📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂

𑀲𑀕𑀸𑀣𑀸𑀯𑀕𑁆𑀕𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸

𑁧. 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 ¶ ¶ 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀧𑀪𑀯𑀦𑀺𑀲𑁆𑀲𑀬𑀯𑀺𑀲𑀼𑀤𑁆𑀥𑀺𑀧𑀝𑀺𑀯𑁂𑀤𑀦𑀢𑁆𑀣𑀁, 𑀢𑀁 𑀧𑀦 𑀥𑀫𑁆𑀫𑀲𑀁𑀯𑀡𑁆𑀡𑀦𑀸𑀲𑀼 𑀯𑀺𑀜𑁆𑀜𑀽𑀦𑀁 𑀩𑀳𑀼𑀫𑀸𑀦𑀼𑀧𑁆𑀧𑀸𑀤𑀦𑀢𑁆𑀣𑀁, 𑀢𑀁 𑀲𑀫𑁆𑀫𑀤𑁂𑀯 𑀢𑁂𑀲𑀁 𑀉𑀕𑁆𑀕𑀳𑀡𑀥𑀸𑀭𑀡𑀸𑀤𑀺𑀓𑁆𑀓𑀫𑀮𑀤𑁆𑀥𑀩𑁆𑀩𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀲𑀩𑁆𑀩𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀢𑁆𑀣𑀦𑁆𑀢𑀺. 𑀅𑀣 𑀯𑀸 𑀫𑀗𑁆𑀕𑀮𑀪𑀸𑀯𑀢𑁄, 𑀲𑀩𑁆𑀩𑀓𑀺𑀭𑀺𑀬𑀸𑀲𑀼 𑀧𑀼𑀩𑁆𑀩𑀓𑀺𑀘𑁆𑀘𑀪𑀸𑀯𑀢𑁄, 𑀧𑀡𑁆𑀟𑀺𑀢𑁂𑀳𑀺 𑀲𑀫𑀸𑀘𑀭𑀺𑀢𑀪𑀸𑀯𑀢𑁄, 𑀆𑀬𑀢𑀺𑀁 𑀧𑀭𑁂𑀲𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑀢𑁄 𑀘 𑀲𑀁𑀯𑀡𑁆𑀡𑀦𑀸𑀬𑀁 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀺𑀭𑀺𑀬𑀸𑀢𑀺. 𑀅𑀣 𑀯𑀸 𑀭𑀢𑀦𑀢𑁆𑀢𑀬𑀧𑀡𑀸𑀫𑀓𑀭𑀡𑀁 𑀧𑀽𑀚𑀦𑀻𑀬𑀧𑀽𑀚𑀸𑀧𑀼𑀜𑁆𑀜𑀯𑀺𑀲𑁂𑀲𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀁, 𑀢𑀁 𑀅𑀢𑁆𑀢𑀦𑁄 𑀬𑀣𑀸𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀓𑀲𑁆𑀲 𑀓𑀫𑁆𑀫𑀲𑁆𑀲 𑀩𑀮𑀸𑀦𑀼𑀧𑁆𑀧𑀤𑀸𑀦𑀢𑁆𑀣𑀁, 𑀅𑀦𑁆𑀢𑀭𑀸 𑀘 𑀢𑀲𑁆𑀲 𑀅𑀲𑀁𑀓𑁄𑀘𑀸𑀧𑀦𑀢𑁆𑀣𑀁, 𑀢𑀤𑀼𑀪𑀬𑀁 𑀅𑀦𑀦𑁆𑀢𑀭𑀸𑀬𑁂𑀦 𑀅𑀝𑁆𑀞𑀓𑀣𑀸𑀬 𑀧𑀭𑀺𑀲𑀫𑀸𑀧𑀦𑀢𑁆𑀣𑀦𑁆𑀢𑀺 𑀇𑀤𑀫𑁂𑀯 𑀘 𑀧𑀬𑁄𑀚𑀦𑀁 𑀆𑀘𑀭𑀺𑀬𑁂𑀦 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀇𑀢𑀺 𑀫𑁂 𑀧𑀲𑀦𑁆𑀦𑀫𑀢𑀺𑀦𑁄…𑀧𑁂… 𑀢𑀲𑁆𑀲𑀸𑀦𑀼𑀪𑀸𑀯𑁂𑀦𑀸’’𑀢𑀺. 𑀯𑀢𑁆𑀣𑀼𑀢𑁆𑀢𑀬𑀧𑀽𑀚𑀸 𑀳𑀺 𑀦𑀺𑀭𑀢𑀺𑀲𑀬𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀲𑀁𑀩𑀼𑀤𑁆𑀥𑀺𑀬𑀸 𑀅𑀧𑀭𑀺𑀫𑁂𑀬𑁆𑀬𑀧𑀪𑀸𑀯𑁄 𑀧𑀼𑀜𑁆𑀜𑀸𑀢𑀺𑀲𑀬𑁄𑀢𑀺 𑀩𑀳𑀼𑀯𑀺𑀥𑀦𑁆𑀢𑀭𑀸𑀬𑁂𑀧𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 ¶ 𑀅𑀦𑁆𑀢𑀭𑀸𑀬𑀦𑀺𑀩𑀦𑁆𑀥𑀦𑀲𑀓𑀮𑀲𑀁𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀸𑀬 𑀧𑀳𑁄𑀢𑀺, 𑀪𑀬𑀸𑀤𑀺𑀉𑀧𑀤𑁆𑀤𑀯𑀜𑁆𑀘 𑀦𑀺𑀯𑀸𑀭𑁂𑀢𑀺. 𑀬𑀣𑀸𑀳 ‘‘𑀧𑀽𑀚𑀸𑀭𑀳𑁂 𑀧𑀽𑀚𑀬𑀢𑁄’’𑀢𑀺𑀆𑀤𑀺 (𑀥. 𑀧. 𑁧𑁯𑁫; 𑀅𑀧. 𑀣𑁂𑀭 𑁧.𑁧𑁦.𑁧), 𑀢𑀣𑀸 ‘‘𑀬𑁂, 𑀪𑀺𑀓𑁆𑀔𑀯𑁂, 𑀩𑀼𑀤𑁆𑀥𑁂 𑀧𑀲𑀦𑁆𑀦𑀸, 𑀅𑀕𑁆𑀕𑁂 𑀢𑁂 𑀧𑀲𑀦𑁆𑀦𑀸, 𑀅𑀕𑁆𑀕𑁂 𑀔𑁄 𑀧𑀦 𑀧𑀲𑀦𑁆𑀦𑀸𑀦𑀁 𑀅𑀕𑁆𑀕𑁄 𑀯𑀺𑀧𑀸𑀓𑁄 𑀳𑁄𑀢𑀻’’𑀢𑀺𑀆𑀤𑀺 (𑀇𑀢𑀺𑀯𑀼. 𑁯𑁦).

‘‘𑀩𑀼𑀤𑁆𑀥𑁄𑀢𑀺 ¶ 𑀓𑀺𑀢𑁆𑀢𑀬𑀦𑁆𑀢𑀲𑁆𑀲, 𑀓𑀸𑀬𑁂 𑀪𑀯𑀢𑀺 𑀬𑀸 𑀧𑀻𑀢𑀺;

𑀯𑀭𑀫𑁂𑀯 𑀳𑀺 𑀲𑀸 𑀧𑀻𑀢𑀺, 𑀓𑀲𑀺𑀡𑁂𑀦𑀧𑀺 𑀚𑀫𑁆𑀩𑀼𑀤𑀻𑀧𑀲𑁆𑀲;

𑀥𑀫𑁆𑀫𑁄𑀢𑀺…𑀧𑁂…, 𑀲𑀗𑁆𑀖𑁄𑀢𑀺…𑀧𑁂…, 𑀚𑀫𑁆𑀩𑀼𑀤𑀻𑀧𑀲𑁆𑀲𑀸’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁬);

𑀢𑀣𑀸 ‘‘𑀬𑀲𑁆𑀫𑀺𑀁, 𑀫𑀳𑀸𑀦𑀸𑀫, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲…𑀧𑁂… 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁬.𑁧𑁦; 𑁧𑁧.𑁧𑁧). ‘‘𑀅𑀭𑀜𑁆𑀜𑁂 𑀭𑀼𑀓𑁆𑀔𑀫𑀽𑀮𑁂 𑀯𑀸…𑀧𑁂… 𑀪𑀬𑀁 𑀯𑀸 𑀙𑀫𑁆𑀪𑀺𑀢𑀢𑁆𑀢𑀁 𑀯𑀸 𑀮𑁄𑀫𑀳𑀁𑀲𑁄 𑀦 𑀳𑁂𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁧.𑁨𑁪𑁯) 𑀘.

𑀢𑀢𑁆𑀣 𑀬𑀲𑁆𑀲 𑀯𑀢𑁆𑀣𑀼𑀢𑁆𑀢𑀬𑀲𑁆𑀲 𑀯𑀦𑁆𑀤𑀦𑀁 𑀓𑀢𑁆𑀢𑀼𑀓𑀸𑀫𑁄, 𑀢𑀲𑁆𑀲 𑀕𑀼𑀡𑀸𑀢𑀺𑀲𑀬𑀬𑁄𑀕𑀲𑀦𑁆𑀤𑀲𑁆𑀲𑀦𑀢𑁆𑀣𑀁 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺𑀆𑀤𑀺𑀦𑀸 𑀕𑀸𑀣𑀢𑁆𑀢𑀬𑀫𑀸𑀳. 𑀕𑀼𑀡𑀸𑀢𑀺𑀲𑀬𑀬𑁄𑀕𑁂𑀦 𑀳𑀺 𑀯𑀦𑁆𑀤𑀦𑀸𑀭𑀳𑀪𑀸𑀯𑁄, 𑀯𑀦𑁆𑀤𑀦𑀸𑀭𑀳𑁂 𑀘 𑀓𑀢𑀸 𑀯𑀦𑁆𑀤𑀦𑀸 𑀬𑀣𑀸𑀥𑀺𑀧𑁆𑀧𑁂𑀢𑀁 𑀧𑀬𑁄𑀚𑀦𑀁 𑀲𑀸𑀥𑁂𑀢𑀻𑀢𑀺. 𑀢𑀢𑁆𑀣 𑀬𑀲𑁆𑀲𑀸 𑀤𑁂𑀲𑀦𑀸𑀬 𑀲𑀁𑀯𑀡𑁆𑀡𑀦𑀁 𑀓𑀢𑁆𑀢𑀼𑀓𑀸𑀫𑁄, 𑀲𑀸 𑀦 𑀯𑀺𑀦𑀬𑀤𑁂𑀲𑀦𑀸 𑀯𑀺𑀬 𑀓𑀭𑀼𑀡𑀸𑀧𑁆𑀧𑀥𑀸𑀦𑀸, 𑀦𑀸𑀧𑀺 𑀅𑀪𑀺𑀥𑀫𑁆𑀫𑀤𑁂𑀲𑀦𑀸 𑀯𑀺𑀬 𑀧𑀜𑁆𑀜𑀸𑀧𑁆𑀧𑀥𑀸𑀦𑀸, 𑀅𑀣 𑀔𑁄 𑀓𑀭𑀼𑀡𑀸𑀧𑀜𑁆𑀜𑀸𑀧𑁆𑀧𑀥𑀸𑀦𑀸𑀢𑀺 𑀢𑀤𑀼𑀪𑀬𑀧𑁆𑀧𑀥𑀸𑀦𑀫𑁂𑀯 𑀢𑀸𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀣𑁄𑀫𑀦𑀁 𑀓𑀸𑀢𑀼𑀁 𑀢𑀫𑁆𑀫𑀽𑀮𑀓𑀢𑁆𑀢𑀸 𑀲𑁂𑀲𑀭𑀢𑀦𑀸𑀦𑀁 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀺𑀭𑀢𑀻𑀢𑀺 𑀓𑀭𑀼𑀡𑀸, 𑀧𑀭𑀤𑀼𑀓𑁆𑀔𑀁 𑀯𑀺𑀓𑁆𑀔𑀺𑀧𑀢𑀺 𑀅𑀧𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀓𑀺𑀡𑀸𑀢𑀻𑀢𑀺 𑀓𑀭𑀼𑀡𑀸, 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀓𑀸𑀭𑀼𑀡𑀺𑀓𑀁 𑀳𑀺𑀁𑀲𑀢𑀺 𑀯𑀺𑀩𑀸𑀥𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀲𑀸𑀥𑀽𑀦𑀁 𑀓𑀫𑁆𑀧𑀦𑀁 𑀳𑀤𑀬𑀔𑁂𑀤𑀁 𑀓𑀭𑁄𑀢𑀻𑀢𑀺 𑀯𑀸 𑀓𑀭𑀼𑀡𑀸. 𑀅𑀣 𑀯𑀸 𑀓𑀫𑀺𑀢𑀺 𑀲𑀼𑀔𑀁, 𑀢𑀁 𑀭𑀼𑀦𑁆𑀥𑀢𑀻𑀢𑀺 𑀓𑀭𑀼𑀡𑀸. 𑀏𑀲𑀸 𑀳𑀺 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸𑀮𑀓𑁆𑀔𑀡𑀸 𑀅𑀢𑁆𑀢𑀲𑀼𑀔𑀦𑀺𑀭𑀧𑁂𑀓𑁆𑀔𑀢𑀸𑀬 𑀓𑀸𑀭𑀼𑀡𑀺𑀓𑀸𑀦𑀁 𑀲𑀼𑀔𑀁 𑀭𑀼𑀦𑁆𑀥𑀢𑀺 𑀯𑀺𑀩𑀦𑁆𑀥𑀢𑀻𑀢𑀺 𑀅𑀢𑁆𑀣𑁄. 𑀓𑀭𑀼𑀡𑀸𑀬 𑀲𑀻𑀢𑀮𑀁 𑀓𑀭𑀼𑀡𑀸𑀲𑀻𑀢𑀮𑀁, 𑀓𑀭𑀼𑀡𑀸𑀲𑀻𑀢𑀮𑀁 𑀳𑀤𑀬𑀁 𑀅𑀲𑁆𑀲𑀸𑀢𑀺 𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑁄, 𑀢𑀁 𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑀁.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀭𑁂𑀲𑀁 𑀳𑀺𑀢𑁄𑀧𑀲𑀁𑀳𑀸𑀭𑀲𑀼𑀔𑀸𑀤𑀺𑀅𑀧𑀭𑀺𑀳𑀸𑀦𑀺𑀘𑁆𑀙𑀦𑀲𑀪𑀸𑀯𑀢𑀸𑀬, 𑀩𑁆𑀬𑀸𑀧𑀸𑀤𑀸𑀭𑀢𑀻𑀦𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑀸𑀬 𑀘 𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑀲𑀦𑁆𑀢𑀸𑀧𑀯𑀺𑀘𑁆𑀙𑁂𑀤𑀦𑀸𑀓𑀸𑀭𑀧𑀯𑀢𑁆𑀢𑀺𑀬𑀸 𑀫𑁂𑀢𑁆𑀢𑀸𑀫𑀼𑀤𑀺𑀢𑀸𑀦𑀫𑁆𑀧𑀺 𑀘𑀺𑀢𑁆𑀢𑀲𑀻𑀢𑀮𑀪𑀸𑀯𑀓𑀸𑀭𑀡𑀢𑀸 𑀉𑀧𑀮𑀩𑁆𑀪𑀢𑀺, 𑀢𑀣𑀸𑀧𑀺 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀧𑀭𑀽𑀧𑀢𑀸𑀧𑀸𑀲𑀳𑀦𑀭𑀲𑀸 𑀅𑀯𑀺𑀳𑀺𑀁𑀲𑀸𑀪𑀽𑀢𑀸 ¶ 𑀓𑀭𑀼𑀡𑀸𑀯 𑀯𑀺𑀲𑁂𑀲𑁂𑀦 𑀪𑀕𑀯𑀢𑁄 𑀘𑀺𑀢𑁆𑀢𑀲𑁆𑀲 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺 𑀯𑀺𑀬 𑀲𑀻𑀢𑀺𑀪𑀸𑀯𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺. 𑀓𑀭𑀼𑀡𑀸𑀫𑀼𑀔𑁂𑀦 𑀯𑀸 𑀫𑁂𑀢𑁆𑀢𑀸𑀫𑀼𑀤𑀺𑀢𑀸𑀦𑀫𑁆𑀧𑀺 𑀳𑀤𑀬𑀲𑀻𑀢𑀮𑀪𑀸𑀯𑀓𑀸𑀭𑀡𑀢𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸 ¶ .

𑀅𑀣 𑀯𑀸 𑀙𑀅𑀲𑀸𑀥𑀸𑀭𑀡𑀜𑀸𑀡𑀯𑀺𑀲𑁂𑀲𑀦𑀺𑀩𑀦𑁆𑀥𑀦𑀪𑀽𑀢𑀸 𑀲𑀸𑀢𑀺𑀲𑀬𑀁 𑀦𑀺𑀭𑀯𑀲𑁂𑀲𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀯𑀺𑀬 𑀲𑀯𑀺𑀲𑀬𑀩𑁆𑀬𑀸𑀧𑀺𑀢𑀸𑀬 𑀫𑀳𑀸𑀓𑀭𑀼𑀡𑀸𑀪𑀸𑀯𑀫𑀼𑀧𑀕𑀢𑀸 𑀓𑀭𑀼𑀡𑀸𑀯 𑀪𑀕𑀯𑀢𑁄 𑀅𑀪𑀺𑀲𑀬𑁂𑀦 𑀳𑀤𑀬𑀲𑀻𑀢𑀮𑀪𑀸𑀯𑀳𑁂𑀢𑀽𑀢𑀺 𑀆𑀳 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺.

𑀅𑀣 𑀯𑀸 𑀲𑀢𑀺𑀧𑀺 𑀫𑁂𑀢𑁆𑀢𑀸𑀫𑀼𑀤𑀺𑀢𑀸𑀦𑀁 𑀲𑀸𑀢𑀺𑀲𑀬𑁂 𑀳𑀤𑀬𑀲𑀻𑀢𑀺𑀪𑀸𑀯𑀦𑀺𑀩𑀦𑁆𑀥𑀦𑀢𑁆𑀢𑁂 𑀲𑀓𑀮𑀩𑀼𑀤𑁆𑀥𑀕𑀼𑀡𑀯𑀺𑀲𑁂𑀲𑀓𑀸𑀭𑀡𑀢𑀸𑀬 𑀢𑀸𑀲𑀫𑁆𑀧𑀺 𑀓𑀸𑀭𑀡𑀦𑁆𑀢𑀺 𑀓𑀭𑀼𑀡𑀸𑀯 𑀪𑀕𑀯𑀢𑁄 ‘‘𑀳𑀤𑀬𑀲𑀻𑀢𑀮𑀪𑀸𑀯𑀓𑀸𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀸. 𑀓𑀭𑀼𑀡𑀸𑀦𑀺𑀤𑀸𑀦𑀸 𑀳𑀺 𑀲𑀩𑁆𑀩𑁂𑀧𑀺 𑀩𑀼𑀤𑁆𑀥𑀕𑀼𑀡𑀸, 𑀓𑀭𑀼𑀡𑀸𑀦𑀼𑀪𑀸𑀯𑀦𑀺𑀩𑁆𑀩𑀸𑀧𑀺𑀬𑀫𑀸𑀦𑀲𑀁𑀲𑀸𑀭𑀤𑀼𑀓𑁆𑀔𑀲𑀦𑁆𑀢𑀸𑀧𑀲𑁆𑀲 𑀳𑀺 𑀪𑀕𑀯𑀢𑁄 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸𑀬 𑀅𑀦𑁂𑀓𑀸𑀦𑀺𑀧𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀸𑀦𑀁 𑀅𑀓𑀺𑀮𑀦𑁆𑀢𑀭𑀽𑀧𑀲𑁆𑀲𑁂𑀯 𑀦𑀺𑀭𑀯𑀲𑁂𑀲𑀩𑀼𑀤𑁆𑀥𑀓𑀭𑀥𑀫𑁆𑀫𑀲𑀫𑁆𑀪𑀭𑀡𑀦𑀺𑀬𑀢𑀲𑁆𑀲 𑀲𑀫𑀥𑀺𑀕𑀢𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑀲𑁆𑀲 𑀘 𑀲𑀦𑁆𑀦𑀺𑀳𑀺𑀢𑁂𑀲𑀼𑀧𑀺 𑀲𑀢𑁆𑀢𑀲𑀗𑁆𑀖𑀸𑀝𑀲𑀫𑀼𑀧𑀦𑀻𑀢𑀳𑀤𑀬𑀽𑀧𑀢𑀸𑀧𑀦𑀺𑀫𑀺𑀢𑁆𑀢𑁂𑀲𑀼 𑀦 𑀈𑀲𑀓𑀫𑁆𑀧𑀺 𑀘𑀺𑀢𑁆𑀢𑀲𑀻𑀢𑀺𑀪𑀸𑀯𑀲𑁆𑀲 𑀅𑀜𑁆𑀜𑀣𑀢𑁆𑀢𑀫𑀳𑁄𑀲𑀻𑀢𑀺. 𑀏𑀢𑀲𑁆𑀫𑀺𑀜𑁆𑀘 𑀅𑀢𑁆𑀣𑀯𑀺𑀓𑀧𑁆𑀧𑁂 𑀢𑀻𑀲𑀼𑀧𑀺 𑀅𑀯𑀢𑁆𑀣𑀸𑀲𑀼 𑀪𑀕𑀯𑀢𑁄 𑀓𑀭𑀼𑀡𑀸 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀧𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸, 𑀬𑀣𑀸𑀲𑀪𑀸𑀯𑀁 𑀧𑀓𑀸𑀭𑁂𑀳𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀸𑀯 𑀜𑁂𑀬𑁆𑀬𑀸𑀯𑀭𑀡𑀧𑁆𑀧𑀳𑀸𑀦𑀢𑁄 𑀧𑀓𑀸𑀭𑁂𑀳𑀺 𑀥𑀫𑁆𑀫𑀲𑀪𑀸𑀯𑀚𑁄𑀢𑀦𑀝𑁆𑀞𑁂𑀦 𑀧𑀚𑁆𑀚𑁄𑀢𑁄𑀢𑀺 𑀧𑀜𑁆𑀜𑀸𑀧𑀚𑁆𑀚𑁄𑀢𑁄. 𑀲𑀯𑀸𑀲𑀦𑀧𑁆𑀧𑀳𑀸𑀦𑀢𑁄 𑀯𑀺𑀲𑁂𑀲𑁂𑀦 𑀳𑀢𑀁 𑀲𑀫𑀼𑀕𑁆𑀖𑀸𑀝𑀺𑀢𑀁 𑀯𑀺𑀳𑀢𑀁. 𑀧𑀜𑁆𑀜𑀸𑀧𑀚𑁆𑀚𑁄𑀢𑁂𑀦 𑀯𑀺𑀳𑀢𑀁 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀁. 𑀫𑀼𑀬𑁆𑀳𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀫𑀼𑀬𑁆𑀳𑀢𑀺, 𑀫𑁄𑀳𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀫𑁄𑀳𑁄, 𑀅𑀯𑀺𑀚𑁆𑀚𑀸. 𑀲𑁆𑀯𑁂𑀯 𑀯𑀺𑀲𑀬𑀲𑀪𑀸𑀯𑀧𑀝𑀺𑀘𑁆𑀙𑀸𑀤𑀦𑀓𑀭𑀡𑀢𑁄 𑀅𑀦𑁆𑀥𑀓𑀸𑀭𑀲𑀭𑀺𑀓𑁆𑀔𑀢𑀸𑀬 𑀢𑀫𑁄 𑀯𑀺𑀬𑀸𑀢𑀺 𑀢𑀫𑁄. 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑁄 𑀫𑁄𑀳𑀢𑀫𑁄 𑀏𑀢𑀲𑁆𑀲𑀸𑀢𑀺 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫𑁄, 𑀢𑀁 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫𑀁. 𑀲𑀩𑁆𑀩𑁂𑀲𑀫𑁆𑀧𑀺 𑀳𑀺 𑀔𑀻𑀡𑀸𑀲𑀯𑀸𑀦𑀁 𑀲𑀢𑀺𑀧𑀺 𑀧𑀜𑁆𑀜𑀸𑀧𑀚𑁆𑀚𑁄𑀢𑁂𑀦 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀲𑁆𑀲 𑀯𑀺𑀳𑀢𑀪𑀸𑀯𑁂 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁂𑀳𑀺 𑀯𑀺𑀬 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸𑀦𑀁 𑀲𑀸𑀯𑀓𑁂𑀳𑀺 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁂𑀳𑀺 𑀘 𑀲𑀯𑀸𑀲𑀦𑀧𑁆𑀧𑀳𑀸𑀦𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑀲𑁆𑀲 𑀯𑀺𑀲𑁂𑀲𑁄 𑀯𑀺𑀚𑁆𑀚𑀢𑀻𑀢𑀺 𑀲𑀸𑀢𑀺𑀲𑀬𑁂𑀦 𑀅𑀯𑀺𑀚𑁆𑀚𑀸𑀧𑁆𑀧𑀳𑀸𑀦𑁂𑀦 𑀪𑀕𑀯𑀦𑁆𑀢𑀁 𑀣𑁄𑀫𑁂𑀦𑁆𑀢𑁄 𑀆𑀳 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺.

𑀅𑀣 𑀯𑀸 𑀅𑀦𑁆𑀢𑀭𑁂𑀦 𑀧𑀭𑁄𑀧𑀤𑁂𑀲𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀅𑀘𑁆𑀘𑀦𑁆𑀢𑀁 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀯𑀺𑀕𑀫𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀢𑀢𑁆𑀢𑀸, 𑀢𑀣𑀸 𑀲𑀩𑁆𑀩𑀜𑁆𑀜𑀼𑀢𑀸𑀬 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯𑀲𑁆𑀲 𑀲𑀫𑀥𑀺𑀕𑀢𑀢𑁆𑀢𑀸, 𑀧𑀭𑀲𑀦𑁆𑀢𑀢𑀺𑀬𑀜𑁆𑀘 𑀥𑀫𑁆𑀫𑀤𑁂𑀲𑀦𑀸𑀢𑀺𑀲𑀬𑀸𑀦𑀼𑀪𑀸𑀯𑁂𑀦 𑀲𑀫𑁆𑀫𑀤𑁂𑀯 𑀢𑀲𑁆𑀲 ¶ 𑀧𑀯𑀢𑁆𑀢𑀺𑀢𑀢𑁆𑀢𑀸 𑀪𑀕𑀯𑀸𑀯 𑀯𑀺𑀲𑁂𑀲𑀢𑁄 𑀫𑁄𑀳𑀢𑀫𑀯𑀺𑀕𑀫𑁂𑀦 𑀣𑁄𑀫𑁂𑀢𑀩𑁆𑀩𑁄𑀢𑀺 ¶ 𑀆𑀳 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑀯𑀺𑀓𑀧𑁆𑀧𑁂 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑁄’’𑀢𑀺 𑀧𑀤𑁂𑀦 𑀪𑀕𑀯𑀢𑁄 𑀧𑀝𑀺𑀯𑁂𑀥𑀧𑀜𑁆𑀜𑀸 𑀯𑀺𑀬 𑀤𑁂𑀲𑀦𑀸𑀧𑀜𑁆𑀜𑀸𑀧𑀺 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, 𑀏𑀓𑀲𑁂𑀲𑀦𑀬𑁂𑀦 𑀯𑀸 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸.

𑀅𑀣 𑀯𑀸 𑀪𑀕𑀯𑀢𑁄 𑀜𑀸𑀡𑀲𑁆𑀲 𑀜𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀢𑁆𑀢𑀸 𑀲𑀓𑀮𑀜𑁂𑀬𑁆𑀬𑀥𑀫𑁆𑀫𑀲𑀪𑀸𑀯𑀸𑀯𑀩𑁄𑀥𑀦𑀲𑀫𑀢𑁆𑀣𑁂𑀦 𑀅𑀦𑀸𑀯𑀭𑀡𑀜𑀸𑀡𑀲𑀗𑁆𑀔𑀸𑀢𑁂𑀦 𑀧𑀜𑁆𑀜𑀸𑀧𑀚𑁆𑀚𑁄𑀢𑁂𑀦 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀲𑀪𑀸𑀯𑀘𑁆𑀙𑀸𑀤𑀓𑀲𑁆𑀲 𑀫𑁄𑀳𑀦𑁆𑀥𑀓𑀸𑀭𑀲𑁆𑀲 𑀯𑀺𑀥𑀫𑀺𑀢𑀢𑁆𑀢𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀪𑀕𑀯𑀢𑁄 𑀫𑁄𑀳𑀢𑀫𑀯𑀺𑀦𑀸𑀲𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺. 𑀏𑀢𑁆𑀣 𑀘 𑀫𑁄𑀳𑀢𑀫𑀯𑀺𑀥𑀫𑀦𑀦𑁆𑀢𑁂 𑀅𑀥𑀺𑀕𑀢𑀢𑁆𑀢𑀸 𑀅𑀦𑀸𑀯𑀭𑀡𑀜𑀸𑀡𑀁 𑀓𑀸𑀭𑀡𑀽𑀧𑀘𑀸𑀭𑁂𑀦 𑀲𑀲𑀦𑁆𑀢𑀸𑀦𑁂 𑀫𑁄𑀳𑀢𑀫𑀯𑀺𑀥𑀫𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀲𑀯𑀸𑀲𑀦𑀧𑁆𑀧𑀳𑀸𑀦𑀫𑁂𑀯 𑀳𑀺 𑀓𑀺𑀮𑁂𑀲𑀸𑀦𑀁 𑀜𑁂𑀬𑁆𑀬𑀸𑀯𑀭𑀡𑀧𑀳𑀸𑀦𑀦𑁆𑀢𑀺, 𑀧𑀭𑀲𑀦𑁆𑀢𑀸𑀦𑁂 𑀧𑀦 𑀫𑁄𑀳𑀢𑀫𑀯𑀺𑀥𑀫𑀦𑀲𑁆𑀲 𑀓𑀸𑀭𑀡𑀪𑀸𑀯𑀢𑁄 𑀨𑀮𑀽𑀧𑀘𑀸𑀭𑁂𑀦 𑀅𑀦𑀸𑀯𑀭𑀡𑀜𑀸𑀡𑀁 ‘‘𑀫𑁄𑀳𑀢𑀫𑀯𑀺𑀥𑀫𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀓𑀺𑀁 𑀧𑀦 𑀓𑀸𑀭𑀡𑀁 𑀅𑀯𑀺𑀚𑁆𑀚𑀸𑀲𑀫𑀼𑀕𑁆𑀖𑀸𑀢𑁄𑀬𑁂𑀯𑁂𑀓𑁄 𑀧𑀳𑀸𑀦𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀪𑀕𑀯𑀢𑁄 𑀣𑁄𑀫𑀦𑀸𑀦𑀺𑀫𑀺𑀢𑁆𑀢𑀁 𑀕𑀬𑁆𑀳𑀢𑀺, 𑀦 𑀧𑀦 𑀲𑀸𑀢𑀺𑀲𑀬𑀁 𑀦𑀺𑀭𑀯𑀲𑁂𑀲𑀓𑀺𑀮𑁂𑀲𑀧𑀳𑀸𑀦𑀦𑁆𑀢𑀺? 𑀢𑀧𑁆𑀧𑀳𑀸𑀦𑀯𑀘𑀦𑁂𑀦𑁂𑀯 𑀢𑀤𑁂𑀓𑀝𑁆𑀞𑀢𑀸𑀬 𑀲𑀓𑀮𑀲𑀁𑀓𑀺𑀮𑁂𑀲𑀕𑀡𑀲𑀫𑀼𑀕𑁆𑀖𑀸𑀢𑀲𑁆𑀲 𑀚𑁄𑀢𑀺𑀢𑀪𑀸𑀯𑀢𑁄. 𑀦 𑀳𑀺 𑀲𑁄 𑀢𑀸𑀤𑀺𑀲𑁄 𑀓𑀺𑀮𑁂𑀲𑁄 𑀅𑀢𑁆𑀣𑀺, 𑀬𑁄 𑀦𑀺𑀭𑀯𑀲𑁂𑀲𑀅𑀯𑀺𑀚𑁆𑀚𑀸𑀧𑁆𑀧𑀳𑀸𑀦𑁂𑀦 𑀦 𑀧𑀳𑀻𑀬𑀢𑀻𑀢𑀺.

𑀅𑀣 𑀯𑀸 𑀯𑀺𑀚𑁆𑀚𑀸 𑀯𑀺𑀬 𑀲𑀓𑀮𑀓𑀼𑀲𑀮𑀥𑀫𑁆𑀫𑀲𑀫𑀼𑀧𑁆𑀧𑀢𑁆𑀢𑀺𑀬𑀸 𑀦𑀺𑀭𑀯𑀲𑁂𑀲𑀸𑀓𑀼𑀲𑀮𑀥𑀫𑁆𑀫𑀦𑀺𑀩𑁆𑀩𑀢𑁆𑀢𑀺𑀬𑀸 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀘 𑀅𑀯𑀺𑀚𑁆𑀚𑀸 𑀧𑀥𑀸𑀦𑀓𑀸𑀭𑀡𑀦𑁆𑀢𑀺 𑀢𑀩𑁆𑀩𑀺𑀖𑀸𑀢𑀯𑀘𑀦𑁂𑀦 𑀲𑀓𑀮𑀲𑀁𑀓𑀺𑀮𑁂𑀲𑀕𑀡𑀲𑀫𑀼𑀕𑁆𑀖𑀸𑀢𑁄 𑀯𑀼𑀢𑁆𑀢𑁄 𑀏𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺.

𑀦𑀭𑀸 𑀘 𑀅𑀫𑀭𑀸 𑀘 𑀦𑀭𑀸𑀫𑀭𑀸, 𑀲𑀳 𑀦𑀭𑀸𑀫𑀭𑁂𑀳𑀻𑀢𑀺 𑀲𑀦𑀭𑀸𑀫𑀭𑁄, 𑀲𑀦𑀭𑀸𑀫𑀭𑁄 𑀘 𑀲𑁄 𑀮𑁄𑀓𑁄 𑀘𑀸𑀢𑀺 𑀲𑀦𑀭𑀸𑀫𑀭𑀮𑁄𑀓𑁄, 𑀢𑀲𑁆𑀲 𑀕𑀭𑀽𑀢𑀺 𑀲𑀦𑀭𑀸𑀫𑀭𑀮𑁄𑀓𑀕𑀭𑀼, 𑀢𑀁 𑀲𑀦𑀭𑀸𑀫𑀭𑀮𑁄𑀓𑀕𑀭𑀼𑀁. 𑀏𑀢𑁂𑀦 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀯𑀺𑀬 𑀢𑀤𑀯𑀲𑀺𑀝𑁆𑀞𑀲𑀢𑁆𑀢𑀸𑀦𑀫𑁆𑀧𑀺 𑀬𑀣𑀸𑀭𑀳𑀁 𑀕𑀼𑀡𑀯𑀺𑀲𑁂𑀲𑀸𑀯𑀳𑀢𑀸𑀬 𑀪𑀕𑀯𑀢𑁄 𑀉𑀧𑀓𑀸𑀭𑀢𑀁 𑀤𑀲𑁆𑀲𑁂𑀢𑀺. 𑀦 𑀘𑁂𑀢𑁆𑀣 𑀧𑀥𑀸𑀦𑀸𑀧𑁆𑀧𑀥𑀸𑀦𑀪𑀸𑀯𑁄 𑀘𑁄𑀤𑁂𑀢𑀩𑁆𑀩𑁄. 𑀅𑀜𑁆𑀜𑁄 𑀳𑀺 𑀲𑀤𑁆𑀤𑀓𑁆𑀓𑀫𑁄, 𑀅𑀜𑁆𑀜𑁄 𑀅𑀢𑁆𑀣𑀓𑁆𑀓𑀫𑁄. 𑀏𑀤𑀺𑀲𑁂𑀲𑀼 𑀳𑀺 𑀲𑀫𑀸𑀲𑀧𑀤𑁂𑀲𑀼 𑀧𑀥𑀸𑀦𑀫𑁆𑀧𑀺 𑀅𑀧𑁆𑀧𑀥𑀸𑀦𑀁 𑀯𑀺𑀬 𑀦𑀺𑀤𑁆𑀤𑀺𑀲𑀻𑀬𑀢𑀺 𑀬𑀣𑀸 ‘‘𑀲𑀭𑀸𑀚𑀺𑀓𑀸𑀬 𑀧𑀭𑀺𑀲𑀸𑀬𑀸’’𑀢𑀺 ¶ (𑀅𑀧. 𑀅𑀝𑁆𑀞. 𑁧.𑁧.𑁮𑁨). 𑀓𑀸𑀫𑀜𑁆𑀘𑁂𑀢𑁆𑀣 𑀲𑀢𑁆𑀢𑀲𑀗𑁆𑀔𑀸𑀭𑁄𑀓𑀸𑀲𑀯𑀲𑁂𑀦 𑀢𑀺𑀯𑀺𑀥𑁄 𑀮𑁄𑀓𑁄, 𑀕𑀭𑀼𑀪𑀸𑀯𑀲𑁆𑀲 𑀧𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀕𑀭𑀼𑀓𑀭𑀡𑀲𑀫𑀢𑁆𑀣𑀲𑁆𑀲𑁂𑀯 𑀲𑀢𑁆𑀢𑀮𑁄𑀓𑀲𑁆𑀲 𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀲𑁄 𑀳𑀺 𑀮𑁄𑀓𑀻𑀬𑀦𑁆𑀢𑀺 𑀏𑀢𑁆𑀣 𑀧𑀼𑀜𑁆𑀜𑀧𑀸𑀧𑀸𑀦𑀺 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺 ‘‘𑀮𑁄𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀫𑀭𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀉𑀧𑀧𑀢𑁆𑀢𑀺𑀤𑁂𑀯𑀸 𑀅𑀥𑀺𑀧𑁆𑀧𑁂𑀢𑀸.

𑀅𑀣 ¶ 𑀯𑀸 𑀲𑀫𑀽𑀳𑀢𑁆𑀣𑁄 𑀮𑁄𑀓-𑀲𑀤𑁆𑀤𑁄 𑀲𑀫𑀼𑀤𑀸𑀬𑀯𑀲𑁂𑀦 𑀮𑁄𑀓𑀻𑀬𑀢𑀺 𑀧𑀜𑁆𑀜𑀸𑀧𑀻𑀬𑀢𑀻𑀢𑀺. 𑀲𑀳 𑀦𑀭𑁂𑀳𑀻𑀢𑀺 𑀲𑀦𑀭𑀸, 𑀲𑀦𑀭𑀸 𑀘 𑀢𑁂 𑀅𑀫𑀭𑀸 𑀘𑀸𑀢𑀺 𑀲𑀦𑀭𑀸𑀫𑀭𑀸, 𑀢𑁂𑀲𑀁 𑀮𑁄𑀓𑁄𑀢𑀺 𑀲𑀦𑀭𑀸𑀫𑀭𑀮𑁄𑀓𑁄𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀅𑀫𑀭-𑀲𑀤𑁆𑀤𑁂𑀦 𑀘𑁂𑀢𑁆𑀣 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀧𑀺 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀢𑁂 𑀳𑀺 𑀫𑀭𑀡𑀸𑀪𑀸𑀯𑀢𑁄 𑀧𑀭𑀫𑀢𑁆𑀣𑀢𑁄 𑀅𑀫𑀭𑀸, 𑀦𑀭𑀸𑀫𑀭𑀸𑀦𑀁𑀬𑁂𑀯 𑀕𑀳𑀡𑀁 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑀯𑀲𑁂𑀦 𑀬𑀣𑀸 ‘‘𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 (𑀤𑀻. 𑀦𑀺. 𑁧.𑁧𑁫𑁭). 𑀢𑀣𑀸 𑀳𑀺 𑀲𑀩𑁆𑀩𑀸𑀦𑀢𑁆𑀣𑀧𑀭𑀺𑀳𑀭𑀡𑀧𑀼𑀩𑁆𑀩𑀗𑁆𑀕𑀫𑀸𑀬 𑀦𑀺𑀭𑀯𑀲𑁂𑀲𑀳𑀺𑀢𑀲𑀼𑀔𑀯𑀺𑀥𑀸𑀦𑀢𑀧𑁆𑀧𑀭𑀸𑀬 𑀦𑀺𑀭𑀢𑀺𑀲𑀬𑀸𑀬 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀧𑀚𑀸𑀬 𑀅𑀘𑁆𑀘𑀦𑁆𑀢𑀫𑀼𑀧𑀓𑀸𑀭𑀺𑀢𑀸𑀬 𑀅𑀧𑀭𑀺𑀫𑀺𑀢𑀦𑀺𑀭𑀼𑀧𑀫𑀧𑁆𑀧𑀪𑀸𑀯𑀕𑀼𑀡𑀯𑀺𑀲𑁂𑀲𑀲𑀫𑀗𑁆𑀕𑀺𑀢𑀸𑀬 𑀘 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑁄 𑀪𑀕𑀯𑀸 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀉𑀢𑁆𑀢𑀫𑀁 𑀕𑀸𑀭𑀯𑀝𑁆𑀞𑀸𑀦𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀦𑀭𑀸𑀫𑀭𑀮𑁄𑀓𑀕𑀭𑀼’’𑀦𑁆𑀢𑀺.

𑀲𑁄𑀪𑀦𑀁 𑀕𑀢𑀁 𑀕𑀫𑀦𑀁 𑀏𑀢𑀲𑁆𑀲𑀸𑀢𑀺 𑀲𑀼𑀕𑀢𑁄. 𑀪𑀕𑀯𑀢𑁄 𑀳𑀺 𑀯𑁂𑀦𑁂𑀬𑁆𑀬𑀚𑀦𑀼𑀧𑀲𑀗𑁆𑀓𑀫𑀦𑀁 𑀏𑀓𑀦𑁆𑀢𑁂𑀦 𑀢𑁂𑀲𑀁 𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀢𑁄 𑀲𑁄𑀪𑀦𑀁, 𑀢𑀣𑀸 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢𑀭𑀽𑀧𑀓𑀸𑀬𑀢𑀸𑀬 𑀤𑀼𑀢𑀯𑀺𑀮𑀫𑁆𑀩𑀺𑀢𑀔𑀮𑀺𑀢𑀸𑀦𑀼𑀓𑀟𑁆𑀠𑀦𑀦𑀺𑀧𑁆𑀧𑀻𑀴𑀦𑀼𑀓𑁆𑀓𑀼𑀝𑀺𑀓𑀓𑀼𑀝𑀺𑀮𑀸𑀓𑀼𑀮𑀢𑀸𑀤𑀺- 𑀤𑁄𑀲𑀭𑀳𑀺𑀢𑀫𑀯𑀳𑀲𑀺𑀢𑀭𑀸𑀚𑀳𑀁𑀲𑀯𑀲𑀪𑀯𑀸𑀭𑀡𑀫𑀺𑀕𑀭𑀸𑀚𑀕𑀫𑀦𑀁 𑀓𑀸𑀬𑀕𑀫𑀦𑀁 𑀜𑀸𑀡𑀕𑀫𑀦𑀜𑁆𑀘 𑀯𑀺𑀧𑀼𑀮𑀦𑀺𑀫𑁆𑀫𑀮𑀓𑀭𑀼𑀡𑀸𑀲𑀢𑀺𑀯𑀻𑀭𑀺𑀬𑀸𑀤𑀺𑀕𑀼𑀡𑀯𑀺𑀲𑁂𑀲𑀲𑀳𑀺𑀢𑀫𑀪𑀺𑀦𑀻𑀳𑀸𑀭𑀢𑁄 𑀬𑀸𑀯 𑀫𑀳𑀸𑀩𑁄𑀥𑀺 𑀦𑀺𑀭𑀯𑀚𑁆𑀚𑀢𑀸𑀬 𑀲𑁄𑀪𑀦𑀫𑁂𑀯𑀸𑀢𑀺.

𑀅𑀣 𑀯𑀸 𑀲𑀬𑀫𑁆𑀪𑀽𑀜𑀸𑀡𑁂𑀦 𑀲𑀓𑀮𑀫𑀧𑀺 𑀮𑁄𑀓𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦 𑀧𑀭𑀺𑀚𑀸𑀦𑀦𑁆𑀢𑁄 𑀜𑀸𑀡𑁂𑀦 𑀲𑀫𑁆𑀫𑀸 𑀕𑀢𑁄 𑀅𑀯𑀕𑀢𑁄𑀢𑀺 𑀲𑀼𑀕𑀢𑁄, 𑀢𑀣𑀸 𑀮𑁄𑀓𑀲𑀫𑀼𑀤𑀬𑀁 𑀧𑀳𑀸𑀦𑀸𑀪𑀺𑀲𑀫𑀬𑀯𑀲𑁂𑀦 𑀧𑀚𑀳𑀦𑁆𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑁂𑀦𑁆𑀢𑁄 𑀲𑀫𑁆𑀫𑀸 𑀕𑀢𑁄 𑀅𑀢𑀻𑀢𑁄𑀢𑀺 𑀲𑀼𑀕𑀢𑁄, 𑀮𑁄𑀓𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀲𑀫𑁆𑀫𑀸 𑀕𑀢𑁄 𑀅𑀥𑀺𑀕𑀢𑁄𑀢𑀺 𑀲𑀼𑀕𑀢𑁄, 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀺𑀁 𑀧𑀝𑀺𑀧𑀤𑀁 𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀲𑀫𑁆𑀫𑀸 ¶ 𑀕𑀢𑁄 𑀧𑀝𑀺𑀧𑀦𑁆𑀦𑁄𑀢𑀺 𑀲𑀼𑀕𑀢𑁄. ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑀲𑀼𑀕𑀢𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 (𑀫𑀳𑀸𑀦𑀺. 𑁩𑁮) 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄𑀢𑀺.

𑀅𑀣 𑀯𑀸 𑀲𑀼𑀦𑁆𑀤𑀭𑀁 𑀞𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁, 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸 𑀕𑀢𑁄 𑀅𑀥𑀺𑀕𑀢𑁄𑀢𑀺 𑀲𑀼𑀕𑀢𑁄. 𑀬𑀲𑁆𑀫𑀸 𑀯𑀸 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀁𑀳𑀺𑀢𑀁 𑀯𑁂𑀦𑁂𑀬𑁆𑀬𑀸𑀦𑀁 𑀬𑀣𑀸𑀭𑀳𑀁 𑀓𑀸𑀮𑀬𑀼𑀢𑁆𑀢𑀫𑁂𑀯 𑀘 𑀥𑀫𑁆𑀫𑀁 𑀪𑀸𑀲𑀢𑀺, 𑀢𑀲𑁆𑀫𑀸 𑀲𑀫𑁆𑀫𑀸 𑀕𑀤𑀢𑀺 𑀯𑀤𑀢𑀻𑀢𑀺 𑀲𑀼𑀕𑀢𑁄 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸. 𑀇𑀢𑀺 𑀲𑁄𑀪𑀦𑀕𑀫𑀦𑀢𑀸𑀤𑀻𑀳𑀺 𑀲𑀼𑀕𑀢𑁄, 𑀢𑀁 𑀲𑀼𑀕𑀢𑀁.

𑀧𑀼𑀜𑁆𑀜𑀧𑀸𑀧𑀓𑁂𑀳𑀺 𑀉𑀧𑀧𑀚𑁆𑀚𑀦𑀯𑀲𑁂𑀦 𑀕𑀦𑁆𑀢𑀩𑁆𑀩𑀢𑁄 𑀕𑀢𑀺𑀬𑁄, 𑀉𑀧𑀧𑀢𑁆𑀢𑀺𑀪𑀯𑀯𑀺𑀲𑁂𑀲𑀸. 𑀢𑀸 𑀧𑀦 𑀦𑀺𑀭𑀬𑀸𑀤𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑀸. 𑀢𑀸 𑀳𑀺 𑀲𑀓𑀮𑀲𑁆𑀲𑀧𑀺 𑀪𑀯𑀕𑀸𑀫𑀺𑀓𑀫𑁆𑀫𑀲𑁆𑀲 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑁂𑀦 𑀅𑀯𑀺𑀧𑀸𑀓𑀸𑀭𑀳𑀪𑀸𑀯𑀓𑀭𑀡𑁂𑀦 ¶ 𑀦𑀺𑀯𑀢𑁆𑀢𑀺𑀢𑀢𑁆𑀢𑀸 𑀪𑀕𑀯𑀸 𑀧𑀜𑁆𑀘𑀳𑀺𑀧𑀺 𑀕𑀢𑀻𑀳𑀺 𑀲𑀼𑀝𑁆𑀞𑀼 𑀫𑀼𑀢𑁆𑀢𑁄 𑀯𑀺𑀲𑀁𑀬𑀼𑀢𑁆𑀢𑁄𑀢𑀺 𑀆𑀳 ‘‘𑀕𑀢𑀺𑀯𑀺𑀫𑀼𑀢𑁆𑀢’’𑀦𑁆𑀢𑀺. 𑀏𑀢𑁂𑀦 𑀪𑀕𑀯𑀢𑁄 𑀓𑀢𑁆𑀣𑀘𑀺𑀧𑀺 𑀅𑀧𑀭𑀺𑀬𑀸𑀧𑀦𑁆𑀦𑀢𑀁 𑀤𑀲𑁆𑀲𑁂𑀢𑀺, 𑀬𑀢𑁄 𑀪𑀕𑀯𑀸 ‘‘𑀤𑁂𑀯𑀸𑀢𑀺𑀤𑁂𑀯𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 𑁋

‘‘𑀬𑁂𑀦 𑀤𑁂𑀯𑀽𑀧𑀧𑀢𑁆𑀬𑀲𑁆𑀲, 𑀕𑀦𑁆𑀥𑀩𑁆𑀩𑁄 𑀯𑀸 𑀯𑀺𑀳𑀗𑁆𑀕𑀫𑁄;

𑀬𑀓𑁆𑀔𑀢𑁆𑀢𑀁 𑀬𑁂𑀦 𑀕𑀘𑁆𑀙𑁂𑀬𑁆𑀬𑀁, 𑀫𑀦𑀼𑀲𑁆𑀲𑀢𑁆𑀢𑀜𑁆𑀘 𑀅𑀩𑁆𑀩𑀚𑁂;

𑀢𑁂 𑀫𑀬𑁆𑀳𑀁 𑀆𑀲𑀯𑀸 𑀔𑀻𑀡𑀸, 𑀯𑀺𑀤𑁆𑀥𑀲𑁆𑀢𑀸 𑀯𑀺𑀦𑀴𑀻𑀓𑀢𑀸’’𑀢𑀺. (𑀅. 𑀦𑀺. 𑁪.𑁩𑁬);

𑀢𑀁𑀢𑀁𑀕𑀢𑀺𑀲𑀁𑀯𑀢𑁆𑀢𑀦𑀓𑀸𑀦𑀜𑁆𑀳𑀺 𑀓𑀫𑁆𑀫𑀓𑀺𑀮𑁂𑀲𑀸𑀦𑀁 𑀅𑀕𑁆𑀕𑀫𑀕𑁆𑀕𑁂𑀦 𑀩𑁄𑀥𑀺𑀫𑀽𑀮𑁂𑀬𑁂𑀯 𑀲𑀼𑀧𑁆𑀧𑀳𑀻𑀦𑀢𑁆𑀢𑀸 𑀦𑀢𑁆𑀣𑀺 𑀪𑀕𑀯𑀢𑁄 𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀢𑀺 𑀅𑀘𑁆𑀘𑀦𑁆𑀢𑀫𑁂𑀯 𑀪𑀕𑀯𑀸 𑀲𑀩𑁆𑀩𑀪𑀯𑀬𑁄𑀦𑀺𑀕𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑀲𑀢𑁆𑀢𑀦𑀺𑀓𑀸𑀬𑁂𑀳𑀺 𑀲𑀼𑀧𑀭𑀺𑀫𑀼𑀢𑁆𑀢𑁄. 𑀢𑀁 𑀕𑀢𑀺𑀯𑀺𑀫𑀼𑀢𑁆𑀢𑀁. 𑀯𑀦𑁆𑀤𑁂𑀢𑀺 𑀦𑀫𑀸𑀫𑀺, 𑀣𑁄𑀫𑁂𑀫𑀻𑀢𑀺 𑀯𑀸 𑀅𑀢𑁆𑀣𑁄.

𑀅𑀣 𑀯𑀸 𑀕𑀢𑀺𑀯𑀺𑀫𑀼𑀢𑁆𑀢𑀦𑁆𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀧𑁆𑀧𑀢𑁆𑀢𑀺𑀬𑀸 𑀪𑀕𑀯𑀦𑁆𑀢𑀁 𑀣𑁄𑀫𑁂𑀢𑀺. 𑀏𑀢𑁆𑀣 𑀳𑀺 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀪𑀕𑀯𑀢𑁄 𑀣𑁄𑀫𑀦𑀸 𑀯𑁂𑀤𑀺𑀢𑀩𑁆𑀩𑀸 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺𑀢𑁄 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀢𑁄 𑀘. 𑀢𑁂𑀲𑀼 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 𑀅𑀦𑀸𑀯𑀭𑀡𑀜𑀸𑀡𑀸𑀥𑀺𑀕𑀫𑀢𑁄, 𑀲𑀯𑀸𑀲𑀦𑀸𑀦𑀁 𑀲𑀩𑁆𑀩𑁂𑀲𑀁 𑀓𑀺𑀮𑁂𑀲𑀸𑀦𑀁 𑀅𑀘𑁆𑀘𑀦𑁆𑀢𑀧𑀳𑀸𑀦𑀢𑁄, 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀢𑁄 𑀘 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀮𑀸𑀪𑀲𑀓𑁆𑀓𑀸𑀭𑀸𑀤𑀺𑀦𑀺𑀭𑀧𑁂𑀓𑁆𑀔𑀘𑀺𑀢𑁆𑀢𑀲𑁆𑀲 𑀲𑀩𑁆𑀩𑀤𑀼𑀓𑁆𑀔𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀤𑁂𑀲𑀦𑀢𑁄, 𑀯𑀺𑀭𑀼𑀤𑁆𑀥𑁂𑀲𑀼𑀧𑀺 𑀦𑀺𑀘𑁆𑀘𑀁 𑀳𑀺𑀢𑀚𑁆𑀛𑀸𑀲𑀬𑀯𑀲𑁂𑀦 𑀜𑀸𑀡𑀧𑀭𑀺𑀧𑀸𑀓𑀓𑀸𑀮𑀸𑀕𑀫𑀦𑀢𑁄 𑀘. 𑀲𑀸 𑀧𑀦𑁂𑀢𑁆𑀣 𑀆𑀲𑀬𑀢𑁄 𑀧𑀬𑁄𑀕𑀢𑁄 𑀘 𑀤𑀼𑀯𑀺𑀥𑀸 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺, 𑀢𑀺𑀯𑀺𑀥𑀸 ¶ 𑀘 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 𑀧𑀓𑀸𑀲𑀺𑀢𑀸 𑀳𑁄𑀢𑀺, 𑀓𑀣𑀁? ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺 𑀏𑀢𑁂𑀦 𑀆𑀲𑀬𑀢𑁄 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺, 𑀲𑀫𑁆𑀫𑀸𑀕𑀤𑀦𑀢𑁆𑀣𑁂𑀦 𑀲𑀼𑀕𑀢-𑀲𑀤𑁆𑀤𑁂𑀦 𑀧𑀬𑁄𑀕𑀢𑁄 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺, ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫𑀁 𑀕𑀢𑀺𑀯𑀺𑀫𑀼𑀢𑁆𑀢’’𑀦𑁆𑀢𑀺 𑀏𑀢𑁂𑀳𑀺 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑀢𑁆𑀣𑁂𑀦 𑀘 𑀲𑀼𑀕𑀢-𑀲𑀤𑁆𑀤𑁂𑀦 𑀢𑀺𑀯𑀺𑀥𑀸𑀧𑀺 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺, 𑀅𑀯𑀲𑀺𑀝𑁆𑀞𑀢𑁆𑀣𑁂𑀦 𑀢𑁂𑀦 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺 𑀏𑀢𑁂𑀦 𑀘 𑀲𑀩𑁆𑀩𑀸𑀧𑀺 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺 𑀧𑀓𑀸𑀲𑀺𑀢𑀸 𑀳𑁄𑀢𑀻𑀢𑀺.

𑀅𑀣 𑀯𑀸 𑀢𑀻𑀳𑀺 𑀆𑀓𑀸𑀭𑁂𑀳𑀺 𑀪𑀕𑀯𑀢𑁄 𑀣𑁄𑀫𑀦𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀳𑁂𑀢𑀼𑀢𑁄 𑀨𑀮𑀢𑁄 𑀉𑀧𑀓𑀸𑀭𑀢𑁄 𑀘. 𑀢𑀢𑁆𑀣 𑀳𑁂𑀢𑀼 𑀫𑀳𑀸𑀓𑀭𑀼𑀡𑀸, 𑀲𑀸 𑀧𑀞𑀫𑀧𑀤𑁂𑀦 𑀤𑀲𑁆𑀲𑀺𑀢𑀸. 𑀨𑀮𑀁 𑀘𑀢𑀼𑀩𑁆𑀩𑀺𑀥𑀁 𑀜𑀸𑀡𑀲𑀫𑁆𑀧𑀤𑀸 𑀧𑀳𑀸𑀦𑀲𑀫𑁆𑀧𑀤𑀸 𑀆𑀦𑀼𑀪𑀸𑀯𑀲𑀫𑁆𑀧𑀤𑀸 𑀭𑀽𑀧𑀓𑀸𑀬𑀲𑀫𑁆𑀧𑀤𑀸 𑀘𑀸𑀢𑀺. 𑀢𑀸𑀲𑀼 𑀜𑀸𑀡𑀧𑀳𑀸𑀦𑀲𑀫𑁆𑀧𑀤𑀸 𑀤𑀼𑀢𑀺𑀬𑀧𑀤𑁂𑀦 𑀲𑀘𑁆𑀘𑀧𑀝𑀺𑀯𑁂𑀥𑀢𑁆𑀣𑁂𑀦 𑀘 𑀲𑀼𑀕𑀢-𑀲𑀤𑁆𑀤𑁂𑀦 𑀧𑀓𑀸𑀲𑀺𑀢𑀸 𑀳𑁄𑀦𑁆𑀢𑀺, 𑀆𑀦𑀼𑀪𑀸𑀯𑀲𑀫𑁆𑀧𑀤𑀸 𑀧𑀦 𑀢𑀢𑀺𑀬𑀧𑀤𑁂𑀦, 𑀭𑀽𑀧𑀓𑀸𑀬𑀲𑀫𑁆𑀧𑀤𑀸 𑀬𑀣𑀸𑀯𑀼𑀢𑁆𑀢𑀓𑀸𑀬𑀕𑀫𑀦𑀲𑁄𑀪𑀦𑀢𑁆𑀣𑁂𑀦 𑀲𑀼𑀕𑀢-𑀲𑀤𑁆𑀤𑁂𑀦 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀧𑀸𑀭𑀺𑀧𑀽𑀭𑀺𑀬𑀸 𑀯𑀺𑀦𑀸 𑀢𑀤𑀪𑀸𑀯𑀢𑁄 ¶ . 𑀉𑀧𑀓𑀸𑀭𑁄 𑀅𑀦𑀦𑁆𑀢𑀭𑀁 𑀅𑀩𑀸𑀳𑀺𑀭𑀁 𑀓𑀭𑀺𑀢𑁆𑀯𑀸 𑀢𑀺𑀯𑀺𑀥𑀬𑀸𑀦𑀫𑀼𑀔𑁂𑀦 𑀯𑀺𑀫𑀼𑀢𑁆𑀢𑀺𑀥𑀫𑁆𑀫𑀤𑁂𑀲𑀦𑀸. 𑀲𑁄 𑀲𑀫𑁆𑀫𑀸𑀕𑀤𑀦𑀢𑁆𑀣𑁂𑀦 𑀲𑀼𑀕𑀢-𑀲𑀤𑁆𑀤𑁂𑀦 𑀧𑀓𑀸𑀲𑀺𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺 𑀏𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀫𑀽𑀮𑀁 𑀤𑀲𑁆𑀲𑁂𑀢𑀺. 𑀫𑀳𑀸𑀓𑀭𑀼𑀡𑀸𑀬 𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀳𑀺 𑀪𑀕𑀯𑀸 𑀲𑀁𑀲𑀸𑀭𑀧𑀗𑁆𑀓𑀢𑁄 𑀲𑀢𑁆𑀢𑀸𑀦𑀁 𑀲𑀫𑀼𑀤𑁆𑀥𑀭𑀡𑀢𑁆𑀣𑀁 𑀓𑀢𑀸𑀪𑀺𑀦𑀻𑀳𑀸𑀭𑁄 𑀅𑀦𑀼𑀧𑀼𑀩𑁆𑀩𑁂𑀦 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀢𑁄𑀢𑀺 𑀓𑀭𑀼𑀡𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀫𑀽𑀮𑀁. ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺 𑀏𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀤𑀲𑁆𑀲𑁂𑀢𑀺. 𑀅𑀦𑀸𑀯𑀭𑀡𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀳𑀺 𑀫𑀕𑁆𑀕𑀜𑀸𑀡𑀁, 𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀘 𑀅𑀦𑀸𑀯𑀭𑀡𑀜𑀸𑀡𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀲𑀫𑁆𑀫𑀸𑀕𑀫𑀦𑀢𑁆𑀣𑁂𑀦 𑀲𑀼𑀕𑀢-𑀲𑀤𑁆𑀤𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 𑀮𑀻𑀦𑀼𑀤𑁆𑀥𑀘𑁆𑀘𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀓𑀸𑀫𑀲𑀼𑀔𑀮𑁆𑀮𑀺𑀓𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕-𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀪𑀺𑀦𑀺𑀯𑁂𑀲𑀸𑀤𑀺-𑀅𑀦𑁆𑀢𑀤𑁆𑀯𑀬𑀭𑀳𑀺𑀢𑀸𑀬 𑀓𑀭𑀼𑀡𑀸𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑀺𑀢𑀸𑀬 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀧𑀓𑀸𑀲𑀦𑀢𑁄 𑀲𑀼𑀕𑀢-𑀲𑀤𑁆𑀤𑀲𑁆𑀲. 𑀇𑀢𑀭𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀧𑀥𑀸𑀦𑀸𑀧𑁆𑀧𑀥𑀸𑀦𑀪𑁂𑀤𑀁 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀺. 𑀲𑀁𑀲𑀸𑀭𑀫𑀳𑁄𑀖𑀢𑁄 𑀲𑀢𑁆𑀢𑀲𑀦𑁆𑀢𑀸𑀭𑀡𑀜𑁆𑀳𑁂𑀢𑁆𑀣 𑀧𑀥𑀸𑀦𑀁 𑀧𑀬𑁄𑀚𑀦𑀁, 𑀢𑀤𑀜𑁆𑀜𑀫𑀧𑁆𑀧𑀥𑀸𑀦𑀁. 𑀢𑁂𑀲𑀼 𑀧𑀥𑀸𑀦𑁂𑀦 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺, 𑀇𑀢𑀭𑁂𑀦 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺𑀁, 𑀢𑀤𑀼𑀪𑀬𑁂𑀦 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀸𑀤𑀻𑀲𑀼 𑀘𑀢𑀽𑀲𑀼 𑀧𑀼𑀕𑁆𑀕𑀮𑁂𑀲𑀼 𑀪𑀕𑀯𑀢𑁄 ¶ 𑀘𑀢𑀼𑀢𑁆𑀣𑀧𑀼𑀕𑁆𑀕𑀮𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦 𑀘 𑀅𑀦𑀼𑀢𑁆𑀢𑀭𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀁, 𑀉𑀢𑁆𑀢𑀫𑀯𑀦𑁆𑀤𑀦𑀻𑀬𑀪𑀸𑀯𑀁, 𑀅𑀢𑁆𑀢𑀦𑁄 𑀘 𑀯𑀦𑁆𑀤𑀦𑀓𑀺𑀭𑀺𑀬𑀸𑀬 𑀔𑁂𑀢𑁆𑀢𑀗𑁆𑀕𑀢𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀏𑀢𑁆𑀣 𑀘 𑀓𑀭𑀼𑀡𑀸𑀕𑀳𑀡𑁂𑀦 𑀮𑁄𑀓𑀺𑀬𑁂𑀲𑀼 𑀫𑀳𑀕𑁆𑀕𑀢𑀪𑀸𑀯𑀧𑁆𑀧𑀢𑁆𑀢𑀸𑀲𑀸𑀥𑀸𑀭𑀡𑀕𑀼𑀡𑀤𑀻𑀧𑀦𑀢𑁄 𑀪𑀕𑀯𑀢𑁄 𑀲𑀩𑁆𑀩𑀮𑁄𑀓𑀺𑀬𑀕𑀼𑀡𑀲𑀫𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸 𑀳𑁄𑀢𑀺, 𑀧𑀜𑁆𑀜𑀸𑀕𑀳𑀡𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀫𑀕𑁆𑀕𑀜𑀸𑀡𑀤𑀻𑀧𑀦𑀢𑁄 𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑀕𑀼𑀡𑀲𑀫𑁆𑀧𑀢𑁆𑀢𑀺. 𑀢𑀤𑀼𑀪𑀬𑀕𑁆𑀕𑀳𑀡𑀲𑀺𑀤𑁆𑀥𑁄 𑀳𑀺 𑀅𑀢𑁆𑀣𑁄 ‘‘𑀲𑀦𑀭𑀸𑀫𑀭𑀮𑁄𑀓𑀕𑀭𑀼’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀧𑀜𑁆𑀘𑀻𑀬𑀢𑀻𑀢𑀺. 𑀓𑀭𑀼𑀡𑀸𑀕𑀳𑀡𑁂𑀦 𑀘 𑀉𑀧𑀕𑀫𑀦𑀁 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁 𑀤𑀲𑁆𑀲𑁂𑀢𑀺, 𑀧𑀜𑁆𑀜𑀸𑀕𑀳𑀡𑁂𑀦 𑀅𑀧𑀕𑀫𑀦𑀁. 𑀢𑀣𑀸 𑀓𑀭𑀼𑀡𑀸𑀕𑀳𑀡𑁂𑀦 𑀮𑁄𑀓𑀲𑀫𑀜𑁆𑀜𑀸𑀦𑀼𑀭𑀽𑀧𑀁 𑀪𑀕𑀯𑀢𑁄 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 𑀮𑁄𑀓𑀯𑁄𑀳𑀸𑀭𑀯𑀺𑀲𑀬𑀢𑁆𑀢𑀸 𑀓𑀭𑀼𑀡𑀸𑀬, 𑀧𑀜𑁆𑀜𑀸𑀕𑀳𑀡𑁂𑀦 𑀲𑀫𑀜𑁆𑀜𑀸𑀬 𑀅𑀦𑀢𑀺𑀥𑀸𑀯𑀦𑀁. 𑀲𑀪𑀸𑀯𑀸𑀦𑀯𑀩𑁄𑀥𑁂𑀦 𑀳𑀺 𑀥𑀫𑁆𑀫𑀸𑀦𑀁 𑀲𑀫𑀜𑁆𑀜𑀁 𑀅𑀢𑀺𑀥𑀸𑀯𑀺𑀢𑁆𑀯𑀸 𑀲𑀢𑁆𑀢𑀸𑀤𑀺𑀧𑀭𑀸𑀫𑀲𑀦𑀁 𑀳𑁄𑀢𑀻𑀢𑀺. 𑀢𑀣𑀸 𑀓𑀭𑀼𑀡𑀸𑀕𑀳𑀡𑁂𑀦 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀁 𑀤𑀲𑁆𑀲𑁂𑀢𑀺, 𑀧𑀜𑁆𑀜𑀸𑀕𑀳𑀡𑁂𑀦 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀁 𑀘𑀢𑀼𑀲𑀘𑁆𑀘𑀜𑀸𑀡𑀁 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀁 𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑀁, 𑀓𑀭𑀼𑀡𑀸𑀕𑀳𑀡𑁂𑀦 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀜𑀸𑀡𑀲𑁆𑀲 𑀕𑀳𑀺𑀢𑀢𑁆𑀢𑀸 𑀲𑁂𑀲𑀸𑀥𑀸𑀭𑀡𑀜𑀸𑀡𑀸𑀦𑀺 𑀙 𑀅𑀪𑀺𑀜𑁆𑀜𑀸 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀅𑀓𑀫𑁆𑀧𑀦𑀜𑀸𑀡𑀸𑀦𑀺 𑀤𑀲 𑀩𑀮𑀸𑀦𑀺 𑀘𑀼𑀤𑁆𑀤𑀲 𑀩𑀼𑀤𑁆𑀥𑀜𑀸𑀡𑀸𑀦𑀺 𑀲𑁄𑀴𑀲 𑀜𑀸𑀡𑀘𑀭𑀺𑀬𑀸 𑀅𑀝𑁆𑀞𑀸𑀭𑀲 𑀩𑀼𑀤𑁆𑀥𑀥𑀫𑁆𑀫𑀸 𑀘𑀢𑀼𑀘𑀢𑁆𑀢𑀸𑀮𑀻𑀲 𑀜𑀸𑀡𑀯𑀢𑁆𑀣𑀽𑀦𑀺 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀯𑀢𑁆𑀣𑀽𑀦𑀻𑀢𑀺 𑀏𑀯𑀫𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀧𑀜𑁆𑀜𑀸𑀧𑀪𑁂𑀤𑀸𑀦𑀁 𑀯𑀲𑁂𑀦 𑀜𑀸𑀡𑀘𑀸𑀭𑀁 𑀤𑀲𑁆𑀲𑁂𑀢𑀺. 𑀢𑀣𑀸 𑀓𑀭𑀼𑀡𑀸𑀕𑀳𑀡𑁂𑀦 𑀘𑀭𑀡𑀲𑀫𑁆𑀧𑀢𑁆𑀢𑀺𑀁, 𑀧𑀜𑁆𑀜𑀸𑀕𑀳𑀡𑁂𑀦 𑀯𑀺𑀚𑁆𑀚𑀸𑀲𑀫𑁆𑀧𑀢𑁆𑀢𑀺𑀁. 𑀓𑀭𑀼𑀡𑀸𑀕𑀳𑀡𑁂𑀦 ¶ 𑀅𑀢𑁆𑀢𑀸𑀥𑀺𑀧𑀢𑀺𑀢𑀸, 𑀧𑀜𑁆𑀜𑀸𑀕𑀳𑀡𑁂𑀦 𑀥𑀫𑁆𑀫𑀸𑀥𑀺𑀧𑀢𑀺𑀢𑀸. 𑀓𑀭𑀼𑀡𑀸𑀕𑀳𑀡𑁂𑀦 𑀮𑁄𑀓𑀦𑀸𑀣𑀪𑀸𑀯𑁄, 𑀧𑀜𑁆𑀜𑀸𑀕𑀳𑀡𑁂𑀦 𑀅𑀢𑁆𑀢𑀦𑀸𑀣𑀪𑀸𑀯𑁄. 𑀢𑀣𑀸 𑀓𑀭𑀼𑀡𑀸𑀕𑀳𑀡𑁂𑀦 𑀧𑀼𑀩𑁆𑀩𑀓𑀸𑀭𑀺𑀪𑀸𑀯𑁄, 𑀧𑀜𑁆𑀜𑀸𑀕𑀳𑀡𑁂𑀦 𑀓𑀢𑀜𑁆𑀜𑀼𑀢𑀸. 𑀓𑀭𑀼𑀡𑀸𑀕𑀳𑀡𑁂𑀦 𑀅𑀧𑀭𑀦𑁆𑀢𑀧𑀢𑀸, 𑀧𑀜𑁆𑀜𑀸𑀕𑀳𑀡𑁂𑀦 𑀅𑀦𑀢𑁆𑀢𑀦𑁆𑀢𑀧𑀢𑀸. 𑀓𑀭𑀼𑀡𑀸𑀕𑀳𑀡𑁂𑀦 𑀯𑀸 𑀩𑀼𑀤𑁆𑀥𑀓𑀭𑀥𑀫𑁆𑀫𑀲𑀺𑀤𑁆𑀥𑀺, 𑀧𑀜𑁆𑀜𑀸𑀕𑀳𑀡𑁂𑀦 𑀩𑀼𑀤𑁆𑀥𑀪𑀸𑀯𑀲𑀺𑀤𑁆𑀥𑀺. 𑀢𑀣𑀸 𑀓𑀭𑀼𑀡𑀸𑀕𑀳𑀡𑁂𑀦 𑀧𑀭𑁂𑀲𑀁 𑀢𑀸𑀭𑀡𑀁, 𑀧𑀜𑁆𑀜𑀸𑀕𑀳𑀡𑁂𑀦 𑀲𑀬𑀁 𑀢𑀸𑀭𑀡𑀁. 𑀢𑀣𑀸 𑀓𑀭𑀼𑀡𑀸𑀕𑀳𑀡𑁂𑀦 𑀲𑀩𑁆𑀩𑀲𑀢𑁆𑀢𑁂𑀲𑀼 𑀅𑀦𑀼𑀕𑁆𑀕𑀳𑀘𑀺𑀢𑁆𑀢𑀢𑀸, 𑀧𑀜𑁆𑀜𑀸𑀕𑀳𑀡𑁂𑀦 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀭𑀢𑁆𑀢𑀘𑀺𑀢𑁆𑀢𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺.

𑀲𑀩𑁆𑀩𑁂𑀲𑀜𑁆𑀘 𑀩𑀼𑀤𑁆𑀥𑀕𑀼𑀡𑀸𑀦𑀁 𑀓𑀭𑀼𑀡𑀸 𑀆𑀤𑀺 𑀢𑀦𑁆𑀦𑀺𑀤𑀸𑀦𑀪𑀸𑀯𑀢𑁄, 𑀧𑀜𑁆𑀜𑀸 𑀧𑀭𑀺𑀬𑁄𑀲𑀸𑀦𑀁 𑀢𑀢𑁄 𑀉𑀢𑁆𑀢𑀭𑀺 𑀓𑀭𑀡𑀻𑀬𑀸𑀪𑀸𑀯𑀢𑁄. 𑀇𑀢𑀺 𑀆𑀤𑀺𑀧𑀭𑀺𑀬𑁄𑀲𑀸𑀦𑀤𑀲𑁆𑀲𑀦𑁂𑀦 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀢𑀣𑀸 𑀓𑀭𑀼𑀡𑀸𑀕𑀳𑀡𑁂𑀦 𑀲𑀻𑀮𑀓𑁆𑀔𑀦𑁆𑀥𑀧𑀼𑀩𑁆𑀩𑀗𑁆𑀕𑀫𑁄 ¶ 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀓𑀭𑀼𑀡𑀸𑀦𑀺𑀤𑀸𑀦𑀜𑁆𑀳𑀺 𑀲𑀻𑀮𑀁 𑀢𑀢𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀺𑀭𑀢𑀺𑀧𑁆𑀧𑀯𑀢𑁆𑀢𑀺𑀢𑁄, 𑀲𑀸 𑀘 𑀛𑀸𑀦𑀢𑁆𑀢𑀬𑀲𑀫𑁆𑀧𑀬𑁄𑀕𑀺𑀦𑀻𑀢𑀺. 𑀧𑀜𑁆𑀜𑀸𑀯𑀘𑀦𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀲𑀻𑀮𑀜𑁆𑀘 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑀸𑀦𑀁 𑀆𑀤𑀺, 𑀲𑀫𑀸𑀥𑀺 𑀫𑀚𑁆𑀛𑁂, 𑀧𑀜𑁆𑀜𑀸 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀏𑀯𑀫𑁆𑀧𑀺 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀤𑀲𑁆𑀲𑀦𑁂𑀦 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺 𑀦𑀬𑀢𑁄 𑀤𑀲𑁆𑀲𑀺𑀢𑀢𑁆𑀢𑀸. 𑀏𑀲𑁄 𑀏𑀯 𑀳𑀺 𑀦𑀺𑀭𑀯𑀲𑁂𑀲𑀢𑁄 𑀩𑀼𑀤𑁆𑀥𑀕𑀼𑀡𑀸𑀦𑀁 𑀤𑀲𑁆𑀲𑀦𑀼𑀧𑀸𑀬𑁄, 𑀬𑀤𑀺𑀤𑀁 𑀦𑀬𑀕𑁆𑀕𑀳𑀡𑀁, 𑀅𑀜𑁆𑀜𑀣𑀸 𑀓𑁄 𑀦𑀸𑀫 𑀲𑀫𑀢𑁆𑀣𑁄 𑀪𑀕𑀯𑀢𑁄 𑀕𑀼𑀡𑁂 𑀅𑀦𑀼𑀧𑀤𑀁 𑀦𑀺𑀭𑀯𑀲𑁂𑀲𑀢𑁄 𑀤𑀲𑁆𑀲𑁂𑀢𑀼𑀁. 𑀢𑁂𑀦𑁂𑀯𑀸𑀳 𑁋

‘‘𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁,

𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄;

𑀔𑀻𑀬𑁂𑀣 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂,

𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁦𑁪; 𑁩.𑁧𑁪𑁧; 𑀫. 𑀦𑀺. 𑀅𑀝𑁆𑀞. 𑁩.𑁪𑁨𑁫; 𑀉𑀤𑀸. 𑁫𑁩; 𑀩𑀼. 𑀯𑀁. 𑀅𑀝𑁆𑀞. 𑁪.𑁫; 𑀘𑀭𑀺𑀬𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸, 𑀧𑀓𑀺𑀡𑁆𑀡𑀓𑀓𑀣𑀸; 𑀅𑀧. 𑁨.𑁭.𑁨𑁦) 𑁋

𑀢𑁂𑀦𑁂𑀯 𑀘 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦𑀧𑀺 𑀩𑀼𑀤𑁆𑀤𑀕𑀼𑀡𑀧𑀭𑀺𑀘𑁆𑀙𑁂𑀤𑀦𑀁 𑀧𑀢𑀺 𑀅𑀦𑀼𑀬𑀼𑀢𑁆𑀢𑁂𑀦 ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀧𑀺 𑀘 𑀫𑁂, 𑀪𑀦𑁆𑀢𑁂, 𑀥𑀫𑁆𑀫𑀦𑁆𑀯𑀬𑁄 𑀯𑀺𑀤𑀺𑀢𑁄’’𑀢𑀺 (𑀤𑀻. 𑀦𑀺. 𑁨.𑁧𑁪𑁬) 𑀯𑀼𑀢𑁆𑀢𑀁.

𑁨. 𑀏𑀯𑀁 𑀲𑀗𑁆𑀔𑁂𑀧𑁂𑀦 𑀲𑀓𑀮𑀲𑀩𑁆𑀩𑀜𑁆𑀜𑀼𑀕𑀼𑀡𑁂𑀳𑀺 𑀪𑀕𑀯𑀦𑁆𑀢𑀁 𑀅𑀪𑀺𑀢𑁆𑀣𑀯𑀺𑀢𑁆𑀯𑀸 𑀇𑀤𑀸𑀦𑀺 𑀲𑀤𑁆𑀥𑀫𑁆𑀫𑀁 𑀣𑁄𑀫𑁂𑀢𑀼𑀁 ‘‘𑀩𑀼𑀤𑁆𑀥𑁄𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑀼𑀤𑁆𑀥𑁄𑀢𑀺 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄. 𑀩𑀼𑀤𑁆𑀥𑀪𑀸𑀯𑀦𑁆𑀢𑀺 𑀓𑀫𑁆𑀫𑀦𑀺𑀤𑁆𑀤𑁂𑀲𑁄. 𑀪𑀸𑀯𑁂𑀢𑁆𑀯𑀸 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 ¶ 𑀘 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄. 𑀬𑀦𑁆𑀢𑀺 𑀅𑀦𑀺𑀬𑀫𑀢𑁄 𑀓𑀫𑁆𑀫𑀦𑀺𑀤𑁆𑀤𑁂𑀲𑁄. 𑀉𑀧𑀕𑀢𑁄𑀢𑀺 𑀅𑀧𑀭𑀓𑀸𑀮𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄. 𑀯𑀦𑁆𑀤𑁂𑀢𑀺 𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄. 𑀢𑀦𑁆𑀢𑀺 𑀦𑀺𑀬𑀫𑀦𑀁. 𑀥𑀫𑁆𑀫𑀦𑁆𑀢𑀺 𑀯𑀦𑁆𑀤𑀦𑀓𑀺𑀭𑀺𑀬𑀸𑀬 𑀓𑀫𑁆𑀫𑀦𑀺𑀤𑁆𑀤𑁂𑀲𑁄. 𑀕𑀢𑀫𑀮𑀁 𑀅𑀦𑀼𑀢𑁆𑀢𑀭𑀦𑁆𑀢𑀺 𑀘 𑀢𑀩𑁆𑀩𑀺𑀲𑁂𑀲𑀦𑀁.

𑀢𑀢𑁆𑀣 𑀩𑀼𑀤𑁆𑀥𑀲𑀤𑁆𑀤𑀲𑁆𑀲 𑀢𑀸𑀯 𑁋 ‘‘𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄, 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑁂𑀲𑀦𑀬𑁂𑀦 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁯𑁭) 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀲𑀯𑀸𑀲𑀦𑀸𑀬 𑀅𑀜𑁆𑀜𑀸𑀡𑀦𑀺𑀤𑁆𑀤𑀸𑀬 𑀅𑀘𑁆𑀘𑀦𑁆𑀢𑀯𑀺𑀕𑀫𑀢𑁄, 𑀩𑀼𑀤𑁆𑀥𑀺𑀬𑀸 𑀯𑀸 𑀯𑀺𑀓𑀲𑀺𑀢𑀪𑀸𑀯𑀢𑁄 𑀩𑀼𑀤𑁆𑀥𑀯𑀸𑀢𑀺 𑀩𑀼𑀤𑁆𑀥𑁄 𑀚𑀸𑀕𑀭𑀡𑀯𑀺𑀓𑀲𑀦𑀢𑁆𑀣𑀯𑀲𑁂𑀦. 𑀅𑀣 𑀯𑀸 𑀓𑀲𑁆𑀲𑀘𑀺𑀧𑀺 𑀜𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀦𑀯𑀩𑀼𑀤𑁆𑀥𑀲𑁆𑀲 𑀅𑀪𑀸𑀯𑁂𑀦 𑀜𑁂𑀬𑁆𑀬𑀯𑀺𑀲𑁂𑀲𑀲𑁆𑀲 𑀓𑀫𑁆𑀫𑀪𑀸𑀯𑁂𑀦 ¶ 𑀅𑀕𑁆𑀕𑀳𑀡𑀢𑁄 𑀓𑀫𑁆𑀫𑀯𑀘𑀦𑀺𑀘𑁆𑀙𑀸𑀬 𑀅𑀪𑀸𑀯𑁂𑀦 𑀅𑀯𑀕𑀫𑀦𑀢𑁆𑀣𑀯𑀲𑁂𑀦𑁂𑀯 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄 𑀮𑀩𑁆𑀪𑀢𑀻𑀢𑀺 𑀩𑀼𑀤𑁆𑀥𑀯𑀸𑀢𑀺 𑀩𑀼𑀤𑁆𑀥𑁄 𑀬𑀣𑀸 ‘‘𑀤𑀺𑀓𑁆𑀔𑀺𑀢𑁄 𑀦 𑀤𑀤𑀸𑀢𑀻’’𑀢𑀺. 𑀅𑀢𑁆𑀣𑀢𑁄 𑀧𑀦 𑀧𑀸𑀭𑀫𑀺𑀢𑀸𑀧𑀭𑀺𑀪𑀸𑀯𑀺𑀢𑁄 𑀲𑀬𑀫𑁆𑀪𑀽𑀜𑀸𑀡𑁂𑀦 𑀲𑀳 𑀯𑀸𑀲𑀦𑀸𑀬 𑀯𑀺𑀳𑀢𑀯𑀺𑀤𑁆𑀥𑀲𑁆𑀢𑀦𑀺𑀭𑀯𑀲𑁂𑀲𑀓𑀺𑀮𑁂𑀲𑁄 𑀫𑀳𑀸𑀓𑀭𑀼𑀡𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀅𑀧𑀭𑀺𑀫𑁂𑀬𑁆𑀬𑀕𑀼𑀡𑀕𑀡𑀸𑀥𑀸𑀭𑁄 𑀔𑀦𑁆𑀥𑀲𑀦𑁆𑀢𑀸𑀦𑁄 𑀩𑀼𑀤𑁆𑀥𑁄. 𑀬𑀣𑀸𑀳 𑁋 ‘‘𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺. 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯’’𑀦𑁆𑀢𑀺 (𑀫𑀳𑀸𑀦𑀺. 𑁧𑁯𑁨). 𑀅𑀧𑀺-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂. 𑀢𑁂𑀦 ‘‘𑀏𑀯𑀁 𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑁄 𑀲𑁄𑀧𑀺 𑀦𑀸𑀫 𑀪𑀕𑀯𑀸’’𑀢𑀺 𑀯𑀓𑁆𑀔𑀫𑀸𑀦𑀕𑀼𑀡𑁂 𑀥𑀫𑁆𑀫𑁂 𑀲𑀫𑁆𑀪𑀸𑀯𑀦𑀁 𑀤𑀻𑀧𑁂𑀢𑀺. 𑀩𑀼𑀤𑁆𑀥𑀪𑀸𑀯𑀦𑁆𑀢𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁. 𑀪𑀸𑀯𑁂𑀢𑁆𑀯𑀸𑀢𑀺 𑀉𑀧𑁆𑀧𑀸𑀤𑁂𑀢𑁆𑀯𑀸 𑀯𑀟𑁆𑀠𑁂𑀢𑁆𑀯𑀸 𑀘. 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸. 𑀉𑀧𑀕𑀢𑁄𑀢𑀺 𑀧𑀢𑁆𑀢𑁄, 𑀅𑀥𑀺𑀕𑀢𑁄𑀢𑀺 𑀅𑀢𑁆𑀣𑁄. 𑀏𑀢𑀲𑁆𑀲 ‘‘𑀩𑀼𑀤𑁆𑀥𑀪𑀸𑀯’’𑀦𑁆𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀕𑀢𑀫𑀮𑀦𑁆𑀢𑀺 𑀯𑀺𑀕𑀢𑀫𑀮𑀁, 𑀦𑀺𑀤𑁆𑀤𑁄𑀲𑀦𑁆𑀢𑀺 𑀅𑀢𑁆𑀣𑁄. 𑀯𑀦𑁆𑀤𑁂𑀢𑀺 𑀧𑀡𑀫𑀸𑀫𑀺, 𑀣𑁄𑀫𑁂𑀫𑀺 𑀯𑀸. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀉𑀢𑁆𑀢𑀭𑀭𑀳𑀺𑀢𑀁, 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀦𑁆𑀢𑀺 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀅𑀧𑀸𑀬𑀢𑁄 𑀲𑀁𑀲𑀸𑀭𑀢𑁄 𑀘 𑀅𑀧𑀢𑀫𑀸𑀦𑁂 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄.

𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀏𑀯𑀁 𑀯𑀺𑀯𑀺𑀥𑀕𑀼𑀡𑀕𑀡𑀲𑀫𑀦𑁆𑀦𑀸𑀕𑀢𑁄 𑀩𑀼𑀤𑁆𑀥𑁄𑀧𑀺 𑀪𑀕𑀯𑀸 𑀬𑀁 𑀅𑀭𑀺𑀬𑀫𑀕𑁆𑀕𑀲𑀗𑁆𑀔𑀸𑀢𑀁 𑀥𑀫𑁆𑀫𑀁 𑀪𑀸𑀯𑁂𑀢𑁆𑀯𑀸 𑀨𑀮𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀧𑀦 𑀥𑀫𑁆𑀫𑀁 𑀲𑀘𑁆𑀙𑀺𑀓𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀢𑁄, 𑀢𑀫𑁂𑀢𑀁 𑀩𑀼𑀤𑁆𑀥𑀸𑀦𑀫𑁆𑀧𑀺 𑀩𑀼𑀤𑁆𑀥𑀪𑀸𑀯𑀳𑁂𑀢𑀼𑀪𑀽𑀢𑀁 𑀲𑀩𑁆𑀩𑀤𑁄𑀲𑀫𑀮𑀭𑀳𑀺𑀢𑀁 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀢𑀭𑀸𑀪𑀸𑀯𑁂𑀦 𑀅𑀦𑀼𑀢𑁆𑀢𑀭𑀁 𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑀁 𑀦𑀫𑀸𑀫𑀻𑀢𑀺. 𑀧𑀭𑀺𑀬𑀢𑁆𑀢𑀺𑀲𑀤𑁆𑀥𑀫𑁆𑀫𑀲𑁆𑀲𑀧𑀺 𑀢𑀧𑁆𑀧𑀓𑀸𑀲𑀦𑀢𑁆𑀢𑀸 𑀇𑀥 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀣 𑀯𑀸 ‘‘𑀅𑀪𑀺𑀥𑀫𑁆𑀫𑀦𑀬𑀲𑀫𑀼𑀤𑁆𑀤𑀁 𑀅𑀥𑀺𑀕𑀘𑁆𑀙𑀺, 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑀫𑁆𑀫𑀲𑀻’’𑀢𑀺 𑀘 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲𑀧𑀺 𑀲𑀘𑁆𑀙𑀺𑀓𑀺𑀭𑀺𑀬𑀲𑀫𑁆𑀫𑀲𑀦𑀧𑀭𑀺𑀬𑀸𑀬𑁄 𑀮𑀩𑁆𑀪𑀢𑀻𑀢𑀺 𑀲𑁄𑀧𑀺 𑀇𑀥 𑀯𑀼𑀢𑁆𑀢𑁄 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀢𑀣𑀸 ‘‘𑀬𑀁 𑀥𑀫𑁆𑀫𑀁 𑀪𑀸𑀯𑁂𑀢𑁆𑀯𑀸 𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀩𑀼𑀤𑁆𑀥𑀓𑀭𑀥𑀫𑁆𑀫𑀪𑀽𑀢𑀸𑀳𑀺 𑀧𑀸𑀭𑀫𑀺𑀢𑀸𑀳𑀺 𑀲𑀳 ¶ 𑀧𑀼𑀩𑁆𑀩𑀪𑀸𑀕𑁂 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀬𑁄𑀧𑀺 𑀇𑀥 𑀥𑀫𑁆𑀫-𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀸𑀧𑀺 𑀳𑀺 𑀫𑀮𑀧𑀝𑀺𑀧𑀓𑁆𑀔𑀢𑀸𑀬 𑀕𑀢𑀫𑀮𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀅𑀦𑀼𑀢𑁆𑀢𑀭𑀸 𑀘𑀸𑀢𑀺. 𑀢𑀣𑀸 𑀳𑀺 𑀲𑀢𑁆𑀢𑀸𑀦𑀁 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀢𑁆𑀣𑀸𑀬 𑀓𑀢𑀫𑀳𑀸𑀪𑀺𑀦𑀻𑀳𑀸𑀭𑁄 𑀫𑀳𑀸𑀓𑀭𑀼𑀡𑀸𑀥𑀺𑀯𑀸𑀲𑀧𑁂𑀲𑀮𑀚𑁆𑀛𑀸𑀲𑀬𑁄 𑀧𑀜𑁆𑀜𑀸𑀯𑀺𑀲𑁂𑀲𑀧𑀭𑀺𑀥𑁄𑀢𑀦𑀺𑀫𑁆𑀫𑀮𑀸𑀦𑀁 𑀤𑀸𑀦𑀤𑀫𑀲𑀜𑁆𑀜𑀫𑀸𑀤𑀻𑀦𑀁 𑀉𑀢𑁆𑀢𑀫𑀥𑀫𑁆𑀫𑀸𑀦𑀁 ¶ 𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀓𑀧𑁆𑀧𑀸𑀦𑀁 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀲𑀓𑁆𑀓𑀘𑁆𑀘𑀁 𑀦𑀺𑀭𑀦𑁆𑀢𑀭𑀁 𑀦𑀺𑀭𑀯𑀲𑁂𑀲𑀸𑀦𑀁 𑀪𑀸𑀯𑀦𑀸𑀧𑀘𑁆𑀘𑀓𑁆𑀔𑀓𑀭𑀡𑁂𑀳𑀺 𑀓𑀫𑁆𑀫𑀸𑀤𑀻𑀲𑀼 𑀅𑀥𑀺𑀕𑀢𑀯𑀲𑀺𑀪𑀸𑀯𑁄 𑀅𑀘𑁆𑀙𑀭𑀺𑀬𑀸𑀘𑀺𑀦𑁆𑀢𑁂𑀬𑁆𑀬𑀫𑀳𑀸𑀦𑀼𑀪𑀸𑀯𑁄 𑀅𑀥𑀺𑀲𑀻𑀮𑀸𑀥𑀺𑀘𑀺𑀢𑁆𑀢𑀸𑀦𑀁 𑀧𑀭𑀫𑀼𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀪𑀕𑀯𑀸 𑀧𑀘𑁆𑀘𑀬𑀸𑀓𑀸𑀭𑁂 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀼𑀔𑁂𑀦 𑀫𑀳𑀸𑀯𑀚𑀺𑀭𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺.

𑀏𑀢𑁆𑀣 𑀘 ‘‘𑀪𑀸𑀯𑁂𑀢𑁆𑀯𑀸’’𑀢𑀺 𑀏𑀢𑁂𑀦 𑀯𑀺𑀚𑁆𑀚𑀸𑀲𑀫𑁆𑀧𑀤𑀸𑀬 𑀥𑀫𑁆𑀫𑀁 𑀣𑁄𑀫𑁂𑀢𑀺, ‘‘𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺 𑀏𑀢𑁂𑀦 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀤𑀸𑀬. 𑀢𑀣𑀸 𑀧𑀞𑀫𑁂𑀦 𑀛𑀸𑀦𑀲𑀫𑁆𑀧𑀤𑀸𑀬, 𑀤𑀼𑀢𑀺𑀬𑁂𑀦 𑀯𑀺𑀫𑁄𑀓𑁆𑀔𑀲𑀫𑁆𑀧𑀤𑀸𑀬. 𑀧𑀞𑀫𑁂𑀦 𑀯𑀸 𑀲𑀫𑀸𑀥𑀺𑀲𑀫𑁆𑀧𑀤𑀸𑀬, 𑀤𑀼𑀢𑀺𑀬𑁂𑀦 𑀲𑀫𑀸𑀧𑀢𑁆𑀢𑀺𑀲𑀫𑁆𑀧𑀤𑀸𑀬. 𑀅𑀣 𑀯𑀸 𑀧𑀞𑀫𑁂𑀦 𑀔𑀬𑁂𑀜𑀸𑀡𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀅𑀦𑀼𑀧𑁆𑀧𑀸𑀤𑁂𑀜𑀸𑀡𑀪𑀸𑀯𑁂𑀦. 𑀧𑀼𑀭𑀺𑀫𑁂𑀦 𑀯𑀸 𑀯𑀺𑀚𑁆𑀚𑀽𑀧𑀫𑀢𑀸𑀬, 𑀤𑀼𑀢𑀺𑀬𑁂𑀦 𑀯𑀚𑀺𑀭𑀼𑀧𑀫𑀢𑀸𑀬. 𑀧𑀼𑀭𑀺𑀫𑁂𑀦 𑀯𑀸 𑀯𑀺𑀭𑀸𑀕𑀲𑀫𑁆𑀧𑀢𑁆𑀢𑀺𑀬𑀸, 𑀤𑀼𑀢𑀺𑀬𑁂𑀦 𑀦𑀺𑀭𑁄𑀥𑀲𑀫𑁆𑀧𑀢𑁆𑀢𑀺𑀬𑀸. 𑀢𑀣𑀸 𑀧𑀞𑀫𑁂𑀦 𑀦𑀺𑀬𑁆𑀬𑀸𑀦𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀦𑀺𑀲𑁆𑀲𑀭𑀡𑀪𑀸𑀯𑁂𑀦. 𑀧𑀞𑀫𑁂𑀦 𑀯𑀸 𑀳𑁂𑀢𑀼𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀅𑀲𑀗𑁆𑀔𑀢𑀪𑀸𑀯𑁂𑀦. 𑀧𑀞𑀫𑁂𑀦 𑀯𑀸 𑀤𑀲𑁆𑀲𑀦𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀯𑀺𑀯𑁂𑀓𑀪𑀸𑀯𑁂𑀦. 𑀧𑀞𑀫𑁂𑀦 𑀯𑀸 𑀅𑀥𑀺𑀧𑀢𑀺𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀅𑀫𑀢𑀪𑀸𑀯𑁂𑀦 𑀥𑀫𑁆𑀫𑀁 𑀣𑁄𑀫𑁂𑀢𑀺. 𑀅𑀣 𑀯𑀸 ‘‘𑀬𑀁 𑀥𑀫𑁆𑀫𑀁 𑀪𑀸𑀯𑁂𑀢𑁆𑀯𑀸 𑀩𑀼𑀤𑁆𑀥𑀪𑀸𑀯𑀁 𑀉𑀧𑀕𑀢𑁄’’𑀢𑀺 𑀏𑀢𑁂𑀦 𑀲𑁆𑀯𑀸𑀓𑁆𑀔𑀸𑀢𑀢𑀸𑀬 𑀥𑀫𑁆𑀫𑀁 𑀣𑁄𑀫𑁂𑀢𑀺, ‘‘𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺 𑀏𑀢𑁂𑀦 𑀲𑀦𑁆𑀤𑀺𑀝𑁆𑀞𑀺𑀓𑀢𑀸𑀬. 𑀢𑀣𑀸 𑀧𑀼𑀭𑀺𑀫𑁂𑀦 𑀅𑀓𑀸𑀮𑀺𑀓𑀢𑀸𑀬, 𑀧𑀘𑁆𑀙𑀺𑀫𑁂𑀦 𑀏𑀳𑀺𑀧𑀲𑁆𑀲𑀺𑀓𑀢𑀸𑀬. 𑀧𑀼𑀭𑀺𑀫𑁂𑀦 𑀯𑀸 𑀑𑀧𑀦𑁂𑀬𑁆𑀬𑀺𑀓𑀢𑀸𑀬, 𑀧𑀘𑁆𑀙𑀺𑀫𑁂𑀦 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀢𑀸𑀬 𑀥𑀫𑁆𑀫𑀁 𑀣𑁄𑀫𑁂𑀢𑀺. ‘‘𑀕𑀢𑀫𑀮’’𑀦𑁆𑀢𑀺 𑀇𑀫𑀺𑀦𑀸 𑀲𑀁𑀓𑀺𑀮𑁂𑀲𑀸𑀪𑀸𑀯𑀤𑀻𑀧𑀦𑁂𑀦 𑀥𑀫𑁆𑀫𑀲𑁆𑀲 𑀧𑀭𑀺𑀲𑀼𑀤𑁆𑀥𑀢𑀁 𑀤𑀲𑁆𑀲𑁂𑀢𑀺. ‘‘𑀅𑀦𑀼𑀢𑁆𑀢𑀭’’𑀦𑁆𑀢𑀺 𑀏𑀢𑁂𑀦 𑀅𑀜𑁆𑀜𑀲𑁆𑀲 𑀯𑀺𑀲𑀺𑀝𑁆𑀞𑀲𑁆𑀲 𑀅𑀪𑀸𑀯𑀤𑀻𑀧𑀦𑁂𑀦 𑀯𑀺𑀧𑀼𑀮𑀧𑀭𑀺𑀧𑀼𑀡𑁆𑀡𑀢𑀁. 𑀧𑀞𑀫𑁂𑀦 𑀯𑀸 𑀧𑀳𑀸𑀦𑀲𑀫𑁆𑀧𑀤𑀁 𑀥𑀫𑁆𑀫𑀲𑁆𑀲 𑀤𑀲𑁆𑀲𑁂𑀢𑀺, 𑀤𑀼𑀢𑀺𑀬𑁂𑀦 𑀲𑀪𑀸𑀯𑀲𑀫𑁆𑀧𑀤𑀁. 𑀪𑀸𑀯𑁂𑀢𑀩𑁆𑀩𑀢𑀸𑀬 𑀯𑀸 𑀥𑀫𑁆𑀫𑀲𑁆𑀲 𑀕𑀢𑀫𑀮𑀪𑀸𑀯𑁄 𑀬𑁄𑀚𑁂𑀢𑀩𑁆𑀩𑁄. 𑀪𑀸𑀯𑀦𑀸𑀩𑀮𑁂𑀦 𑀳𑀺 𑀲𑁄 𑀤𑁄𑀲𑀸𑀦𑀁 𑀲𑀫𑀼𑀕𑁆𑀖𑀸𑀢𑀓𑁄 𑀳𑁄𑀢𑀻𑀢𑀺. 𑀲𑀘𑁆𑀙𑀺𑀓𑀸𑀢𑀩𑁆𑀩𑀪𑀸𑀯𑁂𑀦 𑀅𑀦𑀼𑀢𑁆𑀢𑀭𑀪𑀸𑀯𑁄 𑀬𑁄𑀚𑁂𑀢𑀩𑁆𑀩𑁄. 𑀲𑀘𑁆𑀙𑀺𑀓𑀺𑀭𑀺𑀬𑀸𑀦𑀺𑀩𑁆𑀩𑀢𑁆𑀢𑀺𑀢𑁄 𑀳𑀺 𑀢𑀢𑀼𑀢𑁆𑀢𑀭𑀺𑀓𑀭𑀡𑀻𑀬𑀸𑀪𑀸𑀯𑀢𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀅𑀦𑀼𑀢𑁆𑀢𑀭𑁄𑀢𑀺. 𑀢𑀣𑀸 ‘‘𑀪𑀸𑀯𑁂𑀢𑁆𑀯𑀸’’𑀢𑀺 𑀏𑀢𑁂𑀦 𑀲𑀳 𑀧𑀼𑀩𑁆𑀩𑀪𑀸𑀕𑀲𑀻𑀮𑀸𑀤𑀻𑀳𑀺 𑀲𑁂𑀓𑁆𑀔𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀓𑁆𑀔𑀦𑁆𑀥𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. ‘‘𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺 𑀏𑀢𑁂𑀦 𑀲𑀳 𑀅𑀲𑀗𑁆𑀔𑀢𑀸𑀬 𑀥𑀸𑀢𑀼𑀬𑀸 𑀅𑀲𑁂𑀓𑁆𑀔𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀓𑁆𑀔𑀦𑁆𑀥𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀻𑀢𑀺.

𑁩. 𑀏𑀯𑀁 𑀲𑀗𑁆𑀔𑁂𑀧𑁂𑀦𑁂𑀯 𑀲𑀩𑁆𑀩𑀥𑀫𑁆𑀫𑀕𑀼𑀡𑁂𑀳𑀺 𑀲𑀤𑁆𑀥𑀫𑁆𑀫𑀁 𑀅𑀪𑀺𑀢𑁆𑀣𑀯𑀺𑀢𑁆𑀯𑀸 𑀇𑀤𑀸𑀦𑀺 𑀅𑀭𑀺𑀬𑀲𑀗𑁆𑀖𑀁 𑀣𑁄𑀫𑁂𑀢𑀼𑀁 ‘‘𑀲𑀼𑀕𑀢𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀕𑀢𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑀦𑀺𑀤𑁆𑀤𑁂𑀲𑁄 ¶ . 𑀢𑀲𑁆𑀲 ‘‘𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄 ¶ . 𑀑𑀭𑀲𑀸𑀦𑀦𑁆𑀢𑀺 𑀧𑀼𑀢𑁆𑀢𑀯𑀺𑀲𑁂𑀲𑀦𑀁. 𑀫𑀸𑀭𑀲𑁂𑀦𑀫𑀣𑀦𑀸𑀦𑀦𑁆𑀢𑀺 𑀑𑀭𑀲𑀧𑀼𑀢𑁆𑀢𑀪𑀸𑀯𑁂 𑀓𑀸𑀭𑀡𑀦𑀺𑀤𑁆𑀤𑁂𑀲𑁄. 𑀢𑁂𑀦 𑀓𑀺𑀮𑁂𑀲𑀧𑀳𑀸𑀦𑀫𑁂𑀯 𑀪𑀕𑀯𑀢𑁄 𑀑𑀭𑀲𑀧𑀼𑀢𑁆𑀢𑀪𑀸𑀯𑁂 𑀓𑀸𑀭𑀡𑀁 𑀅𑀦𑀼𑀚𑀸𑀦𑀸𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀝𑁆𑀞𑀦𑁆𑀦𑀦𑁆𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑀦𑀺𑀤𑁆𑀤𑁂𑀲𑁄. 𑀢𑁂𑀦 𑀘 𑀲𑀢𑀺𑀧𑀺 𑀢𑁂𑀲𑀁 𑀲𑀢𑁆𑀢𑀯𑀺𑀲𑁂𑀲𑀪𑀸𑀯𑁂𑀦 𑀅𑀦𑁂𑀓𑀲𑀳𑀲𑁆𑀲𑀲𑀗𑁆𑀔𑀸𑀪𑀸𑀯𑁂 𑀇𑀫𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺 𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄. 𑀲𑀫𑀽𑀳𑀦𑁆𑀢𑀺 𑀲𑀫𑀼𑀤𑀸𑀬𑀦𑀺𑀤𑁆𑀤𑁂𑀲𑁄. 𑀅𑀭𑀺𑀬𑀲𑀗𑁆𑀖𑀦𑁆𑀢𑀺 𑀕𑀼𑀡𑀯𑀺𑀲𑀺𑀝𑁆𑀞𑀲𑀗𑁆𑀖𑀸𑀢𑀪𑀸𑀯𑀦𑀺𑀤𑁆𑀤𑁂𑀲𑁄. 𑀢𑁂𑀦 𑀅𑀲𑀢𑀺𑀧𑀺 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀓𑀸𑀬𑀲𑀸𑀫𑀕𑁆𑀕𑀺𑀬𑀁 𑀅𑀭𑀺𑀬𑀲𑀗𑁆𑀖𑀪𑀸𑀯𑀁 𑀤𑀲𑁆𑀲𑁂𑀢𑀺 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀪𑀸𑀯𑀢𑁄.

𑀢𑀢𑁆𑀣 𑀉𑀭𑀲𑀺 𑀪𑀯𑀸 𑀚𑀸𑀢𑀸 𑀲𑀁𑀩𑀤𑁆𑀥𑀸 𑀘 𑀑𑀭𑀲𑀸. 𑀬𑀣𑀸 𑀳𑀺 𑀲𑀢𑁆𑀢𑀸𑀦𑀁 𑀑𑀭𑀲𑀧𑀼𑀢𑁆𑀢𑀸 𑀅𑀢𑁆𑀢𑀚𑀸𑀢𑀢𑀸𑀬 𑀧𑀺𑀢𑀼 𑀲𑀦𑁆𑀢𑀓𑀲𑁆𑀲 𑀤𑀸𑀬𑀚𑁆𑀚𑀲𑁆𑀲 𑀯𑀺𑀲𑁂𑀲𑁂𑀦 𑀪𑀸𑀕𑀺𑀦𑁄 𑀳𑁄𑀦𑁆𑀢𑀺, 𑀏𑀯𑀫𑁂𑀢𑁂𑀧𑀺 𑀅𑀭𑀺𑀬𑀧𑀼𑀕𑁆𑀕𑀮𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀥𑀫𑁆𑀫𑀲𑁆𑀲𑀯𑀦𑀦𑁆𑀢𑁂 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀢𑀸𑀬 𑀪𑀕𑀯𑀢𑁄 𑀲𑀦𑁆𑀢𑀓𑀲𑁆𑀲 𑀯𑀺𑀫𑀼𑀢𑁆𑀢𑀺𑀲𑀼𑀔𑀲𑁆𑀲 𑀅𑀭𑀺𑀬𑀥𑀫𑁆𑀫𑀭𑀢𑀦𑀲𑁆𑀲 𑀘 𑀏𑀓𑀦𑁆𑀢𑀪𑀸𑀕𑀺𑀦𑁄𑀢𑀺 𑀑𑀭𑀲𑀸 𑀯𑀺𑀬 𑀑𑀭𑀲𑀸. 𑀅𑀣 𑀯𑀸 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸𑀦𑀼𑀪𑀸𑀯𑁂𑀦𑁂𑀯 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀫𑀸𑀦𑀸 𑀑𑀓𑁆𑀓𑀦𑁆𑀢𑀸 𑀘 𑀅𑀭𑀺𑀬𑀲𑀸𑀯𑀓𑀸 𑀪𑀕𑀯𑀢𑁄 𑀉𑀭𑁂𑀦 𑀯𑀸𑀬𑀸𑀫𑀚𑀦𑀺𑀢𑀸𑀪𑀺𑀚𑀸𑀢𑀺𑀢𑀸𑀬 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀑𑀭𑀲𑀸 𑀧𑀼𑀢𑁆𑀢𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀦𑁆𑀢𑀺. 𑀲𑀸𑀯𑀓𑁂𑀳𑀺 𑀧𑀯𑀢𑁆𑀢𑀺𑀬𑀫𑀸𑀦𑀸𑀧𑀺 𑀳𑀺 𑀥𑀫𑁆𑀫𑀤𑁂𑀲𑀦𑀸 ‘‘𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸’’𑀇𑀘𑁆𑀘𑁂𑀯 𑀯𑀼𑀘𑁆𑀘𑀢𑀺 𑀢𑀫𑁆𑀫𑀽𑀮𑀺𑀓𑀢𑁆𑀢𑀸 𑀮𑀓𑁆𑀔𑀡𑀸𑀤𑀺𑀯𑀺𑀲𑁂𑀲𑀸𑀪𑀸𑀯𑀢𑁄 𑀘.

𑀬𑀤𑀺𑀧𑀺 𑀅𑀭𑀺𑀬𑀲𑀸𑀯𑀓𑀸𑀦𑀁 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀲𑀫𑀬𑁂 𑀪𑀕𑀯𑀢𑁄 𑀯𑀺𑀬 𑀢𑀤𑀦𑁆𑀢𑀭𑀸𑀬𑀓𑀭𑀡𑀢𑁆𑀣𑀁 𑀤𑁂𑀯𑀧𑀼𑀢𑁆𑀢𑀫𑀸𑀭𑁄, 𑀫𑀸𑀭𑀯𑀸𑀳𑀺𑀦𑀻 𑀯𑀸 𑀦 𑀏𑀓𑀦𑁆𑀢𑁂𑀦 𑀅𑀧𑀲𑀸𑀤𑁂𑀢𑀺, 𑀢𑁂𑀳𑀺 𑀧𑀦 𑀅𑀧𑀲𑀸𑀤𑁂𑀢𑀩𑁆𑀩𑀢𑀸𑀬 𑀓𑀸𑀭𑀡𑁂 𑀯𑀺𑀫𑀣𑀺𑀢𑁂 𑀢𑁂𑀧𑀺 𑀯𑀺𑀫𑀣𑀺𑀢𑀸 𑀏𑀯 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 ‘‘𑀫𑀸𑀭𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀫𑀸𑀭𑀲𑁂𑀦𑀫𑀣𑀦𑀸𑀦𑀦𑁆𑀢𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀔𑀦𑁆𑀥𑀸𑀪𑀺𑀲𑀗𑁆𑀔𑀸𑀭𑀫𑀸𑀭𑀸𑀦𑀁 𑀯𑀺𑀬 𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑁆𑀲𑀧𑀺 𑀕𑀼𑀡𑀫𑀸𑀭𑀡𑁂 𑀲𑀳𑀸𑀬𑀪𑀸𑀯𑀽𑀧𑀕𑀫𑀦𑀢𑁄 𑀓𑀺𑀮𑁂𑀲𑀩𑀮𑀓𑀸𑀬𑁄 ‘‘𑀲𑁂𑀦𑀸’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 ‘‘𑀓𑀸𑀫𑀸 𑀢𑁂 𑀧𑀞𑀫𑀸 𑀲𑁂𑀦𑀸’’𑀢𑀺𑀆𑀤𑀺 (𑀲𑀼. 𑀦𑀺. 𑁪𑁩𑁮). 𑀲𑀸 𑀘 𑀢𑁂𑀳𑀺 𑀤𑀺𑀬𑀟𑁆𑀠𑀲𑀳𑀲𑁆𑀲𑀪𑁂𑀤𑀸, 𑀅𑀦𑀦𑁆𑀢𑀪𑁂𑀤𑀸 𑀯𑀸 𑀓𑀺𑀮𑁂𑀲𑀯𑀸𑀳𑀺𑀦𑀻 𑀲𑀢𑀺𑀥𑀫𑁆𑀫𑀯𑀺𑀘𑀬𑀯𑀻𑀭𑀺𑀬𑀲𑀫𑀣𑀸𑀤𑀺𑀕𑀼𑀡𑀧𑀳𑀭𑀡𑁂𑀳𑀺 𑀑𑀥𑀺𑀲𑁄 𑀯𑀺𑀫𑀣𑀺𑀢𑀸 ¶ 𑀯𑀺𑀳𑀢𑀸 𑀯𑀺𑀤𑁆𑀥𑀲𑁆𑀢𑀸 𑀘𑀸𑀢𑀺 𑀫𑀸𑀭𑀲𑁂𑀦𑀫𑀣𑀦𑀸, 𑀅𑀭𑀺𑀬𑀲𑀸𑀯𑀓𑀸. 𑀏𑀢𑁂𑀦 𑀢𑁂𑀲𑀁 𑀪𑀕𑀯𑀢𑁄 𑀅𑀦𑀼𑀚𑀸𑀢𑀧𑀼𑀢𑁆𑀢𑀢𑀁 𑀤𑀲𑁆𑀲𑁂𑀢𑀺.

𑀆𑀭𑀓𑀢𑁆𑀢𑀸 𑀓𑀺𑀮𑁂𑀲𑁂𑀳𑀺, 𑀅𑀦𑀬𑁂 𑀦 𑀇𑀭𑀺𑀬𑀦𑀢𑁄, 𑀅𑀬𑁂 𑀘 𑀇𑀭𑀺𑀬𑀦𑀢𑁄 𑀅𑀭𑀺𑀬𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀅𑀣 𑀯𑀸 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀲𑀭𑀡𑀦𑁆𑀢𑀺 𑀅𑀭𑀡𑀻𑀬𑀢𑁄 𑀉𑀧𑀕𑀦𑁆𑀢𑀩𑁆𑀩𑀢𑁄, 𑀉𑀧𑀕𑀢𑀸𑀦𑀜𑁆𑀘 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄 𑀅𑀭𑀺𑀬𑀸. 𑀅𑀭𑀺𑀬𑀸𑀦𑀁 𑀲𑀗𑁆𑀖𑁄𑀢𑀺 𑀅𑀭𑀺𑀬𑀲𑀗𑁆𑀖𑁄. 𑀅𑀭𑀺𑀬𑁄 𑀘 𑀲𑁄 𑀲𑀗𑁆𑀖𑁄 𑀘𑀸𑀢𑀺 𑀯𑀸 𑀅𑀭𑀺𑀬𑀲𑀗𑁆𑀖𑁄. 𑀪𑀕𑀯𑀢𑁄 ¶ 𑀅𑀧𑀭𑀪𑀸𑀕𑁂 𑀩𑀼𑀤𑁆𑀥𑀥𑀫𑁆𑀫𑀭𑀢𑀦𑀸𑀦𑀫𑁆𑀧𑀺 𑀲𑀫𑀥𑀺𑀕𑀫𑁄 𑀲𑀗𑁆𑀖𑀭𑀢𑀦𑀸𑀥𑀻𑀦𑁄𑀢𑀺 𑀅𑀲𑁆𑀲 𑀅𑀭𑀺𑀬𑀲𑀗𑁆𑀖𑀲𑁆𑀲 𑀩𑀳𑀽𑀧𑀓𑀸𑀭𑀢𑀁 𑀤𑀲𑁆𑀲𑁂𑀢𑀼𑀁 𑀇𑀥𑁂𑀯 ‘‘𑀲𑀺𑀭𑀲𑀸 𑀯𑀦𑁆𑀤𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀢𑁆𑀣 𑀘 ‘‘𑀲𑀼𑀕𑀢𑀲𑁆𑀲 𑀑𑀭𑀲𑀸𑀦𑀁 𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀏𑀢𑁂𑀦 𑀅𑀭𑀺𑀬𑀲𑀗𑁆𑀖𑀲𑁆𑀲 𑀧𑀪𑀯𑀲𑀫𑁆𑀧𑀤𑀁 𑀤𑀲𑁆𑀲𑁂𑀢𑀺, ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺 𑀏𑀢𑁂𑀦 𑀧𑀳𑀸𑀦𑀲𑀫𑁆𑀧𑀤𑀁 𑀲𑀓𑀮𑀲𑀁𑀓𑀺𑀮𑁂𑀲𑀧𑀳𑀸𑀦𑀤𑀻𑀧𑀦𑀢𑁄, ‘‘𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀽𑀳’’𑀦𑁆𑀢𑀺 𑀏𑀢𑁂𑀦 𑀜𑀸𑀡𑀲𑀫𑁆𑀧𑀤𑀁 𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑀪𑀸𑀯𑀤𑀻𑀧𑀦𑀢𑁄. ‘‘𑀅𑀭𑀺𑀬𑀲𑀗𑁆𑀖’’𑀦𑁆𑀢𑀺 𑀏𑀢𑁂𑀦 𑀧𑀪𑀯𑀲𑀫𑁆𑀧𑀤𑀁 𑀤𑀲𑁆𑀲𑁂𑀢𑀺 𑀲𑀩𑁆𑀩𑀲𑀗𑁆𑀖𑀸𑀦𑀁 𑀅𑀕𑁆𑀕𑀪𑀸𑀯𑀤𑀻𑀧𑀦𑀢𑁄. 𑀅𑀣 𑀯𑀸 𑀲𑀼𑀕𑀢𑀲𑁆𑀲 𑀑𑀭𑀲𑀸𑀦𑀁 𑀧𑀼𑀢𑁆𑀢𑀸𑀦𑀦𑁆𑀢𑀺 𑀅𑀭𑀺𑀬𑀲𑀗𑁆𑀖𑀲𑁆𑀲 𑀯𑀺𑀲𑀼𑀤𑁆𑀥𑀦𑀺𑀲𑁆𑀲𑀬𑀪𑀸𑀯𑀤𑀻𑀧𑀦𑀁. 𑀫𑀸𑀭𑀲𑁂𑀦𑀫𑀣𑀦𑀸𑀦𑀦𑁆𑀢𑀺 𑀲𑀫𑁆𑀫𑀸𑀉𑀚𑀼𑀜𑀸𑀬𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀪𑀸𑀯𑀤𑀻𑀧𑀦𑀁. 𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀽𑀳𑀦𑁆𑀢𑀺 𑀆𑀳𑀼𑀦𑁂𑀬𑁆𑀬𑀸𑀤𑀺𑀪𑀸𑀯𑀤𑀻𑀧𑀦𑀁. 𑀅𑀭𑀺𑀬𑀲𑀗𑁆𑀖𑀦𑁆𑀢𑀺 𑀅𑀦𑀼𑀢𑁆𑀢𑀭𑀧𑀼𑀜𑁆𑀜𑀔𑁂𑀢𑁆𑀢𑀪𑀸𑀯𑀤𑀻𑀧𑀦𑀁. 𑀢𑀣𑀸 ‘‘𑀲𑀼𑀕𑀢𑀲𑁆𑀲 𑀑𑀭𑀲𑀸𑀦𑀁 𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀏𑀢𑁂𑀦 𑀅𑀭𑀺𑀬𑀲𑀗𑁆𑀖𑀲𑁆𑀲 𑀮𑁄𑀓𑀼𑀢𑁆𑀢𑀭𑀲𑀭𑀡𑀕𑀫𑀦𑀲𑀪𑀸𑀯𑀁 𑀤𑀻𑀧𑁂𑀢𑀺. 𑀮𑁄𑀓𑀼𑀢𑁆𑀢𑀭𑀲𑀭𑀡𑀕𑀫𑀦𑁂𑀦 𑀳𑀺 𑀢𑁂 𑀪𑀕𑀯𑀢𑁄 𑀑𑀭𑀲𑀧𑀼𑀢𑁆𑀢𑀸 𑀚𑀸𑀢𑀸. ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺 𑀏𑀢𑁂𑀦 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀤𑀸𑀬 𑀲𑀺𑀤𑁆𑀥𑀁 𑀧𑀼𑀩𑁆𑀩𑀪𑀸𑀕𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀓𑀢𑀸𑀪𑀺𑀦𑀻𑀳𑀸𑀭𑀸 𑀳𑀺 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸 𑀫𑀸𑀭𑀁 𑀫𑀸𑀭𑀧𑀭𑀺𑀲𑀁 𑀯𑀸 𑀅𑀪𑀺𑀯𑀺𑀚𑀺𑀦𑀦𑁆𑀢𑀺. ‘‘𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀽𑀳’’𑀦𑁆𑀢𑀺 𑀏𑀢𑁂𑀦 𑀧𑀝𑀺𑀯𑀺𑀤𑁆𑀥𑀲𑁆𑀢𑀯𑀺𑀧𑀓𑁆𑀔𑁂 𑀲𑁂𑀓𑁆𑀔𑀸𑀲𑁂𑀓𑁆𑀔𑀥𑀫𑁆𑀫𑁂 𑀤𑀲𑁆𑀲𑁂𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀫𑀕𑁆𑀕𑀨𑀮𑀥𑀫𑁆𑀫𑀸𑀦𑀁 𑀧𑀓𑀸𑀲𑀺𑀢𑀢𑁆𑀢𑀸. ‘‘𑀅𑀭𑀺𑀬𑀲𑀗𑁆𑀖’’𑀦𑁆𑀢𑀺 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀭𑀡𑀕𑀫𑀦𑀜𑁆𑀘 𑀲𑀸𑀯𑀓𑀸𑀦𑀁 𑀲𑀩𑁆𑀩𑀕𑀼𑀡𑀸𑀦𑀁 𑀆𑀤𑀺, 𑀲𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀲𑁂𑀓𑁆𑀔𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀫𑀚𑁆𑀛𑁂, 𑀅𑀲𑁂𑀓𑁆𑀔𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀗𑁆𑀔𑁂𑀧𑀢𑁄 𑀲𑀩𑁆𑀩𑁂 𑀅𑀭𑀺𑀬𑀲𑀗𑁆𑀖𑀕𑀼𑀡𑀸 𑀧𑀓𑀸𑀲𑀺𑀢𑀸 𑀳𑁄𑀦𑁆𑀢𑀺.

𑁪. 𑀏𑀯𑀁 𑀕𑀸𑀣𑀸𑀢𑁆𑀢𑀬𑁂𑀦 𑀲𑀗𑁆𑀔𑁂𑀧𑀢𑁄 𑀲𑀓𑀮𑀕𑀼𑀡𑀲𑀁𑀓𑀺𑀢𑁆𑀢𑀦𑀫𑀼𑀔𑁂𑀦 𑀭𑀢𑀦𑀢𑁆𑀢𑀬𑀲𑁆𑀲 𑀧𑀡𑀸𑀫𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀢𑀁 𑀦𑀺𑀧𑀘𑁆𑀘𑀓𑀸𑀭𑀁 𑀬𑀣𑀸𑀥𑀺𑀧𑁆𑀧𑁂𑀢𑁂 𑀧𑀬𑁄𑀚𑀦𑁂 𑀧𑀭𑀺𑀡𑀸𑀫𑁂𑀦𑁆𑀢𑁄 ¶ ‘‘𑀇𑀢𑀺 𑀫𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀭𑀢𑀺𑀚𑀦𑀦𑀝𑁆𑀞𑁂𑀦 𑀭𑀢𑀦𑀁, 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀸. 𑀢𑁂𑀲𑀜𑁆𑀳𑀺 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀪𑀽𑀢𑀕𑀼𑀡𑁂 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀅𑀫𑀢𑀸𑀥𑀺𑀕𑀫𑀳𑁂𑀢𑀼𑀪𑀽𑀢𑀁 𑀅𑀦𑀧𑁆𑀧𑀓𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸𑀳 𑁋

‘‘𑀬𑀲𑁆𑀫𑀺𑀁, 𑀫𑀳𑀸𑀦𑀸𑀫, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀉𑀚𑀼𑀕𑀢𑀫𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺 𑀢𑀣𑀸𑀕𑀢𑀁 𑀆𑀭𑀩𑁆𑀪. 𑀉𑀚𑀼𑀕𑀢𑀘𑀺𑀢𑁆𑀢𑁄 𑀔𑁄 𑀧𑀦, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚𑀁, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁬.𑁧𑁦; 𑁧𑁧.𑁧𑁧).

𑀘𑀺𑀢𑁆𑀢𑀻𑀓𑀢𑀸𑀤𑀺𑀪𑀸𑀯𑁄 ¶ 𑀯𑀸 𑀭𑀢𑀦𑀝𑁆𑀞𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀁 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩; 𑀔𑀼. 𑀧𑀸. 𑀅𑀝𑁆𑀞. 𑁬.𑁩; 𑀲𑀼. 𑀦𑀺. 𑀅𑀝𑁆𑀞. 𑁨𑁨𑁬; 𑀫𑀳𑀸𑀦𑀺. 𑀅𑀝𑁆𑀞. 𑁫𑁦) 𑁋

𑀘𑀺𑀢𑁆𑀢𑀻𑀓𑀢𑀪𑀸𑀯𑀸𑀤𑀬𑁄 𑀘 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀩𑀼𑀤𑁆𑀥𑀸𑀤𑀻𑀲𑀼 𑀏𑀯 𑀮𑀩𑁆𑀪𑀦𑁆𑀢𑀻𑀢𑀺.

𑀯𑀦𑁆𑀤𑀦𑀸𑀯 𑀯𑀦𑁆𑀤𑀦𑀸𑀫𑀬𑀁 𑀬𑀣𑀸 ‘‘𑀤𑀸𑀦𑀫𑀬𑀁 𑀲𑀻𑀮𑀫𑀬’’𑀦𑁆𑀢𑀺. 𑀯𑀦𑁆𑀤𑀦𑀸 𑀘𑁂𑀢𑁆𑀣 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑀦𑀺𑀦𑁆𑀦𑀢𑀸, 𑀣𑁄𑀫𑀦𑀸 𑀯𑀸. 𑀧𑀼𑀚𑁆𑀚𑀪𑀯𑀨𑀮𑀦𑀺𑀩𑁆𑀩𑀢𑁆𑀢𑀦𑀢𑁄 𑀧𑀼𑀜𑁆𑀜𑀁, 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀁 𑀧𑀼𑀦𑀸𑀢𑀻𑀢𑀺 𑀯𑀸. 𑀲𑀼𑀯𑀺𑀳𑀢𑀦𑁆𑀢𑀭𑀸𑀬𑁄𑀢𑀺. 𑀲𑀼𑀝𑁆𑀞𑀼 𑀯𑀺𑀳𑀢𑀦𑁆𑀢𑀭𑀸𑀬𑁄. 𑀏𑀢𑁂𑀦 𑀅𑀢𑁆𑀢𑀦𑁄 𑀧𑀲𑀸𑀤𑀲𑀫𑁆𑀧𑀢𑁆𑀢𑀺𑀬𑀸, 𑀭𑀢𑀦𑀢𑁆𑀢𑀬𑀲𑁆𑀲 𑀘 𑀔𑁂𑀢𑁆𑀢𑀪𑀸𑀯𑀲𑀫𑁆𑀧𑀢𑁆𑀢𑀺𑀬𑀸 𑀢𑀁 𑀧𑀼𑀜𑁆𑀜𑀁 𑀅𑀢𑁆𑀣𑀧𑁆𑀧𑀓𑀸𑀲𑀦𑀲𑁆𑀲 𑀉𑀧𑀖𑀸𑀢𑀓𑀉𑀧𑀤𑁆𑀤𑀯𑀸𑀦𑀁 𑀯𑀺𑀳𑀦𑀦𑁂 𑀲𑀫𑀢𑁆𑀣𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀳𑀼𑀢𑁆𑀯𑀸𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸. 𑀢𑀲𑁆𑀲 ‘‘𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀬𑀁 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸𑀫𑀬𑀁 𑀧𑀼𑀜𑁆𑀜𑀁, 𑀢𑀲𑁆𑀲. 𑀆𑀦𑀼𑀪𑀸𑀯𑁂𑀦𑀸𑀢𑀺 𑀩𑀮𑁂𑀦.

𑁫. 𑀏𑀯𑀁 𑀭𑀢𑀦𑀢𑁆𑀢𑀬𑀲𑁆𑀲 𑀦𑀺𑀧𑀘𑁆𑀘𑀓𑀸𑀭𑁂 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀲𑀸 𑀥𑀫𑁆𑀫𑀤𑁂𑀲𑀦𑀸𑀬 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀢𑀼𑀓𑀸𑀫𑁄, 𑀢𑀲𑁆𑀲𑀸 𑀢𑀸𑀯 𑀕𑀼𑀡𑀸𑀪𑀺𑀢𑁆𑀣𑀯𑀦𑀯𑀲𑁂𑀦 𑀉𑀧𑀜𑁆𑀜𑀸𑀧𑀦𑀢𑁆𑀣𑀁 ‘‘𑀲𑀁𑀬𑀼𑀢𑁆𑀢𑀯𑀕𑁆𑀕𑀧𑀝𑀺𑀫𑀡𑁆𑀟𑀺𑀢𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀸𑀤𑀺𑀲𑀁𑀬𑀼𑀢𑁆𑀢𑁂𑀳𑀺 𑀘𑁂𑀯 𑀦𑀴𑀯𑀕𑁆𑀕𑀸𑀤𑀺𑀯𑀕𑁆𑀕𑁂𑀳𑀺 𑀘 𑀯𑀺𑀪𑀽𑀲𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 ¶ ‘‘𑀲𑀁𑀬𑀼𑀢𑁆𑀢’’𑀦𑁆𑀢𑀺 ‘‘𑀲𑀁𑀬𑁄𑀕𑁄’’𑀢𑀺 𑀘 𑀅𑀢𑁆𑀣𑀢𑁄 𑀏𑀓𑀁. 𑀓𑁂𑀲𑀁 𑀲𑀁𑀬𑀼𑀢𑁆𑀢𑀁? 𑀲𑀼𑀢𑁆𑀢𑀯𑀕𑁆𑀕𑀸𑀦𑀁. 𑀬𑀣𑀸 𑀳𑀺 𑀩𑁆𑀬𑀜𑁆𑀚𑀦𑀲𑀫𑀼𑀤𑀸𑀬𑁄 𑀧𑀤𑀁, 𑀏𑀯𑀁 𑀅𑀢𑁆𑀣𑁂𑀲𑀼 𑀘 𑀓𑀢𑀸𑀯𑀥𑀺𑀓𑁄 𑀧𑀤𑀲𑀫𑀼𑀤𑀸𑀬𑁄 𑀯𑀸𑀓𑁆𑀬𑀁, 𑀯𑀸𑀓𑁆𑀬𑀲𑀫𑀼𑀤𑀸𑀬𑁄 𑀲𑀼𑀢𑁆𑀢𑀁, 𑀲𑀼𑀢𑁆𑀢𑀲𑀫𑀼𑀤𑀸𑀬𑁂 𑀯𑀕𑁆𑀕𑁄𑀢𑀺 𑀲𑀫𑀜𑁆𑀜𑀸, 𑀢𑀣𑀸 𑀲𑀼𑀢𑁆𑀢𑀯𑀕𑁆𑀕𑀲𑀫𑀼𑀤𑀸𑀬𑁂 𑀲𑀁𑀬𑀼𑀢𑁆𑀢𑀲𑀫𑀜𑁆𑀜𑀸. 𑀲𑀁𑀬𑀼𑀚𑁆𑀚𑀦𑁆𑀢𑀻𑀢𑀺 𑀏𑀢𑁆𑀣 𑀲𑀼𑀢𑁆𑀢𑀯𑀕𑁆𑀕𑀸𑀢𑀺 𑀲𑀁𑀬𑀼𑀢𑁆𑀢𑀁. 𑀬𑀤𑀺𑀧𑀺 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀲𑀫𑀼𑀤𑀸𑀬𑁄 𑀦𑀸𑀫 𑀧𑀭𑀫𑀢𑁆𑀣𑀢𑁄 𑀦𑀢𑁆𑀣𑀺, 𑀅𑀯𑀬𑀯𑁂 𑀏𑀯 𑀢𑀁𑀢𑀁𑀲𑀦𑁆𑀦𑀺𑀯𑁂𑀲𑀯𑀺𑀲𑀺𑀝𑁆𑀞𑁂 𑀉𑀧𑀸𑀤𑀸𑀬 𑀧𑀤𑀸𑀤𑀺𑀲𑀫𑀜𑁆𑀜𑀸 𑀯𑀺𑀬 𑀲𑀼𑀢𑁆𑀢𑀯𑀕𑁆𑀕𑀲𑀫𑀜𑁆𑀜𑀸 𑀲𑀁𑀬𑀼𑀢𑁆𑀢𑀲𑀫𑀜𑁆𑀜𑀸 𑀆𑀕𑀫𑀲𑀫𑀜𑁆𑀜𑀸 𑀘, 𑀢𑀣𑀸𑀧𑀺 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀲𑀫𑀼𑀤𑀸𑀬𑁄 𑀩𑀼𑀤𑁆𑀥𑀺𑀧𑀭𑀺𑀓𑀧𑁆𑀧𑀺𑀢𑀭𑀽𑀧𑁂𑀦 𑀯𑀺𑀚𑁆𑀚𑀫𑀸𑀦𑁄 𑀯𑀺𑀬 𑀕𑀬𑁆𑀳𑀫𑀸𑀦𑁄 𑀅𑀯𑀬𑀯𑀸𑀦𑀁 𑀅𑀥𑀺𑀝𑁆𑀞𑀸𑀦𑀪𑀸𑀯𑁂𑀦 𑀯𑁄𑀳𑀭𑀻𑀬𑀢𑀺 𑀬𑀣𑀸 ‘‘𑀭𑀼𑀓𑁆𑀔𑁂 𑀲𑀸𑀔𑀸’’𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀁𑀬𑀼𑀢𑁆𑀢𑀯𑀕𑁆𑀕𑀧𑀝𑀺𑀫𑀡𑁆𑀟𑀺𑀢𑀲𑁆𑀲𑀸’’𑀢𑀺.

𑀦𑀦𑀼 𑀲𑀁𑀬𑀼𑀢𑁆𑀢𑀯𑀕𑁆𑀕𑁄 𑀏𑀯 𑀆𑀕𑀫𑁄, 𑀢𑀲𑁆𑀲 𑀧𑀦 𑀓𑁂𑀳𑀺 𑀫𑀡𑁆𑀟𑀦𑀦𑁆𑀢𑀺? 𑀦 𑀘𑁄𑀤𑁂𑀢𑀩𑁆𑀩𑀫𑁂𑀢𑀁. 𑀪𑀯𑀢𑀺 𑀳𑀺 𑀅𑀪𑀺𑀦𑁆𑀦𑁂𑀧𑀺 𑀯𑀢𑁆𑀣𑀼𑀲𑁆𑀫𑀺𑀁 𑀬𑀣𑀸𑀥𑀺𑀧𑁆𑀧𑁂𑀢𑀯𑀺𑀲𑁂𑀲𑀸𑀯𑀩𑁄𑀥𑀦𑀢𑁄 𑀪𑁂𑀤𑀓𑀲𑀫𑀼𑀤𑀸𑀘𑀸𑀭𑁄 𑀬𑀣𑀸 ‘‘𑀲𑀺𑀮𑀸𑀧𑀼𑀢𑁆𑀢𑀓𑀲𑁆𑀲 ¶ 𑀲𑀭𑀻𑀭’’𑀦𑁆𑀢𑀺. 𑀆𑀕𑀫𑀺𑀲𑁆𑀲𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦, 𑀏𑀢𑀲𑁆𑀫𑀸 𑀯𑀸 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸𑀤𑀬𑁄𑀢𑀺 𑀆𑀕𑀫𑁄, 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸 𑀉𑀢𑁆𑀢𑀫𑀝𑁆𑀞𑁂𑀦 𑀢𑀁𑀢𑀁𑀅𑀪𑀺𑀧𑀢𑁆𑀣𑀺𑀢𑀲𑀫𑀺𑀤𑁆𑀥𑀺𑀳𑁂𑀢𑀼𑀢𑀸𑀬 𑀧𑀡𑁆𑀟𑀺𑀢𑁂𑀳𑀺 𑀯𑀭𑀺𑀢𑀩𑁆𑀩𑀢𑁄 𑀯𑀭𑁄, 𑀆𑀕𑀫𑁄 𑀘 𑀲𑁄 𑀯𑀭𑁄 𑀘𑀸𑀢𑀺 𑀆𑀕𑀫𑀯𑀭𑁄. 𑀆𑀕𑀫𑀲𑀫𑁆𑀫𑀢𑁂𑀳𑀺 𑀯𑀸 𑀯𑀭𑁄𑀢𑀺 𑀆𑀕𑀫𑀯𑀭𑁄, 𑀲𑀁𑀬𑀼𑀢𑁆𑀢𑁄 𑀘 𑀲𑁄 𑀆𑀕𑀫𑀯𑀭𑁄 𑀘𑀸𑀢𑀺 𑀲𑀁𑀬𑀼𑀢𑁆𑀢𑀸𑀕𑀫𑀯𑀭𑁄, 𑀢𑀲𑁆𑀲. 𑀩𑀼𑀤𑁆𑀥𑀸𑀦𑀁 𑀅𑀦𑀼𑀩𑀼𑀤𑁆𑀥𑀸 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀸, 𑀩𑀼𑀤𑁆𑀥𑀸𑀦𑀁 𑀲𑀘𑁆𑀘𑀧𑀝𑀺𑀯𑁂𑀥𑀁 𑀅𑀦𑀼𑀕𑀫𑁆𑀫 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑀸 𑀅𑀕𑁆𑀕𑀲𑀸𑀯𑀓𑀸𑀤𑀬𑁄 𑀅𑀭𑀺𑀬𑀸. 𑀢𑁂𑀳𑀺 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀕𑀼𑀡𑀲𑀁𑀯𑀡𑁆𑀡𑀦𑀸𑀦𑀁 𑀯𑀲𑁂𑀦 𑀲𑀁𑀯𑀡𑁆𑀡𑀺𑀢𑀲𑁆𑀲.

𑀅𑀣 𑀯𑀸 𑀩𑀼𑀤𑁆𑀥𑀸 𑀘 𑀅𑀦𑀼𑀩𑀼𑀤𑁆𑀥𑀸 𑀘 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑁂𑀯 𑀳𑀺 𑀯𑀺𑀦𑀬𑀲𑀼𑀢𑁆𑀢𑀅𑀪𑀺𑀥𑀫𑁆𑀫𑀸𑀦𑀁 𑀧𑀓𑀺𑀡𑁆𑀡𑀓𑀤𑁂𑀲𑀦𑀸𑀤𑀺𑀯𑀲𑁂𑀦 𑀬𑁄 𑀧𑀞𑀫𑀁 𑀅𑀢𑁆𑀣𑁄 𑀯𑀺𑀪𑀢𑁆𑀢𑁄, 𑀲𑁄 𑀏𑀯 𑀧𑀘𑁆𑀙𑀸 𑀢𑁂𑀲𑀁 𑀅𑀢𑁆𑀣𑀯𑀡𑁆𑀡𑀦𑀸𑀯𑀲𑁂𑀦 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀲𑀗𑁆𑀕𑀳𑀁 𑀆𑀭𑁄𑀧𑀺𑀢𑁄𑀢𑀺. 𑀏𑀢𑁆𑀣 𑀘 𑀲𑀁𑀬𑀼𑀢𑁆𑀢𑀸𑀦𑀁 𑀯𑀕𑁆𑀕𑀸 𑀲𑀫𑀽𑀳𑀸𑀢𑀺 𑀲𑀁𑀬𑀼𑀢𑁆𑀢𑀯𑀕𑁆𑀕𑀸, 𑀲𑀕𑀸𑀣𑀸𑀯𑀕𑁆𑀕𑀸𑀤𑀬𑁄. 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀲𑀁𑀬𑀼𑀢𑁆𑀢𑁂𑀲𑀼 𑀯𑀕𑁆𑀕𑀸 𑀲𑀁𑀬𑀼𑀢𑁆𑀢𑀯𑀕𑁆𑀕𑀸, 𑀦𑀴𑀯𑀕𑁆𑀕𑀸𑀤𑀬𑁄. 𑀲𑀁𑀬𑀼𑀢𑁆𑀢𑀸𑀯 𑀯𑀕𑁆𑀕𑀸 𑀲𑀁𑀬𑀼𑀢𑁆𑀢𑀯𑀕𑁆𑀕𑀸. 𑀢𑀺𑀯𑀺𑀥𑁂𑀧𑀺 𑀢𑁂 𑀏𑀓𑀲𑁂𑀲𑀦𑀬𑁂𑀦 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀲𑀁𑀬𑀼𑀢𑁆𑀢𑀯𑀕𑁆𑀕𑀧𑀝𑀺𑀫𑀡𑁆𑀟𑀺𑀢𑀲𑁆𑀲𑀸’’𑀢𑀺.

𑀢𑀢𑁆𑀣 𑀲𑀕𑀸𑀣𑀸𑀯𑀕𑁆𑀕𑁂 𑀢𑀸𑀯 𑀏𑀓𑀸𑀤𑀲 𑀲𑀁𑀬𑀼𑀢𑁆𑀢𑀸𑀦𑀺 𑀅𑀝𑁆𑀞𑀢𑀺𑀁𑀲 𑀯𑀕𑁆𑀕𑀸. 𑀦𑀺𑀤𑀸𑀦𑀯𑀕𑁆𑀕𑁂 𑀦𑀯 𑀲𑀁𑀬𑀼𑀢𑁆𑀢𑀸𑀦𑀺 𑀏𑀓𑀽𑀦𑀘𑀢𑁆𑀢𑀸𑀮𑀻𑀲 𑀯𑀕𑁆𑀕𑀸. 𑀔𑀦𑁆𑀥𑀯𑀕𑁆𑀕𑁂 𑀏𑀓𑀸𑀤𑀲 𑀲𑀁𑀬𑀼𑀢𑁆𑀢𑀸𑀦𑀺 ¶ 𑀏𑀓𑀽𑀦𑀲𑀝𑁆𑀞𑀺 𑀯𑀕𑁆𑀕𑀸. 𑀲𑀴𑀸𑀬𑀢𑀦𑀯𑀕𑁆𑀕𑁂 𑀦𑀯 𑀲𑀁𑀬𑀼𑀢𑁆𑀢𑀸𑀦𑀺 𑀅𑀝𑁆𑀞𑀢𑀺𑀁𑀲 𑀯𑀕𑁆𑀕𑀸. 𑀫𑀳𑀸𑀯𑀕𑁆𑀕𑁂 𑀤𑁆𑀯𑀸𑀤𑀲 𑀲𑀁𑀬𑀼𑀢𑁆𑀢𑀸𑀦𑀺 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀯𑀕𑁆𑀕𑀸. 𑀇𑀤𑀫𑁂𑀢𑁆𑀣 𑀲𑀁𑀬𑀼𑀢𑁆𑀢𑀦𑁆𑀢𑀭𑀯𑀕𑁆𑀕𑀸𑀦𑀁 𑀧𑀭𑀺𑀫𑀸𑀡𑀁.

𑀜𑀸𑀡𑀧𑁆𑀧𑀪𑁂𑀤𑀚𑀦𑀦𑀲𑁆𑀲𑀸𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀔𑀦𑁆𑀥𑀸𑀬𑀢𑀦𑀸𑀤𑀺𑀓𑀣𑀸𑀩𑀳𑀼𑀮𑀢𑀸𑀬 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀸𑀯𑀺𑀪𑀸𑀯𑀦𑀢𑁄 𑀧𑀜𑁆𑀜𑀸𑀯𑀺𑀪𑀸𑀕𑀲𑀫𑀼𑀧𑁆𑀧𑀸𑀤𑀓𑀲𑁆𑀲. 𑀇𑀥 𑀧𑀦 ‘‘𑀧𑀜𑁆𑀜𑀸𑀧𑁆𑀧𑀪𑁂𑀤𑀚𑀦𑀦𑀲𑁆𑀲𑀸’’𑀢𑀺 𑀲𑁆𑀯𑀸𑀬𑀫𑀸𑀕𑀫𑁄 𑀣𑁄𑀫𑀺𑀢𑁄, 𑀲𑀁𑀯𑀡𑁆𑀡𑀦𑀸𑀲𑀼 𑀘𑀸𑀬𑀁 𑀆𑀘𑀭𑀺𑀬𑀲𑁆𑀲 𑀧𑀓𑀢𑀺, 𑀬𑀤𑀺𑀤𑀁 𑀢𑀁𑀢𑀁𑀲𑀁𑀯𑀡𑁆𑀡𑀦𑀸𑀦𑀁 𑀆𑀤𑀺𑀢𑁄 𑀢𑀲𑁆𑀲 𑀢𑀲𑁆𑀲 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀯𑀺𑀲𑁂𑀲𑀕𑀼𑀡𑀓𑀺𑀢𑁆𑀢𑀦𑁂𑀦 𑀣𑁄𑀫𑀦𑀸. 𑀢𑀣𑀸 𑀳𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀻𑀧𑀧𑀜𑁆𑀘𑀲𑀽𑀤𑀦𑀻𑀫𑀦𑁄𑀭𑀣𑀧𑀽𑀭𑀡𑀻𑀅𑀝𑁆𑀞𑀲𑀸𑀮𑀺𑀦𑀻𑀆𑀤𑀻𑀲𑀼 𑀘 𑀬𑀣𑀸𑀓𑁆𑀓𑀫𑀁 ‘‘𑀲𑀤𑁆𑀥𑀸𑀯𑀳𑀕𑀼𑀡𑀲𑁆𑀲, 𑀧𑀭𑀯𑀸𑀤𑀫𑀣𑀦𑀲𑁆𑀲, 𑀥𑀫𑁆𑀫𑀓𑀣𑀺𑀓𑀧𑀼𑀗𑁆𑀕𑀯𑀸𑀦𑀁 𑀯𑀺𑀘𑀺𑀢𑁆𑀢𑀧𑀝𑀺𑀪𑀸𑀦𑀚𑀦𑀦𑀲𑁆𑀲, 𑀢𑀲𑁆𑀲 𑀕𑀫𑁆𑀪𑀻𑀭𑀜𑀸𑀡𑁂𑀳𑀺 𑀑𑀕𑀸𑀴𑁆𑀳𑀲𑁆𑀲 𑀅𑀪𑀺𑀡𑁆𑀳𑀲𑁄 𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀲𑁆𑀲 𑀅𑀪𑀺𑀥𑀫𑁆𑀫𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀣𑁄𑀫𑀦𑀸 𑀓𑀢𑀸.

𑁬. 𑀅𑀢𑁆𑀣𑁄 𑀓𑀣𑀻𑀬𑀢𑀺 𑀏𑀢𑀸𑀬𑀸𑀢𑀺 𑀅𑀢𑁆𑀣𑀓𑀣𑀸, 𑀅𑀢𑁆𑀣𑀓𑀣𑀸𑀯 𑀅𑀝𑁆𑀞𑀓𑀣𑀸 𑀢𑁆𑀣-𑀓𑀸𑀭𑀲𑁆𑀲 𑀝𑁆𑀞-𑀓𑀸𑀭𑀁 𑀓𑀢𑁆𑀯𑀸 𑀬𑀣𑀸 ‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄’’𑀢𑀺. 𑀆𑀤𑀺𑀢𑁄𑀢𑀺 𑀆𑀤𑀺𑀫𑁆𑀳𑀺 𑀧𑀞𑀫𑀲𑀗𑁆𑀕𑀻𑀢𑀺𑀬𑀁. 𑀙𑀴𑀪𑀺𑀜𑁆𑀜𑀢𑀸𑀬 𑀧𑀭𑀫𑁂𑀦 𑀘𑀺𑀢𑁆𑀢𑀯𑀲𑀺𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀛𑀸𑀦𑀸𑀤𑀻𑀲𑀼 𑀧𑀜𑁆𑀘𑀯𑀺𑀥𑀯𑀲𑀺𑀢𑀸𑀲𑀫𑁆𑀪𑀸𑀯𑀢𑁄 𑀘 𑀯𑀲𑀺𑀦𑁄, 𑀣𑁂𑀭𑀸 𑀫𑀳𑀸𑀓𑀲𑁆𑀲𑀧𑀸𑀤𑀬𑁄 ¶ . 𑀢𑁂𑀲𑀁 𑀲𑀢𑁂𑀳𑀺 𑀧𑀜𑁆𑀘𑀳𑀺. 𑀬𑀸𑀢𑀺 𑀬𑀸 𑀅𑀝𑁆𑀞𑀓𑀣𑀸. 𑀲𑀗𑁆𑀕𑀻𑀢𑀸𑀢𑀺 𑀅𑀢𑁆𑀣𑀁 𑀓𑀣𑁂𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 ‘‘𑀅𑀬𑀁 𑀏𑀢𑀲𑁆𑀲 𑀅𑀢𑁆𑀣𑁄, 𑀅𑀬𑀁 𑀏𑀢𑀲𑁆𑀲 𑀅𑀢𑁆𑀣𑁄’’𑀢𑀺 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀸. 𑀅𑀦𑀼𑀲𑀗𑁆𑀕𑀻𑀢𑀸 𑀘 𑀬𑀲𑀢𑁆𑀣𑁂𑀭𑀸𑀤𑀻𑀳𑀺 𑀧𑀘𑁆𑀙𑀸𑀧𑀺 𑀤𑀼𑀢𑀺𑀬𑀢𑀢𑀺𑀬𑀲𑀗𑁆𑀕𑀻𑀢𑀻𑀲𑀼. 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀲𑀁𑀯𑀡𑁆𑀡𑀦𑀸𑀬 𑀆𑀕𑀫𑀦𑀯𑀺𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀺.

𑁭. 𑀲𑀻𑀳𑀲𑁆𑀲 𑀮𑀸𑀦𑀢𑁄 𑀕𑀳𑀡𑀢𑁄 𑀲𑀻𑀳𑀴𑁄, 𑀲𑀻𑀳𑀓𑀼𑀫𑀸𑀭𑁄, 𑀢𑀩𑁆𑀩𑀁𑀲𑀚𑀸𑀢𑀢𑀸𑀬 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀔𑀢𑁆𑀢𑀺𑀬𑀸, 𑀢𑁂𑀲𑀁 𑀦𑀺𑀯𑀸𑀲𑀢𑀸𑀬 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀲𑁆𑀲 𑀘 𑀲𑀻𑀳𑀴𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀪𑀢𑀸𑀢𑀺 𑀚𑀫𑁆𑀩𑀼𑀤𑀻𑀧𑀢𑁄 𑀆𑀦𑀻𑀢𑀸. 𑀅𑀣𑀸𑀢𑀺 𑀧𑀘𑁆𑀙𑀸. 𑀅𑀧𑀭𑀪𑀸𑀕𑁂 𑀳𑀺 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀻𑀳𑀺 𑀅𑀲𑀗𑁆𑀓𑀭𑀢𑁆𑀣𑀁 𑀲𑀻𑀳𑀴𑀪𑀸𑀲𑀸𑀬 𑀅𑀝𑁆𑀞𑀓𑀣𑀸 𑀞𑀧𑀺𑀢𑀸𑀢𑀺. 𑀢𑁂𑀦 𑀫𑀽𑀮𑀝𑁆𑀞𑀓𑀣𑀸 𑀲𑀩𑁆𑀩𑀲𑀸𑀥𑀸𑀭𑀡𑀸 𑀦 𑀳𑁄𑀢𑀻𑀢𑀺 𑀇𑀤𑀁 𑀅𑀢𑁆𑀣𑀧𑁆𑀧𑀓𑀸𑀲𑀦𑀁 𑀏𑀓𑀦𑁆𑀢𑁂𑀦 𑀓𑀭𑀡𑀻𑀬𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀤𑀻𑀧𑀯𑀸𑀲𑀻𑀦𑀫𑀢𑁆𑀣𑀸𑀬𑀸’’𑀢𑀺. 𑀏𑀢𑁆𑀣 𑀤𑀻𑀧𑀯𑀸𑀲𑀻𑀦𑀦𑁆𑀢𑀺 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀁, 𑀲𑀻𑀳𑀴𑀤𑀻𑀧𑀯𑀸𑀲𑀻𑀦𑀁 𑀯𑀸 𑀅𑀢𑁆𑀣𑀸𑀬 𑀲𑀻𑀳𑀴𑀪𑀸𑀲𑀸𑀬 𑀞𑀧𑀺𑀢𑀸𑀢𑀺 𑀬𑁄𑀚𑀦𑀸.

𑁮. 𑀅𑀧𑀦𑁂𑀢𑁆𑀯𑀸𑀢𑀺 ¶ 𑀓𑀜𑁆𑀘𑀼𑀓𑀲𑀤𑀺𑀲𑀁 𑀲𑀻𑀳𑀴𑀪𑀸𑀲𑀁 𑀅𑀧𑀦𑁂𑀢𑁆𑀯𑀸. 𑀢𑀢𑁄𑀢𑀺 𑀅𑀝𑁆𑀞𑀓𑀣𑀸𑀢𑁄. 𑀅𑀳𑀦𑁆𑀢𑀺 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑀺𑀲𑀢𑀺. 𑀫𑀦𑁄𑀭𑀫𑀁 𑀪𑀸𑀲𑀦𑁆𑀢𑀺 𑀫𑀸𑀕𑀥𑀪𑀸𑀲𑀁. 𑀲𑀸 𑀳𑀺 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀽𑀢𑀸 𑀧𑀡𑁆𑀟𑀺𑀢𑀫𑀦𑀁 𑀭𑀫𑀬𑀢𑀺. 𑀢𑁂𑀦𑁂𑀯𑀸𑀳 ‘‘𑀢𑀦𑁆𑀢𑀺𑀦𑀬𑀸𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺, 𑀧𑀸𑀴𑀺𑀕𑀢𑀺𑀬𑀸 𑀅𑀦𑀼𑀮𑁄𑀫𑀺𑀓𑀁 𑀧𑀸𑀴𑀺𑀙𑀸𑀬𑀸𑀦𑀼𑀯𑀺𑀥𑀸𑀬𑀺𑀦𑀺𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀕𑀢𑀤𑁄𑀲𑀦𑁆𑀢𑀺 𑀅𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀸𑀲𑀦𑁆𑀢𑀭𑀭𑀳𑀺𑀢𑀁.

𑁯. 𑀲𑀫𑀬𑀁 𑀅𑀯𑀺𑀮𑁄𑀫𑁂𑀦𑁆𑀢𑁄𑀢𑀺 𑀲𑀺𑀤𑁆𑀥𑀦𑁆𑀢𑀁 𑀅𑀯𑀺𑀭𑁄𑀥𑁂𑀦𑁆𑀢𑁄. 𑀏𑀢𑁂𑀦 𑀅𑀢𑁆𑀣𑀤𑁄𑀲𑀸𑀪𑀸𑀯𑀫𑀸𑀳. 𑀅𑀯𑀺𑀭𑀼𑀤𑁆𑀥𑀢𑁆𑀢𑀸 𑀏𑀯 𑀳𑀺 𑀣𑁂𑀭𑀯𑀸𑀤𑀸𑀧𑀺 𑀇𑀥 𑀧𑀓𑀸𑀲𑀻𑀬𑀺𑀲𑁆𑀲𑀦𑁆𑀢𑀺. 𑀣𑁂𑀭𑀯𑀁𑀲𑀤𑀻𑀧𑀸𑀦𑀦𑁆𑀢𑀺 𑀣𑀺𑀭𑁂𑀳𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀣𑁂𑀭𑀸, 𑀫𑀳𑀸𑀓𑀲𑁆𑀲𑀧𑀸𑀤𑀬𑁄. 𑀢𑁂𑀳𑀺 𑀆𑀕𑀢𑀸 𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀣𑁂𑀭𑀯𑀁𑀲𑁄, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀸 𑀳𑀼𑀢𑁆𑀯𑀸 𑀆𑀕𑀫𑀸𑀥𑀺𑀕𑀫𑀲𑀫𑁆𑀧𑀦𑁆𑀦𑀢𑁆𑀢𑀸 𑀧𑀜𑁆𑀜𑀸𑀧𑀚𑁆𑀚𑁄𑀢𑁂𑀦 𑀢𑀲𑁆𑀲 𑀲𑀫𑀼𑀚𑁆𑀚𑀮𑀦𑀢𑁄 𑀣𑁂𑀭𑀯𑀁𑀲𑀤𑀻𑀧𑀸, 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄, 𑀢𑁂𑀲𑀁. 𑀯𑀺𑀯𑀺𑀥𑁂𑀳𑀺 𑀆𑀓𑀸𑀭𑁂𑀳𑀺 𑀦𑀺𑀘𑁆𑀙𑀻𑀬𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑁄, 𑀕𑀡𑁆𑀞𑀺𑀝𑁆𑀞𑀸𑀦𑁂𑀲𑀼 𑀔𑀺𑀮𑀫𑀤𑁆𑀤𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀯𑀺𑀫𑀢𑀺𑀘𑁆𑀙𑁂𑀤𑀦𑀻 𑀓𑀣𑀸. 𑀲𑀼𑀝𑁆𑀞𑀼𑀦𑀺𑀧𑀼𑀡𑁄 𑀲𑀡𑁆𑀳𑁄 𑀯𑀺𑀦𑀺𑀘𑁆𑀙𑀬𑁄 𑀏𑀢𑁂𑀲𑀦𑁆𑀢𑀺 𑀲𑀼𑀦𑀺𑀧𑀼𑀡𑀯𑀺𑀦𑀺𑀘𑁆𑀙𑀬𑀸. 𑀅𑀣 𑀯𑀸 𑀯𑀺𑀦𑀺𑀘𑁆𑀙𑀺𑀦𑁄𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀯𑀺𑀲𑀬𑀁 𑀜𑀸𑀡𑀁. 𑀲𑀼𑀝𑁆𑀞𑀼 𑀦𑀺𑀧𑀼𑀡𑁄 𑀙𑁂𑀓𑁄 𑀯𑀺𑀦𑀺𑀘𑁆𑀙𑀬𑁄 𑀏𑀢𑁂𑀲𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀢𑁂𑀦 𑀫𑀳𑀸𑀓𑀲𑁆𑀲𑀧𑀸𑀤𑀺𑀣𑁂𑀭𑀧𑀭𑀫𑁆𑀧𑀭𑀸𑀕𑀢𑁄, 𑀢𑀢𑁄 𑀏𑀯 𑀘 𑀅𑀯𑀺𑀧𑀭𑀻𑀢𑁄 𑀲𑀡𑁆𑀳𑁄 𑀲𑀼𑀔𑀼𑀫𑁄 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀯𑀺𑀦𑀺𑀘𑁆𑀙𑀬𑁄, 𑀢𑀲𑁆𑀲 𑀧𑀫𑀸𑀡𑀪𑀽𑀢𑀢𑀁 𑀤𑀲𑁆𑀲𑁂𑀢𑀺.

𑁧𑁦. 𑀲𑀼𑀚𑀦𑀲𑁆𑀲 𑀘𑀸𑀢𑀺 𑀘-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑁂𑀦 ‘‘𑀦 𑀓𑁂𑀯𑀮𑀁 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀫𑁂𑀯 𑀅𑀢𑁆𑀣𑀸𑀬 ¶ , 𑀅𑀣 𑀔𑁄 𑀲𑀸𑀥𑀼𑀚𑀦𑀢𑁄𑀲𑀦𑀢𑁆𑀣𑀜𑁆𑀘𑀸’’𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦 𑀘 ‘‘𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀯𑀸𑀲𑀻𑀦𑀫𑁆𑀧𑀺 𑀅𑀢𑁆𑀣𑀸𑀬𑀸’’𑀢𑀺 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄 𑀳𑁄𑀢𑀺 𑀉𑀕𑁆𑀕𑀳𑀡𑀸𑀤𑀺𑀲𑀼𑀓𑀭𑀢𑀸𑀬 𑀢𑁂𑀲𑀫𑁆𑀧𑀺 𑀩𑀳𑀼𑀓𑀸𑀭𑀢𑁆𑀢𑀸. 𑀘𑀺𑀭𑀝𑁆𑀞𑀺𑀢𑀢𑁆𑀣𑀦𑁆𑀢𑀺 𑀘𑀺𑀭𑀝𑁆𑀞𑀺𑀢𑀺𑀅𑀢𑁆𑀣𑀁, 𑀘𑀺𑀭𑀓𑀸𑀮𑀧𑁆𑀧𑀯𑀢𑁆𑀢𑀦𑀸𑀬𑀸𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀳𑀺 𑀅𑀢𑁆𑀣𑀧𑁆𑀧𑀓𑀸𑀲𑀦𑀁 𑀅𑀯𑀺𑀧𑀭𑀻𑀢𑀧𑀤𑀩𑁆𑀬𑀜𑁆𑀚𑀦𑀲𑀼𑀦𑀺𑀓𑁆𑀔𑁂𑀧𑀲𑁆𑀲 𑀅𑀢𑁆𑀣𑀲𑀼𑀦𑀬𑀲𑁆𑀲 𑀘 𑀉𑀧𑀸𑀬𑀪𑀸𑀯𑀢𑁄 𑀲𑀤𑁆𑀥𑀫𑁆𑀫𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀬𑀸 𑀧𑀯𑀢𑁆𑀢𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀤𑁆𑀥𑀫𑁆𑀫𑀲𑁆𑀲 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀅𑀦𑀦𑁆𑀢𑀭𑀥𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀤𑁆𑀯𑁂? 𑀲𑀼𑀦𑀺𑀓𑁆𑀔𑀺𑀢𑁆𑀢𑀜𑁆𑀘 𑀧𑀤𑀩𑁆𑀬𑀜𑁆𑀚𑀦𑀁 𑀅𑀢𑁆𑀣𑁄 𑀘 𑀲𑀼𑀦𑀻𑀢𑁄’’𑀢𑀺 (𑀅. 𑀦𑀺. 𑁨.𑁨𑁦).

𑁧𑁧-𑁧𑁨. 𑀬𑀁 𑀅𑀢𑁆𑀣𑀯𑀡𑁆𑀡𑀦𑀁 𑀓𑀢𑁆𑀢𑀼𑀓𑀸𑀫𑁄, 𑀢𑀲𑁆𑀲𑀸 𑀫𑀳𑀢𑁆𑀢𑀁 𑀧𑀭𑀺𑀳𑀭𑀺𑀢𑀼𑀁 ‘‘𑀲𑀸𑀯𑀢𑁆𑀣𑀺𑀧𑀪𑀽𑀢𑀻𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 𑁋 ‘‘𑀦 𑀇𑀥 𑀪𑀺𑀬𑁆𑀬𑁄 𑀯𑀺𑀢𑁆𑀣𑀸𑀭𑀓𑀣𑀁 ¶ 𑀓𑀭𑀺𑀲𑁆𑀲𑀸𑀫𑀺, 𑀦 𑀢𑀁 𑀇𑀥 𑀯𑀺𑀘𑀸𑀭𑀬𑀺𑀲𑁆𑀲𑀸𑀫𑀻’’𑀢𑀺 𑀘. 𑀲𑀗𑁆𑀕𑀻𑀢𑀻𑀦𑀁 𑀤𑁆𑀯𑀺𑀦𑁆𑀦𑀦𑁆𑀢𑀺 𑀤𑀻𑀖𑀫𑀚𑁆𑀛𑀺𑀫𑀦𑀺𑀓𑀸𑀬𑀸𑀦𑀁.

𑁧𑁩. ‘‘𑀦 𑀇𑀥 𑀪𑀺𑀬𑁆𑀬𑁄 𑀯𑀺𑀢𑁆𑀣𑀸𑀭𑀓𑀣𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀯𑀲𑁆𑀲𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀢𑁆𑀢𑀸𑀦𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁧𑁪. 𑀬𑀁 𑀅𑀝𑁆𑀞𑀓𑀣𑀁 𑀓𑀢𑁆𑀢𑀼𑀓𑀸𑀫𑁄, 𑀢𑀤𑁂𑀓𑀤𑁂𑀲𑀪𑀸𑀯𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀕𑀳𑁂𑀢𑀩𑁆𑀩𑁄𑀢𑀺 𑀓𑀣𑀺𑀓𑀸𑀦𑀁 𑀉𑀧𑀤𑁂𑀲𑀁 𑀓𑀭𑁄𑀦𑁆𑀢𑁄 𑀢𑀢𑁆𑀢 𑀯𑀺𑀘𑀸𑀭𑀺𑀢𑀥𑀫𑁆𑀫𑁂 𑀉𑀤𑁆𑀤𑁂𑀲𑀯𑀲𑁂𑀦 𑀤𑀲𑁆𑀲𑁂𑀢𑀺 ‘‘𑀲𑀻𑀮𑀓𑀣𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀲𑀻𑀮𑀓𑀣𑀸𑀢𑀺 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀸𑀤𑀺𑀯𑀲𑁂𑀦 𑀲𑀻𑀮𑀲𑁆𑀲 𑀯𑀺𑀢𑁆𑀣𑀸𑀭𑀓𑀣𑀸. 𑀥𑀼𑀢𑀥𑀫𑁆𑀫𑀸𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀸𑀤𑀬𑁄 𑀢𑁂𑀭𑀲 𑀓𑀺𑀮𑁂𑀲𑀥𑀼𑀦𑀦𑀓𑀥𑀫𑁆𑀫𑀸. 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀲𑀩𑁆𑀩𑀸𑀦𑀻𑀢𑀺 𑀧𑀸𑀴𑀺𑀬𑀁 𑀆𑀕𑀢𑀸𑀦𑀺 𑀅𑀝𑁆𑀞𑀢𑁆𑀢𑀺𑀁𑀲, 𑀅𑀝𑁆𑀞𑀓𑀣𑀸𑀬𑀁 𑀤𑁆𑀯𑁂𑀢𑀺 𑀦𑀺𑀭𑀯𑀲𑁂𑀲𑀸𑀦𑀺 𑀬𑁄𑀕𑀓𑀫𑁆𑀫𑀲𑁆𑀲 𑀪𑀸𑀯𑀦𑀸𑀬 𑀧𑀯𑀢𑁆𑀢𑀺𑀝𑁆𑀞𑀸𑀦𑀸𑀦𑀺. 𑀘𑀭𑀺𑀬𑀸𑀯𑀺𑀥𑀸𑀦𑀲𑀳𑀺𑀢𑁄𑀢𑀺 𑀭𑀸𑀕𑀘𑀭𑀺𑀬𑀸𑀤𑀻𑀦𑀁 𑀲𑀪𑀸𑀕𑀸𑀤𑀺𑀯𑀺𑀥𑀸𑀦𑁂𑀦 𑀲𑀳𑀺𑀢𑁄. 𑀛𑀸𑀦𑀸𑀦𑀺 𑀘𑀢𑁆𑀢𑀸𑀭𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺, 𑀲𑀫𑀸𑀧𑀢𑁆𑀢𑀺𑀬𑁄 𑀘𑀢𑀲𑁆𑀲𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄. 𑀅𑀝𑁆𑀞𑀧𑀺 𑀯𑀸 𑀧𑀝𑀺𑀮𑀤𑁆𑀥𑀫𑀢𑁆𑀢𑀸𑀦𑀺 𑀛𑀸𑀦𑀸𑀦𑀺, 𑀲𑀫𑀸𑀧𑀚𑁆𑀚𑀦𑀯𑀲𑀺𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀲𑀫𑀸𑀧𑀢𑁆𑀢𑀺𑀬𑁄. 𑀛𑀸𑀦𑀸𑀦𑀺 𑀯𑀸 𑀭𑀽𑀧𑀸𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺, 𑀲𑀫𑀸𑀧𑀢𑁆𑀢𑀺𑀬𑁄 𑀨𑀮𑀲𑀫𑀸𑀧𑀢𑁆𑀢𑀺𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑁄.

𑁧𑁫. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀪𑁂𑀤𑀸 𑀙 𑀅𑀪𑀺𑀜𑁆𑀜𑀸𑀬𑁄 𑀲𑀩𑁆𑀩𑀸 𑀅𑀪𑀺𑀜𑁆𑀜𑀸𑀬𑁄. 𑀜𑀸𑀡𑀯𑀺𑀪𑀗𑁆𑀕𑀸𑀤𑀻𑀲𑀼 𑀆𑀕𑀢𑀦𑀬𑁂𑀦 𑀏𑀓𑀯𑀺𑀥𑀸𑀤𑀺𑀦𑀸 𑀧𑀜𑁆𑀜𑀸𑀬 𑀲𑀗𑁆𑀓𑀮𑁂𑀢𑁆𑀯𑀸 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀦𑀺𑀘𑁆𑀙𑀬𑁄 𑀧𑀜𑁆𑀜𑀸𑀲𑀗𑁆𑀓𑀮𑀦𑀦𑀺𑀘𑁆𑀙𑀬𑁄.

𑁧𑁬. 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀳𑁂𑀢𑀼𑀆𑀤𑀻𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀪𑀸𑀯𑁄 𑀧𑀘𑁆𑀘𑀬𑀸𑀓𑀸𑀭𑁄, 𑀢𑀲𑁆𑀲 𑀤𑁂𑀲𑀦𑀸 𑀧𑀘𑁆𑀘𑀬𑀸𑀓𑀸𑀭𑀤𑁂𑀲𑀦𑀸, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸𑀢𑀺 𑀅𑀢𑁆𑀣𑁄. 𑀲𑀸 𑀧𑀦 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀺𑀲𑀗𑁆𑀓𑀭𑀭𑀳𑀺𑀢𑀢𑀸𑀬 𑀲𑀼𑀝𑁆𑀞𑀼𑀧𑀭𑀺𑀲𑀼𑀤𑁆𑀥𑀸, 𑀖𑀦𑀯𑀺𑀦𑀺𑀩𑁆𑀪𑁄𑀕𑀲𑁆𑀲 𑀘 𑀲𑀼𑀤𑀼𑀓𑁆𑀓𑀭𑀢𑀸𑀬 𑀦𑀺𑀧𑀼𑀡𑀸 𑀲𑀡𑁆𑀳𑀲𑀼𑀔𑀼𑀫𑀸, 𑀏𑀓𑀢𑁆𑀢𑀦𑀬𑀸𑀤𑀺𑀲𑀳𑀺𑀢𑀸 ¶ 𑀘 𑀢𑀢𑁆𑀣 𑀯𑀺𑀘𑀸𑀭𑀺𑀢𑀸𑀢𑀺 𑀆𑀳 ‘‘𑀲𑀼𑀧𑀭𑀺𑀲𑀼𑀤𑁆𑀥𑀦𑀺𑀧𑀼𑀡𑀦𑀬𑀸’’𑀢𑀺. 𑀧𑀝𑀺𑀲𑀫𑁆𑀪𑀺𑀤𑀸𑀤𑀻𑀲𑀼 𑀆𑀕𑀢𑀦𑀬𑀁 𑀅𑀯𑀺𑀲𑀚𑁆𑀚𑁂𑀢𑁆𑀯𑀸𑀯 𑀯𑀺𑀘𑀸𑀭𑀺𑀢𑀢𑁆𑀢𑀸 𑀅𑀯𑀺𑀫𑀼𑀢𑁆𑀢𑀢𑀦𑁆𑀢𑀺𑀫𑀕𑁆𑀕𑀸.

𑁧𑁭. 𑀇𑀢𑀺 𑀧𑀦 𑀲𑀩𑁆𑀩𑀦𑁆𑀢𑀺 𑀇𑀢𑀺-𑀲𑀤𑁆𑀤𑁄 𑀧𑀭𑀺𑀲𑀫𑀸𑀧𑀦𑁂, 𑀧𑀦-𑀲𑀤𑁆𑀤𑁄 𑀯𑀘𑀦𑀸𑀮𑀗𑁆𑀓𑀸𑀭𑁂, 𑀏𑀢𑀁 𑀲𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀇𑀥𑀸𑀢𑀺 𑀇𑀫𑀺𑀲𑁆𑀲𑀸 𑀅𑀝𑁆𑀞𑀓𑀣𑀸𑀬. 𑀦 𑀢𑀁 𑀯𑀺𑀘𑀸𑀭𑀬𑀺𑀲𑁆𑀲𑀸𑀫𑀺 𑀧𑀼𑀦𑀭𑀼𑀢𑁆𑀢𑀺𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁮. 𑀇𑀤𑀸𑀦𑀺 ¶ 𑀢𑀲𑁆𑀲𑁂𑀯 𑀅𑀯𑀺𑀘𑀸𑀭𑀡𑀲𑁆𑀲 𑀏𑀓𑀦𑁆𑀢𑀓𑀸𑀭𑀡𑀁 𑀦𑀺𑀤𑁆𑀥𑀸𑀭𑁂𑀦𑁆𑀢𑁄 ‘‘𑀫𑀚𑁆𑀛𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀫𑀚𑁆𑀛𑁂 𑀞𑀢𑁆𑀯𑀸’’𑀢𑀺 𑀏𑀢𑁂𑀦 𑀫𑀚𑁆𑀛𑀝𑁆𑀞𑀪𑀸𑀯𑀤𑀻𑀧𑀦𑁂𑀦 𑀯𑀺𑀲𑁂𑀲𑀢𑁄 𑀘𑀢𑀼𑀦𑁆𑀦𑀁 𑀆𑀕𑀫𑀸𑀦𑀁 𑀲𑀸𑀥𑀸𑀭𑀡𑀝𑁆𑀞𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄, 𑀦 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀆𑀤𑀬𑁄 𑀯𑀺𑀬 𑀅𑀲𑀸𑀥𑀸𑀭𑀡𑀝𑁆𑀞𑀓𑀣𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀯𑀺𑀲𑁂𑀲𑀢𑁄’’𑀢𑀺 𑀘 𑀇𑀤𑀁 𑀯𑀺𑀦𑀬𑀸𑀪𑀺𑀥𑀫𑁆𑀫𑀸𑀦𑀫𑁆𑀧𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀬𑀣𑀸𑀭𑀳𑀁 𑀅𑀢𑁆𑀣𑀯𑀡𑁆𑀡𑀦𑀸 𑀳𑁄𑀢𑀺 𑀏𑀯𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑁧𑁯. 𑀇𑀘𑁆𑀘𑁂𑀯𑀸𑀢𑀺 𑀇𑀢𑀺 𑀏𑀯. 𑀢𑀫𑁆𑀧𑀻𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀫𑁆𑀧𑀺. 𑀏𑀢𑀸𑀬𑀸𑀢𑀺 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸.

𑀏𑀢𑁆𑀣 𑀘 ‘‘𑀲𑀻𑀳𑀴𑀤𑀻𑀧𑀁 𑀆𑀪𑀢𑀸’’𑀢𑀺𑀆𑀤𑀺𑀦𑀸 𑀅𑀝𑁆𑀞𑀓𑀣𑀸𑀓𑀭𑀡𑀲𑁆𑀲 𑀦𑀺𑀫𑀺𑀢𑁆𑀢𑀁 𑀤𑀲𑁆𑀲𑁂𑀢𑀺, ‘‘𑀤𑀻𑀧𑀯𑀸𑀲𑀻𑀦𑀫𑀢𑁆𑀣𑀸𑀬 𑀲𑀼𑀚𑀦𑀲𑁆𑀲 𑀘 𑀢𑀼𑀝𑁆𑀞𑀢𑁆𑀣𑀁 𑀘𑀺𑀭𑀝𑁆𑀞𑀺𑀢𑀢𑁆𑀣𑀜𑁆𑀘 𑀥𑀫𑁆𑀫𑀲𑁆𑀲𑀸’’𑀢𑀺 𑀏𑀢𑁂𑀳𑀺 𑀧𑀬𑁄𑀚𑀦𑀁, ‘‘𑀲𑀁𑀬𑀼𑀢𑁆𑀢𑀸𑀕𑀫𑀯𑀭𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀏𑀢𑁂𑀦 𑀧𑀺𑀡𑁆𑀟𑀢𑁆𑀣𑀁, ‘‘𑀅𑀧𑀦𑁂𑀢𑁆𑀯𑀸𑀦 𑀢𑀢𑁄𑀳𑀁 𑀲𑀻𑀳𑀴𑀪𑀸𑀲’’𑀦𑁆𑀢𑀺𑀆𑀤𑀺𑀦𑀸 ‘‘𑀲𑀸𑀯𑀢𑁆𑀣𑀺𑀧𑀪𑀽𑀢𑀻𑀦’’𑀦𑁆𑀢𑀺𑀆𑀤𑀺𑀦𑀸 ‘‘𑀲𑀻𑀮𑀓𑀣𑀸’’𑀢𑀺𑀆𑀤𑀺𑀦𑀸 𑀘 𑀓𑀭𑀡𑀧𑁆𑀧𑀓𑀸𑀭𑀁. 𑀳𑁂𑀝𑁆𑀞𑀺𑀫𑀦𑀺𑀓𑀸𑀬𑁂𑀲𑀼 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀘 𑀯𑀺𑀘𑀸𑀭𑀺𑀢𑀸𑀦𑀁 𑀅𑀢𑁆𑀣𑀸𑀦𑀁 𑀅𑀯𑀺𑀘𑀸𑀭𑀡𑀫𑁆𑀧𑀺 𑀳𑀺 𑀇𑀥 𑀓𑀭𑀡𑀧𑁆𑀧𑀓𑀸𑀭𑁄 𑀏𑀯𑀸𑀢𑀺.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀁

𑁧. 𑀦𑀴𑀯𑀕𑁆𑀕𑁄

𑁧. 𑀑𑀖𑀢𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑀯𑀺𑀪𑀸𑀕𑀯𑀦𑁆𑀢𑀸𑀦𑀁 ¶ ¶ 𑀲𑀪𑀸𑀯𑀯𑀺𑀪𑀸𑀯𑀦𑀁 𑀯𑀺𑀪𑀸𑀕𑀤𑀲𑁆𑀲𑀦𑀯𑀲𑁂𑀦𑁂𑀯 𑀳𑁄𑀢𑀻𑀢𑀺 𑀧𑀞𑀫𑀁 𑀢𑀸𑀯 𑀲𑀁𑀬𑀼𑀢𑁆𑀢𑀯𑀕𑁆𑀕𑀲𑀼𑀢𑁆𑀢𑀸𑀤𑀺𑀯𑀲𑁂𑀦 𑀲𑀁𑀬𑀼𑀢𑁆𑀢𑀸𑀕𑀫𑀲𑁆𑀲 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀲𑀁𑀬𑀼𑀢𑁆𑀢𑀸𑀕𑀫𑁄 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀬𑀁 𑀯𑀼𑀢𑁆𑀢𑀁 𑁋 ‘‘𑀲𑀁𑀬𑀼𑀢𑁆𑀢𑀸𑀕𑀫𑀯𑀭𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺, 𑀢𑀲𑁆𑀫𑀺𑀁 𑀯𑀘𑀦𑁂. 𑀢𑀢𑁆𑀣𑀸𑀢𑀺 𑀯𑀸 ‘‘𑀏𑀢𑀸𑀬 𑀅𑀝𑁆𑀞𑀓𑀣𑀸𑀬 𑀯𑀺𑀚𑀸𑀦𑀸𑀣 𑀲𑀁𑀬𑀼𑀢𑁆𑀢𑀦𑀺𑀲𑁆𑀲𑀺𑀢𑀁 𑀅𑀢𑁆𑀣’’𑀦𑁆𑀢𑀺 𑀏𑀢𑁆𑀣 𑀬𑀁 𑀲𑀁𑀬𑀼𑀢𑁆𑀢𑀕𑁆𑀕𑀳𑀡𑀁 𑀓𑀢𑀁, 𑀢𑀢𑁆𑀣. 𑀧𑀜𑁆𑀘 𑀯𑀕𑁆𑀕𑀸 𑀏𑀢𑀲𑁆𑀲𑀸𑀢𑀺 𑀧𑀜𑁆𑀘𑀯𑀕𑁆𑀕𑁄. 𑀅𑀯𑀬𑀯𑁂𑀦 𑀯𑀺𑀕𑁆𑀕𑀳𑁄, 𑀲𑀫𑀼𑀤𑀸𑀬𑁄 𑀲𑀫𑀸𑀲𑀢𑁆𑀣𑁄.

𑀇𑀤𑀸𑀦𑀺 𑀢𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀁𑀯𑀡𑁆𑀡𑁂𑀢𑀼𑀓𑀸𑀫𑁄 𑀅𑀢𑁆𑀢𑀦𑁄 𑀲𑀁𑀯𑀡𑁆𑀡𑀦𑀸𑀬 𑀢𑀲𑁆𑀲 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀬𑀁 𑀦𑀺𑀓𑁆𑀔𑀺𑀢𑁆𑀢𑀸𑀦𑀼𑀓𑁆𑀓𑀫𑁂𑀦𑁂𑀯 𑀧𑀯𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁, ‘‘𑀢𑀲𑁆𑀲 𑀯𑀕𑁆𑀕𑁂𑀲𑀼 𑀲𑀕𑀸𑀣𑀸𑀯𑀕𑁆𑀕𑁄 𑀆𑀤𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸𑀧𑀘𑁆𑀘𑀬𑀁 𑀢𑀢𑁆𑀣 𑀢𑀢𑁆𑀣 𑀤𑁂𑀲𑀺𑀢𑀢𑁆𑀢𑀸 𑀧𑀜𑁆𑀜𑀢𑁆𑀢𑀢𑁆𑀢𑀸 𑀘 𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀁 𑀥𑀫𑁆𑀫𑀯𑀺𑀦𑀬𑀸𑀦𑀁 𑀲𑀗𑁆𑀕𑀳𑁂𑀢𑁆𑀯𑀸 𑀕𑀸𑀬𑀦𑀁 𑀓𑀣𑀦𑀁 𑀲𑀗𑁆𑀕𑀻𑀢𑀺, 𑀫𑀳𑀸𑀯𑀺𑀲𑀬𑀢𑁆𑀢𑀸 𑀧𑀽𑀚𑀦𑀺𑀬𑀢𑁆𑀢𑀸 𑀘 𑀫𑀳𑀢𑀻 𑀲𑀗𑁆𑀕𑀻𑀢𑀺 𑀫𑀳𑀸𑀲𑀗𑁆𑀕𑀻𑀢𑀺. 𑀧𑀞𑀫𑀸 𑀫𑀳𑀸𑀲𑀗𑁆𑀕𑀻𑀢𑀺 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺, 𑀢𑀲𑁆𑀲𑀸 𑀧𑀯𑀢𑁆𑀢𑀺𑀢𑀓𑀸𑀮𑁄 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁄, 𑀢𑀲𑁆𑀫𑀺𑀁 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂.

𑀦𑀺𑀤𑀤𑀸𑀢𑀺 𑀤𑁂𑀲𑀦𑀁 𑀤𑁂𑀲𑀓𑀸𑀮𑀸𑀤𑀺𑀯𑀲𑁂𑀦 𑀅𑀯𑀺𑀤𑀺𑀢𑀁 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀦𑀺𑀤𑀲𑁆𑀲𑁂𑀢𑀻𑀢𑀺 𑀦𑀺𑀤𑀸𑀦𑀁. 𑀬𑁄 𑀮𑁄𑀓𑁂 𑀕𑀦𑁆𑀣𑀲𑁆𑀲 𑀉𑀧𑁄𑀕𑁆𑀖𑀸𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀲𑁆𑀯𑀸𑀬𑀫𑁂𑀢𑁆𑀣 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺-𑀆𑀤𑀺𑀓𑁄 𑀕𑀦𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀧𑀦 ‘‘𑀲𑀦𑀺𑀤𑀸𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀫𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁧𑁨𑁬) 𑀯𑀺𑀬 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀺𑀤𑁂𑀲𑀦𑀼𑀧𑁆𑀧𑀢𑁆𑀢𑀺𑀳𑁂𑀢𑀼. 𑀢𑁂𑀦𑁂𑀯𑀸𑀳 𑁋 ‘‘𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺-𑀆𑀤𑀺𑀓𑀁 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂 𑀯𑀼𑀢𑁆𑀢𑀁 𑀦𑀺𑀤𑀸𑀦𑀫𑀸𑀤𑀻’’𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 𑀬𑀲𑁆𑀲𑀁 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀬𑀁 𑀦𑀺𑀓𑁆𑀔𑀺𑀢𑁆𑀢𑀸𑀦𑀼𑀓𑁆𑀓𑀫𑁂𑀦 𑀲𑀁𑀯𑀡𑁆𑀡𑀦𑀁 𑀓𑀢𑁆𑀢𑀼𑀓𑀸𑀫𑁄, 𑀲𑀸 𑀯𑀺𑀢𑁆𑀣𑀸𑀭𑀢𑁄 𑀯𑀢𑁆𑀢𑀩𑁆𑀩𑀸, 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀁 ¶ 𑀧𑀦 𑀅𑀢𑁆𑀢𑀦𑀸 𑀯𑀺𑀢𑁆𑀣𑀸𑀭𑀺𑀢𑀢𑁆𑀢𑀸 𑀢𑀢𑁆𑀣𑁂𑀯 𑀕𑀳𑁂𑀢𑀩𑁆𑀩𑀸𑀢𑀺 𑀇𑀫𑀺𑀲𑁆𑀲𑀸 𑀲𑀁𑀯𑀡𑁆𑀡𑀦𑀸𑀬 𑀫𑀳𑀢𑁆𑀢𑀁 𑀧𑀭𑀺𑀳𑀭𑀦𑁆𑀢𑁄 ‘‘𑀲𑀸 𑀧𑀦𑁂𑀲𑀸’’𑀢𑀺𑀆𑀤𑀺𑀫𑀸𑀳.

𑁧. 𑀏𑀯𑀁 𑀩𑀸𑀳𑀺𑀭𑀦𑀺𑀤𑀸𑀦𑁂 𑀯𑀢𑁆𑀢𑀩𑁆𑀩𑀁 𑀅𑀢𑀺𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀅𑀩𑁆𑀪𑀦𑁆𑀢𑀭𑀦𑀺𑀤𑀸𑀦𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀁𑀯𑀡𑁆𑀡𑁂𑀢𑀼𑀁 ‘‘𑀬𑀁 𑀧𑀦𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀲𑁆𑀫𑀸 𑀲𑀁𑀯𑀡𑁆𑀡𑀦𑀁 𑀓𑀭𑁄𑀦𑁆𑀢𑁂𑀦 𑀲𑀁𑀯𑀡𑁆𑀡𑁂𑀢𑀩𑁆𑀩𑁂 𑀥𑀫𑁆𑀫𑁂 𑀧𑀤𑀯𑀺𑀪𑀸𑀕𑀁 𑀧𑀤𑀢𑁆𑀣𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀧𑀺𑀡𑁆𑀟𑀢𑁆𑀣𑀸𑀤𑀺𑀤𑀲𑁆𑀲𑀦𑀯𑀲𑁂𑀦 𑀲𑀁𑀯𑀡𑁆𑀡𑀦𑀸 𑀓𑀸𑀢𑀩𑁆𑀩𑀸, 𑀢𑀲𑁆𑀫𑀸 𑀧𑀤𑀸𑀦𑀺 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 ¶ ‘‘𑀏𑀯𑀦𑁆𑀢𑀺 𑀦𑀺𑀧𑀸𑀢𑀧𑀤’’𑀦𑁆𑀢𑀺-𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀤𑀯𑀺𑀪𑀸𑀕𑁄𑀢𑀺 𑀧𑀤𑀸𑀦𑀁 𑀯𑀺𑀲𑁂𑀲𑁄, 𑀦 𑀧𑀤𑀯𑀺𑀕𑁆𑀕𑀳𑁄. 𑀅𑀣 𑀯𑀸 𑀧𑀤𑀸𑀦𑀺 𑀘 𑀧𑀤𑀯𑀺𑀪𑀸𑀕𑁄 𑀘 𑀧𑀤𑀯𑀺𑀪𑀸𑀕𑁄. 𑀧𑀤𑀯𑀺𑀕𑁆𑀕𑀳𑁄 𑀘 𑀧𑀤𑀯𑀺𑀪𑀸𑀕𑁄 𑀘 𑀧𑀤𑀯𑀺𑀪𑀸𑀕𑁄𑀢𑀺 𑀯𑀸 𑀏𑀓𑀲𑁂𑀲𑀯𑀲𑁂𑀦 𑀧𑀤𑀧𑀤𑀯𑀺𑀕𑁆𑀕𑀳𑀸 𑀧𑀤𑀯𑀺𑀪𑀸𑀕𑀲𑀤𑁆𑀤𑁂𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀧𑀤𑀯𑀺𑀕𑁆𑀕𑀳𑁄 ‘‘𑀚𑁂𑀢𑀲𑁆𑀲 𑀯𑀦𑀁 𑀚𑁂𑀢𑀯𑀦’’𑀦𑁆𑀢𑀺𑀆𑀤𑀺𑀦𑀸 𑀲𑀫𑀸𑀲𑀧𑀤𑁂𑀲𑀼 𑀤𑀝𑁆𑀞𑀩𑁆𑀩𑁄.

𑀅𑀢𑁆𑀣𑀢𑁄𑀢𑀺 𑀧𑀤𑀢𑁆𑀣𑀢𑁄. 𑀢𑀁 𑀧𑀦 𑀧𑀤𑀢𑁆𑀣𑀁 𑀅𑀢𑁆𑀣𑀼𑀤𑁆𑀥𑀸𑀭𑀓𑁆𑀓𑀫𑁂𑀦 𑀧𑀞𑀫𑀁 𑀏𑀯𑀁𑀲𑀤𑁆𑀤𑀲𑁆𑀲 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁𑀲𑀤𑁆𑀤𑁄 𑀢𑀸𑀯𑀸’’𑀢𑀺𑀆𑀤𑀺𑀫𑀸𑀳. 𑀅𑀯𑀥𑀸𑀭𑀡𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀇𑀤𑀫𑀢𑁆𑀣𑀧𑀼𑀘𑁆𑀙𑀸𑀧𑀭𑀺𑀫𑀸𑀡𑀸𑀤𑀺𑀅𑀢𑁆𑀣𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 ‘‘𑀏𑀯𑀁𑀕𑀢𑀸𑀦𑀺 𑀧𑀼𑀣𑀼𑀲𑀺𑀧𑁆𑀧𑀸𑀬𑀢𑀦𑀸𑀦𑀺 (𑀤𑀻. 𑀦𑀺. 𑁧.𑁧𑁬𑁩, 𑁧𑁬𑁫), 𑀏𑀯𑀁𑀯𑀺𑀥𑁄 𑀏𑀯𑀫𑀸𑀓𑀸𑀭𑁄’’𑀢𑀺 𑀘 𑀆𑀤𑀻𑀲𑀼 𑀇𑀤𑀁-𑀲𑀤𑁆𑀤𑀲𑁆𑀲 𑀅𑀢𑁆𑀣𑁂 𑀏𑀯𑀁-𑀲𑀤𑁆𑀤𑁄. 𑀕𑀢-𑀲𑀤𑁆𑀤𑁄 𑀳𑀺 𑀧𑀓𑀸𑀭𑀧𑀭𑀺𑀬𑀸𑀬𑁄, 𑀢𑀣𑀸 𑀯𑀺𑀥𑀸𑀓𑀸𑀭-𑀲𑀤𑁆𑀤𑁄 𑀘. 𑀢𑀣𑀸 𑀳𑀺 𑀕𑀢𑀯𑀺𑀥𑀆𑀓𑀸𑀭𑀲𑀤𑁆𑀤𑁂 𑀮𑁄𑀓𑀺𑀬𑀸 𑀧𑀓𑀸𑀭𑀢𑁆𑀣𑁂 𑀯𑀤𑀦𑁆𑀢𑀺. ‘‘𑀏𑀯𑀁 𑀲𑀼 𑀢𑁂 𑀲𑀼𑀦𑁆𑀳𑀸𑀢𑀸 𑀲𑀼𑀯𑀺𑀮𑀺𑀢𑁆𑀢𑀸 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽 𑀆𑀫𑀼𑀢𑁆𑀢𑀫𑀸𑀮𑀸𑀪𑀭𑀡𑀸 𑀑𑀤𑀸𑀢𑀯𑀢𑁆𑀣𑀯𑀲𑀦𑀸 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀧𑀭𑀺𑀘𑀸𑀭𑁂𑀦𑁆𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀢𑁆𑀯𑀁 𑀏𑀢𑀭𑀳𑀺 𑀲𑀸𑀘𑀭𑀺𑀬𑀓𑁄𑀢𑀺. 𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁮𑁬) 𑀧𑀼𑀘𑁆𑀙𑀸𑀬𑀁, ‘‘𑀏𑀯𑀁 𑀮𑀳𑀼𑀧𑀭𑀺𑀯𑀢𑁆𑀢𑀁 (𑀅. 𑀦𑀺. 𑁧.𑁪𑁮), 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄’’𑀢𑀺 (𑀧𑀸𑀭𑀸. 𑁧𑁨) 𑀘 𑀆𑀤𑀻𑀲𑀼 𑀧𑀭𑀺𑀫𑀸𑀡𑁂.

𑀦𑀦𑀼 𑀘 ‘‘𑀏𑀯𑀁 𑀲𑀼 𑀢𑁂 𑀲𑀼𑀦𑁆𑀳𑀸𑀢𑀸 𑀲𑀼𑀯𑀺𑀮𑀺𑀢𑁆𑀢𑀸, 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄’’𑀢𑀺 𑀏𑀢𑁆𑀣 𑀏𑀯𑀁-𑀲𑀤𑁆𑀤𑁂𑀦 𑀧𑀼𑀘𑁆𑀙𑀦𑀸𑀓𑀸𑀭𑀧𑀭𑀺𑀫𑀸𑀡𑀸𑀓𑀸𑀭𑀸𑀦𑀁 𑀯𑀼𑀢𑁆𑀢𑀢𑁆𑀢𑀸 𑀆𑀓𑀸𑀭𑀢𑁆𑀣𑁄 𑀏𑀯 𑀏𑀯𑀁-𑀲𑀤𑁆𑀤𑁄𑀢𑀺? 𑀦, 𑀯𑀺𑀲𑁂𑀲𑀲𑀩𑁆𑀪𑀸𑀯𑀢𑁄. 𑀆𑀓𑀸𑀭𑀫𑀢𑁆𑀢𑀯𑀸𑀘𑀓𑁄 𑀳𑀺 𑀏𑀯𑀁-𑀲𑀤𑁆𑀤𑁄, 𑀆𑀓𑀸𑀭𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑁂𑀢𑁄 𑀬𑀣𑀸 ‘‘𑀏𑀯𑀁 𑀩𑁆𑀬𑀸𑀔𑁄’’𑀢𑀺𑀆𑀤𑀻𑀲𑀼, 𑀦 𑀧𑀦 𑀆𑀓𑀸𑀭𑀯𑀺𑀲𑁂𑀲𑀯𑀸𑀘𑀓𑁄. 𑀏𑀯𑀜𑁆𑀘 𑀓𑀢𑁆𑀯𑀸, ‘‘𑀏𑀯𑀁 𑀚𑀸𑀢𑁂𑀦 𑀫𑀘𑁆𑀘𑁂𑀦𑀸’’𑀢𑀺𑀆𑀤𑀻𑀦𑀺 (𑀥. 𑀧. 𑁫𑁩) 𑀉𑀧𑀫𑀸𑀤𑀻𑀲𑀼 𑀉𑀤𑀸𑀳𑀭𑀡𑀸𑀦𑀺 𑀉𑀧𑀧𑀦𑁆𑀦𑀸𑀦𑀺 𑀳𑁄𑀦𑁆𑀢𑀺. 𑀢𑀣𑀸 𑀳𑀺 ‘‘𑀬𑀣𑀸𑀧𑀺…𑀧𑁂… 𑀩𑀳𑀼’’𑀦𑁆𑀢𑀺 (𑀥. 𑀧. 𑁫𑁩)? 𑀏𑀢𑁆𑀣 𑀧𑀼𑀧𑁆𑀨𑀭𑀸𑀲𑀺𑀝𑁆𑀞𑀸𑀦𑀺𑀬𑀢𑁄 𑀫𑀦𑀼𑀲𑁆𑀲𑀽𑀧𑀧𑀢𑁆𑀢𑀺𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬-𑀲𑀤𑁆𑀥𑀫𑁆𑀫𑀲𑁆𑀲𑀯𑀦- 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭-𑀪𑁄𑀕𑀲𑀫𑁆𑀧𑀢𑁆𑀢𑀺𑀆𑀤𑀺𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀺𑀭𑀺𑀬𑀳𑁂𑀢𑀼𑀲𑀫𑀼𑀤𑀸𑀬𑀢𑁄 𑀲𑁄𑀪𑀸𑀲𑀼𑀕𑀦𑁆𑀥𑀢𑀸𑀤𑀺𑀕𑀼𑀡𑀬𑁄𑀕𑀢𑁄 𑀫𑀸𑀮𑀸𑀕𑀼𑀴𑀲𑀤𑀺𑀲𑀺𑀬𑁄 𑀧𑀳𑀽𑀢𑀸 𑀧𑀼𑀜𑁆𑀜𑀓𑀺𑀭𑀺𑀬𑀸 𑀫𑀭𑀺𑀢𑀩𑁆𑀩𑀲𑀪𑀸𑀯𑀢𑀸𑀬 𑀫𑀘𑁆𑀘𑁂𑀦 𑀲𑀢𑁆𑀢𑁂𑀦 𑀓𑀢𑁆𑀢𑀩𑁆𑀩𑀸𑀢𑀺 𑀚𑁄𑀢𑀺𑀢𑀢𑁆𑀢𑀸 ¶ 𑀧𑀼𑀧𑁆𑀨𑀭𑀸𑀲𑀺𑀫𑀸𑀮𑀸𑀕𑀼𑀴𑀸𑀯 𑀉𑀧𑀫𑀸, 𑀢𑁂𑀲𑀁 𑀉𑀧𑀫𑀸𑀓𑀸𑀭𑁄 𑀬𑀣𑀸-𑀲𑀤𑁆𑀤𑁂𑀦 𑀅𑀦𑀺𑀬𑀫𑀢𑁄 𑀯𑀼𑀢𑁆𑀢𑁄𑀢𑀺 ‘‘𑀏𑀯𑀁-𑀲𑀤𑁆𑀤𑁄 𑀉𑀧𑀫𑀸𑀓𑀸𑀭𑀦𑀺𑀕𑀫𑀦𑀢𑁆𑀣𑁄’’𑀢𑀺 ¶ 𑀯𑀢𑁆𑀣𑀼𑀁 𑀬𑀼𑀢𑁆𑀢𑀁, 𑀲𑁄 𑀧𑀦 𑀉𑀧𑀫𑀸𑀓𑀸𑀭𑁄 𑀦𑀺𑀬𑀫𑀺𑀬𑀫𑀸𑀦𑁄 𑀅𑀢𑁆𑀣𑀢𑁄 𑀉𑀧𑀫𑀸𑀯 𑀳𑁄𑀢𑀻𑀢𑀺 𑀆𑀳 ‘‘𑀉𑀧𑀫𑀸𑀬𑀁 𑀆𑀕𑀢𑁄’’𑀢𑀺. 𑀢𑀣𑀸 ‘‘𑀏𑀯𑀁 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀅𑀪𑀺𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀉𑀧𑀤𑀺𑀲𑀺𑀬𑀫𑀸𑀦𑀸𑀬 𑀲𑀫𑀡𑀲𑀸𑀭𑀼𑀧𑁆𑀧𑀸𑀬 𑀆𑀓𑀧𑁆𑀧𑀲𑀫𑁆𑀧𑀢𑁆𑀢𑀺𑀬𑀸 𑀬𑁄 𑀢𑀢𑁆𑀣 𑀉𑀧𑀤𑀺𑀲𑀦𑀸𑀓𑀸𑀭𑁄, 𑀲𑁄 𑀅𑀢𑁆𑀣𑀢𑁄 𑀉𑀧𑀤𑁂𑀲𑁄 𑀏𑀯𑀸𑀢𑀺 𑀯𑀼𑀢𑁆𑀢𑀁, ‘‘𑀏𑀯𑀁 𑀢𑁂…𑀧𑁂… 𑀉𑀧𑀤𑁂𑀲𑁂’’𑀢𑀺. 𑀢𑀣𑀸 ‘‘𑀏𑀯𑀫𑁂𑀢𑀁 𑀪𑀕𑀯𑀸, 𑀏𑀯𑀫𑁂𑀢𑀁 𑀲𑀼𑀕𑀢𑀸’’𑀢𑀺 𑀏𑀢𑁆𑀣 𑀘 𑀪𑀕𑀯𑀢𑀸 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀅𑀯𑀺𑀧𑀭𑀻𑀢𑀢𑁄 𑀚𑀸𑀦𑀦𑁆𑀢𑁂𑀳𑀺 𑀓𑀢𑀁 𑀢𑀢𑁆𑀣 𑀲𑀁𑀯𑀺𑀚𑁆𑀚𑀫𑀸𑀦𑀕𑀼𑀡𑀸𑀦𑀁 𑀧𑀓𑀸𑀭𑁂𑀳𑀺 𑀳𑀁𑀲𑀦𑀁 𑀉𑀤𑀕𑁆𑀕𑀢𑀸𑀓𑀭𑀡𑀁 𑀲𑀫𑁆𑀧𑀳𑀁𑀲𑀦𑀁. 𑀬𑁄 𑀢𑀢𑁆𑀣 𑀲𑀫𑁆𑀧𑀳𑀁𑀲𑀦𑀸𑀓𑀸𑀭𑁄𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀏𑀯𑀫𑁂𑀯𑀁 𑀧𑀦𑀸𑀬𑀦𑁆𑀢𑀺 𑀏𑀢𑁆𑀣 𑀕𑀭𑀳𑀡𑀸𑀓𑀸𑀭𑁄𑀢𑀺 𑀬𑁄𑀚𑁂𑀢𑀩𑁆𑀩𑀁, 𑀲𑁄 𑀘 𑀕𑀭𑀳𑀡𑀸𑀓𑀸𑀭𑁄 𑀯𑀲𑀮𑀻𑀢𑀺-𑀆𑀤𑀺𑀔𑀼𑀁𑀲𑀦𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀢𑁄 𑀇𑀥 𑀏𑀯𑀁-𑀲𑀤𑁆𑀤𑁂𑀦 𑀧𑀓𑀸𑀲𑀺𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀉𑀧𑀫𑀸𑀓𑀸𑀭𑀸𑀤𑀬𑁄𑀧𑀺 𑀉𑀧𑀫𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀸𑀦𑀁 𑀧𑀼𑀧𑁆𑀨𑀭𑀸𑀲𑀺𑀆𑀤𑀺𑀲𑀤𑁆𑀤𑀸𑀦𑀁 𑀲𑀦𑁆𑀦𑀺𑀥𑀸𑀦𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁, 𑀪𑀦𑁆𑀢𑁂𑀢𑀺 𑀧𑀦 𑀥𑀫𑁆𑀫𑀲𑁆𑀲 𑀲𑀸𑀥𑀼𑀓𑀁 𑀲𑀯𑀦𑀫𑀦𑀲𑀺𑀓𑀸𑀭𑁂 𑀲𑀦𑁆𑀦𑀺𑀬𑁄𑀚𑀺𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀅𑀢𑁆𑀢𑀦𑁄 𑀢𑀢𑁆𑀣 𑀞𑀺𑀢𑀪𑀸𑀯𑀲𑁆𑀲 𑀧𑀝𑀺𑀚𑀸𑀦𑀦𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀏𑀢𑁆𑀣 𑀏𑀯𑀁-𑀲𑀤𑁆𑀤𑁄 ‘‘𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑁄’’𑀢𑀺 𑀯𑀼𑀢𑁆𑀢𑁄. 𑀢𑁂𑀦 𑀏𑀯𑀁, 𑀪𑀦𑁆𑀢𑁂𑀢𑀺 𑀲𑀸𑀥𑀼, 𑀪𑀦𑁆𑀢𑁂, 𑀲𑀼𑀝𑁆𑀞𑀼, 𑀪𑀦𑁆𑀢𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀜𑁆𑀘 𑀯𑀤𑁂𑀳𑀻𑀢𑀺 𑀬𑀣𑀸𑀳𑀁 𑀯𑀤𑀸𑀫𑀺, 𑀏𑀯𑀁 𑀲𑀫𑀡𑀁 𑀆𑀦𑀦𑁆𑀤𑀁 𑀯𑀤𑁂𑀳𑀻𑀢𑀺 𑀬𑁄 𑀏𑀯𑀁 𑀯𑀤𑀦𑀸𑀓𑀸𑀭𑁄 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑁄, 𑀲𑁄 𑀏𑀯𑀁-𑀲𑀤𑁆𑀤𑁂𑀦 𑀦𑀺𑀤𑀲𑁆𑀲𑀻𑀬𑀢𑀻𑀢𑀺 ‘‘𑀦𑀺𑀤𑀲𑁆𑀲𑀦𑀢𑁆𑀣𑁄’’𑀢𑀺 𑀯𑀼𑀢𑁆𑀢𑁄𑀢𑀺. 𑀏𑀯𑀁 𑀦𑁄𑀢𑀺 𑀏𑀢𑁆𑀣𑀸𑀧𑀺 𑀦𑁂𑀲𑀁 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀳𑀺𑀢𑀤𑀼𑀓𑁆𑀔𑀸𑀯𑀳𑀪𑀸𑀯𑁂 𑀲𑀦𑁆𑀦𑀺𑀝𑁆𑀞𑀸𑀦𑀚𑀦𑀦𑀢𑁆𑀣𑀁 𑀅𑀦𑀼𑀫𑀢𑀺𑀕𑀳𑀡𑀯𑀲𑁂𑀦 ‘‘𑀲𑀁𑀯𑀢𑁆𑀢𑀦𑁆𑀢𑀺 𑀯𑀸 𑀦𑁄 𑀯𑀸, 𑀓𑀣𑀁 𑀯𑁄 𑀏𑀢𑁆𑀣 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀸𑀬 𑀓𑀢𑀸𑀬 ‘‘𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀤𑀸𑀓𑀸𑀭𑀲𑀦𑁆𑀦𑀺𑀝𑁆𑀞𑀸𑀦𑀁 𑀏𑀯𑀁-𑀲𑀤𑁆𑀤𑁂𑀦 𑀯𑀺𑀪𑀸𑀯𑀺𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀲𑁄 𑀧𑀦 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑀸𑀓𑀸𑀭𑁄 𑀦𑀺𑀬𑀫𑀺𑀬𑀫𑀸𑀦𑁄 𑀅𑀯𑀥𑀸𑀭𑀡𑀢𑁆𑀣𑁄 𑀳𑁄𑀢𑀻𑀢𑀺 𑀆𑀳 𑁋 ‘‘𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀻𑀢𑀺𑀆𑀤𑀻𑀲𑀼 𑀅𑀯𑀥𑀸𑀭𑀡𑁂’’𑀢𑀺.

𑀦𑀸𑀦𑀸𑀦𑀬𑀦𑀺𑀧𑀼𑀡𑀦𑁆𑀢𑀺 𑀏𑀓𑀢𑁆𑀢𑀦𑀸𑀦𑀢𑁆𑀢𑀅𑀩𑁆𑀬𑀸𑀧𑀸𑀭𑀏𑀯𑀁𑀥𑀫𑁆𑀫𑀢𑀸𑀲𑀗𑁆𑀔𑀸𑀢𑀸, 𑀦𑀦𑁆𑀤𑀺𑀬𑀸𑀯𑀝𑁆𑀝𑀢𑀺𑀧𑀼𑀓𑁆𑀔𑀮𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀅𑀗𑁆𑀓𑀼𑀲𑀤𑀺𑀲𑀸𑀮𑁄𑀘𑀦𑀲𑀗𑁆𑀔𑀸𑀢𑀸 𑀯𑀸 𑀆𑀥𑀸𑀭𑀸𑀤𑀺𑀪𑁂𑀤𑀯𑀲𑁂𑀦 𑀦𑀸𑀦𑀸𑀯𑀺𑀥𑀸 𑀦𑀬𑀸 𑀦𑀸𑀦𑀸𑀦𑀬𑀸. 𑀦𑀬𑀸 𑀯𑀸 𑀧𑀸𑀴𑀺𑀕𑀢𑀺𑀬𑁄 𑀢𑀸 𑀘 𑀧𑀜𑁆𑀜𑀢𑁆𑀢𑀺𑀅𑀦𑀼𑀧𑀜𑁆𑀜𑀢𑁆𑀢𑀺𑀆𑀤𑀺𑀯𑀲𑁂𑀦 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀮𑁄𑀓𑀺𑀬𑀸𑀤𑀺𑀢𑀤𑀼𑀪𑀬𑀯𑁄𑀫𑀺𑀲𑁆𑀲𑀓𑀸𑀤𑀺𑀯𑀲𑁂𑀦 𑀓𑀼𑀲𑀮𑀸𑀤𑀺𑀯𑀲𑁂𑀦 𑀔𑀦𑁆𑀥𑀸𑀤𑀺𑀯𑀲𑁂𑀦 𑀲𑀗𑁆𑀕𑀳𑀸𑀤𑀺𑀯𑀲𑁂𑀦 𑀲𑀫𑀬𑀯𑀺𑀫𑀼𑀢𑁆𑀢𑀸𑀤𑀺𑀯𑀲𑁂𑀦 𑀞𑀧𑀦𑀸𑀤𑀺𑀯𑀲𑁂𑀦 𑀓𑀼𑀲𑀮𑀫𑀽𑀮𑀸𑀤𑀺𑀯𑀲𑁂𑀦 𑀢𑀺𑀓𑀧𑁆𑀧𑀝𑁆𑀞𑀸𑀦𑀸𑀤𑀺𑀯𑀲𑁂𑀦 ¶ 𑀘 𑀦𑀸𑀦𑀧𑁆𑀧𑀓𑀸𑀭𑀸𑀢𑀺 𑀦𑀸𑀦𑀸𑀦𑀬𑀸, 𑀢𑁂𑀳𑀺 𑀦𑀺𑀧𑀼𑀡𑀁 𑀲𑀡𑁆𑀳𑀁 𑀲𑀼𑀔𑀼𑀫𑀦𑁆𑀢𑀺 𑀦𑀸𑀦𑀸𑀦𑀬𑀦𑀺𑀧𑀼𑀡𑀁. 𑀆𑀲𑀬𑁄𑀯 𑀅𑀚𑁆𑀛𑀸𑀲𑀬𑁄, 𑀢𑁂 𑀘 𑀲𑀲𑁆𑀲𑀢𑀸𑀤𑀺𑀪𑁂𑀤𑁂𑀦 𑀢𑀢𑁆𑀣 𑀘 𑀅𑀧𑁆𑀧𑀭𑀚𑀓𑁆𑀔𑀢𑀸𑀤𑀺𑀪𑁂𑀤𑁂𑀦 𑀅𑀦𑁂𑀓𑁂, 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀬𑁄 𑀏𑀯 𑀯𑀸 𑀲𑀫𑀼𑀝𑁆𑀞𑀸𑀦𑀁 𑀉𑀧𑁆𑀧𑀢𑁆𑀢𑀺𑀳𑁂𑀢𑀼 𑀏𑀢𑀲𑁆𑀲𑀸𑀢𑀺 𑀅𑀦𑁂𑀓𑀚𑁆𑀛𑀸𑀲𑀬𑀲𑀫𑀼𑀝𑁆𑀞𑀸𑀦𑀁 ¶ . 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀦𑁆𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀭𑀺𑀧𑀼𑀡𑁆𑀡𑀁 𑀉𑀧𑀦𑁂𑀢𑀩𑁆𑀩𑀸𑀪𑀸𑀯𑀢𑁄, 𑀲𑀗𑁆𑀓𑀸𑀲𑀦𑀧𑀓𑀸𑀲𑀦𑀯𑀺𑀯𑀭𑀡𑀯𑀺𑀪𑀚𑀦𑀉𑀢𑁆𑀢𑀸𑀦𑀻𑀓𑀭𑀡𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀙𑀳𑀺 𑀅𑀢𑁆𑀣𑀧𑀤𑁂𑀳𑀺 𑀅𑀓𑁆𑀔𑀭𑀧𑀤𑀩𑁆𑀬𑀜𑁆𑀚𑀦𑀸𑀓𑀸𑀭𑀦𑀺𑀭𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀙𑀳𑀺 𑀩𑁆𑀬𑀜𑁆𑀚𑀦𑀧𑀤𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀯𑀺𑀯𑀺𑀥𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀏𑀢𑁆𑀣 𑀧𑀸𑀝𑀺𑀳𑀸𑀭𑀺𑀬𑀧𑀤𑀲𑁆𑀲 𑀯𑀘𑀦𑀢𑁆𑀣𑀁 (𑀉𑀤𑀸. 𑀅𑀝𑁆𑀞. 𑁧; 𑀇𑀢𑀺𑀯𑀼. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸; 𑀥. 𑀲. 𑀫𑀽𑀮𑀝𑀻. 𑁨) ‘‘𑀧𑀝𑀺𑀧𑀓𑁆𑀔𑀳𑀭𑀡𑀢𑁄 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀧𑀦𑀬𑀦𑀢𑁄 𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀤𑀦𑁆𑀢𑀺. 𑀪𑀕𑀯𑀢𑁄 𑀧𑀦 𑀧𑀝𑀺𑀧𑀓𑁆𑀔𑀸 𑀭𑀸𑀕𑀸𑀤𑀬𑁄 𑀦 𑀲𑀦𑁆𑀢𑀺 𑀬𑁂 𑀳𑀭𑀺𑀢𑀩𑁆𑀩𑀸, 𑀧𑀼𑀣𑀼𑀚𑁆𑀚𑀦𑀸𑀦𑀫𑁆𑀧𑀺 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀅𑀝𑁆𑀞𑀕𑀼𑀡𑀲𑀫𑀦𑁆𑀦𑀸𑀕𑀢𑁂 𑀘𑀺𑀢𑁆𑀢𑁂 𑀳𑀢𑀧𑀝𑀺𑀧𑀓𑁆𑀔𑁂 𑀇𑀤𑁆𑀥𑀺𑀯𑀺𑀥𑀁 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀧𑀯𑀢𑁆𑀢𑀯𑁄𑀳𑀸𑀭𑁂𑀦 𑀘 𑀦 𑀲𑀓𑁆𑀓𑀸 𑀇𑀥 ‘‘𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀢𑁆𑀢𑀼𑀁. 𑀲𑀘𑁂 𑀧𑀦 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀪𑀕𑀯𑀢𑁄 𑀯𑁂𑀦𑁂𑀬𑁆𑀬𑀕𑀢𑀸 𑀘 𑀓𑀺𑀮𑁂𑀲𑀸 𑀧𑀝𑀺𑀧𑀓𑁆𑀔𑀸, 𑀢𑁂𑀲𑀁 𑀳𑀭𑀡𑀢𑁄 ‘‘𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 𑀬𑀼𑀢𑁆𑀢𑀫𑁂𑀢𑀁. 𑀅𑀣 𑀯𑀸 𑀪𑀕𑀯𑀢𑁄 𑀘 𑀲𑀸𑀲𑀦𑀲𑁆𑀲 𑀘 𑀧𑀝𑀺𑀧𑀓𑁆𑀔𑀸 𑀢𑀺𑀢𑁆𑀣𑀺𑀬𑀸, 𑀢𑁂𑀲𑀁 𑀳𑀭𑀡𑀢𑁄 𑀧𑀸𑀝𑀺𑀳𑀸𑀭𑀺𑀬𑀁. 𑀢𑁂 𑀳𑀺 𑀤𑀺𑀝𑁆𑀞𑀺𑀳𑀭𑀡𑀯𑀲𑁂𑀦 𑀤𑀺𑀝𑁆𑀞𑀺𑀧𑁆𑀧𑀓𑀸𑀲𑀦𑁂 𑀅𑀲𑀫𑀢𑁆𑀣𑀪𑀸𑀯𑁂𑀦 𑀘 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀻𑀳𑀺 𑀳𑀭𑀺𑀢𑀸 𑀅𑀧𑀦𑀻𑀢𑀸 𑀳𑁄𑀦𑁆𑀢𑀻𑀢𑀺. 𑀧𑀝𑀻𑀢𑀺 𑀯𑀸 𑀅𑀬𑀁 𑀲𑀤𑁆𑀤𑁄 ‘‘𑀧𑀘𑁆𑀙𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀩𑁄𑀥𑁂𑀢𑀺 ‘‘𑀢𑀲𑁆𑀫𑀺𑀁 𑀧𑀝𑀺𑀧𑀯𑀺𑀝𑁆𑀞𑀫𑁆𑀳𑀺, 𑀅𑀜𑁆𑀜𑁄 𑀆𑀕𑀜𑁆𑀙𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁯𑁮𑁫; 𑀘𑀽𑀴𑀦𑀺. 𑀯𑀢𑁆𑀣𑀼𑀕𑀸𑀣𑀸 𑁪) 𑀯𑀺𑀬, 𑀢𑀲𑁆𑀫𑀸 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀓𑀢𑀓𑀺𑀘𑁆𑀘𑁂𑀦 𑀧𑀘𑁆𑀙𑀸𑀳𑀭𑀺𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀧𑀝𑀺𑀳𑀸𑀭𑀺𑀬𑀁, 𑀅𑀢𑁆𑀢𑀦𑁄 𑀯𑀸 𑀉𑀧𑀓𑁆𑀓𑀺𑀮𑁂𑀲𑁂𑀲𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑀕𑁆𑀕𑁂𑀳𑀺 𑀳𑀭𑀺𑀢𑁂𑀲𑀼 𑀧𑀘𑁆𑀙𑀸 𑀳𑀭𑀡𑀁 𑀧𑀝𑀺𑀳𑀸𑀭𑀺𑀬𑀁, 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀺𑀬𑁄 𑀘 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂𑀦 𑀓𑀢𑀓𑀺𑀘𑁆𑀘𑁂𑀦 𑀘 𑀲𑀢𑁆𑀢𑀳𑀺𑀢𑀢𑁆𑀣𑀁 𑀧𑀼𑀦 𑀧𑀯𑀢𑁆𑀢𑁂𑀢𑀩𑁆𑀩𑀸, 𑀳𑀭𑀺𑀢𑁂𑀲𑀼 𑀘 𑀅𑀢𑁆𑀢𑀦𑁄 𑀉𑀧𑀢𑁆𑀢𑀺𑀮𑁂𑀲𑁂𑀲𑀼 𑀧𑀭𑀲𑀢𑁆𑀢𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑀳𑀭𑀡𑀸𑀦𑀺 𑀳𑁄𑀦𑁆𑀢𑀻𑀢𑀺 𑀧𑀝𑀺𑀳𑀸𑀭𑀺𑀬𑀸𑀦𑀺 𑀪𑀯𑀦𑁆𑀢𑀺, 𑀧𑀝𑀺𑀳𑀸𑀭𑀺𑀬𑀫𑁂𑀯 𑀧𑀸𑀝𑀺𑀳𑀸𑀭𑀺𑀬𑀁. 𑀧𑀝𑀺𑀳𑀸𑀭𑀺𑀬𑁂 𑀯𑀸 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀺𑀲𑀫𑀼𑀤𑀸𑀬𑁂 𑀪𑀯𑀁 𑀏𑀓𑁂𑀓𑀁 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀝𑀺𑀳𑀸𑀭𑀺𑀬𑀁 𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀫𑀕𑁆𑀕𑁄 𑀘 𑀧𑀝𑀺𑀧𑀓𑁆𑀔𑀳𑀭𑀡𑀢𑁄, 𑀢𑀢𑁆𑀣 𑀚𑀸𑀢𑀁, 𑀢𑀲𑁆𑀫𑀺𑀁 𑀯𑀸 𑀦𑀺𑀫𑀺𑀢𑁆𑀢𑀪𑀽𑀢𑁂, 𑀢𑀢𑁄 𑀯𑀸 𑀆𑀕𑀢𑀦𑁆𑀢𑀺 𑀧𑀸𑀝𑀺𑀳𑀸𑀭𑀺𑀬𑀁. 𑀢𑀲𑁆𑀲 𑀧𑀦 𑀇𑀤𑁆𑀥𑀺𑀆𑀤𑀺𑀪𑁂𑀤𑁂𑀦 𑀯𑀺𑀲𑀬𑀪𑁂𑀤𑁂𑀦 𑀘 𑀩𑀳𑀼𑀯𑀺𑀥𑀲𑁆𑀲 ¶ 𑀪𑀕𑀯𑀢𑁄 𑀤𑁂𑀲𑀦𑀸𑀬𑀁 𑀮𑀩𑁆𑀪𑀫𑀸𑀦𑀢𑁆𑀢𑀸 𑀆𑀳 ‘‘𑀯𑀺𑀯𑀺𑀥𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺.

𑀦 𑀅𑀜𑁆𑀜𑀣𑀸𑀢𑀺 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀸𑀓𑀸𑀭𑀢𑁄 𑀦 𑀅𑀜𑁆𑀜𑀣𑀸𑀢𑀺 𑀅𑀢𑁆𑀣𑁄, 𑀦 𑀧𑀦 𑀪𑀕𑀯𑀢𑁄 𑀤𑁂𑀲𑀺𑀢𑀸𑀓𑀸𑀭𑀢𑁄. 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑀸 𑀳𑀺 𑀪𑀕𑀯𑀢𑁄 𑀤𑁂𑀲𑀦𑀸. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀓𑁄 𑀲𑀫𑀢𑁆𑀣𑁄 𑀯𑀺𑀜𑁆𑀜𑀸𑀢𑀼’’𑀦𑁆𑀢𑀺 𑀇𑀤𑀁 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀪𑀯𑀢𑀺, 𑀥𑀸𑀭𑀡𑀩𑀮𑀤𑀲𑁆𑀲𑀦𑀜𑁆𑀘 𑀦 𑀯𑀺𑀭𑀼𑀚𑁆𑀛𑀢𑀺 𑀲𑀼𑀢𑀸𑀓𑀸𑀭𑀅𑀯𑀺𑀭𑀚𑁆𑀛𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀦 𑀳𑁂𑀢𑁆𑀣 𑀅𑀢𑁆𑀣𑀦𑁆𑀢𑀭𑀢𑀸𑀧𑀭𑀺𑀳𑀸𑀭𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀢𑁆𑀣𑀸𑀦𑀁 𑀏𑀓𑀯𑀺𑀲𑀬𑀢𑁆𑀢𑀸. 𑀇𑀢𑀭𑀣𑀸 𑀣𑁂𑀭𑁄 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀲𑀩𑁆𑀩𑀣𑀸 𑀧𑀝𑀺𑀕𑁆𑀕𑀳𑀡𑁂 𑀲𑀫𑀢𑁆𑀣𑁄 𑀅𑀲𑀫𑀢𑁆𑀣𑁄 𑀘𑀸𑀢𑀺 𑀆𑀧𑀚𑁆𑀚𑁂𑀬𑁆𑀬𑀸𑀢𑀺.

‘‘𑀬𑁄 ¶ 𑀧𑀭𑁄 𑀦 𑀳𑁄𑀢𑀺, 𑀲𑁄 𑀅𑀢𑁆𑀢𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀬 𑀦𑀺𑀬𑀓𑀚𑁆𑀛𑀢𑁆𑀢𑀲𑀗𑁆𑀔𑀸𑀢𑀸𑀬 𑀲𑀲𑀦𑁆𑀢𑀢𑀺𑀬𑀸 𑀯𑀢𑁆𑀢𑀦𑀢𑁄 𑀢𑀺𑀯𑀺𑀥𑁄𑀧𑀺 𑀫𑁂-𑀲𑀤𑁆𑀤𑁄 𑀓𑀺𑀜𑁆𑀘𑀸𑀧𑀺 𑀏𑀓𑀲𑁆𑀫𑀺𑀁 𑀏𑀯 𑀅𑀢𑁆𑀣𑁂 𑀤𑀺𑀲𑁆𑀲𑀢𑀺, 𑀓𑀭𑀡𑀲𑀫𑁆𑀧𑀤𑀸𑀦𑀲𑀸𑀫𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀧𑀦 𑀯𑀺𑀚𑁆𑀚𑀫𑀸𑀦𑀁 𑀪𑁂𑀤𑀁 𑀲𑀦𑁆𑀥𑀸𑀬𑀸𑀳, ‘‘𑀫𑁂-𑀲𑀤𑁆𑀤𑁄 𑀢𑀻𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀻’’𑀢𑀺.

𑀓𑀺𑀜𑁆𑀘𑀸𑀧𑀺 𑀉𑀧𑀲𑀕𑁆𑀕𑁄 𑀓𑀺𑀭𑀺𑀬𑀁 𑀯𑀺𑀲𑁂𑀲𑁂𑀢𑀺, 𑀚𑁄𑀢𑀓𑀪𑀸𑀯𑀢𑁄 𑀧𑀦 𑀲𑀢𑀺𑀧𑀺 𑀢𑀲𑁆𑀫𑀺𑀁 𑀲𑀼𑀢-𑀲𑀤𑁆𑀤𑁄 𑀏𑀯 𑀢𑀁 𑀢𑀁 𑀅𑀢𑁆𑀢𑀁 𑀯𑀤𑀢𑀻𑀢𑀺 𑀅𑀦𑀼𑀧𑀲𑀕𑁆𑀕𑀲𑁆𑀲 𑀲𑀼𑀢-𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂 𑀲𑀉𑀧𑀲𑀕𑁆𑀕𑀲𑁆𑀲 𑀕𑀳𑀡𑀁 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀉𑀧𑀲𑀕𑁆𑀕𑁄 𑀅𑀦𑀼𑀧𑀲𑀕𑁆𑀕𑁄 𑀘𑀸’’𑀢𑀺𑀆𑀤𑀺𑀫𑀸𑀳. 𑀅𑀲𑁆𑀲𑀸𑀢𑀺 𑀲𑀼𑀢-𑀲𑀤𑁆𑀤𑀲𑁆𑀲. 𑀓𑀫𑁆𑀫𑀪𑀸𑀯𑀲𑀸𑀥𑀦𑀸𑀦𑀺 𑀇𑀥 𑀲𑀼𑀢𑀲𑀤𑁆𑀤𑁂 𑀲𑀫𑁆𑀪𑀯𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀉𑀧𑀥𑀸𑀭𑀺𑀢𑀦𑁆𑀢𑀺 𑀯𑀸 𑀉𑀧𑀥𑀸𑀭𑀡𑀦𑁆𑀢𑀺 𑀯𑀸 𑀅𑀢𑁆𑀣𑁄’’𑀢𑀺. 𑀫𑀬𑀸𑀢𑀺 𑀅𑀢𑁆𑀣𑁂 𑀲𑀢𑀻𑀢𑀺 𑀬𑀤𑀸 𑀫𑁂-𑀲𑀤𑁆𑀤𑀲𑁆𑀲 𑀓𑀢𑁆𑀢𑀼𑀯𑀲𑁂𑀦 𑀓𑀭𑀡𑀦𑀺𑀤𑁆𑀤𑁂𑀲𑁄, 𑀢𑀤𑀸𑀢𑀺 𑀅𑀢𑁆𑀣𑁄. 𑀫𑀫𑀸𑀢𑀺 𑀅𑀢𑁆𑀣𑁂 𑀲𑀢𑀻𑀢𑀺 𑀬𑀤𑀸 𑀲𑀫𑁆𑀩𑀦𑁆𑀥𑀯𑀲𑁂𑀦 𑀲𑀸𑀫𑀺𑀦𑀺𑀤𑁆𑀤𑁂𑀲𑁄, 𑀢𑀤𑀸.

𑀲𑀼𑀢-𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂 𑀧𑀬𑀼𑀢𑁆𑀢𑁂𑀦 𑀏𑀯𑀁-𑀲𑀤𑁆𑀤𑁂𑀦 𑀲𑀯𑀦𑀓𑀺𑀭𑀺𑀬𑀸𑀚𑁄𑀢𑀓𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀏𑀯𑀦𑁆𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀺𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀁 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀤𑀪𑀺𑀦𑀻𑀳𑀝𑀸𑀦𑀜𑁆𑀘 𑀫𑀦𑁄𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑁂𑀲𑀫𑁆𑀧𑀺 𑀯𑀸𑀓𑁆𑀬𑀸𑀦𑀁 𑀏𑀯𑀓𑀸𑀭𑀢𑁆𑀣𑀲𑀳𑀺𑀢𑀢𑁆𑀢𑀸 ‘‘𑀲𑀼𑀢’’𑀦𑁆𑀢𑀺 𑀏𑀢𑀲𑁆𑀲 𑀲𑀼𑀢𑀫𑁂𑀯𑀸𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀅𑀲𑁆𑀲𑀯𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺. 𑀏𑀢𑁂𑀦 𑀅𑀯𑀥𑀸𑀭𑀡𑁂𑀦 𑀦𑀺𑀭𑀸𑀲𑀗𑁆𑀓𑀢𑀁 𑀤𑀲𑁆𑀲𑁂𑀢𑀺. 𑀬𑀣𑀸 𑀘 𑀲𑀼𑀢𑀁 𑀲𑀼𑀢𑀫𑁂𑀯𑀸𑀢𑀺 𑀦𑀺𑀬𑀫𑁂𑀢𑀩𑁆𑀩𑀁, 𑀢𑀁 𑀲𑀫𑁆𑀫𑀸 𑀲𑀼𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀽𑀦𑀸𑀦𑀥𑀺𑀓𑀸𑀯𑀺𑀧𑀭𑀻𑀢𑀕𑁆𑀕𑀳𑀡𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀅𑀣 𑀯𑀸 𑀲𑀤𑁆𑀤𑀦𑁆𑀢𑀭𑀢𑁆𑀣𑀸𑀧𑁄𑀳𑀦𑀯𑀲𑁂𑀦 ¶ 𑀲𑀤𑁆𑀤𑁄 𑀅𑀢𑁆𑀣𑀁 𑀯𑀤𑀢𑀻𑀢𑀺 𑀲𑀼𑀢𑀦𑁆𑀢𑀺 𑀅𑀲𑀼𑀢𑀁 𑀦 𑀳𑁄𑀢𑀻𑀢𑀺 𑀅𑀬𑀫𑁂𑀢𑀲𑁆𑀲 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀲𑁆𑀲𑀯𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺. 𑀇𑀫𑀺𑀦𑀸 𑀤𑀺𑀝𑁆𑀞𑀸𑀤𑀺𑀯𑀺𑀦𑀺𑀯𑀢𑁆𑀢𑀦𑀁 𑀓𑀭𑁄𑀢𑀺.

𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀦 𑀇𑀤𑀁 𑀫𑀬𑀸 𑀤𑀺𑀝𑁆𑀞𑀁, 𑀦 𑀲𑀬𑀫𑁆𑀪𑀽𑀜𑀸𑀡𑁂𑀦 𑀲𑀘𑁆𑀙𑀺𑀓𑀢𑀁, 𑀅𑀣 𑀔𑁄 𑀲𑀼𑀢𑀁, 𑀢𑀜𑁆𑀘 𑀔𑁄 𑀲𑀫𑁆𑀫𑀤𑁂𑀯𑀸𑀢𑀺. 𑀢𑁂𑀦𑁂𑀯𑀸𑀳 ‘‘𑀅𑀦𑀽𑀦𑀸𑀦𑀥𑀺𑀓𑀸𑀯𑀺𑀧𑀭𑀻𑀢𑀕𑁆𑀕𑀳𑀡𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀅𑀯𑀥𑀸𑀭𑀡𑀢𑁆𑀣𑁂 𑀯𑀸 𑀏𑀯𑀁-𑀲𑀤𑁆𑀤𑁂 𑀅𑀬𑀫𑀢𑁆𑀣𑀬𑁄𑀚𑀦𑀸 𑀓𑀭𑀻𑀬𑀢𑀻𑀢𑀺 𑀢𑀤𑀧𑁂𑀓𑁆𑀔𑀲𑁆𑀲 𑀲𑀼𑀢-𑀲𑀤𑁆𑀤𑀲𑁆𑀲 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 ‘‘𑀅𑀲𑁆𑀲𑀯𑀦𑀪𑀸𑀯𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺. 𑀢𑁂𑀦𑁂𑀯𑀸𑀳 ‘‘𑀅𑀦𑀽𑀦𑀸𑀦𑀥𑀺𑀓𑀸𑀯𑀺𑀧𑀭𑀻𑀢𑀕𑁆𑀕𑀳𑀡𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀲𑀯𑀦𑀲𑀤𑁆𑀤𑁄 𑀘𑁂𑀢𑁆𑀣 𑀓𑀫𑁆𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 ‘‘𑀲𑀼𑀬𑁆𑀬𑀢𑀻’’𑀢𑀺.

𑀏𑀯𑀁 𑀲𑀯𑀦𑀳𑁂𑀢𑀼𑀲𑀯𑀦𑀯𑀺𑀲𑁂𑀲𑀯𑀲𑁂𑀦 𑀧𑀤𑀢𑁆𑀢𑀬𑀲𑁆𑀲 𑀏𑀓𑁂𑀦 𑀧𑀓𑀸𑀭𑁂𑀦 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀓𑀸𑀭𑀦𑁆𑀢𑀭𑁂𑀳𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀣𑀸 𑀏𑀯’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀲𑁆𑀲𑀸𑀢𑀺 𑀬𑀸 𑀲𑀸 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 ¶ 𑀥𑀫𑁆𑀫𑀲𑁆𑀲𑀯𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀫𑀦𑁄𑀤𑁆𑀯𑀸𑀭𑀯𑀺𑀜𑁆𑀜𑀸𑀡𑀯𑀻𑀣𑀺, 𑀢𑀲𑁆𑀲𑀸. 𑀲𑀸 𑀳𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑁂𑀢𑀼𑀁 𑀲𑀫𑀢𑁆𑀣𑀸. 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦𑀸’’𑀢𑀺. 𑀦𑀸𑀦𑀧𑁆𑀧𑀓𑀸𑀭𑁂𑀦𑀸𑀢𑀺 𑀯𑀓𑁆𑀔𑀫𑀸𑀦𑀸𑀦𑀁 𑀅𑀦𑁂𑀓𑀯𑀺𑀳𑀺𑀢𑀸𑀦𑀁 𑀩𑁆𑀬𑀜𑁆𑀚𑀦𑀢𑁆𑀣𑀕𑁆𑀕𑀳𑀡𑀸𑀦𑀁 𑀦𑀸𑀦𑀸𑀓𑀸𑀭𑁂𑀦. 𑀏𑀢𑁂𑀦 𑀇𑀫𑀺𑀲𑁆𑀲𑀸 𑀬𑁄𑀚𑀦𑀸𑀬 𑀆𑀓𑀸𑀭𑀢𑁆𑀣𑁄 𑀏𑀯𑀁-𑀲𑀤𑁆𑀤𑁄 𑀕𑀳𑀺𑀢𑁄𑀢𑀺 𑀤𑀻𑀧𑁂𑀢𑀺. 𑀧𑀯𑀢𑁆𑀢𑀺𑀪𑀸𑀯𑀧𑁆𑀧𑀓𑀸𑀲𑀦𑀦𑁆𑀢𑀺 𑀧𑀯𑀢𑁆𑀢𑀺𑀬𑀸 𑀅𑀢𑁆𑀣𑀺𑀢𑀸𑀧𑀓𑀸𑀲𑀦𑀁. 𑀲𑀼𑀢𑀦𑁆𑀢𑀺 𑀥𑀫𑁆𑀫𑀧𑁆𑀧𑀓𑀸𑀲𑀦𑀦𑁆𑀢𑀺 𑀬𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀯𑀺𑀜𑁆𑀜𑀸𑀡𑀯𑀻𑀣𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀧𑀯𑀢𑁆𑀢𑀸, 𑀢𑀲𑁆𑀲 𑀥𑀫𑁆𑀫𑀢𑁆𑀢𑀸 𑀯𑀼𑀢𑁆𑀢𑀁, 𑀦 𑀲𑀼𑀢-𑀲𑀤𑁆𑀤𑀲𑁆𑀲 𑀥𑀫𑁆𑀫𑀢𑁆𑀣𑀢𑁆𑀢𑀸. 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀸𑀓𑀝𑀻𑀓𑀭𑀡𑀁 ‘‘𑀅𑀬𑀁 𑀳𑁂𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸𑀢𑀺 𑀓𑀭𑀡𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀫𑀬𑀸𑀢𑀺 𑀓𑀢𑁆𑀢𑀼𑀅𑀢𑁆𑀣𑁂.

𑀏𑀯𑀦𑁆𑀢𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀧𑁆𑀧𑀓𑀸𑀲𑀦𑀦𑁆𑀢𑀺 𑀦𑀺𑀤𑀲𑁆𑀲𑀦𑀢𑁆𑀣𑀫𑁂𑀯𑀁 𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁 𑀦𑀺𑀤𑀲𑁆𑀲𑁂𑀢𑀩𑁆𑀩𑀲𑁆𑀲 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑁆𑀢𑀸𑀪𑀸𑀯𑀸𑀪𑀸𑀯𑀢𑁄. 𑀢𑁂𑀦 𑀏𑀯𑀁-𑀲𑀤𑁆𑀤𑁂𑀦 𑀲𑀓𑀮𑀫𑁆𑀧𑀺 𑀲𑀼𑀢𑁆𑀢𑀁 𑀧𑀘𑁆𑀘𑀸𑀫𑀝𑁆𑀞𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀼𑀢-𑀲𑀤𑁆𑀤𑀲𑁆𑀲 𑀓𑀺𑀭𑀺𑀬𑀸𑀲𑀤𑁆𑀤𑀢𑁆𑀢𑀸 𑀲𑀯𑀦𑀓𑀺𑀭𑀺𑀬𑀸𑀬 𑀘 𑀲𑀸𑀥𑀸𑀭𑀡𑀯𑀺𑀜𑁆𑀜𑀸𑀡𑀧𑁆𑀧𑀩𑀦𑁆𑀥𑀧𑀝𑀺𑀩𑀤𑁆𑀥𑀢𑁆𑀢𑀸 𑀢𑀢𑁆𑀣 𑀘 𑀧𑀼𑀕𑁆𑀕𑀮𑀯𑁄𑀳𑀸𑀭𑁄𑀢𑀺 𑀯𑀼𑀢𑁆𑀢𑀁 ‘‘𑀲𑀼𑀢𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀧𑁆𑀧𑀓𑀸𑀲𑀦’’𑀦𑁆𑀢𑀺. 𑀦 𑀳𑀺 𑀧𑀼𑀕𑁆𑀕𑀮𑀯𑁄𑀳𑀸𑀭𑀭𑀳𑀺𑀢𑁂 𑀥𑀫𑁆𑀫𑀧𑁆𑀧𑀩𑀦𑁆𑀥𑁂 𑀲𑀯𑀦𑀓𑀺𑀭𑀺𑀬𑀸 𑀮𑀩𑁆𑀪𑀢𑀻𑀢𑀺.

𑀬𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲𑀸𑀢𑀺𑀆𑀤𑀺𑀧𑀺 𑀆𑀓𑀸𑀭𑀢𑁆𑀣𑀫𑁂𑀯 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀧𑀼𑀭𑀺𑀫𑀬𑁄𑀚𑀦𑀸𑀬 𑀅𑀜𑁆𑀜𑀣𑀸 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀓𑀸𑀭𑀧𑀜𑁆𑀜𑀢𑁆𑀢𑀻𑀢𑀺 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀏𑀯 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑀼𑀧𑀸𑀤𑀸𑀦𑀯𑀲𑁂𑀦 𑀢𑀣𑀸 ¶ 𑀯𑀼𑀢𑁆𑀢𑀸. 𑀲𑀼𑀢𑀦𑁆𑀢𑀺 𑀯𑀺𑀲𑀬𑀦𑀺𑀤𑁆𑀤𑁂𑀲𑁄𑀢𑀺 𑀲𑁄𑀢𑀩𑁆𑀩𑀪𑀽𑀢𑁄 𑀥𑀫𑁆𑀫𑁄 𑀲𑀯𑀦𑀓𑀺𑀭𑀺𑀬𑀸𑀓𑀢𑁆𑀢𑀼𑀧𑀼𑀕𑁆𑀕𑀮𑀲𑁆𑀲 𑀲𑀯𑀦𑀓𑀺𑀭𑀺𑀬𑀸𑀯𑀲𑁂𑀦 𑀧𑀯𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀲𑀦𑁆𑀢𑀸𑀦𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀧𑀭𑀫𑀢𑁆𑀣𑀢𑁄 𑀓𑀲𑁆𑀲𑀘𑀺 𑀓𑀢𑁆𑀢𑀼 𑀅𑀪𑀸𑀯𑁂𑀧𑀺 𑀲𑀤𑁆𑀤𑀯𑁄𑀳𑀸𑀭𑁂𑀦 𑀩𑀼𑀤𑁆𑀥𑀺𑀧𑀭𑀺𑀓𑀧𑁆𑀧𑀺𑀢𑀪𑁂𑀤𑀯𑀘𑀦𑀺𑀘𑁆𑀙𑀸𑀬 𑀘𑀺𑀢𑁆𑀢𑀲𑀦𑁆𑀢𑀸𑀦𑀢𑁄 𑀅𑀜𑁆𑀜𑀁 𑀯𑀺𑀬 𑀢𑀁𑀲𑀫𑀗𑁆𑀕𑀺𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀦 𑀢𑀁𑀲𑀫𑀗𑁆𑀕𑀻𑀦𑁄’’𑀢𑀺. 𑀲𑀯𑀦𑀓𑀺𑀭𑀺𑀬𑀸𑀯𑀺𑀲𑀬𑁄𑀧𑀺 𑀲𑁄𑀢𑀩𑁆𑀩𑀥𑀫𑁆𑀫𑁄 𑀲𑀯𑀦𑀓𑀺𑀭𑀺𑀬𑀸𑀯𑀲𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀇𑀥 𑀧𑀭𑀫𑀢𑁆𑀣𑀢𑁄 𑀓𑀢𑁆𑀢𑀼𑀪𑀸𑀯𑀢𑁄, 𑀲𑀯𑀦𑀯𑀲𑁂𑀦 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀏𑀯 𑀯𑀸 𑀲𑀯𑀦𑀓𑀺𑀭𑀺𑀬𑀸𑀪𑀸𑀯𑀢𑁄 𑀢𑀁𑀓𑀺𑀭𑀺𑀬𑀸𑀓𑀢𑁆𑀢𑀼 𑀘 𑀯𑀺𑀲𑀬𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑀁𑀲𑀫𑀗𑁆𑀕𑀻𑀦𑁄 𑀓𑀢𑁆𑀢𑀼𑀯𑀺𑀲𑀬𑁂’’𑀢𑀺. 𑀲𑀼𑀢𑀸𑀓𑀸𑀭𑀲𑁆𑀲 𑀘 𑀣𑁂𑀭𑀲𑁆𑀲 𑀲𑀫𑁆𑀫𑀸𑀦𑀺𑀘𑁆𑀙𑀺𑀢𑀪𑀸𑀯𑀢𑁄 𑀆𑀳 ‘‘𑀕𑀳𑀡𑀲𑀦𑁆𑀦𑀺𑀝𑁆𑀞𑀸𑀦’’𑀦𑁆𑀢𑀺. 𑀏𑀢𑁂𑀦 𑀯𑀸 𑀅𑀯𑀥𑀸𑀭𑀡𑀢𑁆𑀣𑀁 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀅𑀬𑀫𑀢𑁆𑀣𑀬𑁄𑀚𑀦𑀸 𑀓𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀼𑀩𑁆𑀩𑁂 𑀲𑀼𑀢𑀸𑀦𑀁 𑀦𑀸𑀦𑀸𑀯𑀺𑀳𑀺𑀢𑀸𑀦𑀁 𑀲𑀼𑀢𑁆𑀢𑀲𑀗𑁆𑀔𑀸𑀢𑀸𑀦𑀁 𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀦𑀁 𑀉𑀧𑀥𑀸𑀭𑀺𑀢𑀭𑀽𑀧𑀲𑁆𑀲 𑀆𑀓𑀸𑀭𑀲𑁆𑀲 𑀦𑀺𑀤𑀲𑁆𑀲𑀦𑀲𑁆𑀲, 𑀅𑀯𑀥𑀸𑀭𑀡𑀲𑁆𑀲 𑀯𑀸 𑀧𑀓𑀸𑀲𑀦𑀲𑀪𑀸𑀯𑁄 𑀏𑀯𑀁-𑀲𑀤𑁆𑀤𑁄𑀢𑀺 𑀢𑀤𑀸𑀓𑀸𑀭𑀸𑀤𑀺𑀉𑀧𑀥𑀸𑀭𑀡𑀲𑁆𑀲 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀦𑀪𑀽𑀢𑀥𑀫𑁆𑀫𑀧𑁆𑀧𑀩𑀦𑁆𑀥𑀩𑁆𑀬𑀸𑀧𑀸𑀭𑀢𑀸𑀬 𑀯𑀼𑀢𑁆𑀢𑀁 ‘‘𑀏𑀯𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄’’𑀢𑀺. 𑀲𑀯𑀦𑀓𑀺𑀭𑀺𑀬𑀸 𑀧𑀦 𑀧𑀼𑀕𑁆𑀕𑀮𑀯𑀸𑀤𑀺𑀦𑁄𑀧𑀺 𑀯𑀺𑀜𑁆𑀜𑀸𑀡𑀦𑀺𑀭𑀧𑁂𑀓𑁆𑀔𑀸 𑀦𑀢𑁆𑀣𑀻𑀢𑀺 𑀯𑀺𑀲𑁂𑀲𑀢𑁄 𑀯𑀺𑀜𑁆𑀜𑀸𑀡𑀩𑁆𑀬𑀸𑀧𑀸𑀭𑁄𑀢𑀺 𑀆𑀳 ¶ ‘‘𑀲𑀼𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄’’𑀢𑀺. 𑀫𑁂𑀢𑀺 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀬𑀸 𑀏𑀓𑀦𑁆𑀢𑁂𑀦𑁂𑀯 𑀲𑀢𑁆𑀢𑀯𑀺𑀲𑀬𑀢𑁆𑀢𑀸 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀲𑁆𑀲 𑀘 𑀢𑀢𑁆𑀣𑁂𑀯 𑀲𑀫𑁄𑀤𑀳𑀺𑀢𑀩𑁆𑀩𑀢𑁄 ‘‘𑀫𑁂𑀢𑀺 𑀉𑀪𑀬𑀓𑀺𑀘𑁆𑀘𑀬𑀼𑀢𑁆𑀢𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑁄’’𑀢𑀺 𑀯𑀼𑀢𑁆𑀢𑀁. 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀲𑀪𑀸𑀯𑀸 𑀬𑀣𑀸𑀓𑁆𑀓𑀫𑀁 𑀏𑀯𑀁-𑀲𑀤𑁆𑀤𑀲𑀼𑀢-𑀲𑀤𑁆𑀤𑀸𑀦𑀁 𑀅𑀢𑁆𑀣𑀸𑀢𑀺 𑀢𑁂 𑀢𑀣𑀸𑀭𑀽𑀧-𑀧𑀜𑁆𑀜𑀢𑁆𑀢𑀺-𑀉𑀧𑀸𑀤𑀸𑀦𑀪𑀽𑀢-𑀥𑀫𑁆𑀫𑀧𑁆𑀧𑀩𑀦𑁆𑀥𑀩𑁆𑀬𑀸𑀧𑀸𑀭𑀪𑀸𑀯𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀏𑀯𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄, 𑀲𑀼𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄’’𑀢𑀺. 𑀏𑀢𑁆𑀣 𑀘 𑀓𑀭𑀡𑀓𑀺𑀭𑀺𑀬𑀸𑀓𑀢𑁆𑀢𑀼𑀓𑀫𑁆𑀫-𑀯𑀺𑀲𑁂𑀲𑀧𑁆𑀧𑀓𑀸𑀲𑀦𑀯𑀲𑁂𑀦 𑀧𑀼𑀕𑁆𑀕𑀮𑀩𑁆𑀬𑀸𑀧𑀸𑀭𑀯𑀺𑀲𑀬-𑀧𑀼𑀕𑁆𑀕𑀮𑀩𑁆𑀬𑀸𑀧𑀸𑀭𑀦𑀺𑀤𑀲𑁆𑀲𑀦𑀯𑀲𑁂𑀦 𑀕𑀳𑀡𑀸𑀓𑀸𑀭𑀕𑀸𑀳𑀓𑀢𑀩𑁆𑀩𑀺𑀲𑀬𑀯𑀺𑀲𑁂𑀲𑀦𑀺𑀤𑁆𑀤𑁂𑀲𑀯𑀲𑁂𑀦 𑀓𑀢𑁆𑀢𑀼𑀓𑀭𑀡𑀩𑁆𑀬𑀸𑀧𑀸𑀭-𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑀯𑀲𑁂𑀦 𑀘 𑀤𑀼𑀢𑀺𑀬𑀸𑀤𑀬𑁄 𑀘𑀢𑀲𑁆𑀲𑁄 𑀅𑀢𑁆𑀣𑀬𑁄𑀚𑀦𑀸 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀩𑁆𑀩𑀲𑁆𑀲𑀧𑀺 𑀲𑀤𑁆𑀤𑀸𑀥𑀺𑀕𑀫𑀦𑀻𑀬𑀲𑁆𑀲 𑀅𑀢𑁆𑀣𑀲𑁆𑀲 𑀧𑀜𑁆𑀜𑀢𑁆𑀢𑀺𑀫𑀼𑀔𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀲𑀩𑁆𑀩𑀧𑀜𑁆𑀜𑀢𑁆𑀢𑀻𑀦𑀜𑁆𑀘 𑀯𑀺𑀚𑁆𑀚𑀫𑀸𑀦𑀸𑀤𑀺𑀯𑀲𑁂𑀦 𑀙𑀲𑀼 𑀧𑀜𑁆𑀜𑀢𑁆𑀢𑀺𑀪𑁂𑀤𑁂𑀲𑀼 𑀅𑀦𑁆𑀢𑁄𑀕𑀥𑀢𑁆𑀢𑀸 𑀢𑁂𑀲𑀼 ‘‘𑀏𑀯’’𑀦𑁆𑀢𑀺𑀆𑀤𑀻𑀦𑀁 𑀧𑀜𑁆𑀜𑀢𑁆𑀢𑀻𑀦𑀁 𑀲𑀭𑀽𑀧𑀁 𑀦𑀺𑀤𑁆𑀥𑀸𑀭𑁂𑀦𑁆𑀢𑁄 𑀆𑀳 ‘‘𑀏𑀯𑀦𑁆𑀢𑀺 𑀘 𑀫𑁂𑀢𑀺 𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀏𑀯𑀦𑁆𑀢𑀺 𑀘 𑀫𑁂𑀢𑀺 𑀘 𑀯𑀼𑀘𑁆𑀘𑀫𑀸𑀦𑀲𑁆𑀲 𑀅𑀢𑁆𑀣𑀲𑁆𑀲 𑀆𑀓𑀸𑀭𑀸𑀤𑀺𑀦𑁄 ¶ 𑀥𑀫𑁆𑀫𑀸𑀦𑀁 𑀅𑀲𑀮𑀓𑁆𑀔𑀡𑀪𑀸𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑁄𑀢𑀺 𑀆𑀳 ‘‘𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺. 𑀢𑀢𑁆𑀣 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦𑀸𑀢𑀺 𑀪𑀽𑀢𑀢𑁆𑀣𑀉𑀢𑁆𑀢𑀫𑀢𑁆𑀣𑀯𑀲𑁂𑀦. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀫𑀸𑀬𑀸𑀫𑀭𑀻𑀘𑀺𑀆𑀤𑀬𑁄 𑀯𑀺𑀬 𑀅𑀪𑀽𑀢𑀢𑁆𑀣𑁄, 𑀅𑀦𑀼𑀲𑁆𑀲𑀯𑀸𑀤𑀻𑀳𑀺 𑀕𑀳𑁂𑀢𑀩𑁆𑀩𑁄 𑀯𑀺𑀬 𑀅𑀦𑀼𑀢𑁆𑀢𑀫𑀢𑁆𑀣𑁄 𑀘 𑀦 𑀳𑁄𑀢𑀺, 𑀲𑁄 𑀭𑀽𑀧𑀲𑀤𑁆𑀤𑀸𑀤𑀺𑀲𑀪𑀸𑀯𑁄, 𑀭𑀼𑀧𑁆𑀧𑀦𑀸𑀦𑀼𑀪𑀯𑀦𑀸𑀤𑀺𑀲𑀪𑀸𑀯𑁄 𑀯𑀸 𑀅𑀢𑁆𑀣𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄 𑀘𑀸𑀢𑀺 𑀯𑀼𑀘𑁆𑀘𑀢𑀺, 𑀦 𑀢𑀣𑀸 𑀏𑀯𑀁 𑀫𑁂𑀢𑀺 𑀧𑀤𑀸𑀦𑀁 𑀅𑀢𑁆𑀣𑁄𑀢𑀺. 𑀏𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀓𑀺𑀜𑁆𑀳𑁂𑀢𑁆𑀣𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀼𑀢𑀦𑁆𑀢𑀺 𑀧𑀦 𑀲𑀤𑁆𑀤𑀸𑀬𑀢𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺. 𑀢𑁂𑀦𑁂𑀯 𑀳𑀺 ‘‘𑀬𑀜𑁆𑀳𑀺 𑀢𑀁 𑀏𑀢𑁆𑀣 𑀲𑁄𑀢𑁂𑀦 𑀉𑀧𑀮𑀤𑁆𑀥’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀉𑀧𑀮𑀤𑁆𑀥𑀦𑁆𑀢𑀺 𑀧𑀦 𑀯𑀼𑀢𑁆𑀢𑁂 𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀤𑀺 𑀲𑀩𑁆𑀩𑀁 𑀮𑀩𑁆𑀪𑀢𑀻𑀢𑀺. 𑀢𑀁 𑀢𑀁 𑀉𑀧𑀸𑀤𑀸𑀬 𑀯𑀢𑁆𑀢𑀩𑁆𑀩𑀢𑁄𑀢𑀺 𑀲𑁄𑀢𑀧𑀣𑀫𑀸𑀕𑀢𑁂 𑀥𑀫𑁆𑀫𑁂 𑀉𑀧𑀸𑀤𑀸𑀬 𑀢𑁂𑀲𑀁 𑀉𑀧𑀥𑀸𑀭𑀺𑀢𑀸𑀓𑀸𑀭𑀸𑀤𑀺𑀦𑁄 𑀧𑀘𑁆𑀘𑀸𑀫𑀲𑀦𑀯𑀲𑁂𑀦 𑀏𑀯𑀦𑁆𑀢𑀺, 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁂 𑀔𑀦𑁆𑀥𑁂 𑀉𑀧𑀸𑀤𑀸𑀬 𑀫𑁂𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀸𑀤𑀺𑀲𑀪𑀸𑀯𑀭𑀳𑀺𑀢𑁂 𑀲𑀤𑁆𑀤𑀸𑀬𑀢𑀦𑁂 𑀧𑀯𑀢𑁆𑀢𑀫𑀸𑀦𑁄𑀧𑀺 𑀲𑀼𑀢𑀯𑁄𑀳𑀸𑀭𑁄 ‘‘𑀤𑀼𑀢𑀺𑀬𑀁 𑀢𑀢𑀺𑀬’’𑀦𑁆𑀢𑀺𑀆𑀤𑀺𑀓𑁄 𑀯𑀺𑀬 𑀧𑀞𑀫𑀸𑀤𑀻𑀦𑀺 𑀤𑀺𑀝𑁆𑀞𑀫𑀼𑀢𑀯𑀺𑀜𑁆𑀜𑀸𑀢𑁂 𑀅𑀧𑁂𑀓𑁆𑀔𑀺𑀢𑁆𑀯𑀸 𑀧𑀯𑀢𑁆𑀢𑁄𑀢𑀺 𑀆𑀳 ‘‘𑀤𑀺𑀝𑁆𑀞𑀸𑀤𑀻𑀦𑀺 𑀉𑀧𑀦𑀺𑀥𑀸𑀬 𑀯𑀢𑁆𑀢𑀩𑁆𑀩𑀢𑁄’’𑀢𑀺. 𑀅𑀲𑀼𑀢𑀁 𑀦 𑀳𑁄𑀢𑀻𑀢𑀺 𑀳𑀺 𑀲𑀼𑀢𑀦𑁆𑀢𑀺 𑀧𑀓𑀸𑀲𑀺𑀢𑁄𑀬𑀫𑀢𑁆𑀣𑁄𑀢𑀺.

𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀸 𑀲𑀼𑀢𑁆𑀢𑀲𑁆𑀲 𑀧𑀓𑀸𑀭𑀯𑀺𑀲𑁂𑀲𑀸 𑀏𑀯𑀦𑁆𑀢𑀺 𑀣𑁂𑀭𑁂𑀦 𑀧𑀘𑁆𑀘𑀸𑀫𑀝𑁆𑀞𑀸𑀢𑀺 𑀆𑀳 ‘‘𑀅𑀲𑀫𑁆𑀫𑁄𑀳𑀁 𑀤𑀻𑀧𑁂𑀢𑀻’’𑀢𑀺. 𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀲𑀫𑀢𑁆𑀣𑁄 𑀳𑁄𑀢𑀻𑀢𑀺 𑀏𑀢𑁂𑀦 𑀯𑀓𑁆𑀔𑀫𑀸𑀦𑀲𑁆𑀲 𑀲𑀼𑀢𑁆𑀢𑀲𑁆𑀲 𑀦𑀸𑀦𑀧𑁆𑀧𑀓𑀸𑀭𑀢𑀁 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀲𑀼𑀢𑀲𑁆𑀲 𑀅𑀲𑀫𑁆𑀫𑁄𑀲𑀁 𑀤𑀻𑀧𑁂𑀢𑀻𑀢𑀺 𑀲𑀼𑀢𑀸𑀓𑀸𑀭𑀲𑁆𑀲 𑀬𑀸𑀣𑀸𑀯𑀢𑁄 𑀤𑀲𑁆𑀲𑀺𑀬𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀅𑀲𑀫𑁆𑀫𑁄𑀳𑁂𑀦𑀸𑀢𑀺 𑀲𑀫𑁆𑀫𑁄𑀳𑀸𑀪𑀸𑀯𑁂𑀦, 𑀧𑀜𑁆𑀜𑀸𑀬 𑀏𑀯 𑀯𑀸 𑀲𑀯𑀦𑀓𑀸𑀮𑀲𑀫𑁆𑀪𑀽𑀢𑀸𑀬 𑀢𑀤𑀼𑀢𑁆𑀢𑀭𑀓𑀸𑀮𑀧𑀜𑁆𑀜𑀸𑀲𑀺𑀤𑁆𑀥𑀺 ¶ . 𑀏𑀯𑀁 𑀅𑀲𑀫𑁆𑀫𑁄𑀲𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀯𑀢𑁆𑀢𑀩𑁆𑀩𑀁. 𑀩𑁆𑀬𑀜𑁆𑀚𑀦𑀸𑀦𑀁 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄 𑀆𑀓𑀸𑀭𑁄 𑀦𑀸𑀢𑀺𑀕𑀫𑁆𑀪𑀻𑀭𑁄 𑀬𑀣𑀸𑀲𑀼𑀢𑀥𑀸𑀭𑀡𑀫𑁂𑀯 𑀢𑀢𑁆𑀣 𑀓𑀭𑀡𑀻𑀬𑀦𑁆𑀢𑀺 𑀲𑀢𑀺𑀬𑀸 𑀩𑁆𑀬𑀸𑀧𑀸𑀭𑁄 𑀅𑀥𑀺𑀓𑁄, 𑀧𑀜𑁆𑀜𑀸 𑀢𑀢𑁆𑀣 𑀕𑀼𑀡𑀻𑀪𑀽𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀸𑀬𑀸’’𑀢𑀺𑀆𑀤𑀺 𑀧𑀜𑁆𑀜𑀸𑀬 𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀓𑀢𑁆𑀯𑀸. 𑀧𑀼𑀩𑁆𑀩𑀗𑁆𑀕𑀫𑀢𑀸 𑀘𑁂𑀢𑁆𑀣 𑀧𑀥𑀸𑀦𑀢𑀸 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀧𑀼𑀩𑁆𑀩𑀗𑁆𑀕𑀫𑀢𑀸𑀬 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀆𑀯𑀚𑁆𑀚𑀦𑀸𑀤𑀻𑀦𑀁 𑀯𑀺𑀬 𑀅𑀧𑁆𑀧𑀥𑀸𑀦𑀢𑁆𑀢𑁂 𑀧𑀜𑁆𑀜𑀸 𑀧𑀼𑀩𑁆𑀩𑀗𑁆𑀕𑀫𑀸 𑀏𑀢𑀺𑀲𑁆𑀲𑀸𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺, 𑀏𑀯𑀁 𑀲𑀢𑀺 𑀧𑀼𑀩𑁆𑀩𑀗𑁆𑀕𑀫𑀸𑀬𑀸𑀢𑀺 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀬𑀣𑀸𑀲𑀫𑁆𑀪𑀯𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀲𑁆𑀲𑀸𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀭𑀺𑀧𑀼𑀡𑁆𑀡𑀲𑁆𑀲 ¶ , 𑀲𑀗𑁆𑀓𑀸𑀲𑀦-𑀧𑀓𑀸𑀲𑀦-𑀯𑀺𑀯𑀭𑀡-𑀯𑀺𑀪𑀚𑀦-𑀉𑀢𑁆𑀢𑀸𑀦𑀻𑀓𑀭𑀡𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀙𑀳𑀺 𑀅𑀢𑁆𑀣𑀧𑀤𑁂𑀳𑀺, 𑀅𑀓𑁆𑀔𑀭𑀧𑀤𑀩𑁆𑀬𑀜𑁆𑀚𑀦𑀸𑀓𑀸𑀭𑀦𑀺𑀭𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀙𑀳𑀺 𑀩𑁆𑀬𑀜𑁆𑀚𑀦𑀧𑀤𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑀲𑁆𑀲𑀸𑀢𑀺 𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀁 𑀤𑀻𑀧𑁂𑀢𑀺 𑀏𑀯𑀁-𑀲𑀤𑁆𑀤𑁂𑀦 𑀯𑀼𑀘𑁆𑀘𑀫𑀸𑀦𑀸𑀦𑀁 𑀆𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑀢𑁆𑀣𑀸𑀦𑀁 𑀅𑀯𑀺𑀧𑀭𑀻𑀢𑀲𑀤𑁆𑀥𑀫𑁆𑀫𑀯𑀺𑀲𑀬𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀯𑀺𑀓𑁆𑀔𑁂𑀧𑀁 𑀤𑀻𑀧𑁂𑀢𑀻𑀢𑀺 ‘‘𑀑𑀖𑀢𑀭𑀡𑀲𑀼𑀢𑁆𑀢𑀁 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺𑀆𑀤𑀺𑀧𑀼𑀘𑁆𑀙𑀸𑀯𑀲𑁂𑀦 𑀧𑀓𑀭𑀡𑀧𑁆𑀧𑀯𑀢𑁆𑀢𑀲𑁆𑀲 𑀯𑀓𑁆𑀔𑀫𑀸𑀦𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀯𑀦𑀁 𑀲𑀫𑀸𑀥𑀸𑀦𑀫𑀦𑁆𑀢𑀭𑁂𑀦 𑀦 𑀲𑀫𑁆𑀪𑀯𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲𑀸𑀢𑀺𑀆𑀤𑀺 𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀲𑀫𑀢𑁆𑀣𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀤𑁂𑀲𑀓-𑀧𑀬𑁄𑀚𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸. 𑀅𑀯𑀺𑀧𑀭𑀻𑀢𑀲𑀤𑁆𑀥𑀫𑁆𑀫𑀯𑀺𑀲𑀬𑁂𑀳𑀺 𑀯𑀺𑀬 𑀆𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑀢𑁆𑀣𑁂𑀳𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑁂𑀦 𑀯𑀺𑀬 𑀘 𑀅𑀯𑀺𑀓𑁆𑀔𑁂𑀧𑀲𑁆𑀲 𑀬𑀣𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀨𑀮𑀪𑀽𑀢𑁂𑀦 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸𑀦𑀁 𑀲𑀺𑀤𑁆𑀥𑀺 𑀯𑀼𑀢𑁆𑀢𑀸 𑀢𑀤𑀯𑀺𑀦𑀸𑀪𑀸𑀯𑀢𑁄, 𑀏𑀯𑀁 𑀅𑀯𑀺𑀓𑁆𑀔𑁂𑀧𑁂𑀦𑁂𑀯 𑀨𑀮𑀪𑀽𑀢𑁂𑀦 𑀓𑀸𑀭𑀡𑀪𑀽𑀢𑀸𑀦𑀁 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀦𑀁 𑀲𑀺𑀤𑁆𑀥𑀺 𑀤𑀲𑁆𑀲𑁂𑀢𑀩𑁆𑀩𑀸 𑀲𑀺𑀬𑀸 𑀅𑀲𑁆𑀲𑀼𑀢𑀯𑀢𑁄 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀭𑀳𑀺𑀢𑀲𑁆𑀲 𑀘 𑀢𑀤𑀪𑀸𑀯𑀢𑁄. ‘‘𑀦 𑀳𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀲𑀫𑀢𑁆𑀣𑀦𑀯𑀘𑀦𑁂𑀦 𑀧𑀦 𑀅𑀯𑀺𑀓𑁆𑀔𑁂𑀧𑁂𑀦 𑀓𑀸𑀭𑀡𑀪𑀽𑀢𑁂𑀦 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁂𑀦 𑀘 𑀨𑀮𑀪𑀽𑀢𑀲𑁆𑀲 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀲𑀺𑀤𑁆𑀥𑀺 𑀤𑀲𑁆𑀲𑀺𑀢𑀸. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀬𑀼𑀢𑁆𑀢𑁄 𑀲𑀺𑀬𑀸, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸 𑀦 𑀏𑀓𑀦𑁆𑀢𑁂𑀦 𑀅𑀯𑀺𑀓𑁆𑀔𑁂𑀧𑀲𑁆𑀲 𑀓𑀸𑀭𑀡𑀁 𑀩𑀸𑀳𑀺𑀭𑀗𑁆𑀕𑀢𑁆𑀢𑀸. 𑀅𑀯𑀺𑀓𑁆𑀔𑁂𑀧𑁄 𑀧𑀦 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁄 𑀯𑀺𑀬 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀏𑀓𑀦𑁆𑀢𑀓𑀸𑀭𑀡𑀦𑁆𑀢𑀺, 𑀏𑀯𑀫𑁆𑀧𑀺 𑀅𑀯𑀺𑀓𑁆𑀔𑁂𑀧𑁂𑀦 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀲𑀺𑀤𑁆𑀥𑀺𑀚𑁄𑀢𑀦𑀸 𑀦 𑀲𑀫𑀢𑁆𑀣𑀺𑀢𑀸𑀯, 𑀦𑁄 𑀦 𑀲𑀫𑀢𑁆𑀣𑀺𑀢𑀸 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸𑀦𑀁 𑀲𑀧𑁆𑀧𑀼𑀭𑀺𑀲𑀧𑀬𑀺𑀭𑀽𑀧𑀸𑀲𑀦𑀸𑀪𑀸𑀯𑀲𑁆𑀲 𑀅𑀢𑁆𑀣𑀲𑀺𑀤𑁆𑀥𑀺𑀢𑁄. 𑀏𑀢𑁆𑀣 𑀘 𑀧𑀼𑀭𑀺𑀫𑀁 𑀨𑀮𑁂𑀦 𑀓𑀸𑀭𑀡𑀲𑁆𑀲 𑀲𑀺𑀤𑁆𑀥𑀺𑀤𑀲𑁆𑀲𑀦𑀁 𑀦𑀤𑀻𑀧𑀽𑀭𑁂𑀦 𑀯𑀺𑀬 𑀉𑀧𑀭𑀺 𑀯𑀼𑀝𑁆𑀞𑀺𑀲𑀩𑁆𑀪𑀸𑀯𑀲𑁆𑀲. 𑀤𑀼𑀢𑀺𑀬𑀁 𑀓𑀸𑀭𑀡𑁂𑀦 𑀨𑀮𑀲𑁆𑀲 𑀲𑀺𑀤𑁆𑀥𑀺𑀤𑀲𑁆𑀲𑀦𑀁 𑀤𑀝𑁆𑀞𑀩𑁆𑀩𑀁 𑀏𑀓𑀦𑁆𑀢𑀯𑀲𑁆𑀲𑀺𑀦𑀸 𑀯𑀺𑀬 𑀫𑁂𑀖𑀯𑀼𑀝𑁆𑀞𑀸𑀦𑁂𑀦 𑀯𑀼𑀝𑁆𑀞𑀺𑀧𑁆𑀧𑀯𑀢𑁆𑀢𑀺𑀬𑀸.

𑀪𑀕𑀯𑀢𑁄 𑀯𑀘𑀦𑀲𑁆𑀲 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀪𑁂𑀤-𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀓𑀮𑀲𑀸𑀲𑀦𑀲𑀫𑁆𑀧𑀢𑁆𑀢𑀺-𑀑𑀕𑀸𑀳𑀦𑀸𑀓𑀸𑀭𑁄 𑀦𑀺𑀭𑀯𑀲𑁂𑀲𑀧𑀭𑀳𑀺𑀢-𑀧𑀸𑀭𑀺𑀧𑀽𑀭𑀺𑀓𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀏𑀯𑀁 𑀪𑀤𑁆𑀤𑀓𑁄 𑀆𑀓𑀸𑀭𑁄’’𑀢𑀺. 𑀬𑀲𑁆𑀫𑀸 𑀦 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄 ¶ . 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺-𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸-𑀲𑀗𑁆𑀔𑀸𑀢𑀁 𑀕𑀼𑀡𑀤𑁆𑀯𑀬𑀁. 𑀅𑀧𑀭𑀸𑀧𑀭𑀯𑀼𑀢𑁆𑀢𑀺𑀬𑀸 𑀘𑁂𑀢𑁆𑀣 𑀘𑀓𑁆𑀓𑀪𑀸𑀯𑁄, 𑀘𑀭𑀦𑁆𑀢𑀺 𑀏𑀢𑁂𑀳𑀺 𑀲𑀢𑁆𑀢𑀸, 𑀲𑀫𑁆𑀧𑀢𑁆𑀢𑀺𑀪𑀯𑁂𑀲𑀽𑀢𑀺 𑀯𑀸 ¶ . 𑀬𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀘𑀢𑀼𑀘𑀓𑁆𑀓𑀁 𑀯𑀢𑁆𑀢𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁪.𑁩𑁧). 𑀧𑀼𑀭𑀺𑀫𑀧𑀘𑁆𑀙𑀺𑀫𑀪𑀸𑀯𑁄 𑀘𑁂𑀢𑁆𑀣 𑀤𑁂𑀲𑀦𑀓𑁆𑀓𑀫𑀯𑀲𑁂𑀦 𑀤𑀝𑁆𑀞𑀩𑁆𑀩𑁄. 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑀺𑀤𑁆𑀥𑀺𑀬𑀸𑀢𑀺 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑁆𑀲 𑀘 𑀅𑀢𑁆𑀣𑀺𑀢𑀸𑀬. 𑀲𑀫𑁆𑀫𑀸𑀧𑀡𑀺𑀳𑀺𑀢𑀢𑁆𑀢𑁄 𑀧𑀼𑀩𑁆𑀩𑁂 𑀘 𑀓𑀢𑀧𑀼𑀜𑁆𑀜𑁄 𑀲𑀼𑀤𑁆𑀥𑀸𑀲𑀬𑁄 𑀳𑁄𑀢𑀺 𑀢𑀤𑀲𑀼𑀤𑁆𑀥𑀺𑀳𑁂𑀢𑀽𑀦𑀁 𑀓𑀺𑀮𑁂𑀲𑀸𑀦𑀁 𑀤𑀽𑀭𑀻𑀪𑀸𑀯𑀢𑁄𑀢𑀺 𑀆𑀳 ‘‘𑀆𑀲𑀬𑀲𑀼𑀤𑁆𑀥𑀺 𑀲𑀺𑀤𑁆𑀥𑀸 𑀳𑁄𑀢𑀻’’𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋 ‘‘𑀲𑀫𑁆𑀫𑀸𑀧𑀡𑀺𑀳𑀺𑀢𑀁 𑀘𑀺𑀢𑁆𑀢𑀁, 𑀲𑁂𑀬𑁆𑀬𑀲𑁄 𑀦𑀁 𑀢𑀢𑁄 𑀓𑀭𑁂’’𑀢𑀺 (𑀥. 𑀧. 𑁪𑁩) ‘‘𑀓𑀢𑀧𑀼𑀜𑁆𑀜𑁄𑀲𑀺, 𑀢𑁆𑀯𑀁 𑀆𑀦𑀦𑁆𑀤, 𑀧𑀥𑀸𑀦𑀫𑀦𑀼𑀬𑀼𑀜𑁆𑀚, 𑀔𑀺𑀧𑁆𑀧𑀁 𑀳𑁄𑀳𑀺𑀲𑀺 𑀅𑀦𑀸𑀲𑀯𑁄’’𑀢𑀺 (𑀤𑀻. 𑀦𑀺. 𑁨.𑁨𑁦𑁭) 𑀘. 𑀢𑁂𑀦𑁂𑀯𑀸𑀳 ‘‘𑀆𑀲𑀬𑀲𑀼𑀤𑁆𑀥𑀺𑀬𑀸 𑀅𑀥𑀺𑀕𑀫𑀩𑁆𑀬𑀢𑁆𑀢𑀺𑀲𑀺𑀤𑁆𑀥𑀻’’𑀢𑀺. 𑀧𑀬𑁄𑀕𑀲𑀼𑀤𑁆𑀥𑀺𑀬𑀸𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀼𑀩𑁆𑀩𑀗𑁆𑀕𑀫𑀲𑁆𑀲 𑀥𑀫𑁆𑀫𑀲𑁆𑀲𑀯𑀦𑀧𑀬𑁄𑀕𑀲𑁆𑀲 𑀯𑀺𑀲𑀤𑀪𑀸𑀯𑁂𑀦. 𑀢𑀣𑀸 𑀘𑀸𑀳 ‘‘𑀆𑀕𑀫𑀩𑁆𑀬𑀢𑁆𑀢𑀺𑀲𑀺𑀤𑁆𑀥𑀻’’𑀢𑀺, 𑀲𑀩𑁆𑀩𑀲𑁆𑀲 𑀯𑀸 𑀓𑀸𑀬𑀯𑀘𑀻𑀧𑀬𑁄𑀕𑀲𑁆𑀲 𑀦𑀺𑀤𑁆𑀤𑁄𑀲𑀪𑀸𑀯𑁂𑀦. 𑀧𑀭𑀺𑀲𑀼𑀤𑁆𑀥𑀓𑀸𑀬𑀯𑀘𑀻𑀧𑀬𑁄𑀕𑁄 𑀳𑀺 𑀯𑀺𑀧𑁆𑀧𑀝𑀺𑀲𑀸𑀭𑀸𑀪𑀸𑀯𑀢𑁄 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀭𑀺𑀬𑀢𑁆𑀢𑀺𑀬𑀁 𑀯𑀺𑀲𑀸𑀭𑀤𑁄 𑀳𑁄𑀢𑀻𑀢𑀺.

𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀤𑀻𑀧𑀓𑁂𑀦𑀸𑀢𑀺𑀆𑀤𑀺𑀦𑀸 𑀅𑀢𑁆𑀣𑀩𑁆𑀬𑀜𑁆𑀚𑀦𑁂𑀲𑀼 𑀣𑁂𑀭𑀲𑁆𑀲 𑀏𑀯𑀁-𑀲𑀤𑁆𑀤𑀲𑀼𑀢-𑀲𑀤𑁆𑀤𑀸𑀦𑀁 𑀅𑀲𑀫𑁆𑀫𑁄𑀳𑀸𑀲𑀫𑁆𑀫𑁄𑀲𑀤𑀻𑀧𑀦𑀢𑁄 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀯𑀲𑁂𑀦 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀲𑁄𑀢𑀩𑁆𑀩𑀪𑁂𑀤𑀧𑀝𑀺𑀯𑁂𑀥𑀤𑀻𑀧𑀓𑁂𑀦𑀸𑀢𑀺 𑀏𑀢𑁂𑀦 𑀅𑀬𑀁 𑀲𑀼𑀢-𑀲𑀤𑁆𑀤𑁄 𑀏𑀯𑀁-𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀢𑁄, 𑀯𑀓𑁆𑀔𑀫𑀸𑀦𑀸𑀧𑁂𑀓𑁆𑀔𑀸𑀬 𑀯𑀸 𑀲𑀸𑀫𑀜𑁆𑀜𑁂𑀦𑁂𑀯 𑀲𑁄𑀢𑀩𑁆𑀩𑀥𑀫𑁆𑀫𑀯𑀺𑀲𑁂𑀲𑀁 𑀆𑀫𑀲𑀢𑀻𑀢𑀺 𑀤𑀻𑀧𑁂𑀢𑀺. 𑀫𑀦𑁄𑀤𑀺𑀝𑁆𑀞𑀻𑀳𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸𑀦𑀁 𑀅𑀦𑀼𑀧𑁂𑀓𑁆𑀔𑀦𑀲𑀼𑀧𑁆𑀧𑀝𑀺𑀯𑁂𑀥𑀸 𑀯𑀺𑀲𑁂𑀲𑀢𑁄 𑀫𑀦𑀲𑀺𑀓𑀸𑀭𑀧𑀝𑀺𑀩𑀤𑁆𑀥𑀸𑀢𑀺 𑀢𑁂 𑀯𑀼𑀢𑁆𑀢𑀦𑀬𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀤𑀻𑀧𑀓𑁂𑀦 𑀏𑀯𑀁 𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸, 𑀲𑀯𑀦𑀥𑀸𑀭𑀡𑀯𑀘𑀻𑀧𑀭𑀺𑀘𑀬𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑁂𑀦 𑀲𑁄𑀢𑀸𑀯𑀥𑀸𑀦𑀧𑀝𑀺𑀩𑀤𑁆𑀥𑀸𑀢𑀺 𑀢𑁂 𑀯𑀼𑀢𑁆𑀢𑀦𑀬𑁂𑀦 𑀅𑀯𑀺𑀓𑁆𑀔𑁂𑀧𑀤𑀻𑀧𑀓𑁂𑀦 𑀲𑀼𑀢-𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀬𑀸 𑀥𑀫𑁆𑀫𑀲𑁆𑀲𑀯𑀦𑁂 𑀉𑀲𑁆𑀲𑀸𑀳𑀁 𑀚𑀦𑁂𑀢𑀺. 𑀢𑀢𑁆𑀣 𑀥𑀫𑁆𑀫𑀸𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸. 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀺𑀢𑀸𑀢𑀺 ‘‘𑀇𑀥 𑀲𑀻𑀮𑀁 𑀓𑀣𑀺𑀢𑀁, 𑀇𑀥 𑀲𑀫𑀸𑀥𑀺, 𑀇𑀥 𑀧𑀜𑁆𑀜𑀸, 𑀏𑀢𑁆𑀢𑀓𑀸 𑀏𑀢𑁆𑀣 𑀅𑀦𑀼𑀲𑀦𑁆𑀥𑀺𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀺𑀢𑀸. 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀢𑀺 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺 𑀪𑀽𑀢𑀸𑀬, 𑀜𑀸𑀢𑀧𑀭𑀺𑀜𑁆𑀜𑀸𑀲𑀗𑁆𑀔𑀸𑀢𑀸𑀬 𑀯𑀸 𑀤𑀺𑀝𑁆𑀞𑀺𑀬𑀸 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀭𑀽𑀧𑀸𑀭𑀽𑀧𑀥𑀫𑁆𑀫𑁂 ‘‘𑀇𑀢𑀺 𑀭𑀽𑀧𑀁, 𑀏𑀢𑁆𑀢𑀓𑀁 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀲𑀼𑀝𑁆𑀞𑀼 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀝𑀺𑀯𑀺𑀤𑁆𑀥𑀸.

