𑀁 𑀦 𑀤𑁂𑀢𑀺. 𑀏𑀓𑀘𑁆𑀘𑁄 𑀔𑀺𑀟𑁆𑀟𑀸𑀤𑀺𑀧𑀲𑀼𑀢𑀢𑁆𑀢𑀸 ‘𑀤𑀸𑀦𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀢𑀺. 𑀏𑀯𑀁 𑀤𑀸𑀦𑀁 𑀦 𑀤𑀻𑀬𑀢𑀻𑀢𑀺 𑀏𑀯𑀫𑁂𑀢𑀁 𑀬𑀲𑀤𑀸𑀬𑀓𑀁 𑀲𑀺𑀭𑀻𑀤𑀸𑀬𑀓𑀁 𑀲𑀫𑁆𑀧𑀢𑁆𑀢𑀺𑀤𑀸𑀬𑀓𑀁 𑀲𑀼𑀔𑀤𑀸𑀬𑀓𑀁 𑀤𑀸𑀦𑀁 𑀦𑀸𑀫 𑀦 𑀤𑀻𑀬𑀢𑀻𑀢𑀺𑀆𑀤𑀺𑀦𑀸 𑀓𑀸𑀭𑀡𑀁 𑀓𑀣𑁂𑀲𑀺. 𑀧𑀼𑀜𑁆𑀜𑀁 𑀆𑀓𑀗𑁆𑀔𑀫𑀸𑀦𑁂𑀦𑀸𑀢𑀺 𑀧𑀼𑀩𑁆𑀩𑀘𑁂𑀢𑀦𑀸𑀤𑀺𑀪𑁂𑀤𑀁 𑀧𑀼𑀜𑁆𑀜𑀁 𑀇𑀘𑁆𑀙𑀫𑀸𑀦𑁂𑀦. 𑀤𑁂𑀬𑁆𑀬𑀁 𑀳𑁄𑀢𑀺 𑀯𑀺𑀚𑀸𑀦𑀢𑀸𑀢𑀺 𑀅𑀢𑁆𑀣𑀺 𑀤𑀸𑀦𑀲𑁆𑀲 𑀨𑀮𑀦𑁆𑀢𑀺 𑀚𑀸𑀦𑀦𑁆𑀢𑁂𑀦 𑀤𑀸𑀢𑀩𑁆𑀩𑀫𑁂𑀯𑀸𑀢𑀺 𑀯𑀤𑀢𑀺.

𑀢𑀫𑁂𑀯 𑀩𑀸𑀮𑀁 𑀨𑀼𑀲𑀢𑀻𑀢𑀺 𑀢𑀁𑀬𑁂𑀯 𑀩𑀸𑀮𑀁 𑀇𑀥𑀮𑁄𑀓𑀧𑀭𑀮𑁄𑀓𑁂𑀲𑀼 𑀚𑀺𑀖𑀘𑁆𑀙𑀸 𑀘 𑀧𑀺𑀧𑀸𑀲𑀸 𑀘 𑀨𑀼𑀲𑀢𑀺 𑀅𑀦𑀼𑀩𑀦𑁆𑀥𑀢𑀺 𑀦 𑀯𑀺𑀚𑀳𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀢𑀫𑁂𑀯 𑀨𑀼𑀲𑀢𑀺, 𑀢𑀲𑁆𑀫𑀸. 𑀯𑀺𑀦𑁂𑀬𑁆𑀬 𑀫𑀘𑁆𑀙𑁂𑀭𑀦𑁆𑀢𑀺 𑀫𑀘𑁆𑀙𑁂𑀭𑀫𑀮𑀁 𑀯𑀺𑀦𑁂𑀢𑁆𑀯𑀸. 𑀤𑀚𑁆𑀚𑀸 𑀤𑀸𑀦𑀁 𑀫𑀮𑀸𑀪𑀺𑀪𑀽𑀢𑀺 𑀫𑀮𑀸𑀪𑀺𑀪𑀽 𑀳𑀼𑀢𑁆𑀯𑀸 𑀢𑀁 𑀫𑀘𑁆𑀙𑁂𑀭𑀫𑀮𑀁 𑀅𑀪𑀺𑀪𑀯𑀺𑀢𑁆𑀯𑀸 𑀤𑀸𑀦𑀁 𑀤𑀤𑁂𑀬𑁆𑀬.

𑀢𑁂 𑀫𑀢𑁂𑀲𑀼 𑀦 𑀫𑀻𑀬𑀦𑁆𑀢𑀻𑀢𑀺 𑀅𑀤𑀸𑀦𑀲𑀻𑀮𑀢𑀸𑀬 𑀫𑀭𑀡𑁂𑀦 𑀫𑀢𑁂𑀲𑀼 𑀦 𑀫𑀻𑀬𑀦𑁆𑀢𑀺. 𑀬𑀣𑀸 𑀳𑀺 𑀫𑀢𑁄 𑀲𑀫𑁆𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀧𑀺𑀢𑁂 𑀩𑀳𑀼𑀫𑁆𑀳𑀺𑀧𑀺 𑀅𑀦𑁆𑀦𑀧𑀸𑀦𑀸𑀤𑀺𑀫𑁆𑀳𑀺 ‘‘𑀇𑀤𑀁 𑀇𑀫𑀲𑁆𑀲 𑀳𑁄𑀢𑀼, 𑀇𑀤𑀁 𑀇𑀫𑀲𑁆𑀲𑀸’’𑀢𑀺 𑀉𑀝𑁆𑀞𑀳𑀺𑀢𑁆𑀯𑀸 𑀲𑀁𑀯𑀺𑀪𑀸𑀕𑀁 𑀦 𑀓𑀭𑁄𑀢𑀺, 𑀏𑀯𑀁 𑀅𑀤𑀸𑀦𑀲𑀻𑀮𑁄𑀧𑀻𑀢𑀺 𑀫𑀢𑀓𑀲𑁆𑀲 𑀘 𑀅𑀤𑀸𑀦𑀲𑀻𑀮𑀲𑁆𑀲 𑀘 𑀪𑁄𑀕𑀸 𑀲𑀫𑀲𑀫𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑁂𑀦 𑀤𑀸𑀦𑀲𑀻𑀮𑀸 𑀏𑀯𑀭𑀽𑀧𑁂𑀲𑀼 𑀫𑀢𑁂𑀲𑀼 𑀦 𑀫𑀻𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀦𑁆𑀣𑀸𑀦𑀁𑀯 𑀲𑀳 𑀯𑀚𑀁, 𑀅𑀧𑁆𑀧𑀲𑁆𑀫𑀺𑀁 𑀬𑁂 𑀧𑀯𑁂𑀘𑁆𑀙𑀦𑁆𑀢𑀻𑀢𑀺 𑀬𑀣𑀸 𑀅𑀤𑁆𑀥𑀸𑀦𑀁 𑀓𑀦𑁆𑀢𑀸𑀭𑀫𑀕𑁆𑀕𑀁 𑀲𑀳 𑀯𑀚𑀦𑁆𑀢𑀸 𑀧𑀣𑀺𑀓𑀸 𑀲𑀳 𑀯𑀚𑀦𑁆𑀢𑀸𑀦𑀁 𑀧𑀣𑀺𑀓𑀸𑀦𑀁 𑀅𑀧𑁆𑀧𑀲𑁆𑀫𑀺𑀁 𑀧𑀸𑀣𑁂𑀬𑁆𑀬𑁂 𑀲𑀁𑀯𑀺𑀪𑀸𑀕𑀁 𑀓𑀢𑁆𑀯𑀸 𑀧𑀯𑁂𑀘𑁆𑀙𑀦𑁆𑀢𑀺 𑀤𑀤𑀦𑁆𑀢𑀺𑀬𑁂𑀯, 𑀏𑀯𑀫𑁂𑀯𑀁 𑀬𑁂 𑀧𑀦 𑀅𑀦𑀫𑀢𑀕𑁆𑀕𑀁 𑀲𑀁𑀲𑀸𑀭𑀓𑀦𑁆𑀢𑀸𑀭𑀁 𑀲𑀳 𑀯𑀚𑀦𑁆𑀢𑀸 𑀲𑀳 𑀯𑀚𑀦𑁆𑀢𑀸𑀦𑀁 𑀅𑀧𑁆𑀧𑀲𑁆𑀫𑀺𑀫𑁆𑀧𑀺 𑀤𑁂𑀬𑁆𑀬𑀥𑀫𑁆𑀫𑁂 𑀲𑀁𑀯𑀺𑀪𑀸𑀕𑀁 𑀓𑀢𑁆𑀯𑀸 𑀤𑀤𑀦𑁆𑀢𑀺𑀬𑁂𑀯, 𑀢𑁂 𑀫𑀢𑁂𑀲𑀼 𑀦 𑀫𑀻𑀬𑀦𑁆𑀢𑀺.

𑀏𑀲 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄𑀢𑀺 𑀏𑀲 𑀧𑁄𑀭𑀸𑀡𑀓𑁄 𑀥𑀫𑁆𑀫𑁄, 𑀲𑀦𑀦𑁆𑀢𑀦𑀸𑀦𑀁 𑀯𑀸 𑀧𑀡𑁆𑀟𑀺𑀢𑀸𑀦𑀁 𑀏𑀲 𑀥𑀫𑁆𑀫𑁄𑀢𑀺. 𑀅𑀧𑁆𑀧𑀲𑁆𑀫𑁂𑀓𑁂𑀢𑀺 𑀅𑀧𑁆𑀧𑀲𑁆𑀫𑀺𑀁 𑀤𑁂𑀬𑁆𑀬𑀥𑀫𑁆𑀫𑁂 𑀏𑀓𑁂. 𑀧𑀯𑁂𑀘𑁆𑀙𑀦𑁆𑀢𑀻𑀢𑀺 𑀤𑀤𑀦𑁆𑀢𑀺. 𑀩𑀳𑀼𑀦𑁂𑀓𑁂 𑀦 𑀤𑀺𑀘𑁆𑀙𑀭𑁂𑀢𑀺 𑀩𑀳𑀼𑀦𑀸𑀧𑀺 𑀪𑁄𑀕𑁂𑀦 𑀲𑀫𑀦𑁆𑀦𑀸𑀕𑀢𑀸 𑀏𑀓𑀘𑁆𑀘𑁂 𑀦 𑀤𑀤𑀦𑁆𑀢𑀺. 𑀲𑀳𑀲𑁆𑀲𑁂𑀦 𑀲𑀫𑀁 𑀫𑀺𑀢𑀸𑀢𑀺 𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀫𑀺𑀢𑀸, 𑀲𑀳𑀲𑁆𑀲 𑀤𑀸𑀦𑀲𑀤𑀺𑀲𑀸 𑀳𑁄𑀢𑀺.

𑀤𑀼𑀭𑀦𑁆𑀯𑀬𑁄𑀢𑀺 𑀤𑀼𑀭𑀦𑀼𑀕𑀫𑀦𑁄, 𑀤𑀼𑀧𑁆𑀧𑀽𑀭𑁄𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀁 𑀘𑀭𑁂𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀁 𑀘𑀭𑀢𑀺. 𑀬𑁄𑀧𑀺 𑀲𑀫𑀼𑀜𑁆𑀚𑀓𑀜𑁆𑀘𑀭𑁂𑀢𑀺 𑀬𑁄 𑀅𑀧𑀺 𑀔𑀮𑀫𑀡𑁆𑀟𑀮𑀸𑀤𑀺𑀲𑁄𑀥𑀦𑀧𑀮𑀸𑀮𑀧𑁄𑀞𑀦𑀸𑀤𑀺𑀯𑀲𑁂𑀦 𑀲𑀫𑀼𑀜𑁆𑀚𑀓𑀜𑁆𑀘𑀭𑀢𑀺. 𑀤𑀸𑀭𑀜𑁆𑀘 𑀧𑁄𑀲𑀦𑁆𑀢𑀺 𑀤𑀸𑀭𑀜𑁆𑀘 𑀧𑁄𑀲𑀦𑁆𑀢𑁄. 𑀤𑀤𑀁 𑀅𑀧𑁆𑀧𑀓𑀲𑁆𑀫𑀺𑀦𑁆𑀢𑀺 𑀅𑀧𑁆𑀧𑀓𑀲𑁆𑀫𑀺𑀁 𑀧𑀡𑁆𑀡𑀲𑀸𑀓𑀫𑀢𑁆𑀢𑀲𑁆𑀫𑀺𑀫𑁆𑀧𑀺 𑀲𑀁𑀯𑀺𑀪𑀸𑀕𑀁 𑀓𑀢𑁆𑀯𑀸 𑀤𑀤𑀦𑁆𑀢𑁄𑀯 𑀲𑁄 𑀥𑀫𑁆𑀫𑀁 𑀘𑀭𑀢𑀺. 𑀲𑀢𑀁 𑀲𑀳𑀲𑁆𑀲𑀸𑀦𑀦𑁆𑀢𑀺 𑀲𑀳𑀲𑁆𑀲𑀁 𑀲𑀳𑀲𑁆𑀲𑀁 𑀓𑀢𑁆𑀯𑀸 𑀕𑀡𑀺𑀢𑀸𑀦𑀁 𑀧𑀼𑀭𑀺𑀲𑀸𑀦𑀁 𑀲𑀢𑀁, 𑀲𑀢𑀲𑀳𑀲𑁆𑀲𑀦𑁆𑀢𑀺 𑀅𑀢𑁆𑀣𑁄. 𑀲𑀳𑀲𑁆𑀲𑀬𑀸𑀕𑀺𑀦𑀦𑁆𑀢𑀺 𑀪𑀺𑀓𑁆𑀔𑀼𑀲𑀳𑀲𑁆𑀲𑀲𑁆𑀲 𑀯𑀸 𑀬𑀸𑀕𑁄 𑀓𑀳𑀸𑀧𑀡𑀲𑀳𑀲𑁆𑀲𑁂𑀦 𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑁄 𑀬𑀸𑀕𑁄𑀧𑀺 𑀲𑀳𑀲𑁆𑀲𑀬𑀸𑀕𑁄. 𑀲𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀲𑀳𑀲𑁆𑀲𑀬𑀸𑀕𑀺𑀦𑁄, 𑀢𑁂𑀲𑀁 𑀲𑀳𑀲𑁆𑀲𑀬𑀸𑀕𑀺𑀦𑀁. 𑀏𑀢𑁂𑀦 𑀤𑀲𑀦𑁆𑀦𑀁 𑀯𑀸 𑀪𑀺𑀓𑁆𑀔𑀼𑀓𑁄𑀝𑀻𑀦𑀁 𑀤𑀲𑀦𑁆𑀦𑀁 𑀯𑀸 𑀓𑀳𑀸𑀧𑀡𑀓𑁄𑀝𑀻𑀦𑀁 𑀧𑀺𑀡𑁆𑀟𑀧𑀸𑀢𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀬𑁂 𑀏𑀢𑁆𑀢𑀓𑀁 𑀤𑀤𑀦𑁆𑀢𑀺, 𑀢𑁂 𑀓𑀮𑀫𑁆𑀧𑀺 𑀦𑀕𑁆𑀖𑀦𑁆𑀢𑀺 𑀢𑀣𑀸𑀯𑀺𑀥𑀲𑁆𑀲𑀸𑀢𑀺 𑀆𑀳. 𑀬𑁆𑀯𑀸𑀬𑀁 𑀲𑀫𑀼𑀜𑁆𑀚𑀓𑀁 𑀘𑀭𑀦𑁆𑀢𑁄𑀧𑀺 𑀥𑀫𑁆𑀫𑀁 𑀘𑀭𑀢𑀺, 𑀤𑀸𑀭𑀁 𑀧𑁄𑀲𑁂𑀦𑁆𑀢𑁄𑀧𑀺, 𑀅𑀧𑁆𑀧𑀓𑀲𑁆𑀫𑀺𑀁 𑀤𑀤𑀦𑁆𑀢𑁄𑀧𑀺, 𑀢𑀣𑀸𑀯𑀺𑀥𑀲𑁆𑀲 𑀏𑀢𑁂 𑀲𑀳𑀲𑁆𑀲𑀬𑀸𑀕𑀺𑀦𑁄 𑀓𑀮𑀫𑁆𑀧𑀺 𑀦𑀕𑁆𑀖𑀦𑁆𑀢𑀺. 𑀬𑀁 𑀢𑁂𑀦 𑀤𑀮𑀺𑀤𑁆𑀤𑁂𑀦 𑀏𑀓𑀧𑀝𑀺𑀯𑀻𑀲𑀓𑀫𑀢𑁆𑀢𑀫𑁆𑀧𑀺 𑀲𑀮𑀸𑀓𑀪𑀢𑁆𑀢𑀫𑀢𑁆𑀢𑀫𑁆𑀧𑀺 𑀯𑀸 𑀤𑀺𑀦𑁆𑀦𑀁, 𑀢𑀲𑁆𑀲 𑀤𑀸𑀦𑀲𑁆𑀲 𑀲𑀩𑁆𑀩𑁂𑀲𑀫𑁆𑀧𑀺 𑀢𑁂𑀲𑀁 𑀤𑀸𑀦𑀁 𑀓𑀮𑀁 𑀦𑀕𑁆𑀖𑀢𑀻𑀢𑀺. 𑀓𑀮𑀁 𑀦𑀸𑀫 𑀲𑁄𑀴𑀲𑀪𑀸𑀕𑁄𑀧𑀺 𑀲𑀢𑀪𑀸𑀕𑁄𑀧𑀺 𑀲𑀳𑀲𑁆𑀲𑀪𑀸𑀕𑁄𑀧𑀺. 𑀇𑀥 𑀲𑀢𑀪𑀸𑀕𑁄 𑀕𑀳𑀺𑀢𑁄. 𑀬𑀁 𑀢𑁂𑀦 𑀤𑀸𑀦𑀁 𑀤𑀺𑀦𑁆𑀦𑀁, 𑀢𑀲𑁆𑀫𑀺𑀁 𑀲𑀢𑀥𑀸 𑀯𑀺𑀪𑀢𑁆𑀢𑁂 𑀇𑀢𑀭𑁂𑀲𑀁 𑀤𑀲𑀓𑁄𑀝𑀺𑀲𑀳𑀲𑁆𑀲𑀤𑀸𑀦𑀁 𑀢𑀢𑁄 𑀏𑀓𑀓𑁄𑀝𑁆𑀞𑀸𑀲𑀫𑁆𑀧𑀺 𑀦𑀕𑁆𑀖𑀢𑀻𑀢𑀺 𑀆𑀳.

𑀏𑀯𑀁 𑀢𑀣𑀸𑀕𑀢𑁂 𑀤𑀸𑀦𑀲𑁆𑀲 𑀅𑀕𑁆𑀖𑀁 𑀓𑀭𑁄𑀦𑁆𑀢𑁂 𑀲𑀫𑀻𑀧𑁂 𑀞𑀺𑀢𑀸 𑀤𑁂𑀯𑀢𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀯𑀁 𑀪𑀕𑀯𑀸 𑀫𑀳𑀦𑁆𑀢𑀁 𑀤𑀸𑀦𑀁 𑀧𑀸𑀤𑁂𑀦 𑀧𑀯𑀝𑁆𑀝𑁂𑀢𑁆𑀯𑀸 𑀭𑀢𑀦𑀲𑀢𑀺𑀓𑁂 𑀯𑀺𑀬 𑀦𑀭𑀓𑁂 𑀧𑀓𑁆𑀔𑀺𑀧𑀦𑁆𑀢𑁄 𑀇𑀤𑀁 𑀏𑀯𑀁 𑀧𑀭𑀺𑀢𑁆𑀢𑀓𑀁 𑀤𑀸𑀦𑀁 𑀘𑀦𑁆𑀤𑀫𑀡𑁆𑀟𑀮𑁂 𑀧𑀳𑀭𑀦𑁆𑀢𑁄 𑀯𑀺𑀬 𑀉𑀓𑁆𑀔𑀺𑀧𑀢𑀺, 𑀓𑀣𑀁 𑀦𑀼 𑀔𑁄 𑀏𑀢𑀁 𑀫𑀳𑀧𑁆𑀨𑀮𑀢𑀭’’𑀦𑁆𑀢𑀺 𑀚𑀸𑀦𑀦𑀢𑁆𑀣𑀁 𑀕𑀸𑀣𑀸𑀬 𑀅𑀚𑁆𑀛𑀪𑀸𑀲𑀺. 𑀢𑀢𑁆𑀣 𑀓𑁂𑀦𑀸𑀢𑀺 𑀓𑁂𑀦 𑀓𑀸𑀭𑀡𑁂𑀦. 𑀫𑀳𑀕𑁆𑀕𑀢𑁄𑀢𑀺 𑀫𑀳𑀢𑁆𑀢𑀁 𑀕𑀢𑁄, 𑀯𑀺𑀧𑀼𑀮𑀲𑁆𑀲𑁂𑀢𑀁 𑀯𑁂𑀯𑀘𑀦𑀁. 𑀲𑀫𑁂𑀦 𑀤𑀺𑀦𑁆𑀦𑀲𑁆𑀲𑀸𑀢𑀺 𑀲𑀫𑁂𑀦 𑀤𑀺𑀦𑁆𑀦𑀲𑁆𑀲 𑀤𑀸𑀦𑀲𑁆𑀲. 𑀅𑀣𑀲𑁆𑀲𑀸 𑀪𑀕𑀯𑀸 𑀤𑀸𑀦𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀤𑀤𑀦𑁆𑀢𑀺 𑀳𑁂𑀓𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀲𑀫𑁂 𑀦𑀺𑀯𑀺𑀝𑁆𑀞𑀸𑀢𑀺 𑀯𑀺𑀲𑀫𑁂 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑀸 𑀳𑀼𑀢𑁆𑀯𑀸. 𑀙𑁂𑀢𑁆𑀯𑀸𑀢𑀺 𑀧𑁄𑀣𑁂𑀢𑁆𑀯𑀸. 𑀯𑀥𑀺𑀢𑁆𑀯𑀸𑀢𑀺 𑀫𑀸𑀭𑁂𑀢𑁆𑀯𑀸. 𑀲𑁄𑀘𑀬𑀺𑀢𑁆𑀯𑀸𑀢𑀺 𑀧𑀭𑀁 𑀲𑁄𑀓𑀲𑀫𑀧𑁆𑀧𑀺𑀢𑀁 𑀓𑀢𑁆𑀯𑀸. 𑀅𑀲𑁆𑀲𑀼𑀫𑀼𑀔𑀸𑀢𑀺 𑀅𑀲𑁆𑀲𑀼𑀫𑀼𑀔𑀲𑀫𑁆𑀫𑀺𑀲𑁆𑀲𑀸. 𑀧𑀭𑀁 𑀭𑁄𑀤𑀸𑀧𑁂𑀢𑁆𑀯𑀸 𑀤𑀺𑀦𑁆𑀦𑀤𑀸𑀦𑀜𑁆𑀳𑀺 𑀅𑀲𑁆𑀲𑀼𑀫𑀼𑀔𑀤𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀤𑀡𑁆𑀟𑀸𑀢𑀺 𑀤𑀡𑁆𑀟𑁂𑀦 𑀢𑀚𑁆𑀚𑁂𑀢𑁆𑀯𑀸 𑀧𑀳𑀭𑀺𑀢𑁆𑀯𑀸 𑀤𑀺𑀦𑁆𑀦𑀤𑀓𑁆𑀔𑀺𑀡𑀸 𑀲𑀤𑀡𑁆𑀟𑀸𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀦𑁆𑀢𑀺 𑀦𑀸𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑀸𑀬 𑀫𑀳𑀸𑀤𑀸𑀦𑀁 𑀕𑀳𑁂𑀢𑁆𑀯𑀸 𑀅𑀧𑁆𑀧𑀨𑀮𑀁 𑀦𑀸𑀫 𑀓𑀸𑀢𑀼𑀁 𑀲𑀓𑁆𑀓𑁄𑀫𑀺 𑀧𑀭𑀺𑀢𑁆𑀢𑀓𑀤𑀸𑀦𑀁 𑀯𑀸 𑀫𑀳𑀧𑁆𑀨𑀮𑀁 𑀦𑀸𑀫. 𑀇𑀤𑀁 𑀧𑀦 𑀫𑀳𑀸𑀤𑀸𑀦𑀁 𑀅𑀢𑁆𑀢𑀦𑁄 𑀉𑀧𑁆𑀧𑀢𑁆𑀢𑀺𑀬𑀸 𑀅𑀧𑀭𑀺𑀲𑀼𑀤𑁆𑀥𑀢𑀸𑀬 𑀏𑀯𑀁 𑀅𑀧𑁆𑀧𑀨𑀮𑀁 𑀦𑀸𑀫 𑀳𑁄𑀢𑀺, 𑀇𑀢𑀭𑀁 𑀧𑀭𑀺𑀢𑁆𑀢𑀤𑀸𑀦𑀁 𑀅𑀢𑁆𑀢𑀦𑁄 𑀉𑀧𑁆𑀧𑀢𑁆𑀢𑀺𑀬𑀸 𑀧𑀭𑀺𑀲𑀼𑀤𑁆𑀥𑀢𑀸𑀬 𑀏𑀯𑀁 𑀫𑀳𑀧𑁆𑀨𑀮𑀁 𑀦𑀸𑀫𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀦𑁆𑀢𑀺𑀆𑀤𑀺𑀫𑀸𑀳𑀸𑀢𑀺. 𑀤𑀼𑀢𑀺𑀬𑀁.

𑁩. 𑀲𑀸𑀥𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁩. 𑀢𑀢𑀺𑀬𑁂 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀉𑀤𑀸𑀳𑀸𑀭𑀁 𑀉𑀤𑀸𑀳𑀭𑀺. 𑀬𑀣𑀸 𑀳𑀺 𑀬𑀁 𑀢𑁂𑀮𑀁 𑀫𑀸𑀦𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀯𑀺𑀲𑁆𑀲𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀁 𑀅𑀯𑀲𑁂𑀲𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀜𑁆𑀘 𑀚𑀮𑀁 𑀢𑀴𑀸𑀓𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀁 𑀑𑀖𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑁂𑀯𑀁 𑀬𑀁 𑀧𑀻𑀢𑀺𑀯𑀘𑀦𑀁 𑀳𑀤𑀬𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀥𑀺𑀓𑀁 𑀳𑀼𑀢𑁆𑀯𑀸 𑀅𑀦𑁆𑀢𑁄 𑀅𑀲𑀡𑁆𑀞𑀳𑀺𑀢𑁆𑀯𑀸 𑀩𑀳𑀺 𑀦𑀺𑀓𑁆𑀔𑀫𑀢𑀺, 𑀢𑀁 𑀉𑀤𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀭𑀽𑀧𑀁 𑀧𑀻𑀢𑀺𑀫𑀬𑀁 𑀯𑀘𑀦𑀁 𑀦𑀺𑀘𑁆𑀙𑀸𑀭𑁂𑀲𑀻𑀢𑀺 𑀅𑀢𑁆𑀣𑁄. 𑀲𑀤𑁆𑀥𑀸𑀬𑀧𑀺 𑀲𑀸𑀳𑀼 𑀤𑀸𑀦𑀦𑁆𑀢𑀺 𑀓𑀫𑁆𑀫𑀜𑁆𑀘 𑀓𑀫𑁆𑀫𑀨𑀮𑀜𑁆𑀘 𑀲𑀤𑁆𑀤𑀳𑀺𑀢𑁆𑀯𑀸𑀧𑀺 𑀤𑀺𑀦𑁆𑀦𑀤𑀸𑀦𑀁 𑀲𑀸𑀳𑀼 𑀮𑀤𑁆𑀥𑀓𑀁 𑀪𑀤𑁆𑀤𑀓𑀫𑁂𑀯. 𑀆𑀳𑀽𑀢𑀺 𑀓𑀣𑁂𑀦𑁆𑀢𑀺. 𑀓𑀣𑀁 𑀧𑀦𑁂𑀢𑀁 𑀉𑀪𑀬𑀁 𑀲𑀫𑀁 𑀦𑀸𑀫 𑀳𑁄𑀢𑀻𑀢𑀺? 𑀚𑀻𑀯𑀺𑀢𑀪𑀻𑀭𑀼𑀓𑁄 𑀳𑀺 𑀬𑀼𑀚𑁆𑀛𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀔𑀬𑀪𑀻𑀭𑀼𑀓𑁄 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. ‘‘𑀚𑀻𑀯𑀺𑀢𑀜𑁆𑀘 𑀭𑀓𑁆𑀔𑀺𑀲𑁆𑀲𑀸𑀫𑀺 𑀬𑀼𑀚𑁆𑀛𑀺𑀲𑁆𑀲𑀸𑀫𑀺 𑀘𑀸’’𑀢𑀺 𑀳𑀺 𑀯𑀤𑀦𑁆𑀢𑁄 𑀦 𑀬𑀼𑀚𑁆𑀛𑀢𑀺. 𑀚𑀻𑀯𑀺𑀢𑁂 𑀧𑀦 𑀆𑀮𑀬𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸, ‘‘𑀙𑁂𑀚𑁆𑀚𑀁 𑀯𑀸 𑀳𑁄𑀢𑀼 𑀫𑀭𑀡𑀁 𑀯𑀸, 𑀕𑀡𑁆𑀳𑀺𑀲𑁆𑀲𑀸𑀫𑁂𑀢𑀁 𑀇𑀲𑁆𑀲𑀭𑀺𑀬’’𑀦𑁆𑀢𑀺 𑀉𑀲𑁆𑀲𑀳𑀦𑁆𑀢𑁄𑀯 𑀬𑀼𑀚𑁆𑀛𑀢𑀺. ‘‘𑀪𑁄𑀕𑁂 𑀘 𑀭𑀓𑁆𑀔𑀺𑀲𑁆𑀲𑀸𑀫𑀺, 𑀤𑀸𑀦𑀜𑁆𑀘 𑀤𑀲𑁆𑀲𑀸𑀫𑀻’’𑀢𑀺 𑀯𑀤𑀦𑁆𑀢𑁄 𑀦 𑀤𑀤𑀸𑀢𑀺. 𑀪𑁄𑀕𑁂𑀲𑀼 𑀧𑀦 𑀆𑀮𑀬𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀳𑀸𑀤𑀸𑀦𑀁 𑀤𑀲𑁆𑀲𑀸𑀫𑀻𑀢𑀺 𑀉𑀲𑁆𑀲𑀳𑀦𑁆𑀢𑁄𑀯 𑀤𑁂𑀢𑀺. 𑀏𑀯𑀁 𑀤𑀸𑀦𑀜𑁆𑀘 𑀬𑀼𑀤𑁆𑀥𑀜𑁆𑀘 𑀲𑀫𑀁 𑀳𑁄𑀢𑀺. 𑀓𑀺𑀜𑁆𑀘 𑀪𑀺𑀬𑁆𑀬𑁄? 𑀅𑀧𑁆𑀧𑀸𑀧𑀺 𑀲𑀦𑁆𑀢𑀸 𑀩𑀳𑀼𑀓𑁂 𑀚𑀺𑀦𑀦𑁆𑀢𑀻𑀢𑀺 𑀬𑀣𑀸 𑀘 𑀬𑀼𑀤𑁆𑀥𑁂 𑀅𑀧𑁆𑀧𑀓𑀸𑀧𑀺 𑀯𑀻𑀭𑀧𑀼𑀭𑀺𑀲𑀸 𑀩𑀳𑀼𑀓𑁂 𑀪𑀻𑀭𑀼𑀧𑀼𑀭𑀺𑀲𑁂 𑀚𑀺𑀦𑀦𑁆𑀢𑀺, 𑀏𑀯𑀁 𑀲𑀤𑁆𑀥𑀸𑀤𑀺𑀲𑀫𑁆𑀧𑀦𑁆𑀦𑁄 𑀅𑀧𑁆𑀧𑀓𑀫𑁆𑀧𑀺 𑀤𑀸𑀦𑀁 𑀤𑀤𑀦𑁆𑀢𑁄 𑀩𑀳𑀼𑀫𑀘𑁆𑀙𑁂𑀭𑀁 𑀫𑀤𑁆𑀤𑀢𑀺, 𑀩𑀳𑀼𑀜𑁆𑀘 𑀤𑀸𑀦𑀯𑀺𑀧𑀸𑀓𑀁 𑀅𑀥𑀺𑀕𑀘𑁆𑀙𑀢𑀺. 𑀏𑀯𑀫𑁆𑀧𑀺 𑀤𑀸𑀦𑀜𑁆𑀘 𑀬𑀼𑀤𑁆𑀥𑀜𑁆𑀘 𑀲𑀫𑀸𑀦𑀁. 𑀢𑁂𑀦𑁂𑀯𑀸𑀳 𑁋

‘‘𑀅𑀧𑁆𑀧𑀫𑁆𑀧𑀺 𑀘𑁂 𑀲𑀤𑁆𑀤𑀳𑀸𑀦𑁄 𑀤𑀤𑀸𑀢𑀺,

𑀢𑁂𑀦𑁂𑀯 𑀲𑁄 𑀳𑁄𑀢𑀺 𑀲𑀼𑀔𑀻 𑀧𑀭𑀢𑁆𑀣𑀸’’𑀢𑀺.

𑀇𑀫𑀲𑁆𑀲 𑀘 𑀧𑀦𑀢𑁆𑀣𑀲𑁆𑀲 𑀧𑀓𑀸𑀲𑀦𑀢𑁆𑀣𑀁 𑀏𑀓𑀲𑀸𑀝𑀓𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼 𑀘 𑀅𑀗𑁆𑀓𑀼𑀭𑀯𑀢𑁆𑀣𑀼 𑀘 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀥𑀫𑁆𑀫𑀮𑀤𑁆𑀥𑀲𑁆𑀲𑀸𑀢𑀺 𑀥𑀫𑁆𑀫𑁂𑀦 𑀲𑀫𑁂𑀦 𑀮𑀤𑁆𑀥𑀲𑁆𑀲 𑀪𑁄𑀕𑀲𑁆𑀲 𑀥𑀫𑁆𑀫𑀮𑀤𑁆𑀥𑀲𑁆𑀲 𑀘 𑀧𑀼𑀕𑁆𑀕𑀮𑀲𑁆𑀲. 𑀏𑀢𑁆𑀣 𑀧𑀼𑀕𑁆𑀕𑀮𑁄 𑀮𑀤𑁆𑀥𑀥𑀫𑁆𑀫𑁄 𑀦𑀸𑀫 𑀅𑀥𑀺𑀕𑀢𑀥𑀫𑁆𑀫𑁄 𑀅𑀭𑀺𑀬𑀧𑀼𑀕𑁆𑀕𑀮𑁄. 𑀇𑀢𑀺 𑀬𑀁 𑀥𑀫𑁆𑀫𑀮𑀤𑁆𑀥𑀲𑁆𑀲 𑀪𑁄𑀕𑀲𑁆𑀲 𑀤𑀸𑀦𑀁 𑀥𑀫𑁆𑀫𑀮𑀤𑁆𑀥𑀲𑁆𑀲 𑀅𑀭𑀺𑀬𑀧𑀼𑀕𑁆𑀕𑀮𑀲𑁆𑀲 𑀤𑀻𑀬𑀢𑀺, 𑀢𑀫𑁆𑀧𑀺 𑀲𑀸𑀥𑀽𑀢𑀺 𑀅𑀢𑁆𑀣𑁄. 𑀬𑁄 𑀥𑀫𑁆𑀫𑀮𑀤𑁆𑀥𑀲𑁆𑀲𑀸𑀢𑀺 𑀇𑀫𑀲𑁆𑀫𑀺𑀫𑁆𑀧𑀺 𑀕𑀸𑀣𑀸𑀧𑀤𑁂 𑀅𑀬𑀫𑁂𑀯 𑀅𑀢𑁆𑀣𑁄. 𑀉𑀝𑁆𑀞𑀸𑀦𑀯𑀻𑀭𑀺𑀬𑀸𑀥𑀺𑀕𑀢𑀲𑁆𑀲𑀸𑀢𑀺 𑀉𑀝𑁆𑀞𑀸𑀦𑁂𑀦 𑀘 𑀯𑀻𑀭𑀺𑀬𑁂𑀦 𑀘 𑀅𑀥𑀺𑀕𑀢𑀲𑁆𑀲 𑀪𑁄𑀕𑀲𑁆𑀲. 𑀯𑁂𑀢𑀭𑀡𑀺𑀦𑁆𑀢𑀺 𑀤𑁂𑀲𑀦𑀸𑀲𑀻𑀲𑀫𑀢𑁆𑀢𑀫𑁂𑀢𑀁. 𑀬𑀫𑀲𑁆𑀲 𑀧𑀦 𑀯𑁂𑀢𑀭𑀡𑀺𑀫𑁆𑀧𑀺 𑀲𑀜𑁆𑀚𑀻𑀯𑀓𑀸𑀴𑀲𑀼𑀢𑁆𑀢𑀸𑀤𑀬𑁄𑀧𑀺 𑀏𑀓𑀢𑀺𑀁𑀲𑀫𑀳𑀸𑀦𑀺𑀭𑀬𑁂𑀧𑀺 𑀲𑀩𑁆𑀩𑀲𑁄𑀯 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀯𑀺𑀘𑁂𑀬𑁆𑀬 𑀤𑀸𑀦𑀦𑁆𑀢𑀺 𑀯𑀺𑀘𑀺𑀦𑀺𑀢𑁆𑀯𑀸 𑀤𑀺𑀦𑁆𑀦𑀤𑀸𑀦𑀁. 𑀢𑀢𑁆𑀣 𑀤𑁆𑀯𑁂 𑀯𑀺𑀘𑀺𑀦𑀦𑀸 𑀤𑀓𑁆𑀔𑀺𑀡𑀸𑀯𑀺𑀘𑀺𑀦𑀦𑀁 𑀤𑀓𑁆𑀔𑀺𑀡𑁂𑀬𑁆𑀬𑀯𑀺𑀘𑀺𑀦𑀦𑀜𑁆𑀘. 𑀢𑁂𑀲𑀼 𑀮𑀸𑀫𑀓𑀮𑀸𑀫𑀓𑁂 𑀧𑀘𑁆𑀘𑀬𑁂 𑀅𑀧𑀦𑁂𑀢𑁆𑀯𑀸 𑀧𑀡𑀻𑀢𑀧𑀡𑀻𑀢𑁂 𑀯𑀺𑀘𑀺𑀦𑀺𑀢𑁆𑀯𑀸 𑀢𑁂𑀲𑀁 𑀤𑀸𑀦𑀁 𑀤𑀓𑁆𑀔𑀺𑀡𑀸𑀯𑀺𑀘𑀺𑀦𑀦𑀁 𑀦𑀸𑀫. 𑀯𑀺𑀧𑀦𑁆𑀦𑀲𑀻𑀮𑁂 𑀇𑀢𑁄 𑀩𑀳𑀺𑀤𑁆𑀥𑀸 𑀧𑀜𑁆𑀘𑀦𑀯𑀼𑀢𑀺𑀧𑀸𑀲𑀡𑁆𑀟𑀪𑁂𑀤𑁂 𑀯𑀸 𑀤𑀓𑁆𑀔𑀺𑀡𑁂𑀬𑁆𑀬𑁂 𑀧𑀳𑀸𑀬 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑀸𑀦𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀸𑀦𑀁 𑀤𑀸𑀦𑀁 𑀤𑀓𑁆𑀔𑀺𑀡𑁂𑀬𑁆𑀬𑀯𑀺𑀘𑀺𑀦𑀦𑀁 𑀦𑀸𑀫. 𑀏𑀯𑀁 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀯𑀺𑀘𑁂𑀬𑁆𑀬 𑀤𑀸𑀦𑀁. 𑀲𑀼𑀕𑀢𑀧𑁆𑀧𑀲𑀢𑁆𑀣𑀦𑁆𑀢𑀺 𑀲𑀼𑀕𑀢𑁂𑀦 𑀯𑀡𑁆𑀡𑀺𑀢𑀁. 𑀢𑀢𑁆𑀣 𑀤𑀓𑁆𑀔𑀺𑀡𑁂𑀬𑁆𑀬𑀯𑀺𑀘𑀺𑀦𑀦𑀁 𑀤𑀲𑁆𑀲𑁂𑀦𑁆𑀢𑁄 𑀬𑁂 𑀤𑀓𑁆𑀔𑀺𑀡𑁂𑀬𑁆𑀬𑀸𑀢𑀺𑀆𑀤𑀺𑀫𑀸𑀳. 𑀩𑀻𑀚𑀸𑀦𑀺 𑀯𑀼𑀢𑁆𑀢𑀸𑀦𑀺 𑀬𑀣𑀸𑀢𑀺 𑀇𑀫𑀺𑀦𑀸 𑀧𑀦 𑀤𑀓𑁆𑀔𑀺𑀡𑀸𑀯𑀺𑀘𑀺𑀦𑀦𑀁 𑀆𑀳. 𑀅𑀯𑀺𑀧𑀦𑁆𑀦𑀩𑀻𑀚𑀲𑀤𑀺𑀲𑀸 𑀳𑀺 𑀯𑀺𑀘𑀺𑀦𑀺𑀢𑁆𑀯𑀸 𑀕𑀳𑀺𑀢𑀸 𑀧𑀡𑀻𑀢𑀧𑀡𑀻𑀢𑀸 𑀤𑁂𑀬𑁆𑀬𑀥𑀫𑁆𑀫𑀸𑀢𑀺.

𑀧𑀸𑀡𑁂𑀲𑀼𑀧𑀺 𑀲𑀸𑀥𑀼 𑀲𑀁𑀬𑀫𑁄𑀢𑀺 𑀧𑀸𑀡𑁂𑀲𑀼 𑀲𑀁𑀬𑀢𑀪𑀸𑀯𑁄𑀧𑀺 𑀪𑀤𑁆𑀤𑀓𑁄. 𑀅𑀬𑀁 𑀤𑁂𑀯𑀢𑀸 𑀇𑀢𑀭𑀸𑀳𑀺 𑀓𑀣𑀺𑀢𑀁 𑀤𑀸𑀦𑀸𑀦𑀺𑀲𑀁𑀲𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀻𑀮𑀸𑀦𑀺𑀲𑀁𑀲𑀁 𑀓𑀣𑁂𑀢𑀼𑀫𑀸𑀭𑀤𑁆𑀥𑀸. 𑀅𑀳𑁂𑀞𑀬𑀁 𑀘𑀭𑀦𑁆𑀢𑀺 𑀅𑀯𑀺𑀳𑀺𑀁𑀲𑀦𑁆𑀢𑁄 𑀘𑀭𑀫𑀸𑀦𑁄. 𑀧𑀭𑀽𑀧𑀯𑀸𑀤𑀸𑀢𑀺 𑀧𑀭𑀲𑁆𑀲 𑀉𑀧𑀯𑀸𑀤𑀪𑀬𑁂𑀦. 𑀪𑀬𑀸𑀢𑀺 𑀉𑀧𑀯𑀸𑀤𑀪𑀬𑀸. 𑀤𑀸𑀦𑀸 𑀘 𑀔𑁄 𑀥𑀫𑁆𑀫𑀧𑀤𑀁𑀯 𑀲𑁂𑀬𑁆𑀬𑁄𑀢𑀺 𑀤𑀸𑀦𑀢𑁄 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀥𑀫𑁆𑀫𑀧𑀤𑀫𑁂𑀯 𑀲𑁂𑀬𑁆𑀬𑁄. 𑀧𑀼𑀩𑁆𑀩𑁂 𑀘 𑀳𑀺 𑀧𑀼𑀩𑁆𑀩𑀢𑀭𑁂 𑀘 𑀲𑀦𑁆𑀢𑁄𑀢𑀺 𑀧𑀼𑀩𑁆𑀩𑁂 𑀘 𑀓𑀲𑁆𑀲𑀧𑀩𑀼𑀤𑁆𑀥𑀸𑀤𑀺𑀓𑀸𑀮𑁂 𑀧𑀼𑀩𑁆𑀩𑀢𑀭𑁂 𑀘 𑀓𑁄𑀡𑀸𑀕𑀫𑀦𑀩𑀼𑀤𑁆𑀥𑀸𑀤𑀺𑀓𑀸𑀮𑁂, 𑀲𑀩𑁆𑀩𑁂𑀧𑀺 𑀯𑀸 𑀏𑀢𑁂 𑀧𑀼𑀩𑁆𑀩𑁂 𑀘 𑀧𑀼𑀩𑁆𑀩𑀢𑀭𑁂 𑀘 𑀲𑀦𑁆𑀢𑁄 𑀦𑀸𑀫𑀸𑀢𑀺. 𑀢𑀢𑀺𑀬𑀁.

𑁪. 𑀦𑀲𑀦𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪. 𑀘𑀢𑀼𑀢𑁆𑀣𑁂 𑀓𑀫𑀦𑀻𑀬𑀸𑀦𑀻𑀢𑀺 𑀭𑀽𑀧𑀸𑀤𑀻𑀦𑀺 𑀇𑀝𑁆𑀞𑀸𑀭𑀫𑁆𑀫𑀡𑀸𑀦𑀺. 𑀅𑀧𑀼𑀦𑀸𑀕𑀫𑀦𑀁 𑀅𑀦𑀸𑀕𑀦𑁆𑀢𑀸 𑀧𑀼𑀭𑀺𑀲𑁄 𑀫𑀘𑁆𑀘𑀼𑀥𑁂𑀬𑁆𑀬𑀸𑀢𑀺 𑀢𑁂𑀪𑀽𑀫𑀓𑀯𑀝𑁆𑀝𑀲𑀗𑁆𑀔𑀸𑀢𑀸 𑀫𑀘𑁆𑀘𑀼𑀥𑁂𑀬𑁆𑀬𑀸 𑀅𑀧𑀼𑀦𑀸𑀕𑀫𑀦𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀅𑀦𑀸𑀕𑀦𑁆𑀢𑀸. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀲𑀢𑁆𑀢𑀸 𑀦 𑀧𑀼𑀦𑀸𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀅𑀧𑀼𑀦𑀸𑀕𑀫𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀓𑀸𑀫𑁂𑀲𑀼 𑀩𑀤𑁆𑀥𑁄 𑀘 𑀧𑀫𑀢𑁆𑀢𑁄 𑀘 𑀅𑀦𑀸𑀕𑀦𑁆𑀢𑀸 𑀦𑀸𑀫 𑀳𑁄𑀢𑀺, 𑀲𑁄 𑀢𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀙𑀦𑁆𑀤𑀚𑀦𑁆𑀢𑀺 𑀢𑀡𑁆𑀳𑀸𑀙𑀦𑁆𑀤𑀢𑁄 𑀚𑀸𑀢𑀁. 𑀅𑀖𑀦𑁆𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀤𑀼𑀓𑁆𑀔𑀁. 𑀤𑀼𑀢𑀺𑀬𑀧𑀤𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀙𑀦𑁆𑀤𑀯𑀺𑀦𑀬𑀸 𑀅𑀖𑀯𑀺𑀦𑀬𑁄𑀢𑀺 𑀢𑀡𑁆𑀳𑀸𑀯𑀺𑀦𑀬𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑀯𑀺𑀦𑀬𑁄. 𑀅𑀖𑀯𑀺𑀦𑀬𑀸 𑀤𑀼𑀓𑁆𑀔𑀯𑀺𑀦𑀬𑁄𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀯𑀺𑀦𑀬𑁂𑀦 𑀯𑀝𑁆𑀝𑀤𑀼𑀓𑁆𑀔𑀁 𑀯𑀺𑀦𑀻𑀢𑀫𑁂𑀯 𑀳𑁄𑀢𑀺. 𑀘𑀺𑀢𑁆𑀭𑀸𑀦𑀻𑀢𑀺 𑀆𑀭𑀫𑁆𑀫𑀡𑀘𑀺𑀢𑁆𑀢𑀸𑀦𑀺. 𑀲𑀗𑁆𑀓𑀧𑁆𑀧𑀭𑀸𑀕𑁄𑀢𑀺 𑀲𑀗𑁆𑀓𑀧𑁆𑀧𑀺𑀢𑀭𑀸𑀕𑁄. 𑀏𑀯𑀫𑁂𑀢𑁆𑀣 𑀯𑀢𑁆𑀣𑀼𑀓𑀸𑀫𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀓𑀺𑀮𑁂𑀲𑀓𑀸𑀫𑁄 𑀓𑀸𑀫𑁄𑀢𑀺 𑀯𑀼𑀢𑁆𑀢𑁄. 𑀅𑀬𑀁 𑀧𑀦𑀢𑁆𑀣𑁄 𑀧𑀲𑀽𑀭𑀲𑀼𑀢𑁆𑀢𑁂𑀦 (𑀲𑀼. 𑀦𑀺. 𑁮𑁩𑁦 𑀆𑀤𑀬𑁄) 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀧𑀲𑀽𑀭𑀧𑀭𑀺𑀩𑁆𑀩𑀸𑀚𑀓𑁄 𑀳𑀺 𑀣𑁂𑀭𑁂𑀦 ‘‘𑀲𑀗𑁆𑀓𑀧𑁆𑀧𑀭𑀸𑀕𑁄 𑀧𑀼𑀭𑀺𑀲𑀲𑁆𑀲 𑀓𑀸𑀫𑁄’’𑀢𑀺 𑀯𑀼𑀢𑁆𑀢𑁂 𑁋

‘‘𑀦 𑀢𑁂 𑀓𑀸𑀫𑀸 𑀬𑀸𑀦𑀺 𑀘𑀺𑀢𑁆𑀭𑀸𑀦𑀺 𑀮𑁄𑀓𑁂,

𑀲𑀗𑁆𑀓𑀧𑁆𑀧𑀭𑀸𑀕𑀜𑁆𑀘 𑀯𑀤𑁂𑀲𑀺 𑀓𑀸𑀫𑀁;

𑀲𑀗𑁆𑀓𑀧𑁆𑀧𑀬𑀁 𑀅𑀓𑀼𑀲𑀮𑁂 𑀯𑀺𑀢𑀓𑁆𑀓𑁂,

𑀪𑀺𑀓𑁆𑀔𑀽𑀧𑀺 𑀢𑁂 𑀳𑁂𑀳𑀺𑀦𑁆𑀢𑀺 𑀓𑀸𑀫𑀪𑁄𑀕𑀻’’𑀢𑀺. 𑁋

𑀆𑀳. 𑀅𑀣 𑀦𑀁 𑀣𑁂𑀭𑁄 𑀅𑀯𑁄𑀘 𑁋

‘‘𑀢𑁂 𑀘𑁂 𑀓𑀸𑀫𑀸 𑀬𑀸𑀦𑀺 𑀘𑀺𑀢𑁆𑀭𑀸𑀦𑀺 𑀮𑁄𑀓𑁂,

𑀲𑀗𑁆𑀓𑀧𑁆𑀧𑀭𑀸𑀕𑀁 𑀦 𑀯𑀤𑁂𑀲𑀺 𑀓𑀸𑀫𑀁;

𑀧𑀲𑁆𑀲𑀦𑁆𑀢𑁄 𑀭𑀽𑀧𑀸𑀦𑀺 𑀫𑀦𑁄𑀭𑀫𑀸𑀦𑀺,

𑀲𑀢𑁆𑀣𑀸𑀧𑀺 𑀢𑁂 𑀳𑁂𑀳𑀺𑀢𑀺 𑀓𑀸𑀫𑀪𑁄𑀕𑀻.

𑀲𑀼𑀡𑀦𑁆𑀢𑁄 𑀲𑀤𑁆𑀤𑀸𑀦𑀺, 𑀖𑀸𑀬𑀦𑁆𑀢𑁄 𑀕𑀦𑁆𑀥𑀸𑀦𑀺;

𑀲𑀸𑀬𑀦𑁆𑀢𑁄 𑀭𑀲𑀸𑀦𑀺, 𑀨𑀼𑀲𑀦𑁆𑀢𑁄 𑀨𑀲𑁆𑀲𑀸𑀦𑀺 𑀫𑀦𑁄𑀭𑀫𑀸𑀦𑀺;

𑀲𑀢𑁆𑀣𑀸𑀧𑀺 𑀢𑁂 𑀳𑁂𑀳𑀺𑀢𑀺 𑀓𑀸𑀫𑀪𑁄𑀕𑀻’’𑀢𑀺.

𑀅𑀣𑁂𑀢𑁆𑀣 𑀥𑀻𑀭𑀸𑀢𑀺 𑀅𑀣 𑀏𑀢𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀡𑁆𑀟𑀺𑀢𑀸 𑀙𑀦𑁆𑀤𑀭𑀸𑀕𑀁 𑀯𑀺𑀦𑀬𑀦𑁆𑀢𑀺. 𑀲𑀁𑀬𑁄𑀚𑀦𑀁 𑀲𑀩𑁆𑀩𑀦𑁆𑀢𑀺 𑀤𑀲𑀯𑀺𑀥𑀫𑁆𑀧𑀺 𑀲𑀁𑀬𑁄𑀚𑀦𑀁. 𑀅𑀓𑀺𑀜𑁆𑀘𑀦𑀦𑁆𑀢𑀺 𑀭𑀸𑀕𑀓𑀺𑀜𑁆𑀘𑀦𑀸𑀤𑀺𑀯𑀺𑀭𑀳𑀺𑀢𑀁. 𑀦𑀸𑀦𑀼𑀧𑀢𑀦𑁆𑀢𑀺 𑀤𑀼𑀓𑁆𑀔𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀸 𑀧𑀦 𑀢𑀲𑁆𑀲 𑀉𑀧𑀭𑀺 𑀦 𑀧𑀢𑀦𑁆𑀢𑀺. 𑀇𑀘𑁆𑀘𑀸𑀬𑀲𑁆𑀫𑀸 𑀫𑁄𑀖𑀭𑀸𑀚𑀸𑀢𑀺, ‘‘𑀧𑀳𑀸𑀲𑀺 𑀲𑀗𑁆𑀔’’𑀦𑁆𑀢𑀺 𑀕𑀸𑀣𑀁 𑀲𑀼𑀢𑁆𑀯𑀸 𑀢𑀲𑁆𑀲𑀁 𑀧𑀭𑀺𑀲𑀢𑀺 𑀅𑀦𑀼𑀲𑀦𑁆𑀥𑀺𑀓𑀼𑀲𑀮𑁄 𑀫𑁄𑀖𑀭𑀸𑀚𑀸 𑀦𑀸𑀫 𑀣𑁂𑀭𑁄 ‘‘𑀇𑀫𑀺𑀲𑁆𑀲𑀸 𑀕𑀸𑀣𑀸𑀬 𑀅𑀢𑁆𑀣𑁄 𑀦 𑀬𑀣𑀸𑀦𑀼𑀲𑀦𑁆𑀥𑀺𑀁 𑀕𑀢𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀬𑀣𑀸𑀦𑀼𑀲𑀦𑁆𑀥𑀺𑀁 𑀖𑀝𑁂𑀦𑁆𑀢𑁄 𑀏𑀯𑀫𑀸𑀳. 𑀢𑀢𑁆𑀣 𑀇𑀥 𑀯𑀸 𑀳𑀼𑀭𑀁 𑀯𑀸𑀢𑀺 𑀇𑀥𑀮𑁄𑀓𑁂 𑀯𑀸 𑀧𑀭𑀮𑁄𑀓𑁂 𑀯𑀸. 𑀦𑀭𑀼𑀢𑁆𑀢𑀫𑀁 𑀅𑀢𑁆𑀣𑀘𑀭𑀁 𑀦𑀭𑀸𑀦𑀦𑁆𑀢𑀺 𑀓𑀺𑀜𑁆𑀘𑀸𑀧𑀺 𑀲𑀩𑁆𑀩𑁂 𑀔𑀻𑀡𑀸𑀲𑀯𑀸 𑀦𑀭𑀼𑀢𑁆𑀢𑀫𑀸 𑀘𑁂𑀯 𑀅𑀢𑁆𑀣𑀘𑀭𑀸 𑀘 𑀦𑀭𑀸𑀦𑀁, 𑀣𑁂𑀭𑁄 𑀧𑀦 𑀤𑀲𑀩𑀮𑀁 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀬𑁂 𑀢𑀁 𑀦𑀫𑀲𑁆𑀲𑀦𑁆𑀢𑀺 𑀧𑀲𑀁𑀲𑀺𑀬𑀸 𑀢𑁂𑀢𑀺 𑀬𑀤𑀺 𑀢𑀣𑀸𑀯𑀺𑀫𑀼𑀢𑁆𑀢𑀁 𑀤𑁂𑀯𑀫𑀦𑀼𑀲𑁆𑀲𑀸 𑀦𑀫𑀲𑁆𑀲𑀦𑁆𑀢𑀺, 𑀅𑀣 𑀬𑁂 𑀢𑀁 𑀪𑀕𑀯𑀦𑁆𑀢𑀁 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀅𑀦𑀼𑀧𑀝𑀺𑀧𑀢𑁆𑀢𑀺𑀬𑀸 𑀯𑀸 𑀦𑀫𑀲𑁆𑀲𑀦𑁆𑀢𑀺, 𑀢𑁂 𑀓𑀺𑀁 𑀧𑀲𑀁𑀲𑀺𑀬𑀸, 𑀉𑀤𑀸𑀳𑀼 𑀅𑀧𑀲𑀁𑀲𑀺𑀬𑀸𑀢𑀺. 𑀪𑀺𑀓𑁆𑀔𑀽𑀢𑀺 𑀫𑁄𑀖𑀭𑀸𑀚𑀢𑁆𑀣𑁂𑀭𑀁 𑀆𑀮𑀧𑀢𑀺. 𑀅𑀜𑁆𑀜𑀸𑀬 𑀥𑀫𑁆𑀫𑀦𑁆𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀚𑀸𑀦𑀺𑀢𑁆𑀯𑀸. 𑀲𑀗𑁆𑀕𑀸𑀢𑀺𑀕𑀸 𑀢𑁂𑀧𑀺 𑀪𑀯𑀦𑁆𑀢𑀻𑀢𑀺 𑀬𑁂 𑀢𑀁 𑀓𑀸𑀬𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀅𑀦𑀼𑀧𑀝𑀺𑀧𑀢𑁆𑀢𑀺𑀬𑀸 𑀯𑀸 𑀦𑀫𑀲𑁆𑀲𑀦𑁆𑀢𑀺. 𑀢𑁂 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀅𑀜𑁆𑀜𑀸𑀬 𑀯𑀺𑀘𑀺𑀓𑀺𑀘𑁆𑀙𑀁 𑀧𑀳𑀸𑀬 𑀲𑀗𑁆𑀕𑀸𑀢𑀺𑀕𑀸𑀧𑀺 𑀳𑁄𑀦𑁆𑀢𑀺, 𑀧𑀲𑀁𑀲𑀺𑀬𑀸𑀧𑀺 𑀳𑁄𑀦𑁆𑀢𑀻𑀢𑀺. 𑀘𑀢𑀼𑀢𑁆𑀣𑀁.

𑁫. 𑀉𑀚𑁆𑀛𑀸𑀦𑀲𑀜𑁆𑀜𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫. 𑀧𑀜𑁆𑀘𑀫𑁂 𑀉𑀚𑁆𑀛𑀸𑀦𑀲𑀜𑁆𑀜𑀺𑀓𑀸𑀢𑀺 𑀉𑀚𑁆𑀛𑀸𑀦𑀲𑀜𑁆𑀜𑀻 𑀤𑁂𑀯𑀮𑁄𑀓𑁄 𑀦𑀸𑀫 𑀧𑀸𑀝𑀺𑀬𑁂𑀓𑁆𑀓𑁄 𑀦𑀢𑁆𑀣𑀺, 𑀇𑀫𑀸 𑀧𑀦 𑀤𑁂𑀯𑀢𑀸 𑀢𑀣𑀸𑀕𑀢𑀲𑁆𑀲 𑀘𑀢𑀼𑀧𑀘𑁆𑀘𑀬𑀧𑀭𑀺𑀪𑁄𑀕𑀁 𑀦𑀺𑀲𑁆𑀲𑀸𑀬 𑀉𑀚𑁆𑀛𑀸𑀬𑀫𑀸𑀦𑀸 𑀆𑀕𑀢𑀸. 𑀢𑀸𑀲𑀁 𑀓𑀺𑀭 𑀏𑀯𑀁 𑀅𑀳𑁄𑀲𑀺 𑁋 ‘‘𑀲𑀫𑀡𑁄 𑀕𑁄𑀢𑀫𑁄 𑀪𑀺𑀓𑁆𑀔𑀽𑀦𑀁 𑀧𑀁𑀲𑀼𑀓𑀽𑀮𑀘𑀻𑀯𑀭-𑀧𑀺𑀡𑁆𑀟𑀺𑀬𑀸𑀮𑁄𑀧-𑀭𑀼𑀓𑁆𑀔𑀫𑀽𑀮𑀲𑁂𑀦𑀸𑀲𑀦𑀧𑀽𑀢𑀺𑀫𑀼𑀢𑁆𑀢𑀪𑁂𑀲𑀚𑁆𑀚𑁂𑀳𑀺 𑀲𑀦𑁆𑀢𑁄𑀲𑀲𑁆𑀲𑁂𑀯 𑀧𑀭𑀺𑀬𑀦𑁆𑀢𑀓𑀸𑀭𑀺𑀢𑀁 𑀯𑀡𑁆𑀡𑁂𑀢𑀺, 𑀲𑀬𑀁 𑀧𑀦 𑀧𑀢𑁆𑀢𑀼𑀡𑁆𑀡𑀤𑀼𑀓𑀽𑀮 𑀔𑁄𑀫𑀸𑀤𑀻𑀦𑀺 𑀧𑀡𑀻𑀢𑀘𑀻𑀯𑀭𑀸𑀦𑀺 𑀥𑀸𑀭𑁂𑀢𑀺, 𑀭𑀸𑀚𑀸𑀭𑀳𑀁 𑀉𑀢𑁆𑀢𑀫𑀁 𑀪𑁄𑀚𑀦𑀁 𑀪𑀼𑀜𑁆𑀚𑀢𑀺, 𑀤𑁂𑀯𑀯𑀺𑀫𑀸𑀦𑀓𑀧𑁆𑀧𑀸𑀬 𑀕𑀦𑁆𑀥𑀓𑀼𑀝𑀺𑀬𑀸 𑀯𑀭𑀲𑀬𑀦𑁂 𑀲𑀬𑀢𑀺, 𑀲𑀧𑁆𑀧𑀺𑀦𑀯𑀦𑀻𑀢𑀸𑀤𑀻𑀦𑀺 𑀪𑁂𑀲𑀚𑁆𑀚𑀸𑀦𑀺 𑀧𑀝𑀺𑀲𑁂𑀯𑀢𑀺, 𑀤𑀺𑀯𑀲𑀁 𑀫𑀳𑀸𑀚𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀯𑀘𑀦𑀫𑀲𑁆𑀲 𑀅𑀜𑁆𑀜𑀢𑁄 𑀕𑀘𑁆𑀙𑀢𑀺, 𑀓𑀺𑀭𑀺𑀬𑀸 𑀅𑀜𑁆𑀜𑀢𑁄’’𑀢𑀺 𑀉𑀚𑁆𑀛𑀸𑀬𑀫𑀸𑀦𑀸 𑀆𑀕𑀫𑀺𑀁𑀲𑀼. 𑀢𑁂𑀦 𑀢𑀸𑀲𑀁 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 ‘‘𑀉𑀚𑁆𑀛𑀸𑀦𑀲𑀜𑁆𑀜𑀺𑀓𑀸’’𑀢𑀺 𑀦𑀸𑀫𑀁 𑀕𑀳𑀺𑀢𑀁.

𑀅𑀜𑁆𑀜𑀣𑀸 𑀲𑀦𑁆𑀢𑀦𑁆𑀢𑀺 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀪𑀽𑀢𑀁. 𑀦𑀺𑀓𑀘𑁆𑀘𑀸𑀢𑀺 𑀦𑀺𑀓𑀢𑀺𑀬𑀸 𑀯𑀜𑁆𑀘𑀦𑀸𑀬, 𑀯𑀜𑁆𑀘𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀺𑀢𑀯𑀲𑁆𑀲𑁂𑀯𑀸𑀢𑀺 𑀓𑀺𑀢𑀯𑁄 𑀯𑀼𑀘𑁆𑀘𑀢𑀺 𑀲𑀸𑀓𑀼𑀡𑀺𑀓𑁄. 𑀲𑁄 𑀳𑀺 𑀅𑀕𑀼𑀫𑁆𑀩𑁄𑀯 𑀲𑀫𑀸𑀦𑁄 𑀲𑀸𑀔𑀧𑀡𑁆𑀡𑀸𑀤𑀺𑀧𑀝𑀺𑀘𑁆𑀙𑀸𑀤𑀦𑁂𑀦 𑀕𑀼𑀫𑁆𑀩𑀯𑀡𑁆𑀡𑀁 𑀤𑀲𑁆𑀲𑁂𑀢𑁆𑀯𑀸 𑀉𑀧𑀕𑀢𑁂 𑀫𑁄𑀭𑀢𑀺𑀢𑁆𑀢𑀺𑀭𑀸𑀤𑀬𑁄 𑀲𑀓𑀼𑀡𑁂 𑀫𑀸𑀭𑁂𑀢𑁆𑀯𑀸 𑀤𑀸𑀭𑀪𑀭𑀡𑀁 𑀓𑀭𑁄𑀢𑀺. 𑀇𑀢𑀺 𑀢𑀲𑁆𑀲 𑀓𑀺𑀢𑀯𑀲𑁆𑀲 𑀇𑀫𑀸𑀬 𑀯𑀜𑁆𑀘𑀦𑀸𑀬 𑀏𑀯𑀁 𑀯𑀜𑁆𑀘𑁂𑀢𑁆𑀯𑀸 𑀲𑀓𑀼𑀡𑀫𑀁𑀲𑀪𑁄𑀚𑀦𑀁 𑀯𑀺𑀬 𑀓𑀼𑀳𑀓𑀲𑁆𑀲𑀸𑀧𑀺 𑀧𑀁𑀲𑀼𑀓𑀽𑀮𑁂𑀦 𑀅𑀢𑁆𑀢𑀸𑀦𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀓𑀣𑀸𑀙𑁂𑀓𑀢𑀸𑀬 𑀫𑀳𑀸𑀚𑀦𑀁 𑀯𑀜𑁆𑀘𑁂𑀢𑁆𑀯𑀸 𑀔𑀸𑀤𑀫𑀸𑀦𑀲𑁆𑀲 𑀯𑀺𑀘𑀭𑀢𑁄. 𑀪𑀼𑀢𑁆𑀢𑀁 𑀣𑁂𑀬𑁆𑀬𑁂𑀦 𑀢𑀲𑁆𑀲 𑀢𑀦𑁆𑀢𑀺 𑀲𑀩𑁆𑀩𑁄𑀧𑀺 𑀢𑀲𑁆𑀲 𑀘𑀢𑀼𑀧𑀘𑁆𑀘𑀬𑀧𑀭𑀺𑀪𑁄𑀕𑁄 𑀣𑁂𑀬𑁆𑀬𑁂𑀦 𑀧𑀭𑀺𑀪𑀼𑀢𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀧𑀭𑀺𑀚𑀸𑀦𑀦𑁆𑀢𑀺 𑀧𑀡𑁆𑀟𑀺𑀢𑀸𑀢𑀺 𑀅𑀬𑀁 𑀓𑀸𑀭𑀓𑁄 𑀯𑀸 𑀅𑀓𑀸𑀭𑀓𑁄 𑀯𑀸𑀢𑀺 𑀧𑀡𑁆𑀟𑀺𑀢𑀸 𑀚𑀸𑀦𑀦𑁆𑀢𑀺. 𑀇𑀢𑀺 𑀢𑀸 𑀤𑁂𑀯𑀢𑀸 ‘‘𑀢𑀣𑀸𑀕𑀢𑀸𑀧𑀺 𑀫𑀬𑀫𑁂𑀯 𑀧𑀡𑁆𑀟𑀺𑀢𑀸’’𑀢𑀺 𑀫𑀜𑁆𑀜𑀫𑀸𑀦𑀸 𑀏𑀯𑀫𑀸𑀳𑀁𑀲𑀼.

𑀅𑀣 𑀪𑀕𑀯𑀸 𑀦𑀬𑀺𑀤𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀸𑀬𑀁 𑀧𑀝𑀺𑀧𑀤𑀸 𑀤𑀴𑁆𑀳𑀸𑀢𑀺 𑀅𑀬𑀁 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀸 𑀤𑀴𑁆𑀳𑀸 𑀣𑀺𑀭𑀸. 𑀬𑀸𑀬 𑀧𑀝𑀺𑀧𑀤𑀸𑀬 𑀥𑀻𑀭𑀸 𑀧𑀡𑁆𑀟𑀺𑀢𑀸 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺 𑀛𑀸𑀦𑁂𑀳𑀺 𑀛𑀸𑀬𑀺𑀦𑁄 𑀫𑀸𑀭𑀩𑀦𑁆𑀥𑀦𑀸 𑀧𑀫𑀼𑀘𑁆𑀘𑀦𑁆𑀢𑀺, 𑀢𑀁 𑀧𑀝𑀺𑀧𑀤𑀁 𑀪𑀸𑀲𑀺𑀢𑀫𑀢𑁆𑀢𑁂𑀦 𑀯𑀸 𑀲𑀯𑀦𑀫𑀢𑁆𑀢𑁂𑀦 𑀯𑀸 𑀑𑀓𑁆𑀓𑀫𑀺𑀢𑀼𑀁 𑀧𑀝𑀺𑀧𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀢𑁆𑀣𑁄. 𑀦 𑀯𑁂 𑀥𑀻𑀭𑀸 𑀧𑀓𑀼𑀩𑁆𑀩𑀦𑁆𑀢𑀻𑀢𑀺 𑀥𑀻𑀭𑀸 𑀧𑀡𑁆𑀟𑀺𑀢𑀸 𑀯𑀺𑀤𑀺𑀢𑁆𑀯𑀸 𑀮𑁄𑀓𑀧𑀭𑀺𑀬𑀸𑀬𑀁 𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀉𑀤𑀬𑀩𑁆𑀩𑀬𑀁 𑀜𑀢𑁆𑀯𑀸 𑀘𑀢𑀼𑀲𑀘𑁆𑀘𑀥𑀫𑁆𑀫𑀜𑁆𑀘 𑀅𑀜𑁆𑀜𑀸𑀬 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀼𑀢𑀸 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓𑀁 𑀢𑀺𑀡𑁆𑀡𑀸 𑀏𑀯𑀁 𑀦 𑀓𑀼𑀩𑁆𑀩𑀦𑁆𑀢𑀺, 𑀫𑀬𑀁 𑀏𑀯𑀭𑀽𑀧𑀸𑀦𑀺 𑀦 𑀓𑀣𑁂𑀫𑀸𑀢𑀺 𑀅𑀢𑁆𑀣𑁄.

𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀳𑀺𑀢𑁆𑀯𑀸𑀢𑀺 ‘‘𑀅𑀬𑀼𑀢𑁆𑀢𑀁 𑀅𑀫𑁆𑀳𑁂𑀳𑀺 𑀓𑀢𑀁, 𑀅𑀓𑀸𑀭𑀓𑀫𑁂𑀯 𑀫𑀬𑀁 𑀓𑀸𑀭𑀓𑀯𑀸𑀤𑁂𑀦 𑀲𑀫𑀼𑀤𑀸𑀘𑀭𑀺𑀫𑁆𑀳𑀸’’𑀢𑀺 𑀮𑀚𑁆𑀚𑀫𑀸𑀦𑀸 𑀫𑀳𑀸𑀩𑁆𑀭𑀳𑁆𑀫𑀦𑀺 𑀯𑀺𑀬 𑀪𑀕𑀯𑀢𑀺 𑀕𑀸𑀭𑀯𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀯𑀺𑀬 𑀪𑀕𑀯𑀦𑁆𑀢𑀁 𑀤𑀼𑀭𑀸𑀲𑀤𑀁 𑀓𑀢𑁆𑀯𑀸 𑀧𑀲𑁆𑀲𑀫𑀸𑀦𑀸 𑀆𑀓𑀸𑀲𑀢𑁄 𑀑𑀢𑀭𑀺𑀢𑁆𑀯𑀸 𑀪𑀽𑀫𑀺𑀬𑀁 𑀞𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀘𑁆𑀘𑀬𑁄𑀢𑀺 𑀅𑀧𑀭𑀸𑀥𑁄. 𑀦𑁄, 𑀪𑀦𑁆𑀢𑁂, 𑀅𑀘𑁆𑀘𑀸𑀕𑀫𑀸𑀢𑀺 𑀅𑀫𑁆𑀳𑁂 𑀅𑀢𑀺𑀓𑁆𑀓𑀫𑁆𑀫 𑀅𑀪𑀺𑀪𑀯𑀺𑀢𑁆𑀯𑀸 𑀧𑀯𑀢𑁆𑀢𑁄. 𑀆𑀲𑀸𑀤𑁂𑀢𑀩𑁆𑀩𑀦𑁆𑀢𑀺 𑀖𑀝𑁆𑀝𑀬𑀺𑀢𑀩𑁆𑀩𑀁. 𑀢𑀸 𑀓𑀺𑀭 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀓𑀸𑀬𑁂𑀦 𑀯𑀸𑀘𑀸𑀬𑀸𑀢𑀺 𑀤𑁆𑀯𑀻𑀳𑀺𑀧𑀺 𑀖𑀝𑁆𑀝𑀬𑀺𑀁𑀲𑀼. 𑀢𑀣𑀸𑀕𑀢𑀁 𑀅𑀯𑀦𑁆𑀤𑀺𑀢𑁆𑀯𑀸 𑀆𑀓𑀸𑀲𑁂 𑀧𑀢𑀺𑀝𑁆𑀞𑀫𑀸𑀦𑀸 𑀓𑀸𑀬𑁂𑀦 𑀖𑀝𑁆𑀝𑀬𑀺𑀁𑀲𑀼, 𑀓𑀺𑀢𑀯𑁄𑀧𑀫𑀁 𑀆𑀳𑀭𑀺𑀢𑁆𑀯𑀸 𑀦𑀸𑀦𑀧𑁆𑀧𑀓𑀸𑀭𑀓𑀁 𑀅𑀲𑀩𑁆𑀪𑀺𑀯𑀸𑀤𑀁 𑀯𑀤𑀫𑀸𑀦𑀸 𑀯𑀸𑀘𑀸𑀬 𑀖𑀝𑁆𑀝𑀬𑀺𑀁𑀲𑀼. 𑀢𑀲𑁆𑀫𑀸 𑀆𑀲𑀸𑀤𑁂𑀢𑀩𑁆𑀩𑀁 𑀅𑀫𑀜𑁆𑀜𑀺𑀫𑁆𑀳𑀸𑀢𑀺 𑀆𑀳𑀁𑀲𑀼. 𑀧𑀝𑀺𑀕𑁆𑀕𑀡𑁆𑀳𑀸𑀢𑀽𑀢𑀺 𑀔𑀫𑀢𑀼. 𑀆𑀬𑀢𑀺𑀁 𑀲𑀁𑀯𑀭𑀸𑀬𑀸𑀢𑀺 𑀅𑀦𑀸𑀕𑀢𑁂 𑀲𑀁𑀯𑀭𑀡𑀢𑁆𑀣𑀸𑀬, 𑀧𑀼𑀦 𑀏𑀯𑀭𑀽𑀧𑀲𑁆𑀲 𑀅𑀧𑀭𑀸𑀥𑀲𑁆𑀲 𑀤𑁄𑀲𑀲𑁆𑀲 𑀅𑀓𑀭𑀡𑀢𑁆𑀣𑀸𑀬.

𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀻𑀢𑀺 𑀅𑀕𑁆𑀕𑀤𑀦𑁆𑀢𑁂 𑀤𑀲𑁆𑀲𑁂𑀦𑁆𑀢𑁄 𑀧𑀳𑀝𑁆𑀞𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀓𑀲𑁆𑀫𑀸? 𑀢𑀸 𑀓𑀺𑀭 𑀤𑁂𑀯𑀢𑀸 𑀦 𑀲𑀪𑀸𑀯𑁂𑀦 𑀔𑀫𑀸𑀧𑁂𑀦𑁆𑀢𑀺, 𑀮𑁄𑀓𑀺𑀬𑀫𑀳𑀸𑀚𑀦𑀜𑁆𑀘 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑀁 𑀢𑀣𑀸𑀕𑀢𑀜𑁆𑀘 𑀏𑀓𑀲𑀤𑀺𑀲𑀁 𑀓𑀭𑁄𑀦𑁆𑀢𑀺. 𑀅𑀣 𑀪𑀕𑀯𑀸 ‘‘𑀧𑀭𑀢𑁄 𑀓𑀣𑀸𑀬 𑀉𑀧𑁆𑀧𑀦𑁆𑀦𑀸𑀬 𑀩𑀼𑀤𑁆𑀥𑀩𑀮𑀁 𑀤𑀻𑀧𑁂𑀢𑁆𑀯𑀸 𑀧𑀘𑁆𑀙𑀸 𑀔𑀫𑀺𑀲𑁆𑀲𑀸𑀫𑀻’’𑀢𑀺 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺. 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬𑀸𑀢𑀺 𑀅𑀢𑀺𑀭𑁂𑀓𑀧𑁆𑀧𑀫𑀸𑀡𑁂𑀦. 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀻𑀢𑀺 𑀓𑀼𑀧𑀺𑀢𑁄 𑀏𑀲 𑀅𑀫𑁆𑀳𑀸𑀓𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀅𑀪𑀸𑀲𑀺.

𑀦 𑀧𑀝𑀺𑀕𑀡𑁆𑀳𑀢𑀻𑀢𑀺 𑀦 𑀔𑀫𑀢𑀺 𑀦𑀸𑀥𑀺𑀯𑀸𑀲𑁂𑀢𑀺. 𑀓𑁄𑀧𑀦𑁆𑀢𑀭𑁄𑀢𑀺 𑀅𑀩𑁆𑀪𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑀓𑁄𑀧𑁄. 𑀤𑁄𑀲𑀕𑀭𑀽𑀢𑀺 𑀤𑁄𑀲𑀁 𑀕𑀭𑀼𑀁 𑀓𑀢𑁆𑀯𑀸 𑀆𑀤𑀸𑀬 𑀯𑀺𑀳𑀭𑀦𑁆𑀢𑁄. 𑀲 𑀯𑁂𑀭𑀁 𑀧𑀝𑀺𑀫𑀼𑀜𑁆𑀘𑀢𑀻𑀢𑀺 𑀲𑁄 𑀏𑀯𑀭𑀽𑀧𑁄 𑀕𑀡𑁆𑀞𑀺𑀓𑀁 𑀧𑀝𑀺𑀫𑀼𑀜𑁆𑀘𑀦𑁆𑀢𑁄 𑀯𑀺𑀬 𑀢𑀁 𑀯𑁂𑀭𑀁 𑀅𑀢𑁆𑀢𑀦𑀺 𑀧𑀝𑀺𑀫𑀼𑀜𑁆𑀘𑀢𑀺 𑀞𑀧𑁂𑀢𑀺, 𑀦 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀅𑀘𑁆𑀘𑀬𑁄 𑀘𑁂 𑀦 𑀯𑀺𑀚𑁆𑀚𑁂𑀣𑀸𑀢𑀺 𑀲𑀘𑁂 𑀅𑀘𑁆𑀘𑀸𑀬𑀺𑀓𑀓𑀫𑁆𑀫𑀁 𑀦 𑀪𑀯𑁂𑀬𑁆𑀬. 𑀦𑁄 𑀘𑀺𑀥𑀸𑀧𑀕𑀢𑀁 𑀲𑀺𑀬𑀸𑀢𑀺 𑀬𑀤𑀺 𑀅𑀧𑀭𑀸𑀥𑁄 𑀦𑀸𑀫 𑀦 𑀪𑀸𑀯𑁂𑀬𑁆𑀬. 𑀓𑁂𑀦𑀻𑀥 𑀓𑀼𑀲𑀮𑁄 𑀲𑀺𑀬𑀸𑀢𑀺 𑀬𑀤𑀺 𑀯𑁂𑀭𑀸𑀦𑀺 𑀦 𑀲𑀫𑁆𑀫𑁂𑀬𑁆𑀬𑀼𑀁, 𑀓𑁂𑀦 𑀓𑀸𑀭𑀡𑁂𑀦 𑀓𑀼𑀲𑀮𑁄 𑀪𑀯𑁂𑀬𑁆𑀬.

𑀓𑀲𑁆𑀲𑀘𑁆𑀘𑀬𑀸𑀢𑀺 𑀕𑀸𑀣𑀸𑀬 𑀓𑀲𑁆𑀲 𑀅𑀢𑀺𑀓𑁆𑀓𑀫𑁄 𑀦𑀢𑁆𑀣𑀺? 𑀓𑀲𑁆𑀲 𑀅𑀧𑀭𑀸𑀥𑁄 𑀦𑀢𑁆𑀣𑀺? 𑀓𑁄 𑀲𑀫𑁆𑀫𑁄𑀳𑀁 𑀦𑀸𑀧𑀚𑁆𑀚𑀢𑀺? 𑀓𑁄 𑀦𑀺𑀘𑁆𑀘𑀫𑁂𑀯 𑀧𑀡𑁆𑀟𑀺𑀢𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄? 𑀇𑀫𑀁 𑀓𑀺𑀭 𑀕𑀸𑀣𑀁 𑀪𑀡𑀸𑀧𑀦𑀢𑁆𑀣𑀁 𑀪𑀕𑀯𑀢𑁄 𑀲𑀺𑀢𑀧𑀸𑀢𑀼𑀓𑀫𑁆𑀫𑀁. 𑀢𑀲𑁆𑀫𑀸 𑀇𑀤𑀸𑀦𑀺 𑀤𑁂𑀯𑀢𑀸𑀦𑀁 𑀩𑀼𑀤𑁆𑀥𑀩𑀮𑀁 𑀤𑀻𑀧𑁂𑀢𑁆𑀯𑀸 𑀔𑀫𑀺𑀲𑁆𑀲𑀸𑀫𑀻𑀢𑀺 𑀢𑀣𑀸𑀕𑀢𑀲𑁆𑀲 𑀩𑀼𑀤𑁆𑀥𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀣𑀸𑀕𑀢𑀲𑁆𑀲𑀸𑀢𑀺 𑀢𑀣𑀸 𑀆𑀕𑀢𑁄𑀢𑀺 𑀏𑀯𑀫𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀢𑀣𑀸𑀕𑀢𑀲𑁆𑀲. 𑀩𑀼𑀤𑁆𑀥𑀲𑁆𑀲𑀸𑀢𑀺 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀩𑀼𑀤𑁆𑀥𑀢𑁆𑀢𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀯𑀺𑀫𑁄𑀓𑁆𑀔𑀦𑁆𑀢𑀺𑀓𑀧𑀡𑁆𑀡𑀢𑁆𑀢𑀺𑀯𑀲𑁂𑀦 𑀏𑀯𑀁 𑀮𑀤𑁆𑀥𑀦𑀸𑀫𑀲𑁆𑀲. 𑀅𑀘𑁆𑀘𑀬𑀁 𑀤𑁂𑀲𑀬𑀦𑁆𑀢𑀻𑀦𑀦𑁆𑀢𑀺 𑀬𑀁 𑀯𑀼𑀢𑁆𑀢𑀁 𑀢𑀼𑀫𑁆𑀳𑁂𑀳𑀺 ‘‘𑀅𑀘𑁆𑀘𑀬𑀁 𑀤𑁂𑀲𑀬𑀦𑁆𑀢𑀻𑀦𑀁…𑀧𑁂… 𑀲 𑀯𑁂𑀭𑀁 𑀧𑀝𑀺𑀫𑀼𑀜𑁆𑀘𑀢𑀻’’𑀢𑀺, 𑀢𑀁 𑀲𑀸𑀥𑀼 𑀯𑀼𑀢𑁆𑀢𑀁, 𑀅𑀳𑀁 𑀧𑀦 𑀢𑀁 𑀯𑁂𑀭𑀁 𑀦𑀸𑀪𑀺𑀦𑀦𑁆𑀤𑀸𑀫𑀺 𑀦 𑀧𑀢𑁆𑀣𑀬𑀸𑀫𑀻𑀢𑀺 𑀅𑀢𑁆𑀣𑁄. 𑀧𑀝𑀺𑀕𑁆𑀕𑀡𑁆𑀳𑀸𑀫𑀺 𑀯𑁄𑀘𑁆𑀘𑀬𑀦𑁆𑀢𑀺 𑀢𑀼𑀫𑁆𑀳𑀸𑀓𑀁 𑀅𑀧𑀭𑀸𑀥𑀁 𑀔𑀫𑀸𑀫𑀻𑀢𑀺. 𑀧𑀜𑁆𑀘𑀫𑀁.

𑁬. 𑀲𑀤𑁆𑀥𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬. 𑀙𑀝𑁆𑀞𑁂 𑀲𑀤𑁆𑀥𑀸 𑀤𑀼𑀢𑀺𑀬𑀸 𑀧𑀼𑀭𑀺𑀲𑀲𑁆𑀲 𑀳𑁄𑀢𑀻𑀢𑀺 𑀧𑀼𑀭𑀺𑀲𑀲𑁆𑀲 𑀤𑁂𑀯𑀮𑁄𑀓𑁂 𑀫𑀦𑀼𑀲𑁆𑀲𑀮𑁄𑀓𑁂 𑀘𑁂𑀯 𑀦𑀺𑀩𑁆𑀩𑀸𑀦𑀜𑁆𑀘 𑀕𑀘𑁆𑀙𑀦𑁆𑀢𑀲𑁆𑀲 𑀲𑀤𑁆𑀥𑀸 𑀤𑀼𑀢𑀺𑀬𑀸 𑀳𑁄𑀢𑀺, 𑀲𑀳𑀸𑀬𑀓𑀺𑀘𑁆𑀘𑀁 𑀲𑀸𑀥𑁂𑀢𑀺. 𑀦𑁄 𑀘𑁂 𑀅𑀲𑁆𑀲𑀤𑁆𑀥𑀺𑀬𑀁 𑀅𑀯𑀢𑀺𑀝𑁆𑀞𑀢𑀻𑀢𑀺 𑀬𑀤𑀺 𑀅𑀲𑁆𑀲𑀤𑁆𑀥𑀺𑀬𑀁 𑀦 𑀢𑀺𑀝𑁆𑀞𑀢𑀺. 𑀬𑀲𑁄𑀢𑀺 𑀧𑀭𑀺𑀯𑀸𑀭𑁄. 𑀓𑀺𑀢𑁆𑀢𑀻𑀢𑀺 𑀯𑀡𑁆𑀡𑀪𑀡𑀦𑀁. 𑀢𑀢𑁆𑀯𑀲𑁆𑀲 𑀳𑁄𑀢𑀻𑀢𑀺 𑀢𑀢𑁄 𑀅𑀲𑁆𑀲 𑀳𑁄𑀢𑀺. 𑀦𑀸𑀦𑀼𑀧𑀢𑀦𑁆𑀢𑀺 𑀲𑀗𑁆𑀕𑀸𑀢𑀺 𑀭𑀸𑀕𑀲𑀗𑁆𑀕𑀸𑀤𑀬𑁄 𑀧𑀜𑁆𑀘 𑀲𑀗𑁆𑀕𑀸 𑀦 𑀅𑀦𑀼𑀧𑀢𑀦𑁆𑀢𑀺. 𑀧𑀫𑀸𑀤𑀫𑀦𑀼𑀬𑀼𑀜𑁆𑀚𑀦𑁆𑀢𑀻𑀢𑀺 𑀬𑁂 𑀧𑀫𑀸𑀤𑀁 𑀓𑀭𑁄𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀺, 𑀢𑁂 𑀢𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀺 𑀦𑀸𑀫. 𑀥𑀦𑀁 𑀲𑁂𑀝𑁆𑀞𑀁𑀯 𑀭𑀓𑁆𑀔𑀢𑀻𑀢𑀺 𑀫𑀼𑀢𑁆𑀢𑀸𑀫𑀡𑀺𑀲𑀸𑀭𑀸𑀤𑀺𑀉𑀢𑁆𑀢𑀫𑀥𑀦𑀁 𑀯𑀺𑀬 𑀭𑀓𑁆𑀔𑀢𑀺. 𑀛𑀸𑀬𑀦𑁆𑀢𑁄𑀢𑀺 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀘 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀘 𑀛𑀸𑀬𑀦𑁆𑀢𑁄. 𑀢𑀢𑁆𑀣 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁 𑀦𑀸𑀫 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀸𑀦𑀺. 𑀯𑀺𑀧𑀲𑁆𑀲𑀦𑀸 𑀳𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁. 𑀫𑀕𑁆𑀕𑁄 𑀯𑀺𑀧𑀲𑁆𑀲𑀦𑀸𑀬 𑀆𑀕𑀢𑀓𑀺𑀘𑁆𑀘𑀁 𑀲𑀸𑀥𑁂𑀢𑀻𑀢𑀺 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁. 𑀨𑀮𑀁 𑀢𑀣𑀮𑀓𑁆𑀔𑀡𑀁 𑀦𑀺𑀭𑁄𑀥𑀲𑀘𑁆𑀘𑀁 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁. 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀧𑀦 𑀓𑀲𑀺𑀡𑀸𑀭𑀫𑁆𑀫𑀡𑀲𑁆𑀲 𑀉𑀧𑀦𑀺𑀚𑁆𑀛𑀸𑀬𑀦𑀢𑁄 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀫𑀁 𑀦𑀸𑀫 𑀅𑀭𑀳𑀢𑁆𑀢𑀲𑀼𑀔𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺. 𑀙𑀝𑁆𑀞𑀁.

𑁭. 𑀲𑀫𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭. 𑀲𑀢𑁆𑀢𑀫𑁂 𑀲𑀓𑁆𑀓𑁂𑀲𑀽𑀢𑀺 ‘‘𑀲𑀓𑁆𑀬𑀸 𑀯𑀢, 𑀪𑁄 𑀓𑀼𑀫𑀸𑀭𑀸’’𑀢𑀺 (𑀤𑀻. 𑀦𑀺. 𑁧.𑁨𑁬𑁭) 𑀉𑀤𑀸𑀦𑀁 𑀧𑀝𑀺𑀘𑁆𑀘 𑀲𑀓𑁆𑀓𑀸𑀢𑀺 𑀮𑀤𑁆𑀥𑀦𑀸𑀫𑀸𑀦𑀁 𑀭𑀸𑀚𑀓𑀼𑀫𑀸𑀭𑀸𑀦𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀽𑀴𑁆𑀳𑀻𑀲𑀤𑁆𑀤𑁂𑀦 𑀲𑀓𑁆𑀓𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀲𑀓𑁆𑀓𑁂𑀲𑀼 𑀚𑀦𑀧𑀤𑁂. 𑀫𑀳𑀸𑀯𑀦𑁂𑀢𑀺 𑀲𑀬𑀁𑀚𑀸𑀢𑁂 𑀅𑀭𑁄𑀧𑀺𑀫𑁂 𑀳𑀺𑀫𑀯𑀦𑁆𑀢𑁂𑀦 𑀲𑀤𑁆𑀥𑀺𑀁 𑀏𑀓𑀸𑀩𑀤𑁆𑀥𑁂 𑀫𑀳𑀢𑀺 𑀯𑀦𑁂. 𑀲𑀩𑁆𑀩𑁂𑀳𑁂𑀯 𑀅𑀭𑀳𑀦𑁆𑀢𑁂𑀳𑀻𑀢𑀺 𑀇𑀫𑀁 𑀲𑀼𑀢𑁆𑀢𑀁 𑀓𑀣𑀺𑀢𑀤𑀺𑀯𑀲𑁂𑀬𑁂𑀯 𑀧𑀢𑁆𑀢𑀅𑀭𑀳𑀦𑁆𑀢𑁂𑀳𑀺.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀲𑀸𑀓𑀺𑀬𑀓𑁄𑀮𑀺𑀬𑀸 𑀳𑀺 𑀓𑀺𑀭 𑀓𑀧𑀺𑀮𑀯𑀢𑁆𑀣𑀼𑀦𑀕𑀭𑀲𑁆𑀲 𑀘 𑀓𑁄𑀮𑀺𑀬𑀦𑀕𑀭𑀲𑁆𑀲 𑀘 𑀅𑀦𑁆𑀢𑀭𑁂 𑀭𑁄𑀳𑀺𑀡𑀺𑀁 𑀦𑀸𑀫 𑀦𑀤𑀺𑀁 𑀏𑀓𑁂𑀦𑁂𑀯 𑀆𑀯𑀭𑀡𑁂𑀦 𑀩𑀦𑁆𑀥𑀸𑀧𑁂𑀢𑁆𑀯𑀸 𑀲𑀲𑁆𑀲𑀸𑀦𑀺 𑀓𑀸𑀭𑁂𑀦𑁆𑀢𑀺. 𑀅𑀣 𑀚𑁂𑀝𑁆𑀞𑀫𑀽𑀮𑀫𑀸𑀲𑁂 𑀲𑀲𑁆𑀲𑁂𑀲𑀼 𑀫𑀺𑀮𑀸𑀬𑀦𑁆𑀢𑁂𑀲𑀼 𑀉𑀪𑀬𑀦𑀕𑀭𑀯𑀸𑀲𑀻𑀦𑀫𑁆𑀧𑀺 𑀓𑀫𑁆𑀫𑀓𑀸𑀭𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀢𑀢𑁆𑀣 𑀓𑁄𑀮𑀺𑀬𑀦𑀕𑀭𑀯𑀸𑀲𑀺𑀦𑁄 𑀆𑀳𑀁𑀲𑀼 𑁋 ‘‘𑀇𑀤𑀁 𑀉𑀤𑀓𑀁 𑀉𑀪𑀬𑀢𑁄 𑀆𑀳𑀭𑀺𑀬𑀫𑀸𑀦𑀁 𑀦 𑀢𑀼𑀫𑁆𑀳𑀸𑀓𑀁, 𑀦 𑀅𑀫𑁆𑀳𑀸𑀓𑀁 𑀧𑀳𑁄𑀲𑁆𑀲𑀢𑀺, 𑀅𑀫𑁆𑀳𑀸𑀓𑀁 𑀧𑀦 𑀲𑀲𑁆𑀲𑀁 𑀏𑀓𑁂𑀦 𑀉𑀤𑀓𑁂𑀦𑁂𑀯 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀢𑀺, 𑀇𑀤𑀁 𑀉𑀤𑀓𑀁 𑀅𑀫𑁆𑀳𑀸𑀓𑀁 𑀤𑁂𑀣𑀸’’𑀢𑀺. 𑀓𑀧𑀺𑀮𑀯𑀢𑁆𑀣𑀼𑀯𑀸𑀲𑀺𑀦𑁄 𑀆𑀳𑀁𑀲𑀼 𑁋 ‘‘𑀢𑀼𑀫𑁆𑀳𑁂𑀲𑀼 𑀓𑁄𑀝𑁆𑀞𑁂 𑀧𑀽𑀭𑁂𑀢𑁆𑀯𑀸 𑀞𑀺𑀢𑁂𑀲𑀼 𑀫𑀬𑀁 𑀭𑀢𑁆𑀢𑀲𑀼𑀯𑀡𑁆𑀡𑀦𑀻𑀮𑀫𑀡𑀺𑀓𑀸𑀴𑀓𑀳𑀸𑀧𑀡𑁂 𑀘 𑀕𑀳𑁂𑀢𑁆𑀯𑀸 𑀧𑀘𑁆𑀙𑀺𑀧𑀲𑀺𑀩𑁆𑀩𑀓𑀸𑀤𑀺𑀳𑀢𑁆𑀣𑀸 𑀦 𑀲𑀓𑁆𑀔𑀺𑀲𑁆𑀲𑀸𑀫 𑀢𑀼𑀫𑁆𑀳𑀸𑀓𑀁 𑀖𑀭𑀤𑁆𑀯𑀸𑀭𑁂 𑀯𑀺𑀘𑀭𑀺𑀢𑀼𑀁, 𑀅𑀫𑁆𑀳𑀸𑀓𑀫𑁆𑀧𑀺 𑀲𑀲𑁆𑀲𑀁 𑀏𑀓𑁂𑀦𑁂𑀯 𑀉𑀤𑀓𑁂𑀦 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀢𑀺, 𑀇𑀤𑀁 𑀉𑀤𑀓𑀁 𑀅𑀫𑁆𑀳𑀸𑀓𑀁 𑀤𑁂𑀣𑀸’’𑀢𑀺. ‘‘𑀦 𑀫𑀬𑀁 𑀤𑀲𑁆𑀲𑀸𑀫𑀸’’𑀢𑀺. ‘‘𑀫𑀬𑀫𑁆𑀧𑀺 𑀦 𑀤𑀲𑁆𑀲𑀸𑀫𑀸’’𑀢𑀺. 𑀏𑀯𑀁 𑀓𑀣𑀁 𑀯𑀟𑁆𑀠𑁂𑀢𑁆𑀯𑀸 𑀏𑀓𑁄 𑀉𑀝𑁆𑀞𑀸𑀬 𑀏𑀓𑀲𑁆𑀲 𑀧𑀳𑀸𑀭𑀁 𑀅𑀤𑀸𑀲𑀺, 𑀲𑁄𑀧𑀺 𑀅𑀜𑁆𑀜𑀲𑁆𑀲𑀸𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀁 𑀧𑀳𑀭𑀺𑀢𑁆𑀯𑀸 𑀭𑀸𑀚𑀓𑀼𑀮𑀸𑀦𑀁 𑀚𑀸𑀢𑀺𑀁 𑀖𑀝𑁆𑀝𑁂𑀢𑁆𑀯𑀸 𑀓𑀮𑀳𑀁 𑀯𑀟𑁆𑀠𑀬𑀺𑀁𑀲𑀼.

𑀓𑁄𑀮𑀺𑀬𑀓𑀫𑁆𑀫𑀓𑀸𑀭𑀸 𑀯𑀤𑀦𑁆𑀢𑀺 𑁋 ‘‘𑀢𑀼𑀫𑁆𑀳𑁂 𑀓𑀧𑀺𑀮𑀯𑀢𑁆𑀣𑀼𑀯𑀸𑀲𑀺𑀓𑁂 𑀕𑀳𑁂𑀢𑁆𑀯𑀸 𑀕𑀚𑁆𑀚𑀣, 𑀬𑁂 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀬𑁄 𑀯𑀺𑀬 𑀅𑀢𑁆𑀢𑀦𑁄 𑀪𑀕𑀺𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀲𑀺𑀁𑀲𑀼, 𑀏𑀢𑁂𑀲𑀁 𑀳𑀢𑁆𑀣𑀺𑀦𑁄 𑀘 𑀅𑀲𑁆𑀲𑀸 𑀘 𑀨𑀮𑀓𑀸𑀯𑀼𑀥𑀸𑀦𑀺 𑀘 𑀅𑀫𑁆𑀳𑀸𑀓𑀁 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? 𑀲𑀸𑀓𑀺𑀬𑀓𑀫𑁆𑀫𑀓𑀸𑀭𑀸 𑀯𑀤𑀦𑁆𑀢𑀺 𑁋 ‘‘𑀢𑀼𑀫𑁆𑀳𑁂 𑀤𑀸𑀦𑀺 𑀓𑀼𑀝𑁆𑀞𑀺𑀦𑁄 𑀤𑀸𑀭𑀓𑁂 𑀕𑀳𑁂𑀢𑁆𑀯𑀸 𑀕𑀚𑁆𑀚𑀣, 𑀬𑁂 𑀅𑀦𑀸𑀣𑀸 𑀦𑀺𑀕𑁆𑀕𑀢𑀺𑀓𑀸 𑀢𑀺𑀭𑀘𑁆𑀙𑀸𑀦𑀸 𑀯𑀺𑀬 𑀓𑁄𑀮𑀭𑀼𑀓𑁆𑀔𑁂 𑀯𑀲𑀺𑀁𑀲𑀼, 𑀏𑀢𑁂𑀲𑀁 𑀳𑀢𑁆𑀣𑀺𑀦𑁄 𑀘 𑀅𑀲𑁆𑀲𑀸 𑀘 𑀨𑀮𑀓𑀸𑀯𑀼𑀥𑀸𑀦𑀺 𑀘 𑀅𑀫𑁆𑀳𑀸𑀓𑀁 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? 𑀢𑁂 𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀦𑀺𑀬𑀼𑀢𑁆𑀢𑀅𑀫𑀘𑁆𑀘𑀸𑀦𑀁 𑀓𑀣𑁂𑀲𑀼𑀁, 𑀅𑀫𑀘𑁆𑀘𑀸 𑀭𑀸𑀚𑀓𑀼𑀮𑀸𑀦𑀁 𑀓𑀣𑁂𑀲𑀼𑀁. 𑀢𑀢𑁄 𑀲𑀸𑀓𑀺𑀬𑀸 𑁋 ‘‘𑀪𑀕𑀺𑀦𑀻𑀳𑀺 𑀲𑀤𑁆𑀥𑀺𑀁 𑀲𑀁𑀯𑀲𑀺𑀢𑀓𑀸𑀦𑀁 𑀣𑀸𑀫𑀜𑁆𑀘 𑀩𑀮𑀜𑁆𑀘 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺 𑀬𑀼𑀤𑁆𑀥𑀲𑀚𑁆𑀚𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀓𑁄𑀮𑀺𑀬𑀸𑀧𑀺 𑁋 ‘‘𑀓𑁄𑀮𑀭𑀼𑀓𑁆𑀔𑀯𑀸𑀲𑀻𑀦𑀁 𑀣𑀸𑀫𑀜𑁆𑀘 𑀩𑀮𑀜𑁆𑀘 𑀤𑀲𑁆𑀲𑁂𑀲𑁆𑀲𑀸𑀫𑀸’’𑀢𑀺 𑀬𑀼𑀤𑁆𑀥𑀲𑀚𑁆𑀚𑀸 𑀦𑀺𑀓𑁆𑀔𑀫𑀺𑀁𑀲𑀼.

𑀪𑀕𑀯𑀸𑀧𑀺 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑁂𑀯 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀢𑁄 𑀉𑀝𑁆𑀞𑀸𑀬 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄 𑀇𑀫𑁂 𑀏𑀯𑀁 𑀬𑀼𑀤𑁆𑀥𑀲𑀚𑁆𑀚𑁂 𑀦𑀺𑀓𑁆𑀔𑀫𑀦𑁆𑀢𑁂 𑀅𑀤𑁆𑀤𑀲. 𑀤𑀺𑀲𑁆𑀯𑀸 𑁋 ‘‘𑀫𑀬𑀺 𑀕𑀢𑁂 𑀅𑀬𑀁 𑀓𑀮𑀳𑁄 𑀯𑀽𑀧𑀲𑀫𑁆𑀫𑀺𑀲𑁆𑀲𑀢𑀺 𑀦𑀼 𑀔𑁄 𑀉𑀤𑀸𑀳𑀼 𑀦𑁄’’𑀢𑀺 𑀉𑀧𑀥𑀸𑀭𑁂𑀦𑁆𑀢𑁄 𑁋 ‘‘𑀅𑀳𑀫𑁂𑀢𑁆𑀣 𑀕𑀦𑁆𑀢𑁆𑀯𑀸 𑀓𑀮𑀳𑀯𑀽𑀧𑀲𑀫𑀦𑀢𑁆𑀣𑀁 𑀢𑀻𑀡𑀺 𑀚𑀸𑀢𑀓𑀸𑀦𑀺 𑀓𑀣𑁂𑀲𑁆𑀲𑀸𑀫𑀺, 𑀢𑀢𑁄 𑀓𑀮𑀳𑁄 𑀯𑀽𑀧𑀲𑀫𑁆𑀫𑀺𑀲𑁆𑀲𑀢𑀺. 𑀅𑀣 𑀲𑀸𑀫𑀕𑁆𑀕𑀺𑀤𑀻𑀧𑀦𑀢𑁆𑀣𑀸𑀬 𑀤𑁆𑀯𑁂 𑀚𑀸𑀢𑀓𑀸𑀦𑀺 𑀓𑀣𑁂𑀢𑁆𑀯𑀸 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀁 𑀤𑁂𑀲𑁂𑀲𑁆𑀲𑀸𑀫𑀺. 𑀤𑁂𑀲𑀦𑀁 𑀲𑀼𑀢𑁆𑀯𑀸 𑀉𑀪𑀬𑀦𑀕𑀭𑀯𑀸𑀲𑀺𑀦𑁄𑀧𑀺 𑀅𑀟𑁆𑀠𑀢𑀺𑀬𑀸𑀦𑀺 𑀅𑀟𑁆𑀠𑀢𑀺𑀬𑀸𑀦𑀺 𑀓𑀼𑀫𑀸𑀭𑀲𑀢𑀸𑀦𑀺 𑀤𑀲𑁆𑀲𑀦𑁆𑀢𑀺, 𑀅𑀳𑀁 𑀢𑁂 𑀧𑀩𑁆𑀩𑀸𑀚𑁂𑀲𑁆𑀲𑀸𑀫𑀺, 𑀢𑀤𑀸 𑀫𑀳𑀸𑀲𑀫𑀸𑀕𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀅𑀓𑀸𑀲𑀺. 𑀢𑀲𑁆𑀫𑀸 𑀇𑀫𑁂𑀲𑀼 𑀬𑀼𑀤𑁆𑀥𑀲𑀚𑁆𑀚𑁂𑀲𑀼 𑀦𑀺𑀓𑁆𑀔𑀫𑀦𑁆𑀢𑁂𑀲𑀼 𑀓𑀲𑁆𑀲𑀘𑀺 𑀅𑀦𑀸𑀭𑁄𑀘𑁂𑀢𑁆𑀯𑀸 𑀲𑀬𑀫𑁂𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀕𑀦𑁆𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀲𑁂𑀦𑀸𑀦𑀁 𑀅𑀦𑁆𑀢𑀭𑁂 𑀆𑀓𑀸𑀲𑁂 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀺𑀲𑀻𑀤𑀺.

𑀓𑀧𑀺𑀮𑀯𑀢𑁆𑀣𑀼𑀯𑀸𑀲𑀺𑀦𑁄 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸𑀯, ‘‘𑀅𑀫𑁆𑀳𑀸𑀓𑀁 𑀜𑀸𑀢𑀺𑀲𑁂𑀝𑁆𑀞𑁄 𑀲𑀢𑁆𑀣𑀸 𑀆𑀕𑀢𑁄. 𑀤𑀺𑀝𑁆𑀞𑁄 𑀦𑀼 𑀔𑁄 𑀢𑁂𑀦 𑀅𑀫𑁆𑀳𑀸𑀓𑀁 𑀓𑀮𑀳𑀓𑀭𑀡𑀪𑀸𑀯𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀦 𑀔𑁄 𑀧𑀦 𑀲𑀓𑁆𑀓𑀸 𑀪𑀕𑀯𑀢𑀺 𑀆𑀕𑀢𑁂 𑀅𑀫𑁆𑀳𑁂𑀳𑀺 𑀧𑀭𑀲𑁆𑀲 𑀲𑀭𑀻𑀭𑁂 𑀲𑀢𑁆𑀣𑀁 𑀧𑀸𑀢𑁂𑀢𑀼𑀁. 𑀓𑁄𑀮𑀺𑀬𑀦𑀕𑀭𑀯𑀸𑀲𑀺𑀦𑁄 𑀅𑀫𑁆𑀳𑁂 𑀳𑀦𑀦𑁆𑀢𑀼 𑀯𑀸 𑀩𑀚𑁆𑀛𑀦𑁆𑀢𑀼 𑀯𑀸’’𑀢𑀺. 𑀆𑀯𑀼𑀥𑀸𑀦𑀺 𑀙𑀟𑁆𑀟𑁂𑀢𑁆𑀯𑀸, 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸, 𑀦𑀺𑀲𑀻𑀤𑀺𑀁𑀲𑀼. 𑀓𑁄𑀮𑀺𑀬𑀦𑀕𑀭𑀯𑀸𑀲𑀺𑀦𑁄𑀧𑀺 𑀢𑀣𑁂𑀯 𑀘𑀺𑀦𑁆𑀢𑁂𑀢𑁆𑀯𑀸 𑀆𑀯𑀼𑀥𑀸𑀦𑀺 𑀙𑀟𑁆𑀟𑁂𑀢𑁆𑀯𑀸, 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸, 𑀦𑀺𑀲𑀻𑀤𑀺𑀁𑀲𑀼.

𑀪𑀕𑀯𑀸 𑀚𑀸𑀦𑀦𑁆𑀢𑁄𑀯, ‘‘𑀓𑀲𑁆𑀫𑀸 𑀆𑀕𑀢𑀢𑁆𑀣, 𑀫𑀳𑀸𑀭𑀸𑀚𑀸’’𑀢𑀺 𑀧𑀼𑀘𑁆𑀙𑀺? ‘‘𑀦, 𑀪𑀕𑀯𑀸, 𑀢𑀺𑀢𑁆𑀣𑀓𑀻𑀴𑀸𑀬 𑀦 𑀧𑀩𑁆𑀩𑀢𑀓𑀻𑀴𑀸𑀬, 𑀦 𑀦𑀤𑀻𑀓𑀻𑀴𑀸𑀬, 𑀦 𑀕𑀺𑀭𑀺𑀤𑀲𑁆𑀲𑀦𑀢𑁆𑀣𑀁, 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀲𑀗𑁆𑀕𑀸𑀫𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀆𑀕𑀢𑀫𑁆𑀳𑀸’’𑀢𑀺. ‘‘𑀓𑀺𑀁 𑀦𑀺𑀲𑁆𑀲𑀸𑀬 𑀯𑁄 𑀓𑀮𑀳𑁄, 𑀫𑀳𑀸𑀭𑀸𑀚𑀸𑀢𑀺? 𑀉𑀤𑀓𑀁, 𑀪𑀦𑁆𑀢𑁂𑀢𑀺. 𑀉𑀤𑀓𑀁 𑀓𑀺𑀁 𑀅𑀕𑁆𑀖𑀢𑀺, 𑀫𑀳𑀸𑀭𑀸𑀚𑀸𑀢𑀺? 𑀅𑀧𑁆𑀧𑀁, 𑀪𑀦𑁆𑀢𑁂𑀢𑀺. 𑀧𑀣𑀯𑀻 𑀦𑀸𑀫 𑀓𑀺𑀁 𑀅𑀕𑁆𑀖𑀢𑀺, 𑀫𑀳𑀸𑀭𑀸𑀚𑀸𑀢𑀺? 𑀅𑀦𑀕𑁆𑀖𑀸, 𑀪𑀦𑁆𑀢𑁂𑀢𑀺. 𑀔𑀢𑁆𑀢𑀺𑀬𑀸 𑀓𑀺𑀁 𑀅𑀕𑁆𑀖𑀦𑁆𑀢𑀻𑀢𑀺? 𑀔𑀢𑁆𑀢𑀺𑀬𑀸 𑀦𑀸𑀫 𑀅𑀦𑀕𑁆𑀖𑀸, 𑀪𑀦𑁆𑀢𑁂𑀢𑀺. 𑀅𑀧𑁆𑀧𑀫𑀽𑀮𑀁 𑀉𑀤𑀓𑀁 𑀦𑀺𑀲𑁆𑀲𑀸𑀬 𑀓𑀺𑀫𑀢𑁆𑀣𑀁 𑀅𑀦𑀕𑁆𑀖𑁂 𑀔𑀢𑁆𑀢𑀺𑀬𑁂 𑀦𑀸𑀲𑁂𑀣, 𑀫𑀳𑀸𑀭𑀸𑀚, 𑀓𑀮𑀳𑁂 𑀅𑀲𑁆𑀲𑀸𑀤𑁄 𑀦𑀸𑀫 𑀦𑀢𑁆𑀣𑀺, 𑀓𑀮𑀳𑀯𑀲𑁂𑀦, 𑀫𑀳𑀸𑀭𑀸𑀚, 𑀅𑀝𑁆𑀞𑀸𑀦𑁂 𑀯𑁂𑀭𑀁 𑀓𑀢𑁆𑀯𑀸 𑀏𑀓𑀸𑀬 𑀭𑀼𑀓𑁆𑀔𑀤𑁂𑀯𑀢𑀸𑀬 𑀓𑀸𑀴𑀲𑀻𑀳𑁂𑀦 𑀲𑀤𑁆𑀥𑀺𑀁 𑀩𑀤𑁆𑀥𑀸𑀖𑀸𑀢𑁄 𑀲𑀓𑀮𑀫𑁆𑀧𑀺 𑀇𑀫𑀁 𑀓𑀧𑁆𑀧𑀁 𑀅𑀦𑀼𑀧𑁆𑀧𑀢𑁆𑀢𑁄𑀬𑁂𑀯𑀸𑀢𑀺 𑀯𑀢𑁆𑀯𑀸 𑀨𑀦𑁆𑀤𑀦𑀚𑀸𑀢𑀓𑀁 (𑀚𑀸. 𑁧.𑁧𑁩.𑁧𑁪 𑀆𑀤𑀬𑁄) 𑀓𑀣𑁂𑀲𑀺’’. 𑀢𑀢𑁄 ‘‘𑀧𑀭𑀧𑀢𑁆𑀢𑀺𑀬𑁂𑀦 𑀦𑀸𑀫, 𑀫𑀳𑀸𑀭𑀸𑀚, 𑀦 𑀪𑀯𑀺𑀢𑀩𑁆𑀩𑀁. 𑀧𑀭𑀧𑀢𑁆𑀢𑀺𑀬𑀸 𑀳𑀼𑀢𑁆𑀯𑀸 𑀳𑀺 𑀏𑀓𑀲𑁆𑀲 𑀲𑀲𑀓𑀲𑁆𑀲 𑀓𑀣𑀸𑀬 𑀢𑀺𑀬𑁄𑀚𑀦𑀲𑀳𑀲𑁆𑀲𑀯𑀺𑀢𑁆𑀣𑀢𑁂 𑀳𑀺𑀫𑀯𑀦𑁆𑀢𑁂 𑀘𑀢𑀼𑀧𑁆𑀧𑀤𑀕𑀡𑀸 𑀫𑀳𑀸𑀲𑀫𑀼𑀤𑁆𑀤𑀁 𑀧𑀓𑁆𑀔𑀦𑁆𑀤𑀺𑀦𑁄 𑀅𑀳𑁂𑀲𑀼𑀁. 𑀢𑀲𑁆𑀫𑀸 𑀧𑀭𑀧𑀢𑁆𑀢𑀺𑀬𑁂𑀦 𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸, 𑀧𑀣𑀯𑀻𑀉𑀦𑁆𑀤𑁆𑀭𑀺𑀬𑀚𑀸𑀢𑀓𑀁 𑀓𑀣𑁂𑀲𑀺. 𑀢𑀢𑁄 ‘‘𑀓𑀤𑀸𑀘𑀺, 𑀫𑀳𑀸𑀭𑀸𑀚, 𑀤𑀼𑀩𑁆𑀩𑀮𑁄𑀧𑀺 𑀫𑀳𑀸𑀩𑀮𑀲𑁆𑀲 𑀭𑀦𑁆𑀥𑀁 𑀯𑀺𑀯𑀭𑀁 𑀧𑀲𑁆𑀲𑀢𑀺, 𑀓𑀤𑀸𑀘𑀺 𑀫𑀳𑀸𑀩𑀮𑁄 𑀤𑀼𑀩𑁆𑀩𑀮𑀲𑁆𑀲. 𑀮𑀝𑀼𑀓𑀺𑀓𑀸𑀧𑀺 𑀳𑀺 𑀲𑀓𑀼𑀡𑀺𑀓𑀸 𑀳𑀢𑁆𑀣𑀺𑀦𑀸𑀕𑀁 𑀖𑀸𑀢𑁂𑀲𑀻’’𑀢𑀺 𑀮𑀝𑀼𑀓𑀺𑀓𑀚𑀸𑀢𑀓𑀁 (𑀚𑀸. 𑁧.𑁫.𑁩𑁯 𑀆𑀤𑀬𑁄) 𑀓𑀣𑁂𑀲𑀺. 𑀏𑀯𑀁 𑀓𑀮𑀳𑀯𑀽𑀧𑀲𑀫𑀦𑀢𑁆𑀣𑀸𑀬 𑀢𑀻𑀡𑀺 𑀚𑀸𑀢𑀓𑀸𑀦𑀺 𑀓𑀣𑁂𑀢𑁆𑀯𑀸 𑀲𑀸𑀫𑀕𑁆𑀕𑀺𑀧𑀭𑀺𑀤𑀻𑀧𑀦𑀢𑁆𑀣𑀸𑀬 𑀤𑁆𑀯𑁂 𑀚𑀸𑀢𑀓𑀸𑀦𑀺 𑀓𑀣𑁂𑀲𑀺. 𑀓𑀣𑀁? ‘‘𑀲𑀫𑀕𑁆𑀕𑀸𑀦𑀜𑁆𑀳𑀺, 𑀫𑀳𑀸𑀭𑀸𑀚, 𑀓𑁄𑀘𑀺 𑀑𑀢𑀸𑀭𑀁 𑀦𑀸𑀫 𑀧𑀲𑁆𑀲𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀯𑀢𑁆𑀯𑀸, 𑀭𑀼𑀓𑁆𑀔𑀥𑀫𑁆𑀫𑀚𑀸𑀢𑀓𑀁 (𑀚𑀸. 𑁧.𑁧.𑁭𑁪) 𑀓𑀣𑁂𑀲𑀺. 𑀢𑀢𑁄 ‘‘𑀲𑀫𑀕𑁆𑀕𑀸𑀦𑀁, 𑀫𑀳𑀸𑀭𑀸𑀚, 𑀓𑁄𑀘𑀺 𑀯𑀺𑀯𑀭𑀁 𑀤𑀲𑁆𑀲𑀺𑀢𑀼𑀁 𑀦 𑀲𑀓𑁆𑀔𑀺. 𑀬𑀤𑀸 𑀧𑀦 𑀅𑀜𑁆𑀜𑀫𑀜𑁆𑀜𑀁 𑀯𑀺𑀯𑀸𑀤𑀫𑀓𑀁𑀲𑀼, 𑀅𑀣 𑀢𑁂 𑀦𑁂𑀲𑀸𑀤𑀧𑀼𑀢𑁆𑀢𑁄 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑁆𑀯𑀸 𑀆𑀤𑀸𑀬 𑀕𑀢𑁄𑀢𑀺 𑀯𑀺𑀯𑀸𑀤𑁂 𑀅𑀲𑁆𑀲𑀸𑀤𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸, 𑀯𑀝𑁆𑀝𑀓𑀚𑀸𑀢𑀓𑀁 (𑀚𑀸. 𑁧.𑁧.𑁧𑁧𑁮) 𑀓𑀣𑁂𑀲𑀺. 𑀏𑀯𑀁 𑀇𑀫𑀸𑀦𑀺 𑀧𑀜𑁆𑀘 𑀚𑀸𑀢𑀓𑀸𑀦𑀺 𑀓𑀣𑁂𑀢𑁆𑀯𑀸 𑀅𑀯𑀲𑀸𑀦𑁂 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀁 (𑀲𑀼. 𑀦𑀺. 𑁯𑁪𑁧 𑀆𑀤𑀬𑁄) 𑀓𑀣𑁂𑀲𑀺.

𑀭𑀸𑀚𑀸𑀦𑁄 𑀧𑀲𑀦𑁆𑀦𑀸 𑁋 ‘‘𑀲𑀘𑁂 𑀲𑀢𑁆𑀣𑀸 𑀦𑀸𑀕𑀫𑀺𑀲𑁆𑀲, 𑀫𑀬𑀁 𑀲𑀳𑀢𑁆𑀣𑀸 𑀅𑀜𑁆𑀜𑀫𑀜𑁆𑀜𑀁 𑀯𑀥𑀺𑀢𑁆𑀯𑀸 𑀮𑁄𑀳𑀺𑀢𑀦𑀤𑀺𑀁 𑀧𑀯𑀢𑁆𑀢𑀬𑀺𑀲𑁆𑀲𑀸𑀫. 𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀪𑀸𑀢𑀭𑁄 𑀘 𑀕𑁂𑀳𑀤𑁆𑀯𑀸𑀭𑁂 𑀦 𑀧𑀲𑁆𑀲𑁂𑀬𑁆𑀬𑀸𑀫, 𑀲𑀸𑀲𑀦𑀧𑀝𑀺𑀲𑀸𑀲𑀦𑀫𑁆𑀧𑀺 𑀦𑁄 𑀆𑀳𑀭𑀡𑀓𑁄 𑀦𑀸𑀪𑀯𑀺𑀲𑁆𑀲. 𑀲𑀢𑁆𑀣𑀸𑀭𑀁 𑀦𑀺𑀲𑁆𑀲𑀸𑀬 𑀦𑁄 𑀚𑀻𑀯𑀺𑀢𑀁 𑀮𑀤𑁆𑀥𑀁. 𑀲𑀘𑁂 𑀧𑀦 𑀲𑀢𑁆𑀣𑀸 𑀆𑀕𑀸𑀭𑀁 𑀅𑀚𑁆𑀛𑀸𑀯𑀲𑀺𑀲𑁆𑀲 𑀤𑀻𑀧𑀲𑀳𑀲𑁆𑀲𑀤𑁆𑀯𑀬𑀧𑀭𑀺𑀯𑀸𑀭𑀁 𑀘𑀢𑀼𑀫𑀳𑀸𑀤𑀻𑀧𑀭𑀚𑁆𑀚𑀫𑀲𑁆𑀲 𑀳𑀢𑁆𑀣𑀕𑀢𑀁 𑀅𑀪𑀯𑀺𑀲𑁆𑀲, 𑀅𑀢𑀺𑀭𑁂𑀓𑀲𑀳𑀲𑁆𑀲𑀁 𑀔𑁄 𑀧𑀦𑀲𑁆𑀲 𑀧𑀼𑀢𑁆𑀢𑀸 𑀅𑀪𑀯𑀺𑀲𑁆𑀲𑀁𑀲𑀼, 𑀢𑀢𑁄 𑀔𑀢𑁆𑀢𑀺𑀬𑀧𑀭𑀺𑀯𑀸𑀭𑁄 𑀅𑀯𑀺𑀘𑀭𑀺𑀲𑁆𑀲. 𑀢𑀁 𑀔𑁄 𑀧𑀦𑁂𑀲 𑀲𑀫𑁆𑀧𑀢𑁆𑀢𑀺𑀁 𑀧𑀳𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀫𑁆𑀩𑁄𑀥𑀺𑀁 𑀧𑀢𑁆𑀢𑁄. 𑀇𑀤𑀸𑀦𑀺𑀧𑀺 𑀔𑀢𑁆𑀢𑀺𑀬𑀧𑀭𑀺𑀯𑀸𑀭𑁄𑀬𑁂𑀯 𑀯𑀺𑀘𑀭𑀢𑀽’’𑀢𑀺 𑀉𑀪𑀬𑀦𑀕𑀭𑀯𑀸𑀲𑀺𑀦𑁄 𑀅𑀟𑁆𑀠𑀢𑀺𑀬𑀸𑀦𑀺 𑀅𑀟𑁆𑀠𑀢𑀺𑀬𑀸𑀦𑀺 𑀓𑀼𑀫𑀸𑀭𑀲𑀢𑀸𑀦𑀺 𑀅𑀤𑀁𑀲𑀼. 𑀪𑀕𑀯𑀸𑀧𑀺 𑀢𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀫𑀳𑀸𑀯𑀦𑀁 𑀅𑀕𑀫𑀸𑀲𑀺. 𑀢𑁂𑀲𑀁 𑀕𑀭𑀼𑀕𑀸𑀭𑀯𑁂𑀦 𑀦 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀧𑀩𑁆𑀩𑀚𑀺𑀢𑀸𑀦𑀁 𑀅𑀦𑀪𑀺𑀭𑀢𑀺 𑀉𑀧𑁆𑀧𑀚𑁆𑀚𑀺. 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬𑁄𑀧𑀺 𑀢𑁂𑀲𑀁 𑁋 ‘‘𑀅𑀬𑁆𑀬𑀧𑀼𑀢𑁆𑀢𑀸 𑀉𑀓𑁆𑀓𑀡𑁆𑀞𑀦𑁆𑀢𑀼, 𑀖𑀭𑀸𑀯𑀸𑀲𑁄 𑀦 𑀲𑀡𑁆𑀞𑀸𑀢𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀲𑀸𑀲𑀦𑀁 𑀧𑁂𑀲𑁂𑀦𑁆𑀢𑀺. 𑀢𑁂 𑀘 𑀅𑀢𑀺𑀭𑁂𑀓𑀢𑀭𑀁 𑀉𑀓𑁆𑀓𑀡𑁆𑀞𑀺𑀁𑀲𑀼.

𑀪𑀕𑀯𑀸 𑀆𑀯𑀚𑁆𑀚𑁂𑀦𑁆𑀢𑁄 𑀢𑁂𑀲𑀁 𑀅𑀦𑀪𑀺𑀭𑀢𑀺𑀪𑀸𑀯𑀁 𑀜𑀢𑁆𑀯𑀸 𑁋 ‘‘𑀇𑀫𑁂 𑀪𑀺𑀓𑁆𑀔𑀽 𑀫𑀸𑀤𑀺𑀲𑁂𑀦 𑀩𑀼𑀤𑁆𑀥𑁂𑀦 𑀲𑀤𑁆𑀥𑀺𑀁 𑀏𑀓𑀢𑁄 𑀯𑀲𑀦𑁆𑀢𑀸 𑀉𑀓𑁆𑀓𑀡𑁆𑀞𑀦𑁆𑀢𑀺, 𑀳𑀦𑁆𑀤 𑀦𑁂𑀲𑀁 𑀓𑀼𑀡𑀸𑀮𑀤𑀳𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀢𑀢𑁆𑀣 𑀦𑁂𑀢𑁆𑀯𑀸 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀫𑀻’’𑀢𑀺 𑀓𑀼𑀡𑀸𑀮𑀤𑀳𑀲𑁆𑀲 𑀯𑀡𑁆𑀡𑀁 𑀓𑀣𑁂𑀲𑀺. 𑀢𑁂 𑀢𑀁 𑀤𑀝𑁆𑀞𑀼𑀓𑀸𑀫𑀸 𑀅𑀳𑁂𑀲𑀼𑀁. 𑀤𑀝𑁆𑀞𑀼𑀓𑀸𑀫𑀢𑁆𑀣, 𑀪𑀺𑀓𑁆𑀔𑀯𑁂, 𑀓𑀼𑀡𑀸𑀮𑀤𑀳𑀦𑁆𑀢𑀺? 𑀆𑀫 𑀪𑀕𑀯𑀸𑀢𑀺. 𑀬𑀤𑀺 𑀏𑀯𑀁 𑀏𑀣 𑀕𑀘𑁆𑀙𑀸𑀫𑀸𑀢𑀺. 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀪𑀕𑀯𑀸 𑀕𑀫𑀦𑀝𑁆𑀞𑀸𑀦𑀁 𑀫𑀬𑀁 𑀓𑀣𑀁 𑀕𑀫𑀺𑀲𑁆𑀲𑀸𑀫𑀸𑀢𑀺. 𑀢𑀼𑀫𑁆𑀳𑁂 𑀕𑀦𑁆𑀢𑀼𑀓𑀸𑀫𑀸 𑀳𑁄𑀣, 𑀅𑀳𑀁 𑀫𑀫𑀸𑀦𑀼𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻𑀢𑀺. 𑀲𑀸𑀥𑀼, 𑀪𑀦𑁆𑀢𑁂𑀢𑀺. 𑀪𑀕𑀯𑀸 𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀺 𑀕𑀳𑁂𑀢𑁆𑀯𑀸 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀓𑀼𑀡𑀸𑀮𑀤𑀳𑁂 𑀧𑀢𑀺𑀝𑁆𑀞𑀸𑀬 𑀢𑁂 𑀪𑀺𑀓𑁆𑀔𑀽 𑀆𑀳 𑁋 ‘‘𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀓𑀼𑀡𑀸𑀮𑀤𑀳𑁂 𑀬𑁂𑀲𑀁 𑀫𑀘𑁆𑀙𑀸𑀦𑀁 𑀦𑀸𑀫𑀁 𑀦 𑀚𑀸𑀦𑀸𑀣 𑀫𑀫𑀁 𑀧𑀼𑀘𑁆𑀙𑀣𑀸’’𑀢𑀺.

𑀢𑁂 𑀧𑀼𑀘𑁆𑀙𑀺𑀁𑀲𑀼. 𑀪𑀕𑀯𑀸 𑀧𑀼𑀘𑁆𑀙𑀺𑀢𑀁 𑀧𑀼𑀘𑁆𑀙𑀺𑀢𑀁 𑀓𑀣𑁂𑀲𑀺. 𑀦 𑀓𑁂𑀯𑀮𑀜𑁆𑀘, 𑀫𑀘𑁆𑀙𑀸𑀦𑀁𑀬𑁂𑀯, 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀭𑀼𑀓𑁆𑀔𑀸𑀦𑀫𑁆𑀧𑀺 𑀧𑀩𑁆𑀩𑀢𑀧𑀸𑀤𑁂 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀲𑀓𑀼𑀡𑀸𑀦𑀫𑁆𑀧𑀺 𑀦𑀸𑀫𑀸𑀦𑀺 𑀧𑀼𑀘𑁆𑀙𑀸𑀧𑁂𑀢𑁆𑀯𑀸 𑀓𑀣𑁂𑀲𑀺. 𑀅𑀣 𑀤𑁆𑀯𑀻𑀳𑀺 𑀲𑀓𑀼𑀡𑁂𑀳𑀺 𑀫𑀼𑀔𑀢𑀼𑀡𑁆𑀟𑀓𑁂𑀦 𑀟𑀁𑀲𑀺𑀢𑁆𑀯𑀸 𑀕𑀳𑀺𑀢𑀤𑀡𑁆𑀟𑀓𑁂 𑀦𑀺𑀲𑀺𑀦𑁆𑀦𑁄 𑀓𑀼𑀡𑀸𑀮𑀲𑀓𑀼𑀡𑀭𑀸𑀚𑀸 𑀧𑀼𑀭𑀢𑁄 𑀧𑀘𑁆𑀙𑀢𑁄 𑀉𑀪𑁄𑀲𑀼 𑀘 𑀧𑀲𑁆𑀲𑁂𑀲𑀼 𑀲𑀓𑀼𑀡𑀲𑀗𑁆𑀖𑀧𑀭𑀺𑀯𑀼𑀢𑁄 𑀆𑀕𑀘𑁆𑀙𑀢𑀺. 𑀪𑀺𑀓𑁆𑀔𑀽 𑀢𑀁 𑀤𑀺𑀲𑁆𑀯𑀸 𑁋 ‘‘𑀏𑀲, 𑀪𑀦𑁆𑀢𑁂, 𑀇𑀫𑁂𑀲𑀁 𑀲𑀓𑀼𑀡𑀸𑀦𑀁 𑀭𑀸𑀚𑀸 𑀪𑀯𑀺𑀲𑁆𑀲𑀢𑀺, 𑀧𑀭𑀺𑀯𑀸𑀭𑀸 𑀏𑀢𑁂 𑀏𑀢𑀲𑁆𑀲𑀸’’𑀢𑀺 𑀫𑀜𑁆𑀜𑀸𑀫𑀸𑀢𑀺. 𑀏𑀯𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀬𑀫𑁆𑀧𑀺 𑀫𑀫𑁂𑀯 𑀯𑀁𑀲𑁄 𑀫𑀫 𑀧𑀯𑁂𑀡𑀻𑀢𑀺. 𑀇𑀤𑀸𑀦𑀺 𑀢𑀸𑀯 𑀫𑀬𑀁, 𑀪𑀦𑁆𑀢𑁂, 𑀏𑀢𑁂 𑀲𑀓𑀼𑀡𑁂 𑀧𑀲𑁆𑀲𑀸𑀫. 𑀬𑀁 𑀧𑀦 𑀪𑀕𑀯𑀸 ‘‘𑀅𑀬𑀫𑁆𑀧𑀺 𑀫𑀫𑁂𑀯 𑀯𑀁𑀲𑁄 𑀫𑀫 𑀧𑀯𑁂𑀡𑀻’’𑀢𑀺 𑀆𑀳, 𑀢𑀁 𑀲𑁄𑀢𑀼𑀓𑀸𑀫𑀫𑁆𑀳𑀸𑀢𑀺. 𑀲𑁄𑀢𑀼𑀓𑀸𑀫𑀢𑁆𑀣, 𑀪𑀺𑀓𑁆𑀔𑀯𑁂𑀢𑀺? 𑀆𑀫 𑀪𑀕𑀯𑀸𑀢𑀺. 𑀢𑁂𑀦 𑀳𑀺 𑀲𑀼𑀡𑀸𑀣𑀸𑀢𑀺 𑀢𑀻𑀳𑀺 𑀕𑀸𑀣𑀸𑀲𑀢𑁂𑀳𑀺 𑀫𑀡𑁆𑀟𑁂𑀢𑁆𑀯𑀸 𑀓𑀼𑀡𑀸𑀮𑀚𑀸𑀢𑀓𑀁 (𑀚𑀸. 𑁨.𑁨𑁧.𑀓𑀼𑀡𑀸𑀮𑀚𑀸𑀢𑀓) 𑀓𑀣𑁂𑀦𑁆𑀢𑁄 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀩𑁆𑀩𑁂𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼, 𑀫𑀕𑁆𑀕𑁂𑀦𑁂𑀯 𑀘 𑀦𑁂𑀲𑀁 𑀇𑀤𑁆𑀥𑀺𑀧𑀺 𑀆𑀕𑀢𑀸. 𑀪𑀕𑀯𑀸 ‘‘𑀳𑁄𑀢𑀼 𑀢𑀸𑀯 𑀏𑀢𑁆𑀢𑀓𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦’’𑀦𑁆𑀢𑀺 𑀆𑀓𑀸𑀲𑁂 𑀉𑀧𑁆𑀧𑀢𑀺𑀢𑁆𑀯𑀸 𑀫𑀳𑀸𑀯𑀦𑀫𑁂𑀯 𑀅𑀕𑀫𑀸𑀲𑀺. 𑀢𑁂𑀧𑀺 𑀪𑀺𑀓𑁆𑀔𑀽 𑀕𑀫𑀦𑀓𑀸𑀮𑁂 𑀤𑀲𑀩𑀮𑀲𑁆𑀲 𑀆𑀦𑀼𑀪𑀸𑀯𑁂𑀦 𑀕𑀦𑁆𑀢𑁆𑀯𑀸 𑀆𑀕𑀫𑀦𑀓𑀸𑀮𑁂 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀫𑀳𑀸𑀯𑀦𑁂 𑀑𑀢𑀭𑀺𑀁𑀲𑀼.

𑀪𑀕𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 𑁋 ‘‘𑀏𑀣, 𑀪𑀺𑀓𑁆𑀔𑀯𑁂, 𑀦𑀺𑀲𑀻𑀤𑀣. 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀯𑀚𑁆𑀛𑀸𑀦𑀁 𑀯𑁄 𑀓𑀺𑀮𑁂𑀲𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑀺. 𑀪𑀺𑀓𑁆𑀔𑀽 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀪𑀕𑀯𑀸 𑀅𑀫𑁆𑀳𑀸𑀓𑀁 𑀅𑀦𑀪𑀺𑀭𑀢𑀪𑀸𑀯𑀁 𑀜𑀢𑁆𑀯𑀸 𑀓𑀼𑀡𑀸𑀮𑀤𑀳𑀁 𑀦𑁂𑀢𑁆𑀯𑀸 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀲𑀺, 𑀢𑀢𑁆𑀣 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑀸𑀦𑀁 𑀦𑁄 𑀇𑀤𑀸𑀦𑀺 𑀇𑀥 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀁 𑀅𑀤𑀸𑀲𑀺, 𑀦 𑀔𑁄 𑀧𑀦 𑀅𑀫𑁆𑀳𑁂𑀳𑀺 ‘𑀲𑁄𑀢𑀸𑀧𑀦𑁆𑀦𑀸 𑀫𑀬’𑀦𑁆𑀢𑀺 𑀯𑀻𑀢𑀺𑀦𑀸𑀫𑁂𑀢𑀼𑀁 𑀯𑀝𑁆𑀝𑀢𑀺, 𑀧𑀼𑀭𑀺𑀲𑀧𑀼𑀭𑀺𑀲𑁂𑀳𑀺 𑀦𑁄 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑁂 𑀤𑀲𑀩𑀮𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀸𑀬 𑀦𑀺𑀲𑀻𑀤𑀦𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀩𑁆𑀪𑀸𑀭𑀭𑀼𑀓𑁆𑀔𑀫𑀽𑀮𑁂𑀲𑀼 𑀦𑀺𑀲𑀻𑀤𑀺𑀁𑀲𑀼.

𑀪𑀕𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀪𑀺𑀓𑁆𑀔𑀽 𑀧𑀓𑀢𑀺𑀬𑀸𑀧𑀺 𑀅𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀝𑁆𑀞𑀸𑀦𑀸, 𑀮𑀤𑁆𑀥𑀼𑀧𑀸𑀬𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑁄 𑀓𑀺𑀮𑀫𑀦𑀓𑀸𑀭𑀡𑀁 𑀦𑀸𑀫 𑀦𑀢𑁆𑀣𑀺. 𑀕𑀘𑁆𑀙𑀦𑁆𑀢𑀸 𑀕𑀘𑁆𑀙𑀦𑁆𑀢𑀸 𑀘 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 ‘𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀕𑀼𑀡𑀁 𑀆𑀭𑁄𑀘𑁂𑀲𑁆𑀲𑀸𑀫𑀸’𑀢𑀺 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀫𑀺𑀲𑁆𑀲𑀦𑁆𑀢𑀺. 𑀏𑀢𑁂𑀲𑀼 𑀆𑀕𑀢𑁂𑀲𑀼 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸 𑀏𑀓𑀘𑀓𑁆𑀓𑀯𑀸𑀴𑁂 𑀲𑀦𑁆𑀦𑀺𑀧𑀢𑀺𑀲𑁆𑀲𑀦𑁆𑀢𑀺, 𑀫𑀳𑀸𑀲𑀫𑀬𑁄 𑀪𑀯𑀺𑀲𑁆𑀲𑀢𑀺, 𑀯𑀺𑀯𑀺𑀢𑁆𑀢𑁂 𑀑𑀓𑀸𑀲𑁂 𑀫𑀬𑀸 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀢𑀢𑁄 𑀯𑀺𑀯𑀺𑀢𑁆𑀢𑁂 𑀑𑀓𑀸𑀲𑁂 𑀩𑀼𑀤𑁆𑀥𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀦𑀺𑀲𑀻𑀤𑀺.

𑀲𑀩𑁆𑀩𑀧𑀞𑀫𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀕𑀢𑀢𑁆𑀣𑁂𑀭𑁄 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑀢𑁄 𑀅𑀧𑀭𑁄 𑀢𑀢𑁄 𑀅𑀧𑀭𑁄𑀢𑀺 𑀧𑀜𑁆𑀘𑀲𑀢𑀸𑀧𑀺 𑀧𑀤𑀼𑀫𑀺𑀦𑀺𑀬𑀁 𑀧𑀤𑀼𑀫𑀸𑀦𑀺 𑀯𑀺𑀬 𑀯𑀺𑀓𑀲𑀺𑀁𑀲𑀼. 𑀲𑀩𑁆𑀩𑀧𑀞𑀫𑀁 𑀅𑀭𑀳𑀢𑁆𑀢𑀁 𑀧𑀢𑁆𑀢𑀪𑀺𑀓𑁆𑀔𑀼 ‘‘𑀪𑀕𑀯𑀢𑁄 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀧𑀮𑁆𑀮𑀗𑁆𑀓𑀁 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀦𑀺𑀲𑀻𑀤𑀦𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀉𑀝𑁆𑀞𑀸𑀬 𑀤𑀲𑀩𑀮𑀸𑀪𑀺𑀫𑀼𑀔𑁄 𑀅𑀳𑁄𑀲𑀺. 𑀏𑀯𑀁 𑀅𑀧𑀭𑁄𑀧𑀺 𑀅𑀧𑀭𑁄𑀧𑀻𑀢𑀺 𑀧𑀜𑁆𑀘𑀲𑀢𑀸 𑀪𑀢𑁆𑀢𑀲𑀸𑀮𑀁 𑀧𑀯𑀺𑀲𑀦𑁆𑀢𑀸 𑀯𑀺𑀬 𑀧𑀝𑀺𑀧𑀸𑀝𑀺𑀬𑀸𑀯 𑀆𑀕𑀫𑀺𑀁𑀲𑀼. 𑀧𑀞𑀫𑀁 𑀆𑀕𑀢𑁄 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸, 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸, 𑀧𑀝𑀺𑀯𑀺𑀤𑁆𑀥𑀕𑀼𑀡𑀁 𑀆𑀭𑁄𑀘𑁂𑀢𑀼𑀓𑀸𑀫𑁄 ‘‘𑀅𑀢𑁆𑀣𑀺 𑀦𑀼 𑀔𑁄 𑀅𑀜𑁆𑀜𑁄 𑀓𑁄𑀘𑀺? 𑀦𑀢𑁆𑀣𑀻’’𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀆𑀕𑀢𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑁄 𑀅𑀧𑀭𑀫𑁆𑀧𑀺 𑀅𑀤𑁆𑀤𑀲 𑀅𑀧𑀭𑀫𑁆𑀧𑀺 𑀅𑀤𑁆𑀤𑀲𑀬𑁂𑀯𑀸𑀢𑀺 𑀲𑀩𑁆𑀩𑁂𑀧𑀺 𑀢𑁂 𑀆𑀕𑀦𑁆𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸, 𑀅𑀬𑀁 𑀇𑀫𑀲𑁆𑀲 𑀳𑀭𑀸𑀬𑀫𑀸𑀦𑁄 𑀦 𑀓𑀣𑁂𑀲𑀺, 𑀅𑀬𑀁 𑀇𑀫𑀲𑁆𑀲 𑀳𑀭𑀸𑀬𑀫𑀸𑀦𑁄 𑀦 𑀓𑀣𑁂𑀲𑀺. 𑀔𑀻𑀡𑀸𑀲𑀯𑀸𑀦𑀁 𑀓𑀺𑀭 𑀤𑁆𑀯𑁂 𑀆𑀓𑀸𑀭𑀸 𑀳𑁄𑀦𑁆𑀢𑀺 𑁋 ‘‘𑀅𑀳𑁄 𑀯𑀢 𑀫𑀬𑀸 𑀧𑀝𑀺𑀯𑀺𑀤𑁆𑀥𑀕𑀼𑀡𑀁 𑀲𑀤𑁂𑀯𑀓𑁄 𑀮𑁄𑀓𑁄 𑀔𑀺𑀧𑁆𑀧𑀫𑁂𑀯 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀸’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀧𑀝𑀺𑀯𑀺𑀤𑁆𑀥𑀪𑀸𑀯𑀁 𑀧𑀦 𑀦𑀺𑀥𑀺𑀮𑀤𑁆𑀥𑀧𑀼𑀭𑀺𑀲𑁄 𑀯𑀺𑀬 𑀦 𑀅𑀜𑁆𑀜𑀲𑁆𑀲 𑀆𑀭𑁄𑀘𑁂𑀢𑀼𑀓𑀸𑀫𑀸 𑀳𑁄𑀦𑁆𑀢𑀺.

𑀏𑀯𑀁 𑀑𑀲𑀝𑀫𑀢𑁆𑀢𑁂 𑀧𑀦 𑀢𑀲𑁆𑀫𑀺𑀁 𑀅𑀭𑀺𑀬𑀫𑀡𑁆𑀟𑀮𑁂 𑀧𑀸𑀘𑀻𑀦𑀬𑀼𑀕𑀦𑁆𑀥𑀭𑀧𑀭𑀺𑀓𑁆𑀔𑁂𑀧𑀢𑁄 𑀅𑀩𑁆𑀪𑀸 𑀫𑀳𑀺𑀓𑀸 𑀥𑀽𑀫𑁄 𑀭𑀚𑁄 𑀭𑀸𑀳𑀽𑀢𑀺, 𑀇𑀫𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑀧𑀝𑀺𑀫𑀡𑁆𑀟𑀺𑀢𑀲𑁆𑀲 𑀮𑁄𑀓𑀲𑁆𑀲 𑀭𑀸𑀫𑀡𑁂𑀬𑁆𑀬𑀓𑀤𑀲𑁆𑀲𑀦𑀢𑁆𑀣𑀁 𑀧𑀸𑀘𑀻𑀦𑀤𑀺𑀲𑀸𑀬 𑀉𑀓𑁆𑀔𑀺𑀢𑁆𑀢𑀭𑀚𑀢𑀫𑀬𑀫𑀳𑀸𑀆𑀤𑀸𑀲𑀫𑀡𑁆𑀟𑀮𑀁 𑀯𑀺𑀬, 𑀦𑁂𑀫𑀺𑀯𑀝𑁆𑀝𑀺𑀬𑀁 𑀕𑀳𑁂𑀢𑁆𑀯𑀸, 𑀧𑀭𑀺𑀯𑀢𑁆𑀢𑀺𑀬𑀫𑀸𑀦𑀭𑀚𑀢𑀘𑀓𑁆𑀓𑀲𑀲𑁆𑀲𑀺𑀭𑀺𑀓𑀁 𑀧𑀼𑀡𑁆𑀡𑀘𑀦𑁆𑀤𑀫𑀡𑁆𑀟𑀮𑀁 𑀉𑀮𑁆𑀮𑀗𑁆𑀖𑀺𑀢𑁆𑀯𑀸, 𑀅𑀦𑀺𑀮𑀧𑀣𑀁 𑀧𑀝𑀺𑀧𑀚𑁆𑀚𑀺𑀢𑁆𑀣. 𑀇𑀢𑀺 𑀏𑀯𑀭𑀽𑀧𑁂 𑀔𑀡𑁂 𑀮𑀬𑁂 𑀫𑀼𑀳𑀼𑀢𑁆𑀢𑁂 𑀪𑀕𑀯𑀸 𑀲𑀓𑁆𑀓𑁂𑀲𑀼 𑀯𑀺𑀳𑀭𑀢𑀺 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀫𑀳𑀸𑀯𑀦𑁂 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀩𑁆𑀩𑁂𑀳𑁂𑀯 𑀅𑀭𑀳𑀦𑁆𑀢𑁂𑀳𑀺.

𑀢𑀢𑁆𑀣 𑀪𑀕𑀯𑀸𑀧𑀺 𑀫𑀳𑀸𑀲𑀫𑁆𑀫𑀢𑀲𑁆𑀲 𑀯𑀁𑀲𑁂 𑀉𑀧𑁆𑀧𑀦𑁆𑀦𑁄, 𑀢𑁂𑀧𑀺 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀫𑀳𑀸𑀲𑀫𑁆𑀫𑀢𑀲𑁆𑀲 𑀓𑀼𑀮𑁂 𑀉𑀧𑁆𑀧𑀦𑁆𑀦𑀸. 𑀪𑀕𑀯𑀸𑀧𑀺 𑀔𑀢𑁆𑀢𑀺𑀬𑀕𑀩𑁆𑀪𑁂 𑀚𑀸𑀢𑁄, 𑀢𑁂𑀧𑀺 𑀔𑀢𑁆𑀢𑀺𑀬𑀕𑀩𑁆𑀪𑁂 𑀚𑀸𑀢𑀸. 𑀪𑀕𑀯𑀸𑀧𑀺 𑀭𑀸𑀚𑀧𑀩𑁆𑀩𑀚𑀺𑀢𑁄, 𑀢𑁂𑀧𑀺 𑀭𑀸𑀚𑀧𑀩𑁆𑀩𑀚𑀺𑀢𑀸. 𑀪𑀕𑀯𑀸𑀧𑀺 𑀲𑁂𑀢𑀘𑁆𑀙𑀢𑁆𑀢𑀁 𑀧𑀳𑀸𑀬 𑀳𑀢𑁆𑀣𑀕𑀢𑀁 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄, 𑀢𑁂𑀧𑀺 𑀲𑁂𑀢𑀘𑁆𑀙𑀢𑁆𑀢𑀁 𑀧𑀳𑀸𑀬 𑀳𑀢𑁆𑀣𑀕𑀢𑀸𑀦𑀺 𑀭𑀚𑁆𑀚𑀸𑀦𑀺 𑀯𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀸. 𑀇𑀢𑀺 𑀪𑀕𑀯𑀸 𑀧𑀭𑀺𑀲𑀼𑀤𑁆𑀥𑁂 𑀑𑀓𑀸𑀲𑁂, 𑀧𑀭𑀺𑀲𑀼𑀤𑁆𑀥𑁂 𑀭𑀢𑁆𑀢𑀺𑀪𑀸𑀕𑁂, 𑀲𑀬𑀁 𑀧𑀭𑀺𑀲𑀼𑀤𑁆𑀥𑁄 𑀧𑀭𑀺𑀲𑀼𑀤𑁆𑀥𑀧𑀭𑀺𑀯𑀸𑀭𑁄, 𑀯𑀻𑀢𑀭𑀸𑀕𑁄 𑀯𑀻𑀢𑀭𑀸𑀕𑀧𑀭𑀺𑀯𑀸𑀭𑁄, 𑀯𑀻𑀢𑀤𑁄𑀲𑁄 𑀯𑀻𑀢𑀤𑁄𑀲𑀧𑀭𑀺𑀯𑀸𑀭𑁄, 𑀯𑀻𑀢𑀫𑁄𑀳𑁄 𑀯𑀻𑀢𑀫𑁄𑀳𑀧𑀭𑀺𑀯𑀸𑀭𑁄, 𑀦𑀺𑀢𑁆𑀢𑀡𑁆𑀳𑁄 𑀦𑀺𑀢𑁆𑀢𑀡𑁆𑀳𑀧𑀭𑀺𑀯𑀸𑀭𑁄, 𑀦𑀺𑀓𑁆𑀓𑀺𑀮𑁂𑀲𑁄 𑀦𑀺𑀓𑁆𑀓𑀺𑀮𑁂𑀲𑀧𑀭𑀺𑀯𑀸𑀭𑁄, 𑀲𑀦𑁆𑀢𑁄 𑀲𑀦𑁆𑀢𑀧𑀭𑀺𑀯𑀸𑀭𑁄, 𑀤𑀦𑁆𑀢𑁄 𑀤𑀦𑁆𑀢𑀧𑀭𑀺𑀯𑀸𑀭𑁄, 𑀫𑀼𑀢𑁆𑀢𑁄 𑀫𑀼𑀢𑁆𑀢𑀧𑀭𑀺𑀯𑀸𑀭𑁄, 𑀅𑀢𑀺𑀯𑀺𑀬 𑀯𑀺𑀭𑁄𑀘𑀢𑀻𑀢𑀺. 𑀯𑀡𑁆𑀡𑀪𑀽𑀫𑀺 𑀦𑀸𑀫𑁂𑀲𑀸, 𑀬𑀢𑁆𑀢𑀓𑀁 𑀲𑀓𑁆𑀓𑁄𑀢𑀺, 𑀢𑀢𑁆𑀢𑀓𑀁 𑀯𑀢𑁆𑀢𑀩𑁆𑀩𑀁. 𑀇𑀢𑀺 𑀇𑀫𑁂 𑀪𑀺𑀓𑁆𑀔𑀽 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, ‘‘𑀧𑀜𑁆𑀘𑀫𑀢𑁆𑀢𑁂𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀩𑁆𑀩𑁂𑀳𑁂𑀯 𑀅𑀭𑀳𑀦𑁆𑀢𑁂𑀳𑀻’’𑀢𑀺.

𑀬𑁂𑀪𑀼𑀬𑁆𑀬𑁂𑀦𑀸𑀢𑀺 𑀩𑀳𑀼𑀢𑀭𑀸 𑀲𑀦𑁆𑀦𑀺𑀧𑀢𑀺𑀢𑀸, 𑀫𑀦𑁆𑀤𑀸 𑀦 𑀲𑀦𑁆𑀦𑀺𑀧𑀢𑀺𑀢𑀸 𑀅𑀲𑀜𑁆𑀜𑀻 𑀅𑀭𑀽𑀧𑀸𑀯𑀘𑀭𑀤𑁂𑀯𑀢𑀸 𑀲𑀫𑀸𑀧𑀦𑁆𑀦𑀤𑁂𑀯𑀢𑀸𑀬𑁄 𑀘. 𑀢𑀢𑁆𑀭𑀸𑀬𑀁 𑀲𑀦𑁆𑀦𑀺𑀧𑀸𑀢𑀓𑁆𑀓𑀫𑁄 𑁋 𑀫𑀳𑀸𑀯𑀦𑀲𑁆𑀲 𑀓𑀺𑀭 𑀲𑀸𑀫𑀦𑁆𑀢𑀸 𑀤𑁂𑀯𑀢𑀸 𑀘𑀮𑀺𑀁𑀲𑀼, ‘‘𑀆𑀬𑀸𑀫 𑀪𑁄! 𑀩𑀼𑀤𑁆𑀥𑀤𑀲𑁆𑀲𑀦𑀁 𑀦𑀸𑀫 𑀩𑀳𑀽𑀧𑀓𑀸𑀭𑀁, 𑀥𑀫𑁆𑀫𑀲𑁆𑀲𑀯𑀦𑀁 𑀩𑀳𑀽𑀧𑀓𑀸𑀭𑀁, 𑀪𑀺𑀓𑁆𑀔𑀼𑀲𑀗𑁆𑀖𑀤𑀲𑁆𑀲𑀦𑀁 𑀩𑀳𑀽𑀧𑀓𑀸𑀭𑀁. 𑀆𑀬𑀸𑀫 𑀆𑀬𑀸𑀫𑀸’’𑀢𑀺! 𑀫𑀳𑀸𑀲𑀤𑁆𑀤𑀁 𑀓𑀼𑀭𑀼𑀫𑀸𑀦𑀸 𑀆𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀜𑁆𑀘 𑀢𑀁𑀫𑀼𑀳𑀼𑀢𑁆𑀢𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀔𑀻𑀡𑀸𑀲𑀯𑁂 𑀘 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀢𑀸𑀲𑀁 𑀢𑀸𑀲𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀲𑀤𑁆𑀤𑀦𑁆𑀢𑀭𑀅𑀟𑁆𑀠𑀕𑀸𑀯𑀼𑀢𑀕𑀸𑀯𑀼𑀢𑀅𑀟𑁆𑀠𑀬𑁄𑀚𑀦𑀬𑁄𑀚𑀦𑀸𑀤𑀺𑀯𑀲𑁂𑀦 𑀢𑀺𑀬𑁄𑀚𑀦𑀲𑀳𑀲𑁆𑀲𑀯𑀺𑀢𑁆𑀣𑀢𑁂 𑀳𑀺𑀫𑀯𑀦𑁆𑀢𑁂, 𑀢𑀺𑀓𑁆𑀔𑀢𑁆𑀢𑀼𑀁 𑀢𑁂𑀲𑀝𑁆𑀞𑀺𑀬𑀸 𑀦𑀕𑀭𑀲𑀳𑀲𑁆𑀲𑁂𑀲𑀼, 𑀦𑀯𑀦𑀯𑀼𑀢𑀺𑀬𑀸 𑀤𑁄𑀡𑀫𑀼𑀔𑀲𑀢𑀲𑀳𑀲𑁆𑀲𑁂𑀲𑀼, 𑀙𑀦𑀯𑀼𑀢𑀺𑀬𑀸 𑀧𑀝𑁆𑀝𑀦𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀲𑀼, 𑀙𑀧𑀡𑁆𑀡𑀸𑀲𑀸𑀬 𑀭𑀢𑀦𑀸𑀓𑀭𑁂𑀲𑀽𑀢𑀺 𑀲𑀓𑀮𑀚𑀫𑁆𑀩𑀼𑀤𑀻𑀧𑁂, 𑀧𑀼𑀩𑁆𑀩𑀯𑀺𑀤𑁂𑀳𑁂, 𑀅𑀧𑀭𑀕𑁄𑀬𑀸𑀦𑁂, 𑀉𑀢𑁆𑀢𑀭𑀓𑀼𑀭𑀼𑀫𑁆𑀳𑀺, 𑀤𑁆𑀯𑀻𑀲𑀼 𑀧𑀭𑀺𑀢𑁆𑀢𑀤𑀻𑀧𑀲𑀳𑀲𑁆𑀲𑁂𑀲𑀽𑀢𑀺 𑀲𑀓𑀮𑀘𑀓𑁆𑀓𑀯𑀸𑀴𑁂, 𑀢𑀢𑁄 𑀤𑀼𑀢𑀺𑀬𑀢𑀢𑀺𑀬𑀘𑀓𑁆𑀓𑀯𑀸𑀴𑁂𑀢𑀺 𑀏𑀯𑀁 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀜𑁆𑀳𑀺 𑀇𑀥 𑀤𑀲𑀮𑁄𑀓𑀥𑀸𑀢𑀼𑀬𑁄𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀤𑀲𑀳𑀺 𑀘 𑀮𑁄𑀓𑀥𑀸𑀢𑀽𑀳𑀺 𑀤𑁂𑀯𑀢𑀸 𑀬𑁂𑀪𑀼𑀬𑁆𑀬𑁂𑀦 𑀲𑀦𑁆𑀦𑀺𑀧𑀢𑀺𑀢𑀸 𑀳𑁄𑀦𑁆𑀢𑀻’’𑀢𑀺.

𑀏𑀯𑀁 𑀲𑀦𑁆𑀦𑀺𑀧𑀢𑀺𑀢𑀸𑀳𑀺 𑀤𑁂𑀯𑀢𑀸𑀳𑀺 𑀲𑀓𑀮𑀘𑀓𑁆𑀓𑀯𑀸𑀴𑀕𑀩𑁆𑀪𑀁 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀲𑀽𑀘𑀺𑀖𑀭𑁂 𑀦𑀺𑀭𑀦𑁆𑀢𑀭𑀁 𑀧𑀓𑁆𑀔𑀺𑀢𑁆𑀢𑀲𑀽𑀘𑀻𑀳𑀺 𑀯𑀺𑀬 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺. 𑀢𑀢𑁆𑀣 𑀩𑁆𑀭𑀳𑁆𑀫𑀮𑁄𑀓𑀲𑁆𑀲 𑀏𑀯𑀁 𑀉𑀘𑁆𑀘𑀢𑁆𑀢𑀦𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀮𑁄𑀳𑀧𑀸𑀲𑀸𑀤𑁂 𑀓𑀺𑀭 𑀲𑀢𑁆𑀢𑀓𑀽𑀝𑀸𑀕𑀸𑀭𑀲𑀫𑁄 𑀧𑀸𑀲𑀸𑀡𑁄 𑀩𑁆𑀭𑀳𑁆𑀫𑀮𑁄𑀓𑁂 𑀞𑀢𑁆𑀯𑀸 𑀅𑀥𑁄 𑀔𑀺𑀢𑁆𑀢𑁄 𑀘𑀢𑀽𑀳𑀺 𑀫𑀸𑀲𑁂𑀳𑀺 𑀧𑀣𑀯𑀺𑀁 𑀧𑀸𑀧𑀼𑀡𑀸𑀢𑀺. 𑀏𑀯𑀁 𑀫𑀳𑀦𑁆𑀢𑁂 𑀑𑀓𑀸𑀲𑁂 𑀬𑀣𑀸 𑀳𑁂𑀝𑁆𑀞𑀸 𑀞𑀢𑁆𑀯𑀸 𑀔𑀺𑀢𑁆𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀯𑀸 𑀥𑀽𑀫𑁄 𑀯𑀸 𑀉𑀧𑀭𑀺 𑀕𑀦𑁆𑀢𑀼𑀁, 𑀉𑀧𑀭𑀺 𑀯𑀸 𑀞𑀢𑁆𑀯𑀸 𑀔𑀺𑀢𑁆𑀢𑀲𑀸𑀲𑀧𑀸 𑀳𑁂𑀝𑁆𑀞𑀸 𑀑𑀢𑀭𑀺𑀢𑀼𑀁 𑀅𑀦𑁆𑀢𑀭𑀁 𑀦 𑀮𑀪𑀦𑁆𑀢𑀺, 𑀏𑀯𑀁 𑀦𑀺𑀭𑀦𑁆𑀢𑀭𑀸 𑀤𑁂𑀯𑀢𑀸 𑀅𑀳𑁂𑀲𑀼𑀁. 𑀬𑀣𑀸 𑀔𑁄 𑀧𑀦 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀅𑀲𑀫𑁆𑀩𑀸𑀥𑀁 𑀳𑁄𑀢𑀺, 𑀆𑀕𑀢𑀸𑀕𑀢𑀸 𑀫𑀳𑁂𑀲𑀓𑁆𑀔𑀸 𑀔𑀢𑁆𑀢𑀺𑀬𑀸 𑀑𑀓𑀸𑀲𑀁 𑀮𑀪𑀦𑁆𑀢𑀺𑀬𑁂𑀯, 𑀧𑀭𑀢𑁄 𑀧𑀭𑀢𑁄 𑀧𑀦 𑀅𑀢𑀺𑀲𑀫𑁆𑀩𑀸𑀥𑀁 𑀳𑁄𑀢𑀺. 𑀏𑀯𑀫𑁂𑀯 𑀪𑀕𑀯𑀢𑁄 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀅𑀲𑀫𑁆𑀩𑀸𑀥𑀁, 𑀆𑀕𑀢𑀸𑀕𑀢𑀸 𑀫𑀳𑁂𑀲𑀓𑁆𑀔𑀸 𑀤𑁂𑀯𑀸 𑀘 𑀩𑁆𑀭𑀳𑁆𑀫𑀸𑀦𑁄 𑀘 𑀑𑀓𑀸𑀲𑀁 𑀮𑀪𑀦𑁆𑀢𑀺𑀬𑁂𑀯. 𑀅𑀧𑀺 𑀲𑀼𑀤𑀁 𑀪𑀕𑀯𑀢𑁄 𑀆𑀲𑀦𑁆𑀦𑀸𑀲𑀦𑁆𑀦𑀝𑁆𑀞𑀸𑀦𑁂 𑀯𑀸𑀮𑀕𑁆𑀕𑀦𑀺𑀢𑁆𑀢𑀼𑀤𑀦𑀫𑀢𑁆𑀢𑁂 𑀧𑀤𑁂𑀲𑁂 𑀤𑀲𑀧𑀺 𑀯𑀻𑀲𑀢𑀺𑀧𑀺 𑀤𑁂𑀯𑀸 𑀲𑀼𑀔𑀼𑀫𑁂 𑀅𑀢𑁆𑀢𑀪𑀸𑀯𑁂 𑀫𑀸𑀧𑁂𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀲𑀩𑁆𑀩𑀧𑀭𑀢𑁄 𑀲𑀝𑁆𑀞𑀺 𑀲𑀝𑁆𑀞𑀺 𑀤𑁂𑀯𑀢𑀸 𑀅𑀝𑁆𑀞𑀁𑀲𑀼.

𑀲𑀼𑀤𑁆𑀥𑀸𑀯𑀸𑀲𑀓𑀸𑀬𑀺𑀓𑀸𑀦𑀦𑁆𑀢𑀺 𑀲𑀼𑀤𑁆𑀥𑀸𑀯𑀸𑀲𑀯𑀸𑀲𑀻𑀦𑀁. 𑀲𑀼𑀤𑁆𑀥𑀸𑀯𑀸𑀲𑀸 𑀦𑀸𑀫 𑀲𑀼𑀤𑁆𑀥𑀸𑀦𑀁 𑀅𑀦𑀸𑀕𑀸𑀫𑀺𑀔𑀻𑀡𑀸𑀲𑀯𑀸𑀦𑀁 𑀆𑀯𑀸𑀲𑀸 𑀧𑀜𑁆𑀘 𑀩𑁆𑀭𑀳𑁆𑀫𑀮𑁄𑀓𑀸. 𑀏𑀢𑀤𑀳𑁄𑀲𑀻𑀢𑀺 𑀓𑀲𑁆𑀫𑀸 𑀅𑀳𑁄𑀲𑀺? 𑀢𑁂 𑀓𑀺𑀭 𑀩𑁆𑀭𑀳𑁆𑀫𑀸𑀦𑁄 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀬𑀣𑀸 𑀧𑀭𑀺𑀘𑁆𑀙𑁂𑀤𑁂𑀦 𑀯𑀼𑀝𑁆𑀞𑀺𑀢𑀸 𑀩𑁆𑀭𑀳𑁆𑀫𑀪𑀯𑀦𑀁 𑀑𑀮𑁄𑀓𑁂𑀦𑁆𑀢𑀸 𑀧𑀘𑁆𑀙𑀸𑀪𑀢𑁆𑀢𑁂 𑀪𑀢𑁆𑀢𑀕𑁂𑀳𑀁 𑀯𑀺𑀬 𑀲𑀼𑀜𑁆𑀜𑀢𑀁 𑀅𑀤𑁆𑀤𑀲𑀁𑀲𑀼. 𑀢𑀢𑁄 ‘‘𑀓𑀼𑀳𑀺𑀁 𑀩𑁆𑀭𑀳𑁆𑀫𑀸𑀦𑁄 𑀕𑀢𑀸’’𑀢𑀺 𑀆𑀯𑀚𑁆𑀚𑀦𑁆𑀢𑀸 𑀫𑀳𑀸𑀲𑀫𑀸𑀕𑀫𑀁 𑀜𑀢𑁆𑀯𑀸 𑁋 ‘‘𑀅𑀬𑀁 𑀲𑀫𑀸𑀕𑀫𑁄 𑀫𑀳𑀸, 𑀫𑀬𑀁 𑀑𑀳𑀻𑀦𑀸, 𑀑𑀳𑀻𑀦𑀓𑀸𑀦𑀁 𑀧𑀦 𑀑𑀓𑀸𑀲𑁄 𑀤𑀼𑀮𑁆𑀮𑀪𑁄 𑀳𑁄𑀢𑀺, 𑀢𑀲𑁆𑀫𑀸 𑀕𑀘𑁆𑀙𑀦𑁆𑀢𑀸 𑀅𑀢𑀼𑀘𑁆𑀙𑀳𑀢𑁆𑀣𑀸 𑀳𑀼𑀢𑁆𑀯𑀸 𑀏𑀓𑁂𑀓𑀁 𑀕𑀸𑀣𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀕𑀘𑁆𑀙𑀸𑀫. 𑀢𑀸𑀬 𑀫𑀳𑀸𑀲𑀫𑀸𑀕𑀫𑁂 𑀘 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀲𑁆𑀲𑀸𑀫, 𑀤𑀲𑀩𑀮𑀲𑁆𑀲 𑀘 𑀯𑀡𑁆𑀡𑀁 𑀪𑀸𑀲𑀺𑀲𑁆𑀲𑀸𑀫𑀸’’𑀢𑀺. 𑀇𑀢𑀺 𑀢𑁂𑀲𑀁 𑀲𑀫𑀸𑀧𑀢𑁆𑀢𑀺𑀢𑁄 𑀉𑀝𑁆𑀞𑀸𑀬 𑀆𑀯𑀚𑁆𑀚𑀺𑀢𑀢𑁆𑀢𑀸 𑀏𑀢𑀤𑀳𑁄𑀲𑀺.

𑀪𑀕𑀯𑀢𑁄 𑀧𑀼𑀭𑀢𑁄 𑀧𑀸𑀢𑀼𑀭𑀳𑁂𑀲𑀼𑀦𑁆𑀢𑀺 𑀧𑀸𑀴𑀺𑀬𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀅𑀪𑀺𑀫𑀼𑀔𑀝𑁆𑀞𑀸𑀦𑁂𑀬𑁂𑀯 𑀑𑀢𑀺𑀡𑁆𑀡𑀸 𑀯𑀺𑀬 𑀓𑀢𑁆𑀯𑀸 𑀯𑀼𑀢𑁆𑀢𑀸, 𑀦 𑀔𑁄 𑀧𑀦𑁂𑀢𑁆𑀣 𑀏𑀯𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂 𑀧𑀦 𑀩𑁆𑀭𑀳𑁆𑀫𑀮𑁄𑀓𑁂 𑀞𑀺𑀢𑀸𑀬𑁂𑀯 𑀕𑀸𑀣𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀏𑀓𑁄 𑀧𑀼𑀭𑀢𑁆𑀣𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀑𑀢𑀭𑀺, 𑀏𑀓𑁄 𑀤𑀓𑁆𑀔𑀺𑀡𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁, 𑀏𑀓𑁄 𑀧𑀘𑁆𑀙𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁, 𑀏𑀓𑁄 𑀉𑀢𑁆𑀢𑀭𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀑𑀢𑀭𑀺. 𑀢𑀢𑁄 𑀧𑀼𑀭𑀢𑁆𑀣𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀑𑀢𑀺𑀡𑁆𑀡𑀩𑁆𑀭𑀳𑁆𑀫𑀸 𑀦𑀻𑀮𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀦𑀻𑀮𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀦𑀁 𑀫𑀡𑀺𑀯𑀫𑁆𑀫𑀁 𑀧𑀝𑀺𑀫𑀼𑀜𑁆𑀘𑀦𑁆𑀢𑁄 𑀯𑀺𑀬 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀩𑀼𑀤𑁆𑀥𑀯𑀻𑀣𑀺 𑀦𑀸𑀫 𑀓𑁂𑀦𑀘𑀺 𑀉𑀢𑁆𑀢𑀭𑀺𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀫𑀳𑀢𑀺𑀬𑀸 𑀩𑀼𑀤𑁆𑀥𑀯𑀻𑀣𑀺𑀬𑀸𑀯 𑀆𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀅𑀢𑁆𑀢𑀦𑀸 𑀅𑀪𑀺𑀲𑀗𑁆𑀔𑀢𑀁 𑀕𑀸𑀣𑀁 𑀅𑀪𑀸𑀲𑀺.

𑀤𑀓𑁆𑀔𑀺𑀡𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀑𑀢𑀺𑀡𑁆𑀡𑀩𑁆𑀭𑀳𑁆𑀫𑀸 𑀧𑀻𑀢𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀲𑀼𑀯𑀡𑁆𑀡𑀧𑀪𑀁 𑀫𑀼𑀜𑁆𑀘𑀺𑀢𑁆𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀦𑀁 𑀲𑀼𑀯𑀡𑁆𑀡𑀧𑀝𑀁 𑀧𑀸𑀭𑀼𑀧𑀦𑁆𑀢𑁄 𑀯𑀺𑀬 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀢𑀣𑁂𑀯 𑀅𑀓𑀸𑀲𑀺. 𑀧𑀘𑁆𑀙𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀑𑀢𑀺𑀡𑁆𑀡𑀩𑁆𑀭𑀳𑁆𑀫𑀸 𑀮𑁄𑀳𑀺𑀢𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀮𑁄𑀳𑀺𑀢𑀓𑀭𑀲𑁆𑀫𑀺𑀬𑁄 𑀫𑀼𑀜𑁆𑀘𑀺𑀢𑁆𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀦𑀁 𑀭𑀢𑁆𑀢𑀯𑀭𑀓𑀫𑁆𑀩𑀮𑁂𑀦 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀢𑀣𑁂𑀯 𑀅𑀓𑀸𑀲𑀺. 𑀉𑀢𑁆𑀢𑀭𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀑𑀢𑀺𑀡𑁆𑀡𑀩𑁆𑀭𑀳𑁆𑀫𑀸 𑀑𑀤𑀸𑀢𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀑𑀤𑀸𑀢𑀭𑀲𑁆𑀫𑀺𑀬𑁄 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀦𑀁 𑀲𑀼𑀫𑀦𑀓𑀼𑀲𑀼𑀫𑀧𑀝𑀁 𑀧𑀸𑀭𑀼𑀧𑀦𑁆𑀢𑁄 𑀯𑀺𑀬 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑁆𑀯𑀸 𑀢𑀣𑁂𑀯 𑀅𑀓𑀸𑀲𑀺.

𑀧𑀸𑀴𑀺𑀬𑀁 𑀧𑀦 𑀪𑀕𑀯𑀢𑁄 𑀧𑀼𑀭𑀢𑁄 𑀧𑀸𑀢𑀼𑀭𑀳𑁂𑀲𑀼𑀁. 𑀅𑀣 𑀔𑁄 𑀢𑀸 𑀤𑁂𑀯𑀢𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀽𑀢𑀺 𑀏𑀯𑀁 𑀏𑀓𑀓𑁆𑀔𑀡𑁂 𑀯𑀺𑀬 𑀧𑀼𑀭𑀢𑁄 𑀧𑀸𑀢𑀼𑀪𑀸𑀯𑁄 𑀘 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑀪𑀸𑀯𑁄 𑀘 𑀯𑀼𑀢𑁆𑀢𑁄, 𑀲𑁄 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀅𑀳𑁄𑀲𑀺, 𑀏𑀓𑀢𑁄 𑀓𑀢𑁆𑀯𑀸 𑀧𑀦 𑀤𑀲𑁆𑀲𑀺𑀢𑁄. 𑀕𑀸𑀣𑀸𑀪𑀸𑀲𑀦𑀁 𑀧𑀦 𑀧𑀸𑀴𑀺𑀬𑀫𑁆𑀧𑀺 𑀯𑀺𑀲𑀼𑀁 𑀯𑀺𑀲𑀼𑀁𑀬𑁂𑀯 𑀯𑀼𑀢𑁆𑀢𑀁.

𑀢𑀢𑁆𑀣 𑀫𑀳𑀸𑀲𑀫𑀬𑁄𑀢𑀺 𑀫𑀳𑀸𑀲𑀫𑀽𑀳𑁄. 𑀧𑀯𑀦𑀁 𑀯𑀼𑀘𑁆𑀘𑀢𑀺 𑀯𑀦𑀲𑀡𑁆𑀟𑁄. 𑀉𑀪𑀬𑁂𑀦𑀧𑀺 𑀪𑀕𑀯𑀸 ‘‘𑀇𑀫𑀲𑁆𑀫𑀺𑀁 𑀧𑀦 𑀯𑀦𑀲𑀡𑁆𑀟𑁂 𑀅𑀚𑁆𑀚 𑀫𑀳𑀸𑀲𑀫𑀽𑀳𑁄 𑀲𑀦𑁆𑀦𑀺𑀧𑀸𑀢𑁄’’𑀢𑀺 𑀆𑀳. 𑀢𑀢𑁄 𑀬𑁂𑀲𑀁 𑀲𑁄 𑀲𑀦𑁆𑀦𑀺𑀧𑀸𑀢𑁄, 𑀢𑁂 𑀤𑀲𑁆𑀲𑁂𑀢𑀼𑀁 𑀤𑁂𑀯𑀓𑀸𑀬𑀸 𑀲𑀫𑀸𑀕𑀢𑀸𑀢𑀺 𑀆𑀳. 𑀢𑀢𑁆𑀣 𑀤𑁂𑀯𑀓𑀸𑀬𑀸𑀢𑀺 𑀤𑁂𑀯𑀖𑀝𑀸. 𑀆𑀕𑀢𑀫𑁆𑀳 𑀇𑀫𑀁 𑀥𑀫𑁆𑀫𑀲𑀫𑀬𑀦𑁆𑀢𑀺 𑀏𑀯𑀁 𑀲𑀫𑀸𑀕𑀢𑁂 𑀤𑁂𑀯𑀓𑀸𑀬𑁂 𑀤𑀺𑀲𑁆𑀯𑀸 𑀫𑀬𑀫𑁆𑀧𑀺 𑀇𑀫𑀁 𑀥𑀫𑁆𑀫𑀲𑀫𑀽𑀳𑀁 𑀆𑀕𑀢𑀸. 𑀓𑀺𑀁 𑀓𑀸𑀭𑀡𑀸? 𑀤𑀓𑁆𑀔𑀺𑀢𑀸𑀬𑁂 𑀅𑀧𑀭𑀸𑀚𑀺𑀢𑀲𑀗𑁆𑀖𑀦𑁆𑀢𑀺 𑀓𑁂𑀦𑀘𑀺 𑀅𑀧𑀭𑀸𑀚𑀺𑀢𑀁 𑀅𑀚𑁆𑀚𑁂𑀯 𑀢𑀬𑁄 𑀫𑀸𑀭𑁂 𑀫𑀤𑁆𑀤𑀺𑀢𑁆𑀯𑀸 𑀯𑀺𑀚𑀺𑀢𑀲𑀗𑁆𑀕𑀸𑀫𑀁 𑀇𑀫𑀁 𑀅𑀧𑀭𑀸𑀚𑀺𑀢𑀲𑀗𑁆𑀖𑀁 𑀤𑀲𑁆𑀲𑀦𑀢𑁆𑀣𑀸𑀬 𑀆𑀕𑀢𑀫𑁆𑀳𑀸𑀢𑀺 𑀅𑀢𑁆𑀣𑁄. 𑀲𑁄 𑀧𑀦, 𑀩𑁆𑀭𑀳𑁆𑀫𑀸, 𑀇𑀫𑀁 𑀕𑀸𑀣𑀁 𑀪𑀸𑀲𑀺𑀢𑁆𑀯𑀸, 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸, 𑀧𑀼𑀭𑀢𑁆𑀣𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁𑀬𑁂𑀯 𑀅𑀝𑁆𑀞𑀸𑀲𑀺.

𑀅𑀣 𑀤𑀼𑀢𑀺𑀬𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑀅𑀪𑀸𑀲𑀺. 𑀢𑀢𑁆𑀣 𑀢𑀢𑁆𑀭 𑀪𑀺𑀓𑁆𑀔𑀯𑁄𑀢𑀺 𑀢𑀲𑁆𑀫𑀺𑀁 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑁂 𑀪𑀺𑀓𑁆𑀔𑀽. 𑀲𑀫𑀸𑀤𑀳𑀁𑀲𑀽𑀢𑀺 𑀲𑀫𑀸𑀥𑀺𑀦𑀸 𑀬𑁄𑀚𑁂𑀲𑀼𑀁. 𑀘𑀺𑀢𑁆𑀢𑀫𑀢𑁆𑀢𑀦𑁄 𑀉𑀚𑀼𑀓𑀁 𑀅𑀓𑀁𑀲𑀽𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂 𑀲𑀩𑁆𑀩𑁂 𑀯𑀗𑁆𑀓𑀓𑀼𑀝𑀺𑀮𑀚𑀺𑀫𑁆𑀳𑀪𑀸𑀯𑁂 𑀳𑀭𑀺𑀢𑁆𑀯𑀸 𑀉𑀚𑀼𑀓𑀁 𑀅𑀓𑀭𑀺𑀁𑀲𑀼. 𑀲𑀸𑀭𑀣𑀻𑀯 𑀦𑁂𑀢𑁆𑀢𑀸𑀦𑀺 𑀕𑀳𑁂𑀢𑁆𑀯𑀸𑀢𑀺 𑀬𑀣𑀸 𑀲𑀫𑀧𑁆𑀧𑀯𑀢𑁆𑀢𑁂𑀲𑀼 𑀲𑀺𑀦𑁆𑀥𑀯𑁂𑀲𑀼 𑀑𑀥𑀲𑁆𑀢𑀧𑀢𑁄𑀤𑁄 𑀲𑀸𑀭𑀣𑀻 𑀲𑀩𑁆𑀩𑀬𑁄𑀢𑁆𑀢𑀸𑀦𑀺 𑀕𑀳𑁂𑀢𑁆𑀯𑀸 𑀅𑀘𑁄𑀤𑁂𑀦𑁆𑀢𑁄 𑀅𑀯𑀸𑀭𑁂𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀏𑀯𑀁 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀬 𑀲𑀫𑀦𑁆𑀦𑀸𑀕𑀢𑀸 𑀕𑀼𑀢𑁆𑀢𑀤𑁆𑀯𑀸𑀭𑀸 𑀲𑀩𑁆𑀩𑁂𑀧𑁂𑀢𑁂 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀇𑀦𑁆𑀤𑁆𑀭𑀺𑀬𑀸𑀦𑀺 𑀭𑀓𑁆𑀔𑀦𑁆𑀢𑀺 𑀧𑀡𑁆𑀟𑀺𑀢𑀸, 𑀏𑀢𑁂 𑀤𑀝𑁆𑀞𑀼𑀁 𑀇𑀥𑀸𑀕𑀢𑀫𑁆𑀳𑀸 𑀪𑀕𑀯𑀸𑀢𑀺, 𑀲𑁄𑀧𑀺 𑀕𑀦𑁆𑀢𑁆𑀯𑀸 𑀬𑀣𑀸𑀞𑀸𑀦𑁂𑀬𑁂𑀯 𑀅𑀝𑁆𑀞𑀸𑀲𑀺.

𑀅𑀣 𑀢𑀢𑀺𑀬𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑀅𑀪𑀸𑀲𑀺. 𑀢𑀢𑁆𑀣 𑀙𑁂𑀢𑁆𑀯𑀸 𑀔𑀻𑀮𑀦𑁆𑀢𑀺 𑀭𑀸𑀕𑀤𑁄𑀲𑀫𑁄𑀳𑀔𑀻𑀮𑀁 𑀙𑀺𑀦𑁆𑀤𑀺𑀢𑁆𑀯𑀸. 𑀧𑀮𑀺𑀖𑀦𑁆𑀢𑀺 𑀭𑀸𑀕𑀤𑁄𑀲𑀫𑁄𑀳𑀧𑀮𑀺𑀖𑀫𑁂𑀯. 𑀇𑀦𑁆𑀤𑀔𑀻𑀮𑀦𑁆𑀢𑀺 𑀭𑀸𑀕𑀤𑁄𑀲𑀫𑁄𑀳𑀇𑀦𑁆𑀤𑀔𑀻𑀮𑀫𑁂𑀯. 𑀊𑀳𑀘𑁆𑀘 𑀫𑀦𑁂𑀚𑀸𑀢𑀺 𑀏𑀢𑁂 𑀢𑀡𑁆𑀳𑀸𑀏𑀚𑀸𑀬 𑀅𑀦𑁂𑀚𑀸 𑀪𑀺𑀓𑁆𑀔𑀽 𑀇𑀦𑁆𑀤𑀔𑀻𑀮𑀁 𑀊𑀳𑀘𑁆𑀘 𑀲𑀫𑀽𑀳𑀦𑀺𑀢𑁆𑀯𑀸 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀅𑀧𑁆𑀧𑀝𑀺𑀳𑀢𑀘𑀸𑀭𑀺𑀓𑀁 𑀘𑀭𑀦𑁆𑀢𑀺. 𑀲𑀼𑀤𑁆𑀥𑀸𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀸. 𑀯𑀺𑀫𑀮𑀸𑀢𑀺 𑀦𑀺𑀫𑁆𑀫𑀮𑀸. 𑀇𑀤𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀘𑀓𑁆𑀔𑀼𑀫𑀢𑀸𑀢𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀦𑁆𑀢𑁂𑀦. 𑀲𑀼𑀤𑀦𑁆𑀢𑀸𑀢𑀺 𑀘𑀓𑁆𑀔𑀼𑀢𑁄𑀧𑀺 𑀤𑀦𑁆𑀢𑀸 𑀲𑁄𑀢𑀢𑁄𑀧𑀺 𑀖𑀸𑀦𑀢𑁄𑀧𑀺 𑀚𑀺𑀯𑁆𑀳𑀸𑀢𑁄𑀧𑀺 𑀓𑀸𑀬𑀢𑁄𑀧𑀺 𑀫𑀦𑀢𑁄𑀧𑀺 𑀤𑀦𑁆𑀢𑀸. 𑀲𑀼𑀲𑀼𑀦𑀸𑀕𑀸𑀢𑀺 𑀢𑀭𑀼𑀡𑀦𑀸𑀕𑀸. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀙𑀦𑁆𑀤𑀸𑀤𑀻𑀳𑀺 𑀦 𑀕𑀘𑁆𑀙𑀦𑁆𑀢𑀻𑀢𑀺 𑀦𑀸𑀕𑀸, 𑀢𑁂𑀦 𑀢𑁂𑀦 𑀫𑀕𑁆𑀕𑁂𑀦 𑀧𑀳𑀻𑀦𑁂 𑀓𑀺𑀮𑁂𑀲𑁂 𑀦 𑀆𑀕𑀘𑁆𑀙𑀦𑁆𑀢𑀻𑀢𑀺 𑀦𑀸𑀕𑀸, 𑀦𑀸𑀦𑀧𑁆𑀧𑀓𑀸𑀭𑀁 𑀆𑀕𑀼𑀁 𑀦 𑀓𑀭𑁄𑀦𑁆𑀢𑀻𑀢𑀺 𑀦𑀸𑀕𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀫𑀳𑀸𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁮𑁦) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀺𑀘 𑁋

‘‘𑀆𑀕𑀼𑀁 𑀦 𑀓𑀭𑁄𑀢𑀺 𑀓𑀺𑀜𑁆𑀘𑀺 𑀮𑁄𑀓𑁂,

𑀲𑀩𑁆𑀩𑀲𑀁𑀬𑁄𑀕 𑀯𑀺𑀲𑀚𑁆𑀚 𑀩𑀦𑁆𑀥𑀦𑀸𑀦𑀺;

𑀲𑀩𑁆𑀩𑀢𑁆𑀣 𑀦 𑀲𑀚𑁆𑀚𑀢𑀻 𑀯𑀺𑀫𑀼𑀢𑁆𑀢𑁄,

𑀦𑀸𑀕𑁄 𑀢𑀸𑀤𑀺 𑀧𑀯𑀼𑀘𑁆𑀘𑀢𑁂 𑀢𑀣𑀢𑁆𑀢𑀸’’𑀢𑀺. 𑁋

𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀼𑀲𑀼𑀦𑀸𑀕𑀸𑀢𑀺 𑀲𑀼𑀲𑀽 𑀦𑀸𑀕𑀸, 𑀲𑀼𑀲𑀼𑀦𑀸𑀕𑀪𑀸𑀯𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀢𑁂 𑀏𑀯𑀭𑀽𑀧𑁂 𑀅𑀦𑀼𑀢𑁆𑀢𑀭𑁂𑀦 𑀬𑁄𑀕𑁆𑀕𑀸𑀘𑀭𑀺𑀬𑁂𑀦 𑀤𑀫𑀺𑀢𑁂 𑀢𑀭𑀼𑀡𑀦𑀸𑀕𑁂 𑀤𑀲𑁆𑀲𑀦𑀸𑀬 𑀆𑀕𑀢𑀫𑁆𑀳 𑀪𑀕𑀯𑀸𑀢𑀺. 𑀲𑁄𑀧𑀺 𑀕𑀦𑁆𑀢𑁆𑀯𑀸 𑀬𑀣𑀸𑀞𑀸𑀦𑁂𑀬𑁂𑀯 𑀅𑀝𑁆𑀞𑀸𑀲𑀺.

𑀅𑀣 𑀘𑀢𑀼𑀢𑁆𑀣𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑀅𑀪𑀸𑀲𑀺. 𑀢𑀢𑁆𑀣 𑀕𑀢𑀸𑀲𑁂𑀢𑀺 𑀦𑀺𑀩𑁆𑀩𑁂𑀫𑀢𑀺𑀓𑀲𑀭𑀡𑀕𑀫𑀦𑁂𑀦 𑀕𑀢𑀸. 𑀲𑁄𑀧𑀺 𑀕𑀦𑁆𑀢𑁆𑀯𑀸 𑀬𑀣𑀸𑀞𑀸𑀦𑁂𑀬𑁂𑀯 𑀅𑀝𑁆𑀞𑀸𑀲𑀻𑀢𑀺. 𑀲𑀢𑁆𑀢𑀫𑀁.

𑁮. 𑀲𑀓𑀮𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮. 𑀅𑀝𑁆𑀞𑀫𑁂 𑀫𑀤𑁆𑀤𑀓𑀼𑀘𑁆𑀙𑀺𑀲𑁆𑀫𑀺𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀉𑀬𑁆𑀬𑀸𑀦𑁂. 𑀢𑀜𑁆𑀳𑀺 𑀅𑀚𑀸𑀢𑀲𑀢𑁆𑀢𑀼𑀫𑁆𑀳𑀺 𑀓𑀼𑀘𑁆𑀙𑀺𑀕𑀢𑁂 𑀢𑀲𑁆𑀲 𑀫𑀸𑀢𑀭𑀸 𑁋 ‘‘𑀅𑀬𑀁 𑀫𑀬𑁆𑀳𑀁 𑀓𑀼𑀘𑁆𑀙𑀺𑀕𑀢𑁄 𑀕𑀩𑁆𑀪𑁄 𑀭𑀜𑁆𑀜𑁄 𑀲𑀢𑁆𑀢𑀼 𑀪𑀯𑀺𑀲𑁆𑀲𑀢𑀺. 𑀓𑀺𑀁 𑀫𑁂 𑀇𑀫𑀺𑀦𑀸’’𑀢𑀺? 𑀕𑀩𑁆𑀪𑀧𑀸𑀢𑀦𑀢𑁆𑀣𑀁 𑀓𑀼𑀘𑁆𑀙𑀺 𑀫𑀤𑁆𑀤𑀸𑀧𑀺𑀢𑀸. 𑀢𑀲𑁆𑀫𑀸 ‘‘𑀫𑀤𑁆𑀤𑀓𑀼𑀘𑁆𑀙𑀻’’𑀢𑀺 𑀲𑀗𑁆𑀔𑀁 𑀕𑀢𑀁. 𑀫𑀺𑀕𑀸𑀦𑀁 𑀧𑀦 𑀅𑀪𑀬𑀯𑀸𑀲𑀢𑁆𑀣𑀸𑀬 𑀤𑀺𑀦𑁆𑀦𑀢𑁆𑀢𑀸 𑀫𑀺𑀕𑀤𑀸𑀬𑁄𑀢𑀺 𑀯𑀼𑀘𑁆𑀘𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦𑀸𑀢𑀺 𑀏𑀢𑁆𑀣 𑀅𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀤𑁂𑀯𑀤𑀢𑁆𑀢𑁄 𑀳𑀺 𑀅𑀚𑀸𑀢𑀲𑀢𑁆𑀢𑀼𑀁 𑀦𑀺𑀲𑁆𑀲𑀸𑀬 𑀥𑀦𑀼𑀕𑁆𑀕𑀳𑁂 𑀘 𑀥𑀦𑀧𑀸𑀮𑀓𑀜𑁆𑀘 𑀧𑀬𑁄𑀚𑁂𑀢𑁆𑀯𑀸𑀧𑀺 𑀢𑀣𑀸𑀕𑀢𑀲𑁆𑀲 𑀚𑀻𑀯𑀺𑀢𑀦𑁆𑀢𑀭𑀸𑀬𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀲𑀳𑀢𑁆𑀣𑁂𑀦𑁂𑀯 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀕𑀺𑀚𑁆𑀛𑀓𑀽𑀝𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀫𑀳𑀦𑁆𑀢𑀁 𑀓𑀽𑀝𑀸𑀕𑀸𑀭𑀧𑁆𑀧𑀫𑀸𑀡𑀁 𑀲𑀺𑀮𑀁 𑀉𑀓𑁆𑀔𑀺𑀧𑀺𑀢𑁆𑀯𑀸, ‘‘𑀲𑀫𑀡𑁄 𑀕𑁄𑀢𑀫𑁄 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑁄 𑀳𑁄𑀢𑀽’’𑀢𑀺 𑀧𑀯𑀺𑀚𑁆𑀛𑀺. 𑀫𑀳𑀸𑀣𑀸𑀫𑀯𑀸 𑀓𑀺𑀭𑁂𑀲 𑀧𑀜𑁆𑀘𑀦𑁆𑀦𑀁 𑀳𑀢𑁆𑀣𑀻𑀦𑀁 𑀩𑀮𑀁 𑀥𑀸𑀭𑁂𑀢𑀺. 𑀅𑀝𑁆𑀞𑀸𑀦𑀁 𑀔𑁄 𑀧𑀦𑁂𑀢𑀁, 𑀬𑀁 𑀩𑀼𑀤𑁆𑀥𑀸𑀦𑀁 𑀧𑀭𑀽𑀧𑀓𑁆𑀓𑀫𑁂𑀦 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀪𑀯𑁂𑀬𑁆𑀬𑀸𑀢𑀺 𑀢𑀁 𑀢𑀣𑀸𑀕𑀢𑀲𑁆𑀲 𑀲𑀭𑀻𑀭𑀸𑀪𑀺𑀫𑀼𑀔𑀁 𑀆𑀕𑀘𑁆𑀙𑀦𑁆𑀢𑀁 𑀆𑀓𑀸𑀲𑁂 𑀅𑀜𑁆𑀜𑀸 𑀲𑀺𑀮𑀸 𑀉𑀝𑁆𑀞𑀳𑀺𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀺. 𑀤𑁆𑀯𑀺𑀦𑁆𑀦𑀁 𑀲𑀺𑀮𑀸𑀦𑀁 𑀲𑀫𑁆𑀧𑀳𑀸𑀭𑁂𑀦 𑀫𑀳𑀦𑁆𑀢𑁄 𑀧𑀸𑀲𑀸𑀡𑀲𑁆𑀲 𑀲𑀓𑀮𑀺𑀓𑀸 𑀉𑀝𑁆𑀞𑀳𑀺𑀢𑁆𑀯𑀸 𑀪𑀕𑀯𑀢𑁄 𑀧𑀺𑀝𑁆𑀞𑀺𑀧𑀸𑀤𑀧𑀭𑀺𑀬𑀦𑁆𑀢𑀁 𑀅𑀪𑀺𑀳𑀦𑀺, 𑀧𑀸𑀤𑁄 𑀫𑀳𑀸𑀨𑀭𑀲𑀼𑀦𑀸 𑀧𑀳𑀢𑁄 𑀯𑀺𑀬 𑀲𑀫𑀼𑀕𑁆𑀕𑀢𑀮𑁄𑀳𑀺𑀢𑁂𑀦 𑀮𑀸𑀔𑀸𑀭𑀲𑀫𑀓𑁆𑀔𑀺𑀢𑁄 𑀯𑀺𑀬 𑀅𑀳𑁄𑀲𑀺. 𑀪𑀕𑀯𑀸 𑀉𑀤𑁆𑀥𑀁 𑀉𑀮𑁆𑀮𑁄𑀓𑁂𑀢𑁆𑀯𑀸 𑀤𑁂𑀯𑀤𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀩𑀳𑀼 𑀢𑀬𑀸 𑀫𑁄𑀖𑀧𑀼𑀭𑀺𑀲, 𑀅𑀧𑀼𑀜𑁆𑀜𑀁 𑀧𑀲𑀼𑀢𑀁, 𑀬𑁄 𑀢𑁆𑀯𑀁 𑀧𑀤𑀼𑀝𑁆𑀞𑀘𑀺𑀢𑁆𑀢𑁄 𑀯𑀥𑀓𑀘𑀺𑀢𑁆𑀢𑁄 𑀢𑀣𑀸𑀕𑀢𑀲𑁆𑀲 𑀮𑁄𑀳𑀺𑀢𑀁 𑀉𑀧𑁆𑀧𑀸𑀤𑁂𑀲𑀻’’𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀪𑀕𑀯𑀢𑁄 𑀅𑀨𑀸𑀲𑀼 𑀚𑀸𑀢𑀁. 𑀪𑀺𑀓𑁆𑀔𑀽 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀅𑀬𑀁 𑀯𑀺𑀳𑀸𑀭𑁄 𑀉𑀚𑁆𑀚𑀗𑁆𑀕𑀮𑁄 𑀯𑀺𑀲𑀫𑁄, 𑀩𑀳𑀽𑀦𑀁 𑀔𑀢𑁆𑀢𑀺𑀬𑀸𑀤𑀻𑀦𑀜𑁆𑀘𑁂𑀯 𑀧𑀩𑁆𑀩𑀚𑀺𑀢𑀸𑀦𑀜𑁆𑀘 𑀅𑀦𑁄𑀓𑀸𑀲𑁄’’𑀢𑀺. 𑀢𑁂 𑀢𑀣𑀸𑀕𑀢𑀁 𑀫𑀜𑁆𑀘𑀲𑀺𑀯𑀺𑀓𑀸𑀬 𑀆𑀤𑀸𑀬 𑀫𑀤𑁆𑀤𑀓𑀼𑀘𑁆𑀙𑀺𑀁 𑀦𑀬𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀢𑁄 𑀧𑀸𑀤𑁄 𑀲𑀓𑀮𑀺𑀓𑀸𑀬 𑀔𑀢𑁄 𑀳𑁄𑀢𑀻’’𑀢𑀺.

𑀪𑀼𑀲𑀸𑀢𑀺 𑀩𑀮𑀯𑀢𑀺𑀬𑁄. 𑀲𑀼𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀤𑀼𑀓𑁆𑀔𑀦𑁆𑀢𑀺 𑀲𑀼𑀔𑀧𑀝𑀺𑀓𑁆𑀔𑁂𑀧𑁄. 𑀢𑀺𑀩𑁆𑀩𑀸𑀢𑀺 𑀩𑀳𑀮𑀸. 𑀔𑀭𑀸𑀢𑀺 𑀨𑀭𑀼𑀲𑀸. 𑀓𑀝𑀼𑀓𑀸𑀢𑀺 𑀢𑀺𑀔𑀺𑀡𑀸. 𑀅𑀲𑀸𑀢𑀸𑀢𑀺 𑀅𑀫𑀥𑀼𑀭𑀸. 𑀦 𑀢𑀸𑀲𑀼 𑀫𑀦𑁄 𑀅𑀧𑁆𑀧𑁂𑀢𑀺, 𑀦 𑀢𑀸 𑀫𑀦𑀁 𑀅𑀧𑁆𑀧𑀸𑀬𑀦𑁆𑀢𑀺 𑀯𑀟𑁆𑀠𑁂𑀦𑁆𑀢𑀻𑀢𑀺 𑀅𑀫𑀦𑀸𑀧𑀸. 𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺 𑀯𑁂𑀤𑀦𑀸𑀥𑀺𑀯𑀸𑀲𑀦𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸. 𑀅𑀯𑀺𑀳𑀜𑁆𑀜𑀫𑀸𑀦𑁄𑀢𑀺 𑀅𑀧𑀻𑀴𑀺𑀬𑀫𑀸𑀦𑁄, 𑀲𑀫𑁆𑀧𑀭𑀺𑀯𑀢𑁆𑀢𑀲𑀸𑀬𑀺𑀢𑀸𑀬 𑀯𑁂𑀤𑀦𑀸𑀦𑀁 𑀯𑀲𑀁 𑀅𑀕𑀘𑁆𑀙𑀦𑁆𑀢𑁄.

𑀲𑀻𑀳𑀲𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀓𑀸𑀫𑀪𑁄𑀕𑀺𑀲𑁂𑀬𑁆𑀬𑀸, 𑀧𑁂𑀢𑀲𑁂𑀬𑁆𑀬𑀸, 𑀲𑀻𑀳𑀲𑁂𑀬𑁆𑀬𑀸, 𑀢𑀣𑀸𑀕𑀢𑀲𑁂𑀬𑁆𑀬𑀸𑀢𑀺 𑀘𑀢𑀲𑁆𑀲𑁄 𑀲𑁂𑀬𑁆𑀬𑀸. 𑀢𑀢𑁆𑀣 ‘‘𑀬𑁂𑀪𑀼𑀬𑁆𑀬𑁂𑀦, 𑀪𑀺𑀓𑁆𑀔𑀯𑁂, 𑀓𑀸𑀫𑀪𑁄𑀕𑀻 𑀲𑀢𑁆𑀢𑀸 𑀯𑀸𑀫𑁂𑀦 𑀧𑀲𑁆𑀲𑁂𑀦 𑀲𑁂𑀦𑁆𑀢𑀻’’𑀢𑀺 𑀅𑀬𑀁 𑀓𑀸𑀫𑀪𑁄𑀕𑀺𑀲𑁂𑀬𑁆𑀬𑀸. 𑀢𑁂𑀲𑀼 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀤𑀓𑁆𑀔𑀺𑀡𑀧𑀲𑁆𑀲𑁂𑀦 𑀲𑀬𑀸𑀦𑁄 𑀦𑀸𑀫 𑀦𑀢𑁆𑀣𑀺. ‘‘𑀬𑁂𑀪𑀼𑀬𑁆𑀬𑁂𑀦, 𑀪𑀺𑀓𑁆𑀔𑀯𑁂, 𑀧𑁂𑀢𑀸 𑀉𑀢𑁆𑀢𑀸𑀦𑀸 𑀲𑁂𑀦𑁆𑀢𑀻’’𑀢𑀺 𑀅𑀬𑀁 𑀧𑁂𑀢𑀲𑁂𑀬𑁆𑀬𑀸. 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑀢𑁆𑀢𑀸 𑀳𑀺 𑀅𑀝𑁆𑀞𑀺𑀲𑀗𑁆𑀖𑀸𑀝𑀚𑀝𑀺𑀢𑀸 𑀏𑀓𑁂𑀦 𑀧𑀲𑁆𑀲𑁂𑀦 𑀲𑀬𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀉𑀢𑁆𑀢𑀸𑀦𑀸𑀯 𑀲𑁂𑀦𑁆𑀢𑀺. ‘‘𑀬𑁂𑀪𑀼𑀬𑁆𑀬𑁂𑀦, 𑀪𑀺𑀓𑁆𑀔𑀯𑁂, 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀦𑀗𑁆𑀕𑀼𑀝𑁆𑀞𑀁 𑀅𑀦𑁆𑀢𑀭𑀲𑀢𑁆𑀣𑀺𑀫𑁆𑀳𑀺 𑀅𑀦𑀼𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑁂𑀢𑀻’’𑀢𑀺 𑀅𑀬𑀁 𑀲𑀻𑀳𑀲𑁂𑀬𑁆𑀬𑀸. 𑀢𑁂𑀚𑀼𑀲𑁆𑀲𑀤𑀢𑁆𑀢𑀸 𑀳𑀺 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀤𑁆𑀯𑁂 𑀧𑀼𑀭𑀺𑀫𑀧𑀸𑀤𑁂 𑀏𑀓𑀲𑁆𑀫𑀺𑀁, ‘𑀧𑀘𑁆𑀙𑀺𑀫𑀧𑀸𑀤𑁂 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀦𑀗𑁆𑀕𑀼𑀝𑁆𑀞𑀁 𑀅𑀦𑁆𑀢𑀭𑀲𑀢𑁆𑀣𑀺𑀫𑁆𑀳𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀭𑀺𑀫𑀧𑀸𑀤𑀧𑀘𑁆𑀙𑀺𑀫𑀧𑀸𑀤𑀦𑀗𑁆𑀕𑀼𑀝𑁆𑀞𑀸𑀦𑀁 𑀞𑀺𑀢𑁄𑀓𑀸𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀧𑀼𑀭𑀺𑀫𑀧𑀸𑀤𑀸𑀦𑀁 𑀫𑀢𑁆𑀣𑀓𑁂 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀲𑀬𑀢𑀺, 𑀤𑀺𑀯𑀲𑀫𑁆𑀧𑀺 𑀲𑀬𑀺𑀢𑁆𑀯𑀸 𑀧𑀩𑀼𑀚𑁆𑀛𑀫𑀸𑀦𑁄 𑀦 𑀉𑀢𑁆𑀭𑀲𑀦𑁆𑀢𑁄 𑀧𑀩𑀼𑀚𑁆𑀛𑀢𑀺, 𑀲𑀻𑀲𑀁 𑀧𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀭𑀺𑀫𑀧𑀸𑀤𑀸𑀤𑀻𑀦𑀁 𑀞𑀺𑀢𑁄𑀓𑀸𑀲𑀁 𑀲𑀮𑁆𑀮𑀓𑁆𑀔𑁂𑀢𑀺’. 𑀲𑀘𑁂 𑀓𑀺𑀜𑁆𑀘𑀺 𑀞𑀸𑀦𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑀁 𑀳𑁄𑀢𑀺, ‘‘𑀦𑀬𑀺𑀤𑀁 𑀢𑀼𑀬𑁆𑀳𑀁 𑀚𑀸𑀢𑀺𑀬𑀸, 𑀦 𑀲𑀽𑀭𑀪𑀸𑀯𑀲𑁆𑀲 𑀅𑀦𑀼𑀭𑀽𑀧’’𑀦𑁆𑀢𑀺 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 𑀢𑀢𑁆𑀣𑁂𑀯 𑀲𑀬𑀢𑀺, 𑀦 𑀕𑁄𑀘𑀭𑀸𑀬 𑀧𑀓𑁆𑀓𑀫𑀢𑀺. 𑀅𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁂 𑀧𑀦 ‘‘𑀢𑀼𑀬𑁆𑀳𑀁 𑀚𑀸𑀢𑀺𑀬𑀸 𑀘 𑀲𑀽𑀭𑀪𑀸𑀯𑀲𑁆𑀲 𑀘 𑀅𑀦𑀼𑀭𑀽𑀧𑀫𑀺𑀤’’𑀦𑁆𑀢𑀺 𑀳𑀝𑁆𑀞𑀢𑀼𑀝𑁆𑀞𑁄 𑀉𑀝𑁆𑀞𑀸𑀬 𑀲𑀻𑀳𑀯𑀺𑀚𑀫𑁆𑀪𑀺𑀢𑀁 𑀯𑀺𑀚𑀫𑁆𑀪𑀺𑀢𑁆𑀯𑀸 𑀓𑁂𑀲𑀭𑀪𑀸𑀭𑀁 𑀯𑀺𑀥𑀼𑀦𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀕𑁄𑀘𑀭𑀸𑀬 𑀧𑀓𑁆𑀓𑀫𑀢𑀺. 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁂𑀬𑁆𑀬𑀸 𑀧𑀦 ‘‘𑀢𑀣𑀸𑀕𑀢𑀲𑁂𑀬𑁆𑀬𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑀸𑀲𑀼 𑀇𑀥 𑀲𑀻𑀳𑀲𑁂𑀬𑁆𑀬𑀸 𑀆𑀕𑀢𑀸. 𑀅𑀬𑀜𑁆𑀳𑀺 𑀢𑁂𑀚𑀼𑀲𑁆𑀲𑀤𑀇𑀭𑀺𑀬𑀸𑀧𑀣𑀢𑁆𑀢𑀸 𑀉𑀢𑁆𑀢𑀫𑀲𑁂𑀬𑁆𑀬𑀸 𑀦𑀸𑀫.

𑀧𑀸𑀤𑁂 𑀧𑀸𑀤𑀦𑁆𑀢𑀺 𑀤𑀓𑁆𑀔𑀺𑀡𑀧𑀸𑀤𑁂 𑀯𑀸𑀫𑀧𑀸𑀤𑀁. 𑀅𑀘𑁆𑀘𑀸𑀥𑀸𑀬𑀸𑀢𑀺 𑀅𑀢𑀺𑀆𑀥𑀸𑀬, 𑀈𑀲𑀓𑀁 𑀅𑀢𑀺𑀓𑁆𑀓𑀫𑁆𑀫 𑀞𑀧𑁂𑀢𑁆𑀯𑀸. 𑀕𑁄𑀧𑁆𑀨𑀓𑁂𑀦 𑀳𑀺 𑀕𑁄𑀧𑁆𑀨𑀓𑁂 𑀚𑀸𑀡𑀼𑀦𑀸 𑀯𑀸 𑀚𑀸𑀡𑀼𑀫𑁆𑀳𑀺 𑀲𑀗𑁆𑀖𑀝𑁆𑀝𑀺𑀬𑀫𑀸𑀦𑁂 𑀅𑀪𑀺𑀡𑁆𑀳𑀁 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀦 𑀳𑁄𑀢𑀺, 𑀲𑁂𑀬𑁆𑀬𑀸 𑀅𑀨𑀸𑀲𑀼𑀓𑀸 𑀳𑁄𑀢𑀺. 𑀬𑀣𑀸 𑀦 𑀲𑀗𑁆𑀖𑀝𑁆𑀝𑁂𑀢𑀺, 𑀏𑀯𑀁 𑀅𑀢𑀺𑀓𑁆𑀓𑀫𑁆𑀫 𑀞𑀧𑀺𑀢𑁂 𑀯𑁂𑀤𑀦𑀸 𑀦𑀼𑀧𑁆𑀧𑀚𑁆𑀚𑀢𑀺, 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺, 𑀲𑁂𑀬𑁆𑀬𑀸 𑀨𑀸𑀲𑀼 𑀳𑁄𑀢𑀺. 𑀢𑀲𑁆𑀫𑀸 𑀏𑀯𑀁 𑀦𑀺𑀧𑀚𑁆𑀚𑀺. 𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺 𑀲𑀬𑀦𑀧𑀭𑀺𑀕𑁆𑀕𑀸𑀳𑀓𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄. ‘‘𑀉𑀝𑁆𑀞𑀸𑀦𑀲𑀜𑁆𑀜’’𑀦𑁆𑀢𑀺 𑀧𑀦𑁂𑀢𑁆𑀣 𑀦 𑀯𑀼𑀢𑁆𑀢𑀁, 𑀕𑀺𑀮𑀸𑀦𑀲𑁂𑀬𑁆𑀬𑀸 𑀳𑁂𑀲𑀸 𑀢𑀣𑀸𑀕𑀢𑀲𑁆𑀲.

𑀲𑀢𑁆𑀢𑀲𑀢𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀩𑁆𑀩𑀸𑀧𑀺 𑀢𑀸 𑀤𑁂𑀯𑀢𑀸 𑀕𑀺𑀮𑀸𑀦𑀲𑁂𑀬𑁆𑀬𑀝𑁆𑀞𑀸𑀦𑀁 𑀆𑀕𑀢𑀸. 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀕𑀺𑀮𑀸𑀦𑀲𑁂𑀬𑁆𑀬𑀁 𑀆𑀕𑀢𑀸𑀦𑀁 𑀤𑁄𑀫𑀦𑀲𑁆𑀲𑁂𑀦 𑀪𑀯𑀺𑀢𑀩𑁆𑀩𑀁 𑀲𑀺𑀬𑀸. 𑀇𑀫𑀸𑀲𑀁 𑀧𑀦 𑀢𑀣𑀸𑀕𑀢𑀲𑁆𑀲 𑀯𑁂𑀤𑀦𑀸𑀥𑀺𑀯𑀸𑀲𑀦𑀁 𑀤𑀺𑀲𑁆𑀯𑀸, ‘‘𑀅𑀳𑁄 𑀩𑀼𑀤𑁆𑀥𑀸𑀦𑀁 𑀫𑀳𑀸𑀦𑀼𑀪𑀸𑀯𑀢𑀸! 𑀏𑀯𑀭𑀽𑀧𑀸𑀲𑀼 𑀦𑀸𑀫 𑀯𑁂𑀤𑀦𑀸𑀲𑀼 𑀯𑀢𑁆𑀢𑀫𑀸𑀦𑀸𑀲𑀼 𑀯𑀺𑀓𑀸𑀭𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, 𑀲𑀺𑀭𑀻𑀲𑀬𑀦𑁂 𑀅𑀮𑀗𑁆𑀓𑀭𑀺𑀢𑁆𑀯𑀸 𑀞𑀧𑀺𑀢𑀲𑀼𑀯𑀡𑁆𑀡𑀭𑀽𑀧𑀓𑀁 𑀯𑀺𑀬 𑀅𑀦𑀺𑀜𑁆𑀚𑀫𑀸𑀦𑁂𑀦 𑀓𑀸𑀬𑁂𑀦 𑀦𑀺𑀧𑀦𑁆𑀦𑁄, 𑀇𑀤𑀸𑀦𑀺𑀲𑁆𑀲 𑀅𑀥𑀺𑀓𑀢𑀭𑀁 𑀫𑀼𑀔𑀯𑀡𑁆𑀡𑁄 𑀯𑀺𑀭𑁄𑀘𑀢𑀺, 𑀆𑀪𑀸𑀲𑀫𑁆𑀧𑀦𑁆𑀦𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀲𑀫𑁆𑀧𑀢𑀺 𑀯𑀺𑀓𑀲𑀺𑀢𑀁 𑀯𑀺𑀬 𑀘 𑀅𑀭𑀯𑀺𑀦𑁆𑀤𑀁 𑀅𑀲𑁆𑀲 𑀫𑀼𑀔𑀁 𑀲𑁄𑀪𑀢𑀺, 𑀓𑀸𑀬𑁂𑀧𑀺 𑀯𑀡𑁆𑀡𑀸𑀬𑀢𑀦𑀁 𑀇𑀤𑀸𑀦𑀺 𑀲𑀼𑀲𑀫𑁆𑀫𑀝𑁆𑀞𑀓𑀜𑁆𑀘𑀦𑀁 𑀯𑀺𑀬 𑀯𑀺𑀧𑁆𑀧𑀲𑀻𑀤𑀢𑀻’’𑀢𑀺 𑀉𑀤𑀸𑀦𑀁 𑀉𑀤𑀧𑀸𑀤𑀺.

𑀦𑀸𑀕𑁄 𑀯𑀢 𑀪𑁄𑀢𑀺, 𑀏𑀢𑁆𑀣 𑀪𑁄𑀢𑀺 𑀥𑀫𑁆𑀫𑀸𑀮𑀧𑀦𑀁. 𑀩𑀮𑀯𑀦𑁆𑀢𑀝𑁆𑀞𑁂𑀦 𑀦𑀸𑀕𑁄. 𑀦𑀸𑀕𑀯𑀢𑀸𑀢𑀺 𑀦𑀸𑀕𑀪𑀸𑀯𑁂𑀦. 𑀲𑀻𑀳𑁄 𑀯𑀢𑀸𑀢𑀺𑀆𑀤𑀻𑀲𑀼 𑀅𑀲𑀦𑁆𑀢𑀸𑀲𑀦𑀝𑁆𑀞𑁂𑀦 𑀲𑀻𑀳𑁄. 𑀩𑁆𑀬𑀢𑁆𑀢𑀧𑀭𑀺𑀘𑀬𑀝𑁆𑀞𑁂𑀦 𑀓𑀸𑀭𑀡𑀸𑀓𑀸𑀭𑀡𑀚𑀸𑀦𑀦𑁂𑀦 𑀯𑀸 𑀆𑀚𑀸𑀦𑀻𑀬𑁄. 𑀅𑀧𑁆𑀧𑀝𑀺𑀲𑀫𑀝𑁆𑀞𑁂𑀦 𑀦𑀺𑀲𑀪𑁄. 𑀕𑀯𑀲𑀢𑀚𑁂𑀝𑁆𑀞𑀓𑁄 𑀳𑀺 𑀉𑀲𑀪𑁄, 𑀕𑀯𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀯𑀲𑀪𑁄, 𑀕𑀯𑀲𑀢𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀦𑀺𑀲𑀪𑁄𑀢𑀺 𑀯𑀼𑀘𑁆𑀘𑀢𑀺. 𑀪𑀕𑀯𑀸 𑀧𑀦 𑀅𑀧𑁆𑀧𑀝𑀺𑀲𑀫𑀝𑁆𑀞𑁂𑀦 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺. 𑀢𑁂𑀦𑁂𑀯𑀢𑁆𑀣𑁂𑀦 𑀇𑀥 ‘‘𑀦𑀺𑀲𑀪𑁄’’𑀢𑀺 𑀯𑀼𑀢𑁆𑀢𑁄. 𑀥𑀼𑀭𑀯𑀸𑀳𑀝𑁆𑀞𑁂𑀦 𑀥𑁄𑀭𑀬𑁆𑀳𑁄. 𑀦𑀺𑀩𑁆𑀩𑀺𑀲𑁂𑀯𑀦𑀝𑁆𑀞𑁂𑀦 𑀤𑀦𑁆𑀢𑁄.

𑀧𑀲𑁆𑀲𑀸𑀢𑀺 𑀅𑀦𑀺𑀬𑀫𑀺𑀢𑀸𑀡𑀢𑁆𑀢𑀺. 𑀲𑀫𑀸𑀥𑀺𑀦𑁆𑀢𑀺 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺𑀁. 𑀲𑀼𑀯𑀺𑀫𑀼𑀢𑁆𑀢𑀦𑁆𑀢𑀺 𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀲𑀼𑀯𑀺𑀫𑀼𑀢𑁆𑀢𑀁. 𑀭𑀸𑀕𑀸𑀦𑀼𑀕𑀢𑀁 𑀧𑀦 𑀘𑀺𑀢𑁆𑀢𑀁 𑀅𑀪𑀺𑀦𑀢𑀁 𑀦𑀸𑀫 𑀳𑁄𑀢𑀺, 𑀤𑁄𑀲𑀸𑀦𑀼𑀕𑀢𑀁 𑀅𑀧𑀦𑀢𑀁. 𑀢𑀤𑀼𑀪𑀬𑀧𑀝𑀺𑀓𑁆𑀔𑁂𑀧𑁂𑀦 𑀦 𑀘𑀸𑀪𑀺𑀦𑀢𑀁 𑀦 𑀘𑀸𑀧𑀦𑀢𑀦𑁆𑀢𑀺 𑀆𑀳. 𑀦 𑀘 𑀲𑀲𑀗𑁆𑀔𑀸𑀭𑀦𑀺𑀕𑁆𑀕𑀬𑁆𑀳𑀯𑀸𑀭𑀺𑀢𑀕𑀢𑀦𑁆𑀢𑀺 𑀦 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀓𑀺𑀮𑁂𑀲𑁂 𑀦𑀺𑀕𑁆𑀕𑀳𑁂𑀢𑁆𑀯𑀸 𑀯𑀸𑀭𑀺𑀢𑀯𑀢𑀁, 𑀓𑀺𑀮𑁂𑀲𑀸𑀦𑀁 𑀧𑀦 𑀙𑀺𑀦𑁆𑀦𑀢𑁆𑀢𑀸 𑀯𑀢𑀁 𑀨𑀮𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀯𑀺𑀳𑁂𑀞𑁂𑀢𑀩𑁆𑀩𑀁 𑀖𑀝𑁆𑀝𑁂𑀢𑀩𑁆𑀩𑀁. 𑀅𑀤𑀲𑁆𑀲𑀦𑀸𑀢𑀺 𑀅𑀜𑁆𑀜𑀸𑀡𑀸. 𑀅𑀜𑁆𑀜𑀸𑀡𑀻 𑀳𑀺 𑀅𑀦𑁆𑀥𑀩𑀸𑀮𑁄𑀯 𑀏𑀯𑀭𑀽𑀧𑁂 𑀲𑀢𑁆𑀣𑀭𑀺 𑀅𑀧𑀭𑀚𑁆𑀛𑁂𑀬𑁆𑀬𑀸𑀢𑀺 𑀤𑁂𑀯𑀤𑀢𑁆𑀢𑀁 𑀖𑀝𑁆𑀝𑀬𑀫𑀸𑀦𑀸 𑀯𑀤𑀦𑁆𑀢𑀺.

𑀧𑀜𑁆𑀘𑀯𑁂𑀤𑀸𑀢𑀺 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁 𑀯𑁂𑀤𑀸𑀦𑀁 𑀥𑀸𑀭𑀓𑀸. 𑀲𑀢𑀁 𑀲𑀫𑀦𑁆𑀢𑀺 𑀯𑀲𑁆𑀲𑀲𑀢𑀁. 𑀢𑀧𑀲𑁆𑀲𑀻𑀢𑀺 𑀢𑀧𑀦𑀺𑀲𑁆𑀲𑀺𑀢𑀓𑀸 𑀳𑀼𑀢𑁆𑀯𑀸. 𑀘𑀭𑀦𑁆𑀢𑀺 𑀘𑀭𑀦𑁆𑀢𑀸. 𑀦 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀦𑁆𑀢𑀺 𑀲𑀘𑁂𑀧𑀺 𑀏𑀯𑀭𑀽𑀧𑀸 𑀩𑁆𑀭𑀸𑀳𑁆𑀫𑀡𑀸 𑀯𑀲𑁆𑀲𑀲𑀢𑀁 𑀘𑀭𑀦𑁆𑀢𑀺, 𑀘𑀺𑀢𑁆𑀢𑀜𑁆𑀘 𑀦𑁂𑀲𑀁 𑀲𑀫𑁆𑀫𑀸 𑀯𑀺𑀫𑀼𑀢𑁆𑀢𑀁 𑀦 𑀳𑁄𑀢𑀺. 𑀳𑀻𑀦𑀢𑁆𑀢𑀭𑀽𑀧𑀸 𑀦 𑀧𑀸𑀭𑀁 𑀕𑀫𑀸 𑀢𑁂𑀢𑀺 𑀳𑀻𑀦𑀢𑁆𑀢𑀲𑀪𑀸𑀯𑀸 𑀢𑁂 𑀦𑀺𑀩𑁆𑀩𑀸𑀦𑀗𑁆𑀕𑀫𑀸 𑀦 𑀳𑁄𑀦𑁆𑀢𑀺. ‘‘𑀳𑀻𑀦𑀢𑁆𑀣𑀭𑀽𑀧𑀸’’𑀢𑀺𑀧𑀺 𑀧𑀸𑀞𑁄, 𑀳𑀻𑀦𑀢𑁆𑀣𑀚𑀸𑀢𑀺𑀓𑀸 𑀧𑀭𑀺𑀳𑀻𑀦𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀢𑀡𑁆𑀳𑀸𑀥𑀺𑀧𑀦𑁆𑀦𑀸𑀢𑀺 𑀢𑀡𑁆𑀳𑀸𑀬 𑀅𑀚𑁆𑀛𑁄𑀢𑁆𑀣𑀝𑀸. 𑀯𑀢𑀲𑀻𑀮𑀩𑀤𑁆𑀥𑀸𑀢𑀺 𑀅𑀚𑀯𑀢𑀓𑀼𑀓𑁆𑀓𑀼𑀭𑀯𑀢𑀸𑀤𑀻𑀳𑀺 𑀘 𑀯𑀢𑁂𑀳𑀺 𑀢𑀸𑀤𑀺𑀲𑁂𑀳𑁂𑀯 𑀘 𑀲𑀻𑀮𑁂𑀳𑀺 𑀩𑀤𑁆𑀥𑀸. 𑀮𑀽𑀔𑀁 𑀢𑀧𑀦𑁆𑀢𑀺 𑀧𑀜𑁆𑀘𑀸𑀢𑀧𑀢𑀸𑀧𑀦𑀁 𑀓𑀡𑁆𑀝𑀓𑀲𑁂𑀬𑁆𑀬𑀸𑀤𑀺𑀓𑀁 𑀢𑀧𑀁. 𑀇𑀤𑀸𑀦𑀺 𑀲𑀸 𑀤𑁂𑀯𑀢𑀸 𑀲𑀸𑀲𑀦𑀲𑁆𑀲 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀁 𑀓𑀣𑁂𑀦𑁆𑀢𑀻 𑀦 𑀫𑀸𑀦𑀓𑀸𑀫𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯𑀸𑀢𑀺. 𑀅𑀝𑁆𑀞𑀫𑀁.

𑁯. 𑀧𑀞𑀫𑀧𑀚𑁆𑀚𑀼𑀦𑁆𑀦𑀥𑀻𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯. 𑀦𑀯𑀫𑁂 𑀧𑀚𑁆𑀚𑀼𑀦𑁆𑀦𑀲𑁆𑀲 𑀥𑀻𑀢𑀸𑀢𑀺 𑀧𑀚𑁆𑀚𑀼𑀦𑁆𑀦𑀲𑁆𑀲 𑀦𑀸𑀫 𑀯𑀲𑁆𑀲𑀯𑀮𑀸𑀳𑀓𑀤𑁂𑀯𑀭𑀜𑁆𑀜𑁄 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀲𑁆𑀲 𑀥𑀻𑀢𑀸. 𑀅𑀪𑀺𑀯𑀦𑁆𑀤𑁂𑀢𑀺 𑀪𑀕𑀯𑀸 𑀢𑀼𑀫𑁆𑀳𑀸𑀓𑀁 𑀧𑀸𑀤𑁂 𑀯𑀦𑁆𑀤𑀸𑀫𑀺. 𑀘𑀓𑁆𑀔𑀼𑀫𑀢𑀸𑀢𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀦𑁆𑀢𑁂𑀦 𑀢𑀣𑀸𑀕𑀢𑁂𑀦. 𑀥𑀫𑁆𑀫𑁄 𑀅𑀦𑀼𑀩𑀼𑀤𑁆𑀥𑁄𑀢𑀺, ‘‘𑀇𑀤𑀁 𑀫𑀬𑀸 𑀧𑀼𑀩𑁆𑀩𑁂 𑀧𑀭𑁂𑀲𑀁 𑀲𑀦𑁆𑀢𑀺𑀓𑁂 𑀓𑁂𑀯𑀮𑀁 𑀲𑀼𑀢𑀁𑀬𑁂𑀯 𑀆𑀲𑀻’’𑀢𑀺 𑀯𑀤𑀢𑀺. 𑀲𑀸𑀳𑀁 𑀤𑀸𑀦𑀻𑀢𑀺, 𑀲𑀸 𑀅𑀳𑀁 𑀇𑀤𑀸𑀦𑀺. 𑀲𑀓𑁆𑀔𑀺 𑀚𑀸𑀦𑀸𑀫𑀻𑀢𑀺, 𑀧𑀝𑀺𑀯𑁂𑀥𑀯𑀲𑁂𑀦 𑀧𑀘𑁆𑀘𑀓𑁆𑀔𑀫𑁂𑀯 𑀚𑀸𑀦𑀸𑀫𑀺. 𑀯𑀺𑀕𑀭𑀳𑀦𑁆𑀢𑀸𑀢𑀺, ‘‘𑀳𑀻𑀦𑀓𑁆𑀔𑀭𑀧𑀤𑀩𑁆𑀬𑀜𑁆𑀚𑀦𑁄’’𑀢𑀺 𑀯𑀸 ‘‘𑀅𑀦𑀺𑀬𑁆𑀬𑀸𑀦𑀺𑀓𑁄’’𑀢𑀺 𑀯𑀸 𑀏𑀯𑀁 𑀕𑀭𑀳𑀦𑁆𑀢𑀸. 𑀭𑁄𑀭𑀼𑀯𑀦𑁆𑀢𑀺, 𑀤𑁆𑀯𑁂 𑀭𑁄𑀭𑀼𑀯𑀸 𑁋 𑀥𑀽𑀫𑀭𑁄𑀭𑀼𑀯𑁄 𑀘 𑀚𑀸𑀮𑀭𑁄𑀭𑀼𑀯𑁄 𑀘. 𑀢𑀢𑁆𑀣 𑀥𑀽𑀫𑀭𑁄𑀭𑀼𑀯𑁄 𑀯𑀺𑀲𑀼𑀁 𑀳𑁄𑀢𑀺, 𑀚𑀸𑀮𑀭𑁄𑀭𑀼𑀯𑁄𑀢𑀺 𑀧𑀦 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀲𑁆𑀲𑁂𑀯𑁂𑀢𑀁 𑀦𑀸𑀫𑀁. 𑀢𑀢𑁆𑀣 𑀳𑀺 𑀲𑀢𑁆𑀢𑀸 𑀅𑀕𑁆𑀕𑀺𑀫𑁆𑀳𑀺 𑀚𑀮𑀦𑁆𑀢𑁂 𑀚𑀮𑀦𑁆𑀢𑁂 𑀧𑀼𑀦𑀧𑁆𑀧𑀼𑀦𑀁 𑀭𑀯𑀁 𑀭𑀯𑀦𑁆𑀢𑀺, 𑀢𑀲𑁆𑀫𑀸 𑀲𑁄 ‘‘𑀭𑁄𑀭𑀼𑀯𑁄’’𑀢𑀺 𑀯𑀼𑀘𑁆𑀘𑀢𑀺. 𑀖𑁄𑀭𑀦𑁆𑀢𑀺 𑀤𑀸𑀭𑀼𑀡𑀁. 𑀔𑀦𑁆𑀢𑀺𑀬𑀸 𑀉𑀧𑀲𑀫𑁂𑀦 𑀉𑀧𑁂𑀢𑀸𑀢𑀺 𑀭𑀼𑀘𑁆𑀘𑀺𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 𑀕𑀳𑀡𑀔𑀦𑁆𑀢𑀺𑀬𑀸 𑀘 𑀭𑀸𑀕𑀸𑀤𑀺𑀉𑀧𑀲𑀫𑁂𑀦 𑀘 𑀉𑀧𑁂𑀢𑀸𑀢𑀺. 𑀦𑀯𑀫𑀁.

𑁧𑁦. 𑀤𑀼𑀢𑀺𑀬𑀧𑀚𑁆𑀚𑀼𑀦𑁆𑀦𑀥𑀻𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁦. 𑀤𑀲𑀫𑁂 𑀥𑀫𑁆𑀫𑀜𑁆𑀘𑀸𑀢𑀺 𑀘 𑀲𑀤𑁆𑀤𑁂𑀦 𑀲𑀗𑁆𑀖𑀜𑁆𑀘, 𑀇𑀢𑀺 𑀢𑀻𑀡𑀺 𑀭𑀢𑀦𑀸𑀦𑀺 𑀦𑀫𑀲𑁆𑀲𑀫𑀸𑀦𑀸 𑀇𑀥𑀸𑀕𑀢𑀸𑀢𑀺 𑀯𑀤𑀢𑀺. 𑀅𑀢𑁆𑀣𑀯𑀢𑀻𑀢𑀺, 𑀅𑀢𑁆𑀣𑀯𑀢𑀺𑀬𑁄. 𑀩𑀳𑀼𑀦𑀸𑀧𑀺 𑀔𑁄 𑀢𑀦𑁆𑀢𑀺 𑀬𑀁 𑀥𑀫𑁆𑀫𑀁 𑀲𑀸 𑀅𑀪𑀸𑀲𑀺, 𑀢𑀁 𑀥𑀫𑁆𑀫𑀁 𑀩𑀳𑀼𑀦𑀸𑀧𑀺 𑀧𑀭𑀺𑀬𑀸𑀬𑁂𑀦 𑀅𑀳𑀁 𑀯𑀺𑀪𑀚𑁂𑀬𑁆𑀬𑀁. 𑀢𑀸𑀤𑀺𑀲𑁄 𑀥𑀫𑁆𑀫𑁄𑀢𑀺, 𑀢𑀸𑀤𑀺𑀲𑁄 𑀳𑀺 𑀅𑀬𑀁 𑀪𑀕𑀯𑀸 𑀥𑀫𑁆𑀫𑁄, 𑀢𑀁𑀲𑀡𑁆𑀞𑀺𑀢𑁄 𑀢𑀧𑁆𑀧𑀝𑀺𑀪𑀸𑀕𑁄 𑀩𑀳𑀽𑀳𑀺 𑀧𑀭𑀺𑀬𑀸𑀬𑁂𑀳𑀺 𑀯𑀺𑀪𑀚𑀺𑀢𑀩𑁆𑀩𑀬𑀼𑀢𑁆𑀢𑀓𑁄𑀢𑀺 𑀤𑀲𑁆𑀲𑁂𑀢𑀺. 𑀮𑀧𑀬𑀺𑀲𑁆𑀲𑀸𑀫𑀻𑀢𑀺, 𑀓𑀣𑀬𑀺𑀲𑁆𑀲𑀸𑀫𑀺. 𑀬𑀸𑀯𑀢𑀸 𑀫𑁂 𑀫𑀦𑀲𑀸 𑀧𑀭𑀺𑀬𑀢𑁆𑀢𑀦𑁆𑀢𑀺 𑀬𑀢𑁆𑀢𑀓𑀁 𑀫𑀬𑀸 𑀫𑀦𑀲𑀸 𑀧𑀭𑀺𑀬𑀸𑀧𑀼𑀝𑀁, 𑀢𑀲𑁆𑀲𑀢𑁆𑀣𑀁 𑀤𑀺𑀯𑀲𑀁 𑀅𑀯𑀢𑁆𑀯𑀸 𑀫𑀥𑀼𑀧𑀝𑀮𑀁 𑀧𑀻𑀴𑁂𑀦𑁆𑀢𑀻 𑀯𑀺𑀬 𑀫𑀼𑀳𑀼𑀢𑁆𑀢𑁂𑀦𑁂𑀯 𑀲𑀁𑀔𑀺𑀢𑁆𑀢𑁂𑀦 𑀓𑀣𑁂𑀲𑁆𑀲𑀸𑀫𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀤𑀲𑀫𑀁.

𑀲𑀢𑀼𑀮𑁆𑀮𑀧𑀓𑀸𑀬𑀺𑀓𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑁫. 𑀆𑀤𑀺𑀢𑁆𑀢𑀯𑀕𑁆𑀕𑁄

𑁧. 𑀆𑀤𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧. 𑀆𑀤𑀺𑀢𑁆𑀢𑀯𑀕𑁆𑀕𑀲𑁆𑀲 𑀧𑀞𑀫𑁂 𑀚𑀭𑀸𑀬 𑀫𑀭𑀡𑁂𑀦 𑀘𑀸𑀢𑀺 𑀤𑁂𑀲𑀦𑀸𑀲𑀻𑀲𑀫𑁂𑀢𑀁, 𑀭𑀸𑀕𑀸𑀤𑀻𑀳𑀺 𑀧𑀦 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺 𑀮𑁄𑀓𑁄 𑀆𑀤𑀺𑀢𑁆𑀢𑁄𑀯. 𑀤𑀸𑀦𑁂𑀦𑀸𑀢𑀺 𑀤𑀸𑀦𑀘𑁂𑀢𑀦𑀸𑀬. 𑀤𑀺𑀦𑁆𑀦𑀁 𑀳𑁄𑀢𑀺 𑀲𑀼𑀦𑀻𑀳𑀢𑀦𑁆𑀢𑀺 𑀤𑀸𑀦𑀧𑀼𑀜𑁆𑀜𑀘𑁂𑀢𑀦𑀸𑀳𑀺 𑀤𑀸𑀬𑀓𑀲𑁆𑀲𑁂𑀯 𑀳𑁄𑀢𑀺 𑀖𑀭𑀲𑀸𑀫𑀺𑀓𑀲𑁆𑀲 𑀯𑀺𑀬 𑀦𑀻𑀳𑀢𑀪𑀡𑁆𑀟𑀓𑀁, 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀘𑁄𑀭𑀸 𑀳𑀭𑀦𑁆𑀢𑀻𑀢𑀺 𑀅𑀤𑀺𑀦𑁆𑀦𑁂 𑀪𑁄𑀕𑁂 𑀘𑁄𑀭𑀸𑀧𑀺 𑀳𑀭𑀦𑁆𑀢𑀺 𑀭𑀸𑀚𑀸𑀦𑁄𑀧𑀺, 𑀅𑀕𑁆𑀕𑀺𑀧𑀺 𑀟𑀳𑀢𑀺, 𑀞𑀧𑀺𑀢𑀝𑁆𑀞𑀸𑀦𑁂𑀧𑀺 𑀦𑀲𑁆𑀲𑀦𑁆𑀢𑀺. 𑀅𑀦𑁆𑀢𑁂𑀦𑀸𑀢𑀺 𑀫𑀭𑀡𑁂𑀦. 𑀲𑀭𑀻𑀭𑀁 𑀲𑀧𑀭𑀺𑀕𑁆𑀕𑀳𑀦𑁆𑀢𑀺 𑀲𑀭𑀻𑀭𑀜𑁆𑀘𑁂𑀯 𑀘𑁄𑀭𑀸𑀤𑀻𑀦𑀁 𑀯𑀲𑁂𑀦 𑀅𑀯𑀺𑀦𑀝𑁆𑀞𑀪𑁄𑀕𑁂 𑀘. 𑀲𑀕𑁆𑀕𑀫𑀼𑀧𑁂𑀢𑀻𑀢𑀺 𑀯𑁂𑀲𑁆𑀲𑀦𑁆𑀢𑀭𑀫𑀳𑀸𑀭𑀸𑀚𑀸𑀤𑀬𑁄 𑀯𑀺𑀬 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀢𑀻𑀢𑀺. 𑀧𑀞𑀫𑀁.

𑁨. 𑀓𑀺𑀁𑀤𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁨. 𑀤𑀼𑀢𑀺𑀬𑁂 𑀅𑀦𑁆𑀦𑀤𑁄𑀢𑀺 𑀬𑀲𑁆𑀫𑀸 𑀅𑀢𑀺𑀩𑀮𑀯𑀸𑀧𑀺 𑀤𑁆𑀯𑁂 𑀢𑀻𑀡𑀺 𑀪𑀢𑁆𑀢𑀸𑀦𑀺 𑀅𑀪𑀼𑀢𑁆𑀯𑀸 𑀉𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀪𑀼𑀢𑁆𑀯𑀸 𑀧𑀦 𑀤𑀼𑀩𑁆𑀩𑀮𑁄𑀧𑀺 𑀳𑀼𑀢𑁆𑀯𑀸 𑀩𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀅𑀦𑁆𑀦𑀤𑁄 𑀩𑀮𑀤𑁄’’𑀢𑀺 𑀆𑀳. 𑀯𑀢𑁆𑀣𑀤𑁄𑀢𑀺 𑀬𑀲𑁆𑀫𑀸 𑀲𑀼𑀭𑀽𑀧𑁄𑀧𑀺 𑀤𑀼𑀘𑁆𑀘𑁄𑀴𑁄 𑀯𑀸 𑀅𑀘𑁄𑀴𑁄 𑀯𑀸 𑀯𑀺𑀭𑀽𑀧𑁄 𑀳𑁄𑀢𑀺 𑀑𑀳𑀻𑀴𑀺𑀢𑁄 𑀤𑀼𑀤𑁆𑀤𑀲𑀺𑀓𑁄, 𑀯𑀢𑁆𑀣𑀘𑁆𑀙𑀦𑁆𑀦𑁄 𑀤𑁂𑀯𑀧𑀼𑀢𑁆𑀢𑁄 𑀯𑀺𑀬 𑀲𑁄𑀪𑀢𑀺, 𑀢𑀲𑁆𑀫𑀸 ‘‘𑀯𑀢𑁆𑀣𑀤𑁄 𑀳𑁄𑀢𑀺 𑀯𑀡𑁆𑀡𑀤𑁄’’𑀢𑀺 𑀆𑀳. 𑀬𑀸𑀦𑀤𑁄𑀢𑀺 𑀳𑀢𑁆𑀣𑀺𑀬𑀸𑀦𑀸𑀤𑀻𑀦𑀁 𑀤𑀸𑀬𑀓𑁄. 𑀢𑁂𑀲𑀼 𑀧𑀦 𑁋

‘‘𑀦 𑀳𑀢𑁆𑀣𑀺𑀬𑀸𑀦𑀁 𑀲𑀫𑀡𑀲𑁆𑀲 𑀓𑀧𑁆𑀧𑀢𑀺,

𑀦 𑀅𑀲𑁆𑀲𑀬𑀸𑀦𑀁, 𑀦 𑀭𑀣𑁂𑀦 𑀬𑀸𑀢𑀼𑀁;

𑀇𑀤𑀜𑁆𑀘 𑀬𑀸𑀦𑀁 𑀲𑀫𑀡𑀲𑁆𑀲 𑀓𑀧𑁆𑀧𑀢𑀺,

𑀉𑀧𑀸𑀳𑀦𑀸 𑀭𑀓𑁆𑀔𑀢𑁄 𑀲𑀻𑀮𑀔𑀦𑁆𑀥’’𑀦𑁆𑀢𑀺.

𑀢𑀲𑁆𑀫𑀸 𑀙𑀢𑁆𑀢𑀼𑀧𑀸𑀳𑀦𑀓𑀢𑁆𑀢𑀭𑀬𑀝𑁆𑀞𑀺𑀫𑀜𑁆𑀘𑀧𑀻𑀞𑀸𑀦𑀁 𑀤𑀸𑀬𑀓𑁄, 𑀬𑁄 𑀘 𑀫𑀕𑁆𑀕𑀁 𑀲𑁄𑀥𑁂𑀢𑀺, 𑀦𑀺𑀲𑁆𑀲𑁂𑀡𑀺𑀁 𑀓𑀭𑁄𑀢𑀺, 𑀲𑁂𑀢𑀼𑀁 𑀓𑀭𑁄𑀢𑀺, 𑀦𑀸𑀯𑀁 𑀧𑀝𑀺𑀬𑀸𑀤𑁂𑀢𑀺, 𑀲𑀩𑁆𑀩𑁄𑀧𑀺 𑀬𑀸𑀦𑀤𑁄𑀯 𑀳𑁄𑀢𑀺. 𑀲𑀼𑀔𑀤𑁄 𑀳𑁄𑀢𑀻𑀢𑀺 𑀬𑀸𑀦𑀲𑁆𑀲 𑀲𑀼𑀔𑀸𑀯𑀳𑀦𑀢𑁄 𑀲𑀼𑀔𑀤𑁄 𑀦𑀸𑀫 𑀳𑁄𑀢𑀺. 𑀘𑀓𑁆𑀔𑀼𑀤𑁄𑀢𑀺 𑀅𑀦𑁆𑀥𑀓𑀸𑀭𑁂 𑀘𑀓𑁆𑀔𑀼𑀫𑀦𑁆𑀢𑀸𑀦𑀫𑁆𑀧𑀺 𑀭𑀽𑀧𑀤𑀲𑁆𑀲𑀦𑀸𑀪𑀸𑀯𑀢𑁄 𑀤𑀻𑀧𑀤𑁄 𑀘𑀓𑁆𑀔𑀼𑀤𑁄 𑀦𑀸𑀫 𑀳𑁄𑀢𑀺, 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀯𑀺𑀬 𑀤𑀺𑀩𑁆𑀩𑀘𑀓𑁆𑀔𑀼 𑀲𑀫𑁆𑀧𑀤𑀫𑁆𑀧𑀺 𑀮𑀪𑀢𑀺.

𑀲𑀩𑁆𑀩𑀤𑀤𑁄 𑀳𑁄𑀢𑀻𑀢𑀺 𑀲𑀩𑁆𑀩𑁂𑀲𑀁𑀬𑁂𑀯 𑀩𑀮𑀸𑀤𑀻𑀦𑀁 𑀤𑀸𑀬𑀓𑁄 𑀳𑁄𑀢𑀺. 𑀤𑁆𑀯𑁂 𑀢𑀬𑁄 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀺𑀜𑁆𑀘𑀺 𑀅𑀮𑀤𑁆𑀥𑀸 𑀆𑀕𑀢𑀲𑁆𑀲𑀸𑀧𑀺 𑀲𑀻𑀢𑀮𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀦𑁆𑀳𑀸𑀬𑀺𑀢𑁆𑀯𑀸 𑀧𑀢𑀺𑀲𑁆𑀲𑀬𑀁 𑀧𑀯𑀺𑀲𑀺𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀫𑀜𑁆𑀘𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀉𑀝𑁆𑀞𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀳𑀺 𑀓𑀸𑀬𑁂 𑀩𑀮𑀁 𑀆𑀳𑀭𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑀁 𑀯𑀺𑀬 𑀳𑁄𑀢𑀺. 𑀩𑀳𑀺 𑀯𑀺𑀘𑀭𑀦𑁆𑀢𑀲𑁆𑀲 𑀘 𑀓𑀸𑀬𑁂 𑀯𑀡𑁆𑀡𑀸𑀬𑀢𑀦𑀁 𑀯𑀸𑀢𑀸𑀢𑀧𑁂𑀳𑀺 𑀛𑀸𑀬𑀢𑀺, 𑀧𑀢𑀺𑀲𑁆𑀲𑀬𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀫𑀼𑀳𑀼𑀢𑁆𑀢𑀁 𑀦𑀺𑀧𑀦𑁆𑀦𑀲𑁆𑀲 𑀘 𑀯𑀺𑀲𑀪𑀸𑀕𑀲𑀦𑁆𑀢𑀢𑀺 𑀯𑀽𑀧𑀲𑀫𑁆𑀫𑀢𑀺, 𑀲𑀪𑀸𑀕𑀲𑀦𑁆𑀢𑀢𑀺 𑀑𑀓𑁆𑀓𑀫𑀢𑀺, 𑀯𑀡𑁆𑀡𑀸𑀬𑀢𑀦𑀁 𑀆𑀳𑀭𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑀁 𑀯𑀺𑀬 𑀳𑁄𑀢𑀺. 𑀩𑀳𑀺 𑀯𑀺𑀘𑀭𑀦𑁆𑀢𑀲𑁆𑀲 𑀧𑀸𑀤𑁂 𑀓𑀡𑁆𑀝𑀓𑁄 𑀯𑀺𑀚𑁆𑀛𑀢𑀺, 𑀔𑀸𑀡𑀼 𑀧𑀳𑀭𑀢𑀺, 𑀲𑀭𑀻𑀲𑀧𑀸𑀤𑀺𑀧𑀭𑀺𑀲𑁆𑀲𑀬𑁄 𑀘𑁂𑀯 𑀘𑁄𑀭𑀪𑀬𑀜𑁆𑀘 𑀉𑀧𑁆𑀧𑀚𑁆𑀚𑀢𑀺, 𑀧𑀢𑀺𑀲𑁆𑀲𑀬𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀦𑀺𑀧𑀦𑁆𑀦𑀲𑁆𑀲 𑀲𑀩𑁆𑀩𑁂𑀢𑁂 𑀧𑀭𑀺𑀲𑁆𑀲𑀬𑀸 𑀦 𑀳𑁄𑀦𑁆𑀢𑀺, 𑀥𑀫𑁆𑀫𑀁 𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑀥𑀫𑁆𑀫𑀧𑀻𑀢𑀺𑀲𑀼𑀔𑀁, 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀉𑀧𑀲𑀫𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀣𑀸 𑀩𑀳𑀺 𑀯𑀺𑀘𑀭𑀦𑁆𑀢𑀲𑁆𑀲 𑀘 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀅𑀓𑁆𑀔𑀻𑀦𑀺 𑀨𑀦𑁆𑀤𑀦𑁆𑀢𑀺, 𑀲𑁂𑀦𑀸𑀲𑀦𑀁 𑀧𑀯𑀺𑀲𑀦𑀓𑁆𑀔𑀡𑁂 𑀓𑀽𑀧𑁂 𑀑𑀢𑀺𑀡𑁆𑀡𑁄 𑀯𑀺𑀬 𑀳𑁄𑀢𑀺, 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀦 𑀧𑀜𑁆𑀜𑀸𑀬𑀦𑁆𑀢𑀺. 𑀫𑀼𑀳𑀼𑀢𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀧𑀦 𑀅𑀓𑁆𑀔𑀺𑀧𑀲𑀸𑀤𑁄 𑀆𑀳𑀭𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑁄 𑀯𑀺𑀬 𑀳𑁄𑀢𑀺, 𑀤𑁆𑀯𑀸𑀭𑀓𑀯𑀸𑀝𑀯𑀸𑀢𑀧𑀸𑀦𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀧𑀜𑁆𑀜𑀸𑀬𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑁄 𑀘 𑀲𑀩𑁆𑀩𑀤𑀤𑁄 𑀳𑁄𑀢𑀺, 𑀬𑁄 𑀤𑀤𑀸𑀢𑀺 𑀉𑀧𑀲𑁆𑀲𑀬’’𑀦𑁆𑀢𑀺.

𑀅𑀫𑀢𑀁𑀤𑀤𑁄 𑀘 𑀲𑁄 𑀳𑁄𑀢𑀻𑀢𑀺 𑀧𑀡𑀻𑀢𑀪𑁄𑀚𑀦𑀲𑁆𑀲 𑀧𑀢𑁆𑀢𑀁 𑀧𑀽𑀭𑁂𑀦𑁆𑀢𑁄 𑀯𑀺𑀬 𑀅𑀫𑀭𑀡𑀤𑀸𑀦𑀁 𑀦𑀸𑀫 𑀤𑁂𑀢𑀺. 𑀬𑁄 𑀥𑀫𑁆𑀫𑀫𑀦𑀼𑀲𑀸𑀲𑀢𑀻𑀢𑀺 𑀬𑁄 𑀥𑀫𑁆𑀫𑀁 𑀅𑀦𑀼𑀲𑀸𑀲𑀢𑀺, 𑀅𑀝𑁆𑀞𑀓𑀣𑀁 𑀓𑀣𑁂𑀢𑀺, 𑀧𑀸𑀴𑀺𑀁 𑀯𑀸𑀘𑁂𑀢𑀺, 𑀧𑀼𑀘𑁆𑀙𑀺𑀢𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀢𑀺, 𑀥𑀫𑁆𑀫𑀲𑁆𑀲𑀯𑀦𑀁 𑀓𑀭𑁄𑀢𑀺, 𑀲𑀩𑁆𑀩𑁄𑀧𑁂𑀲 𑀥𑀫𑁆𑀫𑀁 𑀅𑀦𑀼𑀲𑀸𑀲𑀢𑀺 𑀦𑀸𑀫. 𑀲𑀩𑁆𑀩𑀤𑀸𑀦𑀸𑀦𑀜𑁆𑀘 𑀇𑀤𑀁 𑀥𑀫𑁆𑀫𑀤𑀸𑀦𑀫𑁂𑀯 𑀅𑀕𑁆𑀕𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀲𑀩𑁆𑀩𑀤𑀸𑀦𑀁 𑀥𑀫𑁆𑀫𑀤𑀸𑀦𑀁 𑀚𑀺𑀦𑀸𑀢𑀺,

𑀲𑀩𑁆𑀩𑀭𑀲𑀁 𑀥𑀫𑁆𑀫𑀭𑀲𑁄 𑀚𑀺𑀦𑀸𑀢𑀺;

𑀲𑀩𑁆𑀩𑀭𑀢𑀺𑀁 𑀥𑀫𑁆𑀫𑀭𑀢𑀺 𑀚𑀺𑀦𑀸𑀢𑀺,

𑀢𑀡𑁆𑀳𑀓𑁆𑀔𑀬𑁄 𑀲𑀩𑁆𑀩𑀤𑀼𑀓𑁆𑀔𑀁 𑀚𑀺𑀦𑀸𑀢𑀻’’𑀢𑀺. (𑀥. 𑀧. 𑁩𑁫𑁪); 𑀤𑀼𑀢𑀺𑀬𑀁;

𑁩. 𑀅𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁩. 𑀢𑀢𑀺𑀬𑁂 𑀅𑀪𑀺𑀦𑀦𑁆𑀤𑀦𑁆𑀢𑀻𑀢𑀺 𑀧𑀢𑁆𑀣𑁂𑀦𑁆𑀢𑀺. 𑀪𑀚𑀢𑀻𑀢𑀺 𑀉𑀧𑀕𑀘𑁆𑀙𑀢𑀺, 𑀘𑀺𑀢𑁆𑀢𑀕𑀳𑀧𑀢𑀺𑀲𑀻𑀯𑀮𑀺𑀢𑁆𑀣𑁂𑀭𑀸𑀤𑀺𑀓𑁂 𑀯𑀺𑀬 𑀧𑀘𑁆𑀙𑀢𑁄 𑀅𑀦𑀼𑀩𑀦𑁆𑀥𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀇𑀥𑀮𑁄𑀓𑁂 𑀧𑀭𑀮𑁄𑀓𑁂 𑀘 𑀅𑀦𑁆𑀦𑀤𑀸𑀬𑀓𑀫𑁂𑀯 𑀅𑀦𑀼𑀕𑀘𑁆𑀙𑀢𑀺, 𑀢𑀲𑁆𑀫𑀸. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀢𑀢𑀺𑀬𑀁.

𑁪. 𑀏𑀓𑀫𑀽𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪. 𑀘𑀢𑀼𑀢𑁆𑀣𑁂 𑀏𑀓𑀫𑀽𑀮𑀦𑁆𑀢𑀺 𑀅𑀯𑀺𑀚𑁆𑀚𑀸 𑀢𑀡𑁆𑀳𑀸𑀬 𑀫𑀽𑀮𑀁, 𑀢𑀡𑁆𑀳𑀸 𑀅𑀯𑀺𑀚𑁆𑀚𑀸𑀬. 𑀇𑀥 𑀧𑀦 𑀢𑀡𑁆𑀳𑀸 𑀅𑀥𑀺𑀧𑁆𑀧𑁂𑀢𑀸. 𑀤𑁆𑀯𑀻𑀳𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀻𑀳𑀺 𑀆𑀯𑀝𑁆𑀝𑀢𑀻𑀢𑀺 𑀤𑁆𑀯𑀺𑀭𑀸𑀯𑀝𑁆𑀝𑀸. 𑀲𑀸 𑀘 𑀭𑀸𑀕𑀸𑀤𑀻𑀳𑀺 𑀢𑀻𑀳𑀺 𑀫𑀮𑁂𑀳𑀺 𑀢𑀺𑀫𑀮𑀸. 𑀢𑀢𑁆𑀭𑀸𑀲𑁆𑀲𑀸 𑀫𑁄𑀳𑁄 𑀲𑀳𑀚𑀸𑀢𑀓𑁄𑀝𑀺𑀬𑀸 𑀫𑀮𑀁 𑀳𑁄𑀢𑀺, 𑀭𑀸𑀕𑀤𑁄𑀲𑀸 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸. 𑀧𑀜𑁆𑀘 𑀧𑀦 𑀓𑀸𑀫𑀕𑀼𑀡𑀸 𑀅𑀲𑁆𑀲𑀸 𑀧𑀢𑁆𑀣𑀭𑀡𑀝𑁆𑀞𑀸𑀦𑀸, 𑀢𑁂𑀲𑀼 𑀲𑀸 𑀧𑀢𑁆𑀣𑀭𑀢𑀻𑀢𑀺 𑀧𑀜𑁆𑀘𑀧𑀢𑁆𑀣𑀭𑀸. 𑀲𑀸 𑀘 𑀅𑀧𑀽𑀭𑀡𑀻𑀬𑀝𑁆𑀞𑁂𑀦 𑀲𑀫𑀼𑀤𑁆𑀤𑁄. 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀧𑀦𑁂𑀲𑀸 𑀤𑁆𑀯𑀸𑀤𑀲𑀸𑀬𑀢𑀦𑁂𑀲𑀼 𑀆𑀯𑀝𑁆𑀝𑀢𑀺 𑀧𑀭𑀺𑀯𑀝𑁆𑀝𑀢𑀻𑀢𑀺 𑀤𑁆𑀯𑀸𑀤𑀲𑀸𑀯𑀝𑁆𑀝𑀸. 𑀅𑀧𑀢𑀺𑀝𑁆𑀞𑀝𑁆𑀞𑁂𑀦 𑀧𑀦 𑀧𑀸𑀢𑀸𑀮𑁄𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀏𑀓𑀫𑀽𑀮𑀁…𑀧𑁂… 𑀧𑀸𑀢𑀸𑀮𑀁, 𑀅𑀢𑀭𑀺 𑀇𑀲𑀺, 𑀉𑀢𑁆𑀢𑀭𑀺 𑀲𑀫𑀢𑀺𑀓𑁆𑀓𑀫𑀻𑀢𑀺 𑀅𑀢𑁆𑀣𑁄. 𑀘𑀢𑀼𑀢𑁆𑀣𑀁.

𑁫. 𑀅𑀦𑁄𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁫. 𑀧𑀜𑁆𑀘𑀫𑁂 𑀅𑀦𑁄𑀫𑀦𑀸𑀫𑀦𑁆𑀢𑀺 𑀲𑀩𑁆𑀩𑀕𑀼𑀡𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀅𑀯𑁂𑀓𑀮𑁆𑀮𑀦𑀸𑀫𑀁, 𑀧𑀭𑀺𑀧𑀽𑀭𑀦𑀸𑀫𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀧𑀼𑀡𑀢𑁆𑀣𑀤𑀲𑁆𑀲𑀺𑀦𑁆𑀢𑀺 𑀪𑀕𑀯𑀸 𑀲𑀡𑁆𑀳𑀲𑀼𑀔𑀼𑀫𑁂 𑀔𑀦𑁆𑀥𑀦𑁆𑀢𑀭𑀸𑀤𑀬𑁄 𑀅𑀢𑁆𑀣𑁂 𑀧𑀲𑁆𑀲𑀢𑀻𑀢𑀺 𑀦𑀺𑀧𑀼𑀡𑀢𑁆𑀣𑀤𑀲𑁆𑀲𑀻. 𑀧𑀜𑁆𑀜𑀸𑀤𑀤𑀦𑁆𑀢𑀺 𑀅𑀦𑁆𑀯𑀬𑀧𑀜𑁆𑀜𑀸𑀥𑀺𑀕𑀫𑀸𑀬 𑀧𑀝𑀺𑀧𑀤𑀁 𑀓𑀣𑀦𑀯𑀲𑁂𑀦 𑀧𑀜𑁆𑀜𑀸𑀬 𑀤𑀸𑀬𑀓𑀁. 𑀓𑀸𑀫𑀸𑀮𑀬𑁂 𑀅𑀲𑀢𑁆𑀢𑀦𑁆𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀸𑀮𑀬𑁂 𑀅𑀮𑀕𑁆𑀕𑀁. 𑀓𑀫𑀫𑀸𑀦𑀦𑁆𑀢𑀺 𑀪𑀕𑀯𑀸 𑀫𑀳𑀸𑀩𑁄𑀥𑀺𑀫𑀡𑁆𑀟𑁂𑀬𑁂𑀯 𑀅𑀭𑀺𑀬𑀫𑀕𑁆𑀕𑁂𑀦 𑀕𑀢𑁄, 𑀦 𑀇𑀤𑀸𑀦𑀺 𑀕𑀘𑁆𑀙𑀢𑀺, 𑀅𑀢𑀻𑀢𑀁 𑀧𑀦 𑀉𑀧𑀸𑀤𑀸𑀬 𑀇𑀤𑀁 𑀯𑀼𑀢𑁆𑀢𑀁. 𑀫𑀳𑁂𑀲𑀺𑀦𑁆𑀢𑀺 𑀫𑀳𑀦𑁆𑀢𑀸𑀦𑀁 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀏𑀲𑀺𑀢𑀸𑀭𑀁 𑀧𑀭𑀺𑀬𑁂𑀲𑀺𑀢𑀸𑀭𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀅𑀘𑁆𑀙𑀭𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁬. 𑀙𑀝𑁆𑀞𑁂 𑀅𑀘𑁆𑀙𑀭𑀸𑀕𑀡𑀲𑀗𑁆𑀖𑀼𑀝𑁆𑀞𑀦𑁆𑀢𑀺 𑀅𑀬𑀁 𑀓𑀺𑀭 𑀤𑁂𑀯𑀧𑀼𑀢𑁆𑀢𑁄 𑀲𑀢𑁆𑀣𑀼𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑀬𑀫𑀸𑀦𑁄 𑀧𑀜𑁆𑀘𑀯𑀲𑁆𑀲𑀓𑀸𑀮𑁂 𑀧𑀯𑀸𑀭𑁂𑀢𑁆𑀯𑀸 𑀤𑁆𑀯𑁂𑀫𑀸𑀢𑀺𑀓𑀁 𑀧𑀕𑀼𑀡𑀁 𑀓𑀢𑁆𑀯𑀸 𑀓𑀫𑁆𑀫𑀸𑀓𑀫𑁆𑀫𑀁 𑀉𑀕𑁆𑀕𑀳𑁂𑀢𑁆𑀯𑀸 𑀘𑀺𑀢𑁆𑀢𑀭𑀼𑀘𑀺𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺𑀓𑁄 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀬𑁄 𑀪𑀕𑀯𑀢𑀸 𑀫𑀚𑁆𑀛𑀺𑀫𑀬𑀸𑀫𑁄 𑀲𑀬𑀦𑀲𑁆𑀲 𑀓𑁄𑀝𑁆𑀞𑀸𑀲𑁄𑀢𑀺 𑀅𑀦𑀼𑀜𑁆𑀜𑀸𑀢𑁄. 𑀢𑀲𑁆𑀫𑀺𑀫𑁆𑀧𑀺 𑀲𑀫𑁆𑀧𑀢𑁆𑀢𑁂 ‘‘𑀧𑀫𑀸𑀤𑀲𑁆𑀲 𑀪𑀸𑀬𑀸𑀫𑀻’’𑀢𑀺 𑀫𑀜𑁆𑀘𑀓𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀭𑀢𑁆𑀢𑀺𑀜𑁆𑀘 𑀤𑀺𑀯𑀸 𑀘 𑀦𑀺𑀭𑀸𑀳𑀸𑀭𑁄 𑀓𑀫𑁆𑀫𑀝𑁆𑀞𑀸𑀦𑀫𑁂𑀯 𑀫𑀦𑀲𑀸𑀓𑀸𑀲𑀺.

𑀅𑀣𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀲𑀢𑁆𑀣𑀓𑀯𑀸𑀢𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀚𑀻𑀯𑀺𑀢𑀁 𑀧𑀭𑀺𑀬𑀸𑀤𑀺𑀬𑀺𑀁𑀲𑀼. 𑀲𑁄 𑀥𑀼𑀭𑀲𑁆𑀫𑀺𑀁𑀬𑁂𑀯 𑀓𑀸𑀮𑀫𑀓𑀸𑀲𑀺. 𑀬𑁄 𑀳𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀘𑀗𑁆𑀓𑀫𑁂 𑀘𑀗𑁆𑀓𑀫𑀫𑀸𑀦𑁄 𑀯𑀸 𑀆𑀮𑀫𑁆𑀩𑀦𑀢𑁆𑀣𑀫𑁆𑀪𑀁 𑀦𑀺𑀲𑁆𑀲𑀸𑀬 𑀞𑀺𑀢𑁄 𑀯𑀸 𑀘𑀗𑁆𑀓𑀫𑀓𑁄𑀝𑀺𑀬𑀁 𑀘𑀻𑀯𑀭𑀁 𑀲𑀻𑀲𑁂 𑀞𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀯𑀸 𑀦𑀺𑀧𑀦𑁆𑀦𑁄 𑀯𑀸 𑀧𑀭𑀺𑀲𑀫𑀚𑁆𑀛𑁂 𑀅𑀮𑀗𑁆𑀓𑀢𑀥𑀫𑁆𑀫𑀸𑀲𑀦𑁂 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀯𑀸 𑀓𑀸𑀮𑀁 𑀓𑀭𑁄𑀢𑀺, 𑀲𑀩𑁆𑀩𑁄 𑀲𑁄 𑀥𑀼𑀭𑀲𑁆𑀫𑀺𑀁 𑀓𑀸𑀮𑀁 𑀓𑀭𑁄𑀢𑀺 𑀦𑀸𑀫. 𑀇𑀢𑀺 𑀅𑀬𑀁 𑀘𑀗𑁆𑀓𑀫𑀦𑁂 𑀓𑀸𑀮𑀁 𑀓𑀢𑁆𑀯𑀸 𑀉𑀧𑀦𑀺𑀲𑁆𑀲𑀬𑀫𑀦𑁆𑀤𑀢𑀸𑀬 𑀆𑀲𑀯𑀓𑁆𑀔𑀬𑀁 𑀅𑀧𑁆𑀧𑀢𑁆𑀢𑁄 𑀢𑀸𑀯𑀢𑀺𑀁𑀲𑀪𑀯𑀦𑁂 𑀫𑀳𑀸𑀯𑀺𑀫𑀸𑀦𑀤𑁆𑀯𑀸𑀭𑁂 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀧𑀩𑀼𑀚𑁆𑀛𑀦𑁆𑀢𑁄 𑀯𑀺𑀬 𑀧𑀝𑀺𑀲𑀦𑁆𑀥𑀺𑀁 𑀅𑀕𑁆𑀕𑀳𑁂𑀲𑀺. 𑀢𑀸𑀯𑀤𑁂𑀯𑀲𑁆𑀲 𑀲𑀼𑀯𑀡𑁆𑀡𑀢𑁄𑀭𑀡𑀁 𑀯𑀺𑀬 𑀢𑀺𑀕𑀸𑀯𑀼𑀢𑁄 𑀅𑀢𑁆𑀢𑀪𑀸𑀯𑁄 𑀦𑀺𑀩𑁆𑀩𑀢𑁆𑀢𑀺.

𑀅𑀦𑁆𑀢𑁄𑀯𑀺𑀫𑀸𑀦𑁂 𑀲𑀳𑀲𑁆𑀲𑀫𑀢𑁆𑀢𑀸 𑀅𑀘𑁆𑀙𑀭𑀸 𑀢𑀁 𑀤𑀺𑀲𑁆𑀯𑀸, ‘‘𑀯𑀺𑀫𑀸𑀦𑀲𑀸𑀫𑀺𑀓𑁄 𑀤𑁂𑀯𑀧𑀼𑀢𑁆𑀢𑁄 𑀆𑀕𑀢𑁄, 𑀭𑀫𑀬𑀺𑀲𑁆𑀲𑀸𑀫 𑀦’’𑀦𑁆𑀢𑀺 𑀢𑀽𑀭𑀺𑀬𑀸𑀦𑀺 𑀕𑀳𑁂𑀢𑁆𑀯𑀸 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀤𑁂𑀯𑀧𑀼𑀢𑁆𑀢𑁄 𑀦 𑀢𑀸𑀯 𑀘𑀼𑀢𑀪𑀸𑀯𑀁 𑀚𑀸𑀦𑀸𑀢𑀺, 𑀧𑀩𑁆𑀩𑀚𑀺𑀢𑀲𑀜𑁆𑀜𑀻𑀬𑁂𑀯 𑀅𑀘𑁆𑀙𑀭𑀸 𑀑𑀮𑁄𑀓𑁂𑀢𑁆𑀯𑀸 𑀯𑀺𑀳𑀸𑀭𑀘𑀸𑀭𑀺𑀓𑀁 𑀆𑀕𑀢𑀁 𑀫𑀸𑀢𑀼𑀕𑀸𑀫𑀁 𑀤𑀺𑀲𑁆𑀯𑀸 𑀮𑀚𑁆𑀚𑀻. 𑀧𑀁𑀲𑀼𑀓𑀽𑀮𑀺𑀓𑁄 𑀯𑀺𑀬 𑀉𑀧𑀭𑀺 𑀞𑀺𑀢𑀁 𑀖𑀦𑀤𑀼𑀓𑀽𑀮𑀁 𑀏𑀓𑀁𑀲𑀁 𑀓𑀭𑁄𑀦𑁆𑀢𑁄 𑀅𑀁𑀲𑀓𑀽𑀝𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀇𑀦𑁆𑀤𑁆𑀭𑀺𑀬𑀸𑀦𑀺 𑀑𑀓𑁆𑀔𑀺𑀧𑀺𑀢𑁆𑀯𑀸 𑀅𑀥𑁄𑀫𑀼𑀔𑁄 𑀅𑀝𑁆𑀞𑀸𑀲𑀺. 𑀢𑀲𑁆𑀲 𑀓𑀸𑀬𑀯𑀺𑀓𑀸𑀭𑁂𑀦𑁂𑀯 𑀢𑀸 𑀤𑁂𑀯𑀢𑀸 ‘‘𑀲𑀫𑀡𑀤𑁂𑀯𑀧𑀼𑀢𑁆𑀢𑁄 𑀅𑀬’’𑀦𑁆𑀢𑀺 𑀜𑀢𑁆𑀯𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀅𑀬𑁆𑀬, 𑀤𑁂𑀯𑀧𑀼𑀢𑁆𑀢, 𑀤𑁂𑀯𑀮𑁄𑀓𑁄 𑀦𑀸𑀫𑀸𑀬𑀁, 𑀦 𑀲𑀫𑀡𑀥𑀫𑁆𑀫𑀲𑁆𑀲 𑀓𑀭𑀡𑁄𑀓𑀸𑀲𑁄, 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁄𑀓𑀸𑀲𑁄’’𑀢𑀺. 𑀲𑁄 𑀢𑀣𑁂𑀯 𑀅𑀝𑁆𑀞𑀸𑀲𑀺. 𑀤𑁂𑀯𑀢𑀸 ‘‘𑀦 𑀢𑀸𑀯𑀸𑀬𑀁 𑀲𑀮𑁆𑀮𑀓𑁆𑀔𑁂𑀢𑀻’’𑀢𑀺 𑀢𑀽𑀭𑀺𑀬𑀸𑀦𑀺 𑀧𑀕𑁆𑀕𑀡𑁆𑀳𑀺𑀁𑀲𑀼. 𑀲𑁄 𑀢𑀣𑀸𑀧𑀺 𑀅𑀦𑁄𑀮𑁄𑀓𑁂𑀦𑁆𑀢𑁄𑀯 𑀅𑀝𑁆𑀞𑀸𑀲𑀺.

𑀅𑀣𑀲𑁆𑀲 𑀲𑀩𑁆𑀩𑀓𑀸𑀬𑀺𑀓𑀁 𑀆𑀤𑀸𑀲𑀁 𑀧𑀼𑀭𑀢𑁄 𑀞𑀧𑀬𑀺𑀁𑀲𑀼. 𑀲𑁄 𑀙𑀸𑀬𑀁 𑀤𑀺𑀲𑁆𑀯𑀸 𑀘𑀼𑀢𑀪𑀸𑀯𑀁 𑀜𑀢𑁆𑀯𑀸, ‘‘𑀦 𑀫𑀬𑀸 𑀇𑀫𑀁 𑀞𑀸𑀦𑀁 𑀧𑀢𑁆𑀣𑁂𑀢𑁆𑀯𑀸 𑀲𑀫𑀡𑀥𑀫𑁆𑀫𑁄 𑀓𑀢𑁄, 𑀉𑀢𑁆𑀢𑀫𑀢𑁆𑀣𑀁 𑀅𑀭𑀳𑀢𑁆𑀢𑀁 𑀧𑀢𑁆𑀣𑁂𑀢𑁆𑀯𑀸 𑀓𑀢𑁄’’𑀢𑀺 𑀲𑀫𑁆𑀧𑀢𑁆𑀢𑀺𑀬𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑁄𑀲𑀺, ‘‘𑀲𑀼𑀯𑀡𑁆𑀡𑀧𑀝𑀁 𑀧𑀝𑀺𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀢𑀓𑁆𑀓𑀬𑀺𑀢𑁆𑀯𑀸 𑀬𑀼𑀤𑁆𑀥𑀝𑁆𑀞𑀸𑀦𑀁 𑀑𑀢𑀺𑀡𑁆𑀡𑀫𑀮𑁆𑀮𑁄 𑀫𑀽𑀮𑀓𑀫𑀼𑀝𑁆𑀞𑀺𑀁 𑀮𑀪𑀺𑀢𑁆𑀯𑀸 𑀯𑀺𑀬. 𑀲𑁄 𑁋 ‘‘𑀅𑀬𑀁 𑀲𑀕𑁆𑀕𑀲𑀫𑁆𑀧𑀢𑁆𑀢𑀺 𑀦𑀸𑀫 𑀲𑀼𑀮𑀪𑀸, 𑀩𑀼𑀤𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑁄 𑀤𑀼𑀮𑁆𑀮𑀪𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀯𑀺𑀫𑀸𑀦𑀁 𑀅𑀧𑀯𑀺𑀲𑀺𑀢𑁆𑀯𑀸𑀯 𑀅𑀲𑀫𑁆𑀪𑀺𑀦𑁆𑀦𑁂𑀦𑁂𑀯 𑀲𑀻𑀮𑁂𑀦 𑀅𑀘𑁆𑀙𑀭𑀸𑀲𑀗𑁆𑀖𑀧𑀭𑀺𑀯𑀼𑀢𑁄 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀫𑁆𑀫 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺.

𑀢𑀢𑁆𑀣 𑀅𑀘𑁆𑀙𑀭𑀸𑀕𑀡𑀲𑀗𑁆𑀖𑀼𑀝𑁆𑀞𑀦𑁆𑀢𑀺 𑀅𑀘𑁆𑀙𑀭𑀸𑀕𑀡𑁂𑀦 𑀕𑀻𑀢𑀯𑀸𑀤𑀺𑀢𑀲𑀤𑁆𑀤𑁂𑀳𑀺 𑀲𑀗𑁆𑀖𑁄𑀲𑀺𑀢𑀁. 𑀧𑀺𑀲𑀸𑀘𑀕𑀡𑀲𑁂𑀯𑀺𑀢𑀦𑁆𑀢𑀺 𑀢𑀫𑁂𑀯 𑀅𑀘𑁆𑀙𑀭𑀸𑀕𑀡𑀁 𑀧𑀺𑀲𑀸𑀘𑀕𑀡𑀁 𑀓𑀢𑁆𑀯𑀸 𑀯𑀤𑀢𑀺. 𑀯𑀦𑀦𑁆𑀢𑀺 𑀦𑀦𑁆𑀤𑀦𑀯𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀬𑀜𑁆𑀳𑀺 𑀦𑀺𑀬𑀸𑀫𑀘𑀺𑀢𑁆𑀢𑀢𑀸𑀬 𑀅𑀢𑁆𑀢𑀦𑁄 𑀕𑀭𑀼𑀪𑀸𑀯𑁂𑀦 𑀤𑁂𑀯𑀕𑀡𑀁 ‘‘𑀤𑁂𑀯𑀕𑀡𑁄’’𑀢𑀺 𑀯𑀢𑁆𑀢𑀼𑀁 𑀦 𑀭𑁄𑀘𑁂𑀢𑀺. ‘‘𑀧𑀺𑀲𑀸𑀘𑀕𑀡𑁄’’𑀢𑀺 𑀯𑀤𑀢𑀺. 𑀦𑀦𑁆𑀤𑀦𑀯𑀦𑀜𑁆𑀘 ‘‘𑀦𑀦𑁆𑀤𑀦’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀫𑁄𑀳𑀦’’𑀦𑁆𑀢𑀺 𑀯𑀤𑀢𑀺. 𑀓𑀣𑀁 𑀬𑀸𑀢𑁆𑀭𑀸 𑀪𑀯𑀺𑀲𑁆𑀲𑀢𑀻𑀢𑀺 𑀓𑀣𑀁 𑀦𑀺𑀕𑁆𑀕𑀫𑀦𑀁 𑀪𑀯𑀺𑀲𑁆𑀲𑀢𑀺, 𑀓𑀣𑀁 𑀅𑀢𑀺𑀓𑁆𑀓𑀫𑁄 𑀪𑀯𑀺𑀲𑁆𑀲𑀢𑀺, 𑀅𑀭𑀳𑀢𑁆𑀢𑀲𑁆𑀲 𑀫𑁂 𑀧𑀤𑀝𑁆𑀞𑀸𑀦𑀪𑀽𑀢𑀁 𑀯𑀺𑀧𑀲𑁆𑀲𑀦𑀁 𑀆𑀘𑀺𑀓𑁆𑀔𑀣 𑀪𑀕𑀯𑀸𑀢𑀺 𑀯𑀤𑀢𑀺.

𑀅𑀣 𑀪𑀕𑀯𑀸 ‘‘𑀅𑀢𑀺𑀲𑀮𑁆𑀮𑀺𑀔𑀢𑁂𑀯 𑀅𑀬𑀁 𑀤𑁂𑀯𑀧𑀼𑀢𑁆𑀢𑁄, 𑀓𑀺𑀁 𑀦𑀼 𑀔𑁄 𑀇𑀤’’𑀦𑁆𑀢𑀺? 𑀆𑀯𑀚𑁆𑀚𑁂𑀦𑁆𑀢𑁄 𑀅𑀢𑁆𑀢𑀦𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀪𑀸𑀯𑀁 𑀜𑀢𑁆𑀯𑀸 𑁋 ‘‘𑀅𑀬𑀁 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑀸𑀬 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄, 𑀅𑀚𑁆𑀚𑀸𑀧𑀺𑀲𑁆𑀲 𑀘𑀗𑁆𑀓𑀫𑀦𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁄 𑀅𑀲𑀫𑁆𑀪𑀺𑀦𑁆𑀦𑁂𑀦 𑀲𑀻𑀮𑁂𑀦 𑀆𑀕𑀢𑁄’’𑀢𑀺 𑀘𑀺𑀦𑁆𑀢𑁂𑀲𑀺. 𑀩𑀼𑀤𑁆𑀥𑀸 𑀘 𑀅𑀓𑀢𑀸𑀪𑀺𑀦𑀺𑀯𑁂𑀲𑀲𑁆𑀲 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀅𑀓𑀢𑀧𑀭𑀺𑀓𑀫𑁆𑀫𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀦𑁄 𑀘𑀺𑀢𑁆𑀢𑀓𑀸𑀭𑁄 𑀪𑀺𑀢𑁆𑀢𑀺𑀧𑀭𑀺𑀓𑀫𑁆𑀫𑀁 𑀯𑀺𑀬 𑁋 ‘‘𑀲𑀻𑀮𑀁 𑀢𑀸𑀯 𑀲𑁄𑀥𑁂𑀳𑀺, 𑀲𑀫𑀸𑀥𑀺𑀁 𑀪𑀸𑀯𑁂𑀳𑀺, 𑀓𑀫𑁆𑀫𑀲𑁆𑀲𑀓𑀢𑀧𑀜𑁆𑀜𑀁 𑀉𑀚𑀼𑀁 𑀓𑀭𑁄𑀳𑀻’’𑀢𑀺 𑀧𑀞𑀫𑀁 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀁 𑀆𑀘𑀺𑀓𑁆𑀔𑀦𑁆𑀢𑀺, 𑀓𑀸𑀭𑀓𑀲𑁆𑀲 𑀧𑀦 𑀬𑀼𑀢𑁆𑀢𑀧𑀬𑀼𑀢𑁆𑀢𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑀧𑀤𑀝𑁆𑀞𑀸𑀦𑀪𑀽𑀢𑀁 𑀲𑀡𑁆𑀳𑀲𑀼𑀔𑀼𑀫𑀁 𑀲𑀼𑀜𑁆𑀜𑀢𑀸𑀯𑀺𑀧𑀲𑁆𑀲𑀦𑀁𑀬𑁂𑀯 𑀆𑀘𑀺𑀓𑁆𑀔𑀦𑁆𑀢𑀺, 𑀅𑀬𑀜𑁆𑀘 𑀤𑁂𑀯𑀧𑀼𑀢𑁆𑀢𑁄 𑀓𑀸𑀭𑀓𑁄 𑀅𑀪𑀺𑀦𑁆𑀦𑀲𑀻𑀮𑁄, 𑀏𑀓𑁄 𑀫𑀕𑁆𑀕𑁄 𑀅𑀲𑁆𑀲 𑀅𑀦𑀸𑀕𑀢𑁄𑀢𑀺 𑀲𑀼𑀜𑁆𑀜𑀢𑀸𑀯𑀺𑀧𑀲𑁆𑀲𑀦𑀁 𑀆𑀘𑀺𑀓𑁆𑀔𑀦𑁆𑀢𑁄 𑀉𑀚𑀼𑀓𑁄 𑀦𑀸𑀫𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀉𑀚𑀼𑀓𑁄𑀢𑀺 𑀓𑀸𑀬𑀯𑀗𑁆𑀓𑀸𑀤𑀻𑀦𑀁 𑀅𑀪𑀸𑀯𑀢𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀉𑀚𑀼𑀓𑁄 𑀦𑀸𑀫. 𑀅𑀪𑀬𑀸 𑀦𑀸𑀫 𑀲𑀸 𑀤𑀺𑀲𑀸𑀢𑀺 𑀦𑀺𑀩𑁆𑀩𑀸𑀦𑀁 𑀲𑀦𑁆𑀥𑀸𑀬𑀸𑀳. 𑀢𑀲𑁆𑀫𑀺𑀁 𑀳𑀺 𑀓𑀺𑀜𑁆𑀘𑀺 𑀪𑀬𑀁 𑀦𑀢𑁆𑀣𑀺, 𑀢𑀁 𑀯𑀸 𑀧𑀢𑁆𑀢𑀲𑁆𑀲 𑀪𑀬𑀁 𑀦𑀢𑁆𑀣𑀻𑀢𑀺 ‘‘𑀅𑀪𑀬𑀸 𑀦𑀸𑀫 𑀲𑀸 𑀤𑀺𑀲𑀸’’𑀢𑀺 𑀯𑀼𑀢𑁆𑀢𑀁. 𑀭𑀣𑁄 𑀅𑀓𑀽𑀚𑀦𑁄𑀢𑀺 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀯 𑀅𑀥𑀺𑀧𑁆𑀧𑁂𑀢𑁄. 𑀬𑀣𑀸 𑀳𑀺 𑀧𑀸𑀓𑀢𑀺𑀓𑀭𑀣𑁄 𑀅𑀓𑁆𑀔𑁂 𑀯𑀸 𑀅𑀦𑀩𑁆𑀪𑀜𑁆𑀚𑀺𑀢𑁂 𑀅𑀢𑀺𑀭𑁂𑀓𑁂𑀲𑀼 𑀯𑀸 𑀫𑀦𑀼𑀲𑁆𑀲𑁂𑀲𑀼 𑀅𑀪𑀺𑀭𑀼𑀴𑁆𑀳𑁂𑀲𑀼 𑀓𑀽𑀚𑀢𑀺 𑀯𑀺𑀭𑀯𑀢𑀺, 𑀦 𑀏𑀯𑀁 𑀅𑀭𑀺𑀬𑀫𑀕𑁆𑀕𑁄. 𑀲𑁄 𑀳𑀺 𑀏𑀓𑀧𑁆𑀧𑀳𑀸𑀭𑁂𑀦 𑀘𑀢𑀼𑀭𑀸𑀲𑀻𑀢𑀺𑀬𑀸𑀧𑀺 𑀧𑀸𑀡𑀲𑀳𑀲𑁆𑀲𑁂𑀲𑀼 𑀅𑀪𑀺𑀭𑀼𑀳𑀦𑁆𑀢𑁂𑀲𑀼 𑀦 𑀓𑀽𑀚𑀢𑀺 𑀦 𑀯𑀺𑀭𑀯𑀢𑀺. 𑀢𑀲𑁆𑀫𑀸 ‘‘𑀅𑀓𑀽𑀚𑀦𑁄’’𑀢𑀺 𑀯𑀼𑀢𑁆𑀢𑁄. 𑀥𑀫𑁆𑀫𑀘𑀓𑁆𑀓𑁂𑀳𑀺 𑀲𑀁𑀬𑀼𑀢𑁄𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑀲𑀗𑁆𑀔𑀸𑀢𑁂𑀳𑀺 𑀥𑀫𑁆𑀫𑀘𑀓𑁆𑀓𑁂𑀳𑀺 𑀲𑀁𑀬𑀼𑀢𑁆𑀢𑁄.

𑀳𑀺𑀭𑀻𑀢𑀺 𑀏𑀢𑁆𑀣 𑀳𑀺𑀭𑀺𑀕𑁆𑀕𑀳𑀡𑁂𑀦 𑀑𑀢𑁆𑀢𑀧𑁆𑀧𑀫𑁆𑀧𑀺 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀢𑀲𑁆𑀲 𑀅𑀧𑀸𑀮𑀫𑁆𑀩𑁄𑀢𑀺 𑀬𑀣𑀸 𑀩𑀸𑀳𑀺𑀭𑀓𑀭𑀣𑀲𑁆𑀲 𑀭𑀣𑁂 𑀞𑀺𑀢𑀸𑀦𑀁 𑀬𑁄𑀥𑀸𑀦𑀁 𑀅𑀧𑀢𑀦𑀢𑁆𑀣𑀸𑀬 𑀤𑀸𑀭𑀼𑀫𑀬𑀁 𑀅𑀧𑀸𑀮𑀫𑁆𑀩𑀦𑀁 𑀳𑁄𑀢𑀺, 𑀏𑀯𑀁 𑀇𑀫𑀲𑁆𑀲 𑀫𑀕𑁆𑀕𑀭𑀣𑀲𑁆𑀲 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑀁 𑀳𑀺𑀭𑁄𑀢𑁆𑀢𑀧𑁆𑀧𑀁 𑀅𑀧𑀸𑀮𑀫𑁆𑀩𑀦𑀁. 𑀲𑀢𑁆𑀬𑀲𑁆𑀲 𑀧𑀭𑀺𑀯𑀸𑀭𑀡𑀦𑁆𑀢𑀺 𑀭𑀣𑀲𑁆𑀲 𑀲𑀻𑀳𑀘𑀫𑁆𑀫𑀸𑀤𑀺𑀧𑀭𑀺𑀯𑀸𑀭𑁄 𑀯𑀺𑀬 𑀇𑀫𑀲𑁆𑀲𑀸𑀧𑀺 𑀫𑀕𑁆𑀕𑀭𑀣𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺 𑀧𑀭𑀺𑀯𑀸𑀭𑀡𑀁. 𑀥𑀫𑁆𑀫𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀁. 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀚𑀯𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀚𑀯𑀸 𑀅𑀲𑁆𑀲 𑀧𑀼𑀩𑁆𑀩𑀬𑀸𑀬𑀺𑀓𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀚𑀯𑁄, 𑀢𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀚𑀯𑀁. 𑀬𑀣𑀸 𑀳𑀺 𑀧𑀞𑀫𑀢𑀭𑀁 𑀭𑀸𑀚𑀧𑀼𑀭𑀺𑀲𑁂𑀳𑀺 𑀓𑀸𑀡𑀓𑀼𑀡𑀺𑀆𑀤𑀻𑀦𑀁 𑀦𑀻𑀳𑀭𑀡𑁂𑀦 𑀫𑀕𑁆𑀕𑁂 𑀲𑁄𑀥𑀺𑀢𑁂 𑀧𑀘𑁆𑀙𑀸 𑀭𑀸𑀚𑀸 𑀦𑀺𑀓𑁆𑀔𑀫𑀢𑀺, 𑀏𑀯𑀫𑁂𑀯𑀁 𑀯𑀺𑀧𑀲𑁆𑀲𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀔𑀦𑁆𑀥𑀸𑀤𑀻𑀲𑀼 𑀲𑁄𑀥𑀺𑀢𑁂𑀲𑀼 𑀧𑀘𑁆𑀙𑀸 𑀪𑀽𑀫𑀺𑀮𑀤𑁆𑀥𑀯𑀝𑁆𑀝𑀁 𑀧𑀭𑀺𑀚𑀸𑀦𑀫𑀸𑀦𑀸 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀥𑀫𑁆𑀫𑀸𑀳𑀁 𑀲𑀸𑀭𑀣𑀺𑀁 𑀩𑁆𑀭𑀽𑀫𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀼𑀭𑁂𑀚𑀯’’𑀦𑁆𑀢𑀺.