𑀲𑀓𑀮𑁂𑀦 𑀯𑀘𑀦𑁂𑀦𑀸𑀢𑀺 𑀧𑀼𑀩𑁆𑀩𑁂 𑀢𑀻𑀳𑀺 𑀧𑀤𑁂𑀳𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀅𑀤𑀳𑀦𑁆𑀢𑁄𑀢𑀺 ‘‘𑀫𑀫𑁂𑀤’’𑀦𑁆𑀢𑀺 𑀅𑀢𑁆𑀢𑀦𑀺 𑀅𑀝𑁆𑀞𑀧𑁂𑀦𑁆𑀢𑁄. 𑀪𑀼𑀫𑁆𑀫𑀢𑁆𑀣𑁂 𑀘𑁂𑀢𑀁 ¶ 𑀲𑀸𑀫𑀺𑀯𑀘𑀦𑀁. 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀦𑁆𑀢𑀺 𑀅𑀓𑀢𑀜𑁆𑀜𑀼𑀢𑀁. ‘‘𑀇𑀥𑁂𑀓𑀘𑁆𑀘𑁄 𑀧𑀸𑀧𑀪𑀺𑀓𑁆𑀔𑀼 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀅𑀢𑁆𑀢𑀦𑁄 𑀤𑀳𑀢𑀻’’𑀢𑀺 (𑀧𑀸𑀭𑀸. 𑁧𑁯𑁫) 𑀏𑀯𑀁 𑀯𑀼𑀢𑁆𑀢𑀁 𑀅𑀦𑀭𑀺𑀬𑀯𑁄𑀳𑀸𑀭𑀸𑀯𑀢𑁆𑀣𑀁, 𑀲𑀸 𑀏𑀯 𑀅𑀦𑀭𑀺𑀬𑀯𑁄𑀳𑀸𑀭𑀸𑀯𑀢𑁆𑀣𑀸 𑀅𑀲𑀤𑁆𑀥𑀫𑁆𑀫𑁄 ¶ . 𑀦𑀦𑀼 𑀘 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 ‘‘𑀫𑀫𑁂𑀤𑀁 𑀯𑀘𑀦’’𑀦𑁆𑀢𑀺 𑀅𑀥𑀺𑀫𑀸𑀦𑀲𑁆𑀲, 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀸𑀤𑀻𑀦𑀜𑁆𑀘 𑀢𑀤𑀸𑀲𑀗𑁆𑀓𑀸𑀬 𑀅𑀪𑀸𑀯𑀢𑁄 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺-𑀲𑀫𑀢𑀺𑀓𑁆𑀓𑀫𑀸𑀤𑀺𑀯𑀘𑀦𑀁 𑀦𑀺𑀭𑀢𑁆𑀣𑀓𑀦𑁆𑀢𑀺? 𑀦𑀬𑀺𑀤𑀫𑁂𑀯𑀁. ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺 𑀯𑀤𑀦𑁆𑀢𑁂𑀦 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀺𑀪𑀸𑀯𑀺𑀢𑁄𑀢𑀺 𑀤𑀲𑁆𑀲𑀦𑀢𑁄. 𑀓𑁂𑀘𑀺 𑀧𑀦 ‘‘𑀤𑁂𑀯𑀢𑀸𑀦𑀁 𑀧𑀭𑀺𑀯𑀺𑀢𑀓𑁆𑀓𑀸𑀧𑁂𑀓𑁆𑀔𑀁 𑀢𑀣𑀸𑀯𑀘𑀦𑀦𑁆𑀢𑀺 𑀏𑀤𑀺𑀲𑀻 𑀘𑁄𑀤𑀦𑀸 𑀅𑀦𑀯𑀓𑀸𑀲𑀸’’𑀢𑀺 𑀯𑀤𑀦𑁆𑀢𑀺. 𑀢𑀲𑁆𑀫𑀺𑀁 𑀓𑀺𑀭 𑀔𑀡𑁂 𑀏𑀓𑀘𑁆𑀘𑀸𑀦𑀁 𑀤𑁂𑀯𑀢𑀸𑀦𑀁 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 ‘‘𑀪𑀕𑀯𑀸 𑀘 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀬𑀜𑁆𑀘 𑀆𑀬𑀲𑁆𑀫𑀸 𑀤𑁂𑀲𑀦𑀸𑀓𑀼𑀲𑀮𑁄 𑀇𑀤𑀸𑀦𑀺 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀲𑀓𑁆𑀬𑀓𑀼𑀮𑀧𑁆𑀧𑀲𑀼𑀢𑁄 𑀢𑀣𑀸𑀕𑀢𑀲𑁆𑀲 𑀪𑀸𑀢𑀸 𑀘𑀽𑀴𑀧𑀺𑀢𑀼𑀧𑀼𑀢𑁆𑀢𑁄. 𑀓𑀺𑀁 𑀦𑀼 𑀔𑁄 𑀲𑀬𑀁 𑀲𑀘𑁆𑀙𑀺𑀓𑀢𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺? 𑀉𑀤𑀸𑀳𑀼 𑀪𑀕𑀯𑀢𑁄 𑀏𑀯 𑀯𑀘𑀦𑀁 𑀬𑀣𑀸𑀲𑀼𑀢’’𑀦𑁆𑀢𑀺, 𑀏𑀯𑀁 𑀢𑀤𑀸𑀲𑀗𑁆𑀓𑀺𑀢𑀧𑁆𑀧𑀓𑀸𑀭𑀢𑁄 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀲𑀫𑁄𑀓𑁆𑀓𑀫𑀸𑀤𑀺𑀢𑁄 𑀅𑀢𑀺𑀓𑁆𑀓𑀫𑀸𑀤𑀺 𑀯𑀺𑀪𑀸𑀯𑀺𑀢𑀦𑁆𑀢𑀺. 𑀅𑀧𑁆𑀧𑁂𑀢𑀻𑀢𑀺 𑀦𑀺𑀤𑀲𑁆𑀲𑁂𑀢𑀺. 𑀤𑀺𑀝𑁆𑀞𑀥𑀫𑁆𑀫𑀺𑀓-𑀲𑀫𑁆𑀧𑀭𑀸𑀬𑀺𑀓-𑀧𑀭𑀫𑀢𑁆𑀣𑁂𑀲𑀼 𑀬𑀣𑀸𑀭𑀳𑀁 𑀲𑀢𑁆𑀢𑁂 𑀦𑁂𑀢𑀻𑀢𑀺 𑀦𑁂𑀢𑁆𑀢𑀺, 𑀥𑀫𑁆𑀫𑁄 𑀏𑀯 𑀦𑁂𑀢𑁆𑀢𑀺 𑀥𑀫𑁆𑀫𑀦𑁂𑀢𑁆𑀢𑀺.

𑀤𑀴𑁆𑀳𑀢𑀭𑀦𑀺𑀯𑀺𑀝𑁆𑀞𑀸 𑀯𑀺𑀘𑀺𑀓𑀺𑀘𑁆𑀙𑀸 𑀓𑀗𑁆𑀔𑀸, 𑀦𑀸𑀢𑀺𑀲𑀁𑀲𑀧𑁆𑀧𑀦𑀸 𑀫𑀢𑀺𑀪𑁂𑀤𑀫𑀢𑁆𑀢𑀸 𑀯𑀺𑀫𑀢𑀺. 𑀅𑀲𑁆𑀲𑀤𑁆𑀥𑀺𑀬𑀁 𑀯𑀺𑀦𑀸𑀲𑁂𑀢𑀻𑀢𑀺 𑀪𑀕𑀯𑀢𑀸 𑀪𑀸𑀲𑀺𑀢𑀢𑁆𑀢𑀸 𑀲𑀫𑁆𑀫𑀼𑀔𑀸𑀯𑀲𑁆𑀲 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀔𑀮𑀺𑀢𑀤𑀼𑀭𑀼𑀢𑁆𑀢𑀸𑀤𑀺𑀕𑀳𑀡𑀤𑁄𑀲𑀸𑀪𑀸𑀯𑀢𑁄 𑀘. 𑀏𑀢𑁆𑀣 𑀘 𑀧𑀞𑀫𑀸𑀤𑀬𑁄 𑀢𑀺𑀲𑁆𑀲𑁄 𑀅𑀢𑁆𑀣𑀬𑁄𑀚𑀦𑀸 𑀆𑀓𑀸𑀭𑀸𑀤𑀺𑀅𑀢𑁆𑀣𑁂𑀲𑀼 𑀅𑀕𑁆𑀕𑀳𑀺𑀢𑀯𑀺𑀲𑁂𑀲𑀫𑁂𑀯 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑀺𑀢𑀸, 𑀢𑀢𑁄 𑀧𑀭𑀸 𑀘𑀢𑀲𑁆𑀲𑁄 𑀆𑀓𑀸𑀭𑀢𑁆𑀣𑀫𑁂𑀯 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀯𑀺𑀪𑀸𑀯𑀺𑀢𑀸. 𑀧𑀘𑁆𑀙𑀺𑀫𑀸 𑀧𑀦 𑀢𑀺𑀲𑁆𑀲𑁄 𑀬𑀣𑀸𑀓𑁆𑀓𑀫𑀁 𑀆𑀓𑀸𑀭𑀢𑁆𑀣𑀁 𑀦𑀺𑀤𑀲𑁆𑀲𑀦𑀢𑁆𑀣𑀁 𑀅𑀯𑀥𑀸𑀭𑀡𑀢𑁆𑀣𑀜𑁆𑀘 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀬𑁄𑀚𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀓-𑀲𑀤𑁆𑀤𑁄 𑀅𑀜𑁆𑀜𑀲𑁂𑀝𑁆𑀞𑀅𑀲𑀳𑀸𑀬𑀲𑀗𑁆𑀔𑀬𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑁂𑀲 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜𑀦𑁆𑀢𑀺 𑀇𑀢𑁆𑀣𑁂𑀓𑁂 𑀅𑀪𑀺𑀯𑀤𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁨𑁭) 𑀅𑀜𑁆𑀜𑀢𑁆𑀣𑁂 𑀤𑀺𑀲𑁆𑀲𑀢𑀺. ‘‘𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁨𑁮; 𑀧𑀸𑀭𑀸. 𑁧𑁧) 𑀲𑁂𑀝𑁆𑀞𑁂, ‘‘𑀏𑀓𑁄 𑀯𑀽𑀧𑀓𑀝𑁆𑀞𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁪𑁦𑁫) 𑀅𑀲𑀳𑀸𑀬𑁂, ‘‘𑀏𑀓𑁄𑀯 𑀔𑁄, 𑀪𑀺𑀓𑁆𑀔𑀯𑁂, 𑀔𑀡𑁄 𑀘 𑀲𑀫𑀬𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁨𑁯) 𑀲𑀗𑁆𑀔𑀬𑀸𑀬𑀁. 𑀇𑀥𑀸𑀧𑀺 𑀲𑀗𑁆𑀔𑀬𑀸𑀬𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀏𑀓𑀦𑁆𑀢𑀺 ¶ 𑀕𑀡𑀦𑀧𑀭𑀺𑀘𑁆𑀙𑁂𑀤𑀦𑀺𑀤𑁆𑀤𑁂𑀲𑁄’’𑀢𑀺. 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘𑀸𑀢𑀺 𑀬𑀼𑀢𑁆𑀢𑀓𑀸𑀮𑀜𑁆𑀘 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀜𑁆𑀘. 𑀔𑀡𑁄𑀢𑀺 𑀑𑀓𑀸𑀲𑁄. 𑀢𑀣𑀸𑀕𑀢𑀼𑀧𑁆𑀧𑀸𑀤𑀸𑀤𑀺𑀓𑁄 𑀳𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀑𑀓𑀸𑀲𑁄 𑀢𑀧𑁆𑀧𑀘𑁆𑀘𑀬𑀲𑁆𑀲 𑀧𑀝𑀺𑀮𑀸𑀪𑀳𑁂𑀢𑀼𑀢𑁆𑀢𑀸. 𑀔𑀡𑁄 𑀏𑀯 𑀘 𑀲𑀫𑀬𑁄, 𑀬𑁄 𑀔𑀡𑁄𑀢𑀺 𑀘 𑀲𑀫𑀬𑁄𑀢𑀺 𑀘 𑀯𑀼𑀘𑁆𑀘𑀢𑀺, 𑀲𑁄 𑀏𑀓𑁄 𑀏𑀯𑀸𑀢𑀺 𑀳𑀺 𑀅𑀢𑁆𑀣𑁄. 𑀫𑀳𑀸𑀲𑀫𑀬𑁄𑀢𑀺 𑀫𑀳𑀸𑀲𑀫𑀽𑀳𑁄. 𑀲𑀫𑀬𑁄𑀧𑀺 𑀔𑁄𑀢𑀺 𑀲𑀺𑀓𑁆𑀔𑀸𑀧𑀤𑀧𑀽𑀭𑀡𑀲𑁆𑀲 𑀳𑁂𑀢𑀼𑀧𑀺. 𑀲𑀫𑀬𑀧𑁆𑀧𑀯𑀸𑀤𑀓𑁂𑀢𑀺 𑀤𑀺𑀝𑁆𑀞𑀺𑀧𑁆𑀧𑀯𑀸𑀤𑀓𑁂. 𑀢𑀢𑁆𑀣 𑀳𑀺 𑀦𑀺𑀲𑀺𑀦𑁆𑀦𑀸 𑀢𑀺𑀢𑁆𑀣𑀺𑀬𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀫𑀬𑀁 𑀧𑀯𑀤𑀦𑁆𑀢𑀺. 𑀅𑀢𑁆𑀣𑀸𑀪𑀺𑀲𑀫𑀬𑀸𑀢𑀺 𑀳𑀺𑀢𑀧𑀝𑀺𑀮𑀸𑀪𑀸. 𑀅𑀪𑀺𑀲𑀫𑁂𑀢𑀩𑁆𑀩𑁄𑀢𑀺 𑀅𑀪𑀺𑀲𑀫𑀬𑁄, 𑀅𑀪𑀺𑀲𑀫𑀬𑁄 𑀅𑀢𑁆𑀣𑁄 𑀅𑀪𑀺𑀲𑀫𑀬𑀢𑁆𑀣𑁄𑀢𑀺 𑀧𑀻𑀴𑀦𑀸𑀤𑀻𑀦𑀺 𑀅𑀪𑀺𑀲𑀫𑁂𑀢𑀩𑁆𑀩𑀪𑀸𑀯𑁂𑀦 𑀏𑀓𑀻𑀪𑀸𑀯𑀁 𑀉𑀧𑀦𑁂𑀢𑁆𑀯𑀸 ¶ 𑀯𑀼𑀢𑁆𑀢𑀸𑀦𑀺. 𑀅𑀪𑀺𑀲𑀫𑀬𑀲𑁆𑀲 𑀯𑀸 𑀧𑀝𑀺𑀯𑁂𑀥𑀲𑁆𑀲 𑀯𑀺𑀲𑀬𑀪𑀽𑀢𑁄 𑀅𑀢𑁆𑀣𑁄 𑀅𑀪𑀺𑀲𑀫𑀬𑀢𑁆𑀣𑁄𑀢𑀺 𑀢𑀸𑀦𑁂𑀯 𑀢𑀣𑀸 𑀏𑀓𑀢𑁆𑀢𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀧𑀻𑀴𑀦𑀁 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀢𑀁𑀲𑀫𑀗𑁆𑀕𑀺𑀦𑁄 𑀳𑀺𑀁𑀲𑀦𑀁 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀓𑀭𑀡𑀁, 𑀲𑀦𑁆𑀢𑀸𑀧𑁄 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀤𑀺𑀯𑀲𑁂𑀦 𑀲𑀦𑁆𑀢𑀸𑀧𑀦𑀁 𑀧𑀭𑀺𑀤𑀳𑀦𑀁.

𑀢𑀢𑁆𑀣 𑀲𑀳𑀓𑀸𑀭𑀺𑀓𑀸𑀭𑀡𑀁 𑀲𑀦𑁆𑀦𑀺𑀚𑁆𑀛𑀁 𑀲𑀫𑁂𑀢𑀺 𑀲𑀫𑀯𑁂𑀢𑀻𑀢𑀺 𑀲𑀫𑀬𑁄, 𑀲𑀫𑀯𑀸𑀬𑁄. 𑀲𑀫𑁂𑀢𑀺 𑀲𑀫𑀸𑀕𑀘𑁆𑀙𑀢𑀺 𑀏𑀢𑁆𑀣 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀢𑀤𑀸𑀥𑀸𑀭𑀧𑀼𑀕𑁆𑀕𑀮𑁂𑀳𑀻𑀢𑀺 𑀲𑀫𑀬𑁄, 𑀔𑀡𑁄. 𑀲𑀫𑁂𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸 𑀲𑀁𑀕𑀘𑁆𑀙𑀢𑀺 𑀲𑀢𑁆𑀢𑁄, 𑀲𑀪𑀸𑀯𑀥𑀫𑁆𑀫𑁄 𑀯𑀸 𑀲𑀳𑀚𑀸𑀢𑀸𑀤𑀻𑀳𑀺, 𑀉𑀧𑁆𑀧𑀸𑀤𑀸𑀤𑀻𑀳𑀺 𑀯𑀸𑀢𑀺 𑀲𑀫𑀬𑁄, 𑀓𑀸𑀮𑁄. 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀢𑀸𑀬 𑀅𑀢𑁆𑀣𑀢𑁄 𑀅𑀪𑀽𑀢𑁄𑀧𑀺 𑀳𑀺 𑀓𑀸𑀮𑁄 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀅𑀥𑀺𑀓𑀭𑀡𑀁 𑀓𑀭𑀡𑀁 𑀯𑀺𑀬 𑀘 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑁂𑀦 𑀭𑀽𑀧𑁂𑀦 𑀯𑁄𑀳𑀭𑀻𑀬𑀢𑀻𑀢𑀺. 𑀲𑀫𑀁, 𑀲𑀳 𑀯𑀸 𑀅𑀯𑀬𑀯𑀸𑀦𑀁 𑀅𑀬𑀦𑀁 𑀧𑀯𑀢𑁆𑀢𑀺 𑀅𑀯𑀝𑁆𑀞𑀸𑀦𑀦𑁆𑀢𑀺 𑀲𑀫𑀬𑁄, 𑀲𑀫𑀽𑀳𑁄 𑀬𑀣𑀸 ‘‘𑀲𑀫𑀼𑀤𑀸𑀬𑁄’’𑀢𑀺. 𑀅𑀯𑀬𑀯𑀲𑀳𑀸𑀯𑀝𑁆𑀞𑀸𑀦𑀫𑁂𑀯 𑀳𑀺 𑀲𑀫𑀽𑀳𑁄𑀢𑀺. 𑀅𑀯𑀲𑁂𑀲𑀧𑀘𑁆𑀘𑀬𑀸𑀦𑀁 𑀲𑀫𑀸𑀕𑀫𑁂 𑀏𑀢𑀺 𑀨𑀮𑀁 𑀏𑀢𑀲𑁆𑀫𑀸 𑀉𑀧𑁆𑀧𑀚𑁆𑀚𑀢𑀺 𑀧𑀯𑀢𑁆𑀢𑀢𑀺 𑀘𑀸𑀢𑀺 𑀲𑀫𑀬𑁄, 𑀳𑁂𑀢𑀼 𑀬𑀣𑀸 ‘‘𑀲𑀫𑀼𑀤𑀬𑁄’’𑀢𑀺. 𑀲𑀫𑁂𑀢𑀺 𑀲𑀁𑀬𑁄𑀚𑀦𑀪𑀸𑀯𑀢𑁄 𑀲𑀫𑁆𑀩𑀦𑁆𑀥𑁄 𑀏𑀢𑀺 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀧𑀯𑀢𑁆𑀢𑀢𑀺, 𑀤𑀴𑁆𑀳𑀕𑁆𑀕𑀳𑀡𑀪𑀸𑀯𑀢𑁄 𑀯𑀸 𑀲𑀁𑀬𑀼𑀢𑁆𑀢𑀸 𑀅𑀬𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺 𑀲𑀢𑁆𑀢𑀸 𑀬𑀣𑀸𑀪𑀺𑀦𑀺𑀯𑁂𑀲𑀁 𑀏𑀢𑁂𑀦𑀸𑀢𑀺 𑀲𑀫𑀬𑁄, 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑁂𑀦 𑀳𑀺 𑀲𑀢𑁆𑀢𑀸 𑀅𑀢𑀺𑀯𑀺𑀬 𑀩𑀚𑁆𑀛𑀦𑁆𑀢𑀻𑀢𑀺. 𑀲𑀫𑀺𑀢𑀺 𑀲𑀁𑀕𑀢𑀺 𑀲𑀫𑁄𑀥𑀸𑀦𑀦𑁆𑀢𑀺 𑀲𑀫𑀬𑁄, 𑀧𑀝𑀺𑀮𑀸𑀪𑁄. 𑀲𑀫𑀲𑁆𑀲 𑀦𑀺𑀭𑁄𑀥𑀲𑁆𑀲 𑀬𑀸𑀦𑀁, 𑀲𑀫𑁆𑀫𑀸 𑀯𑀸 𑀬𑀸𑀦𑀁 𑀅𑀧𑀕𑀫𑁄 𑀅𑀧𑀯𑀢𑁆𑀢𑀺 𑀲𑀫𑀬𑁄, 𑀧𑀳𑀸𑀦𑀁. 𑀅𑀪𑀺𑀫𑀼𑀔𑀁 𑀜𑀸𑀡𑁂𑀦 𑀲𑀫𑁆𑀫𑀸 𑀏𑀢𑀩𑁆𑀩𑁄 𑀅𑀥𑀺𑀕𑀦𑁆𑀢𑀩𑁆𑀩𑁄𑀢𑀺 𑀅𑀪𑀺𑀲𑀫𑀬𑁄, 𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑁄 𑀲𑀪𑀸𑀯𑁄. 𑀅𑀪𑀺𑀫𑀼𑀔𑀪𑀸𑀯𑁂𑀦 𑀲𑀫𑁆𑀫𑀸 𑀏𑀢𑀺 𑀕𑀘𑁆𑀙𑀢𑀺 𑀩𑀼𑀚𑁆𑀛𑀢𑀻𑀢𑀺 𑀅𑀪𑀺𑀲𑀫𑀬𑁄, 𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑀲𑀪𑀸𑀯𑀸𑀯𑀩𑁄𑀥𑁄 ¶ . 𑀏𑀯𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀫𑀬𑀲𑀤𑁆𑀤𑀧𑁆𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀫𑀬𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂 𑀅𑀪𑀺𑀲𑀫𑀬𑀲𑀤𑁆𑀤𑀲𑁆𑀲 𑀉𑀤𑀸𑀳𑀭𑀡𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀲𑁆𑀲𑀸𑀢𑀺 𑀲𑀫𑀬𑀲𑀤𑁆𑀤𑀲𑁆𑀲. 𑀓𑀸𑀮𑁄 𑀅𑀢𑁆𑀣𑁄 𑀲𑀫𑀯𑀸𑀬𑀸𑀤𑀻𑀦𑀁 𑀅𑀢𑁆𑀣𑀸𑀦𑀁 𑀇𑀥 𑀅𑀲𑀫𑁆𑀪𑀯𑀢𑁄 𑀤𑁂𑀲𑀤𑁂𑀲𑀓𑀧𑀭𑀺𑀲𑀸𑀦𑀁 𑀯𑀺𑀬 𑀲𑀼𑀢𑁆𑀢𑀲𑁆𑀲 𑀦𑀺𑀤𑀸𑀦𑀪𑀸𑀯𑁂𑀦 𑀓𑀸𑀮𑀲𑁆𑀲 𑀅𑀧𑀤𑀺𑀲𑀺𑀢𑀩𑁆𑀩𑀢𑁄 𑀘.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀅𑀦𑀺𑀬𑀫𑀺𑀢𑀯𑀲𑁂𑀦𑁂𑀯 𑀓𑀸𑀮𑁄 𑀦𑀺𑀤𑁆𑀤𑀺𑀝𑁆𑀞𑁄? 𑀦 𑀉𑀢𑀼𑀲𑀁𑀯𑀘𑁆𑀙𑀭𑀸𑀤𑀺𑀯𑀲𑁂𑀦 𑀦𑀺𑀬𑀫𑀺𑀢𑁄𑀢𑀺 𑀆𑀳 ‘‘𑀢𑀢𑁆𑀣 𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀉𑀢𑀼𑀲𑀁𑀯𑀘𑁆𑀙𑀭𑀸𑀤𑀺𑀯𑀲𑁂𑀦 𑀦𑀺𑀬𑀫𑀁 𑀅𑀓𑀢𑁆𑀯𑀸 𑀲𑀫𑀬𑀲𑀤𑁆𑀤𑀲𑁆𑀲 𑀯𑀘𑀦𑁂 𑀅𑀬𑀫𑁆𑀧𑀺 𑀕𑀼𑀡𑁄 𑀮𑀤𑁆𑀥𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂 𑀯𑀸 𑀇𑀫𑁂’’𑀢𑀺𑀆𑀤𑀺𑀫𑀸𑀳. 𑀲𑀸𑀫𑀜𑁆𑀜𑀚𑁄𑀢𑀦𑀸 𑀳𑀺 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀻𑀢𑀺. 𑀢𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑀫𑀬𑁄 𑀤𑁂𑀯𑀲𑀺𑀓𑀁 𑀛𑀸𑀦𑀨𑀮𑀲𑀫𑀸𑀧𑀢𑁆𑀢𑀻𑀳𑀺 𑀯𑀻𑀢𑀺𑀦𑀸𑀫𑀦𑀓𑀸𑀮𑁄, 𑀯𑀺𑀲𑁂𑀲𑀢𑁄 𑀲𑀢𑁆𑀢𑀲𑀢𑁆𑀢𑀸𑀳𑀸𑀦𑀺. 𑀲𑀼𑀧𑁆𑀧𑀓𑀸𑀲𑀸𑀢𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀧𑀓𑀫𑁆𑀧𑀦-𑀑𑀪𑀸𑀲𑀧𑀸𑀢𑀼𑀪𑀸𑀯𑀸𑀤𑀻𑀳𑀺 𑀧𑀸𑀓𑀝𑀸. 𑀬𑀣𑀸𑀯𑀼𑀢𑁆𑀢𑀧𑁆𑀧𑀪𑁂𑀤𑁂𑀲𑀼 𑀏𑀯 𑀲𑀫𑀬𑁂𑀲𑀼 𑀏𑀓𑀤𑁂𑀲𑀁 𑀧𑀓𑀸𑀭𑀦𑁆𑀢𑀭𑁂𑀳𑀺 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀘𑀸𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀣𑀸 𑀳𑀺 𑀜𑀸𑀡𑀓𑀺𑀘𑁆𑀘𑀲𑀫𑀬𑁄, 𑀅𑀢𑁆𑀢𑀳𑀺𑀢𑀧𑀝𑀺𑀧𑀢𑁆𑀢𑀺𑀲𑀫𑀬𑁄 ¶ 𑀘 𑀅𑀪𑀺𑀲𑀫𑁆𑀩𑁄𑀥𑀺𑀲𑀫𑀬𑁄, 𑀅𑀭𑀺𑀬𑀢𑀼𑀡𑁆𑀳𑀻𑀪𑀸𑀯𑀲𑀫𑀬𑁄, 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑀫𑀬𑁄, 𑀓𑀭𑀼𑀡𑀸𑀓𑀺𑀘𑁆𑀘𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀻𑀓𑀣𑀸𑀲𑀫𑀬𑀸, 𑀤𑁂𑀲𑀦𑀸𑀲𑀫𑀬𑁄 𑀏𑀯.

𑀓𑀭𑀡𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀅𑀪𑀺𑀥𑀫𑁆𑀫𑀢𑀤𑀜𑁆𑀜𑀲𑀼𑀢𑁆𑀢𑀧𑀤𑀯𑀺𑀦𑀬𑁂𑀲𑀼. 𑀢𑀣𑀸𑀢𑀺 𑀪𑀼𑀫𑁆𑀫𑀓𑀭𑀡𑁂𑀳𑀺. 𑀅𑀥𑀺𑀓𑀭𑀡𑀢𑁆𑀣𑁄 𑀆𑀥𑀸𑀭𑀢𑁆𑀣𑁄. 𑀪𑀸𑀯𑁄 𑀦𑀸𑀫 𑀓𑀺𑀭𑀺𑀬𑀸, 𑀢𑀸𑀬 𑀓𑀺𑀭𑀺𑀬𑀦𑁆𑀢𑀭𑀮𑀓𑁆𑀔𑀡𑀁 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀁. 𑀢𑀢𑁆𑀣 𑀬𑀣𑀸 𑀓𑀸𑀮𑁄 𑀲𑀪𑀸𑀯𑀥𑀫𑁆𑀫𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀬𑀁 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀆𑀥𑀸𑀭𑀪𑀸𑀯𑁂𑀦 𑀧𑀜𑁆𑀜𑀸𑀢𑁄 𑀢𑀗𑁆𑀔𑀡𑀧𑁆𑀧𑀯𑀢𑁆𑀢𑀸𑀦𑀁 𑀢𑀢𑁄 𑀧𑀼𑀩𑁆𑀩𑁂 𑀧𑀭𑀢𑁄 𑀘 𑀅𑀪𑀸𑀯𑀢𑁄 ‘‘𑀧𑀼𑀩𑁆𑀩𑀡𑁆𑀳𑁂 𑀚𑀸𑀢𑁄, 𑀲𑀸𑀬𑀦𑁆𑀳𑁂 𑀕𑀘𑁆𑀙𑀢𑀻’’𑀢𑀺 𑀘 𑀆𑀤𑀻𑀲𑀼, 𑀲𑀫𑀽𑀳𑁄 𑀘 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀯𑀺𑀲𑀼𑀁 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑁄 𑀅𑀯𑀬𑀯𑀸𑀦𑀁 𑀆𑀥𑀸𑀭𑀪𑀸𑀯𑁂𑀦 𑀧𑀜𑁆𑀜𑀸𑀧𑀻𑀬𑀢𑀺 𑀬𑀣𑀸 ‘‘𑀭𑀼𑀓𑁆𑀔𑁂 𑀲𑀸𑀔𑀸, 𑀬𑀯𑀭𑀸𑀲𑀺𑀬𑀁 𑀲𑀫𑁆𑀪𑀽𑀢𑁄’’𑀢𑀺𑀆𑀤𑀻𑀲𑀼, 𑀏𑀯𑀁 𑀇𑀥𑀸𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀥𑀺𑀓𑀭𑀡𑀜𑁆𑀳𑀺…𑀧𑁂… 𑀥𑀫𑁆𑀫𑀸𑀦’’𑀦𑁆𑀢𑀺. 𑀬𑀲𑁆𑀫𑀺𑀁 𑀓𑀸𑀮𑁂, 𑀥𑀫𑁆𑀫𑀧𑀼𑀜𑁆𑀚𑁂 𑀯𑀸 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀏𑀯 𑀓𑀸𑀮𑁂 𑀥𑀫𑁆𑀫𑀧𑀼𑀜𑁆𑀚𑁂 𑀘 𑀨𑀲𑁆𑀲𑀸𑀤𑀬𑁄𑀧𑀺 𑀳𑁄𑀦𑁆𑀢𑀻𑀢𑀺 𑀅𑀬𑀁 𑀳𑀺 𑀢𑀢𑁆𑀣 𑀅𑀢𑁆𑀣𑁄. 𑀬𑀣𑀸 𑀘 ‘‘𑀕𑀸𑀯𑀻𑀲𑀼 𑀤𑀼𑀬𑁆𑀳𑀫𑀸𑀦𑀸𑀲𑀼 𑀕𑀢𑁄, 𑀤𑀼𑀤𑁆𑀥𑀸𑀲𑀼 𑀆𑀕𑀢𑁄’’𑀢𑀺 𑀤𑁄𑀳𑀦𑀓𑀺𑀭𑀺𑀬𑀸𑀬 𑀕𑀫𑀦𑀓𑀺𑀭𑀺𑀬𑀸 𑀮𑀓𑁆𑀔𑀻𑀬𑀢𑀺, 𑀏𑀯𑀁 𑀇𑀥𑀸𑀧𑀺 𑀬𑀲𑁆𑀫𑀺𑀁 𑀲𑀫𑀬𑁂, 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀘 𑀯𑀼𑀢𑁆𑀢𑁂 ¶ ‘‘𑀲𑀢𑀻’’𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀫𑀸𑀦𑁄 𑀏𑀯 𑀳𑁄𑀢𑀺 𑀧𑀤𑀢𑁆𑀣𑀲𑁆𑀲 𑀲𑀢𑁆𑀢𑀸𑀯𑀺𑀭𑀳𑀸𑀪𑀸𑀯𑀢𑁄𑀢𑀺 𑀲𑀫𑀬𑀲𑁆𑀲 𑀲𑀢𑁆𑀢𑀸𑀓𑀺𑀭𑀺𑀬𑀸𑀬 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑀺𑀭𑀺𑀬𑀸 𑀨𑀲𑁆𑀲𑀸𑀤𑀺𑀪𑀯𑀦𑀓𑀺𑀭𑀺𑀬𑀸 𑀘 𑀮𑀓𑁆𑀔𑀻𑀬𑀢𑀺. 𑀬𑀲𑁆𑀫𑀺𑀁 𑀲𑀫𑀬𑁂𑀢𑀺 𑀬𑀲𑁆𑀫𑀺𑀁 𑀦𑀯𑀫𑁂 𑀔𑀡𑁂, 𑀬𑀲𑁆𑀫𑀺𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀳𑁂𑀢𑀼𑀫𑁆𑀳𑀺, 𑀧𑀘𑁆𑀘𑀬𑀲𑀫𑀯𑀸𑀬𑁂 𑀯𑀸 𑀲𑀢𑀺 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂, 𑀳𑁂𑀢𑀼𑀫𑁆𑀳𑀺, 𑀧𑀘𑁆𑀘𑀬𑀲𑀫𑀯𑀸𑀬𑁂 𑀯𑀸 𑀨𑀲𑁆𑀲𑀸𑀤𑀬𑁄𑀧𑀺 𑀳𑁄𑀦𑁆𑀢𑀻𑀢𑀺 𑀉𑀪𑀬𑀢𑁆𑀣 𑀲𑀫𑀬𑀲𑀤𑁆𑀤𑁂 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁄 𑀓𑀢𑁄 𑀮𑀓𑁆𑀔𑀡𑀪𑀽𑀢𑀪𑀸𑀯𑀬𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀔𑀡…𑀧𑁂… 𑀮𑀓𑁆𑀔𑀻𑀬𑀢𑀻’’𑀢𑀺.

𑀳𑁂𑀢𑀼𑀅𑀢𑁆𑀣𑁄 𑀓𑀭𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀺 ‘‘𑀅𑀦𑁆𑀦𑁂𑀦 𑀯𑀲𑀢𑀺, 𑀯𑀺𑀚𑁆𑀚𑀸𑀬 𑀯𑀲𑀢𑀺, 𑀨𑀭𑀲𑀼𑀦𑀸 𑀙𑀺𑀦𑁆𑀤𑀢𑀺, 𑀓𑀼𑀤𑀸𑀮𑁂𑀦 𑀔𑀡𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀯𑀻𑀢𑀺𑀓𑁆𑀓𑀫𑀜𑁆𑀳𑀺 𑀲𑀼𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀑𑀢𑀺𑀡𑁆𑀡𑀯𑀢𑁆𑀣𑀼𑀓𑀁 𑀧𑀼𑀕𑁆𑀕𑀮𑀁 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀕𑀭𑀳𑀺𑀢𑁆𑀯𑀸 𑀘 𑀢𑀁 𑀢𑀁 𑀯𑀢𑁆𑀣𑀼𑀑𑀢𑀺𑀡𑁆𑀡𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑁂𑀦𑁂𑀯 𑀓𑀸𑀮𑁂𑀦 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀧𑁂𑀦𑁆𑀢𑁄 𑀪𑀕𑀯𑀸 𑀯𑀺𑀳𑀭𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀜𑁆𑀘 𑀅𑀧𑁂𑀓𑁆𑀔𑀫𑀸𑀦𑁄 𑀢𑀢𑀺𑀬𑀧𑀸𑀭𑀸𑀚𑀺𑀓𑀸𑀤𑀻𑀲𑀼 𑀯𑀺𑀬.

𑀅𑀘𑁆𑀘𑀦𑁆𑀢𑀫𑁂𑀯 𑀆𑀭𑀫𑁆𑀪𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑁂𑀲𑀦𑀸𑀦𑀺𑀝𑁆𑀞𑀸𑀦𑀁. 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀓𑀭𑀼𑀡𑀸𑀯𑀺𑀳𑀸𑀭𑁂𑀦. 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑀚𑁄𑀢𑀦𑀢𑁆𑀣𑀁. 𑀉𑀧𑀬𑁄𑀕𑀦𑀺𑀤𑁆𑀤𑁂𑀲𑁄 𑀓𑀢𑁄 𑀬𑀣𑀸 ‘‘𑀫𑀸𑀲𑀁 𑀲𑀚𑁆𑀛𑀸𑀬𑀢𑀻’’𑀢𑀺 ¶ . 𑀧𑁄𑀭𑀸𑀡𑀸𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸. 𑀅𑀪𑀺𑀮𑀸𑀧𑀫𑀢𑁆𑀢𑀪𑁂𑀤𑁄𑀢𑀺 𑀯𑀘𑀦𑀫𑀢𑁆𑀢𑁂𑀦 𑀯𑀺𑀲𑁂𑀲𑁄. 𑀢𑁂𑀦 𑀲𑀼𑀢𑁆𑀢𑀯𑀺𑀦𑀬𑁂𑀲𑀼 𑀯𑀺𑀪𑀢𑁆𑀢𑀺𑀩𑁆𑀬𑀢𑁆𑀢𑀬𑁄 𑀓𑀢𑁄𑀢𑀺 𑀤𑀲𑁆𑀲𑁂𑀢𑀺.

𑀲𑁂𑀝𑁆𑀞𑀦𑁆𑀢𑀺 𑀲𑁂𑀝𑁆𑀞𑀯𑀸𑀘𑀓𑀁 𑀯𑀘𑀦𑀁 ‘‘𑀲𑁂𑀝𑁆𑀞’’𑀦𑁆𑀢𑀺 𑀯𑀼𑀢𑁆𑀢𑀁 𑀲𑁂𑀝𑁆𑀞𑀕𑀼𑀡𑀲𑀳𑀘𑀭𑀡𑀢𑁄, 𑀢𑀣𑀸 ‘‘𑀉𑀢𑁆𑀢𑀫’’𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀕𑀸𑀭𑀯𑀬𑀼𑀢𑁆𑀢𑁄𑀢𑀺 𑀕𑀭𑀼𑀪𑀸𑀯𑀬𑀼𑀢𑁆𑀢𑁄 𑀕𑀭𑀼𑀕𑀼𑀡𑀬𑁄𑀕𑀢𑁄, 𑀕𑀭𑀼𑀓𑀭𑀡𑀸𑀭𑀳𑀢𑀸𑀬 𑀯𑀸 𑀕𑀸𑀭𑀯𑀬𑀼𑀢𑁆𑀢𑁄. 𑀯𑀼𑀢𑁆𑀢𑁄𑀬𑁂𑀯, 𑀦 𑀧𑀦 𑀇𑀥 𑀯𑀢𑁆𑀢𑀩𑁆𑀩𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑁆𑀲 𑀇𑀫𑀺𑀲𑁆𑀲𑀸 𑀅𑀝𑁆𑀞𑀓𑀣𑀸𑀬 𑀏𑀓𑀤𑁂𑀲𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀧𑀭𑁄 𑀦𑀬𑁄 (𑀇𑀢𑀺𑀯𑀼. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸; 𑀲𑀸𑀭𑀢𑁆𑀣. 𑀝𑀻. 𑁧.𑁧.𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸; 𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁧𑁪𑁪) 𑁋 𑀪𑀸𑀕𑀯𑀸𑀢𑀺 𑀪𑀕𑀯𑀸, 𑀪𑀢𑀯𑀸𑀢𑀺 𑀪𑀕𑀯𑀸, 𑀪𑀸𑀕𑁂 𑀯𑀦𑀻𑀢𑀺 𑀪𑀕𑀯𑀸, 𑀪𑀕𑁂 𑀯𑀦𑀻𑀢𑀺 𑀪𑀕𑀯𑀸, 𑀪𑀢𑁆𑀢𑀯𑀸𑀢𑀺 𑀪𑀕𑀯𑀸, 𑀪𑀕𑁂 𑀯𑀫𑀻𑀢𑀺 𑀪𑀕𑀯𑀸, 𑀪𑀸𑀕𑁂 𑀯𑀫𑀻𑀢𑀺 𑀪𑀕𑀯𑀸.

‘‘𑀪𑀸𑀕𑀯𑀸 ¶ 𑀪𑀢𑀯𑀸 𑀪𑀸𑀕𑁂, 𑀪𑀕𑁂 𑀘 𑀯𑀦𑀺 𑀪𑀢𑁆𑀢𑀯𑀸;

𑀪𑀕𑁂 𑀯𑀫𑀺 𑀢𑀣𑀸 𑀪𑀸𑀕𑁂, 𑀯𑀫𑀻𑀢𑀺 𑀪𑀕𑀯𑀸 𑀚𑀺𑀦𑁄’’.

𑀢𑀢𑁆𑀣 𑀓𑀣𑀁 𑀪𑀸𑀕𑀯𑀸𑀢𑀺 𑀪𑀕𑀯𑀸? 𑀬𑁂 𑀢𑁂 𑀲𑀻𑀮𑀸𑀤𑀬𑁄 𑀥𑀫𑁆𑀫𑀓𑁆𑀔𑀦𑁆𑀥𑀸 𑀕𑀼𑀡𑀪𑀸𑀕𑀸 𑀕𑀼𑀡𑀓𑁄𑀝𑁆𑀞𑀸𑀲𑀸, 𑀢𑁂 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀦𑀺𑀭𑀢𑀺𑀲𑀬𑀸 𑀢𑀣𑀸𑀕𑀢𑁂 𑀅𑀢𑁆𑀣𑀺 𑀉𑀧𑀮𑀩𑁆𑀪𑀦𑁆𑀢𑀺. 𑀢𑀣𑀸 𑀳𑀺𑀲𑁆𑀲 𑀲𑀻𑀮𑀁 𑀲𑀫𑀸𑀥𑀺 𑀧𑀜𑁆𑀜𑀸 𑀯𑀺𑀫𑀼𑀢𑁆𑀢𑀺 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁, 𑀳𑀺𑀭𑀻 𑀑𑀢𑁆𑀢𑀧𑁆𑀧𑀁, 𑀲𑀤𑁆𑀥𑀸 𑀯𑀻𑀭𑀺𑀬𑀁, 𑀲𑀢𑀺 𑀲𑀫𑁆𑀧𑀚𑀜𑁆𑀜𑀁, 𑀲𑀻𑀮𑀯𑀺𑀲𑀼𑀤𑁆𑀥𑀺 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺, 𑀲𑀫𑀣𑁄 𑀯𑀺𑀧𑀲𑁆𑀲𑀦𑀸, 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺, 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺, 𑀢𑀬𑁄 𑀲𑀫𑁆𑀫𑀸𑀯𑀺𑀢𑀓𑁆𑀓𑀸, 𑀢𑀺𑀲𑁆𑀲𑁄 𑀅𑀦𑀯𑀚𑁆𑀚𑀲𑀜𑁆𑀜𑀸, 𑀢𑀺𑀲𑁆𑀲𑁄 𑀥𑀸𑀢𑀼𑀬𑁄, 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀅𑀭𑀺𑀬𑀨𑀮𑀸𑀦𑀺, 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸, 𑀘𑀢𑀼𑀬𑁄𑀦𑀺𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀸𑀦𑀺, 𑀘𑀢𑁆𑀢𑀸𑀭𑁄 𑀅𑀭𑀺𑀬𑀯𑀁𑀲𑀸, 𑀘𑀢𑁆𑀢𑀸𑀭𑀺 𑀯𑁂𑀲𑀸𑀭𑀚𑁆𑀚𑀜𑀸𑀡𑀸𑀦𑀺, 𑀧𑀜𑁆𑀘 𑀧𑀥𑀸𑀦𑀺𑀬𑀗𑁆𑀕𑀸𑀦𑀺, 𑀧𑀜𑁆𑀘𑀗𑁆𑀕𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀺, 𑀧𑀜𑁆𑀘𑀜𑀸𑀡𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀺, 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀧𑀜𑁆𑀘 𑀩𑀮𑀸𑀦𑀺, 𑀧𑀜𑁆𑀘 𑀦𑀺𑀲𑁆𑀲𑀸𑀭𑀡𑀻𑀬𑀸 𑀥𑀸𑀢𑀼𑀬𑁄, 𑀧𑀜𑁆𑀘 𑀯𑀺𑀫𑀼𑀢𑁆𑀢𑀸𑀬𑀢𑀦𑀜𑀸𑀡𑀸𑀦𑀺, 𑀧𑀜𑁆𑀘 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀲𑀜𑁆𑀜𑀸, 𑀙 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦𑀸𑀦𑀺, 𑀙 𑀕𑀸𑀭𑀯𑀸, 𑀙 𑀦𑀺𑀲𑁆𑀲𑀸𑀭𑀡𑀻𑀬𑀸 𑀥𑀸𑀢𑀼𑀬𑁄, 𑀙 𑀲𑀢𑀢𑀯𑀺𑀳𑀸𑀭𑀸, 𑀙 𑀅𑀦𑀼𑀢𑁆𑀢𑀭𑀺𑀬𑀸𑀦𑀺, 𑀙 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸 𑀲𑀜𑁆𑀜𑀸, 𑀙 𑀅𑀪𑀺𑀜𑁆𑀜𑀸, 𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺, 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸, 𑀲𑀢𑁆𑀢 𑀅𑀭𑀺𑀬𑀥𑀫𑁆𑀫𑀸, 𑀲𑀢𑁆𑀢 𑀅𑀭𑀺𑀬𑀥𑀦𑀸𑀦𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀲𑀢𑁆𑀢 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀸, 𑀲𑀢𑁆𑀢 𑀦𑀺𑀚𑁆𑀚𑀭𑀯𑀢𑁆𑀣𑀽𑀦𑀺, 𑀲𑀢𑁆𑀢 𑀲𑀜𑁆𑀜𑀸, 𑀲𑀢𑁆𑀢𑀤𑀓𑁆𑀔𑀺𑀡𑁂𑀬𑁆𑀬𑀧𑀼𑀕𑁆𑀕𑀮𑀤𑁂𑀲𑀦𑀸, 𑀲𑀢𑁆𑀢𑀔𑀻𑀡𑀸𑀲𑀯𑀩𑀮𑀤𑁂𑀲𑀦𑀸, 𑀅𑀝𑁆𑀞𑀧𑀜𑁆𑀜𑀸𑀧𑀝𑀺𑀮𑀸𑀪𑀳𑁂𑀢𑀼𑀤𑁂𑀲𑀦𑀸 𑀅𑀝𑁆𑀞 𑀲𑀫𑁆𑀫𑀢𑁆𑀢𑀸𑀦𑀺, 𑀅𑀝𑁆𑀞𑀮𑁄𑀓𑀥𑀫𑁆𑀫𑀸𑀢𑀺𑀓𑁆𑀓𑀫𑁄, 𑀅𑀝𑁆𑀞 ¶ 𑀆𑀭𑀫𑁆𑀪𑀯𑀢𑁆𑀣𑀽𑀦𑀺, 𑀅𑀝𑁆𑀞𑀅𑀓𑁆𑀔𑀡𑀤𑁂𑀲𑀦𑀸, 𑀅𑀝𑁆𑀞 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑀸, 𑀅𑀝𑁆𑀞𑀅𑀪𑀺𑀪𑀸𑀬𑀢𑀦𑀤𑁂𑀲𑀦𑀸, 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸, 𑀦𑀯 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀫𑀽𑀮𑀓𑀸 𑀥𑀫𑁆𑀫𑀸, 𑀦𑀯 𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕𑀸𑀦𑀺, 𑀦𑀯𑀲𑀢𑁆𑀢𑀸𑀯𑀸𑀲𑀤𑁂𑀲𑀦𑀸, 𑀦𑀯 𑀆𑀖𑀸𑀢𑀧𑀝𑀺𑀯𑀺𑀦𑀬𑀸, 𑀦𑀯 𑀲𑀜𑁆𑀜𑀸, 𑀦𑀯𑀦𑀸𑀦𑀢𑁆𑀢𑀸, 𑀦𑀯 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀸, 𑀤𑀲 𑀦𑀸𑀣𑀓𑀭𑀡𑀸 𑀥𑀫𑁆𑀫𑀸, 𑀤𑀲 𑀓𑀲𑀺𑀡𑀸𑀬𑀢𑀦𑀸𑀦𑀺, 𑀤𑀲 𑀓𑀼𑀲𑀮𑀓𑀫𑁆𑀫𑀧𑀣𑀸, 𑀤𑀲 𑀲𑀫𑁆𑀫𑀢𑁆𑀢𑀸𑀦𑀺, 𑀤𑀲 𑀅𑀭𑀺𑀬𑀯𑀸𑀲𑀸, 𑀤𑀲 𑀅𑀲𑁂𑀓𑁆𑀔𑀥𑀫𑁆𑀫𑀸, 𑀤𑀲 𑀢𑀣𑀸𑀕𑀢𑀩𑀮𑀸𑀦𑀺, 𑀏𑀓𑀸𑀤𑀲 𑀫𑁂𑀢𑁆𑀢𑀸𑀦𑀺𑀲𑀁𑀲𑀸, 𑀤𑁆𑀯𑀸𑀤𑀲 𑀥𑀫𑁆𑀫𑀸𑀘𑀓𑁆𑀓𑀸𑀓𑀸𑀭𑀸, 𑀢𑁂𑀭𑀲 𑀥𑀼𑀢𑀕𑀼𑀡𑀸, 𑀘𑀼𑀤𑁆𑀤𑀲 𑀩𑀼𑀤𑁆𑀥𑀜𑀸𑀡𑀸𑀦𑀺, 𑀧𑀜𑁆𑀘𑀤𑀲 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀥𑀫𑁆𑀫𑀸, 𑀲𑁄𑀴𑀲𑀯𑀺𑀥𑀸 𑀆𑀦𑀸𑀧𑀸𑀦𑀲𑁆𑀲𑀢𑀺, 𑀲𑁄𑀴𑀲 𑀅𑀧𑀭𑀦𑁆𑀢𑀧𑀦𑀻𑀬𑀸 𑀥𑀫𑁆𑀫𑀸, 𑀅𑀝𑁆𑀞𑀸𑀭𑀲 𑀩𑀼𑀤𑁆𑀥𑀥𑀫𑁆𑀫𑀸, 𑀏𑀓𑀽𑀦𑀯𑀻𑀲𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺, 𑀘𑀢𑀼𑀘𑀢𑁆𑀢𑀸𑀮𑀻𑀲 𑀜𑀸𑀡𑀯𑀢𑁆𑀣𑀽𑀦𑀺, 𑀧𑀜𑁆𑀜𑀸𑀲 𑀉𑀤𑀬𑀩𑁆𑀩𑀬𑀜𑀸𑀡𑀸𑀦𑀺, 𑀧𑀭𑁄𑀧𑀜𑁆𑀜𑀸𑀲 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀯𑀢𑁆𑀣𑀽𑀦𑀺, 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀲𑀫𑀸𑀧𑀢𑁆𑀢𑀺𑀲𑀜𑁆𑀘𑀸𑀭𑀺𑀫𑀳𑀸𑀯𑀚𑀺𑀭𑀜𑀸𑀡𑀁 ¶ , 𑀅𑀦𑀦𑁆𑀢𑀦𑀬𑀲𑀫𑀦𑁆𑀢𑀧𑀝𑁆𑀞𑀸𑀦-𑀧𑀯𑀺𑀘𑀬-𑀧𑀘𑁆𑀘𑀯𑁂𑀓𑁆𑀔𑀡𑀤𑁂𑀲𑀦𑀸𑀜𑀸𑀡𑀸𑀦𑀺, 𑀢𑀣𑀸 𑀅𑀦𑀦𑁆𑀢𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀦𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀆𑀲𑀬𑀸𑀤𑀺𑀯𑀺𑀪𑀸𑀯𑀦𑀜𑀸𑀡𑀸𑀦𑀺 𑀘𑀸𑀢𑀺 𑀏𑀯𑀫𑀸𑀤𑀬𑁄 𑀅𑀦𑀦𑁆𑀢𑀸𑀧𑀭𑀺𑀫𑀸𑀡𑀪𑁂𑀤𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀦𑀺𑀭𑀢𑀺𑀲𑀬𑀸 𑀕𑀼𑀡𑀪𑀸𑀕𑀸 𑀕𑀼𑀡𑀓𑁄𑀝𑁆𑀞𑀸𑀲𑀸 𑀲𑀁𑀯𑀺𑀚𑁆𑀚𑀦𑁆𑀢𑀺 𑀉𑀧𑀮𑀩𑁆𑀪𑀦𑁆𑀢𑀺, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀯𑀺𑀪𑀸𑀕𑀸 𑀕𑀼𑀡𑀪𑀸𑀕𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 ‘‘𑀪𑀸𑀕𑀯𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀆𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀓𑀢𑁆𑀯𑀸 ‘‘𑀪𑀕𑀯𑀸’’𑀢𑀺 𑀯𑀼𑀢𑁆𑀢𑁄. 𑀏𑀯𑀁 𑀢𑀸𑀯 𑀪𑀸𑀕𑀯𑀸𑀢𑀺 𑀪𑀕𑀯𑀸.

‘‘𑀬𑀲𑁆𑀫𑀸 𑀲𑀻𑀮𑀸𑀤𑀬𑁄 𑀲𑀩𑁆𑀩𑁂, 𑀕𑀼𑀡𑀪𑀸𑀕𑀸 𑀅𑀲𑁂𑀲𑀢𑁄;

𑀯𑀺𑀚𑁆𑀚𑀦𑁆𑀢𑀺 𑀲𑀼𑀕𑀢𑁂 𑀢𑀲𑁆𑀫𑀸, 𑀪𑀕𑀯𑀸𑀢𑀺 𑀧𑀯𑀼𑀘𑁆𑀘𑀢𑀺’’.

𑀓𑀣𑀁 𑀪𑀢𑀯𑀸𑀢𑀺 𑀪𑀕𑀯𑀸? 𑀬𑁂 𑀢𑁂 𑀲𑀩𑁆𑀩𑀮𑁄𑀓𑀳𑀺𑀢𑀸𑀬 𑀉𑀲𑁆𑀲𑀼𑀓𑁆𑀓𑀫𑀸𑀧𑀦𑁆𑀦𑁂𑀳𑀺 𑀫𑀦𑀼𑀲𑁆𑀲𑀢𑁆𑀢𑀸𑀤𑀺𑀓𑁂 𑀅𑀝𑁆𑀞 𑀥𑀫𑁆𑀫𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀓𑀢𑀫𑀳𑀸𑀪𑀺𑀦𑀻𑀳𑀸𑀭𑁂𑀳𑀺 𑀫𑀳𑀸𑀩𑁄𑀥𑀺𑀲𑀢𑁆𑀢𑁂𑀳𑀺 𑀧𑀭𑀺𑀧𑀽𑀭𑀺𑀢𑀩𑁆𑀩𑀸 𑀤𑀸𑀦𑀧𑀸𑀭𑀫𑀻, 𑀲𑀻𑀮, 𑀦𑁂𑀓𑁆𑀔𑀫𑁆𑀫, 𑀧𑀜𑁆𑀜𑀸, 𑀯𑀻𑀭𑀺𑀬, 𑀔𑀦𑁆𑀢𑀺, 𑀲𑀘𑁆𑀘, 𑀅𑀥𑀺𑀝𑁆𑀞𑀸𑀦, 𑀫𑁂𑀢𑁆𑀢𑀸, 𑀉𑀧𑁂𑀓𑁆𑀔𑀸𑀧𑀸𑀭𑀫𑀻𑀢𑀺 𑀤𑀲 𑀧𑀸𑀭𑀫𑀺𑀬𑁄, 𑀤𑀲 𑀉𑀧𑀧𑀸𑀭𑀫𑀺𑀬𑁄, 𑀤𑀲 𑀧𑀭𑀫𑀢𑁆𑀣𑀧𑀸𑀭𑀫𑀺𑀬𑁄𑀢𑀺 𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄, 𑀤𑀸𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀲𑀗𑁆𑀕𑀳𑀯𑀢𑁆𑀣𑀽𑀦𑀺, 𑀲𑀘𑁆𑀘𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀅𑀥𑀺𑀝𑁆𑀞𑀸𑀦𑀸𑀦𑀺, 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑁄, 𑀚𑀻𑀯𑀺𑀢, 𑀭𑀚𑁆𑀚, 𑀧𑀼𑀢𑁆𑀢, 𑀤𑀸𑀭𑀧𑀭𑀺𑀘𑁆𑀘𑀸𑀕𑁄𑀢𑀺 𑀧𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑀸, 𑀧𑀼𑀩𑁆𑀩𑀬𑁄𑀕𑁄, 𑀧𑀼𑀩𑁆𑀩𑀘𑀭𑀺𑀬𑀸, 𑀥𑀫𑁆𑀫𑀓𑁆𑀔𑀸𑀦𑀁, 𑀜𑀸𑀢𑀢𑁆𑀣𑀘𑀭𑀺𑀬𑀸, 𑀮𑁄𑀓𑀢𑁆𑀣𑀘𑀭𑀺𑀬𑀸, 𑀩𑀼𑀤𑁆𑀥𑀺𑀘𑀭𑀺𑀬𑀸𑀢𑀺 𑀏𑀯𑀫𑀸𑀤𑀬𑁄, 𑀲𑀗𑁆𑀔𑁂𑀧𑀢𑁄 𑀯𑀸 𑀲𑀩𑁆𑀩𑁂 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑀸 𑀩𑀼𑀤𑁆𑀥𑀓𑀭𑀥𑀫𑁆𑀫𑀸, 𑀢𑁂 𑀫𑀳𑀸𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀬𑀣𑀸 𑀳𑀸𑀦𑀪𑀸𑀕𑀺𑀬𑀸 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸 𑀞𑀺𑀢𑀺𑀪𑀸𑀕𑀺𑀬𑀸 𑀯𑀸 𑀦 𑀳𑁄𑀦𑁆𑀢𑀺, 𑀅𑀣 𑀔𑁄 𑀉𑀢𑁆𑀢𑀭𑀼𑀢𑁆𑀢𑀭𑀺 𑀯𑀺𑀲𑁂𑀲𑀪𑀸𑀕𑀺𑀬𑀸𑀯 𑀳𑁄𑀦𑁆𑀢𑀺, 𑀏𑀯𑀁 𑀲𑀓𑁆𑀓𑀘𑁆𑀘𑀁 𑀦𑀺𑀭𑀦𑁆𑀢𑀭𑀁 𑀅𑀦𑀯𑀲𑁂𑀲𑀢𑁄 𑀪𑀢𑀸 𑀲𑀫𑁆𑀪𑀢𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 ‘‘𑀪𑀢𑀯𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀪𑀕𑀯𑀸’’𑀢𑀺 𑀯𑀼𑀢𑁆𑀢𑁄 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀢-𑀓𑀸𑀭𑀲𑁆𑀲 𑀕-𑀓𑀸𑀭𑀁 𑀓𑀢𑁆𑀯𑀸 ¶ . 𑀅𑀣 𑀯𑀸 𑀪𑀢𑀯𑀸𑀢𑀺 𑀢𑁂𑀬𑁂𑀯 𑀬𑀣𑀸𑀯𑀼𑀢𑁆𑀢𑁂 𑀩𑀼𑀤𑁆𑀥𑀓𑀭𑀥𑀫𑁆𑀫𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀪𑀭𑀺, 𑀲𑀫𑁆𑀪𑀭𑀺, 𑀧𑀭𑀺𑀧𑀽𑀭𑁂𑀲𑀻𑀢𑀺 𑀅𑀢𑁆𑀣𑁄. 𑀏𑀯𑀫𑁆𑀧𑀺 𑀪𑀢𑀯𑀸𑀢𑀺 𑀪𑀕𑀯𑀸.

‘‘𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀲𑀩𑁆𑀩𑁂, 𑀤𑀸𑀦𑀧𑀸𑀭𑀫𑀺𑀆𑀤𑀺𑀓𑁂;

𑀲𑀫𑁆𑀪𑀸𑀭𑁂 𑀪𑀢𑀯𑀸 𑀦𑀸𑀣𑁄, 𑀢𑀲𑁆𑀫𑀸𑀧𑀺 𑀪𑀕𑀯𑀸 𑀫𑀢𑁄’’.

𑀓𑀣𑀁 𑀪𑀸𑀕𑁂 𑀯𑀦𑀻𑀢𑀺 𑀪𑀕𑀯𑀸? 𑀬𑁂 𑀢𑁂 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸 𑀤𑁂𑀯𑀲𑀺𑀓𑀁 𑀯𑀴𑀜𑁆𑀚𑀦𑀓𑀲𑀫𑀸𑀧𑀢𑁆𑀢𑀺𑀪𑀸𑀕𑀸, 𑀢𑁂 𑀅𑀦𑀯𑀲𑁂𑀲𑀢𑁄 𑀮𑁄𑀓𑀳𑀺𑀢𑀢𑁆𑀣𑀁 ¶ 𑀅𑀢𑁆𑀢𑀦𑁄 𑀘 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀢𑁆𑀣𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀦𑀺, 𑀪𑀚𑀺, 𑀲𑁂𑀯𑀺, 𑀩𑀳𑀼𑀮𑀫𑀓𑀸𑀲𑀻𑀢𑀺 𑀪𑀸𑀕𑁂 𑀯𑀦𑀻𑀢𑀺 𑀪𑀕𑀯𑀸. 𑀅𑀣 𑀯𑀸 𑀅𑀪𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑁂𑀲𑀼 𑀓𑀼𑀲𑀮𑀸𑀤𑀻𑀲𑀼 𑀔𑀦𑁆𑀥𑀸𑀤𑀻𑀲𑀼 𑀘 𑀬𑁂 𑀢𑁂 𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀺𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀯𑀸 𑀘𑀢𑀼𑀩𑁆𑀩𑀺𑀥𑀸 𑀅𑀪𑀺𑀲𑀫𑀬𑀪𑀸𑀕𑀸, 𑀯𑀺𑀢𑁆𑀣𑀸𑀭𑀢𑁄 𑀧𑀦 ‘‘𑀘𑀓𑁆𑀔𑀼 𑀧𑀭𑀺𑀜𑁆𑀜𑁂𑀬𑁆𑀬𑀁 𑀲𑁄𑀢𑀁…𑀧𑁂… 𑀚𑀭𑀸𑀫𑀭𑀡𑀁 𑀧𑀭𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁨𑁧) 𑀅𑀦𑁂𑀓𑁂 𑀧𑀭𑀺𑀜𑁆𑀜𑁂𑀬𑁆𑀬𑀪𑀸𑀕𑀸, ‘‘𑀘𑀓𑁆𑀔𑀼𑀲𑁆𑀲 𑀲𑀫𑀼𑀤𑀬𑁄 𑀧𑀳𑀸𑀢𑀩𑁆𑀩𑁄…𑀧𑁂… 𑀚𑀭𑀸𑀫𑀭𑀡𑀲𑁆𑀲 𑀲𑀫𑀼𑀤𑀬𑁄 𑀧𑀳𑀸𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀧𑀳𑀸𑀢𑀩𑁆𑀩𑀪𑀸𑀕𑀸, ‘‘𑀘𑀓𑁆𑀔𑀼𑀲𑁆𑀲 𑀦𑀺𑀭𑁄𑀥𑁄…𑀧𑁂… 𑀚𑀭𑀸𑀫𑀭𑀡𑀲𑁆𑀲 𑀦𑀺𑀭𑁄𑀥𑁄 𑀲𑀘𑁆𑀙𑀺𑀓𑀸𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑀪𑀸𑀕𑀸, ‘‘𑀘𑀓𑁆𑀔𑀼𑀦𑀺𑀭𑁄𑀥𑀕𑀸𑀫𑀺𑀦𑀻𑀧𑀝𑀺𑀧𑀤𑀸’’𑀢𑀺𑀆𑀤𑀺𑀦𑀸, ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺𑀦𑀸 𑀘 𑀅𑀦𑁂𑀓𑀪𑁂𑀤𑀸 𑀪𑀸𑀯𑁂𑀢𑀩𑁆𑀩𑀪𑀸𑀕𑀸 𑀘 𑀥𑀫𑁆𑀫𑀸, 𑀢𑁂 𑀲𑀩𑁆𑀩𑁂 𑀯𑀦𑀺, 𑀪𑀚𑀺, 𑀬𑀣𑀸𑀭𑀳𑀁 𑀕𑁄𑀘𑀭𑀪𑀸𑀯𑀦𑀸𑀲𑁂𑀯𑀦𑀸𑀦𑀁 𑀯𑀲𑁂𑀦 𑀲𑁂𑀯𑀺. 𑀏𑀯𑀫𑁆𑀧𑀺 𑀪𑀸𑀕𑁂 𑀯𑀦𑀻𑀢𑀺 𑀪𑀕𑀯𑀸. 𑀅𑀣 𑀯𑀸 ‘‘𑀬𑁂 𑀇𑀫𑁂 𑀲𑀻𑀮𑀸𑀤𑀬𑁄 𑀥𑀫𑁆𑀫𑀓𑁆𑀔𑀦𑁆𑀥𑀸 𑀲𑀸𑀯𑀓𑁂𑀳𑀺 𑀲𑀸𑀥𑀸𑀭𑀡𑀸 𑀕𑀼𑀡𑀓𑁄𑀝𑁆𑀞𑀸𑀲𑀸 𑀕𑀼𑀡𑀪𑀸𑀕𑀸, 𑀓𑀺𑀦𑁆𑀢𑀺 𑀦𑀼 𑀔𑁄 𑀢𑁂 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑁂𑀲𑀼 𑀧𑀢𑀺𑀝𑁆𑀞𑀧𑁂𑀬𑁆𑀬’’𑀦𑁆𑀢𑀺 𑀫𑀳𑀸𑀓𑀭𑀼𑀡𑀸𑀬 𑀯𑀦𑀺 𑀅𑀪𑀺𑀧𑀢𑁆𑀣𑀬𑀺, 𑀲𑀸 𑀘𑀲𑁆𑀲 𑀅𑀪𑀺𑀧𑀢𑁆𑀣𑀦𑀸 𑀬𑀣𑀸𑀥𑀺𑀧𑁆𑀧𑁂𑀢𑀨𑀮𑀸𑀯𑀳𑀸 𑀅𑀳𑁄𑀲𑀺. 𑀏𑀯𑀫𑁆𑀧𑀺 𑀪𑀸𑀕𑁂 𑀯𑀦𑀻𑀢𑀺 𑀪𑀕𑀯𑀸.

‘‘𑀬𑀲𑁆𑀫𑀸 𑀜𑁂𑀬𑁆𑀬𑀲𑀫𑀸𑀧𑀢𑁆𑀢𑀺-𑀕𑀼𑀡𑀪𑀸𑀕𑁂 𑀢𑀣𑀸𑀕𑀢𑁄;

𑀪𑀚𑀺 𑀧𑀢𑁆𑀣𑀬𑀺 𑀲𑀢𑁆𑀢𑀸𑀦𑀁, 𑀳𑀺𑀢𑀸𑀬 𑀪𑀕𑀯𑀸 𑀢𑀢𑁄’’.

𑀓𑀣𑀁 𑀪𑀕𑁂 𑀯𑀦𑀻𑀢𑀺 𑀪𑀕𑀯𑀸? 𑀲𑀫𑀸𑀲𑀢𑁄 𑀢𑀸𑀯 𑀓𑀢𑀧𑀼𑀜𑁆𑀜𑁂𑀳𑀺 𑀧𑀬𑁄𑀕𑀲𑀫𑁆𑀧𑀦𑁆𑀦𑁂𑀳𑀺 𑀬𑀣𑀸𑀯𑀺𑀪𑀯𑀁 𑀪𑀚𑀻𑀬𑀦𑁆𑀢𑀻𑀢𑀺 𑀪𑀕𑀸, 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀫𑁆𑀧𑀢𑁆𑀢𑀺𑀬𑁄. 𑀢𑀢𑁆𑀣 𑀮𑁄𑀓𑀺𑀬𑁂 𑀢𑀸𑀯 𑀢𑀣𑀸𑀕𑀢𑁄 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀢𑁄 𑀧𑀼𑀩𑁆𑀩𑁂 𑀩𑁄𑀥𑀺𑀲𑀢𑁆𑀢𑀪𑀽𑀢𑁄 𑀧𑀭𑀫𑀼𑀓𑁆𑀓𑀁𑀲𑀕𑀢𑁂, 𑀯𑀦𑀺, 𑀪𑀚𑀺, 𑀲𑁂𑀯𑀺, 𑀬𑀢𑁆𑀣 𑀧𑀢𑀺𑀝𑁆𑀞𑀸𑀬 𑀦𑀺𑀭𑀯𑀲𑁂𑀲𑀢𑁄 𑀩𑀼𑀤𑁆𑀥𑀓𑀭𑀥𑀫𑁆𑀫𑁂 𑀲𑀫𑀦𑁆𑀦𑀸𑀦𑁂𑀦𑁆𑀢𑁄 𑀩𑀼𑀤𑁆𑀥𑀥𑀫𑁆𑀫𑁂 𑀧𑀭𑀺𑀧𑀸𑀘𑁂𑀲𑀺, 𑀩𑀼𑀤𑁆𑀥𑀪𑀽𑀢𑁄 𑀧𑀦 𑀢𑁂 𑀦𑀺𑀭𑀯𑀚𑁆𑀚𑁂𑀲𑀼 𑀉𑀧𑀲𑀁𑀳𑀺𑀢𑁂 𑀅𑀦𑀜𑁆𑀜𑀲𑀸𑀥𑀸𑀭𑀡𑁂 𑀮𑁄𑀓𑀼𑀢𑁆𑀢𑀭𑁂𑀧𑀺, 𑀯𑀦𑀺, 𑀪𑀚𑀺, 𑀲𑁂𑀯𑀺, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀧𑀤𑁂𑀲𑀭𑀚𑁆𑀚-𑀇𑀲𑁆𑀲𑀭𑀺𑀬𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺-𑀤𑁂𑀯𑀭𑀚𑁆𑀚𑀲𑀫𑁆𑀧𑀢𑁆𑀢𑀺𑀆𑀤𑀺𑀯𑀲𑁂𑀦 𑀛𑀸𑀦-𑀯𑀺𑀫𑁄𑀓𑁆𑀔-𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀺-𑀜𑀸𑀡𑀤𑀲𑁆𑀲𑀦-𑀫𑀕𑁆𑀕𑀪𑀸𑀯𑀦𑀸-𑀨𑀮𑀲𑀘𑁆𑀙𑀺-𑀓𑀺𑀭𑀺𑀬𑀸𑀤𑀺-𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀯𑀲𑁂𑀦 ¶ 𑀘 𑀅𑀦𑁂𑀓𑀯𑀺𑀳𑀺𑀢𑁂 𑀅𑀦𑀜𑁆𑀜𑀲𑀸𑀥𑀸𑀭𑀡𑁂, 𑀪𑀕𑁂, 𑀯𑀦𑀺, 𑀪𑀚𑀺, 𑀲𑁂𑀯𑀺. 𑀏𑀯𑀫𑁆𑀧𑀺 𑀪𑀕𑁂 𑀯𑀦𑀻𑀢𑀺 𑀪𑀕𑀯𑀸.

‘‘𑀬𑀸 ¶ 𑀢𑀸 𑀲𑀫𑁆𑀧𑀢𑁆𑀢𑀺𑀬𑁄 𑀮𑁄𑀓𑁂, 𑀬𑀸 𑀘 𑀮𑁄𑀓𑀼𑀢𑁆𑀢𑀭𑀸 𑀧𑀼𑀣𑀼;

𑀲𑀩𑁆𑀩𑀸 𑀢𑀸 𑀪𑀚𑀺 𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀫𑀸𑀧𑀺 𑀪𑀕𑀯𑀸 𑀫𑀢𑁄’’.

𑀓𑀣𑀁 𑀲𑀢𑁆𑀢𑀯𑀸𑀢𑀺 𑀪𑀕𑀯𑀸? 𑀪𑀢𑁆𑀢𑀸 𑀤𑀴𑁆𑀳𑀪𑀢𑁆𑀢𑀺𑀓𑀸 𑀅𑀲𑁆𑀲 𑀩𑀳𑀽 𑀅𑀢𑁆𑀣𑀻𑀢𑀺 𑀪𑀢𑁆𑀢𑀯𑀸. 𑀢𑀣𑀸𑀕𑀢𑁄 𑀳𑀺 𑀫𑀳𑀸𑀓𑀭𑀼𑀡𑀸𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺-𑀅𑀧𑀭𑀺𑀫𑀺𑀢𑀦𑀺𑀭𑀼𑀧𑀫𑀧𑁆𑀧𑀪𑀸𑀯-𑀕𑀼𑀡𑀯𑀺𑀲𑁂𑀲𑀲𑀫𑀗𑁆𑀕𑀺𑀪𑀸𑀯𑀢𑁄 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑁄, 𑀲𑀩𑁆𑀩𑀸𑀦𑀢𑁆𑀣𑀧𑀭𑀺𑀳𑀸𑀭𑀧𑀼𑀩𑁆𑀩𑀗𑁆𑀕𑀫𑀸𑀬 𑀦𑀺𑀭𑀯𑀲𑁂𑀲𑀳𑀺𑀢𑀲𑀼𑀔𑀯𑀺𑀥𑀸𑀦𑀢𑀧𑁆𑀧𑀭𑀸𑀬 𑀦𑀺𑀭𑀢𑀺𑀲𑀬𑀸𑀬 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀧𑀚𑀸𑀬 𑀅𑀘𑁆𑀘𑀦𑁆𑀢𑀼𑀧𑀓𑀸𑀭𑀺𑀢𑀸𑀬 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀅𑀲𑀻𑀢𑀺 𑀅𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸𑀤𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀯𑀺𑀲𑁂𑀲𑀧𑀝𑀺𑀫𑀡𑁆𑀟𑀺𑀢𑀭𑀽𑀧𑀓𑀸𑀬𑀢𑀸𑀬 𑀬𑀣𑀸𑀪𑀼𑀘𑁆𑀘𑀕𑀼𑀡𑀸𑀥𑀺𑀕𑀢𑁂𑀦 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀦 𑀮𑁄𑀓𑀢𑁆𑀢𑀬𑀩𑁆𑀬𑀸𑀧𑀺𑀦𑀸 𑀲𑀼𑀯𑀺𑀧𑀼𑀮𑁂𑀦 𑀲𑀼𑀯𑀺𑀲𑀼𑀤𑁆𑀥𑁂𑀦 𑀘 𑀣𑀼𑀢𑀺𑀖𑁄𑀲𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑀸𑀲𑀼 𑀅𑀧𑁆𑀧𑀺𑀘𑁆𑀙𑀢𑀸𑀲𑀦𑁆𑀢𑀼𑀝𑁆𑀞𑀺𑀆𑀤𑀻𑀲𑀼 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀢𑁄 𑀤𑀲𑀩𑀮𑀘𑀢𑀼𑀯𑁂𑀲𑀸𑀭𑀚𑁆𑀚𑀸𑀤𑀺-𑀦𑀺𑀭𑀢𑀺𑀲𑀬𑀕𑀼𑀡𑀯𑀺𑀲𑁂𑀲-𑀲𑀫𑀗𑁆𑀕𑀻𑀪𑀸𑀯𑀢𑁄 𑀘 𑀭𑀽𑀧𑀧𑁆𑀧𑀫𑀸𑀡𑁄 𑀭𑀽𑀧𑀧𑁆𑀧𑀲𑀦𑁆𑀦𑁄, 𑀖𑁄𑀲𑀧𑁆𑀧𑀫𑀸𑀡𑁄 𑀖𑁄𑀲𑀧𑁆𑀧𑀲𑀦𑁆𑀦𑁄, 𑀮𑀽𑀔𑀧𑁆𑀧𑀫𑀸𑀡𑁄 𑀮𑀽𑀔𑀧𑁆𑀧𑀲𑀦𑁆𑀦𑁄, 𑀥𑀫𑁆𑀫𑀧𑁆𑀧𑀫𑀸𑀡𑁄 𑀥𑀫𑁆𑀫𑀧𑁆𑀧𑀲𑀦𑁆𑀦𑁄𑀢𑀺 𑀏𑀯𑀁 𑀘𑀢𑀼𑀧𑁆𑀧𑀫𑀸𑀡𑀺𑀓𑁂 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀲𑀩𑁆𑀩𑀣𑀸𑀧𑀺 𑀧𑀲𑀸𑀤𑀸𑀯𑀳𑀪𑀸𑀯𑁂𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀢𑁆𑀢𑀸 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀲𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀆𑀤𑀭𑀩𑀳𑀼𑀫𑀸𑀦𑀕𑀸𑀭𑀯𑀸𑀬𑀢𑀦𑀢𑀸𑀬 𑀧𑀭𑀫𑀧𑁂𑀫𑀲𑀫𑁆𑀪𑀢𑁆𑀢𑀺𑀝𑁆𑀞𑀸𑀦𑀁. 𑀬𑁂 𑀢𑀲𑁆𑀲 𑀑𑀯𑀸𑀤𑁂 𑀧𑀢𑀺𑀝𑁆𑀞𑀺𑀢𑀸 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀲𑀫𑀦𑁆𑀦𑀸𑀕𑀢𑀸 𑀳𑁄𑀦𑁆𑀢𑀺, 𑀓𑁂𑀦𑀘𑀺 𑀅𑀲𑀁𑀳𑀸𑀭𑀺𑀬𑀸 𑀢𑁂𑀲𑀁 𑀧𑀲𑀸𑀤𑀪𑀢𑁆𑀢𑀺 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸. 𑀢𑀣𑀸 𑀳𑀺 𑀢𑁂 𑀅𑀢𑁆𑀢𑀦𑁄 𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑁂𑀧𑀺 𑀢𑀢𑁆𑀣 𑀧𑀲𑀸𑀤𑀁 𑀦 𑀧𑀭𑀺𑀘𑁆𑀘𑀚𑀦𑁆𑀢𑀺, 𑀢𑀲𑁆𑀲 𑀯𑀸 𑀆𑀡𑀁 𑀤𑀴𑁆𑀳𑀪𑀢𑁆𑀢𑀺𑀪𑀸𑀯𑀢𑁄.

𑀢𑁂𑀦𑁂𑀯𑀸𑀳 𑁋

‘‘𑀬𑁄 𑀯𑁂 𑀓𑀢𑀜𑁆𑀜𑀽 𑀓𑀢𑀯𑁂𑀤𑀺 𑀥𑀻𑀭𑁄;

𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀤𑀴𑁆𑀳𑀪𑀢𑁆𑀢𑀺 𑀘 𑀳𑁄𑀢𑀻’’𑀢𑀺. (𑀚𑀸. 𑁨.𑁧𑁭.𑁭𑁮);

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀫𑀳𑀸𑀲𑀫𑀼𑀤𑁆𑀤𑁄 𑀞𑀺𑀢𑀥𑀫𑁆𑀫𑁄 𑀯𑁂𑀮𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀁 𑀫𑀬𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀢𑀁 𑀫𑀫 𑀲𑀸𑀯𑀓𑀸 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦𑀸𑀢𑀺𑀓𑁆𑀓𑀫𑀦𑁆𑀢𑀻’’𑀢𑀺 (𑀉𑀤𑀸. 𑁪𑁫; 𑀘𑀽𑀴𑀯. 𑁩𑁮𑁫) 𑀘. 𑁋

𑀏𑀯𑀁 ¶ ¶ 𑀪𑀢𑁆𑀢𑀯𑀸𑀢𑀺 𑀪𑀕𑀯𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀏𑀓𑀲𑁆𑀲 𑀢-𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 𑀇𑀢𑀭𑀲𑁆𑀲 𑀕-𑀓𑀸𑀭𑀁 𑀓𑀢𑁆𑀯𑀸.

‘‘𑀕𑀼𑀡𑀸𑀢𑀺𑀲𑀬𑀬𑀼𑀢𑁆𑀢𑀲𑁆𑀲, 𑀬𑀲𑁆𑀫𑀸 𑀮𑁄𑀓𑀳𑀺𑀢𑁂𑀲𑀺𑀦𑁄;

𑀲𑀫𑁆𑀪𑀢𑁆𑀢𑀸 𑀩𑀳𑀯𑁄 𑀲𑀢𑁆𑀣𑀼, 𑀪𑀕𑀯𑀸 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺.

𑀓𑀣𑀁 𑀪𑀕𑁂 𑀯𑀫𑀻𑀢𑀺 𑀪𑀕𑀯𑀸? 𑀬𑀲𑁆𑀫𑀸 𑀢𑀣𑀸𑀕𑀢𑁄 𑀩𑁄𑀥𑀺𑀲𑀢𑁆𑀢𑀪𑀽𑀢𑁄𑀧𑀺 𑀅𑀧𑀭𑀺𑀫𑀸𑀡𑀸𑀲𑀼 𑀚𑀸𑀢𑀻𑀲𑀼 𑀧𑀸𑀭𑀫𑀺𑀬𑁄 𑀧𑀭𑀺𑀧𑀽𑀭𑁂𑀦𑁆𑀢𑁄 𑀪𑀕𑀲𑀗𑁆𑀔𑀸𑀢𑀁 𑀲𑀺𑀭𑀺𑀁 𑀇𑀲𑁆𑀲𑀭𑀺𑀬𑀁 𑀬𑀲𑀜𑁆𑀘 𑀯𑀫𑀺 𑀉𑀕𑁆𑀕𑀺𑀭𑀺, 𑀔𑁂𑀴𑀧𑀺𑀡𑁆𑀟𑀁 𑀯𑀺𑀬 𑀅𑀦𑀧𑁂𑀓𑁆𑀔𑁄 𑀙𑀟𑁆𑀟𑀬𑀺, 𑀘𑀭𑀺𑀫𑀢𑁆𑀢𑀪𑀸𑀯𑁂𑀧𑀺 𑀳𑀢𑁆𑀣𑀕𑀢𑀁 𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀁 𑀤𑁂𑀯𑀮𑁄𑀓𑀸𑀥𑀺𑀧𑀘𑁆𑀘𑀲𑀤𑀺𑀲𑀁 𑀘𑀢𑀼𑀤𑀻𑀧𑀺𑀲𑁆𑀲𑀭𑀺𑀬𑀁 𑀘𑀓𑁆𑀓𑀯𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀲𑀦𑁆𑀦𑀺𑀲𑁆𑀲𑀬𑀁 𑀲𑀢𑁆𑀢𑀭𑀢𑀦𑀲𑀫𑀼𑀚𑁆𑀚𑀮𑀁 𑀬𑀲𑀜𑁆𑀘 𑀢𑀺𑀡𑀸𑀬𑀧𑀺 𑀅𑀫𑀜𑁆𑀜𑀫𑀸𑀦𑁄 𑀦𑀺𑀭𑀧𑁂𑀓𑁆𑀔𑁄 𑀧𑀳𑀸𑀬 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀫𑀸 𑀇𑀫𑁂 𑀲𑀺𑀭𑀻𑀆𑀤𑀺𑀓𑁂 𑀪𑀕𑁂 𑀯𑀫𑀻𑀢𑀺 𑀪𑀕𑀯𑀸. 𑀅𑀣 𑀯𑀸 𑀪𑀸𑀦𑀺 𑀦𑀸𑀫 𑀦𑀓𑁆𑀔𑀢𑁆𑀢𑀸𑀦𑀺, 𑀢𑁂𑀳𑀺 𑀲𑀫𑀁 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀪𑀕𑀸, 𑀲𑀺𑀦𑁂𑀭𑀼𑀬𑀼𑀕𑀦𑁆𑀥𑀭𑀉𑀢𑁆𑀢𑀭𑀓𑀼𑀭𑀼𑀳𑀺𑀫𑀯𑀦𑁆𑀢𑀸𑀤𑀺𑀪𑀸𑀚𑀦𑀮𑁄𑀓𑀯𑀺𑀲𑁂𑀲𑀲𑀦𑁆𑀦𑀺𑀲𑁆𑀲𑀬𑀸 𑀲𑁄𑀪𑀸 𑀓𑀧𑁆𑀧𑀝𑁆𑀞𑀺𑀬𑀪𑀸𑀯𑀢𑁄, 𑀢𑁂𑀧𑀺 𑀪𑀕𑀯𑀸 𑀯𑀫𑀺 𑀢𑀦𑁆𑀦𑀺𑀯𑀸𑀲𑀺𑀲𑀢𑁆𑀢𑀸𑀯𑀸𑀲𑀲𑀫𑀢𑀺𑀓𑁆𑀓𑀫𑀢𑁄 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀧𑀚𑀳𑀻𑀢𑀺. 𑀏𑀯𑀫𑁆𑀧𑀺 𑀪𑀕𑁂 𑀯𑀫𑀻𑀢𑀺 𑀪𑀕𑀯𑀸.

‘‘𑀘𑀓𑁆𑀓𑀯𑀢𑁆𑀢𑀺𑀲𑀺𑀭𑀺𑀁 𑀬𑀲𑁆𑀫𑀸, 𑀬𑀲𑀁 𑀇𑀲𑁆𑀲𑀭𑀺𑀬𑀁 𑀲𑀼𑀔𑀁;

𑀧𑀳𑀸𑀲𑀺 𑀮𑁄𑀓𑀘𑀺𑀢𑁆𑀢𑀜𑁆𑀘, 𑀲𑀼𑀕𑀢𑁄 𑀪𑀕𑀯𑀸 𑀢𑀢𑁄’’.

𑀓𑀣𑀁 𑀪𑀸𑀕𑁂 𑀯𑀫𑀻𑀢𑀺 𑀪𑀕𑀯𑀸? 𑀪𑀸𑀕𑀸 𑀦𑀸𑀫 𑀲𑀪𑀸𑀕𑀥𑀫𑁆𑀫𑀓𑁄𑀝𑁆𑀞𑀸𑀲𑀸, 𑀢𑁂 𑀔𑀦𑁆𑀥𑀸𑀬𑀢𑀦𑀥𑀸𑀢𑀸𑀤𑀺𑀯𑀲𑁂𑀦, 𑀢𑀢𑁆𑀣𑀸𑀧𑀺 𑀭𑀽𑀧𑀯𑁂𑀤𑀦𑀸𑀤𑀺𑀯𑀲𑁂𑀦 𑀧𑀣𑀯𑀺𑀬𑀸𑀤𑀺𑀯𑀲𑁂𑀦 𑀅𑀢𑀻𑀢𑀸𑀤𑀺𑀯𑀲𑁂𑀦 𑀘 𑀅𑀦𑁂𑀓𑀯𑀺𑀥𑀸, 𑀢𑁂 𑀘 𑀪𑀕𑀯𑀸 𑀲𑀩𑁆𑀩𑀁 𑀧𑀧𑀜𑁆𑀘𑀁 𑀲𑀩𑁆𑀩𑀁 𑀬𑁄𑀕𑀁 𑀲𑀩𑁆𑀩𑀁 𑀕𑀦𑁆𑀣𑀁 𑀲𑀩𑁆𑀩𑀁 𑀲𑀁𑀬𑁄𑀚𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀫𑀢𑀥𑀸𑀢𑀼𑀁 𑀲𑀫𑀥𑀺𑀕𑀘𑁆𑀙𑀦𑁆𑀢𑁄 𑀯𑀫𑀺 𑀉𑀕𑁆𑀕𑀺𑀭𑀺, 𑀅𑀦𑀧𑁂𑀓𑁆𑀔𑁄 𑀙𑀟𑁆𑀟𑀬𑀺 𑀦 𑀧𑀘𑁆𑀘𑀸𑀯𑀫𑀺. 𑀢𑀣𑀸 𑀳𑁂𑀲 ‘‘𑀲𑀩𑁆𑀩𑀢𑁆𑀣𑀓𑀫𑁂𑀯 𑀧𑀣𑀯𑀺𑀁 𑀆𑀧𑀁 𑀢𑁂𑀚𑀁 𑀯𑀸𑀬𑀁, 𑀘𑀓𑁆𑀔𑀼𑀁 𑀲𑁄𑀢𑀁 𑀖𑀸𑀦𑀁 𑀚𑀺𑀯𑁆𑀳𑀁 𑀓𑀸𑀬𑀁 𑀫𑀦𑀁, 𑀭𑀽𑀧𑁂 𑀲𑀤𑁆𑀤𑁂 𑀕𑀦𑁆𑀥𑁂 𑀭𑀲𑁂 𑀨𑁄𑀝𑁆𑀞𑀩𑁆𑀩𑁂 𑀥𑀫𑁆𑀫𑁂, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁…𑀧𑁂… 𑀫𑀦𑁄𑀯𑀺𑀜𑁆𑀜𑀸𑀡𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀯𑁂𑀤𑀦𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀁 𑀲𑀜𑁆𑀜𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀲𑀜𑁆𑀜𑀁, 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀁 𑀘𑁂𑀢𑀦𑀁…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀁 𑀘𑁂𑀢𑀦𑀁, 𑀭𑀽𑀧𑀢𑀡𑁆𑀳𑀁…𑀧𑁂… 𑀥𑀫𑁆𑀫𑀢𑀡𑁆𑀳𑀁, 𑀭𑀽𑀧𑀯𑀺𑀢𑀓𑁆𑀓𑀁…𑀧𑁂… 𑀥𑀫𑁆𑀫𑀯𑀺𑀢𑀓𑁆𑀓𑀁, 𑀭𑀽𑀧𑀯𑀺𑀘𑀸𑀭𑀁…𑀧𑁂… 𑀥𑀫𑁆𑀫𑀯𑀺𑀘𑀸𑀭’’𑀦𑁆𑀢𑀺𑀆𑀤𑀺𑀦𑀸 𑀅𑀦𑀼𑀧𑀤𑀥𑀫𑁆𑀫𑀯𑀺𑀪𑀸𑀕𑀯𑀲𑁂𑀦𑀧𑀺 𑀲𑀩𑁆𑀩𑁂𑀯 𑀥𑀫𑁆𑀫𑀓𑁄𑀝𑁆𑀞𑀸𑀲𑁂 𑀅𑀦𑀯𑀲𑁂𑀲𑀢𑁄 𑀯𑀫𑀺 𑀉𑀕𑁆𑀕𑀺𑀭𑀺, 𑀅𑀦𑀧𑁂𑀓𑁆𑀔𑀧𑀭𑀺𑀘𑁆𑀘𑀸𑀕𑁂𑀦 𑀙𑀟𑁆𑀟𑀬𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑀁 ¶ 𑀢𑀁, 𑀆𑀦𑀦𑁆𑀤, 𑀘𑀢𑁆𑀢𑀁 𑀯𑀦𑁆𑀢𑀁 𑀫𑀼𑀢𑁆𑀢𑀁 𑀧𑀳𑀻𑀦𑀁 𑀧𑀝𑀺𑀦𑀺𑀲𑁆𑀲𑀝𑁆𑀞𑀁, 𑀢𑀁 𑀢𑀣𑀸𑀕𑀢𑁄 𑀧𑀼𑀦 𑀧𑀘𑁆𑀘𑀸𑀯𑀫𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 (𑀤𑀻. 𑀦𑀺. 𑁨.𑁧𑁮𑁩). 𑀏𑀯𑀫𑁆𑀧𑀺 ¶ 𑀪𑀸𑀕𑁂 𑀯𑀫𑀻𑀢𑀺 𑀪𑀕𑀯𑀸. 𑀅𑀣 𑀯𑀸 𑀪𑀸𑀕𑁂 𑀯𑀫𑀻𑀢𑀺 𑀲𑀩𑁆𑀩𑁂𑀧𑀺 𑀓𑀼𑀲𑀮𑀸𑀓𑀼𑀲𑀮𑁂 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑁂 𑀳𑀻𑀦𑀧𑀡𑀻𑀢𑁂 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑁂 𑀥𑀫𑁆𑀫𑁂 𑀅𑀭𑀺𑀬𑀫𑀕𑁆𑀕𑀜𑀸𑀡𑀫𑀼𑀔𑁂𑀦 𑀯𑀫𑀺 𑀉𑀕𑁆𑀕𑀺𑀭𑀺, 𑀅𑀦𑀧𑁂𑀓𑁆𑀔𑁄 𑀧𑀭𑀺𑀘𑁆𑀘𑀚𑀺 𑀧𑀚𑀳𑀺, 𑀧𑀭𑁂𑀲𑀜𑁆𑀘 𑀢𑀣𑀢𑁆𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀥𑀫𑁆𑀫𑀸𑀧𑀺 𑀯𑁄, 𑀪𑀺𑀓𑁆𑀔𑀯𑁂, 𑀧𑀳𑀸𑀢𑀩𑁆𑀩𑀸, 𑀧𑀕𑁂𑀯 𑀅𑀥𑀫𑁆𑀫𑀸 (𑀫. 𑀦𑀺. 𑁧.𑁨𑁪𑁦). 𑀓𑀼𑀮𑁆𑀮𑀽𑀧𑀫𑀁 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀺 𑀦𑀺𑀢𑁆𑀣𑀭𑀡𑀢𑁆𑀣𑀸𑀬, 𑀦𑁄 𑀕𑀳𑀡𑀢𑁆𑀣𑀸𑀬𑀸’’𑀢𑀺𑀆𑀤𑀺 (𑀫. 𑀦𑀺. 𑁧.𑁨𑁪𑁦). 𑀏𑀯𑀫𑁆𑀧𑀺 𑀪𑀸𑀕𑁂 𑀯𑀫𑀻𑀢𑀺 𑀪𑀕𑀯𑀸.

‘‘𑀔𑀦𑁆𑀥𑀸𑀬𑀢𑀦𑀥𑀸𑀢𑀸𑀤𑀺-𑀥𑀫𑁆𑀫𑀪𑀸𑀕𑀸-𑀫𑀳𑁂𑀲𑀺𑀦𑀸;

𑀓𑀡𑁆𑀳𑀲𑀼𑀓𑁆𑀓𑀸 𑀬𑀢𑁄 𑀯𑀦𑁆𑀢𑀸, 𑀢𑀢𑁄𑀧𑀺 𑀪𑀕𑀯𑀸 𑀫𑀢𑁄’’.

𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀪𑀸𑀕𑀯𑀸 𑀪𑀢𑀯𑀸 𑀪𑀸𑀕𑁂, 𑀪𑀕𑁂 𑀘 𑀯𑀦𑀺 𑀪𑀢𑁆𑀢𑀯𑀸;

𑀪𑀕𑁂 𑀯𑀫𑀺 𑀢𑀣𑀸 𑀪𑀸𑀕𑁂, 𑀯𑀫𑀻𑀢𑀺 𑀪𑀕𑀯𑀸 𑀚𑀺𑀦𑁄’’𑀢𑀺.

𑀥𑀫𑁆𑀫𑀲𑀭𑀻𑀭𑀁 𑀧𑀘𑁆𑀘𑀓𑁆𑀔𑀁 𑀓𑀭𑁄𑀢𑀻𑀢𑀺 ‘‘𑀬𑁄 𑀯𑁄, 𑀆𑀦𑀦𑁆𑀤, 𑀫𑀬𑀸 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄, 𑀲𑁄 𑀯𑁄 𑀫𑀫𑀘𑁆𑀘𑀬𑁂𑀦 𑀲𑀢𑁆𑀣𑀸’’𑀢𑀺 𑀯𑀘𑀦𑀢𑁄 𑀥𑀫𑁆𑀫𑀲𑁆𑀲 𑀲𑀢𑁆𑀣𑀼𑀪𑀸𑀯𑀧𑀭𑀺𑀬𑀸𑀬𑁄 𑀯𑀺𑀚𑁆𑀚𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀚𑀺𑀭𑀲𑀗𑁆𑀖𑀸𑀢𑀲𑀫𑀸𑀦𑀓𑀸𑀬𑁄 𑀧𑀭𑁂𑀳𑀺 𑀅𑀪𑁂𑀚𑁆𑀚𑀲𑀭𑀻𑀭𑀢𑁆𑀢𑀸. 𑀦 𑀳𑀺 𑀪𑀕𑀯𑀢𑁄 𑀭𑀽𑀧𑀓𑀸𑀬𑁂 𑀓𑁂𑀦𑀘𑀺 𑀲𑀓𑁆𑀓𑀸 𑀅𑀦𑁆𑀢𑀭𑀸𑀬𑀁 𑀓𑀸𑀢𑀼𑀦𑁆𑀢𑀺. 𑀤𑁂𑀲𑀦𑀸𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀯𑀓𑁆𑀔𑀫𑀸𑀦𑀲𑁆𑀲 𑀲𑀓𑀮𑀲𑁆𑀲 𑀲𑀼𑀢𑁆𑀢𑀲𑁆𑀲 ‘‘𑀏𑀯’’𑀦𑁆𑀢𑀺 𑀦𑀺𑀤𑀲𑁆𑀲𑀦𑀢𑁄. 𑀲𑀸𑀯𑀓𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑁂𑀦 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀪𑀕𑀯𑀢𑀸 𑀏𑀢𑀤𑀕𑁆𑀕𑁂 𑀞𑀧𑀺𑀢𑁂𑀦 𑀫𑀬𑀸 𑀫𑀳𑀸𑀲𑀸𑀯𑀓𑁂𑀦 𑀲𑀼𑀢𑀁, 𑀢𑀜𑁆𑀘 𑀔𑁄 𑀫𑀬𑀸𑀯 𑀲𑀼𑀢𑀁, 𑀦 𑀅𑀦𑀼𑀲𑁆𑀲𑀼𑀢𑀁 𑀦 𑀧𑀭𑀁𑀧𑀭𑀸𑀪𑀢𑀦𑁆𑀢𑀺 𑀇𑀫𑀲𑁆𑀲𑀢𑁆𑀣𑀲𑁆𑀲 𑀤𑀻𑀧𑀦𑀢𑁄. 𑀓𑀸𑀮𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀪𑀕𑀯𑀸𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂 𑀧𑀬𑀼𑀢𑁆𑀢𑀲𑁆𑀲 𑀲𑀫𑀬𑀲𑀤𑁆𑀤𑀲𑁆𑀲 𑀩𑀼𑀤𑁆𑀥𑀼𑀧𑁆𑀧𑀸𑀤𑀧𑀝𑀺𑀫𑀡𑁆𑀟𑀺𑀢𑀪𑀸𑀯𑀤𑀻𑀧𑀦𑀢𑁄. 𑀩𑀼𑀤𑁆𑀥𑀼𑀧𑁆𑀧𑀸𑀤𑀧𑀭𑀫𑀸 𑀳𑀺 𑀓𑀸𑀮𑀲𑀫𑁆𑀧𑀤𑀸. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀓𑀧𑁆𑀧𑀓𑀲𑀸𑀬𑁂 𑀓𑀮𑀺𑀬𑀼𑀕𑁂, 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀅𑀳𑁄 𑀫𑀳𑀘𑁆𑀙𑀭𑀺𑀬𑀁;

𑀳𑀼𑀢𑀸𑀯𑀳𑀫𑀚𑁆𑀛𑁂 𑀚𑀸𑀢𑀁, 𑀲𑀫𑀼𑀤𑀺𑀢𑀫𑀓𑀭𑀦𑁆𑀤𑀫𑀭𑀯𑀺𑀦𑁆𑀤’’𑀦𑁆𑀢𑀺.

𑀪𑀕𑀯𑀸𑀢𑀺 𑀤𑁂𑀲𑀓𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀕𑀼𑀡𑀯𑀺𑀲𑀺𑀝𑁆𑀞𑀲𑀢𑁆𑀢𑀼𑀢𑁆𑀢𑀫𑀪𑀸𑀯𑀤𑀻𑀧𑀦𑀢𑁄 𑀕𑀭𑀼𑀕𑀸𑀭𑀯𑀸𑀥𑀺𑀯𑀘𑀦𑀪𑀸𑀯𑀢𑁄.

𑀅𑀯𑀺𑀲𑁂𑀲𑁂𑀦𑀸𑀢𑀺 ¶ ¶ 𑀦 𑀯𑀺𑀲𑁂𑀲𑁂𑀦, 𑀯𑀺𑀳𑀸𑀭𑀪𑀸𑀯𑀲𑀸𑀫𑀜𑁆𑀜𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀭𑀺𑀬𑀸𑀧𑀣…𑀧𑁂… 𑀯𑀺𑀳𑀸𑀭𑁂𑀲𑀽𑀢𑀺 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁄, 𑀤𑀺𑀩𑁆𑀩𑀯𑀺𑀳𑀸𑀭𑁄, 𑀩𑁆𑀭𑀳𑁆𑀫𑀯𑀺𑀳𑀸𑀭𑁄, 𑀅𑀭𑀺𑀬𑀯𑀺𑀳𑀸𑀭𑁄𑀢𑀺 𑀏𑀢𑁂𑀲𑀼 𑀘𑀢𑀽𑀲𑀼 𑀯𑀺𑀳𑀸𑀭𑁂𑀲𑀼. 𑀲𑀫𑀗𑁆𑀕𑀻𑀧𑀭𑀺𑀤𑀻𑀧𑀦𑀦𑁆𑀢𑀺 𑀲𑀫𑀗𑁆𑀕𑀻𑀪𑀸𑀯𑀧𑀭𑀺𑀤𑀻𑀧𑀦𑀁. 𑀏𑀢𑀦𑁆𑀢𑀺 ‘‘𑀯𑀺𑀳𑀭𑀢𑀻’’𑀢𑀺 𑀏𑀢𑀁 𑀧𑀤𑀁. 𑀢𑀣𑀸 𑀳𑀺 𑀢𑀁 ‘‘𑀇𑀥𑁂𑀓𑀘𑁆𑀘𑁄 𑀕𑀺𑀳𑀻𑀳𑀺 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀲𑀳𑀦𑀦𑁆𑀤𑀻 𑀲𑀳𑀲𑁄𑀓𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁪.𑁨𑁪𑁧) 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂 𑀆𑀕𑀢𑀁. ‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 (𑀥. 𑀲. 𑁧𑁬𑁦; 𑀯𑀺𑀪. 𑁬𑁨𑁪) 𑀏𑀢𑁆𑀣 𑀤𑀺𑀩𑁆𑀩𑀯𑀺𑀳𑀸𑀭𑁂. ‘‘𑀲𑁄 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁫𑁫𑁬; 𑁩.𑁩𑁦𑁮; 𑀫. 𑀦𑀺. 𑁧.𑁭𑁭; 𑁨.𑁩𑁦𑁯; 𑁩.𑁨𑁩𑁦) 𑀩𑁆𑀭𑀳𑁆𑀫𑀯𑀺𑀳𑀸𑀭𑁂. ‘‘𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀲𑁆𑀲𑀸𑀬𑁂𑀯 𑀓𑀣𑀸𑀬 𑀧𑀭𑀺𑀬𑁄𑀲𑀸𑀦𑁂 𑀢𑀲𑁆𑀫𑀺𑀁 𑀏𑀯 𑀧𑀼𑀭𑀺𑀫𑀲𑁆𑀫𑀺𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁂 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀫𑀺 𑀲𑀦𑁆𑀦𑀺𑀲𑀸𑀤𑁂𑀫𑀺 𑀏𑀓𑁄𑀤𑀺𑀁 𑀓𑀭𑁄𑀫𑀺 𑀲𑀫𑀸𑀤𑀳𑀸𑀫𑀺, 𑀬𑁂𑀦 𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁮𑁭) 𑀅𑀭𑀺𑀬𑀯𑀺𑀳𑀸𑀭𑁂.

𑀢𑀢𑁆𑀣 𑀇𑀭𑀺𑀬𑀦𑀁 𑀯𑀢𑁆𑀢𑀦𑀁 𑀇𑀭𑀺𑀬𑀸, 𑀓𑀸𑀬𑀧𑁆𑀧𑀬𑁄𑀕𑁄. 𑀢𑀲𑁆𑀲𑀸 𑀧𑀯𑀢𑁆𑀢𑀦𑀼𑀧𑀸𑀬𑀪𑀸𑀯𑀢𑁄 𑀞𑀸𑀦𑀸𑀤𑀺 𑀇𑀭𑀺𑀬𑀸𑀧𑀣𑁄. 𑀞𑀸𑀦𑀲𑀫𑀗𑁆𑀕𑀻 𑀯𑀸 𑀳𑀺 𑀓𑀸𑀬𑁂𑀦 𑀓𑀺𑀜𑁆𑀘𑀺 𑀓𑀭𑁂𑀬𑁆𑀬 𑀕𑀫𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑀫𑀗𑁆𑀕𑀻 𑀯𑀸. 𑀅𑀣 𑀯𑀸 𑀇𑀭𑀺𑀬𑀢𑀺 𑀧𑀯𑀢𑁆𑀢𑀢𑀺 𑀏𑀢𑁂𑀦 𑀅𑀢𑁆𑀢𑀪𑀸𑀯𑁄 𑀓𑀸𑀬𑀓𑀺𑀘𑁆𑀘𑀁 𑀯𑀸𑀢𑀺 𑀇𑀭𑀺𑀬𑀸, 𑀢𑀲𑁆𑀲𑀸 𑀧𑀯𑀢𑁆𑀢𑀺𑀉𑀧𑀸𑀬𑀪𑀸𑀯𑀢𑁄 𑀇𑀭𑀺𑀬𑀸 𑀘 𑀲𑁄 𑀧𑀣𑁄 𑀘𑀸𑀢𑀺 𑀇𑀭𑀺𑀬𑀸𑀧𑀣𑁄, 𑀞𑀸𑀦𑀸𑀤𑀺 𑀏𑀯. 𑀲𑁄 𑀘 𑀅𑀢𑁆𑀣𑀢𑁄 𑀕𑀢𑀺𑀦𑀺𑀯𑀢𑁆𑀢𑀺𑀆𑀤𑀺𑀆𑀓𑀸𑀭𑁂𑀦 𑀧𑀯𑀢𑁆𑀢𑁄 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀧𑀩𑀦𑁆𑀥𑁄 𑀏𑀯. 𑀯𑀺𑀳𑀭𑀡𑀁, 𑀯𑀺𑀳𑀭𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀯𑀺𑀳𑀸𑀭𑁄, 𑀇𑀭𑀺𑀬𑀸𑀧𑀣𑁄 𑀏𑀯 𑀯𑀺𑀳𑀸𑀭𑁄 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁄. 𑀤𑀺𑀯𑀺 𑀪𑀯𑁄 𑀤𑀺𑀩𑁆𑀩𑁄, 𑀢𑀢𑁆𑀣 𑀩𑀳𑀼𑀮𑀧𑁆𑀧𑀯𑀢𑁆𑀢𑀺𑀬𑀸 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀺𑀤𑁂𑀯𑀮𑁄𑀓𑁂 𑀪𑀯𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀬𑁄 𑀤𑀺𑀩𑁆𑀩𑀸𑀦𑀼𑀪𑀸𑀯𑁄, 𑀢𑀤𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀯𑀸 𑀤𑀺𑀩𑁆𑀩𑁄, 𑀅𑀪𑀺𑀜𑁆𑀜𑀸𑀪𑀺𑀦𑀻𑀳𑀸𑀭𑀯𑀲𑁂𑀦 𑀫𑀳𑀸𑀕𑀢𑀺𑀓𑀢𑁆𑀢𑀸 𑀯𑀸 𑀤𑀺𑀩𑁆𑀩𑁄, 𑀤𑀺𑀩𑁆𑀩𑁄 𑀘 𑀲𑁄 𑀯𑀺𑀳𑀸𑀭𑁄 𑀘𑀸𑀢𑀺 𑀤𑀺𑀩𑁆𑀩𑀯𑀺𑀳𑀸𑀭𑁄, 𑀘𑀢𑀲𑁆𑀲𑁄 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀬𑁄. 𑀆𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺𑀬𑁄𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀩𑁆𑀭𑀳𑁆𑀫𑀽𑀦𑀁, 𑀩𑁆𑀭𑀳𑁆𑀫𑀸𑀦𑁄 𑀯𑀸 𑀯𑀺𑀳𑀸𑀭𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀸, 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄. 𑀅𑀭𑀺𑀬𑀸𑀦𑀁, 𑀅𑀭𑀺𑀬𑀸 𑀯𑀸 𑀯𑀺𑀳𑀸𑀭𑀸 𑀅𑀭𑀺𑀬𑀯𑀺𑀳𑀸𑀭𑀸, 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺. 𑀲𑁄 𑀳𑀺 𑀏𑀓𑀁 𑀇𑀭𑀺𑀬𑀸𑀧𑀣𑀩𑀸𑀥𑀦𑀦𑁆𑀢𑀺𑀆𑀤𑀺 𑀬𑀤𑀺𑀧𑀺 𑀪𑀕𑀯𑀸 𑀏𑀓𑁂𑀦𑀧𑀺 𑀇𑀭𑀺𑀬𑀸𑀧𑀣𑁂𑀦 𑀘𑀺𑀭𑀢𑀭𑀁 𑀓𑀸𑀮𑀁 𑀅𑀢𑁆𑀢𑀪𑀸𑀯𑀁 𑀧𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀣𑀸𑀧𑀺 𑀉𑀧𑀸𑀤𑀺𑀦𑁆𑀦𑀓𑀲𑀭𑀻𑀭𑀲𑁆𑀲 𑀦𑀸𑀫 𑀅𑀬𑀁 𑀲𑀪𑀸𑀯𑁄𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁 ¶ . 𑀬𑀲𑁆𑀫𑀸 𑀯𑀸 𑀪𑀕𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀦𑁆𑀢𑁄 𑀯𑀺𑀦𑁂𑀬𑁆𑀬𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄, 𑀦𑀸𑀦𑀸𑀲𑀫𑀸𑀧𑀢𑁆𑀢𑀻𑀳𑀺 𑀘 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀯𑀲𑀢𑀻𑀢𑀺 𑀲𑀢𑁆𑀢𑀸𑀦𑀁 𑀅𑀢𑁆𑀢𑀦𑁄 𑀘 𑀯𑀺𑀯𑀺𑀥𑀁 𑀳𑀺𑀢𑀲𑀼𑀔𑀁 𑀳𑀭𑀢𑀺 𑀉𑀧𑀦𑁂𑀢𑀺 𑀉𑀧𑁆𑀧𑀸𑀤𑁂𑀢𑀺, 𑀢𑀲𑁆𑀫𑀸 𑀯𑀺𑀯𑀺𑀥𑀁 𑀳𑀭𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀘𑁆𑀘𑀢𑁆𑀣𑀺𑀓𑁂 𑀚𑀺𑀦𑀸𑀢𑀻𑀢𑀺 𑀚𑁂𑀢𑁄. 𑀚𑁂𑀢-𑀲𑀤𑁆𑀤𑁄 𑀳𑀺 𑀲𑁄𑀢-𑀲𑀤𑁆𑀤𑁄 𑀯𑀺𑀬 𑀓𑀢𑁆𑀢𑀼𑀲𑀸𑀥𑀦𑁄𑀧𑀺 𑀅𑀢𑁆𑀣𑀻𑀢𑀺. 𑀭𑀜𑁆𑀜𑁄 ¶ 𑀯𑀸 𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀚𑀺𑀢𑀓𑀸𑀮𑁂 𑀚𑀸𑀢𑀢𑁆𑀢𑀸 𑀚𑁂𑀢𑁄. 𑀭𑀜𑁆𑀜𑁄 𑀳𑀺 𑀅𑀢𑁆𑀢𑀦𑁄 𑀚𑀬𑀁 𑀢𑀢𑁆𑀣 𑀆𑀭𑁄𑀧𑁂𑀢𑁆𑀯𑀸 𑀚𑀺𑀢𑀯𑀸𑀢𑀺 𑀚𑁂𑀢𑁄𑀢𑀺 𑀓𑀼𑀫𑀸𑀭𑁄 𑀯𑀼𑀢𑁆𑀢𑁄. 𑀫𑀗𑁆𑀕𑀮𑀓𑀸𑀫𑀢𑀸𑀬 𑀯𑀸 𑀚𑁂𑀢𑁄𑀢𑀺𑀲𑁆𑀲 𑀦𑀸𑀫𑀁 𑀓𑀢𑀁, 𑀢𑀲𑁆𑀫𑀸 ‘‘𑀚𑁂𑀬𑁆𑀬𑁄’’𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 ‘‘𑀚𑁂𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀲𑁆𑀲 𑀚𑁂𑀢𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲. 𑀯𑀦𑁂𑀢𑀺𑀆𑀤𑀺𑀢𑁄 𑀧𑀝𑁆𑀞𑀸𑀬𑁂𑀯 𑀢𑀁 𑀢𑀲𑁆𑀲 𑀲𑀦𑁆𑀢𑀓𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀺𑀢𑀸𑀬 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑀢𑀸𑀬 𑀓𑀭𑀼𑀡𑀸𑀤𑀺𑀕𑀼𑀡𑀲𑀫𑀗𑁆𑀕𑀺𑀢𑀸𑀬 𑀘 𑀦𑀺𑀘𑁆𑀘𑀓𑀸𑀮𑀁 𑀉𑀧𑀝𑁆𑀞𑀧𑀺𑀢𑁄 𑀅𑀦𑀸𑀣𑀸𑀦𑀁 𑀧𑀺𑀡𑁆𑀟𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁄, 𑀢𑀲𑁆𑀲 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲. 𑀬𑀤𑀺 𑀚𑁂𑀢𑀯𑀦𑀁, 𑀓𑀣𑀁 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁄𑀢𑀺 𑀆𑀳 ‘‘𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦𑀸’’𑀢𑀺𑀆𑀤𑀺. 𑀧𑀜𑁆𑀘𑀯𑀺𑀥𑀲𑁂𑀦𑀸𑀲𑀦𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀆𑀭𑀫𑀦𑁆𑀢𑀺 𑀏𑀢𑁆𑀣 𑀧𑀩𑁆𑀩𑀚𑀺𑀢𑀸𑀢𑀺 𑀆𑀭𑀸𑀫𑁄, 𑀢𑀲𑁆𑀫𑀺𑀁 𑀆𑀭𑀸𑀫𑁂. 𑀬𑀤𑀺𑀧𑀺 𑀲𑁄 𑀪𑀽𑀫𑀺𑀪𑀸𑀕𑁄 𑀓𑁄𑀝𑀺𑀲𑀦𑁆𑀣𑀭𑁂𑀦 𑀫𑀳𑀸𑀲𑁂𑀝𑁆𑀞𑀺𑀦𑀸 𑀓𑀻𑀢𑁄, 𑀭𑀼𑀓𑁆𑀔𑀸 𑀧𑀦 𑀚𑁂𑀢𑁂𑀦 𑀦 𑀯𑀺𑀓𑁆𑀓𑀻𑀢𑀸𑀢𑀺 𑀢𑀁 ‘‘𑀚𑁂𑀢𑀯𑀦’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀻𑀢𑀺 𑀯𑀤𑀦𑁆𑀢𑀺. 𑀉𑀪𑀺𑀦𑁆𑀦𑀫𑁆𑀧𑀺 𑀯𑀸 𑀢𑀢𑁆𑀣 𑀧𑀭𑀺𑀘𑁆𑀘𑀸𑀕𑀯𑀺𑀲𑁂𑀲𑀓𑀺𑀢𑁆𑀢𑀦𑀢𑁆𑀣𑀁 𑀉𑀪𑀬𑀯𑀘𑀦𑀁, 𑀚𑁂𑀢𑁂𑀦𑀧𑀺 𑀳𑀺 𑀪𑀽𑀫𑀺𑀪𑀸𑀕𑀯𑀺𑀓𑁆𑀓𑀬𑁂𑀦 𑀮𑀤𑁆𑀥𑀥𑀦𑀁 𑀢𑀢𑁆𑀣 𑀤𑁆𑀯𑀸𑀭𑀓𑁄𑀝𑁆𑀞𑀓𑀓𑀭𑀡𑀯𑀲𑁂𑀦 𑀯𑀺𑀦𑀺𑀬𑀼𑀢𑁆𑀢𑀁. 𑀲𑀸𑀯𑀢𑁆𑀣𑀺𑀚𑁂𑀢𑀯𑀦𑀸𑀦𑀁 𑀪𑀽𑀫𑀺𑀪𑀸𑀕𑀯𑀲𑁂𑀦 𑀪𑀺𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀦 𑀳𑀺 𑀲𑀓𑁆𑀓𑀸 𑀉𑀪𑀬𑀢𑁆𑀣 𑀏𑀓𑀁 𑀲𑀫𑀬𑀁 𑀯𑀺𑀳𑀭𑀺𑀢𑀼’’𑀦𑁆𑀢𑀺.

𑀅𑀧𑀸𑀓𑀝𑀸𑀢𑀺 𑀲𑀓𑁆𑀓𑁄 𑀲𑀼𑀬𑀸𑀫𑁄𑀢𑀺𑀆𑀤𑀺𑀦𑀸 𑀅𑀦𑀪𑀺𑀜𑁆𑀜𑀸𑀢𑀸. 𑀅𑀪𑀺𑀜𑁆𑀜𑀸𑀢𑀸𑀦𑀫𑁆𑀧𑀺 𑀅𑀜𑁆𑀜𑀢𑀭𑀲𑀤𑁆𑀤𑁄 𑀤𑀺𑀲𑁆𑀲𑀢𑁂𑀯 𑀏𑀓𑀲𑀤𑀺𑀲𑀸𑀬𑀢𑁆𑀢𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀪𑀺𑀚𑀸𑀦𑀸𑀢𑀺 𑀦𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀳𑀼𑀦𑀸 𑀇𑀤𑀸𑀦𑁂𑀯. 𑀲𑀸𑀥𑀸𑀭𑀡𑀯𑀘𑀦𑀁 𑀤𑀺𑀩𑁆𑀩𑀢𑀁 𑀅𑀦𑁆𑀢𑁄𑀦𑀻𑀢𑀁 𑀓𑀢𑁆𑀯𑀸. 𑀤𑁂𑀯𑁄 𑀏𑀯 𑀤𑁂𑀯𑀢𑀸 𑀧𑀼𑀭𑀺𑀲𑁂𑀧𑀺 𑀯𑀢𑁆𑀢𑀦𑀢𑁄. 𑀢𑁂𑀦𑁂𑀯𑀸𑀳 ‘‘𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂’’𑀢𑀺𑀆𑀤𑀺. 𑀦𑀦𑀼 𑀘 𑀭𑀽𑀧𑀸𑀯𑀘𑀭𑀲𑀢𑁆𑀢𑀸𑀦𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀦𑀢𑁆𑀣𑀺, 𑀬𑁂𑀦 𑀢𑁂 𑀧𑀼𑀭𑀺𑀲𑀸𑀢𑀺 𑀯𑀼𑀘𑁆𑀘𑁂𑀬𑁆𑀬𑀼𑀁? 𑀬𑀤𑀺𑀧𑀺 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀦𑀢𑁆𑀣𑀺, 𑀧𑀼𑀭𑀺𑀲𑀲𑀡𑁆𑀞𑀸𑀦𑀲𑁆𑀲 𑀧𑀦 𑀧𑀼𑀭𑀺𑀲𑀯𑁂𑀲𑀲𑁆𑀲 𑀘 𑀯𑀲𑁂𑀦 𑀧𑀼𑀭𑀺𑀲𑀧𑀼𑀕𑁆𑀕𑀮𑀸𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺 𑀧𑀼𑀭𑀺𑀲𑀧𑀓𑀢𑀺𑀪𑀸𑀯𑀢𑁄.

𑀅𑀪𑀺𑀓𑁆𑀓𑀦𑁆𑀢𑀸𑀢𑀺 ¶ 𑀅𑀢𑀺𑀓𑁆𑀓𑀦𑁆𑀢𑀸, 𑀯𑀺𑀕𑀢𑀸𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀔𑀬𑁂 𑀤𑀺𑀲𑁆𑀲𑀢𑀻’’𑀢𑀺. 𑀢𑁂𑀦𑁂𑀯 𑀳𑀺 ‘‘𑀦𑀺𑀓𑁆𑀔𑀦𑁆𑀢𑁄 𑀧𑀞𑀫𑁄 𑀬𑀸𑀫𑁄’’𑀢𑀺 𑀉𑀧𑀭𑀺 𑀯𑀼𑀢𑁆𑀢𑀁. 𑀅𑀪𑀺𑀓𑁆𑀓𑀦𑁆𑀢𑀢𑀭𑁄𑀢𑀺 𑀅𑀢𑀺𑀯𑀺𑀬 𑀓𑀦𑁆𑀢𑀢𑀭𑁄. 𑀢𑀸𑀤𑀺𑀲𑁄 𑀘 𑀲𑀼𑀦𑁆𑀤𑀭𑁄 𑀪𑀤𑁆𑀤𑀓𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀲𑀼𑀦𑁆𑀤𑀭𑁂 𑀤𑀺𑀲𑁆𑀲𑀢𑀻’’𑀢𑀺. 𑀓𑁄𑀢𑀺 𑀤𑁂𑀯𑀦𑀸𑀕𑀬𑀓𑁆𑀔𑀕𑀦𑁆𑀥𑀩𑁆𑀩𑀸𑀤𑀻𑀲𑀼 𑀓𑁄 𑀓𑀢𑀫𑁄? 𑀫𑁂𑀢𑀺 𑀫𑀫. 𑀧𑀸𑀤𑀸𑀦𑀻𑀢𑀺 𑀧𑀸𑀤𑁂. 𑀇𑀤𑁆𑀥𑀺𑀬𑀸𑀢𑀺 𑀇𑀫𑀸𑀬 𑀏𑀯𑀭𑀽𑀧𑀸𑀬 𑀤𑁂𑀯𑀺𑀤𑁆𑀥𑀺𑀬𑀸. 𑀬𑀲𑀲𑀸𑀢𑀺 𑀇𑀫𑀺𑀦𑀸 𑀏𑀤𑀺𑀲𑁂𑀦 𑀧𑀭𑀺𑀯𑀸𑀭𑁂𑀦 𑀧𑀭𑀺𑀘𑁆𑀙𑀤𑁂𑀦 𑀘. 𑀚𑀮𑀦𑁆𑀢𑀺 𑀯𑀺𑀚𑁆𑀚𑁄𑀢𑀫𑀸𑀦𑁄. 𑀅𑀪𑀺𑀓𑁆𑀓𑀦𑁆𑀢𑁂𑀦𑀸𑀢𑀺 𑀅𑀢𑀺𑀯𑀺𑀬 𑀓𑀦𑁆𑀢𑁂𑀦 𑀓𑀫𑀦𑀺𑀬𑁂𑀦 𑀅𑀪𑀺𑀭𑀽𑀧𑁂𑀦. 𑀯𑀡𑁆𑀡𑁂𑀦𑀸𑀢𑀺 𑀙𑀯𑀺𑀯𑀡𑁆𑀡𑁂𑀦 𑀲𑀭𑀻𑀭𑀯𑀡𑁆𑀡𑀦𑀺𑀪𑀸𑀬. 𑀲𑀩𑁆𑀩𑀸 𑀑𑀪𑀸𑀲𑀬𑀁 𑀤𑀺𑀲𑀸𑀢𑀺 𑀲𑀩𑁆𑀩𑀸𑀧𑀺 𑀤𑀺𑀲𑀸 𑀧𑀪𑀸𑀲𑁂𑀦𑁆𑀢𑁄 𑀘𑀦𑁆𑀤𑁄 𑀯𑀺𑀬 𑀲𑀽𑀭𑀺𑀬𑁄 𑀯𑀺𑀬 𑀘 𑀏𑀓𑁄𑀪𑀸𑀲𑀁 𑀏𑀓𑀸𑀮𑁄𑀓𑀁 𑀓𑀭𑁄𑀦𑁆𑀢𑁄𑀢𑀺 𑀕𑀸𑀣𑀸𑀬 𑀅𑀢𑁆𑀣𑁄. 𑀅𑀪𑀺𑀭𑀽𑀧𑁂𑀢𑀺 𑀉𑀴𑀸𑀭𑀭𑀽𑀧𑁂 𑀲𑀫𑁆𑀧𑀦𑁆𑀦𑀭𑀽𑀧𑁂.

𑀓𑀜𑁆𑀘𑀦𑀲𑀦𑁆𑀦𑀺𑀪𑀢𑁆𑀢𑀘𑀢𑀸 𑀲𑀼𑀯𑀡𑁆𑀡𑀯𑀡𑁆𑀡𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀙𑀯𑀺𑀬’’𑀦𑁆𑀢𑀺. 𑀙𑀯𑀺𑀕𑀢𑀸 ¶ 𑀧𑀦 𑀯𑀡𑁆𑀡𑀥𑀸𑀢𑀼 𑀏𑀯 ‘‘𑀲𑀼𑀯𑀡𑁆𑀡𑀯𑀡𑁆𑀡𑁄’’𑀢𑀺 𑀏𑀢𑁆𑀣 𑀯𑀡𑁆𑀡𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀢𑀺 𑀅𑀧𑀭𑁂. 𑀯𑀡𑁆𑀡𑀦𑀁 𑀓𑀺𑀢𑁆𑀢𑀺𑀬𑀸 𑀉𑀕𑁆𑀖𑁄𑀲𑀦𑀦𑁆𑀢𑀺 𑀯𑀡𑁆𑀡𑁄, 𑀣𑀼𑀢𑀺. 𑀯𑀡𑁆𑀡𑀻𑀬𑀢𑀺 𑀅𑀲𑀗𑁆𑀓𑀭𑀢𑁄 𑀯𑀯𑀢𑁆𑀣𑀧𑀻𑀬𑀢𑀻𑀢𑀺 𑀯𑀡𑁆𑀡𑁄, 𑀓𑀼𑀮𑀯𑀕𑁆𑀕𑁄. 𑀯𑀡𑁆𑀡𑀻𑀬𑀢𑀺 𑀨𑀮𑀁 𑀏𑀢𑁂𑀦 𑀬𑀣𑀸𑀲𑀪𑀸𑀯𑀢𑁄 𑀯𑀺𑀪𑀸𑀯𑀻𑀬𑀢𑀻𑀢𑀺 𑀯𑀡𑁆𑀡𑁄, 𑀓𑀸𑀭𑀡𑀁. 𑀯𑀡𑁆𑀡𑀦𑀁 𑀤𑀻𑀖𑀭𑀲𑁆𑀲𑀸𑀤𑀺𑀯𑀲𑁂𑀦 𑀲𑀡𑁆𑀞𑀳𑀦𑀦𑁆𑀢𑀺 𑀯𑀡𑁆𑀡𑁄, 𑀲𑀡𑁆𑀞𑀸𑀦𑀁. 𑀯𑀡𑁆𑀡𑀻𑀬𑀢𑀺 𑀅𑀡𑀼𑀫𑀳𑀦𑁆𑀢𑀸𑀤𑀺𑀯𑀲𑁂𑀦 𑀧𑀫𑀻𑀬𑀢𑀻𑀢𑀺 𑀯𑀡𑁆𑀡𑁄, 𑀧𑀫𑀸𑀡𑀁. 𑀯𑀡𑁆𑀡𑁂𑀢𑀺 𑀯𑀺𑀓𑀸𑀭𑀁 𑀆𑀧𑀚𑁆𑀚𑀫𑀸𑀦𑀁 𑀳𑀤𑀬𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀢𑀻𑀢𑀺 𑀯𑀡𑁆𑀡𑁄, 𑀭𑀽𑀧𑀸𑀬𑀢𑀦𑀁. 𑀏𑀯𑀁 𑀢𑁂𑀦 𑀢𑁂𑀦 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑁂𑀦 𑀯𑀡𑁆𑀡𑀲𑀤𑁆𑀤𑀲𑁆𑀲 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀤𑁆𑀥𑀺𑀁 𑀫𑀸𑀧𑁂𑀢𑁆𑀯𑀸𑀢𑀺 𑀯𑀢𑁆𑀣𑀸𑀮𑀗𑁆𑀓𑀸𑀭𑀓𑀸𑀬𑀸𑀤𑀻𑀳𑀺 𑀑𑀪𑀸𑀲𑀫𑀼𑀜𑁆𑀘𑀦𑀸𑀤𑀺𑀯𑀲𑁂𑀦 𑀤𑀺𑀩𑁆𑀩𑀁 𑀇𑀤𑁆𑀥𑀸𑀦𑀼𑀪𑀸𑀯𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸. 𑀓𑀸𑀫𑀸𑀯𑀘𑀭𑀸 𑀅𑀦𑀪𑀺𑀲𑀗𑁆𑀔𑀢𑁂𑀦𑀧𑀺 𑀆𑀕𑀦𑁆𑀢𑀼𑀁 𑀲𑀓𑁆𑀓𑁄𑀦𑁆𑀢𑀺 𑀑𑀴𑀸𑀭𑀺𑀓𑀭𑀽𑀧𑀢𑁆𑀢𑀸. 𑀢𑀣𑀸 𑀳𑀺 𑀢𑁂 𑀓𑀩𑀴𑀻𑀓𑀸𑀭𑀪𑀓𑁆𑀔𑀸. 𑀭𑀽𑀧𑀸𑀯𑀘𑀭𑀸 𑀦 𑀲𑀓𑁆𑀓𑁄𑀦𑁆𑀢𑀺 𑀢𑀢𑁄 𑀲𑀼𑀔𑀼𑀫𑀢𑀭𑀭𑀽𑀧𑀢𑁆𑀢𑀸. 𑀢𑁂𑀦𑀸𑀳 ‘‘𑀢𑁂𑀲𑀁 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 ‘‘𑀅𑀢𑀺𑀲𑀼𑀔𑀼𑀫𑁄’’𑀢𑀺 𑀫𑀽𑀮𑀧𑀝𑀺𑀲𑀦𑁆𑀥𑀺𑀭𑀽𑀧𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀦 𑀢𑁂𑀦 𑀇𑀭𑀺𑀬𑀸𑀧𑀣𑀓𑀧𑁆𑀧𑀦𑀁 𑀳𑁄𑀢𑀻𑀢𑀺 𑀏𑀢𑁂𑀦 𑀩𑁆𑀭𑀳𑁆𑀫𑀮𑁄𑀓𑁂𑀧𑀺 𑀩𑁆𑀭𑀳𑁆𑀫𑀸𑀦𑁄 𑀬𑁂𑀪𑀼𑀬𑁆𑀬𑁂𑀦 𑀦𑀺𑀫𑁆𑀫𑀺𑀢𑀭𑀽𑀧𑁂𑀦𑁂𑀯 𑀧𑀯𑀢𑁆𑀢𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀢𑀭𑀜𑁆𑀳𑀺 𑀅𑀢𑀺𑀯𑀺𑀬 𑀲𑀼𑀔𑀼𑀫𑀁 𑀭𑀽𑀧𑀁 𑀓𑁂𑀯𑀮𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀦𑀺𑀲𑁆𑀲𑀬𑀸𑀥𑀺𑀝𑁆𑀞𑀸𑀦𑀪𑀽𑀢𑀁 𑀲𑀡𑁆𑀞𑀸𑀦𑀯𑀦𑁆𑀢𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺.

𑀅𑀦𑀯𑀲𑁂𑀲𑀢𑁆𑀢𑀁 𑀲𑀓𑀮𑀢𑀸. 𑀬𑁂𑀪𑀼𑀬𑁆𑀬𑀢𑀸 𑀩𑀳𑀼𑀮𑀪𑀸𑀯𑁄. 𑀅𑀩𑁆𑀬𑀸𑀫𑀺𑀲𑁆𑀲𑀢𑀸 𑀯𑀺𑀚𑀸𑀢𑀺𑀬𑁂𑀦 𑀅𑀲𑀗𑁆𑀓𑀭𑁄. 𑀲𑀼𑀔𑁂𑀦 𑀳𑀺 𑀅𑀯𑁄𑀓𑀺𑀡𑁆𑀡𑀢𑀸 𑀢𑀢𑁆𑀣 𑀅𑀥𑀺𑀧𑁆𑀧𑁂𑀢𑀸 ¶ . 𑀅𑀦𑀢𑀺𑀭𑁂𑀓𑀢𑀸 𑀢𑀁𑀧𑀭𑀫𑀢𑀸 𑀯𑀺𑀲𑁂𑀲𑀸𑀪𑀸𑀯𑁄. 𑀓𑁂𑀯𑀮𑀓𑀧𑁆𑀧𑀦𑁆𑀢𑀺 𑀓𑁂𑀯𑀮𑀁 𑀤𑀴𑁆𑀳𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀗𑁆𑀖𑀪𑁂𑀤𑀸𑀬𑀸𑀢𑀺 𑀲𑀗𑁆𑀖𑁂 𑀯𑀺𑀯𑀸𑀤𑀸𑀬, 𑀯𑀺𑀯𑀸𑀤𑀼𑀧𑁆𑀧𑀸𑀤𑀸𑀬𑀸𑀢𑀺 𑀅𑀢𑁆𑀣𑁄. 𑀓𑁂𑀯𑀮𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁 𑀲𑀩𑁆𑀩𑀲𑀗𑁆𑀔𑀢𑀯𑀺𑀯𑀺𑀢𑁆𑀢𑀢𑁆𑀢𑀸, 𑀏𑀢𑀲𑁆𑀲 𑀢𑀁 𑀅𑀢𑁆𑀣𑀻𑀢𑀺 𑀓𑁂𑀯𑀮𑀻, 𑀲𑀘𑁆𑀙𑀺𑀓𑀢𑀦𑀺𑀭𑁄𑀥𑁄 𑀔𑀻𑀡𑀸𑀲𑀯𑁄. 𑀢𑁂𑀦𑀸𑀳 ‘‘𑀯𑀺𑀲𑀁𑀬𑁄𑀕𑁄 𑀅𑀢𑁆𑀣𑁄’’𑀢𑀺.

𑀓𑀧𑁆𑀧𑀲𑀤𑁆𑀤𑁄 𑀧𑀦𑀸𑀬𑀁 𑀲𑀉𑀧𑀲𑀕𑁆𑀕𑁄 𑀅𑀦𑀼𑀧𑀲𑀕𑁆𑀕𑁄 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀑𑀓𑀧𑁆𑀧𑀦𑀺𑀬𑀧𑀤𑁂 𑀮𑀩𑁆𑀪𑀫𑀸𑀦𑀁 𑀓𑀧𑁆𑀧𑀲𑀤𑁆𑀤𑀫𑀢𑁆𑀢𑀁 𑀤𑀲𑁆𑀲𑁂𑀢𑀺, 𑀅𑀜𑁆𑀜𑀣𑀸 𑀓𑀧𑁆𑀧𑀧𑀤𑀁 𑀅𑀦𑀺𑀤𑀲𑁆𑀲𑀦𑀫𑁂𑀯 𑀲𑀺𑀬𑀸. 𑀲𑀫𑀡𑀓𑀧𑁆𑀧𑁂𑀳𑀻𑀢𑀺 𑀯𑀺𑀦𑀬𑀲𑀺𑀤𑁆𑀥𑁂𑀳𑀺 𑀲𑀫𑀡𑀯𑁄𑀳𑀸𑀭𑁂𑀳𑀺. 𑀦𑀺𑀘𑁆𑀘𑀓𑀧𑁆𑀧𑀦𑁆𑀢𑀺 𑀦𑀺𑀘𑁆𑀘𑀓𑀸𑀮𑀁. 𑀧𑀜𑁆𑀜𑀢𑁆𑀢𑀻𑀢𑀺 𑀦𑀸𑀫𑀁. 𑀦𑀸𑀫𑀜𑁆𑀳𑁂𑀢𑀁 𑀢𑀲𑁆𑀲 𑀆𑀬𑀲𑁆𑀫𑀢𑁄, 𑀬𑀤𑀺𑀤𑀁 𑀓𑀧𑁆𑀧𑁄𑀢𑀺. 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽𑀢𑀺 𑀓𑀢𑁆𑀢𑀭𑀺𑀓𑀸𑀬 𑀙𑁂𑀤𑀺𑀢𑀓𑁂𑀲𑀫𑀲𑁆𑀲𑀼. 𑀤𑁆𑀯𑀗𑁆𑀕𑀼𑀮𑀓𑀧𑁆𑀧𑁄𑀢𑀺 𑀫𑀚𑁆𑀛𑀦𑁆𑀳𑀺𑀓𑀯𑁂𑀮𑀸𑀬 𑀯𑀻𑀢𑀺𑀓𑁆𑀓𑀦𑁆𑀢𑀸𑀬 𑀤𑁆𑀯𑀗𑁆𑀕𑀼𑀮𑀢𑀸𑀯𑀺𑀓𑀧𑁆𑀧𑁄. 𑀮𑁂𑀲𑁄𑀢𑀺 𑀅𑀧𑀤𑁂𑀲𑁄. 𑀅𑀦𑀯𑀲𑁂𑀲𑀁 𑀨𑀭𑀺𑀢𑀼𑀁 𑀲𑀫𑀢𑁆𑀣𑀲𑁆𑀲𑀧𑀺 𑀑𑀪𑀸𑀲𑀲𑁆𑀲 𑀓𑁂𑀦𑀘𑀺𑀧𑀺 𑀓𑀸𑀭𑀡𑁂𑀦 𑀏𑀓𑀤𑁂𑀲𑀨𑀭𑀡𑀫𑁆𑀧𑀺 𑀲𑀺𑀬𑀸, 𑀅𑀬𑀁 𑀧𑀦 𑀲𑀩𑁆𑀩𑀲𑁄𑀯 𑀨𑀭𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀲𑀫𑀦𑁆𑀢𑀢𑁆𑀣𑁄 𑀓𑀧𑁆𑀧-𑀲𑀤𑁆𑀤𑁄 𑀕𑀳𑀺𑀢𑁄𑀢𑀺 𑀆𑀳 ‘‘𑀅𑀦𑀯𑀲𑁂𑀲𑀁 𑀲𑀫𑀦𑁆𑀢𑀢𑁄’’𑀢𑀺. 𑀈𑀲𑀁 𑀅𑀲𑀫𑀢𑁆𑀢𑀁, 𑀓𑁂𑀯𑀮𑀁 𑀯𑀸 𑀓𑁂𑀯𑀮𑀓𑀧𑁆𑀧𑀁. 𑀪𑀕𑀯𑀢𑁄 𑀆𑀪𑀸𑀬 𑀅𑀦𑁄𑀪𑀸𑀲𑀺𑀢𑀫𑁂𑀯 𑀳𑀺 𑀧𑀤𑁂𑀲𑀁 𑀤𑁂𑀯𑀢𑀸 𑀅𑀢𑁆𑀢𑀦𑁄 𑀧𑀪𑀸𑀬 𑀑𑀪𑀸𑀲𑁂𑀦𑁆𑀢𑀺. 𑀦 𑀳𑀺 𑀪𑀕𑀯𑀢𑁄 𑀧𑀪𑀸 𑀓𑀸𑀬𑀘𑀺 𑀧𑀪𑀸𑀬 𑀅𑀪𑀺𑀪𑀼𑀬𑁆𑀬𑀢𑀺, 𑀲𑀽𑀭𑀺𑀬𑀸𑀤𑀻𑀦𑀫𑁆𑀧𑀺 𑀧𑀪𑀁 𑀲𑀸 𑀅𑀪𑀺𑀪𑀼𑀬𑁆𑀬 𑀢𑀺𑀝𑁆𑀞𑀢𑀻𑀢𑀺.

𑀬𑁂𑀦 ¶ 𑀯𑀸 𑀓𑀸𑀭𑀡𑁂𑀦𑀸𑀢𑀺 𑀳𑁂𑀢𑀼𑀫𑁆𑀳𑀺 𑀇𑀤𑀁 𑀓𑀭𑀡𑀯𑀘𑀦𑀁. 𑀳𑁂𑀢𑀼𑀅𑀢𑁆𑀣𑁄 𑀳𑀺 𑀓𑀺𑀭𑀺𑀬𑀸𑀬 𑀓𑀸𑀭𑀡𑀁, 𑀦 𑀓𑀭𑀡𑀁 𑀯𑀺𑀬 𑀓𑀺𑀭𑀺𑀬𑀢𑁆𑀣𑁄, 𑀢𑀲𑁆𑀫𑀸 𑀦𑀸𑀦𑀧𑁆𑀧𑀓𑀸𑀭-𑀕𑀼𑀡𑀯𑀺𑀲𑁂𑀲𑀸𑀥𑀺𑀕𑀫𑀦𑀢𑁆𑀣𑀸 𑀇𑀥 𑀉𑀧𑀲𑀗𑁆𑀓𑀫𑀦𑀓𑀺𑀭𑀺𑀬𑀸𑀢𑀺 ‘‘𑀅𑀦𑁆𑀦𑁂𑀦 𑀯𑀲𑀢𑀺, 𑀯𑀺𑀚𑁆𑀚𑀸𑀬 𑀯𑀲𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀳𑁂𑀢𑀼𑀅𑀢𑁆𑀣𑀫𑁂𑀯 𑀢𑀁 𑀓𑀭𑀡𑀯𑀘𑀦𑀁 𑀬𑀼𑀢𑁆𑀢𑀁 𑀦 𑀓𑀭𑀡𑀢𑁆𑀣𑀁 𑀢𑀲𑁆𑀲 𑀅𑀬𑀼𑀚𑁆𑀚𑀫𑀸𑀦𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀬𑁂𑀦 𑀯𑀸 𑀓𑀸𑀭𑀡𑁂𑀦𑀸’’𑀢𑀺𑀆𑀤𑀺. 𑀪𑀕𑀯𑀢𑁄 𑀲𑀢𑀢𑀧𑁆𑀧𑀯𑀢𑁆𑀢𑀦𑀺𑀭𑀢𑀺𑀲𑀬-𑀲𑀸𑀤𑀼𑀯𑀺𑀧𑀼𑀮𑀫𑀢𑀭𑀲-𑀲𑀤𑁆𑀥𑀫𑁆𑀫𑀨𑀮𑀢𑀸𑀬 𑀲𑀸𑀤𑀼𑀨𑀮𑀦𑀺𑀘𑁆𑀘𑀨𑀮𑀺𑀢𑀫𑀳𑀸𑀭𑀼𑀓𑁆𑀔𑁂𑀦 𑀪𑀕𑀯𑀸 𑀉𑀧𑀫𑀺𑀢𑁄. 𑀲𑀸𑀤𑀼𑀨𑀮𑀽𑀧𑀪𑁄𑀕𑀸𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑁂𑀦𑁂𑀯 𑀳𑀺 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀲𑀸𑀤𑀼𑀨𑀮𑀢𑀸 𑀕𑀳𑀺𑀢𑀸𑀢𑀺. 𑀉𑀧𑀲𑀗𑁆𑀓𑀫𑀻𑀢𑀺 𑀉𑀧𑀲𑀗𑁆𑀓𑀦𑁆𑀢𑀸. 𑀲𑀫𑁆𑀧𑀢𑁆𑀢𑀓𑀸𑀫𑀢𑀸𑀬 𑀳𑀺 𑀓𑀺𑀜𑁆𑀘𑀺 𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 ¶ 𑀢𑀁𑀢𑀁𑀧𑀤𑁂𑀲𑀸𑀢𑀺𑀓𑁆𑀓𑀫𑀦𑁂𑀦 𑀉𑀧𑀲𑀗𑁆𑀓𑀫𑀺, 𑀉𑀧𑀲𑀗𑁆𑀓𑀦𑁆𑀢𑁄𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺. 𑀢𑁂𑀦𑀸𑀳 ‘‘𑀕𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺, 𑀉𑀧𑀕𑀢𑀸𑀢𑀺 𑀅𑀢𑁆𑀣𑁄. 𑀉𑀧𑀲𑀗𑁆𑀓𑀫𑀺𑀢𑁆𑀯𑀸𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀉𑀧𑀲𑀗𑁆𑀓𑀫𑀦𑀧𑀭𑀺𑀬𑁄𑀲𑀸𑀦𑀤𑀻𑀧𑀦’’𑀦𑁆𑀢𑀺. 𑀢𑀢𑁄𑀢𑀺 𑀬𑀁 𑀞𑀸𑀦𑀁 𑀧𑀢𑁆𑀢𑀸 ‘‘𑀉𑀧𑀲𑀗𑁆𑀓𑀫𑀻’’𑀢𑀺 𑀯𑀼𑀢𑁆𑀢𑀸, 𑀢𑀢𑁄 𑀉𑀧𑀕𑀢𑀝𑁆𑀞𑀸𑀦𑀢𑁄.

𑀕𑀢𑀺𑀦𑀺𑀯𑀢𑁆𑀢𑀺𑀅𑀢𑁆𑀣𑀢𑁄 𑀲𑀸𑀫𑀜𑁆𑀜𑀢𑁄 𑀆𑀲𑀦𑀫𑁆𑀧𑀺 𑀞𑀸𑀦𑀕𑁆𑀕𑀳𑀡𑁂𑀦 𑀕𑀬𑁆𑀳𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀆𑀲𑀦𑀓𑀼𑀲𑀮𑀢𑀸𑀬 𑀏𑀓𑀫𑀦𑁆𑀢𑀁 𑀢𑀺𑀝𑁆𑀞𑀦𑁆𑀢𑀻’’𑀢𑀺. 𑀦𑀺𑀲𑀺𑀦𑁆𑀦𑀸𑀧𑀺 𑀳𑀺 𑀕𑀫𑀦𑀢𑁄 𑀦𑀺𑀯𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀺 𑀞𑀢𑁆𑀯𑀸 𑀦𑀺𑀲𑀻𑀤𑀺𑀢𑀩𑁆𑀩𑀢𑁆𑀢𑀸, 𑀬𑀣𑀸𑀯𑀼𑀢𑁆𑀢𑀝𑁆𑀞𑀸𑀦𑀸𑀤𑀬𑁄𑀧𑀺 𑀆𑀲𑀦𑁂𑀦𑁂𑀯 𑀲𑀗𑁆𑀕𑀳𑀺𑀢𑀸𑀢𑀺. 𑀅𑀢𑀺𑀤𑀽𑀭𑀅𑀘𑁆𑀘𑀸𑀲𑀦𑁆𑀦𑀧𑀝𑀺𑀓𑁆𑀔𑁂𑀧𑁂𑀦 𑀦𑀸𑀢𑀺𑀤𑀽𑀭𑀦𑀘𑁆𑀘𑀸𑀲𑀦𑁆𑀦𑀁 𑀦𑀸𑀫 𑀕𑀳𑀺𑀢𑀁. 𑀢𑀁 𑀧𑀦 𑀅𑀯𑀓𑀁𑀲𑀢𑁄 𑀉𑀪𑀺𑀦𑁆𑀦𑀁 𑀧𑀲𑀸𑀭𑀺𑀢𑀳𑀢𑁆𑀣𑀲𑀗𑁆𑀖𑀝𑁆𑀝𑀦𑁂𑀦 𑀤𑀝𑁆𑀞𑀩𑁆𑀩𑀁. 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸𑀢𑀺 𑀕𑀻𑀯𑀁 𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀧𑀲𑀸𑀭𑁂𑀢𑁆𑀯𑀸.

𑀓𑀸𑀫𑀁 ‘‘𑀓𑀣’’𑀦𑁆𑀢𑀺 𑀅𑀬𑀫𑀸𑀓𑀸𑀭𑀧𑀼𑀘𑁆𑀙𑀸, 𑀢𑀭𑀡𑀸𑀓𑀸𑀭𑁄 𑀇𑀥 𑀧𑀼𑀘𑁆𑀙𑀺𑀢𑁄. 𑀲𑁄 𑀧𑀦 𑀢𑀭𑀡𑀸𑀓𑀸𑀭𑁄 𑀅𑀢𑁆𑀣𑀢𑁄 𑀓𑀸𑀭𑀡𑀫𑁂𑀯𑀸𑀢𑀺 𑀆𑀳 ‘‘𑀓𑀣𑀁 𑀦𑀽𑀢𑀺 𑀓𑀸𑀭𑀡𑀧𑀼𑀘𑁆𑀙𑀸’’𑀢𑀺? 𑀧𑀸𑀓𑀝𑁄 𑀅𑀪𑀺𑀲𑀫𑁆𑀩𑁄𑀥𑀺𑀬𑀁 𑀫𑀳𑀸𑀧𑀣𑀯𑀻𑀓𑀫𑁆𑀧𑀦𑀸𑀤𑀺𑀅𑀦𑁂𑀓𑀘𑁆𑀙𑀭𑀺𑀬𑀧𑀸𑀢𑀼𑀪𑀸𑀯𑀸𑀤𑀺𑀦𑀸.

𑀫𑀭𑀺𑀲𑀦𑀝𑁆𑀞𑁂𑀦 𑀧𑀸𑀧𑀸𑀦𑀁 𑀭𑁄𑀕𑀸𑀤𑀺𑀅𑀦𑀢𑁆𑀣𑀸𑀦𑀁 𑀅𑀪𑀺𑀪𑀯𑀦𑀝𑁆𑀞𑁂𑀦 𑀫𑀸𑀭𑀺𑀲𑁄, 𑀤𑀼𑀓𑁆𑀔𑀭𑀳𑀺𑀢𑁄. 𑀢𑁂𑀦𑀸𑀳 ‘‘𑀦𑀺𑀤𑁆𑀤𑀼𑀓𑁆𑀔𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀦𑀺𑀭𑀬𑀧𑀓𑁆𑀔𑁂 𑀧𑀺𑀬𑀸𑀮𑀧𑀦𑀯𑀘𑀦𑀯𑀲𑁂𑀦 𑀉𑀧𑀘𑀸𑀭𑀯𑀘𑀦𑀜𑁆𑀘𑁂𑀢𑀁 𑀬𑀣𑀸 ‘‘𑀤𑁂𑀯𑀸𑀦𑀁 𑀧𑀺𑀬𑀸’’𑀢𑀺. 𑀢𑁂𑀦𑁂𑀯𑀸𑀳 ‘‘𑀬𑀤𑀺 𑀏𑀯’’𑀦𑁆𑀢𑀺𑀆𑀤𑀺. 𑀲𑀗𑁆𑀓𑀼𑀦𑀸 𑀲𑀗𑁆𑀓𑀽𑀢𑀺 𑀫𑀢𑁆𑀣𑀓𑀢𑁄 𑀲𑀫𑀓𑁄𑀝𑁆𑀝𑀺𑀢𑁂𑀦 𑀬𑀸𑀯 𑀳𑀤𑀬𑀧𑀤𑁂𑀲𑀸 𑀦𑀺𑀩𑁆𑀩𑀺𑀚𑁆𑀛𑀺𑀢𑁆𑀯𑀸 𑀑𑀢𑀺𑀡𑁆𑀡𑁂𑀦 𑀲𑀗𑁆𑀓𑀼𑀦𑀸 𑀧𑀸𑀤𑀢𑀮𑀢𑁄 𑀲𑀫𑀓𑁄𑀝𑁆𑀝𑀺𑀢𑁄 𑀲𑀗𑁆𑀓𑀼 𑀦𑀺𑀩𑁆𑀩𑀺𑀚𑁆𑀛𑀺𑀢𑁆𑀯𑀸 𑀆𑀭𑁄𑀳𑀦𑁆𑀢𑁄 𑀳𑀤𑀬𑁂 𑀳𑀤𑀬𑀲𑁆𑀲 𑀧𑀤𑁂𑀲𑁂 𑀲𑀫𑀸𑀕𑀘𑁆𑀙𑁂𑀬𑁆𑀬, 𑀅𑀣 𑀦𑁂𑀲𑀁 𑀲𑀗𑁆𑀓𑀽𑀦𑀁 𑀲𑀫𑀸𑀕𑀫𑀲𑀫𑀓𑀸𑀮𑁂 𑀦𑀁 𑀬𑀣𑀸𑀢𑀺𑀓𑁆𑀓𑀦𑁆𑀢𑀲𑀗𑁆𑀓𑀼𑀓𑀭𑀡𑀓𑀸𑀮𑀁 𑀚𑀸𑀦𑁂𑀬𑁆𑀬𑀸𑀲𑀺. 𑀓𑀺𑀜𑁆𑀘𑀺 𑀦𑀺𑀫𑀺𑀢𑁆𑀢𑀁 𑀉𑀧𑀸𑀤𑀸𑀬 𑀓𑀺𑀲𑁆𑀫𑀺𑀜𑁆𑀘𑀺 𑀅𑀢𑁆𑀣𑁂 𑀧𑀯𑀢𑁆𑀢𑀲𑁆𑀲 𑀲𑀤𑁆𑀤𑀲𑁆𑀲 𑀢𑀦𑁆𑀦𑀺𑀫𑀺𑀢𑁆𑀢𑀭𑀳𑀺𑀢𑁂 𑀧𑀯𑀢𑁆𑀢𑀺 𑀭𑀼𑀴𑁆𑀳𑀻 𑀦𑀸𑀫 𑀕𑀫𑀦𑀓𑀺𑀭𑀺𑀬𑀸𑀭𑀳𑀺𑀢𑁂 𑀲𑀸𑀲𑀦𑀸𑀤𑀺𑀫𑀢𑀺 𑀧𑀝𑀺𑀧𑀺𑀡𑁆𑀟𑁂 𑀬𑀣𑀸 𑀕𑁄𑀲𑀤𑁆𑀤𑀲𑁆𑀲.

𑀑𑀖𑀫𑀢𑀭𑀻𑀢𑀺 ¶ 𑀬𑁂𑀲𑀁 𑀑𑀖𑀸𑀦𑀁 𑀢𑀭𑀡𑀁 𑀧𑀼𑀘𑁆𑀙𑀺𑀢𑀁, 𑀢𑁂 𑀕𑀡𑀦𑀧𑀭𑀺𑀘𑁆𑀙𑁂𑀤𑀢𑁄 𑀲𑀭𑀽𑀧𑀢𑁄 𑀘 𑀤𑀲𑁆𑀲𑁂𑀢𑀼𑀁 ‘‘𑀘𑀢𑁆𑀢𑀸𑀭𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀘𑀢𑁆𑀢𑀸𑀭𑁄 ¶ 𑀏𑀯 𑀑𑀖𑀸 𑀯𑀼𑀢𑁆𑀢𑀸, 𑀢𑁂 𑀘 𑀓𑀸𑀫𑀸𑀤𑀬𑁄 𑀏𑀯𑀸𑀢𑀺? 𑀦 𑀘𑁄𑀤𑁂𑀢𑀩𑁆𑀩𑀫𑁂𑀢𑀁, 𑀬𑀲𑁆𑀫𑀸 𑀥𑀫𑁆𑀫𑀸𑀦𑀁 𑀲𑀪𑀸𑀯𑀓𑀺𑀘𑁆𑀘𑀯𑀺𑀲𑁂𑀲𑀜𑁆𑀜𑀼𑀦𑀸 𑀪𑀕𑀯𑀢𑀸 𑀲𑀩𑁆𑀩𑀁 𑀜𑁂𑀬𑁆𑀬𑀁 𑀬𑀸𑀣𑀸𑀯𑀢𑁄 𑀅𑀪𑀺𑀲𑀫𑁆𑀩𑀼𑀚𑁆𑀛𑀺𑀢𑁆𑀯𑀸 𑀏𑀢𑁆𑀢𑀓𑀸𑀯 𑀑𑀖𑀸 𑀤𑁂𑀲𑀺𑀢𑀸, 𑀇𑀫𑁂 𑀏𑀯 𑀘 𑀤𑁂𑀲𑀺𑀢𑀸𑀢𑀺. 𑀯𑀝𑁆𑀝𑀲𑁆𑀫𑀺𑀁 𑀑𑀳𑀦𑀦𑁆𑀢𑀺 𑀑𑀲𑀻𑀤𑀸𑀧𑁂𑀦𑁆𑀢𑀻𑀢𑀺 𑀑𑀖𑀸, 𑀑𑀳𑀦𑀦𑁆𑀢𑀺 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀳𑀦𑀦𑁆𑀢𑀺 𑀕𑀸𑀫𑁂𑀦𑁆𑀢𑀺, 𑀢𑀣𑀸𑀪𑀽𑀢𑀸 𑀲𑀢𑁆𑀢𑁂 𑀅𑀥𑁄 𑀕𑀸𑀫𑁂𑀦𑁆𑀢𑀺 𑀦𑀸𑀫. 𑀅𑀬𑀜𑁆𑀘 𑀅𑀢𑁆𑀣𑁄 ‘‘𑀲𑀩𑁆𑀩𑁄𑀧𑀺 𑀘𑁂𑀲𑀸’’𑀢𑀺𑀆𑀤𑀺𑀦𑀸 𑀧𑀭𑀢𑁄 𑀅𑀝𑁆𑀞𑀓𑀣𑀸𑀬𑀫𑁂𑀯 𑀆𑀕𑀫𑀺𑀲𑁆𑀲𑀢𑀺. 𑀓𑀸𑀫𑀦𑀝𑁆𑀞𑁂𑀦 𑀓𑀸𑀫𑁄, 𑀓𑀸𑀫𑁄 𑀘 𑀲𑁄 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦 𑀑𑀖𑁄 𑀘𑀸𑀢𑀺, 𑀓𑀸𑀫𑁂𑀲𑀼 𑀑𑀖𑁄𑀢𑀺 𑀯𑀸 𑀓𑀸𑀫𑁄𑀖𑁄. 𑀪𑀯𑁄𑀖𑁄 𑀦𑀸𑀫 𑀪𑀯𑀭𑀸𑀕𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀙𑀦𑁆𑀤𑀭𑀸𑀕𑁄 𑀛𑀸𑀦𑀦𑀺𑀓𑀦𑁆𑀢𑀺 𑀘𑀸’’𑀢𑀺 𑀯𑀼𑀢𑁆𑀢𑀁. 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀻𑀆𑀤𑀻𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁩.𑁩𑁧𑁨) 𑀧𑀦 ‘‘𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑀭𑀸𑀕𑁄 𑀘𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀞𑀫𑁄 𑀉𑀧𑀧𑀢𑁆𑀢𑀺𑀪𑀯𑁂𑀲𑀼 𑀭𑀸𑀕𑁄, 𑀤𑀼𑀢𑀺𑀬𑁄 𑀓𑀫𑁆𑀫𑀪𑀯𑁂. 𑀪𑀯𑀤𑀺𑀝𑁆𑀞𑀺𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀤𑀺𑀝𑁆𑀞𑀺𑀕𑀢𑀲𑁆𑀲 𑀅𑀪𑀸𑀯𑀢𑁄. ‘‘𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀬𑁄 𑀤𑀺𑀝𑁆𑀞𑁄𑀖𑁄’’𑀢𑀺 𑀯𑀼𑀢𑁆𑀢𑀁, 𑀘𑀢𑀼𑀲𑀘𑁆𑀘𑀦𑁆𑀢𑁄𑀕𑀥𑀢𑁆𑀢𑀸 𑀲𑀩𑁆𑀩𑀲𑁆𑀲 𑀜𑁂𑀬𑁆𑀬𑀲𑁆𑀲 ‘‘𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀅𑀜𑁆𑀜𑀸𑀡𑀁 𑀅𑀯𑀺𑀚𑁆𑀚𑁄𑀖𑁄’’𑀢𑀺 𑀆𑀳.

𑀇𑀤𑀸𑀦𑀺 𑀢𑁂𑀲𑀁 𑀑𑀖𑀲𑀗𑁆𑀔𑀸𑀢𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀧𑀦 𑀓𑀸𑀫𑀕𑀼𑀡𑀸𑀤𑀬𑁄 𑀤𑀲𑁆𑀲𑀺𑀢𑀸 𑀏𑀯. ‘‘𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀙𑀦𑁆𑀤𑀭𑀸𑀕𑁄 𑀓𑀸𑀫𑁄𑀖𑁄’’𑀢𑀺 𑀏𑀢𑁆𑀣 𑀪𑀯𑁄𑀖𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑁄 𑀮𑁄𑀪𑁄 𑀓𑀸𑀫𑁄𑀖𑁄𑀢𑀺 𑀬𑀼𑀢𑁆𑀢𑀁 𑀲𑀺𑀬𑀸. 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑁄 𑀭𑀸𑀕𑁄 𑀪𑀯𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀪𑀯𑁄𑀖𑁄𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑁄, 𑀪𑀯𑁄𑀖𑁄 𑀧𑀦 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀏𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑁄. 𑀢𑁂𑀦𑁂𑀯𑀸𑀳 𑁋 ‘‘𑀪𑀯𑁄𑀖𑁄 𑀘𑀢𑀽𑀲𑀼 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀢𑀲𑁆𑀫𑀸 𑀤𑀺𑀝𑁆𑀞𑀺𑀲𑀳𑀕𑀢𑀮𑁄𑀪𑁄𑀧𑀺 𑀓𑀸𑀫𑁄𑀖𑁄𑀢𑀺 𑀬𑀼𑀢𑁆𑀢𑀁 𑀲𑀺𑀬𑀸. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀤𑀼𑀓𑁆𑀔𑀸𑀦𑀜𑁆𑀳𑀺 𑀓𑀸𑀭𑀡𑀪𑀽𑀢𑀸 𑀓𑀸𑀫𑀸𑀲𑀯𑀸𑀤𑀬𑁄𑀧𑀺 𑀤𑁆𑀯𑀺𑀥𑀸 𑀯𑀼𑀢𑁆𑀢𑀸, 𑀆𑀲𑀯𑀸 𑀏𑀯 𑀘 𑀑𑀖𑀸. 𑀓𑀸𑀫𑀸𑀲𑀯𑀦𑀺𑀤𑁆𑀤𑁂𑀲𑁂 𑀘 𑀓𑀸𑀫𑁂𑀲𑀽𑀢𑀺 𑀓𑀸𑀫𑀭𑀸𑀕𑀤𑀺𑀝𑁆𑀞𑀺𑀭𑀸𑀕𑀸𑀤𑀻𑀦𑀁 𑀆𑀭𑀫𑁆𑀫𑀡𑀪𑀽𑀢𑁂𑀲𑀼 𑀢𑁂𑀪𑀽𑀫𑀓𑁂𑀲𑀼 𑀯𑀢𑁆𑀣𑀼𑀓𑀸𑀫𑁂𑀲𑀽𑀢𑀺 𑀅𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀢𑀢𑁆𑀣 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀸𑀬𑀁 𑀢𑀡𑁆𑀳𑀸 𑀲𑀩𑁆𑀩𑀸𑀧𑀺 𑀦 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀦𑀸𑀫𑀁 𑀦 𑀮𑀪𑀢𑀻𑀢𑀺.

𑀬𑀤𑀺 𑀧𑀦 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀘 𑀭𑀸𑀕𑁄 𑀓𑀸𑀫𑁄𑀖𑁄𑀢𑀺 𑀯𑀼𑀢𑁆𑀢𑁄𑀢𑀺 𑀓𑀢𑁆𑀯𑀸 𑀩𑁆𑀭𑀳𑁆𑀫𑀸𑀦𑀁 𑀯𑀺𑀫𑀸𑀦𑀸𑀤𑀻𑀲𑀼 𑀭𑀸𑀕𑀲𑁆𑀲 𑀤𑀺𑀝𑁆𑀞𑀺𑀭𑀸𑀕𑀲𑁆𑀲 𑀘 𑀓𑀸𑀫𑁄𑀖𑀪𑀸𑀯𑁄 𑀧𑀝𑀺𑀲𑁂𑀥𑀺𑀢𑀩𑁆𑀩𑁄 𑀲𑀺𑀬𑀸, 𑀏𑀯𑀁 𑀲𑀢𑀺 𑀓𑀸𑀫𑁄𑀖𑀪𑀯𑁄𑀖𑀯𑀺𑀦𑀺𑀫𑀼𑀢𑁆𑀢𑁂𑀦 𑀦𑀸𑀫 𑀮𑁄𑀪𑁂𑀦 𑀪𑀯𑀺𑀢𑀩𑁆𑀩𑀁 ¶ . 𑀲𑁄 𑀬𑀤𑀸 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁄 𑀅𑀯𑀺𑀚𑁆𑀚𑁄𑀖𑁄 𑀑𑀖𑀯𑀺𑀧𑁆𑀧𑀬𑀼𑀢𑁆𑀢𑁄𑀢𑀺 𑀤𑁄𑀫𑀦𑀲𑁆𑀲𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀯𑀺𑀬 𑀢𑀲𑁆𑀲𑀧𑀺 𑀑𑀖𑀯𑀺𑀧𑁆𑀧𑀬𑀼𑀢𑁆𑀢𑀢𑀸 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸 ‘‘𑀘𑀢𑀽𑀲𑀼𑀧𑀺 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑀲𑀳𑀕𑀢𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀦𑁆𑀦𑁄 𑀫𑁄𑀳𑁄 𑀲𑀺𑀬𑀸 𑀑𑀖𑀲𑀫𑁆𑀧𑀬𑀼𑀢𑁆𑀢𑁄 𑀲𑀺𑀬𑀸 𑀑𑀖𑀯𑀺𑀧𑁆𑀧𑀬𑀼𑀢𑁆𑀢𑁄’’𑀢𑀺. ‘‘𑀓𑀸𑀫𑁄𑀖𑁄 𑀅𑀝𑁆𑀞𑀲𑀼 𑀮𑁄𑀪𑀲𑀳𑀕𑀢𑁂𑀲𑀼 ¶ 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀚𑁆𑀚𑀢𑀻’’𑀢𑀺, ‘‘𑀓𑀸𑀫𑁄𑀖𑀁 𑀧𑀝𑀺𑀘𑁆𑀘 𑀤𑀺𑀝𑁆𑀞𑁄𑀖𑁄 𑀅𑀯𑀺𑀚𑁆𑀚𑁄𑀖𑁄’’𑀢𑀺 𑀘 𑀯𑀘𑀦𑀢𑁄 𑀤𑀺𑀝𑁆𑀞𑀺𑀲𑀳𑀕𑀢𑁄 𑀓𑀸𑀫𑁄𑀖𑁄 𑀦 𑀳𑁄𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑀣𑀸 𑀳𑁂𑀢𑁆𑀣 ‘‘𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀙𑀦𑁆𑀤𑀭𑀸𑀕𑁄 𑀛𑀸𑀦𑀦𑀺𑀓𑀦𑁆𑀢𑀺 𑀘 𑀪𑀯𑁄𑀖𑁄 𑀦𑀸𑀫𑀸𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑁄 𑀭𑀸𑀕𑁄’’𑀢𑀺.

𑀅𑀥𑁄𑀕𑀫𑀦𑀝𑁆𑀞𑁂𑀦𑀸𑀢𑀺 𑀳𑁂𑀝𑁆𑀞𑀸𑀧𑀯𑀢𑁆𑀢𑀦𑀝𑁆𑀞𑁂𑀦. 𑀳𑁂𑀝𑁆𑀞𑀸𑀧𑀯𑀢𑁆𑀢𑀦𑀜𑁆𑀘𑁂𑀢𑁆𑀣 𑀦 𑀓𑁂𑀯𑀮𑀁 𑀅𑀧𑀸𑀬𑀕𑀫𑀦𑀺𑀬𑀪𑀸𑀯𑁂𑀦, 𑀅𑀣 𑀔𑁄 𑀲𑀁𑀲𑀸𑀭𑀢𑀭𑀓𑀸𑀯𑀭𑁄𑀥𑀦𑁂𑀦𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀉𑀧𑀭𑀺𑀪𑀯𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀸𑀫𑀁 𑀦𑀺𑀩𑁆𑀩𑀸𑀦𑀁 𑀅𑀭𑀽𑀧𑀺𑀪𑀸𑀯𑀸 𑀅𑀤𑁂𑀲𑀁, 𑀦 𑀢𑀲𑁆𑀲 𑀞𑀸𑀦𑀯𑀲𑁂𑀦 𑀉𑀧𑀭𑀺𑀕𑀳𑀡𑀁, 𑀲𑀩𑁆𑀩𑀲𑀗𑁆𑀔𑀢𑀯𑀺𑀦𑀺𑀲𑁆𑀲𑀝𑀢𑁆𑀢𑀸 𑀧𑀦 𑀲𑀩𑁆𑀩𑀲𑁆𑀲𑀧𑀺 𑀪𑀯𑀲𑁆𑀲 𑀉𑀧𑀭𑀻𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀉𑀧𑀭𑀺𑀪𑀯𑀁 𑀦𑀺𑀩𑁆𑀩𑀸𑀦’’𑀦𑁆𑀢𑀺. ‘‘𑀫𑀳𑀸𑀉𑀤𑀓𑁄𑀖𑁄’’𑀢𑀺𑀆𑀤𑀻𑀲𑀼 𑀭𑀸𑀲𑀝𑁆𑀞𑁄 𑀑𑀖-𑀲𑀤𑁆𑀤𑁄𑀢𑀺 ‘‘𑀫𑀳𑀸 𑀳𑁂𑀲𑁄 𑀓𑀺𑀮𑁂𑀲𑀭𑀸𑀲𑀻’’𑀢𑀺 𑀯𑀼𑀢𑁆𑀢𑀁 𑀲𑁂𑀲𑁂𑀲𑀼𑀧𑀻𑀢𑀺 𑀪𑀯𑁄𑀖𑀸𑀤𑀻𑀲𑀼𑀧𑀺.

𑀅𑀧𑁆𑀧𑀢𑀺𑀝𑁆𑀞𑀳𑀦𑁆𑀢𑁄𑀢𑀺 𑀓𑀺𑀮𑁂𑀲𑀸𑀤𑀻𑀦𑀁 𑀯𑀲𑁂𑀦 𑀅𑀲𑀦𑁆𑀢𑀺𑀝𑁆𑀞𑀦𑁆𑀢𑁄, 𑀅𑀲𑀁𑀲𑀻𑀤𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀦𑀸𑀬𑀽𑀳𑀦𑁆𑀢𑁄𑀢𑀺 𑀅𑀪𑀺𑀲𑀗𑁆𑀔𑀸𑀭𑀸𑀤𑀺𑀯𑀲𑁂𑀦 𑀦 𑀆𑀬𑀽𑀳𑀦𑁆𑀢𑁄 𑀫𑀚𑁆𑀛𑀺𑀫𑀁 𑀧𑀝𑀺𑀧𑀤𑀁 𑀯𑀺𑀮𑀗𑁆𑀖𑀺𑀢𑁆𑀯𑀸 𑀦𑀺𑀩𑁆𑀩𑀼𑀬𑁆𑀳𑀦𑁆𑀢𑁄. 𑀢𑁂𑀦𑀸𑀳 𑁋 ‘‘𑀅𑀯𑀸𑀬𑀫𑀦𑁆𑀢𑁄’’𑀢𑀺, 𑀫𑀺𑀘𑁆𑀙𑀸𑀯𑀸𑀬𑀸𑀫𑀯𑀲𑁂𑀦 𑀅𑀯𑀸𑀬𑀫𑀦𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀽𑀴𑁆𑀳𑀦𑁆𑀢𑀺 𑀲𑀁𑀯𑀼𑀢𑀁. 𑀧𑀝𑀺𑀘𑁆𑀙𑀦𑁆𑀦𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀢𑁆𑀣𑀯𑀲𑁂𑀦 𑀯𑀸 𑀲𑀁𑀯𑀼𑀢𑁆𑀢𑀁 𑀕𑀽𑀴𑁆𑀳𑀁, 𑀲𑀤𑁆𑀤𑀯𑀲𑁂𑀦𑀧𑀺 𑀅𑀧𑀸𑀓𑀝𑀁 𑀧𑀝𑀺𑀘𑁆𑀙𑀦𑁆𑀦𑀁 𑀅𑀦𑁆𑀢𑀭𑀤𑀻𑀧𑀸𑀤𑀺𑀓𑁂 𑀞𑀸𑀢𑀩𑁆𑀩𑀝𑁆𑀞𑀸𑀦𑁂. 𑀆𑀬𑀽𑀳𑀦𑁆𑀢𑀸𑀢𑀺 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀯𑀸𑀬𑀫𑀦𑁆𑀢𑀸. 𑀏𑀢𑀁 𑀅𑀢𑁆𑀣𑀚𑀸𑀢𑀁, 𑀏𑀢𑀁 𑀯𑀸 𑀯𑀺𑀲𑁆𑀲𑀚𑁆𑀚𑀦𑀁.

𑀇𑀤𑀸𑀦𑀺 𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀪𑀕𑀯𑀢𑀸 𑀢𑀣𑀸𑀕𑀽𑀴𑁆𑀳𑀁 𑀓𑀢𑁆𑀯𑀸 𑀧𑀜𑁆𑀳𑁄 𑀓𑀣𑀺𑀢𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀁 𑀧𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀺𑀕𑁆𑀕𑀳𑀫𑀼𑀔𑁂𑀦𑀸𑀢𑀺 𑀯𑁂𑀦𑁂𑀬𑁆𑀬𑀸𑀦𑀁 𑀯𑀺𑀦𑀬𑀉𑀧𑀸𑀬𑀪𑀽𑀢𑀦𑀺𑀕𑁆𑀕𑀳𑀯𑀲𑁂𑀦. 𑀢𑁂𑀦𑀸𑀳 𑀬𑁂 𑀧𑀡𑁆𑀟𑀺𑀢𑀫𑀸𑀦𑀺𑀦𑁄’’𑀢𑀺𑀆𑀤𑀺. 𑀧𑀯𑀬𑁆𑀳 𑀧𑀯𑀬𑁆𑀳𑀸𑀢𑀺 𑀑𑀨𑀼𑀡𑀺𑀢𑁆𑀯𑀸 𑀑𑀨𑀼𑀡𑀺𑀢𑁆𑀯𑀸.

𑀲𑁄𑀢𑀺 ¶ 𑀤𑁂𑀯𑀧𑀼𑀢𑁆𑀢𑁄 𑀦𑀺𑀳𑀢𑀫𑀸𑀦𑁄 𑀅𑀳𑁄𑀲𑀺 𑀬𑀣𑀸𑀯𑀺𑀲𑁆𑀲𑀚𑁆𑀚𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀚𑀸𑀦𑀦𑁆𑀢𑁄. 𑀬𑀣𑀸𑀢𑀺 𑀅𑀦𑀺𑀬𑀫𑀯𑀘𑀦𑀁 𑀦𑀺𑀬𑀫𑀦𑀺𑀤𑁆𑀤𑀺𑀝𑁆𑀞𑀁 𑀳𑁄𑀢𑀺, 𑀢𑀁𑀲𑀫𑁆𑀩𑀦𑁆𑀥𑀜𑁆𑀘 𑀓𑀣𑀦𑁆𑀢𑀺 𑀧𑀼𑀘𑁆𑀙𑀸𑀯𑀘𑀦𑀦𑁆𑀢𑀺 𑀢𑀤𑀼𑀪𑀬𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸𑀳𑀁 𑀚𑀸𑀦𑀸𑀫𑀺, 𑀏𑀯𑀁 𑀫𑁂 𑀓𑀣𑁂𑀳𑀻’’𑀢𑀺 𑀆𑀳.

𑀬𑀤𑀸𑀲𑁆𑀯𑀸𑀳𑀦𑁆𑀢𑀺 𑀬𑀤𑀸 𑀲𑀼 𑀅𑀳𑀁, 𑀲𑀼-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁 ‘‘𑀬𑀤𑀺𑀤𑀁 𑀓𑀣𑀁 𑀲𑀽’’𑀢𑀺𑀆𑀤𑀻𑀲𑀼 𑀯𑀺𑀬. 𑀲𑀩𑁆𑀩𑀧𑀤𑁂𑀲𑀽𑀢𑀺 ‘‘𑀢𑀤𑀸𑀲𑁆𑀲𑀼 𑀲𑀁𑀲𑀻𑀤𑀸𑀫𑀻’’𑀢𑀺𑀆𑀤𑀻𑀲𑀼 𑀢𑀻𑀲𑀼𑀧𑀺 𑀧𑀤𑁂𑀲𑀼. 𑀅𑀢𑀭𑀦𑁆𑀢𑁄𑀢𑀺 𑀑𑀖𑀸𑀦𑀁 𑀅𑀢𑀺𑀓𑁆𑀓𑀫𑀦𑀢𑁆𑀣𑀁 𑀢𑀭𑀡𑀧𑁆𑀧𑀬𑁄𑀕𑀁 𑀅𑀓𑀭𑁄𑀦𑁆𑀢𑁄. 𑀢𑀢𑁆𑀣𑁂𑀯𑀸𑀢𑀺 𑀑𑀖𑀦𑀺𑀬𑀑𑀖𑁂𑀲𑀼 𑀏𑀯. 𑀑𑀲𑀻𑀤𑀸𑀫𑀻𑀢𑀺 𑀦𑀺𑀫𑀼𑀚𑁆𑀚𑀸𑀫𑀺 ¶ 𑀑𑀖𑁂𑀳𑀺 𑀅𑀚𑁆𑀛𑁄𑀢𑁆𑀣𑀝𑁄 𑀳𑁄𑀫𑀺. 𑀦𑀺𑀩𑁆𑀩𑀼𑀬𑁆𑀳𑀸𑀫𑀻𑀢𑀺 𑀑𑀖𑁂𑀳𑀺 𑀦𑀺𑀩𑁆𑀩𑀽𑀴𑁆𑀳𑁄 𑀳𑁄𑀫𑀺. 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀲𑀁𑀲𑀻𑀤𑀦𑁆𑀢𑁄. 𑀅𑀢𑀺𑀯𑀢𑁆𑀢𑀸𑀫𑀻𑀢𑀺 𑀅𑀦𑀼𑀧𑀬𑁄𑀕𑀁 𑀅𑀢𑀺𑀓𑁆𑀓𑀫𑀸𑀫𑀺, 𑀅𑀧𑀦𑀺𑀥𑀸𑀦𑀯𑀲𑁂𑀦 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀯𑀺𑀭𑀸𑀥𑁂𑀫𑀻𑀢𑀺 𑀅𑀢𑁆𑀣𑁄. 𑀞𑀸𑀦𑁂 𑀘 𑀯𑀸𑀬𑀸𑀫𑁂 𑀘𑀸𑀢𑀺 𑀯𑀓𑁆𑀔𑀫𑀸𑀦𑀯𑀺𑀪𑀸𑀕𑁂 𑀧𑀢𑀺𑀝𑁆𑀞𑀳𑀦𑁂 𑀯𑀸𑀬𑀸𑀫𑁂 𑀘 𑀤𑁄𑀲𑀁 𑀤𑀺𑀲𑁆𑀯𑀸𑀢𑀺 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑁂𑀲𑀼 𑀲𑀁𑀲𑀻𑀤𑀦𑀦𑀺𑀩𑁆𑀩𑀼𑀬𑁆𑀳𑀦𑀲𑀗𑁆𑀔𑀸𑀢𑀁 𑀢𑀭𑀡𑀲𑁆𑀲 𑀯𑀺𑀩𑀦𑁆𑀥𑀦𑀪𑀽𑀢𑀁 𑀆𑀤𑀻𑀦𑀯𑀁 𑀤𑀺𑀲𑁆𑀯𑀸𑀦. 𑀇𑀤𑀁 𑀪𑀕𑀯𑀢𑀸 𑀩𑁄𑀥𑀺𑀫𑀽𑀮𑁂 𑀅𑀢𑁆𑀢𑀦𑀸 𑀧𑀯𑀢𑁆𑀢𑀺𑀢-𑀧𑀼𑀩𑁆𑀩𑀪𑀸𑀕-𑀫𑀦𑀲𑀺𑀓𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀢𑀺𑀝𑁆𑀞𑀦𑁆𑀢𑁄 𑀅𑀯𑀸𑀬𑀫𑀦𑁆𑀢𑁄𑀢𑀺 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀓𑀭𑀡𑀓𑀺𑀮𑁂𑀲𑀸𑀤𑀻𑀦𑀁 𑀧𑀭𑀺𑀯𑀚𑁆𑀚𑀦𑁂𑀦 𑀅𑀲𑀁𑀲𑀻𑀤𑀦𑁆𑀢𑁄 𑀅𑀦𑀺𑀩𑁆𑀩𑀼𑀬𑁆𑀳𑀦𑁆𑀢𑁄. 𑀤𑁂𑀯𑀢𑀸𑀬𑀧𑀺 𑀧𑀝𑀺𑀯𑀺𑀤𑁆𑀥𑁄 𑀢𑀤𑀢𑁆𑀣𑁄 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑀢𑀸𑀬 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀥𑀫𑁆𑀫𑀸𑀦𑀁 𑀧𑀭𑀺𑀧𑀓𑁆𑀓𑀢𑁆𑀢𑀸. 𑀦 𑀧𑀦 𑀧𑀸𑀓𑀝𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀽𑀆𑀤𑀻𑀦𑀁, 𑀉𑀕𑁆𑀖𑀝𑀺𑀢𑀜𑁆𑀜𑀽𑀦𑀁 𑀧𑀦 𑀬𑀣𑀸 𑀢𑀲𑁆𑀲𑀸 𑀤𑁂𑀯𑀢𑀸𑀬, 𑀢𑀣𑀸 𑀧𑀸𑀓𑀝𑁄 𑀏𑀯𑀸𑀢𑀺. 𑀲𑀢𑁆𑀢 𑀤𑀼𑀓𑀸 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀭𑀽𑀧𑀸 𑀤𑀲𑁆𑀲𑀺𑀢𑀸 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀁. 𑀓𑀺𑀮𑁂𑀲𑀯𑀲𑁂𑀦 𑀲𑀦𑁆𑀢𑀺𑀝𑁆𑀞𑀦𑁆𑀢𑁄𑀢𑀺 𑀮𑁄𑀪𑀸𑀤𑀻𑀳𑀺 𑀅𑀪𑀺𑀪𑀽𑀢𑀢𑀸𑀬 𑀲𑀁𑀲𑀸𑀭𑁂 𑀧𑀢𑀺𑀝𑁆𑀞𑀳𑀦𑁆𑀢𑁄 𑀲𑀫𑁆𑀫𑀸 𑀅𑀧𑁆𑀧𑀝𑀺𑀧𑀚𑁆𑀚𑀦𑁂𑀦 𑀢𑀢𑁆𑀣𑁂𑀯 𑀲𑀁𑀲𑀻𑀤𑀢𑀺 𑀦𑀸𑀫. 𑀅𑀪𑀺𑀲𑀗𑁆𑀔𑀸𑀭𑀯𑀲𑁂𑀦𑀸𑀢𑀺 𑀢𑀢𑁆𑀣𑁂𑀯𑀸𑀪𑀺𑀲𑀗𑁆𑀔𑀸𑀭𑀘𑁂𑀢𑀦𑀸𑀬 𑀘𑁂𑀢𑁂𑀦𑁆𑀢𑁄 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑁄𑀕𑁆𑀬𑀲𑁆𑀲 𑀔𑀡𑀲𑁆𑀲 𑀅𑀢𑀺𑀯𑀢𑁆𑀢𑀦𑁂𑀦 𑀦𑀺𑀩𑁆𑀩𑀼𑀬𑁆𑀳𑀢𑀺 𑀦𑀸𑀫. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀤𑀼𑀓𑁂𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 𑀘 𑀯𑀝𑁆𑀝𑀫𑀽𑀮𑀓𑀸 𑀓𑀺𑀮𑁂𑀲𑀸𑀢𑀺 𑀢𑁂𑀲𑀁 𑀯𑀲𑁂𑀦 𑀲𑀁𑀲𑀸𑀭𑁂 𑀅𑀯𑀝𑁆𑀞𑀸𑀦𑀁 𑀢𑀁𑀢𑀁𑀓𑀫𑁆𑀫𑀼𑀦𑀸 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀅𑀪𑀺𑀦𑀺𑀩𑁆𑀩𑀢𑁆𑀢𑀺, 𑀓𑀺𑀮𑁂𑀲𑀸 𑀧𑀦 𑀢𑁂𑀲𑀁 𑀧𑀘𑁆𑀘𑀬𑀫𑀢𑁆𑀢𑀁. 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀅𑀧𑀭𑀸𑀧𑀭𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁄 𑀲𑀁𑀲𑀸𑀭𑁂 𑀦𑀺𑀩𑁆𑀩𑀼𑀬𑁆𑀳𑀢𑀺 𑀦𑀸𑀫𑀸𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀤𑀲𑁆𑀲𑀦𑀯𑀲𑁂𑀦 𑀧𑀞𑀫𑀤𑀼𑀓𑁄 𑀯𑀼𑀢𑁆𑀢𑁄. 𑀇𑀫𑁂 𑀲𑀢𑁆𑀢𑀸 𑀲𑀁𑀲𑀸𑀭𑁂 𑀧𑀭𑀺𑀩𑁆𑀪𑀫𑀦𑁆𑀢𑀸 𑀤𑀼𑀯𑀺𑀥𑀸 𑀢𑀡𑁆𑀳𑀸𑀘𑀭𑀺𑀢𑀸 𑀤𑀺𑀝𑁆𑀞𑀺𑀘𑀭𑀺𑀢𑀸 𑀘𑀸𑀢𑀺 𑀢𑁂𑀲𑀁 𑀲𑀁𑀲𑀸𑀭𑀦𑀸𑀬𑀺𑀓𑀪𑀽𑀢𑀸𑀦𑀁 𑀥𑀫𑁆𑀫𑀸𑀦𑀁 𑀯𑀲𑁂𑀦 𑀲𑀦𑁆𑀢𑀺𑀝𑁆𑀞𑀦𑀁, 𑀢𑀤𑀜𑁆𑀜𑁂𑀲𑀁 𑀧𑀯𑀢𑁆𑀢𑀺𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 ¶ 𑀆𑀬𑀽𑀳𑀦𑀦𑁆𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀤𑀲𑁆𑀲𑀦𑀯𑀲𑁂𑀦 𑀤𑀼𑀢𑀺𑀬𑀤𑀼𑀓𑁄 𑀯𑀼𑀢𑁆𑀢𑁄. 𑀲𑀁𑀬𑁄𑀚𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀤𑀲𑁆𑀲𑀦𑀲𑀪𑀸𑀯𑀸𑀬 𑀢𑀡𑁆𑀳𑀸𑀬 𑀯𑀲𑁂𑀦 𑀯𑀺𑀲𑁂𑀲𑀢𑁄 𑀧𑀢𑀺𑀝𑁆𑀞𑀸𑀦𑀁, 𑀅𑀫𑀼𑀢𑁆𑀢𑀺𑀫𑀕𑁆𑀕𑁂 𑀫𑀼𑀢𑁆𑀢𑀺𑀫𑀕𑁆𑀕𑀧𑀭𑀸𑀫𑀸𑀲𑀢𑁄 𑀢𑀣𑀸 𑀆𑀬𑀽𑀳𑀦𑀫𑁆𑀧𑀺 𑀤𑀺𑀝𑁆𑀞𑀺𑀬𑀸 𑀯𑀲𑁂𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀢𑀢𑀺𑀬𑀤𑀼𑀓𑁄 𑀯𑀼𑀢𑁆𑀢𑁄. 𑀘𑀢𑀼𑀢𑁆𑀣𑀤𑀼𑀓𑁂 𑀧𑀦 𑀅𑀥𑀺𑀧𑁆𑀧𑀸𑀬𑁄 𑀅𑀝𑁆𑀞𑀓𑀣𑀸𑀬 𑀏𑀯 𑀯𑀺𑀪𑀸𑀯𑀺𑀢𑁄. 𑀬𑀲𑁆𑀫𑀸 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸’’𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑁄 𑀅𑀭𑀽𑀧𑀭𑀸𑀕𑀁, 𑀅𑀲𑀜𑁆𑀜𑀽𑀧𑀕𑀁 𑀯𑀸 𑀅𑀯𑀺𑀫𑁄𑀓𑁆𑀔𑀁𑀬𑁂𑀯 𑀯𑀺𑀫𑁄𑀓𑁆𑀔𑁄𑀢𑀺 𑀕𑀳𑁂𑀢𑁆𑀯𑀸 𑀲𑀁𑀲𑀸𑀭𑁂 𑀏𑀯 𑀑𑀮𑀻𑀬𑀢𑀺. 𑀢𑁂𑀦𑀸𑀳 ‘‘𑀑𑀮𑀻𑀬𑀦𑀸𑀪𑀺𑀦𑀺𑀯𑁂𑀲𑀸 𑀳𑀺 𑀪𑀯𑀤𑀺𑀝𑁆𑀞𑀻’’𑀢𑀺. 𑀬𑀲𑁆𑀫𑀸 𑀧𑀦 𑀓𑀸𑀫𑀪𑀯𑀸𑀤𑀻𑀲𑀼 𑀬𑀁 𑀯𑀸 𑀢𑀁 𑀯𑀸 𑀪𑀯𑀁 𑀧𑀢𑁆𑀯𑀸 𑀅𑀢𑁆𑀢𑀸 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺, 𑀦 𑀳𑁄𑀢𑀺 𑀧𑀭𑀁 𑀫𑀭𑀡𑀸𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑁄 𑀪𑀯𑀯𑀺𑀧𑁆𑀧𑀫𑁄𑀓𑁆𑀔𑀸𑀯𑀳𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀧𑁆𑀧𑀝𑀺𑀧𑀚𑁆𑀚𑀦𑁂𑀦 𑀢𑀁 𑀅𑀢𑀺𑀯𑀢𑁆𑀢𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑀺𑀥𑀸𑀯𑀦𑀸𑀪𑀺𑀦𑀺𑀯𑁂𑀲𑀸 𑀯𑀺𑀪𑀯𑀤𑀺𑀝𑁆𑀞𑀻’’𑀢𑀺.

𑀮𑀻𑀦𑀯𑀲𑁂𑀦 𑀲𑀦𑁆𑀢𑀺𑀝𑁆𑀞𑀦𑁆𑀢𑁄𑀢𑀺 𑀓𑁄𑀲𑀚𑁆𑀚𑀸𑀤𑀺𑀯𑀲𑁂𑀦 𑀲𑀁𑀓𑁄𑀘𑀸𑀧𑀚𑁆𑀚𑀦𑁂𑀦 𑀲𑀫𑁆𑀫𑀸 𑀅𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑁄. 𑀉𑀤𑁆𑀥𑀘𑁆𑀘𑀯𑀲𑁂𑀦 𑀆𑀬𑀽𑀳𑀦𑁆𑀢𑁄𑀢𑀺 𑀲𑀫𑁆𑀫𑀸𑀲𑀫𑀸𑀥𑀺𑀦𑁄 𑀅𑀪𑀸𑀯𑁂𑀦 𑀯𑀺𑀓𑁆𑀔𑁂𑀧𑀯𑀲𑁂𑀦 𑀧𑀜𑁆𑀘𑀫𑁄 𑀤𑀼𑀓𑁄 𑀯𑀼𑀢𑁆𑀢𑁄. 𑀬𑀣𑀸 𑀓𑀸𑀫𑀲𑀼𑀔𑀁 𑀧𑀯𑀺𑀝𑁆𑀞𑀲𑁆𑀲 𑀲𑀫𑀸𑀥𑀸𑀦𑀁 𑀦𑀢𑁆𑀣𑀺 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑀺𑀝𑁆𑀞𑀢𑁆𑀢𑀸, 𑀏𑀯𑀁 𑀅𑀢𑁆𑀢𑀧𑀭𑀺𑀢𑀸𑀧𑀦𑀫𑀦𑀼𑀬𑀼𑀢𑁆𑀢𑀲𑁆𑀲 𑀓𑀸𑀬𑀲𑁆𑀲 ¶ 𑀉𑀧𑀓𑁆𑀓𑀺𑀮𑀺𑀝𑁆𑀞𑀢𑁆𑀢𑀸. 𑀇𑀢𑀺 𑀘𑀺𑀢𑁆𑀢𑀓𑀸𑀬𑀧𑀭𑀺𑀓𑁆𑀓𑀺𑀮𑁂𑀲𑀓𑀭𑀸 𑀤𑁆𑀯𑁂 𑀅𑀦𑁆𑀢𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑀢𑀸𑀬 𑀲𑀁𑀲𑀻𑀤𑀦𑀦𑀺𑀩𑁆𑀩𑀼𑀬𑁆𑀳𑀦𑀦𑀺𑀫𑀺𑀢𑁆𑀢𑀸 𑀯𑀼𑀢𑁆𑀢𑀸 𑀙𑀝𑁆𑀞𑀤𑀼𑀓𑁂. 𑀧𑀼𑀩𑁆𑀩𑁂 𑀲𑀧𑁆𑀧𑀤𑁂𑀲𑀢𑁄𑀯 𑀲𑀁𑀓𑀺𑀮𑁂𑀲𑀥𑀫𑁆𑀫𑀸 ‘‘𑀲𑀁𑀲𑀻𑀤𑀦𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀤𑀲𑁆𑀲𑀺𑀢𑀸𑀢𑀺 𑀇𑀤𑀸𑀦𑀺 𑀦𑀺𑀧𑁆𑀧𑀤𑁂𑀲𑀢𑁄 𑀤𑀲𑁆𑀲𑀦𑀯𑀲𑁂𑀦, 𑀧𑀼𑀩𑁆𑀩𑁂 𑀘 𑀲𑀸𑀥𑀸𑀭𑀡𑀢𑁄 𑀅𑀪𑀺𑀲𑀗𑁆𑀔𑀸𑀭𑀥𑀫𑁆𑀫𑀸 ‘‘𑀦𑀺𑀩𑁆𑀩𑀼𑀬𑁆𑀳𑀦𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀤𑀲𑁆𑀲𑀺𑀢𑀸𑀢𑀺 𑀇𑀤𑀸𑀦𑀺 𑀧𑀼𑀜𑁆𑀜𑀸𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁂 𑀏𑀯 ‘‘𑀆𑀬𑀽𑀳𑀦𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀤𑀲𑁆𑀲𑀦𑀯𑀲𑁂𑀦 𑀲𑀢𑁆𑀢𑀫𑀤𑀼𑀓𑁄 𑀯𑀼𑀢𑁆𑀢𑁄. 𑀏𑀯𑀜𑁆𑀳𑀺 𑀤𑀼𑀕𑁆𑀕𑀢𑀺𑀲𑀼𑀕𑀢𑀽𑀧𑀧𑀢𑁆𑀢𑀺𑀯𑀲𑁂𑀦 𑀲𑀁𑀲𑀻𑀤𑀦𑀦𑀺𑀩𑁆𑀩𑀼𑀬𑁆𑀳𑀦𑀸𑀦𑀺 𑀯𑀺𑀪𑀚𑁆𑀚 𑀤𑀲𑁆𑀲𑀺𑀢𑀸𑀦𑀺 𑀳𑁄𑀦𑁆𑀢𑀻𑀢𑀺. 𑀢𑁂𑀦𑁂𑀯𑀸𑀳 ‘‘𑀯𑀼𑀢𑁆𑀢𑀫𑁆𑀧𑀺 𑀘𑁂𑀢’’𑀦𑁆𑀢𑀺𑀆𑀤𑀺. 𑀅𑀥𑁄𑀪𑀸𑀕𑀁 𑀤𑀼𑀕𑁆𑀕𑀢𑀺𑀁 𑀕𑀫𑁂𑀦𑁆𑀢𑀻𑀢𑀺 𑀅𑀥𑁄𑀪𑀸𑀕𑀗𑁆𑀕𑀫𑀦𑀻𑀬𑀸 𑀅𑀦𑀼𑀦𑀸𑀲𑀺𑀓𑀮𑁄𑀧𑀁 𑀅𑀓𑀢𑁆𑀯𑀸. 𑀢𑀣𑀸 𑀉𑀧𑀭𑀺𑀪𑀸𑀕𑀁 𑀕𑀫𑁂𑀦𑁆𑀢𑀻𑀢𑀺 𑀉𑀧𑀭𑀺𑀪𑀸𑀕𑀗𑁆𑀕𑀫𑀦𑀻𑀬𑀸.

𑀏𑀢𑁆𑀣 𑀘 𑀑𑀖𑀢𑀭𑀡𑀁 𑀧𑀼𑀘𑁆𑀙𑀺𑀢𑁂𑀦 𑀪𑀕𑀯𑀢𑀸 ‘‘𑀅𑀧𑁆𑀧𑀢𑀺𑀝𑁆𑀞𑀁 𑀅𑀦𑀸𑀬𑀽𑀳’’𑀦𑁆𑀢𑀺 𑀢𑀲𑁆𑀲 𑀧𑀳𑀸𑀦𑀗𑁆𑀕𑀫𑁂𑀯 𑀤𑀲𑁆𑀲𑀺𑀢𑀁, 𑀦 𑀲𑀫𑁆𑀧𑀬𑁄𑀕𑀗𑁆𑀕𑀦𑁆𑀢𑀺? 𑀦 𑀏𑀯𑀁 𑀤𑀝𑁆𑀞𑀩𑁆𑀩𑀁, 𑀬𑀸𑀯𑀢𑀸 𑀬𑁂𑀦 𑀧𑀢𑀺𑀝𑁆𑀞𑀸𑀦𑀁 𑀳𑁄𑀢𑀺, 𑀬𑁂𑀦 𑀘 𑀆𑀬𑀽𑀳𑀦𑀁, 𑀢𑀤𑀼𑀪𑀬𑀧𑀝𑀺𑀓𑁆𑀔𑁂𑀧𑀫𑀼𑀔𑁂𑀦 𑀢𑀧𑁆𑀧𑀝𑀺𑀧𑀓𑁆𑀔𑀥𑀫𑁆𑀫𑀤𑀲𑁆𑀲𑀦𑀫𑁂𑀢𑀦𑁆𑀢𑀺. 𑀦 𑀳𑁂𑀲 𑀅-𑀓𑀸𑀭𑁄 𑀓𑁂𑀯𑀮𑀁 𑀧𑀝𑀺𑀲𑁂𑀥𑁂, 𑀅𑀣 ¶ 𑀔𑁄 𑀧𑀝𑀺𑀧𑀓𑁆𑀔𑁂 ‘‘𑀅𑀓𑀼𑀲𑀮𑀸 𑀥𑀫𑁆𑀫𑀸, 𑀅𑀳𑀺𑀢𑁄, 𑀅𑀥𑀫𑁆𑀫𑁄’’𑀢𑀺𑀆𑀤𑀻𑀲𑀼 𑀯𑀺𑀬, 𑀢𑀲𑁆𑀫𑀸 𑀅𑀧𑁆𑀧𑀢𑀺𑀝𑁆𑀞𑀁 𑀅𑀦𑀸𑀬𑀽𑀳𑀦𑁆𑀢𑀺 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀸𑀦𑀁 𑀧𑀝𑀺𑀧𑀓𑁆𑀔𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁄 𑀢𑀣𑀸𑀧𑀯𑀢𑁆𑀢𑀺𑀳𑁂𑀢𑀽𑀯𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀔𑁄𑀢𑀺 𑀘 𑀅𑀯𑀥𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄 ‘‘𑀅𑀲𑁆𑀲𑁄𑀲𑀺 𑀔𑁄’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧) 𑀯𑀺𑀬. 𑀢𑁂𑀦 𑀅𑀧𑁆𑀧𑀢𑀺𑀝𑁆𑀞𑀸𑀦𑀲𑁆𑀲 𑀏𑀓𑀁𑀲𑀺𑀓𑀢𑀁 𑀤𑀲𑁆𑀲𑁂𑀢𑀺. 𑀲𑁄𑀬𑀁 𑀔𑁄-𑀲𑀤𑁆𑀤𑁄 ‘‘𑀅𑀦𑀸𑀬𑀽𑀳’’𑀦𑁆𑀢𑀺 𑀏𑀢𑁆𑀣𑀸𑀧𑀺 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑁄. 𑀅𑀦𑀸𑀬𑀽𑀳𑀦𑀫𑁆𑀧𑀺 𑀳𑀺 𑀏𑀓𑀁𑀲𑀺𑀓𑀫𑁂𑀯𑀸𑀢𑀺 𑀢𑀲𑁆𑀲 𑀧𑀝𑀺𑀧𑀓𑁆𑀔𑁄 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀅𑀭𑀺𑀬𑀫𑀕𑁆𑀕𑁄. 𑀢𑁂𑀦 𑀳𑀺 𑀑𑀖𑀢𑀭𑀡𑀁 𑀳𑁄𑀢𑀺, 𑀦 𑀅𑀜𑁆𑀜𑀣𑀸. 𑀏𑀯𑀫𑀬𑀁 𑀬𑀣𑀸𑀦𑀼𑀲𑀦𑁆𑀥𑀺𑀤𑁂𑀲𑀦𑀸 𑀓𑀢𑀸, 𑀤𑁂𑀯𑀢𑀸 𑀘 𑀲𑀳𑀯𑀺𑀧𑀲𑁆𑀲𑀦𑀁 𑀫𑀕𑁆𑀕𑀁 𑀧𑀝𑀺𑀯𑀺𑀚𑁆𑀛𑀻𑀢𑀺 𑀧𑀞𑀫𑀨𑀮𑁂 𑀧𑀢𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀫𑀁 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦’’𑀦𑁆𑀢𑀺𑀆𑀤𑀺.

‘‘𑀘𑀺𑀭𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑀁 𑀧𑀤𑀦𑁆𑀢𑀭𑀫𑁂𑀢𑀦𑁆𑀢𑀺 𑀆𑀳 ‘‘𑀘𑀺𑀭𑀲𑁆𑀲 𑀓𑀸𑀮𑀲𑁆𑀲𑀸’’𑀢𑀺 𑀬𑀣𑀸 ‘‘𑀫𑀫𑀁 𑀯𑀸, 𑀪𑀺𑀓𑁆𑀔𑀯𑁂’’𑀢𑀺 (𑀤𑀻. 𑀦𑀺. 𑁧.𑁫-𑁬) 𑀏𑀢𑁆𑀣 ‘‘𑀫𑀫𑀸’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑀁 𑀧𑀤𑀦𑁆𑀢𑀭𑀁 𑀫𑀫𑀦𑁆𑀢𑀺. 𑀦 𑀤𑀺𑀝𑁆𑀞𑀧𑀼𑀩𑁆𑀩𑀸𑀢𑀺 𑀅𑀤𑀲𑁆𑀲𑀸𑀯𑀻. 𑀅𑀤𑀲𑁆𑀲𑀸𑀯𑀺𑀢𑀸 𑀘 𑀤𑀺𑀲𑁆𑀯𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀅𑀲𑀺𑀤𑁆𑀥𑀢𑀸𑀬 𑀯𑁂𑀤𑀺𑀢𑀩𑁆𑀩𑀸. 𑀅𑀜𑁆𑀜𑀣𑀸 𑀓𑀸 𑀦𑀸𑀫 𑀲𑀸 𑀤𑁂𑀯𑀢𑀸, 𑀬𑀸 𑀪𑀕𑀯𑀦𑁆𑀢𑀁 𑀦 𑀤𑀺𑀝𑁆𑀞𑀯𑀢𑀻? 𑀢𑁂𑀦𑀸𑀳 ‘‘𑀓𑀺𑀁 𑀧𑀦𑀺𑀫𑀸𑀬𑀸’’𑀢𑀺𑀆𑀤𑀺. 𑀤𑀲𑁆𑀲𑀦𑀁 𑀉𑀧𑀸𑀤𑀸𑀬 𑀏𑀯𑀁 𑀯𑀢𑁆𑀢𑀼𑀁 𑀯𑀢𑁆𑀢𑀢𑀻𑀢𑀺 𑀬𑀤𑀸 𑀓𑀤𑀸𑀘𑀺 𑀓𑀜𑁆𑀘𑀺 𑀧𑀺𑀬𑀚𑀸𑀢𑀺𑀓𑀁 𑀤𑀺𑀲𑁆𑀯𑀸 𑀢𑀁 𑀤𑀲𑁆𑀲𑀦𑀁 𑀉𑀧𑀸𑀤𑀸𑀬 ‘‘𑀘𑀺𑀭𑁂𑀦 𑀯𑀢 𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀧𑀲𑁆𑀲𑀸𑀫𑀸’’𑀢𑀺 𑀅𑀤𑀺𑀝𑁆𑀞𑀧𑀼𑀩𑁆𑀩𑀁 𑀤𑀺𑀝𑁆𑀞𑀧𑀼𑀩𑁆𑀩𑀁 𑀯𑀸 𑀏𑀯𑀁 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺, 𑀅𑀬𑀁 𑀮𑁄𑀓𑁂 𑀦𑀺𑀭𑀼𑀴𑁆𑀳𑁂 𑀲𑀫𑀼𑀤𑀸𑀘𑀸𑀭𑁄𑀢𑀺 𑀤𑀲𑁆𑀲𑁂𑀢𑀺. 𑀩𑁆𑀭𑀳𑁆𑀫𑀁 𑀯𑀸 𑀯𑀼𑀘𑁆𑀘𑀢𑀺 𑀅𑀭𑀺𑀬𑀫𑀕𑁆𑀕𑁄, 𑀢𑀲𑁆𑀲 𑀅𑀡𑀦𑀢𑁄 𑀚𑀸𑀦𑀦𑀢𑁄 𑀧𑀝𑀺𑀯𑀺𑀚𑁆𑀛𑀦𑀢𑁄 𑀩𑁆𑀭𑀸𑀳𑁆𑀫𑀡𑁄. 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑁂𑀦𑀸𑀢𑀺 𑀓𑀺𑀮𑁂𑀲𑀸𑀦𑀁 ¶ 𑀅𑀘𑁆𑀘𑀦𑁆𑀢𑀲𑀫𑀼𑀘𑁆𑀙𑁂𑀤𑀲𑀗𑁆𑀔𑀸𑀢𑁂𑀦 𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀼𑀢𑀁 𑀲𑀫𑁆𑀫𑀤𑁂𑀯 𑀯𑀽𑀧𑀲𑀦𑁆𑀢-𑀲𑀩𑁆𑀩𑀓𑀺𑀮𑁂𑀲𑀤𑀭𑀣-𑀧𑀭𑀺𑀴𑀸𑀳𑀁. 𑀆𑀲𑀢𑁆𑀢𑀯𑀺𑀲𑀢𑁆𑀢𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑀺𑀲𑀢𑀸𑀤𑀺𑀆𑀓𑀸𑀭𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀯𑀺𑀲𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀝𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀸𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀓𑁆𑀓𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀁𑀯𑀸𑀤𑀺𑀓𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀁 𑀳𑀭𑀢𑀻𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀫𑀽𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀨𑀮𑀸𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀧𑀭𑀺𑀪𑁄𑀕𑁄𑀢𑀺 𑀯𑀺𑀲𑀢𑁆𑀢𑀺𑀓𑀸, 𑀯𑀺𑀲𑀸𑀮𑀸 𑀯𑀸 𑀧𑀦 𑀲𑀸 𑀢𑀡𑁆𑀳𑀸 𑀭𑀽𑀧𑁂 𑀲𑀤𑁆𑀤𑁂 𑀕𑀦𑁆𑀥𑁂 𑀭𑀲𑁂 𑀨𑁄𑀝𑁆𑀞𑀩𑁆𑀩𑁂 𑀥𑀫𑁆𑀫𑁂 𑀓𑀼𑀮𑁂 𑀕𑀡𑁂 𑀯𑀺𑀲𑀢𑀸 𑀯𑀺𑀢𑁆𑀣𑀢𑀸𑀢𑀺 𑀯𑀺𑀲𑀢𑁆𑀢𑀺𑀓𑀸’’𑀢𑀺 (𑀫𑀳𑀸𑀦𑀺. 𑁩).

𑀢𑀢𑁆𑀣 ¶ 𑀯𑀺𑀲𑀢𑀸𑀢𑀺 𑀯𑀺𑀢𑁆𑀣𑀢𑀸 𑀭𑀽𑀧𑀸𑀤𑀻𑀲𑀼 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼 𑀅𑀪𑀺𑀩𑁆𑀬𑀸𑀧𑀦𑀯𑀲𑁂𑀦 𑀯𑀺𑀲𑀝𑀸𑀢𑀺 𑀧𑀼𑀭𑀺𑀫𑀯𑀘𑀦𑀫𑁂𑀯 𑀢-𑀓𑀸𑀭𑀲𑁆𑀲 𑀝-𑀓𑀸𑀭𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀺𑀲𑀸𑀮𑀸𑀢𑀺 𑀯𑀺𑀧𑀼𑀮𑀸. 𑀯𑀺𑀲𑀓𑁆𑀓𑀢𑀻𑀢𑀺 𑀧𑀭𑀺𑀲𑀓𑁆𑀓𑀢𑀺, 𑀲𑀳𑀢𑀺 𑀯𑀸. 𑀭𑀢𑁆𑀢𑁄 𑀳𑀺 𑀭𑀸𑀕𑀯𑀢𑁆𑀣𑀼𑀦𑀸 𑀧𑀸𑀤𑁂𑀦 𑀢𑀸𑀴𑀺𑀬𑀫𑀸𑀦𑁄𑀧𑀺 𑀲𑀳𑀢𑀻𑀢𑀺. 𑀑𑀲𑀓𑁆𑀓𑀦𑀁 𑀯𑀺𑀧𑁆𑀨𑀦𑁆𑀤𑀦𑀁 𑀯𑀸 ‘‘𑀯𑀺𑀲𑀓𑁆𑀓𑀦’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀦𑀺𑀘𑁆𑀘𑀸𑀤𑀺𑀁 𑀦𑀺𑀘𑁆𑀘𑀸𑀤𑀺𑀢𑁄. 𑀕𑀡𑁆𑀳𑀸𑀢𑀻𑀢𑀺 𑀯𑀺𑀲𑀁𑀯𑀸𑀤𑀺𑀓𑀸 𑀳𑁄𑀢𑀺. 𑀯𑀺𑀲𑀁 𑀳𑀭𑀢𑀻𑀢𑀺 𑀢𑀣𑀸 𑀢𑀣𑀸 𑀓𑀸𑀫𑁂𑀲𑀼 𑀆𑀦𑀺𑀲𑀁𑀲𑀁 𑀧𑀲𑁆𑀲𑀦𑁆𑀢𑀻 𑀯𑀺𑀯𑀺𑀥𑁂𑀳𑀺 𑀆𑀓𑀸𑀭𑁂𑀳𑀺 𑀦𑁂𑀓𑁆𑀔𑀫𑁆𑀫𑀸𑀪𑀺𑀫𑀼𑀔𑀧𑁆𑀧𑀯𑀢𑁆𑀢𑀺𑀢𑁄 𑀘𑀺𑀢𑁆𑀢𑀁 𑀲𑀁𑀳𑀭𑀢𑀺 𑀲𑀁𑀔𑀺𑀧𑀢𑀺, 𑀯𑀺𑀲𑀁 𑀯𑀸 𑀤𑀼𑀓𑁆𑀔𑀁, 𑀢𑀁 𑀳𑀭𑀢𑀺, 𑀯𑀳𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀲𑁆𑀲 𑀳𑁂𑀢𑀼𑀪𑀸𑀯𑀢𑁄 𑀯𑀺𑀲𑀫𑀽𑀮𑀸. 𑀯𑀺𑀲𑀁 𑀯𑀸 𑀤𑀼𑀓𑁆𑀔𑀸𑀪𑀺𑀪𑀽𑀢𑀸 𑀯𑁂𑀤𑀦𑀸 𑀫𑀽𑀮𑀁 𑀏𑀢𑀺𑀲𑁆𑀲𑀸𑀢𑀺 𑀯𑀺𑀲𑀫𑀽𑀮𑀸. 𑀤𑀼𑀓𑁆𑀔𑀲𑀫𑀼𑀤𑀬𑀢𑁆𑀢𑀸 𑀯𑀺𑀲𑀁 𑀨𑀮𑀁 𑀏𑀢𑀺𑀲𑁆𑀲𑀸𑀢𑀺 𑀯𑀺𑀲𑀨𑀮𑀸. 𑀢𑀡𑁆𑀳𑀸𑀬 𑀭𑀽𑀧𑀸𑀤𑀺𑀓𑀲𑁆𑀲 𑀤𑀼𑀓𑁆𑀔𑀲𑁆𑀲𑁂𑀯 𑀧𑀭𑀺𑀪𑁄𑀕𑁄 𑀳𑁄𑀢𑀺, 𑀦 𑀅𑀫𑀢𑀲𑁆𑀲𑀸𑀢𑀺 𑀯𑀺𑀲𑀧𑀭𑀺𑀪𑁄𑀕𑁄𑀢𑀺 𑀯𑀼𑀢𑁆𑀢𑀸, 𑀲𑀩𑁆𑀩𑀢𑁆𑀣 𑀦𑀺𑀭𑀼𑀢𑁆𑀢𑀺𑀯𑀲𑁂𑀦 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀬𑁄 𑀧𑀦𑁂𑀢𑁆𑀣 𑀧𑀥𑀸𑀦𑁄 𑀅𑀢𑁆𑀣𑁄, 𑀢𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 ‘‘𑀯𑀺𑀲𑀸𑀮𑀸 𑀯𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀏𑀯𑀫𑁂𑀢𑁆𑀣 𑀯𑀺𑀲𑀢𑁆𑀢𑀺𑀓𑀸𑀧𑀤𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀺𑀡𑁆𑀡𑀁 𑀧𑀞𑀫𑀤𑀼𑀢𑀺𑀬𑀫𑀕𑁆𑀕𑁂𑀳𑀺. 𑀦𑀺𑀢𑁆𑀢𑀺𑀡𑁆𑀡𑀁 𑀢𑀢𑀺𑀬𑀫𑀕𑁆𑀕𑁂𑀦. 𑀉𑀢𑁆𑀢𑀺𑀡𑁆𑀡𑀁 𑀘𑀢𑀼𑀢𑁆𑀣𑀫𑀕𑁆𑀕𑁂𑀦.

𑀲𑀫𑀦𑀼𑀜𑁆𑀜𑁄𑀢𑀺 𑀲𑀫𑁆𑀫𑀤𑁂𑀯 𑀓𑀢𑀸𑀦𑀼𑀜𑁆𑀜𑁄. 𑀢𑁂𑀦𑀸𑀳 ‘‘𑀏𑀓𑀚𑁆𑀛𑀸𑀲𑀬𑁄 𑀅𑀳𑁄𑀲𑀻’’𑀢𑀺. 𑀅𑀦𑁆𑀢𑀭𑀥𑀸𑀬𑀻𑀢𑀺 𑀅𑀤𑀲𑁆𑀲𑀦𑀁 𑀅𑀕𑀫𑀸𑀲𑀺. 𑀬𑀣𑀸 𑀧𑀦 𑀅𑀦𑁆𑀢𑀭𑀥𑀸𑀬𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀪𑀺𑀲𑀗𑁆𑀔𑀢𑀓𑀸𑀬’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀸𑀮𑁂𑀳𑀻𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁, ‘‘𑀫𑀸𑀮𑀸𑀳𑀻’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺, ‘‘𑀫𑀮𑁆𑀬𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀬-𑀓𑀸𑀭𑀮𑁄𑀧𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄. 𑀅𑀬𑀁 𑀢𑀸𑀯 𑀅𑀝𑁆𑀞𑀓𑀣𑀸𑀬 𑀮𑀻𑀦𑀢𑁆𑀣𑀯𑀡𑁆𑀡𑀦𑀸.

𑀦𑁂𑀢𑁆𑀢𑀺𑀦𑀬𑀯𑀡𑁆𑀡𑀦𑀸

𑀇𑀤𑀸𑀦𑀺 𑀧𑀓𑀭𑀡𑀦𑀬𑁂𑀦 𑀧𑀸𑀴𑀺𑀬𑀸 𑀅𑀢𑁆𑀣𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫. 𑀲𑀸 𑀧𑀦 𑀅𑀢𑁆𑀣𑀯𑀡𑁆𑀡𑀦𑀸 𑀬𑀲𑁆𑀫𑀸 𑀤𑁂𑀲𑀦𑀸𑀬 ¶ 𑀲𑀫𑀼𑀝𑁆𑀞𑀸𑀦𑀧𑁆𑀧𑀬𑁄𑀚𑀦𑀪𑀸𑀚𑀦𑁂𑀲𑀼 𑀧𑀺𑀡𑁆𑀟𑀢𑁆𑀣𑁂𑀲𑀼 𑀘 𑀦𑀺𑀤𑁆𑀥𑀸𑀭𑀺𑀢𑁂𑀲𑀼 𑀲𑀼𑀓𑀭𑀸 𑀳𑁄𑀢𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸 𑀘, 𑀢𑀲𑁆𑀫𑀸 𑀲𑀼𑀢𑁆𑀢𑀤𑁂𑀲𑀦𑀸𑀬 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀞𑀫𑀁 𑀦𑀺𑀤𑁆𑀥𑀸𑀭𑀬𑀺𑀲𑁆𑀲𑀸𑀫. 𑀢𑀢𑁆𑀣 𑀲𑀫𑀼𑀝𑁆𑀞𑀸𑀦𑀁 𑀢𑀸𑀯 𑀤𑁂𑀲𑀦𑀸𑀦𑀺𑀤𑀸𑀦𑀁, 𑀢𑀁 𑀲𑀸𑀥𑀸𑀭𑀡𑀁 𑀅𑀲𑀸𑀥𑀸𑀭𑀡𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀢𑁆𑀣 𑀲𑀸𑀥𑀸𑀭𑀡𑀫𑁆𑀧𑀺 𑀅𑀩𑁆𑀪𑀦𑁆𑀢𑀭𑀩𑀸𑀳𑀺𑀭𑀪𑁂𑀤𑀢𑁄 𑀤𑀼𑀯𑀺𑀥𑀁. 𑀢𑀢𑁆𑀣 𑀲𑀸𑀥𑀸𑀭𑀡𑀁 𑀅𑀩𑁆𑀪𑀦𑁆𑀢𑀭𑀲𑀫𑀼𑀝𑁆𑀞𑀸𑀦𑀁 𑀦𑀸𑀫 𑀮𑁄𑀓𑀦𑀸𑀣𑀲𑁆𑀲 𑀫𑀳𑀸𑀓𑀭𑀼𑀡𑀸. 𑀢𑀸𑀬 𑀳𑀺 𑀲𑀫𑀼𑀲𑁆𑀲𑀸𑀳𑀺𑀢𑀲𑁆𑀲 𑀪𑀕𑀯𑀢𑁄 𑀯𑁂𑀦𑁂𑀬𑁆𑀬𑀸𑀦𑀁 𑀥𑀫𑁆𑀫𑀤𑁂𑀲𑀦𑀸𑀬 𑀘𑀺𑀢𑁆𑀢𑀁 𑀉𑀤𑀧𑀸𑀤𑀺, 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀲𑀢𑁆𑀢𑁂𑀲𑀼 𑀘 ¶ 𑀓𑀸𑀭𑀼𑀜𑁆𑀜𑀢𑀁 𑀧𑀝𑀺𑀘𑁆𑀘 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀲𑀻’’𑀢𑀺𑀆𑀤𑀺 (𑀫. 𑀦𑀺. 𑁧.𑁨𑁮𑁩; 𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁯). 𑀏𑀢𑁆𑀣 𑀘 𑀳𑁂𑀢𑀼𑀅𑀯𑀢𑁆𑀣𑀸𑀬𑀧𑀺 𑀫𑀳𑀸𑀓𑀭𑀼𑀡𑀸𑀬 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄 𑀬𑀸𑀯𑀤𑁂𑀯 𑀲𑀁𑀲𑀸𑀭𑀫𑀳𑁄𑀖𑀢𑁄 𑀲𑀤𑁆𑀥𑀫𑁆𑀫𑀤𑁂𑀲𑀦𑀸𑀳𑀢𑁆𑀣𑀤𑀸𑀦𑁂𑀳𑀺 𑀲𑀢𑁆𑀢𑀲𑀦𑁆𑀢𑀸𑀭𑀡𑀢𑁆𑀣𑀁 𑀢𑀤𑀼𑀧𑁆𑀧𑀢𑁆𑀢𑀺𑀢𑁄. 𑀬𑀣𑀸 𑀘 𑀫𑀳𑀸𑀓𑀭𑀼𑀡𑀸, 𑀏𑀯𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀤𑀲𑀩𑀮𑀜𑀸𑀡𑀸𑀤𑀻𑀦𑀺 𑀘 𑀤𑁂𑀲𑀦𑀸𑀬 𑀅𑀩𑁆𑀪𑀦𑁆𑀢𑀭𑀲𑀫𑀼𑀝𑁆𑀞𑀸𑀦𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀸𑀦𑀺. 𑀲𑀩𑁆𑀩𑀜𑁆𑀳𑀺 𑀜𑁂𑀬𑁆𑀬𑀥𑀫𑁆𑀫𑀁 𑀢𑁂𑀲𑀁 𑀤𑁂𑀲𑁂𑀢𑀩𑁆𑀩𑀧𑁆𑀧𑀓𑀸𑀭𑀁 𑀲𑀢𑁆𑀢𑀸𑀦𑀜𑁆𑀘 𑀆𑀲𑀬𑀸𑀦𑀼𑀲𑀬𑀸𑀤𑀺𑀁 𑀬𑀸𑀣𑀸𑀯𑀢𑁄 𑀚𑀸𑀦𑀦𑁆𑀢𑁄 𑀪𑀕𑀯𑀸 𑀞𑀸𑀦𑀸𑀝𑁆𑀞𑀸𑀦𑀸𑀤𑀻𑀲𑀼 𑀓𑁄𑀲𑀮𑁆𑀮𑁂𑀦 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀯𑀺𑀘𑀺𑀢𑁆𑀢𑀦𑀬𑀤𑁂𑀲𑀦𑀁 𑀧𑀯𑀢𑁆𑀢𑁂𑀲𑀻𑀢𑀺. 𑀩𑀸𑀳𑀺𑀭𑀁 𑀧𑀦 𑀲𑀸𑀥𑀸𑀭𑀡𑀁 𑀲𑀫𑀼𑀝𑁆𑀞𑀸𑀦𑀁 𑀤𑀲𑀲𑀳𑀲𑁆𑀲𑀫𑀳𑀸𑀩𑁆𑀭𑀳𑁆𑀫𑀧𑀭𑀺𑀯𑀸𑀭-𑀲𑀳𑀫𑁆𑀧𑀢𑀺𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀅𑀚𑁆𑀛𑁂𑀲𑀦𑀁. 𑀢𑀤𑀚𑁆𑀛𑁂𑀲𑀦𑀼𑀢𑁆𑀢𑀭𑀓𑀸𑀮𑀜𑁆𑀳𑀺 𑀥𑀫𑁆𑀫𑀕𑀫𑁆𑀪𑀻𑀭𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀸𑀚𑀦𑀺𑀢𑀁 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑁆𑀯𑀸 𑀥𑀫𑁆𑀫𑀲𑁆𑀲𑀸𑀫𑀻 𑀥𑀫𑁆𑀫𑀤𑁂𑀲𑀦𑀸𑀬 𑀉𑀲𑁆𑀲𑀸𑀳𑀚𑀸𑀢𑁄 𑀅𑀳𑁄𑀲𑀺. 𑀅𑀲𑀸𑀥𑀸𑀭𑀡𑀫𑁆𑀧𑀺 𑀅𑀩𑁆𑀪𑀦𑁆𑀢𑀭𑀩𑀸𑀳𑀺𑀭𑀪𑁂𑀤𑀢𑁄 𑀤𑀼𑀯𑀺𑀥𑀫𑁂𑀯. 𑀢𑀢𑁆𑀣 𑀅𑀩𑁆𑀪𑀦𑁆𑀢𑀭𑀁 𑀬𑀸𑀬 𑀫𑀳𑀸𑀓𑀭𑀼𑀡𑀸𑀬 𑀬𑁂𑀦 𑀘 𑀤𑁂𑀲𑀦𑀸𑀜𑀸𑀡𑁂𑀦 𑀇𑀤𑀁 𑀲𑀼𑀢𑁆𑀢𑀁 𑀧𑀯𑀢𑁆𑀢𑀺𑀢𑀁, 𑀢𑀤𑀼𑀪𑀬𑀁 𑀯𑁂𑀤𑀺𑀢𑀩𑁆𑀩𑀁 𑀩𑀸𑀳𑀺𑀭𑀁 𑀧𑀦 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀧𑀼𑀘𑁆𑀙𑀸, 𑀧𑀼𑀘𑁆𑀙𑀸𑀯𑀲𑀺𑀓𑁄 𑀳𑁂𑀲 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄. 𑀢𑀬𑀺𑀤𑀁 𑀧𑀸𑀴𑀺𑀬𑀁 𑀆𑀕𑀢𑀫𑁂𑀯.

𑀧𑀬𑁄𑀚𑀦𑀫𑁆𑀧𑀺 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀢𑁄 𑀤𑀼𑀯𑀺𑀥𑀁. 𑀢𑀢𑁆𑀣 𑀲𑀸𑀥𑀸𑀭𑀡𑀁 𑀅𑀦𑀼𑀓𑁆𑀓𑀫𑁂𑀦 𑀬𑀸𑀯 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀯𑀺𑀫𑀼𑀢𑁆𑀢𑀺𑀭𑀲𑀢𑁆𑀢𑀸 𑀪𑀕𑀯𑀢𑁄 𑀤𑁂𑀲𑀦𑀸𑀬. 𑀢𑁂𑀦𑁂𑀯𑀸𑀳 ‘‘𑀏𑀢𑀤𑀢𑁆𑀣𑀸 𑀓𑀣𑀸, 𑀏𑀢𑀤𑀢𑁆𑀣𑀸 𑀫𑀦𑁆𑀢𑀦𑀸’’𑀢𑀺𑀆𑀤𑀺 (𑀧𑀭𑀺. 𑁩𑁬𑁬). 𑀅𑀲𑀸𑀥𑀸𑀭𑀡𑀁 𑀧𑀦 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀤𑀲𑁆𑀲𑀦𑀫𑀕𑁆𑀕𑀲𑀫𑀥𑀺𑀕𑀫𑁄, 𑀉𑀪𑀬𑀫𑁆𑀧𑁂𑀢𑀁 𑀩𑀸𑀳𑀺𑀭𑀫𑁂𑀯. 𑀲𑀘𑁂 𑀧𑀦 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑀕𑀢𑀫𑁆𑀧𑀺 𑀤𑁂𑀲𑀦𑀸𑀩𑀮𑀲𑀺𑀤𑁆𑀥𑀺𑀲𑀗𑁆𑀔𑀸𑀢𑀁 𑀧𑀬𑁄𑀚𑀦𑀁 𑀅𑀥𑀺𑀧𑁆𑀧𑀸𑀬𑀲𑀫𑀺𑀚𑁆𑀛𑀦𑀪𑀸𑀯𑀢𑁄 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀲𑀺𑀤𑁆𑀥𑀺𑀬𑀸 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀪𑀕𑀯𑀢𑁄𑀧𑀺 𑀧𑀬𑁄𑀚𑀦𑀫𑁂𑀯𑀸𑀢𑀺 𑀕𑀡𑁆𑀳𑁂𑀬𑁆𑀬, 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦𑀲𑁆𑀲 𑀅𑀩𑁆𑀪𑀦𑁆𑀢𑀭𑀢𑀸𑀧𑀺 𑀲𑀺𑀬𑀸.

𑀅𑀧𑀺𑀘 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀑𑀖𑀢𑀭𑀡𑀸𑀓𑀸𑀭𑀲𑁆𑀲 𑀬𑀸𑀣𑀸𑀯𑀢𑁄 𑀅𑀦𑀯𑀩𑁄𑀥𑁄 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀲𑀫𑀼𑀝𑁆𑀞𑀸𑀦𑀁, 𑀢𑀤𑀯𑀩𑁄𑀥𑁄 𑀧𑀬𑁄𑀚𑀦𑀁. 𑀲𑁄 𑀳𑀺 𑀇𑀫𑀸𑀬 𑀤𑁂𑀲𑀦𑀸𑀬 𑀪𑀕𑀯𑀦𑁆𑀢𑀁 𑀧𑀬𑁄𑀚𑁂𑀢𑀺 𑀢𑀦𑁆𑀦𑀺𑀧𑁆𑀨𑀸𑀤𑀦𑀧𑀭𑀸𑀬𑀁 𑀤𑁂𑀲𑀦𑀸𑀢𑀺 𑀓𑀢𑁆𑀯𑀸. 𑀬𑀜𑁆𑀳𑀺 𑀤𑁂𑀲𑀦𑀸𑀬 𑀲𑀸𑀥𑁂𑀢𑀩𑁆𑀩𑀁 𑀨𑀮𑀁, 𑀢𑀁 𑀆𑀓𑀗𑁆𑀔𑀺𑀢𑀩𑁆𑀩𑀢𑁆𑀢𑀸 𑀤𑁂𑀲𑀓𑀁 𑀤𑁂𑀲𑀦𑀸𑀬 𑀧𑀬𑁄𑀚𑁂𑀢𑀻𑀢𑀺 𑀧𑀬𑁄𑀚𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀤𑁂𑀯𑀢𑀸𑀬 𑀢𑀤𑀜𑁆𑀜𑁂𑀲𑀜𑁆𑀘 𑀯𑀺𑀦𑁂𑀬𑁆𑀬𑀸𑀦𑀁 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀯𑀺𑀲𑁆𑀲𑀚𑁆𑀚𑀦𑀜𑁆𑀘𑁂𑀢𑁆𑀣 𑀧𑀬𑁄𑀚𑀦𑀁 ¶ . 𑀢𑀣𑀸 𑀲𑀁𑀲𑀸𑀭𑀘𑀓𑁆𑀓𑀦𑀺𑀯𑀢𑁆𑀢𑀺-𑀲𑀤𑁆𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀺𑀲𑀲𑁆𑀲𑀢𑀸𑀤𑀺𑀫𑀺𑀘𑁆𑀙𑀸𑀘𑀸𑀭-𑀦𑀺𑀭𑀸𑀓𑀭𑀡𑀁 ¶ 𑀲𑀫𑁆𑀫𑀸𑀯𑀸𑀤𑀧𑀼𑀭𑁂𑀓𑁆𑀔𑀸𑀭𑁄 𑀅𑀓𑀼𑀲𑀮𑀫𑀽𑀮𑀲𑀫𑀽𑀳𑀦𑀦𑀁 𑀓𑀼𑀲𑀮𑀫𑀽𑀮𑀲𑀫𑀸𑀭𑁄𑀧𑀦𑀁 𑀅𑀧𑀸𑀬𑀤𑁆𑀯𑀸𑀭𑀧𑀺𑀤𑀳𑀦𑀁 𑀲𑀕𑁆𑀕𑀫𑁄𑀓𑁆𑀔𑀤𑁆𑀯𑀸𑀭𑀯𑀺𑀯𑀭𑀡𑀁 𑀧𑀭𑀺𑀬𑀼𑀝𑁆𑀞𑀸𑀦𑀯𑀽𑀧𑀲𑀫𑀦𑀁 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑀦𑀁 ‘‘𑀫𑀼𑀢𑁆𑀢𑁄 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀧𑀼𑀭𑀺𑀫𑀧𑀝𑀺𑀜𑁆𑀜𑀸𑀅𑀯𑀺𑀲𑀁𑀯𑀸𑀤𑀦𑀁 𑀢𑀧𑁆𑀧𑀝𑀺𑀧𑀓𑁆𑀔𑀫𑀸𑀭𑀫𑀦𑁄𑀭𑀣𑀯𑀺𑀲𑀁𑀯𑀸𑀤𑀦𑀁 𑀢𑀺𑀢𑁆𑀣𑀺𑀬𑀲𑀫𑀬𑀦𑀺𑀫𑁆𑀫𑀣𑀦𑀁 𑀩𑀼𑀤𑁆𑀥𑀥𑀫𑁆𑀫𑀧𑀢𑀺𑀝𑁆𑀞𑀸𑀧𑀦𑀦𑁆𑀢𑀺 𑀏𑀯𑀫𑀸𑀤𑀻𑀦𑀺𑀧𑀺 𑀧𑀬𑁄𑀚𑀦𑀸𑀦𑀺 𑀇𑀥 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀬𑀣𑀸 𑀤𑁂𑀯𑀢𑀸 𑀑𑀖𑀢𑀭𑀡𑁂 𑀲𑀁𑀲𑀬𑀧𑀓𑁆𑀔𑀦𑁆𑀤𑀸, 𑀢𑀸𑀤𑀺𑀲𑀸 𑀅𑀜𑁆𑀜𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀘 𑀧𑀝𑀺𑀧𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑀸 𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦-𑀥𑀸𑀭𑀡-𑀧𑀭𑀺𑀘𑀬-𑀫𑀦𑀲𑀺𑀓𑀸𑀭𑀯𑀺𑀧𑀮𑁆𑀮𑀢𑁆𑀣𑀩𑀼𑀤𑁆𑀥𑀺𑀓𑀸 𑀲𑀤𑁆𑀥𑀫𑁆𑀫𑀲𑁆𑀲𑀯𑀦-𑀥𑀸𑀭𑀡-𑀧𑀭𑀺𑀘𑀬𑀯𑀺𑀫𑀼𑀔𑀸 𑀘 𑀪𑀯𑀯𑀺𑀫𑁄𑀓𑁆𑀔𑁂𑀲𑀺𑀦𑁄 𑀯𑀺𑀦𑁂𑀬𑁆𑀬𑀸 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀪𑀸𑀚𑀦𑀁.

𑀧𑀺𑀡𑁆𑀟𑀢𑁆𑀣𑀸 𑀧𑀦 ‘‘𑀅𑀧𑁆𑀧𑀢𑀺𑀝𑁆𑀞𑀁 𑀅𑀦𑀸𑀬𑀽𑀳’’𑀦𑁆𑀢𑀺 𑀧𑀤𑀤𑁆𑀯𑀬𑁂 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀯𑀲𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄 𑀓𑀼𑀲𑀮𑀫𑀽𑀮𑀲𑀫𑀸𑀬𑁄𑀕𑁄 𑀑𑀮𑀻𑀬𑀦𑀸𑀢𑀺𑀥𑀸𑀯𑀦𑀸𑀯𑀺𑀲𑁆𑀲𑀚𑁆𑀚𑀦𑀁 𑀉𑀧𑀸𑀬𑀯𑀺𑀦𑀺𑀩𑀦𑁆𑀥𑀯𑀺𑀥𑀫𑀦𑀁 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀤𑀽𑀭𑀻𑀪𑀸𑀯𑁄 𑀢𑀡𑁆𑀳𑀸𑀯𑀺𑀚𑁆𑀚𑀸𑀯𑀺𑀲𑁄𑀥𑀦𑀁 𑀯𑀝𑁆𑀝𑀢𑁆𑀢𑀬𑀯𑀺𑀘𑁆𑀙𑁂𑀤𑀦𑀼𑀧𑀸𑀬𑁄 𑀆𑀲𑀯𑁄𑀖-𑀬𑁄𑀕-𑀕𑀦𑁆𑀣𑀸𑀕𑀢𑀺-𑀢𑀡𑁆𑀳𑀼𑀧𑁆𑀧𑀸𑀤𑀼𑀧𑀸𑀤𑀸𑀦𑀯𑀺𑀬𑁄𑀕𑁄 𑀘𑁂𑀢𑁄𑀔𑀺𑀮𑀯𑀺𑀯𑁂𑀘𑀦𑀁 𑀅𑀪𑀺𑀦𑀦𑁆𑀤𑀦𑀦𑀺𑀯𑀸𑀭𑀡𑀁 𑀲𑀁𑀲𑀕𑁆𑀕𑀸𑀢𑀺𑀓𑁆𑀓𑀫𑁄 𑀯𑀺𑀯𑀸𑀤𑀫𑀽𑀮𑀧𑀭𑀺𑀘𑁆𑀘𑀸𑀕𑁄 𑀅𑀓𑀼𑀲𑀮𑀓𑀫𑁆𑀫𑀧𑀣𑀯𑀺𑀤𑁆𑀥𑀁𑀲𑀦𑀁 𑀫𑀺𑀘𑁆𑀙𑀢𑁆𑀢𑀸𑀢𑀺𑀯𑀢𑁆𑀢𑀦𑀁 𑀅𑀦𑀼𑀲𑀬𑀫𑀽𑀮𑀘𑁆𑀙𑁂𑀤𑁄. 𑀲𑀩𑁆𑀩𑀓𑀺𑀮𑁂𑀲-𑀤𑀭𑀣𑀧𑀭𑀺𑀴𑀸𑀳-𑀲𑀸𑀭𑀫𑁆𑀪𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀁 𑀤𑀲𑁆𑀲𑀦𑀲𑀯𑀦𑀦𑀺𑀤𑁆𑀤𑁂𑀲𑁄 𑀯𑀺𑀚𑁆𑀚𑀽𑀧𑀫𑀯𑀚𑀺𑀭𑀽𑀧𑀫𑀥𑀫𑁆𑀫𑀸𑀧𑀤𑁂𑀲𑁄 𑀅𑀧𑀘𑀬𑀕𑀸𑀫𑀺𑀥𑀫𑁆𑀫𑀯𑀺𑀪𑀸𑀯𑀦𑀸 𑀧𑀳𑀸𑀦𑀢𑁆𑀢𑀬𑀤𑀻𑀧𑀦𑀸 𑀲𑀺𑀓𑁆𑀔𑀢𑁆𑀢𑀬𑀸𑀦𑀼𑀬𑁄𑀕𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀼𑀝𑁆𑀞𑀸𑀦𑀁 𑀪𑀸𑀯𑀦𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀲𑀺𑀤𑁆𑀥𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀧𑀸𑀭𑀺𑀲𑀼𑀤𑁆𑀥𑀻𑀢𑀺 𑀏𑀯𑀫𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸.

𑀢𑀢𑁆𑀣 𑀬𑁂𑀲𑀁 𑀓𑀺𑀮𑁂𑀲𑀸𑀤𑀻𑀦𑀁 𑀯𑀲𑁂𑀦 𑀧𑀢𑀺𑀝𑁆𑀞𑀸𑀢𑀺 𑀲𑀁𑀲𑀻𑀤𑀢𑀺, 𑀬𑁂𑀲𑀜𑁆𑀘 𑀅𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁 𑀯𑀲𑁂𑀦 𑀆𑀬𑀽𑀳𑀢𑀺 𑀦𑀺𑀩𑁆𑀩𑀼𑀬𑁆𑀳𑀢𑀺, 𑀉𑀪𑀬𑀫𑁂𑀢𑀁 𑀲𑀫𑀼𑀤𑀬𑀲𑀘𑁆𑀘𑀁, 𑀢𑀧𑁆𑀧𑀪𑀸𑀯𑀺𑀢𑀸 𑀢𑀤𑀼𑀪𑀬𑀦𑀺𑀲𑁆𑀲𑀺𑀢𑀸 𑀘 𑀔𑀦𑁆𑀥𑀸 𑀤𑀼𑀓𑁆𑀔𑀲𑀘𑁆𑀘𑀁, 𑀢𑀤𑀼𑀪𑀬𑀫𑀢𑁆𑀣𑁄, ‘‘𑀅𑀧𑁆𑀧𑀢𑀺𑀝𑁆𑀞𑀁 𑀅𑀦𑀸𑀬𑀽𑀳’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀝𑀺𑀘𑁆𑀙𑀦𑁆𑀦𑀁 𑀓𑀢𑁆𑀯𑀸 𑀤𑁂𑀲𑀦𑀸 𑀉𑀧𑀸𑀬𑁄 𑀫𑀸𑀦𑀦𑀺𑀕𑁆𑀕𑀡𑁆𑀳𑀦𑀯𑀲𑁂𑀦 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀲𑀘𑁆𑀘𑀸𑀪𑀺𑀲𑀫𑀬𑀓𑀸𑀭𑀡𑀪𑀸𑀯𑀢𑁄 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀧𑀝𑀺𑀓𑁆𑀔𑁂𑀧𑁄𑀧𑀤𑁂𑀲𑁂𑀦 𑀘𑀢𑀼𑀭𑁄𑀖𑀦𑀺𑀭𑀢𑁆𑀣𑀭𑀡𑀢𑁆𑀣𑀺𑀓𑁂𑀳𑀺 𑀅𑀦𑁆𑀢𑀤𑁆𑀯𑀬𑀭𑀳𑀺𑀢𑀸 𑀫𑀚𑁆𑀛𑀺𑀫𑀸 𑀧𑀝𑀺𑀧𑀢𑁆𑀢𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸𑀢𑀺 𑀅𑀬𑀫𑁂𑀢𑁆𑀣 𑀪𑀕𑀯𑀢𑁄 𑀆𑀡𑀢𑁆𑀢𑀻𑀢𑀺 𑀅𑀬𑀁 𑀤𑁂𑀲𑀦𑀸𑀳𑀸𑀭𑁄.

𑀧𑀭𑀲𑀁𑀲𑀬𑀧𑀓𑁆𑀔𑀦𑁆𑀤𑀦𑀢𑀸𑀬 ¶ 𑀜𑀸𑀢𑀼𑀓𑀸𑀫𑀢𑀸𑀬 𑀘 𑀓𑀣𑀁 𑀦𑀽𑀢𑀺 𑀧𑀼𑀘𑁆𑀙𑀸𑀯𑀲𑁂𑀦 𑀯𑀼𑀢𑁆𑀢𑀁? 𑀅𑀪𑀺𑀫𑀼𑀔𑀪𑀸𑀯𑀢𑁄 𑀏𑀓𑀧𑀼𑀕𑁆𑀕𑀮𑀪𑀸𑀯𑀢𑁄 𑀘 ‘‘𑀢𑁆𑀯’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀭𑀫𑀼𑀓𑁆𑀓𑀁𑀲𑀕𑀢𑀲𑁆𑀲 𑀕𑀭𑀼𑀪𑀸𑀯𑀲𑁆𑀲 𑀅𑀦𑀜𑁆𑀜𑀬𑁄𑀕𑁆𑀬𑀲𑁆𑀲 𑀲𑀤𑁆𑀥𑀫𑁆𑀫𑀥𑀼𑀭𑀲𑁆𑀲 𑀧𑀭𑀺𑀤𑀻𑀧𑀦𑀢𑁄 𑀲𑀸𑀥𑀽𑀢𑀺 𑀫𑀭𑀺𑀲𑀲𑀻𑀮𑀸𑀤𑀺𑀕𑀼𑀡𑀢𑀸𑀬 ‘‘𑀫𑀸𑀭𑀺𑀲𑀸’’𑀢𑀺 𑀯𑀼𑀢𑁆𑀢𑀁 ¶ . 𑀅𑀯𑀳𑀦𑀦𑀢𑁄 𑀭𑀸𑀲𑀺𑀪𑀸𑀯𑀢𑁄 𑀘 ‘‘𑀑𑀖’’𑀦𑁆𑀢𑀺 𑀯𑀼𑀢𑁆𑀢𑀁. 𑀜𑀸𑀢𑀼𑀁 𑀇𑀘𑁆𑀙𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀓𑀢𑀢𑁆𑀢𑀸 𑀧𑀭𑀺𑀬𑁄𑀲𑀸𑀧𑀺𑀢𑀢𑁆𑀢𑀸 ‘‘𑀇𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀁𑀲𑀻𑀤𑀦𑀮𑀓𑁆𑀔𑀡𑀲𑁆𑀲 𑀧𑀢𑀺𑀝𑁆𑀞𑀸𑀦𑀲𑁆𑀲 𑀅𑀓𑀸𑀢𑀩𑁆𑀩𑀢𑁄 𑀲𑀩𑁆𑀩𑀲𑁄 𑀘 𑀅𑀓𑀢𑀢𑁆𑀢𑀸. ‘‘𑀅𑀧𑁆𑀧𑀢𑀺𑀝𑁆𑀞’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀬𑀺𑀤𑀁 𑀅𑀓𑀭𑀡𑀁 𑀏𑀓𑀁𑀲𑀺𑀓𑀦𑁆𑀢𑀺 𑀔𑁄𑀢𑀺 𑀅𑀯𑀥𑀸𑀭𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀲𑁆𑀲 𑀘 𑀅𑀧𑁆𑀧𑀢𑀺𑀝𑁆𑀞𑀸𑀦𑀲𑁆𑀲 𑀲𑀲𑀦𑁆𑀢𑀢𑀺𑀕𑀢𑀢𑁆𑀢𑀸 ‘‘𑀢𑁆𑀯’’𑀦𑁆𑀢𑀺 𑀘 𑀧𑀼𑀘𑁆𑀙𑀺𑀢𑀢𑁆𑀢𑀸 ‘‘𑀅𑀳’’𑀦𑁆𑀢𑀺 𑀯𑀼𑀢𑁆𑀢𑀁. 𑀤𑁂𑀯𑀢𑀸𑀬 𑀲𑀫𑁆𑀩𑁄𑀥𑀦𑀢𑁄 𑀧𑀺𑀬𑀸𑀮𑀧𑀦𑀢𑁄 𑀘, ‘‘𑀆𑀯𑀼𑀲𑁄’’𑀢𑀺 𑀯𑀼𑀢𑁆𑀢𑀁. 𑀦𑀺𑀩𑁆𑀩𑀼𑀬𑁆𑀳𑀦𑀮𑀓𑁆𑀔𑀡𑀲𑁆𑀲 𑀆𑀬𑀽𑀳𑀦𑀲𑁆𑀲 𑀅𑀓𑀸𑀢𑀩𑁆𑀩𑀢𑁄 𑀲𑀩𑁆𑀩𑀲𑁄 𑀘 𑀅𑀓𑀢𑀢𑁆𑀢𑀸 𑀅𑀦𑀸𑀬𑀽𑀳𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀺𑀡𑁆𑀡𑀸𑀓𑀸𑀭𑀲𑁆𑀲 𑀑𑀖𑀸𑀦𑀁 𑀅𑀦𑀺𑀘𑁆𑀙𑀺𑀢𑀪𑀸𑀯𑀢𑁄 𑀏𑀯 𑀢𑀢𑁆𑀣 𑀲𑀁𑀲𑀬𑀲𑁆𑀲 𑀅𑀦𑀧𑀕𑀢𑀢𑁆𑀢𑀸 𑀑𑀖𑀢𑀭𑀡𑀲𑁆𑀲 𑀘 𑀅𑀯𑀺𑀲𑁂𑀲𑀢𑁆𑀢𑀸 ‘‘𑀬𑀣𑀸 𑀓𑀣𑀁 𑀧𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀲𑀁𑀲𑀻𑀤𑀦𑀮𑀓𑁆𑀔𑀡𑀁 𑀧𑀢𑀺𑀝𑁆𑀞𑀸𑀦𑀁 𑀲𑀁𑀲𑀸𑀭𑁂 𑀘 𑀲𑀡𑁆𑀞𑀸𑀦𑀦𑁆𑀢𑀺 𑀅𑀦𑀢𑁆𑀣𑀦𑁆𑀢𑀭𑀢𑁆𑀢𑀸 𑀅𑀪𑀺𑀦𑁆𑀦𑀓𑀸𑀮𑀺𑀓𑀁. 𑀢𑀣𑀸 𑀦𑀺𑀩𑁆𑀩𑀼𑀬𑁆𑀳𑀦𑀮𑀓𑁆𑀔𑀡𑀁 𑀆𑀬𑀽𑀳𑀦𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀢𑀺𑀯𑀢𑁆𑀢𑀦𑀦𑁆𑀢𑀺 𑀅𑀦𑀢𑁆𑀣𑀦𑁆𑀢𑀭𑀢𑁆𑀢𑀸 𑀅𑀪𑀺𑀦𑁆𑀦𑀓𑀸𑀮𑀺𑀓𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀬𑀤𑀸 𑀲𑁆𑀯𑀸𑀳𑀁…𑀧𑁂… 𑀢𑀤𑀸𑀲𑁆𑀲𑀼 𑀦𑀺𑀩𑁆𑀩𑀼𑀬𑁆𑀳𑀸𑀫𑀻’’𑀢𑀺. 𑀢𑀤𑀼𑀪𑀬𑀲𑁆𑀲 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀧𑀝𑀺𑀩𑀸𑀳𑀦𑀢𑁄 𑀘 𑀑𑀖𑀸𑀢𑀺𑀡𑁆𑀡𑀸𑀢𑀺 𑀯𑀼𑀢𑁆𑀢𑀁 ‘‘𑀏𑀯𑀁 𑀔𑁆𑀯𑀸𑀳𑀁…𑀧𑁂… 𑀑𑀖𑀫𑀢𑀭𑀺’’𑀦𑁆𑀢𑀺.

𑀏𑀓𑀩𑀼𑀤𑁆𑀥𑀦𑁆𑀢𑀭𑀦𑁆𑀢𑀭𑀺𑀓𑀢𑁆𑀢𑀸 𑀲𑀼𑀤𑀽𑀭𑀓𑀸𑀮𑀺𑀓𑀢𑀸𑀬 ‘‘𑀘𑀺𑀭𑀲𑁆𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀦𑁆𑀢𑀭𑀸 𑀅𑀤𑀺𑀝𑁆𑀞𑀧𑀼𑀩𑁆𑀩𑀢𑀸𑀬 𑀯𑀺𑀫𑁆𑀳𑀬𑀦𑀻𑀬𑀢𑀸𑀬 𑀘 ‘‘𑀯𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀤𑀸 𑀉𑀧𑀮𑀩𑁆𑀪𑀫𑀸𑀦𑀢𑀸𑀬 𑀅𑀢𑁆𑀢𑀧𑀘𑁆𑀘𑀓𑁆𑀔𑀢𑀸𑀬 𑀘 ‘‘𑀧𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀁. 𑀩𑀸𑀳𑀺𑀢𑀧𑀸𑀧𑀢𑁄 𑀩𑁆𑀭𑀳𑁆𑀫𑀲𑁆𑀲 𑀘 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀡𑀦𑀢𑁄 𑀧𑀝𑀺𑀯𑀺𑀚𑁆𑀛𑀦𑀢𑁄 ‘‘𑀩𑁆𑀭𑀸𑀳𑁆𑀫𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀺𑀮𑁂𑀲𑀲𑀦𑁆𑀢𑀸𑀧𑀯𑀽𑀧𑀲𑀫𑀦𑀢𑁄 𑀤𑀼𑀓𑁆𑀔𑀲𑀦𑁆𑀢𑀸𑀧𑀯𑀽𑀧𑀲𑀫𑀦𑀢𑁄 𑀘 𑀲𑀩𑁆𑀩𑀲𑁄 𑀦𑀺𑀩𑁆𑀩𑀼𑀢𑀢𑁆𑀢𑀸 ‘‘𑀧𑀭𑀺𑀦𑀺𑀩𑁆𑀩𑀼𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀭𑀡𑀧𑀬𑁄𑀕𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀢𑀢𑁆𑀢𑀸 𑀉𑀧𑀭𑀺 𑀢𑀭𑀺𑀢𑀩𑁆𑀩𑀸𑀪𑀸𑀯𑀢𑁄 𑀘 ‘‘𑀢𑀺𑀡𑁆𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀜𑀸𑀡𑀘𑀓𑁆𑀔𑀼𑀦𑀸 𑀑𑀮𑁄𑀓𑁂𑀢𑀩𑁆𑀩𑀢𑁄 𑀮𑀼𑀚𑁆𑀚𑀦𑀢𑁄 𑀧𑀮𑀼𑀚𑁆𑀚𑀦𑀢𑁄 𑀘 ‘‘𑀮𑁄𑀓𑁂’’𑀢𑀺 𑀯𑀼𑀢𑁆𑀢𑀁. 𑀯𑀺𑀲𑀬𑁂𑀲𑀼 𑀲𑀜𑁆𑀚𑀦𑀢𑁄 𑀚𑀸𑀢𑀪𑀸𑀯𑀢𑁄 ‘‘𑀯𑀺𑀲𑀢𑁆𑀢𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀜𑀸𑀡𑀲𑁆𑀲 𑀧𑀘𑁆𑀘𑀓𑁆𑀔𑀪𑀸𑀯𑀢𑁄 𑀦𑀺𑀕𑀫𑀦𑀢𑁄 𑀘 ‘‘𑀇𑀤’’𑀦𑁆𑀢𑀺 𑀯𑀼𑀢𑁆𑀢𑀁. 𑀪𑀸𑀲𑀺𑀢𑀢𑁆𑀢𑀸 𑀧𑀭𑀺𑀲𑀫𑀢𑁆𑀢𑀢𑁆𑀢𑀸 𑀘 ‘‘𑀅𑀯𑁄𑀘𑀸’’𑀢𑀺 𑀯𑀼𑀢𑁆𑀢𑀁. 𑀧𑀞𑀫𑀁 𑀕𑀳𑀺𑀢𑀢𑁆𑀢𑀸 𑀧𑀘𑁆𑀘𑀸𑀫𑀲𑀦𑀢𑁄 𑀘 ‘‘𑀲𑀸 𑀤𑁂𑀯𑀢𑀸’’𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀓𑁆𑀔𑁂𑀧𑀲𑁆𑀲 𑀅𑀪𑀸𑀯𑀢𑁄 𑀅𑀢𑁆𑀣𑀲𑁆𑀲 𑀅𑀦𑀼𑀫𑁄𑀤𑀺𑀢𑀩𑁆𑀩𑀢𑁄 ‘‘𑀲𑀫𑀦𑀼𑀜𑁆𑀜𑁄’’𑀢𑀺 𑀯𑀼𑀢𑁆𑀢𑀁. 𑀯𑀺𑀦𑁂𑀬𑁆𑀬𑀸𑀦𑀁 ¶ 𑀲𑀸𑀲𑀦𑀢𑁄 𑀧𑀭𑀫𑀢𑁆𑀣𑀲𑀫𑁆𑀧𑀢𑁆𑀢𑀺𑀢𑁄 𑀘 ‘‘𑀲𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀁. 𑀘𑀓𑁆𑀔𑀼𑀧𑀣𑀸𑀢𑀺𑀓𑁆𑀓𑀫𑁂𑀦 𑀢𑀺𑀭𑁄𑀪𑀸𑀯𑀽𑀧𑀕𑀫𑀦𑀢𑁄 ‘‘𑀅𑀦𑁆𑀢𑀭𑀥𑀸𑀬𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀬𑀁 𑀅𑀦𑀼𑀧𑀤𑀯𑀺𑀘𑀬𑀢𑁄 𑀯𑀺𑀘𑀬𑀳𑀸𑀭𑁄.

𑀅𑀧𑁆𑀧𑀢𑀺𑀝𑁆𑀞𑀸𑀦𑀸𑀦𑀸𑀬𑀽𑀳𑀦𑁂𑀳𑀺 𑀑𑀖𑀢𑀭𑀡𑀁 𑀬𑀼𑀚𑁆𑀚𑀢𑀺 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀯𑀺𑀚𑀳𑀦𑁂𑀦 𑀧𑀸𑀭𑀲𑀫𑁆𑀧𑀢𑁆𑀢𑀺𑀲𑀫𑀺𑀚𑁆𑀛𑀦𑀢𑁄. 𑀲𑀩𑁆𑀩𑀓𑀺𑀮𑁂𑀲-𑀢𑀡𑁆𑀳𑀸𑀤𑀺𑀝𑁆𑀞𑀺-𑀢𑀡𑁆𑀳𑀸𑀬𑀢𑀦-𑀲𑀲𑁆𑀲𑀢𑀸𑀤𑀺𑀯𑀲𑁂𑀦 𑀲𑀦𑁆𑀢𑀺𑀝𑁆𑀞𑀢𑁄 𑀲𑀁𑀲𑀸𑀭𑁂 𑀲𑀁𑀲𑀻𑀤𑀦𑀁 𑀳𑁄𑀢𑀻𑀢𑀺 𑀬𑀼𑀚𑁆𑀚𑀢𑀺 𑀓𑀸𑀭𑀡𑀲𑁆𑀲 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀢𑁄. 𑀅𑀪𑀺𑀲𑀗𑁆𑀔𑀭𑀡𑀓𑀺𑀘𑁆𑀘𑁂 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑁂 𑀯𑀺𑀚𑁆𑀚𑀫𑀸𑀦𑁂 𑀲𑀩𑁆𑀩𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲-𑀅𑀢𑀺𑀥𑀸𑀯𑀦𑀸𑀪𑀺𑀦𑀺𑀯𑁂𑀲𑀸𑀤𑀻𑀦𑀁 𑀯𑀲𑁂𑀦 𑀆𑀬𑀽𑀳𑀦𑁆𑀢𑀲𑁆𑀲 𑀲𑀁𑀲𑀸𑀭𑀫𑀳𑁄𑀖𑁂𑀦 𑀦𑀺𑀩𑁆𑀩𑀼𑀬𑁆𑀳𑀦𑀁 ¶ 𑀳𑁄𑀢𑀻𑀢𑀺 𑀬𑀼𑀚𑁆𑀚𑀢𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀢𑀺𑀯𑀢𑁆𑀢𑀦𑀢𑁄. 𑀩𑁆𑀭𑀳𑁆𑀫𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀅𑀡𑀦𑀢𑁄 𑀧𑀝𑀺𑀯𑀺𑀚𑁆𑀛𑀦𑀢𑁄 𑀩𑁆𑀭𑀸𑀳𑁆𑀫𑀡𑀪𑀸𑀯𑁄 𑀬𑀼𑀚𑁆𑀚𑁆𑀚𑀢𑀺 𑀩𑀸𑀳𑀺𑀢𑀧𑀸𑀧𑀢𑁆𑀢𑀸. 𑀲𑀫𑁆𑀫𑀤𑁂𑀯 𑀲𑀦𑁆𑀢𑀥𑀫𑁆𑀫𑀲𑀫𑀥𑀺𑀕𑀫𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑁄 𑀬𑀼𑀚𑁆𑀚𑀢𑀺 𑀲𑀩𑁆𑀩𑀲𑁄 𑀲𑀯𑀸𑀲𑀦𑀧𑀳𑀻𑀦𑀓𑀺𑀮𑁂𑀲𑀢𑁆𑀢𑀸. 𑀢𑀣𑀸 𑀘 𑀯𑀺𑀲𑀢𑁆𑀢𑀺𑀓𑀸𑀬 𑀢𑀺𑀡𑁆𑀡𑀪𑀸𑀯𑁄 𑀬𑀼𑀚𑁆𑀚𑀢𑀺 𑀬𑀣𑀸 𑀬𑀸𑀬 𑀮𑁂𑀲𑁄𑀧𑀺 𑀦 𑀤𑀺𑀲𑁆𑀲𑀢𑀺, 𑀏𑀯𑀁 𑀅𑀕𑁆𑀕𑀫𑀕𑁆𑀕𑁂𑀦 𑀢𑀲𑁆𑀲𑀸 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸𑀢𑀺 𑀅𑀬𑀁 𑀬𑀼𑀢𑁆𑀢𑀺𑀳𑀸𑀭𑁄.

𑀓𑀺𑀮𑁂𑀲𑀯𑀝𑁆𑀝𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁 𑀯𑀺𑀲𑁂𑀲𑀢𑁄 𑀓𑀫𑁆𑀫𑀯𑀝𑁆𑀝𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀆𑀬𑀽𑀳𑀦𑀜𑁆𑀘 𑀯𑀺𑀧𑀸𑀓𑀯𑀝𑁆𑀝𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀅𑀧𑁆𑀧𑀢𑀺𑀝𑁆𑀞𑀸𑀦𑀸𑀦𑀸𑀬𑀽𑀳𑀦𑀸𑀦𑀺 𑀑𑀖𑀢𑀭𑀡𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀑𑀖𑀢𑀭𑀡𑀁 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀲𑁆𑀲. 𑀢𑀡𑁆𑀳𑀸𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀲𑁆𑀲 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀢𑀸 𑀧𑀤𑀝𑁆𑀞𑀸𑀦𑀁. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀲𑀁𑀬𑁄𑀚𑀦𑀺𑀬𑁂𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀻’’𑀢𑀺 (𑀲𑀁. 𑀦𑀺. 𑁨.𑁫𑁨, 𑁫𑁬).

𑀔𑀦𑁆𑀥𑀸𑀯𑀺𑀚𑁆𑀚𑀸-𑀨𑀲𑁆𑀲-𑀲𑀜𑁆𑀜𑀸-𑀯𑀺𑀢𑀓𑁆𑀓𑀸𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭-𑀧𑀸𑀧𑀫𑀺𑀢𑁆𑀢𑀧𑀭𑀢𑁄𑀖𑁄𑀲𑀸 𑀤𑀺𑀝𑁆𑀞𑀺𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀬𑀣𑀸𑀳 𑁋 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 (𑀧𑀝𑀺. 𑀫. 𑁧.𑁧𑁨𑁪) ‘‘𑀔𑀦𑁆𑀥𑀸𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁, 𑀅𑀯𑀺𑀚𑁆𑀚𑀸𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺. 𑀢𑀡𑁆𑀳𑀸𑀤𑀺𑀝𑁆𑀞𑀸𑀪𑀺𑀦𑀦𑁆𑀤𑀦𑀅𑀯𑀲𑁂𑀲𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀆𑀬𑀽𑀳𑀦𑀲𑁆𑀲 𑀧𑀤𑀝𑁆𑀞𑀸𑀦𑀁. 𑀇𑀫𑀺𑀦𑀸 𑀦𑀬𑁂𑀦 𑀬𑀣𑀸𑀭𑀳𑀁 𑀢𑀡𑁆𑀳𑀸𑀤𑀺𑀝𑁆𑀞𑀸𑀤𑀺𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀸𑀦𑀁 𑀧𑀤𑀝𑁆𑀞𑀸𑀦𑀪𑀸𑀯𑁄 𑀯𑀢𑁆𑀢𑀩𑁆𑀩𑁄. 𑀲𑁂𑀲𑀫𑁂𑀢𑁆𑀣 𑀧𑀸𑀴𑀺𑀢𑁄 𑀏𑀯 𑀲𑀼𑀦𑀺𑀤𑁆𑀥𑀸𑀭𑀺𑀬𑀁. 𑀅𑀬𑀁 𑀧𑀤𑀝𑁆𑀞𑀸𑀦𑀳𑀸𑀭𑁄.

𑀅𑀧𑁆𑀧𑀢𑀺𑀝𑁆𑀞𑀁 𑀅𑀦𑀸𑀬𑀽𑀳𑀦𑁆𑀢𑀺 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀧𑀝𑀺𑀓𑁆𑀔𑁂𑀧𑁂𑀦 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁂𑀦 𑀦𑀺𑀬𑁆𑀬𑀸𑀦𑀸𑀯𑀳𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀕𑀳𑀺𑀢𑀸 𑀏𑀓𑀦𑁆𑀢𑀢𑁄 𑀑𑀖𑀦𑀺𑀢𑁆𑀣𑀭𑀡𑀽𑀧𑀸𑀬𑀪𑀸𑀯𑀢𑁄. 𑀢𑀕𑁆𑀕𑀳𑀡𑁂𑀦 𑀘 𑀲𑀩𑁆𑀩𑁂𑀧𑀺 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀕𑀳𑀺𑀢𑀸 𑀳𑁄𑀦𑁆𑀢𑀺 𑀦𑀺𑀬𑁆𑀬𑀸𑀦𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸𑀢𑀺 𑀅𑀬𑀁 𑀮𑀓𑁆𑀔𑀡𑀳𑀸𑀭𑁄.

𑀦𑀺𑀤𑀸𑀦𑀫𑀲𑁆𑀲𑀸 ¶ 𑀤𑁂𑀯𑀢𑀸𑀬 𑀑𑀖𑀢𑀭𑀡𑀸𑀓𑀸𑀭𑀲𑁆𑀲 𑀬𑀸𑀣𑀸𑀯𑀢𑁄 𑀅𑀦𑀯𑀩𑁄𑀥𑁄𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀅𑀜𑁆𑀜𑁂𑀧𑀺 𑀬𑁂 𑀇𑀫𑀁 𑀤𑁂𑀲𑀦𑀁 𑀦𑀺𑀲𑁆𑀲𑀸𑀬 𑀑𑀖𑀢𑀭𑀡𑀽𑀧𑀸𑀬𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑀺, 𑀢𑁂𑀧𑀺 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀦𑀺𑀤𑀸𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀸. ‘‘𑀓𑀣𑀁 𑀦𑀼 𑀔𑁄 𑀇𑀫𑀁 𑀤𑁂𑀲𑀦𑀁 𑀦𑀺𑀲𑁆𑀲𑀸𑀬 𑀲𑀫𑁆𑀫𑀤𑁂𑀯 𑀧𑀝𑀺𑀯𑀺𑀚𑁆𑀛𑀦𑁆𑀢𑀸 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀑𑀖𑀁 𑀢𑀭𑀦𑁆𑀢𑀸 𑀲𑀓𑀮𑀲𑀁𑀲𑀸𑀭𑀫𑀳𑁄𑀖𑀢𑁄 𑀦𑀺𑀢𑁆𑀣𑀭𑁂𑀬𑁆𑀬𑀼𑀁, 𑀧𑀭𑁂 𑀘 𑀢𑀢𑁆𑀣 𑀧𑀢𑀺𑀝𑁆𑀞𑀧𑁂𑀬𑁆𑀬𑀼’’𑀦𑁆𑀢𑀺 𑀅𑀬𑀫𑁂𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄. 𑀧𑀤𑀦𑀺𑀩𑁆𑀩𑀘𑀦𑀁 𑀦𑀺𑀭𑀼𑀢𑁆𑀢𑀁, 𑀢𑀁 ‘‘𑀏𑀯’’𑀦𑁆𑀢𑀺𑀆𑀤𑀺𑀦𑀺𑀤𑀸𑀦𑀧𑀤𑀸𑀦𑀁 ‘‘𑀓𑀣’’𑀦𑁆𑀢𑀺𑀆𑀤𑀺𑀧𑀸𑀴𑀺𑀧𑀤𑀸𑀦𑀜𑁆𑀘 𑀅𑀝𑁆𑀞𑀓𑀣𑀸𑀬 𑀢𑀲𑁆𑀲𑀸 𑀮𑀻𑀦𑀢𑁆𑀣𑀯𑀡𑁆𑀡𑀦𑀸𑀬 𑀘 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑀼𑀓𑀭𑀢𑁆𑀢𑀸 𑀅𑀢𑀺𑀯𑀺𑀢𑁆𑀣𑀸𑀭𑀪𑀬𑁂𑀦 𑀦 𑀯𑀺𑀢𑁆𑀣𑀸𑀭𑀬𑀺𑀫𑁆𑀳.

𑀧𑀤-𑀧𑀤𑀢𑁆𑀣-𑀤𑁂𑀲𑀦𑀸-𑀦𑀺𑀓𑁆𑀔𑁂𑀧-𑀲𑀼𑀢𑁆𑀢𑀲𑀦𑁆𑀥𑀺-𑀯𑀲𑁂𑀦 𑀧𑀜𑁆𑀘𑀯𑀺𑀥𑀸 𑀲𑀦𑁆𑀥𑀺. 𑀢𑀢𑁆𑀣 𑀧𑀤𑀲𑁆𑀲 𑀧𑀤𑀦𑁆𑀢𑀭𑁂𑀦 𑀲𑀫𑁆𑀩𑀦𑁆𑀥𑁄 ¶ 𑀧𑀤𑀲𑀦𑁆𑀥𑀺. 𑀢𑀣𑀸 𑀧𑀤𑀢𑁆𑀣𑀲𑁆𑀲 𑀧𑀤𑀢𑁆𑀣𑀦𑁆𑀢𑀭𑁂𑀦 𑀲𑀫𑁆𑀩𑀦𑁆𑀥𑁄 𑀧𑀤𑀢𑁆𑀣𑀲𑀦𑁆𑀥𑀺, 𑀬𑁄 ‘‘𑀓𑀺𑀭𑀺𑀬𑀸𑀓𑀸𑀭𑀓𑀲𑀫𑁆𑀩𑀦𑁆𑀥𑁄’’𑀢𑀺 𑀯𑀼𑀢𑁆𑀢𑁄. 𑀦𑀸𑀦𑀸𑀦𑀼𑀲𑀦𑁆𑀥𑀺𑀓𑀲𑁆𑀲 𑀢𑀁𑀢𑀁𑀅𑀦𑀼𑀲𑀦𑁆𑀥𑀻𑀢𑀺 𑀲𑀫𑁆𑀩𑀦𑁆𑀥𑁄, 𑀏𑀓𑀸𑀦𑀼𑀲𑀦𑁆𑀥𑀺𑀓𑀲𑁆𑀲 𑀧𑀦 𑀧𑀼𑀩𑁆𑀩𑀸𑀧𑀭𑀲𑀫𑁆𑀩𑀦𑁆𑀥𑁄 𑀤𑁂𑀲𑀦𑀸𑀲𑀦𑁆𑀥𑀺, 𑀬𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺 𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺 𑀬𑀣𑀸𑀦𑀼𑀲𑀦𑁆𑀥𑀻’’𑀢𑀺 𑀢𑀺𑀥𑀸 𑀯𑀺𑀪𑀢𑁆𑀢𑀸. 𑀅𑀚𑁆𑀛𑀸𑀲𑀬𑁄 𑀘𑁂𑀢𑁆𑀣 𑀅𑀢𑁆𑀢𑀚𑁆𑀛𑀸𑀲𑀬𑁄 𑀧𑀭𑀚𑁆𑀛𑀸𑀲𑀬𑁄𑀢𑀺 𑀤𑁆𑀯𑀺𑀥𑀸 𑀯𑁂𑀤𑀺𑀢𑀩𑁆𑀩𑁄. 𑀦𑀺𑀓𑁆𑀔𑁂𑀧𑀲𑀦𑁆𑀥𑀺 𑀘𑀢𑀼𑀦𑁆𑀦𑀁 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀧𑀜𑁆𑀘𑀲𑀽𑀤𑀦𑀻𑀝𑀻𑀓𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀕𑀳𑁂𑀢𑀩𑁆𑀩𑀁. 𑀲𑀼𑀢𑁆𑀢𑀲𑀦𑁆𑀥𑀺 𑀇𑀥 𑀧𑀞𑀫𑀦𑀺𑀓𑁆𑀔𑁂𑀧𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸.

‘‘𑀓𑀲𑁆𑀫𑀸 𑀧𑀦𑁂𑀢𑁆𑀣 𑀑𑀖𑀢𑀭𑀡𑀲𑀼𑀢𑁆𑀢𑀫𑁂𑀯 𑀧𑀞𑀫𑀁 𑀦𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺 𑀦𑀸𑀬𑀫𑀦𑀼𑀬𑁄𑀕𑁄 𑀓𑀢𑁆𑀣𑀘𑀺 𑀦 𑀧𑀯𑀢𑁆𑀢𑀢𑀺? 𑀅𑀧𑀺𑀘 ‘‘𑀅𑀧𑁆𑀧𑀢𑀺𑀝𑁆𑀞𑀁 𑀅𑀦𑀸𑀬𑀽𑀳𑀁 𑀑𑀖𑀫𑀢𑀭𑀺’’𑀦𑁆𑀢𑀺 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀅𑀦𑁆𑀢𑀤𑁆𑀯𑀬𑀯𑀺𑀯𑀚𑁆𑀚𑀦𑀫𑀼𑀔𑁂𑀦 𑀯𑀸 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀤𑀸𑀬 𑀯𑀺𑀪𑀸𑀯𑀦𑀢𑁄 𑀲𑀩𑁆𑀩𑀧𑀞𑀫𑀫𑀺𑀤𑀁 𑀲𑀼𑀢𑁆𑀢𑀁 𑀇𑀥 𑀦𑀺𑀓𑁆𑀔𑀺𑀢𑁆𑀢𑀁. 𑀅𑀦𑁆𑀢𑀤𑁆𑀯𑀬𑀁 𑀅𑀦𑀼𑀧𑀕𑀫𑁆𑀫 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀲𑀗𑁆𑀓𑀸𑀲𑀦𑀧𑀭𑀜𑁆𑀳𑀺 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀦𑁆𑀢𑀺. 𑀬𑀁 𑀧𑀦 𑀏𑀓𑀺𑀲𑁆𑀲𑀸 𑀤𑁂𑀲𑀦𑀸𑀬 𑀤𑁂𑀲𑀦𑀦𑁆𑀢𑀭𑁂𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑀁, 𑀅𑀬𑀫𑁆𑀧𑀺 𑀤𑁂𑀲𑀦𑀸𑀲𑀦𑁆𑀥𑀺. 𑀲𑀸 𑀇𑀥 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋

‘‘𑀅𑀧𑁆𑀧𑀢𑀺𑀝𑁆𑀞𑀁…𑀧𑁂… 𑀅𑀦𑀸𑀬𑀽𑀳𑀁 𑀑𑀖𑀫𑀢𑀭𑀺’’𑀦𑁆𑀢𑀺 𑀅𑀬𑀁 𑀤𑁂𑀲𑀦𑀸 𑁋

‘‘𑀲𑀩𑁆𑀩𑀤𑀸 𑀲𑀻𑀮𑀲𑀫𑁆𑀧𑀦𑁆𑀦𑁄, 𑀧𑀜𑁆𑀜𑀯𑀸 𑀲𑀼𑀲𑀫𑀸𑀳𑀺𑀢𑁄;

𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀳𑀺𑀢𑀢𑁆𑀢𑁄, 𑀑𑀖𑀁 𑀢𑀭𑀢𑀺 𑀤𑀼𑀢𑁆𑀢𑀭𑀁.

‘‘𑀯𑀺𑀭𑀢𑁄 𑀓𑀸𑀫𑀲𑀜𑁆𑀜𑀸𑀬, 𑀭𑀽𑀧𑀲𑀁𑀬𑁄𑀚𑀦𑀸𑀢𑀺𑀕𑁄;

𑀦𑀦𑁆𑀤𑀻𑀭𑀸𑀕𑀧𑀭𑀺𑀓𑁆𑀔𑀻𑀡𑁄, 𑀲𑁄 𑀕𑀫𑁆𑀪𑀻𑀭𑁂 𑀦 𑀲𑀻𑀤𑀢𑀺; (𑀲𑀁. 𑀦𑀺. 𑁧.𑁯𑁬);

𑀲𑀤𑁆𑀥𑀸𑀬 ¶ 𑀢𑀭𑀢𑀺 𑀑𑀖𑀁, 𑀅𑀧𑁆𑀧𑀫𑀸𑀤𑁂𑀦 𑀅𑀡𑁆𑀡𑀯𑀁. (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁮𑁬);

‘‘𑀧𑀜𑁆𑀘 𑀙𑀺𑀦𑁆𑀤𑁂 𑀧𑀜𑁆𑀘 𑀚𑀳𑁂, 𑀧𑀜𑁆𑀘 𑀘𑀼𑀢𑁆𑀢𑀭𑀺 𑀪𑀸𑀯𑀬𑁂;

𑀧𑀜𑁆𑀘𑀲𑀗𑁆𑀕𑀸𑀢𑀺𑀕𑁄 𑀪𑀺𑀓𑁆𑀔𑀼, 𑀑𑀖𑀢𑀺𑀡𑁆𑀡𑁄𑀢𑀺 𑀯𑀼𑀘𑁆𑀘𑀢𑀺. (𑀲𑀁. 𑀦𑀺. 𑁧.𑁫; 𑀥. 𑀧. 𑁩𑁭𑁦);

‘‘𑀢𑀲𑁆𑀫𑀸 ¶ 𑀚𑀦𑁆𑀢𑀼 𑀲𑀤𑀸 𑀲𑀢𑁄, 𑀓𑀸𑀫𑀸𑀦𑀺 𑀧𑀭𑀺𑀯𑀚𑁆𑀚𑀬𑁂;

𑀢𑁂 𑀧𑀳𑀸𑀬 𑀢𑀭𑁂 𑀑𑀖𑀁, 𑀦𑀸𑀯𑀁 𑀲𑀺𑀢𑁆𑀯𑀸𑀯 𑀧𑀸𑀭𑀕𑀽. (𑀲𑀼. 𑀦𑀺. 𑁭𑁭𑁭; 𑀫𑀳𑀸𑀦𑀺. 𑁬; 𑀦𑁂𑀢𑁆𑀢𑀺. 𑁫);

‘‘𑀏𑀓𑀸𑀬𑀦𑀁 𑀚𑀸𑀢𑀺𑀔𑀬𑀦𑁆𑀢𑀤𑀲𑁆𑀲𑀻, 𑀫𑀕𑁆𑀕𑀁 𑀧𑀚𑀸𑀦𑀸𑀢𑀺 𑀳𑀺𑀢𑀸𑀦𑀼𑀓𑀫𑁆𑀧𑀻;

𑀏𑀢𑁂𑀦 𑀫𑀕𑁆𑀕𑁂𑀦 𑀢𑀭𑀺𑀁𑀲𑀼 𑀧𑀼𑀩𑁆𑀩𑁂, 𑀢𑀭𑀺𑀲𑁆𑀲𑀦𑁆𑀢𑀺 𑀬𑁂 𑀘 𑀢𑀭𑀦𑁆𑀢𑀺 𑀑𑀖’’𑀦𑁆𑀢𑀺. (𑀲𑀁. 𑀦𑀺. 𑁫.𑁩𑁮𑁪, 𑁪𑁦𑁯; 𑀫𑀳𑀸𑀦𑀺. 𑁧𑁯𑁧; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀸𑀦𑀼𑀕𑀻𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁧𑁦𑁭; 𑀧𑀞𑀫𑀯𑀕𑁆𑀕 𑁧𑁨𑁧; 𑀦𑁂𑀢𑁆𑀢𑀺. 𑁧𑁭𑁦) 𑁋

𑀏𑀯𑀫𑀸𑀤𑀻𑀳𑀺 𑀤𑁂𑀲𑀦𑀸𑀳𑀺 𑀲𑀁𑀲𑀦𑁆𑀤𑀢𑀻𑀢𑀺 𑀅𑀬𑀁 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄.

𑀅𑀧𑁆𑀧𑀢𑀺𑀝𑁆𑀞𑀁 𑀅𑀦𑀸𑀬𑀽𑀳𑀦𑁆𑀢𑀺 𑀏𑀢𑁆𑀣 𑀲𑀁𑀓𑀺𑀮𑁂𑀲𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁 𑀆𑀬𑀽𑀳𑀦𑀜𑁆𑀘. 𑀢𑁂𑀦 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀤𑀻𑀧𑀺𑀢𑁄, 𑀲𑀦𑁆𑀢𑀓𑀺𑀮𑁂𑀲𑀯𑀲𑁂𑀦 𑀅𑀦𑀸𑀬𑀽𑀳𑀦𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀭𑁄𑀢𑁄 𑀢𑀡𑁆𑀳𑀸𑀯𑀺𑀚𑁆𑀚𑀸 𑀧𑀯𑀟𑁆𑀠𑀢𑀺. 𑀢𑁂𑀲𑀼 𑀢𑀡𑁆𑀳𑀸𑀕𑀳𑀡𑁂𑀦 𑀘 𑀢𑀡𑁆𑀳𑀸𑀫𑀽𑀮𑀓𑀸 𑀥𑀫𑁆𑀫𑀸 𑀆𑀯𑀢𑁆𑀢𑀦𑁆𑀢𑀺. 𑀅𑀯𑀺𑀚𑁆𑀚𑀸𑀕𑀳𑀡𑁂𑀦 𑀅𑀯𑀺𑀚𑁆𑀚𑀸𑀫𑀽𑀮𑀓𑀁 𑀲𑀩𑁆𑀩𑀁 𑀪𑀯𑀘𑀓𑁆𑀓𑀁 𑀆𑀯𑀢𑁆𑀢𑀢𑀺. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀕𑁆𑀕𑀳𑀡𑁂𑀦 𑀘 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀫𑀽𑀮𑀓𑀸 𑀥𑀫𑁆𑀫𑀸 𑀆𑀯𑀢𑁆𑀢𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀜𑁆𑀘 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀁. 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀧𑀝𑀺𑀓𑁆𑀔𑁂𑀧𑁂𑀦 𑀧𑀦 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀤𑀻𑀧𑀺𑀢𑀸, 𑀲𑀸 𑀘 𑀲𑀗𑁆𑀔𑁂𑀧𑀢𑁄 𑀲𑀻𑀮𑀸𑀤𑀺𑀲𑀗𑁆𑀕𑀳𑀸. 𑀢𑀢𑁆𑀣 𑀲𑀻𑀮𑀕𑁆𑀕𑀳𑀡𑁂𑀦 𑀏𑀓𑀸𑀤𑀲 𑀲𑀻𑀮𑀸𑀦𑀺𑀲𑀁𑀲𑀸 𑀆𑀯𑀢𑁆𑀢𑀦𑁆𑀢𑀺, 𑀲𑀫𑀸𑀥𑀺𑀕𑁆𑀕𑀳𑀡𑁂𑀦 𑀧𑀜𑁆𑀘𑀗𑁆𑀕𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀺 𑀧𑀜𑁆𑀘𑀜𑁆𑀜𑀸𑀡𑀺𑀓𑁄 𑀲𑀫𑁆𑀫𑀸𑀲𑀫𑀸𑀥𑀺 𑀲𑀫𑀸𑀥𑀺𑀧𑀭𑀺𑀓𑁆𑀔𑀸𑀭𑀸 𑀘 𑀆𑀯𑀢𑁆𑀢𑀦𑁆𑀢𑀺. 𑀧𑀜𑁆𑀜𑀸𑀕𑀳𑀡𑁂𑀦 𑀧𑀜𑁆𑀜𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀼𑀤𑀲𑁆𑀲𑀦𑀸 𑀲𑀩𑁆𑀩𑁂𑀧𑀺 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑀸 𑀆𑀯𑀢𑁆𑀢𑀦𑁆𑀢𑀻𑀢𑀺 𑀅𑀬𑀁 𑀆𑀯𑀢𑁆𑀢𑁄 𑀳𑀸𑀭𑁄.

𑀧𑀢𑀺𑀝𑁆𑀞𑀸𑀦𑀁 𑀓𑀺𑀮𑁂𑀲𑀸𑀤𑀺𑀯𑀲𑁂𑀦 𑀲𑀢𑁆𑀢𑀯𑀺𑀥𑀁. 𑀆𑀬𑀽𑀳𑀦𑀁 𑀅𑀪𑀺𑀲𑀗𑁆𑀔𑀸𑀭𑀸𑀤𑀺𑀯𑀲𑁂𑀦 𑀲𑀢𑁆𑀢𑀯𑀺𑀥𑀁. 𑀢𑀣𑀸 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀧𑁆𑀧𑀢𑀺𑀝𑁆𑀞𑀸𑀦𑀁 𑀅𑀦𑀸𑀬𑀽𑀳𑀦𑀜𑁆𑀘. 𑀅𑀬𑀫𑁂𑀢𑁆𑀣 𑀥𑀫𑁆𑀫𑀯𑀺𑀪𑀢𑁆𑀢𑀺. 𑀧𑀤𑀝𑁆𑀞𑀸𑀦𑀪𑀽𑀫𑀺𑀯𑀺𑀪𑀢𑁆𑀢𑀺𑀬𑁄 𑀧𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀁 𑀯𑀺𑀪𑀢𑁆𑀢𑀺𑀳𑀸𑀭𑁄.

𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀁 𑀲𑀫𑁆𑀫𑀤𑁂𑀯 𑀲𑀫𑁆𑀧𑀸𑀤𑁂𑀢𑁆𑀯𑀸 𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀓𑀢𑁆𑀯𑀸 𑀪𑀸𑀯𑀦𑀁 𑀉𑀲𑁆𑀲𑀓𑁆𑀓𑁂𑀦𑁆𑀢𑁄 𑀓𑀺𑀮𑁂𑀲𑀸𑀤𑀻𑀦𑀁 𑀤𑀽𑀭𑀻𑀓𑀭𑀡𑀢𑁄 𑀢𑁂𑀲𑀁 𑀯𑀲𑁂𑀦 𑀅𑀲𑀁𑀲𑀻𑀤𑀦𑁆𑀢𑁄 ¶ 𑀅𑀦𑀺𑀩𑁆𑀩𑀼𑀬𑁆𑀳𑀦𑁆𑀢𑁄 𑀅𑀧𑁆𑀧𑀢𑀺𑀝𑁆𑀞𑀁 𑀅𑀦𑀸𑀬𑀽𑀳𑀁 𑀑𑀖𑀁 𑀢𑀭𑀢𑀺. 𑀓𑀺𑀮𑁂𑀲𑀸𑀤𑀻𑀦𑀁 𑀯𑀲𑁂𑀦 𑀧𑀦 𑀲𑀁𑀲𑀻𑀤𑀦𑁆𑀢𑁄 𑀦𑀺𑀩𑁆𑀩𑀼𑀬𑁆𑀳𑀦𑁆𑀢𑁄 𑀲𑀁𑀲𑀸𑀭𑁂 𑀧𑀢𑀺𑀝𑁆𑀞𑀸𑀦𑀢𑁄 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸 𑀆𑀬𑀽𑀳𑀦𑀢𑁄 𑀑𑀖𑀁 𑀦 𑀢𑀭𑀢𑀻𑀢𑀺 𑀅𑀬𑀁 𑀧𑀭𑀺𑀯𑀢𑁆𑀢𑁄 𑀳𑀸𑀭𑁄.

𑀅𑀧𑁆𑀧𑀢𑀺𑀝𑁆𑀞𑀁 ¶ 𑀅𑀲𑀦𑁆𑀢𑀺𑀝𑁆𑀞𑀦𑁆𑀢𑁄 𑀅𑀲𑀁𑀲𑀻𑀤𑀦𑁆𑀢𑁄 𑀅𑀦𑀺𑀩𑁆𑀩𑀺𑀲𑀁 𑀅𑀦𑀯𑀺𑀦𑀺𑀩𑁆𑀩𑀺𑀲𑀦𑁆𑀢𑀺 𑀧𑀭𑀺𑀬𑀸𑀬𑀯𑀘𑀦𑀁, 𑀅𑀦𑀸𑀬𑀽𑀳𑀁 𑀅𑀦𑀺𑀩𑁆𑀩𑀼𑀬𑁆𑀳𑀦𑁆𑀢𑁄 𑀅𑀘𑁂𑀢𑁂𑀦𑁆𑀢𑁄 𑀅𑀧𑀓𑀧𑁆𑀧𑁂𑀦𑁆𑀢𑁄𑀢𑀺 𑀧𑀭𑀺𑀬𑀸𑀬𑀯𑀘𑀦𑀁, 𑀑𑀖𑀁 𑀓𑀺𑀮𑁂𑀲𑀲𑀫𑀼𑀤𑁆𑀤𑀦𑁆𑀢𑀺 𑀧𑀭𑀺𑀬𑀸𑀬𑀯𑀘𑀦𑀁, 𑀅𑀢𑀭𑀺 𑀅𑀢𑀺𑀓𑁆𑀓𑀫𑀺 𑀅𑀘𑁆𑀘𑀯𑀸𑀬𑀻𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀤𑁂𑀲𑀼𑀧𑀺 𑀧𑀭𑀺𑀬𑀸𑀬𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀅𑀬𑀁 𑀯𑁂𑀯𑀘𑀦𑁄 𑀳𑀸𑀭𑁄.

𑀅𑀧𑁆𑀧𑀢𑀺𑀝𑁆𑀞𑀁 𑀅𑀦𑀸𑀬𑀽𑀳𑀦𑁆𑀢𑀺 𑀏𑀢𑁆𑀣 𑀧𑀢𑀺𑀝𑁆𑀞𑀁 𑀆𑀬𑀽𑀳𑀦𑁆𑀢𑀺 𑀓𑀺𑀮𑁂𑀲𑀸𑀦𑀁 𑀓𑀺𑀘𑁆𑀘𑀓𑀭𑀡𑀧𑀜𑁆𑀜𑀢𑁆𑀢𑀺. 𑀧𑀭𑀺𑀬𑀼𑀝𑁆𑀞𑀸𑀦𑀸𑀦𑀁 𑀯𑀺𑀪𑀸𑀯𑀦𑀧𑀜𑁆𑀜𑀢𑁆𑀢𑀺. 𑀅𑀪𑀺𑀲𑀗𑁆𑀔𑀸𑀭𑀸𑀦𑀁 𑀯𑀺𑀭𑀼𑀳𑀦𑀧𑀜𑁆𑀜𑀢𑁆𑀢𑀺. 𑀢𑀡𑁆𑀳𑀸𑀬 𑀅𑀲𑁆𑀲𑀸𑀤𑀧𑀜𑁆𑀜𑀢𑁆𑀢𑀺. 𑀤𑀺𑀝𑁆𑀞𑀺𑀬𑀸 𑀧𑀭𑀺𑀦𑀺𑀧𑁆𑀨𑀦𑁆𑀤𑀦𑀧𑀜𑁆𑀜𑀢𑁆𑀢𑀺. 𑀪𑀯𑀤𑀺𑀝𑁆𑀞𑀺𑀬𑀸 𑀪𑀯𑀸𑀪𑀺𑀦𑀺𑀯𑁂𑀲𑀧𑀜𑁆𑀜𑀢𑁆𑀢𑀺. 𑀯𑀺𑀪𑀯𑀤𑀺𑀝𑁆𑀞𑀺𑀬𑀸 𑀯𑀺𑀧𑀮𑁆𑀮𑀸𑀲𑀧𑀜𑁆𑀜𑀢𑁆𑀢𑀺. 𑀓𑀸𑀫𑀲𑀼𑀔𑀸𑀦𑀼𑀬𑁄𑀕𑀲𑁆𑀲 𑀓𑀸𑀫𑁂𑀲𑀼 𑀅𑀦𑀼𑀕𑀺𑀚𑁆𑀛𑀦𑀧𑀜𑁆𑀜𑀢𑁆𑀢𑀺. 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀲𑁆𑀲 𑀅𑀢𑁆𑀢𑀧𑀭𑀺𑀢𑀸𑀧𑀦𑀧𑀜𑁆𑀜𑀢𑁆𑀢𑀺. 𑀅𑀧𑁆𑀧𑀢𑀺𑀝𑁆𑀞𑀁 𑀅𑀦𑀸𑀬𑀽𑀳𑀦𑁆𑀢𑀺 𑀧𑀦 𑀅𑀪𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀧𑀜𑁆𑀜𑀢𑁆𑀢𑀺. 𑀧𑀭𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑀸𑀦𑀁 𑀧𑀭𑀺𑀜𑁆𑀜𑀸𑀧𑀜𑁆𑀜𑀢𑁆𑀢𑀺. 𑀑𑀖𑀫𑀢𑀭𑀺𑀦𑁆𑀢𑀺 𑀧𑀳𑀸𑀢𑀩𑁆𑀩𑀥𑀫𑁆𑀫𑀸𑀦𑀁 𑀧𑀳𑀸𑀦𑀧𑀜𑁆𑀜𑀢𑁆𑀢𑀺. 𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀧𑀜𑁆𑀜𑀢𑁆𑀢𑀺. 𑀦𑀺𑀭𑁄𑀥𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀜𑁆𑀜𑀢𑁆𑀢𑀻𑀢𑀺 𑀅𑀬𑀁 𑀧𑀜𑁆𑀜𑀢𑁆𑀢𑀺𑀳𑀸𑀭𑁄.

𑀅𑀧𑁆𑀧𑀢𑀺𑀝𑁆𑀞𑀁 𑀅𑀦𑀸𑀬𑀽𑀳𑀦𑁆𑀢𑀺 𑀏𑀢𑁆𑀣 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀕𑁆𑀕𑀳𑀡𑁂𑀦 𑀑𑀖𑀕𑁆𑀕𑀳𑀡𑁂𑀦 𑀘 𑀲𑀫𑀼𑀤𑀬𑀲𑀘𑁆𑀘𑀁 𑀕𑀳𑀺𑀢𑀁. 𑀅𑀧𑁆𑀧𑀢𑀺𑀝𑁆𑀞𑀁 𑀅𑀦𑀸𑀬𑀽𑀳𑀁 𑀅𑀢𑀭𑀺𑀦𑁆𑀢𑀺 𑀧𑀦 𑀧𑀤𑀢𑁆𑀢𑀬𑁂𑀦 𑀫𑀕𑁆𑀕𑀲𑀘𑁆𑀘𑀁 𑀕𑀳𑀺𑀢𑀁, 𑀳𑁂𑀢𑀼𑀕𑀳𑀡𑁂𑀦 𑀘 𑀳𑁂𑀢𑀼𑀫𑀢𑁄 𑀕𑀳𑀡𑀁 𑀲𑀺𑀤𑁆𑀥𑀫𑁂𑀯𑀸𑀢𑀺 𑀤𑀼𑀓𑁆𑀔𑀦𑀺𑀭𑁄𑀥𑀲𑀘𑁆𑀘𑀸𑀦𑀺 𑀅𑀢𑁆𑀣𑀢𑁄 𑀕𑀳𑀺𑀢𑀸𑀦𑁂𑀯𑀸𑀢𑀺 𑀅𑀬𑀁 𑀲𑀘𑁆𑀘𑁂𑀳𑀺 𑀑𑀢𑀭𑀡𑀸. 𑀢𑀢𑁆𑀣 𑀬𑁂 𑀮𑁄𑀓𑀺𑀬𑀸 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀬𑁂𑀲𑀁 𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀲𑀺𑀤𑁆𑀥𑀺. 𑀬𑁂 𑀮𑁄𑀓𑀼𑀢𑁆𑀢𑀭𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸, 𑀬𑁂𑀲𑀁 𑀯𑀲𑁂𑀦 𑀑𑀖𑀢𑀭𑀡𑀲𑀺𑀤𑁆𑀥𑀺. 𑀅𑀬𑀁 𑀔𑀦𑁆𑀥𑀫𑀼𑀔𑁂𑀦 𑀑𑀢𑀭𑀡𑀸. 𑀬𑁂 𑀏𑀯 𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄, 𑀢𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀤𑁆𑀯𑀸𑀬𑀢𑀦𑀸𑀦𑀺 𑀤𑁆𑀯𑁂 𑀥𑀸𑀢𑀼𑀬𑁄𑀢𑀺 𑀅𑀬𑀁 𑀆𑀬𑀢𑀦𑀫𑀼𑀔𑁂𑀦 𑀥𑀸𑀢𑀼𑀫𑀼𑀔𑁂𑀦 𑀘 𑀑𑀢𑀭𑀡𑀸. 𑀢𑀣𑀸 𑀅𑀧𑁆𑀧𑀢𑀺𑀝𑁆𑀞𑀁 𑀅𑀦𑀸𑀬𑀽𑀳𑀦𑁆𑀢𑀺 𑀏𑀢𑁆𑀣 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀕𑁆𑀕𑀳𑀡𑁂𑀦 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁 𑀕𑀳𑀡𑀁. 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀸𑀤𑀬𑁄 𑀑𑀖𑀸 𑀘 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀸 𑀥𑀫𑁆𑀫𑀸𑀬𑀢𑀦𑀁 𑀥𑀫𑁆𑀫𑀥𑀸𑀢𑀼 𑀘, 𑀅𑀧𑁆𑀧𑀢𑀺𑀝𑁆𑀞𑀸𑀦𑀸𑀦𑀸𑀬𑀽𑀳𑀦𑀕𑁆𑀕𑀳𑀡𑁂𑀦 𑀑𑀖𑀢𑀭𑀡𑀯𑀘𑀦𑁂𑀦 𑀘 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁄 𑀓𑀣𑀺𑀢𑁄. 𑀏𑀯𑀜𑁆𑀘 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀥𑀫𑁆𑀫𑀸𑀬𑀢𑀦𑀁 𑀥𑀫𑁆𑀫𑀥𑀸𑀢𑀼 𑀘 ¶ 𑀕𑀳𑀺𑀢𑀸𑀢𑀺 𑀏𑀯𑀫𑁆𑀧𑀺 𑀔𑀦𑁆𑀥𑀫𑀼𑀔𑁂𑀦 𑀆𑀬𑀢𑀦𑀫𑀼𑀔𑁂𑀦 𑀥𑀸𑀢𑀼𑀫𑀼𑀔𑁂𑀦 𑀑𑀢𑀭𑀡𑀸. 𑀯𑀺𑀧𑀲𑁆𑀲𑀦𑀸 𑀘𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸, 𑀅𑀦𑀺𑀫𑀺𑀢𑁆𑀢𑀫𑀼𑀔𑁂𑀦 𑀯𑀺𑀫𑁄𑀓𑁆𑀔𑀫𑀼𑀔𑀁, 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀘𑁂, 𑀅𑀧𑁆𑀧𑀡𑀺𑀳𑀺𑀢𑀯𑀺𑀫𑁄𑀓𑁆𑀔𑀫𑀼𑀔𑀁, 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀘𑁂, 𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀫𑀼𑀔𑀦𑁆𑀢𑀺 𑀏𑀯𑀁 𑀯𑀺𑀫𑁄𑀓𑁆𑀔𑀫𑀼𑀔𑁂𑀦 𑀑𑀢𑀭𑀡𑀁. 𑀫𑀕𑁆𑀕𑁂 𑀲𑁂𑀓𑁆𑀔𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀥𑀫𑁆𑀫𑀸𑀬𑀢𑀦𑀥𑀫𑁆𑀫𑀥𑀸𑀢𑀽 𑀅𑀦𑀸𑀲𑀯𑀸 𑀘 𑀏𑀯𑀫𑁆𑀧𑀺 𑀔𑁄 𑀔𑀦𑁆𑀥𑀸𑀤𑀺𑀫𑀼𑀔𑁂𑀦 𑀑𑀢𑀭𑀡𑀸𑀢𑀺 𑀅𑀬𑀁 𑀑𑀢𑀭𑀡𑁄 𑀳𑀸𑀭𑁄.

𑀅𑀧𑁆𑀧𑀢𑀺𑀝𑁆𑀞𑀦𑁆𑀢𑀺 𑀆𑀭𑀫𑁆𑀪𑁄. 𑀅𑀦𑀸𑀬𑀽𑀳𑀦𑁆𑀢𑀺 𑀧𑀤𑀲𑀼𑀤𑁆𑀥𑀺, 𑀦𑁄 𑀆𑀭𑀫𑁆𑀪𑀲𑀼𑀤𑁆𑀥𑀺, 𑀢𑀣𑀸 𑀑𑀖𑀦𑁆𑀢𑀺. 𑀅𑀢𑀭𑀺𑀦𑁆𑀢𑀺 𑀧𑀦 𑀧𑀤𑀲𑀼𑀤𑁆𑀥𑀺 𑀘𑁂𑀯 𑀆𑀭𑀫𑁆𑀪𑀲𑀼𑀤𑁆𑀥𑀺 𑀘𑀸𑀢𑀺 𑀅𑀬𑀁 𑀲𑁄𑀥𑀦𑁄 𑀳𑀸𑀭𑁄.

𑀅𑀧𑁆𑀧𑀢𑀺𑀝𑁆𑀞𑀁 ¶ 𑀅𑀦𑀸𑀬𑀽𑀳𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀅𑀥𑀺𑀝𑁆𑀞𑀸𑀦𑀁 𑀢𑀡𑁆𑀳𑀸𑀤𑀺𑀝𑁆𑀞𑀺𑀆𑀤𑀺𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀸𑀦𑀁 𑀲𑀸𑀥𑀸𑀭𑀡𑀢𑁄 𑀧𑀝𑀺𑀓𑁆𑀔𑁂𑀧𑀘𑁄𑀤𑀦𑀸𑀢𑀺 𑀓𑀢𑁆𑀯𑀸 𑀑𑀖𑀫𑀢𑀭𑀺𑀦𑁆𑀢𑀺 𑀢𑀁 𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀺𑀲𑁂𑀲𑀯𑀘𑀦𑀁. 𑀑𑀖𑀢𑀭𑀡𑀜𑁆𑀳𑀺 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸. 𑀢𑀢𑁆𑀣 𑀧𑀞𑀫𑀤𑀼𑀢𑀺𑀬𑀫𑀕𑁆𑀕𑀸 𑀅𑀯𑀺𑀲𑁂𑀲𑁂𑀦 𑀤𑀺𑀝𑁆𑀞𑁄𑀖𑀢𑀭𑀡𑀁, 𑀢𑀢𑀺𑀬𑀫𑀕𑁆𑀕𑁄 𑀓𑀸𑀫𑁄𑀖𑀢𑀭𑀡𑀁, 𑀅𑀕𑁆𑀕𑀫𑀕𑁆𑀕𑁄 𑀲𑁂𑀲𑁄𑀖𑀢𑀭𑀡𑀦𑁆𑀢𑀺 𑀅𑀬𑀁 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑁄.

𑀓𑀺𑀮𑁂𑀲𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀲𑁆𑀲 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀳𑁂𑀢𑀼. 𑀅𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀆𑀬𑀽𑀳𑀦𑀲𑁆𑀲 𑀓𑀺𑀮𑁂𑀲𑀸 𑀳𑁂𑀢𑀽. 𑀅𑀧𑁆𑀧𑀢𑀺𑀝𑁆𑀞𑀸𑀦𑀸𑀦𑀸𑀬𑀽𑀳𑀦𑀸𑀦𑀁 𑀧𑀦 𑀬𑀣𑀸𑀓𑁆𑀓𑀫𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀳𑀸𑀦𑀸𑀦𑀺 𑀳𑁂𑀢𑀽. 𑀲𑀁𑀬𑁄𑀚𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀦𑀸 𑀢𑀡𑁆𑀳𑀸𑀯𑀲𑁂𑀦 𑀬𑀣𑀸𑀭𑀳𑀁 𑀢𑀲𑁆𑀲 𑀳𑁂𑀢𑀽. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀲𑀁𑀬𑁄𑀚𑀦𑀺𑀬𑁂𑀲𑀼, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀢𑀡𑁆𑀳𑀸 𑀧𑀯𑀟𑁆𑀠𑀢𑀻’’𑀢𑀺. 𑀔𑀦𑁆𑀥𑀸𑀯𑀺𑀚𑁆𑀚𑀸𑀨𑀲𑁆𑀲𑀲𑀜𑁆𑀜𑀸𑀯𑀺𑀢𑀓𑁆𑀓𑀸𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀸𑀧𑀫𑀺𑀢𑁆𑀢𑀧𑀭𑀢𑁄𑀖𑁄𑀲𑀸 𑀤𑀺𑀝𑁆𑀞𑀺𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀲𑁆𑀲 𑀳𑁂𑀢𑀽. 𑀢𑁂𑀦𑀸𑀳 𑁋 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 ‘‘𑀔𑀦𑁆𑀥𑀸𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦𑀁, 𑀅𑀯𑀺𑀚𑁆𑀚𑀸𑀧𑀺 𑀤𑀺𑀝𑁆𑀞𑀺𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺. 𑀢𑀡𑁆𑀳𑀸𑀪𑀺𑀦𑀦𑁆𑀤𑀦𑀸 𑀅𑀯𑀲𑁂𑀲𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀆𑀬𑀽𑀳𑀦𑀲𑁆𑀲 𑀳𑁂𑀢𑀽. 𑀇𑀫𑀺𑀦𑀸 𑀦𑀬𑁂𑀦 𑀬𑀣𑀸𑀭𑀳𑀁 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀸𑀦𑀁 𑀳𑁂𑀢𑀼𑀯𑀺𑀪𑀸𑀕𑁄 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑁄, 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀅𑀧𑁆𑀧𑀢𑀺𑀝𑁆𑀞𑀸𑀦𑀸𑀦𑀸𑀬𑀽𑀳𑀦𑀸𑀦𑀁. 𑀓𑀺𑀮𑁂𑀲𑀼𑀧𑁆𑀧𑀸𑀤𑀦𑁂 𑀳𑀺 𑀲𑀫𑁆𑀫𑀤𑁂𑀯 𑀆𑀤𑀻𑀦𑀯𑀤𑀲𑁆𑀲𑀦𑀁 𑀅𑀧𑁆𑀧𑀢𑀺𑀝𑁆𑀞𑀸𑀦𑀲𑁆𑀲 𑀳𑁂𑀢𑀽, 𑀅𑀪𑀺𑀲𑀗𑁆𑀔𑀭𑀡𑁂 𑀆𑀤𑀻𑀦𑀯𑀤𑀲𑁆𑀲𑀦𑀁 𑀅𑀦𑀸𑀬𑀽𑀳𑀦𑀲𑁆𑀲 𑀳𑁂𑀢𑀽, 𑀯𑀺𑀧𑀲𑁆𑀲𑀦𑀸𑀬 𑀉𑀲𑁆𑀲𑀼𑀓𑁆𑀓𑀸𑀧𑀦𑀁 𑀑𑀖𑀢𑀭𑀡𑀲𑁆𑀲 𑀳𑁂𑀢𑀽𑀢𑀺 𑀅𑀬𑀁 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑁄.

𑀬𑀣𑀸𑀯𑀼𑀢𑁆𑀢𑀯𑀺𑀪𑀸𑀕𑁂𑀳𑀺 ¶ 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑁂𑀳𑀺 𑀘𑀢𑀼𑀩𑁆𑀩𑀺𑀥𑀲𑁆𑀲𑀧𑀺 𑀑𑀖𑀲𑁆𑀲 𑀧𑀭𑀺𑀲𑀼𑀤𑁆𑀥𑀺. 𑀅𑀧𑁆𑀧𑀢𑀺𑀝𑁆𑀞𑀸𑀦𑀸𑀦𑀸𑀬𑀽𑀳𑀦𑁂𑀳𑀺 𑀧𑀦 𑀲𑁄𑀢𑀸𑀦𑀁 𑀲𑀁𑀯𑀭𑁄 𑀲𑀩𑁆𑀩𑀲𑁄 𑀧𑀺𑀥𑀸𑀦𑀜𑁆𑀘𑀸𑀢𑀺 𑀘𑀢𑀼𑀩𑁆𑀩𑀺𑀥𑀲𑁆𑀲𑀧𑀺 𑀑𑀖𑀲𑁆𑀲 𑀯𑀺𑀲𑁂𑀲𑀢𑁄 𑀧𑀺𑀥𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀁. 𑀅𑀭𑀺𑀬𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀬 𑀳𑀺 𑀓𑀺𑀮𑁂𑀲𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁 𑀅𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀆𑀬𑀽𑀳𑀦𑀁 𑀉𑀧𑀘𑁆𑀙𑀺𑀦𑁆𑀦𑀁, 𑀢𑀲𑁆𑀲 𑀲𑀩𑁆𑀩𑁂𑀧𑀺 𑀑𑀖𑀸 𑀢𑀺𑀡𑁆𑀡𑀸 𑀲𑀫𑁆𑀫𑀢𑀺𑀡𑁆𑀡𑀸 𑀧𑀳𑀻𑀦𑀸 𑀳𑁄𑀦𑁆𑀢𑀻𑀢𑀺 𑀅𑀬𑀁 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄.

𑀅𑀧𑁆𑀧𑀢𑀺𑀝𑁆𑀞𑀁 𑀅𑀦𑀸𑀬𑀽𑀳𑀦𑁆𑀢𑀺 𑀏𑀢𑁆𑀣 𑀧𑀢𑀺𑀝𑁆𑀞𑀸𑀕𑀳𑀡𑁂𑀦 𑀢𑀡𑁆𑀳𑀸𑀯𑀺𑀚𑁆𑀚𑀸 𑀕𑀳𑀺𑀢𑀸. 𑀢𑀸𑀲𑀁 𑀳𑀺 𑀯𑀲𑁂𑀦 𑀲𑀢𑁆𑀢𑁄 𑀢𑀢𑁆𑀣 𑀢𑀢𑁆𑀣 𑀪𑀯𑁂 𑀧𑀢𑀺𑀝𑁆𑀞𑀸𑀢𑀺. 𑀆𑀬𑀽𑀳𑀦𑀕𑁆𑀕𑀳𑀡𑁂𑀦 𑀢𑀧𑁆𑀧𑀘𑁆𑀘𑀬𑀸 𑀅𑀪𑀺𑀲𑀗𑁆𑀔𑀸𑀭𑀥𑀫𑁆𑀫𑀸 𑀕𑀳𑀺𑀢𑀸. 𑀢𑀢𑁆𑀣 𑀢𑀡𑁆𑀳𑀸𑀬 𑀯𑀺𑀲𑁂𑀲𑀢𑁄 𑀭𑀽𑀧𑀥𑀫𑁆𑀫𑀸 𑀅𑀥𑀺𑀝𑁆𑀞𑀸𑀦𑀁, 𑀅𑀯𑀺𑀚𑁆𑀚𑀸𑀬 𑀅𑀭𑀽𑀧𑀥𑀫𑁆𑀫𑀸. 𑀢𑁂𑀲𑀁 𑀬𑀣𑀸𑀓𑁆𑀓𑀫𑀁 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘 𑀧𑀝𑀺𑀧𑀓𑁆𑀔𑀸, 𑀢𑁂 ‘‘𑀅𑀧𑁆𑀧𑀢𑀺𑀝𑁆𑀞𑀁 𑀅𑀦𑀸𑀬𑀽𑀳𑀁 𑀑𑀖𑀫𑀢𑀭𑀺’’𑀦𑁆𑀢𑀺 𑀧𑀤𑁂𑀳𑀺 𑀧𑀓𑀸𑀲𑀺𑀢𑀸 𑀳𑁄𑀦𑁆𑀢𑀺, 𑀢𑁂𑀲𑀼 𑀲𑀫𑀣𑀲𑁆𑀲 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀨𑀮𑀁, 𑀯𑀺𑀧𑀲𑁆𑀲𑀦𑀸𑀬 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺. 𑀢𑀣𑀸 𑀳𑀺 𑀲𑀸 ‘‘𑀭𑀸𑀕𑀯𑀺𑀭𑀸𑀕𑀸 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀢𑀡𑁆𑀳𑀸𑀯𑀺𑀚𑁆𑀚𑀸 𑀅𑀪𑀺𑀲𑀗𑁆𑀔𑀸𑀭𑁄 𑀘 𑀲𑀫𑀼𑀤𑀬𑀲𑀘𑁆𑀘𑀁, 𑀢𑁂𑀲𑀁 𑀅𑀥𑀺𑀝𑁆𑀞𑀸𑀦𑀪𑀽𑀢𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀤𑀼𑀓𑁆𑀔𑀲𑀘𑁆𑀘𑀁, 𑀢𑁂𑀲𑀁 𑀅𑀧𑁆𑀧𑀯𑀢𑁆𑀢𑀺 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑀚𑀸𑀦𑀦𑀸 𑀧𑀝𑀺𑀧𑀤𑀸 𑀑𑀖𑀢𑀭𑀡𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸 𑀫𑀕𑁆𑀕𑀲𑀘𑁆𑀘𑀁. 𑀢𑀡𑁆𑀳𑀸𑀕𑀳𑀡𑁂𑀦 𑀘𑁂𑀢𑁆𑀣 𑀫𑀸𑀬𑀸-𑀲𑀸𑀞𑁂𑀬𑁆𑀬𑀫𑀸𑀦𑀸𑀢𑀺𑀫𑀸𑀦-𑀫𑀤𑀧𑁆𑀧𑀫𑀸𑀤-𑀧𑀸𑀧𑀺𑀘𑁆𑀙𑀢𑀸-𑀧𑀸𑀧𑀫𑀺𑀢𑁆𑀢𑀢𑀸-𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀸𑀤𑀺𑀯𑀲𑁂𑀦 ¶ 𑀅𑀓𑀼𑀲𑀮𑀧𑀓𑁆𑀔𑁄 𑀦𑁂𑀢𑀩𑁆𑀩𑁄. 𑀅𑀯𑀺𑀚𑁆𑀚𑀸𑀕𑀳𑀡𑁂𑀦 𑀯𑀺𑀧𑀭𑀻𑀢𑀫𑀦𑀲𑀺𑀓𑀸𑀭-𑀓𑁄𑀥𑀽𑀧𑀦𑀸𑀳-𑀫𑀓𑁆𑀔𑀧𑀴𑀸𑀲-𑀇𑀲𑁆𑀲𑀸𑀫𑀘𑁆𑀙𑀭𑀺𑀬-𑀲𑀸𑀭𑀫𑁆𑀪- 𑀤𑁄𑀯𑀘𑀲𑁆𑀲𑀢𑀸-𑀪𑀯𑀤𑀺𑀝𑁆𑀞𑀺𑀆𑀤𑀺𑀯𑀲𑁂𑀦 𑀅𑀓𑀼𑀲𑀮𑀧𑀓𑁆𑀔𑁄 𑀦𑁂𑀢𑀩𑁆𑀩𑁄. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀫𑀸𑀬𑀸𑀅𑀲𑀸𑀞𑁂𑀬𑁆𑀬𑀸𑀤𑀺𑀅𑀯𑀺𑀧𑀭𑀻𑀢𑀫𑀦𑀲𑀺𑀓𑀸𑀭𑀸𑀤𑀺𑀯𑀲𑁂𑀦. 𑀢𑀣𑀸 𑀲𑀫𑀣𑀧𑀓𑁆𑀔𑀺𑀬𑀸𑀦𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀦𑀁 𑀯𑀺𑀧𑀲𑁆𑀲𑀦𑀸𑀧𑀓𑁆𑀔𑀺𑀬𑀸𑀦𑀁 𑀅𑀦𑀺𑀘𑁆𑀘𑀲𑀜𑁆𑀜𑀸𑀤𑀻𑀦𑀜𑁆𑀘 𑀯𑀲𑁂𑀦 𑀯𑁄𑀤𑀸𑀦𑀧𑀓𑁆𑀔𑁄 𑀦𑁂𑀢𑀩𑁆𑀩𑁄𑀢𑀺 𑀅𑀬𑀁 𑀦𑀦𑁆𑀤𑀺𑀬𑀸𑀯𑀢𑁆𑀢𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺.

𑀢𑀣𑀸 𑀯𑀼𑀢𑁆𑀢𑀦𑀬𑁂𑀦 𑀕𑀳𑀺𑀢𑁂𑀲𑀼 𑀢𑀡𑁆𑀳𑀸𑀯𑀺𑀚𑁆𑀚𑀸𑀢𑀧𑁆𑀧𑀓𑁆𑀔𑀺𑀬𑀥𑀫𑁆𑀫𑁂𑀲𑀼 𑀢𑀡𑁆𑀳𑀸 𑀮𑁄𑀪𑁄, 𑀅𑀯𑀺𑀚𑁆𑀚𑀸 𑀫𑁄𑀳𑁄, 𑀅𑀯𑀺𑀚𑁆𑀚𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀮𑁄𑀳𑀺𑀢𑁂 𑀲𑀢𑀺 𑀧𑀼𑀩𑁆𑀩𑁄 𑀯𑀺𑀬 𑀢𑀡𑁆𑀳𑀸𑀬 𑀲𑀢𑀺 𑀲𑀺𑀚𑁆𑀛𑀫𑀸𑀦𑁄 𑀆𑀖𑀸𑀢𑁄 𑀤𑁄𑀲𑁄 𑀇𑀢𑀺 𑀢𑀻𑀳𑀺 𑀅𑀓𑀼𑀲𑀮𑀫𑀽𑀮𑁂𑀳𑀺 𑀕𑀳𑀺𑀢𑁂𑀳𑀺, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 ‘‘𑀅𑀧𑁆𑀧𑀢𑀺𑀝𑁆𑀞’’𑀦𑁆𑀢𑀺𑀆𑀤𑀺𑀯𑀘𑀦𑁂𑀳𑀺 𑀘 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑀘 𑀲𑀺𑀤𑁆𑀥𑀸𑀦𑀺 𑀏𑀯 𑀳𑁄𑀦𑁆𑀢𑀺. 𑀇𑀥𑀸𑀧𑀺 𑀮𑁄𑀪𑁄 𑀲𑀩𑁆𑀩𑀸𑀦𑀺 𑀲𑀸𑀲𑀯𑀓𑀼𑀲𑀮𑀫𑀽𑀮𑀸𑀦𑀺 𑀆𑀬𑀽𑀳𑀦𑀥𑀫𑁆𑀫𑀸 𑀘 𑀲𑀫𑀼𑀤𑀬𑀲𑀘𑁆𑀘𑀁, 𑀢𑀦𑁆𑀦𑀺𑀩𑁆𑀩𑀢𑁆𑀢𑀸 𑀢𑁂𑀲𑀁 𑀅𑀥𑀺𑀝𑁆𑀞𑀸𑀦𑀕𑁄𑀘𑀭𑀪𑀽𑀢𑀸 𑀘 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀲𑀘𑁆𑀘𑀬𑁄𑀚𑀦𑀸 𑀬𑁄𑀚𑁂𑀢𑀩𑁆𑀩𑀸. 𑀨𑀮𑀁 𑀧𑀦𑁂𑀢𑁆𑀣 𑀯𑀺𑀫𑁄𑀓𑁆𑀔𑀢𑁆𑀢𑀬𑀯𑀲𑁂𑀦 ¶ 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀁, 𑀢𑀻𑀳𑀺 𑀅𑀓𑀼𑀲𑀮𑀫𑀽𑀮𑁂𑀳𑀺 𑀢𑀺𑀯𑀺𑀥𑀤𑀼𑀘𑁆𑀘𑀭𑀺𑀢-𑀲𑀁𑀓𑀺𑀮𑁂𑀲𑀫𑀮𑀯𑀺𑀲𑀫𑀅𑀓𑀼𑀲𑀮𑀲𑀜𑁆𑀜𑀸-𑀯𑀺𑀢𑀓𑁆𑀓𑀸𑀤𑀺𑀯𑀲𑁂𑀦 𑀅𑀓𑀼𑀲𑀮𑀧𑀓𑁆𑀔𑁄 𑀦𑁂𑀢𑀩𑁆𑀩𑁄, 𑀢𑀣𑀸 𑀢𑀻𑀳𑀺 𑀓𑀼𑀲𑀮𑀫𑀽𑀮𑁂𑀳𑀺 𑀢𑀺𑀯𑀺𑀥𑀲𑀼𑀘𑀭𑀺𑀢-𑀲𑀫𑀓𑀼𑀲𑀮𑀲𑀜𑁆𑀜𑀸-𑀯𑀺𑀢𑀓𑁆𑀓-𑀲𑀫𑀸𑀥𑀺-𑀯𑀺𑀫𑁄𑀓𑁆𑀔𑀫𑀼𑀔𑀸𑀤𑀺𑀯𑀲𑁂𑀦 𑀯𑁄𑀤𑀸𑀦𑀧𑀓𑁆𑀔𑁄 𑀦𑁂𑀢𑀩𑁆𑀩𑁄𑀢𑀺 𑀅𑀬𑀁 𑀢𑀺𑀧𑀼𑀓𑁆𑀔𑀮𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺.

𑀢𑀣𑀸 𑀯𑀼𑀢𑁆𑀢𑀦𑀬𑁂𑀦 𑀕𑀳𑀺𑀢𑁂𑀲𑀼 𑀢𑀡𑁆𑀳𑀸𑀯𑀺𑀚𑁆𑀚𑀸𑀢𑀧𑁆𑀧𑀓𑁆𑀔𑀺𑀬𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀢𑁄 𑀢𑀡𑁆𑀳𑀸𑀤𑀺𑀝𑁆𑀞𑀻𑀦𑀁 𑀯𑀲𑁂𑀦 𑀅𑀲𑀼𑀪𑁂 ‘‘𑀲𑀼𑀪’’𑀦𑁆𑀢𑀺, 𑀤𑀼𑀓𑁆𑀔𑁂 ‘‘𑀲𑀼𑀔’’𑀦𑁆𑀢𑀺 𑀘 𑀯𑀺𑀧𑀮𑁆𑀮𑀸𑀲𑀸, 𑀅𑀯𑀺𑀚𑁆𑀚𑀸𑀤𑀺𑀝𑁆𑀞𑀻𑀦𑀁 𑀯𑀲𑁂𑀦 ‘‘𑀅𑀦𑀺𑀘𑁆𑀘𑁂 𑀦𑀺𑀘𑁆𑀘’’𑀦𑁆𑀢𑀺 𑀅𑀦𑀢𑁆𑀢𑀦𑀺 ‘‘𑀅𑀢𑁆𑀢𑀸’’𑀢𑀺 𑀯𑀺𑀧𑀮𑁆𑀮𑀸𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀲𑀁 𑀧𑀝𑀺𑀧𑀓𑁆𑀔𑀢𑁄 ‘‘𑀅𑀧𑁆𑀧𑀢𑀺𑀝𑁆𑀞’’𑀦𑁆𑀢𑀺𑀆𑀤𑀺𑀯𑀘𑀦𑁂𑀳𑀺 𑀘 𑀮𑀤𑁆𑀥𑁂𑀳𑀺 𑀲𑀢𑀺𑀯𑀻𑀭𑀺𑀬𑀲𑀫𑀸𑀥𑀺𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂𑀳𑀺 𑀘𑀢𑁆𑀢𑀸𑀭𑀺 𑀲𑀢𑀺𑀧𑀝𑁆𑀞𑀸𑀦𑀸𑀦𑀺 𑀲𑀺𑀤𑁆𑀥𑀸𑀦𑁂𑀯 𑀳𑁄𑀦𑁆𑀢𑀺.

𑀢𑀢𑁆𑀣 𑀘𑀢𑀽𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀓𑀣𑀁? 𑀤𑀼𑀯𑀺𑀥𑁄 𑀳𑀺 𑀢𑀡𑁆𑀳𑀸𑀘𑀭𑀺𑀢𑁄 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄𑀢𑀺, 𑀢𑀣𑀸 𑀤𑀺𑀝𑁆𑀞𑀺𑀘𑀭𑀺𑀢𑁄. 𑀢𑁂𑀲𑀼 𑀧𑀞𑀫𑁄 𑀅𑀲𑀼𑀪𑁂 ‘‘𑀲𑀼𑀪’’𑀦𑁆𑀢𑀺 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑀻 𑀲𑀢𑀺𑀩𑀮𑁂𑀦 𑀬𑀣𑀸𑀪𑀽𑀢𑀁 𑀓𑀸𑀬𑀲𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀪𑀸𑀯𑀦𑀸𑀩𑀮𑁂𑀦 𑀢𑀁 𑀯𑀺𑀧𑀮𑁆𑀮𑀸𑀲𑀁 𑀲𑀫𑀼𑀕𑁆𑀖𑀸𑀢𑁂𑀢𑁆𑀯𑀸 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀤𑀼𑀢𑀺𑀬𑁄 𑀅𑀲𑀼𑀔𑁂 ‘‘𑀲𑀼𑀔’’𑀦𑁆𑀢𑀺 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑀻 ‘‘𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀯𑀻𑀭𑀺𑀬𑀲𑀁𑀯𑀭𑀪𑀽𑀢𑁂𑀦 𑀯𑀻𑀭𑀺𑀬𑀩𑀮𑁂𑀦 𑀧𑀝𑀺𑀧𑀓𑁆𑀔𑀁 𑀯𑀺𑀦𑁄𑀤𑁂𑀦𑁆𑀢𑁄 𑀪𑀸𑀯𑀦𑀸𑀩𑀮𑁂𑀦 𑀢𑀁 𑀯𑀺𑀧𑀮𑁆𑀮𑀸𑀲𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀢𑀢𑀺𑀬𑁄 ¶ 𑀅𑀦𑀺𑀘𑁆𑀘𑁂 ‘‘𑀦𑀺𑀘𑁆𑀘’’𑀦𑁆𑀢𑀺 𑀅𑀬𑀸𑀣𑀸𑀯𑀕𑁆𑀕𑀸𑀳𑀻 𑀲𑀫𑀣𑀩𑀮𑁂𑀦 𑀲𑀫𑀸𑀳𑀺𑀢𑀘𑀺𑀢𑁆𑀢𑁄 𑀲𑀗𑁆𑀔𑀸𑀭𑀸𑀦𑀁 𑀢𑀗𑁆𑀔𑀡𑀺𑀓𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀪𑀸𑀯𑀦𑀸𑀩𑀮𑁂𑀦 𑀢𑀁 𑀯𑀺𑀧𑀮𑁆𑀮𑀸𑀲𑀁 𑀲𑀫𑀼𑀕𑁆𑀖𑀸𑀢𑁂𑀢𑁆𑀯𑀸 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀘𑀢𑀼𑀢𑁆𑀣𑁄 𑀲𑀦𑁆𑀢𑀢𑀺-𑀲𑀫𑀽𑀳-𑀓𑀺𑀘𑁆𑀘𑀸𑀭𑀫𑁆𑀫𑀡-𑀖𑀦𑀯𑀜𑁆𑀘𑀺𑀢𑀢𑀸𑀬 𑀨𑀲𑁆𑀲𑀸𑀤𑀺𑀥𑀫𑁆𑀫𑀧𑀼𑀜𑁆𑀚𑀫𑀢𑁆𑀢𑁂 𑀅𑀦𑀢𑁆𑀢𑀦𑀺 ‘‘𑀅𑀢𑁆𑀢𑀸’’𑀢𑀺 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀻 𑀘𑀢𑀼𑀓𑁄𑀝𑀺𑀓𑀲𑀼𑀜𑁆𑀜𑀢𑀸𑀫𑀦𑀲𑀺𑀓𑀸𑀭𑁂𑀦 𑀢𑀁 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀲𑀸𑀫𑀜𑁆𑀜𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀺. 𑀲𑀼𑀪𑀲𑀜𑁆𑀜𑀸𑀲𑀼𑀔𑀲𑀜𑁆𑀜𑀸𑀤𑀻𑀳𑀺 𑀘𑀢𑀽𑀳𑀺 𑀯𑀸 𑀯𑀺𑀧𑀮𑁆𑀮𑀸𑀲𑁂𑀳𑀺 𑀲𑀫𑀼𑀤𑀬𑀲𑀘𑁆𑀘𑀁, 𑀢𑁂𑀲𑀫𑀥𑀺𑀝𑁆𑀞𑀸𑀦𑀸𑀭𑀫𑁆𑀫𑀡𑀪𑀽𑀢𑀸 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀲𑀘𑁆𑀘𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀨𑀮𑀁 𑀧𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀘𑀢𑀽𑀳𑀺 𑀘𑁂𑀢𑁆𑀣 𑀯𑀺𑀧𑀮𑁆𑀮𑀸𑀲𑁂𑀳𑀺 𑀘𑀢𑀼𑀭𑀸𑀲𑀯𑁄𑀖𑀬𑁄𑀕-𑀓𑀸𑀬𑀕𑀦𑁆𑀣-𑀅𑀕𑀢𑀺-𑀢𑀡𑁆𑀳𑀼𑀧𑁆𑀧𑀸𑀤𑀼𑀧𑀸𑀤𑀸𑀦-𑀲𑀢𑁆𑀢𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺-𑀅𑀧𑀭𑀺𑀜𑁆𑀜𑀸𑀤𑀺𑀯𑀲𑁂𑀦 𑀅𑀓𑀼𑀲𑀮𑀧𑀓𑁆𑀔𑁄 𑀦𑁂𑀢𑀩𑁆𑀩𑁄, 𑀢𑀣𑀸 𑀘𑀢𑀽𑀳𑀺 𑀲𑀢𑀺𑀧𑀝𑁆𑀞𑀸𑀦𑁂𑀳𑀺 𑀘𑀢𑀼𑀩𑁆𑀩𑀺𑀥𑀛𑀸𑀦-𑀯𑀺𑀳𑀸𑀭𑀸𑀥𑀺𑀝𑁆𑀞𑀸𑀦-𑀲𑀼𑀔𑀪𑀸𑀕𑀺𑀬𑀥𑀫𑁆𑀫-𑀅𑀧𑁆𑀧𑀫𑀜𑁆𑀜𑀸𑀲𑀫𑁆𑀫𑀧𑁆𑀧𑀥𑀸𑀦𑀺𑀤𑁆𑀥𑀺𑀧𑀸𑀤𑀸𑀤𑀺𑀯𑀲𑁂𑀦 𑀯𑁄𑀤𑀸𑀦𑀧𑀓𑁆𑀔𑁄 𑀦𑁂𑀢𑀩𑁆𑀩𑁄𑀢𑀺 𑀅𑀬𑀁 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺.

𑀇𑀫𑁂𑀲𑀁 ¶ 𑀧𑀦 𑀢𑀺𑀡𑁆𑀡𑀁 𑀅𑀢𑁆𑀣𑀦𑀬𑀸𑀦𑀁 𑀲𑀺𑀤𑁆𑀥𑀺𑀬𑀸 𑀯𑁄𑀳𑀸𑀭𑀦𑀬𑀤𑁆𑀯𑀬𑀁 𑀲𑀺𑀤𑁆𑀥𑀫𑁂𑀯 𑀳𑁄𑀢𑀺. 𑀢𑀣𑀸 𑀳𑀺 𑀅𑀢𑁆𑀣𑀦𑀬𑀸𑀦𑀁 𑀤𑀺𑀲𑀸𑀪𑀽𑀢𑀥𑀫𑁆𑀫𑀸𑀮𑁄𑀘𑀦𑀁 𑀤𑀺𑀲𑀸𑀮𑁄𑀘𑀦𑀁, 𑀢𑁂𑀲𑀁 𑀲𑀫𑀸𑀦𑀬𑀦𑀁 𑀅𑀗𑁆𑀓𑀼𑀲𑁄𑀢𑀺 𑀧𑀜𑁆𑀘𑀧𑀺 𑀦𑀬𑀸 𑀇𑀥 𑀦𑀺𑀬𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀤𑀜𑁆𑀘 𑀲𑀼𑀢𑁆𑀢𑀁 𑀲𑁄𑀴𑀲𑀯𑀺𑀥𑁂 𑀲𑀼𑀢𑁆𑀢𑀦𑁆𑀢𑀧𑀝𑁆𑀞𑀸𑀦𑁂 𑀦𑀺𑀩𑁆𑀩𑁂𑀥𑀲𑁂𑀓𑁆𑀔𑀪𑀸𑀕𑀺𑀬𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀸𑀦𑀺 𑀕𑀳𑀺𑀢𑀸𑀦𑀻𑀢𑀺 𑀲𑀁𑀓𑀺𑀮𑁂𑀲𑀦𑀺𑀩𑁆𑀩𑁂𑀥𑀲𑁂𑀓𑁆𑀔𑀪𑀸𑀕𑀺𑀬𑀁 𑀘𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑁂 𑀧𑀦 𑀲𑀼𑀢𑁆𑀢𑀦𑁆𑀢𑀧𑀝𑁆𑀞𑀸𑀦𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁 𑀜𑀸𑀡𑀜𑁂𑀬𑁆𑀬𑀁 𑀤𑀲𑁆𑀲𑀦𑀪𑀸𑀯𑀦𑀁 𑀲𑀓𑀯𑀘𑀦𑀁 𑀯𑀺𑀲𑁆𑀲𑀚𑁆𑀚𑀦𑀻𑀬𑀁 𑀓𑀼𑀲𑀮𑀁 𑀅𑀦𑀼𑀜𑁆𑀜𑀸𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀑𑀖𑀢𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀦𑀺𑀫𑁄𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁨. 𑀧𑀞𑀫𑀫𑀸𑀕𑀢𑀦𑁆𑀢𑀺 𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀧𑀞𑀫𑀲𑀼𑀢𑁆𑀢𑀸𑀤𑀻𑀲𑀼 𑀧𑀞𑀫𑀁 𑀆𑀕𑀢𑀧𑀤𑀁. 𑀉𑀢𑁆𑀢𑀸𑀦𑀢𑁆𑀣𑀦𑁆𑀢𑀺 𑀧𑀸𑀓𑀝𑀢𑁆𑀣𑀁. 𑀅𑀧𑀼𑀩𑁆𑀩𑀁𑀬𑁂𑀯 𑀳𑀺 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀣𑀜𑁆𑀘 𑀧𑀤𑀁 𑀲𑀁𑀯𑀡𑁆𑀡𑁂𑀢𑀩𑁆𑀩𑀁. 𑀦𑁄𑀢𑀺 𑀧𑀼𑀘𑁆𑀙𑀸𑀬𑀁 𑀦𑀼-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄 𑀦𑀺𑀧𑀸𑀢𑁄𑀢𑀺 𑀆𑀳 ‘‘𑀚𑀸𑀦𑀸𑀲𑀺 𑀦𑁄𑀢𑀺 𑀚𑀸𑀦𑀸𑀲𑀺 𑀦𑀽’’𑀢𑀺. 𑀯𑀝𑁆𑀝𑀢𑁄 𑀦𑀺𑀫𑀼𑀘𑁆𑀘𑀦𑁆𑀢𑀺 𑀢𑁂𑀦 𑀲𑀢𑁆𑀢𑀸𑀢𑀺 𑀦𑀺𑀫𑁄𑀓𑁆𑀔𑁄, 𑀫𑀕𑁆𑀕𑁄. 𑀲𑁄 𑀘 𑀧𑀫𑀼𑀘𑁆𑀘𑀦𑁆𑀢𑀺 𑀢𑁂𑀦𑀸𑀢𑀺 𑀧𑀫𑁄𑀓𑁆𑀔𑁄, 𑀧𑀫𑀼𑀘𑁆𑀘𑀦𑀦𑁆𑀢𑁂 𑀧𑀦 𑀅𑀥𑀺𑀕𑀦𑁆𑀢𑀩𑁆𑀩𑀢𑁆𑀢𑀸𑀨𑀮𑀁 ‘‘𑀧𑀫𑁄𑀓𑁆𑀔𑁄’’𑀢𑀺 𑀯𑀼𑀢𑁆𑀢𑀁, 𑀬𑀣𑀸 𑀅𑀭𑀳𑀢𑁆𑀢𑀁 ‘‘𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀢𑀺 𑀲𑀢𑁆𑀢𑀸. 𑀯𑀺𑀯𑀺𑀘𑁆𑀘𑀢𑀻𑀢𑀺 𑀯𑀺𑀲𑀼𑀁 𑀅𑀲𑀫𑁆𑀫𑀺𑀲𑁆𑀲𑁄 𑀳𑁄𑀢𑀺, 𑀯𑀺𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀯𑀺𑀘𑁆𑀘𑀢𑀺 𑀤𑀼𑀓𑁆𑀔𑀁 𑀏𑀢𑀲𑁆𑀫𑀸𑀢𑀺 𑀯𑀺𑀯𑁂𑀓𑁄. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀦 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀢𑁄 𑀲𑀢𑁆𑀢𑀸 𑀦𑀺𑀫𑀼𑀘𑁆𑀘𑀦𑁆𑀢𑀺 𑀏𑀢𑁆𑀣 𑀧𑀫𑀼𑀘𑁆𑀘𑀦𑁆𑀢𑀺 𑀯𑀺𑀯𑀺𑀘𑁆𑀘𑀦𑁆𑀢𑀺 𑀘𑀸𑀢𑀺 𑀦𑀺𑀫𑁄𑀓𑁆𑀔𑁄 𑀧𑀫𑁄𑀓𑁆𑀔𑁄 𑀯𑀺𑀯𑁂𑀓𑁄, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀢𑁆𑀣𑁄 ¶ 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣𑀸𑀢𑀺 𑀘 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁 𑀤𑀝𑁆𑀞𑀩𑁆𑀩𑀁. 𑀅𑀯𑀥𑀸𑀭𑀡𑀢𑁆𑀣𑁄 𑀔𑁄-𑀓𑀸𑀭𑁄 ‘‘𑀅𑀲𑁆𑀲𑁄𑀲𑀺 𑀔𑁄’’𑀢𑀺𑀆𑀤𑀻𑀲𑀼 𑀯𑀺𑀬.

𑀦𑀦𑁆𑀤𑀻𑀫𑀽𑀮𑀓𑁄 𑀪𑀯𑁄 𑀦𑀦𑁆𑀤𑀻𑀪𑀯𑁄 𑀧𑀼𑀭𑀺𑀫𑀧𑀤𑁂 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀲𑀸𑀓𑀪𑀓𑁆𑀔𑁄 𑀧𑀢𑁆𑀣𑀯𑁄 𑀲𑀸𑀓𑀧𑀢𑁆𑀣𑀯𑁄’’𑀢𑀺 𑀬𑀣𑀸. 𑀧𑀞𑀫𑀁 𑀓𑀫𑁆𑀫𑀯𑀝𑁆𑀝𑀧𑀥𑀸𑀦𑀁 𑀅𑀢𑁆𑀣𑀁 𑀯𑀢𑁆𑀯𑀸 𑀧𑀼𑀦 𑀓𑀺𑀮𑁂𑀲𑀓𑀫𑁆𑀫𑀸𑀦𑀁 𑀯𑀲𑁂𑀦 𑀉𑀪𑀬𑀧𑁆𑀧𑀥𑀸𑀦𑀁 𑀅𑀢𑁆𑀣𑀁 𑀯𑀤𑀦𑁆𑀢𑁄 ‘‘𑀦𑀦𑁆𑀤𑀺𑀬𑀸 𑀘𑀸’’𑀢𑀺𑀆𑀤𑀺𑀫𑀸𑀳. 𑀧𑀼𑀭𑀺𑀫𑀦𑀬𑁂𑀢𑀺 𑀦𑀦𑁆𑀤𑀻𑀫𑀽𑀮𑀓𑁄 𑀓𑀫𑁆𑀫𑀪𑀯𑁄 𑀦𑀦𑁆𑀤𑀻𑀪𑀯𑁄𑀢𑀺 𑀏𑀢𑀲𑁆𑀫𑀺𑀁 𑀧𑀓𑁆𑀔𑁂. 𑀦𑀦𑁆𑀤𑀻𑀪𑀯𑁂𑀦𑀸𑀢𑀺 𑀦𑀦𑁆𑀤𑀻𑀪𑀯𑀧𑀤𑁂𑀦. 𑀢𑀺𑀯𑀺𑀥𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦𑀸𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀯𑀲𑁂𑀦 𑀓𑀸𑀬𑀲𑀗𑁆𑀔𑀸𑀭𑀸𑀤𑀺𑀯𑀲𑁂𑀦 𑀘 𑀢𑀺𑀧𑁆𑀧𑀓𑀸𑀭𑀲𑁆𑀲 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀲𑁆𑀲 ¶ 𑀯𑀲𑁂𑀦. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀕𑀳𑀺𑀢𑁄 𑀘𑁂𑀢𑀦𑀸𑀧𑀥𑀸𑀦𑀢𑁆𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑁆𑀲. 𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑁂𑀳𑀻𑀢𑀺 ‘‘𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀲𑀗𑁆𑀔𑀬𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀧𑀤𑁂𑀳𑀺. 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘𑀸𑀢𑀺 𑀢𑁂𑀦 𑀬𑀣𑀸𑀯𑀼𑀢𑁆𑀢𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦 𑀲𑀫𑀁 𑀬𑀼𑀢𑁆𑀢𑀸 𑀏𑀯. 𑀤𑁆𑀯𑁂 𑀔𑀦𑁆𑀥𑀸𑀢𑀺 𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀸.

𑀦𑀦𑀼 𑀏𑀢𑁆𑀣 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀦 𑀕𑀳𑀺𑀢𑁄𑀢𑀺? 𑀦𑁄 𑀦 𑀕𑀳𑀺𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀳𑀺 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀻𑀳𑀺 𑀔𑀦𑁆𑀥𑁂𑀳𑀻𑀢𑀺 𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂𑀳𑀺. 𑀕𑀳𑀺𑀢𑀸𑀯 𑀅𑀯𑀺𑀦𑀸𑀪𑀸𑀯𑀢𑁄. 𑀦 𑀳𑀺 𑀯𑁂𑀤𑀦𑀸𑀭𑀳𑀺𑀢𑁄 𑀓𑁄𑀘𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀅𑀢𑁆𑀣𑀺. 𑀅𑀦𑀼𑀧𑀸𑀤𑀺𑀡𑁆𑀡𑀓𑀸𑀦𑀦𑁆𑀢𑀺 𑀓𑀼𑀲𑀮𑀸𑀓𑀼𑀲𑀮𑀸𑀦𑀁. 𑀦 𑀳𑁂𑀢𑁆𑀣 𑀓𑀺𑀭𑀺𑀬𑀸𑀔𑀦𑁆𑀥𑀸𑀦𑀁 𑀅𑀧𑁆𑀧𑀯𑀢𑁆𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀅𑀧𑁆𑀧𑀯𑀢𑁆𑀢𑀺𑀯𑀲𑁂𑀦𑀸𑀢𑀺 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀢𑁆𑀢𑀺𑀯𑀲𑁂𑀦. 𑀦𑀺𑀩𑁆𑀩𑀢𑁆𑀢𑀦𑀯𑀲𑁂𑀦 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀉𑀧𑀸𑀤𑀻𑀬𑀢𑀻𑀢𑀺 𑀉𑀧𑀸𑀤𑀺, 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀉𑀧𑀸𑀤𑀺𑀦𑁄 𑀲𑁂𑀲𑁄 𑀉𑀧𑀸𑀤𑀺𑀲𑁂𑀲𑁄, 𑀲𑀳 𑀉𑀧𑀸𑀤𑀺𑀲𑁂𑀲𑁂𑀦𑀸𑀢𑀺 𑀲𑀉𑀧𑀸𑀤𑀺𑀲𑁂𑀲𑀁. 𑀦𑀺𑀩𑁆𑀩𑀸𑀦𑀁 𑀓𑀣𑀺𑀢𑀁 𑀲𑀓𑀮𑀓𑀫𑁆𑀫𑀓𑀺𑀮𑁂𑀲𑀯𑀽𑀧𑀲𑀫𑀢𑁆𑀣𑀲𑁆𑀲 𑀚𑁄𑀢𑀺𑀢𑀢𑁆𑀢𑀸. 𑀳𑁂𑀝𑁆𑀞𑀸 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀅𑀦𑀼𑀧𑀸𑀤𑀺𑀡𑁆𑀡𑀓𑀓𑁆𑀔𑀦𑁆𑀥𑀸 𑀕𑀳𑀺𑀢𑀸𑀢𑀺 ‘‘𑀯𑁂𑀤𑀦𑀸𑀦’’𑀦𑁆𑀢𑀺 𑀏𑀢𑁆𑀣 𑀉𑀧𑀸𑀤𑀺𑀡𑁆𑀡𑀓𑀕𑁆𑀕𑀳𑀡𑀁 𑀬𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀉𑀧𑀸𑀤𑀺𑀡𑁆𑀡𑀓𑀯𑁂𑀤𑀦𑀸𑀦’’𑀦𑁆𑀢𑀺. 𑀦𑀺𑀭𑁄𑀥𑁂𑀦𑀸𑀢𑀺 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀦𑀺𑀭𑁄𑀥𑀯𑀲𑁂𑀦 𑀦𑀺𑀭𑀼𑀚𑁆𑀛𑀦𑁂𑀦. 𑀉𑀧𑀲𑀫𑁂𑀦𑀸𑀢𑀺 𑀅𑀘𑁆𑀘𑀦𑁆𑀢𑀽𑀧𑀲𑀫𑁂𑀦 𑀅𑀧𑁆𑀧𑀯𑀢𑁆𑀢𑀦𑁂𑀦. 𑀏𑀯𑀜𑁆𑀘 𑀓𑀢𑁆𑀯𑀸 𑀘-𑀲𑀤𑁆𑀤𑀕𑁆𑀕𑀳𑀡𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀢𑁂𑀲𑀦𑁆𑀢𑀺 𑀢𑀲𑁆𑀲𑀸 𑀯𑁂𑀤𑀦𑀸𑀬 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀜𑁆𑀘 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁. 𑀯𑀢𑁆𑀣𑀸𑀭𑀫𑁆𑀫𑀡𑀯𑀲𑁂𑀦𑀸𑀢𑀺 𑀯𑀢𑁆𑀣𑀼𑀪𑀽𑀢𑀸𑀦𑀁 𑀙𑀦𑁆𑀦𑀁 𑀆𑀭𑀫𑁆𑀫𑀡𑀪𑀽𑀢𑀸𑀦𑀜𑁆𑀘 𑀲𑀩𑁆𑀩𑁂𑀲𑀫𑁆𑀧𑀺 𑀉𑀧𑀸𑀤𑀺𑀡𑁆𑀡𑀓𑀭𑀽𑀧𑀥𑀫𑁆𑀫𑀸𑀦𑀁 𑀯𑀲𑁂𑀦.

𑀓𑀲𑁆𑀫𑀸 𑀧𑀦 𑀳𑁂𑀝𑁆𑀞𑀸 𑀘𑀢𑁆𑀢𑀸𑀭𑁄 𑀅𑀭𑀽𑀧𑀓𑁆𑀔𑀦𑁆𑀥𑀸𑀬𑁂𑀯 𑀯𑀼𑀢𑁆𑀢𑀸, 𑀭𑀽𑀧𑀓𑁆𑀔𑀦𑁆𑀥𑁄 𑀦 𑀕𑀳𑀺𑀢𑁄𑀢𑀺? 𑀯𑀺𑀲𑁂𑀲𑀪𑀸𑀯𑀢𑁄. 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀜𑁆𑀳𑀺 𑀉𑀧𑀸𑀤𑀺𑀡𑁆𑀡𑀓𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀬 𑀅𑀦𑀼𑀧𑀸𑀤𑀺𑀡𑁆𑀡𑀓𑀭𑀽𑀧𑀥𑀫𑁆𑀫𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀬𑁂𑀯 𑀦𑀢𑁆𑀣𑀺. 𑀤𑀼𑀢𑀺𑀬𑀦𑀬𑁂𑀢𑀺 𑀦𑀦𑁆𑀤𑀺𑀬𑀸 𑀘 𑀪𑀯𑀲𑁆𑀲 𑀘𑀸𑀢𑀺 𑀏𑀢𑀫𑁆𑀳𑀺 𑀧𑀓𑁆𑀔𑁂. 𑀦𑀦𑁆𑀤𑀺𑀕𑁆𑀕𑀳𑀡𑁂𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀕𑀳𑀺𑀢𑁄 𑀢𑀁𑀲𑀳𑀘𑀭𑀡𑀢𑁄. 𑀉𑀧𑀧𑀢𑁆𑀢𑀺𑀪𑀯𑀲𑀗𑁆𑀔𑀸𑀢𑁄 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀉𑀧𑀸𑀤𑀺𑀡𑁆𑀡𑀓𑀭𑀽𑀧𑀥𑀫𑁆𑀫𑀫𑁂𑀯 𑀯𑀤𑀢𑀺. 𑀢𑀕𑁆𑀕𑀳𑀡𑁂𑀦𑁂𑀯 𑀘 𑀢𑀦𑁆𑀦𑀺𑀫𑀺𑀢𑁆𑀢𑀓𑀸𑀦𑀺 𑀉𑀢𑀼𑀆𑀳𑀸𑀭𑀚𑀸𑀦𑀺, 𑀯𑀺𑀜𑁆𑀜𑀸𑀡𑀕𑁆𑀕𑀳𑀡𑁂𑀦 ¶ 𑀘𑀺𑀢𑁆𑀢𑀚𑀸𑀦𑀻𑀢𑀺 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀲𑁆𑀲𑀧𑁂𑀢𑁆𑀣 𑀕𑀳𑀺𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀜𑁆𑀜𑀸𑀤𑀻𑀳𑀻𑀢𑀺 𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀯𑁂𑀤𑀦𑀸𑀕𑀳𑀡𑁂𑀳𑀺 𑀢𑀬𑁄 𑀔𑀦𑁆𑀥𑀸 𑀕𑀳𑀺𑀢𑀸, 𑀢𑀜𑁆𑀘 𑀔𑁄 𑀉𑀧𑀸𑀤𑀺𑀡𑁆𑀡𑀸 𑀅𑀦𑀼𑀧𑀸𑀤𑀺𑀡𑁆𑀡𑀸𑀢𑀺 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀅𑀯𑀺𑀲𑁂𑀲𑀢𑁄. 𑀅𑀯𑀺𑀲𑁂𑀲𑁂𑀦 𑀳𑀺 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀅𑀧𑁆𑀧𑀯𑀢𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀢𑁂𑀦𑀸𑀳 ‘‘𑀏𑀯𑀁…𑀧𑁂… 𑀦𑀺𑀩𑁆𑀩𑀸𑀦𑀁 𑀓𑀣𑀺𑀢𑀁 𑀳𑁄𑀢𑀻’’𑀢𑀺. ‘‘𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀳𑀺 𑀇𑀥 𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀇𑀫𑀫𑁂𑀯 𑀘 𑀦𑀬𑀦𑁆𑀢𑀺 𑀇𑀤𑀁 𑀬𑀣𑀸𑀯𑀼𑀢𑁆𑀢𑀁 𑀤𑀼𑀢𑀺𑀬𑀫𑁂𑀯. 𑀘𑀢𑁆𑀢𑀸𑀭𑁄 ¶ 𑀫𑀳𑀸𑀦𑀺𑀓𑀸𑀬𑁂 𑀥𑀸𑀭𑁂𑀢𑀻𑀢𑀺 𑀘𑀢𑀼𑀦𑀺𑀓𑀸𑀬𑀺𑀓𑁄. 𑀪𑀡𑁆𑀟𑀺𑀓𑀦𑀸𑀫𑀓𑁄 𑀣𑁂𑀭𑁄 𑀪𑀡𑁆𑀟𑀺𑀓𑀢𑁆𑀣𑁂𑀭𑁄. 𑀇𑀢𑀻𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀧𑀭𑀸𑀫𑀲𑀦𑀁. 𑀦𑀺𑀩𑁆𑀩𑀸𑀦𑀯𑀲𑁂𑀦𑁂𑀯𑀸𑀢𑀺 𑀧𑀞𑀫𑀦𑀬𑁂 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀲𑁆𑀲 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀲𑁆𑀲 𑀘, 𑀤𑀼𑀢𑀺𑀬𑁂 𑀧𑀦 ‘‘𑀅𑀫𑀢𑀫𑀳𑀸𑀦𑀺𑀩𑁆𑀩𑀸𑀦𑀲𑁆𑀲𑀸’’𑀢𑀺 𑀲𑀩𑁆𑀩𑀣𑀸𑀧𑀺 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀯𑀲𑁂𑀦 𑀪𑀕𑀯𑀸 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀺 𑀲𑀫𑀸𑀧𑁂𑀲𑀻𑀢𑀺.

𑀦𑀺𑀫𑁄𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀉𑀧𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀼𑀲𑀤𑁆𑀤𑀸𑀦𑀁 𑀉𑀧𑀲𑀕𑁆𑀕𑀯𑀲𑁂𑀦 𑀅𑀢𑁆𑀣𑀯𑀺𑀲𑁂𑀲𑀯𑀸𑀘𑀓𑁄 𑀳𑁄𑀢𑀻𑀢𑀺 𑀆𑀳 ‘‘𑀉𑀧𑀦𑀻𑀬𑀢𑀻𑀢𑀺 𑀧𑀭𑀺𑀓𑁆𑀔𑀻𑀬𑀢𑀺 𑀦𑀺𑀭𑀼𑀚𑁆𑀛𑀢𑀻’’𑀢𑀺. 𑀯𑀺𑀦𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀦𑀻𑀬𑀢𑀻𑀢𑀺 𑀯𑀸 𑀲𑀭𑀲𑁂𑀦𑁂𑀯 𑀚𑀻𑀯𑀺𑀢𑀲𑁆𑀲 𑀫𑀭𑀡𑀽𑀧𑀕𑀫𑀦𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀉𑀧𑀕𑀘𑁆𑀙𑀢𑀺 𑀯𑀸, 𑀅𑀦𑀼𑀧𑀼𑀩𑁆𑀩𑁂𑀦 𑀫𑀭𑀡𑀁 𑀉𑀧𑁂𑀢𑀻𑀢𑀺 𑀅𑀢𑁆𑀣𑁄’’𑀢𑀺. 𑀓𑀸𑀫𑀜𑁆𑀘𑁂𑀢𑁆𑀣 ‘‘𑀉𑀧𑀦𑀻𑀬𑀢𑀻’’𑀢𑀺 𑀧𑀤𑀁 𑀅𑀧𑀸𑀓𑀝𑀓𑀫𑁆𑀫𑀯𑀺𑀲𑁂𑀲𑀁 𑀯𑀼𑀢𑁆𑀢𑀁. 𑀬𑀣𑀸 𑀧𑀦 ‘‘𑀲𑀩𑁆𑀩𑀁 𑀆𑀭𑁄𑀕𑁆𑀬𑀁 𑀩𑁆𑀬𑀸𑀥𑀺𑀧𑀭𑀺𑀬𑁄𑀲𑀸𑀦𑀁, 𑀲𑀩𑁆𑀩𑀁 𑀬𑁄𑀩𑁆𑀩𑀦𑀁 𑀚𑀭𑀸𑀧𑀭𑀺𑀬𑁄𑀲𑀸𑀦𑀁, 𑀲𑀩𑁆𑀩𑀁 𑀚𑀻𑀯𑀺𑀢𑀁 𑀫𑀭𑀡𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺, ‘‘𑀉𑀧𑀦𑀻𑀬𑀢𑀺 𑀚𑀻𑀯𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀫𑀭𑀡𑀁 𑀉𑀧𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀫𑁆𑀫𑀓𑀢𑁆𑀢𑀼𑀯𑀲𑁂𑀦 𑀳𑁂𑀢𑀁 𑀯𑀼𑀢𑁆𑀢𑀁.

𑀇𑀤𑀸𑀦𑀺 𑀓𑀫𑁆𑀫𑀲𑀸𑀥𑀦𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑁄𑀧𑀸𑀮𑁂𑀦 𑀕𑁄𑀕𑀡𑁄 𑀦𑀻𑀬𑀢𑀺 𑀬𑀣𑀺𑀘𑁆𑀙𑀺𑀢𑀁 𑀞𑀸𑀦𑀁. 𑀚𑀻𑀯𑀦𑁆𑀢𑀺 𑀢𑁂𑀦 𑀲𑀢𑁆𑀢𑀸, 𑀲𑀳𑀚𑀸𑀢𑀥𑀫𑁆𑀫𑀸 𑀯𑀸𑀢𑀺 𑀚𑀻𑀯𑀺𑀢𑀁, 𑀢𑀤𑁂𑀯 𑀢𑁂𑀲𑀁 𑀅𑀦𑀼𑀧𑀸𑀮𑀦𑁂 𑀆𑀥𑀺𑀧𑀘𑁆𑀘𑀲𑀩𑁆𑀪𑀸𑀯𑀢𑁄 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀆𑀳 ‘‘𑀚𑀻𑀯𑀺𑀢𑀦𑁆𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬’’𑀦𑁆𑀢𑀺 𑀧𑀭𑀺𑀢𑁆𑀢𑀦𑁆𑀢𑀺 𑀇𑀢𑁆𑀢𑀭𑀁. 𑀢𑁂𑀦𑀸𑀳 ‘‘𑀣𑁄𑀓’’𑀦𑁆𑀢𑀺. 𑀧𑀩𑀦𑁆𑀥𑀸𑀦𑀼𑀧𑀘𑁆𑀙𑁂𑀤𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀇𑀥 𑀚𑀻𑀯𑀺𑀢𑀲𑁆𑀲 𑀫𑀭𑀡𑀓𑀺𑀘𑁆𑀘𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀲𑀭𑀲𑀧𑀭𑀺𑀢𑁆𑀢𑀢𑀸𑀬 𑀘𑀸’’𑀢𑀺𑀆𑀤𑀺. 𑀆𑀬𑀽𑀢𑀺 𑀘 𑀧𑀭𑀫𑀸𑀬𑀼 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀢𑀜𑁆𑀘 𑀅𑀚𑁆𑀚𑀓𑀸𑀮𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀇𑀫𑀲𑁆𑀫𑀺𑀜𑁆𑀳𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀅𑀬𑀁 𑀓𑀣𑀸𑀢𑀺 𑀚𑀻𑀯𑀺𑀢𑀲𑁆𑀲 𑀅𑀢𑀺𑀇𑀢𑁆𑀢𑀭𑀪𑀸𑀯𑀤𑀻𑀧𑀦𑀧𑀭𑀸 𑀅𑀬𑀁 𑀤𑁂𑀲𑀦𑀸. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀚𑀻𑀯𑀺𑀢𑀓𑁆𑀔𑀬𑀁 𑀦𑀺𑀬𑀫𑁂𑀦𑁆𑀢𑁄 ‘‘𑀏𑀓𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑁄𑀬𑁂𑀯𑀸’’𑀢𑀺 𑀆𑀳, 𑀏𑀓𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 ¶ 𑀧𑀯𑀢𑁆𑀢𑀺𑀓𑁆𑀔𑀡𑀫𑀢𑁆𑀢𑁄 𑀏𑀯𑀸𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀯𑀢𑁆𑀢𑀫𑀸𑀦𑀦𑁆𑀢𑀺 𑀦𑁂𑀫𑀺𑀭𑀣𑀻𑀲𑀸 𑀯𑀢𑁆𑀢𑀦𑁆𑀢𑀻 𑀏𑀓𑁂𑀦𑁂𑀯 𑀦𑁂𑀫𑀺𑀧𑁆𑀧𑀤𑁂𑀲𑁂𑀦 ¶ 𑀧𑀯𑀢𑁆𑀢𑀢𑀺 𑀏𑀓𑀲𑁆𑀫𑀺𑀁 𑀔𑀡𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀏𑀓𑁂𑀦𑁂𑀯 𑀢𑀺𑀝𑁆𑀞𑀢𑀻’’𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀦𑁆𑀢𑀺 𑀏𑀓𑀘𑀺𑀢𑁆𑀢𑀓𑁆𑀔𑀡𑀫𑀢𑁆𑀢𑀯𑀦𑁆𑀢𑀁. 𑀢𑀲𑁆𑀫𑀺𑀁 𑀘𑀺𑀢𑁆𑀢𑁂𑀢𑀺 𑀢𑀲𑁆𑀫𑀺𑀁 𑀬𑀲𑁆𑀫𑀺𑀁 𑀓𑀺𑀲𑁆𑀫𑀺𑀜𑁆𑀘𑀺 𑀏𑀓𑀲𑁆𑀫𑀺𑀁 𑀘𑀺𑀢𑁆𑀢𑁂. 𑀦𑀺𑀭𑀼𑀤𑁆𑀥𑀫𑀢𑁆𑀢𑁂𑀢𑀺 𑀦𑀺𑀭𑀼𑀤𑁆𑀥𑀪𑀸𑀯𑀧𑁆𑀧𑀢𑁆𑀢𑀫𑀢𑁆𑀢𑁂. 𑀦𑀺𑀭𑀼𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀫𑀢𑁄𑀢𑀺 𑀯𑀼𑀘𑁆𑀘𑀢𑀺 𑀢𑀁𑀲𑀫𑀗𑁆𑀕𑀻 𑀲𑀢𑁆𑀢𑁄 𑀧𑀭𑀫𑀢𑁆𑀣𑀢𑁄. 𑀅𑀯𑀺𑀲𑁂𑀲𑀯𑀺𑀤𑀼𑀦𑁄 𑀧𑀦 𑀅𑀯𑀺𑀜𑁆𑀜𑀸𑀬𑀫𑀸𑀦𑀦𑁆𑀢𑀭𑁂𑀦 𑀅𑀦𑀼𑀲𑀦𑁆𑀥𑀸𑀦𑀲𑁆𑀲 𑀦𑀺𑀭𑀼𑀤𑁆𑀥𑀦𑀁 𑀦𑀺𑀭𑁄𑀥𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑀺. 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀲𑀼𑀢𑁆𑀢𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸𑀳𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀢𑀻𑀲𑀼𑀧𑀺 𑀓𑀸𑀮𑁂𑀲𑀼 𑀲𑀢𑁆𑀢𑀸𑀦𑀁 𑀧𑀭𑀫𑀢𑁆𑀣𑀢𑁄 𑀚𑀻𑀯𑀦𑀁 𑀫𑀭𑀡𑀁 𑀘𑀺𑀢𑁆𑀢𑀓𑁆𑀔𑀡𑀯𑀲𑁂𑀦𑁂𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀚𑀻𑀯𑀺𑀢𑀦𑁆𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀅𑀢𑁆𑀢𑀪𑀸𑀯𑁄𑀢𑀺 𑀚𑀻𑀯𑀺𑀢𑀯𑁂𑀤𑀦𑀸𑀯𑀺𑀜𑁆𑀜𑀸𑀡𑀸𑀦𑀺 𑀞𑀧𑁂𑀢𑁆𑀯𑀸 𑀅𑀯𑀲𑀺𑀝𑁆𑀞𑀥𑀫𑁆𑀫𑀸 𑀅𑀥𑀺𑀧𑁆𑀧𑁂𑀢𑀸. 𑀲𑀼𑀔𑀤𑀼𑀓𑁆𑀔𑀸𑀢𑀺 𑀲𑀼𑀔𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀉𑀧𑁂𑀓𑁆𑀔𑀸𑀧𑀺 𑀇𑀥 𑀲𑀼𑀔𑀤𑀼𑀓𑁆𑀔𑀸𑀲𑁆𑀯𑁂𑀯 𑀅𑀦𑁆𑀢𑁄𑀕𑀥𑀸 𑀇𑀝𑁆𑀞𑀸𑀦𑀺𑀝𑁆𑀞𑀪𑀸𑀯𑀢𑁄. 𑀓𑁂𑀯𑀮𑀸𑀢𑀺 𑀅𑀢𑁆𑀢𑀦𑀸, 𑀦𑀺𑀘𑁆𑀘𑀪𑀸𑀯𑁂𑀦 𑀯𑀸 𑀅𑀯𑁄𑀫𑀺𑀲𑁆𑀲𑀸. 𑀏𑀓𑀘𑀺𑀢𑁆𑀢𑀲𑀫𑀸𑀬𑀼𑀢𑁆𑀢𑀸𑀢𑀺 𑀏𑀓𑀓𑁂𑀦 𑀘𑀺𑀢𑁆𑀢𑁂𑀦 𑀲𑀳𑀺𑀢𑀸. 𑀮𑀳𑀼𑀲𑁄 𑀯𑀢𑁆𑀢𑀢𑁂 𑀔𑀡𑁄𑀢𑀺 𑀯𑀼𑀢𑁆𑀢𑀦𑀬𑁂𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑀸𑀬 𑀮𑀳𑀼𑀓𑁄 𑀅𑀢𑀺𑀇𑀢𑁆𑀢𑀭𑁄 𑀚𑀻𑀯𑀺𑀢𑀸𑀤𑀻𑀦𑀁 𑀔𑀡𑁄 𑀯𑀢𑁆𑀢𑀢𑀺.

𑀬𑁂 𑀦𑀺𑀭𑀼𑀤𑁆𑀥𑀸 𑀫𑀭𑀦𑁆𑀢𑀲𑁆𑀲𑀸𑀢𑀺 𑀘𑀯𑀦𑁆𑀢𑀲𑁆𑀲 𑀲𑀢𑁆𑀢𑀲𑁆𑀲 𑀘𑀼𑀢𑀺𑀢𑁄 𑀉𑀤𑁆𑀥𑀁 𑀦𑀺𑀭𑀼𑀤𑁆𑀥𑀸𑀢𑀺 𑀯𑀢𑁆𑀢𑀩𑁆𑀩𑀸 𑀬𑁂 𑀔𑀦𑁆𑀥𑀸. 𑀢𑀺𑀝𑁆𑀞𑀫𑀸𑀦𑀲𑁆𑀲 𑀯𑀸 𑀇𑀥𑀸𑀢𑀺 𑀬𑁂 𑀯𑀸 𑀇𑀥 𑀧𑀯𑀢𑁆𑀢𑀺𑀬𑀁 𑀢𑀺𑀝𑁆𑀞𑀫𑀸𑀦𑀲𑁆𑀲 𑀥𑀭𑀦𑁆𑀢𑀲𑁆𑀲 𑀪𑀗𑁆𑀕𑀧𑁆𑀧𑀢𑁆𑀢𑀺𑀬𑀸 𑀦𑀺𑀭𑀼𑀤𑁆𑀥𑀸 𑀔𑀦𑁆𑀥𑀸, 𑀲𑀩𑁆𑀩𑁂𑀧𑀺 𑀲𑀤𑀺𑀲𑀸 𑀢𑁂 𑀲𑀩𑁆𑀩𑁂𑀧𑀺 𑀏𑀓𑀲𑀤𑀺𑀲𑀸 𑀕𑀢𑀸 𑀅𑀢𑁆𑀣𑀗𑁆𑀕𑀢𑀸 𑀅𑀧𑁆𑀧𑀝𑀺𑀲𑀦𑁆𑀥𑀺𑀬𑀸 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀧𑀝𑀺𑀲𑀦𑁆𑀥𑀸𑀦𑀸𑀪𑀸𑀯𑁂𑀦 𑀯𑀺𑀕𑀢𑀸. 𑀬𑀣𑀸 𑀳𑀺 𑀘𑀼𑀢𑀺𑀔𑀦𑁆𑀥𑀸 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀏𑀯𑀁 𑀢𑀢𑁄 𑀧𑀼𑀩𑁆𑀩𑁂𑀧𑀺 𑀔𑀦𑁆𑀥𑀸. 𑀢𑀲𑁆𑀫𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀦𑀺𑀩𑁆𑀩𑀢𑁆𑀢𑁂𑀦 𑀦 𑀚𑀸𑀢𑁄𑀢𑀺 𑀅𑀦𑀼𑀧𑁆𑀧𑀦𑁆𑀦𑁂𑀦 𑀘𑀺𑀢𑁆𑀢𑁂𑀦 𑀚𑀸𑀢𑁄 𑀦 𑀳𑁄𑀢𑀺 ‘‘𑀅𑀦𑀸𑀕𑀢𑁂 𑀘𑀺𑀢𑁆𑀢𑀓𑁆𑀔𑀡𑁂 𑀦 𑀚𑀻𑀯𑀺𑀢𑁆𑀣 𑀦 𑀚𑀻𑀯𑀢𑀺 𑀚𑀻𑀯𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁄. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀯𑀢𑁆𑀢𑀫𑀸𑀦𑁂𑀦 𑀘𑀺𑀢𑁆𑀢𑁂𑀦 𑀚𑀻𑀯𑀢𑀺 𑀚𑀻𑀯𑀫𑀸𑀦𑁄 𑀦𑀸𑀫 𑀳𑁄𑀢𑀺, 𑀦 𑀚𑀻𑀯𑀺𑀢𑁆𑀣 𑀦 𑀚𑀻𑀯𑀺𑀲𑁆𑀲𑀢𑀺. 𑀘𑀺𑀢𑁆𑀢𑀪𑀗𑁆𑀕𑀸 𑀫𑀢𑁄 𑀮𑁄𑀓𑁄𑀢𑀺 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀯𑀺𑀬 𑀲𑀩𑁆𑀩𑀲𑁆𑀲𑀧𑀺 𑀢𑀲𑁆𑀲 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀧𑁆𑀧𑀢𑁆𑀢𑀺𑀬𑀸 𑀅𑀬𑀁 𑀮𑁄𑀓𑁄 𑀧𑀭𑀫𑀢𑁆𑀣𑀢𑁄 𑀫𑀢𑁄 𑀦𑀸𑀫 𑀳𑁄𑀢𑀺 ‘‘𑀅𑀢𑀻𑀢𑁂 𑀘𑀺𑀢𑁆𑀢𑀓𑁆𑀔𑀡𑁂 𑀚𑀻𑀯𑀺𑀢𑁆𑀣 𑀦 𑀚𑀻𑀯𑀢𑀺 𑀦 𑀚𑀻𑀯𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁄, 𑀦𑀺𑀭𑀼𑀤𑁆𑀥𑀲𑁆𑀲 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸. 𑀏𑀯𑀁 𑀲𑀦𑁆𑀢𑁂𑀧𑀺 𑀧𑀜𑁆𑀜𑀢𑁆𑀢𑀺 𑀧𑀭𑀫𑀢𑁆𑀣𑀺𑀬𑀸, 𑀬𑀸𑀬𑀁 𑀢𑀁 𑀢𑀁 𑀧𑀯𑀢𑁆𑀢𑀁 𑀘𑀺𑀢𑁆𑀢𑀁 𑀉𑀧𑀸𑀤𑀸𑀬 ‘‘𑀢𑀺𑀲𑁆𑀲𑁄 𑀚𑀻𑀯𑀢𑀺, 𑀨𑀼𑀲𑁆𑀲𑁄 𑀚𑀻𑀯𑀢𑀻’’𑀢𑀺 𑀯𑀘𑀦𑀧𑁆𑀧𑀯𑀢𑁆𑀢𑀺𑀬𑀸 ¶ 𑀯𑀺𑀲𑀬𑀪𑀽𑀢𑀸 𑀲𑀦𑁆𑀢𑀸𑀦𑀧𑀜𑁆𑀜𑀢𑁆𑀢𑀺, 𑀲𑀸 𑀏𑀢𑁆𑀣 𑀧𑀭𑀫𑀢𑁆𑀣𑀺𑀬𑀸 𑀧𑀭𑀫𑀢𑁆𑀣𑀪𑀽𑀢𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀦𑀸𑀫𑀕𑁄𑀢𑁆𑀢𑀁 𑀦 𑀚𑀻𑀭𑀢𑀻’’𑀢𑀺 (𑀲𑀁. 𑀦𑀺. 𑁧.𑁭𑁬).

𑀦 ¶ 𑀲𑀦𑁆𑀢𑀺 𑀢𑀸𑀡𑀸𑀢𑀺 𑀚𑀭𑀁 𑀉𑀧𑀕𑀢𑀲𑁆𑀲 𑀢𑀢𑁄 𑀢𑀁𑀦𑀺𑀫𑀺𑀢𑁆𑀢𑀁 𑀬𑀁 𑀯𑀸 𑀧𑀸𑀧𑀓𑀸𑀭𑀺𑀦𑁄 𑀧𑀸𑀧𑀓𑀫𑁆𑀫𑀸𑀦𑀁 𑀉𑀧𑀝𑁆𑀞𑀸𑀦𑀯𑀲𑁂𑀦 𑀧𑀼𑀜𑁆𑀜𑀓𑀸𑀭𑀺𑀦𑁄 𑀧𑀺𑀬𑀯𑀺𑀧𑁆𑀧𑀬𑁄𑀕𑀯𑀲𑁂𑀦 𑀘𑀺𑀢𑁆𑀢𑀤𑀼𑀓𑁆𑀔𑀁 𑀉𑀪𑀬𑁂𑀲𑀫𑁆𑀧𑀺 𑀩𑀦𑁆𑀥𑀦𑀘𑁆𑀙𑁂𑀤𑀦𑀸𑀤𑀺𑀯𑀲𑁂𑀦 𑀯𑀺𑀢𑀼𑀚𑁆𑀚𑀫𑀸𑀦𑀁 𑀅𑀦𑀧𑁆𑀧𑀓𑀁 𑀲𑀭𑀻𑀭𑀤𑀼𑀓𑁆𑀔𑀁 𑀲𑀫𑁆𑀫𑁄𑀳𑀧𑁆𑀧𑀢𑁆𑀢𑀺 𑀘 𑀳𑁄𑀢𑀺, 𑀢𑀢𑁄 𑀢𑀸𑀬𑀦𑁆𑀢𑀸 𑀦 𑀲𑀦𑁆𑀢𑀺. 𑀢𑁂𑀦𑀸𑀳 𑁋 ‘‘𑀢𑀸𑀡𑀁 𑀮𑁂𑀡𑀁 𑀲𑀭𑀡𑀁 𑀪𑀯𑀺𑀢𑀼𑀁 𑀲𑀫𑀢𑁆𑀣𑀸 𑀦𑀸𑀫 𑀓𑁂𑀘𑀺 𑀦𑀢𑁆𑀣𑀻’’𑀢𑀺. 𑀪𑀸𑀬𑀢𑀺 𑀏𑀢𑀲𑁆𑀫𑀸𑀢𑀺 𑀪𑀬𑀁, 𑀪𑀬𑀦𑀺𑀫𑀺𑀢𑁆𑀢𑀦𑁆𑀢𑀺 𑀆𑀳 ‘‘𑀪𑀬𑀯𑀢𑁆𑀣𑀽’’𑀢𑀺. 𑀢𑀕𑁆𑀕𑀳𑀡𑁂𑀦 𑀘 𑀘𑀺𑀢𑁆𑀢𑀼𑀢𑁆𑀭𑀸𑀲𑀮𑀓𑁆𑀔𑀡𑀁 𑀪𑀬𑀁 𑀕𑀳𑀺𑀢𑀫𑁂𑀯, 𑀲𑀢𑀺 𑀦𑀺𑀫𑀺𑀢𑁆𑀢𑁂 𑀦𑁂𑀫𑀺𑀢𑁆𑀢𑀁 𑀲𑀦𑁆𑀢𑀫𑁂𑀯𑀸𑀢𑀺. 𑀧𑀼𑀩𑁆𑀩𑀘𑁂𑀢𑀦𑀦𑁆𑀢𑀺 𑀏𑀓𑀸𑀯𑀚𑁆𑀚𑀦𑀯𑀻𑀣𑀺𑀬𑀁 𑀦𑀸𑀦𑀸𑀯𑀚𑁆𑀚𑀦𑀯𑀻𑀣𑀺𑀬𑀁 𑀲𑀫𑁆𑀧𑀯𑀢𑁆𑀢𑀁 𑀉𑀧𑀘𑀸𑀭𑀚𑁆𑀛𑀸𑀦𑀘𑁂𑀢𑀦𑀁. 𑀅𑀧𑀭𑀘𑁂𑀢𑀦𑀦𑁆𑀢𑀺 𑀯𑀲𑀻𑀪𑀸𑀯𑀸𑀧𑀸𑀤𑀦𑀯𑀲𑁂𑀦 𑀧𑀭𑀢𑁄 𑀲𑀫𑀸𑀧𑀚𑁆𑀚𑀦𑀯𑀲𑁂𑀦 𑀘 𑀧𑀯𑀢𑁆𑀢𑀁 𑀲𑀫𑀸𑀧𑀢𑁆𑀢𑀺𑀘𑁂𑀢𑀦𑀁. 𑀫𑀼𑀜𑁆𑀘𑀘𑁂𑀢𑀦𑀦𑁆𑀢𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀯𑀢𑁆𑀢𑀁 𑀧𑀞𑀫𑀧𑁆𑀧𑀦𑀸𑀘𑁂𑀢𑀦𑀁. 𑀓𑀼𑀲𑀮𑀚𑁆𑀛𑀸𑀦𑀲𑁆𑀲 𑀯𑀺𑀧𑀸𑀓𑀚𑁆𑀛𑀸𑀦𑁂𑀯 𑀮𑀩𑁆𑀪𑀫𑀸𑀦𑀁 𑀲𑀼𑀔𑀁 𑀛𑀸𑀦𑀲𑀼𑀔𑀁. 𑀇𑀝𑁆𑀞𑀧𑀭𑀺𑀬𑀸𑀬𑁄 𑀘𑁂𑀢𑁆𑀣 𑀲𑀼𑀔-𑀲𑀤𑁆𑀤𑁄. 𑀛𑀸𑀦𑁂 𑀅𑀧𑁂𑀓𑁆𑀔𑀸 𑀛𑀸𑀦𑀦𑀺𑀓𑀦𑁆𑀢𑀺. 𑀛𑀸𑀦𑀲𑁆𑀲 𑀅𑀲𑁆𑀲𑀸𑀤𑀯𑀲𑁂𑀦 𑀧𑀯𑀢𑁆𑀢𑁄 𑀮𑁄𑀪𑁄 𑀛𑀸𑀦𑀲𑁆𑀲𑀸𑀤𑁄. 𑀬𑁂𑀦 𑀢𑁂 𑀢𑁂 𑀩𑁆𑀭𑀳𑁆𑀫𑀸𑀦𑁄 𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 ‘‘𑀅𑀳𑁄 𑀲𑀼𑀔𑀁 𑀅𑀳𑁄 𑀲𑀼𑀔’’𑀦𑁆𑀢𑀺 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀼𑀦𑁆𑀢𑀺. 𑀬𑀣𑀸 𑀤𑁂𑀯𑀸 𑀲𑀼𑀔𑀩𑀳𑀼𑀮𑀸 𑀢𑀺𑀳𑁂𑀢𑀼𑀧𑀝𑀺𑀲𑀦𑁆𑀥𑀺𑀓𑀸𑀯𑀸𑀢𑀺 𑀧𑀝𑀺𑀧𑀚𑁆𑀚𑀦𑁆𑀢𑀸 𑀛𑀸𑀦𑀁 𑀅𑀥𑀺𑀕𑀦𑁆𑀢𑀼𑀁 𑀪𑀩𑁆𑀩𑀸, 𑀦 𑀇𑀢𑀭𑁂𑀢𑀺 ‘‘𑀓𑀸𑀫𑀸𑀯𑀘𑀭𑀤𑁂𑀯𑁂𑀲𑀽’’𑀢𑀺 𑀯𑀼𑀢𑁆𑀢𑀁. 𑀓𑀸𑀫𑀸𑀯𑀘𑀭𑀸 𑀘 𑀉𑀧𑀭𑀺𑀤𑁂𑀯𑀸 𑀘 𑀓𑀸𑀫𑀸𑀯𑀘𑀭𑀤𑁂𑀯𑀸𑀢𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀏𑀓𑀘𑁆𑀘𑀸𑀦𑀁 𑀲𑀩𑁆𑀩𑁂𑀲𑀫𑁆𑀧𑀺 𑀯𑀸 𑀲𑀗𑁆𑀕𑀳𑁄 𑀲𑀺𑀤𑁆𑀥𑁄 𑀳𑁄𑀢𑀺 𑀧𑀢𑁆𑀣𑀦𑀸𑀧𑀭𑀺𑀓𑀧𑁆𑀧𑀦𑀸𑀬 𑀯𑀺𑀲𑀬𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀅𑀳𑁄 𑀯𑀢𑀺𑀫𑁂 𑀘…𑀧𑁂… 𑀢𑀺𑀝𑁆𑀞𑁂𑀬𑁆𑀬𑀼’’𑀦𑁆𑀢𑀺. 𑀣𑀼𑀮𑁆𑀮𑀸𑀦𑀺 𑀨𑀼𑀲𑀺𑀢𑀸𑀦𑀺 𑀯𑀺𑀧𑁆𑀨𑀼𑀭𑀸𑀦𑀺 𑀏𑀢𑁆𑀣𑀸𑀢𑀺 𑀣𑀼𑀮𑁆𑀮𑀨𑀼𑀲𑀺𑀢𑀓𑁄, 𑀓𑀸𑀮𑁄, 𑀤𑁂𑀲𑁄 𑀯𑀸. 𑀢𑀲𑁆𑀫𑀺𑀁 𑀣𑀼𑀮𑁆𑀮𑀨𑀼𑀲𑀺𑀢𑀓𑁂.

‘‘𑀧𑀼𑀜𑁆𑀜𑀸𑀦𑀺 𑀓𑀬𑀺𑀭𑀸𑀣 𑀲𑀼𑀔𑀸𑀯𑀳𑀸𑀦𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀅𑀦𑀺𑀬𑁆𑀬𑀸𑀦𑀺𑀓𑀁 𑀯𑀝𑁆𑀝𑀓𑀣𑀁 𑀓𑀣𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄, 𑀓𑀺𑀮𑁂𑀲𑁂𑀳𑀺 𑀆𑀫𑀲𑀺𑀢𑀩𑁆𑀩𑀢𑁄 𑀆𑀫𑀺𑀲𑀜𑁆𑀘𑀸𑀢𑀺 𑀮𑁄𑀓𑀸𑀫𑀺𑀲𑀁. 𑀦𑀺𑀧𑁆𑀧𑀭𑀺𑀬𑀸𑀬𑀸𑀫𑀺𑀲𑀁 𑀧𑀦 𑀮𑁄𑀓𑁂 𑀆𑀫𑀺𑀲𑀦𑁆𑀢𑀺𑀧𑀺 𑀮𑁄𑀓𑀸𑀫𑀺𑀲𑀁. 𑀧𑀭𑀺𑀬𑀸𑀬𑁂𑀢𑀺 𑀲𑀪𑀸𑀯𑀢𑁄 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀜𑀸𑀧𑁂𑀢𑀺 𑀏𑀢𑁂𑀦𑀸𑀢𑀺 𑀧𑀭𑀺𑀬𑀸𑀬𑁄, 𑀮𑁂𑀲𑁄, 𑀓𑀸𑀭𑀡𑀁 𑀯𑀸𑀢𑀺 𑀆𑀳 ‘‘𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸’’𑀢𑀺, 𑀯𑀝𑁆𑀝𑀲𑁆𑀲 𑀏𑀓𑀦𑁆𑀢𑀢𑁄 𑀩𑀸𑀮𑀮𑁄𑀓𑁂𑀳𑁂𑀯 ¶ 𑀆𑀫𑀲𑀺𑀢𑀩𑁆𑀩𑀪𑀸𑀯𑀢𑁄 𑀧𑀭𑀺𑀬𑀸𑀬𑀸𑀫𑀺𑀲𑀢𑀸 𑀯𑀼𑀢𑁆𑀢𑀸. 𑀇𑀥 𑀧𑀭𑀺..𑀧𑁂… 𑀅𑀥𑀺𑀧𑁆𑀧𑁂𑀢𑀁 𑀯𑀺𑀯𑀝𑁆𑀝𑀧𑀝𑀺𑀬𑁄𑀕𑀺𑀦𑁄 𑀇𑀘𑁆𑀙𑀺𑀢𑀢𑁆𑀢𑀸. 𑀘𑀢𑀼𑀧𑀘𑁆𑀘𑀬𑀸𑀧𑁂𑀓𑁆𑀔𑀜𑁆𑀳𑀺 𑀧𑀳𑀸𑀦𑀁. 𑀏𑀓𑀘𑁆𑀘𑀲𑁆𑀲 𑀲𑀓𑀮𑀯𑀝𑁆𑀝𑀸𑀧𑁂𑀓𑁆𑀔𑀧𑁆𑀧𑀳𑀸𑀦𑀲𑁆𑀲𑀧𑀺 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 ‘‘𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺 𑀲𑀸𑀲𑀗𑁆𑀓𑀁 𑀯𑀤𑀢𑀺. 𑀯𑀽𑀧𑀲𑀫𑀢𑀺 𑀏𑀢𑁆𑀣 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀦𑁆𑀢𑀺 𑀲𑀦𑁆𑀢𑀺, 𑀅𑀲𑀗𑁆𑀔𑀢𑀥𑀸𑀢𑀽𑀢𑀺 𑀆𑀳 ‘‘𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢’’𑀦𑁆𑀢𑀺.

𑀉𑀧𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀘𑁆𑀘𑁂𑀦𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪. 𑀓𑀸𑀮𑀬𑀦𑁆𑀢𑀺 ¶ 𑀔𑁂𑀧𑁂𑀦𑁆𑀢𑀻𑀢𑀺 𑀓𑀸𑀮𑀸. 𑀧𑀼𑀭𑁂𑀪𑀢𑁆𑀢𑀸𑀤𑀬𑁄 𑀳𑀺 𑀓𑀸𑀮𑀸 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀢𑀸𑀬 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀸𑀧𑀺 𑀮𑁄𑀓𑀲𑀗𑁆𑀓𑁂𑀢𑀫𑀢𑁆𑀢𑀲𑀺𑀤𑁆𑀥𑀸 𑀢𑀲𑁆𑀲𑀸𑀬𑁂𑀯 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀕𑀢𑀕𑀢𑀸𑀬 𑀅𑀦𑀺𑀯𑀢𑁆𑀢𑀦𑀢𑁄 𑀢𑀁 𑀢𑀁 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀁 𑀔𑁂𑀧𑁂𑀦𑁆𑀢𑀸 𑀯𑀺𑀦𑀸𑀲𑀬𑀦𑁆𑀢𑀸 𑀯𑀺𑀬 𑀲𑀬𑀜𑁆𑀘 𑀢𑀸𑀳𑀺 𑀲𑀤𑁆𑀥𑀺𑀁 𑀅𑀘𑁆𑀘𑁂𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀺. 𑀢𑁂𑀦𑀸𑀳 𑁋 ‘‘𑀓𑀸𑀮𑁄 𑀖𑀲𑀢𑀺 𑀪𑀽𑀢𑀸𑀦𑀺, 𑀲𑀩𑁆𑀩𑀸𑀦𑁂𑀯 𑀲𑀳𑀢𑁆𑀢𑀦𑀸’’𑀢𑀺 (𑀚𑀸. 𑁧.𑁨.𑁧𑁯𑁦). ‘‘𑀢𑀭𑀬𑀦𑁆𑀢𑀺 𑀭𑀢𑁆𑀢𑀺𑀬𑁄’’𑀢𑀺 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀏𑀢𑀁 𑀪𑀬𑀁 𑀫𑀭𑀡𑁂 𑀧𑁂𑀓𑁆𑀔𑀫𑀸𑀦𑁄’’𑀢𑀺 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀧𑀼𑀕𑁆𑀕𑀮𑀁 𑀫𑀭𑀡𑀽𑀧𑀕𑀫𑀦𑀸𑀬 𑀢𑀭𑀬𑀦𑁆𑀢𑀻𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀯𑀬𑁄𑀕𑀼𑀡𑀸𑀢𑀺 𑀏𑀢𑁆𑀣 𑀓𑁄𑀝𑁆𑀞𑀸𑀲𑀸 𑀕𑀼𑀡𑀸. 𑀢𑀺𑀢𑁆𑀣𑀺𑀬𑀸𑀦𑀁 𑀳𑀺 𑀘𑀭𑀺𑀫𑀘𑀺𑀢𑁆𑀢𑁂𑀦 𑀲𑀓𑀮𑀘𑀺𑀢𑁆𑀢𑁂 𑀯𑀬𑀲𑀫𑀽𑀳𑁂 𑀯𑀬𑀲𑀫𑀜𑁆𑀜𑀸𑀢𑀺 𑀆𑀳 𑁋 ‘‘𑀧𑀞𑀫𑀫𑀚𑁆𑀛𑀺𑀫𑀧𑀘𑁆𑀙𑀺𑀫𑀯𑀬𑀸𑀦𑀁 𑀕𑀼𑀡𑀸, 𑀭𑀸𑀲𑀬𑁄𑀢𑀺 𑀅𑀢𑁆𑀣𑁄’’𑀢𑀺. 𑀆𑀦𑀺𑀲𑀁𑀲𑀝𑁆𑀞𑁄 𑀕𑀼𑀡𑀝𑁆𑀞𑁄 ‘‘𑀯𑀸𑀓𑀘𑀺𑀭𑀁 𑀦𑀺𑀯𑀸𑀲𑁂𑀲𑀺𑀁, 𑀤𑁆𑀯𑀸𑀤𑀲𑀕𑀼𑀡𑀫𑀼𑀧𑀸𑀕𑀢’’𑀦𑁆𑀢𑀺𑀆𑀤𑀻𑀲𑀼 (𑀩𑀼. 𑀯𑀁. 𑁨.𑁩𑁦) 𑀯𑀺𑀬. ‘‘𑀢𑀦𑁆𑀤𑀺𑀕𑀼𑀡𑀸𑀳𑀁 𑀓𑀭𑀺𑀲𑁆𑀲𑀸𑀫𑀺, 𑀤𑀺𑀕𑀼𑀡𑀁 𑀤𑀺𑀕𑀼𑀡𑀁 𑀯𑀤𑁆𑀥𑁂𑀬𑁆𑀬𑀸’’𑀢𑀺 𑀘 𑀏𑀯𑀫𑀸𑀤𑀻𑀲𑀼 𑀧𑀦 𑀢𑀩𑁆𑀪𑀸𑀯𑀯𑀼𑀢𑁆𑀢𑀺𑀅𑀢𑁆𑀣𑁄 𑀕𑀼𑀡𑀝𑁆𑀞𑁄.

‘‘𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀦𑀸𑀫𑀸𑀦𑀺, 𑀲𑀕𑀼𑀡𑁂𑀦 𑀫𑀳𑁂𑀲𑀺𑀦𑁄;

𑀕𑀼𑀡𑁂𑀦 𑀦𑀸𑀫𑀫𑀼𑀤𑁆𑀥𑁂𑀬𑁆𑀬𑀁, 𑀅𑀧𑀺 𑀦𑀸𑀫 𑀲𑀳𑀲𑁆𑀲𑀢𑁄’’𑀢𑀺. (𑀥. 𑀲. 𑀅𑀝𑁆𑀞. 𑁧𑁩𑁧𑁩; 𑀉𑀤𑀸. 𑁫𑁩; 𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁭𑁬) 𑁋

𑀆𑀤𑀻𑀲𑀼 𑀧𑀲𑀁𑀲𑀝𑁆𑀞𑁄 𑀕𑀼𑀡𑀝𑁆𑀞𑁄 𑀤𑀝𑁆𑀞𑀩𑁆𑀩𑁄. ‘‘𑀯𑀬𑁄𑀕𑀼𑀡𑀸 𑀅𑀦𑀼𑀧𑀼𑀩𑁆𑀩𑀁 𑀚𑀳𑀦𑁆𑀢𑀻’’𑀢𑀺 𑀏𑀢𑁆𑀣 𑀅𑀢𑁆𑀣𑁄 ‘‘𑀅𑀘𑁆𑀘𑁂𑀦𑁆𑀢𑀺 𑀓𑀸𑀮𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁄 𑀏𑀯. 𑀧𑀞𑀫𑀫𑀚𑁆𑀛𑀺𑀫𑀯𑀬𑀸𑀢𑀺 𑀧𑀞𑀫𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀯𑀬𑀲𑁆𑀲 𑀕𑀢𑀲𑁆𑀲 𑀅𑀧𑀼𑀦𑀭𑀸𑀯𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀓𑀢𑀁. 𑀢𑁂𑀦𑁂𑀯𑀸𑀳 𑁋 ‘‘𑀫𑀭𑀡𑀓𑁆𑀔𑀡𑁂 𑀧𑀦 𑀢𑀬𑁄𑀧𑀺 𑀯𑀬𑀸 𑀚𑀳𑀦𑁆𑀢𑁂𑀯𑀸’’𑀢𑀺.

𑀏𑀢𑁆𑀣 ¶ 𑀘 𑀧𑀸𑀴𑀺𑀬𑀁 ‘‘𑀅𑀘𑁆𑀘𑁂𑀦𑁆𑀢𑀺 𑀓𑀸𑀮𑀸’’𑀢𑀺 𑀲𑀸𑀫𑀜𑁆𑀜𑀢𑁄 𑀓𑀸𑀮𑀲𑁆𑀲 𑀅𑀧𑀕𑀫𑀦𑀁 𑀤𑀲𑁆𑀲𑀺𑀢𑀁, 𑀧𑀼𑀦 𑀢𑀁 𑀯𑀺𑀲𑁂𑀲𑀢𑁄𑀧𑀺 𑀤𑀲𑁆𑀲𑁂𑀢𑀼𑀁 𑀇𑀢𑀭𑀤𑁆𑀯𑀬𑀁 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀫𑀼𑀤𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 ‘‘𑀯𑀬𑁄𑀕𑀼𑀡𑀸 𑀅𑀦𑀼𑀧𑀼𑀩𑁆𑀩𑀁 𑀚𑀳𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁, 𑀫𑀚𑁆𑀛𑀺𑀫𑀺𑀦𑁆𑀤𑁆𑀭𑀺𑀬𑀲𑁆𑀲 𑀯𑀲𑁂𑀦 ‘‘𑀢𑀭𑀬𑀦𑁆𑀢𑀺 𑀭𑀢𑁆𑀢𑀺𑀬𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀓𑀸𑀮𑀸𑀢𑀺 𑀧𑀼𑀭𑁂𑀪𑀢𑁆𑀢𑀸𑀤𑀬𑁄 𑀓𑀸𑀮𑀸’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀢𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀧𑀘𑁆𑀙𑀸𑀪𑀢𑁆𑀢𑀧𑀞𑀫𑀬𑀸𑀫-𑀫𑀼𑀳𑀼𑀢𑁆𑀢𑀓𑀸𑀮𑀸𑀤𑀺-𑀓𑀸𑀮𑀓𑁄𑀝𑁆𑀞𑀸𑀲𑁄 𑀏𑀯 𑀅𑀡𑀼𑀧𑀪𑁂𑀤𑁄 𑀓𑀸𑀮𑀯𑀺𑀪𑀸𑀕𑁄 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀦𑁆𑀢𑀺 𑀇𑀥 𑀤𑁆𑀯𑀻𑀲𑀼 𑀕𑀸𑀣𑀸𑀲𑀼 𑀧𑀘𑁆𑀙𑀺𑀫𑀤𑁆𑀥𑁄. 𑀲𑁄 𑀳𑀺 𑀇𑀥 𑀅𑀢𑁆𑀣𑀢𑁄 𑀅𑀥𑀺𑀕𑀢𑀢𑁆𑀢𑀸 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀘 𑀯𑀼𑀢𑁆𑀢𑀢𑁆𑀢𑀸 𑀅𑀢𑀺𑀤𑀺𑀲𑀺𑀢𑁄.

𑀅𑀘𑁆𑀘𑁂𑀦𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀓𑀢𑀺𑀙𑀺𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁫. 𑀙𑀺𑀦𑁆𑀤𑀦𑁆𑀢𑁄𑀢𑀺 ¶ 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑁄. 𑀓𑀢𑀺 𑀙𑀺𑀦𑁆𑀤𑁂𑀬𑁆𑀬𑀸𑀢𑀺 𑀓𑀺𑀢𑁆𑀢𑀓𑁂 𑀧𑀸𑀧𑀥𑀫𑁆𑀫𑁂 𑀲𑀫𑀼𑀘𑁆𑀙𑀺𑀦𑁆𑀤𑁂𑀬𑁆𑀬, 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀧𑀸𑀧𑁂𑀬𑁆𑀬. 𑀲𑁂𑀲𑀧𑀤𑁂𑀲𑀼𑀧𑀻𑀢𑀺 𑀲𑁂𑀲𑁂𑀲𑀼𑀧𑀺 𑀤𑁆𑀯𑀻𑀲𑀼 𑀧𑀤𑁂𑀲𑀼. 𑀚𑀳𑀦𑁆𑀢𑁄 𑀓𑀢𑀺 𑀚𑀳𑁂𑀬𑁆𑀬, 𑀪𑀸𑀯𑁂𑀦𑁆𑀢𑁄 𑀓𑀢𑀺 𑀉𑀢𑁆𑀢𑀭𑀺 𑀪𑀸𑀯𑁂𑀬𑁆𑀬𑀸𑀢𑀺 𑀇𑀫𑀫𑀢𑁆𑀣𑀁 ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀅𑀢𑀺𑀤𑀺𑀲𑀢𑀺. 𑀘𑀢𑀼𑀢𑁆𑀣𑀧𑀤𑀲𑁆𑀲 𑀧𑀦 𑀅𑀢𑁆𑀣𑁄 𑀲𑀭𑀽𑀧𑁂𑀦𑁂𑀯 𑀤𑀲𑁆𑀲𑀺𑀢𑁄. 𑀅𑀢𑁆𑀣𑀢𑁄 𑀏𑀓𑀦𑁆𑀢𑀺 𑀪𑀸𑀯𑀢𑁆𑀣𑀢𑁄 𑀏𑀓𑀁. 𑀬𑀤𑀺 𑀏𑀯𑀁 𑀓𑀺𑀫𑀢𑁆𑀣𑀁 𑀧𑀭𑀺𑀬𑀸𑀬𑀦𑁆𑀢𑀭𑀁 𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀕𑀸𑀣𑀸𑀩𑀦𑁆𑀥𑀲𑁆𑀲 𑀧𑀦𑀸’’𑀢𑀺𑀆𑀤𑀺. 𑀅𑀢𑁆𑀣𑀢𑁄 𑀏𑀢𑁆𑀣 𑀧𑀼𑀦𑀭𑀼𑀢𑁆𑀢𑀺 𑀅𑀢𑁆𑀣𑁂𑀯𑀸𑀢𑀺 𑀆𑀳 ‘‘𑀲𑀤𑁆𑀤𑀧𑀼𑀦𑀭𑀼𑀢𑁆𑀢𑀺𑀁 𑀯𑀚𑁆𑀚𑀬𑀦𑁆𑀢𑀻’’𑀢𑀺. 𑀲𑀗𑁆𑀕𑀁 𑀅𑀢𑀺𑀓𑁆𑀓𑀫𑀬𑀢𑀻𑀢𑀺 𑀲𑀗𑁆𑀕𑀸𑀢𑀺𑀕𑁄𑀢𑀺 𑀆𑀳 ‘‘𑀅𑀬𑀫𑁂𑀯𑀢𑁆𑀣𑁄’’𑀢𑀺.

𑀑𑀭𑀁 𑀯𑀼𑀘𑁆𑀘𑀢𑀺 𑀓𑀸𑀫𑀥𑀸𑀢𑀼, 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀪𑀸𑀯𑁂𑀦 𑀢𑀜𑁆𑀘 𑀪𑀚𑀦𑁆𑀢𑀻𑀢𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀺. 𑀢𑀢𑁆𑀣 𑀘 𑀓𑀫𑁆𑀫𑀁 𑀢𑀩𑁆𑀩𑀺𑀧𑀸𑀓𑀁 𑀲𑀢𑁆𑀢𑁂 𑀤𑀼𑀓𑁆𑀔𑀁, 𑀓𑀫𑁆𑀫𑀼𑀦𑀸 𑀯𑀺𑀧𑀸𑀓𑀁, 𑀲𑀢𑁆𑀢𑁂𑀦 𑀤𑀼𑀓𑁆𑀔𑀁 𑀲𑀁𑀬𑁄𑀚𑁂𑀦𑁆𑀢𑀻𑀢𑀺 𑀲𑀁𑀬𑁄𑀚𑀦𑀸𑀦𑀺, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺-𑀯𑀺𑀘𑀺𑀓𑀺𑀘𑁆𑀙𑀸-𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲-𑀓𑀸𑀫𑀭𑀸𑀕-𑀧𑀝𑀺𑀖𑀸. 𑀉𑀤𑁆𑀥𑀁 𑀯𑀼𑀘𑁆𑀘𑀢𑀺 𑀘𑀢𑀲𑁆𑀲𑁄 𑀅𑀭𑀽𑀧𑀥𑀸𑀢𑀼𑀬𑁄, 𑀯𑀼𑀢𑁆𑀢𑀦𑀬𑁂𑀦 𑀢𑀁 𑀪𑀚𑀦𑁆𑀢𑀻𑀢𑀺 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺, 𑀲𑀁𑀬𑁄𑀚𑀦𑀸𑀦𑀺 𑀭𑀽𑀧𑀸𑀭𑀽𑀧𑀭𑀸𑀕𑀫𑀸𑀦𑀼𑀤𑁆𑀥𑀘𑁆𑀘𑀸𑀯𑀺𑀚𑁆𑀚𑀸. 𑀆𑀭𑁄𑀧𑀺𑀢𑀯𑀘𑀦𑀸𑀦𑀼𑀭𑀽𑀧𑁂𑀦𑁂𑀯 𑀏𑀯𑀫𑀸𑀳𑀸𑀢𑀺 ‘‘𑀧𑀜𑁆𑀘 𑀙𑀺𑀦𑁆𑀤𑁂 𑀧𑀜𑁆𑀘 𑀚𑀳𑁂’’𑀢𑀺 𑀏𑀯𑀁 𑀓𑀣𑁂𑀲𑀺 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀲𑀼𑀔𑀕𑁆𑀕𑀳𑀡𑀢𑁆𑀣𑀁. 𑀦 𑀓𑁂𑀯𑀮𑀁 𑀢𑀸𑀬 𑀤𑁂𑀯𑀢𑀸𑀬 𑀯𑀼𑀢𑁆𑀢𑀯𑀘𑀦𑀸𑀦𑀼𑀭𑀽𑀧𑀢𑁄 𑀏𑀯, 𑀅𑀣 𑀔𑁄 𑀢𑁂𑀲𑀼 𑀲𑀁𑀬𑁄𑀚𑀦𑁂𑀲𑀼 ¶ 𑀯𑀢𑁆𑀢𑀩𑁆𑀩𑀸𑀓𑀸𑀭𑀢𑁄𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀑𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀦𑀸𑀫 𑀕𑀭𑀽𑀦𑀺 𑀤𑀼𑀘𑁆𑀙𑁂𑀤𑀸𑀦𑀺 𑀕𑀸𑀴𑁆𑀳𑀩𑀦𑁆𑀥𑀦𑀪𑀸𑀯𑀢𑁄, 𑀢𑀲𑁆𑀫𑀸 𑀢𑀸𑀦𑀺 𑀲𑀦𑁆𑀥𑀸𑀬 ‘‘𑀧𑀜𑁆𑀘 𑀙𑀺𑀦𑁆𑀤𑁂’’𑀢𑀺 𑀯𑀼𑀢𑁆𑀢𑀁.

𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀧𑀦 𑀮𑀳𑀽𑀦𑀺 𑀲𑀼𑀘𑁆𑀙𑁂𑀤𑀸𑀦𑀺 𑀳𑁂𑀝𑁆𑀞𑀸 𑀧𑀯𑀢𑁆𑀢𑀺𑀢𑀸𑀦𑀼𑀓𑁆𑀓𑀫𑁂𑀦 𑀪𑀸𑀯𑀦𑀸𑀦𑀬𑁂𑀦 𑀧𑀳𑀸𑀢𑀩𑁆𑀩𑀢𑁄, 𑀢𑀲𑁆𑀫𑀸 𑀢𑀸𑀦𑀺 𑀲𑀦𑁆𑀥𑀸𑀬 ‘‘𑀧𑀜𑁆𑀘 𑀚𑀳𑁂’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀧𑀸𑀤𑁂𑀲𑀼 𑀩𑀤𑁆𑀥𑀧𑀸𑀲𑀲𑀓𑀼𑀡𑁄 𑀯𑀺𑀬𑀸’’𑀢𑀺𑀆𑀤𑀺. 𑀯𑀺𑀲𑁂𑀲𑀦𑁆𑀢𑀺 𑀪𑀸𑀯𑀦𑀸𑀦𑀁 𑀯𑀺𑀲𑁂𑀲𑀁 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀁 𑀪𑀸𑀯𑁂𑀦𑁆𑀢𑁄 𑀉𑀧𑁆𑀧𑀸𑀤𑁂𑀦𑁆𑀢𑁄 𑀯𑀺𑀧𑀘𑁆𑀘𑁂𑀦𑁆𑀢𑁄 𑀯𑀟𑁆𑀠𑁂𑀦𑁆𑀢𑁄 𑀘. 𑀲𑀁𑀲𑀸𑀭𑀧𑀗𑁆𑀓𑁂 𑀲𑀜𑁆𑀚𑀦𑀝𑁆𑀞𑁂𑀦 𑀭𑀸𑀕𑁄 𑀏𑀯 𑀲𑀗𑁆𑀕𑁄 ‘‘𑀭𑀸𑀕𑀲𑀗𑁆𑀕𑁄’’. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀬𑀲𑁆𑀫𑀸 𑀏𑀢𑁆𑀣 𑀭𑀸𑀕-𑀫𑁄𑀳-𑀤𑀺𑀝𑁆𑀞𑀺-𑀢𑀩𑁆𑀪𑀸𑀕𑀺𑀬𑀲𑀓𑁆𑀓𑀸𑀬𑀤𑀺𑀝𑁆𑀞𑀺-𑀲𑀻𑀮𑀩𑁆𑀩𑀢𑀧𑀭𑀸𑀫𑀸𑀲-𑀓𑀸𑀫𑀭𑀸𑀕𑀸𑀯𑀺𑀚𑁆𑀚𑀸 𑀅𑀢𑁆𑀣𑀢𑁄 𑀑𑀖𑀸 𑀏𑀯, 𑀇𑀢𑀭𑁂 𑀢𑀤𑁂𑀓𑀝𑁆𑀞𑀸, 𑀢𑀲𑁆𑀫𑀸 𑀪𑀕𑀯𑀸 𑀲𑀁𑀬𑁄𑀚𑀦𑀧𑁆𑀧𑀳𑀸𑀦𑀲𑀗𑁆𑀕𑀸𑀢𑀺𑀓𑁆𑀓𑀫𑁂𑀳𑀺 𑀑𑀖𑀢𑀭𑀡𑀁 𑀓𑀣𑁂𑀲𑀺. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀦𑀺 𑀓𑀣𑀺𑀢𑀸𑀦𑀺 ‘‘𑀪𑀸𑀯𑀬𑁂’’𑀢𑀺 𑀧𑀼𑀩𑁆𑀩𑀪𑀸𑀕𑀸𑀬 𑀫𑀕𑁆𑀕𑀪𑀸𑀯𑀦𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀢𑀸.

𑀓𑀢𑀺𑀙𑀺𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀚𑀸𑀕𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁬. 𑀚𑀸𑀕𑀭𑀢𑀦𑁆𑀢𑀺 ¶ 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁. 𑀢𑁂𑀦𑀸𑀳 ‘‘𑀇𑀦𑁆𑀤𑁆𑀭𑀺𑀬𑁂𑀲𑀼 𑀚𑀸𑀕𑀭𑀦𑁆𑀢𑁂𑀲𑀽’’𑀢𑀺. ‘‘𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸𑀬𑀁 𑀧𑀦𑀸’’𑀢𑀺 𑀇𑀫𑀲𑁆𑀲 𑀧𑀤𑀲𑁆𑀲 ‘‘𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀧𑀼𑀘𑁆𑀙𑀸𑀕𑀸𑀣𑀸𑀬 𑀧𑀦 𑀅𑀢𑁆𑀣𑁄 𑀇𑀫𑀺𑀦𑀸𑀯 𑀦𑀬𑁂𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀜𑁆𑀘 𑀚𑀸𑀕𑀭𑀢𑀁 𑀲𑀼𑀢𑁆𑀢𑀸𑀢𑀺 𑀏𑀢𑁆𑀣 ‘‘𑀲𑀼𑀢𑁆𑀢𑀸’’𑀢𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀧𑀜𑁆𑀘𑀸𑀢𑀺 𑀧𑀘𑁆𑀘𑀢𑁆𑀢𑀯𑀘𑀦𑀁 ‘‘𑀚𑀸𑀕𑀭𑀢’’𑀦𑁆𑀢𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀲𑀸𑀫𑀺𑀯𑀲𑁂𑀦 𑀧𑀭𑀺𑀡𑀸𑀫𑁂𑀢𑀩𑁆𑀩𑀁 ‘‘𑀧𑀜𑁆𑀘𑀦𑁆𑀦𑀁 𑀚𑀸𑀕𑀭𑀢’’𑀦𑁆𑀢𑀺. 𑀢𑁂𑀦𑀸𑀳 𑁋 ‘‘𑀧𑀜𑁆𑀘𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀚𑀸𑀕𑀭𑀦𑁆𑀢𑁂𑀲𑀽’’𑀢𑀺, 𑀚𑀸𑀕𑀭𑀦𑁆𑀢𑁂𑀲𑀼 𑀩𑀤𑁆𑀥𑀸𑀪𑀸𑀯𑁂𑀦 𑀲𑀓𑀺𑀘𑁆𑀘𑀧𑁆𑀧𑀲𑀼𑀢𑀢𑀸𑀬 𑀲𑀓𑀺𑀘𑁆𑀘𑀲𑀫𑀢𑁆𑀣𑀢𑀸𑀬 𑀘𑀸𑀢𑀺 𑀅𑀢𑁆𑀣𑁄. 𑀲𑁄𑀢𑁆𑀢𑀁𑀯 𑀲𑀼𑀢𑁆𑀢𑀸 𑀧𑀫𑀸𑀤𑀦𑀺𑀤𑁆𑀤𑀸𑀪𑀸𑀯𑀢𑁄. 𑀢𑀫𑁂𑀯 𑀲𑀼𑀢𑁆𑀢𑀪𑀸𑀯𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀓𑀣𑀸𑀬 𑀤𑀲𑁆𑀲𑁂𑀢𑀼𑀁 ‘‘𑀓𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀫𑀚𑁆𑀚𑀢𑀺, 𑀧𑀫𑀸𑀤𑁄 𑀯𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀧𑀫𑀸𑀤𑁄, 𑀢𑀲𑁆𑀲 𑀪𑀸𑀯𑁄 𑀧𑀫𑀸𑀤𑀢𑀸, 𑀢𑀸𑀬, 𑀧𑀫𑀢𑁆𑀢𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄.

𑀏𑀯𑀁 ¶ 𑀕𑀸𑀣𑀸𑀬 𑀧𑀞𑀫𑀲𑁆𑀲 𑀧𑀸𑀤𑀲𑁆𑀲 𑀅𑀢𑁆𑀣𑀁 𑀯𑀢𑁆𑀯𑀸 𑀤𑀼𑀢𑀺𑀬𑀲𑁆𑀲 𑀯𑀢𑁆𑀢𑀼𑀁 ‘‘𑀏𑀯𑀁 𑀲𑀼𑀢𑁆𑀢𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀅𑀧𑁆𑀧𑀳𑀻𑀦𑀲𑀼𑀧𑀦𑀓𑀺𑀭𑀺𑀬𑀸𑀯𑀲𑁂𑀦 𑀲𑀦𑀻𑀯𑀭𑀡𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀦𑀼𑀧𑁆𑀧𑀦𑁆𑀦𑀭𑀸𑀕𑀭𑀚𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀉𑀧𑁆𑀧𑀦𑁆𑀦𑀸 𑀧𑀯𑀟𑁆𑀠𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦𑀻𑀯𑀭𑀡𑁂𑀳𑁂𑀯 𑀓𑀺𑀮𑁂𑀲𑀭𑀚𑀁 𑀆𑀤𑀺𑀬𑀢𑀻’’𑀢𑀺. 𑀢𑁂𑀦𑁂𑀯𑀸𑀳 ‘‘𑀧𑀼𑀭𑀺𑀫𑀸’’𑀢𑀺𑀆𑀤𑀺. 𑀧𑀼𑀭𑀺𑀫𑀸𑀦𑀁 𑀧𑀘𑁆𑀙𑀺𑀫𑀸𑀦𑀁 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑁄 𑀳𑁂𑀢𑁆𑀣 𑀆𑀤𑀺𑀬𑀦𑀁. 𑀧𑀜𑁆𑀘𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀧𑀭𑀺𑀲𑀼𑀚𑁆𑀛𑀢𑀻𑀢𑀺 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑁂𑀳𑀺 𑀲𑀤𑁆𑀥𑀸𑀤𑀻𑀳𑀺 𑀧𑀜𑁆𑀘𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀓𑀮𑀲𑀁𑀓𑀺𑀮𑁂𑀲𑀢𑁄 𑀯𑀺𑀲𑀼𑀚𑁆𑀛𑀢𑀺. 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀫𑁂𑀯 𑀳𑀺 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺, 𑀇𑀢𑀭𑀸𑀦𑀺 𑀘 𑀅𑀦𑁆𑀯𑀬𑀸𑀦𑀻𑀢𑀺.

𑀚𑀸𑀕𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀧𑁆𑀧𑀝𑀺𑀯𑀺𑀤𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁭. 𑀧𑀯𑀢𑁆𑀢𑀺𑀦𑀺𑀯𑀢𑁆𑀢𑀺𑀢𑀤𑀼𑀪𑀬𑀳𑁂𑀢𑀼𑀯𑀺𑀪𑀸𑀕𑀲𑁆𑀲 𑀥𑀫𑁆𑀫𑀲𑁆𑀲𑀧𑀺 𑀘𑀢𑀼𑀲𑀘𑁆𑀘𑀦𑁆𑀢𑁄𑀕𑀥𑀢𑁆𑀢𑀸 𑀆𑀳 ‘‘𑀥𑀫𑁆𑀫𑀸𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀸’’𑀢𑀺. 𑀘𑀢𑁆𑀢𑀸𑀭𑀺𑀧𑀺 𑀳𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀘𑀢𑀼𑀲𑀘𑁆𑀘𑀦𑁆𑀢𑁄𑀕𑀥𑀸𑀦𑀺. 𑀅𑀧𑁆𑀧𑀝𑀺𑀯𑀺𑀤𑁆𑀥𑀸𑀢𑀺 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀯𑀲𑁂𑀦 𑀅𑀦𑀪𑀺𑀲𑀫𑀺𑀢𑀸. 𑀤𑀺𑀝𑁆𑀞𑀺𑀕𑀢𑀯𑀸𑀤𑁂𑀲𑀽𑀢𑀺 𑀤𑀺𑀝𑁆𑀞𑀺𑀕𑀢𑀲𑀜𑁆𑀜𑀺𑀢𑁂𑀲𑀼 𑀯𑀸𑀤𑁂𑀲𑀼. 𑀤𑀺𑀝𑁆𑀞𑀺𑀕𑀢𑁂𑀳𑀺 𑀢𑁂 𑀧𑀯𑀢𑁆𑀢𑀺𑀢𑀸. 𑀇𑀢𑁄 𑀧𑀭𑁂𑀲𑀦𑁆𑀢𑀺 𑀇𑀢𑁄 𑀲𑀸𑀲𑀦𑀺𑀓𑁂𑀳𑀺 𑀧𑀭𑁂𑀲𑀁 𑀅𑀜𑁆𑀜𑁂𑀲𑀁. 𑀥𑀫𑁆𑀫𑀢𑀸𑀬𑀸𑀢𑀺 𑀲𑀪𑀸𑀯𑁂𑀦, 𑀲𑀬𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀕𑀘𑁆𑀙𑀦𑁆𑀢𑀻𑀢𑀺 𑀧𑀯𑀢𑁆𑀢𑀦𑁆𑀢𑀺 𑀤𑀺𑀝𑁆𑀞𑀺𑀯𑀸𑀤𑀁 𑀧𑀕𑁆𑀕𑀬𑁆𑀳 𑀢𑀺𑀝𑁆𑀞𑀦𑁆𑀢𑀺. 𑀧𑀭𑁂𑀦𑀸𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑁂𑀦. 𑀦𑀻𑀬𑀦𑁆𑀢𑀻𑀢𑀺 𑀤𑀺𑀝𑁆𑀞𑀺𑀯𑀸𑀤𑀲𑀗𑁆𑀕𑀡𑁆𑀳𑀦𑁂 𑀉𑀬𑁆𑀬𑁄𑀚𑀻𑀬𑀦𑁆𑀢𑀺. 𑀢𑁂𑀦𑀸𑀳 ‘‘𑀢𑀢𑁆𑀣𑀸’’𑀢𑀺𑀆𑀤𑀺. 𑀧𑀩𑀼𑀚𑁆𑀛𑀺𑀢𑀼𑀦𑁆𑀢𑀺 ¶ 𑀧𑀫𑀸𑀤𑀦𑀺𑀤𑁆𑀤𑀸𑀬 𑀧𑀝𑀺𑀩𑀼𑀚𑁆𑀛𑀺𑀢𑀼𑀁. 𑀧𑀝𑀺𑀧𑀤𑀸 𑀬𑀣𑀸𑀤𑁂𑀲𑀺𑀢𑀲𑁆𑀲 𑀥𑀫𑁆𑀫𑀲𑁆𑀲 𑀓𑀣𑀺𑀢𑀢𑀸𑀬, 𑀧𑀝𑀺𑀩𑀼𑀚𑁆𑀛𑀺𑀢𑀼𑀁 𑀬𑁄𑀦𑀺𑀲𑁄 𑀧𑀯𑀢𑁆𑀢𑀺𑀬𑀫𑀸𑀦𑀢𑁆𑀢𑀸 𑀪𑀤𑁆𑀤𑀺𑀓𑀸.

𑀳𑁂𑀢𑀼𑀦𑀸𑀢𑀺 𑀜𑀸𑀬𑁂𑀦. 𑀓𑀸𑀭𑀡𑁂𑀦𑀸𑀢𑀺 𑀘𑀢𑀼𑀲𑀘𑁆𑀘𑀸𑀦𑀁 𑀲𑀫𑁆𑀩𑁄𑀥𑀬𑀼𑀢𑁆𑀢𑀺𑀬𑀸. 𑀳𑀢𑁆𑀣𑀢𑀮𑁂 𑀆𑀫𑀮𑀓𑀁 𑀯𑀺𑀬 𑀲𑀩𑁆𑀩𑀁 𑀜𑁂𑀬𑁆𑀬𑀁 𑀚𑀸𑀦𑀸𑀢𑀻𑀢𑀺 𑀲𑀩𑁆𑀩𑀜𑁆𑀜𑀽, 𑀢𑁂𑀦𑁂𑀯 𑀲𑀩𑁆𑀩𑀜𑁆𑀜𑀼𑀢𑀸𑀪𑀺𑀲𑀫𑁆𑀩𑁄𑀥𑁂𑀦 𑀩𑀼𑀤𑁆𑀥𑁄𑀢𑀺 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄. 𑀧𑀘𑁆𑀘𑁂𑀓𑀁 𑀧𑀭𑁂𑀳𑀺 𑀅𑀲𑀸𑀥𑀸𑀭𑀡𑀢𑀸𑀬 𑀯𑀺𑀲𑀼𑀁 𑀲𑀬𑀫𑁆𑀪𑀼𑀜𑀸𑀡𑁂𑀦 𑀲𑀘𑁆𑀘𑀸𑀦𑀺 𑀩𑀼𑀤𑁆𑀥𑀯𑀸𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑁄. 𑀧𑀭𑁄𑀧𑀤𑁂𑀲𑁂𑀦 𑀘𑀢𑀼𑀲𑀘𑁆𑀘𑀁 𑀩𑀼𑀚𑁆𑀛𑀢𑀻𑀢𑀺 𑀘𑀢𑀼𑀲𑀘𑁆𑀘𑀩𑀼𑀤𑁆𑀥𑁄. 𑀢𑀣𑀸 𑀳𑀺 𑀲𑁄 𑀲𑀬𑀫𑁆𑀪𑀼𑀢𑀸𑀬 𑀅𑀪𑀸𑀯𑀢𑁄 𑀓𑁂𑀯𑀮𑀁 𑀘𑀢𑀼𑀲𑀘𑁆𑀘𑀩𑀼𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀲𑀼𑀢𑁂𑀦 𑀲𑀼𑀢𑀫𑀬𑀜𑀸𑀡𑁂𑀦 𑀔𑀦𑁆𑀥𑀸𑀤𑀺𑀪𑁂𑀤𑀁 𑀜𑁂𑀬𑁆𑀬𑀁 𑀩𑀼𑀤𑁆𑀥𑀯𑀸𑀢𑀺 𑀲𑀼𑀢𑀩𑀼𑀤𑁆𑀥𑁄. 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑁂 ¶ 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀅𑀕𑁆𑀕𑀲𑀸𑀯𑀓𑀫𑀳𑀸𑀲𑀸𑀯𑀓𑀸𑀧𑀺 𑀧𑀓𑀢𑀺𑀲𑀸𑀯𑀓𑀸𑀧𑀺 𑀯𑀻𑀢𑀭𑀸𑀕𑀸 𑀅𑀯𑀲𑁂𑀲𑀸 𑀔𑀻𑀡𑀸𑀲𑀯𑀸. 𑀢𑀬𑁄𑀧𑀺 𑀧𑀼𑀭𑀺𑀫𑀸 𑀯𑀝𑁆𑀝𑀦𑁆𑀢𑀺 𑀲𑀫𑁆𑀩𑀼𑀤𑁆𑀥𑀸𑀢𑀺𑀆𑀤𑀺𑀯𑀘𑀦𑀢𑁄. 𑀲𑀦𑁆𑀦𑀺𑀯𑀲𑀢𑀺 𑀏𑀢𑁂𑀦𑀸𑀢𑀺 𑀲𑀦𑁆𑀦𑀺𑀯𑀸𑀲𑁄, 𑀘𑀭𑀺𑀢𑀁. 𑀮𑁄𑀓𑀲𑁆𑀲 𑀲𑀦𑁆𑀦𑀺𑀯𑀸𑀲𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄, 𑀢𑀲𑁆𑀫𑀺𑀁. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀪𑁂𑀤𑁂 𑀯𑀺𑀲𑀫𑁂. 𑀲𑀢𑀺𑀲𑀫𑁆𑀫𑁄𑀲𑁂𑀦 𑀯𑀺𑀲𑀫𑁂 𑀯𑀸 𑀲𑀢𑁆𑀢𑀦𑀺𑀓𑀸𑀬𑁂. 𑀲𑁄 𑀳𑀺 𑀯𑀺𑀲𑀫𑀬𑁄𑀕𑀢𑁄 𑀯𑀺𑀲𑀫𑁄. 𑀭𑀸𑀕𑀯𑀺𑀲𑀫𑀸𑀤𑀺𑀓𑁂 𑀯𑀺𑀲𑀫𑁂 𑀯𑀸 𑀓𑀺𑀮𑁂𑀲𑀚𑀸𑀢𑁂. 𑀢𑀁 𑀯𑀺𑀲𑀫𑀁 𑀧𑀳𑀸𑀬 𑀢𑀁 𑀯𑀺𑀲𑀫𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀲𑀫𑀁 𑀲𑀤𑀺𑀲𑀁 𑀬𑀼𑀢𑁆𑀢𑀭𑀽𑀧𑀁, 𑀧𑀼𑀭𑀺𑀫𑀓𑁂𑀳𑀺 𑀯𑀸 𑀲𑀫𑁆𑀩𑀼𑀤𑁆𑀥𑁂𑀳𑀺 𑀲𑀫𑀁 𑀲𑀤𑀺𑀲𑀁 𑀘𑀭𑀦𑁆𑀢𑀺 𑀯𑀢𑁆𑀢𑀦𑁆𑀢𑀺.

𑀅𑀧𑁆𑀧𑀝𑀺𑀯𑀺𑀤𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀼𑀲𑀫𑁆𑀫𑀼𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸

𑁮. 𑀲𑀼𑀲𑀫𑁆𑀫𑀼𑀝𑁆𑀞𑀸𑀢𑀺 𑀲𑀼𑀝𑁆𑀞𑀼 𑀅𑀢𑀺𑀯𑀺𑀬 𑀲𑀫𑁆𑀫𑀼𑀝𑁆𑀞𑀸. 𑀲𑀢𑁆𑀢 𑀲𑁂𑀓𑁆𑀔𑀸 𑀳𑀺 𑀲𑀼𑀲𑀫𑁆𑀫𑀼𑀲𑀺𑀢𑀸 𑀯𑀺𑀦𑀝𑁆𑀞𑀸. 𑀓𑀣𑀁 𑀧𑀦 𑀢𑁂 𑀅𑀦𑀥𑀺𑀕𑀢𑀸 𑀦𑀝𑁆𑀞𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀬𑀣𑀸 𑀳𑀻’’𑀢𑀺𑀆𑀤𑀺. 𑀅𑀥𑀺𑀕𑀢𑀲𑁆𑀲𑀸𑀢𑀺 𑀅𑀥𑀺𑀕𑀢𑁄 𑀅𑀲𑁆𑀲. 𑀲𑁄 𑀯𑀤𑀦𑁆𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀦𑁆𑀢𑀺 ‘‘𑀥𑀫𑁆𑀫𑀸’’𑀢𑀺𑀆𑀤𑀺. 𑀧𑀼𑀭𑀺𑀫𑀲𑀤𑀺𑀲𑀫𑁂𑀯𑀸𑀢𑀺 𑀅𑀦𑀦𑁆𑀢𑀭𑀕𑀸𑀣𑀸𑀬 𑀯𑀼𑀢𑁆𑀢𑀲𑀤𑀺𑀲𑀫𑁂𑀯.

𑀲𑀼𑀲𑀫𑁆𑀫𑀼𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀫𑀸𑀦𑀓𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁯. 𑀲𑁂𑀬𑁆𑀬𑀸𑀤𑀺𑀪𑁂𑀤𑀁 𑀫𑀸𑀦𑀁 𑀅𑀧𑁆𑀧𑀳𑀸𑀬 𑀢𑀁 𑀧𑀕𑁆𑀕𑀬𑁆𑀳 𑀯𑀺𑀘𑀭𑀦𑁆𑀢𑁄 𑀓𑀸𑀫𑁂𑀦𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀫𑀸𑀦𑀁 𑀓𑀸𑀫𑁂𑀦𑁆𑀢𑀲𑁆𑀲 𑀇𑀘𑁆𑀙𑀦𑁆𑀢𑀲𑁆𑀲𑀸’’𑀢𑀺. 𑀤𑀫𑀢𑀺 𑀘𑀺𑀢𑁆𑀢𑀁 𑀏𑀢𑁂𑀦𑀸𑀢𑀺 𑀤𑀫𑁄, 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀺𑀓𑁄 𑀲𑀫𑀸𑀥𑀺𑀧𑀓𑁆𑀔𑀺𑀓𑁄 𑀤𑀫𑁄. 𑀫𑀦𑀘𑁆𑀙𑀝𑁆𑀞𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀤𑀫𑁂𑀢𑀻𑀢𑀺 𑀤𑀫𑁄, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄. 𑀓𑀺𑀮𑁂𑀲𑁂 𑀤𑀫𑁂𑀢𑀺 𑀧𑀚𑀳𑀢𑀻𑀢𑀺 𑀤𑀫𑁄, 𑀧𑀜𑁆𑀜𑀸. 𑀉𑀧𑀯𑀲𑀦𑀯𑀲𑁂𑀦 𑀓𑀸𑀬𑀓𑀫𑁆𑀫𑀸𑀤𑀺𑀁 𑀤𑀫𑁂𑀢𑀻𑀢𑀺 𑀤𑀫𑁄, 𑀉𑀧𑁄𑀲𑀣𑀓𑀫𑁆𑀫𑀁. 𑀓𑁄𑀥𑀽𑀧𑀦𑀸𑀳𑀫𑀓𑁆𑀔𑀫𑀸𑀦𑀸𑀤𑀺𑀓𑁂 ¶ 𑀤𑀫𑁂𑀢𑀺 𑀯𑀺𑀦𑁂𑀢𑀻𑀢𑀺 𑀤𑀫𑁄, 𑀅𑀥𑀺𑀯𑀸𑀲𑀦𑀔𑀦𑁆𑀢𑀺. 𑀢𑁂𑀦𑁂𑀯𑀸𑀢𑀺 ‘‘𑀤𑀫𑁄’’𑀢𑀺 𑀲𑀫𑀸𑀥𑀺𑀧𑀓𑁆𑀔𑀺𑀓𑀥𑀫𑁆𑀫𑀸𑀦𑀁 𑀏𑀯 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 ¶ . ‘‘𑀦 𑀫𑁄𑀦𑀁 𑀅𑀢𑁆𑀣𑀻’’𑀢𑀺 𑀘 𑀧𑀸𑀞𑁄. 𑀅𑀲𑀫𑀸𑀳𑀺𑀢𑀲𑁆𑀲𑀸𑀢𑀺 𑀲𑀫𑀸𑀥𑀺𑀧𑀝𑀺𑀓𑁆𑀔𑁂𑀧𑁄 𑀚𑁄𑀢𑀺𑀢𑁄.

𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲 𑀧𑀸𑀭𑀢𑀭𑀡𑀲𑁆𑀲 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 ‘‘𑀫𑁄𑀦𑀦𑁆𑀢𑀺 𑀘𑀢𑀼𑀫𑀕𑁆𑀕𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀢𑀢𑁄 𑀅𑀜𑁆𑀜𑁂𑀦 𑀢𑀁 𑀲𑀫𑁆𑀪𑀯𑀢𑀺. 𑀚𑀸𑀦𑀸𑀢𑀺 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑀯𑀲𑁂𑀦 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀫𑀘𑁆𑀘𑀼 𑀥𑀻𑀬𑀢𑀺 𑀏𑀢𑁆𑀣𑀸𑀢𑀺 𑀫𑀘𑁆𑀘𑀼𑀥𑁂𑀬𑁆𑀬𑀁, 𑀔𑀦𑁆𑀥𑀧𑀜𑁆𑀘𑀓𑀁 𑀫𑀭𑀡𑀥𑀫𑁆𑀫𑀢𑁆𑀢𑀸. 𑀢𑀲𑁆𑀲𑁂𑀯𑀸𑀢𑀺 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲𑁂𑀯. 𑀧𑀸𑀭𑀁 𑀧𑀭𑀢𑀻𑀭𑀪𑀽𑀢𑀁 𑀦𑀺𑀩𑁆𑀩𑀸𑀦𑀁. 𑀢𑀭𑁂𑀬𑁆𑀬𑀸𑀢𑀺 𑀏𑀢𑁆𑀣 𑀢𑀭𑀡𑀁 𑀦𑀸𑀫 𑀅𑀭𑀺𑀬𑀫𑀕𑁆𑀕𑀩𑁆𑀬𑀸𑀧𑀸𑀭𑁄𑀢𑀺 𑀆𑀳 ‘‘𑀧𑀝𑀺𑀯𑀺𑀚𑁆𑀛𑁂𑀬𑁆𑀬 𑀧𑀸𑀧𑀼𑀡𑁂𑀬𑁆𑀬𑀸’’𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀧𑀝𑀺𑀯𑁂𑀥𑀢𑀭𑀡𑀁 𑀦𑀸𑀫 𑀯𑀼𑀢𑁆𑀢’’𑀦𑁆𑀢𑀺. ‘‘𑀦 𑀢𑀭𑁂𑀬𑁆𑀬 𑀦 𑀧𑀝𑀺𑀯𑀺𑀚𑁆𑀛𑁂𑀬𑁆𑀬 𑀦 𑀧𑀸𑀧𑀼𑀡𑁂𑀬𑁆𑀬 𑀯𑀸’’𑀢𑀺 𑀅𑀬𑀫𑁂𑀢𑁆𑀣 𑀧𑀸𑀞𑁄 𑀬𑀼𑀢𑁆𑀢𑁄. 𑀅𑀜𑁆𑀜𑀣𑀸 ‘‘𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺𑀯𑀘𑀦𑀁 𑀯𑀺𑀭𑀼𑀚𑁆𑀛𑁂𑀬𑁆𑀬. 𑀏𑀓𑁄 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑁄𑀢𑀺 𑀏𑀓𑀸𑀓𑀻 𑀳𑀼𑀢𑁆𑀯𑀸 𑀅𑀭𑀜𑁆𑀜𑁂 𑀯𑀺𑀳𑀭𑀦𑁆𑀢𑁄𑀢𑀺 𑀅𑀢𑁆𑀣𑁄.

𑀓𑀸𑀫𑀁 𑀳𑁂𑀝𑁆𑀞𑀺𑀫𑀫𑀕𑁆𑀕𑁂𑀳𑀺𑀧𑀺 𑀏𑀓𑀘𑁆𑀘𑀲𑁆𑀲 𑀫𑀸𑀦𑀲𑁆𑀲 𑀧𑀳𑀸𑀦𑀁 𑀮𑀩𑁆𑀪𑀢𑀺. 𑀅𑀕𑁆𑀕𑀫𑀕𑁆𑀕𑁂𑀦𑁂𑀯 𑀧𑀦 𑀢𑀲𑁆𑀲 𑀅𑀦𑀯𑀲𑁂𑀲𑀢𑁄 𑀧𑀳𑀸𑀦𑀦𑁆𑀢𑀺 𑀆𑀳 𑁋 ‘‘𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀦𑀯𑀯𑀺𑀥𑀫𑀸𑀦𑀁 𑀧𑀚𑀳𑀺𑀢𑁆𑀯𑀸’’𑀢𑀺. 𑀉𑀧𑀘𑀸𑀭𑀲𑀫𑀸𑀥𑀺𑀧𑀼𑀩𑁆𑀩𑀓𑁄 𑀅𑀧𑁆𑀧𑀦𑀸𑀲𑀫𑀸𑀥𑀻𑀢𑀺 𑀯𑀼𑀢𑁆𑀢𑀁 ‘‘𑀉𑀧𑀘𑀸𑀭𑀧𑁆𑀧𑀦𑀸𑀲𑀫𑀸𑀥𑀻𑀳𑀻’’𑀢𑀺, 𑀦 𑀉𑀧𑀘𑀸𑀭𑀲𑀫𑀸𑀥𑀺𑀫𑀢𑁆𑀢𑁂𑀦 𑀲𑀫𑀸𑀥𑀺𑀫𑀢𑁆𑀢𑀁 𑀲𑀦𑁆𑀥𑀸𑀬 𑀧𑀘𑁆𑀘𑁂𑀓𑀁 𑀯𑀸𑀓𑁆𑀬𑀧𑀭𑀺𑀲𑀫𑀸𑀧𑀦𑀲𑁆𑀲 𑀅𑀬𑀼𑀚𑁆𑀚𑀦𑀢𑁄. 𑀦 𑀳𑀺 𑀅𑀧𑁆𑀧𑀦𑀁 𑀅𑀧𑁆𑀧𑀢𑁆𑀢𑀁 𑀮𑁄𑀓𑀼𑀢𑁆𑀢𑀭𑀚𑁆𑀛𑀸𑀦𑀁 𑀅𑀢𑁆𑀣𑀺. ‘‘𑀲𑀼𑀘𑁂𑀢𑀲𑁄’’𑀢𑀺 𑀘𑀺𑀢𑁆𑀢𑀲𑁆𑀲 𑀜𑀸𑀡𑀲𑀳𑀺𑀢𑀢𑀸𑀬 𑀮𑀓𑁆𑀔𑀡𑀯𑀘𑀦𑀦𑁆𑀢𑀺 𑀆𑀳 ‘‘𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀢𑀸𑀬𑀸’’𑀢𑀺𑀆𑀤𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀲𑀼𑀘𑁂𑀢𑀲𑁄𑀢𑀺 𑀏𑀢𑁆𑀣 𑀘𑀺𑀢𑁆𑀢𑁂𑀦 𑀧𑀜𑁆𑀜𑀸 𑀤𑀲𑁆𑀲𑀺𑀢𑀸’’𑀢𑀺. ‘‘𑀲𑀩𑁆𑀩𑀥𑀺 𑀯𑀺𑀧𑁆𑀧𑀫𑀼𑀢𑁆𑀢𑁄’’𑀢𑀺 𑀲𑀩𑁆𑀩𑁂𑀲𑀼 𑀪𑀯𑀸𑀤𑀻𑀲𑀼 𑀯𑀺𑀲𑀁𑀲𑀝𑁆𑀞𑀘𑀺𑀢𑁆𑀢𑁄 𑀲𑀩𑁆𑀩𑀲𑁄 𑀔𑀦𑁆𑀥𑀸𑀤𑀻𑀳𑀺 𑀯𑀺𑀲𑀁𑀬𑀼𑀢𑁆𑀢𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀩𑁆𑀩𑁂𑀲𑀼 𑀔𑀦𑁆𑀥𑀸𑀬𑀢𑀦𑀸𑀤𑀻𑀲𑀼 𑀯𑀺𑀧𑁆𑀧𑀫𑀼𑀢𑁆𑀢𑁄 𑀳𑀼𑀢𑁆𑀯𑀸’’𑀢𑀺. 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑁄 𑀲𑀘𑁆𑀙𑀺𑀓𑀺𑀭𑀺𑀬𑀧𑀝𑀺𑀯𑁂𑀥𑁂𑀦 𑀯𑀺𑀦𑀸 𑀦𑀢𑁆𑀣𑀻𑀢𑀺 𑀆𑀳 ‘‘𑀢𑁂𑀪𑀽𑀫𑀓…𑀧𑁂… 𑀯𑀼𑀢𑁆𑀢’’𑀦𑁆𑀢𑀺.

𑀫𑀸𑀦𑀁 𑀦𑀺𑀲𑁆𑀲𑀸𑀬 𑀤𑀼𑀘𑁆𑀘𑀭𑀺𑀢𑀘𑀭𑀡𑀢𑁄 𑀫𑀸𑀦𑁄 𑀦𑀸𑀫𑀸𑀬𑀁 𑀲𑀻𑀮𑀪𑁂𑀤𑀦𑁄. 𑀢𑀲𑁆𑀫𑀸𑀢𑀺 𑀫𑀸𑀦𑀲𑁆𑀲 𑀲𑀻𑀮𑀧𑀝𑀺𑀧𑀓𑁆𑀔𑀪𑀸𑀯𑀢𑁄. 𑀇𑀫𑀺𑀦𑀸 𑀧𑀝𑀺𑀧𑀓𑁆𑀔𑀧𑁆𑀧𑀳𑀸𑀦𑀓𑀺𑀢𑁆𑀢𑀦𑁂𑀦. 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸 𑀓𑀣𑀺𑀢𑀸 𑀲𑀭𑀽𑀧𑀢𑁄 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁆𑀣 𑀘𑀺𑀢𑁆𑀢𑁂𑀦𑀸𑀢𑀺 𑀲𑀼-𑀲𑀤𑁆𑀤𑁂𑀦 𑀯𑀺𑀲𑁂𑀲𑀺𑀢𑀘𑀺𑀢𑁆𑀢𑁂𑀦. 𑀢𑀲𑁆𑀫𑀸𑀢𑀺 𑀧𑀜𑁆𑀜𑀸𑀬 𑀤𑀲𑁆𑀲𑀺𑀢𑀢𑁆𑀢𑀸. 𑀇𑀫𑀺𑀦𑀸𑀢𑀺 ‘‘𑀲𑀼𑀘𑁂𑀢𑀲𑁄’’𑀢𑀺 𑀇𑀫𑀺𑀦𑀸 𑀧𑀤𑁂𑀦. 𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀢𑀺 𑀲𑀻𑀮𑀸𑀤𑀻𑀦𑀺𑀧𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀺. 𑀲𑀫𑁆𑀪𑀯𑁂 𑀩𑁆𑀬𑀪𑀺𑀘𑀸𑀭𑁂 𑀘 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀢𑀸𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀥𑀺𑀲𑀻𑀮𑀜𑁆𑀘 𑀦𑀸𑀫 𑀲𑀻𑀮𑁂 𑀲𑀢𑀺 𑀳𑁄𑀢𑀻’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀢𑀤𑀼𑀪𑀬𑀁 ¶ 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀞𑀫𑀦𑀬𑁄 𑀲𑀗𑁆𑀓𑀭𑀯𑀲𑁂𑀦 𑀧𑀯𑀢𑁆𑀢𑁄𑀢𑀺 𑀅𑀲𑀗𑁆𑀓𑀭𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀦𑀸 ¶ 𑀤𑀼𑀢𑀺𑀬𑀦𑀬𑁄 𑀯𑀼𑀢𑁆𑀢𑁄. ‘‘𑀲𑀫𑀸𑀧𑀦𑁆𑀦𑀸’’𑀢𑀺 𑀏𑀢𑁆𑀣𑀸𑀧𑀺 ‘‘𑀦𑀺𑀩𑁆𑀩𑀸𑀦𑀁 𑀧𑀢𑁆𑀣𑀬𑀦𑁆𑀢𑁂𑀦𑀸’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀯𑀺𑀧𑀲𑁆𑀲𑀦𑀸𑀬 𑀧𑀸𑀤𑀓𑀪𑀸𑀯𑀁 𑀅𑀦𑀼𑀧𑀕𑀢𑀸𑀧𑀺 𑀢𑀤𑀢𑁆𑀣𑀁 𑀦𑀺𑀩𑁆𑀩𑀢𑁆𑀢𑀦𑀸𑀤𑀺𑀯𑀲𑁂𑀦 𑀲𑀫𑀸𑀧𑀦𑁆𑀦𑀸𑀢𑀺 𑀅𑀬𑀫𑀢𑁆𑀣𑁄 𑀧𑀼𑀭𑀺𑀫𑀦𑀬𑀢𑁄 𑀯𑀺𑀲𑁂𑀲𑁄. 𑀅𑀥𑀺𑀧𑀜𑁆𑀜𑀸𑀬 𑀧𑀦𑁂𑀢𑁆𑀣 𑀧𑀼𑀭𑀺𑀫𑀦𑀬𑀢𑁄 𑀯𑀺𑀲𑁂𑀲𑁄 𑀦𑀢𑁆𑀣𑀻𑀢𑀺 𑀲𑀸 𑀅𑀦𑀼𑀤𑁆𑀥𑀝𑀸. 𑀲𑀫𑁄𑀥𑀸𑀦𑁂𑀢𑁆𑀯𑀸𑀢𑀺 𑀧𑀭𑀺𑀬𑀸𑀬𑀢𑁄 𑀲𑀭𑀽𑀧𑀢𑁄 𑀘 𑀲𑀗𑁆𑀕𑀳𑁂𑀢𑁆𑀯𑀸. 𑀲𑀓𑀮𑀲𑀸𑀲𑀦𑀦𑁆𑀢𑀺 𑀢𑀺𑀲𑁆𑀲𑀦𑁆𑀦𑀁 𑀓𑀣𑀺𑀢𑀢𑁆𑀢𑀸 𑀏𑀯 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀲𑀓𑀮𑀲𑀸𑀲𑀦𑀁 𑀓𑀣𑀺𑀢𑀁 𑀳𑁄𑀢𑀻𑀢𑀺.

𑀫𑀸𑀦𑀓𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀅𑀭𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦. 𑀲𑀦𑁆𑀢𑀓𑀺𑀮𑁂𑀲𑀸𑀦𑀦𑁆𑀢𑀺 𑀯𑀽𑀧𑀲𑀦𑁆𑀢𑀓𑀺𑀮𑁂𑀲𑀧𑀭𑀺𑀴𑀸𑀳𑀸𑀦𑀁. 𑀬𑀲𑁆𑀫𑀸 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀪𑀯𑀁 𑀢𑀢𑁄 𑀏𑀯 𑀪𑀬𑀲𑀦𑁆𑀢𑀜𑁆𑀘 𑀉𑀧𑀸𑀤𑀸𑀬 𑀧𑀡𑁆𑀟𑀺𑀢𑀸 ‘‘𑀲𑀦𑁆𑀢𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀡𑁆𑀟𑀺𑀢𑀸𑀦𑀁 𑀯𑀸’’𑀢𑀺. 𑀢𑁂𑀦𑀸𑀳 ‘‘𑀲𑀦𑁆𑀢𑁄 𑀳𑀯𑁂’’𑀢𑀺𑀆𑀤𑀺. 𑀲𑁂𑀝𑁆𑀞𑀘𑀸𑀭𑀻𑀦𑀦𑁆𑀢𑀺 𑀲𑁂𑀝𑁆𑀞𑀘𑀭𑀺𑀬𑀁 𑀘𑀭𑀦𑁆𑀢𑀸𑀦𑀁. 𑀬𑀲𑁆𑀫𑀸 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀼 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀯𑀲𑀢𑀺 𑀦𑀸𑀫, 𑀢𑀲𑁆𑀫𑀸 𑀆𑀳 ‘‘𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀯𑀲𑀦𑁆𑀢𑀸𑀦’’𑀦𑁆𑀢𑀺. 𑀅𑀭𑀺𑀬𑀸𑀦𑀁 𑀧𑀦 𑀫𑀼𑀔𑀯𑀡𑁆𑀡𑀲𑁆𑀲 𑀧𑀲𑀻𑀤𑀦𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀧𑀸𑀭𑀺𑀳𑀸𑀭𑀺𑀬𑀓𑀫𑁆𑀫𑀝𑁆𑀞𑀸𑀦𑀁. 𑀯𑀺𑀲𑀪𑀸𑀕𑀲𑀦𑁆𑀢𑀢𑀻𑀢𑀺 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀘𑀺𑀢𑁆𑀢𑀲𑀦𑁆𑀢𑀢𑀺. 𑀲𑀸 𑀳𑀺 𑀯𑀺𑀓𑁆𑀔𑁂𑀧𑀩𑁆𑀬𑀸𑀓𑀼𑀮𑀢𑀸𑀬 𑀅𑀧𑁆𑀧𑀲𑀦𑁆𑀦𑀸 𑀲𑀫𑀸𑀳𑀺𑀢𑀘𑀺𑀢𑁆𑀢𑀲𑀦𑁆𑀢𑀢𑀺𑀬𑀸 𑀯𑀺𑀲𑀪𑀸𑀕𑀲𑀦𑁆𑀢𑀢𑀺. 𑀑𑀓𑁆𑀓𑀫𑀢𑀻𑀢𑀺 𑀲𑀫𑀸𑀥𑀺𑀲𑀪𑀸𑀕𑀸 𑀘𑀺𑀢𑁆𑀢𑀲𑀦𑁆𑀢𑀢𑀺 𑀲𑀫𑀣𑀯𑀻𑀣𑀺𑀁 𑀅𑀦𑀼𑀧𑀯𑀺𑀲𑀢𑀺. 𑀘𑀺𑀢𑁆𑀢𑀁 𑀧𑀲𑀻𑀤𑀢𑀻𑀢𑀺 𑀓𑀫𑁆𑀫𑀝𑁆𑀞𑀸𑀦𑀦𑀺𑀭𑀢𑀁 𑀪𑀸𑀯𑀦𑀸𑀘𑀺𑀢𑁆𑀢𑀁 𑀲𑀦𑁆𑀥𑀸𑀬𑀸𑀳, 𑀢𑀁 𑀧𑀲𑀦𑁆𑀦𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀮𑁄𑀳𑀺𑀢𑀁 𑀧𑀲𑀻𑀤𑀢𑀻𑀢𑀺 𑀘𑀺𑀢𑁆𑀢𑀓𑀸𑀮𑀼𑀲𑁆𑀲𑀺𑀬𑀲𑁆𑀲𑀸𑀪𑀸𑀯𑀢𑁄 𑀮𑁄𑀳𑀺𑀢𑀁 𑀅𑀦𑀸𑀯𑀺𑀮𑀁 𑀳𑁄𑀢𑀺. 𑀧𑀭𑀺𑀲𑀼𑀤𑁆𑀥𑀸𑀦𑀺 𑀳𑁄𑀦𑁆𑀢𑀺 𑀓𑀸𑀭𑀡𑀲𑁆𑀲 𑀧𑀭𑀺𑀲𑀼𑀤𑁆𑀥𑀪𑀸𑀯𑀢𑁄. 𑀢𑀸𑀮𑀨𑀮𑀫𑀼𑀔𑀲𑁆𑀲 𑀯𑀺𑀬 𑀫𑀼𑀔𑀲𑁆𑀲 𑀯𑀡𑁆𑀡𑁄 𑀳𑁄𑀢𑀻𑀢𑀺 𑀫𑀼𑀔-𑀲𑀤𑁆𑀤𑀲𑁆𑀲 𑀆𑀤𑀺𑀫𑁆𑀳𑀺 𑀧𑀫𑀼𑀢𑁆𑀢𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀘𑀲𑁆𑀲 𑀧𑀫𑀼𑀢𑁆𑀢𑀕𑁆𑀕𑀳𑀡𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺 𑀢𑀸𑀮𑀨𑀮𑀫𑀼𑀔𑀲𑁆𑀲 𑀯𑀡𑁆𑀡𑀲𑀫𑁆𑀧𑀤𑀸𑀲𑀤𑀺𑀲𑀢𑁆𑀢𑀸. 𑀢𑀺𑀪𑀽𑀫𑀓𑁄 𑀏𑀯 𑀢𑁂𑀪𑀽𑀫𑀓𑁄.

𑀅𑀢𑀻𑀢𑀁 𑀦𑀸𑀦𑀼𑀲𑁄𑀘𑀦𑁆𑀢𑀺 𑀅𑀢𑀻𑀢𑀁 𑀧𑀘𑁆𑀘𑀬𑀮𑀸𑀪𑀁 𑀮𑀓𑁆𑀔𑀡𑀁 𑀓𑀢𑁆𑀯𑀸 𑀦 𑀲𑁄𑀘𑀦𑁆𑀢𑀺 𑀦 𑀅𑀦𑀼𑀢𑁆𑀣𑀼𑀦𑀦𑁆𑀢𑀺. 𑀚𑀧𑁆𑀧𑀦𑀢𑀡𑁆𑀳𑀸𑀬 𑀯𑀲𑁂𑀦 𑀦 𑀧𑀭𑀺𑀓𑀧𑁆𑀧𑀦𑁆𑀢𑀻𑀢𑀺 𑀆𑀳 ‘‘𑀦 𑀧𑀢𑁆𑀣𑁂𑀦𑁆𑀢𑀻’’𑀢𑀺 ¶ . 𑀬𑁂𑀦 𑀓𑁂𑀦𑀘𑀻𑀢𑀺 𑀇𑀢𑀭𑀻𑀢𑀭𑁂𑀦. 𑀢𑀗𑁆𑀔𑀡𑁂 𑀮𑀤𑁆𑀥𑁂𑀦𑀸𑀢𑀺 𑀲𑀦𑁆𑀦𑀺𑀥𑀺𑀓𑀸𑀭𑀧𑀭𑀺𑀪𑁄𑀕𑀸𑀪𑀸𑀯𑀫𑀸𑀳. 𑀢𑀺𑀯𑀺𑀥𑁂𑀦𑀧𑀺 𑀓𑀸𑀭𑀡𑁂𑀦𑀸𑀢𑀺 𑀢𑀺𑀧𑁆𑀧𑀓𑀸𑀭𑁂𑀦 𑀳𑁂𑀢𑀼𑀦𑀸, 𑀢𑀺𑀮𑀓𑁆𑀔𑀡𑀲𑀦𑁆𑀢𑁄𑀲𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀯𑀺𑀦𑀸𑀲𑀦𑁆𑀢𑀺 𑀯𑀺𑀦𑀸𑀲𑀦𑀳𑁂𑀢𑀼𑀁. 𑀯𑀺𑀦𑀲𑁆𑀲𑀦𑁆𑀢𑀺 𑀏𑀢𑁂𑀳𑀻𑀢𑀺 𑀯𑀺𑀦𑀸𑀲𑁄, 𑀮𑁄𑀪𑀤𑁄𑀲𑀸 𑀢𑀤𑁂𑀓𑀝𑁆𑀞𑀸 𑀘 𑀧𑀸𑀧𑀥𑀫𑁆𑀫𑀸 ¶ . 𑀅𑀭𑀽𑀧𑀓𑀸𑀬𑀲𑁆𑀲 𑀯𑀺𑀬 𑀭𑀽𑀧𑀓𑀸𑀬𑀲𑁆𑀲𑀧𑀺 𑀯𑀺𑀲𑁂𑀲𑀢𑁄 𑀲𑀼𑀓𑁆𑀔𑀪𑀸𑀯𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀏𑀢𑁂𑀦 𑀓𑀸𑀭𑀡𑀤𑁆𑀯𑀬𑁂𑀦𑀸’’𑀢𑀺. 𑀮𑀼𑀢𑁄𑀢𑀺 𑀮𑀽𑀦𑁄.

𑀅𑀭𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀴𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀦𑀦𑁆𑀤𑀦𑀯𑀕𑁆𑀕𑁄

𑁧. 𑀦𑀦𑁆𑀤𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧. ‘‘𑀢𑀢𑁆𑀭 𑀪𑀕𑀯𑀸’’𑀢𑀺 𑀯𑀼𑀢𑁆𑀢𑁂 𑀦 𑀢𑀣𑀸 𑀩𑁆𑀬𑀜𑁆𑀚𑀦𑀸𑀦𑀁 𑀲𑀺𑀮𑀺𑀝𑁆𑀞𑀢𑀸, 𑀬𑀣𑀸 ‘‘𑀢𑀢𑁆𑀭 𑀔𑁄 𑀪𑀕𑀯𑀸’’𑀢𑀺 𑀯𑀼𑀢𑁆𑀢𑁂𑀢𑀺 𑀆𑀳 ‘‘𑀩𑁆𑀬𑀜𑁆𑀚𑀦𑀲𑀺𑀮𑀺𑀝𑁆𑀞𑀢𑀸𑀯𑀲𑁂𑀦𑀸’’𑀢𑀺. 𑀧𑀭𑀺𑀲𑀚𑁂𑀝𑁆𑀞𑀓𑁂𑀢𑀺 𑀧𑀭𑀺𑀲𑀸𑀬 𑀚𑁂𑀝𑁆𑀞𑀓𑁂, 𑀬𑁂 𑀢𑀲𑁆𑀲𑀸 𑀤𑁂𑀲𑀦𑀸𑀬 𑀯𑀺𑀲𑁂𑀲𑀢𑁄 𑀪𑀸𑀚𑀦𑀪𑀽𑀢𑀸. 𑀧𑀭𑀺𑀲𑀚𑁂𑀝𑁆𑀞𑀓𑁂 𑀪𑀺𑀓𑁆𑀔𑀽𑀢𑀺 𑀘𑀢𑀼𑀧𑀭𑀺𑀲𑀚𑁂𑀝𑁆𑀞𑀓𑁂 𑀪𑀺𑀓𑁆𑀔𑀽. 𑀘𑀢𑀼𑀦𑁆𑀦𑀁 𑀳𑀺 𑀧𑀭𑀺𑀲𑀸𑀦𑀁 𑀚𑁂𑀝𑁆𑀞𑀸 𑀪𑀺𑀓𑁆𑀔𑀼𑀧𑀭𑀺𑀲𑀸 𑀧𑀞𑀫𑀼𑀧𑁆𑀧𑀦𑁆𑀦𑀢𑁆𑀢𑀸. 𑀆𑀫𑀦𑁆𑀢𑁂𑀲𑀻𑀢𑀺 𑀲𑀫𑁆𑀩𑁄𑀥𑁂𑀲𑀺, 𑀲𑀫𑁆𑀩𑁄𑀥𑀦𑀜𑁆𑀘 𑀚𑀸𑀦𑀸𑀧𑀦𑀦𑁆𑀢𑀺 𑀆𑀳 ‘‘𑀚𑀸𑀦𑀸𑀧𑁂𑀲𑀻’’𑀢𑀺. 𑀪𑀤𑀦𑁆𑀢𑁂𑀢𑀺 𑀕𑀭𑀼𑀕𑀸𑀭𑀯𑀲𑀧𑁆𑀧𑀢𑀺𑀲𑁆𑀲𑀯𑀯𑀘𑀦𑀫𑁂𑀢𑀁, 𑀅𑀢𑁆𑀣𑀢𑁄 𑀧𑀦 𑀪𑀤𑀦𑁆𑀢𑁂𑀢𑀺 𑀪𑀤𑁆𑀤𑀁 𑀢𑀯 𑀳𑁄𑀢𑀼 𑀅𑀢𑁆𑀢𑀦𑁄 𑀦𑀺𑀝𑁆𑀞𑀸𑀦𑀧𑀭𑀺𑀬𑁄𑀲𑀸𑀦𑀢𑁆𑀢𑀸 𑀧𑀭𑁂𑀲𑀜𑁆𑀘 𑀲𑀦𑁆𑀢𑀢𑀸𑀯𑀳𑀢𑁆𑀢𑀸. 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀦𑁆𑀢𑀺 𑀏𑀢𑁆𑀣 𑀪𑀕𑀯𑀢𑁄𑀢𑀺 𑀲𑀸𑀫𑀺𑀯𑀘𑀦𑀁 𑀆𑀫𑀦𑁆𑀢𑀦𑀫𑁂𑀯 𑀲𑀫𑁆𑀩𑀦𑁆𑀥𑀺𑀅𑀢𑁆𑀣𑀧𑀤𑀁 𑀅𑀧𑁂𑀓𑁆𑀔𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀪𑀕𑀯𑀢𑁄 𑀯𑀘𑀦𑀁 𑀧𑀢𑀺𑀅𑀲𑁆𑀲𑁄𑀲𑀼’’𑀦𑁆𑀢𑀺. 𑀪𑀕𑀯𑀢𑁄𑀢𑀺 𑀧𑀦 𑀇𑀤𑀁 𑀧𑀢𑀺𑀲𑁆𑀲𑀯𑀦𑀲𑀫𑁆𑀩𑀦𑁆𑀥𑁂𑀦 𑀲𑀫𑁆𑀧𑀤𑀸𑀦𑀯𑀘𑀦𑀁 𑀬𑀣𑀸 ‘‘𑀤𑁂𑀯𑀤𑀢𑁆𑀢𑀲𑁆𑀲 𑀧𑀝𑀺𑀲𑁆𑀲𑀼𑀡𑀸𑀢𑀻’’𑀢𑀺. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀦𑀺𑀤𑀸𑀦𑀯𑀕𑁆𑀕𑀲𑁆𑀲 𑀆𑀤𑀺𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀆𑀕𑀫𑀺𑀲𑁆𑀲𑀢𑀺.

𑀢𑀸𑀯𑀢𑀺𑀁𑀲𑀓𑀸𑀬𑁄𑀢𑀺 𑀢𑀸𑀯𑀢𑀺𑀁𑀲𑀲𑀜𑁆𑀜𑀺𑀢𑁄 𑀤𑁂𑀯𑀦𑀺𑀓𑀸𑀬𑁄. 𑀤𑀼𑀢𑀺𑀬𑀤𑁂𑀯𑀮𑁄𑀓𑁄𑀢𑀺 𑀙𑀲𑀼 𑀓𑀸𑀫𑀮𑁄𑀓𑁂𑀲𑀼 𑀤𑀼𑀢𑀺𑀬𑁄 𑀤𑁂𑀯𑀮𑁄𑀓𑁄. 𑀢𑁂𑀢𑁆𑀢𑀺𑀁𑀲 𑀚𑀦𑀸 𑀲𑀳𑀧𑀼𑀜𑁆𑀜𑀓𑀸𑀭𑀺𑀦𑁄 𑀢𑀢𑁆𑀣 𑀉𑀧𑁆𑀧𑀦𑁆𑀦𑀸, 𑀢𑀁𑀲𑀳𑀘𑀭𑀺𑀢𑀝𑁆𑀞𑀸𑀦𑀁 𑀢𑀸𑀯𑀢𑀺𑀁𑀲𑀁 ¶ , 𑀢𑀦𑁆𑀦𑀺𑀯𑀸𑀲𑀺𑀦𑁄𑀧𑀺 𑀢𑀸𑀯𑀢𑀺𑀁𑀲𑀦𑀸𑀫𑀓𑀸 𑀲𑀳𑀘𑀭𑀡𑀜𑀸𑀬𑁂𑀦𑀸𑀢𑀺 𑀆𑀳 ‘‘𑀫𑀖𑁂𑀦 𑀫𑀸𑀡𑀯𑁂𑀦𑀸’’𑀢𑀺𑀆𑀤𑀺. 𑀅𑀬𑀁 𑀧𑀦 𑀓𑁂𑀘𑀺𑀯𑀸𑀤𑁄 𑀩𑁆𑀬𑀸𑀧𑀦𑁆𑀦𑁄 𑀳𑁄𑀢𑀻𑀢𑀺 𑀢𑀁 𑀅𑀭𑁄𑀘𑁂𑀦𑁆𑀢𑁂𑀦 ‘‘𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀩𑁆𑀬𑀸𑀧𑀦𑁆𑀦𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀏𑀯𑀁 𑀳𑀺 𑀦𑀺𑀤𑁆𑀤𑁄𑀲𑀁 𑀧𑀤𑀁 𑀳𑁄𑀢𑀻’’𑀢𑀺. 𑀦𑀸𑀫𑀧𑀡𑁆𑀡𑀢𑁆𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑀦𑀺𑀭𑀧𑁂𑀓𑁆𑀔𑀢𑁆𑀢𑀸 𑀦𑀺𑀭𑀼𑀴𑁆𑀳𑀲𑀫𑀜𑁆𑀜𑀸 𑀏𑀯.

𑀢𑀁 𑀯𑀦𑀦𑁆𑀢𑀺 𑀢𑀁 𑀉𑀧𑀯𑀦𑀁. 𑀧𑀯𑀺𑀝𑁆𑀞𑁂 𑀧𑀯𑀺𑀝𑁆𑀞𑁂 𑀤𑀼𑀓𑁆𑀔𑀧𑁆𑀧𑀢𑁆𑀢𑁂𑀧𑀺 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀬𑀸 𑀦𑀦𑁆𑀤𑀬𑀢𑀺, 𑀧𑀕𑁂𑀯 ¶ 𑀅𑀤𑀼𑀓𑁆𑀔𑀧𑁆𑀧𑀢𑁆𑀢𑁂𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀘𑀲𑀼 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀯𑁂𑀲𑀺𑀢𑀸𑀦𑀦𑁆𑀢𑀺 𑀧𑀓𑁄𑀝𑁆𑀞𑀯𑀸𑀭𑁂𑀦 𑀧𑀯𑁂𑀲𑀺𑀢𑀸𑀦𑀫𑁆𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀯𑀦𑀓𑀸𑀮𑁂𑀬𑁂𑀯 𑀣𑁄𑀓𑀁 𑀤𑀺𑀲𑁆𑀲𑀫𑀸𑀦𑀯𑀺𑀓𑀸𑀭𑀸 𑀳𑀼𑀢𑁆𑀯𑀸 𑀘𑀯𑀦𑁆𑀢𑀺, 𑀢𑁂 𑀲𑀦𑁆𑀥𑀸𑀬 ‘‘𑀳𑀺𑀫𑀧𑀺𑀡𑁆𑀟𑁄 𑀯𑀺𑀬 𑀯𑀺𑀮𑀻𑀬𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑁂 𑀧𑀦 𑀅𑀤𑀺𑀲𑁆𑀲𑀫𑀸𑀦𑀯𑀺𑀓𑀸𑀭𑀸 𑀲𑀳𑀲𑀸 𑀅𑀦𑁆𑀢𑀭𑀥𑀸𑀬𑀦𑁆𑀢𑀺, 𑀢𑁂 𑀲𑀦𑁆𑀥𑀸𑀬 ‘‘𑀤𑀻𑀧𑀲𑀺𑀔𑀸 𑀯𑀺𑀬 𑀯𑀺𑀚𑁆𑀛𑀸𑀬𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀦𑀦𑁆𑀤𑀬𑀢𑀺 𑀧𑀓𑀢𑀺𑀬𑀸 𑀲𑁄𑀫𑀦𑀲𑁆𑀲𑀺𑀢𑀁 𑀤𑁄𑀫𑀦𑀲𑁆𑀲𑀺𑀢𑀜𑁆𑀘. 𑀦𑀦𑁆𑀤𑀦𑁂𑀢𑀺 𑀏𑀯𑀁𑀅𑀦𑁆𑀯𑀢𑁆𑀣𑀦𑀸𑀫𑀓𑁂 𑀉𑀬𑁆𑀬𑀸𑀦𑁂. 𑀧𑀭𑀺𑀯𑀼𑀢𑀸𑀢𑀺 ‘‘𑀤𑁂𑀯𑀢𑀸’’𑀢𑀺 𑀯𑀘𑀦𑀁 𑀉𑀧𑀸𑀤𑀸𑀬 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀁. 𑀤𑁂𑀯𑀧𑀼𑀢𑁆𑀢𑁄 𑀳𑀺 𑀲𑁄.

𑀤𑀺𑀯𑀺 𑀪𑀯𑀢𑁆𑀢𑀸 𑀤𑀺𑀩𑁆𑀩𑀸𑀢𑀺 𑀆𑀳 ‘‘𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁂𑀳𑀻’’𑀢𑀺. 𑀓𑀸𑀫𑁂𑀢𑀩𑁆𑀩𑀢𑀸𑀬 𑀓𑀸𑀫𑀩𑀦𑁆𑀥𑀦𑁂𑀳𑀺, 𑀢𑀣𑀸 𑀅𑀜𑁆𑀜𑀫𑀜𑁆𑀜𑀁 𑀅𑀲𑀁𑀓𑀺𑀡𑁆𑀡𑀲𑀪𑀸𑀯𑀢𑀸𑀬 𑀓𑀸𑀫𑀓𑁄𑀝𑁆𑀞𑀸𑀲𑁂𑀳𑀺. 𑀉𑀧𑁂𑀢𑀸𑀢𑀺 𑀉𑀧𑀕𑀢𑀸 𑀲𑀫𑀦𑁆𑀦𑀸𑀕𑀢𑀸. 𑀧𑀭𑀺𑀘𑀸𑀭𑀬𑀫𑀸𑀦𑀸𑀢𑀺 𑀧𑀭𑀺𑀭𑀫𑀫𑀸𑀦𑀸. 𑀇𑀤𑀜𑁆𑀳𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀓𑀸𑀫𑀕𑀼𑀡𑁂𑀳𑀻’’𑀢𑀺 𑀓𑀢𑁆𑀢𑀭𑀺 𑀓𑀭𑀡𑀯𑀘𑀦𑀁, 𑀧𑀼𑀭𑀺𑀫𑀸𑀦𑀺 𑀅𑀧𑁂𑀓𑁆𑀔𑀺𑀢𑁆𑀯𑀸 𑀲𑀳𑀬𑁄𑀕𑁂. 𑀭𑀫𑀫𑀸𑀦𑀸 𑀘𑀭𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀭𑀫𑀫𑀸𑀦𑀸’’𑀢𑀺. 𑀧𑀭𑀺𑀘𑀸𑀭𑀬𑀫𑀸𑀦𑀸𑀢𑀺 𑀯𑀸 𑀧𑀭𑀺𑀢𑁄 𑀲𑀫𑀦𑁆𑀢𑀢𑁄 𑀘𑀸𑀭𑀬𑀫𑀸𑀦𑀸𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀜𑁆𑀘𑀸𑀭𑀬𑀫𑀸𑀦𑀸’’𑀢𑀺. 𑀧𑀞𑀫𑀦𑀬𑁂 𑀳𑀺 𑀅𑀦𑀼𑀪𑀯𑀦𑀢𑁆𑀣𑁄 𑀧𑀭𑀺𑀘𑀭𑀡𑀲𑀤𑁆𑀤𑁄, 𑀤𑀼𑀢𑀺𑀬𑀦𑀬𑁂 𑀧𑀭𑀺𑀯𑀢𑁆𑀢𑀦𑀢𑁆𑀣𑁄. 𑀲𑁄 𑀧𑀦𑀸𑀢𑀺 ‘‘𑀢𑀸𑀬𑀁 𑀯𑁂𑀮𑀸𑀬’’𑀦𑁆𑀢𑀺 𑀯𑀼𑀢𑁆𑀢𑀓𑀸𑀮𑁄. 𑀅𑀥𑀼𑀦𑀸𑀢𑀺 𑀲𑀫𑁆𑀧𑀢𑀺. 𑀲𑁄 𑀯𑀺𑀘𑀭𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀓𑀸𑀫𑀕𑀼𑀡𑁂𑀳𑀻𑀢𑀺 𑀳𑁂𑀢𑀼𑀫𑁆𑀳𑀺 𑀓𑀭𑀡𑀯𑀘𑀦𑀁. 𑀑𑀯𑀼𑀢𑁄𑀢𑀺 𑀬𑀣𑀸 𑀢𑀁 𑀦 𑀜𑀸𑀬𑀢𑀺, 𑀏𑀯𑀁 𑀧𑀺𑀳𑀺𑀢𑀘𑀺𑀢𑁆𑀢𑁄. 𑀦𑀺𑀯𑀼𑀢𑁄 𑀧𑀭𑀺𑀬𑁄𑀦𑀤𑁆𑀥𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀢𑁂𑀦𑀸𑀳 ‘‘𑀮𑁄𑀓𑀸𑀪𑀺𑀪𑀽𑀢𑁄’’𑀢𑀺. 𑀆𑀲𑀪𑀺𑀦𑁆𑀢𑀺 𑀲𑁂𑀝𑁆𑀞𑀁 ‘‘𑀅𑀕𑁆𑀕𑁄𑀳𑀫𑀲𑁆𑀫𑀺 𑀮𑁄𑀓𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁩𑁧; 𑀫. 𑀦𑀺. 𑁩.𑁨𑁦𑁭) 𑀪𑀸𑀲𑀦𑁆𑀢𑁄 𑀩𑁄𑀥𑀺𑀲𑀢𑁆𑀢𑁄 𑀯𑀺𑀬.

𑀓𑁂𑀯𑀮𑀁 ¶ 𑀤𑀲𑁆𑀲𑀦𑀁 𑀓𑀺𑀫𑀢𑁆𑀣𑀺𑀬𑀦𑁆𑀢𑀺 𑀆𑀳 𑁋 ‘‘𑀬𑁂…𑀧𑁂… 𑀯𑀲𑁂𑀦𑀸’’𑀢𑀺, 𑀢𑀲𑁆𑀫𑀺𑀁 𑀦𑀦𑁆𑀤𑀦𑀯𑀦𑁂 𑀅𑀯𑀝𑁆𑀞𑀺𑀢𑀓𑀸𑀫𑀪𑀸𑀕𑀸𑀦𑀼𑀪𑀯𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀦𑀭𑀤𑁂𑀯𑀸𑀦𑀦𑁆𑀢𑀺 𑀧𑀼𑀭𑀺𑀲𑀪𑀽𑀢𑀤𑁂𑀯𑀢𑀸𑀦𑀁. 𑀢𑁂𑀦𑀸𑀳 ‘‘𑀤𑁂𑀯𑀧𑀼𑀭𑀺𑀲𑀸𑀦’’𑀦𑁆𑀢𑀺. 𑀅𑀧𑁆𑀧𑀓𑀁 𑀅𑀥𑀺𑀓𑀁 𑀊𑀦𑀁 𑀯𑀸 𑀕𑀡𑀦𑀽𑀧𑀕𑀁 𑀦𑀸𑀫 𑀦 𑀳𑁄𑀢𑀻𑀢𑀺 ‘‘𑀢𑀺𑀓𑁆𑀔𑀢𑁆𑀢𑀼𑀁 𑀤𑀲𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀢𑁂𑀢𑁆𑀢𑀺𑀁𑀲𑀸𑀦’’𑀦𑁆𑀢𑀺 𑀳𑀺 𑀯𑀢𑁆𑀢𑀩𑁆𑀩𑁂 𑀅𑀬𑀁 𑀭𑀼𑀴𑁆𑀳𑀻. 𑀧𑀭𑀺𑀯𑀸𑀭𑀲𑀗𑁆𑀔𑀸𑀢𑁂𑀦, 𑀦 𑀓𑀺𑀢𑁆𑀢𑀺𑀲𑀗𑁆𑀔𑀸𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀻𑀮𑀸𑀘𑀸𑀭𑀸𑀤𑀺𑀕𑀼𑀡𑀦𑁂𑀫𑀺𑀢𑁆𑀢𑀺𑀓𑀸 𑀳𑀺 𑀓𑀺𑀢𑁆𑀢𑀺. ‘‘𑀢𑀸𑀯𑀢𑀺𑀁𑀲𑀸 𑀤𑁂𑀯𑀸 𑀤𑀻𑀖𑀸𑀬𑀼𑀓𑀸 𑀯𑀡𑁆𑀡𑀯𑀦𑁆𑀢𑁄 𑀲𑀼𑀔𑀩𑀳𑀼𑀮𑀸’’𑀢𑀺 𑀏𑀯𑀫𑀸𑀤𑀺𑀯𑀘𑀦𑁂𑀦 𑀬𑀲𑁂 𑀇𑀘𑁆𑀙𑀺𑀢𑁂 𑀅𑀯𑀺𑀲𑁂𑀲𑁂𑀢𑁆𑀯𑀸𑀯 ‘‘𑀬𑀲𑁂𑀦 𑀲𑀫𑁆𑀧𑀦𑁆𑀦𑀸𑀦’’𑀦𑁆𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁.

𑀅𑀭𑀺𑀬𑀲𑀸𑀯𑀺𑀓𑀸𑀢𑀺 𑀲𑁄𑀢𑀸𑀧𑀦𑁆𑀦𑀸. ‘‘𑀲𑀓𑀤𑀸𑀕𑀸𑀫𑀺𑀦𑀻’’𑀢𑀺 𑀓𑁂𑀘𑀺. 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀝𑁆𑀝𑁂𑀢𑁆𑀯𑀸𑀢𑀺 𑀬𑀣𑀸 𑀢𑁆𑀯𑀁 𑀅𑀦𑁆𑀥𑀩𑀸𑀮𑁂 𑀫𑀜𑁆𑀜𑀲𑀺, 𑀥𑀫𑁆𑀫𑀲𑀪𑀸𑀯𑁄 𑀏𑀯𑀁 𑀦 𑀳𑁄𑀢𑀻𑀢𑀺 𑀢𑀲𑁆𑀲𑀸 𑀤𑁂𑀯𑀢𑀸𑀬 𑀅𑀥𑀺𑀧𑁆𑀧𑀸𑀬𑀁 𑀯𑀺𑀧𑀭𑀺𑀯𑀢𑁆𑀢𑁂𑀢𑁆𑀯𑀸. 𑀏𑀓𑀦𑁆𑀢𑀢𑁄 𑀲𑀼𑀔𑀁 𑀦𑀸𑀫 𑀦𑀺𑀩𑁆𑀩𑀸𑀦𑀫𑁂𑀯. 𑀓𑀸𑀫𑀸 𑀳𑀺 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸𑀢𑀺 𑀇𑀫𑀺𑀦𑀸 ¶ 𑀅𑀥𑀺𑀧𑁆𑀧𑀸𑀬𑁂𑀦 𑀢𑀲𑁆𑀲𑀸 𑀅𑀥𑀺𑀧𑁆𑀧𑀸𑀬𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸. 𑀓𑀸𑀫𑀁 𑀘𑀢𑀼𑀢𑁆𑀣𑀪𑀽𑀫𑀓𑀸𑀧𑀺 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸 𑀏𑀯, 𑀢𑁂 𑀧𑀦 𑀲𑀫𑁆𑀫𑀲𑀦𑀽𑀧𑀕𑀸 𑀦 𑀳𑁄𑀦𑁆𑀢𑀻𑀢𑀺 𑀢𑁂𑀪𑀽𑀫𑀓𑀕𑁆𑀕𑀳𑀡𑀁 𑀲𑀫𑁆𑀫𑀲𑀦𑀬𑁄𑀕𑁆𑀕𑁂𑀦. 𑀳𑀼𑀢𑁆𑀯𑀸𑀢𑀺 𑀧𑀼𑀩𑁆𑀩𑁂 𑀅𑀯𑀺𑀚𑁆𑀚𑀫𑀸𑀦𑀸 𑀧𑀘𑁆𑀘𑀬𑀲𑀫𑀯𑀸𑀬𑁂𑀦 𑀪𑀯𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸. 𑀏𑀢𑁂𑀦 𑀦𑁂𑀲𑀁 𑀪𑀸𑀯𑀪𑀸𑀕𑁄 𑀤𑀲𑁆𑀲𑀺𑀢𑁄. 𑀅𑀪𑀸𑀯𑀢𑁆𑀣𑁂𑀦𑀸𑀢𑀺 𑀲𑀭𑀲𑀦𑀺𑀭𑁄𑀥𑀪𑀽𑀢𑁂𑀦 𑀯𑀺𑀤𑁆𑀥𑀁𑀲𑀦𑀪𑀸𑀯𑁂𑀦.

𑀅𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀸, 𑀢𑀢𑁄 𑀏𑀯 ‘‘𑀫𑀬𑁆𑀳𑀁 𑀇𑀫𑁂 𑀲𑀼𑀔𑀸’’𑀢𑀺 𑀯𑀸 𑀦 𑀇𑀘𑁆𑀘𑀸𑀢𑀺 𑀅𑀦𑀺𑀘𑁆𑀘𑀸. 𑀉𑀧𑁆𑀧𑀸𑀤𑀯𑀬𑀲𑀪𑀸𑀯𑀸𑀢𑀺 𑀔𑀡𑁂 𑀔𑀡𑁂 𑀉𑀧𑁆𑀧𑀚𑁆𑀚𑀦𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑀸. 𑀢𑁂𑀦𑀸𑀳 ‘‘𑀉𑀧𑁆𑀧…𑀧𑁂… 𑀯𑁂𑀯𑀘𑀦’’𑀦𑁆𑀢𑀺. 𑀧𑀼𑀭𑀺𑀫𑀲𑁆𑀲 𑀯𑀸 𑀧𑀘𑁆𑀙𑀺𑀫𑀁 𑀓𑀸𑀭𑀡𑀯𑁂𑀯𑀘𑀦𑀦𑁆𑀢𑀺 𑀆𑀳 ‘‘𑀬𑀲𑁆𑀫𑀸 𑀯𑀸’’𑀢𑀺𑀆𑀤𑀺. 𑀢𑀤𑀦𑀦𑁆𑀢𑀭𑀸𑀢𑀺 𑀢𑁂𑀲𑀁 𑀉𑀧𑁆𑀧𑀸𑀤𑀯𑀬𑀸𑀦𑀁 𑀅𑀦𑁆𑀢𑀭𑁂. 𑀯𑁂𑀫𑀚𑁆𑀛𑀝𑁆𑀞𑀸𑀦𑀦𑁆𑀢𑀺 𑀞𑀺𑀢𑀺𑀓𑁆𑀔𑀡𑀁 𑀯𑀤𑀢𑀺. 𑀬𑁂 𑀧𑀦 ‘‘𑀲𑀗𑁆𑀔𑀸𑀭𑀸𑀦𑀁 𑀞𑀺𑀢𑀺 𑀦𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀢𑀁 𑀫𑀺𑀘𑁆𑀙𑀸. 𑀬𑀣𑀸 𑀳𑀺 𑀢𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀉𑀧𑁆𑀧𑀸𑀤𑀸𑀯𑀢𑁆𑀣𑀸𑀬 𑀪𑀺𑀦𑁆𑀦𑀸 𑀪𑀗𑁆𑀕𑀸𑀯𑀢𑁆𑀣𑀸 𑀇𑀘𑁆𑀙𑀺𑀢𑀸, 𑀅𑀜𑁆𑀜𑀣𑀸 𑀅𑀜𑁆𑀜𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀜𑁆𑀜𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀆𑀧𑀚𑁆𑀚𑀢𑀺, 𑀏𑀯𑀁 𑀉𑀧𑁆𑀧𑀦𑁆𑀦𑀲𑁆𑀲 𑀪𑀗𑁆𑀕𑀸𑀪𑀺𑀫𑀼𑀔𑀸𑀯𑀢𑁆𑀣𑀸 𑀇𑀘𑁆𑀙𑀺𑀢𑀩𑁆𑀩𑀸, 𑀲𑀸𑀯 𑀞𑀺𑀢𑀺𑀓𑁆𑀔𑀡𑁄. 𑀦 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀪𑀺𑀚𑁆𑀚𑀢𑀻𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺. 𑀯𑀽𑀧𑀲𑀫𑀲𑀗𑁆𑀔𑀸𑀢𑀦𑁆𑀢𑀺 𑀅𑀘𑁆𑀘𑀦𑁆𑀢𑀁 𑀯𑀽𑀧𑀲𑀫𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀫𑁂𑀯 𑀲𑀼𑀔𑀁, 𑀦 𑀢𑀬𑀸 𑀅𑀥𑀺𑀧𑁆𑀧𑁂𑀢𑀸 𑀓𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑀦𑁆𑀤𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀦𑀦𑁆𑀤𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨. 𑀦𑀦𑁆𑀤𑀢𑀻𑀢𑀺 ¶ 𑀏𑀢𑁆𑀣 𑀦𑀦𑁆𑀤𑀦𑀁 𑀲𑀧𑁆𑀧𑀻𑀢𑀺𑀓𑀓𑀸𑀫𑀢𑀡𑁆𑀳𑀸𑀓𑀺𑀘𑁆𑀘𑀦𑁆𑀢𑀺 𑀆𑀳 𑁋 ‘‘𑀢𑀼𑀲𑁆𑀲𑀢𑀻’’𑀢𑀺, 𑀢𑀲𑁆𑀫𑀸 𑀓𑀸𑀫𑀧𑀭𑀺𑀢𑁄𑀲𑁂𑀦 𑀳𑀝𑁆𑀞𑀢𑀼𑀝𑁆𑀞𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀢𑁆𑀢𑀺𑀫𑀸𑀢𑀺 𑀧𑀼𑀢𑁆𑀢𑀯𑀸. 𑀧𑀳𑀽𑀢𑁂 𑀘𑀸𑀬𑀁 𑀫𑀸-𑀲𑀤𑁆𑀤𑁄𑀢𑀺 𑀆𑀳 ‘‘𑀩𑀳𑀼𑀧𑀼𑀢𑁆𑀢𑁄’’𑀢𑀺. 𑀩𑀳𑀼𑀧𑀼𑀢𑁆𑀢𑀢𑀸𑀕𑀳𑀡𑁂𑀦 𑀇𑀤𑀁 𑀧𑀬𑁄𑀚𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀲𑁆𑀲 𑀳𑀻’’𑀢𑀺𑀆𑀤𑀺𑀫𑀸𑀳. 𑀧𑀽𑀭𑁂𑀦𑁆𑀢𑀻𑀢𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀥𑀜𑁆𑀜𑀲𑁆𑀲𑀸𑀢𑀺 𑀲𑀸𑀫𑀺𑀯𑀘𑀦𑀁. 𑀇𑀢𑀺 𑀆𑀳𑀸𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬𑀸𑀳, 𑀏𑀯𑀁𑀅𑀥𑀺𑀧𑁆𑀧𑀸𑀬𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀕𑁄𑀲𑀸𑀫𑀺𑀓𑁄𑀢𑀺 𑀕𑁄𑀫𑀸. 𑀇𑀥𑀸𑀧𑀺 𑀧𑀳𑀽𑀢𑁂 𑀫𑀸-𑀲𑀤𑁆𑀤𑁄. 𑀕𑁄𑀭𑀲𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀕𑁄𑀭𑀲𑁂𑀳𑀺 𑀦𑀺𑀧𑁆𑀨𑀚𑁆𑀚𑀦𑀲𑀫𑁆𑀧𑀢𑁆𑀢𑀺𑀁. 𑀉𑀧𑀥𑀻𑀢𑀺 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀁. 𑀳𑀻𑀢𑀺 𑀳𑁂𑀢𑀼𑀅𑀢𑁆𑀣𑁂 𑀦𑀺𑀧𑀸𑀢𑁄. 𑀦𑀦𑁆𑀤𑀬𑀦𑁆𑀢𑀺 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀚𑀦𑀬𑀦𑁆𑀢𑀻𑀢𑀺 𑀦𑀦𑁆𑀤𑀦𑀸. 𑀓𑀸𑀫𑀁 𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀓𑀸𑀫𑀸 ‘‘𑀉𑀧𑀥𑀻’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀦𑁆𑀢𑀺, 𑀢𑀲𑁆𑀲𑀸 𑀧𑀦 𑀤𑁂𑀯𑀢𑀸𑀬 𑀅𑀥𑀺𑀧𑁆𑀧𑀸𑀬𑀯𑀲𑁂𑀦𑀸𑀳 ‘‘𑀲𑀼𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄’’𑀢𑀺. 𑀓𑀺𑀮𑁂𑀲𑀯𑀢𑁆𑀣𑀼𑀳𑁂𑀢𑀼𑀓𑀢𑁆𑀢𑀸 𑀲𑁂𑀲𑀧𑀤𑀤𑁆𑀯𑀬𑀲𑁆𑀲 𑀓𑀺𑀜𑁆𑀘𑀸𑀧𑀺 𑀲𑀩𑁆𑀩𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀓𑀺𑀮𑁂𑀲𑀳𑁂𑀢𑀼𑀓𑀁, 𑀯𑀺𑀲𑁂𑀲𑀢𑁄 𑀧𑀦 𑀧𑀸𑀧𑀥𑀫𑁆𑀫𑀸 𑀅𑀧𑀸𑀬𑀽𑀧𑀧𑀢𑁆𑀢𑀺𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 𑀆𑀳 𑁋 ‘‘𑀓𑀺𑀮𑁂𑀲𑀸𑀧𑀺 𑀅𑀧𑀸𑀬𑀤𑀼𑀓𑁆𑀔𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄’’𑀢𑀺. 𑀉𑀧𑀲𑀁𑀳𑀭𑀫𑀸𑀦𑀸𑀢𑀺 𑀉𑀧𑀦𑁂𑀦𑁆𑀢𑀸 𑀉𑀧𑁆𑀧𑀸𑀤𑁂𑀦𑁆𑀢𑀸. 𑀫𑀦𑀼𑀲𑁆𑀲𑀚𑀸𑀢𑀺𑀓𑁄𑀧𑀺 𑀤𑀼𑀮𑁆𑀮𑀪𑀖𑀸𑀲𑀘𑁆𑀙𑀸𑀤𑀦𑀢𑀸𑀬 ¶ 𑀤𑀼𑀓𑁆𑀔𑀩𑀳𑀼𑀮𑁄 𑀧𑁂𑀢𑁄 𑀯𑀺𑀬𑀸𑀢𑀺 𑀫𑀦𑀼𑀲𑁆𑀲𑀧𑁂𑀢𑁄. 𑀫𑀦𑀼𑀲𑁆𑀲𑀚𑀸𑀢𑀺𑀓𑁄𑀧𑀺 𑀯𑀼𑀢𑁆𑀢𑀭𑀽𑀧𑁄 𑀅𑀦𑀢𑁆𑀣𑀧𑀸𑀢𑀺𑀢𑁄 𑀧𑀭𑁂𑀳𑀺 𑀳𑀺𑀁𑀲𑀺𑀢𑁄 𑀲𑀫𑀸𑀦𑁄 𑀦𑁂𑀭𑀬𑀺𑀓𑁄 𑀯𑀺𑀬𑀸𑀢𑀺 𑀫𑀦𑀼𑀲𑁆𑀲𑀦𑁂𑀭𑀬𑀺𑀓𑁄.

𑀨𑀮𑁂𑀦 𑀭𑀼𑀓𑁆𑀔𑀢𑁄 𑀨𑀮𑀁 𑀧𑀸𑀢𑁂𑀦𑁆𑀢𑁄 𑀯𑀺𑀬. 𑀢𑀣𑁂𑀯 𑀦𑀯𑀳𑀸𑀓𑀸𑀭𑁂𑀳𑀻𑀢𑀺 𑀬𑀣𑀸 𑀢𑀻𑀲𑀼 𑀓𑀸𑀮𑁂𑀲𑀼 𑀦𑀸𑀲𑀫𑀭𑀡𑀪𑁂𑀤𑀦𑀯𑀲𑁂𑀦 𑀧𑀼𑀢𑁆𑀢𑀺𑀫𑀸 𑀧𑀼𑀢𑁆𑀢𑀦𑀺𑀫𑀺𑀢𑁆𑀢𑀁, 𑀢𑀣𑁂𑀯 𑀕𑁄𑀫𑀸 𑀕𑁄𑀦𑀺𑀫𑀺𑀢𑁆𑀢𑀁 𑀲𑁄𑀘𑀢𑀺 𑀦𑀯𑀧𑁆𑀧𑀓𑀸𑀭𑁂𑀳𑀺. 𑀧𑀜𑁆𑀘 𑀓𑀸𑀫𑀕𑀼𑀡𑁄𑀧𑀥𑀻𑀧𑀺 𑀦𑀭𑀁 𑀲𑁄𑀘𑁂𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀲𑁆𑀲𑀸𑀢𑀺 𑀬𑁄 𑀉𑀢𑁆𑀢𑀭𑀺 𑀅𑀦𑀼𑀕𑀺𑀚𑁆𑀛𑀢𑀺 𑀢𑀲𑁆𑀲. 𑀓𑀸𑀫𑀬𑀸𑀦𑀲𑁆𑀲𑀸𑀢𑀺 𑀚𑀸𑀢𑀓𑀸𑀫𑀘𑁆𑀙𑀦𑁆𑀤𑀲𑁆𑀲. 𑀚𑀦𑁆𑀢𑀼𑀦𑁄𑀢𑀺 𑀲𑀢𑁆𑀢𑀲𑁆𑀲. 𑀧𑀭𑀺𑀳𑀸𑀬𑀦𑁆𑀢𑀺 𑀘𑁂 𑀯𑀺𑀦𑀲𑁆𑀲𑀦𑁆𑀢𑀺 𑀘𑁂. 𑀲𑀮𑁆𑀮𑀯𑀺𑀤𑁆𑀥𑁄𑀯𑀸𑀢𑀺 𑀲𑀮𑁆𑀮𑁂𑀦 𑀯𑀺𑀤𑁆𑀥𑁄 𑀯𑀺𑀬. 𑀭𑀼𑀧𑁆𑀧𑀢𑀻𑀢𑀺 𑀯𑀺𑀓𑀸𑀭𑀁 𑀆𑀧𑀚𑁆𑀚𑀢𑀺, 𑀲𑁄𑀘𑀢𑀻𑀢𑀺 𑀅𑀢𑁆𑀣𑁄. 𑀦𑀭𑀲𑁆𑀲 𑀲𑁄𑀘𑀦𑀸 𑀲𑁄𑀓𑀖𑀝𑁆𑀝𑀦𑀧𑀘𑁆𑀘𑀬𑁄. 𑀉𑀧𑀥𑀬𑁄 𑀦𑀢𑁆𑀣𑀻𑀢𑀺 𑀓𑀸𑀫𑀁 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀽𑀧𑀥𑀬𑁄 𑀢𑀸𑀯 𑀔𑀻𑀡𑀸𑀲𑀯𑀲𑁆𑀲 𑀦𑀢𑁆𑀣𑁂𑀯 𑀫𑀕𑁆𑀕𑀸𑀥𑀺𑀕𑀫𑁂𑀦 𑀦𑀺𑀭𑁄𑀥𑀺𑀢𑀢𑁆𑀢𑀸, 𑀔𑀦𑁆𑀥𑀽𑀧𑀥𑀬𑁄 𑀧𑀦 𑀓𑀣𑀦𑁆𑀢𑀺? 𑀢𑁂𑀧𑀺 𑀢𑀲𑁆𑀲 𑀲𑀉𑀧𑀸𑀤𑀺𑀲𑁂𑀲𑀓𑀸𑀮𑁂𑀧𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀸 𑀦 𑀲𑀦𑁆𑀢𑁂𑀯, 𑀅𑀬𑀜𑁆𑀘 𑀅𑀦𑀼𑀧𑀸𑀤𑀺𑀲𑁂𑀲𑀓𑀸𑀮𑁂. 𑀢𑁂𑀦𑀸𑀳 ‘‘𑀲𑁄 𑀦𑀺𑀭𑀼𑀧𑀥𑀺 𑀫𑀳𑀸𑀔𑀻𑀡𑀸𑀲𑀯𑁄’’𑀢𑀺.

𑀦𑀦𑁆𑀤𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀦𑀢𑁆𑀣𑀺𑀧𑀼𑀢𑁆𑀢𑀲𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩. 𑀧𑀼𑀢𑁆𑀢𑀧𑁂𑀫𑀁 ¶ 𑀧𑀼𑀢𑁆𑀢𑀕𑁆𑀕𑀳𑀡𑁂𑀦 𑀕𑀳𑀺𑀢𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦𑀸𑀢𑀺 𑀆𑀳 ‘‘𑀧𑀼𑀢𑁆𑀢𑀧𑁂𑀫𑀲𑀫’’𑀦𑁆𑀢𑀺. 𑀕𑁄𑀲𑀫𑀺𑀢𑀦𑁆𑀢𑀺 𑀕𑁄𑀳𑀺 𑀲𑀫𑀁 𑀓𑀢𑀁. 𑀢𑁂𑀦𑀸𑀳 ‘‘𑀕𑁄𑀳𑀺 𑀲𑀫’’𑀦𑁆𑀢𑀺. 𑀲𑀽𑀭𑀺𑀬𑀲𑁆𑀲 𑀲𑀫𑀸𑀢𑀺 𑀲𑀽𑀭𑀺𑀬𑀲𑀫𑀸. 𑀅𑀯𑀬𑀯𑀲𑀫𑁆𑀩𑀦𑁆𑀥𑁂 𑀘𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀅𑀯𑀬𑀯𑁄 𑀘𑁂𑀢𑁆𑀣 𑀆𑀪𑀸 𑀏𑀯𑀸𑀢𑀺 𑀯𑀺𑀜𑁆𑀜𑀸𑀬𑀢𑀺 ‘‘𑀅𑀦𑀦𑁆𑀢𑀭𑀁 𑀆𑀪𑀸’’𑀢𑀺 𑀯𑀼𑀘𑁆𑀘𑀫𑀸𑀦𑀢𑁆𑀢𑀸𑀢𑀺 𑀆𑀳 ‘‘𑀲𑀽𑀭𑀺𑀬𑀸𑀪𑀸𑀬 𑀲𑀫𑀸’’𑀢𑀺𑀆𑀤𑀺. 𑀫𑀳𑁄𑀖𑀪𑀸𑀯𑁂𑀦 𑀲𑀭𑀦𑁆𑀢𑀺 𑀲𑀯𑀦𑁆𑀢𑀻𑀢𑀺 𑀲𑀭𑀸, 𑀫𑀳𑀦𑁆𑀢𑀸 𑀚𑀮𑀸𑀲𑀬𑀸. 𑀲𑀩𑁆𑀩𑁂 𑀢𑁂 𑀲𑀫𑀼𑀤𑁆𑀤𑀧𑀭𑀫𑀸 𑀑𑀭𑀺𑀫𑀚𑀦𑁂𑀳𑀺 𑀅𑀤𑀺𑀝𑁆𑀞𑀧𑀭𑀢𑀻𑀭𑀢𑁆𑀢𑀸 𑀢𑀲𑁆𑀲.

𑀦𑀢𑁆𑀣𑀺 𑀅𑀢𑁆𑀢𑀲𑀫𑀁 𑀧𑁂𑀫𑀦𑁆𑀢𑀺 𑀕𑀸𑀣𑀸𑀬 𑀧𑀞𑀫𑀕𑀸𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀢𑀧𑁂𑀫𑁂𑀦 𑀲𑀫𑀁 𑀧𑁂𑀫𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀬𑀫𑀢𑁆𑀣𑁄. 𑀅𑀦𑀼𑀤𑀓𑀓𑀦𑁆𑀢𑀸𑀭𑁂 𑀖𑀫𑁆𑀫𑀲𑀦𑁆𑀢𑀸𑀧𑀁 𑀅𑀲𑀳𑀦𑁆𑀢𑀺𑀬𑀸 𑀅𑀗𑁆𑀓𑁂 𑀞𑀧𑀺𑀢𑀧𑀼𑀢𑁆𑀢𑀓𑀁 𑀓𑀦𑁆𑀤𑀦𑁆𑀢𑀁 𑀪𑀽𑀫𑀺𑀬𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀢𑀲𑁆𑀲 𑀉𑀧𑀭𑀺 𑀞𑀢𑁆𑀯𑀸 𑀫𑀢𑀇𑀢𑁆𑀣𑀺𑀯𑀢𑁆𑀣𑀼𑀦𑀸 𑀤𑀻𑀧𑁂𑀢𑀩𑁆𑀩𑀁. 𑀢𑁂𑀦𑀸𑀳 𑁋 ‘‘𑀫𑀸𑀢𑀸𑀧𑀺𑀢𑀸𑀤𑀬𑁄 𑀳𑀺 𑀙𑀟𑁆𑀟𑁂𑀢𑁆𑀯𑀸𑀧𑀺 𑀧𑀼𑀢𑁆𑀢𑀥𑀻𑀢𑀸𑀤𑀬𑁄’’𑀢𑀺. 𑀢𑀣𑀸 𑀘𑀸𑀳 𑁋

‘‘𑀲𑀩𑁆𑀩𑀸 𑀤𑀺𑀲𑀸 𑀅𑀦𑀼𑀧𑀭𑀺𑀕𑀫𑁆𑀫 𑀘𑁂𑀢𑀲𑀸,

𑀦𑁂𑀯𑀚𑁆𑀛𑀕𑀸 𑀧𑀺𑀬𑀢𑀭𑀫𑀢𑁆𑀢𑀦𑀸 𑀓𑁆𑀯𑀘𑀺;

𑀏𑀯𑀁 ¶ 𑀧𑀺𑀬𑁄 𑀧𑀼𑀣𑀼 𑀅𑀢𑁆𑀢𑀸 𑀧𑀭𑁂𑀲𑀁,

𑀢𑀲𑁆𑀫𑀸 𑀦 𑀳𑀺𑀁𑀲𑁂 𑀧𑀭𑀫𑀢𑁆𑀢𑀓𑀸𑀫𑁄’’𑀢𑀺. (𑀲𑀁. 𑀦𑀺. 𑁧.𑁧𑁧𑁯; 𑀉𑀤𑀸. 𑁪𑁧; 𑀦𑁂𑀢𑁆𑀢𑀺. 𑁧𑁧𑁩);

𑀥𑀜𑁆𑀜𑁂𑀦 𑀲𑀫𑀁 𑀥𑀦𑀁 𑀦𑀸𑀫 𑀦𑀢𑁆𑀣𑀺, 𑀬𑀲𑁆𑀫𑀸 𑀢𑀧𑁆𑀧𑀝𑀺𑀩𑀤𑁆𑀥𑀸 𑀆𑀳𑀸𑀭𑀽𑀧𑀚𑀻𑀯𑀻𑀦𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀯𑀼𑀢𑁆𑀢𑀺. 𑀢𑀣𑀸𑀭𑀽𑀧𑁂 𑀓𑀸𑀮𑁂𑀢𑀺 𑀤𑀼𑀩𑁆𑀪𑀺𑀓𑁆𑀔𑀓𑀸𑀮𑁂. 𑀏𑀓𑀤𑁂𑀲𑀁𑀬𑁂𑀯 𑀑𑀪𑀸𑀲𑀦𑁆𑀢𑀻𑀢𑀺 𑀏𑀓𑀲𑁆𑀫𑀺𑀁 𑀔𑀡𑁂 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀑𑀪𑀸𑀲𑀁 𑀨𑀭𑀺𑀢𑀼𑀁 𑀅𑀲𑀫𑀢𑁆𑀣𑀢𑁆𑀢𑀸 𑀲𑀽𑀭𑀺𑀬𑀲𑁆𑀲𑀧𑀺, 𑀧𑀕𑁂𑀯 𑀇𑀢𑀭𑁂𑀲𑀁. 𑀩𑁄𑀥𑀺𑀲𑀢𑁆𑀢𑀲𑁆𑀲 𑀉𑀤𑀬𑀩𑁆𑀩𑀬𑀲𑁆𑀲 𑀜𑀸𑀡𑀸𑀦𑀼𑀪𑀸𑀯𑁂𑀦 𑀲𑀓𑀮𑀚𑀸𑀢𑀺𑀔𑁂𑀢𑁆𑀢𑀁 𑀏𑀓𑀸𑀮𑁄𑀓𑀁 𑀅𑀳𑁄𑀲𑀻𑀢𑀺 𑀆𑀳 ‘‘𑀧𑀜𑁆𑀜𑀸…𑀧𑁂… 𑀲𑀓𑁆𑀓𑁄𑀢𑀻’’𑀢𑀺. 𑀢𑀫𑀁 𑀯𑀺𑀥𑀫𑀢𑀻𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀸𑀤𑀬𑁄 𑀧𑀜𑁆𑀜𑀸 𑀬𑀢𑁆𑀣 𑀧𑀯𑀢𑁆𑀢𑀦𑁆𑀢𑀺, 𑀢𑀫𑀦𑀯𑀲𑁂𑀲𑀁 𑀩𑁆𑀬𑀸𑀧𑁂𑀢𑁆𑀯𑀸 𑀏𑀓𑀧𑁆𑀧𑀳𑀸𑀭𑁂𑀦 𑀧𑀯𑀢𑁆𑀢𑀦𑀢𑁄. ‘‘𑀯𑀼𑀝𑁆𑀞𑀺𑀬𑀸 𑀧𑀦 𑀧𑀯𑀢𑁆𑀢𑀫𑀸𑀦𑀸𑀬 𑀬𑀸𑀯 𑀆𑀪𑀲𑁆𑀲𑀭𑀪𑀯𑀦𑀸’’𑀢𑀺 𑀧𑀘𑀼𑀭𑀯𑀲𑁂𑀦 𑀯𑀼𑀢𑁆𑀢𑀁.

𑀦𑀢𑁆𑀣𑀺𑀧𑀼𑀢𑁆𑀢𑀲𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀔𑀢𑁆𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪. 𑀔𑁂𑀢𑁆𑀢𑀢𑁄 ¶ 𑀯𑀺𑀯𑀸𑀤𑀸 𑀲𑀢𑁆𑀢𑁂 𑀢𑀸𑀬𑀢𑀻𑀢𑀺 𑀔𑀢𑁆𑀢𑀺𑀬𑁄. 𑀯𑀤𑀢𑀺 𑀤𑁂𑀯𑀢𑀸 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀯𑀲𑁂𑀦. 𑀤𑁆𑀯𑀺𑀧𑀤𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀘𑀢𑀼𑀧𑁆𑀧𑀤𑀪𑀭𑀺𑀬𑀧𑀼𑀢𑁆𑀢𑀸 𑀕𑀳𑀺𑀢𑀸. 𑀩𑀼𑀤𑁆𑀥𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀆𑀚𑀸𑀦𑀻𑀬𑀲𑀼𑀲𑁆𑀲𑀽𑀲𑀪𑀭𑀺𑀬𑀲𑁆𑀲𑀯𑀧𑀼𑀢𑁆𑀢𑀸. 𑀤𑁆𑀯𑀺𑀧𑀤𑀸𑀦𑀁 𑀲𑁂𑀝𑁆𑀞𑁄𑀢𑀺 𑀏𑀢𑁆𑀣 𑀤𑁆𑀯𑀺𑀧𑀤𑀸𑀦𑀁 𑀏𑀯 𑀲𑁂𑀝𑁆𑀞𑁄𑀢𑀺 𑀦𑀸𑀬𑀁 𑀦𑀺𑀬𑀫𑁄 𑀇𑀘𑁆𑀙𑀺𑀢𑁄, 𑀲𑁂𑀝𑁆𑀞𑁄 𑀏𑀯𑀸𑀢𑀺 𑀧𑀦 𑀇𑀘𑁆𑀙𑀺𑀢𑁄, 𑀢𑀲𑁆𑀫𑀸 𑀲𑀫𑁆𑀩𑀼𑀤𑁆𑀥𑁄 𑀤𑁆𑀯𑀺𑀧𑀤𑁂𑀲𑀼 𑀅𑀜𑁆𑀜𑁂𑀲𑀼 𑀢𑀢𑁆𑀣 𑀘 𑀉𑀧𑁆𑀧𑀚𑁆𑀚𑀦𑀢𑁄 𑀲𑁂𑀝𑁆𑀞𑁄 𑀏𑀯 𑀲𑀩𑁆𑀩𑁂𑀲𑀫𑁆𑀧𑀺 𑀉𑀢𑁆𑀢𑀭𑀺𑀢𑀭𑀲𑁆𑀲 𑀅𑀪𑀸𑀯𑀢𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀉𑀧𑁆𑀧𑀚𑁆𑀚𑀫𑀸𑀦𑁄 𑀧𑀦𑁂𑀲𑀸’’𑀢𑀺𑀆𑀤𑀺. 𑀓𑀸𑀭𑀡𑀸𑀓𑀸𑀭𑀡𑀁 𑀆𑀚𑀸𑀦𑀸𑀢𑀻𑀢𑀺 𑀆𑀚𑀸𑀦𑀻𑀬𑁄. 𑀕𑀡𑁆𑀳𑀸𑀧𑁂𑀣𑀸𑀢𑀺 𑀬𑀣𑀸 𑀉𑀤𑀓𑁄 𑀦 𑀢𑁂𑀫𑀺𑀲𑁆𑀲𑀢𑀺, 𑀏𑀯𑀁 𑀯𑀸𑀴𑀁 𑀕𑀡𑁆𑀳𑀸𑀧𑁂𑀣. ‘‘𑀅𑀲𑀼𑀲𑁆𑀲𑀽𑀲𑀸’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺. 𑀆𑀲𑀼𑀡𑀫𑀸𑀦𑁄𑀢𑀺 𑀲𑀧𑁆𑀧𑀝𑀺𑀲𑁆𑀲𑀯𑁄 𑀳𑀼𑀢𑁆𑀯𑀸 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀓𑁄.

𑀔𑀢𑁆𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀡𑀫𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫. 𑀞𑀺𑀢𑁂 𑀫𑀚𑁆𑀛𑀦𑁆𑀳𑀺𑀓𑁂𑀢𑀺 𑀧𑀼𑀩𑁆𑀩𑀤𑁆𑀥𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀧𑀭𑀤𑁆𑀥𑀁 𑀅𑀧𑁆𑀧𑀢𑁆𑀯𑀸 𑀞𑀺𑀢𑀫𑀚𑁆𑀛𑀦𑁆𑀳𑁂. 𑀲𑀦𑁆𑀦𑀺𑀲𑀻𑀯𑁂𑀲𑀽𑀢𑀺 𑀧𑀭𑀺𑀲𑁆𑀲𑀫𑀯𑀺𑀦𑁄𑀤𑀦𑀢𑁆𑀣𑀁 𑀲𑀩𑁆𑀩𑀲𑁄 𑀲𑀦𑁆𑀦𑀺𑀲𑀻𑀤𑀦𑁆𑀢𑁂𑀲𑀼. 𑀤-𑀓𑀸𑀭𑀲𑁆𑀲 𑀳𑀺 𑀯-𑀓𑀸𑀭𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄. 𑀢𑁂𑀦𑀸𑀳 ‘‘𑀲𑀦𑁆𑀦𑀺𑀲𑀺𑀦𑁆𑀦𑁂𑀲𑀼 𑀯𑀺𑀲𑁆𑀲𑀫𑀫𑀸𑀦𑁂𑀲𑀽’’𑀢𑀺. 𑀲𑀩𑁆𑀩𑀲𑀢𑁆𑀢𑀸𑀦𑀦𑁆𑀢𑀺 𑀲𑀩𑁆𑀩𑁂𑀲𑀜𑁆𑀘 𑀆𑀳𑀸𑀭𑀽𑀧𑀚𑀻𑀯𑀺𑀢𑀲𑀢𑁆𑀢𑀸𑀦𑀁 ¶ 𑀖𑀫𑁆𑀫𑀢𑀸𑀧𑀦𑁂 𑀲𑀦𑁆𑀢𑀢𑁆𑀢𑀓𑀸𑀬𑀸𑀦𑀁 𑀇𑀭𑀺𑀬𑀸𑀧𑀣𑀤𑀼𑀩𑁆𑀩𑀮𑁆𑀬𑀓𑀸𑀮𑁄𑀢𑀺 𑀞𑀸𑀦𑀸𑀤𑀺𑀇𑀭𑀺𑀬𑀸𑀧𑀣𑀲𑁆𑀲 𑀅𑀲𑀫𑀢𑁆𑀣𑀓𑀸𑀮𑁄. 𑀲𑀡𑀢𑀺 𑀯𑀺𑀬𑀸𑀢𑀺 𑀲𑀤𑁆𑀤𑀁 𑀓𑀭𑁄𑀢𑀺 𑀯𑀺𑀬, 𑀬𑀣𑀸 𑀢𑀁 𑀅𑀜𑁆𑀜𑀫𑁆𑀧𑀺 𑀫𑀳𑀸𑀯𑀦𑀁 𑀯𑀓𑁆𑀔𑀫𑀸𑀦𑀦𑀬𑁂𑀦. 𑀢𑁂𑀦𑀸𑀳 ‘‘𑀢𑀧𑁆𑀧𑀝𑀺𑀪𑀸𑀕𑀁 𑀦𑀸𑀫𑁂𑀢’’𑀦𑁆𑀢𑀺 𑀙𑀺𑀤𑁆𑀤𑀯𑁂𑀡𑀼𑀧𑀩𑁆𑀩𑀸𑀦𑀦𑁆𑀢𑀺 𑀭𑀦𑁆𑀥𑀚𑀸𑀢𑀓𑀻𑀘𑀓𑀫𑀳𑀸𑀯𑁂𑀴𑀼𑀧𑀩𑁆𑀩𑀸𑀦𑀁. 𑀤𑀼𑀢𑀺𑀬𑀓𑀁 𑀲𑀳𑀸𑀬𑀁 𑀅𑀮𑀪𑀦𑁆𑀢𑀻 𑀅𑀦𑀪𑀺𑀭𑀢𑀺𑀧𑀭𑀺𑀢𑀲𑁆𑀲𑀦𑀸𑀬 𑀏𑀯𑀫𑀸𑀳. 𑀅𑀦𑀧𑁆𑀧𑀓𑀁 𑀲𑀼𑀔𑀦𑁆𑀢𑀺 𑀯𑀺𑀧𑀼𑀮𑀁 𑀉𑀴𑀸𑀭𑀁 𑀯𑀺𑀯𑁂𑀓𑀲𑀼𑀔𑀁.

𑀏𑀓𑀯𑀺𑀳𑀸𑀭𑀢𑀸𑀬 𑀲𑀼𑀜𑁆𑀜𑀸𑀕𑀸𑀭𑀁 𑀧𑀯𑀺𑀝𑁆𑀞𑀲𑁆𑀲. 𑀢𑁂𑀦 𑀓𑀸𑀬𑀯𑀺𑀯𑁂𑀓𑀁 𑀤𑀲𑁆𑀲𑁂𑀢𑀺. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀳𑀺 𑀦𑀺𑀘𑁆𑀘𑀲𑀜𑁆𑀜𑀸𑀤𑀺𑀧𑁆𑀧𑀳𑀸𑀦𑁂𑀦 𑀲𑀦𑁆𑀢𑀘𑀺𑀢𑁆𑀢𑀲𑁆𑀲. 𑀢𑁂𑀦 𑀘𑀺𑀢𑁆𑀢𑀯𑀺𑀯𑁂𑀓𑀁 𑀤𑀲𑁆𑀲𑁂𑀢𑀺. 𑀲𑀁𑀲𑀸𑀭𑁂 𑀪𑀬𑀁 𑀇𑀓𑁆𑀔𑀦𑀢𑁄 𑀪𑀺𑀓𑁆𑀔𑀼𑀦𑁄 𑀉𑀪𑀬𑀯𑀺𑀯𑁂𑀓𑀲𑀫𑁆𑀧𑀦𑁆𑀦𑀲𑁆𑀲, 𑀢𑀢𑁄 ¶ 𑀏𑀯 𑀉𑀢𑁆𑀢𑀭𑀺𑀁 𑀫𑀦𑀼𑀲𑁆𑀲𑀥𑀫𑁆𑀫𑀢𑁄 𑀭𑀢𑀺𑀁 𑀮𑀸𑀪𑀺𑀦𑁄. 𑀅𑀫𑀸𑀦𑀼𑀲𑀻 𑀭𑀢𑀻𑀢𑀺 𑀪𑀸𑀯𑀦𑀸𑀭𑀢𑀺. 𑀧𑀼𑀭𑀢𑁄𑀢𑀺 𑀧𑀼𑀭𑀺𑀫𑀪𑀸𑀕𑁂. 𑀧𑀘𑁆𑀙𑀢𑁄𑀢𑀺 𑀧𑀘𑁆𑀙𑀺𑀫𑀪𑀸𑀕𑁂. 𑀅𑀧𑀭𑁄𑀢𑀺 𑀅𑀜𑁆𑀜𑁄. 𑀧𑀼𑀭𑀢𑁄𑀢𑀺 𑀯𑀸 𑀅𑀦𑀸𑀕𑀢𑁂, 𑀅𑀦𑀸𑀕𑀢𑀁 𑀆𑀭𑀩𑁆𑀪𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀙𑀢𑁄𑀢𑀺 𑀅𑀢𑀻𑀢𑁂 𑀅𑀢𑀻𑀢𑀁 𑀆𑀭𑀩𑁆𑀪 𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀩𑀸𑀥𑀦𑀢𑁄. 𑀧𑀭𑁄𑀢𑀺 𑀓𑁄𑀥𑁄 𑀘𑀺𑀢𑁆𑀢𑀧𑀝𑀺𑀤𑀼𑀲𑁆𑀲𑀦𑀢𑀸𑀬. 𑀦 𑀧𑀭𑁄𑀢𑀺 𑀅𑀧𑀭𑁄, 𑀮𑁄𑀪𑁄, 𑀲𑁄 𑀘𑁂 𑀦 𑀯𑀺𑀚𑁆𑀚𑀢𑀺. 𑀏𑀢𑁂𑀦 𑀅𑀦𑀸𑀕𑀢𑀧𑁆𑀧𑀚𑀧𑁆𑀧𑀦𑀸𑀬 𑀅𑀢𑀻𑀢𑀸𑀦𑀼𑀲𑁄𑀘𑀦𑀸𑀬 𑀘 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀢𑀻𑀯 𑀨𑀸𑀲𑀼 𑀪𑀯𑀢𑀻𑀢𑀺 𑀦𑀻𑀯𑀭𑀡𑀚𑁂𑀝𑁆𑀞𑀓𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀯𑀺𑀕𑀫𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑀦𑀻𑀯𑀭𑀡𑀲𑁆𑀲 𑀛𑀸𑀦𑀲𑁆𑀲 𑀯𑀲𑁂𑀦 𑀅𑀢𑀺𑀯𑀺𑀬 𑀨𑀸𑀲𑀼𑀯𑀺𑀳𑀸𑀭𑁄 𑀳𑁄𑀢𑀺. 𑀏𑀓𑀲𑁆𑀲 𑀯𑀲𑀢𑁄 𑀯𑀦𑁂𑀢𑀺 𑀢𑀡𑁆𑀳𑀸𑀤𑀼𑀢𑀺𑀬𑀺𑀓𑀸𑀪𑀸𑀯𑁂𑀦 𑀏𑀓𑀲𑁆𑀲 𑀅𑀭𑀜𑁆𑀜𑁂 𑀯𑀺𑀯𑁂𑀓𑀯𑀸𑀲𑀁 𑀯𑀲𑀢𑁄. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺 𑀲𑁂𑀲𑀫𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀞𑀫𑀕𑀸𑀣𑀸𑀬𑀁 𑀯𑀼𑀢𑁆𑀢𑀲𑀤𑀺𑀲𑀫𑁂𑀯.

𑀲𑀡𑀫𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀦𑀺𑀤𑁆𑀤𑀸𑀢𑀦𑁆𑀤𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬. 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑁄 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀧𑁂𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺 𑀏𑀢𑁆𑀢𑀓𑀁 𑀧𑀸𑀞𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 ‘‘𑀦𑀺𑀤𑁆𑀤𑀁 𑀑𑀓𑁆𑀓𑀫𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀓𑀺𑀭𑀺𑀬𑀸𑀫𑀬𑀘𑀺𑀢𑁆𑀢𑁂𑀳𑀺 𑀅𑀯𑁄𑀫𑀺𑀲𑁆𑀲𑁄 𑀪𑀯𑀗𑁆𑀕𑀲𑁄𑀢𑁄 𑀅𑀩𑁆𑀬𑀸𑀓𑀢𑀦𑀺𑀤𑁆𑀤𑀸. 𑀲𑀸 𑀳𑀺 𑀔𑀻𑀡𑀸𑀲𑀯𑀸𑀦𑀁 𑀉𑀧𑁆𑀧𑀚𑁆𑀚𑀦𑀸𑀭𑀳𑀸, 𑀢𑀲𑁆𑀲𑀸 𑀧𑀼𑀩𑁆𑀩𑀪𑀸𑀕𑀸𑀧𑀭𑀪𑀸𑀕𑁂𑀲𑀼…𑀧𑁂… 𑀉𑀧𑁆𑀧𑀦𑁆𑀦𑀁 𑀣𑀺𑀦𑀫𑀺𑀤𑁆𑀥𑀁 𑀇𑀥𑀸𑀥𑀺𑀧𑁆𑀧𑁂𑀢𑀸 𑀦𑀺𑀤𑁆𑀤𑀸, 𑀲𑀸 𑀅𑀔𑀻𑀡𑀸𑀲𑀯𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀅𑀦𑀺𑀬𑀢𑀓𑀸𑀮𑀸, 𑀢𑀩𑁆𑀩𑀺𑀥𑀼𑀭𑀦𑀺𑀬𑀢𑀲𑀩𑁆𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑀺𑀘𑁆𑀙𑀸𑀢…𑀧𑁂… 𑀆𑀕𑀦𑁆𑀢𑀼𑀓𑀁 𑀆𑀮𑀲𑀺𑀬’’𑀦𑁆𑀢𑀺 𑀆𑀳. 𑀓𑀸𑀬𑀸𑀮𑀲𑀺𑀬𑀧𑀘𑁆𑀘𑀬𑀸 𑀯𑀻𑀭𑀺𑀬𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀸 𑀘𑀢𑁆𑀢𑀸𑀭𑁄 𑀅𑀓𑀼𑀲𑀮𑀓𑁆𑀔𑀦𑁆𑀥𑀸 𑀢𑀦𑁆𑀤𑀻 𑀦𑀸𑀫. 𑀢𑀦𑁆𑀤𑀻𑀢𑀺 𑀲𑀪𑀸𑀯𑀦𑀺𑀤𑁆𑀤𑁂𑀲𑁄. 𑀢𑀦𑁆𑀤𑀺𑀬𑀦𑀸𑀢𑀺 𑀆𑀓𑀸𑀭𑀦𑀺𑀁𑀤𑁆𑀤𑁂𑀲𑁄. 𑀢𑀦𑁆𑀤𑀻𑀫𑀦𑀢𑀸𑀢𑀺 𑀢𑀦𑁆𑀤𑀻𑀪𑀽𑀢𑀘𑀺𑀢𑁆𑀢𑀢𑀸. 𑀆𑀮𑀲𑁆𑀬𑀦𑁆𑀢𑀺 𑀅𑀮𑀲𑀪𑀸𑀯𑀸𑀳𑀭𑀡𑀁. 𑀆𑀮𑀲𑁆𑀬𑀸𑀬𑀺𑀢𑀢𑁆𑀢𑀦𑁆𑀢𑀺 𑀅𑀮𑀲𑀪𑀸𑀯𑀧𑁆𑀧𑀢𑁆𑀢𑀺. 𑀓𑀸𑀬𑀯𑀺𑀚𑀫𑁆𑀪𑀦𑀸𑀢𑀺 𑀓𑀸𑀬𑀲𑁆𑀲 𑀯𑀺𑀦𑀸𑀫𑀦𑀸. 𑀅𑀓𑀼𑀲𑀮𑀧𑀓𑁆𑀔𑀸 𑀉𑀓𑁆𑀓𑀡𑁆𑀞𑀺𑀢𑀢𑀸𑀢𑀺 𑀅𑀓𑀼𑀲𑀮𑀧𑀓𑁆𑀔𑀺𑀬𑀸 ¶ 𑀅𑀦𑀪𑀺𑀭𑀢𑀺. 𑀪𑀢𑁆𑀢𑀓𑀺𑀮𑀫𑀣𑁄𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀪𑀢𑁆𑀢𑀯𑀢𑁆𑀣𑀼𑀓𑀲𑁆𑀲 𑀆𑀳𑀸𑀭𑀲𑁆𑀲 𑀯𑀲𑁂𑀦 𑀲𑀭𑀻𑀭𑁂 𑀉𑀧𑁆𑀧𑀚𑁆𑀚𑀦𑀓𑀔𑁂𑀤𑁄. 𑀉𑀧𑀓𑁆𑀓𑀺𑀮𑀺𑀝𑁆𑀞𑁄𑀢𑀺 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂𑀦 𑀉𑀧𑀓𑁆𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑁄. 𑀘𑀺𑀢𑁆𑀢𑀲𑁆𑀲 𑀅𑀲𑀫𑀸𑀳𑀺𑀢𑀢𑁆𑀢𑀸 𑀦𑀺𑀯𑀸𑀭𑀺𑀢𑀧𑀸𑀢𑀼𑀪𑀸𑀯𑁄. 𑀅𑀭𑀺𑀬𑀫𑀕𑁆𑀕𑀲𑁆𑀲 𑀚𑁄𑀢𑀦𑀁 𑀦𑀸𑀫 𑀉𑀧𑁆𑀧𑀚𑁆𑀚𑀦𑀫𑁂𑀯𑀸𑀢𑀺 𑀆𑀳 ‘‘𑀦 𑀚𑁄𑀢𑀢𑀺 ¶ , 𑀦 𑀧𑀸𑀢𑀼𑀪𑀯𑀢𑀻𑀢𑀺 𑀅𑀢𑁆𑀣𑁄’’𑀢𑀺. 𑀦 𑀳𑀺 𑀅𑀭𑀺𑀬𑀫𑀕𑁆𑀕𑁄 𑀚𑁄𑀢𑀺𑀅𑀚𑁄𑀢𑀺𑀦𑀸𑀫𑁄 𑀧𑀯𑀢𑁆𑀢𑀢𑀺.

𑀫𑀕𑁆𑀕𑀲𑀳𑀚𑀸𑀢𑀯𑀻𑀭𑀺𑀬𑁂𑀦𑀸𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑀳𑀚𑀸𑀢𑀯𑀻𑀭𑀺𑀬𑁂𑀦. 𑀫𑀺𑀲𑁆𑀲𑀓𑀫𑀕𑁆𑀕𑁄 𑀳𑀺 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀦𑀻𑀳𑀭𑀺𑀢𑁆𑀯𑀸𑀢𑀺 𑀦𑀻𑀳𑀭𑀡𑀳𑁂𑀢𑀼. 𑀳𑁂𑀢𑀼𑀅𑀢𑁆𑀣𑁄 𑀳𑀺 𑀅𑀬𑀁 𑀢𑁆𑀯𑀸-𑀲𑀤𑁆𑀤𑁄 ‘‘𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁭𑁧) 𑀯𑀺𑀬. 𑀢𑁂𑀦 ‘‘𑀫𑀕𑁆𑀕𑁄 𑀯𑀺𑀲𑀼𑀚𑁆𑀛𑀢𑀻’’𑀢𑀺 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. ‘‘𑀅𑀭𑀺𑀬𑀫𑀕𑁆𑀕𑀁 𑀯𑀺𑀲𑀼𑀚𑁆𑀛𑀢𑀻’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺.

𑀦𑀺𑀤𑁆𑀤𑀸𑀢𑀦𑁆𑀤𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀤𑀼𑀓𑁆𑀓𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭. 𑀤𑀼𑀓𑁆𑀔𑀁 𑀢𑀺𑀢𑀺𑀓𑁆𑀔𑀦𑁆𑀢𑀺 𑀤𑀼𑀢𑁆𑀢𑀺𑀢𑀺𑀓𑁆𑀔𑀁. 𑀢𑀜𑁆𑀘 𑀤𑀼𑀓𑁆𑀔𑀫𑀁 𑀤𑀼𑀲𑁆𑀲𑀳𑀦𑀁 𑀆𑀭𑀫𑁆𑀪𑀯𑀲𑁂𑀦 𑀤𑀼𑀓𑁆𑀓𑀭𑀁, 𑀅𑀦𑀼𑀬𑀼𑀜𑁆𑀚𑀦𑀯𑀲𑁂𑀦 𑀤𑀼𑀢𑁆𑀢𑀺𑀢𑀺𑀓𑁆𑀔𑀦𑁆𑀢𑀺. 𑀅𑀩𑁆𑀬𑀢𑁆𑀢𑁂𑀦𑀸𑀢𑀺 𑀲𑀸𑀫𑀜𑁆𑀜𑀲𑁆𑀲 𑀉𑀧𑀓𑀸𑀭𑀸𑀦𑀼𑀧𑀓𑀸𑀭𑁂 𑀥𑀫𑁆𑀫𑁂 𑀚𑀸𑀦𑀦𑀲𑀫𑀢𑁆𑀣𑀸𑀬 𑀯𑁂𑀬𑁆𑀬𑀢𑁆𑀢𑀺𑀬𑀲𑀗𑁆𑀔𑀸𑀢𑀸𑀬 𑀧𑀜𑁆𑀜𑀸𑀬 𑀅𑀪𑀸𑀯𑀢𑁄 𑀦 𑀩𑁆𑀬𑀢𑁆𑀢𑁂𑀦. 𑀢𑁂𑀦𑀸𑀳 ‘‘𑀩𑀸𑀮𑁂𑀦𑀸’’𑀢𑀺. 𑀬𑀲𑁆𑀫𑀺𑀁 𑀥𑀫𑁆𑀫𑁂 𑀲𑀢𑀺 𑀲𑀫𑀡𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀲𑀸𑀫𑀜𑁆𑀜𑀦𑁆𑀢𑀺 𑀆𑀳 ‘‘𑀲𑀫𑀡𑀥𑀫𑁆𑀫𑁄’’𑀢𑀺. 𑀇𑀫𑀺𑀦𑀸𑀢𑀺 ‘‘𑀤𑀼𑀓𑁆𑀓𑀭𑀁 𑀤𑀼𑀢𑁆𑀢𑀺𑀢𑀺𑀓𑁆𑀔𑀜𑁆𑀘, 𑀅𑀩𑁆𑀬𑀢𑁆𑀢𑁂𑀦 𑀘 𑀲𑀸𑀫𑀜𑁆𑀜’’𑀦𑁆𑀢𑀺 𑀇𑀫𑀺𑀦𑀸 𑀕𑀸𑀣𑀤𑁆𑀥𑁂𑀦 𑀇𑀤𑀁 𑀤𑀲𑁆𑀲𑁂𑀢𑀻𑀢𑀺 𑀇𑀤𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀁 𑀅𑀢𑁆𑀣𑀚𑀸𑀢𑀁 𑀤𑀲𑁆𑀲𑁂𑀢𑀺. 𑀅𑀪𑀺𑀤𑀦𑁆𑀢𑀦𑁆𑀢𑀺 𑀅𑀪𑀺𑀪𑀯𑀦𑀤𑀦𑁆𑀢𑀁, 𑀉𑀧𑀭𑀺𑀤𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀲𑁄 𑀳𑀺 𑀇𑀢𑀭𑀁 𑀫𑀼𑀲𑀮𑀁 𑀯𑀺𑀬 𑀉𑀤𑀼𑀓𑁆𑀔𑀮𑀁 𑀯𑀺𑀲𑁂𑀲𑀢𑁄 𑀓𑀲𑁆𑀲𑀘𑀺 𑀔𑀸𑀤𑀦𑀓𑀸𑀮𑁂 𑀅𑀪𑀺𑀪𑀼𑀬𑁆𑀬 𑀯𑀢𑁆𑀢𑀢𑀺. 𑀆𑀥𑀸𑀬𑀸𑀢𑀺 𑀦𑀺𑀧𑁆𑀧𑀻𑀴𑀦𑀯𑀲𑁂𑀦𑁂𑀯 𑀞𑀧𑁂𑀢𑁆𑀯𑀸. 𑀢𑀸𑀮𑀼𑀁 𑀆𑀳𑀘𑁆𑀘𑀸𑀢𑀺 𑀢𑀸𑀮𑀼𑀧𑀤𑁂𑀲𑀫𑀸𑀳𑀦𑀺𑀢𑁆𑀯𑀸 𑀯𑀺𑀬. 𑀘𑁂𑀢𑀲𑀸𑀢𑀺 𑀓𑀼𑀲𑀮𑀘𑀺𑀢𑁆𑀢𑁂𑀦. 𑀘𑀺𑀢𑁆𑀢𑀦𑁆𑀢𑀺 𑀅𑀓𑀼𑀲𑀮𑀘𑀺𑀢𑁆𑀢𑀁. 𑀅𑀪𑀺𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸𑀢𑀺 𑀬𑀣𑀸 𑀅𑀢𑀺𑀲𑀫𑀼𑀤𑀸𑀘𑀸𑀭𑁄 𑀦 𑀳𑁄𑀢𑀺, 𑀏𑀯𑀁 𑀯𑀺𑀩𑀸𑀥𑀦𑀯𑀲𑁂𑀦 𑀦𑀺𑀕𑁆𑀕𑀳𑁂𑀢𑁆𑀯𑀸. 𑀆𑀧𑀸𑀡𑀓𑁄𑀝𑀺𑀓𑀦𑁆𑀢𑀺 𑀧𑀸𑀡𑀓𑁄𑀝𑀺𑀧𑀭𑀺𑀬𑁄𑀲𑀸𑀦𑀁, 𑀧𑀭𑀺𑀚𑀻𑀯𑀦𑁆𑀢𑀺 𑀅𑀢𑁆𑀣𑁄. 𑀲𑀫𑁆𑀩𑀸𑀥𑁂𑀢𑀻𑀢𑀺 𑀲𑀫𑁆𑀩𑀸𑀥𑁄, 𑀅𑀦𑁆𑀢𑀭𑀸𑀬𑀺𑀓𑁄. 𑀩𑀳𑀽 𑀧𑀭𑀺𑀲𑁆𑀲𑀬𑀸𑀢𑀺 𑀅𑀬𑁄𑀦𑀺𑀲𑁄 𑀓𑀸𑀫𑀯𑀺𑀢𑀓𑁆𑀓𑀸𑀤𑀺𑀯𑀲𑁂𑀦.

𑀧𑀚𑁆𑀚𑀢𑀺 𑀘𑀺𑀢𑁆𑀢𑀫𑁂𑀢𑁆𑀣𑀸𑀢𑀺 𑀧𑀤𑀁, 𑀆𑀭𑀫𑁆𑀫𑀡𑀁. 𑀇𑀭𑀺𑀬𑀸𑀧𑀣𑀁 𑀏𑀯 𑀧𑀤𑀁 𑀇𑀭𑀺𑀬𑀸𑀧𑀣𑀧𑀤𑀁.

𑀕𑀻𑀯𑀸 ¶ 𑀘𑀢𑁆𑀢𑀸𑀭𑁄 𑀧𑀸𑀤𑀸𑀢𑀺 𑀕𑀻𑀯𑀧𑀜𑁆𑀘𑀫𑀸𑀦𑀺. 𑀲𑀫𑁄𑀤𑀳𑀦𑁆𑀢𑀺 𑀯𑀸 𑀲𑀫𑁄𑀥𑀸𑀦𑀳𑁂𑀢𑀽𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 𑁋 ‘‘𑀲𑀫𑁄𑀤𑀳𑀺𑀢𑁆𑀯𑀸 𑀯𑀸’’𑀢𑀺, 𑀲𑀫𑁆𑀫𑀸 𑀑𑀥𑀸𑀬 𑀅𑀦𑁆𑀢𑁄 𑀧𑀯𑁂𑀲𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀲𑀓𑁂 𑀆𑀭𑀫𑁆𑀫𑀡𑀓𑀧𑀸𑀮𑁂𑀢𑀺 𑀕𑁄𑀘𑀭𑀚𑁆𑀛𑀢𑁆𑀢𑀁 𑀯𑀤𑀢𑀺. 𑀲𑀫𑁄𑀤𑀳𑀦𑁆𑀢𑀺 𑀲𑀫𑁄𑀤𑀳𑀦𑁆𑀢𑁄. 𑀅𑀦𑀺𑀲𑁆𑀲𑀺𑀢𑁄𑀢𑀺 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼 𑀓𑀜𑁆𑀘𑀺𑀧𑀺 ¶ 𑀥𑀫𑁆𑀫𑀁 𑀢𑀡𑁆𑀳𑀸𑀤𑀺𑀝𑁆𑀞𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀅𑀦𑀺𑀲𑁆𑀲𑀺𑀢𑁄. 𑀅𑀯𑀺𑀳𑀺𑀁𑀲𑀫𑀸𑀦𑁄 𑀯𑀺𑀳𑀺𑀁𑀲𑀸𑀦𑀺𑀫𑀺𑀢𑁆𑀢𑀸𑀦𑀁 𑀧𑀚𑀳𑀦𑁂𑀦. 𑀉𑀮𑁆𑀮𑀼𑀫𑁆𑀧𑀦𑀲𑀪𑀸𑀯𑀲𑀡𑁆𑀞𑀺𑀢𑁂𑀦𑀸𑀢𑀺 𑀲𑀻𑀮𑀩𑁆𑀬𑀲𑀦𑀢𑁄 𑀉𑀤𑁆𑀥𑀭𑀡𑀭𑀽𑀧𑁂 𑀲𑀡𑁆𑀞𑀺𑀢𑁂𑀦, 𑀓𑀭𑀼𑀡𑀸𑀬𑀼𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀓𑀸𑀭𑀼𑀜𑁆𑀜𑀢𑀁 𑀧𑀝𑀺𑀘𑁆𑀘𑀸’’𑀢𑀺.

𑀤𑀼𑀓𑁆𑀓𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀳𑀺𑀭𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮. 𑀦𑀺𑀲𑁂𑀥𑁂𑀢𑀻𑀢𑀺 𑀦𑀺𑀯𑀸𑀭𑁂𑀢𑀺 𑀧𑀯𑀢𑁆𑀢𑀺𑀢𑀼𑀁 𑀦 𑀤𑁂𑀢𑀺. 𑀧𑀼𑀘𑁆𑀙𑀢𑀺 𑀤𑁂𑀯𑀢𑀸. 𑀅𑀧𑀳𑀭𑀦𑁆𑀢𑁄𑀢𑀺 𑀅𑀧𑀦𑁂𑀦𑁆𑀢𑁄, 𑀬𑀣𑀸 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀓𑁆𑀓𑁄𑀲𑀯𑀢𑁆𑀣𑀼 𑀦 𑀳𑁄𑀢𑀺, 𑀏𑀯𑀁 𑀧𑀭𑀺𑀳𑀭𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀩𑀼𑀚𑁆𑀛𑀢𑀺 𑀲𑀸𑀭𑀣𑀺𑀯𑀺𑀥𑀁. 𑀅𑀢𑁆𑀢𑀦𑀺 𑀦𑀺𑀧𑀸𑀢𑀁 𑀦 𑀤𑁂𑀢𑀺, 𑀆𑀚𑀸𑀦𑀻𑀬𑁄 𑀳𑀺 𑀬𑀼𑀢𑁆𑀢𑀁 𑀧𑀚𑀸𑀦𑀸𑀢𑀺. 𑀅𑀪𑀽𑀢𑁂𑀦 𑀅𑀪𑀽𑀢𑀓𑁆𑀓𑁄𑀲𑁂𑀦 𑀧𑀭𑀺𑀫𑀼𑀢𑁆𑀢𑁄 𑀦𑀸𑀫 𑀦𑀢𑁆𑀣𑀺 𑀩𑀸𑀮𑀸𑀦𑀜𑁆𑀘 𑀚𑀦𑀸𑀦𑀁 𑀧𑀭𑀸𑀧𑀯𑀸𑀤𑁂 𑀬𑀼𑀢𑁆𑀢𑀧𑀬𑀼𑀢𑁆𑀢𑀪𑀸𑀯𑀢𑁄. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀦𑀺𑀦𑁆𑀤𑀦𑁆𑀢𑀺 𑀢𑀼𑀡𑁆𑀳𑀺𑀫𑀸𑀲𑀻𑀦𑀁, 𑀦𑀺𑀦𑁆𑀤𑀦𑁆𑀢𑀺 𑀩𑀳𑀼𑀪𑀸𑀡𑀺𑀦𑀁;

𑀫𑀺𑀢𑀪𑀸𑀡𑀺𑀫𑁆𑀧𑀺 𑀦𑀺𑀦𑁆𑀤𑀦𑁆𑀢𑀺, 𑀦𑀢𑁆𑀣𑀺 𑀮𑁄𑀓𑁂 𑀅𑀦𑀺𑀦𑁆𑀤𑀺𑀢𑁄’’𑀢𑀺. (𑀥. 𑀧. 𑁨𑁨𑁭);

𑀢𑀦𑀼𑀬𑀸𑀢𑀺 𑀯𑀸 𑀓𑀢𑀺𑀧𑀬𑀸. 𑀢𑁂𑀦𑀸𑀳 ‘‘𑀅𑀧𑁆𑀧𑀓𑀸’’𑀢𑀺. 𑀲𑀤𑀸 𑀲𑀢𑀸𑀢𑀺 𑀳𑀺𑀭𑀺𑀦𑀺𑀲𑁂𑀥𑀪𑀸𑀯𑁂 𑀓𑀸𑀭𑀡𑀯𑀘𑀦𑀁. 𑀧𑀧𑁆𑀧𑀼𑀬𑁆𑀬𑀸𑀢𑀺 𑀧𑀢𑁆𑀯𑀸 𑀅𑀥𑀺𑀕𑀦𑁆𑀢𑁆𑀯𑀸. 𑀯𑀸𑀦𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀦𑀺𑀩𑁆𑀩𑀸𑀦𑀁, 𑀅𑀲𑀗𑁆𑀔𑀢𑀥𑀸𑀢𑀼.

𑀳𑀺𑀭𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀓𑀼𑀝𑀺𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯. 𑀅𑀦𑁆𑀢𑁄𑀢𑀺 𑀓𑀼𑀘𑁆𑀙𑀺𑀅𑀩𑁆𑀪𑀦𑁆𑀢𑀭𑁂. 𑀯𑀲𑀦𑀝𑁆𑀞𑀸𑀦𑀝𑁆𑀞𑁂𑀦𑀸𑀢𑀺 𑀯𑀲𑀦𑀪𑀸𑀯𑁂𑀦. 𑀓𑀼𑀮𑀧𑀯𑁂𑀡𑀺𑀦𑁆𑀢𑀺 𑀓𑀼𑀮𑀸𑀘𑀸𑀭𑀁 𑀓𑀼𑀮𑀢𑀦𑁆𑀢𑀺𑀁. 𑀲𑀦𑁆𑀢𑀸𑀦𑀓𑀝𑁆𑀞𑁂𑀦𑀸𑀢𑀺 𑀓𑀼𑀮𑀲𑀦𑁆𑀢𑀢𑀺𑀬𑀸 𑀩𑀦𑁆𑀥𑀦𑀪𑀸𑀯𑁂𑀦 ¶ . 𑀏𑀯𑀁 𑀲𑀩𑁆𑀩𑀧𑀤𑁂𑀳𑀺 𑀧𑀼𑀘𑁆𑀙𑀺𑀢𑀢𑁆𑀣𑀲𑁆𑀲 𑀅𑀦𑀼𑀚𑀸𑀦𑀦𑀯𑀲𑁂𑀦 ‘‘𑀏𑀓𑀁𑀲𑀯𑀘𑀦𑁂 𑀦𑀺𑀧𑀸𑀢𑁄’’𑀢𑀺 𑀯𑀼𑀢𑁆𑀢𑀁. 𑀆𑀧𑀸𑀤𑀺𑀓𑀸 𑀧𑁄𑀲𑀺𑀓𑀸 𑀫𑀸𑀢𑀼𑀘𑁆𑀙𑀸 𑀫𑀳𑀸𑀧𑀚𑀸𑀧𑀢𑀺 𑀫𑀸𑀢𑀸 𑀏𑀯𑀸𑀢𑀺 𑀓𑀢𑁆𑀯𑀸 ‘‘𑀧𑀳𑀸𑀬 𑀧𑀩𑁆𑀩𑀚𑀺𑀢𑀢𑁆𑀢𑀸’’𑀢𑀺 𑀅𑀯𑀺𑀲𑁂𑀲𑀢𑁄 𑀯𑀼𑀢𑁆𑀢𑀁. 𑀧𑀳𑀸𑀬 𑀧𑀩𑁆𑀩𑀚𑀺𑀢𑀢𑁆𑀢𑀸 𑀦𑀢𑁆𑀣𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀧𑀼𑀦 𑀫𑀸𑀢𑀼𑀓𑀼𑀘𑁆𑀙𑀺𑀯𑀸𑀲𑀸𑀤𑀻𑀦𑀁 𑀅𑀪𑀸𑀯𑀯𑀘𑀦𑁂𑀦𑁂𑀯 𑀯𑀝𑁆𑀝𑀫𑁆𑀳𑀺 𑀩𑀦𑁆𑀥𑀦𑀲𑁆𑀲 𑀅𑀪𑀸𑀯𑁄 𑀤𑀻𑀧𑀺𑀢𑁄 𑀳𑁄𑀢𑀻𑀢𑀺 𑀦 𑀕𑀳𑀺𑀢𑁄. 𑀅𑀬𑀁 𑀓𑀺𑀭 𑀤𑁂𑀯𑀢𑀸 𑀬𑀣𑀸 𑀧𑀼𑀣𑀼𑀚𑁆𑀚𑀦𑀸 𑀩𑀼𑀤𑁆𑀥𑀸𑀦𑀁 𑀕𑀼𑀡𑁂 𑀦 𑀚𑀸𑀦𑀦𑁆𑀢𑀺, 𑀏𑀯𑀁 𑀦 𑀚𑀸𑀦𑀸𑀢𑀺, 𑀢𑀲𑁆𑀫𑀸 ‘‘𑀫𑀬𑀸 𑀲𑀦𑁆𑀦𑀸𑀳𑀁 𑀩𑀦𑁆𑀥𑀺𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳.

𑀓𑀼𑀝𑀺𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀫𑀺𑀤𑁆𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦. 𑀢𑀧𑀦𑀪𑀸𑀯𑁂𑀦 ¶ 𑀢𑀧𑀦𑁄𑀤𑀓𑀢𑁆𑀢𑀸 𑀢𑀧𑁄𑀤𑀸𑀢𑀺 𑀢𑀲𑁆𑀲 𑀭𑀳𑀤𑀲𑁆𑀲 𑀦𑀸𑀫𑀁. 𑀢𑁂𑀦𑀸𑀳 ‘‘𑀢𑀢𑁆𑀢𑁄𑀤𑀓𑀲𑁆𑀲 𑀭𑀳𑀤𑀲𑁆𑀲𑀸’’𑀢𑀺. 𑀢𑀢𑁄𑀢𑀺 𑀦𑀸𑀕𑀪𑀯𑀦𑁂 𑀉𑀤𑀓𑀭𑀳𑀤𑀢𑁄 𑀢𑀧𑁄𑀤𑀸 𑀦𑀸𑀫 𑀦𑀤𑀻 𑀲𑀦𑁆𑀤𑀢𑀺. 𑀲𑀸 𑀳𑀺 𑀦𑀤𑀻 𑀪𑀽𑀫𑀺𑀢𑀮𑀁 𑀆𑀭𑁄𑀳𑀢𑀺. ‘‘𑀏𑀤𑀺𑀲𑀸 𑀚𑀸𑀢𑀸’’𑀢𑀺 𑀯𑀘𑀦𑀲𑁂𑀲𑁄. 𑀧𑁂𑀢𑀮𑁄𑀓𑁄𑀢𑀺 𑀮𑁄𑀳𑀓𑀼𑀫𑁆𑀪𑀺𑀦𑀺𑀭𑀬𑀸 𑀇𑀥𑀸𑀥𑀺𑀧𑁆𑀧𑁂𑀢𑀸𑀢𑀺 𑀯𑀤𑀦𑁆𑀢𑀺. 𑀭𑀳𑀤𑀲𑁆𑀲 𑀧𑀦 𑀆𑀤𑀺𑀢𑁄 𑀧𑀩𑁆𑀩𑀢𑀧𑀸𑀤𑀯𑀦𑀦𑁆𑀢𑀭𑁂𑀲𑀼 𑀩𑀳𑀽 𑀧𑁂𑀢𑀸 𑀯𑀺𑀳𑀭𑀦𑁆𑀢𑀺, 𑀲𑁆𑀯𑀸𑀬𑀫𑀢𑁆𑀣𑁄 𑀧𑁂𑀢𑀯𑀢𑁆𑀣𑀼𑀧𑀸𑀴𑀺𑀬𑀸 𑀮𑀓𑁆𑀔𑀡𑀲𑀁𑀬𑀼𑀢𑁆𑀢𑁂𑀦 𑀘 𑀤𑀻𑀧𑁂𑀢𑀩𑁆𑀩𑁄. 𑀬𑀢𑀸𑀬𑀦𑁆𑀢𑀺 𑀬𑀢𑁄 𑀭𑀳𑀤𑀢𑁄 𑀅𑀬𑀁. 𑀲𑀸𑀢𑁄𑀤𑀓𑁄𑀢𑀺 𑀫𑀥𑀼𑀭𑁄𑀤𑀓𑁄. 𑀲𑁂𑀢𑁄𑀤𑀓𑁄𑀢𑀺 𑀧𑀭𑀺𑀲𑀼𑀤𑁆𑀥𑁄𑀤𑀓𑁄, 𑀅𑀦𑀸𑀯𑀺𑀮𑁄𑀤𑀓𑁄𑀢𑀺 𑀅𑀢𑁆𑀣𑁄. 𑀢𑀢𑁄𑀢𑀺 𑀢𑀧𑁄𑀤𑀸𑀦𑀤𑀺𑀢𑁄.

𑀲𑀫𑀺𑀤𑁆𑀥𑁄𑀢𑀺 𑀅𑀯𑀬𑀯𑀸𑀦𑀁 𑀲𑀫𑁆𑀧𑀼𑀡𑁆𑀡𑀢𑀸𑀬 𑀲𑀁𑀲𑀺𑀤𑁆𑀥𑀺𑀬𑀸𑀯 𑀲𑀫𑁆𑀫𑀸 𑀇𑀤𑁆𑀥𑁄. 𑀢𑁂𑀦𑀸𑀳 ‘‘𑀅𑀪𑀺𑀭𑀽𑀧𑁄’’𑀢𑀺𑀆𑀤𑀺. 𑀧𑀥𑀸𑀦𑁂 𑀲𑀫𑁆𑀫𑀲𑀦𑀥𑀫𑁆𑀫𑁂 𑀦𑀺𑀬𑀼𑀢𑁆𑀢𑁄, 𑀢𑀁 𑀯𑀸 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀧𑀥𑀸𑀦𑀺𑀓𑁄. 𑀲𑁂𑀦𑀸𑀲𑀦𑀁 𑀲𑀼𑀝𑁆𑀞𑀧𑀺𑀢𑀤𑁆𑀯𑀸𑀭𑀯𑀸𑀢𑀧𑀸𑀦𑀁, 𑀢𑁂𑀲𑀁 𑀧𑀺𑀤𑀳𑀦𑁂𑀦 𑀉𑀢𑀼𑀁 𑀕𑀸𑀳𑀸𑀧𑁂𑀢𑁆𑀯𑀸.

𑀧𑀼𑀩𑁆𑀩𑀸𑀧𑀬𑀫𑀸𑀦𑁄𑀢𑀺 𑀦𑁆𑀳𑀸𑀦𑀢𑁄 𑀧𑀼𑀩𑁆𑀩𑀪𑀸𑀕𑁂 𑀯𑀺𑀬 𑀯𑁄𑀤𑀓𑀪𑀸𑀯𑀁 𑀆𑀧𑀚𑁆𑀚𑀫𑀸𑀦𑁄 𑀕𑀫𑁂𑀦𑁆𑀢𑁄. 𑀅𑀯𑀢𑁆𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣…𑀧𑁂… 𑀦 𑀑𑀢𑀭𑀺𑀢𑀩𑁆𑀩’’𑀦𑁆𑀢𑀺 𑀧𑀞𑀫𑀁 𑀯𑀼𑀢𑁆𑀢𑀁. 𑀲𑀩𑁆𑀩𑀤𑀺𑀲𑀸𑀧𑀮𑁄𑀓𑀦𑀁 𑀬𑀣𑀸 𑀦𑁆𑀳𑀸𑀬𑀦𑀝𑁆𑀞𑀸𑀦𑀲𑁆𑀲 𑀫𑀦𑀼𑀲𑁆𑀲𑁂𑀳𑀺 𑀯𑀺𑀯𑀺𑀢𑁆𑀢𑀪𑀸𑀯𑀚𑀸𑀦𑀦𑀢𑁆𑀣𑀁. 𑀔𑀸𑀡𑀼𑀆𑀤𑀺𑀯𑀯𑀢𑁆𑀣𑀸𑀧𑀦𑀁 𑀘𑀻𑀯𑀭𑀸𑀤𑀻𑀦𑀁 𑀞𑀧𑀦𑀢𑁆𑀣𑀁 𑀉𑀤𑀓𑀲𑀫𑀻𑀧𑁂𑀢𑀺 ¶ 𑀅𑀥𑀺𑀧𑁆𑀧𑀸𑀬𑁄. 𑀉𑀓𑁆𑀓𑀸𑀲𑀦𑀁 𑀅𑀫𑀦𑀼𑀲𑁆𑀲𑀸𑀦𑀁 𑀅𑀧𑀕𑀫𑀦𑀢𑁆𑀣𑀁. 𑀅𑀯𑀓𑀼𑀚𑁆𑀚𑀝𑁆𑀞𑀸𑀦𑀁 𑀢𑀗𑁆𑀔𑀡𑁂𑀧𑀺 𑀉𑀧𑀭𑀺𑀫𑀓𑀸𑀬𑀲𑁆𑀲 𑀉𑀚𑀼𑀓𑀁 𑀅𑀯𑀺𑀯𑀝𑀓𑀭𑀡𑀢𑁆𑀣𑀁. 𑀘𑀻𑀯𑀭𑀧𑀺𑀝𑁆𑀞𑁂𑀬𑁂𑀯 𑀞𑀧𑁂𑀢𑀩𑁆𑀩𑀁 𑀬𑀢𑁆𑀣 𑀯𑀸 𑀢𑀢𑁆𑀣 𑀯𑀸 𑀅𑀝𑁆𑀞𑀧𑁂𑀢𑁆𑀯𑀸. 𑀉𑀤𑀓𑀦𑁆𑀢𑁂𑀢𑀺 𑀉𑀤𑀓𑀲𑀫𑀻𑀧𑁂. 𑀲𑀺𑀦𑁆𑀦𑀝𑁆𑀞𑀸𑀦𑀦𑁆𑀢𑀺 𑀲𑁂𑀤𑀕𑀢𑀧𑀤𑁂𑀲𑁄. 𑀧𑀲𑀸𑀭𑁂𑀢𑀩𑁆𑀩𑀁 𑀢𑀲𑁆𑀲 𑀲𑀼𑀓𑁆𑀔𑀸𑀧𑀦𑀢𑁆𑀣𑀁. 𑀲𑀁𑀳𑀭𑀺𑀢𑁆𑀯𑀸 𑀞𑀧𑀦𑀁 𑀧𑀼𑀦 𑀲𑀼𑀔𑁂𑀦 𑀕𑀳𑁂𑀢𑁆𑀯𑀸 𑀦𑀺𑀯𑀸𑀲𑀦𑀢𑁆𑀣𑀁. 𑀦𑀸𑀪𑀺𑀧𑁆𑀧𑀫𑀸𑀡𑀫𑀢𑁆𑀢𑀁 𑀑𑀢𑀭𑀡𑀁 𑀢𑀸𑀯𑀢𑀸 𑀉𑀤𑀓𑀧𑀝𑀺𑀘𑁆𑀙𑀸𑀤𑀺𑀮𑀓𑁆𑀔𑀡𑀧𑁆𑀧𑀢𑁆𑀢𑀢𑁄. 𑀯𑀻𑀘𑀺𑀁 𑀅𑀦𑀼𑀝𑁆𑀞𑀸𑀧𑁂𑀦𑁆𑀢𑁂𑀦𑀸𑀢𑀺𑀆𑀤𑀺 𑀲𑀁𑀬𑀢𑀓𑀸𑀭𑀺𑀢𑀸𑀤𑀲𑁆𑀲𑀦𑀁. 𑀦𑀺𑀯𑀸𑀲𑀦𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀦𑁆𑀢𑀭𑀯𑀸𑀲𑀓𑀁 𑀓𑀝𑀺𑀧𑁆𑀧𑀤𑁂𑀲𑀲𑁆𑀲 𑀬𑀣𑀸 𑀧𑀭𑀺𑀢𑁄 𑀳𑁄𑀢𑀺, 𑀏𑀯𑀁 𑀔𑀺𑀧𑀺𑀢𑁆𑀯𑀸 𑀧𑀭𑀺𑀯𑀲𑀺𑀢𑁆𑀯𑀸.

𑀲𑀭𑀻𑀭𑀯𑀡𑁆𑀡𑁄𑀧𑀺 𑀯𑀺𑀧𑁆𑀧𑀲𑀻𑀤𑀺 𑀲𑀫𑁆𑀫𑀤𑁂𑀯 𑀪𑀸𑀯𑀦𑀸𑀦𑀼𑀲𑁆𑀲𑀢𑀺𑀫𑁆𑀧𑀺 𑀯𑀺𑀦𑁆𑀤𑀦𑁆𑀢𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀫𑀦𑀁 𑀦𑀺𑀕𑁆𑀕𑀳𑁂𑀢𑀼𑀦𑁆𑀢𑀺 𑀓𑀺𑀮𑁂𑀲𑀯𑀲𑀁 𑀕𑀢𑀁 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀦𑀺𑀕𑁆𑀕𑀡𑁆𑀳𑀺𑀢𑀼𑀁. 𑀓𑀸𑀫𑀽𑀧𑀦𑀻𑀢𑀸𑀢𑀺 𑀓𑀸𑀫𑀁 𑀉𑀧𑀕𑀢𑀘𑀺𑀢𑁆𑀢𑀸. 𑀅𑀣 𑀯𑀸 𑀓𑀺𑀮𑁂𑀲𑀓𑀸𑀫𑁂𑀦 𑀣𑁂𑀭𑁂 𑀉𑀧𑀦𑀻𑀢𑀘𑀺𑀢𑁆𑀢𑀸.

𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸𑀢𑀺 𑀅𑀦𑀦𑀼𑀪𑁄𑀢𑁆𑀯𑀸. 𑀅𑀦𑀼𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑀢𑁄 𑀆𑀧𑀦𑁆𑀦𑀫𑁂𑀯𑀸𑀢𑀺 𑀆𑀳 ‘‘𑀧𑀜𑁆𑀘𑀓𑀸𑀫𑀕𑀼𑀡𑁂’’𑀢𑀺 ¶ . 𑀪𑀺𑀓𑁆𑀔𑀲𑀻𑀢𑀺 𑀬𑀸𑀘𑀲𑀺. 𑀢𑀜𑁆𑀘 𑀪𑀺𑀓𑁆𑀔𑀸𑀘𑀭𑀺𑀬𑀯𑀲𑁂𑀦𑀸𑀢𑀺 𑀆𑀳 ‘‘𑀧𑀺𑀡𑁆𑀟𑀸𑀬 𑀘𑀭𑀲𑀻’’𑀢𑀺. 𑀓𑀸𑀫𑀧𑀭𑀺𑀪𑁄𑀕𑀕𑀭𑀼𑀕𑀫𑀦𑀓𑀸𑀮𑁄 𑀦𑀸𑀫 𑀯𑀺𑀲𑁂𑀲𑀢𑁄 𑀧𑀞𑀫𑀬𑁄𑀩𑁆𑀩𑀦𑀸𑀯𑀢𑁆𑀣𑀸𑀢𑀺 𑀆𑀳 ‘‘𑀤𑀳𑀭𑀬𑁄𑀩𑁆𑀩𑀦𑀓𑀸𑀮𑁄’’𑀢𑀺. 𑀑𑀪𑀕𑁆𑀕𑁂𑀦𑀸𑀢𑀺 𑀫𑀚𑁆𑀛𑁂 𑀲𑀁𑀪𑀕𑁆𑀕𑀓𑀸𑀬𑁂𑀦. 𑀚𑀺𑀡𑁆𑀡𑀓𑀸𑀮𑁂 𑀳𑀺 𑀲𑀢𑁆𑀢𑀸𑀦𑀁 𑀓𑀝𑀺𑀬𑀁 𑀓𑀸𑀬𑁄 𑀑𑀪𑀕𑁆𑀕𑁄 𑀳𑁄𑀢𑀺.