𑀇𑀢𑀺 𑀪𑀕𑀯𑀸 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀅𑀯𑀲𑀸𑀦𑁂 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀤𑀻𑀧𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀤𑁂𑀯𑀧𑀼𑀢𑁆𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀬𑀣𑀸 𑀳𑀺 𑀭𑀜𑁆𑀜𑁄 𑀪𑁄𑀚𑀦𑀓𑀸𑀮𑁂 𑀅𑀢𑁆𑀢𑀦𑁄 𑀫𑀼𑀔𑀧𑁆𑀧𑀫𑀸𑀡𑁂 𑀓𑀩𑀴𑁂 𑀉𑀓𑁆𑀔𑀺𑀢𑁆𑀢𑁂 𑀅𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀧𑀼𑀢𑁆𑀢𑁄 𑀅𑀢𑁆𑀢𑀦𑁄 𑀫𑀼𑀔𑀧𑁆𑀧𑀫𑀸𑀡𑁂𑀦𑁂𑀯 𑀢𑀢𑁄 𑀓𑀩𑀴𑀁 𑀓𑀭𑁄𑀢𑀺, 𑀏𑀯𑀫𑁂𑀯𑀁 𑀪𑀕𑀯𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀤𑁂𑀲𑁂𑀦𑁆𑀢𑁂𑀧𑀺 𑀲𑀢𑁆𑀢𑀸 𑀅𑀢𑁆𑀢𑀦𑁄 𑀉𑀧𑀦𑀺𑀲𑁆𑀲𑀬𑀸𑀦𑀼𑀭𑀽𑀧𑁂𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀦𑀺 𑀧𑀸𑀧𑀼𑀡𑀦𑁆𑀢𑀺. 𑀅𑀬𑀫𑁆𑀧𑀺 𑀤𑁂𑀯𑀧𑀼𑀢𑁆𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀯𑀸 𑀪𑀕𑀯𑀦𑁆𑀢𑀁 𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑁂𑀢𑁆𑀯𑀸 𑀧𑀓𑁆𑀓𑀸𑀫𑀻𑀢𑀺. 𑀙𑀝𑁆𑀞𑀁.

𑁭. 𑀯𑀦𑀭𑁄𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭. 𑀲𑀢𑁆𑀢𑀫𑁂 𑀥𑀫𑁆𑀫𑀝𑁆𑀞𑀸 𑀲𑀻𑀮𑀲𑀫𑁆𑀧𑀦𑁆𑀦𑀸𑀢𑀺 𑀓𑁂 𑀥𑀫𑁆𑀫𑀝𑁆𑀞𑀸, 𑀓𑁂 𑀲𑀻𑀮𑀲𑀫𑁆𑀧𑀦𑁆𑀦𑀸𑀢𑀺 𑀧𑀼𑀘𑁆𑀙𑀢𑀺. 𑀪𑀕𑀯𑀸 𑀇𑀫𑀁 𑀧𑀜𑁆𑀳𑀁 𑀣𑀸𑀯𑀭𑀯𑀢𑁆𑀣𑀼𑀦𑀸 𑀤𑀻𑀧𑁂𑀦𑁆𑀢𑁄 𑀆𑀭𑀸𑀫𑀭𑁄𑀧𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀭𑀸𑀫𑀭𑁄𑀧𑀸𑀢𑀺 𑀧𑀼𑀧𑁆𑀨𑀸𑀭𑀸𑀫𑀨𑀮𑀸𑀭𑀸𑀫𑀭𑁄𑀧𑀓𑀸. 𑀯𑀦𑀭𑁄𑀧𑀸𑀢𑀺 𑀲𑀬𑀁𑀚𑀸𑀢𑁂 𑀅𑀭𑁄𑀧𑀺𑀫𑀯𑀦𑁂 𑀲𑀻𑀫𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀘𑁂𑀢𑀺𑀬𑀩𑁄𑀥𑀺𑀘𑀗𑁆𑀓𑀫𑀦𑀫𑀡𑁆𑀟𑀧𑀓𑀼𑀝𑀺𑀮𑁂𑀡𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀦𑀁 𑀓𑀸𑀭𑀓𑀸 𑀙𑀸𑀬𑀽𑀧𑀕𑁂 𑀭𑀼𑀓𑁆𑀔𑁂 𑀭𑁄𑀧𑁂𑀢𑁆𑀯𑀸 𑀤𑀤𑀫𑀸𑀦𑀸𑀧𑀺 𑀯𑀦𑀭𑁄𑀧𑀸𑀬𑁂𑀯 𑀦𑀸𑀫. 𑀲𑁂𑀢𑀼𑀓𑀸𑀭𑀓𑀸𑀢𑀺 𑀯𑀺𑀲𑀫𑁂 𑀲𑁂𑀢𑀼𑀁 𑀓𑀭𑁄𑀦𑁆𑀢𑀺, 𑀉𑀤𑀓𑁂 𑀦𑀸𑀯𑀁 𑀧𑀝𑀺𑀬𑀸𑀤𑁂𑀦𑁆𑀢𑀺. 𑀧𑀧𑀦𑁆𑀢𑀺 𑀧𑀸𑀦𑀻𑀬𑀤𑀸𑀦𑀲𑀸𑀮𑀁. 𑀉𑀤𑀧𑀸𑀦𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀧𑁄𑀓𑁆𑀔𑀭𑀡𑀻𑀢𑀴𑀸𑀓𑀸𑀤𑀺𑀁. 𑀉𑀧𑀲𑁆𑀲𑀬𑀦𑁆𑀢𑀺 𑀯𑀸𑀲𑀸𑀕𑀸𑀭𑀁. ‘‘𑀉𑀧𑀸𑀲𑀬’’𑀦𑁆𑀢𑀺𑀧𑀺 𑀧𑀸𑀞𑁄.

𑀲𑀤𑀸 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻𑀢𑀺 𑀦 𑀅𑀓𑀼𑀲𑀮𑀯𑀺𑀢𑀓𑁆𑀓𑀁 𑀯𑀸 𑀯𑀺𑀢𑀓𑁆𑀓𑁂𑀦𑁆𑀢𑀲𑁆𑀲 𑀦𑀺𑀤𑁆𑀤𑀸𑀬𑀦𑁆𑀢𑀲𑁆𑀲 𑀯𑀸 𑀧𑀯𑀟𑁆𑀠𑀢𑀺. 𑀬𑀤𑀸 𑀬𑀤𑀸 𑀧𑀦 𑀅𑀦𑀼𑀲𑁆𑀲𑀭𑀢𑀺, 𑀢𑀤𑀸 𑀢𑀤𑀸 𑀢𑀲𑁆𑀲 𑀯𑀟𑁆𑀠𑀢𑀺. 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀲𑀤𑀸 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻’’𑀢𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀝𑁆𑀞𑀸 𑀲𑀻𑀮𑀲𑀫𑁆𑀧𑀦𑁆𑀦𑀸𑀢𑀺 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀞𑀺𑀢𑀢𑁆𑀢𑀸 𑀢𑁂𑀦𑀧𑀺 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑀢𑁆𑀢𑀸 𑀥𑀫𑁆𑀫𑀝𑁆𑀞𑀸 𑀲𑀻𑀮𑀲𑀫𑁆𑀧𑀦𑁆𑀦𑀸. 𑀅𑀣 𑀯𑀸 𑀏𑀯𑀭𑀽𑀧𑀸𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀸𑀦𑀁 𑀤𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀽𑀭𑁂𑀦𑁆𑀢𑀺, 𑀢𑁂𑀲𑀼 𑀞𑀺𑀢𑀢𑁆𑀢𑀸 𑀥𑀫𑁆𑀫𑀝𑁆𑀞𑀸. 𑀢𑁂𑀦𑁂𑀯 𑀘 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑀢𑁆𑀢𑀸 𑀲𑀻𑀮𑀲𑀫𑁆𑀧𑀦𑁆𑀦𑀸𑀢𑀺. 𑀲𑀢𑁆𑀢𑀫𑀁.

𑁮. 𑀚𑁂𑀢𑀯𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮. 𑀅𑀝𑁆𑀞𑀫𑁂 𑀇𑀤𑀁 𑀳𑀺 𑀢𑀁 𑀚𑁂𑀢𑀯𑀦𑀦𑁆𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀤𑁂𑀯𑀧𑀼𑀢𑁆𑀢𑁄 𑀚𑁂𑀢𑀯𑀦𑀲𑁆𑀲 𑀘𑁂𑀯 𑀩𑀼𑀤𑁆𑀥𑀸𑀤𑀻𑀦𑀜𑁆𑀘 𑀯𑀡𑁆𑀡𑀪𑀡𑀦𑀢𑁆𑀣𑀁 𑀆𑀕𑀢𑁄 𑀏𑀯𑀫𑀸𑀳. 𑀇𑀲𑀺𑀲𑀗𑁆𑀖𑀦𑀺𑀲𑁂𑀯𑀺𑀢𑀦𑁆𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀦𑀺𑀲𑁂𑀯𑀺𑀢𑀁.

𑀏𑀯𑀁 𑀧𑀞𑀫𑀕𑀸𑀣𑀸𑀬 𑀚𑁂𑀢𑀯𑀦𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀓𑀣𑁂𑀦𑁆𑀢𑁄 𑀓𑀫𑁆𑀫𑀁 𑀯𑀺𑀚𑁆𑀚𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀫𑁆𑀫𑀦𑁆𑀢𑀺 𑀫𑀕𑁆𑀕𑀘𑁂𑀢𑀦𑀸. 𑀯𑀺𑀚𑁆𑀚𑀸𑀢𑀺 𑀫𑀕𑁆𑀕𑀧𑀜𑁆𑀜𑀸. 𑀥𑀫𑁆𑀫𑁄𑀢𑀺 𑀲𑀫𑀸𑀥𑀺𑀧𑀓𑁆𑀔𑀺𑀓𑀸 𑀥𑀫𑁆𑀫𑀸. 𑀲𑀻𑀮𑀁 𑀚𑀻𑀯𑀺𑀢𑀫𑀼𑀢𑁆𑀢𑀫𑀦𑁆𑀢𑀺 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀚𑀻𑀯𑀺𑀢𑀁 𑀉𑀢𑁆𑀢𑀫𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀯𑀺𑀚𑁆𑀚𑀸𑀢𑀺 𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑀸. 𑀥𑀫𑁆𑀫𑁄𑀢𑀺 𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀬𑁄. 𑀲𑀻𑀮𑀦𑁆𑀢𑀺 𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸. 𑀚𑀻𑀯𑀺𑀢𑀫𑀼𑀢𑁆𑀢𑀫𑀦𑁆𑀢𑀺 𑀏𑀢𑀲𑁆𑀫𑀺𑀁 𑀲𑀻𑀮𑁂 𑀞𑀺𑀢𑀲𑁆𑀲 𑀚𑀻𑀯𑀺𑀢𑀁 𑀦𑀸𑀫 𑀉𑀢𑁆𑀢𑀫𑀁. 𑀏𑀢𑁂𑀦 𑀫𑀘𑁆𑀘𑀸 𑀲𑀼𑀚𑁆𑀛𑀦𑁆𑀢𑀻𑀢𑀺 𑀏𑀢𑁂𑀦 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑁂𑀦 𑀲𑀢𑁆𑀢𑀸 𑀯𑀺𑀲𑀼𑀚𑁆𑀛𑀦𑁆𑀢𑀺.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀫𑀕𑁆𑀕𑁂𑀦 𑀲𑀼𑀚𑁆𑀛𑀦𑁆𑀢𑀺, 𑀦 𑀕𑁄𑀢𑁆𑀢𑀥𑀦𑁂𑀳𑀺, 𑀢𑀲𑁆𑀫𑀸. 𑀬𑁄𑀦𑀺𑀲𑁄 𑀯𑀺𑀘𑀺𑀦𑁂 𑀥𑀫𑁆𑀫𑀦𑁆𑀢𑀺 𑀉𑀧𑀸𑀬𑁂𑀦 𑀲𑀫𑀸𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀁 𑀯𑀺𑀘𑀺𑀦𑁂𑀬𑁆𑀬. 𑀏𑀯𑀁 𑀢𑀢𑁆𑀣 𑀯𑀺𑀲𑀼𑀚𑁆𑀛𑀢𑀻𑀢𑀺 𑀏𑀯𑀁 𑀢𑀲𑁆𑀫𑀺𑀁 𑀅𑀭𑀺𑀬𑀫𑀕𑁆𑀕𑁂 𑀯𑀺𑀲𑀼𑀚𑁆𑀛𑀢𑀺. 𑀅𑀣 𑀯𑀸 𑀬𑁄𑀦𑀺𑀲𑁄 𑀯𑀺𑀘𑀺𑀦𑁂 𑀥𑀫𑁆𑀫𑀦𑁆𑀢𑀺 𑀉𑀧𑀸𑀬𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑀥𑀫𑁆𑀫𑀁 𑀯𑀺𑀘𑀺𑀦𑁂𑀬𑁆𑀬. 𑀏𑀯𑀁 𑀢𑀢𑁆𑀣 𑀯𑀺𑀲𑀼𑀚𑁆𑀛𑀢𑀻𑀢𑀺 𑀏𑀯𑀁 𑀢𑁂𑀲𑀼 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀯𑀺𑀲𑀼𑀚𑁆𑀛𑀢𑀺.

𑀇𑀤𑀸𑀦𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀡𑁆𑀡𑀁 𑀓𑀣𑁂𑀦𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑁄𑀯𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀸𑀭𑀺𑀧𑀼𑀢𑁆𑀢𑁄𑀯𑀸𑀢𑀺 𑀅𑀯𑀥𑀸𑀭𑀡𑀯𑀘𑀦𑀁, 𑀏𑀢𑁂𑀳𑀺 𑀧𑀜𑁆𑀜𑀸𑀤𑀻𑀳𑀺 𑀲𑀸𑀭𑀺𑀧𑀼𑀢𑁆𑀢𑁄𑀯 𑀲𑁂𑀬𑁆𑀬𑁄𑀢𑀺 𑀯𑀤𑀢𑀺. 𑀉𑀧𑀲𑀫𑁂𑀦𑀸𑀢𑀺 𑀓𑀺𑀮𑁂𑀲𑀉𑀧𑀲𑀫𑁂𑀦. 𑀧𑀸𑀭𑀁 𑀕𑀢𑁄𑀢𑀺 𑀦𑀺𑀩𑁆𑀩𑀸𑀦𑀁 𑀕𑀢𑁄. 𑀬𑁄 𑀓𑁄𑀘𑀺 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑁄 𑀪𑀺𑀓𑁆𑀔𑀼, 𑀲𑁄 𑀏𑀢𑀸𑀯𑀧𑀭𑀫𑁄 𑀲𑀺𑀬𑀸, 𑀦 𑀣𑁂𑀭𑁂𑀦 𑀉𑀢𑁆𑀢𑀭𑀺𑀢𑀭𑁄 𑀦𑀸𑀫 𑀅𑀢𑁆𑀣𑀻𑀢𑀺 𑀯𑀤𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀅𑀝𑁆𑀞𑀫𑀁.

𑁯. 𑀫𑀘𑁆𑀙𑀭𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁯. 𑀦𑀯𑀫𑁂 𑀫𑀘𑁆𑀙𑀭𑀺𑀦𑁄𑀢𑀺 𑀫𑀘𑁆𑀙𑁂𑀭𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀏𑀓𑀘𑁆𑀘𑁄 𑀳𑀺 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑁂 𑀪𑀺𑀓𑁆𑀔𑀼𑀁 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸𑀧𑀺 𑀦 𑀯𑀦𑁆𑀤𑀢𑀺, 𑀅𑀜𑁆𑀜𑀢𑁆𑀣 𑀕𑀢𑁄 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑀓𑁆𑀓𑀘𑁆𑀘𑀁 𑀯𑀦𑁆𑀤𑀺𑀢𑁆𑀯𑀸 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀢𑀺 𑁋 ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀯𑀲𑀦𑀝𑁆𑀞𑀸𑀦𑀁 𑀦𑀸𑀕𑀘𑁆𑀙𑀣, 𑀲𑀫𑁆𑀧𑀦𑁆𑀦𑁄 𑀧𑀤𑁂𑀲𑁄, 𑀧𑀝𑀺𑀩𑀮𑀸 𑀫𑀬𑀁 𑀅𑀬𑁆𑀬𑀸𑀦𑀁 𑀬𑀸𑀕𑀼𑀪𑀢𑁆𑀢𑀸𑀤𑀻𑀳𑀺 𑀉𑀧𑀝𑁆𑀞𑀸𑀦𑀁 𑀓𑀸𑀢𑀼’’𑀦𑁆𑀢𑀺. 𑀪𑀺𑀓𑁆𑀔𑀽 ‘‘𑀲𑀤𑁆𑀥𑁄 𑀅𑀬𑀁 𑀉𑀧𑀸𑀲𑀓𑁄’’𑀢𑀺 𑀬𑀸𑀕𑀼𑀪𑀢𑁆𑀢𑀸𑀤𑀻𑀳𑀺 𑀲𑀗𑁆𑀕𑀡𑁆𑀳𑀦𑁆𑀢𑀺. 𑀅𑀣𑁂𑀓𑁄 𑀣𑁂𑀭𑁄 𑀢𑀲𑁆𑀲 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀢𑀺. 𑀲𑁄 𑀢𑀁 𑀤𑀺𑀲𑁆𑀯𑀸 𑀅𑀜𑁆𑀜𑁂𑀦 𑀯𑀸 𑀕𑀘𑁆𑀙𑀢𑀺, 𑀖𑀭𑀁 𑀯𑀸 𑀧𑀯𑀺𑀲𑀢𑀺. 𑀲𑀘𑁂𑀧𑀺 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀘𑁆𑀙𑀢𑀺, 𑀳𑀢𑁆𑀣𑁂𑀦 𑀯𑀦𑁆𑀤𑀺𑀢𑁆𑀯𑀸 𑁋 ‘‘𑀅𑀬𑁆𑀬𑀲𑁆𑀲 𑀪𑀺𑀓𑁆𑀔𑀁 𑀤𑁂𑀣, 𑀅𑀳𑀁 𑀏𑀓𑁂𑀦 𑀓𑀫𑁆𑀫𑁂𑀦 𑀕𑀘𑁆𑀙𑀸𑀫𑀻’’𑀢𑀺 𑀧𑀓𑁆𑀓𑀫𑀢𑀺. 𑀣𑁂𑀭𑁄 𑀲𑀓𑀮𑀕𑀸𑀫𑀁 𑀘𑀭𑀺𑀢𑁆𑀯𑀸 𑀢𑀼𑀘𑁆𑀙𑀧𑀢𑁆𑀢𑁄𑀯 𑀦𑀺𑀓𑁆𑀔𑀫𑀢𑀺. 𑀇𑀤𑀁 𑀢𑀸𑀯 𑀫𑀼𑀤𑀼𑀫𑀘𑁆𑀙𑀭𑀺𑀬𑀁 𑀦𑀸𑀫, 𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀅𑀤𑀸𑀬𑀓𑁄𑀧𑀺 𑀤𑀸𑀬𑀓𑁄 𑀯𑀺𑀬 𑀧𑀜𑁆𑀜𑀸𑀬𑀢𑀺. 𑀇𑀥 𑀧𑀦 𑀣𑀤𑁆𑀥𑀫𑀘𑁆𑀙𑀭𑀺𑀬𑀁 𑀅𑀥𑀺𑀧𑁆𑀧𑁂𑀢𑀁, 𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀽𑀲𑀼 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁂𑀲𑀼, ‘‘𑀣𑁂𑀭𑀸 𑀞𑀺𑀢𑀸’’𑀢𑀺 𑀯𑀼𑀢𑁆𑀢𑁂, ‘‘𑀓𑀺𑀁 𑀫𑀬𑁆𑀳𑀁 𑀧𑀸𑀤𑀸 𑀭𑀼𑀚𑁆𑀚𑀦𑁆𑀢𑀻’’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀲𑀺𑀮𑀸𑀣𑀫𑁆𑀪𑁄 𑀯𑀺𑀬 𑀔𑀸𑀡𑀼𑀓𑁄 𑀯𑀺𑀬 𑀘 𑀣𑀤𑁆𑀥𑁄 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀲𑀸𑀫𑀻𑀘𑀺𑀫𑁆𑀧𑀺 𑀦 𑀓𑀭𑁄𑀢𑀺. 𑀓𑀤𑀭𑀺𑀬𑀸𑀢𑀺 𑀇𑀤𑀁 𑀫𑀘𑁆𑀙𑀭𑀺𑀦𑁄𑀢𑀺 𑀧𑀤𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀫𑀼𑀤𑀼𑀓𑀫𑁆𑀧𑀺 𑀳𑀺 𑀫𑀘𑁆𑀙𑀭𑀺𑀬𑀁 ‘‘𑀫𑀘𑁆𑀙𑀭𑀺𑀬’’𑀦𑁆𑀢𑁂𑀯 𑀯𑀼𑀘𑁆𑀘𑀢𑀺, 𑀣𑀤𑁆𑀥𑀁 𑀧𑀦 𑀓𑀤𑀭𑀺𑀬𑀁 𑀦𑀸𑀫. 𑀧𑀭𑀺𑀪𑀸𑀲𑀓𑀸𑀢𑀺 𑀪𑀺𑀓𑁆𑀔𑀽 𑀖𑀭𑀤𑁆𑀯𑀸𑀭𑁂 𑀞𑀺𑀢𑁂 𑀤𑀺𑀲𑁆𑀯𑀸, ‘‘𑀓𑀺𑀁 𑀢𑀼𑀫𑁆𑀳𑁂 𑀓𑀲𑀺𑀢𑁆𑀯𑀸 𑀆𑀕𑀢𑀸, 𑀯𑀧𑀺𑀢𑁆𑀯𑀸, 𑀮𑀸𑀬𑀺𑀢𑁆𑀯𑀸? 𑀫𑀬𑀁 𑀅𑀢𑁆𑀢𑀦𑁄𑀧𑀺 𑀦 𑀮𑀪𑀸𑀫, 𑀓𑀼𑀢𑁄 𑀢𑀼𑀫𑁆𑀳𑀸𑀓𑀁, 𑀲𑀻𑀖𑀁 𑀦𑀺𑀓𑁆𑀔𑀫𑀣𑀸’’𑀢𑀺𑀆𑀤𑀻𑀳𑀺 𑀲𑀁𑀢𑀚𑁆𑀚𑀓𑀸. 𑀅𑀦𑁆𑀢𑀭𑀸𑀬𑀓𑀭𑀸𑀢𑀺 𑀤𑀸𑀬𑀓𑀲𑁆𑀲 𑀲𑀕𑁆𑀕𑀦𑁆𑀢𑀭𑀸𑀬𑁄, 𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀮𑀸𑀪𑀦𑁆𑀢𑀭𑀸𑀬𑁄, 𑀅𑀢𑁆𑀢𑀦𑁄 𑀉𑀧𑀖𑀸𑀢𑁄𑀢𑀺 𑀇𑀫𑁂𑀲𑀁 𑀅𑀦𑁆𑀢𑀭𑀸𑀬𑀸𑀦𑀁 𑀓𑀸𑀭𑀓𑀸.

𑀲𑀫𑁆𑀧𑀭𑀸𑀬𑁄𑀢𑀺 𑀧𑀭𑀮𑁄𑀓𑁄. 𑀭𑀢𑀻𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀭𑀢𑀺. 𑀔𑀺𑀟𑁆𑀟𑀸𑀢𑀺 𑀓𑀸𑀬𑀺𑀓𑀔𑀺𑀟𑁆𑀟𑀸𑀤𑀺𑀓𑀸 𑀢𑀺𑀯𑀺𑀥𑀸 𑀔𑀺𑀟𑁆𑀟𑀸. 𑀤𑀺𑀝𑁆𑀞𑁂 𑀥𑀫𑁆𑀫𑁂𑀲 𑀯𑀺𑀧𑀸𑀓𑁄𑀢𑀺 𑀢𑀲𑁆𑀫𑀺𑀁 𑀦𑀺𑀩𑁆𑀩𑀢𑁆𑀢𑀪𑀯𑀦𑁂 𑀤𑀺𑀝𑁆𑀞𑁂 𑀥𑀫𑁆𑀫𑁂 𑀏𑀲 𑀯𑀺𑀧𑀸𑀓𑁄. 𑀲𑀫𑁆𑀧𑀭𑀸𑀬𑁂 𑀘 𑀤𑀼𑀕𑁆𑀕𑀢𑀻𑀢𑀺 ‘‘𑀬𑀫𑀮𑁄𑀓𑀁 𑀉𑀧𑀧𑀚𑁆𑀚𑀭𑁂’’𑀢𑀺 𑀯𑀼𑀢𑁆𑀢𑁂 𑀲𑀫𑁆𑀧𑀭𑀸𑀬𑁂 𑀘 𑀤𑀼𑀕𑁆𑀕𑀢𑀺.

𑀯𑀤𑀜𑁆𑀜𑀽𑀢𑀺 𑀪𑀺𑀓𑁆𑀔𑀽 𑀖𑀭𑀤𑁆𑀯𑀸𑀭𑁂 𑀞𑀺𑀢𑀸 𑀓𑀺𑀜𑁆𑀘𑀸𑀧𑀺 𑀢𑀼𑀡𑁆𑀳𑀻𑀯 𑀳𑁄𑀦𑁆𑀢𑀺, 𑀅𑀢𑁆𑀣𑀢𑁄 𑀧𑀦 𑁋 ‘‘𑀪𑀺𑀓𑁆𑀔𑀁 𑀤𑁂𑀣𑀸’’𑀢𑀺 𑀯𑀤𑀦𑁆𑀢𑀺 𑀦𑀸𑀫. 𑀢𑀢𑁆𑀭 𑀬𑁂 ‘‘𑀫𑀬𑀁 𑀧𑀘𑀸𑀫, 𑀇𑀫𑁂 𑀧𑀦 𑀦 𑀧𑀘𑀦𑁆𑀢𑀺, 𑀧𑀘𑀫𑀸𑀦𑁂 𑀧𑀢𑁆𑀯𑀸 𑀅𑀮𑀪𑀦𑁆𑀢𑀸 𑀓𑀼𑀳𑀺𑀁 𑀮𑀪𑀺𑀲𑁆𑀲𑀦𑁆𑀢𑀻’’𑀢𑀺? 𑀤𑁂𑀬𑁆𑀬𑀥𑀫𑁆𑀫𑀁 𑀲𑀁𑀯𑀺𑀪𑀚𑀦𑁆𑀢𑀺, 𑀢𑁂 𑀯𑀤𑀜𑁆𑀜𑀽 𑀦𑀸𑀫. 𑀧𑀓𑀸𑀲𑀦𑁆𑀢𑀻𑀢𑀺 𑀯𑀺𑀫𑀸𑀦𑀧𑁆𑀧𑀪𑀸𑀬 𑀚𑁄𑀢𑀦𑁆𑀢𑀺. 𑀧𑀭𑀲𑀫𑁆𑀪𑀢𑁂𑀲𑀽𑀢𑀺 𑀧𑀭𑁂𑀳𑀺 𑀲𑀫𑁆𑀧𑀺𑀡𑁆𑀟𑀺𑀢𑁂𑀲𑀼. 𑀲𑀫𑁆𑀧𑀭𑀸𑀬𑁂 𑀘 𑀲𑀼𑀕𑁆𑀕𑀢𑀻𑀢𑀺, ‘‘𑀏𑀢𑁂 𑀲𑀕𑁆𑀕𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀲𑀫𑁆𑀧𑀭𑀸𑀬𑁂 𑀲𑀼𑀕𑀢𑀺. 𑀉𑀪𑀺𑀦𑁆𑀦𑀫𑁆𑀧𑀺 𑀯𑀸 𑀏𑀢𑁂𑀲𑀁 𑀢𑀢𑁄 𑀘𑀯𑀺𑀢𑁆𑀯𑀸 𑀧𑀼𑀦 𑀲𑀫𑁆𑀧𑀭𑀸𑀬𑁂𑀧𑀺 𑀤𑀼𑀕𑁆𑀕𑀢𑀺𑀲𑀼𑀕𑀢𑀺𑀬𑁂𑀯 𑀳𑁄𑀢𑀻𑀢𑀺. 𑀦𑀯𑀫𑀁.

𑁧𑁦. 𑀖𑀝𑀻𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦. 𑀤𑀲𑀫𑁂 𑀉𑀧𑀧𑀦𑁆𑀦𑀸𑀲𑁂𑀢𑀺 𑀦𑀺𑀩𑁆𑀩𑀢𑁆𑀢𑀺𑀯𑀲𑁂𑀦 𑀉𑀧𑀕𑀢𑀸. 𑀯𑀺𑀫𑀼𑀢𑁆𑀢𑀸𑀢𑀺 𑀅𑀯𑀺𑀳𑀸𑀩𑁆𑀭𑀳𑁆𑀫𑀮𑁄𑀓𑀲𑁆𑀫𑀺𑀁 𑀉𑀧𑀧𑀢𑁆𑀢𑀺𑀲𑀫𑀦𑀦𑁆𑀢𑀭𑀫𑁂𑀯 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀸. 𑀫𑀸𑀦𑀼𑀲𑀁 𑀤𑁂𑀳𑀦𑁆𑀢𑀺 𑀇𑀥 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀏𑀯 𑀯𑀼𑀢𑁆𑀢𑀸𑀦𑀺. 𑀤𑀺𑀩𑁆𑀩𑀬𑁄𑀕𑀦𑁆𑀢𑀺 𑀧𑀜𑁆𑀘 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺. 𑀉𑀧𑀘𑁆𑀘𑀕𑀼𑀦𑁆𑀢𑀺 𑀅𑀢𑀺𑀓𑁆𑀓𑀫𑀺𑀁𑀲𑀼. 𑀉𑀧𑀓𑁄𑀢𑀺𑀆𑀤𑀻𑀦𑀺 𑀢𑁂𑀲𑀁 𑀣𑁂𑀭𑀸𑀦𑀁 𑀦𑀸𑀫𑀸𑀦𑀺. 𑀓𑀼𑀲𑀮𑀻 𑀪𑀸𑀲𑀲𑀻 𑀢𑁂𑀲𑀦𑁆𑀢𑀺, ‘‘𑀓𑀼𑀲𑀮’’𑀦𑁆𑀢𑀺 𑀇𑀤𑀁 𑀯𑀘𑀦𑀁 𑀇𑀫𑀲𑁆𑀲 𑀅𑀢𑁆𑀣𑀻𑀢𑀺 𑀓𑀼𑀲𑀮𑀻, 𑀢𑁂𑀲𑀁 𑀣𑁂𑀭𑀸𑀦𑀁 𑀢𑁆𑀯𑀁 𑀓𑀼𑀲𑀮𑀁 𑀅𑀦𑀯𑀚𑁆𑀚𑀁 𑀪𑀸𑀲𑀲𑀺, 𑀣𑁄𑀫𑁂𑀲𑀺 𑀧𑀲𑀁𑀲𑀲𑀺, 𑀧𑀡𑁆𑀟𑀺𑀢𑁄𑀲𑀺 𑀤𑁂𑀯𑀧𑀼𑀢𑁆𑀢𑀸𑀢𑀺 𑀯𑀤𑀢𑀺. 𑀢𑀁 𑀢𑁂 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬𑀸𑀢𑀺 𑀢𑁂 𑀣𑁂𑀭𑀸 𑀢𑀁 𑀥𑀫𑁆𑀫𑀁 𑀇𑀥 𑀢𑀼𑀫𑁆𑀳𑀸𑀓𑀁 𑀲𑀸𑀲𑀦𑁂 𑀚𑀸𑀦𑀺𑀢𑁆𑀯𑀸. 𑀕𑀫𑁆𑀪𑀻𑀭𑀦𑁆𑀢𑀺 𑀕𑀫𑁆𑀪𑀻𑀭𑀢𑁆𑀣𑀁. 𑀩𑁆𑀭𑀳𑁆𑀫𑀘𑀸𑀭𑀻 𑀦𑀺𑀭𑀸𑀫𑀺𑀲𑁄𑀢𑀺 𑀦𑀺𑀭𑀸𑀫𑀺𑀲𑀩𑁆𑀭𑀳𑁆𑀫𑀘𑀸𑀭𑀻 𑀦𑀸𑀫 𑀅𑀦𑀸𑀕𑀸𑀫𑀻, 𑀅𑀦𑀸𑀕𑀸𑀫𑀻 𑀅𑀳𑁄𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀅𑀳𑀼𑀯𑀸𑀢𑀺 𑀅𑀳𑁄𑀲𑀺. 𑀲𑀕𑀸𑀫𑁂𑀬𑁆𑀬𑁄𑀢𑀺 𑀏𑀓𑀕𑀸𑀫𑀯𑀸𑀲𑀻. 𑀧𑀭𑀺𑀬𑁄𑀲𑀸𑀦𑀕𑀸𑀣𑀸 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀞𑀧𑀺𑀢𑀸𑀢𑀺. 𑀤𑀲𑀫𑀁.

𑀆𑀤𑀺𑀢𑁆𑀢𑀯𑀕𑁆𑀕𑁄 𑀧𑀜𑁆𑀘𑀫𑁄.

𑁬. 𑀚𑀭𑀸𑀯𑀕𑁆𑀕𑁄

𑁧. 𑀚𑀭𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧. 𑀚𑀭𑀸𑀯𑀕𑁆𑀕𑀲𑁆𑀲 𑀧𑀞𑀫𑁂 𑀲𑀸𑀥𑀽𑀢𑀺 𑀮𑀤𑁆𑀥𑀓𑀁 𑀪𑀤𑁆𑀤𑀓𑀁. 𑀲𑀻𑀮𑀁 𑀬𑀸𑀯 𑀚𑀭𑀸𑀢𑀺 𑀇𑀫𑀺𑀦𑀸 𑀇𑀤𑀁 𑀤𑀲𑁆𑀲𑁂𑀢𑀺 𑁋 𑀬𑀣𑀸 𑀫𑀼𑀢𑁆𑀢𑀸𑀫𑀡𑀺𑀭𑀢𑁆𑀢𑀯𑀢𑁆𑀣𑀸𑀤𑀻𑀦𑀺 𑀆𑀪𑀭𑀡𑀸𑀦𑀺 𑀢𑀭𑀼𑀡𑀓𑀸𑀮𑁂𑀬𑁂𑀯 𑀲𑁄𑀪𑀦𑁆𑀢𑀺, 𑀚𑀭𑀸𑀚𑀺𑀡𑁆𑀡𑀓𑀸𑀮𑁂 𑀢𑀸𑀦𑀺 𑀥𑀸𑀭𑁂𑀦𑁆𑀢𑁄 ‘‘𑀅𑀬𑀁 𑀅𑀚𑁆𑀚𑀸𑀧𑀺 𑀩𑀸𑀮𑀪𑀸𑀯𑀁 𑀧𑀢𑁆𑀣𑁂𑀢𑀺, 𑀉𑀫𑁆𑀫𑀢𑁆𑀢𑀓𑁄 𑀫𑀜𑁆𑀜𑁂’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺, 𑀦 𑀏𑀯𑀁 𑀲𑀻𑀮𑀁. 𑀲𑀻𑀮𑀜𑁆𑀳𑀺 𑀦𑀺𑀘𑁆𑀘𑀓𑀸𑀮𑀁 𑀲𑁄𑀪𑀢𑀺. 𑀩𑀸𑀮𑀓𑀸𑀮𑁂𑀧𑀺 𑀳𑀺 𑀲𑀻𑀮𑀁 𑀭𑀓𑁆𑀔𑀦𑁆𑀢𑀁 ‘‘𑀓𑀺𑀁 𑀇𑀫𑀲𑁆𑀲 𑀲𑀻𑀮𑁂𑀦𑀸’’𑀢𑀺? 𑀯𑀢𑁆𑀢𑀸𑀭𑁄 𑀦𑀢𑁆𑀣𑀺. 𑀫𑀚𑁆𑀛𑀺𑀫𑀓𑀸𑀮𑁂𑀧𑀺 𑀫𑀳𑀮𑁆𑀮𑀓𑀓𑀸𑀮𑁂𑀧𑀻𑀢𑀺.

𑀲𑀤𑁆𑀥𑀸 𑀲𑀸𑀥𑀼 𑀧𑀢𑀺𑀝𑁆𑀞𑀺𑀢𑀸𑀢𑀺 𑀳𑀢𑁆𑀣𑀸𑀴𑀯𑀓𑀘𑀺𑀢𑁆𑀢𑀕𑀳𑀧𑀢𑀺𑀆𑀤𑀻𑀦𑀁 𑀯𑀺𑀬 𑀫𑀕𑁆𑀕𑁂𑀦 𑀆𑀕𑀢𑀸 𑀧𑀢𑀺𑀝𑁆𑀞𑀺𑀢𑀲𑀤𑁆𑀥𑀸 𑀦𑀸𑀫 𑀲𑀸𑀥𑀼. 𑀧𑀜𑁆𑀜𑀸 𑀦𑀭𑀸𑀦𑀁 𑀭𑀢𑀦𑀦𑁆𑀢𑀺 𑀏𑀢𑁆𑀣 𑀘𑀺𑀢𑁆𑀢𑀻𑀓𑀢𑀝𑁆𑀞𑀸𑀤𑀻𑀳𑀺 𑀭𑀢𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑀤𑀺 𑀘𑀺𑀢𑁆𑀢𑀻𑀓𑀢𑀦𑁆𑀢𑀺 𑀭𑀢𑀦𑀁, 𑀦𑀦𑀼 𑀪𑀕𑀯𑀸 𑀘𑀺𑀢𑁆𑀢𑀻𑀓𑀢𑁄 𑀧𑀼𑀭𑀺𑀲𑀲𑀻𑀳𑁄, 𑀬𑁂 𑀘 𑀮𑁄𑀓𑁂 𑀘𑀺𑀢𑁆𑀢𑀻𑀓𑀢𑀸, 𑀢𑁂𑀲𑀁 𑀘𑀺𑀢𑁆𑀢𑀻𑀓𑀢𑁄 𑀪𑀕𑀯𑀸. 𑀬𑀤𑀺 𑀭𑀢𑀺𑀓𑀭𑀦𑁆𑀢𑀺 𑀭𑀢𑀦𑀁, 𑀦𑀦𑀼 𑀪𑀕𑀯𑀸 𑀭𑀢𑀺𑀓𑀭𑁄 𑀧𑀼𑀭𑀺𑀲𑀲𑀻𑀳𑁄, 𑀢𑀲𑁆𑀲 𑀯𑀘𑀦𑁂𑀦 𑀘𑀭𑀦𑁆𑀢𑀸 𑀛𑀸𑀦𑀭𑀢𑀺𑀲𑀼𑀔𑁂𑀦 𑀅𑀪𑀺𑀭𑀫𑀦𑁆𑀢𑀺. 𑀬𑀤𑀺 𑀅𑀢𑀼𑀮𑁆𑀬𑀦𑁆𑀢𑀺 𑀭𑀢𑀦𑀁, 𑀦𑀦𑀼 𑀪𑀕𑀯𑀸 𑀅𑀢𑀼𑀮𑁄 𑀧𑀼𑀭𑀺𑀲𑀲𑀻𑀳𑁄. 𑀦 𑀳𑀺 𑀲𑀓𑁆𑀓𑀸 𑀢𑀼𑀮𑁂𑀢𑀼𑀁 𑀕𑀼𑀡𑁂𑀳𑀺 𑀕𑀼𑀡𑀧𑀸𑀭𑀫𑀺𑀁 𑀕𑀢𑁄. 𑀬𑀤𑀺 𑀤𑀼𑀮𑁆𑀮𑀪𑀦𑁆𑀢𑀺 𑀭𑀢𑀦𑀁, 𑀦𑀦𑀼 𑀪𑀕𑀯𑀸 𑀤𑀼𑀮𑁆𑀮𑀪𑁄 𑀧𑀼𑀭𑀺𑀲𑀲𑀻𑀳𑁄. 𑀬𑀤𑀺 𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀦𑁆𑀢𑀺 𑀭𑀢𑀦𑀁, 𑀦𑀦𑀼 𑀪𑀕𑀯𑀸 𑀅𑀦𑁄𑀫𑁄 𑀲𑀻𑀮𑁂𑀦 𑀲𑀫𑀸𑀥𑀺𑀦𑀸 𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑁂𑀦𑀸’’𑀢𑀺.

𑀇𑀥 𑀧𑀦 𑀤𑀼𑀮𑁆𑀮𑀪𑀧𑀸𑀢𑀼𑀪𑀸𑀯𑀝𑁆𑀞𑁂𑀦 𑀧𑀜𑁆𑀜𑀸 ‘‘𑀭𑀢𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀼𑀜𑁆𑀜𑀦𑁆𑀢𑀺 𑀧𑀼𑀜𑁆𑀜𑀘𑁂𑀢𑀦𑀸, 𑀲𑀸 𑀳𑀺 𑀅𑀭𑀽𑀧𑀢𑁆𑀢𑀸 𑀧𑀭𑀺𑀳𑀭𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺. 𑀧𑀞𑀫𑀁.

𑁨. 𑀅𑀚𑀭𑀲𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨. 𑀤𑀼𑀢𑀺𑀬𑁂 𑀅𑀚𑀭𑀲𑀸𑀢𑀺 𑀅𑀚𑀻𑀭𑀡𑁂𑀦, 𑀅𑀯𑀺𑀧𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀲𑀻𑀮𑀜𑁆𑀳𑀺 𑀅𑀯𑀺𑀧𑀦𑁆𑀦𑀫𑁂𑀯 𑀲𑀸𑀥𑀼 𑀳𑁄𑀢𑀺, 𑀯𑀺𑀧𑀦𑁆𑀦𑀲𑀻𑀮𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀤𑀬𑁄𑀧𑀺 𑀦 𑀲𑀗𑁆𑀕𑀡𑁆𑀳𑀦𑁆𑀢𑀺, 𑀕𑀢𑀕𑀢𑀝𑁆𑀞𑀸𑀦𑁂 𑀦𑀺𑀤𑁆𑀥𑀫𑀺𑀢𑀩𑁆𑀩𑁄𑀯 𑀳𑁄𑀢𑀻𑀢𑀺. 𑀤𑀼𑀢𑀺𑀬𑀁.

𑁩. 𑀫𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁩. 𑀢𑀢𑀺𑀬𑁂 𑀲𑀢𑁆𑀣𑁄𑀢𑀺 𑀲𑀤𑁆𑀥𑀺𑀁𑀘𑀭𑁄, 𑀚𑀗𑁆𑀖𑀲𑀢𑁆𑀣𑁄 𑀯𑀸 𑀲𑀓𑀝𑀲𑀢𑁆𑀣𑁄 𑀯𑀸. 𑀫𑀺𑀢𑁆𑀢𑀦𑁆𑀢𑀺 𑀭𑁄𑀕𑁂 𑀉𑀧𑁆𑀧𑀦𑁆𑀦𑁂 𑀧𑀸𑀝𑀗𑁆𑀓𑀺𑀬𑀸 𑀯𑀸 𑀅𑀜𑁆𑀜𑁂𑀦 𑀯𑀸 𑀬𑀸𑀦𑁂𑀦 𑀳𑀭𑀺𑀢𑁆𑀯𑀸 𑀔𑁂𑀫𑀦𑁆𑀢𑀲𑀫𑁆𑀧𑀸𑀧𑀦𑁂𑀦 𑀫𑀺𑀢𑁆𑀢𑀁. 𑀲𑀓𑁂 𑀖𑀭𑁂𑀢𑀺 𑀅𑀢𑁆𑀢𑀦𑁄 𑀕𑁂𑀳𑁂. 𑀢𑀣𑀸𑀭𑀽𑀧𑁂 𑀭𑁄𑀕𑁂 𑀚𑀸𑀢𑁂 𑀧𑀼𑀢𑁆𑀢𑀪𑀭𑀺𑀬𑀸𑀤𑀬𑁄 𑀚𑀺𑀕𑀼𑀘𑁆𑀙𑀦𑁆𑀢𑀺, 𑀫𑀸𑀢𑀸 𑀧𑀦 𑀅𑀲𑀼𑀘𑀺𑀫𑁆𑀧𑀺 𑀘𑀦𑁆𑀤𑀦𑀁 𑀯𑀺𑀬 𑀫𑀜𑁆𑀜𑀢𑀺. 𑀢𑀲𑁆𑀫𑀸 𑀲𑀸 𑀲𑀓𑁂 𑀖𑀭𑁂 𑀫𑀺𑀢𑁆𑀢𑀁. 𑀲𑀳𑀸𑀬𑁄 𑀅𑀢𑁆𑀣𑀚𑀸𑀢𑀲𑁆𑀲𑀸𑀢𑀺 𑀉𑀧𑁆𑀧𑀦𑁆𑀦𑀓𑀺𑀘𑁆𑀘𑀲𑁆𑀲 𑀬𑁄 𑀢𑀁 𑀓𑀺𑀘𑁆𑀘𑀁 𑀯𑀳𑀢𑀺 𑀦𑀺𑀢𑁆𑀣𑀭𑀢𑀺, 𑀲𑁄 𑀓𑀺𑀘𑁆𑀘𑁂𑀲𑀼 𑀲𑀳 𑀅𑀬𑀦𑀪𑀸𑀯𑁂𑀦 𑀲𑀳𑀸𑀬𑁄 𑀫𑀺𑀢𑁆𑀢𑀁, 𑀲𑀼𑀭𑀸𑀧𑀸𑀦𑀸𑀤𑀺𑀲𑀳𑀸𑀬𑀸 𑀧𑀦 𑀦 𑀫𑀺𑀢𑁆𑀢𑀸. 𑀲𑀫𑁆𑀧𑀭𑀸𑀬𑀺𑀓𑀦𑁆𑀢𑀺 𑀲𑀫𑁆𑀧𑀭𑀸𑀬𑀳𑀺𑀢𑀁. 𑀢𑀢𑀺𑀬𑀁.

𑁪. 𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁪. 𑀘𑀢𑀼𑀢𑁆𑀣𑁂 𑀧𑀼𑀢𑁆𑀢𑀸 𑀯𑀢𑁆𑀣𑀽𑀢𑀺 𑀫𑀳𑀮𑁆𑀮𑀓𑀓𑀸𑀮𑁂 𑀧𑀝𑀺𑀚𑀕𑁆𑀕𑀦𑀝𑁆𑀞𑁂𑀦 𑀧𑀼𑀢𑁆𑀢𑀸 𑀧𑀢𑀺𑀝𑁆𑀞𑀸. 𑀧𑀭𑀫𑁄𑀢𑀺 𑀅𑀜𑁆𑀜𑁂𑀲𑀁 𑀅𑀓𑀣𑁂𑀢𑀩𑁆𑀩𑀲𑁆𑀲𑀧𑀺 𑀕𑀼𑀬𑁆𑀳𑀲𑁆𑀲 𑀓𑀣𑁂𑀢𑀩𑁆𑀩𑀬𑀼𑀢𑁆𑀢𑀢𑀸𑀬 𑀪𑀭𑀺𑀬𑀸 𑀧𑀭𑀫𑁄 𑀲𑀔𑀸 𑀦𑀸𑀫. 𑀘𑀢𑀼𑀢𑁆𑀣𑀁.

𑁫-𑁭. 𑀧𑀞𑀫𑀚𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫𑁫. 𑀧𑀜𑁆𑀘𑀫𑁂 𑀯𑀺𑀥𑀸𑀯𑀢𑀻𑀢𑀺 𑀧𑀭𑀲𑀫𑀼𑀤𑁆𑀤𑀸𑀤𑀺𑀕𑀫𑀦𑀯𑀲𑁂𑀦 𑀇𑀢𑁄 𑀘𑀺𑀢𑁄 𑀘 𑀯𑀺𑀥𑀸𑀯𑀢𑀺. 𑀧𑀜𑁆𑀘𑀫𑀁.

𑁫𑁬. 𑀙𑀝𑁆𑀞𑁂 𑀤𑀼𑀓𑁆𑀔𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀢𑁄. 𑀙𑀝𑁆𑀞𑀁.

𑁫𑁭. 𑀲𑀢𑁆𑀢𑀫𑁂 𑀧𑀭𑀸𑀬𑀡𑀦𑁆𑀢𑀺 𑀦𑀺𑀧𑁆𑀨𑀢𑁆𑀢𑀺 𑀅𑀯𑀲𑁆𑀲𑀬𑁄. 𑀲𑀢𑁆𑀢𑀫𑀁.

𑁮. 𑀉𑀧𑁆𑀧𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁮. 𑀅𑀝𑁆𑀞𑀫𑁂 𑀭𑀸𑀕𑁄 𑀉𑀧𑁆𑀧𑀣𑁄𑀢𑀺 𑀲𑀼𑀕𑀢𑀺𑀜𑁆𑀘 𑀦𑀺𑀩𑁆𑀩𑀸𑀦𑀜𑁆𑀘 𑀕𑀘𑁆𑀙𑀦𑁆𑀢𑀲𑁆𑀲 𑀅𑀫𑀕𑁆𑀕𑁄. 𑀭𑀢𑁆𑀢𑀺𑀦𑁆𑀤𑀺𑀯𑀓𑁆𑀔𑀬𑁄𑀢𑀺 𑀭𑀢𑁆𑀢𑀺𑀤𑀺𑀯𑁂𑀳𑀺, 𑀭𑀢𑁆𑀢𑀺𑀤𑀺𑀯𑁂𑀲𑀼 𑀯𑀸 𑀔𑀻𑀬𑀢𑀺. 𑀇𑀢𑁆𑀣𑀻 𑀫𑀮𑀦𑁆𑀢𑀺 𑀲𑁂𑀲𑀁 𑀩𑀸𑀳𑀺𑀭𑀫𑀮𑀁 𑀪𑀲𑁆𑀫𑀔𑀸𑀭𑀸𑀤𑀻𑀳𑀺 𑀥𑁄𑀯𑀺𑀢𑁆𑀯𑀸 𑀲𑀓𑁆𑀓𑀸 𑀲𑁄𑀥𑁂𑀢𑀼𑀁, 𑀫𑀸𑀢𑀼𑀕𑀸𑀫𑀫𑀮𑁂𑀦 𑀤𑀼𑀝𑁆𑀞𑁄 𑀧𑀦 𑀦 𑀲𑀓𑁆𑀓𑀸 𑀲𑀼𑀤𑁆𑀥𑁄 𑀦𑀸𑀫 𑀓𑀸𑀢𑀼𑀦𑁆𑀢𑀺 𑀇𑀢𑁆𑀣𑀻 ‘‘𑀫𑀮’’𑀦𑁆𑀢𑀺 𑀯𑀼𑀢𑁆𑀢𑀸. 𑀏𑀢𑁆𑀣𑀸𑀢𑀺 𑀏𑀢𑁆𑀣 𑀇𑀢𑁆𑀣𑀺𑀬𑀁 𑀧𑀚𑀸 𑀲𑀚𑁆𑀚𑀢𑀺. 𑀢𑀧𑁄𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀥𑀼𑀢𑀗𑁆𑀕𑀕𑀼𑀡𑀯𑀻𑀭𑀺𑀬𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀦𑀁 𑀦𑀸𑀫𑀁, 𑀇𑀥 𑀧𑀦 𑀞𑀧𑁂𑀢𑁆𑀯𑀸 𑀤𑀼𑀓𑁆𑀓𑀭𑀓𑀸𑀭𑀺𑀓𑀁 𑀲𑀩𑁆𑀩𑀸𑀧𑀺 𑀓𑀺𑀮𑁂𑀲𑀲𑀦𑁆𑀢𑀸𑀧𑀺𑀓𑀸 𑀧𑀝𑀺𑀧𑀤𑀸 𑀯𑀝𑁆𑀝𑀢𑀺. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑁂𑀣𑀼𑀦𑀯𑀺𑀭𑀢𑀺. 𑀅𑀝𑁆𑀞𑀫𑀁.

𑁯. 𑀤𑀼𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁯. 𑀦𑀯𑀫𑁂 𑀓𑀺𑀲𑁆𑀲 𑀘𑀸𑀪𑀺𑀭𑀢𑁄𑀢𑀺 𑀓𑀺𑀲𑁆𑀫𑀺𑀁 𑀅𑀪𑀺𑀭𑀢𑁄. 𑀤𑀼𑀢𑀺𑀬𑀸𑀢𑀺 𑀲𑀼𑀕𑀢𑀺𑀜𑁆𑀘𑁂𑀯 𑀦𑀺𑀩𑁆𑀩𑀸𑀦𑀜𑁆𑀘 𑀕𑀘𑁆𑀙𑀦𑁆𑀢𑀲𑁆𑀲 𑀤𑀼𑀢𑀺𑀬𑀺𑀓𑀸. 𑀧𑀜𑁆𑀜𑀸 𑀘𑁂𑀦𑀁 𑀧𑀲𑀸𑀲𑀢𑀻𑀢𑀺 𑀧𑀜𑁆𑀜𑀸 𑀏𑀢𑀁 𑀧𑀼𑀭𑀺𑀲𑀁 ‘‘𑀇𑀤𑀁 𑀓𑀭𑁄𑀳𑀺, 𑀇𑀤𑀁 𑀫𑀸𑀓𑀭𑀻’’𑀢𑀺 𑀅𑀦𑀼𑀲𑀸𑀲𑀢𑀺. 𑀦𑀯𑀫𑀁.

𑁧𑁦. 𑀓𑀯𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁦. 𑀤𑀲𑀫𑁂 𑀙𑀦𑁆𑀤𑁄 𑀦𑀺𑀤𑀸𑀦𑀦𑁆𑀢𑀺 𑀕𑀸𑀬𑀢𑁆𑀢𑀺𑀆𑀤𑀺𑀓𑁄 𑀙𑀦𑁆𑀤𑁄 𑀕𑀸𑀣𑀸𑀦𑀁 𑀦𑀺𑀤𑀸𑀦𑀁. 𑀧𑀼𑀩𑁆𑀩𑀧𑀝𑁆𑀞𑀸𑀧𑀦𑀕𑀸𑀣𑀸 𑀆𑀭𑀪𑀦𑁆𑀢𑁄 𑀳𑀺 ‘‘𑀓𑀢𑀭𑀘𑁆𑀙𑀦𑁆𑀤𑁂𑀦 𑀳𑁄𑀢𑀽’’𑀢𑀺 𑀆𑀭𑀪𑀢𑀺. 𑀯𑀺𑀬𑀜𑁆𑀚𑀦𑀦𑁆𑀢𑀺 𑀚𑀦𑀦𑀁. 𑀅𑀓𑁆𑀔𑀭𑀁 𑀳𑀺 𑀧𑀤𑀁 𑀚𑀦𑁂𑀢𑀺, 𑀧𑀤𑀁 𑀕𑀸𑀣𑀁 𑀚𑀦𑁂𑀢𑀺, 𑀕𑀸𑀣𑀸 𑀅𑀢𑁆𑀣𑀁 𑀧𑀓𑀸𑀲𑁂𑀢𑀻𑀢𑀺. 𑀦𑀸𑀫𑀲𑀦𑁆𑀦𑀺𑀲𑁆𑀲𑀺𑀢𑀸𑀢𑀺 𑀲𑀫𑀼𑀤𑁆𑀤𑀸𑀤𑀺𑀧𑀡𑁆𑀡𑀢𑁆𑀢𑀺𑀦𑀺𑀲𑁆𑀲𑀺𑀢𑀸. 𑀕𑀸𑀣𑀸 𑀆𑀭𑀪𑀦𑁆𑀢𑁄 𑀳𑀺 𑀲𑀫𑀼𑀤𑁆𑀤𑀁 𑀯𑀸 𑀧𑀣𑀯𑀺𑀁 𑀯𑀸 𑀬𑀁 𑀓𑀺𑀜𑁆𑀘𑀺 𑀦𑀸𑀫𑀁 𑀦𑀺𑀲𑁆𑀲𑀬𑀺𑀢𑁆𑀯𑀸𑀯 𑀆𑀭𑀪𑀢𑀺. 𑀆𑀲𑀬𑁄𑀢𑀺 𑀧𑀢𑀺𑀝𑁆𑀞𑀸. 𑀓𑀯𑀺𑀢𑁄 𑀳𑀺 𑀕𑀸𑀣𑀸 𑀧𑀯𑀢𑁆𑀢𑀦𑁆𑀢𑀺. 𑀲𑁄 𑀢𑀸𑀲𑀁 𑀧𑀢𑀺𑀝𑁆𑀞𑀸 𑀳𑁄𑀢𑀻𑀢𑀺. 𑀤𑀲𑀫𑀁.

𑀚𑀭𑀸𑀯𑀕𑁆𑀕𑁄 𑀙𑀝𑁆𑀞𑁄.

𑁭. 𑀅𑀤𑁆𑀥𑀯𑀕𑁆𑀕𑁄

𑁧. 𑀦𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁧. 𑀅𑀤𑁆𑀥𑀯𑀕𑁆𑀕𑀲𑁆𑀲 𑀧𑀞𑀫𑁂 𑀦𑀸𑀫𑀁 𑀲𑀩𑁆𑀩𑀁 𑀅𑀤𑁆𑀥𑀪𑀯𑀻𑀢𑀺 𑀦𑀸𑀫𑀁 𑀲𑀩𑁆𑀩𑀁 𑀅𑀪𑀺𑀪𑀯𑀢𑀺 𑀅𑀦𑀼𑀧𑀢𑀢𑀺. 𑀑𑀧𑀧𑀸𑀢𑀺𑀓𑁂𑀦 𑀯𑀸 𑀳𑀺 𑀓𑀺𑀢𑁆𑀢𑀺𑀫𑁂𑀦 𑀯𑀸 𑀦𑀸𑀫𑁂𑀦 𑀫𑀼𑀢𑁆𑀢𑁄 𑀲𑀢𑁆𑀢𑁄 𑀯𑀸 𑀲𑀗𑁆𑀔𑀸𑀭𑁄 𑀯𑀸 𑀦𑀢𑁆𑀣𑀺. 𑀬𑀲𑁆𑀲𑀧𑀺 𑀳𑀺 𑀭𑀼𑀓𑁆𑀔𑀲𑁆𑀲 𑀯𑀸 𑀧𑀸𑀲𑀸𑀡𑀲𑁆𑀲 𑀯𑀸 ‘‘𑀇𑀤𑀁 𑀦𑀸𑀫 𑀦𑀸𑀫’’𑀦𑁆𑀢𑀺 𑀦 𑀚𑀸𑀦𑀦𑁆𑀢𑀺, 𑀅𑀦𑀸𑀫𑀓𑁄𑀢𑁆𑀯𑁂𑀯 𑀢𑀲𑁆𑀲 𑀦𑀸𑀫𑀁 𑀳𑁄𑀢𑀺. 𑀧𑀞𑀫𑀁.

𑁨-𑁩. 𑀘𑀺𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁬𑁨. 𑀤𑀼𑀢𑀺𑀬𑁂 𑀲𑀩𑁆𑀩𑁂𑀯 𑀯𑀲𑀫𑀦𑁆𑀯𑀕𑀽𑀢𑀺 𑀬𑁂 𑀘𑀺𑀢𑁆𑀢𑀲𑁆𑀲 𑀯𑀲𑀁 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁𑀬𑁂𑀯 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀫𑁂𑀢𑀁. 𑀤𑀼𑀢𑀺𑀬𑀁.

𑁬𑁩. 𑀢𑀢𑀺𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑀺𑀬𑀁.

𑁪-𑁫. 𑀲𑀁𑀬𑁄𑀚𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁬𑁪. 𑀘𑀢𑀼𑀢𑁆𑀣𑁂 𑀓𑀺𑀁 𑀲𑀼 𑀲𑀁𑀬𑁄𑀚𑀦𑁄𑀢𑀺 𑀓𑀺𑀁 𑀲𑀁𑀬𑁄𑀚𑀦𑁄 𑀓𑀺𑀁 𑀩𑀦𑁆𑀥𑀦𑁄? 𑀯𑀺𑀘𑀸𑀭𑀡𑀦𑁆𑀢𑀺 𑀯𑀺𑀘𑀭𑀡𑀸 𑀧𑀸𑀤𑀸𑀦𑀺. 𑀩𑀳𑀼𑀯𑀘𑀦𑁂 𑀏𑀓𑀯𑀘𑀦𑀁 𑀓𑀢𑀁. 𑀯𑀺𑀢𑀓𑁆𑀓𑀲𑁆𑀲 𑀯𑀺𑀘𑀸𑀭𑀡𑀦𑁆𑀢𑀺 𑀯𑀺𑀢𑀓𑁆𑀓𑁄 𑀢𑀲𑁆𑀲 𑀧𑀸𑀤𑀸. 𑀘𑀢𑀼𑀢𑁆𑀣𑀁.

𑁬𑁫. 𑀧𑀜𑁆𑀘𑀫𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀜𑁆𑀘𑀫𑀁.

𑁬. 𑀅𑀢𑁆𑀢𑀳𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁬. 𑀙𑀝𑁆𑀞𑁂 𑀓𑁂𑀦𑀲𑁆𑀲𑀼𑀩𑁆𑀪𑀸𑀳𑀢𑁄𑀢𑀺 𑀓𑁂𑀦 𑀅𑀩𑁆𑀪𑀸𑀳𑀢𑁄. 𑀲𑀼-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀇𑀘𑁆𑀙𑀸𑀥𑀽𑀧𑀸𑀬𑀺𑀢𑁄𑀢𑀺 𑀇𑀘𑁆𑀙𑀸𑀬 𑀆𑀤𑀺𑀢𑁆𑀢𑁄. 𑀙𑀝𑁆𑀞𑀁.

𑁭-𑁯. 𑀉𑀟𑁆𑀟𑀺𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁬𑁭. 𑀲𑀢𑁆𑀢𑀫𑁂 𑀢𑀡𑁆𑀳𑀸𑀬 𑀉𑀟𑁆𑀟𑀺𑀢𑁄𑀢𑀺 𑀢𑀡𑁆𑀳𑀸𑀬 𑀉𑀮𑁆𑀮𑀗𑁆𑀖𑀺𑀢𑁄. 𑀘𑀓𑁆𑀔𑀼𑀜𑁆𑀳𑀺 𑀢𑀡𑁆𑀳𑀸𑀭𑀚𑁆𑀚𑀼𑀦𑀸 𑀆𑀯𑀼𑀦𑀺𑀢𑁆𑀯𑀸 𑀭𑀽𑀧𑀦𑀸𑀕𑀤𑀦𑁆𑀢𑁂 𑀉𑀟𑁆𑀟𑀺𑀢𑀁, 𑀲𑁄𑀢𑀸𑀤𑀻𑀦𑀺 𑀲𑀤𑁆𑀤𑀸𑀤𑀻𑀲𑀽𑀢𑀺 𑀢𑀡𑁆𑀳𑀸𑀬 𑀉𑀟𑁆𑀟𑀺𑀢𑁄 𑀮𑁄𑀓𑁄. 𑀫𑀘𑁆𑀘𑀼𑀦𑀸 𑀧𑀺𑀳𑀺𑀢𑁄𑀢𑀺 𑀅𑀦𑀦𑁆𑀢𑀭𑁂 𑀅𑀢𑁆𑀢𑀪𑀸𑀯𑁂 𑀓𑀢𑀁 𑀓𑀫𑁆𑀫𑀁 𑀦 𑀤𑀽𑀭𑀁 𑀏𑀓𑀘𑀺𑀢𑁆𑀢𑀦𑁆𑀢𑀭𑀁, 𑀩𑀮𑀯𑀢𑀺𑀬𑀸 𑀧𑀦 𑀫𑀸𑀭𑀡𑀦𑁆𑀢𑀺𑀓𑀯𑁂𑀤𑀦𑀸𑀬 𑀧𑀩𑁆𑀩𑀢𑁂𑀦 𑀯𑀺𑀬 𑀑𑀢𑁆𑀣𑀝𑀢𑁆𑀢𑀸 𑀲𑀢𑁆𑀢𑀸 𑀢𑀁 𑀦 𑀩𑀼𑀚𑁆𑀛𑀦𑁆𑀢𑀻𑀢𑀺 ‘‘𑀫𑀘𑁆𑀘𑀼𑀦𑀸 𑀧𑀺𑀳𑀺𑀢𑁄 𑀮𑁄𑀓𑁄’’𑀢𑀺 𑀯𑀼𑀢𑁆𑀢𑀁. 𑀲𑀢𑁆𑀢𑀫𑀁.

𑁬𑁮. 𑀅𑀝𑁆𑀞𑀫𑁂 𑀲𑁆𑀯𑁂𑀯 𑀧𑀜𑁆𑀳𑁄 𑀤𑁂𑀯𑀢𑀸𑀬 𑀳𑁂𑀝𑁆𑀞𑀼𑀧𑀭𑀺𑀬𑀸𑀬𑀯𑀲𑁂𑀦 𑀧𑀼𑀘𑁆𑀙𑀺𑀢𑁄. 𑀅𑀝𑁆𑀞𑀫𑀁.

𑁬𑁯. 𑀦𑀯𑀫𑁂 𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯. 𑀦𑀯𑀫𑀁.

𑁧𑁦. 𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁦. 𑀤𑀲𑀫𑁂 𑀓𑀺𑀲𑁆𑀫𑀺𑀁 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄𑀢𑀺 𑀓𑀺𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂 𑀮𑁄𑀓𑁄 𑀉𑀧𑁆𑀧𑀦𑁆𑀦𑁄𑀢𑀺 𑀧𑀼𑀘𑁆𑀙𑀢𑀺. 𑀙𑀲𑀽𑀢𑀺 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀆𑀬𑀢𑀦𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀉𑀧𑁆𑀧𑀦𑁆𑀦𑁄𑀢𑀺 𑀯𑀼𑀘𑁆𑀘𑀢𑀺. 𑀙𑀲𑀼 𑀓𑀼𑀩𑁆𑀩𑀢𑀻𑀢𑀺 𑀢𑁂𑀲𑀼𑀬𑁂𑀯 𑀙𑀲𑀼 𑀲𑀦𑁆𑀣𑀯𑀁 𑀓𑀭𑁄𑀢𑀺. 𑀉𑀧𑀸𑀤𑀸𑀬𑀸𑀢𑀺 𑀢𑀸𑀦𑀺𑀬𑁂𑀯 𑀘 𑀉𑀧𑀸𑀤𑀸𑀬 𑀆𑀕𑀫𑁆𑀫 𑀧𑀝𑀺𑀘𑁆𑀘 𑀧𑀯𑀢𑁆𑀢𑀢𑀺. 𑀯𑀺𑀳𑀜𑁆𑀜𑀢𑀻𑀢𑀺 𑀢𑁂𑀲𑀼𑀬𑁂𑀯 𑀙𑀲𑀼 𑀯𑀺𑀳𑀜𑁆𑀜𑀢𑀺 𑀧𑀻𑀴𑀺𑀬𑀢𑀺. 𑀇𑀢𑀺 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀯𑀲𑁂𑀦 𑀅𑀬𑀁 𑀧𑀜𑁆𑀳𑁄 𑀆𑀕𑀢𑁄, 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀁 𑀧𑀦 𑀯𑀲𑁂𑀦 𑀆𑀳𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀙𑀲𑀼 𑀳𑀺 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀅𑀬𑀁 𑀉𑀧𑁆𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺, 𑀙𑀲𑀼 𑀩𑀸𑀳𑀺𑀭𑁂𑀲𑀼 𑀲𑀦𑁆𑀣𑀯𑀁 𑀓𑀭𑁄𑀢𑀺, 𑀙𑀦𑁆𑀦𑀁 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀉𑀧𑀸𑀤𑀸𑀬 𑀙𑀲𑀼 𑀩𑀸𑀳𑀺𑀭𑁂𑀲𑀼 𑀯𑀺𑀳𑀜𑁆𑀜𑀢𑀻𑀢𑀺. 𑀤𑀲𑀫𑀁.

𑀅𑀤𑁆𑀥𑀯𑀕𑁆𑀕𑁄 𑀲𑀢𑁆𑀢𑀫𑁄.

𑁮. 𑀙𑁂𑀢𑁆𑀯𑀸𑀯𑀕𑁆𑀕𑁄

𑁧. 𑀙𑁂𑀢𑁆𑀯𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁧. 𑀙𑁂𑀢𑁆𑀯𑀸𑀯𑀕𑁆𑀕𑀲𑁆𑀲 𑀧𑀞𑀫𑁂 𑀙𑁂𑀢𑁆𑀯𑀸𑀢𑀺 𑀯𑀥𑀺𑀢𑁆𑀯𑀸. 𑀲𑀼𑀔𑀁 𑀲𑁂𑀢𑀻𑀢𑀺 𑀓𑁄𑀥𑀧𑀭𑀺𑀴𑀸𑀳𑁂𑀦 𑀅𑀧𑀭𑀺𑀤𑀬𑁆𑀳𑀫𑀸𑀦𑀢𑁆𑀢𑀸 𑀲𑀼𑀔𑀁 𑀲𑀬𑀢𑀺. 𑀦 𑀲𑁄𑀘𑀢𑀻𑀢𑀺 𑀓𑁄𑀥𑀯𑀺𑀦𑀸𑀲𑁂𑀦 𑀯𑀺𑀦𑀝𑁆𑀞𑀤𑁄𑀫𑀦𑀲𑁆𑀲𑀢𑁆𑀢𑀸 𑀦 𑀲𑁄𑀘𑀢𑀺. 𑀯𑀺𑀲𑀫𑀽𑀮𑀲𑁆𑀲𑀸𑀢𑀺 𑀤𑀼𑀓𑁆𑀔𑀯𑀺𑀧𑀸𑀓𑀲𑁆𑀲. 𑀫𑀥𑀼𑀭𑀕𑁆𑀕𑀲𑁆𑀲𑀸𑀢𑀺 𑀓𑀼𑀤𑁆𑀥𑀲𑁆𑀲 𑀧𑀝𑀺𑀓𑀼𑀚𑁆𑀛𑀺𑀢𑁆𑀯𑀸, 𑀅𑀓𑁆𑀓𑀼𑀝𑁆𑀞𑀲𑁆𑀲 𑀧𑀘𑁆𑀘𑀓𑁆𑀓𑁄𑀲𑀺𑀢𑁆𑀯𑀸, 𑀧𑀳𑀝𑀲𑁆𑀲 𑀘 𑀧𑀝𑀺𑀧𑀳𑀭𑀺𑀢𑁆𑀯𑀸 𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀦𑁆𑀥𑀸𑀬 𑀫𑀥𑀼𑀭𑀕𑁆𑀕𑁄𑀢𑀺 𑀯𑀼𑀢𑁆𑀢𑁄. 𑀇𑀫𑀲𑁆𑀫𑀺𑀁 𑀳𑀺 𑀞𑀸𑀦𑁂 𑀧𑀭𑀺𑀬𑁄𑀲𑀸𑀦𑀁 𑀅𑀕𑁆𑀕𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀭𑀺𑀬𑀸𑀢𑀺 𑀩𑀼𑀤𑁆𑀥𑀸𑀤𑀬𑁄. 𑀧𑀞𑀫𑀁.

𑁨. 𑀭𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁨. 𑀤𑀼𑀢𑀺𑀬𑁂 𑀧𑀜𑁆𑀜𑀸𑀬𑀢𑀺 𑀏𑀢𑁂𑀦𑀸𑀢𑀺 𑀧𑀜𑁆𑀜𑀸𑀡𑀁. 𑀥𑀚𑁄 𑀭𑀣𑀲𑁆𑀲𑀸𑀢𑀺 𑀫𑀳𑀦𑁆𑀢𑀲𑁆𑀫𑀺𑀁 𑀳𑀺 𑀲𑀗𑁆𑀕𑀸𑀫𑀲𑀻𑀲𑁂 𑀤𑀽𑀭𑀢𑁄𑀯 𑀥𑀚𑀁 𑀤𑀺𑀲𑁆𑀯𑀸 ‘‘𑀅𑀲𑀼𑀓𑀭𑀜𑁆𑀜𑁄 𑀦𑀸𑀫 𑀅𑀬𑀁 𑀭𑀣𑁄’’𑀢𑀺 𑀭𑀣𑁄 𑀧𑀸𑀓𑀝𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀥𑀚𑁄 𑀭𑀣𑀲𑁆𑀲 𑀧𑀜𑁆𑀜𑀸𑀡’’𑀦𑁆𑀢𑀺. 𑀅𑀕𑁆𑀕𑀺𑀧𑀺 𑀤𑀽𑀭𑀢𑁄𑀯 𑀥𑀽𑀫𑁂𑀦 𑀧𑀜𑁆𑀜𑀸𑀬𑀢𑀺. 𑀘𑁄𑀴𑀭𑀝𑁆𑀞𑀁 𑀧𑀡𑁆𑀟𑀼𑀭𑀝𑁆𑀞𑀦𑁆𑀢𑀺 𑀏𑀯𑀁 𑀭𑀝𑁆𑀞𑀫𑁆𑀧𑀺 𑀭𑀜𑁆𑀜𑀸 𑀧𑀜𑁆𑀜𑀸𑀬𑀢𑀺. 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀥𑀻𑀢𑀸𑀧𑀺 𑀧𑀦 𑀇𑀢𑁆𑀣𑀻 ‘‘𑀅𑀲𑀼𑀓𑀲𑁆𑀲 𑀦𑀸𑀫 𑀪𑀭𑀺𑀬𑀸’’𑀢𑀺 𑀪𑀢𑁆𑀢𑀸𑀭𑀁 𑀧𑀢𑁆𑀯𑀸𑀯 𑀧𑀜𑁆𑀜𑀸𑀬𑀢𑀺. 𑀢𑀲𑁆𑀫𑀸 𑀥𑀽𑀫𑁄 𑀧𑀜𑁆𑀜𑀸𑀡𑀫𑀕𑁆𑀕𑀺𑀦𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀁.

𑁩. 𑀯𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁩. 𑀢𑀢𑀺𑀬𑁂 𑀲𑀤𑁆𑀥𑀻𑀥 𑀯𑀺𑀢𑁆𑀢𑀦𑁆𑀢𑀺 𑀬𑀲𑁆𑀫𑀸 𑀲𑀤𑁆𑀥𑁄 𑀲𑀤𑁆𑀥𑀸𑀬 𑀫𑀼𑀢𑁆𑀢𑀫𑀡𑀺𑀆𑀤𑀻𑀦𑀺𑀧𑀺 𑀯𑀺𑀢𑁆𑀢𑀸𑀦𑀺 𑀮𑀪𑀢𑀺, 𑀢𑀺𑀲𑁆𑀲𑁄𑀧𑀺 𑀓𑀼𑀮𑀲𑀫𑁆𑀧𑀤𑀸, 𑀙 𑀓𑀸𑀫𑀲𑀕𑁆𑀕𑀸𑀦𑀺, 𑀦𑀯 𑀩𑁆𑀭𑀳𑁆𑀫𑀮𑁄𑀓𑁂 𑀧𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑁂 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀫𑁆𑀧𑀺 𑀮𑀪𑀢𑀺, 𑀢𑀲𑁆𑀫𑀸 𑀫𑀡𑀺𑀫𑀼𑀢𑁆𑀢𑀸𑀤𑀻𑀳𑀺 𑀯𑀺𑀢𑁆𑀢𑁂𑀳𑀺 𑀲𑀤𑁆𑀥𑀸𑀯𑀺𑀢𑁆𑀢𑀫𑁂𑀯 𑀲𑁂𑀝𑁆𑀞𑀁. 𑀥𑀫𑁆𑀫𑁄𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑁄. 𑀲𑀼𑀔𑀫𑀸𑀯𑀳𑀢𑀻𑀢𑀺 𑀲𑀩𑁆𑀩𑀫𑁆𑀧𑀺 𑀲𑀸𑀲𑀯𑀸𑀦𑀸𑀲𑀯𑀁 𑀅𑀲𑀁𑀓𑀺𑀮𑀺𑀝𑁆𑀞𑀲𑀼𑀔𑀁 𑀆𑀯𑀳𑀢𑀺. 𑀲𑀸𑀤𑀼𑀢𑀭𑀦𑁆𑀢𑀺 𑀮𑁄𑀓𑀲𑁆𑀫𑀺𑀁 𑀮𑁄𑀡𑀫𑁆𑀩𑀺𑀮𑀸𑀤𑀻𑀦𑀁 𑀲𑀩𑁆𑀩𑀭𑀲𑀸𑀦𑀁 𑀲𑀘𑁆𑀘𑀫𑁂𑀯 𑀫𑀥𑀼𑀭𑀢𑀭𑀁. 𑀲𑀘𑁆𑀘𑀲𑁆𑀫𑀺𑀁 𑀳𑀺 𑀞𑀺𑀢𑀸 𑀲𑀻𑀖𑀯𑁂𑀕𑀁 𑀦𑀤𑀺𑀫𑁆𑀧𑀺 𑀦𑀺𑀯𑀢𑁆𑀢𑁂𑀦𑁆𑀢𑀺, 𑀯𑀺𑀲𑀫𑁆𑀧𑀺 𑀦𑀺𑀫𑁆𑀫𑀤𑁆𑀤𑁂𑀦𑁆𑀢𑀺, 𑀅𑀕𑁆𑀕𑀺𑀫𑁆𑀧𑀺 𑀧𑀝𑀺𑀩𑀸𑀳𑀦𑁆𑀢𑀺, 𑀤𑁂𑀯𑀫𑁆𑀧𑀺 𑀯𑀲𑁆𑀲𑀸𑀧𑁂𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀲𑀩𑁆𑀩𑀭𑀲𑀸𑀦𑀁 𑀫𑀥𑀼𑀭𑀢𑀭𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀜𑁆𑀜𑀸𑀚𑀻𑀯𑀺𑀁 𑀚𑀻𑀯𑀺𑀢𑀫𑀸𑀳𑀼 𑀲𑁂𑀝𑁆𑀞𑀦𑁆𑀢𑀺 𑀬𑁄 𑀧𑀜𑁆𑀜𑀸𑀚𑀻𑀯𑀻 𑀕𑀳𑀝𑁆𑀞𑁄 𑀲𑀫𑀸𑀦𑁄 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀬 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀧𑀝𑁆𑀞𑀧𑁂𑀢𑁆𑀯𑀸 𑀧𑀜𑁆𑀜𑀸𑀬 𑀚𑀻𑀯𑀢𑀺, 𑀧𑀩𑁆𑀩𑀚𑀺𑀢𑁄 𑀯𑀸 𑀧𑀦 𑀥𑀫𑁆𑀫𑁂𑀦 𑀉𑀧𑁆𑀧𑀦𑁆𑀦𑁂 𑀧𑀘𑁆𑀘𑀬𑁂 ‘‘𑀇𑀤𑀫𑀢𑁆𑀣’’𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀆𑀤𑀸𑀬 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀺𑀬𑀨𑀮𑀸𑀥𑀺𑀕𑀫𑀯𑀲𑁂𑀦 𑀧𑀜𑁆𑀜𑀸𑀬 𑀚𑀻𑀯𑀢𑀺, 𑀢𑀁 𑀧𑀜𑁆𑀜𑀸𑀚𑀻𑀯𑀺𑀁 𑀧𑀼𑀕𑁆𑀕𑀮𑀁 𑀲𑁂𑀝𑁆𑀞𑀁 𑀚𑀻𑀯𑀺𑀢𑀁 𑀚𑀻𑀯𑀢𑀻𑀢𑀺 𑀆𑀳𑀼. 𑀢𑀢𑀺𑀬𑀁.

𑁪. 𑀯𑀼𑀝𑁆𑀞𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁪. 𑀘𑀢𑀼𑀢𑁆𑀣𑁂 𑀩𑀻𑀚𑀦𑁆𑀢𑀺 𑀉𑀧𑁆𑀧𑀢𑀦𑁆𑀢𑀸𑀦𑀁 𑀲𑀢𑁆𑀢𑀯𑀺𑀥𑀁 𑀥𑀜𑁆𑀜𑀩𑀻𑀚𑀁 𑀲𑁂𑀝𑁆𑀞𑀁. 𑀢𑀲𑁆𑀫𑀺𑀜𑁆𑀳𑀺 𑀉𑀕𑁆𑀕𑀢𑁂 𑀚𑀦𑀧𑀤𑁄 𑀔𑁂𑀫𑁄 𑀳𑁄𑀢𑀺 𑀲𑀼𑀪𑀺𑀓𑁆𑀔𑁄. 𑀦𑀺𑀧𑀢𑀢𑀦𑁆𑀢𑀺 𑀦𑀺𑀧𑀢𑀦𑁆𑀢𑀸𑀦𑀁 𑀫𑁂𑀖𑀯𑀼𑀝𑁆𑀞𑀺 𑀲𑁂𑀝𑁆𑀞𑀸. 𑀫𑁂𑀖𑀯𑀼𑀝𑁆𑀞𑀺𑀬𑀜𑁆𑀳𑀺 𑀲𑀢𑀺 𑀯𑀺𑀯𑀺𑀥𑀸𑀦𑀺 𑀲𑀲𑁆𑀲𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀚𑀦𑀧𑀤𑀸 𑀨𑀻𑀢𑀸 𑀳𑁄𑀦𑁆𑀢𑀺 𑀔𑁂𑀫𑀸 𑀲𑀼𑀪𑀺𑀓𑁆𑀔𑀸. 𑀧𑀯𑀚𑀫𑀸𑀦𑀸𑀦𑀦𑁆𑀢𑀺 𑀚𑀗𑁆𑀕𑀫𑀸𑀦𑀁 𑀧𑀤𑀲𑀸 𑀘𑀭𑀫𑀸𑀦𑀸𑀦𑀁 𑀕𑀸𑀯𑁄 𑀲𑁂𑀝𑁆𑀞𑀸. 𑀢𑀸 𑀦𑀺𑀲𑁆𑀲𑀸𑀬 𑀳𑀺 𑀲𑀢𑁆𑀢𑀸 𑀧𑀜𑁆𑀘 𑀕𑁄𑀭𑀲𑁂 𑀧𑀭𑀺𑀪𑀼𑀜𑁆𑀚𑀫𑀸𑀦𑀸 𑀲𑀼𑀔𑀁 𑀯𑀺𑀳𑀭𑀦𑁆𑀢𑀺. 𑀧𑀯𑀤𑀢𑀦𑁆𑀢𑀺 𑀭𑀸𑀚𑀓𑀼𑀮𑀫𑀚𑁆𑀛𑀸𑀤𑀻𑀲𑀼 𑀯𑀤𑀦𑁆𑀢𑀸𑀦𑀁 𑀧𑀼𑀢𑁆𑀢𑁄 𑀯𑀭𑁄. 𑀲𑁄 𑀳𑀺 𑀫𑀸𑀢𑀸𑀧𑀺𑀢𑀽𑀦𑀁 𑀅𑀦𑀢𑁆𑀣𑀸𑀯𑀳𑀁 𑀦 𑀯𑀤𑀢𑀺.

𑀯𑀺𑀚𑁆𑀚𑀸 𑀉𑀧𑁆𑀧𑀢𑀢𑀁 𑀲𑁂𑀝𑁆𑀞𑀸𑀢𑀺 𑀧𑀼𑀭𑀺𑀫𑀧𑀜𑁆𑀳𑁂 𑀓𑀺𑀭 𑀲𑀼𑀢𑁆𑀯𑀸 𑀲𑀫𑀻𑀧𑁂 𑀞𑀺𑀢𑀸 𑀏𑀓𑀸 𑀤𑁂𑀯𑀢𑀸 ‘‘𑀤𑁂𑀯𑀢𑁂, 𑀓𑀲𑁆𑀫𑀸 𑀢𑁆𑀯𑀁 𑀏𑀢𑀁 𑀧𑀜𑁆𑀳𑀁 𑀤𑀲𑀩𑀮𑀁 𑀧𑀼𑀘𑁆𑀙𑀲𑀺? 𑀅𑀳𑀁 𑀢𑁂 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀔𑀦𑁆𑀢𑀺𑀬𑀸 𑀮𑀤𑁆𑀥𑀺𑀬𑀸 𑀧𑀜𑁆𑀳𑀁 𑀓𑀣𑁂𑀲𑀺. 𑀅𑀣 𑀦𑀁 𑀇𑀢𑀭𑀸 𑀤𑁂𑀯𑀢𑀸 𑀆𑀳 𑁋 ‘‘𑀬𑀸𑀯 𑀧𑀥𑀁𑀲𑀻 𑀯𑀤𑁂𑀲𑀺 𑀤𑁂𑀯𑀢𑁂 𑀬𑀸𑀯 𑀧𑀕𑀩𑁆𑀪𑀸 𑀫𑀼𑀔𑀭𑀸, 𑀅𑀳𑀁 𑀩𑀼𑀤𑁆𑀥𑀁 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀸𑀫𑀺. 𑀢𑁆𑀯𑀁 𑀫𑀬𑁆𑀳𑀁 𑀓𑀲𑁆𑀫𑀸 𑀓𑀣𑁂𑀲𑀻’’𑀢𑀺? 𑀦𑀺𑀯𑀢𑁆𑀢𑁂𑀢𑁆𑀯𑀸 𑀢𑀤𑁂𑀯 𑀧𑀜𑁆𑀳𑀁 𑀤𑀲𑀩𑀮𑀁 𑀧𑀼𑀘𑁆𑀙𑀺. 𑀅𑀣𑀲𑁆𑀲𑀸 𑀲𑀢𑁆𑀣𑀸 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀯𑀺𑀚𑁆𑀚𑀸 𑀉𑀧𑁆𑀧𑀢𑀢𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀚𑁆𑀚𑀸𑀢𑀺 𑀘𑀢𑀼𑀫𑀕𑁆𑀕𑀯𑀺𑀚𑁆𑀚𑀸. 𑀲𑀸 𑀳𑀺 𑀉𑀧𑁆𑀧𑀢𑀫𑀸𑀦𑀸 𑀲𑀩𑁆𑀩𑀸𑀓𑀼𑀲𑀮𑀥𑀫𑁆𑀫𑁂 𑀲𑀫𑀼𑀕𑁆𑀖𑀸𑀢𑁂𑀢𑀺. 𑀢𑀲𑁆𑀫𑀸 ‘‘𑀉𑀧𑁆𑀧𑀢𑀢𑀁 𑀲𑁂𑀝𑁆𑀞𑀸’’𑀢𑀺 𑀯𑀼𑀢𑁆𑀢𑀸. 𑀅𑀯𑀺𑀚𑁆𑀚𑀸𑀢𑀺 𑀯𑀝𑁆𑀝𑀫𑀽𑀮𑀓𑀫𑀳𑀸𑀅𑀯𑀺𑀚𑁆𑀚𑀸. 𑀲𑀸 𑀳𑀺 𑀦𑀺𑀧𑀢𑀦𑁆𑀢𑀸𑀦𑀁 𑀑𑀲𑀻𑀤𑀦𑁆𑀢𑀸𑀦𑀁 𑀯𑀭𑀸. 𑀧𑀯𑀚𑀫𑀸𑀦𑀸𑀦𑀦𑁆𑀢𑀺 𑀧𑀤𑀲𑀸 𑀘𑀭𑀫𑀸𑀦𑀸𑀦𑀁 𑀚𑀗𑁆𑀕𑀫𑀸𑀦𑀁 𑀅𑀦𑁄𑀫𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀪𑀽𑀢𑁄 𑀲𑀗𑁆𑀖𑁄 𑀯𑀭𑁄. 𑀢𑀜𑁆𑀳𑀺 𑀢𑀢𑁆𑀣 𑀢𑀢𑁆𑀣 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀲𑀢𑁆𑀢𑀸 𑀲𑁄𑀢𑁆𑀣𑀺𑀁 𑀧𑀸𑀧𑀼𑀡𑀦𑁆𑀢𑀺. 𑀩𑀼𑀤𑁆𑀥𑁄𑀢𑀺 𑀬𑀸𑀤𑀺𑀲𑁄 𑀧𑀼𑀢𑁆𑀢𑁄 𑀯𑀸 𑀳𑁄𑀢𑀼 𑀅𑀜𑁆𑀜𑁄 𑀯𑀸, 𑀬𑁂𑀲𑀁 𑀓𑁂𑀲𑀜𑁆𑀘𑀺 𑀯𑀤𑀫𑀸𑀦𑀸𑀦𑀁 𑀩𑀼𑀤𑁆𑀥𑁄 𑀯𑀭𑁄. 𑀢𑀲𑁆𑀲 𑀳𑀺 𑀥𑀫𑁆𑀫𑀤𑁂𑀲𑀦𑀁 𑀆𑀕𑀫𑁆𑀫 𑀅𑀦𑁂𑀓𑀲𑀢𑀲𑀳𑀲𑁆𑀲𑀸𑀦𑀁 𑀧𑀸𑀡𑀸𑀦𑀁 𑀩𑀦𑁆𑀥𑀦𑀫𑁄𑀓𑁆𑀔𑁄 𑀳𑁄𑀢𑀻𑀢𑀺. 𑀘𑀢𑀼𑀢𑁆𑀣𑀁.

𑁫. 𑀪𑀻𑀢𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁫. 𑀧𑀜𑁆𑀘𑀫𑁂 𑀓𑀺𑀁𑀲𑀽𑀥 𑀪𑀻𑀢𑀸𑀢𑀺 𑀓𑀺𑀁 𑀪𑀻𑀢𑀸? 𑀫𑀕𑁆𑀕𑁄 𑀘𑀦𑁂𑀓𑀸𑀬𑀢𑀦𑀧𑁆𑀧𑀯𑀼𑀢𑁆𑀢𑁄𑀢𑀺 𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑀯𑀲𑁂𑀦 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺 𑀓𑀣𑀺𑀢𑁄. 𑀏𑀯𑀁 𑀲𑀦𑁆𑀢𑁂 𑀓𑀺𑀲𑁆𑀲 𑀪𑀻𑀢𑀸 𑀳𑀼𑀢𑁆𑀯𑀸 𑀅𑀬𑀁 𑀚𑀦𑀢𑀸 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀅𑀕𑁆𑀕𑀳𑁂𑀲𑀻𑀢𑀺 𑀯𑀤𑀢𑀺. 𑀪𑀽𑀭𑀺𑀧𑀜𑁆𑀜𑀸𑀢𑀺 𑀩𑀳𑀼𑀧𑀜𑁆𑀜 𑀉𑀲𑁆𑀲𑀦𑁆𑀦𑀧𑀜𑁆𑀜. 𑀧𑀭𑀮𑁄𑀓𑀁 𑀦 𑀪𑀸𑀬𑁂𑀢𑀺 𑀇𑀫𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁 𑀕𑀘𑁆𑀙𑀦𑁆𑀢𑁄 𑀦 𑀪𑀸𑀬𑁂𑀬𑁆𑀬. 𑀧𑀡𑀺𑀥𑀸𑀬𑀸𑀢𑀺 𑀞𑀧𑁂𑀢𑁆𑀯𑀸. 𑀩𑀳𑁆𑀯𑀦𑁆𑀦𑀧𑀸𑀦𑀁 𑀖𑀭𑀫𑀸𑀯𑀲𑀦𑁆𑀢𑁄𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑀸𑀤𑀬𑁄 𑀯𑀺𑀬 𑀩𑀳𑁆𑀯𑀦𑁆𑀦𑀧𑀸𑀦𑁂 𑀖𑀭𑁂 𑀯𑀲𑀦𑁆𑀢𑁄. 𑀲𑀁𑀯𑀺𑀪𑀸𑀕𑀻𑀢𑀺 𑀅𑀘𑁆𑀙𑀭𑀸𑀬 𑀕𑀳𑀺𑀢𑀫𑁆𑀧𑀺 𑀦𑀔𑁂𑀦 𑀨𑀸𑀮𑁂𑀢𑁆𑀯𑀸 𑀧𑀭𑀲𑁆𑀲 𑀤𑀢𑁆𑀯𑀸𑀯 𑀪𑀼𑀜𑁆𑀚𑀦𑀲𑀻𑀮𑁄. 𑀯𑀤𑀜𑁆𑀜𑀽𑀢𑀺 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀇𑀤𑀸𑀦𑀺 𑀕𑀸𑀣𑀸𑀬 𑀅𑀗𑁆𑀕𑀸𑀦𑀺 𑀉𑀤𑁆𑀥𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸𑀦𑀺 𑁋 ‘‘𑀯𑀸𑀘’’𑀦𑁆𑀢𑀺 𑀳𑀺 𑀇𑀫𑀺𑀦𑀸 𑀘𑀢𑁆𑀢𑀸𑀭𑀺 𑀯𑀘𑀻𑀲𑀼𑀘𑀭𑀺𑀢𑀸𑀦𑀺 𑀕𑀳𑀺𑀢𑀸𑀦𑀺, ‘‘𑀫𑀦𑁂𑀦𑀸’’𑀢𑀺𑀧𑀤𑁂𑀦 𑀢𑀻𑀡𑀺 𑀫𑀦𑁄𑀲𑀼𑀘𑀭𑀺𑀢𑀸𑀦𑀺, ‘‘𑀓𑀸𑀬𑁂𑀦𑀸’’𑀢𑀺 𑀧𑀤𑁂𑀦 𑀢𑀻𑀡𑀺 𑀓𑀸𑀬𑀲𑀼𑀘𑀭𑀺𑀢𑀸𑀦𑀺. 𑀇𑀢𑀺 𑀇𑀫𑁂 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸 𑀧𑀼𑀩𑁆𑀩𑀲𑀼𑀤𑁆𑀥𑀺𑀅𑀗𑁆𑀕𑀁 𑀦𑀸𑀫. 𑀩𑀳𑁆𑀯𑀦𑁆𑀦𑀧𑀸𑀦𑀁 𑀖𑀭𑀫𑀸𑀯𑀲𑀦𑁆𑀢𑁄𑀢𑀺 𑀇𑀫𑀺𑀦𑀸 𑀬𑀜𑁆𑀜𑀉𑀧𑀓𑁆𑀔𑀭𑁄 𑀕𑀳𑀺𑀢𑁄. 𑀲𑀤𑁆𑀥𑁄𑀢𑀺 𑀏𑀓𑀫𑀗𑁆𑀕𑀁, 𑀫𑀼𑀤𑀽𑀢𑀺 𑀏𑀓𑀁, 𑀲𑀁𑀯𑀺𑀪𑀸𑀕𑀻𑀢𑀺 𑀏𑀓𑀁, 𑀯𑀤𑀜𑁆𑀜𑀽𑀢𑀺 𑀏𑀓𑀁. 𑀇𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀲𑀦𑁆𑀥𑀸𑀬 ‘‘𑀏𑀢𑁂𑀲𑀼 𑀥𑀫𑁆𑀫𑁂𑀲𑀼 𑀞𑀺𑀢𑁄 𑀘𑀢𑀽𑀲𑀽’’𑀢𑀺 𑀆𑀳.

𑀅𑀧𑀭𑁄𑀧𑀺 𑀧𑀭𑀺𑀬𑀸𑀬𑁄 𑁋 𑀯𑀸𑀘𑀦𑁆𑀢𑀺𑀆𑀤𑀻𑀦𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺, 𑀩𑀳𑁆𑀯𑀦𑁆𑀦𑀧𑀸𑀦𑀦𑁆𑀢𑀺 𑀇𑀫𑀺𑀦𑀸 𑀬𑀜𑁆𑀜𑀉𑀧𑀓𑁆𑀔𑀭𑁄𑀯 𑀕𑀳𑀺𑀢𑁄, 𑀲𑀤𑁆𑀥𑁄 𑀫𑀼𑀤𑀽 𑀲𑀁𑀯𑀺𑀪𑀸𑀕𑀻 𑀯𑀤𑀜𑁆𑀜𑀽𑀢𑀺 𑀏𑀓𑀁 𑀅𑀗𑁆𑀕𑀁. 𑀅𑀧𑀭𑁄 𑀤𑀼𑀓𑀦𑀬𑁄 𑀦𑀸𑀫 𑀳𑁄𑀢𑀺. ‘‘𑀯𑀸𑀘𑀁 𑀫𑀦𑀜𑁆𑀘𑀸’’𑀢𑀺 𑀇𑀤𑀫𑁂𑀓𑀁 𑀅𑀗𑁆𑀕𑀁, ‘‘𑀓𑀸𑀬𑁂𑀦 𑀧𑀸𑀧𑀸𑀦𑀺 𑀅𑀓𑀼𑀩𑁆𑀩𑀫𑀸𑀦𑁄, 𑀩𑀳𑁆𑀯𑀦𑁆𑀦𑀧𑀸𑀦𑀁 𑀖𑀭𑀫𑀸𑀯𑀲𑀦𑁆𑀢𑁄’’𑀢𑀺 𑀏𑀓𑀁, ‘‘𑀲𑀤𑁆𑀥𑁄 𑀫𑀼𑀤𑀽’’𑀢𑀺 𑀏𑀓𑀁, ‘‘𑀲𑀁𑀯𑀺𑀪𑀸𑀕𑀻 𑀯𑀤𑀜𑁆𑀜𑀽’’𑀢𑀺 𑀏𑀓𑀁. 𑀏𑀢𑁂𑀲𑀼 𑀘𑀢𑀽𑀲𑀼 𑀥𑀫𑁆𑀫𑁂𑀲𑀼 𑀞𑀺𑀢𑁄 𑀥𑀫𑁆𑀫𑁂 𑀞𑀺𑀢𑁄 𑀦𑀸𑀫 𑀳𑁄𑀢𑀺. 𑀲𑁄 𑀇𑀢𑁄 𑀧𑀭𑀮𑁄𑀓𑀁 𑀕𑀘𑁆𑀙𑀦𑁆𑀢𑁄 𑀦 𑀪𑀸𑀬𑀢𑀺. 𑀧𑀜𑁆𑀘𑀫𑀁.

𑁬. 𑀦𑀚𑀻𑀭𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁬. 𑀙𑀝𑁆𑀞𑁂 𑀦𑀸𑀫𑀕𑁄𑀢𑁆𑀢𑀁 𑀦 𑀚𑀻𑀭𑀢𑀻𑀢𑀺 𑀅𑀢𑀻𑀢𑀩𑀼𑀤𑁆𑀥𑀸𑀦𑀁 𑀬𑀸𑀯𑀚𑁆𑀚𑀤𑀺𑀯𑀲𑀸 𑀦𑀸𑀫𑀕𑁄𑀢𑁆𑀢𑀁 𑀓𑀣𑀺𑀬𑀢𑀺, 𑀢𑀲𑁆𑀫𑀸 𑀦 𑀚𑀻𑀭𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀧𑁄𑀭𑀸𑀡𑀸 𑀧𑀦 ‘‘𑀅𑀤𑁆𑀥𑀸𑀦𑁂 𑀕𑀘𑁆𑀙𑀦𑁆𑀢𑁂 𑀦 𑀧𑀜𑁆𑀜𑀸𑀬𑀺𑀲𑁆𑀲𑀢𑀺, 𑀚𑀻𑀭𑀡𑀲𑀪𑀸𑀯𑁄 𑀧𑀦 𑀦 𑀳𑁄𑀢𑀺𑀬𑁂𑀯𑀸’’𑀢𑀺 𑀯𑀤𑀦𑁆𑀢𑀺. 𑀆𑀮𑀲𑁆𑀬𑀦𑁆𑀢𑀺 𑀆𑀮𑀲𑀺𑀬𑀁, 𑀬𑁂𑀦 𑀞𑀺𑀢𑀝𑁆𑀞𑀸𑀦𑁂 𑀞𑀺𑀢𑁄𑀯, 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄𑀯 𑀳𑁄𑀢𑀺, 𑀢𑁂𑀮𑁂𑀧𑀺 𑀉𑀢𑁆𑀢𑀭𑀦𑁆𑀢𑁂 𑀞𑀺𑀢𑀺𑀁 𑀦 𑀓𑀭𑁄𑀢𑀺. 𑀧𑀫𑀸𑀤𑁄𑀢𑀺 𑀦𑀺𑀤𑁆𑀤𑀸𑀬 𑀯𑀸 𑀓𑀺𑀮𑁂𑀲𑀯𑀲𑁂𑀦 𑀯𑀸 𑀧𑀫𑀸𑀤𑁄. 𑀅𑀦𑀼𑀝𑁆𑀞𑀸𑀦𑀦𑁆𑀢𑀺 𑀓𑀫𑁆𑀫𑀲𑀫𑀬𑁂 𑀓𑀫𑁆𑀫𑀓𑀭𑀡𑀯𑀻𑀭𑀺𑀬𑀸𑀪𑀸𑀯𑁄. 𑀅𑀲𑀁𑀬𑀫𑁄𑀢𑀺 𑀲𑀻𑀮𑀲𑀜𑁆𑀜𑀫𑀸𑀪𑀸𑀯𑁄 𑀯𑀺𑀲𑁆𑀲𑀝𑁆𑀞𑀸𑀘𑀸𑀭𑀢𑀸. 𑀦𑀺𑀤𑁆𑀤𑀸𑀢𑀺 𑀲𑁄𑀧𑁆𑀧𑀩𑀳𑀼𑀮𑀢𑀸. 𑀢𑀸𑀬 𑀕𑀘𑁆𑀙𑀦𑁆𑀢𑁄𑀧𑀺 𑀞𑀺𑀢𑁄𑀧𑀺 𑀦𑀺𑀲𑀺𑀦𑁆𑀦𑁄𑀧𑀺 𑀦𑀺𑀤𑁆𑀤𑀸𑀬𑀢𑀺, 𑀧𑀕𑁂𑀯 𑀦𑀺𑀧𑀦𑁆𑀦𑁄. 𑀢𑀦𑁆𑀤𑀻𑀢𑀺 𑀅𑀢𑀺𑀘𑁆𑀙𑀸𑀢𑀸𑀤𑀺𑀯𑀲𑁂𑀦 𑀆𑀕𑀦𑁆𑀢𑀼𑀓𑀸𑀮𑀲𑀺𑀬𑀁. 𑀢𑁂 𑀙𑀺𑀤𑁆𑀤𑁂𑀢𑀺 𑀢𑀸𑀦𑀺 𑀙 𑀙𑀺𑀤𑁆𑀤𑀸𑀦𑀺 𑀯𑀺𑀯𑀭𑀸𑀦𑀺. 𑀲𑀩𑁆𑀩𑀲𑁄𑀢𑀺 𑀲𑀩𑁆𑀩𑀸𑀓𑀸𑀭𑁂𑀦. 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀯𑀺𑀯𑀚𑁆𑀚𑀬𑁂𑀢𑀺 𑀯𑀚𑁆𑀚𑁂𑀬𑁆𑀬 𑀚𑀳𑁂𑀬𑁆𑀬. 𑀙𑀝𑁆𑀞𑀁.

𑁭. 𑀇𑀲𑁆𑀲𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁭. 𑀲𑀢𑁆𑀢𑀫𑁂 𑀲𑀢𑁆𑀣𑀫𑀮𑀦𑁆𑀢𑀺 𑀫𑀮𑀕𑁆𑀕𑀳𑀺𑀢𑀲𑀢𑁆𑀣𑀁. 𑀓𑀺𑀁 𑀲𑀼 𑀳𑀭𑀦𑁆𑀢𑀁 𑀯𑀸𑀭𑁂𑀦𑁆𑀢𑀻𑀢𑀺 𑀓𑀁 𑀳𑀭𑀦𑁆𑀢𑀁 𑀦𑀺𑀲𑁂𑀥𑁂𑀦𑁆𑀢𑀺. 𑀯𑀲𑁄𑀢𑀺 𑀆𑀡𑀸𑀧𑀯𑀢𑁆𑀢𑀦𑀁. 𑀇𑀢𑁆𑀣𑀻𑀢𑀺 𑀅𑀯𑀺𑀲𑁆𑀲𑀚𑁆𑀚𑀦𑀻𑀬𑀪𑀡𑁆𑀟𑀢𑁆𑀢𑀸 ‘‘𑀇𑀢𑁆𑀣𑀻 𑀪𑀡𑁆𑀟𑀸𑀦𑀫𑀼𑀢𑁆𑀢𑀫𑀁, 𑀯𑀭𑀪𑀡𑁆𑀟’’𑀦𑁆𑀢𑀺 𑀆𑀳. 𑀅𑀣 𑀯𑀸 𑀲𑀩𑁆𑀩𑁂𑀧𑀺 𑀩𑁄𑀥𑀺𑀲𑀢𑁆𑀢𑀸 𑀘 𑀘𑀓𑁆𑀓𑀯𑀢𑁆𑀢𑀺𑀦𑁄 𑀘 𑀫𑀸𑀢𑀼𑀓𑀼𑀘𑁆𑀙𑀺𑀬𑀁𑀬𑁂𑀯 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 ‘‘𑀇𑀢𑁆𑀣𑀻 𑀪𑀡𑁆𑀟𑀸𑀦𑀫𑀼𑀢𑁆𑀢𑀫’’𑀦𑁆𑀢𑀺 𑀆𑀳. 𑀓𑁄𑀥𑁄 𑀲𑀢𑁆𑀣𑀫𑀮𑀦𑁆𑀢𑀺 𑀓𑁄𑀥𑁄 𑀫𑀮𑀕𑁆𑀕𑀳𑀺𑀢𑀲𑀢𑁆𑀣𑀲𑀤𑀺𑀲𑁄, 𑀧𑀜𑁆𑀜𑀸𑀲𑀢𑁆𑀣𑀲𑁆𑀲 𑀯𑀸 𑀫𑀮𑀦𑁆𑀢𑀺 𑀲𑀢𑁆𑀣𑀫𑀮𑀁. 𑀅𑀩𑁆𑀩𑀼𑀤𑀦𑁆𑀢𑀺 𑀯𑀺𑀦𑀸𑀲𑀓𑀸𑀭𑀡𑀁, 𑀘𑁄𑀭𑀸 𑀮𑁄𑀓𑀲𑁆𑀫𑀺𑀁 𑀯𑀺𑀦𑀸𑀲𑀓𑀸𑀢𑀺 𑀅𑀢𑁆𑀣𑁄. 𑀳𑀭𑀦𑁆𑀢𑁄𑀢𑀺 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑁄. 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀳𑀺 𑀧𑀝𑁆𑀞𑀧𑀺𑀢𑀓𑀸𑀮𑁂𑀬𑁂𑀯 𑀫𑀦𑀼𑀲𑁆𑀲𑁂𑀳𑀺 𑀧𑀭𑀺𑀘𑁆𑀘𑀢𑁆𑀢𑀸𑀦𑀺. 𑀢𑁂𑀲𑀁 𑀢𑀸𑀦𑀺 𑀳𑀭𑀦𑁆𑀢𑁄 𑀲𑀫𑀡𑁄 𑀧𑀺𑀬𑁄 𑀳𑁄𑀢𑀺, 𑀅𑀦𑀸𑀳𑀭𑀦𑁆𑀢𑁂 𑀧𑀼𑀜𑁆𑀜𑀳𑀸𑀦𑀺𑀁 𑀦𑀺𑀲𑁆𑀲𑀸𑀬 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀳𑁄𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀓𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁮. 𑀅𑀝𑁆𑀞𑀫𑁂 𑀅𑀢𑁆𑀢𑀸𑀦𑀁 𑀦 𑀤𑀤𑁂𑀢𑀺 𑀧𑀭𑀲𑁆𑀲 𑀤𑀸𑀲𑀁 𑀓𑀢𑁆𑀯𑀸 𑀅𑀢𑁆𑀢𑀸𑀦𑀁 𑀦 𑀤𑀤𑁂𑀬𑁆𑀬 𑀞𑀧𑁂𑀢𑁆𑀯𑀸 𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑁂𑀢𑀺 𑀯𑀼𑀢𑁆𑀢𑀁. 𑀦 𑀧𑀭𑀺𑀘𑁆𑀘𑀚𑁂𑀢𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀻𑀦𑀁 𑀦 𑀧𑀭𑀺𑀘𑁆𑀘𑀚𑁂𑀬𑁆𑀬 𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑁂 𑀞𑀧𑁂𑀢𑁆𑀯𑀸𑀬𑁂𑀯𑀸𑀢𑀺 𑀯𑀼𑀢𑁆𑀢𑀁. 𑀓𑀮𑁆𑀬𑀸𑀡𑀦𑁆𑀢𑀺 𑀲𑀡𑁆𑀳𑀁 𑀫𑀼𑀤𑀼𑀓𑀁. 𑀧𑀸𑀧𑀺𑀓𑀦𑁆𑀢𑀺 𑀨𑀭𑀼𑀲𑀁 𑀯𑀸𑀘𑀁. 𑀅𑀝𑁆𑀞𑀫𑀁.

𑁯. 𑀧𑀸𑀣𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁯. 𑀦𑀯𑀫𑁂 𑀲𑀤𑁆𑀥𑀸 𑀩𑀦𑁆𑀥𑀢𑀺 𑀧𑀸𑀣𑁂𑀬𑁆𑀬𑀦𑁆𑀢𑀺 𑀲𑀤𑁆𑀥𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀁 𑀭𑀓𑁆𑀔𑀢𑀺, 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺, 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀲𑀺𑀭𑀻𑀢𑀺 𑀇𑀲𑁆𑀲𑀭𑀺𑀬𑀁. 𑀆𑀲𑀬𑁄𑀢𑀺 𑀯𑀲𑀦𑀝𑁆𑀞𑀸𑀦𑀁. 𑀇𑀲𑁆𑀲𑀭𑀺𑀬𑁂 𑀳𑀺 𑀅𑀪𑀺𑀫𑀼𑀔𑀻𑀪𑀽𑀢𑁂 𑀣𑀮𑀢𑁄𑀧𑀺 𑀚𑀮𑀢𑁄𑀧𑀺 𑀪𑁄𑀕𑀸 𑀆𑀕𑀘𑁆𑀙𑀦𑁆𑀢𑀺𑀬𑁂𑀯. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀧𑀭𑀺𑀓𑀲𑁆𑀲𑀢𑀻𑀢𑀺 𑀧𑀭𑀺𑀓𑀟𑁆𑀠𑀢𑀺. 𑀦𑀯𑀫𑀁.

𑁧𑁦. 𑀧𑀚𑁆𑀚𑁄𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁦. 𑀤𑀲𑀫𑁂 𑀧𑀚𑁆𑀚𑁄𑀢𑁄𑀢𑀺 𑀧𑀤𑀻𑀧𑁄 𑀯𑀺𑀬 𑀳𑁄𑀢𑀺. 𑀚𑀸𑀕𑀭𑁄𑀢𑀺 𑀚𑀸𑀕𑀭𑀩𑁆𑀭𑀸𑀳𑁆𑀫𑀡𑁄 𑀯𑀺𑀬 𑀳𑁄𑀢𑀺. 𑀕𑀸𑀯𑁄 𑀓𑀫𑁆𑀫𑁂 𑀲𑀚𑀻𑀯𑀸𑀦𑀦𑁆𑀢𑀺 𑀓𑀫𑁆𑀫𑁂𑀦 𑀲𑀳 𑀚𑀻𑀯𑀦𑁆𑀢𑀸𑀦𑀁 𑀕𑀸𑀯𑁄𑀯 𑀓𑀫𑁆𑀫𑁂 𑀓𑀫𑁆𑀫𑀲𑀳𑀸𑀬𑀸 𑀓𑀫𑁆𑀫𑀤𑀼𑀢𑀺𑀬𑀓𑀸 𑀦𑀸𑀫 𑀳𑁄𑀦𑁆𑀢𑀺. 𑀕𑁄𑀫𑀡𑁆𑀟𑀮𑁂𑀳𑀺 𑀲𑀤𑁆𑀥𑀺𑀁 𑀓𑀲𑀺𑀓𑀫𑁆𑀫𑀸𑀤𑀻𑀦𑀺 𑀦𑀺𑀧𑁆𑀨𑀚𑁆𑀚𑀦𑁆𑀢𑀺. 𑀲𑀻𑀢𑀲𑁆𑀲 𑀇𑀭𑀺𑀬𑀸𑀧𑀣𑁄𑀢𑀺 𑀲𑀻𑀢𑀁 𑀅𑀲𑁆𑀲 𑀲𑀢𑁆𑀢𑀓𑀸𑀬𑀲𑁆𑀲 𑀇𑀭𑀺𑀬𑀸𑀧𑀣𑁄 𑀚𑀻𑀯𑀺𑀢𑀯𑀼𑀢𑁆𑀢𑀺. 𑀲𑀻𑀢𑀦𑁆𑀢𑀺 𑀦𑀗𑁆𑀕𑀮𑀁. 𑀬𑀲𑁆𑀲 𑀳𑀺 𑀦𑀗𑁆𑀕𑀮𑁂𑀳𑀺 𑀔𑁂𑀢𑁆𑀢𑀁 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀓𑀝𑁆𑀞𑀁 𑀦 𑀳𑁄𑀢𑀺, 𑀲𑁄 𑀓𑀣𑀁 𑀚𑀻𑀯𑀺𑀲𑁆𑀲𑀢𑀻𑀢𑀺 𑀯𑀤𑀢𑀺. 𑀤𑀲𑀫𑀁.

𑁧𑁧. 𑀅𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁧. 𑀏𑀓𑀸𑀤𑀲𑀫𑁂 𑀅𑀭𑀡𑀸𑀢𑀺 𑀦𑀺𑀓𑁆𑀓𑀺𑀮𑁂𑀲𑀸. 𑀯𑀼𑀲𑀺𑀢𑀦𑁆𑀢𑀺 𑀯𑀼𑀲𑀺𑀢𑀯𑀸𑀲𑁄. 𑀪𑁄𑀚𑀺𑀲𑁆𑀲𑀺𑀬𑀦𑁆𑀢𑀺 𑀅𑀤𑀸𑀲𑀪𑀸𑀯𑁄. 𑀲𑀫𑀡𑀸𑀢𑀺 𑀔𑀻𑀡𑀸𑀲𑀯𑀲𑀫𑀡𑀸. 𑀢𑁂 𑀳𑀺 𑀏𑀓𑀦𑁆𑀢𑁂𑀦 𑀅𑀭𑀡𑀸 𑀦𑀸𑀫. 𑀯𑀼𑀲𑀺𑀢𑀁 𑀦 𑀦𑀲𑁆𑀲𑀢𑀻𑀢𑀺 𑀢𑁂𑀲𑀁 𑀅𑀭𑀺𑀬𑀫𑀕𑁆𑀕𑀯𑀸𑀲𑁄 𑀦 𑀦𑀲𑁆𑀲𑀢𑀺. 𑀧𑀭𑀺𑀚𑀸𑀦𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀢𑁄 𑀧𑀝𑁆𑀞𑀸𑀬 𑀲𑁂𑀔𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀬 𑀧𑀭𑀺𑀜𑁆𑀜𑀸𑀬 𑀧𑀭𑀺𑀚𑀸𑀦𑀦𑁆𑀢𑀺. 𑀪𑁄𑀚𑀺𑀲𑁆𑀲𑀺𑀬𑀦𑁆𑀢𑀺 𑀔𑀻𑀡𑀸𑀲𑀯𑀲𑀫𑀡𑀸𑀦𑀁𑀬𑁂𑀯 𑀦𑀺𑀘𑁆𑀘𑀁 𑀪𑀼𑀚𑀺𑀲𑁆𑀲𑀪𑀸𑀯𑁄 𑀦𑀸𑀫. 𑀯𑀦𑁆𑀤𑀦𑁆𑀢𑀻𑀢𑀺 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀯𑀦𑁆𑀤𑀦𑁆𑀢𑀺. 𑀧𑀢𑀺𑀝𑁆𑀞𑀺𑀢𑀦𑁆𑀢𑀺 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀁. 𑀲𑀫𑀡𑀻𑀥𑀸𑀢𑀺 𑀲𑀫𑀡𑀁 𑀇𑀥. 𑀚𑀸𑀢𑀺𑀳𑀻𑀦𑀦𑁆𑀢𑀺 𑀅𑀧𑀺 𑀘𑀡𑁆𑀟𑀸𑀮𑀓𑀼𑀮𑀸 𑀧𑀩𑁆𑀩𑀚𑀺𑀢𑀁. 𑀔𑀢𑁆𑀢𑀺𑀬𑀸𑀢𑀺 𑀦 𑀓𑁂𑀯𑀮𑀁 𑀔𑀢𑁆𑀢𑀺𑀬𑀸𑀯, 𑀤𑁂𑀯𑀸𑀧𑀺 𑀲𑀻𑀮𑀲𑀫𑁆𑀧𑀦𑁆𑀦𑀁 𑀲𑀫𑀡𑀁 𑀯𑀦𑁆𑀤𑀦𑁆𑀢𑀺𑀬𑁂𑀯𑀸𑀢𑀺. 𑀏𑀓𑀸𑀤𑀲𑀫𑀁.

𑀙𑁂𑀢𑁆𑀯𑀸𑀯𑀕𑁆𑀕𑁄 𑀅𑀝𑁆𑀞𑀫𑁄.

𑀇𑀢𑀺 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸

𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑁂𑀯𑀧𑀼𑀢𑁆𑀢𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧. 𑀧𑀞𑀫𑀓𑀲𑁆𑀲𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁨. 𑀤𑁂𑀯𑀧𑀼𑀢𑁆𑀢𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀤𑁂𑀯𑀧𑀼𑀢𑁆𑀢𑁄𑀢𑀺 𑀤𑁂𑀯𑀸𑀦𑀜𑁆𑀳𑀺 𑀅𑀗𑁆𑀓𑁂 𑀦𑀺𑀩𑁆𑀩𑀢𑁆𑀢𑀸 𑀧𑀼𑀭𑀺𑀲𑀸 𑀤𑁂𑀯𑀧𑀼𑀢𑁆𑀢𑀸 𑀦𑀸𑀫, 𑀇𑀢𑁆𑀣𑀺𑀬𑁄 𑀤𑁂𑀯𑀥𑀻𑀢𑀭𑁄 𑀦𑀸𑀫 𑀳𑁄𑀦𑁆𑀢𑀺. 𑀦𑀸𑀫𑀯𑀲𑁂𑀦 𑀅𑀧𑀸𑀓𑀝𑀸𑀯 ‘‘𑀅𑀜𑁆𑀜𑀢𑀭𑀸 𑀤𑁂𑀯𑀢𑀸’’𑀢𑀺 𑀯𑀼𑀘𑁆𑀘𑀢𑀺, 𑀧𑀸𑀓𑀝𑁄 ‘‘𑀇𑀢𑁆𑀣𑀦𑁆𑀦𑀸𑀫𑁄 𑀤𑁂𑀯𑀧𑀼𑀢𑁆𑀢𑁄’’𑀢𑀺. 𑀢𑀲𑁆𑀫𑀸 𑀳𑁂𑀝𑁆𑀞𑀸 ‘‘𑀅𑀜𑁆𑀜𑀢𑀭𑀸 𑀤𑁂𑀯𑀢𑀸’’𑀢𑀺 𑀯𑀢𑁆𑀯𑀸 𑀇𑀥 ‘‘𑀤𑁂𑀯𑀧𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀅𑀦𑀼𑀲𑀸𑀲𑀦𑁆𑀢𑀺 𑀅𑀦𑀼𑀲𑀺𑀝𑁆𑀞𑀺𑀁. 𑀅𑀬𑀁 𑀓𑀺𑀭 𑀤𑁂𑀯𑀧𑀼𑀢𑁆𑀢𑁄 𑀪𑀕𑀯𑀢𑀸 𑀲𑀫𑁆𑀩𑁄𑀥𑀺𑀢𑁄 𑀲𑀢𑁆𑀢𑀫𑁂 𑀯𑀲𑁆𑀲𑁂 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀓𑀢𑁆𑀯𑀸 𑀢𑀺𑀤𑀲𑀧𑀼𑀭𑁂 𑀯𑀲𑁆𑀲𑀁 𑀉𑀧𑀕𑀫𑁆𑀫 𑀅𑀪𑀺𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂𑀦 𑀛𑀸𑀦𑀯𑀺𑀪𑀗𑁆𑀕𑁂 𑁋 ‘‘𑀪𑀺𑀓𑁆𑀔𑀽𑀢𑀺 𑀲𑀫𑀜𑁆𑀜𑀸𑀬 𑀪𑀺𑀓𑁆𑀔𑀼, 𑀧𑀝𑀺𑀜𑁆𑀜𑀸𑀬 𑀪𑀺𑀓𑁆𑀔𑀽’’𑀢𑀺 (𑀯𑀺𑀪. 𑁫𑁧𑁦). 𑀏𑀯𑀁 𑀪𑀺𑀓𑁆𑀔𑀼𑀦𑀺𑀤𑁆𑀤𑁂𑀲𑀁 𑀓𑀣𑀺𑀬𑀫𑀸𑀦𑀁 𑀅𑀲𑁆𑀲𑁄𑀲𑀺. ‘‘𑀏𑀯𑀁 𑀯𑀺𑀢𑀓𑁆𑀓𑁂𑀣, 𑀫𑀸 𑀏𑀯𑀁 𑀯𑀺𑀢𑀓𑁆𑀓𑀬𑀺𑀢𑁆𑀣, 𑀏𑀯𑀁 𑀫𑀦𑀲𑀺𑀓𑀭𑁄𑀣, 𑀫𑀸 𑀏𑀯𑀁 𑀫𑀦𑀲𑀸𑀓𑀢𑁆𑀣. 𑀇𑀤𑀁 𑀧𑀚𑀳𑀣, 𑀇𑀤𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀣𑀸’’𑀢𑀺 (𑀧𑀸𑀭𑀸. 𑁧𑁯). 𑀏𑀯𑀭𑀽𑀧𑀁 𑀧𑀦 𑀪𑀺𑀓𑁆𑀔𑀼𑀑𑀯𑀸𑀤𑀁 𑀪𑀺𑀓𑁆𑀔𑀼𑀅𑀦𑀼𑀲𑀸𑀲𑀦𑀁 𑀦 𑀅𑀲𑁆𑀲𑁄𑀲𑀺. 𑀲𑁄 𑀢𑀁 𑀲𑀦𑁆𑀥𑀸𑀬 𑁋 ‘‘𑀪𑀺𑀓𑁆𑀔𑀼𑀁 𑀪𑀕𑀯𑀸 𑀧𑀓𑀸𑀲𑁂𑀲𑀺, 𑀦𑁄 𑀘 𑀪𑀺𑀓𑁆𑀔𑀼𑀦𑁄 𑀅𑀦𑀼𑀲𑀸𑀲’’𑀦𑁆𑀢𑀺 𑀆𑀳.

𑀢𑁂𑀦 𑀳𑀻𑀢𑀺 𑀬𑀲𑁆𑀫𑀸 𑀫𑀬𑀸 𑀪𑀺𑀓𑁆𑀔𑀼𑀦𑁄 𑀅𑀦𑀼𑀲𑀺𑀝𑁆𑀞𑀺 𑀦 𑀧𑀓𑀸𑀲𑀺𑀢𑀸𑀢𑀺 𑀯𑀤𑀲𑀺, 𑀢𑀲𑁆𑀫𑀸. 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀪𑀸𑀢𑀽𑀢𑀺 𑀢𑀼𑀬𑁆𑀳𑁂𑀯𑁂𑀲𑀸 𑀅𑀦𑀼𑀲𑀺𑀝𑁆𑀞𑀺𑀧𑀓𑀸𑀲𑀦𑀸 𑀉𑀧𑀝𑁆𑀞𑀸𑀢𑀽𑀢𑀺. 𑀬𑁄 𑀳𑀺 𑀧𑀜𑁆𑀳𑀁 𑀓𑀣𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀦 𑀘 𑀲𑀓𑁆𑀓𑁄𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀓𑀣𑁂𑀢𑀼𑀁. 𑀬𑁄 𑀯𑀸 𑀦 𑀓𑀣𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀲𑀓𑁆𑀓𑁄𑀢𑀺 𑀧𑀦 𑀓𑀣𑁂𑀢𑀼𑀁. 𑀬𑁄 𑀯𑀸 𑀦𑁂𑀯 𑀓𑀣𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀓𑀣𑁂𑀢𑀼𑀁 𑀦 𑀘 𑀲𑀓𑁆𑀓𑁄𑀢𑀺. 𑀲𑀩𑁆𑀩𑁂𑀲𑀫𑁆𑀧𑀺 𑀢𑁂𑀲𑀁 𑀪𑀕𑀯𑀸 𑀧𑀜𑁆𑀳𑀁 𑀪𑀸𑀭𑀁 𑀦 𑀓𑀭𑁄𑀢𑀺. 𑀅𑀬𑀁 𑀧𑀦 𑀤𑁂𑀯𑀧𑀼𑀢𑁆𑀢𑁄 𑀓𑀣𑁂𑀢𑀼𑀓𑀸𑀫𑁄 𑀘𑁂𑀯, 𑀲𑀓𑁆𑀓𑁄𑀢𑀺 𑀘 𑀓𑀣𑁂𑀢𑀼𑀁. 𑀢𑀲𑁆𑀫𑀸 𑀢𑀲𑁆𑀲𑁂𑀯 𑀪𑀸𑀭𑀁 𑀓𑀭𑁄𑀦𑁆𑀢𑁄 𑀪𑀕𑀯𑀸 𑀏𑀯𑀫𑀸𑀳. 𑀲𑁄𑀧𑀺 𑀧𑀜𑁆𑀳𑀁 𑀓𑀣𑁂𑀲𑀺.

𑀢𑀢𑁆𑀣 𑀲𑀼𑀪𑀸𑀲𑀺𑀢𑀲𑁆𑀲 𑀲𑀺𑀓𑁆𑀔𑁂𑀣𑀸𑀢𑀺 𑀲𑀼𑀪𑀸𑀲𑀺𑀢𑀁 𑀲𑀺𑀓𑁆𑀔𑁂𑀬𑁆𑀬, 𑀘𑀢𑀼𑀲𑀘𑁆𑀘𑀦𑀺𑀲𑁆𑀲𑀺𑀢𑀁 𑀤𑀲𑀓𑀣𑀸𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀁 𑀲𑀢𑁆𑀢𑀢𑀺𑀁𑀲𑀩𑁄𑀥𑀺𑀧𑀓𑁆𑀔𑀺𑀬𑀦𑀺𑀲𑁆𑀲𑀺𑀢𑀁 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀲𑀼𑀘𑀭𑀺𑀢𑀫𑁂𑀯 𑀲𑀺𑀓𑁆𑀔𑁂𑀬𑁆𑀬. 𑀲𑀫𑀡𑀽𑀧𑀸𑀲𑀦𑀲𑁆𑀲 𑀘𑀸𑀢𑀺 𑀲𑀫𑀡𑁂𑀳𑀺 𑀉𑀧𑀸𑀲𑀺𑀢𑀩𑁆𑀩𑀁 𑀲𑀫𑀡𑀽𑀧𑀸𑀲𑀦𑀁 𑀦𑀸𑀫 𑀅𑀝𑁆𑀞𑀢𑀺𑀁𑀲𑀪𑁂𑀤𑀁 𑀓𑀫𑁆𑀫𑀝𑁆𑀞𑀸𑀦𑀁, 𑀢𑀫𑁆𑀧𑀺 𑀲𑀺𑀓𑁆𑀔𑁂𑀬𑁆𑀬 𑀪𑀸𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀩𑀳𑀼𑀲𑁆𑀲𑀼𑀢𑀸𑀦𑀁 𑀯𑀸 𑀪𑀺𑀓𑁆𑀔𑀽𑀦𑀁 𑀉𑀧𑀸𑀲𑀦𑀫𑁆𑀧𑀺 𑀲𑀫𑀡𑀽𑀧𑀸𑀲𑀦𑀁. 𑀢𑀫𑁆𑀧𑀺 ‘𑀓𑀺𑀁, 𑀪𑀦𑁆𑀢𑁂, 𑀓𑀼𑀲𑀮’’𑀦𑁆𑀢𑀺𑀆𑀤𑀺𑀦𑀸 𑀧𑀜𑁆𑀳𑀧𑀼𑀘𑁆𑀙𑀦𑁂𑀦 𑀧𑀜𑁆𑀜𑀸𑀯𑀼𑀤𑁆𑀥𑀢𑁆𑀣𑀁 𑀲𑀺𑀓𑁆𑀔𑁂𑀬𑁆𑀬. 𑀘𑀺𑀢𑁆𑀢𑀯𑀽𑀧𑀲𑀫𑀲𑁆𑀲 𑀘𑀸𑀢𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀘𑀺𑀢𑁆𑀢𑀯𑀽𑀧𑀲𑀫𑀁 𑀲𑀺𑀓𑁆𑀔𑁂𑀬𑁆𑀬. 𑀇𑀢𑀺 𑀤𑁂𑀯𑀧𑀼𑀢𑁆𑀢𑁂𑀦 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀓𑀣𑀺𑀢𑀸 𑀳𑁄𑀦𑁆𑀢𑀺. 𑀧𑀼𑀭𑀺𑀫𑀧𑀤𑁂𑀦 𑀳𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀓𑀣𑀺𑀢𑀸, 𑀤𑀼𑀢𑀺𑀬𑀧𑀤𑁂𑀦 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸, 𑀘𑀺𑀢𑁆𑀢𑀯𑀽𑀧𑀲𑀫𑁂𑀦 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸𑀢𑀺 𑀏𑀯𑀁 𑀇𑀫𑀸𑀬 𑀕𑀸𑀣𑀸𑀬 𑀲𑀓𑀮𑀫𑁆𑀧𑀺 𑀲𑀸𑀲𑀦𑀁 𑀧𑀓𑀸𑀲𑀺𑀢𑀫𑁂𑀯 𑀳𑁄𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀓𑀲𑁆𑀲𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁩. 𑀤𑀼𑀢𑀺𑀬𑁂 𑀛𑀸𑀬𑀻𑀢𑀺 𑀤𑁆𑀯𑀻𑀳𑀺 𑀛𑀸𑀦𑁂𑀳𑀺 𑀛𑀸𑀬𑀻. 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄. 𑀳𑀤𑀬𑀲𑁆𑀲𑀸𑀦𑀼𑀧𑀢𑁆𑀢𑀺𑀦𑁆𑀢𑀺 𑀅𑀭𑀳𑀢𑁆𑀢𑀁. 𑀮𑁄𑀓𑀲𑁆𑀲𑀸𑀢𑀺 𑀲𑀗𑁆𑀔𑀸𑀭𑀮𑁄𑀓𑀲𑁆𑀲. 𑀅𑀦𑀺𑀲𑁆𑀲𑀺𑀢𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀅𑀦𑀺𑀲𑁆𑀲𑀺𑀢𑁄, 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄 𑀯𑀸 𑀅𑀦𑀺𑀲𑁆𑀲𑀺𑀢𑁄. 𑀢𑀤𑀸𑀦𑀺𑀲𑀁𑀲𑁄𑀢𑀺 𑀅𑀭𑀳𑀢𑁆𑀢𑀸𑀦𑀺𑀲𑀁𑀲𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀭𑀳𑀢𑁆𑀢𑀸𑀦𑀺𑀲𑀁𑀲𑁄 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑀁 𑀧𑀢𑁆𑀣𑁂𑀦𑁆𑀢𑁄 𑀛𑀸𑀬𑀻 𑀪𑀯𑁂𑀬𑁆𑀬, 𑀲𑀼𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑁄 𑀪𑀯𑁂𑀬𑁆𑀬, 𑀮𑁄𑀓𑀲𑁆𑀲 𑀉𑀤𑀬𑀩𑁆𑀩𑀬𑀁 𑀜𑀢𑁆𑀯𑀸 𑀅𑀦𑀺𑀲𑁆𑀲𑀺𑀢𑁄 𑀪𑀯𑁂𑀬𑁆𑀬. 𑀢𑀦𑁆𑀢𑀺𑀥𑀫𑁆𑀫𑁄 𑀧𑀦 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀼𑀩𑁆𑀩𑀪𑀸𑀕𑁄𑀢𑀺. 𑀤𑀼𑀢𑀺𑀬𑀁.

𑁩-𑁪. 𑀫𑀸𑀖𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁮𑁪. 𑀢𑀢𑀺𑀬𑁂 𑀫𑀸𑀖𑁄𑀢𑀺 𑀲𑀓𑁆𑀓𑀲𑁆𑀲𑁂𑀢𑀁 𑀦𑀸𑀫𑀁. 𑀲𑁆𑀯𑁂𑀯 𑀯𑀢𑁆𑀢𑁂𑀦 𑀅𑀜𑁆𑀜𑁂 𑀅𑀪𑀺𑀪𑀯𑀺𑀢𑁆𑀯𑀸 𑀤𑁂𑀯𑀺𑀲𑁆𑀲𑀭𑀺𑀬𑀁 𑀧𑀢𑁆𑀢𑁄𑀢𑀺 𑀯𑀢𑁆𑀭𑀪𑀽, 𑀯𑀢𑁆𑀭𑀦𑀸𑀫𑀓𑀁 𑀯𑀸 𑀅𑀲𑀼𑀭𑀁 𑀅𑀪𑀺𑀪𑀯𑀢𑀻𑀢𑀺 𑀯𑀢𑁆𑀭𑀪𑀽. 𑀢𑀢𑀺𑀬𑀁.

𑁮𑁫. 𑀘𑀢𑀼𑀢𑁆𑀣𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀘𑀢𑀼𑀢𑁆𑀣𑀁.

𑁫. 𑀤𑀸𑀫𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁬. 𑀧𑀜𑁆𑀘𑀫𑁂 𑀦 𑀢𑁂𑀦𑀸𑀲𑀻𑀲𑀢𑁂 𑀪𑀯𑀦𑁆𑀢𑀺 𑀢𑁂𑀦 𑀓𑀸𑀭𑀡𑁂𑀦 𑀬𑀁 𑀓𑀺𑀜𑁆𑀘𑀺 𑀪𑀯𑀁 𑀦 𑀧𑀢𑁆𑀣𑁂𑀢𑀺. 𑀆𑀬𑀢𑀧𑀕𑁆𑀕𑀳𑁄 𑀦𑀸𑀫𑁂𑀲 𑀤𑁂𑀯𑀧𑀼𑀢𑁆𑀢𑁄, 𑀔𑀻𑀡𑀸𑀲𑀯𑀲𑁆𑀲 𑀓𑀺𑀘𑁆𑀘𑀯𑁄𑀲𑀸𑀦𑀁 𑀦𑀢𑁆𑀣𑀺. 𑀔𑀻𑀡𑀸𑀲𑀯𑁂𑀦 𑀳𑀺 𑀆𑀤𑀺𑀢𑁄 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀯𑀻𑀭𑀺𑀬𑀁 𑀓𑀢𑀁, 𑀅𑀧𑀭𑀪𑀸𑀕𑁂 𑀫𑀬𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀦𑁆𑀢𑀺 𑀫𑀸 𑀢𑀼𑀡𑁆𑀳𑀻 𑀪𑀯𑀢𑀼, 𑀢𑀣𑁂𑀯 𑀯𑀻𑀭𑀺𑀬𑀁 𑀤𑀴𑁆𑀳𑀁 𑀓𑀭𑁄𑀢𑀼 𑀧𑀭𑀓𑁆𑀓𑀫𑀢𑀽𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳.

𑀅𑀣 𑀪𑀕𑀯𑀸 ‘‘𑀅𑀬𑀁 𑀤𑁂𑀯𑀧𑀼𑀢𑁆𑀢𑁄 𑀔𑀻𑀡𑀸𑀲𑀯𑀲𑁆𑀲 𑀓𑀺𑀘𑁆𑀘𑀯𑁄𑀲𑀸𑀦𑀁 𑀅𑀓𑀣𑁂𑀦𑁆𑀢𑁄 𑀫𑀫 𑀲𑀸𑀲𑀦𑀁 𑀅𑀦𑀺𑀬𑁆𑀬𑀸𑀦𑀺𑀓𑀁 𑀓𑀣𑁂𑀢𑀺, 𑀓𑀺𑀘𑁆𑀘𑀯𑁄𑀲𑀸𑀦𑀫𑀲𑁆𑀲 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀦𑀢𑁆𑀣𑀺 𑀓𑀺𑀘𑁆𑀘𑀦𑁆𑀢𑀺𑀆𑀤𑀺𑀫𑀸𑀳. 𑀢𑀻𑀲𑀼 𑀓𑀺𑀭 𑀧𑀺𑀝𑀓𑁂𑀲𑀼 𑀅𑀬𑀁 𑀕𑀸𑀣𑀸 𑀅𑀲𑀁𑀓𑀺𑀡𑁆𑀡𑀸. 𑀪𑀕𑀯𑀢𑀸 𑀳𑀺 𑀅𑀜𑁆𑀜𑀢𑁆𑀣 𑀯𑀻𑀭𑀺𑀬𑀲𑁆𑀲 𑀤𑁄𑀲𑁄 𑀦𑀸𑀫 𑀤𑀲𑁆𑀲𑀺𑀢𑁄 𑀦𑀢𑁆𑀣𑀺. 𑀇𑀥 𑀧𑀦 𑀇𑀫𑀁 𑀤𑁂𑀯𑀧𑀼𑀢𑁆𑀢𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 ‘‘𑀔𑀻𑀡𑀸𑀲𑀯𑁂𑀦 𑀧𑀼𑀩𑁆𑀩𑀪𑀸𑀕𑁂 𑀆𑀲𑀯𑀓𑁆𑀔𑀬𑀢𑁆𑀣𑀸𑀬 𑀅𑀭𑀜𑁆𑀜𑁂 𑀯𑀲𑀦𑁆𑀢𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀆𑀤𑀸𑀬 𑀯𑀻𑀭𑀺𑀬𑀁 𑀓𑀢𑀁, 𑀅𑀧𑀭𑀪𑀸𑀕𑁂 𑀲𑀘𑁂 𑀇𑀘𑁆𑀙𑀢𑀺, 𑀓𑀭𑁄𑀢𑀼, 𑀦𑁄 𑀘𑁂 𑀇𑀘𑁆𑀙𑀢𑀺, 𑀬𑀣𑀸𑀲𑀼𑀔𑀁 𑀯𑀺𑀳𑀭𑀢𑀽’’𑀢𑀺 𑀔𑀻𑀡𑀸𑀲𑀯𑀲𑁆𑀲 𑀓𑀺𑀘𑁆𑀘𑀯𑁄𑀲𑀸𑀦𑀤𑀲𑁆𑀲𑀦𑀢𑁆𑀣𑀁 𑀏𑀯𑀫𑀸𑀳. 𑀢𑀢𑁆𑀣 𑀕𑀸𑀥𑀦𑁆𑀢𑀺 𑀧𑀢𑀺𑀝𑁆𑀞𑀁. 𑀧𑀜𑁆𑀘𑀫𑀁.

𑁬. 𑀓𑀸𑀫𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁭. 𑀙𑀝𑁆𑀞𑁂 𑀤𑀼𑀓𑁆𑀓𑀭𑀦𑁆𑀢𑀺 𑀅𑀬𑀁 𑀓𑀺𑀭 𑀤𑁂𑀯𑀧𑀼𑀢𑁆𑀢𑁄 𑀧𑀼𑀩𑁆𑀩𑀬𑁄𑀕𑀸𑀯𑀘𑀭𑁄 𑀩𑀳𑀮𑀓𑀺𑀮𑁂𑀲𑀢𑀸𑀬 𑀲𑀧𑁆𑀧𑀬𑁄𑀕𑁂𑀦 𑀓𑀺𑀮𑁂𑀲𑁂 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀧𑀼𑀩𑁆𑀩𑀽𑀧𑀦𑀺𑀲𑁆𑀲𑀬𑀫𑀦𑁆𑀤𑀢𑀸𑀬 𑀅𑀭𑀺𑀬𑀪𑀽𑀫𑀺𑀁 𑀅𑀧𑁆𑀧𑀢𑁆𑀯𑀸𑀯 𑀓𑀸𑀮𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄. 𑀲𑁄 ‘‘𑀢𑀣𑀸𑀕𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀤𑀼𑀓𑁆𑀓𑀭𑀪𑀸𑀯𑀁 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀆𑀕𑀦𑁆𑀢𑁆𑀯𑀸 𑀏𑀯𑀫𑀸𑀳. 𑀢𑀢𑁆𑀣 𑀤𑀼𑀓𑁆𑀓𑀭𑀦𑁆𑀢𑀺 𑀤𑀲𑀧𑀺 𑀯𑀲𑁆𑀲𑀸𑀦𑀺…𑀧𑁂… 𑀲𑀝𑁆𑀞𑀺𑀧𑀺 𑀬𑀤𑁂𑀢𑀁 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀲𑁆𑀲 𑀲𑀫𑀡𑀥𑀫𑁆𑀫𑀲𑁆𑀲 𑀓𑀭𑀡𑀁 𑀦𑀸𑀫, 𑀢𑀁 𑀤𑀼𑀓𑁆𑀓𑀭𑀁. 𑀲𑁂𑀔𑀸𑀢𑀺 𑀲𑀢𑁆𑀢 𑀲𑁂𑀔𑀸. 𑀲𑀻𑀮𑀲𑀫𑀸𑀳𑀺𑀢𑀸𑀢𑀺 𑀲𑀻𑀮𑁂𑀦 𑀲𑀫𑀸𑀳𑀺𑀢𑀸 𑀲𑀫𑀼𑀧𑁂𑀢𑀸. 𑀞𑀺𑀢𑀢𑁆𑀢𑀸𑀢𑀺 𑀧𑀢𑀺𑀝𑁆𑀞𑀺𑀢𑀲𑀪𑀸𑀯𑀸. 𑀏𑀯𑀁 𑀧𑀼𑀘𑁆𑀙𑀺𑀢𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀇𑀤𑀸𑀦𑀺 𑀉𑀧𑀭𑀺𑀧𑀜𑁆𑀳𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀅𑀦𑀕𑀸𑀭𑀺𑀬𑀼𑀧𑁂𑀢𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀕𑀸𑀭𑀺𑀬𑀼𑀧𑁂𑀢𑀲𑁆𑀲𑀸𑀢𑀺 𑀅𑀦𑀕𑀸𑀭𑀺𑀬𑀁 𑀦𑀺𑀕𑁆𑀕𑁂𑀳𑀪𑀸𑀯𑀁 𑀉𑀧𑁂𑀢𑀲𑁆𑀲. 𑀲𑀢𑁆𑀢𑀪𑀽𑀫𑀺𑀓𑁂𑀧𑀺 𑀳𑀺 𑀧𑀸𑀲𑀸𑀤𑁂 𑀯𑀲𑀦𑁆𑀢𑁄 𑀪𑀺𑀓𑁆𑀔𑀼 𑀯𑀼𑀟𑁆𑀠𑀢𑀭𑁂𑀦 𑀆𑀕𑀦𑁆𑀢𑁆𑀯𑀸 ‘‘𑀫𑀬𑁆𑀳𑀁 𑀇𑀤𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀼𑀢𑁆𑀢𑁂 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀦𑀺𑀓𑁆𑀔𑀫𑀢𑁂𑀯. 𑀢𑀲𑁆𑀫𑀸 ‘‘𑀅𑀦𑀕𑀸𑀭𑀺𑀬𑀼𑀧𑁂𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀼𑀝𑁆𑀞𑀻𑀢𑀺 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑁄. 𑀪𑀸𑀯𑀦𑀸𑀬𑀸𑀢𑀺 𑀘𑀺𑀢𑁆𑀢𑀯𑀽𑀧𑀲𑀫𑀪𑀸𑀯𑀦𑀸𑀬.