𑀯𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁 ‘‘𑀬𑁂 𑀳𑀺 𑀯𑁄 𑀅𑀭𑀺𑀬𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀲𑀢𑁆𑀢𑀸𑀦𑀦𑁆𑀢𑀺 𑀲𑀸𑀫𑀜𑁆𑀜𑀯𑀘𑀦𑀁, 𑀦 𑀫𑀦𑀼𑀲𑁆𑀲𑀸𑀦𑀁 𑀏𑀯. 𑀤𑁂𑀳𑀦𑀺𑀓𑁆𑀔𑁂𑀧𑀦𑀦𑁆𑀢𑀺 𑀓𑀴𑁂𑀯𑀭𑀝𑁆𑀞𑀧𑀺𑀢𑀝𑁆𑀞𑀸𑀦𑀁. 𑀦𑀢𑁆𑀣𑀺 𑀏𑀢𑁂𑀲𑀁 𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀦𑀺𑀫𑀺𑀢𑁆𑀢𑀸, ‘‘𑀏𑀢𑁆𑀢𑀓𑀁 𑀅𑀬𑀁 𑀚𑀻𑀯𑀢𑀻’’𑀢𑀺𑀆𑀤𑀺𑀦𑀸 𑀲𑀜𑁆𑀚𑀸𑀦𑀦𑀦𑀺𑀫𑀺𑀢𑁆𑀢𑀭𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀦 𑀦𑀸𑀬𑀭𑁂𑀢𑀺 𑀦 𑀜𑀸𑀬𑀦𑁆𑀢𑀺. 𑀇𑀢𑁄 𑀧𑀭𑀦𑁆𑀢𑀺 𑀏𑀢𑁆𑀣 𑀧𑀭𑀦𑁆𑀢𑀺 𑀅𑀜𑁆𑀜𑀁 𑀓𑀸𑀮𑀁. 𑀢𑁂𑀦 𑀑𑀭𑀓𑀸𑀮𑀲𑁆𑀲𑀧𑀺 𑀲𑀗𑁆𑀕𑀳𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀧𑀭𑀫𑀸𑀬𑀼𑀦𑁄 𑀑𑀭𑀓𑀸𑀮𑁂 𑀏𑀯 𑀘𑁂𑀢𑁆𑀣 𑀧𑀭𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁 𑀢𑀢𑁄 𑀧𑀭𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀲𑁆𑀲 𑀅𑀪𑀸𑀯𑀢𑁄. 𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄𑀢𑀺 𑀓𑀸𑀮𑀯𑀲𑁂𑀦 𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄. 𑀯𑀯𑀢𑁆𑀣𑀸𑀦𑀦𑁆𑀢𑀺 𑀘𑁂𑀢𑁆𑀣 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀅𑀲𑀗𑁆𑀓𑀭𑀢𑁄 𑀯𑀯𑀢𑁆𑀣𑀸𑀦𑀁, 𑀦𑀺𑀘𑁆𑀙𑀬𑁄 𑀯𑀸. 𑀅𑀩𑁆𑀩𑀼𑀤𑀧𑁂𑀲𑀻𑀢𑀺𑀆𑀤𑀻𑀲𑀼 𑀅𑀩𑁆𑀩𑀼𑀤𑀓𑀸𑀮𑁄 𑀧𑁂𑀲𑀺𑀓𑀸𑀮𑁄𑀢𑀺𑀆𑀤𑀺𑀦𑀸 𑀓𑀸𑀮-𑀲𑀤𑁆𑀤𑁄 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. 𑀓𑀸𑀮𑁄𑀢𑀺 𑀇𑀥 𑀧𑀼𑀩𑁆𑀩𑀡𑁆𑀳𑀸𑀤𑀺𑀯𑁂𑀮𑀸 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀦𑀸𑀳 𑀧𑀼𑀩𑁆𑀩𑀡𑁆𑀳𑁂𑀧𑀺 𑀳𑀻𑀢𑀺𑀆𑀤𑀺 ¶ . 𑀇𑀥𑁂𑀯 𑀤𑁂𑀳𑁂𑀦 𑀧𑀢𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀦𑁂𑀓𑀧𑁆𑀧𑀓𑀸𑀭𑀢𑁄𑀢𑀺 𑀦𑀕𑀭𑁂 𑀚𑀸𑀢𑀸𑀦𑀁 𑀕𑀸𑀫𑁂, 𑀕𑀸𑀫𑁂 𑀚𑀸𑀢𑀸𑀦𑀁 𑀦𑀕𑀭𑁂, 𑀯𑀦𑁂 𑀚𑀸𑀢𑀸𑀦𑀁 𑀚𑀦𑀧𑀤𑁂, 𑀚𑀦𑀧𑀤𑁂 𑀚𑀸𑀢𑀸𑀦𑀁 𑀯𑀦𑁂𑀢𑀺𑀆𑀤𑀺𑀦𑀸 𑀅𑀦𑁂𑀓𑀧𑁆𑀧𑀓𑀸𑀭𑀢𑁄. 𑀇𑀢𑁄 𑀘𑀼𑀢𑁂𑀦𑀸𑀢𑀺 𑀇𑀢𑁄 𑀕𑀢𑀺𑀢𑁄 𑀘𑀼𑀢𑁂𑀦. 𑀇𑀥 𑀇𑀫𑀺𑀲𑁆𑀲𑀁 𑀕𑀢𑀺𑀬𑀁. 𑀬𑀦𑁆𑀢𑁂 𑀬𑀼𑀢𑁆𑀢𑀕𑁄𑀡𑁄 𑀯𑀺𑀬𑀸𑀢𑀺 𑀬𑀣𑀸 𑀬𑀦𑁆𑀢𑁂 𑀬𑀼𑀢𑁆𑀢𑀕𑁄𑀡𑁄 𑀬𑀦𑁆𑀢𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀏𑀯𑀁 𑀓𑀸𑀮𑁄 𑀕𑀢𑀺𑀧𑀜𑁆𑀘𑀓𑀦𑁆𑀢𑀺 𑀏𑀯𑀁 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀬𑀁 𑀓𑀸𑀮𑁄𑀢𑀺 𑀅𑀬𑀁 𑀫𑀭𑀡𑀓𑀸𑀮𑁄. 𑀧𑀘𑁆𑀙𑀺𑀫𑁂 𑀓𑀸𑀮𑁂𑀢𑀺 𑀧𑀘𑁆𑀙𑀺𑀫𑁂 𑀯𑀬𑁂. 𑀢𑀺𑀲𑁆𑀲𑁄 𑀯𑀬𑁄𑀲𑀻𑀫𑀸𑀢𑀺. 𑀧𑀞𑀫𑀸𑀤𑀺𑀓𑀸 𑀢𑀺𑀲𑁆𑀲𑁄 𑀯𑀬𑀲𑁆𑀲 𑀲𑀻𑀫𑀸 𑀅𑀢𑀺𑀓𑁆𑀓𑀦𑁆𑀢𑁂𑀦. 𑀧𑀼𑀭𑀺𑀫𑀸𑀦𑀁 𑀳𑀺 𑀤𑁆𑀯𑀺𑀦𑁆𑀦𑀁 𑀯𑀬𑀸𑀦𑀁 𑀲𑀩𑁆𑀩𑀲𑁄 𑀲𑀻𑀫𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀘𑁆𑀙𑀺𑀫𑀲𑁆𑀲 𑀆𑀤𑀺𑀲𑀻𑀫𑀁 𑀅𑀢𑀺𑀓𑁆𑀓𑀦𑁆𑀢𑁄 𑀢𑀣𑀸 𑀯𑀼𑀢𑁆𑀢𑁄. ‘‘𑀅𑀬𑀜𑁆𑀳𑀺 𑀲𑀫𑀡𑀥𑀫𑁆𑀫𑁄…𑀧𑁂… 𑀦 𑀲𑀓𑁆𑀓𑀸 𑀓𑀸𑀢𑀼’’𑀦𑁆𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀢𑀤𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑀡𑁆𑀳𑀺𑀢𑀼𑀦𑁆𑀢𑀺 𑀧𑀸𑀴𑀺𑀢𑁄 𑀅𑀢𑁆𑀣𑀢𑁄 𑀘 𑀳𑀤𑀬𑁂 𑀞𑀧𑀦𑀯𑀲𑁂𑀦 𑀕𑀡𑁆𑀳𑀺𑀢𑀼𑀁. 𑀧𑀭𑀺𑀪𑀼𑀜𑁆𑀚𑀺𑀢𑀼𑀦𑁆𑀢𑀺 𑀯𑀼𑀢𑁆𑀢𑀥𑀫𑁆𑀫𑀧𑀭𑀺𑀳𑀭𑀡𑀲𑀼𑀔𑀁 𑀅𑀦𑀼𑀪𑀯𑀺𑀢𑀼𑀁. 𑀏𑀓𑀲𑁆𑀲 𑀓𑀣𑀦𑀢𑁄 𑀧𑀞𑀫𑀁 𑀕𑀸𑀣𑀁 𑀲𑀼𑀢𑁆𑀢𑀁 𑀯𑀸 𑀉𑀲𑁆𑀲𑀸𑀭𑁂𑀢𑀺, 𑀢𑀲𑁆𑀫𑀺𑀁 𑀦𑀺𑀝𑁆𑀞𑀺𑀢𑁂 𑀇𑀢𑀭𑁄 𑀥𑀫𑁆𑀫𑀓𑀣𑀺𑀓𑁄 𑀢𑀁𑀬𑁂𑀯 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀥𑀫𑁆𑀫𑀁 𑀓𑀣𑁂𑀢𑀺, 𑀅𑀬𑀁 𑀲𑀭𑀪𑀸𑀡𑀥𑀫𑁆𑀫𑀓𑀣𑀸. 𑀲𑀼𑀢𑁆𑀢𑀕𑁂𑀬𑁆𑀬𑀸𑀦𑀼𑀲𑀸𑀭𑁂𑀦 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀉𑀲𑁆𑀲𑀸𑀭𑀡𑀁 𑀲𑀭𑀪𑀜𑁆𑀜𑀥𑀫𑁆𑀫𑀓𑀣𑀸. ‘‘𑀫𑀸 𑀫𑀁 𑀓𑀸𑀮𑁄 𑀉𑀧𑀘𑁆𑀘𑀕𑀸’’𑀢𑀺 𑀯𑀤𑀦𑁆𑀢𑁄 ‘‘𑀲𑀫𑀡𑀥𑀫𑁆𑀫𑀲𑁆𑀲 𑀓𑀭𑀡𑀲𑁆𑀲 𑀅𑀬𑀁 𑀫𑁂 𑀓𑀸𑀮𑁄’’𑀢𑀺 𑀓𑀣𑁂𑀢𑀺, 𑀢𑀢𑁄 𑀧𑀭𑁄 ‘‘𑀧𑀘𑁆𑀙𑀺𑀫𑀯𑀬𑁄 𑀅𑀜𑁆𑀜𑁄 𑀓𑀸𑀮𑁄’’𑀢𑀺 𑀓𑀣𑁂𑀢𑀺. ‘‘𑀓𑀸𑀮𑀁 𑀯𑁄𑀳𑀁…𑀧𑁂… 𑀢𑀲𑁆𑀫𑀸 𑀅𑀪𑀼𑀢𑁆𑀯𑀸 𑀪𑀺𑀓𑁆𑀔𑀸𑀫𑀻’’𑀢𑀺 𑀯𑀤𑀦𑁆𑀢𑁄 𑀅𑀢𑁆𑀢𑀦𑀸 𑀓𑀢𑀁 𑀧𑀝𑀺𑀧𑀢𑁆𑀢𑀺𑀜𑁆𑀘 𑀲𑀳𑁂𑀢𑀼𑀓𑀁 𑀲𑀸𑀦𑀺𑀲𑀁𑀲𑀁 𑀓𑀣𑁂𑀢𑀺.

𑀢𑀁 ¶ 𑀕𑀸𑀭𑀯𑀓𑀸𑀭𑀡𑀁 𑀲𑀦𑁆𑀥𑀸𑀬. 𑀏𑀢𑀦𑁆𑀢𑀺 ‘‘𑀅𑀣 𑀔𑁄 𑀲𑀸 𑀤𑁂𑀯𑀢𑀸 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀳𑀺𑀢𑁆𑀯𑀸’’𑀢𑀺 𑀏𑀢𑀁 𑀯𑀼𑀢𑁆𑀢𑀁. 𑀤𑀳𑀭𑁄 𑀢𑁆𑀯𑀦𑁆𑀢𑀺𑀆𑀤𑀺𑀫𑀸𑀳 𑀮𑁄𑀪𑀸𑀪𑀺𑀪𑀽𑀢𑀢𑀸𑀬 𑀅𑀥𑀺𑀕𑀢𑀢𑁆𑀢𑀸. 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀼𑀢𑁆𑀢𑁄𑀢𑀺 𑀪𑁄𑀕𑀲𑀫𑁆𑀧𑀤𑀸 𑀧𑀭𑀺𑀯𑀸𑀭𑀲𑀫𑁆𑀧𑀤𑀸𑀢𑀺 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀳𑀺 𑀬𑀼𑀢𑁆𑀢𑁄. 𑀅𑀮𑀗𑁆𑀓𑀸𑀭𑀧𑀭𑀺𑀳𑀸𑀭𑀦𑁆𑀢𑀺 𑀅𑀮𑀗𑁆𑀓𑀸𑀭𑀓𑀭𑀡𑀁. 𑀅𑀦𑀺𑀓𑁆𑀓𑀻𑀴𑀺𑀢𑀸𑀯𑀻𑀢𑀺 𑀅𑀓𑀻𑀴𑀺𑀢𑀧𑀼𑀩𑁆𑀩𑁄. 𑀓𑀻𑀴𑀦𑀜𑁆𑀘𑁂𑀢𑁆𑀣 𑀓𑀸𑀫𑀸𑀦𑀁 𑀧𑀭𑀺𑀪𑁄𑀕𑁄𑀢𑀺 𑀆𑀳 ‘‘𑀅𑀪𑀼𑀢𑁆𑀢𑀸𑀯𑀻’’𑀢𑀺. 𑀅𑀓𑀢𑀓𑀸𑀫𑀓𑀻𑀴𑁄𑀢𑀺 𑀅𑀓𑀢𑀓𑀸𑀫𑀸𑀦𑀼𑀪𑀯𑀦𑀧𑁆𑀧𑀬𑁄𑀕𑁄. 𑀲𑀬𑀁 𑀅𑀢𑁆𑀢𑀦𑀸 𑀏𑀯 𑀤𑀺𑀲𑁆𑀲𑀦𑁆𑀢𑀻𑀢𑀺 𑀲𑀦𑁆𑀤𑀺𑀝𑁆𑀞𑀸, 𑀲𑀦𑁆𑀤𑀺𑀝𑁆𑀞𑀸 𑀏𑀯 𑀲𑀦𑁆𑀤𑀺𑀝𑁆𑀞𑀺𑀓𑀸, 𑀅𑀢𑁆𑀢𑀧𑀘𑁆𑀘𑀓𑁆𑀔𑀢𑁄 𑀲𑀦𑁆𑀤𑀺𑀝𑁆𑀞𑀺𑀓𑀸. 𑀧𑀓𑀝𑁆𑀞𑁄 𑀓𑀸𑀮𑁄 𑀧𑀢𑁆𑀢𑁄 𑀏𑀢𑁂𑀲𑀦𑁆𑀢𑀺 𑀓𑀸𑀮𑀺𑀓𑀸, 𑀢𑁂 𑀓𑀸𑀮𑀺𑀓𑁂.

𑀘𑀺𑀢𑁆𑀢𑀸𑀦𑀦𑁆𑀢𑀭𑀦𑁆𑀢𑀺 ¶ 𑀇𑀘𑁆𑀙𑀺𑀢𑀘𑀺𑀢𑁆𑀢𑀸𑀦𑀦𑁆𑀢𑀭𑀁, 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀸𑀭𑀫𑁆𑀫𑀡𑀸𑀓𑀸𑀭𑁂𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀘𑀺𑀢𑁆𑀢𑀸𑀦𑀦𑁆𑀢𑀭𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀁 𑀦 𑀲𑀫𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺. 𑀘𑀺𑀢𑁆𑀢𑀸𑀦𑀦𑁆𑀢𑀭𑀁 𑀮𑀤𑁆𑀥𑀩𑁆𑀩𑀢𑀸𑀬𑀸𑀢𑀺 𑀅𑀦𑀦𑁆𑀢𑀭𑀺𑀢𑀲𑀫𑀸𑀥𑀺𑀘𑀺𑀢𑁆𑀢𑀸𑀦𑀦𑁆𑀢𑀭𑀁 𑀮𑀤𑁆𑀥𑀩𑁆𑀩𑀨𑀮𑀢𑀸𑀬. 𑀲𑀫𑁄𑀳𑀺𑀢𑁂𑀲𑀼𑀧𑀻𑀢𑀺 𑀲𑀫𑁆𑀪𑀢𑁂𑀲𑀼𑀧𑀺. 𑀲𑀫𑁆𑀧𑀦𑁆𑀦𑀓𑀸𑀫𑀲𑁆𑀲𑀸𑀢𑀺 𑀲𑀫𑀺𑀤𑁆𑀥𑀓𑀸𑀫𑀲𑁆𑀲. 𑀘𑀺𑀢𑁆𑀢𑀓𑀸𑀭𑀸 𑀭𑀽𑀧𑀮𑀸𑀪𑁂𑀦, 𑀧𑁄𑀢𑁆𑀣𑀓𑀸𑀭𑀸 𑀧𑀝𑀺𑀫𑀸𑀓𑀸𑀭𑀓𑀸, 𑀭𑀽𑀧𑀓𑀸𑀭𑀸 𑀤𑀦𑁆𑀢𑀭𑀽𑀧𑀓𑀝𑁆𑀞𑀭𑀽𑀧-𑀮𑁄𑀳𑀭𑀽𑀧𑀸𑀤𑀺𑀓𑀸𑀭𑀓𑀸. 𑀆𑀤𑀺𑀲𑀤𑁆𑀤𑁂𑀦 𑀦𑀸𑀦𑀸𑀭𑀽𑀧𑀯𑁂𑀲𑀥𑀸𑀭𑀻𑀦𑀁 𑀦𑀝𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀲𑁂𑀲𑀤𑁆𑀯𑀸𑀭𑁂𑀲𑀽𑀢𑀺 𑀏𑀢𑁆𑀣 𑀕𑀦𑁆𑀥𑀩𑁆𑀩𑀫𑀸𑀮𑀸𑀓𑀸𑀭𑀲𑀽𑀧𑀓𑀸𑀭𑀸𑀤𑀬𑁄 𑀯𑀢𑁆𑀢𑀩𑁆𑀩𑀸.

𑀲𑁄𑀢𑀺 𑀲𑀫𑀺𑀤𑁆𑀥𑀺𑀢𑁆𑀣𑁂𑀭𑁄. 𑀲𑀫𑁄𑀳𑀺𑀢𑀲𑀫𑁆𑀧𑀢𑁆𑀢𑀺𑀦𑀸𑀢𑀺 𑀲𑀗𑁆𑀕𑀸𑀳𑀪𑁄𑀕𑀽𑀧𑀓𑀭𑀡𑀲𑀫𑁆𑀧𑀢𑁆𑀢𑀺𑀦𑀸. 𑀧𑀢𑁆𑀢𑀩𑁆𑀩𑀤𑀼𑀓𑁆𑀔𑀲𑁆𑀲𑀸𑀢𑀺 𑀓𑀸𑀫𑀸𑀦𑀁 𑀆𑀧𑀚𑁆𑀚𑀦𑀭𑀓𑁆𑀔𑀡𑀯𑀲𑁂𑀦 𑀮𑀤𑁆𑀥𑀩𑁆𑀩𑀲𑁆𑀲 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀲𑁆𑀲. 𑀉𑀧𑀸𑀬𑀸𑀲𑀲𑁆𑀲𑀸𑀢𑀺 𑀤𑀴𑁆𑀳𑀧𑀭𑀺𑀲𑁆𑀲𑀫𑀲𑁆𑀲 𑀯𑀺𑀭𑀢𑀲𑁆𑀲. ‘‘𑀯𑀺𑀲𑁆𑀲𑀸𑀢𑀲𑁆𑀲𑀸’’𑀢𑀺 𑀓𑁂𑀘𑀺. ‘‘𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦𑀸’’𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺. 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀓𑀸𑀮𑁂 𑀨𑀮𑀁 𑀳𑁄𑀢𑀻𑀢𑀺 𑀏𑀯𑀁 𑀉𑀤𑀺𑀓𑁆𑀔𑀺𑀢𑀩𑁆𑀩𑁄 𑀦𑀲𑁆𑀲 𑀓𑀸𑀮𑁄𑀢𑀺 𑀅𑀓𑀸𑀮𑁄. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀦𑀯𑀲𑀼 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀲𑀼. 𑀏𑀳𑀺𑀧𑀲𑁆𑀲𑀯𑀺𑀥𑀺𑀦𑁆𑀢𑀺 ‘‘𑀏𑀳𑀺 𑀧𑀲𑁆𑀲𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀯𑀺𑀥𑀺𑀯𑀘𑀦𑀁. 𑀉𑀧𑀦𑁂𑀢𑀩𑁆𑀩𑁄𑀢𑀺 𑀯𑀸 𑀉𑀧𑀦𑁂𑀬𑁆𑀬𑁄, 𑀲𑁄 𑀏𑀯 𑀑𑀧𑀦𑁂𑀬𑁆𑀬𑀺𑀓𑁄. 𑀯𑀺𑀜𑁆𑀜𑀽𑀳𑀻𑀢𑀺 𑀯𑀺𑀤𑀽𑀳𑀺 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑁂𑀳𑀺. 𑀢𑁂 𑀏𑀓𑀁𑀲𑀢𑁄 𑀉𑀕𑁆𑀖𑀝𑀺𑀢𑀜𑁆𑀜𑀽𑀆𑀤𑀬𑁄 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀉𑀕𑁆𑀖𑀝𑀺𑀢𑀜𑁆𑀜𑀽𑀆𑀤𑀻𑀳𑀻’’𑀢𑀺. ‘‘𑀧𑀘𑁆𑀘𑀢𑁆𑀢’’𑀦𑁆𑀢𑀺 𑀏𑀢𑀲𑁆𑀲 𑀧𑀢𑀺𑀅𑀢𑁆𑀢𑀦𑀻𑀢𑀺 𑀪𑀼𑀫𑁆𑀫𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀅𑀢𑁆𑀢𑀦𑀺 𑀅𑀢𑁆𑀢𑀦𑀻’’𑀢𑀺.

𑀲𑀩𑁆𑀩𑀧𑀤𑁂𑀳𑀺 𑀲𑀫𑁆𑀩𑀦𑁆𑀥𑁄𑀢𑀺 ‘‘𑀓𑀣𑀁 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄, 𑀓𑀣𑀁 𑀅𑀓𑀸𑀮𑀺𑀓𑁄’’𑀢𑀺𑀆𑀤𑀺𑀦𑀸 𑀲𑀩𑁆𑀩𑁂𑀳𑀺 𑀧𑀘𑁆𑀘𑁂𑀓𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄.

𑀦𑀯𑁄𑀢𑀺 𑀢𑀭𑀼𑀡𑁄 𑀦 𑀘𑀺𑀭𑀯𑀲𑁆𑀲𑁄. 𑀬𑁂 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀮𑀓𑁆𑀔𑀡𑀧𑁆𑀧𑀢𑁆𑀢𑀸, 𑀢𑁂 𑀲𑀦𑁆𑀥𑀸𑀬 ‘‘𑀯𑀻𑀲𑀢𑀺𑀯𑀲𑁆𑀲𑀢𑁄 𑀧𑀝𑁆𑀞𑀸𑀬 𑀣𑁂𑀭𑁄’’𑀢𑀺 𑀯𑀼𑀢𑁆𑀢𑀁. 𑀇𑀥 𑀲𑀸𑀲𑀦𑀁 𑀦𑀸𑀫 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀧𑀺𑀝𑀓𑀢𑁆𑀢𑀬𑀦𑁆𑀢𑀺 𑀆𑀳 ‘‘𑀥𑀫𑁆𑀫𑁂𑀦 ¶ 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀥𑀫𑁆𑀫𑁂𑀦 𑀯𑀺𑀦𑀬𑁄 𑀏𑀢𑁆𑀣 𑀯𑀺𑀦𑀸 𑀤𑀡𑁆𑀟𑀲𑀢𑁆𑀣𑁂𑀳𑀻𑀢𑀺 𑀥𑀫𑁆𑀫𑀯𑀺𑀦𑀬𑁄. 𑀥𑀫𑁆𑀫𑀸𑀬 𑀯𑀺𑀦𑀬𑁄 𑀏𑀢𑁆𑀣 𑀦 𑀆𑀫𑀺𑀲𑀢𑁆𑀣𑀦𑁆𑀢𑀺 𑀥𑀫𑁆𑀫𑀯𑀺𑀦𑀬𑁄. 𑀥𑀫𑁆𑀫𑀢𑁄 𑀯𑀺𑀦𑀬𑁄 𑀦 𑀅𑀥𑀫𑁆𑀫𑀢𑁄𑀢𑀺 𑀥𑀫𑁆𑀫𑀯𑀺𑀦𑀬𑁄. 𑀥𑀫𑁆𑀫𑁄 𑀯𑀸 𑀪𑀕𑀯𑀸 𑀥𑀫𑁆𑀫𑀲𑁆𑀲𑀸𑀫𑀻 𑀥𑀫𑁆𑀫𑀓𑀸𑀬𑀢𑁆𑀢𑀸, 𑀢𑀲𑁆𑀲 𑀥𑀫𑁆𑀫𑀲𑀜𑁆𑀜𑀺𑀢𑀲𑁆𑀲 𑀲𑀢𑁆𑀣𑀼 𑀯𑀺𑀦𑀬𑁄, 𑀦 𑀢𑀓𑁆𑀓𑀺𑀓𑀸𑀦𑀦𑁆𑀢𑀺 𑀥𑀫𑁆𑀫𑀯𑀺𑀦𑀬𑁄. 𑀥𑀫𑁆𑀫𑁂 𑀯𑀺𑀦𑀬𑁄 𑀦 𑀅𑀥𑀫𑁆𑀫𑁂 𑀯𑀺𑀦𑀬𑁄. 𑀥𑀫𑁆𑀫𑁄 𑀘 𑀲𑁄 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀲𑀢𑁆𑀢𑁂 𑀅𑀧𑀸𑀬𑁂𑀲𑀼 𑀅𑀧𑀢𑀫𑀸𑀦𑁂 𑀥𑀸𑀭𑁂𑀢𑀻𑀢𑀺, 𑀲𑀩𑁆𑀩𑁂 𑀲𑀁𑀓𑀺𑀮𑁂𑀲𑀢𑁄 𑀯𑀺𑀦𑁂𑀢𑀻𑀢𑀺 𑀯𑀺𑀦𑀬𑁄 𑀘𑀸𑀢𑀺 𑀥𑀫𑁆𑀫𑀯𑀺𑀦𑀬𑁄. 𑀢𑁂𑀦𑀸𑀳 ‘‘𑀉𑀪𑀬𑀫𑁆𑀧𑁂𑀢𑀁 𑀲𑀸𑀲𑀦𑀲𑁆𑀲𑁂𑀯 𑀦𑀸𑀫’’𑀦𑁆𑀢𑀺.

𑀥𑀫𑁆𑀫𑀯𑀺𑀦𑀬𑁄𑀢𑀺 ¶ 𑀥𑀫𑁆𑀫𑁂𑀦 𑀬𑀼𑀢𑁆𑀢𑁄 𑀯𑀺𑀦𑀬𑁄𑀢𑀺 𑀥𑀫𑁆𑀫𑀯𑀺𑀦𑀬𑁄 𑀆𑀚𑀜𑁆𑀜𑀭𑀣𑁄 𑀯𑀺𑀬. 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘𑀸𑀢𑀺 𑀯𑀸 𑀥𑀫𑁆𑀫𑀯𑀺𑀦𑀬𑁄, 𑀢𑀁 𑀥𑀫𑁆𑀫𑀯𑀺𑀦𑀬𑀁. 𑀥𑀫𑁆𑀫𑀯𑀺𑀦𑀬𑀸𑀦𑀜𑁆𑀳𑀺 𑀲𑀢𑁆𑀣𑀼𑀪𑀸𑀯𑀯𑀘𑀦𑀢𑁄 𑀥𑀫𑁆𑀫𑀯𑀺𑀦𑀬𑀢𑁆𑀢𑀲𑀁𑀲𑀺𑀤𑁆𑀥𑀺 𑀥𑀫𑁆𑀫𑀯𑀺𑀦𑀬𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑁂𑀲𑀦𑀢𑁄. 𑀅𑀪𑀺𑀥𑀫𑁆𑀫𑁂𑀧𑀺 𑀯𑀺𑀦𑀬𑀯𑀘𑀦𑀦𑁆𑀢𑀺 𑀥𑀫𑁆𑀫𑀯𑀺𑀦𑀬𑀤𑁆𑀯𑀬𑀲𑀺𑀤𑁆𑀥𑀺, 𑀤𑁂𑀲𑀺𑀢𑀧𑀜𑁆𑀜𑀢𑁆𑀢𑀯𑀘𑀦𑀢𑁄 𑀥𑀫𑁆𑀫𑀯𑀺𑀦𑀬𑀲𑀺𑀤𑁆𑀥𑀺. 𑀥𑀫𑁆𑀫𑁄 𑀘𑀢𑀼𑀥𑀸 𑀤𑁂𑀲𑀺𑀢𑁄 𑀲𑀦𑁆𑀤𑀲𑁆𑀲𑀦-𑀲𑀫𑀸𑀤𑀸𑀧𑀦-𑀲𑀫𑀼𑀢𑁆𑀢𑁂𑀚𑀦-𑀲𑀫𑁆𑀧𑀳𑀁𑀲𑀦𑀯𑀲𑁂𑀦, 𑀯𑀺𑀦𑀬𑁄 𑀘𑀢𑀼𑀥𑀸 𑀧𑀜𑁆𑀜𑀢𑁆𑀢𑁄 𑀲𑀻𑀮𑀸𑀘𑀸𑀭𑀢𑁄 𑀧𑀭𑀸𑀚𑀺𑀢𑀯𑀲𑁂𑀦. 𑀥𑀫𑁆𑀫𑀘𑀭𑀺𑀬𑀸 𑀲𑀓𑀯𑀺𑀲𑀬𑁄, 𑀯𑀺𑀦𑀬𑀧𑀜𑁆𑀜𑀢𑁆𑀢𑀺 𑀩𑀼𑀤𑁆𑀥𑀯𑀺𑀲𑀬𑁄. 𑀧𑀭𑀺𑀬𑀸𑀬𑁂𑀦 𑀤𑁂𑀲𑀺𑀢𑁄 𑀥𑀫𑁆𑀫𑁄, 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀜𑁆𑀜𑀢𑁆𑀢𑁄 𑀯𑀺𑀦𑀬𑁄. 𑀥𑀫𑁆𑀫𑀤𑁂𑀲𑀦𑀸 𑀅𑀥𑀺𑀧𑁆𑀧𑀸𑀬𑀢𑁆𑀣𑀧𑁆𑀧𑀥𑀸𑀦𑀸, 𑀯𑀺𑀦𑀬𑀧𑀜𑁆𑀜𑀢𑁆𑀢𑀺 𑀯𑀘𑀦𑀢𑁆𑀣𑀧𑁆𑀧𑀥𑀸𑀦𑀸. 𑀧𑀭𑀫𑀢𑁆𑀣𑀲𑀘𑁆𑀘𑀧𑁆𑀧𑀥𑀸𑀦𑁄 𑀥𑀫𑁆𑀫𑁄, 𑀲𑀫𑁆𑀫𑀼𑀢𑀺𑀲𑀘𑁆𑀘𑀧𑁆𑀧𑀥𑀸𑀦𑁄 𑀯𑀺𑀦𑀬𑁄. 𑀆𑀲𑀬𑀲𑀼𑀤𑁆𑀥𑀺𑀧𑀥𑀸𑀦𑁄 𑀥𑀫𑁆𑀫𑁄, 𑀧𑀬𑁄𑀕𑀲𑀼𑀤𑁆𑀥𑀺𑀧𑀥𑀸𑀦𑁄 𑀯𑀺𑀦𑀬𑁄.

𑀓𑀺𑀭𑀺𑀬𑀤𑁆𑀯𑀬𑀲𑀺𑀤𑁆𑀥𑀺𑀬𑀸 𑀥𑀫𑁆𑀫𑀯𑀺𑀦𑀬𑀲𑀺𑀤𑁆𑀥𑀺. 𑀥𑀫𑁆𑀫𑁂𑀦 𑀳𑀺 𑀅𑀦𑀼𑀲𑀸𑀲𑀦𑀲𑀺𑀤𑁆𑀥𑀺, 𑀯𑀺𑀦𑀬𑁂𑀦 𑀑𑀯𑀸𑀤𑀲𑀺𑀤𑁆𑀥𑀺. 𑀥𑀫𑁆𑀫𑁂𑀦 𑀥𑀫𑁆𑀫𑀓𑀣𑀸𑀲𑀺𑀤𑁆𑀥𑀺, 𑀯𑀺𑀦𑀬𑁂𑀦 𑀅𑀭𑀺𑀬𑀢𑀼𑀡𑁆𑀳𑀻𑀪𑀸𑀯𑀲𑀺𑀤𑁆𑀥𑀺. 𑀲𑀸𑀯𑀚𑁆𑀚𑀤𑁆𑀯𑀬𑀧𑀭𑀺𑀯𑀚𑁆𑀚𑀦𑀢𑁄 𑀥𑀫𑁆𑀫𑀯𑀺𑀦𑀬𑀲𑀺𑀤𑁆𑀥𑀺. 𑀥𑀫𑁆𑀫𑁂𑀦 𑀳𑀺 𑀯𑀺𑀲𑁂𑀲𑀢𑁄 𑀧𑀓𑀢𑀺𑀲𑀸𑀯𑀚𑁆𑀚𑀧𑀭𑀺𑀘𑁆𑀘𑀸𑀕𑀲𑀺𑀤𑁆𑀥𑀺, 𑀯𑀺𑀦𑀬𑁂𑀦 𑀧𑀜𑁆𑀜𑀢𑁆𑀢𑀺𑀲𑀸𑀯𑀚𑁆𑀚𑀧𑀭𑀺𑀘𑁆𑀘𑀸𑀕𑀲𑀺𑀤𑁆𑀥𑀺. 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀁 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀕𑀼𑀡𑀤𑁆𑀯𑀬𑀲𑀺𑀤𑁆𑀥𑀺. 𑀩𑀳𑀼𑀲𑁆𑀲𑀼𑀢𑀲𑀼𑀢𑀧𑀲𑀦𑁆𑀦𑀤𑁆𑀯𑀬𑀢𑁄 𑀧𑀭𑀺𑀬𑀢𑁆𑀢𑀺-𑀧𑀭𑀺𑀬𑀸𑀧𑀼𑀡𑀦-𑀥𑀫𑁆𑀫𑀯𑀺𑀳𑀸𑀭-𑀯𑀺𑀪𑀸𑀕𑀢𑁄 𑀥𑀫𑁆𑀫𑀥𑀭𑀯𑀺𑀦𑀬𑀥𑀭𑀯𑀺𑀪𑀸𑀕𑀢𑁄 𑀘 𑀥𑀫𑁆𑀫𑀯𑀺𑀦𑀬𑀤𑁆𑀯𑀬𑀲𑀺𑀤𑁆𑀥𑀺, 𑀲𑀭𑀡𑀤𑁆𑀯𑀬𑀲𑀺𑀤𑁆𑀥𑀺𑀬𑀸 𑀥𑀫𑁆𑀫𑀯𑀺𑀦𑀬𑀤𑁆𑀯𑀬𑀲𑀺𑀤𑁆𑀥𑀺. 𑀇𑀥 𑀲𑀢𑁆𑀢𑀸𑀦𑀁 𑀤𑀼𑀯𑀺𑀥𑀁 𑀲𑀭𑀡𑀁 𑀥𑀫𑁆𑀫𑁄 𑀅𑀢𑁆𑀢𑀸 𑀘. 𑀢𑀢𑁆𑀣 𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀲𑀭𑀡𑀁. ‘‘𑀥𑀫𑁆𑀫𑁄 𑀳𑀯𑁂 𑀭𑀓𑁆𑀔𑀢𑀺 𑀥𑀫𑁆𑀫𑀘𑀸𑀭𑀺’’𑀦𑁆𑀢𑀺 (𑀣𑁂𑀭𑀕𑀸. 𑁩𑁦𑁩; 𑀚𑀸. 𑁧.𑁧𑁦.𑁧𑁦𑁨; 𑁧.𑁧𑁫.𑁩𑁮𑁫) 𑀳𑀺 𑀯𑀼𑀢𑁆𑀢𑀁. 𑀲𑀼𑀤𑀦𑁆𑀢𑁄 𑀅𑀢𑁆𑀢𑀸𑀧𑀺 𑀲𑀭𑀡𑀁 ‘‘𑀅𑀢𑁆𑀢𑀸 𑀳𑀺 𑀅𑀢𑁆𑀢𑀦𑁄 𑀦𑀸𑀣𑁄’’𑀢𑀺 (𑀥. 𑀧. 𑁧𑁬𑁦, 𑁩𑁮𑁦) 𑀯𑀘𑀦𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀭𑀡𑀤𑁆𑀯𑀬𑀲𑀺𑀤𑁆𑀥𑀺𑀬𑀸 𑀥𑀫𑁆𑀫𑀯𑀺𑀦𑀬𑀲𑀺𑀤𑁆𑀥𑀻’’𑀢𑀺. 𑀢𑀢𑁆𑀣 𑀬𑀢𑀲𑁆𑀲 𑀥𑀫𑁆𑀫𑀲𑀺𑀤𑁆𑀥𑀺, 𑀬𑀢𑁄 𑀘 𑀯𑀺𑀦𑀬𑀲𑀺𑀤𑁆𑀥𑀺, 𑀢𑀤𑀼𑀪𑀬𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀥𑀫𑁆𑀫𑁂𑀦 𑀳𑁂𑀢𑁆𑀣 𑀤𑁆𑀯𑁂 𑀧𑀺𑀝𑀓𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀯𑀺𑀦𑀬𑁂𑀦 𑀯𑀺𑀦𑀬𑀧𑀺𑀝𑀓’’𑀦𑁆𑀢𑀺. 𑀅𑀥𑀼𑀦𑀸 𑀆𑀕𑀢𑁄 𑀇𑀤𑀸𑀦𑁂𑀯 𑀦 𑀘𑀺𑀭𑀲𑁆𑀲𑁂𑀯 𑀉𑀧𑀕𑀢𑁄.

𑀫𑀳𑀦𑁆𑀢𑁂 ¶ 𑀞𑀸𑀦𑁂 𑀞𑀧𑁂𑀢𑁆𑀯𑀸𑀢𑀺 𑀫𑀳𑁂𑀲𑀓𑁆𑀔𑀢𑀸𑀤𑀲𑁆𑀲𑀦𑀢𑁆𑀣𑀁 𑀅𑀢𑁆𑀢𑀦𑁄 𑀧𑀭𑀺𑀯𑀸𑀭𑁂𑀦 𑀫𑀳𑀦𑁆𑀢𑀝𑁆𑀞𑀸𑀦𑁂 𑀞𑀧𑀺𑀢𑀪𑀸𑀯𑀁 𑀧𑀯𑁂𑀤𑁂𑀢𑁆𑀯𑀸. 𑀫𑀳𑀢𑀺𑀬𑀸𑀢𑀺 𑀉𑀧𑀲𑀗𑁆𑀓𑀫𑀦𑀯𑀦𑁆𑀤𑀦𑀸𑀤𑀺𑀯𑀘𑀦𑀸𑀧𑀚𑁆𑀚𑀦𑀯𑀲𑁂𑀦 𑀲𑀫𑀸𑀘𑀺𑀡𑁆𑀡𑀸𑀬. 𑀲𑀩𑁆𑀩𑁂𑀧𑀺 𑀓𑀺𑀭 𑀦𑀺𑀲𑀻𑀤𑀦𑁆𑀢𑀸 𑀢𑀁 𑀞𑀸𑀦𑀁 𑀞𑀧𑁂𑀢𑁆𑀯𑀸𑀯 𑀦𑀺𑀲𑀻𑀤𑀦𑁆𑀢𑀺. 𑀣𑀺𑀭𑀓𑀭𑀡𑀯𑀲𑁂𑀦𑀸𑀢𑀺 𑀤𑀴𑁆𑀳𑀻𑀓𑀭𑀡𑀯𑀲𑁂𑀦. 𑀅𑀬𑀁 𑀓𑀺𑀭 𑀤𑁂𑀯𑀢𑀸 𑀜𑀸𑀡𑀲𑀫𑁆𑀧𑀦𑁆𑀦𑀸 𑀫𑀸𑀦𑀚𑀸𑀢𑀺𑀓𑀸, 𑀢𑀲𑁆𑀫𑀸 𑀦𑀸𑀬𑀁 𑀫𑀸𑀦𑀁 𑀅𑀧𑁆𑀧𑀳𑀸𑀬 ¶ 𑀫𑀫 𑀤𑁂𑀲𑀦𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀫𑀸𑀦𑀦𑀺𑀕𑁆𑀕𑀡𑁆𑀳𑀦𑀢𑁆𑀣𑀁 𑀆𑀤𑀺𑀢𑁄 𑀤𑀼𑀯𑀺𑀜𑁆𑀜𑁂𑀬𑁆𑀬𑀁 𑀓𑀣𑁂𑀦𑁆𑀢𑁄 𑀪𑀕𑀯𑀸 ‘‘𑀅𑀓𑁆𑀔𑁂𑀬𑁆𑀬𑀲𑀜𑁆𑀜𑀺𑀦𑁄’’𑀢𑀺𑀆𑀤𑀺𑀦𑀸 𑀢𑀸𑀬 𑀜𑀸𑀢𑀼𑀫𑀺𑀘𑁆𑀙𑀺𑀢𑀓𑀸𑀫𑀸𑀦𑀁 𑀓𑀸𑀮𑀺𑀓𑀸𑀤𑀺𑀪𑀸𑀯𑀁, 𑀥𑀫𑁆𑀫𑀲𑁆𑀲 𑀘 𑀲𑀦𑁆𑀤𑀺𑀝𑁆𑀞𑀺𑀓𑀸𑀤𑀺𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑁄 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺.

𑀅𑀓𑁆𑀔𑁂𑀬𑁆𑀬𑀢𑁄𑀢𑀺 𑀕𑀺𑀳𑀺𑀮𑀺𑀗𑁆𑀕𑀧𑀭𑀺𑀬𑀸𑀬𑀦𑀸𑀫𑀯𑀺𑀲𑁂𑀲𑀸𑀤𑀺𑀯𑀲𑁂𑀦 𑀢𑀣𑀸 𑀢𑀣𑀸 𑀅𑀓𑁆𑀔𑀸𑀢𑀩𑁆𑀩𑀢𑁄. 𑀢𑁂𑀦𑀸𑀳 ‘‘𑀓𑀣𑀸𑀦𑀁 𑀯𑀢𑁆𑀣𑀼𑀪𑀽𑀢𑀢𑁄’’𑀢𑀺. 𑀏𑀢𑁂𑀲𑀦𑁆𑀢𑀺 𑀲𑀢𑁆𑀢𑀸𑀦𑀁. 𑀧𑀢𑀺𑀝𑁆𑀞𑀺𑀢𑀸𑀢𑀺 𑀧𑀯𑀢𑁆𑀢𑀺𑀢𑀸 𑀆𑀲𑀢𑁆𑀢𑀸. 𑀧𑀜𑁆𑀘𑀦𑁆𑀦𑀁 𑀓𑀸𑀫𑀲𑀗𑁆𑀕𑀸𑀤𑀻𑀦𑀁 𑀯𑀲𑁂𑀦 𑀆𑀲𑀢𑁆𑀢𑀸 𑀳𑁄𑀦𑁆𑀢𑀼, 𑀇𑀢𑀭𑁂𑀲𑀁 𑀧𑀦 𑀓𑀣𑀦𑁆𑀢𑀺? 𑀅𑀦𑀺𑀝𑁆𑀞𑀗𑁆𑀕𑀢𑁄𑀧𑀺 𑀳𑀺 ‘‘𑀇𑀤𑀁 𑀦𑀼 𑀔𑁄’’𑀢𑀺𑀆𑀤𑀺𑀦𑀸 𑀓𑀗𑁆𑀔𑀢𑁄 𑀢𑀢𑁆𑀣 𑀆𑀲𑀢𑁆𑀢𑁄 𑀏𑀯 𑀦𑀸𑀫 𑀅𑀯𑀺𑀚𑀳𑀦𑀢𑁄, 𑀢𑀣𑀸 𑀯𑀺𑀓𑁆𑀔𑁂𑀧𑀕𑀢𑁄 𑀯𑀺𑀓𑁆𑀔𑁂𑀧𑀯𑀢𑁆𑀣𑀼𑀲𑁆𑀫𑀺𑀁, 𑀅𑀦𑀼𑀲𑀬𑀸𑀦𑀁 𑀧𑀦 𑀆𑀲𑀢𑁆𑀢𑀪𑀸𑀯𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀫𑀘𑁆𑀘𑀼𑀦𑁄 𑀬𑁄𑀕𑀦𑁆𑀢𑀺, 𑀫𑀘𑁆𑀘𑀼𑀩𑀦𑁆𑀥𑀦𑀁, 𑀫𑀭𑀡𑀥𑀫𑁆𑀫𑀢𑀦𑁆𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀅𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀸 𑀅𑀦𑀢𑀻𑀢𑀫𑀭𑀡𑀢𑁆𑀢𑀸 𑀫𑀘𑁆𑀘𑀼𑀦𑀸 𑀬𑀣𑀸𑀭𑀼𑀘𑀺 𑀧𑀬𑁄𑀚𑁂𑀢𑀩𑁆𑀩𑀸, 𑀢𑀢𑁆𑀣 𑀢𑀢𑁆𑀣 𑀉𑀧𑀭𑀽𑀧𑀭𑀺 𑀘 𑀔𑀺𑀧𑀺𑀢𑀸𑀬 𑀆𑀡𑀸𑀬 𑀅𑀩𑁆𑀪𑀦𑁆𑀢𑀭𑁂 𑀏𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀬𑁄𑀕𑀁…𑀧𑁂… 𑀆𑀕𑀘𑁆𑀙𑀦𑁆𑀢𑀻’’𑀢𑀺. 𑀬𑀲𑁆𑀫𑀸 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸 𑀓𑀫𑀦𑀻𑀬𑀝𑁆𑀞𑁂𑀦 𑀓𑀸𑀫𑀸, 𑀦𑁂𑀲𑀫𑁆𑀧𑀺 𑀓𑀸𑀮𑀲𑁆𑀲 𑀮𑀤𑁆𑀥𑀩𑁆𑀩𑀢𑀸𑀬 𑀓𑀸𑀮𑀺𑀓𑀢𑀸 𑀇𑀥 𑀅𑀓𑁆𑀔𑁂𑀬𑁆𑀬𑀯𑀘𑀦𑁂𑀦 𑀧𑀯𑁂𑀤𑀺𑀢𑀸. 𑀢𑁂𑀦𑀸𑀳 𑁋 ‘‘𑀏𑀯𑀫𑀺𑀫𑀸𑀬 𑀕𑀸𑀣𑀸𑀬 𑀓𑀸𑀮𑀺𑀓𑀸 𑀓𑀸𑀫𑀸 𑀓𑀣𑀺𑀢𑀸’’𑀢𑀺. 𑀲𑀩𑁆𑀩𑁂𑀧𑀺 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸 𑀓𑀫𑀦𑀻𑀬𑀸, 𑀬𑀲𑁆𑀫𑀸 𑀘 𑀓𑀸𑀮𑀺𑀓𑀸𑀦𑀁 𑀓𑀸𑀫𑀸𑀦𑀁 𑀢𑀣𑀸𑀲𑀪𑀸𑀯𑀢𑀸 𑀓𑀣𑀺𑀢𑀸. 𑀅𑀬𑀫𑁆𑀧𑀺 𑀕𑀸𑀣𑀸 𑀢𑀤𑀢𑁆𑀣𑀫𑁂𑀯 𑀤𑀻𑀧𑁂𑀢𑀻𑀢𑀺 𑀇𑀫𑀸𑀬 𑀢𑁂 𑀓𑀣𑀺𑀢𑀸 𑀏𑀯 𑀳𑁄𑀦𑁆𑀢𑀺. 𑀬𑁂 𑀘 𑀲𑀢𑁆𑀢𑀸 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀤𑀺𑀝𑁆𑀞𑀺𑀢𑀡𑁆𑀳𑀸𑀤𑀺𑀯𑀲𑁂𑀦 𑀧𑀢𑀺𑀝𑁆𑀞𑀺𑀢𑀸 ‘‘𑀇𑀢𑁆𑀣𑀻, 𑀧𑀼𑀭𑀺𑀲𑁄, 𑀅𑀳𑀁, 𑀫𑀫𑀸’’𑀢𑀺 𑀘 𑀅𑀪𑀺𑀦𑀺𑀯𑀺𑀲𑀺𑀬 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀢𑁂 𑀫𑀭𑀡𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺. 𑀏𑀯𑀫𑁆𑀧𑁂𑀢𑁆𑀣 𑀓𑀸𑀫𑀸𑀦𑀁 𑀓𑀸𑀮𑀺𑀓𑀢𑁆𑀣𑁄 𑀓𑀣𑀺𑀢𑁄𑀢𑀺 𑀆𑀳 ‘‘𑀓𑀸𑀮𑀺𑀓𑀸 𑀓𑀸𑀫𑀸 𑀓𑀣𑀺𑀢𑀸’’𑀢𑀺.

𑀅𑀬𑀁 𑀜𑀸𑀢𑀧𑀭𑀺𑀜𑁆𑀜𑀸𑀢𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀮𑀓𑁆𑀔𑀡𑀸𑀤𑀺𑀢𑁄 𑀜𑀸𑀢𑁂 𑀓𑀢𑁆𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀦𑀧𑀜𑁆𑀜𑀸. 𑀢𑁂𑀦𑀸𑀳 ‘‘𑀏𑀯𑀁 𑀜𑀸𑀢𑀁 𑀓𑀢𑁆𑀯𑀸’’𑀢𑀺𑀆𑀤𑀺. 𑀧𑀤𑀝𑁆𑀞𑀸𑀦𑀕𑁆𑀕𑀳𑀡𑁂𑀦𑁂𑀯 𑀘𑁂𑀢𑁆𑀣 𑀢𑁂𑀲𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑁄 𑀕𑀳𑀺𑀢𑁄𑀢𑀺 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀲𑁆𑀲𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀻𑀭𑁂𑀢𑀺 𑀢𑀼𑀮𑁂𑀢𑀺 𑀯𑀻𑀫𑀁𑀲𑀢𑀺. 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀸𑀬 𑀆𑀓𑀸𑀭𑁂𑀳𑀻𑀢𑀺 𑀇𑀫𑀺𑀦𑀸 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀫𑀳𑀸𑀯𑀺𑀧𑀲𑁆𑀲𑀦𑀁 𑀤𑀲𑁆𑀲𑁂𑀢𑀺. 𑀢𑁂 𑀧𑀦 𑀆𑀓𑀸𑀭𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀬 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. ‘‘𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀻’’𑀢𑀺𑀆𑀤𑀺𑀦𑀸 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂𑀧𑀺 𑀏𑀓𑀤𑁂𑀲𑁂𑀦 𑀧𑀳𑀸𑀦𑀁 𑀮𑀩𑁆𑀪𑀢𑁂𑀯, 𑀅𑀦𑀯𑀲𑁂𑀲𑀢𑁄 𑀧𑀦 𑀧𑀳𑀸𑀦𑀯𑀲𑁂𑀦 𑀧𑀳𑀸𑀦𑀧𑀭𑀺𑀜𑁆𑀜𑀁 𑀤𑀲𑁆𑀲𑁂𑀦𑁆𑀢𑁄 ¶ 𑀆𑀳 ‘‘𑀅𑀕𑁆𑀕𑀫𑀕𑁆𑀕𑁂𑀦 ¶ …𑀧𑁂… 𑀅𑀬𑀁 𑀧𑀳𑀸𑀦𑀧𑀭𑀺𑀜𑁆𑀜𑀸’’𑀢𑀺. 𑀢𑀣𑀸 𑀘 𑀆𑀳 ‘‘𑀏𑀯𑀁 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀻’’𑀢𑀺𑀆𑀤𑀺.

𑀅𑀓𑁆𑀔𑀸𑀢𑀸𑀭𑀦𑁆𑀢𑀺 𑀅𑀓𑁆𑀔𑀸𑀢𑀩𑁆𑀩𑀁, 𑀦 𑀅𑀓𑁆𑀔𑁂𑀬𑁆𑀬𑀓𑀁. 𑀢𑁂𑀦𑀸𑀳 ‘‘𑀓𑀫𑁆𑀫𑀯𑀲𑁂𑀦 𑀓𑀸𑀭𑀓’’𑀦𑁆𑀢𑀺𑀆𑀤𑀺. 𑀓𑀸𑀭𑀓𑀦𑁆𑀢𑀺 𑀘 𑀲𑀸𑀥𑀦𑀫𑀸𑀳. 𑀦 𑀫𑀜𑁆𑀜𑀢𑀻𑀢𑀺 𑀯𑀸 𑀫𑀜𑁆𑀜𑀦𑀁 𑀦𑀧𑁆𑀧𑀯𑀢𑁆𑀢𑁂𑀢𑀺 𑀅𑀓𑁆𑀔𑀸𑀢𑀸𑀭𑀦𑁆𑀢𑀺 𑀔𑀻𑀡𑀸𑀲𑀯𑀁. 𑀅𑀣 𑀯𑀸 𑀢𑀜𑁆𑀳𑀺 𑀢𑀲𑁆𑀲 𑀦 𑀳𑁄𑀢𑀻𑀢𑀺 𑀢𑀁 𑀓𑀸𑀭𑀡𑀁 𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀦 𑀳𑁄𑀢𑀺 𑀦 𑀯𑀺𑀚𑁆𑀚𑀢𑀺, 𑀬𑁂𑀦 𑀤𑀺𑀝𑁆𑀞𑀺𑀢𑀡𑁆𑀳𑀸𑀤𑀺𑀓𑀸𑀭𑀡𑁂𑀦 𑀅𑀓𑁆𑀔𑁂𑀬𑁆𑀬𑀁 𑀔𑀦𑁆𑀥𑀧𑀜𑁆𑀘𑀓𑀁 ‘‘𑀢𑀺𑀲𑁆𑀲𑁄’’𑀢𑀺 𑀯𑀸 ‘‘𑀨𑀼𑀲𑁆𑀲𑁄’’𑀢𑀺 𑀯𑀸 ‘‘𑀇𑀢𑁆𑀣𑀻’’𑀢𑀺 𑀯𑀸 ‘‘𑀧𑀼𑀭𑀺𑀲𑁄’’𑀢𑀺 𑀯𑀸 𑀅𑀪𑀺𑀦𑀺𑀯𑀺𑀲𑁆𑀲 𑀯𑀤𑁂𑀬𑁆𑀬𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀦𑀼𑀲𑁆𑀲𑀦𑀸𑀕𑀸𑀤𑀻𑀳𑀺 𑀧𑀽𑀚𑀦𑀻𑀬𑀢𑁆𑀢𑀸 ‘‘𑀬𑀓𑁆𑀔𑁄’’𑀢𑀺 𑀲𑀩𑁆𑀩𑀤𑁂𑀯𑀸𑀦𑀁 𑀲𑀸𑀥𑀸𑀭𑀡𑀯𑀘𑀦𑀦𑁆𑀢𑀺 𑀤𑁂𑀯𑀥𑀻𑀢𑀸𑀧𑀺 ‘‘𑀬𑀓𑁆𑀔𑀻’’𑀢𑀺 𑀯𑀼𑀢𑁆𑀢𑀸. 𑀅𑀓𑁆𑀔𑁂𑀬𑁆𑀬𑀦𑁆𑀢𑀺 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀧𑀳𑀸𑀦𑀫𑀕𑁆𑀕𑁄, 𑀢𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑀁 𑀦𑀺𑀩𑁆𑀩𑀸𑀦𑀫𑁆𑀧𑀺 𑀕𑀳𑀺𑀢𑀁. 𑀦 𑀫𑀜𑁆𑀜𑀢𑀻𑀢𑀺 𑀔𑀻𑀡𑀸𑀲𑀯𑀲𑁆𑀲 𑀅𑀲𑁆𑀲 𑀨𑀮𑀧𑁆𑀧𑀢𑁆𑀢𑀻𑀢𑀺 𑀆𑀳 ‘‘𑀦𑀯𑀯𑀺𑀥𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀓𑀣𑀺𑀢𑁄’’𑀢𑀺.

𑀯𑀺𑀲𑁂𑀲𑀻𑀢𑀺 𑀯𑀺𑀲𑁂𑀲𑀚𑀸𑀢𑀺𑀆𑀤𑀺𑀯𑀲𑁂𑀦 𑀲𑁂𑀬𑁆𑀬𑁄𑀢𑀺 𑀅𑀢𑁆𑀣𑁄. 𑀢𑁂𑀲𑀼 𑀕𑀳𑀺𑀢𑁂𑀲𑀽𑀢𑀺 𑀢𑁂𑀲𑀼 𑀲𑁂𑀬𑁆𑀬𑀫𑀸𑀦𑀸𑀤𑀻𑀲𑀼 𑀢𑀻𑀲𑀼 𑀫𑀸𑀦𑁂𑀲𑀼 𑀕𑀳𑀺𑀢𑁂𑀲𑀼. 𑀢𑀬𑁄 𑀲𑁂𑀬𑁆𑀬𑀫𑀸𑀦𑀸, 𑀢𑀬𑁄 𑀲𑀤𑀺𑀲𑀫𑀸𑀦𑀸, 𑀢𑀬𑁄 𑀳𑀻𑀦𑀫𑀸𑀦𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺. 𑀲𑁄 𑀧𑀼𑀕𑁆𑀕𑀮𑁄𑀢𑀺 𑀲𑁄 𑀅𑀧𑁆𑀧𑀳𑀻𑀦𑀫𑀜𑁆𑀜𑀦𑀧𑀼𑀕𑁆𑀕𑀮𑁄. 𑀢𑁂𑀦𑁂𑀯 𑀫𑀸𑀦𑁂𑀦 𑀳𑁂𑀢𑀼𑀪𑀽𑀢𑁂𑀦. 𑀉𑀧𑀟𑁆𑀠𑀕𑀸𑀣𑀸𑀬𑀸𑀢𑀺 𑀧𑀼𑀭𑀺𑀫𑀤𑁆𑀥𑁂𑀦 𑀧𑀦 𑀯𑀢𑁆𑀣𑀼𑀓𑀸𑀫𑀸 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀓𑀸𑀮𑀺𑀓𑀸 𑀓𑀸𑀫𑀸 𑀓𑀣𑀺𑀢𑀸’’𑀢𑀺.

𑀯𑀺𑀥𑀻𑀬𑀢𑀺 𑀯𑀺𑀲𑀤𑀺𑀲𑀸𑀓𑀸𑀭𑁂𑀦 𑀞𑀧𑀻𑀬𑀢𑀻𑀢𑀺 𑀯𑀺𑀥𑀸, 𑀓𑁄𑀝𑁆𑀞𑀸𑀲𑁄. 𑀓𑀣𑀁𑀯𑀺𑀥𑀦𑁆𑀢𑀺 𑀓𑀣𑀁 𑀧𑀢𑀺𑀝𑁆𑀞𑀺𑀢𑀁, 𑀓𑁂𑀦 𑀧𑀓𑀸𑀭𑁂𑀦 𑀧𑀯𑀢𑁆𑀢𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀤𑀳𑀦𑀢𑁄 𑀳𑀻𑀦𑀸𑀤𑀺𑀯𑀲𑁂𑀦 𑀯𑀺𑀯𑀺𑀥𑁂𑀦𑀸𑀓𑀸𑀭𑁂𑀦 𑀤𑀳𑀦𑀢𑁄 𑀉𑀧𑀥𑀸𑀭𑀡𑀢𑁄 𑀯𑀺𑀥𑀸, 𑀫𑀸𑀦𑁄. 𑀫𑀸𑀦𑁂𑀲𑀽𑀢𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁, 𑀫𑀸𑀦𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀦 𑀘𑀮𑀢𑀻𑀢𑀺 𑀦 𑀯𑁂𑀥𑀢𑀺 𑀅𑀢𑁆𑀢𑀦𑁄 𑀧𑀭𑀺𑀲𑀼𑀤𑁆𑀥𑀧𑀓𑀢𑀺𑀁 𑀅𑀯𑀺𑀚𑀳𑀦𑀢𑁄.

𑀧𑀜𑁆𑀜𑀸 ‘‘𑀲𑀗𑁆𑀔𑀸’’𑀢𑀺 𑀆𑀕𑀢𑀸, 𑀧𑀜𑁆𑀜𑀸𑀢𑀺 𑀬𑁄𑀦𑀺𑀲𑁄 𑀧𑀝𑀺𑀲𑀗𑁆𑀔𑀸𑀦𑀁. 𑀲𑀗𑁆𑀔𑀸𑀬𑀓𑁄𑀢𑀺 𑀲𑀗𑁆𑀓𑀮𑀦𑀧𑀤𑀼𑀧𑁆𑀧𑀸𑀤𑀦𑀸𑀤𑀺-𑀧𑀺𑀡𑁆𑀟𑀕𑀡𑀦𑀸𑀯𑀲𑁂𑀦 𑀕𑀡𑀓𑁄 𑀧𑀧𑀜𑁆𑀘𑀲𑀗𑁆𑀔𑀸𑀢𑀺 𑀫𑀸𑀦𑀸𑀤𑀺𑀧𑀧𑀜𑁆𑀘𑀪𑀸𑀕𑀸. 𑀢𑁂 𑀢𑁂 𑀥𑀫𑁆𑀫𑀸 𑀲𑀫𑁆𑀫𑀸 𑀬𑀸𑀣𑀸𑀯𑀢𑁄 𑀲𑀗𑁆𑀔𑀸𑀬𑀦𑁆𑀢𑀺 𑀉𑀧𑀢𑀺𑀝𑁆𑀞𑀦𑁆𑀢𑀺 𑀏𑀢𑀸𑀬𑀸𑀢𑀺 𑀲𑀗𑁆𑀔𑀸, 𑀧𑀜𑁆𑀜𑀸. 𑀏𑀓𑀁 𑀤𑁆𑀯𑁂𑀢𑀺𑀆𑀤𑀺𑀦𑀸 𑀲𑀗𑁆𑀔𑀸𑀦𑀁 𑀕𑀡𑀦𑀁 𑀧𑀭𑀺𑀘𑁆𑀙𑀺𑀦𑁆𑀤𑀦𑀦𑁆𑀢𑀺 𑀲𑀗𑁆𑀔𑀸, 𑀕𑀡𑀦𑀸. 𑀲𑀗𑁆𑀔𑀸𑀬𑀢𑀺 𑀪𑀸𑀕𑀲𑁄 𑀓𑀣𑀻𑀬𑀢𑀻𑀢𑀺 𑀲𑀗𑁆𑀔𑀸 ¶ , 𑀓𑁄𑀝𑁆𑀞𑀸𑀲𑁄. 𑀲𑀗𑁆𑀔𑀸𑀦𑀁 𑀲𑀢𑁆𑀢𑁄 𑀧𑀼𑀕𑁆𑀕𑀮𑁄𑀢𑀺𑀆𑀤𑀺𑀦𑀸 𑀲𑀜𑁆𑀜𑀸𑀧𑀦𑀦𑁆𑀢𑀺 𑀲𑀗𑁆𑀔𑀸, 𑀭𑀢𑁆𑀢𑁄𑀢𑀺𑀆𑀤𑀺 𑀧𑀡𑁆𑀡𑀢𑁆𑀢𑀺. 𑀔𑀻𑀡𑀸𑀲𑀯𑁄 𑀚𑀳𑀺 𑀧𑀚𑀳𑀺 𑀭𑀸𑀕𑀸𑀤𑀻𑀦𑀁 𑀲𑀼𑀧𑁆𑀧𑀳𑀻𑀦𑀢𑁆𑀢𑀸. 𑀦𑀯𑀪𑁂𑀤𑀁 𑀧𑀪𑁂𑀤𑀢𑁄, 𑀲𑀗𑁆𑀔𑁂𑀧𑀢𑁄 𑀢𑀺𑀯𑀺𑀥𑀫𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀦𑀯𑀯𑀺𑀥𑀦𑁆𑀢𑀺 𑀯𑀸 𑀧𑀸𑀞𑁂 𑀦𑀯𑀪𑁂𑀤𑀢𑁆𑀢𑀸 𑀅𑀦𑁆𑀢𑀭𑀪𑁂𑀤𑀯𑀲𑁂𑀦 𑀦𑀯𑀯𑀺𑀥𑀦𑁆𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀯𑀺𑀲𑁂𑀲𑁂𑀳𑀺 𑀇𑀢𑁆𑀣𑀺𑀪𑀸𑀯𑀸𑀤𑀺𑀯𑀺𑀲𑁂𑀲𑁂𑀳𑀺 𑀯𑀺𑀲𑁂𑀲𑁂𑀦 ¶ 𑀫𑀸𑀦𑀻𑀬𑀢𑀺 𑀕𑀩𑁆𑀪𑁄 𑀏𑀢𑁆𑀣𑀸𑀢𑀺 𑀯𑀺𑀫𑀸𑀦𑀁, 𑀕𑀩𑁆𑀪𑀸𑀲𑀬𑁄. 𑀦 𑀉𑀧𑀕𑀘𑁆𑀙𑀻𑀢𑀺 𑀦 𑀉𑀧𑀕𑀫𑀺𑀲𑁆𑀲𑀢𑀺. 𑀢𑁂𑀦𑀸𑀳 ‘‘𑀅𑀦𑀸𑀕𑀢𑀢𑁆𑀣𑁂 𑀅𑀢𑀻𑀢𑀯𑀘𑀦’’𑀦𑁆𑀢𑀺. ‘‘𑀦𑀸𑀚𑁆𑀛𑀕𑀸’’𑀢𑀺 𑀳𑀺 𑀅𑀢𑀻𑀢𑀁 ‘‘𑀦 𑀕𑀫𑀺𑀲𑁆𑀲𑀢𑀻’’𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂. 𑀙𑀺𑀦𑁆𑀤𑀺 𑀅𑀭𑀺𑀬𑀫𑀕𑁆𑀕𑀲𑀢𑁆𑀣𑁂𑀦. 𑀑𑀮𑁄𑀓𑀬𑀫𑀸𑀦𑀸 𑀉𑀧𑀧𑀢𑁆𑀢𑀻𑀲𑀼. 𑀲𑀢𑁆𑀢𑀦𑀺𑀯𑁂𑀲𑀦𑁂𑀲𑀽𑀢𑀺 𑀲𑀢𑁆𑀢𑀸𑀦𑀁 𑀉𑀧𑀧𑀚𑁆𑀚𑀝𑁆𑀞𑀸𑀦𑁂𑀲𑀼. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀫𑁂𑀯 𑀓𑀣𑁂𑀲𑀺 𑀅𑀭𑀳𑀢𑁆𑀢𑀲𑁆𑀲 𑀧𑀯𑁂𑀤𑀺𑀢𑀢𑁆𑀢𑀸.

‘‘𑀕𑀸𑀣𑀸𑀬 𑀅𑀢𑁆𑀣𑀁 𑀓𑀣𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀅𑀢𑁆𑀣-𑀲𑀤𑁆𑀤𑁄 𑀆𑀳𑀭𑀺𑀢𑁆𑀯𑀸 𑀯𑀢𑁆𑀢𑀩𑁆𑀩𑁄. 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀯𑀲𑁂𑀦𑀧𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀦𑀸𑀫 𑀓𑀼𑀲𑀮𑀥𑀫𑁆𑀫𑀸𑀦𑀼𑀬𑁄𑀕𑁂 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀓𑀸𑀭𑀡’’𑀦𑁆𑀢𑀺.

𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀯𑀲𑁂𑀦 𑀘 𑀕𑀸𑀣𑀸𑀅𑀢𑁆𑀣𑀯𑀘𑀦𑁂 𑀅𑀬𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑁄 𑀯𑀺𑀢𑁆𑀣𑀸𑀭-𑀦𑀬𑁄. 𑀢𑀲𑁆𑀫𑀺𑀁 𑀓𑀺𑀭 𑀞𑀸𑀦𑁂𑀢𑀺 𑀢𑀲𑁆𑀫𑀺𑀁 𑀓𑀺𑀭 𑀤𑁂𑀯𑀢𑀸𑀬 𑀧𑀼𑀘𑁆𑀙𑀺𑀢𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑀦𑀝𑁆𑀞𑀸𑀦𑁂. 𑀤𑁂𑀯𑀢𑀸𑀬 𑀜𑀸𑀡𑀧𑀭𑀺𑀧𑀸𑀓𑀁 𑀑𑀮𑁄𑀓𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑀺𑀬𑀸 𑀓𑀣𑀸𑀬 𑀲𑀤𑁆𑀥𑀺𑀁 𑀲𑀸𑀫𑀼𑀓𑁆𑀓𑀁𑀲𑀺𑀓𑀤𑁂𑀲𑀦𑀸 𑀫𑀳𑀢𑀻 𑀥𑀫𑁆𑀫𑀤𑁂𑀲𑀦𑀸 𑀅𑀳𑁄𑀲𑀺. 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸𑀢𑀺 𑀲𑀢𑁆𑀣𑀼𑀤𑁂𑀲𑀦𑀸𑀬 𑀅𑀦𑀼𑀲𑁆𑀲𑀭𑀡𑀯𑀲𑁂𑀦 𑀧𑀢𑁆𑀢𑀯𑀺𑀲𑀼𑀤𑁆𑀥𑀺𑀧𑀝𑀺𑀧𑀸𑀝𑀺𑀧𑀯𑀢𑁆𑀢𑀁 𑀪𑀸𑀯𑀦𑀸𑀜𑀸𑀡𑀁 𑀩𑀦𑁆𑀥𑀺𑀢𑁆𑀯𑀸. 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬𑀸𑀢𑀺 𑀲𑀢𑁆𑀣𑀼𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀅𑀢𑁆𑀢𑀦𑁄 𑀘 𑀧𑀭𑀺𑀧𑀓𑁆𑀓𑀜𑀸𑀡𑀢𑁆𑀢𑀸 𑀧𑀞𑀫𑀁 𑀨𑀮𑀁 𑀧𑀢𑁆𑀯𑀸. 𑀏𑀯𑀫𑀸𑀳𑀸𑀢𑀺 𑀏𑀯𑀁 ‘‘𑀧𑀸𑀧𑀁 𑀦 𑀓𑀬𑀺𑀭𑀸’’𑀢𑀺𑀆𑀤𑀺𑀧𑁆𑀧𑀓𑀸𑀭𑁂𑀦 𑀕𑀸𑀣𑀫𑀸𑀳. 𑀅𑀗𑁆𑀕𑀁 𑀦 𑀳𑁄𑀢𑀺, 𑀆𑀚𑀻𑀯𑁄 𑀬𑀣𑀸 𑀓𑀼𑀧𑁆𑀧𑀫𑀸𑀦𑁄 𑀯𑀸𑀘𑀸𑀓𑀫𑁆𑀫𑀦𑁆𑀢𑀯𑀲𑁂𑀦 𑀓𑀼𑀧𑁆𑀧𑀢𑀺, 𑀢𑀣𑀸 𑀲𑀫𑁆𑀧𑀚𑁆𑀚𑀫𑀸𑀦𑁄𑀧𑀻𑀢𑀺. 𑀲𑁄 𑀯𑀸𑀘𑀸𑀓𑀫𑁆𑀫𑀦𑁆𑀢𑀧𑀓𑁆𑀔𑀺𑀓𑁄, 𑀢𑀲𑁆𑀫𑀸 𑀢𑀕𑁆𑀕𑀳𑀡𑁂𑀦 𑀕𑀳𑀺𑀢𑁄𑀯 𑀳𑁄𑀢𑀺. 𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀬𑁄 𑀕𑀳𑀺𑀢𑀸 𑀲𑀫𑀸𑀥𑀺𑀓𑁆𑀔𑀦𑁆𑀥𑀲𑀗𑁆𑀕𑀳𑀢𑁄. 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸 𑀕𑀳𑀺𑀢𑀸 𑀧𑀜𑁆𑀜𑀸𑀓𑁆𑀔𑀦𑁆𑀥𑀲𑀗𑁆𑀕𑀳𑀢𑁄. 𑀅𑀦𑁆𑀢𑀤𑁆𑀯𑀬𑀯𑀺𑀯𑀚𑁆𑀚𑀦𑀁 𑀕𑀳𑀺𑀢𑀁 𑀲𑀭𑀽𑀧𑁂𑀦𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀻𑀢𑀺𑀆𑀤𑀺 𑀦𑀺𑀕𑀫𑀦𑀁.

𑀲𑀫𑀺𑀤𑁆𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀦𑁆𑀤𑀦𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀢𑁆𑀢𑀺𑀯𑀕𑁆𑀕𑁄

𑁧.𑀲𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧. 𑀤𑁂𑀲𑀦𑀸𑀲𑀻𑀲𑀦𑁆𑀢𑀺 ¶ 𑀤𑁂𑀲𑀦𑀸𑀧𑀤𑁂𑀲𑀮𑀓𑁆𑀔𑀡𑀯𑀘𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀑𑀫𑀝𑁆𑀞𑁄𑀢𑀺 𑀅𑀥𑁄𑀫𑀼𑀔𑀁 𑀓𑀢𑁆𑀯𑀸 𑀤𑀺𑀦𑁆𑀦𑀧𑁆𑀧𑀳𑀸𑀭𑁄. 𑀇𑀫𑀺𑀦𑀸 𑀏𑀯 𑀧𑀲𑀗𑁆𑀕𑁂𑀦 𑀧𑀳𑀸𑀭𑁂 𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀘𑀢𑁆𑀢𑀸𑀭𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁 ¶ . 𑀉𑀧𑀭𑀺 𑀞𑀢𑁆𑀯𑀸𑀢𑀺 𑀳𑀢𑁆𑀣𑀺𑀆𑀤𑀻𑀦𑀁 𑀉𑀧𑀭𑀺 𑀞𑀢𑁆𑀯𑀸. 𑀅𑀥𑁄𑀫𑀼𑀔𑀁 𑀤𑀺𑀦𑁆𑀦𑀧𑁆𑀧𑀳𑀸𑀭𑁄𑀢𑀺 𑀔𑀕𑁆𑀕𑀓𑀭𑀯𑀸𑀮𑀸𑀤𑀻𑀦𑀁 𑀅𑀥𑁄𑀫𑀼𑀔𑀁 𑀓𑀢𑁆𑀯𑀸 𑀧𑀳𑀢𑀧𑀳𑀸𑀭𑁄. 𑀉𑀫𑁆𑀫𑀝𑁆𑀞𑁄 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀯𑀺𑀥𑀧𑁆𑀧𑀳𑀸𑀭𑁄 𑀯𑀺𑀫𑀝𑁆𑀞𑁄. ‘‘𑀑𑀫𑀝𑁆𑀞𑁄 𑀕𑀳𑀺𑀢𑁄’’𑀢𑀺 𑀯𑀢𑁆𑀯𑀸 𑀢𑀲𑁆𑀲𑁂𑀯 𑀕𑀳𑀡𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀼𑀕𑁆𑀕𑀦𑁆𑀥𑀓𑀺𑀫𑀺𑀆𑀤𑀻𑀦𑀁 𑀯𑀲𑁂𑀦 𑀅𑀦𑁆𑀢𑁄𑀤𑁄𑀲𑁄. 𑀫𑀜𑁆𑀘𑁂𑀦 𑀲𑀤𑁆𑀥𑀺𑀁 𑀩𑀦𑁆𑀥𑀺𑀢𑁆𑀯𑀸𑀢𑀺 𑀬𑀲𑁆𑀫𑀺𑀁 𑀫𑀜𑁆𑀘𑁂 𑀯𑀡𑀺𑀓𑀧𑀼𑀕𑁆𑀕𑀮𑁄 𑀦𑀺𑀧𑀦𑁆𑀦𑁄, 𑀢𑀢𑁆𑀣 𑀢𑀁 𑀲𑀼𑀩𑀦𑁆𑀥𑀁 𑀓𑀢𑁆𑀯𑀸 𑀧𑀸𑀤𑀝𑁆𑀞𑀸𑀦𑀁 𑀉𑀤𑁆𑀥𑀁 𑀓𑀭𑁄𑀦𑁆𑀢𑁂𑀳𑀺 𑀲𑀻𑀲𑀝𑁆𑀞𑀸𑀦𑀁 𑀅𑀥𑁄 𑀓𑀸𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀅𑀥𑁄𑀲𑀺𑀭𑁄 𑀓𑀸𑀢𑀩𑁆𑀩𑁄’’𑀢𑀺. 𑀧𑀭𑀺𑀩𑁆𑀩𑀚𑁂𑀢𑀺 𑀧𑀯𑀢𑁆𑀢𑁂𑀬𑁆𑀬. 𑀲𑀸 𑀧𑀦 𑀧𑀯𑀢𑁆𑀢𑀺 𑀪𑀸𑀯𑀦𑀸𑀯𑀺𑀳𑀸𑀭𑁂𑀦 𑀬𑀼𑀢𑁆𑀢𑀸𑀢𑀺 𑀆𑀳 ‘‘𑀯𑀺𑀳𑀭𑁂𑀬𑁆𑀬𑀸’’𑀢𑀺.

𑀲𑀮𑁆𑀮𑀲𑁆𑀲 𑀉𑀩𑁆𑀩𑀳𑀦𑀁 𑀲𑀮𑁆𑀮𑀼𑀩𑁆𑀩𑀳𑀦𑀁. 𑀅𑀢𑁆𑀣𑀁 𑀧𑀭𑀺𑀢𑁆𑀢𑀓𑀁 𑀕𑀳𑁂𑀢𑁆𑀯𑀸 𑀞𑀺𑀢𑀸 𑀉𑀧𑀫𑀸𑀓𑀸𑀭𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺𑀆𑀤𑀺. 𑀅𑀦𑀼𑀩𑀦𑁆𑀥𑁄𑀯 𑀳𑁄𑀢𑀺 𑀲𑀢𑀺 𑀧𑀘𑁆𑀘𑀬𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀢𑁄 𑀤𑁂𑀯𑀢𑀸𑀬 𑀓𑀸𑀫𑀭𑀸𑀕𑀧𑁆𑀧𑀳𑀸𑀦𑀲𑁆𑀲 𑀚𑁄𑀢𑀺𑀢𑀢𑁆𑀢𑀸. 𑀦𑀦𑀼 𑀪𑀕𑀯𑀢𑀸 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀤𑁂𑀲𑀦𑀸 𑀦𑀺𑀝𑁆𑀞𑀸𑀧𑁂𑀢𑀩𑁆𑀩𑀸𑀢𑀺? 𑀦, 𑀇𑀢𑀭𑀺𑀲𑁆𑀲𑀸 𑀜𑀸𑀡𑀩𑀮𑀸𑀦𑀼𑀭𑀽𑀧𑀤𑁂𑀲𑀦𑀸𑀬 𑀧𑀯𑀢𑁆𑀢𑁂𑀢𑀩𑁆𑀩𑀢𑁄. 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀓𑀼𑀮𑀜𑁆𑀳𑀺 𑀥𑀫𑁆𑀫𑀁 𑀥𑀫𑁆𑀫𑀲𑁆𑀲𑀸𑀫𑀻 𑀤𑁂𑀲𑁂𑀢𑀻𑀢𑀺.

𑀲𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀨𑀼𑀲𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨. 𑀓𑀫𑁆𑀫𑀁 𑀅𑀨𑀼𑀲𑀦𑁆𑀢𑀦𑁆𑀢𑀺 𑀓𑀫𑁆𑀫𑀨𑀲𑁆𑀲𑀁 𑀅𑀨𑀼𑀲𑀦𑁆𑀢𑀁, 𑀓𑀫𑁆𑀫𑀁 𑀅𑀓𑀭𑁄𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀧𑀸𑀓𑁄 𑀦 𑀨𑀼𑀲𑀢𑀻𑀢𑀺 𑀯𑀺𑀧𑀸𑀓𑀨𑀲𑁆𑀲𑁄 𑀦 𑀨𑀼𑀲𑀢𑀺, 𑀯𑀺𑀧𑀸𑀓𑁄 𑀦 𑀉𑀧𑁆𑀧𑀚𑁆𑀚𑀢𑁂𑀯 𑀓𑀸𑀭𑀡𑀲𑁆𑀲 𑀅𑀪𑀸𑀯𑀢𑁄. 𑀏𑀯𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀓𑀫𑁆𑀫𑀯𑀝𑁆𑀝𑁂𑀦 𑀯𑀺𑀧𑀸𑀓𑀯𑀝𑁆𑀝𑀁 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸 𑀅𑀢𑁆𑀣𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀓𑁂𑀯𑀮𑀁 𑀓𑀫𑁆𑀫𑀯𑀝𑁆𑀝𑀯𑀲𑁂𑀦 𑀅𑀢𑁆𑀣𑀁 𑀯𑀤𑀦𑁆𑀢𑁄 ‘‘𑀓𑀫𑁆𑀫𑀫𑁂𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀸𑀓𑀭𑁄𑀢𑁄 𑀓𑀭𑀺𑀬𑀢𑀻𑀢𑀺 𑀓𑀫𑁆𑀫𑀁 𑀅𑀓𑀼𑀩𑁆𑀩𑀢𑁄 𑀦 𑀓𑀬𑀺𑀭𑀢𑀺, 𑀅𑀦𑀪𑀺𑀲𑀦𑁆𑀥𑀺𑀓𑀢𑀓𑀫𑁆𑀫𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 ¶ 𑀢𑀫𑁂𑀯𑀢𑁆𑀣𑀁 𑀅𑀦𑁆𑀯𑀬𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀨𑀼𑀲𑀦𑁆𑀢𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀢𑁄𑀢𑀺 𑀨𑀼𑀲𑀦𑀳𑁂𑀢𑀼. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀓𑀸𑀭𑀡𑀁 𑀓𑀢𑁆𑀯𑀸 𑀧𑀭𑀺𑀯𑁂𑀞𑀺𑀢𑀯𑀲𑁂𑀦 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀫𑀸 𑀨𑀼𑀲𑀦𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀢𑀸𑀢𑀺 𑀓𑀸𑀭𑀓𑀲𑁆𑀲𑁂𑀯 𑀓𑀫𑁆𑀫𑀯𑀺𑀧𑀸𑀓𑀸𑀦𑀼𑀩𑀦𑁆𑀥𑁄, 𑀦𑀸𑀓𑀸𑀭𑀓𑀲𑁆𑀲𑀸𑀢𑀺 𑀅𑀬𑀁 𑀓𑀫𑁆𑀫𑀯𑀺𑀧𑀸𑀓𑀸𑀦𑀁 𑀲𑀪𑀸𑀯𑁄.

𑀧𑀘𑁆𑀘𑁂𑀢𑀺 𑀉𑀧𑀕𑀘𑁆𑀙𑀢𑀺 𑀅𑀦𑀼𑀩𑀦𑁆𑀥𑀢𑀺. 𑀧𑀸𑀧𑀦𑁆𑀢𑀺 𑀧𑀸𑀧𑀓𑀁 𑀓𑀫𑁆𑀫𑀁 𑀨𑀮𑀜𑁆𑀘. 𑀅𑀬𑀜𑁆𑀘 𑀅𑀢𑁆𑀣𑁄 𑀅𑀭𑀜𑁆𑀜𑁂 𑀮𑀼𑀤𑁆𑀤𑀓𑀲𑁆𑀲 𑀉𑀬𑁆𑀬𑁄𑀚𑀦𑀸𑀬 𑀲𑀼𑀦𑀔𑁂𑀳𑀺 𑀧𑀭𑀺𑀯𑀸𑀭𑀺𑀬𑀫𑀸𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀬𑁂𑀦 𑀭𑀼𑀓𑁆𑀔𑀁 𑀆𑀭𑀼𑀴𑁆𑀳𑀲𑁆𑀲 ¶ 𑀘𑀻𑀯𑀭𑁂 𑀮𑀼𑀤𑁆𑀤𑀲𑁆𑀲 𑀉𑀧𑀭𑀺 𑀧𑀢𑀺𑀢𑁂 𑀢𑀲𑁆𑀲 𑀲𑀼𑀦𑀔𑁂𑀳𑀺 𑀔𑀸𑀤𑀺𑀢𑁆𑀯𑀸 𑀫𑀸𑀭𑀺𑀢𑀯𑀢𑁆𑀣𑀼𑀦𑀸 𑀤𑀻𑀧𑁂𑀢𑀩𑁆𑀩𑁄𑀢𑀺.

𑀨𑀼𑀲𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀚𑀝𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩. 𑀬𑁂𑀦 𑀅𑀢𑁆𑀣𑁂𑀦 𑀢𑀡𑁆𑀳𑀸 ‘‘𑀚𑀝𑀸’’𑀢𑀺 𑀯𑀼𑀢𑁆𑀢𑀸, 𑀢𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀚𑀸𑀮𑀺𑀦𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀲𑀸 𑀳𑀺 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀧𑀪𑁂𑀤𑀸 𑀅𑀢𑁆𑀢𑀦𑁄 𑀅𑀯𑀬𑀯𑀪𑀽𑀢𑀸 𑀏𑀯 𑀚𑀸𑀮𑀸 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀚𑀸𑀮𑀺𑀦𑀻𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀸𑀦𑀺𑀲𑁆𑀲𑀸 𑀚𑀝𑀸𑀓𑀸𑀭𑁂𑀦 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀽𑀢𑀺 𑀢𑀲𑁆𑀲𑀸 𑀧𑀯𑀢𑁆𑀢𑀺𑀝𑁆𑀞𑀸𑀦𑀫𑀸𑀳 𑀭𑀽𑀧𑀸𑀤𑀺𑀙𑀴𑀸𑀭𑀫𑁆𑀫𑀡𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀢𑀡𑁆𑀳𑀸𑀯𑀺𑀲𑀬𑀲𑁆𑀲 𑀅𑀪𑀸𑀯𑀢𑁄. 𑀳𑁂𑀝𑁆𑀞𑀼𑀧𑀭𑀺𑀬𑀯𑀲𑁂𑀦𑀸𑀢𑀺 𑀓𑀤𑀸𑀘𑀺 𑀭𑀽𑀧𑀸𑀭𑀫𑁆𑀫𑀡𑁂 𑀓𑀤𑀸𑀘𑀺 𑀬𑀸𑀯 𑀥𑀫𑁆𑀫𑀸𑀭𑀫𑁆𑀫𑀡𑀸, 𑀓𑀤𑀸𑀘𑀺 𑀥𑀫𑁆𑀫𑀸𑀭𑀫𑁆𑀫𑀡𑁂 𑀓𑀤𑀸𑀘𑀺 𑀬𑀸𑀯 𑀭𑀽𑀧𑀸𑀭𑀫𑁆𑀫𑀡𑀸𑀢𑀺 𑀏𑀯𑀁 𑀳𑁂𑀝𑁆𑀞𑀸 𑀘 𑀉𑀧𑀭𑀺 𑀘 𑀧𑀯𑀢𑁆𑀢𑀺𑀯𑀲𑁂𑀦. 𑀤𑁂𑀲𑀦𑀸𑀓𑁆𑀓𑀫𑁂𑀦 𑀘𑁂𑀢𑁆𑀣 𑀳𑁂𑀝𑁆𑀞𑀼𑀧𑀭𑀺𑀬𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀓𑀸𑀫𑀭𑀸𑀕𑀸𑀤𑀺𑀯𑀲𑁂𑀦𑀧𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀗𑁆𑀔𑀸𑀭𑀸𑀦𑀁 𑀔𑀡𑀺𑀓𑀪𑀸𑀯𑀢𑁄 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺 𑀏𑀢𑁆𑀣 𑀲𑀁𑀲𑀺𑀩𑁆𑀩𑀦𑀦𑁆𑀢𑀺 𑀆𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑀢𑁄 𑀲𑀁𑀲𑀺𑀩𑁆𑀩𑀦𑀝𑁆𑀞𑁂𑀦𑀸’’𑀢𑀺. 𑀇𑀤𑀁 𑀬𑁂𑀦 𑀲𑀫𑁆𑀩𑀦𑁆𑀥𑁂𑀦 𑀚𑀝𑀸 𑀯𑀺𑀬𑀸𑀢𑀺 𑀚𑀝𑀸𑀢𑀺 𑀚𑀝𑀸𑀢𑀡𑁆𑀳𑀸𑀦𑀁 𑀉𑀧𑀫𑀽𑀧𑀫𑁂𑀬𑁆𑀬𑀢𑀸, 𑀢𑀁𑀤𑀲𑁆𑀲𑀦𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀬𑀣𑀸 𑀚𑀸𑀮𑀺𑀦𑀻 𑀯𑁂𑀴𑀼𑀕𑀼𑀫𑁆𑀩𑀲𑁆𑀲 𑀲𑀸𑀔𑀸, 𑀢𑀸𑀲𑀁 𑀲𑀜𑁆𑀘𑀬𑀸𑀤𑀬𑁄 𑀘 𑀅𑀢𑁆𑀢𑀦𑁄 𑀅𑀯𑀬𑀯𑁂𑀳𑀺 𑀲𑀁𑀲𑀺𑀩𑁆𑀩𑀺𑀢𑀸 𑀯𑀺𑀦𑀤𑁆𑀥𑀸 ‘‘𑀚𑀝𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀁 𑀢𑀡𑁆𑀳𑀸𑀧𑀺 𑀲𑀁𑀲𑀺𑀩𑁆𑀩𑀦𑀲𑀪𑀸𑀯𑁂𑀦𑀸𑀢𑀺.

𑀇𑀫𑁂 ¶ 𑀲𑀢𑁆𑀢𑀸 ‘‘𑀫𑀫 𑀇𑀤’’𑀦𑁆𑀢𑀺 𑀧𑀭𑀺𑀕𑁆𑀕𑀳𑀺𑀢𑀁 𑀅𑀢𑁆𑀢𑀦𑀺𑀩𑁆𑀩𑀺𑀲𑁂𑀲𑀁 𑀫𑀜𑁆𑀜𑀫𑀸𑀦𑀸 𑀅𑀩𑁆𑀪𑀦𑁆𑀢𑀭𑀺𑀫𑀁 𑀓𑀭𑁄𑀦𑁆𑀢𑀺. 𑀅𑀩𑁆𑀪𑀦𑁆𑀢𑀭𑀝𑁆𑀞𑁄 𑀘 𑀅𑀦𑁆𑀢𑁄-𑀲𑀤𑁆𑀤𑁄𑀢𑀺 𑀲𑀓𑀧𑀭𑀺𑀓𑁆𑀔𑀸𑀭𑁂𑀲𑀼 𑀉𑀧𑁆𑀧𑀚𑁆𑀚𑀦𑀫𑀸𑀦𑀸𑀧𑀺 𑀢𑀡𑁆𑀳𑀸 ‘‘𑀅𑀦𑁆𑀢𑁄𑀚𑀝𑀸’’𑀢𑀺 𑀯𑀼𑀢𑁆𑀢𑀸. 𑀧𑀩𑁆𑀩𑀚𑀺𑀢𑀲𑁆𑀲 𑀧𑀢𑁆𑀢𑀸𑀤𑀺, 𑀕𑀳𑀝𑁆𑀞𑀲𑁆𑀲 𑀳𑀢𑁆𑀣𑀺𑀆𑀤𑀺 𑀲𑀓𑀧𑀭𑀺𑀓𑁆𑀔𑀸𑀭𑁄. 𑀅𑀢𑁆𑀢𑀸𑀢𑀺 𑀪𑀯𑀢𑀺 𑀏𑀢𑁆𑀣 𑀅𑀪𑀺𑀫𑀸𑀦𑁄𑀢𑀺 𑀅𑀢𑁆𑀢𑀪𑀸𑀯𑁄, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀁. 𑀲𑀭𑀻𑀭𑀦𑁆𑀢𑀺 𑀓𑁂𑀘𑀺. ‘‘𑀫𑀫 𑀅𑀢𑁆𑀢𑀪𑀸𑀯𑁄 𑀲𑀼𑀦𑁆𑀤𑀭𑁄, 𑀅𑀲𑀼𑀓𑀲𑁆𑀲 𑀯𑀺𑀬 𑀫𑀫 𑀅𑀢𑁆𑀢𑀪𑀸𑀯𑁄 𑀪𑀯𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 𑀲𑀓𑀅𑀢𑁆𑀢𑀪𑀸𑀯𑀸𑀤𑀻𑀲𑀼 𑀢𑀡𑁆𑀳𑀸𑀬 𑀉𑀧𑁆𑀧𑀚𑁆𑀚𑀦𑀸𑀓𑀸𑀭𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀢𑀦𑁄 𑀘𑀓𑁆𑀔𑀸𑀤𑀻𑀦𑀺 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀦𑀺, 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀭𑀽𑀧𑀸𑀤𑀻𑀦𑀺 𑀩𑀸𑀳𑀺𑀭𑀸𑀬𑀢𑀦𑀸𑀦𑀺, 𑀧𑀭𑁂𑀲𑀁 𑀲𑀩𑁆𑀩𑀸𑀦𑀺 𑀯𑀸. 𑀲𑀧𑀭𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀯𑀸 𑀘𑀓𑁆𑀔𑀸𑀤𑀻𑀦𑀺 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀦𑀺, 𑀢𑀣𑀸 𑀭𑀽𑀧𑀸𑀤𑀻𑀦𑀺 𑀩𑀸𑀳𑀺𑀭𑀸𑀬𑀢𑀦𑀸𑀦𑀺. 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀪𑀯𑁂𑀲𑀼 𑀧𑀯𑀢𑁆𑀢𑀺𑀬𑀸𑀧𑀺 𑀢𑀡𑁆𑀳𑀸𑀬 𑀅𑀦𑁆𑀢𑁄𑀚𑀝𑀸𑀩𑀳𑀺𑀚𑀝𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀸𑀫𑀪𑀯𑁄 𑀳𑀺 𑀓𑀲𑁆𑀲𑀘𑀺𑀧𑀺 𑀓𑀺𑀮𑁂𑀲𑀲𑁆𑀲 𑀅𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸 𑀓𑀢𑁆𑀣𑀘𑀺𑀧𑀺 𑀅𑀯𑀺𑀫𑀼𑀢𑁆𑀢𑁄 𑀅𑀚𑁆𑀛𑀢𑁆𑀢𑀕𑁆𑀕𑀳𑀡𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄𑀢𑀺 ‘‘𑀅𑀚𑁆𑀛𑀢𑁆𑀢𑀁 𑀅𑀦𑁆𑀢𑁄’’𑀢𑀺 ¶ 𑀘 𑀯𑀼𑀘𑁆𑀘𑀢𑀺, 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀭𑀽𑀧𑀸𑀭𑀽𑀧𑀪𑀯𑁄 ‘‘𑀩𑀳𑀺𑀤𑁆𑀥𑀸 𑀩𑀳𑀻’’𑀢𑀺 𑀘. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀅𑀚𑁆𑀛𑀢𑁆𑀢𑀲𑀁𑀬𑁄𑀚𑀦𑁄 𑀧𑀼𑀕𑁆𑀕𑀮𑁄, 𑀩𑀳𑀺𑀤𑁆𑀥𑀸𑀲𑀁𑀬𑁄𑀚𑀦𑁄 𑀧𑀼𑀕𑁆𑀕𑀮𑁄’’𑀢𑀺 (𑀅. 𑀦𑀺. 𑁨.𑁩𑁭).

𑀯𑀺𑀲𑀬𑀪𑁂𑀤𑁂𑀦 𑀧𑀯𑀢𑁆𑀢𑀺𑀆𑀓𑀸𑀭𑀪𑁂𑀤𑁂𑀦 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀫𑁆𑀧𑀺 𑀢𑀡𑁆𑀳𑀁 𑀚𑀝𑀸𑀪𑀸𑀯𑀲𑀸𑀫𑀜𑁆𑀜𑁂𑀦 𑀏𑀓𑀦𑁆𑀢𑀺 𑀕𑀳𑁂𑀢𑁆𑀯𑀸 ‘‘𑀢𑀸𑀬 𑀏𑀯𑀁 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀚𑀝𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀲𑀸 𑀧𑀦 𑀧𑀚𑀸𑀢𑀺 𑀯𑀼𑀢𑁆𑀢𑀲𑀢𑁆𑀢𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀸 𑀏𑀯 𑀳𑀼𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀢𑀁 𑀚𑀝𑁂𑀦𑁆𑀢𑀻 𑀯𑀺𑀦𑀦𑁆𑀥𑀦𑁆𑀢𑀻 𑀧𑀯𑀢𑁆𑀢𑀢𑀻𑀢𑀺 𑀆𑀳 ‘‘𑀚𑀝𑀸𑀬 𑀚𑀝𑀺𑀢𑀸 𑀧𑀚𑀸’’𑀢𑀺. 𑀢𑀣𑀸 𑀳𑀺 𑀧𑀭𑀫𑀢𑁆𑀣𑀢𑁄 𑀬𑀤𑀺𑀧𑀺 𑀅𑀯𑀬𑀯𑀩𑁆𑀬𑀢𑀺𑀭𑁂𑀓𑁂𑀦 𑀲𑀫𑀼𑀤𑀸𑀬𑁄 𑀦𑀢𑁆𑀣𑀺, 𑀏𑀓𑀤𑁂𑀲𑁄 𑀧𑀦 𑀲𑀫𑀼𑀤𑀸𑀬𑁄 𑀦𑀸𑀫 𑀦 𑀳𑁄𑀢𑀻𑀢𑀺 𑀅𑀯𑀬𑀯𑀢𑁄 𑀲𑀫𑀼𑀤𑀸𑀬𑀁 𑀪𑀺𑀦𑁆𑀦𑀁 𑀓𑀢𑁆𑀯𑀸 𑀉𑀧𑀫𑀽𑀧𑀫𑁂𑀬𑁆𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀦𑀸𑀫 𑀯𑁂𑀴𑀼𑀚𑀝𑀸𑀤𑀻𑀳𑀺…𑀧𑁂… 𑀲𑀁𑀲𑀺𑀩𑁆𑀩𑀺𑀢𑀸’’𑀢𑀺 𑀆𑀳. 𑀇𑀫𑀁 𑀚𑀝𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀻𑀲𑀼 𑀥𑀸𑀢𑀽𑀲𑀼 𑀏𑀓𑀫𑁆𑀧𑀺 𑀅𑀲𑁂𑀲𑁂𑀢𑁆𑀯𑀸 𑀲𑀁𑀲𑀺𑀩𑁆𑀩𑀦𑁂𑀦 𑀢𑁂𑀥𑀸𑀢𑀼𑀓𑀁 𑀚𑀝𑁂𑀢𑁆𑀯𑀸 𑀞𑀺𑀢𑀁. 𑀢𑁂𑀦𑀲𑁆𑀲𑀸 𑀫𑀳𑀸𑀯𑀺𑀲𑀬𑀢𑀁 𑀯𑀺𑀚𑀝𑀦𑀲𑁆𑀲 𑀘 𑀲𑀼𑀤𑀼𑀓𑁆𑀓𑀭𑀪𑀸𑀯𑀫𑀸𑀳. 𑀯𑀺𑀚𑀝𑁂𑀢𑀼𑀁 𑀓𑁄 𑀲𑀫𑀢𑁆𑀣𑁄𑀢𑀺 𑀇𑀫𑀺𑀦𑀸 ‘‘𑀯𑀺𑀚𑀝𑀬𑁂’’𑀢𑀺 𑀧𑀤𑀁 𑀲𑀢𑁆𑀢𑀺𑀅𑀢𑁆𑀣𑀁, 𑀦 𑀯𑀺𑀥𑀺𑀅𑀢𑁆𑀣𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀏𑀯𑀁 ‘‘𑀅𑀦𑁆𑀢𑁄𑀚𑀝𑀸’’𑀢𑀺𑀆𑀤𑀺𑀦𑀸 𑀧𑀼𑀝𑁆𑀞𑁄 𑀅𑀣𑀲𑁆𑀲 𑀪𑀕𑀯𑀸 𑀢𑀫𑀢𑁆𑀣𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 ‘‘𑀲𑀻𑀮𑁂 𑀧𑀢𑀺𑀝𑁆𑀞𑀸𑀬𑀸’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀲𑀻𑀮𑁂𑀢𑀺 𑀓𑀼𑀲𑀮𑀲𑀻𑀮𑁂. 𑀢𑀁 𑀧𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀤𑀺𑀪𑁂𑀤𑁂𑀲𑀼 𑀧𑀭𑀺𑀲𑀼𑀤𑁆𑀥𑀫𑁂𑀯 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂’’𑀢𑀺.

𑀦𑀭𑀢𑀺 ¶ 𑀦𑁂𑀢𑀻𑀢𑀺 𑀦𑀭𑁄, 𑀧𑀼𑀭𑀺𑀲𑁄. 𑀓𑀸𑀫𑀁 𑀇𑀢𑁆𑀣𑀻𑀧𑀺 𑀢𑀡𑁆𑀳𑀸𑀚𑀝𑀸𑀯𑀺𑀚𑀝𑀦𑁂 𑀲𑀫𑀢𑁆𑀣𑀸 𑀅𑀢𑁆𑀣𑀺, 𑀧𑀥𑀸𑀦𑀫𑁂𑀯 𑀧𑀦 𑀲𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀭𑁄’’𑀢𑀺 𑀆𑀳 𑀬𑀣𑀸 ‘‘𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀯𑀺𑀪𑀸𑀕𑁂𑀦 𑀧𑀼𑀕𑁆𑀕𑀮𑀧𑀭𑀺𑀬𑀸𑀬𑁄 𑀅𑀬𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦𑀭𑁄𑀢𑀺 𑀲𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀯𑀺𑀧𑀸𑀓𑀪𑀽𑀢𑀸𑀬 𑀲𑀳 𑀧𑀜𑁆𑀜𑀸𑀬 𑀪𑀯𑀢𑀻𑀢𑀺 𑀲𑀧𑀜𑁆𑀜𑁄. 𑀢𑀸𑀬 𑀳𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀦𑁆𑀢𑀸𑀦𑀯𑀲𑁂𑀦 𑀩𑀳𑀼𑀮𑀁 𑀧𑀯𑀢𑁆𑀢𑀫𑀸𑀦𑀸𑀬 𑀅𑀬𑀁 𑀲𑀢𑁆𑀢𑁄 𑀲𑀯𑀺𑀲𑁂𑀲𑀁 𑀲𑀧𑀜𑁆𑀜𑁄𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺. 𑀯𑀺𑀧𑀸𑀓𑀧𑀜𑁆𑀜𑀸𑀧𑀺 𑀳𑀺 𑀲𑀦𑁆𑀢𑀸𑀦𑀯𑀺𑀲𑁂𑀲𑁂𑀦 𑀪𑀸𑀯𑀦𑀸𑀧𑀜𑁆𑀜𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄 𑀳𑁄𑀢𑀺 𑀅𑀳𑁂𑀢𑀼𑀓𑀤𑁆𑀯𑀺𑀳𑁂𑀢𑀼𑀓𑀸𑀦𑀁 𑀢𑀤𑀪𑀸𑀯𑀢𑁄. 𑀓𑀫𑁆𑀫𑀚𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀧𑀜𑁆𑀜𑀸𑀬𑀸𑀢𑀺 𑀓𑀫𑁆𑀫𑀚𑀸𑀬 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀁 𑀧𑀜𑁆𑀜𑀸𑀬𑀸𑀢𑀺 𑀏𑀯𑀁 𑀢𑀺𑀳𑁂𑀢𑀼𑀓𑀲𑀤𑁆𑀤𑁄 𑀧𑀝𑀺𑀲𑀦𑁆𑀥𑀺𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄, 𑀦 𑀧𑀜𑁆𑀜𑀸𑀲𑀤𑁆𑀤𑁂𑀦. 𑀦 𑀳𑀺 𑀧𑀜𑁆𑀜𑀸 𑀢𑀺𑀳𑁂𑀢𑀼𑀓𑀸 𑀅𑀢𑁆𑀣𑀺. 𑀧𑀝𑀺𑀲𑀦𑁆𑀥𑀺𑀢𑁄 𑀧𑀪𑀼𑀢𑀺 𑀧𑀯𑀢𑁆𑀢𑀫𑀸𑀦𑀸 𑀧𑀜𑁆𑀜𑀸 ‘‘𑀧𑀝𑀺𑀲𑀦𑁆𑀥𑀺𑀬𑀁 𑀧𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀸 𑀢𑀁𑀫𑀽𑀮𑀓𑀢𑁆𑀢𑀸, 𑀦 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀧𑀯𑀢𑁆𑀢𑀸 𑀏𑀯.

𑀘𑀺𑀦𑁆𑀢𑁂𑀢𑀺 𑀆𑀭𑀫𑁆𑀫𑀡𑀁 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀘𑀺𑀢𑁆𑀢𑀁, 𑀲𑀫𑀸𑀥𑀺. 𑀲𑁄 𑀳𑀺 𑀲𑀸𑀢𑀺𑀲𑀬𑀁 𑀉𑀧𑀦𑀺𑀚𑁆𑀛𑀸𑀦𑀓𑀺𑀘𑁆𑀘𑁄. 𑀦 𑀳𑀺 𑀯𑀺𑀢𑀓𑁆𑀓𑀸𑀤𑀬𑁄 𑀯𑀺𑀦𑀸 𑀲𑀫𑀸𑀥𑀺𑀦𑀸 𑀢𑀫𑀢𑁆𑀣𑀁 𑀲𑀸𑀥𑁂𑀦𑁆𑀢𑀺, 𑀲𑀫𑀸𑀥𑀺 𑀧𑀦 𑀢𑁂𑀳𑀺 𑀯𑀺𑀦𑀸𑀧𑀺 ¶ 𑀲𑀸𑀥𑁂𑀢𑀻𑀢𑀺. 𑀧𑀕𑀼𑀡𑀩𑀮𑀯𑀪𑀸𑀯𑀸𑀧𑀸𑀤𑀦𑁂𑀦 𑀧𑀘𑁆𑀘𑀬𑁂𑀳𑀺 𑀘𑀺𑀢𑁆𑀢𑀁, 𑀅𑀢𑁆𑀢𑀲𑀦𑁆𑀢𑀸𑀦𑀁 𑀘𑀺𑀦𑁄𑀢𑀻𑀢𑀺𑀧𑀺 𑀘𑀺𑀢𑁆𑀢𑀁, 𑀲𑀫𑀸𑀥𑀺. 𑀧𑀞𑀫𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀢𑀸𑀬 𑀇𑀤𑁆𑀥𑀺𑀯𑀺𑀥𑀸𑀤𑀺𑀘𑀺𑀢𑁆𑀢𑀓𑀭𑀡𑁂𑀦 𑀘 𑀲𑀫𑀸𑀥𑀺 𑀘𑀺𑀢𑁆𑀢𑀦𑁆𑀢𑀺 𑀯𑀺𑀦𑀸𑀧𑀺 𑀧𑀭𑁄𑀧𑀤𑁂𑀲𑁂𑀦𑀲𑁆𑀲 𑀘𑀺𑀢𑁆𑀢𑀧𑀭𑀺𑀬𑀸𑀬𑁄 𑀮𑀩𑁆𑀪𑀢𑁂𑀯. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀘𑀺𑀢𑁆𑀢-𑀲𑀤𑁆𑀤𑁄 𑀯𑀺𑀜𑁆𑀜𑀸𑀡𑁂 𑀦𑀺𑀭𑀼𑀴𑁆𑀳𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀲𑀻𑀲𑁂𑀦 𑀳𑁂𑀢𑁆𑀣 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀓𑀣𑀺𑀢𑀸’’𑀢𑀺. 𑀬𑀣𑀸𑀲𑀪𑀸𑀯𑀁 𑀧𑀓𑀸𑀭𑁂𑀳𑀺 𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸. 𑀲𑀸 𑀬𑀤𑀺𑀧𑀺 𑀓𑀼𑀲𑀮𑀸𑀤𑀺𑀪𑁂𑀤𑀢𑁄 𑀩𑀳𑀼𑀯𑀺𑀥𑀸, ‘‘𑀪𑀸𑀯𑀬’’𑀦𑁆𑀢𑀺 𑀧𑀦 𑀯𑀘𑀦𑀢𑁄 𑀪𑀸𑀯𑁂𑀢𑀩𑁆𑀩𑀸 𑀇𑀥𑀸𑀥𑀺𑀧𑁆𑀧𑁂𑀢𑀸𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀜𑁆𑀜𑀸𑀦𑀸𑀫𑁂𑀦 𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸’’𑀢𑀺. 𑀬𑀤𑀺𑀧𑀺 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀁 𑀆𑀢𑀸𑀧𑀦𑀁, 𑀢𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀫𑁆𑀧𑀺 𑀅𑀢𑁆𑀣𑁂𑀯, 𑀆𑀢𑀧𑁆𑀧𑀲𑀤𑁆𑀤𑁄 𑀯𑀺𑀬 𑀧𑀦 𑀆𑀢𑀸𑀧-𑀲𑀤𑁆𑀤𑁄 𑀯𑀻𑀭𑀺𑀬𑁂 𑀏𑀯 𑀦𑀺𑀭𑀼𑀴𑁆𑀳𑁄𑀢𑀺 𑀆𑀳 ‘‘𑀆𑀢𑀸𑀧𑀻𑀢𑀺 𑀯𑀻𑀭𑀺𑀬𑀯𑀸’’𑀢𑀺. 𑀬𑀣𑀸 𑀓𑀫𑁆𑀫𑀝𑁆𑀞𑀸𑀦𑀁 𑀢𑀸𑀬 𑀧𑀜𑁆𑀜𑀸𑀬 𑀧𑀭𑀺𑀢𑁄 𑀳𑀭𑀻𑀬𑀢𑀺 𑀧𑀯𑀢𑁆𑀢𑀻𑀬𑀢𑀺, 𑀏𑀯𑀁 𑀲𑀸𑀧𑀺 𑀢𑀤𑀢𑁆𑀣𑀁 𑀬𑁄𑀕𑀺𑀦𑀸𑀢𑀺 𑀆𑀳 ‘‘𑀧𑀸𑀭𑀺𑀳𑀸𑀭𑀺𑀬𑀧𑀜𑁆𑀜𑀸’’𑀢𑀺. 𑀅𑀪𑀺𑀓𑁆𑀓𑀫𑀸𑀤𑀻𑀦𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀸𑀤𑀺𑀯𑀲𑁂𑀦 𑀧𑀭𑀺𑀘𑁆𑀙𑀺𑀚𑁆𑀚 𑀦𑁂𑀢𑀻𑀢𑀺 𑀲𑀩𑁆𑀩𑀓𑀺𑀘𑁆𑀘𑀧𑀭𑀺𑀡𑀸𑀬𑀺𑀓𑀸.

𑀬𑀲𑁆𑀫𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀕𑀸𑀣𑀸 𑀪𑀸𑀲𑀺𑀢𑀸, 𑀢𑀲𑁆𑀫𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀫𑁂𑀯 𑀉𑀧𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀦𑀸𑀫 𑀧𑀼𑀭𑀺𑀲𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀦𑀺𑀲𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 ¶ 𑀦𑀺𑀲𑀺𑀢𑀁, 𑀅𑀢𑀺𑀯𑀺𑀬 𑀢𑀺𑀔𑀺𑀡𑀦𑁆𑀢𑀺 𑀅𑀢𑁆𑀣𑁄. 𑀲𑀢𑁆𑀣𑀲𑁆𑀲 𑀦𑀺𑀲𑀺𑀢𑀢𑀭𑀪𑀸𑀯𑀓𑀭𑀡𑀁 𑀦𑀺𑀲𑀸𑀦𑀲𑀺𑀮𑀸𑀬𑀁, 𑀩𑀸𑀳𑀼𑀩𑀮𑁂𑀦 𑀘𑀲𑁆𑀲 𑀉𑀓𑁆𑀔𑀺𑀧𑀦𑀦𑁆𑀢𑀺 𑀉𑀪𑀬𑀫𑁆𑀧𑁂𑀢𑀁 𑀅𑀢𑁆𑀣𑀸𑀧𑀦𑁆𑀦𑀁 𑀓𑀢𑁆𑀯𑀸 𑀉𑀧𑀫𑀸 𑀯𑀼𑀢𑁆𑀢𑀸𑀢𑀺 𑀢𑀤𑀼𑀪𑀬𑀁 𑀉𑀧𑀫𑁂𑀬𑁆𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑀸𑀥𑀺𑀲𑀺𑀮𑀸𑀬𑀁 𑀲𑀼𑀦𑀺𑀲𑀺𑀢𑀁…𑀧𑁂… 𑀧𑀜𑁆𑀜𑀸𑀳𑀢𑁆𑀣𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺 𑀆𑀳. 𑀲𑀫𑀸𑀥𑀺𑀕𑀼𑀡𑁂𑀦 𑀳𑀺 𑀧𑀜𑁆𑀜𑀸𑀬 𑀢𑀺𑀓𑁆𑀔𑀪𑀸𑀯𑁄. 𑀬𑀣𑀸𑀳 ‘‘𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺 (𑀲𑀁. 𑀦𑀺. 𑁩.𑁫; 𑁪.𑁯𑁯; 𑁫.𑁧𑁦𑁭𑁧). 𑀯𑀻𑀭𑀺𑀬𑀜𑁆𑀘𑀲𑁆𑀲𑀸 𑀉𑀧𑀢𑁆𑀣𑀫𑁆𑀪𑀓𑀁 𑀧𑀕𑁆𑀕𑀡𑁆𑀳𑀦𑀢𑁄. 𑀯𑀺𑀚𑀝𑁂𑀬𑁆𑀬𑀸𑀢𑀺 𑀯𑀺𑀚𑀝𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀬 𑀳𑀺 𑀯𑀢𑁆𑀢𑀫𑀸𑀦𑀸𑀬 𑀬𑁄𑀕𑀸𑀯𑀘𑀭𑁄 𑀢𑀡𑁆𑀳𑀸𑀚𑀝𑀁 𑀯𑀺𑀚𑀝𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫. 𑀯𑀺𑀚𑀝𑀦𑀜𑁆𑀘𑁂𑀢𑁆𑀣 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀳𑀸𑀦𑀦𑁆𑀢𑀺 𑀆𑀳 𑁋 ‘‘𑀲𑀜𑁆𑀙𑀺𑀦𑁆𑀤𑁂𑀬𑁆𑀬 𑀲𑀫𑁆𑀧𑀤𑀸𑀮𑁂𑀬𑁆𑀬𑀸’’𑀢𑀺.

𑀫𑀕𑁆𑀕𑀓𑁆𑀔𑀡𑁂 𑀧𑀦𑁂𑀲 𑀯𑀺𑀚𑀝𑁂𑀢𑀺 𑀦𑀸𑀫, 𑀅𑀕𑁆𑀕𑀨𑀮𑀓𑁆𑀔𑀡𑁂 𑀲𑀩𑁆𑀩𑀲𑁄 𑀯𑀺𑀚𑀝𑀺𑀢𑀚𑀝𑁄 𑀦𑀸𑀫. 𑀢𑁂𑀦𑀸𑀳 ‘‘𑀇𑀤𑀸𑀦𑀻’’𑀢𑀺𑀆𑀤𑀺. 𑀬𑀲𑁆𑀫𑀸 𑀚𑀝𑀸𑀬 𑀯𑀺𑀚𑀝𑀦𑀁 𑀅𑀭𑀺𑀬𑀫𑀕𑁆𑀕𑁂𑀦, 𑀢𑀜𑁆𑀘 𑀔𑁄 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫, 𑀢𑀲𑁆𑀫𑀸 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀚𑀝𑀸𑀬 𑀯𑀺𑀚𑀝𑀦𑁄𑀓𑀸𑀲’’𑀦𑁆𑀢𑀺. 𑀬𑀢𑁆𑀣 𑀧𑀦 𑀲𑀸 𑀯𑀺𑀚𑀝𑀻𑀬𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀢𑁆𑀣 𑀦𑀸𑀫𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀧𑀝𑀺𑀖𑀁 𑀭𑀽𑀧𑀲𑀜𑁆𑀜𑀸 𑀘𑀸’’𑀢𑀺 𑀕𑀸𑀣𑀸𑀲𑀼𑀔𑀢𑁆𑀣𑀁 𑀲𑀸𑀦𑀼𑀦𑀸𑀲𑀺𑀓𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄, ‘‘𑀧𑀝𑀺𑀖𑀭𑀽𑀧𑀲𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀝𑀺𑀖𑀲𑀜𑁆𑀜𑀸𑀯𑀲𑁂𑀦 𑀓𑀸𑀫𑀪𑀯𑁄 𑀕𑀳𑀺𑀢𑁄 𑀓𑀸𑀫𑀪𑀯𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀢𑀸𑀬. 𑀧𑀣𑀯𑀻𑀓𑀲𑀺𑀡𑀸𑀤𑀺𑀭𑀽𑀧𑁂 𑀲𑀜𑁆𑀜𑀸 𑀭𑀽𑀧𑀲𑀜𑁆𑀜𑀸. 𑀉𑀪𑀬𑀢𑁆𑀣𑀸𑀧𑀺 𑀲𑀜𑁆𑀜𑀸𑀲𑀻𑀲𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲𑁂𑀯 𑀕𑀳𑀡𑀁. 𑀪𑀯𑀲𑀗𑁆𑀔𑁂𑀧𑁂𑀦𑀸𑀢𑀺 𑀪𑀯𑀪𑀸𑀯𑁂𑀦 𑀲𑀗𑁆𑀔𑀺𑀧𑀺𑀢𑀩𑁆𑀩𑀢𑀸𑀬, 𑀪𑀯𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀭𑀽𑀧𑁂 𑀯𑀸 𑀯𑀺𑀭𑀚𑁆𑀚𑀦𑀯𑀲𑁂𑀦 𑀘 𑀯𑀢𑁆𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸 𑀇𑀥 𑀭𑀽𑀧𑀲𑀜𑁆𑀜𑀸𑀢𑀺 𑀯𑀼𑀢𑁆𑀢𑀸 ¶ , 𑀏𑀯𑀫𑁆𑀧𑁂𑀢𑁆𑀣 𑀅𑀭𑀽𑀧𑀪𑀯𑀲𑁆𑀲 𑀘 𑀕𑀳𑀺𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. ‘‘𑀦𑀸𑀫𑀜𑁆𑀘 𑀭𑀽𑀧𑀜𑁆𑀘𑀸’’𑀢𑀺 𑀅𑀦𑀯𑀲𑁂𑀲𑀢𑁄 𑀦𑀸𑀫𑀭𑀽𑀧𑀁 𑀕𑀳𑀺𑀢𑀦𑁆𑀢𑀺 𑀅𑀭𑀽𑀧𑀪𑀯-𑀅𑀲𑀜𑁆𑀜𑀪𑀯𑀸𑀦𑀫𑁆𑀧𑁂𑀢𑁆𑀣 𑀕𑀳𑀡𑀁 𑀲𑀺𑀤𑁆𑀥𑀦𑁆𑀢𑀺 𑀅𑀧𑀭𑁂. 𑀧𑀭𑀺𑀬𑀸𑀤𑀺𑀬𑀦𑀝𑁆𑀞𑀸𑀦𑁂𑀢𑀺 𑀧𑀭𑀺𑀬𑀸𑀤𑀺𑀬𑀦𑀓𑀸𑀭𑀡𑁂 𑀲𑀩𑁆𑀩𑀲𑁄 𑀔𑁂𑀧𑀦𑀦𑀺𑀫𑀺𑀢𑁆𑀢𑁂 𑀦𑀺𑀩𑁆𑀩𑀸𑀦𑁂. 𑀢𑁂𑀦𑀸𑀳 ‘‘𑀦𑀺𑀩𑁆𑀩𑀸𑀦𑀁…𑀧𑁂… 𑀤𑀲𑁆𑀲𑀺𑀢𑁄 𑀳𑁄𑀢𑀻’’𑀢𑀺.

𑀚𑀝𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀫𑀦𑁄𑀦𑀺𑀯𑀸𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪. 𑀏𑀯𑀁𑀮𑀤𑁆𑀥𑀺𑀓𑀸𑀢𑀺 𑀲𑀩𑁆𑀩𑀣𑀸𑀧𑀺 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺 𑀲𑀤𑀼𑀓𑁆𑀔𑀸, 𑀲𑀩𑁆𑀩𑀣𑀸𑀧𑀺 𑀅𑀘𑀺𑀢𑁆𑀢𑀓𑀪𑀸𑀯𑁄 𑀲𑁂𑀬𑁆𑀬𑁄, 𑀢𑀲𑁆𑀫𑀸 𑀬𑀢𑁄 𑀓𑀼𑀢𑁄𑀘𑀺 𑀘𑀺𑀢𑁆𑀢𑀁 𑀦𑀺𑀯𑀸𑀭𑁂𑀢𑀩𑁆𑀩𑀦𑁆𑀢𑀺 𑀏𑀯𑀁𑀤𑀺𑀝𑁆𑀞𑀺𑀓𑀸 ¶ . 𑀲𑁄𑀢𑀺 𑀲𑀢𑁆𑀢𑁄. 𑀅𑀦𑀺𑀬𑁆𑀬𑀸𑀦𑀺𑀓𑀓𑀣𑀁 𑀓𑀣𑁂𑀢𑀺 𑀅𑀬𑁄𑀦𑀺𑀲𑁄 𑀘𑀺𑀢𑁆𑀢𑀦𑀺𑀯𑀸𑀭𑀡𑀁 𑀯𑀤𑀦𑁆𑀢𑀻. 𑀲𑀁𑀬𑀢𑀪𑀸𑀯𑀁 𑀆𑀕𑀢𑀦𑁆𑀢𑀺 𑀭𑀸𑀕𑀯𑀺𑀲𑁂𑀯𑀦𑀸𑀤𑀺𑀢𑁄 𑀲𑀫𑁆𑀫𑀤𑁂𑀯 𑀲𑀁𑀬𑀢𑀪𑀸𑀯𑀁 𑀑𑀢𑀭𑀪𑀸𑀯𑀁. 𑀥𑀫𑁆𑀫𑀘𑀭𑀺𑀬𑀸𑀯𑀲𑁂𑀦 𑀳𑀺 𑀧𑀯𑀢𑁆𑀢𑀫𑀸𑀦𑁂 𑀘𑀺𑀢𑁆𑀢𑁂 𑀦𑀢𑁆𑀣𑀺 𑀈𑀲𑀓𑀫𑁆𑀧𑀺 𑀭𑀸𑀕𑀸𑀤𑀺𑀯𑀺𑀲𑁂𑀯𑀦𑀁, 𑀦 𑀢𑀲𑁆𑀲 𑀲𑀫𑁆𑀧𑀢𑀺 𑀆𑀬𑀢𑀺𑀜𑁆𑀘 𑀓𑁄𑀘𑀺 𑀅𑀦𑀢𑁆𑀣𑁄 𑀲𑀺𑀬𑀸, 𑀢𑀲𑁆𑀫𑀸 𑀢𑀁 𑀫𑀦𑁄 𑀲𑀩𑁆𑀩𑀢𑁄 𑀅𑀦𑀯𑀚𑁆𑀚𑀯𑀼𑀢𑁆𑀢𑀺𑀢𑁄 𑀦 𑀦𑀺𑀯𑀸𑀭𑁂𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺𑀆𑀤𑀺. 𑀬𑀢𑁄 𑀬𑀢𑁄𑀢𑀺 𑀬𑀢𑁄 𑀬𑀢𑁄 𑀲𑀸𑀯𑀚𑁆𑀚𑀯𑀼𑀢𑁆𑀢𑀺𑀢𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀢𑁄. 𑀢𑀦𑁆𑀢𑀺 𑀫𑀦𑁄 𑀦𑀺𑀯𑀸𑀭𑁂𑀢𑀩𑁆𑀩𑀁 𑀅𑀦𑀢𑁆𑀣𑀸𑀯𑀳𑀢𑁆𑀢𑀸.

𑀫𑀦𑁄𑀦𑀺𑀯𑀸𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀭𑀳𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫. 𑀓𑀢𑀸𑀯𑀻𑀢𑀺 𑀓𑀢𑀯𑀸, 𑀧𑀭𑀺𑀜𑁆𑀜𑀸𑀤𑀺𑀓𑀺𑀘𑁆𑀘𑀁 𑀓𑀢𑁆𑀯𑀸 𑀦𑀺𑀝𑁆𑀞𑀧𑁂𑀢𑁆𑀯𑀸 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀓𑀢𑀓𑀺𑀘𑁆𑀘𑁄’’𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀅𑀭𑀳𑀦𑁆𑀢𑀺𑀆𑀤𑀺𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀢𑁄 𑀯𑀺𑀜𑁆𑀜𑀸𑀬𑀢𑀺. 𑀏𑀯𑀁 ‘‘𑀅𑀳𑀁 𑀯𑀤𑀸𑀫𑀻’’𑀢𑀺𑀆𑀤𑀺𑀆𑀓𑀸𑀭𑁂𑀦 𑀧𑀼𑀘𑁆𑀙𑀢𑀺.

𑀔𑀦𑁆𑀥𑀸𑀤𑀻𑀲𑀼 𑀓𑀼𑀲𑀮𑁄𑀢𑀺 𑀔𑀦𑁆𑀥𑀸𑀬𑀢𑀦𑀸𑀤𑀻𑀲𑀼 𑀲𑀮𑀓𑁆𑀔𑀡𑀸𑀤𑀻𑀲𑀼 𑀘 𑀲𑀫𑀽𑀳𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀜𑁆𑀘 𑀙𑁂𑀓𑁄 𑀬𑀣𑀸𑀪𑀽𑀢𑀯𑁂𑀤𑀻. 𑀉𑀧𑀮𑀤𑁆𑀥𑀺𑀦𑀺𑀲𑁆𑀲𑀺𑀢𑀓𑀣𑀦𑁆𑀢𑀺 𑀅𑀢𑁆𑀢𑀼𑀧𑀮𑀤𑁆𑀥𑀺𑀦𑀺𑀲𑁆𑀲𑀺𑀢𑀓𑀣𑀁 𑀳𑀺𑀢𑁆𑀯𑀸. 𑀯𑁄𑀳𑀸𑀭𑀪𑁂𑀤𑀁 𑀅𑀓𑀭𑁄𑀦𑁆𑀢𑁄𑀢𑀺 ‘‘𑀅𑀳𑀁 𑀧𑀭𑀫𑀢𑁆𑀣𑀁 𑀚𑀸𑀦𑀸𑀫𑀻’’𑀢𑀺 𑀮𑁄𑀓𑀯𑁄𑀳𑀸𑀭𑀁 𑀪𑀺𑀦𑁆𑀤𑀦𑁆𑀢𑁄 𑀅𑀯𑀺𑀦𑀸𑀲𑁂𑀦𑁆𑀢𑁄 𑀮𑁄𑀓𑁂 𑀮𑁄𑀓𑀲𑀫𑀜𑁆𑀜𑀫𑁂𑀯 𑀦𑀺𑀲𑁆𑀲𑀸𑀬 ‘‘𑀅𑀳𑀁, 𑀫𑀫𑀸’’𑀢𑀺 𑀯𑀤𑁂𑀬𑁆𑀬. 𑀔𑀦𑁆𑀥𑀸 𑀪𑀼𑀜𑁆𑀚𑀦𑁆𑀢𑀻𑀢𑀺𑀆𑀤𑀺𑀦𑀸 𑀯𑁄𑀳𑀸𑀭𑀪𑁂𑀤𑀁, 𑀢𑀢𑁆𑀣 𑀘 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑀺.

𑀫𑀸𑀦𑁄 𑀦𑀸𑀫 𑀤𑀺𑀝𑁆𑀞𑀺𑀬𑀸 𑀲𑀫𑀥𑀼𑀭𑁄. 𑀢𑀣𑀸 𑀳𑀺 𑀤𑀼𑀢𑀺𑀬𑀫𑀕𑁆𑀕𑀸𑀤𑀻𑀲𑀼 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀳𑀸𑀦𑀸𑀪𑀺𑀲𑀫𑀬𑀲𑁆𑀲 ¶ 𑀧𑀝𑀺𑀯𑀺𑀧𑀘𑁆𑀘𑀦𑀻𑀓𑁂 𑀧𑀝𑀺𑀧𑀢𑁆𑀢𑀺𑀲𑀺𑀤𑁆𑀥𑀺. 𑀢𑁂𑀦𑀸𑀳 ‘‘𑀬𑀤𑀺 𑀤𑀺𑀝𑁆𑀞𑀺𑀬𑀸 𑀯𑀲𑁂𑀦 𑀦 𑀯𑀤𑀢𑀺, 𑀫𑀸𑀦𑀯𑀲𑁂𑀦 𑀦𑀼 𑀔𑁄 𑀯𑀤𑀢𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸’’𑀢𑀺. 𑀯𑀺𑀥𑀽𑀧𑀺𑀢𑀸𑀢𑀺 𑀲𑀦𑁆𑀢𑀸𑀧𑀺𑀢𑀸 𑀜𑀸𑀡𑀕𑁆𑀕𑀺𑀦𑀸 𑀤𑀟𑁆𑀠𑀸. 𑀢𑁂 𑀧𑀦 𑀯𑀺𑀤𑁆𑀥𑀁𑀲𑀺𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀯𑀺𑀥𑀫𑀺𑀢𑀸’’𑀢𑀺. 𑀫𑀫𑀗𑁆𑀓𑀸𑀭𑀸𑀤𑀬𑁄 𑀫𑀬𑀦𑁆𑀢𑀺 𑀲𑀢𑁆𑀢𑀲𑀦𑁆𑀢𑀸𑀦𑁂 𑀲𑀢𑀺 𑀧𑀯𑀢𑁆𑀢𑀦𑁆𑀢𑀺 𑀏𑀢𑁂𑀦𑀸𑀢𑀺 𑀫𑀬𑁄, 𑀫𑀜𑁆𑀜𑀦𑀸. 𑀫𑀬𑁄 𑀏𑀯 𑀫𑀬𑀢𑀸𑀢𑀺 𑀆𑀳 ‘‘𑀫𑀬𑀢𑀦𑁆𑀢𑀺 𑀫𑀜𑁆𑀜𑀦’’𑀦𑁆𑀢𑀺.

𑀅𑀭𑀳𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀧𑀚𑁆𑀚𑁄𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬. 𑀤𑀺𑀯𑀸𑀭𑀢𑁆𑀢𑀺𑀦𑁆𑀢𑀺 ¶ 𑀦 𑀆𑀤𑀺𑀘𑁆𑀘𑁄 𑀯𑀺𑀬 𑀤𑀺𑀯𑀸 𑀏𑀯, 𑀦 𑀘𑀦𑁆𑀤𑀺𑀫𑀸 𑀯𑀺𑀬 𑀭𑀢𑁆𑀢𑀺𑀁 𑀏𑀯, 𑀅𑀣 𑀔𑁄 𑀤𑀺𑀯𑀸 𑀘 𑀭𑀢𑁆𑀢𑀺𑀜𑁆𑀘. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀬𑀢𑁆𑀣 𑀬𑀢𑁆𑀣 𑀲𑀫𑁆𑀧𑀚𑁆𑀚𑀮𑀺𑀢𑁄, 𑀢𑀢𑁆𑀣 𑀢𑀢𑁆𑀣𑁂𑀯 𑀧𑀤𑁂𑀲𑁂, 𑀦 𑀆𑀤𑀺𑀘𑁆𑀘𑁄 𑀯𑀺𑀬 𑀘𑀦𑁆𑀤𑀺𑀫𑀸 𑀯𑀺𑀬 𑀲𑀓𑀮𑀁 𑀫𑀳𑀸𑀤𑀺𑀲𑀁 𑀤𑀺𑀲𑀦𑁆𑀢𑀭𑀸𑀴𑀜𑁆𑀘. 𑀜𑀸𑀡𑀸𑀦𑀼𑀪𑀸𑀯𑁂𑀦 𑀉𑀧𑁆𑀧𑀦𑁆𑀦𑀸𑀮𑁄𑀓𑁄 𑀜𑀸𑀡𑀸𑀮𑁄𑀓𑁄𑀢𑀺 𑀯𑀤𑀦𑁆𑀢𑀺. ‘‘𑀇𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀧𑀼𑀩𑁆𑀩𑁂 𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺 𑀜𑀸𑀡𑀁 𑀉𑀤𑀧𑀸𑀤𑀺 𑀧𑀜𑁆𑀜𑀸 𑀉𑀤𑀧𑀸𑀤𑀺 𑀯𑀺𑀚𑁆𑀚𑀸 𑀉𑀤𑀧𑀸𑀤𑀺 𑀆𑀮𑁄𑀓𑁄 𑀉𑀤𑀧𑀸𑀤𑀻’’𑀢𑀺 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁫; 𑀧𑀝𑀺. 𑀫. 𑁨.𑁩𑁦) 𑀧𑀦 𑀯𑀘𑀦𑀢𑁄 𑀫𑀕𑁆𑀕𑁄 𑀜𑀸𑀡𑀸𑀮𑁄𑀓𑁄. ‘‘𑀢𑀫𑁄 𑀯𑀺𑀳𑀢𑁄, 𑀆𑀮𑁄𑀓𑁄 𑀉𑀧𑁆𑀧𑀦𑁆𑀦𑁄’’𑀢𑀺 (𑀫. 𑀦𑀺. 𑁧.𑁩𑁮𑁬; 𑀧𑀸𑀭𑀸. 𑁧𑁨) 𑀯𑀸 𑀯𑀘𑀦𑀢𑁄 𑀯𑀺𑀚𑁆𑀚𑀢𑁆𑀢𑀬𑀸𑀮𑁄𑀓𑁄 𑀜𑀸𑀡𑀸𑀮𑁄𑀓𑁄. 𑀧𑀞𑀫𑀸𑀪𑀺𑀲𑀫𑁆𑀩𑁄𑀥𑀺𑀬𑀁 𑀯𑀺𑀬 𑀲𑀜𑁆𑀚𑀸𑀢𑀧𑀻𑀢𑀺𑀯𑀺𑀧𑁆𑀨𑀸𑀭𑁄, 𑀯𑀺𑀲𑁂𑀲𑀢𑁄 𑀭𑀢𑀦𑀖𑀭𑁂 𑀲𑀫𑀦𑁆𑀢𑀧𑀝𑁆𑀞𑀸𑀦𑀯𑀺𑀘𑀺𑀦𑀦𑁂 𑀲𑀜𑁆𑀚𑀸𑀢𑀧𑀻𑀢𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀲𑀭𑀻𑀭𑁄𑀪𑀸𑀲𑁄 𑀯𑀸 𑀧𑀻𑀢𑀺𑀆𑀮𑁄𑀓𑁄. 𑀢𑀢𑁆𑀣𑁂𑀯 𑀉𑀧𑁆𑀧𑀦𑁆𑀦𑀧𑀲𑀸𑀤𑀯𑀲𑁂𑀦 𑀲𑀜𑁆𑀚𑀸𑀢𑀆𑀮𑁄𑀓𑁄𑀯 𑀧𑀲𑀸𑀤𑀸𑀮𑁄𑀓𑁄. 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑁂 ‘‘𑀅𑀜𑁆𑀜𑀸𑀲𑀺 𑀯𑀢, 𑀪𑁄, 𑀓𑁄𑀡𑁆𑀟𑀜𑁆𑀜𑁄’’𑀢𑀺 𑀉𑀧𑁆𑀧𑀦𑁆𑀦𑀧𑀲𑀸𑀤𑀸𑀮𑁄𑀓𑁄𑀢𑀺 𑀘 𑀯𑀤𑀦𑁆𑀢𑀺. 𑀲𑀩𑁆𑀩𑀢𑁆𑀣𑁂𑀯 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀸 𑀲𑀢𑁆𑀢𑀸𑀦𑀁 𑀳𑀤𑀬𑀢𑀫𑀁 𑀯𑀺𑀥𑀫𑀦𑁆𑀢𑀻 𑀥𑀫𑁆𑀫𑀓𑀣𑀸𑀆𑀮𑁄𑀓𑁄. 𑀲𑀩𑁆𑀩𑁄𑀧𑀺 𑀩𑀼𑀤𑁆𑀥𑀸𑀦𑀁 𑀧𑀸𑀢𑀼𑀪𑀸𑀯𑀸 𑀉𑀧𑁆𑀧𑀦𑁆𑀦𑁄 𑀆𑀮𑁄𑀓𑁄𑀢𑀺 𑀇𑀫𑀺𑀦𑀸 𑀲𑀸𑀯𑀓𑀸𑀦𑀁 𑀤𑁂𑀲𑀦𑀸𑀬 𑀲𑀜𑁆𑀚𑀸𑀢𑀥𑀫𑁆𑀫𑀸𑀮𑁄𑀓𑁄𑀧𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑁄𑀢𑀺 𑀤𑀲𑁆𑀲𑁂𑀢𑀺.

𑀧𑀚𑁆𑀚𑁄𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭. 𑀲𑀭𑀡𑀢𑁄 𑀅𑀯𑀺𑀘𑁆𑀙𑁂𑀤𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀔𑀦𑁆𑀥𑀸𑀤𑀻𑀦𑀁 𑀧𑀝𑀺𑀧𑀸𑀝𑀺 𑀲𑀭𑀸. 𑀢𑁂𑀦𑀸𑀳 ‘‘𑀇𑀫𑁂 𑀲𑀁𑀲𑀸𑀭𑀲𑀭𑀸’’𑀢𑀺. 𑀓𑀼𑀢𑁄𑀢𑀺 𑀓𑁂𑀦 𑀓𑀸𑀭𑀡𑁂𑀦, 𑀓𑀺𑀫𑁆𑀳𑀺 𑀯𑀸? 𑀢𑁂𑀦𑀸𑀳 ‘‘𑀓𑀺𑀁 𑀆𑀕𑀫𑁆𑀫𑀸’’𑀢𑀺? 𑀦 𑀧𑀢𑀺𑀝𑁆𑀞𑀸𑀢𑀺 𑀧𑀘𑁆𑀘𑀬𑀸𑀪𑀸𑀯𑀢𑁄. 𑀆𑀧𑁄𑀢𑀺𑀆𑀤𑀺𑀦𑀸 𑀧𑀸𑀴𑀺𑀬𑀁 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀅𑀧𑁆𑀧𑀢𑀺𑀝𑁆𑀞𑀸𑀦𑀸𑀧𑀤𑁂𑀲𑁂𑀦 𑀢𑀢𑁆𑀣 𑀓𑀸𑀫𑀭𑀽𑀧𑀪𑀯𑀸𑀦𑀁 𑀅𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀢𑀤𑀼𑀪𑀬𑀸𑀪𑀸𑀯𑀤𑀲𑁆𑀲𑀦𑁂𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀭𑀽𑀧𑀪𑀯𑀲𑁆𑀲𑀧𑀺 ¶ 𑀅𑀪𑀸𑀯𑁄 𑀤𑀲𑁆𑀲𑀺𑀢𑁄𑀯 𑀳𑁄𑀢𑀺, 𑀬𑀣𑀸𑀭𑀼𑀢𑀯𑀲𑁂𑀦 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀧𑀼𑀭𑀺𑀫𑀸 𑀤𑁆𑀯𑁂 𑀕𑀳𑀺𑀢𑀸, 𑀕𑀳𑀺𑀢𑀜𑁆𑀘 𑀅𑀢𑁆𑀣𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸𑀯 𑀧𑀘𑁆𑀙𑀺𑀫𑀢𑁆𑀣𑁄 𑀧𑀯𑀢𑁆𑀢𑁄𑀢𑀺.

𑀲𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀫𑀳𑀤𑁆𑀥𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮. 𑀦𑀺𑀥𑀻𑀬𑀢𑀻𑀢𑀺 ¶ 𑀦𑀺𑀥𑀸𑀦𑀁. 𑀦𑀺𑀥𑀸𑀢𑀩𑁆𑀩𑀢𑀁 𑀕𑀢𑀁 𑀦𑀺𑀳𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀫𑀼𑀢𑁆𑀢𑀲𑀸𑀭𑀸𑀤𑀻𑀢𑀺 𑀫𑀼𑀢𑁆𑀢𑀸𑀫𑀡𑀺𑀯𑁂𑀴𑀼𑀭𑀺𑀬𑀧𑀯𑀸𑀴𑀭𑀚𑀢𑀚𑀸𑀢𑀭𑀽𑀧𑀸𑀤𑀺. 𑀲𑀼𑀯𑀡𑁆𑀡𑀭𑀚𑀢𑀪𑀸𑀚𑀦𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀳𑀸𑀧𑀡-𑀥𑀜𑁆𑀜𑀓𑁄𑀝𑁆𑀞𑀪𑀡𑁆𑀟𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀫𑁆𑀧𑀺 𑀳𑀺 𑀦𑀺𑀘𑁆𑀘𑀧𑀭𑀺𑀩𑁆𑀩𑀬𑀯𑀲𑁂𑀦 𑀪𑀼𑀜𑁆𑀚𑀻𑀬𑀢𑀻𑀢𑀺 ‘‘𑀪𑁄𑀕𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀜𑁆𑀜𑀫𑀜𑁆𑀜𑀁 𑀅𑀪𑀺𑀕𑀺𑀚𑁆𑀛𑀦𑁆𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀲𑀦𑁆𑀢𑀓𑀁 𑀅𑀪𑀺𑀕𑀺𑀚𑁆𑀛𑀦𑁆𑀢𑀺. 𑀢𑁂𑀦𑀸𑀳 ‘‘𑀧𑀢𑁆𑀣𑁂𑀦𑁆𑀢𑀻’’𑀢𑀺. 𑀅𑀦𑀮𑀗𑁆𑀓𑀢𑀸𑀢𑀺 𑀦 𑀅𑀮𑀁 𑀧𑀭𑀺𑀬𑀢𑁆𑀢𑀦𑁆𑀢𑀺 𑀏𑀯𑀁 𑀓𑀢𑀘𑀺𑀢𑁆𑀢𑀸, 𑀅𑀢𑁆𑀭𑀺𑀘𑁆𑀙𑀢𑀸𑀫𑀳𑀺𑀘𑁆𑀙𑀢𑀸𑀳𑀺 𑀅𑀪𑀺𑀪𑀽𑀢𑀸. 𑀢𑁂𑀦𑀸𑀳 ‘‘𑀅𑀢𑀺𑀢𑁆𑀢𑀸 𑀅𑀧𑀭𑀺𑀬𑀢𑁆𑀢𑀚𑀸𑀢𑀸’’𑀢𑀺. 𑀉𑀲𑁆𑀲𑀼𑀓𑁆𑀓𑀚𑀸𑀢𑁂𑀲𑀽𑀢𑀺 𑀢𑀁𑀢𑀁𑀓𑀺𑀘𑁆𑀘𑁂 𑀲𑀜𑁆𑀚𑀸𑀢𑀉𑀲𑁆𑀲𑀼𑀓𑁆𑀓𑁂𑀲𑀼. 𑀦𑀸𑀦𑀸𑀓𑀺𑀘𑁆𑀘𑀚𑀸𑀢𑁂𑀲𑀽𑀢𑀺 𑀦𑀸𑀦𑀸𑀯𑀺𑀥𑀓𑀺𑀘𑁆𑀘𑁂𑀲𑀼, 𑀲𑀜𑁆𑀚𑀸𑀢𑀦𑀸𑀦𑀸𑀓𑀺𑀘𑁆𑀘𑁂𑀲𑀼 𑀯𑀸. 𑀯𑀝𑁆𑀝𑀕𑀸𑀫𑀺𑀓𑀧𑀲𑀼𑀢𑁂𑀦 𑀯𑀝𑁆𑀝𑀲𑁄𑀢𑀁 𑀅𑀦𑀼𑀲𑀭𑀦𑁆𑀢𑁂𑀲𑀼. 𑀢𑀡𑁆𑀳𑀸𑀦𑀺𑀯𑀸𑀲𑀢𑀸𑀬 𑀕𑁂𑀳𑀦𑁆𑀢𑀺𑀧𑀺 𑀅𑀕𑀸𑀭𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀕𑁂𑀳’’𑀦𑁆𑀢𑀺. 𑀯𑀺𑀭𑀸𑀚𑀺𑀬𑀸𑀢𑀺 𑀳𑁂𑀢𑀼𑀅𑀢𑁆𑀣𑀤𑀻𑀧𑀓𑀁 𑀧𑀤𑀦𑁆𑀢𑀺 𑀆𑀳 ‘‘𑀯𑀺𑀭𑀸𑀚𑁂𑀢𑁆𑀯𑀸’’𑀢𑀺, 𑀢𑁆𑀯𑀸-𑀲𑀤𑁆𑀤𑁄𑀧𑀺 𑀘𑀸𑀬𑀁 𑀳𑁂𑀢𑀼𑀅𑀢𑁆𑀣𑁄𑀢𑀺.

𑀫𑀳𑀤𑁆𑀥𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀘𑀢𑀼𑀘𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯. 𑀇𑀭𑀺𑀬𑀸 𑀯𑀼𑀘𑁆𑀘𑀢𑀺 𑀓𑀸𑀬𑁂𑀦 𑀓𑀢𑁆𑀢𑀩𑁆𑀩𑀓𑀺𑀭𑀺𑀬𑀸, 𑀢𑀲𑁆𑀲𑀸 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄 𑀇𑀭𑀺𑀬𑀸𑀧𑀣𑁄, 𑀕𑀫𑀦𑀸𑀤𑀺. 𑀢𑀁 𑀅𑀧𑀭𑀸𑀧𑀭𑀧𑁆𑀧𑀯𑀢𑁆𑀢𑀺𑀬𑀸 𑀘𑀓𑁆𑀓𑀁. 𑀢𑁂𑀦𑀸𑀳 ‘‘𑀘𑀢𑀼𑀘𑀓𑁆𑀓𑀦𑁆𑀢𑀺 𑀘𑀢𑀼𑀇𑀭𑀺𑀬𑀸𑀧𑀣’’𑀦𑁆𑀢𑀺. 𑀦𑀯𑀤𑁆𑀯𑀸𑀭𑀦𑁆𑀢𑀺 𑀓𑀭𑀚𑀓𑀸𑀬𑁄 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀘 𑀓𑁂𑀲𑀸𑀤𑀺𑀅𑀲𑀼𑀘𑀺𑀧𑀭𑀺𑀧𑀽𑀭𑁄𑀢𑀺 𑀆𑀳 ‘‘𑀧𑀼𑀡𑁆𑀡𑀦𑁆𑀢𑀺 𑀅𑀲𑀼𑀘𑀺𑀧𑀽𑀭’’𑀦𑁆𑀢𑀺. 𑀢𑀡𑁆𑀳𑀸𑀬 𑀲𑀁𑀬𑀼𑀢𑁆𑀢𑀦𑁆𑀢𑀺 𑀢𑀡𑁆𑀳𑀸𑀲𑀳𑀺𑀢𑀁. 𑀢𑁂𑀦 𑀦 𑀓𑁂𑀯𑀮𑀁 𑀲𑀪𑀸𑀯𑀢𑁄 𑀏𑀯, 𑀅𑀣 𑀔𑁄 𑀦𑀺𑀲𑁆𑀲𑀺𑀢𑀥𑀫𑁆𑀫𑁄 𑀘 𑀅𑀲𑀼𑀘𑀺𑀁 𑀤𑀲𑁆𑀲𑁂𑀢𑀺. 𑀫𑀸𑀢𑀼𑀓𑀼𑀘𑁆𑀙𑀺𑀲𑀗𑁆𑀔𑀸𑀢𑁂 𑀅𑀲𑀼𑀘𑀺𑀧𑀗𑁆𑀓𑁂 𑀚𑀸𑀢𑀢𑁆𑀢𑀸 𑀧𑀗𑁆𑀓𑀚𑀸𑀢𑀁, 𑀓𑁂𑀲𑀸𑀤𑀺𑀅𑀲𑀼𑀘𑀺𑀧𑀗𑁆𑀓𑀚𑀸𑀢𑀢𑁆𑀢𑀸 𑀘 𑀧𑀗𑁆𑀓𑀚𑀸𑀢𑀁. 𑀬𑀸𑀢𑁆𑀭𑀸𑀢𑀺 𑀅𑀧𑀕𑀫𑁄. 𑀢𑁂𑀦 𑀲𑀪𑀸𑀯𑀢𑁄 𑀦𑀺𑀲𑁆𑀲𑀺𑀢𑀥𑀫𑁆𑀫𑀢𑁄 𑀘 𑀅𑀲𑀼𑀘𑀺𑀲𑀪𑀸𑀯𑀢𑁄 𑀓𑀸𑀬𑀢𑁄 𑀓𑀣𑀁 𑀅𑀧𑀕𑀫𑁄 𑀲𑀺𑀬𑀸𑀢𑀺 𑀧𑀼𑀘𑁆𑀙𑀢𑀺. 𑀢𑁂𑀦𑀸𑀳 ‘‘𑀏𑀢𑀲𑁆𑀲𑀸’’𑀢𑀺𑀆𑀤𑀺.

𑀦𑀳𑀦𑀝𑁆𑀞𑁂𑀦 𑀩𑀦𑁆𑀥𑀦𑀝𑁆𑀞𑁂𑀦 𑀦𑀤𑁆𑀥𑀻𑀢𑀺 𑀉𑀧𑀦𑀸𑀳𑁄 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀦𑀤𑁆𑀥𑀺𑀦𑁆𑀢𑀺 𑀉𑀧𑀦𑀸𑀳’’𑀦𑁆𑀢𑀺. 𑀲𑁄 𑀧𑀦 𑀇𑀢𑁄 𑀧𑀼𑀩𑁆𑀩𑀓𑀸𑀮𑁂 𑀓𑁄𑀥𑁄𑀢𑀺 𑀆𑀳 ‘‘𑀧𑀼𑀩𑁆𑀩𑀓𑀸𑀮𑁂’’𑀢𑀺𑀆𑀤𑀺 ¶ . 𑀧𑀸𑀴𑀺𑀦𑀺𑀤𑁆𑀤𑀺𑀝𑁆𑀞𑁂𑀢𑀺 𑀉𑀧𑀦𑀸𑀳𑀇𑀘𑁆𑀘𑀸𑀤𑀺𑀓𑁂 ¶ 𑀇𑀥 𑀧𑀸𑀴𑀺𑀬𑀁 𑀦𑀺𑀤𑁆𑀤𑀺𑀝𑁆𑀞𑁂 𑀓𑀺𑀮𑁂𑀲𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀤𑀬𑁄 𑀲𑀢𑁆𑀢 𑀓𑀺𑀮𑁂𑀲𑀸 𑀤𑀼𑀫𑁆𑀫𑁄𑀘𑀬𑀢𑀸𑀬 𑀯𑀭𑀢𑁆𑀢𑀸 𑀯𑀺𑀬𑀸𑀢𑀺 𑀯𑀭𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀆𑀭𑀫𑁆𑀫𑀡𑀕𑁆𑀕𑀳𑀡𑀲𑀪𑀸𑀯𑀢𑁄 𑀏𑀓𑁄 𑀏𑀯𑁂𑀲 𑀥𑀫𑁆𑀫𑁄, 𑀧𑀯𑀢𑁆𑀢𑀺-𑀆𑀓𑀸𑀭𑀪𑁂𑀤𑁂𑀦 𑀧𑀦 𑀇𑀘𑁆𑀙𑀦𑀝𑁆𑀞𑁂𑀦 𑀧𑀢𑁆𑀣𑀦𑀝𑁆𑀞𑁂𑀦 𑀇𑀘𑁆𑀙𑀸, 𑀮𑀼𑀩𑁆𑀪𑀦𑀝𑁆𑀞𑁂𑀦 𑀕𑀺𑀚𑁆𑀛𑀦𑀝𑁆𑀞𑁂𑀦 𑀮𑁄𑀪𑁄𑀢𑀺 𑀯𑀼𑀢𑁆𑀢𑁄. 𑀧𑀞𑀫𑀼𑀧𑁆𑀧𑀢𑁆𑀢𑀺𑀓𑀸𑀢𑀺 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂, 𑀯𑀸𑀭𑁂 𑀯𑀸 𑀧𑀞𑀫𑀁 𑀉𑀧𑁆𑀧𑀦𑁆𑀦𑀸. 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀓𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀓𑁄. 𑀅𑀮𑀤𑁆𑀥𑀧𑀢𑁆𑀣𑀦𑀸 𑀅𑀧𑁆𑀧𑀝𑀺𑀮𑀤𑁆𑀥𑀯𑀢𑁆𑀣𑀼𑀫𑁆𑀳𑀺 𑀆𑀲𑀢𑁆𑀢𑀺 𑀮𑁄𑀪𑁄. 𑀉𑀧𑁆𑀧𑀸𑀝𑁂𑀢𑁆𑀯𑀸𑀢𑀺 𑀲𑀲𑀦𑁆𑀢𑀸𑀦𑀢𑁄 𑀉𑀤𑁆𑀥𑀭𑀺𑀢𑁆𑀯𑀸.

𑀘𑀢𑀼𑀘𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀏𑀡𑀺𑀚𑀗𑁆𑀖𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦. 𑀏𑀡𑀺𑀫𑀺𑀕𑀲𑁆𑀲 𑀯𑀺𑀬𑀸𑀢𑀺 𑀏𑀡𑀺𑀫𑀺𑀕𑀲𑁆𑀲 𑀚𑀗𑁆𑀖𑀸 𑀯𑀺𑀬. 𑀅𑀯𑀬𑀯𑀻𑀲𑀫𑁆𑀩𑀦𑁆𑀥𑁂 𑀳𑀺 𑀇𑀤𑀁 𑀲𑀸𑀫𑀺𑀯𑀘𑀦𑀁. 𑀧𑀺𑀡𑁆𑀟𑀺𑀫𑀁𑀲𑀲𑁆𑀲 𑀧𑀭𑀺𑀢𑁄 𑀲𑀫𑀲𑀡𑁆𑀞𑀺𑀢𑀢𑁆𑀢𑀸 𑀲𑀼𑀯𑀝𑁆𑀝𑀻𑀢𑀚𑀗𑁆𑀖𑁄. 𑀓𑀺𑀲𑀦𑁆𑀢𑀺 𑀣𑀽𑀮𑀪𑀸𑀯𑀧𑀝𑀺𑀓𑁆𑀔𑁂𑀧𑀧𑀭𑀸𑀚𑁄𑀢𑀦𑀸, 𑀦 𑀲𑀼𑀝𑁆𑀞𑀼 𑀓𑀺𑀲𑀪𑀸𑀯𑀤𑀻𑀧𑀦𑀧𑀭𑀸𑀢𑀺 𑀆𑀳 ‘‘𑀅𑀣𑀽𑀮𑀁 𑀲𑀫𑀲𑀭𑀻𑀭’’𑀦𑁆𑀢𑀺. 𑀆𑀢𑀧𑁂𑀦 𑀫𑀺𑀮𑀸𑀢𑀦𑁆𑀢𑀺 𑀢𑀧𑀲𑀸 𑀫𑀺𑀮𑀸𑀢𑀓𑀸𑀬𑀁 𑀇𑀦𑁆𑀤𑁆𑀭𑀺𑀬𑀲𑀦𑁆𑀢𑀸𑀧𑀦𑀪𑀸𑀯𑀢𑁄. 𑀢𑁂𑀦𑁂𑀯𑀸𑀳 𑁋 ‘‘𑀢𑀧𑁄 𑀫𑀺𑀮𑀸𑀢’’𑀦𑁆𑀢𑀺𑀆𑀤𑀺, 𑀢𑀣𑀸 𑀘𑀸𑀳 𑀧𑀸𑀴𑀺𑀬𑀁 ‘‘𑀅𑀧𑁆𑀧𑀸𑀳𑀸𑀭𑀁 𑀅𑀮𑁄𑀮𑀼𑀧’’𑀦𑁆𑀢𑀺. 𑀬𑀣𑀸 ‘‘𑀯𑀻𑀭𑀲𑁆𑀲 𑀪𑀸𑀯𑁄 𑀯𑀻𑀭𑀺𑀬’’𑀦𑁆𑀢𑀺 𑀯𑀻𑀭𑀪𑀸𑀯𑁂𑀦 𑀯𑀻𑀭𑀺𑀬𑀁 𑀮𑀓𑁆𑀔𑀻𑀬𑀢𑀺, 𑀏𑀯𑀁 𑀯𑀻𑀭𑀺𑀬𑀲𑀫𑁆𑀪𑀯𑁂𑀦 𑀯𑀻𑀭𑀪𑀸𑀯𑁄𑀢𑀺 𑀆𑀳 ‘‘𑀯𑀻𑀭𑀦𑁆𑀢𑀺 𑀯𑀻𑀭𑀺𑀬𑀯𑀦𑁆𑀢’’𑀦𑁆𑀢𑀺. ‘‘𑀘𑀢𑁆𑀢𑀸𑀭𑁄 𑀧𑀜𑁆𑀘 𑀆𑀮𑁄𑀧𑁂, 𑀅𑀪𑀼𑀢𑁆𑀯𑀸 𑀉𑀤𑀓𑀁 𑀧𑀺𑀯𑁂’’𑀢𑀺 (𑀣𑁂𑀭𑀕𑀸. 𑁯𑁮𑁩; 𑀫𑀺. 𑀧. 𑁬.𑁫.𑁧𑁦) 𑀥𑀫𑁆𑀫𑀲𑁂𑀦𑀸𑀧𑀢𑀺𑀯𑀼𑀢𑁆𑀢𑀦𑀺𑀬𑀸𑀫𑁂𑀦 𑀧𑀭𑀺𑀫𑀺𑀢𑀪𑁄𑀚𑀺𑀢𑀸𑀬 𑀅𑀧𑁆𑀧𑀸𑀳𑀸𑀭𑀢𑀸 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸. ‘‘𑀫𑀺𑀢𑀸𑀳𑀸𑀭’’𑀦𑁆𑀢𑀺 𑀯𑀢𑁆𑀯𑀸 𑀧𑀼𑀦 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀪𑁄𑀚𑀺𑀢𑀸𑀬𑀧𑀺 𑀅𑀧𑁆𑀧𑀸𑀳𑀸𑀭𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀓𑀸𑀮…𑀧𑁂… 𑀧𑀭𑀺𑀢𑁆𑀢𑀸𑀳𑀸𑀭’’𑀦𑁆𑀢𑀺 𑀆𑀳. 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀮𑁄𑀮𑀼𑀧𑁆𑀧𑀯𑀺𑀭𑀳𑀺𑀢𑀁 𑀩𑁄𑀥𑀺𑀫𑀽𑀮𑁂 𑀏𑀯 𑀲𑀩𑁆𑀩𑀲𑁄 𑀮𑁄𑀮𑀼𑀧𑁆𑀧𑀲𑁆𑀲 𑀧𑀳𑀻𑀦𑀢𑁆𑀢𑀸. ‘‘𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀽’’𑀢𑀺 𑀳𑀺 𑀇𑀫𑀺𑀦𑀸𑀯 𑀲𑀩𑁆𑀩𑀢𑁆𑀣 𑀮𑁄𑀮𑀼𑀧𑁆𑀧𑀯𑀺𑀕𑀫𑁄 𑀤𑀻𑀧𑀺𑀢𑁄𑀯𑀸𑀢𑀺. 𑀭𑀲𑀢𑀡𑁆𑀳𑀸𑀧𑀝𑀺𑀓𑁆𑀔𑁂𑀧𑁄 𑀯𑀸 𑀏𑀲 ‘‘𑀅𑀧𑁆𑀧𑀸𑀳𑀸𑀭’’𑀦𑁆𑀢𑀺 𑀯𑀢𑁆𑀯𑀸 ‘‘𑀅𑀮𑁄𑀮𑀼𑀧’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸. ‘‘𑀲𑀻𑀳𑀁 𑀯𑀸’’𑀢𑀺 𑀏𑀢𑁆𑀣 𑀏𑀓𑀘𑀭𑀲𑀤𑁆𑀤𑁄 𑀯𑀺𑀬 𑀇𑀯-𑀲𑀤𑁆𑀤𑁄 𑀅𑀢𑁆𑀣𑀢𑁄 ‘‘𑀦𑀸𑀕’’𑀦𑁆𑀢𑀺 𑀏𑀢𑁆𑀣𑀸𑀧𑀺 𑀆𑀦𑁂𑀢𑁆𑀯𑀸, 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄𑀢𑀺 ¶ 𑀆𑀳 𑁋 ‘‘𑀏𑀓𑀘𑀭𑀁 𑀲𑀻𑀳𑀁 𑀯𑀺𑀬, 𑀏𑀓𑀘𑀭𑀁 𑀦𑀸𑀕𑀁 𑀯𑀺𑀬𑀸’’𑀢𑀺. 𑀏𑀓𑀘𑀭𑀸 𑀅𑀧𑁆𑀧𑀫𑀢𑁆𑀢𑀸 𑀏𑀓𑀻𑀓𑀢𑀸𑀬.

𑀧𑀜𑁆𑀘𑀓𑀸𑀫𑀕𑀼𑀡𑀯𑀲𑁂𑀦 𑀭𑀽𑀧𑀁 𑀕𑀳𑀺𑀢𑀁 𑀢𑁂𑀲𑀁 𑀭𑀽𑀧𑀲𑀪𑀸𑀯𑀢𑁆𑀢𑀸. 𑀫𑀦𑁂𑀦 𑀦𑀸𑀫𑀁 𑀕𑀳𑀺𑀢𑀁 𑀫𑀦𑀲𑁆𑀲 𑀦𑀸𑀫𑀲𑀪𑀸𑀯𑀢𑁆𑀢𑀸. 𑀅𑀯𑀺𑀦𑀺𑀪𑀼𑀢𑁆𑀢𑀥𑀫𑁆𑀫𑁂𑀢𑀺 𑀅𑀯𑀺𑀦𑀸𑀪𑀸𑀯𑀥𑀫𑁆𑀫𑁂 𑀕𑀳𑁂𑀢𑁆𑀯𑀸. 𑀆𑀤𑀺-𑀲𑀤𑁆𑀤𑁂𑀦 𑀆𑀬𑀢𑀦𑀥𑀸𑀢𑀼𑀆𑀤𑀬𑁄 𑀕𑀳𑀺𑀢𑀸. 𑀓𑀸𑀫𑀕𑀼𑀡𑀕𑁆𑀕𑀳𑀡𑁂𑀦 𑀳𑁂𑀢𑁆𑀣 𑀭𑀽𑀧𑀪𑀸𑀯𑀲𑀸𑀫𑀜𑁆𑀜𑁂𑀦 𑀧𑀜𑁆𑀘 𑀯𑀢𑁆𑀣𑀽𑀦𑀺 𑀕𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀺, 𑀫𑀦𑁄𑀕𑀳𑀡𑁂𑀦 𑀥𑀫𑁆𑀫𑀸𑀬𑀢𑀦𑀁, 𑀏𑀯𑀁 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀕𑀳𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀥𑀸𑀢𑀼𑀆𑀤𑀻𑀦𑀫𑁆𑀧𑀺 ¶ 𑀕𑀳𑀺𑀢𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸𑀤𑀺𑀯𑀲𑁂𑀦𑀧𑁂𑀢𑁆𑀣 𑀪𑀼𑀫𑁆𑀫𑀁 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺. 𑀏𑀢𑁆𑀣𑀸𑀢𑀺 𑀧𑀸𑀴𑀺𑀬𑀁. 𑀓𑀸𑀫𑀯𑀢𑁆𑀣𑀼 𑀪𑀼𑀫𑁆𑀫𑀁.

𑀏𑀡𑀺𑀚𑀗𑁆𑀖𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑁆𑀢𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀢𑀼𑀮𑁆𑀮𑀧𑀓𑀸𑀬𑀺𑀓𑀯𑀕𑁆𑀕𑁄

𑁧. 𑀲𑀩𑁆𑀪𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀲𑀢𑀁 𑀲𑀸𑀥𑀽𑀦𑀁 𑀲𑀭𑀡𑀕𑀫𑀦𑀲𑀻𑀮𑀸𑀤𑀺𑀪𑁂𑀤𑀲𑁆𑀲 𑀥𑀫𑁆𑀫𑀲𑁆𑀲 𑀉𑀮𑁆𑀮𑀧𑀦𑀢𑁄, 𑀅𑀢𑁆𑀢𑀦𑁄 𑀯𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀬𑀸 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀉𑀮𑁆𑀮𑀧𑀦𑀢𑁄 𑀓𑀣𑀦𑀢𑁄 𑀲𑀢𑀼𑀮𑁆𑀮𑀧𑀸, 𑀤𑁂𑀯𑀢𑀸, 𑀢𑀸𑀲𑀁 𑀓𑀸𑀬𑁄 𑀲𑀫𑀽𑀳𑁄, 𑀢𑀢𑁆𑀣 𑀪𑀯𑀸𑀢𑀺 𑀲𑀢𑀼𑀮𑁆𑀮𑀧𑀓𑀸𑀬𑀺𑀓𑀸. 𑀢𑁂𑀦𑀸𑀳 ‘‘𑀲𑀢𑀁 𑀥𑀫𑁆𑀫’’𑀦𑁆𑀢𑀺𑀆𑀤𑀺. 𑀲𑀫𑀸𑀤𑀸𑀦𑀯𑀲𑁂𑀦 𑀉𑀮𑁆𑀮𑀧𑁂𑀢𑁆𑀯𑀸, 𑀦 𑀯𑀡𑁆𑀡𑀦𑀸𑀓𑀣𑀦𑀫𑀢𑁆𑀢𑁂𑀦 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀲𑀢𑀼𑀮𑁆𑀮𑀧𑀓𑀸𑀬𑀺𑀓𑀪𑀸𑀯𑁂. 𑀇𑀤𑀁 𑀯𑀢𑁆𑀣𑀽𑀢𑀺 𑀇𑀤𑀁 𑀓𑀸𑀭𑀡𑀁. 𑀲𑀫𑀼𑀤𑁆𑀤𑀯𑀸𑀡𑀺𑀚𑀸𑀢𑀺 𑀲𑀁𑀬𑀢𑁆𑀢𑀺𑀓𑀸. 𑀔𑀺𑀢𑁆𑀢𑀲𑀭𑀯𑁂𑀕𑁂𑀦𑀸𑀢𑀺 𑀚𑀺𑀬𑀸𑀫𑀼𑀢𑁆𑀢𑀲𑀭𑀲𑀤𑀺𑀲𑀯𑁂𑀕𑁂𑀦, 𑀲𑀻𑀖𑀑𑀖𑁂𑀦𑀸𑀢𑀺 𑀅𑀢𑁆𑀣𑁄. 𑀉𑀧𑁆𑀧𑀢𑀢𑀻𑀢𑀺 𑀉𑀧𑁆𑀧𑀸𑀢𑁄. 𑀉𑀧𑁆𑀧𑀸𑀢𑁂 𑀪𑀯𑀁 𑀩𑁆𑀬𑀲𑀦𑀁 𑀉𑀧𑁆𑀧𑀸𑀢𑀺𑀓𑀁. 𑀧𑀢𑀺𑀝𑁆𑀞𑀸𑀢𑀺 𑀳𑀺𑀢𑀧𑀢𑀺𑀝𑁆𑀞𑀸. 𑀧𑀭𑀮𑁄𑀓𑁂 𑀳𑀺𑀢𑀲𑀼𑀔𑀸𑀯𑀳𑀁 𑀅𑀪𑀬𑀓𑀸𑀭𑀡𑀁. 𑀚𑀗𑁆𑀖𑀲𑀢𑀦𑁆𑀢𑀺 𑀫𑀦𑀼𑀲𑁆𑀲𑀲𑀢𑀁. 𑀚𑀗𑁆𑀖𑀸𑀲𑀻𑀲𑁂𑀦 𑀳𑀺 𑀫𑀦𑀼𑀲𑁆𑀲𑁂 𑀯𑀤𑀢𑀺 𑀲𑀳𑀘𑀸𑀭𑀺𑀪𑀸𑀯𑀢𑁄. 𑀅𑀕𑁆𑀕𑀳𑁂𑀲𑀺 𑀧𑀜𑁆𑀘𑀲𑀻𑀮𑀸𑀦𑀺. 𑀆𑀲𑀦𑁆𑀦𑀸𑀦𑀸𑀲𑀦𑁆𑀦𑁂𑀲𑀼 𑀆𑀲𑀦𑁆𑀦𑀲𑁆𑀲𑁂𑀯 𑀧𑀞𑀫𑀁 𑀯𑀺𑀧𑀘𑁆𑀘𑀦𑀢𑁄 ‘‘𑀆𑀲𑀦𑁆𑀦𑀓𑀸𑀮𑁂 𑀕𑀳𑀺𑀢𑀲𑀻𑀮𑀁 𑀦𑀺𑀲𑁆𑀲𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀖𑀝𑀸𑀯𑀲𑁂𑀦𑀸𑀢𑀺 𑀲𑀫𑀽𑀳𑀯𑀲𑁂𑀦.

𑀲𑀩𑁆𑀪𑀻𑀢𑀺 ¶ 𑀲𑀸𑀥𑀽𑀳𑀺. 𑀢𑁂 𑀳𑀺 𑀲𑀧𑀭𑀳𑀺𑀢𑀲𑀸𑀥𑀦𑀢𑁄 𑀧𑀸𑀲𑀁𑀲𑀢𑀸𑀬 𑀲𑀦𑁆𑀢𑀕𑀼𑀡𑀢𑀸𑀬 𑀘 𑀲𑀦𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂 𑀧𑀦 𑀬𑀲𑁆𑀫𑀸 𑀧𑀡𑁆𑀟𑀺𑀢𑀮𑀓𑁆𑀔𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀧𑀡𑁆𑀟𑀺𑀢𑁂𑀳𑀻’’𑀢𑀺 𑀆𑀳. 𑀲𑀫𑀸𑀲𑁂𑀣𑀸𑀢𑀺 𑀲𑀁𑀯𑀲𑁂𑀣𑀸𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄𑀢𑀺 𑀆𑀳 ‘‘𑀲𑀩𑁆𑀩𑀇𑀭𑀺𑀬𑀸𑀧𑀣𑁂’’𑀢𑀺𑀆𑀤𑀺. 𑀫𑀺𑀢𑁆𑀢𑀲𑀦𑁆𑀣𑀯𑀦𑁆𑀢𑀺 𑀫𑁂𑀢𑁆𑀢𑀺𑀲𑀦𑁆𑀥𑀸𑀦𑀁. 𑀲𑀢𑁆𑀢𑀸𑀦𑀁 𑀳𑀺𑀢𑁂𑀲𑀺𑀢𑀸𑀮𑀓𑁆𑀔𑀡𑀸 𑀳𑀺 𑀫𑁂𑀢𑁆𑀢𑀺, 𑀲𑀸 𑀘 𑀜𑀸𑀡𑀲𑀳𑀺𑀢𑀸 𑀜𑀸𑀡𑀧𑀼𑀩𑁆𑀩𑀗𑁆𑀕𑀫𑀸𑀯𑀸𑀢𑀺 𑀫𑀺𑀢𑁆𑀢𑀲𑀦𑁆𑀣𑀯𑁄 𑀅𑀲𑀁𑀓𑀺𑀮𑀺𑀝𑁆𑀞𑁄, 𑀇𑀢𑀭𑁄 𑀲𑀁𑀓𑀺𑀮𑀺𑀝𑁆𑀞𑁄𑀢𑀺 𑀆𑀳 ‘‘𑀦 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀓𑀸𑀢𑀩𑁆𑀩𑁄’’𑀢𑀺. 𑀲𑀤𑁆𑀥𑀫𑁆𑀫𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀳𑀺𑀢𑀸𑀯𑀳𑀁 𑀲𑀼𑀦𑁆𑀤𑀭𑀥𑀫𑁆𑀫𑀁. 𑀲𑁂𑀬𑁆𑀬𑁄𑀢𑀺 𑀳𑀺𑀢𑀯𑀟𑁆𑀠𑀦𑀢𑀸𑀤𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀯𑀟𑁆𑀠𑀻’’𑀢𑀺.

𑀲𑀢𑀁 𑀲𑀸𑀥𑀽𑀦𑀁, 𑀧𑀡𑁆𑀟𑀺𑀢𑀸𑀦𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀢𑀧𑁆𑀧𑀝𑀺𑀬𑁄𑀕𑀯𑀺𑀲𑀬𑀢𑁆𑀢𑀸 𑀅𑀜𑁆𑀜-𑀲𑀤𑁆𑀤𑀲𑁆𑀲 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀢𑁄 ¶ 𑀅𑀦𑁆𑀥𑀩𑀸𑀮𑀢𑁄’’𑀢𑀺. 𑀲𑁄𑀓𑀦𑀺𑀫𑀺𑀢𑁆𑀢𑀁 𑀲𑁄𑀓𑀓𑀸𑀭𑀡𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀇𑀥 𑀲𑁄𑀓𑀲𑀤𑁆𑀤𑁂𑀦 𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀲𑁄𑀓𑀯𑀢𑁆𑀣𑀽𑀦’’𑀦𑁆𑀢𑀺𑀆𑀤𑀺. 𑀲𑁄𑀓𑀯𑀢𑁆𑀣𑀽𑀦𑀺 𑀦𑀸𑀫 𑀘𑁄𑀭𑀸𑀤𑀬𑁄 𑀅𑀘𑁆𑀙𑀺𑀦𑁆𑀤𑀦𑀸𑀤𑀺𑀯𑀲𑁂𑀦 𑀧𑀭𑁂𑀲𑀁 𑀲𑁄𑀓𑀓𑀭𑀡𑀢𑁄. 𑀲𑁄𑀓𑀸𑀦𑀼𑀕𑀢𑀸 𑀲𑁄𑀓𑀧𑁆𑀧𑀢𑁆𑀢𑀸.

𑀣𑁂𑀭𑀲𑁆𑀲𑀸𑀢𑀺 𑀲𑀁𑀓𑀺𑀘𑁆𑀘𑀢𑁆𑀣𑁂𑀭𑀲𑁆𑀲. 𑀅𑀢𑁆𑀢𑀦𑁄 𑀪𑀕𑀺𑀦𑀺𑀬𑀸 𑀚𑁂𑀝𑁆𑀞𑀢𑁆𑀢𑀸 ‘‘𑀢𑀼𑀫𑁆𑀳𑁂’’𑀢𑀺 𑀆𑀳. 𑀅𑀬𑀁 ‘‘𑀇𑀥 𑀘𑁄𑀭𑀸 𑀧𑀝𑀺𑀧𑀚𑁆𑀚𑀺𑀁𑀲𑀽’’𑀢𑀺 𑀅𑀫𑁆𑀳𑁂 𑀢𑀺𑀡𑀸𑀬𑀧𑀺 𑀦 𑀫𑀜𑁆𑀜𑀢𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀘𑁆𑀘𑁂 ‘‘𑀫𑀸𑀭𑁂𑀫 𑀦’’𑀦𑁆𑀢𑀺 𑀆𑀳𑀁𑀲𑀼. 𑀓𑀭𑀼𑀡𑀸𑀬 𑀏𑀓𑀘𑁆𑀘𑁂 ‘‘𑀯𑀺𑀲𑁆𑀲𑀚𑁆𑀚𑁂𑀫𑀸’’𑀢𑀺 𑀆𑀳𑀁𑀲𑀼. 𑀫𑀦𑁆𑀢𑁂𑀢𑁆𑀯𑀸𑀢𑀺 𑀪𑀸𑀲𑁂𑀢𑁆𑀯𑀸.

𑀅𑀳𑀼 𑀅𑀳𑁄𑀲𑀺, 𑀪𑀽𑀢𑀧𑀼𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀅𑀭𑀜𑁆𑀜𑀲𑁆𑀫𑀺𑀁 𑀩𑁆𑀭𑀳𑀸𑀯𑀦𑁂𑀢𑀺 𑀢𑀸𑀤𑀺𑀲𑁂 𑀩𑁆𑀭𑀳𑀸𑀯𑀦𑁂, 𑀫𑀳𑀸𑀭𑀜𑁆𑀜𑁂 𑀦𑀺𑀯𑀸𑀲𑀻𑀢𑀺 𑀅𑀢𑁆𑀣𑁄 𑀘𑁂𑀢𑁄𑀢𑀺 𑀩𑁆𑀬𑀸𑀥𑁄. 𑀓𑀽𑀝𑀸𑀦𑀻𑀢𑀺 𑀯𑀸𑀓𑀼𑀭𑀸𑀤𑀬𑁄. 𑀑𑀟𑁆𑀟𑁂𑀢𑁆𑀯𑀸𑀢𑀺 𑀲𑀚𑁆𑀚𑁂𑀢𑁆𑀯𑀸. 𑀲𑀲𑀓𑀦𑁆𑀢𑀺 𑀧𑁂𑀮𑀓𑀁 𑀉𑀩𑁆𑀩𑀺𑀕𑁆𑀕𑀸𑀢𑀺 𑀪𑀻𑀢𑀢𑀲𑀺𑀢𑀸. 𑀏𑀓𑀭𑀢𑁆𑀢𑀺𑀦𑁆𑀢𑀺 𑀏𑀓𑀭𑀢𑁆𑀢𑁂𑀦𑁂𑀯. 𑀥𑀦𑀚𑀸𑀦𑀻𑀢𑀺 𑀧𑀭𑀺𑀩𑁆𑀩𑀬𑀯𑀲𑁂𑀦 𑀅𑀤𑁆𑀥𑀺𑀓𑁂𑀳𑀺 𑀮𑀤𑁆𑀥𑀩𑁆𑀩𑀥𑀦𑀢𑁄 𑀳𑀸𑀦𑀺, ‘‘𑀲𑀫𑀡𑀫𑁆𑀧𑀺 𑀦𑀸𑀫 𑀳𑀦𑁆𑀢𑀺, 𑀓𑀺𑀁 𑀅𑀫𑁆𑀳𑁂𑀲𑀼 𑀮𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀅𑀤𑁆𑀥𑀺𑀓𑀸𑀦𑀁 𑀅𑀦𑀸𑀕𑀫𑀦𑀢𑁄 𑀏𑀓𑀤𑀺𑀯𑀲𑀁 𑀮𑀤𑁆𑀥𑀩𑁆𑀩𑀧𑀭𑀺𑀩𑁆𑀩𑀬𑀫𑁆𑀧𑀺 𑀦 𑀮𑀪𑀺𑀲𑁆𑀲𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀜𑀸𑀢𑀬𑁄𑀧𑀺 𑀫𑀸𑀢𑀸𑀧𑀺𑀢𑀼𑀪𑀸𑀢𑀼𑀪𑀕𑀺𑀦𑀺𑀆𑀤𑀺𑀓𑁂 𑀜𑀸𑀢𑀓𑁂. 𑀢𑁂 𑀓𑀺𑀭 𑀅𑀥𑀺𑀫𑀼𑀢𑁆𑀢𑀲𑁆𑀲 𑀪𑀕𑀺𑀦𑀺𑀬𑀸 𑀲𑀦𑁆𑀢𑀺𑀓𑀁 𑀉𑀧𑀕𑀘𑁆𑀙𑀦𑁆𑀢𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀢𑁂𑀦 𑀲𑀫𑀸𑀕𑀢𑀸, 𑀅𑀥𑀺𑀫𑀼𑀢𑁆𑀢𑁄 ¶ 𑀲𑀘𑁆𑀘𑀯𑀸𑀘𑀁 𑀅𑀦𑀼𑀭𑀓𑁆𑀔𑀦𑁆𑀢𑁄 𑀘𑁄𑀭𑀪𑀬𑀁 𑀢𑁂𑀲𑀁 𑀦𑀸𑀭𑁄𑀘𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑁂𑀲𑀫𑁆𑀧𑀻’’𑀢𑀺𑀆𑀤𑀺. 𑀢𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑀺𑀢𑀢𑁆𑀢𑀸 ‘‘𑀅𑀥𑀺𑀫𑀼𑀢𑁆𑀢𑀲𑀸𑀫𑀡𑁂𑀭𑀲𑁆𑀲 𑀲𑀦𑁆𑀢𑀺𑀓𑁂’’𑀢𑀺 𑀯𑀼𑀢𑁆𑀢𑀁, 𑀦 𑀉𑀧𑀲𑀫𑁆𑀧𑀤𑀸𑀘𑀭𑀺𑀬𑁄 𑀳𑀼𑀢𑁆𑀯𑀸. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑁄 𑀅𑀦𑁆𑀢𑁂𑀯𑀸𑀲𑀺𑀓𑁂 𑀓𑀢𑁆𑀯𑀸’’𑀢𑀺. 𑀲𑀘𑁆𑀘𑀸𑀦𑀼𑀭𑀓𑁆𑀔𑀡𑁂𑀦 𑀅𑀦𑀼𑀢𑁆𑀢𑀭𑀕𑀼𑀡𑀸𑀥𑀺𑀕𑀫𑁂𑀦 𑀘 𑀜𑀸𑀢𑀺𑀫𑀚𑁆𑀛𑁂 𑀯𑀺𑀭𑁄𑀘𑀢𑀺.

𑀲𑀸𑀢𑀢𑀦𑁆𑀢𑀺 𑀲𑀢𑀢𑀁. 𑀲-𑀲𑀤𑁆𑀤𑀲𑁆𑀲 𑀳𑀺 𑀇𑀥 𑀲𑀸𑀪𑀸𑀯𑁄 𑀬𑀣𑀸 ‘‘𑀲𑀸𑀭𑀸𑀕𑁄’’𑀢𑀺𑀆𑀤𑀻𑀲𑀼. 𑀲𑀸𑀢𑀪𑀸𑀯𑁄 𑀯𑀸 𑀲𑀸𑀢𑀢𑀦𑁆𑀢𑀺 𑀆𑀳 ‘‘𑀲𑀼𑀔𑀁 𑀯𑀸’’𑀢𑀺. 𑀓𑀸𑀭𑀡𑁂𑀦𑀸𑀢𑀺 𑀢𑁂𑀦 𑀢𑁂𑀦 𑀓𑀸𑀭𑀡𑁂𑀦. 𑀲𑀩𑁆𑀩𑀸𑀲𑀁 𑀢𑀸𑀲𑀁 𑀯𑀘𑀦𑀁 𑀲𑀼𑀪𑀸𑀲𑀺𑀢𑀁, 𑀪𑀕𑀯𑀢𑁄 𑀧𑀦 𑀉𑀓𑁆𑀓𑀁𑀲𑀕𑀢𑀁 𑀲𑀼𑀪𑀸𑀲𑀺𑀢𑀫𑁂𑀯. 𑀲𑁆𑀯𑀸𑀬𑀫𑀢𑁆𑀣𑁄 𑀢𑀁𑀢𑀁𑀕𑀸𑀣𑀸𑀧𑀤𑁂𑀦𑁂𑀯 𑀯𑀺𑀜𑁆𑀜𑀸𑀬𑀢𑀻𑀢𑀺 𑀢𑀁 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀲𑀧𑁆𑀧𑀼𑀭𑀺𑀲𑀽𑀧𑀲𑀁𑀲𑁂𑀯𑀲𑀤𑁆𑀥𑀫𑁆𑀫𑀸𑀪𑀺𑀬𑁄𑀕𑁄 𑀬𑀣𑀸 𑀲𑀢𑁆𑀢𑀸𑀦𑀁 𑀯𑀟𑁆𑀠𑀺𑀬𑀸 𑀧𑀜𑁆𑀜𑀸𑀧𑀝𑀺𑀮𑀸𑀪𑀲𑁆𑀲 𑀏𑀓𑀦𑁆𑀢𑀺𑀓𑀁 𑀓𑀸𑀭𑀡𑀁, 𑀏𑀯𑀁 𑀲𑁄𑀓𑀧𑀘𑁆𑀘𑀬𑁂 𑀲𑀢𑀺 𑀯𑀺𑀲𑁄𑀓𑀪𑀸𑀯𑀲𑁆𑀲, 𑀜𑀸𑀢𑀺𑀫𑀚𑁆𑀛𑁂 𑀲𑁄𑀪𑀸𑀬, 𑀲𑀼𑀕𑀢𑀺𑀕𑀫𑀦𑀲𑁆𑀲, 𑀘𑀺𑀭𑀁 𑀲𑀼𑀔𑀝𑁆𑀞𑀸𑀦𑀲𑁆𑀲, 𑀯𑀝𑁆𑀝𑀤𑀼𑀓𑁆𑀔𑀫𑁄𑀘𑀦𑀲𑁆𑀲𑀧𑀺 𑀅𑀜𑁆𑀜𑀸𑀲𑀸𑀥𑀸𑀭𑀡𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀩𑁆𑀪𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀫𑀘𑁆𑀙𑀭𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨. 𑀧𑀫𑀚𑁆𑀚𑀦𑀸𑀓𑀸𑀭𑁂𑀦 ¶ 𑀧𑀯𑀢𑁆𑀢𑀸 𑀅𑀦𑀼𑀧𑀮𑀤𑁆𑀥𑀺 𑀧𑀫𑀸𑀤𑁄. 𑀢𑁂𑀦 𑀏𑀓𑀦𑁆𑀢𑀢𑁄 𑀲𑀢𑀺𑀭𑀳𑀺𑀢𑀸 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀢𑀺𑀯𑀺𑀧𑁆𑀧𑀯𑀸𑀲𑀮𑀓𑁆𑀔𑀡𑁂𑀦𑀸’’𑀢𑀺. 𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀤𑀬𑁄 𑀘𑁂𑀢𑁆𑀣 𑀧𑀫𑀸𑀤𑁂𑀦𑁂𑀯 𑀲𑀗𑁆𑀕𑀳𑀺𑀢𑀸. 𑀇𑀤𑀸𑀦𑀺 𑀬𑀣𑀸 𑀫𑀘𑁆𑀙𑀭𑀺𑀬𑀦𑀺𑀫𑀺𑀢𑁆𑀢𑀜𑁆𑀘 𑀧𑀫𑀸𑀤𑀦𑀺𑀫𑀺𑀢𑁆𑀢𑀜𑁆𑀘 𑀤𑀸𑀦𑀁 𑀦 𑀤𑀻𑀬𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀘𑁆𑀘𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀓𑁆𑀔𑀬𑀁 𑀕𑀫𑀺𑀲𑁆𑀲𑀢𑀻𑀢𑀺 𑀪𑁄𑀕𑀧𑀭𑀺𑀳𑀸𑀦𑀺𑀁 𑀕𑀫𑀺𑀲𑁆𑀲𑀢𑀺. 𑀔𑀺𑀟𑁆𑀟𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀡𑁆𑀟𑀦𑀯𑀺𑀪𑀽𑀲𑀦𑀙𑀡𑀦𑀓𑁆𑀔𑀢𑁆𑀢𑀓𑀺𑀘𑁆𑀘𑀩𑁆𑀬𑀲𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀲𑀤𑀸𑀬𑀓𑀦𑁆𑀢𑀺 𑀓𑀺𑀢𑁆𑀢𑀺𑀬𑀲𑀲𑁆𑀲 𑀧𑀭𑀺𑀯𑀸𑀭𑀬𑀲𑀲𑁆𑀲 𑀘 𑀤𑀸𑀬𑀓𑀁. 𑀲𑀺𑀭𑀻𑀤𑀸𑀬𑀓𑀦𑁆𑀢𑀺 𑀲𑁄𑀪𑀕𑁆𑀕𑀤𑀸𑀬𑀓𑀁. 𑀲𑀫𑁆𑀧𑀢𑁆𑀢𑀺𑀤𑀸𑀬𑀓𑀦𑁆𑀢𑀺 𑀓𑀼𑀮𑀪𑁄𑀕𑀭𑀽𑀧𑀪𑁄𑀕𑀲𑀫𑁆𑀧𑀤𑀸𑀳𑀺 𑀲𑀫𑁆𑀧𑀢𑁆𑀢𑀺𑀤𑀸𑀬𑀓𑀁. 𑀧𑀼𑀜𑁆𑀜𑀦𑁆𑀢𑀺 𑀯𑀸 𑀇𑀥 𑀧𑀼𑀜𑁆𑀜𑀨𑀮𑀁 𑀤𑀝𑁆𑀞𑀩𑁆𑀩𑀁 ‘‘𑀏𑀯𑀫𑀺𑀤𑀁 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁮𑁦) 𑀯𑀺𑀬. 𑀅𑀢𑁆𑀣𑀺 𑀤𑀸𑀦𑀲𑁆𑀲 𑀨𑀮𑀦𑁆𑀢𑀺 𑀏𑀢𑁆𑀣 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀦𑀯𑀝𑁆𑀞𑀺𑀢𑀢𑀁 𑀩𑀳𑀼𑀮𑀲𑀸𑀥𑀸𑀭𑀡𑀢𑀁, 𑀢𑀁 𑀧𑀳𑀸𑀬 𑀕𑀫𑀦𑀻𑀬𑀢𑀁 ¶ , 𑀢𑀩𑁆𑀩𑀺𑀲𑀬𑀸𑀬 𑀧𑀻𑀢𑀺𑀬𑀸 𑀲𑀸𑀯𑀚𑁆𑀚𑀢𑀁, 𑀤𑀸𑀦𑀥𑀫𑁆𑀫𑀲𑁆𑀲 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀁 𑀅𑀦𑀼𑀕𑀸𑀫𑀺𑀓𑀢𑀁, 𑀢𑀩𑁆𑀩𑀺𑀲𑀬𑀸𑀬 𑀧𑀻𑀢𑀺𑀬𑀸 𑀅𑀦𑀯𑀚𑁆𑀚𑀢𑀁, 𑀮𑁄𑀪𑀸𑀤𑀺𑀧𑀸𑀧𑀥𑀫𑁆𑀫𑀸𑀦𑀁 𑀯𑀺𑀦𑁄𑀤𑀦𑀁, 𑀲𑁂𑀲𑀧𑀼𑀜𑁆𑀜𑀸𑀦𑀁 𑀉𑀧𑀦𑀺𑀲𑁆𑀲𑀬𑀜𑁆𑀘 𑀚𑀸𑀦𑀦𑁆𑀢𑁂𑀦𑀸𑀢𑀺 𑀯𑀢𑁆𑀢𑀩𑁆𑀩𑀁.

𑀢𑀁𑀬𑁂𑀯 𑀩𑀸𑀮𑀦𑁆𑀢𑀺 𑀬𑁄 𑀫𑀘𑁆𑀙𑀭𑀻, 𑀢𑀫𑁂𑀯. 𑀅𑀤𑀸𑀦𑀲𑀻𑀮𑀸 𑀩𑀸𑀮𑀸. 𑀏𑀓𑀘𑁆𑀘𑁄 𑀥𑀦𑀲𑁆𑀲 𑀧𑀭𑀺𑀪𑁄𑀕𑀧𑀭𑀺𑀓𑁆𑀔𑀬𑀪𑀬𑁂𑀦 𑀅𑀢𑁆𑀢𑀦𑀸𑀧𑀺 𑀦 𑀧𑀭𑀺𑀪𑀼𑀜𑁆𑀚𑀢𑀺 𑀅𑀢𑀺𑀮𑁄𑀪𑀲𑁂𑀝𑁆𑀞𑀺 𑀯𑀺𑀬𑀸𑀢𑀺 𑀆𑀳 ‘‘𑀇𑀥𑀮𑁄𑀓𑀧𑀭𑀮𑁄𑀓𑁂𑀲𑀽’’𑀢𑀺.

𑀬𑀲𑁆𑀫𑀸 𑀏𑀓𑀘𑁆𑀘𑁄 𑀅𑀤𑀸𑀦𑀲𑀻𑀮𑁄 𑀧𑀼𑀭𑀺𑀲𑁄 𑀅𑀤𑁆𑀥𑀺𑀓𑁂 𑀤𑀺𑀲𑁆𑀯𑀸 𑀧𑀲𑁆𑀲𑀦𑁆𑀢𑁄𑀧𑀺 𑀦 𑀧𑀲𑁆𑀲𑀢𑀺, 𑀢𑁂𑀲𑀁 𑀓𑀣𑀁 𑀲𑀼𑀡𑀦𑁆𑀢𑁄𑀧𑀺 𑀦 𑀲𑀼𑀡𑁄𑀢𑀺, 𑀲𑀬𑀁 𑀓𑀺𑀜𑁆𑀘𑀺 𑀦 𑀓𑀣𑁂𑀢𑀺, 𑀅𑀤𑀸𑀢𑀼𑀓𑀫𑁆𑀬𑀢𑀸𑀣𑀫𑁆𑀪𑁂 𑀩𑀤𑁆𑀥𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀫𑀢𑀮𑀺𑀗𑁆𑀕𑀸𑀦𑀺 𑀉𑀧𑀮𑀩𑁆𑀪𑀦𑁆𑀢𑀺𑀬𑁂𑀯𑀸𑀢𑀺 𑀆𑀳 ‘‘𑀅𑀤𑀸𑀦𑀲𑀻𑀮𑀢𑀸𑀬 𑀫𑀭𑀡𑁂𑀦 𑀫𑀢𑁂𑀲𑀽’’𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀤𑀸𑀦𑀫𑀢𑁆𑀢𑀫𑁂𑀯 𑀕𑀳𑁂𑀢𑁆𑀯𑀸 𑀫𑀢𑁂𑀦𑀲𑁆𑀲 𑀲𑀫𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀸𑀦𑀲𑀻𑀮𑀲𑁆𑀲 𑀧𑀦 𑀅𑀫𑀢𑀮𑀺𑀗𑁆𑀕𑀸𑀦𑀺 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀯𑀚𑀦𑁆𑀢𑀺 𑀧𑀼𑀣𑀼𑀢𑁆𑀢𑁂 𑀏𑀓𑀯𑀘𑀦𑀁, 𑀢𑀲𑁆𑀫𑀸 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀳 𑀯𑀚𑀦𑁆𑀢𑀸’’𑀢𑀺. 𑀤𑀸𑀦𑀲𑀻𑀮𑀸𑀤𑀺𑀥𑀫𑁆𑀫𑁄 𑀧𑀼𑀭𑀸𑀢𑀦𑁄, 𑀦 𑀅𑀚𑁆𑀚𑀢𑀦𑁄𑀢𑀺 𑀲𑀦𑀦𑁆𑀢𑀦𑁄, 𑀲𑁄 𑀏𑀢𑁂𑀲𑀼 𑀅𑀢𑁆𑀣𑀻𑀢𑀺 𑀲𑀦𑀦𑁆𑀢𑀦𑀸, 𑀧𑀡𑁆𑀟𑀺𑀢𑀸, 𑀢𑁂𑀲𑀁 𑀥𑀫𑁆𑀫𑀸𑀢𑀺 𑀢𑁂𑀲𑀁 𑀯𑀲𑁂𑀦𑀧𑀺 𑀥𑀫𑁆𑀫𑁄 𑀲𑀦𑀦𑁆𑀢𑀦𑁄𑀢𑀺 𑀆𑀳 ‘‘𑀲𑀦𑀦𑁆𑀢𑀦𑀸𑀦𑀁 𑀯𑀸 𑀧𑀡𑁆𑀟𑀺𑀢𑀸𑀦𑀁 𑀏𑀲 𑀥𑀫𑁆𑀫𑁄’’𑀢𑀺. 𑀅𑀧𑁆𑀧𑀲𑁆𑀫𑀺𑀫𑁆𑀧𑀺 𑀤𑁂𑀬𑁆𑀬𑀥𑀫𑁆𑀫𑁂 𑀲𑀢𑀺 𑀏𑀓𑁂 𑀤𑀸𑀦𑀁 𑀤𑀤𑀦𑁆𑀢𑀺, 𑀏𑀓𑁂 𑀦 𑀤𑀤𑀦𑁆𑀢𑀺 𑀫𑀘𑁆𑀙𑀭𑀺𑀪𑀸𑀯𑀸. 𑀲𑀳𑀲𑁆𑀲𑀤𑀸𑀦𑀲𑀤𑀺𑀲𑀸𑀢𑀺 𑀏𑀓𑀸𑀧𑀺 𑀤𑀓𑁆𑀔𑀺𑀡𑀸 𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀸𑀬 𑀉𑀴𑀸𑀭𑀪𑀸𑀯𑀢𑁄 𑀲𑀳𑀲𑁆𑀲𑀤𑀸𑀦𑀲𑀤𑀺𑀲𑀸 𑀳𑁄𑀢𑀺.

𑀤𑀼𑀭𑀦𑀼𑀕𑀫𑀦𑁄𑀢𑀺 𑀅𑀲𑀫𑀗𑁆𑀕𑀺𑀦𑀸 𑀅𑀦𑀼𑀕𑀦𑁆𑀢𑀼𑀁 𑀤𑀼𑀓𑁆𑀓𑀭𑁄. 𑀅𑀦𑀦𑀼𑀕𑀫𑀦𑀜𑁆𑀘𑀲𑁆𑀲 𑀥𑀫𑁆𑀫𑀲𑁆𑀲 𑀅𑀧𑀽𑀭𑀡𑀫𑁂𑀯𑀸𑀢𑀺 𑀆𑀳 ¶ ‘‘𑀤𑀼𑀧𑁆𑀧𑀽𑀭𑁄’’𑀢𑀺. ‘‘𑀥𑀫𑁆𑀫𑀁 𑀘𑀭𑁂’’𑀢𑀺 𑀅𑀬𑀁 𑀥𑀫𑁆𑀫𑀘𑀭𑀺𑀬𑀸 𑀕𑀳𑀝𑁆𑀞𑀲𑁆𑀲 𑀯𑀲𑁂𑀦 𑀆𑀭𑀤𑁆𑀥𑀸𑀢𑀺 𑀆𑀳 ‘‘𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀁 𑀘𑀭𑀢𑀻’’𑀢𑀺. 𑀢𑁂𑀦𑀸𑀳 ‘‘𑀤𑀸𑀭𑀜𑁆𑀘 𑀧𑁄𑀲’’𑀦𑁆𑀢𑀺. 𑀲𑀫𑀼𑀜𑁆𑀚𑀓𑀦𑁆𑀢𑀺 𑀓𑀲𑁆𑀲𑀓𑁂𑀳𑀺 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀁 𑀓𑀢𑁆𑀯𑀸 𑀯𑀺𑀲𑀝𑁆𑀞𑀥𑀜𑁆𑀜𑀓𑀭𑀡𑀢𑁄 𑀔𑀮𑁂 𑀉𑀜𑁆𑀙𑀸𑀘𑀭𑀺𑀬𑀯𑀲𑁂𑀦 𑀲𑀫𑀼𑀜𑁆𑀚𑀦𑀺𑀆𑀤𑀺𑀦𑀸 𑀙𑀟𑁆𑀟𑀺𑀢𑀥𑀜𑁆𑀜𑀲𑀁𑀳𑀭𑀡𑀁. 𑀢𑁂𑀦𑀸𑀳 ‘‘𑀬𑁄 𑀅𑀧𑀺…𑀧𑁂… 𑀲𑀫𑀼𑀜𑁆𑀚𑀓𑀁 𑀘𑀭𑀢𑀻’’𑀢𑀺. 𑀏𑀢𑁂𑀦𑀸𑀢𑀺 𑀲𑀢𑀲𑀳𑀲𑁆𑀲𑀲𑀳𑀲𑁆𑀲𑀬𑀸𑀕𑀺𑀕𑁆𑀕𑀳𑀡𑁂𑀦 𑀤𑀲𑀦𑁆𑀦𑀫𑁆𑀧𑀺 𑀪𑀺𑀓𑁆𑀔𑀼𑀓𑁄𑀝𑀻𑀦𑀁 𑀧𑀺𑀡𑁆𑀟𑀧𑀸𑀢𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. ‘‘𑀤𑀺𑀦𑁆𑀦𑁄’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀬𑁄𑀚𑀦𑀸. 𑀤𑀲𑀦𑁆𑀦𑀁 𑀯𑀸 𑀓𑀳𑀸𑀧𑀡𑀓𑁄𑀝𑀻𑀦𑀁 𑀧𑀺𑀡𑁆𑀟𑀧𑀸𑀢𑁄𑀢𑀺 𑀤𑀲𑀦𑁆𑀦𑀁 𑀓𑀳𑀸𑀧𑀡𑀓𑁄𑀝𑀻𑀦𑀁 𑀯𑀺𑀦𑀺𑀬𑀼𑀜𑁆𑀚𑀦𑀯𑀲𑁂𑀦 𑀲𑀫𑁆𑀧𑀸𑀤𑀺𑀢𑀧𑀺𑀡𑁆𑀟𑀧𑀸𑀢𑁄. 𑀢𑀬𑀺𑀤𑀁 𑀲𑀢𑀲𑀳𑀲𑁆𑀲𑀁 ¶ 𑀲𑀳𑀲𑁆𑀲𑀬𑀸𑀕𑀻𑀦𑀁 𑀤𑀸𑀦𑀁 𑀏𑀢𑁆𑀢𑀓𑀁 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀫𑀼𑀜𑁆𑀚𑀓𑀁 𑀘𑀭𑀦𑁆𑀢𑁄𑀧𑀻𑀢𑀺 𑀲𑀫𑀼𑀜𑁆𑀚𑀓𑀁 𑀘𑀭𑀺𑀢𑁆𑀯𑀸𑀧𑀺, 𑀲𑀫𑀼𑀜𑁆𑀚𑀓𑀘𑀭𑀡𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀤𑀸𑀭𑀁 𑀧𑁄𑀲𑁂𑀦𑁆𑀢𑁄𑀧𑀺 𑀥𑀫𑁆𑀫𑀁 𑀘𑀭𑀢𑀺, 𑀅𑀧𑁆𑀧𑀓𑀲𑁆𑀫𑀺𑀁 𑀤𑀤𑀦𑁆𑀢𑁄𑀧𑀺 𑀥𑀫𑁆𑀫𑀁 𑀘𑀭𑀢𑀻𑀢𑀺 𑀬𑁄𑀚𑀦𑀸. 𑀢𑀣𑀸𑀯𑀺𑀥𑀲𑁆𑀲𑀸𑀢𑀺 𑀢𑀸𑀤𑀺𑀲𑀲𑁆𑀲 𑀢𑀣𑀸𑀥𑀫𑁆𑀫𑀘𑀸𑀭𑀺𑀦𑁄 𑀬𑀸 𑀥𑀫𑁆𑀫𑀘𑀭𑀺𑀬𑀸, 𑀢𑀲𑁆𑀲𑀸 𑀓𑀮𑀫𑁆𑀧𑀺 𑀦𑀕𑁆𑀖𑀦𑁆𑀢𑀺 𑀏𑀢𑁂 𑀲𑀳𑀲𑁆𑀲𑀬𑀸𑀕𑀺𑀦𑁄 𑀅𑀢𑁆𑀢𑀦𑁄 𑀲𑀳𑀲𑁆𑀲𑀬𑀸𑀕𑀺𑀢𑀸𑀬. 𑀬𑀁 𑀢𑁂𑀦 𑀤𑀮𑀺𑀤𑁆𑀤𑁂𑀦𑀸𑀢𑀺𑀆𑀤𑀺 𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀯𑀺𑀯𑀭𑀡𑀁. 𑀲𑀩𑁆𑀩𑁂𑀲𑀫𑁆𑀧𑀺 𑀢𑁂𑀲𑀦𑁆𑀢𑀺 ‘‘𑀲𑀢𑀁𑀲𑀳𑀲𑁆𑀲𑀸𑀦𑀁 𑀲𑀳𑀲𑁆𑀲𑀬𑀸𑀕𑀺𑀦’’𑀦𑁆𑀢𑀺 𑀯𑀼𑀢𑁆𑀢𑀸𑀦𑀁 𑀢𑁂𑀲𑀁 𑀲𑀩𑁆𑀩𑁂𑀲𑀫𑁆𑀧𑀺. 𑀇𑀢𑀭𑁂𑀲𑀦𑁆𑀢𑀺 ‘‘𑀢𑀣𑀸𑀯𑀺𑀥𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀧𑀼𑀭𑀺𑀲𑀢𑁄 𑀅𑀜𑁆𑀜𑁂𑀲𑀁. 𑀤𑀲𑀓𑁄𑀝𑀺𑀲𑀳𑀲𑁆𑀲𑀤𑀸𑀦𑀦𑁆𑀢𑀺 𑀤𑀲𑀓𑁄𑀝𑀺𑀲𑀗𑁆𑀔𑀸𑀢𑀁 𑀢𑀢𑁄 𑀅𑀦𑁂𑀓𑀲𑀳𑀲𑁆𑀲𑀪𑁂𑀤𑀢𑀸𑀬 𑀲𑀳𑀲𑁆𑀲𑀤𑀸𑀦𑀁.

‘‘𑀓𑀮𑀁 𑀦𑀕𑁆𑀖𑀢𑀻’’𑀢𑀺 𑀇𑀤𑀁 𑀢𑁂𑀲𑀁 𑀤𑀸𑀦𑀢𑁄 𑀇𑀫𑀲𑁆𑀲 𑀤𑀸𑀦𑀲𑁆𑀲 𑀉𑀴𑀸𑀭𑀢𑀭𑀪𑀸𑀯𑁂𑀦 𑀯𑀺𑀧𑀼𑀮𑀢𑀭𑀪𑀸𑀯𑁂𑀦 𑀯𑀺𑀧𑀼𑀮𑀢𑀭𑀨𑀮𑀢𑀸𑀬 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀓𑀣𑀁 𑀦𑀼 𑀔𑁄 𑀏𑀢𑀁 𑀫𑀳𑀧𑁆𑀨𑀮𑀢𑀭𑀦𑁆𑀢𑀺 𑀚𑀸𑀦𑀦𑀢𑁆𑀣’’𑀦𑁆𑀢𑀺. 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀫𑀳𑀢𑁆𑀢𑀁 𑀕𑀢𑁄𑀢𑀺 𑀫𑀳𑀕𑁆𑀕𑀢𑁄, 𑀉𑀴𑀸𑀭𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀯𑀺𑀧𑀼𑀮𑀲𑁆𑀲𑁂𑀢𑀁 𑀯𑁂𑀯𑀘𑀦’’𑀦𑁆𑀢𑀺. 𑀲𑀫𑁂𑀦𑀸𑀢𑀺 𑀜𑀸𑀬𑁂𑀦, 𑀥𑀫𑁆𑀫𑁂𑀦𑀸𑀢𑀺 𑀅𑀢𑁆𑀣𑁄. 𑀯𑀺𑀲𑀫𑁂𑀢𑀺 𑀦 𑀲𑀫𑁂 𑀫𑀘𑁆𑀙𑀭𑀺𑀬𑀮𑀓𑁆𑀔𑀡𑀧𑁆𑀧𑀢𑁆𑀢𑁂. 𑀙𑁂𑀢𑁆𑀯𑀸𑀢𑀺 𑀧𑀻𑀴𑁂𑀢𑁆𑀯𑀸. 𑀢𑀁 𑀧𑀦 𑀧𑀻𑀴𑀦𑀁 𑀧𑁄𑀣𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑁄𑀣𑁂𑀢𑁆𑀯𑀸’’𑀢𑀺 𑀆𑀳. 𑀅𑀲𑁆𑀲𑀼𑀫𑀼𑀔𑀸𑀢𑀺 𑀢𑀺𑀦𑁆𑀢𑀅𑀲𑁆𑀲𑀼𑀫𑀼𑀔𑀲𑀫𑁆𑀫𑀺𑀲𑁆𑀲𑀸 𑀧𑀭𑀁 𑀭𑁄𑀤𑀸𑀧𑁂𑀢𑁆𑀯𑀸. 𑀫𑀳𑀸𑀤𑀸𑀦𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀩𑀳𑀼𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀧𑀭𑀺𑀘𑁆𑀘𑀚𑀦𑁂𑀦 𑀫𑀳𑀦𑁆𑀢𑀤𑀸𑀦𑀁. 𑀉𑀧𑁆𑀧𑀢𑁆𑀢𑀺𑀬𑀸 𑀅𑀧𑀭𑀺𑀲𑀼𑀤𑁆𑀥𑀢𑀸𑀬𑀸𑀢𑀺 𑀅𑀚𑁆𑀛𑀸𑀲𑀬𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀕𑀯𑁂𑀲𑀦𑀸𑀬 𑀘 𑀲𑀼𑀤𑁆𑀥𑀢𑀸𑀬 𑀫𑀮𑀻𑀦𑀢𑁆𑀢𑀸. 𑀇𑀢𑀭𑀁 𑀥𑀫𑁆𑀫𑀘𑀭𑀺𑀬𑀸𑀬 𑀦𑀺𑀩𑁆𑀩𑀢𑁆𑀢𑀺𑀢𑀤𑀸𑀦𑀁. 𑀧𑀭𑀺𑀢𑁆𑀢𑀤𑀸𑀦𑀦𑁆𑀢𑀺 𑀧𑀭𑀺𑀢𑁆𑀢𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀯𑀲𑁂𑀦 𑀧𑀭𑀺𑀢𑁆𑀢𑀤𑀸𑀦𑀁. 𑀅𑀢𑁆𑀢𑀦𑁄 𑀉𑀧𑁆𑀧𑀢𑁆𑀢𑀺𑀬𑀸 𑀧𑀭𑀺𑀲𑀼𑀤𑁆𑀥𑀢𑀸𑀬𑀸𑀢𑀺 𑀅𑀚𑁆𑀛𑀸𑀲𑀬𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀕𑀯𑁂𑀲𑀦𑀸𑀬 𑀘 𑀯𑀺𑀲𑀼𑀤𑁆𑀥𑀢𑀸𑀬. 𑀏𑀯𑀦𑁆𑀢𑀺𑀆𑀤𑀺𑀫𑀸𑀳𑀸𑀢𑀺 ‘‘𑀏𑀯𑀁 𑀲𑀳𑀲𑁆𑀲𑀸𑀦𑀁 𑀲𑀳𑀲𑁆𑀲𑀬𑀸𑀕𑀺𑀦’’𑀦𑁆𑀢𑀺 𑀅𑀯𑁄𑀘. 𑀢𑀢𑁆𑀣 𑀲𑀳𑀲𑁆𑀲𑀸𑀦𑀦𑁆𑀢𑀺 𑀲𑀢𑀁𑀲𑀳𑀲𑁆𑀲𑀸𑀦𑀁. 𑀕𑀸𑀣𑀸𑀩𑀦𑁆𑀥𑀲𑀼𑀔𑀢𑁆𑀣𑀁 𑀲𑀢𑀕𑁆𑀕𑀳𑀡𑀁 𑀦 𑀓𑀢𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀫𑀘𑁆𑀙𑀭𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀸𑀥𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁩. 𑀉𑀤𑀸𑀦𑀁 ¶ 𑀉𑀤𑀸𑀦𑁂𑀲𑀻𑀢𑀺 𑀧𑀻𑀢𑀺𑀯𑁂𑀕𑁂𑀦 𑀉𑀕𑁆𑀕𑀺𑀭𑀺𑀢𑀩𑁆𑀩𑀢𑀸𑀬 𑀉𑀤𑀸𑀦𑀁 𑀉𑀕𑁆𑀕𑀺𑀭𑀺 𑀉𑀘𑁆𑀘𑀸𑀭𑁂𑀲𑀺. 𑀢𑀬𑀺𑀤𑀁 𑀬𑀲𑁆𑀫𑀸 𑀧𑀻𑀢𑀺𑀲𑀫𑀼𑀝𑁆𑀞𑀸𑀧𑀺𑀢𑀁 𑀯𑀘𑀦𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀉𑀤𑀸𑀳𑀸𑀭𑀁 𑀉𑀤𑀸𑀳𑀭𑀻’’𑀢𑀺 ¶ . 𑀬𑀣𑀸 𑀧𑀦 𑀢𑀁 𑀯𑀘𑀦𑀁 ‘‘𑀉𑀤𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀤𑁆𑀥𑀸𑀬𑀸𑀢𑀺 𑀏𑀢𑁆𑀣 𑀬-𑀓𑀸𑀭𑁄 𑀳𑁂𑀢𑀼𑀅𑀢𑁆𑀣𑁄. 𑀧𑀭𑀺𑀘𑁆𑀘𑀸𑀕𑀘𑁂𑀢𑀦𑀸𑀬 𑀳𑀺 𑀲𑀤𑁆𑀥𑀸 𑀯𑀺𑀲𑁂𑀲𑀧𑀘𑁆𑀘𑀬𑁄 𑀅𑀲𑁆𑀲𑀤𑁆𑀥𑀲𑁆𑀲 𑀢𑀤𑀪𑀸𑀯𑀢𑁄. 𑀧𑀺-𑀲𑀤𑁆𑀤𑁄 𑀯𑀼𑀢𑁆𑀢𑀢𑁆𑀣𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. ‘‘𑀲𑀸𑀳𑀽’’𑀢𑀺 𑀧𑀤𑀁 𑀲𑀸𑀥𑀼𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀁 𑀤𑀝𑁆𑀞𑀩𑁆𑀩𑀁. 𑀓𑀣𑀦𑁆𑀢𑀺 𑀤𑀸𑀦𑀬𑀼𑀤𑁆𑀥𑀸𑀦𑀁 𑀯𑀺𑀧𑀓𑁆𑀔𑀲𑀪𑀸𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑀁 𑀉𑀪𑀬𑀦𑁆𑀢𑀺 𑀤𑀸𑀦𑀁 𑀬𑀼𑀤𑁆𑀥𑀦𑁆𑀢𑀺 𑀇𑀤𑀁 𑀤𑁆𑀯𑀬𑀁. 𑀚𑀻𑀯𑀺𑀢𑀪𑀻𑀭𑀼𑀓𑁄𑀢𑀺 𑀚𑀻𑀯𑀺𑀢𑀯𑀺𑀦𑀸𑀲𑀪𑀻𑀭𑀼𑀓𑁄. 𑀔𑀬𑀪𑀻𑀭𑀼𑀓𑁄𑀢𑀺 𑀪𑁄𑀕𑀓𑁆𑀔𑀬𑀲𑁆𑀲 𑀪𑀻𑀭𑀼𑀓𑁄. 𑀯𑀤𑀦𑁆𑀢𑁄𑀢𑀺 𑀚𑀻𑀯𑀺𑀢𑁂 𑀲𑀸𑀮𑀬𑀢𑀁, 𑀢𑀢𑁄 𑀏𑀯 𑀬𑀼𑀚𑁆𑀛𑀦𑁂 𑀅𑀲𑀫𑀢𑁆𑀣𑀢𑀁 𑀧𑀯𑁂𑀤𑁂𑀦𑁆𑀢𑁄. 𑀙𑁂𑀚𑁆𑀚𑀦𑁆𑀢𑀺 𑀳𑀢𑁆𑀣𑀧𑀸𑀤𑀸𑀤𑀺𑀙𑁂𑀤𑁄. 𑀉𑀲𑁆𑀲𑀳𑀦𑁆𑀢𑁄𑀢𑀺 𑀯𑀻𑀭𑀺𑀬𑀁 𑀓𑀭𑁄𑀦𑁆𑀢𑁄. 𑀏𑀯𑀁 𑀪𑁄𑀕𑁂 𑀭𑀓𑁆𑀔𑀺𑀲𑁆𑀲𑀸𑀫𑀻𑀢𑀺 𑀢𑀣𑀸 𑀪𑁄𑀕𑁂 𑀅𑀧𑀭𑀺𑀓𑁆𑀔𑀻𑀡𑁂 𑀓𑀭𑀺𑀲𑁆𑀲𑀸𑀫𑀻𑀢𑀺. 𑀯𑀤𑀦𑁆𑀢𑁄𑀢𑀺 𑀇𑀥 𑀪𑁄𑀕𑁂𑀲𑀼 𑀮𑁄𑀪𑀁, 𑀢𑀢𑁄 𑀏𑀯 𑀤𑀸𑀢𑀼𑀁 𑀅𑀲𑀫𑀢𑁆𑀣𑀢𑀁 𑀧𑀯𑁂𑀤𑁂𑀦𑁆𑀢𑁄. 𑀏𑀯𑀦𑁆𑀢𑀺 𑀏𑀯𑀁 𑀚𑀻𑀯𑀺𑀢𑀪𑁄𑀕𑀦𑀺𑀭𑀧𑁂𑀓𑁆𑀔𑀢𑀸𑀬 𑀤𑀸𑀦𑀜𑁆𑀘 𑀬𑀼𑀤𑁆𑀥𑀜𑁆𑀘 𑀲𑀫𑀁 𑀳𑁄𑀢𑀺. 𑀲𑀤𑁆𑀥𑀸𑀤𑀺𑀲𑀫𑁆𑀧𑀦𑁆𑀦𑁄𑀢𑀺 𑀲𑀤𑁆𑀥𑀸𑀥𑀫𑁆𑀫𑀚𑀻𑀯𑀺𑀢𑀸𑀯𑀻𑀫𑀁𑀲𑀸𑀲𑀻𑀮𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑁄. 𑀲𑁄 𑀳𑀺 𑀤𑁂𑀬𑁆𑀬𑀯𑀢𑁆𑀣𑀼𑀦𑁄 𑀧𑀭𑀺𑀢𑁆𑀢𑀓𑀢𑁆𑀢𑀸 𑀅𑀧𑁆𑀧𑀓𑀫𑁆𑀧𑀺 𑀤𑀤𑀦𑁆𑀢𑁄 𑀅𑀢𑁆𑀢𑀦𑁄 𑀧𑀦 𑀘𑀺𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀔𑁂𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀘 𑀩𑀳𑀼𑀁 𑀉𑀴𑀸𑀭𑀧𑀼𑀜𑁆𑀜𑀁 𑀧𑀯𑀟𑁆𑀠𑁂𑀦𑁆𑀢𑁄 𑀩𑀳𑀼𑀯𑀺𑀥𑀁 𑀮𑁄𑀪-𑀤𑁄𑀲-𑀇𑀲𑁆𑀲𑀸-𑀫𑀘𑁆𑀙𑀭𑀺𑀬-𑀤𑀺𑀝𑁆𑀞𑀺𑀯𑀺𑀘𑀺𑀓𑀺𑀘𑁆𑀙𑀸𑀤𑀺𑀪𑁂𑀤𑀁 𑀢𑀧𑁆𑀧𑀝𑀺𑀧𑀓𑁆𑀔𑀁 𑀅𑀪𑀺𑀪𑀯𑀢𑀺, 𑀢𑀢𑁄 𑀏𑀯 𑀘 𑀢𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀫𑀘𑁆𑀙𑁂𑀭𑀁 𑀫𑀤𑁆𑀤𑀢𑀺’’𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀢𑀲𑁆𑀲 𑀧𑀦 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀪𑀸𑀯𑀢𑁄.

𑀧𑀭𑀢𑁆𑀣𑀸𑀢𑀺 𑀧𑀭𑀮𑁄𑀓𑁂. 𑀏𑀓𑀲𑀸𑀝𑀓𑀩𑁆𑀭𑀸𑀳𑁆𑀫𑀡𑀯𑀢𑁆𑀣𑀼 𑀅𑀦𑁆𑀯𑀬𑀯𑀲𑁂𑀦, 𑀅𑀗𑁆𑀓𑀼𑀭𑀯𑀢𑁆𑀣𑀼 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀥𑀫𑁆𑀫𑁄 𑀮𑀤𑁆𑀥𑁄 𑀏𑀢𑁂𑀦𑀸𑀢𑀺 𑀥𑀫𑁆𑀫𑀮𑀤𑁆𑀥𑁄, 𑀧𑀼𑀕𑁆𑀕𑀮𑁄. 𑀅𑀕𑁆𑀕𑀺𑀆𑀳𑀺𑀢𑀧𑀤𑀲𑁆𑀲 𑀯𑀺𑀬 𑀲𑀤𑁆𑀤𑀲𑀺𑀤𑁆𑀥𑀺 𑀤𑀝𑁆𑀞𑀩𑁆𑀩𑀸. ‘‘𑀉𑀝𑁆𑀞𑀸𑀦𑀦𑁆𑀢𑀺 𑀓𑀸𑀬𑀺𑀓𑀁 𑀯𑀻𑀭𑀺𑀬𑀁, 𑀯𑀻𑀭𑀺𑀬𑀦𑁆𑀢𑀺 𑀘𑁂𑀢𑀲𑀺𑀓’’𑀦𑁆𑀢𑀺 𑀯𑀤𑀦𑁆𑀢𑀺. 𑀉𑀝𑁆𑀞𑀸𑀦𑀦𑁆𑀢𑀺 𑀪𑁄𑀕𑀼𑀧𑁆𑀧𑀸𑀤𑁂 𑀬𑀼𑀢𑁆𑀢𑀧𑀬𑀼𑀢𑁆𑀢𑀢𑀸. 𑀯𑀻𑀭𑀺𑀬𑀦𑁆𑀢𑀺 𑀢𑀚𑁆𑀚𑁄 𑀉𑀲𑁆𑀲𑀸𑀳𑁄. 𑀬𑀫𑀲𑁆𑀲 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑀁. 𑀯𑁂𑀢𑀭𑀡𑀺𑀫𑁆𑀧𑀺 𑀇𑀢𑀭𑁂 𑀦𑀺𑀭𑀬𑁂 𑀘 𑀅𑀢𑀺𑀓𑁆𑀓𑀫𑁆𑀫. 𑀢𑁂 𑀧𑀦 𑀅𑀩𑁆𑀩𑀼𑀤𑀸𑀤𑀻𑀦𑀁 𑀯𑀲𑁂𑀦 𑀅𑀯𑀻𑀘𑀺𑀁 𑀤𑀲𑀥𑀸 𑀓𑀢𑁆𑀯𑀸 𑀅𑀯𑀲𑁂𑀲𑀫𑀳𑀸𑀦𑀺𑀭𑀬𑁂 𑀲𑀢𑁆𑀢𑀧𑀺 𑀆𑀬𑀼𑀧𑁆𑀧𑀫𑀸𑀡𑀪𑁂𑀤𑁂𑀦 𑀢𑀬𑁄 𑀢𑀬𑁄 𑀓𑀢𑁆𑀯𑀸 𑀏𑀓𑀢𑀺𑀁𑀲𑀸𑀢𑀺 𑀯𑀤𑀦𑁆𑀢𑀺. 𑀲𑀜𑁆𑀚𑀻𑀯𑀸𑀤𑀺𑀦𑀺𑀭𑀬𑀲𑀁𑀯𑀢𑁆𑀢𑀦𑀲𑁆𑀲 𑀓𑀫𑁆𑀫𑀲𑁆𑀲 𑀢𑀺𑀓𑁆𑀔𑀫𑀚𑁆𑀛𑀫𑀼𑀤𑀼𑀪𑀸𑀯𑁂𑀦 𑀢𑀲𑁆𑀲 𑀆𑀬𑀼𑀧𑁆𑀧𑀫𑀸𑀡𑀲𑁆𑀲 𑀢𑀺𑀯𑀺𑀥𑀢𑀸 𑀯𑀺𑀪𑀸𑀯𑁂𑀢𑀩𑁆𑀩𑀸. 𑀅𑀧𑀭𑁂 𑀧𑀦 ‘‘𑀅𑀝𑁆𑀞 𑀫𑀳𑀸𑀦𑀺𑀭𑀬𑀸 𑀲𑁄𑀴𑀲 𑀉𑀲𑁆𑀲𑀤𑀦𑀺𑀭𑀬𑀸 𑀆𑀤𑀺𑀢𑁄 𑀘𑀢𑁆𑀢𑀸𑀭𑁄 𑀲𑀺𑀢𑀦𑀺𑀭𑀬𑁂 𑀏𑀓𑀁 𑀓𑀢𑁆𑀯𑀸 𑀲𑀢𑁆𑀢 𑀲𑀺𑀢𑀦𑀺𑀭𑀬𑀸𑀢𑀺 𑀏𑀯𑀁 𑀏𑀓𑀢𑀺𑀁𑀲 𑀫𑀳𑀸𑀦𑀺𑀭𑀬𑀸’’𑀢𑀺 ¶ 𑀯𑀤𑀦𑁆𑀢𑀺. 𑀫𑀳𑀸𑀦𑀺𑀭𑀬𑀕𑁆𑀕𑀳𑀡𑀢𑁄 𑀆𑀤𑀺𑀢𑁄 𑀘𑀢𑁆𑀢𑀸𑀭𑁄 𑀲𑀺𑀢𑀦𑀺𑀭𑀬𑀸 𑀏𑀓𑁄 𑀦𑀺𑀭𑀬𑁄 𑀓𑀢𑁄𑀢𑀺.

𑀢𑁂𑀲𑀦𑁆𑀢𑀺 ¶ 𑀯𑀺𑀘𑀺𑀦𑀺𑀢𑁆𑀯𑀸 𑀕𑀳𑀺𑀢𑀧𑀘𑁆𑀘𑀬𑀸𑀦𑀁. 𑀧𑀜𑁆𑀘𑀦𑀯𑀼𑀢𑀺𑀧𑀸𑀲𑀡𑁆𑀟𑀪𑁂𑀤𑀸 𑀧𑀧𑀜𑁆𑀘𑀲𑀽𑀤𑀦𑀺𑀲𑀁𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣𑀸𑀢𑀺 𑀢𑁂𑀲𑀼 𑀤𑁆𑀯𑀻𑀲𑀼 𑀯𑀺𑀘𑀺𑀦𑀦𑁂𑀲𑀼. 𑀤𑀓𑁆𑀔𑀺𑀡𑀸𑀯𑀺𑀘𑀺𑀦𑀦𑀁 𑀆𑀳, 𑀉𑀧𑀫𑀸𑀦𑀸𑀦𑀺 𑀳𑀺 𑀦𑀸𑀫 𑀬𑀸𑀯𑀤𑁂𑀯 𑀉𑀧𑀫𑁂𑀬𑁆𑀬𑀢𑁆𑀣𑀯𑀺𑀪𑀸𑀯𑀦𑀢𑁆𑀣𑀸𑀦𑀺. 𑀏𑀢𑁂𑀦 𑀲𑀼𑀔𑁂𑀢𑁆𑀢𑀕𑀳𑀡𑀢𑁄𑀧𑀺 𑀤𑀓𑁆𑀔𑀺𑀡𑁂𑀬𑁆𑀬𑀯𑀺𑀘𑀺𑀦𑀦𑀁 𑀤𑀝𑁆𑀞𑀩𑁆𑀩𑀁.

𑀧𑀸𑀡𑁂𑀲𑀼 𑀲𑀁𑀬𑀫𑁄𑀢𑀺 𑀇𑀫𑀺𑀦𑀸 𑀤𑀲𑀯𑀺𑀥𑀫𑁆𑀧𑀺 𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀁 𑀤𑀲𑁆𑀲𑁂𑀢𑀺. 𑀬𑀣𑀸 𑀳𑀺 ‘‘𑀧𑀸𑀡𑁂𑀲𑀼 𑀲𑀁𑀬𑀫𑁄’’𑀢𑀺 𑀇𑀫𑀺𑀦𑀸 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀸𑀯𑁄𑀭𑁄𑀧𑀦𑀢𑁄 𑀲𑀁𑀬𑀫𑁄 𑀯𑀼𑀢𑁆𑀢𑁄, 𑀏𑀯𑀁 𑀢𑁂𑀲𑀁 𑀲𑀸𑀧𑀢𑁂𑀬𑁆𑀬𑀸𑀯𑀳𑀸𑀭𑀢𑁄 𑀧𑀭𑀤𑀸𑀭𑀸𑀫𑀲𑀦𑀢𑁄 𑀯𑀺𑀲𑀁𑀯𑀸𑀤𑀦𑀢𑁄 𑀅𑀜𑁆𑀜𑀫𑀜𑁆𑀜𑀪𑁂𑀤𑀦𑀢𑁄 𑀨𑀭𑀼𑀲𑀯𑀘𑀦𑁂𑀦 𑀲𑀗𑁆𑀖𑀝𑁆𑀝𑀦𑀢𑁄 𑀦𑀺𑀭𑀢𑁆𑀣𑀓𑀯𑀺𑀧𑁆𑀧𑀮𑀧𑀦𑀢𑁄 𑀧𑀭𑀲𑀦𑁆𑀢𑀓𑀸𑀪𑀺𑀚𑁆𑀛𑀸𑀦𑀢𑁄 𑀉𑀘𑁆𑀙𑁂𑀤𑀘𑀺𑀦𑁆𑀢𑀦𑀢𑁄 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀦𑀢𑁄 𑀘 𑀲𑀁𑀬𑀫𑁄 𑀳𑁄𑀢𑀻𑀢𑀺. 𑀢𑁂𑀦𑀸𑀳 ‘‘𑀲𑀻𑀮𑀸𑀦𑀺𑀲𑀁𑀲𑀁 𑀓𑀣𑁂𑀢𑀼𑀫𑀸𑀭𑀤𑁆𑀥𑀸’’𑀢𑀺. 𑀨𑀭𑀼𑀲𑀯𑀘𑀦𑀲𑀁𑀬𑀫𑁄 𑀧𑀦𑁂𑀢𑁆𑀣 𑀲𑀭𑀽𑀧𑁂𑀦𑁂𑀯 𑀯𑀼𑀢𑁆𑀢𑁄.

𑀧𑀭𑀲𑁆𑀲 𑀉𑀧𑀯𑀸𑀤𑀪𑀬𑁂𑀦𑀸𑀢𑀺 𑀧𑀸𑀧𑀓𑀺𑀭𑀺𑀬𑀳𑁂𑀢𑀼 𑀧𑀭𑁂𑀦 𑀅𑀢𑁆𑀢𑀦𑁄 𑀯𑀢𑁆𑀢𑀩𑁆𑀩𑀉𑀧𑀯𑀸𑀤𑀪𑀬𑁂𑀦. 𑀉𑀧𑀯𑀸𑀤𑀪𑀬𑀸𑀢𑀺 𑀉𑀧𑀯𑀸𑀤𑀪𑀬𑀦𑀺𑀫𑀺𑀢𑁆𑀢𑀁. ‘‘𑀓𑀣𑀁 𑀦𑀼 𑀔𑁄 𑀅𑀫𑁆𑀳𑁂 𑀧𑀭𑁂 𑀦 𑀉𑀧𑀯𑀤𑁂𑀬𑁆𑀬𑀼’’𑀦𑁆𑀢𑀺 𑀆𑀲𑀻𑀲𑀦𑁆𑀢𑀸 𑀧𑀸𑀧𑀁 𑀦 𑀓𑀭𑁄𑀦𑁆𑀢𑀺. 𑀥𑀫𑁆𑀫𑀧𑀤𑀫𑁂𑀯𑀸𑀢𑀺 𑀅𑀲𑀗𑁆𑀔𑀢𑀥𑀫𑁆𑀫𑀓𑁄𑀝𑁆𑀞𑀸𑀲𑁄 𑀏𑀯 𑀲𑁂𑀬𑁆𑀬𑁄 𑀲𑁂𑀝𑁆𑀞𑁄. 𑀬𑀲𑁆𑀫𑀸 𑀲𑀩𑁆𑀩𑀲𑀗𑁆𑀔𑀢𑀁 𑀅𑀦𑀺𑀘𑁆𑀘𑀁 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫𑀁, 𑀢𑀲𑁆𑀫𑀸 𑀢𑀤𑀥𑀺𑀕𑀫𑀸𑀬 𑀉𑀲𑁆𑀲𑀸𑀳𑁄 𑀓𑀭𑀡𑀻𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀼𑀩𑁆𑀩𑀲𑀤𑁆𑀤𑁄 𑀓𑀸𑀮𑀯𑀺𑀲𑁂𑀲𑀯𑀺𑀲𑀬𑁄𑀢𑀺 𑀆𑀳 ‘‘𑀧𑀼𑀩𑁆𑀩𑁂 𑀘 𑀓𑀲𑁆𑀲𑀧𑀩𑀼𑀤𑁆𑀥𑀸𑀤𑀺𑀓𑀸𑀮𑁂𑀧𑀻’’𑀢𑀺𑀆𑀤𑀺. 𑀧𑀼𑀦 𑀅𑀓𑀸𑀮𑀯𑀺𑀲𑁂𑀲𑁄 𑀅𑀧𑀸𑀝𑀺𑀬𑁂𑀓𑁆𑀓𑁄 𑀪𑀼𑀫𑁆𑀫𑀢𑁆𑀣𑀯𑀺𑀲𑀬𑁄𑀯𑀸𑀢𑀺 𑀆𑀳 ‘‘𑀲𑀩𑁆𑀩𑁂𑀧𑀺 𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀲𑀩𑁆𑀩𑁂𑀧𑀺 𑀯𑀸𑀢𑀺 𑀏𑀢𑁂 𑀲𑀩𑁆𑀩𑁂𑀧𑀺 𑀓𑀲𑁆𑀲𑀧𑀩𑀼𑀤𑁆𑀥𑀸𑀤𑀬𑁄 𑀮𑁄𑀓𑀦𑀸𑀣𑀸 𑀲𑀦𑁆𑀢𑁄 𑀦𑀸𑀫 𑀯𑀽𑀧𑀲𑀦𑁆𑀢𑀲𑀩𑁆𑀩𑀓𑀺𑀮𑁂𑀲𑀲𑀦𑁆𑀢𑀸𑀧𑀸 𑀲𑀦𑁆𑀢𑀲𑀩𑁆𑀪𑀽𑀢𑀕𑀼𑀡𑀢𑁆𑀢𑀸.

𑀲𑀸𑀥𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀦𑀲𑀦𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪. 𑀓𑀫𑀦𑀻𑀬𑀸𑀦𑀻𑀢𑀺 ¶ 𑀓𑀦𑁆𑀢𑀸𑀦𑀺. 𑀢𑀢𑁄 𑀏𑀯 𑀏𑀢𑀸𑀦𑀺 𑀇𑀝𑁆𑀞𑀸𑀭𑀫𑁆𑀫𑀡𑀸𑀦𑀺 𑀲𑀼𑀔𑀸𑀭𑀫𑁆𑀫𑀡𑀸𑀦𑀺 𑀭𑀽𑀧𑀸𑀤𑀻𑀦𑀺, 𑀢𑁂 𑀧𑀦 𑀯𑀢𑁆𑀣𑀼𑀓𑀸𑀫𑀸, 𑀢𑀤𑀸𑀭𑀫𑁆𑀫𑀡𑀓𑀺𑀮𑁂𑀲𑀓𑀸𑀫𑀸 𑀯𑀸. ‘‘𑀦 𑀲𑀦𑁆𑀢𑀺 𑀓𑀸𑀫𑀸 𑀫𑀦𑀼𑀚𑁂𑀲𑀽’’𑀢𑀺 𑀤𑁂𑀲𑀦𑀸𑀲𑀻𑀲𑀫𑁂𑀢𑀁, 𑀦𑀺𑀘𑁆𑀙𑀬𑁂𑀦 𑀓𑀸𑀫𑀸 𑀅𑀦𑀺𑀘𑁆𑀘𑀸𑀬𑁂𑀯. 𑀫𑀘𑁆𑀘𑀼 𑀥𑀻𑀬𑀢𑀺 𑀏𑀢𑁆𑀣𑀸𑀢𑀺 𑀫𑀘𑁆𑀘𑀼𑀥𑁂𑀬𑁆𑀬𑀁. 𑀦 𑀧𑀼𑀦 𑀆𑀕𑀘𑁆𑀙𑀢𑀺 𑀏𑀢𑁆𑀣 𑀢𑀁 𑀅𑀧𑀼𑀦𑀸𑀕𑀫𑀦𑀁. 𑀅𑀧𑀼𑀦𑀸𑀕𑀫𑀦𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀕𑀘𑁆𑀙𑀦𑀢𑁄. 𑀦𑀺𑀩𑁆𑀩𑀸𑀦𑀁 𑀳𑀻𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀯𑀺𑀯𑀭𑀡𑀁. 𑀩𑀤𑁆𑀥𑁄𑀢𑀺 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄. 𑀧𑀫𑀢𑁆𑀢𑁄𑀢𑀺 𑀯𑁄𑀲𑁆𑀲𑀕𑁆𑀕𑀧𑀫𑀸𑀤𑀁 𑀆𑀧𑀦𑁆𑀦𑁄.

𑀢𑀡𑁆𑀳𑀸𑀙𑀦𑁆𑀤𑀢𑁄 ¶ 𑀚𑀸𑀢𑀁 𑀢𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑀢𑁆𑀢𑀸. 𑀇𑀘𑁆𑀙𑀺𑀢𑀁 𑀳𑀦𑀢𑀻𑀢𑀺 𑀅𑀖𑀁, 𑀤𑀼𑀓𑁆𑀔𑀁. 𑀇𑀥 𑀧𑀦 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀯𑀲𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀦𑁆𑀢𑀺. 𑀙𑀦𑁆𑀤𑀯𑀺𑀦𑀬𑀸 𑀅𑀖𑀯𑀺𑀦𑀬𑁄𑀢𑀺 𑀳𑁂𑀢𑀼𑀦𑀺𑀭𑁄𑀥𑁂𑀦 𑀳𑀺 𑀨𑀮𑀦𑀺𑀭𑁄𑀥𑁄, 𑀏𑀯𑀁 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀁 𑀯𑀢𑁆𑀯𑀸 𑀅𑀖𑀯𑀺𑀦𑀬𑀸 𑀤𑀼𑀓𑁆𑀔𑀯𑀺𑀦𑀬𑁄𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀁 𑀯𑀤𑀢𑀺.

𑀘𑀺𑀢𑁆𑀭𑀸𑀦𑀻𑀢𑀺 𑀓𑀺𑀮𑁂𑀲𑀓𑀸𑀫𑀸𑀧𑀺 𑀯𑁂𑀤𑀦𑀸𑀤𑀺𑀝𑁆𑀞𑀺𑀲𑀫𑁆𑀧𑀬𑁄𑀕𑀪𑁂𑀤𑁂𑀦 𑀳𑁄𑀦𑁆𑀢𑀺, 𑀆𑀓𑀸𑀭𑀪𑁂𑀤𑁂𑀦 𑀘 𑀅𑀢𑁆𑀣𑀺 𑀲𑀯𑀺𑀖𑀸𑀢𑀸𑀯𑀺𑀖𑀸𑀢𑀸𑀢𑀺 𑀢𑀢𑁄 𑀯𑀺𑀲𑁂𑀲𑁂𑀢𑀼𑀁 ‘‘𑀆𑀭𑀫𑁆𑀫𑀡𑀘𑀺𑀢𑁆𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀲𑀗𑁆𑀓𑀧𑁆𑀧𑀺𑀢𑀭𑀸𑀕𑁄𑀢𑀺 𑀲𑀼𑀪𑀸𑀤𑀺𑀯𑀲𑁂𑀦 𑀲𑀗𑁆𑀓𑀧𑁆𑀧𑀺𑀢𑀯𑀢𑁆𑀣𑀼𑀫𑁆𑀳𑀺 𑀭𑀸𑀕𑁄. 𑀓𑀺𑀮𑁂𑀲𑀓𑀸𑀫𑁄 𑀓𑀸𑀫𑁄𑀢𑀺 𑀯𑀼𑀢𑁆𑀢𑁄 𑀢𑀲𑁆𑀲𑁂𑀯𑀺𑀥 𑀯𑀺𑀲𑁂𑀲𑀢𑁄 𑀓𑀸𑀫𑀪𑀸𑀯𑀲𑀺𑀤𑁆𑀥𑀺𑀢𑁄. 𑀧𑀲𑀽𑀭𑀲𑀼𑀢𑁆𑀢𑁂𑀦 𑀯𑀺𑀪𑀸𑀯𑁂𑀢𑀩𑁆𑀩𑁄 ‘‘𑀦 𑀢𑁂 𑀓𑀸𑀫𑀸’’𑀢𑀺𑀆𑀤𑀺𑀦𑀸 𑀢𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 𑀆𑀕𑀢𑀢𑁆𑀢𑀸. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀲𑀗𑁆𑀔𑁂𑀧𑁂𑀦𑁂𑀯 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀧𑀲𑀽𑀭𑀧𑀭𑀺𑀩𑁆𑀩𑀸𑀚𑀓𑁄 𑀳𑀻’’𑀢𑀺𑀆𑀤𑀺𑀫𑀸𑀳. 𑀦 𑀢𑁂 𑀓𑀸𑀫𑀸 𑀬𑀸𑀦𑀺 𑀘𑀺𑀢𑁆𑀭𑀸𑀦𑀺 𑀮𑁄𑀓𑁂𑀢𑀺 𑀢𑁂 𑀘𑁂 𑀓𑀸𑀫𑀸 𑀦 𑀳𑁄𑀦𑁆𑀢𑀺, 𑀬𑀸𑀦𑀺 𑀮𑁄𑀓𑁂 𑀘𑀺𑀢𑁆𑀭𑀸𑀦𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸𑀦𑀺. 𑀯𑁂𑀤𑁂𑀲𑀻𑀢𑀺 𑀓𑁂𑀯𑀮𑀁 𑀲𑀗𑁆𑀓𑀧𑁆𑀧𑀭𑀸𑀕𑀜𑁆𑀘 𑀓𑀸𑀫𑀁 𑀓𑀢𑁆𑀯𑀸 𑀯𑀤𑁂𑀲𑀺 𑀘𑁂. 𑀳𑁂𑀳𑀺𑀦𑁆𑀢𑀻𑀢𑀺 𑀪𑀯𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀲𑀼𑀡𑀦𑁆𑀢𑁄 𑀲𑀤𑁆𑀤𑀸𑀦𑀺 𑀫𑀦𑁄𑀭𑀫𑀸𑀦𑀺, 𑀲𑀢𑁆𑀣𑀸𑀧𑀺 𑀢𑁂 𑀳𑁂𑀳𑀺𑀢𑀺 𑀓𑀸𑀫𑀪𑁄𑀕𑀻𑀢𑀺 𑀧𑀘𑁆𑀘𑁂𑀓𑀁 𑀕𑀸𑀣𑀸, 𑀇𑀥 𑀧𑀦 𑀲𑀁𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑀺𑀢𑀸. 𑀥𑀻𑀭𑀸 𑀦𑀸𑀫 𑀥𑀺𑀢𑀺𑀲𑀫𑁆𑀧𑀦𑁆𑀦𑀸𑀢𑀺 𑀆𑀳 ‘‘𑀧𑀡𑁆𑀟𑀺𑀢𑀸’’𑀢𑀺.

𑀢𑀲𑁆𑀲𑀸𑀢𑀺 𑀬𑁄 𑀧𑀳𑀻𑀦𑀓𑁄𑀥𑀫𑀸𑀦𑁄 𑀲𑀩𑁆𑀩𑀲𑁄 𑀲𑀁𑀬𑁄𑀚𑀦𑀸𑀢𑀺𑀕𑁄 𑀦𑀸𑀫𑀭𑀽𑀧𑀲𑁆𑀫𑀺𑀁 𑀅𑀲𑀚𑁆𑀚𑀦𑁆𑀢𑁄 𑀭𑀸𑀕𑀸𑀤𑀺𑀓𑀺𑀜𑁆𑀘𑀦𑀭𑀳𑀺𑀢𑁄, 𑀢𑀲𑁆𑀲. 𑀫𑁄𑀖𑀭𑀸𑀚𑀸 𑀦𑀸𑀫 𑀣𑁂𑀭𑁄 𑀩𑀸𑀯𑀭𑀻𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀭𑀺𑀘𑀸𑀭𑀓𑀸𑀦𑀁 𑀲𑁄𑀴𑀲𑀦𑁆𑀦𑀁 𑀅𑀜𑁆𑀜𑀢𑀭𑁄. 𑀬𑀣𑀸𑀦𑀼𑀲𑀦𑁆𑀥𑀺𑀁 𑀅𑀧𑁆𑀧𑀢𑁆𑀢𑁄 𑀲𑀸𑀯𑀲𑁂𑀲-𑀅𑀢𑁆𑀣𑁄, 𑀓𑀺𑀜𑁆𑀘𑀺 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 ¶ . 𑀲𑀩𑁆𑀩𑀲𑁄 𑀯𑀺𑀫𑀼𑀢𑁆𑀢𑀢𑁆𑀢𑀸𑀯 𑀤𑁂𑀯𑀫𑀦𑀼𑀲𑁆𑀲𑀸 𑀦𑀫𑀲𑁆𑀲𑀦𑁆𑀢𑀺, 𑀬𑁂 𑀢𑀁 𑀧𑀝𑀺𑀧𑀚𑁆𑀚𑀦𑁆𑀢𑀺. 𑀢𑁂𑀲𑀁 𑀓𑀺𑀁 𑀳𑁄𑀢𑀺? 𑀓𑀺𑀜𑁆𑀘𑀺𑀧𑀺 𑀦 𑀲𑀺𑀬𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑀯𑀺𑀲𑁂𑀲𑁄? 𑀤𑀲𑀩𑀮𑀁 𑀲𑀦𑁆𑀥𑀸𑀬𑁂𑀯𑀫𑀸𑀳 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦. 𑀅𑀦𑀼𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀧𑀝𑀺𑀧𑀢𑁆𑀢𑀺𑀁 𑀅𑀦𑀼𑀕𑀦𑁆𑀢𑁆𑀯𑀸 𑀧𑀝𑀺𑀧𑀚𑁆𑀚𑀦𑁂𑀦. 𑀦𑀫𑀲𑁆𑀲𑀦𑁆𑀢𑀺 𑀢𑀁 𑀧𑀽𑀚𑁂𑀦𑁆𑀢𑀺.

𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀚𑀸𑀦𑀺𑀢𑁆𑀯𑀸𑀢𑀺 𑀢𑁂𑀦 𑀧𑀝𑀺𑀯𑀺𑀤𑁆𑀥𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸. 𑀢𑀣𑀸 𑀘 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀸𑀬 𑀦𑀺𑀩𑁆𑀩𑁂𑀫𑀢𑀺𑀓𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀯𑀺𑀘𑀺𑀓𑀺𑀘𑁆𑀙𑀁 𑀧𑀳𑀸𑀬𑀸’’𑀢𑀺. 𑀢𑀢𑁄 𑀧𑀭𑀁 𑀧𑀦 𑀅𑀦𑀼𑀓𑁆𑀓𑀫𑁂𑀦 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑁂𑀦 𑀲𑀗𑁆𑀕𑀸𑀢𑀺𑀕𑀸𑀧𑀺 𑀳𑁄𑀦𑁆𑀢𑀺. 𑀅𑀲𑁂𑀓𑁆𑀔𑀥𑀫𑁆𑀫𑀧𑀸𑀭𑀺𑀧𑀽𑀭𑀺𑀬𑀸 𑀧𑀲𑀁𑀲𑀺𑀬𑀸 𑀯𑀺𑀜𑁆𑀜𑀽𑀦𑀁 𑀧𑀲𑀁𑀲𑀸𑀧𑀺 𑀳𑁄𑀦𑁆𑀢𑀻𑀢𑀺.

𑀦𑀲𑀦𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀉𑀚𑁆𑀛𑀸𑀦𑀲𑀜𑁆𑀜𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫. 𑀉𑀚𑁆𑀛𑀸𑀦𑀯𑀲𑁂𑀦 ¶ 𑀧𑀯𑀢𑁆𑀢𑀸 𑀲𑀜𑁆𑀜𑀸 𑀏𑀢𑁂𑀲𑀁 𑀅𑀢𑁆𑀣𑀺, 𑀉𑀚𑁆𑀛𑀸𑀦𑀯𑀲𑁂𑀦 𑀯𑀸 𑀲𑀜𑁆𑀚𑀸𑀦𑀦𑁆𑀢𑀻𑀢𑀺 𑀉𑀚𑁆𑀛𑀸𑀦𑀲𑀜𑁆𑀜𑀻. 𑀓𑀸𑀭𑀬𑁂𑀢𑀺 𑀓𑀢𑀸𑀦𑀁 𑀧𑀭𑀺𑀬𑀦𑁆𑀢𑀁 𑀓𑀸𑀭𑀬𑁂𑀢𑀺 𑀅𑀢𑁆𑀣𑁄. 𑀧𑀭𑀺𑀬𑀦𑁆𑀢𑀓𑀸𑀭𑀺𑀢𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀭𑀺𑀢𑀁 𑀧𑀭𑀺𑀫𑀺𑀢𑀯𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀁𑀲𑀼𑀓𑀽𑀮𑀸𑀤𑀺𑀧𑀝𑀺𑀧𑀓𑁆𑀔𑀦𑀬𑁂𑀦 𑀧𑀢𑁆𑀢𑀼𑀡𑁆𑀡𑀤𑀼𑀓𑀼𑀮𑀸𑀤𑀺 𑀯𑀼𑀢𑁆𑀢𑀁. 𑀦𑀸𑀫𑀁 𑀕𑀳𑀺𑀢𑀦𑁆𑀢𑀺 𑀏𑀢𑁂𑀦 ‘‘𑀉𑀚𑁆𑀛𑀸𑀦𑀲𑀜𑁆𑀜𑀺𑀓𑀸’’𑀢𑀺 𑀏𑀢𑁆𑀣 𑀓-𑀲𑀤𑁆𑀤𑁄 𑀲𑀜𑁆𑀜𑀸𑀬𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀪𑀽𑀢𑀦𑁆𑀢𑀺 𑀅𑀢𑁆𑀢𑀦𑀸 𑀧𑀯𑁂𑀤𑀺𑀬𑀫𑀸𑀦𑀸𑀓𑀸𑀭𑀢𑁄 𑀅𑀜𑁆𑀜𑁂𑀦 𑀅𑀲𑀼𑀤𑁆𑀥𑁂𑀦 𑀆𑀓𑀸𑀭𑁂𑀦 𑀯𑀺𑀚𑁆𑀚𑀫𑀸𑀦𑀁 𑀉𑀧𑀮𑀩𑁆𑀪𑀫𑀸𑀦𑀁 𑀅𑀢𑁆𑀢𑀸𑀦𑀁. 𑀯𑀜𑁆𑀘𑁂𑀢𑁆𑀯𑀸𑀢𑀺 𑀧𑀮𑀫𑁆𑀪𑁂𑀢𑁆𑀯𑀸. 𑀢𑀲𑁆𑀲 𑀓𑀼𑀳𑀓𑀲𑁆𑀲. 𑀢𑀁 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀧𑀭𑀺𑀪𑀼𑀜𑁆𑀚𑀦𑀁. 𑀧𑀭𑀺𑀚𑀸𑀦𑀦𑁆𑀢𑀻𑀢𑀺 𑀢𑀲𑁆𑀲 𑀧𑀝𑀺𑀧𑀢𑁆𑀢𑀺𑀁 𑀧𑀭𑀺𑀘𑁆𑀙𑀺𑀚𑁆𑀚 𑀚𑀸𑀦𑀦𑁆𑀢𑀺. 𑀓𑀸𑀭𑀓𑁄𑀢𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀓𑀢𑁆𑀢𑀸, 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀺𑀢𑀸𑀢𑀺 𑀅𑀢𑁆𑀣𑁄.

𑀇𑀤𑀦𑁆𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁, 𑀅𑀬𑀦𑁆𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀤𑀸𑀢𑀺 𑀦𑀺𑀩𑁆𑀩𑀸𑀦𑀥𑀫𑁆𑀫𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀢𑀸𑀬 𑀅𑀦𑀼𑀥𑀫𑁆𑀫𑀪𑀽𑀢𑀸 𑀧𑀝𑀺𑀧𑀤𑀸. 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑁂 𑀅𑀲𑀺𑀣𑀺𑀮𑀢𑀸𑀬 𑀤𑀴𑁆𑀳𑀸. 𑀪𑀸𑀲𑀺𑀢𑀫𑀢𑁆𑀢𑁂𑀦 𑀘 𑀲𑀯𑀦𑀫𑀢𑁆𑀢𑁂𑀦 𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄. 𑀢𑁂𑀦 𑀪𑀸𑀲𑀺𑀢𑀲𑁆𑀲 𑀲𑀼𑀢𑀲𑁆𑀲 𑀘 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀯𑀺𑀲𑁂𑀲𑀁 𑀦𑀺𑀯𑀢𑁆𑀢𑁂𑀢𑀺. 𑀮𑁄𑀓𑀧𑀭𑀺𑀬𑀸𑀬𑀦𑁆𑀢𑀺 𑀮𑁄𑀓𑀲𑁆𑀲 𑀧𑀭𑀺𑀯𑀺𑀥𑀫𑀦𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑀯𑀲𑁂𑀦 𑀲𑀗𑁆𑀔𑀸𑀭𑀸𑀦𑀁 𑀧𑀭𑀸𑀯𑀼𑀢𑁆𑀢𑀺𑀁. 𑀢𑁂𑀦𑀸𑀳 ‘‘𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀉𑀤𑀬𑀩𑁆𑀩𑀬’’𑀦𑁆𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀲𑀘𑁆𑀘𑀧𑀝𑀺𑀯𑁂𑀥𑁂𑀦𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀘𑀢𑀼𑀲𑀘𑁆𑀘𑀥𑀫𑁆𑀫𑀜𑁆𑀘 𑀅𑀜𑁆𑀜𑀸𑀬𑀸’’𑀢𑀺 ¶ . 𑀏𑀯𑀁 𑀦 𑀓𑀼𑀩𑁆𑀩𑀦𑁆𑀢𑀻𑀢𑀺 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀕𑀼𑀡𑀁 𑀅𑀦𑀸𑀯𑀻𑀓𑀭𑁄𑀦𑁆𑀢𑁄 ‘‘𑀬𑀣𑀸 𑀢𑀼𑀫𑁆𑀳𑁂 𑀯𑀤𑀣, 𑀏𑀯𑀁 𑀦 𑀓𑀼𑀩𑁆𑀩𑀦𑁆𑀢𑀻’’𑀢𑀺 𑀅𑀯𑀺𑀚𑁆𑀚𑀫𑀸𑀦𑀢𑀁 𑀩𑁆𑀬𑀸𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑀅𑀓𑀸𑀭𑀓𑀫𑁂𑀯𑀸𑀢𑀺 𑀤𑁄𑀲𑀁 𑀅𑀓𑀸𑀭𑀓𑀫𑁂𑀯. 𑀅𑀘𑁆𑀘𑀬𑀲𑁆𑀲 𑀧𑀝𑀺𑀕𑁆𑀕𑀡𑁆𑀳𑀦𑀁 𑀦𑀸𑀫 𑀅𑀥𑀺𑀯𑀸𑀲𑀦𑀁, 𑀏𑀯𑀁 𑀲𑁄 𑀤𑁂𑀲𑀓𑁂𑀦 𑀤𑁂𑀲𑀺𑀬𑀫𑀸𑀦𑁄 𑀢𑀢𑁄 𑀯𑀺𑀕𑀢𑁄 𑀦𑀸𑀫 𑀳𑁄𑀢𑀺. 𑀢𑁂𑀦𑀸𑀳 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀽𑀢𑀺 𑀔𑀫𑀢𑀽’’𑀢𑀺.

𑀲𑀪𑀸𑀯𑁂𑀦𑀸𑀢𑀺 𑀲𑀪𑀸𑀯𑀢𑁄. 𑀏𑀓𑀲𑀤𑀺𑀲𑀦𑁆𑀢𑀺 𑀧𑀭𑁂𑀲𑀁 𑀘𑀺𑀢𑁆𑀢𑀸𑀘𑀸𑀭𑀁 𑀚𑀸𑀦𑀦𑁆𑀢𑀫𑁆𑀧𑀺 𑀅𑀚𑀸𑀦𑀦𑁆𑀢𑁂𑀳𑀺 𑀲𑀳 𑀏𑀓𑀲𑀤𑀺𑀲𑀁 𑀓𑀭𑁄𑀦𑁆𑀢𑀸. 𑀧𑀭𑀢𑁄𑀢𑀺 𑀧𑀘𑁆𑀙𑀸. 𑀓𑀣𑀸𑀬 𑀉𑀧𑁆𑀧𑀦𑁆𑀦𑀸𑀬𑀸𑀢𑀺 ‘‘𑀓𑀲𑁆𑀲𑀘𑁆𑀘𑀬𑀸 𑀦 𑀯𑀺𑀚𑁆𑀚𑀦𑁆𑀢𑀻’’𑀢𑀺𑀆𑀤𑀺𑀓𑀣𑀸𑀬 𑀧𑀯𑀢𑁆𑀢𑀫𑀸𑀦𑀸𑀬 ‘‘𑀢𑀣𑀸𑀕𑀢𑀲𑁆𑀲 𑀩𑀼𑀤𑁆𑀥𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀩𑀼𑀤𑁆𑀥𑀩𑀮𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀤𑀻𑀧𑁂𑀢𑁆𑀯𑀸. 𑀔𑀫𑀺𑀲𑁆𑀲𑀸𑀫𑀻𑀢𑀺 𑀅𑀘𑁆𑀘𑀬𑀤𑁂𑀲𑀦𑀁 𑀧𑀝𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀺. 𑀢𑀧𑁆𑀧𑀝𑀺𑀕𑁆𑀕𑀳𑁄 𑀳𑀺 𑀇𑀥 𑀔𑀫𑀦𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀲𑀢𑁆𑀣𑀸 𑀧𑀦 𑀲𑀩𑁆𑀩𑀓𑀸𑀮𑀁 𑀔𑀫𑁄 𑀏𑀯.

𑀓𑁄𑀧𑁄 ¶ 𑀅𑀦𑁆𑀢𑀭𑁂 𑀘𑀺𑀢𑁆𑀢𑁂 𑀏𑀢𑀲𑁆𑀲𑀸𑀢𑀺 𑀓𑁄𑀧𑀦𑁆𑀢𑀭𑁄. 𑀤𑁄𑀲𑁄 𑀕𑀭𑀼 𑀕𑀭𑀼𑀓𑀸𑀢𑀩𑁆𑀩𑁄 𑀅𑀲𑁆𑀲𑀸𑀢𑀺 𑀤𑁄𑀲𑀕𑀭𑀼. ‘‘𑀧𑀝𑀺𑀫𑀼𑀘𑁆𑀘𑀢𑀻’’𑀢𑀺 𑀯𑀸 𑀧𑀸𑀞𑁄, 𑀅𑀬𑀫𑁂𑀯 𑀅𑀢𑁆𑀣𑁄. 𑀅𑀘𑁆𑀘𑀸𑀬𑀺𑀓𑀓𑀫𑁆𑀫𑀦𑁆𑀢𑀺 𑀲𑀳𑀲𑀸 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀓𑀺𑀭𑀺𑀬𑀸. 𑀦𑁄 𑀘𑀺𑀥𑀸𑀢𑀺 𑀦𑁄 𑀘𑁂 𑀇𑀥. 𑀇𑀥𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀧𑀕𑀢𑀁 𑀅𑀧𑀦𑀻𑀢𑀁. 𑀤𑁄𑀲𑁄 𑀦𑁄 𑀘𑁂 𑀲𑀺𑀬𑀸, 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀬𑀤𑀺 𑀅𑀧𑀭𑀸𑀥𑁄 𑀦𑀸𑀫 𑀦 𑀪𑀯𑁂𑀬𑁆𑀬𑀸𑀢𑀺. 𑀦 𑀲𑀫𑁆𑀫𑁂𑀬𑁆𑀬𑀼𑀁 𑀦 𑀯𑀽𑀧𑀲𑀫𑁂𑀬𑁆𑀬𑀼𑀁. 𑀓𑀼𑀲𑀮𑁄𑀢𑀺 𑀅𑀦𑀯𑀚𑁆𑀚𑁄.

𑀥𑀻𑀭𑁄 𑀲𑀢𑁄𑀢𑀺 𑀧𑀤𑀤𑁆𑀯𑀬𑁂𑀦 𑀯𑀝𑁆𑀝𑀙𑀺𑀦𑁆𑀤𑀁 𑀆𑀳. 𑀓𑁄 𑀦𑀺𑀘𑁆𑀘𑀫𑁂𑀯 𑀧𑀡𑁆𑀟𑀺𑀢𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄𑀢𑀺 ‘‘𑀓𑀲𑁆𑀲𑀘𑁆𑀘𑀬𑀸’’𑀢𑀺𑀆𑀤𑀺𑀓𑀸𑀬 𑀧𑀼𑀘𑁆𑀙𑀸𑀕𑀸𑀣𑀸𑀬 𑀅𑀢𑁆𑀣𑁄. 𑀤𑀻𑀖𑀫𑀚𑁆𑀛𑀺𑀫𑀲𑀁𑀯𑀡𑁆𑀡𑀦𑀸𑀲𑀼 𑀢𑀣𑀸𑀕𑀢-𑀲𑀤𑁆𑀤𑁄 𑀯𑀺𑀢𑁆𑀣𑀸𑀭𑀢𑁄 𑀲𑀁𑀯𑀡𑁆𑀡𑀺𑀢𑁄𑀢𑀺 𑀆𑀳 ‘‘𑀏𑀯𑀫𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀢𑀣𑀸𑀕𑀢𑀲𑁆𑀲𑀸’’𑀢𑀺. 𑀩𑀼𑀤𑁆𑀥𑀢𑁆𑀢𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀩𑁄𑀥𑁂𑀢𑀸 𑀧𑀚𑀸𑀬𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲 𑁯𑁭) 𑀦𑀺𑀤𑁆𑀤𑁂𑀲𑁂 𑀆𑀕𑀢𑀓𑀸𑀭𑀡𑀸𑀦𑀺 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀯𑀺𑀫𑁄𑀓𑁆𑀔𑀁 𑀯𑀼𑀘𑁆𑀘𑀢𑀺 𑀅𑀭𑀺𑀬𑀫𑀕𑁆𑀕𑁄, 𑀢𑀲𑁆𑀲 𑀅𑀦𑁆𑀢𑁄 𑀅𑀕𑁆𑀕𑀨𑀮𑀁, 𑀢𑀢𑁆𑀣 𑀪𑀯𑀸 𑀧𑀡𑁆𑀡𑀢𑁆𑀢𑀺, 𑀢𑀲𑁆𑀲𑀸 𑀯𑀲𑁂𑀦. 𑀏𑀯𑀁 𑀩𑀼𑀤𑁆𑀥𑀩𑀮𑀁 𑀤𑀻𑀧𑁂𑀢𑀺. 𑀇𑀤𑀸𑀦𑀺 𑀔𑀺𑀢𑁆𑀢𑀁 𑀲𑀗𑁆𑀔𑁂𑀧𑁂𑀦 𑀲𑀁𑀳𑀭𑀸𑀧𑀺𑀢𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀉𑀚𑁆𑀛𑀸𑀦𑀲𑀜𑁆𑀜𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀤𑁆𑀥𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬. 𑀢𑀢𑁆𑀯𑀲𑁆𑀲𑀸𑀢𑀺 ¶ 𑀑-𑀓𑀸𑀭𑀲𑁆𑀲 𑀯-𑀓𑀸𑀭𑀸𑀤𑁂𑀲𑀁 𑀅-𑀓𑀸𑀭𑀲𑁆𑀲 𑀘 𑀮𑁄𑀧𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀢𑀢𑁄 𑀅𑀲𑁆𑀲𑀸’’𑀢𑀺. ‘‘𑀢𑀢𑀲𑁆𑀲𑀸’’𑀢𑀺 𑀯𑀸 𑀧𑀸𑀞𑁄, 𑀢𑀢𑁄𑀢𑀺 𑀘 𑀲𑀤𑁆𑀥𑀸𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀦𑀸𑀦𑀼𑀧𑀢𑀦𑁆𑀢𑀻𑀢𑀺 𑀦 𑀯𑀢𑁆𑀢𑀦𑁆𑀢𑀺. 𑀧𑀫𑀸𑀤𑀁 𑀓𑀭𑁄𑀦𑁆𑀢𑀻𑀢𑀺 𑀧𑀫𑀚𑁆𑀚𑀦𑁆𑀢𑀺, 𑀫𑀺𑀘𑁆𑀙𑀸 𑀧𑀝𑀺𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀮𑀓𑁆𑀔𑀡𑀸𑀦𑀻𑀢𑀺 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀸𑀦𑀺. 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀉𑀧𑁂𑀘𑁆𑀘 𑀜𑀸𑀡𑀘𑀓𑁆𑀔𑀼𑀦𑀸 𑀧𑁂𑀓𑁆𑀔𑀢𑀺, 𑀅𑀦𑀼𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀆𑀕𑀢𑀓𑀺𑀘𑁆𑀘𑀦𑁆𑀢𑀺 𑀆𑀳𑀢𑀓𑀺𑀘𑁆𑀘𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀲𑀸𑀥𑁂𑀢𑀻𑀢𑀺 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑀯𑀲𑁂𑀦 𑀦𑀺𑀧𑁆𑀨𑀸𑀤𑁂𑀢𑀺, 𑀢𑀣𑀮𑀓𑁆𑀔𑀡𑀁 𑀦𑀺𑀭𑁄𑀥𑀲𑀘𑁆𑀘𑀁 𑀉𑀧𑀦𑀺𑀚𑁆𑀛𑀸𑀬𑀢𑀻𑀢𑀺 𑀅𑀬𑀫𑀢𑁆𑀣𑁄 𑀫𑀕𑁆𑀕𑁂𑀧𑀺 𑀯𑀢𑁆𑀢𑀩𑁆𑀩𑁄 𑀢𑁂𑀦 𑀯𑀺𑀦𑀸 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀓𑀲𑀺𑀡𑀸𑀭𑀫𑁆𑀫𑀡𑀲𑁆𑀲𑀸𑀢𑀺 𑀇𑀤𑀁 𑀮𑀓𑁆𑀔𑀡𑀯𑀘𑀦𑀁. 𑀅𑀓𑀲𑀺𑀡𑀸𑀭𑀫𑁆𑀫𑀡𑀲𑀫𑀸𑀧𑀢𑁆𑀢𑀺𑀬𑁄𑀧𑀺 𑀳𑀺 𑀲𑀦𑁆𑀢𑀻𑀢𑀺. 𑀬𑀣𑀸 𑀘 𑀓𑀲𑀺𑀡𑀸𑀭𑀫𑁆𑀫𑀡𑀸𑀦𑀺 𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀅𑀯𑀲𑁂𑀲𑀸𑀦𑀜𑁆𑀘 𑀢𑀤𑀸𑀭𑀫𑁆𑀫𑀡𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀘𑀺𑀢𑁆𑀢𑀸𑀦𑀁, 𑀏𑀯𑀁 𑀢𑁂𑀦 𑀢𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀕𑀳𑀺𑀢𑀸𑀦𑀻𑀢𑀺 ‘‘𑀓𑀲𑀺𑀡𑀸𑀭𑀫𑁆𑀫𑀡𑀲𑁆𑀲’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀧𑀭𑀫𑀁 𑀉𑀢𑁆𑀢𑀫𑀁 𑀲𑀼𑀔𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑁄 𑀧𑀭𑀫𑀲𑀼𑀔𑀁 𑀅𑀭𑀳𑀢𑁆𑀢𑀁.

𑀲𑀤𑁆𑀥𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀫𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭. 𑀉𑀤𑀸𑀦𑀁 ¶ 𑀧𑀝𑀺𑀘𑁆𑀘𑀸𑀢𑀺 𑀉𑀓𑁆𑀓𑀸𑀓𑀭𑀜𑁆𑀜𑀸 𑀚𑀸𑀢𑀺𑀲𑀫𑁆𑀪𑁂𑀤𑀧𑀭𑀺𑀳𑀸𑀭𑀦𑀺𑀫𑀺𑀢𑁆𑀢𑀁 𑀅𑀢𑁆𑀢𑀦𑁄 𑀯𑀁𑀲𑀧𑀭𑀺𑀲𑀼𑀤𑁆𑀥𑀁 𑀦𑀺𑀲𑁆𑀲𑀸𑀬 𑀯𑀼𑀢𑁆𑀢𑀁 𑀧𑀻𑀢𑀺𑀉𑀤𑀸𑀳𑀸𑀭𑀁 𑀧𑀝𑀺𑀘𑁆𑀘 𑀕𑁄𑀢𑁆𑀢𑀯𑀲𑁂𑀦 ‘‘𑀲𑀓𑁆𑀓𑀸’’𑀢𑀺 𑀮𑀤𑁆𑀥𑀦𑀸𑀫𑀸𑀦𑀁. 𑀬𑀤𑀺 𑀏𑀓𑁄𑀧𑀺 𑀚𑀦𑀧𑀤𑁄, 𑀓𑀣𑀁 𑀩𑀳𑀼𑀯𑀘𑀦𑀦𑁆𑀢𑀺 𑀆𑀳 ‘‘𑀭𑀼𑀴𑁆𑀳𑀻𑀲𑀤𑁆𑀤𑁂𑀦𑀸’’𑀢𑀺. 𑀅𑀓𑁆𑀔𑀭𑀘𑀺𑀦𑁆𑀢𑀺𑀓𑀸 𑀳𑀺 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀬𑀼𑀢𑁆𑀢𑁂 𑀯𑀺𑀬 𑀲𑀮𑀺𑀗𑁆𑀕𑀯𑀘𑀦𑀸𑀦𑀺 𑀇𑀘𑁆𑀙𑀦𑁆𑀢𑀺, 𑀅𑀬𑀫𑁂𑀢𑁆𑀣 𑀭𑀼𑀴𑁆𑀳𑀻 𑀬𑀣𑀸 ‘‘𑀅𑀯𑀦𑁆𑀢𑀻 𑀓𑀼𑀭𑀽’’𑀢𑀺, 𑀢𑀩𑁆𑀩𑀺𑀲𑁂𑀲𑀦𑁂 𑀧𑀦 𑀚𑀦𑀧𑀤𑀲𑀤𑁆𑀤𑁂 𑀚𑀸𑀢𑀺𑀲𑀤𑁆𑀤𑀢𑀸𑀬 𑀏𑀓𑀯𑀘𑀦𑀫𑁂𑀯. 𑀅𑀭𑁄𑀧𑀺𑀫𑁂𑀢𑀺 𑀓𑁂𑀦𑀘𑀺 𑀦 𑀭𑁄𑀧𑀺𑀫𑁂.

𑀆𑀯𑀭𑀡𑁂𑀦𑀸𑀢𑀺 𑀲𑁂𑀢𑀼𑀦𑀸. 𑀩𑀦𑁆𑀥𑀸𑀧𑁂𑀢𑁆𑀯𑀸𑀢𑀺 𑀧𑀡𑁆𑀟𑀼𑀧𑀮𑀸𑀲𑀧𑀸𑀲𑀸𑀡𑀫𑀢𑁆𑀢𑀺𑀓𑀔𑀡𑁆𑀟𑀸𑀤𑀻𑀳𑀺 𑀆𑀮𑀺𑀁 𑀣𑀺𑀭𑀁 𑀓𑀸𑀭𑀸𑀧𑁂𑀢𑁆𑀯𑀸. 𑀲𑀲𑁆𑀲𑀸𑀦𑀺 𑀓𑀸𑀭𑁂𑀦𑁆𑀢𑀻𑀢𑀺 𑀚𑁂𑀝𑁆𑀞𑀫𑀸𑀲𑁂 𑀓𑀺𑀭 𑀖𑀫𑁆𑀫𑀲𑁆𑀲 𑀩𑀮𑀯𑀪𑀸𑀯𑁂𑀦 𑀳𑀺𑀫𑀯𑀦𑁆𑀢𑁂 𑀳𑀺𑀫𑀁 𑀯𑀺𑀮𑀻𑀬𑀺𑀢𑁆𑀯𑀸 𑀲𑀦𑁆𑀤𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀭𑁄𑀳𑀺𑀡𑀺𑀁 𑀦𑀤𑀺𑀁 𑀧𑀯𑀺𑀲𑀢𑀺, 𑀢𑀁 𑀩𑀦𑁆𑀥𑀺𑀢𑁆𑀯𑀸 𑀲𑀲𑁆𑀲𑀸𑀦𑀺 𑀓𑀸𑀭𑁂𑀦𑁆𑀢𑀺. ‘‘𑀚𑀸𑀢𑀺𑀁 ¶ 𑀖𑀝𑁆𑀝𑁂𑀢𑁆𑀯𑀸 𑀓𑀮𑀳𑀁 𑀯𑀟𑁆𑀠𑀬𑀺𑀁𑀲𑀽’’𑀢𑀺 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀓𑁄𑀮𑀺𑀬𑀓𑀫𑁆𑀫𑀓𑀭𑀸 𑀯𑀤𑀦𑁆𑀢𑀻’’𑀢𑀺 𑀆𑀳. 𑀦𑀺𑀬𑀼𑀢𑁆𑀢𑀅𑀫𑀘𑁆𑀘𑀸𑀦𑀦𑁆𑀢𑀺 𑀢𑀲𑁆𑀫𑀺𑀁 𑀲𑀲𑁆𑀲𑀧𑀭𑀺𑀧𑀸𑀮𑀦𑀓𑀫𑁆𑀫𑁂 𑀦𑀺𑀬𑁄𑀚𑀺𑀢𑀫𑀳𑀸𑀫𑀢𑁆𑀢𑀸𑀦𑀁.

𑀢𑀻𑀡𑀺 𑀚𑀸𑀢𑀓𑀸𑀦𑀻𑀢𑀺 ‘‘𑀓𑀼𑀞𑀸𑀭𑀺𑀳𑀢𑁆𑀣𑁄 𑀧𑀼𑀭𑀺𑀲𑁄’’𑀢𑀺𑀆𑀤𑀺𑀦𑀸 𑀨𑀦𑁆𑀤𑀦𑀚𑀸𑀢𑀓𑀁 (𑀚𑀸. 𑁧.𑁧𑁩.𑁧𑁪 𑀆𑀤𑀬𑁄) ‘‘𑀤𑀼𑀤𑁆𑀤𑀼𑀪𑀸𑀬𑀢𑀺 𑀪𑀤𑁆𑀤𑀦𑁆𑀢𑁂’’𑀢𑀺𑀆𑀤𑀺𑀦𑀸 𑀤𑀼𑀤𑁆𑀤𑀼𑀪𑀚𑀸𑀢𑀓𑀁, (𑀚𑀸. 𑁧.𑁪.𑁮𑁫 𑀆𑀤𑀬𑁄) ‘‘𑀯𑀦𑁆𑀤𑀸𑀫𑀺 𑀢𑀁 𑀓𑀼𑀜𑁆𑀚𑀭𑀸’’𑀢𑀺𑀆𑀤𑀺𑀦𑀸 𑀮𑀝𑀼𑀓𑀺𑀓𑀚𑀸𑀢𑀓𑀦𑁆𑀢𑀺 (𑀚𑀸. 𑁧.𑁫.𑁩𑁯 𑀆𑀤𑀬𑁄) 𑀇𑀫𑀸𑀦𑀺 𑀢𑀻𑀡𑀺 𑀚𑀸𑀢𑀓𑀸𑀦𑀺. 𑀤𑁆𑀯𑁂 𑀚𑀸𑀢𑀓𑀸𑀦𑀻𑀢𑀺 𑁋

‘‘𑀲𑀸𑀥𑀼 𑀲𑀫𑁆𑀩𑀳𑀼𑀮𑀸 𑀜𑀸𑀢𑀻, 𑀅𑀧𑀺 𑀭𑀼𑀓𑁆𑀔𑀸 𑀅𑀭𑀜𑁆𑀜𑀚𑀸;

𑀯𑀸𑀢𑁄 𑀯𑀳𑀢𑀺 𑀏𑀓𑀝𑁆𑀞𑀁, 𑀩𑁆𑀭𑀳𑀦𑁆𑀢𑀫𑁆𑀧𑀺 𑀯𑀦𑀧𑁆𑀧𑀢𑀺’’𑀦𑁆𑀢𑀺. 𑁋

𑀆𑀤𑀺𑀦𑀸 𑀭𑀼𑀓𑁆𑀔𑀥𑀫𑁆𑀫𑀚𑀸𑀢𑀓𑀁 (𑀚𑀸. 𑁧.𑁧.𑁭𑁪).

‘‘𑀲𑀫𑁆𑀫𑁄𑀤𑀫𑀸𑀦𑀸 𑀕𑀘𑁆𑀙𑀦𑁆𑀢𑀺, 𑀚𑀸𑀮𑀫𑀸𑀤𑀸𑀬 𑀧𑀓𑁆𑀔𑀺𑀦𑁄;

𑀬𑀤𑀸 𑀢𑁂 𑀯𑀺𑀯𑀤𑀺𑀲𑁆𑀲𑀦𑁆𑀢𑀺, 𑀢𑀤𑀸 𑀏𑀳𑀺𑀦𑁆𑀢𑀺 𑀫𑁂 𑀯𑀲’’𑀦𑁆𑀢𑀺. (𑀚𑀸. 𑁧.𑁧.𑁩𑁩) 𑁋

𑀆𑀤𑀺𑀦𑀸 𑀲𑀫𑁆𑀫𑁄𑀤𑀫𑀸𑀦𑀚𑀸𑀢𑀓𑀦𑁆𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀚𑀸𑀢𑀓𑀸𑀦𑀺.

‘‘𑀅𑀢𑁆𑀢𑀤𑀡𑁆𑀟𑀸 ¶ 𑀪𑀬𑀁 𑀚𑀸𑀢𑀁, 𑀚𑀦𑀁 𑀧𑀲𑁆𑀲𑀣 𑀫𑁂𑀥𑀕𑀁;

𑀲𑀁𑀯𑁂𑀕𑀁 𑀓𑀺𑀢𑁆𑀢𑀬𑀺𑀲𑁆𑀲𑀸𑀫𑀺, 𑀬𑀣𑀸 𑀲𑀁𑀯𑀺𑀚𑀺𑀢𑀁 𑀫𑀬𑀸’’𑀢𑀺. (𑀲𑀼. 𑀦𑀺. 𑁯𑁪𑁧) 𑁋

𑀆𑀤𑀺𑀦𑀸 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀁.

𑀢𑁂𑀦𑀸𑀢𑀺 𑀪𑀕𑀯𑀢𑀸. 𑀓𑀮𑀳𑀓𑀭𑀡𑀪𑀸𑀯𑁄𑀢𑀺 𑀓𑀮𑀳𑀓𑀭𑀡𑀲𑁆𑀲 𑀅𑀢𑁆𑀣𑀺𑀪𑀸𑀯𑁄. 𑀫𑀳𑀸𑀧𑀣𑀯𑀺𑀬𑀸 𑀫𑀳𑀕𑁆𑀖𑁂 𑀔𑀢𑁆𑀢𑀺𑀬𑁂 𑀓𑀲𑁆𑀫𑀸 𑀦𑀸𑀲𑁂𑀣𑀸𑀢𑀺 𑀤𑀲𑁆𑀲𑁂𑀢𑁆𑀯𑀸 𑀓𑀮𑀳𑀁 𑀯𑀽𑀧𑀲𑀫𑁂𑀢𑀼𑀓𑀸𑀫𑁄 𑀪𑀕𑀯𑀸 𑀧𑀣𑀯𑀺𑀁 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀕𑀡𑁆𑀳𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀣𑀯𑀻 𑀦𑀸𑀫 𑀓𑀺𑀁 𑀅𑀕𑁆𑀖𑀢𑀻’’𑀢𑀺𑀆𑀤𑀺𑀫𑀸𑀳. 𑀅𑀝𑁆𑀞𑀸𑀦𑁂𑀢𑀺 𑀅𑀓𑀸𑀭𑀡𑁂. 𑀯𑁂𑀭𑀁 𑀓𑀢𑁆𑀯𑀸𑀢𑀺 𑀯𑀺𑀭𑁄𑀥𑀁 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀢𑀁𑀢𑀁𑀧𑀮𑁄𑀪𑀦𑀓𑀺𑀭𑀺𑀬𑀸𑀬 𑀧𑀭𑀓𑁆𑀓𑀫𑀦𑁆𑀢𑀺𑀬𑁄 ‘‘𑀉𑀓𑁆𑀓𑀡𑁆𑀞𑀦𑁆𑀢𑀽’’𑀢𑀺 𑀲𑀸𑀲𑀦𑀁 𑀧𑁂𑀲𑁂𑀦𑁆𑀢𑀺. 𑀓𑀼𑀡𑀸𑀮𑀤𑀳𑁂𑀢𑀺 𑀓𑀼𑀡𑀸𑀮𑀤𑀳𑀢𑀻𑀭𑁂 𑀧𑀢𑀺𑀝𑁆𑀞𑀸𑀬. 𑀧𑀼𑀘𑁆𑀙𑀺𑀢𑀁 𑀓𑀣𑁂𑀲𑀺 𑀅𑀦𑀼𑀓𑁆𑀓𑀫𑁂𑀦 𑀓𑀼𑀡𑀸𑀮𑀲𑀓𑀼𑀡𑀭𑀸𑀚𑀲𑁆𑀲 𑀧𑀼𑀘𑁆𑀙𑀸𑀧𑀲𑀗𑁆𑀕𑁂𑀦 𑀓𑀼𑀡𑀸𑀮𑀚𑀸𑀢𑀓𑀁 (𑀚𑀸. 𑁨.𑁨𑁧.𑀓𑀼𑀡𑀸𑀮𑀚𑀸𑀢𑀓) 𑀓𑀣𑁂𑀲𑁆𑀲𑀸𑀫𑀻𑀢𑀺. 𑀅𑀦𑀪𑀺𑀭𑀢𑀺𑀁 𑀯𑀺𑀦𑁄𑀤𑁂𑀲𑀺 𑀇𑀢𑁆𑀣𑀻𑀦𑀁 𑀤𑁄𑀲𑀤𑀲𑁆𑀲𑀦𑀫𑀼𑀔𑁂𑀦 𑀓𑀸𑀫𑀸𑀦𑀁 𑀆𑀤𑀻𑀦𑀯𑁄𑀓𑀸𑀭𑀲𑀁𑀓𑀺𑀮𑁂𑀲𑀯𑀺𑀪𑀸𑀯𑀦𑀯𑀲𑁂𑀦. 𑀧𑀼𑀭𑀺𑀲𑀧𑀼𑀭𑀺𑀲𑁂𑀳𑀻𑀢𑀺 𑀓𑁄𑀲𑀚𑁆𑀚𑀁 𑀯𑀺𑀤𑁆𑀥𑀁𑀲𑁂𑀢𑁆𑀯𑀸 𑀧𑀼𑀭𑀺𑀲𑀣𑀸𑀫𑀩𑁆𑀭𑀽𑀳𑀦𑁂𑀦 𑀉𑀢𑁆𑀢𑀫𑀧𑀼𑀭𑀺𑀲𑁂𑀳𑀺 𑀦𑁄 𑀪𑀯𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀸 ¶ . 𑀅𑀯𑀺𑀲𑁆𑀲𑀝𑁆𑀞𑀲𑀫𑀡𑀓𑀫𑁆𑀫𑀦𑁆𑀢𑀸 𑀅𑀧𑀭𑀺𑀘𑁆𑀘𑀢𑁆𑀢𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀬𑁄𑀕𑀸𑀢𑀺 𑀅𑀢𑁆𑀣𑁄. 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀪𑀕𑀯𑀸 𑀘𑀺𑀦𑁆𑀢𑁂𑀲𑀻𑀢𑀺 𑀬𑁄𑀚𑀦𑀸.

𑀧𑀤𑀼𑀫𑀺𑀦𑀺𑀬𑀦𑁆𑀢𑀺 𑀧𑀤𑀼𑀫𑀯𑀦𑁂. 𑀯𑀺𑀓𑀲𑀺𑀁𑀲𑀼 𑀕𑀼𑀡𑀕𑀡𑀯𑀺𑀩𑁄𑀥𑁂𑀦. 𑀅𑀬𑀁 𑀇𑀫𑀲𑁆𑀲…𑀧𑁂… 𑀦 𑀓𑀣𑁂𑀲𑀻𑀢𑀺 𑀇𑀫𑀺𑀦𑀸 𑀲𑀩𑁆𑀩𑁂𑀧𑀺 𑀢𑁂 𑀪𑀺𑀓𑁆𑀔𑀽 𑀢𑀸𑀯𑀤𑁂𑀯 𑀧𑀝𑀺𑀧𑀸𑀝𑀺𑀬𑀸 𑀆𑀕𑀢𑀢𑁆𑀢𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀮𑀚𑁆𑀚𑀫𑀸𑀦𑀸 𑀅𑀢𑁆𑀢𑀦𑀸 𑀧𑀝𑀺𑀮𑀤𑁆𑀥𑀯𑀺𑀲𑁂𑀲𑀁 𑀪𑀕𑀯𑀢𑁄 𑀦𑀸𑀭𑁄𑀘𑁂𑀲𑀼𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀔𑀻𑀡𑀸𑀲𑀯𑀸𑀦𑀦𑁆𑀢𑀺𑀆𑀤𑀺𑀦𑀸 𑀢𑀢𑁆𑀣 𑀓𑀸𑀭𑀡𑀫𑀸𑀳.

𑀑𑀲𑀝𑀫𑀢𑁆𑀢𑁂𑀢𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀉𑀧𑀕𑀢𑀫𑀢𑁆𑀢𑁂. 𑀅𑀭𑀺𑀬𑀫𑀡𑁆𑀟𑀮𑁂𑀢𑀺 𑀅𑀭𑀺𑀬𑀧𑀼𑀕𑁆𑀕𑀮𑀲𑀫𑀽𑀳𑁂. 𑀧𑀸𑀘𑀻𑀦𑀬𑀼𑀕𑀦𑁆𑀥𑀭𑀧𑀭𑀺𑀓𑁆𑀔𑁂𑀧𑀢𑁄𑀢𑀺 𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑀲𑁆𑀲 𑀧𑀸𑀘𑀻𑀦𑀧𑀭𑀺𑀓𑁆𑀔𑁂𑀧𑀢𑁄, 𑀦 𑀩𑀸𑀳𑀺𑀭𑀓𑁂𑀳𑀺 𑀯𑀼𑀘𑁆𑀘𑀫𑀸𑀦𑀉𑀤𑀬𑀧𑀩𑁆𑀩𑀢𑀢𑁄. 𑀭𑀸𑀫𑀡𑁂𑀬𑁆𑀬𑀓𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑀧𑀝𑀺𑀫𑀡𑁆𑀟𑀺𑀢𑀢𑁆𑀢𑀸 𑀯𑀺𑀲𑁂𑀲𑀢𑁄 𑀭𑀫𑀡𑀻𑀬𑀲𑁆𑀲 𑀮𑁄𑀓𑀲𑁆𑀲 𑀭𑀫𑀡𑀻𑀬𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀉𑀮𑁆𑀮𑀗𑁆𑀖𑀺𑀢𑁆𑀯𑀸𑀢𑀺 𑀉𑀝𑁆𑀞𑀳𑀺𑀢𑁆𑀯𑀸. 𑀏𑀯𑀭𑀽𑀧𑁂 𑀔𑀡𑁂 𑀮𑀬𑁂 𑀫𑀼𑀳𑀼𑀢𑁆𑀢𑁂𑀢𑀺 𑀬𑀣𑀸𑀯𑀼𑀢𑁆𑀢𑁂 𑀘𑀦𑁆𑀤𑀫𑀡𑁆𑀟𑀮𑀲𑁆𑀲 𑀉𑀝𑁆𑀞𑀺𑀢𑀓𑁆𑀔𑀡𑁂 𑀉𑀝𑁆𑀞𑀺𑀢𑀯𑁂𑀮𑀸𑀬𑀁 𑀉𑀝𑁆𑀞𑀺𑀢𑀫𑀼𑀳𑀼𑀢𑁆𑀢𑁂𑀢𑀺 𑀉𑀧𑀭𑀽𑀧𑀭𑀺𑀓𑀸𑀮𑀲𑁆𑀲 𑀯𑀟𑁆𑀠𑀺𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁.

𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀚𑀸𑀢𑀺𑀆𑀤𑀺𑀯𑀲𑁂𑀦 𑀪𑀕𑀯𑀢𑁄 𑀅𑀦𑀼𑀭𑀽𑀧𑀧𑀭𑀺𑀯𑀸𑀭𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀫𑀳𑀸𑀲𑀫𑁆𑀫𑀢𑀲𑁆𑀲 𑀯𑀁𑀲𑁂 𑀉𑀧𑁆𑀧𑀦𑁆𑀦𑁄𑀢𑀺𑀆𑀤𑀺 𑀓𑀼𑀮𑀯𑀁𑀲𑀲𑀼𑀤𑁆𑀥𑀺𑀤𑀲𑁆𑀲𑀦𑀁. 𑀔𑀢𑁆𑀢𑀺𑀬𑀕𑀩𑁆𑀪𑁂 𑀚𑀸𑀢𑁄𑀢𑀺 𑀇𑀤𑀁 𑀲𑀢𑀺𑀧𑀺 𑀚𑀸𑀢𑀺𑀯𑀺𑀲𑀼𑀤𑁆𑀥𑀺𑀬𑀁 𑀫𑀸𑀢𑀸𑀧𑀺𑀢𑀽𑀦𑀁 𑀯𑀲𑁂𑀦 𑀅𑀯𑀺𑀲𑀼𑀤𑁆𑀥𑀢𑀸 𑀲𑀺𑀬𑀸𑀢𑀺 𑀢𑁂𑀲𑀫𑁆𑀧𑀺 ‘‘𑀅𑀯𑀺𑀲𑀼𑀤𑁆𑀥𑀢𑀸 𑀦𑀢𑁆𑀣𑀺 𑀇𑀫𑁂𑀲’’𑀦𑁆𑀢𑀺 ¶ 𑀯𑀺𑀲𑀼𑀤𑁆𑀥𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑀢𑀺𑀧𑀺 𑀘 𑀕𑀩𑁆𑀪𑀯𑀺𑀲𑀼𑀤𑁆𑀥𑀺𑀬𑀁 𑀓𑀢𑀤𑁄𑀲𑁂𑀦 𑀫𑀺𑀲𑁆𑀲𑀓𑀢𑁆𑀢𑀸 𑀅𑀭𑀚𑁆𑀚𑀸𑀭𑀳𑀢𑀸𑀧𑀺 𑀲𑀺𑀬𑀸𑀢𑀺 ‘‘𑀢𑀫𑁆𑀧𑀺 𑀦𑀢𑁆𑀣𑀺 𑀇𑀫𑁂𑀲’’𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀭𑀸𑀚𑀧𑀩𑁆𑀩𑀚𑀺𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀸𑀫𑀦𑁆𑀢𑀸𑀢𑀺 𑀲𑀫𑀻𑀧𑁂. 𑀘𑀮𑀺𑀁𑀲𑀽𑀢𑀺 𑀉𑀝𑁆𑀞𑀳𑀺𑀁𑀲𑀼. 𑀓𑁄𑀲𑀫𑀢𑁆𑀢𑀁 𑀞𑀸𑀦𑀁 𑀲𑀤𑁆𑀤𑀦𑁆𑀢𑀭𑀁, ‘‘𑀲𑀤𑁆𑀤𑀲𑀯𑀦𑀝𑁆𑀞𑀸𑀦𑀫𑁂𑀯 𑀲𑀤𑁆𑀤𑀦𑁆𑀢𑀭’’𑀦𑁆𑀢𑀺 𑀅𑀧𑀭𑁂. 𑀢𑀺𑀓𑁆𑀔𑀢𑁆𑀢𑀼𑀁 𑀢𑁂𑀲𑀝𑁆𑀞𑀺𑀬𑀸 𑀦𑀕𑀭𑀲𑀳𑀲𑁆𑀲𑁂𑀲𑀽𑀢𑀺 𑀚𑀫𑁆𑀩𑀼𑀤𑀻𑀧𑁂 𑀓𑀺𑀭 𑀆𑀤𑀺𑀢𑁄 𑀫𑀳𑀦𑁆𑀢𑀸𑀦𑀺 𑀢𑁂𑀲𑀝𑁆𑀞𑀺 𑀦𑀕𑀭𑀲𑀳𑀲𑁆𑀲𑀸𑀦𑀺 𑀉𑀧𑁆𑀧𑀦𑁆𑀦𑀸𑀦𑀺, 𑀢𑀣𑀸 𑀤𑀼𑀢𑀺𑀬𑀁, 𑀢𑀣𑀸 𑀢𑀢𑀺𑀬𑀁. 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀢𑀺𑀓𑁆𑀔𑀢𑁆𑀢𑀼𑀁 𑀢𑁂𑀲𑀝𑁆𑀞𑀺𑀬𑀸 𑀦𑀕𑀭𑀲𑀳𑀲𑁆𑀲𑁂𑀲𑀽’’𑀢𑀺. 𑀢𑀸𑀦𑀺 𑀧𑀦 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀢𑁄 𑀧𑀭𑀁 𑀦𑀯𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀅𑀲𑀻𑀢𑀺𑀲𑀳𑀲𑁆𑀲𑀸𑀦𑀺. 𑀦𑀯𑀦𑀯𑀼𑀢𑀺𑀬𑀸 𑀤𑁄𑀡𑀫𑀼𑀔𑀲𑀢𑀲𑀳𑀲𑁆𑀲𑁂𑀲𑀽𑀢𑀺 𑀦𑀯𑀲𑀢𑀲𑀳𑀲𑁆𑀲𑀸𑀥𑀺𑀓𑁂𑀲𑀼 ¶ 𑀦𑀯𑀼𑀢𑀺𑀲𑀢𑀲𑀳𑀲𑁆𑀲𑁂𑀲𑀼 𑀤𑁄𑀡𑀫𑀼𑀔𑁂𑀲𑀼. 𑀤𑁄𑀡𑀫𑀼𑀔𑀦𑁆𑀢𑀺 𑀘 𑀫𑀳𑀸𑀦𑀕𑀭𑀲𑁆𑀲 𑀆𑀬𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀁 𑀧𑀸𑀤𑀦𑀕𑀭𑀁 𑀯𑀼𑀘𑁆𑀘𑀢𑀺. 𑀙𑀦𑀯𑀼𑀢𑀺𑀬𑀸 𑀧𑀝𑁆𑀝𑀦𑀓𑁄𑀝𑀺𑀲𑀢𑀲𑀳𑀲𑁆𑀲𑁂𑀲𑀽𑀢𑀺 𑀙𑀓𑁄𑀝𑀺𑀲𑀢𑀲𑀳𑀲𑁆𑀲𑀅𑀥𑀺𑀓𑁂𑀲𑀼 𑀦𑀯𑀼𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀧𑀝𑁆𑀝𑀦𑁂𑀲𑀼. 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀸𑀤𑀺𑀙𑀧𑀡𑁆𑀡𑀸𑀲𑀸𑀬 𑀭𑀢𑀦𑀸𑀓𑀭𑁂𑀲𑀼. 𑀏𑀯𑀁 𑀧𑀦 𑀦𑀕𑀭-𑀤𑁄𑀡𑀫𑀼𑀔𑀧𑀝𑁆𑀝𑀦-𑀭𑀢𑀦𑀸𑀓𑀭𑀸𑀤𑀺𑀪𑀸𑀯𑁂𑀦 𑀓𑀣𑀦𑀁 𑀢𑀁𑀢𑀁𑀅𑀥𑀺𑀯𑀢𑁆𑀣𑀸𑀬 𑀯𑀲𑀦𑁆𑀢𑀻𑀦𑀁 𑀢𑀸𑀲𑀁 𑀤𑁂𑀯𑀢𑀸𑀦𑀁 𑀩𑀳𑀼𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀬𑀤𑀺 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀼 𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀢𑀸. 𑀅𑀣 𑀓𑀲𑁆𑀫𑀸 𑀧𑀸𑀴𑀺𑀬𑀁 ‘‘𑀤𑀲𑀳𑀺 𑀘 𑀮𑁄𑀓𑀥𑀸𑀢𑀽𑀳𑀻’’𑀢𑀺? 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀤𑀲𑀲𑀳𑀲𑁆𑀲…𑀧𑁂… 𑀅𑀥𑀺𑀧𑁆𑀧𑁂𑀢’’𑀦𑁆𑀢𑀺. 𑀢𑁂𑀦 𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀇𑀥 ‘‘𑀏𑀓𑀸 𑀮𑁄𑀓𑀥𑀸𑀢𑀽’’𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀮𑁄𑀳𑀧𑀸𑀲𑀸𑀤𑁂𑀢𑀺 𑀲𑀩𑁆𑀩𑀧𑀞𑀫𑀓𑀢𑁂 𑀮𑁄𑀳𑀧𑀸𑀲𑀸𑀤𑁂. 𑀩𑁆𑀭𑀳𑁆𑀫𑀮𑁄𑀓𑁂𑀢𑀺 𑀳𑁂𑀝𑁆𑀞𑀺𑀫𑁂 𑀩𑁆𑀭𑀳𑁆𑀫𑀮𑁄𑀓𑁂. 𑀬𑀤𑀺 𑀢𑀸 𑀤𑁂𑀯𑀢𑀸 𑀏𑀯𑀁 𑀦𑀺𑀭𑀦𑁆𑀢𑀭𑀸 𑀳𑀼𑀢𑁆𑀯𑀸 𑀲𑀦𑁆𑀦𑀺𑀧𑀢𑀺𑀢𑀸, 𑀧𑀘𑁆𑀙𑀸 𑀆𑀕𑀢𑀸𑀦𑀁 𑀑𑀓𑀸𑀲𑁄 𑀏𑀯 𑀦 𑀪𑀯𑁂𑀬𑁆𑀬𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀬𑀣𑀸 𑀔𑁄 𑀧𑀦𑀸’’𑀢𑀺𑀆𑀤𑀺.

𑀲𑀼𑀤𑁆𑀥𑀸𑀯𑀸𑀲𑀓𑀸𑀬𑁂 𑀉𑀧𑁆𑀧𑀦𑁆𑀦𑀸 𑀲𑀼𑀤𑁆𑀥𑀸𑀯𑀸𑀲𑀓𑀸𑀬𑀺𑀓𑀸. 𑀢𑀸𑀲𑀁 𑀧𑀦 𑀬𑀲𑁆𑀫𑀸 𑀲𑀼𑀤𑁆𑀥𑀸𑀯𑀸𑀲𑀪𑀽𑀫𑀺 𑀦𑀺𑀯𑀸𑀲𑀝𑁆𑀞𑀸𑀦𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀲𑀼𑀤𑁆𑀥𑀸𑀯𑀸𑀲𑀯𑀸𑀲𑀻𑀦’’𑀦𑁆𑀢𑀺. 𑀆𑀯𑀸𑀲𑀸𑀢𑀺 𑀆𑀯𑀸𑀲𑀝𑁆𑀞𑀸𑀦𑀪𑀽𑀢𑀸. 𑀤𑁂𑀯𑀢𑀸 𑀧𑀦 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀇𑀢𑀭𑁂𑀲𑀜𑁆𑀘 𑀲𑀁𑀬𑁄𑀚𑀦𑀸𑀦𑀁 𑀲𑀫𑀼𑀘𑁆𑀙𑀺𑀦𑁆𑀦𑀝𑁆𑀞𑁂𑀦 𑀲𑀼𑀤𑁆𑀥𑁄 𑀆𑀯𑀸𑀲𑁄 𑀯𑀺𑀳𑀸𑀭𑁄 𑀏𑀢𑁂𑀲𑀦𑁆𑀢𑀺 𑀲𑀼𑀤𑁆𑀥𑀸𑀯𑀸𑀲𑀸. 𑀫𑀳𑀸𑀲𑀫𑀸𑀕𑀫𑀁 𑀜𑀢𑁆𑀯𑀸𑀢𑀺 𑀫𑀳𑀸𑀲𑀫𑀸𑀕𑀫𑀁 𑀕𑀢𑀸𑀢𑀺 𑀜𑀢𑁆𑀯𑀸.

𑀧𑀼𑀭𑀢𑁆𑀣𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀑𑀢𑀭𑀺 𑀅𑀜𑁆𑀜𑀢𑁆𑀣 𑀑𑀓𑀸𑀲𑀁 𑀅𑀮𑀪𑀫𑀸𑀦𑁄. 𑀏𑀯𑀁 𑀲𑁂𑀲𑀸𑀧𑀺. 𑀫𑀡𑀺𑀯𑀫𑁆𑀫𑀦𑁆𑀢𑀺 𑀇𑀦𑁆𑀤𑀦𑀻𑀮𑀫𑀡𑀺𑀫𑀬𑀁 𑀓𑀯𑀘𑀁. 𑀩𑀼𑀤𑁆𑀥𑀸𑀦𑀁 𑀅𑀪𑀺𑀫𑀼𑀔𑀪𑀸𑀕𑁄 𑀩𑀼𑀤𑁆𑀥𑀯𑀻𑀣𑀺, 𑀲𑀸 𑀬𑀸𑀯 𑀘𑀓𑁆𑀓𑀯𑀸𑀴𑀸 𑀉𑀢𑁆𑀢𑀭𑀺𑀢𑀼𑀁 𑀦 𑀲𑀓𑁆𑀓𑀸. 𑀫𑀳𑀢𑀺𑀬𑀸 𑀩𑀼𑀤𑁆𑀥𑀯𑀻𑀣𑀺𑀬𑀸𑀯𑀸𑀢𑀺 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀦𑁆𑀢𑁂𑀳𑀺 𑀢𑁂𑀳𑀺 𑀤𑁂𑀯𑀩𑁆𑀭𑀳𑁆𑀫𑁂𑀳𑀺 𑀯𑀮𑀜𑁆𑀚𑀺𑀢𑀩𑀼𑀤𑁆𑀥𑀯𑀻𑀣𑀺𑀬𑀸𑀯.

𑀲𑀫𑀺𑀢𑀺 ¶ 𑀲𑀗𑁆𑀕𑀢𑀺 𑀲𑀦𑁆𑀦𑀺𑀧𑀸𑀢𑁄 𑀲𑀫𑀬𑁄, 𑀫𑀳𑀦𑁆𑀢𑁄 𑀲𑀫𑀬𑁄 𑀫𑀳𑀸𑀲𑀫𑀬𑁄𑀢𑀺 𑀆𑀳 ‘‘𑀫𑀳𑀸𑀲𑀫𑀽𑀳𑁄’’𑀢𑀺. 𑀧𑀯𑀤𑁆𑀥𑀁 𑀯𑀦𑀁 𑀧𑀯𑀦𑀦𑁆𑀢𑀺 𑀆𑀳 ‘‘𑀯𑀦𑀲𑀡𑁆𑀟𑁄’’𑀢𑀺. 𑀤𑁂𑀯𑀖𑀝𑀸𑀢𑀺 𑀤𑁂𑀯𑀲𑀫𑀽𑀳𑀸. 𑀲𑀫𑀸𑀤𑀳𑀁𑀲𑀽𑀢𑀺 𑀲𑀫𑀸𑀳𑀺𑀢𑀁 𑀮𑁄𑀓𑀼𑀢𑁆𑀢𑀭𑀲𑀫𑀸𑀥𑀺𑀁 𑀲𑀼𑀝𑁆𑀞𑀼 𑀅𑀧𑁆𑀧𑀺𑀢𑀁 𑀅𑀓𑀁𑀲𑀼. 𑀢𑀣𑀸 𑀲𑀫𑀸𑀳𑀺𑀢𑀁 𑀧𑀦 𑀲𑀫𑀸𑀥𑀺𑀦𑀸 𑀦𑀺𑀬𑁄𑀚𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀫𑀸𑀥𑀺𑀦𑀸 𑀬𑁄𑀚𑁂𑀲𑀼’’𑀦𑁆𑀢𑀺. 𑀲𑀩𑁆𑀩𑁂𑀲𑀁 𑀕𑁄𑀫𑀼𑀢𑁆𑀢𑀯𑀗𑁆𑀓𑀸𑀤𑀻𑀦𑀁 𑀤𑀽𑀭𑀲𑀫𑀼𑀲𑁆𑀲𑀸𑀭𑀺𑀢𑀢𑁆𑀢𑀸 𑀅𑀢𑁆𑀢𑀦𑁄…𑀧𑁂… 𑀅𑀓𑀭𑀺𑀁𑀲𑀼. 𑀯𑀺𑀦𑀬𑀢𑀺 𑀅𑀲𑁆𑀲𑁂 𑀏𑀢𑁂𑀳𑀻𑀢𑀺 𑀦𑁂𑀢𑁆𑀢𑀸𑀦𑀺, 𑀬𑁄𑀢𑁆𑀢𑀸𑀦𑀺. 𑀅𑀯𑀻𑀣𑀺𑀧𑀝𑀺𑀧𑀦𑁆𑀦𑀸𑀦𑀁 𑀅𑀲𑁆𑀲𑀸𑀦𑀁 𑀯𑀻𑀣𑀺𑀧𑀝𑀺𑀧𑀸𑀤𑀦𑀁 𑀭𑀲𑁆𑀫𑀺𑀕𑁆𑀕𑀳𑀡𑁂𑀦 𑀳𑁄𑀢𑀻𑀢𑀺 ‘‘𑀬𑁄𑀢𑁆𑀢𑀸𑀦𑀺 𑀕𑀳𑁂𑀢𑁆𑀯𑀸 𑀅𑀘𑁄𑀤𑁂𑀦𑁆𑀢𑁄’’𑀢𑀺 𑀯𑀢𑁆𑀯𑀸 𑀢𑀁 𑀧𑀦 𑀅𑀘𑁄𑀤𑀦𑀁 𑀅𑀯𑀸𑀭𑀡𑀫𑁂𑀯𑀸𑀢𑀺 𑀆𑀳 ‘‘𑀅𑀘𑁄𑀤𑁂𑀦𑁆𑀢𑁄 𑀅𑀯𑀸𑀭𑁂𑀦𑁆𑀢𑁄’’𑀢𑀺.

𑀬𑀣𑀸 ¶ 𑀔𑀻𑀮𑀁 𑀪𑀺𑀢𑁆𑀢𑀺𑀬𑀁, 𑀪𑀽𑀫𑀺𑀬𑀁 𑀯𑀸 𑀆𑀓𑁄𑀝𑀺𑀢𑀁 𑀤𑀼𑀦𑁆𑀦𑀻𑀳𑀭𑀡𑀁, 𑀬𑀣𑀸 𑀘 𑀧𑀮𑀺𑀖𑀁 𑀦𑀕𑀭𑀧𑁆𑀧𑀯𑁂𑀲𑀦𑀺𑀯𑀸𑀭𑀡𑀁, 𑀬𑀣𑀸 𑀘 𑀇𑀦𑁆𑀤𑀔𑀻𑀮𑀁 𑀕𑀫𑁆𑀪𑀻𑀭𑀦𑁂𑀫𑀺 𑀲𑀼𑀦𑀺𑀔𑀸𑀢𑀁 𑀤𑀼𑀦𑁆𑀦𑀻𑀳𑀭𑀡𑀁, 𑀏𑀯𑀁 𑀭𑀸𑀕𑀸𑀤𑀬𑁄 𑀲𑀢𑁆𑀢𑀲𑀦𑁆𑀢𑀸𑀦𑀢𑁄 𑀤𑀼𑀦𑁆𑀦𑀻𑀳𑀭𑀡𑀸 𑀦𑀺𑀩𑁆𑀩𑀸𑀦𑀦𑀕𑀭𑀧𑁆𑀧𑀯𑁂𑀲𑀦𑀺𑀯𑀸𑀭𑀡𑀸 𑀘𑀸𑀢𑀺 𑀢𑁂 ‘‘𑀔𑀻𑀮𑀁 𑀧𑀮𑀺𑀖𑀁 𑀇𑀦𑁆𑀤𑀔𑀻𑀮’’𑀦𑁆𑀢𑀺 𑀘 𑀯𑀼𑀢𑁆𑀢𑀸. 𑀊𑀳𑀘𑁆𑀘𑀸𑀢𑀺 𑀉𑀤𑁆𑀥𑀭𑀺𑀢𑁆𑀯𑀸. 𑀢𑀡𑁆𑀳𑀸𑀏𑀚𑀸𑀬 𑀅𑀪𑀸𑀯𑁂𑀦 𑀅𑀦𑁂𑀚𑀸. 𑀧𑀭𑀫𑀲𑀦𑁆𑀢𑀼𑀝𑁆𑀞𑀪𑀸𑀯𑁂𑀦 𑀘𑀸𑀢𑀼𑀤𑁆𑀤𑀺𑀲𑀢𑁆𑀢𑀸 𑀅𑀧𑁆𑀧𑀝𑀺𑀳𑀢𑀘𑀸𑀭𑀺𑀓𑀁 𑀘𑀭𑀦𑁆𑀢𑀺. 𑀩𑀼𑀤𑁆𑀥𑀘𑀓𑁆𑀔𑀼-𑀥𑀫𑁆𑀫𑀘𑀓𑁆𑀔𑀼-𑀤𑀺𑀩𑁆𑀩𑀘𑀓𑁆𑀔𑀼-𑀲𑀫𑀦𑁆𑀢𑀘𑀓𑁆𑀔𑀼-𑀧𑀓𑀢𑀺𑀘𑀓𑁆𑀔𑀽𑀦𑀁 𑀯𑀲𑁂𑀦 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺. 𑀲𑀼𑀤𑀦𑁆𑀢𑀸 𑀓𑀼𑀢𑁄𑀢𑀺 𑀆𑀳 ‘‘𑀘𑀓𑁆𑀔𑀼𑀢𑁄𑀧𑀻’’𑀢𑀺. 𑀙𑀦𑁆𑀤𑀸𑀤𑀻𑀳𑀻𑀢𑀺 𑀙𑀦𑁆𑀤𑀸𑀤𑀻𑀦𑀁 𑀯𑀲𑁂𑀦 𑀦 𑀕𑀘𑁆𑀙𑀦𑁆𑀢𑀺 𑀦 𑀯𑀢𑁆𑀢𑀦𑁆𑀢𑀺. 𑀦 𑀆𑀕𑀘𑁆𑀙𑀦𑁆𑀢𑀺 𑀅𑀦𑀼𑀧𑁆𑀧𑀸𑀤𑀦𑀢𑁄. 𑀆𑀕𑀼𑀦𑁆𑀢𑀺 𑀅𑀧𑀭𑀸𑀥𑀁.

𑀲𑀩𑁆𑀩𑀲𑀁𑀬𑁄𑀕𑀸𑀢𑀺 𑀯𑀺𑀪𑀢𑁆𑀢𑀺𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄, 𑀲𑀩𑁆𑀩𑁂 𑀲𑀁𑀬𑁄𑀕𑁂𑀢𑀺 𑀅𑀢𑁆𑀣𑁄. 𑀯𑀺𑀲𑀚𑁆𑀚𑀸𑀢𑀺 𑀯𑀺𑀲𑀚𑁆𑀚𑀺𑀢𑁆𑀯𑀸. 𑀏𑀯𑀫𑁆𑀧𑀻𑀢𑀺 𑀇𑀫𑀸𑀬𑀧𑀺 𑀕𑀸𑀣𑀸𑀬 𑀯𑀲𑁂𑀦 ‘‘𑀆𑀕𑀼𑀁 𑀦 𑀓𑀭𑁄𑀢𑀻’’𑀢𑀺 𑀧𑀤𑁂.

𑀕𑀢𑀸𑀲𑁂𑀢𑀺 𑀕𑀢𑀸 𑀏𑀯. 𑀦 𑀕𑀫𑀺𑀲𑁆𑀲𑀦𑁆𑀢𑀺 𑀧𑀭𑀺𑀦𑀺𑀝𑁆𑀞𑀺𑀢𑀲𑀭𑀡𑀕𑀫𑀦𑀢𑁆𑀢𑀸. 𑀮𑁄𑀓𑀼𑀢𑁆𑀢𑀭𑀲𑀭𑀡𑀕𑀫𑀦𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦𑀸𑀳 ‘‘𑀦𑀺𑀩𑁆𑀩𑁂𑀫𑀢𑀺𑀓𑀲𑀭𑀡𑀕𑀫𑀦𑁂𑀦 𑀕𑀢𑀸’’𑀢𑀺. 𑀢𑁂 𑀳𑀺 𑀦𑀺𑀬𑀫𑁂𑀦 𑀅𑀧𑀸𑀬𑀁 𑀦 𑀕𑀫𑀺𑀲𑁆𑀲𑀦𑁆𑀢𑀺, 𑀤𑁂𑀯𑀓𑀸𑀬𑀜𑁆𑀘 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀺. 𑀬𑁂 𑀧𑀦 𑀮𑁄𑀓𑀺𑀬𑁂𑀦 𑀲𑀭𑀡𑀕𑀫𑀦𑁂𑀦 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸, 𑀦 𑀢𑁂 𑀕𑀫𑀺𑀲𑁆𑀲𑀦𑁆𑀢𑀺 𑀅𑀧𑀸𑀬𑀁, 𑀲𑀢𑀺 𑀘 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂 𑀧𑀳𑀸𑀬 𑀫𑀸𑀦𑀼𑀲𑀁 𑀤𑁂𑀳𑀁 𑀤𑁂𑀯𑀓𑀸𑀬𑀁 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻𑀢𑀺. 𑀢𑁂𑀦𑀸𑀳 𑀲𑁄 𑀩𑁆𑀭𑀳𑁆𑀫𑀸 ‘‘𑀬𑁂 𑀓𑁂𑀘𑀺 𑀩𑀼𑀤𑁆𑀥𑀁…𑀧𑁂… 𑀧𑀭𑀺𑀧𑀽𑀭𑁂𑀲𑁆𑀲𑀦𑁆𑀢𑀻’’𑀢𑀺.

𑀲𑀫𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀓𑀮𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮. 𑀢𑀦𑁆𑀢𑀺 𑀉𑀬𑁆𑀬𑀸𑀦𑀁 𑀲𑀗𑁆𑀔𑀁 𑀕𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀥𑀦𑀼𑀦𑀸 𑀲𑀭𑁂𑀦 𑀕𑀳𑀦𑁆𑀢𑀺 𑀧𑁄𑀣𑀬𑀦𑁆𑀢𑀺 𑀩𑀸𑀥𑁂𑀦𑁆𑀢𑀻𑀢𑀺 𑀥𑀦𑀼𑀕𑁆𑀕𑀳𑀸. 𑀢𑀁 𑀲𑀫𑁆𑀧𑀝𑀺𑀘𑁆𑀙𑀻𑀢𑀺 𑀢𑀲𑁆𑀲𑀸 𑀲𑀺𑀮𑀸𑀬 𑀳𑁂𑀝𑁆𑀞𑀸𑀪𑀸𑀕𑁂𑀦 𑀉𑀕𑁆𑀕𑀦𑁆𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀺. 𑀲𑀢𑁆𑀣𑀼 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 ¶ 𑀉𑀧𑀳𑀢𑀢𑁆𑀢𑀸 𑀲𑀬𑀫𑁆𑀧𑀺 𑀧𑀭𑀺𑀧𑀢𑀦𑁆𑀢𑀻 𑀯𑀸𑀢𑀁 𑀉𑀧𑀢𑁆𑀣𑀫𑁆𑀪𑁂𑀢𑀺. 𑀅𑀪𑀺𑀳𑀦𑀺 𑀲𑀢𑁆𑀣𑀸𑀭𑀸 𑀅𑀦𑀸𑀯𑀚𑁆𑀚𑀺𑀢𑀢𑁆𑀢𑀸. 𑀢𑀜𑁆𑀘 𑀔𑁄 𑀓𑀫𑁆𑀫𑀨𑀮𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁄 𑀏𑀯 𑀢𑀢𑁄 𑀧𑀝𑁆𑀞𑀸𑀬 𑀪𑀕𑀯𑀢𑁄 𑀅𑀨𑀸𑀲𑀼 𑀚𑀸𑀢𑀦𑁆𑀢𑀺 𑀏𑀢𑁂𑀦𑀧𑀺 𑀉𑀧𑀸𑀤𑀺𑀡𑁆𑀡𑀓𑀲𑀭𑀻𑀭𑁂 𑀦𑀸𑀫 𑀅𑀦𑀺𑀝𑁆𑀞𑀸𑀧𑀺 𑀲𑀫𑁆𑀨𑀲𑁆𑀲𑀓𑀸 𑀧𑀢𑀦𑁆𑀢𑀺 𑀏𑀯 𑀢𑀣𑀸𑀭𑀽𑀧𑁂𑀦 𑀓𑀫𑁆𑀫𑀼𑀦𑀸 𑀓𑀢𑁄𑀓𑀸𑀲𑁂𑀢𑀺 𑀤𑀲𑁆𑀲𑁂𑀢𑀺. 𑀅𑀬𑀁 ¶ 𑀯𑀺𑀳𑀸𑀭𑁄𑀢𑀺 𑀕𑀺𑀚𑁆𑀛𑀓𑀽𑀝𑀯𑀺𑀳𑀸𑀭𑁄. 𑀉𑀚𑁆𑀚𑀗𑁆𑀕𑀮𑁄 𑀦 𑀓𑀢𑁆𑀢𑀩𑁆𑀩𑀧𑀭𑁄. 𑀯𑀺𑀲𑀫𑁄𑀢𑀺 𑀪𑀽𑀫𑀺𑀪𑀸𑀕𑀯𑀲𑁂𑀦 𑀯𑀺𑀲𑀫𑁄. 𑀲𑀺𑀯𑀺𑀓𑀸𑀓𑀸𑀭𑁂𑀦 𑀲𑀚𑁆𑀚𑀺𑀢𑁄 𑀫𑀜𑁆𑀘𑁄 𑀏𑀯 𑀫𑀜𑁆𑀘𑀲𑀺𑀯𑀺𑀓𑀸.

𑀪𑀼𑀲𑀸𑀢𑀺 𑀤𑀴𑁆𑀳𑀸. 𑀤𑀼𑀓𑁆𑀔𑀸𑀢𑀺 𑀤𑀼𑀓𑁆𑀔𑀫𑀸 𑀤𑀼𑀢𑁆𑀢𑀺𑀢𑀺𑀓𑁆𑀔𑀸. 𑀔𑀭𑀸𑀢𑀺 𑀓𑀓𑁆𑀓𑀲𑀸. 𑀓𑀝𑀼𑀓𑀸𑀢𑀺 𑀅𑀦𑀺𑀝𑁆𑀞𑀸. 𑀅𑀲𑀸𑀢𑀸𑀢𑀺 𑀦 𑀲𑀸𑀢𑀸 𑀅𑀧𑁆𑀧𑀺𑀬𑀸. 𑀦 𑀅𑀧𑁆𑀧𑁂𑀢𑀻𑀢𑀺 𑀦 𑀉𑀧𑁂𑀢𑀺. 𑀦 𑀅𑀧𑁆𑀧𑀸𑀬𑀦𑁆𑀢𑀻𑀢𑀺 𑀦 𑀔𑀫𑀦𑁆𑀢𑀺. 𑀯𑁂𑀤𑀦𑀸𑀥𑀺𑀯𑀸𑀲𑀦𑀔𑀦𑁆𑀢𑀺𑀬𑀸 𑀲𑀢𑀺𑀲𑀫𑁆𑀧𑀚𑀜𑁆𑀜𑀬𑀼𑀢𑁆𑀢𑀢𑁆𑀢𑀸 𑀲𑀩𑁆𑀩𑀲𑀢𑁆𑀢𑀝𑁆𑀞𑀺𑀢𑀸𑀳𑀸𑀭𑀲𑀫𑀼𑀤𑀬𑀯𑀢𑁆𑀣𑀼𑀚𑀸𑀢𑀲𑁆𑀲 𑀆𑀤𑀻𑀦𑀯𑀦𑀺𑀲𑁆𑀲𑀭𑀡𑀸𑀦𑀁 𑀧𑀕𑁂𑀯 𑀲𑀼𑀧𑁆𑀧𑀝𑀺𑀯𑀺𑀤𑀺𑀢𑀢𑁆𑀢𑀸 𑀬𑀣𑀸 𑀲𑀫𑀼𑀤𑀸𑀘𑀸𑀭𑁄 𑀘𑀺𑀢𑁆𑀢𑀁 𑀦𑀸𑀪𑀺𑀪𑀯𑀢𑀺, 𑀏𑀯𑀁 𑀲𑀫𑁆𑀫𑀤𑁂𑀯 𑀉𑀧𑀝𑁆𑀞𑀸𑀧𑀺𑀢𑀲𑀢𑀺𑀲𑀫𑁆𑀧𑀚𑀜𑁆𑀜𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀯𑁂𑀤𑀦𑀸𑀥𑀺𑀯𑀸𑀲𑀦…𑀧𑁂… 𑀳𑀼𑀢𑁆𑀯𑀸’’𑀢𑀺. 𑀅𑀧𑀻𑀴𑀺𑀬𑀫𑀸𑀦𑁄𑀢𑀺 𑀅𑀩𑀸𑀥𑀺𑀬𑀫𑀸𑀦𑁄. 𑀓𑀸𑀫𑀁 𑀅𑀦𑀺𑀝𑁆𑀞𑀸𑀬 𑀯𑁂𑀤𑀦𑀸𑀬 𑀨𑀼𑀝𑁆𑀞𑁄 𑀢𑀸𑀬 𑀅𑀧𑀻𑀴𑀺𑀬𑀫𑀸𑀦𑁄 𑀦𑀸𑀫 𑀦𑀢𑁆𑀣𑀺, 𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀢𑁆𑀢𑀸 𑀧𑀦 𑀢𑀲𑁆𑀲𑀸 𑀯𑀲𑁂 𑀅𑀯𑀢𑁆𑀢𑀫𑀸𑀦𑁄 ‘‘𑀅𑀯𑀺𑀳𑀜𑁆𑀜𑀫𑀸𑀦𑁄’’𑀢𑀺 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀲𑀫𑁆𑀧𑀭𑀺𑀯𑀢𑁆𑀢𑀲𑀸𑀬𑀺𑀢𑀸𑀬 𑀯𑁂𑀤𑀦𑀸𑀦𑀁 𑀯𑀲𑀁 𑀅𑀕𑀘𑁆𑀙𑀦𑁆𑀢𑁄’’𑀢𑀺.

𑀲𑀻𑀳𑀲𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀲𑀬𑀦𑀁 𑀲𑁂𑀬𑁆𑀬𑀸, 𑀲𑀻𑀳𑀲𑁆𑀲 𑀯𑀺𑀬 𑀲𑁂𑀬𑁆𑀬𑀸 𑀲𑀻𑀳𑀲𑁂𑀬𑁆𑀬𑀸, 𑀢𑀁 𑀲𑀻𑀳𑀲𑁂𑀬𑁆𑀬𑀁. 𑀅𑀣 𑀯𑀸 𑀲𑀻𑀳𑀲𑁂𑀬𑁆𑀬𑀦𑁆𑀢𑀺 𑀲𑁂𑀝𑁆𑀞𑀲𑁂𑀬𑁆𑀬𑀁 𑀉𑀢𑁆𑀢𑀫𑀲𑁂𑀬𑁆𑀬𑀁. 𑀲𑁆𑀯𑀸𑀬𑀫𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀫𑁂𑀯 𑀆𑀕𑀫𑀺𑀲𑁆𑀲𑀢𑀺. ‘‘𑀯𑀸𑀫𑁂𑀦 𑀧𑀲𑁆𑀲𑁂𑀦 𑀲𑁂𑀦𑁆𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑀸 𑀓𑀸𑀫𑀪𑁄𑀕𑀺𑀲𑁂𑀬𑁆𑀬𑀸. 𑀤𑀓𑁆𑀔𑀺𑀡𑀧𑀲𑁆𑀲𑁂𑀦 𑀲𑀬𑀸𑀦𑁄 𑀦𑀸𑀫 𑀦𑀢𑁆𑀣𑀺 𑀤𑀓𑁆𑀔𑀺𑀡𑀳𑀢𑁆𑀣𑀲𑁆𑀲 𑀲𑀭𑀻𑀭𑀕𑁆𑀕𑀳𑀡𑀸𑀤𑀺𑀬𑁄𑀕𑀓𑁆𑀔𑀫𑀢𑁄. 𑀧𑀼𑀭𑀺𑀲𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀏𑀓𑁂𑀦 𑀧𑀲𑁆𑀲𑁂𑀦 𑀲𑀬𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀢𑁄. 𑀅𑀬𑀁 𑀲𑀻𑀳𑀲𑁂𑀬𑁆𑀬𑀸𑀢𑀺 𑀅𑀬𑀁 𑀬𑀣𑀸𑀯𑀼𑀢𑁆𑀢𑀸 𑀲𑀻𑀳𑀲𑁂𑀬𑁆𑀬𑀸. 𑀢𑁂𑀚𑀼𑀲𑁆𑀲𑀤𑀢𑁆𑀢𑀸𑀢𑀺 𑀇𑀫𑀺𑀦𑀸 𑀲𑀻𑀳𑀲𑁆𑀲 𑀅𑀪𑀻𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀪𑀻𑀭𑀼𑀓𑀚𑀸𑀢𑀺𑀓𑀸 𑀳𑀺 𑀲𑁂𑀲𑀫𑀺𑀕𑀸 𑀅𑀢𑁆𑀢𑀦𑁄 𑀆𑀲𑀬𑀁 𑀧𑀯𑀺𑀲𑀺𑀢𑁆𑀯𑀸 𑀉𑀢𑁆𑀭𑀸𑀲𑀩𑀳𑀼𑀮𑀸 𑀲𑀦𑁆𑀢𑀸𑀲𑀧𑀼𑀩𑁆𑀩𑀓𑀁 𑀬𑀣𑀸 𑀢𑀣𑀸 𑀲𑀬𑀦𑁆𑀢𑀺, 𑀲𑀻𑀳𑁄 𑀧𑀦 𑀅𑀪𑀺𑀭𑀼𑀓𑀪𑀸𑀯𑀢𑁄 𑀲𑀢𑁄𑀓𑀸𑀭𑀻 𑀪𑀺𑀓𑁆𑀔𑀼 𑀯𑀺𑀬 𑀲𑀢𑀺𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀯 𑀲𑀬𑀢𑀺. 𑀢𑁂𑀦𑀸𑀳 ‘‘𑀤𑁆𑀯𑁂 𑀧𑀼𑀭𑀺𑀫𑀧𑀸𑀤𑁂’’𑀢𑀺𑀆𑀤𑀺. 𑀧𑀼𑀭𑀺𑀫𑀧𑀸𑀤𑁂𑀢𑀺 𑀤𑀓𑁆𑀔𑀺𑀡𑀧𑀼𑀭𑀺𑀫𑀧𑀸𑀤𑁂 𑀯𑀸𑀫𑀲𑁆𑀲 𑀧𑀼𑀭𑀺𑀫𑀧𑀸𑀤𑀲𑁆𑀲 𑀞𑀧𑀦𑀯𑀲𑁂𑀦 𑀤𑁆𑀯𑁂 𑀧𑀼𑀭𑀺𑀫𑀧𑀸𑀤𑁂 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀞𑀧𑁂𑀢𑁆𑀯𑀸. 𑀧𑀘𑁆𑀙𑀺𑀫𑀧𑀸𑀤𑁂𑀢𑀺 𑀤𑁆𑀯𑁂 𑀧𑀘𑁆𑀙𑀺𑀫𑀧𑀸𑀤𑁂. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀇𑀥𑀸𑀧𑀺 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀞𑀧𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀞𑀺𑀢𑁄𑀓𑀸𑀲𑀲𑀮𑁆𑀮𑀓𑁆𑀔𑀡𑀁 𑀅𑀪𑀻𑀭𑀼𑀓𑀪𑀸𑀯𑁂𑀦𑁂𑀯. 𑀲𑀻𑀲𑀁 𑀧𑀦 𑀉𑀓𑁆𑀔𑀺𑀧𑀺𑀢𑁆𑀯𑀸𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑀻𑀳𑀓𑀺𑀭𑀺𑀬𑀸 𑀅𑀦𑀼𑀢𑁆𑀭𑀸𑀲𑀧𑀩𑀼𑀚𑁆𑀛𑀦𑀁 𑀯𑀺𑀬 𑀅𑀪𑀻𑀭𑀼𑀓𑀪𑀸𑀯𑀲𑀺𑀤𑁆𑀥𑀸 𑀥𑀫𑁆𑀫𑀢𑀸𑀯𑀲𑁂𑀦𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀻𑀳𑀯𑀺𑀚𑀫𑁆𑀪𑀺𑀢𑀯𑀺𑀚𑀫𑁆𑀪𑀦𑀁 𑀅𑀢𑀺𑀯𑁂𑀮𑀁 𑀏𑀓𑀸𑀓𑀸𑀭𑁂𑀦 𑀞𑀧𑀺𑀢𑀸𑀦𑀁 𑀲𑀭𑀻𑀭𑀸𑀯𑀬𑀯𑀸𑀦𑀁 ¶ 𑀕𑀫𑀦𑀸𑀤𑀺𑀓𑀺𑀭𑀺𑀬𑀸𑀲𑀼 𑀬𑁄𑀕𑁆𑀕𑀪𑀸𑀯𑀸𑀧𑀸𑀤𑀦𑀢𑁆𑀣𑀁. 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀦𑀤𑀦𑀁 𑀅𑀧𑁆𑀧𑁂𑀲𑀓𑁆𑀔𑀫𑀺𑀕𑀚𑀸𑀢𑀧𑀭𑀺𑀳𑀭𑀡𑀢𑁆𑀣𑀁.

𑀲𑁂𑀢𑀺 ¶ 𑀅𑀩𑁆𑀬𑀸𑀯𑀝𑀪𑀸𑀯𑁂𑀦 𑀧𑀯𑀢𑁆𑀢𑀢𑀺 𑀏𑀢𑁆𑀣𑀸𑀢𑀺 𑀲𑁂𑀬𑁆𑀬𑀸, 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑁂𑀯 𑀲𑁂𑀬𑁆𑀬𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁂𑀬𑁆𑀬𑀸. 𑀓𑀺𑀁 𑀧𑀦𑁂𑀢𑁆𑀣 𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀦𑁆𑀢𑀺? 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀁. 𑀢𑀢𑁄 𑀳𑀺 𑀯𑀼𑀝𑁆𑀞𑀳𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀅𑀕𑁆𑀕𑀫𑀕𑁆𑀕𑀁 𑀅𑀥𑀺𑀕𑀦𑁆𑀢𑁆𑀯𑀸 𑀢𑀣𑀸𑀕𑀢𑁄 𑀚𑀸𑀢𑁄𑀢𑀺. ‘‘𑀢𑀬𑀺𑀤𑀁 𑀧𑀤𑀝𑁆𑀞𑀸𑀦𑀁 𑀦𑀸𑀫, 𑀦 𑀲𑁂𑀬𑁆𑀬𑀸, 𑀢𑀣𑀸𑀧𑀺 𑀬𑀲𑁆𑀫𑀸 ‘𑀘𑀢𑀼𑀢𑁆𑀣𑀚𑁆𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀲𑀫𑀦𑀦𑁆𑀢𑀭𑀁 𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻’𑀢𑀺 𑀫𑀳𑀸𑀧𑀭𑀺𑀦𑀺𑀩𑁆𑀩𑀸𑀦𑁂 (𑀤𑀻. 𑀦𑀺. 𑁨.𑁨𑁧𑁯) 𑀆𑀕𑀢𑀁. 𑀢𑀲𑁆𑀫𑀸 𑀮𑁄𑀓𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀢𑁆𑀢𑀺 𑀏𑀯 𑀢𑀣𑀸𑀕𑀢𑀲𑁂𑀬𑁆𑀬𑀸’’𑀢𑀺 𑀓𑁂𑀘𑀺. 𑀏𑀯𑀁 𑀲𑀢𑀺 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑀺𑀓𑀸𑀯 𑀢𑀣𑀸𑀕𑀢𑀲𑁂𑀬𑁆𑀬𑀸𑀢𑀺 𑀆𑀧𑀚𑁆𑀚𑀢𑀺; 𑀦 𑀘 𑀢𑀣𑀸𑀕𑀢𑁄 𑀮𑁄𑀓𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀚𑁆𑀚𑀦𑀩𑀳𑀼𑀮𑁄 𑀯𑀺𑀳𑀸𑀲𑀺. 𑀅𑀕𑁆𑀕𑀨𑀮𑀯𑀲𑁂𑀦 𑀧𑀯𑀢𑁆𑀢𑀁 𑀧𑀦𑁂𑀢𑁆𑀣 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀬𑀣𑀸 𑀲𑀢𑁆𑀢𑀸𑀦𑀁 𑀦𑀺𑀤𑁆𑀤𑀼𑀧𑀕𑀫𑀮𑀓𑁆𑀔𑀡𑀸 𑀲𑁂𑀬𑁆𑀬𑀸 𑀪𑀯𑀗𑁆𑀕𑀘𑀺𑀢𑁆𑀢𑀯𑀲𑁂𑀦 𑀳𑁄𑀢𑀺, 𑀲𑀸 𑀘 𑀦𑁂𑀲𑀁 𑀧𑀞𑀫𑀁 𑀚𑀸𑀢𑀺𑀲𑀫𑀦𑁆𑀯𑀬𑀸 𑀬𑁂𑀪𑀼𑀬𑁆𑀬𑀯𑀼𑀢𑁆𑀢𑀺𑀓𑀸, 𑀏𑀯𑀁 𑀪𑀕𑀯𑀢𑁄 𑀅𑀭𑀺𑀬𑀚𑀸𑀢𑀺𑀲𑀫𑀦𑁆𑀯𑀬𑀁 𑀬𑁂𑀪𑀼𑀬𑁆𑀬𑀯𑀼𑀢𑁆𑀢𑀺𑀓𑀁 𑀅𑀕𑁆𑀕𑀨𑀮𑀪𑀽𑀢𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀢𑀣𑀸𑀕𑀢𑀲𑁂𑀬𑁆𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀻𑀳𑀲𑁂𑀬𑁆𑀬𑀸 𑀦𑀸𑀫 𑀲𑁂𑀝𑁆𑀞𑀲𑁂𑀬𑁆𑀬𑀸𑀢𑀺 𑀆𑀳 ‘‘𑀉𑀢𑁆𑀢𑀫𑀲𑁂𑀬𑁆𑀬𑀸’’𑀢𑀺.

‘‘𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀬𑀣𑀸𑀧𑀭𑀺𑀘𑁆𑀙𑁂𑀤𑀁 𑀉𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀢𑀤𑀸 𑀫𑀦𑀲𑀺𑀓𑀸𑀭𑀲𑁆𑀲 𑀅𑀓𑀢𑀢𑁆𑀢𑀸 𑀧𑀸𑀴𑀺𑀬𑀁 ‘‘𑀉𑀝𑁆𑀞𑀸𑀦𑀲𑀜𑁆𑀜𑀁 𑀫𑀦𑀲𑀺𑀓𑀭𑀺𑀢𑁆𑀯𑀸’’𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀉𑀝𑁆𑀞𑀸𑀦𑀲𑀜𑁆𑀜𑀦𑁆𑀢𑀺 𑀧𑀦𑁂𑀢𑁆𑀣 𑀦 𑀯𑀼𑀢𑁆𑀢’’𑀦𑁆𑀢𑀺. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀕𑀺𑀮𑀸𑀦𑀲𑁂𑀬𑁆𑀬𑀸 𑀳𑁂𑀲𑀸’’𑀢𑀺. 𑀲𑀸 𑀳𑀺 𑀘𑀺𑀭𑀓𑀸𑀮𑀧𑁆𑀧𑀯𑀢𑁆𑀢𑀺𑀓𑀸 𑀳𑁄𑀢𑀺.

𑀯𑀺𑀲𑀼𑀁 𑀯𑀺𑀲𑀼𑀁 𑀭𑀸𑀲𑀺𑀯𑀲𑁂𑀦 𑀅𑀦𑀸𑀕𑀦𑁆𑀢𑁆𑀯𑀸 𑀏𑀓𑀚𑁆𑀛𑀁 𑀧𑀼𑀜𑁆𑀚𑀯𑀲𑁂𑀦 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀸𑀧𑀺 𑀢𑀸’’𑀢𑀺. 𑀢𑁂𑀦𑀸𑀳 ‘‘𑀲𑀢𑁆𑀢𑀲𑀢𑀸’’𑀢𑀺. 𑀯𑀺𑀓𑀸𑀭𑀫𑀢𑁆𑀢𑀫𑁆𑀧𑀻𑀢𑀺 𑀯𑁂𑀤𑀦𑀸𑀬 𑀅𑀲𑀳𑀦𑀯𑀲𑁂𑀦 𑀧𑀯𑀢𑁆𑀢𑀦𑀸𑀓𑀸𑀭𑀫𑀢𑁆𑀢𑀫𑁆𑀧𑀺. 𑀲𑀼𑀲𑀫𑁆𑀫𑀝𑁆𑀞𑀓𑀜𑁆𑀘𑀦𑀁 𑀯𑀺𑀬𑀸𑀢𑀺 𑀲𑀫𑁆𑀫𑀝𑁆𑀞𑀲𑀼𑀲𑀚𑁆𑀚𑀺𑀢𑀲𑀼𑀯𑀡𑁆𑀡𑀁 𑀯𑀺𑀬.

𑀥𑀫𑁆𑀫𑀸𑀮𑀧𑀦𑀦𑁆𑀢𑀺 𑀅𑀲𑀗𑁆𑀔𑀸𑀭𑀺𑀓𑀲𑀫𑀼𑀧𑁆𑀧𑀦𑁆𑀦𑀲𑀪𑀸𑀯𑀸𑀮𑀧𑀦𑀁. 𑀲𑀫𑀼𑀮𑁆𑀮𑀧𑀺𑀢𑀜𑁆𑀳𑀺 𑀆𑀓𑀸𑀭𑀲𑀫𑀸𑀦𑀯𑀘𑀦𑀫𑁂𑀢𑀁. 𑀦𑀸𑀕𑁄 𑀯𑀺𑀬 𑀯𑀸𑀢𑀺 𑀧𑀯𑀢𑁆𑀢𑀢𑀻𑀢𑀺 𑀦𑀸𑀕𑀯𑁄. 𑀢𑀲𑁆𑀲 𑀪𑀸𑀯𑁄 𑀦𑀸𑀕𑀯𑀢𑀸. 𑀯𑀺𑀪𑀢𑁆𑀢𑀺𑀮𑁄𑀧𑁂𑀦 𑀳𑁂𑀲 𑀦𑀺𑀤𑁆𑀤𑁂𑀲𑁄, 𑀫𑀳𑀸𑀦𑀸𑀕𑀳𑀢𑁆𑀣𑀺𑀲𑀤𑀺𑀲𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀩𑁆𑀬𑀢𑁆𑀢𑀼𑀧𑀭𑀺𑀘𑀭𑀡𑀝𑁆𑀞𑁂𑀦𑀸𑀢𑀺 𑀩𑁆𑀬𑀢𑁆𑀢𑀁 𑀉𑀧𑀭𑀽𑀧𑀭𑀺 𑀅𑀢𑁆𑀢𑀦𑁄 𑀓𑀺𑀭𑀺𑀬𑀸𑀘𑀭𑀡𑁂𑀦. 𑀆𑀚𑀸𑀦𑀻𑀬𑁄𑀢𑀺 𑀲𑀫𑁆𑀫𑀸𑀧𑀢𑀺𑀢𑀁 𑀤𑀼𑀓𑁆𑀔𑀁 𑀲𑀳𑀦𑁆𑀢𑁄 ¶ 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀓𑀺𑀭𑀺𑀬𑀁 𑀥𑀻𑀭𑁄 𑀳𑀼𑀢𑁆𑀯𑀸 𑀦𑀺𑀢𑁆𑀣𑀸𑀭𑀓𑁄. 𑀓𑀸𑀭𑀡𑀸𑀓𑀸𑀭𑀡𑀚𑀸𑀦𑀦𑁂𑀦𑀸𑀢𑀺 𑀦𑀺𑀬𑁆𑀬𑀸𑀦𑀺𑀓𑀸𑀦𑀺𑀬𑁆𑀬𑀸𑀦𑀺𑀓𑀓𑀭𑀡𑀜𑀸𑀢𑀢𑀸𑀬. 𑀢𑁂𑀦𑁂𑀯𑀝𑁆𑀞𑁂𑀦𑀸𑀢𑀺 𑀅𑀧𑁆𑀧𑀝𑀺𑀲𑀫𑀝𑁆𑀞𑁂𑀦𑁂𑀯. ‘‘𑀫𑀼𑀢𑁆𑀢𑁄 𑀫𑁄𑀘𑁂𑀬𑁆𑀬’’𑀦𑁆𑀢𑀺𑀆𑀤𑀺 𑀥𑀼𑀭𑀯𑀸𑀳𑀝𑁆𑀞𑁂𑀦. 𑀦𑀺𑀩𑁆𑀩𑀺𑀲𑁂𑀯𑀦𑀝𑁆𑀞𑁂𑀦𑀸𑀢𑀺 𑀭𑀸𑀕𑀸𑀤𑀺𑀯𑀺𑀲𑀯𑀺𑀕𑀢𑀪𑀸𑀯𑁂𑀦.

𑀅𑀦𑀺𑀬𑀫𑀺𑀢𑀸𑀡𑀢𑁆𑀢𑀻𑀢𑀺 𑀅𑀦𑀼𑀤𑁆𑀤𑁂𑀲𑀺𑀓𑀁 𑀆𑀡𑀸𑀧𑀦𑀁. 𑀲𑀸𑀫𑀜𑁆𑀜𑀓𑀢𑁄𑀧𑀺 𑀲𑀫𑀸𑀥𑀺𑀲𑀤𑁆𑀤𑁄 𑀧𑀓𑀭𑀡𑀢𑁄 𑀇𑀥 𑀯𑀺𑀲𑁂𑀲𑀢𑁆𑀣𑁄𑀢𑀺 𑀆𑀳 ‘‘𑀲𑀫𑀸𑀥𑀺𑀦𑁆𑀢𑀺 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺’’𑀦𑁆𑀢𑀺. 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀲𑀼𑀝𑁆𑀞𑀼 ¶ 𑀯𑀺𑀫𑀼𑀢𑁆𑀢𑀦𑁆𑀢𑀺 𑀲𑀼𑀯𑀺𑀫𑀼𑀢𑁆𑀢𑀁. 𑀅𑀪𑀺𑀦𑀢𑀁 𑀦𑀸𑀫 𑀆𑀭𑀫𑁆𑀫𑀡𑁂 𑀅𑀪𑀺𑀫𑀼𑀔𑀪𑀸𑀯𑁂𑀦 𑀧𑀯𑀢𑁆𑀢𑀺𑀬𑀸. 𑀅𑀧𑀦𑀢𑀁 𑀅𑀧𑀕𑀫𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸, 𑀯𑀺𑀫𑀼𑀔𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀮𑁄𑀓𑀺𑀬𑀚𑁆𑀛𑀸𑀦𑀘𑀺𑀢𑁆𑀢𑀁 𑀯𑀺𑀬 𑀯𑀺𑀧𑀲𑁆𑀲𑀦𑀸 𑀯𑀺𑀬 𑀘 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀢𑀤𑀗𑁆𑀕𑀧𑁆𑀧𑀳𑀸𑀦𑀯𑀺𑀓𑁆𑀔𑀫𑁆𑀪𑀦𑀧𑀳𑀸𑀦𑀯𑀲𑁂𑀦 𑀘 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀦 𑀅𑀥𑀺𑀕𑀢𑀁 𑀦 𑀞𑀧𑀺𑀢𑀁, 𑀓𑀺𑀜𑁆𑀘𑀭𑀳𑀺 𑀓𑀺𑀮𑁂𑀲𑀸𑀦𑀁 𑀲𑀩𑁆𑀩𑀲𑁄 𑀙𑀺𑀦𑁆𑀦𑀢𑀸𑀬𑀸𑀢𑀺 𑀆𑀳 ‘‘𑀙𑀺𑀦𑁆𑀦𑀢𑁆𑀢𑀸 𑀯𑀢𑀁 𑀨𑀮𑀲𑀫𑀸𑀥𑀺𑀦𑀸 𑀲𑀫𑀸𑀳𑀺𑀢’’𑀦𑁆𑀢𑀺. 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀆𑀘𑀸𑀭𑀸𑀢𑀺𑀓𑁆𑀓𑀫𑀯𑀲𑁂𑀦 𑀮𑀗𑁆𑀖𑀺𑀢𑀩𑁆𑀩𑀁. 𑀲𑀸 𑀧𑀦 𑀮𑀗𑁆𑀖𑀦𑀸 𑀆𑀲𑀸𑀤𑀦𑀸 𑀖𑀝𑁆𑀝𑀦𑀸𑀢𑀺 𑀆𑀳 ‘‘𑀖𑀝𑁆𑀝𑁂𑀢𑀩𑁆𑀩’’𑀦𑁆𑀢𑀺.

𑀧𑀜𑁆𑀘𑀯𑁂𑀤𑀸 𑀦𑀸𑀫 𑁋 𑀇𑀭𑀼𑀯𑁂𑀤𑁄, 𑀬𑀚𑀼𑀯𑁂𑀤𑁄, 𑀲𑀸𑀫𑀯𑁂𑀤𑁄, 𑀆𑀣𑀩𑁆𑀩𑀡𑀯𑁂𑀤𑁄, 𑀇𑀢𑀺𑀳𑀸𑀲𑁄 𑀘𑀸𑀢𑀺 𑀏𑀯𑀁 𑀇𑀢𑀺𑀳𑀸𑀲𑀧𑀜𑁆𑀘𑀫𑀸𑀦𑀁 𑀯𑁂𑀤𑀸𑀦𑀁. ‘‘𑀘𑀭’’𑀦𑁆𑀢𑀺 𑀯𑀘𑀦𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀘𑀭𑀦𑁆𑀢𑀸’’𑀢𑀺, 𑀢𑀧𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀳𑀻𑀦𑀢𑁆𑀢𑀭𑀽𑀧𑀸𑀢𑀺 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸𑀬 𑀦𑀺𑀳𑀻𑀦𑀘𑀺𑀢𑁆𑀢𑀲𑀪𑀸𑀯𑀸. 𑀯𑀺𑀫𑀼𑀢𑁆𑀢𑀺𑀓𑀢𑀸𑀬 𑀅𑀪𑀸𑀯𑀢𑁄 𑀦𑀺𑀩𑁆𑀩𑀸𑀦𑀗𑁆𑀕𑀫𑀸 𑀦 𑀳𑁄𑀦𑁆𑀢𑀺. 𑀅𑀭𑀳𑀢𑁆𑀢𑀸𑀥𑀺𑀕𑀫𑀓𑀫𑁆𑀫𑀲𑁆𑀲 𑀅𑀪𑀩𑁆𑀩𑀢𑀸𑀬 𑀧𑀭𑀺𑀳𑀻𑀦𑀢𑁆𑀣𑀸. 𑀅𑀚𑁆𑀛𑁄𑀢𑁆𑀣𑀝𑀸𑀢𑀺 𑀅𑀪𑀺𑀪𑀽𑀢𑀸. 𑀢𑀸𑀤𑀺𑀲𑁂𑀳𑁂𑀯 𑀲𑀻𑀮𑁂𑀳𑀻𑀢𑀺 𑀕𑁄𑀲𑀻𑀮𑀸𑀤𑀻𑀳𑀺. 𑀩𑀤𑁆𑀥𑀸𑀢𑀺 𑀲𑀫𑀸𑀤𑀧𑁂𑀢𑁆𑀯𑀸 𑀧𑀯𑀢𑁆𑀢𑀦𑀯𑀲𑁂𑀦 𑀅𑀦𑀼𑀩𑀤𑁆𑀥𑀸. 𑀮𑀽𑀔𑀁 𑀢𑀧𑀦𑁆𑀢𑀺 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀁. 𑀢𑀁 𑀧𑀦 𑀏𑀓𑀤𑁂𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀜𑁆𑀘𑀸𑀢𑀧𑀢𑀸𑀧𑀦’’𑀦𑁆𑀢𑀺𑀆𑀤𑀺𑀫𑀸𑀳. ‘‘𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀫𑁄𑀓𑁆𑀔𑁄 𑀦𑀢𑁆𑀣𑀺, 𑀏𑀯𑀁 𑀧𑀝𑀺𑀧𑀦𑁆𑀦𑀲𑁆𑀲 𑀯𑀝𑁆𑀝𑀢𑁄 𑀫𑀼𑀢𑁆𑀢𑀺 𑀅𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀻 𑀲𑀸 𑀅𑀢𑁆𑀢𑀢𑁄 𑀲𑀸𑀲𑀦𑀲𑁆𑀲 𑀦𑀺𑀬𑁆𑀬𑀸𑀦𑀪𑀸𑀯𑁄 𑀓𑀣𑀺𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀲𑀸𑀲𑀦𑀲𑁆𑀲 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀁 𑀓𑀣𑁂𑀦𑁆𑀢𑀻’’𑀢𑀺. 𑀆𑀤𑀺𑀦𑁆𑀢𑀺 𑀕𑀸𑀣𑀸𑀤𑁆𑀯𑀬𑀁.

𑀲𑀓𑀮𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀞𑀫𑀧𑀚𑁆𑀚𑀼𑀦𑁆𑀦𑀥𑀻𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀲𑁆𑀲𑀸𑀢𑀺 ¶ 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀓𑀸𑀬𑀺𑀓𑀲𑁆𑀲. 𑀥𑀫𑁆𑀫𑁄 𑀅𑀦𑀼𑀩𑀼𑀤𑁆𑀥𑁄𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁄 𑀧𑀭𑀺𑀜𑁆𑀜𑁂𑀬𑁆𑀬𑀸𑀤𑀺𑀪𑀸𑀯𑀲𑁆𑀲 𑀅𑀦𑀼𑀭𑀽𑀧𑀢𑁄 𑀩𑀼𑀤𑁆𑀥𑁄. 𑀧𑀘𑁆𑀘𑀓𑁆𑀔𑀫𑁂𑀯𑀸𑀢𑀺 𑀧𑀭𑀧𑀢𑁆𑀢𑀺𑀬𑀸 𑀅𑀳𑀼𑀢𑁆𑀯𑀸 𑀅𑀢𑁆𑀢𑀧𑀘𑁆𑀘𑀓𑁆𑀔𑀫𑁂𑀯 𑀓𑀢𑁆𑀯𑀸 𑀚𑀸𑀦𑀸𑀫𑀺. 𑀥𑀫𑁆𑀫𑀁 𑀕𑀭𑀳𑀦𑁆𑀢𑀸 𑀦𑀸𑀫 𑀲𑀤𑁆𑀤𑀤𑁄𑀲𑀯𑀲𑁂𑀦 𑀯𑀸 𑀅𑀢𑁆𑀣𑀤𑁄𑀲𑀯𑀲𑁂𑀦 𑀯𑀸 𑀕𑀭𑀳𑁂𑀬𑁆𑀬𑀼𑀦𑁆𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀳𑀻𑀦𑀓𑁆𑀔𑀭…𑀧𑁂… 𑀓𑁄𑀢𑀺𑀯𑀸’’𑀢𑀺 𑀆𑀳. 𑀲𑀸 𑀧𑀦 ‘‘𑀢𑁂𑀲𑀁 𑀯𑀺𑀕𑀭𑀳𑀸 𑀤𑀼𑀫𑁆𑀫𑁂𑀥𑀢𑀸𑀬 𑀫𑀳𑀸𑀦𑀢𑁆𑀣𑀸𑀯𑀳𑀸𑀯𑀸’’𑀢𑀺 𑀤𑀲𑁆𑀲𑁂𑀦𑁆𑀢𑀻 𑀤𑁂𑀯𑀢𑀸 𑀆𑀳 ‘‘𑀤𑀼𑀫𑁆𑀫𑁂𑀥𑀸 𑀉𑀧𑁂𑀦𑁆𑀢𑀺 𑀭𑁄𑀭𑀼𑀯’’𑀦𑁆𑀢𑀺. 𑀯𑀺𑀲𑀼𑀁 𑀳𑁄𑀢𑀻𑀢𑀺 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀢𑁄 𑀯𑀺𑀲𑀼𑀁 𑀏𑀯 𑀳𑁄𑀢𑀺. 𑀔𑀦𑁆𑀢𑀺𑀬𑀸𑀢𑀺 𑀜𑀸𑀡𑀔𑀦𑁆𑀢𑀺𑀬𑀸. 𑀉𑀧𑀲𑀫𑁂𑀦𑀸𑀢𑀺 𑀭𑀸𑀕𑀸𑀤𑀻𑀦𑀁 𑀲𑀩𑁆𑀩𑀲𑁄 𑀯𑀽𑀧𑀲𑀫𑁂𑀦. 𑀢𑁂𑀦𑀸𑀳 ‘‘𑀭𑀼𑀘𑁆𑀘𑀺𑀢𑁆𑀯𑀸’’𑀢𑀺𑀆𑀤𑀺.

𑀧𑀞𑀫𑀧𑀚𑁆𑀚𑀼𑀦𑁆𑀦𑀥𑀻𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀼𑀢𑀺𑀬𑀧𑀚𑁆𑀚𑀼𑀦𑁆𑀦𑀥𑀻𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁦. 𑀩𑀼𑀤𑁆𑀥𑀜𑁆𑀘 ¶ 𑀥𑀫𑁆𑀫𑀜𑁆𑀘 𑀦𑀫𑀲𑁆𑀲𑀫𑀸𑀦𑀸𑀢𑀺 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀁 𑀥𑀫𑁆𑀫𑀲𑀼𑀥𑀫𑁆𑀫𑀢𑀜𑁆𑀘 𑀜𑀢𑁆𑀯𑀸 𑀢𑀤𑀼𑀪𑀬𑀁 𑀦𑀫𑀲𑁆𑀲𑀫𑀸𑀦𑀸. 𑀬𑀲𑁆𑀫𑀸 𑀩𑀼𑀤𑁆𑀥𑁂 𑀘 𑀥𑀫𑁆𑀫𑁂 𑀘 𑀧𑀲𑀦𑁆𑀦𑁄 𑀲𑀗𑁆𑀖𑁂 𑀘 𑀧𑀲𑀦𑁆𑀦𑁄 𑀏𑀯 𑀳𑁄𑀢𑀺 𑀢𑀲𑁆𑀲 𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀯𑀺𑀚𑀸𑀦𑀦𑀢𑁄, 𑀢𑀲𑁆𑀫𑀸 𑀲𑁄 𑀅𑀢𑁆𑀣𑁄 𑀕𑀸𑀣𑀸𑀬 𑀘-𑀲𑀤𑁆𑀤𑀲𑀗𑁆𑀕𑀳𑀺𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀘-𑀲𑀤𑁆𑀤𑁂𑀦 𑀲𑀗𑁆𑀖𑀜𑁆𑀘𑀸’’𑀢𑀺 𑀆𑀳 𑀅𑀢𑁆𑀣𑀯𑀢𑀺𑀬𑁄𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀅𑀢𑁆𑀣𑀲𑀗𑁆𑀕𑀳𑀺𑀢𑀸 𑀮𑁄𑀓𑀺𑀬𑀓𑀼𑀲𑀮𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑀗𑁆𑀕𑀡𑁆𑀳𑀦𑀢𑁄. 𑀬𑀁 𑀥𑀫𑁆𑀫𑀁 𑀲𑀸 𑀅𑀪𑀸𑀲𑀻𑀢𑀺 𑀬𑀁 𑀢𑀼𑀫𑁆𑀳𑀸𑀓𑀁 𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑀸, 𑀲𑀸 𑀫𑀳𑀸𑀓𑁄𑀓𑀦𑀤𑀸 𑀅𑀢𑁆𑀢𑀦𑁄 𑀩𑀮𑀸𑀦𑀼𑀭𑀽𑀧𑀁 𑀅𑀪𑀸𑀲𑀺. 𑀩𑀳𑀼𑀦𑀸𑀢𑀺 𑀦𑀸𑀦𑀧𑁆𑀧𑀓𑀸𑀭𑁂𑀦. 𑀧𑀭𑀺𑀬𑀸𑀬𑁂𑀦𑀸𑀢𑀺 𑀓𑀸𑀭𑀡𑁂𑀦. 𑀢𑀸𑀤𑀺𑀲𑁄𑀢𑀺 𑀢𑀣𑀸𑀭𑀽𑀧𑁄 𑀢𑀣𑀸𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑁄 𑀅𑀢𑁆𑀣𑀥𑀫𑁆𑀫𑀸𑀤𑀻𑀲𑀼 𑀓𑀼𑀲𑀮𑁄 𑀏𑀓𑁂𑀓𑀁 𑀧𑀤𑀫𑁆𑀧𑀺 𑀉𑀤𑀸𑀳𑀭𑀡𑀳𑁂𑀢𑀼𑀦𑀺𑀕𑀫𑀦𑀸𑀦𑀺 𑀦𑀻𑀳𑀭𑀦𑁆𑀢𑁄 𑀆𑀘𑀺𑀓𑁆𑀔𑀢𑀺 𑀤𑁂𑀲𑁂𑀢𑀺 𑀧𑀜𑁆𑀜𑀧𑁂𑀢𑀺 𑀧𑀞𑀧𑁂𑀢𑀺 𑀯𑀺𑀯𑀭𑀢𑀺 𑀯𑀺𑀪𑀚𑀢𑀺 𑀉𑀢𑁆𑀢𑀸𑀦𑀻𑀓𑀭𑁄𑀢𑀺. 𑀢𑁂𑀦𑀸𑀳 ‘‘𑀅𑀬𑀁 𑀪𑀕𑀯𑀸’’𑀢𑀺𑀆𑀤𑀺. 𑀏𑀢𑁂𑀦 𑀅𑀢𑀺𑀯𑀺𑀬 𑀯𑀺𑀢𑁆𑀣𑀸𑀭𑀓𑁆𑀔𑀫𑁄 𑀲𑀼𑀕𑀢𑀥𑀫𑁆𑀫𑁄𑀢𑀺 𑀤𑀲𑁆𑀲𑁂𑀢𑀺. 𑀧𑀭𑀺𑀬𑀸𑀧𑀼𑀝𑀦𑁆𑀢𑀺 𑀧𑀭𑀺𑀯𑀢𑁆𑀢𑀺𑀢𑀁. 𑀏𑀯𑀁 𑀯𑀺𑀢𑁆𑀣𑀸𑀭𑀓𑁆𑀔𑀫𑀁 ¶ 𑀥𑀫𑁆𑀫𑀁 𑀬𑀲𑁆𑀫𑀸 𑀤𑁂𑀯𑀥𑀻𑀢𑀸 ‘‘𑀲𑀁𑀔𑀺𑀢𑁆𑀢𑀫𑀢𑁆𑀣𑀁 𑀮𑀧𑀬𑀺𑀲𑁆𑀲𑀸𑀫𑀻’’𑀢𑀺 𑀅𑀯𑁄𑀘, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀢𑀲𑁆𑀲𑀢𑁆𑀣’’𑀦𑁆𑀢𑀺𑀆𑀤𑀺.

𑀤𑀼𑀢𑀺𑀬𑀧𑀚𑁆𑀚𑀼𑀦𑁆𑀦𑀥𑀻𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀢𑀼𑀮𑁆𑀮𑀧𑀓𑀸𑀬𑀺𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀆𑀤𑀺𑀢𑁆𑀢𑀯𑀕𑁆𑀕𑁄

𑁧. 𑀆𑀤𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧. 𑀲𑀻𑀲𑀦𑁆𑀢𑀺 𑀤𑁂𑀲𑀦𑀸𑀧𑀤𑁂𑀲𑁄, 𑀤𑁂𑀲𑀦𑀸𑀬 𑀅𑀜𑁆𑀜𑁂𑀲𑀼𑀧𑀺 𑀯𑀢𑁆𑀢𑀩𑁆𑀩𑁂𑀲𑀼 𑀓𑀲𑁆𑀲𑀘𑀺𑀤𑁂𑀯 𑀲𑀻𑀲𑀪𑀸𑀕𑁂𑀦 𑀅𑀧𑀤𑀺𑀲𑀦𑀁. 𑀢𑁂𑀦𑀸𑀳 ‘‘𑀭𑀸𑀕𑀸𑀤𑀻𑀳𑀻’’𑀢𑀺𑀆𑀤𑀺. 𑀤𑀸𑀦𑁂𑀦𑀸𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀲𑁆𑀲 𑀧𑀭𑁂𑀲𑀁 𑀧𑀭𑀺𑀘𑁆𑀘𑀚𑀦𑁂𑀦. 𑀢𑀁 𑀧𑀦 𑀧𑀭𑀺𑀘𑁆𑀘𑀚𑀦𑀁 𑀘𑁂𑀢𑀦𑀸𑀬 𑀳𑁄𑀢𑀻𑀢𑀺 𑀆𑀳 ‘‘𑀤𑀸𑀦𑀘𑁂𑀢𑀦𑀸𑀬𑀸’’𑀢𑀺 𑀤𑀸𑀦𑀧𑀼𑀜𑁆𑀜𑀘𑁂𑀢𑀦𑀸𑀢𑀺 𑀤𑀸𑀦𑀫𑀬𑀸 𑀧𑀼𑀜𑁆𑀜𑀘𑁂𑀢𑀦𑀸 𑀤𑀸𑀬𑀓𑀲𑁆𑀲𑁂𑀯 𑀳𑁄𑀢𑀺 𑀢𑀁𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸. 𑀦𑀻𑀳𑀢𑀪𑀡𑁆𑀟𑀓𑀦𑁆𑀢𑀺 𑀆𑀤𑀺𑀢𑁆𑀢𑀕𑁂𑀳𑀢𑁄 𑀩𑀳𑀺 𑀦𑀺𑀓𑁆𑀔𑀸𑀫𑀺𑀢𑀁 𑀪𑀡𑁆𑀟𑀓𑀁. 𑀏𑀢𑀦𑁆𑀢𑀺 ‘‘𑀤𑀺𑀦𑁆𑀦𑀁 𑀳𑁄𑀢𑀻’’𑀢𑀺𑀆𑀤𑀺𑀯𑀘𑀦𑀁. 𑀅𑀤𑀺𑀦𑁆𑀦𑁂𑀢𑀺 𑀤𑀸𑀦𑀫𑀼𑀔𑁂 𑀅𑀦𑀺𑀬𑀼𑀜𑁆𑀚𑀺𑀢𑁂 𑀪𑁄𑀕𑁂. ‘‘𑀅𑀦𑁆𑀢𑁂𑀦𑀸’’𑀢𑀺 𑀚𑀻𑀯𑀺𑀢𑀲𑁆𑀲 𑀅𑀦𑁆𑀢𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀫𑀭𑀡𑁂𑀦𑀸’’𑀢𑀺. 𑀫𑀫𑀸𑀢𑀺 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀧𑀭𑀺𑀕𑁆𑀕𑀳𑀸, 𑀪𑁄𑀕𑀸. 𑀢𑁂𑀧𑀺 𑀓𑁂𑀦𑀘𑀺 𑀆𑀓𑀸𑀭𑁂𑀦 𑀯𑀺𑀦𑀸𑀲𑀁 𑀅𑀦𑀼𑀧𑀕𑀢𑀸 𑀫𑀭𑀡𑁂𑀦 𑀧𑀳𑀻𑀬𑀦𑁆𑀢𑀺 ¶ 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁 ‘‘𑀘𑁄𑀭𑀸𑀤𑀻𑀦𑀁 𑀯𑀲𑁂𑀦 𑀅𑀯𑀺𑀦𑀝𑁆𑀞𑀪𑁄𑀕𑁂’’𑀢𑀺. 𑀲𑁄𑀪𑀦𑀸 𑀅𑀕𑁆𑀕𑀪𑀽𑀢𑀸 𑀭𑀽𑀧𑀸𑀤𑀬𑁄 𑀏𑀢𑁆𑀣𑀸𑀢𑀺 𑀲𑀕𑁆𑀕𑁄, 𑀢𑀁 𑀲𑀕𑁆𑀕𑀁.

𑀆𑀤𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀓𑀺𑀁𑀤𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁨. 𑀤𑁆𑀯𑁂 𑀢𑀻𑀡𑀺 𑀪𑀢𑁆𑀢𑀸𑀦𑀺 𑀅𑀪𑀼𑀢𑁆𑀯𑀸𑀢𑀺 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀪𑀢𑁆𑀢𑀸𑀦𑀺 𑀅𑀪𑀼𑀜𑁆𑀚𑀺𑀢𑁆𑀯𑀸. 𑀉𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀉𑀝𑁆𑀞𑀸𑀢𑀼𑀫𑁆𑀧𑀺 𑀦 𑀲𑀓𑁆𑀓𑁄𑀢𑀻, 𑀧𑀕𑁂𑀯 𑀅𑀜𑁆𑀜𑀁 𑀲𑀭𑀻𑀭𑁂𑀦 𑀓𑀸𑀢𑀩𑁆𑀩𑀓𑀺𑀘𑁆𑀘𑀁 𑀤𑀼𑀩𑁆𑀩𑀮𑀪𑀸𑀯𑀢𑁄. 𑀤𑀼𑀩𑁆𑀩𑀮𑁄𑀧𑀺 𑀳𑀼𑀢𑁆𑀯𑀸𑀢𑀺 𑀪𑀼𑀜𑁆𑀚𑀦𑀢𑁄 𑀧𑀼𑀩𑁆𑀩𑁂 𑀤𑀼𑀩𑁆𑀩𑀮𑁄 𑀳𑀼𑀢𑁆𑀯𑀸 𑀩𑀮𑀲𑀫𑁆𑀧𑀦𑁆𑀦𑁄 𑀳𑁄𑀢𑀺. 𑀏𑀯𑀁 𑀩𑁆𑀬𑀢𑀺𑀭𑁂𑀓𑀢𑁄 𑀅𑀦𑁆𑀯𑀬𑀢𑁄 𑀘 𑀆𑀳𑀸𑀭𑀲𑁆𑀲 𑀲𑀭𑀻𑀭𑁂 𑀩𑀮𑀯𑀢𑀁 𑀆𑀳. 𑀬𑀲𑁆𑀫𑀸 𑀅𑀦𑁆𑀦𑀤𑁄 ¶ 𑀤𑀸𑀬𑀓𑁄 𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀩𑀮𑀤𑁄 𑀳𑁄𑀢𑀺, 𑀢𑀲𑁆𑀫𑀸 𑀲𑁄 𑀆𑀬𑀢𑀺𑀁 𑀅𑀢𑁆𑀢𑀦𑁄 𑀲𑀭𑀻𑀭𑁂 𑀩𑀮𑀤𑁄 𑀅𑀯𑀺𑀦𑀸𑀲𑀯𑀲𑁂𑀦 𑀩𑀮𑀲𑁆𑀲 𑀭𑀓𑁆𑀔𑀓𑁄 𑀘 𑀳𑁄𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀩𑀮𑀁 𑀔𑁄 𑀧𑀦 𑀤𑀢𑁆𑀯𑀸 𑀩𑀮𑀲𑁆𑀲 𑀪𑀸𑀕𑀻 𑀳𑁄𑀢𑀻’’𑀢𑀺 (𑀅. 𑀦𑀺. 𑁫.𑁩𑁭) 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀼𑀭𑀽𑀧𑁄𑀧𑀻𑀢𑀺 𑀅𑀪𑀺𑀭𑀽𑀧𑁄𑀧𑀺. 𑀯𑀺𑀭𑀽𑀧𑁄 𑀳𑁄𑀢𑀻𑀢𑀺 𑀩𑀻𑀪𑀘𑁆𑀙𑀭𑀽𑀧𑁄 𑀓𑁄𑀧𑀻𑀦𑀲𑁆𑀲 𑀅𑀘𑁆𑀙𑀦𑁆𑀦𑀢𑁆𑀢𑀸. 𑀇𑀤𑀜𑁆𑀘 𑀬𑀸𑀦𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁. 𑀉𑀧𑀸𑀳𑀦𑀸𑀢𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺. 𑀅𑀤𑀼𑀓𑁆𑀔𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀬𑀸𑀢𑀺 𑀯𑀢𑁆𑀢𑀢𑀺 𑀏𑀢𑁂𑀦𑀸𑀢𑀺 𑀬𑀸𑀦𑀦𑁆𑀢𑀺 𑀙𑀢𑁆𑀢𑀸𑀤𑀻𑀦𑀫𑁆𑀧𑀺 𑀬𑀸𑀦𑀪𑀸𑀯𑁄 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀬𑀸𑀦𑀤𑁄 𑀲𑀼𑀔𑀤𑁄 𑀳𑁄𑀢𑀻’’𑀢𑀺. 𑀘𑀓𑁆𑀔𑀼𑀤𑁄 𑀦𑀸𑀫 𑀳𑁄𑀢𑀺 𑀘𑀓𑁆𑀔𑀼𑀦𑀸 𑀓𑀸𑀢𑀩𑁆𑀩𑀓𑀺𑀘𑁆𑀘𑁂 𑀲𑀳𑀓𑀸𑀭𑀻𑀓𑀸𑀭𑀡𑀪𑀸𑀯𑀢𑁄 𑀤𑀻𑀧𑀲𑁆𑀲.

‘‘𑀲𑀩𑁆𑀩𑁂𑀲𑀁𑀬𑁂𑀯 𑀩𑀮𑀸𑀤𑀻𑀦𑀁 𑀤𑀸𑀬𑀓𑁄 𑀳𑁄𑀢𑀻’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀁 𑀅𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀤𑁆𑀯𑁂 𑀢𑀬𑁄 𑀕𑀸𑀫𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀺𑀲𑀚𑁆𑀚𑀸𑀤𑀺𑀯𑀲𑁂𑀦 𑀧𑀢𑀺𑀲𑁆𑀲𑀬𑀺𑀢𑀩𑁆𑀩𑀢𑁄 𑀧𑀢𑀺𑀲𑁆𑀲𑀬𑁄, 𑀯𑀺𑀳𑀸𑀭𑁄. 𑀧𑀓𑁆𑀔𑀺𑀢𑁆𑀢𑀁 𑀯𑀺𑀬 𑀳𑁄𑀢𑀺 𑀧𑀭𑀺𑀲𑁆𑀲𑀫𑀲𑁆𑀲 𑀯𑀺𑀦𑁄𑀤𑀺𑀢𑀢𑁆𑀢𑀸. 𑀩𑀳𑀺 𑀯𑀺𑀘𑀭𑀦𑁆𑀢𑀲𑁆𑀲𑀸𑀢𑀺 𑀧𑀢𑀺𑀲𑁆𑀲𑀬𑀁 𑀅𑀮𑀪𑀺𑀢𑁆𑀯𑀸 𑀩𑀳𑀺 𑀯𑀺𑀯𑀝𑀗𑁆𑀕𑀡𑁂 𑀯𑀺𑀘𑀭𑀦𑁆𑀢𑀲𑁆𑀲. 𑀛𑀸𑀬𑀢𑀻𑀢𑀺 𑀛𑀸𑀬𑀦𑁆𑀢𑀁 𑀳𑁄𑀢𑀺, 𑀓𑀺𑀮𑀫𑀢𑀻𑀢𑀺 𑀅𑀢𑁆𑀣𑁄. 𑀲𑀻𑀢𑀼𑀡𑁆𑀳𑀸𑀤𑀺𑀯𑀺𑀭𑁄𑀥𑀺𑀧𑀘𑁆𑀘𑀬𑀯𑀲𑁂𑀦 𑀲𑀲𑀦𑁆𑀢𑀸𑀦𑁂 𑀯𑀺𑀲𑀪𑀸𑀕𑀲𑀦𑁆𑀢𑀢𑀺, 𑀢𑀩𑁆𑀩𑀺𑀧𑀭𑀺𑀬𑀸𑀬𑀢𑁄 𑀲𑀪𑀸𑀕𑀲𑀦𑁆𑀢𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀔𑀁 𑀦𑀸𑀫 𑀤𑀼𑀓𑁆𑀔𑀧𑀘𑁆𑀘𑀬𑀧𑀭𑀺𑀳𑀸𑀭𑀢𑁄 𑀲𑀼𑀔𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁄 𑀘 𑀳𑁄𑀢𑀺, 𑀢𑀤𑀼𑀪𑀬𑀁 𑀧𑀢𑀺𑀲𑁆𑀲𑀬𑀯𑀲𑁂𑀦 𑀮𑀪𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀩𑀳𑀺 𑀯𑀺𑀘𑀭𑀦𑁆𑀢𑀲𑁆𑀲 𑀧𑀸𑀤𑁂’’𑀢𑀺𑀆𑀤𑀺𑀫𑀸𑀳. 𑀥𑀫𑁆𑀫𑀧𑀻𑀢𑀺𑀲𑀼𑀔𑀦𑁆𑀢𑀺 𑀥𑀫𑁆𑀫𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀉𑀧𑁆𑀧𑀦𑁆𑀦𑀧𑀻𑀢𑀺𑀲𑀼𑀔𑀁. 𑀉𑀧𑀲𑀫𑀲𑀼𑀔𑀦𑁆𑀢𑀺 𑀓𑀺𑀮𑁂𑀲𑀸𑀦𑀁 𑀯𑀽𑀧𑀲𑀫𑁂𑀦 𑀧𑀯𑀢𑁆𑀢𑀲𑀼𑀔𑀁. 𑀦𑀺𑀯𑀸𑀢𑀁 𑀧𑀺𑀳𑀺𑀢𑀯𑀸𑀢𑀧𑀸𑀦𑀁 𑀧𑀢𑀺𑀲𑁆𑀲𑀬𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀞𑀺𑀢𑀲𑁆𑀲 𑀅𑀦𑁆𑀥𑀓𑀸𑀭𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀓𑀽𑀧𑁂 𑀑𑀢𑀺𑀡𑁆𑀡𑁄 𑀯𑀺𑀬 𑀳𑁄𑀢𑀻’’𑀢𑀺. 𑀢𑁂𑀦𑀸𑀳 ‘‘𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀦 𑀧𑀜𑁆𑀜𑀸𑀬𑀦𑁆𑀢𑀻’’𑀢𑀺. 𑀢𑀬𑀺𑀤𑀁 𑀩𑀳𑀺𑀲𑀫𑀸𑀧𑀦𑁆𑀦𑀧𑀭𑀺𑀲𑁆𑀲𑀫𑀤𑁄𑀲𑁂𑀦, 𑀦 𑀘 𑀧𑀢𑀺𑀲𑁆𑀲𑀬𑀤𑁄𑀲𑁂𑀦. 𑀢𑁂𑀦𑀸𑀳 ‘‘𑀫𑀼𑀳𑀼𑀢𑁆𑀢’’𑀦𑁆𑀢𑀺𑀆𑀤𑀺.

𑀦 ¶ 𑀫𑀭𑀢𑀺 𑀏𑀢𑁂𑀦𑀸𑀢𑀺 𑀅𑀫𑀭𑀡𑀁, 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀸𑀤𑀬𑁄. 𑀢𑀲𑁆𑀲 𑀤𑀸𑀦𑀁 𑀥𑀫𑁆𑀫𑀽𑀧𑀤𑁂𑀲𑁄, 𑀢𑀁 𑀤𑁂𑀢𑀺. 𑀢𑁂𑀦𑀸𑀳 ‘‘𑀬𑁄 𑀥𑀫𑁆𑀫𑀁 𑀅𑀦𑀼𑀲𑀸𑀲𑀢𑀻’’𑀢𑀺. 𑀢𑀬𑀺𑀤𑀁 𑀥𑀫𑁆𑀫𑀸𑀦𑀼𑀲𑀸𑀲𑀦𑀁 𑀓𑀣𑀁 𑀳𑁄𑀢𑀻𑀢𑀺 𑀆𑀳 ‘‘𑀅𑀝𑁆𑀞𑀓𑀣’’𑀦𑁆𑀢𑀺𑀆𑀤𑀺. 𑀅𑀝𑁆𑀞𑀓𑀣𑀁 𑀓𑀣𑁂𑀢𑀻𑀢𑀺 𑀅𑀯𑀺𑀯𑀝𑀧𑀸𑀞𑀲𑁆𑀲 𑀧𑀸𑀴𑀺𑀬𑀸 𑀅𑀢𑁆𑀣𑀲𑀁𑀯𑀡𑁆𑀡𑀦𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀥𑀻𑀢𑀺𑀦𑁄 𑀧𑀦 𑀧𑀸𑀴𑀺𑀁 𑀯𑀸𑀘𑁂𑀢𑀺. 𑀢𑀢𑁆𑀣 𑀢𑀢𑁆𑀣 𑀕𑀢𑀝𑁆𑀞𑀸𑀦𑁂 𑀧𑀼𑀘𑁆𑀙𑀺𑀢𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀅𑀬𑀁 𑀢𑀸𑀯 𑀕𑀦𑁆𑀣𑀥𑀼𑀭𑁄, 𑀧𑀝𑀺𑀧𑀢𑁆𑀢𑀺𑀯𑀸𑀲𑀥𑀼𑀭𑁂 𑀧𑀦 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀢𑀺, 𑀉𑀪𑀬𑁂𑀲𑀫𑁆𑀧𑀺 ¶ 𑀥𑀫𑁆𑀫𑀲𑁆𑀲𑀯𑀦𑀁 𑀓𑀭𑁄𑀢𑀺. 𑀲𑀩𑁆𑀩𑀤𑀸𑀦𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀆𑀫𑀺𑀲𑀤𑀸𑀦𑀁 𑀅𑀪𑀬𑀤𑀸𑀦𑀁. 𑀥𑀫𑁆𑀫𑀤𑀸𑀦𑀦𑁆𑀢𑀺 𑀥𑀫𑁆𑀫𑀤𑁂𑀲𑀦𑀸. 𑀥𑀫𑁆𑀫𑀭𑀢𑀻𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂 𑀅𑀪𑀺𑀭𑀢𑀺. 𑀥𑀫𑁆𑀫𑀭𑀲𑁄𑀢𑀺 𑀲𑀤𑁆𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀬𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁.

𑀓𑀺𑀁𑀤𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁩. 𑀧𑀢𑁆𑀣𑁂𑀦𑁆𑀢𑀻𑀢𑀺 𑀧𑀺𑀳𑁂𑀦𑁆𑀢𑀺. 𑀬𑀢𑁆𑀣𑀲𑁆𑀲 𑀉𑀧𑀕𑀫𑀦𑀁 𑀮𑁄𑀓𑁂 𑀧𑀸𑀓𑀝𑀢𑀭𑀁 𑀅𑀳𑁄𑀲𑀺, 𑀢𑁂 𑀉𑀤𑀸𑀳𑀭𑀡𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀺𑀢𑁆𑀢𑀕𑀳𑀧𑀢𑀺𑀲𑀻𑀯𑀮𑀺𑀢𑁆𑀣𑁂𑀭𑀸𑀤𑀺𑀓𑁂 𑀯𑀺𑀬𑀸’’𑀢𑀺 𑀆𑀳. 𑀅𑀦𑁆𑀦𑀦𑁆𑀢𑀺 𑀅𑀦𑁆𑀦𑀲𑀜𑁆𑀜𑀺𑀢𑁄 𑀘𑀢𑀼𑀩𑁆𑀩𑀺𑀥𑁄𑀧𑀺 𑀧𑀘𑁆𑀘𑀬𑁄. 𑀲𑀩𑁆𑀩𑁂𑀧𑀺 𑀤𑀸𑀬𑀓𑁂 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀲𑀸𑀫𑀜𑁆𑀜𑀢𑁄 𑀏𑀓𑀯𑀲𑁂𑀦 ‘‘𑀤𑀸𑀬𑀓𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁, 𑀬𑀣𑀸 𑀘𑀸𑀳 ‘‘𑀓𑁄 𑀦𑀸𑀫 𑀲𑁄 𑀬𑀓𑁆𑀔𑁄, 𑀬𑀁 𑀅𑀦𑁆𑀦𑀁 𑀦𑀸𑀪𑀺𑀦𑀦𑁆𑀤𑀢𑀻’’𑀢𑀺? 𑀢𑀢𑁆𑀣 𑀬𑀓𑁆𑀔𑁄𑀢𑀺 𑀲𑀢𑁆𑀢𑁄. 𑀲𑀸𑀫𑀜𑁆𑀜𑀚𑁄𑀢𑀦𑀸 𑀘 𑀦𑀸𑀫 𑀬𑀲𑁆𑀫𑀸 𑀧𑀼𑀣𑀼𑀅𑀢𑁆𑀣𑀯𑀺𑀲𑀬𑀸, 𑀢𑀲𑁆𑀫𑀸 ‘‘𑀬𑁂 𑀦𑀁 𑀤𑀤𑀦𑁆𑀢𑀺 𑀲𑀤𑁆𑀥𑀸𑀬, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸. 𑀢𑀫𑁂𑀯 𑀅𑀦𑁆𑀦𑀁 𑀪𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀢𑁂 𑀏𑀯𑀸𑀢𑀺 𑀅𑀢𑁆𑀣𑁄. 𑀤𑀸𑀬𑀓𑀁 𑀅𑀧𑀭𑀺𑀘𑁆𑀘𑀚𑀦𑀫𑁂𑀯 𑀅𑀦𑀼𑀕𑀘𑁆𑀙𑀢𑀺 𑀘𑀓𑁆𑀓𑀁 𑀯𑀺𑀬 𑀓𑀼𑀩𑁆𑀩𑀭𑀁.

𑀅𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀏𑀓𑀫𑀽𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪. 𑀧𑀢𑀺𑀝𑁆𑀞𑀝𑁆𑀞𑁂𑀦 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀁 𑀏𑀓𑀁 𑀫𑀽𑀮𑀁 𑀏𑀢𑀺𑀲𑁆𑀲𑀸𑀢𑀺 𑀏𑀓𑀫𑀽𑀮𑀸. 𑀢𑀁 𑀏𑀓𑀫𑀽𑀮𑀁. 𑀬𑀣𑀸 𑀲𑀁𑀬𑁄𑀚𑀦𑀻𑀬𑁂𑀲𑀼 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀢𑀡𑁆𑀳𑀸𑀲𑀫𑀼𑀧𑁆𑀧𑀸𑀤𑁄, 𑀏𑀯𑀁 𑀢𑀡𑁆𑀳𑀸𑀪𑀺𑀪𑀯𑀯𑀲𑁂𑀦 𑀅𑀦𑀯𑀩𑁄𑀥𑁄𑀢𑀺 𑀅𑀯𑀺𑀚𑁆𑀚𑀸 𑀢𑀡𑁆𑀳𑀸𑀬 𑀫𑀽𑀮𑀁, 𑀢𑀡𑁆𑀳𑀸 𑀘 𑀅𑀯𑀺𑀚𑁆𑀚𑀸𑀬 𑀫𑀽𑀮𑀁. 𑀅𑀬𑀜𑁆𑀳𑀺 𑀦𑀬𑁄 𑀉𑀧𑀦𑀺𑀲𑁆𑀲𑀬𑀢𑀸𑀯𑀲𑁂𑀦 𑀯𑀼𑀢𑁆𑀢𑁄, 𑀲𑀳𑀚𑀸𑀢𑀯𑀲𑁂𑀦 𑀘𑀸𑀬𑀁 𑀅𑀜𑁆𑀜𑀫𑀜𑁆𑀜𑀁 𑀫𑀽𑀮𑀪𑀸𑀯𑁄 𑀧𑀸𑀓𑀝𑁄𑀬𑁂𑀯. 𑀇𑀥 𑀧𑀦 𑀇𑀫𑀺𑀲𑁆𑀲𑀁 𑀕𑀸𑀣𑀸𑀬𑀁 𑀅𑀥𑀺𑀧𑁆𑀧𑁂𑀢𑀸 ‘‘𑀏𑀓𑀫𑀽𑀮’’𑀦𑁆𑀢𑀺 𑀲𑀸 𑀢𑀡𑁆𑀳𑀸. 𑀢𑀢𑁆𑀣 𑀬𑀸 𑀪𑀯𑀢𑀡𑁆𑀳𑀸, 𑀲𑀸 𑀲𑀲𑁆𑀲𑀢𑀤𑀺𑀝𑁆𑀞𑀺𑀯𑀲𑁂𑀦 𑀆𑀯𑀝𑁆𑀝𑀢𑀺 𑀧𑀭𑀺𑀯𑀢𑁆𑀢𑀢𑀺, 𑀯𑀺𑀪𑀯𑀢𑀡𑁆𑀳𑀸 ¶ 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀯𑀲𑁂𑀦, 𑀏𑀯𑀁 𑀤𑁆𑀯𑀺𑀭𑀸𑀯𑀝𑁆𑀝𑀁. 𑀲𑀳𑀚𑀸𑀢𑀓𑁄𑀝𑀺𑀬𑀸𑀢𑀺 𑀲𑀳𑀚𑀸𑀢𑀓𑁄𑀝𑀺𑀬𑀸𑀧𑀺, 𑀧𑀕𑁂𑀯 𑀲𑀫𑁆𑀫𑀼𑀬𑁆𑀳𑀁 𑀆𑀧𑀦𑁆𑀦𑀲𑁆𑀲 𑀧𑀦 𑀯𑀢𑁆𑀢𑀫𑀸𑀦𑀸𑀬 𑀢𑀡𑁆𑀳𑀸𑀬 𑀩𑀮𑀯𑀪𑀸𑀯𑁂𑀦 𑀫𑀮𑀻𑀦𑀢𑀸 𑀲𑀺𑀬𑀸. 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸𑀢𑀺 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸𑀯 𑀲𑀳𑀚𑀸𑀢𑀓𑁄𑀝𑀺𑀬𑀸 𑀅𑀲𑀫𑁆𑀪𑀯𑀢𑁄. 𑀧𑀢𑁆𑀣𑀭𑀡𑀝𑁆𑀞𑀸𑀦𑀸𑀢𑀺 𑀯𑀺𑀢𑁆𑀣𑀢𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀽𑀫𑀺 ¶ . 𑀢𑁂𑀦𑀸𑀳 ‘‘𑀢𑁂𑀲𑀼 𑀲𑀸 𑀧𑀢𑁆𑀣𑀭𑀢𑀻’’𑀢𑀺. 𑀲𑀫𑀼𑀤𑁆𑀤𑀦𑀝𑁆𑀞𑁂𑀦 𑀲𑀫𑀼𑀤𑁆𑀤𑁄. 𑀉𑀢𑁆𑀢𑀭𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀧𑀢𑀸𑀬 𑀅𑀮𑀁 𑀧𑀭𑀺𑀬𑀢𑁆𑀢𑁄𑀢𑀺 𑀧𑀸𑀢𑀸𑀮𑁄, 𑀅𑀬𑀁 𑀧𑀦 𑀧𑀸𑀢𑀸𑀮𑁄 𑀯𑀺𑀬𑀸𑀢𑀺 𑀧𑀸𑀢𑀸𑀮𑁄. 𑀢𑁂𑀦𑀸𑀳 ‘‘𑀅𑀧𑁆𑀧𑀢𑀺𑀝𑁆𑀞𑀝𑁆𑀞𑁂𑀦𑀸’’𑀢𑀺. 𑀅𑀕𑀸𑀥𑀕𑀫𑁆𑀪𑀻𑀭𑀢𑀸𑀬𑀸𑀢𑀺 𑀅𑀢𑁆𑀣𑁄.

𑀏𑀓𑀫𑀽𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀦𑁄𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁫. 𑀅𑀦𑁄𑀫𑀦𑀸𑀫𑀦𑁆𑀢𑀺 𑀅𑀦𑀽𑀦𑀦𑀸𑀫𑀁. 𑀕𑀼𑀡𑀦𑁂𑀫𑀺𑀢𑁆𑀢𑀺𑀓𑀸𑀦𑀺 𑀏𑀯 𑀳𑀺 𑀪𑀕𑀯𑀢𑁄 𑀦𑀸𑀫𑀸𑀦𑀺. 𑀕𑀼𑀡𑀸𑀦𑀜𑁆𑀘𑀲𑁆𑀲 𑀧𑀭𑀺𑀧𑀼𑀡𑁆𑀡𑀢𑀸𑀬 𑀅𑀦𑀽𑀦𑀦𑀸𑀫𑀦𑁆𑀢𑀺 𑀆𑀳 ‘‘𑀲𑀩𑁆𑀩𑀕𑀼𑀡𑀲𑀫𑀦𑁆𑀦𑀸𑀕𑀢𑀢𑁆𑀢𑀸’’𑀢𑀺𑀆𑀤𑀺. 𑀅𑀧𑀺𑀘 𑀢𑀣𑀸 𑀢𑁂𑀯𑀺𑀚𑁆𑀚𑁄, 𑀙𑀴𑀪𑀺𑀜𑁆𑀜𑁄𑀢𑀺𑀆𑀤𑀻𑀦𑀺 𑀦𑀸𑀫𑀸𑀦𑀺 𑀅𑀦𑁄𑀫𑀦𑀸𑀫𑀸𑀦𑀺 𑀦 𑀳𑁄𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀯𑀺𑀲𑀬𑀢𑁆𑀢𑀸, 𑀪𑀕𑀯𑀢𑁄 𑀧𑀦 𑀲𑀢𑁆𑀣𑀸, 𑀲𑀩𑁆𑀩𑀜𑁆𑀜𑀽, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺𑀆𑀤𑀻𑀦𑀺 𑀦𑀸𑀫𑀸𑀦𑀺 𑀅𑀦𑁄𑀫𑀦𑀸𑀫𑀸𑀦𑀺 𑀦𑀸𑀫 𑀫𑀳𑀸𑀯𑀺𑀲𑀬𑀢𑁆𑀢𑀸 𑀅𑀦𑀽𑀦𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀅𑀯𑁂𑀓𑀮𑁆𑀮𑀦𑀸𑀫’’𑀦𑁆𑀢𑀺. 𑀔𑀦𑁆𑀥𑀦𑁆𑀢𑀭𑀸𑀤𑀬𑁄𑀢𑀺 𑀔𑀦𑁆𑀥𑀯𑀺𑀲𑁂𑀲𑀸𑀤𑀺𑀓𑁂. 𑀜𑀸𑀡𑁂𑀦 𑀬𑀸𑀣𑀸𑀯𑀢𑁄 𑀅𑀭𑀡𑀻𑀬𑀝𑁆𑀞𑁂𑀦 𑀅𑀢𑁆𑀣𑁂. 𑀅𑀦𑁆𑀯𑀬𑀧𑀜𑁆𑀜𑀸𑀥𑀺𑀕𑀫𑀸𑀬𑀸𑀢𑀺 𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀸𑀧𑀝𑀺𑀮𑀸𑀪𑀸𑀬. 𑀧𑀝𑀺𑀧𑀤𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀤𑀁. 𑀓𑀺𑀮𑁂𑀲𑀓𑀸𑀫𑀸𑀦𑀁 𑀯𑀲𑁂𑀦 𑀅𑀮𑁆𑀮𑀻𑀬𑀺𑀢𑀩𑁆𑀩𑀝𑁆𑀞𑁂𑀦 𑀓𑀸𑀫𑀸 𑀏𑀯 𑀆𑀮𑀬𑁄. 𑀅𑀢𑀻𑀢𑀓𑀸𑀮𑁂𑀬𑁂𑀯 𑀓𑀫𑀦𑀢𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀓𑀫𑀫𑀸𑀦’’𑀦𑁆𑀢𑀺. 𑀦 𑀏𑀢𑀭𑀳𑀺 𑀢𑀤𑀪𑀸𑀯𑀢𑁄𑀢𑀺 𑀆𑀳 ‘‘𑀅𑀢𑀻𑀢𑀁 𑀧𑀦 𑀉𑀧𑀸𑀤𑀸𑀬 𑀇𑀤𑀁 𑀯𑀼𑀢𑁆𑀢’’𑀦𑁆𑀢𑀺. 𑀫𑀳𑀸𑀦𑀼𑀪𑀸𑀯𑀢𑀸𑀤𑀺𑀦𑀸 𑀫𑀳𑀦𑁆𑀢𑀸𑀦𑀁.

𑀅𑀦𑁄𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀘𑁆𑀙𑀭𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁬. ‘‘𑀅𑀘𑁆𑀙𑀭𑀸𑀕𑀡𑀲𑀗𑁆𑀖𑀼𑀝𑁆𑀞’’𑀦𑁆𑀢𑀺 𑀕𑀸𑀣𑀸 𑀤𑁂𑀯𑀧𑀼𑀢𑁆𑀢𑁂𑀦 𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀕𑀸𑀬𑀺𑀢𑀸, 𑀲𑁄 𑀅𑀦𑀼𑀧𑀼𑀩𑁆𑀩𑀺𑀓𑀣𑀸𑀬 𑀯𑀺𑀦𑀸 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀢𑀁 𑀆𑀕𑀫𑀦𑀢𑁄 𑀧𑀝𑁆𑀞𑀸𑀬 ¶ 𑀓𑀣𑁂𑀦𑁆𑀢𑁄 ‘‘𑀅𑀬𑀁 𑀓𑀺𑀭 𑀤𑁂𑀯𑀧𑀼𑀢𑁆𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀸𑀲𑀦𑁂𑀢𑀺 𑀇𑀫𑀲𑁆𑀲𑁂𑀯 𑀲𑀢𑁆𑀣𑀼𑀲𑀸𑀲𑀦𑁂. 𑀓𑀫𑁆𑀫𑀸𑀓𑀫𑁆𑀫𑀦𑁆𑀢𑀺 𑀓𑀫𑁆𑀫𑀯𑀺𑀦𑀺𑀘𑁆𑀙𑀬𑀁. 𑀅𑀢𑁆𑀣𑀧𑀼𑀭𑁂𑀓𑁆𑀔𑀸𑀭𑀢𑀸𑀬 𑀅𑀧𑁆𑀧𑀓𑀺𑀘𑁆𑀘𑀢𑀸𑀬 𑀘 𑀲𑀮𑁆𑀮𑀳𑀼𑀓𑀯𑀼𑀢𑁆𑀢𑀺𑀓𑁄. 𑀲𑀬𑀦𑀲𑁆𑀲 𑀓𑁄𑀝𑁆𑀞𑀸𑀲𑁄𑀢𑀺 𑀤𑀺𑀯𑀲𑀁 𑀧𑀼𑀭𑀺𑀫𑀬𑀸𑀫𑀜𑁆𑀘 𑀪𑀸𑀯𑀦𑀸𑀦𑀼𑀬𑁄𑀕𑀯𑀲𑁂𑀦 𑀓𑀺𑀮𑀦𑁆𑀢𑀓𑀸𑀬𑀲𑁆𑀲 𑀲𑀫𑀲𑁆𑀲𑀸𑀲𑀦𑀢𑁆𑀣𑀁 𑀲𑁂𑀬𑁆𑀬𑀸𑀬 𑀉𑀧𑀕𑀫𑀦𑀪𑀸𑀕𑁄 𑀅𑀦𑀼𑀜𑁆𑀜𑀸𑀢𑁄.

𑀅𑀩𑁆𑀪𑀦𑁆𑀢𑀭𑁂𑀢𑀺 𑀓𑀼𑀘𑁆𑀙𑀺𑀬𑀁 𑀪𑀢𑁆𑀢𑀲𑁆𑀲 𑀧𑀭𑀺𑀢𑁆𑀢𑀢𑀸𑀬 𑀲𑀢𑁆𑀣𑀓𑀯𑀸𑀢𑀸𑀢𑀺 𑀢𑀺𑀓𑁆𑀔𑀪𑀸𑀯𑁂𑀦 𑀲𑀢𑁆𑀣𑀓𑀸 𑀯𑀺𑀬 𑀓𑀦𑁆𑀢𑀦𑀓𑀸 𑀯𑀸𑀢𑀸. 𑀥𑀼𑀭𑀲𑁆𑀫𑀺𑀁𑀬𑁂𑀯𑀸𑀢𑀺 𑀓𑀺𑀮𑁂𑀲𑀫𑀸𑀭𑁂𑀦 𑀬𑀼𑀤𑁆𑀥𑁂 𑀏𑀯. 𑀯𑀺𑀫𑀼𑀢𑁆𑀢𑀸𑀬𑀢𑀦𑀲𑀻𑀲𑁂 𑀞𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀯𑀸. 𑀉𑀧𑀦𑀺𑀲𑁆𑀲𑀬𑀫𑀦𑁆𑀤𑀢𑀸𑀬 𑀅𑀧𑀭𑀺𑀧𑀓𑁆𑀓𑀜𑀸𑀡𑀢𑀸𑀬 𑀆𑀲𑀯𑀓𑁆𑀔𑀬𑀁 𑀅𑀧𑁆𑀧𑀢𑁆𑀢𑁄 𑀓𑀸𑀮𑀁 𑀓𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀉𑀧𑀭𑀺 𑀞𑀺𑀢𑀦𑁆𑀢𑀺 𑀧𑀭𑀺𑀓𑁆𑀔𑀸𑀭𑀪𑀸𑀯𑁂𑀦 𑀤𑀺𑀩𑁆𑀩𑀤𑀼𑀲𑁆𑀲𑀽𑀧𑀭𑀺 𑀞𑀺𑀢𑀁. 𑀢𑀣𑁂𑀯 𑀅𑀝𑁆𑀞𑀸𑀲𑀻𑀢𑀺 𑀢𑀸𑀳𑀺 𑀢𑀣𑀸 𑀯𑀼𑀢𑁆𑀢𑁂𑀧𑀺 ¶ 𑀬𑀣𑀸 𑀢𑀢𑁄 𑀧𑀼𑀩𑁆𑀩𑁂, 𑀢𑀣𑁂𑀯 𑀅𑀝𑁆𑀞𑀸𑀲𑀺. 𑀲𑀼𑀯𑀡𑁆𑀡𑀧𑀝𑁆𑀝𑀦𑁆𑀢𑀺 𑀦𑀺𑀩𑁆𑀩𑀼𑀤𑁆𑀥𑁂 𑀧𑀝𑀺𑀚𑀺𑀦𑀺𑀢𑁆𑀯𑀸 𑀮𑀤𑁆𑀥𑀩𑁆𑀩𑀲𑀼𑀯𑀡𑁆𑀡𑀧𑀝𑁆𑀝𑀁. 𑀯𑀻𑀢𑀺𑀓𑁆𑀓𑀫𑀲𑁆𑀲 𑀅𑀓𑀢𑀢𑁆𑀢𑀸 𑀅𑀲𑀫𑁆𑀪𑀺𑀦𑁆𑀦𑁂𑀦𑁂𑀯 𑀲𑀻𑀮𑁂𑀦. 𑀬𑀲𑁆𑀫𑀸 𑀢𑀲𑁆𑀫𑀺𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑁂 𑀢𑀸𑀧𑀺 𑀢𑁂𑀦 𑀲𑀤𑁆𑀥𑀺𑀁 𑀆𑀕𑀫𑀁𑀲𑀼 𑀢𑀲𑁆𑀫𑀸 ‘‘𑀅𑀘𑁆𑀙𑀭𑀸𑀲𑀗𑁆𑀖𑀧𑀭𑀺𑀯𑀼𑀢𑁄’’𑀢𑀺 𑀯𑀼𑀢𑁆𑀢𑀁.

𑀲𑀗𑁆𑀖𑁄𑀲𑀺𑀢𑀦𑁆𑀢𑀺 𑀲𑀗𑁆𑀕𑀫𑁆𑀫 𑀖𑁄𑀲𑀺𑀢𑀁, 𑀢𑀢𑁆𑀣 𑀢𑀢𑁆𑀣 𑀅𑀘𑁆𑀙𑀭𑀸𑀦𑀁 𑀕𑀻𑀢𑀲𑀤𑁆𑀤𑀯𑀲𑁂𑀦 𑀖𑁄𑀲𑀺𑀢𑀁. 𑀧𑀺𑀲𑀸𑀘𑀕𑀡𑀁 𑀓𑀢𑁆𑀯𑀸 𑀯𑀤𑀢𑀺 𑀅𑀘𑁆𑀙𑀦𑁆𑀤𑀭𑀸𑀕𑀢𑀸𑀬. 𑀦𑀺𑀬𑀸𑀫𑀘𑀺𑀢𑁆𑀢𑀢𑀸𑀬𑀸𑀢𑀺 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁂 𑀦𑀺𑀦𑁆𑀦𑀘𑀺𑀢𑁆𑀢𑀢𑀸𑀬. 𑀕𑀭𑀼𑀪𑀸𑀯𑁂𑀦𑀸𑀢𑀺 𑀢𑀸𑀲𑀁 𑀯𑀲𑁂 𑀅𑀯𑀢𑁆𑀢𑀦𑀢𑁄 𑀕𑀭𑀼𑀝𑁆𑀞𑀸𑀦𑀪𑀸𑀯𑁂𑀦. 𑀬𑀸𑀢𑁆𑀭𑀸𑀢𑀺 𑀦𑀺𑀩𑁆𑀩𑀸𑀦𑀁 𑀧𑀢𑀺 𑀬𑀸𑀢𑁆𑀭𑀸. 𑀢𑀁 𑀧𑀦 𑀯𑀝𑁆𑀝𑀢𑁄 𑀦𑀺𑀕𑁆𑀕𑀫𑀦𑀁 𑀳𑁄𑀢𑀻𑀢𑀺 𑀆𑀳 ‘‘𑀓𑀣𑀁 𑀦𑀺𑀕𑁆𑀕𑀫𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺.

𑀅𑀢𑀺𑀲𑀮𑁆𑀮𑁂𑀔𑀢𑁂𑀯𑀸𑀢𑀺 𑀅𑀢𑀺𑀯𑀺𑀬 𑀓𑀺𑀮𑁂𑀲𑀸𑀦𑀁 𑀲𑀮𑁆𑀮𑁂𑀔𑀺𑀢𑀯𑀼𑀢𑁆𑀢𑀺𑀓𑁄. 𑀅𑀓𑀢𑀸𑀪𑀺𑀦𑀺𑀯𑁂𑀲𑀲𑁆𑀲𑀸𑀢𑀺 𑀪𑀸𑀯𑀦𑀫𑀦𑀦𑀼𑀬𑀼𑀢𑁆𑀢𑀲𑁆𑀲 𑀅𑀦𑀸𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲. 𑀓𑀸𑀭𑀓𑀲𑁆𑀲𑀸𑀢𑀺 𑀲𑀼𑀕𑀢𑁄𑀯𑀸𑀤𑀓𑀸𑀭𑀓𑀲𑁆𑀲 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀢𑁄. 𑀲𑀼𑀜𑁆𑀜𑀢𑀸𑀯𑀺𑀧𑀲𑁆𑀲𑀦𑀦𑁆𑀢𑀺 𑀲𑀼𑀜𑁆𑀜𑀢𑀸𑀤𑀻𑀧𑀦𑀁 𑀯𑀺𑀧𑀲𑁆𑀲𑀦𑀁 𑀤𑀼𑀘𑁆𑀘𑀭𑀺𑀢𑀢𑀡𑁆𑀳𑀸𑀬 𑀤𑀽𑀭𑀻𑀓𑀭𑀡𑁂𑀦 𑀏𑀓𑀯𑀺𑀳𑀸𑀭𑀺𑀢𑀸𑀬. 𑀏𑀓𑁄 𑀫𑀕𑁆𑀕𑁄 𑀅𑀲𑁆𑀲𑀸𑀢𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀏𑀯 𑀅𑀲𑁆𑀲 𑀅𑀦𑀸𑀕𑀢𑁄, 𑀧𑀼𑀩𑁆𑀩𑀪𑀸𑀕𑀫𑀕𑁆𑀕𑁄 𑀧𑀦 𑀓𑀢𑀧𑀭𑀺𑀘𑀬𑁄𑀢𑀺 𑀅𑀢𑁆𑀣𑁄.

𑀓𑀸𑀬𑀯𑀗𑁆𑀓𑀸𑀤𑀻𑀦𑀦𑁆𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀅𑀪𑀸𑀯𑀢𑁄 𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀅𑀦𑀼𑀧𑀮𑀩𑁆𑀪𑀦𑀢𑁄. 𑀦𑀢𑁆𑀣𑀺 𑀏𑀢𑁆𑀣 𑀪𑀬𑀁, 𑀅𑀲𑁆𑀫𑀺𑀁 𑀯𑀸 𑀅𑀥𑀺𑀕𑀢𑁂 𑀧𑀼𑀕𑁆𑀕𑀮𑀲𑁆𑀲 𑀦𑀢𑁆𑀣𑀺 𑀪𑀬𑀦𑁆𑀢𑀺 ¶ 𑀅𑀪𑀬𑀁 𑀦𑀸𑀫. 𑀲𑀁𑀲𑀸𑀭𑀓𑀦𑁆𑀢𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀔𑁂𑀫𑀁 𑀅𑀫𑀢𑀝𑁆𑀞𑀸𑀦𑀁 𑀕𑀫𑀦𑁂 𑀲𑀼𑀕𑀢𑀲𑀸𑀭𑀣𑀺𑀦𑀸 𑀲𑀼𑀲𑀚𑁆𑀚𑀺𑀢𑀬𑀸𑀦𑀪𑀸𑀯𑀢𑁄 𑀭𑀣𑁄 𑀅𑀓𑀽𑀚𑀦𑁄𑀢𑀺 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄𑀯 𑀅𑀥𑀺𑀧𑁆𑀧𑁂𑀢𑁄. 𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑀸𑀬 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀬𑀸 𑀘 𑀥𑀫𑁆𑀫𑀘𑀓𑁆𑀓𑁂𑀳𑀺.

𑀑𑀢𑁆𑀢𑀧𑁆𑀧𑀫𑁆𑀧𑀺 𑀕𑀳𑀺𑀢𑀫𑁂𑀯 𑀅𑀯𑀺𑀦𑀸𑀪𑀸𑀯𑀸. 𑀅𑀧𑀸𑀮𑀫𑁆𑀩𑁄𑀢𑀺 𑀅𑀯𑀲𑁆𑀲𑀬𑁄. 𑀧𑀭𑀺𑀯𑀸𑀭𑁄𑀢𑀺 𑀧𑀭𑀺𑀓𑁆𑀔𑀸𑀭𑁄 𑀅𑀪𑀺𑀲𑀗𑁆𑀔𑀭𑀡𑀢𑁄. 𑀫𑀕𑁆𑀕𑀲𑁆𑀲 𑀓𑀭𑀡𑀝𑁆𑀞𑀸𑀦𑁂 𑀥𑀫𑁆𑀫𑁄 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦𑀸𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦. 𑀲𑁄𑀥𑀺𑀢𑁂𑀲𑀼 𑀯𑀚𑁆𑀛𑀫𑀸𑀦𑁂𑀲𑀼. 𑀪𑀽𑀫𑀺𑀮𑀤𑁆𑀥𑀯𑀝𑁆𑀝𑀦𑁆𑀢𑀺 𑀪𑀽𑀫𑀺𑀮𑀤𑁆𑀥𑀲𑀗𑁆𑀔𑀸𑀢𑀁 𑀯𑀝𑁆𑀝𑀁. 𑀢𑀢𑁆𑀣 𑀯𑀺𑀧𑀲𑁆𑀲𑀦𑀸𑀬 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄 𑀧𑀜𑁆𑀘𑀓𑁆𑀔𑀦𑁆𑀥𑀸 𑀪𑀽𑀫𑀺 𑀦𑀸𑀫, 𑀯𑀝𑁆𑀝𑀫𑀬𑀓𑀫𑁆𑀫𑀪𑀸𑀯𑀢𑁄 𑀢𑀢𑁆𑀣 𑀉𑀧𑁆𑀧𑀚𑁆𑀚𑀦𑀸𑀭𑀳𑀁 𑀓𑀺𑀮𑁂𑀲𑀚𑀸𑀢𑀁 𑀪𑀽𑀫𑀺𑀮𑀤𑁆𑀥𑀯𑀝𑁆𑀝𑀁. 𑀧𑀭𑀺𑀚𑀸𑀦𑀫𑀸𑀦𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀦𑀯𑀲𑁂𑀦 𑀲𑀫𑀢𑀺𑀓𑁆𑀓𑀫𑀯𑀲𑁂𑀦 𑀚𑀸𑀦𑀫𑀸𑀦𑀸 𑀧𑀝𑀺𑀯𑀺𑀚𑁆𑀛𑀦𑁆𑀢𑀻.

𑀓𑀲𑁆𑀫𑀸 𑀤𑁂𑀯𑀧𑀼𑀢𑁆𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂𑀬𑁂𑀯 𑀧𑀢𑀺𑀝𑁆𑀞𑀸𑀲𑀺, 𑀦𑀦𑀼 𑀘 𑀲𑀸 𑀤𑁂𑀲𑀦𑀸 𑀪𑀕𑀯𑀢𑀸 𑀘𑀢𑀼𑀫𑀕𑁆𑀕𑀧𑁆𑀧𑀥𑀸𑀦𑀪𑀸𑀯𑁂𑀦 𑀧𑀯𑀢𑁆𑀢𑀺𑀢𑀸𑀢𑀺 𑀆𑀳 ‘‘𑀬𑀣𑀸 𑀳𑀻’’𑀢𑀺𑀆𑀤𑀺.

𑀅𑀘𑁆𑀙𑀭𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀯𑀦𑀭𑁄𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭. 𑀓𑁂𑀲𑀦𑁆𑀢𑀺 ¶ 𑀲𑀸𑀫𑀺𑀯𑀲𑁂𑀦 𑀯𑀼𑀢𑁆𑀢𑀓𑀲𑀤𑁆𑀤𑁄 ‘‘𑀥𑀫𑁆𑀫𑀝𑁆𑀞𑀸 𑀲𑀻𑀮𑀲𑀫𑁆𑀧𑀦𑁆𑀦𑀸’’𑀢𑀺 𑀏𑀢𑁆𑀣 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀯𑀲𑁂𑀦 𑀧𑀭𑀺𑀡𑀸𑀫𑁂𑀢𑀩𑁆𑀩𑁄. 𑀅𑀢𑁆𑀣𑀯𑀲𑁂𑀦 𑀳𑀺 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁄. 𑀓𑁂 𑀚𑀦𑀸𑀢𑀺 𑀏𑀢𑁆𑀣 𑀯𑀸 𑀯𑀼𑀢𑁆𑀢𑀓𑁂𑀲𑀤𑁆𑀤𑁄 𑀲𑀻𑀳𑀯𑀺𑀮𑁄𑀓𑀦𑀦𑀬𑁂𑀦 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑁄𑀢𑀺 𑀆𑀳 ‘‘𑀓𑁂 𑀥𑀫𑁆𑀫𑀝𑁆𑀞𑀸, 𑀓𑁂 𑀲𑀻𑀮𑀲𑀫𑁆𑀧𑀦𑁆𑀦𑀸’’𑀢𑀺? 𑀧𑀼𑀘𑁆𑀙𑀢𑀻𑀢𑀺 𑀇𑀫𑀺𑀦𑀸 𑀢𑀢𑁆𑀣 𑀓𑀸𑀭𑀡𑀫𑀸𑀳. 𑀨𑀮𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀆𑀭𑀫𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀸𑀢𑀺 𑀆𑀭𑀸𑀫𑁄. 𑀆𑀭𑀸𑀫𑁂 𑀭𑁄𑀧𑁂𑀦𑁆𑀢𑀺 𑀦𑀺𑀧𑁆𑀨𑀸𑀤𑁂𑀦𑁆𑀢𑀻𑀢𑀺 𑀆𑀭𑀸𑀫𑀭𑁄𑀧𑀸. 𑀯𑀦𑀻𑀬𑀢𑀺 𑀙𑀸𑀬𑀸𑀲𑀫𑁆𑀧𑀢𑁆𑀢𑀺𑀬𑀸 𑀪𑀚𑀻𑀬𑀢𑀻𑀢𑀺 𑀯𑀦𑀁. 𑀢𑀢𑁆𑀣 𑀬𑀁 𑀉𑀧𑀯𑀦𑀮𑀓𑁆𑀔𑀡𑀁 𑀯𑀦𑀁, 𑀢𑀁 𑀆𑀭𑀸𑀫𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀦𑁆𑀢𑀺 𑀢𑀧𑁄𑀯𑀦𑀮𑀓𑁆𑀔𑀡𑀁, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀻𑀫𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀯𑀺𑀲𑀫𑁂𑀢𑀺 𑀉𑀤𑀓𑀘𑀺𑀓𑁆𑀔𑀮𑁆𑀮𑁂𑀦 𑀯𑀺𑀲𑀫𑁂 𑀧𑀤𑁂𑀲𑁂. 𑀧𑀸𑀦𑀻𑀬𑀁 𑀧𑀺𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀧𑀧𑀸, 𑀢𑀁 𑀧𑀧𑀁. 𑀉𑀤𑀓𑀁 𑀧𑀻𑀬𑀢𑀺 𑀏𑀢𑁆𑀣𑀸𑀢𑀺 𑀯𑀸 𑀧𑀧𑀸. 𑀢𑀴𑀸𑀓𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀸𑀢𑀺𑀓𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀇𑀫𑀫𑀢𑁆𑀣𑀁 ¶ 𑀲𑀦𑁆𑀥𑀸𑀬𑀸𑀢𑀺 𑀇𑀫𑀺𑀦𑀸 𑀓𑀫𑁆𑀫𑀧𑁆𑀧𑀣𑀧𑁆𑀧𑀢𑁆𑀢𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀅𑀢𑁆𑀢𑀦𑀸 𑀓𑀢𑀜𑁆𑀳𑀺 𑀧𑀼𑀜𑁆𑀜𑀁 𑀅𑀦𑀼𑀲𑁆𑀲𑀭𑀢𑁄 𑀢𑀁 𑀆𑀭𑀩𑁆𑀪 𑀩𑀳𑀼𑀁 𑀧𑀼𑀜𑁆𑀜𑀁 𑀧𑀲𑀯𑀢𑀺, 𑀦 𑀧𑀦 𑀬𑀣𑀸 𑀓𑀢𑀁 𑀧𑀼𑀜𑁆𑀜𑀁 𑀲𑀬𑀫𑁂𑀯 𑀧𑀯𑀟𑁆𑀠𑀢𑀺. 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀞𑀺𑀢𑀢𑁆𑀢𑀸𑀢𑀺 𑀢𑀲𑁆𑀫𑀺𑀁 𑀆𑀭𑀸𑀫𑀭𑁄𑀧𑀦𑀸𑀤𑀺𑀥𑀫𑁆𑀫𑁂 𑀧𑀢𑀺𑀝𑁆𑀞𑀺𑀢𑀢𑁆𑀢𑀸. 𑀢𑁂𑀦𑀧𑀺 𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑀢𑁆𑀢𑀸𑀢𑀺 𑀢𑁂𑀦 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑁂 𑀓𑀢𑀲𑀻𑀮𑁂 𑀞𑀢𑁆𑀯𑀸 𑀘𑀺𑀡𑁆𑀡𑁂𑀦 𑀢𑀤𑀜𑁆𑀜𑁂𑀦𑀧𑀺 𑀓𑀸𑀬𑀯𑀸𑀘𑀲𑀺𑀓𑀲𑀁𑀯𑀭𑀮𑀓𑁆𑀔𑀡𑁂𑀦 𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸. 𑀤𑀲 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀽𑀭𑁂𑀦𑁆𑀢𑀺 𑀤𑀼𑀘𑁆𑀘𑀭𑀺𑀢𑀧𑀭𑀺𑀯𑀚𑁆𑀚𑀦𑀢𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀯𑀦𑀭𑁄𑀧𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀚𑁂𑀢𑀯𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮. 𑀏𑀲𑀺𑀢𑀕𑀼𑀡𑀢𑁆𑀢𑀸 𑀏𑀲𑀺𑀬𑀫𑀸𑀦𑀕𑀼𑀡𑀢𑁆𑀢𑀸 𑀘 𑀇𑀲𑀻, 𑀅𑀲𑁂𑀓𑁆𑀔𑀸 𑀲𑁂𑀓𑁆𑀔𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀸 𑀘. 𑀇𑀲𑀻𑀦𑀁 𑀲𑀗𑁆𑀖𑁄 𑀇𑀲𑀺𑀲𑀗𑁆𑀖𑁄. 𑀇𑀲𑀺𑀲𑀗𑁆𑀖𑁂𑀦 𑀦𑀺𑀲𑁂𑀯𑀺𑀢𑀁. 𑀢𑁂𑀦𑀸𑀳 ‘‘𑀪𑀺𑀓𑁆𑀔𑀼𑀲𑀗𑁆𑀖𑀦𑀺𑀲𑁂𑀯𑀺𑀢’’𑀦𑁆𑀢𑀺.

𑀢𑀁 𑀓𑀸𑀭𑁂𑀦𑁆𑀢𑀲𑁆𑀲 𑀕𑀦𑁆𑀥𑀓𑀼𑀝𑀺𑀧𑀸𑀲𑀸𑀤𑀓𑀽𑀝𑀸𑀕𑀸𑀭𑀸𑀤𑀺𑀯𑀲𑁂𑀦 𑀲𑀺𑀦𑀺𑀤𑁆𑀥𑀲𑀦𑁆𑀤𑀘𑁆𑀙𑀸𑀬𑀭𑀼𑀓𑁆𑀔𑀮𑀢𑀸𑀯𑀲𑁂𑀦 𑀪𑀽𑀫𑀺𑀪𑀸𑀕𑀲𑀫𑁆𑀧𑀢𑁆𑀢𑀺𑀬𑀸 𑀘 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀅𑀢𑀺𑀭𑀫𑀡𑀻𑀬𑀁 𑀢𑀁 𑀚𑁂𑀢𑀯𑀦𑀁 𑀘𑀺𑀢𑁆𑀢𑀁 𑀢𑁄𑀲𑁂𑀢𑀺, 𑀢𑀣𑀸 𑀅𑀭𑀺𑀬𑀸𑀦𑀁 𑀦𑀺𑀯𑀸𑀲𑀪𑀸𑀯𑁂𑀦𑀧𑀻𑀢𑀺 𑀆𑀳 ‘‘𑀏𑀯𑀁 𑀧𑀞𑀫𑀕𑀸𑀣𑀸𑀬 𑀚𑁂𑀢𑀯𑀦𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑁆𑀯𑀸’’𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀬𑀢𑁆𑀣 𑀅𑀭𑀳𑀦𑁆𑀢𑁄 𑀯𑀺𑀳𑀭𑀦𑁆𑀢𑀺, 𑀢𑀁 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓’’𑀦𑁆𑀢𑀺 (𑀥. 𑀧. 𑁯𑁮; 𑀣𑁂𑀭𑀕𑀸. 𑁯𑁯𑁧). 𑀅𑀧𑀘𑀬𑀕𑀸𑀫𑀺𑀘𑁂𑀢𑀦𑀸 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀁 𑀆𑀯𑀳𑀢𑀺 𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀦𑀢𑁄𑀢𑀺 𑀆𑀳 ‘‘𑀓𑀫𑁆𑀫𑀦𑁆𑀢𑀺 𑀫𑀕𑁆𑀕𑀘𑁂𑀢𑀦𑀸’’𑀢𑀺. 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦 𑀓𑀺𑀮𑁂𑀲𑀸𑀦𑀁 𑀯𑀺𑀚𑁆𑀛𑀦𑀝𑁆𑀞𑁂𑀦 𑀘 𑀯𑀺𑀚𑁆𑀚𑀸 ¶ . 𑀫𑀕𑁆𑀕𑀧𑀜𑁆𑀜𑀸 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀆𑀳 ‘‘𑀯𑀺𑀚𑁆𑀚𑀸𑀢𑀺 𑀫𑀕𑁆𑀕𑀧𑀜𑁆𑀜𑀸’’𑀢𑀺. 𑀲𑀫𑀸𑀥𑀺𑀧𑀓𑁆𑀔𑀺𑀓𑀸 𑀥𑀫𑁆𑀫𑀸 𑀲𑀫𑁆𑀫𑀸𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀬𑁄. 𑀬𑀣𑀸 𑀳𑀺 𑀯𑀺𑀚𑁆𑀚𑀸𑀧𑀺 𑀯𑀺𑀚𑁆𑀚𑀸𑀪𑀸𑀕𑀺𑀬𑀸, 𑀏𑀯𑀁 𑀲𑀫𑀸𑀥𑀺𑀧𑀺 𑀲𑀫𑀸𑀥𑀺𑀧𑀓𑁆𑀔𑀺𑀓𑁄. 𑀲𑀻𑀮𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀻𑀮𑀦𑁆𑀢𑀺 𑀆𑀳 ‘‘𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑀲𑁆𑀲 𑀚𑀻𑀯𑀺𑀢𑀁 𑀉𑀢𑁆𑀢𑀫’’𑀦𑁆𑀢𑀺. 𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀗𑁆𑀓𑀧𑁆𑀧𑀸. 𑀢𑀢𑁆𑀣 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀲𑁆𑀲 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀉𑀧𑀓𑀸𑀭𑀪𑀸𑀯𑁂𑀦 𑀯𑀺𑀚𑁆𑀚𑀸𑀪𑀸𑀯𑁄 𑀯𑀼𑀢𑁆𑀢𑁄. 𑀢𑀣𑀸 𑀳𑀺 𑀲𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀘 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀬𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑀸, 𑀏𑀯𑀁 𑀯𑀸𑀬𑀸𑀫𑀲𑀢𑀺𑀬𑁄 ¶ 𑀲𑀫𑀸𑀥𑀺𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑀸𑀢𑀺 𑀆𑀳 ‘‘𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀬𑁄’’𑀢𑀺. 𑀥𑀫𑁆𑀫𑁄𑀢𑀺 𑀳𑀺 𑀇𑀥 𑀲𑀫𑀸𑀥𑀺 𑀅𑀥𑀺𑀧𑁆𑀧𑁂𑀢𑁄 ‘‘𑀏𑀯𑀁𑀥𑀫𑁆𑀫𑀸 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁧𑁩; 𑀫. 𑀦𑀺. 𑁩.𑁧𑁯𑁭; 𑀲𑀁. 𑀦𑀺. 𑁫.𑁩𑁭𑁮) 𑀯𑀺𑀬. 𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸𑀢𑀺 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸. 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀸 𑀏𑀯 𑀳𑁂𑀢𑁂 𑀲𑀗𑁆𑀕𑀳𑀺𑀢𑀸. 𑀢𑁂𑀦𑀸𑀳 ‘‘𑀏𑀢𑁂𑀦 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑁂𑀦𑀸’’𑀢𑀺.

𑀉𑀧𑀸𑀬𑁂𑀦 𑀯𑀺𑀥𑀺𑀦𑀸 𑀅𑀭𑀺𑀬𑀫𑀕𑁆𑀕𑁄 𑀪𑀸𑀯𑁂𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀲𑀫𑀸𑀥𑀺𑀧𑀓𑁆𑀔𑀺𑀬𑀥𑀫𑁆𑀫’’𑀦𑁆𑀢𑀺. 𑀲𑀫𑁆𑀫𑀸𑀲𑀫𑀸𑀥𑀺𑀧𑀓𑁆𑀔𑀺𑀬𑀁 𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀜𑁆𑀘𑁂𑀯 𑀫𑀕𑁆𑀕𑀥𑀫𑁆𑀫𑀜𑁆𑀘. ‘‘𑀅𑀭𑀺𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀫𑀸𑀥𑀺𑀁 𑀤𑁂𑀲𑁂𑀲𑁆𑀲𑀸𑀫𑀺 𑀲𑀉𑀧𑀦𑀺𑀲𑀁 𑀲𑀧𑀭𑀺𑀓𑁆𑀔𑀸𑀭’’𑀦𑁆𑀢𑀺 (𑀫. 𑀦𑀺. 𑁩.𑁧𑁩𑁬) 𑀳𑀺 𑀯𑀘𑀦𑀢𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀬𑁄 𑀫𑀕𑁆𑀕𑀥𑀫𑁆𑀫𑀸 𑀲𑀫𑁆𑀫𑀸𑀲𑀫𑀸𑀥𑀺𑀧𑀭𑀺𑀓𑁆𑀔𑀸𑀭𑀸. 𑀯𑀺𑀘𑀺𑀦𑁂𑀬𑁆𑀬𑀸𑀢𑀺 𑀯𑀻𑀫𑀁𑀲𑁂𑀬𑁆𑀬, 𑀪𑀸𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀳𑁂𑀢𑀼𑀫𑁆𑀳𑀺 𑀪𑀼𑀫𑁆𑀫𑀯𑀘𑀦𑀁. 𑀅𑀭𑀺𑀬𑀫𑀕𑁆𑀕𑀳𑁂𑀢𑀼𑀓𑀸 𑀳𑀺 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺. 𑀢𑁂𑀦𑀸𑀳 ‘‘𑀢𑀲𑁆𑀫𑀺𑀁 𑀅𑀭𑀺𑀬𑀫𑀕𑁆𑀕𑁂 𑀯𑀺𑀲𑀼𑀚𑁆𑀛𑀢𑀻’’𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑀥𑀫𑁆𑀫𑀁 𑀯𑀺𑀘𑀺𑀦𑁂𑀬𑁆𑀬𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀧𑀜𑁆𑀘𑀓𑁆𑀔𑀦𑁆𑀥𑁂 𑀯𑀺𑀧𑀲𑁆𑀲𑁂𑀬𑁆𑀬. 𑀢𑁂𑀲𑀼 𑀯𑀺𑀧𑀲𑁆𑀲𑀺𑀬𑀫𑀸𑀦𑁂𑀲𑀼 𑀯𑀺𑀧𑀲𑁆𑀲𑀦𑀸𑀬 𑀉𑀓𑁆𑀓𑀁𑀲𑀕𑀢𑀸𑀬 𑀬𑀤𑀕𑁆𑀕𑁂𑀦 𑀤𑀼𑀓𑁆𑀔𑀲𑀘𑁆𑀘𑀁 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀻𑀬𑀢𑀺, 𑀢𑀤𑀕𑁆𑀕𑁂𑀦 𑀲𑀫𑀼𑀤𑀬𑀲𑀘𑁆𑀘𑀁 𑀧𑀳𑀸𑀦𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀻𑀬𑀢𑀺, 𑀦𑀺𑀭𑁄𑀥𑀲𑀘𑁆𑀘𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀝𑀺𑀯𑁂𑀥𑁂𑀦, 𑀫𑀕𑁆𑀕𑀲𑀘𑁆𑀘𑀁 𑀪𑀸𑀯𑀦𑀸𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀻𑀬𑀢𑀻𑀢𑀺 𑀏𑀯𑀁 𑀢𑁂𑀲𑀼 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀯𑀺𑀲𑀼𑀚𑁆𑀛𑀢𑀻𑀢𑀺 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀦𑀺𑀫𑀺𑀢𑁆𑀢𑀢𑁆𑀣𑁂 𑀏𑀯 𑀪𑀼𑀫𑁆𑀫𑀁, 𑀢𑁂𑀲𑀼 𑀲𑀘𑁆𑀘𑁂𑀲𑀼 𑀧𑀝𑀺𑀯𑀺𑀚𑁆𑀛𑀺𑀬𑀫𑀸𑀦𑁂𑀲𑀽𑀢𑀺 𑀅𑀢𑁆𑀣𑁄.

𑀅𑀯𑀥𑀸𑀭𑀡𑀯𑀘𑀦𑀦𑁆𑀢𑀺 𑀯𑀯𑀢𑁆𑀣𑀸𑀧𑀦𑀯𑀘𑀦𑀁, 𑀅𑀯𑀥𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. ‘‘𑀲𑀸𑀭𑀺𑀧𑀼𑀢𑁆𑀢𑁄𑀯𑀸’’𑀢𑀺 𑀘 𑀅𑀯𑀥𑀸𑀭𑀡𑀁 𑀲𑀸𑀯𑀓𑁂𑀲𑀼 𑀲𑀸𑀭𑀺𑀧𑀼𑀢𑁆𑀢𑁄𑀯 𑀲𑁂𑀬𑁆𑀬𑁄𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺 𑀢𑀲𑁆𑀲𑁂𑀯𑀼𑀓𑁆𑀓𑀁𑀲𑀪𑀸𑀯𑀢𑁄. 𑀓𑀺𑀮𑁂𑀲𑀉𑀧𑀲𑀫𑁂𑀦𑀸𑀢𑀺 𑀇𑀫𑀺𑀦𑀸 𑀫𑀳𑀸𑀣𑁂𑀭𑀲𑁆𑀲 𑀢𑀸𑀤𑀺𑀲𑁄 𑀓𑀺𑀮𑁂𑀲𑀯𑀽𑀧𑀲𑀫𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀲𑁆𑀲 𑀲𑀸𑀯𑀓𑀯𑀺𑀲𑀬𑁂 𑀧𑀜𑁆𑀜𑀸𑀬 𑀧𑀸𑀭𑀫𑀺𑀧𑁆𑀧𑀢𑁆𑀢𑀺 𑀅𑀳𑁄𑀲𑀺. 𑀬𑀤𑀺 𑀏𑀯𑀁 ‘‘𑀬𑁄𑀧𑀺 𑀧𑀸𑀭𑀗𑁆𑀕𑀢𑁄 𑀪𑀺𑀓𑁆𑀔𑀼, 𑀏𑀢𑀸𑀯𑀧𑀭𑀫𑁄 𑀲𑀺𑀬𑀸’’𑀢𑀺 𑀇𑀤𑀁 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁 𑀜𑀸𑀡𑀯𑀺𑀲𑀬𑁂 𑀧𑀜𑁆𑀜𑀸𑀧𑀸𑀭𑀫𑀺𑀧𑁆𑀧𑀢𑁆𑀢𑀸𑀦𑀁 𑀯𑀲𑁂𑀦𑁂𑀯 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀯𑀥𑀸𑀭𑀡𑀫𑁆𑀧𑀺 𑀯𑀺𑀫𑀼𑀢𑁆𑀢𑀺𑀬𑀸 𑀦𑀸𑀦𑀢𑁆𑀢𑀸 𑀢𑀻𑀳𑀺 𑀯𑀺𑀫𑀼𑀢𑁆𑀢𑀻𑀳𑀺 𑀧𑀸𑀭𑀗𑁆𑀕𑀢𑁂 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑁋 ‘‘𑀧𑀸𑀭𑀁 𑀕𑀢𑁄𑀢𑀺 𑀦𑀺𑀩𑁆𑀩𑀸𑀦𑀁 ¶ 𑀕𑀢𑁄’’𑀢𑀺𑀆𑀤𑀺. 𑀦 𑀣𑁂𑀭𑁂𑀦 𑀉𑀢𑁆𑀢𑀭𑀺𑀢𑀭𑁄 𑀦𑀸𑀫 𑀅𑀢𑁆𑀣𑀺 𑀮𑀩𑁆𑀪𑀢𑀺, 𑀮𑀩𑁆𑀪𑀢𑀺 𑀘𑁂, 𑀏𑀯𑀫𑁂𑀯 𑀮𑀩𑁆𑀪𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀚𑁂𑀢𑀯𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀫𑀘𑁆𑀙𑀭𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁯. 𑀫𑀘𑁆𑀙𑀭𑀺𑀦𑁄𑀢𑀺 ¶ 𑀫𑀘𑁆𑀙𑁂𑀭𑀯𑀦𑁆𑀢𑁄 𑀫𑀘𑁆𑀙𑁂𑀭𑀲𑀫𑀗𑁆𑀕𑀺𑀦𑁄𑀢𑀺 𑀆𑀳 ‘‘𑀫𑀘𑁆𑀙𑁂𑀭𑁂𑀦 𑀲𑀫𑀦𑁆𑀦𑀸𑀕𑀢𑀸’’𑀢𑀺. 𑀫𑀘𑁆𑀙𑁂𑀭𑀁 𑀫𑀘𑁆𑀙𑀭𑀺𑀬𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓𑀁. 𑀦 𑀯𑀦𑁆𑀤𑀢𑀻𑀢𑀺 𑀯𑀦𑁆𑀤𑀦𑀫𑀢𑁆𑀢𑀫𑁆𑀧𑀺 𑀦 𑀓𑀭𑁄𑀢𑀺, 𑀓𑀼𑀢𑁄 𑀤𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀧𑀝𑁆𑀞𑀸𑀦𑀁 𑀓𑀸𑀢𑀼𑀦𑁆𑀢𑀺 𑀫𑀥𑀼𑀭𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀢𑀻𑀢𑀺 𑀬𑁄𑀚𑀦𑀸. 𑀇𑀤𑀁 𑀢𑀸𑀯 𑀫𑀼𑀤𑀼𑀫𑀘𑁆𑀙𑀭𑀺𑀬𑀁 𑀦 𑀳𑀤𑀬𑀁 𑀯𑀺𑀬 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀦𑁆𑀢𑀲𑁆𑀲 𑀫𑀘𑁆𑀙𑀭𑀺𑀬𑀦𑁆𑀢𑀺 𑀓𑀢𑁆𑀯𑀸. 𑀓𑀺𑀁 𑀢𑀼𑀬𑁆𑀳𑀁 𑀧𑀸𑀤𑀸 𑀭𑀼𑀚𑁆𑀚𑀦𑁆𑀢𑀺 𑀦𑀦𑀼 𑀢𑀼𑀬𑁆𑀳𑀁𑀬𑁂𑀯 𑀆𑀕𑀢𑀕𑀫𑀦𑁂𑀲𑀼 𑀧𑀸𑀤𑀸 𑀭𑀼𑀚𑁆𑀚𑀦𑁆𑀢𑀺, 𑀓𑀺𑀦𑁆𑀢𑁂 𑀇𑀫𑁂 𑀙𑀺𑀦𑁆𑀤𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀸𑀫𑀻𑀘𑀺𑀫𑁆𑀧𑀺 𑀦 𑀓𑀭𑁄𑀢𑀺 𑀓𑀼𑀢𑁄 𑀤𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀣𑀸𑀓𑀫𑁆𑀫𑀁 𑀢𑀁𑀢𑀁𑀕𑀢𑀺𑀬𑁄 𑀅𑀭𑀦𑁆𑀢𑀺 𑀉𑀧𑀕𑀘𑁆𑀙𑀦𑁆𑀢𑀻𑀢𑀺 𑀅𑀭𑀺𑀬𑀸, 𑀲𑀢𑁆𑀢𑀸. 𑀇𑀫𑁂 𑀧𑀦 𑀓𑀼𑀘𑁆𑀙𑀺𑀢𑀸 𑀅𑀭𑀺𑀬𑀸𑀢𑀺 𑀓𑀤𑀭𑀺𑀬𑀸, 𑀣𑀤𑁆𑀥𑀫𑀘𑁆𑀙𑀭𑀺𑀦𑁄. 𑀫𑀘𑁆𑀙𑀭𑀺𑀬𑀲𑀤𑀺𑀲𑀜𑁆𑀳𑀺 𑀓𑀼𑀘𑁆𑀙𑀺𑀢𑀁 𑀲𑀩𑁆𑀩𑀳𑀻𑀦𑀁 𑀦𑀢𑁆𑀣𑀺 𑀲𑀩𑁆𑀩𑀕𑀼𑀡𑀸𑀪𑀺𑀪𑀽𑀢𑀢𑁆𑀢𑀸 𑀪𑁄𑀕𑀲𑀫𑁆𑀧𑀢𑁆𑀢𑀺𑀆𑀤𑀺𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀦𑀁 𑀫𑀽𑀮𑀪𑀽𑀢𑀲𑁆𑀲 𑀤𑀸𑀦𑀲𑁆𑀲 𑀦𑀺𑀲𑁂𑀥𑀢𑁄. 𑀇𑀢𑀺𑀆𑀤𑀻𑀳𑀺 𑀯𑀘𑀦𑁂𑀳𑀺. 𑀅𑀢𑁆𑀢𑀦𑁄 𑀉𑀧𑀖𑀸𑀢𑀓𑁄𑀢𑀺 𑀫𑀘𑁆𑀙𑀭𑀺𑀬𑀸𑀦𑀼𑀬𑁄𑀕𑁂𑀦 𑀓𑀼𑀲𑀮𑀥𑀫𑁆𑀫𑀸𑀦𑀁 𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀘 𑀯𑀺𑀦𑀸𑀲𑀓𑁄.

𑀧𑀼𑀜𑁆𑀜𑀧𑀸𑀧𑀯𑀲𑁂𑀦 𑀲𑀫𑁆𑀧𑀭𑁂𑀢𑀩𑁆𑀩𑀢𑁄 𑀉𑀧𑀕𑀦𑁆𑀢𑀩𑁆𑀩𑀢𑁄 𑀲𑀫𑁆𑀧𑀭𑀸𑀬𑁄, 𑀧𑀭𑀮𑁄𑀓𑁄. 𑀓𑀸𑀫𑀕𑀼𑀡𑀭𑀢𑀻𑀢𑀺 𑀓𑀸𑀫𑀕𑀼𑀡𑀲𑀦𑁆𑀦𑀺𑀲𑁆𑀲𑀬𑁄 𑀅𑀲𑁆𑀲𑀸𑀤𑁄. 𑀔𑀺𑀟𑁆𑀟𑀸𑀢𑀺 𑀓𑀸𑀬𑀺𑀓𑀔𑀺𑀟𑁆𑀟𑀸 𑀯𑀸𑀘𑀲𑀺𑀓𑀔𑀺𑀟𑁆𑀟𑀸 𑀘𑁂𑀢𑀲𑀺𑀓𑀔𑀺𑀟𑁆𑀟𑀸𑀢𑀺 𑀏𑀯𑀁 𑀢𑀺𑀯𑀺𑀥𑀸. 𑀏𑀲 𑀯𑀺𑀧𑀸𑀓𑁄𑀢𑀺 𑀘𑁄𑀴𑀸𑀤𑀻𑀦𑀁 𑀓𑀺𑀘𑁆𑀙𑀮𑀸𑀪𑁄𑀢𑀺 𑀏𑀲 𑀏𑀯𑀭𑀽𑀧𑁄 𑀯𑀺𑀧𑀸𑀓𑁄. 𑀬𑀫𑀮𑁄𑀓𑀦𑁆𑀢𑀺 𑀧𑀭𑀮𑁄𑀓𑀁. 𑀉𑀧𑀧𑀚𑁆𑀚𑀭𑁂𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀧𑀓𑀸𑀭𑀢𑁆𑀣𑁄. 𑀢𑁂𑀦 𑀧𑀸𑀴𑀺𑀬𑀁 𑀯𑀼𑀢𑁆𑀢𑀁 𑀦𑀺𑀭𑀬𑀁 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺.

𑀬𑀸𑀘𑀦𑁆𑀢𑀺 𑀦𑀸𑀫 𑀅𑀭𑀺𑀬𑀬𑀸𑀘𑀦𑀸𑀬. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀉𑀤𑁆𑀤𑀺𑀲𑁆𑀲 𑀅𑀭𑀺𑀬𑀸 𑀢𑀺𑀝𑁆𑀞𑀦𑁆𑀢𑀺, 𑀏𑀲𑀸 𑀅𑀭𑀺𑀬𑀸𑀦 𑀬𑀸𑀘𑀦𑀸’’𑀢𑀺 (𑀚𑀸. 𑁧.𑁭.𑁫𑁯). 𑀬𑁂 𑀲𑀁𑀯𑀺𑀪𑀚𑀦𑁆𑀢𑀺, 𑀢𑁂 𑀯𑀤𑀜𑁆𑀜𑀽 𑀦𑀸𑀫 𑀜𑀢𑁆𑀯𑀸 𑀓𑀢𑁆𑀢𑀩𑁆𑀩𑀓𑀭𑀡𑀢𑁄. 𑀯𑀺𑀫𑀸𑀦𑀧𑁆𑀧𑀪𑀸𑀬𑀸𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀉𑀬𑁆𑀬𑀸𑀦𑀓𑀧𑁆𑀧𑀭𑀼𑀓𑁆𑀔𑀧𑁆𑀧𑀪𑀸𑀳𑀺 𑀤𑁂𑀯𑀢𑀸𑀦𑀁 𑀯𑀢𑁆𑀣𑀸𑀪𑀭𑀡𑀲𑀭𑀻𑀭𑀧𑁆𑀧𑀪𑀸𑀳𑀺𑀧𑀺 𑀲𑀕𑁆𑀕𑁂 𑀧𑀓𑀸𑀲𑁂𑀦𑁆𑀢𑀺𑀬𑁂𑀯. 𑀧𑀓𑀸𑀲𑀦𑁆𑀢𑀻𑀢𑀺 𑀯𑀸 𑀧𑀸𑀓𑀝𑀸 𑀳𑁄𑀦𑁆𑀢𑀺, 𑀦 𑀅𑀧𑀸𑀬𑀮𑁄𑀓𑁂 𑀯𑀺𑀬 𑀅𑀧𑀸𑀓𑀝𑀸𑀢𑀺 𑀅𑀢𑁆𑀣𑁄. 𑀧𑀭𑀲𑀫𑁆𑀪𑀢𑁂𑀲𑀽𑀢𑀺 𑀲𑀬𑀁 𑀲𑀫𑁆𑀪𑀢𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀧𑀭𑁂𑀳𑁂𑀯 𑀲𑀫𑁆𑀪𑀭𑀺𑀢𑁂𑀲𑀼 𑀲𑀼𑀔𑀽𑀧𑀓𑀭𑀡𑁂𑀲𑀼. 𑀢𑁂𑀦𑀸𑀳 𑀧𑀸𑀴𑀺𑀬𑀁 ‘‘𑀯𑀲𑀯𑀢𑁆𑀢𑀻𑀯 𑀫𑁄𑀤𑀭𑁂’’𑀢𑀺, 𑀧𑀭𑀦𑀺𑀫𑁆𑀫𑀺𑀢𑀪𑁄𑀕𑁂𑀲𑀼 𑀯𑀲𑀯𑀢𑁆𑀢𑀻 𑀤𑁂𑀯𑀧𑀼𑀢𑁆𑀢𑀸 𑀯𑀺𑀬 𑀲𑀼𑀔𑀲𑀫𑀗𑁆𑀕𑀺𑀢𑀸𑀬 𑀫𑁄𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀯𑀼𑀢𑁆𑀢𑀲𑀫𑁆𑀧𑀭𑀸𑀬𑁄𑀢𑀺 𑀏𑀢𑁂 𑀲𑀕𑁆𑀕𑀸𑀢𑀺 𑀏𑀯𑀁 𑀳𑁂𑀝𑁆𑀞𑀸 ¶ 𑀯𑀼𑀢𑁆𑀢𑀲𑀫𑁆𑀧𑀭𑀸𑀬𑁄. 𑀉𑀪𑀺𑀦𑁆𑀦𑀦𑁆𑀢𑀺 𑀏𑀢𑁂𑀲𑀁 𑀬𑀣𑀸𑀯𑀼𑀢𑁆𑀢𑀸𑀦𑀁 𑀉𑀪𑀺𑀦𑁆𑀦𑀁 𑀤𑀼𑀓𑁆𑀓𑀝𑀲𑀼𑀓𑀝𑀓𑀫𑁆𑀫𑀓𑀸𑀭𑀻𑀦𑀁. 𑀢𑀢𑁄 𑀘𑀯𑀺𑀢𑁆𑀯𑀸 𑀢𑀢𑁄 𑀦𑀺𑀭𑀬𑀲𑀕𑁆𑀕𑀸𑀤𑀺𑀢𑁄 𑀘𑀯𑀺𑀢𑁆𑀯𑀸 ¶ 𑀫𑀦𑀼𑀲𑁆𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀢𑀺. 𑀢𑁂𑀲𑀼 𑀬𑁄 𑀫𑀘𑁆𑀙𑀭𑀻 𑀫𑀦𑀼𑀲𑁆𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑁄, 𑀲𑁄 𑀤𑀮𑀺𑀤𑁆𑀤𑁄 𑀳𑀼𑀢𑁆𑀯𑀸 𑀧𑀼𑀩𑁆𑀩𑀘𑀭𑀺𑀬𑀯𑀲𑁂𑀦 𑀫𑀘𑁆𑀙𑀭𑀻𑀬𑁂𑀯 𑀳𑁄𑀦𑁆𑀢𑁄 𑀤𑀸𑀭𑀸𑀤𑀺𑀪𑀭𑀡𑀢𑁆𑀣𑀁 𑀫𑀘𑁆𑀙𑀓𑀘𑁆𑀙𑀧𑀸𑀤𑀻𑀦𑀺 𑀳𑀦𑁆𑀢𑁆𑀯𑀸 𑀧𑀼𑀦𑀧𑀺 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑁄. 𑀇𑀢𑀭𑁄 𑀲𑀼𑀤𑁆𑀥𑀸𑀲𑀬𑁄 𑀲𑀫𑀺𑀤𑁆𑀥𑁄 𑀳𑀼𑀢𑁆𑀯𑀸 𑀧𑀼𑀩𑁆𑀩𑀘𑀭𑀺𑀬𑀸𑀯𑀲𑁂𑀦 𑀧𑀼𑀦𑀧𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑁂𑀬𑁆𑀬. 𑀢𑁂𑀦𑀸𑀳 ‘‘𑀧𑀼𑀦 𑀲𑀫𑁆𑀧𑀭𑀸𑀬𑁂𑀧𑀺 𑀤𑀼𑀕𑁆𑀕𑀢𑀺𑀲𑀼𑀕𑀢𑀺𑀬𑁂𑀯 𑀳𑁄𑀢𑀻’’𑀢𑀺.

𑀫𑀘𑁆𑀙𑀭𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀖𑀝𑀻𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦. ‘‘𑀉𑀧𑀧𑀦𑁆𑀦𑀸𑀲𑁂’’𑀢𑀺 𑀲𑁂-𑀓𑀸𑀭𑀸𑀕𑀫𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄, ‘‘𑀉𑀧𑀧𑀦𑁆𑀦𑀸’’𑀇𑀘𑁆𑀘𑁂𑀯 𑀅𑀢𑁆𑀣𑁄𑀢𑀺 𑀆𑀳 ‘‘𑀦𑀺𑀩𑁆𑀩𑀢𑁆𑀢𑀺𑀯𑀲𑁂𑀦 𑀉𑀧𑀕𑀢𑀸’’𑀢𑀺. 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀢𑁄 𑀅𑀯𑀺𑀳𑀸𑀦𑀢𑁄 𑀅𑀯𑀺𑀳𑀸, 𑀢𑁂𑀲𑀁 𑀩𑁆𑀭𑀳𑁆𑀫𑀮𑁄𑀓𑁄 𑀅𑀯𑀺𑀳𑀸𑀩𑁆𑀭𑀳𑁆𑀫𑀮𑁄𑀓𑁄, 𑀢𑀲𑁆𑀫𑀺𑀁. 𑀉𑀧𑀧𑀢𑁆𑀢𑀺𑀲𑀫𑀦𑀦𑁆𑀢𑀭𑀫𑁂𑀯𑀸𑀢𑀺 𑀧𑀞𑀫𑀓𑁄𑀝𑁆𑀞𑀸𑀲𑁂 𑀏𑀯. 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀅𑀲𑁂𑀓𑁆𑀔𑀯𑀺𑀫𑀼𑀢𑁆𑀢𑀺𑀬𑀸. 𑀲𑁂𑀓𑁆𑀔𑀯𑀺𑀫𑀼𑀢𑁆𑀢𑀺𑀬𑀸 𑀧𑀦 𑀅𑀯𑀺𑀳𑀽𑀧𑀧𑀢𑁆𑀢𑀺𑀢𑁄 𑀧𑀕𑁂𑀯 𑀯𑀺𑀫𑀼𑀢𑁆𑀢𑀸. 𑀫𑀸𑀦𑀼𑀲𑀁 𑀤𑁂𑀳𑀁 𑀲𑀫𑀢𑀺𑀓𑁆𑀓𑀫𑀦𑁆𑀢𑀺 𑀘𑀺𑀢𑁆𑀢𑀼𑀧𑀓𑁆𑀓𑀺𑀮𑁂𑀲𑀧𑀳𑀸𑀦𑀯𑀲𑁂𑀦𑀸𑀢𑀺 𑀨𑀮𑁂𑀦 𑀳𑁂𑀢𑀼𑀤𑀲𑁆𑀲𑀦𑀫𑀺𑀤𑀦𑁆𑀢𑀺 𑀆𑀳 ‘‘𑀫𑀸𑀦𑀼𑀲𑀁 𑀤𑁂𑀳𑀦𑁆𑀢𑀺 𑀇𑀥…𑀧𑁂… 𑀯𑀼𑀢𑁆𑀢𑀸𑀦𑀻’’𑀢𑀺. 𑀤𑀺𑀯𑀺 𑀪𑀯𑀁 𑀤𑀺𑀩𑁆𑀩𑀁, 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑀲𑀜𑁆𑀜𑀺𑀢𑀁 𑀔𑀦𑁆𑀥𑀧𑀜𑁆𑀘𑀓𑀁. 𑀢𑀢𑁆𑀣 𑀲𑀁𑀬𑁄𑀚𑀦𑀓𑁄𑀢𑀺 𑀯𑀼𑀢𑁆𑀢𑀁 ‘‘𑀤𑀺𑀩𑁆𑀩𑀁 𑀬𑁄𑀕𑀦𑁆𑀢𑀺 𑀧𑀜𑁆𑀘 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀻’’𑀢𑀺. 𑀇𑀫𑀲𑁆𑀲𑀸𑀢𑀺 𑀤𑁂𑀯𑀧𑀼𑀢𑁆𑀢𑀲𑁆𑀲. ‘‘𑀳𑀺𑀢𑁆𑀯𑀸 𑀫𑀸𑀦𑀼𑀲𑀁 𑀤𑁂𑀳𑀁, 𑀤𑀺𑀩𑁆𑀩𑀬𑁄𑀕𑀁 𑀉𑀧𑀘𑁆𑀘𑀕𑀼’’𑀦𑁆𑀢𑀺 𑀢𑁂𑀲𑀁 𑀢𑁆𑀯𑀁 𑀓𑀼𑀲𑀮𑀁 𑀲𑀩𑁆𑀩𑀸𑀯𑀚𑁆𑀚𑀧𑁆𑀧𑀳𑀸𑀦𑁂𑀦 𑀅𑀦𑀯𑀚𑁆𑀚𑀢𑀁 𑀪𑀸𑀲𑀢𑀻𑀢𑀺 𑀓𑀼𑀲𑀮𑀻 𑀯𑀤𑁂𑀲𑀺. 𑀅𑀢𑁆𑀣𑁂𑀦 𑀲𑀤𑁆𑀤𑀲𑁆𑀲 𑀅𑀪𑁂𑀤𑁄𑀧𑀘𑀸𑀭𑀁 𑀓𑀢𑁆𑀯𑀸 𑀕𑀫𑁆𑀪𑀻𑀭𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀕𑀫𑁆𑀪𑀻𑀭𑀢𑁆𑀣’’𑀦𑁆𑀢𑀺 𑀅𑀢𑁆𑀣𑀲𑁆𑀲𑁂𑀯 𑀕𑀫𑁆𑀪𑀻𑀭𑀢𑁄, 𑀦 𑀲𑀤𑁆𑀤𑀲𑁆𑀲. 𑀲𑀫𑀼𑀘𑁆𑀙𑀺𑀦𑁆𑀦𑀓𑀸𑀫𑀭𑀸𑀕𑀢𑀸𑀬 𑀲𑀩𑁆𑀩𑀲𑁄 𑀓𑀸𑀫𑀯𑀺𑀲𑀬𑀧𑁆𑀧𑀳𑀸𑀦𑁂𑀦 𑀦𑀺𑀭𑀸𑀫𑀺𑀲𑀩𑁆𑀭𑀳𑁆𑀫𑀘𑀸𑀭𑀻 𑀦𑀸𑀫 𑀅𑀦𑀸𑀕𑀸𑀫𑀻. 𑀦𑀺𑀯𑀸𑀲𑀦𑀝𑁆𑀞𑀸𑀦𑀪𑀽𑀢𑁄 𑀲𑀫𑀸𑀦𑁄 𑀏𑀓𑁄 𑀕𑀸𑀫𑁄 𑀏𑀢𑀲𑁆𑀲𑀸𑀢𑀺 𑀆𑀳 ‘‘𑀏𑀓𑀕𑀸𑀫𑀯𑀸𑀲𑀻’’𑀢𑀺.

𑀖𑀝𑀻𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀤𑀺𑀢𑁆𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀚𑀭𑀸𑀯𑀕𑁆𑀕𑁄

𑁧. 𑀚𑀭𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧. 𑀳𑀺𑀢𑀲𑁆𑀲 ¶ 𑀲𑀸𑀥𑀦𑀢𑁄 𑀲𑀸𑀥𑀼, 𑀬𑀁 𑀓𑀺𑀜𑁆𑀘𑀺 𑀅𑀢𑁆𑀣𑀚𑀸𑀢𑀁. 𑀢𑀁 𑀧𑀦 𑀅𑀢𑁆𑀣𑀓𑀸𑀫𑁂𑀦 𑀮𑀪𑀺𑀢𑀩𑁆𑀩𑀢𑁄 𑀉𑀧𑀲𑁂𑀯𑀺𑀢𑀩𑁆𑀩𑀢𑁄 ¶ 𑀮𑀤𑁆𑀥𑀓𑀁, 𑀓𑀮𑁆𑀬𑀸𑀡𑀝𑁆𑀞𑁂𑀦 𑀪𑀤𑁆𑀤𑀓𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀲𑀸𑀥𑀽𑀢𑀺 𑀮𑀤𑁆𑀥𑀓𑀁 𑀪𑀤𑁆𑀤𑀓’’𑀦𑁆𑀢𑀺. ‘‘𑀲𑀻𑀮𑀁 𑀬𑀸𑀯 𑀚𑀭𑀸 𑀲𑀸𑀥𑀽’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀢𑁄 𑀯𑀺𑀪𑀸𑀯𑁂𑀢𑀼𑀁 ‘‘𑀇𑀫𑀺𑀦𑀸 𑀇𑀤𑀁 𑀤𑀲𑁆𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀇𑀤𑀦𑁆𑀢𑀺 𑀇𑀤𑀁 𑀅𑀢𑁆𑀣𑀚𑀸𑀢𑀁.

𑀧𑀢𑀺𑀝𑁆𑀞𑀺𑀢𑀸𑀢𑀺 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀮𑀤𑁆𑀥𑀧𑀢𑀺𑀝𑁆𑀞𑀸, 𑀓𑁂𑀦𑀘𑀺 𑀅𑀲𑀁𑀳𑀸𑀭𑀺𑀬𑀸. 𑀢𑁂𑀦𑀸𑀳 ‘‘𑀫𑀕𑁆𑀕𑁂𑀦 𑀆𑀕𑀢𑀸’’𑀢𑀺. 𑀘𑀺𑀢𑁆𑀢𑀻𑀓𑀢𑀝𑁆𑀞𑀸𑀤𑀻𑀳𑀻𑀢𑀺 𑀧𑀽𑀚𑀦𑀻𑀬𑀪𑀸𑀯𑀸𑀤𑀻𑀳𑀺. 𑀯𑀼𑀢𑁆𑀢𑀁 𑀳𑁂𑀢𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀁. 𑀘𑀺𑀢𑁆𑀢𑀻𑀓𑀢𑀦𑁆𑀢𑀺 𑀭𑀢𑀦𑀦𑁆𑀢𑀺 𑀇𑀤𑀁 𑀭𑀢𑀦𑀁 𑀦𑀸𑀫 𑀮𑁄𑀓𑁂 𑀘𑀺𑀢𑁆𑀢𑀻𑀓𑀢𑀁 𑀯𑀢𑁆𑀣𑀽𑀦𑀁 𑀲𑀳𑀲𑁆𑀲𑀕𑁆𑀖𑀦𑀢𑀸𑀤𑀺𑀯𑀲𑁂𑀦. 𑀬𑁂𑀧𑀺 𑀮𑁄𑀓𑁂 𑀘𑀺𑀢𑁆𑀢𑀻𑀓𑀢𑀸 𑀔𑀢𑁆𑀢𑀺𑀬𑀧𑀡𑁆𑀟𑀺𑀢-𑀘𑀢𑀼𑀫𑀳𑀸𑀭𑀸𑀚-𑀲𑀓𑁆𑀓-𑀲𑀼𑀬𑀸𑀫-𑀫𑀳𑀸𑀩𑁆𑀭𑀳𑁆𑀫𑀸𑀤𑀬𑁄, 𑀢𑁂𑀲𑀁 𑀘𑀺𑀢𑁆𑀢𑀻𑀓𑀢𑁄 𑀢𑁂𑀳𑀺 𑀲𑀭𑀡𑀦𑁆𑀢𑀺 𑀉𑀧𑀕𑀦𑁆𑀢𑀩𑁆𑀩𑀢𑀸𑀤𑀺𑀯𑀲𑁂𑀦. 𑀭𑀢𑀺𑀓𑀭𑀦𑁆𑀢𑀺 𑀧𑀻𑀢𑀺𑀲𑀼𑀔𑀸𑀯𑀳𑀁. 𑀛𑀸𑀦𑀭𑀢𑀺𑀲𑀼𑀔𑁂𑀦𑀸𑀢𑀺 𑀤𑀼𑀯𑀺𑀥𑁂𑀦𑀧𑀺 𑀛𑀸𑀦𑀭𑀢𑀺𑀲𑀼𑀔𑁂𑀦. 𑀢𑀼𑀮𑁂𑀢𑀼𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁. 𑀕𑀼𑀡𑀧𑀸𑀭𑀫𑀺𑀦𑁆𑀢𑀺 𑀕𑀼𑀡𑀸𑀦𑀁 𑀉𑀓𑁆𑀓𑀁𑀲𑀧𑀸𑀭𑀫𑀺𑀁. 𑀤𑀼𑀮𑁆𑀮𑀪𑁄 𑀅𑀦𑁂𑀓𑀸𑀦𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀅𑀢𑀺𑀥𑀸𑀯𑀺𑀢𑁆𑀯𑀸𑀧𑀺 𑀮𑀤𑁆𑀥𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀅𑀦𑁄𑀫𑁄𑀢𑀺 𑀅𑀦𑀽𑀦𑁄 𑀧𑀭𑀺𑀧𑀼𑀡𑁆𑀡𑁄. 𑀢𑀢𑁆𑀣 𑀯𑀺𑀲𑁂𑀲𑀢𑁄 𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀢𑁄 𑀢𑁂𑀳𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸’’𑀢𑀺 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀢𑁄𑀢𑀺 𑀆𑀳 ‘‘𑀪𑀕𑀯𑀸 𑀅𑀦𑁄𑀫𑁄 𑀲𑀻𑀮𑁂𑀦𑀸’’𑀢𑀺𑀆𑀤𑀺.

𑀅𑀭𑀺𑀬𑀫𑀕𑁆𑀕𑀧𑀜𑁆𑀜𑀸𑀬𑁂𑀯 𑀇𑀥 𑀅𑀥𑀺𑀧𑁆𑀧𑁂𑀢𑀸𑀢𑀺 ‘‘𑀇𑀥 𑀧𑀦 𑀤𑀼𑀮𑁆𑀮𑀪𑀧𑀸𑀢𑀼𑀪𑀸𑀯𑀝𑁆𑀞𑁂𑀦 𑀧𑀜𑁆𑀜𑀸 ‘𑀭𑀢𑀦’𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀆𑀳. 𑀧𑀼𑀚𑁆𑀚𑀨𑀮𑀦𑀺𑀩𑁆𑀩𑀢𑁆𑀢𑀦𑀢𑁄, 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀁 𑀧𑀼𑀦𑀸𑀢𑀻𑀢𑀺 𑀘 𑀧𑀼𑀜𑁆𑀜𑀘𑁂𑀢𑀦𑀸 𑀧𑀼𑀜𑁆𑀜𑀁, 𑀲𑀸 𑀧𑀦 𑀬𑀲𑁆𑀲 𑀉𑀧𑁆𑀧𑀦𑁆𑀦𑀸, 𑀢𑀲𑁆𑀲𑁂𑀯 𑀆𑀯𑁂𑀡𑀺𑀓𑀢𑀸𑀬 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸 𑀓𑁂𑀦𑀘𑀺𑀧𑀺 𑀅𑀦𑀸𑀳𑀝𑀸, 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀅𑀭𑀽𑀧𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑀚𑀭𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀚𑀭𑀲𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨. 𑀅𑀚𑀻𑀭𑀡𑁂𑀦𑀸𑀢𑀺 ¶ 𑀚𑀺𑀡𑁆𑀡𑀪𑀸𑀯𑀸𑀦𑀸𑀧𑀚𑁆𑀚𑀦𑁂𑀦. 𑀮𑀓𑁆𑀔𑀡𑀯𑀘𑀦𑀜𑁆𑀘𑁂𑀢𑀁 𑀅𑀯𑀺𑀦𑀸𑀲𑀧𑁆𑀧𑀢𑁆𑀢𑀺𑀬𑀸. 𑀢𑁂𑀦𑀸𑀳 ‘‘𑀅𑀯𑀺𑀧𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄’’𑀢𑀺. 𑀦𑀺𑀤𑁆𑀥𑀫𑀺𑀢𑀩𑁆𑀩𑁄𑀢𑀺 𑀦𑀻𑀳𑀭𑀺𑀢𑀩𑁆𑀩𑁄.

𑀅𑀚𑀭𑀲𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁩. 𑀲𑀳 𑀅𑀢𑁆𑀣𑁂𑀦 𑀯𑀢𑁆𑀢𑀢𑀻𑀢𑀺 𑀲𑀢𑁆𑀣𑁄, 𑀪𑀡𑁆𑀟𑀫𑀽𑀮𑀁 𑀕𑀳𑁂𑀢𑁆𑀯𑀸 𑀯𑀸𑀡𑀺𑀚𑁆𑀚𑀯𑀲𑁂𑀦 𑀤𑁂𑀲𑀦𑁆𑀢𑀭𑀸𑀤𑀻𑀲𑀼 𑀯𑀺𑀘𑀭𑀡𑀓𑀚𑀦𑀲𑀫𑀽𑀳𑁄. 𑀢𑁂𑀦𑀸𑀳 ‘‘𑀲𑀤𑁆𑀥𑀺𑀁𑀘𑀭𑁄’’𑀢𑀺, 𑀲𑀳𑀘𑀭𑀡𑀓𑁄𑀢𑀺 𑀅𑀢𑁆𑀣𑁄. 𑀫𑀺𑀢𑁆𑀢𑀦𑁆𑀢𑀺 𑀲𑀺𑀦𑁂𑀳𑀬𑁄𑀕𑁂𑀦 𑀫𑀺𑀢𑁆𑀢𑀓𑀺𑀘𑁆𑀘𑀬𑀼𑀢𑁆𑀢𑀁 ¶ . 𑀇𑀥𑀸𑀥𑀺𑀧𑁆𑀧𑁂𑀢𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀭𑁄𑀕𑁂 𑀉𑀧𑁆𑀧𑀦𑁆𑀦𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀣𑀸𑀭𑀽𑀧𑁂𑀢𑀺 𑀚𑀺𑀕𑀼𑀘𑁆𑀙𑀦𑀻𑀬𑁂, 𑀤𑀼𑀢𑁆𑀢𑀺𑀓𑀺𑀘𑁆𑀙𑁂 𑀯𑀸. 𑀬𑀣𑀸 𑀅𑀲𑀡𑁆𑀞𑀺𑀢𑀸𑀦𑀁 𑀲𑀡𑁆𑀞𑀸𑀧𑀦𑀯𑀲𑁂𑀦 𑀧𑀯𑀲𑀢𑁄 𑀧𑀼𑀭𑀺𑀲𑀲𑁆𑀲 𑀪𑁄𑀕𑀩𑁆𑀬𑀲𑀦𑁂 𑀦𑀸𑀣𑀢𑀸, 𑀏𑀯𑀁 𑀧𑀼𑀢𑁆𑀢𑀲𑀺𑀦𑁂𑀳𑀯𑀲𑁂𑀦 𑀧𑀼𑀢𑁆𑀢𑀲𑁆𑀲 𑀫𑀸𑀢𑀼𑀬𑀸 𑀅𑀦𑁆𑀢𑁄𑀕𑁂𑀳𑁂 𑀦𑀸𑀣𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀫𑀸𑀢𑀸 𑀫𑀺𑀢𑁆𑀢𑀁 𑀲𑀓𑁂 𑀖𑀭𑁂’’𑀢𑀺. 𑀅𑀢𑁆𑀣𑀚𑀸𑀢𑀲𑁆𑀲𑀸𑀢𑀺 𑀉𑀧𑀝𑁆𑀞𑀺𑀢𑀧𑀬𑁄𑀚𑀦𑀲𑁆𑀲𑀸𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀉𑀧𑁆𑀧𑀦𑁆𑀦𑀓𑀺𑀘𑁆𑀘𑀲𑁆𑀲𑀸’’𑀢𑀺. 𑀲𑀫𑁆𑀧𑀭𑀸𑀬𑀳𑀺𑀢𑀦𑁆𑀢𑀺 𑀲𑀫𑁆𑀧𑀭𑀸𑀬𑁂 𑀳𑀺𑀢𑀸𑀯𑀳𑀁.

𑀫𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁪. 𑀧𑀢𑀺𑀝𑁆𑀞𑀸𑀢𑀺 𑀅𑀯𑀲𑁆𑀲𑀬𑁄. 𑀕𑀼𑀬𑁆𑀳𑀲𑁆𑀲𑀸𑀢𑀺 𑀕𑀼𑀳𑀺𑀢𑀩𑁆𑀩𑀲𑁆𑀲 𑀭𑀳𑀲𑁆𑀲𑀲𑁆𑀲. 𑀧𑀭𑀫𑁄 𑀲𑀔𑀸 𑀦𑀸𑀫 𑀅𑀢𑀺𑀧𑀺𑀬𑀝𑁆𑀞𑀸𑀦𑀢𑀸𑀬.

𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀞𑀫𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁫. 𑀯𑀺𑀥𑀸𑀯𑀢𑀻𑀢𑀺 𑀯𑀺𑀯𑀺𑀥𑀁 𑀭𑀽𑀧𑀁 𑀧𑀥𑀸𑀯𑀢𑀺, 𑀬𑀣𑀸𑀓𑀸𑀫𑀁 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄.

𑀧𑀞𑀫𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀤𑀼𑀢𑀺𑀬𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁬. 𑀯𑀝𑁆𑀝𑀤𑀼𑀓𑁆𑀔𑀢𑁄𑀢𑀺 ¶ 𑀲𑀁𑀲𑀸𑀭𑀤𑀼𑀓𑁆𑀔𑀢𑁄. 𑀲𑀁𑀲𑀸𑀭𑁄 𑀳𑀺 𑀓𑀺𑀮𑁂𑀲𑀓𑀫𑁆𑀫𑀯𑀺𑀧𑀸𑀓𑀸𑀦𑀁 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀢𑀸𑀬 𑀯𑀺𑀥𑀸𑀯𑀢𑀺. 𑀢𑀜𑁆𑀘 𑀤𑀼𑀓𑁆𑀔𑀁 𑀤𑀼𑀓𑁆𑀔𑀫𑀢𑁆𑀢𑀸𑀬 𑀦𑀸𑀦𑀸𑀯𑀺𑀥𑀤𑀼𑀓𑁆𑀔𑀭𑀸𑀲𑀺𑀪𑀸𑀯𑀢𑁄.

𑀤𑀼𑀢𑀺𑀬𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀢𑀢𑀺𑀬𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁭. 𑀦𑀺𑀧𑁆𑀨𑀢𑁆𑀢𑀻𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀧𑀸𑀓𑀸𑀦𑀁 𑀦𑀺𑀧𑁆𑀨𑀚𑁆𑀚𑀦𑀢𑁄 𑀦𑀺𑀧𑁆𑀨𑀢𑁆𑀢𑀺. 𑀢𑀢𑁄 𑀏𑀯 𑀅𑀯𑀲𑁆𑀲𑀬𑁄, 𑀦𑀺𑀧𑁆𑀨𑀢𑁆𑀢𑀺𑀢𑀯𑀺𑀧𑀸𑀓𑀲𑁆𑀲 𑀅𑀯𑀲𑁆𑀲𑀬𑁄 𑀅𑀥𑀺𑀝𑁆𑀞𑀸𑀦𑀁 𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄.

𑀢𑀢𑀺𑀬𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀉𑀧𑁆𑀧𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁮. 𑀅𑀫𑀕𑁆𑀕𑁄𑀢𑀺 ¶ 𑀦 𑀫𑀕𑁆𑀕𑁄 𑀅𑀦𑀼𑀧𑀸𑀬𑁄. 𑀭𑀢𑁆𑀢𑀺𑀦𑁆𑀤𑀺𑀯𑀓𑁆𑀔𑀬𑁄𑀢𑀺 𑀢𑀢𑁆𑀣 𑀯𑀬𑀓𑁆𑀔𑀡𑀲𑁆𑀲 𑀧𑀸𑀓𑀝𑀪𑀸𑀯𑀢𑁄. 𑀯𑀼𑀢𑁆𑀢𑀓𑁆𑀔𑀡𑁄𑀧𑀺 𑀳𑀺 𑀲𑀬𑀁 𑀔𑀻𑀬𑀢𑁂𑀯. 𑀲𑁂𑀲𑀁 𑀩𑀸𑀳𑀺𑀭𑀫𑀮𑀁 𑀯𑀢𑁆𑀣𑀲𑀭𑀻𑀭𑀸𑀤𑀺𑀪𑀽𑀢𑀁. 𑀢𑀣𑀸 𑀳𑀺 ‘‘𑀪𑀲𑁆𑀫𑀔𑀸𑀭𑀸𑀤𑀻𑀳𑀺 𑀥𑁄𑀯𑀺𑀢𑁆𑀯𑀸 𑀲𑀓𑁆𑀓𑀸 𑀲𑁄𑀥𑁂𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀤𑀼𑀝𑁆𑀞𑁄𑀢𑀺 𑀤𑀽𑀲𑀺𑀢𑁄 𑀲𑀢𑁆𑀢𑀲𑀦𑁆𑀢𑀸𑀦𑁄 𑀦 𑀲𑀓𑁆𑀓𑀸 𑀲𑀼𑀤𑁆𑀥𑁄 𑀦𑀸𑀫 𑀓𑀸𑀢𑀼𑀁 𑀅𑀩𑁆𑀪𑀦𑁆𑀢𑀭𑀫𑀮𑀻𑀦𑀪𑀸𑀯𑀸𑀧𑀸𑀤𑀦𑀢𑁄. 𑀇𑀢𑁆𑀣𑀺𑀬𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑀸𑀬𑀧𑀺. 𑀧𑀚𑀸𑀢𑀺 𑀲𑀢𑁆𑀢𑀓𑀸𑀬𑁄 𑀲𑀚𑁆𑀚𑀢𑀺 𑀲𑀗𑁆𑀕𑀁 𑀓𑀭𑁄𑀢𑀺 𑀬𑀸𑀣𑀸𑀯𑀢𑁄 𑀆𑀤𑀻𑀦𑀯𑀁 𑀅𑀧𑀲𑁆𑀲𑀦𑁆𑀢𑁄. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀺 𑀓𑀺𑀮𑁂𑀲𑀸𑀦𑀁 𑀢𑀸𑀧𑀦𑀢𑁄 𑀢𑀧𑁄, 𑀢𑁂𑀦𑀸𑀳 ‘‘𑀲𑀩𑁆𑀩𑀸𑀧𑀻’’𑀢𑀺𑀆𑀤𑀺.

𑀉𑀧𑁆𑀧𑀣𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀤𑀼𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁯. 𑀓𑀺𑀲𑁆𑀲𑀸𑀢𑀺 ¶ 𑀪𑀼𑀫𑁆𑀫𑀢𑁆𑀣𑁂 𑀲𑀸𑀫𑀺𑀯𑀘𑀦𑀦𑁆𑀢𑀺 𑀆𑀳 ‘‘𑀓𑀺𑀲𑁆𑀫𑀺𑀁 𑀅𑀪𑀺𑀭𑀢𑁄’’𑀢𑀺. 𑀲𑀤𑁆𑀥𑀸 𑀦𑀸𑀫 𑀅𑀦𑀯𑀚𑁆𑀚𑀲𑀪𑀸𑀯𑀸, 𑀢𑀲𑁆𑀫𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀳𑀺𑀢𑀲𑀼𑀔𑀸𑀯𑀳𑀸𑀢𑀺 𑀆𑀳 ‘‘𑀲𑀼𑀕𑀢𑀺𑀜𑁆𑀘𑁂𑀯 𑀦𑀺𑀩𑁆𑀩𑀸𑀦𑀜𑁆𑀘 𑀕𑀘𑁆𑀙𑀦𑁆𑀢𑀲𑁆𑀲 𑀤𑀼𑀢𑀺𑀬𑀺𑀓𑀸’’𑀢𑀺. 𑀅𑀦𑀼𑀲𑀸𑀲𑀢𑀺 𑀳𑀺𑀢𑀘𑀭𑀺𑀬𑀸𑀬 𑀧𑀭𑀺𑀡𑀸𑀬𑀺𑀓𑀪𑀸𑀯𑀢𑁄.

𑀤𑀼𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀓𑀯𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁦. 𑀕𑀸𑀬𑀢𑁆𑀢𑀺𑀆𑀤𑀺𑀓𑁄𑀢𑀺 𑀙𑀩𑁆𑀩𑀻𑀲𑀢𑀺𑀬𑀸 𑀙𑀦𑁆𑀤𑁂𑀲𑀼 𑀕𑀸𑀬𑀢𑁆𑀢𑀺𑀆𑀤𑀺𑀓𑁄 𑀉𑀓𑁆𑀓𑀢𑀺𑀧𑀭𑀺𑀬𑁄𑀲𑀸𑀦𑁄 𑀙𑀦𑁆𑀤𑁄 𑀕𑀸𑀣𑀸𑀦𑀁 𑀦𑀺𑀤𑀸𑀦𑀁 𑀲𑀫𑀼𑀝𑁆𑀞𑀸𑀦𑀁 ‘‘𑀲𑀫𑀼𑀝𑁆𑀞𑀳𑀢𑀺 𑀏𑀢𑁂𑀦𑀸’’𑀢𑀺 𑀓𑀢𑁆𑀯𑀸. 𑀢𑁂𑀳𑀺 𑀧𑀦 𑀅𑀦𑀼𑀝𑁆𑀞𑀼𑀪𑀸𑀤𑀺𑀓𑁄 𑀳𑁄𑀢𑀻𑀢𑀺 𑀆𑀳 ‘‘𑀙𑀦𑁆𑀤𑁄 𑀕𑀸𑀣𑀸𑀦𑀁 𑀦𑀺𑀤𑀸𑀦’’𑀦𑁆𑀢𑀺. 𑀧𑀼𑀩𑁆𑀩𑀧𑀝𑁆𑀞𑀸𑀧𑀦𑀕𑀸𑀣𑀸𑀢𑀺 𑀥𑀫𑁆𑀫𑀓𑀣𑀸𑀬 𑀆𑀤𑀺𑀢𑁄 𑀆𑀭𑁄𑀘𑀦𑀪𑀸𑀯𑀚𑀸𑀦𑀦𑀢𑁆𑀣𑀁 𑀲𑀢𑀺𑀚𑀦𑀦𑀁 𑀯𑀺𑀬 𑀧𑀯𑀢𑁆𑀢𑀺𑀢𑀕𑀸𑀣𑀸. 𑀅𑀓𑁆𑀔𑀭𑀜𑁆𑀳𑀺 𑀧𑀤𑀁 𑀚𑀦𑁂𑀢𑀻𑀢𑀺 𑀬𑀲𑁆𑀫𑀸 𑀅𑀓𑁆𑀔𑀭𑀲𑀫𑀼𑀤𑀸𑀬𑁄 𑀧𑀤𑀁, 𑀧𑀤𑀲𑀫𑀼𑀤𑀸𑀬𑁄 𑀕𑀸𑀣𑀸, 𑀲𑀫𑀼𑀤𑀸𑀬𑁄 𑀘 𑀲𑀫𑀼𑀤𑀸𑀬𑀻𑀳𑀺 𑀩𑁆𑀬𑀜𑁆𑀚𑀻𑀬𑀢𑀺 𑀢𑀁𑀧𑀯𑀢𑁆𑀢𑀦𑀢𑁄, 𑀢𑀲𑁆𑀫𑀸 𑀩𑁆𑀬𑀜𑁆𑀚𑀦𑀪𑀸𑀯𑁂 𑀞𑀺𑀢𑀁 𑀅𑀓𑁆𑀔𑀭𑀁, 𑀢𑀁𑀲𑀫𑀼𑀤𑀸𑀬𑁄 𑀧𑀤𑀁, 𑀧𑀤𑀁 𑀢𑀁 𑀯𑀺𑀬𑀜𑁆𑀚𑁂𑀢𑀸 𑀚𑀦𑁂𑀢𑀸 𑀯𑀺𑀬 𑀳𑁄𑀢𑀻𑀢𑀺 ‘‘𑀅𑀓𑁆𑀔𑀭𑀜𑁆𑀳𑀺 𑀧𑀤𑀁 𑀚𑀦𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀓𑁆𑀔𑀭𑀁 𑀳𑀺 𑀉𑀘𑁆𑀘𑀸𑀭𑀺𑀢𑀯𑀺𑀤𑁆𑀥𑀁𑀲𑀺𑀢𑀸𑀬 𑀢𑀁𑀢𑀁𑀔𑀡𑀫𑀢𑁆𑀢𑀸𑀯𑀝𑁆𑀞𑀸𑀬𑀻𑀧𑀺 𑀧𑀭𑀢𑁄 𑀧𑀯𑀢𑁆𑀢𑀺𑀬𑀸 𑀫𑀦𑁄𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀲𑀗𑁆𑀓𑀮𑀦𑀯𑀲𑁂𑀦 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀧𑀤𑀪𑀸𑀯𑁂𑀦 𑀕𑀬𑁆𑀳𑀫𑀸𑀦𑀁 𑀬𑀣𑀸𑀲𑀗𑁆𑀓𑁂𑀢𑀫𑀢𑁆𑀣𑀁 𑀩𑁆𑀬𑀜𑁆𑀚𑁂𑀢𑀺. 𑀧𑀤𑀁 𑀕𑀸𑀣𑀁 𑀚𑀦𑁂𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀕𑀸𑀣𑀸 𑀅𑀢𑁆𑀣𑀁 𑀧𑀓𑀸𑀲𑁂𑀢𑀻𑀢𑀺 𑀕𑀸𑀣𑀸𑀲𑀜𑁆𑀜𑀺𑀢𑁄 𑀧𑀤𑀲𑀫𑀼𑀤𑀸𑀬𑁄 𑀓𑀺𑀭𑀺𑀬𑀸𑀓𑀸𑀭𑀓𑀲𑀫𑁆𑀩𑀦𑁆𑀥𑀯𑀲𑁂𑀦 𑀲𑀫𑁆𑀩𑀦𑁆𑀥𑀺𑀢𑁄 𑀓𑀢𑁆𑀢𑀼𑀅𑀥𑀺𑀧𑁆𑀧𑀸𑀬𑀸𑀦𑀼𑀭𑀽𑀧𑀁 𑀆𑀮𑁄𑀘𑀺𑀢𑀯𑀺𑀮𑁄𑀘𑀺𑀢𑀁 𑀲𑀁𑀳𑀺𑀢𑀁 𑀅𑀢𑁆𑀣𑀁 𑀯𑀺𑀪𑀸𑀯𑁂𑀢𑀺. 𑀲𑀫𑀼𑀤𑁆𑀤𑀸𑀤𑀺𑀧𑀡𑁆𑀡𑀢𑁆𑀢𑀺𑀦𑀺𑀲𑁆𑀲𑀺𑀢𑀸 𑀯𑁄𑀳𑀸𑀭𑀲𑀦𑁆𑀦𑀺𑀲𑁆𑀲𑀬𑁂𑀦𑁂𑀯 ¶ 𑀧𑀯𑀢𑁆𑀢𑀢𑀻𑀢𑀺 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀕𑀸𑀣𑀸 𑀆𑀭𑀪𑀦𑁆𑀢𑁄’’𑀢𑀺𑀆𑀤𑀺. 𑀆𑀲𑀬𑁄𑀢𑀺 𑀅𑀯𑀲𑁆𑀲𑀬𑁄𑀢𑀺 𑀆𑀳 ‘‘𑀧𑀢𑀺𑀝𑁆𑀞𑀸’’𑀢𑀺 𑀓𑀯𑀺𑀢𑁄𑀢𑀺 𑀯𑀺𑀘𑀺𑀢𑁆𑀢𑀓𑀣𑀻𑀆𑀤𑀺𑀢𑁄.

𑀓𑀯𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀚𑀭𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀤𑁆𑀥𑀯𑀕𑁆𑀕𑁄

𑁧. 𑀦𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁧. 𑀦𑀸𑀫𑀦𑁆𑀢𑀺 ¶ 𑀲𑀸𑀫𑀜𑁆𑀜𑀦𑀸𑀫𑀸𑀤𑀺𑀪𑁂𑀤𑀁 𑀦𑀸𑀫𑀁. 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑀁 𑀧𑀜𑁆𑀜𑀢𑁆𑀢𑀺𑀧𑀣𑀁 𑀲𑀩𑁆𑀩𑀁 𑀜𑁂𑀬𑁆𑀬𑀧𑀯𑀢𑁆𑀢𑀺𑀧𑀣𑀁. 𑀅𑀤𑁆𑀥𑀪𑀯𑀻𑀢𑀺 𑀓𑀸𑀫𑀁 𑀧𑀸𑀴𑀺𑀬𑀁 𑀅𑀢𑀻𑀢𑀓𑀸𑀮𑀦𑀺𑀤𑁆𑀤𑁂𑀲𑁄 𑀓𑀢𑁄, 𑀢𑀁 𑀧𑀦 𑀮𑀓𑁆𑀔𑀡𑀫𑀢𑁆𑀢𑀁. 𑀅𑀪𑀺𑀪𑀯𑀢𑀺 𑀅𑀦𑀼𑀧𑀢𑀢𑀻𑀢𑀺 𑀏𑀢𑁂𑀦 𑀅𑀪𑀺𑀪𑀯𑁄 𑀅𑀦𑀼𑀧𑀢𑀦𑀁 𑀧𑀯𑀢𑁆𑀢𑀺 𑀏𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀁 𑀧𑀦𑀲𑁆𑀲 𑀅𑀪𑀺𑀪𑀯𑀦𑀁 𑀅𑀧𑁆𑀧𑀯𑀺𑀲𑀬𑁂 𑀅𑀦𑀸𑀫𑀲𑀺𑀢𑁆𑀯𑀸 𑀫𑀳𑀸𑀯𑀺𑀲𑀬𑀸𑀦𑀁 𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀑𑀧𑀧𑀸𑀢𑀺𑀓𑁂𑀦 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲 𑀦𑀸𑀫𑀁 𑀳𑁄𑀢𑀻𑀢𑀺 𑀢𑀲𑁆𑀲 𑀭𑀼𑀓𑁆𑀔𑀧𑀸𑀲𑀸𑀡𑀸𑀤𑀺𑀓𑀲𑁆𑀲 𑀅𑀦𑀸𑀫𑀓𑁄𑀇𑀘𑁆𑀘𑁂𑀯 𑀲𑀫𑀜𑁆𑀜𑀸 𑀳𑁄𑀢𑀺, 𑀢𑀣𑀸 𑀦𑀁 𑀲𑀜𑁆𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀦𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀘𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁨. 𑀬𑁂 𑀘𑀺𑀢𑁆𑀢𑀲𑁆𑀲 𑀯𑀲𑀁 𑀕𑀘𑁆𑀙𑀦𑁆𑀢𑀻𑀢𑀺 𑀬𑁂 𑀅𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀸, 𑀢𑁂𑀲𑀁𑀬𑁂𑀯. 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀦𑁆𑀢𑀺 𑀅𑀦𑀯𑀲𑁂𑀲𑀕𑁆𑀕𑀳𑀡𑀁. 𑀦 𑀳𑀺 𑀧𑀭𑀺𑀜𑁆𑀜𑀸𑀢𑀓𑁆𑀔𑀦𑁆𑀥𑀸 𑀧𑀳𑀻𑀦𑀓𑀺𑀮𑁂𑀲𑀸 𑀘𑀺𑀢𑁆𑀢𑀲𑁆𑀲 𑀯𑀲𑀁 𑀕𑀘𑁆𑀙𑀦𑁆𑀢𑀺, 𑀢𑀁 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀦𑁆𑀢𑀺.

𑀘𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀡𑁆𑀳𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁩. 𑀢𑀢𑀺𑀬𑁂 ¶ ‘‘𑀲𑀩𑁆𑀩𑁂𑀯 𑀯𑀲𑀫𑀦𑁆𑀯𑀕𑀽’’𑀢𑀺 𑀬𑁂 𑀢𑀡𑁆𑀳𑀸𑀬 𑀯𑀲𑀁 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀏𑀯 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀦𑁆𑀢𑀺 𑀇𑀫𑀫𑀢𑁆𑀣𑀁 ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸 𑀅𑀢𑀺𑀤𑀺𑀲𑁆𑀲𑀢𑀺.

𑀢𑀡𑁆𑀳𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀁𑀬𑁄𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁪. 𑀓𑀺𑀁 ¶ 𑀲𑀼 𑀲𑀁𑀬𑁄𑀚𑀦𑁄𑀢𑀺 𑀲𑀽𑀢𑀺 𑀦𑀺𑀧𑀸𑀢𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀓𑀺𑀁-𑀲𑀁𑀬𑁄𑀚𑀦𑁄’’𑀢𑀺? 𑀯𑀺𑀘𑀭𑀦𑁆𑀢𑀺 𑀏𑀢𑁂𑀳𑀻𑀢𑀺 𑀯𑀺𑀘𑀸𑀭𑀡𑀸, 𑀧𑀸𑀤𑀸. 𑀩𑀳𑀼𑀯𑀘𑀦𑁂 𑀳𑀺 𑀯𑀢𑁆𑀢𑀩𑁆𑀩𑁂 𑀏𑀓𑀯𑀘𑀦𑀁 𑀓𑀢𑀁. 𑀢𑀲𑁆𑀲𑀸𑀢𑀺 𑀮𑁄𑀓𑀲𑁆𑀲.

𑀲𑀁𑀬𑁄𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀩𑀦𑁆𑀥𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁫. 𑀘𑀢𑀼𑀢𑁆𑀣𑁂 𑀆𑀕𑀢𑀅𑀢𑁆𑀣𑁄 𑀏𑀯 𑀅𑀦𑀦𑁆𑀢𑀭𑁂𑀧𑀺 𑀯𑀼𑀢𑁆𑀢𑁄, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀦𑁆𑀢𑀺 𑀆𑀳 ‘‘𑀧𑀜𑁆𑀘𑀫𑁂𑀧𑀺 𑀏𑀲𑁂𑀯 𑀦𑀬𑁄’’𑀢𑀺.

𑀩𑀦𑁆𑀥𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀢𑁆𑀢𑀳𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁬. ‘‘𑀓𑁂𑀦𑀲𑁆𑀲𑀼𑀩𑁆𑀪𑀸𑀳𑀢𑁄’’𑀢𑀺 𑀧𑀸𑀞𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀲𑀼-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢’’𑀦𑁆𑀢𑀺 𑀆𑀳, ‘‘𑀓𑁂𑀦𑀲𑁆𑀲𑀩𑁆𑀪𑀸𑀳𑀢𑁄’’𑀢𑀺 𑀧𑀦 𑀧𑀸𑀞𑁂 𑀉-𑀓𑀸𑀭𑀮𑁄𑀧𑁂𑀦 𑀧𑀤𑀲𑀦𑁆𑀥𑀺. 𑀇𑀘𑁆𑀙𑀸𑀥𑀽𑀧𑀸𑀬𑀺𑀢𑁄𑀢𑀺 𑀅𑀲𑀫𑁆𑀧𑀢𑁆𑀢𑀯𑀺𑀲𑀬𑀺𑀘𑁆𑀙𑀸𑀮𑀓𑁆𑀔𑀡𑀸𑀬 𑀢𑀡𑁆𑀳𑀸𑀬 𑀲𑀦𑁆𑀢𑀸𑀧𑀺𑀢𑁄 𑀤𑀟𑁆𑀠𑁄. 𑀢𑁂𑀦𑀸𑀳 ‘‘𑀇𑀘𑁆𑀙𑀸𑀬 𑀆𑀤𑀺𑀢𑁆𑀢𑁄’’𑀢𑀺.

𑀅𑀢𑁆𑀢𑀳𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀉𑀟𑁆𑀟𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁭. 𑀉𑀮𑁆𑀮𑀗𑁆𑀖𑀺𑀢𑁄𑀢𑀺 𑀉𑀩𑁆𑀩𑀦𑁆𑀥𑀺𑀢𑁆𑀯𑀸 𑀮𑀗𑁆𑀖𑀺𑀢𑁄. 𑀲𑀤𑁆𑀤𑀸𑀤𑀻𑀲𑀽𑀢𑀺 𑀲𑀤𑁆𑀤𑀸𑀤𑀺𑀦𑀸𑀕𑀤𑀦𑁆𑀢𑁂𑀲𑀼 𑀲𑁄𑀢𑀸𑀤𑀻𑀦𑀺 𑀉𑀟𑁆𑀟𑀺𑀢𑀸𑀦𑀺 𑀢𑀡𑁆𑀳𑀸𑀭𑀚𑁆𑀚𑀼𑀦𑀸 𑀤𑀴𑁆𑀳𑀩𑀦𑁆𑀥𑀦𑁂𑀦 𑀩𑀤𑁆𑀥𑀢𑁆𑀢𑀸 𑀢𑀤𑀦𑀢𑀺𑀯𑀢𑁆𑀢𑀦𑀢𑁄. 𑀮𑁄𑀓𑁄𑀢𑀺 𑀆𑀬𑀢𑀦𑀮𑁄𑀓𑁄. 𑀢𑀣𑀸 𑀅𑀢𑁆𑀣𑀬𑁄𑀚𑀦𑀸𑀬 𑀓𑀢𑀢𑁆𑀢𑀸 𑀔𑀦𑁆𑀥𑀸𑀤𑀺𑀮𑁄𑀓𑀯𑀲𑁂𑀦𑀧𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀦 𑀤𑀽𑀭𑀁 ¶ 𑀅𑀦𑀦𑁆𑀢𑀭𑀪𑀯𑀓𑀢𑁆𑀢𑀸. 𑀘𑀼𑀢𑀺𑀘𑀺𑀢𑁆𑀢𑀅𑀦𑁆𑀢𑀭𑀺𑀢𑀢𑁆𑀢𑀸 ¶ 𑀏𑀓𑀘𑀺𑀢𑁆𑀢𑀦𑁆𑀢𑀭𑀪𑀯𑀲𑁆𑀲 𑀓𑀫𑁆𑀫𑀲𑁆𑀲 𑀅𑀩𑀼𑀚𑁆𑀛𑀦𑀁, 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 𑀲𑀢𑁆𑀢𑀸 𑀦 𑀩𑀼𑀚𑁆𑀛𑀦𑁆𑀢𑀻𑀢𑀺 𑀆𑀳 ‘‘𑀩𑀮𑀯𑀢𑀺𑀬𑀸’’𑀢𑀺𑀆𑀤𑀺.

𑀉𑀟𑁆𑀟𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀧𑀺𑀳𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁮. 𑀧𑀜𑁆𑀳𑁄𑀢𑀺 𑀜𑀸𑀢𑀼𑀁 𑀇𑀘𑁆𑀙𑀺𑀢𑁄 𑀅𑀢𑁆𑀣𑁄. 𑀧𑀼𑀘𑁆𑀙𑀺𑀢𑁄𑀢𑀺 𑀲𑀢𑁆𑀢𑀫𑀲𑀼𑀢𑁆𑀢𑁂 𑀕𑀸𑀣𑀸𑀬 𑀧𑀼𑀭𑀺𑀫𑀤𑁆𑀥𑀁 𑀧𑀘𑁆𑀙𑀺𑀫𑀤𑁆𑀥𑀁, 𑀧𑀘𑁆𑀙𑀺𑀫𑀁 𑀧𑀼𑀭𑀺𑀫𑀁 𑀓𑀢𑁆𑀯𑀸 𑀅𑀝𑁆𑀞𑀫𑀲𑀼𑀢𑁆𑀢𑁂 𑀤𑁂𑀯𑀢𑀸𑀬 𑀧𑀼𑀘𑁆𑀙𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀳𑁂𑀝𑁆𑀞𑀼𑀧𑀭𑀺𑀬𑀸𑀬𑀯𑀲𑁂𑀦 𑀧𑀼𑀘𑁆𑀙𑀺𑀢𑁄’’𑀢𑀺. 𑀧𑀼𑀘𑁆𑀙𑀸𑀦𑀼𑀭𑀽𑀧𑀁 𑀯𑀺𑀲𑁆𑀲𑀚𑁆𑀚𑀦𑀦𑁆𑀢𑀺 𑀅𑀯𑀼𑀢𑁆𑀢𑀫𑁆𑀧𑀺 𑀲𑀺𑀤𑁆𑀥𑀫𑁂𑀢𑀦𑁆𑀢𑀺 𑀅𑀦𑀸𑀳𑀝𑀁.

𑀧𑀺𑀳𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀇𑀘𑁆𑀙𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁯. 𑀦𑀯𑀫𑁂 𑀯𑀺𑀦𑀬𑀸𑀬𑀸𑀢𑀺 𑀯𑀺𑀦𑀬𑁂𑀦. 𑀓𑀭𑀡𑀢𑁆𑀣𑁂 𑀳𑀺 𑀇𑀤𑀁 𑀲𑀫𑁆𑀧𑀤𑀸𑀦𑀯𑀘𑀦𑀁. 𑀓𑀺𑀲𑁆𑀲𑀲𑁆𑀲𑀽𑀢𑀺 𑀓𑀺𑀲𑁆𑀲, 𑀲𑀼-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀲𑀩𑁆𑀩𑀁 𑀙𑀺𑀦𑁆𑀤𑀢𑀺 𑀩𑀦𑁆𑀥𑀦𑀦𑁆𑀢𑀺 𑀲𑀩𑁆𑀩𑀁 𑀤𑀲𑀯𑀺𑀥𑀫𑁆𑀧𑀺 𑀲𑀁𑀬𑁄𑀚𑀦𑀁 𑀲𑀫𑀼𑀘𑁆𑀙𑀺𑀦𑁆𑀤𑀢𑀺. 𑀦 𑀳𑀺 𑀢𑀁 𑀓𑀺𑀜𑁆𑀘𑀺 𑀓𑀺𑀮𑁂𑀲𑀩𑀦𑁆𑀥𑀦𑀁 𑀅𑀢𑁆𑀣𑀺, 𑀬𑀁 𑀅𑀲𑀫𑀼𑀘𑁆𑀙𑀺𑀦𑁆𑀦𑀁 𑀳𑀼𑀢𑁆𑀯𑀸 𑀞𑀺𑀢𑀁 𑀅𑀲𑁆𑀲𑀸 𑀢𑀡𑁆𑀳𑀸𑀬 𑀲𑀫𑀼𑀘𑁆𑀙𑀺𑀦𑁆𑀦𑀸𑀬. 𑀲𑁆𑀯𑀸𑀬𑀫𑀢𑁆𑀣𑁄 𑀲𑀼𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀆𑀳 ‘‘𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯𑀸’’𑀢𑀺.

𑀇𑀘𑁆𑀙𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁦. 𑀓𑀺𑀲𑁆𑀫𑀺𑀦𑁆𑀢𑀺 𑀓𑀺𑀲𑁆𑀫𑀺𑀁 𑀲𑀢𑀺? 𑀢𑀲𑁆𑀲 𑀧𑀦 𑀲𑀦𑁆𑀢𑀪𑀸𑀯𑁄 𑀉𑀧𑁆𑀧𑀢𑁆𑀢𑀺𑀯𑀲𑁂𑀦𑁂𑀯𑀸𑀢𑀺 𑀆𑀳 ‘‘𑀓𑀺𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂’’𑀢𑀺? 𑀮𑁄𑀓𑁄 𑀉𑀧𑁆𑀧𑀦𑁆𑀦𑁄𑀢𑀺 𑀯𑀼𑀘𑁆𑀘𑀢𑀺 𑀅𑀦𑀼𑀧𑀸𑀤𑀸𑀦𑀢𑁆𑀢𑀸 𑀮𑁄𑀓𑀲𑀫𑀜𑁆𑀜𑀸𑀬. 𑀙𑀲𑀽𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄 𑀲𑀦𑁆𑀣𑀯𑀦𑁆𑀢𑀺 𑀅𑀥𑀺𑀓𑀲𑀺𑀦𑁂𑀳𑀁 ¶ 𑀓𑀭𑁄𑀢𑀺 𑀅𑀥𑀺𑀓𑀲𑀺𑀦𑁂𑀳𑀯𑀢𑁆𑀣𑀼𑀪𑀸𑀯𑀢𑁄 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀦𑀁. 𑀉𑀧𑀸𑀤𑀸𑀬𑀸𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸 𑀅𑀧𑀭𑀓𑀸𑀮𑀓𑀺𑀭𑀺𑀬𑀁 𑀅𑀧𑁂𑀓𑁆𑀔𑀢𑀻𑀢𑀺 𑀯𑀘𑀦𑀲𑁂𑀲𑀯𑀲𑁂𑀦 𑀓𑀺𑀭𑀺𑀬𑀸𑀧𑀤𑀁 𑀕𑀳𑀺𑀢𑀁 ‘‘𑀧𑀯𑀢𑁆𑀢𑀢𑀻’’𑀢𑀺. 𑀓𑀺𑀁 𑀧𑀦 𑀧𑀯𑀢𑁆𑀢𑀢𑀺? 𑀮𑁄𑀓𑁄, 𑀮𑁄𑀓𑀲𑀫𑀜𑁆𑀜𑀸𑀢𑀺 𑀅𑀢𑁆𑀣𑁄. 𑀙𑀲𑀽𑀢𑀺 𑀇𑀤𑀁 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁. 𑀙𑀴𑀸𑀬𑀢𑀦𑀦𑀺𑀫𑀺𑀢𑁆𑀢𑀜𑁆𑀳𑀺 𑀲𑀩𑁆𑀩𑀤𑀼𑀓𑁆𑀔𑀁. 𑀅𑀬𑀦𑁆𑀢𑀺 𑀲𑀢𑁆𑀢𑀮𑁄𑀓𑁄. 𑀉𑀧𑁆𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺 𑀙𑀴𑀸𑀬𑀢𑀦𑀁 𑀦𑀸𑀫 𑀫𑀽𑀮𑀁 𑀲𑀩𑁆𑀩𑀤𑀼𑀓𑁆𑀔𑀸𑀦𑀦𑁆𑀢𑀺 𑀓𑀢𑁆𑀯𑀸. 𑀩𑀸𑀳𑀺𑀭𑁂𑀲𑀼 𑀆𑀬𑀢𑀦𑁂𑀲𑀼 𑀲𑀦𑁆𑀣𑀯𑀁 𑀓𑀭𑁄𑀢𑀺 𑀯𑀺𑀲𑁂𑀲𑀢𑁄 𑀭𑀽𑀧𑀸𑀤𑀻𑀦𑀁 𑀢𑀡𑁆𑀳𑀸𑀯𑀢𑁆𑀣𑀼𑀓𑀢𑁆𑀢𑀸. 𑀬𑀲𑁆𑀫𑀸 𑀘𑀓𑁆𑀔𑀸𑀤𑀻𑀦𑀁 𑀲𑀦𑁆𑀢𑀧𑁆𑀧𑀦𑀯𑀲𑁂𑀦 ¶ 𑀭𑀽𑀧𑀸𑀤𑀻𑀦𑀁 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀮𑁄𑀓𑀲𑁆𑀲 𑀦𑀺𑀲𑁂𑀯𑀺𑀢𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀙𑀦𑁆𑀦𑀁…𑀧𑁂… 𑀯𑀺𑀳𑀜𑁆𑀜𑀢𑀻’’𑀢𑀺.

𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀤𑁆𑀥𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀙𑁂𑀢𑁆𑀯𑀸𑀯𑀕𑁆𑀕𑁄

𑁧. 𑀙𑁂𑀢𑁆𑀯𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁧. 𑀯𑀥𑀺𑀢𑁆𑀯𑀸𑀢𑀺 𑀳𑀦𑁆𑀢𑁆𑀯𑀸 𑀯𑀺𑀦𑀸𑀲𑁂𑀢𑁆𑀯𑀸. 𑀅𑀧𑀭𑀺𑀤𑀬𑁆𑀳𑀫𑀸𑀦𑀢𑁆𑀢𑀸𑀢𑀺 𑀅𑀧𑀻𑀴𑀺𑀬𑀫𑀸𑀦𑀢𑁆𑀢𑀸. 𑀯𑀺𑀦𑀝𑁆𑀞𑀤𑁄𑀫𑀦𑀲𑁆𑀲𑀢𑁆𑀢𑀸 𑀦 𑀲𑁄𑀘𑀢𑀺 𑀘𑁂𑀢𑁄𑀤𑀼𑀓𑁆𑀔𑀤𑀼𑀓𑁆𑀔𑀸𑀪𑀸𑀯𑀢𑁄. 𑀯𑀺𑀲𑀁 𑀦𑀸𑀫 𑀤𑀼𑀓𑁆𑀔𑀁 𑀅𑀦𑀺𑀝𑁆𑀞𑀪𑀸𑀯𑀢𑁄, 𑀢𑀲𑁆𑀲 𑀫𑀽𑀮𑀓𑀸𑀭𑀡𑀁 𑀓𑁄𑀥𑁄 𑀅𑀦𑀺𑀝𑁆𑀞𑀨𑀮𑀢𑁆𑀢𑀸𑀢𑀺 𑀆𑀳 ‘‘𑀯𑀺𑀲𑀫𑀽𑀮𑀲𑁆𑀲𑀸𑀢𑀺 𑀤𑀼𑀓𑁆𑀔𑀯𑀺𑀧𑀸𑀓𑀲𑁆𑀲𑀸’’𑀢𑀺. 𑀅𑀓𑁆𑀓𑀼𑀝𑁆𑀞𑀲𑁆𑀲𑀸𑀢𑀺 𑀅𑀓𑁆𑀓𑁄𑀲𑀸𑀧𑀭𑀸𑀥𑀲𑁆𑀲. 𑀅𑀓𑁆𑀓𑁄𑀲𑀧𑀳𑀸𑀭𑀢𑁆𑀣𑀲𑀫𑁆𑀩𑀦𑁆𑀥𑁂𑀦 𑀳𑀺 ‘‘𑀓𑀼𑀤𑁆𑀥𑀲𑁆𑀲𑀸’’𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀫𑁆𑀧𑀤𑀸𑀦𑀯𑀘𑀦𑀁. 𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺 𑀓𑁄𑀥𑀁 𑀦𑀲𑁆𑀲𑀢𑀺. 𑀲𑀼𑀔𑀼𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀏𑀲 𑀓𑁄𑀥𑁄 ‘‘𑀫𑀥𑀼𑀭𑀕𑁆𑀕𑁄’’𑀢𑀺 𑀯𑀼𑀢𑁆𑀢𑁄, 𑀲𑀼𑀔𑀸𑀯𑀲𑀸𑀦𑁄𑀢𑀺 𑀅𑀢𑁆𑀣𑁄.

𑀙𑁂𑀢𑁆𑀯𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀭𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁨. 𑀧𑀜𑁆𑀜𑀸𑀡𑀦𑁆𑀢𑀺 𑀮𑀓𑁆𑀔𑀡𑀁 𑀲𑀮𑁆𑀮𑀓𑁆𑀔𑀡𑀽𑀧𑀸𑀬𑁄. 𑀤𑀺𑀲𑁆𑀯𑀸𑀢𑀺 𑀤𑀲𑁆𑀲𑀦𑀳𑁂𑀢𑀼. ‘‘𑀘𑁄𑀴𑀭𑀜𑁆𑀜𑁄 𑀭𑀝𑁆𑀞𑀁 𑀘𑁄𑀴𑀭𑀝𑁆𑀞’’𑀦𑁆𑀢𑀺 𑀏𑀯𑀁 𑀭𑀝𑁆𑀞𑀁 𑀭𑀜𑁆𑀜𑀸 𑀧𑀜𑁆𑀜𑀸𑀬𑀢𑀺.

𑀭𑀣𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀯𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁩. 𑀲𑀤𑁆𑀥𑀸𑀬𑀸𑀢𑀺 ¶ 𑀲𑀤𑁆𑀥𑀸𑀳𑁂𑀢𑀼. 𑀓𑀼𑀮𑀲𑀫𑁆𑀧𑀤𑀸𑀢𑀺 𑀔𑀢𑁆𑀢𑀺𑀬𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑁄. 𑀲𑀩𑁆𑀩𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀺𑀢𑁆𑀢𑀧𑀝𑀺𑀮𑀸𑀪𑀳𑁂𑀢𑀼𑀢𑁄 𑀲𑀤𑁆𑀥𑀸𑀯𑀺𑀢𑁆𑀢𑀫𑁂𑀯. 𑀳𑁂𑀝𑁆𑀞𑀸 𑀢𑀺𑀡𑁆𑀡𑀁 𑀤𑁆𑀯𑀸𑀭𑀸𑀦𑀁 𑀯𑀲𑁂𑀦 𑀉𑀧𑁆𑀧𑀦𑁆𑀦𑀓𑀲𑁆𑀲 𑀲𑀩𑁆𑀩𑀲𑁆𑀲𑀧𑀺 𑀅𑀦𑀯𑀚𑁆𑀚𑀥𑀫𑁆𑀫𑀲𑁆𑀲 𑀲𑀗𑁆𑀕𑀡𑁆𑀳𑀦𑀢𑁄 ‘‘𑀥𑀫𑁆𑀫𑁄𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑁄’’𑀢𑀺 𑀯𑀼𑀢𑁆𑀢𑀁. 𑀅𑀲𑀁𑀓𑀺𑀮𑀺𑀝𑁆𑀞𑀲𑀼𑀔𑀦𑁆𑀢𑀺. 𑀦𑀺𑀭𑀸𑀫𑀺𑀲𑀁 ¶ 𑀲𑀼𑀔𑀁. 𑀢𑀫𑁂𑀯 𑀲𑀸𑀫𑀺𑀲𑀁 𑀉𑀧𑀦𑀺𑀥𑀸𑀬 𑀲𑀫𑁆𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀅𑀲𑀁𑀓𑀺𑀮𑀺𑀝𑁆𑀞’’𑀦𑁆𑀢𑀺. 𑀅𑀲𑁂𑀘𑀦𑀓𑀪𑀸𑀯𑁂𑀦 𑀅𑀪𑀺𑀭𑀼𑀘𑀺𑀚𑀦𑀦𑀢𑁄 𑀧𑀺𑀬𑀸𑀓𑀺𑀘𑁆𑀙𑀓𑀭𑀡𑀢𑁄 𑀩𑀳𑀼𑀁 𑀲𑀼𑀘𑀺𑀭𑀫𑁆𑀧𑀺 𑀓𑀸𑀮𑀁 𑀆𑀲𑁂𑀯𑀦𑁆𑀢𑀲𑁆𑀲 𑀅𑀤𑁄𑀲𑀸𑀯𑀳𑀢𑁄 𑀲𑀘𑁆𑀘𑀫𑁂𑀯 𑀫𑀥𑀼𑀭𑀢𑀭𑀁. 𑀦 𑀳𑀺 𑀢𑀁 𑀧𑀺𑀯𑀺𑀢𑀩𑁆𑀩𑀢𑁄 𑀲𑀸𑀤𑀺𑀢𑀩𑁆𑀩𑀢𑁄 𑀅𑀦𑀼𑀪𑀯𑀺𑀢𑀩𑁆𑀩𑀢𑁄 𑀭𑀲𑁄𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺. 𑀇𑀤𑀸𑀦𑀺 𑀢𑀲𑁆𑀲 𑀓𑀺𑀘𑁆𑀘𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑁂𑀳𑀺𑀧𑀺 𑀫𑀳𑀸𑀭𑀳𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁆𑀘𑀲𑁆𑀫𑀺𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀤𑀻𑀦𑀺𑀯𑀢𑁆𑀢𑀦𑀁 𑀫𑀳𑀸𑀓𑀧𑁆𑀧𑀺𑀦𑀯𑀢𑁆𑀣𑀼𑀆𑀤𑀻𑀳𑀺 (𑀥. 𑀧. 𑀅𑀝𑁆𑀞. 𑁧.𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑀯𑀢𑁆𑀣𑀼; 𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁩𑁧; 𑀣𑁂𑀭𑀕𑀸. 𑀅𑀝𑁆𑀞. 𑁨.𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸) 𑀤𑀻𑀧𑁂𑀢𑀩𑁆𑀩𑀁, 𑀇𑀢𑀭𑀸𑀦𑀺 𑀓𑀡𑁆𑀳𑀤𑀻𑀧𑀸𑀬𑀦𑀚𑀸𑀢𑀓- (𑀚𑀸. 𑁧.𑁧𑁦.𑁬𑁨 𑀆𑀤𑀬𑁄) 𑀲𑀼𑀢𑀲𑁄𑀫- (𑀚𑀸. 𑁨.𑁨𑁧.𑁩𑁭𑁧 𑀆𑀤𑀬𑁄) 𑀫𑀘𑁆𑀙𑀚𑀸𑀢𑀓𑁂𑀳𑀺 (𑀚𑀸. 𑁧.𑁧.𑁩𑁪, 𑁭𑁫; 𑁧.𑁨.𑁧𑁩𑁧 𑀆𑀤𑀬𑁄) 𑀤𑀻𑀧𑁂𑀢𑀩𑁆𑀩𑀸𑀦𑀺. 𑀦𑀺𑀫𑁆𑀫𑀤𑁆𑀤𑁂𑀦𑁆𑀢𑀺 𑀅𑀪𑀺𑀪𑀯𑀦𑁆𑀢𑀺. 𑀫𑀥𑀼𑀭𑀢𑀭𑀦𑁆𑀢𑀺 𑀲𑀼𑀦𑁆𑀤𑀭𑀢𑀭𑀁 𑀲𑁂𑀝𑁆𑀞𑁂𑀲𑀽𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀸𑀚𑀻𑀯𑀻𑀢𑀺 𑀧𑀜𑁆𑀜𑀸𑀬 𑀚𑀻𑀯𑀦𑀲𑀻𑀮𑁄𑀢𑀺 𑀧𑀜𑁆𑀜𑀸𑀚𑀻𑀯𑀻, 𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀘𑀭𑀺𑀬𑁄𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀸𑀚𑀻𑀯𑀻𑀢𑀺 𑀘 𑀧𑀜𑁆𑀜𑀸𑀯𑀲𑁂𑀦 𑀇𑀭𑀺𑀬𑀢𑀺 𑀯𑀢𑁆𑀢𑀢𑀺 𑀚𑀻𑀯𑀺𑀢𑀁 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀧𑀜𑁆𑀜𑀸𑀚𑀻𑀯𑀻’’𑀢𑀺𑀆𑀤𑀺𑀫𑀸𑀳. ‘‘𑀚𑀻𑀯𑀢’’𑀦𑁆𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺, 𑀚𑀻𑀯𑀦𑁆𑀢𑀸𑀦𑀁 𑀧𑀜𑁆𑀜𑀸𑀚𑀻𑀯𑀺𑀁 𑀲𑁂𑀝𑁆𑀞𑀫𑀸𑀳𑀽𑀢𑀺 𑀅𑀢𑁆𑀣𑁄.

𑀯𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀯𑀼𑀝𑁆𑀞𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁪. 𑀉𑀧𑁆𑀧𑀢𑀦𑁆𑀢𑀸𑀦𑀦𑁆𑀢𑀺 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀳𑀦𑁆𑀢𑀸𑀦𑀁. ‘‘𑀲𑁂𑀝𑁆𑀞’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑀢𑁆𑀢𑀸 ‘‘𑀲𑀢𑁆𑀢𑀯𑀺𑀥’’𑀦𑁆𑀢𑀺 𑀯𑀼𑀢𑁆𑀢𑀁, 𑀇𑀢𑀭𑁂𑀲𑀁 𑀯𑀸 𑀢𑀤𑀦𑀼𑀮𑁄𑀫𑀢𑁄. 𑀔𑁂𑀫𑁄 𑀳𑁄𑀢𑀺 𑀤𑀼𑀩𑁆𑀪𑀺𑀓𑁆𑀔𑀼𑀧𑀤𑁆𑀤𑀯𑀸𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀲𑀼𑀪𑀺𑀓𑁆𑀔𑁄’’𑀢𑀺. 𑀦𑀺𑀧𑀢𑀦𑁆𑀢𑀸𑀦𑀦𑁆𑀢𑀺 𑀅𑀥𑁄𑀫𑀼𑀔𑀁 𑀧𑀯𑀢𑁆𑀢𑀦𑁆𑀢𑀸𑀦𑀁. 𑀧𑀯𑀚𑀫𑀸𑀦𑀸𑀦𑀦𑁆𑀢𑀺 𑀯𑀚𑀦𑀲𑀻𑀮𑀸𑀦𑀁. 𑀢𑁂 𑀧𑀦 𑀬𑀲𑁆𑀫𑀸 𑀚𑀗𑁆𑀕𑀫𑀸 𑀦𑀸𑀫 𑀳𑁄𑀦𑁆𑀢𑀺, 𑀦 𑀭𑀼𑀓𑁆𑀔𑀸𑀤𑀬𑁄 𑀯𑀺𑀬 𑀣𑀸𑀯𑀭𑀸, 𑀢𑀲𑁆𑀫𑀸 𑀆𑀳 ‘‘𑀚𑀗𑁆𑀕𑀫𑀸𑀦’’𑀦𑁆𑀢𑀺. 𑀕𑀸𑀯𑁄𑀢𑀺 𑀥𑁂𑀦𑀼𑀬𑁄. 𑀢𑁂𑀦 𑀫𑀳𑀺𑀁𑀲𑀸𑀤𑀺𑀓𑀸𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀯𑀤𑀦𑁆𑀢𑀸𑀦𑀦𑁆𑀢𑀺 𑀉𑀧𑁆𑀧𑀦𑁆𑀦𑀁 𑀅𑀢𑁆𑀣𑀁 𑀯𑀤𑀦𑁆𑀢𑀸𑀦𑀁.

𑀅𑀢𑁆𑀢𑀦𑁄 ¶ 𑀔𑀦𑁆𑀢𑀺𑀬𑀸𑀢𑀺 𑀅𑀢𑁆𑀢𑀦𑁄 𑀔𑀦𑁆𑀢𑀺𑀬𑀸 𑀭𑀼𑀘𑀺𑀬𑀸 𑀕𑀳𑀺𑀢𑀪𑀸𑀯𑁂𑀦. 𑀇𑀢𑀭𑀸 𑀤𑁂𑀯𑀢𑀸 𑀢𑀲𑁆𑀲𑀸 𑀯𑀺𑀲𑁆𑀲𑀚𑁆𑀚𑀦𑁂 𑀅𑀧𑀭𑀺𑀢𑀼𑀲𑁆𑀲𑀫𑀸𑀦𑀸 𑀆𑀳. 𑀬𑀸𑀯 𑀧𑀥𑀁𑀲𑀻𑀢𑀺 𑀕𑀼𑀡𑀥𑀁𑀲𑀻 𑀲𑀢𑁆𑀣𑀼𑀤𑁂𑀲𑀦𑀸𑀬 𑀮𑀤𑁆𑀥𑀩𑁆𑀩𑀕𑀼𑀡𑀦𑀸𑀲𑀦𑀢𑁄. 𑀧𑀕𑀩𑁆𑀩𑀸𑀢𑀺 𑀧𑀸𑀕𑀩𑁆𑀩𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑀸, 𑀬𑀣𑀸 𑀯𑀘𑀻𑀧𑀸𑀕𑀩𑁆𑀩𑀺𑀬𑁂𑀦 𑀅𑀔𑀭𑀸, 𑀢𑀣𑀸 𑀯𑀸𑀘𑀸𑀬 𑀪𑀯𑀺𑀢𑀩𑁆𑀩𑀁. 𑀫𑀼𑀔𑀭𑀸𑀢𑀺 𑀫𑀼𑀔𑀔𑀭𑀸. 𑀤𑀲𑀩𑀮𑀁 𑀧𑀼𑀘𑁆𑀙𑀺 𑀲𑀡𑁆𑀳𑀁 𑀲𑀼𑀔𑀼𑀫𑀁 𑀭𑀢𑀦𑀢𑁆𑀢𑀬𑀲𑀁𑀳𑀺𑀢𑀁 𑀅𑀢𑁆𑀣𑀁 𑀲𑁄𑀢𑀼𑀓𑀸𑀫𑀸. 𑀅𑀲𑁆𑀲𑀸 𑀤𑁂𑀯𑀢𑀸𑀬 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁. 𑀉𑀧𑁆𑀧𑀢𑀫𑀸𑀦𑀸𑀢𑀺 𑀉𑀧𑁆𑀧𑀢𑀦𑁆𑀢𑀻 𑀲𑀫𑀼𑀕𑁆𑀖𑀸𑀝𑁂𑀢𑀺 𑀑𑀥𑀺𑀲𑁄. 𑀯𑀝𑁆𑀝𑀫𑀽𑀮𑀓𑀫𑀳𑀸𑀅𑀯𑀺𑀚𑁆𑀚𑀸𑀢𑀺 𑀢𑀲𑁆𑀲𑀸 𑀆𑀤𑀻𑀦𑀯𑀤𑀲𑁆𑀲𑀦𑀢𑁆𑀣𑀁 𑀪𑀽𑀢𑀓𑀣𑀦𑀯𑀺𑀲𑁂𑀲𑀦𑀁. 𑀑𑀲𑀻𑀤𑀦𑁆𑀢𑀸𑀦𑀦𑁆𑀢𑀺 𑀧𑀝𑀺𑀧𑀓𑁆𑀔𑀯𑀲𑁂𑀦 𑀅𑀥𑁄 𑀲𑀻𑀤𑀦𑁆𑀢𑀸𑀦𑀁, 𑀉𑀲𑁆𑀲𑀸𑀤𑀬𑀫𑀸𑀦𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀪𑀽𑀢𑁄𑀢𑀺 𑀇𑀤𑀁 ‘‘𑀧𑀤𑀲𑀸 𑀘𑀭𑀫𑀸𑀦𑀸𑀦’’𑀦𑁆𑀢𑀺 ¶ 𑀧𑀤𑀲𑁆𑀲 𑀅𑀢𑁆𑀣𑀯𑀺𑀯𑀭𑀡𑀯𑀲𑁂𑀦 𑀪𑀽𑀢𑀓𑀣𑀦𑀯𑀺𑀲𑁂𑀲𑀦𑀁. 𑀬𑀸𑀤𑀺𑀲𑁄 𑀧𑀼𑀢𑁆𑀢𑁄 𑀯𑀸 𑀳𑁄𑀢𑀽𑀢𑀺 𑀇𑀤𑀁 𑀧𑀼𑀭𑀺𑀫𑀧𑀤𑁂 𑀤𑁂𑀯𑀢𑀸𑀬 𑀧𑀼𑀢𑁆𑀢𑀕𑀳𑀡𑀲𑁆𑀲 𑀓𑀢𑀢𑁆𑀢𑀸 𑀯𑀼𑀢𑁆𑀢𑀁.

𑀯𑀼𑀝𑁆𑀞𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀪𑀻𑀢𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁫. 𑀓𑀺𑀁 𑀲𑀽𑀥 𑀪𑀻𑀢𑀸𑀢𑀺 𑀏𑀢𑁆𑀣 𑀲𑀼-𑀇𑀥𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀓𑀺𑀁 𑀪𑀻𑀢𑀸’’𑀢𑀺? 𑀫𑀕𑁆𑀕𑁄 𑀘 𑀦𑁂𑀓𑀸𑀬𑀢𑀦𑀧𑁆𑀧𑀯𑀼𑀢𑁆𑀢𑁄𑀢𑀺 𑀅𑀦𑁂𑀓𑀓𑀸𑀭𑀡𑀁 𑀦𑀸𑀦𑀸𑀯𑀺𑀥𑀸𑀥𑀺𑀕𑀫𑁄𑀓𑀸𑀲𑀁 𑀓𑀢𑁆𑀯𑀸 𑀧𑀯𑀼𑀢𑁆𑀢𑁄 𑀓𑀣𑀺𑀢𑁄. 𑀢𑁂𑀦𑀸𑀳 ‘‘𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑀯𑀲𑁂𑀦𑀸’’𑀢𑀺𑀆𑀤𑀺. 𑀏𑀯𑀁 𑀲𑀦𑁆𑀢𑁂𑀢𑀺 𑀏𑀯𑀁 𑀲𑀩𑁆𑀩𑀲𑀸𑀥𑀸𑀭𑀡𑀸𑀦𑁂𑀓𑀸𑀬𑀢𑀦𑁂𑀳𑀺 𑀦𑀺𑀩𑁆𑀩𑀸𑀦𑀕𑀸𑀫𑀺𑀫𑀕𑁆𑀕𑀲𑁆𑀲 𑀢𑀼𑀫𑁆𑀳𑁂𑀳𑀺 𑀧𑀯𑁂𑀤𑀺𑀢𑀢𑁆𑀢𑀸 𑀮𑀩𑁆𑀪𑀫𑀸𑀦𑁂 𑀔𑁂𑀫𑁂 𑀫𑀕𑁆𑀕𑁂 𑀓𑀺𑀁 𑀪𑀻𑀢𑀸𑀬𑀁 𑀚𑀦𑀢𑀸 𑀉𑀧𑁆𑀧𑀣𑀪𑀽𑀢𑀸 𑀯𑀺𑀧𑀭𑀻𑀢𑀤𑀺𑀝𑁆𑀞𑀺𑀢𑁄 𑀕𑀡𑁆𑀳𑀻𑀢𑀺 𑀅𑀢𑁆𑀣𑁄? 𑀏𑀯𑀁 𑀤𑁂𑀯𑀢𑀸 𑀬𑀣𑀺𑀘𑁆𑀙𑀸𑀬 𑀧𑀼𑀭𑀺𑀫𑀤𑁆𑀥𑁂𑀦 𑀅𑀢𑁆𑀢𑀦𑀸 𑀬𑀣𑀸𑀘𑀺𑀦𑁆𑀢𑀺𑀢𑀫𑀢𑁆𑀣𑀁 𑀲𑀢𑁆𑀣𑀼 𑀧𑀯𑁂𑀤𑀺𑀢𑀸, 𑀧𑀘𑁆𑀙𑀺𑀫𑀤𑁆𑀥𑁂𑀦 𑀅𑀢𑁆𑀢𑀦𑁄 𑀲𑀁𑀲𑀬𑀁 𑀧𑀼𑀘𑁆𑀙𑀢𑀺. 𑀩𑀳𑀼𑀧𑀜𑁆𑀜𑀸𑀢𑀺 𑀧𑀼𑀣𑀼𑀧𑀜𑁆𑀜. 𑀉𑀲𑁆𑀲𑀦𑁆𑀦𑀧𑀜𑁆𑀜𑀸𑀢𑀺 𑀅𑀥𑀺𑀓𑀧𑀜𑁆𑀜𑀸. 𑀞𑀧𑁂𑀢𑁆𑀯𑀸𑀢𑀺 𑀲𑀁𑀬𑀫𑁂𑀢𑁆𑀯𑀸. 𑀲𑀁𑀯𑀺𑀪𑀸𑀕𑀻𑀢𑀺 𑀆𑀳𑀸𑀭𑀧𑀭𑀺𑀪𑁄𑀕𑁂 𑀲𑀫𑁆𑀫𑀤𑁂𑀯 𑀯𑀺𑀪𑀚𑀦𑀲𑀻𑀮𑁄. 𑀢𑁂𑀦𑀸𑀳 ‘‘𑀅𑀘𑁆𑀙𑀭𑀸𑀬𑀸’’𑀢𑀺𑀆𑀤𑀺. 𑀯𑀼𑀢𑁆𑀢𑀢𑁆𑀣𑀫𑁂𑀯 𑀳𑁂𑀝𑁆𑀞𑀸.

𑀫𑀦𑁂𑀦𑀸𑀢𑀺 𑀫𑀦𑁄𑀕𑀳𑀡𑁂𑀦. 𑀧𑀼𑀩𑁆𑀩𑀲𑀼𑀤𑁆𑀥𑀺𑀅𑀗𑁆𑀕𑀦𑁆𑀢𑀺 𑀧𑀼𑀩𑁆𑀩𑀪𑀸𑀕𑀲𑀼𑀤𑁆𑀥𑀺𑀪𑀽𑀢𑀁 𑀅𑀗𑁆𑀕𑀁. 𑀘𑀢𑀽𑀲𑀽𑀢𑀺 𑀯𑀼𑀢𑁆𑀢𑀅𑀗𑁆𑀕𑀧𑀭𑀺𑀬𑀸𑀧𑀦𑁆𑀦𑀁. 𑀬𑀜𑁆𑀜𑀉𑀧𑀓𑁆𑀔𑀭𑁄𑀢𑀺 𑀤𑀸𑀦𑀲𑁆𑀲 𑀲𑀸𑀥𑀦𑀁. 𑀏𑀢𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 ¶ 𑀏𑀢𑁂𑀲𑀼 𑀲𑀤𑁆𑀥𑀸𑀤𑀺𑀕𑀼𑀡𑁂𑀲𑀼. 𑀬𑀣𑀸 𑀳𑀺 𑀲𑀤𑁆𑀥𑁄 𑀧𑀘𑁆𑀘𑀬𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄 𑀓𑀫𑁆𑀫𑀨𑀮𑀲𑁆𑀲 𑀧𑀭𑀮𑁄𑀓𑀲𑁆𑀲 𑀘 𑀧𑀘𑁆𑀘𑀓𑁆𑀔𑀢𑁄 𑀯𑀺𑀬 𑀧𑀢𑁆𑀢𑀺𑀬𑀸𑀬𑀦𑀢𑁄, 𑀏𑀯𑀁 𑀫𑀼𑀤𑀼𑀳𑀤𑀬𑁄. 𑀫𑀼𑀤𑀼𑀳𑀤𑀬𑁄 𑀳𑀺 𑀅𑀦𑀼𑀤𑀬𑀁 𑀧𑀢𑁆𑀯𑀸 𑀬𑀁 𑀓𑀺𑀜𑁆𑀘𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀧𑀭𑁂𑀲𑀁 𑀤𑁂𑀢𑀺. 𑀬𑁄 𑀘 𑀲𑀁𑀯𑀺𑀪𑀸𑀕𑀲𑀻𑀮𑁄, 𑀲𑁄 𑀅𑀧𑁆𑀧𑀓𑀲𑁆𑀫𑀺𑀫𑁆𑀧𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂 𑀧𑀭𑁂𑀳𑀺 𑀲𑀸𑀥𑀸𑀭𑀡𑀪𑁄𑀕𑀻 𑀳𑁄𑀢𑀺. 𑀯𑀤𑀜𑁆𑀜𑀽 𑀯𑀤𑀸𑀦𑀺𑀬𑀢𑀸𑀬 𑀬𑀸𑀕𑀺𑀦𑁄𑀯 𑀬𑀼𑀢𑁆𑀢𑀁 𑀬𑀼𑀢𑁆𑀢𑀓𑀸𑀮𑀁 𑀜𑀢𑁆𑀯𑀸 𑀅𑀢𑁆𑀣𑀺𑀓𑀸𑀦𑀁 𑀫𑀦𑁄𑀭𑀣𑀁 𑀧𑀽𑀭𑁂𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀇𑀢𑀺…𑀧𑁂… 𑀘𑀢𑀽𑀲𑀽𑀢𑀺 𑀆𑀳𑀸’’𑀢𑀺.

𑀯𑀸𑀘𑀦𑁆𑀢𑀺𑀆𑀤𑀻𑀦𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺 𑀢𑀺𑀯𑀺𑀥𑀲𑀻𑀮𑀲𑀫𑁆𑀧𑀢𑁆𑀢𑀺𑀤𑀻𑀧𑀦𑀢𑁄. 𑀲𑀫𑁆𑀧𑀦𑁆𑀦𑀲𑀻𑀮𑁄 𑀳𑀺 𑀧𑀭𑀮𑁄𑀓𑀁 𑀦 𑀪𑀸𑀲𑁂𑀬𑁆𑀬. 𑀲𑀤𑁆𑀥𑁄 𑀏𑀓𑀁 𑀅𑀗𑁆𑀕𑀁 𑀧𑀬𑁄𑀕𑀸𑀲𑀬𑀲𑀼𑀤𑁆𑀥𑀺𑀤𑀻𑀧𑀦𑀢𑁄. 𑀲𑀼𑀤𑁆𑀥𑀸𑀲𑀬𑀲𑁆𑀲 𑀲𑀫𑁆𑀫𑀸𑀧𑀬𑁄𑀕𑁂 𑀞𑀺𑀢𑀲𑁆𑀲 𑀓𑀣𑀁 𑀧𑀭𑀮𑁄𑀓𑀢𑁄 𑀪𑀬𑀦𑁆𑀢𑀺. 𑀤𑀼𑀓𑀯𑀲𑁂𑀦 𑀘𑀢𑀼𑀭𑀗𑁆𑀕𑀬𑁄𑀚𑀦𑀸 𑀤𑀼𑀓𑀦𑀬𑁄. 𑀏𑀢𑁂𑀲𑀼 𑀘𑀢𑀽𑀲𑀼 𑀥𑀫𑁆𑀫𑁂𑀲𑀼 𑀞𑀺𑀢𑁄𑀢𑀺 𑀏𑀢𑁂𑀲𑀼 𑀬𑀣𑀸𑀯𑀼𑀢𑁆𑀢𑀤𑀼𑀓𑀲𑀗𑁆𑀕𑀳𑁂𑀲𑀼 𑀘𑀢𑀽𑀲𑀼 𑀕𑀼𑀡𑁂𑀲𑀼 𑀧𑀢𑀺𑀝𑁆𑀞𑀺𑀢𑁄.

𑀪𑀻𑀢𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀦𑀚𑀻𑀭𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁬. 𑀦𑀸𑀫𑀕𑁄𑀢𑁆𑀢𑀦𑁆𑀢𑀺 ¶ 𑀢𑀺𑀲𑁆𑀲𑁄 𑀓𑀲𑁆𑀲𑀧𑁄 𑀕𑁄𑀢𑀫𑁄𑀢𑀺 𑀏𑀯𑀭𑀽𑀧𑀁 𑀦𑀸𑀫𑀜𑁆𑀘 𑀕𑁄𑀢𑁆𑀢𑀜𑁆𑀘. 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁, 𑀢𑀲𑁆𑀫𑀸 𑀲𑀩𑁆𑀩𑀲𑁆𑀲 𑀧𑀜𑁆𑀜𑀢𑁆𑀢𑀺𑀬𑀸 𑀮𑀓𑁆𑀔𑀡𑀯𑀘𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀚𑀻𑀭𑀢𑀻𑀢𑀺 𑀅𑀲𑀪𑀸𑀯𑀥𑀫𑁆𑀫𑀢𑁆𑀢𑀸 𑀉𑀧𑁆𑀧𑀸𑀤𑀯𑀬𑀸𑀪𑀸𑀯𑀢𑁄 𑀚𑀭𑀁 𑀦 𑀧𑀸𑀧𑀼𑀡𑀸𑀢𑀺. 𑀢𑁂𑀦𑀸𑀳 ‘‘𑀚𑀻𑀭𑀡𑀲𑀪𑀸𑀯𑁄 𑀦 𑀳𑁄𑀢𑀻’’𑀢𑀺. 𑀬𑀲𑁆𑀫𑀸 𑀲𑀫𑀜𑁆𑀜𑀸𑀪𑀸𑀯𑀢𑁄 𑀓𑀸𑀮𑀦𑁆𑀢𑀭𑁂𑀧𑀺 𑀢𑀁 𑀲𑀫𑀜𑁆𑀜𑀸𑀬𑀢𑁂𑀯, 𑀢𑀲𑁆𑀫𑀸 ‘‘𑀅𑀢𑀻𑀢𑀩𑀼𑀤𑁆𑀥𑀸𑀦𑀁…𑀧𑁂… 𑀦 𑀚𑀻𑀭𑀢𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀆𑀳.

𑀆𑀮𑀲𑀺𑀬𑀦𑁆𑀢𑀺 𑀅𑀮𑀲𑀪𑀸𑀯𑁄 𑀤𑀴𑁆𑀳𑀓𑁄𑀲𑀚𑁆𑀚𑀁. 𑀢𑁂𑀦𑀸𑀳 ‘‘𑀬𑁂𑀦𑀸’’𑀢𑀺𑀆𑀤𑀺. 𑀞𑀺𑀢𑀺𑀦𑁆𑀢𑀺 𑀩𑁆𑀬𑀸𑀧𑀸𑀭𑀁. 𑀦𑀺𑀤𑁆𑀤𑀸𑀯𑀲𑁂𑀦 𑀧𑀫𑀚𑁆𑀚𑀦𑀁 𑀓𑀢𑁆𑀢𑀩𑁆𑀩𑀲𑁆𑀲 𑀅𑀓𑀭𑀡𑀁. 𑀓𑀺𑀮𑁂𑀲𑀯𑀲𑁂𑀦 𑀧𑀫𑀚𑁆𑀚𑀦𑀁 𑀅𑀓𑀢𑁆𑀢𑀩𑁆𑀩𑀲𑁆𑀲 𑀓𑀭𑀡𑀫𑁆𑀧𑀺. 𑀓𑀫𑁆𑀫𑀲𑀫𑀬𑁂𑀢𑀺 𑀓𑀫𑁆𑀫𑀁 𑀓𑀸𑀢𑀼𑀁 𑀬𑀼𑀢𑁆𑀢𑀓𑀸𑀮𑁂. 𑀓𑀫𑁆𑀫𑀓𑀭𑀡𑀯𑀻𑀭𑀺𑀬𑀸𑀪𑀸𑀯𑁄𑀢𑀺 𑀢𑀁𑀓𑀫𑁆𑀫𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀧𑀓𑀯𑀻𑀭𑀺𑀬𑀸𑀪𑀸𑀯𑁄. 𑀲𑁄 𑀧𑀦 𑀅𑀢𑁆𑀣𑀢𑁄 𑀯𑀻𑀭𑀺𑀬𑀧𑀝𑀺𑀧𑀓𑁆𑀔𑁄 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄, 𑀦 𑀯𑀻𑀭𑀺𑀬𑀲𑁆𑀲 𑀅𑀪𑀸𑀯𑀫𑀢𑁆𑀢𑀁. 𑀲𑀻𑀮𑀲𑀜𑁆𑀜𑀫𑀸𑀪𑀸𑀯𑁄 𑀤𑀼𑀲𑁆𑀲𑀻𑀮𑁆𑀬𑀁. 𑀯𑀺𑀲𑁆𑀲𑀝𑁆𑀞𑀸𑀘𑀸𑀭𑀢𑀸 𑀦𑀸𑀫 𑀅𑀦𑀸𑀘𑀸𑀭𑁄. 𑀲𑁄𑀧𑁆𑀧𑀩𑀳𑀼𑀮𑀢𑀸𑀢𑀺 𑀦𑀺𑀤𑁆𑀤𑀸𑀮𑀼𑀢𑀸 ¶ . 𑀬𑀢𑁄 𑀕𑀳𑀡𑀳𑀢𑁆𑀣𑁄𑀧𑀺 𑀦 𑀓𑀺𑀮𑀸𑀲𑀼𑀧𑀺 𑀧𑀼𑀭𑀺𑀲𑁄 𑀦𑀺𑀤𑁆𑀤𑀸𑀬 𑀅𑀪𑀺𑀪𑀼𑀬𑁆𑀬𑀢𑀺. 𑀢𑁂𑀦𑀸𑀳 ‘‘𑀢𑀸𑀬𑀸’’𑀢𑀺𑀆𑀤𑀺. 𑀅𑀢𑀺𑀘𑁆𑀙𑀸𑀢𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀪𑀺𑀪𑀼𑀬𑁆𑀬𑀢𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀆𑀕𑀦𑁆𑀢𑀼𑀓𑀸𑀮𑀲𑀺𑀬𑀁 𑀦 𑀧𑀼𑀩𑁆𑀩𑁂 𑀯𑀼𑀢𑁆𑀢𑀆𑀮𑀲𑁆𑀬𑀁 𑀯𑀺𑀬 𑀧𑀓𑀢𑀺𑀲𑀺𑀤𑁆𑀥𑀁. ‘‘𑀢𑁂 𑀙𑀺𑀤𑁆𑀤𑁂’’𑀢𑀺 𑀧𑀸𑀴𑀺𑀬𑀁 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀢𑀸𑀦𑀺 𑀙 𑀙𑀺𑀤𑁆𑀤𑀸𑀦𑀻’’𑀢𑀺. 𑀓𑀼𑀲𑀮𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀅𑀦𑁄𑀓𑀸𑀲𑀪𑀸𑀯𑀢𑁄 𑀙𑀺𑀤𑁆𑀤𑀸𑀦𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀬𑀢𑁆𑀣 𑀯𑀺𑀢𑁆𑀢𑀁 𑀦 𑀢𑀺𑀝𑁆𑀞𑀢𑀻’’𑀢𑀺. 𑀲𑀩𑁆𑀩𑀸𑀓𑀸𑀭𑁂𑀦 𑀮𑁂𑀲𑀫𑀢𑁆𑀢𑀁 𑀅𑀲𑁂𑀲𑁂𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑀚𑀻𑀭𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀇𑀲𑁆𑀲𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁭. 𑀲𑀢𑁆𑀣𑀲𑁆𑀲 𑀫𑀮𑀦𑁆𑀢𑀺 𑀲𑀢𑁆𑀣𑀫𑀮𑀁, 𑀬𑁂𑀦 𑀲𑀢𑁆𑀣𑀁 𑀫𑀮𑀻𑀦𑀁 𑀳𑁄𑀢𑀺, 𑀲𑀢𑁆𑀣𑀫𑀮𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀫𑀮𑀻𑀦𑀁 𑀲𑀢𑁆𑀣𑀫𑁂𑀯 𑀕𑀳𑀺𑀢𑀦𑁆𑀢𑀺 𑀆𑀳 ‘‘𑀫𑀮𑀕𑁆𑀕𑀳𑀺𑀢𑀲𑀢𑁆𑀣’’𑀦𑁆𑀢𑀺. 𑀆𑀡𑀸𑀧𑀯𑀢𑁆𑀢𑀦𑀦𑁆𑀢𑀺 𑀅𑀧𑁆𑀧𑀓𑁂 𑀯𑀸 𑀫𑀳𑀦𑁆𑀢𑁂 𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀅𑀢𑁆𑀢𑀦𑁄 𑀆𑀡𑀸𑀬 𑀧𑀯𑀢𑁆𑀢𑀦𑀯𑀲𑁂𑀦 𑀯𑀲𑀦𑀁 𑀇𑀲𑁆𑀲𑀭𑀺𑀬𑀢𑁆𑀢𑀫𑀺𑀘𑁆𑀙𑀦𑁆𑀢𑀺. 𑀫𑀡𑀺𑀭𑀢𑀦𑀫𑁆𑀧𑀺 𑀯𑀺𑀲𑁆𑀲𑀚𑁆𑀚𑀦𑀻𑀬𑀧𑀓𑁆𑀔𑀺𑀓𑀢𑁆𑀢𑀸 𑀉𑀢𑁆𑀢𑀫𑀁 𑀪𑀡𑁆𑀟𑀁 𑀦𑀸𑀫 𑀦 𑀳𑁄𑀢𑀺, 𑀇𑀢𑁆𑀣𑀻 𑀧𑀦 𑀧𑀭𑀺𑀘𑁆𑀘𑀢𑁆𑀢𑀓𑀼𑀮𑀸𑀘𑀸𑀭𑀺𑀢𑁆𑀣𑀺𑀓𑀸𑀬𑀧𑀺 𑀅𑀦𑀺𑀲𑁆𑀲𑀚𑁆𑀚𑀦𑀻𑀬𑀢𑀸𑀬 𑀉𑀢𑁆𑀢𑀫𑀪𑀡𑁆𑀟𑀁 𑀦𑀸𑀫. 𑀢𑁂𑀦𑀸𑀳 ‘‘𑀇𑀢𑁆𑀣𑀻 𑀪𑀡𑁆𑀟𑀸𑀦𑀫𑀼𑀢𑁆𑀢𑀫’’𑀦𑁆𑀢𑀺. 𑀢𑁂𑀲𑀁 𑀢𑁂𑀲𑀜𑁆𑀳𑀺 𑀧𑀼𑀭𑀺𑀲𑀸𑀚𑀸𑀦𑀻𑀬𑀸𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀉𑀢𑁆𑀢𑀫𑀭𑀢𑀦𑀸𑀓𑀭𑀢𑁆𑀢𑀸 𑀇𑀢𑁆𑀣𑀻 𑀪𑀡𑁆𑀟𑀸𑀦𑀫𑀼𑀢𑁆𑀢𑀫𑀁. 𑀫𑀮𑀕𑁆𑀕𑀳𑀺𑀢𑀲𑀢𑁆𑀣𑀲𑀤𑀺𑀲𑁄 𑀅𑀯𑀩𑁄𑀥𑀓𑀺𑀘𑁆𑀘𑀯𑀺𑀩𑀦𑁆𑀥𑀦𑀢𑁄. 𑀲𑀢𑁆𑀣𑀫𑀮𑀁 𑀯𑀺𑀬 𑀲𑀢𑁆𑀣𑀲𑁆𑀲 𑀧𑀜𑁆𑀜𑀸𑀲𑀢𑁆𑀣𑀲𑁆𑀲 𑀕𑀼𑀡𑀸𑀪𑀸𑀯𑀓𑀭𑀡𑀢𑁄 𑀧𑀜𑁆𑀜𑀸𑀲𑀢𑁆𑀣𑀫𑀮𑀁 ¶ . 𑀅𑀩𑁆𑀩𑀼 𑀯𑀼𑀘𑁆𑀘𑀢𑀺 𑀉𑀧𑀤𑁆𑀤𑀯𑀁, 𑀢𑀁 𑀤𑁂𑀢𑀻𑀢𑀺 𑀅𑀩𑁆𑀩𑀼𑀤𑀁, 𑀯𑀺𑀦𑀸𑀲𑀓𑀸𑀭𑀡𑀁. 𑀦𑀦𑀼 𑀳𑀭𑀡𑀁 𑀲𑀫𑀡𑀲𑁆𑀲 𑀅𑀬𑀼𑀢𑁆𑀢𑀦𑁆𑀢𑀺? 𑀬𑀼𑀢𑁆𑀢𑀁. 𑀢𑀲𑁆𑀲 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀬𑀼𑀢𑁆𑀢𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀻’’𑀢𑀺𑀆𑀤𑀺𑀫𑀸𑀳.

𑀇𑀲𑁆𑀲𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀓𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁮. ‘‘𑀅𑀢𑁆𑀢𑀓𑀸𑀫𑁄’’𑀢𑀺 ¶ 𑀧𑀸𑀴𑀺𑀬𑀁 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀞𑀧𑁂𑀢𑁆𑀯𑀸 𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑁂’’𑀢𑀺. 𑀢𑁂 𑀳𑀺 𑀲𑀩𑁆𑀩𑀲𑁄 𑀧𑀭𑀢𑁆𑀣𑀸𑀬 𑀏𑀯 𑀧𑀝𑀺𑀧𑀚𑁆𑀚𑀫𑀸𑀦𑀸 𑀫𑀳𑀸𑀓𑀸𑀭𑀼𑀡𑀺𑀓𑀸 𑀧𑀭𑀢𑁆𑀣𑀓𑀸𑀫𑀸, 𑀅𑀢𑁆𑀣𑀓𑀸𑀫𑀸 𑀦𑀸𑀫 𑀦 𑀳𑁄𑀦𑁆𑀢𑀺, 𑀬𑀸 𑀘 𑀢𑁂𑀲𑀁 𑀅𑀢𑁆𑀢𑀢𑁆𑀣𑀸𑀯𑀳𑀸 𑀧𑀝𑀺𑀧𑀢𑁆𑀢𑀺, 𑀲𑀸𑀧𑀺 𑀬𑀸𑀯𑀤𑁂𑀯 𑀧𑀭𑀢𑁆𑀣𑀸 𑀏𑀯𑀸𑀢𑀺. 𑀯𑀼𑀢𑁆𑀢𑀁 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀁. 𑀬𑀲𑁆𑀫𑀸 𑀩𑁄𑀥𑀺𑀲𑀢𑁆𑀢𑀸 𑀧𑀭𑀳𑀺𑀢𑀧𑀝𑀺𑀧𑀢𑁆𑀢𑀺𑀬𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑀸 𑀢𑀣𑀸𑀭𑀽𑀧𑀁 𑀓𑀸𑀭𑀡𑀁 𑀧𑀢𑁆𑀯𑀸 𑀅𑀢𑁆𑀢𑀸𑀦𑀁 𑀧𑀭𑁂𑀲𑀁 𑀧𑀭𑀺𑀘𑁆𑀘𑀚𑀦𑁆𑀢𑀺 𑀧𑀜𑁆𑀜𑀸𑀧𑀸𑀭𑀫𑀺𑀬𑀸 𑀧𑀭𑀺𑀧𑀽𑀭𑀡𑀢𑁄, 𑀢𑀲𑁆𑀫𑀸 𑀇𑀥𑀸𑀧𑀺 ‘‘𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑁂 𑀞𑀧𑁂𑀢𑁆𑀯𑀸𑀬𑁂𑀯𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀆𑀳. 𑀓𑀮𑁆𑀬𑀸𑀡𑀦𑁆𑀢𑀺 𑀪𑀤𑁆𑀤𑀓𑀁. 𑀯𑀸𑀘𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀆𑀳 ‘‘𑀲𑀡𑁆𑀳𑀁 𑀫𑀼𑀤𑀼𑀓’’𑀦𑁆𑀢𑀺. 𑀧𑀸𑀧𑀺𑀓𑀦𑁆𑀢𑀺 𑀮𑀸𑀫𑀓𑀁 𑀦𑀺𑀳𑀻𑀦𑀁. 𑀢𑀁 𑀧𑀦 𑀨𑀭𑀼𑀲𑀁 𑀯𑀸𑀘𑀦𑁆𑀢𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀺.

𑀓𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀸𑀣𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁯. 𑀲𑀤𑁆𑀥𑀸 𑀩𑀦𑁆𑀥𑀢𑀺 𑀧𑀸𑀣𑁂𑀬𑁆𑀬𑀦𑁆𑀢𑀺 𑀲𑀤𑁆𑀥𑀸 𑀦𑀸𑀫 𑀲𑀢𑁆𑀢𑀲𑁆𑀲 𑀫𑀭𑀡𑀯𑀲𑁂𑀦 𑀫𑀳𑀸𑀧𑀣𑀁 𑀲𑀁𑀯𑀚𑀢𑁄 𑀫𑀳𑀸𑀓𑀦𑁆𑀢𑀸𑀭𑀁 𑀧𑀝𑀺𑀧𑀚𑁆𑀚𑀢𑁄 𑀫𑀳𑀸𑀯𑀺𑀤𑀼𑀕𑁆𑀕𑀁 𑀧𑀓𑁆𑀔𑀦𑁆𑀤𑀢𑁄 𑀧𑀸𑀣𑁂𑀬𑁆𑀬𑀧𑀼𑀝𑀁 𑀩𑀦𑁆𑀥𑀢𑀺 𑀲𑀫𑁆𑀩𑀮𑀁 𑀲𑀚𑁆𑀚𑁂𑀢𑀺. 𑀓𑀣𑀦𑁆𑀢𑀺 𑀆𑀳 ‘‘𑀲𑀤𑁆𑀥𑀁 𑀉𑀧𑁆𑀧𑀸𑀤𑁂𑀢𑁆𑀯𑀸’’𑀢𑀺𑀆𑀤𑀺. 𑀏𑀢𑀁 𑀯𑀼𑀢𑁆𑀢𑀦𑁆𑀢𑀺 ‘‘𑀲𑀤𑁆𑀥𑀸 𑀩𑀦𑁆𑀥𑀢𑀺 𑀧𑀸𑀣𑁂𑀬𑁆𑀬’’𑀦𑁆𑀢𑀺 𑀏𑀢𑀁 𑀕𑀸𑀣𑀸𑀧𑀤𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸. 𑀲𑀺𑀭𑀻𑀢𑀺 𑀓𑀢𑀧𑀼𑀜𑁆𑀜𑁂𑀳𑀺 𑀲𑁂𑀯𑀻𑀬𑀢𑀺 𑀢𑁂𑀳𑀺 𑀧𑀝𑀺𑀮𑀪𑀻𑀬𑀢𑀻𑀢𑀺 𑀲𑀺𑀭𑀻. 𑀇𑀲𑁆𑀲𑀭𑀺𑀬𑀁 𑀯𑀺𑀪𑀯𑁄. 𑀆𑀲𑀬𑀺𑀢𑀩𑁆𑀩𑀢𑁄 𑀆𑀲𑀬𑁄, 𑀯𑀲𑀦𑀝𑁆𑀞𑀸𑀦𑀁 𑀦𑀺𑀓𑁂𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀺𑀓𑀟𑁆𑀠𑀢𑀻𑀢𑀺 𑀇𑀘𑁆𑀙𑀸𑀯𑀲𑀺𑀓𑀁 𑀧𑀼𑀕𑁆𑀕𑀮𑀁 𑀢𑀢𑁆𑀣 𑀢𑀢𑁆𑀣 𑀉𑀧𑀓𑀟𑁆𑀠𑀢𑀺.

𑀧𑀸𑀣𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀚𑁆𑀚𑁄𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁦. 𑀢𑀁 𑀢𑀁 𑀲𑀫𑀯𑀺𑀲𑀫𑀁 𑀧𑀚𑁆𑀚𑁄𑀢𑀢𑀻𑀢𑀺 𑀧𑀚𑁆𑀚𑁄𑀢𑁄. 𑀧𑀤𑀻𑀧𑁄 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀧𑀘𑁆𑀘𑀓𑁆𑀔𑀢𑁄 𑀭𑀽𑀧𑀕𑀢𑀁 𑀤𑀲𑁆𑀲𑁂𑀢𑀺, 𑀏𑀯𑀁 𑀧𑀜𑁆𑀜𑀸𑀧𑀚𑁆𑀚𑁄𑀢𑁄 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀥𑀫𑁆𑀫𑀸𑀦𑀁 𑀧𑀭𑀫𑀢𑁆𑀣𑀪𑀽𑀢𑀁 ¶ 𑀭𑀽𑀧𑀁 𑀤𑀲𑁆𑀲𑁂𑀢𑀺. 𑀚𑀸𑀕𑀭𑀩𑁆𑀭𑀸𑀳𑁆𑀫𑀡𑁄 𑀯𑀺𑀬𑀸𑀢𑀺 𑀚𑀸𑀕𑀭𑀔𑀻𑀡𑀸𑀲𑀯𑀩𑁆𑀭𑀸𑀳𑁆𑀫𑀡𑁄 𑀯𑀺𑀬. 𑀲𑁄 𑀳𑀺 𑀲𑀢𑀺𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺𑀬𑀸 𑀲𑀩𑁆𑀩𑀤𑀸𑀧𑀺 𑀚𑀸𑀕𑀭𑁄 𑀳𑁄𑀢𑀺. 𑀕𑀸𑀯𑁄𑀢𑀺 𑀕𑁄𑀚𑀸𑀢𑀺𑀬𑁄. 𑀇𑀤𑀁 ¶ 𑀕𑀼𑀦𑁆𑀦𑀁 𑀕𑁄𑀡𑀸𑀦𑀜𑁆𑀘 𑀲𑀸𑀫𑀜𑁆𑀜𑀢𑁄 𑀕𑀳𑀡𑀁. 𑀓𑀫𑁆𑀫𑁂𑀢𑀺 𑀓𑀭𑀡𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁. 𑀚𑀻𑀯𑀦𑀁 𑀚𑀻𑀯𑁄, 𑀲𑀳 𑀚𑀻𑀯𑁂𑀦𑀸𑀢𑀺 𑀲𑀚𑀻𑀯𑀺𑀦𑁄. 𑀢𑁂𑀦𑀸𑀳 ‘‘𑀓𑀫𑁆𑀫𑁂𑀦 𑀲𑀳 𑀚𑀻𑀯𑀦𑁆𑀢𑀸𑀦’’𑀦𑁆𑀢𑀺, 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀁 𑀓𑀢𑁆𑀯𑀸 𑀚𑀻𑀯𑀦𑁆𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀕𑁄𑀫𑀡𑁆𑀟𑀮𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀕𑁄𑀕𑀡𑁂𑀦 𑀲𑀳. 𑀦 𑀢𑁂𑀦 𑀯𑀺𑀦𑀸 𑀓𑀲𑀺𑀓𑀫𑁆𑀫𑀸𑀤𑀻𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀕𑁄𑀭𑀲𑀲𑀺𑀤𑁆𑀥𑀺𑀬𑀸 𑀘𑁂𑀯 𑀓𑀲𑀦𑀪𑀸𑀭𑀯𑀳𑀦𑀲𑀺𑀤𑁆𑀥𑀺𑀬𑀸 𑀘 𑀓𑀲𑀺𑀓𑀫𑁆𑀫𑀏𑀓𑀘𑁆𑀘𑀯𑀸𑀡𑀺𑀚𑁆𑀚𑀓𑀫𑁆𑀫𑀸𑀤𑀻𑀦𑀺 𑀇𑀚𑁆𑀛𑀦𑁆𑀢𑀺. 𑀲𑀢𑁆𑀢𑀓𑀸𑀬𑀲𑁆𑀲𑀸𑀢𑀺 𑀆𑀳𑀸𑀭𑀼𑀧𑀚𑀻𑀯𑀺𑀦𑁄 𑀲𑀢𑁆𑀢𑀓𑀸𑀬𑀲𑁆𑀲 𑀓𑀲𑀺𑀢𑁄 𑀅𑀜𑁆𑀜𑀣𑀸 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀲𑁆𑀲𑀧𑀺 𑀓𑀲𑀺𑀚𑀻𑀯𑀺𑀢𑀯𑀼𑀢𑁆𑀢𑀺𑀬𑀸 𑀫𑀽𑀮𑀓𑀸𑀭𑀡𑀁 𑀨𑀮𑀦𑀺𑀧𑁆𑀨𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑁆𑀢𑀸 𑀢𑀲𑁆𑀲. 𑀇𑀭𑀺𑀬𑀸𑀧𑀣𑁄 𑀘 𑀇𑀭𑀺𑀬𑀦𑀓𑀺𑀭𑀺𑀬𑀸𑀦𑀁 𑀧𑀯𑀢𑁆𑀢𑀦𑀼𑀧𑀸𑀬𑁄. ‘‘𑀲𑀻𑀢𑀦𑁆𑀢𑀺 𑀦𑀗𑁆𑀕𑀮𑀲𑀻𑀢𑀓𑀫𑁆𑀫’’𑀦𑁆𑀢𑀺 𑀯𑀤𑀦𑁆𑀢𑀺.

𑀧𑀚𑁆𑀚𑁄𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀅𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁧. 𑀭𑀡𑀦𑁆𑀢𑀺 𑀓𑀦𑁆𑀤𑀦𑁆𑀢𑀺 𑀏𑀢𑁂𑀳𑀻𑀢𑀺 𑀭𑀡𑀸, 𑀭𑀸𑀕𑀸𑀤𑀬𑁄. 𑀢𑁂𑀳𑀺 𑀅𑀪𑀺𑀪𑀽𑀢𑀢𑀸𑀬 𑀳𑀺 𑀲𑀢𑁆𑀢𑀸 𑀦𑀸𑀦𑀧𑁆𑀧𑀓𑀸𑀭𑀁 𑀓𑀦𑁆𑀤𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑀺. 𑀢𑁂 𑀧𑀦 𑀲𑀩𑁆𑀩𑀲𑁄 𑀦𑀢𑁆𑀣𑀺 𑀏𑀢𑁂𑀲𑀁 𑀭𑀡𑀸𑀢𑀺 𑀅𑀭𑀡𑀸. 𑀦𑀺𑀓𑁆𑀓𑀺𑀮𑁂𑀲𑀸 𑀔𑀻𑀡𑀸𑀲𑀯𑀸. 𑀯𑀼𑀲𑀺𑀢𑀯𑀸𑀲𑁄𑀢𑀺 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄. 𑀪𑁄𑀚𑀺𑀲𑁆𑀲𑀺𑀬𑀦𑁆𑀢𑀺 𑀪𑀼𑀚𑀺𑀲𑁆𑀲𑀪𑀸𑀯𑁄. 𑀢𑁂𑀦𑀸𑀳 ‘‘𑀅𑀤𑀸𑀲𑀪𑀸𑀯𑁄’’𑀢𑀺. 𑀲𑀫𑀡𑀸𑀢𑀺 𑀲𑀫𑀺𑀢𑀧𑀸𑀧𑀲𑀫𑀡𑀸𑀢𑀺 𑀆𑀳 ‘‘𑀔𑀻𑀡𑀸𑀲𑀯𑀲𑀫𑀡𑀸’’𑀢𑀺. 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀸𑀮𑁂 𑀮𑁄𑀓𑀺𑀬𑀧𑀭𑀺𑀜𑁆𑀜𑀸𑀬, 𑀲𑁂𑀓𑁆𑀔𑀸 𑀧𑀼𑀩𑁆𑀩𑀪𑀸𑀕𑁂 𑀮𑁄𑀓𑀺𑀬𑀧𑀭𑀺𑀜𑁆𑀜𑀸𑀬, 𑀧𑀘𑁆𑀘𑀯𑁂𑀓𑁆𑀔𑀡𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀬 𑀧𑀭𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑁂𑀬𑁆𑀬𑀁 𑀢𑁂𑀪𑀽𑀫𑀓𑀁 𑀔𑀦𑁆𑀥𑀧𑀜𑁆𑀘𑀓𑀁 𑀧𑀭𑀺𑀚𑀸𑀦𑀦𑁆𑀢𑀺 𑀧𑀭𑀺𑀘𑁆𑀙𑀺𑀚𑁆𑀚𑀦𑁆𑀢𑀺. 𑀔𑀻𑀡𑀸𑀲𑀯𑀸 𑀧𑀦 𑀧𑀭𑀺𑀜𑁆𑀜𑀸𑀢𑀧𑀭𑀺𑀜𑁆𑀜𑁂𑀬𑁆𑀬𑀸 𑀳𑁄𑀦𑁆𑀢𑀺. 𑀢𑀣𑀸 𑀳𑀺 𑀢𑁂 𑀲𑀸𑀫𑀻 𑀳𑀼𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀯𑀦𑁆𑀤𑀦𑁆𑀢𑀺 𑀦𑀁 𑀧𑀢𑀺𑀝𑁆𑀞𑀺𑀢𑀦𑁆𑀢𑀺 𑀯𑀼𑀢𑁆𑀢𑀁, 𑀯𑀦𑁆𑀤𑀦𑀻𑀬𑀪𑀸𑀯𑁄 𑀘 𑀲𑀻𑀮𑀲𑀫𑁆𑀧𑀦𑁆𑀦𑀢𑀸𑀬𑀸𑀢𑀺 𑀆𑀳 ‘‘𑀧𑀢𑀺𑀝𑁆𑀞𑀺𑀢𑀦𑁆𑀢𑀺 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢’’𑀦𑁆𑀢𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀮𑁄𑀓𑁂. 𑀔𑀢𑁆𑀢𑀺𑀬𑀸𑀢𑀺 𑀮𑀓𑁆𑀔𑀡𑀯𑀘𑀦𑀦𑁆𑀢𑀺 𑀆𑀳 ‘‘𑀦 𑀓𑁂𑀯𑀮𑀁 𑀔𑀢𑁆𑀢𑀺𑀬𑀸𑀯𑀸’’𑀢𑀺𑀆𑀤𑀺.

𑀅𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀙𑁂𑀢𑁆𑀯𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁨. 𑀤𑁂𑀯𑀧𑀼𑀢𑁆𑀢𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧. 𑀧𑀞𑀫𑀓𑀲𑁆𑀲𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁨. 𑀤𑁂𑀯𑀲𑁆𑀲 ¶ ¶ 𑀧𑀼𑀢𑁆𑀢𑁄 𑀤𑁂𑀯𑀧𑀼𑀢𑁆𑀢𑁄. 𑀤𑁂𑀯𑀸𑀦𑀁 𑀚𑀦𑀓𑀚𑀦𑁂𑀢𑀩𑁆𑀩𑀲𑀫𑁆𑀩𑀦𑁆𑀥𑀸𑀪𑀸𑀯𑀢𑁄 𑀓𑀣𑀫𑀬𑀁 𑀤𑁂𑀯𑀧𑀼𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀤𑁂𑀯𑀸𑀦𑀁 𑀳𑀻’’𑀢𑀺𑀆𑀤𑀺. ‘‘𑀅𑀧𑀸𑀓𑀝𑁄 𑀅𑀜𑁆𑀜𑀢𑀭𑁄𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀸𑀓𑀝𑁄𑀧𑀺 𑀳𑀺 𑀓𑀢𑁆𑀣𑀘𑀺 ‘‘𑀅𑀜𑁆𑀜𑀢𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀳𑁂𑀝𑁆𑀞𑀸 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑁂 ‘‘𑀅𑀧𑀸𑀓𑀝𑀸 𑀅𑀜𑁆𑀜𑀢𑀭𑀸 𑀤𑁂𑀯𑀢𑀸’’𑀢𑀺 𑀯𑀢𑁆𑀯𑀸 𑀇𑀥 ‘‘𑀧𑀸𑀓𑀝𑁄 𑀤𑁂𑀯𑀧𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺𑀲𑁆𑀲 𑀓𑀲𑁆𑀲𑀧𑁄𑀢𑀺 𑀕𑁄𑀢𑁆𑀢𑀦𑀸𑀫𑀁 𑀕𑀳𑀺𑀢𑀁, 𑀢𑀜𑁆𑀘 𑀔𑁄 𑀧𑀼𑀭𑀺𑀫𑀚𑀸𑀢𑀺𑀲𑀺𑀤𑁆𑀥𑀲𑀫𑀜𑁆𑀜𑀸𑀯𑀲𑁂𑀦. 𑀅𑀦𑀼𑀲𑀸𑀲𑀦𑀁 𑀅𑀦𑀼𑀲𑀸𑀲𑁄, 𑀢𑀁 𑀅𑀦𑀼𑀲𑀸𑀲𑀁. 𑀪𑀺𑀓𑁆𑀔𑀼𑀦𑀺𑀤𑁆𑀤𑁂𑀲𑀦𑁆𑀢𑀺 𑀪𑀺𑀓𑁆𑀔𑀼𑀲𑀤𑁆𑀤𑀲𑁆𑀲 𑀦𑀺𑀤𑁆𑀤𑁂𑀲𑀁. 𑀪𑀺𑀓𑁆𑀔𑀼𑀑𑀯𑀸𑀤𑀦𑁆𑀢𑀺 𑀪𑀺𑀓𑁆𑀔𑀼𑀪𑀸𑀯𑀸𑀯𑀳𑀁 𑀑𑀯𑀸𑀤𑀁. 𑀬𑀤𑀺 𑀧𑀦 𑀦 𑀅𑀲𑁆𑀲𑁄𑀲𑀺, 𑀓𑀣𑀫𑀬𑀁 𑀧𑀜𑁆𑀳𑀁 𑀓𑀣𑁂𑀲𑀻𑀢𑀺? 𑀅𑀜𑁆𑀜𑀢𑁄 𑀲𑀼𑀢𑀁 𑀦𑀺𑀲𑁆𑀲𑀸𑀬 𑀧𑀜𑁆𑀳𑀁 𑀓𑀣𑁂𑀲𑀺, 𑀦 𑀧𑀦 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀪𑀸𑀯𑁂𑀦.

𑀢𑁂𑀲𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀢𑀺𑀡𑁆𑀡𑀁 𑀧𑀼𑀕𑁆𑀕𑀮𑀸𑀦𑀁. ‘‘𑀓𑀣𑁂𑀢𑀼𑀓𑀸𑀫𑁄 𑀘𑁂𑀯𑀸’’𑀢𑀺𑀆𑀤𑀺𑀦𑀸 𑀳𑀺 𑀘𑀢𑀼𑀢𑁆𑀣𑀁 𑀇𑀥 𑀉𑀤𑁆𑀥𑀝𑀁. 𑀢𑀢𑁆𑀣 𑀆𑀤𑀺𑀢𑁄 𑀢𑀺𑀡𑁆𑀡𑀁 𑀪𑀕𑀯𑀸 𑀧𑀜𑁆𑀳𑀁 𑀪𑀸𑀭𑀁 𑀦 𑀓𑀭𑁄𑀢𑀺 𑀏𑀓𑁂𑀓𑀗𑁆𑀕𑀯𑁂𑀓𑀮𑁆𑀮𑀢𑁄 𑀘𑁂𑀯 𑀅𑀗𑁆𑀕𑀤𑁆𑀯𑀬𑀯𑁂𑀓𑀮𑁆𑀮𑀢𑁄 𑀘, 𑀘𑀢𑀼𑀢𑁆𑀣𑀲𑁆𑀲 𑀧𑀦 𑀉𑀪𑀬𑀗𑁆𑀕𑀧𑀸𑀭𑀺𑀧𑀽𑀭𑀢𑁆𑀢𑀸 𑀪𑀸𑀭𑀁 𑀓𑀭𑁄𑀢𑀻𑀢𑀺 𑀆𑀳 ‘‘𑀅𑀬𑀁 𑀧𑀦𑀸’’𑀢𑀺𑀆𑀤𑀺.