𑀢𑁂 𑀙𑁂𑀢𑁆𑀯𑀸 𑀫𑀘𑁆𑀘𑀼𑀦𑁄 𑀚𑀸𑀮𑀦𑁆𑀢𑀺 𑀬𑁂 𑀭𑀢𑁆𑀢𑀺𑀦𑁆𑀤𑀺𑀯𑀁 𑀇𑀦𑁆𑀤𑁆𑀭𑀺𑀬𑀽𑀧𑀲𑀫𑁂 𑀭𑀢𑀸, 𑀢𑁂 𑀤𑀼𑀲𑁆𑀲𑀫𑀸𑀤𑀳𑀁 𑀘𑀺𑀢𑁆𑀢𑀁 𑀲𑀫𑀸𑀤𑀳𑀦𑁆𑀢𑀺. 𑀬𑁂 𑀘 𑀲𑀫𑀸𑀳𑀺𑀢𑀘𑀺𑀢𑁆𑀢𑀸, 𑀢𑁂 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑀁 𑀧𑀽𑀭𑁂𑀦𑁆𑀢𑀸 𑀦 𑀓𑀺𑀮𑀫𑀦𑁆𑀢𑀺. 𑀬𑁂 𑀲𑀦𑁆𑀢𑀼𑀝𑁆𑀞𑀸, 𑀢𑁂 𑀲𑀻𑀮𑀁 𑀧𑀽𑀭𑁂𑀦𑁆𑀢𑀸 𑀦 𑀓𑀺𑀮𑀫𑀦𑁆𑀢𑀺. 𑀬𑁂 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀸 𑀲𑀢𑁆𑀢 𑀲𑁂𑀔𑀸, 𑀢𑁂 𑀅𑀭𑀺𑀬𑀸 𑀫𑀘𑁆𑀘𑀼𑀦𑁄 𑀚𑀸𑀮𑀲𑀗𑁆𑀔𑀸𑀢𑀁 𑀓𑀺𑀮𑁂𑀲𑀚𑀸𑀮𑀁 𑀙𑀺𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺. 𑀤𑀼𑀕𑁆𑀕𑀫𑁄𑀢𑀺 ‘‘𑀲𑀘𑁆𑀘𑀫𑁂𑀢𑀁, 𑀪𑀦𑁆𑀢𑁂, 𑀬𑁂 𑀇𑀦𑁆𑀤𑁆𑀭𑀺𑀬𑀽𑀧𑀲𑀫𑁂 𑀭𑀢𑀸, 𑀢𑁂 𑀤𑀼𑀲𑁆𑀲𑀫𑀸𑀤𑀳𑀁 𑀲𑀫𑀸𑀤𑀳𑀦𑁆𑀢𑀺…𑀧𑁂… 𑀬𑁂 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀸, 𑀢𑁂 𑀫𑀘𑁆𑀘𑀼𑀦𑁄 𑀚𑀸𑀮𑀁 𑀙𑀺𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺’’. 𑀓𑀺𑀁 𑀦 𑀕𑀘𑁆𑀙𑀺𑀲𑁆𑀲𑀦𑁆𑀢𑀺? 𑀅𑀬𑀁 𑀧𑀦 𑀤𑀼𑀕𑁆𑀕𑀫𑁄 𑀪𑀕𑀯𑀸 𑀯𑀺𑀲𑀫𑁄 𑀫𑀕𑁆𑀕𑁄𑀢𑀺 𑀆𑀳. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀭𑀺𑀬𑀫𑀕𑁆𑀕𑁄 𑀦𑁂𑀯 𑀤𑀼𑀕𑁆𑀕𑀫𑁄 𑀦 𑀯𑀺𑀲𑀫𑁄, 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬 𑀧𑀦𑀲𑁆𑀲 𑀩𑀳𑀽 𑀧𑀭𑀺𑀲𑁆𑀲𑀬𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑁄. 𑀅𑀯𑀁𑀲𑀺𑀭𑀸𑀢𑀺 𑀜𑀸𑀡𑀲𑀺𑀭𑁂𑀦 𑀅𑀥𑁄𑀲𑀺𑀭𑀸 𑀳𑀼𑀢𑁆𑀯𑀸 𑀧𑀧𑀢𑀦𑁆𑀢𑀺. 𑀅𑀭𑀺𑀬𑀫𑀕𑁆𑀕𑀁 𑀆𑀭𑁄𑀳𑀺𑀢𑀼𑀁 𑀅𑀲𑀫𑀢𑁆𑀣𑀢𑀸𑀬𑁂𑀯 𑀘 𑀢𑁂 𑀅𑀦𑀭𑀺𑀬𑀫𑀕𑁆𑀕𑁂 𑀧𑀧𑀢𑀦𑁆𑀢𑀻𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀅𑀭𑀺𑀬𑀸𑀦𑀁 𑀲𑀫𑁄 𑀫𑀕𑁆𑀕𑁄𑀢𑀺 𑀲𑁆𑀯𑁂𑀯 𑀫𑀕𑁆𑀕𑁄 𑀅𑀭𑀺𑀬𑀸𑀦𑀁 𑀲𑀫𑁄 𑀳𑁄𑀢𑀺. 𑀯𑀺𑀲𑀫𑁂 𑀲𑀫𑀸𑀢𑀺 𑀯𑀺𑀲𑀫𑁂𑀧𑀺 𑀲𑀢𑁆𑀢𑀓𑀸𑀬𑁂 𑀲𑀫𑀸𑀬𑁂𑀯. 𑀙𑀝𑁆𑀞𑀁.

𑁭. 𑀧𑀜𑁆𑀘𑀸𑀮𑀘𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁮. 𑀲𑀢𑁆𑀢𑀫𑁂 𑀲𑀫𑁆𑀩𑀸𑀥𑁂𑀢𑀺 𑀦𑀻𑀯𑀭𑀡𑀲𑀫𑁆𑀩𑀸𑀥𑀁 𑀓𑀸𑀫𑀕𑀼𑀡𑀲𑀫𑁆𑀩𑀸𑀥𑀦𑁆𑀢𑀺 𑀤𑁆𑀯𑁂 𑀲𑀫𑁆𑀩𑀸𑀥𑀸. 𑀢𑁂𑀲𑀼 𑀇𑀥 𑀦𑀻𑀯𑀭𑀡𑀲𑀫𑁆𑀩𑀸𑀥𑀁 𑀅𑀥𑀺𑀧𑁆𑀧𑁂𑀢𑀁. 𑀑𑀓𑀸𑀲𑀦𑁆𑀢𑀺 𑀛𑀸𑀦𑀲𑁆𑀲𑁂𑀢𑀁 𑀦𑀸𑀫𑀁. 𑀧𑀝𑀺𑀮𑀻𑀦𑀦𑀺𑀲𑀪𑁄𑀢𑀺 𑀧𑀝𑀺𑀮𑀻𑀦𑀲𑁂𑀝𑁆𑀞𑁄. 𑀧𑀝𑀺𑀮𑀻𑀦𑁄 𑀦𑀸𑀫 𑀧𑀳𑀻𑀦𑀫𑀸𑀦𑁄 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋 ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀝𑀺𑀮𑀻𑀦𑁄 𑀳𑁄𑀢𑀺. 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀲𑁆𑀫𑀺𑀫𑀸𑀦𑁄 𑀧𑀳𑀻𑀦𑁄 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄’’𑀢𑀺 (𑀅. 𑀦𑀺. 𑁪.𑁩𑁮; 𑀫𑀳𑀸𑀦𑀺. 𑁮𑁭). 𑀧𑀘𑁆𑀘𑀮𑀢𑁆𑀣𑀁𑀲𑀽𑀢𑀺 𑀧𑀝𑀺𑀮𑀪𑀺𑀁𑀲𑀼. 𑀲𑀫𑁆𑀫𑀸 𑀢𑁂𑀢𑀺 𑀬𑁂 𑀦𑀺𑀩𑁆𑀩𑀸𑀦𑀧𑀢𑁆𑀢𑀺𑀬𑀸 𑀲𑀢𑀺𑀁 𑀧𑀝𑀺𑀮𑀪𑀺𑀁𑀲𑀼, 𑀢𑁂 𑀮𑁄𑀓𑀼𑀢𑁆𑀢𑀭𑀲𑀫𑀸𑀥𑀺𑀦𑀸𑀧𑀺 𑀲𑀼𑀲𑀫𑀸𑀳𑀺𑀢𑀸𑀢𑀺 𑀫𑀺𑀲𑁆𑀲𑀓𑀚𑁆𑀛𑀸𑀦𑀁 𑀓𑀣𑀺𑀢𑀁. 𑀲𑀢𑁆𑀢𑀫𑀁.

𑁮. 𑀢𑀸𑀬𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁯. 𑀅𑀝𑁆𑀞𑀫𑁂 𑀧𑀼𑀭𑀸𑀡𑀢𑀺𑀢𑁆𑀣𑀓𑀭𑁄𑀢𑀺 𑀧𑀼𑀩𑁆𑀩𑁂 𑀢𑀺𑀢𑁆𑀣𑀓𑀭𑁄. 𑀏𑀢𑁆𑀣 𑀘 𑀢𑀺𑀢𑁆𑀣𑀁 𑀦𑀸𑀫 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄, 𑀢𑀺𑀢𑁆𑀣𑀓𑀭𑁄 𑀦𑀸𑀫 𑀢𑀸𑀲𑀁 𑀉𑀧𑁆𑀧𑀸𑀤𑀓𑁄 𑀲𑀢𑁆𑀣𑀸. 𑀲𑁂𑀬𑁆𑀬𑀣𑀺𑀤𑀁 𑀦𑀦𑁆𑀤𑁄, 𑀯𑀘𑁆𑀙𑁄, 𑀓𑀺𑀲𑁄, 𑀲𑀁𑀓𑀺𑀘𑁆𑀘𑁄. 𑀧𑀼𑀭𑀸𑀡𑀸𑀤𑀬𑁄 𑀧𑀦 𑀢𑀺𑀢𑁆𑀣𑀺𑀬𑀸 𑀦𑀸𑀫. 𑀅𑀬𑀁 𑀧𑀦 𑀤𑀺𑀝𑁆𑀞𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀣𑀁 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁄𑀢𑀺? 𑀓𑀫𑁆𑀫𑀯𑀸𑀤𑀺𑀢𑀸𑀬. 𑀏𑀲 𑀓𑀺𑀭 𑀉𑀧𑁄𑀲𑀣𑀪𑀢𑁆𑀢𑀸𑀤𑀻𑀦𑀺 𑀅𑀤𑀸𑀲𑀺, 𑀅𑀦𑀸𑀣𑀸𑀦𑀁 𑀯𑀢𑁆𑀢𑀁 𑀧𑀝𑁆𑀞𑀧𑁂𑀲𑀺, 𑀧𑀢𑀺𑀲𑁆𑀲𑀬𑁂 𑀅𑀓𑀸𑀲𑀺, 𑀧𑁄𑀓𑁆𑀔𑀭𑀡𑀺𑀬𑁄 𑀔𑀡𑀸𑀧𑁂𑀲𑀺, 𑀅𑀜𑁆𑀜𑀫𑁆𑀧𑀺 𑀩𑀳𑀼𑀁 𑀓𑀮𑁆𑀬𑀸𑀡𑀁 𑀅𑀓𑀸𑀲𑀺. 𑀲𑁄 𑀢𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁄, 𑀲𑀸𑀲𑀦𑀲𑁆𑀲 𑀧𑀦 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀁 𑀚𑀸𑀦𑀸𑀢𑀺. 𑀲𑁄 𑀢𑀣𑀸𑀕𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀸𑀲𑀦𑀸𑀦𑀼𑀘𑁆𑀙𑀯𑀺𑀓𑀸 𑀯𑀻𑀭𑀺𑀬𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸 𑀕𑀸𑀣𑀸 𑀯𑀓𑁆𑀔𑀸𑀫𑀻𑀢𑀺 𑀆𑀕𑀦𑁆𑀢𑁆𑀯𑀸 𑀙𑀺𑀦𑁆𑀤 𑀲𑁄𑀢𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀙𑀺𑀦𑁆𑀤𑀸𑀢𑀺 𑀅𑀦𑀺𑀬𑀫𑀺𑀢𑀆𑀡𑀢𑁆𑀢𑀺. 𑀲𑁄𑀢𑀦𑁆𑀢𑀺 𑀢𑀡𑁆𑀳𑀸𑀲𑁄𑀢𑀁. 𑀧𑀭𑀓𑁆𑀓𑀫𑁆𑀫𑀸𑀢𑀺 𑀧𑀭𑀓𑁆𑀓𑀫𑀺𑀢𑁆𑀯𑀸 𑀯𑀻𑀭𑀺𑀬𑀁 𑀓𑀢𑁆𑀯𑀸. 𑀓𑀸𑀫𑁂𑀢𑀺 𑀓𑀺𑀮𑁂𑀲𑀓𑀸𑀫𑁂𑀧𑀺 𑀯𑀢𑁆𑀣𑀼𑀓𑀸𑀫𑁂𑀧𑀺. 𑀧𑀦𑀼𑀤𑀸𑀢𑀺 𑀦𑀻𑀳𑀭. 𑀏𑀓𑀢𑁆𑀢𑀦𑁆𑀢𑀺 𑀛𑀸𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑀸𑀫𑁂 𑀅𑀚𑀳𑀺𑀢𑁆𑀯𑀸 𑀫𑀼𑀦𑀺 𑀛𑀸𑀦𑀁 𑀦 𑀉𑀧𑀧𑀚𑁆𑀚𑀢𑀺, 𑀦 𑀧𑀝𑀺𑀮𑀪𑀢𑀻𑀢𑀺 𑀅𑀢𑁆𑀣𑁄. 𑀓𑀬𑀺𑀭𑀸 𑀘𑁂 𑀓𑀬𑀺𑀭𑀸𑀣𑁂𑀦𑀦𑁆𑀢𑀺 𑀬𑀤𑀺 𑀯𑀻𑀭𑀺𑀬𑀁 𑀓𑀭𑁂𑀬𑁆𑀬, 𑀓𑀭𑁂𑀬𑁆𑀬𑀸𑀣, 𑀢𑀁 𑀯𑀻𑀭𑀺𑀬𑀁 𑀦 𑀑𑀲𑀓𑁆𑀓𑁂𑀬𑁆𑀬. 𑀤𑀴𑁆𑀳𑀫𑁂𑀦𑀁 𑀧𑀭𑀓𑁆𑀓𑀫𑁂𑀢𑀺 𑀤𑀴𑁆𑀳𑀁 𑀏𑀦𑀁 𑀓𑀭𑁂𑀬𑁆𑀬. 𑀲𑀺𑀣𑀺𑀮𑁄 𑀳𑀺 𑀧𑀭𑀺𑀩𑁆𑀩𑀸𑀚𑁄𑀢𑀺 𑀲𑀺𑀣𑀺𑀮𑀕𑀳𑀺𑀢𑀸 𑀧𑀩𑁆𑀩𑀚𑁆𑀚𑀸. 𑀪𑀺𑀬𑁆𑀬𑁄 𑀆𑀓𑀺𑀭𑀢𑁂 𑀭𑀚𑀦𑁆𑀢𑀺 𑀅𑀢𑀺𑀭𑁂𑀓𑀁 𑀉𑀧𑀭𑀺 𑀓𑀺𑀮𑁂𑀲𑀭𑀚𑀁 𑀆𑀓𑀺𑀭𑀢𑀺. 𑀅𑀓𑀢𑀁 𑀤𑀼𑀓𑁆𑀓𑀝𑀁 𑀲𑁂𑀬𑁆𑀬𑁄𑀢𑀺 𑀤𑀼𑀓𑁆𑀓𑀝𑀁 𑀅𑀓𑀢𑀫𑁂𑀯 𑀲𑁂𑀬𑁆𑀬𑁄. 𑀬𑀁 𑀓𑀺𑀜𑁆𑀘𑀻𑀢𑀺 𑀦 𑀓𑁂𑀯𑀮𑀁 𑀤𑀼𑀓𑁆𑀓𑀝𑀁 𑀓𑀢𑁆𑀯𑀸 𑀓𑀢𑀲𑀸𑀫𑀜𑁆𑀜𑀫𑁂𑀯, 𑀅𑀜𑁆𑀜𑀫𑁆𑀧𑀺 𑀬𑀁 𑀓𑀺𑀜𑁆𑀘𑀺 𑀲𑀺𑀣𑀺𑀮𑀁 𑀓𑀢𑀁 𑀏𑀯𑀭𑀽𑀧𑀫𑁂𑀯 𑀳𑁄𑀢𑀺. 𑀲𑀁𑀓𑀺𑀮𑀺𑀝𑁆𑀞𑀦𑁆𑀢𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀯𑀢𑀁. 𑀇𑀫𑀲𑁆𑀫𑀺𑀁 𑀳𑀺 𑀲𑀸𑀲𑀦𑁂 𑀧𑀘𑁆𑀘𑀬𑀳𑁂𑀢𑀼 𑀲𑀫𑀸𑀤𑀺𑀦𑁆𑀦𑀥𑀼𑀢𑀗𑁆𑀕𑀯𑀢𑀁 𑀲𑀁𑀓𑀺𑀮𑀺𑀝𑁆𑀞𑀫𑁂𑀯. 𑀲𑀗𑁆𑀓𑀲𑁆𑀲𑀭𑀦𑁆𑀢𑀺 𑀲𑀗𑁆𑀓𑀸𑀬 𑀲𑀭𑀺𑀢𑀁, ‘‘𑀇𑀤𑀫𑁆𑀧𑀺 𑀇𑀫𑀺𑀦𑀸 𑀓𑀢𑀁 𑀪𑀯𑀺𑀲𑁆𑀲𑀢𑀺, 𑀇𑀤𑀫𑁆𑀧𑀺 𑀇𑀫𑀺𑀦𑀸’’𑀢𑀺 𑀏𑀯𑀁 𑀆𑀲𑀗𑁆𑀓𑀺𑀢𑀧𑀭𑀺𑀲𑀗𑁆𑀓𑀺𑀢𑀁. 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀺𑀓𑀸𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺𑀪𑀽𑀢𑀸 𑀧𑀼𑀩𑁆𑀩𑀧𑀥𑀸𑀦𑀪𑀽𑀢𑀸. 𑀅𑀝𑁆𑀞𑀫𑀁.

𑁯. 𑀘𑀦𑁆𑀤𑀺𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁦. 𑀦𑀯𑀫𑁂 𑀘𑀦𑁆𑀤𑀺𑀫𑀸𑀢𑀺 𑀘𑀦𑁆𑀤𑀯𑀺𑀫𑀸𑀦𑀯𑀸𑀲𑀻 𑀤𑁂𑀯𑀧𑀼𑀢𑁆𑀢𑁄. 𑀲𑀩𑁆𑀩𑀥𑀻𑀢𑀺 𑀲𑀩𑁆𑀩𑁂𑀲𑀼 𑀔𑀦𑁆𑀥𑀆𑀬𑀢𑀦𑀸𑀤𑀻𑀲𑀼. 𑀮𑁄𑀓𑀸𑀦𑀼𑀓𑀫𑁆𑀧𑀓𑀸𑀢𑀺 𑀢𑀼𑀬𑁆𑀳𑀫𑁆𑀧𑀺 𑀏𑀢𑀲𑁆𑀲𑀧𑀺 𑀢𑀸𑀤𑀺𑀲𑀸 𑀏𑀯. 𑀲𑀦𑁆𑀢𑀭𑀫𑀸𑀦𑁄𑀯𑀸𑀢𑀺 𑀢𑀼𑀭𑀺𑀢𑁄 𑀯𑀺𑀬. 𑀧𑀫𑀼𑀜𑁆𑀘𑀲𑀻𑀢𑀺 𑀅𑀢𑀻𑀢𑀢𑁆𑀣𑁂 𑀯𑀢𑁆𑀢𑀫𑀸𑀦𑀯𑀘𑀦𑀁. 𑀦𑀯𑀫𑀁.

𑁧𑁦. 𑀲𑀽𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁧. 𑀤𑀲𑀫𑁂 𑀲𑀽𑀭𑀺𑀬𑁄𑀢𑀺 𑀲𑀽𑀭𑀺𑀬𑀯𑀺𑀫𑀸𑀦𑀯𑀸𑀲𑀻 𑀤𑁂𑀯𑀧𑀼𑀢𑁆𑀢𑁄. 𑀅𑀦𑁆𑀥𑀓𑀸𑀭𑁂𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑁂𑀦 𑀅𑀦𑁆𑀥𑀪𑀸𑀯𑀓𑀭𑀡𑁂. 𑀯𑀺𑀭𑁄𑀘𑀢𑀻𑀢𑀺 𑀯𑁂𑀭𑁄𑀘𑀦𑁄. 𑀫𑀡𑁆𑀟𑀮𑀻𑀢𑀺 𑀫𑀡𑁆𑀟𑀮𑀲𑀡𑁆𑀞𑀸𑀦𑁄. 𑀫𑀸, 𑀭𑀸𑀳𑀼, 𑀕𑀺𑀮𑀻 𑀘𑀭𑀫𑀦𑁆𑀢𑀮𑀺𑀓𑁆𑀔𑁂𑀢𑀺 𑀅𑀦𑁆𑀢𑀮𑀺𑀓𑁆𑀔𑁂 𑀘𑀭𑀁 𑀲𑀽𑀭𑀺𑀬𑀁, 𑀭𑀸𑀳𑀼, 𑀫𑀸 𑀕𑀺𑀮𑀻𑀢𑀺 𑀯𑀤𑀢𑀺. 𑀓𑀺𑀁 𑀧𑀦𑁂𑀲 𑀢𑀁 𑀕𑀺𑀮𑀢𑀻𑀢𑀺? 𑀆𑀫, 𑀕𑀺𑀮𑀢𑀺. 𑀭𑀸𑀳𑀼𑀲𑁆𑀲 𑀳𑀺 𑀅𑀢𑁆𑀢𑀪𑀸𑀯𑁄 𑀫𑀳𑀸, 𑀉𑀘𑁆𑀘𑀢𑁆𑀢𑀦𑁂𑀦 𑀅𑀝𑁆𑀞𑀬𑁄𑀚𑀦𑀲𑀢𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀬𑁄𑀚𑀦𑀲𑀳𑀲𑁆𑀲𑀸𑀦𑀺, 𑀩𑀸𑀳𑀦𑁆𑀢𑀭𑀫𑀲𑁆𑀲 𑀤𑁆𑀯𑀸𑀤𑀲𑀬𑁄𑀚𑀦𑀲𑀢𑀸𑀦𑀺, 𑀩𑀳𑀮𑀢𑁆𑀢𑁂𑀦 𑀙 𑀬𑁄𑀚𑀦𑀲𑀢𑀸𑀦𑀺, 𑀲𑀻𑀲𑀁 𑀦𑀯 𑀬𑁄𑀚𑀦𑀲𑀢𑀁, 𑀦𑀮𑀸𑀝𑀁 𑀢𑀺𑀬𑁄𑀚𑀦𑀲𑀢𑀁, 𑀪𑀫𑀼𑀓𑀦𑁆𑀢𑀭𑀁 𑀧𑀡𑁆𑀡𑀸𑀲𑀬𑁄𑀚𑀦𑀁, 𑀫𑀼𑀔𑀁 𑀤𑁆𑀯𑀺𑀬𑁄𑀚𑀦𑀲𑀢𑀁, 𑀖𑀸𑀦𑀁 𑀢𑀺𑀬𑁄𑀚𑀦𑀲𑀢𑀁, 𑀫𑀼𑀔𑀸𑀥𑀸𑀦𑀁 𑀢𑀺𑀬𑁄𑀚𑀦𑀲𑀢𑀕𑀫𑁆𑀪𑀻𑀭𑀁 𑀳𑀢𑁆𑀣𑀢𑀮𑀧𑀸𑀤𑀢𑀮𑀸𑀦𑀺 𑀧𑀼𑀣𑀼𑀮𑀢𑁄 𑀤𑁆𑀯𑀺𑀬𑁄𑀚𑀦𑀲𑀢𑀸𑀦𑀺. 𑀅𑀗𑁆𑀕𑀼𑀮𑀺𑀧𑀩𑁆𑀩𑀸𑀦𑀺 𑀧𑀡𑁆𑀡𑀸𑀲 𑀬𑁄𑀚𑀦𑀸𑀦𑀺. 𑀲𑁄 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀯𑀺𑀭𑁄𑀘𑀫𑀸𑀦𑁂 𑀤𑀺𑀲𑁆𑀯𑀸 𑀇𑀲𑁆𑀲𑀸𑀧𑀓𑀢𑁄 𑀢𑁂𑀲𑀁 𑀕𑀫𑀦𑀯𑀻𑀣𑀺𑀁 𑀑𑀢𑀭𑀺𑀢𑁆𑀯𑀸 𑀫𑀼𑀔𑀁 𑀯𑀺𑀯𑀭𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀘𑀦𑁆𑀤𑀯𑀺𑀫𑀸𑀦𑀁 𑀲𑀽𑀭𑀺𑀬𑀯𑀺𑀫𑀸𑀦𑀁 𑀯𑀸 𑀢𑀺𑀬𑁄𑀚𑀦𑀲𑀢𑀺𑀓𑁂 𑀫𑀳𑀸𑀦𑀭𑀓𑁂 𑀧𑀓𑁆𑀔𑀺𑀢𑁆𑀢𑀁 𑀯𑀺𑀬 𑀳𑁄𑀢𑀺. 𑀯𑀺𑀫𑀸𑀦𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀫𑀭𑀡𑀪𑀬𑀢𑀚𑁆𑀚𑀺𑀢𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀯𑀺𑀭𑀯𑀦𑁆𑀢𑀺. 𑀲𑁄 𑀧𑀦 𑀯𑀺𑀫𑀸𑀦𑀁 𑀓𑀤𑀸𑀘𑀺 𑀳𑀢𑁆𑀣𑁂𑀦 𑀙𑀸𑀤𑁂𑀢𑀺, 𑀓𑀤𑀸𑀘𑀺 𑀳𑀦𑀼𑀓𑀲𑁆𑀲 𑀳𑁂𑀝𑁆𑀞𑀸 𑀧𑀓𑁆𑀔𑀺𑀧𑀢𑀺, 𑀓𑀤𑀸𑀘𑀺 𑀚𑀺𑀯𑁆𑀳𑀸𑀬 𑀧𑀭𑀺𑀫𑀚𑁆𑀚𑀢𑀺, 𑀓𑀤𑀸𑀘𑀺 𑀅𑀯𑀕𑀡𑁆𑀟𑀓𑀸𑀭𑀓𑀁 𑀪𑀼𑀜𑁆𑀚𑀦𑁆𑀢𑁄 𑀯𑀺𑀬 𑀓𑀧𑁄𑀮𑀦𑁆𑀢𑀭𑁂 𑀞𑀧𑁂𑀢𑀺. 𑀯𑁂𑀕𑀁 𑀧𑀦 𑀯𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑀘𑁂 𑀯𑀸𑀭𑁂𑀲𑁆𑀲𑀸𑀫𑀻𑀢𑀺 𑀕𑀡𑁆𑀟𑀓𑀁 𑀓𑀢𑁆𑀯𑀸 𑀢𑀺𑀝𑁆𑀞𑁂𑀬𑁆𑀬, 𑀫𑀢𑁆𑀣𑀓𑀁 𑀢𑀲𑁆𑀲 𑀪𑀺𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑁂𑀬𑁆𑀬, 𑀆𑀓𑀟𑁆𑀠𑀺𑀢𑁆𑀯𑀸 𑀯𑀸 𑀦𑀁 𑀑𑀦𑀫𑁂𑀬𑁆𑀬. 𑀢𑀲𑁆𑀫𑀸 𑀯𑀺𑀫𑀸𑀦𑁂𑀦 𑀲𑀳𑁂𑀯 𑀕𑀘𑁆𑀙𑀢𑀺. 𑀧𑀚𑀁 𑀫𑀫𑀦𑁆𑀢𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀓𑀺𑀭 𑀤𑁆𑀯𑁂𑀧𑀺 𑀤𑁂𑀯𑀧𑀼𑀢𑁆𑀢𑀸 𑀫𑀳𑀸𑀲𑀫𑀬𑀲𑀼𑀢𑁆𑀢𑀓𑀣𑀦𑀤𑀺𑀯𑀲𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑀸. 𑀢𑁂𑀦 𑀪𑀕𑀯𑀸 ‘‘𑀧𑀚𑀁 𑀫𑀫’’𑀦𑁆𑀢𑀺 𑀆𑀳, 𑀧𑀼𑀢𑁆𑀢𑁄 𑀫𑀫 𑀏𑀲𑁄𑀢𑀺 𑀅𑀢𑁆𑀣𑁄. 𑀤𑀲𑀫𑀁.

𑀧𑀞𑀫𑁄 𑀯𑀕𑁆𑀕𑁄.

𑁨. 𑀅𑀦𑀸𑀣𑀧𑀺𑀡𑁆𑀟𑀺𑀓𑀯𑀕𑁆𑀕𑁄

𑁧. 𑀘𑀦𑁆𑀤𑀺𑀫𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁨. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀓𑀘𑁆𑀙𑁂𑀯𑀸𑀢𑀺 𑀓𑀘𑁆𑀙𑁂 𑀯𑀺𑀬. 𑀓𑀘𑁆𑀙𑁂𑀢𑀺 𑀧𑀩𑁆𑀩𑀢𑀓𑀘𑁆𑀙𑁂𑀧𑀺 𑀦𑀤𑀻𑀓𑀘𑁆𑀙𑁂𑀧𑀺. 𑀏𑀓𑁄𑀤𑀺 𑀦𑀺𑀧𑀓𑀸𑀢𑀺 𑀏𑀓𑀕𑁆𑀕𑀘𑀺𑀢𑁆𑀢𑀸 𑀘𑁂𑀯 𑀧𑀜𑁆𑀜𑀸𑀦𑁂𑀧𑀓𑁆𑀓𑁂𑀦 𑀘 𑀲𑀫𑀦𑁆𑀦𑀸𑀕𑀢𑀸. 𑀲𑀢𑀸𑀢𑀺 𑀲𑀢𑀺𑀫𑀦𑁆𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁂 𑀛𑀸𑀦𑀸𑀦𑀺 𑀮𑀪𑀺𑀢𑁆𑀯𑀸 𑀏𑀓𑁄𑀤𑀻 𑀦𑀺𑀧𑀓𑀸 𑀲𑀢𑀸 𑀯𑀺𑀳𑀭𑀦𑁆𑀢𑀺, 𑀢𑁂 𑀅𑀫𑀓𑀲𑁂 𑀧𑀩𑁆𑀩𑀢𑀓𑀘𑁆𑀙𑁂 𑀯𑀸 𑀦𑀤𑀻𑀓𑀘𑁆𑀙𑁂 𑀯𑀸 𑀫𑀕𑀸 𑀯𑀺𑀬 𑀲𑁄𑀢𑁆𑀣𑀺𑀁 𑀕𑀫𑀺𑀲𑁆𑀲𑀦𑁆𑀢𑀻𑀢𑀺. 𑀧𑀸𑀭𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀅𑀫𑁆𑀩𑀼𑀚𑁄𑀢𑀺 𑀫𑀘𑁆𑀙𑁄. 𑀭𑀡𑀜𑁆𑀚𑀳𑀸𑀢𑀺 𑀓𑀺𑀮𑁂𑀲𑀜𑁆𑀚𑀳𑀸. 𑀬𑁂𑀧𑀺 𑀛𑀸𑀦𑀸𑀦𑀺 𑀮𑀪𑀺𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑀸 𑀓𑀺𑀮𑁂𑀲𑁂 𑀚𑀳𑀦𑁆𑀢𑀺, 𑀢𑁂 𑀲𑀼𑀢𑁆𑀢𑀚𑀸𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀘𑁆𑀙𑀸 𑀯𑀺𑀬 𑀦𑀺𑀩𑁆𑀩𑀸𑀦𑀁 𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀞𑀫𑀁.

𑁨. 𑀯𑁂𑀡𑁆𑀟𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁩. 𑀤𑀼𑀢𑀺𑀬𑁂 𑀯𑁂𑀡𑁆𑀟𑀽𑀢𑀺 𑀢𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀦𑀸𑀫𑀁. 𑀧𑀬𑀺𑀭𑀼𑀧𑀸𑀲𑀺𑀬𑀸𑀢𑀺 𑀧𑀭𑀺𑀭𑀼𑀧𑀸𑀲𑀺𑀢𑁆𑀯𑀸. 𑀅𑀦𑀼𑀲𑀺𑀓𑁆𑀔𑀭𑁂𑀢𑀺 𑀲𑀺𑀓𑁆𑀔𑀦𑁆𑀢𑀺. 𑀲𑀺𑀝𑁆𑀞𑀺𑀧𑀤𑁂𑀢𑀺 𑀅𑀦𑀼𑀲𑀺𑀝𑁆𑀞𑀺𑀧𑀤𑁂. 𑀓𑀸𑀮𑁂 𑀢𑁂 𑀅𑀧𑁆𑀧𑀫𑀚𑁆𑀚𑀦𑁆𑀢𑀸𑀢𑀺 𑀓𑀸𑀮𑁂 𑀢𑁂 𑀅𑀧𑁆𑀧𑀫𑀸𑀤𑀁 𑀓𑀭𑁄𑀦𑁆𑀢𑀸. 𑀤𑀼𑀢𑀺𑀬𑀁.

𑁩. 𑀤𑀻𑀖𑀮𑀝𑁆𑀞𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁪. 𑀢𑀢𑀺𑀬𑁂 𑀤𑀻𑀖𑀮𑀝𑁆𑀞𑀻𑀢𑀺 𑀤𑁂𑀯𑀮𑁄𑀓𑁂 𑀲𑀩𑁆𑀩𑁂 𑀲𑀫𑀧𑁆𑀧𑀫𑀸𑀡𑀸 𑀢𑀺𑀕𑀸𑀯𑀼𑀢𑀺𑀓𑀸𑀯 𑀳𑁄𑀦𑁆𑀢𑀺, 𑀫𑀦𑀼𑀲𑁆𑀲𑀮𑁄𑀓𑁂 𑀧𑀦𑀲𑁆𑀲 𑀤𑀻𑀖𑀢𑁆𑀢𑀪𑀸𑀯𑀢𑀸𑀬 𑀏𑀯𑀁𑀦𑀸𑀫𑀁 𑀅𑀳𑁄𑀲𑀺. 𑀲𑁄 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄𑀧𑀺 𑀢𑀣𑁂𑀯 𑀧𑀜𑁆𑀜𑀸𑀬𑀺. 𑀢𑀢𑀺𑀬𑀁.

𑁪. 𑀦𑀦𑁆𑀤𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁫. 𑀘𑀢𑀼𑀢𑁆𑀣𑁂 𑀕𑁄𑀢𑀫𑀸𑀢𑀺 𑀪𑀕𑀯𑀦𑁆𑀢𑀁 𑀕𑁄𑀢𑁆𑀢𑁂𑀦 𑀆𑀮𑀧𑀢𑀺. 𑀅𑀦𑀸𑀯𑀝𑀦𑁆𑀢𑀺 𑀢𑀣𑀸𑀕𑀢𑀲𑁆𑀲 𑀳𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑁂𑀲𑁂𑀦𑁆𑀢𑀲𑁆𑀲 𑀭𑀼𑀓𑁆𑀔𑁄 𑀯𑀸 𑀧𑀩𑁆𑀩𑀢𑁄 𑀯𑀸 𑀆𑀯𑀭𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀢𑁂𑀦𑀸𑀳 ‘‘𑀅𑀦𑀸𑀯𑀝’’𑀦𑁆𑀢𑀺. 𑀇𑀢𑀺 𑀢𑀣𑀸𑀕𑀢𑀁 𑀣𑁄𑀫𑁂𑀢𑁆𑀯𑀸 𑀤𑁂𑀯𑀮𑁄𑀓𑁂 𑀅𑀪𑀺𑀲𑀗𑁆𑀔𑀢𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 𑀓𑀣𑀁𑀯𑀺𑀥𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀼𑀓𑁆𑀔𑀫𑀢𑀺𑀘𑁆𑀘 𑀇𑀭𑀺𑀬𑀢𑀻𑀢𑀺 𑀤𑀼𑀓𑁆𑀔𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀲𑀻𑀮𑀯𑀸𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂𑀦 𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀔𑀻𑀡𑀸𑀲𑀯𑁄. 𑀧𑀜𑁆𑀜𑀸𑀤𑀬𑁄𑀧𑀺 𑀫𑀺𑀲𑁆𑀲𑀓𑀸𑀬𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀧𑀽𑀚𑀬𑀦𑁆𑀢𑀻𑀢𑀺 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀧𑀽𑀚𑁂𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫-𑁬. 𑀘𑀦𑁆𑀤𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁬. 𑀧𑀜𑁆𑀘𑀫𑁂 𑀅𑀧𑁆𑀧𑀢𑀺𑀝𑁆𑀞𑁂 𑀅𑀦𑀸𑀮𑀫𑁆𑀩𑁂𑀢𑀺 𑀳𑁂𑀝𑁆𑀞𑀸 𑀅𑀧𑀢𑀺𑀝𑁆𑀞𑁂 𑀉𑀧𑀭𑀺 𑀅𑀦𑀸𑀮𑀫𑁆𑀩𑀦𑁂. 𑀲𑀼𑀲𑀫𑀸𑀳𑀺𑀢𑁄𑀢𑀺 𑀅𑀧𑁆𑀧𑀦𑀸𑀬𑀧𑀺 𑀉𑀧𑀘𑀸𑀭𑁂𑀦𑀧𑀺 𑀲𑀼𑀝𑁆𑀞𑀼 𑀲𑀫𑀸𑀳𑀺𑀢𑁄. 𑀧𑀳𑀺𑀢𑀢𑁆𑀢𑁄𑀢𑀺 𑀧𑁂𑀲𑀺𑀢𑀢𑁆𑀢𑁄. 𑀦𑀦𑁆𑀤𑀻𑀭𑀸𑀕𑀧𑀭𑀺𑀓𑁆𑀔𑀻𑀡𑁄𑀢𑀺 𑀧𑀭𑀺𑀓𑁆𑀔𑀻𑀡𑀦𑀦𑁆𑀤𑀻𑀭𑀸𑀕𑁄. 𑀦𑀦𑁆𑀤𑀻𑀭𑀸𑀕𑁄 𑀦𑀸𑀫 𑀢𑀬𑁄 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀸. 𑀇𑀢𑀺 𑀇𑀫𑀸𑀬 𑀕𑀸𑀣𑀸𑀬 𑀓𑀸𑀫𑀲𑀜𑁆𑀜𑀸𑀕𑀳𑀡𑁂𑀦 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺, 𑀭𑀽𑀧𑀲𑀁𑀬𑁄𑀚𑀦𑀕𑀳𑀡𑁂𑀦 𑀧𑀜𑁆𑀘 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺, 𑀦𑀦𑁆𑀤𑀻𑀭𑀸𑀕𑁂𑀦 𑀢𑀬𑁄 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀸 𑀕𑀳𑀺𑀢𑀸. 𑀏𑀯𑀁 𑀬𑀲𑁆𑀲 𑀤𑀲 𑀲𑀁𑀬𑁄𑀚𑀦𑀸𑀦𑀺 𑀢𑀬𑁄 𑀘 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀸 𑀧𑀳𑀻𑀦𑀸, 𑀲𑁄 𑀕𑀫𑁆𑀪𑀻𑀭𑁂 𑀫𑀳𑁄𑀖𑁂 𑀦 𑀲𑀻𑀤𑀢𑀻𑀢𑀺. 𑀓𑀸𑀫𑀲𑀜𑁆𑀜𑀸𑀬 𑀯𑀸 𑀓𑀸𑀫𑀪𑀯𑁄, 𑀭𑀽𑀧𑀲𑀁𑀬𑁄𑀚𑀦𑁂𑀦 𑀭𑀽𑀧𑀪𑀯𑁄 𑀕𑀳𑀺𑀢𑁄, 𑀢𑁂𑀲𑀁 𑀕𑀳𑀡𑁂𑀦 𑀅𑀭𑀽𑀧𑀪𑀯𑁄 𑀕𑀳𑀺𑀢𑁄𑀯, 𑀦𑀦𑁆𑀤𑀻𑀭𑀸𑀕𑁂𑀦 𑀢𑀬𑁄 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀸 𑀕𑀳𑀺𑀢𑀸𑀢𑀺 𑀏𑀯𑀁 𑀬𑀲𑁆𑀲 𑀢𑀻𑀲𑀼 𑀪𑀯𑁂𑀲𑀼 𑀢𑀬𑁄 𑀲𑀗𑁆𑀔𑀸𑀭𑀸 𑀦𑀢𑁆𑀣𑀺, 𑀲𑁄 𑀕𑀫𑁆𑀪𑀻𑀭𑁂 𑀦 𑀲𑀻𑀤𑀢𑀻𑀢𑀺𑀧𑀺 𑀤𑀲𑁆𑀲𑁂𑀢𑀺. 𑀧𑀜𑁆𑀘𑀫𑀁.

𑁯𑁭. 𑀙𑀝𑁆𑀞𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀙𑀝𑁆𑀞𑀁.

𑁭. 𑀲𑀼𑀩𑁆𑀭𑀳𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁮. 𑀲𑀢𑁆𑀢𑀫𑁂 𑀲𑀼𑀩𑁆𑀭𑀳𑁆𑀫𑀸𑀢𑀺 𑀲𑁄 𑀓𑀺𑀭 𑀤𑁂𑀯𑀧𑀼𑀢𑁆𑀢𑁄 𑀅𑀘𑁆𑀙𑀭𑀸𑀲𑀗𑁆𑀖𑀧𑀭𑀺𑀯𑀼𑀢𑁄 𑀦𑀦𑁆𑀤𑀦𑀓𑀻𑀴𑀺𑀓𑀁 𑀕𑀦𑁆𑀢𑁆𑀯𑀸 𑀧𑀸𑀭𑀺𑀘𑁆𑀙𑀢𑁆𑀢𑀓𑀫𑀽𑀮𑁂 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀢𑀁 𑀧𑀜𑁆𑀘𑀲𑀢𑀸 𑀤𑁂𑀯𑀥𑀻𑀢𑀭𑁄 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸, 𑀧𑀜𑁆𑀘𑀲𑀢𑀸 𑀭𑀼𑀓𑁆𑀔𑀁 𑀅𑀪𑀺𑀭𑀼𑀴𑁆𑀳𑀸. 𑀦𑀦𑀼 𑀘 𑀤𑁂𑀯𑀢𑀸𑀦𑀁 𑀘𑀺𑀢𑁆𑀢𑀯𑀲𑁂𑀦 𑀬𑁄𑀚𑀦𑀲𑀢𑀺𑀓𑁄𑀧𑀺 𑀭𑀼𑀓𑁆𑀔𑁄 𑀑𑀦𑀫𑀺𑀢𑁆𑀯𑀸 𑀳𑀢𑁆𑀣𑀁 𑀆𑀕𑀘𑁆𑀙𑀢𑀺, 𑀓𑀲𑁆𑀫𑀸 𑀢𑀸 𑀅𑀪𑀺𑀭𑀼𑀴𑁆𑀳𑀸𑀢𑀺. 𑀔𑀺𑀟𑁆𑀟𑀸𑀧𑀲𑀼𑀢𑀢𑀸𑀬. 𑀅𑀪𑀺𑀭𑀼𑀬𑁆𑀳 𑀧𑀦 𑀫𑀥𑀼𑀭𑀲𑁆𑀲𑀭𑁂𑀦 𑀕𑀸𑀬𑀺𑀢𑁆𑀯𑀸 𑀕𑀸𑀬𑀺𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀧𑀸𑀢𑁂𑀦𑁆𑀢𑀺, 𑀢𑀸𑀦𑀺 𑀕𑀳𑁂𑀢𑁆𑀯𑀸 𑀇𑀢𑀭𑀸 𑀏𑀓𑀢𑁄𑀯𑀡𑁆𑀝𑀺𑀓𑀫𑀸𑀮𑀸𑀤𑀺𑀯𑀲𑁂𑀦 𑀕𑀦𑁆𑀣𑁂𑀦𑁆𑀢𑀺. 𑀅𑀣 𑀭𑀼𑀓𑁆𑀔𑀁 𑀅𑀪𑀺𑀭𑀼𑀴𑁆𑀳𑀸 𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑀯𑀲𑁂𑀦 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀅𑀯𑀻𑀘𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀸 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑁆𑀢𑀺.

𑀅𑀣 𑀓𑀸𑀮𑁂 𑀕𑀘𑁆𑀙𑀦𑁆𑀢𑁂 𑀤𑁂𑀯𑀧𑀼𑀢𑁆𑀢𑁄 ‘‘𑀇𑀫𑀸𑀲𑀁 𑀦𑁂𑀯 𑀲𑀤𑁆𑀤𑁄 𑀲𑀼𑀬𑁆𑀬𑀢𑀺, 𑀦 𑀧𑀼𑀧𑁆𑀨𑀸𑀦𑀺 𑀧𑀸𑀢𑁂𑀦𑁆𑀢𑀺. 𑀓𑀳𑀁 𑀦𑀼 𑀔𑁄 𑀕𑀢𑀸’’𑀢𑀺? 𑀆𑀯𑀚𑁆𑀚𑁂𑀦𑁆𑀢𑁄 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀪𑀸𑀯𑀁 𑀤𑀺𑀲𑁆𑀯𑀸 𑀧𑀺𑀬𑀯𑀢𑁆𑀣𑀼𑀓𑀲𑁄𑀓𑁂𑀦 𑀭𑀼𑀧𑁆𑀧𑀫𑀸𑀦𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀢𑀸 𑀢𑀸𑀯 𑀬𑀣𑀸𑀓𑀫𑁆𑀫𑁂𑀦 𑀕𑀢𑀸, 𑀫𑀬𑁆𑀳𑀁 𑀆𑀬𑀼𑀲𑀗𑁆𑀔𑀸𑀭𑁄 𑀓𑀺𑀢𑁆𑀢𑀓𑁄’’𑀢𑀺. 𑀲𑁄 𑁋 ‘‘𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀬𑀸𑀧𑀺 𑀅𑀯𑀲𑁂𑀲𑀸𑀳𑀺 𑀧𑀜𑁆𑀘𑀲𑀢𑀸𑀳𑀺 𑀲𑀤𑁆𑀥𑀺𑀁 𑀓𑀸𑀮𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀩𑁆𑀩𑀢𑁆𑀢𑀺𑀢𑀩𑁆𑀩’’𑀦𑁆𑀢𑀺 𑀤𑀺𑀲𑁆𑀯𑀸 𑀩𑀮𑀯𑀢𑀭𑁂𑀦 𑀲𑁄𑀓𑁂𑀦 𑀭𑀼𑀧𑁆𑀧𑀺. 𑀲𑁄 𑁋 ‘‘𑀇𑀫𑀁 𑀫𑀬𑁆𑀳𑀁 𑀲𑁄𑀓𑀁 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀜𑁆𑀜𑀢𑁆𑀭 𑀢𑀣𑀸𑀕𑀢𑀸 𑀦𑀺𑀤𑁆𑀥𑀫𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀦𑀺𑀘𑁆𑀘𑀁 𑀉𑀢𑁆𑀭𑀲𑁆𑀢𑀦𑁆𑀢𑀺 𑀕𑀸𑀣𑀫𑀸𑀳.

𑀢𑀢𑁆𑀣 𑀇𑀤𑀦𑁆𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀤𑀲𑁆𑀲𑁂𑀢𑀺. 𑀤𑀼𑀢𑀺𑀬𑀧𑀤𑀁 𑀧𑀼𑀭𑀺𑀫𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀦𑀺𑀘𑁆𑀘𑀦𑁆𑀢𑀺 𑀘 𑀧𑀤𑀲𑁆𑀲 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬𑀸𑀢𑀺 𑀅𑀢𑁆𑀣𑁄 𑀦 𑀕𑀳𑁂𑀢𑀩𑁆𑀩𑁄, 𑀲𑁄𑀓𑀼𑀧𑁆𑀧𑀢𑁆𑀢𑀺𑀓𑀸𑀮𑀢𑁄 𑀧𑀦 𑀧𑀝𑁆𑀞𑀸𑀬 𑀦𑀺𑀘𑁆𑀘𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀦𑀼𑀧𑁆𑀧𑀦𑁆𑀦𑁂𑀲𑀼 𑀓𑀺𑀘𑁆𑀙𑁂𑀲𑀽𑀢𑀺 𑀇𑀢𑁄 𑀲𑀢𑁆𑀢𑀸𑀳𑀘𑁆𑀘𑀬𑁂𑀦 𑀬𑀸𑀦𑀺 𑀤𑀼𑀓𑁆𑀔𑀸𑀦𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀢𑁂𑀲𑀼. 𑀅𑀣𑁄 𑀉𑀧𑁆𑀧𑀢𑀺𑀢𑁂𑀲𑀼 𑀘𑀸𑀢𑀺 𑀬𑀸𑀦𑀺 𑀧𑀜𑁆𑀘𑀲𑀢𑀸𑀦𑀁 𑀅𑀘𑁆𑀙𑀭𑀸𑀦𑀁 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀸𑀦𑀁 𑀤𑀺𑀝𑁆𑀞𑀸𑀦𑀺, 𑀢𑁂𑀲𑀼 𑀘𑀸𑀢𑀺 𑀏𑀯𑀁 𑀇𑀫𑁂𑀲𑀼 𑀉𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀦𑁆𑀦𑁂𑀲𑀼 𑀤𑀼𑀓𑁆𑀔𑁂𑀲𑀼 𑀦𑀺𑀘𑁆𑀘𑀁 𑀫𑀫 𑀉𑀢𑁆𑀭𑀲𑁆𑀢𑀁 𑀘𑀺𑀢𑁆𑀢𑀁, 𑀅𑀩𑁆𑀪𑀦𑁆𑀢𑀭𑁂 𑀟𑀬𑁆𑀳𑀫𑀸𑀦𑁄 𑀯𑀺𑀬 𑀳𑁄𑀫𑀺 𑀪𑀕𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀦𑀸𑀜𑁆𑀜𑀢𑁆𑀭 𑀩𑁄𑀚𑁆𑀛𑀸 𑀢𑀧𑀲𑀸𑀢𑀺 𑀩𑁄𑀚𑁆𑀛𑀗𑁆𑀕𑀪𑀸𑀯𑀦𑀜𑁆𑀘 𑀢𑀧𑁄𑀕𑀼𑀡𑀜𑁆𑀘 𑀅𑀜𑁆𑀜𑀢𑁆𑀭 𑀫𑀼𑀜𑁆𑀘𑀺𑀢𑁆𑀯𑀸 𑀲𑁄𑀢𑁆𑀣𑀺𑀁 𑀦 𑀧𑀲𑁆𑀲𑀸𑀫𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀦𑀺𑀲𑁆𑀲𑀕𑁆𑀕𑀸𑀢𑀺 𑀦𑀺𑀩𑁆𑀩𑀸𑀦𑀢𑁄. 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀩𑁄𑀚𑁆𑀛𑀗𑁆𑀕𑀪𑀸𑀯𑀦𑀸 𑀧𑀞𑀫𑀁 𑀕𑀳𑀺𑀢𑀸, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀧𑀘𑁆𑀙𑀸, 𑀅𑀢𑁆𑀣𑀢𑁄 𑀧𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄𑀯 𑀧𑀞𑀫𑀁 𑀯𑁂𑀤𑀺𑀢𑀩𑁆𑀩𑁄. 𑀇𑀦𑁆𑀤𑀺𑀬𑀲𑀁𑀯𑀭𑁂 𑀳𑀺 𑀕𑀳𑀺𑀢𑁂 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀕𑀳𑀺𑀢𑀁 𑀳𑁄𑀢𑀺. 𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑁄 𑀪𑀺𑀓𑁆𑀔𑀼 𑀦𑀺𑀲𑁆𑀲𑀬𑀫𑀼𑀢𑁆𑀢𑀓𑁄 𑀥𑀼𑀢𑀗𑁆𑀕𑀲𑀗𑁆𑀔𑀸𑀢𑀁 𑀢𑀧𑁄𑀕𑀼𑀡𑀁 𑀲𑀫𑀸𑀤𑀸𑀬 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀦𑁆𑀢𑁄 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀩𑁄𑀚𑁆𑀛𑀗𑁆𑀕𑁂 𑀪𑀸𑀯𑁂𑀢𑀺. 𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑁄 𑀬𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀲𑁄 ‘‘𑀲𑀩𑁆𑀩𑀦𑀺𑀲𑁆𑀲𑀕𑁆𑀕𑁄’’𑀢𑀺 𑀪𑀕𑀯𑀸 𑀘𑀢𑀼𑀲𑀘𑁆𑀘𑀯𑀲𑁂𑀦 𑀤𑁂𑀲𑀦𑀁 𑀯𑀺𑀦𑀺𑀯𑀢𑁆𑀢𑁂𑀲𑀺. 𑀤𑁂𑀯𑀧𑀼𑀢𑁆𑀢𑁄 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀻𑀢𑀺. 𑀲𑀢𑁆𑀢𑀫𑀁.

𑁮-𑁧𑁦. 𑀓𑀓𑀼𑀥𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁯. 𑀅𑀝𑁆𑀞𑀫𑁂 𑀓𑀓𑀼𑀥𑁄 𑀤𑁂𑀯𑀧𑀼𑀢𑁆𑀢𑁄𑀢𑀺 𑀅𑀬𑀁 𑀓𑀺𑀭 𑀓𑁄𑀮𑀦𑀕𑀭𑁂 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀉𑀧𑀝𑁆𑀞𑀸𑀓𑀧𑀼𑀢𑁆𑀢𑁄 𑀤𑀳𑀭𑀓𑀸𑀮𑁂𑀬𑁂𑀯 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀯𑀲𑀦𑁆𑀢𑁄 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀓𑀸𑀮𑀗𑁆𑀓𑀢𑁄, 𑀩𑁆𑀭𑀳𑁆𑀫𑀮𑁄𑀓𑁂 𑀉𑀧𑁆𑀧𑀚𑁆𑀚𑀺. 𑀢𑀢𑁆𑀭𑀸𑀧𑀺 𑀦𑀁 𑀓𑀓𑀼𑀥𑁄 𑀩𑁆𑀭𑀳𑁆𑀫𑀸𑀢𑁆𑀯𑁂𑀯 𑀲𑀜𑁆𑀚𑀸𑀦𑀦𑁆𑀢𑀺. 𑀦𑀦𑁆𑀤𑀲𑀻𑀢𑀺 𑀢𑀼𑀲𑁆𑀲𑀲𑀺. 𑀓𑀺𑀁 𑀮𑀤𑁆𑀥𑀸𑀢𑀺 𑀢𑀼𑀝𑁆𑀞𑀺 𑀦𑀸𑀫 𑀓𑀺𑀜𑁆𑀘𑀺 𑀫𑀦𑀸𑀧𑀁 𑀮𑀪𑀺𑀢𑁆𑀯𑀸 𑀳𑁄𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀓𑀺𑀁 𑀚𑀻𑀬𑀺𑀢𑁆𑀣𑀸𑀢𑀺 𑀬𑀲𑁆𑀲 𑀳𑀺 𑀓𑀺𑀜𑁆𑀘𑀺 𑀫𑀦𑀸𑀧𑀁 𑀘𑀻𑀯𑀭𑀸𑀤𑀺𑀯𑀢𑁆𑀣𑀼 𑀚𑀺𑀡𑁆𑀡𑀁 𑀳𑁄𑀢𑀺, 𑀲𑁄 𑀲𑁄𑀘𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀅𑀭𑀢𑀻 𑀦𑀸𑀪𑀺𑀓𑀻𑀭𑀢𑀻𑀢𑀺 𑀉𑀓𑁆𑀓𑀡𑁆𑀞𑀺𑀢𑀸 𑀦𑀸𑀪𑀺𑀪𑀯𑀢𑀺. 𑀅𑀖𑀚𑀸𑀢𑀲𑁆𑀲𑀸𑀢𑀺 𑀤𑀼𑀓𑁆𑀔𑀚𑀸𑀢𑀲𑁆𑀲, 𑀯𑀝𑁆𑀝𑀤𑀼𑀓𑁆𑀔𑁂 𑀞𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀦𑀦𑁆𑀤𑀻𑀚𑀸𑀢𑀲𑁆𑀲𑀸𑀢𑀺 𑀚𑀸𑀢𑀢𑀡𑁆𑀳𑀲𑁆𑀲. 𑀅𑀖𑀦𑁆𑀢𑀺 𑀏𑀯𑀭𑀽𑀧𑀲𑁆𑀲 𑀳𑀺 𑀯𑀝𑁆𑀝𑀤𑀼𑀓𑁆𑀔𑀁 𑀆𑀕𑀢𑀫𑁂𑀯 𑀳𑁄𑀢𑀺. ‘‘𑀤𑀼𑀓𑁆𑀔𑀻 𑀲𑀼𑀔𑀁 𑀧𑀢𑁆𑀣𑀬𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀇𑀢𑀺 𑀅𑀖𑀚𑀸𑀢𑀲𑁆𑀲 𑀦𑀦𑁆𑀤𑀻 𑀳𑁄𑀢𑀺, 𑀲𑀼𑀔𑀯𑀺𑀧𑀭𑀺𑀡𑀸𑀫𑁂𑀦 𑀤𑀼𑀓𑁆𑀔𑀁 𑀆𑀕𑀢𑀫𑁂𑀯𑀸𑀢𑀺 𑀦𑀦𑁆𑀤𑀻𑀚𑀸𑀢𑀲𑁆𑀲 𑀅𑀖𑀁 𑀳𑁄𑀢𑀺. 𑀅𑀝𑁆𑀞𑀫𑀁.

𑁧𑁦𑁦. 𑀦𑀯𑀫𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀦𑀯𑀫𑀁.

𑁧𑁦𑁧. 𑀤𑀲𑀫𑁂 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀅𑀦𑀼𑀫𑀸𑀦𑀩𑀼𑀤𑁆𑀥𑀺𑀬𑀸 𑀆𑀦𑀼𑀪𑀸𑀯𑀧𑁆𑀧𑀓𑀸𑀲𑀦𑀢𑁆𑀣𑀁 𑀅𑀜𑁆𑀜𑀢𑀭𑁄𑀢𑀺 𑀆𑀳. 𑀤𑀲𑀫𑀁.

𑀤𑀼𑀢𑀺𑀬𑁄 𑀯𑀕𑁆𑀕𑁄.

𑁩. 𑀦𑀸𑀦𑀸𑀢𑀺𑀢𑁆𑀣𑀺𑀬𑀯𑀕𑁆𑀕𑁄

𑁧-𑁨. 𑀲𑀺𑀯𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁨. 𑀢𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀧𑀞𑀫𑀁.

𑁧𑁦𑁩. 𑀤𑀼𑀢𑀺𑀬𑁂 𑀧𑀝𑀺𑀓𑀘𑁆𑀘𑁂𑀯𑀸𑀢𑀺 𑀧𑀞𑀫𑀁𑀬𑁂𑀯. 𑀅𑀓𑁆𑀔𑀘𑁆𑀙𑀺𑀦𑁆𑀦𑁄𑀯𑀛𑀸𑀬𑀢𑀻𑀢𑀺 𑀅𑀓𑁆𑀔𑀘𑁆𑀙𑀺𑀦𑁆𑀦𑁄 𑀅𑀯𑀛𑀸𑀬𑀢𑀺, 𑀩𑀮𑀯𑀘𑀺𑀦𑁆𑀢𑀦𑀁 𑀘𑀺𑀦𑁆𑀢𑁂𑀢𑀺. 𑀤𑀼𑀢𑀺𑀬𑀕𑀸𑀣𑀸𑀬 𑀅𑀓𑁆𑀔𑀘𑁆𑀙𑀺𑀦𑁆𑀦𑁄𑀯𑀸𑀢𑀺 𑀅𑀓𑁆𑀔𑀘𑁆𑀙𑀺𑀦𑁆𑀦𑁄 𑀯𑀺𑀬. 𑀤𑀼𑀢𑀺𑀬𑀁.

𑁩-𑁪. 𑀲𑁂𑀭𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁪. 𑀢𑀢𑀺𑀬𑁂 𑀤𑀸𑀬𑀓𑁄𑀢𑀺 𑀤𑀸𑀦𑀲𑀻𑀮𑁄. 𑀤𑀸𑀦𑀧𑀢𑀻𑀢𑀺 𑀬𑀁 𑀤𑀸𑀦𑀁 𑀤𑁂𑀫𑀺, 𑀢𑀲𑁆𑀲 𑀧𑀢𑀺 𑀳𑀼𑀢𑁆𑀯𑀸 𑀤𑁂𑀫𑀺, 𑀦 𑀤𑀸𑀲𑁄 𑀦 𑀲𑀳𑀸𑀬𑁄. 𑀬𑁄 𑀳𑀺 𑀅𑀢𑁆𑀢𑀦𑀸 𑀫𑀥𑀼𑀭𑀁 𑀪𑀼𑀜𑁆𑀚𑀢𑀺, 𑀧𑀭𑁂𑀲𑀁 𑀅𑀫𑀥𑀼𑀭𑀁 𑀤𑁂𑀢𑀺, 𑀲𑁄 𑀤𑀸𑀦𑀲𑀗𑁆𑀔𑀸𑀢𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀤𑀸𑀲𑁄 𑀳𑀼𑀢𑁆𑀯𑀸 𑀤𑁂𑀢𑀺. 𑀬𑁄 𑀬𑀁 𑀅𑀢𑁆𑀢𑀦𑀸 𑀪𑀼𑀜𑁆𑀚𑀢𑀺, 𑀢𑀤𑁂𑀯 𑀤𑁂𑀢𑀺, 𑀲𑁄 𑀲𑀳𑀸𑀬𑁄 𑀳𑀼𑀢𑁆𑀯𑀸 𑀤𑁂𑀢𑀺. 𑀬𑁄 𑀧𑀦 𑀅𑀢𑁆𑀢𑀦𑀸 𑀬𑁂𑀦 𑀢𑁂𑀦 𑀬𑀸𑀧𑁂𑀢𑀺, 𑀧𑀭𑁂𑀲𑀁 𑀫𑀥𑀼𑀭𑀁 𑀤𑁂𑀢𑀺, 𑀲𑁄 𑀧𑀢𑀺 𑀚𑁂𑀝𑁆𑀞𑀓𑁄 𑀲𑀸𑀫𑀺 𑀳𑀼𑀢𑁆𑀯𑀸 𑀤𑁂𑀢𑀺. 𑀅𑀳𑀁 ‘‘𑀢𑀸𑀤𑀺𑀲𑁄 𑀅𑀳𑁄𑀲𑀺’’𑀦𑁆𑀢𑀺 𑀯𑀤𑀢𑀺.

𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼𑀢𑀺 𑀢𑀲𑁆𑀲 𑀓𑀺𑀭 𑀭𑀜𑁆𑀜𑁄 𑀲𑀺𑀦𑁆𑀥𑀯𑀭𑀝𑁆𑀞𑀁 𑀲𑁄𑀥𑀺𑀯𑀸𑀓𑀭𑀝𑁆𑀞𑀦𑁆𑀢𑀺 𑀤𑁆𑀯𑁂 𑀭𑀝𑁆𑀞𑀸𑀦𑀺 𑀅𑀳𑁂𑀲𑀼𑀁, 𑀦𑀕𑀭𑀁 𑀭𑁄𑀭𑀼𑀯𑀁 𑀦𑀸𑀫. 𑀢𑀲𑁆𑀲 𑀏𑀓𑁂𑀓𑀲𑁆𑀫𑀺𑀁 𑀤𑁆𑀯𑀸𑀭𑁂 𑀤𑁂𑀯𑀲𑀺𑀓𑀁 𑀲𑀢𑀲𑀳𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀦𑁆𑀢𑁄𑀦𑀕𑀭𑁂 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀲𑀢𑀲𑀳𑀲𑁆𑀲𑀁. 𑀲𑁄 𑀩𑀳𑀼𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀭𑀸𑀲𑀺𑀪𑀽𑀢𑀁 𑀤𑀺𑀲𑁆𑀯𑀸 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀤𑀸𑀦𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑁆𑀯𑀸𑀭𑁂 𑀉𑀝𑁆𑀞𑀺𑀢𑀆𑀬𑁂𑀦 𑀤𑀸𑀦𑀁 𑀤𑁂𑀣𑀸𑀢𑀺 𑀅𑀫𑀘𑁆𑀘𑁂 𑀞𑀧𑁂𑀲𑀺. 𑀢𑁂𑀦𑀸𑀳 𑁋 ‘‘𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀤𑀸𑀦𑀁 𑀤𑀻𑀬𑀺𑀢𑁆𑀣𑀸’’𑀢𑀺.

𑀲𑀫𑀡𑀩𑁆𑀭𑀸𑀳𑁆𑀫𑀡𑀓𑀧𑀡𑀤𑁆𑀥𑀺𑀓𑀯𑀦𑀺𑀩𑁆𑀩𑀓𑀬𑀸𑀘𑀓𑀸𑀦𑀦𑁆𑀢𑀺 𑀏𑀢𑁆𑀣 𑀲𑀫𑀡𑀸𑀢𑀺 𑀧𑀩𑁆𑀩𑀚𑁆𑀚𑀽𑀧𑀕𑀢𑀸. 𑀩𑁆𑀭𑀸𑀳𑁆𑀫𑀡𑀸𑀢𑀺 𑀪𑁄𑀯𑀸𑀤𑀺𑀦𑁄. 𑀲𑀫𑀺𑀢𑀧𑀸𑀧𑀩𑀸𑀳𑀺𑀢𑀧𑀸𑀧𑁂 𑀧𑀦 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀏𑀲 𑀦𑀸𑀮𑀢𑁆𑀣. 𑀓𑀧𑀡𑀸𑀢𑀺 𑀤𑀼𑀕𑁆𑀕𑀢𑀸 𑀤𑀮𑀺𑀤𑁆𑀤𑀫𑀦𑀼𑀲𑁆𑀲𑀸 𑀓𑀸𑀡𑀓𑀼𑀡𑀺𑀆𑀤𑀬𑁄. 𑀅𑀤𑁆𑀥𑀺𑀓𑀸𑀢𑀺 𑀧𑀣𑀸𑀯𑀺𑀦𑁄. 𑀯𑀦𑀺𑀩𑁆𑀩𑀓𑀸𑀢𑀺 𑀬𑁂 ‘‘𑀇𑀝𑁆𑀞𑀁, 𑀤𑀺𑀦𑁆𑀦𑀁, 𑀓𑀦𑁆𑀢𑀁, 𑀫𑀦𑀸𑀧𑀁, 𑀓𑀸𑀮𑁂𑀦, 𑀅𑀦𑀯𑀚𑁆𑀚𑀁 𑀤𑀺𑀦𑁆𑀦𑀁, 𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀬𑁆𑀬, 𑀕𑀘𑁆𑀙𑀢𑀼 𑀪𑀯𑀁 𑀩𑁆𑀭𑀳𑁆𑀫𑀮𑁄𑀓’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑀸𑀦𑀲𑁆𑀲 𑀯𑀡𑁆𑀡𑀁 𑀣𑁄𑀫𑀬𑀫𑀸𑀦𑀸 𑀯𑀺𑀘𑀭𑀦𑁆𑀢𑀺. 𑀬𑀸𑀘𑀓𑀸𑀢𑀺 𑀬𑁂 ‘‘𑀧𑀲𑀢𑀫𑀢𑁆𑀢𑀁 𑀤𑁂𑀣, 𑀲𑀭𑀸𑀯𑀫𑀢𑁆𑀢𑀁 𑀤𑁂𑀣𑀸’’𑀢𑀺𑀆𑀤𑀻𑀦𑀺 𑀘 𑀯𑀢𑁆𑀯𑀸 𑀬𑀸𑀘𑀫𑀸𑀦𑀸 𑀯𑀺𑀘𑀭𑀦𑁆𑀢𑀺. 𑀇𑀢𑁆𑀣𑀸𑀕𑀸𑀭𑀲𑁆𑀲 𑀤𑀸𑀦𑀁 𑀤𑀻𑀬𑀺𑀢𑁆𑀣𑀸𑀢𑀺 𑀧𑀞𑀫𑀤𑁆𑀯𑀸𑀭𑀲𑁆𑀲 𑀮𑀤𑁆𑀥𑀢𑁆𑀢𑀸 𑀢𑀢𑁆𑀣 𑀉𑀧𑁆𑀧𑀚𑁆𑀚𑀦𑀓𑀲𑀢𑀲𑀳𑀲𑁆𑀲𑁂 𑀅𑀜𑁆𑀜𑀫𑁆𑀧𑀺 𑀥𑀦𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀭𑀜𑁆𑀜𑁄 𑀅𑀫𑀘𑁆𑀘𑁂 𑀳𑀸𑀭𑁂𑀢𑁆𑀯𑀸 𑀅𑀢𑁆𑀢𑀦𑁄 𑀅𑀫𑀘𑁆𑀘𑁂 𑀞𑀧𑁂𑀢𑁆𑀯𑀸 𑀭𑀜𑁆𑀜𑀸 𑀤𑀺𑀦𑁆𑀦𑀤𑀸𑀦𑀢𑁄 𑀭𑀸𑀚𑀺𑀢𑁆𑀣𑀺𑀬𑁄 𑀫𑀳𑀦𑁆𑀢𑀢𑀭𑀁 𑀤𑀸𑀦𑀁 𑀅𑀤𑀁𑀲𑀼. 𑀢𑀁 𑀲𑀦𑁆𑀥𑀸𑀬𑁂𑀯𑀫𑀸𑀳. 𑀫𑀫 𑀤𑀸𑀦𑀁 𑀧𑀝𑀺𑀓𑁆𑀓𑀫𑀻𑀢𑀺 𑀬𑀁 𑀫𑀫 𑀤𑀸𑀦𑀁 𑀢𑀢𑁆𑀣 𑀤𑀻𑀬𑀺𑀢𑁆𑀣, 𑀢𑀁 𑀧𑀝𑀺𑀦𑀺𑀯𑀢𑁆𑀢𑀺. 𑀲𑁂𑀲𑀤𑁆𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑁄𑀘𑀻𑀢𑀺 𑀓𑀢𑁆𑀣𑀘𑀺. 𑀤𑀻𑀖𑀭𑀢𑁆𑀢𑀦𑁆𑀢𑀺 𑀅𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺. 𑀏𑀢𑁆𑀢𑀓𑀁 𑀓𑀺𑀭 𑀓𑀸𑀮𑀁 𑀢𑀲𑁆𑀲 𑀭𑀜𑁆𑀜𑁄 𑀤𑀸𑀦𑀁 𑀤𑀻𑀬𑀺𑀢𑁆𑀣. 𑀢𑀢𑀺𑀬𑀁.

𑁧𑁦𑁫. 𑀘𑀢𑀼𑀢𑁆𑀣𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀘𑀢𑀼𑀢𑁆𑀣𑀁.

𑁫. 𑀚𑀦𑁆𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁬. 𑀧𑀜𑁆𑀘𑀫𑁂 𑀓𑁄𑀲𑀮𑁂𑀲𑀼 𑀯𑀺𑀳𑀭𑀦𑁆𑀢𑀻𑀢𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀺𑀳𑀭𑀦𑁆𑀢𑀺. 𑀉𑀤𑁆𑀥𑀢𑀸𑀢𑀺 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸𑀬 𑀘 𑀓𑀧𑁆𑀧𑀺𑀬𑁂 𑀅𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸𑀬 𑀘 𑀅𑀦𑀯𑀚𑁆𑀚𑁂 𑀲𑀸𑀯𑀚𑁆𑀚𑀲𑀜𑁆𑀜𑀺𑀢𑀸𑀬 𑀘 𑀲𑀸𑀯𑀚𑁆𑀚𑁂 𑀅𑀦𑀯𑀚𑁆𑀚𑀲𑀜𑁆𑀜𑀺𑀢𑀸𑀬 𑀘 𑀉𑀤𑁆𑀥𑀘𑁆𑀘𑀧𑀓𑀢𑀺𑀓𑀸 𑀳𑀼𑀢𑁆𑀯𑀸. 𑀉𑀦𑁆𑀦𑀴𑀸𑀢𑀺 𑀉𑀕𑁆𑀕𑀢𑀦𑀴𑀸, 𑀉𑀝𑁆𑀞𑀺𑀢𑀢𑀼𑀘𑁆𑀙𑀫𑀸𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀧𑀮𑀸𑀢𑀺 𑀧𑀢𑁆𑀢𑀘𑀻𑀯𑀭𑀫𑀡𑁆𑀟𑀦𑀸𑀤𑀺𑀦𑀸 𑀘𑀸𑀧𑀮𑁆𑀮𑁂𑀦 𑀬𑀼𑀢𑁆𑀢𑀸. 𑀫𑀼𑀔𑀭𑀸𑀢𑀺 𑀫𑀼𑀔𑀔𑀭𑀸, 𑀔𑀭𑀯𑀘𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀓𑀺𑀡𑁆𑀡𑀯𑀸𑀘𑀸𑀢𑀺 𑀅𑀲𑀁𑀬𑀢𑀯𑀘𑀦𑀸, 𑀤𑀺𑀯𑀲𑀫𑁆𑀧𑀺 𑀦𑀺𑀭𑀢𑁆𑀣𑀓𑀯𑀘𑀦𑀧𑀮𑀸𑀧𑀺𑀦𑁄. 𑀫𑀼𑀝𑁆𑀞𑀲𑁆𑀲𑀢𑀺𑀦𑁄𑀢𑀺 𑀦𑀝𑁆𑀞𑀲𑁆𑀲𑀢𑀺𑀦𑁄 𑀲𑀢𑀺𑀯𑀺𑀭𑀳𑀺𑀢𑀸, 𑀇𑀥 𑀓𑀢𑀁 𑀏𑀢𑁆𑀣 𑀧𑀫𑀼𑀲𑁆𑀲𑀦𑁆𑀢𑀺. 𑀅𑀲𑀫𑁆𑀧𑀚𑀸𑀦𑀸𑀢𑀺 𑀦𑀺𑀧𑁆𑀧𑀜𑁆𑀜𑀸. 𑀅𑀲𑀫𑀸𑀳𑀺𑀢𑀸𑀢𑀺 𑀅𑀧𑁆𑀧𑀦𑀸𑀉𑀧𑀘𑀸𑀭𑀲𑀫𑀸𑀥𑀺𑀭𑀳𑀺𑀢𑀸, 𑀘𑀡𑁆𑀟𑀲𑁄𑀢𑁂 𑀩𑀤𑁆𑀥𑀦𑀸𑀯𑀸𑀲𑀤𑀺𑀲𑀸. 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑀸𑀢𑀺 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀸, 𑀧𑀦𑁆𑀣𑀸𑀭𑀼𑀴𑁆𑀳𑀩𑀸𑀮𑀫𑀺𑀕𑀲𑀤𑀺𑀲𑀸. 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑀸𑀢𑀺 𑀲𑀁𑀯𑀭𑀸𑀪𑀸𑀯𑁂𑀦 𑀕𑀺𑀳𑀺𑀓𑀸𑀮𑁂 𑀯𑀺𑀬 𑀯𑀺𑀯𑀝𑀇𑀦𑁆𑀤𑁆𑀭𑀺𑀬𑀸.

𑀚𑀦𑁆𑀢𑀽𑀢𑀺 𑀏𑀯𑀁𑀦𑀸𑀫𑀓𑁄 𑀤𑁂𑀯𑀧𑀼𑀢𑁆𑀢𑁄. 𑀢𑀤𑀳𑀼𑀧𑁄𑀲𑀣𑁂𑀢𑀺 𑀢𑀲𑁆𑀫𑀺𑀁 𑀅𑀳𑀼 𑀉𑀧𑁄𑀲𑀣𑁂, 𑀉𑀧𑁄𑀲𑀣𑀤𑀺𑀯𑀲𑁂𑀢𑀺 𑀅𑀢𑁆𑀣𑁄. 𑀧𑀦𑁆𑀦𑀭𑀲𑁂𑀢𑀺 𑀘𑀸𑀢𑀼𑀤𑁆𑀤𑀲𑀺𑀓𑀸𑀤𑀺𑀧𑀝𑀺𑀓𑁆𑀔𑁂𑀧𑁄. 𑀉𑀧𑀲𑀗𑁆𑀓𑀫𑀻𑀢𑀺 𑀘𑁄𑀤𑀦𑀢𑁆𑀣𑀸𑀬 𑀉𑀧𑀕𑀢𑁄. 𑀲𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀪𑀺𑀓𑁆𑀔𑀽 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑀸, 𑀇𑀤𑀸𑀦𑀺 𑀧𑀫𑀢𑁆𑀢𑀸 𑀯𑀺𑀳𑀭𑀦𑁆𑀢𑀺, 𑀦 𑀔𑁄 𑀧𑀦𑁂𑀢𑁂 𑀧𑀸𑀝𑀺𑀬𑁂𑀓𑁆𑀓𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂 𑀘𑁄𑀤𑀺𑀬𑀫𑀸𑀦𑀸 𑀓𑀣𑀁 𑀕𑀡𑁆𑀳𑀺𑀲𑁆𑀲𑀦𑁆𑀢𑀺, 𑀲𑀫𑀸𑀕𑀫𑀦𑀓𑀸𑀮𑁂 𑀘𑁄𑀤𑀺𑀲𑁆𑀲𑀸𑀫𑀻’’𑀢𑀺 𑀉𑀧𑁄𑀲𑀣𑀤𑀺𑀯𑀲𑁂 𑀢𑁂𑀲𑀁 𑀲𑀦𑁆𑀦𑀺𑀧𑀢𑀺𑀢𑀪𑀸𑀯𑀁 𑀜𑀢𑁆𑀯𑀸 𑀉𑀧𑀲𑀗𑁆𑀓𑀫𑀺. 𑀕𑀸𑀣𑀸𑀳𑀺 𑀅𑀚𑁆𑀛𑀪𑀸𑀲𑀻𑀢𑀺 𑀲𑀩𑁆𑀩𑁂𑀲𑀁 𑀫𑀚𑁆𑀛𑁂 𑀞𑀢𑁆𑀯𑀸 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀬𑀲𑁆𑀫𑀸 𑀕𑀼𑀡𑀓𑀣𑀸𑀬 𑀲𑀤𑁆𑀥𑀺𑀁 𑀦𑀺𑀕𑁆𑀕𑀼𑀡𑀲𑁆𑀲 𑀅𑀕𑀼𑀡𑁄 𑀧𑀸𑀓𑀝𑁄 𑀳𑁄𑀢𑀺, 𑀢𑀲𑁆𑀫𑀸 𑀕𑀼𑀡𑀁 𑀢𑀸𑀯 𑀓𑀣𑁂𑀦𑁆𑀢𑁄 𑀲𑀼𑀔𑀚𑀻𑀯𑀺𑀦𑁄 𑀧𑀼𑀭𑁂 𑀆𑀲𑀼𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀔𑀚𑀻𑀯𑀺𑀦𑁄 𑀧𑀼𑀭𑁂 𑀆𑀲𑀼𑀦𑁆𑀢𑀺 𑀧𑀼𑀩𑁆𑀩𑁂 𑀪𑀺𑀓𑁆𑀔𑀽 𑀲𑀼𑀧𑁆𑀧𑁄𑀲𑀸 𑀲𑀼𑀪𑀭𑀸 𑀅𑀳𑁂𑀲𑀼𑀁, 𑀉𑀘𑁆𑀘𑀦𑀻𑀘𑀓𑀼𑀮𑁂𑀲𑀼 𑀲𑀧𑀤𑀸𑀦𑀁 𑀘𑀭𑀺𑀢𑁆𑀯𑀸 𑀮𑀤𑁆𑀥𑁂𑀦 𑀫𑀺𑀲𑁆𑀲𑀓𑀧𑀺𑀡𑁆𑀟𑁂𑀦 𑀬𑀸𑀧𑁂𑀲𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀏𑀯𑀫𑀸𑀳. 𑀅𑀦𑀺𑀘𑁆𑀙𑀸𑀢𑀺 𑀦𑀺𑀢𑁆𑀢𑀡𑁆𑀳𑀸 𑀳𑀼𑀢𑁆𑀯𑀸.

𑀏𑀯𑀁 𑀧𑁄𑀭𑀸𑀡𑀓𑀪𑀺𑀓𑁆𑀔𑀽𑀦𑀁 𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀁 𑀅𑀯𑀡𑁆𑀡𑀁 𑀓𑀣𑁂𑀦𑁆𑀢𑁄 𑀤𑀼𑀧𑁆𑀧𑁄𑀲𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀕𑀸𑀫𑁂 𑀕𑀸𑀫𑀡𑀺𑀓𑀸 𑀯𑀺𑀬𑀸𑀢𑀺 𑀬𑀣𑀸 𑀕𑀸𑀫𑁂 𑀕𑀸𑀫𑀓𑀼𑀝𑀸 𑀦𑀸𑀦𑀧𑁆𑀧𑀓𑀸𑀭𑁂𑀦 𑀚𑀦𑀁 𑀧𑀻𑀴𑁂𑀢𑁆𑀯𑀸 𑀔𑀻𑀭𑀤𑀥𑀺𑀢𑀡𑁆𑀟𑀼𑀮𑀸𑀤𑀻𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺, 𑀏𑀯𑀁 𑀢𑀼𑀫𑁆𑀳𑁂𑀧𑀺 𑀅𑀦𑁂𑀲𑀦𑀸𑀬 𑀞𑀺𑀢𑀸 𑀢𑀼𑀫𑁆𑀳𑀸𑀓𑀁 𑀚𑀻𑀯𑀺𑀓𑀁 𑀓𑀧𑁆𑀧𑁂𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺. 𑀦𑀺𑀧𑀚𑁆𑀚𑀦𑁆𑀢𑀻𑀢𑀺 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀫𑀦𑀲𑀺𑀓𑀸𑀭𑁂𑀳𑀺 𑀅𑀦𑀢𑁆𑀣𑀺𑀓𑀸 𑀳𑀼𑀢𑁆𑀯𑀸 𑀲𑀬𑀦𑀫𑁆𑀳𑀺 𑀳𑀢𑁆𑀣𑀧𑀸𑀤𑁂 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀺𑀧𑀚𑁆𑀚𑀦𑁆𑀢𑀺. 𑀧𑀭𑀸𑀕𑀸𑀭𑁂𑀲𑀽𑀢𑀺 𑀧𑀭𑀕𑁂𑀳𑁂𑀲𑀼, 𑀓𑀼𑀮𑀲𑀼𑀡𑁆𑀳𑀸𑀤𑀻𑀲𑀽𑀢𑀺 𑀅𑀢𑁆𑀣𑁄. 𑀫𑀼𑀘𑁆𑀙𑀺𑀢𑀸𑀢𑀺 𑀓𑀺𑀮𑁂𑀲𑀫𑀼𑀘𑁆𑀙𑀸𑀬 𑀫𑀼𑀘𑁆𑀙𑀺𑀢𑀸.

𑀏𑀓𑀘𑁆𑀘𑁂𑀢𑀺 𑀯𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑁂𑀬𑁂𑀯. 𑀅𑀧𑀯𑀺𑀤𑁆𑀥𑀸𑀢𑀺 𑀙𑀟𑁆𑀟𑀺𑀢𑀓𑀸. 𑀅𑀦𑀸𑀣𑀸𑀢𑀺 𑀅𑀧𑀢𑀺𑀝𑁆𑀞𑀸. 𑀧𑁂𑀢𑀸𑀢𑀺 𑀲𑀼𑀲𑀸𑀦𑁂 𑀙𑀟𑁆𑀟𑀺𑀢𑀸 𑀓𑀸𑀮𑀗𑁆𑀓𑀢𑀫𑀦𑀼𑀲𑁆𑀲𑀸. 𑀬𑀣𑀸 𑀳𑀺 𑀲𑀼𑀲𑀸𑀦𑁂 𑀙𑀟𑁆𑀟𑀺𑀢𑀸 𑀦𑀸𑀦𑀸𑀲𑀓𑀼𑀡𑀸𑀤𑀻𑀳𑀺 𑀔𑀚𑁆𑀚𑀦𑁆𑀢𑀺, 𑀜𑀸𑀢𑀓𑀸𑀧𑀺 𑀦𑁂𑀲𑀁 𑀦𑀸𑀣𑀓𑀺𑀘𑁆𑀘𑀁 𑀦 𑀓𑀭𑁄𑀦𑁆𑀢𑀺, 𑀦 𑀭𑀓𑁆𑀔𑀦𑁆𑀢𑀺, 𑀦 𑀕𑁄𑀧𑀬𑀦𑁆𑀢𑀺, 𑀏𑀯𑀫𑁂𑀯𑀁 𑀏𑀯𑀭𑀽𑀧𑀸𑀧𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀤𑀻𑀦𑀁 𑀲𑀦𑁆𑀢𑀺𑀓𑀸 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀁 𑀦 𑀮𑀪𑀦𑁆𑀢𑀻𑀢𑀺 𑀅𑀧𑀯𑀺𑀤𑁆𑀥𑀸 𑀅𑀦𑀸𑀣𑀸, 𑀬𑀣𑀸 𑀧𑁂𑀢𑀸, 𑀢𑀣𑁂𑀯 𑀳𑁄𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀭𑁄𑀳𑀺𑀢𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁭. 𑀙𑀝𑁆𑀞𑁂 𑀬𑀢𑁆𑀣𑀸𑀢𑀺 𑀘𑀓𑁆𑀓𑀯𑀸𑀴𑀮𑁄𑀓𑀲𑁆𑀲 𑀏𑀓𑁄𑀓𑀸𑀲𑁂 𑀪𑀼𑀫𑁆𑀫𑀁. 𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀻𑀢𑀺 𑀇𑀤𑀁 𑀅𑀧𑀭𑀸𑀧𑀭𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀕𑀳𑀺𑀢𑀁. 𑀕𑀫𑀦𑁂𑀦𑀸𑀢𑀺 𑀧𑀤𑀕𑀫𑀦𑁂𑀦. 𑀦𑀸𑀳𑀁 𑀢𑀁 𑀮𑁄𑀓𑀲𑁆𑀲 𑀅𑀦𑁆𑀢𑀦𑁆𑀢𑀺 𑀲𑀢𑁆𑀣𑀸 𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀅𑀦𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀜𑀸𑀢𑁂𑀬𑁆𑀬𑀦𑁆𑀢𑀺𑀆𑀤𑀻𑀲𑀼 𑀜𑀸𑀢𑀩𑁆𑀩𑀁, 𑀤𑀝𑁆𑀞𑀩𑁆𑀩𑀁, 𑀧𑀢𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀇𑀢𑀺 𑀤𑁂𑀯𑀧𑀼𑀢𑁆𑀢𑁂𑀦 𑀘𑀓𑁆𑀓𑀯𑀸𑀴𑀮𑁄𑀓𑀲𑁆𑀲 𑀅𑀦𑁆𑀢𑁄 𑀧𑀼𑀘𑁆𑀙𑀺𑀢𑁄, 𑀲𑀢𑁆𑀣𑀸𑀭𑀸 𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀓𑀣𑀺𑀢𑁄. 𑀲𑁄 𑀧𑀦 𑀅𑀢𑁆𑀢𑀦𑁄 𑀧𑀜𑁆𑀳𑁂𑀦 𑀲𑀤𑁆𑀥𑀺𑀁 𑀲𑀢𑁆𑀣𑀼 𑀩𑁆𑀬𑀸𑀓𑀭𑀡𑀁 𑀲𑀫𑁂𑀢𑀻𑀢𑀺 𑀲𑀜𑁆𑀜𑀸𑀬 𑀧𑀲𑀁𑀲𑀦𑁆𑀢𑁄 𑀅𑀘𑁆𑀙𑀭𑀺𑀬𑀦𑁆𑀢𑀺𑀆𑀤𑀺𑀫𑀸𑀳.

𑀤𑀴𑁆𑀳𑀥𑀫𑁆𑀫𑁄𑀢𑀺 𑀤𑀴𑁆𑀳𑀥𑀦𑀼, 𑀉𑀢𑁆𑀢𑀫𑀧𑁆𑀧𑀫𑀸𑀡𑁂𑀦 𑀥𑀦𑀼𑀦𑀸 𑀲𑀫𑀦𑁆𑀦𑀸𑀕𑀢𑁄. 𑀥𑀦𑀼𑀕𑁆𑀕𑀳𑁄𑀢𑀺 𑀥𑀦𑀼𑀆𑀘𑀭𑀺𑀬𑁄. 𑀲𑀼𑀲𑀺𑀓𑁆𑀔𑀺𑀢𑁄𑀢𑀺 𑀤𑀲 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀥𑀦𑀼𑀲𑀺𑀧𑁆𑀧𑀁 𑀲𑀺𑀓𑁆𑀔𑀺𑀢𑁄. 𑀓𑀢𑀳𑀢𑁆𑀣𑁄𑀢𑀺 𑀉𑀲𑀪𑀧𑁆𑀧𑀫𑀸𑀡𑁂𑀧𑀺 𑀯𑀸𑀮𑀕𑁆𑀕𑀁 𑀯𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑀪𑀸𑀯𑁂𑀦 𑀓𑀢𑀳𑀢𑁆𑀣𑁄. 𑀓𑀢𑀽𑀧𑀸𑀲𑀦𑁄𑀢𑀺 𑀓𑀢𑀲𑀭𑀓𑁆𑀔𑁂𑀧𑁄 𑀤𑀲𑁆𑀲𑀺𑀢𑀲𑀺𑀧𑁆𑀧𑁄. 𑀅𑀲𑀦𑁂𑀦𑀸𑀢𑀺 𑀓𑀡𑁆𑀟𑁂𑀦. 𑀅𑀢𑀺𑀧𑀸𑀢𑁂𑀬𑁆𑀬𑀸𑀢𑀺 𑀅𑀢𑀺𑀓𑁆𑀓𑀫𑁂𑀬𑁆𑀬. 𑀬𑀸𑀯𑀢𑀸 𑀲𑁄 𑀢𑀸𑀮𑀘𑁆𑀙𑀸𑀬𑀁 𑀅𑀢𑀺𑀓𑁆𑀓𑀫𑁂𑀬𑁆𑀬, 𑀢𑀸𑀯𑀢𑀸 𑀓𑀸𑀮𑁂𑀦 𑀏𑀓𑀘𑀓𑁆𑀓𑀯𑀸𑀴𑀁 𑀅𑀢𑀺𑀓𑁆𑀓𑀫𑀸𑀫𑀻𑀢𑀺 𑀅𑀢𑁆𑀢𑀦𑁄 𑀚𑀯𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺.

𑀧𑀼𑀭𑀢𑁆𑀣𑀺𑀫𑀸 𑀲𑀫𑀼𑀤𑁆𑀤𑀸 𑀧𑀘𑁆𑀙𑀺𑀫𑁄𑀢𑀺 𑀬𑀣𑀸 𑀧𑀼𑀭𑀢𑁆𑀣𑀺𑀫𑀲𑀫𑀼𑀤𑁆𑀤𑀸 𑀧𑀘𑁆𑀙𑀺𑀫𑀲𑀫𑀼𑀤𑁆𑀤𑁄 𑀤𑀽𑀭𑁂, 𑀏𑀯𑀁 𑀫𑁂 𑀤𑀽𑀭𑁂 𑀧𑀤𑀯𑀻𑀢𑀺𑀳𑀸𑀭𑁄 𑀅𑀳𑁄𑀲𑀻𑀢𑀺 𑀯𑀤𑀢𑀺. 𑀲𑁄 𑀓𑀺𑀭 𑀧𑀸𑀘𑀻𑀦𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀞𑀺𑀢𑁄 𑀧𑀸𑀤𑀁 𑀧𑀲𑀸𑀭𑁂𑀢𑁆𑀯𑀸 𑀧𑀘𑁆𑀙𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀅𑀓𑁆𑀓𑀫𑀢𑀺, 𑀧𑀼𑀦 𑀤𑀼𑀢𑀺𑀬𑀁 𑀧𑀸𑀤𑀁 𑀧𑀲𑀸𑀭𑁂𑀢𑁆𑀯𑀸 𑀧𑀭𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀅𑀓𑁆𑀓𑀫𑀢𑀺. 𑀇𑀘𑁆𑀙𑀸𑀕𑀢𑀦𑁆𑀢𑀺 𑀇𑀘𑁆𑀙𑀸 𑀏𑀯. 𑀅𑀜𑁆𑀜𑀢𑁆𑀭𑁂𑀯𑀸𑀢𑀺 𑀦𑀺𑀧𑁆𑀧𑀧𑀜𑁆𑀘𑀢𑀁 𑀤𑀲𑁆𑀲𑁂𑀢𑀺. 𑀪𑀺𑀓𑁆𑀔𑀸𑀘𑀸𑀭𑀓𑀸𑀮𑁂 𑀓𑀺𑀭𑁂𑀲 𑀦𑀸𑀕𑀮𑀢𑀸𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑁆𑀯𑀸 𑀅𑀦𑁄𑀢𑀢𑁆𑀢𑁂 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀓𑀸𑀮𑁂 𑀲𑀫𑁆𑀧𑀢𑁆𑀢𑁂 𑀉𑀢𑁆𑀢𑀭𑀓𑀼𑀭𑀼𑀫𑁆𑀳𑀺 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀦𑀺𑀲𑀺𑀦𑁆𑀦𑁄 𑀪𑀢𑁆𑀢𑀓𑀺𑀘𑁆𑀘𑀁 𑀓𑀭𑁄𑀢𑀺, 𑀢𑀢𑁆𑀣 𑀫𑀼𑀳𑀼𑀢𑁆𑀢𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀧𑀼𑀦 𑀚𑀯𑀢𑀺. 𑀯𑀲𑁆𑀲𑀲𑀢𑀸𑀬𑀼𑀓𑁄𑀢𑀺 𑀢𑀤𑀸 𑀤𑀻𑀖𑀸𑀬𑀼𑀓𑀓𑀸𑀮𑁄 𑀳𑁄𑀢𑀺, 𑀅𑀬𑀁 𑀧𑀦 𑀯𑀲𑁆𑀲𑀲𑀢𑀸𑀯𑀲𑀺𑀝𑁆𑀞𑁂 𑀆𑀬𑀼𑀫𑁆𑀳𑀺 𑀕𑀫𑀦𑀁 𑀆𑀭𑀪𑀺. 𑀯𑀲𑁆𑀲𑀲𑀢𑀚𑀻𑀯𑀻𑀢𑀺 𑀢𑀁 𑀯𑀲𑁆𑀲𑀲𑀢𑀁 𑀅𑀦𑀦𑁆𑀢𑀭𑀸𑀬𑁂𑀦 𑀚𑀻𑀯𑀦𑁆𑀢𑁄. 𑀅𑀦𑁆𑀢𑀭𑀸𑀯 𑀓𑀸𑀮𑀗𑁆𑀓𑀢𑁄𑀢𑀺 𑀘𑀓𑁆𑀓𑀯𑀸𑀴𑀮𑁄𑀓𑀲𑁆𑀲 𑀅𑀦𑁆𑀢𑀁 𑀅𑀧𑁆𑀧𑀢𑁆𑀯𑀸 𑀅𑀦𑁆𑀢𑀭𑀸𑀯 𑀫𑀢𑁄. 𑀲𑁄 𑀧𑀦 𑀢𑀢𑁆𑀣 𑀓𑀸𑀮𑀁 𑀓𑀢𑁆𑀯𑀸𑀧𑀺 𑀆𑀕𑀦𑁆𑀢𑁆𑀯𑀸 𑀇𑀫𑀲𑁆𑀫𑀺𑀁𑀬𑁂𑀯 𑀘𑀓𑁆𑀓𑀯𑀸𑀴𑁂 𑀦𑀺𑀩𑁆𑀩𑀢𑁆𑀢𑀺. 𑀅𑀧𑁆𑀧𑀢𑁆𑀯𑀸𑀢𑀺 𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀅𑀦𑁆𑀢𑀁 𑀅𑀧𑁆𑀧𑀢𑁆𑀯𑀸. 𑀤𑀼𑀓𑁆𑀔𑀲𑁆𑀲𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲. 𑀅𑀦𑁆𑀢𑀓𑀺𑀭𑀺𑀬𑀦𑁆𑀢𑀺 𑀧𑀭𑀺𑀬𑀦𑁆𑀢𑀓𑀭𑀡𑀁. 𑀓𑀴𑁂𑀯𑀭𑁂𑀢𑀺 𑀅𑀢𑁆𑀢𑀪𑀸𑀯𑁂. 𑀲𑀲𑀜𑁆𑀜𑀺𑀫𑁆𑀳𑀺 𑀲𑀫𑀦𑀓𑁂𑀢𑀺 𑀲𑀲𑀜𑁆𑀜𑁂 𑀲𑀘𑀺𑀢𑁆𑀢𑁂. 𑀮𑁄𑀓𑀦𑁆𑀢𑀺 𑀤𑀼𑀓𑁆𑀔𑀲𑀘𑁆𑀘𑀁. 𑀮𑁄𑀓𑀲𑀫𑀼𑀤𑀬𑀦𑁆𑀢𑀺 𑀲𑀫𑀼𑀤𑀬𑀲𑀘𑁆𑀘𑀁. 𑀮𑁄𑀓𑀦𑀺𑀭𑁄𑀥𑀦𑁆𑀢𑀺 𑀦𑀺𑀭𑁄𑀥𑀲𑀘𑁆𑀘𑀁. 𑀧𑀝𑀺𑀧𑀤𑀦𑁆𑀢𑀺 𑀫𑀕𑁆𑀕𑀲𑀘𑁆𑀘𑀁. 𑀇𑀢𑀺 𑁋 ‘‘𑀦𑀸𑀳𑀁, 𑀆𑀯𑀼𑀲𑁄, 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀢𑀺𑀡𑀓𑀝𑁆𑀞𑀸𑀤𑀻𑀲𑀼 𑀧𑀜𑁆𑀜𑀧𑁂𑀫𑀺, 𑀇𑀫𑀲𑁆𑀫𑀺𑀁 𑀧𑀦 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁂 𑀓𑀸𑀬𑀲𑁆𑀫𑀺𑀁 𑀬𑁂𑀯 𑀧𑀜𑁆𑀜𑀧𑁂𑀫𑀻’’𑀢𑀺 𑀤𑀲𑁆𑀲𑁂𑀢𑀺. 𑀲𑀫𑀺𑀢𑀸𑀯𑀻𑀢𑀺 𑀲𑀫𑀺𑀢𑀧𑀸𑀧𑁄. 𑀦𑀸𑀲𑀻𑀲𑀢𑀻𑀢𑀺 𑀦 𑀧𑀢𑁆𑀣𑁂𑀢𑀺. 𑀙𑀝𑁆𑀞𑀁.

𑁧𑁦𑁮-𑁧𑁦𑁯. 𑀲𑀢𑁆𑀢𑀫𑀝𑁆𑀞𑀫𑀸𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀲𑀢𑁆𑀢𑀫𑀁, 𑀅𑀝𑁆𑀞𑀫𑀁.

𑁯. 𑀲𑀼𑀲𑀺𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁦. 𑀦𑀯𑀫𑁂 𑀢𑀼𑀬𑁆𑀳𑀫𑁆𑀧𑀺 𑀦𑁄, 𑀆𑀦𑀦𑁆𑀤, 𑀲𑀸𑀭𑀺𑀧𑀼𑀢𑁆𑀢𑁄 𑀭𑀼𑀘𑁆𑀘𑀢𑀻𑀢𑀺 𑀲𑀢𑁆𑀣𑀸 𑀣𑁂𑀭𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑀼𑀓𑀸𑀫𑁄, 𑀯𑀡𑁆𑀡𑁄 𑀘 𑀦𑀸𑀫𑁂𑀲 𑀯𑀺𑀲𑀪𑀸𑀕𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀺𑀓𑁂 𑀓𑀣𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀓𑀣𑀺𑀢𑁄 𑀳𑀺 𑀫𑀢𑁆𑀣𑀓𑀁 𑀦 𑀧𑀸𑀧𑀼𑀡𑀸𑀢𑀺. 𑀲𑁄 𑀳𑀺 ‘‘𑀅𑀲𑀼𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀲𑀻𑀮𑀯𑀸’’𑀢𑀺 𑀯𑀼𑀢𑁆𑀢𑁂. ‘‘𑀓𑀺𑀁 𑀢𑀲𑁆𑀲 𑀲𑀻𑀮𑀁? 𑀕𑁄𑀭𑀽𑀧𑀲𑀻𑀮𑁄 𑀲𑁄. 𑀓𑀺𑀁 𑀢𑀬𑀸 𑀅𑀜𑁆𑀜𑁄 𑀲𑀻𑀮𑀯𑀸 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄’’𑀢𑀺 𑀯𑀸? ‘‘𑀧𑀜𑁆𑀜𑀯𑀸’’𑀢𑀺 𑀯𑀼𑀢𑁆𑀢𑁂, ‘‘𑀓𑀺𑀁 𑀧𑀜𑁆𑀜𑁄 𑀲𑁄? 𑀓𑀺𑀁 𑀢𑀬𑀸 𑀅𑀜𑁆𑀜𑁄 𑀧𑀜𑁆𑀜𑀯𑀸 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄’’𑀢𑀺? 𑀯𑀸, 𑀆𑀤𑀻𑀦𑀺 𑀯𑀢𑁆𑀯𑀸 𑀯𑀡𑁆𑀡𑀓𑀣𑀸𑀬 𑀅𑀦𑁆𑀢𑀭𑀸𑀬𑀁 𑀓𑀭𑁄𑀢𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀧𑀦 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀪𑀸𑀕𑁄, 𑀧𑀡𑀻𑀢𑀸𑀦𑀺 𑀮𑀪𑀺𑀢𑁆𑀯𑀸 𑀣𑁂𑀭𑀲𑁆𑀲 𑀤𑁂𑀢𑀺, 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀤𑀸𑀭𑀓𑁂 𑀧𑀩𑁆𑀩𑀸𑀚𑁂𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀉𑀧𑀚𑁆𑀛𑀁 𑀕𑀡𑁆𑀳𑀸𑀧𑁂𑀢𑀺, 𑀉𑀧𑀲𑀫𑁆𑀧𑀸𑀤𑁂𑀢𑀺. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀢𑀣𑁂𑀯 𑀓𑀭𑁄𑀢𑀺. 𑀓𑀺𑀁 𑀓𑀸𑀭𑀡𑀸? 𑀅𑀜𑁆𑀜𑀫𑀜𑁆𑀜𑀲𑁆𑀲 𑀕𑀼𑀡𑁂𑀲𑀼 𑀧𑀲𑀻𑀤𑀺𑀢𑁆𑀯𑀸. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀳𑀺 𑁋 ‘‘𑀅𑀫𑁆𑀳𑀸𑀓𑀁 𑀚𑁂𑀝𑁆𑀞𑀪𑀸𑀢𑀺𑀓𑁄 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀲𑀢𑀲𑀳𑀲𑁆𑀲𑀜𑁆𑀘 𑀓𑀧𑁆𑀧𑁂 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀲𑁄𑀴𑀲𑀯𑀺𑀥𑀁 𑀧𑀜𑁆𑀜𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑁂 𑀞𑀺𑀢𑁄’’𑀢𑀺 𑀣𑁂𑀭𑀲𑁆𑀲 𑀕𑀼𑀡𑁂𑀲𑀼 𑀧𑀲𑀻𑀤𑀺𑀢𑁆𑀯𑀸𑀯 𑀣𑁂𑀭𑀁 𑀫𑀫𑀸𑀬𑀢𑀺. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑁋 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀫𑀬𑀸 𑀓𑀢𑁆𑀢𑀩𑁆𑀩𑀁 𑀫𑀼𑀔𑁄𑀤𑀓𑀤𑀸𑀦𑀸𑀤𑀺𑀓𑀺𑀘𑁆𑀘𑀁 𑀲𑀩𑁆𑀩𑀁 𑀆𑀦𑀦𑁆𑀤𑁄 𑀓𑀭𑁄𑀢𑀺. 𑀆𑀦𑀦𑁆𑀤𑀁 𑀦𑀺𑀲𑁆𑀲𑀸𑀬 𑀅𑀳𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑀼𑀁 𑀮𑀪𑀸𑀫𑀻’’𑀢𑀺 𑀆𑀬𑀲𑁆𑀫𑀢𑁄 𑀆𑀦𑀦𑁆𑀤𑀲𑁆𑀲 𑀕𑀼𑀡𑁂𑀲𑀼 𑀧𑀲𑀻𑀤𑀺𑀢𑁆𑀯𑀸𑀯 𑀢𑀁 𑀫𑀫𑀸𑀬𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑀼𑀓𑀸𑀫𑁄 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀓𑀣𑁂𑀢𑀼𑀁 𑀆𑀭𑀤𑁆𑀥𑁄.

𑀢𑀢𑁆𑀣 𑀢𑀼𑀬𑁆𑀳𑀫𑁆𑀧𑀻𑀢𑀺 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 𑀧𑀺-𑀓𑀸𑀭𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀆𑀦𑀦𑁆𑀤, 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀆𑀘𑀸𑀭𑁄 𑀕𑁄𑀘𑀭𑁄 𑀯𑀺𑀳𑀸𑀭𑁄 𑀅𑀪𑀺𑀓𑁆𑀓𑀫𑁄 𑀧𑀝𑀺𑀓𑁆𑀓𑀫𑁄 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀁 𑀲𑀫𑀺𑀜𑁆𑀚𑀺𑀢𑀧𑀲𑀸𑀭𑀡𑀁 𑀫𑀬𑁆𑀳𑀁 𑀭𑀼𑀘𑁆𑀘𑀢𑀺, 𑀅𑀲𑀻𑀢𑀺𑀫𑀳𑀸𑀣𑁂𑀭𑀸𑀦𑀁 𑀭𑀼𑀘𑁆𑀘𑀢𑀺, 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀭𑀼𑀘𑁆𑀘𑀢𑀺. 𑀢𑀼𑀬𑁆𑀳𑀫𑁆𑀧𑀺 𑀭𑀼𑀘𑁆𑀘𑀢𑀻’’𑀢𑀺?

𑀢𑀢𑁄 𑀣𑁂𑀭𑁄 𑀲𑀸𑀝𑀓𑀦𑁆𑀢𑀭𑁂 𑀮𑀤𑁆𑀥𑁄𑀓𑀸𑀲𑁄 𑀩𑀮𑀯𑀫𑀮𑁆𑀮𑁄 𑀯𑀺𑀬 𑀢𑀼𑀝𑁆𑀞𑀫𑀸𑀦𑀲𑁄 𑀳𑀼𑀢𑁆𑀯𑀸 𑁋 ‘‘𑀲𑀢𑁆𑀣𑀸 𑀫𑀬𑁆𑀳𑀁 𑀧𑀺𑀬𑀲𑀳𑀸𑀬𑀲𑁆𑀲 𑀯𑀡𑁆𑀡𑀁 𑀓𑀣𑀸𑀧𑁂𑀢𑀼𑀓𑀸𑀫𑁄. 𑀮𑀪𑀺𑀲𑁆𑀲𑀸𑀫𑀺 𑀦𑁄 𑀅𑀚𑁆𑀚, 𑀤𑀻𑀧𑀥𑀚𑀪𑀽𑀢𑀁 𑀫𑀳𑀸𑀚𑀫𑁆𑀩𑀼𑀁 𑀯𑀺𑀥𑀼𑀦𑀦𑁆𑀢𑁄 𑀯𑀺𑀬 𑀯𑀮𑀸𑀳𑀓𑀦𑁆𑀢𑀭𑀢𑁄 𑀘𑀦𑁆𑀤𑀁 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀯𑀺𑀬 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀞𑀫𑀢𑀭𑀁 𑀢𑀸𑀯 𑀘𑀢𑀽𑀳𑀺 𑀧𑀤𑁂𑀳𑀺 𑀧𑀼𑀕𑁆𑀕𑀮𑀧𑀮𑀸𑀧𑁂 𑀳𑀭𑀦𑁆𑀢𑁄 𑀓𑀲𑁆𑀲 𑀳𑀺 𑀦𑀸𑀫, 𑀪𑀦𑁆𑀢𑁂, 𑀅𑀩𑀸𑀮𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀩𑀸𑀮𑁄 𑀳𑀺 𑀩𑀸𑀮𑀢𑀸𑀬, 𑀤𑀼𑀝𑁆𑀞𑁄 𑀤𑁄𑀲𑀢𑀸𑀬, 𑀫𑀽𑀴𑁆𑀳𑁄 𑀫𑁄𑀳𑁂𑀦, 𑀯𑀺𑀧𑀮𑁆𑀮𑀢𑁆𑀣𑀘𑀺𑀢𑁆𑀢𑁄 𑀉𑀫𑁆𑀫𑀢𑁆𑀢𑀓𑁄 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁂𑀦 𑀯𑀡𑁆𑀡𑀁 ‘‘𑀯𑀡𑁆𑀡𑁄’’𑀢𑀺 𑀯𑀸 𑀅𑀯𑀡𑁆𑀡𑀁 ‘‘𑀅𑀯𑀡𑁆𑀡𑁂’’𑀢𑀺 𑀯𑀸, ‘‘𑀅𑀬𑀁 𑀩𑀼𑀤𑁆𑀥𑁄, 𑀅𑀬𑀁 𑀲𑀸𑀯𑀓𑁄’’𑀢𑀺 𑀯𑀸 𑀦 𑀚𑀸𑀦𑀸𑀢𑀺. 𑀅𑀩𑀸𑀮𑀸𑀤𑀬𑁄 𑀧𑀦 𑀚𑀸𑀦𑀦𑁆𑀢𑀺, 𑀢𑀲𑁆𑀫𑀸 𑀅𑀩𑀸𑀮𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀦 𑀭𑀼𑀘𑁆𑀘𑁂𑀬𑁆𑀬𑀸𑀢𑀺 𑀩𑀸𑀮𑀸𑀤𑀻𑀦𑀁𑀬𑁂𑀯 𑀳𑀺 𑀲𑁄 𑀦 𑀭𑀼𑀘𑁆𑀘𑁂𑀬𑁆𑀬, 𑀦 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺 𑀦 𑀭𑀼𑀘𑁆𑀘𑁂𑀬𑁆𑀬.

𑀏𑀯𑀁 𑀧𑀼𑀕𑁆𑀕𑀮𑀧𑀮𑀸𑀧𑁂 𑀳𑀭𑀺𑀢𑁆𑀯𑀸 𑀇𑀤𑀸𑀦𑀺 𑀲𑁄𑀴𑀲𑀳𑀺 𑀧𑀤𑁂𑀳𑀺 𑀬𑀣𑀸𑀪𑀽𑀢𑀁 𑀯𑀡𑁆𑀡𑀁 𑀓𑀣𑁂𑀦𑁆𑀢𑁄 𑀧𑀡𑁆𑀟𑀺𑀢𑁄, 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀡𑁆𑀟𑀺𑀢𑁄𑀢𑀺 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀘𑀢𑀽𑀲𑀼 𑀓𑁄𑀲𑀮𑁆𑀮𑁂𑀲𑀼 𑀞𑀺𑀢𑀲𑁆𑀲𑁂𑀢𑀁 𑀦𑀸𑀫𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀬𑀢𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀥𑀸𑀢𑀼𑀓𑀼𑀲𑀮𑁄 𑀘 𑀳𑁄𑀢𑀺 𑀆𑀬𑀢𑀦𑀓𑀼𑀲𑀮𑁄 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑁄 𑀘 𑀞𑀸𑀦𑀸𑀝𑁆𑀞𑀸𑀦𑀓𑀼𑀲𑀮𑁄 𑀘, 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀦𑀦𑁆𑀤, ‘𑀧𑀡𑁆𑀟𑀺𑀢𑁄 𑀪𑀺𑀓𑁆𑀔𑀽’𑀢𑀺 𑀅𑀮𑀁 𑀯𑀘𑀦𑀸𑀬𑀸’’𑀢𑀺 (𑀫. 𑀦𑀺. 𑁩.𑁧𑁨𑁪). 𑀫𑀳𑀸𑀧𑀜𑁆𑀜𑁄𑀢𑀺𑀆𑀤𑀻𑀲𑀼 𑀫𑀳𑀸𑀧𑀜𑁆𑀜𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀭𑀺𑀤𑀁 𑀫𑀳𑀸𑀧𑀜𑁆𑀜𑀸𑀤𑀻𑀦𑀁 𑀦𑀸𑀦𑀢𑁆𑀢𑀁 (𑀧𑀝𑀺. 𑀫. 𑁩.𑁪) 𑁋 𑀓𑀢𑀫𑀸 𑀫𑀳𑀸𑀧𑀜𑁆𑀜𑀸? 𑀫𑀳𑀦𑁆𑀢𑁂 𑀲𑀻𑀮𑀓𑁆𑀔𑀦𑁆𑀥𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀫𑀳𑀸𑀧𑀜𑁆𑀜𑀸, 𑀫𑀳𑀦𑁆𑀢𑁂 𑀲𑀫𑀸𑀥𑀺𑀓𑁆𑀔𑀦𑁆𑀥𑁂, 𑀧𑀜𑁆𑀜𑀸𑀓𑁆𑀔𑀦𑁆𑀥𑁂, 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀫𑀳𑀸𑀧𑀜𑁆𑀜𑀸. 𑀫𑀳𑀦𑁆𑀢𑀸𑀦𑀺 𑀞𑀸𑀦𑀸𑀝𑁆𑀞𑀸𑀦𑀸𑀦𑀺, 𑀫𑀳𑀸𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑁄, 𑀫𑀳𑀦𑁆𑀢𑀸𑀦𑀺 𑀅𑀭𑀺𑀬𑀲𑀘𑁆𑀘𑀸𑀦𑀺, 𑀫𑀳𑀦𑁆𑀢𑁂 𑀲𑀢𑀺𑀧𑀝𑁆𑀞𑀸𑀦𑁂, 𑀲𑀫𑁆𑀫𑀧𑁆𑀧𑀥𑀸𑀦𑁂, 𑀇𑀤𑁆𑀥𑀺𑀧𑀸𑀤𑁂, 𑀫𑀳𑀦𑁆𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀩𑀮𑀸𑀦𑀺, 𑀩𑁄𑀚𑁆𑀛𑀗𑁆𑀕𑀸𑀦𑀺, 𑀫𑀳𑀦𑁆𑀢𑁂 𑀅𑀭𑀺𑀬𑀫𑀕𑁆𑀕𑁂, 𑀫𑀳𑀦𑁆𑀢𑀸𑀦𑀺 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀫𑀳𑀸𑀅𑀪𑀺𑀜𑁆𑀜𑀸𑀬𑁄, 𑀫𑀳𑀦𑁆𑀢𑀁 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀫𑀳𑀸𑀧𑀜𑁆𑀜𑀸.

𑀲𑀸 𑀧𑀦 𑀣𑁂𑀭𑀲𑁆𑀲 𑀤𑁂𑀯𑁄𑀭𑁄𑀳𑀦𑀁 𑀓𑀢𑁆𑀯𑀸 𑀲𑀗𑁆𑀓𑀲𑁆𑀲𑀦𑀕𑀭𑀤𑁆𑀯𑀸𑀭𑁂 𑀞𑀺𑀢𑁂𑀦 𑀲𑀢𑁆𑀣𑀸𑀭𑀸 𑀧𑀼𑀣𑀼𑀚𑁆𑀚𑀦𑀧𑀜𑁆𑀘𑀓𑁂 𑀧𑀜𑁆𑀳𑁂 𑀧𑀼𑀘𑁆𑀙𑀺𑀢𑁂 𑀢𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀲𑁆𑀲 𑀧𑀸𑀓𑀝𑀸 𑀚𑀸𑀢𑀸.

𑀓𑀢𑀫𑀸 𑀧𑀼𑀣𑀼𑀧𑀜𑁆𑀜𑀸? 𑀧𑀼𑀣𑀼 𑀦𑀸𑀦𑀸𑀔𑀦𑁆𑀥𑁂𑀲𑀼, (𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀧𑀼𑀣𑀼𑀧𑀜𑁆𑀜𑀸.) 𑀧𑀼𑀣𑀼 𑀦𑀸𑀦𑀸𑀥𑀸𑀢𑀽𑀲𑀼, 𑀧𑀼𑀣𑀼 𑀦𑀸𑀦𑀸𑀆𑀬𑀢𑀦𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀲𑀼𑀜𑁆𑀜𑀢𑀫𑀦𑀼𑀧𑀮𑀩𑁆𑀪𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀅𑀢𑁆𑀣𑁂𑀲𑀼, 𑀥𑀫𑁆𑀫𑁂𑀲𑀼 𑀦𑀺𑀭𑀼𑀢𑁆𑀢𑀻𑀲𑀼 𑀧𑀝𑀺𑀪𑀸𑀦𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀲𑀻𑀮𑀓𑁆𑀔𑀦𑁆𑀥𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀲𑀫𑀸𑀥𑀺-𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺-𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀞𑀸𑀦𑀸𑀝𑁆𑀞𑀸𑀦𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀲𑀼, 𑀧𑀼𑀣𑀼 𑀦𑀸𑀦𑀸𑀅𑀭𑀺𑀬𑀲𑀘𑁆𑀘𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀲𑀢𑀺𑀧𑀝𑁆𑀞𑀸𑀦𑁂𑀲𑀼, 𑀲𑀫𑁆𑀫𑀧𑁆𑀧𑀥𑀸𑀦𑁂𑀲𑀼, 𑀇𑀤𑁆𑀥𑀺𑀧𑀸𑀤𑁂𑀲𑀼, 𑀇𑀦𑁆𑀤𑁆𑀭𑀺𑀬𑁂𑀲𑀼, 𑀩𑀮𑁂𑀲𑀼, 𑀩𑁄𑀚𑁆𑀛𑀗𑁆𑀕𑁂𑀲𑀼, 𑀧𑀼𑀣𑀼 𑀦𑀸𑀦𑀸𑀅𑀭𑀺𑀬𑀫𑀕𑁆𑀕𑁂𑀲𑀼, 𑀲𑀸𑀫𑀜𑁆𑀜𑀨𑀮𑁂𑀲𑀼, 𑀅𑀪𑀺𑀜𑁆𑀜𑀸𑀲𑀼, 𑀧𑀼𑀣𑀼 𑀦𑀸𑀦𑀸𑀚𑀦𑀲𑀸𑀥𑀸𑀭𑀡𑁂 𑀥𑀫𑁆𑀫𑁂 𑀲𑀫𑀢𑀺𑀓𑁆𑀓𑀫𑁆𑀫 𑀧𑀭𑀫𑀢𑁆𑀣𑁂 𑀦𑀺𑀩𑁆𑀩𑀸𑀦𑁂 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀧𑀼𑀣𑀼𑀧𑀜𑁆𑀜𑀸.

𑀓𑀢𑀫𑀸 𑀳𑀸𑀲𑀧𑀜𑁆𑀜𑀸? 𑀇𑀥𑁂𑀓𑀘𑁆𑀘𑁄 𑀳𑀸𑀲𑀩𑀳𑀼𑀮𑁄 𑀯𑁂𑀤𑀩𑀳𑀼𑀮𑁄 𑀢𑀼𑀝𑁆𑀞𑀺𑀩𑀳𑀼𑀮𑁄 𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀲𑀻𑀮𑀁 𑀧𑀭𑀺𑀧𑀽𑀭𑁂𑀢𑀺, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀧𑀭𑀺𑀧𑀽𑀭𑁂𑀢𑀺, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀁, 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀁, 𑀲𑀻𑀮𑀓𑁆𑀔𑀦𑁆𑀥𑀁, 𑀲𑀫𑀸𑀥𑀺𑀓𑁆𑀔𑀦𑁆𑀥𑀁, 𑀧𑀜𑁆𑀜𑀸𑀓𑁆𑀔𑀦𑁆𑀥𑀁, 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀁, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀁 𑀧𑀭𑀺𑀧𑀽𑀭𑁂𑀢𑀻𑀢𑀺, 𑀳𑀸𑀲𑀧𑀜𑁆𑀜𑀸. 𑀳𑀸𑀲𑀩𑀳𑀼𑀮𑁄 𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀞𑀸𑀦𑀸𑀝𑁆𑀞𑀸𑀦𑀁 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀳𑀸𑀲𑀧𑀜𑁆𑀜𑀸. 𑀳𑀸𑀲𑀩𑀳𑀼𑀮𑁄 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀬𑁄 𑀧𑀭𑀺𑀧𑀽𑀭𑁂𑀢𑀻𑀢𑀺 𑀳𑀸𑀲𑀧𑀜𑁆𑀜𑀸. 𑀳𑀸𑀲𑀩𑀳𑀼𑀮𑁄 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺. 𑀲𑀢𑀺𑀧𑀝𑁆𑀞𑀸𑀦𑁂, 𑀲𑀫𑁆𑀫𑀧𑁆𑀧𑀥𑀸𑀦𑁂, 𑀇𑀤𑁆𑀥𑀺𑀧𑀸𑀤𑁂, 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀩𑀮𑀸𑀦𑀺, 𑀩𑁄𑀚𑁆𑀛𑀗𑁆𑀕𑀸𑀦𑀺, 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑁂𑀢𑀻𑀢𑀺 𑀳𑀸𑀲𑀧𑀜𑁆𑀜𑀸. 𑀳𑀸𑀲𑀩𑀳𑀼𑀮𑁄 𑀲𑀸𑀫𑀜𑁆𑀜𑀨𑀮𑀸𑀦𑀺 𑀲𑀘𑁆𑀙𑀺𑀓𑀭𑁄𑀢𑀺, 𑀅𑀪𑀺𑀜𑁆𑀜𑀸𑀬𑁄 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀳𑀸𑀲𑀧𑀜𑁆𑀜𑀸, 𑀳𑀸𑀲𑀩𑀳𑀼𑀮𑁄 𑀯𑁂𑀤𑀢𑀼𑀝𑁆𑀞𑀺𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀳𑀸𑀲𑀧𑀜𑁆𑀜𑀸.

𑀣𑁂𑀭𑁄 𑀘 𑀲𑀭𑀤𑁄 𑀦𑀸𑀫 𑀢𑀸𑀧𑀲𑁄 𑀳𑀼𑀢𑁆𑀯𑀸 𑀅𑀦𑁄𑀫𑀤𑀲𑁆𑀲𑀺𑀲𑁆𑀲 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀅𑀕𑁆𑀕𑀲𑀸𑀯𑀓𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀲𑀺. 𑀢𑀁𑀓𑀸𑀮𑀢𑁄 𑀧𑀝𑁆𑀞𑀸𑀬 𑀳𑀸𑀲𑀩𑀳𑀼𑀮𑁄 𑀲𑀻𑀮𑀧𑀭𑀺𑀧𑀽𑀭𑀡𑀸𑀤𑀻𑀦𑀺 𑀅𑀓𑀸𑀲𑀻𑀢𑀺 𑀳𑀸𑀲𑀧𑀜𑁆𑀜𑁄.

𑀓𑀢𑀫𑀸 𑀚𑀯𑀦𑀧𑀜𑁆𑀜𑀸? 𑀬𑀁𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁…𑀧𑁂… 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀭𑀽𑀧𑀁 𑀅𑀦𑀺𑀘𑁆𑀘𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀤𑀼𑀓𑁆𑀔𑀢𑁄 𑀔𑀺𑀧𑁆𑀧𑀁, 𑀅𑀦𑀢𑁆𑀢𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀬𑀸 𑀓𑀸𑀘𑀺 𑀯𑁂𑀤𑀦𑀸…𑀧𑁂… 𑀬𑀸 𑀓𑀸𑀘𑀺 𑀲𑀜𑁆𑀜𑀸… 𑀬𑁂 𑀓𑁂𑀘𑀺 𑀲𑀗𑁆𑀔𑀸𑀭𑀸… 𑀬𑀁𑀓𑀺𑀜𑁆𑀘𑀺 𑀯𑀺𑀜𑁆𑀜𑀸𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁…𑀧𑁂… 𑀲𑀩𑁆𑀩𑀁 𑀯𑀺𑀜𑁆𑀜𑀸𑀡𑀁 𑀅𑀦𑀺𑀘𑁆𑀘𑀢𑁄, 𑀤𑀼𑀓𑁆𑀔𑀢𑁄, 𑀅𑀦𑀢𑁆𑀢𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀘𑀓𑁆𑀔𑀼…𑀧𑁂… 𑀚𑀭𑀸𑀫𑀭𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀢𑁄, 𑀤𑀼𑀓𑁆𑀔𑀢𑁄, 𑀅𑀦𑀢𑁆𑀢𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦, 𑀤𑀼𑀓𑁆𑀔𑀁 𑀪𑀬𑀝𑁆𑀞𑁂𑀦, 𑀅𑀦𑀢𑁆𑀢𑀸 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀭𑀽𑀧𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑁂 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀯𑁂𑀤𑀦𑀸… 𑀲𑀜𑁆𑀜𑀸… 𑀲𑀗𑁆𑀔𑀸𑀭𑀸… 𑀯𑀺𑀜𑁆𑀜𑀸𑀡𑀁… 𑀘𑀓𑁆𑀔𑀼…𑀧𑁂… 𑀚𑀭𑀸𑀫𑀭𑀡𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘𑀁 𑀔𑀬𑀝𑁆𑀞𑁂𑀦…𑀧𑁂… 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑁂 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸. 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁…𑀧𑁂… 𑀯𑀺𑀜𑁆𑀜𑀸𑀡𑀁. 𑀘𑀓𑁆𑀔𑀼…𑀧𑁂… 𑀚𑀭𑀸𑀫𑀭𑀡𑀁 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀢𑀼𑀮𑀬𑀺𑀢𑁆𑀯𑀸 𑀢𑀻𑀭𑀬𑀺𑀢𑁆𑀯𑀸 𑀯𑀺𑀪𑀸𑀯𑀬𑀺𑀢𑁆𑀯𑀸 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀚𑀭𑀸𑀫𑀭𑀡𑀦𑀺𑀭𑁄𑀥𑁂 𑀦𑀺𑀩𑁆𑀩𑀸𑀦𑁂 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀚𑀯𑀦𑀧𑀜𑁆𑀜𑀸.

𑀓𑀢𑀫𑀸 𑀢𑀺𑀓𑁆𑀔𑀧𑀜𑁆𑀜𑀸? 𑀔𑀺𑀧𑁆𑀧𑀁 𑀓𑀺𑀮𑁂𑀲𑁂 𑀙𑀺𑀦𑁆𑀤𑀢𑀻𑀢𑀺 𑀢𑀺𑀓𑁆𑀔𑀧𑀜𑁆𑀜𑀸. 𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀺, 𑀉𑀧𑁆𑀧𑀦𑁆𑀦𑀁 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑀁… 𑀉𑀧𑁆𑀧𑀦𑁆𑀦𑀁 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑀁… 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂… 𑀉𑀧𑁆𑀧𑀦𑁆𑀦𑀁 𑀭𑀸𑀕𑀁… 𑀤𑁄𑀲𑀁… 𑀫𑁄𑀳𑀁… 𑀓𑁄𑀥𑀁… 𑀉𑀧𑀦𑀸𑀳𑀁… 𑀫𑀓𑁆𑀔𑀁… 𑀧𑀴𑀸𑀲𑀁… 𑀇𑀲𑁆𑀲𑀁… 𑀫𑀘𑁆𑀙𑀭𑀺𑀬𑀁… 𑀫𑀸𑀬𑀁… 𑀲𑀸𑀞𑁂𑀬𑁆𑀬𑀁… 𑀣𑀫𑁆𑀪𑀁… 𑀲𑀸𑀭𑀫𑁆𑀪𑀁… 𑀫𑀸𑀦𑀁… 𑀅𑀢𑀺𑀫𑀸𑀦𑀁… 𑀫𑀤𑀁… 𑀧𑀫𑀸𑀤𑀁… 𑀲𑀩𑁆𑀩𑁂 𑀓𑀺𑀮𑁂𑀲𑁂… 𑀲𑀩𑁆𑀩𑁂 𑀤𑀼𑀘𑁆𑀘𑀭𑀺𑀢𑁂… 𑀲𑀩𑁆𑀩𑁂 𑀅𑀪𑀺𑀲𑀗𑁆𑀔𑀸𑀭𑁂… 𑀲𑀩𑁆𑀩𑁂 𑀪𑀯𑀕𑀸𑀫𑀺𑀓𑀫𑁆𑀫𑁂 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀺 𑀯𑀺𑀦𑁄𑀤𑁂𑀢𑀺, 𑀩𑁆𑀬𑀦𑁆𑀢𑀻𑀓𑀭𑁄𑀢𑀺, 𑀅𑀦𑀪𑀸𑀯𑀁 𑀕𑀫𑁂𑀢𑀻𑀢𑀺 𑀢𑀺𑀓𑁆𑀔𑀧𑀜𑁆𑀜𑀸. 𑀏𑀓𑀲𑁆𑀫𑀺𑀁 𑀆𑀲𑀦𑁂 𑀘𑀢𑁆𑀢𑀸𑀭𑁄 𑀘 𑀅𑀭𑀺𑀬𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀘𑀢𑀲𑁆𑀲𑁄 𑀘 𑀧𑀝𑀺𑀲𑀫𑁆𑀪𑀺𑀤𑀸𑀬𑁄, 𑀙 𑀘 𑀅𑀪𑀺𑀜𑁆𑀜𑀸𑀬𑁄 𑀅𑀥𑀺𑀕𑀢𑀸 𑀳𑁄𑀦𑁆𑀢𑀺 𑀲𑀘𑁆𑀙𑀺𑀓𑀢𑀸 𑀨𑀲𑁆𑀲𑀺𑀢𑀸 𑀧𑀜𑁆𑀜𑀸𑀬𑀸𑀢𑀺 𑀢𑀺𑀓𑁆𑀔𑀧𑀜𑁆𑀜𑀸.

𑀣𑁂𑀭𑁄 𑀘 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀤𑀻𑀖𑀦𑀔𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑀲𑀼𑀢𑁆𑀢𑁂 𑀤𑁂𑀲𑀺𑀬𑀫𑀸𑀦𑁂 𑀞𑀺𑀢𑀓𑁄𑀯 𑀲𑀩𑁆𑀩𑀓𑀺𑀮𑁂𑀲𑁂 𑀙𑀺𑀦𑁆𑀤𑀺𑀢𑁆𑀯𑀸 𑀲𑀸𑀯𑀓𑀧𑀸𑀭𑀫𑀺𑀜𑀸𑀡𑀁 𑀧𑀝𑀺𑀯𑀺𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀺𑀓𑁆𑀔𑀧𑀜𑁆𑀜𑁄 𑀦𑀸𑀫 𑀚𑀸𑀢𑁄. 𑀢𑁂𑀦𑀸𑀳 𑁋 ‘‘𑀢𑀺𑀓𑁆𑀔𑀧𑀜𑁆𑀜𑁄, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄’’𑀢𑀺.

𑀓𑀢𑀫𑀸 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸? 𑀇𑀥𑁂𑀓𑀘𑁆𑀘𑁄 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀉𑀩𑁆𑀩𑁂𑀕𑀩𑀳𑀼𑀮𑁄 𑀳𑁄𑀢𑀺 𑀉𑀢𑁆𑀢𑀸𑀲𑀩𑀳𑀼𑀮𑁄 𑀉𑀓𑁆𑀓𑀡𑁆𑀞𑀦𑀩𑀳𑀼𑀮𑁄 𑀅𑀭𑀢𑀺𑀩𑀳𑀼𑀮𑁄 𑀅𑀦𑀪𑀺𑀭𑀢𑀺𑀩𑀳𑀼𑀮𑁄 𑀩𑀳𑀺𑀫𑀼𑀔𑁄 𑀦 𑀭𑀫𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼, 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑁆𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀮𑁄𑀪𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀺𑀚𑁆𑀛𑀢𑀺 𑀧𑀤𑀸𑀮𑁂𑀢𑀻𑀢𑀺 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸. 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀁 𑀅𑀧𑁆𑀧𑀤𑀸𑀮𑀺𑀢𑀧𑀼𑀩𑁆𑀩𑀁 𑀤𑁄𑀲𑀓𑁆𑀔𑀦𑁆𑀥𑀁… 𑀫𑁄𑀳𑀓𑁆𑀔𑀦𑁆𑀥𑀁… 𑀓𑁄𑀥𑀁… 𑀉𑀧𑀦𑀸𑀳𑀁…𑀧𑁂… 𑀲𑀩𑁆𑀩𑁂 𑀪𑀯𑀕𑀸𑀫𑀺𑀓𑀫𑁆𑀫𑁂 𑀦𑀺𑀩𑁆𑀩𑀺𑀚𑁆𑀛𑀢𑀺 𑀧𑀤𑀸𑀮𑁂𑀢𑀻𑀢𑀺 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸.

𑀅𑀧𑁆𑀧𑀺𑀘𑁆𑀙𑁄𑀢𑀺 𑀲𑀦𑁆𑀢𑀕𑀼𑀡𑀦𑀺𑀕𑀼𑀳𑀦𑀢𑀸, 𑀧𑀘𑁆𑀘𑀬𑀧𑀝𑀺𑀕𑁆𑀕𑀳𑀡𑁂 𑀘 𑀫𑀢𑁆𑀢𑀜𑁆𑀜𑀼𑀢𑀸, 𑀏𑀢𑀁 𑀅𑀧𑁆𑀧𑀺𑀘𑁆𑀙𑀮𑀓𑁆𑀔𑀡𑀦𑁆𑀢𑀺 𑀇𑀫𑀺𑀦𑀸 𑀮𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑀦𑁆𑀢𑀼𑀝𑁆𑀞𑁄𑀢𑀺 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄 𑀬𑀣𑀸𑀩𑀮𑀲𑀦𑁆𑀢𑁄𑀲𑁄 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄𑀢𑀺, 𑀇𑀫𑁂𑀳𑀺 𑀢𑀻𑀳𑀺 𑀲𑀦𑁆𑀢𑁄𑀲𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀧𑀯𑀺𑀯𑀺𑀢𑁆𑀢𑁄𑀢𑀺 𑀓𑀸𑀬𑀯𑀺𑀯𑁂𑀓𑁄 𑀘 𑀯𑀺𑀯𑁂𑀓𑀝𑁆𑀞𑀓𑀸𑀬𑀸𑀦𑀁 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀸𑀦𑀁, 𑀘𑀺𑀢𑁆𑀢𑀯𑀺𑀯𑁂𑀓𑁄 𑀘 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀁 𑀧𑀭𑀫𑀯𑁄𑀤𑀸𑀦𑀧𑁆𑀧𑀢𑁆𑀢𑀸𑀦𑀁, 𑀉𑀧𑀥𑀺𑀯𑀺𑀯𑁂𑀓𑁄 𑀘 𑀦𑀺𑀭𑀼𑀧𑀥𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀺𑀲𑀗𑁆𑀔𑀸𑀭𑀕𑀢𑀸𑀦𑀦𑁆𑀢𑀺, 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀯𑀺𑀯𑁂𑀓𑀸𑀦𑀁 𑀮𑀸𑀪𑀻. 𑀅𑀲𑀁𑀲𑀝𑁆𑀞𑁄𑀢𑀺 𑀤𑀲𑁆𑀲𑀦𑀲𑀁𑀲𑀕𑁆𑀕𑁄 𑀲𑀯𑀦𑀲𑀁𑀲𑀕𑁆𑀕𑁄 𑀲𑀫𑀼𑀮𑁆𑀮𑀧𑀦𑀲𑀁𑀲𑀕𑁆𑀕𑁄 𑀧𑀭𑀺𑀪𑁄𑀕𑀲𑀁𑀲𑀕𑁆𑀕𑁄 𑀓𑀸𑀬𑀲𑀁𑀲𑀕𑁆𑀕𑁄𑀢𑀺, 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀲𑀁𑀲𑀕𑁆𑀕𑁂𑀳𑀺 𑀯𑀺𑀭𑀳𑀺𑀢𑁄. 𑀅𑀬𑀜𑁆𑀘 𑀧𑀜𑁆𑀘𑀯𑀺𑀥𑁄 𑀲𑀁𑀲𑀕𑁆𑀕𑁄 𑀭𑀸𑀚𑀽𑀳𑀺 𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺 𑀢𑀺𑀢𑁆𑀣𑀺𑀬𑁂𑀳𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑁂𑀳𑀺 𑀉𑀧𑀸𑀲𑀓𑁂𑀳𑀺 𑀉𑀧𑀲𑀺𑀓𑀸𑀳𑀺 𑀪𑀺𑀓𑁆𑀔𑀽𑀳𑀺 𑀪𑀺𑀓𑁆𑀔𑀼𑀦𑀻𑀳𑀻𑀢𑀺 𑀅𑀝𑁆𑀞𑀳𑀺 𑀧𑀼𑀕𑁆𑀕𑀮𑁂𑀳𑀺 𑀲𑀤𑁆𑀥𑀺𑀁 𑀚𑀸𑀬𑀢𑀺, 𑀲𑁄 𑀲𑀩𑁆𑀩𑁄𑀧𑀺 𑀣𑁂𑀭𑀲𑁆𑀲 𑀦𑀢𑁆𑀣𑀻𑀢𑀺 𑀅𑀲𑀁𑀲𑀝𑁆𑀞𑁄.

𑀆𑀭𑀤𑁆𑀥𑀯𑀻𑀭𑀺𑀬𑁄𑀢𑀺 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑁄 𑀧𑀭𑀺𑀧𑀼𑀡𑁆𑀡𑀯𑀻𑀭𑀺𑀬𑁄. 𑀢𑀢𑁆𑀣 𑀆𑀭𑀤𑁆𑀥𑀯𑀻𑀭𑀺𑀬𑁄 𑀪𑀺𑀓𑁆𑀔𑀼 𑀕𑀫𑀦𑁂 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀲𑁆𑀲 𑀞𑀸𑀦𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀤𑁂𑀢𑀺, 𑀞𑀸𑀦𑁂 𑀉𑀧𑁆𑀧𑀦𑁆𑀦𑀲𑁆𑀲 𑀦𑀺𑀲𑀚𑁆𑀚𑀁, 𑀦𑀺𑀲𑀚𑁆𑀚𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀲𑁂𑀬𑁆𑀬𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀤𑁂𑀢𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀇𑀭𑀺𑀬𑀸𑀧𑀣𑁂 𑀉𑀧𑁆𑀧𑀦𑁆𑀦𑀁 𑀢𑀢𑁆𑀣 𑀢𑀢𑁆𑀣𑁂𑀯 𑀦𑀺𑀕𑁆𑀕𑀡𑁆𑀳𑀸𑀢𑀺. 𑀣𑁂𑀭𑁄 𑀧𑀦 𑀘𑀢𑀼𑀘𑀢𑁆𑀢𑀸𑀮𑀻𑀲 𑀯𑀲𑁆𑀲𑀸𑀦𑀺 𑀫𑀜𑁆𑀘𑁂 𑀧𑀺𑀝𑁆𑀞𑀺𑀁 𑀦 𑀧𑀲𑀸𑀭𑁂𑀢𑀺. 𑀢𑀁 𑀲𑀦𑁆𑀥𑀸𑀬 ‘‘𑀆𑀭𑀤𑁆𑀥𑀯𑀻𑀭𑀺𑀬𑁄’’𑀢𑀺 𑀆𑀳. 𑀯𑀢𑁆𑀢𑀸𑀢𑀺 𑀑𑀥𑀼𑀦𑀦𑀯𑀢𑁆𑀢𑀸. 𑀪𑀺𑀓𑁆𑀔𑀽𑀦𑀁 𑀅𑀚𑁆𑀛𑀸𑀘𑀸𑀭𑀁 𑀤𑀺𑀲𑁆𑀯𑀸 ‘‘𑀅𑀚𑁆𑀚 𑀓𑀣𑁂𑀲𑁆𑀲𑀸𑀫𑀺, 𑀲𑁆𑀯𑁂 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀓𑀣𑀸𑀯𑀯𑀢𑁆𑀣𑀸𑀦𑀁 𑀦 𑀓𑀭𑁄𑀢𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀬𑁂𑀯 𑀞𑀸𑀦𑁂 𑀑𑀯𑀤𑀢𑀺 𑀅𑀦𑀼𑀲𑀸𑀲𑀢𑀻𑀢𑀺 𑀅𑀢𑁆𑀣𑁄.

𑀯𑀘𑀦𑀓𑁆𑀔𑀫𑁄𑀢𑀺 𑀯𑀘𑀦𑀁 𑀔𑀫𑀢𑀺. 𑀏𑀓𑁄 𑀳𑀺 𑀧𑀭𑀲𑁆𑀲 𑀑𑀯𑀸𑀤𑀁 𑀤𑁂𑀢𑀺, 𑀲𑀬𑀁 𑀧𑀦 𑀅𑀜𑁆𑀜𑁂𑀦 𑀑𑀯𑀤𑀺𑀬𑀫𑀸𑀦𑁄 𑀓𑀼𑀚𑁆𑀛𑀢𑀺. 𑀣𑁂𑀭𑁄 𑀧𑀦 𑀧𑀭𑀲𑁆𑀲𑀧𑀺 𑀑𑀯𑀸𑀤𑀁 𑀤𑁂𑀢𑀺, 𑀲𑀬𑀁 𑀑𑀯𑀤𑀺𑀬𑀫𑀸𑀦𑁄𑀧𑀺 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀢𑀺. 𑀏𑀓𑀤𑀺𑀯𑀲𑀁 𑀓𑀺𑀭 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀁 𑀲𑀢𑁆𑀢𑀯𑀲𑁆𑀲𑀺𑀓𑁄 𑀲𑀸𑀫𑀡𑁂𑀭𑁄 𑁋 ‘‘𑀪𑀦𑁆𑀢𑁂, 𑀲𑀸𑀭𑀺𑀧𑀼𑀢𑁆𑀢, 𑀢𑀼𑀫𑁆𑀳𑀸𑀓𑀁 𑀦𑀺𑀯𑀸𑀲𑀦𑀓𑀡𑁆𑀡𑁄 𑀑𑀮𑀫𑁆𑀩𑀢𑀻’’𑀢𑀺 𑀆𑀳. 𑀣𑁂𑀭𑁄 𑀓𑀺𑀜𑁆𑀘𑀺 𑀅𑀯𑀢𑁆𑀯𑀸𑀯 𑀏𑀓𑀫𑀦𑁆𑀢𑀁 𑀕𑀦𑁆𑀢𑁆𑀯𑀸 𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀢𑁆𑀯𑀸 𑀆𑀕𑀫𑁆𑀫 ‘‘𑀏𑀢𑁆𑀢𑀓𑀁 𑀯𑀝𑁆𑀝𑀢𑀺 𑀆𑀘𑀭𑀺𑀬𑀸’’𑀢𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀅𑀝𑁆𑀞𑀸𑀲𑀺.

‘‘𑀢𑀤𑀳𑀼 𑀧𑀩𑁆𑀩𑀚𑀺𑀢𑁄 𑀲𑀦𑁆𑀢𑁄, 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑀺𑀓𑁄;

𑀲𑁄𑀧𑀺 𑀫𑀁 𑀅𑀦𑀼𑀲𑀸𑀲𑁂𑀬𑁆𑀬, 𑀲𑀫𑁆𑀧𑀝𑀺𑀘𑁆𑀙𑀸𑀫𑀺 𑀫𑀢𑁆𑀣𑀓𑁂’’𑀢𑀺. (𑀫𑀺. 𑀧. 𑁬.𑁪.𑁮) 𑁋

𑀆𑀳.

𑀘𑁄𑀤𑀓𑁄𑀢𑀺 𑀯𑀢𑁆𑀣𑀼𑀲𑁆𑀫𑀺𑀁 𑀑𑀢𑀺𑀡𑁆𑀡𑁂 𑀯𑀸 𑀅𑀦𑁄𑀢𑀺𑀡𑁆𑀡𑁂 𑀯𑀸 𑀯𑀻𑀢𑀺𑀓𑁆𑀓𑀫𑀁 𑀤𑀺𑀲𑁆𑀯𑀸 𑁋 ‘‘𑀆𑀯𑀼𑀲𑁄, 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀏𑀯𑀁 𑀦𑀺𑀯𑀸𑀲𑁂𑀢𑀩𑁆𑀩𑀁, 𑀏𑀯𑀁 𑀧𑀸𑀭𑀼𑀧𑀺𑀢𑀩𑁆𑀩𑀁, 𑀏𑀯𑀁 𑀕𑀦𑁆𑀢𑀩𑁆𑀩𑀁, 𑀏𑀯𑀁 𑀞𑀸𑀢𑀩𑁆𑀩𑀁, 𑀏𑀯𑀁 𑀦𑀺𑀲𑀻𑀤𑀺𑀢𑀩𑁆𑀩𑀁, 𑀏𑀯𑀁 𑀔𑀸𑀤𑀺𑀢𑀩𑁆𑀩𑀁, 𑀏𑀯𑀁 𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀢𑀦𑁆𑀢𑀺𑀯𑀲𑁂𑀦 𑀅𑀦𑀼𑀲𑀺𑀝𑁆𑀞𑀺𑀁 𑀤𑁂𑀢𑀺.

𑀧𑀸𑀧𑀕𑀭𑀳𑀻𑀢𑀺 𑀧𑀸𑀧𑀧𑀼𑀕𑁆𑀕𑀮𑁂 𑀦 𑀧𑀲𑁆𑀲𑁂, 𑀦 𑀢𑁂𑀲𑀁 𑀯𑀘𑀦𑀁 𑀲𑀼𑀡𑁂, 𑀢𑁂𑀳𑀺 𑀲𑀤𑁆𑀥𑀺𑀁 𑀏𑀓𑀘𑀓𑁆𑀓𑀯𑀸𑀴𑁂𑀧𑀺 𑀦 𑀯𑀲𑁂𑀬𑁆𑀬𑀁.

‘‘𑀫𑀸 𑀫𑁂 𑀓𑀤𑀸𑀘𑀺 𑀧𑀸𑀧𑀺𑀘𑁆𑀙𑁄, 𑀓𑀼𑀲𑀻𑀢𑁄 𑀳𑀻𑀦𑀯𑀻𑀭𑀺𑀬𑁄;

𑀅𑀧𑁆𑀧𑀲𑁆𑀲𑀼𑀢𑁄 𑀅𑀦𑀸𑀤𑀭𑁄, 𑀲𑀫𑁂𑀢𑁄 𑀅𑀳𑀼 𑀓𑀢𑁆𑀣𑀘𑀻’’𑀢𑀺. 𑁋

𑀏𑀯𑀁 𑀧𑀸𑀧𑀧𑀼𑀕𑁆𑀕𑀮𑁂𑀧𑀺 𑀕𑀭𑀳𑀢𑀺, ‘‘𑀲𑀫𑀡𑁂𑀦 𑀦𑀸𑀫 𑀭𑀸𑀕𑀯𑀲𑀺𑀓𑁂𑀦 𑀤𑁄𑀲𑀫𑁄𑀳𑀯𑀲𑀺𑀓𑁂𑀦 𑀦 𑀳𑁄𑀢𑀩𑁆𑀩𑀁, 𑀉𑀧𑁆𑀧𑀦𑁆𑀦𑁄 𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄 𑀧𑀳𑀸𑀢𑀩𑁆𑀩𑁄’’𑀢𑀺 𑀏𑀯𑀁 𑀧𑀸𑀧𑀥𑀫𑁆𑀫𑁂𑀧𑀺 𑀕𑀭𑀳𑀢𑀻𑀢𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 ‘‘𑀧𑀸𑀧𑀕𑀭𑀳𑀻, 𑀪𑀦𑁆𑀢𑁂, 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄’’𑀢𑀺 𑀯𑀤𑀢𑀺.

𑀏𑀯𑀁 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀲𑁄𑀴𑀲𑀳𑀺 𑀧𑀤𑁂𑀳𑀺 𑀣𑁂𑀭𑀲𑁆𑀲 𑀬𑀣𑀸𑀪𑀽𑀢𑀯𑀡𑁆𑀡𑀧𑁆𑀧𑀓𑀸𑀲𑀦𑁂 𑀓𑀢𑁂 𑁋 ‘‘𑀓𑀺𑀁 𑀆𑀦𑀦𑁆𑀤𑁄 𑀅𑀢𑁆𑀢𑀦𑁄 𑀧𑀺𑀬𑀲𑀳𑀸𑀬𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑀼𑀁 𑀦 𑀮𑀪𑀢𑀺, 𑀓𑀣𑁂𑀢𑀼 𑀓𑀺𑀁 𑀧𑀦 𑀢𑁂𑀦 𑀓𑀣𑀺𑀢𑀁 𑀢𑀣𑁂𑀯 𑀳𑁄𑀢𑀺, 𑀓𑀺𑀁 𑀲𑁄 𑀲𑀩𑁆𑀩𑀜𑁆𑀜𑀽’’𑀢𑀺? 𑀓𑁄𑀘𑀺 𑀧𑀸𑀧𑀧𑀼𑀕𑁆𑀕𑀮𑁄 𑀯𑀢𑁆𑀢𑀼𑀁 𑀫𑀸 𑀮𑀪𑀢𑀽𑀢𑀺 𑀲𑀢𑁆𑀣𑀸 𑀢𑀁 𑀯𑀡𑁆𑀡𑀪𑀡𑀦𑀁 𑀅𑀓𑀼𑀧𑁆𑀧𑀁 𑀲𑀩𑁆𑀩𑀜𑁆𑀜𑀼𑀪𑀸𑀲𑀺𑀢𑀁 𑀓𑀭𑁄𑀦𑁆𑀢𑁄 𑀚𑀺𑀦𑀫𑀼𑀤𑁆𑀤𑀺𑀓𑀸𑀬 𑀮𑀜𑁆𑀙𑀦𑁆𑀢𑁄 𑀏𑀯𑀫𑁂𑀢𑀦𑁆𑀢𑀺𑀆𑀤𑀺𑀫𑀸𑀳.

𑀏𑀯𑀁 𑀢𑀣𑀸𑀕𑀢𑁂𑀦 𑀘 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀘 𑀫𑀳𑀸𑀣𑁂𑀭𑀲𑁆𑀲 𑀯𑀡𑁆𑀡𑁂 𑀓𑀣𑀺𑀬𑀫𑀸𑀦𑁂 𑀪𑀼𑀫𑀝𑁆𑀞𑀓𑀸 𑀤𑁂𑀯𑀢𑀸 𑀉𑀝𑁆𑀞𑀳𑀺𑀢𑁆𑀯𑀸 𑀏𑀢𑁂𑀳𑁂𑀯 𑀲𑁄𑀴𑀲𑀳𑀺 𑀧𑀤𑁂𑀳𑀺 𑀯𑀡𑁆𑀡𑀁 𑀓𑀣𑀬𑀺𑀁𑀲𑀼. 𑀢𑀢𑁄 𑀆𑀓𑀸𑀲𑀝𑁆𑀞𑀓𑀤𑁂𑀯𑀢𑀸 𑀲𑀻𑀢𑀯𑀮𑀸𑀳𑀓𑀸 𑀉𑀡𑁆𑀳𑀯𑀮𑀸𑀳𑀓𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀢𑀺 𑀬𑀸𑀯 𑀅𑀓𑀦𑀺𑀝𑁆𑀞𑀩𑁆𑀭𑀳𑁆𑀫𑀮𑁄𑀓𑀸 𑀤𑁂𑀯𑀢𑀸 𑀉𑀝𑁆𑀞𑀳𑀺𑀢𑁆𑀯𑀸 𑀏𑀢𑁂𑀳𑁂𑀯 𑀲𑁄𑀴𑀲𑀳𑀺 𑀧𑀤𑁂𑀳𑀺 𑀯𑀡𑁆𑀡𑀁 𑀓𑀣𑀬𑀺𑀁𑀲𑀼. 𑀏𑀢𑁂𑀦𑀼𑀧𑀸𑀬𑁂𑀦 𑀏𑀓𑀘𑀓𑁆𑀓𑀯𑀸𑀴𑀁 𑀆𑀤𑀺𑀁 𑀓𑀢𑁆𑀯𑀸 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀤𑁂𑀯𑀢𑀸 𑀉𑀝𑁆𑀞𑀳𑀺𑀢𑁆𑀯𑀸 𑀓𑀣𑀬𑀺𑀁𑀲𑀼. 𑀅𑀣𑀸𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀲𑀼𑀲𑀻𑀫𑁄 𑀤𑁂𑀯𑀧𑀼𑀢𑁆𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀸 𑀤𑁂𑀯𑀢𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀦𑀓𑁆𑀔𑀢𑁆𑀢𑀓𑀻𑀴𑀁 𑀧𑀳𑀸𑀬 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 𑀉𑀧𑀚𑁆𑀛𑀸𑀬𑀲𑁆𑀲𑁂𑀯 𑀯𑀡𑁆𑀡𑀁 𑀓𑀣𑁂𑀦𑁆𑀢𑀺, 𑀕𑀘𑁆𑀙𑀸𑀫𑀺 𑀢𑀣𑀸𑀕𑀢𑀲𑁆𑀲 𑀲𑀦𑁆𑀢𑀺𑀓𑀁, 𑀕𑀦𑁆𑀢𑁆𑀯𑀸 𑀏𑀢𑀤𑁂𑀯 𑀯𑀡𑁆𑀡𑀪𑀡𑀦𑀁 𑀤𑁂𑀯𑀢𑀸𑀪𑀸𑀲𑀺𑀢𑀁 𑀓𑀭𑁄𑀫𑀻’’𑀢𑀺, 𑀲𑁄 𑀢𑀣𑀸 𑀅𑀓𑀸𑀲𑀺. 𑀢𑀁 𑀤𑀲𑁆𑀲𑁂𑀢𑀼𑀁 𑀅𑀣 𑀔𑁄 𑀲𑀼𑀲𑀻𑀫𑁄𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀉𑀘𑁆𑀘𑀸𑀯𑀘𑀸𑀢𑀺 𑀅𑀜𑁆𑀜𑁂𑀲𑀼 𑀞𑀸𑀦𑁂𑀲𑀼 𑀧𑀡𑀻𑀢𑀁 𑀉𑀘𑁆𑀘𑀁 𑀯𑀼𑀘𑁆𑀘𑀢𑀺, 𑀳𑀻𑀦𑀁 𑀅𑀯𑀘𑀁. 𑀇𑀥 𑀧𑀦 𑀉𑀘𑁆𑀘𑀸𑀯𑀘𑀸𑀢𑀺 𑀦𑀸𑀦𑀸𑀯𑀺𑀥𑀸 𑀯𑀡𑁆𑀡𑀦𑀺𑀪𑀸. 𑀢𑀲𑁆𑀲𑀸 𑀓𑀺𑀭 𑀤𑁂𑀯𑀧𑀭𑀺𑀲𑀸𑀬 𑀦𑀻𑀮𑀝𑁆𑀞𑀸𑀦𑀁 𑀅𑀢𑀺𑀦𑀻𑀮𑀁, 𑀧𑀻𑀢𑀓𑀝𑁆𑀞𑀸𑀦𑀁 𑀅𑀢𑀺𑀧𑀻𑀢𑀓𑀁, 𑀮𑁄𑀳𑀺𑀢𑀝𑁆𑀞𑀸𑀦𑀁 𑀅𑀢𑀺𑀮𑁄𑀳𑀺𑀢𑀁, 𑀑𑀤𑀸𑀢𑀝𑁆𑀞𑀸𑀦𑀁 𑀅𑀘𑁆𑀘𑁄𑀤𑀸𑀢𑀦𑁆𑀢𑀺, 𑀘𑀢𑀼𑀩𑁆𑀩𑀺𑀥𑀸 𑀯𑀡𑁆𑀡𑀦𑀺𑀪𑀸 𑀧𑀸𑀢𑀼𑀪𑀯𑀺. 𑀢𑁂𑀦𑁂𑀯 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫𑀸𑀢𑀺 𑀘𑀢𑀲𑁆𑀲𑁄 𑀉𑀧𑀫𑀸 𑀆𑀕𑀢𑀸. 𑀢𑀢𑁆𑀣 𑀲𑀼𑀪𑁄𑀢𑀺 𑀲𑀼𑀦𑁆𑀤𑀭𑁄. 𑀚𑀸𑀢𑀺𑀫𑀸𑀢𑀺 𑀚𑀸𑀢𑀺𑀲𑀫𑁆𑀧𑀦𑁆𑀦𑁄. 𑀲𑀼𑀧𑀭𑀺𑀓𑀫𑁆𑀫𑀓𑀢𑁄𑀢𑀺 𑀥𑁄𑀯𑀦𑀸𑀤𑀺𑀧𑀭𑀺𑀓𑀫𑁆𑀫𑁂𑀦 𑀲𑀼𑀝𑁆𑀞𑀼 𑀧𑀭𑀺𑀓𑀫𑁆𑀫𑀓𑀢𑁄. 𑀧𑀡𑁆𑀟𑀼𑀓𑀫𑁆𑀩𑀮𑁂 𑀦𑀺𑀓𑁆𑀔𑀺𑀢𑁆𑀢𑁄𑀢𑀺 𑀭𑀢𑁆𑀢𑀓𑀫𑁆𑀩𑀮𑁂 𑀞𑀧𑀺𑀢𑁄. 𑀏𑀯𑀫𑁂𑀯𑀦𑁆𑀢𑀺 𑀭𑀢𑁆𑀢𑀓𑀫𑁆𑀩𑀮𑁂 𑀦𑀺𑀓𑁆𑀔𑀺𑀢𑁆𑀢𑀫𑀡𑀺 𑀯𑀺𑀬 𑀲𑀩𑁆𑀩𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀯𑀺𑀭𑁄𑀘𑀺𑀢𑀼𑀁 𑀆𑀭𑀤𑁆𑀥𑀸. 𑀦𑀺𑀓𑁆𑀔𑀦𑁆𑀢𑀺 𑀅𑀢𑀺𑀭𑁂𑀓𑀧𑀜𑁆𑀘𑀲𑀼𑀯𑀡𑁆𑀡𑁂𑀦 𑀓𑀢𑀧𑀺𑀴𑀦𑁆𑀥𑀦𑀁. 𑀢𑀜𑁆𑀳𑀺 𑀖𑀝𑁆𑀝𑀦𑀫𑀚𑁆𑀚𑀦𑀓𑁆𑀔𑀫𑀁 𑀳𑁄𑀢𑀺. 𑀚𑀫𑁆𑀩𑁄𑀦𑀤𑀦𑁆𑀢𑀺 𑀫𑀳𑀸𑀚𑀫𑁆𑀩𑀼𑀲𑀸𑀔𑀸𑀬 𑀧𑀯𑀢𑁆𑀢𑀦𑀤𑀺𑀬𑀁 𑀦𑀺𑀩𑁆𑀩𑀢𑁆𑀢𑀁, 𑀫𑀳𑀸𑀚𑀫𑁆𑀩𑀼𑀨𑀮𑀭𑀲𑁂 𑀯𑀸 𑀧𑀣𑀯𑀺𑀬𑀁 𑀧𑀯𑀺𑀝𑁆𑀞𑁂 𑀲𑀼𑀯𑀡𑁆𑀡𑀗𑁆𑀓𑀼𑀭𑀸 𑀉𑀝𑁆𑀞𑀳𑀦𑁆𑀢𑀺, 𑀢𑁂𑀦 𑀲𑀼𑀯𑀡𑁆𑀡𑁂𑀦 𑀓𑀢𑀧𑀺𑀴𑀦𑁆𑀥𑀦𑀦𑁆𑀢𑀺𑀧𑀺 𑀅𑀢𑁆𑀣𑁄. 𑀤𑀓𑁆𑀔𑀓𑀫𑁆𑀫𑀸𑀭𑀧𑀼𑀢𑁆𑀢𑀉𑀓𑁆𑀓𑀸𑀫𑀼𑀔𑀲𑀼𑀓𑀼𑀲𑀮𑀲𑀫𑁆𑀧𑀳𑀝𑁆𑀞𑀦𑁆𑀢𑀺 𑀲𑀼𑀓𑀼𑀲𑀮𑁂𑀦 𑀓𑀫𑁆𑀫𑀸𑀭𑀧𑀼𑀢𑁆𑀢𑁂𑀦 𑀉𑀓𑁆𑀓𑀸𑀫𑀼𑀔𑁂 𑀧𑀘𑀺𑀢𑁆𑀯𑀸 𑀲𑀫𑁆𑀧𑀳𑀝𑁆𑀞𑀁. 𑀥𑀸𑀢𑀼𑀯𑀺𑀪𑀗𑁆𑀕𑁂 (𑀫. 𑀦𑀺. 𑁩.𑁩𑁫𑁭 𑀆𑀤𑀬𑁄) 𑀅𑀓𑀢𑀪𑀡𑁆𑀟𑀁 𑀕𑀳𑀺𑀢𑀁, 𑀇𑀥 𑀧𑀦 𑀓𑀢𑀪𑀡𑁆𑀟𑀁.

𑀯𑀺𑀤𑁆𑀥𑁂𑀢𑀺 𑀤𑀽𑀭𑀻𑀪𑀽𑀢𑁂. 𑀤𑁂𑀯𑁂𑀢𑀺 𑀆𑀓𑀸𑀲𑁂. 𑀦𑀪𑀁 𑀅𑀩𑁆𑀪𑀼𑀲𑁆𑀲𑀓𑁆𑀓𑀫𑀸𑀦𑁄𑀢𑀺 𑀆𑀓𑀸𑀲𑀁 𑀅𑀪𑀺𑀮𑀗𑁆𑀖𑀦𑁆𑀢𑁄. 𑀇𑀫𑀺𑀦𑀸 𑀢𑀭𑀼𑀡𑀲𑀽𑀭𑀺𑀬𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀲𑁄𑀭𑀢𑁄𑀢𑀺 𑀲𑁄𑀭𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀤𑀦𑁆𑀢𑁄𑀢𑀺 𑀦𑀺𑀩𑁆𑀩𑀺𑀲𑁂𑀯𑀦𑁄. 𑀲𑀢𑁆𑀣𑀼𑀯𑀡𑁆𑀡𑀸𑀪𑀢𑁄𑀢𑀺 𑀲𑀢𑁆𑀣𑀸𑀭𑀸 𑀆𑀪𑀢𑀯𑀡𑁆𑀡𑁄. 𑀲𑀢𑁆𑀣𑀸 𑀳𑀺 𑀅𑀝𑁆𑀞𑀧𑀭𑀺𑀲𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀲𑁂𑀯𑀣, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁩𑁭𑁧) 𑀦𑀬𑁂𑀦 𑀣𑁂𑀭𑀲𑁆𑀲 𑀯𑀡𑁆𑀡𑀁 𑀆𑀳𑀭𑀻𑀢𑀺 𑀣𑁂𑀭𑁄 𑀆𑀪𑀢𑀯𑀡𑁆𑀡𑁄 𑀦𑀸𑀫 𑀳𑁄𑀢𑀺. 𑀓𑀸𑀮𑀁 𑀓𑀗𑁆𑀔𑀢𑀻𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑀁 𑀧𑀢𑁆𑀣𑁂𑀢𑀺. 𑀔𑀻𑀡𑀸𑀲𑀯𑁄 𑀳𑀺 𑀦𑁂𑀯 𑀫𑀭𑀡𑀁 𑀅𑀪𑀺𑀦𑀦𑁆𑀤𑀢𑀺, 𑀦 𑀚𑀻𑀯𑀺𑀢𑀁 𑀧𑀢𑁆𑀣𑁂𑀢𑀺, 𑀤𑀺𑀯𑀲𑀲𑀗𑁆𑀔𑁂𑀧𑀁 𑀯𑁂𑀢𑀦𑀁 𑀕𑀳𑁂𑀢𑁆𑀯𑀸 𑀞𑀺𑀢𑀧𑀼𑀭𑀺𑀲𑁄 𑀯𑀺𑀬 𑀓𑀸𑀮𑀁 𑀧𑀦 𑀧𑀢𑁆𑀣𑁂𑀢𑀺, 𑀑𑀮𑁄𑀓𑁂𑀦𑁆𑀢𑁄 𑀢𑀺𑀝𑁆𑀞𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 𑁋

‘‘𑀦𑀸𑀪𑀺𑀦𑀦𑁆𑀤𑀸𑀫𑀺 𑀫𑀭𑀡𑀁, 𑀦𑀸𑀪𑀺𑀦𑀦𑁆𑀤𑀸𑀫𑀺 𑀚𑀻𑀯𑀺𑀢𑀁;

𑀓𑀸𑀮𑀜𑁆𑀘 𑀧𑀝𑀺𑀓𑀗𑁆𑀔𑀸𑀫𑀺, 𑀦𑀺𑀩𑁆𑀩𑀺𑀲𑀁 𑀪𑀢𑀓𑁄 𑀬𑀣𑀸’’𑀢𑀺. (𑀣𑁂𑀭𑀕𑀸. 𑁧𑁦𑁦𑁧-𑁧𑁦𑁦𑁨); 𑀦𑀯𑀫𑀁;

𑁧𑁦. 𑀦𑀸𑀦𑀸𑀢𑀺𑀢𑁆𑀣𑀺𑀬𑀲𑀸𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁧. 𑀤𑀲𑀫𑁂 𑀦𑀸𑀦𑀸𑀢𑀺𑀢𑁆𑀣𑀺𑀬𑀲𑀸𑀯𑀓𑀸𑀢𑀺 𑀢𑁂 𑀓𑀺𑀭 𑀓𑀫𑁆𑀫𑀯𑀸𑀤𑀺𑀦𑁄 𑀅𑀳𑁂𑀲𑀼𑀁, 𑀢𑀲𑁆𑀫𑀸 𑀤𑀸𑀦𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀸, 𑀢𑁂 ‘‘𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀢𑁆𑀣𑀭𑀺 𑀧𑀲𑀸𑀤𑁂𑀦 𑀦𑀺𑀩𑁆𑀩𑀢𑁆𑀢𑀫𑁆𑀳𑀸’’𑀢𑀺 𑀲𑀜𑁆𑀜𑀺𑀦𑁄 𑀳𑀼𑀢𑁆𑀯𑀸 ‘‘𑀕𑀘𑁆𑀙𑀸𑀫 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑁂 𑀞𑀢𑁆𑀯𑀸 𑀅𑀫𑁆𑀳𑀸𑀓𑀁 𑀲𑀢𑁆𑀣𑀸𑀭𑀸𑀦𑀁 𑀯𑀡𑁆𑀡𑀁 𑀓𑀣𑁂𑀲𑁆𑀲𑀸𑀫𑀸’’𑀢𑀺 𑀆𑀕𑀦𑁆𑀢𑁆𑀯𑀸 𑀧𑀘𑁆𑀘𑁂𑀓𑀕𑀸𑀣𑀸𑀳𑀺 𑀓𑀣𑀬𑀺𑀁𑀲𑀼. 𑀢𑀢𑁆𑀣 𑀙𑀺𑀦𑁆𑀤𑀺𑀢𑀫𑀸𑀭𑀺𑀢𑁂𑀢𑀺 𑀙𑀺𑀦𑁆𑀤𑀺𑀢𑁂 𑀘 𑀫𑀸𑀭𑀺𑀢𑁂 𑀘. 𑀳𑀢𑀚𑀸𑀦𑀻𑀲𑀽𑀢𑀺 𑀧𑁄𑀣𑀦𑁂 𑀘 𑀥𑀦𑀚𑀸𑀦𑀻𑀲𑀼 𑀘. 𑀧𑀼𑀜𑁆𑀜𑀁 𑀯𑀸 𑀧𑀦𑀸𑀢𑀺 𑀅𑀢𑁆𑀢𑀦𑁄 𑀧𑀼𑀜𑁆𑀜𑀫𑁆𑀧𑀺 𑀦 𑀲𑀫𑀦𑀼𑀧𑀲𑁆𑀲𑀢𑀺, 𑀲𑀗𑁆𑀔𑁂𑀧𑀢𑁄 𑀧𑀼𑀜𑁆𑀜𑀸𑀧𑀼𑀜𑁆𑀜𑀸𑀦𑀁 𑀯𑀺𑀧𑀸𑀓𑁄 𑀦𑀢𑁆𑀣𑀻𑀢𑀺 𑀯𑀤𑀢𑀺. 𑀲 𑀯𑁂 𑀯𑀺𑀲𑁆𑀲𑀸𑀲𑀫𑀸𑀘𑀺𑀓𑁆𑀔𑀻𑀢𑀺 𑀲𑁄 𑁋 ‘‘𑀏𑀯𑀁 𑀓𑀢𑀧𑀸𑀧𑀸𑀦𑀫𑁆𑀧𑀺 𑀓𑀢𑀧𑀼𑀜𑁆𑀜𑀸𑀦𑀫𑁆𑀧𑀺 𑀯𑀺𑀧𑀸𑀓𑁄 𑀦𑀢𑁆𑀣𑀻’’𑀢𑀺 𑀯𑀤𑀦𑁆𑀢𑁄 𑀲𑀢𑁆𑀢𑀸𑀦𑀁 𑀯𑀺𑀲𑁆𑀲𑀸𑀲𑀁 𑀅𑀯𑀲𑁆𑀲𑀬𑀁 𑀧𑀢𑀺𑀝𑁆𑀞𑀁 𑀆𑀘𑀺𑀓𑁆𑀔𑀢𑀺, 𑀢𑀲𑁆𑀫𑀸 𑀫𑀸𑀦𑀦𑀁 𑀯𑀦𑁆𑀤𑀦𑀁 𑀧𑀽𑀚𑀦𑀁 𑀅𑀭𑀳𑀢𑀻𑀢𑀺 𑀯𑀤𑀢𑀺.

𑀢𑀧𑁄𑀚𑀺𑀕𑀼𑀘𑁆𑀙𑀸𑀬𑀸𑀢𑀺 𑀓𑀸𑀬𑀓𑀺𑀮𑀫𑀣𑀢𑀧𑁂𑀦 𑀧𑀸𑀧𑀚𑀺𑀕𑀼𑀘𑁆𑀙𑀦𑁂𑀦. 𑀲𑀼𑀲𑀁𑀯𑀼𑀢𑀢𑁆𑀢𑁄𑀢𑀺 𑀲𑀫𑀦𑁆𑀦𑀸𑀕𑀢𑁄 𑀧𑀺𑀳𑀺𑀢𑁄 𑀯𑀸. 𑀚𑁂𑀕𑀼𑀘𑁆𑀙𑀻𑀢𑀺 𑀢𑀧𑁂𑀦 𑀧𑀸𑀧𑀚𑀺𑀕𑀼𑀘𑁆𑀙𑀓𑁄. 𑀦𑀺𑀧𑀓𑁄𑀢𑀺 𑀧𑀡𑁆𑀟𑀺𑀢𑁄. 𑀘𑀸𑀢𑀼𑀬𑀸𑀫𑀲𑀼𑀲𑀁𑀯𑀼𑀢𑁄𑀢𑀺 𑀘𑀸𑀢𑀼𑀬𑀸𑀫𑁂𑀦 𑀲𑀼𑀲𑀁𑀯𑀼𑀢𑁄. 𑀘𑀸𑀢𑀼𑀬𑀸𑀫𑁄 𑀦𑀸𑀫 𑀲𑀩𑁆𑀩𑀯𑀸𑀭𑀺𑀯𑀸𑀭𑀺𑀢𑁄 𑀘 𑀳𑁄𑀢𑀺 𑀲𑀩𑁆𑀩𑀯𑀸𑀭𑀺𑀬𑀼𑀢𑁆𑀢𑁄 𑀘 𑀲𑀩𑁆𑀩𑀯𑀸𑀭𑀺𑀥𑀼𑀢𑁄 𑀘 𑀲𑀩𑁆𑀩𑀯𑀸𑀭𑀺𑀨𑀼𑀝𑁄 𑀘𑀸𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀓𑁄𑀝𑁆𑀞𑀸𑀲𑀸. 𑀢𑀢𑁆𑀣 𑀲𑀩𑁆𑀩𑀯𑀸𑀭𑀺𑀯𑀸𑀭𑀺𑀢𑁄𑀢𑀺 𑀯𑀸𑀭𑀺𑀢𑀲𑀩𑁆𑀩𑀉𑀤𑀓𑁄, 𑀧𑀝𑀺𑀓𑁆𑀔𑀺𑀢𑁆𑀢𑀲𑀩𑁆𑀩𑀲𑀻𑀢𑁄𑀤𑀓𑁄𑀢𑀺 𑀅𑀢𑁆𑀣𑁄. 𑀲𑁄 𑀓𑀺𑀭 𑀲𑀻𑀢𑁄𑀤𑀓𑁂 𑀲𑀢𑁆𑀢𑀲𑀜𑁆𑀜𑀻 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀦 𑀯𑀮𑀜𑁆𑀚𑁂𑀢𑀺. 𑀲𑀩𑁆𑀩𑀯𑀸𑀭𑀺𑀬𑀼𑀢𑁆𑀢𑁄𑀢𑀺 𑀲𑀩𑁆𑀩𑁂𑀦 𑀧𑀸𑀧𑀯𑀸𑀭𑀡𑁂𑀦 𑀬𑀼𑀢𑁄. 𑀲𑀩𑁆𑀩𑀯𑀸𑀭𑀺𑀥𑀼𑀢𑁄𑀢𑀺 𑀲𑀩𑁆𑀩𑁂𑀦 𑀧𑀸𑀧𑀯𑀸𑀭𑀡𑁂𑀦 𑀥𑀼𑀢𑀧𑀸𑀧𑁄. 𑀲𑀩𑁆𑀩𑀯𑀸𑀭𑀺𑀨𑀼𑀝𑁄𑀢𑀺 𑀲𑀩𑁆𑀩𑁂𑀦 𑀧𑀸𑀧𑀯𑀸𑀭𑀡𑁂𑀦 𑀨𑀼𑀝𑁆𑀞𑁄. 𑀤𑀺𑀝𑁆𑀞𑀁 𑀲𑀼𑀢𑀜𑁆𑀘 𑀆𑀘𑀺𑀓𑁆𑀔𑀦𑁆𑀢𑀺 𑀤𑀺𑀝𑁆𑀞𑀁 ‘‘𑀤𑀺𑀝𑁆𑀞𑀁 𑀫𑁂’’𑀢𑀺 𑀲𑀼𑀢𑀁 ‘‘𑀲𑀼𑀢𑀁 𑀫𑁂’’𑀢𑀺 𑀆𑀘𑀺𑀓𑁆𑀔𑀦𑁆𑀢𑁄, 𑀦 𑀦𑀺𑀕𑀼𑀳𑀦𑁆𑀢𑁄. 𑀦 𑀳𑀺 𑀦𑀽𑀦 𑀓𑀺𑀩𑁆𑀩𑀺𑀲𑀻𑀢𑀺 𑀏𑀯𑀭𑀽𑀧𑁄 𑀲𑀢𑁆𑀣𑀸 𑀓𑀺𑀩𑁆𑀩𑀺𑀲𑀓𑀸𑀭𑀓𑁄 𑀦𑀸𑀫 𑀦 𑀳𑁄𑀢𑀺.

𑀦𑀸𑀦𑀸𑀢𑀺𑀢𑁆𑀣𑀺𑀬𑁂𑀢𑀺 𑀲𑁄 𑀓𑀺𑀭 𑀦𑀸𑀦𑀸𑀢𑀺𑀢𑁆𑀣𑀺𑀬𑀸𑀦𑀁𑀬𑁂𑀯 𑀉𑀧𑀝𑁆𑀞𑀸𑀓𑁄, 𑀢𑀲𑁆𑀫𑀸 𑀢𑁂 𑀆𑀭𑀩𑁆𑀪 𑀯𑀤𑀢𑀺. 𑀧𑀓𑀼𑀥𑀓𑁄 𑀓𑀸𑀢𑀺𑀬𑀸𑀦𑁄𑀢𑀺 𑀧𑀓𑀼𑀥𑁄 𑀓𑀘𑁆𑀘𑀸𑀬𑀦𑁄. 𑀦𑀺𑀕𑀡𑁆𑀞𑁄𑀢𑀺 𑀦𑀸𑀝𑀧𑀼𑀢𑁆𑀢𑁄. 𑀫𑀓𑁆𑀔𑀮𑀺𑀧𑀽𑀭𑀡𑀸𑀲𑁂𑀢𑀺 𑀫𑀓𑁆𑀔𑀮𑀺 𑀘 𑀧𑀽𑀭𑀡𑁄 𑀘. 𑀲𑀸𑀫𑀜𑁆𑀜𑀧𑁆𑀧𑀢𑁆𑀢𑀸𑀢𑀺 𑀲𑀫𑀡𑀥𑀫𑁆𑀫𑁂 𑀓𑁄𑀝𑀺𑀧𑁆𑀧𑀢𑁆𑀢𑀸. 𑀦 𑀳𑀺 𑀦𑀽𑀦 𑀢𑁂𑀢𑀺 𑀲𑀧𑁆𑀧𑀼𑀭𑀺𑀲𑁂𑀳𑀺 𑀦 𑀤𑀽𑀭𑁂, 𑀢𑁂𑀬𑁂𑀯 𑀮𑁄𑀓𑁂 𑀲𑀧𑁆𑀧𑀼𑀭𑀺𑀲𑀸𑀢𑀺 𑀯𑀤𑀢𑀺. 𑀧𑀘𑁆𑀘𑀪𑀸𑀲𑀻𑀢𑀺 ‘‘𑀅𑀬𑀁 𑀆𑀓𑁄𑀝𑀓𑁄 𑀇𑀫𑁂𑀲𑀁 𑀦𑀕𑁆𑀕𑀦𑀺𑀲𑁆𑀲𑀺𑀭𑀺𑀓𑀸𑀦𑀁 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑁂 𑀞𑀢𑁆𑀯𑀸 𑀯𑀡𑁆𑀡𑀁 𑀓𑀣𑁂𑀢𑀻𑀢𑀺 𑀢𑁂𑀲𑀁 𑀅𑀯𑀡𑁆𑀡𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀧𑀢𑀺𑀅𑀪𑀸𑀲𑀻𑀢𑀺.

𑀢𑀢𑁆𑀣 𑀲𑀳𑀸𑀘𑀭𑀺𑀢𑁂𑀦𑀸𑀢𑀺 𑀲𑀳 𑀘𑀭𑀺𑀢𑀫𑀢𑁆𑀢𑁂𑀦. 𑀙𑀯𑁄 𑀲𑀺𑀕𑀸𑀮𑁄𑀢𑀺 𑀮𑀸𑀫𑀓𑁄 𑀓𑀸𑀮𑀲𑀺𑀕𑀸𑀮𑁄. 𑀓𑁄𑀢𑁆𑀣𑀼𑀓𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑀗𑁆𑀓𑀲𑁆𑀲𑀭𑀸𑀘𑀸𑀭𑁄𑀢𑀺 𑀆𑀲𑀗𑁆𑀓𑀺𑀢𑀲𑀫𑀸𑀘𑀸𑀭𑁄. 𑀦 𑀲𑀢𑀁 𑀲𑀭𑀺𑀓𑁆𑀔𑁄𑀢𑀺 𑀧𑀡𑁆𑀟𑀺𑀢𑀸𑀦𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀲𑀤𑀺𑀲𑁄 𑀦 𑀳𑁄𑀢𑀺, 𑀓𑀺𑀁 𑀢𑁆𑀯𑀁 𑀓𑀸𑀮𑀲𑀺𑀕𑀸𑀮𑀲𑀤𑀺𑀲𑁂 𑀢𑀺𑀢𑁆𑀣𑀺𑀬𑁂 𑀲𑀻𑀳𑁂 𑀓𑀭𑁄𑀲𑀻𑀢𑀺?

𑀅𑀦𑁆𑀯𑀸𑀯𑀺𑀲𑀺𑀢𑁆𑀯𑀸𑀢𑀺 ‘‘𑀅𑀬𑀁 𑀏𑀯𑀭𑀽𑀧𑀸𑀦𑀁 𑀲𑀢𑁆𑀣𑀸𑀭𑀸𑀦𑀁 𑀅𑀯𑀡𑁆𑀡𑀁 𑀓𑀣𑁂𑀢𑀺, 𑀢𑁂𑀦𑁂𑀯 𑀦𑀁 𑀫𑀼𑀔𑁂𑀦 𑀯𑀡𑁆𑀡𑀁 𑀓𑀣𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀲 𑀲𑀭𑀻𑀭𑁂 𑀅𑀦𑀼𑀆𑀯𑀺𑀲𑀺 𑀅𑀥𑀺𑀫𑀼𑀘𑁆𑀘𑀺, 𑀏𑀯𑀁 𑀅𑀦𑁆𑀯𑀸𑀯𑀺𑀲𑀺𑀢𑁆𑀯𑀸. 𑀆𑀬𑀼𑀢𑁆𑀢𑀸𑀢𑀺 𑀢𑀧𑁄𑀚𑀺𑀕𑀼𑀘𑁆𑀙𑀦𑁂 𑀬𑀼𑀢𑁆𑀢𑀧𑀬𑀼𑀢𑁆𑀢𑀸. 𑀧𑀸𑀮𑀬𑀁 𑀧𑀯𑀺𑀯𑁂𑀓𑀺𑀬𑀦𑁆𑀢𑀺 𑀧𑀯𑀺𑀯𑁂𑀓𑀁 𑀧𑀸𑀮𑀬𑀦𑁆𑀢𑀸. 𑀢𑁂 𑀓𑀺𑀭 ‘‘𑀦𑁆𑀳𑀸𑀧𑀺𑀢𑀧𑀯𑀺𑀯𑁂𑀓𑀁 𑀧𑀸𑀮𑁂𑀲𑁆𑀲𑀸𑀫𑀸’’𑀢𑀺 𑀲𑀬𑀁 𑀓𑁂𑀲𑁂 𑀮𑀼𑀜𑁆𑀘𑀦𑁆𑀢𑀺. ‘‘𑀘𑀻𑀯𑀭𑀧𑀯𑀺𑀯𑁂𑀓𑀁 𑀧𑀸𑀢𑁂𑀲𑁆𑀲𑀸𑀫𑀸’’𑀢𑀺 𑀦𑀕𑁆𑀕𑀸 𑀯𑀺𑀘𑀭𑀦𑁆𑀢𑀺. ‘‘𑀧𑀺𑀡𑁆𑀟𑀧𑀸𑀢𑀧𑀯𑀺𑀯𑁂𑀓𑀁 𑀧𑀸𑀮𑁂𑀲𑁆𑀲𑀸𑀫𑀸’’𑀢𑀺 𑀲𑀼𑀦𑀔𑀸 𑀯𑀺𑀬 𑀪𑀽𑀫𑀺𑀬𑀁 𑀯𑀸 𑀪𑀼𑀜𑁆𑀚𑀦𑁆𑀢𑀺 𑀳𑀢𑁆𑀣𑁂𑀲𑀼 𑀯𑀸. ‘‘𑀲𑁂𑀦𑀸𑀲𑀦𑀧𑀯𑀺𑀯𑁂𑀓𑀁 𑀧𑀸𑀮𑁂𑀲𑁆𑀲𑀸𑀫𑀸’’𑀢𑀺 𑀓𑀡𑁆𑀝𑀓𑀲𑁂𑀬𑁆𑀬𑀸𑀤𑀻𑀦𑀺 𑀓𑀧𑁆𑀧𑁂𑀦𑁆𑀢𑀺. 𑀭𑀽𑀧𑁂 𑀦𑀺𑀯𑀺𑀝𑁆𑀞𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀭𑀽𑀧𑁂 𑀧𑀢𑀺𑀝𑁆𑀞𑀺𑀢𑀸. 𑀤𑁂𑀯𑀮𑁄𑀓𑀸𑀪𑀺𑀦𑀦𑁆𑀤𑀺𑀦𑁄𑀢𑀺 𑀤𑁂𑀯𑀮𑁄𑀓𑀧𑀢𑁆𑀣𑀦𑀓𑀸𑀫𑀸. 𑀫𑀸𑀢𑀺𑀬𑀸𑀢𑀺 𑀫𑀘𑁆𑀘𑀸, 𑀢𑁂 𑀯𑁂 𑀫𑀘𑁆𑀘𑀸 𑀧𑀭𑀮𑁄𑀓𑀢𑁆𑀣𑀸𑀬 𑀲𑀫𑁆𑀫𑀸 𑀅𑀦𑀼𑀲𑀸𑀲𑀦𑁆𑀢𑀻𑀢𑀺 𑀯𑀤𑀢𑀺.

𑀇𑀢𑀺 𑀯𑀺𑀤𑀺𑀢𑁆𑀯𑀸𑀢𑀺 ‘‘𑀅𑀬𑀁 𑀧𑀞𑀫𑀁 𑀏𑀢𑁂𑀲𑀁 𑀅𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀯𑀡𑁆𑀡𑀁 𑀓𑀣𑁂𑀢𑀺, 𑀓𑁄 𑀦𑀼 𑀔𑁄 𑀏𑀲𑁄’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀚𑀸𑀦𑀺𑀢𑁆𑀯𑀸𑀯. 𑀬𑁂 𑀘𑀦𑁆𑀢𑀮𑀺𑀓𑁆𑀔𑀲𑁆𑀫𑀺𑀁 𑀧𑀪𑀸𑀲𑀯𑀡𑁆𑀡𑀸𑀢𑀺 𑀬𑁂 𑀅𑀦𑁆𑀢𑀮𑀺𑀓𑁆𑀔𑁂 𑀘𑀦𑁆𑀤𑁄𑀪𑀸𑀲𑀲𑀽𑀭𑀺𑀬𑁄𑀪𑀸𑀲𑀲𑀜𑁆𑀛𑀸𑀭𑀸𑀕𑀇𑀦𑁆𑀤𑀥𑀦𑀼𑀢𑀸𑀭𑀓𑀭𑀽𑀧𑀸𑀦𑀁 𑀧𑀪𑀸𑀲𑀯𑀡𑁆𑀡𑀸. 𑀲𑀩𑁆𑀩𑁂𑀯 𑀢𑁂 𑀢𑁂𑀢𑀺 𑀲𑀩𑁆𑀩𑁂𑀯 𑀢𑁂 𑀢𑀬𑀸. 𑀦𑀫𑀼𑀘𑀻𑀢𑀺 𑀫𑀸𑀭𑀁 𑀆𑀮𑀧𑀢𑀺. 𑀆𑀫𑀺𑀲𑀁𑀯 𑀫𑀘𑁆𑀙𑀸𑀦𑀁 𑀯𑀥𑀸𑀬 𑀔𑀺𑀢𑁆𑀢𑀸𑀢𑀺 𑀬𑀣𑀸 𑀫𑀘𑁆𑀙𑀸𑀦𑀁 𑀯𑀥𑀢𑁆𑀣𑀸𑀬 𑀩𑀴𑀺𑀲𑀮𑀕𑁆𑀕𑀁 𑀆𑀫𑀺𑀲𑀁 𑀔𑀺𑀧𑀢𑀺, 𑀏𑀯𑀁 𑀢𑀬𑀸 𑀧𑀲𑀁𑀲𑀫𑀸𑀦𑁂𑀦 𑀏𑀢𑁂 𑀭𑀽𑀧𑀸 𑀲𑀢𑁆𑀢𑀸𑀦𑀁 𑀯𑀥𑀸𑀬 𑀔𑀺𑀢𑁆𑀢𑀸𑀢𑀺 𑀯𑀤𑀢𑀺.

𑀫𑀸𑀡𑀯𑀕𑀸𑀫𑀺𑀬𑁄𑀢𑀺 𑀅𑀬𑀁 𑀓𑀺𑀭 𑀤𑁂𑀯𑀧𑀼𑀢𑁆𑀢𑁄 𑀩𑀼𑀤𑁆𑀥𑀼𑀧𑀝𑁆𑀞𑀸𑀓𑁄. 𑀭𑀸𑀚𑀕𑀳𑀻𑀬𑀸𑀦𑀦𑁆𑀢𑀺 𑀭𑀸𑀚𑀕𑀳𑀧𑀩𑁆𑀩𑀢𑀸𑀦𑀁. 𑀲𑁂𑀢𑁄𑀢𑀺 𑀓𑁂𑀮𑀸𑀲𑁄. 𑀅𑀖𑀕𑀸𑀫𑀺𑀦𑀦𑁆𑀢𑀺 𑀆𑀓𑀸𑀲𑀕𑀸𑀫𑀻𑀦𑀁. 𑀉𑀤𑀥𑀺𑀦𑀦𑁆𑀢𑀺 𑀉𑀤𑀓𑀦𑀺𑀥𑀸𑀦𑀸𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀭𑀸𑀚𑀕𑀳𑀻𑀬𑀸𑀦𑀁 𑀧𑀩𑁆𑀩𑀢𑀸𑀦𑀁 𑀯𑀺𑀧𑀼𑀮𑁄 𑀲𑁂𑀝𑁆𑀞𑁄, 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀸𑀦𑀁 𑀓𑁂𑀮𑀸𑀲𑁄, 𑀆𑀓𑀸𑀲𑀕𑀸𑀫𑀻𑀦𑀁 𑀆𑀤𑀺𑀘𑁆𑀘𑁄, 𑀉𑀤𑀓𑀦𑀺𑀥𑀸𑀦𑀸𑀦𑀁 𑀲𑀫𑀼𑀤𑁆𑀤𑁄, 𑀦𑀓𑁆𑀔𑀢𑁆𑀢𑀸𑀦𑀁 𑀘𑀦𑁆𑀤𑁄, 𑀏𑀯𑀁 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀩𑀼𑀤𑁆𑀥𑁄 𑀲𑁂𑀝𑁆𑀞𑁄𑀢𑀺. 𑀤𑀲𑀫𑀁.

𑀦𑀸𑀦𑀸𑀢𑀺𑀢𑁆𑀣𑀺𑀬𑀯𑀕𑁆𑀕𑁄 𑀢𑀢𑀺𑀬𑁄.

𑀇𑀢𑀺 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸

𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀤𑁂𑀯𑀧𑀼𑀢𑁆𑀢𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀓𑁄𑀲𑀮𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧. 𑀤𑀳𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁨. 𑀓𑁄𑀲𑀮𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀻𑀢𑀺 𑀬𑀣𑀸 𑀔𑀫𑀦𑀻𑀬𑀸𑀤𑀻𑀦𑀺 𑀧𑀼𑀘𑁆𑀙𑀦𑁆𑀢𑁄 𑀪𑀕𑀯𑀸 𑀢𑁂𑀦, 𑀏𑀯𑀁 𑀲𑁄𑀧𑀺 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑁄 𑀅𑀳𑁄𑀲𑀺. 𑀲𑀻𑀢𑁄𑀤𑀓𑀁 𑀯𑀺𑀬 𑀉𑀡𑁆𑀳𑁄𑀤𑀓𑁂𑀦 𑀲𑀫𑁆𑀫𑁄𑀤𑀺𑀢𑀁 𑀏𑀓𑀻𑀪𑀸𑀯𑀁 𑀅𑀕𑀫𑀸𑀲𑀺. 𑀬𑀸𑀬 𑀘 𑁋 ‘‘𑀓𑀘𑁆𑀘𑀺, 𑀪𑁄 𑀕𑁄𑀢𑀫, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁, 𑀓𑀘𑁆𑀘𑀺 𑀪𑁄𑀢𑁄 𑀘 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸𑀦𑀜𑁆𑀘 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺𑀆𑀤𑀺𑀓𑀸𑀬 𑀓𑀣𑀸𑀬 𑀲𑀫𑁆𑀫𑁄𑀤𑀺, 𑀢𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀲𑀗𑁆𑀔𑀸𑀢𑀲𑀫𑁆𑀫𑁄𑀤𑀚𑀦𑀦𑀢𑁄 𑀲𑀫𑁆𑀫𑁄𑀤𑀺𑀢𑀼𑀁 𑀬𑀼𑀢𑁆𑀢𑀪𑀸𑀯𑀢𑁄 𑀘 𑀲𑀫𑁆𑀫𑁄𑀤𑀦𑀻𑀬𑀁, 𑀅𑀢𑁆𑀣𑀩𑁆𑀬𑀜𑁆𑀚𑀦𑀫𑀥𑀼𑀭𑀢𑀸𑀬 𑀘𑀺𑀭𑀫𑁆𑀧𑀺 𑀓𑀸𑀮𑀁 𑀲𑀸𑀭𑁂𑀢𑀼𑀁 𑀦𑀺𑀭𑀦𑁆𑀢𑀭𑀁 𑀧𑀯𑀢𑁆𑀢𑁂𑀢𑀼𑀁 𑀅𑀭𑀳𑀭𑀽𑀧𑀢𑁄 𑀲𑀭𑀺𑀢𑀩𑁆𑀩𑀪𑀸𑀯𑀢𑁄 𑀘 𑀲𑀸𑀭𑀡𑀻𑀬𑀁. 𑀲𑀼𑀬𑁆𑀬𑀫𑀸𑀦𑀲𑀼𑀔𑀢𑁄 𑀘 𑀲𑀫𑁆𑀫𑁄𑀤𑀦𑀻𑀬𑀁, 𑀅𑀦𑀼𑀲𑁆𑀲𑀭𑀺𑀬𑀫𑀸𑀦𑀲𑀼𑀔𑀢𑁄 𑀲𑀸𑀭𑀡𑀻𑀬𑀁. 𑀢𑀣𑀸 𑀩𑁆𑀬𑀜𑁆𑀚𑀦𑀧𑀭𑀺𑀲𑀼𑀤𑁆𑀥𑀢𑀸𑀬 𑀲𑀫𑁆𑀫𑁄𑀤𑀦𑀻𑀬𑀁, 𑀅𑀢𑁆𑀣𑀧𑀭𑀺𑀲𑀼𑀤𑁆𑀥𑀢𑀸𑀬 𑀲𑀸𑀭𑀡𑀻𑀬𑀦𑁆𑀢𑀺 𑀏𑀯𑀁 𑀅𑀦𑁂𑀓𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀧𑀭𑀺𑀬𑁄𑀲𑀸𑀧𑁂𑀢𑁆𑀯𑀸 𑀦𑀺𑀝𑁆𑀞𑀧𑁂𑀢𑁆𑀯𑀸 𑀇𑀢𑁄 𑀧𑀼𑀩𑁆𑀩𑁂 𑀢𑀣𑀸𑀕𑀢𑀲𑁆𑀲 𑀅𑀤𑀺𑀝𑁆𑀞𑀢𑁆𑀢𑀸 𑀕𑀼𑀡𑀸𑀕𑀼𑀡𑀯𑀲𑁂𑀦 𑀕𑀫𑁆𑀪𑀻𑀭𑀪𑀸𑀯𑀁 𑀯𑀸 𑀉𑀢𑁆𑀢𑀸𑀦𑀪𑀸𑀯𑀁 𑀯𑀸 𑀅𑀚𑀸𑀦𑀦𑁆𑀢𑁄 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺, 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀬𑀁 𑀑𑀯𑀝𑁆𑀝𑀺𑀓𑀲𑀸𑀭𑀁 𑀓𑀢𑁆𑀯𑀸 𑀆𑀕𑀢𑁄 𑀮𑁄𑀓𑀦𑀺𑀲𑁆𑀲𑀭𑀡𑀪𑀯𑁄𑀓𑁆𑀓𑀦𑁆𑀢𑀺𑀧𑀜𑁆𑀳𑀁 𑀲𑀢𑁆𑀣𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑀁 𑀧𑀼𑀘𑁆𑀙𑀺𑀢𑀼𑀁 𑀪𑀯𑀫𑁆𑀧𑀺 𑀦𑁄𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀪𑀯𑀫𑁆𑀧𑀻𑀢𑀺 𑀧𑀺-𑀓𑀸𑀭𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁂 𑀦𑀺𑀧𑀸𑀢𑁄, 𑀢𑁂𑀦 𑀘 𑀙 𑀲𑀢𑁆𑀣𑀸𑀭𑁂 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀬𑀣𑀸 𑀧𑀽𑀭𑀡𑀸𑀤𑀬𑁄 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀫𑁆𑀳𑀸’’𑀢𑀺 𑀧𑀝𑀺𑀚𑀸𑀦𑀦𑁆𑀢𑀺, 𑀏𑀯𑀁 𑀪𑀯𑀫𑁆𑀧𑀺 𑀦𑀼 𑀧𑀝𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀧𑀦 𑀭𑀸𑀚𑀸 𑀦 𑀅𑀢𑁆𑀢𑀦𑁄 𑀮𑀤𑁆𑀥𑀺𑀬𑀸, 𑀮𑁄𑀓𑁂 𑀫𑀳𑀸𑀚𑀦𑁂𑀦 𑀕𑀳𑀺𑀢𑀧𑀝𑀺𑀜𑁆𑀜𑀸𑀯𑀲𑁂𑀦 𑀧𑀼𑀘𑁆𑀙𑀢𑀺. 𑀅𑀣 𑀪𑀕𑀯𑀸 𑀩𑀼𑀤𑁆𑀥𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀬𑀁 𑀳𑀺 𑀢𑀁 𑀫𑀳𑀸𑀭𑀸𑀚𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀳𑀁 𑀳𑀺 𑀫𑀳𑀸𑀭𑀸𑀚𑀸𑀢𑀺 𑀅𑀦𑀼𑀢𑁆𑀢𑀭𑀁 𑀲𑀩𑁆𑀩𑀲𑁂𑀝𑁆𑀞𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀗𑁆𑀔𑀸𑀢𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀳𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺 𑀧𑀩𑁆𑀩𑀚𑁆𑀚𑀽𑀧𑀕𑀫𑀦𑁂𑀦 𑀲𑀫𑀡𑀸, 𑀚𑀸𑀢𑀺𑀯𑀲𑁂𑀦 𑀩𑁆𑀭𑀸𑀳𑁆𑀫𑀡𑀸. 𑀲𑀗𑁆𑀖𑀺𑀦𑁄𑀢𑀺𑀆𑀤𑀻𑀲𑀼 𑀧𑀩𑁆𑀩𑀚𑀺𑀢𑀲𑀫𑀽𑀳𑀲𑀗𑁆𑀔𑀸𑀢𑁄 𑀲𑀗𑁆𑀖𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀲𑀗𑁆𑀖𑀺𑀦𑁄. 𑀲𑁆𑀯𑁂𑀯 𑀕𑀡𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀕𑀡𑀺𑀦𑁄. 𑀆𑀘𑀸𑀭𑀲𑀺𑀓𑁆𑀔𑀸𑀧𑀦𑀯𑀲𑁂𑀦 𑀢𑀲𑁆𑀲 𑀕𑀡𑀲𑁆𑀲 𑀆𑀘𑀭𑀺𑀬𑀸𑀢𑀺 𑀕𑀡𑀸𑀘𑀭𑀺𑀬𑀸. 𑀜𑀸𑀢𑀸𑀢𑀺 𑀧𑀜𑁆𑀜𑀸𑀢𑀸 𑀧𑀸𑀓𑀝𑀸. ‘‘𑀅𑀧𑁆𑀧𑀺𑀘𑁆𑀙𑀸 𑀲𑀦𑁆𑀢𑀼𑀝𑁆𑀞𑀸 𑀅𑀧𑁆𑀧𑀺𑀘𑁆𑀙𑀢𑀸𑀬 𑀯𑀢𑁆𑀣𑀫𑁆𑀧𑀺 𑀦 𑀦𑀺𑀯𑀸𑀲𑁂𑀦𑁆𑀢𑀻’’𑀢𑀺 𑀏𑀯𑀁 𑀲𑀫𑀼𑀕𑁆𑀕𑀢𑁄 𑀬𑀲𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀬𑀲𑀲𑁆𑀲𑀺𑀦𑁄. 𑀢𑀺𑀢𑁆𑀣𑀓𑀭𑀸𑀢𑀺 𑀮𑀤𑁆𑀥𑀺𑀓𑀭𑀸. 𑀲𑀸𑀥𑀼𑀲𑀫𑁆𑀫𑀢𑀸𑀢𑀺 ‘‘𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸’’𑀢𑀺 𑀏𑀯𑀁 𑀲𑀫𑁆𑀫𑀢𑀸. 𑀩𑀳𑀼𑀚𑀦𑀲𑁆𑀲𑀸𑀢𑀺 𑀅𑀲𑁆𑀲𑀼𑀢𑀯𑀢𑁄 𑀅𑀦𑁆𑀥𑀩𑀸𑀮𑀧𑀼𑀣𑀼𑀚𑁆𑀚𑀦𑀲𑁆𑀲. 𑀧𑀽𑀭𑀡𑁄𑀢𑀺𑀆𑀤𑀻𑀦𑀺 𑀢𑁂𑀲𑀁 𑀦𑀸𑀫𑀕𑁄𑀢𑁆𑀢𑀸𑀦𑀺. 𑀧𑀽𑀭𑀡𑁄𑀢𑀺 𑀳𑀺 𑀦𑀸𑀫𑀫𑁂𑀯. 𑀢𑀣𑀸, 𑀫𑀓𑁆𑀔𑀮𑀻𑀢𑀺. 𑀲𑁄 𑀧𑀦 𑀕𑁄𑀲𑀸𑀮𑀸𑀬 𑀚𑀸𑀢𑀢𑁆𑀢𑀸 𑀕𑁄𑀲𑀸𑀮𑁄𑀢𑀺 𑀯𑀼𑀢𑁆𑀢𑁄. 𑀦𑀸𑀝𑀧𑀼𑀢𑁆𑀢𑁄𑀢𑀺 𑀦𑀸𑀝𑀲𑁆𑀲 𑀧𑀼𑀢𑁆𑀢𑁄. 𑀩𑁂𑀮𑀝𑁆𑀞𑀧𑀼𑀢𑁆𑀢𑁄𑀢𑀺 𑀩𑁂𑀮𑀝𑁆𑀞𑀲𑁆𑀲 𑀧𑀼𑀢𑁆𑀢𑁄. 𑀓𑀘𑁆𑀘𑀸𑀬𑀦𑁄𑀢𑀺 𑀧𑀓𑀼𑀥𑀲𑁆𑀲 𑀕𑁄𑀢𑁆𑀢𑀁. 𑀓𑁂𑀲𑀓𑀫𑁆𑀩𑀮𑀲𑁆𑀲 𑀥𑀸𑀭𑀡𑀢𑁄 𑀅𑀚𑀺𑀢𑁄 𑀓𑁂𑀲𑀓𑀫𑁆𑀩𑀮𑁄𑀢𑀺 𑀯𑀼𑀢𑁆𑀢𑁄.

𑀢𑁂𑀧𑀺 𑀫𑀬𑀸𑀢𑀺 𑀓𑀧𑁆𑀧𑀓𑁄𑀮𑀸𑀳𑀮𑀁 𑀩𑀼𑀤𑁆𑀥𑀓𑁄𑀮𑀸𑀳𑀮𑀁 𑀘𑀓𑁆𑀓𑀯𑀢𑁆𑀢𑀺𑀓𑁄𑀮𑀸𑀳𑀮𑀦𑁆𑀢𑀺 𑀢𑀻𑀡𑀺 𑀓𑁄𑀮𑀸𑀳𑀮𑀸𑀦𑀺. 𑀢𑀢𑁆𑀣 ‘‘𑀯𑀲𑁆𑀲𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀓𑀧𑁆𑀧𑀼𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀧𑁆𑀧𑀓𑁄𑀮𑀸𑀳𑀮𑀁 𑀦𑀸𑀫 𑀳𑁄𑀢𑀺 𑁋 ‘‘𑀇𑀢𑁄 𑀯𑀲𑁆𑀲𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀮𑁄𑀓𑁄 𑀯𑀺𑀦𑀲𑁆𑀲𑀺𑀲𑁆𑀲𑀢𑀺, 𑀫𑁂𑀢𑁆𑀢𑀁 𑀫𑀸𑀭𑀺𑀲𑀸, 𑀪𑀸𑀯𑁂𑀣, 𑀓𑀭𑀼𑀡𑀁 𑀫𑀼𑀤𑀺𑀢𑀁 𑀉𑀧𑁂𑀓𑁆𑀔’’𑀦𑁆𑀢𑀺 𑀫𑀦𑀼𑀲𑁆𑀲𑀧𑁆𑀧𑀣𑁂 𑀤𑁂𑀯𑀢𑀸 𑀖𑁄𑀲𑁂𑀦𑁆𑀢𑀺𑀬𑁄 𑀯𑀺𑀘𑀭𑀦𑁆𑀢𑀺. ‘‘𑀯𑀲𑁆𑀲𑀲𑀳𑀲𑁆𑀲𑀫𑀢𑁆𑀣𑀓𑁂 𑀧𑀦 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀩𑀼𑀤𑁆𑀥𑀓𑁄𑀮𑀸𑀳𑀮𑀁 𑀦𑀸𑀫 𑀳𑁄𑀢𑀺 𑁋 ‘‘𑀇𑀢𑁄 𑀯𑀲𑁆𑀲𑀲𑀳𑀲𑁆𑀲𑀫𑀢𑁆𑀣𑀓𑁂 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁂𑀦 𑀲𑀗𑁆𑀖𑀭𑀢𑀦𑁂𑀦 𑀧𑀭𑀺𑀯𑀸𑀭𑀺𑀢𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀯𑀺𑀘𑀭𑀺𑀲𑁆𑀲𑀢𑀻’’𑀢𑀺 𑀤𑁂𑀯𑀢𑀸 𑀉𑀕𑁆𑀖𑁄𑀲𑁂𑀦𑁆𑀢𑀺. ‘‘𑀯𑀲𑁆𑀲𑀲𑀢𑀫𑀢𑁆𑀣𑀓𑁂 𑀧𑀦 𑀘𑀓𑁆𑀓𑀯𑀢𑁆𑀢𑀻 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀘𑀓𑁆𑀓𑀯𑀢𑁆𑀢𑀺𑀓𑁄𑀮𑀸𑀳𑀮𑀁 𑀦𑀸𑀫 𑀳𑁄𑀢𑀺 𑁋 ‘‘𑀇𑀢𑁄 𑀯𑀲𑁆𑀲𑀲𑀢𑀫𑀢𑁆𑀣𑀓𑁂 𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄 𑀘𑀢𑀼𑀤𑁆𑀤𑀻𑀧𑀺𑀲𑁆𑀲𑀭𑁄 𑀲𑀳𑀲𑁆𑀲 𑀧𑀼𑀢𑁆𑀢𑀧𑀭𑀺𑀯𑀸𑀭𑁄 𑀯𑁂𑀳𑀸𑀲𑀗𑁆𑀕𑀫𑁄 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀤𑁂𑀯𑀢𑀸 𑀉𑀕𑁆𑀖𑁄𑀲𑁂𑀦𑁆𑀢𑀺.

𑀇𑀫𑁂𑀲𑀼 𑀢𑀻𑀲𑀼 𑀓𑁄𑀮𑀸𑀳𑀮𑁂𑀲𑀼 𑀇𑀫𑁂 𑀙 𑀲𑀢𑁆𑀣𑀸𑀭𑁄 𑀩𑀼𑀤𑁆𑀥𑀓𑁄𑀮𑀸𑀳𑀮𑀁 𑀲𑀼𑀢𑁆𑀯𑀸 𑀆𑀘𑀭𑀺𑀬𑁂 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀘𑀺𑀦𑁆𑀢𑀸𑀫𑀸𑀡𑀺𑀯𑀺𑀚𑁆𑀚𑀸𑀤𑀻𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑁋 ‘‘𑀫𑀬𑀁 𑀩𑀼𑀤𑁆𑀥𑀫𑁆𑀳𑀸’’𑀢𑀺 𑀧𑀝𑀺𑀜𑁆𑀜𑀁 𑀓𑀢𑁆𑀯𑀸 𑀫𑀳𑀸𑀚𑀦𑀧𑀭𑀺𑀯𑀼𑀢𑀸 𑀚𑀦𑀧𑀤𑀁 𑀯𑀺𑀘𑀭𑀦𑁆𑀢𑀸 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀬𑀁 𑀧𑀢𑁆𑀢𑀸. 𑀢𑁂𑀲𑀁 𑀉𑀧𑀝𑁆𑀞𑀸𑀓𑀸 𑀭𑀸𑀚𑀸𑀦𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀫𑀳𑀸𑀭𑀸𑀚, 𑀧𑀽𑀭𑀡𑁄 𑀓𑀲𑁆𑀲𑀧𑁄…𑀧𑁂… 𑀅𑀚𑀺𑀢𑁄 𑀓𑁂𑀲𑀓𑀫𑁆𑀩𑀮𑁄 𑀩𑀼𑀤𑁆𑀥𑁄 𑀓𑀺𑀭 𑀲𑀩𑁆𑀩𑀜𑁆𑀜𑀽 𑀓𑀺𑀭𑀸’’𑀢𑀺 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀢𑀼𑀫𑁆𑀳𑁂𑀯 𑀦𑁂 𑀦𑀺𑀫𑀦𑁆𑀢𑁂𑀢𑁆𑀯𑀸 𑀆𑀦𑁂𑀣𑀸’’𑀢𑀺 𑀆𑀳. 𑀢𑁂 𑀕𑀦𑁆𑀢𑁆𑀯𑀸 𑀢𑁂𑀳𑀺, ‘‘𑀭𑀸𑀚𑀸 𑀯𑁄 𑀦𑀺𑀫𑀦𑁆𑀢𑁂𑀢𑀺. 𑀭𑀜𑁆𑀜𑁄 𑀕𑁂𑀳𑁂 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀯𑀼𑀢𑁆𑀢𑀸 𑀕𑀦𑁆𑀢𑀼𑀁 𑀦 𑀉𑀲𑁆𑀲𑀳𑀦𑁆𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀯𑀼𑀘𑁆𑀘𑀫𑀸𑀦𑀸 𑀉𑀧𑀝𑁆𑀞𑀸𑀓𑀸𑀦𑀁 𑀘𑀺𑀢𑁆𑀢𑀸𑀦𑀼𑀭𑀓𑁆𑀔𑀡𑀢𑁆𑀣𑀸𑀬 𑀅𑀥𑀺𑀯𑀸𑀲𑁂𑀢𑁆𑀯𑀸 𑀲𑀩𑁆𑀩𑁂 𑀏𑀓𑀢𑁄𑀯 𑀅𑀕𑀫𑀁𑀲𑀼. 𑀭𑀸𑀚𑀸 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 ‘‘𑀦𑀺𑀲𑀻𑀤𑀦𑁆𑀢𑀽’’𑀢𑀺 𑀆𑀳. 𑀦𑀺𑀕𑁆𑀕𑀼𑀡𑀸𑀦𑀁 𑀅𑀢𑁆𑀢𑀪𑀸𑀯𑁂 𑀭𑀸𑀚𑀼𑀲𑁆𑀫𑀸 𑀦𑀸𑀫 𑀨𑀭𑀢𑀺, 𑀢𑁂 𑀫𑀳𑀸𑀭𑀳𑁂𑀲𑀼 𑀆𑀲𑀦𑁂𑀲𑀼 𑀦𑀺𑀲𑀻𑀤𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀨𑀮𑀓𑁂𑀲𑀼 𑀘𑁂𑀯 𑀪𑀽𑀫𑀺𑀬𑀁 𑀘 𑀦𑀺𑀲𑀻𑀤𑀺𑀁𑀲𑀼.

𑀭𑀸𑀚𑀸 ‘‘𑀏𑀢𑁆𑀢𑀓𑁂𑀦𑁂𑀯 𑀦𑀢𑁆𑀣𑀺 𑀢𑁂𑀲𑀁 𑀅𑀦𑁆𑀢𑁄 𑀲𑀼𑀓𑁆𑀓𑀥𑀫𑁆𑀫𑁄’’𑀢𑀺 𑀯𑀢𑁆𑀯𑀸 𑀆𑀳𑀸𑀭𑀁 𑀅𑀤𑀢𑁆𑀯𑀸𑀯 𑀢𑀸𑀮𑀢𑁄 𑀧𑀢𑀺𑀢𑀁 𑀫𑀼𑀕𑁆𑀕𑀭𑁂𑀦 𑀧𑁄𑀣𑁂𑀦𑁆𑀢𑁄 𑀯𑀺𑀬 ‘‘𑀢𑀼𑀫𑁆𑀳𑁂 𑀩𑀼𑀤𑁆𑀥𑀸, 𑀦 𑀩𑀼𑀤𑁆𑀥𑀸’’𑀢𑀺 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀢𑁂 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀲𑀘𑁂 ‘𑀩𑀼𑀤𑁆𑀥𑀫𑁆𑀳𑀸’𑀢𑀺 𑀯𑀓𑁆𑀔𑀸𑀫, 𑀭𑀸𑀚𑀸 𑀩𑀼𑀤𑁆𑀥𑀯𑀺𑀲𑀬𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀓𑀣𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂 ‘𑀢𑀼𑀫𑁆𑀳𑁂 𑀫𑀬𑀁 𑀩𑀼𑀤𑁆𑀥𑀸𑀢𑀺 𑀫𑀳𑀸𑀚𑀦𑀁 𑀯𑀜𑁆𑀘𑁂𑀢𑁆𑀯𑀸 𑀆𑀳𑀺𑀡𑁆𑀟𑀣𑀸’𑀢𑀺 𑀚𑀺𑀯𑁆𑀳𑀫𑁆𑀧𑀺 𑀙𑀺𑀦𑁆𑀤𑀸𑀧𑁂𑀬𑁆𑀬, 𑀅𑀜𑁆𑀜𑀫𑁆𑀧𑀺 𑀅𑀦𑀢𑁆𑀣𑀁 𑀓𑀭𑁂𑀬𑁆𑀬𑀸’’𑀢𑀺 𑀲𑀓𑀧𑀝𑀺𑀜𑁆𑀜𑀸𑀬 𑀏𑀯 ‘𑀦 𑀫𑀬𑀁 𑀩𑀼𑀤𑁆𑀥𑀸’𑀢𑀺 𑀯𑀤𑀺𑀁𑀲𑀼. 𑀅𑀣 𑀦𑁂 𑀭𑀸𑀚𑀸 𑀕𑁂𑀳𑀢𑁄 𑀦𑀺𑀓𑀟𑁆𑀠𑀸𑀧𑁂𑀲𑀺. 𑀢𑁂 𑀭𑀸𑀚𑀖𑀭𑀢𑁄 𑀦𑀺𑀓𑁆𑀔𑀦𑁆𑀢𑁂 𑀉𑀧𑀝𑁆𑀞𑀸𑀓𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀺𑀁 𑀆𑀘𑀭𑀺𑀬𑀸 𑀭𑀸𑀚𑀸 𑀢𑀼𑀫𑁆𑀳𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁 𑀅𑀓𑀸𑀲𑀻’’𑀢𑀺? 𑀭𑀸𑀚𑀸 ‘‘𑀩𑀼𑀤𑁆𑀥𑀸 𑀢𑀼𑀫𑁆𑀳𑁂’’𑀢𑀺 𑀧𑀼𑀘𑁆𑀙𑀺, 𑀢𑀢𑁄 𑀫𑀬𑀁 𑁋 ‘‘𑀲𑀘𑁂 𑀅𑀬𑀁 𑀭𑀸𑀚𑀸 𑀩𑀼𑀤𑁆𑀥𑀯𑀺𑀲𑀬𑁂 𑀧𑀜𑁆𑀳𑀁 𑀓𑀣𑀺𑀬𑀫𑀸𑀦𑀁 𑀅𑀚𑀸𑀦𑀦𑁆𑀢𑁄 𑀅𑀫𑁆𑀳𑁂𑀲𑀼 𑀫𑀦𑀁 𑀧𑀤𑁄𑀲𑁂𑀲𑁆𑀲𑀢𑀺, 𑀩𑀳𑀼𑀁 𑀅𑀧𑀼𑀜𑁆𑀜𑀁 𑀧𑀲𑀯𑀺𑀲𑁆𑀲𑀢𑀻’’𑀢𑀺 𑀭𑀜𑁆𑀜𑁄 𑀅𑀦𑀼𑀓𑀫𑁆𑀧𑀸𑀬 ‘𑀦 𑀫𑀬𑀁 𑀩𑀼𑀤𑁆𑀥𑀸’𑀢𑀺 𑀯𑀤𑀺𑀫𑁆𑀳𑀸, 𑀫𑀬𑀁 𑀧𑀦 𑀩𑀼𑀤𑁆𑀥𑀸 𑀏𑀯, 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑀪𑀸𑀯𑁄, 𑀉𑀤𑀓𑁂𑀦 𑀥𑁄𑀯𑀺𑀢𑁆𑀯𑀸𑀧𑀺 𑀳𑀭𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺. 𑀇𑀢𑀺 𑀩𑀳𑀺𑀤𑁆𑀥𑀸 ‘𑀩𑀼𑀤𑁆𑀥𑀫𑁆𑀳𑀸’𑀢𑀺 𑀆𑀳𑀁𑀲𑀼 𑁋 𑀭𑀜𑁆𑀜𑁄 𑀲𑀦𑁆𑀢𑀺𑀓𑁂 ‘𑀦 𑀫𑀬𑀁 𑀩𑀼𑀤𑁆𑀥𑀸’𑀢𑀺 𑀯𑀤𑀺𑀁𑀲𑀽𑀢𑀺, 𑀇𑀤𑀁 𑀕𑀳𑁂𑀢𑁆𑀯𑀸 𑀭𑀸𑀚𑀸 𑀏𑀯𑀫𑀸𑀳. 𑀢𑀢𑁆𑀣 𑀓𑀺𑀁 𑀧𑀦 𑀪𑀯𑀁 𑀕𑁄𑀢𑀫𑁄 𑀤𑀳𑀭𑁄 𑀘𑁂𑀯 𑀚𑀸𑀢𑀺𑀬𑀸, 𑀦𑀯𑁄 𑀘 𑀧𑀩𑁆𑀩𑀚𑁆𑀚𑀸𑀬𑀸𑀢𑀺 𑀇𑀤𑀁 𑀅𑀢𑁆𑀢𑀦𑁄 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀯𑀤𑀢𑀺. 𑀢𑀢𑁆𑀣 𑀓𑀺𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑀯𑀘𑀦𑀁. 𑀏𑀢𑁂 𑀚𑀸𑀢𑀺𑀫𑀳𑀮𑁆𑀮𑀓𑀸 𑀘 𑀘𑀺𑀭𑀧𑀩𑁆𑀩𑀚𑀺𑀢𑀸 𑀘 ‘‘𑀩𑀼𑀤𑁆𑀥𑀫𑁆𑀳𑀸’’𑀢𑀺 𑀦 𑀧𑀝𑀺𑀚𑀸𑀦𑀦𑁆𑀢𑀺, 𑀪𑀯𑀁 𑀕𑁄𑀢𑀫𑁄 𑀚𑀸𑀢𑀺𑀬𑀸 𑀘 𑀤𑀳𑀭𑁄 𑀧𑀩𑁆𑀩𑀚𑁆𑀚𑀸𑀬 𑀘 𑀦𑀯𑁄 𑀓𑀺𑀁 𑀧𑀝𑀺𑀚𑀸𑀦𑀸𑀢𑀺? 𑀫𑀸 𑀧𑀝𑀺𑀚𑀸𑀦𑀸𑀳𑀻𑀢𑀺 𑀅𑀢𑁆𑀣𑁄.

𑀦 𑀉𑀜𑁆𑀜𑀸𑀢𑀩𑁆𑀩𑀸𑀢𑀺 𑀦 𑀅𑀯𑀚𑀸𑀦𑀺𑀢𑀩𑁆𑀩𑀸. 𑀦 𑀧𑀭𑀺𑀪𑁄𑀢𑀩𑁆𑀩𑀸𑀢𑀺 𑀦 𑀧𑀭𑀺𑀪𑀯𑀺𑀢𑀩𑁆𑀩𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀔𑀢𑁆𑀢𑀺𑀬𑁄𑀢𑀺 𑀭𑀸𑀚𑀓𑀼𑀫𑀸𑀭𑁄. 𑀉𑀭𑀕𑁄𑀢𑀺 𑀆𑀲𑀻𑀯𑀺𑀲𑁄. 𑀅𑀕𑁆𑀕𑀻𑀢𑀺 𑀅𑀕𑁆𑀕𑀺𑀬𑁂𑀯. 𑀪𑀺𑀓𑁆𑀔𑀽𑀢𑀺 𑀇𑀫𑀲𑁆𑀫𑀺𑀁 𑀧𑀦 𑀧𑀤𑁂 𑀤𑁂𑀲𑀦𑀸𑀓𑀼𑀲𑀮𑀢𑀸𑀬 𑀅𑀢𑁆𑀢𑀸𑀦𑀁 𑀅𑀩𑁆𑀪𑀦𑁆𑀢𑀭𑀁 𑀓𑀢𑁆𑀯𑀸 𑀲𑀻𑀮𑀯𑀦𑁆𑀢𑀁 𑀧𑀩𑁆𑀩𑀚𑀺𑀢𑀁 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀘 𑀤𑀳𑀭𑀁 𑀭𑀸𑀚𑀓𑀼𑀫𑀸𑀭𑀁 𑀤𑀺𑀲𑁆𑀯𑀸, 𑀉𑀓𑁆𑀓𑀫𑀺𑀢𑁆𑀯𑀸 𑀫𑀕𑁆𑀕𑀁 𑀅𑀤𑁂𑀦𑁆𑀢𑁄, 𑀧𑀸𑀭𑀼𑀧𑀦𑀁 𑀅𑀦𑀧𑀦𑁂𑀦𑁆𑀢𑁄, 𑀦𑀺𑀲𑀺𑀦𑁆𑀦𑀸𑀲𑀦𑀢𑁄 𑀅𑀦𑀼𑀝𑁆𑀞𑀳𑀦𑁆𑀢𑁄, 𑀳𑀢𑁆𑀣𑀺𑀧𑀺𑀝𑁆𑀞𑀸𑀤𑀻𑀳𑀺 𑀅𑀦𑁄𑀢𑀭𑀦𑁆𑀢𑁄, 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀫𑀜𑁆𑀜𑀦𑀯𑀲𑁂𑀦 𑀅𑀜𑁆𑀜𑀫𑁆𑀧𑀺 𑀏𑀯𑀭𑀽𑀧𑀁 𑀅𑀦𑀸𑀘𑀸𑀭𑀁 𑀓𑀭𑁄𑀦𑁆𑀢𑁄 𑀔𑀢𑁆𑀢𑀺𑀬𑀁 𑀅𑀯𑀚𑀸𑀦𑀸𑀢𑀺 𑀦𑀸𑀫. ‘‘𑀪𑀤𑁆𑀤𑀓𑁄 𑀯𑀢𑀸𑀬𑀁 𑀭𑀸𑀚𑀓𑀼𑀫𑀸𑀭𑁄, 𑀫𑀳𑀸𑀓𑀡𑁆𑀟𑁄 𑀫𑀳𑁄𑀤𑀭𑁄 𑁋 𑀓𑀺𑀁 𑀦𑀸𑀫 𑀬𑀁𑀓𑀺𑀜𑁆𑀘𑀺 𑀘𑁄𑀭𑀽𑀧𑀤𑁆𑀤𑀯𑀁 𑀯𑀽𑀧𑀲𑀫𑁂𑀢𑀼𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀞𑀸𑀦𑁂 𑀭𑀚𑁆𑀚𑀁 𑀅𑀦𑀼𑀲𑀸𑀲𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀧𑀭𑀺𑀪𑁄𑀢𑀺 𑀦𑀸𑀫. 𑀅𑀜𑁆𑀚𑀦𑀺𑀲𑀮𑀸𑀓𑀫𑀢𑁆𑀢𑀫𑁆𑀧𑀺 𑀆𑀲𑀻𑀯𑀺𑀲𑀧𑁄𑀢𑀓𑀁 𑀓𑀡𑁆𑀡𑀸𑀤𑀻𑀲𑀼 𑀧𑀺𑀴𑀦𑁆𑀥𑀦𑁆𑀢𑁄 𑀅𑀗𑁆𑀕𑀼𑀮𑀺𑀫𑁆𑀧𑀺 𑀚𑀺𑀯𑁆𑀳𑀫𑁆𑀧𑀺 𑀟𑀁𑀲𑀸𑀧𑁂𑀦𑁆𑀢𑁄 𑀉𑀭𑀕𑀁 𑀅𑀯𑀚𑀸𑀦𑀸𑀢𑀺 𑀦𑀸𑀫. ‘‘𑀪𑀤𑁆𑀤𑀓𑁄 𑀯𑀢𑀸𑀬𑀁 𑀆𑀲𑀻𑀯𑀺𑀲𑁄 𑀉𑀤𑀓𑀤𑁂𑀟𑁆𑀟𑀼𑀪𑁄 𑀯𑀺𑀬 𑀓𑀺𑀁 𑀦𑀸𑀫 𑀓𑀺𑀜𑁆𑀘𑀺𑀤𑁂𑀯 𑀟𑀁𑀲𑀺𑀢𑀼𑀁 𑀓𑀲𑁆𑀲𑀘𑀺𑀤𑁂𑀯 𑀓𑀸𑀬𑁂 𑀯𑀺𑀲𑀁 𑀨𑀭𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀧𑀭𑀺𑀪𑁄𑀢𑀺 𑀦𑀸𑀫. 𑀔𑀚𑁆𑀚𑁄𑀧𑀦𑀓𑀫𑀢𑁆𑀢𑀫𑁆𑀧𑀺 𑀅𑀕𑁆𑀕𑀺𑀁 𑀕𑀳𑁂𑀢𑁆𑀯𑀸 𑀳𑀢𑁆𑀣𑁂𑀦 𑀓𑀻𑀴𑀦𑁆𑀢𑁄 𑀪𑀡𑁆𑀟𑀼𑀓𑁆𑀔𑀮𑀺𑀓𑀸𑀬 𑀔𑀺𑀧𑀦𑁆𑀢𑁄 𑀘𑀽𑀴𑀸𑀬 𑀯𑀸 𑀲𑀬𑀦𑀧𑀺𑀝𑁆𑀞𑀲𑀸𑀝𑀓𑀧𑀲𑀺𑀩𑁆𑀩𑀓𑀸𑀤𑀻𑀲𑀼 𑀯𑀸 𑀞𑀧𑁂𑀦𑁆𑀢𑁄 𑀅𑀕𑁆𑀕𑀺𑀁 𑀅𑀯𑀚𑀸𑀦𑀸𑀢𑀺 𑀦𑀸𑀫. ‘‘𑀪𑀤𑁆𑀤𑀓𑁄 𑀯𑀢𑀸𑀬𑀁 𑀅𑀕𑁆𑀕𑀺 𑀓𑀢𑀭𑀁 𑀦𑀼 𑀔𑁄 𑀬𑀸𑀕𑀼𑀪𑀢𑁆𑀢𑀁 𑀧𑀘𑀺𑀲𑁆𑀲𑀢𑀺, 𑀓𑀢𑀭𑀁 𑀫𑀘𑁆𑀙𑀫𑀁𑀲𑀁, 𑀓𑀲𑁆𑀲 𑀲𑀻𑀢𑀁 𑀯𑀺𑀦𑁄𑀤𑁂𑀲𑁆𑀲𑀢𑀻’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀧𑀭𑀺𑀪𑁄𑀢𑀺 𑀦𑀸𑀫. 𑀤𑀳𑀭𑀲𑀸𑀫𑀡𑁂𑀭𑀫𑁆𑀧𑀺 𑀧𑀦 𑀤𑀺𑀲𑁆𑀯𑀸 𑀉𑀓𑁆𑀓𑀫𑀺𑀢𑁆𑀯𑀸 𑀫𑀕𑁆𑀕𑀁 𑀅𑀤𑁂𑀦𑁆𑀢𑁄𑀢𑀺 𑀭𑀸𑀚𑀓𑀼𑀫𑀸𑀭𑁂 𑀯𑀼𑀢𑁆𑀢𑀁 𑀅𑀦𑀸𑀘𑀸𑀭𑀁 𑀓𑀭𑁄𑀦𑁆𑀢𑁄 𑀪𑀺𑀓𑁆𑀔𑀼𑀁 𑀅𑀯𑀚𑀸𑀦𑀸𑀢𑀺 𑀦𑀸𑀫. ‘‘𑀪𑀤𑁆𑀤𑀓𑁄 𑀯𑀢𑀸𑀬𑀁 𑀲𑀸𑀫𑀡𑁂𑀭𑁄 𑀫𑀳𑀸𑀓𑀡𑁆𑀞𑁄 𑀫𑀳𑁄𑀤𑀭𑁄 𑀬𑀁𑀓𑀺𑀜𑁆𑀘𑀺 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀳𑁂𑀢𑀼𑀁 𑀬𑀁𑀓𑀺𑀜𑁆𑀘𑀺 𑀅𑀭𑀜𑁆𑀜𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀯𑀲𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺, 𑀲𑀗𑁆𑀖𑀢𑁆𑀣𑁂𑀭𑀓𑀸𑀮𑁂 𑀫𑀦𑀸𑀧𑁄 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀧𑀭𑀺𑀪𑁄𑀢𑀺 𑀦𑀸𑀫. 𑀢𑀁 𑀲𑀩𑁆𑀩𑀫𑁆𑀧𑀺 𑀦 𑀓𑀸𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀦 𑀉𑀜𑁆𑀜𑀸𑀢𑀩𑁆𑀩𑁄 𑀦 𑀧𑀭𑀺𑀪𑁄𑀢𑀩𑁆𑀩𑁄𑀢𑀺 𑀆𑀳.

𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 𑀕𑀸𑀣𑀸𑀩𑀦𑁆𑀥𑀁 𑀅𑀯𑁄𑀘. 𑀕𑀸𑀣𑀸 𑀘 𑀦𑀸𑀫𑁂𑀢𑀸 𑀢𑀤𑀢𑁆𑀣𑀤𑀻𑀧𑀦𑀸𑀧𑀺 𑀳𑁄𑀦𑁆𑀢𑀺 𑀯𑀺𑀲𑁂𑀲𑀢𑁆𑀣𑀤𑀻𑀧𑀦𑀸𑀧𑀺, 𑀢𑀢𑁆𑀭𑀺𑀫𑀸 𑀢𑀤𑀢𑁆𑀣𑀫𑁆𑀧𑀺 𑀯𑀺𑀲𑁂𑀲𑀢𑁆𑀣𑀫𑁆𑀧𑀺 𑀤𑀻𑀧𑁂𑀦𑁆𑀢𑀺𑀬𑁂𑀯. 𑀢𑀢𑁆𑀣 𑀔𑀢𑁆𑀢𑀺𑀬𑀦𑁆𑀢𑀺 𑀔𑁂𑀢𑁆𑀢𑀸𑀦𑀁 𑀅𑀥𑀺𑀧𑀢𑀺𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀔𑁂𑀢𑁆𑀢𑀸𑀦𑀁 𑀅𑀥𑀺𑀧𑀢𑀻𑀢𑀺 𑀔𑁄, 𑀯𑀸𑀲𑁂𑀝𑁆𑀞, ‘𑀔𑀢𑁆𑀢𑀺𑀬𑁄 𑀔𑀢𑁆𑀢𑀺𑀬𑁄’𑀢𑁆𑀯𑁂𑀯 𑀤𑀼𑀢𑀺𑀬𑀁 𑀅𑀓𑁆𑀔𑀭𑀁 𑀉𑀧𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺 (𑀤𑀻. 𑀦𑀺. 𑁩.𑁧𑁩𑁧). 𑀚𑀸𑀢𑀺𑀲𑀫𑁆𑀧𑀦𑁆𑀦𑀦𑁆𑀢𑀺 𑀢𑀸𑀬𑁂𑀯 𑀔𑀢𑁆𑀢𑀺𑀬𑀚𑀸𑀢𑀺𑀬𑀸 𑀚𑀸𑀢𑀺𑀲𑀫𑁆𑀧𑀦𑁆𑀦𑀁. 𑀅𑀪𑀺𑀚𑀸𑀢𑀦𑁆𑀢𑀺 𑀢𑀻𑀡𑀺 𑀓𑀼𑀮𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀚𑀸𑀢𑀁.

𑀞𑀸𑀦𑀁 𑀳𑀻𑀢𑀺 𑀓𑀸𑀭𑀡𑀁 𑀯𑀺𑀚𑁆𑀚𑀢𑀺. 𑀫𑀦𑀼𑀚𑀺𑀦𑁆𑀤𑁄𑀢𑀺 𑀫𑀦𑀼𑀲𑁆𑀲𑀚𑁂𑀝𑁆𑀞𑀓𑁄. 𑀭𑀸𑀚𑀤𑀡𑁆𑀟𑁂𑀦𑀸𑀢𑀺 𑀭𑀜𑁆𑀜𑁄 𑀉𑀤𑁆𑀥𑀝𑀤𑀡𑁆𑀟𑁂𑀦, 𑀲𑁄 𑀅𑀧𑁆𑀧𑀓𑁄 𑀦𑀸𑀫 𑀦 𑀳𑁄𑀢𑀺, 𑀤𑀲𑀲𑀳𑀲𑁆𑀲𑀯𑀻𑀲𑀢𑀺𑀲𑀳𑀲𑁆𑀲𑀧𑁆𑀧𑀫𑀸𑀡𑁄 𑀳𑁄𑀢𑀺𑀬𑁂𑀯. 𑀢𑀲𑁆𑀫𑀺𑀁 𑀧𑀓𑁆𑀓𑀫𑀢𑁂 𑀪𑀼𑀲𑀦𑁆𑀢𑀺 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀩𑀮𑀯𑀉𑀧𑀓𑁆𑀓𑀫𑀁 𑀉𑀧𑀓𑁆𑀓𑀫𑀢𑀺. 𑀭𑀓𑁆𑀔𑀁 𑀚𑀻𑀯𑀺𑀢𑀫𑀢𑁆𑀢𑀦𑁄𑀢𑀺 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀭𑀓𑁆𑀔𑀫𑀸𑀦𑁄 𑀢𑀁 𑀔𑀢𑁆𑀢𑀺𑀬𑀁 𑀧𑀭𑀺𑀯𑀚𑁆𑀚𑁂𑀬𑁆𑀬 𑀦 𑀖𑀝𑁆𑀝𑁂𑀬𑁆𑀬.

𑀉𑀘𑁆𑀘𑀸𑀯𑀘𑁂𑀳𑀻𑀢𑀺 𑀦𑀸𑀦𑀸𑀯𑀺𑀥𑁂𑀳𑀺. 𑀯𑀡𑁆𑀡𑁂𑀳𑀻𑀢𑀺 𑀲𑀡𑁆𑀞𑀸𑀦𑁂𑀳𑀺. 𑀬𑁂𑀦 𑀬𑁂𑀦 𑀳𑀺 𑀯𑀡𑁆𑀡𑁂𑀦 𑀘𑀭𑀦𑁆𑀢𑁄 𑀕𑁄𑀘𑀭𑀁 𑀮𑀪𑀢𑀺, 𑀬𑀤𑀺 𑀲𑀧𑁆𑀧𑀯𑀡𑁆𑀡𑁂𑀦, 𑀬𑀤𑀺 𑀤𑁂𑀟𑁆𑀟𑀼𑀪𑀯𑀡𑁆𑀡𑁂𑀦, 𑀬𑀤𑀺 𑀥𑀫𑀦𑀺𑀯𑀡𑁆𑀡𑁂𑀦, 𑀅𑀦𑁆𑀢𑀫𑀲𑁄 𑀓𑀮𑀦𑁆𑀤𑀓𑀯𑀡𑁆𑀡𑁂𑀦𑀧𑀺 𑀘𑀭𑀢𑀺𑀬𑁂𑀯. 𑀆𑀲𑀚𑁆𑀚𑀸𑀢𑀺 𑀧𑀢𑁆𑀯𑀸. 𑀩𑀸𑀮𑀦𑁆𑀢𑀺 𑀬𑁂𑀦 𑀩𑀸𑀮𑁂𑀦 𑀖𑀝𑁆𑀝𑀺𑀢𑁄, 𑀢𑀁 𑀩𑀸𑀮𑀁 𑀦𑀭𑀁 𑀯𑀸 𑀦𑀸𑀭𑀺𑀁 𑀯𑀸 𑀟𑀁𑀲𑁂𑀬𑁆𑀬.

𑀧𑀳𑀽𑀢𑀪𑀓𑁆𑀔𑀦𑁆𑀢𑀺 𑀩𑀳𑀼𑀪𑀓𑁆𑀔𑀁. 𑀅𑀕𑁆𑀕𑀺𑀲𑁆𑀲 𑀳𑀺 𑀅𑀪𑀓𑁆𑀔𑀁 𑀦𑀸𑀫 𑀦𑀢𑁆𑀣𑀺. 𑀚𑀸𑀮𑀺𑀦𑀦𑁆𑀢𑀺 𑀚𑀸𑀮𑀯𑀦𑁆𑀢𑀁. 𑀧𑀸𑀯𑀓𑀦𑁆𑀢𑀺 𑀅𑀕𑁆𑀕𑀺𑀁. 𑀧𑀸𑀯𑀕𑀦𑁆𑀢𑀺𑀧𑀺 𑀧𑀸𑀞𑁄. 𑀓𑀡𑁆𑀳𑀯𑀢𑁆𑀢𑀦𑀺𑀦𑁆𑀢𑀺 𑀯𑀢𑁆𑀢𑀦𑀻𑀢𑀺 𑀫𑀕𑁆𑀕𑁄, 𑀅𑀕𑁆𑀕𑀺𑀦𑀸 𑀕𑀢𑀫𑀕𑁆𑀕𑁄 𑀓𑀡𑁆𑀳𑁄 𑀳𑁄𑀢𑀺 𑀓𑀸𑀴𑀓𑁄, 𑀢𑀲𑁆𑀫𑀸 ‘‘𑀓𑀡𑁆𑀳𑀯𑀢𑁆𑀢𑀦𑀻’’𑀢𑀺 𑀯𑀼𑀘𑁆𑀘𑀢𑀺.

𑀫𑀳𑀸 𑀳𑀼𑀢𑁆𑀯𑀸𑀦𑀸𑀢𑀺 𑀫𑀳𑀦𑁆𑀢𑁄 𑀳𑀼𑀢𑁆𑀯𑀸. 𑀅𑀕𑁆𑀕𑀺 𑀳𑀺 𑀏𑀓𑀤𑀸 𑀬𑀸𑀯𑀩𑁆𑀭𑀳𑁆𑀫𑀮𑁄𑀓𑀧𑁆𑀧𑀫𑀸𑀡𑁄𑀧𑀺 𑀳𑁄𑀢𑀺. 𑀚𑀸𑀬𑀦𑁆𑀢𑀺 𑀢𑀢𑁆𑀣 𑀧𑀸𑀭𑁄𑀳𑀸𑀢𑀺 𑀢𑀢𑁆𑀣 𑀅𑀕𑁆𑀕𑀺𑀦𑀸 𑀤𑀟𑁆𑀠𑀯𑀦𑁂 𑀧𑀸𑀭𑁄𑀳𑀸 𑀚𑀸𑀬𑀦𑁆𑀢𑀺. 𑀧𑀸𑀭𑁄𑀳𑀸𑀢𑀺 𑀢𑀺𑀡𑀭𑀼𑀓𑁆𑀔𑀸𑀤𑀬𑁄 𑀯𑀼𑀘𑁆𑀘𑀦𑁆𑀢𑀺. 𑀢𑁂 𑀳𑀺 𑀅𑀕𑁆𑀕𑀺𑀦𑀸 𑀤𑀟𑁆𑀠𑀝𑁆𑀞𑀸𑀦𑁂 𑀫𑀽𑀮𑀫𑀢𑁆𑀢𑁂𑀧𑀺 𑀅𑀯𑀲𑀺𑀝𑁆𑀞𑁂 𑀧𑀸𑀤𑀢𑁄 𑀭𑁄𑀳𑀦𑁆𑀢𑀺 𑀚𑀸𑀬𑀦𑁆𑀢𑀺 𑀯𑀟𑁆𑀠𑀦𑁆𑀢𑀺, 𑀢𑀲𑁆𑀫𑀸 ‘‘𑀧𑀸𑀭𑁄𑀳𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀼𑀦 𑀭𑁄𑀳𑀦𑀢𑁆𑀣𑁂𑀦 𑀯𑀸 𑀧𑀸𑀭𑁄𑀳𑀸. 𑀅𑀳𑁄𑀭𑀢𑁆𑀢𑀸𑀦𑀫𑀘𑁆𑀘𑀬𑁂𑀢𑀺 𑀭𑀢𑁆𑀢𑀺𑀦𑁆𑀤𑀺𑀯𑀸𑀦𑀁 𑀅𑀢𑀺𑀓𑁆𑀓𑀫𑁂. 𑀦𑀺𑀤𑀸𑀖𑁂𑀧𑀺 𑀤𑁂𑀯𑁂 𑀯𑀼𑀝𑁆𑀞𑀫𑀢𑁆𑀢𑁂 𑀚𑀸𑀬𑀦𑁆𑀢𑀺.

𑀪𑀺𑀓𑁆𑀔𑀼 𑀟𑀳𑀢𑀺 𑀢𑁂𑀚𑀲𑀸𑀢𑀺 𑀏𑀢𑁆𑀣 𑀅𑀓𑁆𑀓𑁄𑀲𑀦𑁆𑀢𑀁 𑀧𑀘𑁆𑀘𑀓𑁆𑀓𑁄𑀲𑀦𑁆𑀢𑁄 𑀪𑀡𑁆𑀟𑀦𑁆𑀢𑀁 𑀧𑀝𑀺𑀪𑀡𑁆𑀟𑀦𑁆𑀢𑁄 𑀧𑀳𑀭𑀦𑁆𑀢𑀁 𑀧𑀝𑀺𑀧𑀳𑀭𑀦𑁆𑀢𑁄 𑀪𑀺𑀓𑁆𑀔𑀼 𑀦𑀸𑀫 𑀓𑀺𑀜𑁆𑀘𑀺 𑀪𑀺𑀓𑁆𑀔𑀼𑀢𑁂𑀚𑀲𑀸 𑀟𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀬𑁄 𑀧𑀦 𑀅𑀓𑁆𑀓𑁄𑀲𑀦𑁆𑀢𑀁 𑀦 𑀧𑀘𑁆𑀘𑀓𑁆𑀓𑁄𑀲𑀢𑀺, 𑀪𑀡𑁆𑀟𑀦𑁆𑀢𑀁 𑀦 𑀧𑀝𑀺𑀪𑀡𑁆𑀟𑀢𑀺. 𑀧𑀳𑀭𑀦𑁆𑀢𑀁 𑀦 𑀧𑀝𑀺𑀧𑀳𑀭𑀢𑀺, 𑀢𑀲𑁆𑀫𑀺𑀁 𑀯𑀺𑀧𑁆𑀧𑀝𑀺𑀧𑀦𑁆𑀦𑁄 𑀢𑀲𑁆𑀲 𑀲𑀻𑀮𑀢𑁂𑀚𑁂𑀦 𑀟𑀬𑁆𑀳𑀢𑀺. 𑀢𑁂𑀦𑁂𑀯𑁂𑀢𑀁 𑀯𑀼𑀢𑁆𑀢𑀁. 𑀦 𑀢𑀲𑁆𑀲 𑀧𑀼𑀢𑁆𑀢𑀸 𑀧𑀲𑀯𑁄𑀢𑀺 𑀢𑀲𑁆𑀲 𑀧𑀼𑀢𑁆𑀢𑀥𑀻𑀢𑀭𑁄𑀧𑀺 𑀕𑁄𑀫𑀳𑀺𑀁𑀲𑀓𑀼𑀓𑁆𑀓𑀼𑀝𑀲𑀽𑀓𑀭𑀸𑀤𑀬𑁄 𑀧𑀲𑀯𑁄𑀧𑀺 𑀦 𑀪𑀯𑀦𑁆𑀢𑀺, 𑀯𑀺𑀦𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀤𑀸𑀬𑀸𑀤𑀸 𑀯𑀺𑀦𑁆𑀤𑀭𑁂 𑀥𑀦𑀦𑁆𑀢𑀺 𑀢𑀲𑁆𑀲 𑀤𑀸𑀬𑀸𑀤𑀸𑀧𑀺 𑀥𑀦𑀁 𑀦 𑀯𑀺𑀦𑁆𑀤𑀦𑁆𑀢𑀺. 𑀢𑀸𑀮𑀸𑀯𑀢𑁆𑀣𑀽 𑀪𑀯𑀦𑁆𑀢𑀺 𑀢𑁂𑀢𑀺 𑀢𑁂 𑀪𑀺𑀓𑁆𑀔𑀼𑀢𑁂𑀚𑀲𑀸 𑀤𑀟𑁆𑀠𑀸 𑀯𑀢𑁆𑀣𑀼𑀫𑀢𑁆𑀢𑀸𑀯𑀲𑀺𑀝𑁆𑀞𑁄 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀢𑀸𑀮𑁄 𑀯𑀺𑀬 𑀪𑀯𑀦𑁆𑀢𑀺, 𑀧𑀼𑀢𑁆𑀢𑀥𑀻𑀢𑀸𑀤𑀺𑀯𑀲𑁂𑀦 𑀦 𑀯𑀟𑁆𑀠𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀫𑀡𑀢𑁂𑀚𑁂𑀦 𑀤𑀟𑁆𑀠𑀸 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀢𑀸𑀮𑁄 𑀯𑀺𑀬 𑀅𑀯𑀺𑀭𑀼𑀴𑁆𑀳𑀺𑀥𑀫𑁆𑀫𑀸 𑀪𑀯𑀦𑁆𑀢𑀺, 𑀢𑀲𑁆𑀫𑀸. 𑀲𑀫𑁆𑀫𑀤𑁂𑀯 𑀲𑀫𑀸𑀘𑀭𑁂𑀢𑀺 𑀲𑀫𑁆𑀫𑀸 𑀲𑀫𑀸𑀘𑀭𑁂𑀬𑁆𑀬. 𑀲𑀫𑁆𑀫𑀸 𑀲𑀫𑀸𑀘𑀭𑀦𑁆𑀢𑁂𑀦 𑀧𑀦 𑀓𑀺𑀁 𑀓𑀸𑀢𑀩𑁆𑀩𑀦𑁆𑀢𑀺? 𑀔𑀢𑁆𑀢𑀺𑀬𑀁 𑀢𑀸𑀯 𑀦𑀺𑀲𑁆𑀲𑀸𑀬 𑀮𑀤𑁆𑀥𑀩𑁆𑀩𑀁 𑀕𑀸𑀫𑀦𑀺𑀕𑀫𑀬𑀸𑀦𑀯𑀸𑀳𑀦𑀸𑀤𑀺𑀆𑀦𑀺𑀲𑀁𑀲𑀁, 𑀉𑀭𑀕𑀁 𑀦𑀺𑀲𑁆𑀲𑀸𑀬 𑀢𑀲𑁆𑀲 𑀓𑀻𑀴𑀸𑀧𑀦𑁂𑀦 𑀮𑀤𑁆𑀥𑀩𑁆𑀩𑀁 𑀯𑀢𑁆𑀣𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀆𑀦𑀺𑀲𑀁𑀲𑀁 𑀅𑀕𑁆𑀕𑀺𑀁 𑀦𑀺𑀲𑁆𑀲𑀸𑀬 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀧𑀢𑁆𑀢𑀩𑁆𑀩𑀁 𑀬𑀸𑀕𑀼𑀪𑀢𑁆𑀢𑀧𑀘𑀦𑀲𑀻𑀢𑀯𑀺𑀦𑁄𑀤𑀦𑀸𑀤𑀺𑀆𑀦𑀺𑀲𑀁𑀲𑀁, 𑀪𑀺𑀓𑁆𑀔𑀼𑀁 𑀦𑀺𑀲𑁆𑀲𑀸𑀬 𑀢𑀲𑁆𑀲 𑀯𑀲𑁂𑀦 𑀧𑀢𑁆𑀢𑀩𑁆𑀩𑀁 𑀅𑀲𑀼𑀢𑀲𑀯𑀦𑀲𑀼𑀢𑀧𑀭𑀺𑀬𑁄𑀤𑀧𑀦-𑀲𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑀸𑀤𑀺𑀆𑀦𑀺𑀲𑀁𑀲𑀁 𑀲𑀫𑁆𑀧𑀲𑁆𑀲𑀫𑀸𑀦𑁂𑀦 ‘‘𑀏𑀢𑁂 𑀦𑀺𑀲𑁆𑀲𑀸𑀬 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀆𑀤𑀻𑀦𑀯𑁄 𑀅𑀢𑁆𑀣𑀺. 𑀓𑀺𑀁 𑀇𑀫𑁂𑀳𑀻’’𑀢𑀺? 𑀦 𑀲𑀩𑁆𑀩𑀲𑁄 𑀧𑀳𑀸𑀢𑀩𑁆𑀩𑀸. 𑀇𑀲𑁆𑀲𑀭𑀺𑀬𑀢𑁆𑀣𑀺𑀓𑁂𑀦 𑀧𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀅𑀯𑀚𑀸𑀦𑀦𑀜𑁆𑀘 𑀧𑀭𑀺𑀪𑀯𑀦𑀜𑁆𑀘 𑀅𑀓𑀢𑁆𑀯𑀸 𑀧𑀼𑀩𑁆𑀩𑀼𑀝𑁆𑀞𑀸𑀬𑀺𑀧𑀘𑁆𑀙𑀸𑀦𑀺𑀧𑀸𑀢𑀺𑀢𑀸𑀤𑀻𑀳𑀺 𑀉𑀧𑀸𑀬𑁂𑀳𑀺 𑀔𑀢𑁆𑀢𑀺𑀬𑀓𑀼𑀫𑀸𑀭𑁄 𑀢𑁄𑀲𑁂𑀢𑀩𑁆𑀩𑁄, 𑀏𑀯𑀁 𑀢𑀢𑁄 𑀇𑀲𑁆𑀲𑀭𑀺𑀬𑀁 𑀅𑀥𑀺𑀕𑀫𑀺𑀲𑁆𑀲𑀢𑀺. 𑀅𑀳𑀺𑀢𑀼𑀡𑁆𑀟𑀺𑀓𑁂𑀦 𑀉𑀭𑀕𑁂 𑀯𑀺𑀲𑁆𑀲𑀸𑀲𑀁 𑀅𑀓𑀢𑁆𑀯𑀸 𑀦𑀸𑀕𑀯𑀺𑀚𑁆𑀚𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀅𑀚𑀧𑀤𑁂𑀦 𑀤𑀡𑁆𑀟𑁂𑀦 𑀕𑀻𑀯𑀸𑀬 𑀕𑀳𑁂𑀢𑁆𑀯𑀸 𑀯𑀺𑀲𑀳𑀭𑁂𑀦 𑀫𑀽𑀮𑁂𑀦 𑀤𑀸𑀞𑀸 𑀥𑁄𑀯𑀺𑀢𑁆𑀯𑀸 𑀧𑁂𑀴𑀸𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀻𑀴𑀸𑀧𑁂𑀦𑁆𑀢𑁂𑀦 𑀘𑀭𑀺𑀢𑀩𑁆𑀩𑀁. 𑀏𑀯𑀁 𑀢𑀁 𑀦𑀺𑀲𑁆𑀲𑀸𑀬 𑀖𑀸𑀲𑀘𑁆𑀙𑀸𑀤𑀦𑀸𑀤𑀻𑀦𑀺 𑀮𑀪𑀺𑀲𑁆𑀲𑀢𑀺. 𑀬𑀸𑀕𑀼𑀧𑀘𑀦𑀸𑀤𑀻𑀦𑀺 𑀓𑀢𑁆𑀢𑀼𑀓𑀸𑀫𑁂𑀦 𑀅𑀕𑁆𑀕𑀺𑀁 𑀯𑀺𑀲𑁆𑀲𑀸𑀲𑁂𑀦 𑀪𑀡𑁆𑀟𑀼𑀓𑁆𑀔𑀮𑀺𑀓𑀸𑀤𑀻𑀲𑀼 𑀅𑀧𑀓𑁆𑀔𑀺𑀧𑀺𑀢𑁆𑀯𑀸 𑀳𑀢𑁆𑀣𑁂𑀳𑀺 𑀅𑀦𑀸𑀫𑀲𑀦𑁆𑀢𑁂𑀦 𑀕𑁄𑀫𑀬𑀘𑀼𑀡𑁆𑀡𑀸𑀤𑀻𑀳𑀺 𑀚𑀸𑀮𑁂𑀢𑁆𑀯𑀸 𑀬𑀸𑀕𑀼𑀧𑀘𑀦𑀸𑀤𑀻𑀦𑀺 𑀓𑀢𑁆𑀢𑀩𑁆𑀩𑀸𑀦𑀺, 𑀏𑀯𑀁 𑀢𑀁 𑀦𑀺𑀲𑁆𑀲𑀸𑀬 𑀆𑀦𑀺𑀲𑀁𑀲𑀁 𑀮𑀪𑀺𑀲𑁆𑀲𑀢𑀺. 𑀅𑀲𑀼𑀢𑀲𑀯𑀦𑀸𑀤𑀻𑀦𑀺 𑀧𑀢𑁆𑀣𑀬𑀦𑁆𑀢𑁂𑀦𑀧𑀺 𑀪𑀺𑀓𑁆𑀔𑀼𑀁 𑀅𑀢𑀺𑀯𑀺𑀲𑁆𑀲𑀸𑀲𑁂𑀦 𑀯𑁂𑀚𑁆𑀚𑀓𑀫𑁆𑀫𑀦𑀯𑀓𑀫𑁆𑀫𑀸𑀤𑀻𑀲𑀼 𑀅𑀬𑁄𑀚𑁂𑀢𑁆𑀯𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀸𑀢𑀩𑁆𑀩𑁄, 𑀏𑀯𑀁 𑀢𑀁 𑀦𑀺𑀲𑁆𑀲𑀸𑀬 𑀅𑀲𑀼𑀢𑀧𑀼𑀩𑁆𑀩𑀁 𑀩𑀼𑀤𑁆𑀥𑀯𑀘𑀦𑀁 𑀅𑀲𑀼𑀢𑀧𑀼𑀩𑁆𑀩𑀁 𑀧𑀜𑁆𑀳𑀸𑀯𑀺𑀦𑀺𑀘𑁆𑀙𑀬𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀁 𑀅𑀢𑁆𑀣𑀁 𑀢𑀺𑀲𑁆𑀲𑁄 𑀓𑀼𑀮𑀲𑀫𑁆𑀧𑀢𑁆𑀢𑀺𑀬𑁄 𑀙 𑀓𑀸𑀫𑀲𑀕𑁆𑀕𑀸𑀦𑀺 𑀦𑀯 𑀘 𑀩𑁆𑀭𑀳𑁆𑀫𑀮𑁄𑀓𑁂 𑀧𑀢𑁆𑀯𑀸 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀫𑁆𑀧𑀺 𑀮𑀪𑀺𑀲𑁆𑀲𑀢𑀻𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀲𑀫𑁆𑀫𑀤𑁂𑀯 𑀲𑀫𑀸𑀘𑀭𑁂𑀢𑀺 𑀆𑀳.

𑀏𑀢𑀤𑀯𑁄𑀘𑀸𑀢𑀺 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑁄 𑀧𑀲𑀸𑀤𑀁 𑀆𑀯𑀺𑀓𑀭𑁄𑀦𑁆𑀢𑁄 𑀏𑀢𑀁 ‘‘𑀅𑀪𑀺𑀓𑁆𑀓𑀦𑁆𑀢’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀢𑀢𑁆𑀣 𑀅𑀪𑀺𑀓𑁆𑀓𑀦𑁆𑀢𑀦𑁆𑀢𑀺 𑀅𑀪𑀺𑀓𑀦𑁆𑀢𑀁 𑀅𑀢𑀺𑀇𑀝𑁆𑀞𑀁 𑀅𑀢𑀺𑀫𑀦𑀸𑀧𑀁, 𑀅𑀢𑀺𑀲𑀼𑀦𑁆𑀤𑀭𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀏𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑀲𑀤𑁆𑀤𑁂𑀦 𑀤𑁂𑀲𑀦𑀁 𑀣𑁄𑀫𑁂𑀢𑀺 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂, 𑀬𑀤𑀺𑀤𑀁 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸’’𑀢𑀺. 𑀏𑀓𑁂𑀦 𑀅𑀢𑁆𑀢𑀦𑁄 𑀧𑀲𑀸𑀤𑀁 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑀦𑁆𑀢𑁂, 𑀬𑀤𑀺𑀤𑀁 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀆𑀕𑀫𑁆𑀫 𑀫𑀫 𑀧𑀲𑀸𑀤𑁄’’𑀢𑀺.

𑀢𑀢𑁄 𑀧𑀭𑀁 𑀘𑀢𑀽𑀳𑀺 𑀉𑀧𑀫𑀸𑀳𑀺 𑀤𑁂𑀲𑀦𑀁𑀬𑁂𑀯 𑀣𑁄𑀫𑁂𑀢𑀺. 𑀢𑀢𑁆𑀣 𑀦𑀺𑀓𑁆𑀓𑀼𑀚𑁆𑀚𑀺𑀢𑀦𑁆𑀢𑀺 𑀅𑀥𑁄𑀫𑀼𑀔𑀞𑀧𑀺𑀢𑀁, 𑀳𑁂𑀝𑁆𑀞𑀸𑀫𑀼𑀔𑀚𑀸𑀢𑀁 𑀯𑀸. 𑀉𑀓𑁆𑀓𑀼𑀚𑁆𑀚𑁂𑀬𑁆𑀬𑀸𑀢𑀺 𑀉𑀧𑀭𑀺𑀫𑀼𑀔𑀁 𑀓𑀭𑁂𑀬𑁆𑀬. 𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀢𑀺𑀡𑀧𑀡𑁆𑀡𑀸𑀤𑀺𑀙𑀸𑀤𑀺𑀢𑀁. 𑀯𑀺𑀯𑀭𑁂𑀬𑁆𑀬𑀸𑀢𑀺 𑀉𑀕𑁆𑀖𑀸𑀝𑁂𑀬𑁆𑀬. 𑀫𑀽𑀴𑁆𑀳𑀲𑁆𑀲𑀸𑀢𑀺 𑀤𑀺𑀲𑀸𑀫𑀽𑀴𑁆𑀳𑀲𑁆𑀲. 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬𑀸𑀢𑀺 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 ‘‘𑀏𑀲 𑀫𑀕𑁆𑀕𑁄’’𑀢𑀺 𑀯𑀤𑁂𑀬𑁆𑀬. 𑀅𑀦𑁆𑀥𑀓𑀸𑀭𑁂𑀢𑀺 𑀓𑀸𑀴𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀻 𑀅𑀟𑁆𑀠𑀭𑀢𑁆𑀢𑀖𑀦𑀯𑀦𑀲𑀡𑁆𑀟 𑀫𑁂𑀖𑀧𑀝𑀮𑁂𑀳𑀺 𑀘𑀢𑀼𑀭𑀗𑁆𑀕𑁂 𑀢𑀫𑁂. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀓𑁄𑀘𑀺 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀉𑀓𑁆𑀓𑀼𑀚𑁆𑀚𑁂𑀬𑁆𑀬, 𑀏𑀯𑀁 𑀲𑀤𑁆𑀥𑀫𑁆𑀫𑀯𑀺𑀫𑀼𑀔𑀁 𑀅𑀲𑀤𑁆𑀥𑀫𑁆𑀫𑁂 𑀧𑀢𑀺𑀢𑀁 𑀫𑀁 𑀅𑀲𑀤𑁆𑀥𑀫𑁆𑀫𑀸 𑀯𑀼𑀝𑁆𑀞𑀸𑀧𑁂𑀦𑁆𑀢𑁂𑀦, 𑀬𑀣𑀸 𑀧𑀝𑀺𑀘𑁆𑀙𑀦𑁆𑀦𑀁 𑀯𑀺𑀯𑀭𑁂𑀬𑁆𑀬, 𑀏𑀯𑀁 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀦𑁆𑀢𑀭𑀥𑀸𑀦𑀸 𑀧𑀪𑀼𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑀳𑀦𑀧𑀝𑀺𑀘𑁆𑀙𑀦𑁆𑀦𑀁 𑀲𑀸𑀲𑀦𑀁 𑀯𑀺𑀯𑀭𑀦𑁆𑀢𑁂𑀦, 𑀬𑀣𑀸 𑀫𑀽𑀴𑁆𑀳𑀲𑁆𑀲 𑀫𑀕𑁆𑀕𑀁 𑀆𑀘𑀺𑀓𑁆𑀔𑁂𑀬𑁆𑀬, 𑀏𑀯𑀁 𑀓𑀼𑀫𑁆𑀫𑀕𑁆𑀕𑀫𑀺𑀘𑁆𑀙𑀸𑀫𑀕𑁆𑀕𑀧𑀝𑀺𑀧𑀦𑁆𑀦𑀲𑁆𑀲 𑀫𑁂 𑀲𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑀁 𑀆𑀯𑀺𑀓𑀭𑁄𑀦𑁆𑀢𑁂𑀦, 𑀬𑀣𑀸 𑀅𑀦𑁆𑀥𑀓𑀸𑀭𑁂 𑀢𑁂𑀮𑀧𑀚𑁆𑀚𑁄𑀢𑀁 𑀥𑀸𑀭𑁂𑀬𑁆𑀬, 𑀏𑀯𑀁 𑀫𑁄𑀳𑀦𑁆𑀥𑀓𑀸𑀭𑁂 𑀦𑀺𑀫𑀼𑀕𑁆𑀕𑀲𑁆𑀲 𑀫𑁂 𑀩𑀼𑀤𑁆𑀥𑀸𑀤𑀺𑀭𑀢𑀦𑀭𑀽𑀧𑀸𑀦𑀺 𑀅𑀧𑀲𑁆𑀲𑀢𑁄 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀫𑁄𑀳𑀦𑁆𑀥𑀓𑀸𑀭𑀯𑀺𑀤𑁆𑀥𑀁𑀲𑀓𑀤𑁂𑀲𑀦𑀸𑀧𑀚𑁆𑀚𑁄𑀢𑀁 𑀥𑀸𑀭𑁂𑀦𑁆𑀢𑁂𑀦 𑀫𑀬𑁆𑀳𑀁 𑀪𑀕𑀯𑀢𑀸 𑀏𑀢𑁂𑀳𑀺 𑀧𑀭𑀺𑀬𑀸𑀬𑁂𑀳𑀺 𑀧𑀓𑀸𑀲𑀺𑀢𑀢𑁆𑀢𑀸 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑁄 𑀧𑀓𑀸𑀲𑀺𑀢𑁄𑀢𑀺.

𑀏𑀯𑀁 𑀤𑁂𑀲𑀦𑀁 𑀣𑁄𑀫𑁂𑀢𑁆𑀯𑀸 𑀇𑀫𑀸𑀬 𑀤𑁂𑀲𑀦𑀸𑀬 𑀭𑀢𑀦𑀢𑁆𑀢𑀬𑁂 𑀧𑀲𑀦𑁆𑀦𑀘𑀺𑀢𑁆𑀢𑁄 𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁄𑀦𑁆𑀢𑁄 𑀏𑀲𑀸𑀳𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀲𑀸𑀳𑀦𑁆𑀢𑀺 𑀏𑀲𑁄 𑀅𑀳𑀁. 𑀪𑀕𑀯𑀦𑁆𑀢𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘𑀸𑀢𑀺 𑀪𑀕𑀯𑀦𑁆𑀢𑀜𑁆𑀘 𑀥𑀫𑁆𑀫𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀜𑁆𑀘𑀸𑀢𑀺 𑀇𑀫𑀁 𑀭𑀢𑀦𑀢𑁆𑀢𑀬𑀁 𑀲𑀭𑀡𑀁 𑀕𑀘𑁆𑀙𑀸𑀫𑀺. 𑀉𑀧𑀸𑀲𑀓𑀁 𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀥𑀸𑀭𑁂𑀢𑀽𑀢𑀺 𑀫𑀁 𑀪𑀕𑀯𑀸 ‘𑀉𑀧𑀸𑀲𑀓𑁄 𑀅𑀬’𑀦𑁆𑀢𑀺 𑀏𑀯𑀁 𑀥𑀸𑀭𑁂𑀢𑀼, 𑀚𑀸𑀦𑀸𑀢𑀽𑀢𑀺 𑀅𑀢𑁆𑀣𑁄. 𑀅𑀚𑁆𑀚𑀢𑀕𑁆𑀕𑁂𑀢𑀺 𑀅𑀚𑁆𑀚𑀢𑀁 𑀆𑀤𑀺𑀁 𑀓𑀢𑁆𑀯𑀸. 𑀅𑀚𑁆𑀚𑀤𑀕𑁆𑀕𑁂𑀢𑀺 𑀯𑀸 𑀧𑀸𑀞𑁄, 𑀤-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀅𑀚𑁆𑀚 𑀅𑀕𑁆𑀕𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀸𑀡𑀼𑀧𑁂𑀢𑀦𑁆𑀢𑀺 𑀧𑀸𑀡𑁂𑀳𑀺 𑀉𑀧𑁂𑀢𑀁 𑀬𑀸𑀯 𑀫𑁂 𑀚𑀻𑀯𑀺𑀢𑀁 𑀧𑀯𑀢𑁆𑀢𑀢𑀺, 𑀢𑀸𑀯 𑀉𑀧𑁂𑀢𑀁 𑀅𑀦𑀜𑁆𑀜𑀲𑀢𑁆𑀣𑀼𑀓𑀁 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀲𑀭𑀡𑀁 𑀕𑀢𑀁 𑀉𑀧𑀸𑀲𑀓𑀁 𑀓𑀧𑁆𑀧𑀺𑀬𑀓𑀸𑀭𑀓𑀁 𑀫𑀁 𑀪𑀕𑀯𑀸 𑀥𑀸𑀭𑁂𑀢𑀽𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑁂 𑀲𑀩𑁆𑀩𑀸𑀓𑀸𑀭𑁂𑀦 𑀯𑀼𑀢𑁆𑀢𑁄𑀢𑀺. 𑀧𑀞𑀫𑀁.

𑁨. 𑀧𑀼𑀭𑀺𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁩. 𑀤𑀼𑀢𑀺𑀬𑁂 𑀅𑀪𑀺𑀯𑀸𑀤𑁂𑀢𑁆𑀯𑀸𑀢𑀺 𑀧𑀼𑀭𑀺𑀫𑀲𑀼𑀢𑁆𑀢𑁂 𑀲𑀭𑀡𑀕𑀢𑀢𑁆𑀢𑀸 𑀇𑀥 𑀅𑀪𑀺𑀯𑀸𑀤𑁂𑀲𑀺. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀁, 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀮𑁄𑀪𑀸𑀤𑀻𑀲𑀼 𑀮𑀼𑀩𑁆𑀪𑀦𑀮𑀓𑁆𑀔𑀡𑁄 𑀮𑁄𑀪𑁄, 𑀤𑀼𑀲𑁆𑀲𑀦𑀮𑀓𑁆𑀔𑀡𑁄 𑀤𑁄𑀲𑁄, 𑀫𑀼𑀬𑁆𑀳𑀦𑀮𑀓𑁆𑀔𑀡𑁄 𑀫𑁄𑀳𑁄𑀢𑀺. 𑀳𑀺𑀁𑀲𑀦𑁆𑀢𑀻𑀢𑀺 𑀯𑀺𑀳𑁂𑀞𑁂𑀦𑁆𑀢𑀺 𑀦𑀸𑀲𑁂𑀦𑁆𑀢𑀺 𑀯𑀺𑀦𑀸𑀲𑁂𑀦𑁆𑀢𑀺. 𑀅𑀢𑁆𑀢𑀲𑀫𑁆𑀪𑀽𑀢𑀸𑀢𑀺 𑀅𑀢𑁆𑀢𑀦𑀺 𑀲𑀫𑁆𑀪𑀽𑀢𑀸. 𑀢𑀘𑀲𑀸𑀭𑀁𑀯 𑀲𑀫𑁆𑀨𑀮𑀦𑁆𑀢𑀺 𑀬𑀣𑀸 𑀢𑀘𑀲𑀸𑀭𑀁 𑀯𑁂𑀴𑀼𑀁 𑀯𑀸 𑀦𑀴𑀁 𑀯𑀸 𑀅𑀢𑁆𑀢𑀦𑁄 𑀨𑀮𑀁 𑀳𑀺𑀁𑀲𑀢𑀺 𑀯𑀺𑀦𑀸𑀲𑁂𑀢𑀺, 𑀏𑀯𑀁 𑀳𑀺𑀁𑀲𑀦𑁆𑀢𑀺 𑀯𑀺𑀦𑀸𑀲𑁂𑀦𑁆𑀢𑀻𑀢𑀺. 𑀤𑀼𑀢𑀺𑀬𑀁.

𑁩. 𑀚𑀭𑀸𑀫𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁪. 𑀢𑀢𑀺𑀬𑁂 𑀅𑀜𑁆𑀜𑀢𑁆𑀭 𑀚𑀭𑀸𑀫𑀭𑀡𑀸𑀢𑀺 𑀚𑀭𑀸𑀫𑀭𑀡𑀢𑁄 𑀫𑀼𑀢𑁆𑀢𑁄 𑀦𑀸𑀫 𑀅𑀢𑁆𑀣𑀻𑀢𑀺 𑀯𑀼𑀘𑁆𑀘𑀢𑀺. 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸𑀢𑀺 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸 𑀦𑀸𑀫 𑀫𑀳𑀸𑀲𑀸𑀭𑀧𑁆𑀧𑀢𑁆𑀢𑀸 𑀔𑀢𑁆𑀢𑀺𑀬𑀸. 𑀬𑁂𑀲𑀁 𑀳𑀺 𑀔𑀢𑁆𑀢𑀺𑀬𑀸𑀦𑀁 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀓𑁄𑀝𑀺𑀲𑀢𑀁 𑀦𑀺𑀥𑀸𑀦𑀕𑀢𑀁 𑀳𑁄𑀢𑀺, 𑀢𑀬𑁄 𑀓𑀳𑀸𑀧𑀡𑀓𑀼𑀫𑁆𑀪𑀸 𑀯𑀮𑀜𑁆𑀚𑀦𑀢𑁆𑀣𑀸𑀬 𑀕𑁂𑀳𑀫𑀚𑁆𑀛𑁂 𑀭𑀸𑀲𑀺𑀁 𑀓𑀢𑁆𑀯𑀸 𑀞𑀧𑀺𑀢𑀸 𑀳𑁄𑀦𑁆𑀢𑀺, 𑀢𑁂 𑀔𑀢𑁆𑀢𑀺𑀬𑀫𑀳𑀸𑀲𑀸𑀮𑀸 𑀦𑀸𑀫. 𑀬𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀲𑀻𑀢𑀺𑀓𑁄𑀝𑀺𑀥𑀦𑀁 𑀦𑀺𑀳𑀺𑀢𑀁 𑀳𑁄𑀢𑀺, 𑀤𑀺𑀬𑀟𑁆𑀠𑁄 𑀓𑀳𑀸𑀧𑀡𑀓𑀼𑀫𑁆𑀪𑁄 𑀯𑀮𑀜𑁆𑀚𑀦𑀢𑁆𑀣𑀸𑀬 𑀕𑁂𑀳𑀫𑀚𑁆𑀛𑁂 𑀭𑀸𑀲𑀺𑀁 𑀓𑀢𑁆𑀯𑀸 𑀞𑀧𑀺𑀢𑁄 𑀳𑁄𑀢𑀺, 𑀢𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀸 𑀦𑀸𑀫. 𑀬𑁂𑀲𑀁 𑀕𑀳𑀧𑀢𑀻𑀦𑀁 𑀘𑀢𑁆𑀢𑀸𑀮𑀻𑀲𑀓𑁄𑀝𑀺𑀥𑀦𑀁 𑀦𑀺𑀳𑀺𑀢𑀁 𑀳𑁄𑀢𑀺, 𑀓𑀳𑀸𑀧𑀡𑀓𑀼𑀫𑁆𑀪𑁄 𑀯𑀮𑀜𑁆𑀚𑀦𑀢𑁆𑀣𑀸𑀬 𑀕𑁂𑀳𑀫𑀚𑁆𑀛𑁂 𑀭𑀸𑀲𑀺𑀁 𑀓𑀢𑁆𑀯𑀸 𑀞𑀧𑀺𑀢𑁄 𑀳𑁄𑀢𑀺, 𑀢𑁂 𑀕𑀳𑀧𑀢𑀺𑀫𑀳𑀸𑀲𑀸𑀮𑀸 𑀦𑀸𑀫.

𑀅𑀟𑁆𑀠𑀸𑀢𑀺 𑀇𑀲𑁆𑀲𑀭𑀸. 𑀦𑀺𑀥𑀸𑀦𑀕𑀢𑀥𑀦𑀲𑁆𑀲 𑀫𑀳𑀦𑁆𑀢𑀢𑀸𑀬 𑀫𑀳𑀤𑁆𑀥𑀦𑀸. 𑀲𑀼𑀯𑀡𑁆𑀡𑀭𑀚𑀢𑀪𑀸𑀚𑀦𑀸𑀤𑀻𑀦𑀁 𑀉𑀧𑀪𑁄𑀕𑀪𑀡𑁆𑀟𑀸𑀦𑀁 𑀫𑀳𑀦𑁆𑀢𑀢𑀸𑀬 𑀫𑀳𑀸𑀪𑁄𑀕𑀸. 𑀅𑀦𑀺𑀥𑀸𑀦𑀕𑀢𑀲𑁆𑀲 𑀚𑀸𑀢𑀭𑀽𑀧𑀭𑀚𑀢𑀲𑁆𑀲 𑀧𑀳𑀽𑀢𑀢𑀸𑀬, 𑀧𑀳𑀽𑀢𑀚𑀸𑀢𑀭𑀽𑀧𑀭𑀚𑀢𑀸. 𑀯𑀺𑀢𑁆𑀢𑀽𑀧𑀓𑀭𑀡𑀲𑁆𑀲 𑀢𑀼𑀝𑁆𑀞𑀺𑀓𑀭𑀡𑀲𑁆𑀲 𑀧𑀳𑀽𑀢𑀢𑀸𑀬 𑀧𑀳𑀽𑀢𑀯𑀺𑀢𑁆𑀢𑀽𑀧𑀓𑀭𑀡𑀸. 𑀕𑁄𑀥𑀦𑀸𑀤𑀻𑀦𑀜𑁆𑀘 𑀲𑀢𑁆𑀢𑀯𑀺𑀥𑀥𑀜𑁆𑀜𑀸𑀦𑀜𑁆𑀘 𑀧𑀳𑀽𑀢𑀢𑀸𑀬 𑀧𑀳𑀽𑀢𑀥𑀦𑀥𑀜𑁆𑀜𑀸. 𑀢𑁂𑀲𑀫𑁆𑀧𑀺 𑀚𑀸𑀢𑀸𑀦𑀁 𑀦𑀢𑁆𑀣𑀺 𑀅𑀜𑁆𑀜𑀢𑁆𑀭 𑀚𑀭𑀸𑀫𑀭𑀡𑀸𑀢𑀺 𑀢𑁂𑀲𑀫𑁆𑀧𑀺 𑀏𑀯𑀁 𑀇𑀲𑁆𑀲𑀭𑀸𑀦𑀁 𑀚𑀸𑀢𑀸𑀦𑀁 𑀦𑀺𑀩𑁆𑀩𑀢𑁆𑀢𑀸𑀦𑀁 𑀦𑀢𑁆𑀣𑀺 𑀅𑀜𑁆𑀜𑀢𑁆𑀭 𑀚𑀭𑀸𑀫𑀭𑀡𑀸, 𑀚𑀸𑀢𑀢𑁆𑀢𑀸𑀬𑁂𑀯 𑀚𑀭𑀸𑀫𑀭𑀡𑀢𑁄 𑀫𑁄𑀓𑁆𑀔𑁄 𑀦𑀸𑀫 𑀦𑀢𑁆𑀣𑀺, 𑀅𑀦𑁆𑀢𑁄𑀚𑀭𑀸𑀫𑀭𑀡𑁂𑀬𑁂𑀯 𑀳𑁄𑀢𑀺.

𑀅𑀭𑀳𑀦𑁆𑀢𑁄𑀢𑀺𑀆𑀤𑀻𑀲𑀼 𑀆𑀭𑀓𑀸 𑀓𑀺𑀮𑁂𑀲𑁂𑀳𑀻𑀢𑀺 𑀅𑀭𑀳𑀦𑁆𑀢𑁄. 𑀔𑀻𑀡𑀸 𑀏𑀢𑁂𑀲𑀁 𑀘𑀢𑁆𑀢𑀸𑀭𑁄 𑀆𑀲𑀯𑀸𑀢𑀺 𑀔𑀻𑀡𑀸𑀲𑀯𑀸. 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀯𑀼𑀝𑁆𑀞𑀸 𑀧𑀭𑀺𑀦𑀺𑀝𑁆𑀞𑀺𑀢𑀯𑀸𑀲𑀸𑀢𑀺 𑀯𑀼𑀲𑀺𑀢𑀯𑀦𑁆𑀢𑁄. 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀓𑀭𑀡𑀻𑀬𑀁 𑀏𑀢𑁂𑀲𑀁 𑀓𑀢𑀦𑁆𑀢𑀺 𑀓𑀢𑀓𑀭𑀡𑀻𑀬𑀸. 𑀔𑀦𑁆𑀥𑀪𑀸𑀭𑁄 𑀓𑀺𑀮𑁂𑀲𑀪𑀸𑀭𑁄 𑀅𑀪𑀺𑀲𑀗𑁆𑀔𑀸𑀭𑀪𑀸𑀭𑁄 𑀓𑀸𑀫𑀕𑀼𑀡𑀪𑀸𑀭𑁄𑀢𑀺, 𑀇𑀫𑁂 𑀑𑀳𑀺𑀢𑀸 𑀪𑀸𑀭𑀸 𑀏𑀢𑁂𑀲𑀦𑁆𑀢𑀺 𑀑𑀳𑀺𑀢𑀪𑀸𑀭𑀸. 𑀅𑀦𑀼𑀧𑁆𑀧𑀢𑁆𑀢𑁄 𑀅𑀭𑀳𑀢𑁆𑀢𑀲𑀗𑁆𑀔𑀸𑀢𑁄 𑀲𑀓𑁄 𑀅𑀢𑁆𑀣𑁄 𑀏𑀢𑁂𑀲𑀦𑁆𑀢𑀺 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑀸. 𑀤𑀲𑀯𑀺𑀥𑀫𑁆𑀧𑀺 𑀧𑀭𑀺𑀓𑁆𑀔𑀻𑀡𑀁 𑀪𑀯𑀲𑀁𑀬𑁄𑀚𑀦𑀁 𑀏𑀢𑁂𑀲𑀦𑁆𑀢𑀺 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑀸. 𑀲𑀫𑁆𑀫𑀸 𑀓𑀸𑀭𑀡𑁂𑀳𑀺 𑀚𑀸𑀦𑀺𑀢𑁆𑀯𑀸 𑀯𑀺𑀫𑀼𑀢𑁆𑀢𑀸𑀢𑀺 𑀲𑀫𑁆𑀫𑀤𑀜𑁆𑀜𑀸𑀯𑀺𑀫𑀼𑀢𑁆𑀢𑀸. 𑀫𑀕𑁆𑀕𑀧𑀜𑁆𑀜𑀸𑀬 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀜𑀢𑁆𑀯𑀸 𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀪𑁂𑀤𑀦𑀥𑀫𑁆𑀫𑁄𑀢𑀺 𑀪𑀺𑀚𑁆𑀚𑀦𑀲𑀪𑀸𑀯𑁄. 𑀦𑀺𑀓𑁆𑀔𑁂𑀧𑀦𑀥𑀫𑁆𑀫𑁄𑀢𑀺 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀲𑀪𑀸𑀯𑁄. 𑀔𑀻𑀡𑀸𑀲𑀯𑀲𑁆𑀲 𑀳𑀺 𑀅𑀚𑀻𑀭𑀡𑀥𑀫𑁆𑀫𑁄𑀧𑀺 𑀅𑀢𑁆𑀣𑀺, 𑀆𑀭𑀫𑁆𑀫𑀡𑀢𑁄 𑀧𑀝𑀺𑀯𑀺𑀤𑁆𑀥𑀁 𑀦𑀺𑀩𑁆𑀩𑀸𑀦𑀁, 𑀢𑀁 𑀳𑀺 𑀦 𑀚𑀻𑀭𑀢𑀺. 𑀇𑀥 𑀧𑀦𑀲𑁆𑀲 𑀚𑀻𑀭𑀡𑀥𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀓𑁄 𑀓𑀺𑀭𑀲𑁆𑀲 𑀲𑀼𑀢𑁆𑀢𑀲𑁆𑀲 𑀦𑀺𑀓𑁆𑀔𑁂𑀧𑁄. 𑀲𑀺𑀯𑀺𑀓𑀲𑀸𑀮𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀓𑀣𑀺𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀪𑀕𑀯𑀸 𑀘𑀺𑀢𑁆𑀭𑀸𑀦𑀺 𑀭𑀣𑀬𑀸𑀦𑀸𑀤𑀻𑀦𑀺 𑀤𑀺𑀲𑁆𑀯𑀸 𑀤𑀺𑀝𑁆𑀞𑀫𑁂𑀯 𑀉𑀧𑀫𑀁 𑀓𑀢𑁆𑀯𑀸, ‘‘𑀚𑀻𑀭𑀦𑁆𑀢𑀺 𑀯𑁂 𑀭𑀸𑀚𑀭𑀣𑀸’’𑀢𑀺 𑀕𑀸𑀣𑀫𑀸𑀳.

𑀢𑀢𑁆𑀣 𑀚𑀻𑀭𑀦𑁆𑀢𑀻𑀢𑀺 𑀚𑀭𑀁 𑀧𑀸𑀧𑀼𑀡𑀦𑁆𑀢𑀺. 𑀭𑀸𑀚𑀭𑀣𑀸𑀢𑀺 𑀭𑀜𑁆𑀜𑁄 𑀅𑀪𑀺𑀭𑀽𑀳𑀦𑀭𑀣𑀸. 𑀲𑀼𑀘𑀺𑀢𑁆𑀢𑀸𑀢𑀺 𑀲𑀼𑀯𑀡𑁆𑀡𑀭𑀚𑀢𑀸𑀤𑀻𑀳𑀺 𑀲𑀼𑀝𑁆𑀞𑀼 𑀘𑀺𑀢𑁆𑀢𑀺𑀢𑀸. 𑀅𑀣𑁄 𑀲𑀭𑀻𑀭𑀫𑁆𑀧𑀺 𑀚𑀭𑀁 𑀉𑀧𑁂𑀢𑀻𑀢𑀺 𑀏𑀯𑀭𑀽𑀧𑁂𑀲𑀼 𑀅𑀦𑀼𑀧𑀸𑀤𑀺𑀡𑁆𑀡𑀓𑁂𑀲𑀼 𑀲𑀸𑀭𑀤𑀸𑀭𑀼𑀫𑀬𑁂𑀲𑀼 𑀭𑀣𑁂𑀲𑀼 𑀚𑀻𑀭𑀦𑁆𑀢𑁂𑀲𑀼 𑀇𑀫𑀲𑁆𑀫𑀺𑀁 𑀅𑀚𑁆𑀛𑀢𑁆𑀢𑀺𑀓𑁂 𑀉𑀧𑀸𑀤𑀺𑀡𑁆𑀡𑀓𑁂 𑀫𑀁𑀲𑀮𑁄𑀳𑀺𑀢𑀸𑀤𑀺𑀫𑀬𑁂 𑀲𑀭𑀻𑀭𑁂 𑀓𑀺𑀁 𑀯𑀢𑁆𑀢𑀩𑁆𑀩𑀁? 𑀲𑀭𑀻𑀭𑀫𑁆𑀧𑀺 𑀚𑀭𑀁 𑀉𑀧𑁂𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀲𑀦𑁆𑀢𑁄 𑀳𑀯𑁂 𑀲𑀩𑁆𑀪𑀺 𑀧𑀯𑁂𑀤𑀬𑀦𑁆𑀢𑀻𑀢𑀺 𑀲𑀦𑁆𑀢𑁄 𑀲𑀩𑁆𑀪𑀻𑀳𑀺 𑀲𑀤𑁆𑀥𑀺𑀁 𑀲𑀢𑀁 𑀥𑀫𑁆𑀫𑁄 𑀦 𑀚𑀭𑀁 𑀉𑀧𑁂𑀢𑀻𑀢𑀺 𑀏𑀯𑀁 𑀧𑀯𑁂𑀤𑀬𑀦𑁆𑀢𑀺. ‘‘𑀲𑀢𑀁 𑀥𑀫𑁆𑀫𑁄 𑀦𑀸𑀫 𑀦𑀺𑀩𑁆𑀩𑀸𑀦𑀁, 𑀢𑀁 𑀦 𑀚𑀻𑀭𑀢𑀺, 𑀅𑀚𑀭𑀁 𑀅𑀫𑀢𑀦𑁆𑀢𑀺 𑀏𑀯𑀁 𑀓𑀣𑁂𑀦𑁆𑀢𑀻’’𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀯𑀸 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀲𑀻𑀤𑀦𑀲𑀪𑀸𑀯𑀸 𑀓𑀺𑀮𑁂𑀲𑀸 𑀪𑀺𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀲𑀩𑁆𑀪𑀻𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀺 𑀧𑀼𑀭𑀺𑀫𑀧𑀤𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀦𑁆𑀢𑁄 𑀳𑀯𑁂 𑀲𑀩𑁆𑀪𑀺 𑀧𑀯𑁂𑀤𑀬𑀦𑁆𑀢𑀻’’𑀢𑀺 𑀆𑀳. 𑀇𑀤𑀁 𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀢𑀁 𑀥𑀫𑁆𑀫𑁄 𑀦 𑀚𑀭𑀁 𑀉𑀧𑁂𑀢𑀺, 𑀢𑀲𑁆𑀫𑀸 𑀲𑀦𑁆𑀢𑁄 𑀲𑀩𑁆𑀪𑀺 𑀧𑀯𑁂𑀤𑀬𑀦𑁆𑀢𑀺. 𑀅𑀚𑀭𑀁 𑀦𑀺𑀩𑁆𑀩𑀸𑀦𑀁 𑀲𑀢𑀁 𑀥𑀫𑁆𑀫𑁄𑀢𑀺 𑀆𑀘𑀺𑀓𑁆𑀔𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀦𑁆𑀤𑀭𑀸𑀥𑀺𑀯𑀘𑀦𑀁 𑀯𑀸 𑀏𑀢𑀁 𑀲𑀩𑁆𑀪𑀻𑀢𑀺. 𑀬𑀁 𑀲𑀩𑁆𑀪𑀺𑀥𑀫𑁆𑀫𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀲𑀦𑁆𑀢𑁄 𑀧𑀯𑁂𑀤𑀬𑀦𑁆𑀢𑀺 𑀓𑀣𑀬𑀦𑁆𑀢𑀺, 𑀲𑁄 𑀲𑀢𑀁 𑀥𑀫𑁆𑀫𑁄 𑀦 𑀚𑀭𑀁 𑀉𑀧𑁂𑀢𑀻𑀢𑀺𑀧𑀺 𑀅𑀢𑁆𑀣𑁄. 𑀢𑀢𑀺𑀬𑀁.