𑀕𑀸𑀣𑀸𑀬𑀁 ‘‘𑀲𑀼𑀪𑀸𑀲𑀺𑀢𑀲𑁆𑀲𑀸’’𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀼𑀪𑀸𑀲𑀺𑀢𑀁 𑀲𑀺𑀓𑁆𑀔𑁂𑀬𑁆𑀬𑀸’’𑀢𑀺. 𑀘𑀢𑀼𑀲𑀘𑁆𑀘𑀸𑀤𑀺𑀦𑀺𑀲𑁆𑀲𑀺𑀢𑀁 𑀩𑀼𑀤𑁆𑀥𑀯𑀘𑀦𑀁 𑀲𑀺𑀓𑁆𑀔𑀦𑁆𑀢𑁄 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀲𑀼𑀘𑀭𑀺𑀢𑀁 𑀲𑀺𑀓𑁆𑀔𑀢𑀺 𑀦𑀸𑀫𑀸𑀢𑀺 𑀆𑀳 ‘‘𑀘𑀢𑀼𑀲𑀘𑁆𑀘𑀦𑀺𑀲𑁆𑀲𑀺𑀢𑀁…𑀧𑁂… 𑀲𑀺𑀓𑁆𑀔𑁂𑀬𑁆𑀬𑀸’’𑀢𑀺. 𑀅𑀯𑀥𑀸𑀭𑀡𑁂𑀦 𑀢𑀧𑁆𑀧𑀝𑀺𑀧𑀓𑁆𑀔𑀁 𑀧𑀝𑀺𑀦𑀺𑀯𑀢𑁆𑀢𑁂𑀢𑀺. 𑀉𑀧𑀸𑀲𑀺𑀢𑀩𑁆𑀩𑀦𑁆𑀢𑀺 𑀆𑀲𑁂𑀯𑀺𑀢𑀩𑁆𑀩𑀁 𑀪𑀸𑀯𑁂𑀢𑀩𑁆𑀩𑀁 𑀩𑀳𑀼𑀮𑀻𑀓𑀸𑀢𑀩𑁆𑀩𑀁. 𑀅𑀝𑁆𑀞𑀢𑀺𑀁𑀲𑀪𑁂𑀤𑀁 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀇𑀤𑀁 𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀧𑀤𑀝𑁆𑀞𑀸𑀦𑀢𑀁 𑀳𑀤𑀬𑁂 𑀞𑀧𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀤𑀼𑀢𑀺𑀬𑀧𑀤𑁂𑀦 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸 𑀓𑀣𑀺𑀢𑀸’’𑀢𑀺. 𑀬𑁂 𑀧𑀦 ‘‘𑀤𑀼𑀢𑀺𑀬𑀧𑀤𑁂𑀦 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸 𑀘𑀺𑀢𑁆𑀢𑀯𑀽𑀧𑀲𑀫𑁂𑀦 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸’’𑀢𑀺 ¶ 𑀧𑀞𑀦𑁆𑀢𑀺, 𑀢𑁂𑀲𑀁 𑀧𑀤𑁂𑀦 𑀅𑀝𑁆𑀞𑀢𑀺𑀁𑀲𑀧𑁆𑀧𑀪𑁂𑀤𑀓𑀫𑁆𑀫𑀝𑁆𑀞𑀸𑀦𑀁 𑀲𑀼𑀤𑁆𑀥𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀲𑁆𑀲𑁂𑀯 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀬𑀤𑀺 𑀏𑀯𑀁 ‘‘𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑀲𑁂𑀦𑀸’’𑀢𑀺 𑀇𑀤𑀁 𑀓𑀣𑀦𑁆𑀢𑀺? ‘‘𑀢𑀁 𑀯𑀺𑀧𑀲𑁆𑀲𑀦𑀸𑀥𑀺𑀝𑁆𑀞𑀸𑀦𑀸𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀯𑀲𑁂𑀦 ¶ 𑀓𑀣𑀺𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀤𑀼𑀢𑀺𑀬𑀧𑀤𑁂𑀦 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸’’𑀢𑀺 𑀇𑀤𑀁 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀲𑀺𑀓𑁆𑀔𑀦𑀁 𑀦𑀸𑀫 𑀆𑀲𑁂𑀯𑀦𑀦𑁆𑀢𑀺 𑀆𑀳 ‘‘𑀪𑀸𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄’’𑀢𑀺. 𑀉𑀧𑀸𑀲𑀦𑀦𑁆𑀢𑀺 𑀧𑀬𑀺𑀭𑀼𑀧𑀸𑀲𑀦𑀁. 𑀢𑀜𑁆𑀘 𑀔𑁄 𑀅𑀲𑁆𑀲𑀼𑀢𑀧𑀭𑀺𑀬𑀸𑀧𑀼𑀡𑀦𑀓𑀫𑁆𑀫𑀝𑁆𑀞𑀸𑀦𑀼𑀕𑁆𑀕𑀳𑀸𑀤𑀺𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀫𑁆𑀧𑀻’’𑀢𑀺𑀆𑀤𑀺𑀫𑀸𑀳. 𑀅𑀥𑀺𑀲𑀻𑀮𑀲𑀺𑀓𑁆𑀔𑀸 𑀓𑀣𑀺𑀢𑀸 𑀮𑀓𑁆𑀔𑀡𑀳𑀸𑀭𑀦𑀬𑁂𑀦. 𑀯𑀘𑀻𑀲𑀼𑀘𑀭𑀺𑀢𑀲𑁆𑀲 𑀳𑀺 𑀲𑀻𑀮𑀲𑀪𑀸𑀯𑀢𑁆𑀢𑀸 𑀢𑀕𑁆𑀕𑀳𑀡𑁂𑀦𑁂𑀯 𑀢𑀤𑁂𑀓𑀮𑀓𑁆𑀔𑀡𑀁 𑀓𑀸𑀬𑀲𑀼𑀘𑀭𑀺𑀢𑀫𑁆𑀧𑀺 𑀇𑀢𑀭𑀫𑁆𑀧𑀺 𑀕𑀳𑀺𑀢𑀫𑁂𑀯𑀸𑀢𑀺. 𑀏𑀢𑁆𑀣 𑀘 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀬 𑀘𑀺𑀢𑁆𑀢𑀯𑀺𑀯𑁂𑀓𑁄, 𑀅𑀥𑀺𑀧𑀜𑁆𑀜𑀸𑀲𑀺𑀓𑁆𑀔𑀸𑀬 𑀉𑀧𑀥𑀺𑀯𑀺𑀯𑁂𑀓𑁄, 𑀅𑀥𑀺𑀘𑀺𑀢𑁆𑀢𑀲𑀺𑀓𑁆𑀔𑀸𑀬 𑀓𑀸𑀬𑀯𑀺𑀯𑁂𑀓𑁄 𑀓𑀣𑀺𑀢𑁄, 𑀓𑀸𑀬𑀯𑀺𑀯𑁂𑀓𑁄 𑀧𑀦 𑀲𑀭𑀽𑀧𑁂𑀦𑁂𑀯 𑀧𑀸𑀴𑀺𑀬𑀁 𑀕𑀳𑀺𑀢𑁄𑀢𑀺 𑀢𑀺𑀯𑀺𑀥𑀲𑁆𑀲𑀧𑀺 𑀯𑀺𑀯𑁂𑀓𑀲𑁆𑀲 𑀧𑀓𑀸𑀲𑀺𑀢𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀧𑀞𑀫𑀓𑀲𑁆𑀲𑀧𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀓𑀲𑁆𑀲𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁩. 𑀤𑁆𑀯𑀻𑀳𑀺 𑀛𑀸𑀦𑁂𑀳𑀻𑀢𑀺 𑀆𑀭𑀫𑁆𑀫𑀡𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀮𑀓𑁆𑀔𑀡𑁂𑀳𑀺 𑀤𑁆𑀯𑀻𑀳𑀺 𑀛𑀸𑀦𑁂𑀳𑀺. 𑀓𑀫𑁆𑀫𑀝𑁆𑀞𑀸𑀦𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀮𑀤𑁆𑀥𑀸𑀬 𑀯𑀺𑀫𑀼𑀢𑁆𑀢𑀺𑀬𑀸. 𑀢𑁂𑀦 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀺𑀬𑁄 𑀯𑀤𑀢𑀺. 𑀲𑀢𑁆𑀣𑀼𑀲𑀸𑀲𑀦𑀲𑁆𑀲 𑀳𑀤𑀬𑀢𑁆𑀢𑀸 𑀅𑀩𑁆𑀪𑀦𑁆𑀢𑀭𑀢𑁆𑀢𑀸 𑀳𑀤𑀬𑀲𑁆𑀲 𑀫𑀸𑀦𑀲𑀲𑁆𑀲, 𑀅𑀦𑀼𑀧𑀢𑁆𑀢𑀺𑀁 𑀧𑀝𑀺𑀮𑀸𑀪𑀫𑀸𑀦𑀲𑀁. 𑀢𑀁 𑀧𑀦 𑀅𑀢𑁆𑀣𑀢𑁄 𑀅𑀜𑁆𑀜𑀸 𑀏𑀯𑀸𑀢𑀺 𑀆𑀳 ‘‘𑀅𑀭𑀳𑀢𑁆𑀢’’𑀦𑁆𑀢𑀺. 𑀢𑀁 𑀧𑀢𑁆𑀢𑀼𑀓𑀸𑀫𑁂𑀦 𑀏𑀓𑀦𑁆𑀢𑀢𑁄 𑀯𑀚𑁆𑀚𑁂𑀢𑀩𑁆𑀩𑀢𑀡𑁆𑀳𑀸𑀤𑀺𑀝𑁆𑀞𑀻𑀦𑀁 𑀪𑀸𑀯𑁂 𑀢𑀲𑁆𑀲 𑀅𑀦𑀺𑀚𑁆𑀛𑀦𑀢𑁄, 𑀢𑀤𑀪𑀸𑀯𑁂 𑀇𑀚𑁆𑀛𑀦𑀢𑁄 𑀘 𑀢𑁂 𑀉𑀧𑁆𑀧𑀸𑀤𑀦𑀯𑀲𑁂𑀦 𑀬𑀤𑀕𑁆𑀕𑁂𑀦 𑀦𑀺𑀲𑁆𑀲𑀺𑀢𑁄, 𑀢𑀤𑀕𑁆𑀕𑁂𑀦 𑀧𑀦𑀸𑀬𑀫𑁆𑀧𑀺 𑀢𑁂𑀳𑀺 𑀦𑀺𑀲𑁆𑀲𑀺𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀅𑀦𑀺𑀲𑁆𑀲𑀺𑀢𑁄’’𑀢𑀺𑀆𑀤𑀺. 𑀅𑀭𑀳𑀢𑁆𑀢𑀁 𑀆𑀦𑀺𑀲𑀁𑀲𑀺𑀢𑀩𑁆𑀩𑀝𑁆𑀞𑁂𑀦 𑀆𑀦𑀺𑀲𑀁𑀲𑀁 𑀏𑀢𑀲𑁆𑀲𑀸𑀢𑀺 𑀅𑀭𑀳𑀢𑁆𑀢𑀸𑀦𑀺𑀲𑀁𑀲𑁄. 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀓𑀸𑀫𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸 𑀇𑀘𑁆𑀙𑀺𑀢𑀩𑁆𑀩𑀸. 𑀢𑀢𑁆𑀣 𑀘 𑀲𑀩𑁆𑀩𑀧𑀞𑀫𑁄 𑀓𑀫𑁆𑀫𑀝𑁆𑀞𑀸𑀦𑀅𑀢𑁆𑀢𑀸𑀦𑀼𑀬𑁄𑀕𑁄, 𑀲𑁄 𑀇𑀥 𑀦 𑀕𑀳𑀺𑀢𑁄𑀢𑀺 𑀆𑀳 ‘‘𑀢𑀦𑁆𑀢𑀺𑀥𑀫𑁆𑀫𑁄 𑀧𑀼𑀩𑁆𑀩𑀪𑀸𑀕𑁄’’𑀢𑀺. 𑀢𑀢𑁆𑀣 𑀢𑀦𑁆𑀢𑀺𑀥𑀫𑁆𑀫𑁄𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄.

𑀤𑀼𑀢𑀺𑀬𑀓𑀲𑁆𑀲𑀧𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑀖𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁪. 𑀫𑀖𑁄𑀢𑀺 ¶ 𑀲𑀓𑁆𑀓𑀲𑁆𑀲𑁂𑀢𑀁 𑀦𑀸𑀫𑀁 𑀧𑀼𑀭𑀺𑀫𑀚𑀸𑀢𑀺𑀅𑀦𑀼𑀕𑀢𑀁. 𑀲𑁆𑀯𑁂𑀯𑀸𑀢𑀺 𑀲𑀓𑁆𑀓𑁄 𑀏𑀯. 𑀯𑀢𑁂𑀦𑀸𑀢𑀺 𑀫𑀸𑀢𑀸𑀧𑀺𑀢𑀼𑀉𑀧𑀝𑁆𑀞𑀸𑀦𑀸𑀤𑀺𑀘𑀸𑀭𑀺𑀢𑁆𑀢𑀥𑀫𑁆𑀫𑁂𑀦 ¶ . 𑀅𑀜𑁆𑀜𑁂𑀢𑀺 𑀉𑀧𑀥𑀺𑀯𑁂𑀧𑀓𑁆𑀓𑀧𑀸𑀧𑀥𑀫𑁆𑀫𑁂 𑀅𑀪𑀺𑀪𑀯𑀺𑀢𑁆𑀯𑀸. 𑀅𑀲𑀼𑀭𑀦𑁆𑀢𑀺 𑀇𑀦𑁆𑀤𑀲𑀢𑁆𑀢𑀼𑀪𑀽𑀢𑀁 𑀅𑀲𑀼𑀭𑀁.

𑀫𑀖𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀫𑀸𑀕𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁫. 𑀘𑀢𑀼𑀢𑁆𑀣𑀲𑀼𑀢𑁆𑀢𑀁 𑀯𑀼𑀢𑁆𑀢𑀢𑁆𑀣𑀫𑁂𑀯𑀸𑀢𑀺 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑁂 𑀲𑀁𑀯𑀡𑁆𑀡𑀺𑀢𑀢𑁆𑀣𑀫𑁂𑀯, 𑀢𑀲𑁆𑀫𑀸 𑀇𑀥 𑀦 𑀯𑀢𑁆𑀢𑀩𑁆𑀩𑁄 𑀅𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀫𑀸𑀕𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸

𑁫. 𑀤𑀸𑀫𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁬. 𑀢𑁂𑀦 𑀓𑀸𑀭𑀡𑁂𑀦𑀸𑀢𑀺 𑀢𑁂𑀦 𑀧𑀥𑀸𑀦𑁂𑀦 𑀓𑀸𑀭𑀡𑀪𑀽𑀢𑁂𑀦, 𑀧𑀥𑀸𑀦𑀓𑀭𑀡𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀬𑀁 𑀓𑀺𑀜𑁆𑀘𑀺 𑀔𑀼𑀤𑁆𑀤𑀓𑀫𑁆𑀧𑀺 𑀫𑀳𑀦𑁆𑀢𑀫𑁆𑀧𑀺 𑀳𑀻𑀦𑀫𑁆𑀧𑀺 𑀧𑀡𑀻𑀢𑀫𑁆𑀧𑀺 𑀪𑀯𑀁. 𑀆𑀬𑀢𑀧𑀕𑁆𑀕𑀳𑁄𑀢𑀺 𑀤𑀻𑀖𑀭𑀢𑁆𑀢𑀲𑁆𑀲 𑀯𑀻𑀭𑀺𑀬𑀸𑀭𑀫𑁆𑀪𑁄. 𑀓𑀺𑀘𑁆𑀘𑀯𑁄𑀲𑀸𑀦𑀦𑁆𑀢𑀺 𑀓𑀺𑀘𑁆𑀘𑀦𑀺𑀝𑁆𑀞𑀸𑀦𑀁. 𑀢𑀣𑁂𑀯𑀸𑀢𑀺 𑀬𑀣𑀸 𑀅𑀭𑀳𑀢𑁆𑀢𑀼𑀧𑁆𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂, 𑀢𑀢𑁄 𑀧𑀘𑁆𑀙𑀸𑀧𑀺 𑀢𑀣𑁂𑀯 ‘‘𑀩𑀼𑀤𑁆𑀥𑀺𑀧𑀕𑁆𑀕𑀳𑁄’’𑀢𑀺 𑀯𑀻𑀭𑀺𑀬𑀁 𑀤𑀴𑁆𑀳𑀁 𑀓𑀭𑁄𑀢𑀽𑀢𑀺 𑀓𑀼𑀧𑁆𑀧𑀥𑀫𑁆𑀫𑀁 𑀯𑀺𑀬 𑀫𑀜𑁆𑀜𑀫𑀸𑀦𑁄 𑀯𑀤𑀢𑀺. 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀸𑀤𑀺𑀅𑀢𑁆𑀣𑀁 𑀧𑀦 𑀯𑀻𑀭𑀺𑀬𑀓𑀭𑀡𑀁 𑀇𑀘𑁆𑀙𑀺𑀢𑀩𑁆𑀩𑀫𑁂𑀯.

𑀅𑀲𑀁𑀓𑀺𑀡𑁆𑀡𑀸𑀢𑀺 𑀅𑀯𑁄𑀫𑀺𑀲𑁆𑀲𑀸 𑀏𑀯𑀁 𑀅𑀜𑁆𑀜𑀢𑁆𑀣 𑀅𑀦𑀸𑀕𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀪𑀕𑀯𑀢𑀸 𑀳𑀻’’𑀢𑀺𑀆𑀤𑀺. 𑀬𑀤𑀺 𑀏𑀯𑀁 𑀇𑀥𑁂𑀯 𑀓𑀲𑁆𑀫𑀸 𑀏𑀢𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀇𑀥 𑀧𑀦𑀸’’𑀢𑀺𑀆𑀤𑀺. 𑀧𑀢𑀺𑀝𑁆𑀞𑀦𑁆𑀢𑀺 𑀦𑀤𑀻 𑀦𑀸𑀫 𑀅𑀦𑀯𑀝𑁆𑀞𑀺𑀢𑀢𑀻𑀭𑀸, 𑀢𑀢𑁆𑀣 𑀧𑀢𑀺𑀝𑁆𑀞𑀸𑀢𑀩𑁆𑀩𑀝𑁆𑀞𑀸𑀦𑀁.

𑀤𑀸𑀫𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀓𑀸𑀫𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁭. 𑀧𑀼𑀩𑁆𑀩𑀬𑁄𑀕𑀸𑀯𑀘𑀭𑁄𑀢𑀺 ¶ 𑀧𑀼𑀩𑁆𑀩𑁂 𑀬𑁄𑀕𑀸𑀯𑀘𑀭𑁄 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀪𑀸𑀯𑀦𑀫𑀦𑀼𑀬𑀼𑀢𑁆𑀢𑁄. 𑀅𑀬𑀁 𑀓𑀺𑀭 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸𑀯 𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑀫𑀡𑀥𑀫𑁆𑀫𑀁 𑀅𑀓𑀸𑀲𑀺, 𑀦 𑀧𑀦 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀢𑀫𑀢𑁆𑀣𑀁 𑀓𑀸𑀭𑀡𑁂𑀦 𑀲𑀤𑁆𑀥𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀩𑀳𑀮𑀓𑀺𑀮𑁂𑀲𑀢𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀲𑁆𑀲𑀸𑀢𑀺 𑀬𑀣𑀸 𑀯𑀺𑀲𑁂𑀲𑀸𑀯𑀳𑁄 𑀳𑁄𑀢𑀺 ¶ , 𑀏𑀯𑀁 𑀏𑀓𑀦𑁆𑀢𑁂𑀦 𑀧𑀭𑀺𑀲𑀼𑀤𑁆𑀥𑀲𑁆𑀲 𑀲𑀩𑁆𑀩𑀲𑁄 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀲𑁆𑀲. 𑀲𑀻𑀮𑁂𑀦 𑀲𑀫𑀸𑀳𑀺𑀢𑀸𑀢𑀺 𑀬𑀣𑀸 𑀲𑀻𑀮𑀁 𑀉𑀧𑀭𑀽𑀧𑀭𑀺 𑀯𑀺𑀲𑁂𑀲𑀸𑀯𑀳𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀳𑁄𑀢𑀺, 𑀏𑀯𑀁 𑀲𑀫𑁆𑀫𑀤𑁂𑀯 𑀆𑀳𑀺𑀢𑀘𑀺𑀢𑁆𑀢𑀸 𑀲𑀼𑀝𑁆𑀞𑀼 𑀲𑀫𑁆𑀧𑀦𑁆𑀦𑀘𑀺𑀢𑁆𑀢𑀸. 𑀢𑀣𑀸𑀪𑀽𑀢𑀸 𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀲𑀫𑀼𑀧𑁂𑀢𑀸’’𑀢𑀺. 𑀧𑀢𑀺𑀝𑁆𑀞𑀺𑀢𑀲𑀪𑀸𑀯𑀸𑀢𑀺 𑀲𑁂𑀓𑁆𑀔𑀢𑁆𑀢𑀸 𑀏𑀯 𑀬𑀣𑀸𑀥𑀺𑀕𑀢𑀥𑀫𑁆𑀫𑁂𑀦 𑀦𑀺𑀘𑁆𑀘𑀮𑀪𑀸𑀯𑁂𑀦 𑀅𑀥𑀺𑀝𑁆𑀞𑀺𑀢𑀲𑀪𑀸𑀯𑀸. 𑀫𑀬𑀸 𑀢𑀼𑀝𑁆𑀞𑀺𑀬𑀸 𑀕𑀳𑀺𑀢𑀸𑀬 𑀤𑁂𑀯𑀧𑀼𑀢𑁆𑀢𑁄 ‘‘𑀤𑀼𑀮𑁆𑀮𑀪𑀸 𑀢𑀼𑀝𑁆𑀞𑀻’’𑀢𑀺 𑀯𑀓𑁆𑀔𑀢𑀻𑀢𑀺 𑀪𑀕𑀯𑀸 ‘‘𑀢𑀼𑀝𑁆𑀞𑀺 𑀳𑁄𑀢𑀺 𑀲𑀼𑀔𑀸𑀯𑀳𑀸’’𑀢𑀺 𑀅𑀯𑁄𑀘𑀸𑀢𑀺 𑀆𑀳 ‘‘𑀉𑀧𑀭𑀺 𑀧𑀜𑁆𑀳𑀲𑀫𑀼𑀝𑁆𑀞𑀸𑀧𑀦𑀢𑁆𑀣’’𑀦𑁆𑀢𑀺. 𑀧𑀩𑁆𑀩𑀚𑀺𑀢𑁄 𑀭𑀼𑀓𑁆𑀔𑀫𑀽𑀮𑀺𑀓𑁄 𑀅𑀩𑁆𑀪𑁄𑀓𑀸𑀲𑀺𑀓𑁄 𑀯𑀸 𑀅𑀦𑀕𑀸𑀭𑀺𑀬𑀼𑀧𑁂𑀢𑁄 𑀦𑀸𑀫 𑀳𑁄𑀢𑀺, 𑀲𑁂𑀦𑀸𑀲𑀦𑁂 𑀧𑀦 𑀯𑀲𑀦𑁆𑀢𑁄 𑀓𑀣𑀦𑁆𑀢𑀺 𑀆𑀳 ‘‘𑀲𑀢𑁆𑀢𑀪𑀽𑀫𑀺𑀓𑁂’’𑀢𑀺𑀆𑀤𑀺. 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑁄𑀢𑀺 𑀪𑀸𑀯𑀦𑀸𑀪𑀺𑀬𑁄𑀕𑀲𑀺𑀤𑁆𑀥𑁄 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀲𑀦𑁆𑀢𑁄𑀲𑁄. 𑀢𑁂𑀦 𑀘𑀺𑀢𑁆𑀢𑀯𑀽𑀧𑀲𑀫𑁂𑀦 𑀢𑀼𑀝𑁆𑀞𑀺 𑀮𑀤𑁆𑀥𑀸𑀢𑀺 𑀤𑀲𑁆𑀲𑁂𑀢𑀺. 𑀘𑀺𑀢𑁆𑀢𑀯𑀽𑀧𑀲𑀫𑀪𑀸𑀯𑀦𑀸𑀬𑀸𑀢𑀺 𑀘𑀺𑀢𑁆𑀢𑀓𑀺𑀮𑁂𑀲𑀸𑀦𑀁 𑀯𑀽𑀧𑀲𑀫𑀓𑀭𑀪𑀸𑀯𑀦𑀸𑀬, 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀦𑀺𑀩𑁆𑀩𑀺𑀲𑁂𑀯𑀦𑀪𑀸𑀯𑀓𑀭𑀡𑁂𑀦 𑀲𑀯𑀺𑀲𑁂𑀲𑀁 𑀘𑀺𑀢𑁆𑀢𑀲𑁆𑀲 𑀯𑀽𑀧𑀲𑀫𑀓𑀭𑀪𑀸𑀯𑀦𑀸𑀬 𑀭𑀢𑁄 𑀫𑀦𑁄𑀢𑀺 𑀬𑁄𑀚𑀦𑀸.

𑀏𑀢𑁆𑀣 𑀘 𑀇𑀦𑁆𑀤𑁆𑀭𑀺𑀬𑀽𑀧𑀲𑀫𑁂𑀦 𑀘𑀺𑀢𑁆𑀢𑀲𑀫𑀸𑀥𑀸𑀦𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸𑀬 𑀘𑀺𑀢𑁆𑀢𑀲𑀫𑀸𑀥𑀸𑀦𑀲𑁆𑀲 𑀅𑀓𑀸𑀭𑀓𑀸𑀦𑀁 𑀤𑀽𑀭𑀻𑀓𑀭𑀡𑀢𑁄. 𑀅𑀥𑀺𑀘𑀺𑀢𑁆𑀢𑀲𑀫𑀸𑀥𑀸𑀦𑁂𑀦 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑁄 𑀲𑀯𑀺𑀲𑁂𑀲𑀁 𑀧𑀭𑀺𑀲𑀼𑀤𑁆𑀥𑁄 𑀧𑀭𑀺𑀧𑀼𑀡𑁆𑀡𑁄 𑀘 𑀳𑁄𑀢𑀺 𑀧𑀘𑁆𑀘𑀬𑀸𑀦𑀁 𑀅𑀮𑀸𑀪𑀮𑀸𑀪𑁂𑀲𑀼 𑀧𑀭𑀺𑀘𑁆𑀘𑀸𑀕𑀲𑀪𑀸𑀯𑀢𑁄. 𑀯𑀼𑀢𑁆𑀢𑀦𑀬𑁂𑀦 𑀧𑀦 𑀲𑀦𑁆𑀢𑀼𑀝𑁆𑀞𑀲𑁆𑀲 𑀬𑀣𑀸𑀲𑀫𑀸𑀤𑀺𑀦𑁆𑀦𑀁 𑀲𑀻𑀮𑀁 𑀯𑀺𑀲𑀼𑀚𑁆𑀛𑀢𑀺 𑀧𑀸𑀭𑀺𑀧𑀽𑀭𑀺𑀜𑁆𑀘 𑀉𑀧𑀕𑀘𑁆𑀙𑀢𑀺, 𑀢𑀣𑀸𑀪𑀽𑀢𑁄 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑁂 𑀬𑀼𑀢𑁆𑀢𑁄 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀲𑀩𑁆𑀩𑀲𑁄 𑀓𑀺𑀮𑁂𑀲𑁂 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑁄 𑀦𑀺𑀩𑁆𑀩𑀸𑀦𑀤𑀺𑀝𑁆𑀞𑁄 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀬𑁂 𑀭𑀢𑁆𑀢𑀺𑀦𑁆𑀤𑀺𑀯’’𑀦𑁆𑀢𑀺𑀆𑀤𑀺𑀦𑀸. 𑀓𑀺𑀁 𑀦 𑀕𑀘𑁆𑀙𑀺𑀲𑁆𑀲𑀦𑁆𑀢𑀺? 𑀕𑀫𑀺𑀲𑁆𑀲𑀦𑁆𑀢𑁂𑀯𑀸𑀢𑀺 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀁 𑀧𑀳𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀤𑀼𑀓𑁆𑀓𑀭𑀪𑀸𑀯𑀁 𑀲𑀦𑁆𑀥𑀸𑀬 𑀲𑀸𑀲𑀗𑁆𑀓𑀁 𑀯𑀤𑀢𑀺. 𑀢𑁂𑀦𑀸𑀳 ‘‘𑀅𑀬𑀁 𑀧𑀦 𑀤𑀼𑀕𑁆𑀕𑀫𑁄 𑀪𑀕𑀯𑀸 𑀯𑀺𑀲𑀫𑁄 𑀫𑀕𑁆𑀕𑁄’’𑀢𑀺.

𑀢𑀢𑁆𑀣 ¶ 𑀓𑁂𑀘𑀺 ‘‘𑀅𑀬𑀁 𑀧𑀦𑀸𑀢𑀺 𑀤𑁂𑀯𑀧𑀼𑀢𑁆𑀢𑁄. 𑀲𑁄 𑀳𑀺 𑀪𑀕𑀯𑀢𑁄 ‘𑀅𑀭𑀺𑀬𑀸 𑀕𑀘𑁆𑀙𑀦𑁆𑀢𑀻’𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸 ‘𑀤𑀼𑀕𑁆𑀕𑀫𑁄 𑀪𑀕𑀯𑀸’𑀢𑀺𑀆𑀤𑀺𑀫𑀸𑀳𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀚𑁆𑀚𑀢𑀺. 𑀬𑀲𑁆𑀫𑀸 ‘‘𑀲𑀘𑁆𑀘𑀫𑁂𑀢’’𑀦𑁆𑀢𑀺 𑀏𑀯𑀫𑀸𑀤𑀺𑀧𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁 𑀓𑀢𑁆𑀯𑀸 𑀤𑀲𑁆𑀲𑀺𑀢𑀁, 𑀢𑀲𑁆𑀫𑀸 ‘‘𑀬𑁂𑀦 𑀫𑀕𑁆𑀕𑁂𑀦 𑀅𑀭𑀺𑀬𑀸 𑀕𑀘𑁆𑀙𑀦𑁆𑀢𑀻’’𑀢𑀺 𑀢𑀼𑀫𑁆𑀳𑁂𑀳𑀺 𑀯𑀼𑀢𑁆𑀢𑀁, 𑀅𑀬𑀁 𑀧𑀦 ‘‘𑀤𑀼𑀕𑁆𑀕𑀫𑁄 𑀪𑀕𑀯𑀸 𑀯𑀺𑀲𑀫𑁄 𑀫𑀕𑁆𑀕𑁄’’𑀢𑀺 𑀆𑀳 𑀤𑁂𑀯𑀧𑀼𑀢𑁆𑀢𑁄. 𑀅𑀭𑀺𑀬𑀫𑀕𑁆𑀕𑁄 𑀓𑀸𑀫𑀁 𑀓𑀤𑀸𑀘𑀺 𑀅𑀢𑀺𑀤𑀼𑀓𑁆𑀔𑀸 𑀧𑀝𑀺𑀧𑀤𑀸𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀢𑀜𑁆𑀘 𑀔𑁄 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀯𑀲𑁂𑀦, 𑀅𑀬𑀁 𑀧𑀦 𑀅𑀢𑀻𑀯 𑀲𑀼𑀕𑀫𑁄 𑀲𑀩𑁆𑀩𑀓𑀺𑀮𑁂𑀲𑀤𑀼𑀕𑁆𑀕𑀯𑀺𑀯𑀚𑁆𑀚𑀦𑀢𑁄 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀯𑀺𑀲𑀫𑀲𑁆𑀲 𑀭𑀸𑀕𑀸𑀤𑀺𑀯𑀺𑀲𑀫𑀲𑁆𑀲 𑀘 𑀤𑀽𑀭𑀻𑀓𑀭𑀡𑀢𑁄 𑀦 𑀯𑀺𑀲𑀫𑁄. 𑀢𑁂𑀦𑀸𑀳 ‘‘𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀬𑀸’’𑀢𑀺𑀆𑀤𑀺. 𑀅𑀲𑁆𑀲𑀸𑀢𑀺 𑀅𑀭𑀺𑀬𑀫𑀕𑁆𑀕𑀲𑁆𑀲. 𑀅𑀭𑀺𑀬𑀫𑀕𑁆𑀕𑀲𑁆𑀲 𑀳𑀺 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀻𑀦𑀁 𑀧𑀭𑀺𑀩𑀼𑀦𑁆𑀥𑀺𑀢𑀩𑁆𑀩𑀪𑀸𑀕𑁂𑀦 𑀩𑀳𑀽 𑀧𑀭𑀺𑀲𑁆𑀲𑀬𑀸 𑀳𑁄𑀦𑁆𑀢𑀻𑀢𑀺. 𑀏𑀯𑀁 𑀯𑀼𑀢𑁆𑀢𑁄𑀢𑀺 ‘‘𑀤𑀼𑀕𑁆𑀕𑀫𑁄 𑀯𑀺𑀲𑀫𑁄’’𑀢𑀺 𑀘 𑀏𑀯𑀁 𑀯𑀼𑀢𑁆𑀢𑁄.

𑀅𑀯𑀁𑀲𑀺𑀭𑀸𑀢𑀺 𑀅𑀦𑀼𑀝𑁆𑀞𑀳𑀦𑁂𑀦 𑀅𑀥𑁄𑀪𑀽𑀢𑀉𑀢𑁆𑀢𑀫𑀗𑁆𑀕𑀸. 𑀓𑀼𑀲𑀮𑀗𑁆𑀕𑁂𑀲𑀼 𑀳𑀺 𑀲𑀫𑁆𑀫𑀸𑀤𑀺𑀝𑁆𑀞𑀺 𑀉𑀢𑁆𑀢𑀫𑀗𑁆𑀕𑀸 𑀲𑀩𑁆𑀩𑀲𑁂𑀝𑁆𑀞𑀢𑁆𑀢𑀸 ¶ , 𑀢𑀜𑁆𑀘 𑀅𑀦𑀭𑀺𑀬𑀸 𑀧𑀢𑀦𑁆𑀢𑀺 𑀦 𑀉𑀝𑁆𑀞𑀳𑀦𑁆𑀢𑀺 𑀫𑀺𑀘𑁆𑀙𑀸𑀧𑀝𑀺𑀧𑀚𑁆𑀚𑀦𑀢𑁄. 𑀢𑁂𑀦𑀸𑀳 ‘‘𑀜𑀸𑀡𑀲𑀺𑀭𑁂𑀦𑀸’’𑀢𑀺𑀆𑀤𑀺. 𑀅𑀦𑀭𑀺𑀬𑀫𑀕𑁆𑀕𑁂𑀢𑀺 𑀫𑀺𑀘𑁆𑀙𑀸𑀫𑀕𑁆𑀕𑁂. 𑀢𑁂𑀦𑀸𑀳 ‘‘𑀯𑀺𑀲𑀫𑁂 𑀫𑀕𑁆𑀕𑁂’’𑀢𑀺. 𑀢𑀁 𑀫𑀕𑁆𑀕𑀦𑀢𑁄 𑀅𑀦𑀭𑀺𑀬𑀸 𑀅𑀭𑀺𑀬𑀸𑀦𑀁 𑀫𑀕𑁆𑀕𑀢𑁄 𑀅𑀧𑀸𑀧𑀼𑀡𑀦𑁂𑀦 𑀧𑀭𑀺𑀘𑁆𑀘𑀢𑁆𑀢𑀸 𑀳𑀼𑀢𑁆𑀯𑀸 𑀅𑀧𑀸𑀬𑁂 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑁂 𑀘 𑀧𑀢𑀦𑁆𑀢𑀺. 𑀲𑁆𑀯𑁂𑀯𑀸𑀢𑀺 𑀲𑁆𑀯𑀸𑀬𑀁 𑀅𑀦𑀭𑀺𑀬𑁂𑀳𑀺 𑀓𑀤𑀸𑀘𑀺𑀧𑀺 𑀕𑀦𑁆𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁄 𑀫𑀕𑁆𑀕𑁄 𑀅𑀭𑀺𑀬𑀸𑀦𑀁 𑀯𑀺𑀲𑀼𑀤𑁆𑀥𑀲𑀢𑁆𑀢𑀸𑀦𑀁 𑀲𑀩𑁆𑀩𑀲𑁄 𑀲𑀫𑀥𑀺𑀕𑀫𑁂𑀦 𑀲𑀫𑁄 𑀳𑁄𑀢𑀺. 𑀓𑀸𑀬𑀯𑀺𑀲𑀫𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀯𑀺𑀲𑀫𑁂 𑀲𑀢𑁆𑀢𑀓𑀸𑀬𑁂 𑀢𑁂𑀲𑀁 𑀲𑀩𑁆𑀩𑀲𑁄𑀯 𑀧𑀳𑀸𑀦𑁂𑀦 𑀲𑀩𑁆𑀩𑀢𑁆𑀣 𑀲𑀫𑀸𑀬𑁂𑀯.

𑀓𑀸𑀫𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀧𑀜𑁆𑀘𑀸𑀮𑀘𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁮. 𑀲𑀫𑁆𑀩𑀸𑀥𑁂𑀢𑀺 𑀲𑀫𑁆𑀧𑀻𑀴𑀺𑀢𑀢𑀡𑁆𑀳𑀸𑀓𑀺𑀮𑁂𑀲𑀸𑀤𑀺𑀦𑀸 𑀲𑀉𑀧𑁆𑀧𑀻𑀴𑀢𑀸𑀬 𑀧𑀭𑀫𑀲𑀫𑁆𑀩𑀸𑀥𑁂. 𑀅𑀢𑀺𑀯𑀺𑀬 𑀲𑀗𑁆𑀓𑀸𑀭𑀝𑁆𑀞𑀸𑀦𑀪𑀽𑀢𑁄 𑀳𑀺 𑀦𑀻𑀯𑀭𑀡𑀲𑀫𑁆𑀩𑀸𑀥𑁄 𑀅𑀥𑀺𑀧𑁆𑀧𑁂𑀢𑁄. 𑀲𑁄 𑀳𑀺 𑀤𑀼𑀕𑁆𑀕𑀳𑀦𑁄 𑀢𑀲𑁆𑀫𑀺𑀁 𑀅𑀲𑀢𑀺 𑀓𑀸𑀫𑀕𑀼𑀡𑀲𑀫𑁆𑀩𑀸𑀥𑁄 𑀅𑀦𑀯𑀲𑀭𑁄 𑀏𑀯 𑀲𑁂𑀬𑁆𑀬𑀣𑀸𑀧𑀺 𑀫𑀳𑀸𑀓𑀲𑁆𑀲𑀧𑀸𑀤𑀻𑀦𑀁. 𑀑𑀓𑀸𑀲𑀦𑁆𑀢𑀺 𑀛𑀸𑀦𑀲𑁆𑀲𑁂𑀢𑀁 𑀦𑀸𑀫𑀁 𑀦𑀻𑀯𑀭𑀡𑀲𑀫𑁆𑀩𑀸𑀥𑀸𑀪𑀸𑀯𑀢𑁄. 𑀅𑀲𑀫𑁆𑀩𑀸𑀥𑀪𑀸𑀯𑁂𑀦 𑀳𑀺 𑀛𑀸𑀦𑀁 𑀇𑀥 ‘‘𑀑𑀓𑀸𑀲𑁄’’𑀢𑀺 𑀯𑀼𑀢𑁆𑀢𑀁, 𑀢𑀜𑁆𑀘 𑀔𑁄 𑀅𑀘𑁆𑀘𑀦𑁆𑀢𑀸𑀲𑀫𑁆𑀩𑀸𑀥𑀝𑁆𑀞𑀸𑀦𑀢𑀸𑀬 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀢𑀸𑀬 ¶ . 𑀢𑀣𑀸 𑀳𑀺 𑀧𑀸𑀴𑀺𑀬𑀁 ‘‘𑀅𑀯𑀺𑀦𑁆𑀤𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀯𑀺𑀦𑁆𑀤𑀻𑀢𑀺 𑀯𑀺𑀦𑁆𑀤𑀺 𑀧𑀝𑀺𑀮𑀪𑀺. 𑀪𑀽𑀭𑀺𑀫𑁂𑀥𑀲𑁄𑀢𑀺 𑀫𑀳𑀸𑀧𑀜𑁆𑀜𑁄, 𑀲𑀧𑀜𑁆𑀜𑁄𑀢𑀺 𑀅𑀢𑁆𑀣𑁄. 𑀅𑀩𑀼𑀚𑁆𑀛𑀻𑀢𑀺 𑀩𑀼𑀚𑁆𑀛𑀺 𑀧𑀝𑀺𑀯𑀺𑀚𑁆𑀛𑀺. 𑀧𑀝𑀺𑀮𑀻𑀦𑁄 𑀳𑀼𑀢𑁆𑀯𑀸 𑀲𑁂𑀝𑁆𑀞𑁄, 𑀧𑀝𑀺𑀮𑀻𑀦𑀸𑀦𑀁 𑀯𑀸 𑀲𑁂𑀝𑁆𑀞𑁄𑀢𑀺 𑀧𑀝𑀺𑀮𑀻𑀦𑀲𑁂𑀝𑁆𑀞𑁄. 𑀫𑀸𑀦𑀼𑀲𑁆𑀲𑀬𑀯𑀲𑁂𑀦 𑀉𑀦𑁆𑀦𑀢𑀪𑀸𑀯𑀢𑁄 𑀧𑀝𑀺𑀮𑀻𑀦𑁄 𑀦𑀸𑀫 𑀧𑀳𑀻𑀦𑀫𑀸𑀦𑁄. 𑀧𑀝𑀺𑀮𑀪𑀺𑀁𑀲𑀽𑀢𑀺 𑀓𑀸𑀫𑀕𑀼𑀡𑀲𑀫𑁆𑀩𑀸𑀥𑁂𑀧𑀺 ‘‘𑀇𑀫𑁂 𑀓𑀸𑀫𑀕𑀼𑀡𑀸 𑀫𑀸𑀤𑀺𑀲𑀸𑀦𑀁 𑀓𑀺𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺? 𑀢𑁂 𑀅𑀪𑀺𑀪𑀼𑀬𑁆𑀬 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀸 𑀲𑀫𑁆𑀫𑀸𑀲𑀢𑀺𑀁 𑀧𑀝𑀺𑀮𑀪𑀺𑀁𑀲𑀼. 𑀢𑁂𑀦 𑀲𑀫𑁆𑀧𑀬𑀼𑀢𑁆𑀢𑁂𑀦 𑀮𑁄𑀓𑀼𑀢𑁆𑀢𑀭𑀲𑀫𑀸𑀥𑀺𑀦𑀸𑀧𑀺 𑀲𑀼𑀝𑁆𑀞𑀼 𑀲𑀫𑀸𑀳𑀺𑀢𑀸.

𑀅𑀬𑀁 𑀓𑀺𑀭 𑀤𑁂𑀯𑀧𑀼𑀢𑁆𑀢𑁄 𑀇𑀢𑁄 𑀧𑀼𑀭𑀺𑀫𑀯𑀸𑀭𑁂 𑀅𑀢𑁆𑀢𑀪𑀸𑀯𑁂 𑀧𑀞𑀫𑀚𑁆𑀛𑀸𑀦𑀮𑀸𑀪𑀻 𑀳𑀼𑀢𑁆𑀯𑀸 𑀢𑀢𑁄 𑀘𑀯𑀺𑀢𑁆𑀯𑀸 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁆𑀣 𑀛𑀸𑀦𑀲𑀼𑀔𑀁 𑀅𑀦𑀼𑀪𑀯𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀇𑀤𑀸𑀦𑀺 𑀓𑀸𑀫𑀪𑀯𑁂 𑀦𑀺𑀩𑁆𑀩𑀢𑁆𑀢𑁄, 𑀢𑀲𑁆𑀫𑀸 𑀢𑀁 𑀛𑀸𑀦𑀁 𑀲𑀫𑁆𑀪𑀸𑀯𑁂𑀦𑁆𑀢𑁄 ‘‘𑀢𑀸𑀤𑀺𑀲𑀲𑁆𑀲 𑀦𑀸𑀫 𑀛𑀸𑀦𑀲𑀼𑀔𑀲𑁆𑀲 𑀮𑀸𑀪𑀻 𑀪𑀕𑀯𑀸’’𑀢𑀺 𑀢𑁂𑀦 𑀕𑀼𑀡𑁂𑀦 𑀪𑀕𑀯𑀦𑁆𑀢𑀁 𑀅𑀪𑀺𑀢𑁆𑀣𑀯𑀦𑁆𑀢𑁄 ‘‘𑀲𑀫𑁆𑀩𑀸𑀥𑁂 𑀯𑀢𑀸’’𑀢𑀺 𑀕𑀸𑀣𑀁 𑀅𑀪𑀸𑀲𑀺. 𑀅𑀣𑀲𑁆𑀲 𑀪𑀕𑀯𑀸 𑀬𑀣𑀸 𑀦𑀸𑀫 𑀅𑀝𑁆𑀞𑀲𑀝𑁆𑀞𑀺𑀬𑁄𑀚𑀦𑀲𑀢𑀲𑀳𑀲𑁆𑀲𑀼𑀩𑁆𑀩𑁂𑀥𑀲𑀺𑀦𑁂𑀭𑀼𑀧𑀩𑁆𑀩𑀢𑀭𑀸𑀚𑀁 𑀉𑀧𑀸𑀤𑀸𑀬 𑀲𑀸𑀲𑀧𑁄 𑀦 𑀓𑀺𑀜𑁆𑀘𑀺 𑀳𑁄𑀢𑀺, 𑀏𑀯𑀁 𑀅𑀦𑀦𑁆𑀢𑀸𑀧𑀭𑀺𑀫𑁂𑀬𑁆𑀬𑀩𑀼𑀤𑁆𑀥𑀕𑀼𑀡𑁂 𑀉𑀧𑀸𑀤𑀸𑀬 𑀭𑀽𑀧𑀸𑀯𑀘𑀭𑀧𑀞𑀫𑀚𑁆𑀛𑀸𑀦𑀁 𑀦 𑀓𑀺𑀜𑁆𑀘𑀺 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂 𑀲𑀢𑀺’’𑀦𑁆𑀢𑀺𑀆𑀤𑀺𑀦𑀸 𑀅𑀦𑀼𑀢𑁆𑀢𑀭𑀕𑀼𑀡𑀸𑀥𑀺𑀕𑀫𑀁 𑀧𑀯𑁂𑀤𑁂𑀲𑀺. 𑀢𑀢𑁆𑀣 𑀲𑀢𑀺𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀲𑀢𑀺𑀬𑀸 𑀲𑀤𑁆𑀥𑀺𑀁 𑀅𑀭𑀺𑀬𑀫𑀕𑁆𑀕𑀲𑀢𑀺𑀁. 𑀲𑀼𑀲𑀫𑀸𑀳𑀺𑀢𑀸𑀢𑀺 𑀮𑁄𑀓𑀺𑀬𑀲𑀫𑀸𑀥𑀺𑀦𑀸 𑀘𑁂𑀯 𑀮𑁄𑀓𑀼𑀢𑁆𑀢𑀭𑀲𑀫𑀸𑀥𑀺𑀦𑀸 𑀘 𑀲𑀼𑀝𑁆𑀞𑀼 𑀲𑀫𑀸𑀳𑀺𑀢𑀸. 𑀢𑁂 ¶ 𑀳𑀺 𑀅𑀘𑁆𑀘𑀦𑁆𑀢𑀁 𑀲𑀼𑀲𑀫𑀸𑀳𑀺𑀢𑀸, 𑀦 𑀛𑀸𑀦𑀫𑀢𑁆𑀢𑀮𑀸𑀪𑀺𑀦𑁄 𑀅𑀓𑀼𑀧𑁆𑀧𑀥𑀫𑁆𑀫𑀢𑁆𑀢𑀸. 𑀓𑁂𑀘𑀺 ‘‘𑀓𑀫𑁆𑀫𑀦𑁆𑀢𑁂 𑀲𑀼𑀲𑀫𑀸𑀳𑀺𑀢𑀸’’𑀢𑀺 𑀧𑀸𑀞𑀁 𑀯𑀢𑁆𑀯𑀸 ‘‘𑀫𑀕𑁆𑀕𑀲𑀫𑀸𑀳𑀺𑀢𑀸’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺.

𑀧𑀜𑁆𑀘𑀸𑀮𑀘𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀢𑀸𑀬𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁯. 𑀅𑀢𑀻𑀢𑀚𑀸𑀢𑀺𑀬𑀁 𑀲𑀬𑀁𑀓𑀸𑀭𑀯𑀲𑁂𑀦 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀉𑀧𑁆𑀧𑀸𑀤𑀺𑀢𑀢𑁆𑀢𑀸 𑀧𑀼𑀩𑁆𑀩𑁂 𑀢𑀺𑀢𑁆𑀣𑀓𑀭𑁄. 𑀢𑁂𑀦𑀸𑀳 ‘‘𑀤𑀺𑀝𑁆𑀞𑀺 𑀉𑀧𑁆𑀧𑀸𑀤𑁂𑀢𑁆𑀯𑀸’’𑀢𑀺. 𑀅𑀧𑀭𑁂 𑀆𑀳𑀼 ‘‘𑀅𑀬𑀁 𑀫𑁂 𑀲𑀢𑁆𑀣𑀸𑀢𑀺 𑀕𑀳𑀡𑀯𑀲𑁂𑀦 𑀢𑀺𑀢𑁆𑀣𑀓𑀭𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀧𑀼𑀩𑁆𑀩𑁂 𑀢𑀺𑀢𑁆𑀣𑀓𑀭𑁄, 𑀅𑀢𑀻𑀢𑀢𑁆𑀢𑀪𑀸𑀯𑁂 𑀢𑀺𑀢𑁆𑀣𑀓𑀭𑀲𑀸𑀯𑀓𑁄’’𑀢𑀺. 𑀢𑁂 ‘‘𑀤𑀺𑀝𑁆𑀞𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸𑀢𑀺 ¶ 𑀢𑀲𑁆𑀲 𑀲𑀢𑁆𑀣𑀼𑀦𑁄 𑀤𑀺𑀝𑁆𑀞𑀺𑀁 𑀆𑀤𑀸𑀬 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄’’𑀢𑀺 𑀯𑀤𑀦𑁆𑀢𑀺. 𑀢𑀺𑀢𑁆𑀣𑀁 𑀦𑀸𑀫 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀫𑀺𑀘𑁆𑀙𑀸𑀯𑀸𑀤𑀲𑁆𑀲 𑀅𑀪𑀸𑀯𑀢𑁄. 𑀢𑀺𑀢𑁆𑀣𑁂 𑀦𑀺𑀬𑀼𑀢𑁆𑀢𑀸𑀢𑀺 𑀢𑀺𑀢𑁆𑀣𑀺𑀓𑀸, 𑀢𑁂 𑀏𑀯 𑀢𑀺𑀢𑁆𑀣𑀺𑀬𑀸𑀢𑀺 𑀯𑀼𑀢𑁆𑀢𑀸 𑀓-𑀓𑀸𑀭𑀲𑁆𑀲 𑀬-𑀓𑀸𑀭𑀁 𑀓𑀢𑁆𑀯𑀸. 𑀢𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀓𑀮𑁆𑀬𑀸𑀡𑀓𑀫𑁆𑀫𑀲𑁆𑀲. 𑀦𑀺𑀲𑁆𑀲𑀦𑁆𑀤𑁂𑀦𑀸𑀢𑀺 𑀨𑀮𑀪𑀸𑀯𑁂𑀦. 𑀯𑀻𑀭𑀺𑀬𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀢𑀺 𑀯𑀻𑀭𑀺𑀬𑀤𑀻𑀧𑀦𑀸𑀢𑀺 𑀅𑀢𑁆𑀣𑁄.

𑀅𑀦𑀺𑀬𑀫𑀺𑀢𑀆𑀡𑀢𑁆𑀢𑀻𑀢𑀺 𑀅𑀦𑀺𑀬𑀫𑀯𑀺𑀥𑀸𑀦𑀁 𑀅𑀦𑀺𑀬𑀫𑀯𑀲𑁂𑀦 𑀯𑀺𑀥𑀺𑀯𑀘𑀦𑀁. 𑀢𑀡𑁆𑀳𑀸𑀲𑁄𑀢𑀦𑁆𑀢𑀺 𑀢𑀡𑁆𑀳𑀸𑀧𑁆𑀧𑀩𑀦𑁆𑀥𑀦𑀁. 𑀦𑀻𑀳𑀭𑀸𑀢𑀺 𑀲𑀫𑁂𑀳𑀺 𑀧𑀚𑀳. 𑀏𑀓𑀢𑁆𑀢𑀦𑁆𑀢𑀺 𑀏𑀓𑀕𑁆𑀕𑀁. 𑀢𑁂𑀦𑀸𑀳 ‘‘𑀛𑀸𑀦’’𑀦𑁆𑀢𑀺. 𑀉𑀧𑀧𑀚𑁆𑀚𑀢𑀻𑀢𑀺 𑀦 𑀉𑀧𑁆𑀧𑀚𑁆𑀚𑀢𑀺 𑀦 𑀧𑀸𑀧𑀼𑀡𑀸𑀢𑀻𑀢𑀺 𑀆𑀳 ‘‘𑀦 𑀧𑀝𑀺𑀮𑀪𑀢𑀻’’𑀢𑀺. 𑀦 𑀑𑀲𑀓𑁆𑀓𑁂𑀬𑁆𑀬𑀸𑀢𑀺 𑀦 𑀲𑀗𑁆𑀓𑁄𑀘𑀁 𑀆𑀧𑀚𑁆𑀚𑁂𑀬𑁆𑀬. 𑀖𑀭𑀸𑀯𑀸𑀲𑀢𑁄 𑀧𑀭𑀺𑀩𑁆𑀩𑀚𑀦𑀁 𑀧𑀭𑀺𑀢𑁄 𑀅𑀧𑀕𑀫𑁄𑀢𑀺 𑀧𑀭𑀺𑀩𑁆𑀩𑀚𑁄. 𑀧𑀩𑁆𑀩𑀚𑀺𑀢𑀯𑀢𑀲𑀫𑀸𑀤𑀸𑀦𑀲𑁆𑀲 𑀅𑀤𑀴𑁆𑀳𑀢𑀸𑀬 𑀘 𑀢𑀢𑁆𑀣 𑀘 𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸𑀬 𑀲𑀺𑀣𑀺𑀮𑀕𑀳𑀺𑀢𑀸. 𑀅𑀢𑀺𑀭𑁂𑀓𑀦𑁆𑀢𑀺 𑀧𑀩𑁆𑀩𑀚𑁆𑀚𑀸𑀬 𑀧𑀼𑀭𑀺𑀫𑀓𑀸𑀮𑀢𑁄𑀧𑀺 𑀅𑀥𑀺𑀓𑀁. 𑀉𑀧𑀭𑀻𑀢𑀺 𑀉𑀧𑀭𑀽𑀧𑀭𑀺. 𑀤𑀼𑀓𑁆𑀓𑀝𑀁 𑀅𑀓𑀢𑀫𑁂𑀯 𑀲𑁂𑀬𑁆𑀬𑁄𑀢𑀺 𑀤𑀼𑀘𑁆𑀘𑀭𑀺𑀢𑀁 𑀦𑀸𑀫 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀓𑀢𑀫𑁂𑀯 𑀳𑀺𑀢𑀸𑀯𑀳𑀁.

𑀬𑀁 𑀓𑀺𑀜𑁆𑀘𑀻𑀢𑀺 𑀬𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁. 𑀲𑀺𑀣𑀺𑀮𑀁 𑀓𑀢𑀦𑁆𑀢𑀺 𑀅𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸𑀬 𑀲𑀺𑀣𑀺𑀮𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀢𑀁. 𑀏𑀯𑀭𑀽𑀧𑀫𑁂𑀯𑀸𑀢𑀺 𑀏𑀯𑀭𑀽𑀧𑀁 𑀧𑀭𑀸𑀫𑀝𑁆𑀞𑀲𑀸𑀫𑀜𑁆𑀜𑀲𑀤𑀺𑀲𑀫𑁂𑀯 𑀧𑀘𑁆𑀙𑀸𑀦𑀼𑀢𑀸𑀧𑀘𑀭𑀺𑀬𑀸𑀤𑀺𑀧𑀝𑀺𑀪𑀸𑀕𑀢𑁄. 𑀲𑀁𑀓𑀺𑀮𑀺𑀝𑁆𑀞𑀫𑁂𑀯 𑀢𑀡𑁆𑀳𑀸𑀲𑀁𑀓𑀺𑀮𑁂𑀲𑀉𑀧𑀓𑁆𑀓𑀺𑀮𑀺𑀝𑁆𑀞𑀢𑁆𑀢𑀸. 𑀆𑀲𑀗𑁆𑀓𑀺𑀢𑀧𑀭𑀺𑀲𑀗𑁆𑀓𑀺𑀢𑀦𑁆𑀢𑀺𑀆𑀤𑀺𑀢𑁄 𑀲𑀫𑀦𑁆𑀢𑀢𑁄𑀧𑀺 𑀧𑀭𑁂𑀳𑀺 𑀲𑀗𑁆𑀓𑀺𑀢𑀁. 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀁, 𑀢𑀢𑁆𑀣 𑀦𑀺𑀬𑀼𑀢𑁆𑀢𑀸𑀢𑀺 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀺𑀓𑀸, 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺𑀪𑀽𑀢𑀸’’𑀢𑀺. 𑀧𑀼𑀩𑁆𑀩𑀧𑀥𑀸𑀦𑀪𑀽𑀢𑀸𑀢𑀺 𑀧𑀞𑀫𑀸𑀭𑀫𑁆𑀪𑀪𑀽𑀢𑀸.

𑀢𑀸𑀬𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀘𑀦𑁆𑀤𑀺𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁦. 𑀯𑀺𑀫𑀸𑀦𑁂 ¶ 𑀕𑀳𑀺𑀢𑁂 𑀢𑀁𑀦𑀺𑀯𑀸𑀲𑀻𑀧𑀺 𑀕𑀳𑀺𑀢𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀘𑀦𑁆𑀤𑀯𑀺𑀫𑀸𑀦𑀯𑀸𑀲𑀻 𑀤𑁂𑀯𑀧𑀼𑀢𑁆𑀢𑁄’’𑀢𑀺. 𑀲𑀩𑁆𑀩𑀥𑀻𑀢𑀺 𑀲𑀩𑁆𑀩𑀲𑁆𑀫𑀸 𑀤𑀼𑀕𑁆𑀕𑀝𑁆𑀞𑀸𑀦𑀸 𑀯𑀺𑀧𑁆𑀧𑀫𑀼𑀢𑁆𑀢𑁄𑀲𑀺 𑀪𑀕𑀯𑀸 𑀢𑁆𑀯𑀁, 𑀢𑀲𑁆𑀫𑀸 𑀫𑀬𑁆𑀳𑀫𑁆𑀧𑀺 𑀇𑀢𑁄 𑀲𑀫𑁆𑀩𑀸𑀥𑀝𑁆𑀞𑀸𑀦𑀢𑁄 𑀯𑀺𑀧𑁆𑀧𑀫𑁄𑀓𑁆𑀔𑀁 𑀓𑀭𑁄𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀢𑀲𑁆𑀲 𑀫𑁂 𑀲𑀭𑀡𑀁 𑀪𑀯𑀸’’𑀢𑀺. 𑀮𑁄𑀓𑀸𑀦𑀼𑀓𑀫𑁆𑀧𑀓𑀸𑀢𑀺 𑀲𑀩𑁆𑀩𑀲𑁆𑀲 ¶ 𑀮𑁄𑀓𑀲𑁆𑀲 𑀅𑀦𑀼𑀕𑁆𑀕𑀳𑀸, 𑀢𑀲𑁆𑀫𑀸 𑀢𑀼𑀬𑁆𑀳𑀫𑁆𑀧𑀺 𑀏𑀢𑀲𑁆𑀲𑀧𑀺 𑀘𑀦𑁆𑀤𑀲𑁆𑀲. 𑀢𑀸𑀤𑀺𑀲𑀸 𑀏𑀯𑀸𑀢𑀺 𑀲𑀫𑀸𑀦𑀸 𑀏𑀯. 𑀧𑀫𑀼𑀜𑁆𑀘𑀲𑀻𑀢𑀺 𑀧𑀫𑀼𑀜𑁆𑀘𑀺𑀢𑁆𑀣. 𑀢𑁂𑀦𑀸𑀳 ‘‘𑀅𑀢𑀻𑀢𑀢𑁆𑀣𑁂 𑀯𑀢𑁆𑀢𑀫𑀸𑀦𑀯𑀘𑀦’’𑀦𑁆𑀢𑀺.

𑀘𑀦𑁆𑀤𑀺𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀽𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁧. 𑀅𑀦𑁆𑀥𑀪𑀸𑀯𑀓𑀭𑀡𑁂𑀢𑀺 𑀮𑁄𑀓𑀲𑁆𑀲 𑀅𑀦𑁆𑀥𑀓𑀭𑀡𑁂𑀢𑀺𑀧𑀺 𑀅𑀧𑀭𑁂. 𑀢𑁂𑀦𑀸𑀳 ‘‘𑀢𑀫𑀲𑀻’’𑀢𑀺. 𑀯𑀺𑀭𑁄𑀘𑀢𑀻𑀢𑀺 𑀯𑀺𑀚𑁆𑀚𑁄𑀢𑀢𑀺. 𑀓𑀸𑀫𑀁 𑀤𑁂𑀯𑀧𑀼𑀢𑁆𑀢𑀯𑀲𑁂𑀦 𑀧𑀞𑀫𑀁 𑀤𑁂𑀯𑀢𑀸 𑀉𑀤𑁆𑀥𑀝𑀸, 𑀭𑀸𑀳𑀼𑀦𑁄 𑀧𑀦 𑀧𑀬𑁄𑀕𑁄 𑀢𑀲𑁆𑀲 𑀯𑀺𑀫𑀸𑀦𑁂𑀢𑀺 𑀆𑀳 ‘‘𑀫𑀡𑁆𑀟𑀮𑀻𑀢𑀺 𑀫𑀡𑁆𑀟𑀮𑀲𑀡𑁆𑀞𑀸𑀦𑁄’’𑀢𑀺. 𑀯𑀤𑀢𑀺 𑀢𑀤𑀸 𑀫𑀼𑀔𑁂𑀦 𑀕𑀳𑀺𑀢𑀢𑁆𑀢𑀸. 𑀫𑀼𑀔𑁂𑀦 𑀕𑀳𑀡𑀜𑁆𑀘𑁂𑀢𑁆𑀣 ‘‘𑀕𑀺𑀮𑀻’’𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀦 𑀘 𑀅𑀚𑁆𑀛𑁄𑀳𑀭𑀡𑀦𑁆𑀢𑀺 𑀆𑀳 ‘‘𑀕𑀺𑀮𑀻𑀢𑀺 𑀯𑀤𑀢𑀻’’𑀢𑀺. 𑀇𑀤𑀸𑀦𑀺 𑀢𑀲𑁆𑀲 𑀫𑀼𑀔𑁂𑀦 𑀕𑀳𑀡𑀲𑀫𑀢𑁆𑀣𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀸𑀳𑀼𑀲𑁆𑀲 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁄𑀢𑀺𑀆𑀤𑀺 𑀢𑀲𑁆𑀲 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀕𑀳𑀡𑀓𑀸𑀭𑀡𑀤𑀲𑁆𑀲𑀦𑀁. 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸𑀢𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀧𑀭𑀺𑀘𑀸𑀭𑀓𑀤𑁂𑀯𑀢𑀸. 𑀯𑁂𑀕𑀦𑁆𑀢𑀺 𑀚𑀯𑀁. 𑀲𑁄 𑀳𑀺 𑀓𑁂𑀦𑀘𑀺 𑀅𑀪𑀺𑀫𑀼𑀔𑀁 𑀅𑀢𑀺𑀤𑀼𑀦𑁆𑀦𑀺𑀯𑀸𑀭𑁄 𑀓𑀫𑁆𑀫𑀦𑀺𑀬𑀸𑀫𑀲𑀺𑀤𑁆𑀥𑁄. 𑀫𑀢𑁆𑀣𑀓𑀦𑁆𑀢𑀺 𑀓𑀡𑁆𑀞𑀲𑁆𑀲 𑀉𑀧𑀭𑀺𑀫𑀤𑁂𑀲𑀁. 𑀓𑁂𑀘𑀺 ‘‘𑀲𑀻𑀲𑀫𑀢𑁆𑀣𑀓𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺. 𑀦𑀺𑀓𑁆𑀔𑀫𑁂𑀬𑁆𑀬 𑀯𑁂𑀕𑀲𑁆𑀲 𑀢𑀺𑀓𑁆𑀔𑀲𑀻𑀖𑀣𑀸𑀫𑀪𑀸𑀯𑀢𑁄. 𑀆𑀓𑀟𑁆𑀠𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀕𑀫𑀦𑀤𑀺𑀲𑀸𑀪𑀺𑀫𑀼𑀔𑀁 𑀆𑀓𑀟𑁆𑀠𑀺𑀢𑁆𑀯𑀸. 𑀦𑀦𑁆𑀢𑀺 𑀭𑀸𑀳𑀼𑀁. 𑀉𑀤𑁆𑀥𑀁 𑀉𑀮𑁆𑀮𑀗𑁆𑀖𑁂𑀢𑀼𑀓𑀸𑀫𑀫𑁆𑀧𑀺 𑀑𑀦𑀫𑁂𑀬𑁆𑀬. 𑀧𑀤𑀤𑁆𑀯𑀬𑁂𑀦𑀧𑀺 𑀲𑁄 𑀫𑀳𑀸𑀲𑀭𑀻𑀭𑁄 𑀫𑀳𑀸𑀩𑀮𑁄, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀧𑀦 𑀕𑀫𑀦𑀯𑁂𑀕𑁄 𑀢𑁂𑀦 𑀲𑀩𑁆𑀩𑀣𑀸𑀧𑀺 𑀤𑀼𑀦𑁆𑀦𑀺𑀯𑀸𑀭𑀺𑀬𑁄𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀯𑀺𑀫𑀸𑀦𑁂𑀦𑀸𑀢𑀺 𑀘𑀦𑁆𑀤𑀕𑁆𑀕𑀳𑁂 𑀘𑀦𑁆𑀤𑀯𑀺𑀫𑀸𑀦𑁂𑀦, 𑀲𑀽𑀭𑀺𑀬𑀕𑁆𑀕𑀳𑁂 𑀲𑀽𑀭𑀺𑀬𑀯𑀺𑀫𑀸𑀦𑁂𑀦 𑀉𑀪𑀺𑀦𑁆𑀦𑀫𑁆𑀧𑀺 𑀯𑀺𑀫𑀸𑀦𑁂𑀦 𑀲𑀳𑁂𑀯. 𑀅𑀫𑀸𑀯𑀸𑀲𑀺𑀬𑀜𑁆𑀳𑀺 𑀤𑁆𑀯𑁂 𑀯𑀺𑀫𑀸𑀦𑀸𑀦𑀺 𑀬𑁄𑀚𑀦𑀫𑀢𑁆𑀢𑀦𑁆𑀢𑀭𑀺𑀢𑀸𑀦𑀺 𑀳𑀼𑀢𑁆𑀯𑀸 𑀲𑀳𑁂𑀯 𑀧𑀯𑀢𑁆𑀢𑀦𑁆𑀢𑀺. 𑀬𑀤𑀺 𑀤𑁆𑀯𑁂𑀧𑀺 𑀤𑁂𑀯𑀧𑀼𑀢𑁆𑀢𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀧𑀢𑁆𑀢𑀸, 𑀅𑀣 𑀓𑀲𑁆𑀫𑀸 𑀲𑀽𑀭𑀺𑀬𑀲𑀼𑀢𑁆𑀢𑁂 𑀏𑀯 ‘‘𑀧𑀚𑀁 𑀫𑀫’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀘𑀦𑁆𑀤𑀲𑀼𑀢𑁆𑀢𑁂𑀢𑀺? ‘‘𑀲𑁄 𑀘 𑀓𑀺𑀭 𑀦 𑀘𑀺𑀭𑀲𑁆𑀲𑁂𑀯 𑀢𑀢𑁄 𑀘𑀯𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀦𑀺𑀩𑁆𑀩𑀢𑁆𑀢𑁄, 𑀅𑀜𑁆𑀜𑀸 𑀏𑀯 𑀘 𑀤𑁂𑀯𑀢𑀸 𑀢𑀢𑁆𑀣 𑀯𑀲𑀺, 𑀬𑀲𑁆𑀫𑀺𑀁 𑀘𑀦𑁆𑀤𑀕𑁆𑀕𑀳𑁂 𑀪𑀕𑀯𑀸 𑀢𑀁 𑀕𑀸𑀣𑀁 𑀅𑀪𑀸𑀲𑀺, 𑀦 𑀢𑀣𑀸 𑀲𑀽𑀭𑀺𑀬𑁄, 𑀅𑀧𑀭𑀪𑀸𑀕𑁂 𑀧𑀦 𑀢𑀢𑁆𑀣𑀧𑀺 𑀓𑀸𑀮𑁂𑀦 𑀓𑀸𑀮𑀁 𑀭𑀸𑀳𑀼𑀕𑁆𑀕𑀳𑁄 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺.

𑀲𑀽𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀦𑀸𑀣𑀧𑀺𑀡𑁆𑀟𑀺𑀓𑀯𑀕𑁆𑀕𑁄

𑁧. 𑀘𑀦𑁆𑀤𑀺𑀫𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁨. 𑀧𑀩𑁆𑀩𑀢𑀢𑀝𑀸 ¶ ¶ 𑀲𑀦𑁆𑀤𑀫𑀸𑀦𑁄 𑀢𑀣𑀸𑀭𑀽𑀧𑁄 𑀦𑀤𑀻𑀦𑀺𑀯𑀢𑁆𑀢𑀦𑀧𑀤𑁂𑀲𑁄𑀧𑀺 𑀲𑀫𑁆𑀩𑀸𑀥𑀝𑁆𑀞𑀸𑀦𑀢𑀸𑀬 𑀓𑀘𑁆𑀙𑁄 𑀯𑀺𑀬𑀸𑀢𑀺 𑀆𑀳 ‘‘𑀧𑀩𑁆𑀩𑀢𑀓𑀘𑁆𑀙𑁂𑀧𑀻’’𑀢𑀺. 𑀧𑀝𑀺𑀧𑀓𑁆𑀔𑀤𑀽𑀭𑀻𑀪𑀸𑀯𑁂𑀦 𑀲𑁂𑀝𑁆𑀞𑀝𑁆𑀞𑁂𑀦 𑀘 𑀏𑀓𑁄 𑀉𑀤𑁂𑀢𑀻𑀢𑀺 𑀏𑀓𑁄𑀤𑀺, 𑀏𑀓𑀕𑁆𑀕𑀢𑀸. 𑀢𑀲𑁆𑀫𑀺𑀁 𑀬𑁄𑀕𑀢𑁄 𑀏𑀓𑀕𑁆𑀕𑀘𑀺𑀢𑁆𑀢𑀸 𑀇𑀥 𑀏𑀓𑁄𑀤𑀻. 𑀧𑀝𑀺𑀧𑀓𑁆𑀔𑀢𑁄 𑀅𑀢𑁆𑀢𑀸𑀦𑀁 𑀦𑀺𑀧𑀬𑀦𑁆𑀢𑀺 𑀯𑀺𑀲𑁄𑀥𑁂𑀦𑁆𑀢𑀻𑀢𑀺 𑀦𑀺𑀧𑀓𑀸, 𑀧𑀜𑁆𑀜𑀯𑀦𑁆𑀢𑁄. 𑀢𑁂𑀦𑀸𑀳 ‘‘𑀏𑀓𑀕𑁆𑀕𑀘𑀺𑀢𑁆𑀢𑀸 𑀘𑁂𑀯𑀸’’𑀢𑀺𑀆𑀤𑀺. 𑀓𑀸𑀬𑀸𑀤𑀺𑀪𑁂𑀤𑀁 𑀆𑀭𑀫𑁆𑀫𑀡𑀁 𑀲𑀸𑀢𑀺𑀲𑀬𑀸𑀬 𑀲𑀢𑀺𑀬𑀸 𑀲𑀭𑀦𑁆𑀢𑀻𑀢𑀺 𑀲𑀢𑀸. 𑀢𑁂𑀦𑀸𑀳 ‘‘𑀲𑀢𑀺𑀫𑀦𑁆𑀢𑁄’’𑀢𑀺. 𑀲𑁄𑀢𑁆𑀣𑀺𑀁 𑀕𑀫𑀺𑀲𑁆𑀲𑀦𑁆𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀧𑀤𑁂𑀲𑁂 𑀫𑀕𑀸 𑀲𑁄𑀢𑁆𑀣𑀺𑀫𑀦𑀼𑀧𑀤𑁆𑀤𑀯𑁂𑀦 𑀯𑀢𑁆𑀢𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀛𑀸𑀦𑀮𑀸𑀪𑀺𑀦𑁄 𑀲𑁄𑀢𑁆𑀣𑀺𑀁 𑀓𑀺𑀮𑁂𑀲𑁂𑀳𑀺 𑀅𑀦𑀼𑀧𑀤𑁆𑀤𑀼𑀢𑀸 𑀯𑀢𑁆𑀢𑀺𑀲𑁆𑀲𑀦𑁆𑀢𑀺. 𑀅𑀬𑀁 𑀓𑀺𑀭 𑀤𑁂𑀯𑀧𑀼𑀢𑁆𑀢𑁄 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀸𑀦𑀲𑀜𑁆𑀜𑀻, 𑀢𑀲𑁆𑀫𑀸 𑀏𑀯𑀫𑀸𑀳. 𑀪𑀕𑀯𑀸 ‘‘𑀅𑀬𑀁 𑀤𑁂𑀯𑀧𑀼𑀢𑁆𑀢𑁄 𑀅𑀦𑀺𑀩𑁆𑀩𑀸𑀦𑀕𑀸𑀫𑀻 𑀲𑀫𑀸𑀦𑁄 𑀦𑀺𑀩𑁆𑀩𑀸𑀦𑀕𑀸𑀫𑀺𑀲𑀜𑁆𑀜𑀻, 𑀳𑀦𑁆𑀤𑀲𑁆𑀲 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑁄 𑀤𑀲𑁆𑀲𑁂𑀫𑀻’’𑀢𑀺 𑀤𑀼𑀢𑀺𑀬𑀁 𑀕𑀸𑀣𑀫𑀸𑀳. 𑀘𑀢𑀼𑀦𑁆𑀦𑀁 𑀑𑀖𑀸𑀦𑀁, 𑀲𑀁𑀲𑀸𑀭𑀫𑀳𑁄𑀖𑀲𑁆𑀲𑁂𑀯 𑀯𑀸 𑀧𑀭𑀢𑀻𑀭𑀪𑀸𑀯𑀢𑁄 𑀧𑀭𑀢𑀻𑀭𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀅𑀫𑁆𑀩𑀼𑀦𑀺 𑀚𑀸𑀢𑁄 𑀅𑀫𑁆𑀩𑀼𑀚𑁄, 𑀫𑀘𑁆𑀙𑁄. 𑀲𑀼𑀢𑁆𑀢𑀚𑀸𑀮𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀘𑁆𑀙𑀸 𑀯𑀺𑀬 𑀓𑀺𑀮𑁂𑀲𑀚𑀸𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀕𑀫𑀺𑀲𑁆𑀲𑀦𑁆𑀢𑀻𑀢𑀺.

𑀘𑀦𑁆𑀤𑀺𑀫𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀯𑁂𑀡𑁆𑀟𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁩. 𑀧𑀬𑀺𑀭𑀼𑀧𑀸𑀲𑀺𑀬𑀸𑀢𑀺 𑀧𑀬𑀺𑀭𑀼𑀧𑀸𑀲𑀳𑁂𑀢𑀼. 𑀲𑀺𑀓𑁆𑀔𑀦𑁆𑀢𑀻𑀢𑀺 𑀢𑀺𑀲𑁆𑀲𑁄𑀧𑀺 𑀲𑀺𑀓𑁆𑀔𑀸 𑀲𑀺𑀓𑁆𑀔𑀦𑁆𑀢𑀺. 𑀲𑀺𑀝𑁆𑀞𑀺𑀧𑀤𑁂𑀢𑀺 𑀓𑀺𑀮𑁂𑀲𑀸𑀦𑀁 𑀲𑀸𑀲𑀦𑀢𑁄 𑀯𑀝𑁆𑀝𑀤𑀼𑀓𑁆𑀔𑀧𑀭𑀺𑀢𑁆𑀢𑀸𑀲𑀦𑀢𑁄 𑀘 𑀲𑀺𑀝𑁆𑀞𑀺𑀲𑀜𑁆𑀜𑀺𑀢𑁂 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁄 𑀧𑀤𑁂, 𑀲𑀤𑁆𑀥𑀫𑁆𑀫𑁂𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀦𑀼𑀲𑀺𑀝𑁆𑀞𑀺𑀧𑀤𑁂’’𑀢𑀺. 𑀢𑀢𑁆𑀣 𑀅𑀦𑀼𑀲𑀺𑀝𑁆𑀞𑀻𑀢𑀺 𑀲𑀤𑁆𑀥𑀫𑁆𑀫𑁄. 𑀓𑀸𑀮𑁂𑀢𑀺 𑀬𑀼𑀢𑁆𑀢𑀧𑀢𑁆𑀢𑀓𑀸𑀮𑁂. 𑀅𑀧𑁆𑀧𑀫𑀸𑀤𑁄𑀦𑀸𑀫 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸.

𑀯𑁂𑀡𑁆𑀟𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀤𑀻𑀖𑀮𑀝𑁆𑀞𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁪. 𑀢𑀣𑁂𑀯 ¶ 𑀧𑀜𑁆𑀜𑀸𑀬𑀻𑀢𑀺 𑀤𑀻𑀖𑀮𑀝𑁆𑀞𑀺𑀢𑁆𑀯𑁂𑀯 𑀧𑀜𑁆𑀜𑀸𑀬𑀺, 𑀢𑀣𑀸𑀲𑀫𑀜𑁆𑀜𑀸 𑀏𑀯 𑀅𑀳𑁄𑀲𑀺.

𑀤𑀻𑀖𑀮𑀝𑁆𑀞𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀦𑀦𑁆𑀤𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁫. 𑀦𑀢𑁆𑀣𑀺 ¶ 𑀏𑀢𑀲𑁆𑀲 𑀆𑀯𑀝𑁆𑀝𑀁 𑀆𑀯𑀭𑀡𑀦𑁆𑀢𑀺 𑀅𑀦𑀸𑀯𑀝𑀁. 𑀭𑀼𑀓𑁆𑀔𑁄 𑀯𑀸 𑀧𑀩𑁆𑀩𑀢𑁄 𑀯𑀸𑀢𑀺 𑀲𑀢𑁆𑀢𑀸𑀦𑀁 𑀧𑀓𑀢𑀺𑀘𑀓𑁆𑀔𑀼𑀲𑁆𑀲 𑀆𑀯𑀭𑀡𑀪𑀽𑀢𑁄 𑀭𑀼𑀓𑁆𑀔𑁄 𑀯𑀺𑀬 𑀧𑀩𑁆𑀩𑀢𑁄 𑀯𑀺𑀬 𑀘 𑀅𑀪𑀺𑀪𑀯𑀺𑀢𑀼𑀁 𑀲𑀫𑀢𑁆𑀣𑁄 𑀜𑁂𑀬𑁆𑀬𑀸𑀯𑀭𑀡𑁄 𑀦𑀢𑁆𑀣𑀺. 𑀓𑀣𑀁𑀯𑀺𑀥𑀦𑁆𑀢𑀺 𑀓𑀣𑀁𑀲𑀡𑁆𑀞𑀺𑀢𑀁, 𑀓𑀣𑀁𑀧𑀓𑀸𑀭𑀁 𑀯𑀸. 𑀤𑀼𑀓𑁆𑀔𑀦𑁆𑀢𑀺 𑀯𑀝𑁆𑀝𑀤𑀼𑀓𑁆𑀔𑀁.

𑀦𑀦𑁆𑀤𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀦𑁆𑀤𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁬. 𑀳𑁂𑀝𑁆𑀞𑀸𑀢𑀺 𑀓𑀸𑀫𑀪𑀯𑁂. 𑀢𑀢𑁆𑀣 𑀳𑀺 𑀧𑀭𑀺𑀩𑁆𑀪𑀫𑀦𑁆𑀢𑀲𑁆𑀲 𑀧𑀢𑀺𑀝𑁆𑀞𑀸 𑀤𑀼𑀮𑁆𑀮𑀪𑀸 𑀬𑁂𑀪𑀼𑀬𑁆𑀬𑁂𑀦 𑀢𑀢𑁆𑀣 𑀲𑀢𑁆𑀢𑀸 𑀦𑀺𑀫𑀼𑀕𑁆𑀕𑀸 𑀏𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀳𑁂𑀝𑁆𑀞𑀸 𑀅𑀧𑁆𑀧𑀢𑀺𑀝𑁆𑀞𑁄 𑀲𑀁𑀲𑀸𑀭𑁄. 𑀉𑀧𑀭𑀻𑀢𑀺 𑀫𑀳𑀕𑁆𑀕𑀢𑀪𑀯𑁂. 𑀢𑀢𑁆𑀣 𑀳𑀺 𑀦𑀺𑀩𑁆𑀩𑀢𑁆𑀢𑀲𑁆𑀲 𑀦𑀺𑀩𑁆𑀩𑀸𑀦𑀁 𑀆𑀭𑀼𑀳𑀺𑀢𑀼𑀁 𑀆𑀮𑀫𑁆𑀩𑀦𑀸 𑀤𑀼𑀮𑁆𑀮𑀪𑀸, 𑀛𑀸𑀦𑀸𑀪𑀺𑀭𑀢𑀺𑀬𑀸 𑀢𑀢𑁆𑀣𑁂𑀯 𑀦𑀺𑀓𑀦𑁆𑀢𑀺 𑀢𑁂𑀲𑀁 𑀩𑀮𑀯𑀢𑀻 𑀳𑁄𑀢𑀺, 𑀢𑀲𑁆𑀫𑀸 𑀉𑀧𑀭𑀺 𑀅𑀦𑀸𑀮𑀫𑁆𑀩𑀦𑁄 𑀲𑀁𑀲𑀸𑀭𑁄. 𑀧𑁂𑀲𑀺𑀢𑀢𑁆𑀢𑁄𑀢𑀺 𑀦𑀺𑀩𑁆𑀩𑀸𑀦𑀁 𑀧𑀢𑀺 𑀧𑁂𑀲𑀺𑀢𑀘𑀺𑀢𑁆𑀢𑁄. 𑀢𑀬𑁄 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀸𑀢𑀺 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀬𑁄 𑀢𑀬𑁄 𑀅𑀪𑀺𑀲𑀗𑁆𑀔𑀸𑀭𑀸. 𑀢𑁂𑀦 ‘‘𑀦𑀦𑁆𑀤𑀻𑀧𑀼𑀩𑁆𑀩𑀓𑁄 𑀓𑀫𑁆𑀫𑀪𑀯𑁄’’𑀢𑀺 𑀯𑀢𑁆𑀯𑀸 ‘‘𑀦𑀦𑁆𑀤𑀺𑀁 𑀚𑀦𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑁄. 𑀓𑀸𑀫𑀲𑀜𑁆𑀜𑀸𑀲𑀻𑀲𑁂𑀦 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀕𑀳𑀡𑀁, 𑀓𑀸𑀫𑀘𑁆𑀙𑀦𑁆𑀤𑀧𑀫𑀼𑀔𑀸𑀦𑀺 𑀘 𑀑𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀕𑀳𑀺𑀢𑀸𑀦𑀻𑀢𑀺 𑀆𑀳 ‘‘𑀓𑀸𑀫𑀲𑀜𑁆𑀜𑀸𑀕𑀳𑀡𑁂𑀦 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀻’’𑀢𑀺. 𑀭𑀽𑀧𑀪𑀯𑁄 𑀭𑀽𑀧𑀁 𑀪𑀯𑀧𑀤𑀮𑁄𑀧𑁂𑀦. 𑀭𑀽𑀧𑀪𑀯𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀲𑁂𑀲𑀪𑀯𑀲𑁆𑀲𑀧𑀺 𑀕𑀳𑀡𑀁. 𑀢𑀲𑁆𑀲 𑀲𑀁𑀬𑁄𑀚𑀦𑀕𑁆𑀕𑀳𑀡𑁂𑀦 𑀧𑀜𑁆𑀘 𑀉𑀤𑁆𑀥𑀫𑁆𑀪𑀸𑀕𑀺𑀬𑀲𑀁𑀬𑁄𑀚𑀦𑀸𑀦𑀺 𑀕𑀳𑀺𑀢𑀸𑀦𑀺. 𑀫𑀳𑁄𑀖𑁂𑀢𑀺 ¶ 𑀲𑀁𑀲𑀸𑀭𑀫𑀳𑁄𑀖𑁂. 𑀢𑁂𑀲𑀦𑁆𑀢𑀺 𑀓𑀸𑀫𑀪𑀯𑀸𑀤𑀻𑀦𑀁 𑀕𑀳𑀡𑁂𑀦 𑀪𑀯𑀪𑀸𑀯𑁂𑀦 𑀢𑀤𑁂𑀓𑀮𑀓𑁆𑀔𑀡𑀢𑀸𑀬. 𑀅𑀭𑀽𑀧𑀪𑀯𑁄 𑀕𑀳𑀺𑀢𑁄 𑀮𑀓𑁆𑀔𑀡𑀳𑀸𑀭𑀦𑀬𑁂𑀦. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀘𑀦𑁆𑀤𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀯𑀸𑀲𑀼𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁭. 𑀙𑀝𑁆𑀞𑀁 𑀳𑁂𑀝𑁆𑀞𑀸 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀯𑀸𑀲𑀼𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀼𑀩𑁆𑀭𑀳𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁮. 𑀲𑀼𑀩𑁆𑀭𑀳𑁆𑀫𑀸𑀢𑀺 𑀢𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀦𑀸𑀫𑀁. 𑀢𑀲𑁆𑀲 𑀲𑀢𑁆𑀣𑀼 𑀲𑀦𑁆𑀢𑀺𑀓𑀽𑀧𑀲𑀗𑁆𑀓𑀫𑀦𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ¶ ‘‘𑀲𑁄 𑀓𑀺𑀭𑀸’’𑀢𑀺𑀆𑀤𑀺𑀫𑀸𑀳. 𑀢𑀤𑁂𑀯 𑀲𑁄𑀓𑀁 𑀢𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺. 𑀅𑀘𑁆𑀙𑀭𑀸𑀲𑀗𑁆𑀖𑀧𑀭𑀺𑀯𑀼𑀢𑁄𑀢𑀺 𑀲𑀳𑀲𑁆𑀲𑀫𑀢𑁆𑀢𑁂𑀦 𑀅𑀘𑁆𑀙𑀭𑀸𑀲𑀗𑁆𑀖𑁂𑀦 𑀧𑀭𑀺𑀯𑀼𑀢𑁄. 𑀦𑀦𑁆𑀤𑀦𑀓𑀻𑀴𑀺𑀓𑀦𑁆𑀢𑀺 𑀦𑀦𑁆𑀤𑀦𑀯𑀦𑀓𑀻𑀴𑀺𑀓𑀁. 𑀳𑀢𑁆𑀣𑀁 𑀆𑀕𑀘𑁆𑀙𑀢𑀻𑀢𑀺 𑀳𑀢𑁆𑀣𑀕𑀬𑁆𑀳𑀼𑀧𑀕𑁄 𑀳𑁄𑀢𑀺. 𑀕𑀦𑁆𑀣𑁂𑀦𑁆𑀢𑀻𑀢𑀺 𑀏𑀢𑁆𑀣 𑀫𑀸𑀮𑀸𑀯𑁂𑀞𑀦𑀫𑁆𑀧𑀺 𑀔𑀺𑀟𑁆𑀟𑀸𑀧𑀲𑀼𑀢𑀢𑀸𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀜𑀣𑀸 𑀧𑀼𑀧𑁆𑀨𑀸𑀦𑀺𑀬𑁂𑀯 𑀢𑀸𑀬 𑀢𑀸𑀬 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀫𑀸𑀮𑀸𑀪𑀸𑀯𑁂𑀦 𑀳𑀢𑁆𑀣𑀁 𑀉𑀧𑀕𑀘𑁆𑀙𑀦𑁆𑀢𑀻𑀢𑀺. 𑀉𑀧𑀘𑁆𑀙𑁂𑀤𑀓𑀓𑀫𑁆𑀫𑀯𑀲𑁂𑀦𑀸𑀢𑀺 𑀢𑀲𑁆𑀫𑀺𑀁 𑀤𑁂𑀯𑀮𑁄𑀓𑁂 𑀆𑀬𑀼𑀲𑁂𑀲𑁂 𑀲𑀢𑀺 𑀏𑀯 𑀢𑀲𑁆𑀲 𑀧𑀦 𑀉𑀧𑀖𑀸𑀢𑀓𑀲𑁆𑀲 𑀮𑀤𑁆𑀥𑁄𑀓𑀸𑀲𑀲𑁆𑀲 𑀧𑀸𑀧𑀓𑀫𑁆𑀫𑀲𑁆𑀲 𑀯𑀲𑁂𑀦. ‘‘𑀧𑀳𑀸𑀭𑁄’’𑀢𑀺 𑀤𑀺𑀯𑀲𑀲𑁆𑀲 𑀢𑀢𑀺𑀬𑁄 𑀪𑀸𑀕𑁄 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀏𑀓𑀧𑁆𑀧𑀳𑀸𑀭𑁂𑀦𑁂𑀯𑀸𑀢𑀺 𑀏𑀓𑀯𑁂𑀮𑀸𑀬𑀫𑁂𑀯𑀸𑀢𑀺 𑀅𑀢𑁆𑀣𑁄.

𑀧𑀺𑀬𑀯𑀢𑁆𑀣𑀼𑀓𑀲𑁄𑀓𑁂𑀦𑀸𑀢𑀺 𑀧𑀺𑀬𑀯𑀢𑁆𑀣𑀼𑀦𑀺𑀫𑀺𑀢𑁆𑀢𑀓𑁂𑀦 𑀲𑁄𑀓𑁂𑀦. 𑀭𑀼𑀧𑁆𑀧𑀫𑀸𑀦𑁄𑀢𑀺 𑀧𑀻𑀴𑀺𑀬𑀫𑀸𑀦𑁄. 𑀲𑀢𑁆𑀢𑀫𑁂 𑀤𑀺𑀯𑀲𑁂𑀢𑀺 𑀫𑀦𑀼𑀲𑁆𑀲𑀕𑀡𑀦𑀸𑀬 𑀲𑀢𑁆𑀢𑀫𑁂 𑀤𑀺𑀯𑀲𑁂. 𑀢𑀢𑁆𑀣𑁂𑀯𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀺𑀢𑀩𑁆𑀩𑀁 𑀇𑀫𑀺𑀦𑀸 𑀢𑀸𑀳𑀺 𑀘 𑀲𑀳𑁂𑀯 𑀧𑀼𑀩𑁆𑀩𑁂 𑀢𑀲𑁆𑀲 𑀧𑀸𑀧𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸. 𑀭𑀼𑀧𑁆𑀧𑀻𑀢𑀺 𑀘𑀺𑀢𑁆𑀢𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀺. 𑀦𑀺𑀤𑁆𑀥𑀫𑀺𑀢𑀼𑀦𑁆𑀢𑀺 𑀦𑀻𑀳𑀭𑀺𑀢𑀼𑀁 𑀅𑀧𑀦𑁂𑀢𑀼𑀁. 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸𑀢𑀺 𑀢𑀸𑀳𑀺 𑀧𑀜𑁆𑀘𑀲𑀢𑀸𑀳𑀺 𑀅𑀘𑁆𑀙𑀭𑀸𑀳𑀺 𑀲𑀤𑁆𑀥𑀺𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸.

𑀇𑀤𑀦𑁆𑀢𑀺 ¶ 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀤𑀲𑁆𑀲𑁂𑀢𑀺 𑀆𑀲𑀦𑁆𑀦𑀧𑀘𑁆𑀘𑀓𑁆𑀔𑀪𑀸𑀯𑀢𑁄. 𑀦𑀺𑀘𑁆𑀘𑀦𑁆𑀢𑀺 𑀲𑀤𑀸. 𑀲𑁆𑀯𑀸𑀬𑀁 𑀦𑀺𑀘𑁆𑀘𑀢𑁆𑀣𑁄 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 𑀕𑀳𑁂𑀢𑀩𑁆𑀩𑁄𑀢𑀺 𑀢𑀢𑁆𑀣 𑀧𑀳𑀸𑀢𑀩𑁆𑀩𑀁 𑀕𑀳𑁂𑀢𑀩𑁆𑀩𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀤𑁂𑀯𑀮𑁄𑀓𑁂’’𑀢𑀺𑀆𑀤𑀺𑀫𑀸𑀳. 𑀦 𑀕𑀳𑁂𑀢𑀩𑁆𑀩𑁄 𑀳𑁂𑀢𑀼𑀧𑀯𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀢𑀲𑁆𑀲 𑀉𑀢𑁆𑀭𑀸𑀲𑀲𑁆𑀲 𑀅𑀪𑀸𑀯𑀢𑁄. 𑀢𑁂𑀲𑀽𑀢𑀺 𑀤𑀼𑀓𑁆𑀔𑁂𑀲𑀼. 𑀢𑀸𑀦𑀺 𑀳𑀺 𑀳𑁂𑀢𑀼𑀧𑀘𑁆𑀘𑀬𑁂𑀳𑀺 𑀓𑀢𑁆𑀢𑀩𑁆𑀩𑀢𑁄 𑀕𑀸𑀣𑀸𑀬𑀁 ‘‘𑀓𑀺𑀘𑁆𑀙𑁂𑀲𑀽’’𑀢𑀺 𑀯𑀼𑀢𑁆𑀢𑀸𑀦𑀺. 𑀓𑀺𑀘𑁆𑀙𑁂𑀲𑀽𑀢𑀺 𑀯𑀸 𑀓𑀺𑀘𑁆𑀙𑀦𑀺𑀫𑀺𑀢𑁆𑀢𑀁. 𑀬𑀸𑀲𑀜𑁆𑀳𑀺 𑀧𑀬𑁄𑀕𑀯𑀺𑀧𑀢𑁆𑀢𑀻𑀦𑀁 𑀯𑀲𑁂𑀦𑀲𑁆𑀲 𑀢𑀸𑀦𑀺 𑀤𑀼𑀓𑁆𑀔𑀸𑀦𑀺 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑀁𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀸 𑀳𑀺 𑀅𑀲𑁆𑀲 𑀧𑀬𑁄𑀕𑀯𑀺𑀧𑀢𑁆𑀢𑀺𑀬𑁄 𑀕𑀢𑀺𑀯𑀺𑀧𑀢𑁆𑀢𑀺𑀬𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀉𑀧𑀕𑀫𑀦𑁂𑀦 𑀳𑀸𑀬𑁂𑀬𑁆𑀬𑀼𑀁. 𑀦𑀺𑀩𑁆𑀩𑀢𑁆𑀢𑀸𑀦𑀁 𑀤𑀺𑀝𑁆𑀞𑀸𑀦𑀻𑀢𑀺 𑀦𑀺𑀩𑁆𑀩𑀢𑁆𑀢𑀸𑀦𑀁 𑀯𑀲𑁂𑀦 𑀤𑀺𑀝𑁆𑀞𑀸𑀦𑀺 𑀤𑀼𑀓𑁆𑀔𑀸𑀦𑀺. 𑀢𑁂𑀲𑀼 𑀘 𑀤𑀼𑀓𑁆𑀔𑁂𑀲𑀼. 𑀲𑀩𑁆𑀩𑀢𑁆𑀣 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁. 𑀟𑀬𑁆𑀳𑀫𑀸𑀦𑁄 𑀯𑀺𑀬 𑀘𑀺𑀢𑁆𑀢𑀲𑀦𑁆𑀢𑀸𑀧𑁂𑀦.

𑀘𑀢𑁆𑀢𑀸𑀭𑀺𑀧𑀺 𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀢𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀩𑁄𑀥𑀺, 𑀲𑀢𑀺𑀆𑀤𑀺𑀥𑀫𑁆𑀫𑀲𑀸𑀫𑀕𑁆𑀕𑀻, 𑀢𑀲𑁆𑀫𑀸 𑀩𑁄𑀚𑁆𑀛𑀸 𑀩𑁄𑀥𑀺𑀢𑁄. 𑀲𑀸 𑀧𑀦 𑀩𑁄𑀥𑀺 𑀪𑀸𑀯𑀦𑀸𑀓𑀸𑀭𑁂𑀦𑁂𑀯 𑀧𑀯𑀢𑁆𑀢𑀢𑀺, 𑀅𑀜𑁆𑀜𑀢𑁆𑀭𑀲𑀤𑁆𑀤𑀬𑁄𑀕𑁂𑀦 𑀘 ‘‘𑀩𑁄𑀚𑁆𑀛𑀸’’𑀢𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀦𑁆𑀢𑀺 𑀢𑀤𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀫𑀼𑀜𑁆𑀘𑀺𑀢𑁆𑀯𑀸𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀩𑁄𑀚𑁆𑀛𑀗𑁆𑀕𑀪𑀸𑀯𑀦’’𑀦𑁆𑀢𑀺 𑀆𑀳. 𑀢𑀧𑁄𑀕𑀼𑀡𑀦𑁆𑀢𑀺 𑀥𑀼𑀢𑀥𑀫𑁆𑀫𑀫𑀸𑀳. 𑀲𑁄 𑀳𑀺 𑀢𑀡𑁆𑀳𑀸𑀮𑁄𑀮𑀼𑀧𑁆𑀧𑀲𑁆𑀲 𑀢𑀧𑀦𑀢𑁄 𑀢𑀧𑁄, 𑀲𑀬𑀁 𑀕𑀼𑀡𑀲𑀪𑀸𑀯𑀢𑁆𑀢𑀸 𑀕𑀼𑀡𑀲𑀦𑁆𑀦𑀺𑀲𑁆𑀲𑀬𑀢𑁄 𑀘 𑀕𑀼𑀡𑀦𑁆𑀢𑀺. 𑀢𑁂𑀦𑀸𑀳 ‘‘𑀥𑀼𑀢𑀗𑁆𑀕𑀲𑀗𑁆𑀔𑀸𑀢𑀁 𑀢𑀧𑁄𑀕𑀼𑀡’’𑀦𑁆𑀢𑀺. 𑀲𑀩𑁆𑀩𑁂 𑀲𑀗𑁆𑀔𑀸𑀭𑀕𑀢𑀸 𑀦𑀺𑀲𑁆𑀲𑀚𑁆𑀚𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀩𑁆𑀩𑀦𑀺𑀲𑁆𑀲𑀕𑁆𑀕𑁄, 𑀅𑀲𑀗𑁆𑀔𑀢𑀥𑀸𑀢𑀽𑀢𑀺 𑀆𑀳 ‘‘𑀲𑀩𑁆𑀩𑀦𑀺𑀲𑁆𑀲𑀕𑁆𑀕𑀸𑀢𑀺 𑀦𑀺𑀩𑁆𑀩𑀸𑀦𑀢𑁄’’𑀢𑀺.

𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄𑀯 ¶ 𑀧𑀞𑀫𑀁 𑀯𑁂𑀤𑀺𑀢𑀩𑁆𑀩𑁄 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑀯𑀲𑁂𑀦 𑀢𑀲𑁆𑀲𑁂𑀯 𑀧𑀞𑀫𑀢𑁆𑀢𑀸. 𑀢𑀁 𑀧𑀦 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂 𑀳𑀻’’𑀢𑀺𑀆𑀤𑀺𑀫𑀸𑀳. 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀸 𑀏𑀯 𑀩𑁄𑀚𑁆𑀛𑀗𑁆𑀕𑀸𑀢𑀺 𑀆𑀳 ‘‘𑀲𑀳𑀯𑀺𑀧𑀲𑁆𑀲𑀦𑀸𑀬 𑀩𑁄𑀚𑁆𑀛𑀗𑁆𑀕𑁂’’𑀢𑀺. 𑀢𑀲𑁆𑀲𑀸𑀢𑀺 𑀢𑀣𑀸𑀪𑀸𑀯𑁂𑀦 𑀢𑀲𑁆𑀲 𑀬𑁄𑀕𑀺𑀦𑁄. 𑀬𑀲𑁆𑀫𑀸 𑀤𑁂𑀯𑀧𑀼𑀢𑁆𑀢𑀲𑁆𑀲 𑀲𑀢𑁆𑀣𑀸 𑀢𑀁 𑀕𑀸𑀣𑀁 𑀯𑀢𑁆𑀯𑀸 𑀉𑀧𑀭𑀺 𑀘 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀲𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀪𑀕𑀯𑀸 𑀘𑀢𑀼𑀲𑀘𑁆𑀘𑀯𑀲𑁂𑀦 𑀤𑁂𑀲𑀦𑀁 𑀯𑀺𑀦𑀺𑀯𑀢𑁆𑀢𑁂𑀲𑀻’’𑀢𑀺. 𑀤𑁂𑀯𑀧𑀼𑀢𑁆𑀢𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀻𑀢𑀺 𑀓𑀸𑀫𑀁 𑀢𑀲𑁆𑀲𑁂𑀯 𑀯𑀺𑀲𑁂𑀲𑀸𑀥𑀺𑀕𑀫𑁄 𑀇𑀥𑀸𑀕𑀢𑁄, 𑀧𑀜𑁆𑀘𑀲𑀢𑀫𑀢𑁆𑀢𑀸𑀳𑀺 𑀧𑀦 𑀅𑀘𑁆𑀙𑀭𑀸𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁭𑁩; 𑀫. 𑀦𑀺. 𑀅𑀝𑁆𑀞. 𑁧.𑁧𑁦𑁬) ‘‘𑀲𑁄 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀜𑁆𑀘𑀳𑀺 𑀅𑀘𑁆𑀙𑀭𑀸𑀲𑀢𑁂𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀣𑀸𑀯𑀭𑀁 𑀓𑀢𑁆𑀯𑀸 𑀤𑁂𑀯𑀮𑁄𑀓𑀫𑁂𑀯 𑀅𑀕𑀫𑀸𑀲𑀻’’𑀢𑀺.

𑀲𑀼𑀩𑁆𑀭𑀳𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀓𑀓𑀼𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁯. ‘‘𑀦𑀦𑁆𑀤𑀸𑀫𑀻’’𑀢𑀺 ¶ 𑀯𑀼𑀢𑁆𑀢𑁂 𑀦𑀦𑁆𑀤𑀻 𑀦𑀸𑀫 𑀧𑀩𑁆𑀩𑀚𑀺𑀢𑀲𑁆𑀲 𑀫𑀮𑀦𑁆𑀢𑀺 𑀘𑁄𑀤𑁂𑀢𑀼𑀓𑀸𑀫𑁄 𑀤𑁂𑀯𑀧𑀼𑀢𑁆𑀢𑁄 ‘‘𑀦𑀦𑁆𑀤𑀲𑀻’’𑀢𑀺 𑀧𑀼𑀘𑁆𑀙𑀺. 𑀅𑀣𑀲𑁆𑀲 𑀪𑀕𑀯𑀸 𑀢𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀓𑀺𑀁 𑀮𑀤𑁆𑀥𑀸’’𑀢𑀺? 𑀆𑀳. 𑀢𑁂𑀦 ‘‘𑀢𑀬𑀸 𑀫𑀫 𑀅𑀥𑀺𑀧𑁆𑀧𑁂𑀢𑀦𑀦𑁆𑀤𑀺𑀬𑀸 𑀇𑀥 𑀧𑀘𑁆𑀘𑀬𑁄 𑀏𑀯 𑀦𑀢𑁆𑀣𑀺, 𑀓𑀼𑀢𑁄 𑀲𑀸 𑀦𑀦𑁆𑀤𑀻’’𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀢𑀼𑀝𑁆𑀞𑀺 𑀦𑀸𑀫𑀸’’𑀢𑀺𑀆𑀤𑀺. 𑀅𑀣 𑀤𑁂𑀯𑀧𑀼𑀢𑁆𑀢𑁄 𑀦𑀦𑁆𑀤𑀺𑀬𑀸 𑀅𑀲𑀢𑀺 𑀲𑁄𑀓𑁂𑀦 𑀪𑀯𑀺𑀢𑀩𑁆𑀩𑀁, 𑀲𑁄𑀓𑁄 𑀘 𑀧𑀩𑁆𑀩𑀚𑀺𑀢𑀲𑁆𑀲 𑀫𑀮𑀦𑁆𑀢𑀺 𑀘𑁄𑀤𑁂𑀦𑁆𑀢𑁄 𑀆𑀳 ‘‘𑀢𑁂𑀦 𑀳𑀺, 𑀲𑀫𑀡, 𑀲𑁄𑀘𑀲𑀻’’𑀢𑀺. 𑀪𑀕𑀯𑀸 𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀦𑁆𑀢𑁄 ‘‘𑀓𑀺𑀁 𑀚𑀻𑀬𑀺𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀓𑀺𑀁 𑀫𑀁 𑀚𑀺𑀦𑀸𑀢𑀻𑀢𑀺 𑀅𑀢𑁆𑀣𑁄?

𑀬𑀤𑀺 𑀢𑁂 𑀦𑀦𑁆𑀤𑀺𑀲𑁄𑀓𑀸 𑀦 𑀲𑀦𑁆𑀢𑀺 𑀳𑀸𑀲𑀯𑀢𑁆𑀣𑀼𑀦𑁄 𑀮𑀸𑀪𑀲𑁆𑀲 𑀚𑀸𑀦𑀺𑀬𑀸 𑀘 𑀅𑀪𑀸𑀯𑀢𑁄, 𑀏𑀓𑀯𑀺𑀳𑀸𑀭𑀺𑀦𑁄 𑀧𑀦 𑀅𑀭𑀢𑀺𑀬𑀸 𑀪𑀯𑀺𑀢𑀩𑁆𑀩𑀦𑁆𑀢𑀺 𑀆𑀳 𑁋 ‘‘𑀓𑀘𑁆𑀘𑀺 𑀢𑀁 𑀏𑀓𑀫𑀸𑀲𑀻𑀦𑀁, 𑀅𑀭𑀢𑀻 𑀦𑀸𑀪𑀺𑀓𑀻𑀭𑀢𑀻’’𑀢𑀺. 𑀢𑀲𑁆𑀫𑀺𑀫𑁆𑀧𑀺 𑀪𑀕𑀯𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑁂 𑀅𑀣 𑀦𑁂𑀲𑀫𑁆𑀧𑀺 𑀦𑀦𑁆𑀤𑀺𑀲𑁄𑀓𑀸𑀭𑀢𑀻𑀦𑀁 𑀅𑀪𑀸𑀯𑁂 𑀓𑀸𑀭𑀡𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀓𑀣𑀁 𑀢𑁆𑀯’’𑀦𑁆𑀢𑀺 𑀕𑀸𑀣𑀫𑀸𑀳? 𑀅𑀣𑀲𑁆𑀲 𑀪𑀕𑀯𑀸 𑀢𑀁 𑀓𑀸𑀭𑀡𑀁 𑀧𑀯𑁂𑀤𑁂𑀦𑁆𑀢𑁄 ‘‘𑀅𑀖𑀚𑀸𑀢𑀲𑁆𑀲𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀅𑀖𑀚𑀸𑀢𑀲𑁆𑀲𑀸𑀢𑀺 𑀅𑀖𑁂 𑀚𑀸𑀢𑀲𑁆𑀲. 𑀢𑁂𑀦𑀸𑀳 ‘‘𑀯𑀝𑁆𑀝𑀤𑀼𑀓𑁆𑀔𑁂 𑀞𑀺𑀢𑀲𑁆𑀲𑀸’’𑀢𑀺. 𑀚𑀸𑀢𑀢𑀡𑁆𑀳𑀲𑁆𑀲 𑀅𑀧𑁆𑀧𑀳𑀻𑀦𑀢𑀡𑁆𑀳𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀁 𑀆𑀕𑀢𑀫𑁂𑀯 𑀓𑀸𑀭𑀡𑀲𑁆𑀲 𑀅𑀧𑁆𑀧𑀳𑀻𑀦𑀢𑁆𑀢𑀸. 𑀢𑀲𑁆𑀲𑁂𑀯 𑀳𑀺 𑀓𑀸𑀭𑀡𑀲𑁆𑀲 𑀅𑀧𑁆𑀧𑀳𑀻𑀦𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀼𑀓𑁆𑀔𑀻 𑀲𑀼𑀔𑀁 𑀧𑀢𑁆𑀣𑀬𑀢𑀻𑀢𑀺 𑀳𑀺 𑀯𑀼𑀢𑁆𑀢’’𑀦𑁆𑀢𑀺 𑀆𑀳. 𑀤𑀼𑀓𑁆𑀔𑀧𑁆𑀧𑀯𑀢𑁆𑀢𑀺𑀬𑀸 𑀲𑀸𑀧𑀺 𑀢𑀡𑁆𑀳𑀸𑀧𑁆𑀧𑀯𑀢𑁆𑀢𑀺 𑀢𑁂𑀦 𑀤𑀲𑁆𑀲𑀺𑀢𑀸. 𑀇𑀢𑀻𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀢𑀺.

𑀓𑀓𑀼𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀉𑀢𑁆𑀢𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁦. 𑀦𑀯𑀫𑀦𑁆𑀢𑀺 ¶ 𑀉𑀢𑁆𑀢𑀭𑀲𑀼𑀢𑁆𑀢𑀁 𑀳𑁂𑀝𑁆𑀞𑀸 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀉𑀢𑁆𑀢𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁧. 𑀤𑀲𑀫𑁂 ¶ 𑀓𑀸𑀫𑀁 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑁂𑀧𑀺 ‘‘𑀇𑀤𑀁 𑀳𑀺 𑀢𑀁 𑀚𑁂𑀢𑀯𑀦’’𑀦𑁆𑀢𑀺𑀆𑀤𑀺𑀦𑀸 𑀇𑀫𑀸 𑀏𑀯 𑀕𑀸𑀣𑀸 𑀆𑀕𑀢𑀸. 𑀢𑀢𑁆𑀣 ‘‘𑀅𑀜𑁆𑀜𑀢𑀭𑀸 𑀤𑁂𑀯𑀢𑀸’’𑀢𑀺 𑀦𑀺𑀤𑀸𑀦𑀁 𑀆𑀭𑁄𑀧𑀺𑀢𑀁. 𑀳𑁂𑀝𑁆𑀞𑀸 𑀆𑀕𑀢𑀦𑀬𑀢𑁆𑀢𑀸 𑀏𑀯 𑀳𑀺 𑀧𑁄𑀢𑁆𑀣𑀓𑁂𑀲𑀼 𑀦 𑀮𑀺𑀔𑀺𑀢𑀁, 𑀇𑀥 𑀧𑀦 𑀤𑁂𑀯𑀧𑀼𑀢𑁆𑀢𑀲𑀁𑀬𑀼𑀢𑁆𑀢𑁂 ‘‘𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀤𑁂𑀯𑀧𑀼𑀢𑁆𑀢𑁄’’𑀢𑀺 𑀦𑀺𑀤𑀸𑀦𑁂 𑀦𑀺𑀕𑀫𑁂 𑀘 𑀆𑀕𑀢𑀁, 𑀢𑀢𑁆𑀣 𑀤𑁂𑀯𑀧𑀼𑀢𑁆𑀢𑁂𑀦 𑀲𑀢𑁆𑀣𑀼 𑀯𑀼𑀢𑁆𑀢𑀧𑁆𑀧𑀓𑀸𑀭𑀕𑀼𑀡𑀧𑀯𑁂𑀤𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀢𑁆𑀣𑀸 𑀧𑀦 𑀪𑀺𑀓𑁆𑀔𑀽𑀦𑀁 𑀢𑀫𑀢𑁆𑀣𑀁 𑀧𑀯𑁂𑀤𑁂𑀦𑁆𑀢𑁄 ‘‘𑀅𑀜𑁆𑀜𑀢𑀭𑁄 𑀤𑁂𑀯𑀧𑀼𑀢𑁆𑀢𑁄’’𑀢𑀺 𑀆𑀳. 𑀢𑀣𑀸 𑀧𑀯𑁂𑀤𑀦𑁂 𑀧𑀦 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀅𑀦𑀼𑀫𑀸𑀦𑀩𑀼𑀤𑁆𑀥𑀺𑀬𑀸𑀢𑀺 𑀅𑀦𑀼𑀫𑀸𑀦𑀜𑀸𑀡𑀲𑁆𑀲. 𑀆𑀦𑀼𑀪𑀸𑀯𑀧𑁆𑀧𑀓𑀸𑀲𑀦𑀢𑁆𑀣𑀦𑁆𑀢𑀺 𑀩𑀮𑀤𑀻𑀧𑀦𑀢𑁆𑀣𑀁.

𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀦𑀸𑀦𑀸𑀢𑀺𑀢𑁆𑀣𑀺𑀬𑀯𑀕𑁆𑀕𑁄

𑁧. 𑀲𑀺𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁨. 𑀢𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑀦𑁆𑀢𑀺 𑀢𑀢𑀺𑀬𑀯𑀕𑁆𑀕𑁂 𑀧𑀞𑀫𑀲𑀼𑀢𑁆𑀢𑀁. 𑀯𑀼𑀢𑁆𑀢𑀢𑁆𑀣𑀫𑁂𑀯 𑀳𑁂𑀝𑁆𑀞𑀸 𑀲𑀢𑀼𑀮𑁆𑀮𑀧𑀓𑀸𑀬𑀺𑀓𑀯𑀕𑁆𑀕𑁂 𑀧𑀞𑀫𑀲𑀼𑀢𑁆𑀢𑁂.

𑀲𑀺𑀯𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀔𑁂𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩. 𑀧𑀞𑀫𑀁𑀬𑁂𑀯𑀸𑀢𑀺 𑀚𑀭𑀸𑀫𑀭𑀡𑀸𑀤𑀺𑀪𑀸𑀯𑀢𑁄 𑀧𑀕𑁂𑀯. 𑀩𑀮𑀯𑀘𑀺𑀦𑁆𑀢𑀦𑀁 𑀘𑀺𑀦𑁆𑀢𑁂𑀢𑀻𑀢𑀺 𑀬𑀣𑀸 𑀲𑀸𑀓𑀝𑀺𑀓𑁄 𑀅𑀚𑀸𑀦𑀺𑀢𑁆𑀯𑀸 𑀯𑀺𑀲𑀫𑁂 𑀫𑀕𑁆𑀕𑁂 𑀲𑀓𑀝𑀁 𑀧𑀸𑀚𑁂𑀦𑁆𑀢𑁄 𑀅𑀓𑁆𑀔𑁂 𑀙𑀺𑀦𑁆𑀦𑁂 𑀧𑀢𑀺𑀓𑀸𑀢𑀼𑀁 𑀅𑀯𑀺𑀲𑀳𑀦𑁆𑀢𑁄 𑀤𑀼𑀓𑁆𑀔𑀻 ¶ 𑀤𑀼𑀫𑁆𑀫𑀦𑁄 𑀩𑀮𑀯𑀘𑀺𑀦𑁆𑀢𑀦𑀁 𑀘𑀺𑀦𑁆𑀢𑁂𑀢𑀺, 𑀫𑀳𑀦𑁆𑀢𑀁 𑀘𑀺𑀢𑁆𑀢𑀲𑀦𑁆𑀢𑀸𑀧𑀁 𑀧𑀸𑀧𑀼𑀡𑀸𑀢𑀺, 𑀏𑀯𑀁 𑀅𑀥𑀫𑁆𑀫𑀯𑀸𑀤𑀻 𑀫𑀘𑁆𑀘𑀼𑀫𑀼𑀔𑀁 𑀧𑀢𑁆𑀢𑁄 𑀩𑀮𑀯𑀘𑀺𑀢𑁆𑀢𑀲𑀦𑁆𑀢𑀸𑀧𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀸 𑀥𑀫𑁆𑀫𑀘𑀭𑀺𑀬𑀸𑀬 𑀦𑀧𑁆𑀧𑀫𑀚𑁆𑀚𑀺𑀢𑀩𑁆𑀩𑀦𑁆𑀢𑀺.

𑀔𑁂𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑁂𑀭𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁪. 𑀬𑀁 ¶ 𑀤𑀸𑀦𑀁 𑀤𑁂𑀫𑀻𑀢𑀺 𑀬𑀁 𑀤𑁂𑀬𑁆𑀬𑀥𑀫𑁆𑀫𑀁 𑀧𑀭𑀲𑁆𑀲 𑀤𑁂𑀫𑀺. 𑀢𑀲𑁆𑀲 𑀧𑀢𑀺 𑀳𑀼𑀢𑁆𑀯𑀸𑀢𑀺 𑀢𑀩𑁆𑀩𑀺𑀲𑀬𑀁 𑀮𑁄𑀪𑀁 𑀲𑀼𑀝𑁆𑀞𑀼 𑀅𑀪𑀺𑀪𑀯𑀦𑁆𑀢𑁄 𑀢𑀲𑁆𑀲 𑀅𑀥𑀺𑀧𑀢𑀺 𑀳𑀼𑀢𑁆𑀯𑀸 𑀤𑁂𑀫𑀺 𑀢𑁂𑀦 𑀅𑀦𑀸𑀓𑀟𑁆𑀠𑀦𑀻𑀬𑀢𑁆𑀢𑀸. ‘‘𑀦 𑀤𑀸𑀲𑁄 𑀦 𑀲𑀳𑀸𑀬𑁄’’𑀢𑀺 𑀯𑀢𑁆𑀯𑀸 𑀢𑀤𑀼𑀪𑀬𑀁 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀸𑀲𑁄 𑀳𑀼𑀢𑁆𑀯𑀸 𑀤𑁂𑀢𑀺 𑀢𑀡𑁆𑀳𑀸𑀬 𑀤𑀸𑀲𑀩𑁆𑀬𑀲𑁆𑀲 𑀉𑀧𑀕𑀢𑀢𑁆𑀢𑀸. 𑀲𑀳𑀸𑀬𑁄 𑀳𑀼𑀢𑁆𑀯𑀸 𑀤𑁂𑀢𑀺 𑀢𑀲𑁆𑀲 𑀧𑀺𑀬𑀪𑀸𑀯𑀸𑀯𑀺𑀲𑁆𑀲𑀚𑁆𑀚𑀦𑀢𑁄. 𑀲𑀸𑀫𑀻 𑀳𑀼𑀢𑁆𑀯𑀸 𑀤𑁂𑀢𑀺 𑀢𑀡𑁆𑀳𑀸𑀤𑀸𑀲𑀩𑁆𑀬𑀢𑁄 𑀅𑀢𑁆𑀢𑀸𑀦𑀁 𑀫𑁄𑀘𑁂𑀢𑁆𑀯𑀸 𑀅𑀪𑀺𑀪𑀼𑀬𑁆𑀬 𑀧𑀯𑀢𑁆𑀢𑀦𑀢𑁄. 𑀲𑀸𑀫𑀺𑀧𑀭𑀺𑀪𑁄𑀕𑀲𑀤𑀺𑀲𑀸 𑀳𑁂𑀢𑀲𑁆𑀲𑀸𑀬𑀁 𑀧𑀯𑀢𑁆𑀢𑀢𑀻𑀢𑀺.

𑀅𑀣 𑀯𑀸 𑀬𑁄 𑀤𑀸𑀦𑀲𑀻𑀮𑀢𑀸𑀬 𑀤𑀸𑀬𑀓𑁄 𑀧𑀼𑀕𑁆𑀕𑀮𑁄, 𑀲𑁄 𑀤𑀸𑀦𑁂 𑀧𑀯𑀢𑁆𑀢𑀺𑀪𑁂𑀤𑁂𑀦 𑀤𑀸𑀦𑀤𑀸𑀲𑁄 𑀤𑀸𑀦𑀲𑀳𑀸𑀬𑁄 𑀤𑀸𑀦𑀧𑀢𑀻𑀢𑀺 𑀢𑀺𑀧𑁆𑀧𑀓𑀸𑀭𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀤𑀲𑁆𑀲 𑀢𑀺𑀧𑁆𑀧𑀓𑀸𑀭𑀢𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀸𑀢𑀩𑁆𑀩𑀝𑁆𑀞𑁂𑀦 𑀤𑀸𑀦𑀁, 𑀅𑀦𑁆𑀦𑀧𑀸𑀦𑀸𑀤𑀺. 𑀢𑀢𑁆𑀣 𑀬𑀁 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀢𑀺 𑀢𑀡𑁆𑀳𑀸𑀥𑀺𑀧𑀦𑁆𑀦𑀢𑀸𑀬, 𑀢𑀲𑁆𑀲 𑀯𑀲𑁂 𑀯𑀢𑁆𑀢𑀦𑀢𑁄 𑀤𑀸𑀲𑁄 𑀯𑀺𑀬 𑀳𑁄𑀢𑀺. 𑀬𑀁 𑀧𑀭𑁂𑀲𑀁 𑀤𑀻𑀬𑀢𑀺, 𑀢𑀢𑁆𑀣𑀧𑀺 𑀅𑀦𑁆𑀦𑀧𑀸𑀦𑀲𑀸𑀫𑀜𑁆𑀜𑁂𑀦 𑀇𑀤𑀁 𑀯𑀼𑀢𑁆𑀢𑀁 ‘‘𑀤𑀸𑀦𑀲𑀗𑁆𑀔𑀸𑀢𑀲𑁆𑀲 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀤𑀸𑀲𑁄 𑀳𑀼𑀢𑁆𑀯𑀸 𑀤𑁂𑀢𑀻’’𑀢𑀺. 𑀲𑀳𑀸𑀬𑁄 𑀳𑀼𑀢𑁆𑀯𑀸 𑀤𑁂𑀢𑀺 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀲𑁆𑀲 𑀧𑀭𑁂𑀲𑀁 𑀤𑀸𑀢𑀩𑁆𑀩𑀲𑁆𑀲 𑀘 𑀲𑀫𑀲𑀫𑀝𑁆𑀞𑀧𑀦𑁂𑀦. 𑀧𑀢𑀺 𑀳𑀼𑀢𑁆𑀯𑀸 𑀤𑁂𑀢𑀺 𑀲𑀬𑀁 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀯𑀲𑁂 𑀅𑀯𑀢𑁆𑀢𑀺𑀢𑁆𑀯𑀸 𑀢𑀲𑁆𑀲 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑀸𑀧𑀦𑀢𑁄.

𑀅𑀧𑀭𑁄 𑀦𑀬𑁄 𑁋 𑀬𑁄 𑀅𑀢𑁆𑀢𑀦𑀸 𑀧𑀡𑀻𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀧𑀭𑁂𑀲𑀁 𑀦𑀺𑀳𑀻𑀦𑀁 𑀤𑁂𑀢𑀺, 𑀲𑁄 𑀤𑀸𑀦𑀤𑀸𑀲𑁄 𑀦𑀸𑀫 𑀢𑀦𑁆𑀦𑀺𑀫𑀺𑀢𑁆𑀢𑀦𑀺𑀳𑀻𑀦𑀪𑀸𑀯𑀸𑀧𑀢𑁆𑀢𑀺𑀢𑁄. 𑀬𑁄 𑀬𑀸𑀤𑀺𑀲𑀁 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀢𑀸𑀤𑀺𑀲𑀫𑁂𑀯 𑀧𑀭𑁂𑀲𑀁 𑀤𑁂𑀢𑀺, 𑀲𑁄 𑀤𑀸𑀦𑀲𑀳𑀸𑀬𑁄 𑀦𑀸𑀫 𑀢𑀦𑁆𑀦𑀺𑀫𑀺𑀢𑁆𑀢𑀦𑀺𑀳𑀻𑀦𑀸𑀥𑀺𑀓𑀪𑀸𑀯𑀯𑀺𑀲𑁆𑀲𑀚𑁆𑀚𑀦𑁂𑀦 𑀲𑀤𑀺𑀲𑀪𑀸𑀯𑀸𑀧𑀢𑁆𑀢𑀺𑀢𑁄. 𑀬𑁄 𑀅𑀢𑁆𑀢𑀦𑀸 𑀦𑀺𑀳𑀻𑀦𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀧𑀭𑁂𑀲𑀁 𑀧𑀡𑀻𑀢𑀁 𑀤𑁂𑀢𑀺, 𑀲𑁄 𑀤𑀸𑀦𑀧𑀢𑀺 𑀦𑀸𑀫 𑀢𑀦𑁆𑀦𑀺𑀫𑀺𑀢𑁆𑀢𑀲𑁂𑀝𑁆𑀞𑀪𑀸𑀯𑀧𑁆𑀧𑀢𑁆𑀢𑀺𑀢𑁄. 𑀓𑀫𑁆𑀫𑀲𑀭𑀺𑀓𑁆𑀔𑀓𑁄 𑀳𑀺 𑀯𑀺𑀧𑀸𑀓𑁄, 𑀢𑀲𑁆𑀫𑀸 𑀤𑁂𑀯𑀧𑀼𑀢𑁆𑀢𑁄 ‘‘𑀤𑀸𑀦𑀧𑀢𑀻’’𑀢𑀺 𑀯𑀤𑀦𑁆𑀢𑁄 ‘‘𑀅𑀳𑀁 𑀢𑀸𑀤𑀺𑀲𑁄 𑀅𑀳𑁄𑀲𑀺’’𑀦𑁆𑀢𑀺 𑀤𑀲𑁆𑀲𑁂𑀢𑀺.

‘‘𑀘𑀢𑀽𑀲𑀼 𑀤𑁆𑀯𑀸𑀭𑁂𑀲𑀼 𑀤𑀸𑀦𑀁 𑀤𑀻𑀬𑀺𑀢𑁆𑀣𑀸’’𑀢𑀺 𑀧𑀸𑀴𑀺𑀬𑀁 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀲 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀸𑀦𑀦𑁆𑀢𑀺 𑀬𑀺𑀝𑁆𑀞𑀁, 𑀢𑀜𑁆𑀘 𑀔𑁄 𑀲𑀩𑁆𑀩𑀲𑀸𑀥𑀸𑀭𑀡𑀯𑀲𑁂𑀦 𑀓𑀢𑀦𑁆𑀢𑀺 𑀆𑀳 ‘‘𑀲𑀫𑀡 ¶ …𑀧𑁂… 𑀬𑀸𑀘𑀓𑀸𑀦’’𑀦𑁆𑀢𑀺. 𑀧𑀩𑁆𑀩𑀚𑁆𑀚𑀽𑀧𑀕𑀢𑀸𑀢𑀺 ¶ 𑀬𑀁 𑀓𑀺𑀜𑁆𑀘𑀺 𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑀸. 𑀪𑁄𑀯𑀸𑀤𑀺𑀦𑁄𑀢𑀺 𑀚𑀸𑀢𑀺𑀫𑀢𑁆𑀢𑀩𑁆𑀭𑀸𑀳𑁆𑀫𑀡𑁂 𑀯𑀤𑀢𑀺. 𑀦𑀸𑀮𑀢𑁆𑀣 𑀩𑀼𑀤𑁆𑀥𑀲𑀼𑀜𑁆𑀜𑀢𑁆𑀢𑀸 𑀢𑀤𑀸 𑀮𑁄𑀓𑀲𑁆𑀲. 𑀤𑀼𑀕𑁆𑀕𑀢𑀸𑀢𑀺 𑀤𑀼𑀓𑁆𑀔𑀚𑀻𑀯𑀺𑀓𑀓𑀧𑁆𑀧𑀓𑀸 𑀓𑀲𑀺𑀭𑀯𑀼𑀢𑁆𑀢𑀺𑀓𑀸. 𑀢𑁂𑀦𑀸𑀳 ‘‘𑀤𑀮𑀺𑀤𑁆𑀤𑀫𑀦𑀼𑀲𑁆𑀲𑀸’’𑀢𑀺. 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀚𑀻𑀯𑀺𑀓𑀁 𑀅𑀦𑀼𑀝𑁆𑀞𑀸𑀢𑀼𑀁 𑀅𑀲𑀫𑀢𑁆𑀣𑀸 𑀇𑀥 ‘‘𑀓𑀧𑀡𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀓𑀸𑀡𑀓𑀼𑀡𑀺𑀆𑀤𑀬𑁄’’𑀢𑀺. 𑀧𑀣𑀸𑀯𑀺𑀦𑁄𑀢𑀺 𑀅𑀤𑁆𑀥𑀺𑀓𑀸. 𑀯𑀦𑀺𑀩𑁆𑀩𑀓𑀸𑀢𑀺 𑀤𑀸𑀬𑀓𑀸𑀦𑀁 𑀕𑀼𑀡𑀓𑀺𑀢𑁆𑀢𑀦𑀓𑀫𑁆𑀫𑀨𑀮𑀓𑀺𑀢𑁆𑀢𑀦𑀯𑀲𑁂𑀦 𑀬𑀸𑀘𑀓𑀸 𑀲𑁂𑀬𑁆𑀬𑀣𑀸𑀧𑀺 𑀦𑀕𑁆𑀕𑀸𑀤𑀬𑁄. 𑀢𑁂𑀦𑀸𑀳 ‘‘𑀇𑀝𑁆𑀞𑀁 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺. 𑀧𑀲𑀢𑀫𑀢𑁆𑀢𑀦𑁆𑀢𑀺 𑀯𑀻𑀳𑀺𑀢𑀡𑁆𑀟𑀼𑀮𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀭𑀸𑀯𑀫𑀢𑁆𑀢𑀦𑁆𑀢𑀺 𑀬𑀸𑀕𑀼𑀪𑀢𑁆𑀢𑀸𑀤𑀺𑀯𑀲𑁂𑀦. 𑀬𑀣𑀸 𑀕𑀸𑀫𑀮𑀸𑀪𑁄 𑀕𑀸𑀫𑁂 𑀉𑀧𑁆𑀧𑀚𑁆𑀚𑀦𑀓𑁄 𑀆𑀬𑀮𑀸𑀪𑁄, 𑀏𑀯𑀁 𑀢𑀢𑁆𑀣 𑀤𑁆𑀯𑀸𑀭𑀮𑀸𑀪𑁄𑀢𑀺 𑀆𑀳 ‘‘𑀢𑀢𑁆𑀣 𑀉𑀧𑁆𑀧𑀚𑁆𑀚𑀦𑀓𑀲𑀢𑀲𑀳𑀲𑁆𑀲𑁂’’𑀢𑀺. 𑀫𑀳𑀦𑁆𑀢𑀢𑀭𑀁 𑀤𑀸𑀦𑀁 𑀅𑀤𑀁𑀲𑀼 𑀅𑀜𑁆𑀜𑀲𑁆𑀲𑀧𑀺 𑀥𑀦𑀲𑁆𑀲 𑀯𑀺𑀦𑀺𑀬𑁄𑀕𑀁 𑀕𑀢𑀢𑁆𑀢𑀸. 𑀢𑀁 𑀲𑀦𑁆𑀥𑀸𑀬𑀸𑀢𑀺 𑀢𑀁 𑀫𑀳𑀦𑁆𑀢𑀢𑀭𑀁 𑀤𑀸𑀦𑀁 𑀓𑀢𑀁 𑀲𑀦𑁆𑀥𑀸𑀬. 𑀭𑀜𑁆𑀜𑁄 𑀳𑀺 𑀢𑀢𑁆𑀣 𑀤𑀸𑀦𑀁 𑀇𑀢𑁆𑀣𑀸𑀕𑀸𑀭𑀲𑁆𑀲 𑀤𑀸𑀦𑁂𑀦 𑀫𑀳𑀢𑀸 𑀅𑀪𑀺𑀪𑀽𑀢𑀁 𑀯𑀺𑀬 𑀧𑀝𑀺𑀦𑀺𑀯𑀢𑁆𑀢𑀁 𑀳𑁄𑀢𑀻𑀢𑀺 𑀆𑀳 ‘‘𑀧𑀝𑀺𑀦𑀺𑀯𑀢𑁆𑀢𑀻’’𑀢𑀺. 𑀓𑁄𑀘𑀻𑀢𑀺 𑀪𑀼𑀫𑁆𑀫𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀢𑁂𑀦𑀸𑀳 ‘‘𑀓𑀢𑁆𑀣𑀘𑀻’’𑀢𑀺. 𑀅𑀦𑁂𑀓𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀓𑀸𑀮𑁂 𑀢𑀲𑁆𑀲 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀲𑀻𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑁄 𑀭𑀸𑀚𑀸 𑀤𑀸𑀦𑀫𑀤𑀸𑀲𑀻𑀢𑀺.

𑀲𑁂𑀭𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀖𑀝𑀻𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁫. 𑀘𑀢𑀼𑀢𑁆𑀣𑀁 𑀳𑁂𑀝𑁆𑀞𑀸 𑀤𑁂𑀯𑀢𑀸𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀖𑀝𑀻𑀓𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀚𑀦𑁆𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁬. 𑀬𑁂 𑀯𑀺𑀦𑀬𑁂 𑀅𑀧𑀓𑀢𑀜𑁆𑀜𑀼𑀦𑁄 𑀲𑀁𑀓𑀺𑀮𑁂𑀲𑀺𑀓𑁂𑀲𑀼 𑀯𑁄𑀤𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀦 𑀓𑀼𑀲𑀮𑀸 𑀬𑀁 𑀓𑀺𑀜𑁆𑀘𑀺 𑀦 𑀓𑀸𑀭𑀺𑀦𑁄 𑀯𑀺𑀧𑁆𑀧𑀝𑀺𑀲𑀸𑀭𑀩𑀳𑀼𑀮𑀸. 𑀢𑁂𑀲𑀁 𑀅𑀦𑀼𑀧𑁆𑀧𑀦𑁆𑀦𑀜𑁆𑀘 𑀉𑀤𑁆𑀥𑀘𑁆𑀘𑀁 𑀉𑀧𑁆𑀧𑀚𑁆𑀚𑀢𑀺, 𑀉𑀧𑁆𑀧𑀦𑁆𑀦𑀜𑁆𑀘 𑀪𑀺𑀬𑁆𑀬𑁄𑀪𑀸𑀯𑀁 𑀯𑁂𑀧𑀼𑀮𑁆𑀮𑀁 𑀆𑀧𑀚𑁆𑀚𑀢𑀻𑀢𑀺 𑀆𑀳 ‘‘𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀺𑀢𑀸𑀬…𑀧𑁂… 𑀉𑀤𑁆𑀥𑀘𑁆𑀘𑀧𑀓𑀢𑀺𑀓𑀸’’𑀢𑀺. 𑀲𑀸𑀭𑀸𑀪𑀸𑀯𑁂𑀦 𑀢𑀼𑀘𑁆𑀙𑀢𑁆𑀢𑀸 𑀘 𑀦𑀴𑁄 𑀯𑀺𑀬𑀸𑀢𑀺 𑀦𑀴𑁄, 𑀫𑀸𑀦𑁄𑀢𑀺 𑀆𑀳 ‘‘𑀉𑀦𑁆𑀦𑀴𑀸𑀢𑀺 𑀉𑀕𑁆𑀕𑀢𑀦𑀴𑀸’’𑀢𑀺. 𑀢𑁂𑀦𑀸𑀳 ‘‘𑀉𑀝𑁆𑀞𑀺𑀢𑀢𑀼𑀘𑁆𑀙𑀫𑀸𑀦𑀸’’𑀢𑀺. 𑀫𑀸𑀦𑁄 𑀳𑀺 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀢𑀺 ¶ 𑀲𑀤𑀺𑀲𑁄𑀢𑀺 𑀘 𑀧𑀯𑀢𑁆𑀢𑀺𑀬𑀸 𑀯𑀺𑀲𑁂𑀲𑀢𑁄 𑀢𑀼𑀘𑁆𑀙𑁄. 𑀘𑀸𑀧𑀮𑁆𑀮𑁂𑀦𑀸𑀢𑀺 𑀘𑀧𑀮𑀪𑀸𑀯𑁂𑀦, 𑀢𑀡𑁆𑀳𑀸𑀮𑁄𑀮𑀼𑀧𑁆𑀧𑁂𑀦𑀸𑀢𑀺 𑀅𑀢𑁆𑀣𑁄. 𑀫𑀼𑀔𑀔𑀭𑀸𑀢𑀺 𑀫𑀼𑀔𑁂𑀦 𑀨𑀭𑀼𑀲𑀸, 𑀨𑀭𑀼𑀲𑀯𑀸𑀤𑀺𑀦𑁄𑀢𑀺 𑀅𑀢𑁆𑀣𑁄. 𑀯𑀺𑀓𑀺𑀡𑁆𑀡𑀯𑀸𑀘𑀸𑀢𑀺 𑀯𑀺𑀲𑀝𑀯𑀘𑀦𑀸, 𑀲𑀫𑁆𑀨𑀧𑁆𑀧𑀮𑀸𑀧𑀢𑀸𑀬 𑀅𑀧𑀭𑀺𑀬𑀦𑁆𑀢𑀯𑀘𑀦𑀸. 𑀢𑁂𑀦𑀸𑀳 ‘‘𑀅𑀲𑀁𑀬𑀢𑀯𑀘𑀦𑀸’’𑀢𑀺𑀆𑀤𑀺. 𑀘𑀡𑁆𑀟𑀲𑁄𑀢𑁂 𑀩𑀤𑁆𑀥𑀦𑀸𑀯𑀸𑀲𑀤𑀺𑀲𑀸𑀢𑀺 𑀏𑀢𑁂𑀦 𑀅𑀦𑀯𑀝𑁆𑀞𑀺𑀢𑀓𑀺𑀭𑀺𑀬𑀢𑀁 𑀤𑀲𑁆𑀲𑁂𑀢𑀺. 𑀬𑁂𑀦 𑀲𑀫𑀦𑁆𑀦𑀸𑀕𑀢𑀸 𑀲𑀢𑁆𑀢𑀸 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀞𑀸𑀢𑀼𑀁 𑀯𑀸 𑀦𑀺𑀲𑀻𑀤𑀺𑀢𑀼𑀁 𑀯𑀸 𑀦 ¶ 𑀲𑀓𑁆𑀓𑁄𑀦𑁆𑀢𑀺, 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀦𑁆𑀢𑀺. 𑀅𑀦𑀯𑀝𑁆𑀞𑀺𑀢𑀘𑀺𑀢𑁆𑀢𑀸𑀢𑀺 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀦 𑀅𑀯𑀝𑁆𑀞𑀺𑀢𑀘𑀺𑀢𑁆𑀢𑀸. 𑀯𑀺𑀯𑀝𑀇𑀦𑁆𑀤𑁆𑀭𑀺𑀬𑀸𑀢𑀺 𑀅𑀲𑀁𑀯𑀼𑀢𑀘𑀓𑁆𑀔𑀸𑀤𑀺𑀇𑀦𑁆𑀤𑁆𑀭𑀺𑀬𑀸.

𑀕𑀼𑀡𑀓𑀣𑀸𑀬 𑀲𑀤𑁆𑀥𑀺𑀁 𑀓𑀣𑀺𑀬𑀫𑀸𑀦𑁄 𑀦𑀺𑀕𑁆𑀕𑀼𑀡𑀲𑁆𑀲 𑀅𑀕𑀼𑀡𑁄 𑀧𑀸𑀓𑀝𑁄 𑀳𑁄𑀢𑀺 𑀚𑀸𑀢𑀺𑀫𑀡𑀺𑀲𑀫𑀻𑀧𑁂 𑀞𑀺𑀢𑀲𑁆𑀲 𑀯𑀺𑀬 𑀓𑀸𑀘𑀫𑀡𑀺𑀦𑁄 𑀤𑁄𑀲𑁄. 𑀲𑀼𑀔𑀚𑀻𑀯𑀺𑀦𑁄𑀢𑀺 𑀲𑀼𑀔𑁂 𑀞𑀺𑀢𑀸. 𑀬𑀣𑀸 𑀤𑀸𑀬𑀓𑀸𑀦𑀁 𑀲𑀼𑀪𑀭𑀁 𑀳𑁄𑀢𑀺, 𑀏𑀯𑀁 𑀲𑀼𑀔𑁂𑀦 𑀅𑀓𑀺𑀘𑁆𑀙𑁂𑀦 𑀧𑀯𑀢𑁆𑀢𑀚𑀻𑀯𑀺𑀓𑀸. 𑀢𑁂𑀦𑀸𑀳 ‘‘𑀧𑀼𑀩𑁆𑀩𑁂 𑀪𑀺𑀓𑁆𑀔𑀽’’𑀢𑀺𑀆𑀤𑀺.

𑀅𑀢𑁆𑀢𑀦𑁄 𑀭𑀼𑀘𑀺𑀯𑀲𑁂𑀦 𑀕𑀸𑀫𑀓𑀺𑀘𑁆𑀘𑀁 𑀦𑁂𑀢𑀻𑀢𑀺 𑀕𑀸𑀫𑀡𑀺, 𑀢𑁂 𑀧𑀦 𑀳𑀻𑀴𑁂𑀦𑁆𑀢𑁄 𑀯𑀤𑀢𑀺 ‘‘𑀕𑀸𑀫𑀡𑀺𑀓𑀸’’𑀢𑀺. 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀢𑀺 𑀲𑀢𑀺𑀯𑁄𑀲𑁆𑀲𑀕𑁆𑀕𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀓𑀺𑀮𑁂𑀲𑀫𑀼𑀘𑁆𑀙𑀸𑀬𑀸𑀢𑀺 𑀫𑀳𑀺𑀘𑁆𑀙𑀸𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀫𑀼𑀘𑁆𑀙𑀸𑀬. 𑀲𑀻𑀮𑀯𑀦𑁆𑀢𑀸𑀦𑀁𑀬𑁂𑀯 𑀳𑀺 𑀤𑀼𑀧𑁆𑀧𑀝𑀺𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 𑀤𑁂𑀯𑀧𑀼𑀢𑁆𑀢𑁄 𑀯𑀤𑀢𑀺. 𑀯𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑁂𑀬𑁂𑀯𑀸𑀢𑀺 𑀑𑀯𑀸𑀤𑁂𑀦 𑀫𑀬𑀸 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑀫𑁂𑀯. 𑀙𑀟𑁆𑀟𑀺𑀢𑀓𑀸𑀢𑀺 𑀧𑀭𑀺𑀘𑁆𑀘𑀢𑁆𑀢𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀤𑀻𑀳𑀺. 𑀢𑀢𑁄 𑀏𑀯 𑀅𑀦𑀸𑀣𑀸 𑀅𑀧𑁆𑀧𑀢𑀺𑀝𑁆𑀞𑀸. 𑀧𑁂𑀢𑀸𑀢𑀺 𑀯𑀺𑀕𑀢𑀚𑀻𑀯𑀺𑀢𑀸 𑀫𑀢𑀸. 𑀬𑀣𑀸 𑀧𑁂𑀢𑀸, 𑀢𑀣𑁂𑀯 𑀳𑁄𑀦𑁆𑀢𑀺 𑀅𑀢𑁆𑀢𑀳𑀺𑀢𑀸𑀲𑀫𑀢𑁆𑀣𑀢𑀸𑀬 𑀯𑀺𑀜𑁆𑀜𑀽𑀦𑀁 𑀚𑀺𑀕𑀼𑀘𑁆𑀙𑀺𑀢𑀩𑁆𑀩𑀢𑀸𑀬 𑀘.

𑀚𑀦𑁆𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀭𑁄𑀳𑀺𑀢𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁭. 𑀏𑀓𑁄𑀓𑀸𑀲𑁂𑀢𑀺 𑀘𑀓𑁆𑀓𑀯𑀸𑀴𑀲𑁆𑀲 𑀧𑀭𑀺𑀬𑀦𑁆𑀢𑀲𑀜𑁆𑀜𑀺𑀢𑁂 𑀏𑀓𑀲𑁆𑀫𑀺𑀁 𑀑𑀓𑀸𑀲𑁂. 𑀪𑀼𑀫𑁆𑀫𑀦𑁆𑀢𑀺 ‘‘𑀬𑀢𑁆𑀣𑀸’’𑀢𑀺 𑀇𑀤𑀁 𑀪𑀼𑀫𑁆𑀫𑀯𑀘𑀦𑀁, 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀫𑁆𑀧𑀺 ‘‘𑀲𑁄 𑀮𑁄𑀓𑀲𑁆𑀲 𑀅𑀦𑁆𑀢𑁄’’𑀢𑀺 𑀯𑀘𑀦𑀢𑁄 𑀯𑀺𑀲𑀺𑀝𑁆𑀞𑀯𑀺𑀲𑀬𑀫𑁂𑀯 𑀳𑁄𑀢𑀺. ‘‘𑀦 𑀚𑀸𑀬𑀢𑀺 𑀦 𑀫𑀻𑀬𑀢𑀻’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀦 𑀘𑀯𑀢𑀺 𑀦 𑀉𑀧𑀧𑀚𑁆𑀚𑀢𑀻’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀇𑀤𑀁 𑀅𑀧𑀭𑀸𑀧𑀭𑀁…𑀧𑁂… 𑀕𑀳𑀺𑀢’’𑀦𑁆𑀢𑀺. 𑀧𑀤𑀕𑀫𑀦𑁂𑀦𑀸𑀢𑀺 𑀧𑀤𑀲𑀸 𑀕𑀫𑀦𑁂𑀦. 𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀅𑀦𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺 𑀉𑀧𑀭𑀺 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑀼𑀓𑀸𑀫𑁄. 𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀳𑀺 𑀅𑀦𑁆𑀢𑁄 𑀦𑀺𑀩𑁆𑀩𑀸𑀦𑀁.

𑀤𑀴𑁆𑀳𑀁 ¶ 𑀣𑀺𑀭𑀁 𑀥𑀦𑀼 𑀏𑀢𑀲𑁆𑀲𑀸𑀢𑀺 𑀤𑀴𑁆𑀳𑀥𑀦𑁆𑀯𑀸. 𑀲𑁄 𑀏𑀯 𑀤𑀴𑁆𑀳𑀥𑀫𑁆𑀫𑁄𑀢𑀺 𑀯𑀼𑀢𑁆𑀢𑁄. 𑀢𑁂𑀦𑀸𑀳 ‘‘𑀤𑀴𑁆𑀳𑀥𑀦𑀽’’𑀢𑀺. 𑀉𑀢𑁆𑀢𑀫𑀧𑁆𑀧𑀫𑀸𑀡𑁂𑀦𑀸𑀢𑀺 𑀲𑀳𑀲𑁆𑀲𑀣𑀸𑀫𑀧𑁆𑀧𑀫𑀸𑀡𑁂𑀦. 𑀥𑀦𑀼𑀲𑀺𑀧𑁆𑀧𑀲𑀺𑀓𑁆𑀔𑀺𑀢𑀢𑀸𑀬 𑀥𑀦𑀼𑀕𑁆𑀕𑀳𑁄, 𑀦 𑀥𑀦𑀼𑀕𑁆𑀕𑀳𑀫𑀢𑁆𑀢𑁂𑀦𑀸𑀢𑀺 𑀆𑀳 ‘‘𑀥𑀦𑀼𑀕𑁆𑀕𑀳𑁄𑀢𑀺 𑀥𑀦𑀼𑀆𑀘𑀭𑀺𑀬𑁄’’𑀢𑀺. ‘‘𑀥𑀦𑀼𑀕𑁆𑀕𑀳𑁄’’𑀢𑀺 𑀯𑀢𑁆𑀯𑀸 ‘‘𑀲𑀺𑀓𑁆𑀔𑀺𑀢𑁄’’𑀢𑀺 𑀯𑀼𑀢𑁆𑀢𑁂 𑀥𑀦𑀼𑀲𑀺𑀓𑁆𑀔𑀸𑀬 𑀲𑀺𑀓𑁆𑀔𑀺𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀲𑀺𑀓𑁆𑀔𑀸 𑀘 𑀏𑀢𑁆𑀢𑀓𑁂 𑀓𑀸𑀮𑁂 𑀲𑀫𑀢𑁆𑀣𑀲𑁆𑀲 𑀉𑀓𑁆𑀓𑀁𑀲𑀕𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀤𑀲 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀥𑀦𑀼𑀲𑀺𑀧𑁆𑀧𑀁 𑀲𑀺𑀓𑁆𑀔𑀺𑀢𑁄’’𑀢𑀺. 𑀉𑀲𑀪𑀧𑁆𑀧𑀫𑀸𑀡𑁂𑀧𑀻𑀢𑀺 𑀯𑀻𑀲𑀢𑀺𑀬𑀝𑁆𑀞𑀺𑀬𑁄 𑀉𑀲𑀪𑀁, 𑀢𑀲𑁆𑀫𑀺𑀁 𑀉𑀲𑀪𑀧𑁆𑀧𑀫𑀸𑀡𑁂 𑀧𑀤𑁂𑀲𑁂. 𑀯𑀸𑀮𑀕𑁆𑀕𑀦𑁆𑀢𑀺 𑀯𑀸𑀴𑀓𑁄𑀝𑀺𑀁. 𑀓𑀢𑀳𑀢𑁆𑀣𑁄𑀢𑀺 ¶ 𑀧𑀭𑀺𑀘𑀺𑀢𑀳𑀢𑁆𑀣𑁄. 𑀓𑀢𑀲𑀭𑀓𑁆𑀔𑁂𑀧𑁄𑀢𑀺 𑀯𑀺𑀯𑀝𑀲𑀭𑀓𑁆𑀔𑁂𑀧𑀧𑀤𑁂𑀲𑀤𑀲𑁆𑀲𑀦𑀯𑀲𑁂𑀦 𑀲𑀭𑀓𑁆𑀔𑁂𑀧𑀓𑀢𑀸𑀯𑀻. 𑀢𑁂𑀦𑀸𑀳 ‘‘𑀤𑀲𑁆𑀲𑀺𑀢𑀲𑀺𑀧𑁆𑀧𑁄’’𑀢𑀺. ‘‘𑀓𑀢𑀲𑀺𑀧𑁆𑀧𑁄’’𑀢𑀺 𑀓𑁂𑀘𑀺. 𑀅𑀲𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀲𑀦𑀁, 𑀓𑀡𑁆𑀟𑁄. 𑀢𑀸𑀮𑀘𑁆𑀙𑀸𑀬𑀦𑁆𑀢𑀺 𑀢𑀸𑀮𑀘𑁆𑀙𑀸𑀤𑀺𑀁, 𑀲𑀸 𑀧𑀦 𑀭𑀢𑀦𑀫𑀢𑁆𑀢𑀸, 𑀯𑀺𑀤𑀢𑁆𑀣𑀺𑀘𑀢𑀼𑀭𑀗𑁆𑀕𑀼𑀮𑀸 𑀯𑀸.

𑀧𑀼𑀭𑀢𑁆𑀣𑀺𑀫𑀲𑀫𑀼𑀤𑁆𑀤𑀸𑀢𑀺 𑀏𑀓𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀧𑀼𑀭𑀢𑁆𑀣𑀺𑀫𑀲𑀫𑀼𑀤𑁆𑀤𑀸. 𑀲𑀫𑀼𑀤𑁆𑀤𑀲𑀻𑀲𑁂𑀦 𑀧𑀼𑀭𑀢𑁆𑀣𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀁 𑀯𑀤𑀢𑀺. 𑀧𑀘𑁆𑀙𑀺𑀫𑀲𑀫𑀼𑀤𑁆𑀤𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀦𑀺𑀧𑁆𑀧𑀧𑀜𑁆𑀘𑀢𑀦𑁆𑀢𑀺 𑀅𑀤𑀦𑁆𑀥𑀓𑀸𑀭𑀺𑀢𑀁. 𑀲𑀫𑁆𑀧𑀢𑁆𑀢𑁂𑀢𑀺 𑀢𑀸𑀤𑀺𑀲𑁂𑀦 𑀚𑀯𑁂𑀦 𑀕𑀘𑁆𑀙𑀦𑁆𑀢𑁂𑀦 𑀲𑀫𑁆𑀧𑀢𑁆𑀢𑁂. 𑀅𑀦𑁄𑀢𑀢𑁆𑀢𑁂𑀢𑀺 𑀏𑀢𑁆𑀣𑀸𑀧𑀺 ‘‘𑀲𑀫𑁆𑀧𑀢𑁆𑀢𑁂’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄, 𑀢𑀣𑀸 ‘‘𑀦𑀸𑀕𑀮𑀢𑀸𑀤𑀦𑁆𑀢𑀓𑀝𑁆𑀞𑀁 𑀔𑀸𑀤𑀺𑀢𑁆𑀯𑀸’’𑀢𑀺 𑀏𑀢𑁆𑀣𑀸𑀧𑀺. 𑀢𑀤𑀸𑀢𑀺 𑀬𑀤𑀸 𑀲𑁄 𑀮𑁄𑀓𑀦𑁆𑀢𑀕𑀯𑁂𑀲𑀓𑁄 𑀅𑀳𑁄𑀲𑀺, 𑀢𑀤𑀸. 𑀤𑀻𑀖𑀸𑀬𑀼𑀓𑀓𑀸𑀮𑁄𑀢𑀺 𑀅𑀦𑁂𑀓𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀓𑀸𑀮𑁄. 𑀘𑀓𑁆𑀓𑀯𑀸𑀴𑀮𑁄𑀓𑀲𑁆𑀲𑀸𑀢𑀺 𑀲𑀸𑀫𑀜𑁆𑀜𑀯𑀲𑁂𑀦 𑀏𑀓𑀯𑀘𑀦𑀁, 𑀘𑀓𑁆𑀓𑀯𑀸𑀴𑀮𑁄𑀓𑀦𑁆𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁𑀬𑁂𑀯 𑀘𑀓𑁆𑀓𑀯𑀸𑀴𑁂 𑀦𑀺𑀩𑁆𑀩𑀢𑁆𑀢𑀺 𑀧𑀼𑀩𑁆𑀩𑀧𑀭𑀺𑀘𑀭𑀺𑀬𑀲𑀺𑀤𑁆𑀥𑀸𑀬 𑀦𑀺𑀓𑀦𑁆𑀢𑀺𑀬𑀸. 𑀲𑀲𑀜𑁆𑀜𑀺𑀫𑁆𑀳𑀺 𑀲𑀫𑀦𑀓𑁂𑀢𑀺 𑀦 𑀭𑀽𑀧𑀥𑀫𑁆𑀫𑀫𑀢𑁆𑀢𑀓𑁂, 𑀅𑀣 𑀔𑁄 𑀧𑀜𑁆𑀘𑀓𑁆𑀔𑀦𑁆𑀥𑀲𑀫𑀼𑀤𑀸𑀬𑁂𑀢𑀺 𑀤𑀲𑁆𑀲𑁂𑀢𑀺. 𑀲𑀫𑀺𑀢𑀧𑀸𑀧𑁄𑀢𑀺 𑀲𑀫𑀼𑀘𑁆𑀙𑀺𑀦𑁆𑀦𑀲𑀁𑀓𑀺𑀮𑁂𑀲𑀥𑀫𑁆𑀫𑁄.

𑀭𑁄𑀳𑀺𑀢𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁮. 𑀦𑀦𑁆𑀤𑀲𑀼𑀢𑁆𑀢𑀦𑀦𑁆𑀤𑀺𑀯𑀺𑀲𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁮-𑁧𑁦𑁯. 𑀦𑀦𑁆𑀤𑀲𑀼𑀢𑁆𑀢𑀯𑀺𑀲𑀸𑀮𑀲𑀼𑀢𑁆𑀢𑀸𑀦𑀺 𑀲𑀢𑁆𑀢𑀫𑀅𑀝𑁆𑀞𑀫𑀸𑀦𑀺 𑀳𑁂𑀝𑁆𑀞𑀸 𑀲𑀁𑀯𑀡𑁆𑀡𑀺𑀢𑀭𑀽𑀧𑀢𑁆𑀢𑀸 𑀯𑀼𑀢𑁆𑀢𑀢𑁆𑀣𑀸𑀦𑁂𑀯.

𑀦𑀦𑁆𑀤𑀲𑀼𑀢𑁆𑀢𑀦𑀦𑁆𑀤𑀺𑀯𑀺𑀲𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀲𑀼𑀲𑀺𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁦. 𑀢𑀼𑀬𑁆𑀳𑀫𑁆𑀧𑀺 ¶ 𑀦𑁄𑀢𑀺 𑀢𑀼𑀬𑁆𑀳𑀫𑁆𑀧𑀺 𑀦𑀼, 𑀦𑀼-𑀲𑀤𑁆𑀤𑁄 𑀧𑀼𑀘𑁆𑀙𑀸𑀬𑀁, 𑀢𑀲𑁆𑀫𑀸 𑀯𑀡𑁆𑀡𑀁 𑀓𑀣𑁂𑀢𑀼𑀓𑀸𑀫𑁄 𑀧𑀼𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀯𑀝𑁆𑀝𑀢𑀻𑀢𑀺 𑀦 𑀬𑀼𑀚𑁆𑀚𑀢𑀺, 𑀓𑀣𑀺𑀢𑁄𑀢𑀺 𑀓𑀣𑁂𑀢𑀼𑀁 𑀆𑀭𑀤𑁆𑀥𑁄, 𑀢𑁂𑀦𑀸𑀳 ‘‘𑀫𑀢𑁆𑀣𑀓𑀁 𑀦 𑀧𑀸𑀧𑀼𑀡𑀸𑀢𑀻’’𑀢𑀺. 𑀢𑀫𑁂𑀯 𑀫𑀢𑁆𑀣𑀓𑀸𑀧𑀸𑀧𑀼𑀡𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀬𑁄𑀕𑀢𑁄 𑀕𑁄𑀭𑀽𑀧𑀲𑀻𑀮𑁄, 𑀫𑀽𑀴𑁆𑀳𑁄 𑀔𑀮𑀺𑀢𑀧𑀜𑁆𑀜𑁄, 𑀕𑁄𑀭𑀽𑀧𑀲𑁆𑀲 𑀯𑀺𑀬 𑀲𑀻𑀮𑀁 𑀏𑀢𑀲𑁆𑀲𑀸𑀢𑀺 𑀳𑀺 𑀕𑁄𑀭𑀽𑀧𑀲𑀻𑀮𑁄. 𑀲𑀪𑀸𑀕𑁄 𑀏𑀓𑀭𑀽𑀧𑀘𑀺𑀢𑁆𑀢𑀢𑀸𑀬. 𑀅𑀭𑀺𑀬𑀸𑀦𑀁 𑀲𑀪𑀸𑀕𑀢𑀸 𑀦𑀸𑀫 𑀕𑀼𑀡𑀯𑀦𑁆𑀢𑀯𑀲𑁂𑀦𑀸𑀢𑀺 𑀆𑀳 ‘‘𑀅𑀜𑁆𑀜𑀫𑀜𑁆𑀜𑀲𑁆𑀲 𑀕𑀼𑀡𑁂𑀲𑀼 𑀧𑀲𑀻𑀤𑀺𑀢𑁆𑀯𑀸’’𑀢𑀺. 𑀲𑁄𑀴𑀲𑀯𑀺𑀥𑀁 𑀧𑀜𑁆𑀜𑀦𑁆𑀢𑀺 𑀫𑀳𑀸𑀧𑀜𑁆𑀜𑀸𑀤𑀺𑀓𑀸 𑀙, 𑀦𑀯 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀧𑀜𑁆𑀜𑀸, 𑀆𑀲𑀯𑀓𑁆𑀔𑀬𑀧𑀜𑁆𑀜𑀸𑀢𑀺 𑀇𑀫𑀁 𑀲𑁄𑀴𑀲𑀯𑀺𑀥𑀁 𑀧𑀜𑁆𑀜𑀁. 𑀢𑁂𑀲𑀝𑁆𑀞𑀺 𑀲𑀸𑀯𑀓𑀲𑀸𑀥𑀸𑀭𑀡𑀜𑀸𑀡𑀸𑀦𑀺𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀁 𑀲𑀫𑁄𑀲𑀭𑀡𑀁 𑀕𑀘𑁆𑀙𑀦𑁆𑀢𑀺.

𑀆𑀦𑀦𑁆𑀤𑀸𑀢𑀺 ¶ 𑀣𑁂𑀭𑀁 𑀆𑀳. 𑀆𑀘𑀸𑀭𑁄𑀢𑀺 𑀘𑀸𑀭𑀺𑀢𑁆𑀢𑀲𑀻𑀮𑀫𑀸𑀳. 𑀕𑁄𑀘𑀭𑁄𑀢𑀺 𑀕𑁄𑀘𑀭𑀲𑀫𑁆𑀧𑀢𑁆𑀢𑀺. 𑀯𑀺𑀳𑀸𑀭𑁄𑀢𑀺 𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑁄. 𑀅𑀪𑀺𑀓𑁆𑀓𑀫𑁄𑀢𑀺𑀆𑀤𑀺𑀦𑀸 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑀁. 𑀢𑀼𑀬𑁆𑀳𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀪𑀕𑀯𑀢𑀸 𑀅𑀢𑁆𑀢𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀢𑀤𑀜𑁆𑀜𑁂𑀲𑀁 𑀯𑀺𑀜𑁆𑀜𑀽𑀦𑀁 𑀲𑀩𑁆𑀩𑁂𑀲𑀁 𑀣𑁂𑀭𑀲𑁆𑀲 𑀭𑀼𑀘𑁆𑀘𑀦𑀲𑀪𑀸𑀯𑁄 𑀤𑀻𑀧𑀺𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀬𑁆𑀳𑀁 𑀭𑀼𑀘𑁆𑀘𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀢𑀺𑀧𑀺 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲𑀧𑀺 𑀅𑀲𑀻𑀢𑀺𑀬𑀸 𑀫𑀳𑀸𑀣𑁂𑀭𑀸𑀦𑀁 𑀅𑀦𑁆𑀢𑁄𑀕𑀥𑀪𑀸𑀯𑁂 ‘‘𑀅𑀲𑀻𑀢𑀺𑀬𑀸 𑀫𑀳𑀸𑀣𑁂𑀭𑀸𑀦𑀁 𑀭𑀼𑀘𑁆𑀘𑀢𑀻’’𑀢𑀺 𑀯𑀢𑁆𑀯𑀸 ‘‘𑀢𑀼𑀬𑁆𑀳𑀫𑁆𑀧𑀺 𑀭𑀼𑀘𑁆𑀘𑀢𑀻’’𑀢𑀺 𑀯𑀘𑀦𑀁 𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀯𑀡𑁆𑀡𑀁 𑀓𑀣𑀸𑀧𑁂𑀢𑀼𑀓𑀸𑀫𑀢𑀸𑀬𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀸𑀝𑀓𑀦𑁆𑀢𑀭𑁂𑀢𑀺 𑀦𑀺𑀯𑀢𑁆𑀣𑀯𑀢𑁆𑀣𑀦𑁆𑀢𑀭𑁂. 𑀮𑀤𑁆𑀥𑁄𑀓𑀸𑀲𑁄𑀢𑀺 𑀦𑀺𑀩𑁆𑀩𑀼𑀤𑁆𑀥𑀁 𑀓𑀭𑁄𑀦𑁆𑀢𑁄 𑀲𑀸𑀝𑀓𑀦𑁆𑀢𑀭𑁂 𑀮𑀤𑁆𑀥𑀁 𑀕𑀳𑁂𑀢𑀼𑀁 𑀮𑀤𑁆𑀥𑀸𑀯𑀲𑀭𑁄. 𑀮𑀪𑀺𑀲𑁆𑀲𑀸𑀫𑀺𑀦𑁄𑀢𑀺 𑀮𑀪𑀺𑀲𑁆𑀲𑀸𑀫𑀺 𑀯𑀢. 𑀤𑀻𑀧𑀥𑀚𑀪𑀽𑀢𑀦𑁆𑀢𑀺 𑀲𑀢𑀬𑁄𑀚𑀦𑀯𑀺𑀢𑁆𑀣𑀺𑀡𑁆𑀡𑀁 𑀚𑀫𑁆𑀩𑀼𑀤𑀻𑀧𑀲𑁆𑀲 𑀥𑀚𑀪𑀽𑀢𑀁. 𑀧𑀼𑀕𑁆𑀕𑀮𑀧𑀮𑀸𑀧𑁂𑀢𑀺 𑀅𑀦𑁆𑀢𑁄𑀲𑀸𑀭𑀸𑀪𑀸𑀯𑀢𑁄 𑀧𑀮𑀸𑀧𑀪𑀽𑀢𑁂 𑀧𑀼𑀕𑁆𑀕𑀮𑁂 𑀳𑀭𑀦𑁆𑀢𑁄. 𑀩𑀸𑀮𑀢𑀸𑀬𑀸𑀢𑀺 𑀭𑀼𑀘𑀺𑀔𑀦𑁆𑀢𑀺𑀆𑀤𑀺𑀅𑀪𑀸𑀯𑀢𑀸𑀬. 𑀤𑁄𑀲𑀢𑀸𑀬𑀸𑀢𑀺 𑀤𑀼𑀲𑁆𑀲𑀓𑀪𑀸𑀯𑁂𑀦. 𑀫𑁄𑀳𑁂𑀦𑀸𑀢𑀺 𑀫𑀳𑀸𑀫𑀽𑀴𑁆𑀳𑀢𑀸𑀬. 𑀓𑁂𑀘𑀺 𑀧𑀦 ‘‘𑀩𑀸𑀮𑁄 𑀩𑀸𑀮𑀢𑀸𑀬𑀸𑀢𑀺 𑀫𑀽𑀴𑁆𑀳𑀢𑀸𑀬 𑀧𑀓𑀢𑀺𑀩𑀸𑀮𑀪𑀸𑀯𑁂𑀦 𑀦 𑀚𑀸𑀦𑀸𑀢𑀺. 𑀫𑀽𑀴𑁆𑀳𑁄 𑀫𑁄𑀳𑁂𑀦𑀸𑀢𑀺 𑀲𑀬𑀁 𑀅𑀩𑀸𑀮𑁄 𑀲𑀫𑀸𑀦𑁄𑀧𑀺 𑀬𑀤𑀸 𑀫𑁄𑀳𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑁄 𑀳𑁄𑀢𑀺, 𑀢𑀤𑀸 𑀫𑁄𑀳𑁂𑀦 𑀦 𑀚𑀸𑀦𑀸𑀢𑀺, 𑀅𑀬𑀁 𑀧𑀤𑀤𑁆𑀯𑀬𑀲𑁆𑀲 𑀯𑀺𑀲𑁂𑀲𑁄’’𑀢𑀺 𑀯𑀤𑀦𑁆𑀢𑀺. 𑀯𑀺𑀧𑀮𑁆𑀮𑀢𑁆𑀣𑀘𑀺𑀢𑁆𑀢𑁄𑀢𑀺 𑀬𑀓𑁆𑀔𑀼𑀫𑁆𑀫𑀸𑀤𑁂𑀦 𑀧𑀺𑀢𑁆𑀢𑀼𑀫𑁆𑀫𑀸𑀤𑁂𑀦 𑀯𑀸 𑀯𑀺𑀧𑀭𑀻𑀢𑀘𑀺𑀢𑁆𑀢𑁄.

‘‘𑀘𑀢𑀽𑀲𑀼 ¶ 𑀓𑁄𑀲𑀮𑁆𑀮𑁂𑀲𑀽’’𑀢𑀺 𑀯𑀼𑀢𑁆𑀢𑀁 𑀘𑀢𑀼𑀩𑁆𑀩𑀺𑀥𑀁 𑀓𑁄𑀲𑀮𑁆𑀮𑀁 𑀧𑀸𑀴𑀺𑀬𑀸 𑀏𑀯 𑀤𑀲𑁆𑀲𑁂𑀢𑀼𑀁 ‘‘𑀯𑀼𑀢𑁆𑀢𑀁 𑀳𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑁄 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀲𑀫𑀼𑀤𑀬𑀢𑁄 𑀅𑀢𑁆𑀣𑀗𑁆𑀕𑀫𑀢𑁄 𑀅𑀲𑁆𑀲𑀸𑀤𑀢𑁄 𑀆𑀤𑀻𑀦𑀯𑀢𑁄 𑀦𑀺𑀲𑁆𑀲𑀭𑀡𑀢𑁄 𑀘 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀅𑀬𑀁 𑀥𑀸𑀢𑀼𑀓𑀼𑀲𑀮𑁄. 𑀯𑀼𑀢𑁆𑀢𑀦𑀬𑁂𑀦 𑀆𑀬𑀢𑀦𑁂𑀲𑀼 𑀓𑀼𑀲𑀮𑁄 𑀆𑀬𑀢𑀦𑀓𑀼𑀲𑀮𑁄. 𑀅𑀯𑀺𑀚𑁆𑀚𑀸𑀤𑀻𑀲𑀼 𑀤𑁆𑀯𑀸𑀤𑀲𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑁂𑀲𑀼 𑀓𑀼𑀲𑀮𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑁄. ‘‘𑀇𑀤𑀁 𑀇𑀫𑀲𑁆𑀲 𑀨𑀮𑀲𑁆𑀲 𑀞𑀸𑀦𑀁 𑀓𑀸𑀭𑀡𑀁, 𑀇𑀤𑀁 𑀅𑀝𑁆𑀞𑀸𑀦𑀁 𑀅𑀓𑀸𑀭𑀡’’𑀦𑁆𑀢𑀺 𑀏𑀯𑀁 𑀞𑀸𑀦𑀜𑁆𑀘 𑀞𑀸𑀦𑀢𑁄, 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀢𑁄 𑀞𑀸𑀦𑀸𑀝𑁆𑀞𑀸𑀦𑀓𑀼𑀲𑀮𑁄. 𑀬𑁄 𑀧𑀦 𑀇𑀫𑁂𑀲𑀼 𑀥𑀸𑀢𑀼𑀆𑀤𑀻𑀲𑀼 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀯𑀲𑁂𑀦 𑀦𑀺𑀲𑁆𑀲𑀗𑁆𑀕𑀕𑀢𑀺𑀬𑀸 𑀧𑀡𑁆𑀟𑀸𑀢𑀺 𑀮𑀤𑁆𑀥𑀦𑀸𑀫𑁂𑀦 𑀜𑀸𑀡𑁂𑀦 𑀇𑀢𑁄 𑀕𑀢𑁄 𑀧𑀯𑀢𑁆𑀢𑁄, 𑀅𑀬𑀁 𑀧𑀡𑁆𑀟𑀺𑀢𑁄 𑀦𑀸𑀫.

𑀫𑀳𑀦𑁆𑀢𑀸𑀦𑀁 𑀅𑀢𑁆𑀣𑀸𑀦𑀁 𑀧𑀭𑀺𑀕𑁆𑀕𑀡𑁆𑀳𑀦𑀢𑁄 𑀫𑀳𑀢𑀻 𑀧𑀜𑁆𑀜𑀸 𑀏𑀢𑀲𑁆𑀲𑀸𑀢𑀺 𑀫𑀳𑀸𑀧𑀜𑁆𑀜𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀆𑀳 ‘‘𑀫𑀳𑀸𑀧𑀜𑁆𑀜𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄’’𑀢𑀺. 𑀦𑀸𑀦𑀢𑁆𑀢𑀦𑁆𑀢𑀺 𑀬𑀸𑀳𑀺 𑀫𑀳𑀸𑀧𑀜𑁆𑀜𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀣𑁂𑀭𑁄 ‘‘𑀫𑀳𑀸𑀧𑀜𑁆𑀜𑁄’’𑀢𑀺𑀆𑀤𑀺𑀦𑀸 𑀓𑀺𑀢𑁆𑀢𑀺𑀢𑁄, 𑀢𑀸𑀲𑀁 𑀫𑀳𑀸𑀧𑀜𑁆𑀜𑀸𑀤𑀻𑀦𑀁 𑀇𑀤𑀁 𑀦𑀸𑀦𑀢𑁆𑀢𑀁 𑀅𑀬𑀁 𑀯𑁂𑀫𑀢𑁆𑀢𑀢𑀸. 𑀬𑀲𑁆𑀲 𑀓𑀲𑁆𑀲𑀘𑀺 𑀯𑀺𑀲𑁂𑀲𑀢𑁄 𑀅𑀭𑀽𑀧𑀥𑀫𑁆𑀫𑀲𑁆𑀲 𑀫𑀳𑀢𑁆𑀢𑀁 𑀦𑀸𑀫 𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀢𑀤𑀲𑁆𑀲 𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀳𑀦𑁆𑀢𑁂 𑀲𑀻𑀮𑀓𑁆𑀔𑀦𑁆𑀥𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑁂𑀢𑀼𑀫𑀳𑀦𑁆𑀢𑀢𑀸𑀬 𑀧𑀘𑁆𑀘𑀬𑀫𑀳𑀦𑁆𑀢𑀢𑀸𑀬 𑀦𑀺𑀲𑁆𑀲𑀬𑀫𑀳𑀦𑁆𑀢𑀢𑀸𑀬 𑀧𑀪𑁂𑀤𑀫𑀳𑀦𑁆𑀢𑀢𑀸𑀬 𑀓𑀺𑀘𑁆𑀘𑀫𑀳𑀦𑁆𑀢𑀢𑀸𑀬 𑀨𑀮𑀫𑀳𑀦𑁆𑀢𑀢𑀸𑀬 𑀆𑀦𑀺𑀲𑀁𑀲𑀫𑀳𑀦𑁆𑀢𑀢𑀸𑀬 𑀘 𑀲𑀻𑀮𑀓𑁆𑀔𑀦𑁆𑀥𑀲𑁆𑀲 𑀫𑀳𑀦𑁆𑀢𑀪𑀸𑀯𑁄 ¶ 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀳𑁂𑀢𑀽 𑀅𑀮𑁄𑀪𑀸𑀤𑀬𑁄. 𑀧𑀘𑁆𑀘𑀬𑀸 𑀳𑀺𑀭𑁄𑀢𑁆𑀢𑀧𑁆𑀧𑀲𑀤𑁆𑀥𑀸𑀲𑀢𑀺𑀯𑀻𑀭𑀺𑀬𑀸𑀤𑀬𑁄. 𑀦𑀺𑀲𑁆𑀲𑀬𑀸 𑀲𑀸𑀯𑀓𑀩𑁄𑀥𑀺𑀧𑀘𑁆𑀘𑁂𑀓𑀩𑁄𑀥𑀺𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀦𑀺𑀬𑀢𑀢𑀸, 𑀢𑀁𑀲𑀫𑀗𑁆𑀕𑀺𑀦𑁄 𑀘 𑀧𑀼𑀭𑀺𑀲𑀯𑀺𑀲𑁂𑀲𑀸. 𑀧𑀪𑁂𑀤𑁄 𑀘𑀸𑀭𑀺𑀢𑁆𑀢𑀸𑀤𑀺𑀯𑀺𑀪𑀸𑀕𑁄. 𑀓𑀺𑀘𑁆𑀘𑀁 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀧𑀝𑀺𑀧𑀓𑁆𑀔𑀲𑁆𑀲 𑀯𑀺𑀥𑀫𑀦𑀁. 𑀨𑀮𑀁 𑀲𑀕𑁆𑀕𑀲𑀫𑁆𑀧𑀤𑀸 𑀦𑀺𑀩𑁆𑀩𑀸𑀦𑀲𑀫𑁆𑀧𑀤𑀸 𑀘. 𑀆𑀦𑀺𑀲𑀁𑀲𑁄 𑀧𑀺𑀬𑀫𑀦𑀸𑀧𑀢𑀸𑀤𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁮-𑁯) 𑀆𑀓𑀗𑁆𑀔𑁂𑀬𑁆𑀬𑀲𑀼𑀢𑁆𑀢𑀸𑀤𑀻𑀲𑀼 (𑀫. 𑀦𑀺. 𑁧.𑁬𑁪 𑀆𑀤𑀬𑁄) 𑀘 𑀆𑀕𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀦𑀸 𑀦𑀬𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑀸𑀤𑀻𑀦𑀫𑁆𑀧𑀺 𑀫𑀳𑀦𑁆𑀢𑀢𑀸 𑀬𑀣𑀸𑀭𑀳𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸. 𑀞𑀸𑀦𑀸𑀝𑁆𑀞𑀸𑀦𑀸𑀤𑀻𑀦𑀁 𑀧𑀦 𑀫𑀳𑀦𑁆𑀢𑀪𑀸𑀯𑁄 𑀫𑀳𑀸𑀯𑀺𑀲𑀬𑀢𑀸𑀬 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀞𑀸𑀦𑀸𑀝𑁆𑀞𑀸𑀦𑀸𑀦𑀁 𑀫𑀳𑀸𑀯𑀺𑀲𑀬𑀢𑀸 𑀩𑀳𑀼𑀥𑀸𑀢𑀼𑀓𑀲𑀼𑀢𑁆𑀢𑀸𑀤𑀻𑀲𑀼 𑀆𑀕𑀢𑀦𑀬𑁂𑀦, 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀦𑀺𑀤𑁆𑀥𑀸𑀭𑀺𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀅𑀭𑀺𑀬𑀲𑀘𑁆𑀘𑀸𑀦𑀁 𑀲𑀓𑀮𑀲𑀸𑀲𑀦𑀲𑀗𑁆𑀕𑀡𑁆𑀳𑀦𑀢𑁄 𑀲𑀘𑁆𑀘𑀯𑀺𑀪𑀗𑁆𑀕𑁂 ¶ (𑀯𑀺𑀪. 𑁧𑁮𑁯 𑀆𑀤𑀬𑁄) 𑀢𑀁𑀲𑀁𑀯𑀡𑁆𑀡𑀦𑀸𑀲𑀼 (𑀯𑀺𑀪. 𑀅𑀝𑁆𑀞. 𑁧𑁮𑁯 𑀆𑀤𑀬𑁄) 𑀆𑀕𑀢𑀦𑀬𑁂𑀦; 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀦𑀁 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑀸𑀤𑀻𑀲𑀼 (𑀯𑀺𑀪. 𑁩𑁫𑁫 𑀆𑀤𑀬𑁄) 𑀢𑀁𑀲𑀁𑀯𑀡𑁆𑀡𑀦𑀸𑀤𑀻𑀲𑀼 (𑀯𑀺𑀪. 𑀅𑀝𑁆𑀞. 𑁩𑁫𑁫 𑀆𑀤𑀬𑁄) 𑀘 𑀆𑀕𑀢𑀦𑀬𑁂𑀦; 𑀲𑀸𑀫𑀜𑁆𑀜𑀨𑀮𑀸𑀦𑀁 𑀫𑀳𑀢𑁄 𑀳𑀺𑀢𑀲𑁆𑀲 𑀫𑀳𑀢𑁄 𑀲𑀼𑀔𑀲𑁆𑀲 𑀫𑀳𑀢𑁄 𑀅𑀢𑁆𑀣𑀲𑁆𑀲 𑀫𑀳𑀢𑁄 𑀬𑁄𑀕𑀓𑁆𑀔𑁂𑀫𑀲𑁆𑀲 𑀦𑀺𑀧𑁆𑀨𑀢𑁆𑀢𑀺𑀪𑀸𑀯𑀢𑁄 𑀲𑀦𑁆𑀢𑀧𑀡𑀻𑀢𑀦𑀺𑀧𑀼𑀡𑀅𑀢𑀓𑁆𑀓𑀸𑀯𑀘𑀭𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀪𑀸𑀯𑀢𑁄 𑀘; 𑀅𑀪𑀺𑀜𑁆𑀜𑀸𑀦𑀁 𑀫𑀳𑀸𑀲𑀫𑁆𑀪𑀸𑀭𑀢𑁄 𑀫𑀳𑀸𑀯𑀺𑀲𑀬𑀢𑁄 𑀫𑀳𑀸𑀓𑀺𑀘𑁆𑀘𑀢𑁄 𑀫𑀳𑀸𑀦𑀼𑀪𑀸𑀯𑀢𑁄 𑀫𑀳𑀸𑀦𑀺𑀧𑁆𑀨𑀢𑁆𑀢𑀺𑀢𑁄 𑀘; 𑀦𑀺𑀩𑁆𑀩𑀸𑀦𑀲𑁆𑀲 𑀫𑀤𑀦𑀺𑀫𑁆𑀫𑀤𑀦𑀸𑀤𑀺𑀫𑀳𑀢𑁆𑀣𑀲𑀺𑀤𑁆𑀥𑀺𑀢𑁄 𑀫𑀳𑀦𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀲𑀪𑀸𑀯𑀸𑀤𑀺𑀢𑁄 𑀧𑀭𑀺𑀘𑁆𑀙𑀺𑀚𑁆𑀚 𑀕𑀡𑁆𑀳𑀸𑀢𑀺 𑀚𑀸𑀦𑀸𑀢𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀲𑀸 𑀧𑀦𑀸𑀢𑀺 𑀫𑀳𑀸𑀧𑀜𑁆𑀜𑀢𑀸.

𑀧𑀼𑀣𑀼𑀧𑀜𑁆𑀜𑀸𑀢𑀺 𑀏𑀢𑁆𑀣 𑀦𑀸𑀦𑀸𑀔𑀦𑁆𑀥𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀅𑀬𑀁 𑀭𑀽𑀧𑀓𑁆𑀔𑀦𑁆𑀥𑁄 𑀦𑀸𑀫…𑀧𑁂… 𑀅𑀬𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀦𑀸𑀫𑀸𑀢𑀺 𑀏𑀯𑀁 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀢𑁂𑀲𑀼 𑀏𑀓𑀯𑀺𑀥𑁂𑀦 𑀭𑀽𑀧𑀓𑁆𑀔𑀦𑁆𑀥𑁄, 𑀏𑀓𑀸𑀤𑀲𑀯𑀺𑀥𑁂𑀦 𑀭𑀽𑀧𑀓𑁆𑀔𑀦𑁆𑀥𑁄, 𑀏𑀓𑀯𑀺𑀥𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀩𑀳𑀼𑀯𑀺𑀥𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀏𑀓𑀯𑀺𑀥𑁂𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺 𑀏𑀯𑀁 𑀏𑀓𑁂𑀓𑀲𑁆𑀲 𑀔𑀦𑁆𑀥𑀲𑁆𑀲 𑀏𑀓𑀯𑀺𑀥𑀸𑀤𑀺𑀯𑀲𑁂𑀦 𑀅𑀢𑀻𑀢𑀸𑀤𑀺𑀯𑀲𑁂𑀦𑀧𑀺 𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀢𑀣𑀸 𑀇𑀤𑀁 𑀘𑀓𑁆𑀔𑀸𑀬𑀢𑀦𑀁 𑀦𑀸𑀫…𑀧𑁂… 𑀇𑀤𑀁 𑀥𑀫𑁆𑀫𑀸𑀬𑀢𑀦𑀁 𑀦𑀸𑀫𑀁. 𑀢𑀢𑁆𑀣 𑀤𑀲𑀸𑀬𑀢𑀦𑀸 𑀓𑀸𑀫𑀸𑀯𑀘𑀭𑀸, 𑀤𑁆𑀯𑁂 𑀘𑀢𑀼𑀪𑀽𑀫𑀓𑀸𑀢𑀺 𑀏𑀯𑀁 𑀆𑀬𑀢𑀦𑀸𑀦𑀁 𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀦𑀸𑀦𑀸𑀥𑀸𑀢𑀽𑀲𑀽𑀢𑀺 𑀅𑀬𑀁 𑀘𑀓𑁆𑀔𑀼𑀥𑀸𑀢𑀼 𑀦𑀸𑀫…𑀧𑁂… 𑀅𑀬𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀦𑀸𑀫. 𑀢𑀢𑁆𑀣 𑀲𑁄𑀴𑀲 𑀥𑀸𑀢𑀼𑀬𑁄 𑀓𑀸𑀫𑀸𑀯𑀘𑀭𑀸, 𑀤𑁆𑀯𑁂 𑀘𑀢𑀼𑀪𑀽𑀫𑀓𑀸𑀢𑀺 𑀏𑀯𑀁 𑀥𑀸𑀢𑀼𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀢𑀁 𑀉𑀧𑀸𑀤𑀺𑀡𑁆𑀡𑀥𑀸𑀢𑀼𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀜𑁆𑀳𑀺 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀜𑁆𑀘 𑀉𑀧𑀸𑀤𑀺𑀡𑁆𑀡𑀥𑀸𑀢𑀽𑀲𑀼 𑀏𑀯 𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀢𑀜𑁆𑀘 𑀔𑁄 𑀏𑀓𑀤𑁂𑀲𑀫𑀢𑁆𑀢𑀢𑁄, 𑀦 𑀦𑀺𑀧𑁆𑀧𑀤𑁂𑀲𑀢𑁄, 𑀅𑀦𑀼𑀧𑀸𑀤𑀺𑀡𑁆𑀡𑀓𑀥𑀸𑀢𑀽𑀦𑀁 𑀧𑀦 𑀦𑀸𑀦𑀸𑀓𑀭𑀡𑀁 𑀦 𑀚𑀸𑀦𑀦𑁆𑀢𑀺 𑀏𑀯. 𑀇𑀢𑀭𑀲𑀸𑀯𑀓𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁𑀬𑁂𑀯 𑀧𑀦 𑀇𑀫𑀸𑀬 𑀦𑀸𑀫 𑀥𑀸𑀢𑀼𑀬𑀸 𑀉𑀲𑁆𑀲𑀦𑁆𑀦𑀢𑁆𑀢𑀸𑀯 𑀇𑀫𑀲𑁆𑀲 𑀭𑀼𑀓𑁆𑀔𑀲𑁆𑀲 𑀔𑀦𑁆𑀥𑁄 𑀲𑁂𑀢𑁄 𑀳𑁄𑀢𑀺, 𑀇𑀫𑀲𑁆𑀲 𑀓𑀸𑀴𑁄, 𑀇𑀫𑀲𑁆𑀲 𑀫𑀝𑁆𑀞𑁄, 𑀇𑀫𑀲𑁆𑀲 ¶ 𑀩𑀳𑀮𑀢𑁆𑀢𑀘𑁄, 𑀇𑀫𑀲𑁆𑀲 𑀢𑀦𑀼𑀢𑁆𑀢𑀘𑁄, 𑀇𑀫𑀲𑁆𑀲 𑀧𑀢𑁆𑀢𑀁 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀲𑁂𑀦 𑀏𑀯𑀭𑀽𑀧𑀁; 𑀇𑀫𑀲𑁆𑀲 𑀧𑀼𑀧𑁆𑀨𑀁 𑀦𑀻𑀮𑀁 𑀧𑀻𑀢𑀓𑀁 𑀮𑁄𑀳𑀺𑀢𑀓𑀁 𑀑𑀤𑀸𑀢𑀁, 𑀲𑀼𑀕𑀦𑁆𑀥𑀁 𑀤𑀼𑀕𑁆𑀕𑀦𑁆𑀥𑀁; 𑀨𑀮𑀁 𑀔𑀼𑀤𑁆𑀤𑀓𑀁 𑀫𑀳𑀦𑁆𑀢𑀁 𑀤𑀻𑀖𑀁 𑀯𑀝𑁆𑀝𑀁 𑀲𑀼𑀲𑀡𑁆𑀞𑀸𑀦𑀁 𑀫𑀝𑁆𑀞𑀁 ¶ 𑀨𑀭𑀼𑀲𑀁 𑀲𑀼𑀕𑀦𑁆𑀥𑀁 𑀫𑀥𑀼𑀭𑀁 𑀢𑀺𑀢𑁆𑀢𑀓𑀁 𑀅𑀫𑁆𑀩𑀺𑀮𑀁 𑀓𑀝𑀼𑀓𑀁 𑀓𑀲𑀸𑀯𑀁; 𑀓𑀡𑁆𑀝𑀓𑁄 𑀢𑀺𑀔𑀺𑀡𑁄 𑀅𑀢𑀺𑀔𑀺𑀡𑁄 𑀉𑀚𑀼𑀓𑁄 𑀓𑀼𑀝𑀺𑀮𑁄 𑀢𑀫𑁆𑀩𑁄 𑀮𑁄𑀳𑀺𑀢𑁄 𑀑𑀤𑀸𑀢𑁄 𑀳𑁄𑀢𑀻𑀢𑀺 𑀥𑀸𑀢𑀼𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺.

𑀅𑀢𑁆𑀣𑁂𑀲𑀽𑀢𑀺 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼. 𑀦𑀸𑀦𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀲𑀽𑀢𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀪𑁂𑀤𑀢𑁄 𑀘 𑀲𑀡𑁆𑀞𑀸𑀦𑀪𑁂𑀤𑀢𑁄 𑀘 𑀦𑀸𑀦𑀧𑁆𑀧𑀪𑁂𑀤𑁂𑀲𑀼 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑁂𑀲𑀼. 𑀅𑀯𑀺𑀚𑁆𑀚𑀸𑀤𑀺𑀅𑀗𑁆𑀕𑀸𑀦𑀜𑁆𑀳𑀺 𑀧𑀘𑁆𑀘𑁂𑀓𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀜𑁆𑀜𑀺𑀢𑀸𑀢𑀺. 𑀢𑁂𑀦𑀸𑀳 𑀲𑀗𑁆𑀔𑀸𑀭𑀧𑀺𑀝𑀓𑁂 ‘‘𑀤𑁆𑀯𑀸𑀤𑀲 𑀧𑀘𑁆𑀘𑀬𑀸 𑀤𑁆𑀯𑀸𑀤𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸’’𑀢𑀺. 𑀦𑀸𑀦𑀸𑀲𑀼𑀜𑁆𑀜𑀢𑀫𑀦𑀼𑀧𑀮𑀩𑁆𑀪𑁂𑀲𑀽𑀢𑀺 𑀦𑀸𑀦𑀸𑀲𑀪𑀸𑀯𑁂𑀲𑀼 𑀦𑀺𑀘𑁆𑀘𑀲𑀸𑀭𑀸𑀤𑀺𑀯𑀺𑀭𑀳𑀢𑁄 𑀲𑀼𑀜𑁆𑀜𑀲𑀪𑀸𑀯𑁂𑀲𑀼, 𑀢𑀢𑁄 𑀏𑀯 𑀇𑀢𑁆𑀣𑀺𑀧𑀼𑀭𑀺𑀲𑀅𑀢𑁆𑀢𑀅𑀢𑁆𑀢𑀦𑀺𑀬𑀸𑀤𑀺𑀯𑀲𑁂𑀦 𑀅𑀦𑀼𑀧𑀮𑀩𑁆𑀪𑁂𑀲𑀼 𑀲𑀪𑀸𑀯𑁂𑀲𑀼. 𑀫-𑀓𑀸𑀭𑁄 𑀳𑁂𑀢𑁆𑀣 𑀧𑀤𑀲𑀦𑁆𑀥𑀺𑀓𑀭𑁄. 𑀦𑀸𑀦𑀸𑀅𑀢𑁆𑀣𑁂𑀲𑀽𑀢𑀺 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑁂𑀲𑀼 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀤𑀺𑀪𑁂𑀤𑁂𑀲𑀼 𑀦𑀸𑀦𑀸𑀯𑀺𑀥𑁂𑀲𑀼 𑀅𑀢𑁆𑀣𑁂𑀲𑀼. 𑀥𑀫𑁆𑀫𑁂𑀲𑀽𑀢𑀺 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑁂𑀲𑀼 𑀧𑀘𑁆𑀘𑀬𑀸𑀤𑀺𑀦𑀸𑀦𑀸𑀥𑀫𑁆𑀫𑁂𑀲𑀼. 𑀦𑀺𑀭𑀼𑀢𑁆𑀢𑀻𑀲𑀽𑀢𑀺 𑀢𑁂𑀲𑀁𑀬𑁂𑀯 𑀅𑀢𑁆𑀣𑀥𑀫𑁆𑀫𑀸𑀦𑀁 𑀦𑀺𑀤𑁆𑀥𑀸𑀭𑀡𑀯𑀘𑀦𑀲𑀗𑁆𑀔𑀸𑀢𑀸𑀲𑀼 𑀦𑀺𑀭𑀼𑀢𑁆𑀢𑀻𑀲𑀼. 𑀧𑀝𑀺𑀪𑀸𑀦𑁂𑀲𑀽𑀢𑀺 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀤𑀻𑀲𑀼 𑀯𑀺𑀲𑀬𑀪𑀽𑀢𑁂𑀲𑀼 ‘‘𑀇𑀫𑀸𑀦𑀺 𑀇𑀤𑀫𑀢𑁆𑀣𑀚𑁄𑀢𑀓𑀸𑀦𑀻’’𑀢𑀺 𑀢𑀣𑀸 𑀢𑀣𑀸 𑀧𑀝𑀺𑀪𑀸𑀦𑀢𑁄 𑀧𑀢𑀺𑀝𑁆𑀞𑀸𑀦𑀢𑁄 𑀧𑀝𑀺𑀪𑀸𑀦𑀸𑀦𑀻𑀢𑀺 𑀮𑀤𑁆𑀥𑀦𑀸𑀫𑁂𑀲𑀼 𑀜𑀸𑀡𑁂𑀲𑀼. 𑀧𑀼𑀣𑀼 𑀦𑀸𑀦𑀸𑀲𑀻𑀮𑀓𑁆𑀔𑀦𑁆𑀥𑁂𑀲𑀽𑀢𑀺𑀆𑀤𑀻𑀲𑀼 𑀲𑀻𑀮𑀲𑁆𑀲 𑀧𑀼𑀣𑀼𑀢𑁆𑀢𑀁 𑀦𑀸𑀦𑀢𑁆𑀢𑀜𑁆𑀘 𑀯𑀼𑀢𑁆𑀢𑀫𑁂𑀯. 𑀇𑀢𑀭𑁂𑀲𑀁 𑀧𑀦 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀧𑀸𑀓𑀝𑀫𑁂𑀯. 𑀬𑀁 𑀧𑀦 𑀅𑀪𑀺𑀦𑁆𑀦𑀁 𑀏𑀓𑀫𑁂𑀯 𑀦𑀺𑀩𑁆𑀩𑀸𑀦𑀁, 𑀢𑀢𑁆𑀣 𑀉𑀧𑀘𑀸𑀭𑀯𑀲𑁂𑀦 𑀧𑀼𑀣𑀼𑀢𑁆𑀢𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀧𑀼𑀣𑀼 𑀚𑀦𑀲𑀸𑀥𑀸𑀭𑀡𑁂 𑀥𑀫𑁆𑀫𑁂 𑀲𑀫𑀢𑀺𑀓𑁆𑀓𑀫𑁆𑀫𑀸’’𑀢𑀺. 𑀢𑁂𑀦𑀲𑁆𑀲 𑀇𑀥 𑀫𑀤𑀦𑀺𑀫𑁆𑀫𑀤𑀦𑀸𑀤𑀺𑀧𑀭𑀺𑀬𑀸𑀬𑁂𑀦 𑀧𑀼𑀣𑀼𑀢𑁆𑀢𑀁 𑀤𑀻𑀧𑀺𑀢𑀁 𑀳𑁄𑀢𑀺.

𑀏𑀯𑀁 𑀯𑀺𑀲𑀬𑀯𑀲𑁂𑀦 𑀧𑀜𑁆𑀜𑀸𑀬 𑀫𑀳𑀢𑁆𑀢𑀁 𑀧𑀼𑀣𑀼𑀢𑁆𑀢𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀯𑀲𑁂𑀦 𑀳𑀸𑀲𑀪𑀸𑀯𑀁, 𑀧𑀯𑀢𑁆𑀢𑀺𑀆𑀓𑀸𑀭𑀯𑀲𑁂𑀦 𑀚𑀯𑀦𑀪𑀸𑀯𑀁, 𑀓𑀺𑀘𑁆𑀘𑀯𑀲𑁂𑀦 𑀢𑀺𑀓𑁆𑀔𑀸𑀤𑀺𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀓𑀢𑀫𑀸 𑀳𑀸𑀲𑀧𑀜𑁆𑀜𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀸𑀲𑀩𑀳𑀼𑀮𑁄𑀢𑀺 𑀧𑀻𑀢𑀺𑀩𑀳𑀼𑀮𑁄. 𑀲𑁂𑀲𑀧𑀤𑀸𑀦𑀺 𑀢𑀲𑁆𑀲 𑀯𑁂𑀯𑀘𑀦𑀸𑀦𑀺. 𑀲𑀻𑀮𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑀳𑀝𑁆𑀞𑀧𑀳𑀝𑁆𑀞𑁄 𑀉𑀤𑀕𑁆𑀕𑀼𑀤𑀕𑁆𑀕𑁄 𑀳𑀼𑀢𑁆𑀯𑀸 𑀧𑀻𑀢𑀺𑀲𑀳𑀕𑀢𑀸𑀬 𑀧𑀜𑁆𑀜𑀸𑀬 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑀁 𑀞𑀧𑁂𑀢𑁆𑀯𑀸 𑀳𑀸𑀲𑀦𑀻𑀬𑀢𑀭𑀲𑁆𑀲𑁂𑀯 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀇𑀢𑀭𑀁 𑀢𑀺𑀯𑀺𑀥𑀁 𑀲𑀻𑀮𑀁 𑀧𑀭𑀺𑀧𑀽𑀭𑁂𑀢𑀺. 𑀧𑀻𑀢𑀺𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀳𑀺 𑀧𑀜𑁆𑀜𑀸 𑀅𑀪𑀺𑀭𑀢𑀺𑀯𑀲𑁂𑀦 𑀢𑀤𑀸𑀭𑀫𑁆𑀫𑀡𑁂 𑀨𑀼𑀮𑁆𑀮𑀺𑀢𑀸 𑀯𑀺𑀓𑀲𑀺𑀢𑀸 𑀯𑀺𑀬 𑀯𑀢𑁆𑀢𑀢𑀺, 𑀦 𑀉𑀧𑁂𑀓𑁆𑀔𑀸𑀲𑀳𑀕𑀢𑀸. 𑀲𑀻𑀮𑀓𑁆𑀔𑀦𑁆𑀥𑀁 𑀲𑀫𑀸𑀥𑀺𑀓𑁆𑀔𑀦𑁆𑀥𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀣𑁂𑀭𑁄𑀢𑀺𑀆𑀤𑀺𑀦𑀸 𑀅𑀪𑀺𑀦𑀻𑀳𑀸𑀭𑀲𑀺𑀤𑁆𑀥𑀸 𑀣𑁂𑀭𑀲𑁆𑀲 𑀳𑀸𑀲𑀧𑀜𑁆𑀜𑀢𑀸𑀢𑀺 𑀤𑀲𑁆𑀲𑁂𑀢𑀺.

𑀲𑀩𑁆𑀩𑀁 ¶ 𑀭𑀽𑀧𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀭𑀽𑀧𑀓𑁆𑀔𑀦𑁆𑀥𑀁 𑀅𑀦𑀺𑀘𑁆𑀘𑀦𑁆𑀢𑀺 𑀲𑀻𑀖𑀯𑁂𑀕𑁂𑀦 𑀧𑀯𑀢𑁆𑀢𑀺𑀬𑀸 𑀧𑀝𑀺𑀧𑀓𑁆𑀔𑀤𑀽𑀭𑀻𑀪𑀸𑀯𑁂𑀦 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀲𑀸𑀢𑀺𑀲𑀬𑀢𑁆𑀢𑀸 𑀇𑀦𑁆𑀤𑁂𑀦 𑀯𑀺𑀲𑀝𑁆𑀞𑀯𑀚𑀺𑀭𑀁 𑀯𑀺𑀬 𑀮𑀓𑁆𑀔𑀡𑀁 ¶ 𑀧𑀝𑀺𑀯𑀺𑀚𑁆𑀛𑀦𑁆𑀢𑀻 𑀅𑀤𑀦𑁆𑀥𑀸𑀬𑀦𑁆𑀢𑀻 𑀭𑀽𑀧𑀓𑁆𑀔𑀦𑁆𑀥𑁂 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀯𑁂𑀕𑁂𑀦 𑀧𑀝𑀺𑀯𑀺𑀚𑁆𑀛𑀢𑀺, 𑀢𑀲𑁆𑀫𑀸 𑀲𑀸 𑀚𑀯𑀦𑀧𑀜𑁆𑀜𑀸 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀚𑀯𑀦𑀧𑀜𑁆𑀜𑀁 𑀤𑀲𑁆𑀲𑁂𑀢𑁆𑀯𑀸 𑀩𑀮𑀯𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀔𑀬𑀝𑁆𑀞𑁂𑀦𑀸𑀢𑀺 𑀬𑀢𑁆𑀣 𑀬𑀢𑁆𑀣 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀔𑀡𑁂𑀦𑁂𑀯 𑀪𑀺𑀚𑁆𑀚𑀦𑀢𑁄 𑀔𑀬𑀲𑀪𑀸𑀯𑀢𑁄. 𑀪𑀬𑀝𑁆𑀞𑁂𑀦𑀸𑀢𑀺 𑀪𑀬𑀸𑀦𑀓𑀢𑁄. 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺 𑀅𑀢𑁆𑀢𑀲𑀸𑀭𑀯𑀺𑀭𑀳𑀢𑁄 𑀦𑀺𑀘𑁆𑀘𑀲𑀸𑀭𑀸𑀤𑀺𑀯𑀺𑀭𑀳𑀢𑁄 𑀘. 𑀢𑀼𑀮𑀬𑀺𑀢𑁆𑀯𑀸𑀢𑀺 𑀢𑀼𑀮𑀸𑀪𑀽𑀢𑀸𑀬 𑀯𑀺𑀧𑀲𑁆𑀲𑀦𑀸𑀬 𑀢𑀼𑀮𑀬𑀺𑀢𑁆𑀯𑀸. 𑀢𑀻𑀭𑀬𑀺𑀢𑁆𑀯𑀸𑀢𑀺 𑀢𑀸𑀬 𑀏𑀯 𑀢𑀻𑀭𑀡𑀪𑀽𑀢𑀸𑀬 𑀢𑀻𑀭𑁂𑀢𑁆𑀯𑀸. 𑀯𑀺𑀪𑀸𑀯𑀬𑀺𑀢𑁆𑀯𑀸𑀢𑀺 𑀬𑀸𑀣𑀸𑀯𑀢𑁄 𑀧𑀓𑀸𑀲𑁂𑀢𑁆𑀯𑀸 𑀧𑀜𑁆𑀘𑀓𑁆𑀔𑀦𑁆𑀥𑀁 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀧𑀸𑀓𑀝𑀁 𑀓𑀢𑁆𑀯𑀸. 𑀭𑀽𑀧𑀦𑀺𑀭𑁄𑀥𑁂𑀢𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑀪𑀽𑀢𑁂 𑀦𑀺𑀩𑁆𑀩𑀸𑀦𑁂 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀪𑀸𑀯𑁂𑀦. 𑀇𑀤𑀸𑀦𑀺 𑀲𑀺𑀔𑀸𑀧𑁆𑀧𑀢𑁆𑀢𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀚𑀯𑀦𑀧𑀜𑁆𑀜𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 ‘‘𑀭𑀽𑀧’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑀸’’𑀢𑀺 𑀓𑁂𑀘𑀺.

𑀜𑀸𑀡𑀢𑀺𑀓𑁆𑀔𑀪𑀸𑀯𑁄 𑀦𑀸𑀫 𑀲𑀯𑀺𑀲𑁂𑀲𑀁 𑀧𑀝𑀺𑀧𑀓𑁆𑀔𑀲𑀫𑀼𑀘𑁆𑀙𑀺𑀦𑁆𑀤𑀦𑁂 𑀯𑁂𑀤𑀺𑀢𑀩𑁆𑀩𑁄𑀢𑀺 ‘‘𑀔𑀺𑀧𑁆𑀧𑀁 𑀓𑀺𑀮𑁂𑀲𑁂 𑀙𑀺𑀦𑁆𑀤𑀢𑀻𑀢𑀺 𑀢𑀺𑀓𑁆𑀔𑀧𑀜𑁆𑀜𑁄’’𑀢𑀺 𑀯𑀢𑁆𑀯𑀸 𑀢𑁂 𑀧𑀦 𑀓𑀺𑀮𑁂𑀲𑁂 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀺𑀓𑁆𑀔𑀧𑀜𑁆𑀜𑁄 𑀔𑀺𑀧𑁆𑀧𑀸𑀪𑀺𑀜𑁆𑀜𑁄 𑀳𑁄𑀢𑀺, 𑀧𑀝𑀺𑀧𑀤𑀸 𑀘𑀲𑁆𑀲 𑀦 𑀘𑀮𑀢𑀻𑀢𑀺 𑀆𑀳 ‘‘𑀏𑀓𑀲𑁆𑀫𑀺𑀁 𑀆𑀲𑀦𑁂 𑀘𑀢𑁆𑀢𑀸𑀭𑁄 𑀘 𑀅𑀭𑀺𑀬𑀫𑀕𑁆𑀕𑀸 𑀅𑀥𑀺𑀕𑀢𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀺. 𑀣𑁂𑀭𑁄 𑀘𑀸𑀢𑀺𑀆𑀤𑀺𑀦𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀢𑀺𑀓𑁆𑀔𑀧𑀜𑁆𑀜𑀢𑀸 𑀲𑀺𑀔𑀸𑀧𑁆𑀧𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺.

‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸’’𑀢𑀺 𑀬𑀸𑀣𑀸𑀯𑀢𑁄 𑀤𑀲𑁆𑀲𑀦𑁂𑀦 𑀲𑀘𑁆𑀘𑀲𑀫𑁆𑀧𑀝𑀺𑀯𑁂𑀥𑁄 𑀇𑀚𑁆𑀛𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀓𑀸𑀭𑀡𑀫𑀼𑀔𑁂𑀦 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀉𑀩𑁆𑀩𑁂𑀕𑀩𑀳𑀼𑀮𑁄 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀩𑁆𑀩𑁂𑀕𑀩𑀳𑀼𑀮𑁄𑀢𑀺 𑀯𑀼𑀢𑁆𑀢𑀦𑀬𑁂𑀦 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀪𑀺𑀡𑁆𑀳𑀧𑁆𑀧𑀯𑀢𑁆𑀢𑀲𑀁𑀯𑁂𑀕𑁄. 𑀉𑀢𑁆𑀢𑀸𑀲𑀩𑀳𑀼𑀮𑁄𑀢𑀺 𑀜𑀸𑀡𑀼𑀢𑁆𑀢𑀸𑀲𑀯𑀲𑁂𑀦 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀩𑀳𑀼𑀲𑁄 𑀉𑀢𑁆𑀭𑀲𑁆𑀢𑀫𑀸𑀦𑀲𑁄. 𑀢𑁂𑀦 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀫𑀸𑀳. 𑀉𑀓𑁆𑀓𑀡𑁆𑀞𑀦𑀩𑀳𑀼𑀮𑁄𑀢𑀺 𑀇𑀫𑀺𑀦𑀸 𑀧𑀦 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀫𑀸𑀳, 𑀅𑀭𑀢𑀺𑀩𑀳𑀼𑀮𑁄𑀢𑀺𑀆𑀤𑀺𑀦𑀸 𑀢𑀲𑁆𑀲𑀸 𑀏𑀯 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀁. 𑀩𑀳𑀺𑀫𑀼𑀔𑁄 𑀲𑀩𑁆𑀩𑀲𑀗𑁆𑀔𑀸𑀭𑀢𑁄 𑀩𑀳𑀺𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀜𑀸𑀡𑀫𑀼𑀔𑁄, 𑀢𑀣𑀸 ¶ 𑀯𑀸 𑀧𑀯𑀢𑁆𑀢𑀺𑀢𑀯𑀺𑀫𑁄𑀓𑁆𑀔𑀫𑀼𑀔𑁄. 𑀦𑀺𑀩𑁆𑀩𑀺𑀚𑁆𑀛𑀦𑀁 𑀦𑀺𑀩𑁆𑀩𑁂𑀥𑁄, 𑀲𑁄 𑀏𑀢𑀺𑀲𑁆𑀲𑀸 𑀅𑀢𑁆𑀣𑀺, 𑀦𑀺𑀩𑁆𑀩𑀺𑀚𑁆𑀛𑀢𑀻𑀢𑀺 𑀯𑀸 𑀦𑀺𑀩𑁆𑀩𑁂𑀥𑀸, 𑀲𑀸 𑀏𑀯 𑀧𑀜𑁆𑀜𑀸 𑀦𑀺𑀩𑁆𑀩𑁂𑀥𑀺𑀓𑀸. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀦 𑀯𑀺𑀪𑀢𑁆𑀢𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀧𑁆𑀧𑀺𑀘𑁆𑀙𑁄𑀢𑀺 𑀲𑀦𑁆𑀢𑀕𑀼𑀡𑀦𑀺𑀕𑀼𑀳𑀦𑀢𑀸𑀢𑀺 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀸𑀦𑀁 𑀩𑀸𑀳𑀼𑀲𑀘𑁆𑀘𑀥𑀼𑀢𑀥𑀫𑁆𑀫𑀲𑀻𑀮𑀸𑀤𑀺𑀕𑀼𑀡𑀸𑀦𑀜𑁆𑀘𑁂𑀯 𑀧𑀝𑀺𑀯𑁂𑀥𑀕𑀼𑀡𑀲𑁆𑀲 𑀘 𑀦𑀺𑀕𑀼𑀳𑀦𑀁, 𑀧𑀝𑀺𑀕𑁆𑀕𑀳𑀡𑁂 𑀘 𑀫𑀢𑁆𑀢𑀜𑁆𑀜𑀼𑀢𑀸𑀢𑀺 𑀏𑀢𑁂𑀦𑁂𑀯 𑀧𑀭𑀺𑀬𑁂𑀲𑀦𑀧𑀭𑀺𑀪𑁄𑀕𑀫𑀢𑁆𑀢𑀜𑁆𑀜𑀼𑀢𑀸𑀧𑀺 𑀯𑀼𑀢𑁆𑀢𑀸 𑀳𑁄𑀢𑀺. 𑀢𑀻𑀳𑀺 𑀲𑀦𑁆𑀢𑁄𑀲𑁂𑀳𑀻𑀢𑀺 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀧𑀘𑁆𑀘𑁂𑀓𑀁 𑀢𑀻𑀳𑀺 𑀲𑀦𑁆𑀢𑁄𑀲𑁂𑀳𑀺 ¶ , 𑀲𑀩𑁆𑀩𑁂 𑀧𑀦 𑀤𑁆𑀯𑀸𑀤𑀲. 𑀧𑀝𑀺𑀲𑀮𑁆𑀮𑀻𑀦𑁂𑀦 𑀯𑀺𑀯𑁂𑀓𑀝𑁆𑀞𑀓𑀸𑀬𑀸𑀦𑀁 𑀦 𑀲𑀗𑁆𑀕𑀡𑀺𑀓𑀸𑀭𑀸𑀫𑀸𑀦𑀁. 𑀦𑁂𑀓𑁆𑀔𑀫𑁆𑀫𑀸𑀪𑀺𑀭𑀢𑀸𑀦𑀦𑁆𑀢𑀺 𑀧𑀩𑁆𑀩𑀚𑁆𑀚𑀁 𑀉𑀧𑀕𑀢𑀸𑀦𑀁. 𑀧𑀭𑀺𑀲𑀼𑀤𑁆𑀥𑀘𑀺𑀢𑁆𑀢𑀸𑀦𑀁 𑀯𑀺𑀕𑀢𑀘𑀺𑀢𑁆𑀢𑀲𑀁𑀓𑀺𑀮𑁂𑀲𑀸𑀦𑀁. 𑀧𑀭𑀫𑀯𑁄𑀤𑀸𑀦𑀧𑁆𑀧𑀢𑁆𑀢𑀸𑀦𑀁 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀲𑀫𑀥𑀺𑀕𑀫𑁂𑀦 𑀅𑀢𑀺𑀯𑀺𑀬 𑀯𑁄𑀤𑀸𑀦𑀁 𑀯𑀺𑀲𑀼𑀤𑁆𑀥𑀺𑀁 𑀧𑀢𑁆𑀢𑀸𑀦𑀁. 𑀓𑀺𑀮𑁂𑀲𑀼𑀧𑀥𑀺𑀆𑀤𑀻𑀦𑀁 𑀅𑀪𑀸𑀯𑀢𑁄 𑀦𑀺𑀭𑀼𑀧𑀥𑀻𑀦𑀁. 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀲𑀩𑁆𑀩𑀲𑀗𑁆𑀔𑀸𑀭𑀯𑀺𑀦𑀺𑀲𑁆𑀲𑀝𑀢𑁆𑀢𑀸 𑀯𑀺𑀲𑀗𑁆𑀔𑀸𑀭𑀁 𑀦𑀺𑀩𑁆𑀩𑀸𑀦𑀁. 𑀉𑀧𑀕𑀢𑀸𑀦𑀁, 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀯𑀺𑀯𑁂𑀓𑀸𑀦𑀁 𑀮𑀸𑀪𑀻 𑀧𑀯𑀺𑀯𑀺𑀢𑁆𑀢𑁄 ‘‘𑀧𑀓𑀸𑀭𑁂𑀳𑀺 𑀯𑀺𑀯𑀺𑀢𑁆𑀢𑁄’’𑀢𑀺 𑀓𑀢𑁆𑀯𑀸. 𑀲𑀫𑀸𑀲𑀚𑁆𑀚𑀦𑀁 𑀧𑀭𑀺𑀲𑀺𑀦𑁂𑀳𑀼𑀧𑁆𑀧𑀸𑀤𑁄 𑀲𑀁𑀲𑀕𑁆𑀕𑁄, 𑀲𑀯𑀦𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀲𑀁𑀲𑀕𑁆𑀕𑁄 𑀲𑀯𑀦𑀲𑀁𑀲𑀕𑁆𑀕𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀲𑀫𑀼𑀮𑁆𑀮𑀧𑀦𑀁 𑀆𑀮𑀸𑀧𑀲𑀮𑁆𑀮𑀧𑀦𑀁. 𑀲𑀁𑀲𑀕𑁆𑀕𑀯𑀢𑁆𑀣𑀼𑀦𑀸 𑀇𑀫𑀺𑀦𑀸 𑀢𑀲𑁆𑀲 𑀧𑀭𑀺𑀪𑁄𑀕𑁄 𑀧𑀭𑀺𑀪𑁄𑀕𑀲𑀁𑀲𑀕𑁆𑀕𑁄.

𑀆𑀭𑀤𑁆𑀥𑀯𑀻𑀭𑀺𑀬𑁄𑀢𑀺 𑀏𑀢𑁆𑀣 𑀯𑀻𑀭𑀺𑀬𑀸𑀭𑀫𑁆𑀪𑁄 𑀦𑀸𑀫 𑀯𑀻𑀭𑀺𑀬𑀲𑁆𑀲 𑀧𑀕𑁆𑀕𑀡𑁆𑀳𑀦𑀁 𑀧𑀭𑀺𑀧𑀼𑀡𑁆𑀡𑀓𑀭𑀡𑀁. 𑀢𑀁 𑀧𑀦 𑀲𑀩𑁆𑀩𑀲𑁄 𑀓𑀺𑀮𑁂𑀲𑀸𑀦𑀁 𑀦𑀺𑀕𑁆𑀕𑀡𑁆𑀳𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀑𑀥𑀼𑀦𑀦𑀯𑀢𑁆𑀢𑀸𑀢𑀺 𑀓𑀺𑀮𑁂𑀲𑀸𑀦𑀁 𑀬𑀲𑁆𑀲 𑀓𑀲𑁆𑀲𑀘𑀺 𑀲𑀸𑀯𑀚𑁆𑀚𑀲𑁆𑀲 𑀑𑀥𑀼𑀦𑀦𑀯𑀲𑁂𑀦 𑀯𑀢𑁆𑀢𑀸. 𑀢𑁂𑀦𑀸𑀳 ‘‘𑀪𑀺𑀓𑁆𑀔𑀽𑀦’’𑀦𑁆𑀢𑀺𑀆𑀤𑀺. 𑀑𑀢𑀺𑀡𑁆𑀡𑀁 𑀦𑀸𑀫 𑀯𑀚𑁆𑀚𑀁 𑀅𑀚𑁆𑀛𑀸𑀘𑀭𑀺𑀢𑀦𑁆𑀢𑀺 𑀆𑀭𑁄𑀘𑀺𑀢𑀁. 𑀅𑀦𑁄𑀢𑀺𑀡𑁆𑀡𑀁 𑀅𑀦𑀸𑀭𑁄𑀘𑀺𑀢𑀁. 𑀢𑀦𑁆𑀢𑀺𑀯𑀲𑁂𑀦𑀸𑀢𑀺 𑀧𑀸𑀴𑀺𑀥𑀫𑁆𑀫𑀯𑀲𑁂𑀦, 𑀬𑀼𑀢𑁆𑀢𑀲𑀤𑁆𑀤𑀲𑁆𑀲 𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀸𑀧𑁂 𑀮𑀸𑀫𑀓𑁂 𑀧𑀼𑀕𑁆𑀕𑀮𑁂 𑀥𑀫𑁆𑀫𑁂 𑀘 𑀕𑀭𑀳𑀢𑀺 𑀚𑀺𑀕𑀼𑀘𑁆𑀙𑀢𑀻𑀢𑀺 𑀧𑀸𑀧𑀕𑀭𑀳𑀻. 𑀢𑁂𑀦𑀸𑀳 ‘‘𑀧𑀸𑀧𑀧𑀼𑀕𑁆𑀕𑀮𑁂’’𑀢𑀺𑀆𑀤𑀺. 𑀏𑀓𑀤𑀲𑁆𑀲𑀻𑀢𑀺 𑀏𑀓𑀪𑀯𑀤𑀲𑁆𑀲𑀻, 𑀇𑀥𑀮𑁄𑀓𑀫𑀢𑁆𑀢𑀤𑀲𑁆𑀲𑀻 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀼𑀔𑀫𑀢𑁆𑀢𑀸𑀧𑁂𑀓𑁆𑀔𑀻. 𑀲𑀫𑀦𑁆𑀢𑀸𑀢𑀺 𑀲𑀫𑀦𑁆𑀢𑀢𑁄, 𑀧𑀭𑀺𑀢𑁄 𑀫𑁂 𑀓𑀢𑁆𑀣𑀘𑀺 𑀫𑀸 𑀅𑀳𑀽𑀢𑀺 𑀬𑁄𑀚𑀦𑀸.

𑀲𑁄𑀴𑀲𑀳𑀺 𑀧𑀤𑁂𑀳𑀻𑀢𑀺 𑀲𑁄𑀴𑀲𑀳𑀺 𑀓𑁄𑀝𑁆𑀞𑀸𑀲𑁂𑀳𑀺. 𑀅𑀓𑀼𑀧𑁆𑀧𑀦𑁆𑀢𑀺 𑀓𑁂𑀦𑀘𑀺 𑀅𑀓𑁄𑀧𑀦𑀻𑀬𑀁. 𑀅𑀬𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀕𑀼𑀡𑀓𑀣𑀸 𑀲𑀢𑁆𑀣𑀼 𑀯𑀘𑀦𑀸𑀦𑀼𑀲𑀸𑀭𑁂𑀦 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀩𑁆𑀬𑀸𑀧𑀺𑀦𑀻 ¶ 𑀅𑀳𑁄𑀲𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀯’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀢𑀼𑀩𑁆𑀩𑀺𑀥𑀸 𑀯𑀡𑁆𑀡𑀦𑀺𑀪𑀸 𑀧𑀸𑀢𑀼𑀪𑀯𑀺 𑀉𑀴𑀸𑀭𑀧𑀻𑀢𑀺𑀲𑁄𑀫𑀦𑀲𑁆𑀲𑀲𑀫𑀼𑀝𑁆𑀞𑀸𑀦𑀢𑁆𑀢𑀸. 𑀲𑀼𑀝𑁆𑀞𑀼 𑀑𑀪𑀸𑀲𑀢𑀻𑀢𑀺 𑀲𑀼𑀪𑁄. 𑀑𑀪𑀸𑀲𑀲𑀫𑁆𑀧𑀢𑁆𑀢𑀺𑀬𑀸 𑀫𑀡𑀺𑀦𑁄 𑀪𑀤𑁆𑀤𑀓𑀢𑀸𑀢𑀺 𑀆𑀳 ‘‘𑀲𑀼𑀪𑁄𑀢𑀺 𑀲𑀼𑀦𑁆𑀤𑀭𑁄’’𑀢𑀺. 𑀚𑀸𑀢𑀺𑀫𑀸 𑀧𑀭𑀺𑀲𑀼𑀤𑁆𑀥𑀆𑀓𑀭𑀲𑀫𑀼𑀝𑁆𑀞𑀺𑀢𑀢𑁆𑀢𑀸. 𑀓𑀼𑀭𑀼𑀯𑀺𑀦𑁆𑀤𑀚𑀸𑀢𑀺𑀆𑀤𑀺𑀚𑀸𑀢𑀺𑀯𑀺𑀲𑁂𑀲𑁄𑀧𑀺 𑀫𑀡𑀺 𑀆𑀓𑀭𑀧𑀭𑀺𑀲𑀼𑀤𑁆𑀥𑀫𑀽𑀮𑀓𑁄 𑀏𑀯𑀸𑀢𑀺 𑀆𑀳 ‘‘𑀚𑀸𑀢𑀺𑀲𑀫𑁆𑀧𑀦𑁆𑀦𑁄’’𑀢𑀺. 𑀥𑁄𑀯𑀦𑀸𑀤𑀺𑀧𑀭𑀺𑀓𑀫𑁆𑀫𑁂𑀦𑀸𑀢𑀺 𑀘𑀢𑀽𑀲𑀼 𑀧𑀸𑀲𑀸𑀡𑁂𑀲𑀼 𑀥𑁄𑀯𑀦𑀤𑁄𑀲𑀦𑀻𑀳𑀭𑀡𑀢𑀸𑀧𑀦𑀲𑀡𑁆𑀳𑀓𑀭𑀡𑀸𑀤𑀺𑀧𑀭𑀺𑀓𑀫𑁆𑀫𑁂𑀦. 𑀭𑀢𑁆𑀢𑀓𑀫𑁆𑀩𑀮𑀲𑁆𑀲 𑀯𑀲𑁂𑀦 𑀲𑀪𑀸𑀯𑀯𑀡𑁆𑀡𑀲𑀺𑀤𑁆𑀥𑀺𑀬𑀸 𑀯𑁂𑀴𑀼𑀭𑀺𑀬𑀫𑀡𑀺 𑀅𑀢𑀺𑀯𑀺𑀬 𑀲𑁄𑀪𑀢𑀻𑀢𑀺 𑀆𑀳 ‘‘𑀧𑀡𑁆𑀟𑀼𑀓𑀫𑁆𑀩𑀮𑁂 𑀦𑀺𑀓𑁆𑀔𑀺𑀢𑁆𑀢𑁄’’𑀢𑀺. 𑀦𑀺𑀓𑁆𑀔𑀦𑁆𑀢𑀺 𑀪𑀡𑁆𑀟𑀫𑀸𑀳. 𑀢𑀜𑁆𑀘 𑀅𑀧𑁆𑀧𑀓𑁂𑀦 𑀲𑀼𑀯𑀡𑁆𑀡𑁂𑀦 𑀓𑀢𑀁 𑀪𑀡𑁆𑀟𑀁 𑀦 𑀲𑁄𑀪𑀢𑀺 𑀲𑁄𑀪𑀸𑀯𑀺𑀧𑀼𑀮𑁂𑀦𑀸𑀢𑀺 𑀆𑀳 ‘‘𑀅𑀢𑀺𑀭𑁂𑀓𑀧𑀜𑁆𑀘𑀲𑀼𑀯𑀡𑁆𑀡𑁂𑀦 𑀓𑀢𑀧𑀺𑀴𑀦𑁆𑀥𑀦’’𑀦𑁆𑀢𑀺. 𑀲𑀼𑀯𑀡𑁆𑀡𑀦𑁆𑀢𑀺 𑀧𑀜𑁆𑀘𑀥𑀭𑀡𑀲𑁆𑀲 𑀲𑀫𑀜𑁆𑀜𑀸, 𑀢𑀲𑁆𑀫𑀸 𑀧𑀜𑁆𑀘𑀯𑀻𑀲𑀢𑀺𑀲𑀼𑀯𑀡𑁆𑀡𑀲𑀸𑀭𑀺𑀬𑀸 𑀯𑀺𑀘𑀺𑀢𑁆𑀢𑀆𑀪𑀭𑀡𑀁 𑀇𑀥 ‘‘𑀦𑀺𑀓𑁆𑀔’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀢𑀜𑁆𑀳𑀺 𑀯𑀺𑀧𑀼𑀮𑀁 𑀦 𑀧𑀭𑀺𑀢𑁆𑀢𑀓𑀁. 𑀫𑀳𑀸𑀚𑀫𑁆𑀩𑀼𑀲𑀸𑀔𑀸𑀬 𑀧𑀯𑀢𑁆𑀢𑀦𑀤𑀺𑀬𑀦𑁆𑀢𑀺 𑀫𑀳𑀸𑀚𑀫𑁆𑀩𑀼𑀲𑀸𑀔𑀸𑀬 𑀳𑁂𑀝𑁆𑀞𑀸 𑀲𑀜𑁆𑀚𑀸𑀢𑀦𑀤𑀺𑀬𑀁. 𑀢𑀁 𑀓𑀺𑀭 𑀭𑀢𑀦𑀁 𑀭𑀢𑁆𑀢𑀁. 𑀲𑀼𑀓𑀼𑀲𑀮𑁂𑀦…𑀧𑁂… 𑀲𑀫𑁆𑀧𑀳𑀝𑁆𑀞𑀦𑁆𑀢𑀺 𑀲𑀼𑀝𑁆𑀞𑀼 𑀓𑀼𑀲𑀮𑁂𑀦 𑀲𑀼𑀯𑀡𑁆𑀡𑀓𑀸𑀭𑁂𑀦 𑀉𑀓𑁆𑀓𑀸𑀬 𑀢𑀸𑀧𑁂𑀢𑁆𑀯𑀸 𑀲𑀫𑁆𑀫𑀸 ¶ 𑀧𑀳𑀝𑁆𑀞𑀁 𑀫𑀚𑁆𑀚𑀦𑀸𑀤𑀺𑀯𑀲𑁂𑀦 𑀲𑀼𑀓𑀢𑀧𑀭𑀺𑀓𑀫𑁆𑀫𑀁. 𑀥𑀸𑀢𑀼𑀯𑀺𑀪𑀗𑁆𑀕𑁂𑀢𑀺 𑀥𑀸𑀢𑀼𑀯𑀺𑀪𑀗𑁆𑀕𑀲𑀼𑀢𑁆𑀢𑁂. 𑀓𑀢𑀪𑀡𑁆𑀟𑀦𑁆𑀢𑀺 𑀆𑀪𑀭𑀡𑀪𑀸𑀯𑁂𑀦 𑀓𑀢𑀁 𑀪𑀡𑁆𑀟𑀁.

𑀦𑀸𑀢𑀺𑀉𑀘𑁆𑀘𑁄 𑀦𑀸𑀢𑀺𑀦𑀻𑀘𑁄 𑀢𑀭𑀼𑀡𑀲𑀽𑀭𑀺𑀬𑁄 𑀦𑀸𑀫. 𑀲𑀢𑁆𑀣𑀸𑀭𑀸 𑀆𑀪𑀢𑀯𑀡𑁆𑀡𑁄 𑀉𑀩𑁆𑀪𑀢𑀕𑀼𑀡𑁄𑀢𑀺 𑀅𑀢𑁆𑀣𑁄. 𑀦𑁂𑀯 𑀫𑀭𑀡𑀁 𑀅𑀪𑀺𑀦𑀦𑁆𑀤𑀢𑀻𑀢𑀺 𑀅𑀢𑁆𑀢𑀦𑁄𑀧𑀺 𑀫𑀭𑀡𑀁 𑀦𑁂𑀯 𑀅𑀪𑀺𑀦𑀦𑁆𑀤𑀢𑀺 𑀅𑀢𑁆𑀢𑀯𑀺𑀦𑀺𑀧𑀸𑀢𑀲𑁆𑀲 𑀲𑀸𑀯𑀚𑁆𑀚𑀪𑀸𑀯𑀢𑁄. 𑀩𑁄𑀥𑀺𑀲𑀢𑁆𑀢𑁄 𑀧𑀦 𑀧𑀭𑁂𑀲𑀁 𑀅𑀢𑁆𑀣𑀸𑀬 𑀅𑀢𑁆𑀢𑀦𑁄 𑀅𑀢𑁆𑀢𑀪𑀸𑀯𑀁 𑀧𑀭𑀺𑀘𑁆𑀘𑀚𑀢𑀺 𑀓𑀭𑀼𑀡𑀸𑀯𑀲𑁂𑀦, 𑀏𑀯𑀁 𑀯𑁄𑀲𑀚𑁆𑀚𑀦𑀁 𑀧𑀭𑀫𑀢𑁆𑀣𑀧𑀸𑀭𑀫𑀻𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀻𑀢𑀺 𑀲𑀸𑀯𑀓𑀸 𑀦 𑀢𑀣𑀸 𑀓𑀸𑀢𑀼𑀁 𑀲𑀓𑁆𑀓𑀸 𑀲𑀺𑀓𑁆𑀔𑀸𑀧𑀤𑀢𑁄. 𑀦 𑀚𑀻𑀯𑀺𑀢𑀁 𑀧𑀢𑁆𑀣𑁂𑀢𑀺 𑀚𑀻𑀯𑀺𑀢𑀸𑀲𑀸𑀬 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸. 𑀤𑀺𑀯𑀲𑀲𑀗𑁆𑀔𑁂𑀧𑀦𑁆𑀢𑀺 𑀅𑀚𑁆𑀚 𑀢𑁆𑀯𑀁 𑀇𑀤𑀁 𑀦𑀸𑀫 𑀓𑀫𑁆𑀫𑀁 𑀓𑀭𑁄𑀳𑀺, 𑀇𑀤𑀁 𑀢𑁂 𑀯𑁂𑀢𑀦𑀦𑁆𑀢𑀺 𑀤𑀺𑀯𑀲𑀪𑀸𑀕𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁 𑀯𑁂𑀢𑀦𑀁. 𑀢𑀸𑀤𑀺𑀲𑁄 𑀳𑀺 𑀪𑀢𑀓𑁄 𑀤𑀺𑀯𑀲𑀓𑁆𑀔𑀬𑀫𑁂𑀯 𑀉𑀤𑀺𑀓𑁆𑀔𑀢𑀺, 𑀦 𑀓𑀫𑁆𑀫𑀦𑀺𑀝𑁆𑀞𑀸𑀦𑀁. 𑀦𑀺𑀩𑁆𑀩𑀺𑀲𑀁 𑀪𑀢𑀓𑁄 𑀬𑀣𑀸𑀢𑀺 𑀯𑁂𑀢𑀦𑀁 𑀪𑀢𑀺𑀁 𑀇𑀘𑁆𑀙𑀦𑁆𑀢𑁄 𑀓𑀸𑀮𑀓𑁆𑀔𑀬𑀁 𑀉𑀤𑀺𑀓𑁆𑀔𑀦𑁆𑀢𑁄 𑀪𑀢𑀓𑀧𑀼𑀭𑀺𑀲𑁄 𑀯𑀺𑀬.

𑀲𑀼𑀲𑀺𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀦𑀸𑀦𑀸𑀢𑀺𑀢𑁆𑀣𑀺𑀬𑀲𑀸𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁧. 𑀦𑀸𑀦𑀸𑀢𑀺𑀢𑁆𑀣𑀺𑀬𑀲𑀸𑀯𑀓𑀸𑀢𑀺 ¶ 𑀧𑀼𑀣𑀼𑀢𑀺𑀢𑁆𑀣𑀺𑀬𑀸𑀦𑀁 𑀲𑀸𑀯𑀓𑀸. 𑀙𑀺𑀦𑁆𑀤𑀺𑀢𑁂𑀢𑀺 𑀳𑀢𑁆𑀣𑀘𑁆𑀙𑁂𑀤𑀸𑀤𑀺𑀯𑀲𑁂𑀦 𑀙𑁂𑀤𑁂. 𑀫𑀸𑀭𑀺𑀢𑁂𑀢𑀺 𑀫𑀸𑀭𑀡𑁂. 𑀦 𑀧𑀸𑀧𑀁 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀓𑀺𑀜𑁆𑀘𑀺 𑀧𑀸𑀧𑀁 𑀅𑀢𑁆𑀣𑀻𑀢𑀺 𑀦 𑀧𑀲𑁆𑀲𑀢𑀺, 𑀧𑀭𑁂𑀲𑀜𑁆𑀘 𑀢𑀣𑀸 𑀧𑀯𑁂𑀤𑁂𑀢𑀺. 𑀯𑀺𑀲𑁆𑀲𑀸𑀲𑀦𑁆𑀢𑀺 𑀯𑀺𑀲𑁆𑀲𑀢𑁆𑀣𑀪𑀸𑀯𑀁. ‘‘𑀓𑀢𑀓𑀫𑁆𑀫𑀸𑀦𑀫𑁆𑀧𑀺 𑀯𑀺𑀧𑀸𑀓𑁄 𑀦𑀢𑁆𑀣𑀻’’𑀢𑀺 𑀯𑀤𑀦𑁆𑀢𑁄 𑀓𑀢𑀧𑀸𑀧𑀸𑀦𑀁 𑀅𑀓𑀢𑀧𑀼𑀜𑁆𑀜𑀸𑀦𑀜𑁆𑀘 𑀯𑀺𑀲𑁆𑀲𑀢𑁆𑀣𑀢𑀁 𑀦𑀺𑀭𑀸𑀲𑀗𑁆𑀓𑀢𑀁 𑀚𑀦𑁂𑀢𑀺.

𑀢𑀧𑁄𑀚𑀺𑀕𑀼𑀘𑁆𑀙𑀸𑀬𑀸𑀢𑀺 𑀢𑀧𑀲𑀸 𑀅𑀘𑁂𑀮𑀯𑀢𑀸𑀤𑀺𑀦𑀸 𑀧𑀸𑀧𑀢𑁄 𑀚𑀺𑀕𑀼𑀘𑁆𑀙𑀦𑁂𑀦, ‘‘𑀧𑀸𑀧𑀁 𑀯𑀺𑀭𑀸𑀚𑀬𑀸𑀫𑀸’’𑀢𑀺 𑀅𑀘𑁂𑀮𑀯𑀢𑀸𑀤𑀺𑀲𑀫𑀸𑀤𑀸𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀺𑀜𑁆𑀳𑀺 𑀲𑀫𑀸𑀤𑀸𑀦𑁂 𑀞𑀺𑀢𑁂𑀦 𑀲𑀁𑀯𑀭𑁂𑀦 𑀲𑀁𑀯𑀼𑀢𑀘𑀺𑀢𑁆𑀢𑁄 𑀲𑀫𑀦𑁆𑀦𑀸𑀕𑀢𑁄 𑀧𑀺𑀳𑀺𑀢𑁄 𑀘 𑀦𑀸𑀫 𑀳𑁄𑀢𑀻𑀢𑀺 ‘‘𑀲𑀼𑀲𑀁𑀯𑀼𑀢𑀢𑁆𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀢𑁆𑀢𑀸𑀭𑁄 𑀬𑀸𑀫𑀸 𑀪𑀸𑀕𑀸 𑀘𑀢𑀼𑀬𑀸𑀫𑀸, 𑀘𑀢𑀼𑀬𑀸𑀫𑀸 𑀏𑀯 𑀘𑀸𑀢𑀼𑀬𑀸𑀫𑀸. 𑀪𑀸𑀕𑀢𑁆𑀣𑁄 𑀳𑀺 𑀇𑀥 𑀬𑀸𑀫-𑀲𑀤𑁆𑀤𑁄 𑀬𑀣𑀸 ‘‘𑀭𑀢𑁆𑀢𑀺𑀬𑀁 𑀧𑀞𑀫𑁄 𑀬𑀸𑀫𑁄’’𑀢𑀺. 𑀲𑁄 𑀧𑀦𑁂𑀢𑁆𑀣 𑀪𑀸𑀕𑁄 𑀲𑀁𑀯𑀭𑀮𑀓𑁆𑀔𑀡𑁄𑀢𑀺 𑀆𑀳 ‘‘𑀘𑀸𑀢𑀼𑀬𑀸𑀫𑁂𑀦 𑀲𑀼𑀲𑀁𑀯𑀼𑀢𑁄’’𑀢𑀺, 𑀘𑀢𑀼𑀓𑁄𑀝𑁆𑀞𑀸𑀲𑁂𑀦 𑀲𑀁𑀯𑀭𑁂𑀦 𑀲𑀼𑀝𑁆𑀞𑀼 𑀲𑀁𑀯𑀼𑀢𑁄𑀢𑀺 𑀅𑀢𑁆𑀣𑁄. 𑀧𑀝𑀺𑀓𑁆𑀔𑀺𑀢𑁆𑀢𑀲𑀩𑁆𑀩𑀲𑀻𑀢𑁄𑀤𑀓𑁄𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀲𑀩𑁆𑀩𑀲𑀻𑀢𑀼𑀤𑀓𑀧𑀭𑀺𑀪𑁄𑀕𑁄. 𑀲𑀩𑁆𑀩𑁂𑀦 𑀧𑀸𑀧𑀯𑀸𑀭𑀡𑁂𑀦 𑀬𑀼𑀢𑁆𑀢𑁄𑀢𑀺 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀲𑀁𑀯𑀭𑀮𑀓𑁆𑀔𑀡𑁂𑀦 𑀧𑀸𑀧𑀯𑀸𑀭𑀡𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀥𑀼𑀢𑀧𑀸𑀧𑁄𑀢𑀺 𑀲𑀩𑁆𑀩𑁂𑀦 𑀦𑀺𑀚𑁆𑀚𑀭𑀮𑀓𑁆𑀔𑀡𑁂𑀦 𑀧𑀸𑀧𑀯𑀸𑀭𑀡𑁂𑀦𑀧𑀺 𑀥𑀼𑀢𑀧𑀸𑀧𑁄. 𑀨𑀼𑀝𑁆𑀞𑁄𑀢𑀺 𑀅𑀝𑁆𑀞𑀦𑁆𑀦𑀫𑁆𑀧𑀺 𑀓𑀫𑁆𑀫𑀸𑀦𑀁 𑀔𑁂𑀧𑀦𑁂𑀦 𑀯𑀺𑀓𑁆𑀔𑁂𑀧𑀧𑁆𑀧𑀢𑁆𑀢𑀺𑀬𑀸 𑀓𑀫𑁆𑀫𑀓𑁆𑀔𑀬𑀮𑀓𑁆𑀔𑀡𑁂𑀦 𑀲𑀩𑁆𑀩𑁂𑀦 𑀧𑀸𑀧𑀯𑀸𑀭𑀡𑁂𑀦 𑀨𑀼𑀝𑁆𑀞𑁄, 𑀢𑀁 𑀨𑀼𑀲𑀺𑀢𑁆𑀯𑀸 𑀞𑀺𑀢𑁄. 𑀦 𑀦𑀺𑀕𑀼𑀳𑀦𑁆𑀢𑁄𑀢𑀺 𑀦 𑀦𑀺𑀕𑀼𑀳𑀦𑀳𑁂𑀢𑀼 𑀤𑀺𑀝𑁆𑀞𑀲𑀼𑀢𑁂 𑀢𑀣𑁂𑀯 𑀓𑀣𑁂𑀦𑁆𑀢𑁄.

𑀦𑀸𑀦𑀸𑀢𑀺𑀢𑁆𑀣𑀺𑀬𑀸𑀦𑀁𑀬𑁂𑀯 ¶ 𑀉𑀧𑀝𑁆𑀞𑀸𑀓𑁄𑀢𑀺 𑀧𑀭𑀯𑀸𑀤𑀻𑀦𑀁 𑀲𑀩𑁆𑀩𑁂𑀲𑀁𑀬𑁂𑀯 𑀢𑀺𑀢𑁆𑀣𑀺𑀬𑀸𑀦𑀁 𑀉𑀧𑀝𑁆𑀞𑀸𑀓𑁄, 𑀢𑁂𑀲𑀼 𑀲𑀸𑀥𑀸𑀭𑀡𑀯𑀲𑁂𑀦 𑀅𑀪𑀺𑀧𑁆𑀧𑀲𑀦𑁆𑀦𑁄. 𑀓𑁄𑀝𑀺𑀧𑁆𑀧𑀢𑁆𑀢𑀸𑀢𑀺 𑀫𑁄𑀓𑁆𑀔𑀸𑀥𑀺𑀕𑀫𑁂𑀦 𑀲𑀫𑀡𑀥𑀫𑁆𑀫𑁂 𑀧𑀢𑁆𑀢𑀩𑁆𑀩𑀫𑀭𑀺𑀬𑀸𑀤𑀧𑁆𑀧𑀢𑁆𑀢𑀸.

𑀲𑀳𑀘𑀭𑀺𑀢𑀫𑀢𑁆𑀢𑁂𑀦𑀸𑀢𑀺 𑀲𑀻𑀳𑀦𑀸𑀤𑁂𑀦 𑀲𑀳 𑀯𑀲𑁆𑀲𑀓𑀭𑀡𑀫𑀢𑁆𑀢𑁂𑀦. 𑀲𑀻𑀳𑁂𑀦 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁂𑀦 𑀲𑀳𑁂𑀯 𑀲𑀺𑀗𑁆𑀕𑀸𑀮𑁂𑀦 𑀅𑀢𑁆𑀢𑀦𑁄 𑀲𑀺𑀗𑁆𑀕𑀸𑀮𑀭𑀯𑀓𑀭𑀡𑀫𑀢𑁆𑀢𑁂𑀦. 𑀓𑁄𑀢𑁆𑀣𑀼𑀓𑁄𑀢𑀺 𑀔𑀼𑀤𑁆𑀤𑀓𑀓𑁄𑀢𑁆𑀣𑀼. 𑀆𑀲𑀗𑁆𑀓𑀺𑀢𑀲𑀫𑀸𑀘𑀸𑀭𑁄𑀢𑀺 𑀅𑀢𑁆𑀢𑀦𑀸 𑀘 𑀧𑀭𑁂𑀳𑀺 𑀘 𑀆𑀲𑀗𑁆𑀓𑀺𑀢𑀩𑁆𑀩𑀲𑀫𑀸𑀘𑀸𑀭𑁄. 𑀲𑀧𑁆𑀧𑀼𑀭𑀺𑀲𑀸𑀦𑀦𑁆𑀢𑀺 𑀩𑀼𑀤𑁆𑀥𑀸𑀤𑀻𑀦𑀁.

𑀢𑀲𑁆𑀲𑀸𑀢𑀺 𑀯𑁂𑀕𑀩𑁆𑀪𑀭𑀺𑀲𑁆𑀲 𑀤𑁂𑀯𑀧𑀼𑀢𑁆𑀢𑀲𑁆𑀲. 𑀲𑀭𑀻𑀭𑁂 𑀅𑀦𑀼𑀆𑀯𑀺𑀲𑀻𑀢𑀺 𑀲𑀭𑀻𑀭𑁂 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀯𑀺𑀬 𑀆𑀯𑀺𑀲𑀺. 𑀅𑀥𑀺𑀫𑀼𑀘𑁆𑀘𑀻𑀢𑀺 𑀬𑀣𑀸 𑀕𑀳𑀺𑀢𑀲𑁆𑀲 𑀯𑀲𑁂𑀦 𑀘𑀺𑀢𑁆𑀢𑀁 𑀦 𑀯𑀢𑁆𑀢𑀢𑀺, 𑀅𑀢𑁆𑀢𑀦𑁄 𑀏𑀯 𑀯𑀲𑁂 𑀯𑀢𑁆𑀢𑀢𑀺, 𑀏𑀯𑀁 𑀅𑀥𑀺𑀝𑁆𑀞𑀳𑀺. 𑀆𑀬𑀼𑀢𑁆𑀢𑀸𑀢𑀺 𑀤𑀲𑁆𑀲𑀦𑁂𑀦 𑀲𑀁𑀬𑀼𑀢𑁆𑀢𑀸 ¶ . 𑀧𑀯𑀺𑀯𑁂𑀓𑀺𑀬𑀦𑁆𑀢𑀺 𑀓𑀧𑁆𑀧𑀓𑀯𑀢𑁆𑀣𑀪𑀼𑀜𑁆𑀚𑀦𑀲𑁂𑀦𑀸𑀲𑀦𑁂𑀳𑀺 𑀧𑀯𑀺𑀯𑀺𑀢𑁆𑀢𑀪𑀸𑀯𑀁. 𑀢𑁂𑀦𑀸𑀳 ‘‘𑀢𑁂 𑀓𑀺𑀭𑀸’’𑀢𑀺𑀆𑀤𑀺. 𑀭𑀽𑀧𑁂 𑀦𑀺𑀯𑀺𑀝𑁆𑀞𑀸𑀢𑀺 𑀘𑀓𑁆𑀔𑀼𑀭𑀽𑀧𑀥𑀫𑁆𑀫𑁂 𑀅𑀪𑀺𑀦𑀺𑀯𑀺𑀝𑁆𑀞𑀸. 𑀢𑁂𑀦𑀸𑀳 ‘‘𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀧𑀢𑀺𑀝𑁆𑀞𑀺𑀢𑀸’’𑀢𑀺. 𑀤𑁂𑀯𑀮𑁄𑀓𑀧𑀢𑁆𑀣𑀦𑀓𑀸𑀫𑀸𑀢𑀺 𑀤𑁂𑀯𑀮𑁄𑀓𑀲𑁆𑀲𑁂𑀯 𑀅𑀪𑀺𑀧𑀢𑁆𑀣𑀦𑀓𑀸𑀫𑀸. 𑀫𑀭𑀡𑀥𑀫𑁆𑀫𑀢𑀸𑀬 𑀫𑀸𑀢𑀺𑀬𑀸. 𑀢𑁂𑀦𑀸𑀳 ‘‘𑀫𑀸𑀢𑀺𑀬𑀸𑀢𑀺 𑀫𑀘𑁆𑀘𑀸’’𑀢𑀺. 𑀧𑀭𑀮𑁄𑀓𑀢𑁆𑀣𑀸𑀬𑀸𑀢𑀺 𑀧𑀭𑀲𑀫𑁆𑀧𑀢𑁆𑀢𑀺𑀪𑀸𑀯𑀸𑀬 𑀮𑁄𑀓𑀲𑁆𑀲 𑀅𑀢𑁆𑀣𑀸𑀬.

𑀧𑀪𑀸𑀲𑀯𑀡𑁆𑀡𑀸𑀢𑀺 𑀧𑀪𑀸𑀬 𑀲𑀫𑀸𑀦𑀯𑀡𑁆𑀡𑀸. 𑀓𑁂𑀲𑀁 𑀧𑀪𑀸𑀬𑀸𑀢𑀺 𑀆𑀳 ‘‘𑀘𑀦𑁆𑀤𑁄𑀪𑀸𑀲𑀸’’𑀢𑀺𑀆𑀤𑀺. 𑀲𑀚𑁆𑀛𑀸𑀭𑀸𑀕𑀧𑀪𑀸𑀲𑀯𑀡𑁆𑀡𑀸 𑀇𑀦𑁆𑀤𑀥𑀦𑀼𑀧𑀪𑀸𑀲𑀯𑀡𑁆𑀡𑀸𑀢𑀺 𑀧𑀘𑁆𑀘𑁂𑀓𑀁 𑀬𑁄𑀚𑀦𑀸. 𑀆𑀫𑁄 𑀆𑀫𑀕𑀦𑁆𑀥𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀆𑀫𑀺𑀲𑀁. 𑀯𑀥𑀸𑀬𑀸𑀢𑀺 𑀯𑀺𑀤𑁆𑀥𑀁𑀲𑀺𑀢𑀼𑀁. 𑀭𑀽𑀧𑀸𑀢𑀺 𑀭𑀽𑀧𑀸𑀬𑀢𑀦𑀸𑀤𑀺𑀭𑀽𑀧𑀺𑀥𑀫𑁆𑀫𑀸.

𑀭𑀸𑀚𑀕𑀳𑀲𑀫𑀻𑀧𑀧𑁆𑀧𑀯𑀢𑁆𑀢𑀻𑀦𑀁 𑀭𑀸𑀚𑀕𑀳𑀺𑀬𑀸𑀦𑀁. ‘‘𑀲𑁂𑀢𑁄’’𑀢𑀺 𑀓𑁂𑀮𑀸𑀲𑀓𑀽𑀝𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀲𑁂𑀢𑁄𑀢𑀺 𑀓𑁂𑀮𑀸𑀲𑁄’’𑀢𑀺. 𑀓𑁂𑀦𑀘𑀺 𑀦 𑀖𑀝𑁆𑀝𑁂𑀢𑀻𑀢𑀺 𑀅𑀖𑀁, 𑀅𑀦𑁆𑀢𑀮𑀺𑀓𑁆𑀔𑀦𑁆𑀢𑀺 𑀆𑀳 ‘‘𑀅𑀖𑀕𑀸𑀫𑀻𑀦𑀦𑁆𑀢𑀺 𑀆𑀓𑀸𑀲𑀕𑀸𑀫𑀻𑀦’’𑀦𑁆𑀢𑀺. 𑀉𑀤𑀓𑀁 𑀥𑀻𑀬𑀢𑀺 𑀏𑀢𑁆𑀣𑀸𑀢𑀺 𑀉𑀤𑀥𑀺, 𑀫𑀳𑁄𑀤𑀥𑀺. 𑀯𑀺𑀧𑀼𑀮𑁄𑀢𑀺 𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑁄. 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀸𑀦𑀦𑁆𑀢𑀺 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑀪𑀸𑀕𑀸𑀦𑀁. 𑀩𑀼𑀤𑁆𑀥𑁄 𑀲𑁂𑀝𑁆𑀞𑁄 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀸𑀤𑀻𑀳𑀺 𑀲𑀩𑁆𑀩𑀕𑀼𑀡𑁂𑀳𑀺.

𑀦𑀸𑀦𑀸𑀢𑀺𑀢𑁆𑀣𑀺𑀬𑀲𑀸𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀤𑁂𑀯𑀧𑀼𑀢𑁆𑀢𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁩. 𑀓𑁄𑀲𑀮𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧. 𑀤𑀳𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁨. 𑀪𑀕𑀯𑀢𑀸 ¶ ¶ 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀻𑀢𑀺 𑀪𑀕𑀯𑀢𑁄 𑀕𑀼𑀡𑁂 𑀅𑀚𑀸𑀦𑀦𑁆𑀢𑁄 𑀓𑁄𑀲𑀮𑀭𑀸𑀚𑀸 𑀅𑀢𑁆𑀢𑀦𑁄 𑀔𑀢𑁆𑀢𑀺𑀬𑀫𑀸𑀦𑁂𑀦 𑀓𑁂𑀯𑀮𑀁 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀧𑀞𑀫𑀸𑀕𑀢𑁂 𑀳𑀺 𑀲𑀢𑁆𑀣𑀭𑀺 𑀢𑀲𑁆𑀲 𑀲𑀫𑁆𑀫𑁄𑀤𑀺𑀢𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀣𑀸 𑀔𑀫𑀦𑀻𑀬𑀸𑀤𑀻𑀦𑀺 𑀧𑀼𑀘𑁆𑀙𑀦𑁆𑀢𑁄𑀢𑀺 𑀬𑀣𑀸 𑀪𑀕𑀯𑀸 ‘‘𑀓𑀘𑁆𑀘𑀺 𑀢𑁂, 𑀫𑀳𑀸𑀭𑀸𑀚, 𑀔𑀫𑀦𑀻𑀬𑀁, 𑀓𑀘𑁆𑀘𑀺 𑀬𑀸𑀧𑀦𑀻𑀬’’𑀦𑁆𑀢𑀺𑀆𑀤𑀺𑀦𑀸 𑀢𑁂𑀦 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀧𑀞𑀫𑀁 𑀧𑀯𑀢𑁆𑀢𑀫𑁄𑀤𑁄 𑀅𑀳𑁄𑀲𑀺 𑀧𑀼𑀩𑁆𑀩𑀪𑀸𑀲𑀺𑀢𑀸𑀬, 𑀢𑀤𑀦𑀼𑀓𑀭𑀡𑁂𑀦 𑀏𑀯𑀁 𑀲𑁄𑀧𑀺 𑀭𑀸𑀚𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑁄 𑀅𑀳𑁄𑀲𑀻𑀢𑀺 𑀬𑁄𑀚𑀦𑀸. 𑀢𑀁 𑀧𑀦 𑀲𑀫𑀧𑁆𑀧𑀯𑀢𑁆𑀢𑀫𑁄𑀤𑀦𑀁 𑀉𑀧𑀫𑀸𑀬 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀢𑁄𑀤𑀓𑀁 𑀯𑀺𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀫𑁆𑀫𑁄𑀤𑀺𑀢𑀦𑁆𑀢𑀺 𑀲𑀁𑀲𑀦𑁆𑀤𑀺𑀢𑀁 𑀏𑀓𑀻𑀪𑀸𑀯𑀦𑁆𑀢𑀺 𑀲𑀫𑁆𑀫𑁄𑀤𑀦𑀓𑀺𑀭𑀺𑀬𑀸𑀬 𑀲𑀫𑀸𑀦𑀢𑀁 𑀏𑀓𑀭𑀽𑀧𑀢𑀁, 𑀔𑀫𑀦𑀻𑀬𑀦𑁆𑀢𑀺 ‘‘𑀇𑀤𑀁 𑀘𑀢𑀼𑀘𑀓𑁆𑀓𑀁 𑀦𑀯𑀤𑁆𑀯𑀸𑀭𑀁 𑀲𑀭𑀻𑀭𑀬𑀦𑁆𑀢𑀁 𑀤𑀼𑀓𑁆𑀔𑀩𑀳𑀼𑀮𑀢𑀸𑀬 𑀲𑀪𑀸𑀯𑀢𑁄 𑀤𑀼𑀲𑁆𑀲𑀳𑀁, 𑀓𑀘𑁆𑀘𑀺 𑀔𑀫𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬’’𑀦𑁆𑀢𑀺 𑀧𑀼𑀘𑁆𑀙𑀢𑀺. 𑀬𑀸𑀧𑀦𑀻𑀬𑀦𑁆𑀢𑀺 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀓𑀁 𑀘𑀺𑀭𑀧𑀩𑀦𑁆𑀥𑀲𑀗𑁆𑀔𑀸𑀢𑀸𑀬 𑀬𑀸𑀧𑀦𑀸𑀬 𑀓𑀘𑁆𑀘𑀺 𑀬𑀸𑀧𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀁. 𑀲𑀻𑀲𑀭𑁄𑀕𑀸𑀤𑀺𑀆𑀩𑀸𑀥𑀸𑀪𑀸𑀯𑁂𑀦 𑀓𑀘𑁆𑀘𑀺 𑀅𑀧𑁆𑀧𑀸𑀩𑀸𑀥𑀁. 𑀤𑀼𑀓𑁆𑀔𑀚𑀻𑀯𑀺𑀓𑀸𑀪𑀸𑀯𑁂𑀦 𑀓𑀘𑁆𑀘𑀺 𑀅𑀧𑁆𑀧𑀸𑀢𑀗𑁆𑀓𑀁. 𑀢𑀁𑀢𑀁𑀓𑀺𑀘𑁆𑀘𑀓𑀭𑀡𑁂 𑀉𑀝𑁆𑀞𑀸𑀦𑀲𑀼𑀔𑀢𑀸𑀬 𑀓𑀘𑁆𑀘𑀺 𑀮𑀳𑀼𑀝𑁆𑀞𑀸𑀦𑀁. 𑀢𑀤𑀦𑀼𑀭𑀽𑀧𑀩𑀮𑀬𑁄𑀕𑀢𑁄 𑀓𑀘𑁆𑀘𑀺 𑀩𑀮𑀁. 𑀲𑀼𑀔𑀯𑀺𑀳𑀸𑀭𑀲𑀫𑁆𑀪𑀯𑁂𑀦 𑀓𑀘𑁆𑀘𑀺 𑀨𑀸𑀲𑀼𑀯𑀺𑀳𑀸𑀭𑁄 𑀅𑀢𑁆𑀣𑀻𑀢𑀺 𑀢𑀢𑁆𑀣 𑀢𑀢𑁆𑀣 𑀓𑀘𑁆𑀘𑀺-𑀲𑀤𑁆𑀤𑀁 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀩𑀮𑀯𑀧𑁆𑀧𑀢𑁆𑀢𑀸 𑀧𑀻𑀢𑀺 𑀧𑀻𑀢𑀺𑀬𑁂𑀯. 𑀢𑀭𑀼𑀡𑀧𑀻𑀢𑀺 𑀧𑀸𑀫𑁄𑀚𑁆𑀚𑀁. 𑀲𑀫𑁆𑀫𑁄𑀤𑀦𑀁 𑀚𑀦𑁂𑀢𑀺 𑀓𑀭𑁄𑀢𑀻𑀢𑀺 𑀲𑀫𑁆𑀫𑁄𑀤𑀦𑀻𑀬𑀁. 𑀲𑀫𑁆𑀫𑁄𑀤𑀺𑀢𑀩𑁆𑀩𑀢𑁄 𑀲𑀫𑁆𑀫𑁄𑀤𑀦𑀻𑀬𑀦𑁆𑀢𑀺 𑀇𑀫𑀁 𑀧𑀦 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑁆𑀫𑁄𑀤𑀺𑀢𑀼𑀁 𑀬𑀼𑀢𑁆𑀢𑀪𑀸𑀯𑀢𑁄’’𑀢𑀺 𑀆𑀳. 𑀲𑀭𑀺𑀢𑀩𑁆𑀩𑀪𑀸𑀯𑀢𑁄𑀢𑀺 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑀪𑀸𑀯𑀢𑁄. ‘‘𑀲𑀭𑀡𑀻𑀬’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 𑀤𑀻𑀖𑀁 𑀓𑀢𑁆𑀯𑀸 ‘‘𑀲𑀸𑀭𑀡𑀻𑀬’’𑀦𑁆𑀢𑀺 𑀯𑀼𑀢𑁆𑀢𑀁.

𑀲𑀼𑀬𑁆𑀬𑀫𑀸𑀦𑀲𑀼𑀔𑀢𑁄𑀢𑀺 𑀆𑀧𑀸𑀣𑀫𑀥𑀼𑀭𑀢𑀁 𑀆𑀳, 𑀅𑀦𑀼𑀲𑁆𑀲𑀭𑀺𑀬𑀫𑀸𑀦𑀲𑀼𑀔𑀢𑁄𑀢𑀺 𑀯𑀺𑀫𑀤𑁆𑀤𑀭𑀫𑀡𑀻𑀬𑀢𑀁. 𑀩𑁆𑀬𑀜𑁆𑀚𑀦𑀧𑀭𑀺𑀲𑀼𑀤𑁆𑀥𑀢𑀸𑀬𑀸𑀢𑀺 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀸𑀯𑁂𑀦 𑀢𑀲𑁆𑀲𑀸 𑀓𑀣𑀸𑀬 𑀯𑀘𑀦𑀘𑀸𑀢𑀼𑀭𑀺𑀬𑀫𑀸𑀳, 𑀅𑀢𑁆𑀣𑀧𑀭𑀺𑀲𑀼𑀤𑁆𑀥𑀢𑀸𑀬𑀸𑀢𑀺 𑀅𑀢𑁆𑀣𑀲𑁆𑀲 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑀁. 𑀅𑀦𑁂𑀓𑁂𑀳𑀺 𑀧𑀭𑀺𑀬𑀸𑀬𑁂𑀳𑀻𑀢𑀺 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺. 𑀅𑀤𑀺𑀝𑁆𑀞𑀢𑁆𑀢𑀸𑀢𑀺 ¶ ¶ 𑀉𑀧𑀲𑀗𑁆𑀓𑀫𑀦𑀯𑀲𑁂𑀦 𑀅𑀤𑀺𑀝𑁆𑀞𑀢𑁆𑀢𑀸. 𑀕𑀼𑀡𑀸𑀕𑀼𑀡𑀯𑀲𑁂𑀦𑀸𑀢𑀺 𑀕𑀼𑀡𑀯𑀲𑁂𑀦 𑀕𑀫𑁆𑀪𑀻𑀭𑀪𑀸𑀯𑀁 𑀯𑀸 𑀅𑀕𑀼𑀡𑀯𑀲𑁂𑀦 𑀉𑀢𑁆𑀢𑀸𑀦𑀪𑀸𑀯𑀁 𑀯𑀸. 𑀑𑀯𑀝𑁆𑀝𑀺𑀓𑀲𑀸𑀭𑀁 𑀓𑀢𑁆𑀯𑀸𑀢𑀺 𑀑𑀯𑀝𑁆𑀝𑀺𑀓𑀸𑀬 𑀕𑀳𑁂𑀢𑀩𑁆𑀩𑀲𑀸𑀭𑀯𑀢𑁆𑀣𑀼𑀁 𑀓𑀢𑁆𑀯𑀸. 𑀮𑁄𑀓𑀦𑀺𑀲𑁆𑀲𑀭𑀡𑀪𑀯𑁄𑀓𑁆𑀓𑀦𑁆𑀢𑀺𑀧𑀜𑁆𑀳𑀦𑁆𑀢𑀺 𑀮𑁄𑀓𑀢𑁄 𑀦𑀺𑀲𑁆𑀲𑀝𑀪𑀸𑀯𑀧𑀜𑁆𑀳𑀜𑁆𑀘𑁂𑀯 𑀆𑀤𑀺𑀢𑁄 𑀪𑀯𑁄𑀓𑁆𑀓𑀫𑀦𑀧𑀜𑁆𑀳𑀜𑁆𑀘. 𑀲𑀢𑁆𑀣𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑀁 𑀧𑀼𑀘𑁆𑀙𑀦𑁆𑀢𑁄 𑀳𑀺 ‘‘𑀓𑀺𑀁 𑀪𑀯𑀁 𑀕𑁄𑀢𑀫𑁄 𑀲𑀩𑁆𑀩𑀮𑁄𑀓𑀢𑁄 𑀦𑀺𑀲𑁆𑀲𑀝𑁄, 𑀲𑀩𑁆𑀩𑀲𑀢𑁆𑀢𑁂𑀳𑀺 𑀘 𑀚𑁂𑀝𑁆𑀞𑁄’’𑀢𑀺? 𑀧𑀼𑀘𑁆𑀙𑀢𑀺 𑀦𑀸𑀫. 𑀬𑀣𑀸 𑀳𑀺 𑀲𑀢𑁆𑀣𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀢𑀸𑀬 𑀮𑁄𑀓𑀢𑁄 𑀦𑀺𑀲𑁆𑀲𑀝𑀢𑀸 𑀯𑀺𑀜𑁆𑀜𑀸𑀬𑀢𑀺, 𑀏𑀯𑀁 𑀲𑀩𑁆𑀩𑀲𑀢𑁆𑀢𑁂𑀳𑀺 𑀚𑁂𑀝𑁆𑀞𑀪𑀸𑀯𑀢𑁄 𑀲𑁂𑀝𑁆𑀞𑀪𑀸𑀯𑀢𑁄. 𑀲𑁆𑀯𑀸𑀬𑀫𑀢𑁆𑀣𑁄 𑀅𑀕𑁆𑀕𑀧𑀲𑀸𑀤𑀲𑀼𑀢𑁆𑀢𑀸𑀤𑀻𑀳𑀺 (𑀇𑀢𑀺𑀯𑀼. 𑁯𑁦; 𑀅. 𑀦𑀺. 𑁪.𑁩𑁪) 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀓𑀣𑀁 𑀧𑀦 𑀲𑀫𑁆𑀩𑀼𑀤𑁆𑀥𑀢𑀸 𑀯𑀺𑀜𑁆𑀜𑀸𑀬𑀢𑀻𑀢𑀺? 𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑀢𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀤𑀻𑀲𑀼 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁧𑁨𑁪) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀭𑀸𑀚𑀸 𑀲𑀢𑁆𑀣𑀼 𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑀁 𑀅𑀚𑀸𑀦𑀦𑁆𑀢𑁄 𑀢𑀢𑁄 𑀏𑀯𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀲𑀤𑁆𑀤𑀳𑀦𑁆𑀢𑁄 ‘‘𑀯𑀼𑀟𑁆𑀠𑀢𑀭𑁂𑀲𑀼𑀧𑀺 𑀘𑀺𑀭𑀧𑀩𑁆𑀩𑀚𑀺𑀢𑁂𑀲𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑁂 𑀅𑀮𑀩𑁆𑀪𑀫𑀸𑀦𑁂 𑀢𑀩𑁆𑀩𑀺𑀧𑀭𑀻𑀢𑁂 𑀓𑀣𑀁 𑀮𑀩𑁆𑀪𑁂𑀬𑁆𑀬𑀸’’𑀢𑀺 𑀫𑀜𑁆𑀜𑀫𑀸𑀦𑁄 ‘‘𑀓𑀺𑀁 𑀧𑀦 𑀪𑀯𑀁 𑀕𑁄𑀢𑀫𑁄’’𑀢𑀺𑀆𑀤𑀺𑀁 𑀯𑀓𑁆𑀔𑀢𑀺. 𑀭𑀸𑀚𑀸 𑀅𑀢𑁆𑀢𑀦𑁄 𑀮𑀤𑁆𑀥𑀺𑀬𑀸 𑀦 𑀧𑀼𑀘𑁆𑀙𑀢𑀺 𑀅𑀢𑁆𑀢𑀦𑁄 𑀲𑀫𑁆𑀫𑀼𑀔𑀸 𑀢𑁂𑀳𑀺 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑀲𑁆𑀲𑁂𑀯 𑀧𑀝𑀺𑀜𑁆𑀜𑀸𑀢𑀢𑁆𑀢𑀸. 𑀬𑀲𑁆𑀫𑀸 𑀢𑁂 𑀫𑀼𑀲𑀸𑀯𑀸𑀤𑀺𑀢𑀸𑀬 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑀸𑀤𑀻𑀦𑀁 ‘‘𑀩𑀼𑀤𑁆𑀥𑀸 𑀫𑀬’’𑀦𑁆𑀢𑀺 𑀧𑀝𑀺𑀚𑀸𑀦𑀺𑀁𑀲𑀼, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀮𑁄𑀓𑁂 𑀫𑀳𑀸𑀚𑀦𑁂𑀦 𑀕𑀳𑀺𑀢𑀧𑀝𑀺𑀜𑁆𑀜𑀸𑀯𑀲𑁂𑀦 𑀧𑀼𑀘𑁆𑀙𑀢𑀻’’𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀆𑀕𑀫𑀺𑀲𑁆𑀲𑀢𑀺. 𑀩𑀼𑀤𑁆𑀥𑀲𑀻𑀳𑀦𑀸𑀤𑀦𑁆𑀢𑀺 𑀩𑀼𑀤𑁆𑀥𑀸𑀦𑀁 𑀏𑀯 𑀆𑀯𑁂𑀡𑀺𑀓𑀁 𑀲𑀻𑀳𑀦𑀸𑀤𑀁. 𑀓𑀸𑀫𑀁 𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀲𑀫𑁆𑀩𑁄𑀥𑀺𑀜𑀸𑀡𑁂 𑀧𑀦 𑀕𑀳𑀺𑀢𑁂 𑀢𑀁 𑀅𑀢𑁆𑀣𑀢𑁄 𑀕𑀳𑀺𑀢𑀫𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀗𑁆𑀔𑀸𑀢𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺’’𑀦𑁆𑀢𑀺.

𑀧𑀩𑁆𑀩𑀚𑁆𑀚𑀽𑀧𑀕𑀫𑀦𑁂𑀦𑀸𑀢𑀺 𑀬𑀸𑀬 𑀓𑀸𑀬𑀘𑀺 𑀧𑀩𑁆𑀩𑀚𑁆𑀚𑀸𑀬 𑀉𑀧𑀕𑀫𑀦𑀫𑀢𑁆𑀢𑁂𑀦 𑀲𑀫𑀡𑀸, 𑀦 𑀲𑀫𑀺𑀢𑀧𑀸𑀧𑀢𑀸𑀬. 𑀚𑀸𑀢𑀺𑀯𑀲𑁂𑀦𑀸𑀢𑀺 𑀚𑀸𑀢𑀺𑀫𑀢𑁆𑀢𑁂𑀦 𑀩𑁆𑀭𑀸𑀳𑁆𑀫𑀡𑀸, 𑀦 𑀩𑀸𑀳𑀺𑀢𑀧𑀸𑀧𑀢𑀸𑀬. 𑀧𑀩𑁆𑀩𑀚𑀺𑀢𑀲𑀫𑀽𑀳𑀲𑀗𑁆𑀔𑀸𑀢𑁄 𑀲𑀗𑁆𑀖𑁄𑀢𑀺 𑀧𑀩𑁆𑀩𑀚𑀺𑀢𑀲𑀫𑀽𑀳𑀢𑀸𑀫𑀢𑁆𑀢𑁂𑀦 𑀲𑀗𑁆𑀖𑁄, 𑀦 𑀦𑀺𑀬𑁆𑀬𑀸𑀦𑀺𑀓𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀲𑀻𑀮𑀲𑀸𑀫𑀜𑁆𑀜𑀯𑀲𑁂𑀦 𑀲𑀁𑀳𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀏𑀢𑁂𑀲𑀁 𑀲𑀩𑁆𑀩𑀜𑁆𑀜𑀼𑀧𑀝𑀺𑀜𑁆𑀜𑀸𑀢𑀸𑀦𑀁 𑀧𑀭𑀺𑀯𑀸𑀭𑀪𑀽𑀢𑁄 𑀅𑀢𑁆𑀣𑀺. 𑀲𑁆𑀯𑁂𑀯𑀸𑀢𑀺 𑀧𑀩𑁆𑀩𑀚𑀺𑀢𑀲𑀫𑀽𑀳𑀲𑀗𑁆𑀔𑀸𑀢𑁄 𑀏𑀯. 𑀓𑁂𑀘𑀺 𑀧𑀦 ‘‘𑀧𑀩𑁆𑀩𑀚𑀺𑀢𑀲𑀫𑀽𑀳𑀯𑀲𑁂𑀦. 𑀲𑀗𑁆𑀖𑀺𑀦𑁄, 𑀕𑀳𑀝𑁆𑀞𑀲𑀫𑀽𑀳𑀯𑀲𑁂𑀦 𑀕𑀡𑀺𑀦𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁 𑀕𑀡𑁂 𑀏𑀯 𑀮𑁄𑀓𑁂 𑀲𑀗𑁆𑀖𑀲𑀤𑁆𑀤𑀲𑁆𑀲 𑀦𑀺𑀭𑀼𑀴𑁆𑀳𑀢𑁆𑀢𑀸. 𑀆𑀘𑀸𑀭𑀲𑀺𑀓𑁆𑀔𑀸𑀧𑀦𑀯𑀲𑁂𑀦𑀸𑀢𑀺 𑀅𑀘𑁂𑀮𑀓𑀯𑀢𑀘𑀭𑀺𑀬𑀸𑀤𑀺-𑀆𑀘𑀸𑀭𑀲𑀺𑀓𑁆𑀔𑀸𑀧𑀦𑀯𑀲𑁂𑀦. 𑀧𑀸𑀓𑀝𑀸𑀢𑀺 𑀲𑀗𑁆𑀖𑀻𑀆𑀤𑀺𑀪𑀸𑀯𑁂𑀦 ¶ 𑀧𑀓𑀸𑀲𑀺𑀢𑀸. ‘‘𑀅𑀧𑁆𑀧𑀺𑀘𑁆𑀙𑀸’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀮𑀩𑁆𑀪𑀫𑀸𑀦𑀁 𑀅𑀧𑁆𑀧𑀺𑀘𑁆𑀙𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑁆𑀙𑀢𑀸𑀬 𑀯𑀢𑁆𑀣𑀫𑁆𑀧𑀺 𑀦 𑀦𑀺𑀯𑀸𑀲𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀢𑁂𑀲𑀼 𑀲𑀸𑀲𑀦𑀺𑀓𑁂𑀲𑀼 𑀯𑀺𑀬 𑀲𑀦𑁆𑀢𑀕𑀼𑀡𑀦𑀺𑀕𑀼𑀳𑀦𑀸 𑀅𑀧𑁆𑀧𑀺𑀘𑁆𑀙𑀸 𑀮𑀩𑁆𑀪𑀢𑀻𑀢𑀺. 𑀬𑀲𑁄𑀢𑀺 𑀓𑀺𑀢𑁆𑀢𑀺𑀲𑀤𑁆𑀤𑁄. 𑀢𑀭𑀦𑁆𑀢𑀺 𑀏𑀢𑁂𑀦 𑀲𑀁𑀲𑀸𑀭𑁄𑀖𑀦𑁆𑀢𑀺 𑀏𑀯𑀁 𑀲𑀫𑁆𑀫𑀢𑀢𑁆𑀢𑀸 𑀢𑀺𑀢𑁆𑀣𑀁 𑀯𑀼𑀘𑁆𑀘𑀢𑀺 𑀮𑀤𑁆𑀥𑀻𑀢𑀺 ¶ 𑀆𑀳 ‘‘𑀢𑀺𑀢𑁆𑀣𑀓𑀭𑀸𑀢𑀺 𑀮𑀤𑁆𑀥𑀺𑀓𑀭𑀸’’𑀢𑀺. 𑀲𑀸𑀥𑀼𑀲𑀫𑁆𑀫𑀢𑀸𑀢𑀺 ‘‘𑀲𑀸𑀥𑀽’’𑀢𑀺 𑀲𑀫𑁆𑀫𑀢𑀸, 𑀦 𑀲𑀸𑀥𑀽𑀳𑀺 𑀲𑀫𑁆𑀫𑀢𑀸𑀢𑀺 𑀆𑀳 ‘‘𑀲𑀦𑁆𑀢𑁄…𑀧𑁂… 𑀧𑀼𑀣𑀼𑀚𑁆𑀚𑀦𑀲𑁆𑀲𑀸’’𑀢𑀺.

𑀓𑀧𑁆𑀧𑀓𑁄𑀮𑀸𑀳𑀮𑀦𑁆𑀢𑀺 𑀓𑀧𑁆𑀧𑀢𑁄 𑀓𑁄𑀮𑀸𑀳𑀮𑀁, ‘‘𑀓𑀧𑁆𑀧𑀼𑀝𑁆𑀞𑀸𑀦𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀤𑁂𑀯𑀧𑀼𑀢𑁆𑀢𑁂𑀳𑀺 𑀉𑀕𑁆𑀖𑁄𑀲𑀺𑀢𑀫𑀳𑀸𑀲𑀤𑁆𑀤𑁄. 𑀇𑀫𑁂𑀢𑀺 𑀧𑀽𑀭𑀡𑀸𑀤𑀬𑁄. 𑀩𑀼𑀤𑁆𑀥𑀓𑁄𑀮𑀸𑀳𑀮𑀦𑁆𑀢𑀺 𑀤𑁂𑀯𑀢𑀸𑀳𑀺 𑀖𑁄𑀲𑀺𑀢𑀁 𑀩𑀼𑀤𑁆𑀥𑀓𑁄𑀮𑀸𑀳𑀮𑀁. 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸𑀢𑀺 𑀧𑀼𑀭𑀺𑀲𑀲𑀼𑀢𑀺𑀧𑀭𑀫𑁆𑀧𑀭𑀸𑀬 𑀲𑀼𑀢𑁆𑀯𑀸. 𑀘𑀺𑀦𑁆𑀢𑀸𑀫𑀡𑀺𑀯𑀺𑀚𑁆𑀚𑀸 𑀦𑀸𑀫 𑀧𑀭𑀘𑀺𑀢𑁆𑀢𑀚𑀸𑀦𑀸𑀧𑀦𑀯𑀺𑀚𑁆𑀚𑀸. 𑀲𑀸 𑀓𑁂𑀯𑀝𑁆𑀝𑀲𑀼𑀢𑁆𑀢𑁂 ‘‘𑀫𑀡𑀺𑀓𑀸’’𑀢𑀺 𑀆𑀕𑀢𑀸, 𑀆𑀤𑀺-𑀲𑀤𑁆𑀤𑁂𑀦 𑀕𑀦𑁆𑀥𑀸𑀭𑀺𑀲𑀫𑁆𑀪𑀯𑀯𑀺𑀚𑁆𑀚𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀕𑀦𑁆𑀥𑀸𑀭𑀺𑀬𑀸 𑀯𑀺𑀓𑀼𑀩𑁆𑀩𑀦𑀁 𑀤𑀲𑁆𑀲𑁂𑀢𑀺. 𑀅𑀢𑁆𑀢𑀪𑀸𑀯𑁂𑀢𑀺 𑀲𑀭𑀻𑀭𑁂. 𑀭𑀸𑀚𑀼𑀲𑁆𑀫𑀸𑀢𑀺 𑀭𑀸𑀚𑀢𑁂𑀚𑁄.

𑀲𑀼𑀓𑁆𑀓𑀥𑀫𑁆𑀫𑁄𑀢𑀺 𑀅𑀦𑀯𑀚𑁆𑀚𑀥𑀫𑁆𑀫𑁄 𑀦𑀺𑀓𑁆𑀓𑀺𑀮𑁂𑀲𑀢𑀸. 𑀇𑀤𑀁 𑀕𑀳𑁂𑀢𑁆𑀯𑀸𑀢𑀺 𑀇𑀤𑀁 𑀧𑀭𑀫𑁆𑀫𑀼𑀔𑀸 ‘‘𑀫𑀬𑀁 𑀩𑀼𑀤𑁆𑀥𑀸’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀲𑀫𑁆𑀫𑀼𑀔𑀸 ‘‘𑀦 𑀫𑀬𑀁 𑀩𑀼𑀤𑁆𑀥𑀸’’𑀢𑀺 𑀢𑁂𑀳𑀺 𑀯𑀼𑀢𑁆𑀢𑀯𑀘𑀦𑀁 𑀕𑀳𑁂𑀢𑁆𑀯𑀸. 𑀏𑀯𑀫𑀸𑀳𑀸𑀢𑀺 ‘‘𑀬𑁂𑀧𑀺 𑀢𑁂, 𑀪𑁄 𑀕𑁄𑀢𑀫…𑀧𑁂… 𑀦𑀯𑁄 𑀘 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺 𑀏𑀯𑀁 𑀅𑀯𑁄𑀘. 𑀅𑀢𑁆𑀢𑀦𑁄 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸𑀢𑀺 ‘‘𑀦 𑀫𑀬𑀁 𑀩𑀼𑀤𑁆𑀥𑀸’’𑀢𑀺 𑀢𑁂𑀲𑀁 𑀅𑀢𑁆𑀢𑀦𑁄 𑀧𑀼𑀭𑀢𑁄 𑀧𑀯𑀢𑁆𑀢𑀺𑀢𑀁 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸. 𑀈𑀤𑀺𑀲𑁂 𑀞𑀸𑀦𑁂 𑀓𑀺𑀁-𑀲𑀤𑁆𑀤𑁄 𑀧𑀝𑀺𑀲𑁂𑀥𑀯𑀸𑀘𑀓𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀓𑀺𑀦𑁆𑀢𑀺 𑀧𑀝𑀺𑀓𑁆𑀔𑁂𑀧𑀯𑀘𑀦’’𑀦𑁆𑀢𑀺, 𑀓𑀲𑁆𑀫𑀸 𑀧𑀝𑀺𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄?

𑀦 𑀉𑀜𑁆𑀜𑀸𑀢𑀩𑁆𑀩𑀸𑀢𑀺 𑀦 𑀕𑀭𑀳𑀺𑀢𑀩𑁆𑀩𑀸. 𑀕𑀭𑀳𑀢𑁆𑀣𑁄 𑀳𑀺 𑀅𑀬𑀁 𑀉-𑀲𑀤𑁆𑀤𑁄. ‘‘𑀤𑀳𑀭𑁄’’𑀢𑀺 𑀅𑀥𑀺𑀓𑀢𑀢𑁆𑀢𑀸 𑀯𑀓𑁆𑀔𑀫𑀸𑀦𑀢𑁆𑀢𑀸 𑀘 ‘‘𑀔𑀢𑁆𑀢𑀺𑀬𑁄𑀢𑀺 𑀭𑀸𑀚𑀓𑀼𑀫𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀉𑀭𑀲𑀸 𑀕𑀘𑁆𑀙𑀢𑀻𑀢𑀺 𑀉𑀭𑀕𑁄, 𑀬𑁄 𑀓𑁄𑀘𑀺 𑀲𑀧𑁆𑀧𑁄, 𑀇𑀥 𑀧𑀦 𑀅𑀥𑀺𑀧𑁆𑀧𑁂𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀲𑀻𑀯𑀺𑀲𑁄’’𑀢𑀺 𑀆𑀳. 𑀲𑀻𑀮𑀯𑀦𑁆𑀢𑀁 𑀧𑀩𑁆𑀩𑀚𑀺𑀢𑀁 𑀤𑀲𑁆𑀲𑁂𑀢𑀺 𑀲𑀸𑀫𑀜𑁆𑀜𑀢𑁄 ‘‘𑀪𑀺𑀓𑁆𑀔𑀽’’𑀢𑀺 𑀯𑀤𑀦𑁆𑀢𑁄. 𑀇𑀥 𑀧𑀦 𑀬𑀲𑁆𑀫𑀸 ‘‘𑀪𑀯𑀫𑁆𑀧𑀺 𑀦𑁄 𑀕𑁄𑀢𑀫𑁄’’𑀢𑀺𑀆𑀤𑀺𑀦𑀸 𑀪𑀕𑀯𑀦𑁆𑀢𑀁 𑀉𑀤𑁆𑀤𑀺𑀲𑁆𑀲 𑀓𑀣𑀁 𑀲𑀫𑀼𑀝𑁆𑀞𑀸𑀧𑁂𑀲𑀺, 𑀢𑀲𑁆𑀫𑀸 𑀪𑀕𑀯𑀸 𑀅𑀢𑁆𑀢𑀸𑀦𑀁 𑀅𑀩𑁆𑀪𑀦𑁆𑀢𑀭𑀁 𑀅𑀓𑀸𑀲𑀺. 𑀬𑀤𑀺𑀧𑀺 𑀯𑀺𑀲𑁂𑀲𑁄 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 𑀯𑀺𑀪𑀸𑀯𑀺𑀢𑁄 𑀳𑁄𑀢𑀺, 𑀲𑀁𑀲𑀬𑀼𑀧𑁆𑀧𑀢𑁆𑀢𑀺𑀤𑀻𑀧𑀓𑀁 𑀦𑁄𑀢𑀺 𑀯𑀼𑀢𑁆𑀢𑀕𑁆𑀕𑀳𑀡𑀁 𑀧𑀦 𑀢𑀁 𑀧𑀭𑀺𑀘𑁆𑀙𑀺𑀚𑁆𑀚𑀢𑀻𑀢𑀺. 𑀢𑁂𑀦𑀸𑀳 ‘‘𑀤𑁂𑀲𑀦𑀸𑀓𑀼𑀲𑀮𑀢𑀸𑀬𑀸’’𑀢𑀺𑀆𑀤𑀺. 𑀇𑀤𑀸𑀦𑀺 𑀅𑀯𑀜𑁆𑀜𑀸𑀧𑀭𑀺𑀪𑀯𑁂 𑀧𑀬𑁄𑀕𑀢𑁄 𑀯𑀺𑀪𑀸𑀯𑁂𑀢𑀼𑀁 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀘𑀺𑀢𑁆𑀢𑀻𑀓𑀢𑀸𑀓𑀸𑀭𑀯𑀲𑁂𑀦 𑀅𑀯𑀜𑁆𑀜𑀸𑀬 𑀧𑀸𑀓𑀝𑀪𑀸𑀯𑁄, 𑀯𑀫𑁆𑀪𑀦𑀯𑀲𑁂𑀦 𑀧𑀭𑀺𑀪𑀯𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ¶ 𑀓𑀸𑀬𑀧𑀬𑁄𑀕𑀯𑀲𑁂𑀦 𑀅𑀯𑀜𑁆𑀜𑀸 𑀤𑀲𑁆𑀲𑀺𑀢𑀸, 𑀯𑀘𑀻𑀧𑀬𑁄𑀕𑀯𑀲𑁂𑀦 𑀧𑀭𑀺𑀪𑀯𑁄, 𑀉𑀪𑀬𑀁 𑀧𑀦 𑀉𑀪𑀬𑀢𑁆𑀣𑀸𑀧𑀺 𑀧𑀪𑁂𑀤𑀢𑁄 𑀕𑀳𑀺𑀢𑀁, 𑀅𑀯𑀜𑁆𑀜𑀧𑀭𑀺𑀪𑀯𑀸𑀦𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀉𑀪𑀬𑀢𑁆𑀣 𑀧𑀭𑀺𑀕𑁆𑀕𑀳𑁄. 𑀢𑀁 𑀲𑀩𑁆𑀩𑀫𑁆𑀧𑀻𑀢𑀺 𑀢𑀁 𑀅𑀯𑀜𑁆𑀜𑀸𑀤𑀺 𑀲𑀩𑁆𑀩𑀫𑁆𑀧𑀺. 𑀘𑀢𑀽𑀲𑀼𑀧𑀺 𑀢𑀁 𑀦 𑀓𑀸𑀢𑀩𑁆𑀩𑀫𑁂𑀯 𑀲𑀫𑁆𑀧𑀢𑀺 𑀆𑀬𑀢𑀺𑀜𑁆𑀘 𑀅𑀦𑀢𑁆𑀣𑀸𑀯𑀳𑀢𑁆𑀢𑀸.

𑀢𑀤𑀢𑁆𑀣𑀤𑀻𑀧𑀦𑀸𑀢𑀺 𑀢𑀲𑁆𑀲 𑀆𑀤𑀺𑀢𑁄 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀤𑀻𑀧𑀦𑀸. 𑀯𑀺𑀲𑁂𑀲𑀢𑁆𑀣𑀤𑀻𑀧𑀦𑀸𑀢𑀺 𑀢𑀢𑁄 𑀯𑀺𑀲𑀺𑀝𑁆𑀞𑀢𑁆𑀣𑀤𑀻𑀧𑀦𑀸 ¶ . 𑀔𑁂𑀢𑁆𑀢𑀸𑀦𑀁 𑀅𑀥𑀺𑀧𑀢𑀻𑀢𑀺 𑀔𑀢𑁆𑀢𑀺𑀬𑁄𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀔𑁂𑀢𑁆𑀢𑀢𑁄 𑀯𑀺𑀯𑀸𑀤𑀸 𑀲𑀢𑁆𑀢𑁂 𑀢𑀸𑀬𑀢𑀻𑀢𑀺 𑀔𑀢𑁆𑀢𑀺𑀬𑁄𑀢𑀺 𑀮𑁄𑀓𑀺𑀬𑀸 𑀓𑀣𑀬𑀦𑁆𑀢𑀺. ‘‘𑀫𑀳𑀸𑀲𑀫𑁆𑀫𑀢𑁄, 𑀔𑀢𑁆𑀢𑀺𑀬𑁄, 𑀭𑀸𑀚𑀸’’𑀢𑀺 𑀏𑀯𑀫𑀸𑀕𑀢𑁂𑀲𑀼 𑀇𑀫𑁂𑀲𑀼 𑀤𑀼𑀢𑀺𑀬𑀁. 𑀅𑀓𑁆𑀔𑀭𑀦𑁆𑀢𑀺 𑀲𑀫𑀜𑁆𑀜𑀸. 𑀲𑀸 𑀳𑀺 𑀉𑀤𑀬𑀩𑁆𑀩𑀬𑀸𑀪𑀸𑀯𑀢𑁄 ‘‘𑀦 𑀓𑀤𑀸𑀘𑀺 𑀔𑀭𑀢𑀻𑀢𑀺 𑀅𑀓𑁆𑀔𑀭’’𑀦𑁆𑀢𑀺 𑀯𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀦𑀸𑀫𑀕𑁄𑀢𑁆𑀢𑀁 𑀦 𑀚𑀻𑀭𑀢𑀻’’𑀢𑀺. 𑀚𑀸𑀢𑀺𑀲𑀫𑁆𑀧𑀦𑁆𑀦𑀦𑁆𑀢𑀺 𑀲𑀫𑁆𑀧𑀦𑁆𑀦𑀚𑀸𑀢𑀺𑀁 𑀅𑀢𑀺𑀯𑀺𑀲𑀼𑀤𑁆𑀥𑀚𑀸𑀢𑀺𑀁. 𑀢𑀻𑀡𑀺 𑀓𑀼𑀮𑀸𑀦𑀻𑀢𑀺 𑀩𑁆𑀭𑀸𑀳𑁆𑀫𑀡𑀯𑁂𑀲𑁆𑀲𑀲𑀼𑀤𑁆𑀤𑀓𑀼𑀮𑀸𑀦𑀺. 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀚𑀸𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀅𑀪𑀺𑀪𑀯𑀺𑀢𑁆𑀯𑀸.

𑀓𑁂𑀯𑀮𑀁 𑀦𑀸𑀫𑀧𑀤𑀁 𑀯𑀼𑀢𑁆𑀢𑀁 𑀆𑀔𑁆𑀬𑀸𑀢𑀧𑀤𑀁 𑀅𑀧𑁂𑀓𑁆𑀔𑀢𑁂𑀯𑀸𑀢𑀺 𑀆𑀳 ‘‘𑀞𑀸𑀦𑀁 𑀳𑀻𑀢𑀺 𑀓𑀸𑀭𑀡𑀁 𑀯𑀺𑀚𑁆𑀚𑀢𑀻’’𑀢𑀺. 𑀉𑀤𑁆𑀥𑀝𑀤𑀡𑁆𑀟𑁂𑀦𑀸𑀢𑀺 𑀲𑀫𑀦𑁆𑀢𑀢𑁄 𑀉𑀩𑁆𑀪𑀢𑁂𑀦 𑀤𑀡𑁆𑀟𑁂𑀦 𑀲𑀸𑀲𑀦𑁂𑀦, 𑀩𑀮𑀯𑀁 𑀉𑀧𑀓𑁆𑀓𑀫𑀁 𑀕𑀭𑀼𑀓𑀁 𑀭𑀸𑀚𑀸𑀦𑀫𑁆𑀧𑀺. 𑀢𑀁 𑀔𑀢𑁆𑀢𑀺𑀬𑀁 𑀧𑀭𑀺𑀯𑀚𑁆𑀚𑁂𑀬𑁆𑀬𑀸𑀢𑀺 𑀔𑀢𑁆𑀢𑀺𑀬𑀁 𑀅𑀯𑀜𑁆𑀜𑀸𑀧𑀭𑀺𑀪𑀯𑀓𑀭𑀡𑀢𑁄 𑀯𑀚𑁆𑀚𑁂𑀬𑁆𑀬. 𑀢𑁂𑀦𑀸𑀳 ‘‘𑀦 𑀖𑀝𑁆𑀝𑁂𑀬𑁆𑀬𑀸’’𑀢𑀺.

𑀉𑀭𑀕𑀲𑁆𑀲 𑀘 𑀦𑀸𑀦𑀸𑀯𑀺𑀥𑀯𑀡𑁆𑀡𑀕𑁆𑀕𑀳𑀡𑁂 𑀓𑀸𑀭𑀡𑀁 𑀯𑀤𑀢𑀺 ‘‘𑀬𑁂𑀦 𑀬𑁂𑀦 𑀳𑀻’’𑀢𑀺𑀆𑀤𑀺𑀦𑀸. 𑀩𑀳𑀼𑀪𑀓𑁆𑀔𑀦𑁆𑀢𑀺 𑀫𑀳𑀸𑀪𑀓𑁆𑀔𑀁 𑀲𑀩𑁆𑀩𑀪𑀓𑁆𑀔𑀔𑀸𑀤𑀓𑀁. 𑀧𑀸𑀯𑀓𑀁 𑀲𑁄𑀥𑀦𑀢𑁆𑀣𑁂𑀦 𑀅𑀲𑀼𑀤𑁆𑀥𑀲𑁆𑀲𑀧𑀺 𑀤𑀳𑀦𑁂𑀦. 𑀲𑁄𑀢𑀺 𑀫𑀕𑁆𑀕𑁄. 𑀓𑀡𑁆𑀳𑁄 𑀯𑀢𑁆𑀢𑀦𑀻 𑀇𑀫𑀲𑁆𑀲𑀸𑀢𑀺 𑀓𑀡𑁆𑀳𑀯𑀢𑁆𑀢𑀦𑀻. 𑀫𑀳𑀦𑁆𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀳𑀼𑀢𑁆𑀯𑀸. 𑀬𑀸𑀯𑀩𑁆𑀭𑀳𑁆𑀫𑀮𑁄𑀓𑀧𑁆𑀧𑀫𑀸𑀡𑁄𑀢𑀺 𑀓𑀧𑁆𑀧𑀯𑀼𑀝𑁆𑀞𑀸𑀦𑀓𑀸𑀮𑁂 𑀅𑀭𑀜𑁆𑀜𑁂 𑀅𑀕𑁆𑀕𑀺𑀦𑀸 𑀕𑀳𑀺𑀢𑁂 𑀓𑀸𑀮𑀦𑁆𑀢𑀭𑁂 𑀏𑀯 𑀓𑀝𑁆𑀞𑀢𑀺𑀡𑀭𑀼𑀓𑁆𑀔𑀸𑀤𑀺𑀲𑀫𑁆𑀪𑀯𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀚𑀸𑀬𑀦𑁆𑀢𑀺 𑀢𑀢𑁆𑀣 𑀧𑀸𑀭𑁄𑀳𑀸’’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳.

𑀟𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀧𑀘𑁆𑀘𑀓𑁆𑀓𑁄𑀲𑀦𑀸𑀤𑀺𑀦𑀸. 𑀯𑀺𑀦𑀲𑁆𑀲𑀦𑁆𑀢𑀺 𑀲𑀫𑀡𑀢𑁂𑀚𑀲𑀸 𑀯𑀺𑀦𑀸𑀲𑀺𑀢𑀢𑁆𑀢𑀸. ‘‘𑀦 𑀢𑀲𑁆𑀲𑀸’’𑀢𑀺 𑀏𑀢𑁆𑀣 𑀦-𑀓𑀸𑀭𑀁 ‘‘𑀯𑀺𑀦𑁆𑀤𑀭𑁂’’𑀢𑀺 𑀏𑀢𑁆𑀣 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀦𑁆𑀢𑀺 ¶ 𑀆𑀳 ‘‘𑀦 𑀯𑀺𑀦𑁆𑀤𑀦𑁆𑀢𑀻’’𑀢𑀺. 𑀯𑀢𑁆𑀣𑀼𑀫𑀢𑁆𑀢𑀸𑀯𑀲𑀺𑀝𑁆𑀞𑁄𑀢𑀺 𑀞𑀸𑀦𑀫𑁂𑀯 𑀦𑁂𑀲𑀁 𑀅𑀯𑀲𑀺𑀲𑁆𑀲𑀢𑀺, 𑀲𑀬𑀁 𑀧𑀦 𑀲𑀩𑁆𑀩𑀲𑁄 𑀲𑀳 𑀥𑀦𑁂𑀦 𑀯𑀺𑀦𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄.

‘‘𑀲𑀫𑁆𑀫𑀤𑁂𑀯 𑀲𑀫𑀸𑀘𑀭𑁂’’𑀢𑀺 𑀏𑀢𑁆𑀣 𑀬𑀣𑀸 𑀭𑀸𑀚𑀸𑀤𑀻𑀲𑀼 𑀲𑀫𑁆𑀫𑀸 𑀲𑀫𑀸𑀘𑀭𑁂𑀬𑁆𑀬, 𑀢𑀁 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀔𑀢𑁆𑀢𑀺𑀬𑀁 𑀢𑀸𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀢𑀺𑀲𑁆𑀲𑁄 𑀓𑀼𑀮𑀲𑀫𑁆𑀧𑀢𑁆𑀢𑀺𑀬𑁄𑀢𑀺 𑀔𑀢𑁆𑀢𑀺𑀬-𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺-𑀫𑀳𑀸𑀲𑀸𑀮𑀓𑀼𑀮𑀸𑀦𑀺 𑀯𑀤𑀢𑀺. 𑀧𑀜𑁆𑀘 𑀭𑀽𑀧𑀺𑀩𑁆𑀭𑀳𑁆𑀫𑀮𑁄𑀓𑁂, 𑀘𑀢𑁆𑀢𑀸𑀭𑁄 𑀅𑀭𑀽𑀧𑀻𑀩𑁆𑀭𑀳𑁆𑀫𑀮𑁄𑀓𑁂𑀢𑀺 𑀏𑀯𑀁 𑀦𑀯 𑀩𑁆𑀭𑀳𑁆𑀫𑀮𑁄𑀓𑁂 𑀓𑀫𑁆𑀫𑀪𑀯𑀯𑀺𑀪𑀸𑀕𑁂𑀦, 𑀲𑁂𑀲𑀸𑀦𑀁 𑀕𑀡𑀦𑀸𑀦𑀁 𑀉𑀧𑀧𑀢𑁆𑀢𑀺𑀪𑀯𑀯𑀺𑀪𑀸𑀕𑁂𑀦.

𑀅𑀪𑀺𑀓𑁆𑀓𑀦𑁆𑀢𑀦𑁆𑀢𑀺 𑀅𑀢𑀺𑀯𑀺𑀬 𑀓𑀫𑀦𑀻𑀬𑀁. 𑀲𑀸 𑀧𑀦𑀲𑁆𑀲𑀸 𑀓𑀦𑁆𑀢𑀢𑀸 𑀅𑀢𑀺𑀯𑀺𑀬 𑀇𑀝𑁆𑀞𑀢𑀸𑀬 𑀫𑀦𑀯𑀟𑁆𑀠𑀦𑀢𑀸𑀬 ¶ 𑀲𑁄𑀪𑀦𑀢𑀸𑀬𑀸𑀢𑀺 𑀆𑀳 ‘‘𑀅𑀢𑀺𑀇𑀝𑁆𑀞𑀁 𑀅𑀢𑀺𑀫𑀦𑀸𑀧𑀁 𑀅𑀢𑀺𑀲𑀼𑀦𑁆𑀤𑀭𑀦𑁆𑀢𑀺 𑀅𑀢𑁆𑀣𑁄’’𑀢𑀺. ‘‘𑀅𑀪𑀺𑀓𑁆𑀓𑀦𑁆𑀢’’𑀦𑁆𑀢𑀺 𑀯𑀘𑀦𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄, 𑀯𑀘𑀦𑀁 𑀧𑀦 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸𑀢𑀺 𑀢𑀣𑀸 𑀯𑀼𑀢𑁆𑀢𑀁. 𑀅𑀢𑁆𑀣𑀫𑀢𑁆𑀢𑀤𑀲𑁆𑀲𑀦𑀁 𑀯𑀸 𑀏𑀢𑀁, 𑀢𑀲𑁆𑀫𑀸 𑀅𑀢𑁆𑀣𑀯𑀲𑁂𑀦 𑀮𑀺𑀗𑁆𑀕𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄.

𑀅𑀥𑁄𑀫𑀼𑀔𑀞𑀧𑀺𑀢𑀦𑁆𑀢𑀺 𑀓𑁂𑀦𑀘𑀺 𑀅𑀥𑁄𑀫𑀼𑀔𑀁 𑀞𑀧𑀺𑀢𑀁. 𑀳𑁂𑀝𑁆𑀞𑀸𑀫𑀼𑀔𑀚𑀸𑀢𑀦𑁆𑀢𑀺 𑀲𑀪𑀸𑀯𑁂𑀦𑁂𑀯 𑀳𑁂𑀝𑁆𑀞𑀸𑀫𑀼𑀔𑀁 𑀚𑀸𑀢𑀁. 𑀉𑀕𑁆𑀖𑀸𑀝𑁂𑀬𑁆𑀬𑀸𑀢𑀺 𑀯𑀺𑀯𑀝𑀁 𑀓𑀭𑁂𑀬𑁆𑀬. 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸𑀢𑀺 ‘‘𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁄 𑀉𑀢𑁆𑀢𑀭𑀸𑀪𑀺𑀫𑀼𑀔𑁄 𑀯𑀸 𑀕𑀘𑁆𑀙𑀸’’𑀢𑀺𑀆𑀤𑀻𑀦𑀺 𑀅𑀯𑀢𑁆𑀯𑀸 𑀳𑀢𑁆𑀣𑁂 𑀕𑀳𑁂𑀢𑁆𑀯𑀸 𑀦𑀺𑀲𑁆𑀲𑀦𑁆𑀤𑁂𑀳𑀁 𑀓𑀢𑁆𑀯𑀸 ‘‘𑀏𑀲 𑀫𑀕𑁆𑀕𑁄’’𑀢𑀺 𑀏𑀯𑀁 𑀯𑀢𑁆𑀯𑀸 ‘‘𑀕𑀘𑁆𑀙𑀸’’𑀢𑀺 𑀯𑀤𑁂𑀬𑁆𑀬. 𑀓𑀸𑀴𑀧𑀓𑁆𑀔𑀘𑀸𑀢𑀼𑀤𑁆𑀤𑀲𑀻𑀢𑀺 𑀓𑀸𑀴𑀧𑀓𑁆𑀔𑁂 𑀘𑀸𑀢𑀼𑀤𑁆𑀤𑀲𑀻. 𑀦𑀺𑀓𑁆𑀓𑀼𑀚𑁆𑀚𑀺𑀢𑀁 𑀉𑀓𑁆𑀓𑀼𑀚𑁆𑀚𑁂𑀬𑁆𑀬𑀸𑀢𑀺 𑀆𑀥𑁂𑀬𑁆𑀬𑀲𑁆𑀲 𑀅𑀦𑀸𑀥𑀸𑀭𑀪𑀽𑀢𑀁 𑀪𑀸𑀚𑀦𑀁 𑀢𑀲𑁆𑀲 𑀆𑀥𑀸𑀭𑀪𑀸𑀯𑀸𑀧𑀸𑀤𑀦𑀯𑀲𑁂𑀦 𑀉𑀓𑁆𑀓𑀼𑀚𑁆𑀚𑁂𑀬𑁆𑀬. 𑀅𑀜𑁆𑀜𑀸𑀡𑀲𑁆𑀲 𑀅𑀪𑀺𑀫𑀼𑀔𑀢𑁆𑀢𑀸 𑀳𑁂𑀝𑁆𑀞𑀸𑀫𑀼𑀔𑀚𑀸𑀢𑀢𑀸𑀬 𑀲𑀤𑁆𑀥𑀫𑁆𑀫𑀯𑀺𑀫𑀼𑀔𑀁, 𑀢𑀢𑁄 𑀏𑀯 𑀅𑀥𑁄𑀫𑀼𑀔𑀪𑀸𑀯𑁂𑀦 𑀅𑀲𑀤𑁆𑀥𑀫𑁆𑀫𑁂 𑀧𑀢𑀺𑀢𑀦𑁆𑀢𑀺 𑀏𑀯𑀁 𑀧𑀤𑀤𑁆𑀯𑀬𑀁 𑀬𑀣𑀸𑀭𑀳𑀁 𑀬𑁄𑀚𑁂𑀢𑀩𑁆𑀩𑀁, 𑀦 𑀬𑀣𑀸𑀲𑀗𑁆𑀔𑀬𑀁. 𑀓𑀸𑀫𑀁 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄𑀧𑀺 𑀧𑀝𑀺𑀘𑁆𑀙𑀸𑀤𑀓𑀸, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀧𑀦 𑀲𑀯𑀺𑀲𑁂𑀲𑀁 𑀧𑀝𑀺𑀘𑁆𑀙𑀸𑀤𑀺𑀓𑀸𑀢𑀺 𑀆𑀳 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀕𑀳𑀦𑀧𑀝𑀺𑀘𑁆𑀙𑀦𑁆𑀦’’𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀭𑀫𑀸𑀳𑀁, 𑀪𑀺𑀓𑁆𑀔𑀯𑁂, 𑀯𑀚𑁆𑀚𑀁 𑀯𑀤𑀸𑀫𑀻’’𑀢𑀺 (𑀅. 𑀦𑀺. 𑁧.𑁩𑁧𑁦). 𑀲𑀩𑁆𑀩𑀸𑀧𑀸𑀬𑀕𑀸𑀫𑀺𑀫𑀕𑁆𑀕𑁄 𑀓𑀼𑀫𑁆𑀫𑀕𑁆𑀕𑁄 ‘‘𑀓𑀼𑀘𑁆𑀙𑀺𑀢𑁄 𑀫𑀕𑁆𑀕𑁄’’𑀢𑀺 𑀓𑀢𑁆𑀯𑀸. 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀉𑀚𑀼𑀧𑀝𑀺𑀧𑀓𑁆𑀔𑀢𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀬𑁄 𑀅𑀝𑁆𑀞 𑀫𑀺𑀘𑁆𑀙𑀢𑁆𑀢𑀥𑀫𑁆𑀫𑀸 𑀫𑀺𑀘𑁆𑀙𑀸𑀫𑀕𑁆𑀕𑁄. 𑀢𑁂𑀦𑁂𑀯 𑀳𑀺 𑀢𑀤𑀼𑀪𑀬𑀧𑀝𑀺𑀧𑀓𑁆𑀔𑀢𑀁 𑀲𑀦𑁆𑀥𑀸𑀬 ‘‘𑀲𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑀁 𑀆𑀯𑀺𑀓𑀭𑁄𑀦𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑀧𑁆𑀧𑀺𑀆𑀤𑀺𑀲𑀦𑁆𑀦𑀺𑀲𑁆𑀲𑀬𑁄 𑀧𑀤𑀻𑀧𑁄 𑀦 𑀢𑀣𑀸 𑀉𑀚𑁆𑀚𑀮𑁄, 𑀬𑀣𑀸 𑀢𑁂𑀮𑀲𑀦𑁆𑀦𑀺𑀲𑁆𑀲𑀬𑁄𑀢𑀺 ¶ 𑀢𑁂𑀮𑀧𑀚𑁆𑀚𑁄𑀢𑀕𑁆𑀕𑀳𑀡𑀁. 𑀏𑀢𑁂𑀳𑀺 𑀧𑀭𑀺𑀬𑀸𑀬𑁂𑀳𑀻𑀢𑀺 𑀏𑀢𑁂𑀳𑀺 𑀦𑀺𑀓𑁆𑀓𑀼𑀚𑁆𑀚𑀺𑀢𑀼𑀓𑁆𑀓𑀼𑀚𑁆𑀚𑀦𑀧𑀝𑀺𑀘𑁆𑀙𑀦𑁆𑀦𑀯𑀺𑀯𑀭𑀡𑀸𑀤𑀺𑀉𑀧𑀫𑁄𑀧𑀫𑀺𑀢𑀩𑁆𑀩𑀧𑁆𑀧𑀓𑀸𑀭𑁂𑀳𑀺.

𑀧𑀲𑀦𑁆𑀦𑀸𑀓𑀸𑀭𑀦𑁆𑀢𑀺 𑀧𑀲𑀦𑁆𑀦𑁂𑀳𑀺 𑀓𑀸𑀢𑀩𑁆𑀩𑀁 𑀲𑀓𑁆𑀓𑀸𑀭𑀁. 𑀲𑀭𑀡𑀦𑁆𑀢𑀺 𑀧𑀝𑀺𑀲𑀭𑀡𑀁 𑀧𑀭𑀸𑀬𑀡𑀁. 𑀅𑀚𑁆𑀚𑀢𑀸𑀢𑀺 𑀅𑀚𑁆𑀚𑀸𑀢𑀺 𑀧𑀤𑀲𑁆𑀲 𑀯𑀟𑁆𑀠𑀦𑀫𑀢𑁆𑀢𑀁 𑀳𑁂𑀢𑁆𑀣 𑀢𑀸-𑀲𑀤𑁆𑀤𑁄 𑀬𑀣𑀸 ‘‘𑀤𑁂𑀯𑀢𑀸’’𑀢𑀺. 𑀧𑀸𑀡𑁂𑀳𑀺 𑀉𑀧𑁂𑀢𑀦𑁆𑀢𑀺 𑀧𑀸𑀡𑁂𑀳𑀺 𑀲𑀳 𑀲𑀭𑀡𑀁 𑀉𑀧𑁂𑀢𑀁. ‘‘𑀬𑀸𑀯 𑀫𑁂 𑀧𑀸𑀡𑀸 𑀥𑀭𑀦𑁆𑀢𑀺, 𑀢𑀸𑀯 𑀲𑀭𑀡𑀁 𑀕𑀢𑀫𑁂𑀯 𑀫𑀁 𑀥𑀸𑀭𑁂𑀢𑀽’’𑀢𑀺 𑀆𑀧𑀸𑀡𑀓𑁄𑀝𑀺𑀓𑀁 𑀅𑀢𑁆𑀢𑀦𑁄 𑀲𑀭𑀡𑀕𑀫𑀦𑀁 𑀧𑀯𑁂𑀤𑁂𑀢𑀺. 𑀢𑁂𑀦𑀸𑀳 ‘‘𑀬𑀸𑀯 𑀫𑁂’’𑀢𑀺𑀆𑀤𑀺. 𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑀢𑁄 𑀅𑀯𑀺𑀪𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀤𑀳𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀼𑀭𑀺𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁩. 𑀧𑀼𑀭𑀺𑀫𑀲𑀼𑀢𑁆𑀢𑁂𑀢𑀺 𑀧𑀼𑀭𑀺𑀫𑀲𑀼𑀢𑁆𑀢𑀤𑁂𑀲𑀦𑀸𑀬𑀁. 𑀢𑀢𑁆𑀣 𑀳𑀺 𑀉𑀧𑀲𑀗𑁆𑀓𑀫𑀦𑁆𑀢𑀯𑁂𑀮𑀸𑀬 𑀲𑀢𑁆𑀣𑀼 𑀕𑀼𑀡𑁂 𑀅𑀚𑀸𑀦𑀦𑁆𑀢𑁄 ¶ 𑀓𑁂𑀯𑀮𑀁 𑀲𑀫𑁆𑀫𑁄𑀤𑀦𑀁 𑀓𑀭𑁄𑀢𑀺. 𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀦 𑀲𑀢𑁆𑀣𑀼 𑀕𑀼𑀡𑁂 𑀜𑀢𑁆𑀯𑀸 𑀲𑀭𑀡𑀗𑁆𑀕𑀢𑀢𑁆𑀢𑀸 𑀇𑀥 𑀇𑀫𑀲𑁆𑀫𑀺𑀁 𑀲𑀫𑀸𑀕𑀫𑁂 𑀅𑀪𑀺𑀯𑀸𑀤𑁂𑀲𑀺 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺. 𑀅𑀢𑁆𑀢𑀸𑀦𑀁 𑀅𑀥𑀺 𑀅𑀚𑁆𑀛𑀢𑁆𑀢𑀁, 𑀅𑀯𑀺𑀚𑀳𑁂𑀦 𑀅𑀢𑁆𑀢𑀸𑀦𑀁 𑀅𑀥𑀺𑀓𑀺𑀘𑁆𑀘 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀁 𑀏𑀓𑀚𑁆𑀛𑀁 𑀕𑀳𑀡𑀯𑀲𑁂𑀦, 𑀪𑀼𑀫𑁆𑀫𑀢𑁆𑀣𑁂 𑀘𑁂𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀓𑀸𑀫𑀜𑁆𑀘𑀸𑀬𑀁 𑀅𑀚𑁆𑀛𑀢𑁆𑀢𑀲𑀤𑁆𑀤𑁄 𑀕𑁄𑀘𑀭𑀚𑁆𑀛𑀢𑁆𑀢𑀯𑀺𑀲𑀬𑀚𑁆𑀛𑀢𑁆𑀢𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑁂𑀲𑀼 𑀧𑀯𑀢𑁆𑀢𑀢𑀺. 𑀢𑁂 𑀧𑀦𑁂𑀢𑁆𑀣 𑀦 𑀬𑀼𑀚𑁆𑀚𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀦𑀺𑀬𑀓𑀚𑁆𑀛𑀢𑁆𑀢’’𑀦𑁆𑀢𑀺, 𑀦𑀺𑀬𑀓𑀲𑀗𑁆𑀔𑀸𑀢𑀅𑀚𑁆𑀛𑀢𑁆𑀢𑀥𑀫𑁆𑀫𑁂𑀲𑀽𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂’’𑀢𑀺. 𑀮𑀼𑀩𑁆𑀪𑀦𑀮𑀓𑁆𑀔𑀡𑁄𑀢𑀺 𑀕𑀺𑀚𑁆𑀛𑀦𑀮𑀓𑁆𑀔𑀡𑁄, 𑀆𑀭𑀫𑁆𑀫𑀡𑁂 𑀤𑀴𑁆𑀳𑀕𑁆𑀕𑀳𑀡𑀲𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀤𑀼𑀲𑁆𑀲𑀦𑀮𑀓𑁆𑀔𑀡𑁄𑀢𑀺 𑀓𑀼𑀚𑁆𑀛𑀦𑀮𑀓𑁆𑀔𑀡𑁄, 𑀩𑁆𑀬𑀸𑀧𑀚𑁆𑀚𑀦𑀲𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀫𑀼𑀬𑁆𑀳𑀦𑀮𑀓𑁆𑀔𑀡𑁄𑀢𑀺 𑀅𑀜𑁆𑀜𑀸𑀡𑀮𑀓𑁆𑀔𑀡𑁄, 𑀆𑀭𑀫𑁆𑀫𑀡𑁂 𑀲𑀪𑀸𑀯𑀲𑀫𑁆𑀫𑁄𑀳𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀯𑀺𑀳𑁂𑀞𑁂𑀦𑁆𑀢𑀻𑀢𑀺 𑀅𑀢𑁆𑀣𑀦𑀸𑀲𑀦𑀅𑀦𑀢𑁆𑀣𑀼𑀧𑁆𑀧𑀸𑀤𑀦𑁂𑀳𑀺 𑀯𑀺𑀩𑀸𑀥𑁂𑀦𑁆𑀢𑀺. 𑀢𑀢𑁄 𑀏𑀯 𑀬𑀣𑀸 𑀲𑀕𑁆𑀕𑀫𑀕𑁆𑀕𑁂𑀲𑀼 𑀦 𑀤𑀺𑀲𑁆𑀲𑀢𑀺, 𑀏𑀯𑀁 𑀓𑀭𑁄𑀦𑁆𑀢𑀻𑀢𑀺 𑀆𑀳 ‘‘𑀦𑀸𑀲𑁂𑀦𑁆𑀢𑀺 𑀯𑀺𑀦𑀸𑀲𑁂𑀦𑁆𑀢𑀻’’𑀢𑀺. 𑀅𑀢𑁆𑀢𑀦𑀺 𑀲𑀫𑁆𑀪𑀽𑀢𑀸𑀢𑀺 𑀲𑀦𑁆𑀢𑀸𑀦𑁂 𑀦𑀺𑀩𑁆𑀩𑀢𑁆𑀢𑀸.

𑀧𑀼𑀭𑀺𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀚𑀭𑀸𑀫𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁪. 𑀅𑀜𑁆𑀜𑀢𑁆𑀭 ¶ 𑀚𑀭𑀸𑀫𑀭𑀡𑀸𑀢𑀺 𑀚𑀭𑀸𑀫𑀭𑀡𑁂𑀦 𑀯𑀺𑀦𑀸. 𑀚𑀭𑀸𑀫𑀭𑀡𑀯𑀺𑀭𑀳𑀺𑀢𑁄 𑀚𑀸𑀢𑁄 𑀦𑀸𑀫 𑀅𑀢𑁆𑀣𑀺 𑀦𑀼 𑀔𑁄𑀢𑀺 𑀧𑀼𑀘𑁆𑀙𑀢𑀺. 𑀧𑀸𑀴𑀺𑀬𑀁 𑀚𑀸𑀢𑀲𑁆𑀲𑀸𑀢𑀺 𑀧𑀘𑁆𑀘𑀢𑁆𑀢𑁂 𑀲𑀸𑀫𑀺𑀯𑀘𑀦𑀁. 𑀫𑀳𑀸𑀲𑀸𑀮𑀸𑀢𑀺 𑀇𑀫𑀺𑀦𑀸 𑀭-𑀓𑀸𑀭𑀲𑁆𑀲 𑀮-𑀓𑀸𑀭𑀁 𑀓𑀢𑁆𑀯𑀸 ‘‘𑀫𑀳𑀸𑀲𑀸𑀮𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺 𑀬𑀣𑀸 ‘‘𑀧𑀼𑀭𑀢𑁆𑀣𑀺𑀬𑁄𑀢𑀺 𑀧𑀼𑀮𑀢𑁆𑀣𑀺𑀬𑁄’’𑀢𑀺. 𑀫𑀳𑀸𑀲𑀸𑀭𑀧𑁆𑀧𑀢𑁆𑀢𑀸𑀢𑀺 𑀫𑀳𑀦𑁆𑀢𑀁 𑀯𑀺𑀪𑀯𑀲𑀸𑀭𑀁 𑀧𑀢𑁆𑀢𑀸. 𑀓𑁄𑀝𑀺𑀲𑀢𑀁 𑀥𑀦𑀁, 𑀅𑀬𑀫𑁂𑀯 𑀯𑀸 𑀧𑀸𑀞𑁄. ‘‘𑀓𑀼𑀫𑁆𑀪𑀁 𑀦𑀸𑀫 𑀤𑀲 𑀅𑀫𑁆𑀩𑀡𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀇𑀲𑁆𑀲𑀭𑀸𑀢𑀺 𑀯𑀺𑀪𑀯𑀺𑀲𑁆𑀲𑀭𑀺𑀬𑁂𑀦 𑀇𑀲𑁆𑀲𑀭𑀸. 𑀲𑀼𑀯𑀡𑁆𑀡𑀭𑀚𑀢𑀪𑀸𑀚𑀦𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑀢𑁆𑀣𑀲𑁂𑀬𑁆𑀬𑀸𑀯𑀲𑀣𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀲𑀸𑀥𑀸𑀭𑀡𑀥𑀦𑀸𑀦𑀁 𑀦𑀺𑀥𑀸𑀦𑀕𑀢𑀢𑁆𑀢𑀸 ‘‘𑀅𑀦𑀺𑀥𑀸𑀦𑀕𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀢𑀼𑀝𑁆𑀞𑀺𑀓𑀭𑀡𑀲𑁆𑀲𑀸𑀢𑀺 𑀧𑀸𑀲𑀸𑀤𑀲𑀺𑀯𑀺𑀓𑀸𑀤𑀺𑀲𑀼𑀔𑀲𑀸𑀥𑀦𑀲𑁆𑀲.

𑀆𑀭𑀓𑀸 𑀓𑀺𑀮𑁂𑀲𑁂𑀳𑀻𑀢𑀺 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀲𑀤𑁆𑀤𑀲𑀺𑀤𑁆𑀥𑀺𑀫𑀸𑀳. 𑀆𑀭𑀓𑀸𑀢𑀺 𑀘 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀢𑁂𑀳𑀺 𑀤𑀽𑀭𑁂𑀢𑀺 𑀅𑀢𑁆𑀣𑁄. 𑀭𑀸𑀕𑀸𑀤𑀻𑀦𑀁 𑀳𑀢𑀢𑁆𑀢𑀸, 𑀧𑀸𑀧𑀓𑀭𑀡𑁂 𑀭𑀳𑀸𑀪𑀸𑀯𑀢𑁄, 𑀅𑀦𑀼𑀢𑁆𑀢𑀭𑀤𑀓𑁆𑀔𑀺𑀡𑁂𑀬𑁆𑀬𑀢𑀸𑀤𑀺𑀧𑀘𑁆𑀘𑀬𑀸 𑀘 𑀅𑀭𑀳𑀁. 𑀓𑀸𑀫𑀜𑁆𑀘𑀸𑀬𑀁 𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸, 𑀅𑀪𑀺𑀥𑀫𑁆𑀫𑀦𑀬𑁄 𑀏𑀯 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀘𑀢𑁆𑀢𑀸𑀭𑁄 𑀆𑀲𑀯𑀸’’𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁. 𑀯𑀼𑀝𑁆𑀞𑀸𑀢𑀺 𑀯𑀼𑀝𑁆𑀞𑀯𑀦𑁆𑀢𑁄. 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀓𑀭𑀡𑀻𑀬𑀦𑁆𑀢𑀺 𑀧𑀘𑁆𑀘𑁂𑀓𑀁 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀓𑀢𑁆𑀢𑀩𑁆𑀩𑀁 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀪𑀸𑀯𑀦𑀸𑀪𑀺𑀲𑀫𑀬𑀁. 𑀏𑀯𑀁 𑀕𑀢𑀁 𑀲𑁄𑀴𑀲𑀯𑀺𑀥𑀁 𑀳𑁄𑀢𑀺. 𑀑𑀲𑀻𑀤𑀸𑀧𑀦𑀝𑁆𑀞𑁂𑀦 𑀪𑀸𑀭𑀸 𑀯𑀺𑀬𑀸𑀢𑀺 𑀪𑀸𑀭𑀸. 𑀢𑁂𑀦𑀸𑀳 ‘‘𑀪𑀸𑀭𑀸 𑀳𑀯𑁂 𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺𑀆𑀤𑀺 (𑀲𑀁. 𑀦𑀺. 𑁩.𑁨𑁨). 𑀅𑀢𑁆𑀢𑀧𑀝𑀺𑀩𑀤𑁆𑀥𑀢𑀸𑀬 𑀅𑀢𑁆𑀢𑀦𑁄 𑀅𑀯𑀺𑀚𑀳𑀦𑀢𑁄 𑀧𑀭𑀫𑀢𑁆𑀣𑀤𑁂𑀲𑀦𑀸𑀬 𑀘 𑀧𑀭𑀫𑀢𑁆𑀣𑁄 𑀅𑀭𑀳𑀢𑁆𑀢𑀁. 𑀓𑀸𑀫𑀜𑁆𑀘𑀸𑀬𑀫𑀢𑁆𑀣𑁄 𑀲𑀩𑁆𑀩𑀲𑀫𑀺𑀤𑁆𑀥𑀺𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁄 𑀅𑀦𑀯𑀚𑁆𑀚𑀥𑀫𑁆𑀫𑁄 ¶ 𑀲𑀫𑁆𑀪𑀯𑀢𑀺 𑀅𑀓𑀼𑀧𑁆𑀧𑀲𑀪𑀸𑀯𑀸, 𑀅𑀧𑀭𑀺𑀳𑀸𑀦𑀥𑀫𑁆𑀫𑁂𑀲𑀼 𑀧𑀦 𑀅𑀕𑁆𑀕𑀪𑀽𑀢𑁂 𑀅𑀭𑀳𑀢𑁆𑀢𑁂 𑀲𑀸𑀢𑀺𑀲𑀬𑁄, 𑀦 𑀇𑀢𑀭𑁂𑀲𑀽𑀢𑀺 ‘‘𑀅𑀭𑀳𑀢𑁆𑀢𑀲𑀗𑁆𑀔𑀸𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀑𑀭𑀫𑁆𑀪𑀸𑀕𑀺𑀬𑀼𑀤𑁆𑀥𑀫𑁆𑀪𑀸𑀕𑀺𑀬𑀯𑀺𑀪𑀸𑀕𑀁 𑀤𑀲𑀯𑀺𑀥𑀫𑁆𑀧𑀺 𑀪𑀯𑁂𑀲𑀼 𑀲𑀁𑀬𑁄𑀚𑀦𑀁 𑀓𑀺𑀮𑁂𑀲𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀦𑀺𑀲𑁆𑀲𑀭𑀺𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦 𑀩𑀦𑁆𑀥𑀢𑀻𑀢𑀺 𑀪𑀯𑀲𑀁𑀬𑁄𑀚𑀦𑀁. 𑀲𑀢𑀺𑀧𑀺 𑀳𑀺 𑀅𑀜𑁆𑀜𑁂𑀲𑀁 𑀢𑀧𑁆𑀧𑀓𑁆𑀔𑀺𑀬𑀪𑀸𑀯𑁂𑀦 𑀯𑀺𑀦𑀸 𑀲𑀁𑀬𑁄𑀚𑀦𑀸𑀦𑀺 𑀢𑁂𑀲𑀁 𑀢𑀧𑁆𑀧𑀘𑁆𑀘𑀬𑀪𑀸𑀯𑁄 𑀅𑀢𑁆𑀣𑀺, 𑀪𑀯𑀦𑀺𑀬𑀸𑀫𑁄 𑀑𑀭𑀫𑁆𑀪𑀸𑀕𑀺𑀬𑀼𑀤𑁆𑀥𑀫𑁆𑀪𑀸𑀕𑀺𑀬𑀲𑀗𑁆𑀕𑀳𑀺𑀢𑁄𑀢𑀺 𑀢𑀁𑀢𑀁𑀪𑀯𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀦𑀺𑀬𑀸𑀫𑁄 𑀘 𑀳𑁄𑀢𑀺, 𑀦 𑀘 𑀉𑀧𑀘𑁆𑀙𑀺𑀦𑁆𑀦𑀲𑀁𑀬𑁄𑀚𑀦𑀲𑁆𑀲 𑀓𑀢𑀸𑀦𑀺𑀧𑀺 𑀓𑀫𑁆𑀫𑀸𑀦𑀺 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 𑀢𑁂𑀲𑀁𑀬𑁂𑀯 𑀲𑀁𑀬𑁄𑀚𑀦𑀝𑁆𑀞𑁄 𑀤𑀝𑁆𑀞𑀩𑁆𑀩𑁄. 𑀲𑀫𑁆𑀫𑀸 ¶ 𑀓𑀸𑀭𑀡𑁂𑀳𑀺 𑀚𑀸𑀦𑀺𑀢𑁆𑀯𑀸𑀢𑀺 𑀜𑀸𑀬𑁂𑀦 𑀤𑀼𑀓𑁆𑀔𑀸𑀤𑀻𑀲𑀼 𑀲𑁄 𑀬𑀣𑀸 𑀚𑀸𑀦𑀺𑀢𑀩𑁆𑀩𑁄; 𑀢𑀣𑀸 𑀚𑀸𑀦𑀺𑀢𑁆𑀯𑀸, 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀯𑀺𑀫𑀼𑀢𑁆𑀢𑀸 𑀳𑀺 𑀅𑀧𑀭𑀓𑀸𑀮𑀓𑀺𑀭𑀺𑀬𑀸 𑀘 𑀬𑀣𑀸 𑀲𑀫𑁆𑀪𑀯𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀕𑁆𑀕𑀧𑀜𑁆𑀜𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀪𑀺𑀚𑁆𑀚𑀦𑀲𑀪𑀸𑀯𑁄 𑀔𑀡𑀸𑀬𑀢𑁆𑀢𑀢𑁆𑀢𑀸. 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀲𑀪𑀸𑀯𑁄 𑀫𑀭𑀡𑀥𑀫𑁆𑀫𑀢𑁆𑀢𑀸. 𑀅𑀬𑀁 𑀓𑀸𑀬𑁄 𑀉𑀲𑁆𑀫𑀸𑀬𑀼𑀯𑀺𑀜𑁆𑀜𑀸𑀡𑀸𑀧𑀕𑀫𑁄 𑀙𑀟𑁆𑀟𑀦𑀻𑀬𑀥𑀫𑁆𑀫𑁄, 𑀬𑀲𑁆𑀫𑀺𑀁 𑀬𑀁 𑀧𑀢𑀺𑀝𑁆𑀞𑀺𑀢𑀁, 𑀢𑀁 𑀢𑀲𑁆𑀲 𑀲𑀦𑁆𑀢𑀸𑀦𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀦𑁆𑀢𑀺 𑀓𑀢𑁆𑀯𑀸 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻𑀢𑀺 𑀆𑀳 ‘‘𑀔𑀻𑀡𑀸𑀲𑀯𑀲𑁆𑀲 𑀳𑀺 𑀅𑀚𑀻𑀭𑀡𑀥𑀫𑁆𑀫𑁄𑀧𑀺 𑀅𑀢𑁆𑀣𑀻’’𑀢𑀺𑀆𑀤𑀺. 𑀢𑁂𑀦𑀸𑀳 𑀪𑀕𑀯𑀸 ‘‘𑀇𑀫𑀲𑁆𑀫𑀺𑀁𑀬𑁂𑀯 𑀩𑁆𑀬𑀸𑀫𑀫𑀢𑁆𑀢𑁂 𑀓𑀴𑁂𑀯𑀭𑁂 𑀲𑀲𑀜𑁆𑀜𑀺𑀫𑁆𑀳𑀺 𑀲𑀫𑀦𑀓𑁂 𑀮𑁄𑀓𑀜𑁆𑀘 𑀧𑀜𑁆𑀜𑀧𑁂𑀫𑀺 𑀮𑁄𑀓𑀲𑀫𑀼𑀤𑀬𑀜𑁆𑀘 𑀮𑁄𑀓𑀦𑀺𑀭𑁄𑀥𑀜𑁆𑀘𑀸’’𑀢𑀺𑀆𑀤𑀺 (𑀲𑀁. 𑀦𑀺. 𑁧.𑁧𑁦𑁭; 𑀅. 𑀦𑀺. 𑁪.𑁪𑁫). 𑀅𑀲𑁆𑀲 𑀔𑀻𑀡𑀸𑀲𑀯𑀲𑁆𑀲, ‘‘𑀚𑀻𑀭𑀡𑀥𑀫𑁆𑀫’’𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀅𑀚𑀻𑀭𑀡𑀥𑀫𑁆𑀫𑀁 𑀞𑀧𑁂𑀢𑁆𑀯𑀸 𑀚𑀻𑀭𑀡𑀥𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀲𑀁𑀧𑀸𑀬𑀁 𑀓𑀸𑀬𑁄 𑀪𑁂𑀤𑀦𑀥𑀫𑁆𑀫𑁄’’𑀢𑀺 𑀏𑀯𑀫𑀸𑀳. 𑀚𑀭𑀁 𑀧𑀢𑁆𑀢𑀲𑁆𑀲𑁂𑀯 𑀳𑀺𑀲𑁆𑀲 𑀪𑁂𑀤𑀦𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀢𑀸𑀦𑀺𑀬𑀢𑁂 𑀅𑀢𑁆𑀣𑁂 𑀲𑀼𑀢𑁆𑀢𑀤𑁂𑀲𑀦𑀸 𑀧𑀯𑀢𑁆𑀢𑀸. 𑀅𑀢𑁆𑀣𑀲𑁆𑀲 𑀉𑀧𑁆𑀧𑀢𑁆𑀢𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺, 𑀲𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄. 𑀓𑀺𑀭-𑀲𑀤𑁆𑀤𑁄 𑀅𑀦𑀼𑀲𑁆𑀲𑀯𑀢𑁆𑀣𑁄, 𑀢𑁂𑀦 𑀅𑀦𑀼𑀲𑁆𑀲𑀯𑀸𑀕𑀢𑁄𑀬𑀫𑀢𑁆𑀣𑁄, 𑀦 𑀅𑀝𑁆𑀞𑀓𑀣𑀸𑀕𑀢𑁄𑀢𑀺 𑀤𑀻𑀧𑁂𑀢𑀺. 𑀢𑁂𑀦𑀸𑀳 ‘‘𑀯𑀤𑀦𑁆𑀢𑀻’’𑀢𑀺. 𑀬𑁂𑀦𑀸𑀬𑀁 𑀅𑀢𑁆𑀣𑁄 𑀳𑁂𑀢𑀼𑀦𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀺𑀯𑀺𑀓𑀲𑀸𑀮𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀓𑀣𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀯𑀺𑀳𑀭𑀢𑀺 𑀚𑁂𑀢𑀯𑀦𑁂’’𑀢𑀺 𑀦𑀺𑀤𑀸𑀦𑀯𑀘𑀦𑁂𑀦 𑀬𑀣𑀸 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀣𑀸 𑀯𑁂𑀤𑀺𑀢𑀩𑁆𑀩𑀁. 𑀦𑀦𑀼 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀧𑀼𑀘𑁆𑀙𑀸𑀯𑀲𑀺𑀓𑁄 𑀦𑀺𑀓𑁆𑀔𑁂𑀧𑁄𑀢𑀺? 𑀲𑀘𑁆𑀘𑀫𑁂𑀢𑀁, 𑀲𑀼𑀢𑁆𑀢𑁂𑀓𑀤𑁂𑀲𑀁 𑀧𑀦 𑀲𑀦𑁆𑀥𑀸𑀬 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀢𑀸𑀯𑀘𑀦𑀁. 𑀓𑁂𑀘𑀺 𑀧𑀦 ‘‘𑀬𑀸𑀦𑀁 𑀆𑀭𑀼𑀳𑀺𑀢𑁆𑀯𑀸 𑀭𑀸𑀚𑀸 𑀆𑀕𑀢𑁄, 𑀭𑀜𑁆𑀜𑁄 𑀆𑀭𑁄𑀳𑀦𑀻𑀬𑀭𑀣𑀁 𑀤𑀲𑁆𑀲𑁂𑀢𑁆𑀯𑀸 𑀯𑀼𑀢𑁆𑀢’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺.

𑀲𑀭𑀻𑀭𑁂 𑀨𑁂𑀡𑀧𑀺𑀡𑁆𑀟𑀲𑀫𑁂 𑀓𑀺𑀁 𑀯𑀢𑁆𑀢𑀩𑁆𑀩𑀁? 𑀲𑀩𑁆𑀪𑀺 𑀲𑀤𑁆𑀥𑀺𑀦𑁆𑀢𑀺 𑀲𑀸𑀥𑀽𑀳𑀺 𑀲𑀳 𑀧𑀯𑁂𑀤𑀬𑀦𑁆𑀢𑀺. 𑀦 𑀳𑀺 𑀓𑀤𑀸𑀘𑀺 𑀲𑀸𑀥𑀽𑀦𑀁 𑀲𑀸𑀥𑀽𑀳𑀺 𑀲𑀳 𑀓𑀢𑁆𑀢𑀩𑁆𑀩𑀸 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑀻𑀤𑀦𑀲𑀪𑀸𑀯𑀸𑀦𑀁 𑀓𑀺𑀮𑁂𑀲𑀸𑀦𑀁 𑀪𑀺𑀚𑁆𑀚𑀦𑀧𑁆𑀧𑀢𑁆𑀢𑀢𑁆𑀢𑀸 𑀦𑀺𑀩𑁆𑀩𑀸𑀦𑀁 𑀲𑀩𑁆𑀪𑀻𑀢𑀺 𑀯𑀼𑀘𑁆𑀘𑀢𑀺. 𑀧𑀼𑀭𑀺𑀫𑀧𑀤𑀲𑁆𑀲𑀸𑀢𑀺 ‘‘𑀲𑀢𑀜𑁆𑀘 𑀥𑀫𑁆𑀫𑁄 𑀦 𑀚𑀭𑀁 𑀉𑀧𑁂𑀢𑀻’’𑀢𑀺 𑀧𑀤𑀲𑁆𑀲. 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 𑀩𑁆𑀬𑀢𑀺𑀭𑁂𑀓𑀯𑀲𑁂𑀦. 𑀲𑀢𑀁 𑀥𑀫𑁆𑀫𑁄 𑀦𑀺𑀩𑁆𑀩𑀸𑀦𑀁 𑀓𑀺𑀮𑁂𑀲𑁂𑀳𑀺 𑀲𑀁𑀲𑀻𑀤𑀦𑀪𑀺𑀚𑁆𑀚𑀦𑀲𑀪𑀸𑀯𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀆𑀕𑀫𑁆𑀫 𑀚𑀭𑀁 𑀦 𑀉𑀧𑁂𑀢𑀺. 𑀓𑀺𑀮𑁂𑀲𑀸 𑀧𑀦 𑀢𑀦𑁆𑀦𑀺𑀫𑀺𑀢𑁆𑀢𑀓𑀸, ¶ 𑀏𑀯𑀫𑀬𑀁 𑀯𑀼𑀢𑁆𑀢𑀓𑀸𑀭𑀡𑀢𑁄 𑀚𑀭𑀁 𑀦 𑀉𑀧𑁂𑀢𑀻𑀢𑀺. 𑀢𑁂𑀦𑀸𑀳 ‘‘𑀇𑀤’’𑀦𑁆𑀢𑀺𑀆𑀤𑀺. 𑀲𑀼𑀦𑁆𑀤𑀭𑀸𑀥𑀺𑀯𑀘𑀦𑀁 𑀯𑀸 𑀏𑀢𑀁 ‘‘𑀲𑀩𑁆𑀪𑀻’’𑀢𑀺 𑀧𑀤𑀁 𑀅𑀧𑀸𑀧𑀢𑀸𑀤𑀻𑀧𑀦𑀢𑁄, 𑀲𑀩𑁆𑀪𑀺𑀥𑀫𑁆𑀫𑀪𑀽𑀢𑀦𑁆𑀢𑀺 ¶ 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀯𑀺𑀭𑀸𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀺 (𑀇𑀢𑀺𑀯𑀼. 𑁯𑁦; 𑀅. 𑀦𑀺. 𑁪.𑁩𑁪), 𑀦 𑀢𑁂𑀦 𑀥𑀫𑁆𑀫𑁂𑀦 𑀲𑀫𑀢𑁆𑀣𑀺 𑀓𑀺𑀜𑁆𑀘𑀻’’𑀢𑀺 (𑀔𑀼. 𑀧𑀸. 𑁬.𑁪; 𑀲𑀼. 𑀦𑀺. 𑁨𑁨𑁭) 𑀘.

𑀚𑀭𑀸𑀫𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁫. 𑀭𑀳𑀲𑀺 𑀕𑀢𑀲𑁆𑀲𑀸𑀢𑀺 𑀚𑀦𑀲𑀫𑁆𑀩𑀸𑀥𑀢𑁄 𑀅𑀧𑀓𑁆𑀓𑀦𑁆𑀢𑀲𑁆𑀲. 𑀦𑀺𑀮𑀻𑀦𑀲𑁆𑀲 𑀢𑁂𑀦𑁂𑀯 𑀚𑀦𑀯𑀺𑀯𑁂𑀓𑁂𑀦 𑀏𑀓𑀫𑀦𑁆𑀢𑀁 𑀦𑀺𑀲𑀚𑁆𑀚𑀸𑀬 𑀏𑀓𑀻𑀪𑀸𑀯𑁂𑀦 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀯𑀺𑀬. 𑀢𑁂𑀦𑀸𑀳 ‘‘𑀏𑀓𑀻𑀪𑀽𑀢𑀲𑁆𑀲𑀸’’𑀢𑀺. 𑀲𑀩𑁆𑀩𑀜𑁆𑀜𑀼𑀪𑀸𑀲𑀺𑀢𑀁 𑀓𑀭𑁄𑀦𑁆𑀢𑁄 𑀆𑀳 𑀢𑀲𑁆𑀲 𑀯𑀘𑀦𑀁 ‘‘𑀏𑀯𑀫𑁂𑀢’’𑀦𑁆𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀢𑀲𑁆𑀲 𑀯𑀘𑀦𑀁 𑀢𑀣𑀸𑀧𑀘𑁆𑀘𑀦𑀼𑀪𑀸𑀲𑀦𑁆𑀢𑁄. 𑀅𑀦𑁆𑀢𑀓𑁂𑀦𑀸𑀥𑀺𑀧𑀦𑁆𑀦𑀢𑁆𑀢𑀸 𑀏𑀯 𑀔𑁂𑀢𑁆𑀢𑀯𑀢𑁆𑀣𑀼𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺 𑀫𑀸𑀦𑀼𑀲𑀁 𑀪𑀯𑀁 𑀚𑀳𑀢𑁄. 𑀅𑀦𑀼𑀕𑀦𑁆𑀢𑀺 𑀅𑀦𑀼𑀕𑀢𑀁, 𑀢𑀫𑁂𑀯 𑀅𑀦𑀼𑀕𑀸𑀫𑀻𑀢𑀺 𑀅𑀢𑁆𑀣𑁄. 𑀦𑀺𑀘𑀬𑀦𑁆𑀢𑀺 𑀉𑀧𑀭𑀽𑀧𑀭𑀺 𑀯𑀟𑁆𑀠𑀺𑀬𑀸 𑀦𑀺𑀘𑀺𑀢𑀪𑀽𑀢𑀁. 𑀲𑀫𑁆𑀧𑀭𑀸𑀬𑀺𑀓𑀦𑁆𑀢𑀺 𑀲𑀫𑁆𑀧𑀭𑀸𑀬 𑀳𑀺𑀢𑀁.

𑀧𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀢𑁆𑀢𑀭𑀓𑁆𑀔𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁬. 𑀧𑀻𑀤𑀳𑀦𑀦𑁆𑀢𑀺 𑀲𑀁𑀬𑀫𑀦𑀁. 𑀓𑀫𑁆𑀫𑀧𑀣𑀪𑁂𑀤𑀁 𑀅𑀧𑁆𑀧𑀢𑁆𑀢𑀲𑁆𑀲𑀸𑀢𑀺 𑀲𑀼𑀧𑀺𑀦𑀓𑀸𑀮𑁄 𑀯𑀺𑀬 𑀧𑀯𑀢𑁆𑀢𑀺𑀫𑀢𑁆𑀢𑀢𑀸𑀬 𑀓𑀫𑁆𑀫𑀧𑀣𑀯𑀺𑀲𑁂𑀲𑀁 𑀅𑀕𑀢𑀲𑁆𑀲. 𑀓𑀫𑁆𑀫𑀲𑁆𑀲𑀸𑀢𑀺 𑀅𑀓𑀼𑀲𑀮𑀓𑀫𑁆𑀫𑀲𑁆𑀲. 𑀲𑀁𑀯𑀭𑀦𑁆𑀢𑀺 𑀲𑀁𑀯𑀭𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀇𑀢𑀭𑀲𑁆𑀲 𑀧𑀦 𑀲𑀁𑀯𑀭𑀪𑀸𑀯𑁄 𑀧𑀼𑀭𑀺𑀫𑁂𑀳𑀺 𑀢𑀻𑀳𑀺 𑀧𑀤𑁂𑀳𑀺 𑀤𑀲𑁆𑀲𑀺𑀢𑁄𑀯𑀸𑀢𑀺. 𑀑𑀢𑁆𑀢𑀧𑁆𑀧𑀫𑁆𑀧𑀺 𑀕𑀳𑀺𑀢𑀫𑁂𑀯 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀦 𑀳𑀺 𑀧𑀸𑀧𑀚𑀺𑀕𑀼𑀘𑁆𑀙𑀦𑀁 𑀧𑀸𑀧𑀉𑀢𑁆𑀭𑀸𑀲𑀭𑀳𑀺𑀢𑀁, 𑀉𑀢𑁆𑀭𑀸𑀲𑁄 𑀯𑀸 𑀧𑀸𑀧𑀚𑀺𑀕𑀼𑀘𑁆𑀙𑀦𑀭𑀳𑀺𑀢𑁄 𑀅𑀢𑁆𑀣𑀻𑀢𑀺.

𑀅𑀢𑁆𑀢𑀭𑀓𑁆𑀔𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀧𑁆𑀧𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁭. 𑀉𑀴𑀸𑀭𑀲𑀤𑁆𑀤𑁄 ¶ 𑀲𑁂𑀝𑁆𑀞𑁂 𑀩𑀳𑀼𑀓𑁂 𑀘 𑀤𑀺𑀲𑁆𑀲𑀢𑀻𑀢𑀺 𑀆𑀳 ‘‘𑀧𑀡𑀻𑀢𑁂 𑀘 𑀩𑀳𑀼𑀓𑁂 𑀘𑀸’’𑀢𑀺. 𑀫𑀸𑀦𑀫𑀚𑁆𑀚𑀦𑁂𑀦𑀸𑀢𑀺 𑀫𑀸𑀦𑀯𑀲𑁂𑀦 𑀫𑀤𑀧𑁆𑀧𑀢𑁆𑀢𑀺𑀬𑀸. 𑀅𑀢𑀺𑀓𑁆𑀓𑀫𑀦𑁆𑀢𑀺 𑀲𑀸𑀥𑀼𑀫𑀭𑀺𑀬𑀸𑀤𑀯𑀻𑀢𑀺𑀓𑁆𑀓𑀫𑀮𑀓𑁆𑀔𑀡𑀁 𑀤𑁄𑀲𑀁. 𑀓𑀽𑀝𑁄 𑀧𑀸𑀲𑁄.

𑀅𑀧𑁆𑀧𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀟𑁆𑀟𑀓𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁮. 𑀬𑀲𑁆𑀫𑀸 ¶ 𑀓𑀸𑀫𑀦𑀺𑀫𑀺𑀢𑁆𑀢𑀁 𑀲𑀢𑁆𑀢𑁄 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀢𑀺, 𑀢𑀲𑁆𑀫𑀸 𑀓𑀸𑀫𑀸 𑀢𑀲𑁆𑀲 𑀧𑀢𑀺𑀝𑁆𑀞𑀸 𑀧𑀘𑁆𑀘𑀬𑁄 𑀓𑀸𑀭𑀡𑀦𑁆𑀢𑀺 𑀆𑀳 ‘‘𑀓𑀸𑀫𑀳𑁂𑀢𑀽’’𑀢𑀺𑀆𑀤𑀺. 𑀪𑀤𑁆𑀭𑀫𑀼𑀔𑀲𑀻𑀲𑁂𑀦 𑀯𑀺𑀝𑀝𑀼𑀪𑀁 𑀪𑀤𑁆𑀭𑁄𑀧𑀘𑀸𑀭𑁂𑀦 𑀉𑀧𑀘𑀭𑀢𑀻𑀢𑀺 𑀅𑀢𑁆𑀣𑁄, 𑀯𑀺𑀦𑀺𑀘𑁆𑀙𑀬𑁄 𑀓𑀭𑀻𑀬𑀢𑀺 𑀏𑀢𑁆𑀣𑀸𑀢𑀺 𑀅𑀟𑁆𑀟𑀓𑀭𑀡𑀁, 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀁. 𑀔𑀺𑀧𑁆𑀧𑀦𑁆𑀢𑀺 𑀓𑀽𑀝𑀁, 𑀫𑀘𑁆𑀙𑀔𑀺𑀧𑁆𑀧𑀦𑁆𑀢𑀺𑀧𑀺 𑀯𑀝𑁆𑀝𑀢𑀺. 𑀑𑀟𑁆𑀟𑀺𑀢𑀦𑁆𑀢𑀺 𑀑𑀟𑁆𑀟𑀦𑀯𑀲𑁂𑀦 𑀨𑀮𑀁 𑀧𑀸𑀧𑀺𑀢𑀁.

𑀅𑀟𑁆𑀟𑀓𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀫𑀮𑁆𑀮𑀺𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁯. ‘‘𑀓𑀲𑁆𑀫𑀸 𑀧𑀼𑀘𑁆𑀙𑀢𑀻’’𑀢𑀺? 𑀧𑀼𑀘𑁆𑀙𑀸𑀓𑀸𑀭𑀡𑀁 𑀘𑁄𑀤𑁂𑀢𑁆𑀯𑀸 𑀲𑀫𑀼𑀤𑀬𑀢𑁄 𑀧𑀝𑁆𑀞𑀸𑀬 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀁 𑀓𑀺𑀭 𑀫𑀮𑁆𑀮𑀺𑀓𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀫𑀸𑀮𑀸𑀭𑀸𑀫𑀁 𑀕𑀦𑁆𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀧𑀺𑀢𑀼 𑀫𑀸𑀮𑀸𑀭𑀸𑀫𑀁 𑀭𑀓𑁆𑀔𑀡𑀢𑁆𑀣𑀜𑁆𑀘𑁂𑀯 𑀅𑀯𑀲𑁂𑀲𑀧𑀼𑀧𑁆𑀨𑀕𑁆𑀕𑀳𑀡𑀢𑁆𑀣𑀜𑁆𑀘 𑀕𑀦𑁆𑀢𑁆𑀯𑀸. 𑀓𑀸𑀲𑀺𑀕𑀸𑀫𑁂𑀢𑀺 𑀓𑀸𑀲𑀺𑀭𑀝𑁆𑀞𑀲𑁆𑀲 𑀕𑀸𑀫𑁂. 𑀲𑁄 𑀓𑀺𑀭 𑀕𑀸𑀫𑁄 𑀫𑀳𑀸𑀓𑁄𑀲𑀮𑀭𑀸𑀚𑁂𑀦 𑀅𑀢𑁆𑀢𑀦𑁄 𑀥𑀻𑀢𑀼𑀬𑀸 𑀧𑀢𑀺𑀖𑀭𑀁 𑀕𑀘𑁆𑀙𑀦𑁆𑀢𑀺𑀬𑀸 𑀧𑀼𑀧𑁆𑀨𑀫𑀽𑀮𑀢𑁆𑀣𑀸𑀬 𑀤𑀺𑀦𑁆𑀦𑁄, 𑀢𑀁𑀦𑀺𑀫𑀺𑀢𑁆𑀢𑀁. 𑀪𑀸𑀕𑀺𑀦𑁂𑀬𑁆𑀬𑁂𑀦 𑀅𑀚𑀸𑀢𑀲𑀢𑁆𑀢𑀼𑀦𑀸. 𑀢𑀲𑁆𑀲𑀸𑀢𑀺 𑀭𑀜𑁆𑀜𑁄 𑀧𑀲𑁂𑀦𑀤𑀺𑀲𑁆𑀲. 𑀲𑀸𑀢𑀺 𑀫𑀮𑁆𑀮𑀺𑀓𑀸. 𑀦𑀺𑀯𑀢𑁆𑀢𑀺𑀢𑀼𑀦𑁆𑀢𑀺 𑀢𑀲𑁆𑀲𑀸 𑀥𑀫𑁆𑀫𑀢𑀸𑀬 𑀦𑀺𑀯𑀢𑁆𑀢𑀺𑀢𑀼𑀁 𑀢𑀲𑁆𑀲𑀸 𑀯𑀘𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑀼𑀁. 𑀦𑁂𑀯𑀚𑁆𑀛𑀕𑀸𑀢𑀺 𑀯𑀢𑁆𑀢𑀫𑀸𑀦𑀢𑁆𑀣𑁂 𑀅𑀢𑀻𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀦𑀸𑀥𑀺𑀕𑀘𑁆𑀙𑀢𑀻’’𑀢𑀺. 𑀧𑀼𑀣𑀼 𑀅𑀢𑁆𑀢𑀸𑀢𑀺 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀅𑀢𑁆𑀢𑀸.

𑀫𑀮𑁆𑀮𑀺𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀬𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁦. 𑀣𑀽𑀡𑀦𑁆𑀢𑀺 ¶ 𑀬𑀜𑁆𑀜𑀽𑀧𑀢𑁆𑀣𑀫𑁆𑀪𑀁. 𑀉𑀧𑀦𑀻𑀢𑀸𑀦𑀺 𑀬𑀜𑁆𑀜𑀁 𑀬𑀚𑀺𑀢𑀼𑀁 𑀆𑀭𑀫𑁆𑀪𑀸𑀬. 𑀏𑀢𑁆𑀢𑀸𑀯𑀢𑀸𑀢𑀺 ‘‘𑀇𑀥, 𑀪𑀦𑁆𑀢𑁂…𑀧𑁂… 𑀭𑀼𑀤𑀫𑀸𑀦𑀸 𑀧𑀭𑀺𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀻’’𑀢𑀺 𑀏𑀢𑁆𑀢𑀓𑁂𑀦 𑀧𑀸𑀞𑁂𑀦. 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺 ‘‘𑀦𑀁 𑀇𑀢𑁆𑀣𑀺𑀁 𑀮𑀪𑀺𑀲𑁆𑀲𑀸𑀫𑀺 𑀦𑀼 𑀔𑁄, 𑀦 𑀦𑀼 𑀔𑁄 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀘𑁆𑀙𑀬𑀁 𑀅𑀯𑀺𑀦𑁆𑀤𑀦𑁆𑀢𑁄 𑀦 𑀜𑀸𑀬𑀦𑁆𑀢𑁄. 𑀨𑁂𑀡𑀼𑀤𑁆𑀤𑁂𑀳𑀓𑀦𑁆𑀢𑀺 𑀬𑀣𑀸 𑀬𑀢𑁆𑀣 𑀓𑀼𑀣𑀺𑀢𑁂 𑀨𑁂𑀡𑀁 𑀉𑀤𑁆𑀤𑁂𑀳𑀢𑀺 𑀦 𑀉𑀧𑀥𑀻𑀬𑀢𑀺, 𑀏𑀯𑀁 𑀅𑀦𑁂𑀓𑀯𑀸𑀭𑀁 𑀨𑁂𑀡𑀁 𑀉𑀝𑁆𑀞𑀸𑀧𑁂𑀢𑁆𑀯𑀸. 𑀢𑀁 𑀤𑀺𑀯𑀲𑀦𑁆𑀢𑀺 𑀢𑀲𑁆𑀫𑀺𑀁 𑀭𑀜𑁆𑀜𑀸 𑀦𑀺𑀤𑁆𑀤𑀁 𑀅𑀮𑀪𑀺𑀢𑁆𑀯𑀸 𑀤𑀼𑀓𑁆𑀔𑀲𑁂𑀬𑁆𑀬𑀤𑀺𑀯𑀲𑁂. 𑀆𑀮𑁄𑀓𑀁 𑀑𑀮𑁄𑀓𑁂𑀢𑁆𑀯𑀸𑀢𑀺 𑀮𑁄𑀳𑀓𑀼𑀫𑁆𑀪𑀺𑀫𑀼𑀔𑀯𑀝𑁆𑀝𑀺𑀲𑀻𑀲𑁂 𑀧𑀢𑁆𑀢𑁂 𑀢𑀢𑁆𑀣 𑀫𑀳𑀦𑁆𑀢𑀁 𑀆𑀮𑁄𑀓𑀁 𑀑𑀮𑁄𑀓𑁂𑀢𑁆𑀯𑀸. 𑀅𑀢𑁆𑀢𑀸𑀦𑁄 𑀯𑀘𑀦𑀁 𑀭𑀜𑁆𑀜𑁄 𑀧𑀯𑀢𑁆𑀢𑀺𑀜𑀸𑀧𑀦𑀢𑁆𑀣𑀁. 𑀫𑀳𑀸𑀲𑀤𑁆𑀤𑁄 𑀉𑀤𑀧𑀸𑀤𑀺 ‘‘𑀏𑀯𑀭𑀽𑀧𑀁 𑀬𑀜𑁆𑀜𑀁 𑀭𑀸𑀚𑀸 𑀓𑀸𑀭𑀸𑀧𑁂𑀢𑀻’’𑀢𑀺. 𑀯𑀢𑁆𑀢𑀼𑀓𑀸𑀫𑁄 𑀅𑀳𑁄𑀲𑀺, 𑀯𑀢𑁆𑀢𑀼𑀜𑁆𑀘 𑀧𑀦 𑀅𑀯𑀺𑀲𑀳𑀦𑁆𑀢𑁄 ‘‘𑀲’’ 𑀇𑀢𑀺 𑀯𑀢𑁆𑀯𑀸 𑀮𑁄𑀳𑀓𑀼𑀫𑁆𑀪𑀺𑀬𑀁 𑀦𑀺𑀫𑀼𑀕𑁆𑀕𑁄. 𑀇𑀫𑀁 𑀕𑀸𑀣𑀁 𑀯𑀢𑁆𑀢𑀼𑀓𑀸𑀫𑁄 𑀅𑀳𑁄𑀲𑀻𑀢𑀺 𑀅𑀬𑀁 𑀧𑀦𑁂𑀢𑁆𑀣 𑀲𑀫𑁆𑀩𑀦𑁆𑀥𑁄. 𑀏𑀲 𑀦𑀬𑁄 𑀲𑁂𑀲𑀧𑀤𑀤𑁆𑀯𑀬𑁂𑀧𑀺. 𑀥𑀫𑁆𑀫𑀪𑁂𑀭𑀺𑀁 𑀘𑀭𑀸𑀧𑁂𑀲𑀼𑀁 ‘‘𑀓𑁄𑀘𑀺 ¶ 𑀓𑀜𑁆𑀘𑀺 𑀧𑀸𑀡𑀁 𑀫𑀸 𑀳𑀦𑀢𑀽’’𑀢𑀺. 𑀲𑁄 𑀇𑀢𑁆𑀣𑀺𑀲𑀸𑀫𑀺𑀓𑁄 𑀧𑀼𑀭𑀺𑀲𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺 𑀅𑀢𑁆𑀢𑀦𑁄 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀲𑀢𑁆𑀢𑀼 𑀘 𑀤𑁂𑀲𑀦𑀸𑀯𑀺𑀮𑀸𑀲𑀲𑀫𑁆𑀧𑀢𑁆𑀢𑀺𑀬𑀸, 𑀭𑀸𑀚𑀸 𑀧𑀦 𑀫𑀳𑀸𑀩𑁄𑀥𑀺𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑀢𑁆𑀢𑀸 𑀓𑀺𑀜𑁆𑀘𑀺 𑀯𑀺𑀲𑁂𑀲𑀁 𑀦𑀸𑀥𑀺𑀕𑀘𑁆𑀙𑀺.

𑀲𑀗𑁆𑀕𑀳𑀯𑀢𑁆𑀣𑀽𑀦𑀻𑀢𑀺 𑀮𑁄𑀓𑀲𑁆𑀲 𑀲𑀗𑁆𑀕𑀳𑀓𑀸𑀭𑀡𑀸𑀦𑀺. 𑀦𑀺𑀧𑁆𑀨𑀦𑁆𑀦𑀲𑀲𑁆𑀲𑀢𑁄 𑀦𑀯𑀪𑀸𑀕𑁂 𑀓𑀲𑁆𑀲𑀓𑀲𑁆𑀲 𑀤𑀢𑁆𑀯𑀸 𑀭𑀜𑁆𑀜𑀁 𑀏𑀓𑀪𑀸𑀕𑀕𑁆𑀕𑀳𑀡𑀁 𑀤𑀲𑀫𑀪𑀸𑀕𑀕𑁆𑀕𑀳𑀡𑀁. 𑀏𑀯𑀁 𑀓𑀲𑁆𑀲𑀓𑀸 𑀳𑀝𑁆𑀞𑀢𑀼𑀝𑁆𑀞𑀸 𑀲𑀲𑁆𑀲𑀸𑀦𑀺 𑀲𑀫𑁆𑀧𑀸𑀤𑁂𑀦𑁆𑀢𑀻𑀢𑀺 𑀆𑀳 ‘‘𑀲𑀲𑁆𑀲𑀲𑀫𑁆𑀧𑀸𑀤𑀦𑁂 𑀫𑁂𑀥𑀸𑀯𑀺𑀢𑀸𑀢𑀺 𑀅𑀢𑁆𑀣𑁄’’𑀢𑀺. 𑀢𑀢𑁄 𑀑𑀭𑀪𑀸𑀕𑁂 𑀓𑀺𑀭 𑀙𑀪𑀸𑀕𑀕𑁆𑀕𑀳𑀡𑀁 𑀚𑀸𑀢𑀁. 𑀙𑀫𑀸𑀲𑀺𑀓𑀦𑁆𑀢𑀺 𑀙𑀦𑁆𑀦𑀁 𑀙𑀦𑁆𑀦𑀁 𑀫𑀸𑀲𑀸𑀦𑀁 𑀧𑀳𑁄𑀦𑀓𑀁. 𑀧𑀸𑀲𑁂𑀢𑀻𑀢𑀺 𑀧𑀸𑀲𑀕𑀢𑁂 𑀯𑀺𑀬 𑀓𑀭𑁄𑀢𑀺. 𑀯𑀸𑀘𑀸𑀬 𑀧𑀺𑀬𑀲𑁆𑀲 𑀧𑀺𑀬𑀓𑀭𑀲𑁆𑀲 𑀓𑀫𑁆𑀫𑀁 𑀯𑀸𑀘𑀸𑀧𑁂𑀬𑁆𑀬𑀁. 𑀲𑀩𑁆𑀩𑀲𑁄 𑀭𑀝𑁆𑀞𑀲𑁆𑀲 𑀇𑀤𑁆𑀥𑀸𑀤𑀺𑀪𑀸𑀯𑀢𑁄 𑀔𑁂𑀫𑀁. 𑀦𑀺𑀭𑀩𑁆𑀩𑀼𑀤𑀁 𑀘𑁄𑀭𑀺𑀬𑀸𑀪𑀸𑀯𑀢𑁄. 𑀇𑀤𑀜𑁆𑀳𑀺 𑀭𑀝𑁆𑀞𑀁 𑀅𑀘𑁄𑀭𑀺𑀬𑀁 𑀦𑀺𑀭𑀕𑁆𑀕𑀴𑀦𑁆𑀢𑀺 𑀯𑀼𑀘𑁆𑀘𑀢𑀺 𑀅𑀧𑀸𑀭𑀼𑀢𑀖𑀭𑀪𑀸𑀯𑀢𑁄.

𑀉𑀤𑁆𑀥𑀁𑀫𑀽𑀮𑀓𑀁 𑀓𑀢𑁆𑀯𑀸𑀢𑀺 𑀉𑀫𑁆𑀫𑀽𑀮𑀁 𑀓𑀢𑁆𑀯𑀸. 𑀤𑁆𑀯𑀻𑀳𑀺 𑀧𑀭𑀺𑀬𑀜𑁆𑀜𑁂𑀳𑀻𑀢𑀺 𑀫𑀳𑀸𑀬𑀜𑁆𑀜𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀧𑀘𑁆𑀙𑀸 𑀘 𑀧𑀯𑀢𑁆𑀢𑁂𑀢𑀩𑁆𑀩𑁂𑀳𑀺 𑀤𑁆𑀯𑀻𑀳𑀺 𑀧𑀭𑀺𑀯𑀸𑀭𑀬𑀜𑁆𑀜𑁂𑀳𑀺. 𑀲𑀢𑁆𑀢𑀯𑀻𑀲𑀢𑀺…𑀧𑁂… 𑀦𑀲𑁆𑀲𑀸𑀢𑀺 𑀲𑀢𑁆𑀢𑀯𑀻𑀲𑀸𑀥𑀺𑀓𑀸𑀦𑀁 𑀢𑀺𑀡𑁆𑀡𑀁 𑀧𑀲𑀼𑀲𑀢𑀸𑀦𑀁 𑀤𑁆𑀯𑀸𑀯𑀻𑀲𑀢𑀺𑀬𑀸 𑀅𑀲𑁆𑀲𑀸𑀤𑀻𑀳𑀺 𑀘 𑀲𑀝𑁆𑀞𑀺𑀅𑀥𑀺𑀓𑀤𑁆𑀯𑀺𑀲𑀢𑀆𑀭𑀜𑁆𑀜𑀓𑀧𑀲𑀽𑀳𑀺 𑀘 𑀲𑀤𑁆𑀥𑀺𑀁 𑀲𑀫𑁆𑀧𑀺𑀡𑁆𑀟𑀺𑀢𑀸𑀦𑀁 𑀧𑀦 ¶ 𑀦𑀯𑀸𑀥𑀺𑀓𑀙𑀲𑀢𑀧𑀲𑀽𑀦𑀁 𑀫𑀸𑀭𑀡𑁂𑀦 𑀪𑁂𑀭𑀯𑀲𑁆𑀲 𑀧𑀸𑀧𑀪𑀻𑀭𑀼𑀓𑀸𑀦𑀁 𑀪𑀬𑀸𑀯𑀳𑀲𑁆𑀲. 𑀢𑀣𑀸 𑀳𑀺 𑀯𑀤𑀦𑁆𑀢𑀺 𑁋

‘‘𑀙𑀲𑀢𑀸𑀦𑀺 𑀦𑀺𑀬𑀼𑀚𑁆𑀚𑀦𑁆𑀢𑀺, 𑀧𑀲𑀽𑀦𑀁 𑀫𑀚𑁆𑀛𑀺𑀫𑁂 𑀳𑀦𑀺,

𑀅𑀲𑁆𑀲𑀫𑁂𑀥𑀲𑁆𑀲 𑀬𑀜𑁆𑀜𑀲𑁆𑀲, 𑀅𑀥𑀺𑀓𑀸𑀦𑀺 𑀦𑀯𑀸𑀧𑀺 𑀘𑀸’’𑀢𑀺.

𑀲𑀫𑁆𑀫𑀦𑁆𑀢𑀺 𑀬𑀼𑀕𑀘𑁆𑀙𑀺𑀤𑁆𑀤𑁂 𑀧𑀓𑁆𑀔𑀺𑀧𑀺𑀢𑀩𑁆𑀩𑀤𑀡𑁆𑀟𑀓𑀁. 𑀧𑀸𑀲𑁂𑀦𑁆𑀢𑀻𑀢𑀺 𑀔𑀺𑀧𑀦𑁆𑀢𑀺. 𑀲𑀁𑀳𑀸𑀭𑀺𑀫𑁂𑀳𑀻𑀢𑀺 𑀲𑀓𑀝𑁂𑀳𑀺 𑀯𑀳𑀺𑀢𑀩𑁆𑀩𑁂𑀳𑀺 𑀬𑀽𑀧𑁂𑀳𑀺. 𑀧𑀼𑀩𑁆𑀩𑁂 𑀓𑀺𑀭 𑀏𑀓𑁄 𑀭𑀸𑀚𑀸 𑀲𑀫𑁆𑀫𑀸𑀧𑀸𑀲𑀁 𑀬𑀚𑀦𑁆𑀢𑁄 𑀲𑀭𑀲𑁆𑀲𑀢𑀺𑀦𑀤𑀻𑀢𑀻𑀭𑁂 𑀧𑀣𑀯𑀺𑀬𑀸 𑀯𑀺𑀯𑀭𑁂 𑀤𑀺𑀦𑁆𑀦𑁂 𑀦𑀺𑀫𑀼𑀕𑁆𑀕𑁄𑀬𑁂𑀯 𑀅𑀳𑁄𑀲𑀺. 𑀅𑀦𑁆𑀥𑀩𑀸𑀮𑀩𑁆𑀭𑀸𑀳𑁆𑀫𑀡𑀸 𑀕𑀢𑀸𑀦𑀼𑀕𑀢𑀺𑀕𑀢𑀸 ‘‘𑀅𑀬𑀁 𑀢𑀲𑁆𑀲 𑀲𑀕𑁆𑀕𑀕𑀫𑀦𑀫𑀕𑁆𑀕𑁄’’𑀢𑀺 𑀲𑀜𑁆𑀜𑀸𑀬 𑀢𑀢𑁆𑀣 𑀲𑀫𑁆𑀫𑀸𑀧𑀸𑀲𑀬𑀜𑁆𑀜𑀁 𑀧𑀝𑁆𑀞𑀧𑁂𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀺𑀫𑀼𑀕𑁆𑀕𑁄𑀓𑀸𑀲𑀢𑁄 𑀧𑀪𑀼𑀢𑀻’’𑀢𑀺. 𑀅𑀬𑀽𑀧𑁄 𑀅𑀧𑁆𑀧𑀓𑀤𑀺𑀯𑀲𑁄 𑀬𑀸𑀕𑁄, 𑀲𑀬𑀽𑀧𑁄 𑀩𑀳𑀼𑀤𑀺𑀯𑀲𑀁 𑀲𑀸𑀥𑁂𑀬𑁆𑀬𑁄 𑀲𑀢𑁆𑀭𑀬𑀸𑀕𑁄. 𑀫𑀦𑁆𑀢𑀧𑀤𑀸𑀪𑀺𑀲𑀗𑁆𑀔𑀢𑀸𑀦𑀁 𑀲𑀧𑁆𑀧𑀺𑀫𑀥𑀽𑀦𑀁 𑀯𑀸𑀚𑀫𑀺𑀢𑀺 𑀲𑀫𑀜𑁆𑀜𑀸, 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀕𑁄𑀫𑀳𑀺𑀁 𑀲𑀸𑀤𑀺𑀲𑀢𑁆𑀢𑀭𑀲𑀓𑀤𑀓𑁆𑀔𑀺𑀡𑀲𑁆𑀲. 𑀲𑀸𑀭𑀕𑀩𑁆𑀪𑀓𑁄𑀝𑁆𑀞𑀸𑀕𑀸𑀭𑀸𑀤𑀻𑀲𑀼 𑀦𑀢𑁆𑀣𑁂𑀢𑁆𑀣 𑀅𑀕𑁆𑀕𑀴𑀦𑁆𑀢𑀺 𑀦𑀺𑀭𑀕𑁆𑀕𑀴𑁄. 𑀢𑀢𑁆𑀣 𑀓𑀺𑀭 𑀬𑀜𑁆𑀜𑁂 𑀅𑀢𑁆𑀢𑀦𑁄 𑀲𑀸𑀧𑀢𑁂𑀬𑁆𑀬𑀁 𑀅𑀦𑀯𑀲𑁂𑀲𑀢𑁄 𑀅𑀦𑀺𑀕𑀽𑀳𑀺𑀢𑁆𑀯𑀸 𑀦𑀺𑀬𑁆𑀬𑀸𑀢𑀻𑀬𑀢𑀺. 𑀫𑀳𑀸𑀭𑀫𑁆𑀪𑀸𑀢𑀺 𑀩𑀳𑀼𑀧𑀲𑀼𑀖𑀸𑀢𑀓𑀫𑁆𑀫𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀯𑀺𑀯𑀺𑀥𑀸 𑀬𑀢𑁆𑀣 𑀳𑀜𑁆𑀜𑀭𑁂’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 ‘‘𑀫𑀳𑀸𑀓𑀺𑀘𑁆𑀘𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀇𑀥 ‘‘𑀫𑀳𑀸𑀭𑀫𑁆𑀪𑀸𑀢𑀺 𑀧𑀧𑀜𑁆𑀘𑀯𑀲𑁂𑀦 𑀅𑀚𑁂𑀴𑀓𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 ‘‘𑀩𑀳𑀼𑀧𑀲𑀼𑀖𑀸𑀢𑀓𑀫𑁆𑀫𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀦𑀺𑀭𑀸𑀭𑀫𑁆𑀪𑀸𑀢𑀺 ¶ 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀦𑀼𑀕𑀢𑀁 𑀓𑀼𑀮𑀦𑁆𑀢𑀺 𑀅𑀦𑀼𑀓𑀼𑀮𑀁, 𑀓𑀼𑀮𑀸𑀦𑀼𑀕𑀢𑀦𑁆𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀬𑀁 𑀦𑀺𑀘𑁆𑀘𑀪𑀢𑁆𑀢𑀸𑀤𑀺…𑀧𑁂… 𑀅𑀢𑁆𑀣𑁄’’𑀢𑀺.

𑀬𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀩𑀦𑁆𑀥𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁧. 𑀇𑀤𑀦𑁆𑀢𑀺 ‘‘𑀇𑀥, 𑀪𑀦𑁆𑀢𑁂’’𑀢𑀺𑀆𑀤𑀺𑀓𑀁 𑀯𑀘𑀦𑀁. 𑀢𑁂 𑀪𑀺𑀓𑁆𑀔𑀽 𑀆𑀭𑁄𑀘𑁂𑀲𑀼𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀲𑀽𑀢𑀺 𑀢𑁂𑀲𑀼 𑀭𑀜𑁆𑀜𑀸 𑀩𑀦𑁆𑀥𑀸𑀧𑀺𑀢𑀫𑀦𑀼𑀲𑁆𑀲𑁂𑀲𑀼. 𑀲𑀼𑀓𑀢𑀓𑀸𑀭𑀡𑀦𑁆𑀢𑀺 𑀲𑀼𑀓𑀸𑀭𑀡𑀓𑀺𑀭𑀺𑀬𑀁 𑀆𑀭𑁄𑀘𑁂𑀲𑀼𑀁, 𑀦 𑀓𑁂𑀯𑀮𑀁 𑀢𑁂𑀲𑀁 𑀫𑀦𑀼𑀲𑁆𑀲𑀸𑀦𑀁 𑀩𑀦𑁆𑀥𑀸𑀧𑀺𑀢𑀪𑀸𑀯𑀁 ¶ . 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀭𑀜𑁆𑀜𑁄 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀯𑀗𑁆𑀓𑁄𑀢𑀺 𑀅𑀝𑁆𑀞𑀁𑀲𑁄. 𑀅𑀦𑁆𑀢𑁄𑀖𑀭𑀘𑀸𑀭𑀺𑀦𑁄𑀢𑀺 𑀅𑀦𑁆𑀢𑁂𑀧𑀼𑀭𑀯𑀸𑀲𑀺𑀦𑁄.

𑀉𑀓𑁆𑀓𑀝𑁆𑀞𑁂𑀢𑀺 𑀬𑀼𑀤𑁆𑀥𑁂. 𑀫𑀦𑁆𑀢𑀻𑀲𑀽𑀢𑀺 𑀕𑀼𑀢𑁆𑀢𑀫𑀦𑁆𑀢𑀻𑀲𑀼. 𑀅𑀓𑀼𑀢𑀽𑀳𑀮𑀦𑁆𑀢𑀺 𑀲𑀜𑁆𑀜𑀢𑀁. 𑀧𑀺𑀬𑀦𑁆𑀢𑀺 𑀧𑀺𑀬𑀸𑀬𑀺𑀢𑀩𑁆𑀩𑀁. 𑀅𑀦𑁆𑀦𑀧𑀸𑀦𑀫𑁆𑀳𑀺 𑀫𑀥𑀼𑀭𑁂 𑀅𑀪𑀼𑀢𑁆𑀢𑁂 𑀉𑀧𑁆𑀧𑀦𑁆𑀦𑁂. 𑀅𑀢𑁆𑀣𑁂𑀢𑀺 𑀅𑀢𑁆𑀣𑁂 𑀓𑀺𑀘𑁆𑀘𑁂 𑀚𑀸𑀢𑁂 𑀣𑀺𑀭𑀦𑁆𑀢𑀺 𑀦 𑀓𑀣𑁂𑀦𑁆𑀢𑀺 𑀓𑀸𑀬𑀩𑀮𑀫𑀢𑁆𑀢𑁂𑀦 𑀅𑀧𑀦𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀲𑀼𑀝𑁆𑀞𑀼 𑀭𑀢𑁆𑀢𑀭𑀢𑁆𑀢𑀸𑀢𑀺 𑀅𑀢𑀺𑀯𑀺𑀬 𑀭𑀢𑁆𑀢𑀸 𑀏𑀯 𑀳𑀼𑀢𑁆𑀯𑀸 𑀭𑀢𑁆𑀢𑀸. 𑀲𑀸𑀭𑀢𑁆𑀢𑁂𑀦𑀸𑀢𑀺 𑀲𑀸𑀭𑀪𑀸𑀯𑁂𑀦 𑀲𑀸𑀭𑀪𑀸𑀯𑀲𑀜𑁆𑀜𑀸𑀬. 𑀑𑀳𑀸𑀭𑀺𑀦𑀦𑁆𑀢𑀺 𑀳𑁂𑀝𑁆𑀞𑀸 𑀳𑀭𑀡𑀲𑀻𑀮𑀦𑁆𑀢𑀺 𑀆𑀳 ‘‘𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀆𑀓𑀟𑁆𑀠𑀦𑀓’’𑀦𑁆𑀢𑀺. 𑀲𑀺𑀣𑀺𑀮𑀦𑁆𑀢𑀺 𑀲𑀺𑀣𑀺𑀮𑀸𑀓𑀸𑀭𑀁, 𑀦 𑀧𑀦 𑀲𑀺𑀣𑀺𑀮𑀁. 𑀢𑁂𑀦𑀸𑀳 𑀪𑀕𑀯𑀸 ‘‘𑀤𑀼𑀧𑁆𑀧𑀫𑀼𑀜𑁆𑀘’’𑀦𑁆𑀢𑀺.

𑀩𑀦𑁆𑀥𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀲𑀢𑁆𑀢𑀚𑀝𑀺𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁨. 𑀧𑀼𑀩𑁆𑀩𑀸𑀭𑀸𑀫𑀲𑀗𑁆𑀔𑀸𑀢𑁂𑀢𑀺 𑀲𑀸𑀯𑀢𑁆𑀣𑀺𑀦𑀕𑀭𑀲𑁆𑀲 𑀧𑀼𑀩𑁆𑀩𑀤𑀺𑀲𑀸𑀬 𑀓𑀢𑀢𑁆𑀢𑀸 𑀧𑀼𑀩𑁆𑀩𑀸𑀭𑀸𑀫𑁂𑀢𑀺 𑀲𑀗𑁆𑀔𑀁 𑀕𑀢𑁂. 𑀢𑀢𑁆𑀭𑀸𑀢𑀺 ‘‘𑀫𑀺𑀕𑀸𑀭𑀫𑀸𑀢𑀼𑀬𑀸 𑀧𑀸𑀲𑀸𑀤𑁂’’𑀢𑀺 𑀢𑀲𑁆𑀫𑀺𑀁 𑀲𑀁𑀔𑀺𑀢𑁆𑀢𑀯𑀘𑀦𑁂. 𑀅𑀬𑀁 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀦𑀼𑀓𑁆𑀓𑀫𑀓𑀣𑀸. 𑀧𑀢𑁆𑀣𑀦𑀁 𑀅𑀓𑀸𑀲𑀺 𑀢𑀲𑁆𑀲 𑀪𑀕𑀯𑀢𑁄 𑀅𑀕𑁆𑀕𑀼𑀧𑀝𑁆𑀞𑀸𑀬𑀺𑀓𑀁 𑀏𑀓𑀁 𑀉𑀧𑀸𑀲𑀺𑀓𑀁 𑀤𑀺𑀲𑁆𑀯𑀸 𑀢𑀁 𑀞𑀸𑀦𑀦𑁆𑀢𑀭𑀁 𑀆𑀓𑀗𑁆𑀔𑀦𑁆𑀢𑀻. 𑀫𑁂𑀡𑁆𑀟𑀓𑀧𑀼𑀢𑁆𑀢𑀲𑁆𑀲𑀸𑀢𑀺 𑀫𑁂𑀡𑁆𑀟𑀓𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲. 𑀫𑀸𑀢𑀺𑀝𑁆𑀞𑀸𑀦𑁂 ¶ 𑀞𑀧𑁂𑀲𑀺 𑀢𑀲𑁆𑀲𑀸 𑀉𑀧𑀓𑀸𑀭𑀁 𑀕𑀭𑀼𑀪𑀸𑀯𑀜𑁆𑀘 𑀤𑀺𑀲𑁆𑀯𑀸. 𑀢𑀸𑀬 𑀓𑀸𑀭𑀺𑀢𑁂 𑀧𑀸𑀲𑀸𑀤𑁂𑀢𑀺 𑀢𑀸𑀬 𑀫𑀳𑀸𑀉𑀧𑀸𑀲𑀺𑀓𑀸𑀬 𑀫𑀳𑀸𑀮𑀢𑀸𑀧𑀲𑀸𑀥𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀦𑀯𑀳𑀺 𑀓𑁄𑀝𑀻𑀳𑀺 𑀓𑀭𑀻𑀲𑀫𑀢𑁆𑀢𑁂 𑀪𑀽𑀫𑀺𑀪𑀸𑀕𑁂 𑀓𑀸𑀭𑀺𑀢𑁂 𑀲𑀳𑀲𑁆𑀲𑀕𑀩𑁆𑀪𑀧𑀝𑀺𑀫𑀡𑁆𑀟𑀺𑀢𑁂 𑀧𑀸𑀲𑀸𑀤𑁂.

𑀧𑀭𑀽𑀴𑁆𑀳𑀓𑀘𑁆𑀙𑀸𑀢𑀺 𑀧𑀭𑀽𑀴𑁆𑀳𑀓𑀘𑁆𑀙𑀮𑁄𑀫𑀸. 𑀓𑀫𑀡𑁆𑀟𑀮𑀼𑀖𑀝𑀺𑀓𑀸𑀤𑀺𑀁 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑀁. 𑀦𑀕𑁆𑀕𑀪𑁄𑀕𑁆𑀕𑀦𑀺𑀲𑁆𑀲𑀺𑀭𑀺𑀓𑀸𑀦𑀦𑁆𑀢𑀺 𑀦𑀕𑁆𑀕𑀸𑀦𑀜𑁆𑀘𑁂𑀯 𑀪𑁄𑀕𑁆𑀕𑀸𑀦𑀜𑁆𑀘 𑀦𑀺𑀲𑁆𑀲𑀺𑀭𑀺𑀓𑀸𑀦𑀜𑁆𑀘. 𑀢𑁂 𑀳𑀺 𑀅𑀦𑀺𑀯𑀢𑁆𑀣𑀯𑀢𑁆𑀣𑀢𑀸𑀬 𑀦𑀕𑁆𑀕𑀸 𑀘𑁂𑀯, 𑀅𑀘𑁂𑀮𑀓𑀯𑀢𑀸𑀤𑀺𑀦𑀸 𑀪𑁄𑀕𑁆𑀕𑀲𑀭𑀻𑀭𑀢𑀸𑀬 𑀪𑁄𑀕𑁆𑀕𑀸, 𑀲𑁄𑀪𑀸𑀭𑀳𑀺𑀢𑀢𑀸𑀬 𑀦𑀺𑀲𑁆𑀲𑀺𑀭𑀺𑀓𑀸 𑀘. 𑀅𑀢𑁆𑀢𑀦𑀸 𑀤𑀺𑀝𑁆𑀞𑀲𑀼𑀢𑀁 ¶ 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀦 𑀓𑀣𑁂𑀬𑁆𑀬𑀼𑀦𑁆𑀢𑀺 𑀅𑀓𑀸𑀭𑀡𑀫𑁂𑀢𑀁 𑀢𑁂𑀲𑀁 𑀭𑀜𑁆𑀜𑀸 𑀧𑀬𑀼𑀢𑁆𑀢𑀘𑀭𑀧𑀼𑀭𑀺𑀲𑀪𑀸𑀯𑀢𑁄. 𑀏𑀯𑀁 𑀓𑀢𑁂 𑀧𑀦 𑀢𑁂 ‘‘𑀅𑀜𑁆𑀜𑁂𑀧𑀺 𑀧𑀩𑁆𑀩𑀚𑀺𑀢𑀸 𑀅𑀢𑁆𑀣𑀻𑀢𑀺 𑀅𑀬𑀁 𑀚𑀸𑀦𑀸𑀢𑀻’’𑀢𑀺 𑀫𑀜𑁆𑀜𑁂𑀬𑁆𑀬𑀼𑀦𑁆𑀢𑀺 𑀓𑁄𑀳𑀜𑁆𑀜𑀘𑀺𑀢𑁆𑀢𑁄 𑀏𑀯𑀁 𑀅𑀓𑀸𑀲𑀻𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀢𑀣𑀸 𑀳𑀺 𑀢𑁂𑀦𑀢𑁆𑀣𑁂𑀦 𑀅𑀧𑀭𑀺𑀢𑁄𑀲𑀫𑀸𑀦𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳.

𑀓𑀸𑀲𑀺𑀓𑀘𑀦𑁆𑀤𑀦𑀦𑁆𑀢𑀺 𑀉𑀚𑁆𑀚𑀮𑀘𑀦𑁆𑀤𑀦𑀁. 𑀢𑀁 𑀓𑀺𑀭 𑀯𑀡𑁆𑀡𑀯𑀲𑁂𑀦 𑀲𑀫𑀼𑀚𑁆𑀚𑀮𑀁 𑀳𑁄𑀢𑀺 𑀧𑀪𑀲𑁆𑀲𑀭𑀁, 𑀢𑀤𑀢𑁆𑀣𑀫𑁂𑀯 𑀦𑀁 𑀲𑀡𑁆𑀳𑀢𑀭𑀁 𑀓𑀭𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀓𑀸𑀲𑀺𑀓𑀘𑀦𑁆𑀤𑀦𑀦𑁆𑀢𑀺 𑀲𑀡𑁆𑀳𑀘𑀦𑁆𑀤𑀦’’𑀦𑁆𑀢𑀺. 𑀯𑀡𑁆𑀡𑀕𑀦𑁆𑀥𑀢𑁆𑀣𑀸𑀬𑀸𑀢𑀺 𑀯𑀡𑁆𑀡𑀲𑁄𑀪𑀢𑁆𑀣𑀜𑁆𑀘𑁂𑀯 𑀲𑀼𑀕𑀦𑁆𑀥𑀪𑀸𑀯𑀢𑁆𑀣𑀜𑁆𑀘. 𑀯𑀡𑁆𑀡𑀕𑀦𑁆𑀥𑀢𑁆𑀣𑀸𑀬𑀸𑀢𑀺 𑀙𑀯𑀺𑀭𑀸𑀕𑀓𑀭𑀡𑀢𑁆𑀣𑀜𑁆𑀘𑁂𑀯 𑀲𑀼𑀕𑀦𑁆𑀥𑀢𑁆𑀣𑀸𑀬 𑀘. ‘‘𑀕𑀺𑀳𑀺𑀦𑀸’’𑀢𑀺𑀆𑀤𑀻𑀳𑀺 𑀧𑀤𑁂𑀳𑀺 𑀏𑀯𑀁 𑀧𑀫𑀸𑀤𑀯𑀺𑀳𑀸𑀭𑀺𑀦𑀸 𑀢𑀬𑀸 𑀅𑀭𑀳𑀦𑁆𑀢𑁄 𑀤𑀼𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀤𑀲𑁆𑀲𑁂𑀢𑀺.

𑀲𑀁𑀯𑀸𑀲𑁄 𑀦𑀸𑀫 𑀇𑀥 𑀓𑀸𑀮𑁂𑀦 𑀉𑀧𑀲𑀗𑁆𑀓𑀫𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀧𑀲𑀗𑁆𑀓𑀫𑀦𑁆𑀢𑁂𑀦𑀸’’𑀢𑀺 𑀆𑀳. 𑀓𑀸𑀬𑀯𑀸𑀘𑀸𑀳𑀺 𑀅𑀲𑀁𑀬𑀢𑁂𑀦𑀧𑀺 𑀲𑀁𑀬𑀢𑀸𑀓𑀸𑀭𑁄, 𑀅𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁂𑀦𑀧𑀺 𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑀸𑀓𑀸𑀭𑁄. 𑀧𑀭𑀺𑀕𑁆𑀕𑀳𑁂𑀲𑁆𑀲𑀸𑀫𑀻𑀢𑀺 𑀯𑀻𑀫𑀁𑀲𑀺𑀲𑁆𑀲𑀸𑀫𑀺 ‘‘𑀧𑀭𑀺𑀲𑀼𑀤𑁆𑀥𑀁 𑀦𑀼 𑀔𑁄, 𑀦𑁄’’𑀢𑀺. 𑀲𑀧𑁆𑀧𑀜𑁆𑀜𑁂𑀦𑀸𑀢𑀺 𑀲𑀻𑀮𑀧𑀭𑀺𑀕𑁆𑀕𑀡𑁆𑀳𑀦𑀧𑀜𑁆𑀜𑀸𑀬 𑀲𑀧𑁆𑀧𑀜𑁆𑀜𑁂𑀦. 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀲𑀪𑀸𑀯𑀲𑁆𑀲 𑀲𑀢𑁄 𑀲𑀻𑀮𑀲𑁆𑀲 𑀅𑀦𑀼𑀧𑀥𑀸𑀭𑀡𑀢𑁄.

𑀓𑀣𑀦𑁂𑀦𑀸𑀢𑀺 𑀅𑀧𑀭𑀸𑀧𑀭𑀁 𑀓𑀣𑀦𑁂𑀦. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀏𑀓𑀘𑁆𑀘𑀲𑁆𑀲 𑀳𑀻’’𑀢𑀺𑀆𑀤𑀺. 𑀅𑀭𑀺𑀬𑀯𑁄𑀳𑀸𑀭𑁄𑀢𑀺 𑀤𑀺𑀝𑁆𑀞𑀸𑀤𑀺𑀮𑀓𑁆𑀔𑀡𑁂𑀦 𑀯𑁄𑀳𑀭𑀺𑀢𑁄 ‘‘𑀤𑀺𑀝𑁆𑀞𑀁 𑀅𑀤𑀺𑀝𑁆𑀞’’𑀦𑁆𑀢𑀺𑀆𑀤𑀺𑀦𑀸 𑀧𑀯𑀼𑀢𑁆𑀢𑀲𑀤𑁆𑀤𑀯𑁄𑀳𑀸𑀭𑁄. 𑀢𑀲𑁆𑀲 𑀧𑀦 𑀓𑀸𑀭𑀡𑀫𑁂𑀯 𑀕𑀡𑁆𑀳𑀦𑁆𑀢𑁄 ‘‘𑀏𑀢𑁆𑀣 𑀘𑁂𑀢𑀦𑀸’’𑀢𑀺 𑀆𑀳. 𑀏𑀲 𑀦𑀬𑁄 𑀅𑀦𑀭𑀺𑀬𑀯𑁄𑀳𑀸𑀭𑁂𑀧𑀺. 𑀧𑀭𑀫𑀢𑁆𑀣𑀢𑁄 𑀳𑀺 𑀲𑀘𑁆𑀘𑀯𑀸𑀘𑀸𑀤𑀬𑁄 𑀫𑀼𑀲𑀸𑀯𑀸𑀤𑀸𑀤𑀬𑁄 𑀘𑁂𑀢𑀦𑀸𑀮𑀓𑁆𑀔𑀡𑀸𑀢𑀺. 𑀧𑀜𑁆𑀜𑀢𑁆𑀢𑀺𑀯𑁄𑀳𑀸𑀭𑁄 𑀢𑀣𑀸 𑀢𑀣𑀸 𑀯𑁄𑀳𑀭𑀺𑀢𑀩𑁆𑀩𑀢𑁄 𑀏𑀯𑀫𑀸𑀳 ‘‘𑀲𑀁𑀯𑁄𑀳𑀸𑀭𑁂𑀦 𑀔𑁄, 𑀫𑀳𑀸𑀭𑀸𑀚, 𑀲𑁄𑀘𑁂𑀬𑁆𑀬𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺.

𑀜𑀸𑀡𑀣𑀸𑀫𑁄𑀢𑀺 𑀜𑀸𑀡𑀕𑀼𑀡𑀩𑀮𑀁, 𑀬𑁂𑀦 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀝𑀺𑀪𑀸𑀦𑀸𑀤𑀺𑀦𑀸 𑀅𑀘𑁆𑀘𑀸𑀬𑀺𑀓𑀓𑀺𑀘𑁆𑀘𑀓𑀭𑀡𑀻𑀬𑀸𑀦𑀺 𑀦𑀺𑀝𑁆𑀞𑀸𑀧𑁂𑀢𑀺. 𑀲𑀁𑀓𑀣𑀸𑀬𑀸𑀢𑀺 𑀅𑀢𑁆𑀣𑀯𑀻𑀫𑀁𑀲𑀦𑀯𑀲𑁂𑀦 𑀧𑀯𑀢𑁆𑀢𑀸𑀬 𑀲𑀫𑁆𑀫𑀸𑀓𑀣𑀸𑀬. 𑀉𑀧𑁆𑀧𑀺𑀮𑀯𑀢𑀺 𑀮𑀳𑀼𑀓𑀪𑀸𑀯𑀢𑁄. 𑀳𑁂𑀝𑁆𑀞𑀸𑀘𑀭𑀓𑀸𑀢𑀺 ¶ 𑀅𑀯𑀘𑀭𑀓𑀸. 𑀬𑁂 𑀅𑀦𑀼𑀧𑀯𑀺𑀲𑀺𑀢𑁆𑀯𑀸 𑀧𑀭𑁂𑀲𑀁 𑀭𑀳𑀲𑁆𑀲𑀯𑀻𑀫𑀁𑀲𑀦𑀯𑀲𑁂𑀦 𑀧𑀯𑀢𑁆𑀢𑀸, 𑀢𑁂𑀲𑀼 𑀑𑀘𑀭𑀓𑀯𑁄𑀳𑀸𑀭𑁄𑀢𑀺 𑀯𑀼𑀢𑁆𑀢𑀁 ‘‘𑀘𑀭𑀸 𑀳𑀻’’𑀢𑀺𑀆𑀤𑀺.

𑀯𑀡𑁆𑀡𑀲𑀡𑁆𑀞𑀸𑀦𑁂𑀦𑀸𑀢𑀺 𑀯𑀡𑁆𑀡𑁂𑀦 𑀯𑀸 𑀲𑀡𑁆𑀞𑀸𑀦𑁂𑀦 𑀯𑀸 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬 𑀯𑀸 𑀲𑀡𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀬𑀸 𑀯𑀸. 𑀲𑀼𑀚𑀸𑀦𑁄 𑀧𑁂𑀲𑀮𑁄 𑀯𑀺𑀲𑁆𑀲𑀲𑁂𑀢𑀺 𑀬𑁄𑀚𑀦𑀸. 𑀮𑀳𑀼𑀓𑀤𑀲𑁆𑀲𑀦𑁂𑀦𑀸𑀢𑀺 ¶ 𑀧𑀭𑀺𑀢𑁆𑀢𑀤𑀲𑁆𑀲𑀦𑁂𑀦 𑀯𑀺𑀚𑁆𑀚𑀼𑀓𑁂𑀦 𑀯𑀺𑀬. 𑀧𑀭𑀺𑀓𑁆𑀔𑀸𑀭𑀪𑀡𑁆𑀟𑀓𑁂𑀦𑀸𑀢𑀺 𑀧𑀩𑁆𑀩𑀚𑀺𑀢𑀧𑀭𑀺𑀓𑁆𑀔𑀸𑀭𑀪𑀽𑀢𑁂𑀦 𑀪𑀡𑁆𑀟𑀓𑁂𑀦. 𑀮𑁄𑀳𑀟𑁆𑀠𑀫𑀸𑀲𑁄𑀢𑀺 𑀮𑁄𑀳𑀫𑀬𑁄 𑀉𑀧𑀟𑁆𑀠𑀕𑁆𑀖𑀦𑀓𑀫𑀸𑀲𑁄.

𑀲𑀢𑁆𑀢𑀚𑀝𑀺𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀜𑁆𑀘𑀭𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁩. 𑀭𑀽𑀧𑀸𑀢𑀺 𑀭𑀽𑀧𑀲𑀗𑁆𑀔𑀸𑀢𑀸 𑀓𑀸𑀫𑀕𑀼𑀡𑀸. 𑀢𑁂 𑀧𑀦 𑀦𑀻𑀮𑀸𑀤𑀺𑀯𑀲𑁂𑀦 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀸𑀧𑀺 𑀭𑀽𑀧𑀸𑀬𑀢𑀦𑀢𑁆𑀢𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀢𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺 𑀆𑀳 ‘‘𑀦𑀻𑀮𑀧𑀻𑀢𑀸𑀤𑀺𑀪𑁂𑀤𑀁 𑀭𑀽𑀧𑀸𑀭𑀫𑁆𑀫𑀡’’𑀦𑁆𑀢𑀺. 𑀢𑁄-𑀲𑀤𑁆𑀤𑁄𑀧𑀺 𑀤𑀸-𑀲𑀤𑁆𑀤𑁄 𑀯𑀺𑀬 𑀓𑀸𑀮𑀢𑁆𑀣𑁄 𑀳𑁄𑀢𑀻𑀢𑀺 𑀆𑀳 ‘‘𑀬𑀢𑁄𑀢𑀺 𑀬𑀤𑀸’’𑀢𑀺. 𑀫𑀦𑀁 𑀆𑀧𑀬𑀢𑀺 𑀯𑀟𑁆𑀠𑁂𑀢𑀻𑀢𑀺 𑀫𑀦𑀸𑀧𑀁, 𑀫𑀦𑁄𑀭𑀫𑀁. 𑀫𑀦𑀸𑀧𑀦𑀺𑀧𑁆𑀨𑀢𑁆𑀢𑀺𑀢𑀦𑁆𑀢𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀫𑀦𑀲𑀸 𑀧𑀺𑀬𑀸𑀬𑀺𑀢𑀁, 𑀢𑀲𑁆𑀲 𑀅𑀕𑁆𑀕𑀪𑀸𑀯𑁂𑀦 𑀧𑀭𑀺𑀬𑀦𑁆𑀢𑀁 𑀧𑀭𑀫𑀁 𑀓𑁄𑀝𑀺𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀕𑁆𑀕𑀮𑀫𑀦𑀸𑀧𑀦𑁆𑀢𑀺 𑀆𑀭𑀫𑁆𑀫𑀡𑀲𑀪𑀸𑀯𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀫𑀦𑀸𑀧𑀪𑀸𑀯𑁂𑀦𑁂𑀯 𑀇𑀝𑁆𑀞𑀢𑀸𑀬 𑀇𑀝𑁆𑀞𑀦𑁆𑀢𑀺. 𑀲𑀫𑁆𑀫𑀼𑀢𑀻𑀢𑀺 𑀲𑀫𑀜𑁆𑀜𑀸. 𑀧𑀼𑀕𑁆𑀕𑀮𑀫𑀦𑀸𑀧𑀁 𑀦𑀸𑀫 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑀺𑀧𑀭𑀻𑀢𑀫𑁆𑀧𑀺 𑀕𑀡𑁆𑀳𑀸𑀢𑀺 𑀇𑀢𑀭𑀲𑀪𑀸𑀯𑀢𑁄𑀢𑀺 𑀆𑀳 ‘‘𑀬𑀁 𑀏𑀓𑀲𑁆𑀲…𑀧𑁂… 𑀇𑀝𑁆𑀞𑀁 𑀓𑀦𑁆𑀢’’𑀦𑁆𑀢𑀺. 𑀇𑀤𑀸𑀦𑀺 𑀢𑀁 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀯𑀲𑁂𑀦 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀘𑁆𑀘𑀦𑁆𑀢𑀯𑀸𑀲𑀻𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀇𑀤𑀁 𑀧𑀼𑀕𑁆𑀕𑀮𑀫𑀦𑀸𑀧𑀦𑁆𑀢𑀺 𑀇𑀤𑀁 𑀬𑀣𑀸𑀯𑀼𑀢𑁆𑀢𑀁 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀁 𑀯𑀺𑀬 𑀅𑀜𑁆𑀜𑀫𑁆𑀧𑀺 𑀏𑀯𑀁𑀚𑀸𑀢𑀺𑀓𑀁 𑀢𑁂𑀦 𑀢𑁂𑀦 𑀧𑀼𑀕𑁆𑀕𑀮𑁂𑀦 𑀫𑀦𑀸𑀧𑀦𑁆𑀢𑀺 𑀕𑀳𑁂𑀢𑀩𑁆𑀩𑀸𑀭𑀫𑁆𑀫𑀡𑀁 𑀧𑀼𑀕𑁆𑀕𑀮𑀫𑀦𑀸𑀧𑀁 𑀦𑀸𑀫.

𑀮𑁄𑀓𑁂 𑀧𑀝𑀺𑀯𑀺𑀪𑀢𑁆𑀢𑀁 𑀦𑀢𑁆𑀣𑀺, 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀦𑁂𑀦 𑀮𑁄𑀓𑁂𑀦 𑀫𑀥𑀼𑀭𑀚𑀸𑀢𑁂𑀦𑀧𑀺 𑀧𑀝𑀺𑀯𑀺𑀪𑀢𑁆𑀢𑀁 𑀓𑀢𑁆𑀯𑀸 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀯𑀺𑀪𑀚𑀺𑀢𑁆𑀯𑀸 𑀧𑀦 𑀤𑀲𑁆𑀲𑁂𑀢𑀩𑁆𑀩’’𑀦𑁆𑀢𑀺. 𑀤𑀺𑀩𑁆𑀩𑀓𑀧𑁆𑀧𑀫𑁆𑀧𑀻𑀢𑀺 𑀤𑁂𑀯𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑀲𑀤𑀺𑀲𑀫𑁆𑀧𑀺 𑀅𑀫𑀦𑀸𑀧𑀁 𑀉𑀧𑀝𑁆𑀞𑀸𑀢𑀺 𑀉𑀴𑀸𑀭𑀧𑀡𑀻𑀢𑀸𑀭𑀫𑁆𑀫𑀡𑀧𑀭𑀺𑀘𑀬𑀢𑁄. 𑀫𑀚𑁆𑀛𑀺𑀫𑀸𑀦𑀁 𑀧𑀦…𑀧𑁂… 𑀯𑀺𑀪𑀚𑀺𑀢𑀩𑁆𑀩𑀁 𑀢𑁂𑀲𑀁 𑀫𑀦𑀸𑀧𑀲𑁆𑀲 𑀫𑀦𑀸𑀧𑀢𑁄, 𑀅𑀫𑀦𑀸𑀧𑀲𑁆𑀲 𑀅𑀫𑀦𑀸𑀧𑀢𑁄 𑀉𑀧𑀝𑁆𑀞𑀸𑀦𑀢𑁄. 𑀢𑀢𑁆𑀣𑀧𑀺 𑀇𑀝𑁆𑀞𑀸𑀦𑀺𑀝𑁆𑀞𑀧𑀭𑀺𑀘𑁆𑀙𑁂𑀤𑁄 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀜𑁆𑀘 𑀧𑀦𑁂𑀢’’𑀦𑁆𑀢𑀺𑀆𑀤𑀺. 𑀢𑀜𑁆𑀘 𑀧𑀦𑁂𑀢𑀁 𑀇𑀝𑁆𑀞𑀸𑀦𑀺𑀝𑁆𑀞𑀪𑀽𑀢𑀁 𑀆𑀭𑀫𑁆𑀫𑀡𑀁 𑀓𑀸𑀫𑀸𑀯𑀘𑀭𑀚𑀯𑀦𑁂𑀲𑀼 𑀅𑀓𑀼𑀲𑀮𑀲𑁆𑀲 𑀯𑀲𑁂𑀦 𑀬𑁂𑀪𑀼𑀬𑁆𑀬𑁂𑀦 ¶ 𑀧𑀯𑀢𑁆𑀢𑀢𑀻𑀢𑀺 𑀓𑀢𑁆𑀯𑀸 𑀢𑀢𑁆𑀣 ‘‘𑀭𑀚𑁆𑀚𑀢𑀺 𑀤𑀼𑀲𑁆𑀲𑀢𑀻’’𑀢𑀺 𑀅𑀓𑀼𑀲𑀮𑀲𑁆𑀲𑁂𑀯 𑀧𑀯𑀢𑁆𑀢𑀺 𑀤𑀲𑁆𑀲𑀺𑀢𑀸. 𑀲𑁂𑀲𑀓𑀸𑀫𑀸𑀯𑀘𑀭𑀲𑁆𑀲𑀧𑀺 𑀯𑀲𑁂𑀦 𑀧𑀯𑀢𑁆𑀢𑀺 𑀮𑀩𑁆𑀪𑀢𑁂𑀯. 𑀢𑀣𑀸 𑀳𑀺 𑀢𑀁 𑀅𑀧𑁆𑀧𑀝𑀺𑀓𑀽𑀮𑁂𑀧𑀺 𑀧𑀝𑀺𑀓𑀽𑀮𑀸𑀓𑀸𑀭𑀢𑁄, 𑀧𑀝𑀺𑀓𑀽𑀮𑁂𑀧𑀺 ¶ 𑀅𑀧𑁆𑀧𑀝𑀺𑀓𑀽𑀮𑀸𑀓𑀸𑀭𑀢𑁄 𑀧𑀯𑀢𑁆𑀢𑀢𑀻𑀢𑀺. 𑀯𑀺𑀧𑀸𑀓𑀘𑀺𑀢𑁆𑀢𑀁 𑀇𑀝𑁆𑀞𑀸𑀦𑀺𑀝𑁆𑀞𑀁 𑀧𑀭𑀺𑀘𑁆𑀙𑀺𑀦𑁆𑀤𑀢𑀺, 𑀦 𑀲𑀓𑁆𑀓𑀸 𑀯𑀺𑀧𑀸𑀓𑀁 𑀯𑀜𑁆𑀘𑁂𑀢𑀼𑀦𑁆𑀢𑀺. 𑀓𑀼𑀲𑀮𑀓𑀫𑁆𑀫𑀁 𑀳𑀺 𑀏𑀓𑀦𑁆𑀢𑀢𑁄 𑀇𑀝𑁆𑀞𑀫𑁂𑀯, 𑀅𑀓𑀼𑀲𑀮𑀓𑀫𑁆𑀫𑀜𑁆𑀘 𑀅𑀦𑀺𑀝𑁆𑀞𑀫𑁂𑀯, 𑀢𑀲𑁆𑀫𑀸 𑀢𑀢𑁆𑀣 𑀉𑀧𑁆𑀧𑀚𑁆𑀚𑀫𑀸𑀦𑀁 𑀯𑀺𑀧𑀸𑀓𑀘𑀺𑀢𑁆𑀢𑀁 𑀬𑀣𑀸𑀲𑀪𑀸𑀯𑀢𑁄 𑀧𑀯𑀢𑁆𑀢𑀢𑀻𑀢𑀺.

𑀬𑀁 𑀧𑀦 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 ‘‘𑀓𑀼𑀲𑀮𑀓𑀫𑁆𑀫𑀚𑀁 𑀅𑀦𑀺𑀝𑁆𑀞𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀢𑀁 𑀧𑀦 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀢𑁂𑀦 𑀲𑁄𑀪𑀦𑀁 𑀅𑀓𑀼𑀲𑀮𑀓𑀫𑁆𑀫𑀚𑀫𑁆𑀧𑀺 𑀏𑀓𑀘𑁆𑀘𑀸𑀦𑀁 𑀲𑀢𑁆𑀢𑀸𑀦𑀁 𑀇𑀝𑁆𑀞𑀦𑁆𑀢𑀺 𑀅𑀦𑀼𑀜𑁆𑀜𑀸𑀢𑀁 𑀲𑀺𑀬𑀸. 𑀓𑀼𑀲𑀮𑀓𑀫𑁆𑀫𑀚𑀁 𑀧𑀦 𑀲𑀩𑁆𑀩𑁂𑀲𑀁 𑀇𑀝𑁆𑀞𑀫𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀓𑁂𑀲𑀜𑁆𑀘𑀺 𑀫𑀦𑀼𑀲𑁆𑀲𑀭𑀽𑀧𑀁 𑀅𑀫𑀦𑀸𑀧𑀁, 𑀬𑀢𑁄 𑀢𑁂 𑀤𑀺𑀲𑁆𑀯𑀸𑀯 𑀧𑀮𑀸𑀬𑀦𑁆𑀢𑀺. 𑀫𑀦𑀼𑀲𑁆𑀲𑀸 𑀘 𑀤𑁂𑀯𑀢𑀸𑀦𑀁 𑀭𑀽𑀧𑀁 𑀤𑀺𑀲𑁆𑀯𑀸 𑀪𑀸𑀬𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁 𑀢𑀁 𑀭𑀽𑀧𑀁 𑀆𑀭𑀩𑁆𑀪 𑀓𑀼𑀲𑀮𑀯𑀺𑀧𑀸𑀓𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀤𑀺𑀲𑀲𑁆𑀲 𑀧𑀦 𑀧𑀼𑀜𑁆𑀜𑀲𑁆𑀲 𑀅𑀪𑀸𑀯𑀸 𑀦 𑀢𑁂𑀲𑀁 𑀢𑀢𑁆𑀣 𑀅𑀪𑀺𑀭𑀢𑀺 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀼𑀲𑀮𑀓𑀫𑁆𑀫𑀚𑀲𑁆𑀲 𑀧𑀦 𑀅𑀦𑀺𑀝𑁆𑀞𑀲𑁆𑀲 𑀅𑀪𑀸𑀯𑁄 𑀯𑀺𑀬 𑀅𑀓𑀼𑀲𑀮𑀓𑀫𑁆𑀫𑀚𑀲𑁆𑀲 𑀲𑁄𑀪𑀦𑀲𑁆𑀲 𑀇𑀝𑁆𑀞𑀲𑁆𑀲 𑀅𑀪𑀸𑀯𑁄 𑀯𑀢𑁆𑀢𑀩𑁆𑀩𑁄. 𑀳𑀢𑁆𑀣𑀺𑀆𑀤𑀻𑀦𑀫𑁆𑀧𑀺 𑀳𑀺 𑀅𑀓𑀼𑀲𑀮𑀓𑀫𑁆𑀫𑀚𑀁 𑀫𑀦𑀼𑀲𑁆𑀲𑀸𑀦𑀁 𑀅𑀓𑀼𑀲𑀮𑀯𑀺𑀧𑀸𑀓𑀲𑁆𑀲𑁂𑀯 𑀆𑀭𑀫𑁆𑀫𑀡𑀁, 𑀓𑀼𑀲𑀮𑀓𑀫𑁆𑀫𑀚𑀁 𑀧𑀦 𑀧𑀯𑀢𑁆𑀢𑁂 𑀲𑀫𑀼𑀝𑁆𑀞𑀺𑀢𑀁 𑀓𑀼𑀲𑀮𑀯𑀺𑀧𑀸𑀓𑀲𑁆𑀲, 𑀇𑀝𑁆𑀞𑀸𑀭𑀫𑁆𑀫𑀡𑁂𑀦 𑀯𑁄𑀫𑀺𑀲𑁆𑀲𑀓𑀢𑁆𑀢𑀸 𑀅𑀧𑁆𑀧𑀓𑀁 𑀅𑀓𑀼𑀲𑀮𑀓𑀫𑁆𑀫𑀚𑀁 𑀩𑀳𑀼𑀮𑀁 𑀅𑀓𑀼𑀲𑀮𑀯𑀺𑀧𑀸𑀓𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀁 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀇𑀤𑀸𑀦𑀺 𑀢𑀫𑁂𑀯 𑀯𑀺𑀧𑀸𑀓𑀯𑀲𑁂𑀦 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀯𑀯𑀢𑁆𑀣𑀸𑀦𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀓𑀺𑀜𑁆𑀘𑀸𑀧𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀬𑀺𑀤𑀁 𑀲𑀫𑁆𑀫𑀼𑀢𑀺𑀫𑀦𑀸𑀧𑀲𑀁𑀯𑀺𑀪𑀸𑀕𑀢𑁆𑀣𑀁 𑀯𑀼𑀢𑁆𑀢𑀁, 𑀇𑀥 𑀧𑀦 𑀦 𑀢𑀣𑀸 𑀯𑀺𑀪𑀢𑁆𑀢𑀦𑁆𑀢𑀺 𑀆𑀳 ‘‘𑀪𑀕𑀯𑀸 𑀧𑀦𑀸’’𑀢𑀺𑀆𑀤𑀺.

𑀲𑁄 𑀉𑀧𑀸𑀲𑀓𑁄 𑀘𑀦𑁆𑀤𑀦𑀗𑁆𑀕𑀮𑀕𑀸𑀫𑁂 𑀚𑀸𑀢𑀢𑁆𑀢𑀸 ‘‘𑀘𑀦𑁆𑀤𑀦𑀗𑁆𑀕𑀮𑀺𑀓𑁄’’𑀢𑀺 𑀧𑀜𑁆𑀜𑀸𑀬𑀢𑀺, ‘‘𑀘𑀦𑁆𑀤𑀦𑀯𑀺𑀮𑀸𑀲𑁄’’𑀢𑀺 𑀓𑁂𑀘𑀺. 𑀢𑀲𑁆𑀲 𑀉𑀧𑀸𑀲𑀓𑀲𑁆𑀲 𑀧𑀝𑀺𑀪𑀸𑀦𑀁 𑀉𑀤𑀧𑀸𑀤𑀻𑀢𑀺 𑀬𑁄𑀚𑀦𑀸. 𑀢𑁂 𑀭𑀸𑀚𑀸𑀦𑁄 𑀳𑀢𑀧𑁆𑀧𑀪𑁂 𑀳𑀢𑀲𑁄𑀪𑁂 𑀤𑀺𑀲𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀤𑀓𑀸𑀪𑀺𑀲𑀺𑀢𑁆𑀢𑁂𑀢𑀺 𑀉𑀤𑀓𑁂𑀦 𑀅𑀪𑀺𑀲𑀺𑀜𑁆𑀘𑀺𑀢𑁂. 𑀅𑀗𑁆𑀕𑀸𑀭𑁂 𑀯𑀺𑀬𑀸𑀢𑀺 𑀅𑀗𑁆𑀕𑀸𑀭𑀓𑁆𑀔𑀡𑁂 𑀯𑀺𑀬.

𑀓𑀸𑀮𑀲𑁆𑀲𑁂𑀯𑀸𑀢𑀺 𑀧𑀕𑁂𑀯. 𑀅𑀯𑀺𑀕𑀢𑀕𑀦𑁆𑀥𑀁 𑀢𑀗𑁆𑀔𑀡𑀯𑀺𑀓𑀲𑀺𑀢𑀢𑀸𑀬. 𑀈𑀤𑀺𑀲𑀁 𑀯𑀘𑀦𑀦𑁆𑀢𑀺 ‘‘𑀅𑀘𑁆𑀙𑀸𑀤𑁂𑀲𑀻’’𑀢𑀺 𑀏𑀯𑀭𑀽𑀧𑀁 𑀯𑀘𑀦𑀦𑁆𑀢𑀺.

𑀧𑀜𑁆𑀘𑀭𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀤𑁄𑀡𑀧𑀸𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁪. ‘‘𑀤𑁄𑀡𑀧𑀸𑀓𑀓𑀼𑀭’’𑀦𑁆𑀢𑀺 ¶ 𑀏𑀢𑁆𑀣 𑀯𑀺𑀪𑀢𑁆𑀢𑀺𑀮𑁄𑀧𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀤𑁄𑀡𑀧𑀸𑀓𑀁 𑀓𑀼𑀭’’𑀦𑁆𑀢𑀺. 𑀤𑁄𑀡𑀲𑁆𑀲𑀸𑀢𑀺 𑀘𑀢𑀼𑀦𑁆𑀦𑀁 𑀆𑀴𑁆𑀳𑀓𑀸𑀦𑀁, 𑀲𑁄𑀴𑀲𑀦𑀸𑀴𑀻𑀦𑀦𑁆𑀢𑀺 𑀅𑀢𑁆𑀣𑁄. 𑀢𑀤𑀼𑀧𑀺𑀬𑀦𑁆𑀢𑀺 𑀢𑀤𑀦𑀼𑀭𑀽𑀧𑀁, 𑀢𑀲𑁆𑀲 ¶ 𑀯𑀼𑀢𑁆𑀢𑀧𑀭𑀺𑀫𑀸𑀡𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑁂𑀢𑀺 𑀢𑀁𑀤𑀺𑀯𑀲𑀢𑁄 𑀧𑀼𑀭𑀺𑀫𑀢𑀭𑀤𑀺𑀯𑀲𑁂𑀲𑀼. 𑀩𑀮𑀯𑀸𑀢𑀺 𑀫𑀳𑀸. 𑀪𑀢𑁆𑀢𑀧𑀭𑀺𑀴𑀸𑀳𑁄𑀢𑀺 𑀪𑀢𑁆𑀢𑀲𑀫𑁆𑀫𑀤𑀳𑁂𑀢𑀼𑀓𑁄. 𑀅𑀲𑁆𑀲 𑀭𑀜𑁆𑀜𑁄 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀕𑀳𑀺𑀢𑀢𑀸𑀮𑀯𑀡𑁆𑀝𑀸 𑀩𑀻𑀚𑀦𑁆𑀢𑀺 𑀬𑀫𑀓𑀢𑀸𑀮𑀯𑀡𑁆𑀝𑁂𑀳𑀺. 𑀨𑀸𑀲𑀼𑀯𑀺𑀳𑀸𑀭𑀦𑁆𑀢𑀺 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀬 𑀮𑀤𑁆𑀥𑀩𑁆𑀩𑀲𑀼𑀔𑀯𑀺𑀳𑀸𑀭𑀁. 𑀪𑁄𑀚𑀦𑀫𑀢𑁆𑀢𑀜𑁆𑀜𑀽 𑀳𑀺 𑀲𑀼𑀔𑀯𑀺𑀳𑀸𑀭𑁄 𑀳𑁄𑀢𑀺. 𑀢𑁂𑀦𑀸𑀳 ‘‘𑀢𑀦𑀼𑀓𑀲𑁆𑀲 𑀪𑀯𑀦𑁆𑀢𑀺 𑀯𑁂𑀤𑀦𑀸, 𑀲𑀡𑀺𑀓𑀁 𑀚𑀻𑀭𑀢𑀺 𑀆𑀬𑀼 𑀧𑀸𑀮𑀬’’𑀦𑁆𑀢𑀺.

𑀢𑀦𑀼𑀓𑀲𑁆𑀲𑀸𑀢𑀺 𑀢𑀦𑀼𑀓𑀸 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, 𑀪𑀼𑀢𑁆𑀢𑀧𑀘𑁆𑀘𑀬𑀸 𑀯𑀺𑀲𑀪𑀸𑀕𑀯𑁂𑀤𑀦𑀸 𑀦 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀡𑀺𑀓𑀦𑁆𑀢𑀺 𑀫𑀦𑁆𑀤𑀁 𑀫𑀼𑀤𑀼𑀓𑀁, 𑀅𑀧𑀭𑀺𑀲𑁆𑀲𑀬𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀚𑀻𑀭𑀢𑀻𑀢𑀺 𑀧𑀭𑀺𑀪𑀼𑀢𑁆𑀢𑀸𑀳𑀸𑀭𑁄 𑀧𑀘𑁆𑀘𑀢𑀺. 𑀆𑀬𑀼𑀧𑀸𑀮𑀬𑀦𑁆𑀢𑀺 𑀦𑀺𑀭𑁄𑀥𑁄 𑀅𑀯𑁂𑀤𑀦𑁄 𑀚𑀻𑀯𑀺𑀢𑀁 𑀭𑀓𑁆𑀔𑀦𑁆𑀢𑁄. 𑀅𑀣 𑀯𑀸 𑀲𑀡𑀺𑀓𑀁 𑀚𑀻𑀭𑀢𑀻𑀢𑀺 𑀲𑁄 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀧𑀼𑀕𑁆𑀕𑀮𑁄 𑀧𑀭𑀺𑀫𑀺𑀢𑀸𑀳𑀸𑀭𑀢𑀸𑀬 𑀲𑀡𑀺𑀓𑀁 𑀘𑀺𑀭𑁂𑀦 𑀚𑀻𑀭𑀢𑀺 𑀚𑀭𑀁 𑀧𑀸𑀧𑀼𑀡𑀸𑀢𑀺 𑀚𑀻𑀯𑀺𑀢𑀁 𑀧𑀸𑀮𑁂𑀦𑁆𑀢𑁄.

𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸𑀢𑀺 𑀏𑀢𑁆𑀣 𑀬𑀣𑀸 𑀲𑀩𑁆𑀩𑀁 𑀲𑁄 𑀧𑀭𑀺𑀬𑀸𑀧𑀼𑀡𑀺, 𑀢𑀢𑁄 𑀧𑀭𑀜𑁆𑀘 𑀬𑀣𑀸 𑀧𑀝𑀺𑀧𑀚𑁆𑀚𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀭𑀜𑁆𑀜𑀸 𑀲𑀤𑁆𑀥𑀺’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀸𑀯𑀢𑀓𑁂 𑀢𑀡𑁆𑀟𑀼𑀮𑁂 𑀳𑀸𑀭𑁂𑀬𑁆𑀬𑀸𑀲𑀺 𑀢𑀤𑀼𑀧𑀺𑀬𑀜𑁆𑀘 𑀩𑁆𑀬𑀜𑁆𑀚𑀦𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄.

𑀧𑀼𑀭𑀺𑀲𑀪𑀸𑀕𑁄 𑀏𑀲𑀸𑀢𑀺 𑀫𑀚𑁆𑀛𑀺𑀫𑁂𑀦 𑀧𑀼𑀭𑀺𑀲𑁂𑀦 𑀪𑀼𑀜𑁆𑀚𑀺𑀢𑀩𑁆𑀩𑀪𑀸𑀕𑁄 𑀏𑀲𑁄, 𑀬𑀤𑀺𑀤𑀁 𑀦𑀸𑀴𑀺𑀓𑁄𑀤𑀦𑀫𑀢𑁆𑀢𑀁. 𑀲𑀮𑁆𑀮𑀺𑀔𑀺𑀢𑀲𑀭𑀻𑀭𑀢𑀸𑀢𑀺 𑀪𑀫𑀁 𑀆𑀭𑁄𑀧𑁂𑀢𑁆𑀯𑀸 𑀉𑀮𑁆𑀮𑀺𑀔𑀺𑀢𑀲𑁆𑀲 𑀯𑀺𑀬 𑀲𑀩𑁆𑀩𑀧𑀭𑀺𑀴𑀸𑀳𑀯𑀽𑀧𑀲𑀫𑀲𑁆𑀲 𑀧𑀼𑀣𑀼𑀮𑀢𑀸𑀧𑀕𑀢𑀲𑀭𑀻𑀭𑀲𑁆𑀲. 𑀲𑀻𑀮𑀁 𑀲𑀫𑁆𑀧𑀭𑀸𑀬𑀺𑀓𑀢𑁆𑀣𑁄𑀢𑀺 𑀯𑀼𑀢𑁆𑀢𑀁, 𑀓𑀼𑀢𑁄 𑀧𑀦𑁂𑀢𑁆𑀣 𑀲𑀻𑀮𑀦𑁆𑀢𑀺 𑀆𑀳 ‘‘𑀪𑁄𑀚𑀦𑁂’’𑀢𑀺𑀆𑀤𑀺. 𑀲𑀻𑀮𑀗𑁆𑀕𑀁 𑀦𑀸𑀫 𑀳𑁄𑀢𑀻𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀲𑁆𑀲 𑀅𑀯𑀬𑀯𑁄 𑀏𑀓𑁄 𑀪𑀸𑀕𑁄 𑀳𑁄𑀢𑀺.

𑀤𑁄𑀡𑀧𑀸𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀞𑀫𑀲𑀗𑁆𑀕𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁫. 𑀯𑁂𑀤𑁂𑀦 ¶ 𑀜𑀸𑀡𑁂𑀦 𑀈𑀳𑀢𑀺 𑀇𑀭𑀺𑀬𑀢𑀻𑀢𑀺 𑀯𑁂𑀤𑁂𑀳𑀻, 𑀓𑁄𑀲𑀮𑀭𑀸𑀚𑀪𑀕𑀺𑀦𑀻 𑀅𑀚𑀸𑀢𑀲𑀢𑁆𑀢𑀼𑀦𑁄 𑀫𑀸𑀢𑀸, 𑀲𑀸 𑀓𑀺𑀭 𑀲𑀫𑁆𑀧𑀚𑀜𑁆𑀜𑀚𑀸𑀢𑀺𑀓𑀸. 𑀢𑁂𑀦𑀸𑀳 ‘‘𑀧𑀡𑁆𑀟𑀺𑀢𑀸𑀥𑀺𑀯𑀘𑀦’’𑀦𑁆𑀢𑀺, 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀏𑀢𑀺𑀲𑁆𑀲𑀦𑁆𑀢𑀺 𑀘𑀢𑀼𑀭𑀗𑁆𑀕𑀺𑀦𑀻. 𑀤𑁆𑀯𑀺𑀦𑁆𑀦𑀁 𑀭𑀚𑁆𑀚𑀸𑀦𑀦𑁆𑀢𑀺 𑀓𑀸𑀲𑀺𑀓𑀭𑀚𑁆𑀚𑀫𑀕𑀥𑀭𑀚𑁆𑀚𑀸𑀦𑀁 𑀅𑀦𑁆𑀢𑀭𑁂, 𑀲𑁄 𑀧𑀦 𑀕𑀸𑀫𑁄 𑀓𑀸𑀲𑀺𑀓𑀭𑀚𑁆𑀚𑁄.

𑀧𑀸𑀧𑀸𑀢𑀺 𑀮𑀸𑀫𑀓𑀸 𑀦𑀺𑀳𑀻𑀦𑀸𑀘𑀸𑀭𑀸. 𑀫𑁂𑀚𑁆𑀚𑀢𑀺 𑀲𑀺𑀦𑀺𑀬𑁆𑀳𑀢𑀻𑀢𑀺 𑀫𑁂𑀢𑁆𑀢𑀺, 𑀲𑀸 𑀏𑀢𑁂𑀲𑀼 𑀅𑀢𑁆𑀣𑀻𑀢𑀺 𑀫𑀺𑀢𑁆𑀢𑀸. 𑀲𑀳 𑀅𑀬𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀲𑀳𑀸𑀬𑀸. 𑀲𑀫𑁆𑀧𑀯𑀗𑁆𑀓𑀦𑁆𑀢𑀺 𑀲𑀼𑀝𑁆𑀞𑀼 𑀑𑀦𑀢𑀁. 𑀚𑀬𑀓𑀸𑀭𑀡𑀁 𑀤𑀺𑀲𑁆𑀯𑀸 𑀆𑀳, 𑀢𑀣𑀸 ¶ 𑀳𑀺 ‘‘𑀅𑀚𑁆𑀚 𑀇𑀫𑀁 𑀭𑀢𑁆𑀢𑀺𑀁 𑀤𑀼𑀓𑁆𑀔𑀁 𑀲𑁂𑀢𑀻’’𑀢𑀺 𑀓𑀸𑀮𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀯𑀼𑀢𑁆𑀢𑀁. 𑀯𑁂𑀭𑀺𑀖𑀸𑀢𑁄 𑀦𑀸𑀫 𑀯𑁂𑀭𑀺𑀧𑀼𑀕𑁆𑀕𑀮𑁂 𑀲𑀢𑀻𑀢𑀺 𑀆𑀳 ‘‘𑀯𑁂𑀭𑀺𑀧𑀼𑀕𑁆𑀕𑀮𑀁 𑀮𑀪𑀢𑀻’’𑀢𑀺.

𑀧𑀞𑀫𑀲𑀗𑁆𑀕𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀤𑀼𑀢𑀺𑀬𑀲𑀗𑁆𑀕𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁬. 𑀲𑀼𑀡𑀸𑀣𑀸𑀢𑀺 ‘‘𑀯𑀢𑁆𑀯𑀸’’𑀢𑀺 𑀯𑀘𑀦𑀲𑁂𑀲𑁄. 𑀉𑀧𑀓𑀧𑁆𑀧𑀢𑀻𑀢𑀺 𑀲𑀫𑁆𑀪𑀯𑀢𑀺. 𑀲𑀬𑁆𑀳𑀁 𑀳𑁄𑀢𑀻𑀢𑀺 𑀓𑀸𑀢𑀼𑀁 𑀲𑀓𑁆𑀓𑀸 𑀳𑁄𑀢𑀺. ‘‘𑀬𑀤𑀸 𑀘𑀜𑁆𑀜𑁂’’𑀢𑀺 𑀘-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀤𑀸 𑀅𑀜𑁆𑀜𑁂’’𑀢𑀺. 𑀯𑀺𑀮𑀼𑀫𑁆𑀧𑀦𑁆𑀢𑀻𑀢𑀺 𑀯𑀺𑀦𑀸𑀲𑀁 𑀅𑀘𑁆𑀙𑀺𑀦𑁆𑀤𑀦𑀁 𑀓𑀭𑁄𑀦𑁆𑀢𑀺. 𑀯𑀺𑀮𑀼𑀫𑁆𑀧𑀻𑀬𑀢𑀻𑀢𑀺 𑀯𑀺𑀮𑀼𑀢𑁆𑀢𑀧𑀭𑀲𑀦𑁆𑀢𑀓𑀲𑁆𑀲 𑀅𑀲𑀓𑀢𑁆𑀢𑀸 𑀧𑀼𑀕𑁆𑀕𑀮𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀁 𑀓𑀫𑁆𑀫𑀨𑀮𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑁄 𑀯𑀺𑀬 𑀲𑀬𑀫𑁆𑀧𑀺 𑀧𑀭𑁂𑀦 𑀯𑀺𑀮𑀼𑀫𑁆𑀧𑀻𑀬𑀢𑀺, 𑀥𑀦𑀚𑀸𑀦𑀺𑀁 𑀧𑀸𑀧𑀼𑀡𑀸𑀢𑀺. ‘‘𑀓𑀸𑀭𑀡’’𑀦𑁆𑀢𑀺 𑀳𑀺 𑀫𑀜𑁆𑀜𑀢𑀻𑀢𑀺 𑀧𑀸𑀧𑀓𑀺𑀭𑀺𑀬𑀁 𑀅𑀢𑁆𑀢𑀦𑁄 𑀳𑀺𑀢𑀸𑀯𑀳𑀁 𑀓𑀸𑀭𑀡𑀁 𑀓𑀢𑁆𑀯𑀸 𑀫𑀜𑁆𑀜𑀢𑀺. 𑀚𑀬𑀦𑁆𑀢𑁄 𑀧𑀼𑀕𑁆𑀕𑀮𑁄 ‘‘𑀇𑀤𑀁 𑀦𑀸𑀫 𑀚𑀺𑀦𑀸𑀫𑀻’’𑀢𑀺 𑀫𑀜𑁆𑀜𑀫𑀸𑀦𑁄 𑀲𑀬𑀫𑁆𑀧𑀺 𑀢𑀢𑁄 𑀧𑀭𑀸𑀚𑀬𑀁 𑀧𑀸𑀧𑀼𑀡𑀸𑀢𑀺. 𑀖𑀝𑁆𑀝𑁂𑀢𑀸𑀭𑀦𑁆𑀢𑀺 𑀧𑀸𑀧𑀓𑀫𑁆𑀫𑀯𑀺𑀧𑀸𑀓𑀁. 𑀓𑀫𑁆𑀫𑀯𑀺𑀯𑀝𑁆𑀝𑁂𑀦𑀸𑀢𑀺 𑀓𑀫𑁆𑀫𑀲𑁆𑀲 𑀯𑀺𑀯𑀝𑁆𑀝𑀦𑁂𑀦, 𑀧𑀘𑁆𑀘𑀬𑀮𑀸𑀪𑁂𑀦 𑀮𑀤𑁆𑀥𑀸𑀯𑀲𑀭𑁂𑀦 𑀯𑀺𑀯𑀝𑁆𑀝𑁂𑀢𑁆𑀯𑀸 𑀯𑀺𑀕𑀫𑀺𑀢𑁂𑀦 𑀓𑀫𑁆𑀫𑁂𑀦𑀸𑀢𑀺 𑀅𑀢𑁆𑀣𑁄.

𑀤𑀼𑀢𑀺𑀬𑀲𑀗𑁆𑀕𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀫𑀮𑁆𑀮𑀺𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁭. 𑀏𑀓𑀘𑁆𑀘𑀸𑀢𑀺 ¶ 𑀧𑀡𑁆𑀟𑀺𑀢𑀸 𑀲𑀧𑀜𑁆𑀜𑀸. 𑀲𑁂𑀬𑁆𑀬𑀸𑀢𑀺 𑀯𑀭𑀸. 𑀕𑀸𑀣𑀸𑀲𑀼𑀔𑀢𑁆𑀣𑀁 𑀲𑀲𑀼𑀭𑀲𑀤𑁆𑀤𑀮𑁄𑀧𑀁 𑀓𑀢𑁆𑀯𑀸 ‘‘𑀲𑀲𑁆𑀲𑀼𑀤𑁂𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀲𑁆𑀲𑀼𑀲𑀲𑀼𑀭𑀤𑁂𑀯𑀢𑀸’’𑀢𑀺. 𑀤𑀺𑀲𑀸𑀚𑁂𑀝𑁆𑀞𑀓𑀸𑀢𑀺 𑀘𑀢𑀽𑀲𑀼𑀧𑀺 𑀤𑀺𑀲𑀸𑀲𑀼 𑀚𑁂𑀝𑁆𑀞𑀓𑀲𑀻𑀲𑁂𑀦 𑀳𑀺 𑀮𑁄𑀓𑀁 𑀯𑀤𑀢𑀺. 𑀢𑀸𑀤𑀺𑀲𑀸𑀬𑀸𑀢𑀺 𑀢𑀣𑀸𑀭𑀽𑀧𑀸𑀬 𑀫𑁂𑀥𑀸𑀯𑀺𑀢𑀸𑀤𑀺𑀕𑀼𑀡𑀯𑀼𑀢𑁆𑀢𑀺𑀬𑀸. 𑀲𑀼𑀪𑀭𑀺𑀬𑀸𑀬𑀸𑀢𑀺 𑀲𑀼𑀔𑁂𑀢𑁆𑀢𑀪𑀽𑀢𑀸𑀬 𑀲𑀼𑀦𑁆𑀤𑀭𑀺𑀢𑁆𑀣𑀺𑀬𑀸𑀢𑀺 𑀅𑀢𑁆𑀣𑁄.

𑀫𑀮𑁆𑀮𑀺𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀧𑁆𑀧𑀫𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁮. 𑀲𑀫𑀥𑀺𑀕𑁆𑀕𑀬𑁆𑀳𑀸𑀢𑀺 𑀲𑀫𑁆𑀫𑀸 𑀅𑀢𑀺𑀯𑀺𑀬 𑀕𑀳𑁂𑀢𑁆𑀯𑀸, 𑀜𑀸𑀬𑁂𑀦 𑀯𑀺𑀲𑁂𑀲𑀢𑁄 𑀕𑀡𑁆𑀳𑀺𑀢𑁆𑀯𑀸. 𑀓𑀸𑀭𑀸𑀧𑀓𑀅𑀧𑁆𑀧𑀫𑀸𑀤𑁄𑀢𑀺 𑀢𑀺𑀡𑁆𑀡𑀁 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀁 𑀧𑀯𑀢𑁆𑀢𑀓𑀅𑀧𑁆𑀧𑀫𑀸𑀤𑁄. 𑀲𑀫𑀯𑀥𑀸𑀦𑀦𑁆𑀢𑀺 𑀲𑀫𑀯𑀭𑁄𑀥𑀁 𑀅𑀦𑁆𑀢𑁄𑀕𑀥𑀁. 𑀉𑀧𑀓𑁆𑀔𑁂𑀧𑀦𑁆𑀢𑀺 𑀩𑀳𑀺 𑀅𑀳𑀼𑀢𑁆𑀯𑀸 𑀧𑀓𑁆𑀔𑀺𑀧𑀺𑀢𑀩𑁆𑀩𑀢𑀁. 𑀲𑁂𑀲𑀧𑀤𑀚𑀸𑀢𑀸𑀦𑀺 𑀯𑀺𑀬 𑀅𑀯…𑀧𑁂… 𑀥𑀫𑁆𑀫𑀸 𑀲𑀧𑁆𑀧𑀤𑁂𑀲𑀢𑁆𑀢𑀸. 𑀅𑀧𑁆𑀧𑀫𑀸𑀤𑁂 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀺 𑀢𑀲𑁆𑀲 𑀦𑀺𑀧𑁆𑀧𑀤𑁂𑀲𑀢𑁆𑀢𑀸. 𑀅𑀕𑁆𑀕𑀁 𑀲𑁂𑀝𑁆𑀞𑀁 𑀫𑀳𑀦𑁆𑀢𑀁 𑀲𑁂𑀲𑀥𑀫𑁆𑀫𑀸𑀦𑀁 ¶ 𑀅𑀧𑁆𑀧𑀫𑀸𑀤𑁄. 𑀧𑀝𑀺𑀮𑀸𑀪𑀓𑀝𑁆𑀞𑁂𑀦𑀸𑀢𑀺 𑀅𑀥𑀺𑀕𑀫𑀳𑁂𑀢𑀼𑀢𑀸𑀬. 𑀮𑁄𑀓𑀺𑀬𑁄𑀧𑀺 𑀲𑀫𑀸𑀦𑁄𑀢𑀺 𑀓𑀸𑀫𑀸𑀯𑀘𑀭𑁄𑀧𑀺 𑀲𑀫𑀸𑀦𑁄. 𑀫𑀳𑀕𑁆𑀕𑀢𑀸𑀦𑀼𑀢𑁆𑀢𑀭𑀸𑀦𑀁 𑀧𑀼𑀩𑁆𑀩𑀪𑀸𑀕𑁂 𑀧𑀯𑀢𑁆𑀢𑀅𑀧𑁆𑀧𑀫𑀸𑀤𑁄 𑀳𑀺 𑀇𑀥𑀸𑀥𑀺𑀧𑁆𑀧𑁂𑀢𑁄.

𑀧𑀲𑀁𑀲𑀦𑁆𑀢𑀺 𑀧𑀡𑁆𑀟𑀺𑀢𑀸𑀢𑀺 𑀬𑁄𑀚𑀦𑀸. 𑀅𑀧𑁆𑀧𑀫𑀸𑀤𑀲𑁆𑀲 𑀧𑀸𑀲𑀁𑀲𑀪𑀸𑀯𑁂 𑀏𑀓𑀦𑁆𑀢𑀢𑁄 𑀓𑀢𑁆𑀢𑀩𑁆𑀩𑀢𑀸𑀬 𑀧𑀦 ‘‘𑀏𑀢𑀸𑀦𑀻’’𑀢𑀺𑀆𑀤𑀺𑀦𑀸 𑀓𑀸𑀭𑀡𑀁 𑀆𑀳. 𑀇𑀫𑀺𑀲𑁆𑀲𑀸 𑀬𑁄𑀚𑀦𑀸𑀬 ‘‘𑀧𑀼𑀜𑁆𑀜𑀓𑀺𑀭𑀺𑀬𑀸𑀲𑀽’’𑀢𑀺 𑀧𑀤𑀲𑁆𑀲 ‘‘𑀅𑀧𑁆𑀧𑀫𑀢𑁆𑀢𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀫𑀸 𑀧𑀡𑁆𑀟𑀺𑀢𑀸 𑀅𑀧𑁆𑀧𑀫𑀸𑀤𑀁 𑀧𑀲𑀁𑀲𑀦𑁆𑀢𑀺, 𑀬𑀲𑁆𑀫𑀸 𑀘 𑀧𑀼𑀜𑁆𑀜𑀓𑀺𑀭𑀺𑀬𑀸𑀲𑀼 𑀅𑀧𑁆𑀧𑀫𑀢𑁆𑀢𑁄 𑀉𑀪𑁄 𑀅𑀢𑁆𑀣𑁂 𑀅𑀥𑀺𑀕𑁆𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 𑀆𑀬𑀼𑀆𑀤𑀻𑀦𑀺 𑀧𑀢𑁆𑀣𑀬𑀦𑁆𑀢𑁂𑀦 𑀅𑀧𑁆𑀧𑀫𑀸𑀤𑁄𑀯 𑀓𑀸𑀢𑀩𑁆𑀩𑁄𑀢𑀺. 𑀤𑀼𑀢𑀺𑀬𑀬𑁄𑀚𑀦𑀸𑀬 𑀧𑀦 𑀧𑀡𑁆𑀟𑀺𑀢𑀸 𑀅𑀧𑁆𑀧𑀫𑀸𑀤𑀁 𑀧𑀲𑀁𑀲𑀦𑁆𑀢𑀺. 𑀓𑀢𑁆𑀣? 𑀧𑀼𑀜𑁆𑀜𑀓𑀺𑀭𑀺𑀬𑀸𑀲𑀼. 𑀓𑀲𑁆𑀫𑀸𑀢𑀺 𑀘𑁂? 𑀅𑀧𑁆𑀧𑀫𑀢𑁆𑀢𑁄𑀢𑀺𑀆𑀤𑀺. 𑀢𑁂𑀦𑀸𑀳 ‘‘𑀬𑀲𑁆𑀫𑀸…𑀧𑁂… 𑀅𑀢𑁆𑀣𑁄’’𑀢𑀺. 𑀅𑀢𑁆𑀣𑀧𑀝𑀺𑀮𑀸𑀪𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀳𑀺𑀢𑀧𑀝𑀺𑀮𑀸𑀪𑀸.

𑀅𑀧𑁆𑀧𑀫𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁯. 𑀲𑀻𑀮𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑁄 ¶ 𑀓𑀮𑁆𑀬𑀸𑀡𑁄 𑀪𑀤𑁆𑀤𑀓𑁄 𑀫𑀺𑀢𑁆𑀢𑁄 𑀏𑀢𑀲𑁆𑀲𑀸𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑁄, 𑀢𑀲𑁆𑀲 𑀥𑀫𑁆𑀫𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀯 𑀲𑁆𑀯𑀸𑀔𑀸𑀢𑁄 𑀦𑀸𑀫 𑀳𑁄𑀢𑀺 𑀲𑀼𑀢𑁆𑀯𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀲𑀸𑀥𑀦𑀢𑁄. 𑀢𑁂𑀦𑀸𑀳 ‘‘𑀅𑀢𑁆𑀣𑀁 𑀧𑀽𑀭𑁂𑀢𑀻’’𑀢𑀺. 𑀇𑀢𑀭𑀲𑁆𑀲𑀸𑀢𑀺 𑀧𑀸𑀧𑀫𑀺𑀢𑁆𑀢𑀲𑁆𑀲. 𑀢𑁂𑀦𑀸𑀢𑀺 𑀅𑀢𑁆𑀣𑀧𑀽𑀭𑀡𑁂𑀦. 𑀏𑀢𑀦𑁆𑀢𑀺 ‘‘𑀲𑁄 𑀘 𑀔𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑀸’’𑀢𑀺 𑀏𑀢𑀁 𑀯𑀘𑀦𑀁. 𑀤𑁂𑀲𑀦𑀸𑀥𑀫𑁆𑀫𑁄𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄. 𑀲𑁄 𑀳𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑁄 𑀧𑀘𑁆𑀘𑀓𑁆𑀔𑀢𑁄 𑀮𑀤𑁆𑀥𑀩𑁆𑀩𑁄, 𑀇𑀢𑀭𑁂 𑀢𑀤𑀼𑀧𑀦𑀺𑀲𑁆𑀲𑀬𑀸 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁂𑀳𑀺, 𑀢𑁂𑀦 𑀮𑀤𑁆𑀥𑀩𑁆𑀩𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁄𑀢𑀺 𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑀯𑀲𑁂𑀦 𑀳𑁂𑀲𑀸 𑀤𑁂𑀲𑀦𑀸 𑀆𑀕𑀢𑀸. 𑀦 𑀳𑀺 𑀲𑁂𑀲𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀭𑁄𑀧𑀤𑁂𑀲𑁂𑀦 𑀧𑀬𑁄𑀚𑀦𑀁 𑀅𑀢𑁆𑀣𑀺.

𑀉𑀧𑀟𑁆𑀠𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑁄𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀲𑁆𑀲 𑀉𑀧𑀟𑁆𑀠𑀕𑀼𑀡𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑁄 𑀮𑀤𑁆𑀥𑀩𑁆𑀩𑁄. 𑀉𑀧𑀟𑁆𑀠𑀁 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑀢𑁄𑀢𑀺 𑀇𑀢𑀭𑀁 𑀉𑀧𑀟𑁆𑀠𑀁 𑀜𑀸𑀡𑀁 𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲 𑀅𑀢𑁆𑀢𑀦𑁄 𑀧𑀼𑀭𑀺𑀲𑀓𑀸𑀭𑀢𑁄. 𑀮𑁄𑀓𑁂𑀧𑀺 𑀧𑀸𑀓𑀝𑁄𑀬𑀫𑀢𑁆𑀣𑁄 ‘‘𑀆𑀘𑀭𑀺𑀬𑀢𑁄 𑀉𑀧𑀟𑁆𑀠𑀁, 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑀢𑁄 𑀉𑀧𑀟𑁆𑀠𑀁 𑀮𑀤𑁆𑀥𑀩𑁆𑀩𑀸 𑀢𑁂𑀯𑀺𑀚𑁆𑀚𑀢𑀸’’𑀢𑀺, 𑀢𑀲𑁆𑀫𑀸 𑀣𑁂𑀭𑁄 𑀢𑀣𑀸 𑀘𑀺𑀦𑁆𑀢𑁂𑀲𑀺. 𑀦𑀺𑀧𑁆𑀧𑀤𑁂𑀲𑀦𑁆𑀢𑀺 𑀅𑀦𑀯𑀲𑁂𑀲𑀢𑁄. 𑀢𑀢𑁄𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑁄. 𑀉𑀧𑀟𑁆𑀠𑀁 𑀆𑀕𑀘𑁆𑀙𑀢𑀻𑀢𑀺 𑀉𑀧𑀟𑁆𑀠𑀕𑀼𑀡𑁄 𑀧𑀝𑀺𑀧𑀚𑁆𑀚𑀦𑁆𑀢𑀁 𑀉𑀧𑀕𑀘𑁆𑀙𑀢𑀺. 𑀩𑀳𑀽𑀳𑀺 𑀧𑀼𑀭𑀺𑀲𑁂𑀳𑀺. 𑀯𑀺𑀦𑀺𑀩𑁆𑀪𑁄𑀕𑁄 𑀯𑀺𑀯𑁂𑀘𑀦𑀁 𑀦𑀢𑁆𑀣𑀺 𑀏𑀓𑀚𑁆𑀛𑀁 𑀅𑀢𑁆𑀣𑀲𑁆𑀲 𑀯𑀺𑀯𑁂𑀘𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀏𑀲𑀸𑀢𑀺 𑀧𑀭𑀢𑁄𑀖𑁄𑀲𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑀢𑁄 𑀘 𑀲𑀺𑀚𑁆𑀛𑀫𑀸𑀦𑁄 𑀅𑀢𑁆𑀣𑁄. 𑀏𑀢𑁆𑀢𑀓𑀦𑁆𑀢𑀺 𑀏𑀢𑁆𑀢𑀓𑁄 𑀪𑀸𑀕𑁄. 𑀬𑀤𑀺 𑀦 𑀲𑀓𑁆𑀓𑀸 𑀮𑀤𑁆𑀥𑀼𑀁, 𑀅𑀣 𑀓𑀲𑁆𑀫𑀸 𑀉𑀧𑀟𑁆𑀠𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀬𑀸’’𑀢𑀺𑀆𑀤𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀲𑀼 𑀦 𑀲𑀓𑁆𑀓𑀸 𑀮𑀤𑁆𑀥𑀼𑀁. 𑀅𑀲𑀓𑁆𑀓𑀼𑀡𑁂𑀬𑁆𑀬𑁂 ¶ 𑀲𑀓𑀮𑀫𑁆𑀧𑀺 𑀦 𑀲𑀫𑁆𑀪𑀯𑀢𑀺 𑀧𑀭𑀢𑁄𑀖𑁄𑀲𑀫𑀢𑁆𑀢𑁂𑀦 𑀢𑁂𑀲𑀁 𑀅𑀲𑀺𑀚𑁆𑀛𑀦𑀢𑁄, 𑀧𑀥𑀸𑀦𑀳𑁂𑀢𑀼𑀪𑀸𑀯𑀤𑀻𑀧𑀦𑀢𑁆𑀣𑀁 𑀧𑀦 ‘‘𑀲𑀓𑀮𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩𑀪𑀸𑀕𑀧𑀝𑀺𑀮𑀸𑀪𑀗𑁆𑀕𑀦𑁆𑀢𑀺 𑀧𑀼𑀩𑁆𑀩𑀪𑀸𑀕𑁂 𑀧𑀝𑀺𑀮𑀤𑁆𑀥𑀩𑁆𑀩𑀓𑀸𑀭𑀡𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲 𑀉𑀧𑀤𑁂𑀲𑁂𑀦 𑀯𑀺𑀦𑀸 𑀢𑁂𑀦 𑀉𑀢𑁆𑀢𑀭𑀺 𑀯𑀺𑀲𑁂𑀲𑀢𑁄 𑀅𑀮𑀤𑁆𑀥𑀩𑁆𑀩𑀢𑁄. 𑀅𑀢𑁆𑀣𑀢𑁄𑀢𑀺 𑀧𑀭𑀫𑀢𑁆𑀣𑀢𑁄. ‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀁…𑀧𑁂… 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸’’𑀢𑀺 𑀯𑀢𑁆𑀯𑀸 𑀲𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑁂 𑀧𑀦 𑀲𑀻𑀮𑀸𑀤𑀬𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀆𑀳 ‘‘𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑀺𑀧𑀺 𑀯𑀤𑀦𑁆𑀢𑀺𑀬𑁂𑀯𑀸’’𑀢𑀺.

𑀫𑀸𑀳𑁂𑀯𑀦𑁆𑀢𑀺 𑀫𑀸 𑀅𑀳 𑀏𑀯𑀦𑁆𑀢𑀺 𑀙𑁂𑀤𑁄, 𑀅𑀳𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀫𑀸𑀢𑀺 𑀧𑀝𑀺𑀲𑁂𑀥𑁂 𑀦𑀺𑀧𑀸𑀢𑁄. 𑀢𑁂𑀦𑀸𑀳 ‘‘𑀫𑀸 𑀏𑀯𑀁 𑀅𑀪𑀡𑀻’’𑀢𑀺. ‘‘𑀫𑀸𑀳𑁂𑀯𑀁 𑀆𑀦𑀦𑁆𑀤𑀸’’𑀢𑀺 ¶ 𑀯𑀤𑀢𑁄 𑀪𑀕𑀯𑀢𑁄 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀢𑀸𑀤𑀺𑀲𑀲𑁆𑀲 𑀦𑀸𑀫 𑀢𑁂, 𑀆𑀦𑀦𑁆𑀤, 𑀓𑀮𑁆𑀬𑀸𑀡𑀫𑀺𑀢𑁆𑀢𑀕𑀼𑀡𑁂 𑀲𑁂𑀯𑀢𑁄 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁 𑀅𑀬𑀸𑀣𑀸𑀯𑀢𑁄𑀢𑀺 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀬𑀣𑀸𑀪𑀽𑀢𑀕𑀼𑀡𑀓𑀺𑀢𑁆𑀢𑀦𑀫𑀼𑀔𑁂𑀦 𑀧𑀝𑀺𑀓𑁆𑀔𑁂𑀧𑁄 𑀬𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀩𑀳𑀼𑀲𑁆𑀲𑀼𑀢𑁄’’𑀢𑀺𑀆𑀤𑀺𑀫𑀸𑀳. 𑀇𑀤𑀦𑁆𑀢𑀺 𑀇𑀤𑀁 𑀯𑀘𑀦𑀁 𑀪𑀕𑀯𑀸 𑀆𑀳𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀓𑀮𑀫𑁂𑀯 𑀳𑀻𑀢𑀺 𑀏𑀢𑁆𑀣 𑀳𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀢𑁂𑀦 ‘‘𑀫𑀸𑀳𑁂𑀯’’𑀦𑁆𑀢𑀺 𑀢𑀲𑁆𑀲 𑀧𑀝𑀺𑀓𑁆𑀔𑁂𑀧𑀲𑁆𑀲 𑀓𑀸𑀭𑀡𑀁 𑀚𑁄𑀢𑀺𑀢𑀁, 𑀦 𑀲𑀭𑀽𑀧𑀢𑁄 𑀯𑀼𑀢𑁆𑀢𑀁. ‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢’’𑀦𑁆𑀢𑀺𑀆𑀤𑀺𑀦𑀸 𑀧𑀦 𑀢𑀁 𑀲𑀭𑀽𑀧𑀢𑁄 𑀤𑀲𑁆𑀲𑀺𑀢𑀦𑁆𑀢𑀺 𑀆𑀳 ‘‘𑀇𑀤𑀸𑀦𑀺…𑀧𑁂… 𑀆𑀤𑀺𑀫𑀸𑀳𑀸’’𑀢𑀺. 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀦𑁆𑀢𑀺 𑀇𑀘𑁆𑀙𑀦𑀝𑁆𑀞𑁂𑀦 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀁, 𑀦 𑀧𑀝𑀺𑀓𑀗𑁆𑀔𑀸𑀦𑀺𑀫𑀺𑀢𑁆𑀢𑁂𑀦𑀸𑀢𑀺 𑀆𑀳 ‘‘𑀅𑀯𑀲𑁆𑀲𑀁𑀪𑀸𑀯𑀻𑀢𑀺 𑀅𑀢𑁆𑀣𑁄’’𑀢𑀺.

𑀇𑀥𑀸𑀢𑀺 𑀅𑀦𑁆𑀢𑁄𑀕𑀥𑀸𑀯𑀥𑀸𑀭𑀡𑀧𑀤𑀁, 𑀇𑀥𑁂𑀯𑀸𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁𑀬𑁂𑀯 𑀳𑀺 𑀲𑀸𑀲𑀦𑁂 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸, 𑀦 𑀅𑀜𑁆𑀜𑀢𑁆𑀣. 𑀆𑀤𑀺𑀧𑀤𑀸𑀦𑀁𑀬𑁂𑀯𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀸𑀓𑁆𑀬𑁂 𑀆𑀤𑀺𑀢𑁄 𑀏𑀯 𑀯𑀼𑀢𑁆𑀢𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀧𑀤𑀸𑀦𑀁𑀬𑁂𑀯. 𑀲𑀫𑁆𑀫𑀸𑀤𑀲𑁆𑀲𑀦𑀮𑀓𑁆𑀔𑀡𑀸𑀢𑀺 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀯𑀲𑁂𑀦 𑀲𑀫𑁆𑀫𑀤𑁂𑀯 𑀤𑀲𑁆𑀲𑀦𑀲𑀪𑀸𑀯𑀸. 𑀲𑀫𑁆𑀫𑀸𑀅𑀪𑀺𑀭𑁄𑀧𑀦𑀮𑀓𑁆𑀔𑀡𑁄𑀢𑀺 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑁂 𑀆𑀭𑀫𑁆𑀫𑀡𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀲𑀫𑁆𑀫𑀤𑁂𑀯 𑀆𑀭𑁄𑀧𑀦𑀲𑀪𑀸𑀯𑁄. 𑀲𑀫𑁆𑀫𑀸𑀧𑀭𑀺𑀕𑁆𑀕𑀳𑀡𑀮𑀓𑁆𑀔𑀡𑀸𑀢𑀺 𑀫𑀼𑀲𑀸𑀯𑀸𑀤𑀸𑀤𑀻𑀦𑀁 𑀯𑀺𑀲𑀁𑀯𑀸𑀤𑀦𑀸𑀤𑀺𑀓𑀺𑀘𑁆𑀘𑀢𑀸𑀬 𑀮𑀽𑀔𑀸𑀦𑀁 𑀅𑀧𑀭𑀺𑀕𑁆𑀕𑀸𑀳𑀓𑀸𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀧𑀭𑀺𑀕𑁆𑀕𑀸𑀳𑀓𑀲𑀪𑀸𑀯𑀸 𑀲𑀫𑁆𑀫𑀸𑀯𑀸𑀘𑀸 𑀲𑀺𑀦𑀺𑀤𑁆𑀥𑀪𑀸𑀯𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀲𑀫𑁆𑀫𑀸𑀯𑀸𑀘𑀸𑀧𑀘𑁆𑀘𑀬𑀁 𑀲𑀼𑀪𑀸𑀲𑀺𑀢𑀲𑁄𑀢𑀸𑀭𑀜𑁆𑀘 𑀧𑀼𑀕𑁆𑀕𑀮𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀲𑀫𑁆𑀫𑀸𑀧𑀭𑀺𑀕𑁆𑀕𑀳𑀡𑀮𑀓𑁆𑀔𑀡𑀸. 𑀬𑀣𑀸 𑀓𑀸𑀬𑀺𑀓𑀓𑀺𑀭𑀺𑀬𑀸 𑀓𑀺𑀜𑁆𑀘𑀺 𑀓𑀢𑁆𑀢𑀩𑁆𑀩𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀲𑀬𑀜𑁆𑀘 𑀲𑀫𑀼𑀝𑁆𑀞𑀳𑀦𑀁 𑀖𑀝𑀦𑀁 𑀳𑁄𑀢𑀺, 𑀢𑀣𑀸 𑀲𑀫𑁆𑀫𑀸𑀓𑀫𑁆𑀫𑀦𑁆𑀢 𑀲𑀗𑁆𑀔𑀸𑀢𑀸 𑀯𑀺𑀭𑀢𑀺𑀧𑀻𑀢𑀺 𑀲𑀫𑀼𑀝𑁆𑀞𑀸𑀧𑀦𑀮𑀓𑁆𑀔𑀡𑀸 𑀤𑀝𑁆𑀞𑀩𑁆𑀩𑀸, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀸 𑀉𑀓𑁆𑀔𑀺𑀧𑀦𑀁 𑀲𑀫𑀼𑀝𑁆𑀞𑀸𑀧𑀦𑀁 𑀓𑀸𑀬𑀺𑀓𑀓𑀺𑀭𑀺𑀬𑀸𑀬 𑀪𑀸𑀭𑀼𑀓𑁆𑀔𑀺𑀧𑀦𑀁 𑀯𑀺𑀬. 𑀚𑀻𑀯𑀫𑀸𑀦𑀲𑁆𑀲 𑀲𑀢𑁆𑀢𑀲𑁆𑀲, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀸, 𑀚𑀻𑀯𑀺𑀢𑀧𑁆𑀧𑀯𑀢𑁆𑀢𑀺𑀬𑀸 𑀆𑀚𑀻𑀯𑀲𑁆𑀲𑁂𑀯 𑀯𑀸 𑀲𑀼𑀤𑁆𑀥𑀺 𑀯𑁄𑀤𑀸𑀦𑀁. 𑀬𑀣𑀸 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀸𑀦𑀁 𑀯𑀚𑁆𑀚𑀸𑀦𑀁 𑀥𑀫𑁆𑀫𑁂𑀦 𑀧𑀳𑀸𑀦𑀸𑀦𑀼𑀧𑁆𑀧𑀸𑀤𑀅𑀢𑁆𑀣𑀮𑀸𑀪𑀸𑀤𑀺𑀧𑀭𑀺𑀯𑀼𑀟𑁆𑀠𑀺 𑀳𑁄𑀢𑀺, 𑀏𑀯𑀁 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀧𑀕𑁆𑀕𑀳𑀡𑀲𑀪𑀸𑀯𑁄𑀢𑀺 𑀲𑀫𑁆𑀫𑀸𑀧𑀕𑁆𑀕𑀳𑀮𑀓𑁆𑀔𑀡𑁄 𑀲𑀫𑁆𑀫𑀸𑀯𑀸𑀬𑀸𑀫𑁄. 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑁂𑀲𑀼 𑀲𑀼𑀪𑀲𑀼𑀔𑀦𑀺𑀘𑁆𑀘𑀅𑀢𑁆𑀢𑀕𑀸𑀳𑀸𑀦𑀜𑁆𑀘 𑀯𑀺𑀥𑀫𑀦𑀯𑀲𑁂𑀦 𑀲𑀫𑁆𑀫𑀸𑀧𑀢𑀺𑀝𑁆𑀞𑀸𑀦𑀲𑀪𑀸𑀯𑀸𑀢𑀺 𑀲𑀫𑁆𑀫𑀸𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑀸 𑀲𑀫𑁆𑀫𑀸𑀲𑀢𑀺. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀲𑀫𑁆𑀫𑀸 𑀲𑀫𑀸𑀤𑀳𑀦𑀁 ¶ 𑀏𑀓𑀕𑁆𑀕𑀢𑀸𑀓𑀭𑀡𑀁 𑀲𑀪𑀸𑀯𑁄 𑀏𑀢𑀲𑁆𑀲𑀸𑀢𑀺 𑀲𑀫𑁆𑀫𑀸𑀲𑀫𑀸𑀥𑀸𑀦𑀮𑀓𑁆𑀔𑀡𑁄 𑀲𑀫𑁆𑀫𑀸𑀲𑀫𑀸𑀥𑀺. 𑀢𑀻𑀡𑀺 𑀓𑀺𑀘𑁆𑀘𑀸𑀦𑀺 𑀳𑁄𑀦𑁆𑀢𑀺 𑀧𑀝𑀺𑀧𑀓𑁆𑀔𑀥𑀫𑁆𑀫𑁂𑀲𑀼 ¶ , 𑀆𑀭𑀫𑁆𑀫𑀡𑀥𑀫𑁆𑀫𑁂𑀲𑀼, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀘 𑀏𑀓𑀲𑁆𑀫𑀺𑀁𑀬𑁂𑀯 𑀔𑀡𑁂 𑀧𑀯𑀢𑁆𑀢𑀺𑀯𑀺𑀲𑁂𑀲𑀪𑀽𑀢𑀸𑀦𑀺. 𑀇𑀤𑀸𑀦𑀺 𑀢𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀲𑁂𑀬𑁆𑀬𑀣𑀺𑀤’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀤𑁆𑀥𑀺𑀦𑁆𑀢𑀺 𑀇𑀫𑀺𑀦𑀸 ‘‘𑀅𑀜𑁆𑀜𑁂𑀳𑀻’’𑀢𑀺 𑀯𑀼𑀢𑁆𑀢𑀓𑀺𑀮𑁂𑀲𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀳 𑀏𑀓𑀝𑁆𑀞𑀸 𑀯𑀸 𑀅𑀦𑁂𑀓𑀝𑁆𑀞𑀸 𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀚𑀳𑀢𑀺 𑀧𑀳𑀸𑀬 𑀦𑀁 𑀧𑀝𑀺𑀯𑀺𑀚𑁆𑀛𑀢𑀺. 𑀦𑀺𑀭𑁄𑀥𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀢𑀺.

𑀦 𑀓𑁂𑀯𑀮𑀁 𑀫𑀕𑁆𑀕𑀥𑀫𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯, 𑀅𑀣 𑀔𑁄 𑀅𑀧𑀭𑁂𑀦𑀧𑀺 𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀦𑀸𑀦𑀸𑀔𑀡𑀸 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀦𑀢𑁄. 𑀦𑀸𑀦𑀸𑀭𑀫𑁆𑀫𑀡𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺𑀪𑀸𑀯𑀢𑁄. 𑀏𑀓𑀓𑁆𑀔𑀡𑀸 𑀲𑀓𑀺𑀤𑁂𑀯 𑀉𑀧𑁆𑀧𑀚𑁆𑀚𑀦𑀢𑁄. 𑀏𑀓𑀸𑀭𑀫𑁆𑀫𑀡𑀸 𑀦𑀺𑀩𑁆𑀩𑀸𑀦𑀯𑀺𑀲𑀬𑀢𑁆𑀢𑀸. 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀢𑀺 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀸. 𑀢𑀻𑀡𑀺 𑀦𑀸𑀫𑀸𑀦𑀺 𑀮𑀪𑀢𑀺 𑀓𑀸𑀫𑀲𑀗𑁆𑀓𑀧𑁆𑀧𑀸𑀤𑀻𑀦𑀁 𑀧𑀳𑀸𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸. 𑀧𑀝𑀺𑀧𑀓𑁆𑀔𑀧𑀳𑀸𑀦𑀯𑀲𑁂𑀦 𑀳𑀺𑀲𑁆𑀲 𑀦𑀸𑀫𑀢𑁆𑀢𑀬𑀮𑀸𑀪𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀯𑀺𑀭𑀢𑀺𑀬𑁄𑀧𑀺 𑀳𑁄𑀦𑁆𑀢𑀺 𑀘𑁂𑀢𑀦𑀸𑀬𑁄𑀧𑀺 𑀧𑀼𑀩𑁆𑀩𑀪𑀸𑀕𑁂𑀧𑀺 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀯𑀢𑁆𑀢𑀦𑀢𑁄. 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀯𑀺𑀭𑀢𑀺𑀬𑁄𑀯 𑀧𑀝𑀺𑀧𑀓𑁆𑀔𑀲𑀫𑀼𑀘𑁆𑀙𑀺𑀦𑁆𑀤𑀦𑀲𑁆𑀲 𑀫𑀕𑁆𑀕𑀓𑀺𑀘𑁆𑀘𑀢𑁆𑀢𑀸. 𑀦 𑀳𑀺 𑀘𑁂𑀢𑀦𑀸 𑀫𑀕𑁆𑀕𑀲𑀪𑀸𑀯𑀸. 𑀲𑀫𑁆𑀫𑀧𑁆𑀧𑀥𑀸𑀦𑀲𑀢𑀺𑀧𑀝𑁆𑀞𑀸𑀦𑀯𑀲𑁂𑀦𑀸𑀢𑀺 𑀘𑀢𑀼𑀩𑁆𑀩𑀺𑀥𑀲𑀫𑁆𑀫𑀧𑁆𑀧𑀥𑀸𑀦𑀘𑀢𑀼𑀩𑁆𑀩𑀺𑀥𑀲𑀢𑀺𑀧𑀝𑁆𑀞𑀸𑀦𑀯𑀲𑁂𑀦 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀢𑀺 𑀅𑀦𑀼𑀧𑁆𑀧𑀦𑁆𑀦𑀸𑀓𑀼𑀲𑀮𑀸𑀦𑀼𑀧𑁆𑀧𑀸𑀤𑀦𑀸𑀤𑀻𑀦𑀁 𑀓𑀼𑀲𑀮𑀸𑀦𑀜𑁆𑀘 𑀯𑀟𑁆𑀠𑀦𑀢𑁄. 𑀧𑀼𑀩𑁆𑀩𑀪𑀸𑀕𑁂𑀧𑀺 𑀫𑀕𑁆𑀕𑀓𑁆𑀔𑀡𑁂𑀧𑀻𑀢𑀺 𑀬𑀣𑀸 𑀧𑀼𑀩𑁆𑀩𑀪𑀸𑀕𑁂 𑀧𑀞𑀫𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀦𑀸𑀦𑀸. 𑀏𑀯𑀁 𑀫𑀕𑁆𑀕𑀓𑁆𑀔𑀡𑁂𑀧𑀺. 𑀦 𑀳𑀺 𑀏𑀓𑁄𑀧𑀺 𑀘 𑀫𑀕𑁆𑀕𑀲𑀫𑀸𑀥𑀺 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺𑀆𑀤𑀺𑀦𑀸𑀫𑀸𑀦𑀺 𑀮𑀪𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀯𑀺𑀬 𑀓𑀺𑀘𑁆𑀘𑀯𑀲𑁂𑀦 𑀪𑁂𑀤𑀸𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀫𑀕𑁆𑀕𑀓𑁆𑀔𑀡𑁂𑀧𑀺 𑀲𑀫𑁆𑀫𑀸𑀲𑀫𑀸𑀥𑀺𑀬𑁂𑀯𑀸’’𑀢𑀺.

𑀜𑀢𑁆𑀯𑀸 𑀜𑀸𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀯𑀼𑀤𑁆𑀥𑀺 𑀦𑀸𑀫 𑀯𑁂𑀧𑀼𑀮𑁆𑀮𑀁 𑀪𑀺𑀬𑁆𑀬𑁄𑀪𑀸𑀯𑁄 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀸𑀤𑁄 𑀏𑀯𑀸𑀢𑀺 𑀆𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀚𑀦𑁂𑀢𑀻’’𑀢𑀺. 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀅𑀪𑀺𑀯𑀟𑁆𑀠𑀁 𑀧𑀸𑀧𑁂𑀦𑁆𑀢𑁄 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀯𑀺𑀯𑀺𑀢𑁆𑀢𑀢𑀸𑀢𑀺 𑀯𑀺𑀯𑀺𑀢𑁆𑀢𑀪𑀸𑀯𑁄. 𑀲𑁄 𑀳𑀺 𑀯𑀺𑀯𑁂𑀘𑀦𑀻𑀬𑀢𑁄 𑀯𑀺𑀯𑀺𑀘𑁆𑀘𑀢𑀺, 𑀬𑀁 𑀯𑀺𑀯𑀺𑀘𑁆𑀘𑀺𑀢𑁆𑀯𑀸 𑀞𑀺𑀢𑀁, 𑀢𑀤𑀼𑀪𑀬𑀫𑁆𑀧𑀺 𑀇𑀥 𑀯𑀺𑀯𑀺𑀢𑁆𑀢𑀪𑀸𑀯𑀲𑀸𑀫𑀜𑁆𑀜𑁂𑀦 ‘‘𑀯𑀺𑀯𑀺𑀢𑁆𑀢𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀼 𑀧𑀼𑀭𑀺𑀫𑁄 𑀯𑀺𑀯𑁂𑀘𑀦𑀻𑀬𑀢𑁄 𑀯𑀺𑀯𑀺𑀘𑁆𑀘𑀫𑀸𑀦𑀢𑀸𑀬 𑀯𑀺𑀯𑀺𑀘𑁆𑀘𑀦𑀓𑀺𑀭𑀺𑀬𑀸𑀬 𑀲𑀫𑀗𑁆𑀕𑀻 𑀥𑀫𑁆𑀫𑀲𑀫𑀽𑀳𑁄 𑀢𑀸𑀬 𑀏𑀯 𑀯𑀺𑀯𑀺𑀘𑁆𑀘𑀦𑀓𑀺𑀭𑀺𑀬𑀸𑀬 𑀯𑀲𑁂𑀦 𑀯𑀺𑀯𑁂𑀓𑁄𑀢𑀺 𑀕𑀳𑀺𑀢𑁄. 𑀇𑀢𑀭𑁄 𑀲𑀩𑁆𑀩𑀲𑁄 𑀢𑀢𑁄 𑀯𑀺𑀯𑀺𑀢𑁆𑀢𑀲𑀪𑀸𑀯𑀢𑀸𑀬. 𑀢𑀢𑁆𑀣 𑀬𑀲𑁆𑀫𑀺𑀁 𑀥𑀫𑁆𑀫𑀧𑀼𑀜𑁆𑀚𑁂 𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀯𑀢𑁆𑀢𑀢𑀺, 𑀢𑀁 𑀬𑀣𑀸𑀯𑀼𑀢𑁆𑀢𑀸𑀬 𑀯𑀺𑀯𑀺𑀘𑁆𑀘𑀫𑀸𑀦𑀢𑀸𑀬 𑀯𑀺𑀯𑁂𑀓𑀲𑀗𑁆𑀔𑀸𑀢𑀁 𑀦𑀺𑀲𑁆𑀲𑀸𑀬𑁂𑀯 𑀧𑀯𑀢𑁆𑀢𑀢𑀺, 𑀇𑀢𑀭𑀁 𑀧𑀦 𑀢𑀁𑀦𑀺𑀦𑁆𑀦𑀢𑀸𑀢𑀁𑀆𑀭𑀫𑁆𑀫𑀡𑀢𑀸𑀳𑀻𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀯𑁂𑀓𑀁 𑀦𑀺𑀲𑁆𑀲𑀺𑀢𑀁, 𑀯𑀺𑀯𑁂𑀓𑁂 𑀯𑀸 𑀦𑀺𑀲𑁆𑀲𑀺𑀢’’𑀦𑁆𑀢𑀺.

𑀬𑀣𑀸 ¶ 𑀯𑀸 𑀯𑀺𑀯𑁂𑀓𑀯𑀲𑁂𑀦 𑀧𑀯𑀢𑁆𑀢𑀁 𑀛𑀸𑀦𑀁 ‘‘𑀯𑀺𑀯𑁂𑀓𑀚’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀯𑀺𑀯𑁂𑀓𑀯𑀲𑁂𑀦 𑀧𑀯𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 ¶ ‘‘𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀸’’𑀢𑀺 𑀤𑀝𑁆𑀞𑀩𑁆𑀩𑀸. 𑀦𑀺𑀲𑁆𑀲𑀬𑁄 𑀘 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀸𑀦𑀁 𑀯𑀲𑁂𑀦 𑀫𑀕𑁆𑀕𑀨𑀮𑀸𑀦𑀁 𑀯𑁂𑀤𑀺𑀢𑀩𑁆𑀩𑁄. 𑀅𑀲𑀢𑀺𑀧𑀺 𑀢𑀸𑀲𑀁 𑀧𑀼𑀩𑁆𑀩𑀸𑀧𑀭𑀪𑀸𑀯𑁂 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺 𑀏𑀢𑁆𑀣 𑀧𑀘𑁆𑀘𑀬𑀸𑀦𑀁 𑀲𑀫𑀼𑀧𑁆𑀧𑀸𑀤𑀦𑀁 𑀯𑀺𑀬 𑀅𑀪𑀺𑀦𑁆𑀦𑀥𑀫𑁆𑀫𑀸𑀥𑀸𑀭𑀸 𑀦𑀺𑀲𑁆𑀲𑀬𑀪𑀸𑀯𑀦𑀸 𑀲𑀫𑁆𑀪𑀯𑀦𑁆𑀢𑀺. 𑀢𑀲𑁆𑀲 𑀢𑀤𑀗𑁆𑀕-𑀲𑀫𑀼𑀘𑁆𑀙𑁂𑀤𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀢𑀁 𑀯𑀢𑁆𑀯𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀢𑀸𑀬 𑀅𑀯𑀘𑀦𑀁 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸𑀬 𑀯𑀼𑀘𑁆𑀘𑀫𑀸𑀦𑀢𑁆𑀢𑀸. 𑀪𑀸𑀯𑀺𑀢𑀫𑀕𑁆𑀕𑀲𑁆𑀲 𑀳𑀺 𑀬𑁂 𑀲𑀘𑁆𑀙𑀺𑀓𑀸𑀢𑀩𑁆𑀩𑀸 𑀥𑀫𑁆𑀫𑀸. 𑀢𑁂𑀲𑀁 𑀓𑀺𑀘𑁆𑀘𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑁄. 𑀅𑀚𑁆𑀛𑀸𑀲𑀬𑀢𑁄𑀢𑀺 ‘‘𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀫𑀳𑀦𑁆𑀢𑀅𑀚𑁆𑀛𑀸𑀲𑀬𑀢𑁄. 𑀬𑀤𑀺𑀧𑀺 𑀳𑀺 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁, 𑀲𑀗𑁆𑀔𑀸𑀭𑁂𑀲𑀼 𑀧𑀦 𑀆𑀤𑀻𑀦𑀯𑀁 𑀲𑀼𑀝𑁆𑀞𑀼, 𑀤𑀺𑀲𑁆𑀯𑀸 𑀢𑀧𑁆𑀧𑀝𑀺𑀧𑀓𑁆𑀔𑁂 𑀦𑀺𑀩𑁆𑀩𑀸𑀦𑁂 𑀦𑀺𑀦𑁆𑀦𑀢𑀸𑀬 𑀅𑀚𑁆𑀛𑀸𑀲𑀬𑀢𑁄 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑁄 𑀳𑁄𑀢𑀺, 𑀉𑀡𑁆𑀳𑀸𑀪𑀺𑀪𑀽𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀻𑀢𑀦𑀺𑀦𑁆𑀦𑀘𑀺𑀢𑁆𑀢𑀢𑀸 𑀯𑀺𑀬. 𑀓𑁂𑀘𑀺 𑀧𑀦 ‘‘𑀬𑀣𑀸 𑀲𑀪𑀸𑀯𑀢𑁄, 𑀬𑀣𑀸 𑀅𑀚𑁆𑀛𑀸𑀲𑀬𑀢𑁄 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀢𑀸, 𑀏𑀯𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀢𑀸𑀧𑀺 𑀲𑀺𑀬𑀸’’𑀢𑀺 𑀯𑀤𑀦𑁆𑀢𑀺. 𑀬𑀤𑀕𑁆𑀕𑁂𑀦 𑀳𑀺 𑀦𑀺𑀩𑁆𑀩𑀸𑀦𑀦𑀺𑀦𑁆𑀦𑀢𑀸 𑀲𑀺𑀬𑀸, 𑀢𑀤𑀕𑁆𑀕𑁂𑀦 𑀨𑀮𑀦𑀺𑀦𑁆𑀦𑀢𑀸𑀧𑀺 𑀲𑀺𑀬𑀸 ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀁 𑀢𑀤𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺 𑀅𑀚𑁆𑀛𑀸𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀪𑀸𑀯𑀢𑁄. 𑀬𑀲𑁆𑀫𑀸 𑀧𑀳𑀸𑀦𑀯𑀺𑀦𑀬𑁄 𑀯𑀺𑀬 𑀭𑀸𑀕𑀦𑀺𑀭𑁄𑀥𑁄𑀧𑀺 𑀇𑀥𑀸𑀥𑀺𑀧𑁆𑀧𑁂𑀢𑀯𑀺𑀯𑁂𑀓𑁂𑀦 𑀅𑀢𑁆𑀣𑀢𑁄 𑀦𑀺𑀩𑁆𑀩𑀺𑀲𑀺𑀝𑁆𑀞𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑀏𑀲 𑀦𑀬𑁄 𑀯𑀺𑀭𑀸𑀕𑀦𑀺𑀲𑁆𑀲𑀺𑀢𑀸𑀤𑀻𑀲𑀽𑀢𑀺. 𑀢𑁂𑀦𑀸𑀳 ‘‘𑀯𑀺𑀯𑁂𑀓𑀢𑁆𑀣𑀸 𑀏𑀯 𑀳𑀺 𑀯𑀺𑀭𑀸𑀕𑀸𑀤𑀬𑁄’’𑀢𑀺.

𑀯𑁄𑀲𑁆𑀲𑀕𑁆𑀕𑀲𑀤𑁆𑀤𑁄 𑀧𑀭𑀺𑀘𑁆𑀘𑀸𑀕𑀢𑁆𑀣𑁄 𑀧𑀓𑁆𑀔𑀦𑁆𑀤𑀦𑀢𑁆𑀣𑁄 𑀘𑀸𑀢𑀺 𑀯𑁄𑀲𑁆𑀲𑀕𑁆𑀕𑀲𑁆𑀲 𑀤𑀼𑀯𑀺𑀥𑀢𑀸 𑀯𑀼𑀢𑁆𑀢𑀸. 𑀯𑁄𑀲𑁆𑀲𑀚𑁆𑀚𑀦𑀜𑁆𑀳𑀺 𑀧𑀳𑀸𑀦𑀁, 𑀯𑀺𑀲𑁆𑀲𑀝𑁆𑀞𑀪𑀸𑀯𑁂𑀦 𑀦𑀺𑀭𑀸𑀲𑀗𑁆𑀓𑀧𑀯𑀢𑁆𑀢𑀺 𑀘, 𑀢𑀲𑁆𑀫𑀸 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀢𑀤𑀗𑁆𑀕𑀯𑀲𑁂𑀦, 𑀫𑀕𑁆𑀕𑀓𑁆𑀔𑀡𑁂 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀝𑀺𑀧𑀓𑁆𑀔𑀲𑁆𑀲 𑀧𑀳𑀸𑀦𑀁 𑀯𑁄𑀲𑁆𑀲𑀕𑁆𑀕𑁄, 𑀢𑀣𑀸 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀢𑀁𑀦𑀺𑀦𑁆𑀦𑀪𑀸𑀯𑁂𑀦, 𑀫𑀕𑁆𑀕𑀓𑁆𑀔𑀡𑁂 𑀆𑀭𑀫𑁆𑀫𑀡𑀓𑀭𑀡𑁂𑀦 𑀯𑀺𑀲𑁆𑀲𑀝𑁆𑀞𑀲𑀪𑀸𑀯𑀢𑀸 𑀯𑁄𑀲𑁆𑀲𑀕𑁆𑀕𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀢𑀢𑁆𑀣 𑀧𑀭𑀺𑀘𑁆𑀘𑀸𑀕𑀯𑁄𑀲𑁆𑀲𑀕𑁆𑀕𑁄’’𑀢𑀺𑀆𑀤𑀺. 𑀅𑀬𑀁 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀅𑀬𑀁 𑀫𑀺𑀲𑁆𑀲𑀓𑀯𑀲𑁂𑀦 𑀯𑀼𑀢𑁆𑀢𑀸 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀬𑀣𑀸𑀯𑀼𑀢𑁆𑀢𑁂𑀦 𑀧𑀓𑀸𑀭𑁂𑀦𑀸𑀢𑀺 𑀢𑀤𑀗𑁆𑀕𑀧𑁆𑀧𑀳𑀸𑀦𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀧𑀓𑀸𑀭𑁂𑀦 𑀢𑀁𑀦𑀺𑀦𑁆𑀦𑀢𑀤𑀸𑀭𑀫𑁆𑀫𑀡𑀓𑀭𑀡𑀧𑁆𑀧𑀓𑀸𑀭𑁂𑀦 𑀘.

𑀧𑀼𑀩𑁆𑀩𑁂 𑀯𑁄𑀲𑁆𑀲𑀕𑁆𑀕𑀯𑀘𑀦𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀲𑀓𑀮𑁂𑀦 𑀯𑀘𑀦𑁂𑀦𑀸’’𑀢𑀺. 𑀧𑀭𑀺𑀡𑀫𑀦𑁆𑀢𑀁 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂, 𑀧𑀭𑀺𑀡𑀢𑀁 𑀫𑀕𑁆𑀕𑀓𑁆𑀔𑀡𑁂. 𑀧𑀭𑀺𑀡𑀸𑀫𑁄 𑀦𑀸𑀫 𑀇𑀥 𑀧𑀭𑀺𑀧𑀸𑀓𑁄𑀢𑀺 𑀆𑀳 ‘‘𑀧𑀭𑀺𑀧𑀘𑁆𑀘𑀦𑁆𑀢𑀁 𑀧𑀭𑀺𑀧𑀓𑁆𑀓𑀜𑁆𑀘𑀸’’𑀢𑀺. 𑀧𑀭𑀺𑀧𑀸𑀓𑁄 𑀘 𑀆𑀲𑁂𑀯𑀦𑀮𑀸𑀪𑁂𑀦 𑀮𑀤𑁆𑀥𑀲𑀸𑀫𑀢𑁆𑀣𑀺𑀬𑀲𑁆𑀲 𑀓𑀺𑀮𑁂𑀲𑁂 𑀧𑀭𑀺𑀘𑁆𑀘𑀚𑀺𑀢𑀼𑀁 ¶ 𑀦𑀺𑀩𑁆𑀩𑀸𑀦𑀁 𑀧𑀓𑁆𑀔𑀦𑁆𑀤𑀺𑀢𑀼𑀁 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑁄. 𑀢𑁂𑀦𑀸𑀳 ‘‘𑀅𑀬’’𑀦𑁆𑀢𑀺𑀆𑀤𑀺. 𑀏𑀲 𑀦𑀬𑁄𑀢𑀺 𑀬𑁆𑀯𑀸𑀬𑀁 𑀦𑀬𑁄 ‘‘𑀯𑀺𑀯𑁂𑀓𑀦𑀺𑀲𑁆𑀲𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀁 𑀯𑀼𑀢𑁆𑀢𑁄, 𑀲𑁂𑀲𑁂𑀲𑀼 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄, 𑀏𑀯𑀁 𑀢𑀢𑁆𑀣 𑀦𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀘𑁆𑀘𑀸𑀢𑀺 𑀦𑀺𑀲𑁆𑀲𑀸𑀬. 𑀚𑀸𑀢𑀺𑀲𑀪𑀸𑀯𑀸𑀢𑀺 𑀚𑀸𑀬𑀦𑀲𑀪𑀸𑀯𑀸. 𑀲𑀓𑀮𑁄𑀢𑀺 𑀅𑀦𑀯𑀲𑁂𑀲𑁄, 𑀲𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀦 𑀓𑁄𑀘𑀺 𑀫𑀕𑁆𑀕𑁄 𑀲𑀸𑀯𑀲𑁂𑀲𑁄 𑀳𑀼𑀢𑁆𑀯𑀸 𑀲𑀫𑁆𑀪𑀯𑀢𑀺. 𑀳𑁂𑀝𑁆𑀞𑀺𑀫𑁂 𑀫𑀕𑁆𑀕𑁂 𑀉𑀧𑁆𑀧𑀦𑁆𑀦𑁂 ¶ 𑀉𑀧𑀭𑀺𑀫𑁄 𑀉𑀧𑁆𑀧𑀦𑁆𑀦𑁄 𑀏𑀯 𑀦𑀸𑀫 𑀅𑀦𑀦𑁆𑀢𑀭𑀸𑀬𑁂𑀦 𑀉𑀧𑁆𑀧𑀚𑁆𑀚𑀦𑀢𑁄. 𑀯𑀯𑀲𑁆𑀲𑀕𑁆𑀕𑀢𑁆𑀣𑁂𑀢𑀺 𑀯𑀘𑀲𑀸𑀬𑀢𑁆𑀣𑁂. 𑀯𑀡𑁆𑀡𑀬𑀦𑁆𑀢𑀻𑀢𑀺 𑀕𑀼𑀡𑀯𑀡𑁆𑀡𑀦𑀯𑀲𑁂𑀦 𑀯𑀺𑀢𑁆𑀣𑀸𑀭𑁂𑀦𑁆𑀢𑀺.

𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀞𑀫𑀅𑀧𑀼𑀢𑁆𑀢𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁦. 𑀤𑀺𑀯-𑀲𑀤𑁆𑀤𑁄 𑀤𑀺𑀯𑀸-𑀲𑀤𑁆𑀤𑁄 𑀯𑀺𑀬 𑀤𑀺𑀯𑀲𑀧𑀭𑀺𑀬𑀸𑀬𑁄, 𑀢𑀲𑁆𑀫𑀸 𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀼𑀘𑁆𑀘𑀫𑀸𑀦𑁄 𑀤𑀺𑀯𑀲𑀤𑁆𑀤𑁄 𑀅𑀢𑁆𑀣𑀯𑀺𑀲𑁂𑀲𑀁 𑀤𑀻𑀧𑁂𑀢𑀻𑀢𑀺 𑀆𑀳 ‘‘𑀤𑀺𑀯𑀲𑀲𑁆𑀲 𑀤𑀺𑀯𑀸’’𑀢𑀺𑀆𑀤𑀺. 𑀲𑀁 𑀯𑀼𑀘𑁆𑀘𑀢𑀺 𑀥𑀦𑀁, 𑀢𑀲𑁆𑀲 𑀧𑀢𑀻𑀢𑀺 𑀲𑀫𑁆𑀧𑀢𑀺, 𑀥𑀦𑀲𑀸𑀫𑀺𑀓𑁄, 𑀢𑀲𑁆𑀲 𑀳𑀺𑀢𑀸𑀯𑀳𑀢𑁆𑀢𑀸 𑀲𑀸𑀧𑀢𑁂𑀬𑁆𑀬𑀦𑁆𑀢𑀺 𑀆𑀳 ‘‘𑀲𑀸𑀧𑀢𑁂𑀬𑁆𑀬𑀦𑁆𑀢𑀺 𑀥𑀦’’𑀦𑁆𑀢𑀺. 𑀢𑀲𑁆𑀲 𑀕𑁂𑀳𑁂 𑀓𑀢𑀸𑀓𑀢𑀪𑀡𑁆𑀟𑀲𑁆𑀲 𑀅𑀢𑀺𑀩𑀳𑀼𑀪𑀸𑀯𑀢𑁄 𑀯𑀺𑀫𑁆𑀳𑀬𑀧𑁆𑀧𑀢𑁆𑀢𑁄 𑀭𑀸𑀚𑀸 ‘‘𑀓𑁄 𑀧𑀦 𑀯𑀸𑀤𑁄’’𑀢𑀺 𑀆𑀳. 𑀓𑀸𑀴𑀮𑁄𑀳𑀁 𑀦𑀸𑀫 𑀅𑀬𑁄𑀨𑀮𑀁. 𑀓𑀘𑁆𑀙𑀧𑀸𑀤𑀺𑀭𑀽𑀧𑁂𑀳𑀺𑀧𑀺 𑀲𑁄𑀯𑀡𑁆𑀡𑀸𑀤𑀻𑀦𑀺 𑀞𑀧𑁂𑀦𑁆𑀢𑀺. 𑀲𑀓𑀼𑀡𑁆𑀟𑀓𑀪𑀢𑁆𑀢𑀦𑁆𑀢𑀺 𑀲𑀓𑀼𑀡𑁆𑀟𑁂𑀳𑀺 𑀯𑀸 𑀲𑀣𑀼𑀲𑁂𑀳𑀺 𑀯𑀸 𑀧𑀓𑁆𑀓𑀪𑀢𑁆𑀢𑀁. 𑀩𑀺𑀮𑀗𑁆𑀕𑀁 𑀯𑀼𑀘𑁆𑀘𑀢𑀺 𑀥𑀜𑁆𑀜𑀩𑀺𑀮𑀗𑁆𑀕𑀁, 𑀆𑀭𑀦𑀸𑀮𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀢𑀁 𑀤𑀼𑀢𑀺𑀬𑀁 𑀅𑀲𑁆𑀲𑀸𑀢𑀺 𑀩𑀺𑀮𑀗𑁆𑀕𑀤𑀼𑀢𑀺𑀬𑀁. 𑀢𑀜𑁆𑀳𑀺 𑀓𑀜𑁆𑀚𑀺𑀢𑁄 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀓𑀜𑁆𑀚𑀺𑀓𑀁 𑀦𑀸𑀫. 𑀢𑀻𑀳𑀺 𑀧𑀓𑁆𑀔𑁂𑀳𑀺 𑀯𑀢𑁆𑀣𑀔𑀡𑁆𑀟𑁂𑀳𑀺 𑀓𑀢𑀦𑀺𑀯𑀸𑀲𑀦𑀁 𑀢𑀺𑀧𑀓𑁆𑀔𑀯𑀲𑀦𑀁. 𑀢𑁂𑀦𑀸𑀳 ‘‘𑀢𑀻𑀡𑀺…𑀧𑁂… 𑀦𑀺𑀯𑀸𑀲𑀦’’𑀦𑁆𑀢𑀺.

𑀅𑀲𑀦𑁆𑀢𑁄 𑀦𑀻𑀘𑁄 𑀧𑀼𑀭𑀺𑀲𑁄𑀢𑀺 𑀅𑀲𑀧𑁆𑀧𑀼𑀭𑀺𑀲𑁄𑀢𑀺 𑀆𑀳 ‘‘𑀮𑀸𑀫𑀓𑀧𑀼𑀭𑀺𑀲𑁄’’𑀢𑀺. 𑀓𑀫𑁆𑀫𑀲𑁆𑀲 𑀦𑀺𑀩𑁆𑀩𑀢𑁆𑀢𑀪𑀸𑀯𑁂𑀦 𑀑𑀢𑀭𑀡𑀢𑀸𑀬 𑀨𑀮𑀁 𑀅𑀕𑁆𑀕𑀁 𑀦𑀸𑀫, 𑀉𑀧𑀭𑀺𑀪𑀽𑀫𑀺𑀕𑀢𑀢𑁆𑀢𑀸 𑀉𑀤𑁆𑀥𑀁 𑀅𑀕𑁆𑀕𑀁 𑀅𑀲𑁆𑀲𑀸𑀢𑀺 𑀉𑀤𑁆𑀥𑀕𑁆𑀕𑀺𑀓𑀁. 𑀤𑀓𑁆𑀔𑀺𑀡𑀦𑁆𑀢𑀺 𑀤𑀸𑀦𑀫𑀸𑀳. 𑀲𑀕𑁆𑀕𑁄 𑀦𑀸𑀫 𑀓𑀸𑀫𑀪𑀯𑀽𑀧𑀧𑀢𑁆𑀢𑀺𑀪𑀯𑁄, 𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑀢𑁄 ‘‘𑀲𑀕𑁆𑀕𑀲𑁆𑀲 𑀳𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀭𑀼𑀧𑀧𑀢𑁆𑀢𑀺𑀚𑀦𑀦𑀢𑁄𑀢𑀺 𑀢𑀢𑁆𑀭 𑀉𑀧𑀧𑀢𑁆𑀢𑀺𑀬𑀸 𑀚𑀦𑀦𑀢𑁄, 𑀉𑀧𑁆𑀧𑀸𑀤𑀦𑀢𑁄𑀢𑀺 𑀅𑀢𑁆𑀣𑁄.

𑀲𑁂𑀢𑀁 ¶ 𑀉𑀤𑀓𑀁 𑀏𑀢𑀺𑀲𑁆𑀲𑀸𑀢𑀺 𑀲𑁂𑀢𑁄𑀤𑀓𑀸. 𑀲𑁄 𑀬𑁂𑀦 𑀪𑀸𑀯𑁂𑀦 𑀬𑀢𑁆𑀣 𑀧𑀸𑀓𑀝𑀢𑀭𑁄 𑀳𑀼𑀢𑁆𑀯𑀸 𑀤𑀺𑀲𑁆𑀲𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀻𑀘𑀻𑀦𑀁 𑀪𑀺𑀦𑁆𑀦𑀝𑁆𑀞𑀸𑀦𑁂’’𑀢𑀺 𑀆𑀳. 𑀲𑀼𑀔𑁄𑀢𑀭𑀡𑀝𑁆𑀞𑀸𑀦𑀢𑀸𑀬 𑀓𑀤𑁆𑀤𑀫𑀸𑀤𑀺𑀤𑁄𑀲𑀯𑀺𑀭𑀳𑀢𑁄 𑀘 𑀲𑀼𑀦𑁆𑀤𑀭𑀢𑀺𑀢𑁆𑀣𑀸. 𑀢𑀁 𑀅𑀧𑁂𑀬𑁆𑀬𑀫𑀸𑀦𑀦𑁆𑀢𑀺 𑀢𑀁 𑀉𑀤𑀓𑀁 𑀓𑁂𑀦𑀘𑀺 𑀅𑀧𑀭𑀺𑀪𑀼𑀜𑁆𑀚𑀺𑀬𑀫𑀸𑀦𑀁. 𑀅𑀢𑁆𑀢𑀦𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀓𑀭𑁄𑀢𑀺 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀓𑀫𑁆𑀫𑀲𑀗𑁆𑀔𑀸𑀢𑀓𑀺𑀘𑁆𑀘𑀓𑀭𑁄, 𑀧𑀭𑀺𑀪𑁄𑀕𑀯𑀲𑁂𑀦 𑀘𑁂𑀯 𑀲𑀗𑁆𑀕𑀳𑁂𑀢𑀩𑁆𑀩𑀲𑀗𑁆𑀕𑀡𑁆𑀳𑀦𑀯𑀲𑁂𑀦 𑀘 𑀦𑀺𑀬𑁄𑀚𑀓𑁄𑀢𑀺 𑀅𑀢𑁆𑀣𑁄. 𑀓𑀼𑀲𑀮𑀓𑀺𑀘𑁆𑀘𑀓𑀭𑁄𑀢𑀺 𑀅𑀢𑁆𑀢𑀦𑀸 𑀓𑀸𑀢𑀩𑁆𑀩𑀧𑀼𑀜𑁆𑀜𑀓𑀭𑁄.

𑀧𑀞𑀫𑀅𑀧𑀼𑀢𑁆𑀢𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀼𑀢𑀺𑀬𑀅𑀧𑀼𑀢𑁆𑀢𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁧. 𑀧𑀺𑀡𑁆𑀟𑀧𑀸𑀢𑁂𑀦𑀸𑀢𑀺 ¶ 𑀲𑀳𑀬𑁄𑀕𑁂 𑀓𑀭𑀡𑀯𑀘𑀦𑀁. 𑀧𑀝𑀺𑀧𑀸𑀤𑀦𑀁 𑀢𑁂𑀦 𑀲𑀳 𑀬𑁄𑀚𑀦𑀦𑁆𑀢𑀺 𑀆𑀳 ‘‘𑀧𑀺𑀡𑁆𑀟𑀧𑀸𑀢𑁂𑀦 𑀲𑀤𑁆𑀥𑀺𑀁 𑀲𑀁𑀬𑁄𑀚𑁂𑀲𑀺, 𑀧𑀺𑀡𑁆𑀟𑀧𑀸𑀢𑀁 𑀅𑀤𑀸𑀲𑀻𑀢𑀺 𑀅𑀢𑁆𑀣𑁄’’𑀢𑀺. ‘‘𑀧𑀡𑀻𑀢𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, 𑀧𑀸𑀴𑀺𑀬𑀁 𑀧𑀦 ‘‘𑀓𑀡𑀸𑀚𑀓𑀁 𑀪𑀼𑀜𑁆𑀚𑀢𑀺 𑀩𑀺𑀮𑀗𑁆𑀕𑀤𑀼𑀢𑀺𑀬’’𑀦𑁆𑀢𑀺. 𑀢𑀁 𑀢𑀁 𑀧𑀯𑀢𑁆𑀢𑀺𑀢𑀁 𑀬𑁂𑀪𑀼𑀬𑁆𑀬𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀤𑀸𑀦𑀺 ‘‘𑀇𑀫𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀓𑀲𑁆𑀲𑀘𑀺 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀤𑁂𑀣𑀸’’𑀢𑀺 𑀯𑀘𑀦𑀁 𑀦 𑀲𑀼𑀢𑀧𑀼𑀩𑁆𑀩𑀁, 𑀬𑀲𑁆𑀫𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀦𑀸𑀫 𑀅𑀢𑁆𑀢𑀦𑁄 𑀕𑀼𑀡𑀸𑀦𑀼𑀪𑀸𑀯𑁂𑀳𑀺 𑀮𑁄𑀓𑁂 𑀧𑀸𑀓𑀝𑀸 𑀲𑀜𑁆𑀚𑀸𑀢𑀸 𑀏𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀲𑁂𑀝𑁆𑀞𑀺𑀪𑀭𑀺𑀬𑀸𑀬 ‘‘𑀦 𑀬𑀲𑁆𑀲 𑀯𑀸 𑀢𑀲𑁆𑀲 𑀯𑀸’’𑀢𑀺𑀆𑀤𑀺 𑀘𑀺𑀦𑁆𑀢𑀺𑀢𑀁. 𑀢𑀣𑀸 𑀳𑀺 𑀢𑁂𑀲𑀁 𑀤𑁂𑀦𑁆𑀢𑀸𑀧𑀺 𑀲𑀓𑁆𑀓𑀘𑁆𑀘𑀁 𑀬𑁂𑀪𑀼𑀬𑁆𑀬𑁂𑀦 𑀧𑀡𑀻𑀢𑀫𑁂𑀯 𑀤𑁂𑀦𑁆𑀢𑀺. 𑀦𑀸𑀲𑀸𑀧𑀼𑀝𑀁 𑀧𑀳𑀭𑀺 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦. 𑀲𑁄 𑀮𑀼𑀤𑁆𑀥𑀢𑀸𑀬 ‘‘𑀩𑀳𑀼 𑀯𑀢 𑀥𑀜𑁆𑀜𑀁 𑀫𑀫𑀲𑁆𑀲𑀸’’𑀢𑀺 𑀘𑀺𑀢𑁆𑀢𑀁 𑀲𑀁𑀬𑀫𑁂𑀢𑀼𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄.

𑀯𑀺𑀧𑁆𑀧𑀝𑀺𑀲𑀸𑀭𑀼𑀧𑁆𑀧𑀦𑁆𑀦𑀸𑀓𑀸𑀭𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀭𑀫𑁂𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀇𑀫𑀲𑁆𑀲 𑀲𑀫𑀡𑀲𑁆𑀲 𑀧𑀺𑀡𑁆𑀟𑀧𑀸𑀢𑀁 𑀤𑁂𑀳𑀻’’𑀢𑀺 𑀯𑀤𑀢𑁄 𑀦 𑀏𑀓𑀸𑀬 𑀏𑀯 𑀚𑀯𑀦𑀯𑀻𑀣𑀺𑀬𑀸 𑀯𑀲𑁂𑀦 𑀅𑀢𑁆𑀣𑀲𑀺𑀤𑁆𑀥𑀺. 𑀅𑀣 𑀔𑁄 𑀢𑀢𑁆𑀣 𑀆𑀤𑀺𑀢𑁄 𑀧𑀯𑀢𑁆𑀢𑀚𑀯𑀦𑀯𑀸𑀭𑁄𑀧𑀺 𑀅𑀢𑁆𑀣𑀺 𑀫𑀚𑁆𑀛𑁂 𑀧𑀯𑀢𑁆𑀢𑀚𑀯𑀦𑀯𑀸𑀭𑁄𑀧𑀺, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀼𑀩𑁆𑀩𑀧𑀘𑁆𑀙𑀺𑀫𑀘𑁂𑀢𑀦𑀸𑀯𑀲𑁂𑀦𑀸’’𑀢𑀺. 𑀏𑀓𑀸 𑀘𑁂𑀢𑀦𑀸 𑀤𑁆𑀯𑁂 𑀧𑀝𑀺𑀲𑀦𑁆𑀥𑀺𑀬𑁄 𑀦 𑀤𑁂𑀢𑀻𑀢𑀺 𑀏𑀢𑁆𑀣 𑀲𑀸𑀓𑁂𑀢𑀧𑀜𑁆𑀳𑀯𑀲𑁂𑀦 𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀼𑀤𑁆𑀤𑀲𑀦𑁆𑀦𑀁 𑀘𑁂𑀢𑀦𑀸𑀦𑀁 𑀧𑀼𑀩𑁆𑀩𑁂 𑀧𑀼𑀭𑁂𑀢𑀭𑀁 𑀓𑀢𑀢𑁆𑀢𑀸 𑀧𑀼𑀭𑀸𑀡𑀁.

𑀧𑀭𑀺𑀕𑀬𑁆𑀳𑀢𑀻𑀢𑀺 ¶ 𑀧𑀭𑀺𑀕𑁆𑀕𑀳𑁄𑀢𑀺 𑀆𑀳 ‘‘𑀧𑀭𑀺𑀕𑁆𑀕𑀳𑀺𑀢𑀁 𑀯𑀢𑁆𑀣𑀼’’𑀦𑁆𑀢𑀺. 𑀅𑀦𑁆𑀯𑀸𑀬 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀦𑁆𑀢𑀻𑀢𑀺 𑀅𑀦𑀼𑀚𑀻𑀯𑀺𑀦𑁄. 𑀲𑀩𑁆𑀩𑀫𑁂𑀢𑀦𑁆𑀢𑀺 𑀥𑀦𑀥𑀜𑁆𑀜𑀸𑀤𑀺𑀲𑀩𑁆𑀩𑀁 𑀏𑀢𑀁 𑀬𑀣𑀸𑀯𑀼𑀢𑁆𑀢𑀧𑀭𑀺𑀕𑁆𑀕𑀳𑀯𑀢𑁆𑀣𑀼𑀁. 𑀦𑀺𑀓𑁆𑀔𑀺𑀧𑁆𑀧𑀕𑀸𑀫𑀺𑀦𑀦𑁆𑀢𑀺 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀢𑀸𑀕𑀸𑀫𑀺𑀦𑀁. 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀲𑀪𑀸𑀯𑀁 𑀳𑁄𑀢𑀻𑀢𑀺 𑀆𑀳 ‘‘𑀦𑀺𑀓𑁆𑀔𑀺𑀧𑁆𑀧𑀲𑀪𑀸𑀯’’𑀦𑁆𑀢𑀺. 𑀧𑀳𑀸𑀬 𑀕𑀫𑀦𑀻𑀬𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀧𑀭𑀺𑀘𑁆𑀘𑀚𑀺𑀢𑀩𑁆𑀩𑀲𑀪𑀸𑀯𑀫𑁂𑀯𑀸’’𑀢𑀺.

𑀤𑀼𑀢𑀺𑀬𑀅𑀧𑀼𑀢𑁆𑀢𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀯𑀕𑁆𑀕𑁄

𑁧. 𑀧𑀼𑀕𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁨. ‘‘𑀦𑀻𑀘𑁂 ¶ 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄’’𑀢𑀺𑀆𑀤𑀺 𑀅𑀧𑁆𑀧𑀓𑀸𑀲𑀦𑀪𑀸𑀯𑁂𑀦 𑀢𑀫𑀢𑀻𑀢𑀺 𑀢𑀫𑁄, 𑀢𑁂𑀦 𑀢𑀫𑁂𑀦 𑀬𑀼𑀢𑁆𑀢𑁄𑀢𑀺 𑀢𑀫𑁄 𑀧𑀼𑀕𑁆𑀕𑀮𑁄 𑀯𑀼𑀘𑁆𑀘𑀢𑀺, 𑀢𑀁𑀬𑁄𑀕𑀢𑁄 𑀧𑀼𑀕𑁆𑀕𑀮𑀲𑁆𑀲 𑀢𑀩𑁆𑀩𑁄𑀳𑀸𑀭𑁄 𑀬𑀣𑀸 ‘‘𑀫𑀘𑁆𑀙𑁂𑀭𑀬𑁄𑀕𑀢𑁄 𑀫𑀘𑁆𑀙𑁂𑀭𑁄’’𑀢𑀺. 𑀢𑀲𑁆𑀫𑀸 𑀢𑀫𑁄𑀢𑀺 𑀅𑀧𑁆𑀧𑀓𑀸𑀲𑀦𑀪𑀸𑀯𑁂𑀦 𑀢𑀫𑁄 𑀢𑀫𑀪𑀽𑀢𑁄 𑀅𑀦𑁆𑀥𑀓𑀸𑀭𑁄 𑀯𑀺𑀬 𑀚𑀸𑀢𑁄, 𑀅𑀦𑁆𑀥𑀓𑀸𑀭𑀢𑁆𑀢𑀁 𑀯𑀸 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀮𑀓𑁆𑀔𑀡𑀁 𑀢𑀫𑀫𑁂𑀯 𑀧𑀭𑀫𑁆𑀧𑀭𑀢𑁄 𑀅𑀬𑀦𑀁 𑀕𑀢𑀺 𑀦𑀺𑀝𑁆𑀞𑀸 𑀏𑀢𑀲𑁆𑀲𑀸𑀢𑀺 𑀢𑀫𑀧𑀭𑀸𑀬𑀡𑁄, 𑀢𑀫𑀧𑀭𑀸𑀬𑀡𑀢𑀁 𑀯𑀸 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀜𑀸𑀬𑁂𑀦𑀧𑀺 𑀢𑀫𑀕𑁆𑀕𑀳𑀡𑁂𑀦 𑀔𑀦𑁆𑀥𑀢𑀫𑁄𑀯 𑀓𑀣𑀺𑀢𑁄, 𑀦 𑀅𑀦𑁆𑀥𑀓𑀸𑀭𑀢𑀫𑁄. 𑀔𑀦𑁆𑀥𑀢𑀫𑁄𑀢𑀺 𑀘 𑀲𑀫𑁆𑀧𑀢𑁆𑀢𑀺𑀭𑀳𑀺𑀢𑀸 𑀔𑀦𑁆𑀥𑀧𑀯𑀢𑁆𑀢𑀺𑀬𑁂𑀯 𑀤𑀝𑁆𑀞𑀩𑁆𑀩𑀸. ‘‘𑀉𑀘𑁆𑀘𑁂 𑀓𑀼𑀮𑁂 𑀧𑀘𑁆𑀘𑀸𑀚𑀸𑀢𑁄’’𑀢𑀺𑀆𑀤𑀺 𑀧𑀓𑀸𑀲𑀦𑀪𑀸𑀯𑁂𑀦 𑀚𑁄𑀢𑁂𑀢𑀻𑀢𑀺 𑀚𑁄𑀢𑀺, 𑀢𑁂𑀦 𑀚𑁄𑀢𑀺𑀦𑀸 𑀬𑀼𑀢𑁆𑀢𑁄𑀢𑀺𑀆𑀤𑀺 𑀲𑀩𑁆𑀩𑀁 𑀢𑀫𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀭𑁂 𑀤𑁆𑀯𑁂𑀢𑀺 𑀚𑁄𑀢𑀺𑀢𑀫𑀧𑀭𑀸𑀬𑀡𑁄 𑀚𑁄𑀢𑀺𑀚𑁄𑀢𑀺𑀧𑀭𑀸𑀬𑀡𑁄𑀢𑀺 𑀇𑀢𑀭𑁂 𑀤𑁆𑀯𑁂 𑀧𑀼𑀕𑁆𑀕𑀮𑁂.

𑀯𑁂𑀡𑀼𑀯𑁂𑀢𑁆𑀢𑀸𑀤𑀺𑀓𑁂𑀳𑀺 𑀧𑁂𑀴𑀸𑀤𑀺𑀓𑀸𑀭𑀓𑀸 𑀯𑀺𑀮𑀻𑀯𑀓𑀸𑀭𑀓𑀸. 𑀫𑀺𑀕𑀫𑀘𑁆𑀙𑀸𑀤𑀻𑀦𑀁 𑀦𑀺𑀲𑀸𑀤𑀦𑀢𑁄 𑀦𑁂𑀲𑀸𑀤𑀸, 𑀫𑀸𑀕𑀯𑀺𑀓𑀫𑀘𑁆𑀙𑀩𑀦𑁆𑀥𑀸𑀤𑀬𑁄. 𑀭𑀣𑁂𑀲𑀼 𑀘𑀫𑁆𑀫𑁂𑀦 𑀳𑀦𑀦𑀓𑀭𑀡𑀢𑁄 𑀭𑀣𑀓𑀸𑀭𑀸 𑀘𑀫𑁆𑀫𑀓𑀸𑀭𑀸 𑀯𑀼𑀢𑁆𑀢𑀸. ‘‘𑀧𑀼’’ 𑀇𑀢𑀺 𑀓𑀭𑀻𑀲𑀲𑁆𑀲 𑀦𑀸𑀫𑀁, 𑀢𑀁 𑀓𑀼𑀲𑁂𑀦𑁆𑀢𑀺 𑀅𑀧𑀦𑁂𑀦𑁆𑀢𑀻𑀢𑀺 𑀧𑀼𑀓𑁆𑀓𑀼𑀲𑀸, 𑀧𑀼𑀧𑁆𑀨𑀙𑀟𑁆𑀟𑀓𑀸. 𑀤𑀼𑀩𑁆𑀩𑀡𑁆𑀡𑁄𑀢𑀺 𑀯𑀺𑀭𑀽𑀧𑁄. 𑀑𑀓𑁄𑀝𑀺𑀫𑀓𑁄𑀢𑀺 ¶ 𑀆𑀭𑁄𑀳𑀸𑀪𑀸𑀯𑁂𑀦 𑀳𑁂𑀝𑁆𑀞𑀺𑀫𑀓𑁄𑀝𑀺𑀓𑁄, 𑀭𑀲𑁆𑀲𑀓𑀸𑀬𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀮𑀓𑀼𑀡𑁆𑀟𑀓𑁄’’𑀢𑀺. 𑀮𑀓𑀼 𑀯𑀺𑀬 𑀖𑀝𑀺𑀓𑀸 𑀯𑀺𑀬 𑀟𑁂𑀢𑀺 𑀧𑀯𑀢𑁆𑀢𑀢𑀻𑀢𑀺 𑀳𑀺 𑀮𑀓𑀼𑀡𑁆𑀟𑀓𑁄, 𑀭𑀲𑁆𑀲𑁄. 𑀓𑀡𑀢𑀺 𑀦𑀺𑀫𑀻𑀮𑀢𑀻𑀢𑀺 𑀓𑀸𑀡𑁄. 𑀢𑀁 𑀧𑀦𑀲𑁆𑀲 𑀦𑀺𑀫𑀻𑀮𑀦𑀁 𑀏𑀓𑁂𑀦 𑀅𑀓𑁆𑀔𑀺𑀦𑀸 𑀤𑁆𑀯𑀻𑀳𑀺𑀧𑀺 𑀯𑀸𑀢𑀺 𑀆𑀳 ‘‘𑀏𑀓𑀓𑁆𑀔𑀺𑀓𑀸𑀡𑁄 𑀯𑀸 𑀉𑀪𑀬𑀓𑁆𑀔𑀺𑀓𑀸𑀡𑁄 𑀯𑀸’’𑀢𑀺. 𑀓𑀼𑀡𑀦𑀁 𑀓𑀼𑀡𑁄, 𑀳𑀢𑁆𑀣𑀯𑁂𑀓𑀮𑁆𑀮𑀁, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀓𑀼𑀡𑀻. 𑀔𑀜𑁆𑀚𑁄 𑀯𑀼𑀘𑁆𑀘𑀢𑀺 𑀧𑀸𑀤𑀯𑀺𑀓𑀮𑁄. 𑀳𑁂𑀝𑁆𑀞𑀺𑀫𑀓𑀸𑀬𑀲𑀗𑁆𑀔𑀸𑀢𑁄 𑀲𑀭𑀻𑀭𑀲𑁆𑀲 𑀧𑀓𑁆𑀔𑁄 𑀧𑀤𑁂𑀲𑁄 𑀳𑀢𑁄 𑀅𑀲𑁆𑀲𑀸𑀢𑀺 𑀧𑀓𑁆𑀔𑀳𑀢𑁄. 𑀢𑁂𑀦𑀸𑀳 ‘‘𑀧𑀻𑀞𑀲𑀫𑁆𑀧𑀻’’𑀢𑀺. 𑀧𑀤𑀻𑀧𑁂 𑀧𑀤𑀻𑀧𑀦𑁂 𑀏𑀢𑀩𑁆𑀩𑀁 𑀦𑁂𑀢𑀩𑁆𑀩𑀦𑁆𑀢𑀺 𑀧𑀤𑀻𑀧𑁂𑀬𑁆𑀬𑀁, 𑀢𑁂𑀮𑀓𑀧𑀮𑁆𑀮𑀸𑀤𑀺𑀉𑀧𑀓𑀭𑀡𑀁. 𑀯𑀼𑀢𑁆𑀢𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁.

𑀆𑀕𑀫𑀦𑀯𑀺𑀧𑀢𑁆𑀢𑀻𑀢𑀺 𑀆𑀕𑀫𑀦𑀝𑁆𑀞𑀸𑀦𑀯𑀲𑁂𑀦 𑀯𑀺𑀧𑀢𑁆𑀢𑀺 𑀆𑀕𑀫𑁄 𑀏𑀢𑁆𑀣𑀸𑀢𑀺 𑀓𑀢𑁆𑀯𑀸. 𑀧𑀼𑀩𑁆𑀩𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀯𑀺𑀧𑀢𑁆𑀢𑀻𑀢𑀺 𑀧𑀞𑀫𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀯𑀲𑁂𑀦 𑀯𑀺𑀧𑀢𑁆𑀢𑀺. 𑀘𑀡𑁆𑀟𑀸𑀮𑀸𑀤𑀺𑀲𑀪𑀸𑀯𑀸 𑀳𑀺𑀲𑁆𑀲 𑀫𑀸𑀢𑀸𑀧𑀺𑀢𑀭𑁄 𑀧𑀞𑀫𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀸, 𑀧𑀞𑀫𑀼𑀧𑁆𑀧𑀢𑁆𑀢𑀺𑀬𑀸 𑀯𑀸 𑀧𑀘𑁆𑀘𑀬𑀸, 𑀢𑁂𑀳𑁂𑀯𑀲𑁆𑀲 𑀯𑀺𑀧𑀢𑁆𑀢𑀺 𑀏𑀯, 𑀦 𑀲𑀫𑁆𑀧𑀢𑁆𑀢𑀺. 𑀧𑀯𑀢𑁆𑀢𑀧𑀘𑁆𑀘𑀬𑀯𑀺𑀧𑀢𑁆𑀢𑀻𑀢𑀺 𑀧𑀯𑀢𑁆𑀢𑁂 𑀲𑀼𑀔𑀧𑀘𑁆𑀘𑀬𑀯𑀺𑀧𑀢𑁆𑀢𑀺. 𑀢𑀸𑀤𑀺𑀲𑁂 𑀦𑀺𑀳𑀻𑀦𑀓𑀼𑀮𑁂 𑀉𑀧𑁆𑀧𑀦𑁆𑀦𑁄𑀧𑀺 𑀓𑁄𑀘𑀺 𑀯𑀺𑀪𑀯𑀲𑀫𑁆𑀧𑀦𑁆𑀦𑁄 ¶ 𑀲𑀺𑀬𑀸, 𑀅𑀬𑀁 𑀧𑀦 𑀤𑀼𑀕𑁆𑀕𑀢𑁄 𑀤𑀼𑀭𑀽𑀧𑁄 𑀳𑁄𑀢𑀺. 𑀆𑀚𑀻𑀯𑀼𑀧𑀸𑀬𑀯𑀺𑀧𑀢𑁆𑀢𑀻𑀢𑀺 𑀆𑀚𑀻𑀯𑀦𑀼𑀧𑀸𑀬𑀯𑀲𑁂𑀦 𑀯𑀺𑀧𑀢𑁆𑀢𑀺. 𑀲𑀼𑀔𑁂𑀦 𑀳𑀺 𑀚𑀻𑀯𑀺𑀓𑀁 𑀧𑀯𑀢𑁆𑀢𑁂𑀢𑀼𑀁 𑀉𑀧𑀸𑀬𑀪𑀽𑀢𑀸 𑀳𑀢𑁆𑀣𑀺𑀲𑀺𑀧𑁆𑀧𑀸𑀤𑀬𑁄 𑀇𑀫𑀲𑁆𑀲 𑀦𑀢𑁆𑀣𑀺, 𑀧𑀼𑀧𑁆𑀨𑀙𑀟𑁆𑀟𑀓𑀲𑀺𑀮𑀸𑀓𑁄𑀝𑁆𑀝𑀦𑀸𑀤𑀺𑀓𑀫𑁆𑀫𑀁 𑀧𑀦 𑀓𑀢𑁆𑀯𑀸 𑀚𑀻𑀯𑀺𑀓𑀁 𑀧𑀯𑀢𑁆𑀢𑁂𑀢𑀺. 𑀢𑁂𑀦𑀸𑀳 ‘‘𑀓𑀲𑀺𑀭𑀯𑀼𑀢𑁆𑀢𑀺𑀓𑁂’’𑀢𑀺. 𑀅𑀢𑁆𑀢𑀪𑀸𑀯𑀯𑀺𑀧𑀢𑁆𑀢𑀻𑀢𑀺 𑀉𑀧𑀥𑀺𑀯𑀺𑀧𑀢𑁆𑀢𑀺. 𑀤𑀼𑀓𑁆𑀔𑀓𑀸𑀭𑀡𑀲𑀫𑀸𑀬𑁄𑀕𑁄𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑀲𑀫𑁄𑀥𑀸𑀦𑀁. 𑀲𑀼𑀔𑀓𑀸𑀭𑀡𑀯𑀺𑀧𑀢𑁆𑀢𑀻𑀢𑀺 𑀲𑀼𑀔𑀧𑀘𑁆𑀘𑀬𑀧𑀭𑀺𑀳𑀸𑀦𑀺. 𑀉𑀧𑀪𑁄𑀕𑀯𑀺𑀧𑀢𑁆𑀢𑀻𑀢𑀺 𑀉𑀧𑀪𑁄𑀕𑀲𑀼𑀔𑀲𑁆𑀲 𑀯𑀺𑀦𑀸𑀲𑁄 𑀅𑀦𑀼𑀧𑀮𑀤𑁆𑀥𑀺. 𑀚𑁄𑀢𑀺 𑀘𑁂𑀯 𑀚𑁄𑀢𑀺𑀧𑀭𑀸𑀬𑀡𑀪𑀸𑀯𑁄 𑀘 𑀲𑀼𑀓𑁆𑀓𑀧𑀓𑁆𑀔𑁄.

𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀻𑀢𑀺 𑀮𑀓𑁆𑀔𑀡𑀯𑀘𑀦𑀁 𑀏𑀢𑀁 𑀬𑀣𑀸 ‘‘𑀬𑀤𑀺 𑀫𑁂 𑀩𑁆𑀬𑀸𑀥𑀺𑀢𑀸 𑀳𑁄𑀦𑁆𑀢𑀺, 𑀤𑀸𑀢𑀩𑁆𑀩𑀫𑀺𑀤𑀫𑁄𑀲𑀥’’𑀦𑁆𑀢𑀺, 𑀢𑀲𑁆𑀫𑀸 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺, 𑀢𑀢𑁆𑀣 𑀯𑀸 𑀬𑁂𑀦 𑀓𑁂𑀦𑀘𑀺 𑀧𑀭𑀺𑀪𑀸𑀲𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀕𑁆𑀕𑀘𑀺𑀢𑁆𑀢𑁄𑀢𑀺 𑀤𑀸𑀦𑀁 𑀤𑀸𑀢𑀼𑀁 𑀅𑀧𑁂𑀓𑁆𑀔𑀺𑀢𑀢𑀸𑀬 𑀲𑀫𑀸𑀳𑀺𑀢𑀘𑀺𑀢𑁆𑀢𑁄.

𑀧𑀼𑀕𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀬𑁆𑀬𑀺𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁩. 𑀚𑀭𑀸𑀚𑀺𑀡𑁆𑀡𑀸𑀢𑀺 ¶ 𑀚𑀭𑀸𑀬 𑀚𑀺𑀡𑁆𑀡𑀸. 𑀢𑁂𑀦 𑀧𑀸𑀓𑀝𑀚𑀭𑀸𑀬 𑀫𑀢𑁆𑀣𑀓𑀧𑁆𑀧𑀢𑁆𑀢𑀺𑀫𑀸𑀳. 𑀯𑀬𑁄𑀯𑀼𑀟𑁆𑀠𑀸𑀢𑀺 𑀯𑀬𑀲𑀸 𑀯𑀼𑀟𑁆𑀠𑀸. 𑀢𑁂𑀦 𑀧𑀘𑁆𑀙𑀺𑀫𑀯𑀬𑀲𑁆𑀲 𑀑𑀲𑀓𑁆𑀓𑀲𑀫𑁆𑀧𑀯𑀢𑁆𑀢𑀺𑀁 𑀯𑀤𑀢𑀺. 𑀚𑀸𑀢𑀺𑀫𑀳𑀮𑁆𑀮𑀺𑀓𑀸𑀢𑀺 𑀚𑀸𑀢𑀺𑀫𑀳𑀢𑁆𑀢𑀕𑀢𑀸. 𑀘𑀺𑀭𑀓𑀸𑀮𑀁 𑀅𑀢𑀺𑀓𑁆𑀓𑀦𑁆𑀢𑀸𑀢𑀺 𑀤𑁆𑀯𑁂 𑀢𑀬𑁄 𑀭𑀸𑀚𑀧𑀭𑀺𑀯𑀝𑁆𑀝𑁂 𑀯𑀻𑀢𑀺𑀯𑀢𑁆𑀢𑀸. 𑀯𑀬𑁄-𑀲𑀤𑁆𑀤𑁄 𑀲𑀸𑀥𑀸𑀭𑀡𑀯𑀘𑀦𑁄𑀧𑀺 𑀚𑀺𑀡𑁆𑀡𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀢𑁄 𑀑𑀲𑀸𑀦𑀯𑀬𑀁 𑀏𑀯 𑀯𑀤𑀢𑀻𑀢𑀺 𑀆𑀳 ‘‘𑀧𑀘𑁆𑀙𑀺𑀫𑀯𑀬𑀁 𑀲𑀫𑁆𑀧𑀢𑁆𑀢𑀸’’𑀢𑀺. 𑀅𑀬𑁆𑀬𑀺𑀓𑀸𑀢𑀺 𑀫𑀸𑀢𑀸𑀫𑀳𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀳𑀢𑁆𑀣𑀻 𑀏𑀯 𑀭𑀢𑀦𑀪𑀽𑀢𑁄 𑀳𑀢𑁆𑀣𑀺𑀭𑀢𑀦𑀦𑁆𑀢𑀺 𑀆𑀳 ‘‘𑀲𑀢𑀲𑀳𑀲𑁆𑀲𑀕𑁆𑀖𑀦𑀓𑁂𑀦𑀸’’𑀢𑀺𑀆𑀤𑀺. 𑀲𑀩𑁆𑀩𑀸𑀦𑀺 𑀢𑀸𑀦𑀻𑀢𑀺 𑀓𑀼𑀫𑁆𑀪𑀓𑀸𑀭𑀪𑀸𑀚𑀦𑀸𑀦𑀺, 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀧𑀫𑀸𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑁂𑀲𑀼 𑀳𑀻’’𑀢𑀺𑀆𑀤𑀺𑀫𑀸𑀳, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀬𑁆𑀬𑀺𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀇𑀲𑁆𑀲𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁫. 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄𑀢𑀺 𑀏𑀢𑁆𑀣 𑀓𑀸 𑀅𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺? 𑀢𑀺𑀢𑁆𑀣𑀺𑀬𑀸𑀦𑀁 𑀪𑀕𑀯𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀅𑀮𑀸𑀪𑀸𑀬 𑀅𑀬𑀲𑀸𑀬 𑀧𑀭𑀺𑀲𑀓𑁆𑀓𑀦𑀁. 𑀢𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀪𑀕𑀯𑀢𑁄 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀣𑀸 𑀢𑀁 𑀲𑀩𑁆𑀩𑀤𑀺𑀲𑀸𑀲𑀼 𑀬𑀫𑀓𑀫𑀳𑀸𑀫𑁂𑀖𑁄 𑀉𑀝𑁆𑀞𑀳𑀺𑀢𑁆𑀯𑀸 𑀫𑀳𑀸𑀑𑀖𑀁 𑀯𑀺𑀬 𑀲𑀩𑁆𑀩𑀸 𑀧𑀸𑀭𑀫𑀺𑀬𑁄 ‘‘𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑀲𑁆𑀲𑀸𑀫𑀸’’𑀢𑀺 𑀲𑀫𑁆𑀧𑀺𑀡𑁆𑀟𑀺𑀢𑀸 𑀯𑀺𑀬 𑀮𑀸𑀪𑀲𑀓𑁆𑀓𑀸𑀭𑀫𑀳𑁄𑀖𑀁 𑀦𑀺𑀩𑁆𑀩𑀢𑁆𑀢𑀬𑀺𑀁𑀲𑀼. 𑀢𑀢𑁄 𑀢𑀢𑁄 𑀅𑀦𑁆𑀦𑀧𑀸𑀦𑀬𑀸𑀦𑀯𑀢𑁆𑀣𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀺𑀳𑀢𑁆𑀣𑀸 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀆𑀕𑀦𑁆𑀢𑁆𑀯𑀸 𑁋 ‘‘𑀓𑀳𑀁 𑀪𑀕𑀯𑀸, 𑀓𑀳𑀁 ¶ 𑀤𑁂𑀯𑀤𑁂𑀯𑁄 𑀦𑀭𑀸𑀲𑀪𑁄 𑀮𑁄𑀓𑀦𑀸𑀣𑁄’’𑀢𑀺 𑀪𑀕𑀯𑀦𑁆𑀢𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀲𑀓𑀝𑀲𑀢𑁂𑀳𑀺𑀧𑀺 𑀧𑀘𑁆𑀘𑀬𑁂 𑀆𑀳𑀭𑀺𑀢𑁆𑀯𑀸 𑀑𑀓𑀸𑀲𑀁 𑀅𑀮𑀪𑀫𑀸𑀦𑀸 𑀲𑀫𑀦𑁆𑀢𑀸 𑀕𑀸𑀯𑀼𑀢𑀧𑁆𑀧𑀫𑀸𑀡𑀫𑁆𑀧𑀺 𑀲𑀓𑀝𑀥𑀼𑀭𑁂𑀦 𑀲𑀓𑀝𑀥𑀼𑀭𑀁 𑀆𑀳𑀘𑁆𑀘 𑀢𑀺𑀝𑁆𑀞𑀦𑁆𑀢𑀺 𑀘𑁂𑀯 𑀅𑀦𑀼𑀯𑀢𑁆𑀢𑀦𑁆𑀢𑀺 𑀘 𑀅𑀦𑁆𑀥𑀓𑀯𑀺𑀦𑁆𑀤𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀯𑀺𑀬. 𑀲𑀩𑁆𑀩𑀁 𑀔𑀦𑁆𑀥𑀓𑁂 (𑀫𑀳𑀸𑀯. 𑁨𑁮𑁨) 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑁂𑀲𑀼 𑀘 𑀆𑀕𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀘 𑀪𑀕𑀯𑀢𑁄, 𑀏𑀯𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀧𑀺. 𑀯𑀼𑀢𑁆𑀢𑀫𑁆𑀧𑀺 𑁋 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀲𑀓𑁆𑀓𑀢𑁄 𑀳𑁄𑀢𑀺 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄 𑀮𑀸𑀪𑀻 𑀘𑀻𑀯𑀭…𑀧𑁂… 𑀧𑀭𑀺𑀓𑁆𑀔𑀸𑀭𑀸𑀦𑀁, 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀔𑁄’’𑀢𑀺𑀆𑀤𑀺 (𑀉𑀤𑀸. 𑁩𑁮), 𑀢𑀣𑀸 ‘‘𑀬𑀸𑀯𑀢𑀸 𑀔𑁄, 𑀘𑀼𑀦𑁆𑀤, 𑀏𑀢𑀭𑀳𑀺 ¶ 𑀲𑀗𑁆𑀖𑁄 𑀯𑀸 𑀕𑀡𑁄 𑀯𑀸 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀦𑀸𑀳𑀁, 𑀘𑀼𑀦𑁆𑀤, 𑀅𑀜𑁆𑀜𑀁 𑀏𑀓𑀁 𑀲𑀗𑁆𑀖𑀫𑁆𑀧𑀺 𑀏𑀓𑀁 𑀕𑀡𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀏𑀯𑀁 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑀁, 𑀬𑀣𑀭𑀺𑀯𑀸𑀬𑀁, 𑀘𑀼𑀦𑁆𑀤, 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺 (𑀤𑀻. 𑀦𑀺. 𑁩.𑁧𑁭𑁬). 𑀏𑀯𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁂𑀦. 𑀦𑀺𑀚𑁆𑀛𑀢𑁆𑀢𑀺𑀦𑁆𑀢𑀺 𑀲𑀜𑁆𑀜𑀢𑁆𑀢𑀺𑀁. 𑀦𑀦𑁆𑀢𑀺 𑀓𑀣𑀁.

𑀏𑀯𑀁 𑀧𑀼𑀘𑁆𑀙𑀺𑀢𑀼𑀁 𑀅𑀬𑀼𑀢𑁆𑀢𑀁 𑀢𑀺𑀢𑁆𑀣𑀺𑀬𑀸𑀦𑀁 𑀓𑀣𑀸 𑀫𑀳𑀸𑀚𑀦𑀲𑀦𑁆𑀦𑀺𑀧𑀸𑀢𑁂 𑀦𑀺𑀬𑁆𑀬𑀸𑀢𑀺𑀢𑀸 𑀳𑁄𑀢𑀻𑀢𑀺. 𑀢𑀲𑁆𑀫𑀺𑀁 𑀤𑀸𑀢𑀩𑁆𑀩𑀁, 𑀘𑀺𑀢𑁆𑀢𑀧𑁆𑀧𑀲𑀸𑀤𑀫𑀢𑁆𑀢𑁂𑀦 𑀤𑁂𑀦𑁆𑀢𑁂𑀧𑀺 𑀳𑀺 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀺. 𑀆𑀭𑁄𑀘𑀺𑀢𑀁 𑀅𑀢𑁆𑀢𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀕𑀯𑀸𑀢𑀺 𑀲𑀢𑁆𑀣𑀼 𑀆𑀫𑀦𑁆𑀢𑀦𑀁. 𑀘𑀺𑀢𑁆𑀢𑀁 𑀦𑀸𑀫 𑀬𑀣𑀸𑀧𑀘𑁆𑀘𑀬𑀁 𑀧𑀯𑀢𑁆𑀢𑀫𑀸𑀦𑀁 𑀦𑀺𑀕𑀡𑁆𑀞𑀸…𑀧𑁂… 𑀧𑀲𑀻𑀤𑀢𑀺 𑀧𑀲𑀦𑁆𑀦𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀩𑁆𑀩𑁂 𑀅𑀯𑀺𑀲𑁂𑀲𑀢𑁄 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀤𑀸𑀢𑀩𑁆𑀩𑀝𑁆𑀞𑀸𑀦𑀁 𑀦𑀸𑀫 𑀧𑀼𑀘𑁆𑀙𑀺𑀢𑀁, 𑀇𑀤𑀸𑀦𑀺 𑀢𑀲𑁆𑀲 𑀫𑀳𑀧𑁆𑀨𑀮𑀪𑀸𑀯𑀓𑀭𑁄 𑀤𑀓𑁆𑀔𑀺𑀡𑁂𑀬𑁆𑀬𑀯𑀺𑀲𑁂𑀲𑁄𑀢𑀺 𑀆𑀳 ‘‘𑀅𑀜𑁆𑀜𑀁 𑀢𑀬𑀸 𑀧𑀞𑀫𑀁 𑀧𑀼𑀘𑁆𑀙𑀺𑀢𑀁, 𑀅𑀜𑁆𑀜𑀁 𑀧𑀘𑁆𑀙𑀸’’𑀢𑀺. 𑀲𑀮𑁆𑀮𑀓𑁆𑀔𑁂𑀳𑀺 𑀏𑀢𑀁. 𑀧𑀘𑁆𑀙𑀺𑀫𑀁 𑀧𑀼𑀭𑀺𑀫𑁂𑀦 𑀲𑀤𑁆𑀥𑀺𑀁 𑀆𑀦𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀘𑁆𑀙𑀺𑀢𑀲𑁆𑀲 𑀦𑀸𑀫 𑀧𑀜𑁆𑀳𑀲𑁆𑀲 𑀓𑀣𑀦𑀁 𑀫𑀬𑁆𑀳𑀫𑁂𑀯 𑀪𑀸𑀭𑁄. 𑀲𑀫𑀼𑀧𑀩𑁆𑀬𑀽𑀴𑁆𑀳𑁄𑀢𑀺 𑀏𑀓𑀢𑁄 𑀲𑁂𑀦𑀸𑀬 𑀭𑀸𑀲𑀺𑀯𑀲𑁂𑀦 𑀲𑀫𑁆𑀧𑀺𑀡𑁆𑀟𑀺𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀭𑀸𑀲𑀺𑀪𑀽𑀢𑁄’’𑀢𑀺. 𑀅𑀲𑀺𑀓𑁆𑀔𑀺𑀢𑁄𑀢𑀺 𑀲𑀢𑁆𑀢𑀝𑁆𑀞𑀲𑀁𑀯𑀘𑁆𑀙𑀭𑀸𑀦𑀺 𑀥𑀦𑀼𑀲𑀺𑀧𑁆𑀧𑁂𑀦 𑀲𑀺𑀓𑁆𑀔𑀺𑀢𑁄. 𑀥𑀦𑀼𑀲𑀺𑀧𑁆𑀧𑀁 𑀲𑀺𑀓𑁆𑀔𑀺𑀢𑁆𑀯𑀸𑀧𑀺 𑀓𑁄𑀘𑀺 𑀓𑀢𑀳𑀢𑁆𑀣𑁄 𑀦 𑀳𑁄𑀢𑀺, 𑀅𑀬𑀁 𑀧𑀦 𑀅𑀲𑀺𑀓𑁆𑀔𑀺𑀢𑁄 𑀦 𑀓𑀢𑀳𑀢𑁆𑀣𑁄, 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀪𑀸𑀯𑁄𑀬𑁂𑀯 𑀩𑁆𑀬𑀸𑀫𑀫𑀼𑀝𑁆𑀞𑀺𑀩𑀦𑁆𑀥𑁄. 𑀢𑀺𑀡𑀧𑀼𑀜𑁆𑀚𑀫𑀢𑁆𑀢𑀺𑀓𑀸𑀧𑀼𑀜𑁆𑀚𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀁𑀲𑀼𑀧𑀼𑀜𑁆𑀚𑀯𑀸𑀮𑀼𑀓𑀧𑀼𑀜𑁆𑀚𑀲𑀸𑀭𑀨𑀮𑀓𑀅𑀬𑁄𑀖𑀦𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀓𑀢𑀧𑀭𑀺𑀘𑀬𑁄𑀢𑀺 𑀢𑁂𑀲𑀁 𑀲𑀦𑁆𑀢𑀺𑀓𑀸 𑀯𑀺𑀚𑁆𑀛𑀦𑀝𑁆𑀞𑁂𑀦 𑀅𑀓𑀢𑀧𑀭𑀺𑀘𑀬𑁄. 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀺𑀓𑁂 𑀉𑀧𑁂𑀘𑁆𑀘 𑀅𑀲𑀦𑀁 𑀉𑀧𑀸𑀲𑀦𑀁, 𑀦 𑀓𑀢𑀁 𑀉𑀧𑀸𑀲𑀦𑀁 𑀏𑀢𑁂𑀦𑀸𑀢𑀺 𑀅𑀓𑀢𑀽𑀧𑀸𑀲𑀦𑁄. 𑀅𑀲𑀺𑀓𑁆𑀔𑀺𑀢𑀢𑀸𑀤𑀺𑀦𑀸 𑀪𑀻𑀭𑀼𑀪𑀸𑀯𑁂𑀦 𑀯𑀸 𑀓𑀸𑀬𑀲𑁆𑀲 𑀙𑀫𑁆𑀪𑀦𑀁 𑀲𑀗𑁆𑀓𑀫𑁆𑀧𑀦𑀁 𑀉𑀢𑁆𑀢𑀸𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀙𑀫𑁆𑀪𑀻𑀢𑀺 𑀆𑀳 ‘‘𑀧𑀯𑁂𑀥𑀺𑀢𑀓𑀸𑀬𑁄’’𑀢𑀺.

𑀤𑀓𑁆𑀔𑀺𑀡𑁂𑀬𑁆𑀬𑀢𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀦𑁄 𑀳𑁄𑀢𑀻’’𑀢𑀺 𑀆𑀳. 𑀅𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸 𑀢𑀢𑀺𑀬𑁂𑀦𑁂𑀯 𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀦𑀁 𑀳𑁄𑀢𑀺 𑀧𑀝𑀺𑀖𑀲𑀫𑁆𑀧𑀬𑁄𑀕𑀁. 𑀅𑀲𑁂𑀓𑁆𑀔𑀲𑁆𑀲 𑀅𑀬𑀦𑁆𑀢𑀺 𑀅𑀲𑁂𑀓𑁆𑀔𑀁, 𑀲𑀻𑀮𑀓𑁆𑀔𑀦𑁆𑀥𑁄. 𑀢𑀬𑀺𑀤𑀁 𑀦 𑀅𑀕𑁆𑀕𑀨𑀮𑀁 𑀲𑀻𑀮𑀫𑁂𑀯 𑀅𑀥𑀺𑀧𑁆𑀧𑁂𑀢𑀁, 𑀅𑀣 𑀔𑁄 𑀬𑀁 𑀓𑀺𑀜𑁆𑀘𑀺 𑀅𑀲𑁂𑀓𑁆𑀔𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀁 𑀲𑀻𑀮𑀁, 𑀮𑁄𑀓𑀼𑀢𑁆𑀢𑀭𑁄 𑀏𑀯 𑀦 𑀅𑀥𑀺𑀧𑁆𑀧𑁂𑀢𑁄 𑀲𑀺𑀓𑁆𑀔𑀸𑀬 𑀚𑀸𑀢𑀢𑁆𑀢𑀸, 𑀏𑀯𑀁 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁄𑀧𑀻𑀢𑀺 ¶ . 𑀲𑁂𑀓𑁆𑀔𑀲𑁆𑀲 𑀏𑀲𑁄𑀢𑀺 𑀯𑀸, 𑀅𑀧𑀭𑀺𑀬𑁄𑀲𑀺𑀢𑀲𑀺𑀓𑁆𑀔𑀢𑁆𑀢𑀸 𑀲𑀬𑀫𑁂𑀯 𑀲𑀺𑀓𑁆𑀔𑀢𑀻𑀢𑀺 𑀯𑀸 𑀲𑁂𑀓𑁆𑀔𑁄, 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 ¶ 𑀳𑁂𑀝𑁆𑀞𑀺𑀫𑁂𑀲𑀼 𑀘 𑀢𑀻𑀲𑀼 𑀨𑀮𑁂𑀲𑀼 𑀲𑀻𑀮𑀓𑁆𑀔𑀦𑁆𑀥𑁄. 𑀉𑀧𑀭𑀺 𑀲𑀺𑀓𑁆𑀔𑀺𑀢𑀩𑁆𑀩𑀸𑀪𑀸𑀯𑀢𑁄 𑀅𑀲𑁂𑀓𑁆𑀔𑁄. 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁄 𑀲𑁂𑀓𑁆𑀔𑁄𑀢𑀺 𑀅𑀲𑁂𑀓𑁆𑀔𑁄. 𑀅𑀕𑁆𑀕𑀨𑀮𑀪𑀽𑀢𑁄 𑀲𑀻𑀮𑀓𑁆𑀔𑀦𑁆𑀥𑁄 𑀯𑀼𑀘𑁆𑀘𑁂𑀬𑁆𑀬, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀺𑀧𑀲𑁆𑀲𑀓𑀲𑁆𑀲 𑀲𑀻𑀮𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀢𑀣𑀸 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀲𑀩𑁆𑀩𑀢𑁆𑀣𑀸𑀢𑀺 ‘‘𑀅𑀲𑁂𑀓𑁆𑀔𑁂𑀦𑀸’’𑀢𑀺𑀆𑀤𑀻𑀲𑀼. 𑀏𑀢𑁆𑀣 𑀘 𑀬𑀣𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀓𑁆𑀔𑀦𑁆𑀥𑀸 𑀫𑀺𑀲𑁆𑀲𑀓𑀸 𑀅𑀥𑀺𑀧𑁆𑀧𑁂𑀢𑀸, 𑀏𑀯𑀁 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀸𑀧𑀻𑀢𑀺 𑀢𑀤𑀗𑁆𑀕𑀯𑀺𑀫𑀼𑀢𑁆𑀢𑀺𑀆𑀤𑀬𑁄𑀧𑀺 𑀯𑁂𑀤𑀺𑀢𑀩𑁆𑀩𑀸, 𑀦 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀺 𑀏𑀯.

𑀬𑁂𑀦 𑀲𑀺𑀧𑁆𑀧𑁂𑀦 𑀇𑀲𑁆𑀲𑀸𑀲𑁄 𑀳𑁄𑀢𑀺, 𑀢𑀁 𑀇𑀲𑁆𑀲𑀢𑁆𑀢𑀦𑁆𑀢𑀺 𑀆𑀳 ‘‘𑀉𑀲𑀼𑀲𑀺𑀧𑁆𑀧’’𑀦𑁆𑀢𑀺. 𑀬𑀲𑁆𑀲𑀸 𑀯𑀸𑀬𑁄𑀥𑀸𑀢𑀼𑀬𑀸 𑀯𑀲𑁂𑀦 𑀲𑀭𑀻𑀭𑀁 𑀲𑀜𑁆𑀚𑀸𑀢𑀣𑀸𑀫𑀁 𑀳𑁄𑀢𑀺, 𑀢𑀁 𑀩𑀮𑀧𑀘𑁆𑀘𑀬𑀁 𑀲𑀦𑁆𑀥𑀸𑀬𑀸𑀳 ‘‘𑀩𑀮𑀁 𑀦𑀸𑀫 𑀯𑀸𑀬𑁄𑀥𑀸𑀢𑀽’’𑀢𑀺. 𑀲𑀫𑀧𑁆𑀧𑀯𑀢𑁆𑀢𑀺𑀢𑁄 𑀳𑀺 𑀯𑀺𑀲𑀫𑀧𑁆𑀧𑀯𑀢𑁆𑀢𑀺𑀦𑀺𑀯𑀸𑀭𑀓𑀥𑀸𑀢𑀼 𑀩𑀮𑀁 𑀦𑀸𑀫, 𑀢𑁂𑀦 𑀢𑀢𑁄 𑀅𑀜𑁆𑀜𑀁 𑀩𑀮𑀭𑀽𑀧𑀁 𑀦𑀸𑀫 𑀦𑀢𑁆𑀣𑀺.

𑀬𑀲𑁆𑀫𑀸 𑀅𑀭𑀳𑀸 𑀏𑀯 𑀏𑀓𑀦𑁆𑀢𑀢𑁄 𑀲𑁄𑀭𑀢𑁄, 𑀢𑀲𑁆𑀲 𑀪𑀸𑀯𑁄 𑀲𑁄𑀭𑀘𑁆𑀘𑀦𑁆𑀢𑀺 𑀆𑀳 ‘‘𑀲𑁄𑀭𑀘𑁆𑀘𑀦𑁆𑀢𑀺 𑀅𑀭𑀳𑀢𑁆𑀢’’𑀦𑁆𑀢𑀺. 𑀏𑀢𑁂 𑀤𑁆𑀯𑁂𑀢𑀺 𑀔𑀦𑁆𑀢𑀺 𑀲𑁄𑀭𑀘𑁆𑀘𑀦𑁆𑀢𑀺 𑀏𑀢𑁂 𑀤𑁆𑀯𑁂 𑀥𑀫𑁆𑀫𑀸. 𑀧𑀸𑀦𑀻𑀬𑀁 𑀧𑀺𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀧𑀧𑀸, 𑀬𑁄 𑀓𑁄𑀘𑀺 𑀚𑀮𑀸𑀲𑀬𑁄 𑀬𑀁 𑀓𑀺𑀜𑁆𑀘𑀺 𑀧𑀸𑀦𑀻𑀬𑀝𑁆𑀞𑀸𑀦𑀦𑁆𑀢𑀺 𑀆𑀳 ‘‘𑀘𑀢𑀼𑀭𑀲𑁆𑀲𑀧𑁄𑀓𑁆𑀔𑀭𑀡𑀻𑀆𑀤𑀻𑀦𑀻’’𑀢𑀺. 𑀉𑀤𑀓𑀯𑀺𑀓𑀽𑀮𑀸𑀤𑀻𑀲𑀼 𑀓𑀫𑀦𑁆𑀢𑀺 𑀅𑀢𑀺𑀓𑁆𑀓𑀫𑀦𑁆𑀢𑀺 𑀏𑀢𑁂𑀳𑀻𑀢𑀺 𑀲𑀗𑁆𑀓𑀫𑀦𑀸𑀦𑀺, 𑀲𑁂𑀢𑀼𑀆𑀤𑀻𑀦𑀺. 𑀲𑁂𑀢𑀼𑀓𑀭𑀡𑀬𑀼𑀢𑁆𑀢𑀝𑁆𑀞𑀸𑀦𑁂 𑀲𑁂𑀢𑀼𑀁, 𑀘𑀗𑁆𑀓𑀫𑀦𑀓𑀭𑀡𑀬𑀼𑀢𑁆𑀢𑀝𑁆𑀞𑀸𑀦𑁂 𑀘𑀗𑁆𑀓𑀫𑀦𑀁, 𑀫𑀕𑁆𑀕𑀓𑀭𑀡𑀬𑀼𑀢𑁆𑀢𑀝𑁆𑀞𑀸𑀦𑁂 𑀫𑀕𑁆𑀕𑀁 𑀓𑀭𑁂𑀬𑁆𑀬𑀸𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑀸𑀳 ‘‘𑀧𑀡𑁆𑀡𑀸𑀲𑀸’’𑀢𑀺𑀆𑀤𑀺.

𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑀦𑁆𑀢𑀺 𑀅𑀭𑀺𑀬𑀸𑀦𑀁 𑀳𑀺𑀢𑀁 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁. 𑀤𑁂𑀦𑁆𑀢𑁄𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀅𑀔𑀻𑀡𑀸𑀲𑀯𑀲𑁆𑀲 𑀤𑁂𑀦𑁆𑀢𑁄𑀧𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺𑀧𑀺 𑀤𑁂𑀦𑁆𑀢𑁂𑀦𑀧𑀺 𑀓𑀫𑁆𑀫𑀨𑀮𑀁 𑀲𑀤𑁆𑀤𑀳𑀺𑀢𑁆𑀯𑀸 𑀯𑀺𑀧𑁆𑀧𑀲𑀦𑁆𑀦𑀘𑀺𑀢𑁆𑀢𑁂𑀦𑁂𑀯 𑀤𑀸𑀢𑀩𑁆𑀩𑀢𑁆𑀢𑀸. 𑀣𑀦𑀬𑀦𑁆𑀢𑀺 𑀇𑀤𑀁 𑀢𑀲𑁆𑀲 𑀫𑀳𑀸𑀫𑁂𑀖𑀪𑀸𑀯𑀤𑀲𑁆𑀲𑀦𑀁, 𑀬𑁄 𑀳𑀺 𑀫𑀳𑀸𑀯𑀲𑁆𑀲𑀁 𑀯𑀲𑁆𑀲𑀢𑀺, 𑀲𑁄 𑀕𑀚𑁆𑀚𑀦𑁆𑀢𑁄 𑀯𑀺𑀚𑁆𑀚𑀼𑀫𑁆𑀫𑀸𑀮𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀧𑀯𑀲𑁆𑀲𑀢𑀺. 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀲𑀫𑁄𑀥𑀸𑀦𑁂𑀢𑁆𑀯𑀸𑀢𑀺 𑀔𑀸𑀤𑀦𑀻𑀬𑀲𑁆𑀲 𑀯𑀺𑀯𑀺𑀥𑀚𑀸𑀢𑀺𑀬𑀸𑀦𑀺 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸. 𑀢𑁂𑀦𑀸𑀳 ‘‘𑀭𑀸𑀲𑀺𑀁 𑀓𑀢𑁆𑀯𑀸’’𑀢𑀺.

𑀧𑀓𑀺𑀭𑀡𑀁 𑀦𑀸𑀫 𑀯𑀺𑀓𑀺𑀭𑀡𑀫𑁆𑀧𑀺 𑀳𑁄𑀢𑀺 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀦𑁆𑀢𑀺 𑀆𑀳 ‘‘𑀯𑀺𑀓𑀺𑀭𑀢𑀻’’𑀢𑀺. 𑀧𑀓𑀺𑀭𑀦𑁆𑀢𑁄 𑀯𑀺𑀬 𑀯𑀸 𑀤𑀸𑀦𑀁 𑀤𑁂𑀢𑀻𑀢𑀺 𑀇𑀫𑀺𑀦𑀸 𑀕𑀼𑀡𑀔𑁂𑀢𑁆𑀢𑀫𑁂𑀯 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀓𑀭𑀼𑀡𑀸𑀔𑁂𑀢𑁆𑀢𑁂𑀧𑀺 𑀫𑀳𑀸𑀤𑀸𑀦𑀁 𑀧𑀯𑀢𑁆𑀢𑁂𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦 ‘‘𑀧𑀓𑀺𑀭𑁂𑀢𑀻’’𑀢𑀺 ¶ 𑀯𑀤𑀦𑁆𑀢𑁂𑀦 𑀪𑀕𑀯𑀢𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀆𑀕𑀢𑀢𑀺𑀢𑁆𑀣𑀺𑀬𑀯𑀸𑀤𑁂𑀦 𑀅𑀧𑁆𑀧𑀝𑀺𑀲𑁂𑀥𑀺𑀢𑀢𑀸𑀧𑀺 𑀤𑀻𑀧𑀺𑀢𑀸 𑀳𑁄𑀢𑀺. 𑀧𑀼𑀜𑁆𑀜𑀥𑀸𑀭𑀸𑀢𑀺 𑀧𑀼𑀜𑁆𑀜𑀫𑀬𑀥𑀸𑀭𑀸 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸. 𑀲𑀺𑀦𑁂𑀳𑀬𑀦𑁆𑀢𑀻𑀢𑀺 𑀣𑀽𑀮𑀥𑀸𑀭𑁂𑀦𑀧𑀺 𑀲𑀺𑀦𑁂𑀳𑁂𑀦 𑀲𑀺𑀦𑀺𑀤𑁆𑀥𑀁 𑀓𑀭𑁄𑀦𑁆𑀢𑀻. 𑀓𑀺𑀮𑁂𑀤𑀬𑀦𑁆𑀢𑀻𑀢𑀺 𑀅𑀮𑁆𑀮𑀪𑀸𑀯𑀁 𑀧𑀸𑀧𑀬𑀦𑁆𑀢𑀻. 𑀬𑀣𑀸𑀬𑀁 𑀧𑀼𑀜𑁆𑀜𑀥𑀸𑀭𑀸 ¶ 𑀤𑀸𑀢𑀸𑀭𑀁 𑀅𑀦𑁆𑀢𑁄 𑀲𑀺𑀦𑁂𑀳𑁂𑀢𑀺 𑀧𑀽𑀭𑁂𑀢𑀺 𑀅𑀪𑀺𑀲𑀦𑁆𑀤𑁂𑀢𑀺, 𑀏𑀯𑀁 𑀧𑀝𑀺𑀕𑁆𑀕𑀸𑀳𑀓𑀸𑀦𑀫𑁆𑀧𑀺 𑀅𑀦𑁆𑀢𑁄 𑀲𑀺𑀦𑁂𑀳𑁂𑀢𑀺 𑀧𑀽𑀭𑁂𑀢𑀺 𑀅𑀪𑀺𑀲𑀦𑁆𑀤𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀤𑀤𑀁 𑀧𑀺𑀬𑁄 𑀳𑁄𑀢𑀺 𑀪𑀚𑀦𑁆𑀢𑀺 𑀦𑀁 𑀩𑀳𑀽’’𑀢𑀺𑀆𑀤𑀺 (𑀅. 𑀦𑀺. 𑁫.𑁩𑁪) 𑀏𑀯𑀁 𑀲𑀦𑁆𑀢𑁂𑀧𑀺 ‘‘𑀤𑀸𑀢𑀸𑀭𑀁 𑀅𑀪𑀺𑀯𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀝𑁆𑀞𑀓𑀣𑀸𑀬𑀁 𑀤𑀸𑀬𑀓𑀯𑀲𑁂𑀦𑁂𑀯 ‘‘𑀲𑀺𑀦𑁂𑀳𑁂𑀢𑀻’’𑀢𑀺 𑀯𑀼𑀢𑁆𑀢𑀁, 𑀬𑀲𑁆𑀫𑀸 𑀯𑀸 𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀲𑀺𑀦𑁂𑀳𑀼𑀧𑁆𑀧𑀢𑁆𑀢𑀺 𑀆𑀫𑀺𑀲𑀦𑀺𑀲𑁆𑀲𑀺𑀢𑀸𑀢𑀺 𑀤𑀸𑀬𑀓𑀯𑀲𑁂𑀦𑁂𑀯 𑀯𑀼𑀢𑁆𑀢𑀁.

𑀇𑀲𑁆𑀲𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀩𑁆𑀩𑀢𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁬. 𑀔𑀢𑁆𑀢𑀺𑀬𑀸𑀢𑀺 𑀅𑀪𑀺𑀲𑁂𑀓𑀧𑁆𑀧𑀢𑁆𑀢𑀸. 𑀇𑀲𑁆𑀲𑀭𑀺𑀬𑀫𑀤𑁄 𑀓𑀸𑀫𑀕𑁂𑀥𑁄. 𑀧𑀣𑀯𑀺𑀫𑀡𑁆𑀟𑀮𑀲𑁆𑀲 𑀫𑀳𑀦𑁆𑀢𑀢𑀸 𑀢𑀁𑀦𑀺𑀯𑀸𑀲𑀺𑀦𑀁 𑀅𑀦𑀼𑀬𑀦𑁆𑀢𑀢𑀸𑀢𑀺 𑀲𑀩𑁆𑀩𑀫𑀺𑀤𑀁 𑀬𑀣𑀺𑀘𑁆𑀙𑀺𑀢𑀲𑁆𑀲 𑀭𑀸𑀚𑀓𑀺𑀘𑁆𑀘𑀲𑁆𑀲 𑀲𑀼𑀔𑁂𑀦 𑀲𑀫𑀺𑀚𑁆𑀛𑀦𑀲𑁆𑀲 𑀓𑀸𑀭𑀡𑀓𑀺𑀢𑁆𑀢𑀦𑀁. 𑀬𑀸𑀤𑀺𑀲𑁂 𑀭𑀸𑀚𑀓𑀺𑀘𑁆𑀘𑁂 𑀉𑀲𑁆𑀲𑀼𑀓𑁆𑀓𑀁 𑀆𑀧𑀦𑁆𑀦𑁄, 𑀢𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀏𑀲 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑁆𑀢𑀭𑀕𑀫𑀦𑀸𑀦𑀻𑀢𑀺 𑀢𑀺𑀡𑁆𑀡𑀁 𑀦𑀺𑀭𑀦𑁆𑀢𑀭𑀕𑀫𑀦𑀸𑀦𑀁 𑀅𑀦𑁆𑀢𑀭𑀦𑁆𑀢𑀭𑀸 𑀕𑀫𑀦𑀸𑀦𑀺. 𑀘𑁄𑀭𑀸 𑀘𑀺𑀦𑁆𑀢𑀬𑀺𑀁𑀲𑀽𑀢𑀺 𑀏𑀓𑁄 𑀅𑀦𑁆𑀢𑀭𑀪𑁄𑀕𑀺𑀓𑁄 𑀭𑀸𑀚𑀸𑀧𑀭𑀸𑀥𑀺𑀓𑁄 𑀧𑀜𑁆𑀘𑀲𑀢𑀫𑀦𑀼𑀲𑁆𑀲𑀧𑀭𑀺𑀯𑀸𑀭𑁄 𑀘𑁄𑀭𑀺𑀬𑀁 𑀓𑀭𑁄𑀦𑁆𑀢𑁄 𑀯𑀺𑀘𑀭𑀢𑀺, 𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

‘‘𑀅𑀬𑀼𑀢𑁆𑀢𑀁 𑀢𑁂 𑀓𑀢’’𑀦𑁆𑀢𑀺 𑀲𑀘𑀸𑀳𑀁 𑀯𑀓𑁆𑀔𑀸𑀫𑀻𑀢𑀺 𑀬𑁄𑀚𑀦𑀸. 𑀥𑀼𑀭𑀯𑀺𑀳𑀸𑀭𑁂𑀢𑀺 𑀭𑀣𑀲𑁆𑀲 𑀥𑀼𑀭𑀁 𑀯𑀺𑀬 𑀦𑀕𑀭𑀲𑁆𑀲 𑀥𑀼𑀭𑀪𑀽𑀢𑁂 𑀯𑀺𑀳𑀸𑀭𑁂. 𑀲𑀦𑁆𑀣𑀫𑁆𑀪𑀺𑀢𑀼𑀦𑁆𑀢𑀺 𑀯𑀺𑀲𑁆𑀲𑀸𑀲𑀪𑀸𑀯𑁂𑀦 𑀉𑀧𑀝𑁆𑀞𑀸𑀢𑀼𑀁. 𑀲𑀤𑁆𑀥𑀸𑀬𑀺𑀓𑁄𑀢𑀺 𑀲𑀤𑁆𑀥𑀸𑀬 𑀅𑀬𑀺𑀢𑀩𑁆𑀩𑁄, 𑀲𑀤𑁆𑀥𑁂𑀬𑁆𑀬𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀲𑀤𑁆𑀥𑀸𑀢𑀩𑁆𑀩𑁄’’𑀢𑀺. 𑀧𑀘𑁆𑀘𑀬𑀺𑀓𑁄𑀢𑀺 𑀧𑀢𑁆𑀢𑀺𑀬𑀸𑀬𑀺𑀢𑀩𑁆𑀩𑁄. 𑀅𑀩𑁆𑀪𑀲𑀫𑀁 𑀧𑀼𑀣𑀼𑀮𑀪𑀸𑀯𑁂𑀦. 𑀦𑀺𑀧𑁆𑀧𑁄𑀣𑁂𑀦𑁆𑀢𑁄𑀢𑀺 𑀦𑀺𑀫𑁆𑀫𑀤𑁆𑀤𑁂𑀦𑁆𑀢𑁄. 𑀲𑀡𑁆𑀳𑀓𑀭𑀡𑀻𑀬𑀁 𑀅𑀢𑀺𑀲𑀡𑁆𑀳𑀁 𑀧𑀺𑀲𑀦𑁆𑀢𑁄 𑀦𑀺𑀲𑀤𑀧𑁄𑀢𑁄 𑀯𑀺𑀬 𑀧𑀺𑀲𑀦𑁆𑀢𑁄.