𑁪. 𑀧𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁫. 𑀘𑀢𑀼𑀢𑁆𑀣𑁂 𑀭𑀳𑁄𑀕𑀢𑀲𑁆𑀲𑀸𑀢𑀺 𑀭𑀳𑀲𑀺 𑀕𑀢𑀲𑁆𑀲. 𑀧𑀝𑀺𑀲𑀮𑁆𑀮𑀻𑀦𑀲𑁆𑀲𑀸𑀢𑀺 𑀦𑀺𑀮𑀻𑀦𑀲𑁆𑀲 𑀏𑀓𑀻𑀪𑀽𑀢𑀲𑁆𑀲. 𑀏𑀯𑀫𑁂𑀢𑀁, 𑀫𑀳𑀸𑀭𑀸𑀚𑀸𑀢𑀺 𑀇𑀥 𑀪𑀕𑀯𑀸 𑀇𑀫𑀁 𑀲𑀼𑀢𑁆𑀢𑀁 𑀲𑀩𑁆𑀩𑀜𑁆𑀜𑀼𑀪𑀸𑀲𑀺𑀢𑀁 𑀓𑀭𑁄𑀦𑁆𑀢𑁄 𑀆𑀳. 𑀅𑀦𑁆𑀢𑀓𑁂𑀦𑀸𑀥𑀺𑀧𑀦𑁆𑀦𑀲𑁆𑀲𑀸𑀢𑀺 𑀫𑀭𑀡𑁂𑀦 𑀅𑀚𑁆𑀛𑁄𑀢𑁆𑀣𑀝𑀲𑁆𑀲. 𑀘𑀢𑀼𑀢𑁆𑀣𑀁.

𑁫. 𑀅𑀢𑁆𑀢𑀭𑀓𑁆𑀔𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁬. 𑀧𑀜𑁆𑀘𑀫𑁂 𑀳𑀢𑁆𑀣𑀺𑀓𑀸𑀬𑁄𑀢𑀺 𑀳𑀢𑁆𑀣𑀺𑀖𑀝𑀸. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀁𑀯𑀭𑁄𑀢𑀺 𑀧𑀺𑀤𑀳𑀦𑀁. 𑀲𑀸𑀥𑀼 𑀲𑀩𑁆𑀩𑀢𑁆𑀣 𑀲𑀁𑀯𑀭𑁄𑀢𑀺 𑀇𑀫𑀺𑀦𑀸 𑀓𑀫𑁆𑀫𑀧𑀣𑀪𑁂𑀤𑀁 𑀅𑀧𑀢𑁆𑀢𑀲𑁆𑀲 𑀓𑀫𑁆𑀫𑀲𑁆𑀲 𑀲𑀁𑀯𑀭𑀁 𑀤𑀲𑁆𑀲𑁂𑀢𑀺. 𑀮𑀚𑁆𑀚𑀻𑀢𑀺 𑀳𑀺𑀭𑀺𑀫𑀸. 𑀮𑀚𑁆𑀚𑀻𑀕𑀳𑀡𑁂𑀦 𑀘𑁂𑀢𑁆𑀣 𑀑𑀢𑁆𑀢𑀧𑁆𑀧𑀫𑁆𑀧𑀺 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀧𑀜𑁆𑀘𑀫𑀁.

𑁬. 𑀅𑀧𑁆𑀧𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁭. 𑀙𑀝𑁆𑀞𑁂 𑀉𑀴𑀸𑀭𑁂 𑀉𑀴𑀸𑀭𑁂𑀢𑀺 𑀧𑀡𑀻𑀢𑁂 𑀘 𑀩𑀳𑀼𑀓𑁂 𑀘. 𑀫𑀚𑁆𑀚𑀦𑁆𑀢𑀻𑀢𑀺 𑀫𑀸𑀦𑀫𑀚𑁆𑀚𑀦𑁂𑀦 𑀫𑀚𑁆𑀚𑀦𑁆𑀢𑀺. 𑀅𑀢𑀺𑀲𑀸𑀭𑀦𑁆𑀢𑀺 𑀅𑀢𑀺𑀓𑁆𑀓𑀫𑀁. 𑀓𑀽𑀝𑀦𑁆𑀢𑀺 𑀧𑀸𑀲𑀁. 𑀧𑀘𑁆𑀙𑀸𑀲𑀦𑁆𑀢𑀺 𑀧𑀘𑁆𑀙𑀸 𑀢𑁂𑀲𑀁. 𑀙𑀝𑁆𑀞𑀁.

𑁭. 𑀅𑀟𑁆𑀟𑀓𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁮. 𑀲𑀢𑁆𑀢𑀫𑁂 𑀓𑀸𑀫𑀳𑁂𑀢𑀽𑀢𑀺 𑀓𑀸𑀫𑀫𑀽𑀮𑀓𑀁. 𑀓𑀸𑀫𑀦𑀺𑀤𑀸𑀦𑀦𑁆𑀢𑀺 𑀓𑀸𑀫𑀧𑀘𑁆𑀘𑀬𑀸. 𑀓𑀸𑀫𑀸𑀥𑀺𑀓𑀭𑀡𑀦𑁆𑀢𑀺 𑀓𑀸𑀫𑀓𑀸𑀭𑀡𑀸. 𑀲𑀩𑁆𑀩𑀸𑀦𑀺 𑀳𑁂𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑁂𑀯. 𑀪𑀤𑁆𑀭𑀫𑀼𑀔𑁄𑀢𑀺 𑀲𑀼𑀦𑁆𑀤𑀭𑀫𑀼𑀔𑁄. 𑀏𑀓𑀤𑀺𑀯𑀲𑀁 𑀓𑀺𑀭 𑀭𑀸𑀚𑀸 𑀅𑀟𑁆𑀟𑀓𑀭𑀡𑁂 𑀦𑀺𑀲𑀻𑀤𑀺. 𑀢𑀢𑁆𑀣 𑀧𑀞𑀫𑀢𑀭𑀁 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀅𑀫𑀘𑁆𑀘𑀸 𑀅𑀲𑁆𑀲𑀸𑀫𑀺𑀓𑁂𑀧𑀺 𑀲𑀸𑀫𑀺𑀓𑁂 𑀓𑀭𑀺𑀁𑀲𑀼. 𑀭𑀸𑀚𑀸 𑀢𑀁 𑀜𑀢𑁆𑀯𑀸 𑁋 ‘‘𑀫𑀬𑁆𑀳𑀁 𑀢𑀸𑀯 𑀧𑀣𑀯𑀺𑀲𑁆𑀲𑀭𑀲𑁆𑀲 𑀲𑀫𑁆𑀫𑀼𑀔𑀸𑀧𑁂𑀢𑁂 𑀏𑀯𑀁 𑀓𑀭𑁄𑀦𑁆𑀢𑀺, 𑀧𑀭𑀫𑁆𑀫𑀼𑀔𑀸 𑀓𑀺𑀁 𑀦𑀸𑀫 𑀦 𑀓𑀭𑀺𑀲𑁆𑀲𑀦𑁆𑀢𑀺? 𑀧𑀜𑁆𑀜𑀸𑀬𑀺𑀲𑁆𑀲𑀢𑀺 𑀤𑀸𑀦𑀺 𑀯𑀺𑀝𑀝𑀽𑀪𑁄 𑀲𑁂𑀦𑀸𑀧𑀢𑀺 𑀲𑀓𑁂𑀦 𑀭𑀚𑁆𑀚𑁂𑀦, 𑀓𑀺𑀁 𑀫𑀬𑁆𑀳𑀁 𑀏𑀯𑀭𑀽𑀧𑁂𑀳𑀺 𑀮𑀜𑁆𑀚𑀔𑀸𑀤𑀓𑁂𑀳𑀺 𑀫𑀼𑀲𑀸𑀯𑀸𑀤𑀻𑀳𑀺 𑀲𑀤𑁆𑀥𑀺𑀁 𑀏𑀓𑀝𑁆𑀞𑀸𑀦𑁂 𑀦𑀺𑀲𑀚𑁆𑀚𑀸𑀬𑀸’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀔𑀺𑀧𑁆𑀧𑀁𑀯 𑀑𑀟𑁆𑀟𑀺𑀢𑀦𑁆𑀢𑀺 𑀓𑀼𑀫𑀺𑀦𑀁 𑀯𑀺𑀬 𑀑𑀟𑁆𑀟𑀺𑀢𑀁. 𑀬𑀣𑀸 𑀫𑀘𑁆𑀙𑀸 𑀑𑀟𑁆𑀟𑀺𑀢𑀁 𑀓𑀼𑀫𑀺𑀦𑀁 𑀧𑀯𑀺𑀲𑀦𑁆𑀢𑀸 𑀦 𑀚𑀸𑀦𑀦𑁆𑀢𑀺, 𑀏𑀯𑀁 𑀲𑀢𑁆𑀢𑀸 𑀓𑀺𑀮𑁂𑀲𑀓𑀸𑀫𑁂𑀦 𑀯𑀢𑁆𑀣𑀼𑀓𑀸𑀫𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑀸 𑀦 𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀢𑁆𑀢𑀫𑀁.

𑁮. 𑀫𑀮𑁆𑀮𑀺𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁯. 𑀅𑀝𑁆𑀞𑀫𑁂 𑀅𑀢𑁆𑀣𑀺 𑀦𑀼 𑀔𑁄 𑀢𑁂 𑀫𑀮𑁆𑀮𑀺𑀓𑁂𑀢𑀺 𑀓𑀲𑁆𑀫𑀸 𑀧𑀼𑀘𑁆𑀙𑀢𑀺? 𑀅𑀬𑀁 𑀓𑀺𑀭 𑀫𑀮𑁆𑀮𑀺𑀓𑀸 𑀤𑀼𑀕𑁆𑀕𑀢𑀫𑀸𑀮𑀸𑀓𑀸𑀭𑀲𑁆𑀲 𑀥𑀻𑀢𑀸, 𑀏𑀓𑀤𑀺𑀯𑀲𑀁 𑀆𑀧𑀡𑀢𑁄 𑀧𑀽𑀯𑀁 𑀕𑀳𑁂𑀢𑁆𑀯𑀸 ‘‘𑀫𑀸𑀮𑀸𑀭𑀸𑀫𑀁 𑀕𑀦𑁆𑀢𑁆𑀯𑀸𑀯 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀦𑁆𑀢𑀻 𑀧𑀝𑀺𑀧𑀣𑁂 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑀁 𑀪𑀕𑀯𑀦𑁆𑀢𑀁 𑀪𑀺𑀓𑁆𑀔𑀸𑀘𑀸𑀭𑀁 𑀧𑀯𑀺𑀲𑀦𑁆𑀢𑀁 𑀤𑀺𑀲𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀢𑀁 𑀪𑀕𑀯𑀢𑁄 𑀅𑀤𑀸𑀲𑀺. 𑀲𑀢𑁆𑀣𑀸 𑀦𑀺𑀲𑀻𑀤𑀦𑀸𑀓𑀸𑀭𑀁 𑀤𑀲𑁆𑀲𑁂𑀲𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀘𑀻𑀯𑀭𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀸𑀲𑀺. 𑀪𑀕𑀯𑀸 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀢𑀁 𑀧𑀽𑀯𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀲𑀺𑀢𑀁 𑀧𑀸𑀢𑁆𑀯𑀸𑀓𑀸𑀲𑀺. 𑀣𑁂𑀭𑁄 ‘‘𑀇𑀫𑀺𑀲𑁆𑀲𑀸, 𑀪𑀦𑁆𑀢𑁂, 𑀓𑁄 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀘𑁆𑀙𑀺. 𑀆𑀦𑀦𑁆𑀤, 𑀅𑀚𑁆𑀚𑁂𑀲𑀸 𑀢𑀣𑀸𑀕𑀢𑀲𑁆𑀲 𑀧𑀞𑀫𑀪𑁄𑀚𑀦𑀁 𑀅𑀤𑀸𑀲𑀺, 𑀅𑀚𑁆𑀚𑁂𑀯 𑀓𑁄𑀲𑀮𑀭𑀜𑁆𑀜𑁄 𑀅𑀕𑁆𑀕𑀫𑀳𑁂𑀲𑀻 𑀪𑀯𑀺𑀲𑁆𑀲𑀢𑀻𑀢𑀺. 𑀢𑀁𑀤𑀺𑀯𑀲𑀫𑁂𑀯 𑀘 𑀭𑀸𑀚𑀸 𑀓𑀸𑀲𑀺𑀕𑀸𑀫𑁂 𑀪𑀸𑀕𑀺𑀦𑁂𑀬𑁆𑀬𑁂𑀦 𑀬𑀼𑀤𑁆𑀥𑁂𑀦 𑀧𑀭𑀸𑀚𑀺𑀢𑁄 𑀧𑀮𑀸𑀬𑀺𑀢𑁆𑀯𑀸 𑀦𑀕𑀭𑀁 𑀆𑀕𑀘𑁆𑀙𑀦𑁆𑀢𑁄 𑀫𑀸𑀮𑀸𑀭𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀩𑀮𑀓𑀸𑀬𑀲𑁆𑀲 𑀆𑀕𑀫𑀦𑀁 𑀆𑀕𑀫𑁂𑀲𑀺. 𑀢𑀲𑁆𑀲 𑀲𑀸 𑀯𑀢𑁆𑀢𑀁 𑀅𑀓𑀸𑀲𑀺. 𑀲𑁄 𑀢𑀸𑀬 𑀯𑀢𑁆𑀢𑁂 𑀧𑀲𑀻𑀤𑀺𑀢𑁆𑀯𑀸 𑀢𑀁 𑀅𑀦𑁆𑀢𑁂𑀧𑀽𑀭𑀁 𑀅𑀢𑀺𑀳𑀸𑀭𑀸𑀧𑁂𑀢𑁆𑀯𑀸 𑀢𑀁 𑀅𑀕𑁆𑀕𑀫𑀳𑁂𑀲𑀺𑀝𑁆𑀞𑀸𑀦𑁂 𑀞𑀧𑁂𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀸 𑀇𑀫𑀺𑀲𑁆𑀲𑀸 𑀤𑀼𑀕𑁆𑀕𑀢𑀓𑀼𑀮𑀲𑁆𑀲 𑀥𑀻𑀢𑀼𑀬𑀸 𑀫𑀳𑀦𑁆𑀢𑀁 𑀇𑀲𑁆𑀲𑀭𑀺𑀬𑀁 𑀤𑀺𑀦𑁆𑀦𑀁, 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀧𑀼𑀘𑁆𑀙𑁂𑀬𑁆𑀬𑀁 ‘𑀓𑁄 𑀢𑁂 𑀧𑀺𑀬𑁄’𑀢𑀺? 𑀲𑀸 ‘𑀢𑁆𑀯𑀁 𑀫𑁂, 𑀫𑀳𑀸𑀭𑀸𑀚, 𑀧𑀺𑀬𑁄’𑀢𑀺 𑀯𑀢𑁆𑀯𑀸 𑀧𑀼𑀦 𑀫𑀁 𑀧𑀼𑀘𑁆𑀙𑀺𑀲𑁆𑀲𑀢𑀺. 𑀅𑀣𑀲𑁆𑀲𑀸𑀳𑀁 ‘𑀫𑀬𑁆𑀳𑀫𑁆𑀧𑀺 𑀢𑁆𑀯𑀁𑀬𑁂𑀯 𑀧𑀺𑀬𑀸’𑀢𑀺 𑀯𑀓𑁆𑀔𑀸𑀫𑀻’’𑀢𑀺. 𑀇𑀢𑀺 𑀲𑁄 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑁆𑀲𑀸𑀲𑀚𑀦𑀦𑀢𑁆𑀣𑀁 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀓𑀣𑁂𑀦𑁆𑀢𑁄 𑀧𑀼𑀘𑁆𑀙𑀢𑀺. 𑀲𑀸 𑀧𑀦 𑀤𑁂𑀯𑀻 𑀧𑀡𑁆𑀟𑀺𑀢𑀸 𑀩𑀼𑀤𑁆𑀥𑀼𑀧𑀝𑁆𑀞𑀸𑀬𑀺𑀓𑀸 𑀥𑀫𑁆𑀫𑀼𑀧𑀝𑁆𑀞𑀸𑀬𑀺𑀓𑀸 𑀲𑀗𑁆𑀖𑀼𑀧𑀝𑁆𑀞𑀸𑀬𑀺𑀓𑀸 𑀫𑀳𑀸𑀧𑀜𑁆𑀜𑀸, 𑀢𑀲𑁆𑀫𑀸 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀦𑀸𑀬𑀁 𑀧𑀜𑁆𑀳𑁄 𑀭𑀜𑁆𑀜𑁄 𑀫𑀼𑀔𑀁 𑀑𑀮𑁄𑀓𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑁄’’𑀢𑀺. 𑀲𑀸 𑀲𑀭𑀲𑁂𑀦𑁂𑀯 𑀓𑀣𑁂𑀢𑁆𑀯𑀸 𑀭𑀸𑀚𑀸𑀦𑀁 𑀧𑀼𑀘𑁆𑀙𑀺. 𑀭𑀸𑀚𑀸 𑀢𑀸𑀬 𑀲𑀭𑀲𑁂𑀦 𑀓𑀣𑀺𑀢𑀢𑁆𑀢𑀸 𑀦𑀺𑀯𑀢𑁆𑀢𑀺𑀢𑀼𑀁 𑀅𑀮𑀪𑀦𑁆𑀢𑁄 𑀲𑀬𑀫𑁆𑀧𑀺 𑀲𑀭𑀲𑁂𑀦𑁂𑀯 𑀓𑀣𑁂𑀢𑁆𑀯𑀸 ‘‘𑀲𑀓𑀸𑀭𑀡𑀁 𑀇𑀤𑀁, 𑀢𑀣𑀸𑀕𑀢𑀲𑁆𑀲 𑀦𑀁 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀪𑀕𑀯𑀢𑁄 𑀆𑀭𑁄𑀘𑁂𑀲𑀺. 𑀦𑁂𑀯𑀚𑁆𑀛𑀕𑀸𑀢𑀺 𑀦𑀸𑀥𑀺𑀕𑀘𑁆𑀙𑀢𑀺. 𑀏𑀯𑀁 𑀧𑀺𑀬𑁄 𑀧𑀼𑀣𑀼 𑀅𑀢𑁆𑀢𑀸 𑀧𑀭𑁂𑀲𑀦𑁆𑀢𑀺 𑀬𑀣𑀸 𑀏𑀓𑀲𑁆𑀲 𑀅𑀢𑁆𑀢𑀸 𑀧𑀺𑀬𑁄, 𑀏𑀯𑀁 𑀧𑀭𑁂𑀲𑀁 𑀧𑀼𑀣𑀼𑀲𑀢𑁆𑀢𑀸𑀦𑀫𑁆𑀧𑀺 𑀅𑀢𑁆𑀢𑀸 𑀧𑀺𑀬𑁄𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀫𑀁.

𑁯. 𑀬𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁦. 𑀦𑀯𑀫𑁂 𑀣𑀽𑀡𑀽𑀧𑀦𑀻𑀢𑀸𑀦𑀻𑀢𑀺 𑀣𑀽𑀡𑀁 𑀉𑀧𑀦𑀻𑀢𑀸𑀦𑀺, 𑀣𑀽𑀡𑀸𑀬 𑀩𑀤𑁆𑀥𑀸𑀦𑀺 𑀳𑁄𑀦𑁆𑀢𑀺. 𑀧𑀭𑀺𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀻𑀢𑀺 𑀏𑀢𑁆𑀢𑀸𑀯𑀢𑀸 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀭𑀜𑁆𑀜𑁄 𑀆𑀭𑀤𑁆𑀥𑀬𑀜𑁆𑀜𑁄 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑀺𑀢𑁄. 𑀓𑀲𑁆𑀫𑀸 𑀧𑀦 𑀭𑀜𑁆𑀜𑀸 𑀅𑀬𑀁 𑀬𑀜𑁆𑀜𑁄 𑀆𑀭𑀤𑁆𑀥𑁄? 𑀤𑀼𑀲𑁆𑀲𑀼𑀧𑀺𑀦𑀧𑀝𑀺𑀖𑀸𑀢𑀸𑀬. 𑀏𑀓𑀤𑀺𑀯𑀲𑀁 𑀓𑀺𑀭 𑀭𑀸𑀚𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑁆𑀧𑀝𑀺𑀫𑀡𑁆𑀟𑀺𑀢𑁄 𑀳𑀢𑁆𑀣𑀺𑀓𑁆𑀔𑀦𑁆𑀥𑀯𑀭𑀕𑀢𑁄 𑀦𑀕𑀭𑀁 𑀅𑀦𑀼𑀲𑀜𑁆𑀘𑀭𑀦𑁆𑀢𑁄 𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀑𑀮𑁄𑀓𑀬𑀫𑀸𑀦𑀁 𑀏𑀓𑀁 𑀇𑀢𑁆𑀣𑀺𑀁 𑀤𑀺𑀲𑁆𑀯𑀸 𑀢𑀲𑁆𑀲𑀸 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀢𑀢𑁄𑀯 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀅𑀦𑁆𑀢𑁂𑀧𑀼𑀭𑀁 𑀧𑀯𑀺𑀲𑀺𑀢𑁆𑀯𑀸 𑀏𑀓𑀲𑁆𑀲 𑀧𑀼𑀭𑀺𑀲𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸 ‘‘𑀕𑀘𑁆𑀙 𑀢𑀲𑁆𑀲𑀸 𑀲𑀲𑁆𑀲𑀸𑀫𑀺𑀓𑀪𑀸𑀯𑀁 𑀯𑀸 𑀅𑀲𑁆𑀲𑀸𑀫𑀺𑀓𑀪𑀸𑀯𑀁 𑀯𑀸 𑀚𑀸𑀦𑀸𑀳𑀻’’𑀢𑀺 𑀧𑁂𑀲𑁂𑀲𑀺. 𑀲𑁄 𑀕𑀦𑁆𑀢𑁆𑀯𑀸 𑀧𑀼𑀘𑁆𑀙𑀺. 𑀲𑀸 ‘‘𑀏𑀲𑁄 𑀫𑁂 𑀲𑀸𑀫𑀺𑀓𑁄 𑀆𑀧𑀡𑁂 𑀦𑀺𑀲𑀺𑀦𑁆𑀦𑁄’’𑀢𑀺 𑀤𑀲𑁆𑀲𑁂𑀲𑀺. 𑀭𑀸𑀚𑀧𑀼𑀭𑀺𑀲𑁄 𑀭𑀜𑁆𑀜𑁄 𑀢𑀫𑀢𑁆𑀣𑀁 𑀆𑀘𑀺𑀓𑁆𑀔𑀺. 𑀭𑀸𑀚𑀸 𑀢𑀁 𑀧𑀼𑀭𑀺𑀲𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀫𑀁 𑀉𑀧𑀝𑁆𑀞𑀳𑀸’’𑀢𑀺 𑀆𑀳. ‘‘𑀦𑀸𑀳𑀁, 𑀤𑁂𑀯, 𑀉𑀧𑀝𑁆𑀞𑀳𑀺𑀢𑀼𑀁 𑀚𑀸𑀦𑀸𑀫𑀻’’𑀢𑀺 𑀘 𑀯𑀼𑀢𑁆𑀢𑁂 ‘‘𑀉𑀧𑀝𑁆𑀞𑀸𑀦𑀁 𑀦𑀸𑀫 𑀦 𑀆𑀘𑀭𑀺𑀬𑀲𑁆𑀲 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀩𑀮𑀓𑁆𑀓𑀸𑀭𑁂𑀦 𑀆𑀯𑀼𑀥𑀨𑀮𑀓𑀁 𑀕𑀸𑀳𑀸𑀧𑁂𑀢𑁆𑀯𑀸 𑀉𑀧𑀝𑁆𑀞𑀸𑀓𑀁 𑀅𑀓𑀸𑀲𑀺. 𑀉𑀧𑀝𑁆𑀞𑀳𑀺𑀢𑁆𑀯𑀸 𑀕𑁂𑀳𑀁 𑀕𑀢𑀫𑀢𑁆𑀢𑀫𑁂𑀯 𑀘 𑀦𑀁 𑀧𑀼𑀦 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀉𑀧𑀝𑁆𑀞𑀸𑀓𑁂𑀦 𑀦𑀸𑀫 𑀭𑀜𑁆𑀜𑁄 𑀯𑀘𑀦𑀁 𑀓𑀢𑁆𑀢𑀩𑁆𑀩𑀁, 𑀕𑀘𑁆𑀙 𑀇𑀢𑁄 𑀬𑁄𑀚𑀦𑀫𑀢𑁆𑀢𑁂 𑀅𑀫𑁆𑀳𑀸𑀓𑀁 𑀲𑀻𑀲𑀥𑁄𑀯𑀦𑀧𑁄𑀓𑁆𑀔𑀭𑀡𑀻 𑀅𑀢𑁆𑀣𑀺, 𑀢𑀢𑁄 𑀅𑀭𑀼𑀡𑀫𑀢𑁆𑀢𑀺𑀓𑀜𑁆𑀘 𑀮𑁄𑀳𑀺𑀢𑀼𑀧𑁆𑀧𑀮𑀫𑀸𑀮𑀜𑁆𑀘 𑀕𑀡𑁆𑀳𑀺𑀢𑁆𑀯𑀸 𑀏𑀳𑀺. 𑀲𑀘𑁂 𑀅𑀚𑁆𑀚𑁂𑀯 𑀦𑀸𑀕𑀘𑁆𑀙𑀲𑀺, 𑀭𑀸𑀚𑀤𑀡𑁆𑀟𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀧𑁂𑀲𑁂𑀲𑀺. 𑀲𑁄 𑀭𑀸𑀚𑀪𑀬𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀢𑁄.

𑀭𑀸𑀚𑀸𑀧𑀺 𑀢𑀲𑁆𑀫𑀺𑀁 𑀕𑀢𑁂 𑀤𑁄𑀯𑀸𑀭𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀅𑀚𑁆𑀚 𑀲𑀸𑀬𑀦𑁆𑀳𑁂𑀬𑁂𑀯 𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 ‘𑀅𑀳𑀁 𑀭𑀸𑀚𑀤𑀽𑀢𑁄’𑀢𑀺 𑀯𑀸 ‘𑀉𑀧𑀭𑀸𑀚𑀤𑀽𑀢𑁄’𑀢𑀺 𑀯𑀸 𑀪𑀡𑀦𑁆𑀢𑀸𑀦𑀫𑁆𑀧𑀺 𑀫𑀸 𑀯𑀺𑀯𑀭𑀻’’𑀢𑀺 𑀆𑀳. 𑀲𑁄 𑀧𑀼𑀭𑀺𑀲𑁄 𑀫𑀢𑁆𑀢𑀺𑀓𑀜𑁆𑀘 𑀉𑀧𑁆𑀧𑀮𑀸𑀦𑀺 𑀘 𑀕𑀳𑁂𑀢𑁆𑀯𑀸 𑀤𑁆𑀯𑀸𑀭𑁂 𑀧𑀺𑀳𑀺𑀢𑀫𑀢𑁆𑀢𑁂 𑀆𑀕𑀦𑁆𑀢𑁆𑀯𑀸 𑀩𑀳𑀼𑀁 𑀯𑀤𑀦𑁆𑀢𑁄𑀧𑀺 𑀤𑁆𑀯𑀸𑀭𑀁 𑀅𑀮𑀪𑀺𑀢𑁆𑀯𑀸 𑀧𑀭𑀺𑀲𑁆𑀲𑀬𑀪𑀬𑁂𑀦 𑀚𑁂𑀢𑀯𑀦𑀁 𑀕𑀢𑁄. 𑀭𑀸𑀚𑀸𑀧𑀺 𑀭𑀸𑀕𑀧𑀭𑀺𑀴𑀸𑀳𑁂𑀦 𑀅𑀪𑀺𑀪𑀽𑀢𑁄 𑀓𑀸𑀮𑁂 𑀦𑀺𑀲𑀻𑀤𑀢𑀺, 𑀓𑀸𑀮𑁂 𑀢𑀺𑀝𑁆𑀞𑀢𑀺, 𑀓𑀸𑀮𑁂 𑀦𑀺𑀧𑀚𑁆𑀚𑀢𑀺, 𑀲𑀦𑁆𑀦𑀺𑀝𑁆𑀞𑀸𑀦𑀁 𑀅𑀮𑀪𑀦𑁆𑀢𑁄 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀲𑀺𑀦𑁆𑀦𑀓𑁄𑀯 𑀫𑀓𑁆𑀓𑀝𑀦𑀺𑀤𑁆𑀤𑀸𑀬 𑀦𑀺𑀤𑁆𑀤𑀸𑀬𑀢𑀺.

𑀧𑀼𑀩𑁆𑀩𑁂 𑀘 𑀢𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀘𑀢𑁆𑀢𑀸𑀭𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑀸 𑀧𑀭𑀤𑀸𑀭𑀺𑀓𑀓𑀫𑁆𑀫𑀁 𑀓𑀢𑁆𑀯𑀸 𑀦𑀦𑁆𑀤𑁄𑀧𑀦𑀦𑁆𑀤𑀸𑀬 𑀦𑀸𑀫 𑀮𑁄𑀳𑀓𑀼𑀫𑁆𑀪𑀺𑀬𑀸 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂 𑀨𑁂𑀡𑀼𑀤𑁆𑀤𑁂𑀳𑀓𑀁 𑀧𑀘𑁆𑀘𑀫𑀸𑀦𑀸 𑀢𑀺𑀁𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀳𑁂𑀝𑁆𑀞𑀸 𑀕𑀘𑁆𑀙𑀦𑁆𑀢𑀸 𑀓𑀼𑀫𑁆𑀪𑀺𑀬𑀸 𑀢𑀮𑀁 𑀧𑀸𑀧𑀼𑀡𑀦𑁆𑀢𑀺, 𑀢𑀺𑀁𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀉𑀧𑀭𑀺 𑀕𑀘𑁆𑀙𑀦𑁆𑀢𑀸 𑀫𑀢𑁆𑀣𑀓𑀁 𑀧𑀸𑀧𑀼𑀡𑀦𑁆𑀢𑀺. 𑀢𑁂 𑀢𑀁 𑀤𑀺𑀯𑀲𑀁 𑀆𑀮𑁄𑀓𑀁 𑀑𑀮𑁄𑀓𑁂𑀢𑁆𑀯𑀸 𑀅𑀢𑁆𑀢𑀦𑁄 𑀤𑀼𑀓𑁆𑀓𑀝𑀪𑀬𑁂𑀦 𑀏𑀓𑁂𑀓𑀁 𑀕𑀸𑀣𑀁 𑀯𑀢𑁆𑀢𑀼𑀓𑀸𑀫𑀸 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀏𑀓𑁂𑀓𑀁 𑀅𑀓𑁆𑀔𑀭𑀫𑁂𑀯 𑀆𑀳𑀁𑀲𑀼. 𑀏𑀓𑁄 𑀲-𑀓𑀸𑀭𑀁, 𑀏𑀓𑁄 𑀲𑁄-𑀓𑀸𑀭𑀁, 𑀏𑀓𑁄 𑀦-𑀓𑀸𑀭𑀁, 𑀏𑀓𑁄 𑀤𑀼-𑀓𑀸𑀭𑀁 𑀆𑀳. 𑀭𑀸𑀚𑀸 𑀢𑁂𑀲𑀁 𑀦𑁂𑀭𑀬𑀺𑀓𑀲𑀢𑁆𑀢𑀸𑀦𑀁 𑀲𑀤𑁆𑀤𑀁 𑀲𑀼𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀼𑀔𑀁 𑀅𑀯𑀺𑀦𑁆𑀤𑀫𑀸𑀦𑁄𑀯 𑀢𑀁𑀭𑀢𑁆𑀢𑀸𑀯𑀲𑁂𑀲𑀁 𑀯𑀻𑀢𑀺𑀦𑀸𑀫𑁂𑀲𑀺.

𑀅𑀭𑀼𑀡𑁂 𑀉𑀝𑁆𑀞𑀺𑀢𑁂 𑀧𑀼𑀭𑁄𑀳𑀺𑀢𑁄 𑀆𑀕𑀦𑁆𑀢𑁆𑀯𑀸 𑀢𑀁 𑀲𑀼𑀔𑀲𑁂𑀬𑁆𑀬𑀁 𑀧𑀼𑀘𑁆𑀙𑀺. 𑀲𑁄 ‘‘𑀓𑀼𑀢𑁄 𑀫𑁂, 𑀆𑀘𑀭𑀺𑀬, 𑀲𑀼𑀔’’𑀦𑁆𑀢𑀺? 𑀯𑀢𑁆𑀯𑀸, ‘‘𑀲𑀼𑀧𑀺𑀦𑁂 𑀏𑀯𑀭𑀽𑀧𑁂 𑀲𑀤𑁆𑀤𑁂 𑀅𑀲𑁆𑀲𑁄𑀲𑀺’’𑀦𑁆𑀢𑀺 𑀆𑀘𑀺𑀓𑁆𑀔𑀺. 𑀩𑁆𑀭𑀸𑀳𑁆𑀫𑀡𑁄 𑁋 ‘‘𑀇𑀫𑀲𑁆𑀲 𑀭𑀜𑁆𑀜𑁄 𑀇𑀫𑀺𑀦𑀸 𑀲𑀼𑀧𑀺𑀦𑁂𑀦 𑀯𑀼𑀟𑁆𑀠𑀺 𑀯𑀸 𑀳𑀸𑀦𑀺 𑀯𑀸 𑀦𑀢𑁆𑀣𑀺, 𑀅𑀧𑀺𑀘 𑀔𑁄 𑀧𑀦 𑀬𑀁 𑀇𑀫𑀲𑁆𑀲 𑀕𑁂𑀳𑁂 𑀅𑀢𑁆𑀣𑀺, 𑀢𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀳𑁄𑀢𑀺, 𑀕𑁄𑀢𑀫𑀲𑀸𑀯𑀓𑀸𑀦𑀁 𑀳𑁄𑀢𑀺, 𑀩𑁆𑀭𑀸𑀳𑁆𑀫𑀡𑀸 𑀓𑀺𑀜𑁆𑀘𑀺 𑀦 𑀮𑀪𑀦𑁆𑀢𑀺, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀪𑀺𑀓𑁆𑀔𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺, ‘‘𑀪𑀸𑀭𑀺𑀬𑁄 𑀅𑀬𑀁, 𑀫𑀳𑀸𑀭𑀸𑀚, 𑀲𑀼𑀧𑀺𑀦𑁄 𑀢𑀻𑀲𑀼 𑀚𑀸𑀦𑀻𑀲𑀼 𑀏𑀓𑀸 𑀧𑀜𑁆𑀜𑀸𑀬𑀢𑀺, 𑀭𑀚𑁆𑀚𑀦𑁆𑀢𑀭𑀸𑀬𑁄 𑀯𑀸 𑀪𑀯𑀺𑀲𑁆𑀲𑀢𑀺 𑀚𑀻𑀯𑀺𑀢𑀦𑁆𑀢𑀭𑀸𑀬𑁄 𑀯𑀸, 𑀤𑁂𑀯𑁄 𑀯𑀸 𑀦 𑀯𑀲𑁆𑀲𑀺𑀲𑁆𑀲𑀢𑀻’’𑀢𑀺 𑀆𑀳. 𑀓𑀣𑀁 𑀲𑁄𑀢𑁆𑀣𑀺 𑀪𑀯𑁂𑀬𑁆𑀬 𑀆𑀘𑀭𑀺𑀬𑀸𑀢𑀺? ‘‘𑀫𑀦𑁆𑀢𑁂𑀢𑁆𑀯𑀸 𑀜𑀸𑀢𑀼𑀁 𑀲𑀓𑁆𑀓𑀸, 𑀫𑀳𑀸𑀭𑀸𑀚𑀸𑀢𑀺. 𑀕𑀘𑁆𑀙𑀣 𑀆𑀘𑀭𑀺𑀬𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑁂𑀢𑁆𑀯𑀸 𑀅𑀫𑁆𑀳𑀸𑀓𑀁 𑀲𑁄𑀢𑁆𑀣𑀺𑀁 𑀓𑀭𑁄𑀣𑀸’’𑀢𑀺.

𑀲𑁄 𑀲𑀺𑀯𑀺𑀓𑀲𑀸𑀮𑀸𑀬𑀁 𑀩𑁆𑀭𑀸𑀳𑁆𑀫𑀡𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸, ‘‘𑀯𑀺𑀲𑀼𑀁 𑀯𑀺𑀲𑀼𑀁 𑀕𑀦𑁆𑀢𑁆𑀯𑀸 𑀏𑀯𑀁 𑀯𑀤𑀣𑀸’’𑀢𑀺 𑀢𑀬𑁄 𑀯𑀕𑁆𑀕𑁂 𑀅𑀓𑀸𑀲𑀺. 𑀩𑁆𑀭𑀸𑀳𑁆𑀫𑀡𑀸 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀸𑀦𑀁 𑀲𑀼𑀔𑀲𑁂𑀬𑁆𑀬𑀁 𑀧𑀼𑀘𑁆𑀙𑀺𑀁𑀲𑀼. 𑀭𑀸𑀚𑀸 𑀧𑀼𑀭𑁄𑀳𑀺𑀢𑀲𑁆𑀲 𑀓𑀣𑀺𑀢𑀦𑀺𑀬𑀸𑀫𑁂𑀦𑁂𑀯 𑀓𑀣𑁂𑀢𑁆𑀯𑀸 ‘‘𑀓𑀣𑀁 𑀲𑁄𑀢𑁆𑀣𑀺 𑀪𑀯𑁂𑀬𑁆𑀬𑀸’’𑀢𑀺 𑀧𑀼𑀘𑁆𑀙𑀺. 𑀫𑀳𑀸𑀩𑁆𑀭𑀸𑀳𑁆𑀫𑀡𑀸 𑁋 ‘‘𑀲𑀩𑁆𑀩𑀧𑀜𑁆𑀘𑀲𑀢𑀁 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸 𑀏𑀢𑀲𑁆𑀲 𑀓𑀫𑁆𑀫𑀲𑁆𑀲 𑀲𑁄𑀢𑁆𑀣𑀺 𑀪𑀯𑁂𑀬𑁆𑀬, 𑀏𑀯𑀁, 𑀫𑀳𑀸𑀭𑀸𑀚, 𑀆𑀘𑀭𑀺𑀬𑀸 𑀓𑀣𑁂𑀦𑁆𑀢𑀻’’𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀢𑁂𑀲𑀁 𑀲𑀼𑀢𑁆𑀯𑀸 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀅𑀣 𑀤𑀼𑀢𑀺𑀬𑀯𑀕𑁆𑀕𑀩𑁆𑀭𑀸𑀳𑁆𑀫𑀡𑀸𑀧𑀺 𑀆𑀕𑀦𑁆𑀢𑁆𑀯𑀸 𑀢𑀢𑁆𑀣𑁂𑀯 𑀓𑀣𑁂𑀲𑀼𑀁. 𑀢𑀣𑀸 𑀢𑀢𑀺𑀬𑀯𑀕𑁆𑀕𑀩𑁆𑀭𑀸𑀳𑁆𑀫𑀡𑀸𑀧𑀺. 𑀅𑀣 𑀭𑀸𑀚𑀸 ‘‘𑀬𑀜𑁆𑀜𑀁 𑀓𑀭𑁄𑀦𑁆𑀢𑀽’’𑀢𑀺 𑀆𑀡𑀸𑀧𑁂𑀲𑀺. 𑀢𑀢𑁄 𑀧𑀝𑁆𑀞𑀸𑀬 𑀩𑁆𑀭𑀸𑀳𑁆𑀫𑀡𑀸 𑀉𑀲𑀪𑀸𑀤𑀬𑁄 𑀧𑀸𑀡𑁂 𑀆𑀳𑀭𑀸𑀧𑁂𑀲𑀼𑀁. 𑀦𑀕𑀭𑁂 𑀫𑀳𑀸𑀲𑀤𑁆𑀤𑁄 𑀉𑀤𑀧𑀸𑀤𑀺. 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀫𑀮𑁆𑀮𑀺𑀓𑀸 𑀭𑀸𑀚𑀸𑀦𑀁 𑀢𑀣𑀸𑀕𑀢𑀲𑁆𑀲 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺. 𑀲𑁄 𑀕𑀦𑁆𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀦𑀁 𑀪𑀕𑀯𑀸 𑁋 ‘‘𑀳𑀦𑁆𑀤 𑀓𑀼𑀢𑁄 𑀦𑀼 𑀢𑁆𑀯𑀁, 𑀫𑀳𑀸𑀭𑀸𑀚, 𑀆𑀕𑀘𑁆𑀙𑀲𑀺 𑀤𑀺𑀯𑀸𑀤𑀺𑀯𑀲𑁆𑀲𑀸’’𑀢𑀺 𑀆𑀳. 𑀭𑀸𑀚𑀸 𑁋 ‘‘𑀅𑀚𑁆𑀚 𑀫𑁂, 𑀪𑀦𑁆𑀢𑁂, 𑀲𑀼𑀧𑀺𑀦𑀓𑁂 𑀘𑀢𑁆𑀢𑀸𑀭𑁄 𑀲𑀤𑁆𑀤𑀸 𑀲𑀼𑀢𑀸, 𑀲𑁄𑀳𑀁 𑀩𑁆𑀭𑀸𑀳𑁆𑀫𑀡𑁂 𑀧𑀼𑀘𑁆𑀙𑀺𑀁. 𑀩𑁆𑀭𑀸𑀳𑁆𑀫𑀡𑀸 ‘𑀪𑀸𑀭𑀺𑀬𑁄, 𑀫𑀳𑀸𑀭𑀸𑀚, 𑀲𑀼𑀧𑀺𑀦𑁄, 𑀲𑀩𑁆𑀩𑀧𑀜𑁆𑀘𑀲𑀢𑀁 𑀬𑀜𑁆𑀜𑀁 𑀬𑀚𑀺𑀢𑁆𑀯𑀸 𑀧𑀝𑀺𑀓𑀫𑁆𑀫𑀁 𑀓𑀭𑁄𑀫𑀸𑀢𑀺 𑀆𑀭𑀤𑁆𑀥𑀸’’’𑀢𑀺 𑀆𑀳. 𑀓𑀺𑀦𑁆𑀢𑀺 𑀢𑁂, 𑀫𑀳𑀸𑀭𑀸𑀚, 𑀲𑀤𑁆𑀤𑀸 𑀲𑀼𑀢𑀸𑀢𑀺. 𑀲𑁄 𑀬𑀣𑀸𑀲𑀼𑀢𑀁 𑀆𑀭𑁄𑀘𑁂𑀲𑀺. 𑀅𑀣 𑀦𑀁 𑀪𑀕𑀯𑀸 𑀆𑀳 𑁋 𑀧𑀼𑀩𑁆𑀩𑁂, 𑀫𑀳𑀸𑀭𑀸𑀚, 𑀇𑀫𑀲𑁆𑀫𑀺𑀁𑀬𑁂𑀯 𑀦𑀕𑀭𑁂 𑀘𑀢𑁆𑀢𑀸𑀭𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑀸 𑀧𑀭𑀤𑀸𑀭𑀺𑀓𑀸 𑀳𑀼𑀢𑁆𑀯𑀸 𑀦𑀦𑁆𑀤𑁄𑀧𑀦𑀦𑁆𑀤𑀸𑀬 𑀮𑁄𑀳𑀓𑀼𑀫𑁆𑀪𑀺𑀬𑀸 𑀦𑀺𑀩𑁆𑀩𑀢𑁆𑀢𑀸 𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀫𑀢𑁆𑀣𑀓𑁂 𑀉𑀕𑁆𑀕𑀘𑁆𑀙𑀺𑀁𑀲𑀼.

𑀢𑀢𑁆𑀣 𑀏𑀓𑁄 𑁋

‘‘𑀲𑀝𑁆𑀞𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺, 𑀧𑀭𑀺𑀧𑀼𑀡𑁆𑀡𑀸𑀦𑀺 𑀲𑀩𑁆𑀩𑀲𑁄;

𑀦𑀺𑀭𑀬𑁂 𑀧𑀘𑁆𑀘𑀫𑀸𑀦𑀸𑀦𑀁, 𑀓𑀤𑀸 𑀅𑀦𑁆𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺.(𑀧𑁂. 𑀯. 𑁮𑁦𑁨; 𑀚𑀸. 𑁧.𑁪.𑁫𑁪) 𑁋

𑀇𑀫𑀁 𑀕𑀸𑀣𑀁 𑀯𑀢𑁆𑀣𑀼𑀓𑀸𑀫𑁄 𑀅𑀳𑁄𑀲𑀺. 𑀤𑀼𑀢𑀺𑀬𑁄 𑁋

‘‘𑀲𑁄𑀳𑀁 𑀦𑀽𑀦 𑀇𑀢𑁄 𑀕𑀦𑁆𑀢𑁆𑀯𑀸, 𑀬𑁄𑀦𑀺𑀁 𑀮𑀤𑁆𑀥𑀸𑀦 𑀫𑀸𑀦𑀼𑀲𑀺𑀁;

𑀯𑀤𑀜𑁆𑀜𑀽 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀓𑀸𑀳𑀸𑀫𑀺 𑀓𑀼𑀲𑀮𑀁 𑀩𑀳𑀼’’𑀦𑁆𑀢𑀺. (𑀧𑁂. 𑀯. 𑁮𑁦𑁫; 𑀚𑀸. 𑁧.𑁪.𑁫𑁬) 𑁋

𑀇𑀫𑀁 𑀕𑀸𑀣𑀁 𑀯𑀢𑁆𑀣𑀼𑀓𑀸𑀫𑁄 𑀅𑀳𑁄𑀲𑀺. 𑀢𑀢𑀺𑀬𑁄 𑁋

‘‘𑀦𑀢𑁆𑀣𑀺 𑀅𑀦𑁆𑀢𑁄 𑀓𑀼𑀢𑁄 𑀅𑀦𑁆𑀢𑁄, 𑀦 𑀅𑀦𑁆𑀢𑁄 𑀧𑀝𑀺𑀤𑀺𑀲𑁆𑀲𑀢𑀺;

𑀢𑀤𑀸 𑀳𑀺 𑀧𑀓𑀢𑀁 𑀧𑀸𑀧𑀁, 𑀫𑀫 𑀢𑀼𑀬𑁆𑀳𑀜𑁆𑀘 𑀫𑀸𑀭𑀺𑀲𑀸’’𑀢𑀺. (𑀧𑁂. 𑀯. 𑁮𑁦𑁩; 𑀚𑀸. 𑁧.𑁪.𑁫𑁫) 𑁋

𑀇𑀫𑀁 𑀕𑀸𑀣𑀁 𑀯𑀢𑁆𑀣𑀼𑀓𑀸𑀫𑁄 𑀅𑀳𑁄𑀲𑀺. 𑀘𑀢𑀼𑀢𑁆𑀣𑁄 𑁋

‘‘𑀤𑀼𑀚𑁆𑀚𑀻𑀯𑀺𑀢𑀫𑀚𑀻𑀯𑀺𑀫𑁆𑀳𑀸, 𑀬𑁂 𑀲𑀦𑁆𑀢𑁂 𑀦 𑀤𑀤𑀫𑁆𑀳𑀲𑁂;

𑀯𑀺𑀚𑁆𑀚𑀫𑀸𑀦𑁂𑀲𑀼 𑀪𑁄𑀕𑁂𑀲𑀼, 𑀤𑀻𑀧𑀁 𑀦𑀸𑀓𑀫𑁆𑀳 𑀅𑀢𑁆𑀢𑀦𑁄’’𑀢𑀺. (𑀧𑁂. 𑀯. 𑁮𑁦𑁪; 𑀚𑀸. 𑁧.𑁪.𑁫𑁩) 𑁋

𑀇𑀫𑀁. 𑀢𑁂 𑀇𑀫𑀸 𑀕𑀸𑀣𑀸 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀏𑀓𑁂𑀓𑀁 𑀅𑀓𑁆𑀔𑀭𑀁 𑀯𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀫𑀼𑀕𑁆𑀕𑀸. 𑀇𑀢𑀺, 𑀫𑀳𑀸𑀭𑀸𑀚, 𑀢𑁂 𑀦𑁂𑀭𑀬𑀺𑀓𑀲𑀢𑁆𑀢𑀸 𑀬𑀣𑀸𑀓𑀫𑁆𑀫𑁂𑀦 𑀯𑀺𑀭𑀯𑀺𑀁𑀲𑀼. 𑀢𑀲𑁆𑀲 𑀲𑀤𑁆𑀤𑀲𑁆𑀲 𑀲𑀼𑀢𑀧𑀘𑁆𑀘𑀬𑀸 𑀢𑀼𑀬𑁆𑀳𑀁 𑀳𑀸𑀦𑀺 𑀯𑀸 𑀯𑀼𑀟𑁆𑀠𑀺 𑀯𑀸 𑀦𑀢𑁆𑀣𑀺. 𑀏𑀢𑁆𑀢𑀓𑀸𑀦𑀁 𑀧𑀦 𑀧𑀲𑀽𑀦𑀁 𑀖𑀸𑀢𑀦𑀓𑀫𑁆𑀫𑀁 𑀦𑀸𑀫 𑀪𑀸𑀭𑀺𑀬𑀦𑁆𑀢𑀺 𑀦𑀺𑀭𑀬𑀪𑀬𑁂𑀦 𑀢𑀚𑁆𑀚𑁂𑀢𑁆𑀯𑀸 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀭𑀸𑀚𑀸 𑀤𑀲𑀩𑀮𑁂 𑀧𑀲𑀻𑀤𑀺𑀢𑁆𑀯𑀸, ‘‘𑀫𑀼𑀜𑁆𑀘𑀸𑀫𑀺, 𑀦𑁂𑀲𑀁 𑀚𑀻𑀯𑀺𑀢𑀁 𑀤𑀤𑀸𑀫𑀺, 𑀳𑀭𑀺𑀢𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀔𑀸𑀤𑀦𑁆𑀢𑀼, 𑀲𑀻𑀢𑀮𑀸𑀦𑀺 𑀘 𑀧𑀸𑀦𑀻𑀬𑀸𑀦𑀺 𑀧𑀺𑀯𑀦𑁆𑀢𑀼, 𑀲𑀻𑀢𑁄 𑀘 𑀦𑁂𑀲𑀁 𑀯𑀸𑀢𑁄 𑀉𑀧𑀯𑀸𑀬𑀢𑀽’’𑀢𑀺 𑀯𑀢𑁆𑀯𑀸, ‘‘𑀕𑀘𑁆𑀙𑀣 𑀳𑀸𑀭𑁂𑀣𑀸’’𑀢𑀺 𑀫𑀦𑀼𑀲𑁆𑀲𑁂 𑀆𑀡𑀸𑀧𑁂𑀲𑀺. 𑀢𑁂 𑀕𑀦𑁆𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑁂 𑀧𑀮𑀸𑀧𑁂𑀢𑁆𑀯𑀸 𑀢𑀁 𑀧𑀸𑀡𑀲𑀗𑁆𑀖𑀁 𑀩𑀦𑁆𑀥𑀦𑀢𑁄 𑀫𑁄𑀘𑁂𑀢𑁆𑀯𑀸 𑀦𑀕𑀭𑁂 𑀥𑀫𑁆𑀫𑀪𑁂𑀭𑀺𑀁 𑀘𑀭𑀸𑀧𑁂𑀲𑀼𑀁.

𑀅𑀣 𑀭𑀸𑀚𑀸 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑁄 𑀆𑀳 𑁋 ‘‘𑀪𑀦𑁆𑀢𑁂, 𑀏𑀓𑀭𑀢𑁆𑀢𑀺 𑀦𑀸𑀫 𑀢𑀺𑀬𑀸𑀫𑀸 𑀳𑁄𑀢𑀺, 𑀫𑀬𑁆𑀳𑀁 𑀧𑀦 𑀅𑀚𑁆𑀚 𑀤𑁆𑀯𑁂 𑀭𑀢𑁆𑀢𑀺𑀬𑁄 𑀏𑀓𑀢𑁄 𑀖𑀝𑀺𑀢𑀸 𑀯𑀺𑀬 𑀅𑀳𑁂𑀲𑀼’’𑀦𑁆𑀢𑀺. 𑀲𑁄𑀧𑀺 𑀧𑀼𑀭𑀺𑀲𑁄 𑀢𑀢𑁆𑀣𑁂𑀯 𑀦𑀺𑀲𑀺𑀦𑁆𑀦𑁄 𑀆𑀳 𑁋 ‘‘𑀪𑀦𑁆𑀢𑁂, 𑀬𑁄𑀚𑀦𑀁 𑀦𑀸𑀫 𑀘𑀢𑀼𑀕𑀸𑀯𑀼𑀢𑀁 𑀳𑁄𑀢𑀺, 𑀫𑀬𑁆𑀳𑀁 𑀧𑀦 𑀅𑀚𑁆𑀚 𑀤𑁆𑀯𑁂 𑀬𑁄𑀚𑀦𑀸𑀦𑀺 𑀏𑀓𑀢𑁄 𑀓𑀢𑀸𑀦𑀺 𑀯𑀺𑀬 𑀅𑀳𑁂𑀲𑀼’’𑀦𑁆𑀢𑀺. 𑀅𑀣 𑀪𑀕𑀯𑀸 𑁋 ‘‘𑀚𑀸𑀕𑀭𑀲𑁆𑀲 𑀢𑀸𑀯 𑀭𑀢𑁆𑀢𑀺𑀬𑀸 𑀤𑀻𑀖𑀪𑀸𑀯𑁄 𑀧𑀸𑀓𑀝𑁄, 𑀲𑀦𑁆𑀢𑀲𑁆𑀲 𑀬𑁄𑀚𑀦𑀲𑁆𑀲 𑀤𑀻𑀖𑀪𑀸𑀯𑁄 𑀧𑀸𑀓𑀝𑁄, 𑀯𑀝𑁆𑀝𑀧𑀢𑀺𑀢𑀲𑁆𑀲 𑀧𑀦 𑀩𑀸𑀮𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀦𑀫𑀢𑀕𑁆𑀕𑀲𑀁𑀲𑀸𑀭𑀯𑀝𑁆𑀝𑀁 𑀏𑀓𑀦𑁆𑀢𑀤𑀻𑀖𑀫𑁂𑀯𑀸’’𑀢𑀺 𑀭𑀸𑀚𑀸𑀦𑀜𑁆𑀘 𑀢𑀜𑁆𑀘 𑀧𑀼𑀭𑀺𑀲𑀁 𑀦𑁂𑀭𑀬𑀺𑀓𑀲𑀢𑁆𑀢𑁂 𑀘 𑀆𑀭𑀩𑁆𑀪 𑀥𑀫𑁆𑀫𑀧𑀤𑁂 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺 𑁋

‘‘𑀤𑀻𑀖𑀸 𑀚𑀸𑀕𑀭𑀢𑁄 𑀭𑀢𑁆𑀢𑀺, 𑀤𑀻𑀖𑀁 𑀲𑀦𑁆𑀢𑀲𑁆𑀲 𑀬𑁄𑀚𑀦𑀁;

𑀤𑀻𑀖𑁄 𑀩𑀸𑀮𑀸𑀦𑀁 𑀲𑀁𑀲𑀸𑀭𑁄, 𑀲𑀤𑁆𑀥𑀫𑁆𑀫𑀁 𑀅𑀯𑀺𑀚𑀸𑀦𑀢’’𑀦𑁆𑀢𑀺. (𑀥. 𑀧. 𑁬𑁦);

𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀲𑁄 𑀇𑀢𑁆𑀣𑀺𑀲𑀸𑀫𑀺𑀓𑁄 𑀧𑀼𑀭𑀺𑀲𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀏𑀢𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸𑀢𑀺 𑀏𑀢𑀁 𑀓𑀸𑀭𑀡𑀁 𑀚𑀸𑀦𑀺𑀢𑁆𑀯𑀸.

𑀅𑀲𑁆𑀲𑀫𑁂𑀥𑀦𑁆𑀢𑀺𑀆𑀤𑀻𑀲𑀼 𑁋 𑀧𑁄𑀭𑀸𑀡𑀭𑀸𑀚𑀓𑀸𑀮𑁂 𑀓𑀺𑀭 𑀲𑀲𑁆𑀲𑀫𑁂𑀥𑀁 𑀧𑀼𑀭𑀺𑀲𑀫𑁂𑀥𑀁 𑀲𑀫𑁆𑀫𑀸𑀧𑀸𑀲𑀁 𑀯𑀸𑀘𑀸𑀧𑁂𑀬𑁆𑀬𑀦𑁆𑀢𑀺 𑀘𑀢𑁆𑀢𑀸𑀭𑀺 𑀲𑀗𑁆𑀕𑀳𑀯𑀢𑁆𑀣𑀽𑀦𑀺 𑀅𑀳𑁂𑀲𑀼𑀁, 𑀬𑁂𑀳𑀺 𑀭𑀸𑀚𑀸𑀦𑁄 𑀮𑁄𑀓𑀁 𑀲𑀗𑁆𑀕𑀡𑁆𑀳𑀺𑀁𑀲𑀼. 𑀢𑀢𑁆𑀣 𑀦𑀺𑀧𑁆𑀨𑀦𑁆𑀦𑀲𑀲𑁆𑀲𑀢𑁄 𑀤𑀲𑀫𑀪𑀸𑀕𑀕𑁆𑀕𑀳𑀡𑀁 𑀲𑀲𑁆𑀲𑀫𑁂𑀥𑀁 𑀦𑀸𑀫, 𑀲𑀲𑁆𑀲𑀲𑀫𑁆𑀧𑀸𑀤𑀦𑁂 𑀫𑁂𑀥𑀸𑀯𑀺𑀢𑀸𑀢𑀺 𑀅𑀢𑁆𑀣𑁄. 𑀫𑀳𑀸𑀬𑁄𑀥𑀸𑀦𑀁 𑀙𑀫𑀸𑀲𑀺𑀓𑀁 𑀪𑀢𑁆𑀢-𑀯𑁂𑀢𑀦𑀸𑀦𑀼𑀧𑁆𑀧𑀤𑀸𑀦𑀁 𑀧𑀼𑀭𑀺𑀲𑀫𑁂𑀥𑀁 𑀦𑀸𑀫, 𑀧𑀼𑀭𑀺𑀲𑀲𑀗𑁆𑀕𑀡𑁆𑀳𑀦𑁂 𑀫𑁂𑀥𑀸𑀯𑀺𑀢𑀸𑀢𑀺 𑀅𑀢𑁆𑀣𑁄. 𑀤𑀮𑀺𑀤𑁆𑀤𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀮𑁂𑀔𑀁 𑀕𑀳𑁂𑀢𑁆𑀯𑀸 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀯𑀺𑀦𑀸𑀯 𑀯𑀟𑁆𑀠𑀺𑀬𑀸 𑀲𑀳𑀲𑁆𑀲𑀤𑁆𑀯𑀺𑀲𑀳𑀲𑁆𑀲𑀫𑀢𑁆𑀢𑀥𑀦𑀸𑀦𑀼𑀧𑁆𑀧𑀤𑀸𑀦𑀁 𑀲𑀫𑁆𑀫𑀸𑀧𑀸𑀲𑀁 𑀦𑀸𑀫. 𑀢𑀜𑁆𑀳𑀺 𑀲𑀫𑁆𑀫𑀸 𑀫𑀦𑀼𑀲𑁆𑀲𑁂 𑀧𑀸𑀲𑁂𑀢𑀺, 𑀳𑀤𑀬𑁂 𑀩𑀦𑁆𑀥𑀺𑀢𑁆𑀯𑀸 𑀯𑀺𑀬 𑀞𑀧𑁂𑀢𑀺, 𑀢𑀲𑁆𑀫𑀸 𑀲𑀫𑁆𑀫𑀸𑀧𑀸𑀲𑀦𑁆𑀢𑀺 𑀯𑀼𑀘𑁆𑀘𑀢𑀺. ‘‘𑀢𑀸𑀢 𑀫𑀸𑀢𑀼𑀮𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀡𑁆𑀳𑀯𑀸𑀘𑀸𑀪𑀡𑀦𑀁 𑀯𑀸𑀘𑀸𑀧𑁂𑀬𑁆𑀬𑀁 𑀦𑀸𑀫, 𑀧𑀺𑀬𑀯𑀸𑀘𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀘𑀢𑀽𑀳𑀺 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀲𑀗𑁆𑀕𑀳𑀺𑀢𑀁 𑀭𑀝𑁆𑀞𑀁 𑀇𑀤𑁆𑀥𑀜𑁆𑀘𑁂𑀯 𑀳𑁄𑀢𑀺 𑀨𑀻𑀢𑀜𑁆𑀘 𑀧𑀳𑀽𑀢𑀅𑀦𑁆𑀦𑀧𑀸𑀦𑀁 𑀔𑁂𑀫𑀁 𑀦𑀺𑀭𑀩𑁆𑀩𑀼𑀤𑀁. 𑀫𑀦𑀼𑀲𑁆𑀲𑀸 𑀫𑀼𑀤𑀸 𑀫𑁄𑀤𑀫𑀸𑀦𑀸 𑀉𑀭𑁂 𑀧𑀼𑀢𑁆𑀢𑁂 𑀦𑀘𑁆𑀘𑁂𑀦𑁆𑀢𑀸 𑀅𑀧𑀸𑀭𑀼𑀢𑀖𑀭𑀤𑁆𑀯𑀸𑀭𑀸 𑀯𑀺𑀳𑀭𑀦𑁆𑀢𑀺. 𑀇𑀤𑀁 𑀖𑀭𑀤𑁆𑀯𑀸𑀭𑁂𑀲𑀼 𑀅𑀕𑁆𑀕𑀴𑀸𑀦𑀁 𑀅𑀪𑀸𑀯𑀢𑁄 𑀦𑀺𑀭𑀕𑁆𑀕𑀴𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀧𑁄𑀭𑀸𑀡𑀺𑀓𑀸 𑀧𑀯𑁂𑀡𑀻.

𑀅𑀧𑀭𑀪𑀸𑀕𑁂 𑀧𑀦 𑀑𑀓𑁆𑀓𑀸𑀓𑀭𑀸𑀚𑀓𑀸𑀮𑁂 𑀩𑁆𑀭𑀸𑀳𑁆𑀫𑀡𑀸 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀲𑀗𑁆𑀕𑀳𑀯𑀢𑁆𑀣𑀽𑀦𑀺 𑀇𑀫𑀜𑁆𑀘 𑀭𑀝𑁆𑀞𑀲𑀫𑁆𑀧𑀢𑁆𑀢𑀺𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀉𑀤𑁆𑀥𑀁𑀫𑀽𑀮𑀓𑀁 𑀓𑀢𑁆𑀯𑀸 𑀅𑀲𑁆𑀲𑀫𑁂𑀥𑀁 𑀧𑀼𑀭𑀺𑀲𑀫𑁂𑀥𑀦𑁆𑀢𑀺 𑀆𑀤𑀺𑀓𑁂 𑀧𑀜𑁆𑀘 𑀬𑀜𑁆𑀜𑁂 𑀦𑀸𑀫 𑀅𑀓𑀁𑀲𑀼. 𑀢𑁂𑀲𑀼 𑀅𑀲𑁆𑀲𑀫𑁂𑀢𑁆𑀣 𑀫𑁂𑀥𑀦𑁆𑀢𑀺 𑀯𑀥𑀦𑁆𑀢𑀻𑀢𑀺 𑀅𑀲𑁆𑀲𑀫𑁂𑀥𑁄. 𑀤𑁆𑀯𑀻𑀳𑀺 𑀧𑀭𑀺𑀬𑀜𑁆𑀜𑁂𑀳𑀺 𑀬𑀚𑀺𑀢𑀩𑁆𑀩𑀲𑁆𑀲 𑀏𑀓𑀯𑀻𑀲𑀢𑀺𑀬𑀽𑀧𑀲𑁆𑀲 𑀏𑀓𑀲𑁆𑀫𑀺𑀁 𑀫𑀚𑁆𑀛𑀺𑀫𑀤𑀺𑀯𑀲𑁂𑀬𑁂𑀯 𑀲𑀢𑁆𑀢𑀦𑀯𑀼𑀢𑀺𑀧𑀜𑁆𑀘𑀧𑀲𑀼𑀲𑀢𑀖𑀸𑀢𑀪𑀺𑀁𑀲𑀦𑀲𑁆𑀲 𑀞𑀧𑁂𑀢𑁆𑀯𑀸 𑀪𑀽𑀫𑀺𑀜𑁆𑀘 𑀧𑀼𑀭𑀺𑀲𑁂 𑀘 𑀅𑀯𑀲𑁂𑀲𑀲𑀩𑁆𑀩𑀯𑀺𑀪𑀯𑀤𑀓𑁆𑀔𑀺𑀡𑀲𑁆𑀲 𑀬𑀜𑁆𑀜𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀼𑀭𑀺𑀲𑀫𑁂𑀢𑁆𑀣 𑀫𑁂𑀥𑀦𑁆𑀢𑀻𑀢𑀺 𑀧𑀼𑀭𑀺𑀲𑀫𑁂𑀥𑁄. 𑀘𑀢𑀽𑀳𑀺 𑀧𑀭𑀺𑀬𑀜𑁆𑀜𑁂𑀳𑀺 𑀬𑀚𑀺𑀢𑀩𑁆𑀩𑀲𑁆𑀲 𑀲𑀤𑁆𑀥𑀺𑀁 𑀪𑀽𑀫𑀺𑀬𑀸 𑀅𑀲𑁆𑀲𑀫𑁂𑀥𑁂 𑀯𑀼𑀢𑁆𑀢𑀯𑀺𑀪𑀯𑀤𑀓𑁆𑀔𑀺𑀡𑀲𑁆𑀲 𑀬𑀜𑁆𑀜𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀫𑁆𑀫𑀫𑁂𑀢𑁆𑀣 𑀧𑀸𑀲𑁂𑀦𑁆𑀢𑀻𑀢𑀺 𑀲𑀫𑁆𑀫𑀸𑀧𑀸𑀲𑁄. 𑀤𑀺𑀯𑀲𑁂 𑀤𑀺𑀯𑀲𑁂 𑀲𑀫𑁆𑀫𑀁 𑀔𑀺𑀧𑀺𑀢𑁆𑀯𑀸 𑀢𑀲𑁆𑀲 𑀧𑀢𑀺𑀢𑁄𑀓𑀸𑀲𑁂 𑀯𑁂𑀤𑀺𑀁 𑀓𑀢𑁆𑀯𑀸 𑀲𑀁𑀳𑀸𑀭𑀺𑀫𑁂𑀳𑀺 𑀬𑀽𑀧𑀸𑀤𑀻𑀳𑀺 𑀲𑀭𑀲𑁆𑀲𑀢𑀺𑀦𑀤𑀺𑀬𑀸 𑀦𑀺𑀫𑀼𑀕𑁆𑀕𑁄𑀓𑀸𑀲𑀢𑁄 𑀧𑀪𑀼𑀢𑀺 𑀧𑀝𑀺𑀮𑁄𑀫𑀁 𑀕𑀘𑁆𑀙𑀦𑁆𑀢𑁂𑀦 𑀬𑀚𑀺𑀢𑀩𑁆𑀩𑀲𑁆𑀲 𑀲𑀢𑁆𑀭𑀬𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀸𑀚𑀫𑁂𑀢𑁆𑀣 𑀧𑀺𑀯𑀦𑁆𑀢𑀻𑀢𑀺 𑀯𑀸𑀚𑀧𑁂𑀬𑁆𑀬𑁄. 𑀏𑀓𑁂𑀦 𑀧𑀭𑀺𑀬𑀜𑁆𑀜𑁂𑀦 𑀲𑀢𑁆𑀢𑀭𑀲𑀳𑀺 𑀧𑀲𑀽𑀳𑀺 𑀬𑀚𑀺𑀢𑀩𑁆𑀩𑀲𑁆𑀲 𑀩𑁂𑀮𑀼𑀯𑀬𑀽𑀧𑀲𑁆𑀲 𑀲𑀢𑁆𑀢𑀭𑀲𑀓𑀤𑀓𑁆𑀔𑀺𑀡𑀲𑁆𑀲 𑀬𑀜𑁆𑀜𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀦𑀢𑁆𑀣𑀺 𑀏𑀢𑁆𑀣 𑀅𑀕𑁆𑀕𑀴𑀸𑀢𑀺 𑀦𑀺𑀭𑀕𑁆𑀕𑀴𑁄. 𑀦𑀯𑀳𑀺 𑀧𑀭𑀺𑀬𑀜𑁆𑀜𑁂𑀳𑀺 𑀬𑀚𑀺𑀢𑀩𑁆𑀩𑀲𑁆𑀲 𑀲𑀤𑁆𑀥𑀺𑀁 𑀪𑀽𑀫𑀺𑀬𑀸 𑀘 𑀧𑀼𑀭𑀺𑀲𑁂𑀳𑀺 𑀘 𑀅𑀲𑁆𑀲𑀫𑁂𑀥𑁂 𑀯𑀼𑀢𑁆𑀢𑀯𑀺𑀪𑀯𑀤𑀓𑁆𑀔𑀺𑀡𑀲𑁆𑀲 𑀲𑀩𑁆𑀩𑀫𑁂𑀥𑀧𑀭𑀺𑀬𑀸𑀬𑀦𑀸𑀫𑀲𑁆𑀲 𑀅𑀲𑁆𑀲𑀫𑁂𑀥𑀯𑀺𑀓𑀧𑁆𑀧𑀲𑁆𑀲𑁂𑀯𑁂𑀢𑀁 𑀅𑀥𑀺𑀯𑀘𑀦𑀁. 𑀫𑀳𑀸𑀭𑀫𑁆𑀪𑀸𑀢𑀺 𑀫𑀳𑀸𑀓𑀺𑀘𑁆𑀘𑀸 𑀫𑀳𑀸𑀓𑀭𑀡𑀻𑀬𑀸. 𑀲𑀫𑁆𑀫𑀕𑁆𑀕𑀢𑀸𑀢𑀺 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀸 𑀩𑀼𑀤𑁆𑀥𑀸𑀤𑀬𑁄. 𑀦𑀺𑀭𑀸𑀭𑀫𑁆𑀪𑀸𑀢𑀺 𑀅𑀧𑁆𑀧𑀢𑁆𑀣𑀸 𑀅𑀧𑁆𑀧𑀓𑀺𑀘𑁆𑀘𑀸. 𑀬𑀚𑀦𑁆𑀢𑀺 𑀅𑀦𑀼𑀓𑀼𑀮𑀦𑁆𑀢𑀺 𑀅𑀦𑀼𑀓𑀼𑀮𑁂𑀲𑀼 𑀬𑀚𑀦𑁆𑀢𑀺, 𑀬𑀁 𑀦𑀺𑀘𑁆𑀘𑀪𑀢𑁆𑀢𑀸𑀤𑀺 𑀧𑀼𑀩𑁆𑀩𑀧𑀼𑀭𑀺𑀲𑁂𑀳𑀺 𑀧𑀝𑁆𑀞𑀧𑀺𑀢𑀁, 𑀢𑀁 𑀅𑀧𑀭𑀸𑀧𑀭𑀁 𑀅𑀦𑀼𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀫𑀦𑀼𑀲𑁆𑀲𑀸 𑀤𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦𑀯𑀫𑀁.

𑁧𑁦. 𑀩𑀦𑁆𑀥𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁧. 𑀤𑀲𑀫𑁂 𑀇𑀥, 𑀪𑀦𑁆𑀢𑁂, 𑀭𑀜𑁆𑀜𑀸𑀢𑀺 𑀇𑀤𑀁 𑀢𑁂 𑀪𑀺𑀓𑁆𑀔𑀽 𑀢𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀲𑀼𑀓𑀢𑀓𑀸𑀭𑀡𑀁 𑀆𑀭𑁄𑀘𑁂𑀦𑁆𑀢𑀸 𑀆𑀭𑁄𑀘𑁂𑀲𑀼𑀁. 𑀭𑀜𑁆𑀜𑁄 𑀓𑀺𑀭 𑀲𑀓𑁆𑀓𑁂𑀦 𑀓𑀼𑀲𑀭𑀸𑀚𑀲𑁆𑀲 𑀤𑀺𑀦𑁆𑀦𑁄 𑀅𑀝𑁆𑀞𑀯𑀗𑁆𑀓𑁄 𑀫𑀡𑀺 𑀧𑀯𑁂𑀡𑀺𑀬𑀸 𑀆𑀕𑀢𑁄. 𑀭𑀸𑀚𑀸 𑀅𑀮𑀗𑁆𑀓𑀭𑀡𑀓𑀸𑀮𑁂 𑀢𑀁 𑀫𑀡𑀺𑀁 𑀆𑀳𑀭𑀣𑀸𑀢𑀺 𑀆𑀳. 𑀫𑀦𑀼𑀲𑁆𑀲𑀸 ‘‘𑀞𑀧𑀺𑀢𑀝𑁆𑀞𑀸𑀦𑁂 𑀦 𑀧𑀲𑁆𑀲𑀸𑀫𑀸’’𑀢𑀺 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 𑀅𑀦𑁆𑀢𑁄𑀖𑀭𑀘𑀸𑀭𑀺𑀦𑁄 ‘‘𑀫𑀡𑀺𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀤𑁂𑀣𑀸’’𑀢𑀺 𑀩𑀦𑁆𑀥𑀸𑀧𑁂𑀲𑀺. 𑀆𑀦𑀦𑁆𑀤𑀢𑁆𑀣𑁂𑀭𑁄 𑀢𑁂 𑀤𑀺𑀲𑁆𑀯𑀸 𑀫𑀡𑀺𑀧𑀝𑀺𑀲𑀸𑀫𑀓𑀸𑀦𑀁 𑀏𑀓𑀁 𑀉𑀧𑀸𑀬𑀁 𑀆𑀘𑀺𑀓𑁆𑀔𑀺. 𑀢𑁂 𑀭𑀜𑁆𑀜𑁄 𑀆𑀭𑁄𑀘𑁂𑀲𑀼𑀁. 𑀭𑀸𑀚𑀸 ‘‘𑀧𑀡𑁆𑀟𑀺𑀢𑁄 𑀣𑁂𑀭𑁄, 𑀣𑁂𑀭𑀲𑁆𑀲 𑀯𑀘𑀦𑀁 𑀓𑀭𑁄𑀣𑀸’’𑀢𑀺. 𑀧𑀝𑀺𑀲𑀸𑀫𑀓𑀫𑀦𑀼𑀲𑁆𑀲𑀸 𑀭𑀸𑀚𑀗𑁆𑀕𑀡𑁂 𑀉𑀤𑀓𑀘𑀸𑀝𑀺𑀁 𑀞𑀧𑁂𑀢𑁆𑀯𑀸 𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀢𑁂 𑀫𑀦𑀼𑀲𑁆𑀲𑁂 𑀆𑀳𑀁𑀲𑀼 𑁋 ‘‘𑀲𑀸𑀝𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀏𑀢𑁆𑀣 𑀕𑀦𑁆𑀢𑁆𑀯𑀸 𑀳𑀢𑁆𑀣𑀁 𑀑𑀢𑀸𑀭𑁂𑀣𑀸’’𑀢𑀺. 𑀫𑀡𑀺𑀘𑁄𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀭𑀸𑀚𑀪𑀡𑁆𑀟𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀯𑀸 𑀯𑀮𑀜𑁆𑀚𑁂𑀢𑀼𑀁 𑀯𑀸 𑀦 𑀲𑀓𑁆𑀓𑀸’’𑀢𑀺. 𑀲𑁄 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀫𑀡𑀺𑀁 𑀉𑀧𑀓𑀘𑁆𑀙𑀓𑁂 𑀞𑀧𑁂𑀢𑁆𑀯𑀸 𑀲𑀸𑀝𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀆𑀕𑀫𑁆𑀫 𑀉𑀤𑀓𑀘𑀸𑀝𑀺𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀫𑀳𑀸𑀚𑀦𑁂 𑀧𑀝𑀺𑀓𑁆𑀓𑀦𑁆𑀢𑁂 𑀭𑀸𑀚𑀫𑀦𑀼𑀲𑁆𑀲𑀸 𑀘𑀸𑀝𑀺𑀬𑀁 𑀳𑀢𑁆𑀣𑀁 𑀑𑀢𑀸𑀭𑁂𑀢𑁆𑀯𑀸 𑀫𑀡𑀺𑀁 𑀤𑀺𑀲𑁆𑀯𑀸 𑀆𑀳𑀭𑀺𑀢𑁆𑀯𑀸 𑀭𑀜𑁆𑀜𑁄 𑀅𑀤𑀁𑀲𑀼. ‘‘𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀓𑀺𑀭 𑀤𑀲𑁆𑀲𑀺𑀢𑀦𑀬𑁂𑀦 𑀫𑀡𑀺 𑀤𑀺𑀝𑁆𑀞𑁄’’𑀢𑀺 𑀫𑀳𑀸𑀚𑀦𑁄 𑀓𑁄𑀮𑀸𑀳𑀮𑀁 𑀅𑀓𑀸𑀲𑀺. 𑀢𑁂 𑀪𑀺𑀓𑁆𑀔𑀽 𑀢𑀁 𑀓𑀸𑀭𑀡𑀁 𑀢𑀣𑀸𑀕𑀢𑀲𑁆𑀲 𑀆𑀭𑁄𑀘𑁂𑀦𑁆𑀢𑀸 𑀇𑀫𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀼𑀁. 𑀲𑀢𑁆𑀣𑀸 𑁋 ‘‘𑀅𑀦𑀘𑁆𑀙𑀭𑀺𑀬𑀁, 𑀪𑀺𑀓𑁆𑀔𑀯𑁂, 𑀬𑀁 𑀆𑀦𑀦𑁆𑀤𑁄 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀸𑀭𑀼𑀴𑁆𑀳𑀫𑀡𑀺𑀁 𑀆𑀳𑀭𑀸𑀧𑁂𑀬𑁆𑀬, 𑀬𑀢𑁆𑀣 𑀧𑀼𑀩𑁆𑀩𑁂 𑀧𑀡𑁆𑀟𑀺𑀢𑀸 𑀅𑀢𑁆𑀢𑀦𑁄 𑀜𑀸𑀡𑁂 𑀞𑀢𑁆𑀯𑀸 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀁 𑀦𑀺𑀩𑁆𑀩𑀢𑁆𑀢𑀸𑀦𑀁 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀫𑁆𑀧𑀺 𑀳𑀢𑁆𑀣𑀸𑀭𑀼𑀴𑁆𑀳𑀁 𑀪𑀡𑁆𑀟𑀁 𑀆𑀳𑀭𑀸𑀧𑁂𑀢𑁆𑀯𑀸 𑀭𑀜𑁆𑀜𑁄 𑀅𑀤𑀁𑀲𑀽’’𑀢𑀺 𑀯𑀢𑁆𑀯𑀸 𑁋

‘‘𑀉𑀓𑁆𑀓𑀝𑁆𑀞𑁂 𑀲𑀽𑀭𑀫𑀺𑀘𑁆𑀙𑀦𑁆𑀢𑀺, 𑀫𑀦𑁆𑀢𑀻𑀲𑀼 𑀅𑀓𑀼𑀢𑀽𑀳𑀮𑀁;

𑀧𑀺𑀬𑀜𑁆𑀘 𑀅𑀦𑁆𑀦𑀧𑀸𑀦𑀫𑁆𑀳𑀺, 𑀅𑀢𑁆𑀣𑁂 𑀚𑀸𑀢𑁂 𑀘 𑀧𑀡𑁆𑀟𑀺𑀢’’𑀦𑁆𑀢𑀺. (𑀚𑀸. 𑁧.𑁧.𑁯𑁨) 𑁋

𑀫𑀳𑀸𑀲𑀸𑀭𑀚𑀸𑀢𑀓𑀁 𑀓𑀣𑁂𑀲𑀺.

𑀦 𑀢𑀁 𑀤𑀴𑁆𑀳𑀦𑁆𑀢𑀺 𑀢𑀁 𑀩𑀦𑁆𑀥𑀦𑀁 𑀣𑀺𑀭𑀦𑁆𑀢𑀺 𑀦 𑀓𑀣𑁂𑀦𑁆𑀢𑀺. 𑀬𑀤𑀸𑀬𑀲𑀦𑁆𑀢𑀺 𑀬𑀁 𑀆𑀬𑀲𑀸 𑀓𑀢𑀁. 𑀲𑀸𑀭𑀢𑁆𑀢𑀭𑀢𑁆𑀢𑀸𑀢𑀺 𑀲𑀼𑀝𑁆𑀞𑀼 𑀭𑀢𑁆𑀢𑀭𑀢𑁆𑀢𑀸, 𑀲𑀸𑀭𑀢𑁆𑀢𑁂𑀦 𑀯𑀸 𑀭𑀢𑁆𑀢𑀸 𑀲𑀸𑀭𑀢𑁆𑀢𑀭𑀢𑁆𑀢𑀸, 𑀲𑀸𑀭𑀁 𑀇𑀤𑀦𑁆𑀢𑀺 𑀫𑀜𑁆𑀜𑀦𑀸𑀬 𑀭𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀧𑁂𑀓𑁆𑀔𑀸𑀢𑀺 𑀆𑀮𑀬𑁄 𑀦𑀺𑀓𑀦𑁆𑀢𑀺. 𑀆𑀳𑀽𑀢𑀺 𑀓𑀣𑁂𑀦𑁆𑀢𑀺. 𑀑𑀳𑀸𑀭𑀺𑀦𑀦𑁆𑀢𑀺 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀆𑀓𑀟𑁆𑀠𑀦𑀓𑀁. 𑀲𑀺𑀣𑀺𑀮𑀦𑁆𑀢𑀺 𑀦 𑀆𑀬𑀲𑀸𑀤𑀺𑀩𑀦𑁆𑀥𑀦𑀁 𑀯𑀺𑀬 𑀇𑀭𑀺𑀬𑀸𑀧𑀣𑀁 𑀦𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀁. 𑀢𑁂𑀦 𑀳𑀺 𑀩𑀦𑁆𑀥𑀦𑁂𑀦 𑀩𑀤𑁆𑀥𑀸 𑀧𑀭𑀤𑁂𑀲𑀫𑁆𑀧𑀺 𑀕𑀘𑁆𑀙𑀦𑁆𑀢𑀺𑀬𑁂𑀯. 𑀤𑀼𑀧𑁆𑀧𑀫𑀼𑀜𑁆𑀘𑀦𑁆𑀢𑀺 𑀅𑀜𑁆𑀜𑀢𑁆𑀭 𑀮𑁄𑀓𑀼𑀢𑁆𑀢𑀭𑀜𑀸𑀡𑁂𑀦 𑀫𑀼𑀜𑁆𑀘𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀦𑁆𑀢𑀺. 𑀤𑀲𑀫𑀁.

𑀧𑀞𑀫𑁄 𑀯𑀕𑁆𑀕𑁄.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀲𑀢𑁆𑀢𑀚𑀝𑀺𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁨. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀧𑀼𑀩𑁆𑀩𑀸𑀭𑀸𑀫𑁂 𑀫𑀺𑀕𑀸𑀭𑀫𑀸𑀢𑀼𑀧𑀸𑀲𑀸𑀤𑁂𑀢𑀺 𑀧𑀼𑀩𑁆𑀩𑀸𑀭𑀸𑀫𑀲𑀗𑁆𑀔𑀸𑀢𑁂 𑀯𑀺𑀳𑀸𑀭𑁂 𑀫𑀺𑀕𑀸𑀭𑀫𑀸𑀢𑀼𑀬𑀸 𑀧𑀸𑀲𑀸𑀤𑁂. 𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀅𑀢𑀻𑀢𑁂 𑀲𑀢𑀲𑀳𑀲𑁆𑀲𑀓𑀧𑁆𑀧𑀫𑀢𑁆𑀣𑀓𑁂 𑀏𑀓𑀸 𑀉𑀧𑀸𑀲𑀺𑀓𑀸 𑀧𑀤𑀼𑀫𑀼𑀢𑁆𑀢𑀭𑀁 𑀪𑀕𑀯𑀦𑁆𑀢𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀢𑀲𑀳𑀲𑁆𑀲𑀤𑀸𑀦𑀁 𑀤𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑁋 ‘‘𑀅𑀦𑀸𑀕𑀢𑁂 𑀢𑀼𑀫𑁆𑀳𑀸𑀤𑀺𑀲𑀲𑁆𑀲 𑀩𑀼𑀤𑁆𑀥𑀲𑁆𑀲 𑀅𑀕𑁆𑀕𑀼𑀧𑀝𑁆𑀞𑀸𑀬𑀺𑀓𑀸 𑀳𑁄𑀫𑀻’’𑀢𑀺 𑀧𑀢𑁆𑀣𑀦𑀁 𑀅𑀓𑀸𑀲𑀺. 𑀲𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀁𑀲𑀭𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀪𑀕𑀯𑀢𑁄 𑀓𑀸𑀮𑁂 𑀪𑀤𑁆𑀤𑀺𑀬𑀦𑀕𑀭𑁂 𑀫𑁂𑀡𑁆𑀟𑀓𑀧𑀼𑀢𑁆𑀢𑀲𑁆𑀲 𑀥𑀦𑀜𑁆𑀘𑀬𑀲𑁂𑀝𑁆𑀞𑀺𑀦𑁄 𑀕𑁂𑀳𑁂 𑀲𑀼𑀫𑀦𑀤𑁂𑀯𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺. 𑀚𑀸𑀢𑀓𑀸𑀮𑁂 𑀘𑀲𑁆𑀲𑀸 𑀯𑀺𑀲𑀸𑀔𑀸𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑀸 𑀬𑀤𑀸 𑀪𑀕𑀯𑀸 𑀪𑀤𑁆𑀤𑀺𑀬𑀦𑀕𑀭𑀁 𑀅𑀕𑀫𑀸𑀲𑀺, 𑀢𑀤𑀸 𑀧𑀜𑁆𑀘𑀳𑀺 𑀤𑀸𑀭𑀺𑀓𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀪𑀕𑀯𑀢𑁄 𑀧𑀘𑁆𑀘𑀼𑀕𑁆𑀕𑀫𑀦𑀁 𑀕𑀢𑀸 𑀧𑀞𑀫𑀤𑀲𑁆𑀲𑀦𑀫𑁆𑀳𑀺𑀬𑁂𑀯 𑀲𑁄𑀢𑀸𑀧𑀦𑁆𑀦𑀸 𑀅𑀳𑁄𑀲𑀺. 𑀅𑀧𑀭𑀪𑀸𑀕𑁂 𑀲𑀸𑀯𑀢𑁆𑀣𑀺𑀬𑀁 𑀫𑀺𑀕𑀸𑀭𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀧𑀼𑀡𑁆𑀡𑀯𑀟𑁆𑀠𑀦𑀓𑀼𑀫𑀸𑀭𑀲𑁆𑀲 𑀕𑁂𑀳𑀁 𑀕𑀢𑀸. 𑀢𑀢𑁆𑀣 𑀦𑀁 𑀫𑀺𑀕𑀸𑀭𑀲𑁂𑀝𑁆𑀞𑀺 𑀫𑀸𑀢𑀺𑀝𑁆𑀞𑀸𑀦𑁂 𑀞𑀧𑁂𑀲𑀺, 𑀢𑀲𑁆𑀫𑀸 𑀫𑀺𑀕𑀸𑀭𑀫𑀸𑀢𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀸𑀬 𑀓𑀸𑀭𑀺𑀢𑁂 𑀧𑀸𑀲𑀸𑀤𑁂.

𑀩𑀳𑀺 𑀤𑁆𑀯𑀸𑀭𑀓𑁄𑀝𑁆𑀞𑀓𑁂𑀢𑀺 𑀧𑀸𑀲𑀸𑀤𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑁆𑀲 𑀩𑀳𑀺, 𑀦 𑀯𑀺𑀳𑀸𑀭𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑁆𑀲. 𑀲𑁄 𑀓𑀺𑀭 𑀧𑀸𑀲𑀸𑀤𑁄 𑀮𑁄𑀳𑀧𑀸𑀲𑀸𑀤𑁄 𑀯𑀺𑀬 𑀲𑀫𑀦𑁆𑀢𑀸 𑀘𑀢𑀼𑀤𑁆𑀯𑀸𑀭𑀓𑁄𑀝𑁆𑀞𑀓𑀬𑀼𑀢𑁆𑀢𑁂𑀦 𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑁄. 𑀢𑁂𑀲𑀼 𑀧𑀸𑀘𑀻𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑀲𑁆𑀲 𑀩𑀳𑀺 𑀧𑀸𑀲𑀸𑀤𑀘𑁆𑀙𑀸𑀬𑀸𑀬𑀁 𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀁 𑀑𑀮𑁄𑀓𑁂𑀦𑁆𑀢𑁄 𑀧𑀜𑁆𑀜𑀢𑁆𑀢𑁂 𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺.

𑀧𑀭𑀽𑀴𑁆𑀳𑀓𑀘𑁆𑀙𑀦𑀔𑀮𑁄𑀫𑀸𑀢𑀺 𑀧𑀭𑀽𑀴𑁆𑀳𑀓𑀘𑁆𑀙𑀸 𑀧𑀭𑀽𑀴𑁆𑀳𑀦𑀔𑀸 𑀧𑀭𑀽𑀴𑁆𑀳𑀮𑁄𑀫𑀸, 𑀓𑀘𑁆𑀙𑀸𑀤𑀻𑀲𑀼 𑀤𑀻𑀖𑀮𑁄𑀫𑀸 𑀤𑀻𑀖𑀦𑀔𑀸 𑀘𑀸𑀢𑀺 𑀅𑀢𑁆𑀣𑁄. 𑀔𑀸𑀭𑀺𑀯𑀺𑀯𑀺𑀥𑀦𑁆𑀢𑀺 𑀯𑀺𑀯𑀺𑀥𑀔𑀸𑀭𑀺𑀁 𑀦𑀸𑀦𑀧𑁆𑀧𑀓𑀸𑀭𑀓𑀁 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑀪𑀡𑁆𑀟𑀓𑀁. 𑀅𑀯𑀺𑀤𑀽𑀭𑁂 𑀅𑀢𑀺𑀓𑁆𑀓𑀫𑀦𑁆𑀢𑀻𑀢𑀺 𑀅𑀯𑀺𑀤𑀽𑀭𑀫𑀕𑁆𑀕𑁂𑀦 𑀦𑀕𑀭𑀁 𑀧𑀯𑀺𑀲𑀦𑁆𑀢𑀺. 𑀭𑀸𑀚𑀸𑀳𑀁, 𑀪𑀦𑁆𑀢𑁂𑀢𑀺 𑀅𑀳𑀁, 𑀪𑀦𑁆𑀢𑁂, 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄, 𑀫𑀬𑁆𑀳𑀁 𑀦𑀸𑀫𑀁 𑀢𑀼𑀫𑁆𑀳𑁂 𑀚𑀸𑀦𑀸𑀣𑀸𑀢𑀺. 𑀓𑀲𑁆𑀫𑀸 𑀧𑀦 𑀭𑀸𑀚𑀸 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑁄 𑀏𑀯𑀭𑀽𑀧𑀸𑀦𑀁 𑀦𑀕𑁆𑀕𑀪𑁄𑀕𑁆𑀕𑀦𑀺𑀲𑁆𑀲𑀺𑀭𑀺𑀓𑀸𑀦𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀡𑁆𑀳𑀸𑀢𑀻𑀢𑀺. 𑀲𑀗𑁆𑀕𑀡𑁆𑀳𑀦𑀢𑁆𑀣𑀸𑀬. 𑀏𑀯𑀁 𑀳𑀺𑀲𑁆𑀲 𑀅𑀳𑁄𑀲𑀺 𑁋 ‘‘𑀲𑀘𑀸𑀳𑀁 𑀏𑀢𑁆𑀢𑀓𑀫𑁆𑀧𑀺 𑀏𑀢𑁂𑀲𑀁 𑀦 𑀓𑀭𑀺𑀲𑁆𑀲𑀸𑀫𑀺, ‘𑀫𑀬𑀁 𑀧𑀼𑀢𑁆𑀢𑀤𑀸𑀭𑀁 𑀧𑀳𑀸𑀬 𑀏𑀢𑀲𑁆𑀲𑀢𑁆𑀣𑀸𑀬 𑀤𑀼𑀩𑁆𑀪𑁄𑀚𑀦𑀤𑀼𑀓𑁆𑀔𑀲𑁂𑀬𑁆𑀬𑀸𑀤𑀻𑀦𑀺 𑀅𑀦𑀼𑀪𑁄𑀫, 𑀅𑀬𑀁 𑀅𑀫𑁆𑀳𑀸𑀓𑀁 𑀅𑀜𑁆𑀚𑀮𑀺𑀫𑀢𑁆𑀢𑀫𑁆𑀧𑀺 𑀦 𑀓𑀭𑁄𑀢𑀻’𑀢𑀺 𑀅𑀢𑁆𑀢𑀦𑀸 𑀤𑀺𑀝𑁆𑀞𑀁 𑀲𑀼𑀢𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀦 𑀓𑀣𑁂𑀬𑁆𑀬𑀼𑀁. 𑀏𑀯𑀁 𑀓𑀢𑁂 𑀧𑀦 𑀅𑀦𑀺𑀕𑀽𑀳𑀺𑀢𑁆𑀯𑀸 𑀓𑀣𑁂𑀲𑁆𑀲𑀦𑁆𑀢𑀻’’𑀢𑀺. 𑀢𑀲𑁆𑀫𑀸 𑀏𑀯𑀫𑀓𑀸𑀲𑀺. 𑀅𑀧𑀺𑀘 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀚𑀸𑀦𑀦𑀢𑁆𑀣𑀁 𑀏𑀯𑀫𑀓𑀸𑀲𑀺.

𑀓𑀸𑀲𑀺𑀓𑀘𑀦𑁆𑀤𑀦𑀦𑁆𑀢𑀺 𑀲𑀡𑁆𑀳𑀘𑀦𑁆𑀤𑀦𑀁. 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀦𑁆𑀢𑀺 𑀯𑀡𑁆𑀡𑀕𑀦𑁆𑀥𑀢𑁆𑀣𑀸𑀬 𑀫𑀸𑀮𑀁, 𑀲𑀼𑀕𑀦𑁆𑀥𑀪𑀸𑀯𑀢𑁆𑀣𑀸𑀬 𑀕𑀦𑁆𑀥𑀁, 𑀯𑀡𑁆𑀡𑀕𑀦𑁆𑀥𑀢𑁆𑀣𑀸𑀬 𑀯𑀺𑀮𑁂𑀧𑀦𑀜𑁆𑀘 𑀥𑀸𑀭𑁂𑀦𑁆𑀢𑁂𑀦.

𑀲𑀁𑀯𑀸𑀲𑁂𑀦𑀸𑀢𑀺 𑀲𑀳𑀯𑀸𑀲𑁂𑀦. 𑀲𑀻𑀮𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀅𑀬𑀁 𑀲𑀼𑀲𑀻𑀮𑁄 𑀯𑀸 𑀤𑀼𑀲𑁆𑀲𑀻𑀮𑁄 𑀯𑀸𑀢𑀺 𑀲𑀁𑀯𑀲𑀦𑁆𑀢𑁂𑀦 𑀉𑀧𑀲𑀗𑁆𑀓𑀫𑀦𑁆𑀢𑁂𑀦 𑀚𑀸𑀦𑀺𑀢𑀩𑁆𑀩𑁄. 𑀢𑀜𑁆𑀘 𑀔𑁄 𑀤𑀻𑀖𑁂𑀦 𑀅𑀤𑁆𑀥𑀼𑀦𑀸 𑀦 𑀇𑀢𑁆𑀢𑀭𑀦𑁆𑀢𑀺 𑀢𑀜𑁆𑀘 𑀲𑀻𑀮𑀁 𑀤𑀻𑀖𑁂𑀦 𑀓𑀸𑀮𑁂𑀦 𑀯𑁂𑀤𑀺𑀢𑀩𑁆𑀩𑀁, 𑀦 𑀇𑀢𑁆𑀢𑀭𑁂𑀦. 𑀤𑁆𑀯𑀻𑀳𑀢𑀻𑀳𑀜𑁆𑀳𑀺 𑀲𑀁𑀬𑀢𑀸𑀓𑀸𑀭𑁄 𑀘 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑀸𑀓𑀸𑀭𑁄 𑀘 𑀦 𑀲𑀓𑁆𑀓𑀸 𑀤𑀲𑁆𑀲𑁂𑀢𑀼𑀁. 𑀫𑀦𑀲𑀺𑀓𑀭𑁄𑀢𑀸𑀢𑀺 𑀲𑀻𑀮𑀫𑀲𑁆𑀲 𑀧𑀭𑀺𑀕𑁆𑀕𑀳𑁂𑀲𑁆𑀲𑀸𑀫𑀻𑀢𑀺 𑀫𑀦𑀲𑀺𑀓𑀭𑁄𑀦𑁆𑀢𑁂𑀦 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁂𑀦𑁂𑀯 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁, 𑀦 𑀇𑀢𑀭𑁂𑀦. 𑀧𑀜𑁆𑀜𑀯𑀢𑀸𑀢𑀺 𑀢𑀫𑁆𑀧𑀺 𑀲𑀧𑁆𑀧𑀜𑁆𑀜𑁂𑀦𑁂𑀯 𑀧𑀡𑁆𑀟𑀺𑀢𑁂𑀦. 𑀩𑀸𑀮𑁄 𑀳𑀺 𑀫𑀦𑀲𑀺𑀓𑀭𑁄𑀦𑁆𑀢𑁄𑀧𑀺 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀲𑀁𑀯𑁄𑀳𑀸𑀭𑁂𑀦𑀸𑀢𑀺 𑀓𑀣𑀦𑁂𑀦.

‘‘𑀬𑁄 𑀳𑀺 𑀓𑁄𑀘𑀺 𑀫𑀦𑀼𑀲𑁆𑀲𑁂𑀲𑀼, 𑀯𑁄𑀳𑀸𑀭𑀁 𑀉𑀧𑀚𑀻𑀯𑀢𑀺;

𑀏𑀯𑀁 𑀯𑀸𑀲𑁂𑀝𑁆𑀞 𑀚𑀸𑀦𑀸𑀳𑀺, 𑀯𑀸𑀡𑀺𑀚𑁄 𑀲𑁄 𑀦 𑀩𑁆𑀭𑀸𑀳𑁆𑀫𑀡𑁄’’𑀢𑀺. (𑀫. 𑀦𑀺. 𑁨.𑁪𑁫𑁭) 𑁋

𑀏𑀢𑁆𑀣 𑀳𑀺 𑀩𑁆𑀬𑀯𑀳𑀸𑀭𑁄 𑀯𑁄𑀳𑀸𑀭𑁄 𑀦𑀸𑀫. ‘‘𑀘𑀢𑁆𑀢𑀸𑀭𑁄 𑀅𑀭𑀺𑀬𑀯𑁄𑀳𑀸𑀭𑀸 𑀘𑀢𑁆𑀢𑀸𑀭𑁄 𑀅𑀦𑀭𑀺𑀬𑀯𑁄𑀳𑀸𑀭𑀸’’𑀢𑀺 (𑀤𑀻. 𑀦𑀺. 𑁩.𑁩𑁧𑁩) 𑀏𑀢𑁆𑀣 𑀘𑁂𑀢𑀦𑀸. ‘‘𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄’’𑀢𑀺 (𑀥. 𑀲. 𑁧𑁩𑁧𑁩-𑁧𑁩𑁧𑁫) 𑀏𑀢𑁆𑀣 𑀧𑀜𑁆𑀜𑀢𑁆𑀢𑀺. ‘‘𑀯𑁄𑀳𑀸𑀭𑀫𑀢𑁆𑀢𑁂𑀦 𑀲𑁄 𑀯𑁄𑀳𑀭𑁂𑀬𑁆𑀬𑀸’’𑀢𑀺 (𑀲𑀁. 𑀦𑀺. 𑁧.𑁨𑁫) 𑀏𑀢𑁆𑀣 𑀓𑀣𑀸 𑀯𑁄𑀳𑀸𑀭𑁄. 𑀇𑀥𑀸𑀧𑀺 𑀏𑀲𑁄𑀯 𑀅𑀥𑀺𑀧𑁆𑀧𑁂𑀢𑁄. 𑀏𑀓𑀘𑁆𑀘𑀲𑁆𑀲 𑀳𑀺 𑀲𑀫𑁆𑀫𑀼𑀔𑀸 𑀓𑀣𑀸 𑀧𑀭𑀫𑁆𑀫𑀼𑀔𑀸𑀬 𑀓𑀣𑀸𑀬 𑀦 𑀲𑀫𑁂𑀢𑀺, 𑀧𑀭𑀫𑁆𑀫𑀼𑀔𑀸 𑀓𑀣𑀸 𑀘 𑀲𑀫𑁆𑀫𑀼𑀔𑀸𑀬 𑀓𑀣𑀸𑀬, 𑀢𑀣𑀸 𑀧𑀼𑀭𑀺𑀫𑀓𑀣𑀸 𑀘 𑀧𑀘𑁆𑀙𑀺𑀫𑀓𑀣𑀸𑀬, 𑀧𑀘𑁆𑀙𑀺𑀫𑀓𑀣𑀸 𑀘 𑀧𑀼𑀭𑀺𑀫𑀓𑀣𑀸𑀬. 𑀲𑁄 𑀓𑀣𑁂𑀦𑁆𑀢𑁂𑀦𑁂𑀯 𑀲𑀓𑁆𑀓𑀸 𑀚𑀸𑀦𑀺𑀢𑀼𑀁 ‘‘𑀅𑀲𑀼𑀘𑀺 𑀏𑀲𑁄 𑀧𑀼𑀕𑁆𑀕𑀮𑁄’’𑀢𑀺. 𑀲𑀼𑀘𑀺𑀲𑀻𑀮𑀲𑁆𑀲 𑀧𑀦 𑀧𑀼𑀭𑀺𑀫𑀁 𑀧𑀘𑁆𑀙𑀺𑀫𑁂𑀦, 𑀧𑀘𑁆𑀙𑀺𑀫𑀜𑁆𑀘 𑀧𑀼𑀭𑀺𑀫𑁂𑀦 𑀲𑀫𑁂𑀢𑀺, 𑀲𑀫𑁆𑀫𑀼𑀔𑀸𑀓𑀣𑀺𑀢𑀁 𑀧𑀭𑀫𑁆𑀫𑀼𑀔𑀸𑀓𑀣𑀺𑀢𑁂𑀦, 𑀧𑀭𑀫𑁆𑀫𑀼𑀔𑀸𑀓𑀣𑀺𑀢𑀜𑁆𑀘 𑀲𑀫𑁆𑀫𑀼𑀔𑀸𑀓𑀣𑀺𑀢𑁂𑀦, 𑀢𑀲𑁆𑀫𑀸 𑀓𑀣𑁂𑀦𑁆𑀢𑁂𑀦 𑀲𑀓𑁆𑀓𑀸 𑀲𑀼𑀘𑀺𑀪𑀸𑀯𑁄 𑀚𑀸𑀦𑀺𑀢𑀼𑀦𑁆𑀢𑀺 𑀧𑀓𑀸𑀲𑁂𑀦𑁆𑀢𑁄 𑀏𑀯𑀫𑀸𑀳.

𑀣𑀸𑀫𑁄𑀢𑀺 𑀜𑀸𑀡𑀣𑀸𑀫𑁄. 𑀬𑀲𑁆𑀲 𑀳𑀺 𑀜𑀸𑀡𑀣𑀸𑀫𑁄 𑀦𑀢𑁆𑀣𑀺, 𑀲𑁄 𑀉𑀧𑁆𑀧𑀦𑁆𑀦𑁂𑀲𑀼 𑀉𑀧𑀤𑁆𑀤𑀯𑁂𑀲𑀼 𑀕𑀳𑁂𑀢𑀩𑁆𑀩𑀕𑁆𑀕𑀳𑀡𑀁 𑀓𑀢𑀩𑁆𑀩𑀓𑀺𑀘𑁆𑀘𑀁 𑀅𑀧𑀲𑁆𑀲𑀦𑁆𑀢𑁄 𑀅𑀤𑁆𑀯𑀸𑀭𑀖𑀭𑀁 𑀧𑀯𑀺𑀝𑁆𑀞𑁄 𑀯𑀺𑀬 𑀘𑀭𑀢𑀺. 𑀢𑁂𑀦𑀸𑀳 𑀆𑀧𑀤𑀸𑀲𑀼 𑀔𑁄, 𑀫𑀳𑀸𑀭𑀸𑀚, 𑀣𑀸𑀫𑁄 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀲𑀸𑀓𑀘𑁆𑀙𑀸𑀬𑀸𑀢𑀺 𑀲𑀁𑀓𑀣𑀸𑀬. 𑀤𑀼𑀧𑁆𑀧𑀜𑁆𑀜𑀲𑁆𑀲 𑀳𑀺 𑀓𑀣𑀸 𑀉𑀤𑀓𑁂 𑀕𑁂𑀡𑁆𑀟𑀼 𑀯𑀺𑀬 𑀉𑀧𑁆𑀧𑀮𑀯𑀢𑀺, 𑀧𑀜𑁆𑀜𑀯𑀢𑁄 𑀓𑀣𑁂𑀦𑁆𑀢𑀲𑁆𑀲 𑀧𑀝𑀺𑀪𑀸𑀦𑀁 𑀅𑀦𑀦𑁆𑀢𑀭𑀁 𑀳𑁄𑀢𑀺. 𑀉𑀤𑀓𑀯𑀺𑀧𑁆𑀨𑀦𑁆𑀤𑀺𑀢𑁂𑀦𑁂𑀯 𑀳𑀺 𑀫𑀘𑁆𑀙𑁄 𑀔𑀼𑀤𑁆𑀤𑀓𑁄 𑀯𑀸 𑀫𑀳𑀦𑁆𑀢𑁄 𑀯𑀸𑀢𑀺 𑀜𑀸𑀬𑀢𑀺. 𑀑𑀘𑀭𑀓𑀸𑀢𑀺 𑀳𑁂𑀝𑁆𑀞𑀸𑀘𑀭𑀓𑀸. 𑀘𑀭𑀸 𑀳𑀺 𑀧𑀩𑁆𑀩𑀢𑀫𑀢𑁆𑀣𑀓𑁂𑀦 𑀘𑀭𑀦𑁆𑀢𑀸𑀧𑀺 𑀳𑁂𑀝𑁆𑀞𑀸 𑁋 𑀘𑀭𑀓𑀸𑀯 𑀳𑁄𑀦𑁆𑀢𑀺. 𑀑𑀘𑀭𑀺𑀢𑁆𑀯𑀸𑀢𑀺 𑀅𑀯𑀘𑀭𑀺𑀢𑁆𑀯𑀸 𑀯𑀻𑀫𑀁𑀲𑀺𑀢𑁆𑀯𑀸, 𑀢𑀁 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀭𑀚𑁄𑀚𑀮𑁆𑀮𑀦𑁆𑀢𑀺 𑀭𑀚𑀜𑁆𑀘 𑀚𑀮𑁆𑀮𑀜𑁆𑀘. 𑀯𑀡𑁆𑀡𑀭𑀽𑀧𑁂𑀦𑀸𑀢𑀺 𑀯𑀡𑁆𑀡𑀲𑀡𑁆𑀞𑀸𑀦𑁂𑀦. 𑀇𑀢𑁆𑀢𑀭𑀤𑀲𑁆𑀲𑀦𑁂𑀦𑀸𑀢𑀺 𑀮𑀳𑀼𑀓𑀤𑀲𑁆𑀲𑀦𑁂𑀦. 𑀯𑀺𑀬𑀜𑁆𑀚𑀦𑁂𑀦𑀸𑀢𑀺 𑀧𑀭𑀺𑀓𑁆𑀔𑀸𑀭𑀪𑀡𑁆𑀟𑀓𑁂𑀦. 𑀧𑀢𑀺𑀭𑀽𑀧𑀓𑁄 𑀫𑀢𑁆𑀢𑀺𑀓𑀸𑀓𑀼𑀡𑁆𑀟𑀮𑁄𑀯𑀸𑀢𑀺 𑀲𑀼𑀯𑀡𑁆𑀡𑀓𑀼𑀡𑁆𑀟𑀮𑀧𑀢𑀺𑀭𑀽𑀧𑀓𑁄 𑀫𑀢𑁆𑀢𑀺𑀓𑀸𑀓𑀼𑀡𑁆𑀟𑀮𑁄𑀯. 𑀮𑁄𑀳𑀟𑁆𑀠𑀫𑀸𑀲𑁄𑀢𑀺 𑀮𑁄𑀳𑀟𑁆𑀠𑀫𑀸𑀲𑀓𑁄. 𑀧𑀞𑀫𑀁.

𑁨. 𑀧𑀜𑁆𑀘𑀭𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁩. 𑀤𑀼𑀢𑀺𑀬𑁂 𑀭𑀽𑀧𑀸𑀢𑀺 𑀦𑀻𑀮𑀧𑀻𑀢𑀸𑀤𑀺𑀪𑁂𑀤𑀁 𑀭𑀽𑀧𑀸𑀭𑀫𑁆𑀫𑀡𑀁. 𑀓𑀸𑀫𑀸𑀦𑀁 𑀅𑀕𑁆𑀕𑀦𑁆𑀢𑀺 𑀏𑀢𑀁 𑀓𑀸𑀫𑀸𑀦𑀁 𑀉𑀢𑁆𑀢𑀫𑀁 𑀲𑁂𑀝𑁆𑀞𑀦𑁆𑀢𑀺 𑀭𑀽𑀧𑀕𑀭𑀼𑀓𑁄 𑀆𑀳. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀢𑁄𑀢𑀺 𑀬𑀤𑀸. 𑀫𑀦𑀸𑀧𑀧𑀭𑀺𑀬𑀦𑁆𑀢𑀦𑁆𑀢𑀺 𑀫𑀦𑀸𑀧𑀦𑀺𑀧𑁆𑀨𑀢𑁆𑀢𑀺𑀓𑀁 𑀫𑀦𑀸𑀧𑀓𑁄𑀝𑀺𑀓𑀁. 𑀢𑀢𑁆𑀣 𑀤𑁆𑀯𑁂 𑀫𑀦𑀸𑀧𑀸𑀦𑀺 𑀧𑀼𑀕𑁆𑀕𑀮𑀫𑀦𑀸𑀧𑀁 𑀲𑀫𑁆𑀫𑀼𑀢𑀺𑀫𑀦𑀸𑀧𑀜𑁆𑀘. 𑀧𑀼𑀕𑁆𑀕𑀮𑀫𑀦𑀸𑀧𑀁 𑀦𑀸𑀫 𑀬𑀁 𑀏𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀇𑀝𑁆𑀞𑀁 𑀓𑀦𑁆𑀢𑀁 𑀳𑁄𑀢𑀺, 𑀢𑀤𑁂𑀯 𑀅𑀜𑁆𑀜𑀲𑁆𑀲 𑀅𑀦𑀺𑀝𑁆𑀞𑀁 𑀅𑀓𑀦𑁆𑀢𑀁. 𑀧𑀘𑁆𑀘𑀦𑁆𑀢𑀯𑀸𑀲𑀻𑀦𑀜𑁆𑀳𑀺 𑀕𑀡𑁆𑀟𑀼𑀧𑁆𑀧𑀸𑀤𑀸𑀧𑀺 𑀇𑀝𑁆𑀞𑀸 𑀳𑁄𑀦𑁆𑀢𑀺 𑀓𑀦𑁆𑀢𑀸 𑀫𑀦𑀸𑀧𑀸, 𑀫𑀚𑁆𑀛𑀺𑀫𑀤𑁂𑀲𑀯𑀸𑀲𑀻𑀦𑀁 𑀅𑀢𑀺𑀚𑁂𑀕𑀼𑀘𑁆𑀙𑀸. 𑀢𑁂𑀲𑀜𑁆𑀘 𑀫𑁄𑀭𑀫𑀁𑀲𑀸𑀤𑀻𑀦𑀺 𑀇𑀝𑁆𑀞𑀸𑀦𑀺 𑀳𑁄𑀦𑁆𑀢𑀺, 𑀇𑀢𑀭𑁂𑀲𑀁 𑀢𑀸𑀦𑀺 𑀅𑀢𑀺𑀚𑁂𑀕𑀼𑀘𑁆𑀙𑀸𑀦𑀺. 𑀇𑀤𑀁 𑀧𑀼𑀕𑁆𑀕𑀮𑀫𑀦𑀸𑀧𑀁. 𑀇𑀢𑀭𑀁 𑀲𑀫𑁆𑀫𑀼𑀢𑀺𑀫𑀦𑀸𑀧𑀁.

𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀁 𑀦𑀸𑀫 𑀮𑁄𑀓𑁂 𑀧𑀝𑀺𑀯𑀺𑀪𑀢𑁆𑀢𑀁 𑀦𑀢𑁆𑀣𑀺, 𑀯𑀺𑀪𑀚𑀺𑀢𑁆𑀯𑀸 𑀧𑀦 𑀤𑀲𑁆𑀲𑁂𑀢𑀩𑁆𑀩𑀁. 𑀯𑀺𑀪𑀚𑀦𑁆𑀢𑁂𑀦 𑀘 𑀦 𑀅𑀢𑀺𑀇𑀲𑁆𑀲𑀭𑀸𑀦𑀁 𑀫𑀳𑀸𑀲𑀫𑁆𑀫𑀢𑀫𑀳𑀸𑀲𑀼𑀤𑀲𑁆𑀲𑀦𑀥𑀫𑁆𑀫𑀸𑀲𑁄𑀓𑀸𑀤𑀻𑀦𑀁 𑀯𑀲𑁂𑀦 𑀯𑀺𑀪𑀚𑀺𑀢𑀩𑁆𑀩𑀁. 𑀢𑁂𑀲𑀜𑁆𑀳𑀺 𑀤𑀺𑀧𑁆𑀧𑀓𑀧𑁆𑀧𑀫𑁆𑀧𑀺 𑀆𑀭𑀫𑁆𑀫𑀡𑀁 𑀅𑀫𑀦𑀸𑀧𑀁 𑀉𑀧𑀝𑁆𑀞𑀸𑀢𑀺. 𑀅𑀢𑀺𑀤𑀼𑀕𑁆𑀕𑀢𑀸𑀦𑀁 𑀤𑀼𑀮𑁆𑀮𑀪𑀦𑁆𑀦𑀧𑀸𑀦𑀸𑀦𑀁 𑀯𑀲𑁂𑀦𑀧𑀺 𑀦 𑀯𑀺𑀪𑀚𑀺𑀢𑀩𑁆𑀩𑀁. 𑀢𑁂𑀲𑀜𑁆𑀳𑀺 𑀓𑀡𑀸𑀚𑀓𑀪𑀢𑁆𑀢𑀲𑀺𑀢𑁆𑀣𑀸𑀦𑀺𑀧𑀺 𑀧𑀽𑀢𑀺𑀫𑀁𑀲𑀲𑁆𑀲 𑀭𑀲𑁄𑀧𑀺 𑀅𑀢𑀺𑀫𑀥𑀼𑀭𑁄 𑀅𑀫𑀢𑀲𑀤𑀺𑀲𑁄 𑀳𑁄𑀢𑀺. 𑀫𑀚𑁆𑀛𑀺𑀫𑀸𑀦𑀁 𑀧𑀦 𑀕𑀡𑀓𑀫𑀳𑀸𑀫𑀢𑁆𑀢𑀲𑁂𑀝𑁆𑀞𑀺 𑀓𑀼𑀝𑀼𑀫𑁆𑀩𑀺𑀓𑀯𑀸𑀡𑀺𑀚𑀸𑀤𑀻𑀦𑀁 𑀓𑀸𑀮𑁂𑀦 𑀇𑀝𑁆𑀞𑀁 𑀓𑀸𑀮𑁂𑀦 𑀅𑀦𑀺𑀝𑁆𑀞𑀁 𑀮𑀪𑀫𑀸𑀦𑀸𑀦𑀁 𑀯𑀲𑁂𑀦 𑀯𑀺𑀪𑀚𑀺𑀢𑀩𑁆𑀩𑀁. 𑀢𑀜𑁆𑀘 𑀧𑀦𑁂𑀢𑀁 𑀆𑀭𑀫𑁆𑀫𑀡𑀁 𑀚𑀯𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀚𑀯𑀦𑀜𑁆𑀳𑀺 𑀇𑀝𑁆𑀞𑁂𑀧𑀺 𑀭𑀚𑁆𑀚𑀢𑀺 𑀅𑀦𑀺𑀝𑁆𑀞𑁂𑀧𑀺, 𑀇𑀝𑁆𑀞𑁂𑀧𑀺 𑀤𑀼𑀲𑁆𑀲𑀢𑀺 𑀅𑀦𑀺𑀝𑁆𑀞𑁂𑀧𑀺. 𑀏𑀓𑀦𑁆𑀢𑀢𑁄 𑀧𑀦 𑀯𑀺𑀧𑀸𑀓𑀘𑀺𑀢𑁆𑀢𑀁 𑀇𑀝𑁆𑀞𑀸𑀦𑀺𑀝𑁆𑀞𑀁 𑀧𑀭𑀺𑀘𑁆𑀙𑀺𑀦𑁆𑀤𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀩𑀼𑀤𑁆𑀥𑀁 𑀯𑀸 𑀲𑀗𑁆𑀖𑀁 𑀯𑀸 𑀫𑀳𑀸𑀘𑁂𑀢𑀺𑀬𑀸𑀤𑀻𑀦𑀺 𑀯𑀸 𑀉𑀴𑀸𑀭𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀤𑀺𑀲𑁆𑀯𑀸 𑀅𑀓𑁆𑀔𑀻𑀦𑀺 𑀧𑀺𑀤𑀳𑀦𑁆𑀢𑀺 𑀤𑁄𑀫𑀦𑀲𑁆𑀲𑀁 𑀆𑀧𑀚𑁆𑀚𑀦𑁆𑀢𑀺, 𑀥𑀫𑁆𑀫𑀲𑀤𑁆𑀤𑀁 𑀲𑀼𑀢𑁆𑀯𑀸 𑀓𑀡𑁆𑀡𑁂 𑀣𑀓𑁂𑀦𑁆𑀢𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁄𑀢𑀯𑀺𑀜𑁆𑀜𑀸𑀡𑀸𑀦𑀺 𑀧𑀦 𑀢𑁂𑀲𑀁 𑀓𑀼𑀲𑀮𑀯𑀺𑀧𑀸𑀓𑀸𑀦𑁂𑀯 𑀳𑁄𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 𑀕𑀽𑀣𑀲𑀽𑀓𑀭𑀸𑀤𑀬𑁄 𑀕𑀽𑀣𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸 𑀔𑀸𑀤𑀺𑀢𑀼𑀁 𑀮𑀪𑀺𑀲𑁆𑀲𑀸𑀫𑀸𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑀸 𑀳𑁄𑀦𑁆𑀢𑀺, 𑀕𑀽𑀣𑀤𑀲𑁆𑀲𑀦𑁂 𑀧𑀦 𑀦𑁂𑀲𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀢𑀲𑁆𑀲 𑀕𑀦𑁆𑀥𑀖𑀸𑀬𑀦𑁂 𑀖𑀸𑀦𑀯𑀺𑀜𑁆𑀜𑀸𑀡𑀁, 𑀭𑀲𑀲𑀸𑀬𑀦𑁂 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀜𑁆𑀘 𑀅𑀓𑀼𑀲𑀮𑀯𑀺𑀧𑀸𑀓𑀫𑁂𑀯 𑀳𑁄𑀢𑀺. 𑀪𑀕𑀯𑀸 𑀧𑀦 𑀧𑀼𑀕𑁆𑀕𑀮𑀫𑀦𑀸𑀧𑀢𑀁 𑀲𑀦𑁆𑀥𑀸𑀬 𑀢𑁂 𑀘, 𑀫𑀳𑀸𑀭𑀸𑀚, 𑀭𑀽𑀧𑀸𑀢𑀺𑀆𑀤𑀺𑀫𑀸𑀳.

𑀘𑀦𑁆𑀤𑀦𑀗𑁆𑀕𑀮𑀺𑀓𑁄𑀢𑀺 𑀇𑀤𑀁 𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀦𑀸𑀫𑀁. 𑀧𑀝𑀺𑀪𑀸𑀢𑀺 𑀫𑀁 𑀪𑀕𑀯𑀸𑀢𑀺 𑀪𑀕𑀯𑀸 𑀫𑀬𑁆𑀳𑀁 𑀏𑀓𑀁 𑀓𑀸𑀭𑀡𑀁 𑀉𑀧𑀝𑁆𑀞𑀸𑀢𑀺 𑀧𑀜𑁆𑀜𑀸𑀬𑀢𑀺. 𑀢𑀲𑁆𑀲 𑀢𑁂 𑀧𑀜𑁆𑀘 𑀭𑀸𑀚𑀸𑀦𑁄 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑁂 𑀲𑀚𑁆𑀚𑀺𑀢𑀸𑀬 𑀆𑀧𑀸𑀦𑀪𑀽𑀫𑀺𑀬𑀸 𑀦𑀺𑀲𑀺𑀦𑁆𑀦𑀯𑀲𑁂𑀦𑁂𑀯 𑀫𑀳𑀢𑀸 𑀭𑀸𑀚𑀸𑀦𑀼𑀪𑀸𑀯𑁂𑀦 𑀧𑀭𑀫𑁂𑀦 𑀇𑀲𑁆𑀲𑀭𑀺𑀬𑀯𑀺𑀪𑀯𑁂𑀦 𑀆𑀕𑀦𑁆𑀢𑁆𑀯𑀸𑀧𑀺 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑁂 𑀞𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀤𑀺𑀯𑀸 𑀧𑀤𑀻𑀧𑁂 𑀯𑀺𑀬 𑀉𑀤𑀓𑀸𑀪𑀺𑀲𑀺𑀢𑁆𑀢𑁂 𑀅𑀗𑁆𑀕𑀸𑀭𑁂 𑀯𑀺𑀬 𑀲𑀽𑀭𑀺𑀬𑀼𑀝𑁆𑀞𑀸𑀦𑁂 𑀔𑀚𑁆𑀚𑁄𑀧𑀦𑀓𑁂 𑀯𑀺𑀬 𑀘 𑀳𑀢𑀧𑁆𑀧𑀪𑁂 𑀳𑀢𑀲𑁄𑀪𑁂 𑀢𑀁 𑀢𑀣𑀸𑀕𑀢𑀜𑁆𑀘 𑀢𑁂𑀳𑀺 𑀲𑀢𑀕𑀼𑀡𑁂𑀦 𑀲𑀳𑀲𑁆𑀲𑀕𑀼𑀡𑁂𑀦 𑀯𑀺𑀭𑁄𑀘𑀫𑀸𑀦𑀁 𑀤𑀺𑀲𑁆𑀯𑀸, ‘‘𑀫𑀳𑀦𑁆𑀢𑀸 𑀯𑀢 𑀪𑁄 𑀩𑀼𑀤𑁆𑀥𑀸 𑀦𑀸𑀫𑀸’’𑀢𑀺 𑀧𑀝𑀺𑀪𑀸𑀦𑀁 𑀉𑀤𑀧𑀸𑀤𑀺. 𑀢𑀲𑁆𑀫𑀸 𑀏𑀯𑀫𑀸𑀳.

𑀓𑁄𑀓𑀦𑀤𑀦𑁆𑀢𑀺 𑀧𑀤𑀼𑀫𑀲𑁆𑀲𑁂𑀯𑁂𑀢𑀁 𑀯𑁂𑀯𑀘𑀦𑀁. 𑀧𑀸𑀢𑁄𑀢𑀺 𑀓𑀸𑀮𑀲𑁆𑀲𑁂𑀯. 𑀲𑀺𑀬𑀸𑀢𑀺 𑀪𑀯𑁂𑀬𑁆𑀬. 𑀅𑀯𑀻𑀢𑀕𑀦𑁆𑀥𑀦𑁆𑀢𑀺 𑀅𑀯𑀺𑀕𑀢𑀕𑀦𑁆𑀥𑀁. 𑀅𑀗𑁆𑀕𑀻𑀭𑀲𑀦𑁆𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁. 𑀪𑀕𑀯𑀢𑁄 𑀳𑀺 𑀅𑀗𑁆𑀕𑀢𑁄 𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀦𑁆𑀢𑀺, 𑀢𑀲𑁆𑀫𑀸 𑀅𑀗𑁆𑀕𑀻𑀭𑀲𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀓𑁄𑀓𑀦𑀤𑀲𑀗𑁆𑀔𑀸𑀢𑀁 𑀧𑀤𑀼𑀫𑀁 𑀧𑀸𑀢𑁄𑀯 𑀨𑀼𑀮𑁆𑀮𑀁 𑀅𑀯𑀻𑀢𑀕𑀦𑁆𑀥𑀁 𑀲𑀺𑀬𑀸, 𑀏𑀯𑀫𑁂𑀯 𑀪𑀕𑀯𑀦𑁆𑀢𑀁 𑀅𑀗𑁆𑀕𑀻𑀭𑀲𑀁 𑀢𑀧𑀦𑁆𑀢𑀁 𑀆𑀤𑀺𑀘𑁆𑀘𑀫𑀺𑀯 𑀅𑀦𑁆𑀢𑀮𑀺𑀓𑁆𑀔𑁂 𑀯𑀺𑀭𑁄𑀘𑀫𑀸𑀦𑀁 𑀧𑀲𑁆𑀲𑀸𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄. 𑀪𑀕𑀯𑀦𑁆𑀢𑀁 𑀅𑀘𑁆𑀙𑀸𑀤𑁂𑀲𑀻𑀢𑀺 𑀪𑀕𑀯𑀢𑁄 𑀅𑀤𑀸𑀲𑀻𑀢𑀺 𑀅𑀢𑁆𑀣𑁄. 𑀮𑁄𑀓𑀯𑁄𑀳𑀸𑀭𑀢𑁄 𑀧𑀦𑁂𑀢𑁆𑀣 𑀈𑀤𑀺𑀲𑀁 𑀯𑀘𑀦𑀁 𑀳𑁄𑀢𑀺. 𑀲𑁄 𑀓𑀺𑀭 𑀉𑀧𑀸𑀲𑀓𑁄 𑁋 ‘‘𑀏𑀢𑁂 𑀢𑀣𑀸𑀕𑀢𑀲𑁆𑀲 𑀕𑀼𑀡𑁂𑀲𑀼 𑀧𑀲𑀻𑀤𑀺𑀢𑁆𑀯𑀸 𑀫𑀬𑁆𑀳𑀁 𑀧𑀜𑁆𑀘 𑀉𑀢𑁆𑀢𑀭𑀸𑀲𑀗𑁆𑀕𑁂 𑀤𑁂𑀦𑁆𑀢𑀺, 𑀅𑀳𑀫𑁆𑀧𑀺 𑀢𑁂 𑀪𑀕𑀯𑀢𑁄𑀯 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀤𑀸𑀲𑀺. 𑀤𑀼𑀢𑀺𑀬𑀁.

𑁩. 𑀤𑁄𑀡𑀧𑀸𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁪. 𑀢𑀢𑀺𑀬𑁂 𑀤𑁄𑀡𑀧𑀸𑀓𑀓𑀼𑀭𑀦𑁆𑀢𑀺 𑀤𑁄𑀡𑀧𑀸𑀓𑀁 𑀓𑀼𑀭𑀁, 𑀤𑁄𑀡𑀲𑁆𑀲 𑀢𑀡𑁆𑀟𑀼𑀮𑀸𑀦𑀁 𑀧𑀓𑁆𑀓𑀪𑀢𑁆𑀢𑀁 𑀢𑀤𑀽𑀧𑀺𑀬𑀜𑁆𑀘 𑀲𑀽𑀧𑀩𑁆𑀬𑀜𑁆𑀚𑀦𑀁 𑀪𑀼𑀜𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀪𑀼𑀢𑁆𑀢𑀸𑀯𑀻𑀢𑀺 𑀧𑀼𑀩𑁆𑀩𑁂 𑀪𑀢𑁆𑀢𑀲𑀫𑁆𑀫𑀤𑀁 𑀯𑀺𑀦𑁄𑀤𑁂𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀯𑀺𑀲𑁆𑀲𑀫𑀺𑀢𑁆𑀯𑀸 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺, 𑀢𑀁𑀤𑀺𑀯𑀲𑀁 𑀧𑀦 𑀪𑀼𑀜𑁆𑀚𑀦𑁆𑀢𑁄𑀯 𑀤𑀲𑀩𑀮𑀁 𑀲𑀭𑀺𑀢𑁆𑀯𑀸 𑀳𑀢𑁆𑀣𑁂 𑀥𑁄𑀯𑀺𑀢𑁆𑀯𑀸 𑀅𑀕𑀫𑀸𑀲𑀺. 𑀫𑀳𑀲𑁆𑀲𑀸𑀲𑀻𑀢𑀺 𑀢𑀲𑁆𑀲 𑀕𑀘𑁆𑀙𑀢𑁄 𑀩𑀮𑀯𑀸 𑀪𑀢𑁆𑀢𑀧𑀭𑀻𑀴𑀸𑀳𑁄 𑀉𑀤𑀧𑀸𑀤𑀺, 𑀢𑀲𑁆𑀫𑀸 𑀫𑀳𑀦𑁆𑀢𑁂𑀳𑀺 𑀅𑀲𑁆𑀲𑀸𑀲𑁂𑀳𑀺 𑀅𑀲𑁆𑀲𑀲𑀢𑀺, 𑀕𑀢𑁆𑀢𑀢𑁄𑀧𑀺𑀲𑁆𑀲 𑀲𑁂𑀤𑀩𑀺𑀦𑁆𑀤𑀽𑀦𑀺 𑀫𑀼𑀘𑁆𑀘𑀦𑁆𑀢𑀺, 𑀢𑀫𑁂𑀦𑀁 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀞𑀢𑁆𑀯𑀸 𑀬𑀫𑀓𑀢𑀸𑀮𑀯𑀡𑁆𑀝𑁂𑀳𑀺 𑀩𑀻𑀚𑀦𑁆𑀢𑀺, 𑀩𑀼𑀤𑁆𑀥𑀕𑀸𑀭𑀯𑁂𑀦 𑀧𑀦 𑀦𑀺𑀧𑀚𑁆𑀚𑀺𑀢𑀼𑀁 𑀦 𑀉𑀲𑁆𑀲𑀳𑀢𑀻𑀢𑀺 𑀇𑀤𑀁 𑀲𑀦𑁆𑀥𑀸𑀬 ‘‘𑀫𑀳𑀲𑁆𑀲𑀸𑀲𑀻’’𑀢𑀺 𑀯𑀼𑀢𑁆𑀢𑀁. 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀻𑀢𑀺, 𑀭𑀸𑀚𑀸 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀼𑀢𑀸𑀬 𑀓𑀺𑀮𑀫𑀢𑀺, 𑀨𑀸𑀲𑀼 𑀯𑀺𑀳𑀸𑀭𑀁 𑀤𑀸𑀦𑀺𑀲𑁆𑀲 𑀓𑀭𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀪𑀸𑀲𑀺. 𑀫𑀦𑀼𑀚𑀲𑁆𑀲𑀸𑀢𑀺 𑀲𑀢𑁆𑀢𑀲𑁆𑀲. 𑀓𑀳𑀸𑀧𑀡𑀲𑀢𑀦𑁆𑀢𑀺 𑀧𑀸𑀢𑀭𑀸𑀲𑁂 𑀧𑀡𑁆𑀡𑀸𑀲𑀁 𑀲𑀸𑀬𑀫𑀸𑀲𑁂 𑀧𑀡𑁆𑀡𑀸𑀲𑀦𑁆𑀢𑀺 𑀏𑀯𑀁 𑀓𑀳𑀸𑀧𑀡𑀲𑀢𑀁. 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸𑀢𑀺 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀣𑁄𑀓𑀁 𑀕𑀦𑁆𑀢𑁆𑀯𑀸 ‘‘𑀇𑀫𑀁 𑀫𑀗𑁆𑀕𑀮𑀅𑀲𑀺𑀁 𑀓𑀲𑁆𑀲 𑀤𑀫𑁆𑀫𑀺, 𑀫𑀳𑀸𑀭𑀸𑀚𑀸’’𑀢𑀺? 𑀅𑀲𑀼𑀓𑀲𑁆𑀲 𑀦𑀸𑀫 𑀤𑁂𑀳𑀻𑀢𑀺 𑀲𑁄 𑀢𑀁 𑀅𑀲𑀺𑀁 𑀤𑀢𑁆𑀯𑀸 𑀤𑀲𑀩𑀮𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀫𑁆𑀫 𑀯𑀦𑁆𑀤𑀺𑀢𑁆𑀯𑀸 𑀞𑀺𑀢𑀓𑁄𑀯 ‘‘𑀕𑀸𑀣𑀁 𑀯𑀤𑀣, 𑀪𑁄 𑀕𑁄𑀢𑀫𑀸’’𑀢𑀺 𑀯𑀢𑁆𑀯𑀸 𑀪𑀕𑀯𑀢𑀸 𑀯𑀼𑀢𑁆𑀢𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀪𑀢𑁆𑀢𑀸𑀪𑀺𑀳𑀸𑀭𑁂 𑀲𑀼𑀤𑀁 𑀪𑀸𑀲𑀢𑀻𑀢𑀺 𑀓𑀣𑀁 𑀪𑀸𑀲𑀢𑀺? 𑀪𑀕𑀯𑀢𑀸 𑀅𑀦𑀼𑀲𑀺𑀝𑁆𑀞𑀺𑀦𑀺𑀬𑀸𑀫𑁂𑀦. 𑀪𑀕𑀯𑀸 𑀳𑀺 𑀦𑀁 𑀏𑀯𑀁 𑀅𑀦𑀼𑀲𑀸𑀲𑀺 𑁋 ‘‘𑀫𑀸𑀡𑀯, 𑀇𑀫𑀁 𑀕𑀸𑀣𑀁 𑀦𑀝𑁄 𑀯𑀺𑀬 𑀧𑀢𑁆𑀢𑀧𑀢𑁆𑀢𑀝𑁆𑀞𑀸𑀦𑁂 𑀫𑀸 𑀅𑀯𑀘, 𑀭𑀜𑁆𑀜𑁄 𑀪𑀼𑀜𑁆𑀚𑀦𑀝𑁆𑀞𑀸𑀦𑁂 𑀞𑀢𑁆𑀯𑀸 𑀧𑀞𑀫𑀧𑀺𑀡𑁆𑀟𑀸𑀤𑀻𑀲𑀼𑀧𑀺 𑀅𑀯𑀢𑁆𑀯𑀸 𑀯𑁄𑀲𑀸𑀦𑀧𑀺𑀡𑁆𑀟𑁂 𑀕𑀳𑀺𑀢𑁂 𑀯𑀤𑁂𑀬𑁆𑀬𑀸𑀲𑀺, 𑀭𑀸𑀚𑀸 𑀲𑀼𑀢𑁆𑀯𑀸𑀯 𑀪𑀢𑁆𑀢𑀧𑀺𑀡𑁆𑀟𑀁 𑀙𑀟𑁆𑀟𑁂𑀲𑁆𑀲𑀢𑀺. 𑀅𑀣 𑀭𑀜𑁆𑀜𑁄 𑀳𑀢𑁆𑀣𑁂𑀲𑀼 𑀥𑁄𑀢𑁂𑀲𑀼 𑀧𑀸𑀢𑀺𑀁 𑀅𑀧𑀦𑁂𑀢𑁆𑀯𑀸 𑀲𑀺𑀢𑁆𑀣𑀸𑀦𑀺 𑀕𑀡𑁂𑀢𑁆𑀯𑀸 𑀢𑀤𑀼𑀧𑀺𑀬𑀁 𑀩𑁆𑀬𑀜𑁆𑀚𑀦𑀁 𑀜𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀢𑀸𑀯𑀢𑀓𑁂 𑀢𑀡𑁆𑀟𑀼𑀮𑁂 𑀳𑀸𑀭𑁂𑀬𑁆𑀬𑀸𑀲𑀺, 𑀧𑀸𑀢𑀭𑀸𑀲𑁂 𑀘 𑀯𑀢𑁆𑀯𑀸 𑀲𑀸𑀬𑀫𑀸𑀲𑁂 𑀫𑀸 𑀯𑀤𑁂𑀬𑁆𑀬𑀸𑀲𑀻’’𑀢𑀺. 𑀲𑁄 𑀲𑀸𑀥𑀽𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀢𑀁𑀤𑀺𑀯𑀲𑀁 𑀭𑀜𑁆𑀜𑁄 𑀧𑀸𑀢𑀭𑀸𑀲𑀁 𑀪𑀼𑀢𑁆𑀯𑀸 𑀕𑀢𑀢𑁆𑀢𑀸 𑀲𑀸𑀬𑀫𑀸𑀲𑁂 𑀪𑀕𑀯𑀢𑁄 𑀅𑀦𑀼𑀲𑀺𑀝𑁆𑀞𑀺𑀦𑀺𑀬𑀸𑀫𑁂𑀦 𑀕𑀸𑀣𑀁 𑀅𑀪𑀸𑀲𑀺. 𑀭𑀸𑀚𑀸 𑀤𑀲𑀩𑀮𑀲𑁆𑀲 𑀯𑀘𑀦𑀁 𑀲𑀭𑀺𑀢𑁆𑀯𑀸 𑀪𑀢𑁆𑀢𑀧𑀺𑀡𑁆𑀟𑀁 𑀧𑀸𑀢𑀺𑀬𑀁𑀬𑁂𑀯 𑀙𑀟𑁆𑀟𑁂𑀲𑀺. 𑀭𑀜𑁆𑀜𑁄 𑀳𑀢𑁆𑀣𑁂𑀲𑀼 𑀥𑁄𑀢𑁂𑀲𑀼 𑀧𑀸𑀢𑀺𑀁 𑀅𑀧𑀦𑁂𑀢𑁆𑀯𑀸 𑀲𑀺𑀢𑁆𑀣𑀸𑀦𑀺 𑀕𑀡𑁂𑀢𑁆𑀯𑀸 𑀢𑀤𑀼𑀧𑀺𑀬𑀁 𑀩𑁆𑀬𑀜𑁆𑀚𑀦𑀁 𑀜𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀢𑀢𑁆𑀢𑀓𑁂 𑀢𑀡𑁆𑀟𑀼𑀮𑁂 𑀳𑀭𑀺𑀁𑀲𑀼.

𑀦𑀸𑀴𑀺𑀓𑁄𑀤𑀦𑀧𑀭𑀫𑀢𑀸𑀬 𑀲𑀡𑁆𑀞𑀸𑀲𑀻𑀢𑀺 𑀲𑁄 𑀓𑀺𑀭 𑀫𑀸𑀡𑀯𑁄 𑀤𑀺𑀯𑀲𑁂 𑀤𑀺𑀯𑀲𑁂 𑀢𑀣𑀸𑀕𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀢𑀺, 𑀤𑀲𑀩𑀮𑀲𑁆𑀲 𑀯𑀺𑀲𑁆𑀲𑀸𑀲𑀺𑀓𑁄 𑀅𑀳𑁄𑀲𑀺. 𑀅𑀣 𑀦𑀁 𑀏𑀓𑀤𑀺𑀯𑀲𑀁 𑀧𑀼𑀘𑁆𑀙𑀺 ‘‘𑀭𑀸𑀚𑀸 𑀓𑀺𑀢𑁆𑀢𑀓𑀁 𑀪𑀼𑀜𑁆𑀚𑀢𑀻’’𑀢𑀺? 𑀲𑁄 ‘‘𑀦𑀸𑀴𑀺𑀓𑁄𑀤𑀦’’𑀦𑁆𑀢𑀺 𑀆𑀳. 𑀯𑀝𑁆𑀝𑀺𑀲𑁆𑀲𑀢𑀺 𑀏𑀢𑁆𑀢𑀸𑀯𑀢𑀸 𑀧𑀼𑀭𑀺𑀲𑀪𑀸𑀕𑁄 𑀏𑀲, 𑀇𑀢𑁄 𑀧𑀝𑁆𑀞𑀸𑀬 𑀕𑀸𑀣𑀁 𑀫𑀸 𑀯𑀤𑀻𑀢𑀺. 𑀇𑀢𑀺 𑀭𑀸𑀚𑀸 𑀢𑀢𑁆𑀣𑁂𑀯 𑀲𑀡𑁆𑀞𑀸𑀲𑀺. 𑀤𑀺𑀝𑁆𑀞𑀥𑀫𑁆𑀫𑀺𑀓𑁂𑀦 𑀘𑁂𑀯 𑀅𑀢𑁆𑀣𑁂𑀦 𑀲𑀫𑁆𑀧𑀭𑀸𑀬𑀺𑀓𑁂𑀦 𑀘𑀸𑀢𑀺 𑀏𑀢𑁆𑀣 𑀲𑀮𑁆𑀮𑀺𑀔𑀺𑀢𑀲𑀭𑀻𑀭𑀢𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀢𑁆𑀣𑁄 𑀦𑀸𑀫, 𑀲𑀻𑀮𑀁 𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑁄. 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸 𑀳𑀺 𑀲𑀻𑀮𑀗𑁆𑀕𑀁 𑀦𑀸𑀫 𑀳𑁄𑀢𑀻𑀢𑀺. 𑀢𑀢𑀺𑀬𑀁.

𑁪. 𑀧𑀞𑀫𑀲𑀗𑁆𑀕𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁫. 𑀘𑀢𑀼𑀢𑁆𑀣𑁂 𑀯𑁂𑀤𑁂𑀳𑀺𑀧𑀼𑀢𑁆𑀢𑁄𑀢𑀺 𑀯𑁂𑀤𑁂𑀳𑀻𑀢𑀺 𑀧𑀡𑁆𑀟𑀺𑀢𑀸𑀥𑀺𑀯𑀘𑀦𑀫𑁂𑀢𑀁, 𑀧𑀡𑁆𑀟𑀺𑀢𑀺𑀢𑁆𑀣𑀺𑀬𑀸 𑀧𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀘𑀢𑀼𑀭𑀗𑁆𑀕𑀺𑀦𑀺𑀦𑁆𑀢𑀺 𑀳𑀢𑁆𑀣𑀺𑀅𑀲𑁆𑀲𑀭𑀣𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀳𑀺 𑀘𑀢𑀽𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁. 𑀲𑀦𑁆𑀦𑀬𑁆𑀳𑀺𑀢𑁆𑀯𑀸𑀢𑀺 𑀘𑀫𑁆𑀫𑀧𑀝𑀺𑀫𑀼𑀜𑁆𑀘𑀦𑀸𑀤𑀻𑀳𑀺 𑀲𑀦𑁆𑀦𑀸𑀳𑀁 𑀓𑀸𑀭𑁂𑀢𑁆𑀯𑀸. 𑀲𑀗𑁆𑀕𑀸𑀫𑁂𑀲𑀼𑀦𑁆𑀢𑀺 𑀬𑀼𑀚𑁆𑀛𑀺𑀁𑀲𑀼. 𑀓𑁂𑀦 𑀓𑀸𑀭𑀡𑁂𑀦? 𑀫𑀳𑀸𑀓𑁄𑀲𑀮𑀭𑀜𑁆𑀜𑀸 𑀓𑀺𑀭 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀥𑀻𑀢𑀭𑀁 𑀤𑁂𑀦𑁆𑀢𑁂𑀦 𑀤𑁆𑀯𑀺𑀦𑁆𑀦𑀁 𑀭𑀚𑁆𑀚𑀸𑀦𑀁 𑀅𑀦𑁆𑀢𑀭𑁂 𑀲𑀢𑀲𑀳𑀲𑁆𑀲𑀼𑀝𑁆𑀞𑀸𑀦𑁄 𑀓𑀸𑀲𑀺𑀕𑀸𑀫𑁄 𑀦𑀸𑀫 𑀥𑀻𑀢𑀼 𑀤𑀺𑀦𑁆𑀦𑁄. 𑀅𑀚𑀸𑀢𑀲𑀢𑁆𑀢𑀼𑀦𑀸 𑀘 𑀧𑀺𑀢𑀭𑀺 𑀫𑀸𑀭𑀺𑀢𑁂 𑀫𑀸𑀢𑀸𑀧𑀺𑀲𑁆𑀲 𑀭𑀜𑁆𑀜𑁄 𑀯𑀺𑀬𑁄𑀕𑀲𑁄𑀓𑁂𑀦 𑀦𑀘𑀺𑀭𑀲𑁆𑀲𑁂𑀯 𑀫𑀢𑀸. 𑀢𑀢𑁄 𑀭𑀸𑀚𑀸 𑀧𑀲𑁂𑀦𑀤𑀺 𑀓𑁄𑀲𑀮𑁄 𑁋 ‘‘𑀅𑀚𑀸𑀢𑀲𑀢𑁆𑀢𑀼𑀦𑀸 𑀫𑀸𑀢𑀸𑀧𑀺𑀢𑀭𑁄 𑀫𑀸𑀭𑀺𑀢𑀸, 𑀫𑀬𑁆𑀳𑀁 𑀧𑀺𑀢𑀼 𑀲𑀦𑁆𑀢𑀓𑁄 𑀕𑀸𑀫𑁄’’𑀢𑀺 𑀢𑀲𑁆𑀲𑀢𑁆𑀣𑀸𑀬 𑀅𑀟𑁆𑀟𑀁 𑀓𑀭𑁄𑀢𑀺. 𑀅𑀚𑀸𑀢𑀲𑀢𑁆𑀢𑀼𑀧𑀺 ‘‘𑀫𑀬𑁆𑀳𑀁 𑀫𑀸𑀢𑀼 𑀲𑀦𑁆𑀢𑀓𑁄’’𑀢𑀺 𑀢𑀲𑁆𑀲 𑀕𑀸𑀫𑀲𑁆𑀲𑀢𑁆𑀣𑀸𑀬 𑀤𑁆𑀯𑁂𑀧𑀺 𑀫𑀸𑀢𑀼𑀮𑀪𑀸𑀕𑀺𑀦𑁂𑀬𑁆𑀬𑀸 𑀬𑀼𑀚𑁆𑀛𑀺𑀁𑀲𑀼.

𑀧𑀸𑀧𑀸 𑀤𑁂𑀯𑀤𑀢𑁆𑀢𑀸𑀤𑀬𑁄 𑀫𑀺𑀢𑁆𑀢𑀸 𑀅𑀲𑁆𑀲𑀸𑀢𑀺 𑀧𑀸𑀧𑀫𑀺𑀢𑁆𑀢𑁄. 𑀢𑁂𑀬𑁂𑀯𑀲𑁆𑀲 𑀲𑀳𑀸𑀬𑀸𑀢𑀺 𑀧𑀸𑀧𑀲𑀳𑀸𑀬𑁄. 𑀢𑁂𑀲𑁆𑀯𑁂𑀯𑀲𑁆𑀲 𑀘𑀺𑀢𑁆𑀢𑀁 𑀦𑀺𑀦𑁆𑀦𑀁 𑀲𑀫𑁆𑀧𑀯𑀗𑁆𑀓𑀦𑁆𑀢𑀺 𑀧𑀸𑀧𑀲𑀫𑁆𑀧𑀯𑀗𑁆𑀓𑁄. 𑀧𑀲𑁂𑀦𑀤𑀺𑀲𑁆𑀲 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀸𑀤𑀻𑀦𑀁 𑀯𑀲𑁂𑀦 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀤𑀺𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀤𑀼𑀓𑁆𑀔𑀁 𑀲𑁂𑀢𑀻𑀢𑀺 𑀚𑀺𑀢𑀸𑀦𑀺 𑀳𑀢𑁆𑀣𑀺𑀆𑀤𑀻𑀦𑀺 𑀅𑀦𑀼𑀲𑁄𑀘𑀦𑁆𑀢𑁄 𑀤𑀼𑀓𑁆𑀔𑀁 𑀲𑀬𑀺𑀲𑁆𑀲𑀢𑀺. 𑀇𑀤𑀁 𑀪𑀕𑀯𑀸 𑀧𑀼𑀦 𑀢𑀲𑁆𑀲 𑀚𑀬𑀓𑀸𑀭𑀡𑀁 𑀤𑀺𑀲𑁆𑀯𑀸 𑀆𑀳. 𑀚𑀬𑀁 𑀯𑁂𑀭𑀁 𑀧𑀲𑀯𑀢𑀻𑀢𑀺 𑀚𑀺𑀦𑀦𑁆𑀢𑁄 𑀯𑁂𑀭𑀁 𑀧𑀲𑀯𑀢𑀺, 𑀯𑁂𑀭𑀺𑀧𑀼𑀕𑁆𑀕𑀮𑀁 𑀮𑀪𑀢𑀺. 𑀘𑀢𑀼𑀢𑁆𑀣𑀁.

𑁫. 𑀤𑀼𑀢𑀺𑀬𑀲𑀗𑁆𑀕𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁬. 𑀧𑀜𑁆𑀘𑀫𑁂 𑀅𑀩𑁆𑀪𑀼𑀬𑁆𑀬𑀸𑀲𑀻𑀢𑀺 𑀧𑀭𑀸𑀚𑀬𑁂 𑀕𑀭𑀳𑀧𑁆𑀧𑀢𑁆𑀢𑁄 ‘‘𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀓𑀣𑀸𑀲𑀮𑁆𑀮𑀸𑀧𑀁 𑀲𑀼𑀡𑀸𑀣𑀸’’𑀢𑀺 𑀭𑀢𑁆𑀢𑀺𑀪𑀸𑀕𑁂 𑀩𑀼𑀤𑁆𑀥𑀭𑀓𑁆𑀔𑀺𑀢𑁂𑀦 𑀦𑀸𑀫 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁂𑀦 𑀥𑀫𑁆𑀫𑀭𑀓𑁆𑀔𑀺𑀢𑀲𑁆𑀲 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑀲𑁆𑀲 ‘‘𑀲𑀘𑁂 𑀭𑀸𑀚𑀸 𑀇𑀫𑀜𑁆𑀘 𑀉𑀧𑀸𑀬𑀁 𑀓𑀢𑁆𑀯𑀸 𑀕𑀘𑁆𑀙𑁂𑀬𑁆𑀬, 𑀧𑀼𑀦 𑀚𑀺𑀦𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀚𑀬𑀓𑀸𑀭𑀡𑀁 𑀲𑀼𑀢𑁆𑀯𑀸 𑀅𑀪𑀺𑀉𑀬𑁆𑀬𑀸𑀲𑀺.

𑀬𑀸𑀯𑀲𑁆𑀲 𑀉𑀧𑀓𑀧𑁆𑀧𑀢𑀻𑀢𑀺 𑀬𑀸𑀯 𑀢𑀲𑁆𑀲 𑀉𑀧𑀓𑀧𑁆𑀧𑀢𑀺 𑀲𑀬𑁆𑀳𑀁 𑀳𑁄𑀢𑀺. 𑀬𑀤𑀸 𑀘𑀜𑁆𑀜𑁂𑀢𑀺 𑀬𑀤𑀸 𑀅𑀜𑁆𑀜𑁂. 𑀯𑀺𑀮𑀼𑀫𑁆𑀧𑀦𑁆𑀢𑀻𑀢𑀺 𑀢𑀁 𑀯𑀺𑀮𑀼𑀫𑁆𑀧𑀺𑀢𑁆𑀯𑀸 𑀞𑀺𑀢𑀧𑀼𑀕𑁆𑀕𑀮𑀁 𑀯𑀺𑀮𑀼𑀫𑁆𑀧𑀦𑁆𑀢𑀺. 𑀯𑀺𑀮𑀼𑀫𑁆𑀧𑀢𑀻𑀢𑀺 𑀯𑀺𑀮𑀼𑀫𑁆𑀧𑀺𑀬𑀢𑀺. 𑀞𑀸𑀦𑀁 𑀳𑀺 𑀫𑀜𑁆𑀜𑀢𑀻𑀢𑀺 ‘‘𑀓𑀸𑀭𑀡’’𑀦𑁆𑀢𑀺 𑀳𑀺 𑀫𑀜𑁆𑀜𑀢𑀺. 𑀬𑀤𑀸𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂. 𑀚𑁂𑀢𑀸𑀭𑀁 𑀮𑀪𑀢𑁂 𑀚𑀬𑀦𑁆𑀢𑀺 𑀚𑀬𑀦𑁆𑀢𑁄 𑀧𑀼𑀕𑁆𑀕𑀮𑁄 𑀧𑀘𑁆𑀙𑀸 𑀚𑁂𑀢𑀸𑀭𑀫𑁆𑀧𑀺 𑀮𑀪𑀢𑀺. 𑀭𑁄𑀲𑁂𑀢𑀸𑀭𑀦𑁆𑀢𑀺 𑀖𑀝𑁆𑀝𑁂𑀢𑀸𑀭𑀁. 𑀭𑁄𑀲𑀓𑁄𑀢𑀺 𑀖𑀝𑁆𑀝𑀓𑁄. 𑀓𑀫𑁆𑀫𑀯𑀺𑀯𑀝𑁆𑀝𑁂𑀦𑀸𑀢𑀺 𑀓𑀫𑁆𑀫𑀧𑀭𑀺𑀡𑀸𑀫𑁂𑀦, 𑀢𑀲𑁆𑀲 𑀯𑀺𑀮𑀼𑀫𑁆𑀧𑀦𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀤𑀸𑀦𑁂𑀦. 𑀲𑁄 𑀯𑀺𑀮𑀼𑀢𑁆𑀢𑁄 𑀯𑀺𑀮𑀼𑀧𑁆𑀧𑀢𑀻𑀢𑀺 𑀲𑁄 𑀯𑀺𑀮𑀼𑀫𑁆𑀧𑀓𑁄 𑀯𑀺𑀮𑀼𑀫𑁆𑀧𑀺𑀬𑀢𑀺. 𑀧𑀜𑁆𑀘𑀫𑀁.

𑁬. 𑀫𑀮𑁆𑀮𑀺𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁭. 𑀙𑀝𑁆𑀞𑁂 𑀉𑀧𑀲𑀗𑁆𑀓𑀫𑀻𑀢𑀺 𑀫𑀮𑁆𑀮𑀺𑀓𑀸𑀬 𑀤𑁂𑀯𑀺𑀬𑀸 𑀕𑀩𑁆𑀪𑀯𑀼𑀝𑁆𑀞𑀸𑀦𑀓𑀸𑀮𑁂 𑀲𑀽𑀢𑀺𑀖𑀭𑀁 𑀧𑀝𑀺𑀚𑀕𑁆𑀕𑀸𑀧𑁂𑀢𑁆𑀯𑀸 𑀆𑀭𑀓𑁆𑀔𑀁 𑀤𑀢𑁆𑀯𑀸 𑀉𑀧𑀲𑀗𑁆𑀓𑀫𑀺. 𑀅𑀦𑀢𑁆𑀢𑀫𑀦𑁄 𑀅𑀳𑁄𑀲𑀻𑀢𑀺, ‘‘𑀤𑀼𑀕𑁆𑀕𑀢𑀓𑀼𑀮𑀲𑁆𑀲 𑀫𑁂 𑀥𑀻𑀢𑀼 𑀫𑀳𑀦𑁆𑀢𑀁 𑀇𑀲𑁆𑀲𑀭𑀺𑀬𑀁 𑀤𑀺𑀦𑁆𑀦𑀁, 𑀲𑀘𑁂 𑀧𑀼𑀢𑁆𑀢𑀁 𑀅𑀮𑀪𑀺𑀲𑁆𑀲, 𑀫𑀳𑀦𑁆𑀢𑀁 𑀲𑀓𑁆𑀓𑀸𑀭𑀁 𑀅𑀥𑀺𑀕𑀫𑀺𑀲𑁆𑀲, 𑀢𑀢𑁄 𑀤𑀸𑀦𑀺 𑀧𑀭𑀺𑀳𑀻𑀦𑀸’’𑀢𑀺 𑀅𑀦𑀢𑁆𑀢𑀫𑀦𑁄 𑀅𑀳𑁄𑀲𑀺. 𑀲𑁂𑀬𑁆𑀬𑀸𑀢𑀺 𑀤𑀦𑁆𑀥𑀧𑀜𑁆𑀜𑀲𑁆𑀫𑀸 𑀏𑀮𑀫𑀽𑀕𑀧𑀼𑀢𑁆𑀢𑀢𑁄 𑀏𑀓𑀘𑁆𑀘𑀸 𑀇𑀢𑁆𑀣𑀻𑀬𑁂𑀯 𑀲𑁂𑀬𑁆𑀬𑀸. 𑀧𑁄𑀲𑀸𑀢𑀺 𑀧𑁄𑀲𑁂𑀳𑀺. 𑀚𑀦𑀸𑀥𑀺𑀧𑀸𑀢𑀺 𑀚𑀦𑀸𑀥𑀺𑀪𑀼𑀁 𑀭𑀸𑀚𑀸𑀦𑀁 𑀆𑀮𑀧𑀢𑀺. 𑀲𑀲𑁆𑀲𑀼𑀤𑁂𑀯𑀸𑀢𑀺 𑀲𑀲𑁆𑀲𑀼𑀲𑀲𑀼𑀭𑀤𑁂𑀯𑀢𑀸. 𑀤𑀺𑀲𑀫𑁆𑀧𑀢𑀻𑀢𑀺 𑀤𑀺𑀲𑀸𑀚𑁂𑀝𑁆𑀞𑀓𑀸. 𑀢𑀸𑀤𑀺𑀲𑀸 𑀲𑀼𑀪𑀕𑀺𑀬𑀸𑀢𑀺 𑀢𑀸𑀤𑀺𑀲𑀸𑀬 𑀲𑀼𑀪𑀭𑀺𑀬𑀸𑀬. 𑀙𑀝𑁆𑀞𑀁.

𑁭. 𑀅𑀧𑁆𑀧𑀫𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁮. 𑀲𑀢𑁆𑀢𑀫𑁂 𑀲𑀫𑀥𑀺𑀕𑁆𑀕𑀬𑁆𑀳𑀸𑀢𑀺 𑀲𑀫𑀥𑀺𑀕𑁆𑀕𑀡𑁆𑀳𑀺𑀢𑁆𑀯𑀸, 𑀆𑀤𑀺𑀬𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀫𑀸𑀤𑁄𑀢𑀺 𑀓𑀸𑀭𑀸𑀧𑀓𑀅𑀧𑁆𑀧𑀫𑀸𑀤𑁄. 𑀲𑀫𑁄𑀥𑀸𑀦𑀦𑁆𑀢𑀺 𑀲𑀫𑀯𑀥𑀸𑀦𑀁 𑀉𑀧𑀓𑁆𑀔𑁂𑀧𑀁. 𑀏𑀯𑀫𑁂𑀯 𑀔𑁄𑀢𑀺 𑀳𑀢𑁆𑀣𑀺𑀧𑀤𑀁 𑀯𑀺𑀬 𑀳𑀺 𑀓𑀸𑀭𑀸𑀧𑀓𑀅𑀧𑁆𑀧𑀫𑀸𑀤𑁄, 𑀲𑁂𑀲𑀧𑀤𑀚𑀸𑀢𑀸𑀦𑀺 𑀯𑀺𑀬 𑀅𑀯𑀲𑁂𑀲𑀸 𑀘𑀢𑀼𑀪𑀽𑀫𑀓𑀸 𑀓𑀼𑀲𑀮𑀥𑀫𑁆𑀫𑀸. 𑀢𑁂 𑀳𑀢𑁆𑀣𑀺𑀧𑀤𑁂 𑀲𑁂𑀲𑀧𑀤𑀸𑀦𑀺 𑀯𑀺𑀬 𑀅𑀧𑁆𑀧𑀫𑀸𑀤𑁂 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀅𑀧𑁆𑀧𑀫𑀸𑀤𑀲𑁆𑀲 𑀅𑀦𑁆𑀢𑁄 𑀧𑀭𑀺𑀯𑀢𑁆𑀢𑀦𑁆𑀢𑀺. 𑀬𑀣𑀸 𑀘 𑀳𑀢𑁆𑀣𑀺𑀧𑀤𑀁 𑀲𑁂𑀲𑀧𑀤𑀸𑀦𑀁 𑀅𑀕𑁆𑀕𑀁 𑀲𑁂𑀝𑁆𑀞𑀁, 𑀏𑀯𑀁 𑀅𑀧𑁆𑀧𑀫𑀸𑀤𑁄 𑀲𑁂𑀲𑀥𑀫𑁆𑀫𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀫𑀳𑀕𑁆𑀕𑀢𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀫𑁆𑀧𑀺 𑀳𑁂𑀲 𑀧𑀝𑀺𑀮𑀸𑀪𑀓𑀝𑁆𑀞𑁂𑀦 𑀮𑁄𑀓𑀺𑀬𑁄𑀧𑀺 𑀲𑀫𑀸𑀦𑁄 𑀅𑀕𑁆𑀕𑁄𑀯 𑀳𑁄𑀢𑀺.

𑀅𑀧𑁆𑀧𑀫𑀸𑀤𑀁 𑀧𑀲𑀁𑀲𑀦𑁆𑀢𑀻𑀢𑀺 ‘‘𑀏𑀢𑀸𑀦𑀺 𑀆𑀬𑀼𑀆𑀤𑀻𑀦𑀺 𑀧𑀢𑁆𑀣𑀬𑀦𑁆𑀢𑁂𑀦 𑀅𑀧𑁆𑀧𑀫𑀸𑀤𑁄𑀯 𑀓𑀸𑀢𑀩𑁆𑀩𑁄’’𑀢𑀺 𑀅𑀧𑁆𑀧𑀫𑀸𑀤𑀫𑁂𑀯 𑀧𑀲𑀁𑀲𑀦𑁆𑀢𑀺. 𑀬𑀲𑁆𑀫𑀸 𑀯𑀸 𑀧𑀼𑀜𑁆𑀜𑀓𑀺𑀭𑀺𑀬𑀸𑀲𑀼 𑀧𑀡𑁆𑀟𑀺𑀢𑀸 𑀅𑀧𑁆𑀧𑀫𑀸𑀤𑀁 𑀧𑀲𑀁𑀲𑀦𑁆𑀢𑀺, 𑀢𑀲𑁆𑀫𑀸 𑀆𑀬𑀼𑀆𑀤𑀻𑀦𑀺 𑀧𑀢𑁆𑀣𑀬𑀦𑁆𑀢𑁂𑀦 𑀅𑀧𑁆𑀧𑀫𑀸𑀤𑁄𑀯 𑀓𑀸𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀸𑀪𑀺𑀲𑀫𑀬𑀸𑀢𑀺 𑀅𑀢𑁆𑀣𑀧𑀝𑀺𑀮𑀸𑀪𑀸. 𑀲𑀢𑁆𑀢𑀫𑀁.

𑁮. 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁯. 𑀅𑀝𑁆𑀞𑀫𑁂 𑀲𑁄 𑀘 𑀔𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑀸𑀢𑀺 𑀲𑁄 𑀘𑀸𑀬𑀁 𑀥𑀫𑁆𑀫𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀯 𑀲𑁆𑀯𑀸𑀓𑁆𑀔𑀸𑀢𑁄 𑀦𑀸𑀫 𑀳𑁄𑀢𑀺, 𑀦 𑀧𑀸𑀧𑀫𑀺𑀢𑁆𑀢𑀲𑁆𑀲𑀸𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀥𑀫𑁆𑀫𑁄 𑀲𑀩𑁆𑀩𑁂𑀲𑀫𑁆𑀧𑀺 𑀲𑁆𑀯𑀸𑀓𑁆𑀔𑀸𑀢𑁄𑀯, 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲 𑀧𑀦 𑀲𑀼𑀲𑁆𑀲𑀽𑀲𑀦𑁆𑀢𑀲𑁆𑀲 𑀲𑀤𑁆𑀤𑀳𑀦𑁆𑀢𑀲𑁆𑀲 𑀅𑀢𑁆𑀣𑀁 𑀧𑀽𑀭𑁂𑀢𑀺 𑀪𑁂𑀲𑀚𑁆𑀚𑀁 𑀯𑀺𑀬 𑀯𑀴𑀜𑁆𑀚𑀦𑁆𑀢𑀲𑁆𑀲 𑀦 𑀇𑀢𑀭𑀲𑁆𑀲𑀸𑀢𑀺. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀥𑀫𑁆𑀫𑁄𑀢𑀺 𑀘𑁂𑀢𑁆𑀣 𑀤𑁂𑀲𑀦𑀸𑀥𑀫𑁆𑀫𑁄 𑀯𑁂𑀤𑀺𑀢𑀩𑁆𑀩𑁄.

𑀉𑀧𑀟𑁆𑀠𑀫𑀺𑀤𑀦𑁆𑀢𑀺 𑀣𑁂𑀭𑁄 𑀓𑀺𑀭 𑀭𑀳𑁄𑀕𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀲𑀫𑀡𑀥𑀫𑁆𑀫𑁄 𑀦𑀸𑀫 𑀑𑀯𑀸𑀤𑀓𑁂 𑀅𑀦𑀼𑀲𑀸𑀲𑀓𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑀢𑀺 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁂 𑀞𑀺𑀢𑀲𑁆𑀲 𑀲𑀫𑁆𑀧𑀚𑁆𑀚𑀢𑀺, 𑀉𑀧𑀟𑁆𑀠𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑁄 𑀳𑁄𑀢𑀺, 𑀉𑀧𑀟𑁆𑀠𑀁 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑀢𑁄’’𑀢𑀺. 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀳𑀁 𑀧𑀤𑁂𑀲𑀜𑀸𑀡𑁂 𑀞𑀺𑀢𑁄 𑀦𑀺𑀧𑁆𑀧𑀤𑁂𑀲𑀁 𑀘𑀺𑀦𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀲𑀢𑁆𑀣𑀸𑀭𑀁 𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀓𑁆𑀓𑀗𑁆𑀔𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀸 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳. 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲𑀸𑀢𑀺 𑀅𑀭𑀺𑀬𑀫𑀕𑁆𑀕𑀲𑁆𑀲. 𑀬𑀤𑀺𑀤𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀢𑀺 𑀬𑀸 𑀏𑀲𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀦𑀸𑀫, 𑀲𑀸 𑀉𑀧𑀟𑁆𑀠𑀁, 𑀢𑀢𑁄 𑀉𑀧𑀟𑁆𑀠𑀁 𑀆𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀺 𑀣𑁂𑀭𑁂𑀦 ‘‘𑀉𑀧𑀟𑁆𑀠𑀼𑀧𑀟𑁆𑀠𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑁄 𑀆𑀕𑀘𑁆𑀙𑀦𑁆𑀢𑀺, 𑀉𑀧𑀟𑁆𑀠𑀼𑀧𑀟𑁆𑀠𑀸 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑀢𑁄’’𑀢𑀺 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀣𑁂𑀭𑀲𑁆𑀲 𑀅𑀬𑀁 𑀫𑀦𑁄𑀭𑀣𑁄, 𑀬𑀣𑀸 𑀧𑀦 𑀩𑀳𑀽𑀳𑀺 𑀲𑀺𑀮𑀸𑀣𑀫𑁆𑀪𑁂 𑀉𑀲𑁆𑀲𑀸𑀧𑀺𑀢𑁂, ‘‘𑀏𑀢𑁆𑀢𑀓𑀁 𑀞𑀸𑀦𑀁 𑀅𑀲𑀼𑀓𑁂𑀦 𑀉𑀲𑁆𑀲𑀸𑀧𑀺𑀢𑀁, 𑀏𑀢𑁆𑀢𑀓𑀁 𑀅𑀲𑀼𑀓𑁂𑀦𑀸’’𑀢𑀺 𑀯𑀺𑀦𑀺𑀩𑁆𑀪𑁄𑀕𑁄 𑀦𑀢𑁆𑀣𑀺, 𑀬𑀣𑀸 𑀘 𑀫𑀸𑀢𑀸𑀧𑀺𑀢𑀭𑁄 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁂𑀲𑀼 𑀧𑀼𑀢𑁆𑀢𑁂𑀲𑀼 ‘‘𑀏𑀢𑁆𑀢𑀓𑀁 𑀫𑀸𑀢𑀺𑀢𑁄 𑀦𑀺𑀩𑁆𑀩𑀢𑁆𑀢𑀁, 𑀏𑀢𑁆𑀢𑀓𑀁 𑀧𑀺𑀢𑀺𑀢𑁄’’𑀢𑀺 𑀯𑀺𑀦𑀺𑀩𑁆𑀪𑁄𑀕𑁄 𑀦𑀢𑁆𑀣𑀺, 𑀏𑀯𑀁 𑀇𑀥𑀸𑀧𑀺 𑀅𑀯𑀺𑀦𑀺𑀩𑁆𑀪𑁄𑀕𑀥𑀫𑁆𑀫𑁄 𑀳𑁂𑀲, ‘‘𑀏𑀢𑁆𑀢𑀓𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑁄 𑀦𑀺𑀩𑁆𑀩𑀢𑁆𑀢𑀁, 𑀏𑀢𑁆𑀢𑀓𑀁 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑀢𑁄’’𑀢𑀺 𑀦 𑀲𑀓𑁆𑀓𑀸 𑀮𑀤𑁆𑀥𑀼𑀁, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀬 𑀧𑀦 𑀉𑀧𑀟𑁆𑀠𑀕𑀼𑀡𑁄 𑀮𑀩𑁆𑀪𑀢𑀻𑀢𑀺 𑀣𑁂𑀭𑀲𑁆𑀲 𑀅𑀚𑁆𑀛𑀸𑀲𑀬𑁂𑀦 𑀉𑀧𑀟𑁆𑀠𑀁 𑀦𑀸𑀫 𑀚𑀸𑀢𑀁, 𑀲𑀓𑀮𑀕𑀼𑀡𑁄 𑀧𑀝𑀺𑀮𑀩𑁆𑀪𑀢𑀻𑀢𑀺 𑀪𑀕𑀯𑀢𑁄 𑀅𑀚𑁆𑀛𑀸𑀲𑀬𑁂𑀦 𑀲𑀓𑀮𑀁 𑀦𑀸𑀫 𑀚𑀸𑀢𑀁. 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀢𑀺 𑀘𑁂𑀢𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀮𑀸𑀪𑀗𑁆𑀕𑀁 𑀦𑀸𑀫𑀸𑀢𑀺 𑀕𑀳𑀺𑀢𑀁. 𑀅𑀢𑁆𑀣𑀢𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀦𑀺𑀲𑁆𑀲𑀸𑀬 𑀮𑀤𑁆𑀥𑀸 𑀲𑀻𑀮𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑀺𑀧𑀺 𑀯𑀤𑀦𑁆𑀢𑀺𑀬𑁂𑀯.

𑀫𑀸 𑀳𑁂𑀯𑀁, 𑀆𑀦𑀦𑁆𑀤𑀸𑀢𑀺, 𑀆𑀦𑀦𑁆𑀤, 𑀫𑀸 𑀏𑀯𑀁 𑀅𑀪𑀡𑀺, 𑀩𑀳𑀼𑀲𑁆𑀲𑀼𑀢𑁄 𑀢𑁆𑀯𑀁 𑀲𑁂𑀔𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑁄 𑀅𑀝𑁆𑀞 𑀯𑀭𑁂 𑀕𑀳𑁂𑀢𑁆𑀯𑀸 𑀫𑀁 𑀉𑀧𑀝𑁆𑀞𑀳𑀲𑀺, 𑀘𑀢𑀽𑀳𑀺 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀢𑀸𑀤𑀺𑀲𑀲𑁆𑀲 𑀏𑀯𑀁 𑀓𑀣𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀓𑀮𑀫𑁂𑀯 𑀳𑀺𑀤𑀁, 𑀆𑀦𑀦𑁆𑀤, 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀬𑀤𑀺𑀤𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀢𑀺 𑀇𑀤𑀁 𑀪𑀕𑀯𑀸 𑁋 ‘‘𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀙 𑀅𑀪𑀺𑀜𑁆𑀜𑀸 𑀲𑀩𑁆𑀩𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀫𑀽𑀮𑀓𑀫𑁂𑀯 𑀳𑁄𑀢𑀻’’𑀢𑀺 𑀲𑀦𑁆𑀥𑀸𑀬𑀸𑀳. 𑀇𑀤𑀸𑀦𑀺 𑀯𑀘𑀻𑀪𑁂𑀤𑁂𑀦𑁂𑀯 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀸𑀝𑀺𑀓𑀗𑁆𑀔𑀦𑁆𑀢𑀺 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀅𑀯𑀲𑁆𑀲𑀁𑀪𑀸𑀯𑀻𑀢𑀺 𑀅𑀢𑁆𑀣𑁄.

𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀻𑀢𑀺𑀆𑀤𑀻𑀲𑀼 𑀅𑀝𑁆𑀞𑀦𑁆𑀦𑀁 𑀆𑀤𑀺𑀧𑀤𑀸𑀦𑀁𑀬𑁂𑀯 𑀢𑀸𑀯 𑀅𑀬𑀁 𑀲𑀗𑁆𑀔𑁂𑀧𑀯𑀡𑁆𑀡𑀦𑀸 𑁋 𑀲𑀫𑁆𑀫𑀸 𑀤𑀲𑁆𑀲𑀦𑀮𑀓𑁆𑀔𑀡𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀲𑀫𑁆𑀫𑀸 𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄. 𑀲𑀫𑁆𑀫𑀸 𑀧𑀭𑀺𑀕𑁆𑀕𑀳𑀡𑀮𑀓𑁆𑀔𑀡𑀸 𑀲𑀫𑁆𑀫𑀸𑀯𑀸𑀘𑀸. 𑀲𑀫𑁆𑀫𑀸 𑀲𑀫𑀼𑀝𑁆𑀞𑀸𑀧𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄. 𑀲𑀫𑁆𑀫𑀸 𑀯𑁄𑀤𑀸𑀧𑀦𑀮𑀓𑁆𑀔𑀡𑀸 𑀲𑀫𑁆𑀫𑀸𑀆𑀚𑀻𑀯𑁄. 𑀲𑀫𑁆𑀫𑀸 𑀧𑀕𑁆𑀕𑀳𑀮𑀓𑁆𑀔𑀡𑁄 𑀲𑀫𑁆𑀫𑀸𑀯𑀸𑀬𑀸𑀫𑁄. 𑀲𑀫𑁆𑀫𑀸 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑀸 𑀲𑀫𑁆𑀫𑀸𑀲𑀢𑀺. 𑀲𑀫𑁆𑀫𑀸 𑀲𑀫𑀸𑀥𑀸𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀲𑀫𑀸𑀥𑀺.

𑀢𑁂𑀲𑀼 𑀏𑀓𑁂𑀓𑀲𑁆𑀲 𑀢𑀻𑀡𑀺 𑀓𑀺𑀘𑁆𑀘𑀸𑀦𑀺 𑀳𑁄𑀦𑁆𑀢𑀺. 𑀲𑁂𑀬𑁆𑀬𑀸𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺 𑀢𑀸𑀯 𑀅𑀜𑁆𑀜𑁂𑀳𑀺𑀧𑀺 𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑁂𑀳𑀺 𑀲𑀤𑁆𑀥𑀺𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀚𑀳𑀢𑀺, 𑀦𑀺𑀭𑁄𑀥𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀧𑀲𑁆𑀲𑀢𑀺 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀫𑁄𑀳𑀯𑀺𑀥𑀫𑀦𑀯𑀲𑁂𑀦 𑀅𑀲𑀫𑁆𑀫𑁄𑀳𑀢𑁄. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀬𑁄𑀧𑀺 𑀢𑀣𑁂𑀯 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀤𑀻𑀦𑀺 𑀘 𑀧𑀚𑀳𑀦𑁆𑀢𑀺, 𑀦𑀺𑀭𑁄𑀥𑀜𑁆𑀘 𑀆𑀭𑀫𑁆𑀫𑀡𑀁 𑀓𑀭𑁄𑀦𑁆𑀢𑀺. 𑀯𑀺𑀲𑁂𑀲𑀢𑁄 𑀧𑀦𑁂𑀢𑁆𑀣 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀳𑀚𑀸𑀢𑀥𑀫𑁆𑀫𑁂 𑀲𑀫𑁆𑀫𑀸 𑀤𑀲𑁆𑀲𑁂𑀢𑀺. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀲𑀳𑀚𑀸𑀢𑀥𑀫𑁆𑀫𑁂 𑀅𑀪𑀺𑀦𑀺𑀭𑁄𑀧𑁂𑀢𑀺, 𑀲𑀫𑁆𑀫𑀸𑀯𑀸𑀘𑀸 𑀲𑀫𑁆𑀫𑀸 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀲𑀫𑁆𑀫𑀸 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀲𑀫𑁆𑀫𑀸𑀆𑀚𑀻𑀯𑁄 𑀲𑀫𑁆𑀫𑀸 𑀯𑁄𑀤𑀸𑀧𑁂𑀢𑀺, 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸 𑀧𑀕𑁆𑀕𑀡𑁆𑀳𑀸𑀢𑀺, 𑀲𑀫𑁆𑀫𑀸𑀲𑀢𑀺 𑀲𑀫𑁆𑀫𑀸 𑀉𑀧𑀝𑁆𑀞𑀸𑀧𑁂𑀢𑀺, 𑀲𑀫𑁆𑀫𑀸𑀲𑀫𑀸𑀥𑀺 𑀲𑀫𑁆𑀫𑀸 𑀤𑀳𑀢𑀺.

𑀅𑀧𑀺𑀘𑁂𑀲𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀦𑀸𑀫 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀔𑀡𑀸 𑀦𑀸𑀦𑀸𑀭𑀫𑁆𑀫𑀡𑀸 𑀳𑁄𑀢𑀺, 𑀫𑀕𑁆𑀕𑀓𑀸𑀮𑁂 𑀏𑀓𑀓𑁆𑀔𑀡𑀸 𑀏𑀓𑀸𑀭𑀫𑁆𑀫𑀡𑀸. 𑀓𑀺𑀘𑁆𑀘𑀢𑁄 𑀧𑀦 𑀲𑀫𑁆𑀫𑀸𑀤𑀺𑀝𑁆𑀞𑀺 𑀤𑀼𑀓𑁆𑀔𑁂 𑀜𑀸𑀡𑀦𑁆𑀢𑀺𑀆𑀤𑀻𑀦𑀺 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀢𑀺. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀬𑁄𑀧𑀺 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸𑀔𑀡𑀸 𑀦𑀸𑀦𑀸𑀭𑀫𑁆𑀫𑀡𑀸 𑀳𑁄𑀦𑁆𑀢𑀺, 𑀫𑀕𑁆𑀕𑀓𑀸𑀮𑁂 𑀏𑀓𑀓𑁆𑀔𑀡𑀸 𑀏𑀓𑀸𑀭𑀫𑁆𑀫𑀡𑀸. 𑀢𑁂𑀲𑀼 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀓𑀺𑀘𑁆𑀘𑀢𑁄 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑁄𑀢𑀺𑀆𑀤𑀻𑀦𑀺 𑀢𑀻𑀡𑀺 𑀦𑀸𑀫𑀸𑀦𑀺 𑀮𑀪𑀢𑀺. 𑀲𑀫𑁆𑀫𑀸𑀯𑀸𑀘𑀸𑀤𑀬𑁄 𑀢𑀬𑁄 𑀯𑀺𑀭𑀢𑀺𑀬𑁄𑀧𑀺 𑀳𑁄𑀦𑁆𑀢𑀺 𑀘𑁂𑀢𑀦𑀸𑀬𑁄𑀧𑀺, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀯𑀺𑀭𑀢𑀺𑀬𑁄𑀯. 𑀲𑀫𑁆𑀫𑀸𑀯𑀸𑀬𑀸𑀫𑁄 𑀲𑀫𑁆𑀫𑀸𑀲𑀢𑀻𑀢𑀺 𑀇𑀤𑀫𑁆𑀧𑀺 𑀤𑁆𑀯𑀬𑀁 𑀓𑀺𑀘𑁆𑀘𑀢𑁄 𑀲𑀫𑁆𑀫𑀧𑁆𑀧𑀥𑀸𑀦𑀲𑀢𑀺𑀧𑀝𑁆𑀞𑀸𑀦𑀯𑀲𑁂𑀦 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀢𑀺. 𑀲𑀫𑁆𑀫𑀸𑀲𑀫𑀸𑀥𑀺 𑀧𑀦 𑀧𑀼𑀩𑁆𑀩𑀪𑀸𑀕𑁂𑀧𑀺 𑀫𑀕𑁆𑀕𑀓𑁆𑀔𑀡𑁂𑀧𑀺 𑀲𑀫𑁆𑀫𑀸𑀲𑀫𑀸𑀥𑀺𑀬𑁂𑀯.

𑀏𑀯𑀁 𑀢𑀸𑀯 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸𑀦𑀁 𑀅𑀝𑁆𑀞𑀦𑁆𑀦𑀁 𑀆𑀤𑀺𑀧𑀤𑀸𑀦𑀁𑀬𑁂𑀯 𑀅𑀢𑁆𑀣𑀯𑀡𑁆𑀡𑀦𑀁 𑀜𑀢𑁆𑀯𑀸 𑀇𑀤𑀸𑀦𑀺 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀦𑁆𑀢𑀺𑀆𑀤𑀻𑀲𑀼 𑀏𑀯𑀁 𑀜𑀸𑀢𑀩𑁆𑀩𑁄. 𑀪𑀸𑀯𑁂𑀢𑀻𑀢𑀺 𑀯𑀟𑁆𑀠𑁂𑀢𑀺, 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀧𑀼𑀦𑀧𑁆𑀧𑀼𑀦𑀁 𑀚𑀦𑁂𑀢𑀺, 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀦𑁆𑀢𑀺 𑀯𑀺𑀯𑁂𑀓𑀁 𑀦𑀺𑀲𑁆𑀲𑀺𑀢𑀁, 𑀯𑀺𑀯𑁂𑀓𑁂 𑀯𑀸 𑀦𑀺𑀲𑁆𑀲𑀺𑀢𑀦𑁆𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁. 𑀯𑀺𑀯𑁂𑀓𑁄𑀢𑀺 𑀯𑀺𑀯𑀺𑀢𑁆𑀢𑀢𑀸. 𑀯𑀺𑀯𑀺𑀢𑁆𑀢𑀢𑀸 𑀘𑀸𑀬𑀁 𑀢𑀤𑀗𑁆𑀕𑀯𑀺𑀯𑁂𑀓𑁄, 𑀯𑀺𑀓𑁆𑀔𑀫𑁆𑀪𑀦-𑀲𑀫𑀼𑀘𑁆𑀙𑁂𑀤-𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺-𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑁄𑀢𑀺 𑀧𑀜𑁆𑀘𑀯𑀺𑀥𑁄. 𑀏𑀯𑀫𑁂𑀢𑀲𑁆𑀫𑀺𑀁 𑀧𑀜𑁆𑀘𑀯𑀺𑀥𑁂 𑀯𑀺𑀯𑁂𑀓𑁂. 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀦𑁆𑀢𑀺 𑀢𑀤𑀗𑁆𑀕𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀜𑁆𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀳𑀺 𑀅𑀬𑀁 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸𑀦𑀼𑀬𑀼𑀢𑁆𑀢𑁄 𑀬𑁄𑀕𑀻 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀓𑀺𑀘𑁆𑀘𑀢𑁄 𑀢𑀤𑀗𑁆𑀕𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁, 𑀅𑀚𑁆𑀛𑀸𑀲𑀬𑀢𑁄 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁, 𑀫𑀕𑁆𑀕𑀓𑀸𑀮𑁂 𑀧𑀦 𑀓𑀺𑀘𑁆𑀘𑀢𑁄 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁, 𑀆𑀭𑀫𑁆𑀫𑀡𑀢𑁄 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀺. 𑀏𑀲 𑀦𑀬𑁄 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀸𑀤𑀻𑀲𑀼. 𑀯𑀺𑀯𑁂𑀓𑀢𑁆𑀣𑀸 𑀏𑀯 𑀳𑀺 𑀯𑀺𑀭𑀸𑀕𑀸𑀤𑀬𑁄.

𑀓𑁂𑀯𑀮𑀜𑁆𑀘𑁂𑀢𑁆𑀣 𑀯𑁄𑀲𑁆𑀲𑀕𑁆𑀕𑁄 𑀤𑀼𑀯𑀺𑀥𑁄 𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑁄 𑀘 𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑁄 𑀘𑀸𑀢𑀺. 𑀢𑀢𑁆𑀣 𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑁄𑀢𑀺 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀘 𑀢𑀤𑀗𑁆𑀕𑀯𑀲𑁂𑀦, 𑀫𑀕𑁆𑀕𑀓𑁆𑀔𑀡𑁂 𑀘 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀓𑀺𑀮𑁂𑀲𑀧𑁆𑀧𑀳𑀸𑀦𑀁. 𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑁄𑀢𑀺 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀢𑀦𑁆𑀦𑀺𑀦𑁆𑀦𑀪𑀸𑀯𑁂𑀦, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀆𑀭𑀫𑁆𑀫𑀡𑀓𑀭𑀡𑁂𑀦 𑀦𑀺𑀩𑁆𑀩𑀸𑀦𑀧𑀓𑁆𑀔𑀦𑁆𑀤𑀦𑀁, 𑀢𑀤𑀼𑀪𑀬𑀫𑁆𑀧𑀺 𑀇𑀫𑀲𑁆𑀫𑀺𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑁂 𑀅𑀢𑁆𑀣𑀯𑀡𑁆𑀡𑀦𑀸𑀦𑀬𑁂 𑀯𑀝𑁆𑀝𑀢𑀺. 𑀢𑀣𑀸 𑀳𑀺 𑀅𑀬𑀁 𑀲𑀫𑁆𑀫𑀸𑀤𑀺𑀝𑁆𑀞𑀺 𑀬𑀣𑀸𑀯𑀼𑀢𑁆𑀢𑁂𑀦 𑀧𑀓𑀸𑀭𑁂𑀦 𑀓𑀺𑀮𑁂𑀲𑁂 𑀘 𑀧𑀭𑀺𑀘𑁆𑀘𑀚𑀢𑀺, 𑀦𑀺𑀩𑁆𑀩𑀸𑀦𑀜𑁆𑀘 𑀧𑀓𑁆𑀔𑀦𑁆𑀤𑀢𑀺.

𑀯𑁄𑀲𑁆𑀲𑀕𑁆𑀕𑀧𑀭𑀺𑀡𑀸𑀫𑀺𑀦𑁆𑀢𑀺 𑀇𑀫𑀺𑀦𑀸 𑀧𑀦 𑀲𑀓𑀮𑁂𑀦 𑀯𑀘𑀦𑁂𑀦 𑀯𑁄𑀲𑁆𑀲𑀕𑁆𑀕𑀢𑁆𑀣𑀁 𑀧𑀭𑀺𑀡𑀫𑀦𑁆𑀢𑀁 𑀧𑀭𑀺𑀡𑀢𑀜𑁆𑀘, 𑀧𑀭𑀺𑀧𑀘𑁆𑀘𑀦𑁆𑀢𑀁 𑀧𑀭𑀺𑀧𑀓𑁆𑀓𑀜𑁆𑀘𑀸𑀢𑀺 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀜𑁆𑀳𑀺 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀬𑀣𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀓𑀺𑀮𑁂𑀲𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑀢𑁆𑀣𑀁 𑀦𑀺𑀩𑁆𑀩𑀸𑀦𑀧𑀓𑁆𑀔𑀦𑁆𑀤𑀦𑀯𑁄𑀲𑁆𑀲𑀕𑁆𑀕𑀢𑁆𑀣𑀜𑁆𑀘 𑀧𑀭𑀺𑀧𑀘𑁆𑀘𑀢𑀺, 𑀬𑀣𑀸 𑀘 𑀧𑀭𑀺𑀧𑀓𑁆𑀓𑀸 𑀳𑁄𑀢𑀺, 𑀢𑀣𑀸 𑀦𑀁 𑀪𑀸𑀯𑁂𑀢𑀻𑀢𑀺. 𑀏𑀲 𑀦𑀬𑁄 𑀲𑁂𑀲𑀫𑀕𑁆𑀕𑀗𑁆𑀕𑁂𑀲𑀼.

𑀆𑀕𑀫𑁆𑀫𑀸𑀢𑀺 𑀆𑀭𑀩𑁆𑀪 𑀲𑀦𑁆𑀥𑀸𑀬 𑀧𑀝𑀺𑀘𑁆𑀘. 𑀚𑀸𑀢𑀺𑀥𑀫𑁆𑀫𑀸𑀢𑀺 𑀚𑀸𑀢𑀺𑀲𑀪𑀸𑀯𑀸 𑀚𑀸𑀢𑀺𑀧𑀓𑀢𑀺𑀓𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀓𑀮𑁄 𑀅𑀭𑀺𑀬𑀫𑀕𑁆𑀕𑁄𑀧𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀦𑀺𑀲𑁆𑀲𑀸𑀬 𑀮𑀩𑁆𑀪𑀢𑀺, 𑀢𑀲𑁆𑀫𑀸. 𑀳𑀦𑁆𑀤𑀸𑀢𑀺 𑀯𑀯𑀲𑁆𑀲𑀕𑁆𑀕𑀢𑁆𑀣𑁂 𑀦𑀺𑀧𑀸𑀢𑁄. 𑀅𑀧𑁆𑀧𑀫𑀸𑀤𑀁 𑀧𑀲𑀁𑀲𑀦𑁆𑀢𑀻𑀢𑀺 𑀅𑀧𑁆𑀧𑀫𑀸𑀤𑀁 𑀯𑀡𑁆𑀡𑀬𑀦𑁆𑀢𑀺, 𑀢𑀲𑁆𑀫𑀸 𑀅𑀧𑁆𑀧𑀫𑀸𑀤𑁄 𑀓𑀸𑀢𑀩𑁆𑀩𑁄. 𑀅𑀢𑁆𑀣𑀸𑀪𑀺𑀲𑀫𑀬𑀸𑀢𑀺 𑀅𑀢𑁆𑀣𑀧𑀝𑀺𑀮𑀸𑀪𑀸. 𑀅𑀝𑁆𑀞𑀫𑀁.

𑁯. 𑀧𑀞𑀫𑀅𑀧𑀼𑀢𑁆𑀢𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁦. 𑀦𑀯𑀫𑁂 𑀤𑀺𑀯𑀸 𑀤𑀺𑀯𑀲𑁆𑀲𑀸𑀢𑀺 𑀤𑀺𑀯𑀲𑀲𑁆𑀲 𑀤𑀺𑀯𑀸, 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂𑀢𑀺 𑀅𑀢𑁆𑀣𑁄. 𑀲𑀸𑀧𑀢𑁂𑀬𑁆𑀬𑀦𑁆𑀢𑀺 𑀥𑀦𑀁. 𑀓𑁄 𑀧𑀦 𑀯𑀸𑀤𑁄 𑀭𑀽𑀧𑀺𑀬𑀲𑁆𑀲𑀸𑀢𑀺 𑀲𑀼𑀯𑀡𑁆𑀡𑀭𑀚𑀢𑀢𑀫𑁆𑀩𑀮𑁄𑀳𑀓𑀸𑀴𑀮𑁄𑀳𑀨𑀸𑀮𑀓𑀘𑁆𑀙𑀧𑀓𑀸𑀤𑀺𑀪𑁂𑀤𑀲𑁆𑀲 𑀖𑀦𑀓𑀢𑀲𑁆𑀲 𑀘𑁂𑀯 𑀧𑀭𑀺𑀪𑁄𑀕𑀪𑀸𑀚𑀦𑀸𑀤𑀺𑀪𑁂𑀤𑀲𑁆𑀲 𑀘 𑀭𑀽𑀧𑀺𑀬𑀪𑀡𑁆𑀟𑀲𑁆𑀲 𑀧𑀦 𑀓𑁄 𑀯𑀸𑀤𑁄? ‘‘𑀏𑀢𑁆𑀢𑀓𑀁 𑀦𑀸𑀫𑀸’’𑀢𑀺 𑀓𑀸 𑀧𑀭𑀺𑀘𑁆𑀙𑁂𑀤𑀓𑀣𑀸𑀢𑀺 𑀅𑀢𑁆𑀣𑁄. 𑀓𑀡𑀸𑀚𑀓𑀦𑁆𑀢𑀺 𑀲𑀓𑀼𑀡𑁆𑀟𑀓𑀪𑀢𑁆𑀢𑀁. 𑀩𑀺𑀮𑀗𑁆𑀕𑀤𑀼𑀢𑀺𑀬𑀦𑁆𑀢𑀺 𑀓𑀜𑁆𑀚𑀺𑀓𑀤𑀼𑀢𑀺𑀬𑀁. 𑀲𑀸𑀡𑀦𑁆𑀢𑀺 𑀲𑀸𑀡𑀯𑀸𑀓𑀫𑀬𑀁. 𑀢𑀺𑀧𑀓𑁆𑀔𑀯𑀲𑀦𑀦𑁆𑀢𑀺 𑀢𑀻𑀡𑀺 𑀔𑀡𑁆𑀟𑀸𑀦𑀺 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀲𑀺𑀩𑁆𑀩𑀺𑀢𑁆𑀯𑀸 𑀓𑀢𑀦𑀺𑀯𑀸𑀲𑀦𑀁.

𑀅𑀲𑀧𑁆𑀧𑀼𑀭𑀺𑀲𑁄𑀢𑀺 𑀮𑀸𑀫𑀓𑀧𑀼𑀭𑀺𑀲𑁄. 𑀉𑀤𑁆𑀥𑀕𑁆𑀕𑀺𑀓𑀦𑁆𑀢𑀺𑀆𑀤𑀻𑀲𑀼 𑀉𑀧𑀭𑀽𑀧𑀭𑀺𑀪𑀽𑀫𑀻𑀲𑀼 𑀨𑀮𑀤𑀸𑀦𑀯𑀲𑁂𑀦 𑀉𑀤𑁆𑀥𑀁 𑀅𑀕𑁆𑀕𑀫𑀲𑁆𑀲𑀸𑀢𑀺 𑀉𑀤𑁆𑀥𑀕𑁆𑀕𑀺𑀓𑀸. 𑀲𑀕𑁆𑀕𑀲𑁆𑀲 𑀳𑀺𑀢𑀸 𑀢𑀢𑁆𑀭𑀼𑀧𑀧𑀢𑁆𑀢𑀺𑀚𑀦𑀦𑀢𑁄𑀢𑀺 𑀲𑁄𑀯𑀕𑁆𑀕𑀺𑀓𑀸. 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑁂𑀲𑀼 𑀲𑀼𑀔𑁄 𑀯𑀺𑀧𑀸𑀓𑁄 𑀅𑀲𑁆𑀲𑀸𑀢𑀺 𑀲𑀼𑀔𑀯𑀺𑀧𑀸𑀓𑀸. 𑀲𑀼𑀝𑁆𑀞𑀼 𑀅𑀕𑁆𑀕𑀸𑀦𑀁 𑀤𑀺𑀩𑁆𑀩𑀯𑀡𑁆𑀡𑀸𑀤𑀻𑀦𑀁 𑀯𑀺𑀲𑁂𑀲𑀸𑀦𑀁 𑀦𑀺𑀩𑁆𑀩𑀢𑁆𑀢𑀦𑀢𑁄 𑀲𑀕𑁆𑀕𑀲𑀁𑀯𑀢𑁆𑀢𑀦𑀺𑀓𑀸. 𑀏𑀯𑀭𑀽𑀧𑀁 𑀤𑀓𑁆𑀔𑀺𑀡𑀤𑀸𑀦𑀁 𑀦 𑀧𑀢𑀺𑀝𑁆𑀞𑀸𑀧𑁂𑀢𑀻𑀢𑀺.

𑀲𑀸𑀢𑁄𑀤𑀓𑀸𑀢𑀺 𑀫𑀥𑀼𑀭𑁄𑀤𑀓𑀸. 𑀲𑁂𑀢𑁆𑀢𑁄𑀤𑀓𑀸𑀢𑀺 𑀯𑀻𑀘𑀻𑀦𑀁 𑀪𑀺𑀦𑁆𑀦𑀝𑁆𑀞𑀸𑀦𑁂 𑀉𑀤𑀓𑀲𑁆𑀲 𑀲𑁂𑀢𑀢𑀸𑀬 𑀲𑁂𑀢𑁄𑀤𑀓𑀸. 𑀲𑀼𑀧𑀢𑀺𑀢𑁆𑀣𑀸𑀢𑀺 𑀲𑀼𑀦𑁆𑀤𑀭𑀢𑀺𑀢𑁆𑀣𑀸. 𑀢𑀁 𑀚𑀦𑁄𑀢𑀺 𑀬𑁂𑀦 𑀉𑀤𑀓𑁂𑀦 𑀲𑀸𑀢𑁄𑀤𑀓𑀸, 𑀢𑀁 𑀉𑀤𑀓𑀁 𑀚𑀦𑁄 𑀪𑀸𑀚𑀦𑀸𑀦𑀺 𑀧𑀽𑀭𑁂𑀢𑁆𑀯𑀸 𑀦𑁂𑀯 𑀳𑀭𑁂𑀬𑁆𑀬. 𑀦 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁂𑀬𑁆𑀬𑀸𑀢𑀺, 𑀬𑀁 𑀬𑀁 𑀉𑀤𑀓𑁂𑀦 𑀉𑀤𑀓𑀓𑀺𑀘𑁆𑀘𑀁 𑀓𑀸𑀢𑀩𑁆𑀩𑀁, 𑀢𑀁 𑀢𑀁 𑀦 𑀓𑀭𑁂𑀬𑁆𑀬. 𑀢𑀤𑀧𑁂𑀬𑁆𑀬𑀫𑀸𑀦𑀦𑁆𑀢𑀺 𑀢𑀁 𑀅𑀧𑁂𑀬𑁆𑀬𑀫𑀸𑀦𑀁. 𑀓𑀺𑀘𑁆𑀘𑀓𑀭𑁄 𑀘 𑀳𑁄𑀢𑀻𑀢𑀺 𑀅𑀢𑁆𑀢𑀦𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀓𑀭𑁄 𑀘𑁂𑀯 𑀓𑀼𑀲𑀮𑀓𑀺𑀘𑁆𑀘𑀓𑀭𑁄 𑀘, 𑀪𑀼𑀜𑁆𑀚𑀢𑀺 𑀘, 𑀓𑀫𑁆𑀫𑀦𑁆𑀢𑁂 𑀘 𑀧𑀬𑁄𑀚𑁂𑀢𑀺, 𑀤𑀸𑀦𑀜𑁆𑀘 𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀦𑀯𑀫𑀁.

𑁧𑁦. 𑀤𑀼𑀢𑀺𑀬𑀅𑀧𑀼𑀢𑁆𑀢𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁧. 𑀤𑀲𑀫𑁂 𑀧𑀺𑀡𑁆𑀟𑀧𑀸𑀢𑁂𑀦 𑀧𑀝𑀺𑀧𑀸𑀤𑁂𑀲𑀻𑀢𑀺 𑀧𑀺𑀡𑁆𑀟𑀧𑀸𑀢𑁂𑀦 𑀲𑀤𑁆𑀥𑀺𑀁 𑀲𑀁𑀬𑁄𑀚𑁂𑀲𑀺, 𑀧𑀺𑀡𑁆𑀟𑀧𑀸𑀢𑀁 𑀅𑀤𑀸𑀲𑀻𑀢𑀺 𑀅𑀢𑁆𑀣𑁄. 𑀧𑀓𑁆𑀓𑀸𑀫𑀻𑀢𑀺 𑀓𑁂𑀦𑀘𑀺𑀤𑁂𑀯 𑀭𑀸𑀚𑀼𑀧𑀝𑁆𑀞𑀸𑀦𑀸𑀤𑀺𑀦𑀸 𑀓𑀺𑀘𑁆𑀘𑁂𑀦 𑀕𑀢𑁄. 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀅𑀳𑁄𑀲𑀻𑀢𑀺 𑀲𑁄 𑀓𑀺𑀭 𑀅𑀜𑁆𑀜𑁂𑀲𑀼𑀧𑀺 𑀤𑀺𑀯𑀲𑁂𑀲𑀼 𑀢𑀁 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀁 𑀧𑀲𑁆𑀲𑀢𑀺, 𑀤𑀸𑀢𑀼𑀁 𑀧𑀦𑀲𑁆𑀲 𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀺𑀁 𑀧𑀦 𑀤𑀺𑀯𑀲𑁂 𑀅𑀬𑀁 𑀧𑀤𑀼𑀫𑀯𑀢𑀺𑀤𑁂𑀯𑀺𑀬𑀸 𑀢𑀢𑀺𑀬𑀧𑀼𑀢𑁆𑀢𑁄 𑀢𑀕𑁆𑀕𑀭𑀲𑀺𑀔𑀻 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀕𑀦𑁆𑀥𑀫𑀸𑀤𑀦𑀧𑀩𑁆𑀩𑀢𑁂 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀯𑀼𑀝𑁆𑀞𑀸𑀬 𑀅𑀦𑁄𑀢𑀢𑁆𑀢𑀤𑀳𑁂 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀫𑀦𑁄𑀲𑀺𑀮𑀸𑀢𑀮𑁂 𑀦𑀺𑀯𑀸𑀲𑁂𑀢𑁆𑀯𑀸 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀇𑀤𑁆𑀥𑀺𑀬𑀸 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀦𑀕𑀭𑀤𑁆𑀯𑀸𑀭𑁂 𑀑𑀭𑀼𑀬𑁆𑀳 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀫𑀸𑀤𑀸𑀬 𑀦𑀕𑀭𑀯𑀸𑀲𑀻𑀦𑀁 𑀖𑀭𑀤𑁆𑀯𑀸𑀭𑁂𑀲𑀼 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀞𑀧𑁂𑀦𑁆𑀢𑁄 𑀯𑀺𑀬 𑀧𑀸𑀲𑀸𑀤𑀺𑀓𑁂𑀳𑀺 𑀅𑀪𑀺𑀓𑁆𑀓𑀦𑁆𑀢𑀸𑀤𑀻𑀳𑀺 𑀅𑀦𑀼𑀧𑀼𑀩𑁆𑀩𑁂𑀦 𑀲𑁂𑀝𑁆𑀞𑀺𑀦𑁄 𑀖𑀭𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑁄. 𑀢𑀁𑀤𑀺𑀯𑀲𑀜𑁆𑀘 𑀲𑁂𑀝𑁆𑀞𑀺 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀧𑀡𑀻𑀢𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸, 𑀖𑀭𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸, 𑀤𑀦𑁆𑀢𑀦𑁆𑀢𑀭𑀸𑀦𑀺 𑀲𑁄𑀥𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺. 𑀲𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸, 𑀢𑀁𑀤𑀺𑀯𑀲𑀁 𑀧𑀸𑀢𑁄 𑀪𑀼𑀢𑁆𑀯𑀸 𑀦𑀺𑀲𑀺𑀦𑁆𑀦𑀢𑁆𑀢𑀸 𑀤𑀸𑀦𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸, 𑀪𑀭𑀺𑀬𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀇𑀫𑀲𑁆𑀲 𑀲𑀫𑀡𑀲𑁆𑀲 𑀧𑀺𑀡𑁆𑀟𑀧𑀸𑀢𑀁 𑀤𑁂𑀳𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀲𑁂𑀝𑁆𑀞𑀺𑀪𑀭𑀺𑀬𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀸 𑀏𑀢𑁆𑀢𑀓𑁂𑀦 𑀓𑀸𑀮𑁂𑀦 𑀇𑀫𑀲𑁆𑀲 ‘𑀤𑁂𑀣𑀸’𑀢𑀺 𑀯𑀘𑀦𑀁 𑀦 𑀲𑀼𑀢𑀧𑀼𑀩𑁆𑀩𑀁, 𑀤𑀸𑀧𑁂𑀦𑁆𑀢𑁄𑀧𑀺 𑀘 𑀅𑀚𑁆𑀚 𑀦 𑀬𑀲𑁆𑀲 𑀯𑀸 𑀢𑀲𑁆𑀲 𑀯𑀸 𑀤𑀸𑀧𑁂𑀢𑀺, 𑀯𑀻𑀢𑀭𑀸𑀕𑀤𑁄𑀲𑀫𑁄𑀳𑀲𑁆𑀲 𑀯𑀦𑁆𑀢𑀓𑀺𑀮𑁂𑀲𑀲𑁆𑀲 𑀑𑀳𑀺𑀢𑀪𑀸𑀭𑀲𑁆𑀲 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀤𑀸𑀧𑁂𑀢𑀺, 𑀬𑀁 𑀯𑀸 𑀢𑀁 𑀯𑀸 𑀅𑀤𑀢𑁆𑀯𑀸 𑀧𑀡𑀻𑀢𑀁 𑀧𑀺𑀡𑁆𑀟𑀧𑀸𑀢𑀁 𑀤𑀲𑁆𑀲𑀸𑀫𑀻’’𑀢𑀺, 𑀖𑀭𑀸 𑀦𑀺𑀓𑁆𑀔𑀫𑁆𑀫 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀧𑀢𑁆𑀢𑀁 𑀆𑀤𑀸𑀬 𑀅𑀦𑁆𑀢𑁄𑀦𑀺𑀯𑁂𑀲𑀦𑁂 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀲𑀼𑀧𑀭𑀺𑀲𑀼𑀤𑁆𑀥𑁂𑀳𑀺 𑀲𑀸𑀮𑀺𑀢𑀡𑁆𑀟𑀼𑀮𑁂𑀳𑀺 𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑀤𑀦𑀼𑀭𑀽𑀧𑀁 𑀔𑀸𑀤𑀦𑀻𑀬𑀁 𑀩𑁆𑀬𑀜𑁆𑀚𑀦𑀁 𑀲𑀼𑀧𑁂𑀬𑁆𑀬𑀜𑁆𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀩𑀳𑀺 𑀕𑀦𑁆𑀥𑁂𑀳𑀺 𑀲𑀫𑀮𑀗𑁆𑀓𑀭𑀺𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀲𑁆𑀲 𑀳𑀢𑁆𑀣𑁂𑀲𑀼 𑀧𑀢𑀺𑀝𑁆𑀞𑀧𑁂𑀢𑁆𑀯𑀸 𑀯𑀦𑁆𑀤𑀺. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑁋 ‘‘𑀅𑀜𑁆𑀜𑁂𑀲𑀫𑁆𑀧𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀲𑀗𑁆𑀕𑀳𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸𑀯 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑁄𑀧𑀺 𑀔𑁄 𑀲𑁂𑀝𑁆𑀞𑀺 𑀩𑀸𑀳𑀺𑀭𑀢𑁄 𑀆𑀕𑀘𑁆𑀙𑀦𑁆𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀫𑀬𑀁 ‘‘𑀢𑀼𑀫𑁆𑀳𑀸𑀓𑀁 𑀧𑀺𑀡𑁆𑀟𑀧𑀸𑀢𑀁 𑀤𑁂𑀣𑀸’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀦𑁆𑀢𑀸, 𑀅𑀧𑀺 𑀯𑁄 𑀮𑀤𑁆𑀥𑁄𑀢𑀺? 𑀆𑀫, 𑀲𑁂𑀝𑁆𑀞𑀺 𑀮𑀤𑁆𑀥𑁄𑀢𑀺. ‘‘𑀧𑀲𑁆𑀲𑀸𑀫𑀻’’𑀢𑀺 𑀕𑀻𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀑𑀮𑁄𑀓𑁂𑀲𑀺. 𑀅𑀣𑀲𑁆𑀲 𑀧𑀺𑀡𑁆𑀟𑀧𑀸𑀢𑀕𑀦𑁆𑀥𑁄 𑀉𑀝𑁆𑀞𑀳𑀺𑀢𑁆𑀯𑀸 𑀦𑀸𑀲𑀸𑀧𑀼𑀝𑀁 𑀧𑀳𑀭𑀺. 𑀲𑁄 𑀘𑀺𑀢𑁆𑀢𑀁 𑀲𑀁𑀬𑀫𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀻 𑀆𑀳𑁄𑀲𑀻𑀢𑀺.

𑀯𑀭𑀫𑁂𑀢𑀦𑁆𑀢𑀺𑀆𑀤𑀺 𑀯𑀺𑀧𑁆𑀧𑀝𑀺𑀲𑀸𑀭𑀲𑁆𑀲 𑀉𑀧𑁆𑀧𑀦𑁆𑀦𑀸𑀓𑀸𑀭𑀤𑀲𑁆𑀲𑀦𑀁. 𑀪𑀸𑀢𑀼 𑀘 𑀧𑀦 𑀏𑀓𑀧𑀼𑀢𑁆𑀢𑀓𑀁 𑀲𑀸𑀧𑀢𑁂𑀬𑁆𑀬𑀲𑁆𑀲 𑀓𑀸𑀭𑀡𑀸 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀻𑀢𑀺 𑀢𑀤𑀸 𑀓𑀺𑀭𑀲𑁆𑀲 𑀅𑀯𑀺𑀪𑀢𑁆𑀢𑁂𑀬𑁂𑀯 𑀓𑀼𑀝𑀼𑀫𑁆𑀩𑁂 𑀫𑀸𑀢𑀸𑀧𑀺𑀢𑀭𑁄 𑀘 𑀚𑁂𑀝𑁆𑀞𑀪𑀸𑀢𑀸 𑀘 𑀓𑀸𑀮𑀫𑀓𑀁𑀲𑀼. 𑀲𑁄 𑀪𑀸𑀢𑀼𑀚𑀸𑀬𑀸𑀬 𑀲𑀤𑁆𑀥𑀺𑀁𑀬𑁂𑀯 𑀲𑀁𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀪𑀸𑀢𑀼 𑀧𑀦𑀲𑁆𑀲 𑀏𑀓𑁄 𑀧𑀼𑀢𑁆𑀢𑁄 𑀳𑁄𑀢𑀺, 𑀢𑀁 𑀯𑀻𑀣𑀺𑀬𑀸 𑀓𑀻𑀴𑀦𑁆𑀢𑀁 𑀫𑀦𑀼𑀲𑁆𑀲𑀸 𑀯𑀤𑀦𑁆𑀢𑀺 𑁋 ‘‘𑀅𑀬𑀁 𑀤𑀸𑀲𑁄 𑀅𑀬𑀁 𑀤𑀸𑀲𑀻 𑀇𑀤𑀁 𑀬𑀸𑀦𑀁 𑀇𑀤𑀁 𑀥𑀦𑀁 𑀢𑀯 𑀲𑀦𑁆𑀢𑀓’’𑀦𑁆𑀢𑀺. 𑀲𑁄 𑀢𑁂𑀲𑀁 𑀓𑀣𑀁 𑀕𑀳𑁂𑀢𑁆𑀯𑀸 𑁋 ‘‘𑀅𑀬𑀁 𑀤𑀸𑀲𑁄 𑀫𑀬𑁆𑀳𑀁 𑀲𑀦𑁆𑀢𑀓’’𑀦𑁆𑀢𑀺𑀆𑀤𑀻𑀦𑀺 𑀓𑀣𑁂𑀢𑀺.

𑀅𑀣𑀲𑁆𑀲 𑀘𑀽𑀴𑀧𑀺𑀢𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀤𑀸𑀭𑀓𑁄 𑀇𑀤𑀸𑀦𑁂𑀯 𑀏𑀯𑀁 𑀓𑀣𑁂𑀲𑀺, 𑀫𑀳𑀮𑁆𑀮𑀓𑀓𑀸𑀮𑁂 𑀓𑀼𑀝𑀼𑀫𑁆𑀩𑀁 𑀫𑀚𑁆𑀛𑁂 𑀪𑀺𑀦𑁆𑀤𑀸𑀧𑁂𑀬𑁆𑀬, 𑀇𑀤𑀸𑀦𑁂𑀯𑀲𑁆𑀲 𑀓𑀢𑁆𑀢𑀩𑁆𑀩𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀓𑀤𑀺𑀯𑀲𑀁 𑀯𑀸𑀲𑀺𑀁 𑀆𑀤𑀸𑀬 𑁋 ‘‘𑀏𑀳𑀺 𑀧𑀼𑀢𑁆𑀢, 𑀅𑀭𑀜𑁆𑀜𑀁 𑀕𑀘𑁆𑀙𑀸𑀫𑀸’’𑀢𑀺 𑀢𑀁 𑀅𑀭𑀜𑁆𑀜𑀁 𑀦𑁂𑀢𑁆𑀯𑀸 𑀯𑀺𑀭𑀯𑀦𑁆𑀢𑀁 𑀯𑀺𑀭𑀯𑀦𑁆𑀢𑀁 𑀫𑀸𑀭𑁂𑀢𑁆𑀯𑀸 𑀆𑀯𑀸𑀝𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀁𑀲𑀼𑀦𑀸 𑀧𑀝𑀺𑀘𑁆𑀙𑀸𑀤𑁂𑀲𑀺. 𑀇𑀤𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀲𑀢𑁆𑀢𑀓𑁆𑀔𑀢𑁆𑀢𑀼𑀦𑁆𑀢𑀺 𑀲𑀢𑁆𑀢𑀯𑀸𑀭𑁂. 𑀧𑀼𑀩𑁆𑀩𑀧𑀘𑁆𑀙𑀺𑀫𑀘𑁂𑀢𑀦𑀸𑀯𑀲𑁂𑀦 𑀘𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀓𑀧𑀺𑀡𑁆𑀟𑀧𑀸𑀢𑀤𑀸𑀦𑀲𑁆𑀫𑀺𑀜𑁆𑀳𑀺 𑀏𑀓𑀸𑀯 𑀘𑁂𑀢𑀦𑀸 𑀤𑁆𑀯𑁂 𑀧𑀝𑀺𑀲𑀦𑁆𑀥𑀺𑀬𑁄 𑀦 𑀤𑁂𑀢𑀺, 𑀧𑀼𑀩𑁆𑀩𑀧𑀘𑁆𑀙𑀺𑀫𑀘𑁂𑀢𑀦𑀸𑀳𑀺 𑀧𑀦𑁂𑀲 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀲𑀕𑁆𑀕𑁂, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀲𑁂𑀝𑁆𑀞𑀺𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑁄. 𑀧𑀼𑀭𑀸𑀡𑀦𑁆𑀢𑀺 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑀲𑁆𑀲 𑀤𑀺𑀦𑁆𑀦𑀧𑀺𑀡𑁆𑀟𑀧𑀸𑀢𑀘𑁂𑀢𑀦𑀸𑀓𑀫𑁆𑀫𑀁.

𑀧𑀭𑀺𑀕𑁆𑀕𑀳𑀦𑁆𑀢𑀺 𑀧𑀭𑀺𑀕𑁆𑀕𑀳𑀺𑀢𑀯𑀢𑁆𑀣𑀼. 𑀅𑀦𑀼𑀚𑀻𑀯𑀺𑀦𑁄𑀢𑀺 𑀏𑀓𑀁 𑀫𑀳𑀸𑀓𑀼𑀮𑀁 𑀦𑀺𑀲𑁆𑀲𑀸𑀬 𑀧𑀡𑁆𑀡𑀸𑀲𑀫𑁆𑀧𑀺 𑀲𑀝𑁆𑀞𑀺𑀧𑀺 𑀓𑀼𑀮𑀸𑀦𑀺 𑀚𑀻𑀯𑀦𑁆𑀢𑀺, 𑀢𑁂 𑀫𑀦𑀼𑀲𑁆𑀲𑁂 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀲𑀩𑁆𑀩𑀁 𑀦𑀸𑀤𑀸𑀬 𑀕𑀦𑁆𑀢𑀩𑁆𑀩𑀦𑁆𑀢𑀺 𑀲𑀩𑁆𑀩𑀫𑁂𑀢𑀁 𑀦 𑀆𑀤𑀺𑀬𑀺𑀢𑁆𑀯𑀸 𑀕𑀦𑁆𑀢𑀩𑁆𑀩𑀁. 𑀲𑀩𑁆𑀩𑀁 𑀦𑀺𑀓𑁆𑀔𑀺𑀧𑁆𑀧𑀕𑀸𑀫𑀺𑀦𑀦𑁆𑀢𑀺 𑀲𑀩𑁆𑀩𑀫𑁂𑀢𑀁 𑀦𑀺𑀓𑁆𑀔𑀺𑀧𑁆𑀧𑀲𑀪𑀸𑀯𑀁, 𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀲𑀪𑀸𑀯𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀤𑀲𑀫𑀁.

𑀤𑀼𑀢𑀺𑀬𑁄 𑀯𑀕𑁆𑀕𑁄.

𑁩. 𑀢𑀢𑀺𑀬𑀯𑀕𑁆𑀕𑁄

𑁧. 𑀧𑀼𑀕𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁨. 𑀢𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 ‘‘𑀦𑀻𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄’’𑀢𑀺𑀆𑀤𑀺𑀓𑁂𑀦 𑀢𑀫𑁂𑀦 𑀬𑀼𑀢𑁆𑀢𑁄𑀢𑀺 𑀢𑀫𑁄. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺 𑀧𑀼𑀦 𑀦𑀺𑀭𑀬𑀢𑀫𑀽𑀧𑀕𑀫𑀦𑀢𑁄 𑀢𑀫𑀧𑀭𑀸𑀬𑀡𑁄. 𑀇𑀢𑀺 𑀉𑀪𑀬𑁂𑀦𑀧𑀺 𑀔𑀦𑁆𑀥𑀢𑀫𑁄𑀯 𑀓𑀣𑀺𑀢𑁄 𑀳𑁄𑀢𑀺. ‘‘𑀉𑀘𑁆𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄’’𑀢𑀺𑀆𑀤𑀺𑀓𑁂𑀦 𑀚𑁄𑀢𑀺𑀦𑀸 𑀬𑀼𑀢𑁆𑀢𑀢𑁄 𑀚𑁄𑀢𑀺, 𑀆𑀮𑁄𑀓𑀻𑀪𑀽𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀬𑀲𑀼𑀘𑀭𑀺𑀢𑀸𑀤𑀻𑀳𑀺 𑀧𑀼𑀦 𑀲𑀕𑁆𑀕𑀽𑀧𑀧𑀢𑁆𑀢𑀺𑀚𑁄𑀢𑀺𑀪𑀸𑀯𑀽𑀧𑀕𑀫𑀦𑀢𑁄 𑀚𑁄𑀢𑀺𑀧𑀭𑀸𑀬𑀡𑁄. 𑀇𑀫𑀺𑀦𑀸 𑀦𑀬𑁂𑀦 𑀇𑀢𑀭𑁂𑀧𑀺 𑀤𑁆𑀯𑁂 𑀯𑁂𑀤𑀺𑀢𑀩𑁆𑀩𑀸.

𑀯𑁂𑀦𑀓𑀼𑀮𑁂𑀢𑀺 𑀯𑀺𑀮𑀻𑀯𑀓𑀸𑀭𑀓𑀼𑀮𑁂. 𑀦𑁂𑀲𑀸𑀤𑀓𑀼𑀮𑁂𑀢𑀺 𑀫𑀺𑀕𑀮𑀼𑀤𑁆𑀤𑀓𑀸𑀤𑀻𑀦𑀁 𑀓𑀼𑀮𑁂. 𑀭𑀣𑀓𑀸𑀭𑀓𑀼𑀮𑁂𑀢𑀺 𑀘𑀫𑁆𑀫𑀓𑀸𑀭𑀓𑀼𑀮𑁂. 𑀧𑀼𑀓𑁆𑀓𑀼𑀲𑀓𑀼𑀮𑁂𑀢𑀺 𑀧𑀼𑀧𑁆𑀨𑀙𑀟𑁆𑀟𑀓𑀓𑀼𑀮𑁂. 𑀓𑀲𑀺𑀭𑀯𑀼𑀢𑁆𑀢𑀺𑀓𑁂𑀢𑀺 𑀤𑀼𑀓𑁆𑀔𑀯𑀼𑀢𑁆𑀢𑀺𑀓𑁂. 𑀤𑀼𑀩𑁆𑀩𑀡𑁆𑀡𑁄𑀢𑀺 𑀧𑀁𑀲𑀼𑀧𑀺𑀲𑀸𑀘𑀓𑁄 𑀯𑀺𑀬 𑀛𑀸𑀫𑀔𑀸𑀡𑀼𑀯𑀡𑁆𑀡𑁄. 𑀤𑀼𑀤𑁆𑀤𑀲𑀺𑀓𑁄𑀢𑀺 𑀯𑀺𑀚𑀸𑀢𑀫𑀸𑀢𑀼𑀬𑀸𑀧𑀺 𑀅𑀫𑀦𑀸𑀧𑀤𑀲𑁆𑀲𑀦𑁄. 𑀑𑀓𑁄𑀝𑀺𑀫𑀓𑁄𑀢𑀺 𑀮𑀓𑀼𑀡𑁆𑀟𑀓𑁄. 𑀓𑀸𑀡𑁄𑀢𑀺 𑀏𑀓𑀓𑁆𑀔𑀺𑀓𑀸𑀡𑁄 𑀯𑀸 𑀉𑀪𑀬𑀓𑁆𑀔𑀺𑀓𑀸𑀡𑁄 𑀯𑀸. 𑀓𑀼𑀡𑀻𑀢𑀺 𑀏𑀓𑀳𑀢𑁆𑀣𑀓𑀼𑀡𑀻 𑀯𑀸 𑀉𑀪𑀬𑀳𑀢𑁆𑀣𑀓𑀼𑀡𑀻 𑀯𑀸. 𑀔𑀜𑁆𑀚𑁄𑀢𑀺 𑀏𑀓𑀧𑀸𑀤𑀔𑀜𑁆𑀚𑁄 𑀯𑀸 𑀉𑀪𑀬𑀧𑀸𑀤𑀔𑀜𑁆𑀚𑁄 𑀯𑀸. 𑀧𑀓𑁆𑀔𑀳𑀢𑁄𑀢𑀺 𑀳𑀢𑀧𑀓𑁆𑀔𑁄 𑀧𑀻𑀞𑀲𑀧𑁆𑀧𑀻. 𑀧𑀤𑀻𑀧𑁂𑀬𑁆𑀬𑀲𑁆𑀲𑀸𑀢𑀺 𑀢𑁂𑀮𑀓𑀧𑀮𑁆𑀮𑀓𑀸𑀤𑀺𑀦𑁄 𑀧𑀤𑀻𑀧𑀉𑀧𑀓𑀭𑀡𑀲𑁆𑀲. 𑀏𑀯𑀁 𑀔𑁄, 𑀫𑀳𑀸𑀭𑀸𑀚𑀸𑀢𑀺 𑀏𑀢𑁆𑀣 𑀏𑀓𑁄 𑀧𑀼𑀕𑁆𑀕𑀮𑁄 𑀩𑀳𑀺𑀤𑁆𑀥𑀸 𑀆𑀮𑁄𑀓𑀁 𑀅𑀤𑀺𑀲𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁𑀬𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀅𑀧𑀸𑀬𑁂𑀲𑀼 𑀦𑀺𑀩𑁆𑀩𑀢𑁆𑀢𑀦𑁆𑀢𑁄 𑀲𑀓𑀮𑀁 𑀓𑀧𑁆𑀧𑀫𑁆𑀧𑀺 𑀲𑀁𑀲𑀭𑀢𑀺, 𑀲𑁄𑀧𑀺 𑀢𑀫𑁄𑀢𑀫𑀧𑀭𑀸𑀬𑀡𑁄𑀯. 𑀲𑁄 𑀧𑀦 𑀓𑀼𑀳𑀓𑀧𑀼𑀕𑁆𑀕𑀮𑁄 𑀪𑀯𑁂𑀬𑁆𑀬. 𑀓𑀼𑀳𑀓𑀲𑁆𑀲 𑀳𑀺 𑀏𑀯𑀭𑀽𑀧𑀸 𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁.

𑀏𑀢𑁆𑀣 𑀘 ‘‘𑀦𑀻𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄 𑀳𑁄𑀢𑀺 𑀘𑀡𑁆𑀟𑀸𑀮𑀓𑀼𑀮𑁂 𑀯𑀸’’𑀢𑀺𑀆𑀤𑀻𑀳𑀺 𑀆𑀕𑀫𑀦𑀯𑀺𑀧𑀢𑁆𑀢𑀺 𑀘𑁂𑀯 𑀧𑀼𑀩𑁆𑀩𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀯𑀺𑀧𑀢𑁆𑀢𑀺 𑀘 𑀤𑀲𑁆𑀲𑀺𑀢𑀸. 𑀤𑀮𑀺𑀤𑁆𑀤𑁂𑀢𑀺𑀆𑀤𑀻𑀳𑀺 𑀧𑀯𑀢𑁆𑀢𑀧𑀘𑁆𑀘𑀬𑀯𑀺𑀧𑀢𑁆𑀢𑀺. 𑀓𑀲𑀺𑀭𑀯𑀼𑀢𑁆𑀢𑀺𑀓𑁂𑀢𑀺𑀆𑀤𑀻𑀳𑀺 𑀆𑀚𑀻𑀯𑀼𑀧𑀸𑀬𑀯𑀺𑀧𑀢𑁆𑀢𑀺. 𑀤𑀼𑀩𑁆𑀩𑀡𑁆𑀡𑁄𑀢𑀺𑀆𑀤𑀻𑀳𑀺 𑀅𑀢𑁆𑀢𑀪𑀸𑀯𑀯𑀺𑀧𑀢𑁆𑀢𑀺. 𑀩𑀯𑁆𑀳𑀸𑀩𑀸𑀥𑁄𑀢𑀺𑀆𑀤𑀻𑀳𑀺 𑀤𑀼𑀓𑁆𑀔𑀓𑀸𑀭𑀡𑀲𑀫𑀸𑀬𑁄𑀕𑁄. 𑀦 𑀮𑀸𑀪𑀻𑀢𑀺𑀆𑀤𑀻𑀳𑀺 𑀲𑀼𑀔𑀓𑀸𑀭𑀡𑀯𑀺𑀧𑀢𑁆𑀢𑀺 𑀘𑁂𑀯 𑀉𑀧𑀪𑁄𑀕𑀯𑀺𑀧𑀢𑁆𑀢𑀺 𑀘. 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀦𑁆𑀢𑀺𑀆𑀤𑀻𑀳𑀺 𑀢𑀫𑀧𑀭𑀸𑀬𑀡𑀪𑀸𑀯𑀲𑁆𑀲 𑀓𑀸𑀭𑀡𑀲𑀫𑀸𑀬𑁄𑀕𑁄. 𑀓𑀸𑀬𑀲𑁆𑀲 𑀪𑁂𑀤𑀸𑀢𑀺𑀆𑀤𑀻𑀳𑀺 𑀲𑀫𑁆𑀧𑀭𑀸𑀬𑀺𑀓𑀢𑀫𑀽𑀧𑀕𑀫𑁄. 𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀅𑀓𑁆𑀓𑁄𑀲𑀢𑀻𑀢𑀺 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀢𑀺. 𑀧𑀭𑀺𑀪𑀸𑀲𑀢𑀻𑀢𑀺, ‘‘𑀓𑀲𑁆𑀫𑀸 𑀢𑀺𑀝𑁆𑀞𑀣? 𑀓𑀺𑀁 𑀢𑀼𑀫𑁆𑀳𑁂𑀳𑀺 𑀅𑀫𑁆𑀳𑀸𑀓𑀁 𑀓𑀲𑀺𑀓𑀫𑁆𑀫𑀸𑀤𑀻𑀦𑀺 𑀓𑀢𑀸𑀦𑀻’’𑀢𑀺𑀆𑀤𑀻𑀳𑀺? 𑀧𑀭𑀺𑀪𑀯𑀯𑀘𑀦𑁂𑀳𑀺 𑀧𑀭𑀺𑀪𑀸𑀲𑀢𑀺. 𑀭𑁄𑀲𑀓𑁄𑀢𑀺 𑀖𑀝𑁆𑀝𑀓𑁄. 𑀅𑀩𑁆𑀬𑀕𑁆𑀕𑀫𑀦𑀲𑁄𑀢𑀺 𑀏𑀓𑀕𑁆𑀕𑀘𑀺𑀢𑁆𑀢𑁄. 𑀧𑀞𑀫𑀁.

𑁨. 𑀅𑀬𑁆𑀬𑀺𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁩. 𑀤𑀼𑀢𑀺𑀬𑁂 𑀚𑀺𑀡𑁆𑀡𑀸𑀢𑀺 𑀚𑀭𑀸𑀚𑀺𑀡𑁆𑀡𑀸. 𑀯𑀼𑀟𑁆𑀠𑀸𑀢𑀺 𑀯𑀬𑁄𑀯𑀼𑀟𑁆𑀠𑀸. 𑀫𑀳𑀮𑁆𑀮𑀺𑀓𑀸𑀢𑀺 𑀚𑀸𑀢𑀺𑀫𑀳𑀮𑁆𑀮𑀺𑀓𑀸. 𑀅𑀤𑁆𑀥𑀕𑀢𑀸𑀢𑀺 𑀅𑀤𑁆𑀥𑀁 𑀘𑀺𑀭𑀓𑀸𑀮𑀁 𑀅𑀢𑀺𑀓𑁆𑀓𑀦𑁆𑀢𑀸. 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑀸𑀢𑀺 𑀧𑀘𑁆𑀙𑀺𑀫𑀯𑀬𑀁 𑀲𑀫𑁆𑀧𑀢𑁆𑀢𑀸. 𑀧𑀺𑀬𑀸 𑀫𑀦𑀸𑀧𑀸𑀢𑀺 𑀭𑀜𑁆𑀜𑁄 𑀓𑀺𑀭 𑀫𑀸𑀢𑀭𑀺 𑀫𑀢𑀸𑀬 𑀅𑀬𑁆𑀬𑀺𑀓𑀸 𑀫𑀸𑀢𑀼𑀝𑁆𑀞𑀸𑀦𑁂 𑀞𑀢𑁆𑀯𑀸 𑀧𑀝𑀺𑀚𑀕𑁆𑀕𑀺, 𑀢𑁂𑀦𑀲𑁆𑀲 𑀅𑀬𑁆𑀬𑀺𑀓𑀸𑀬 𑀩𑀮𑀯𑀧𑁂𑀫𑀁 𑀉𑀧𑁆𑀧𑀚𑁆𑀚𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀳𑀢𑁆𑀣𑀺𑀭𑀢𑀦𑁂𑀦𑀸𑀢𑀺 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑁄 𑀳𑀢𑁆𑀣𑀻 𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑁂𑀦 𑀅𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀢𑁄 𑀳𑀢𑁆𑀣𑀺𑀭𑀢𑀦𑀁 𑀦𑀸𑀫. 𑀅𑀲𑁆𑀲𑀭𑀢𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀕𑀸𑀫𑀯𑀭𑁄𑀧𑀺 𑀲𑀢𑀲𑀳𑀲𑁆𑀲𑀼𑀝𑁆𑀞𑀸𑀦𑀓𑀕𑀸𑀫𑁄𑀯. 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀪𑁂𑀤𑀦𑀥𑀫𑁆𑀫𑀸𑀦𑀻𑀢𑀺 𑀢𑁂𑀲𑀼 𑀳𑀺 𑀓𑀺𑀜𑁆𑀘𑀺 𑀓𑀭𑀺𑀬𑀫𑀸𑀦𑀫𑁂𑀯 𑀪𑀺𑀚𑁆𑀚𑀢𑀺, 𑀓𑀺𑀜𑁆𑀘𑀺 𑀓𑀢𑀧𑀭𑀺𑀬𑁄𑀲𑀺𑀢𑀁 𑀘𑀓𑁆𑀓𑀢𑁄 𑀅𑀦𑀧𑀦𑀻𑀢𑀫𑁂𑀯, 𑀓𑀺𑀜𑁆𑀘𑀺 𑀅𑀧𑀦𑁂𑀢𑁆𑀯𑀸 𑀪𑀽𑀫𑀺𑀬𑀁 𑀞𑀧𑀺𑀢𑀫𑀢𑁆𑀢𑀁, 𑀓𑀺𑀜𑁆𑀘𑀺 𑀢𑀢𑁄 𑀧𑀭𑀁, 𑀏𑀯𑀫𑁂𑀯 𑀲𑀢𑁆𑀢𑁂𑀲𑀼𑀧𑀺 𑀓𑁄𑀘𑀺 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀫𑀭𑀢𑀺, 𑀓𑁄𑀘𑀺 𑀫𑀽𑀴𑁆𑀳𑀕𑀩𑁆𑀪𑀸𑀬 𑀫𑀸𑀢𑀭𑀺 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀅𑀦𑀺𑀓𑁆𑀔𑀦𑁆𑀢𑁄𑀯, 𑀓𑁄𑀘𑀺 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁄, 𑀓𑁄𑀘𑀺 𑀢𑀢𑁄 𑀧𑀭𑀦𑁆𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀤𑀼𑀢𑀺𑀬𑀁.

𑁧𑁩𑁪. 𑀢𑀢𑀺𑀬𑁂 𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯. 𑀢𑀢𑀺𑀬𑀁.

𑁪. 𑀇𑀲𑁆𑀲𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁫. 𑀘𑀢𑀼𑀢𑁆𑀣𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄 𑀦𑀺𑀓𑁆𑀔𑁂𑀧𑁄. 𑀪𑀕𑀯𑀢𑁄 𑀓𑀺𑀭 𑀧𑀞𑀫𑀩𑁄𑀥𑀺𑀬𑀁 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀉𑀤𑀧𑀸𑀤𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘. 𑀢𑀺𑀢𑁆𑀣𑀺𑀬𑀸 𑀳𑀢𑀮𑀸𑀪𑀲𑀓𑁆𑀓𑀸𑀭𑀸 𑀳𑀼𑀢𑁆𑀯𑀸 𑀓𑀼𑀮𑁂𑀲𑀼 𑀏𑀯𑀁 𑀓𑀦𑁆𑀣𑁂𑀦𑁆𑀢𑀸 𑀯𑀺𑀘𑀭𑀦𑁆𑀢𑀺 𑁋 ‘‘𑀲𑀫𑀡𑁄 𑀕𑁄𑀢𑀫𑁄 𑀏𑀯𑀫𑀸𑀳, ‘𑀫𑀬𑁆𑀳𑀫𑁂𑀯 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀦 𑀅𑀜𑁆𑀜𑁂𑀲𑀁 𑀤𑀸𑀦𑀁 𑀤𑀸𑀢𑀩𑁆𑀩𑀁. 𑀫𑀬𑁆𑀳𑀫𑁂𑀯 𑀲𑀸𑀯𑀓𑀸𑀦𑀁 𑀤𑀸𑀦𑀁 𑀤𑀸𑀢𑀩𑁆𑀩𑀁, 𑀦 𑀅𑀜𑁆𑀜𑁂𑀲𑀁 𑀲𑀸𑀯𑀓𑀸𑀦𑀁 𑀤𑀸𑀦𑀁 𑀤𑀸𑀢𑀩𑁆𑀩𑀁. 𑀫𑀬𑁆𑀳𑀫𑁂𑀯 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁, 𑀦 𑀅𑀜𑁆𑀜𑁂𑀲𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁. 𑀫𑀬𑁆𑀳𑀫𑁂𑀯 𑀲𑀸𑀯𑀓𑀸𑀦𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁, 𑀦 𑀅𑀜𑁆𑀜𑁂𑀲𑀁 𑀲𑀸𑀯𑀓𑀸𑀦𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’𑀦𑁆𑀢𑀺. 𑀬𑀼𑀢𑁆𑀢𑀁 𑀦𑀼 𑀔𑁄 𑀲𑀬𑀫𑁆𑀧𑀺 𑀪𑀺𑀓𑁆𑀔𑀸𑀘𑀸𑀭𑀦𑀺𑀲𑁆𑀲𑀺𑀢𑁂𑀦 𑀧𑀭𑁂𑀲𑀁 𑀪𑀺𑀓𑁆𑀔𑀸𑀘𑀸𑀭𑀦𑀺𑀲𑁆𑀲𑀺𑀢𑀸𑀦𑀁 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀅𑀦𑁆𑀢𑀭𑀸𑀬𑀁 𑀓𑀸𑀢𑀼𑀁, 𑀅𑀬𑀼𑀢𑁆𑀢𑀁 𑀓𑀭𑁄𑀢𑀺 𑀅𑀦𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺. 𑀲𑀸 𑀓𑀣𑀸 𑀧𑀢𑁆𑀣𑀭𑀫𑀸𑀦𑀸 𑀭𑀸𑀚𑀓𑀼𑀮𑀁 𑀲𑀫𑁆𑀧𑀢𑁆𑀢𑀸. 𑀭𑀸𑀚𑀸 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀝𑁆𑀞𑀸𑀦𑀫𑁂𑀢𑀁 𑀬𑀁 𑀢𑀣𑀸𑀕𑀢𑁄 𑀧𑀭𑁂𑀲𑀁 𑀮𑀸𑀪𑀦𑁆𑀢𑀭𑀸𑀬𑀁 𑀓𑀭𑁂𑀬𑁆𑀬. 𑀏𑀢𑁂 𑀢𑀣𑀸𑀕𑀢𑀲𑁆𑀲 𑀅𑀮𑀸𑀪𑀸𑀬 𑀅𑀬𑀲𑀸𑀬 𑀧𑀭𑀺𑀲𑀓𑁆𑀓𑀦𑁆𑀢𑀺. 𑀲𑀘𑀸𑀳𑀁 𑀇𑀥𑁂𑀯 𑀞𑀢𑁆𑀯𑀸 ‘𑀫𑀸 𑀏𑀯𑀁 𑀅𑀯𑁄𑀘𑀼𑀢𑁆𑀣, 𑀦 𑀲𑀢𑁆𑀣𑀸 𑀏𑀯𑀁 𑀓𑀣𑁂𑀢𑀻’𑀢𑀺 𑀯𑀤𑁂𑀬𑁆𑀬𑀁, 𑀏𑀯𑀁 𑀲𑀸 𑀓𑀣𑀸 𑀦𑀺𑀚𑁆𑀛𑀢𑁆𑀢𑀺𑀁 𑀦 𑀕𑀘𑁆𑀙𑁂𑀬𑁆𑀬, 𑀇𑀫𑀲𑁆𑀲 𑀫𑀳𑀸𑀚𑀦𑀲𑁆𑀲 𑀲𑀦𑁆𑀦𑀺𑀧𑀢𑀺𑀢𑀓𑀸𑀮𑁂𑀬𑁂𑀯 𑀦𑀁 𑀦𑀺𑀚𑁆𑀛𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀏𑀓𑀁 𑀙𑀡𑀤𑀺𑀯𑀲𑀁 𑀆𑀕𑀫𑁂𑀦𑁆𑀢𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺.

𑀅𑀧𑀭𑁂𑀦 𑀲𑀫𑀬𑁂𑀦 𑀫𑀳𑀸𑀙𑀡𑁂 𑀲𑀫𑁆𑀧𑀢𑁆𑀢𑁂 ‘‘𑀅𑀬𑀁 𑀇𑀫𑀲𑁆𑀲 𑀓𑀸𑀮𑁄’’𑀢𑀺 𑀦𑀕𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀲𑀺 𑁋 ‘‘𑀲𑀤𑁆𑀥𑀸 𑀯𑀸 𑀅𑀲𑁆𑀲𑀤𑁆𑀥𑀸 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀯𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀯𑀸 𑀕𑁂𑀳𑀭𑀓𑁆𑀔𑀓𑁂 𑀤𑀸𑀭𑀓𑁂 𑀯𑀸 𑀫𑀸𑀢𑀼𑀕𑀸𑀫𑁂 𑀯𑀸 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀬𑁂 𑀯𑀺𑀳𑀸𑀭𑀁 𑀦𑀸𑀕𑀘𑁆𑀙𑀦𑁆𑀢𑀺, 𑀧𑀜𑁆𑀜𑀸𑀲𑀁 𑀤𑀡𑁆𑀟𑁄’’𑀢𑀺. 𑀲𑀬𑀫𑁆𑀧𑀺 𑀧𑀸𑀢𑁄𑀯 𑀦𑁆𑀳𑀢𑁆𑀯𑀸 𑀓𑀢𑀧𑀸𑀢𑀭𑀸𑀲𑁄 𑀲𑀩𑁆𑀩𑀸𑀪𑀭𑀡𑀧𑀝𑀺𑀫𑀡𑁆𑀟𑀺𑀢𑁄 𑀫𑀳𑀢𑀸 𑀩𑀮𑀓𑀸𑀬𑁂𑀦 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀅𑀕𑀫𑀸𑀲𑀺. 𑀕𑀘𑁆𑀙𑀦𑁆𑀢𑁄 𑀘 𑀘𑀺𑀦𑁆𑀢𑁂𑀲𑀺 𑁋 ‘‘𑀪𑀕𑀯𑀸 𑀢𑀼𑀫𑁆𑀳𑁂 𑀓𑀺𑀭 𑀏𑀯𑀁 𑀯𑀤𑀣 ‘𑀫𑀬𑁆𑀳𑀫𑁂𑀯 𑀤𑀸𑀦𑀁 𑀤𑀸𑀢𑀩𑁆𑀩𑀁…𑀧𑁂… 𑀦 𑀅𑀜𑁆𑀜𑁂𑀲𑀁 𑀲𑀸𑀯𑀓𑀸𑀦𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’𑀦𑁆𑀢𑀺 𑀏𑀯𑀁 𑀧𑀼𑀘𑁆𑀙𑀺𑀢𑀼𑀁 𑀅𑀬𑀼𑀢𑁆𑀢𑀁, 𑀧𑀜𑁆𑀳𑀫𑁂𑀯 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀧𑀜𑁆𑀳𑀁 𑀓𑀣𑁂𑀦𑁆𑀢𑁄 𑀘 𑀫𑁂 𑀪𑀕𑀯𑀸 𑀅𑀯𑀲𑀸𑀦𑁂 𑀢𑀺𑀢𑁆𑀣𑀺𑀬𑀸𑀦𑀁 𑀯𑀸𑀤𑀁 𑀪𑀜𑁆𑀚𑀺𑀲𑁆𑀲𑀢𑀻’’𑀢𑀺. 𑀲𑁄 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄 𑀓𑀢𑁆𑀣 𑀦𑀼 𑀔𑁄, 𑀪𑀦𑁆𑀢𑁂, 𑀤𑀸𑀦𑀁 𑀤𑀸𑀢𑀩𑁆𑀩𑀦𑁆𑀢𑀺 𑀆𑀳. 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀧𑀼𑀕𑁆𑀕𑀮𑁂 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀢𑀲𑁆𑀫𑀺𑀁 𑀤𑀸𑀢𑀩𑁆𑀩𑀁, 𑀢𑀲𑁆𑀲 𑀯𑀸 𑀤𑀸𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀏𑀯𑀁 𑀯𑀼𑀢𑁆𑀢𑁂 𑀭𑀸𑀚𑀸 𑀬𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀢𑀺𑀢𑁆𑀣𑀺𑀬𑀸𑀦𑀁 𑀯𑀘𑀦𑀁 𑀆𑀭𑁄𑀘𑀺𑀢𑀁, 𑀢𑁂 𑀑𑀮𑁄𑀓𑁂𑀲𑀺. 𑀢𑁂 𑀭𑀜𑁆𑀜𑀸 𑀑𑀮𑁄𑀓𑀺𑀢𑀫𑀢𑁆𑀢𑀸𑀯 𑀫𑀗𑁆𑀓𑀼𑀪𑀽𑀢𑀸 𑀅𑀥𑁄𑀫𑀼𑀔𑀸 𑀧𑀸𑀤𑀗𑁆𑀕𑀼𑀝𑁆𑀞𑀓𑁂𑀦 𑀪𑀽𑀫𑀺𑀁 𑀮𑁂𑀔𑀫𑀸𑀦𑀸 𑀅𑀝𑁆𑀞𑀁𑀲𑀼. 𑀭𑀸𑀚𑀸 𑁋 ‘‘𑀏𑀓𑀧𑀤𑁂𑀦𑁂𑀯, 𑀪𑀦𑁆𑀢𑁂, 𑀳𑀢𑀸 𑀢𑀺𑀢𑁆𑀣𑀺𑀬𑀸’’𑀢𑀺 𑀫𑀳𑀸𑀚𑀦𑀁 𑀲𑀸𑀯𑁂𑀦𑁆𑀢𑁄 𑀫𑀳𑀸𑀲𑀤𑁆𑀤𑁂𑀦 𑀅𑀪𑀸𑀲𑀺. 𑀏𑀯𑀜𑁆𑀘 𑀧𑀦 𑀪𑀸𑀲𑀺𑀢𑁆𑀯𑀸 𑁋 ‘‘𑀪𑀕𑀯𑀸 𑀘𑀺𑀢𑁆𑀢𑀁 𑀦𑀸𑀫 𑀦𑀺𑀕𑀡𑁆𑀞𑀸𑀘𑁂𑀮𑀓𑀧𑀭𑀺𑀩𑁆𑀩𑀸𑀚𑀓𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀧𑀲𑀻𑀤𑀢𑀺, 𑀓𑀢𑁆𑀣 𑀧𑀦, 𑀪𑀦𑁆𑀢𑁂, 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮’’𑀦𑁆𑀢𑀺 𑀧𑀼𑀘𑁆𑀙𑀺. 𑀅𑀜𑁆𑀜𑀁 𑀔𑁄 𑀏𑀢𑀦𑁆𑀢𑀺, ‘‘𑀫𑀳𑀸𑀭𑀸𑀚, 𑀅𑀜𑁆𑀜𑀁 𑀢𑀬𑀸 𑀧𑀞𑀫𑀁 𑀧𑀼𑀘𑁆𑀙𑀺𑀢𑀁, 𑀅𑀜𑁆𑀜𑀁 𑀧𑀘𑁆𑀙𑀸, 𑀲𑀮𑁆𑀮𑀓𑁆𑀔𑁂𑀳𑀺 𑀏𑀢𑀁, 𑀧𑀜𑁆𑀳𑀸𑀓𑀣𑀦𑀁 𑀧𑀦 𑀫𑀬𑁆𑀳𑀁 𑀪𑀸𑀭𑁄’’𑀢𑀺 𑀯𑀢𑁆𑀯𑀸 𑀲𑀻𑀮𑀯𑀢𑁄 𑀔𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀥 𑀢𑁆𑀬𑀲𑁆𑀲𑀸𑀢𑀺 𑀇𑀥 𑀢𑁂 𑀅𑀲𑁆𑀲. 𑀲𑀫𑀼𑀧𑀩𑁆𑀬𑀽𑀴𑁆𑀳𑁄𑀢𑀺 𑀭𑀸𑀲𑀺𑀪𑀽𑀢𑁄. 𑀅𑀲𑀺𑀓𑁆𑀔𑀺𑀢𑁄𑀢𑀺 𑀥𑀦𑀼𑀲𑀺𑀧𑁆𑀧𑁂 𑀅𑀲𑀺𑀓𑁆𑀔𑀺𑀢𑁄. 𑀅𑀓𑀢𑀳𑀢𑁆𑀣𑁄𑀢𑀺 𑀫𑀼𑀝𑁆𑀞𑀺𑀩𑀦𑁆𑀥𑀸𑀤𑀺𑀯𑀲𑁂𑀦 𑀅𑀲𑀫𑁆𑀧𑀸𑀤𑀺𑀢𑀳𑀢𑁆𑀣𑁄. 𑀅𑀓𑀢𑀬𑁄𑀕𑁆𑀕𑁄𑀢𑀺 𑀢𑀺𑀡𑀧𑀼𑀜𑁆𑀚𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑀸𑀤𑀻𑀲𑀼 𑀅𑀓𑀢𑀧𑀭𑀺𑀘𑀬𑁄. 𑀅𑀓𑀢𑀽𑀧𑀸𑀲𑀦𑁄𑀢𑀺 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀅𑀤𑀲𑁆𑀲𑀺𑀢𑀲𑀭𑀓𑁆𑀔𑁂𑀧𑁄. 𑀙𑀫𑁆𑀪𑀻𑀢𑀺 𑀧𑀯𑁂𑀥𑀺𑀢𑀓𑀸𑀬𑁄.

𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀦𑁄𑀢𑀺𑀆𑀤𑀻𑀲𑀼 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀦𑁄 𑀳𑁄𑀢𑀺, 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀩𑁆𑀬𑀸𑀧𑀸𑀤𑁄, 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑁂𑀯 𑀣𑀺𑀦𑀫𑀺𑀤𑁆𑀥𑀁, 𑀢𑀣𑀸 𑀉𑀤𑁆𑀥𑀘𑁆𑀘𑀁, 𑀢𑀢𑀺𑀬𑁂𑀦𑁂𑀯 𑀓𑀼𑀓𑁆𑀓𑀼𑀘𑁆𑀘𑀁, 𑀧𑀞𑀫𑀫𑀕𑁆𑀕𑁂𑀦 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀦𑀸 𑀳𑁄𑀢𑀺. 𑀅𑀲𑁂𑀓𑁆𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦𑀸𑀢𑀺 𑀅𑀲𑁂𑀓𑁆𑀔𑀲𑁆𑀲 𑀲𑀻𑀮𑀓𑁆𑀔𑀦𑁆𑀥𑁄 𑀅𑀲𑁂𑀓𑁆𑀔𑁄 𑀲𑀻𑀮𑀓𑁆𑀔𑀦𑁆𑀥𑁄 𑀦𑀸𑀫. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀏𑀢𑁆𑀣 𑀘 𑀧𑀼𑀭𑀺𑀫𑁂𑀳𑀺 𑀘𑀢𑀽𑀳𑀺 𑀧𑀤𑁂𑀳𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀬𑁄 𑀓𑀣𑀺𑀢𑀸. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀳𑁄𑀢𑀺, 𑀢𑀁 𑀮𑁄𑀓𑀺𑀬𑀫𑁂𑀯.

𑀇𑀲𑁆𑀲𑀢𑁆𑀢𑀦𑁆𑀢𑀺 𑀉𑀲𑀼𑀲𑀺𑀧𑁆𑀧𑀁. 𑀩𑀮𑀯𑀻𑀭𑀺𑀬𑀦𑁆𑀢𑀺 𑀏𑀢𑁆𑀣 𑀩𑀮𑀁 𑀦𑀸𑀫 𑀯𑀸𑀬𑁄𑀥𑀸𑀢𑀼, 𑀯𑀻𑀭𑀺𑀬𑀁 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑀫𑁂𑀯. 𑀪𑀭𑁂𑀢𑀺 𑀪𑀭𑁂𑀬𑁆𑀬. 𑀦𑀸𑀲𑀽𑀭𑀁 𑀚𑀸𑀢𑀺𑀧𑀘𑁆𑀘𑀬𑀸𑀢𑀺, ‘‘𑀅𑀬𑀁 𑀚𑀸𑀢𑀺𑀲𑀫𑁆𑀧𑀦𑁆𑀦𑁄’’𑀢𑀺 𑀏𑀯𑀁 𑀚𑀸𑀢𑀺𑀓𑀸𑀭𑀡𑀸 𑀅𑀲𑀽𑀭𑀁 𑀦 𑀪𑀭𑁂𑀬𑁆𑀬.

𑀔𑀦𑁆𑀢𑀺𑀲𑁄𑀭𑀘𑁆𑀘𑀦𑁆𑀢𑀺 𑀏𑀢𑁆𑀣 𑀔𑀦𑁆𑀢𑀻𑀢𑀺 𑀅𑀥𑀺𑀯𑀸𑀲𑀦𑀔𑀦𑁆𑀢𑀺, 𑀲𑁄𑀭𑀘𑁆𑀘𑀦𑁆𑀢𑀺 𑀅𑀭𑀳𑀢𑁆𑀢𑀁. 𑀥𑀫𑁆𑀫𑀸𑀢𑀺 𑀏𑀢𑁂 𑀤𑁆𑀯𑁂 𑀥𑀫𑁆𑀫𑀸. 𑀅𑀲𑁆𑀲𑀫𑁂𑀢𑀺 𑀆𑀯𑀲𑀣𑁂. 𑀯𑀺𑀯𑀦𑁂𑀢𑀺 𑀅𑀭𑀜𑁆𑀜𑀝𑁆𑀞𑀸𑀦𑁂, 𑀦𑀺𑀭𑀼𑀤𑀓𑁂 𑀅𑀭𑀜𑁆𑀜𑁂 𑀘𑀢𑀼𑀭𑀲𑁆𑀲𑀧𑁄𑀓𑁆𑀔𑀭𑀡𑀺𑀆𑀤𑀻𑀦𑀺 𑀓𑀸𑀭𑀬𑁂𑀢𑀺 𑀅𑀢𑁆𑀣𑁄. 𑀤𑀼𑀕𑁆𑀕𑁂𑀢𑀺 𑀯𑀺𑀲𑀫𑀝𑁆𑀞𑀸𑀦𑁂. 𑀲𑀗𑁆𑀓𑀫𑀦𑀸𑀦𑀻𑀢𑀺 𑀧𑀡𑁆𑀡𑀸𑀲𑀳𑀢𑁆𑀣𑀲𑀝𑁆𑀞𑀺𑀳𑀢𑁆𑀣𑀸𑀦𑀺 𑀲𑀫𑁄𑀓𑀺𑀡𑁆𑀡𑀧𑀭𑀺𑀲𑀼𑀤𑁆𑀥𑀯𑀸𑀮𑀺𑀓𑀸𑀦𑀺 𑀲𑀗𑁆𑀓𑀫𑀦𑀸𑀦𑀺 𑀓𑀭𑁂𑀬𑁆𑀬.

𑀇𑀤𑀸𑀦𑀺 𑀏𑀢𑁂𑀲𑀼 𑀅𑀭𑀜𑁆𑀜𑀲𑁂𑀦𑀸𑀲𑀦𑁂𑀲𑀼 𑀯𑀲𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑀁 𑀆𑀘𑀺𑀓𑁆𑀔𑀦𑁆𑀢𑁄 𑀅𑀦𑁆𑀦𑀁 𑀧𑀸𑀦𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑁂𑀦𑀸𑀲𑀦𑀸𑀦𑀻𑀢𑀺 𑀫𑀜𑁆𑀘𑀧𑀻𑀞𑀸𑀤𑀻𑀦𑀺. 𑀯𑀺𑀧𑁆𑀧𑀲𑀦𑁆𑀦𑁂𑀦𑀸𑀢𑀺 𑀔𑀻𑀡𑀸𑀲𑀯𑀲𑁆𑀲 𑀤𑁂𑀦𑁆𑀢𑁄𑀧𑀺 𑀲𑀓𑀗𑁆𑀔𑁂𑀦 𑀓𑀺𑀮𑁂𑀲𑀫𑀮𑀺𑀦𑁂𑀦 𑀘𑀺𑀢𑁆𑀢𑁂𑀦 𑀅𑀤𑀢𑁆𑀯𑀸 𑀯𑀺𑀧𑁆𑀧𑀲𑀦𑁆𑀦𑁂𑀦𑁂𑀯 𑀘𑀺𑀢𑁆𑀢𑁂𑀦 𑀤𑀤𑁂𑀬𑁆𑀬. 𑀣𑀦𑀬𑀦𑁆𑀢𑀺 𑀕𑀚𑁆𑀚𑀦𑁆𑀢𑁄. 𑀲𑀢𑀓𑁆𑀓𑀓𑀽𑀢𑀺 𑀲𑀢𑀲𑀺𑀔𑀭𑁄, 𑀅𑀦𑁂𑀓𑀓𑀽𑀝𑁄𑀢𑀺 𑀅𑀢𑁆𑀣𑁄. 𑀅𑀪𑀺𑀲𑀗𑁆𑀔𑀘𑁆𑀘𑀸𑀢𑀺 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀲𑀫𑁄𑀥𑀸𑀦𑁂𑀢𑁆𑀯𑀸 𑀭𑀸𑀲𑀺𑀁 𑀓𑀢𑁆𑀯𑀸.

𑀆𑀫𑁄𑀤𑀫𑀸𑀦𑁄𑀢𑀺 𑀢𑀼𑀝𑁆𑀞𑀫𑀸𑀦𑀲𑁄 𑀳𑀼𑀢𑁆𑀯𑀸. 𑀧𑀓𑀺𑀭𑁂𑀢𑀻𑀢𑀺 𑀤𑀸𑀦𑀕𑁆𑀕𑁂 𑀯𑀺𑀘𑀺𑀭𑀢𑀺, 𑀧𑀓𑀺𑀭𑀦𑁆𑀢𑁄 𑀯𑀺𑀬 𑀯𑀸 𑀤𑀸𑀦𑀁 𑀤𑁂𑀢𑀺. 𑀧𑀼𑀜𑁆𑀜𑀥𑀸𑀭𑀸𑀢𑀺 𑀅𑀦𑁂𑀓𑀤𑀸𑀦𑀘𑁂𑀢𑀦𑀸𑀫𑀬𑀸 𑀧𑀼𑀜𑁆𑀜𑀥𑀸𑀭𑀸. 𑀤𑀸𑀢𑀸𑀭𑀁 𑀅𑀪𑀺𑀯𑀲𑁆𑀲𑀢𑀻𑀢𑀺 𑀬𑀣𑀸 𑀆𑀓𑀸𑀲𑁂 𑀲𑀫𑀼𑀝𑁆𑀞𑀺𑀢𑀫𑁂𑀖𑀢𑁄 𑀦𑀺𑀓𑁆𑀔𑀦𑁆𑀢𑀸 𑀉𑀤𑀓𑀥𑀸𑀭𑀸 𑀧𑀣𑀯𑀺𑀁 𑀲𑀺𑀦𑁂𑀳𑀬𑀦𑁆𑀢𑀻 𑀢𑁂𑀫𑁂𑀦𑁆𑀢𑀻 𑀓𑀺𑀮𑁂𑀤𑀬𑀦𑁆𑀢𑀻 𑀅𑀪𑀺𑀯𑀲𑁆𑀲𑀢𑀺, 𑀏𑀯𑀫𑁂𑀯 𑀅𑀬𑀫𑁆𑀧𑀺 𑀤𑀸𑀬𑀓𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑀸 𑀧𑀼𑀜𑁆𑀜𑀥𑀸𑀭𑀸 𑀢𑀫𑁂𑀯 𑀤𑀸𑀢𑀸𑀭𑀁 𑀅𑀦𑁆𑀢𑁄 𑀲𑀺𑀦𑁂𑀳𑁂𑀢𑀺 𑀧𑀽𑀭𑁂𑀢𑀺 𑀅𑀪𑀺𑀲𑀦𑁆𑀤𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀸𑀢𑀸𑀭𑀁 𑀅𑀪𑀺𑀯𑀲𑁆𑀲𑀢𑀻’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀧𑀩𑁆𑀩𑀢𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁬. 𑀧𑀜𑁆𑀘𑀫𑁂 𑀫𑀼𑀤𑁆𑀥𑀸𑀯𑀲𑀺𑀢𑁆𑀢𑀸𑀦𑀦𑁆𑀢𑀺 𑀔𑀢𑁆𑀢𑀺𑀬𑀸𑀪𑀺𑀲𑁂𑀓𑁂𑀦 𑀫𑀼𑀤𑁆𑀥𑀦𑀺 𑀅𑀯𑀲𑀺𑀢𑁆𑀢𑀸𑀦𑀁 𑀓𑀢𑀸𑀪𑀺𑀲𑁂𑀓𑀸𑀦𑀁. 𑀓𑀸𑀫𑀕𑁂𑀥𑀧𑀭𑀺𑀬𑀼𑀝𑁆𑀞𑀺𑀢𑀸𑀦𑀦𑁆𑀢𑀺 𑀓𑀸𑀫𑁂𑀲𑀼 𑀕𑁂𑀥𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀸𑀦𑀁 𑀅𑀪𑀺𑀪𑀽𑀢𑀸𑀦𑀁. 𑀚𑀦𑀧𑀤𑀢𑁆𑀣𑀸𑀯𑀭𑀺𑀬𑀧𑁆𑀧𑀢𑁆𑀢𑀸𑀦𑀦𑁆𑀢𑀺 𑀚𑀦𑀧𑀤𑁂 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀸𑀦𑀁. 𑀭𑀸𑀚𑀓𑀭𑀡𑀻𑀬𑀸𑀦𑀻𑀢𑀺 𑀭𑀸𑀚𑀓𑀫𑁆𑀫𑀸𑀦𑀺 𑀭𑀸𑀚𑀽𑀳𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀸𑀦𑀺. 𑀢𑁂𑀲𑀼 𑀔𑁆𑀯𑀸𑀳𑀦𑁆𑀢𑀺 𑀢𑁂𑀲𑀼 𑀅𑀳𑀁. 𑀉𑀲𑀼𑀓𑁆𑀓𑀫𑀸𑀧𑀦𑁆𑀦𑁄𑀢𑀺 𑀩𑁆𑀬𑀸𑀧𑀸𑀭𑀁 𑀆𑀧𑀦𑁆𑀦𑁄. 𑀏𑀲 𑀓𑀺𑀭 𑀭𑀸𑀚𑀸 𑀤𑀺𑀯𑀲𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀪𑀕𑀯𑀢𑁄 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺, 𑀅𑀦𑁆𑀢𑀭𑀸𑀕𑀫𑀦𑀸𑀦𑀺 𑀩𑀳𑀽𑀦𑀺𑀧𑀺 𑀳𑁄𑀦𑁆𑀢𑀺. 𑀢𑀲𑁆𑀲 𑀦𑀺𑀩𑀤𑁆𑀥𑀁 𑀕𑀘𑁆𑀙𑀢𑁄 𑀩𑀮𑀓𑀸𑀬𑁄 𑀫𑀳𑀸𑀧𑀺 𑀳𑁄𑀢𑀺 𑀅𑀧𑁆𑀧𑁄𑀧𑀺. 𑀅𑀣𑁂𑀓𑀤𑀺𑀯𑀲𑀁 𑀧𑀜𑁆𑀘𑀲𑀢𑀸 𑀘𑁄𑀭𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀅𑀬𑀁 𑀭𑀸𑀚𑀸 𑀅𑀯𑁂𑀮𑀸𑀬 𑀅𑀧𑁆𑀧𑁂𑀦 𑀩𑀮𑁂𑀦 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀦𑀁 𑀕𑀳𑁂𑀢𑁆𑀯𑀸 𑀭𑀚𑁆𑀚𑀁 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺. 𑀢𑁂 𑀅𑀦𑁆𑀥𑀯𑀦𑁂 𑀦𑀺𑀮𑀻𑀬𑀺𑀁𑀲𑀼. 𑀭𑀸𑀚𑀸𑀦𑁄 𑀘 𑀦𑀸𑀫 𑀫𑀳𑀸𑀧𑀼𑀜𑁆𑀜𑀸 𑀳𑁄𑀦𑁆𑀢𑀺. 𑀅𑀣 𑀢𑁂𑀲𑀁𑀬𑁂𑀯 𑀅𑀩𑁆𑀪𑀦𑁆𑀢𑀭𑀢𑁄 𑀏𑀓𑁄 𑀧𑀼𑀭𑀺𑀲𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀫𑀳𑀦𑁆𑀢𑀁 𑀩𑀮𑀓𑀸𑀬𑀁 𑀆𑀤𑀸𑀬 𑀅𑀦𑁆𑀥𑀯𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀢𑁂 𑀲𑀩𑁆𑀩𑁂 𑀕𑀳𑁂𑀢𑁆𑀯𑀸 𑀅𑀦𑁆𑀥𑀯𑀦𑀢𑁄 𑀬𑀸𑀯 𑀦𑀕𑀭𑀤𑁆𑀯𑀸𑀭𑀸 𑀫𑀕𑁆𑀕𑀲𑁆𑀲 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀬𑀣𑀸 𑀅𑀜𑁆𑀜𑀫𑀜𑁆𑀜𑀁 𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀁 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀺, 𑀏𑀯𑀁 𑀆𑀲𑀦𑁆𑀦𑀸𑀦𑀺 𑀲𑀽𑀮𑀸𑀦𑀺 𑀭𑁄𑀧𑀸𑀧𑁂𑀢𑁆𑀯𑀸 𑀲𑀽𑀮𑁂𑀲𑀼 𑀉𑀢𑁆𑀢𑀸𑀲𑁂𑀲𑀺. 𑀇𑀤𑀁 𑀲𑀦𑁆𑀥𑀸𑀬 𑀏𑀯𑀫𑀸𑀳.

𑀅𑀣 𑀲𑀢𑁆𑀣𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑀸𑀳𑀁 𑀯𑀓𑁆𑀔𑀸𑀫𑀺, ‘𑀫𑀳𑀸𑀭𑀸𑀚, 𑀫𑀸𑀤𑀺𑀲𑁂 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀥𑀼𑀭𑀯𑀺𑀳𑀸𑀭𑁂 𑀯𑀲𑀦𑁆𑀢𑁂 𑀢𑀬𑀸 𑀏𑀯𑀭𑀽𑀧𑀁 𑀤𑀸𑀭𑀼𑀡𑀁 𑀓𑀫𑁆𑀫𑀁 𑀓𑀢𑀁, 𑀅𑀬𑀼𑀢𑁆𑀢𑀁 𑀢𑁂 𑀓𑀢’𑀦𑁆𑀢𑀺, 𑀅𑀣𑀸𑀬𑀁 𑀭𑀸𑀚𑀸 𑀫𑀗𑁆𑀓𑀼 𑀳𑀼𑀢𑁆𑀯𑀸 𑀲𑀦𑁆𑀣𑀫𑁆𑀪𑀺𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬, 𑀧𑀭𑀺𑀬𑀸𑀬𑁂𑀦 𑀥𑀫𑁆𑀫𑀁 𑀓𑀣𑁂𑀦𑁆𑀢𑀲𑁆𑀲𑁂𑀯 𑀫𑁂 𑀲𑀮𑁆𑀮𑀓𑁆𑀔𑁂𑀲𑁆𑀲𑀢𑀻’’𑀢𑀺 𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀦𑁆𑀢𑁄 𑀢𑀁 𑀓𑀺𑀁 𑀫𑀜𑁆𑀜𑀲𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀤𑁆𑀥𑀸𑀬𑀺𑀓𑁄𑀢𑀺 𑀲𑀤𑁆𑀥𑀸𑀢𑀩𑁆𑀩𑁄, 𑀬𑀲𑁆𑀲 𑀢𑁆𑀯𑀁 𑀯𑀘𑀦𑀁 𑀲𑀤𑁆𑀤𑀳𑀲𑀻𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀺𑀓𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀬𑀲𑁆𑀲 𑀯𑀘𑀦𑀁 𑀧𑀢𑁆𑀢𑀺𑀬𑀸𑀬𑀲𑀻𑀢𑀺 𑀅𑀢𑁆𑀣𑁄. 𑀅𑀩𑁆𑀪𑀲𑀫𑀦𑁆𑀢𑀺 𑀆𑀓𑀸𑀲𑀲𑀫𑀁. 𑀦𑀺𑀧𑁆𑀧𑁄𑀣𑁂𑀦𑁆𑀢𑁄 𑀆𑀕𑀘𑁆𑀙𑀢𑀻𑀢𑀺 𑀧𑀣𑀯𑀺𑀢𑀮𑀢𑁄 𑀬𑀸𑀯 𑀅𑀓𑀦𑀺𑀝𑁆𑀞𑀩𑁆𑀭𑀳𑁆𑀫𑀮𑁄𑀓𑀸 𑀲𑀩𑁆𑀩𑁂 𑀲𑀢𑁆𑀢𑁂 𑀲𑀡𑁆𑀳𑀓𑀭𑀡𑀻𑀬𑀁 𑀢𑀺𑀡𑀘𑀼𑀡𑁆𑀡𑀁 𑀯𑀺𑀬 𑀓𑀭𑁄𑀦𑁆𑀢𑁄 𑀧𑀺𑀲𑀦𑁆𑀢𑁄 𑀆𑀕𑀘𑁆𑀙𑀢𑀺.

𑀅𑀜𑁆𑀜𑀢𑁆𑀭 𑀥𑀫𑁆𑀫𑀘𑀭𑀺𑀬𑀸𑀬𑀸𑀢𑀺 𑀞𑀧𑁂𑀢𑁆𑀯𑀸 𑀥𑀫𑁆𑀫𑀘𑀭𑀺𑀬𑀁 𑀅𑀜𑁆𑀜𑀁 𑀓𑀸𑀢𑀩𑁆𑀩𑀁 𑀦𑀢𑁆𑀣𑀺, 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀲𑀗𑁆𑀔𑀸𑀢𑀸 𑀥𑀫𑁆𑀫𑀘𑀭𑀺𑀬𑀸𑀯 𑀓𑀢𑁆𑀢𑀩𑁆𑀩𑀸, 𑀪𑀦𑁆𑀢𑁂𑀢𑀺 𑁋 𑀲𑀫𑀘𑀭𑀺𑀬𑀸𑀤𑀻𑀦𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. 𑀆𑀭𑁄𑀘𑁂𑀫𑀻𑀢𑀺 𑀆𑀘𑀺𑀓𑁆𑀔𑀸𑀫𑀺. 𑀧𑀝𑀺𑀯𑁂𑀤𑀬𑀸𑀫𑀻𑀢𑀺 𑀚𑀸𑀦𑀸𑀧𑁂𑀫𑀺. 𑀅𑀥𑀺𑀯𑀢𑁆𑀢𑀢𑀻𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀺. 𑀳𑀢𑁆𑀣𑀺𑀬𑀼𑀤𑁆𑀥𑀸𑀦𑀻𑀢𑀺 𑀦𑀸𑀴𑀸𑀕𑀺𑀭𑀺𑀲𑀤𑀺𑀲𑁂 𑀳𑁂𑀫𑀓𑀧𑁆𑀧𑀦𑁂 𑀦𑀸𑀕𑁂 𑀅𑀪𑀺𑀭𑀼𑀬𑁆𑀳 𑀬𑀼𑀚𑁆𑀛𑀺𑀢𑀩𑁆𑀩𑀬𑀼𑀤𑁆𑀥𑀸𑀦𑀺. 𑀕𑀢𑀻𑀢𑀺 𑀦𑀺𑀧𑁆𑀨𑀢𑁆𑀢𑀺. 𑀯𑀺𑀲𑀬𑁄𑀢𑀺 𑀑𑀓𑀸𑀲𑁄, 𑀲𑀫𑀢𑁆𑀣𑀪𑀸𑀯𑁄 𑀯𑀸. 𑀦 𑀳𑀺 𑀲𑀓𑁆𑀓𑀸 𑀢𑁂𑀳𑀺 𑀚𑀭𑀸𑀫𑀭𑀡𑀁 𑀧𑀝𑀺𑀩𑀸𑀳𑀺𑀢𑀼𑀁. 𑀫𑀦𑁆𑀢𑀺𑀦𑁄 𑀫𑀳𑀸𑀫𑀢𑁆𑀢𑀸𑀢𑀺 𑀫𑀦𑁆𑀢𑀲𑀫𑁆𑀧𑀦𑁆𑀦𑀸 𑀫𑀳𑁄𑀲𑀥𑀯𑀺𑀥𑀼𑀭𑀧𑀡𑁆𑀟𑀺𑀢𑀸𑀤𑀺𑀲𑀤𑀺𑀲𑀸 𑀫𑀳𑀸𑀅𑀫𑀘𑁆𑀘𑀸. 𑀪𑀽𑀫𑀺𑀕𑀢𑀦𑁆𑀢𑀺 𑀫𑀳𑀸𑀮𑁄𑀳𑀓𑀼𑀫𑁆𑀪𑀺𑀬𑁄 𑀧𑀽𑀭𑁂𑀢𑁆𑀯𑀸 𑀪𑀽𑀫𑀺𑀬𑀁 𑀞𑀧𑀺𑀢𑀁. 𑀯𑁂𑀳𑀸𑀲𑀝𑁆𑀞𑀦𑁆𑀢𑀺 𑀘𑀫𑁆𑀫𑀧𑀲𑀺𑀩𑁆𑀩𑀓𑁂 𑀧𑀽𑀭𑁂𑀢𑁆𑀯𑀸 𑀢𑀼𑀮𑀸𑀲𑀗𑁆𑀖𑀸𑀝𑀸𑀤𑀻𑀲𑀼 𑀮𑀕𑁆𑀕𑁂𑀢𑁆𑀯𑀸 𑀘𑁂𑀯 𑀦𑀺𑀬𑁆𑀬𑀼𑀳𑀸𑀤𑀻𑀲𑀼 𑀘 𑀧𑀽𑀭𑁂𑀢𑁆𑀯𑀸 𑀞𑀧𑀺𑀢𑀁. 𑀉𑀧𑀮𑀸𑀧𑁂𑀢𑀼𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀁 𑀪𑀺𑀦𑁆𑀤𑀺𑀢𑀼𑀁. 𑀬𑀣𑀸 𑀤𑁆𑀯𑁂 𑀚𑀦𑀸 𑀏𑀓𑁂𑀦 𑀫𑀕𑁆𑀕𑁂𑀦 𑀦 𑀕𑀘𑁆𑀙𑀦𑁆𑀢𑀺 𑀏𑀯𑀁 𑀓𑀸𑀢𑀼𑀁.

𑀦𑀪𑀁 𑀆𑀳𑀘𑁆𑀘𑀸𑀢𑀺 𑀆𑀓𑀸𑀲𑀁 𑀧𑀽𑀭𑁂𑀢𑁆𑀯𑀸. 𑀏𑀯𑀁 𑀚𑀭𑀸 𑀘 𑀫𑀘𑁆𑀘𑀼 𑀘𑀸𑀢𑀺 𑀇𑀥 𑀤𑁆𑀯𑁂𑀬𑁂𑀯 𑀧𑀩𑁆𑀩𑀢𑀸 𑀕𑀳𑀺𑀢𑀸, 𑀭𑀸𑀚𑁄𑀯𑀸𑀤𑁂 𑀧𑀦 ‘‘𑀚𑀭𑀸 𑀆𑀕𑀘𑁆𑀙𑀢𑀺 𑀲𑀩𑁆𑀩𑀬𑁄𑀩𑁆𑀩𑀦𑀁 𑀯𑀺𑀮𑀼𑀫𑁆𑀧𑀫𑀸𑀦𑀸’’𑀢𑀺 𑀏𑀯𑀁 𑀚𑀭𑀸 𑀫𑀭𑀡𑀁 𑀩𑁆𑀬𑀸𑀥𑀺 𑀯𑀺𑀧𑀢𑁆𑀢𑀻𑀢𑀺 𑀘𑀢𑁆𑀢𑀸𑀭𑁄𑀧𑁂𑀢𑁂 𑀆𑀕𑀢𑀸𑀯. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀳𑀢𑁆𑀣𑀺𑀬𑀼𑀤𑁆𑀥𑀸𑀤𑀻𑀳𑀺 𑀚𑀭𑀸𑀫𑀭𑀡𑀁 𑀚𑀺𑀦𑀺𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸. 𑀲𑀤𑁆𑀥𑀁 𑀦𑀺𑀯𑁂𑀲𑀬𑁂𑀢𑀺 𑀲𑀤𑁆𑀥𑀁 𑀦𑀺𑀯𑁂𑀲𑁂𑀬𑁆𑀬, 𑀧𑀢𑀺𑀝𑁆𑀞𑀸𑀧𑁂𑀬𑁆𑀬𑀸𑀢𑀺. 𑀧𑀜𑁆𑀘𑀫𑀁.

𑀢𑀢𑀺𑀬𑁄 𑀯𑀕𑁆𑀕𑁄.

𑀇𑀢𑀺 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸

𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀓𑁄𑀲𑀮𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀫𑀸𑀭𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧. 𑀢𑀧𑁄𑀓𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁭. 𑀫𑀸𑀭𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀢𑀻𑀢𑀺 𑀧𑀝𑀺𑀯𑀺𑀤𑁆𑀥𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁄 𑀉𑀭𑀼𑀯𑁂𑀮𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺. 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀧𑀞𑀫𑀁 𑀅𑀦𑁆𑀢𑁄𑀲𑀢𑁆𑀢𑀸𑀳𑀲𑁆𑀫𑀺𑀁𑀬𑁂𑀯. 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬𑀸𑀢𑀺 𑀙𑀩𑁆𑀩𑀲𑁆𑀲𑀸𑀦𑀺 𑀓𑀢𑀸𑀬 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬. 𑀫𑀸𑀭𑁄 𑀧𑀸𑀧𑀺𑀫𑀸𑀢𑀺 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀅𑀢𑀺𑀓𑁆𑀓𑀫𑀺𑀢𑀼𑀁 𑀧𑀝𑀺𑀧𑀦𑁆𑀦𑁂 𑀲𑀢𑁆𑀢𑁂 𑀫𑀸𑀭𑁂𑀢𑀻𑀢𑀺 𑀫𑀸𑀭𑁄. 𑀧𑀸𑀧𑁂 𑀦𑀺𑀬𑁄𑀚𑁂𑀢𑀺, 𑀲𑀬𑀁 𑀯𑀸 𑀧𑀸𑀧𑁂 𑀦𑀺𑀬𑀼𑀢𑁆𑀢𑁄𑀢𑀺 𑀧𑀸𑀧𑀺𑀫𑀸. 𑀅𑀜𑁆𑀜𑀸𑀦𑀺𑀧𑀺𑀲𑁆𑀲 𑀓𑀡𑁆𑀳𑁄, 𑀅𑀥𑀺𑀧𑀢𑀺, 𑀯𑀲𑀯𑀢𑁆𑀢𑀻, 𑀅𑀦𑁆𑀢𑀓𑁄, 𑀦𑀫𑀼𑀘𑀺, 𑀧𑀫𑀢𑁆𑀢𑀩𑀦𑁆𑀥𑀽𑀢𑀺𑀆𑀤𑀻𑀦𑀺 𑀩𑀳𑀽𑀦𑀺 𑀦𑀸𑀫𑀸𑀦𑀺, 𑀇𑀥 𑀧𑀦 𑀦𑀸𑀫𑀤𑁆𑀯𑀬𑀫𑁂𑀯 𑀕𑀳𑀺𑀢𑀁. 𑀉𑀧𑀲𑀗𑁆𑀓𑀫𑀻𑀢𑀺 𑁋 ‘‘𑀅𑀬𑀁 𑀲𑀫𑀡𑁄 𑀕𑁄𑀢𑀫𑁄 ‘𑀫𑀼𑀢𑁆𑀢𑁄𑀲𑁆𑀫𑀻’𑀢𑀺 𑀫𑀜𑁆𑀜𑀢𑀺, 𑀅𑀫𑀼𑀢𑁆𑀢𑀪𑀸𑀯𑀫𑀲𑁆𑀲 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺.

𑀢𑀧𑁄𑀓𑀫𑁆𑀫𑀸 𑀅𑀧𑀓𑁆𑀓𑀫𑁆𑀫𑀸𑀢𑀺 𑀢𑀧𑁄𑀓𑀫𑁆𑀫𑀢𑁄 𑀅𑀧𑀓𑁆𑀓𑀫𑀺𑀢𑁆𑀯𑀸. 𑀅𑀧𑀭𑀤𑁆𑀥𑁄𑀢𑀺 ‘‘𑀤𑀽𑀭𑁂 𑀢𑁆𑀯𑀁 𑀲𑀼𑀤𑁆𑀥𑀺𑀫𑀕𑁆𑀕𑀸’’𑀢𑀺 𑀯𑀤𑀢𑀺. 𑀅𑀫𑀭𑀁 𑀢𑀧𑀦𑁆𑀢𑀺 𑀅𑀫𑀭𑀢𑀧𑀁 𑀅𑀫𑀭𑀪𑀸𑀯𑀢𑁆𑀣𑀸𑀬 𑀓𑀢𑀁 𑀮𑀽𑀔𑀢𑀧𑀁, 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄. 𑀲𑀩𑁆𑀩𑀸𑀦𑀢𑁆𑀣𑀸𑀯𑀳𑀁 𑀳𑁄𑀢𑀻𑀢𑀺, ‘‘𑀲𑀩𑁆𑀩𑀁 𑀢𑀧𑀁 𑀫𑀬𑁆𑀳𑀁 𑀅𑀢𑁆𑀣𑀸𑀯𑀳𑀁 𑀦 𑀪𑀯𑀢𑀻’’𑀢𑀺 𑀜𑀢𑁆𑀯𑀸. 𑀨𑀺𑀬𑀸𑀭𑀺𑀢𑁆𑀢𑀁𑀯 𑀥𑀫𑁆𑀫𑀦𑀻𑀢𑀺 𑀅𑀭𑀜𑁆𑀜𑁂 𑀣𑀮𑁂 𑀨𑀺𑀬𑀸𑀭𑀺𑀢𑁆𑀢𑀁 𑀯𑀺𑀬. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀅𑀭𑀜𑁆𑀜𑁂 𑀣𑀮𑁂 𑀦𑀸𑀯𑀁 𑀞𑀧𑁂𑀢𑁆𑀯𑀸 𑀪𑀡𑁆𑀟𑀲𑁆𑀲 𑀧𑀽𑀭𑁂𑀢𑁆𑀯𑀸 𑀫𑀳𑀸𑀚𑀦𑀸 𑀅𑀪𑀺𑀭𑀽𑀳𑀺𑀢𑁆𑀯𑀸 𑀨𑀺𑀬𑀸𑀭𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀁𑀓𑀟𑁆𑀠𑁂𑀬𑁆𑀬𑀼𑀁 𑀘𑁂𑀯 𑀉𑀧𑁆𑀧𑀻𑀮𑁂𑀬𑁆𑀬𑀼𑀁 𑀘, 𑀲𑁄 𑀫𑀳𑀸𑀚𑀦𑀲𑁆𑀲 𑀯𑀸𑀬𑀸𑀫𑁄 𑀏𑀓𑀗𑁆𑀕𑀼𑀮𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀦𑀸𑀯𑀸𑀬 𑀕𑀫𑀦𑀁 𑀅𑀲𑀸𑀥𑁂𑀦𑁆𑀢𑁄 𑀦𑀺𑀭𑀢𑁆𑀣𑀓𑁄 𑀪𑀯𑁂𑀬𑁆𑀬 𑀦 𑀅𑀦𑀢𑁆𑀣𑀸𑀯𑀳𑁄, 𑀏𑀯𑀫𑁂𑀯 𑀅𑀳𑀁 ‘𑀲𑀩𑁆𑀩𑀁 𑀅𑀫𑀭𑀁 𑀢𑀧𑀁 𑀅𑀦𑀢𑁆𑀣𑀸𑀯𑀳𑀁 𑀳𑁄𑀢𑀻’𑀢𑀺 𑀜𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺𑀦𑁆𑀢𑀺.

𑀇𑀤𑀸𑀦𑀺 𑀢𑀁 𑀅𑀫𑀭𑀁 𑀢𑀧𑀁 𑀧𑀳𑀸𑀬 𑀬𑁂𑀦 𑀫𑀕𑁆𑀕𑁂𑀦 𑀩𑀼𑀤𑁆𑀥𑁄 𑀚𑀸𑀢𑁄, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀲𑀻𑀮𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀻𑀮𑀦𑁆𑀢𑀺 𑀯𑀘𑀦𑁂𑀦 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸 𑀕𑀳𑀺𑀢𑀸, 𑀲𑀫𑀸𑀥𑀺𑀦𑀸 𑀲𑀫𑁆𑀫𑀸𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀬𑁄, 𑀧𑀜𑁆𑀜𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑀸. 𑀫𑀕𑁆𑀕𑀁 𑀩𑁄𑀥𑀸𑀬 𑀪𑀸𑀯𑀬𑀦𑁆𑀢𑀺 𑀇𑀫𑀁 𑀅𑀝𑁆𑀞𑀗𑁆𑀕𑀺𑀓𑀫𑁂𑀯 𑀅𑀭𑀺𑀬𑀫𑀕𑁆𑀕𑀁 𑀩𑁄𑀥𑀢𑁆𑀣𑀸𑀬 𑀪𑀸𑀯𑀬𑀦𑁆𑀢𑁄. 𑀏𑀢𑁆𑀣 𑀘 𑀩𑁄𑀥𑀸𑀬𑀸𑀢𑀺 𑀫𑀕𑁆𑀕𑀢𑁆𑀣𑀸𑀬. 𑀬𑀣𑀸 𑀳𑀺 𑀬𑀸𑀕𑀼𑀢𑁆𑀣𑀸𑀬 𑀬𑀸𑀕𑀼𑀫𑁂𑀯 𑀧𑀘𑀦𑁆𑀢𑀺, 𑀧𑀽𑀯𑀢𑁆𑀣𑀸𑀬 𑀧𑀽𑀯𑀫𑁂𑀯 𑀧𑀘𑀦𑁆𑀢𑀺, 𑀦 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀓𑀭𑁄𑀦𑁆𑀢𑀺, 𑀏𑀯𑀁 𑀫𑀕𑁆𑀕𑀫𑁂𑀯 𑀫𑀕𑁆𑀕𑀢𑁆𑀣𑀸𑀬 𑀪𑀸𑀯𑁂𑀢𑀺. 𑀢𑁂𑀦𑀸𑀳 ‘‘𑀫𑀕𑁆𑀕𑀁 𑀩𑁄𑀥𑀸𑀬 𑀪𑀸𑀯𑀬’’𑀦𑁆𑀢𑀺. 𑀧𑀭𑀫𑀁 𑀲𑀼𑀤𑁆𑀥𑀺𑀦𑁆𑀢𑀺 𑀅𑀭𑀳𑀢𑁆𑀢𑀁. 𑀦𑀺𑀳𑀢𑁄𑀢𑀺 𑀢𑁆𑀯𑀁 𑀫𑀬𑀸 𑀦𑀺𑀳𑀢𑁄 𑀧𑀭𑀸𑀚𑀺𑀢𑁄. 𑀧𑀞𑀫𑀁.