𑀥𑀫𑁆𑀫𑀘𑀭𑀺𑀬𑀸𑀢𑀺𑀆𑀤𑀺𑀢𑁆𑀢𑀫𑁆𑀧𑀺 𑀲𑀻𑀲𑀁 𑀘𑁂𑀮𑀜𑁆𑀘 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀏𑀯 𑀓𑀸𑀢𑀩𑁆𑀩𑀸 𑀢𑀲𑁆𑀲𑀸 𑀏𑀯 𑀧𑀭𑀮𑁄𑀓𑁂 𑀧𑀢𑀺𑀝𑁆𑀞𑀸𑀪𑀸𑀯𑀢𑁄. 𑀆𑀘𑀺𑀓𑁆𑀔𑀸𑀫𑀻𑀢𑀺 𑀓𑀣𑁂𑀫𑀺, 𑀓𑀣𑁂𑀦𑁆𑀢𑁄 𑀘 𑀬𑀣𑀸 𑀢𑀫𑀢𑁆𑀣𑀁 𑀲𑀫𑁆𑀫𑀤𑁂𑀯 𑀭𑀸𑀚𑀸 𑀚𑀸𑀦𑀸𑀢𑀺, 𑀏𑀯𑀁 𑀚𑀸𑀦𑀸𑀧𑁂𑀫𑀻𑀢𑀺 ¶ . 𑀦𑀺𑀧𑁆𑀨𑀢𑁆𑀢𑀺 𑀬𑀼𑀤𑁆𑀥𑁂𑀦 𑀓𑀸𑀢𑀩𑁆𑀩𑀅𑀢𑁆𑀣𑀲𑀺𑀤𑁆𑀥𑀺. 𑀯𑀺𑀲𑀺𑀦𑁄𑀢𑀺 𑀩𑀦𑁆𑀥𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀁 𑀘𑀺𑀢𑁆𑀢𑀁 𑀏𑀢𑁂𑀦𑀸𑀢𑀺 𑀯𑀺𑀲𑀬𑁄, 𑀲𑀫𑀢𑁆𑀣𑀪𑀸𑀯𑁄. 𑀫𑀦𑁆𑀢𑀲𑀫𑁆𑀧𑀦𑁆𑀦𑀸𑀢𑀺 𑀲𑀫𑁆𑀧𑀦𑁆𑀦𑀭𑀸𑀚𑀫𑀦𑁆𑀢𑀸. 𑀫𑀳𑀸𑀅𑀫𑀘𑁆𑀘𑀸𑀢𑀺 𑀫𑀳𑁄𑀲𑀥𑀸𑀤𑀺𑀲𑀤𑀺𑀲𑀸 𑀦𑀻𑀢𑀺𑀲𑀢𑁆𑀣𑀙𑁂𑀓𑀸 𑀅𑀫𑀘𑁆𑀘𑀧𑀼𑀭𑀺𑀲𑀸. 𑀉𑀧𑀮𑀸𑀧𑁂𑀢𑀼𑀦𑁆𑀢𑀺 𑀧𑀭𑁂𑀲𑀁 𑀅𑀦𑁆𑀢𑀭𑁂 𑀯𑀺𑀭𑁄𑀥𑀢𑁆𑀣𑀁 𑀲𑀗𑁆𑀕𑀡𑁆𑀳𑀺𑀢𑀼𑀁.

𑀤𑁆𑀯𑁂𑀬𑁂𑀯 𑀧𑀩𑁆𑀩𑀢𑀸𑀢𑀺 𑀧𑀩𑁆𑀩𑀢𑀲𑀤𑀺𑀲𑀸 𑀤𑁆𑀯𑁂𑀬𑁂𑀯 𑀕𑀳𑀺𑀢𑀸. 𑀭𑀸𑀚𑁄𑀯𑀸𑀤𑁂𑀢𑀺 𑀭𑀸𑀚𑁄𑀯𑀸𑀤𑀲𑀼𑀢𑁆𑀢𑁂. 𑀆𑀕𑀢𑀸𑀯 𑀢𑀢𑁆𑀢𑀦𑁆𑀢𑀺𑀬𑀸 ¶ 𑀅𑀦𑀼𑀭𑀽𑀧𑀢𑁆𑀣𑀁. 𑀯𑀺𑀮𑀼𑀫𑁆𑀧𑀫𑀸𑀦𑀸𑀢𑀺 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. 𑀯𑀺𑀧𑀢𑁆𑀢𑀻𑀢𑀺 𑀪𑁄𑀕𑀧𑀭𑀺𑀳𑀸𑀦𑀸𑀤𑀺𑀯𑀺𑀦𑀸𑀲𑁄. 𑀳𑀢𑁆𑀣𑀺𑀬𑀼𑀤𑁆𑀥𑀸𑀤𑀻𑀳𑀺 𑀚𑀭𑀸𑀫𑀭𑀡𑀁 𑀚𑀺𑀦𑀺𑀢𑀼𑀁 𑀦 𑀲𑀓𑁆𑀓𑀸 𑀲𑀢𑁆𑀢𑀲𑁆𑀲 𑀅𑀯𑀺𑀲𑀬𑀪𑀸𑀯𑀢𑁄. 𑀬𑁂𑀦 𑀧𑀦 𑀚𑀺𑀦𑀺𑀢𑀼𑀁 𑀲𑀓𑁆𑀓𑀸, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 ‘‘𑀩𑀼𑀤𑁆𑀥𑁂…𑀧𑁂… 𑀦𑀺𑀯𑁂𑀲𑀬𑁂’’𑀢𑀺 𑀆𑀳. 𑀭𑀢𑀦𑀢𑁆𑀢𑀬𑁂 𑀳𑀺 𑀲𑀤𑁆𑀥𑀸 𑀦𑀺𑀯𑀺𑀝𑁆𑀞𑀸 𑀫𑀽𑀮𑀚𑀸𑀢𑀸 𑀧𑀢𑀺𑀝𑁆𑀞𑀺𑀢𑀸 𑀏𑀓𑀦𑁆𑀢𑀢𑁄 𑀚𑀭𑀸𑀫𑀭𑀡𑀯𑀺𑀚𑀬𑀸𑀬 𑀳𑁄𑀢𑀺. 𑀢𑁂𑀦𑀸𑀳 ‘‘𑀢𑀲𑁆𑀫𑀸 𑀲𑀤𑁆𑀥’’𑀦𑁆𑀢𑀺.

𑀧𑀩𑁆𑀩𑀢𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀓𑁄𑀲𑀮𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁪. 𑀫𑀸𑀭𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧. 𑀢𑀧𑁄𑀓𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁭. 𑀉𑀭𑀼𑀯𑁂𑀮𑀸𑀬 ¶ ¶ 𑀲𑀫𑀻𑀧𑁂 𑀕𑀸𑀫𑁄 𑀉𑀭𑀼𑀯𑁂𑀮𑀕𑀸𑀫𑁄, 𑀢𑀁 𑀉𑀭𑀼𑀯𑁂𑀮𑀕𑀸𑀫𑀁 𑀅𑀪𑀺𑀫𑀼𑀔𑀪𑀸𑀯𑁂𑀦 𑀲𑀫𑁆𑀫𑀤𑁂𑀯 𑀲𑀩𑁆𑀩𑀥𑀫𑁆𑀫𑁂 𑀩𑀼𑀚𑁆𑀛𑀢𑀻𑀢𑀺 𑀅𑀪𑀺𑀲𑀫𑁆𑀩𑁄𑀥𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀢𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀘 𑀪𑀕𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀧𑀜𑁆𑀘𑀘𑀢𑁆𑀢𑀸𑀮𑀻𑀲𑀸𑀬 𑀯𑀲𑁆𑀲𑁂𑀲𑀼 𑀆𑀤𑀺𑀢𑁄 𑀧𑀦𑁆𑀦𑀭𑀲 𑀯𑀲𑁆𑀲𑀸𑀦𑀺 𑀧𑀞𑀫𑀩𑁄𑀥𑀺, 𑀇𑀥 𑀧𑀦 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑀫𑁂𑀯 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀅𑀦𑁆𑀢𑁄𑀲𑀢𑁆𑀢𑀸𑀳𑀲𑁆𑀫𑀺𑀁 𑀬𑁂𑀯𑀸’’𑀢𑀺. 𑀅𑀲𑀼𑀔𑀪𑀸𑀯𑁂𑀦 𑀅𑀜𑁆𑀜𑁂𑀳𑀺 𑀓𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀤𑀼𑀓𑁆𑀓𑀭𑀁 𑀓𑀭𑁄𑀢𑀻𑀢𑀺 𑀤𑀼𑀓𑁆𑀓𑀭𑀓𑀸𑀭𑁄, 𑀲𑁄 𑀏𑀯 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀤𑀼𑀓𑁆𑀓𑀭𑀓𑀸𑀭𑀺𑀓𑀸. 𑀢𑀸𑀬 𑀫𑀼𑀢𑁆𑀢𑁄 𑀯𑀢𑀫𑁆𑀳𑀻𑀢𑀺 𑀘𑀺𑀦𑁆𑀢𑁂𑀲𑀺. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀢𑀁 𑀮𑁄𑀓𑀦𑀸𑀣𑁄 𑀙𑀩𑁆𑀩𑀲𑁆𑀲𑀸𑀦𑀺 𑀲𑀫𑀦𑀼𑀬𑀼𑀜𑁆𑀚𑀢𑀺? 𑀓𑀫𑁆𑀫𑀧𑀻𑀴𑀺𑀢𑀯𑀲𑁂𑀦. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀧𑀤𑀸𑀦𑁂 (𑀅𑀧. 𑀣𑁂𑀭 𑁧.𑁩𑁯.𑁯𑁨-𑁯𑁪) 𑁋

‘‘𑀅𑀯𑀘𑀸𑀳𑀁 𑀚𑁄𑀢𑀺𑀧𑀸𑀮𑁄, 𑀲𑀼𑀕𑀢𑀁 𑀓𑀲𑁆𑀲𑀧𑀁 𑀢𑀤𑀸;

𑀓𑀼𑀢𑁄 𑀦𑀼 𑀩𑁄𑀥𑀺 𑀫𑀼𑀡𑁆𑀟𑀲𑁆𑀲, 𑀩𑁄𑀥𑀺 𑀧𑀭𑀫𑀤𑀼𑀮𑁆𑀮𑀪𑀸.

‘‘𑀢𑁂𑀦 𑀓𑀫𑁆𑀫𑀯𑀺𑀧𑀸𑀓𑁂𑀦, 𑀅𑀘𑀭𑀺𑀁 𑀤𑀼𑀓𑁆𑀓𑀭𑀁 𑀩𑀳𑀼𑀁;

𑀙𑀩𑁆𑀩𑀲𑁆𑀲𑀸𑀦𑀼𑀭𑀼𑀯𑁂𑀮𑀸𑀬𑀁, 𑀢𑀢𑁄 𑀩𑁄𑀥𑀺𑀫𑀧𑀸𑀧𑀼𑀡𑀺𑀁.

‘‘𑀦𑀸𑀳𑀁 𑀏𑀢𑁂𑀦 𑀫𑀕𑁆𑀕𑁂𑀦, 𑀧𑀸𑀧𑀼𑀡𑀺𑀁 𑀩𑁄𑀥𑀺𑀫𑀼𑀢𑁆𑀢𑀫𑀁;

𑀓𑀼𑀫𑁆𑀫𑀕𑁆𑀕𑁂𑀦 𑀕𑀯𑁂𑀲𑀺𑀲𑁆𑀲𑀁, 𑀧𑀼𑀩𑁆𑀩𑀓𑀫𑁆𑀫𑁂𑀦 𑀯𑀸𑀭𑀺𑀢𑁄’’𑀢𑀺.

𑀫𑀸𑀭𑁂𑀢𑀻𑀢𑀺 𑀯𑀺𑀩𑀸𑀥𑁂𑀢𑀺. 𑀯𑀺𑀧𑀢𑁆𑀢𑀺𑀆𑀤𑀺𑀲𑀁𑀬𑁄𑀚𑀦𑀜𑁆𑀳𑀺 𑀲𑀸𑀥𑀽𑀦𑀁 𑀧𑀭𑀫𑀢𑁆𑀣𑀢𑁄 𑀫𑀭𑀡𑀁 𑀲𑀘𑁆𑀘𑀧𑀝𑀺𑀯𑁂𑀥𑀫𑀸𑀭𑀡𑀢𑁆𑀢𑀸, 𑀧𑀸𑀧𑀢𑀭𑀢𑁆𑀢𑀸 𑀧𑀸𑀧𑀢𑀫𑁄𑀢𑀺 𑀧𑀸𑀧𑀺𑀫𑀸. 𑀲𑀸 𑀘𑀲𑁆𑀲 𑀧𑀸𑀧𑀢𑀫𑀢𑀸 𑀧𑀸𑀧𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀆𑀳 ‘‘𑀧𑀸𑀧𑁂 ¶ 𑀦𑀺𑀬𑀼𑀢𑁆𑀢𑁄’’𑀢𑀺. 𑀅𑀥𑀺𑀧𑀢𑀻𑀢𑀺 𑀓𑀸𑀫𑀸𑀥𑀺𑀧𑀢𑀺. 𑀅𑀧𑁆𑀧𑀳𑀻𑀦𑀓𑀸𑀫𑀭𑀸𑀕𑁂 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀢𑀻𑀢𑀺 𑀯𑀲𑀯𑀢𑁆𑀢𑀻. 𑀢𑁂𑀲𑀁𑀬𑁂𑀯 𑀓𑀼𑀲𑀮𑀓𑀫𑁆𑀫𑀸𑀦𑀁 𑀅𑀦𑁆𑀢𑀁 𑀓𑀭𑁄𑀢𑀻𑀢𑀺 𑀅𑀦𑁆𑀢𑀓𑁄. 𑀯𑀝𑁆𑀝𑀤𑀼𑀓𑁆𑀔𑀢𑁄 𑀅𑀧𑀭𑀺𑀫𑀼𑀢𑁆𑀢𑀧𑀘𑁆𑀘𑀬𑀢𑁆𑀢𑀸 𑀦𑀫𑀼𑀘𑀺. 𑀫𑀢𑁆𑀢𑀸𑀦𑀁 𑀧𑀫𑀢𑁆𑀢𑀸𑀦𑀁 𑀩𑀦𑁆𑀥𑀽𑀢𑀺 𑀧𑀫𑀢𑁆𑀢𑀩𑀦𑁆𑀥𑀼.

𑀢𑀧𑁄𑀓𑀫𑁆𑀫𑀸𑀢𑀺 ¶ 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀢𑁄. 𑀅𑀧𑀭𑀤𑁆𑀥𑁄𑀢𑀺 𑀯𑀺𑀭𑀚𑁆𑀛𑀲𑀺. ‘‘𑀅𑀧𑀭𑀸𑀥𑁄’’𑀢𑀺𑀧𑀺 𑀅𑀢𑁆𑀣𑀺, 𑀲𑁄𑀬𑁂𑀯 𑀅𑀢𑁆𑀣𑁄. 𑀓𑀸𑀬𑀓𑀺𑀮𑀫𑀣𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀬𑁂𑀪𑀼𑀬𑁆𑀬𑁂𑀦 𑀅𑀫𑀭𑀢𑁆𑀣𑀸𑀬 𑀅𑀦𑀼𑀬𑀼𑀜𑁆𑀚𑀢𑀺, 𑀲𑁄 𑀘 𑀓𑀫𑁆𑀫𑀯𑀸𑀤𑀻𑀳𑀺 𑀅𑀦𑀼𑀬𑀼𑀜𑁆𑀚𑀺𑀬𑀫𑀸𑀦𑁄 𑀤𑁂𑀯𑀢𑁆𑀣𑀸𑀬 𑀲𑀺𑀬𑀸𑀢𑀺 𑀆𑀳 ‘‘𑀅𑀫𑀭𑀪𑀸𑀯𑀢𑁆𑀣𑀸𑀬𑀸’’𑀢𑀺. 𑀲𑀩𑁆𑀩𑀁 𑀢𑀧𑀦𑁆𑀢𑀺 𑀲𑀩𑁆𑀩𑀁 𑀅𑀢𑁆𑀢𑀧𑀭𑀺𑀢𑀸𑀧𑀦𑀁. 𑀅𑀢𑁆𑀣𑀸𑀯𑀳𑀁 𑀦 𑀪𑀯𑀢𑀺 𑀩𑁄𑀥𑀺𑀬𑀸 𑀅𑀦𑀼𑀧𑀸𑀬𑀢𑁆𑀢𑀸. 𑀓𑀺𑀜𑁆𑀘𑀲𑁆𑀲𑀸𑀢𑀺 𑀓𑀺𑀜𑁆𑀘𑀺 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀨𑀺𑀬𑀸𑀭𑀺𑀢𑁆𑀢𑀁𑀯 𑀥𑀫𑁆𑀫𑀦𑀻𑀢𑀺 𑀥𑀫𑁆𑀫𑀁 𑀯𑀼𑀘𑁆𑀘𑀢𑀺 𑀯𑀡𑁆𑀡𑀼, 𑀲𑁄 𑀇𑀥 ‘‘𑀥𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑁄, 𑀥𑀫𑁆𑀫𑀦𑀺 𑀯𑀡𑁆𑀡𑀼𑀧𑀤𑁂𑀲𑁂𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀅𑀭𑀜𑁆𑀜𑁂’’𑀢𑀺. 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀨𑀺𑀬𑀸𑀳𑀺 𑀆𑀓𑀟𑁆𑀠𑁂𑀬𑁆𑀬 𑀘𑁂𑀯 𑀅𑀭𑀺𑀢𑁆𑀢𑁂𑀳𑀺 𑀉𑀧𑁆𑀧𑀻𑀴𑁂𑀬𑁆𑀬 𑀘.

𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀚𑀻𑀯𑀸 𑀕𑀳𑀺𑀢𑀸 𑀫𑀕𑁆𑀕𑀲𑀻𑀮𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀲𑀫𑀸𑀥𑀺𑀦𑁄 𑀳𑀺 𑀕𑀳𑀡𑁂𑀦 𑀲𑀫𑁆𑀫𑀸𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀬𑁄 𑀕𑀳𑀺𑀢𑀸 𑀉𑀧𑀓𑀸𑀭𑀪𑀸𑀯𑀢𑁄. 𑀧𑀜𑁆𑀜𑀸𑀬𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀩𑀼𑀚𑁆𑀛𑀢𑀺 𑀏𑀢𑁂𑀦𑀸𑀢𑀺 𑀩𑁄𑀥𑁄. 𑀫𑀕𑁆𑀕𑁄𑀢𑀺 𑀆𑀳 ‘‘𑀩𑁄𑀥𑀸𑀬𑀸𑀢𑀺 𑀫𑀕𑁆𑀕𑀢𑁆𑀣𑀸𑀬𑀸’’𑀢𑀺. 𑀓𑀣𑀁 𑀧𑀦 𑀫𑀕𑁆𑀕𑀁 𑀫𑀕𑁆𑀕𑀢𑁆𑀣𑀸𑀬 𑀪𑀸𑀯𑁂𑀢𑀻𑀢𑀺 𑀆𑀳 ‘‘𑀬𑀣𑀸 𑀳𑀻’’𑀢𑀺𑀆𑀤𑀺. 𑀢𑁂𑀦 𑀬𑀣𑀸 𑀬𑀸𑀕𑀼𑀧𑀘𑀦𑀸𑀭𑀫𑁆𑀪𑁄 𑀬𑀸𑀯𑀤𑁂𑀯 𑀬𑀸𑀕𑀼𑀅𑀢𑁆𑀣𑁄, 𑀏𑀯𑀁 𑀫𑀕𑁆𑀕𑀪𑀸𑀯𑀦𑀸𑀭𑀫𑁆𑀪𑁄 𑀫𑀕𑁆𑀕𑀸𑀥𑀺𑀕𑀫𑀢𑁆𑀣𑀸𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀆𑀭𑀫𑁆𑀪𑁄𑀢𑀺 𑀘 𑀅𑀭𑀺𑀬𑀫𑀕𑁆𑀕𑀪𑀸𑀯𑀦𑀸𑀬 𑀩𑀦𑁆𑀥𑀸𑀧𑀦𑀁 𑀤𑀝𑁆𑀞𑀩𑁆𑀩𑀁. 𑀓𑁂𑀘𑀺 𑀧𑀦 ‘‘𑀫𑀕𑁆𑀕𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀁, 𑀩𑁄𑀥𑀸𑀬𑀸𑀢𑀺 𑀅𑀭𑀳𑀢𑁆𑀢𑀲𑀫𑁆𑀩𑁄𑀥𑀸𑀬, 𑀏𑀯𑀜𑁆𑀘 𑀓𑀢𑁆𑀯𑀸 ‘𑀧𑀢𑁆𑀢𑁄𑀲𑁆𑀫𑀺 𑀧𑀭𑀫𑀲𑀼𑀤𑁆𑀥𑀺’𑀦𑁆𑀢𑀺 𑀇𑀤𑀫𑁆𑀧𑀺 𑀯𑀘𑀦𑀁 𑀲𑀫𑀢𑁆𑀣𑀺𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀅𑀧𑀭𑁂 𑀧𑀦 ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑀫𑁆𑀩𑁄𑀥𑀸𑀬𑀸𑀢𑀺. 𑀲𑁄 𑀳𑀺 𑀲𑀩𑁆𑀩𑀲𑁆𑀫𑀸𑀧𑀺 𑀩𑁄𑀥𑀺𑀢𑁄 𑀉𑀢𑁆𑀢𑀭𑀺𑀢𑀭𑁄’’𑀢𑀺. 𑀦𑀺𑀳𑀢𑁄 𑀦𑀺𑀩𑁆𑀩𑀺𑀲𑁂𑀯𑀦𑀪𑀸𑀯𑀁 𑀧𑀸𑀧𑀺𑀢𑁄. 𑀢𑁂𑀦𑀸𑀳 ‘‘𑀧𑀭𑀸𑀚𑀺𑀢𑁄’’𑀢𑀺.

𑀢𑀧𑁄𑀓𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀳𑀢𑁆𑀣𑀺𑀭𑀸𑀚𑀯𑀡𑁆𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁮. 𑀅𑀦𑁆𑀥𑀪𑀸𑀯𑀓𑀸𑀭𑀓𑁂𑀢𑀺 𑀧𑀘𑀼𑀭𑀚𑀦𑀲𑁆𑀲 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑁂𑀦 𑀅𑀦𑁆𑀥𑀪𑀸𑀯𑀓𑀸𑀭𑀓𑁂. 𑀫𑀳𑀸𑀢𑀫𑁂𑀢𑀺 𑀫𑀳𑀢𑀺 𑀢𑀫𑀲𑀺. 𑀧𑀸𑀲𑀸𑀡𑀨𑀮𑀓𑁂 𑀫𑀳𑀸𑀘𑀻𑀯𑀭𑀁 𑀲𑀻𑀲𑁂 𑀞𑀧𑁂𑀢𑁆𑀯𑀸𑀢𑀺 𑀏𑀢𑁂𑀦 𑀢𑀁 𑀨𑀮𑀓𑀁 𑀅𑀧𑀲𑁆𑀲𑀸𑀬 𑀦𑀺𑀲𑀺𑀦𑁆𑀦𑁄𑀢𑀺 𑀤𑀲𑁆𑀲𑁂𑀢𑀺 ¶ . 𑀧𑀥𑀸𑀦𑀦𑁆𑀢𑀺 𑀪𑀸𑀯𑀦𑀁. 𑀧𑀭𑀺𑀕𑁆𑀕𑀡𑁆𑀳𑀫𑀸𑀦𑁄𑀢𑀺 𑀲𑀩𑁆𑀩𑀲𑁄 𑀕𑀡𑁆𑀳𑀦𑁆𑀢𑁄 𑀅𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄, 𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀺𑀬𑁄 𑀨𑀮𑀲𑀫𑀸𑀧𑀢𑁆𑀢𑀺𑀜𑁆𑀘 𑀫𑀦𑀲𑀺𑀓𑀭𑁄𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀦𑀦𑀼 𑀘𑀸’’𑀢𑀺𑀆𑀤𑀺. 𑀅𑀭𑀺𑀝𑁆𑀞𑀓𑁄𑀢𑀺 𑀅𑀭𑀺𑀝𑁆𑀞𑀓𑀯𑀡𑁆𑀡𑁄. 𑀢𑁂𑀦𑀸𑀳 ‘‘𑀓𑀸𑀴𑀓𑁄’’𑀢𑀺.

𑀤𑀻𑀖𑀫𑀤𑁆𑀥𑀸𑀦𑀦𑁆𑀢𑀺 ¶ 𑀘𑀺𑀭𑀢𑀭𑀁 𑀓𑀸𑀮𑀁. 𑀲𑀁𑀲𑀭𑀦𑁆𑀢𑀺 𑀆𑀲𑀸𑀤𑀦𑀸𑀥𑀺𑀧𑁆𑀧𑀸𑀬𑁂𑀦 𑀲𑀜𑁆𑀘𑀭𑀦𑁆𑀢𑁄, 𑀅𑀮𑀁 𑀢𑀼𑀬𑁆𑀳𑀁 𑀏𑀢𑁂𑀦 𑀦𑀺𑀧𑁆𑀧𑀬𑁄𑀚𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀢𑁂𑀦 𑀫𑀸𑀭𑀲𑁆𑀲 𑀓𑀸𑀘𑀺 𑀅𑀢𑁆𑀣𑀲𑀺𑀤𑁆𑀥𑀻𑀢𑀺.

𑀳𑀢𑁆𑀣𑀺𑀭𑀸𑀚𑀯𑀡𑁆𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀼𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁯. 𑀲𑀼𑀲𑀁𑀯𑀼𑀢𑀸𑀢𑀺 𑀫𑀕𑁆𑀕𑀲𑀁𑀯𑀭𑁂𑀦 𑀲𑀼𑀝𑁆𑀞𑀼 𑀲𑀁𑀯𑀼𑀢𑀸. 𑀲𑀼𑀧𑀺𑀳𑀺𑀢𑀸𑀢𑀺 𑀲𑀼𑀝𑁆𑀞𑀼 𑀧𑀺𑀳𑀺𑀢𑀸. 𑀯𑀲𑀸𑀦𑀼𑀕𑀸𑀢𑀺 𑀓𑀸𑀬𑀸𑀤𑀺𑀤𑁆𑀯𑀸𑀭𑀯𑀲𑀸𑀦𑀼𑀕𑀸 𑀯𑀲𑀯𑀢𑁆𑀢𑀺𑀦𑁄 𑀦 𑀳𑁄𑀦𑁆𑀢𑀺. 𑀩𑀤𑁆𑀥𑀘𑀭𑀸𑀢𑀺 𑀧𑀝𑀺𑀩𑀤𑁆𑀥𑀘𑀭𑀺𑀬𑀸𑀢𑀺.

𑀲𑀼𑀪𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀞𑀫𑀫𑀸𑀭𑀧𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁦. 𑀉𑀧𑀸𑀬𑀫𑀦𑀲𑀺𑀓𑀸𑀭𑁂𑀦𑀸𑀢𑀺 𑀅𑀦𑀺𑀘𑁆𑀘𑀸𑀤𑀻𑀲𑀼 𑀅𑀦𑀺𑀘𑁆𑀘𑀸𑀤𑀺𑀢𑁄 𑀫𑀦𑀲𑀺𑀓𑀭𑀡𑁂𑀦. 𑀉𑀧𑀸𑀬𑀯𑀻𑀭𑀺𑀬𑁂𑀦𑀸𑀢𑀺 𑀅𑀦𑀼𑀧𑁆𑀧𑀦𑁆𑀦𑀸𑀓𑀼𑀲𑀮𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀸𑀬 𑀯𑀺𑀥𑀺𑀦𑀸 𑀧𑀯𑀢𑁆𑀢𑀯𑀻𑀭𑀺𑀬𑁂𑀦. 𑀓𑀸𑀭𑀡𑀯𑀻𑀭𑀺𑀬𑁂𑀦𑀸𑀢𑀺 𑀅𑀦𑀼𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀸𑀤𑀦𑀸𑀤𑀺𑀅𑀢𑁆𑀣𑀲𑁆𑀲 𑀓𑀸𑀭𑀡𑀪𑀽𑀢𑁂𑀦 𑀯𑀻𑀭𑀺𑀬𑁂𑀦. 𑀅𑀦𑀼𑀧𑁆𑀧𑀦𑁆𑀦𑀧𑀸𑀧𑀓𑀸𑀦𑀼𑀧𑁆𑀧𑀸𑀤𑀦𑀸𑀤𑀺𑀅𑀢𑁆𑀣𑀸𑀦𑀺 𑀳𑀺 𑀯𑀻𑀭𑀺𑀬𑀸𑀦𑀺 𑀬𑀤𑀢𑁆𑀣𑀁 𑀳𑁄𑀦𑁆𑀢𑀺, 𑀢𑀁 𑀅𑀢𑁆𑀣𑀁 𑀲𑀸𑀥𑁂𑀦𑁆𑀢𑀺𑀬𑁂𑀯𑀸𑀢𑀺 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 𑀤𑀻𑀧𑀓𑁄 𑀲𑀫𑁆𑀫𑀸-𑀲𑀤𑁆𑀤𑁄. 𑀬𑁄𑀦𑀺𑀲𑁄𑀲𑀫𑁆𑀫𑀸𑀲𑀤𑁆𑀤𑁂𑀦 𑀳𑀺 𑀉𑀧𑀸𑀬𑀓𑀸𑀭𑀡𑀢𑁆𑀣𑀤𑀻𑀧𑀓𑀢𑀁 𑀲𑀦𑁆𑀥𑀸𑀬 ‘‘𑀉𑀧𑀸𑀬𑀯𑀻𑀭𑀺𑀬𑁂𑀦 𑀓𑀸𑀭𑀡𑀯𑀻𑀭𑀺𑀬𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦. 𑀫𑀸𑀭𑁂𑀦 ‘‘𑀫𑀬𑁆𑀳𑀁 𑀔𑁄, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀓𑀁 𑀪𑀕𑀯𑀢𑁄 𑀯𑀘𑀦𑀁 𑀲𑀼𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀭𑀳𑀢𑁆𑀢𑀁 𑀧𑀢𑁆𑀯𑀸𑀧𑀺 𑀦 𑀢𑀼𑀲𑁆𑀲𑀢𑀻’’𑀢𑀺𑀆𑀤𑀺.

𑀓𑀺𑀮𑁂𑀲𑀧𑀸𑀲𑁂𑀦𑀸𑀢𑀺 ¶ 𑀓𑀺𑀮𑁂𑀲𑀫𑀸𑀭𑀲𑁆𑀲 𑀉𑀧𑀸𑀬𑀪𑀽𑀢𑁂𑀦. 𑀓𑀺𑀮𑁂𑀲𑀫𑀸𑀭𑁄 𑀳𑀺 𑀲𑀢𑁆𑀢𑁂 𑀓𑀸𑀫𑀕𑀼𑀡𑀧𑀸𑀲𑁂𑀳𑀺 𑀦𑀺𑀩𑀦𑁆𑀥𑀢𑀺, 𑀦 𑀧𑀦 𑀲𑀬𑀫𑁂𑀯. 𑀢𑁂𑀦𑀸𑀳 ‘‘𑀬𑁂 𑀤𑀺𑀩𑁆𑀩𑀸 𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑀸’’𑀢𑀺𑀆𑀤𑀺. 𑀫𑀸𑀭𑀩𑀦𑁆𑀥𑀦𑁂𑀢𑀺 𑀓𑀺𑀮𑁂𑀲𑀫𑀸𑀭𑀲𑁆𑀲 𑀩𑀦𑁆𑀥𑀦𑀝𑁆𑀞𑀸𑀦𑁂, 𑀪𑀯𑀘𑀸𑀭𑀓𑁂𑀢𑀺 𑀅𑀢𑁆𑀣𑁄. 𑀦 𑀫𑁂 𑀲𑀫𑀡 𑀫𑁄𑀓𑁆𑀔𑀲𑀻𑀢𑀺 𑀇𑀤𑀁 𑀫𑀸𑀭𑁄 ‘‘𑀅𑀦𑀼𑀢𑁆𑀢𑀭𑀸 𑀯𑀺𑀫𑀼𑀢𑁆𑀢𑀺 𑀅𑀦𑀼𑀧𑁆𑀧𑀢𑁆𑀢𑀸, 𑀯𑀺𑀫𑀼𑀢𑁆𑀢𑀸 𑀲𑀩𑁆𑀩𑀧𑀸𑀲𑁂𑀳𑀻’’𑀢𑀺 𑀘 𑀪𑀕𑀯𑀢𑁄 𑀯𑀘𑀦𑀁 𑀅𑀲𑀤𑁆𑀤𑀳𑀦𑁆𑀢𑁄 𑀯𑀤𑀢𑀺 𑀲𑀤𑁆𑀤𑀳𑀦𑁆𑀢𑁄𑀧𑀺 𑀯𑀸 ‘‘𑀏𑀯𑀫𑀬𑀁 𑀧𑀭𑁂𑀲𑀁 𑀲𑀢𑁆𑀢𑀸𑀦𑀁 𑀫𑁄𑀓𑁆𑀔𑀸𑀬 𑀉𑀲𑁆𑀲𑀸𑀳𑀁 𑀦 𑀓𑀭𑁂𑀬𑁆𑀬𑀸’’𑀢𑀺 𑀅𑀢𑁆𑀢𑀦𑁄 𑀓𑁄𑀳𑀜𑁆𑀜𑁂 𑀞𑀢𑁆𑀯𑀸 𑀯𑀤𑀢𑀺.

𑀧𑀞𑀫𑀫𑀸𑀭𑀧𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀤𑀼𑀢𑀺𑀬𑀫𑀸𑀭𑀧𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁧. 𑀅𑀦𑀼𑀧𑀼𑀩𑁆𑀩𑀕𑀫𑀦𑀘𑀸𑀭𑀺𑀓𑀦𑁆𑀢𑀺 ¶ 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀅𑀦𑀼𑀓𑁆𑀓𑀫𑁂𑀦 𑀕𑀫𑀦𑀲𑀗𑁆𑀔𑀸𑀢𑀁 𑀘𑀸𑀭𑀺𑀓𑀁. 𑀏𑀯𑀁 𑀳𑀺 𑀕𑀢𑁂𑀲𑀽𑀢𑀺 𑀏𑀯𑀁 𑀢𑀼𑀫𑁆𑀳𑁂𑀲𑀼 𑀩𑀳𑀽𑀲𑀼 𑀏𑀓𑀚𑁆𑀛𑀁 𑀕𑀢𑁂𑀲𑀼.

𑀆𑀤𑀺𑀫𑁆𑀳𑀺 𑀓𑀮𑁆𑀬𑀸𑀡𑀁 𑀏𑀢𑀲𑁆𑀲𑀸𑀢𑀺 𑀆𑀤𑀺𑀓𑀮𑁆𑀬𑀸𑀡𑀁, 𑀢𑀣𑀸 𑀲𑁂𑀲𑁂𑀲𑀼. 𑀲𑀸𑀲𑀦𑀲𑁆𑀲 𑀆𑀤𑀺 𑀲𑀻𑀮𑀁 𑀫𑀽𑀮𑀓𑀢𑁆𑀢𑀸. 𑀢𑀲𑁆𑀲 𑀲𑀫𑀣𑀸𑀤𑀬𑁄 𑀫𑀚𑁆𑀛𑀁 𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀬𑀸 𑀯𑁂𑀫𑀚𑁆𑀛𑀪𑀸𑀯𑀢𑁄. 𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀧𑀭𑀺𑀬𑁄𑀲𑀸𑀦𑀁 𑀢𑀤𑀥𑀺𑀕𑀫𑀢𑁄 𑀉𑀢𑁆𑀢𑀭𑀺 𑀓𑀭𑀡𑀻𑀬𑀸𑀪𑀸𑀯𑀢𑁄. 𑀲𑀸𑀲𑀦𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺 𑀦𑀸𑀫 𑀧𑀜𑁆𑀜𑀸𑀬 𑀳𑁄𑀢𑀺, 𑀢𑀲𑁆𑀲𑀸 𑀘 𑀲𑀻𑀮𑀁 𑀲𑀫𑀸𑀥𑀺 𑀘 𑀫𑀽𑀮𑀦𑁆𑀢𑀺 𑀆𑀳 ‘‘𑀲𑀻𑀮𑀲𑀫𑀸𑀥𑀬𑁄 𑀯𑀸 𑀆𑀤𑀻’’𑀢𑀺. 𑀬𑀲𑁆𑀫𑀸 𑀧𑀜𑁆𑀜𑀸 𑀅𑀦𑀼𑀩𑁄𑀥𑀧𑀝𑀺𑀯𑁂𑀥𑀯𑀲𑁂𑀦 𑀤𑀼𑀯𑀺𑀥𑀸, 𑀢𑀲𑁆𑀫𑀸 𑀢𑀤𑀼𑀪𑀬𑀁 𑀕𑀡𑁆𑀳𑀦𑁆𑀢𑁄 ‘‘𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀸 𑀫𑀚𑁆𑀛’’𑀦𑁆𑀢𑀺 𑀆𑀳. 𑀧𑀜𑁆𑀜𑀸𑀦𑀺𑀧𑁆𑀨𑀢𑁆𑀢𑀺 𑀨𑀮𑀓𑀺𑀘𑁆𑀘𑀁, 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸 𑀧𑀦 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀧𑀭𑀺𑀬𑁄𑀲𑀸𑀦𑀁 𑀢𑀢𑁄 𑀧𑀭𑀁 𑀓𑀢𑁆𑀢𑀩𑁆𑀩𑀸𑀪𑀸𑀯𑀢𑁄𑀢𑀺 𑀆𑀳 ‘‘𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺. 𑀨𑀮𑀕𑁆𑀕𑀳𑀡𑁂𑀦 𑀳𑀺 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀁 𑀕𑀬𑁆𑀳𑀢𑀺, 𑀇𑀢𑀭𑁂𑀦 𑀇𑀢𑀭𑀁, 𑀢𑀤𑀼𑀪𑀬𑀯𑀲𑁂𑀦 𑀧𑀝𑀺𑀧𑀢𑁆𑀢𑀺𑀬𑀸 𑀑𑀲𑀸𑀦𑀦𑁆𑀢𑀺 𑀆𑀳 ‘‘𑀨𑀮𑀦𑀺𑀩𑁆𑀩𑀸𑀦𑀸𑀦𑀺 𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺. ‘‘𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀤𑀺𑀫𑁂𑀯 𑀯𑀺𑀲𑁄𑀥𑁂𑀳𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀓𑁄 𑀘𑀸𑀤𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁? 𑀲𑀻𑀮𑀜𑁆𑀘 𑀲𑀼𑀯𑀺𑀲𑀼𑀤𑁆𑀥𑀁, 𑀤𑀺𑀝𑁆𑀞𑀺 𑀘 𑀉𑀚𑀼𑀓𑀸’’𑀢𑀺 (𑀲𑀁. 𑀦𑀺. 𑁫.𑁩𑁬𑁯) 𑀯𑀘𑀦𑀢𑁄 𑀲𑀻𑀮𑀤𑀺𑀝𑁆𑀞𑀼𑀚𑀼𑀓𑀢𑀸𑀬 𑀫𑀢𑁆𑀣𑀓𑀪𑀽𑀢𑀸 𑀯𑀺𑀧𑀲𑁆𑀲𑀦𑀸, 𑀢𑀤𑀥𑀺𑀝𑁆𑀞𑀸𑀦𑀸 𑀲𑀻𑀮𑀲𑀫𑀸𑀥𑀻𑀢𑀺 𑀇𑀫𑁂 ¶ 𑀢𑀲𑁆𑀲 𑀲𑀸𑀲𑀦𑀲𑁆𑀲 𑀫𑀽𑀮𑀦𑁆𑀢𑀺 𑀆𑀳 ‘‘𑀲𑀻𑀮𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸 𑀯𑀸 𑀆𑀤𑀻’’𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀓𑀺𑀜𑁆𑀘𑀸𑀧𑀺 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀲𑀫𑀼𑀤𑀸𑀬𑁄 𑀦𑀢𑁆𑀣𑀺, 𑀬𑁂𑀲𑀼 𑀧𑀦 𑀅𑀯𑀬𑀯𑁂𑀲𑀼 𑀲𑀫𑀼𑀤𑀸𑀬𑀭𑀽𑀧𑁂𑀦 𑀅𑀧𑁂𑀓𑁆𑀔𑀺𑀢𑁂𑀲𑀼 𑀕𑀸𑀣𑀸𑀢𑀺 𑀲𑀫𑀜𑁆𑀜𑀸, 𑀢𑀁 𑀢𑀢𑁄 𑀪𑀺𑀦𑁆𑀦𑀁 𑀯𑀺𑀬 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀢𑀼𑀧𑁆𑀧𑀤𑀺𑀓𑀕𑀸𑀣𑀸𑀬 𑀢𑀸𑀯 𑀧𑀞𑀫𑀧𑀸𑀤𑁄’’𑀢𑀺𑀆𑀤𑀺𑀫𑀸𑀳. 𑀧𑀜𑁆𑀘𑀧𑀤𑀙𑀧𑁆𑀧𑀤𑀸𑀦𑀁 𑀕𑀸𑀣𑀸𑀦𑀁 𑀆𑀤𑀺𑀧𑀭𑀺𑀬𑁄𑀲𑀸𑀦𑀕𑁆𑀕𑀳𑀡𑁂𑀦 𑀇𑀢𑀭𑁂 𑀤𑀼𑀢𑀺𑀬𑀸𑀤𑀬𑁄 𑀢𑀬𑁄 𑀘𑀢𑁆𑀢𑀸𑀭𑁄 𑀯𑀸 𑀫𑀚𑁆𑀛𑀦𑁆𑀢𑀺 𑀅𑀯𑀼𑀢𑁆𑀢𑀲𑀺𑀤𑁆𑀥𑀫𑁂𑀯𑀸𑀢𑀺 𑀦 𑀯𑀼𑀢𑁆𑀢𑀁. 𑀏𑀓𑀸𑀦𑀼𑀲𑀦𑁆𑀥𑀺𑀓𑀲𑀼𑀢𑁆𑀢𑀲𑁆𑀲𑀸𑀢𑀺 𑀇𑀤𑀁 𑀩𑀳𑀼𑀯𑀺𑀪𑀸𑀕𑀁 𑀬𑀣𑀸𑀦𑀼𑀲𑀦𑁆𑀥𑀺𑀦𑀸 𑀏𑀓𑀸𑀦𑀼𑀲𑀦𑁆𑀥𑀺𑀓𑀁 𑀲𑀼𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀇𑀢𑀭𑀲𑁆𑀲 𑀧𑀦 𑀢𑁂𑀬𑁂𑀯 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀯𑀺𑀪𑀸𑀕𑁂𑀦 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀪𑀸𑀕𑀸 𑀮𑀩𑁆𑀪𑀦𑁆𑀢𑀺. 𑀦𑀺𑀤𑀸𑀦𑀦𑁆𑀢𑀺 𑀓𑀸𑀮𑀤𑁂𑀲𑀓𑀧𑀭𑀺𑀲𑀸𑀤𑀺-𑀅𑀧𑀤𑀺𑀲𑀦𑀮𑀓𑁆𑀔𑀡𑀸𑀤𑀺𑀓𑁄 𑀅𑀢𑁆𑀣𑁄. 𑀇𑀤𑀫𑀯𑁄𑀘𑀸𑀢𑀺 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. 𑀢𑁂𑀦 𑀢𑀤𑀯𑀲𑁂𑀲𑀦𑀺𑀕𑀫𑀦𑀧𑀸𑀴𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀦𑁂𑀓𑀸𑀦𑀼𑀲𑀦𑁆𑀥𑀻𑀓𑀲𑁆𑀲 𑀲𑀳 𑀦𑀺𑀤𑀸𑀦𑁂𑀦 𑀧𑀞𑀫𑁄 𑀅𑀦𑀼𑀲𑀦𑁆𑀥𑀺 𑀆𑀤𑀺. 𑀲𑀳 𑀦𑀺𑀕𑀫𑀦𑁂𑀦 𑀧𑀘𑁆𑀙𑀺𑀫𑁄 𑀧𑀭𑀺𑀬𑁄𑀲𑀸𑀦𑀁, 𑀇𑀢𑀭𑁂𑀦 𑀫𑀚𑁆𑀛𑀺𑀫𑀦𑁆𑀢𑀺𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀲𑀸𑀢𑁆𑀣𑀓𑀦𑁆𑀢𑀺 𑀅𑀢𑁆𑀣𑀲𑀫𑁆𑀧𑀢𑁆𑀢𑀺𑀬𑀸 𑀲𑀸𑀢𑁆𑀣𑀓𑀁 𑀓𑀢𑁆𑀯𑀸. 𑀲𑀩𑁆𑀬𑀜𑁆𑀚𑀦𑀦𑁆𑀢𑀺 𑀩𑁆𑀬𑀜𑁆𑀚𑀦𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀬𑀜𑁆𑀚𑀦𑀁. 𑀲𑀫𑁆𑀧𑀢𑁆𑀢𑀺 𑀘 𑀦𑀸𑀫 𑀧𑀭𑀺𑀧𑀼𑀡𑁆𑀡𑀩𑁆𑀬𑀜𑁆𑀚𑀦𑀢𑀸𑀢𑀺 𑀆𑀳 ‘‘𑀩𑁆𑀬𑀜𑁆𑀚𑀦𑁂𑀳𑀺…𑀧𑁂… 𑀤𑁂𑀲𑁂𑀢𑀸’’𑀢𑀺. 𑀲𑀓𑀮𑀧𑀭𑀺𑀧𑀼𑀡𑁆𑀡𑀦𑁆𑀢𑀺 ¶ 𑀲𑀩𑁆𑀩𑀲𑁄 𑀧𑀭𑀺𑀧𑀼𑀡𑁆𑀡𑀁 𑀲𑀻𑀮𑀸𑀤𑀺𑀧𑀜𑁆𑀘𑀥𑀫𑁆𑀫𑀓𑁆𑀔𑀦𑁆𑀥𑀧𑀸𑀭𑀺𑀧𑀽𑀭𑀺𑀬𑀸. 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁 𑀤𑀺𑀝𑁆𑀞𑀺𑀫𑀸𑀦𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀸𑀪𑀸𑀯𑀢𑁄. 𑀅𑀯𑀺𑀲𑁂𑀲𑀢𑁄 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀓𑀮𑁂 𑀲𑀸𑀲𑀦𑁂 𑀪𑀯𑀦𑁆𑀢𑀺. 𑀥𑀫𑁆𑀫𑁄𑀢𑀺 𑀧𑀦 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀸 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀓𑀢𑀫𑁂𑀲𑀸𑀦𑀁 𑀔𑁄, 𑀪𑀦𑁆𑀢𑁂, 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀺𑀭𑀝𑁆𑀞𑀺𑀢𑀺𑀓𑀁 𑀅𑀳𑁄𑀲𑀻’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁧𑁮) 𑀯𑀺𑀬. 𑀤𑀼𑀓𑀽𑀮𑀲𑀸𑀡𑀺𑀬𑀸 𑀧𑀝𑀺𑀘𑁆𑀙𑀦𑁆𑀦𑀸 𑀯𑀺𑀬, 𑀦 𑀢𑀼 𑀧𑀸𑀓𑀸𑀭𑀲𑁂𑀮𑀸𑀤𑀺𑀧𑀝𑀺𑀘𑁆𑀙𑀦𑁆𑀦𑀸 𑀯𑀺𑀬. 𑀢𑁂𑀦 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀬𑀸 𑀲𑀓𑀮𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀸𑀦𑀼𑀪𑀸𑀯𑀁 𑀯𑀤𑀢𑀺. 𑀅𑀮𑀸𑀪𑀧𑀭𑀺𑀳𑀸𑀦𑀺𑀬𑀸, 𑀦 𑀮𑀤𑁆𑀥𑀧𑀭𑀺𑀳𑀸𑀦𑀺𑀬𑀸. 𑀅𑀟𑁆𑀠𑀼𑀟𑁆𑀠𑀸𑀦𑀻𑀢𑀺 𑀧𑀜𑁆𑀘𑀲𑀢𑀸𑀥𑀺𑀓𑀸𑀦𑀺 𑀢𑀻𑀡𑀺 𑀧𑀸𑀝𑀺𑀳𑀸𑀭𑀺𑀬𑀲𑀳𑀲𑁆𑀲𑀸𑀦𑀺. 𑀲𑀸𑀢𑀦𑁆𑀢𑀺 𑀲𑀼𑀔𑀁.

𑀤𑀼𑀢𑀺𑀬𑀫𑀸𑀭𑀧𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁨. 𑀲𑀼𑀭𑀸𑀓𑀸𑀭𑀓𑀸𑀦𑀦𑁆𑀢𑀺 ¶ 𑀧𑀺𑀝𑁆𑀞𑀲𑀼𑀭𑀸𑀬𑁄𑀚𑀦𑀓𑀸𑀦𑀁. 𑀓𑁄𑀲𑀮𑀸𑀦𑀁 𑀇𑀲𑁆𑀲𑀭𑁄𑀢𑀺 𑀓𑁄𑀲𑀮𑁄, 𑀓𑁄𑀲𑀮𑀭𑀸𑀚𑀲𑁆𑀲 𑀅𑀬𑀦𑁆𑀢𑀺 𑀓𑁄𑀲𑀮𑀺𑀓𑀸. 𑀧𑀭𑀺𑀪𑁄𑀕𑀧𑀸𑀢𑀻𑀢𑀺 𑀪𑀢𑁆𑀢𑀧𑀭𑀺𑀪𑁄𑀚𑀦𑀢𑁆𑀣𑀸𑀬 𑀧𑀸𑀢𑀺 𑀧𑀭𑀺𑀪𑁄𑀕𑀧𑀸𑀢𑀺. 𑀓𑀫𑁆𑀫𑀸𑀭𑀼𑀤𑁆𑀥𑀦𑀧𑀡𑀸𑀴𑀺𑀬𑀸𑀢𑀺 𑀓𑀫𑁆𑀫𑀸𑀭𑀼𑀤𑁆𑀥𑀦𑀧𑀡𑀸𑀴𑀺𑀫𑀼𑀔𑁂. 𑀥𑀫𑀫𑀸𑀦𑀸𑀬𑀸𑀢𑀺 𑀥𑀫𑀺𑀬𑀫𑀸𑀦𑀸𑀬. 𑀢𑀁 𑀧𑀦 𑀬𑀲𑁆𑀫𑀸 𑀪𑀲𑁆𑀢𑀯𑀸𑀢𑁂𑀳𑀺 𑀧𑀽𑀭𑀺𑀢𑀁 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 ‘‘𑀪𑀲𑁆𑀢𑀯𑀸𑀢𑁂𑀦 𑀧𑀽𑀭𑀺𑀬𑀫𑀸𑀦𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀦𑀺𑀬𑀸𑀫𑀪𑀽𑀫𑀺𑀬𑀦𑁆𑀢𑀺 𑀪𑀕𑀯𑀢𑁄 𑀧𑀝𑀺𑀲𑀮𑁆𑀮𑀸𑀦𑀝𑁆𑀞𑀸𑀦𑁂 𑀲𑀜𑁆𑀘𑀭𑀦𑁆𑀢𑀁 𑀫𑀸𑀭𑀁 𑀫𑀁𑀲𑀘𑀓𑁆𑀔𑀼𑀦𑀸𑀯 𑀤𑀺𑀲𑁆𑀯𑀸. 𑀢𑁂𑀦𑀸𑀳 ‘‘𑀯𑀺𑀚𑁆𑀚𑀼𑀮𑀢𑀸𑀮𑁄𑀓𑁂𑀦𑀸’’𑀢𑀺.

𑀲𑁂𑀬𑁆𑀬𑀢𑁆𑀣𑀸𑀬𑀸𑀢𑀺 𑀲𑁂𑀬𑁆𑀬𑀸𑀦𑀺𑀲𑀁𑀲𑀸𑀬. 𑀢𑁂𑀦𑀸𑀳 ‘‘𑀞𑀲𑁆𑀲𑀸𑀫𑀻’’𑀢𑀺𑀆𑀤𑀺. 𑀅𑀢𑁆𑀢𑀲𑀜𑁆𑀜𑀢𑁄𑀢𑀺 𑀅𑀢𑁆𑀢𑀪𑀸𑀯𑁂𑀦 𑀲𑀁𑀬𑀢𑁄. 𑀢𑁂𑀦𑀸𑀳 ‘‘𑀲𑀁𑀬𑀢𑀢𑁆𑀢𑀪𑀸𑀯𑁄’’𑀢𑀺. 𑀢𑀁𑀲𑀡𑁆𑀞𑀺𑀢𑀲𑁆𑀲𑀸𑀢𑀺 𑀢𑀲𑁆𑀫𑀺𑀁 𑀳𑀢𑁆𑀣𑀧𑀸𑀤𑀓𑀼𑀓𑁆𑀓𑀼𑀘𑁆𑀘𑀭𑀳𑀺𑀢𑁂 𑀩𑀼𑀤𑁆𑀥𑀫𑀼𑀦𑀺𑀲𑁆𑀫𑀺𑀁 𑀅𑀯𑀝𑁆𑀞𑀺𑀢𑀲𑁆𑀲. 𑀯𑁄𑀲𑁆𑀲𑀚𑁆𑀚 𑀘𑀭𑁂𑀬𑁆𑀬 𑀢𑀢𑁆𑀣 𑀲𑁄𑀢𑀺 𑀇𑀫𑀺𑀦𑀸 𑀪𑀕𑀯𑀸 𑀢𑀁 𑀩𑁆𑀬𑀸𑀓𑀭𑀫𑀸𑀦𑁄 𑀯𑀺𑀪𑀺𑀁𑀲𑀺𑀢𑀸 𑀩𑀼𑀤𑁆𑀥𑀸𑀦𑀁 𑀓𑀺𑀁 𑀓𑀭𑀺𑀲𑁆𑀲𑀢𑀺 𑀪𑀬𑀸𑀪𑀸𑀯𑀢𑁄? 𑀓𑁂𑀯𑀮𑀁 𑀧𑀦 𑀅𑀦𑀝𑁆𑀞𑀯𑀮𑀺𑀓𑀁 𑀉𑀧𑁆𑀧𑀻𑀴𑁂𑀦𑁆𑀢𑁄 𑀯𑀺𑀬 𑀢𑁆𑀯𑀫𑁂𑀯 𑀆𑀬𑀸𑀲𑀁 𑀆𑀧𑀚𑁆𑀚𑀺𑀲𑁆𑀲𑀲𑀻𑀢𑀺 𑀫𑀸𑀭𑀁 𑀲𑀦𑁆𑀢𑀚𑁆𑀚𑁂𑀢𑀺.

𑀪𑁂𑀭𑀯𑀸𑀢𑀺 𑀅𑀯𑀻𑀢𑀭𑀸𑀕𑀸𑀦𑀁 𑀪𑀬𑀚𑀦𑀓𑀸. 𑀢𑀢𑁆𑀣𑀸𑀢𑀺 𑀢𑀁𑀦𑀺𑀫𑀺𑀢𑁆𑀢𑀁. 𑀨𑀮𑁂𑀬𑁆𑀬𑀸𑀢𑀺 𑀪𑀺𑀚𑁆𑀚𑁂𑀬𑁆𑀬. 𑀲𑀢𑁆𑀢𑀺𑀲𑀮𑁆𑀮𑀦𑁆𑀢𑀺 𑀲𑀢𑁆𑀢𑀺𑀲𑀗𑁆𑀔𑀸𑀢𑀁 𑀧𑀼𑀣𑀼𑀲𑀮𑁆𑀮𑀁. 𑀉𑀭𑀲𑁆𑀫𑀺𑀁 𑀘𑀸𑀭𑀬𑁂𑀬𑁆𑀬𑀼𑀦𑁆𑀢𑀺 𑀨𑀸𑀲𑀼𑀁 𑀯𑀺𑀚𑁆𑀛𑀺𑀢𑀼𑀁 𑀞𑀧𑁂𑀬𑁆𑀬𑀼𑀁 𑀉𑀕𑁆𑀕𑀺𑀭𑁂𑀬𑁆𑀬𑀼𑀁. 𑀔𑀦𑁆𑀥𑀼𑀧𑀥𑀻𑀲𑀽𑀢𑀺 𑀔𑀦𑁆𑀥𑀲𑀗𑁆𑀔𑀸𑀢𑁂𑀲𑀼 𑀉𑀧𑀥𑀻𑀲𑀼. 𑀢𑀸𑀡𑀁 𑀓𑀭𑁄𑀦𑁆𑀢𑀺 𑀦𑀸𑀫𑀸𑀢𑀺 𑀢𑀢𑁄 𑀪𑀬𑀦𑀺𑀫𑀺𑀢𑁆𑀢𑀢𑁄 𑀅𑀢𑁆𑀢𑀦𑁄 𑀢𑀸𑀡𑀁 𑀓𑀭𑁄𑀦𑁆𑀢𑀺 𑀦𑀸𑀫.

𑀲𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀼𑀧𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁩. 𑀉𑀢𑀼𑀕𑀸𑀳𑀸𑀧𑀦𑀢𑁆𑀣𑀁 ¶ 𑀥𑁄𑀯𑀺𑀢𑁆𑀯𑀸, 𑀦 𑀭𑀚𑁄𑀚𑀮𑁆𑀮𑀯𑀺𑀓𑁆𑀔𑀸𑀮𑀦𑀢𑁆𑀣𑀁. 𑀢𑁂𑀦𑀸𑀳 ‘‘𑀩𑀼𑀤𑁆𑀥𑀸𑀦𑀁 𑀧𑀦𑀸’’𑀢𑀺𑀆𑀤𑀺. 𑀥𑁄𑀢𑀧𑀸𑀤𑀓𑁂 𑀕𑁂𑀳𑁂𑀢𑀺 𑀥𑁄𑀢𑀧𑀸𑀤𑁂𑀳𑀺 𑀅𑀓𑁆𑀓𑀫𑀺𑀢𑀩𑁆𑀩𑀓𑁂. 𑀯𑀢𑁆𑀢𑀪𑁂𑀤𑁄 𑀦𑀸𑀫 𑀦𑀢𑁆𑀣𑀺 𑀥𑀫𑁆𑀫𑀲𑁆𑀲𑀸𑀫𑀺𑀪𑀸𑀯𑀢𑁄. 𑀯𑀢𑁆𑀢𑀲𑀻𑀲𑁂 ¶ 𑀞𑀢𑁆𑀯𑀸 𑀥𑁄𑀯𑀦𑁆𑀢𑀺 𑀅𑀜𑁆𑀜𑁂𑀲𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑀢𑁆𑀣𑀁. 𑀲𑁄𑀧𑁆𑀧𑀧𑀭𑀺𑀕𑁆𑀕𑀸𑀳𑀓𑁂𑀦𑀸𑀢𑀺 𑀏𑀢𑁆𑀣 𑀲𑁄𑀧𑁆𑀧𑀁 𑀦𑀸𑀫 𑀦𑀺𑀤𑁆𑀤𑀸𑀬 𑀅𑀦𑁆𑀢𑀭𑀦𑁆𑀢𑀭𑀸 𑀧𑀯𑀢𑁆𑀢𑀓𑀺𑀭𑀺𑀬𑀫𑀬𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀭𑀳𑀺𑀢𑀸 𑀦𑀺𑀭𑀦𑁆𑀢𑀭𑀪𑀯𑀗𑁆𑀕𑀲𑀦𑁆𑀢𑀢𑀻𑀢𑀺 𑀢𑀁 𑀲𑀪𑀸𑀯𑀢𑁄 𑀧𑀬𑁄𑀚𑀦𑀢𑁄 𑀓𑀸𑀮𑀧𑀭𑀺𑀘𑁆𑀙𑁂𑀤𑀢𑁄 𑀧𑀭𑀺𑀕𑁆𑀕𑀸𑀳𑀓𑀁 𑀉𑀧𑀭𑀺𑀦𑀺𑀤𑁆𑀤𑁂𑀲𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑁄𑀧𑁆𑀧𑀧𑀭𑀺𑀕𑁆𑀕𑀸𑀳𑀓𑁂𑀦 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦𑀸’’𑀢𑀺. 𑀓𑁂𑀘𑀺 𑀧𑀦 ‘‘𑀦𑀺𑀤𑁆𑀤𑀸𑀲𑁄𑀧𑁆𑀧𑀦𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀪𑀕𑀯𑀢𑁄 𑀲𑁄𑀧𑁆𑀧𑀁 𑀳𑀻𑀴𑁂𑀦𑁆𑀢𑁄 𑀯𑀤𑀢𑀺.

𑀓𑀺𑀁 𑀦𑀽𑀢𑀺 𑀏𑀢𑁆𑀣𑀁 𑀓𑀺𑀦𑁆𑀢𑀺 𑀳𑁂𑀢𑀼𑀦𑀺𑀲𑁆𑀲𑀓𑁆𑀓𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀓𑀲𑁆𑀫𑀸 𑀦𑀼 𑀲𑀼𑀧𑀲𑀻’’𑀢𑀺? 𑀤𑀼𑀩𑁆𑀪𑀕𑁄 𑀯𑀼𑀘𑁆𑀘𑀢𑀺 𑀦𑀺𑀲𑁆𑀲𑀺𑀭𑀺𑀓𑁄 𑀪𑀺𑀦𑁆𑀦𑀪𑀕𑁄, 𑀲𑁄 𑀧𑀦 𑀫𑀢𑀲𑀤𑀺𑀲𑁄 𑀯𑀺𑀲𑀜𑁆𑀜𑀺𑀲𑀤𑀺𑀲𑁄 𑀘 𑀳𑁄𑀢𑀻𑀢𑀺 𑀆𑀳 ‘‘𑀫𑀢𑁄 𑀯𑀺𑀬 𑀯𑀺𑀲𑀜𑁆𑀜𑀻 𑀯𑀺𑀬 𑀘𑀸’’𑀢𑀺.

𑀆𑀤𑀺𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀩𑀸𑀳𑀺𑀭𑀲𑁆𑀲 𑀉𑀧𑀸𑀤𑀸𑀬 𑀅𑀝𑁆𑀞𑀸𑀭𑀲𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁮𑁪𑁨) 𑀆𑀕𑀢𑀁 𑀢𑀡𑁆𑀳𑀸𑀓𑁄𑀝𑁆𑀞𑀸𑀲𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀢𑀢𑁆𑀣 𑀯𑀺𑀲𑀢𑁆𑀢𑀢𑀸𑀬𑀸𑀢𑀺 𑀢𑀫𑁆𑀫𑀺𑀁 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀯𑀺𑀲𑁂𑀲𑀢𑁄 𑀆𑀲𑀢𑁆𑀢𑀪𑀸𑀯𑁂𑀦. 𑀯𑀺𑀲𑀲𑁆𑀲 𑀤𑀼𑀓𑁆𑀔𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀲𑁆𑀲 𑀳𑁂𑀢𑀼𑀪𑀸𑀯𑀢𑁄 𑀯𑀺𑀲𑀫𑀽𑀮𑀢𑀸 𑀯𑀺𑀲𑀁 𑀯𑀸 𑀤𑀼𑀓𑁆𑀔𑀤𑀼𑀓𑁆𑀔𑀸𑀤𑀺𑀪𑀽𑀢𑀯𑁂𑀤𑀦𑀸 𑀫𑀽𑀮𑀁 𑀏𑀢𑀲𑁆𑀲𑀸𑀢𑀺 𑀯𑀺𑀲𑀫𑀽𑀮𑀸, 𑀢𑀡𑁆𑀳𑀸. 𑀢𑀲𑁆𑀲 𑀭𑀽𑀧𑀸𑀤𑀺𑀓𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀭𑀺𑀪𑁄𑀕𑁄, 𑀦 𑀅𑀫𑀢𑀲𑁆𑀲𑀸𑀢𑀺 𑀯𑀺𑀲𑀧𑀭𑀺𑀪𑁄𑀕𑀢𑀸. 𑀓𑀢𑁆𑀣𑀘𑀺 𑀦𑁂𑀢𑀼𑀦𑁆𑀢𑀺 𑀓𑀢𑁆𑀣𑀘𑀺 𑀪𑀯𑁂 𑀲𑀩𑁆𑀩𑀣𑀸 𑀦𑁂𑀢𑀼𑀁? 𑀧𑀭𑀺𑀓𑁆𑀔𑀬𑀸𑀢𑀺 𑀲𑀩𑁆𑀩𑀲𑁄 𑀔𑀻𑀡𑀢𑁆𑀢𑀸. 𑀢𑀼𑀬𑁆𑀳𑀁 𑀓𑀺𑀁 𑀏𑀢𑁆𑀣𑀸𑀢𑀺 𑀲𑀩𑁆𑀩𑀼𑀧𑀥𑀺𑀧𑀭𑀺𑀓𑁆𑀔𑀬𑀸 𑀲𑀼𑀤𑁆𑀥𑀲𑁆𑀲 𑀫𑀫 𑀧𑀝𑀺𑀧𑀢𑁆𑀢𑀺𑀬𑀁 𑀢𑀼𑀬𑁆𑀳𑀁 𑀓𑀺𑀁 𑀉𑀚𑁆𑀛𑀸𑀬𑀦𑀁? 𑀓𑁂𑀯𑀮𑀁 𑀯𑀺𑀖𑀸𑀢𑁄𑀬𑁂𑀯 𑀢𑁂𑀢𑀺 𑀤𑀲𑁆𑀲𑁂𑀢𑀺.

𑀲𑀼𑀧𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀦𑀦𑁆𑀤𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁪. 𑀅𑀝𑁆𑀞𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀦𑀦𑁆𑀤𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀞𑀫𑀆𑀬𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁫. 𑀧𑀡𑁆𑀡𑀸𑀲𑀁 ¶ ¶ 𑀯𑀸 𑀯𑀲𑁆𑀲𑀸𑀦𑀺 𑀚𑀻𑀯𑀢𑀺 𑀯𑀲𑁆𑀲𑀲𑀢𑀢𑁄 𑀉𑀧𑀭𑀺 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀅𑀦𑀼𑀭𑀼𑀤𑁆𑀥𑁄. 𑀲𑀝𑁆𑀞𑀺 𑀯𑀸 𑀯𑀲𑁆𑀲𑀸𑀦𑀺 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀩𑀸𑀓𑀼𑀮𑁄. 𑀧𑀝𑀺𑀳𑀭𑀺𑀢𑁆𑀯𑀸 𑀧𑀘𑁆𑀘𑀦𑀻𑀓𑀪𑀸𑀯𑁂 𑀲𑀸𑀢𑀁 𑀲𑀼𑀔𑀁 𑀏𑀢𑀲𑁆𑀲𑀸𑀢𑀺 𑀧𑀘𑁆𑀘𑀦𑀻𑀓𑀲𑀸𑀢𑁄, 𑀢𑀩𑁆𑀪𑀸𑀯𑁄 𑀧𑀘𑁆𑀘𑀦𑀻𑀓𑀲𑀸𑀢𑀢𑀸, 𑀢𑀸𑀬. 𑀅𑀪𑀺𑀪𑀯𑀺𑀢𑁆𑀯𑀸 𑀅𑀪𑀸𑀲𑀺 𑀧𑀝𑀺𑀯𑀘𑀦𑀁 𑀚𑀸𑀦𑀫𑀸𑀦𑁄𑀯.

𑀦 𑀳𑀻𑀴𑁂𑀬𑁆𑀬 𑀦 𑀚𑀺𑀕𑀼𑀘𑁆𑀙𑁂𑀬𑁆𑀬. 𑀏𑀯𑀦𑁆𑀢𑀺 𑀲𑁄 𑀤𑀸𑀭𑀓𑁄 𑀯𑀺𑀬 𑀓𑀺𑀜𑁆𑀘𑀺 𑀅𑀘𑀺𑀦𑁆𑀢𑁂𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑁄 𑀘𑀭𑁂𑀬𑁆𑀬, 𑀏𑀯𑀁 𑀳𑀺𑀲𑁆𑀲 𑀘𑀺𑀢𑁆𑀢𑀤𑀼𑀓𑁆𑀔𑀁 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀚𑁆𑀚𑀮𑀺𑀢𑀲𑀻𑀲𑁄 𑀯𑀺𑀬 𑀘𑀭𑁂𑀬𑁆𑀬𑀸𑀢𑀺 𑀬𑀣𑀸 𑀧𑀚𑁆𑀚𑀮𑀺𑀢𑀲𑀻𑀲𑁄 𑀧𑀼𑀭𑀺𑀲𑁄 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀅𑀓𑀢𑁆𑀯𑀸 𑀢𑀲𑁆𑀲𑁂𑀯 𑀯𑀽𑀧𑀲𑀫𑀸𑀬 𑀯𑀸𑀬𑀫𑁂𑀬𑁆𑀬, 𑀏𑀯𑀁 𑀲𑀧𑁆𑀧𑀼𑀭𑀺𑀲𑁄 𑀆𑀬𑀼𑀁 𑀧𑀭𑀺𑀢𑁆𑀢𑀦𑁆𑀢𑀺 𑀜𑀢𑁆𑀯𑀸 𑀢𑁂𑀦𑁂𑀯 𑀦𑀬𑁂𑀦 𑀲𑀩𑁆𑀩𑀲𑀗𑁆𑀔𑀸𑀭𑀕𑀢𑀁 𑀅𑀦𑀺𑀘𑁆𑀘𑀁, 𑀅𑀦𑀺𑀘𑁆𑀘𑀢𑁆𑀢𑀸 𑀏𑀯 𑀤𑀼𑀓𑁆𑀔𑀁, 𑀅𑀦𑀢𑁆𑀢𑀸𑀢𑀺 𑀯𑀺𑀧𑀲𑁆𑀲𑀦𑀫𑁆𑀧𑀺 𑀑𑀢𑀭𑀺𑀢𑁆𑀯𑀸 𑀢𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀦𑁆𑀢𑁄𑀧𑀺 𑀲𑀗𑁆𑀔𑀸𑀭𑀯𑀺𑀕𑀫𑀸𑀬 𑀘𑀭𑁂𑀬𑁆𑀬 𑀧𑀝𑀺𑀧𑀚𑁆𑀚𑁂𑀬𑁆𑀬.

𑀧𑀞𑀫𑀆𑀬𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀼𑀢𑀺𑀬𑀆𑀬𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁬. 𑀦𑁂𑀫𑀻𑀯𑀸𑀢𑀺 𑀦𑁂𑀫𑀺𑀲𑀻𑀲𑁂𑀦 𑀘𑀓𑁆𑀓𑀁 𑀯𑀤𑀢𑀺. 𑀓𑀼𑀩𑁆𑀩𑀭𑀁 𑀅𑀦𑀼𑀧𑀭𑀺𑀬𑀸𑀬𑀢𑀻𑀢𑀺 𑀓𑀼𑀩𑁆𑀩𑀭𑀁 𑀅𑀦𑀼𑀧𑀭𑀺𑀯𑀢𑁆𑀢𑀢𑀺. 𑀢𑀣𑀸𑀪𑀽𑀢𑁄 𑀧𑀦 𑀲𑁄 𑀢𑀁 𑀅𑀚𑀳𑀦𑁆𑀢𑁄𑀯𑀸𑀢𑀺 𑀆𑀳 ‘‘𑀦 𑀯𑀺𑀚𑀳𑀢𑀻’’𑀢𑀺. 𑀆𑀬𑀼 𑀅𑀦𑀼𑀧𑀭𑀺𑀬𑀸𑀬𑀢𑀻𑀢𑀺 𑀫𑀘𑁆𑀘𑀸𑀦𑀁 𑀆𑀬𑀼 𑀕𑀢𑀫𑁆𑀧𑀺 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑀪𑀕𑀯𑀢𑁄 𑀧𑀝𑀸𑀡𑀺 𑀳𑀼𑀢𑁆𑀯𑀸 𑀯𑀤𑀢𑀺, 𑀪𑀕𑀯𑀸 𑀧𑀦 𑀢𑀁 𑀅𑀪𑀺𑀪𑀯𑀺𑀢𑁆𑀯𑀸 ‘‘𑀅𑀘𑁆𑀘𑀬𑀦𑁆𑀢𑀺 𑀅𑀳𑁄𑀭𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀆𑀬𑀼𑀦𑁄 𑀅𑀘𑁆𑀘𑀬𑀕𑀫𑀦𑀫𑀭𑀡𑀢𑀁𑀬𑁂𑀯 𑀧𑀯𑁂𑀤𑁂𑀲𑀺.

𑀤𑀼𑀢𑀺𑀬𑀆𑀬𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀧𑀸𑀲𑀸𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁭. 𑀧𑀯𑀺𑀚𑁆𑀛𑀻𑀢𑀺 ¶ ¶ 𑀧𑀩𑁆𑀩𑀢𑀁 𑀲𑀩𑁆𑀩𑀢𑁄 𑀧𑀯𑀢𑁆𑀢𑁂𑀦𑁆𑀢𑁄 𑀢𑀢𑁄 𑀢𑀢𑁄 𑀦𑀺𑀲𑁆𑀲𑀚𑁆𑀚𑀺. 𑀲𑀓𑀮𑀦𑁆𑀢𑀺 𑀲𑀩𑁆𑀩𑀪𑀸𑀕𑀯𑀦𑁆𑀢𑀁, 𑀦𑀺𑀲𑁆𑀲𑁂𑀲𑀦𑁆𑀢𑀺 𑀅𑀢𑁆𑀣𑁄.

𑀧𑀸𑀲𑀸𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀓𑀺𑀁𑀦𑀼𑀲𑀻𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁮. 𑀯𑀺𑀘𑀓𑁆𑀔𑀼𑀓𑀫𑁆𑀫𑀸𑀬𑀸𑀢𑀺 𑀯𑀺𑀘𑀓𑁆𑀔𑀼𑀪𑀸𑀯𑀓𑀸𑀫𑀢𑀸𑀬. 𑀬𑀣𑀸 𑀲𑀸 𑀪𑀕𑀯𑀢𑁄 𑀤𑁂𑀲𑀺𑀬𑀫𑀸𑀦𑀁 𑀥𑀫𑁆𑀫𑀁 𑀅𑀢𑁆𑀢𑀦𑁄 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀦 𑀧𑀲𑁆𑀲𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀏𑀯𑀁 𑀓𑀸𑀢𑀼𑀁 𑀓𑀸𑀫𑀢𑀸𑀬. 𑀢𑁂𑀦𑀸𑀳 ‘‘𑀧𑀭𑀺𑀲𑀸𑀬𑀸’’𑀢𑀺𑀆𑀤𑀺. 𑀯𑀺𑀦𑀸𑀲𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀪𑁂𑀭𑀯𑀸𑀭𑀫𑁆𑀫𑀡𑁂 𑀪𑀸𑀬𑀦𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀤𑀲𑀩𑀮𑀧𑁆𑀧𑀢𑁆𑀢𑀸𑀢𑀺 𑀤𑀲𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑀸.

𑀓𑀺𑀁𑀦𑀼𑀲𑀻𑀳𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀓𑀮𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁯. 𑀫𑀦𑁆𑀤𑀪𑀸𑀯𑁂𑀦𑀸𑀢𑀺 𑀚𑀴𑀪𑀸𑀯𑁂𑀦 𑀫𑁄𑀫𑀽𑀳𑀪𑀸𑀯𑁂𑀦𑀸𑀢𑀺 𑀫𑀳𑀸𑀫𑀽𑀴𑁆𑀳𑀢𑀸𑀬. 𑀓𑀩𑁆𑀩𑀓𑀭𑀡𑁂𑀦 𑀫𑀢𑁆𑀢𑁄𑀢𑀺 𑀓𑀩𑁆𑀩𑀓𑀺𑀭𑀺𑀬𑀸𑀧𑀲𑀼𑀢𑀢𑀸𑀤𑀺𑀯𑀲𑁂𑀦 𑀫𑀢𑁆𑀢𑁄 𑀓𑀩𑁆𑀩𑀁 𑀓𑀢𑁆𑀯𑀸. 𑀓𑀺𑀫𑀺𑀤𑀁 𑀲𑁄𑀧𑁆𑀧𑀲𑁂𑀯𑀸𑀢𑀺 𑀇𑀤𑀁 𑀢𑀯 𑀲𑁄𑀧𑁆𑀧𑀁 𑀓𑀺𑀫𑀢𑁆𑀣𑀁, 𑀧𑀼𑀭𑀺𑀲𑁂𑀦 𑀦𑀸𑀫 𑀧𑀼𑀭𑀺𑀲𑀢𑁆𑀢𑀓𑀭𑁂𑀦 𑀪𑀯𑀺𑀢𑀩𑁆𑀩𑀁, 𑀦 𑀲𑁄𑀧𑁆𑀧𑀢𑀺𑀬𑁂𑀯. 𑀅𑀢𑁆𑀣𑀁 𑀲𑀫𑀸𑀕𑀦𑁆𑀢𑁆𑀯𑀸𑀢𑀺 𑀧𑀭𑀫𑀢𑁆𑀣𑀁 𑀦𑀺𑀩𑁆𑀩𑀸𑀦𑀁 𑀲𑀫𑁆𑀫𑀸 𑀆𑀕𑀦𑁆𑀢𑁆𑀯𑀸 𑀅𑀥𑀺𑀕𑀦𑁆𑀢𑁆𑀯𑀸. 𑀅𑀲𑀗𑁆𑀕…𑀧𑁂… 𑀦𑀢𑁆𑀣𑀺 𑀲𑀩𑁆𑀩𑀲𑁄 𑀲𑀺𑀤𑁆𑀥𑀢𑁆𑀣𑀪𑀸𑀯𑀢𑁄. 𑀚𑀕𑁆𑀕𑀦𑁆𑀢𑁄𑀢𑀺 𑀚𑀸𑀕𑀭𑀦𑁆𑀢𑁄 𑀧𑀼𑀭𑀺𑀲𑁄 𑀯𑀺𑀬, 𑀦 𑀪𑀸𑀬𑀸𑀫𑀺 𑀪𑀬𑀳𑁂𑀢𑀽𑀦𑀁 𑀅𑀪𑀸𑀯𑀸. 𑀦𑀸𑀦𑀼𑀢𑀧𑀦𑁆𑀢𑀺 𑀲𑀩𑁆𑀩𑀢𑁆𑀣 𑀲𑀩𑁆𑀩𑀤𑀸𑀧𑀺 𑀯𑀺𑀲𑁆𑀲𑀝𑁆𑀞𑀪𑀸𑀯𑀢𑁄, 𑀫𑀸𑀫𑀦𑁆𑀢𑀺 𑀫𑀫𑀁. 𑀕𑀸𑀣𑀸𑀲𑀼𑀔𑀢𑁆𑀣𑀜𑁆𑀳𑀺 𑀤𑀻𑀖𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀞𑀺𑀢𑀢𑁆𑀢𑀸𑀢𑀺 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀬 𑀧𑀭𑀺𑀘𑁆𑀙𑀺𑀚𑁆𑀚𑀢𑁆𑀢𑀸. 𑀳𑀸𑀦𑀺𑀦𑁆𑀢𑀺 𑀓𑀲𑁆𑀲𑀘𑀺 𑀚𑀸𑀦𑀺𑀁.

𑀲𑀓𑀮𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀢𑀺𑀭𑀽𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁦. 𑀅𑀦𑀼𑀭𑀼𑀚𑁆𑀛𑀢𑀺 ¶ ¶ 𑀏𑀢𑁂𑀦𑀸𑀢𑀺 𑀅𑀦𑀼𑀭𑁄𑀥𑁄, 𑀭𑀸𑀕𑁄. 𑀯𑀺𑀭𑀼𑀚𑁆𑀛𑀢𑀺 𑀏𑀢𑁂𑀦𑀸𑀢𑀺 𑀯𑀺𑀭𑁄𑀥𑁄, 𑀧𑀝𑀺𑀖𑁄. 𑀢𑁂𑀲𑀼 𑀅𑀦𑀼𑀭𑁄𑀥𑀯𑀺𑀭𑁄𑀥𑁂𑀲𑀼 𑀢𑀦𑁆𑀦𑀺𑀫𑀺𑀢𑁆𑀢𑀁 𑀲𑀚𑁆𑀚𑀢𑀺 𑀦𑀸𑀫 𑀲𑀗𑁆𑀕𑀁 𑀓𑀭𑁄𑀢𑀺 𑀦𑀸𑀫, 𑀅𑀦𑀼𑀭𑁄𑀥𑀯𑀺𑀭𑁄𑀥𑀼𑀧𑁆𑀧𑀸𑀤𑀦𑀫𑁂𑀯 𑀘𑁂𑀢𑁆𑀣 𑀲𑀚𑁆𑀚𑀦𑀁. 𑀬𑀤𑀜𑁆𑀜𑀫𑀦𑀼𑀲𑀸𑀲𑀢𑀻𑀢𑀺 𑀬𑀁 𑀅𑀜𑁆𑀜𑁂𑀲𑀁 𑀅𑀦𑀼𑀲𑀸𑀲𑀦𑀁, 𑀢𑀁 𑀢𑁂𑀲𑀁 𑀳𑀺𑀢𑁂𑀲𑀦𑀁 𑀅𑀦𑀼𑀓𑀫𑁆𑀧𑀦𑀁, 𑀢𑀲𑁆𑀫𑀸 𑀅𑀦𑀼𑀓𑀫𑁆𑀧𑀓𑁂 𑀳𑀺𑀢𑁂𑀲𑀓𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀅𑀦𑀼𑀭𑁄𑀥𑀯𑀺𑀭𑁄𑀥𑁂 𑀆𑀭𑁄𑀧𑁂𑀢𑁆𑀯𑀸 𑀯𑀺𑀓𑀫𑁆𑀧𑀦𑀢𑁆𑀣𑀁 𑀫𑀺𑀘𑁆𑀙𑀸 𑀯𑀤𑀲𑀻𑀢𑀺.

𑀧𑀢𑀺𑀭𑀽𑀧𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀫𑀸𑀦𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁧. 𑀆𑀓𑀸𑀲𑁂 𑀘𑀭𑀦𑁆𑀢𑁂𑀢𑀺 𑀧𑀜𑁆𑀘𑀸𑀪𑀺𑀜𑁆𑀜𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀦𑁆𑀢𑀮𑀺𑀓𑁆𑀔𑁂 𑀘𑀭𑀦𑁆𑀢𑁂𑀧𑀺 𑀓𑀺𑀘𑁆𑀘𑀲𑀸𑀥𑀦𑀢𑁄 𑀅𑀦𑁆𑀢𑀮𑀺𑀓𑁆𑀔𑀘𑀭𑁄. 𑀫𑀦𑀲𑀺 𑀚𑀸𑀢𑁄𑀢𑀺 𑀫𑀸𑀦𑀲𑁄. 𑀢𑀁 𑀧𑀦 𑀫𑀦𑀲𑀦𑁆𑀢𑀸𑀦𑀲𑀫𑁆𑀧𑀬𑀼𑀢𑁆𑀢𑀢𑀸𑀬𑀸𑀢𑀺 𑀆𑀳 ‘‘𑀫𑀦𑀲𑀫𑁆𑀧𑀬𑀼𑀢𑁆𑀢𑁄’’𑀢𑀺.

𑀫𑀸𑀦𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀧𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁨. 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀮𑀓𑁆𑀔𑀡𑀸𑀤𑀻𑀦𑀺 𑀘𑁂𑀯 𑀲𑀫𑀼𑀤𑀬𑀜𑁆𑀘 𑀅𑀲𑁆𑀲𑀸𑀤𑀸𑀤𑀻𑀦𑀯𑀦𑀺𑀲𑁆𑀲𑀭𑀡𑀸𑀦𑀺 𑀘 𑀕𑀳𑁂𑀢𑁆𑀯𑀸 𑀲𑀫𑁆𑀫𑀸 𑀢𑁂𑀲𑀁 𑀮𑀓𑁆𑀔𑀡𑀸𑀤𑀻𑀦𑀁 𑀕𑀳𑀡𑀁 𑀳𑁄𑀢𑀻𑀢𑀺 𑀆𑀳 ‘‘𑀧𑀜𑁆𑀘 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀆𑀤𑀺𑀬𑀺𑀢𑁆𑀯𑀸’’𑀢𑀺. 𑀭𑀼𑀧𑁆𑀧𑀦𑀯𑁂𑀤𑀺𑀬𑀦𑀲𑀜𑁆𑀚𑀸𑀦𑀦𑀅𑀪𑀺𑀲𑀗𑁆𑀔𑀭𑀡𑀯𑀺𑀚𑀸𑀦𑀦𑀸𑀦𑀺 𑀔𑀦𑁆𑀥𑀸𑀦𑀁 𑀲𑀪𑀸𑀯𑀮𑀓𑁆𑀔𑀡𑀸𑀦𑀺. 𑀆𑀤𑀺-𑀲𑀤𑁆𑀤𑁂𑀦 𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀦𑀺 𑀘𑁂𑀯 𑀲𑀫𑀼𑀤𑀬𑀸𑀤𑀻𑀦𑀺 𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀤𑀲𑁆𑀲𑁂𑀢𑀻𑀢𑀺 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑁂𑀢𑀺, 𑀳𑀢𑁆𑀣𑀸𑀫𑀮𑀓𑀁 𑀯𑀺𑀬 𑀧𑀸𑀓𑀝𑁂 𑀯𑀺𑀪𑀽𑀢𑁂 𑀓𑀢𑁆𑀯𑀸 𑀯𑀺𑀪𑀸𑀯𑁂𑀢𑀺. 𑀕𑀡𑁆𑀳𑀸𑀧𑁂𑀢𑀻𑀢𑀺 𑀢𑁂 𑀥𑀫𑁆𑀫𑁂 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀺𑀢𑁂 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑁂 𑀓𑀭𑁄𑀦𑁆𑀢𑁄 𑀉𑀕𑁆𑀕𑀡𑁆𑀳𑀸𑀧𑁂𑀢𑀺. 𑀲𑀫𑀸𑀤𑀸𑀦𑀫𑁆𑀳𑀻𑀢𑀺 𑀢𑀢𑁆𑀣 𑀅𑀢𑁆𑀣𑀲𑁆𑀲 𑀲𑀫𑁆𑀫𑀤𑁂𑀯 𑀆𑀤𑀺𑀬𑀦𑁂 𑀔𑀦𑁆𑀥𑀸𑀦𑀜𑁆𑀘 𑀲𑀫𑁆𑀫𑀲𑀦𑀯𑀲𑁂𑀦 𑀅𑀜𑁆𑀜𑀥𑀫𑁆𑀫𑀯𑀲𑁂𑀦 𑀲𑀫𑀸𑀤𑀺𑀬𑀦𑁂. 𑀧𑀝𑀺𑀯𑀺𑀤𑁆𑀥𑀕𑀼𑀡𑁂𑀦𑀸𑀢𑀺 𑀢𑀸𑀬 𑀤𑁂𑀲𑀦𑀸𑀬, 𑀢𑀁 𑀦𑀺𑀲𑁆𑀲𑀸𑀬 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁂𑀦 𑀘 𑀢𑁂𑀲𑀁 𑀧𑀝𑀺𑀯𑀺𑀤𑁆𑀥𑀕𑀼𑀡𑁂𑀦 ¶ . 𑀚𑁄𑀢𑀸𑀧𑁂𑀢𑀻𑀢𑀺 𑀢𑁂𑀲𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀅𑀲𑁆𑀲𑀤𑁆𑀥𑀺𑀬𑀸𑀤𑀺𑀓𑀺𑀮𑁂𑀲𑀫𑀮𑀯𑀺𑀥𑀫𑀦𑁂𑀦 𑀧𑀪𑀲𑁆𑀲𑀭𑀁 𑀓𑀭𑁄𑀢𑀺. 𑀅𑀝𑁆𑀞𑀺𑀁 𑀓𑀢𑁆𑀯𑀸𑀢𑀺 𑀢𑀸𑀬 𑀤𑁂𑀲𑀦𑀸𑀬 𑀧𑀸𑀧𑁂𑀢𑀩𑁆𑀩𑀁 𑀅𑀢𑁆𑀣𑀁 𑀧𑀬𑁄𑀚𑀦𑀁 𑀤𑀴𑁆𑀳𑀁 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀅𑀬𑀁 𑀦𑁄’’𑀢𑀺𑀆𑀤𑀺. 𑀓𑀫𑁆𑀫𑀓𑀸𑀭𑀓𑀘𑀺𑀢𑁆𑀢𑀁 𑀦𑀸𑀫 𑀑𑀢𑀭𑀡𑀘𑀺𑀢𑁆𑀢𑀁. ‘‘𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀼𑀩𑁆𑀩𑀓𑀁 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢’’𑀦𑁆𑀢𑀺 ¶ 𑀓𑁂𑀘𑀺. 𑀑𑀳𑀺𑀢𑀲𑁄𑀢𑀸𑀢𑀺 𑀅𑀦𑀜𑁆𑀜𑀯𑀺𑀳𑀺𑀢𑀢𑀸𑀬 𑀥𑀫𑁆𑀫𑀲𑁆𑀲𑀯𑀦𑀸𑀬 𑀅𑀧𑁆𑀧𑀺𑀢𑀲𑁄𑀢𑀸, 𑀢𑀢𑁄 𑀏𑀯 𑀢𑀤𑀢𑁆𑀣𑀁 𑀞𑀧𑀺𑀢𑀲𑁄𑀢𑀸.

𑀏𑀢𑁂 𑀭𑀽𑀧𑀸𑀤𑀬𑁄 𑀔𑀦𑁆𑀥𑁂 𑀬𑀜𑁆𑀘 𑀲𑀗𑁆𑀔𑀢𑀁 𑀲𑀫𑀺𑀤𑁆𑀥𑀧𑀘𑁆𑀘𑀬𑁂𑀳𑀺 𑀓𑀢𑀁, 𑀢𑀜𑁆𑀘 ‘‘𑀏𑀲𑁄 𑀅𑀳𑀁 𑀦 𑀳𑁄𑀫𑀺, 𑀏𑀢𑀁 𑀫𑀬𑁆𑀳𑀁 𑀦 𑀳𑁄𑀢𑀻’’𑀢𑀺 𑀧𑀲𑁆𑀲𑀦𑁆𑀢𑁄𑀢𑀺 𑀬𑁄𑀚𑀦𑀸. 𑀔𑁂𑀫𑁄 𑀅𑀢𑁆𑀢𑀸𑀢𑀺 𑀔𑁂𑀫𑀢𑁆𑀢𑀸, 𑀢𑀁 𑀔𑁂𑀫𑀢𑁆𑀢𑀁. 𑀢𑁂𑀦𑀸𑀳 ‘‘𑀔𑁂𑀫𑀺𑀪𑀽𑀢𑀁 𑀅𑀢𑁆𑀢𑀪𑀸𑀯’’𑀦𑁆𑀢𑀺. 𑀧𑀭𑀺𑀬𑁂𑀲𑀫𑀸𑀦𑀸 𑀫𑀸𑀭𑀲𑁂𑀦𑀸.

𑀧𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀙𑀨𑀲𑁆𑀲𑀸𑀬𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁩. 𑀲𑀜𑁆𑀚𑀸𑀬𑀢𑀺 𑀏𑀢𑀲𑁆𑀫𑀸𑀢𑀺 𑀲𑀜𑁆𑀚𑀸𑀢𑀺, 𑀲𑁄 𑀏𑀯 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁄 𑀲𑀫𑁄𑀲𑀭𑀢𑀺 𑀏𑀢𑁆𑀣𑀸𑀢𑀺 𑀲𑀫𑁄𑀲𑀭𑀡𑀁, 𑀲𑁄 𑀏𑀯 𑀅𑀢𑁆𑀣𑁄, 𑀢𑁂𑀦 𑀲𑀜𑁆𑀚𑀸𑀢𑀺𑀲𑀫𑁄𑀲𑀭𑀡𑀝𑁆𑀞𑁂𑀦. 𑀪𑀬𑀪𑁂𑀭𑀯𑀁 𑀲𑀤𑁆𑀤𑀦𑁆𑀢𑀺 𑀪𑀸𑀬𑀢𑀺 𑀏𑀢𑀲𑁆𑀫𑀸𑀢𑀺 𑀪𑀬𑀁, 𑀢𑀤𑁂𑀯 𑀬𑀲𑁆𑀲 𑀓𑀲𑁆𑀲𑀘𑀺 𑀪𑁂𑀭𑀯𑀸𑀯𑀳𑀢𑁆𑀢𑀸 𑀪𑁂𑀭𑀯𑀁, 𑀤𑁂𑀯𑀸𑀤𑀺𑀲𑀤𑁆𑀤𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀕𑀢𑀯𑀮𑀸𑀳𑀓𑁂 𑀤𑁂𑀯𑁂 𑀉𑀧𑁆𑀧𑀸𑀢𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀲𑀤𑁆𑀤𑁄 𑀤𑁂𑀯𑀤𑀼𑀦𑁆𑀤𑀼𑀪𑀺. 𑀅𑀲𑀦𑀺𑀧𑀸𑀢𑀸𑀤𑀺𑀲𑀤𑁆𑀤𑁄 𑀅𑀲𑀦𑀺𑀧𑀸𑀢𑀲𑀤𑁆𑀤𑁄. 𑀉𑀦𑁆𑀤𑁆𑀭𑀻𑀬𑀢𑀻𑀢𑀺 𑀯𑀺𑀧𑀭𑀺𑀯𑀢𑁆𑀢𑀢𑀺. 𑀮𑁄𑀓𑁄 𑀅𑀥𑀺𑀫𑀼𑀘𑁆𑀙𑀺𑀢𑁄𑀢𑀺 𑀅𑀢𑀺𑀣𑀤𑁆𑀥𑀓𑀸𑀬𑁄 𑀯𑀺𑀬 𑀫𑀼𑀘𑁆𑀙𑀁 𑀆𑀧𑀦𑁆𑀦𑁄. 𑀫𑀸𑀭𑀲𑁆𑀲𑀸𑀢𑀺 𑀓𑀺𑀮𑁂𑀲𑀫𑀸𑀭𑀲𑁆𑀲. 𑀞𑀸𑀦𑀪𑀽𑀢𑀦𑁆𑀢𑀺 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀁.

𑀙𑀨𑀲𑁆𑀲𑀸𑀬𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀧𑀺𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁪. 𑀢𑀢𑁆𑀣 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀜𑀸𑀢𑀺𑀫𑀺𑀢𑁆𑀢𑀓𑀼𑀮𑁂. 𑀧𑀸𑀳𑀼𑀦𑀓𑀸𑀦𑀻𑀢𑀺 𑀧𑀳𑀺𑀢𑀩𑁆𑀩𑀧𑀡𑁆𑀡𑀸𑀓𑀸𑀭𑀸𑀦𑀺. 𑀆𑀕𑀦𑁆𑀢𑀼𑀓𑀧𑀡𑁆𑀡𑀸𑀓𑀸𑀭𑀸𑀦𑀻𑀢𑀺 𑀆𑀕𑀦𑁆𑀢𑀼𑀓𑀸𑀦𑀁 𑀉𑀧𑀕𑀢𑀸𑀦𑀁 ¶ 𑀤𑀸𑀢𑀩𑁆𑀩𑀧𑀡𑁆𑀡𑀸𑀓𑀸𑀭𑀸𑀦𑀺. 𑀲𑀬𑀁𑀘𑀭𑀤𑀺𑀯𑀲𑁂𑀢𑀺 𑀓𑀼𑀫𑀸𑀭𑀓𑀸𑀦𑀜𑁆𑀘 𑀓𑀼𑀫𑀸𑀭𑀺𑀓𑀸𑀦𑀜𑁆𑀘 𑀲𑀬𑀁 𑀅𑀢𑁆𑀢𑀦𑀸 𑀘𑀭𑀺𑀢𑀩𑁆𑀩𑀙𑀡𑀤𑀺𑀯𑀲𑁂. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑀯𑀬𑀚𑀸𑀢𑀺𑀕𑁄𑀢𑁆𑀢𑀸’’𑀢𑀺𑀆𑀤𑀺𑀫𑀸𑀳. 𑀲𑀫𑀯𑀬𑀲𑀫𑀚𑀸𑀢𑀺𑀓𑀲𑀫𑀕𑁄𑀢𑁆𑀢𑀸𑀢𑀺 𑀧𑀘𑁆𑀘𑁂𑀓𑀁 𑀲𑀫-𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄. 𑀕𑁄𑀢𑁆𑀢𑀲𑀫𑀢𑀸 𑀘 𑀆𑀯𑀸𑀳𑀯𑀺𑀯𑀸𑀳𑀬𑁄𑀕𑁆𑀬𑀢𑀸𑀯𑀲𑁂𑀦 𑀤𑀝𑁆𑀞𑀩𑁆𑀩𑀸, 𑀦 𑀏𑀓𑀕𑁄𑀢𑁆𑀢𑀢𑀸𑀯𑀲𑁂𑀦. 𑀢𑀢𑁄 𑀢𑀢𑁄 𑀕𑀸𑀫𑀢𑁄. 𑀅𑀜𑁆𑀜𑀲𑁆𑀫𑀺𑀁 𑀤𑀸𑀢𑀩𑁆𑀩𑁂 𑀅𑀲𑀢𑀺. 𑀙𑀡𑀯𑀲𑁂𑀦 𑀧𑀳𑀺𑀡𑀺𑀢𑀼𑀁 𑀲𑀫𑁆𑀧𑀸𑀤𑀺𑀢𑀁 𑀧𑀽𑀯𑀁 𑀙𑀡𑀧𑀽𑀯𑀁. 𑀢𑀸𑀲𑀁 𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀢𑀸𑀲𑀁 𑀤𑀸𑀦𑀁 𑀥𑀫𑁆𑀫𑀲𑁆𑀲𑀯𑀦𑀜𑁆𑀘𑀸𑀢𑀺 𑀢𑀲𑁆𑀲𑀸 𑀤𑀼𑀯𑀺𑀥𑀸𑀬𑀧𑀺 𑀲𑀫𑁆𑀧𑀢𑁆𑀢𑀺𑀬𑀸.

𑀜𑀸𑀡𑀁 𑀦𑀸𑀫 𑀆𑀯𑀚𑁆𑀚𑀦𑀧𑀼𑀩𑁆𑀩𑀓𑀁, 𑀢𑀲𑁆𑀫𑀸 𑀅𑀚𑀸𑀦𑀦𑀲𑁆𑀲 ‘‘𑀅𑀦𑀸𑀯𑀚𑁆𑀚𑀦𑀢𑀸𑀬𑀸’’𑀢𑀺 𑀓𑀸𑀭𑀡𑀁 𑀯𑀢𑁆𑀯𑀸 ¶ 𑀲𑁂𑀲𑀓𑀸𑀭𑀡𑀁 𑀯𑀤𑀦𑁆𑀢𑁄 ‘‘𑀩𑀼𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀉𑀧𑀘𑀸𑀭𑀪𑁂𑀤𑀦𑁆𑀢𑀺 𑀩𑀼𑀤𑁆𑀥𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑁂𑀳𑀺 𑀓𑀸𑀢𑀩𑁆𑀩𑀉𑀧𑀘𑀸𑀭𑀲𑁆𑀲 𑀪𑀺𑀦𑁆𑀤𑀦𑀁. 𑀪𑀺𑀦𑁆𑀤𑀺𑀢𑀼𑀦𑁆𑀢𑀺 𑀯𑀺𑀥𑀫𑀺𑀢𑀼𑀁.

𑀪𑀕𑀯𑀸 𑀧𑀦𑀸𑀢𑀺 𑀧𑀦𑀲𑀤𑁆𑀤𑁄 𑀯𑀺𑀲𑁂𑀲𑀢𑁆𑀣𑀚𑁄𑀢𑀓𑁄. 𑀢𑁂𑀦 𑀦 𑀓𑁂𑀯𑀮𑀁 𑀪𑀕𑀯𑀸 𑀉𑀧𑁆𑀧𑀡𑁆𑀟𑀦𑀁 𑀧𑀭𑀺𑀳𑀭𑀦𑁆𑀢𑁄 𑀢𑀁 𑀕𑀸𑀫𑀁 𑀦 𑀧𑀼𑀦 𑀧𑀸𑀯𑀺𑀲𑀺, 𑀅𑀣 𑀔𑁄 𑀫𑀸𑀭𑀁 𑀅𑀦𑀼𑀓𑀫𑁆𑀧𑀦𑁆𑀢𑁄𑀢𑀺 𑀇𑀤𑀁 𑀯𑀺𑀲𑁂𑀲𑀁 𑀚𑁄𑀢𑁂𑀢𑀺.

𑀚𑀦𑁂𑀲𑀻𑀢𑀺 𑀅𑀧𑀼𑀜𑁆𑀜𑀁 𑀚𑀦𑁂𑀲𑀺, 𑀚𑀦𑁂𑀦𑁆𑀢𑁄 𑀘 𑀬𑀣𑀸 𑀢𑀢𑁄 𑀆𑀬𑀢𑀺𑀁 𑀣𑀺𑀭𑀢𑀭𑀁 𑀫𑀳𑀦𑁆𑀢𑀁 𑀤𑀼𑀓𑁆𑀔𑀁 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀢𑀺, 𑀏𑀯𑀁 𑀦𑀺𑀧𑁆𑀨𑀸𑀤𑁂𑀲𑀺. 𑀆𑀲𑀚𑁆𑀚𑀦𑀦𑁆𑀢𑀺 𑀏𑀢𑁆𑀣 𑀦𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀓𑀺𑀜𑁆𑀘𑀢𑀺 𑀫𑀤𑁆𑀤𑀢𑀺 𑀅𑀪𑀺𑀪𑀯𑀢𑀻𑀢𑀺 𑀓𑀺𑀜𑁆𑀘𑀦𑀦𑁆𑀢𑀺 𑀆𑀳 ‘‘𑀫𑀤𑁆𑀤𑀺𑀢𑀼𑀁 𑀲𑀫𑀢𑁆𑀣’’𑀦𑁆𑀢𑀺.

𑀧𑀺𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀓𑀲𑁆𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁫. 𑀦𑀺𑀩𑁆𑀩𑀸𑀦𑀁 𑀅𑀧𑀤𑀺𑀲𑀺𑀢𑁆𑀯𑀸𑀢𑀺 𑀦𑀺𑀩𑁆𑀩𑀸𑀦𑀁 𑀦𑀺𑀲𑁆𑀲𑀸𑀬 𑀦𑀺𑀩𑁆𑀩𑀸𑀦𑀕𑀼𑀡𑁂 𑀆𑀭𑀩𑁆𑀪𑀸𑀢𑀺 𑀅𑀢𑁆𑀣𑁄. 𑀳𑀝𑀳𑀝𑀓𑁂𑀲𑁄𑀢𑀺 𑀇𑀢𑁄 𑀘𑀺𑀢𑁄 𑀘 𑀯𑀺𑀓𑀺𑀡𑁆𑀡𑀢𑁆𑀢𑀸 𑀆𑀓𑀼𑀮𑀸𑀓𑀼𑀮𑀓𑁂𑀲𑁄. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀯𑀺𑀜𑁆𑀜𑀸𑀡𑀸𑀬𑀢𑀦𑀦𑁆𑀢𑀺 𑀏𑀢𑁆𑀣 𑀬𑀣𑀸 𑀘𑀓𑁆𑀔𑀼𑀕𑁆𑀕𑀳𑀡𑁂𑀦 𑀨𑀲𑁆𑀲𑁄 𑀯𑀺𑀲𑁂𑀲𑀺𑀢𑁄, 𑀢𑁂𑀦 𑀏𑀯 𑀯𑀺𑀜𑁆𑀜𑀸𑀡𑀸𑀬𑀢𑀦𑀁. 𑀢𑀣𑀸 𑀲𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀘 𑀕𑀳𑀡𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺. 𑀦𑀦𑀼 𑀘𑁂𑀢𑁆𑀣 𑀘𑀓𑁆𑀔𑀼𑀕𑁆𑀕𑀳𑀡𑁂𑀦 𑀯𑀺𑀲𑁂𑀲𑀺𑀢𑀢𑁆𑀢𑀸 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀸𑀦𑀁 𑀲𑀩𑁆𑀩𑁂𑀲𑀁 𑀯𑀺𑀜𑁆𑀜𑀸𑀡𑀸𑀦𑀁 𑀕𑀳𑀡𑀦𑁆𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑀜𑁆𑀘 𑀔𑁄 𑀧𑀞𑀫𑁂𑀦 𑀘𑀓𑁆𑀔𑀼𑀕𑁆𑀕𑀳𑀡𑁂𑀦𑀸𑀢𑀺 𑀦𑀸𑀬𑀁 𑀤𑁄𑀲𑁄. 𑀪𑀯𑀗𑁆𑀕𑀘𑀺𑀢𑁆𑀢𑀦𑁆𑀢𑀺 𑀆𑀯𑀚𑁆𑀚𑀦𑀸𑀬 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀽𑀢𑀫𑁂𑀯 ¶ 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀲𑀸𑀯𑀚𑁆𑀚𑀦𑀓’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀤𑀸𑀭𑀫𑁆𑀫𑀡𑀫𑁆𑀧𑀻𑀢𑀺 𑀚𑀯𑀦𑀘𑀺𑀢𑁆𑀢𑁂𑀦 𑀲𑀳 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀫𑁆𑀧𑀺. ‘‘𑀯𑀺𑀜𑁆𑀜𑀸𑀡𑀸𑀬𑀢𑀦’’𑀦𑁆𑀢𑀺 𑀘 𑀯𑀼𑀢𑁆𑀢𑁂 𑀦𑀺𑀫𑁆𑀫𑀮𑀫𑁂𑀯.

‘‘𑀘𑀓𑁆𑀔𑀽’’𑀢𑀺 𑀅𑀯𑀺𑀲𑁂𑀲𑀢𑁄 𑀯𑀼𑀢𑁆𑀢𑀢𑁆𑀢𑀸 𑀧𑀦 𑀫𑀸𑀭𑀲𑁆𑀲 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀆𑀧𑀦𑁆𑀦𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀮𑁄𑀓𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀧𑀓𑁆𑀓𑀯𑀺𑀧𑀓𑁆𑀓𑀦𑁆𑀢𑀺 𑀘𑀓𑁆𑀔𑀼𑀧𑀸𑀓𑀭𑁄𑀕𑁂𑀦 𑀉𑀧𑀭𑀺 𑀳𑁂𑀝𑁆𑀞𑀸 𑀘 𑀲𑀩𑁆𑀩𑀲𑁄 𑀧𑀓𑁆𑀓𑀁 𑀓𑀼𑀣𑀺𑀢𑀁. 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 𑀬𑀁 𑀮𑁄𑀓𑁂 𑀓𑀼𑀝𑁆𑀞𑀓𑀺𑀮𑀸𑀲𑀕𑀡𑁆𑀟𑀓𑀘𑁆𑀙𑀼𑀆𑀤𑀻𑀳𑀺 𑀉𑀧𑀤𑁆𑀤𑀼𑀢𑀁 𑀯𑀡𑀧𑀻𑀴𑀓𑀸𑀤𑀺𑀯𑀲𑁂𑀦 𑀧𑀕𑁆𑀖𑀭𑀦𑁆𑀢𑀁 𑀅𑀲𑀼𑀘𑀺𑀁 𑀅𑀦𑁆𑀢𑀫𑀲𑁄 𑀧𑀭𑀫𑀚𑁂𑀕𑀼𑀘𑁆𑀙𑀭𑀽𑀧𑀫𑁆𑀧𑀺, 𑀲𑀩𑁆𑀩𑀁 𑀢𑀁 𑀢𑀯𑁂𑀯 𑀳𑁄𑀢𑀽𑀢𑀺 𑀏𑀯𑀫𑀸𑀤𑀺𑀁 𑀅𑀧𑀤𑀺𑀲𑀢𑀺.

𑀬𑀁 𑀪𑀡𑁆𑀟𑀓𑀦𑁆𑀢𑀺 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀔𑁂𑀢𑁆𑀢𑀯𑀢𑁆𑀣𑀸𑀤𑀺𑀉𑀧𑀓𑀭𑀡𑀁 𑀕𑀳𑀝𑁆𑀞𑀸, 𑀧𑀩𑁆𑀩𑀚𑀺𑀢𑀸 𑀘 𑀬𑀁 𑀧𑀢𑁆𑀢𑀘𑀻𑀯𑀭𑀸𑀤𑀺𑀁 ‘‘𑀫𑀫 𑀇𑀤’’𑀦𑁆𑀢𑀺 𑀅𑀪𑀺𑀦𑀺𑀯𑀺𑀲𑀦𑁆𑀢𑀸𑀯 𑀯𑀤𑀦𑁆𑀢𑀺, 𑀏𑀢𑁂𑀲𑀼 𑀧𑀭𑀺𑀕𑁆𑀕𑀳𑀢𑁆𑀣𑁂𑀲𑀼 𑀘 𑀢𑁂𑀲𑀁 𑀧𑀭𑀺𑀕𑁆𑀕𑀸𑀳𑀓𑀧𑀼𑀕𑁆𑀕𑀮𑁂𑀲𑀼 ¶ 𑀘 𑀢𑁂 𑀘𑀺𑀢𑁆𑀢𑀁 𑀬𑀤𑀺 𑀅𑀢𑁆𑀣𑀺, 𑀢𑀸𑀦𑀺 𑀆𑀭𑀩𑁆𑀪 𑀢𑀯 𑀘𑀺𑀢𑁆𑀢𑀁 𑀬𑀤𑀺 𑀪𑀯𑀢𑀺, 𑀏𑀯𑀁 𑀢𑁆𑀯𑀁 𑀢𑀢𑁆𑀣 𑀩𑀤𑁆𑀥𑁄 𑀏𑀯 𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀦 𑀫𑁂 𑀲𑀫𑀡 𑀫𑁄𑀓𑁆𑀔𑀲𑀻’’𑀢𑀺.

𑀬𑀁 𑀪𑀡𑁆𑀟𑀓𑀁 𑀯𑀤𑀦𑁆𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀁 𑀉𑀧𑀓𑀭𑀡𑀁 𑀮𑁄𑀓𑁂 𑀩𑀳𑀼𑀚𑀦𑀸 ‘‘𑀫𑀫 𑀇𑀤’’𑀦𑁆𑀢𑀺 𑀯𑀤𑀦𑁆𑀢𑀺. 𑀦 𑀢𑀁 𑀫𑀬𑁆𑀳𑀦𑁆𑀢𑀺 𑀢𑀁 𑀫𑀬𑁆𑀳𑀁 𑀦 𑀳𑁄𑀢𑀺, 𑀦 𑀢𑀢𑁆𑀣 𑀫𑀫 𑀢𑀡𑁆𑀳𑀸𑀯𑀲𑁂𑀦 𑀫𑀫𑀦𑁆𑀢𑀺 𑀦𑀢𑁆𑀣𑀺. 𑀦 𑀢𑁂 𑀅𑀳𑀦𑁆𑀢𑀺 𑀬𑁂 𑀧𑀼𑀕𑁆𑀕𑀮𑀸 𑀏𑀢𑁆𑀣 𑀩𑀤𑁆𑀥𑀸, 𑀢𑁂𑀧𑀺 𑀅𑀳𑀁 𑀦 𑀳𑁄𑀫𑀺, 𑀢𑀢𑁆𑀣 𑀫𑁂 𑀤𑀺𑀝𑁆𑀞𑀺𑀩𑀤𑁆𑀥𑁄 𑀦𑀢𑁆𑀣𑀺. 𑀦 𑀫𑁂 𑀫𑀕𑁆𑀕𑀫𑁆𑀧𑀺 𑀤𑀓𑁆𑀔𑀲𑀻𑀢𑀺 𑀏𑀯𑀁 𑀲𑀩𑁆𑀩𑀲𑁄 𑀩𑀤𑁆𑀥𑀸𑀪𑀸𑀯𑁂𑀦 𑀫𑀼𑀢𑁆𑀢𑀲𑁆𑀲 𑀫𑁂 𑀕𑀢𑀫𑀕𑁆𑀕𑀫𑁆𑀧𑀺 𑀫𑀸𑀭 𑀢𑁆𑀯𑀁 𑀦 𑀤𑀓𑁆𑀔𑀲𑀺 𑀦 𑀧𑀲𑁆𑀲𑀺𑀲𑁆𑀲𑀲𑀺, 𑀬𑁂 𑀪𑀯𑀸𑀤𑀬𑁄 𑀢𑀼𑀬𑁆𑀳𑀁 𑀯𑀺𑀲𑀬𑀸, 𑀢𑁂𑀲𑀼 𑀪𑀯𑀬𑁄𑀦𑀺𑀕𑀢𑀺𑀆𑀤𑀻𑀲𑀼 𑀫𑀬𑁆𑀳𑀁 𑀕𑀢𑀫𑀕𑁆𑀕𑀁 𑀦 𑀧𑀲𑁆𑀲𑀺𑀲𑁆𑀲𑀲𑀺 𑀪𑀯𑀦𑀺𑀲𑁆𑀲𑀝𑁆𑀞𑀢𑁆𑀢𑀸𑀢𑀺.

𑀓𑀲𑁆𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀭𑀚𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁬. 𑀅𑀳𑀦𑀦𑁆𑀢𑀺 𑀓𑀭𑀡𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀳𑀦𑀦𑁆𑀢𑁂𑀦𑀸’’𑀢𑀺, 𑀧𑀘𑁆𑀘𑀢𑁆𑀢𑁂 𑀏𑀯 𑀯𑀸 𑀧𑀘𑁆𑀘𑀢𑁆𑀢𑀯𑀘𑀦𑀁, ‘‘𑀅𑀳𑀦𑀦𑁆𑀢𑁄 𑀳𑀼𑀢𑁆𑀯𑀸’’𑀢𑀺 𑀯𑀘𑀦𑀲𑁂𑀲𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀚𑀺𑀦𑀦𑁆𑀢𑀺 𑀅𑀦𑁆𑀢𑁄𑀕𑀥𑀳𑁂𑀢𑀼𑀅𑀢𑁆𑀣𑀁 ¶ 𑀯𑀤𑀢𑀻𑀢𑀺 𑀆𑀳 ‘‘𑀧𑀭𑀲𑁆𑀲 𑀥𑀦𑀚𑀸𑀦𑀺𑀁 𑀅𑀓𑀭𑁄𑀦𑁆𑀢𑁂𑀦𑀸’’𑀢𑀺. 𑀅𑀓𑀸𑀭𑀸𑀧𑁂𑀦𑁆𑀢𑁂𑀦𑀸𑀢𑀺 𑀧𑀭𑀲𑁆𑀲 𑀥𑀦𑀚𑀸𑀦𑀺𑀁 𑀅𑀓𑀸𑀭𑁂𑀦𑁆𑀢𑁂𑀦. 𑀅𑀲𑁄𑀘𑀦𑁆𑀢𑁂𑀦𑀸𑀢𑀺 𑀪𑁄𑀕𑀩𑁆𑀬𑀲𑀦𑀸𑀤𑀺𑀯𑀲𑁂𑀦 𑀧𑀭𑀁 𑀅𑀲𑁄𑀘𑀦𑁆𑀢𑁂𑀦. 𑀓𑀲𑁆𑀫𑀸 𑀪𑀕𑀯𑀸 𑀏𑀯𑀁 𑀘𑀺𑀦𑁆𑀢𑁂𑀲𑀻𑀢𑀺 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀇𑀢𑀻’’𑀢𑀺𑀆𑀤𑀺𑀦𑀸. 𑀭𑀚𑁆𑀚𑁂 𑀯𑀺𑀚𑀺𑀢𑁂 𑀤𑀡𑁆𑀟𑀓𑀭𑀧𑀻𑀴𑀺𑀢𑁂𑀢𑀺 𑀥𑀦𑀤𑀡𑁆𑀟𑀸𑀤𑀺𑀤𑀡𑁆𑀟𑁂𑀦 𑀘𑁂𑀯 𑀩𑀮𑀺𑀦𑀸 𑀘 𑀩𑀸𑀥𑀺𑀢𑁂.

𑀇𑀚𑁆𑀛𑀦𑀓𑀓𑁄𑀝𑁆𑀞𑀸𑀲𑀸𑀢𑀺 𑀘𑁂𑀢𑁄𑀯𑀲𑀺𑀪𑀸𑀯𑀸𑀤𑀺𑀓𑀲𑁆𑀲 𑀲𑀸𑀥𑀦𑀓𑀓𑁄𑀝𑁆𑀞𑀸𑀲𑀸. 𑀯𑀟𑁆𑀠𑀺𑀢𑀸𑀢𑀺 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀯𑀲𑁂𑀦 𑀅𑀦𑀼𑀩𑁆𑀭𑀽𑀳𑀺𑀢𑀸. 𑀧𑀼𑀦𑀧𑁆𑀧𑀼𑀦𑀁 𑀓𑀢𑀸𑀢𑀺 𑀪𑀸𑀯𑀦𑀸𑀬 𑀩𑀳𑀼𑀮𑀻𑀓𑀭𑀡𑁂𑀦 𑀅𑀧𑀭𑀸𑀧𑀭𑀁 𑀧𑀯𑀢𑁆𑀢𑀺𑀢𑀸. 𑀬𑀼𑀢𑁆𑀢𑀬𑀸𑀦𑀦𑁆𑀢𑀺 𑀬𑀣𑀸 𑀬𑀼𑀢𑁆𑀢𑀸𑀦𑀁 𑀆𑀚𑀜𑁆𑀜𑀭𑀣𑀸𑀦𑀁 𑀲𑀸𑀭𑀣𑀺𑀦𑀸 𑀅𑀥𑀺𑀝𑁆𑀞𑀺𑀢𑀁 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀢𑀺, 𑀏𑀯𑀁 𑀬𑀣𑀸𑀭𑀼𑀘𑀺𑀧𑀯𑀢𑁆𑀢𑀺𑀢𑀁 𑀕𑀫𑀺𑀢𑀸. 𑀧𑀢𑀺𑀝𑁆𑀞𑀝𑁆𑀞𑁂𑀦𑀸𑀢𑀺 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦. 𑀯𑀢𑁆𑀣𑀼𑀓𑀢𑀸𑀢𑀺 𑀲𑀩𑁆𑀩𑀲𑁄 𑀉𑀧𑀓𑁆𑀓𑀺𑀮𑁂𑀲𑀲𑁄𑀥𑀦𑁂𑀦 𑀇𑀤𑁆𑀥𑀺𑀯𑀺𑀲𑀬𑀢𑀸𑀬 𑀧𑀢𑀺𑀝𑁆𑀞𑀸𑀦𑀪𑀸𑀯𑀢𑁄 𑀲𑀼𑀯𑀺𑀲𑁄𑀥𑀺𑀢𑀧𑀭𑀺𑀲𑁆𑀲𑀬𑀯𑀢𑁆𑀣𑀼 𑀯𑀺𑀬 𑀓𑀢𑀸. 𑀅𑀯𑀺𑀚𑀳𑀺𑀢𑀸𑀢𑀺 𑀧𑀝𑀺𑀧𑀓𑁆𑀔𑀤𑀽𑀭𑀻𑀪𑀸𑀯𑀢𑁄 𑀲𑀼𑀪𑀸𑀯𑀺𑀢𑀪𑀸𑀯𑁂𑀦 𑀢𑀁𑀢𑀁𑀅𑀥𑀺𑀝𑁆𑀞𑀸𑀦𑀬𑁄𑀕𑁆𑀬𑀢𑀸𑀬 𑀦 𑀚𑀳𑀸𑀧𑀺𑀢𑀸. 𑀦𑀺𑀘𑁆𑀘𑀸𑀦𑀼𑀩𑀤𑁆𑀥𑀸𑀢𑀺 𑀢𑀢𑁄 𑀏𑀯 𑀦𑀺𑀘𑁆𑀘𑀁 𑀅𑀦𑀼𑀩𑀤𑁆𑀥𑀸 𑀯𑀺𑀬 𑀓𑀢𑀸. 𑀲𑀼𑀧𑀭𑀺𑀘𑀺𑀢𑀸𑀢𑀺 𑀲𑀼𑀝𑁆𑀞𑀼 𑀲𑀩𑁆𑀩𑀪𑀸𑀕𑁂𑀦 𑀪𑀸𑀯𑀦𑀸𑀦𑀼𑀧𑀘𑀬𑀁 𑀕𑀫𑀺𑀢𑀸. 𑀅𑀯𑀺𑀭𑀸𑀥𑀺𑀢𑀯𑁂𑀥𑀺𑀳𑀢𑁆𑀣𑁄 𑀯𑀺𑀬𑀸𑀢𑀺 𑀅𑀯𑀺𑀭𑀚𑁆𑀛𑀦𑀪𑀸𑀯𑁂𑀦 𑀯𑀺𑀭𑀚𑁆𑀛𑀦𑀳𑀢𑁆𑀣𑁄 𑀯𑀺𑀬. 𑀲𑀼𑀝𑁆𑀞𑀼 𑀲𑀫𑀸𑀭𑀤𑁆𑀥𑀸𑀢𑀺 𑀪𑀸𑀯𑀦𑀸𑀉𑀧𑁆𑀧𑀢𑁆𑀢𑀺𑀬𑀸 𑀲𑀫𑁆𑀫𑀤𑁂𑀯 𑀲𑀫𑁆𑀧𑀸𑀤𑀺𑀢𑀸. 𑀘𑀺𑀦𑁆𑀢𑁂𑀬𑁆𑀬𑀸𑀢𑀺 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀘𑀺𑀦𑁆𑀢𑁂𑀬𑁆𑀬.

𑀧𑀩𑁆𑀩𑀢𑀲𑁆𑀲𑀸𑀢𑀺 ¶ 𑀧𑀩𑁆𑀩𑀢𑁄 𑀅𑀲𑁆𑀲. 𑀧𑀩𑁆𑀩𑀢𑁄 𑀅𑀲𑁆𑀲𑀸𑀢𑀺 𑀧𑀩𑁆𑀩𑀢𑁄 𑀪𑀯𑁂𑀬𑁆𑀬 𑀓𑀻𑀤𑀺𑀲𑀲𑁆𑀲𑀸𑀢𑀺 𑀆𑀳 ‘‘𑀲𑀼𑀯𑀡𑁆𑀡𑀲𑁆𑀲𑀸’’𑀢𑀺𑀆𑀤𑀺. 𑀚𑀸𑀢𑀭𑀽𑀧𑀲𑁆𑀲𑀸𑀢𑀺 𑀆𑀢𑀧𑀭𑀽𑀧𑀲𑀫𑁆𑀧𑀦𑁆𑀦𑀲𑁆𑀲. 𑀤𑁆𑀯𑀺𑀓𑁆𑀔𑀢𑁆𑀢𑀼𑀫𑁆𑀧𑀺 𑀢𑀸𑀯 𑀫𑀳𑀦𑁆𑀢𑁄𑀢𑀺 𑀬𑀢𑁆𑀢𑀓𑁄 𑀲𑁄 𑀧𑀩𑁆𑀩𑀢𑁄 𑀳𑁄𑀢𑀺, 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀢𑀢𑁆𑀢𑀓𑁄. 𑀏𑀓𑀲𑁆𑀲𑀸𑀢𑀺 𑀏𑀓𑀲𑁆𑀲𑀧𑀺 𑀧𑀼𑀕𑁆𑀕𑀮𑀲𑁆𑀲 𑀦𑀸𑀮𑀁 𑀦 𑀧𑀭𑀺𑀬𑀢𑁆𑀢𑁄 𑀢𑀡𑁆𑀳𑀸𑀬 𑀤𑀼𑀧𑁆𑀧𑀽𑀭𑀡𑀪𑀸𑀯𑀸. 𑀏𑀯𑀁 𑀚𑀸𑀦𑀦𑁆𑀢𑁄𑀢𑀺 𑀏𑀯𑀁 𑀢𑀡𑁆𑀳𑀸𑀬 𑀤𑀼𑀧𑁆𑀧𑀽𑀭𑀡𑀪𑀸𑀯𑀸𑀤𑀻𑀦𑀯𑀢𑀁 𑀚𑀸𑀦𑀦𑁆𑀢𑁄. 𑀲𑀫𑀁 𑀘𑀭𑁂𑀬𑁆𑀬𑀸𑀢𑀺 𑀧𑀭𑀯𑀢𑁆𑀣𑀼𑀧𑀭𑀸𑀫𑀸𑀲𑀸𑀤𑀺𑀁 𑀯𑀺𑀳𑀸𑀬 𑀓𑀸𑀬𑀸𑀤𑀻𑀳𑀺 𑀲𑀫𑀫𑁂𑀯 𑀧𑀝𑀺𑀧𑀚𑁆𑀚𑁂𑀬𑁆𑀬.

𑀤𑀼𑀓𑁆𑀔𑀁 𑀢𑀡𑁆𑀳𑀸𑀦𑀺𑀤𑀸𑀦𑀁, 𑀢𑀡𑁆𑀳𑀸 𑀓𑀸𑀫𑀕𑀼𑀡𑀦𑀺𑀤𑀸𑀦𑀸, 𑀢𑀲𑁆𑀫𑀸 𑀤𑀼𑀓𑁆𑀔𑀲𑁆𑀲 𑀢𑀡𑁆𑀳𑀸𑀧𑀘𑁆𑀘𑀬𑀓𑀸𑀫𑀕𑀼𑀡𑀦𑀺𑀤𑀸𑀦𑀢𑁆𑀢𑀁 𑀯𑀼𑀢𑁆𑀢𑀁. 𑀢𑀦𑁆𑀢𑀺 𑀤𑀼𑀓𑁆𑀔𑀁. 𑀬𑀢𑁄𑀦𑀺𑀤𑀸𑀦𑀁 𑀳𑁄𑀢𑀻𑀢𑀺 𑀬𑀁𑀦𑀺𑀤𑀸𑀦𑀁 𑀬𑀁𑀓𑀸𑀭𑀡𑀁 𑀢𑀁 𑀧𑀯𑀢𑁆𑀢𑀢𑀺. 𑀏𑀯𑀁 𑀬𑁄 𑀅𑀤𑀓𑁆𑀔𑀻𑀢𑀺 𑀬𑁄 𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑁄 𑀏𑀯𑀁 𑀤𑀼𑀓𑁆𑀔𑀁 𑀢𑀲𑁆𑀲 𑀦𑀺𑀤𑀸𑀦𑀪𑀽𑀢𑁂 𑀓𑀸𑀫𑀕𑀼𑀡𑁂 𑀘 𑀢𑀣𑀢𑁄 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀧𑀲𑁆𑀲𑀺. 𑀓𑁂𑀦 𑀓𑀸𑀭𑀡𑁂𑀦 𑀦𑀫𑁂𑀬𑁆𑀬? 𑀢𑀁 𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀓𑀸𑀫𑀕𑀼𑀡𑀉𑀧𑀥𑀺𑀦𑁆𑀢𑀺 𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑀁 𑀉𑀧𑀥𑀺𑀁. 𑀲𑀚𑁆𑀚𑀢𑀺 𑀏𑀢𑁆𑀣𑀸𑀢𑀺 𑀲𑀗𑁆𑀕𑁄 𑀏𑀲𑁄, 𑀮𑀕𑁆𑀕𑀦𑀫𑁂𑀢𑀦𑁆𑀢𑀺 𑀏𑀯𑀁 ¶ 𑀯𑀺𑀤𑀺𑀢𑁆𑀯𑀸. 𑀢𑀫𑁂𑀯 𑀓𑀸𑀫𑀸𑀪𑀺𑀪𑀽𑀢𑁄 𑀦𑀧𑁆𑀧𑀝𑀺𑀲𑁂𑀯𑁂𑀬𑁆𑀬 𑀦 𑀮𑀕𑁆𑀕𑁂𑀬𑁆𑀬𑀸𑀢𑀺 𑀏𑀯𑀁 𑀯𑀺𑀦𑀬𑀸𑀬 𑀯𑀽𑀧𑀲𑀫𑀸𑀬 𑀲𑀺𑀓𑁆𑀔𑁂𑀬𑁆𑀬𑀸𑀢𑀺.

𑀭𑀚𑁆𑀚𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀯𑀕𑁆𑀕𑁄

𑁧. 𑀲𑀫𑁆𑀩𑀳𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁭. 𑀚𑀝𑀸𑀘𑀼𑀫𑁆𑀩𑀝𑀓𑁂𑀦𑀸𑀢𑀺 𑀲𑀻𑀲𑁂 𑀧𑀝𑀺𑀫𑀼𑀓𑁆𑀓𑁂𑀦 𑀚𑀝𑀸𑀓𑀮𑀸𑀧𑁂𑀦. 𑀅𑀧𑀭𑀺𑀕𑁆𑀕𑀳𑀩𑁆𑀭𑀸𑀳𑁆𑀫𑀡𑀧𑀩𑁆𑀩𑀚𑀺𑀢𑀸 𑀳𑀺 𑀚𑀝𑀸𑀬 𑀉𑀜𑁆𑀙𑀸𑀘𑀭𑀺𑀬𑀁 𑀘𑀭𑀦𑁆𑀢𑀺. 𑀉𑀤𑀼𑀫𑁆𑀩𑀭𑀤𑀡𑁆𑀟𑀜𑁆𑀳𑀺 𑀅𑀢𑁆𑀢𑀕𑀼𑀢𑁆𑀢𑀢𑁆𑀣𑀸𑀬 𑀕𑀳𑀺𑀢𑀁 𑀢𑁂𑀲𑀁 𑀅𑀧𑁆𑀧𑀺𑀘𑁆𑀙𑀪𑀸𑀯𑀧𑁆𑀧𑀓𑀸𑀲𑀦𑀁. 𑀢𑁂𑀦𑀸𑀳 ‘‘𑀅𑀧𑁆𑀧𑀺𑀘𑁆𑀙𑀪𑀸𑀯𑀧𑁆𑀧𑀓𑀸𑀲𑀦𑀢𑁆𑀣’’𑀦𑁆𑀢𑀺. 𑀲𑀻𑀲𑀁 𑀑𑀓𑀫𑁆𑀧𑁂𑀢𑁆𑀯𑀸𑀢𑀺 𑀏𑀢𑁆𑀣 𑀅𑀢𑀺𑀯𑀺𑀬 𑀲𑀻𑀲𑀲𑁆𑀲 𑀑𑀓𑀫𑁆𑀧𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀳𑀦𑀼𑀓𑁂𑀦 𑀉𑀭𑀁 𑀧𑀳𑀭𑀦𑁆𑀢𑁄 𑀅𑀥𑁄𑀦𑀢𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀚𑀺𑀯𑁆𑀳𑀁 𑀦𑀻𑀳𑀭𑀺𑀢𑁆𑀯𑀸𑀢𑀺 𑀮𑀫𑁆𑀩𑀦𑀘𑀸𑀮𑀦𑀯𑀲𑁂𑀦 𑀫𑀼𑀔𑀢𑁄 𑀦𑀺𑀓𑁆𑀔𑀸𑀫𑁂𑀢𑁆𑀯𑀸. 𑀢𑁂𑀦𑀸𑀳 ‘‘𑀉𑀤𑁆𑀥’’𑀦𑁆𑀢𑀺𑀆𑀤𑀺. 𑀢𑀺𑀲𑀸𑀔𑀦𑁆𑀢𑀺 𑀢𑀺𑀪𑀗𑁆𑀕𑀪𑀓𑀼𑀝𑀺 𑀯𑀺𑀬 𑀦𑀮𑀸𑀝𑁂 𑀚𑀸𑀢𑀢𑁆𑀢𑀸 𑀦𑀮𑀸𑀝𑀺𑀓𑀁. 𑀢𑁂𑀦𑀸𑀳 ‘‘𑀦𑀮𑀸𑀝𑁂 𑀉𑀝𑁆𑀞𑀺𑀢𑀁 𑀯𑀮𑀺𑀢𑁆𑀢𑀬’’𑀦𑁆𑀢𑀺, 𑀢𑀺𑀪𑀗𑁆𑀕𑀯𑀮𑀺𑀓𑀁 𑀦𑀮𑀸𑀝𑁂 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄𑀯 𑀢𑁂𑀮𑁂𑀢𑀺 𑀅𑀢𑁆𑀢𑀦𑁄𑀯 𑀧𑀸𑀧𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁂 𑀢𑁂𑀮𑁂, 𑀧𑀘𑀺𑀢𑀩𑁆𑀩𑀝𑁆𑀞𑀸𑀦𑀕𑁂𑀳𑁂𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀫𑁆𑀩𑀳𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀫𑀺𑀤𑁆𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁮. 𑀫𑀬𑁆𑀳𑀁 ¶ 𑀮𑀸𑀪𑀸𑀢𑀺 𑀏𑀯𑀭𑀽𑀧𑀲𑁆𑀲 𑀦𑀸𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀢𑁆𑀣𑀼𑀲𑁆𑀲 𑀧𑀝𑀺𑀮𑀸𑀪𑁄, 𑀏𑀯𑀭𑀽𑀧𑀲𑁆𑀲 𑀘 𑀦𑀸𑀫 𑀦𑀺𑀬𑁆𑀬𑀸𑀦𑀺𑀓𑀲𑁆𑀲 𑀲𑀤𑁆𑀥𑀫𑁆𑀫𑀲𑁆𑀲 𑀧𑀝𑀺𑀮𑀸𑀪𑁄, 𑀏𑀯𑀭𑀽𑀧𑀸𑀦𑀜𑁆𑀘 𑀲𑀼𑀧𑁆𑀧𑀝𑀺𑀧𑀦𑁆𑀦𑀸𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀝𑀺𑀮𑀸𑀪𑁄, 𑀏𑀢𑁂 𑀫𑀬𑁆𑀳𑀁 𑀲𑀼𑀮𑀤𑁆𑀥𑀮𑀸𑀪𑀸. 𑀫𑀬𑁆𑀳𑀁 𑀲𑀼𑀮𑀤𑁆𑀥𑀦𑁆𑀢𑀺 𑀬𑀜𑁆𑀘𑁂𑀢𑀁 𑀫𑀫 𑀦𑀺𑀬𑁆𑀬𑀸𑀦𑀺𑀓𑀲𑀸𑀲𑀦𑁂 𑀧𑀩𑁆𑀩𑀚𑁆𑀚𑀸 𑀉𑀧𑀲𑀫𑁆𑀧𑀤𑀸, 𑀢𑀲𑁆𑀫𑀺𑀜𑁆𑀘 𑀅𑀪𑀺𑀭𑀢𑀻𑀢𑀺 𑀲𑀩𑁆𑀩𑀜𑁆𑀘𑁂𑀢𑀁 𑀫𑀬𑀸 𑀲𑀼𑀮𑀤𑁆𑀥𑀁. 𑀬𑀣𑀸 𑀧𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀧𑁆𑀧𑀦𑁆𑀦𑁄, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀭𑀺𑀢𑀸𑀦𑀼𑀭𑀽𑀧𑀯𑀲𑁂𑀦 ¶ 𑀕𑀳𑀺𑀢𑀁 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁. 𑀧𑀸𑀲𑀸𑀤𑀺𑀓𑀦𑁆𑀢𑀺 𑀧𑀲𑀸𑀤𑀸𑀯𑀳𑀁. 𑀏𑀯𑀫𑀳𑁄𑀲𑀻𑀢𑀺 ‘‘𑀮𑀸𑀪𑀸 𑀯𑀢 𑀫𑁂’’𑀢𑀺𑀆𑀤𑀺𑀦𑀸 𑀏𑀯𑀁 𑀧𑀭𑀺𑀯𑀺𑀢𑀓𑁆𑀓𑁄 𑀅𑀳𑁄𑀲𑀺. 𑀦𑀺𑀲𑀺𑀦𑁆𑀦𑀲𑀤𑀺𑀲𑁄𑀢𑀺 𑀦𑀺𑀲𑀺𑀦𑁆𑀦𑁄 𑀯𑀺𑀬. 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀦𑀺𑀲𑀺𑀦𑁆𑀦𑀁 𑀫𑀸𑀭𑁄 𑀉𑀧𑀲𑀗𑁆𑀓𑀫𑀺, 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂. 𑀢𑀲𑁆𑀲𑀸𑀢𑀺 𑀲𑀫𑀺𑀤𑁆𑀥𑀺𑀢𑁆𑀣𑁂𑀭𑀲𑁆𑀲. 𑀓𑀫𑁆𑀫𑀝𑁆𑀞𑀸𑀦𑀁 𑀲𑀧𑁆𑀧𑀸𑀬𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀬 𑀅𑀦𑀼𑀬𑀼𑀜𑁆𑀚𑀦𑀁 𑀲𑀧𑁆𑀧𑀸𑀬𑀁 𑀉𑀧𑀓𑀸𑀭𑀸𑀯𑀳𑀁 𑀪𑀯𑀺𑀲𑁆𑀲𑀢𑀺.

𑀫𑀬𑁆𑀳𑀦𑁆𑀢𑀺 𑀫𑀬𑀸. 𑀲𑀢𑀺 𑀘 𑀧𑀜𑁆𑀜𑀸 𑀘 𑀲𑀢𑀺𑀧𑀜𑁆𑀜𑀸, 𑀢𑀸 𑀅𑀭𑀺𑀬𑀫𑀕𑁆𑀕𑁂𑀦 𑀚𑀸𑀦𑀦𑀲𑀫𑀢𑁆𑀣𑀦𑀪𑀸𑀯𑁂𑀦 𑀅𑀯𑀩𑀼𑀤𑁆𑀥𑀸. 𑀣𑁂𑀭𑁄 𑀓𑀺𑀭 𑀢𑀤𑀸 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀲𑀺. 𑀓𑀸𑀫𑀦𑁆𑀢𑀺 𑀬𑀣𑀸𑀭𑀼𑀘𑀺. 𑀓𑁂𑀘𑀺 ‘‘𑀓𑀸𑀫𑀁 𑀓𑀭𑀲𑁆𑀲𑀽𑀢𑀺 𑀆𑀬𑀲𑁆𑀫𑀢𑁄 ‘𑀓𑀸𑀫𑀸’𑀢𑀺 𑀫𑀸𑀭𑀲𑁆𑀲 𑀆𑀮𑀧𑀦’’𑀦𑁆𑀢𑀺 𑀯𑀤𑀦𑁆𑀢𑀺. 𑀯𑀺𑀪𑀺𑀁𑀲𑀓𑀸𑀭𑀳𑀸𑀦𑀻𑀢𑀺 𑀪𑀬𑀸𑀦𑀓𑀸𑀭𑀳𑀸𑀦𑀺. 𑀭𑀽𑀧𑀸𑀦𑀻𑀢𑀺 𑀯𑀺𑀧𑁆𑀧𑀓𑀸𑀭𑀸𑀦𑀺. 𑀯𑀺𑀧𑁆𑀧𑀓𑀸𑀭𑀢𑁆𑀣𑁄𑀧𑀺 𑀳𑀺 𑀭𑀽𑀧𑀲𑀤𑁆𑀤𑁄 ‘‘𑀭𑀽𑀧𑀁 𑀤𑀲𑁆𑀲𑁂𑀢𑀺 𑀅𑀦𑀧𑁆𑀧𑀓’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀦 𑀓𑀫𑁆𑀧𑁂𑀲𑁆𑀲𑀲𑀻𑀢𑀺 𑀲𑀫𑀡𑀥𑀫𑁆𑀫𑀓𑀭𑀡𑀢𑁄 𑀦 𑀘𑀮𑀺𑀲𑁆𑀲𑀲𑀺.

𑀲𑀫𑀺𑀤𑁆𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀕𑁄𑀥𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁯. 𑀧𑀩𑁆𑀩𑀢𑀲𑁆𑀲 𑀧𑀲𑁆𑀲𑁂𑀢𑀺 𑀧𑀩𑁆𑀩𑀢𑀧𑀸𑀤𑁂 𑀉𑀧𑀘𑁆𑀘𑀓𑀸𑀬𑀁. 𑀲𑀫𑀬𑁂 𑀲𑀫𑀬𑁂 𑀮𑀤𑁆𑀥𑀢𑁆𑀢𑀸 𑀲𑀸𑀫𑀬𑀺𑀓𑀁. 𑀢𑁂𑀦𑀸𑀳 ‘‘𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂 𑀧𑀘𑁆𑀘𑀦𑀻𑀓𑀥𑀫𑁆𑀫𑁂𑀳𑀺 𑀯𑀺𑀫𑀼𑀘𑁆𑀘𑀢𑀻’’𑀢𑀺. 𑀮𑁄𑀓𑀺𑀬𑀯𑀺𑀫𑀼𑀢𑁆𑀢𑀺 𑀳𑀺 𑀅𑀦𑀘𑁆𑀘𑀦𑁆𑀢𑀧𑀳𑀸𑀬𑀺𑀢𑀸𑀬 𑀲𑀫𑀬𑀯𑀺𑀫𑀼𑀢𑁆𑀢𑀺 𑀦𑀸𑀫, 𑀮𑁄𑀓𑀼𑀢𑁆𑀢𑀭𑀯𑀺𑀫𑀼𑀢𑁆𑀢𑀺 𑀅𑀘𑁆𑀘𑀦𑁆𑀢𑀧𑀳𑀸𑀬𑀺𑀢𑀸𑀬 𑀅𑀲𑀫𑀬𑀯𑀺𑀫𑀼𑀢𑁆𑀢𑀺. 𑀢𑀸𑀳𑀺 𑀲𑀫𑀦𑁆𑀦𑀸𑀕𑀢𑀸 ‘‘𑀲𑀫𑀬𑀯𑀺𑀫𑀼𑀢𑁆𑀢𑀸, 𑀅𑀲𑀫𑀬𑀯𑀺𑀫𑀼𑀢𑁆𑀢𑀸’’𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀬𑀸𑀯 𑀧𑀞𑀫𑀚𑁆𑀛𑀸𑀦𑀦𑀺𑀩𑁆𑀩𑀢𑁆𑀢𑀦𑀁, 𑀢𑀸𑀯 𑀓𑀲𑁆𑀫𑀸 𑀧𑀭𑀺𑀳𑀸𑀬𑀻𑀢𑀺 𑀅𑀢𑁆𑀣𑁄? 𑀲𑀸𑀩𑀸𑀥𑀢𑁆𑀢𑀸𑀢𑀺 𑀲𑀭𑁄𑀕𑀢𑁆𑀢𑀸. 𑀯𑀸𑀢𑀧𑀺𑀢𑁆𑀢𑀲𑁂𑀫𑁆𑀳𑀯𑀲𑁂𑀦𑀸𑀢𑀺 𑀓𑀤𑀸𑀘𑀺 𑀯𑀸𑀢𑀧𑀺𑀢𑁆𑀢𑀯𑀲𑁂𑀦, 𑀓𑀤𑀸𑀘𑀺 𑀯𑀸𑀢𑀲𑁂𑀫𑁆𑀳𑀯𑀲𑁂𑀦, 𑀉𑀪𑀺𑀦𑁆𑀦𑀫𑁆𑀧𑀺 𑀲𑀦𑁆𑀦𑀺𑀧𑀸𑀢𑀯𑀲𑁂𑀦. 𑀅𑀦𑀼𑀲𑀸𑀬𑀺𑀓𑁄𑀢𑀺 𑀓𑀸𑀬𑀁 𑀅𑀦𑀼𑀕𑀦𑁆𑀢𑁆𑀯𑀸 𑀲𑀬𑀺𑀢𑁄, 𑀬𑀸𑀧𑁆𑀬𑀸𑀫𑀬𑀪𑀸𑀯𑁂𑀦 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀲𑀫𑀸𑀥𑀺𑀲𑁆𑀲𑀸𑀢𑀺 𑀲𑀫𑀸𑀥𑀺𑀪𑀸𑀯𑀦𑀸𑀬. 𑀉𑀧𑀓𑀸𑀭𑀓𑀥𑀫𑁆𑀫𑁂 𑀉𑀢𑀼𑀪𑁄𑀚𑀦𑀸𑀤𑀺𑀓𑁂. 𑀧𑀽𑀭𑁂𑀢𑀼𑀦𑁆𑀢𑀺 𑀲𑀫𑁄𑀥𑀸𑀦𑁂𑀢𑀼𑀁. 𑀧𑀭𑀺𑀳𑀸𑀬𑀻𑀢𑀺 𑀲𑀭𑀻𑀭𑀲𑁆𑀲 𑀅𑀓𑀮𑁆𑀮𑀪𑀸𑀯𑀢𑁄.

𑀆𑀳𑀭𑁂𑀬𑁆𑀬𑀦𑁆𑀢𑀺 ¶ ¶ 𑀚𑀻𑀯𑀺𑀢𑀳𑀭𑀡𑀢𑁆𑀣𑀸𑀬 𑀉𑀧𑀦𑁂𑀬𑁆𑀬𑀁. 𑀦𑀺𑀩𑀤𑁆𑀥𑀸 𑀕𑀢𑀺 𑀳𑁄𑀢𑀺 𑀓𑁂𑀯𑀮𑀁 𑀩𑁆𑀭𑀳𑁆𑀫𑀮𑁄𑀓𑀽𑀧𑀧𑀢𑁆𑀢𑀺𑀢𑁄, 𑀦 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀯𑀺𑀬 𑀧𑀭𑀺𑀘𑁆𑀙𑀺𑀦𑁆𑀦𑀪𑀸𑀯𑁂𑀦. 𑀢𑁂𑀦𑀸𑀳 ‘‘𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀢𑀻’’𑀢𑀺.

𑀚𑀮𑀫𑀸𑀦𑀸𑀢𑀺 𑀲𑀫𑀼𑀝𑁆𑀞𑀺𑀢𑀦𑀺𑀬𑀢𑀇𑀤𑁆𑀥𑀺𑀬𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀘 𑀲𑀤𑁂𑀯𑀓𑁂 𑀮𑁄𑀓𑁂 𑀚𑀮𑀫𑀸𑀦𑀸. 𑀫𑀁𑀲𑀘𑀓𑁆𑀔𑀼 𑀤𑀺𑀩𑁆𑀩𑀘𑀓𑁆𑀔𑀼 𑀥𑀫𑁆𑀫𑀘𑀓𑁆𑀔𑀼 𑀧𑀜𑁆𑀜𑀸𑀘𑀓𑁆𑀔𑀼 𑀲𑀫𑀦𑁆𑀢𑀘𑀓𑁆𑀔𑀽𑀢𑀺 𑀧𑀜𑁆𑀘𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸. 𑀆𑀦𑀼𑀪𑀸𑀯𑀥𑀭𑀸𑀢𑀺 𑀅𑀘𑀺𑀦𑁆𑀢𑁂𑀬𑁆𑀬𑀸𑀧𑀭𑀺𑀫𑁂𑀬𑁆𑀬𑀩𑀼𑀤𑁆𑀥𑀸𑀦𑀼𑀪𑀸𑀯𑀲𑀫𑁆𑀧𑀦𑁆𑀦𑀸. 𑀆𑀦𑀼𑀪𑀸𑀯𑀧𑀭𑀺𑀬𑀸𑀬𑁄𑀧𑀺 𑀳𑀺 𑀚𑀼𑀢𑀺-𑀲𑀤𑁆𑀤𑁄 𑀳𑁄𑀢𑀺 ‘‘𑀇𑀤𑁆𑀥𑀺𑀚𑀼𑀢𑀺𑀩𑀮𑀯𑀻𑀭𑀺𑀬𑀽𑀧𑀧𑀢𑁆𑀢𑀻’’𑀢𑀺𑀆𑀤𑀻𑀲𑀼 (𑀚𑀸. 𑁨.𑁨𑁨.𑁧𑁫𑁮𑁯, 𑁧𑁫𑁯𑁫) 𑀯𑀺𑀬. 𑀅𑀦𑀯𑀲𑁂𑀲𑀢𑁄 𑀫𑀸𑀦𑀁 𑀲𑀺𑀬𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀢𑀻𑀢𑀺 𑀅𑀕𑁆𑀕𑀫𑀕𑁆𑀕𑁄 𑀫𑀸𑀦𑀲𑀁. 𑀢𑀦𑁆𑀦𑀺𑀩𑁆𑀩𑀢𑁆𑀢𑀦𑀸 𑀧𑀦 𑀅𑀭𑀳𑀢𑁆𑀢𑀲𑁆𑀲 𑀫𑀸𑀦𑀲𑀢𑀸 𑀤𑀝𑁆𑀞𑀩𑁆𑀩𑀸. 𑀲𑀻𑀮𑀸𑀤𑀻𑀦𑀻𑀢𑀺 𑀅𑀦𑀼𑀢𑁆𑀢𑀭𑀲𑀻𑀮𑀸𑀤𑀻𑀦𑀺. 𑀲𑀺𑀓𑁆𑀔𑀫𑀸𑀦𑁄𑀢𑀺 𑀲𑀺𑀓𑁆𑀔𑀸𑀦𑀺 𑀪𑀸𑀯𑁂𑀦𑁆𑀢𑁄 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑁂𑀦𑁆𑀢𑁄. 𑀦 𑀘𑀺𑀢𑁆𑀢𑀪𑀸𑀯𑀦𑀸. 𑀢𑁂𑀦𑀸𑀳 ‘‘𑀲𑀓𑀭𑀡𑀻𑀬𑁄’’𑀢𑀺. 𑀚𑀦𑁂𑀢𑀺 𑀲𑀢𑁆𑀢𑀲𑁆𑀲 𑀓𑀸𑀬𑁂, 𑀲𑀤𑁂𑀯𑀓𑁂 𑀮𑁄𑀓𑁂𑀢𑀺 𑀅𑀢𑁆𑀣𑁄. 𑀯𑀺𑀲𑁆𑀲𑀼𑀢𑀸𑀢𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀳𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀯𑀺𑀲𑁆𑀲𑀼𑀢𑀸.

𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸𑀢𑀺 𑀉𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀯𑁂𑀤𑀦𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀅𑀢𑁆𑀢𑀓𑀺𑀮𑀫𑀣𑀁 𑀅𑀦𑀼𑀧𑁆𑀧𑀸𑀤𑀦𑀯𑀲𑁂𑀦 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀢𑀁𑀬𑁂𑀯 𑀯𑁂𑀤𑀦𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀯𑀺𑀧𑀲𑁆𑀲𑀦𑀸 𑀯𑀻𑀣𑀺𑀫𑁂𑀯 𑀑𑀢𑀭𑀢𑀻𑀢𑀺 𑀓𑀢𑁆𑀯𑀸 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀲𑀫𑀲𑀻𑀲𑀻 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀧𑀪𑁂𑀤𑀁 𑀯𑀺𑀪𑀚𑀺𑀢𑁆𑀯𑀸 𑀇𑀥𑀸𑀥𑀺𑀧𑁆𑀧𑁂𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑀲𑀻𑀲𑀻 𑀦𑀸𑀫 𑀢𑀺𑀯𑀺𑀥𑁄 𑀳𑁄𑀢𑀻’’𑀢𑀺𑀆𑀤𑀺𑀫𑀸𑀳. 𑀇𑀭𑀺𑀬𑀸𑀧𑀣𑀯𑀲𑁂𑀦 𑀲𑀫𑀲𑀻𑀲𑀻 𑀇𑀭𑀺𑀬𑀸𑀧𑀣𑀲𑀫𑀲𑀻𑀲𑀻. 𑀏𑀲 𑀦𑀬𑁄 𑀲𑁂𑀲𑀤𑁆𑀯𑀬𑁂𑀧𑀺.

𑀇𑀭𑀺𑀬𑀸𑀧𑀣𑀓𑁄𑀧𑀦𑀜𑁆𑀘𑀸𑀢𑀺 𑀇𑀭𑀺𑀬𑀸𑀧𑀣𑁂𑀳𑀺 𑀅𑀲𑀫𑀸𑀬𑁄𑀕𑁄. 𑀏𑀓𑀧𑁆𑀧𑀳𑀸𑀭𑁂𑀦𑁂𑀯𑀸𑀢𑀺 𑀏𑀓𑀯𑁂𑀮𑀸𑀬𑀫𑁂𑀯. 𑀧𑀭𑀺𑀦𑀺𑀩𑁆𑀩𑀸𑀦𑀯𑀲𑁂𑀦𑀸𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀯𑀲𑁂𑀦, 𑀦 𑀓𑀺𑀮𑁂𑀲𑀓𑁆𑀔𑀬𑀫𑀢𑁆𑀢𑁂𑀦. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀤𑁆𑀯𑀻𑀲𑀼 𑀦𑀬𑁂𑀲𑀼. 𑀏𑀯𑀁 𑀲𑀢𑀺 𑀢𑁂𑀦𑁂𑀯 𑀇𑀭𑀺𑀬𑀸𑀧𑀣𑁂𑀦 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀢𑁂𑀦𑁂𑀯 𑀇𑀭𑀺𑀬𑀸𑀧𑀣𑁂𑀦, 𑀏𑀓𑀲𑁆𑀫𑀺𑀁 𑀅𑀦𑁆𑀢𑁄𑀭𑁄𑀕𑁂𑀬𑁂𑀯 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀢𑁂𑀦𑁂𑀯 𑀭𑁄𑀕𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀸 𑀔𑀻𑀡𑀸𑀲𑀯𑀸 𑀩𑀳𑀯𑁄𑀧𑀺 𑀲𑀫𑀲𑀻𑀲𑀺𑀦𑁄 𑀏𑀯 𑀲𑀫𑁆𑀪𑀯𑁂𑀬𑁆𑀬𑀼𑀁. 𑀢𑀲𑁆𑀫𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀻𑀲𑀜𑁆𑀘𑁂𑀢𑁆𑀣 ¶ 𑀢𑁂𑀭𑀲 𑁋 𑀧𑀮𑀺𑀩𑁄𑀥𑀲𑀻𑀲𑀁 𑀢𑀡𑁆𑀳𑀸, 𑀩𑀦𑁆𑀥𑀦𑀲𑀻𑀲𑀁 𑀫𑀸𑀦𑁄, 𑀧𑀭𑀸𑀫𑀸𑀲𑀲𑀻𑀲𑀁 𑀤𑀺𑀝𑁆𑀞𑀺, 𑀯𑀺𑀓𑁆𑀔𑁂𑀧𑀲𑀻𑀲𑀁 𑀉𑀤𑁆𑀥𑀘𑁆𑀘𑀁, 𑀓𑀺𑀮𑁂𑀲𑀲𑀻𑀲𑀁 𑀅𑀯𑀺𑀚𑁆𑀚𑀸, 𑀅𑀥𑀺𑀫𑁄𑀓𑁆𑀔𑀲𑀻𑀲𑀁 𑀲𑀤𑁆𑀥𑀸, 𑀧𑀕𑁆𑀕𑀳𑀲𑀻𑀲𑀁 𑀯𑀻𑀭𑀺𑀬𑀁, 𑀉𑀧𑀝𑁆𑀞𑀸𑀦𑀲𑀻𑀲𑀁 𑀲𑀢𑀺, 𑀅𑀯𑀺𑀓𑁆𑀔𑁂𑀧𑀲𑀻𑀲𑀁 𑀲𑀫𑀸𑀥𑀺, 𑀤𑀲𑁆𑀲𑀦𑀲𑀻𑀲𑀁 𑀧𑀜𑁆𑀜𑀸, 𑀧𑀯𑀢𑁆𑀢𑀺𑀲𑀻𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀕𑁄𑀘𑀭𑀲𑀻𑀲𑀁 𑀯𑀺𑀫𑁄𑀓𑁆𑀔𑁄, 𑀲𑀗𑁆𑀔𑀸𑀭𑀲𑀻𑀲𑀁 𑀦𑀺𑀭𑁄𑀥𑁄𑀢𑀺. 𑀇𑀫𑁂𑀲𑀼 𑀢𑁂𑀭𑀲𑀲𑀼 𑀲𑀻𑀲𑁂𑀲𑀼 𑀧𑀮𑀺𑀩𑁄𑀥𑀲𑀻𑀲𑀸𑀤𑀻𑀦𑀺 𑀧𑀯𑀢𑁆𑀢𑀺𑀲𑀻𑀲𑀜𑁆𑀘 𑀧𑀭𑀺𑀬𑀸𑀤𑀺𑀬𑀺𑀢𑀩𑁆𑀩𑀸𑀦𑀺, 𑀅𑀥𑀺𑀫𑁄𑀓𑁆𑀔𑀲𑀻𑀲𑀸𑀤𑀻𑀦𑀺 𑀧𑀭𑀺𑀬𑀸𑀤𑀸𑀬𑀓𑀸𑀦𑀺, 𑀧𑀭𑀺𑀬𑀸𑀤𑀸𑀬𑀓𑀨𑀮𑀁 𑀕𑁄𑀘𑀭𑀲𑀻𑀲𑀁. 𑀢𑀜𑁆𑀳𑀺 𑀯𑀺𑀲𑀬𑀚𑁆𑀛𑀢𑁆𑀢𑀁 𑀨𑀮𑀁 𑀯𑀺𑀫𑁄𑀓𑁆𑀔𑁄, 𑀧𑀭𑀺𑀬𑀸𑀤𑀸𑀬𑀓𑀲𑁆𑀲 𑀫𑀕𑁆𑀕𑀲𑁆𑀲 𑀨𑀮𑀲𑁆𑀲 𑀘 𑀆𑀭𑀫𑁆𑀫𑀡𑀁 ¶ 𑀲𑀗𑁆𑀔𑀸𑀭𑀲𑀻𑀲𑀁 𑀲𑀗𑁆𑀔𑀸𑀭𑀯𑀺𑀯𑁂𑀓𑀪𑀽𑀢𑁄 𑀦𑀺𑀭𑁄𑀥𑁄𑀢𑀺 𑀧𑀭𑀺𑀬𑀸𑀤𑀺𑀬𑀺𑀢𑀩𑁆𑀩𑀸𑀦𑀁 𑀧𑀭𑀺𑀬𑀸𑀤𑀸𑀬𑀓𑀨𑀮𑀸𑀭𑀫𑁆𑀫𑀡𑀸𑀦𑀁 𑀲𑀳 𑀯𑀺𑀬 𑀲𑀁𑀲𑀺𑀤𑁆𑀥𑀁 𑀤𑀲𑁆𑀲𑀦𑁂𑀦 𑀲𑀫𑀲𑀻𑀲𑀺𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 𑀢𑁂𑀭𑀲 𑀲𑀻𑀲𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀇𑀥 𑀧𑀦 ‘‘𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀆𑀲𑀯𑀧𑀭𑀺𑀬𑀸𑀤𑀸𑀦𑀜𑁆𑀘 𑀳𑁄𑀢𑀺 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀜𑁆𑀘𑀸’’𑀢𑀺 (𑀧𑀼. 𑀧. 𑁧𑁬) 𑀯𑀘𑀦𑀢𑁄 𑀢𑁂𑀲𑀼 𑀓𑀺𑀮𑁂𑀲𑀧𑀯𑀢𑁆𑀢𑀲𑀻𑀲𑀸𑀦𑀫𑁂𑀯 𑀯𑀲𑁂𑀦 𑀬𑁄𑀚𑀦𑀁 𑀓𑀭𑁄𑀦𑁆𑀢𑁄 ‘‘𑀏𑀢𑁆𑀣 𑀘 𑀧𑀯𑀢𑁆𑀢𑀺𑀲𑀻𑀲’’𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀧𑀯𑀢𑁆𑀢𑀺𑀲𑀻𑀲𑀁 𑀧𑀯𑀢𑁆𑀢𑀢𑁄 𑀯𑀼𑀝𑁆𑀞𑀳𑀦𑁆𑀢𑁄 𑀫𑀕𑁆𑀕𑁄 𑀘𑀼𑀢𑀺𑀢𑁄 𑀉𑀤𑁆𑀥𑀁 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀯𑀲𑁂𑀦 𑀬𑀤𑀺𑀧𑀺 𑀧𑀭𑀺𑀬𑀸𑀤𑀻𑀬𑀢𑀺, 𑀬𑀸𑀯 𑀧𑀦 𑀘𑀼𑀢𑀺, 𑀢𑀸𑀯 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄 ‘‘𑀧𑀯𑀢𑁆𑀢𑀺𑀲𑀻𑀲𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀘𑀼𑀢𑀺𑀘𑀺𑀢𑁆𑀢𑀁 𑀔𑁂𑀧𑁂𑀢𑀻’’𑀢𑀺 𑀆𑀳. 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑁂𑀦 𑀧𑀦 𑀫𑀕𑁆𑀕𑀘𑀺𑀢𑁆𑀢𑁂𑀦 𑀅𑀢𑁆𑀢𑀦𑁄 𑀅𑀦𑀦𑁆𑀢𑀭𑀁 𑀯𑀺𑀬 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑀸 𑀧𑀘𑁆𑀘𑀯𑁂𑀓𑁆𑀔𑀡𑀯𑀸𑀭𑀸 𑀘 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀲𑁆𑀲𑁂𑀯 𑀯𑀸𑀭𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀦𑁆𑀢𑀺. ‘‘𑀯𑀺𑀫𑀼𑀢𑁆𑀢𑀲𑁆𑀫𑀺𑀁 𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀳𑁄𑀢𑀻’’𑀢𑀺 (𑀫. 𑀦𑀺. 𑁧.𑁭𑁮; 𑀲𑀁. 𑀦𑀺. 𑁩.𑁧𑁨) 𑀯𑀘𑀦𑀢𑁄 𑀧𑀘𑁆𑀘𑀯𑁂𑀓𑁆𑀔𑀡𑀧𑀭𑀺𑀲𑀫𑀸𑀧𑀦𑁂𑀦 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀁 𑀲𑀫𑀸𑀧𑀺𑀢𑀁 𑀦𑀸𑀫 𑀳𑁄𑀢𑀺, 𑀢𑀁 𑀧𑀦 𑀧𑀭𑀺𑀲𑀫𑀸𑀧𑀦𑀁 𑀬𑀤𑀺 𑀘𑀼𑀢𑀺𑀘𑀺𑀢𑁆𑀢𑁂𑀦 𑀳𑁄𑀢𑀺, 𑀢𑁂𑀦𑁂𑀯 𑀚𑀻𑀯𑀺𑀢𑀧𑀭𑀺𑀲𑀫𑀸𑀧𑀦𑀜𑁆𑀘 𑀳𑁄𑀢𑀻𑀢𑀺 𑀇𑀫𑀸𑀬 𑀯𑀸𑀭𑀘𑀼𑀢𑀺𑀲𑀫𑀢𑀸𑀬 𑀓𑀺𑀮𑁂𑀲𑀧𑀭𑀺𑀬𑀸𑀤𑀸𑀦𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸𑀦𑀁 𑀅𑀧𑀼𑀩𑁆𑀩𑀸𑀘𑀭𑀺𑀫𑀢𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀏𑀓𑀢𑁄 𑀉𑀧𑁆𑀧𑀸𑀤𑁄 𑀦𑀢𑁆𑀣𑀻’’𑀢𑀺𑀆𑀤𑀺𑀫𑀸𑀳. 𑀤𑁆𑀯𑀺𑀦𑁆𑀦𑀁 𑀘𑀺𑀢𑁆𑀢𑀸𑀦𑀦𑁆𑀢𑀺 𑀘𑀼𑀢𑀺𑀘𑀺𑀢𑁆𑀢𑀫𑀕𑁆𑀕𑀘𑀺𑀢𑁆𑀢𑀸𑀦𑀁. 𑀢𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀁 𑀧𑀭𑀺𑀧𑀼𑀡𑁆𑀡𑀚𑀯𑀦𑀘𑀺𑀢𑁆𑀢𑀸𑀦𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀬𑀸, 𑀅𑀧𑀭𑀺𑀧𑀼𑀡𑁆𑀡𑀸𑀦𑀁 𑀯𑀸 𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀬𑀸. 𑀓𑀺𑀜𑁆𑀘𑀸𑀧𑀺 ‘‘𑀏𑀓𑁄 𑀯𑀸 𑀤𑁆𑀯𑁂 𑀯𑀸’’𑀢𑀺 𑀯𑀼𑀢𑁆𑀢𑀁 𑀬𑀣𑀸 ‘‘𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀢𑀤𑀸𑀭𑀫𑁆𑀫𑀡𑀘𑀺𑀢𑁆𑀢𑀸𑀦𑀻’’𑀢𑀺, 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀧𑀦 𑀤𑁆𑀯𑁂 𑀧𑀯𑀢𑁆𑀢𑀦𑁆𑀢𑀺.

𑀉𑀧𑁆𑀧𑀸𑀝𑁂𑀢𑁆𑀯𑀸𑀢𑀺 ¶ 𑀉𑀤𑁆𑀥𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀦𑀼𑀧𑀸𑀤𑀺𑀲𑁂𑀲𑁂𑀦𑀸𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑁂𑀦.

𑀥𑀽𑀫𑀸𑀬𑀺𑀢𑀢𑁆𑀢𑀦𑁆𑀢𑀺 𑀥𑀽𑀫𑀲𑁆𑀲 𑀯𑀺𑀬 𑀅𑀬𑀺𑀢𑀪𑀸𑀯𑀁 𑀧𑀯𑀢𑁆𑀢𑀺𑀆𑀓𑀸𑀭𑀁. 𑀥𑀽𑀫𑀲𑀤𑀺𑀲𑀸 𑀯𑀮𑀸𑀳𑀓𑀸 𑀥𑀽𑀫𑀯𑀮𑀸𑀳𑀓𑀸, 𑀢𑀺𑀫𑀺𑀭𑀯𑀮𑀸𑀳𑀓𑀸, 𑀬𑁂 𑀫𑀳𑀺𑀓𑀸 ‘‘𑀢𑀺𑀫𑀺𑀭’’𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀧𑁆𑀧𑀢𑀺𑀝𑁆𑀞𑀺𑀢𑁂𑀦𑀸𑀢𑀺 𑀧𑀢𑀺𑀝𑁆𑀞𑀁 𑀅𑀮𑀪𑀦𑁆𑀢𑁂𑀦. 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀏𑀢𑀁 𑀓𑀭𑀡𑀯𑀘𑀦𑀁, 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀢𑀺 𑀳𑀺 𑀉𑀧𑁆𑀧𑀸𑀤𑁂 𑀧𑀢𑀺𑀝𑁆𑀞𑀺𑀢𑀁 𑀦𑀸𑀫 𑀲𑀺𑀬𑀸, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀬𑀤𑁂𑀯 𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀅𑀧𑁆𑀧𑀢𑀺𑀝𑁆𑀞𑀸𑀦𑀓𑀸𑀭𑀡𑀁, 𑀢𑀤𑁂𑀯 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀧𑁆𑀧𑀢𑀺𑀝𑁆𑀞𑀺𑀢𑀓𑀸𑀭𑀡𑀸’’𑀢𑀺.

𑀲𑁄𑀓𑁂𑀦 𑀨𑀼𑀝𑁆𑀞𑀲𑁆𑀲𑀸𑀢𑀺 ‘‘𑀅𑀨𑀮𑁄 𑀯𑀢 𑀫𑁂 𑀯𑀸𑀬𑀸𑀫𑁄 𑀚𑀸𑀢𑁄’’𑀢𑀺 𑀲𑁄𑀓𑁂𑀦 𑀅𑀪𑀺𑀪𑀽𑀢𑀲𑁆𑀲. 𑀅𑀪𑀲𑁆𑀲𑀣𑀸𑀢𑀺 𑀩𑀮𑀯𑀲𑁄𑀓𑀸𑀪𑀺𑀢𑀼𑀦𑁆𑀦𑀲𑁆𑀲 𑀲𑀢𑀺𑀲𑀫𑁆𑀫𑁄𑀲𑀸 𑀲𑀺𑀣𑀺𑀮𑀁 𑀕𑀳𑀺𑀢𑀸 𑀪𑀲𑁆𑀲𑀺 𑀧𑀢𑀺𑀢𑀸 𑀲𑀸 𑀓𑀘𑁆𑀙𑀸.

𑀕𑁄𑀥𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀢𑁆𑀢𑀯𑀲𑁆𑀲𑀸𑀦𑀼𑀩𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁦. 𑀬𑀲𑁆𑀫𑀸 ¶ 𑀓𑀧𑀺𑀮𑀯𑀢𑁆𑀣𑀼𑀢𑁄 𑀦𑀺𑀓𑁆𑀔𑀦𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀸𑀭𑁄 𑀑𑀢𑀸𑀭𑀸𑀧𑁂𑀓𑁆𑀔𑁄 𑀮𑁄𑀓𑀦𑀸𑀣𑀁 𑀅𑀦𑀼𑀩𑀦𑁆𑀥𑀺𑀢𑀼𑀁 𑀆𑀭𑀤𑁆𑀥𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀧𑀼𑀭𑁂 𑀩𑁄𑀥𑀺𑀬𑀸 𑀙𑀩𑁆𑀩𑀲𑁆𑀲𑀸𑀦𑀻’’𑀢𑀺. 𑀅𑀢𑀺𑀕𑀳𑁂𑀢𑁆𑀯𑀸𑀢𑀺 𑀅𑀦𑀼𑀕𑀦𑁆𑀢𑁆𑀯𑀸 𑀢𑀲𑁆𑀲 𑀬𑀣𑀸𑀭𑀼𑀘𑀺 𑀧𑀝𑀺𑀧𑀢𑁆𑀢𑀺𑀁 𑀅𑀦𑀼𑀯𑀢𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸.

𑀅𑀯𑀚𑁆𑀛𑀸𑀬𑀦𑁆𑀢𑁄𑀢𑀺 𑀧𑀚𑁆𑀛𑀸𑀬𑀦𑁆𑀢𑁄. 𑀚𑀺𑀢𑁄 𑀯𑀺𑀢𑁆𑀢𑀧𑀭𑀸𑀚𑀺𑀢𑁄 𑀅𑀲𑀺 𑀦𑀼. 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀦𑁆𑀢𑀺 𑀕𑀭𑀼𑀢𑀭𑀁.

𑀔𑀦𑀺𑀢𑁆𑀯𑀸 𑀉𑀫𑁆𑀫𑀽𑀮𑁂𑀢𑁆𑀯𑀸. 𑀓𑀸𑀫𑀸𑀲𑀯𑀸𑀤𑀻𑀦𑀺 𑀧𑀚𑀳𑀦𑁆𑀢𑁄 𑀅𑀦𑀸𑀲𑀯𑁄.

𑀧𑁂𑀳𑀻𑀢𑀺 𑀅𑀧𑁂𑀳𑀺. 𑀧𑀸𑀭𑀕𑀸𑀫𑀺𑀦𑁄𑀢𑀺 𑀧𑀸𑀭𑀗𑁆𑀕𑀫𑀦𑀲𑀻𑀮𑀸. 𑀢𑁂𑀓𑀸𑀮𑀺𑀓𑁄 𑀅𑀬𑀁 𑀕𑀸𑀫𑀺-𑀲𑀤𑁆𑀤𑁄𑀢𑀺 𑀆𑀳 ‘‘𑀬𑁂𑀧𑀻’’𑀢𑀺𑀆𑀤𑀺.

𑀫𑀸𑀭𑀯𑀺𑀲𑀽𑀓𑀸𑀦𑀻𑀢𑀺 𑀫𑀸𑀭𑀓𑀡𑁆𑀝𑀓𑀸𑀦𑀺 𑀓𑀡𑁆𑀝𑀓𑀲𑀤𑀺𑀲𑀸𑀦𑀺 𑀫𑀸𑀭𑀲𑁆𑀲 𑀤𑀼𑀭𑀸𑀘𑀸𑀭𑀸𑀦𑀺. 𑀯𑀺𑀭𑀼𑀤𑁆𑀥𑀲𑁂𑀯𑀺𑀢𑀸𑀦𑀺 𑀯𑀺𑀭𑁄𑀥𑀯𑀲𑁂𑀦 𑀢𑀸𑀲𑀁𑀬𑁂𑀯 𑀯𑁂𑀯𑀘𑀦𑀸𑀦𑀺. 𑀢𑀸𑀦𑀺 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀅𑀧𑁆𑀧𑀫𑀸𑀬𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀺𑀩𑁆𑀩𑁂𑀚𑀦𑀻𑀬𑀸𑀢𑀺 𑀦𑀺𑀩𑁆𑀩𑁂𑀤𑀤𑀸𑀬𑀺𑀓𑀸. 𑀉𑀓𑁆𑀓𑀡𑁆𑀞𑀦𑀻𑀬𑀸𑀢𑀺 𑀉𑀓𑁆𑀓𑀡𑁆𑀞𑀯𑀳𑀸.

𑀯𑀺𑀓𑀧𑁆𑀧𑀯𑀲𑁂𑀦 ¶ 𑀯𑁂𑀤𑀺𑀢𑀩𑁆𑀩𑁄 𑀑𑀧𑀫𑁆𑀫𑀧𑀭𑀺𑀓𑀧𑁆𑀧𑀯𑀺𑀲𑀬𑀢𑁆𑀢𑀸 𑀢𑀲𑁆𑀲 𑀓𑀺𑀭𑀺𑀬𑀸𑀧𑀤𑀲𑁆𑀲. 𑀢𑁂𑀦𑀸𑀳 ‘‘𑀅𑀦𑀼𑀧𑀭𑀺𑀕𑀘𑁆𑀙𑁂𑀬𑁆𑀬𑀸’’𑀢𑀺. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀫𑁂𑀤𑀯𑀡𑁆𑀡𑀯𑀢𑁆𑀣𑀼𑀲𑁆𑀫𑀺𑀁. 𑀫𑀼𑀤𑀼𑀦𑁆𑀢𑀺 𑀫𑀼𑀤𑀼𑀫𑀥𑀼𑀭𑀲𑀁 𑀯𑀺𑀦𑁆𑀤𑁂𑀬𑁆𑀬𑀸𑀫 𑀧𑀝𑀺𑀮𑀪𑁂𑀬𑁆𑀬𑀸𑀫. 𑀅𑀲𑁆𑀲𑀸𑀤𑁄𑀢𑀺 𑀅𑀲𑁆𑀲𑀸𑀤𑁂𑀢𑀩𑁆𑀩𑁄.

𑀲𑀢𑁆𑀢𑀯𑀲𑁆𑀲𑀸𑀦𑀼𑀩𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀫𑀸𑀭𑀥𑀻𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁧. 𑀘𑀺𑀦𑁆𑀢𑁂𑀲𑀻𑀢𑀺 𑀲𑁄𑀓𑀯𑀲𑀺𑀓𑁄 𑀳𑀼𑀢𑁆𑀯𑀸 𑀘𑀺𑀦𑁆𑀢𑀬𑀺. 𑀕𑀡𑀺𑀓𑀸𑀭𑀳𑀢𑁆𑀣𑀺𑀦𑀺𑀬𑁄𑀢𑀺 𑀤𑀻𑀧𑀓𑀓𑀭𑁂𑀡𑀼𑀬𑁄. 𑀏𑀓𑀲𑀢𑀁 𑀏𑀓𑀲𑀢𑀦𑁆𑀢𑀺 𑀏𑀓𑀲𑀢𑀁 𑀏𑀓𑀲𑀢𑀁 𑀧𑀘𑁆𑀘𑁂𑀓𑀁 𑀲𑀢𑀁 𑀲𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀏𑀓𑁂𑀓𑀁 𑀲𑀢𑀁 𑀲𑀢𑀁 𑀓𑀢𑁆𑀯𑀸’’𑀢𑀺. 𑀓𑀼𑀫𑀸𑀭𑀺𑀯𑀡𑁆𑀡𑀲𑀢𑀦𑁆𑀢𑀺 𑀓𑀼𑀫𑀸𑀭𑀺𑀢𑁆𑀣𑀻𑀦𑀁 𑀅𑀢𑁆𑀢𑀪𑀸𑀯𑀸𑀦𑀁 𑀲𑀢𑀁. 𑀢𑀸 𑀓𑀺𑀭 𑀧𑀞𑀫𑀁 𑀓𑀜𑁆𑀜𑀸𑀭𑀽𑀧𑁂𑀦 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀼𑀁. 𑀅𑀦𑀼𑀧𑀕𑀢𑀧𑀼𑀧𑁆𑀨𑀸𑀦𑀜𑁆𑀳𑀺 𑀲𑀫𑀜𑁆𑀜𑀸 𑀓𑀜𑁆𑀜𑀸𑀢𑀺. 𑀧𑀼𑀦 𑀬𑀣𑀸𑀯𑀼𑀢𑁆𑀢𑀓𑀼𑀫𑀸𑀭𑀺𑀭𑀽𑀧𑁂𑀦 𑀉𑀧𑀕𑀢𑀧𑀼𑀧𑁆𑀨𑀸 𑀳𑀺 𑀓𑀼𑀫𑀸𑀭𑀻. 𑀧𑀼𑀦 𑀯𑀥𑀼𑀓𑀸𑀭𑀽𑀧𑁂𑀦. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀯𑀺𑀚𑀸𑀢𑀯𑀡𑁆𑀡𑀲𑀢’’𑀦𑁆𑀢𑀺 ¶ . 𑀢𑀢𑀺𑀬𑀯𑀸𑀭𑁂 𑀬𑀼𑀯𑀢𑀺𑀭𑀽𑀧𑁂𑀦. 𑀯𑀺𑀚𑀸𑀢𑀸 𑀳𑀺 𑀇𑀢𑁆𑀣𑀻 𑀅𑀦𑀢𑀺𑀓𑁆𑀓𑀦𑁆𑀢𑀫𑀚𑁆𑀛𑀺𑀫𑀯𑀬𑀸 𑀬𑀼𑀯𑀢𑀻. 𑀏𑀢𑁆𑀢𑀸𑀯𑀢𑀸 𑀩𑀸𑀮𑀸 𑀢𑀭𑀼𑀡𑀻 𑀧𑁄𑀭𑀻𑀢𑀺 𑀢𑀺𑀯𑀺𑀥𑀸𑀲𑀼 𑀇𑀢𑁆𑀣𑀻𑀲𑀼 𑀧𑀼𑀭𑀺𑀫𑀸 𑀤𑁆𑀯𑁂 𑀤𑀲𑁆𑀲𑀺𑀢𑀸, 𑀧𑀭𑀺𑀬𑁄𑀲𑀸𑀦𑀯𑀸𑀭𑁂𑀲𑀼 𑀫𑀦𑀼𑀲𑁆𑀲𑀚𑀸𑀢𑀺𑀓𑀸𑀦𑀁 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑁄𑀯 𑀭𑀼𑀘𑁆𑀘𑀦𑁆𑀢𑀻𑀢𑀺 𑀢𑁂𑀦 𑀫𑀦𑀼𑀲𑁆𑀲𑀭𑀽𑀧𑁂𑀦 𑀢𑀸 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀼𑀁.

𑀅𑀢𑁆𑀣𑀲𑁆𑀲 𑀧𑀢𑁆𑀢𑀺𑀦𑁆𑀢𑀺 𑀏𑀓𑀦𑁆𑀢𑀢𑁄 𑀳𑀺𑀢𑀸𑀦𑀼𑀧𑁆𑀧𑀢𑁆𑀢𑀺𑀁. 𑀳𑀤𑀬𑀲𑁆𑀲 𑀲𑀦𑁆𑀢𑀺𑀦𑁆𑀢𑀺 𑀧𑀭𑀫𑀘𑀺𑀢𑁆𑀢𑀼𑀧𑀲𑀫𑀁. 𑀓𑀺𑀮𑁂𑀲𑀲𑁂𑀦𑀦𑁆𑀢𑀺 𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑀁 𑀧𑀞𑀫𑀁 𑀓𑀺𑀮𑁂𑀲𑀲𑁂𑀦𑀁. 𑀲𑀸 𑀳𑀺 𑀓𑀺𑀮𑁂𑀲𑀲𑁂𑀦𑀸 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀲𑀪𑀸𑀯𑀸𑀧𑀺 𑀧𑀝𑀺𑀧𑀢𑁆𑀣𑀬𑀫𑀸𑀦𑀸 𑀧𑀺𑀬𑀸𑀬𑀺𑀢𑀩𑁆𑀩𑀇𑀘𑁆𑀙𑀺𑀢𑀩𑁆𑀩𑀭𑀽𑀧𑀪𑀸𑀯𑀢𑁄 𑀧𑀺𑀬𑀭𑀽𑀧𑀲𑀸𑀢𑀭𑀽𑀧𑀸 𑀦𑀸𑀫 𑀅𑀢𑁆𑀢𑀦𑁄 𑀓𑀺𑀘𑁆𑀘𑀯𑀲𑁂𑀦. 𑀏𑀓𑁄 𑀅𑀳𑀁 𑀛𑀸𑀬𑀦𑁆𑀢𑁄𑀢𑀺 𑀕𑀡𑀲𑀗𑁆𑀕𑀡𑀺𑀓𑀸𑀬 𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀸𑀬 𑀘 𑀅𑀪𑀸𑀯𑀢𑁄 𑀏𑀓𑁄 𑀅𑀲𑀳𑀸𑀬𑁄 𑀅𑀳𑀁 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀦𑀺𑀚𑁆𑀛𑀸𑀬𑀦𑁆𑀢𑁄. 𑀅𑀦𑀼𑀩𑀼𑀚𑁆𑀛𑀺𑀦𑁆𑀢𑀺 𑀅𑀦𑀼𑀓𑁆𑀓𑀫𑁂𑀦 𑀫𑀕𑁆𑀕𑀧𑀝𑀺𑀧𑀸𑀝𑀺𑀬𑀸 𑀩𑀼𑀚𑁆𑀛𑀺𑀁 𑀧𑀝𑀺𑀩𑀼𑀚𑁆𑀛𑀺𑀁. 𑀢𑀲𑁆𑀫𑀸𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀯𑁂𑀓𑀲𑀼𑀔𑀲𑀫𑀥𑀺𑀕𑀫𑀦𑀺𑀫𑀺𑀢𑁆𑀢𑀁. 𑀅𑀓𑀭𑀡𑁂𑀦𑀸𑀢𑀺 𑀫𑀺𑀢𑁆𑀢𑀲𑀦𑁆𑀣𑀯𑀲𑁆𑀲 𑀅𑀓𑀭𑀡𑁂𑀦. 𑀲𑀓𑁆𑀔𑀻𑀢𑀺 𑀲𑀓𑁆𑀔𑀺𑀪𑀸𑀯𑁄.

𑀓𑀢𑀫𑁂𑀦 ¶ 𑀯𑀺𑀳𑀸𑀭𑁂𑀦𑀸𑀢𑀺 𑀛𑀸𑀦𑀲𑀫𑀸𑀧𑀢𑁆𑀢𑀻𑀦𑀁 𑀓𑀢𑀫𑁂𑀦 𑀯𑀺𑀳𑀸𑀭𑁂𑀦. 𑀇𑀥 𑀤𑀼𑀢𑀺𑀬𑀧𑀤𑀲𑁆𑀲 𑀅𑀢𑁆𑀣𑁄 𑀯𑀺𑀲𑁆𑀲𑀚𑁆𑀚𑀦𑀕𑀸𑀣𑀸𑀯𑀡𑁆𑀡𑀦𑀸𑀬𑀫𑁂𑀯 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀅𑀦𑀸𑀫𑀦𑁆𑀢𑁂𑀦 ‘‘𑀢𑀁 𑀧𑀼𑀕𑁆𑀕𑀮’’𑀦𑁆𑀢𑀺 𑀲𑀫𑁆𑀫𑀼𑀔𑀸 𑀞𑀺𑀢𑀫𑁆𑀧𑀺 𑀪𑀕𑀯𑀦𑁆𑀢𑀁 𑀅𑀲𑀫𑁆𑀫𑀼𑀔𑀸 𑀯𑀺𑀬 𑀓𑀢𑁆𑀯𑀸 𑀯𑀤𑀢𑀺, 𑀓𑀣𑀁 𑀢𑁆𑀯𑀦𑁆𑀢𑀺 𑀅𑀢𑁆𑀣𑁄.

‘‘𑀅𑀯𑀺𑀢𑀓𑁆𑀓𑀛𑀸𑀬𑀻’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 𑀅𑀬𑀫𑁂𑀯𑁂𑀢𑁆𑀣 𑀓𑀸𑀬𑀧𑀲𑁆𑀲𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀦 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀓𑀸𑀬𑀲𑁆𑀲 𑀧𑀲𑁆𑀲𑀤𑁆𑀥𑀢𑁆𑀢𑀸 𑀧𑀲𑁆𑀲𑀤𑁆𑀥𑀓𑀸𑀬𑁄’’𑀢𑀺. 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀓𑁂 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑁂. 𑀓𑀸𑀫𑀸𑀮𑀬𑀸𑀤𑀻𑀦𑀁 𑀅𑀪𑀸𑀯𑀢𑁄 𑀅𑀦𑀸𑀮𑀬𑁄. 𑀦 𑀲𑀭𑀢𑀻𑀢𑀺 𑀦 𑀲𑀯𑀢𑀺. 𑀭𑀸𑀕𑀯𑀲𑁂𑀦 𑀳𑀺 𑀲𑀢𑁆𑀢𑀸 𑀲𑀁𑀲𑀸𑀭𑀫𑀦𑀼𑀲𑀯𑀦𑁆𑀢𑀺. 𑀦 𑀣𑀺𑀦𑁄𑀢𑀺 𑀦 𑀣𑀺𑀦𑀫𑀺𑀤𑁆𑀥𑀘𑀺𑀢𑁆𑀢𑁄. 𑀫𑁄𑀳𑀯𑀲𑁂𑀦 𑀳𑀺 𑀲𑀢𑁆𑀢𑀸 𑀣𑀺𑀦𑀫𑀺𑀤𑁆𑀥𑀁 𑀆𑀧𑀚𑁆𑀚𑀦𑁆𑀢𑀻𑀢𑀺. 𑀤𑀺𑀬𑀟𑁆𑀠𑀓𑀺𑀮𑁂𑀲𑀲𑀳𑀲𑁆𑀲𑀦𑁆𑀢𑀺 𑀔𑀼𑀤𑁆𑀤𑀓𑀯𑀢𑁆𑀣𑀼𑀯𑀺𑀪𑀗𑁆𑀕𑁂 (𑀯𑀺𑀪. 𑁮𑁪𑁨, 𑁯𑁭𑁬) 𑀆𑀕𑀢𑁂𑀲𑀼 𑀅𑀝𑁆𑀞𑀲𑀼 𑀓𑀺𑀮𑁂𑀲𑀲𑀢𑁂𑀲𑀼 𑀅𑀝𑁆𑀞𑀲𑀢𑀁 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀅𑀧𑀦𑁂𑀢𑁆𑀯𑀸 𑀲𑁂𑀲𑀸 𑀧𑀜𑁆𑀜𑀸𑀲𑀸𑀥𑀺𑀓𑀁 𑀲𑀢𑀁 𑀓𑀺𑀮𑁂𑀲𑀸, 𑀢𑁂 𑀩𑁆𑀭𑀳𑁆𑀫𑀚𑀸𑀮𑁂 (𑀤𑀻. 𑀦𑀺. 𑁧.𑁩𑁧) 𑀆𑀕𑀢𑀸𑀳𑀺 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀻𑀳𑀺 𑀲𑀳 𑀧𑀜𑁆𑀘𑀧𑀜𑁆𑀜𑀸𑀲𑀸𑀥𑀺𑀓𑀁 𑀲𑀢𑁆𑀢𑀲𑀢𑀁 𑀳𑁄𑀢𑀺; 𑀢𑀸 𑀘 𑀉𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀤𑀺𑀕𑀼𑀡𑀺𑀢𑀸 𑀤𑀺𑀬𑀟𑁆𑀠𑀓𑀺𑀮𑁂𑀲𑀲𑀳𑀲𑁆𑀲𑀁 𑀤𑀲𑀸𑀥𑀺𑀓𑀁 𑀳𑁄𑀢𑀺; 𑀢𑀁 𑀅𑀧𑁆𑀧𑀓𑀁 𑀧𑀦 𑀊𑀦𑀫𑀥𑀺𑀓𑀁 𑀯𑀸 𑀕𑀡𑀦𑀼𑀧𑀕𑀁 𑀦 𑀳𑁄𑀢𑀻𑀢𑀺 ‘‘𑀤𑀺𑀬𑀟𑁆𑀠𑀓𑀺𑀮𑁂𑀲𑀲𑀳𑀲𑁆𑀲’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀢𑀭𑁂𑀲𑀁 𑀅𑀢𑀻𑀢𑀸𑀤𑀺𑀪𑀸𑀯𑀸𑀫𑀲𑀦𑀢𑁄 𑀅𑀕𑁆𑀕𑀳𑀡𑀁 𑀧𑀳𑀸𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀅𑀪𑀺𑀥𑀫𑁆𑀫𑀝𑀻𑀓𑀸𑀬𑀁 (𑀥. 𑀲. 𑀅𑀦𑀼𑀝𑀻. 𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀧𑀞𑀫𑀧𑀤𑁂𑀦𑀸𑀢𑀺 ‘‘𑀦 𑀓𑀼𑀧𑁆𑀧𑀢𑀻’’𑀢𑀺 𑀇𑀫𑀺𑀦𑀸 𑀧𑀤𑁂𑀦. 𑀤𑀼𑀢𑀺𑀬𑁂𑀦𑀸𑀢𑀺 ‘‘𑀦 𑀲𑀭𑀢𑀻’’𑀢𑀺 𑀧𑀤𑁂𑀦. 𑀢𑀢𑀺𑀬𑁂𑀦𑀸𑀢𑀺 ¶ ‘‘𑀦 𑀣𑀺𑀦𑁄’’𑀢𑀺 𑀧𑀤𑁂𑀦. 𑀦𑀻𑀯𑀭𑀡𑀧𑁆𑀧𑀳𑀸𑀦𑁂𑀦 𑀔𑀻𑀡𑀸𑀲𑀯𑀢𑀁 𑀤𑀲𑁆𑀲𑁂𑀢𑀺, 𑀅𑀦𑀯𑀲𑁂𑀲𑀢𑁄 𑀦𑀻𑀯𑀭𑀡𑀸𑀦𑀁 𑀅𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀁 𑀅𑀥𑀺𑀧𑁆𑀧𑁂𑀢𑀁.

𑀧𑀜𑁆𑀘𑀤𑁆𑀯𑀸𑀭𑀺𑀓𑀓𑀺𑀮𑁂𑀲𑁄𑀖𑀁 𑀢𑀺𑀡𑁆𑀡𑁄𑀢𑀺 𑀙𑀦𑁆𑀦𑀁 𑀤𑁆𑀯𑀸𑀭𑀸𑀦𑀁 𑀯𑀲𑁂𑀦 𑀧𑀯𑀢𑁆𑀢𑀦𑀓𑀺𑀮𑁂𑀲𑁄𑀖𑀁 𑀢𑀭𑀺𑀢𑁆𑀯𑀸 𑀞𑀺𑀢𑁄. 𑀓𑀸𑀫𑁄𑀖𑀤𑀺𑀝𑁆𑀞𑁄𑀖𑀪𑀯𑁄𑀖𑀝𑁆𑀞𑀓𑀺𑀮𑁂𑀲𑀪𑀸𑀯𑀢𑁄 ‘‘𑀧𑀜𑁆𑀘𑁄𑀖𑀕𑁆𑀕𑀳𑀡𑁂𑀦 𑀯𑀸 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀻’’𑀢𑀺 𑀆𑀳. 𑀭𑀽𑀧𑀭𑀸𑀕𑀸𑀤𑀬𑁄 𑀯𑀺𑀲𑁂𑀲𑀢𑁄 𑀦 𑀧𑀜𑁆𑀘𑀤𑁆𑀯𑀸𑀭𑀺𑀓𑀸𑀢𑀺 𑀯𑀼𑀢𑁆𑀢𑀁 ‘‘𑀙𑀝𑁆𑀞𑀕𑁆𑀕𑀳𑀡𑁂𑀦 𑀧𑀜𑁆𑀘𑀼𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀻’’𑀢𑀺.

𑀫𑀘𑁆𑀘𑀼𑀭𑀸𑀚𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑁂 𑀲𑀸𑀫𑀺𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀘𑁆𑀘𑀼𑀭𑀸𑀚𑀲𑁆𑀲 𑀳𑀢𑁆𑀣𑀢𑁄’’𑀢𑀺 𑀆𑀳. 𑀦𑀬𑀫𑀸𑀦𑀸𑀦𑀦𑁆𑀢𑀺 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀦𑀬𑀫𑀸𑀦𑁂𑀲𑀽’’𑀢𑀺.

𑀊𑀳𑀘𑁆𑀘𑀸𑀢𑀺 ¶ 𑀩𑀼𑀤𑁆𑀥𑀁 𑀦𑀺𑀲𑁆𑀲𑀸𑀬. ‘‘𑀇𑀤𑀫𑀯𑁄𑀘𑀸’’𑀢𑀺 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀏𑀢𑁂𑀦 𑀲𑀁𑀬𑀼𑀢𑁆𑀢𑁂𑀲𑀼 𑀅𑀬𑀁 𑀦𑀺𑀕𑀫𑀦𑀧𑀸𑀴𑀺, 𑀳𑁂𑀝𑁆𑀞𑀸 𑀅𑀦𑀸𑀕𑀢𑀦𑀬𑀢𑁆𑀢𑀸 𑀧𑀦 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀦 𑀮𑀺𑀔𑀻𑀬𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀤𑀤𑁆𑀤𑀮𑁆𑀮𑀫𑀸𑀦𑀸𑀢𑀺 𑀚𑀚𑁆𑀚𑀓𑀸𑀭𑀲𑁆𑀲 𑀳𑀺 𑀤𑀤𑁆𑀤𑀓𑀸𑀭𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁄. 𑀢𑁂𑀦𑀸𑀳 ‘‘𑀅𑀢𑀺𑀯𑀺𑀬 𑀚𑀮𑀫𑀸𑀦𑀸’’𑀢𑀺. 𑀦𑀻𑀳𑀭𑀻𑀢𑀺 𑀢𑀸𑀲𑀁 𑀓𑀸𑀬𑀯𑀘𑀻𑀯𑀺𑀓𑀸𑀭𑀁 𑀦 𑀫𑀦𑀲𑀺𑀓𑀭𑁄𑀦𑁆𑀢𑁄 𑀢𑀺𑀡𑀸𑀬𑀧𑀺 𑀅𑀫𑀜𑁆𑀜𑀫𑀸𑀦𑁄𑀯 𑀅𑀦𑀧𑁂𑀓𑁆𑀔𑁂𑀦𑁂𑀯 𑀦𑀻𑀳𑀭𑀺. 𑀨𑀮𑀢𑁄 𑀪𑀝𑁆𑀞𑀦𑁆𑀢𑀺 𑀨𑀮𑀲𑀺𑀧𑀸𑀝𑀺𑀓𑀢𑁄 𑀪𑀝𑁆𑀞𑀁. 𑀓𑀼𑀡𑁆𑀟𑀢𑀺𑀡𑀸𑀤𑀺𑀕𑀘𑁆𑀙𑀢𑀽𑀮𑀁 𑀧𑁄𑀝𑀓𑀺𑀢𑀽𑀮𑀁.

𑀫𑀸𑀭𑀥𑀻𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀫𑀸𑀭𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁫. 𑀪𑀺𑀓𑁆𑀔𑀼𑀦𑀻𑀲𑀁𑀬𑀼𑀢𑁆𑀢𑀁

𑁧. 𑀆𑀴𑀯𑀺𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁨. 𑀆𑀴𑀯𑀺𑀬𑀁 ¶ ¶ 𑀚𑀸𑀢𑀸𑀢𑀺 𑀆𑀴𑀯𑀺𑀬𑀁 𑀯𑀺𑀚𑀸𑀬𑀺𑀢𑁆𑀯𑀸 𑀲𑀁𑀯𑀟𑁆𑀠𑀫𑀸𑀦𑀸. 𑀢𑁂𑀦𑀸𑀳 ‘‘𑀆𑀴𑀯𑀺𑀦𑀕𑀭𑀢𑁄𑀬𑁂𑀯 𑀘 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑀸’’𑀢𑀺. 𑀥𑀦𑀁 𑀲𑀫𑀸𑀤𑀧𑁂𑀢𑁆𑀯𑀸𑀢𑀺 𑀘𑁂𑀢𑀺𑀬𑀲𑁆𑀲 𑀭𑀸𑀚𑀸 𑀏𑀓𑀁 𑀫𑀼𑀔𑀁, 𑀭𑀸𑀚𑀧𑀼𑀢𑁆𑀢𑁄 𑀏𑀓𑀁, 𑀅𑀫𑀘𑁆𑀘𑀸𑀦𑀁 𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸 𑀲𑁂𑀦𑀸𑀧𑀢𑀺 𑀏𑀓𑀁, 𑀚𑀦𑀧𑀤𑀸𑀦𑀁 𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸 𑀲𑁂𑀝𑁆𑀞𑀺 𑀏𑀓𑀦𑁆𑀢𑀺 𑀏𑀯𑀁 𑀘𑀢𑀽𑀲𑀼 𑀫𑀼𑀔𑁂𑀲𑀼 𑀦𑀯𑀓𑀫𑁆𑀫𑁂 𑀓𑀬𑀺𑀭𑀫𑀸𑀦𑁂 𑀲𑁂𑀝𑁆𑀞𑀺𑀦𑀸 𑀕𑀳𑀺𑀢𑀫𑀼𑀔𑁂 𑀓𑀫𑁆𑀫𑁂 𑀑𑀮𑀻𑀬𑀫𑀸𑀦𑁂 𑀏𑀓𑁄 𑀉𑀧𑀸𑀲𑀓𑁄 𑀅𑀭𑀺𑀬𑀲𑀸𑀯𑀓𑁄 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀬𑁄𑀚𑀸𑀧𑁂𑀢𑁆𑀯𑀸 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 ‘‘𑀬𑁄 𑀬𑀁 𑀤𑀸𑀢𑀼𑀁 𑀉𑀲𑁆𑀲𑀳𑀢𑀺 𑀳𑀺𑀭𑀜𑁆𑀜𑀁 𑀯𑀸 𑀲𑀼𑀯𑀡𑁆𑀡𑀁 𑀯𑀸 𑀲𑀢𑁆𑀢𑀯𑀺𑀥𑀭𑀢𑀦𑀁 𑀯𑀸 𑀳𑀭𑀺𑀢𑀸𑀮𑀁 𑀯𑀸 𑀫𑀦𑁄𑀲𑀺𑀮𑀁 𑀯𑀸, 𑀲𑁄 𑀥𑀦𑀁 𑀤𑁂𑀢𑀽’’𑀢𑀺 𑀲𑀫𑀸𑀤𑀧𑁂𑀢𑁆𑀯𑀸 𑀬𑀣𑀸𑀮𑀤𑁆𑀥𑀁 𑀧𑀞𑀫𑀁 𑀓𑀫𑁆𑀫𑀝𑁆𑀞𑀸𑀦𑀁 𑀧𑁂𑀲𑁂𑀢𑁆𑀯𑀸 ‘‘𑀦𑀯𑀓𑀫𑁆𑀫𑀁 𑀦𑀺𑀝𑁆𑀞𑀺𑀢’’𑀦𑁆𑀢𑀺 𑀲𑀼𑀢𑁆𑀯𑀸 𑀏𑀓𑀓𑀁 𑀆𑀕𑀘𑁆𑀙𑀦𑁆𑀢𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀘𑁄𑀭𑀸 𑀧𑀮𑀺𑀩𑀼𑀦𑁆𑀥𑀺𑀢𑁆𑀯𑀸 𑀢𑀢𑁄 𑀓𑀺𑀜𑁆𑀘𑀺𑀧𑀺 𑀥𑀦𑀁 𑀅𑀮𑀪𑀦𑁆𑀢𑀸 ‘‘𑀲𑀘𑁂 𑀦𑀁 𑀫𑀼𑀜𑁆𑀘𑀺𑀲𑁆𑀲𑀸𑀫, 𑀅𑀦𑀢𑁆𑀣𑀁 𑀦𑁄 𑀓𑀭𑁂𑀬𑁆𑀬𑀸’’𑀢𑀺 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀼𑀁. 𑀅𑀦𑀧𑀭𑀸𑀥𑁂 𑀅𑀭𑀺𑀬𑀲𑀸𑀯𑀓𑁂 𑀅𑀧𑀭𑀸𑀥𑀓𑀸 𑀢𑁂 𑀘𑁄𑀭𑀸 𑀅𑀦𑁆𑀥𑀸 𑀚𑀸𑀢𑀸, 𑀢𑀲𑁆𑀫𑀸 𑀢𑀁 𑀞𑀸𑀦𑀁 ‘‘𑀅𑀦𑁆𑀥𑀯𑀦’’𑀦𑁆𑀢𑀺 𑀧𑀜𑁆𑀜𑀸𑀬𑀺𑀢𑁆𑀣𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀔𑀻𑀡𑀸𑀲𑀯𑀸𑀦𑀁 𑀬𑀲𑁆𑀫𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀘𑀺𑀢𑁆𑀢𑀯𑀺𑀯𑁂𑀓𑁄 𑀳𑁄𑀢𑀺𑀬𑁂𑀯 𑀉𑀧𑀥𑀺𑀯𑀺𑀯𑁂𑀓𑀲𑁆𑀲 𑀲𑀺𑀤𑁆𑀥𑀢𑁆𑀢𑀸. 𑀢𑀲𑁆𑀫𑀸 ‘‘𑀓𑀸𑀬𑀯𑀺𑀯𑁂𑀓𑀢𑁆𑀣𑀺𑀦𑀻’’𑀢𑀺 𑀯𑀼𑀢𑁆𑀢𑀁.

𑀦𑀺𑀲𑁆𑀲𑀭𑀡𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀲𑀩𑁆𑀩𑀲𑀗𑁆𑀔𑀢𑀲𑁆𑀲 𑀦𑀺𑀲𑁆𑀲𑀝𑀢𑁆𑀢𑀸. 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦𑀸𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦, 𑀧𑀕𑁂𑀯 𑀫𑀕𑁆𑀕𑀨𑀮𑀜𑀸𑀡𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀺𑀩𑁆𑀩𑀸𑀦𑀧𑀤𑀦𑁆𑀢𑀺 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀥𑀫𑁆𑀫𑀓𑁄𑀝𑁆𑀞𑀸𑀲𑀁. 𑀯𑀺𑀦𑀺𑀯𑀺𑀚𑁆𑀛𑀦𑀝𑁆𑀞𑁂𑀦𑀸𑀢𑀺 𑀳𑀤𑀬𑀁 𑀯𑀺𑀦𑀺𑀯𑀺𑀤𑁆𑀥𑁂𑀦 𑀳𑀤𑀬𑀫𑁆𑀳𑀺 𑀯𑀺𑀚𑁆𑀛𑀺𑀢𑁆𑀯𑀸 𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑁂𑀦 𑀔𑀦𑁆𑀥𑀸𑀦𑀁 𑀏𑀢𑁂 𑀧𑀜𑁆𑀘 𑀓𑀸𑀫𑀸 𑀲𑀢𑁆𑀢𑀺𑀲𑀽𑀮𑀲𑀤𑀺𑀲𑀸. 𑀅𑀥𑀺𑀓𑀼𑀝𑁆𑀝𑀦𑀪𑀡𑁆𑀟𑀺𑀓𑀸𑀢𑀺 𑀆𑀖𑀸𑀢𑀦𑀖𑀝𑀺𑀓𑀸.

𑀆𑀴𑀯𑀺𑀓𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑁄𑀫𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁩. 𑀞𑀸𑀦𑀦𑁆𑀢𑀺 ¶ 𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑀁 𑀯𑀺𑀲𑀬𑀚𑁆𑀛𑀢𑁆𑀢𑀁. 𑀤𑀼𑀧𑁆𑀧𑀲𑀳𑀁 𑀅𑀓𑀫𑁆𑀧𑀺𑀬𑀪𑀸𑀯𑀢𑁆𑀢𑀸. 𑀤𑁆𑀯𑀗𑁆𑀕𑀼𑀮𑀧𑀜𑁆𑀜𑀸𑀬𑀸𑀢𑀺 𑀏𑀢𑁆𑀣 𑀇𑀢𑁆𑀣𑀺𑀬𑁄 𑀳𑀺 𑀤𑀳𑀭𑀓𑀼𑀫𑀸𑀭𑀺𑀓𑀸𑀓𑀸𑀮𑀢𑁄 𑀧𑀝𑁆𑀞𑀸𑀬 ¶ 𑀑𑀤𑀦𑀧𑀘𑀦𑀯𑀺𑀥𑀺𑀁 𑀅𑀦𑀼𑀢𑀺𑀝𑁆𑀞𑀦𑁆𑀢𑀺𑀬𑁄 𑀉𑀓𑁆𑀔𑀮𑀺𑀬𑀁 𑀉𑀤𑀓𑀁 𑀢𑀸𑀧𑁂𑀢𑁆𑀯𑀸 𑀢𑀡𑁆𑀟𑀼𑀮𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀢𑁆𑀢𑀦𑁄 𑀩𑀼𑀤𑁆𑀥𑀺𑀬𑀸 𑀢𑁂𑀲𑀁 𑀧𑀸𑀓𑀓𑀸𑀮𑀧𑁆𑀧𑀫𑀸𑀡𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀢𑀸𑀦𑀺 𑀤𑀩𑁆𑀩𑀺𑀬𑀸 𑀉𑀤𑁆𑀥𑀭𑀺𑀢𑁆𑀯𑀸𑀧𑀺 𑀯𑀡𑁆𑀡𑀲𑀡𑁆𑀞𑀸𑀦𑀕𑁆𑀕𑀳𑀡𑀫𑀢𑁆𑀢𑁂𑀦 𑀧𑀓𑁆𑀓𑀸𑀧𑀓𑁆𑀓𑀪𑀸𑀯𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀓𑁂𑀯𑀮𑀁 𑀧𑀦 𑀤𑁆𑀯𑀻𑀳𑀺 𑀅𑀗𑁆𑀕𑀼𑀮𑀻𑀳𑀺 𑀉𑀧𑁆𑀧𑀻𑀴𑀺𑀢𑀓𑀸𑀮𑁂 𑀏𑀯 𑀚𑀸𑀦𑀦𑁆𑀢𑀺, 𑀢𑀲𑁆𑀫𑀸 𑀤𑁆𑀯𑀻𑀳𑀗𑁆𑀕𑀼𑀮𑀺𑀓𑁂𑀳𑀺 𑀤𑀼𑀩𑁆𑀩𑀮𑀧𑀜𑁆𑀜𑀢𑁆𑀢𑀸 ‘‘𑀤𑁆𑀯𑀗𑁆𑀕𑀼𑀮𑀧𑀜𑁆𑀜𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀨𑀮𑀲𑀫𑀸𑀧𑀢𑁆𑀢𑀺𑀜𑀸𑀡𑀧𑁆𑀧𑀯𑀢𑁆𑀢𑀺𑀓𑀺𑀢𑁆𑀢𑀦𑁂𑀦 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀅𑀲𑀫𑁆𑀫𑁄𑀳𑀯𑀺𑀳𑀸𑀭𑁄 𑀤𑀻𑀧𑀺𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀜𑀸𑀡𑀫𑁆𑀳𑀺 𑀯𑀢𑁆𑀢𑀫𑀸𑀦𑀫𑁆𑀳𑀻𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀜𑀸𑀡𑁂 𑀧𑀯𑀢𑁆𑀢𑀫𑀸𑀦𑁂’’𑀢𑀺. 𑀯𑀺𑀧𑀲𑁆𑀲𑀦𑁆𑀢𑀲𑁆𑀲𑀸𑀢𑀺 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑀢𑁄 𑀯𑀺𑀲𑁂𑀲𑁂𑀦 𑀧𑀲𑁆𑀲𑀦𑁆𑀢𑀲𑁆𑀲 𑀔𑀦𑁆𑀥𑀧𑀜𑁆𑀘𑀓𑀫𑁂𑀯 𑀲𑀘𑁆𑀘𑀸𑀪𑀺𑀲𑀫𑀬𑀢𑁄 𑀧𑀼𑀩𑁆𑀩𑀪𑀸𑀕𑁂 𑀯𑀺𑀧𑀲𑁆𑀲𑀦𑁆𑀢𑀲𑁆𑀲. 𑀅𑀜𑁆𑀜𑀁 𑀯𑀸𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀢𑁄 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀯𑀢𑁆𑀣𑀼𑀁. ‘‘𑀅𑀳𑀁 𑀅𑀲𑁆𑀫𑀻’’𑀢𑀺 𑀫𑀸𑀦𑀤𑀺𑀝𑁆𑀞𑀺𑀕𑀸𑀳𑀢𑀡𑁆𑀳𑀸𑀕𑀸𑀳𑀯𑀲𑁂𑀦 𑀕𑀳𑀺𑀢𑀯𑀢𑁆𑀣𑀼𑀲𑁆𑀫𑀺𑀁 𑀬𑁂𑀯𑀸𑀢𑀺 𑀆𑀳 ‘‘𑀅𑀳𑀁 𑀅𑀲𑁆𑀫𑀻𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦𑀸’’𑀢𑀺.

𑀲𑁄𑀫𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀓𑀺𑀲𑀸𑀕𑁄𑀢𑀫𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁪. ‘‘𑀓𑀺𑀲𑀸𑀕𑁄𑀢𑀫𑀻’’𑀢𑀺 𑀏𑀢𑁆𑀣 𑀓𑀸 𑀧𑀦𑀸𑀬𑀁 𑀓𑀺𑀲𑀸𑀕𑁄𑀢𑀫𑀻, 𑀓𑀺𑀲𑁆𑀲 𑀅𑀬𑀁 𑀪𑀺𑀓𑁆𑀔𑀼𑀦𑀻 𑀳𑀼𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀫𑀢𑁆𑀣𑀓𑀁 𑀧𑀸𑀧𑁂𑀲𑀻𑀢𑀺 𑀢𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀧𑀼𑀩𑁆𑀩𑁂 𑀓𑀺𑀭𑀸’’𑀢𑀺𑀆𑀤𑀺𑀫𑀸𑀭𑀤𑁆𑀥𑀁. 𑀅𑀗𑁆𑀕𑀸𑀭𑀸𑀯𑀸𑀢𑀺 𑀅𑀤𑁆𑀤𑀸𑀭𑀺𑀝𑁆𑀞𑀓𑀯𑀡𑁆𑀡𑀅𑀗𑁆𑀕𑀸𑀭𑀸 𑀏𑀯 𑀚𑀸𑀢𑀸. 𑀤𑀸𑀭𑀼𑀲𑀸𑀓𑀦𑁆𑀢𑀺 𑀅𑀤𑁆𑀥𑀫𑀸𑀲𑀓𑁂𑀦 𑀤𑀸𑀭𑀼𑀁 𑀲𑀸𑀓𑀜𑁆𑀘 𑀆𑀳𑀭𑀺𑀲𑁆𑀲𑀸𑀫𑀻𑀢𑀺 𑀅𑀦𑁆𑀢𑀭𑀸𑀧𑀡𑁂 𑀅𑀦𑁆𑀢𑀭𑀯𑀻𑀣𑀺𑀁 𑀕𑀢𑀸.

𑀲𑀺𑀤𑁆𑀥𑀢𑁆𑀣𑀓𑀦𑁆𑀢𑀺 𑀲𑀸𑀲𑀧𑀁. 𑀲𑀸𑀮𑀸𑀬𑀦𑁆𑀢𑀺 𑀅𑀦𑀸𑀣𑀲𑀸𑀮𑀸𑀬𑀁. 𑀔𑀼𑀭𑀕𑁆𑀕𑁂𑀬𑁂𑀯𑀸𑀢𑀺 𑀔𑀼𑀭𑀲𑀺𑀔𑁂 𑀏𑀯, 𑀓𑁂𑀲𑁄𑀭𑁄𑀳𑀦𑀓𑁆𑀔𑀡𑁂 𑀏𑀯𑀸𑀢𑀺 𑀅𑀢𑁆𑀣𑁄.

𑀏𑀓𑀫𑀸𑀲𑀻𑀢𑀺 𑀏𑀢𑁆𑀣 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀲𑀁𑀳𑀺𑀢𑀸𑀯𑀲𑁂𑀦 𑀘 𑀧𑀼𑀭𑀺𑀫𑀧𑀤𑁂 𑀯𑀸 𑀭𑀲𑁆𑀲𑀢𑁆𑀢𑀁. 𑀧𑀭𑀧𑀤𑁂 𑀯𑀸 𑀤𑀻𑀖𑀢𑁆𑀢𑀦𑁆𑀢𑀺 𑀆𑀳 ‘‘𑀏𑀓𑀸 𑀆𑀲𑀻’’𑀢𑀺. 𑀪𑀸𑀯𑀦𑀧𑀼𑀁𑀲𑀓𑀫𑁂𑀢𑀁 ‘‘𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀧𑀼𑀢𑁆𑀢𑀫𑀭𑀡𑀁 𑀅𑀦𑁆𑀢𑀁 𑀅𑀢𑀻𑀢𑀁 𑀇𑀤𑀸𑀦𑀺 𑀧𑀼𑀢𑁆𑀢𑀫𑀭𑀡𑀲𑁆𑀲 𑀅𑀪𑀸𑀯𑀢𑁄. 𑀢𑁂𑀦𑁂𑀯𑀸𑀳 ‘‘𑀧𑀼𑀢𑁆𑀢𑀫𑀭𑀡𑀁 𑀦𑀸𑀫 𑀦𑀢𑁆𑀣𑀻’’𑀢𑀺. 𑀧𑀼𑀭𑀺𑀲𑀁 𑀕𑀯𑁂𑀲𑀺𑀢𑀼𑀦𑁆𑀢𑀺 𑀬𑀣𑀸 𑀫𑀬𑁆𑀳𑀁 𑀧𑀼𑀭𑀺𑀲𑀕𑀯𑁂𑀲𑀦𑀸 𑀦𑀸𑀫 𑀲𑀩𑁆𑀩𑀲𑁄 𑀦𑀢𑁆𑀣𑀺, 𑀢𑀣𑀸 𑀏𑀯 𑀧𑀼𑀢𑁆𑀢𑀕𑀯𑁂𑀲𑀦𑀸𑀧𑀺 𑀦𑀢𑁆𑀣𑀺, 𑀢𑀲𑁆𑀫𑀸 𑀫𑁂 𑀧𑀼𑀢𑁆𑀢𑀫𑀭𑀡𑀁 𑀏𑀢𑀤𑀦𑁆𑀢𑀁, 𑀲𑀩𑁆𑀩𑁂𑀲𑀼 𑀔𑀦𑁆𑀥𑀸𑀤𑀻𑀲𑀼 𑀪𑀯𑀸𑀤𑀻𑀲𑀼 𑀘 𑀢𑀡𑁆𑀳𑀸𑀦𑀦𑁆𑀤𑀺𑀬𑀸 ¶ 𑀅𑀪𑀸𑀯𑀓𑀣𑀦𑁂𑀦 𑀲𑀩𑁆𑀩𑀲𑀢𑁆𑀢𑁂𑀲𑀼 𑀢𑀡𑁆𑀳𑀸 𑀲𑀩𑁆𑀩𑀲𑁄 ¶ 𑀯𑀺𑀲𑁄𑀲𑀺𑀢𑀸, 𑀢𑀲𑁆𑀲𑀸𑀬𑁂𑀯 𑀓𑀸𑀭𑀓𑀅𑀯𑀺𑀚𑁆𑀚𑀸𑀓𑁆𑀔𑀦𑁆𑀥𑁄 𑀧𑀤𑀸𑀮𑀺𑀢𑁄𑀢𑀺 𑀅𑀢𑁆𑀢𑀦𑁄 𑀦𑀺𑀓𑁆𑀓𑀺𑀮𑁂𑀲𑀢𑀁 𑀧𑀯𑁂𑀤𑁂𑀦𑁆𑀢𑀻 𑀣𑁂𑀭𑀻 𑀲𑀻𑀳𑀦𑀸𑀤𑀁 𑀦𑀤𑀻𑀢𑀺.

𑀓𑀺𑀲𑀸𑀕𑁄𑀢𑀫𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀯𑀺𑀚𑀬𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁫. 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀏𑀢𑀲𑁆𑀲𑀸𑀢𑀺 𑀧𑀜𑁆𑀘𑀗𑁆𑀕𑀁, 𑀧𑀜𑁆𑀘𑀗𑁆𑀕𑀫𑁂𑀯 𑀧𑀜𑁆𑀘𑀗𑁆𑀕𑀺𑀓𑀁, 𑀢𑁂𑀦 𑀧𑀜𑁆𑀘𑀗𑁆𑀕𑀺𑀓𑁂𑀦. 𑀆𑀢𑀢𑀦𑁆𑀢𑀺𑀆𑀤𑀻𑀲𑀼 𑀆𑀢𑀢𑀁 𑀦𑀸𑀫 𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑁂𑀲𑀼 𑀪𑁂𑀭𑀺𑀆𑀤𑀻𑀲𑀼 𑀏𑀓𑀢𑀮𑀁 𑀢𑀽𑀭𑀺𑀬𑀁. 𑀯𑀺𑀢𑀢𑀁 𑀦𑀸𑀫 𑀉𑀪𑀬𑀢𑀮𑀁. 𑀆𑀢𑀢𑀯𑀺𑀢𑀢𑀁 𑀦𑀸𑀫 𑀢𑀦𑁆𑀢𑀺𑀩𑀤𑁆𑀥𑀯𑀻𑀡𑀸𑀤𑀺. 𑀲𑀼𑀲𑀺𑀭𑀁 𑀯𑀁𑀲𑀸𑀤𑀺. 𑀖𑀦𑀁 𑀲𑀫𑁆𑀫𑀸𑀤𑀺. 𑀢𑀢𑀆𑀤𑀺𑀯𑀺𑀲𑁂𑀲𑁄𑀧𑀺 𑀆𑀢𑀢𑀫𑁂𑀯𑀸𑀢𑀺 ‘‘𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑁂𑀲𑀽’’𑀢𑀺 𑀯𑀺𑀲𑁂𑀲𑀦𑀁. 𑀏𑀓𑀢𑀮𑀁 𑀓𑀼𑀫𑁆𑀪𑀣𑀽𑀡𑀤𑀤𑁆𑀤𑀭𑀸𑀤𑀺. 𑀉𑀪𑀬𑀢𑀮𑀁 𑀪𑁂𑀭𑀺𑀫𑀼𑀤𑀺𑀗𑁆𑀕𑀸𑀤𑀺. 𑀘𑀫𑁆𑀫𑀧𑀭𑀺𑀬𑁄𑀦𑀤𑁆𑀥𑀁 𑀲𑁂𑀲𑀁 𑀢𑀦𑁆𑀢𑀺𑀩𑀤𑁆𑀥𑀁 𑀲𑀩𑁆𑀩𑀁 𑀆𑀢𑀢𑀯𑀺𑀢𑀢𑀁 𑀦𑀸𑀫, 𑀕𑁄𑀫𑀼𑀔𑀻𑀆𑀤𑀻𑀦𑀫𑁆𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀯𑀁𑀲𑀸𑀤𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀲𑀗𑁆𑀔𑀲𑀺𑀗𑁆𑀕𑀸𑀦𑀫𑁆𑀧𑀺 𑀲𑀗𑁆𑀕𑀳𑁄. 𑀲𑀫𑁆𑀫𑀢𑀸𑀴-𑀓𑀁𑀲𑀢𑀸𑀴-𑀲𑀺𑀮𑀸𑀢𑀸𑀴-𑀲𑀮𑀸𑀓𑀢𑀸𑀴𑀸𑀤𑀺 𑀲𑀫𑁆𑀫𑀸𑀤𑀺 𑀦𑀸𑀫. 𑀢𑀢𑁆𑀣 𑀲𑀫𑁆𑀫𑀢𑀸𑀴𑀁 𑀦𑀸𑀫 𑀤𑀡𑁆𑀟𑀫𑀬𑀢𑀸𑀴𑀁, 𑀓𑀁𑀲𑀫𑀬𑀢𑀸𑀴𑀁 𑀓𑀁𑀲𑀢𑀸𑀴𑀁, 𑀲𑀺𑀮𑀸𑀬𑀁 𑀅𑀬𑁄𑀧𑀢𑁆𑀢𑁂𑀦 𑀘 𑀢𑀸𑀴𑀦𑀢𑀸𑀴𑀁. 𑀲𑀩𑁆𑀩𑁂 𑀓𑀸𑀫𑀕𑀼𑀡𑁂. 𑀉𑀕𑁆𑀖𑀭𑀺𑀢𑀧𑀕𑁆𑀖𑀭𑀺𑀢𑀝𑁆𑀞𑁂𑀦𑀸𑀢𑀺 𑀉𑀧𑀭𑀺 𑀖𑀭𑀡𑁂𑀦 𑀘 𑀯𑀺𑀲𑁆𑀲𑀦𑁆𑀤𑀦𑁂𑀦 𑀘. 𑀏𑀯𑀦𑁆𑀢𑀺 ‘‘𑀇𑀫𑀺𑀦𑀸 𑀧𑀽𑀢𑀺𑀓𑀸𑀬𑁂𑀦𑀸’’𑀢𑀺. 𑀅𑀭𑀽𑀧𑀝𑁆𑀞𑀸𑀬𑀺𑀦𑁄𑀢𑀺 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑁂𑀦𑀸𑀬𑀁 𑀥𑀫𑁆𑀫𑀤𑁂𑀲𑀦𑀸𑀢𑀺 𑀆𑀳 ‘‘𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀭𑀽𑀧𑀸𑀭𑀽𑀧𑀪𑀯𑁂𑀲𑀽’’𑀢𑀺. 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀭𑀽𑀧𑀸𑀭𑀽𑀧𑀪𑀯𑀸𑀦𑀁 𑀕𑀳𑀺𑀢𑀢𑁆𑀢𑀸. 𑀪𑀯𑀪𑀸𑀯𑀲𑀸𑀫𑀜𑁆𑀜𑀢𑁄, 𑀢𑀤𑀥𑀺𑀝𑁆𑀞𑀸𑀦𑀢𑁄 𑀕𑀳𑀺𑀢𑁂 𑀓𑀸𑀫𑀪𑀯𑁂. 𑀅𑀯𑀺𑀚𑁆𑀚𑀸𑀢𑀫𑁄 𑀯𑀺𑀳𑀢𑁄 𑀅𑀕𑁆𑀕𑀫𑀕𑁆𑀕𑁂𑀦 𑀲𑀫𑀼𑀕𑁆𑀖𑀸𑀢𑀺𑀢𑀢𑁆𑀢𑀸.

𑀯𑀺𑀚𑀬𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀉𑀧𑁆𑀧𑀮𑀯𑀡𑁆𑀡𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁬. 𑀅𑀕𑁆𑀕𑀢𑁄 ¶ 𑀧𑀝𑁆𑀞𑀸𑀬𑀸𑀢𑀺 𑀲𑀩𑁆𑀩𑀅𑀕𑁆𑀕𑀢𑁄 𑀧𑀪𑀼𑀢𑀺 𑀬𑀸𑀯 𑀫𑀽𑀮𑀸 𑀅𑀦𑁆𑀢𑀭𑀸𑀬𑀼𑀢𑁆𑀢𑀁 𑀲𑀫𑁆𑀫𑀤𑁂𑀯 𑀧𑀼𑀧𑁆𑀨𑀺𑀢𑀁 𑀲𑀸𑀮𑀭𑀼𑀓𑁆𑀔𑀁. 𑀯𑀡𑁆𑀡𑀥𑀸𑀢𑀼𑀲𑀻𑀲𑁂𑀦 𑀯𑀡𑁆𑀡𑀥𑀸𑀢𑀼𑀲𑀫𑁆𑀧𑀦𑁆𑀦𑀁 𑀤𑀼𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀯𑀤𑀢𑀻𑀢𑀺 𑀆𑀳 ‘‘𑀢𑀬𑀸 𑀲𑀤𑀺𑀲𑀸 𑀅𑀜𑁆𑀜𑀸 𑀪𑀺𑀓𑁆𑀔𑀼𑀦𑀻 𑀦𑀢𑁆𑀣𑀻’’𑀢𑀺. 𑀧𑀔𑀼𑀫𑀲𑀻𑀲𑁂𑀦 𑀅𑀓𑁆𑀔𑀺𑀪𑀡𑁆𑀟𑀁 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀧𑀔𑀼𑀫𑀦𑁆𑀢𑀭𑀺𑀓𑀸𑀬𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀅𑀓𑁆𑀔𑀻𑀦𑀁 𑀫𑀚𑁆𑀛𑁂’’𑀢𑀺. 𑀦𑀸𑀲𑀯𑀁𑀲𑁂𑀢𑀺 𑀦𑀸𑀲𑀯𑀁𑀲𑀫𑀽𑀮𑁂. ‘‘𑀦 𑀧𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀅𑀤𑀲𑁆𑀲𑀦𑁂 𑀓𑀸𑀭𑀡𑀁 𑀆𑀳 ‘‘𑀯𑀲𑀻𑀪𑀽𑀢𑀫𑁆𑀳𑀻’’𑀢𑀺.

𑀉𑀧𑁆𑀧𑀮𑀯𑀡𑁆𑀡𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀘𑀸𑀮𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁭. 𑀇𑀤𑀦𑁆𑀢𑀺 ¶ 𑀇𑀤𑀁 𑀤𑀲𑁆𑀲𑀦𑀁. 𑀕𑀸𑀳𑀸𑀧𑁂𑀲𑀻𑀢𑀺 𑀲𑀫𑀸𑀤𑀸𑀧𑁂𑀲𑀺 ‘‘𑀚𑀸𑀢𑀺𑀁 𑀫𑀸 𑀭𑁄𑀘𑀸’’𑀢𑀺. 𑀅𑀜𑁆𑀜𑀦𑁆𑀢𑀺 𑀩𑀦𑁆𑀥𑀯𑀥𑀢𑁄 𑀅𑀜𑁆𑀜𑀁 𑀙𑁂𑀤𑀦𑀸𑀤𑀺𑀁. 𑀦𑀺𑀯𑁂𑀲𑁂𑀲𑀻𑀢𑀺 𑀧𑀯𑀺𑀲𑀸𑀧𑁂𑀲𑀺.

𑀘𑀸𑀮𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀉𑀧𑀘𑀸𑀮𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁮. 𑀧𑀼𑀦𑀧𑁆𑀧𑀼𑀦𑀁…𑀧𑁂… 𑀆𑀕𑀘𑁆𑀙𑀦𑁆𑀢𑀺 𑀓𑀸𑀭𑀡𑀲𑁆𑀲 𑀅𑀲𑀫𑀽𑀳𑀢𑀢𑁆𑀢𑀸. 𑀲𑀦𑁆𑀢𑀸𑀧𑀺𑀢𑁄 𑀓𑀺𑀮𑁂𑀲𑀲𑀦𑁆𑀢𑀸𑀧𑁂𑀳𑀺. 𑀅𑀕𑀢𑀻𑀢𑀺 𑀅𑀯𑀺𑀲𑀬𑁄.

𑀉𑀧𑀘𑀸𑀮𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀻𑀲𑀼𑀧𑀘𑀸𑀮𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁯. 𑀲𑀫𑀡𑀺𑀲𑀤𑀺𑀲𑀸𑀢𑀺 𑀲𑀫𑀡𑀮𑀺𑀗𑁆𑀕𑀲𑁆𑀲 𑀥𑀸𑀭𑀡𑁂𑀦 𑀲𑀫𑀡𑀺𑀲𑀤𑀺𑀲𑀸, 𑀓𑀲𑁆𑀲𑀘𑀺𑀧𑀺 𑀧𑀸𑀲𑀡𑁆𑀟𑀲𑁆𑀲 𑀅𑀭𑀼𑀘𑁆𑀘𑀦𑀢𑁄 𑀫𑁄𑀦𑀫𑀕𑁆𑀕𑀲𑁆𑀲 𑀅𑀧𑁆𑀧𑀝𑀺𑀧𑀚𑁆𑀚𑀦𑀢𑁄 𑀢𑀯 𑀲𑀫𑀡𑀺𑀪𑀸𑀯𑀁 𑀦𑀸𑀦𑀼𑀧𑀲𑁆𑀲𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀸𑀲𑀁 𑀟𑁂𑀦𑁆𑀢𑀻𑀢𑀺 𑀧𑀸𑀲𑀁 𑀲𑀚𑁆𑀚𑁂𑀦𑁆𑀢𑀺, 𑀬𑀣𑀸 ¶ 𑀢𑀢𑁆𑀣 𑀤𑀺𑀝𑁆𑀞𑀺𑀧𑀸𑀲𑁂 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀁 𑀧𑀝𑀺𑀫𑀼𑀓𑁆𑀓𑀁 𑀳𑁄𑀢𑀺, 𑀏𑀯𑀁 𑀲𑀚𑁆𑀚𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸𑀪𑀽𑀢𑀸 𑀘 𑀢𑁂 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑁂 𑀔𑀺𑀢𑁆𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀘𑀺𑀢𑁆𑀢𑁂𑀲𑀼 𑀤𑀺𑀝𑁆𑀞𑀺𑀧𑀸𑀲𑀁 𑀔𑀺𑀧𑀦𑁆𑀢𑀻𑀢𑀺 𑀅𑀢𑁆𑀣𑁄’’𑀢𑀺. 𑀧𑀸𑀲𑁂 𑀫𑁄𑀘𑁂𑀢𑀻𑀢𑀺 𑀤𑀺𑀝𑁆𑀞𑀺𑀧𑀸𑀲𑁂 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀲𑀦𑁆𑀢𑀸𑀦𑀢𑁄 𑀦𑀻𑀳𑀭𑀢𑀺 𑀥𑀫𑁆𑀫𑀲𑀼𑀥𑀫𑁆𑀫𑀢𑀸𑀬. 𑀢𑀲𑁆𑀫𑀸𑀢𑀺 𑀧𑀸𑀲𑀫𑁄𑀘𑀦𑀢𑁄 𑀧𑀸𑀲𑀡𑁆𑀟𑁄𑀢𑀺 𑀦 𑀯𑀼𑀘𑁆𑀘𑀢𑀺. ‘‘𑀇𑀢𑁄 𑀩𑀳𑀺𑀤𑁆𑀥𑀸𑀬𑁂𑀯 𑀧𑀸𑀲𑀡𑁆𑀟𑀸 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀕𑀫𑀦𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀲𑀩𑁆𑀩𑁂𑀧𑀺 𑀩𑀸𑀳𑀺𑀭𑀓𑀲𑀫𑀬𑁂 𑀲𑀦𑁆𑀥𑀸𑀬 𑀘𑀽𑀴𑀲𑀻𑀳𑀦𑀸𑀤𑀲𑀼𑀢𑁆𑀢𑁂 ‘‘𑀙𑀦𑁆𑀦𑀯𑀼𑀢𑀺 𑀧𑀸𑀲𑀡𑁆𑀟𑀸’’𑀢𑀺 𑀯𑀼𑀢𑁆𑀢𑀁. 𑀧𑀲𑀻𑀤𑀦𑁆𑀢𑀻𑀢𑀺 𑀤𑀺𑀝𑁆𑀞𑀺𑀧𑀗𑁆𑀓𑁂 𑀲𑀁𑀲𑀸𑀭𑀧𑀗𑁆𑀓𑁂 𑀘 𑀧𑀓𑀸𑀭𑁂𑀳𑀺 𑀅𑀕𑀸𑀥𑀸 𑀑𑀲𑀻𑀤𑀦𑁆𑀢𑀺.

𑀅𑀪𑀺𑀪𑀯𑀺𑀢𑁆𑀯𑀸𑀢𑀺 𑀲𑀩𑁆𑀩𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑁂𑀦 𑀅𑀪𑀺𑀪𑀼𑀬𑁆𑀬 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀅𑀚𑀺𑀢𑁄𑀢𑀺 𑀅𑀚𑀺𑀦𑀺 𑀅𑀯𑀺𑀚𑀬𑀢𑁆𑀢𑀸. 𑀲𑀩𑁆𑀩𑀸𑀦𑀺 𑀅𑀓𑀼𑀲𑀮𑀓𑀫𑁆𑀫𑀸𑀦𑀺 𑀓𑀼𑀲𑀮𑀓𑀫𑁆𑀫𑀸𑀦𑀺 𑀘 𑀔𑀻𑀡𑀸𑀦𑀺 𑀏𑀢𑁆𑀣𑀸𑀢𑀺 𑀲𑀩𑁆𑀩𑀓𑀫𑁆𑀫𑀓𑁆𑀔𑀬𑁄, 𑀅𑀭𑀳𑀢𑁆𑀢𑀁. 𑀉𑀧𑀥𑀬𑁄 𑀲𑀫𑁆𑀫𑀤𑁂𑀯 𑀔𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀉𑀧𑀥𑀺𑀲𑀗𑁆𑀔𑀬𑁄, 𑀦𑀺𑀩𑁆𑀩𑀸𑀦𑀁.

𑀲𑀻𑀲𑀼𑀧𑀘𑀸𑀮𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀲𑁂𑀮𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁦. 𑀓𑁂𑀦𑀺𑀤𑀁 ¶ 𑀧𑀓𑀢𑀁 𑀩𑀺𑀫𑁆𑀩𑀦𑁆𑀢𑀺 𑀇𑀤𑀁 𑀅𑀢𑁆𑀢𑀪𑀸𑀯𑀲𑀜𑁆𑀜𑀺𑀢𑀁 𑀩𑀺𑀫𑁆𑀩𑀁 𑀩𑁆𑀭𑀳𑁆𑀫𑀸-𑀯𑀺𑀲𑀡𑀼𑀧𑀼𑀭𑀺𑀲-𑀧𑀚𑀸𑀧𑀢𑀺𑀆𑀤𑀻𑀲𑀼 𑀓𑁂𑀦 𑀓𑀢𑀁 𑀦𑀺𑀫𑁆𑀫𑀺𑀢𑀁 𑀦𑀺𑀩𑁆𑀩𑀢𑁆𑀢𑀺𑀢𑀦𑁆𑀢𑀺 𑀓𑀢𑁆𑀢𑀩𑁆𑀩𑀫𑁄𑀳𑀁 𑀦𑀸𑀫 𑀓𑀸𑀢𑀼𑀓𑀸𑀫𑁄 𑀧𑀼𑀘𑁆𑀙𑀢𑀺. 𑀅𑀖𑀦𑁆𑀢𑀺 𑀅𑀖𑀯𑀢𑁆𑀣𑀼. 𑀢𑁂𑀦𑀸𑀳 ‘‘𑀤𑀼𑀓𑁆𑀔𑀧𑀢𑀺𑀝𑁆𑀞𑀸𑀦𑀢𑁆𑀢𑀸’’𑀢𑀺. 𑀳𑁂𑀢𑀼𑀦𑀺𑀭𑁄𑀥𑁂𑀦𑀸𑀢𑀺 𑀢𑀡𑁆𑀳𑀸𑀲𑀗𑁆𑀔𑀢𑀲𑁆𑀲 𑀳𑁂𑀢𑀼𑀦𑁄 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁂𑀦. 𑀧𑀘𑁆𑀘𑀬𑀯𑁂𑀓𑀮𑁆𑀮𑁂𑀦𑀸𑀢𑀺 𑀢𑀤𑀯𑀲𑀺𑀝𑁆𑀞𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀸𑀤𑀺𑀧𑀘𑁆𑀘𑀬𑀲𑁆𑀲 𑀯𑁂𑀓𑀮𑁆𑀮𑀪𑀸𑀯𑁂𑀦, 𑀅𑀧𑀘𑁆𑀘𑀬𑀪𑀸𑀯𑀽𑀧𑀕𑀫𑀦𑁂𑀦𑀸𑀢𑀺 𑀅𑀢𑁆𑀣𑁄.

𑀲𑁂𑀮𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀯𑀚𑀺𑀭𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁧. 𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑁂𑀢𑀺 𑀭𑀽𑀧𑀸𑀭𑀽𑀧𑀯𑀺𑀪𑀸𑀕𑁂 𑀓𑀺𑀮𑁂𑀲𑀲𑀗𑁆𑀔𑀸𑀭𑀲𑀫𑀽𑀳𑁂. 𑀧𑀭𑀫𑀢𑁆𑀣𑀢𑁄𑀢𑀺 𑀲𑀪𑀸𑀯𑁂𑀦. 𑀬𑀣𑀸 𑀦 𑀳𑀺 𑀲𑀢𑁆𑀢𑀲𑀜𑁆𑀜𑀺𑀢𑀲𑀗𑁆𑀔𑀸𑀭𑀧𑀼𑀜𑁆𑀚𑁄 𑀦𑀸𑀫 𑀧𑀭𑀫𑀢𑁆𑀣𑀢𑁄 ¶ 𑀉𑀧𑀮𑀩𑁆𑀪𑀢𑀺, 𑀏𑀯𑀁 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑁄 𑀦𑀸𑀫 𑀓𑁄𑀘𑀺 𑀦 𑀉𑀧𑀮𑀩𑁆𑀪𑀢𑀺 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀯𑀺𑀚𑁆𑀚𑀫𑀸𑀦𑁂𑀲𑀽𑀢𑀺 𑀬𑀣𑀸𑀧𑀘𑁆𑀘𑀬𑀲𑀫𑁆𑀧𑀢𑁆𑀢𑀺𑀬𑀸 𑀮𑀩𑁆𑀪𑀫𑀸𑀦𑁂𑀲𑀼. 𑀢𑁂𑀦𑀸𑀓𑀸𑀭𑁂𑀦𑀸𑀢𑀺 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀆𑀓𑀸𑀭𑁂𑀦. 𑀯𑀯𑀢𑁆𑀣𑀺𑀢𑁂𑀲𑀽𑀢𑀺 𑀧𑀘𑁆𑀘𑁂𑀓𑀁 𑀧𑀘𑁆𑀘𑀬𑀯𑀺𑀲𑁂𑀲𑀲𑀫𑀼𑀝𑁆𑀞𑀺𑀢𑀁 𑀲𑀡𑁆𑀞𑀸𑀦𑀯𑀺𑀲𑁂𑀲𑀁 𑀉𑀧𑀸𑀤𑀸𑀬 ‘‘𑀧𑀼𑀭𑀺𑀲𑁄 𑀳𑀢𑁆𑀣𑀻 𑀅𑀲𑁆𑀲𑁄’’𑀢𑀺𑀆𑀤𑀺𑀦𑀸 𑀅𑀪𑀺𑀲𑀗𑁆𑀕𑀢𑁄 𑀧𑀯𑀢𑁆𑀢𑁂𑀲𑀼. 𑀲𑀫𑁆𑀫𑀼𑀢𑀻𑀢𑀺 𑀲𑀢𑁆𑀢𑁄𑀢𑀺 𑀯𑁄𑀳𑀸𑀭𑁄. 𑀢𑁂𑀦𑀸𑀳 ‘‘𑀲𑀫𑀜𑁆𑀜𑀸𑀫𑀢𑁆𑀢𑀫𑁂𑀯𑀸’’𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑀤𑀼𑀓𑁆𑀔𑀦𑁆𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀲𑀜𑁆𑀜𑀺𑀢𑀁 𑀤𑀼𑀓𑁆𑀔𑀁. 𑀯𑀼𑀢𑁆𑀢𑀁 𑀳𑁂𑀢𑀁 𑀪𑀕𑀯𑀢𑀸 ‘‘𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸’’𑀢𑀺 (𑀤𑀻. 𑀦𑀺. 𑁨.𑁩𑁮𑁭; 𑀫. 𑀦𑀺. 𑁧.𑁧𑁨𑁦; 𑁩.𑁩𑁭𑁩; 𑀯𑀺𑀪. 𑁨𑁦𑁨) 𑀅𑀜𑁆𑀜𑁄 𑀦𑁂𑀯 𑀲𑀫𑁆𑀪𑁄𑀢𑀺 𑀬𑀣𑀸𑀯𑀼𑀢𑁆𑀢𑀤𑀼𑀓𑁆𑀔𑀢𑁄 𑀅𑀜𑁆𑀜𑀲𑁆𑀲 𑀲𑀗𑁆𑀔𑀢𑀥𑀫𑁆𑀫𑀲𑁆𑀲 𑀅𑀪𑀸𑀯𑀢𑁄. 𑀦 𑀦𑀺𑀭𑀼𑀚𑁆𑀛𑀢𑀻𑀢𑀺 𑀢𑀢𑁄 𑀅𑀜𑁆𑀜𑀁 𑀦 𑀦𑀺𑀭𑀼𑀚𑁆𑀛𑀢𑀺, 𑀉𑀧𑁆𑀧𑀸𑀤𑀢𑁄 𑀳𑁄𑀢𑀺 𑀦𑀺𑀭𑁄𑀥𑁄𑀢𑀺.

𑀯𑀚𑀺𑀭𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀪𑀺𑀓𑁆𑀔𑀼𑀦𑀻𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁬. 𑀩𑁆𑀭𑀳𑁆𑀫𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧. 𑀩𑁆𑀭𑀳𑁆𑀫𑀸𑀬𑀸𑀘𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁨. 𑀧𑀭𑀺𑀯𑀺𑀢𑀓𑁆𑀓𑁄 ¶ ¶ 𑀉𑀤𑀧𑀸𑀤𑀻𑀢𑀺 𑀥𑀫𑁆𑀫𑀕𑀫𑁆𑀪𑀻𑀭𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀳𑁂𑀢𑀼𑀓𑁄 𑀥𑀫𑁆𑀫𑀤𑁂𑀲𑀦𑀸𑀬 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀉𑀧𑁆𑀧𑀚𑁆𑀚𑀺. 𑀅𑀬𑀁 𑀧𑀭𑀺𑀯𑀺𑀢𑀓𑁆𑀓𑁄 𑀓𑀲𑁆𑀫𑀸 𑀉𑀤𑀧𑀸𑀤𑀺? 𑀓𑀢𑁆𑀣 𑀘 𑀉𑀤𑀧𑀸𑀤𑀻𑀢𑀺 𑀢𑀁 𑀲𑀩𑁆𑀩𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀲𑀩𑁆𑀩𑀩𑀼𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑁄𑀢𑀺 𑀆𑀘𑀭𑀺𑀢𑁄 𑀘𑁂𑀯 𑀆𑀘𑀭𑀦𑁆𑀢𑁂𑀳𑀺 𑀘 𑀲𑀫𑁆𑀫𑀤𑁂𑀯 𑀆𑀘𑀭𑀺𑀢𑁄𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀅𑀬𑀁 𑀧𑀭𑀺𑀯𑀺𑀢𑀓𑁆𑀓𑁄 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀧𑀞𑀫𑀸𑀪𑀺𑀲𑀫𑁆𑀩𑁄𑀥𑀺𑀬𑀁 𑀉𑀧𑁆𑀧𑀚𑁆𑀚𑀢𑁂𑀯𑀸𑀢𑀺 𑀅𑀬𑀫𑁂𑀢𑁆𑀣 𑀥𑀫𑁆𑀫𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂𑀢𑀺 𑀇𑀤𑀁 𑀲𑀢𑁆𑀢𑀫𑀲𑀢𑁆𑀢𑀸𑀳𑀢𑁄 𑀧𑀭𑀁 𑀲𑀢𑁆𑀢𑀸𑀳𑀩𑁆𑀪𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀁, 𑀦 𑀧𑀦 𑀇𑀢𑀭𑁂𑀲𑀁 𑀯𑀺𑀬 𑀅𑀝𑁆𑀞𑀫𑀲𑁆𑀲 𑀦𑀸𑀫 𑀲𑀢𑁆𑀢𑀸𑀳𑀲𑁆𑀲 𑀧𑀯𑀢𑁆𑀢𑀺𑀢𑀲𑁆𑀲 𑀲𑀩𑁆𑀪𑀸𑀯𑀸. 𑀲𑀧𑀘𑁆𑀘𑀕𑁆𑀖𑁂𑀢𑀺 𑀫𑀳𑀕𑁆𑀖𑁂. ‘‘𑀧𑀘𑁆𑀘𑀕𑁆𑀖𑁂’’𑀢𑀺 𑀯𑀸 𑀧𑀸𑀞𑁄, 𑀅𑀪𑀺𑀦𑀯𑁂𑀢𑀺 𑀅𑀢𑁆𑀣𑁄. 𑀲𑁂𑀮𑀫𑀬𑁂𑀢𑀺 𑀫𑀼𑀕𑁆𑀕𑀯𑀡𑁆𑀡𑀲𑀺𑀮𑀸𑀫𑀬𑁂.

𑀧𑀝𑀺𑀯𑀺𑀤𑁆𑀥𑁄𑀢𑀺 𑀲𑀬𑀫𑁆𑀪𑀼𑀜𑀸𑀡𑁂𑀦 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺𑀆𑀤𑀺𑀦𑀸 𑀧𑀝𑀺𑀫𑀼𑀔𑀁 𑀦𑀺𑀩𑁆𑀩𑀺𑀚𑁆𑀛𑀦𑀯𑀲𑁂𑀦 𑀧𑀢𑁆𑀢𑁄, 𑀬𑀸𑀣𑀸𑀯𑀢𑁄 𑀅𑀯𑀩𑀼𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁄𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁄 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑀥𑀫𑁆𑀫𑀲𑁆𑀲 𑀅𑀪𑀸𑀯𑀢𑁄. 𑀕𑀫𑁆𑀪𑀻𑀭𑁄𑀢𑀺 𑀫𑀳𑀸𑀲𑀫𑀼𑀤𑁆𑀤𑁄 𑀯𑀺𑀬 𑀫𑀓𑀲𑀢𑀼𑀡𑁆𑀟𑀲𑀽𑀘𑀺𑀬𑀸 𑀅𑀜𑁆𑀜𑀢𑁆𑀭 𑀲𑀫𑀼𑀧𑀘𑀺𑀢𑀧𑀭𑀺𑀧𑀓𑁆𑀓𑀜𑀸𑀡𑀲𑀫𑁆𑀪𑀸𑀭𑁂𑀳𑀺 𑀅𑀜𑁆𑀜𑁂𑀲𑀁 𑀜𑀸𑀡𑁂𑀦 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑁄. 𑀢𑁂𑀦𑀸𑀳 ‘‘𑀉𑀢𑁆𑀢𑀸𑀦𑀧𑀝𑀺𑀓𑁆𑀔𑁂𑀧𑀯𑀘𑀦𑀫𑁂𑀢’’𑀦𑁆𑀢𑀺. 𑀬𑁄 𑀅𑀮𑀩𑁆𑀪𑀦𑁂𑀬𑁆𑀬𑀧𑀢𑀺𑀝𑁆𑀞𑁄, 𑀲𑁄 𑀑𑀕𑀸𑀳𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀲𑀭𑀽𑀧𑀢𑁄 𑀯𑀺𑀲𑁂𑀲𑀢𑁄 𑀘 𑀧𑀲𑁆𑀲𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀆𑀳 ‘‘𑀕𑀫𑁆𑀪𑀻𑀭𑀢𑁆𑀢𑀸𑀯 𑀤𑀼𑀤𑁆𑀤𑀲𑁄’’𑀢𑀺. 𑀤𑀼𑀓𑁆𑀔𑁂𑀦 𑀤𑀝𑁆𑀞𑀩𑁆𑀩𑁄𑀢𑀺 𑀓𑀺𑀘𑁆𑀙𑁂𑀦 𑀓𑁂𑀦𑀘𑀺 𑀓𑀤𑀸𑀘𑀺𑀤𑁂𑀯 𑀤𑀝𑁆𑀞𑀩𑁆𑀩𑁄. 𑀬𑀁 𑀧𑀦 𑀤𑀝𑁆𑀞𑀼𑀫𑁂𑀯 𑀦 𑀲𑀓𑁆𑀓𑀸, 𑀢𑀲𑁆𑀲 𑀑𑀕𑀸𑀳𑁂𑀢𑁆𑀯𑀸 𑀅𑀦𑀼 𑀅𑀦𑀼 𑀩𑀼𑀚𑁆𑀛𑀦𑀓𑁄 𑀓𑀤𑀸𑀘𑀺 𑀦𑀢𑁆𑀣𑀻𑀢𑀺 𑀆𑀳 ‘‘𑀤𑀼𑀤𑁆𑀤𑀲𑀢𑁆𑀢𑀸𑀯 𑀤𑀼𑀭𑀦𑀼𑀩𑁄𑀥𑁄’’𑀢𑀺. 𑀤𑀼𑀓𑁆𑀔𑁂𑀦 𑀅𑀯𑀩𑀼𑀚𑁆𑀛𑀺𑀢𑀩𑁆𑀩𑁄 𑀅𑀯𑀩𑁄𑀥𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄. 𑀇𑀫𑀲𑁆𑀫𑀺𑀁 𑀞𑀸𑀦𑁂 ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀤𑀼𑀓𑁆𑀓𑀭𑀢𑀭𑀁 𑀯𑀸 𑀤𑀼𑀭𑀪𑀺𑀲𑀫𑁆𑀪𑀯𑀢𑀭𑀁 𑀯𑀸’’𑀢𑀺 (𑀲𑀁. 𑀦𑀺. 𑁫.𑁧𑁧𑁧𑁫) 𑀲𑀼𑀢𑁆𑀢𑀧𑀤𑀁 𑀯𑀢𑁆𑀢𑀩𑁆𑀩𑀁. 𑀲𑀦𑁆𑀢𑀸𑀭𑀫𑁆𑀫𑀡𑀢𑀸𑀬 𑀯𑀸 𑀲𑀦𑁆𑀢𑁄. 𑀦𑀺𑀩𑁆𑀩𑀼𑀢𑀲𑀩𑁆𑀩𑀧𑀭𑀺𑀴𑀸𑀳𑀢𑀸𑀬 𑀦𑀺𑀩𑁆𑀩𑀼𑀢𑁄. 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀧𑀥𑀸𑀦𑀪𑀸𑀯𑀁 𑀦𑀻𑀢𑁄𑀢𑀺 ¶ 𑀯𑀸 𑀧𑀡𑀻𑀢𑁄 ¶ . 𑀅𑀢𑀺𑀢𑁆𑀢𑀺𑀓𑀭𑀡𑀝𑁆𑀞𑁂𑀦 𑀅𑀢𑀧𑁆𑀧𑀓𑁄 𑀲𑀸𑀤𑀼𑀭𑀲𑀪𑁄𑀚𑀦𑀁 𑀯𑀺𑀬. 𑀢𑀢𑁆𑀣 𑀘 𑀦𑀺𑀭𑁄𑀥𑀲𑀘𑁆𑀘𑀁 𑀲𑀦𑁆𑀢𑀁 𑀆𑀭𑀫𑁆𑀫𑀡𑀦𑁆𑀢𑀺 𑀲𑀦𑁆𑀢𑀸𑀭𑀫𑁆𑀫𑀡𑀁, 𑀫𑀕𑁆𑀕𑀲𑀘𑁆𑀘𑀁 𑀲𑀦𑁆𑀢𑀁 𑀲𑀦𑁆𑀢𑀸𑀭𑀫𑁆𑀫𑀡𑀜𑁆𑀘𑀸𑀢𑀺 𑀲𑀦𑁆𑀢𑀸𑀭𑀫𑁆𑀫𑀡𑀁, 𑀅𑀦𑀼𑀧𑀲𑀦𑁆𑀢𑀲𑀪𑀸𑀯𑀸𑀦𑀁 𑀓𑀺𑀮𑁂𑀲𑀸𑀦𑀁 𑀲𑀗𑁆𑀔𑀸𑀭𑀸𑀦𑀜𑁆𑀘 𑀅𑀪𑀸𑀯𑀢𑁄 𑀲𑀦𑁆𑀢𑁄. 𑀦𑀺𑀩𑁆𑀩𑀼𑀢𑀲𑀩𑁆𑀩𑀧𑀭𑀺𑀴𑀸𑀳𑀢𑁆𑀢𑀸 𑀦𑀺𑀩𑁆𑀩𑀼𑀢𑁄. 𑀲𑀦𑁆𑀢𑀧𑀡𑀻𑀢𑀪𑀸𑀯𑁂𑀦𑁂𑀯 𑀢𑀤𑀢𑁆𑀣𑀸𑀬 𑀅𑀲𑁂𑀘𑀦𑀓𑀢𑀸𑀬 𑀅𑀢𑀧𑁆𑀧𑀓𑀢𑀸 𑀤𑀝𑁆𑀞𑀩𑁆𑀩𑀸. 𑀢𑁂𑀦𑀸𑀳 ‘‘𑀇𑀤𑀁 𑀤𑁆𑀯𑀬𑀁 𑀮𑁄𑀓𑀼𑀢𑁆𑀢𑀭𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀉𑀢𑁆𑀢𑀫𑀜𑀸𑀡𑀲𑁆𑀲 𑀯𑀺𑀲𑀬𑀢𑁆𑀢𑀸 𑀦 𑀢𑀓𑁆𑀓𑁂𑀦 𑀅𑀯𑀘𑀭𑀺𑀢𑀩𑁆𑀩𑁄. 𑀢𑀢𑁄 𑀏𑀯 𑀦𑀺𑀧𑀼𑀡𑀜𑀸𑀡𑀕𑁄𑀘𑀭𑀢𑀸𑀬 𑀲𑀡𑁆𑀳𑀲𑀼𑀔𑀼𑀫𑀲𑀪𑀸𑀯𑀢𑁆𑀢𑀸 𑀘 𑀦𑀺𑀧𑀼𑀡𑁄. 𑀩𑀸𑀮𑀸𑀦𑀁 𑀅𑀯𑀺𑀲𑀬𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀏𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑁄. 𑀆𑀮𑀻𑀬𑀦𑁆𑀢𑀺 𑀅𑀪𑀺𑀭𑀫𑀺𑀢𑀩𑁆𑀩𑀝𑁆𑀞𑁂𑀦 𑀲𑁂𑀯𑀻𑀬𑀦𑁆𑀢𑀻𑀢𑀺 𑀆𑀮𑀬𑀸, 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀆𑀮𑀬𑀦𑁆𑀢𑀺 𑀅𑀮𑁆𑀮𑀻𑀬𑀦𑁆𑀢𑀺 𑀅𑀪𑀺𑀭𑀫𑀡𑀯𑀲𑁂𑀦 𑀲𑁂𑀯𑀦𑁆𑀢𑀻𑀢𑀺 𑀆𑀮𑀬𑀸, 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺. 𑀭𑀫𑀦𑁆𑀢𑀻𑀢𑀺 𑀭𑀢𑀺𑀁 𑀯𑀺𑀦𑁆𑀤𑀦𑁆𑀢𑀺 𑀓𑀻𑀴𑀦𑁆𑀢𑀺 𑀮𑀴𑀦𑁆𑀢𑀺. 𑀆𑀮𑀬𑀭𑀢𑀸𑀢𑀺 𑀆𑀮𑀬𑀦𑀺𑀭𑀢𑀸.

𑀞𑀸𑀦𑀁 𑀲𑀦𑁆𑀥𑀸𑀬𑀸𑀢𑀺 𑀞𑀸𑀦𑀲𑀤𑁆𑀤𑀁 𑀲𑀦𑁆𑀥𑀸𑀬, 𑀅𑀢𑁆𑀣𑀓𑁄 𑀧𑀦 𑀞𑀸𑀦𑀦𑁆𑀢𑀺 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀏𑀯 𑀅𑀥𑀺𑀧𑁆𑀧𑁂𑀢𑁄. 𑀢𑀺𑀝𑁆𑀞𑀢𑀺 𑀨𑀮𑀁 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬𑀸𑀢𑀺 𑀳𑀺 𑀞𑀸𑀦𑀁, 𑀲𑀗𑁆𑀔𑀸𑀭𑀸𑀤𑀻𑀦𑀁 𑀧𑀘𑁆𑀘𑀬𑀪𑀽𑀢𑀸 𑀅𑀯𑀺𑀚𑁆𑀚𑀸𑀤𑀬𑁄. 𑀇𑀫𑁂𑀲𑀁 𑀲𑀗𑁆𑀔𑀸𑀭𑀸𑀤𑀻𑀦𑀁 𑀧𑀘𑁆𑀘𑀬𑀸 𑀇𑀤𑀧𑁆𑀧𑀘𑁆𑀘𑀬𑀸, 𑀅𑀯𑀺𑀚𑁆𑀚𑀸𑀤𑀬𑁄. 𑀇𑀤𑀧𑁆𑀧𑀘𑁆𑀘𑀬𑀸 𑀏𑀯 𑀇𑀤𑀧𑁆𑀧𑀘𑁆𑀘𑀬𑀢𑀸 𑀬𑀣𑀸 ‘‘𑀤𑁂𑀯𑁄 𑀏𑀯 𑀤𑁂𑀯𑀢𑀸’’. 𑀇𑀤𑀧𑁆𑀧𑀘𑁆𑀘𑀬𑀸𑀦𑀁 𑀯𑀸 𑀅𑀯𑀺𑀚𑁆𑀚𑀸𑀤𑀻𑀦𑀁 𑀅𑀢𑁆𑀢𑀦𑁄 𑀨𑀮𑀁 𑀧𑀢𑀺 𑀧𑀘𑁆𑀘𑀬𑀪𑀸𑀯𑁄 𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸 𑀇𑀤𑀧𑁆𑀧𑀘𑁆𑀘𑀬𑀢𑀸. 𑀢𑁂𑀦 𑀧𑀭𑀫𑀢𑁆𑀣𑀧𑀘𑁆𑀘𑀬𑀮𑀓𑁆𑀔𑀡𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀧𑀝𑀺𑀘𑁆𑀘 𑀲𑀫𑀼𑀧𑁆𑀧𑀚𑁆𑀚𑀢𑀺 𑀨𑀮𑀁 𑀏𑀢𑀲𑁆𑀫𑀸𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄. 𑀧𑀤𑀤𑁆𑀯𑀬𑁂𑀦𑀧𑀺 𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀝𑁆𑀞𑁄 𑀏𑀯 𑀯𑀺𑀪𑀸𑀯𑀺𑀢𑁄. 𑀢𑁂𑀦𑀸𑀳 ‘‘𑀲𑀗𑁆𑀔𑀸𑀭𑀸𑀤𑀺𑀧𑀘𑁆𑀘𑀬𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀲𑀗𑁆𑀔𑀸𑀭𑀸𑀤𑀻𑀦𑀁 𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀤𑀺𑀧𑀘𑁆𑀘𑀬𑀸, 𑀅𑀯𑀺𑀚𑁆𑀚𑀸𑀤𑀬𑁄. 𑀢𑁂𑀲𑀁 𑀲𑀗𑁆𑀔𑀸𑀭𑀸𑀤𑀺𑀧𑀘𑁆𑀘𑀬𑀸𑀦𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁨.𑁫𑁭𑁨-𑁫𑁭𑁩) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄𑀢𑀺𑀆𑀤𑀺 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑀸𑀤𑀺𑀅𑀪𑀺𑀥𑁂𑀬𑁆𑀬𑀁 𑀲𑀩𑁆𑀩𑀁 𑀅𑀢𑁆𑀣𑀢𑁄 𑀦𑀺𑀩𑁆𑀩𑀸𑀦𑀫𑁂𑀯. 𑀇𑀤𑀸𑀦𑀺 𑀅𑀲𑁆𑀲 𑀦𑀺𑀩𑁆𑀩𑀸𑀦𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀆𑀕𑀫𑁆𑀫𑀸𑀢𑀺 𑀧𑀝𑀺𑀘𑁆𑀘 𑀅𑀭𑀺𑀬𑀫𑀕𑁆𑀕𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀳𑁂𑀢𑀼. 𑀲𑀫𑁆𑀫𑀦𑁆𑀢𑀻𑀢𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀽𑀧𑀲𑀫𑀯𑀲𑁂𑀦 𑀲𑀫𑁆𑀫𑀦𑁆𑀢𑀺. 𑀢𑀣𑀸 𑀲𑀦𑁆𑀢𑀸 𑀘 𑀲𑀯𑀺𑀲𑁂𑀲𑀁 𑀉𑀧𑀲𑀦𑁆𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀯𑀽𑀧𑀲𑀫𑁆𑀫𑀦𑁆𑀢𑀻’’𑀢𑀺. 𑀏𑀢𑁂𑀦 ¶ 𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀲𑀫𑁆𑀫𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀩𑁆𑀩𑀲𑀗𑁆𑀔𑀸𑀭𑀯𑀺𑀲𑀁𑀬𑀼𑀢𑁆𑀢𑁂 𑀳𑀺 𑀦𑀺𑀩𑁆𑀩𑀸𑀦𑁂 𑀲𑀩𑁆𑀩𑀲𑀗𑁆𑀔𑀸𑀭𑀯𑀽𑀧𑀲𑀫𑀧𑀭𑀺𑀬𑀸𑀬𑁄 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄 𑀏𑀯. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀉𑀧𑀥𑀻𑀬𑀢𑀺 𑀏𑀢𑁆𑀣 𑀤𑀼𑀓𑁆𑀔𑀦𑁆𑀢𑀺 𑀉𑀧𑀥𑀺, 𑀔𑀦𑁆𑀥𑀸𑀤𑀬𑁄. 𑀧𑀝𑀺𑀦𑀺𑀲𑁆𑀲𑀝𑁆𑀞𑀸𑀢𑀺 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀭𑀺𑀘𑁆𑀘𑀢𑁆𑀢𑀸 𑀳𑁄𑀦𑁆𑀢𑀺. 𑀲𑀩𑁆𑀩𑀸 𑀢𑀡𑁆𑀳𑀸𑀢𑀺 𑀅𑀝𑁆𑀞𑀲𑀢𑀧𑁆𑀧𑀪𑁂𑀤𑀸 𑀲𑀩𑁆𑀩𑀸𑀧𑀺 𑀢𑀡𑁆𑀳𑀸. 𑀲𑀩𑁆𑀩𑁂 𑀓𑀺𑀮𑁂𑀲𑀭𑀸𑀕𑀸𑀢𑀺 𑀓𑀸𑀫𑀭𑀸𑀕𑀭𑀽𑀧𑀭𑀸𑀕𑀸𑀤𑀺𑀪𑁂𑀤𑀸 𑀲𑀩𑁆𑀩𑁂𑀧𑀺 𑀓𑀺𑀮𑁂𑀲𑀪𑀽𑀢𑀸 𑀭𑀸𑀕𑀸, 𑀲𑀩𑁆𑀩𑁂𑀧𑀺 𑀯𑀸 𑀓𑀺𑀮𑁂𑀲𑀸 𑀇𑀥 ‘‘𑀓𑀺𑀮𑁂𑀲𑀭𑀸𑀕𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀦 𑀮𑁄𑀪𑀯𑀺𑀲𑁂𑀲𑀸 𑀏𑀯 𑀘𑀺𑀢𑁆𑀢𑀲𑁆𑀲 𑀧𑀭𑀺𑀴𑀸𑀳𑀪𑀸𑀯𑀸𑀧𑀸𑀤𑀦𑀢𑁄. 𑀬𑀣𑀸𑀳 ‘‘𑀭𑀢𑁆𑀢𑀫𑁆𑀧𑀺 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀢𑀁 ¶ , 𑀤𑀼𑀝𑁆𑀞𑀫𑁆𑀧𑀺 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀢𑀁, 𑀫𑀽𑀴𑁆𑀳𑀫𑁆𑀧𑀺 𑀘𑀺𑀢𑁆𑀢𑀁 𑀯𑀺𑀧𑀭𑀺𑀡𑀢’’𑀦𑁆𑀢𑀺 (𑀧𑀸𑀭𑀸. 𑁨𑁭𑁧). 𑀯𑀺𑀭𑀚𑁆𑀚𑀦𑁆𑀢𑀻𑀢𑀺 𑀧𑀮𑀼𑀚𑁆𑀚𑀦𑁆𑀢𑀺 𑀯𑀺𑀓𑁆𑀔𑀫𑁆𑀪𑀦𑀢𑁄 𑀲𑀩𑁆𑀩𑀲𑁄 𑀢𑁂𑀦 𑀯𑀺𑀲𑀁𑀬𑀼𑀢𑁆𑀢𑀪𑀸𑀯𑀢𑁄. 𑀲𑀩𑁆𑀩𑀁 𑀤𑀼𑀓𑁆𑀔𑀦𑁆𑀢𑀺 𑀚𑀭𑀸𑀫𑀭𑀡𑀸𑀤𑀺𑀪𑁂𑀤𑀁 𑀲𑀩𑁆𑀩𑀁 𑀯𑀝𑁆𑀝𑀤𑀼𑀓𑁆𑀔𑀁. 𑀪𑀯𑁂𑀦 𑀪𑀯𑀦𑁆𑀢𑀺 𑀢𑁂𑀦 𑀢𑁂𑀦 𑀪𑀯𑁂𑀦 𑀪𑀯𑀦𑁆𑀢𑀭𑀁 𑀪𑀯𑀦𑀺𑀓𑀦𑁆𑀢𑀺𑀪𑀸𑀯𑁂𑀦 𑀲𑀁𑀲𑀺𑀩𑁆𑀩𑀢𑀺. 𑀨𑀮𑁂𑀦 𑀯𑀸 𑀲𑀤𑁆𑀥𑀺𑀁 𑀓𑀫𑁆𑀫𑀁 𑀲𑀢𑀡𑁆𑀳𑀲𑁆𑀲𑁂𑀯 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀪𑀸𑀯𑀢𑁄. 𑀢𑀢𑁄 𑀯𑀸𑀦𑀢𑁄 𑀦𑀺𑀓𑁆𑀔𑀦𑁆𑀢𑀁 𑀢𑀢𑁆𑀣 𑀢𑀲𑁆𑀲 𑀲𑀩𑁆𑀩𑀲𑁄 𑀅𑀪𑀸𑀯𑀢𑁄. 𑀘𑀺𑀭𑀦𑀺𑀲𑀚𑁆𑀚𑀸𑀘𑀺𑀭𑀪𑀸𑀲𑀦𑁂𑀳𑀺 𑀧𑀺𑀝𑁆𑀞𑀺𑀆𑀕𑀺𑀮𑀸𑀬𑀦𑀢𑀸𑀮𑀼𑀕𑀮𑀲𑁄𑀲𑀸𑀤𑀺𑀯𑀲𑁂𑀦 𑀓𑀸𑀬𑀓𑀺𑀮𑀫𑀣𑁄 𑀘𑁂𑀯 𑀓𑀸𑀬𑀯𑀺𑀳𑁂𑀲𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀘 𑀔𑁄 𑀤𑁂𑀲𑀦𑀸𑀬 𑀅𑀢𑁆𑀣𑀫𑀚𑀸𑀦𑀦𑁆𑀢𑀸𑀦𑀁 𑀅𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀜𑁆𑀘 𑀯𑀲𑁂𑀦, 𑀚𑀸𑀦𑀦𑁆𑀢𑀸𑀦𑀁 𑀧𑀦 𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀜𑁆𑀘 𑀤𑁂𑀲𑀦𑀸𑀬 𑀓𑀸𑀬𑀧𑀭𑀺𑀲𑁆𑀲𑀫𑁄𑀧𑀺 𑀲𑀢𑁆𑀣𑀼 𑀅𑀧𑀭𑀺𑀲𑁆𑀲𑀫𑁄𑀬𑁂𑀯. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀦 𑀘 𑀫𑀁 𑀥𑀫𑁆𑀫𑀸𑀥𑀺𑀓𑀭𑀡𑀁 𑀯𑀺𑀳𑁂𑀲𑁂𑀲𑀻’’𑀢𑀺 (𑀉𑀤𑀸. 𑁧𑁦). 𑀢𑁂𑀦𑁂𑀯𑀸𑀳 𑁋 ‘‘𑀬𑀸 𑀅𑀚𑀸𑀦𑀦𑁆𑀢𑀸𑀦𑀁 𑀤𑁂𑀲𑀦𑀸 𑀦𑀸𑀫, 𑀲𑁄 𑀫𑀫 𑀓𑀺𑀮𑀫𑀣𑁄 𑀅𑀲𑁆𑀲𑀸’’𑀢𑀺. 𑀉𑀪𑀬𑀦𑁆𑀢𑀺 𑀘𑀺𑀢𑁆𑀢𑀓𑀺𑀮𑀫𑀣𑁄 𑀘𑀺𑀢𑁆𑀢𑀯𑀺𑀳𑁂𑀲𑀸 𑀘𑀸𑀢𑀺 𑀉𑀪𑀬𑀫𑁆𑀧𑁂𑀢𑀁 𑀩𑀼𑀤𑁆𑀥𑀸𑀦𑀁 𑀦𑀢𑁆𑀣𑀺 𑀩𑁄𑀥𑀺𑀫𑀽𑀮𑁂 𑀏𑀯 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸. 𑀅𑀦𑀼𑀩𑁆𑀭𑀽𑀳𑀦𑀁 𑀲𑀫𑁆𑀧𑀺𑀡𑁆𑀟𑀦𑀁. 𑀲𑁄𑀢𑀺 𑀅𑀧𑀺𑀲𑁆𑀲𑀽𑀢𑀺 𑀦𑀺𑀧𑀸𑀢𑁄. 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸 𑀯𑀸 𑀅𑀘𑁆𑀙𑀭𑀺𑀬𑀸 𑀅𑀦𑀘𑁆𑀙𑀭𑀺𑀬𑀸, 𑀯𑀼𑀤𑁆𑀥𑀺𑀅𑀢𑁆𑀣𑁄𑀧𑀺 𑀳𑀺 -𑀓𑀸𑀭𑁄 𑀳𑁄𑀢𑀺 𑀬𑀣𑀸 ‘‘𑀅𑀲𑁂𑀓𑁆𑀔𑀸 𑀥𑀫𑁆𑀫𑀸’’𑀢𑀺. 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀁 𑀘𑀢𑁆𑀢𑀸𑀭𑀺 𑀘 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀥𑀫𑁆𑀫𑀲𑀁𑀯𑀺𑀪𑀸𑀕𑀓𑀭𑀡𑀢𑁆𑀣𑀫𑁂𑀯 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀇𑀤𑀸𑀦𑀺 𑀲𑀫𑀥𑀺𑀕𑀢𑀥𑀫𑁆𑀫𑀭𑀚𑁆𑀚𑀲𑁆𑀲 𑀢𑀢𑁆𑀣 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀧𑀢𑁆𑀢𑀺𑀤𑀻𑀧𑀦𑀢𑀸 𑀕𑀸𑀣𑀢𑁆𑀣𑀲𑁆𑀲 𑀘 𑀅𑀘𑁆𑀙𑀭𑀺𑀬𑀢𑀸 𑀢𑀲𑁆𑀲 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀢𑁆𑀣𑀤𑁆𑀯𑀸𑀭𑁂𑀦 𑀳𑀺 𑀕𑀸𑀣𑀸𑀦𑀁 𑀅𑀦𑀘𑁆𑀙𑀭𑀺𑀬𑀢𑀸. 𑀕𑁄𑀘𑀭𑀸 𑀅𑀳𑁂𑀲𑀼𑀦𑁆𑀢𑀺 𑀉𑀧𑀝𑁆𑀞𑀳𑀺𑀁𑀲𑀼. 𑀉𑀧𑀝𑁆𑀞𑀸𑀦𑀜𑁆𑀘 𑀯𑀺𑀢𑀓𑁆𑀓𑁂𑀢𑀩𑁆𑀩𑀢𑀸𑀯𑀸𑀢𑀺 𑀆𑀳 ‘‘𑀧𑀭𑀺𑀯𑀺𑀢𑀓𑁆𑀓𑀬𑀺𑀢𑀩𑁆𑀩𑀢𑀁 𑀧𑀸𑀧𑀼𑀡𑀺𑀁𑀲𑀽’’𑀢𑀺.

𑀬𑀤𑀺 ¶ 𑀲𑀼𑀔𑀸𑀧𑀝𑀺𑀧𑀤𑀸𑀯, 𑀓𑀣𑀁 𑀓𑀺𑀘𑁆𑀙𑀢𑀸𑀢𑀺 𑀆𑀳 ‘‘𑀧𑀸𑀭𑀫𑀻𑀧𑀽𑀭𑀡𑀓𑀸𑀮𑁂 𑀧𑀦𑀸’’𑀢𑀺𑀆𑀤𑀺. 𑀏𑀯𑀫𑀸𑀤𑀻𑀦𑀺 𑀤𑀼𑀧𑁆𑀧𑀭𑀺𑀘𑁆𑀘𑀚𑀸𑀦𑀺 𑀤𑁂𑀦𑁆𑀢𑀲𑁆𑀲. 𑀳-𑀇𑀢𑀺 𑀯𑀸 𑀩𑁆𑀬𑀢𑁆𑀢𑀦𑁆𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀦𑀺𑀧𑀸𑀢𑁄. ‘‘𑀏𑀓𑀁𑀲𑀢𑁆𑀣𑁂’’𑀢𑀺 𑀓𑁂𑀘𑀺. 𑀳 𑀩𑁆𑀬𑀢𑁆𑀢𑀁, 𑀏𑀓𑀁𑀲𑁂𑀦 𑀯𑀸 𑀅𑀮𑀁 𑀦𑀺𑀧𑁆𑀧𑀬𑁄𑀚𑀦𑀁 𑀏𑀯𑀁 𑀓𑀺𑀘𑁆𑀙𑁂𑀦 𑀅𑀥𑀺𑀕𑀢𑀲𑁆𑀲 𑀧𑀓𑀸𑀲𑀺𑀢𑀼𑀁 𑀤𑁂𑀲𑀺𑀢𑀼𑀦𑁆𑀢𑀺 𑀬𑁄𑀚𑀦𑀸. 𑀳𑀮𑀦𑁆𑀢𑀺 𑀯𑀸 𑀅𑀮𑀦𑁆𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑀧𑀤𑀁 ‘‘𑀳𑀮𑀦𑁆𑀢𑀺 𑀯𑀤𑀸𑀫𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀭𑀸𑀕𑀤𑁄𑀲𑀨𑀼𑀝𑁆𑀞𑁂𑀳𑀻𑀢𑀺 𑀨𑀼𑀝𑁆𑀞𑀯𑀺𑀲𑁂𑀦 𑀯𑀺𑀬 𑀲𑀧𑁆𑀧𑁂𑀦 𑀭𑀸𑀕𑁂𑀦 𑀤𑁄𑀲𑁂𑀦 𑀘 𑀨𑀼𑀝𑁆𑀞𑁂𑀳𑀺 𑀅𑀪𑀺𑀪𑀽𑀢𑁂𑀳𑀺. 𑀭𑀸𑀕𑀤𑁄𑀲𑀸𑀦𑀼𑀕𑀢𑁂𑀳𑀻𑀢𑀺 𑀭𑀸𑀕𑀤𑁄𑀲𑁂𑀳𑀺 𑀅𑀦𑀼𑀩𑀦𑁆𑀥𑁂𑀳𑀺.

𑀦𑀺𑀘𑁆𑀘𑀸𑀤𑀻𑀦𑀦𑁆𑀢𑀺 𑀦𑀺𑀘𑁆𑀘𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀯𑀺𑀧𑀮𑁆𑀮𑀸𑀲𑀸𑀦𑀁. 𑀏𑀯𑀁𑀕𑀢𑀦𑁆𑀢𑀺 𑀏𑀯𑀁 𑀅𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀆𑀓𑀸𑀭𑁂𑀦 𑀧𑀯𑀢𑁆𑀢𑀁 𑀩𑀼𑀚𑁆𑀛𑀺𑀢𑀩𑁆𑀩𑀁. 𑀓𑀸𑀫𑀭𑀸𑀕𑀭𑀢𑁆𑀢𑀸 𑀘 𑀪𑀯𑀭𑀸𑀕𑀭𑀢𑁆𑀢𑀸 𑀘 𑀦𑀻𑀯𑀭𑀡𑁂𑀳𑀺 𑀦𑀺𑀯𑀼𑀢𑀘𑀺𑀢𑁆𑀢𑀢𑀸𑀬 𑀤𑀺𑀝𑁆𑀞𑀺𑀭𑀸𑀕𑀭𑀢𑁆𑀢𑀸 𑀯𑀺𑀧𑀭𑀻𑀢𑀸𑀪𑀺𑀦𑀺𑀯𑁂𑀲𑁂𑀦 𑀦 𑀤𑀓𑁆𑀔𑀦𑁆𑀢𑀺 𑀬𑀸𑀣𑀸𑀯𑀢𑁄 𑀥𑀫𑁆𑀫𑀁 𑀦 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀦𑁆𑀢𑀺. 𑀲𑀪𑀸𑀯𑁂𑀦𑀸𑀢𑀺 𑀅𑀯𑀺𑀧𑀭𑀻𑀢𑀲𑀪𑀸𑀯𑁂𑀦. 𑀏𑀯𑀁 𑀕𑀸𑀳𑀸𑀧𑁂𑀢𑀼𑀦𑁆𑀢𑀺 𑀅𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀲𑀪𑀸𑀯𑁂𑀦 𑀬𑀸𑀣𑀸𑀯𑀢𑁄 𑀥𑀫𑁆𑀫𑀁 𑀚𑀸𑀦𑀸𑀧𑁂𑀢𑀼𑀁. 𑀭𑀸𑀕𑀤𑁄𑀲𑀧𑀭𑁂𑀢𑀢𑀸𑀧𑀺 𑀦𑁂𑀲𑀁 𑀲𑀫𑁆𑀫𑀽𑀴𑁆𑀳𑀪𑀸𑀯𑁂𑀦𑁂𑀯𑀸𑀢𑀺 𑀆𑀳 ‘‘𑀢𑀫𑁄𑀔𑀦𑁆𑀥𑁂𑀦 𑀆𑀯𑀼𑀝𑀸’’𑀢𑀺.

𑀥𑀫𑁆𑀫𑀤𑁂𑀲𑀦𑀸𑀬 ¶ 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀧𑀢𑁆𑀢𑀺𑀬𑀸 𑀓𑀸𑀭𑀡𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀓𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺𑀦𑀸 𑀲𑀬𑀫𑁂𑀯 𑀘𑁄𑀤𑀦𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀅𑀜𑁆𑀜𑀸𑀢𑀯𑁂𑀲𑁂𑀦𑀸𑀢𑀺 𑀇𑀫𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑀪𑀸𑀯𑀽𑀧𑀕𑀫𑀦𑁂𑀦 𑀅𑀜𑁆𑀜𑀸𑀢𑀯𑁂𑀲𑁂𑀦. ‘‘𑀅𑀜𑁆𑀜𑀢𑀭𑀢𑀸𑀧𑀲𑀯𑁂𑀲𑁂𑀦𑀸’’𑀢𑀺 𑀓𑁂𑀘𑀺, 𑀲𑁄 𑀧𑀦𑀲𑁆𑀲 𑀅𑀭𑀳𑀢𑁆𑀢𑀸𑀥𑀺𑀕𑀫𑀦𑁂𑀦𑁂𑀯 𑀯𑀺𑀕𑀘𑁆𑀙𑁂𑀬𑁆𑀬. 𑀢𑀺𑀯𑀺𑀥𑀁 𑀓𑀸𑀭𑀡𑀁 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀸𑀧𑀢𑁆𑀢𑀺𑀬𑀸 𑀧𑀝𑀺𑀧𑀓𑁆𑀔𑀲𑁆𑀲 𑀩𑀮𑀯𑀪𑀸𑀯𑁄, 𑀥𑀫𑁆𑀫𑀲𑁆𑀲 𑀕𑀫𑁆𑀪𑀻𑀭𑀢𑀸, 𑀢𑀢𑁆𑀣 𑀘 𑀪𑀕𑀯𑀢𑁄 𑀲𑀸𑀢𑀺𑀲𑀬𑀁 𑀕𑀸𑀭𑀯𑀦𑁆𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀲 𑀳𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀢𑁆𑀣 𑀧𑀝𑀺𑀧𑀓𑁆𑀔𑀸 𑀦𑀸𑀫 𑀭𑀸𑀕𑀸𑀤𑀬𑁄 𑀓𑀺𑀮𑁂𑀲𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑁆𑀢𑀭𑀸𑀬𑀓𑀭𑀢𑁆𑀢𑀸. 𑀢𑁂𑀲𑀁 𑀩𑀮𑀯𑀪𑀸𑀯𑀢𑁄 𑀘𑀺𑀭𑀧𑀭𑀺𑀪𑀸𑀯𑀦𑀸𑀬 𑀲𑀢𑁆𑀢𑀲𑀦𑁆𑀢𑀸𑀦𑀢𑁄 𑀤𑀼𑀩𑁆𑀩𑀺𑀲𑁄𑀥