𑁨. 𑀳𑀢𑁆𑀣𑀺𑀭𑀸𑀚𑀯𑀡𑁆𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁮. 𑀤𑀼𑀢𑀺𑀬𑁂 𑀭𑀢𑁆𑀢𑀦𑁆𑀥𑀓𑀸𑀭𑀢𑀺𑀫𑀺𑀲𑀸𑀬𑀦𑁆𑀢𑀺 𑀭𑀢𑁆𑀢𑀺𑀁 𑀅𑀦𑁆𑀥𑀪𑀸𑀯𑀓𑀸𑀭𑀓𑁂 𑀫𑀳𑀸𑀢𑀫𑁂 𑀘𑀢𑀼𑀭𑀗𑁆𑀕𑁂 𑀢𑀫𑀲𑀺. 𑀅𑀩𑁆𑀪𑁄𑀓𑀸𑀲𑁂 𑀦𑀺𑀲𑀺𑀦𑁆𑀦𑁄 𑀳𑁄𑀢𑀻𑀢𑀺 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀧𑀸𑀲𑀸𑀡𑀨𑀮𑀓𑁂 𑀫𑀳𑀸𑀘𑀻𑀯𑀭𑀁 𑀲𑀻𑀲𑁂 𑀞𑀧𑁂𑀢𑁆𑀯𑀸 𑀧𑀥𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀫𑀸𑀦𑁄 𑀦𑀺𑀲𑀺𑀦𑁆𑀦𑁄 𑀳𑁄𑀢𑀺.

𑀦𑀦𑀼 𑀘 𑀢𑀣𑀸𑀕𑀢𑀲𑁆𑀲 𑀅𑀪𑀸𑀯𑀺𑀢𑁄 𑀯𑀸 𑀫𑀕𑁆𑀕𑁄, 𑀅𑀧𑁆𑀧𑀳𑀻𑀦𑀸 𑀯𑀸 𑀓𑀺𑀮𑁂𑀲𑀸, 𑀅𑀧𑁆𑀧𑀝𑀺𑀯𑀺𑀤𑁆𑀥𑀁 𑀯𑀸 𑀅𑀓𑀼𑀧𑁆𑀧𑀁, 𑀅𑀲𑀘𑁆𑀙𑀺𑀓𑀢𑁄 𑀯𑀸 𑀦𑀺𑀭𑁄𑀥𑁄 𑀦𑀢𑁆𑀣𑀺, 𑀓𑀲𑁆𑀫𑀸 𑀏𑀯𑀫𑀓𑀸𑀲𑀻𑀢𑀺? 𑀅𑀦𑀸𑀕𑀢𑁂 𑀓𑀼𑀮𑀧𑀼𑀢𑁆𑀢𑀸𑀦𑀁 𑀅𑀗𑁆𑀓𑀼𑀲𑀢𑁆𑀣𑀁. ‘‘𑀅𑀦𑀸𑀕𑀢𑁂 𑀳𑀺 𑀓𑀼𑀮𑀧𑀼𑀢𑁆𑀢𑀸 𑀫𑀬𑀸 𑀕𑀢𑀫𑀕𑁆𑀕𑀁 𑀆𑀯𑀚𑁆𑀚𑀺𑀢𑁆𑀯𑀸 𑀅𑀩𑁆𑀪𑁄𑀓𑀸𑀲𑀯𑀸𑀲𑀁 𑀯𑀲𑀺𑀢𑀩𑁆𑀩𑀁 𑀫𑀜𑁆𑀜𑀫𑀸𑀦𑀸 𑀧𑀥𑀸𑀦𑀓𑀫𑁆𑀫𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀫𑁆𑀧𑀲𑁆𑀲𑀫𑀸𑀦𑁄 𑀲𑀢𑁆𑀣𑀸 𑀏𑀯𑀫𑀓𑀸𑀲𑀺. 𑀫𑀳𑀸𑀢𑀺 𑀫𑀳𑀦𑁆𑀢𑁄. 𑀅𑀭𑀺𑀝𑁆𑀞𑀓𑁄𑀢𑀺 𑀓𑀸𑀴𑀓𑁄. 𑀫𑀡𑀻𑀢𑀺 𑀧𑀸𑀲𑀸𑀡𑁄. 𑀏𑀯𑀫𑀲𑁆𑀲 𑀲𑀻𑀲𑀁 𑀳𑁄𑀢𑀻𑀢𑀺 𑀏𑀯𑀭𑀽𑀧𑀁 𑀢𑀲𑁆𑀲 𑀓𑀸𑀴𑀯𑀡𑁆𑀡𑀁 𑀓𑀽𑀝𑀸𑀕𑀸𑀭𑀧𑁆𑀧𑀫𑀸𑀡𑀁 𑀫𑀳𑀸𑀧𑀸𑀲𑀸𑀡𑀲𑀤𑀺𑀲𑀁 𑀲𑀻𑀲𑀁 𑀳𑁄𑀢𑀺.

𑀲𑀼𑀪𑀸𑀲𑀼𑀪𑀦𑁆𑀢𑀺 𑀤𑀻𑀖𑀫𑀤𑁆𑀥𑀸𑀦𑀁 𑀲𑀁𑀲𑀭𑀦𑁆𑀢𑁄 𑀲𑀼𑀦𑁆𑀤𑀭𑀸𑀲𑀼𑀦𑁆𑀤𑀭𑀁 𑀯𑀡𑁆𑀡𑀁 𑀓𑀢𑁆𑀯𑀸 𑀆𑀕𑀢𑁄𑀲𑀻𑀢𑀺 𑀯𑀤𑀢𑀺. 𑀅𑀣 𑀯𑀸 𑀲𑀁𑀲𑀭𑀦𑁆𑀢𑀺 𑀲𑀁𑀲𑀭𑀦𑁆𑀢𑁄 𑀆𑀕𑀘𑁆𑀙𑀦𑁆𑀢𑁄. 𑀤𑀻𑀖𑀫𑀤𑁆𑀥𑀸𑀦𑀦𑁆𑀢𑀺 𑀯𑀲𑀯𑀢𑁆𑀢𑀺𑀝𑁆𑀞𑀸𑀦𑀢𑁄 𑀬𑀸𑀯 𑀉𑀭𑀼𑀯𑁂𑀮𑀸𑀬 𑀤𑀻𑀖𑀫𑀕𑁆𑀕𑀁, 𑀧𑀼𑀭𑁂 𑀩𑁄𑀥𑀸𑀬 𑀯𑀸 𑀙𑀩𑁆𑀩𑀲𑁆𑀲𑀸𑀦𑀺 𑀤𑀼𑀓𑁆𑀓𑀭𑀓𑀸𑀭𑀺𑀓𑀲𑀫𑀬𑀲𑀗𑁆𑀔𑀸𑀢𑀁 𑀤𑀻𑀖𑀓𑀸𑀮𑀁. 𑀯𑀡𑁆𑀡𑀁 𑀓𑀢𑁆𑀯𑀸 𑀲𑀼𑀪𑀸𑀲𑀼𑀪𑀦𑁆𑀢𑀺 𑀲𑀼𑀦𑁆𑀤𑀭𑀜𑁆𑀘 𑀅𑀲𑀼𑀦𑁆𑀤𑀭𑀜𑁆𑀘 𑀦𑀸𑀦𑀧𑁆𑀧𑀓𑀸𑀭𑀁 𑀯𑀡𑁆𑀡𑀁 𑀓𑀢𑁆𑀯𑀸 𑀅𑀦𑁂𑀓𑀯𑀸𑀭𑀁 𑀫𑀫 𑀲𑀦𑁆𑀢𑀺𑀓𑀁 𑀆𑀕𑀢𑁄𑀲𑀻𑀢𑀺 𑀅𑀢𑁆𑀣𑁄. 𑀲𑁄 𑀓𑀺𑀭 𑀯𑀡𑁆𑀡𑁄 𑀦𑀸𑀫 𑀦𑀢𑁆𑀣𑀺, 𑀬𑁂𑀦 𑀯𑀡𑁆𑀡𑁂𑀦 𑀫𑀸𑀭𑁄 𑀯𑀺𑀪𑀺𑀁𑀲𑀓𑀢𑁆𑀣𑀸𑀬 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀦 𑀆𑀕𑀢𑀧𑀼𑀩𑁆𑀩𑁄. 𑀢𑁂𑀦 𑀢𑀁 𑀪𑀕𑀯𑀸 𑀏𑀯𑀫𑀸𑀳. 𑀅𑀮𑀁 𑀢𑁂 𑀢𑁂𑀦𑀸𑀢𑀺 𑀅𑀮𑀁 𑀢𑀼𑀬𑁆𑀳𑀁 𑀏𑀢𑁂𑀦 𑀫𑀸𑀭𑀯𑀺𑀪𑀺𑀁𑀲𑀸𑀓𑀸𑀭𑀤𑀲𑁆𑀲𑀦𑀩𑁆𑀬𑀸𑀧𑀸𑀭𑁂𑀦. 𑀤𑀼𑀢𑀺𑀬𑀁.

𑁩. 𑀲𑀼𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁯. 𑀢𑀢𑀺𑀬𑁂 𑀲𑀼𑀲𑀁𑀯𑀼𑀢𑀸𑀢𑀺 𑀲𑀼𑀧𑀺𑀳𑀺𑀢𑀸. 𑀦 𑀢𑁂 𑀫𑀸𑀭𑀯𑀲𑀸𑀦𑀼𑀕𑀸𑀢𑀺, 𑀫𑀸𑀭, 𑀢𑁂 𑀢𑀼𑀬𑁆𑀳𑀁 𑀯𑀲𑀸𑀦𑀼𑀕𑀸 𑀦 𑀳𑁄𑀦𑁆𑀢𑀺. 𑀦 𑀢𑁂 𑀫𑀸𑀭𑀲𑁆𑀲 𑀩𑀤𑁆𑀥𑀕𑀽𑀢𑀺 𑀢𑁂 𑀢𑀼𑀬𑁆𑀳𑀁 𑀫𑀸𑀭𑀲𑁆𑀲 𑀩𑀤𑁆𑀥𑀘𑀭𑀸 𑀲𑀺𑀲𑁆𑀲𑀸 𑀅𑀦𑁆𑀢𑁂𑀯𑀸𑀲𑀺𑀓𑀸 𑀦 𑀳𑁄𑀦𑁆𑀢𑀺. 𑀢𑀢𑀺𑀬𑀁.

𑁪. 𑀧𑀞𑀫𑀫𑀸𑀭𑀧𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁦. 𑀘𑀢𑀼𑀢𑁆𑀣𑁂 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸𑀢𑀺 𑀉𑀧𑀸𑀬𑀫𑀦𑀲𑀺𑀓𑀸𑀭𑁂𑀦. 𑀬𑁄𑀦𑀺𑀲𑁄 𑀲𑀫𑁆𑀫𑀧𑁆𑀧𑀥𑀸𑀦𑀸𑀢𑀺 𑀉𑀧𑀸𑀬𑀯𑀻𑀭𑀺𑀬𑁂𑀦 𑀓𑀸𑀭𑀡𑀯𑀻𑀭𑀺𑀬𑁂𑀦. 𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺. 𑀅𑀚𑁆𑀛𑀪𑀸𑀲𑀻𑀢𑀺 ‘‘𑀅𑀬𑀁 𑀅𑀢𑁆𑀢𑀦𑀸 𑀯𑀻𑀭𑀺𑀬𑀁 𑀓𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸𑀧𑀺 𑀦 𑀢𑀼𑀲𑁆𑀲𑀢𑀺, 𑀇𑀤𑀸𑀦𑀺 𑀅𑀜𑁆𑀜𑁂𑀲𑀫𑁆𑀧𑀺 ‘𑀧𑀸𑀧𑀼𑀡𑀸𑀣𑀸’𑀢𑀺 𑀉𑀲𑁆𑀲𑀸𑀳𑀁 𑀓𑀭𑁄𑀢𑀺, 𑀧𑀝𑀺𑀩𑀸𑀳𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀪𑀸𑀲𑀺.

𑀫𑀸𑀭𑀧𑀸𑀲𑁂𑀦𑀸𑀢𑀺 𑀓𑀺𑀮𑁂𑀲𑀧𑀸𑀲𑁂𑀦. 𑀬𑁂 𑀤𑀺𑀩𑁆𑀩𑀸 𑀬𑁂 𑀘 𑀫𑀸𑀦𑀼𑀲𑀸𑀢𑀺 𑀬𑁂 𑀤𑀺𑀩𑁆𑀩𑀸 𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑀸 𑀫𑀸𑀦𑀼𑀲𑀸 𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑀸 𑀘 𑀫𑀸𑀭𑀧𑀸𑀲𑀸 𑀦𑀸𑀫 𑀅𑀢𑁆𑀣𑀺, 𑀲𑀩𑁆𑀩𑁂𑀳𑀺 𑀢𑁂𑀳𑀺 𑀢𑁆𑀯𑀁 𑀩𑀤𑁆𑀥𑁄𑀢𑀺 𑀯𑀤𑀢𑀺. 𑀫𑀸𑀭𑀩𑀦𑁆𑀥𑀦𑀩𑀤𑁆𑀥𑁄𑀢𑀺 𑀫𑀸𑀭𑀩𑀦𑁆𑀥𑀦𑁂𑀦 𑀩𑀤𑁆𑀥𑁄, 𑀫𑀸𑀭𑀩𑀦𑁆𑀥𑀦𑁂 𑀯𑀸 𑀩𑀤𑁆𑀥𑁄. 𑀦 𑀫𑁂 𑀲𑀫𑀡 𑀫𑁄𑀓𑁆𑀔𑀲𑀻𑀢𑀺 𑀲𑀫𑀡 𑀢𑁆𑀯𑀁 𑀫𑀫 𑀯𑀺𑀲𑀬𑀢𑁄 𑀦 𑀫𑀼𑀘𑁆𑀘𑀺𑀲𑁆𑀲𑀲𑀺. 𑀘𑀢𑀼𑀢𑁆𑀣𑀁.

𑁫. 𑀤𑀼𑀢𑀺𑀬𑀫𑀸𑀭𑀧𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁧. 𑀧𑀜𑁆𑀘𑀫𑁂 𑀫𑀼𑀢𑁆𑀢𑀸𑀳𑀦𑁆𑀢𑀺 𑀫𑀼𑀢𑁆𑀢𑁄 𑀅𑀳𑀁. 𑀧𑀼𑀭𑀺𑀫𑀁 𑀲𑀼𑀢𑁆𑀢𑀁 𑀅𑀦𑁆𑀢𑁄𑀯𑀲𑁆𑀲𑁂 𑀯𑀼𑀢𑁆𑀢𑀁, 𑀇𑀤𑀁 𑀧𑀦 𑀧𑀯𑀸𑀭𑁂𑀢𑁆𑀯𑀸 𑀯𑀼𑀝𑁆𑀞𑀯𑀲𑁆𑀲𑀓𑀸𑀮𑁂. 𑀘𑀸𑀭𑀺𑀓𑀦𑁆𑀢𑀺 𑀅𑀦𑀼𑀧𑀼𑀩𑁆𑀩𑀕𑀫𑀦𑀘𑀸𑀭𑀺𑀓𑀁. (𑀧𑀯𑀸𑀭𑁂𑀢𑁆𑀯𑀸) 𑀤𑀺𑀯𑀲𑁂 𑀤𑀺𑀯𑀲𑁂 𑀬𑁄𑀚𑀦𑀧𑀭𑀫𑀁 𑀕𑀘𑁆𑀙𑀦𑁆𑀢𑀸 𑀘𑀭𑀣𑀸𑀢𑀺 𑀯𑀤𑀢𑀺. 𑀫𑀸 𑀏𑀓𑁂𑀦 𑀤𑁆𑀯𑁂𑀢𑀺 𑀏𑀓𑀫𑀕𑁆𑀕𑁂𑀦 𑀤𑁆𑀯𑁂 𑀚𑀦𑀸 𑀫𑀸 𑀅𑀕𑀫𑀺𑀢𑁆𑀣. 𑀏𑀯𑀜𑁆𑀳𑀺 𑀕𑀢𑁂𑀲𑀼 𑀏𑀓𑀲𑁆𑀫𑀺𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂, 𑀏𑀓𑁂𑀦 𑀢𑀼𑀡𑁆𑀳𑀻𑀪𑀽𑀢𑁂𑀦 𑀞𑀸𑀢𑀩𑁆𑀩𑀁 𑀳𑁄𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳.

𑀆𑀤𑀺𑀓𑀮𑁆𑀬𑀸𑀡𑀦𑁆𑀢𑀺 𑀆𑀤𑀺𑀫𑁆𑀳𑀺 𑀓𑀮𑁆𑀬𑀸𑀡𑀁 𑀲𑀼𑀦𑁆𑀤𑀭𑀁 𑀪𑀤𑁆𑀤𑀓𑀁. 𑀢𑀣𑀸 𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼. 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀜𑁆𑀘 𑀦𑀸𑀫𑁂𑀢𑀁 𑀲𑀸𑀲𑀦𑀲𑁆𑀲 𑀘 𑀤𑁂𑀲𑀦𑀸𑀬 𑀘 𑀯𑀲𑁂𑀦 𑀤𑀼𑀯𑀺𑀥𑀁. 𑀢𑀢𑁆𑀣 𑀲𑀸𑀲𑀦𑀲𑁆𑀲 𑀲𑀻𑀮𑀁 𑀆𑀤𑀺, 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀸 𑀫𑀚𑁆𑀛𑀁, 𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀧𑀭𑀺𑀬𑁄𑀲𑀸𑀦𑀁. 𑀲𑀻𑀮𑀲𑀫𑀸𑀥𑀬𑁄 𑀯𑀸 𑀆𑀤𑀺, 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀸 𑀫𑀚𑁆𑀛𑀁, 𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀧𑀭𑀺𑀬𑁄𑀲𑀸𑀦𑀁. 𑀲𑀻𑀮𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸 𑀯𑀸 𑀆𑀤𑀺, 𑀫𑀕𑁆𑀕𑁄 𑀫𑀚𑁆𑀛𑀁, 𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀧𑀭𑀺𑀬𑁄𑀲𑀸𑀦𑀁. 𑀤𑁂𑀲𑀦𑀸𑀬 𑀧𑀦 𑀘𑀢𑀼𑀧𑁆𑀧𑀤𑀺𑀓𑀸𑀬 𑀕𑀸𑀣𑀸𑀬 𑀢𑀸𑀯 𑀧𑀞𑀫𑀧𑀸𑀤𑁄 𑀆𑀤𑀺, 𑀤𑀼𑀢𑀺𑀬𑀢𑀢𑀺𑀬𑀸 𑀫𑀚𑁆𑀛𑀁, 𑀘𑀢𑀼𑀢𑁆𑀣𑁄 𑀧𑀭𑀺𑀬𑁄𑀲𑀸𑀦𑀁. 𑀧𑀜𑁆𑀘𑀧𑀤𑀙𑀧𑁆𑀧𑀤𑀸𑀦𑀁 𑀧𑀞𑀫𑀧𑀸𑀤𑁄 𑀆𑀤𑀺, 𑀅𑀯𑀲𑀸𑀦𑀧𑀸𑀤𑁄 𑀧𑀭𑀺𑀬𑁄𑀲𑀸𑀦𑀁, 𑀅𑀯𑀲𑁂𑀲𑀸 𑀫𑀚𑁆𑀛𑀁. 𑀏𑀓𑀸𑀦𑀼𑀲𑀦𑁆𑀥𑀺𑀓𑀲𑀼𑀢𑁆𑀢𑀲𑁆𑀲 𑀦𑀺𑀤𑀸𑀦𑀁 𑀆𑀤𑀺, ‘‘𑀇𑀤𑀫𑀯𑁄𑀘𑀸’’𑀢𑀺 𑀧𑀭𑀺𑀬𑁄𑀲𑀸𑀦𑀁, 𑀲𑁂𑀲𑀁 𑀫𑀚𑁆𑀛𑀁. 𑀅𑀦𑁂𑀓𑀸𑀦𑀼𑀲𑀦𑁆𑀥𑀺𑀓𑀲𑁆𑀲 𑀫𑀚𑁆𑀛𑁂 𑀩𑀳𑀽𑀧𑀺 𑀅𑀦𑀼𑀲𑀦𑁆𑀥𑀺 𑀫𑀚𑁆𑀛𑀫𑁂𑀯, 𑀦𑀺𑀤𑀸𑀦𑀁 𑀆𑀤𑀺, ‘‘𑀇𑀤𑀫𑀯𑁄𑀘𑀸’’𑀢𑀺 𑀧𑀭𑀺𑀬𑁄𑀲𑀸𑀦𑀁.

𑀲𑀸𑀢𑁆𑀣𑀦𑁆𑀢𑀺 𑀲𑀸𑀢𑁆𑀣𑀓𑀁 𑀓𑀢𑁆𑀯𑀸 𑀤𑁂𑀲𑁂𑀣. 𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀩𑁆𑀬𑀜𑁆𑀚𑀦𑁂𑀳𑀺 𑀘𑁂𑀯 𑀧𑀤𑁂𑀳𑀺 𑀘 𑀧𑀭𑀺𑀧𑀽𑀭𑀁 𑀓𑀢𑁆𑀯𑀸 𑀤𑁂𑀲𑁂𑀣. 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀲𑀓𑀮𑀧𑀭𑀺𑀧𑀼𑀡𑁆𑀡𑀁. 𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁. 𑀧𑀓𑀸𑀲𑁂𑀣𑀸𑀢𑀺 𑀆𑀯𑀺𑀓𑀭𑁄𑀣.

𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀫𑁆𑀳𑀺 𑀅𑀧𑁆𑀧𑀓𑀺𑀮𑁂𑀲𑀭𑀚𑀲𑀪𑀸𑀯𑀸, 𑀤𑀼𑀓𑀽𑀮𑀲𑀸𑀡𑀺𑀬𑀸 𑀧𑀝𑀺𑀘𑁆𑀙𑀦𑁆𑀦𑀸 𑀯𑀺𑀬 𑀘𑀢𑀼𑀧𑁆𑀧𑀤𑀺𑀓𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀲𑀫𑀢𑁆𑀣𑀸 𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀲𑁆𑀲𑀯𑀦𑀢𑀸𑀢𑀺 𑀅𑀲𑁆𑀲𑀯𑀦𑀢𑀸𑀬. 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀅𑀮𑀸𑀪𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀢𑁄 𑀧𑀭𑀺𑀳𑀸𑀬𑀦𑁆𑀢𑀺. 𑀲𑁂𑀦𑀸𑀦𑀺𑀕𑀫𑁄𑀢𑀺 𑀧𑀞𑀫𑀓𑀧𑁆𑀧𑀺𑀓𑀸𑀦𑀁 𑀲𑁂𑀦𑀸𑀬 𑀦𑀺𑀯𑀺𑀝𑁆𑀞𑁄𑀓𑀸𑀲𑁂 𑀧𑀢𑀺𑀝𑁆𑀞𑀺𑀢𑀕𑀸𑀫𑁄, 𑀲𑀼𑀚𑀸𑀢𑀸𑀬 𑀯𑀸 𑀧𑀺𑀢𑀼 𑀲𑁂𑀦𑀸𑀦𑀻 𑀦𑀸𑀫 𑀦𑀺𑀕𑀫𑁄. 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀻𑀢𑀺 𑀦𑀸𑀳𑀁 𑀢𑀼𑀫𑁆𑀳𑁂 𑀉𑀬𑁆𑀬𑁄𑀚𑁂𑀢𑁆𑀯𑀸 𑀧𑀭𑀺𑀯𑁂𑀡𑀸𑀤𑀻𑀦𑀺 𑀓𑀸𑀭𑁂𑀢𑁆𑀯𑀸 𑀉𑀧𑀝𑁆𑀞𑀸𑀓𑀸𑀤𑀻𑀳𑀺 𑀧𑀭𑀺𑀘𑀭𑀺𑀬𑀫𑀸𑀦𑁄 𑀯𑀺𑀳𑀭𑀺𑀲𑁆𑀲𑀸𑀫𑀺, 𑀢𑀺𑀡𑁆𑀡𑀁 𑀧𑀦 𑀚𑀝𑀺𑀮𑀸𑀦𑀁 𑀅𑀟𑁆𑀠𑀼𑀟𑁆𑀠𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀲𑀳𑀲𑁆𑀲𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀥𑀫𑁆𑀫𑀫𑁂𑀯 𑀤𑁂𑀲𑁂𑀢𑀼𑀁 𑀉𑀧𑀲𑀗𑁆𑀓𑀫𑀺𑀲𑁆𑀲𑀸𑀫𑀻𑀢𑀺. 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺, ‘‘𑀅𑀬𑀁 𑀲𑀫𑀡𑁄 𑀕𑁄𑀢𑀫𑁄 𑀫𑀳𑀸𑀬𑀼𑀤𑁆𑀥𑀁 𑀯𑀺𑀘𑀸𑀭𑁂𑀦𑁆𑀢𑁄 𑀯𑀺𑀬, ‘𑀫𑀸 𑀏𑀓𑁂𑀦 𑀤𑁆𑀯𑁂 𑀅𑀕𑀫𑀺𑀢𑁆𑀣, 𑀥𑀫𑁆𑀫𑀁 𑀤𑁂𑀲𑁂𑀣𑀸’𑀢𑀺 𑀲𑀝𑁆𑀞𑀺 𑀚𑀦𑁂 𑀉𑀬𑁆𑀬𑁄𑀚𑁂𑀢𑀺, 𑀇𑀫𑀲𑁆𑀫𑀺𑀁 𑀧𑀦 𑀏𑀓𑀲𑁆𑀫𑀺𑀫𑁆𑀧𑀺 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀫𑀬𑁆𑀳𑀁 𑀘𑀺𑀢𑁆𑀢𑀲𑁆𑀲𑀸𑀤𑀁 𑀦𑀢𑁆𑀣𑀺, 𑀏𑀯𑀁 𑀩𑀳𑀽𑀲𑀼 𑀤𑁂𑀲𑁂𑀦𑁆𑀢𑁂𑀲𑀼 𑀓𑀼𑀢𑁄 𑀪𑀯𑀺𑀲𑁆𑀲𑀢𑀺, 𑀧𑀝𑀺𑀩𑀸𑀳𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺. 𑀧𑀜𑁆𑀘𑀫𑀁.

𑁬. 𑀲𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁨. 𑀙𑀝𑁆𑀞𑁂 𑀲𑁄𑀡𑁆𑀟𑀺𑀓𑀸𑀓𑀺𑀮𑀜𑁆𑀚𑀦𑁆𑀢𑀺 𑀲𑀼𑀭𑀸𑀓𑀸𑀭𑀓𑀸𑀦𑀁 𑀧𑀺𑀝𑁆𑀞𑀧𑀢𑁆𑀣𑀭𑀡𑀓𑀓𑀺𑀮𑀜𑁆𑀚𑀁. 𑀓𑁄𑀲𑀮𑀺𑀓𑀸 𑀓𑀁𑀲𑀧𑀸𑀢𑀻𑀢𑀺 𑀓𑁄𑀲𑀮𑀭𑀜𑁆𑀜𑁄 𑀭𑀣𑀘𑀓𑁆𑀓𑀧𑁆𑀧𑀫𑀸𑀡𑀸 𑀧𑀭𑀺𑀪𑁄𑀕𑀧𑀸𑀢𑀺. 𑀕𑀴𑀕𑀴𑀸𑀬𑀦𑁆𑀢𑁂𑀢𑀺 𑀕𑀚𑁆𑀚𑀦𑁆𑀢𑁂. 𑀓𑀫𑁆𑀫𑀸𑀭𑀕𑀕𑁆𑀕𑀭𑀺𑀬𑀸𑀢𑀺 𑀓𑀫𑁆𑀫𑀸𑀭𑀼𑀤𑁆𑀥𑀦𑀧𑀡𑀸𑀴𑀺𑀬𑀸. 𑀥𑀫𑀫𑀸𑀦𑀸𑀬𑀸𑀢𑀺 𑀪𑀲𑁆𑀢𑀯𑀸𑀢𑁂𑀦 𑀧𑀽𑀭𑀺𑀬𑀫𑀸𑀦𑀸𑀬. 𑀇𑀢𑀺 𑀯𑀺𑀤𑀺𑀢𑁆𑀯𑀸𑀢𑀺 𑁋 ‘‘𑀲𑀫𑀡𑁄 𑀕𑁄𑀢𑀫𑁄 𑀧𑀥𑀸𑀦𑀫𑀦𑀼𑀬𑀼𑀢𑁆𑀢𑁄 𑀲𑀼𑀔𑁂𑀦 𑀦𑀺𑀲𑀺𑀦𑁆𑀦𑁄, 𑀖𑀝𑁆𑀝𑀬𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀅𑀢𑁆𑀢𑀪𑀸𑀯𑀁 𑀫𑀸𑀧𑁂𑀢𑁆𑀯𑀸 𑀦𑀺𑀬𑀸𑀫𑀪𑀽𑀫𑀺𑀬𑀁 𑀇𑀢𑁄 𑀘𑀺𑀢𑁄 𑀘 𑀲𑀜𑁆𑀘𑀭𑀦𑁆𑀢𑀁 𑀯𑀺𑀚𑁆𑀚𑀼𑀮𑀢𑀸𑀮𑁄𑀓𑁂𑀦 𑀤𑀺𑀲𑁆𑀯𑀸, ‘‘𑀓𑁄 𑀦𑀼 𑀔𑁄 𑀏𑀲𑁄 𑀲𑀢𑁆𑀢𑁄’’𑀢𑀺? 𑀆𑀯𑀚𑁆𑀚𑁂𑀦𑁆𑀢𑁄, ‘‘𑀫𑀸𑀭𑁄 𑀅𑀬’’𑀦𑁆𑀢𑀺 𑀏𑀯𑀁 𑀯𑀺𑀤𑀺𑀢𑁆𑀯𑀸.

𑀲𑀼𑀜𑁆𑀜𑀕𑁂𑀳𑀸𑀦𑀻𑀢𑀺 𑀲𑀼𑀜𑁆𑀜𑀸𑀕𑀸𑀭𑀸𑀦𑀺. 𑀲𑁂𑀬𑁆𑀬𑀸𑀢𑀺 𑀲𑁂𑀬𑁆𑀬𑀢𑁆𑀣𑀸𑀬. 𑀞𑀲𑁆𑀲𑀸𑀫𑀺 𑀘𑀗𑁆𑀓𑀫𑀺𑀲𑁆𑀲𑀸𑀫𑀺 𑀦𑀺𑀲𑀻𑀤𑀺𑀲𑁆𑀲𑀸𑀫𑀺 𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀏𑀢𑀤𑀢𑁆𑀣𑀸𑀬 𑀬𑁄 𑀲𑀼𑀜𑁆𑀜𑀸𑀕𑀸𑀭𑀸𑀦𑀺 𑀲𑁂𑀯𑀢𑀻𑀢𑀺 𑀅𑀢𑁆𑀣𑁄. 𑀲𑁄 𑀫𑀼𑀦𑀺 𑀅𑀢𑁆𑀢𑀲𑀜𑁆𑀜𑀢𑁄𑀢𑀺 𑀲𑁄 𑀩𑀼𑀤𑁆𑀥𑀫𑀼𑀦𑀺 𑀳𑀢𑁆𑀣𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀸𑀪𑀸𑀯𑁂𑀦 𑀲𑀁𑀬𑀢𑀢𑁆𑀢𑀪𑀸𑀯𑁄. 𑀯𑁄𑀲𑁆𑀲𑀚𑁆𑀚 𑀘𑀭𑁂𑀬𑁆𑀬 𑀢𑀢𑁆𑀣 𑀲𑁄𑀢𑀺 𑀲𑁄 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀆𑀮𑀬𑀁 𑀦𑀺𑀓𑀦𑁆𑀢𑀺𑀁 𑀯𑁄𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀳𑀸𑀬 𑀘𑀭𑁂𑀬𑁆𑀬. 𑀧𑀢𑀺𑀭𑀽𑀧𑀁 𑀳𑀺 𑀢𑀣𑀸𑀯𑀺𑀥𑀲𑁆𑀲 𑀢𑀦𑁆𑀢𑀺 𑀢𑀸𑀤𑀺𑀲𑀲𑁆𑀲 𑀢𑀁𑀲𑀡𑁆𑀞𑀺𑀢𑀲𑁆𑀲 𑀩𑀼𑀤𑁆𑀥𑀫𑀼𑀦𑀺𑀦𑁄 𑀢𑀁 𑀅𑀢𑁆𑀢𑀪𑀸𑀯𑁂 𑀦𑀺𑀓𑀦𑁆𑀢𑀺𑀁 𑀯𑁄𑀲𑁆𑀲𑀚𑁆𑀚𑀺𑀢𑁆𑀯𑀸 𑀘𑀭𑀡𑀁 𑀦𑀸𑀫 𑀧𑀢𑀺𑀭𑀽𑀧𑀁 𑀬𑀼𑀢𑁆𑀢𑀁 𑀅𑀦𑀼𑀘𑁆𑀙𑀯𑀺𑀓𑀁.

𑀘𑀭𑀓𑀸𑀢𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀓𑀸 𑀲𑀜𑁆𑀘𑀭𑀡𑀲𑀢𑁆𑀢𑀸. 𑀪𑁂𑀭𑀯𑀸𑀢𑀺 𑀲𑀯𑀺𑀜𑁆𑀜𑀸𑀡𑀓𑀅𑀯𑀺𑀜𑁆𑀜𑀸𑀡𑀓𑀪𑁂𑀭𑀯𑀸. 𑀢𑀢𑁆𑀣 𑀲𑀯𑀺𑀜𑁆𑀜𑀸𑀡𑀓𑀸 𑀲𑀻𑀳𑀩𑁆𑀬𑀕𑁆𑀖𑀸𑀤𑀬𑁄, 𑀅𑀯𑀺𑀜𑁆𑀜𑀸𑀡𑀓𑀸 𑀭𑀢𑁆𑀢𑀺𑀪𑀸𑀕𑁂 𑀔𑀸𑀡𑀼𑀯𑀫𑁆𑀫𑀺𑀓𑀸𑀤𑀬𑁄. 𑀢𑁂𑀧𑀺 𑀳𑀺 𑀢𑀲𑁆𑀫𑀺𑀁 𑀓𑀸𑀮𑁂 𑀬𑀓𑁆𑀔𑀸 𑀯𑀺𑀬 𑀉𑀧𑀝𑁆𑀞𑀳𑀦𑁆𑀢𑀺, 𑀭𑀚𑁆𑀚𑀼𑀯𑀮𑁆𑀮𑀺𑀬𑀸𑀤𑀻𑀦𑀺 𑀲𑀩𑁆𑀩𑀸𑀦𑀺 𑀲𑀧𑁆𑀧𑀸 𑀯𑀺𑀬 𑀉𑀧𑀝𑁆𑀞𑀳𑀦𑁆𑀢𑀺. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀪𑁂𑀭𑀯𑁂𑀲𑀼 𑀲𑀼𑀜𑁆𑀜𑀸𑀕𑀸𑀭𑀕𑀢𑁄 𑀩𑀼𑀤𑁆𑀥𑀫𑀼𑀦𑀺 𑀮𑁄𑀫𑀘𑀮𑀦𑀫𑀢𑁆𑀢𑀓𑀫𑁆𑀧𑀺 𑀦 𑀓𑀭𑁄𑀢𑀺.

𑀇𑀤𑀸𑀦𑀺 𑀅𑀝𑁆𑀞𑀸𑀦𑀧𑀭𑀺𑀓𑀧𑁆𑀧𑀁 𑀤𑀲𑁆𑀲𑁂𑀦𑁆𑀢𑁄 𑀦𑀪𑀁 𑀨𑀮𑁂𑀬𑁆𑀬𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀨𑀮𑁂𑀬𑁆𑀬𑀸𑀢𑀺 𑀓𑀸𑀓𑀧𑀤𑀁 𑀯𑀺𑀬 𑀳𑀻𑀭𑀳𑀻𑀭𑀲𑁄 𑀨𑀮𑁂𑀬𑁆𑀬. 𑀘𑀮𑁂𑀬𑁆𑀬𑀸𑀢𑀺 𑀧𑁄𑀓𑁆𑀔𑀭𑀧𑀢𑁆𑀢𑁂 𑀯𑀸𑀢𑀸𑀳𑀢𑁄 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀘𑀮𑁂𑀬𑁆𑀬. 𑀲𑀮𑁆𑀮𑀫𑁆𑀧𑀺 𑀘𑁂 𑀉𑀭𑀲𑀺 𑀧𑀓𑀧𑁆𑀧𑀬𑁂𑀬𑁆𑀬𑀼𑀦𑁆𑀢𑀺 𑀢𑀺𑀔𑀺𑀡𑀲𑀢𑁆𑀢𑀺𑀲𑀮𑁆𑀮𑀁 𑀘𑁂𑀧𑀺 𑀉𑀭𑀲𑁆𑀫𑀺𑀁 𑀘𑀸𑀭𑁂𑀬𑁂𑀬𑁆𑀬𑀼𑀁. 𑀉𑀧𑀥𑀻𑀲𑀽𑀢𑀺 𑀔𑀦𑁆𑀥𑀽𑀧𑀥𑀻𑀲𑀼. 𑀢𑀸𑀡𑀁 𑀦 𑀓𑀭𑁄𑀦𑁆𑀢𑀻𑀢𑀺 𑀢𑀺𑀔𑀺𑀡𑁂 𑀲𑀮𑁆𑀮𑁂 𑀉𑀭𑀲𑁆𑀫𑀺𑀁 𑀘𑀸𑀭𑀺𑀬𑀫𑀸𑀦𑁂 𑀪𑀬𑁂𑀦 𑀕𑀼𑀫𑁆𑀩𑀦𑁆𑀢𑀭𑀓𑀦𑁆𑀤𑀭𑀸𑀤𑀻𑀦𑀺 𑀧𑀯𑀺𑀲𑀦𑁆𑀢𑀸 𑀢𑀸𑀡𑀁 𑀓𑀭𑁄𑀦𑁆𑀢𑀺 𑀦𑀸𑀫. 𑀩𑀼𑀤𑁆𑀥𑀸 𑀧𑀦 𑀲𑀫𑀼𑀘𑁆𑀙𑀺𑀦𑁆𑀦𑀲𑀩𑁆𑀩𑀪𑀬𑀸 𑀏𑀯𑀭𑀽𑀧𑀁 𑀢𑀸𑀡𑀁 𑀦𑀸𑀫 𑀦 𑀓𑀭𑁄𑀦𑁆𑀢𑀺. 𑀙𑀝𑁆𑀞𑀁.

𑁭. 𑀲𑀼𑀧𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁩. 𑀲𑀢𑁆𑀢𑀫𑁂 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸𑀢𑀺 𑀉𑀢𑀼𑀕𑀸𑀳𑀸𑀧𑀦𑀢𑁆𑀣𑀁 𑀥𑁄𑀯𑀺𑀢𑁆𑀯𑀸. 𑀩𑀼𑀤𑁆𑀥𑀸𑀦𑀁 𑀧𑀦 𑀲𑀭𑀻𑀭𑁂 𑀭𑀚𑁄𑀚𑀮𑁆𑀮𑀁 𑀦 𑀉𑀧𑀮𑀺𑀫𑁆𑀧𑀢𑀺, 𑀉𑀤𑀓𑀫𑁆𑀧𑀺 𑀧𑁄𑀓𑁆𑀔𑀭𑀧𑀢𑁆𑀢𑁂 𑀧𑀓𑁆𑀔𑀺𑀢𑁆𑀢𑀁 𑀯𑀺𑀬 𑀯𑀺𑀯𑀝𑁆𑀝𑀺𑀢𑁆𑀯𑀸 𑀕𑀘𑁆𑀙𑀢𑀺. 𑀅𑀧𑀺𑀘 𑀔𑁄 𑀥𑁄𑀢𑀧𑀸𑀤𑀓𑁂 𑀕𑁂𑀳𑁂 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀧𑀯𑀺𑀲𑀦𑀁 𑀧𑀩𑁆𑀩𑀚𑀺𑀢𑀸𑀦𑀁 𑀯𑀢𑁆𑀢𑀁. 𑀢𑀢𑁆𑀣 𑀩𑀼𑀤𑁆𑀥𑀸𑀦𑀁 𑀯𑀢𑁆𑀢𑀪𑁂𑀤𑁄 𑀦𑀸𑀫 𑀦𑀢𑁆𑀣𑀺, 𑀯𑀢𑁆𑀢𑀲𑀻𑀲𑁂 𑀧𑀦 𑀞𑀢𑁆𑀯𑀸 𑀥𑁄𑀯𑀦𑁆𑀢𑀺. 𑀲𑀘𑁂 𑀳𑀺 𑀢𑀣𑀸𑀕𑀢𑁄 𑀦𑁂𑀯 𑀦𑁆𑀳𑀸𑀬𑁂𑀬𑁆𑀬, 𑀦 𑀧𑀸𑀤𑁂 𑀥𑁄𑀯𑁂𑀬𑁆𑀬, ‘‘𑀦𑀸𑀬𑀁 𑀫𑀦𑀼𑀲𑁆𑀲𑁄’’𑀢𑀺 𑀯𑀤𑁂𑀬𑁆𑀬𑀼𑀁. 𑀢𑀲𑁆𑀫𑀸 𑀫𑀦𑀼𑀲𑁆𑀲𑀓𑀺𑀭𑀺𑀬𑀁 𑀅𑀫𑀼𑀜𑁆𑀘𑀦𑁆𑀢𑁄 𑀥𑁄𑀯𑀢𑀺. 𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺 𑀲𑁄𑀧𑁆𑀧𑀧𑀭𑀺𑀕𑁆𑀕𑀸𑀳𑀓𑁂𑀦 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀉𑀧𑀲𑀗𑁆𑀓𑀫𑀻𑀢𑀺 𑀲𑀫𑀡𑁄 𑀕𑁄𑀢𑀫𑁄 𑀲𑀩𑁆𑀩𑀭𑀢𑁆𑀢𑀺𑀁 𑀅𑀩𑁆𑀪𑁄𑀓𑀸𑀲𑁂 𑀘𑀗𑁆𑀓𑀫𑀺𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀢𑀺, 𑀅𑀢𑀺𑀯𑀺𑀬 𑀲𑀼𑀔𑀲𑀬𑀺𑀢𑁄 𑀪𑀯𑀺𑀲𑁆𑀲𑀢𑀺, 𑀖𑀝𑁆𑀝𑀬𑀺𑀲𑁆𑀲𑀸𑀫𑀺 𑀦𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺.

𑀓𑀺𑀁 𑀲𑁄𑀧𑁆𑀧𑀲𑀻𑀢𑀺 𑀓𑀺𑀁 𑀲𑀼𑀧𑀲𑀺, 𑀓𑀺𑀁 𑀲𑁄𑀧𑁆𑀧𑀁 𑀦𑀸𑀫𑀺𑀤𑀁 𑀢𑀯𑀸𑀢𑀺 𑀯𑀤𑀢𑀺. 𑀓𑀺𑀁 𑀦𑀼 𑀲𑁄𑀧𑁆𑀧𑀲𑀻𑀢𑀺 𑀓𑀲𑁆𑀫𑀸 𑀦𑀼 𑀲𑀼𑀧𑀲𑀺? 𑀤𑀼𑀩𑁆𑀪𑀕𑁄 𑀯𑀺𑀬𑀸𑀢𑀺 𑀫𑀢𑁄 𑀯𑀺𑀬, 𑀯𑀺𑀲𑀜𑁆𑀜𑀻 𑀯𑀺𑀬 𑀘. 𑀲𑀼𑀜𑁆𑀜𑀫𑀕𑀸𑀭𑀦𑁆𑀢𑀺 𑀲𑀼𑀜𑁆𑀜𑀁 𑀫𑁂 𑀖𑀭𑀁 𑀮𑀤𑁆𑀥𑀦𑁆𑀢𑀺 𑀲𑁄𑀧𑁆𑀧𑀲𑀻𑀢𑀺 𑀯𑀤𑀢𑀺. 𑀲𑀽𑀭𑀺𑀬𑁂 𑀉𑀕𑁆𑀕𑀢𑁂𑀢𑀺 𑀲𑀽𑀭𑀺𑀬𑀫𑁆𑀳𑀺 𑀉𑀝𑁆𑀞𑀺𑀢𑁂. 𑀇𑀤𑀸𑀦𑀺 𑀳𑀺 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀲𑀫𑁆𑀫𑀚𑁆𑀚𑀦𑁆𑀢𑀺, 𑀧𑀸𑀦𑀻𑀬𑀁 𑀉𑀧𑀝𑁆𑀞𑀧𑁂𑀦𑁆𑀢𑀺, 𑀪𑀺𑀓𑁆𑀔𑀸𑀘𑀸𑀭𑀕𑀫𑀦𑀲𑀚𑁆𑀚𑀸 𑀪𑀯𑀦𑁆𑀢𑀺, 𑀢𑁆𑀯𑀁 𑀓𑀲𑁆𑀫𑀸 𑀲𑁄𑀧𑁆𑀧𑀲𑀺𑀬𑁂𑀯.

𑀚𑀸𑀮𑀺𑀦𑀻𑀢𑀺 𑀢𑀬𑁄 𑀪𑀯𑁂 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀞𑀺𑀢𑁂𑀦 ‘‘𑀅𑀚𑁆𑀛𑀢𑁆𑀢𑀺𑀓𑀲𑁆𑀲𑀼𑀧𑀸𑀤𑀸𑀬 𑀅𑀝𑁆𑀞𑀸𑀭𑀲𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀻’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁪𑁨) 𑀢𑁂𑀦 𑀢𑁂𑀦 𑀅𑀢𑁆𑀢𑀦𑁄 𑀓𑁄𑀝𑁆𑀞𑀸𑀲𑀪𑀽𑀢𑁂𑀦 𑀚𑀸𑀮𑁂𑀦 𑀚𑀸𑀮𑀺𑀦𑀻. 𑀯𑀺𑀲𑀢𑁆𑀢𑀺𑀓𑀸𑀢𑀺 𑀭𑀽𑀧𑀸𑀤𑀻𑀲𑀼 𑀢𑀢𑁆𑀣 𑀢𑀢𑁆𑀣 𑀯𑀺𑀲𑀢𑁆𑀢𑀢𑀸𑀬 𑀯𑀺𑀲𑀫𑀽𑀮𑀢𑀸𑀬 𑀯𑀺𑀲𑀧𑀭𑀺𑀪𑁄𑀕𑀢𑀸𑀬 𑀘 𑀯𑀺𑀲𑀢𑁆𑀢𑀺𑀓𑀸. 𑀓𑀼𑀳𑀺𑀜𑁆𑀘𑀺 𑀦𑁂𑀢𑀯𑁂𑀢𑀺 𑀓𑀢𑁆𑀣𑀘𑀺 𑀦𑁂𑀢𑀼𑀁. 𑀲𑀩𑁆𑀩𑀽𑀧𑀥𑀺 𑀧𑀭𑀺𑀓𑁆𑀔𑀬𑀸𑀢𑀺 𑀲𑀩𑁆𑀩𑁂𑀲𑀁 𑀔𑀦𑁆𑀥𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀓𑀸𑀫𑀕𑀼𑀡𑀪𑁂𑀤𑀸𑀦𑀁 𑀉𑀧𑀥𑀻𑀦𑀁 𑀧𑀭𑀺𑀓𑁆𑀔𑀬𑀸. 𑀓𑀺𑀁 𑀢𑀯𑁂𑀢𑁆𑀣, 𑀫𑀸𑀭𑀸𑀢𑀺, 𑀫𑀸𑀭, 𑀢𑀼𑀬𑁆𑀳𑀁 𑀓𑀺𑀁 𑀏𑀢𑁆𑀣? 𑀓𑀲𑁆𑀫𑀸 𑀢𑁆𑀯𑀁 𑀉𑀡𑁆𑀳𑀬𑀸𑀕𑀼𑀬𑀁 𑀦𑀺𑀮𑀻𑀬𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸 𑀯𑀺𑀬 𑀅𑀦𑁆𑀢𑀦𑁆𑀢𑁂𑀦𑁂𑀯 𑀉𑀚𑁆𑀛𑀸𑀬𑀦𑁆𑀢𑁄 𑀆𑀳𑀺𑀡𑁆𑀟𑀲𑀻𑀢𑀺. 𑀲𑀢𑁆𑀢𑀫𑀁.

𑁮. 𑀦𑀦𑁆𑀤𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁪. 𑀅𑀝𑁆𑀞𑀫𑀁 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑁂 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀅𑀝𑁆𑀞𑀫𑀁.

𑁯. 𑀧𑀞𑀫𑀆𑀬𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁫. 𑀦𑀯𑀫𑁂 𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄𑀢𑀺 𑀪𑀺𑀬𑁆𑀬𑁄 𑀚𑀻𑀯𑀦𑁆𑀢𑁄 𑀅𑀧𑀭𑀁 𑀯𑀲𑁆𑀲𑀲𑀢𑀁 𑀚𑀻𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀧𑀡𑁆𑀡𑀸𑀲𑀁 𑀯𑀸 𑀲𑀝𑁆𑀞𑀺 𑀯𑀸 𑀯𑀲𑁆𑀲𑀸𑀦𑀺 𑀚𑀻𑀯𑀢𑀺. 𑀅𑀚𑁆𑀛𑀪𑀸𑀲𑀻𑀢𑀺 𑀲𑀫𑀡𑁄 𑀕𑁄𑀢𑀫𑁄 ‘‘𑀫𑀦𑀼𑀲𑁆𑀲𑀸𑀦𑀁 𑀅𑀧𑁆𑀧𑀫𑀸𑀬𑀽’’𑀢𑀺 𑀓𑀣𑁂𑀢𑀺, 𑀤𑀻𑀖𑀪𑀸𑀯𑀫𑀲𑁆𑀲 𑀓𑀣𑁂𑀲𑁆𑀲𑀸𑀫𑀻𑀢𑀺 𑀧𑀘𑁆𑀘𑀦𑀻𑀓𑀲𑀸𑀢𑀢𑀸𑀬 𑀅𑀪𑀺𑀪𑀯𑀺𑀢𑁆𑀯𑀸 𑀅𑀪𑀸𑀲𑀺.

𑀦 𑀦𑀁 𑀳𑀻𑀴𑁂𑀢𑀺 𑀢𑀁 𑀆𑀬𑀼𑀁 ‘‘𑀅𑀧𑁆𑀧𑀓𑀫𑀺𑀤’’𑀦𑁆𑀢𑀺 𑀦 𑀳𑀻𑀴𑁂𑀬𑁆𑀬. 𑀔𑀻𑀭𑀫𑀢𑁆𑀢𑁄 𑀯𑀸𑀢𑀺 𑀬𑀣𑀸 𑀤𑀳𑀭𑁄 𑀓𑀼𑀫𑀸𑀭𑁄 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑁄 𑀔𑀻𑀭𑀁 𑀧𑀺𑀯𑀺𑀢𑁆𑀯𑀸 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂 𑀦𑀺𑀧𑀦𑁆𑀦𑁄 𑀅𑀲𑀜𑁆𑀜𑀻 𑀯𑀺𑀬 𑀦𑀺𑀤𑁆𑀤𑀸𑀬𑀢𑀺, 𑀓𑀲𑁆𑀲𑀘𑀺 𑀆𑀬𑀼𑀁 𑀅𑀧𑁆𑀧𑀁 𑀯𑀸 𑀤𑀻𑀖𑀁 𑀯𑀸𑀢𑀺 𑀦 𑀘𑀺𑀦𑁆𑀢𑁂𑀢𑀺, 𑀏𑀯𑀁 𑀲𑀧𑁆𑀧𑀼𑀭𑀺𑀲𑁄. 𑀘𑀭𑁂𑀬𑁆𑀬𑀸𑀤𑀺𑀢𑁆𑀢𑀲𑀻𑀲𑁄 𑀯𑀸𑀢𑀺 𑀆𑀬𑀼𑀁 𑀧𑀭𑀺𑀢𑁆𑀢𑀦𑁆𑀢𑀺 𑀜𑀢𑁆𑀯𑀸 𑀧𑀚𑁆𑀚𑀮𑀺𑀢𑀲𑀻𑀲𑁄 𑀯𑀺𑀬 𑀘𑀭𑁂𑀬𑁆𑀬. 𑀦𑀯𑀫𑀁.

𑁧𑁦. 𑀤𑀼𑀢𑀺𑀬𑀆𑀬𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁬. 𑀤𑀲𑀫𑁂 𑀦𑁂𑀫𑀻𑀯 𑀭𑀣𑀓𑀼𑀩𑁆𑀩𑀭𑀦𑁆𑀢𑀺 𑀬𑀣𑀸 𑀤𑀺𑀯𑀲𑀁 𑀕𑀘𑁆𑀙𑀦𑁆𑀢𑀲𑁆𑀲 𑀭𑀣𑀲𑁆𑀲 𑀘𑀓𑁆𑀓𑀦𑁂𑀫𑀺 𑀓𑀼𑀩𑁆𑀩𑀭𑀁 𑀅𑀦𑀼𑀧𑀭𑀺𑀬𑀸𑀬𑀢𑀺 𑀦 𑀯𑀺𑀚𑀳𑀢𑀺, 𑀏𑀯𑀁 𑀆𑀬𑀼 𑀅𑀦𑀼𑀧𑀭𑀺𑀬𑀸𑀬𑀢𑀻𑀢𑀺. 𑀤𑀲𑀫𑀁.

𑀧𑀞𑀫𑁄 𑀯𑀕𑁆𑀕𑁄.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀧𑀸𑀲𑀸𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁭. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀦𑀺𑀲𑀺𑀦𑁆𑀦𑁄𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀥𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀦𑀺𑀲𑀺𑀦𑁆𑀦𑁄. 𑀫𑀸𑀭𑁄𑀧𑀺𑀲𑁆𑀲 𑀲𑀼𑀔𑀦𑀺𑀲𑀺𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀖𑀝𑁆𑀝𑀬𑀺𑀲𑁆𑀲𑀸𑀫𑀻𑀢𑀺 𑀉𑀧𑀲𑀗𑁆𑀓𑀫𑀦𑁆𑀢𑁄. 𑀧𑀤𑀸𑀮𑁂𑀲𑀻𑀢𑀺 𑀧𑀩𑁆𑀩𑀢𑀧𑀺𑀝𑁆𑀞𑁂 𑀞𑀢𑁆𑀯𑀸 𑀧𑀯𑀺𑀚𑁆𑀛𑀺. 𑀧𑀸𑀲𑀸𑀡𑀸 𑀦𑀺𑀭𑀦𑁆𑀢𑀭𑀸 𑀅𑀜𑁆𑀜𑀫𑀜𑁆𑀜𑀁 𑀅𑀪𑀺𑀳𑀦𑀦𑁆𑀢𑀸 𑀧𑀢𑀦𑁆𑀢𑀺. 𑀓𑁂𑀯𑀮𑀦𑁆𑀢𑀺 𑀲𑀓𑀮𑀁. 𑀲𑀩𑁆𑀩𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀞𑀫𑀁.

𑁨. 𑀓𑀺𑀦𑁆𑀦𑀼𑀲𑀻𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁮. 𑀤𑀼𑀢𑀺𑀬𑁂 𑀯𑀺𑀘𑀓𑁆𑀔𑀼𑀓𑀫𑁆𑀫𑀸𑀬𑀸𑀢𑀺 𑀧𑀭𑀺𑀲𑀸𑀬 𑀧𑀜𑁆𑀜𑀸𑀘𑀓𑁆𑀔𑀼𑀁 𑀯𑀺𑀦𑀸𑀲𑁂𑀢𑀼𑀓𑀫𑁆𑀬𑀢𑀸𑀬. 𑀩𑀼𑀤𑁆𑀥𑀸𑀦𑀁 𑀧𑀦𑁂𑀲 𑀧𑀜𑁆𑀜𑀸𑀘𑀓𑁆𑀔𑀼𑀁 𑀯𑀺𑀦𑀸𑀲𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀧𑀭𑀺𑀲𑀸𑀬 𑀪𑁂𑀭𑀯𑀸𑀭𑀫𑁆𑀫𑀡𑀁 𑀲𑀸𑀯𑁂𑀦𑁆𑀢𑁄 𑀯𑀸 𑀤𑀲𑁆𑀲𑁂𑀦𑁆𑀢𑁄 𑀯𑀸 𑀲𑀓𑁆𑀓𑁄𑀢𑀺. 𑀯𑀺𑀚𑀺𑀢𑀸𑀯𑀻 𑀦𑀼 𑀫𑀜𑁆𑀜𑀲𑀻𑀢𑀺 𑀓𑀺𑀁 𑀦𑀼 𑀢𑁆𑀯𑀁 ‘‘𑀯𑀺𑀚𑀺𑀢𑀯𑀺𑀚𑀬𑁄 𑀅𑀳’’𑀦𑁆𑀢𑀺 𑀫𑀜𑁆𑀜𑀲𑀺? 𑀫𑀸 𑀏𑀯𑀁 𑀫𑀜𑁆𑀜𑀺, 𑀦𑀢𑁆𑀣𑀺 𑀢𑁂 𑀚𑀬𑁄. 𑀧𑀭𑀺𑀲𑀸𑀲𑀽𑀢𑀺, 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼. 𑀩𑀮𑀧𑁆𑀧𑀢𑁆𑀢𑀸𑀢𑀺 𑀤𑀲𑀩𑀮𑀧𑁆𑀧𑀢𑁆𑀢𑀸. 𑀤𑀼𑀢𑀺𑀬𑀁.

𑁩. 𑀲𑀓𑀮𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁯. 𑀢𑀢𑀺𑀬𑁂 𑀫𑀦𑁆𑀤𑀺𑀬𑀸 𑀦𑀽𑀢𑀺 𑀫𑀦𑁆𑀤𑀪𑀸𑀯𑁂𑀦 𑀫𑁄𑀫𑀽𑀳𑀪𑀸𑀯𑁂𑀦. 𑀉𑀤𑀸𑀳𑀼 𑀓𑀸𑀯𑁂𑀬𑁆𑀬𑀫𑀢𑁆𑀢𑁄𑀢𑀺 𑀉𑀤𑀸𑀳𑀼 𑀬𑀣𑀸 𑀓𑀯𑀺 𑀓𑀩𑁆𑀩𑀁 𑀘𑀺𑀦𑁆𑀢𑁂𑀦𑁆𑀢𑁄 𑀢𑁂𑀦 𑀓𑀩𑁆𑀩𑀓𑀭𑀡𑁂𑀦 𑀫𑀢𑁆𑀢𑁄 𑀲𑀬𑀢𑀺, 𑀏𑀯𑀁 𑀲𑀬𑀲𑀺. 𑀲𑀫𑁆𑀧𑀘𑀼𑀭𑀸𑀢𑀺 𑀩𑀳𑀯𑁄. 𑀓𑀺𑀫𑀺𑀤𑀁 𑀲𑁄𑀧𑁆𑀧𑀲𑁂 𑀯𑀸𑀢𑀺 𑀓𑀲𑁆𑀫𑀸 𑀇𑀤𑀁 𑀲𑁄𑀧𑁆𑀧𑀁 𑀲𑁄𑀧𑁆𑀧𑀲𑀺𑀬𑁂𑀯? 𑀅𑀢𑁆𑀣𑀁 𑀲𑀫𑁂𑀘𑁆𑀘𑀸𑀢𑀺 𑀅𑀢𑁆𑀣𑀁 𑀲𑀫𑀸𑀕𑀦𑁆𑀢𑁆𑀯𑀸 𑀧𑀸𑀧𑀼𑀡𑀺𑀢𑁆𑀯𑀸. 𑀫𑀬𑁆𑀳𑀁 𑀳𑀺 𑀅𑀲𑀗𑁆𑀕𑀳𑁄 𑀦𑀸𑀫 𑀲𑀗𑁆𑀕𑀳𑀯𑀺𑀧𑀦𑁆𑀦𑁄 𑀯𑀸 𑀅𑀢𑁆𑀣𑁄 𑀦𑀢𑁆𑀣𑀺. 𑀲𑀮𑁆𑀮𑀦𑁆𑀢𑀺 𑀢𑀺𑀔𑀺𑀡𑀁 𑀲𑀢𑁆𑀢𑀺𑀲𑀮𑁆𑀮𑀁. 𑀚𑀕𑁆𑀕𑀁 𑀦 𑀲𑀗𑁆𑀓𑁂𑀢𑀺 𑀬𑀣𑀸 𑀏𑀓𑀘𑁆𑀘𑁄 𑀲𑀻𑀳𑀧𑀣𑀸𑀤𑀻𑀲𑀼 𑀚𑀕𑁆𑀕𑀦𑁆𑀢𑁄 𑀲𑀗𑁆𑀓𑀢𑀺, 𑀢𑀣𑀸 𑀅𑀳𑀁 𑀚𑀕𑁆𑀕𑀦𑁆𑀢𑁄𑀧𑀺 𑀦 𑀲𑀗𑁆𑀓𑀸𑀫𑀺. 𑀦𑀧𑀺 𑀪𑁂𑀫𑀺 𑀲𑁄𑀢𑁆𑀢𑀼𑀦𑁆𑀢𑀺 𑀬𑀣𑀸 𑀏𑀓𑀘𑁆𑀘𑁄 𑀲𑀻𑀳𑀧𑀣𑀸𑀤𑀻𑀲𑀼𑀬𑁂𑀯 𑀲𑀼𑀧𑀺𑀢𑀼𑀁 𑀪𑀸𑀬𑀢𑀺, 𑀏𑀯𑀁 𑀅𑀳𑀁 𑀲𑀼𑀧𑀺𑀢𑀼𑀫𑁆𑀧𑀺 𑀦 𑀪𑀸𑀬𑀸𑀫𑀺. 𑀦𑀸𑀦𑀼𑀢𑀧𑀦𑁆𑀢𑀺 𑀫𑀸𑀫𑀦𑁆𑀢𑀺 𑀬𑀣𑀸 𑀆𑀘𑀭𑀺𑀬𑀲𑁆𑀲 𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀯𑀸 𑀅𑀨𑀸𑀲𑀼𑀓𑁂 𑀚𑀸𑀢𑁂 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀬 𑀞𑀺𑀢𑀢𑁆𑀢𑀸 𑀅𑀦𑁆𑀢𑁂𑀯𑀸𑀲𑀺𑀁 𑀭𑀢𑁆𑀢𑀺𑀦𑁆𑀤𑀺𑀯𑀸 𑀅𑀢𑀺𑀓𑁆𑀓𑀫𑀦𑁆𑀢𑀸 𑀅𑀦𑀼𑀢𑀧𑀦𑁆𑀢𑀺, 𑀏𑀯𑀁 𑀫𑀁 𑀦𑀸𑀦𑀼𑀢𑀧𑀦𑁆𑀢𑀺. 𑀦 𑀳𑀺 𑀫𑀬𑁆𑀳𑀁 𑀓𑀺𑀜𑁆𑀘𑀺 𑀅𑀧𑀭𑀺𑀦𑀺𑀝𑁆𑀞𑀺𑀢𑀓𑀫𑁆𑀫𑀁 𑀦𑀸𑀫 𑀅𑀢𑁆𑀣𑀺. 𑀢𑁂𑀦𑁂𑀯𑀸𑀳 𑀳𑀸𑀦𑀺𑀁 𑀦 𑀧𑀲𑁆𑀲𑀸𑀫𑀺 𑀓𑀼𑀳𑀺𑀜𑁆𑀘𑀺 𑀮𑁄𑀓𑁂𑀢𑀺. 𑀢𑀢𑀺𑀬𑀁.

𑁪. 𑀧𑀢𑀺𑀭𑀽𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁦. 𑀘𑀢𑀼𑀢𑁆𑀣𑁂 𑀅𑀦𑀼𑀭𑁄𑀥𑀯𑀺𑀭𑁄𑀥𑁂𑀲𑀽𑀢𑀺 𑀭𑀸𑀕𑀧𑀝𑀺𑀖𑁂𑀲𑀼. 𑀫𑀸 𑀲𑀚𑁆𑀚𑀺𑀢𑁆𑀣𑁄 𑀢𑀤𑀸𑀘𑀭𑀦𑁆𑀢𑀺 𑀏𑀯𑀁 𑀥𑀫𑁆𑀫𑀓𑀣𑀁 𑀆𑀘𑀭𑀦𑁆𑀢𑁄 𑀫𑀸 𑀮𑀕𑁆𑀕𑀺. 𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑀲𑁆𑀲 𑀳𑀺 𑀏𑀓𑀘𑁆𑀘𑁂 𑀲𑀸𑀥𑀼𑀓𑀸𑀭𑀁 𑀤𑀤𑀦𑁆𑀢𑀺, 𑀢𑁂𑀲𑀼 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀏𑀓𑀘𑁆𑀘𑁂 𑀅𑀲𑀓𑁆𑀓𑀘𑁆𑀘𑀁 𑀲𑀼𑀡𑀦𑁆𑀢𑀺, 𑀢𑁂𑀲𑀼 𑀧𑀝𑀺𑀖𑁄 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺 𑀥𑀫𑁆𑀫𑀓𑀣𑀺𑀓𑁄 𑀅𑀦𑀼𑀭𑁄𑀥𑀯𑀺𑀭𑁄𑀥𑁂𑀲𑀼 𑀲𑀚𑁆𑀚𑀢𑀺 𑀦𑀸𑀫. 𑀢𑁆𑀯𑀁 𑀏𑀯𑀁 𑀫𑀸 𑀲𑀚𑁆𑀚𑀺𑀢𑁆𑀣𑁄𑀢𑀺 𑀯𑀤𑀢𑀺. 𑀬𑀤𑀜𑁆𑀜𑀫𑀦𑀼𑀲𑀸𑀲𑀢𑀻𑀢𑀺 𑀬𑀁 𑀅𑀜𑁆𑀜𑀁 𑀅𑀦𑀼𑀲𑀸𑀲𑀢𑀺, 𑀢𑀁. 𑀲𑀫𑁆𑀩𑀼𑀤𑁆𑀥𑁄 𑀳𑀺𑀢𑀸𑀦𑀼𑀓𑀫𑁆𑀧𑀻 𑀳𑀺𑀢𑁂𑀦 𑀅𑀦𑀼𑀧𑀓𑀫𑁆𑀧𑀢𑀺. 𑀬𑀲𑁆𑀫𑀸 𑀘 𑀳𑀺𑀢𑀸𑀦𑀼𑀓𑀫𑁆𑀧𑀻, 𑀢𑀲𑁆𑀫𑀸 𑀅𑀦𑀼𑀭𑁄𑀥𑀯𑀺𑀭𑁄𑀥𑁂𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑁄 𑀢𑀣𑀸𑀕𑀢𑁄𑀢𑀺. 𑀘𑀢𑀼𑀢𑁆𑀣𑀁.

𑁫. 𑀫𑀸𑀦𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁧. 𑀧𑀜𑁆𑀘𑀫𑁂 𑀆𑀓𑀸𑀲𑁂 𑀘𑀭𑀦𑁆𑀢𑁂𑀧𑀺 𑀩𑀦𑁆𑀥𑀢𑀻𑀢𑀺 𑀅𑀦𑁆𑀢𑀮𑀺𑀓𑁆𑀔𑀘𑀭𑁄. 𑀧𑀸𑀲𑁄𑀢𑀺 𑀭𑀸𑀕𑀧𑀸𑀲𑁄. 𑀫𑀸𑀦𑀲𑁄𑀢𑀺 𑀫𑀦𑀲𑀫𑁆𑀧𑀬𑀼𑀢𑁆𑀢𑁄. 𑀧𑀜𑁆𑀘𑀫𑀁.

𑁬. 𑀧𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁨. 𑀙𑀝𑁆𑀞𑁂 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀉𑀧𑀸𑀤𑀸𑀬𑀸𑀢𑀺 𑀧𑀜𑁆𑀘 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀆𑀤𑀺𑀬𑀺𑀢𑁆𑀯𑀸, 𑀲𑀪𑀸𑀯𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄. 𑀲𑀦𑁆𑀤𑀲𑁆𑀲𑁂𑀢𑀻𑀢𑀺 𑀔𑀦𑁆𑀥𑀸𑀦𑀁 𑀲𑀪𑀸𑀯𑀮𑀓𑁆𑀔𑀡𑀸𑀤𑀻𑀦𑀺 𑀤𑀲𑁆𑀲𑁂𑀢𑀺. 𑀲𑀫𑀸𑀤𑀧𑁂𑀢𑀻𑀢𑀺 𑀕𑀡𑁆𑀳𑀸𑀧𑁂𑀢𑀺. 𑀲𑀫𑀼𑀢𑁆𑀢𑁂𑀚𑁂𑀢𑀻𑀢𑀺 𑀲𑀫𑀸𑀤𑀸𑀦𑀫𑁆𑀳𑀺 𑀉𑀲𑁆𑀲𑀸𑀳𑀁 𑀚𑀦𑁂𑀢𑀺. 𑀲𑀫𑁆𑀧𑀳𑀁𑀲𑁂𑀢𑀻𑀢𑀺 𑀧𑀝𑀺𑀯𑀺𑀤𑁆𑀥𑀕𑀼𑀡𑁂𑀦 𑀯𑁄𑀤𑀸𑀧𑁂𑀢𑀺 𑀚𑁄𑀢𑀸𑀧𑁂𑀢𑀺. 𑀅𑀝𑁆𑀞𑀺𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑀺𑀓𑀁 𑀓𑀢𑁆𑀯𑀸, ‘‘𑀅𑀬𑀁 𑀦𑁄 𑀅𑀥𑀺𑀕𑀦𑁆𑀢𑀩𑁆𑀩𑁄 𑀅𑀢𑁆𑀣𑁄’’𑀢𑀺 𑀏𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀸𑀬 𑀤𑁂𑀲𑀦𑀸𑀬 𑀅𑀢𑁆𑀣𑀺𑀓𑀸 𑀳𑀼𑀢𑁆𑀯𑀸. 𑀫𑀦𑀲𑀺 𑀓𑀢𑁆𑀯𑀸𑀢𑀺 𑀘𑀺𑀢𑁆𑀢𑁂 𑀞𑀧𑁂𑀢𑁆𑀯𑀸. 𑀲𑀩𑁆𑀩𑀘𑁂𑀢𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸𑀢𑀺 𑀲𑀩𑁆𑀩𑁂𑀦 𑀢𑁂𑀦 𑀓𑀫𑁆𑀫𑀓𑀸𑀭𑀓𑀘𑀺𑀢𑁆𑀢𑁂𑀦 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸. 𑀑𑀳𑀺𑀢𑀲𑁄𑀢𑀸𑀢𑀺 𑀞𑀧𑀺𑀢𑀸𑀲𑁄𑀢𑀸. 𑀅𑀩𑁆𑀪𑁄𑀓𑀸𑀲𑁂 𑀦𑀺𑀓𑁆𑀔𑀺𑀢𑁆𑀢𑀸𑀢𑀺 𑀑𑀢𑀸𑀧𑀦𑀢𑁆𑀣𑀸𑀬 𑀞𑀧𑀺𑀢𑀸.

𑀭𑀽𑀧𑀁 𑀯𑁂𑀤𑀬𑀺𑀢𑀁 𑀲𑀜𑁆𑀜𑀸𑀦𑁆𑀢𑀺, 𑀏𑀢𑁂 𑀭𑀽𑀧𑀸𑀤𑀬𑁄 𑀢𑀬𑁄 𑀔𑀦𑁆𑀥𑀸. 𑀬𑀜𑁆𑀘 𑀲𑀗𑁆𑀔𑀢𑀦𑁆𑀢𑀺 𑀇𑀫𑀺𑀦𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀕𑀳𑀺𑀢𑁄. 𑀏𑀯𑀁 𑀢𑀢𑁆𑀣 𑀯𑀺𑀭𑀚𑁆𑀚𑀢𑀻𑀢𑀺 ‘‘𑀏𑀲𑁄 𑀅𑀳𑀁 𑀦 𑀳𑁄𑀫𑀺, 𑀏𑀢𑀁 𑀫𑀬𑁆𑀳𑀁 𑀦 𑀳𑁄𑀢𑀻’’𑀢𑀺 𑀧𑀲𑁆𑀲𑀦𑁆𑀢𑁄 𑀏𑀯𑀁 𑀢𑁂𑀲𑀼 𑀔𑀦𑁆𑀥𑁂𑀲𑀼 𑀯𑀺𑀭𑀚𑁆𑀚𑀢𑀺. 𑀔𑁂𑀫𑀢𑁆𑀢𑀦𑁆𑀢𑀺 𑀔𑁂𑀫𑀻𑀪𑀽𑀢𑀁 𑀅𑀢𑁆𑀢𑀪𑀸𑀯𑀁. 𑀇𑀫𑀺𑀦𑀸 𑀨𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀺. 𑀅𑀦𑁆𑀯𑁂𑀲𑀦𑁆𑀢𑀺 𑀪𑀯𑀬𑁄𑀦𑀺𑀕𑀢𑀺𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑀲𑀗𑁆𑀔𑀸𑀢𑁂𑀲𑀼 𑀲𑀩𑁆𑀩𑀝𑁆𑀞𑀸𑀦𑁂𑀲𑀼 𑀧𑀭𑀺𑀬𑁂𑀲𑀫𑀸𑀦𑀸. 𑀦𑀸𑀚𑁆𑀛𑀕𑀸𑀢𑀺 𑀦 𑀧𑀲𑁆𑀲𑀻𑀢𑀺. 𑀙𑀝𑁆𑀞𑀁.

𑁭. 𑀙𑀨𑀲𑁆𑀲𑀸𑀬𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁩. 𑀲𑀢𑁆𑀢𑀫𑁂 𑀨𑀲𑁆𑀲𑀸𑀬𑀢𑀦𑀸𑀦𑀦𑁆𑀢𑀺 𑀲𑀜𑁆𑀚𑀸𑀢𑀺𑀲𑀫𑁄𑀲𑀭𑀡𑀝𑁆𑀞𑁂𑀦 𑀙𑀤𑁆𑀯𑀸𑀭𑀺𑀓𑀲𑁆𑀲 𑀨𑀲𑁆𑀲𑀲𑁆𑀲 𑀆𑀬𑀢𑀦𑀸𑀦𑀁. 𑀪𑀬𑀪𑁂𑀭𑀯𑀁 𑀲𑀤𑁆𑀤𑀦𑁆𑀢𑀺 𑀫𑁂𑀖𑀤𑀼𑀦𑁆𑀤𑀼𑀪𑀺𑀅𑀲𑀦𑀺𑀧𑀸𑀢𑀲𑀤𑁆𑀤𑀲𑀤𑀺𑀲𑀁 𑀪𑀬𑀚𑀦𑀓𑀁 𑀲𑀤𑁆𑀤𑀁. 𑀧𑀣𑀯𑀻 𑀫𑀜𑁆𑀜𑁂 𑀉𑀦𑁆𑀤𑁆𑀭𑀻𑀬𑀢𑀻𑀢𑀺 𑀅𑀬𑀁 𑀫𑀳𑀸𑀧𑀣𑀯𑀻 𑀧𑀝𑀧𑀝𑀲𑀤𑁆𑀤𑀁 𑀓𑀼𑀭𑀼𑀫𑀸𑀦𑀸 𑀯𑀺𑀬 𑀅𑀳𑁄𑀲𑀺. 𑀏𑀢𑁆𑀣 𑀮𑁄𑀓𑁄 𑀯𑀺𑀫𑀼𑀘𑁆𑀙𑀺𑀢𑁄𑀢𑀺 𑀏𑀢𑁂𑀲𑀼 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀮𑁄𑀓𑁄 𑀅𑀥𑀺𑀫𑀼𑀘𑁆𑀙𑀺𑀢𑁄. 𑀫𑀸𑀭𑀥𑁂𑀬𑁆𑀬𑀦𑁆𑀢𑀺 𑀫𑀸𑀭𑀲𑁆𑀲 𑀞𑀸𑀦𑀪𑀽𑀢𑀁 𑀢𑁂𑀪𑀽𑀫𑀓𑀯𑀝𑁆𑀝𑀁. 𑀲𑀢𑁆𑀢𑀫𑀁.

𑁮. 𑀧𑀺𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁪. 𑀅𑀝𑁆𑀞𑀫𑁂 𑀧𑀸𑀳𑀼𑀦𑀓𑀸𑀦𑀺 𑀪𑀯𑀦𑁆𑀢𑀻𑀢𑀺 𑀢𑀣𑀸𑀭𑀽𑀧𑁂 𑀦𑀓𑁆𑀔𑀢𑁆𑀢𑁂 𑀢𑀢𑁆𑀣 𑀢𑀢𑁆𑀣 𑀧𑁂𑀲𑁂𑀢𑀩𑁆𑀩𑀸𑀦𑀺 𑀧𑀸𑀳𑀼𑀦𑀓𑀸𑀦𑀺 𑀪𑀯𑀦𑁆𑀢𑀺, 𑀆𑀕𑀦𑁆𑀢𑀼𑀓𑀧𑀡𑁆𑀡𑀸𑀓𑀸𑀭𑀤𑀸𑀦𑀸𑀦𑀺 𑀯𑀸. 𑀲𑀬𑀁𑀘𑀭𑀡𑀤𑀺𑀯𑀲𑁂 𑀲𑀫𑀯𑀬𑀚𑀸𑀢𑀺𑀕𑁄𑀢𑁆𑀢𑀸 𑀓𑀼𑀫𑀸𑀭𑀓𑀸 𑀢𑀢𑁄 𑀢𑀢𑁄 𑀲𑀦𑁆𑀦𑀺𑀧𑀢𑀦𑁆𑀢𑀺. 𑀓𑀼𑀫𑀸𑀭𑀺𑀓𑀸𑀬𑁄𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀪𑀯𑀸𑀦𑀼𑀭𑀽𑀧𑁂𑀦 𑀅𑀮𑀗𑁆𑀓𑀢𑀸 𑀢𑀳𑀁 𑀢𑀳𑀁 𑀯𑀺𑀘𑀭𑀦𑁆𑀢𑀺. 𑀢𑀢𑁆𑀭 𑀓𑀼𑀫𑀸𑀭𑀺𑀓𑀸𑀬𑁄𑀧𑀺 𑀬𑀣𑀸𑀭𑀼𑀘𑀺𑀓𑀸𑀦𑀁 𑀓𑀼𑀫𑀸𑀭𑀓𑀸𑀦𑀁 𑀧𑀡𑁆𑀡𑀸𑀓𑀸𑀭𑀁 𑀧𑁂𑀲𑁂𑀦𑁆𑀢𑀺, 𑀓𑀼𑀫𑀸𑀭𑀓𑀸𑀧𑀺 𑀓𑀼𑀫𑀸𑀭𑀺𑀓𑀸𑀦𑀁 𑀅𑀜𑁆𑀜𑀲𑁆𑀫𑀺𑀁 𑀅𑀲𑀢𑀺 𑀅𑀦𑁆𑀢𑀫𑀲𑁄 𑀫𑀸𑀮𑀸𑀕𑀼𑀴𑁂𑀦𑀧𑀺 𑀧𑀭𑀺𑀓𑁆𑀔𑀺𑀧𑀦𑁆𑀢𑀺. 𑀅𑀦𑁆𑀯𑀸𑀯𑀺𑀝𑁆𑀞𑀸𑀢𑀺 𑀅𑀦𑀼 𑀆𑀯𑀺𑀝𑁆𑀞𑀸. 𑀢𑀁𑀤𑀺𑀯𑀲𑀁 𑀓𑀺𑀭 𑀧𑀜𑁆𑀘𑀲𑀢𑀸 𑀓𑀼𑀫𑀸𑀭𑀺𑀓𑀸𑀬𑁄 𑀉𑀬𑁆𑀬𑀸𑀦𑀓𑀻𑀴𑀁 𑀕𑀘𑁆𑀙𑀦𑁆𑀢𑀺𑀬𑁄 𑀧𑀝𑀺𑀧𑀣𑁂 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀙𑀡𑀧𑀽𑀯𑀁 𑀤𑀤𑁂𑀬𑁆𑀬𑀼𑀁. 𑀲𑀢𑁆𑀣𑀸 𑀢𑀸𑀲𑀁 𑀤𑀸𑀦𑀸𑀦𑀼𑀫𑁄𑀤𑀦𑀢𑁆𑀣𑀁 𑀧𑀓𑀺𑀡𑁆𑀡𑀓𑀥𑀫𑁆𑀫𑀤𑁂𑀲𑀦𑀁 𑀤𑁂𑀲𑁂𑀬𑁆𑀬, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀩𑁆𑀩𑀸𑀧𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑁂𑀬𑁆𑀬𑀼𑀁. 𑀫𑀸𑀭𑁄 𑀢𑀸𑀲𑀁 𑀲𑀫𑁆𑀧𑀢𑁆𑀢𑀺𑀬𑀸 𑀅𑀦𑁆𑀢𑀭𑀸𑀬𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀅𑀦𑁆𑀯𑀸𑀯𑀺𑀲𑀺. 𑀧𑀸𑀴𑀺𑀬𑀁 𑀧𑀦 𑀫𑀸 𑀲𑀫𑀡𑁄 𑀕𑁄𑀢𑀫𑁄 𑀧𑀺𑀡𑁆𑀟𑀫𑀮𑀢𑁆𑀣𑀸𑀢𑀺 𑀏𑀢𑁆𑀢𑀓𑀁𑀬𑁂𑀯 𑀯𑀼𑀢𑁆𑀢𑀦𑁆𑀢𑀺.

𑀓𑀺𑀁 𑀧𑀦 𑀲𑀢𑁆𑀣𑀸 𑀫𑀸𑀭𑀸𑀯𑀝𑁆𑀝𑀦𑀁 𑀅𑀚𑀸𑀦𑀺𑀢𑁆𑀯𑀸 𑀧𑀯𑀺𑀝𑁆𑀞𑁄𑀢𑀺? 𑀆𑀫 𑀅𑀚𑀸𑀦𑀺𑀢𑁆𑀯𑀸. 𑀓𑀲𑁆𑀫𑀸? 𑀅𑀦𑀸𑀯𑀚𑁆𑀚𑀦𑀢𑀸𑀬. 𑀩𑀼𑀤𑁆𑀥𑀸𑀦𑀜𑁆𑀳𑀺 𑁋 ‘‘𑀅𑀲𑀼𑀓𑀝𑁆𑀞𑀸𑀦𑁂 𑀪𑀢𑁆𑀢𑀁 𑀮𑀪𑀺𑀲𑁆𑀲𑀸𑀫, 𑀦 𑀮𑀪𑀺𑀲𑁆𑀲𑀸𑀫𑀸’’𑀢𑀺 𑀆𑀯𑀚𑁆𑀚𑀦𑀁 𑀦 𑀅𑀦𑀦𑀼𑀘𑁆𑀙𑀯𑀺𑀓𑀁. 𑀧𑀯𑀺𑀝𑁆𑀞𑁄 𑀧𑀦 𑀫𑀦𑀼𑀲𑁆𑀲𑀸𑀦𑀁 𑀉𑀧𑀘𑀸𑀭𑀪𑁂𑀤𑀁 𑀤𑀺𑀲𑁆𑀯𑀸, ‘‘𑀓𑀺𑀁 𑀇𑀤’’𑀦𑁆𑀢𑀺? 𑀆𑀯𑀚𑁆𑀚𑁂𑀦𑁆𑀢𑁄 𑀜𑀢𑁆𑀯𑀸, ‘‘𑀆𑀫𑀺𑀲𑀢𑁆𑀣𑀁 𑀫𑀸𑀭𑀸𑀯𑀝𑁆𑀝𑀦𑀁 𑀪𑀺𑀦𑁆𑀤𑀺𑀢𑀼𑀁 𑀅𑀦𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺 𑀅𑀪𑀺𑀦𑁆𑀤𑀺𑀢𑁆𑀯𑀸𑀯 𑀦𑀺𑀓𑁆𑀔𑀦𑁆𑀢𑁄.

𑀉𑀧𑀲𑀗𑁆𑀓𑀫𑀻𑀢𑀺 𑀅𑀫𑀺𑀢𑁆𑀢𑀯𑀺𑀚𑀬𑁂𑀦 𑀯𑀺𑀬 𑀢𑀼𑀝𑁆𑀞𑁄 𑀲𑀓𑀮𑀕𑀸𑀫𑁂 𑀓𑀝𑀘𑁆𑀙𑀼𑀫𑀢𑁆𑀢𑀫𑁆𑀧𑀺 𑀪𑀢𑁆𑀢𑀁 𑀅𑀮𑀪𑀺𑀢𑁆𑀯𑀸 𑀕𑀸𑀫𑀢𑁄 𑀦𑀺𑀓𑁆𑀔𑀫𑀦𑁆𑀢𑀁 𑀪𑀕𑀯𑀦𑁆𑀢𑀁 𑀕𑀸𑀫𑀺𑀬𑀫𑀦𑀼𑀲𑁆𑀲𑀯𑁂𑀲𑁂𑀦 𑀉𑀧𑀲𑀗𑁆𑀓𑀫𑀺. 𑀢𑀣𑀸𑀳𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀇𑀤𑀁 𑀲𑁄 𑀫𑀼𑀲𑀸 𑀪𑀸𑀲𑀢𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀫𑀬𑀸 𑀏𑀯𑀁 𑀯𑀼𑀢𑁆𑀢𑁂 𑀧𑀼𑀦 𑀧𑀯𑀺𑀲𑀺𑀲𑁆𑀲𑀢𑀺, 𑀅𑀣 𑀦𑀁 𑀕𑀸𑀫𑀤𑀸𑀭𑀓𑀸 ‘𑀲𑀓𑀮𑀕𑀸𑀫𑁂 𑀘𑀭𑀺𑀢𑁆𑀯𑀸 𑀓𑀝𑀘𑁆𑀙𑀼𑀪𑀺𑀓𑁆𑀔𑀫𑁆𑀧𑀺 𑀅𑀮𑀪𑀺𑀢𑁆𑀯𑀸 𑀕𑀸𑀫𑀢𑁄 𑀦𑀺𑀓𑁆𑀔𑀫𑁆𑀫 𑀧𑀼𑀦 𑀧𑀯𑀺𑀝𑁆𑀞𑁄𑀲𑀻’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀉𑀧𑁆𑀧𑀡𑁆𑀟𑁂𑀲𑁆𑀲𑀦𑁆𑀢𑀻’’𑀢𑀺. 𑀪𑀕𑀯𑀸 𑀧𑀦 𑁋 ‘‘𑀲𑀘𑀸𑀬𑀁 𑀫𑀁 𑀏𑀯𑀁 𑀯𑀺𑀳𑁂𑀞𑁂𑀲𑁆𑀲𑀢𑀺 𑀫𑀼𑀤𑁆𑀥𑀫𑀲𑁆𑀲𑁂𑀯 𑀲𑀢𑁆𑀢𑀥𑀸 𑀨𑀮𑀺𑀲𑁆𑀲𑀢𑀻’’𑀢𑀺 𑀢𑀲𑁆𑀫𑀺𑀁 𑀅𑀦𑀼𑀓𑀫𑁆𑀧𑀸𑀬 𑀅𑀧𑀯𑀺𑀲𑀺𑀢𑁆𑀯𑀸 𑀕𑀸𑀣𑀸𑀤𑁆𑀯𑀬𑀫𑀸𑀳.

𑀢𑀢𑁆𑀣 𑀧𑀲𑀯𑀻𑀢𑀺 𑀚𑀦𑁂𑀲𑀺 𑀦𑀺𑀧𑁆𑀨𑀸𑀤𑁂𑀲𑀺. 𑀆𑀲𑀚𑁆𑀚𑀸𑀢𑀺 𑀆𑀲𑀸𑀤𑁂𑀢𑁆𑀯𑀸 𑀖𑀝𑁆𑀝𑁂𑀢𑁆𑀯𑀸. 𑀦 𑀫𑁂 𑀧𑀸𑀧𑀁 𑀯𑀺𑀧𑀘𑁆𑀘𑀢𑀻𑀢𑀺 𑀫𑀫 𑀧𑀸𑀧𑀁 𑀦 𑀧𑀘𑁆𑀘𑀢𑀺. 𑀦𑀺𑀧𑁆𑀨𑀮𑀁 𑀏𑀢𑀦𑁆𑀢𑀺 𑀓𑀺𑀁 𑀦𑀼 𑀢𑁆𑀯𑀁 𑀏𑀯𑀁 𑀫𑀜𑁆𑀜𑀲𑀺? 𑀫𑀸 𑀏𑀯𑀁 𑀫𑀜𑁆𑀜𑀺, 𑀅𑀢𑁆𑀣𑀺 𑀢𑀬𑀸 𑀓𑀢𑀲𑁆𑀲 𑀧𑀸𑀧𑀲𑁆𑀲 𑀨𑀮𑀦𑁆𑀢𑀺 𑀤𑀻𑀧𑁂𑀢𑀺. 𑀓𑀺𑀜𑁆𑀘𑀦𑀦𑁆𑀢𑀺 𑀫𑀤𑁆𑀤𑀺𑀢𑀼𑀁 𑀲𑀫𑀢𑁆𑀣𑀁 𑀭𑀸𑀕𑀓𑀺𑀜𑁆𑀘𑀦𑀸𑀤𑀺 𑀓𑀺𑀮𑁂𑀲𑀚𑀸𑀢𑀁. 𑀆𑀪𑀲𑁆𑀲𑀭𑀸 𑀬𑀣𑀸𑀢𑀺 𑀬𑀣𑀸 𑀆𑀪𑀲𑁆𑀲𑀭𑀸 𑀤𑁂𑀯𑀸 𑀲𑀧𑁆𑀧𑀻𑀢𑀺𑀓𑀚𑁆𑀛𑀸𑀦𑁂𑀦 𑀬𑀸𑀧𑁂𑀦𑁆𑀢𑀸 𑀧𑀻𑀢𑀺𑀪𑀓𑁆𑀔𑀸 𑀦𑀸𑀫 𑀳𑁄𑀦𑁆𑀢𑀺, 𑀏𑀯𑀁 𑀪𑀯𑀺𑀲𑁆𑀲𑀸𑀫𑀸𑀢𑀺. 𑀅𑀝𑁆𑀞𑀫𑀁.

𑁯. 𑀓𑀲𑁆𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁫. 𑀦𑀯𑀫𑁂 𑀦𑀺𑀩𑁆𑀩𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀬𑀸𑀢𑀺 𑀦𑀺𑀩𑁆𑀩𑀸𑀦𑀁 𑀅𑀧𑀤𑀺𑀲𑀺𑀢𑁆𑀯𑀸 𑀧𑀯𑀢𑁆𑀢𑀸𑀬. 𑀳𑀝𑀳𑀝𑀓𑁂𑀲𑁄𑀢𑀺 𑀧𑀼𑀭𑀺𑀫𑀓𑁂𑀲𑁂 𑀧𑀘𑁆𑀙𑀢𑁄, 𑀧𑀘𑁆𑀙𑀺𑀫𑀓𑁂𑀲𑁂 𑀧𑀼𑀭𑀢𑁄 𑀯𑀸𑀫𑀧𑀲𑁆𑀲𑀓𑁂𑀲𑁂 𑀤𑀓𑁆𑀔𑀺𑀡𑀢𑁄, 𑀤𑀓𑁆𑀔𑀺𑀡𑀧𑀲𑁆𑀲𑀓𑁂𑀲𑁂 𑀯𑀸𑀫𑀢𑁄 𑀨𑀭𑀺𑀢𑁆𑀯𑀸 𑀨𑀭𑀺𑀢𑁆𑀯𑀸 𑀯𑀺𑀧𑁆𑀧𑀓𑀺𑀡𑁆𑀡𑀓𑁂𑀲𑁄. 𑀫𑀫 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀯𑀺𑀜𑁆𑀜𑀸𑀡𑀸𑀬𑀢𑀦𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄𑀧𑀺 𑀯𑀺𑀜𑁆𑀜𑀸𑀡𑀸𑀬𑀢𑀦𑀫𑁆𑀧𑀺 𑀫𑀫𑁂𑀯𑀸𑀢𑀺. 𑀏𑀢𑁆𑀣 𑀘 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁂𑀦 𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸 𑀕𑀳𑀺𑀢𑀸, 𑀯𑀺𑀜𑁆𑀜𑀸𑀡𑀸𑀬𑀢𑀦𑁂𑀦 𑀲𑀩𑁆𑀩𑀸𑀦𑀺𑀧𑀺 𑀘𑀓𑁆𑀔𑀼𑀤𑁆𑀯𑀸𑀭𑁂 𑀉𑀧𑁆𑀧𑀦𑁆𑀦𑀸𑀦𑀺 𑀆𑀯𑀚𑁆𑀚𑀦𑀸𑀤𑀺𑀯𑀺𑀜𑁆𑀜𑀸𑀡𑀸𑀦𑀺. 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀫𑀦𑁄𑀢𑀺 𑀲𑀸𑀯𑀚𑁆𑀚𑀦𑀓𑀁 𑀪𑀯𑀗𑁆𑀕𑀘𑀺𑀢𑁆𑀢𑀁. 𑀥𑀫𑁆𑀫𑀸𑀢𑀺 𑀆𑀭𑀫𑁆𑀫𑀡𑀥𑀫𑁆𑀫𑀸. 𑀫𑀦𑁄𑀲𑀫𑁆𑀨𑀲𑁆𑀲𑁄𑀢𑀺 𑀲𑀸𑀯𑀚𑁆𑀚𑀦𑁂𑀦 𑀪𑀯𑀗𑁆𑀕𑁂𑀦 𑀲𑀫𑁆𑀧𑀬𑀼𑀢𑁆𑀢𑀨𑀲𑁆𑀲𑁄. 𑀯𑀺𑀜𑁆𑀜𑀸𑀡𑀸𑀬𑀢𑀦𑀦𑁆𑀢𑀺 𑀚𑀯𑀦𑀘𑀺𑀢𑁆𑀢𑀁 𑀢𑀤𑀸𑀭𑀫𑁆𑀫𑀡𑀫𑁆𑀧𑀺 𑀯𑀝𑁆𑀝𑀢𑀺.

𑀢𑀯𑁂𑀯 𑀧𑀸𑀧𑀺𑀫, 𑀘𑀓𑁆𑀔𑀽𑀢𑀺 𑀬𑀁 𑀮𑁄𑀓𑁂 𑀢𑀺𑀫𑀺𑀭𑀓𑀸𑀘𑀸𑀤𑀻𑀳𑀺 𑀉𑀧𑀤𑁆𑀤𑀼𑀢𑀁 𑀅𑀦𑁂𑀓𑀭𑁄𑀕𑀸𑀬𑀢𑀦𑀁 𑀉𑀧𑀓𑁆𑀓𑀯𑀺𑀧𑀓𑁆𑀓𑀁 𑀅𑀦𑁆𑀢𑀫𑀲𑁄 𑀓𑀸𑀡𑀘𑀓𑁆𑀔𑀼𑀧𑀺, 𑀲𑀩𑁆𑀩𑀁 𑀢𑀁 𑀢𑀯𑁂𑀯 𑀪𑀯𑀢𑀼. 𑀭𑀽𑀧𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀬𑀁 𑀯𑀤𑀦𑁆𑀢𑀻𑀢𑀺 𑀬𑀁 𑀪𑀡𑁆𑀟𑀓𑀁 ‘‘𑀫𑀫 𑀇𑀤’’𑀦𑁆𑀢𑀺 𑀯𑀤𑀦𑁆𑀢𑀺. 𑀬𑁂 𑀯𑀤𑀦𑁆𑀢𑀺 𑀫𑀫𑀦𑁆𑀢𑀺 𑀘𑀸𑀢𑀺 𑀬𑁂 𑀘 𑀧𑀼𑀕𑁆𑀕𑀮𑀸 ‘‘𑀫𑀫’’𑀦𑁆𑀢𑀺 𑀯𑀤𑀦𑁆𑀢𑀺. 𑀏𑀢𑁆𑀣 𑀘𑁂 𑀢𑁂 𑀫𑀦𑁄 𑀅𑀢𑁆𑀣𑀻𑀢𑀺 𑀏𑀢𑁂𑀲𑀼 𑀘 𑀞𑀸𑀦𑁂𑀲𑀼 𑀬𑀤𑀺 𑀘𑀺𑀢𑁆𑀢𑀁 𑀅𑀢𑁆𑀣𑀺. 𑀦 𑀫𑁂 𑀲𑀫𑀡 𑀫𑁄𑀓𑁆𑀔𑀲𑀻𑀢𑀺 𑀲𑀫𑀡 𑀫𑀬𑁆𑀳𑀁 𑀯𑀺𑀲𑀬𑀢𑁄 𑀦 𑀫𑀼𑀘𑁆𑀘𑀺𑀲𑁆𑀲𑀲𑀺. 𑀬𑀁 𑀯𑀤𑀦𑁆𑀢𑀻𑀢𑀺 𑀬𑀁 𑀪𑀡𑁆𑀟𑀓𑀁 𑀯𑀤𑀦𑁆𑀢𑀺, 𑀦 𑀢𑀁 𑀫𑀬𑁆𑀳𑀁. 𑀬𑁂 𑀯𑀤𑀦𑁆𑀢𑀻𑀢𑀺 𑀬𑁂𑀧𑀺 𑀧𑀼𑀕𑁆𑀕𑀮𑀸 𑀏𑀯𑀁 𑀯𑀤𑀦𑁆𑀢𑀺, 𑀦 𑀢𑁂 𑀅𑀳𑀁. 𑀦 𑀫𑁂 𑀫𑀕𑁆𑀕𑀫𑁆𑀧𑀺 𑀤𑀓𑁆𑀔𑀲𑀻𑀢𑀺 𑀪𑀯𑀬𑁄𑀦𑀺𑀕𑀢𑀺𑀆𑀤𑀻𑀲𑀼 𑀫𑀬𑁆𑀳𑀁 𑀕𑀢𑀫𑀕𑁆𑀕𑀫𑁆𑀧𑀺 𑀦 𑀧𑀲𑁆𑀲𑀲𑀺. 𑀦𑀯𑀫𑀁.

𑁧𑁦. 𑀭𑀚𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁬. 𑀤𑀲𑀫𑁂 𑀅𑀳𑀦𑀁 𑀅𑀖𑀸𑀢𑀬𑀦𑁆𑀢𑀺 𑀅𑀳𑀦𑀦𑁆𑀢𑁂𑀦 𑀅𑀖𑀸𑀢𑀬𑀦𑁆𑀢𑁂𑀦. 𑀅𑀚𑀺𑀦𑀁 𑀅𑀚𑀸𑀧𑀬𑀦𑁆𑀢𑀺 𑀧𑀭𑀲𑁆𑀲 𑀥𑀦𑀚𑀸𑀦𑀺𑀁 𑀅𑀓𑀭𑁄𑀦𑁆𑀢𑁂𑀦 𑀅𑀓𑀸𑀭𑀸𑀧𑁂𑀦𑁆𑀢𑁂𑀦. 𑀅𑀲𑁄𑀘𑀁 𑀅𑀲𑁄𑀘𑀸𑀧𑀬𑀦𑁆𑀢𑀺 𑀅𑀲𑁄𑀘𑀦𑁆𑀢𑁂𑀦 𑀅𑀲𑁄𑀘𑀸𑀧𑀬𑀦𑁆𑀢𑁂𑀦. 𑀇𑀢𑀺 𑀪𑀕𑀯𑀸 𑀅𑀥𑀫𑁆𑀫𑀺𑀓𑀭𑀸𑀚𑀽𑀦𑀁 𑀭𑀚𑁆𑀚𑁂 𑀯𑀺𑀚𑀺𑀢𑁂 𑀤𑀡𑁆𑀟𑀓𑀭𑀧𑀻𑀴𑀺𑀢𑁂 𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀓𑀸𑀭𑀼𑀜𑁆𑀜𑀯𑀲𑁂𑀦 𑀏𑀯𑀁 𑀘𑀺𑀦𑁆𑀢𑁂𑀲𑀺. 𑀉𑀧𑀲𑀗𑁆𑀓𑀫𑀻𑀢𑀺 ‘‘𑀲𑀫𑀡𑁄 𑀕𑁄𑀢𑀫𑁄 ‘𑀲𑀓𑁆𑀓𑀸 𑀦𑀼 𑀔𑁄 𑀭𑀚𑁆𑀚𑀁 𑀓𑀸𑀭𑁂𑀢𑀼’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺, 𑀭𑀚𑁆𑀚𑀁 𑀓𑀸𑀭𑁂𑀢𑀼𑀓𑀸𑀫𑁄 𑀪𑀯𑀺𑀲𑁆𑀲𑀢𑀺, 𑀭𑀚𑁆𑀚𑀜𑁆𑀘 𑀦𑀸𑀫𑁂𑀢𑀁 𑀧𑀫𑀸𑀤𑀝𑁆𑀞𑀸𑀦𑀁, 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀲𑀓𑁆𑀓𑀸 𑀑𑀢𑀸𑀭𑀁 𑀮𑀪𑀺𑀢𑀼𑀁, 𑀕𑀘𑁆𑀙𑀸𑀫𑀺 𑀉𑀲𑁆𑀲𑀸𑀳𑀫𑀲𑁆𑀲 𑀚𑀦𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺. 𑀇𑀤𑁆𑀥𑀺𑀧𑀸𑀤𑀸𑀢𑀺 𑀇𑀚𑁆𑀛𑀦𑀓𑀓𑁄𑀝𑁆𑀞𑀸𑀲𑀸. 𑀪𑀸𑀯𑀺𑀢𑀸𑀢𑀺 𑀯𑀟𑁆𑀠𑀺𑀢𑀸. 𑀩𑀳𑀼𑀮𑀻𑀓𑀢𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀢𑀸. 𑀬𑀸𑀦𑀻𑀓𑀢𑀸𑀢𑀺 𑀬𑀼𑀢𑁆𑀢𑀬𑀸𑀦𑀁 𑀯𑀺𑀬 𑀓𑀢𑀸. 𑀯𑀢𑁆𑀣𑀼𑀓𑀢𑀸𑀢𑀺 𑀧𑀢𑀺𑀝𑁆𑀞𑀝𑁆𑀞𑁂𑀦𑀯𑀢𑁆𑀣𑀼𑀓𑀢𑀸. 𑀅𑀦𑀼𑀝𑁆𑀞𑀺𑀢𑀸𑀢𑀺 𑀅𑀯𑀺𑀚𑀳𑀺𑀢𑀸 𑀦𑀺𑀘𑁆𑀘𑀸𑀦𑀼𑀩𑀤𑁆𑀥𑀸. 𑀧𑀭𑀺𑀘𑀺𑀢𑀸𑀢𑀺 𑀲𑀸𑀢𑀘𑁆𑀘𑀓𑀺𑀭𑀺𑀬𑀸𑀬 𑀲𑀼𑀧𑀭𑀺𑀘𑀺𑀢𑀸 𑀓𑀢𑀸 𑀇𑀲𑁆𑀲𑀸𑀲𑀲𑁆𑀲 𑀅𑀯𑀺𑀭𑀸𑀥𑀺𑀢𑀯𑁂𑀥𑀺𑀳𑀢𑁆𑀣𑁄 𑀯𑀺𑀬. 𑀲𑀼𑀲𑀫𑀸𑀭𑀤𑁆𑀥𑀸𑀢𑀺 𑀲𑀼𑀝𑁆𑀞𑀼 𑀲𑀫𑀸𑀭𑀤𑁆𑀥𑀸 𑀧𑀭𑀺𑀧𑀼𑀡𑁆𑀡𑀪𑀸𑀯𑀦𑀸. 𑀅𑀥𑀺𑀫𑀼𑀘𑁆𑀘𑁂𑀬𑁆𑀬𑀸𑀢𑀺 𑀘𑀺𑀦𑁆𑀢𑁂𑀬𑁆𑀬.

𑀧𑀩𑁆𑀩𑀢𑀲𑁆𑀲𑀸𑀢𑀺 𑀧𑀩𑁆𑀩𑀢𑁄 𑀪𑀯𑁂𑀬𑁆𑀬. 𑀤𑁆𑀯𑀺𑀢𑁆𑀢𑀸𑀯𑀸𑀢𑀺 𑀢𑀺𑀝𑁆𑀞𑀢𑀼 𑀏𑀓𑁄 𑀧𑀩𑁆𑀩𑀢𑁄, 𑀤𑁆𑀯𑀺𑀓𑁆𑀔𑀢𑁆𑀢𑀼𑀫𑁆𑀧𑀺 𑀢𑀸𑀯 𑀫𑀳𑀦𑁆𑀢𑁄 𑀲𑀼𑀯𑀡𑁆𑀡𑀧𑀩𑁆𑀩𑀢𑁄 𑀏𑀓𑀲𑁆𑀲 𑀦𑀸𑀮𑀁, 𑀦 𑀧𑀭𑀺𑀬𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀇𑀢𑀺 𑀯𑀺𑀤𑁆𑀯𑀸 𑀲𑀫𑀜𑁆𑀘𑀭𑁂𑀢𑀺 𑀏𑀯𑀁 𑀚𑀸𑀦𑀦𑁆𑀢𑁄 𑀲𑀫𑀁 𑀘𑀭𑁂𑀬𑁆𑀬. 𑀬𑀢𑁄𑀦𑀺𑀤𑀸𑀦𑀦𑁆𑀢𑀺 𑀤𑀼𑀓𑁆𑀔𑀁 𑀦𑀸𑀫 𑀧𑀜𑁆𑀘𑀓𑀸𑀫𑀕𑀼𑀡𑀦𑀺𑀤𑀸𑀦𑀁, 𑀢𑀁 𑀬𑀢𑁄𑀦𑀺𑀤𑀸𑀦𑀁 𑀳𑁄𑀢𑀺, 𑀏𑀯𑀁 𑀬𑁄 𑀅𑀤𑀓𑁆𑀔𑀺. 𑀓𑀣𑀁 𑀦𑀫𑁂𑀬𑁆𑀬𑀸𑀢𑀺 𑀲𑁄 𑀚𑀦𑁆𑀢𑀼 𑀢𑁂𑀲𑀼 𑀤𑀼𑀓𑁆𑀔𑀲𑁆𑀲 𑀦𑀺𑀤𑀸𑀦𑀪𑀽𑀢𑁂𑀲𑀼 𑀓𑀸𑀫𑁂𑀲𑀼 𑀓𑁂𑀦 𑀓𑀸𑀭𑀡𑁂𑀦 𑀦𑀫𑁂𑀬𑁆𑀬. 𑀉𑀧𑀥𑀺𑀁 𑀯𑀺𑀤𑀺𑀢𑁆𑀯𑀸𑀢𑀺 𑀓𑀸𑀫𑀕𑀼𑀡𑀉𑀧𑀥𑀺𑀁 ‘‘𑀲𑀗𑁆𑀕𑁄 𑀏𑀲𑁄, 𑀮𑀕𑁆𑀕𑀦𑀫𑁂𑀢’’𑀦𑁆𑀢𑀺 𑀏𑀯𑀁 𑀯𑀺𑀤𑀺𑀢𑁆𑀯𑀸. 𑀢𑀲𑁆𑀲𑁂𑀯 𑀚𑀦𑁆𑀢𑀼 𑀯𑀺𑀦𑀬𑀸𑀬 𑀲𑀺𑀓𑁆𑀔𑁂𑀢𑀺 𑀢𑀲𑁆𑀲𑁂𑀯 𑀉𑀧𑀥𑀺𑀲𑁆𑀲 𑀯𑀺𑀦𑀬𑀸𑀬 𑀲𑀺𑀓𑁆𑀔𑁂𑀬𑁆𑀬. 𑀤𑀲𑀫𑀁.

𑀤𑀼𑀢𑀺𑀬𑁄 𑀯𑀕𑁆𑀕𑁄.

𑁩. 𑀢𑀢𑀺𑀬𑀯𑀕𑁆𑀕𑁄

𑁧. 𑀲𑀫𑁆𑀩𑀳𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁭. 𑀢𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀚𑀝𑀡𑁆𑀟𑀼𑀯𑁂𑀦𑀸𑀢𑀺 𑀚𑀝𑀸𑀘𑀼𑀫𑁆𑀩𑀝𑀓𑁂𑀦. 𑀅𑀚𑀺𑀦𑀓𑁆𑀔𑀺𑀧𑀦𑀺𑀯𑀢𑁆𑀣𑁄𑀢𑀺 𑀲𑀔𑀼𑀭𑀁 𑀅𑀚𑀺𑀦𑀘𑀫𑁆𑀫𑀁 𑀏𑀓𑀁 𑀦𑀺𑀯𑀢𑁆𑀣𑁄 𑀏𑀓𑀁 𑀧𑀸𑀭𑀼𑀢𑁄. 𑀉𑀤𑀼𑀫𑁆𑀩𑀭𑀤𑀡𑁆𑀟𑀦𑁆𑀢𑀺 𑀅𑀧𑁆𑀧𑀺𑀘𑁆𑀙𑀪𑀸𑀯𑀧𑁆𑀧𑀓𑀸𑀲𑀦𑀢𑁆𑀣𑀁 𑀈𑀲𑀓𑀁 𑀯𑀗𑁆𑀓𑀁 𑀉𑀤𑀼𑀫𑁆𑀩𑀭𑀤𑀡𑁆𑀟𑀁 𑀕𑀳𑁂𑀢𑁆𑀯𑀸. 𑀏𑀢𑀤𑀯𑁄𑀘𑀸𑀢𑀺 𑀮𑁄𑀓𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀘𑀦𑀁 𑀦𑀸𑀫 𑀲𑀼𑀲𑁆𑀲𑀽𑀲𑀦𑁆𑀢𑀺, 𑀩𑁆𑀭𑀸𑀳𑁆𑀫𑀡𑁂𑀲𑀼𑀧𑀺 𑀧𑀩𑁆𑀩𑀚𑀺𑀢𑀲𑁆𑀲, 𑀧𑀩𑁆𑀩𑀚𑀺𑀢𑁂𑀲𑀼𑀧𑀺 𑀫𑀳𑀮𑁆𑀮𑀓𑀲𑁆𑀲𑀸𑀢𑀺 𑀫𑀳𑀮𑁆𑀮𑀓𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀩𑁆𑀩𑀚𑀺𑀢𑀯𑁂𑀲𑀁 𑀕𑀳𑁂𑀢𑁆𑀯𑀸 𑀧𑀥𑀸𑀦𑀪𑀽𑀫𑀺𑀬𑀁 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂 𑀢𑁂 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀏𑀢𑀁 ‘‘𑀤𑀳𑀭𑀸 𑀪𑀯𑀦𑁆𑀢𑁄’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀑𑀓𑀫𑁆𑀧𑁂𑀢𑁆𑀯𑀸𑀢𑀺 𑀳𑀦𑀼𑀓𑁂𑀦 𑀉𑀭𑀁 𑀧𑀳𑀭𑀦𑁆𑀢𑁄 𑀅𑀥𑁄𑀦𑀢𑀁 𑀓𑀢𑁆𑀯𑀸. 𑀚𑀺𑀯𑁆𑀳𑀁 𑀦𑀺𑀮𑁆𑀮𑀸𑀮𑁂𑀢𑁆𑀯𑀸𑀢𑀺 𑀓𑀩𑀭𑀫𑀳𑀸𑀚𑀺𑀯𑁆𑀳𑀁 𑀦𑀻𑀳𑀭𑀺𑀢𑁆𑀯𑀸 𑀉𑀤𑁆𑀥𑀫𑀥𑁄 𑀉𑀪𑀬𑀧𑀲𑁆𑀲𑁂𑀲𑀼 𑀘 𑀮𑀸𑀮𑁂𑀢𑁆𑀯𑀸. 𑀢𑀺𑀯𑀺𑀲𑀸𑀔𑀦𑁆𑀢𑀺 𑀢𑀺𑀲𑀸𑀔𑀁. 𑀦𑀮𑀸𑀝𑀺𑀓𑀦𑁆𑀢𑀺 𑀪𑀓𑀼𑀝𑀺𑀁, 𑀦𑀮𑀸𑀝𑁂 𑀉𑀝𑁆𑀞𑀺𑀢𑀁 𑀯𑀮𑀺𑀢𑁆𑀢𑀬𑀦𑁆𑀢𑀺 𑀅𑀢𑁆𑀣𑁄. 𑀧𑀓𑁆𑀓𑀸𑀫𑀻𑀢𑀺 𑀢𑀼𑀫𑁆𑀳𑁂 𑀚𑀸𑀦𑀦𑁆𑀢𑀸𑀦𑀁 𑀯𑀘𑀦𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑁄𑀯 𑀢𑁂𑀮𑁂 𑀧𑀘𑁆𑀘𑀺𑀲𑁆𑀲𑀣𑀸𑀢𑀺 𑀯𑀢𑁆𑀯𑀸 𑀏𑀓𑀁 𑀫𑀕𑁆𑀕𑀁 𑀕𑀳𑁂𑀢𑁆𑀯𑀸 𑀕𑀢𑁄. 𑀧𑀞𑀫𑀁.

𑁨. 𑀲𑀫𑀺𑀤𑁆𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁮. 𑀤𑀼𑀢𑀺𑀬𑁂 𑀮𑀸𑀪𑀸 𑀯𑀢 𑀫𑁂, 𑀲𑀼𑀮𑀤𑁆𑀥𑀁 𑀯𑀢 𑀫𑁂𑀢𑀺 𑀏𑀯𑀭𑀽𑀧𑀲𑁆𑀲 𑀲𑀢𑁆𑀣𑀼 𑀘𑁂𑀯 𑀥𑀫𑁆𑀫𑀲𑁆𑀲 𑀘 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀜𑁆𑀘 𑀮𑀤𑁆𑀥𑀢𑁆𑀢𑀸 𑀫𑀬𑁆𑀳𑀁 𑀮𑀸𑀪𑀸 𑀫𑀬𑁆𑀳𑀁 𑀲𑀼𑀮𑀤𑁆𑀥𑀦𑁆𑀢𑀺. 𑀲𑁄 𑀓𑀺𑀭𑀸𑀬𑀲𑁆𑀫𑀸 𑀧𑀘𑁆𑀙𑀸 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀲𑀫𑁆𑀫𑀲𑀺𑀢𑁆𑀯𑀸 ‘‘𑀅𑀭𑀳𑀢𑁆𑀢𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀧𑀸𑀲𑀸𑀤𑀺𑀓𑀁 𑀢𑀸𑀯 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀕𑀼𑀡𑁂 𑀆𑀯𑀚𑁆𑀚𑁂𑀢𑁆𑀯𑀸 𑀘𑀺𑀢𑁆𑀢𑀓𑀮𑁆𑀮𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀘𑀺𑀢𑁆𑀢𑀁 𑀳𑀸𑀲𑁂𑀢𑁆𑀯𑀸 𑀢𑁄𑀲𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄. 𑀢𑁂𑀦𑀲𑁆𑀲 𑀏𑀯𑀫𑀳𑁄𑀲𑀺. 𑀉𑀧𑀲𑀗𑁆𑀓𑀫𑀻𑀢𑀺 ‘‘𑀅𑀬𑀁 𑀲𑀫𑀺𑀤𑁆𑀥𑀺 𑀪𑀺𑀓𑁆𑀔𑀼 𑀧𑀸𑀲𑀸𑀤𑀺𑀓𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑀤𑀺𑀲𑁄, 𑀬𑀸𑀯 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀦 𑀕𑀡𑁆𑀳𑀸𑀢𑀺, 𑀢𑀸𑀯𑀲𑁆𑀲 𑀅𑀦𑁆𑀢𑀭𑀸𑀬𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀲𑀗𑁆𑀓𑀫𑀺. 𑀕𑀘𑁆𑀙 𑀢𑁆𑀯𑀦𑁆𑀢𑀺 𑀲𑀢𑁆𑀣𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀑𑀮𑁄𑀓𑁂𑀦𑁆𑀢𑁄 ‘‘𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀲𑀧𑁆𑀧𑀸𑀬𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀤𑁆𑀤𑀲, 𑀢𑀲𑁆𑀫𑀸 𑀏𑀯𑀫𑀸𑀳. 𑀲𑀢𑀺𑀧𑀜𑁆𑀜𑀸 𑀘 𑀫𑁂 𑀩𑀼𑀤𑁆𑀥𑀸𑀢𑀺 𑀫𑀬𑀸 𑀲𑀢𑀺 𑀘 𑀧𑀜𑁆𑀜𑀸 𑀘 𑀜𑀸𑀢𑀸. 𑀓𑀭𑀲𑁆𑀲𑀼 𑀭𑀽𑀧𑀸𑀦𑀻𑀢𑀺 𑀩𑀳𑀽𑀦𑀺𑀧𑀺 𑀯𑀺𑀪𑀺𑀁𑀲𑀓𑀸𑀭𑀳𑀸𑀦𑀺 𑀭𑀽𑀧𑀸𑀦𑀺 𑀓𑀭𑀲𑁆𑀲𑀼. 𑀦𑁂𑀯 𑀫𑀁 𑀩𑁆𑀬𑀸𑀥𑀬𑀺𑀲𑁆𑀲𑀲𑀻𑀢𑀺 𑀫𑀁 𑀦𑁂𑀯 𑀯𑁂𑀥𑀬𑀺𑀲𑁆𑀲𑀲𑀺 𑀦 𑀓𑀫𑁆𑀧𑀲𑁆𑀲𑁂𑀲𑀺. 𑀤𑀼𑀢𑀺𑀬𑀁.

𑁩. 𑀕𑁄𑀥𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁯. 𑀢𑀢𑀺𑀬𑁂 𑀇𑀲𑀺𑀕𑀺𑀮𑀺𑀧𑀲𑁆𑀲𑁂𑀢𑀺 𑀇𑀲𑀺𑀕𑀺𑀮𑀺𑀲𑁆𑀲 𑀦𑀸𑀫 𑀧𑀩𑁆𑀩𑀢𑀲𑁆𑀲 𑀧𑀲𑁆𑀲𑁂. 𑀓𑀸𑀴𑀲𑀺𑀮𑀸𑀬𑀦𑁆𑀢𑀺 𑀓𑀸𑀴𑀯𑀡𑁆𑀡𑀸𑀬 𑀲𑀺𑀮𑀸𑀬𑀁. 𑀲𑀸𑀫𑀬𑀺𑀓𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀯𑀺𑀫𑀼𑀘𑁆𑀘𑀢𑀺, 𑀆𑀭𑀫𑁆𑀫𑀡𑁂 𑀘 𑀅𑀥𑀺𑀫𑀼𑀘𑁆𑀘𑀢𑀻𑀢𑀺 𑀮𑁄𑀓𑀺𑀬𑀲𑀫𑀸𑀧𑀢𑁆𑀢𑀺 𑀲𑀸𑀫𑀬𑀺𑀓𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀦𑀸𑀫. 𑀨𑀼𑀲𑀻𑀢𑀺 𑀧𑀝𑀺𑀮𑀪𑀺. 𑀧𑀭𑀺𑀳𑀸𑀬𑀻𑀢𑀺 𑀓𑀲𑁆𑀫𑀸 𑀬𑀸𑀯 𑀙𑀝𑁆𑀞𑀁 𑀧𑀭𑀺𑀳𑀸𑀬𑀺? 𑀲𑀸𑀩𑀸𑀥𑀢𑁆𑀢𑀸. 𑀣𑁂𑀭𑀲𑁆𑀲 𑀓𑀺𑀭 𑀯𑀸𑀢𑀧𑀺𑀢𑁆𑀢𑀲𑁂𑀫𑁆𑀳𑀯𑀲𑁂𑀦 𑀅𑀦𑀼𑀲𑀸𑀬𑀺𑀓𑁄 𑀆𑀩𑀸𑀥𑁄 𑀅𑀢𑁆𑀣𑀺, 𑀢𑁂𑀦 𑀲𑀫𑀸𑀥𑀺𑀲𑁆𑀲 𑀲𑀧𑁆𑀧𑀸𑀬𑁂 𑀉𑀧𑀓𑀸𑀭𑀓𑀥𑀫𑁆𑀫𑁂 𑀧𑀽𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀧𑁆𑀧𑀺𑀢𑀧𑁆𑀧𑀺𑀢𑀸𑀬 𑀲𑀫𑀸𑀧𑀢𑁆𑀢𑀺𑀬𑀸 𑀧𑀭𑀺𑀳𑀸𑀬𑀢𑀺.

𑀬𑀁𑀦𑀽𑀦𑀸𑀳𑀁 𑀲𑀢𑁆𑀣𑀁 𑀆𑀳𑀭𑁂𑀬𑁆𑀬𑀦𑁆𑀢𑀺 𑀲𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺, 𑀬𑀲𑁆𑀫𑀸 𑀧𑀭𑀺𑀳𑀻𑀦𑀚𑁆𑀛𑀸𑀦𑀲𑁆𑀲 𑀓𑀸𑀮𑀗𑁆𑀓𑀭𑁄𑀢𑁄 𑀅𑀦𑀺𑀩𑀤𑁆𑀥𑀸 𑀕𑀢𑀺 𑀳𑁄𑀢𑀺, 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑀲𑁆𑀲 𑀦𑀺𑀩𑀤𑁆𑀥𑀸 𑀕𑀢𑀺 𑀳𑁄𑀢𑀺, 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀢𑀺, 𑀢𑀲𑁆𑀫𑀸 𑀲𑀢𑁆𑀣𑀁 𑀆𑀳𑀭𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀉𑀧𑀲𑀗𑁆𑀓𑀫𑀻𑀢𑀺 𑁋 ‘‘𑀅𑀬𑀁 𑀲𑀫𑀡𑁄 𑀲𑀢𑁆𑀣𑀁 𑀆𑀳𑀭𑀺𑀢𑀼𑀓𑀸𑀫𑁄, 𑀲𑀢𑁆𑀣𑀸𑀳𑀭𑀡𑀜𑁆𑀘 𑀦𑀸𑀫𑁂𑀢𑀁 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑀲𑁆𑀲 𑀳𑁄𑀢𑀺. 𑀬𑁄 𑀏𑀯𑀁 𑀓𑀸𑀬𑁂 𑀘 𑀚𑀻𑀯𑀺𑀢𑁂 𑀘 𑀅𑀦𑀧𑁂𑀓𑁆𑀔𑁄 𑀳𑁄𑀢𑀺, 𑀲𑁄 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀫𑁆𑀧𑀺 𑀕𑀳𑁂𑀢𑀼𑀁 𑀲𑀫𑀢𑁆𑀣𑁄 𑀳𑁄𑀢𑀺, 𑀫𑀬𑀸 𑀧𑀦 𑀧𑀝𑀺𑀩𑀸𑀳𑀺𑀢𑁄𑀧𑀺 𑀏𑀲 𑀦 𑀑𑀭𑀫𑀺𑀲𑁆𑀲𑀢𑀺, 𑀲𑀢𑁆𑀣𑀸𑀭𑀸 𑀧𑀝𑀺𑀩𑀸𑀳𑀺𑀢𑁄 𑀑𑀭𑀫𑀺𑀲𑁆𑀲𑀢𑀻’’𑀢𑀺 𑀣𑁂𑀭𑀲𑁆𑀲 𑀅𑀢𑁆𑀣𑀓𑀸𑀫𑁄 𑀯𑀺𑀬 𑀳𑀼𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀚𑀮𑀸𑀢𑀺 𑀚𑀮𑀫𑀸𑀦𑀸. 𑀧𑀸𑀤𑁂 𑀯𑀦𑁆𑀤𑀸𑀫𑀺 𑀘𑀓𑁆𑀔𑀼𑀫𑀸𑀢𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸 𑀢𑀯 𑀧𑀸𑀤𑁂 𑀯𑀦𑁆𑀤𑀸𑀫𑀺. 𑀚𑀼𑀢𑀺𑀦𑁆𑀥𑀭𑀸𑀢𑀺 𑀆𑀦𑀼𑀪𑀸𑀯𑀥𑀭𑀸. 𑀅𑀧𑁆𑀧𑀢𑁆𑀢𑀫𑀸𑀦𑀲𑁄𑀢𑀺 𑀅𑀧𑁆𑀧𑀢𑁆𑀢𑀅𑀭𑀳𑀢𑁆𑀢𑁄. 𑀲𑁂𑀔𑁄𑀢𑀺 𑀲𑀻𑀮𑀸𑀤𑀻𑀦𑀺 𑀲𑀺𑀓𑁆𑀔𑀫𑀸𑀦𑁄 𑀲𑀓𑀭𑀡𑀻𑀬𑁄. 𑀚𑀦𑁂 𑀲𑀼𑀢𑀸𑀢𑀺 𑀚𑀦𑁂 𑀯𑀺𑀲𑁆𑀲𑀼𑀢𑀸. 𑀲𑀢𑁆𑀣𑀁 𑀆𑀳𑀭𑀺𑀢𑀁 𑀳𑁄𑀢𑀻𑀢𑀺 𑀣𑁂𑀭𑁄 𑀓𑀺𑀭 ‘‘𑀓𑀺𑀁 𑀫𑀬𑁆𑀳𑀁 𑀇𑀫𑀺𑀦𑀸 𑀚𑀻𑀯𑀺𑀢𑁂𑀦𑀸’’𑀢𑀺? 𑀉𑀢𑁆𑀢𑀸𑀦𑁄 𑀦𑀺𑀧𑀚𑁆𑀚𑀺𑀢𑁆𑀯𑀸 𑀲𑀢𑁆𑀣𑁂𑀦 𑀕𑀮𑀦𑀸𑀴𑀺𑀁 𑀙𑀺𑀦𑁆𑀤𑀺, 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀺𑀁𑀲𑀼. 𑀣𑁂𑀭𑁄 𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀢𑀁𑀬𑁂𑀯 𑀯𑁂𑀤𑀦𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀲𑀫𑁆𑀫𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑀫𑀲𑀻𑀲𑀻 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀲𑀫𑀲𑀻𑀲𑀻 𑀦𑀸𑀫 𑀢𑀺𑀯𑀺𑀥𑁄 𑀳𑁄𑀢𑀺 𑀇𑀭𑀺𑀬𑀸𑀧𑀣𑀲𑀫𑀲𑀻𑀲𑀻, 𑀭𑁄𑀕𑀲𑀫𑀲𑀻𑀲𑀻, 𑀚𑀻𑀯𑀺𑀢𑀲𑀫𑀲𑀻𑀲𑀻𑀢𑀺.

𑀢𑀢𑁆𑀣 𑀬𑁄 𑀞𑀸𑀦𑀸𑀤𑀻𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀅𑀜𑁆𑀜𑀢𑀭𑀁 𑀅𑀥𑀺𑀝𑁆𑀞𑀸𑀬 𑁋 ‘‘𑀇𑀫𑀁 𑀅𑀓𑁄𑀧𑁂𑀢𑁆𑀯𑀸𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑀺, 𑀅𑀣𑀲𑁆𑀲 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺 𑀘 𑀇𑀭𑀺𑀬𑀸𑀧𑀣𑀓𑁄𑀧𑀦𑀜𑁆𑀘 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀳𑁄𑀢𑀺. 𑀅𑀬𑀁 𑀇𑀭𑀺𑀬𑀸𑀧𑀣𑀲𑀫𑀲𑀻𑀲𑀻 𑀦𑀸𑀫. 𑀬𑁄 𑀧𑀦 𑀘𑀓𑁆𑀔𑀼𑀭𑁄𑀕𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀲𑀢𑀺 𑁋 ‘‘𑀇𑀢𑁄 𑀅𑀦𑀼𑀝𑁆𑀞𑀺𑀢𑁄𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑀺, 𑀅𑀣𑀲𑁆𑀲 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺 𑀘 𑀭𑁄𑀕𑀢𑁄 𑀯𑀼𑀝𑁆𑀞𑀸𑀦𑀜𑁆𑀘 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀳𑁄𑀢𑀺. 𑀅𑀬𑀁 𑀭𑁄𑀕𑀲𑀫𑀲𑀻𑀲𑀻 𑀦𑀸𑀫. 𑀓𑁂𑀘𑀺 𑀧𑀦 𑀢𑀲𑁆𑀫𑀺𑀁𑀬𑁂𑀯 𑀇𑀭𑀺𑀬𑀸𑀧𑀣𑁂 𑀢𑀲𑁆𑀫𑀺𑀜𑁆𑀘 𑀭𑁄𑀕𑁂 𑀧𑀭𑀺𑀦𑀺𑀩𑁆𑀩𑀸𑀦𑀯𑀲𑁂𑀦𑁂𑀢𑁆𑀣 𑀲𑀫𑀲𑀻𑀲𑀺𑀢𑀁 𑀧𑀜𑁆𑀜𑀸𑀧𑁂𑀦𑁆𑀢𑀺. 𑀬𑀲𑁆𑀲 𑀧𑀦 𑀆𑀲𑀯𑀓𑁆𑀔𑀬𑁄 𑀘 𑀚𑀻𑀯𑀺𑀢𑀓𑁆𑀔𑀬𑁄 𑀘 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀳𑁄𑀢𑀺. 𑀅𑀬𑀁 𑀚𑀻𑀯𑀺𑀢𑀲𑀫𑀲𑀻𑀲𑀻 𑀦𑀸𑀫. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋 ‘‘𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀆𑀲𑀯𑀧𑀭𑀺𑀬𑀸𑀤𑀸𑀦𑀜𑁆𑀘 𑀳𑁄𑀢𑀺 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀜𑁆𑀘, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀲𑀫𑀲𑀻𑀲𑀻’’𑀢𑀺 (𑀧𑀼. 𑀧. 𑁧𑁬).

𑀏𑀢𑁆𑀣 𑀘 𑀧𑀯𑀢𑁆𑀢𑀺𑀲𑀻𑀲𑀁 𑀓𑀺𑀮𑁂𑀲𑀲𑀻𑀲𑀦𑁆𑀢𑀺 𑀤𑁆𑀯𑁂 𑀲𑀻𑀲𑀸𑀦𑀺. 𑀢𑀢𑁆𑀣 𑀧𑀯𑀢𑁆𑀢𑀺𑀲𑀻𑀲𑀁 𑀦𑀸𑀫 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀓𑀺𑀮𑁂𑀲𑀲𑀻𑀲𑀁 𑀦𑀸𑀫 𑀅𑀯𑀺𑀚𑁆𑀚𑀸. 𑀢𑁂𑀲𑀼 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀘𑀼𑀢𑀺𑀘𑀺𑀢𑁆𑀢𑀁 𑀔𑁂𑀧𑁂𑀢𑀺, 𑀅𑀯𑀺𑀚𑁆𑀚𑀸 𑀫𑀕𑁆𑀕𑀘𑀺𑀢𑁆𑀢𑀁. 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀏𑀓𑀢𑁄 𑀉𑀧𑁆𑀧𑀸𑀤𑁄 𑀦𑀢𑁆𑀣𑀺. 𑀫𑀕𑁆𑀕𑀸𑀦𑀦𑁆𑀢𑀭𑀁 𑀧𑀦 𑀨𑀮𑀁, 𑀨𑀮𑀸𑀦𑀦𑁆𑀢𑀭𑀁 𑀪𑀯𑀗𑁆𑀕𑀁, 𑀪𑀯𑀗𑁆𑀕𑀢𑁄 𑀯𑀼𑀝𑁆𑀞𑀸𑀬 𑀧𑀘𑁆𑀘𑀯𑁂𑀓𑁆𑀔𑀡𑀁, 𑀢𑀁 𑀧𑀭𑀺𑀧𑀼𑀡𑁆𑀡𑀁 𑀯𑀸 𑀳𑁄𑀢𑀺 𑀅𑀧𑀭𑀺𑀧𑀼𑀡𑁆𑀡𑀁 𑀯𑀸. 𑀢𑀺𑀔𑀺𑀡𑁂𑀦 𑀅𑀲𑀺𑀦𑀸 𑀲𑀻𑀲𑁂 𑀙𑀺𑀚𑁆𑀚𑀦𑁆𑀢𑁂𑀧𑀺 𑀳𑀺 𑀏𑀓𑁄 𑀯𑀸 𑀤𑁆𑀯𑁂 𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀯𑀸𑀭𑀸 𑀅𑀯𑀲𑁆𑀲𑀁 𑀉𑀧𑁆𑀧𑀚𑁆𑀚𑀦𑁆𑀢𑀺𑀬𑁂𑀯, 𑀘𑀺𑀢𑁆𑀢𑀸𑀦𑀁 𑀧𑀦 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸𑀬 𑀆𑀲𑀯𑀓𑁆𑀔𑀬𑁄 𑀘 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀜𑁆𑀘 𑀏𑀓𑀓𑁆𑀔𑀡𑁂 𑀯𑀺𑀬 𑀧𑀜𑁆𑀜𑀸𑀬𑀢𑀺.

𑀲𑀫𑀽𑀮𑀁 𑀢𑀡𑁆𑀳𑀫𑀩𑁆𑀩𑀼𑀬𑁆𑀳𑀸𑀢𑀺 𑀅𑀯𑀺𑀚𑁆𑀚𑀸𑀫𑀽𑀮𑁂𑀦 𑀲𑀫𑀽𑀮𑀓𑀁 𑀢𑀡𑁆𑀳𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀉𑀧𑁆𑀧𑀸𑀝𑁂𑀢𑁆𑀯𑀸. 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄.

𑀯𑀺𑀯𑀢𑁆𑀢𑀓𑁆𑀔𑀦𑁆𑀥𑀦𑁆𑀢𑀺 𑀧𑀭𑀺𑀯𑀢𑁆𑀢𑀓𑁆𑀔𑀦𑁆𑀥𑀁. 𑀲𑁂𑀫𑀸𑀦𑀦𑁆𑀢𑀺 𑀉𑀢𑁆𑀢𑀸𑀦𑀁 𑀳𑀼𑀢𑁆𑀯𑀸 𑀲𑀬𑀺𑀢𑀁 𑀳𑁄𑀢𑀺. 𑀣𑁂𑀭𑁄 𑀧𑀦 𑀓𑀺𑀜𑁆𑀘𑀸𑀧𑀺 𑀉𑀢𑁆𑀢𑀸𑀦𑀓𑁄 𑀲𑀬𑀺𑀢𑁄, 𑀢𑀣𑀸𑀧𑀺𑀲𑁆𑀲 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀧𑀭𑀺𑀘𑀺𑀢𑀲𑀬𑀦𑀢𑁆𑀢𑀸 𑀲𑀻𑀲𑀁 𑀤𑀓𑁆𑀔𑀺𑀡𑀢𑁄𑀯 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑀁. 𑀥𑀽𑀫𑀸𑀬𑀺𑀢𑀢𑁆𑀢𑀦𑁆𑀢𑀺 𑀥𑀽𑀫𑀸𑀬𑀺𑀢𑀪𑀸𑀯𑀁. 𑀢𑀲𑁆𑀫𑀺𑀁 𑀳𑀺 𑀔𑀡𑁂 𑀥𑀽𑀫𑀯𑀮𑀸𑀳𑀓𑀸 𑀯𑀺𑀬 𑀢𑀺𑀫𑀺𑀭𑀯𑀮𑀸𑀳𑀓𑀸 𑀯𑀺𑀬 𑀘 𑀉𑀝𑁆𑀞𑀳𑀺𑀁𑀲𑀼. 𑀯𑀺𑀜𑁆𑀜𑀸𑀡𑀁 𑀲𑀫𑀦𑁆𑀯𑁂𑀲𑀢𑀻𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀧𑀭𑀺𑀬𑁂𑀲𑀢𑀺. 𑀅𑀧𑁆𑀧𑀢𑀺𑀝𑁆𑀞𑀺𑀢𑁂𑀦𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑁂𑀦 𑀅𑀧𑁆𑀧𑀢𑀺𑀝𑁆𑀞𑀺𑀢𑁂𑀦, 𑀅𑀧𑁆𑀧𑀢𑀺𑀝𑁆𑀞𑀺𑀢𑀓𑀸𑀭𑀡𑀸𑀢𑀺 𑀅𑀢𑁆𑀣𑁄. 𑀩𑁂𑀮𑀼𑀯𑀧𑀡𑁆𑀟𑀼𑀯𑀻𑀡𑀦𑁆𑀢𑀺 𑀩𑁂𑀮𑀼𑀯𑀧𑀓𑁆𑀓𑀁 𑀯𑀺𑀬 𑀧𑀡𑁆𑀟𑀼𑀯𑀡𑁆𑀡𑀁 𑀲𑀼𑀯𑀡𑁆𑀡𑀫𑀳𑀸𑀯𑀻𑀡𑀁. 𑀆𑀤𑀸𑀬𑀸𑀢𑀺 𑀓𑀘𑁆𑀙𑁂 𑀞𑀧𑁂𑀢𑁆𑀯𑀸. 𑀉𑀧𑀲𑀗𑁆𑀓𑀫𑀻𑀢𑀺 ‘‘𑀕𑁄𑀥𑀺𑀓𑀢𑁆𑀣𑁂𑀭𑀲𑁆𑀲 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀁 𑀦 𑀚𑀸𑀦𑀸𑀫𑀺, 𑀲𑀫𑀡𑀁 𑀕𑁄𑀢𑀫𑀁 𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀓𑁆𑀓𑀗𑁆𑀔𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀔𑀼𑀤𑁆𑀤𑀓𑀤𑀸𑀭𑀓𑀯𑀡𑁆𑀡𑀻 𑀳𑀼𑀢𑁆𑀯𑀸 𑀉𑀧𑀲𑀗𑁆𑀓𑀫𑀺. 𑀦𑀸𑀥𑀺𑀕𑀘𑁆𑀙𑀸𑀫𑀻𑀢𑀺 𑀦 𑀧𑀲𑁆𑀲𑀸𑀫𑀺. 𑀲𑁄𑀓𑀧𑀭𑁂𑀢𑀲𑁆𑀲𑀸𑀢𑀺 𑀲𑁄𑀓𑁂𑀦 𑀨𑀼𑀝𑁆𑀞𑀲𑁆𑀲. 𑀅𑀪𑀲𑁆𑀲𑀣𑀸𑀢𑀺 𑀧𑀸𑀤𑀧𑀺𑀝𑁆𑀞𑀺𑀬𑀁 𑀧𑀢𑀺𑀢𑀸. 𑀢𑀢𑀺𑀬𑀁.

𑁪. 𑀲𑀢𑁆𑀢𑀯𑀲𑁆𑀲𑀸𑀦𑀼𑀩𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁦. 𑀘𑀢𑀼𑀢𑁆𑀣𑁂 𑀲𑀢𑁆𑀢 𑀯𑀲𑁆𑀲𑀸𑀦𑀻𑀢𑀺 𑀧𑀼𑀭𑁂 𑀩𑁄𑀥𑀺𑀬𑀸 𑀙𑀩𑁆𑀩𑀲𑁆𑀲𑀸𑀦𑀺, 𑀩𑁄𑀥𑀺𑀢𑁄 𑀧𑀘𑁆𑀙𑀸 𑀏𑀓𑀁 𑀯𑀲𑁆𑀲𑀁. 𑀑𑀢𑀸𑀭𑀸𑀧𑁂𑀓𑁆𑀔𑁄𑀢𑀺 ‘‘𑀲𑀘𑁂 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀓𑀸𑀬𑀤𑁆𑀯𑀸𑀭𑀸𑀤𑀻𑀲𑀼 𑀓𑀺𑀜𑁆𑀘𑀺𑀤𑁂𑀯 𑀅𑀦𑀦𑀼𑀘𑁆𑀙𑀯𑀺𑀓𑀁 𑀧𑀲𑁆𑀲𑀸𑀫𑀺, 𑀘𑁄𑀤𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀏𑀯𑀁 𑀯𑀺𑀯𑀭𑀁 𑀅𑀧𑁂𑀓𑁆𑀔𑀫𑀸𑀦𑁄. 𑀅𑀮𑀪𑀫𑀸𑀦𑁄𑀢𑀺 𑀭𑀣𑀭𑁂𑀡𑀼𑀫𑀢𑁆𑀢𑀫𑁆𑀧𑀺 𑀅𑀯𑀓𑁆𑀔𑀮𑀺𑀢𑀁 𑀅𑀧𑀲𑁆𑀲𑀦𑁆𑀢𑁄. 𑀢𑁂𑀦𑀸𑀳 𑁋

‘‘𑀲𑀢𑁆𑀢 𑀯𑀲𑁆𑀲𑀸𑀦𑀺 𑀪𑀕𑀯𑀦𑁆𑀢𑀁, 𑀅𑀦𑀼𑀩𑀦𑁆𑀥𑀺𑀁 𑀧𑀤𑀸𑀧𑀤𑀁;

𑀑𑀢𑀸𑀭𑀁 𑀦𑀸𑀥𑀺𑀕𑀘𑁆𑀙𑀺𑀲𑁆𑀲𑀁, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀢𑀻𑀫𑀢𑁄’’𑀢𑀺. (𑀲𑀼. 𑀦𑀺. 𑁪𑁪𑁮);

𑀉𑀧𑀲𑀗𑁆𑀓𑀫𑀻𑀢𑀺 ‘‘𑀅𑀚𑁆𑀚 𑀲𑀫𑀡𑀁 𑀕𑁄𑀢𑀫𑀁 𑀅𑀢𑀺𑀕𑀳𑁂𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀲𑀗𑁆𑀓𑀫𑀺.

𑀛𑀸𑀬𑀲𑀻𑀢𑀺 𑀛𑀸𑀬𑀦𑁆𑀢𑁄 𑀅𑀯𑀚𑁆𑀛𑀸𑀬𑀦𑁆𑀢𑁄 𑀦𑀺𑀲𑀺𑀦𑁆𑀦𑁄𑀲𑀻𑀢𑀺 𑀯𑀤𑀢𑀺. 𑀯𑀺𑀢𑁆𑀢𑀁 𑀦𑀼 𑀚𑀻𑀦𑁄𑀢𑀺 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀚𑀺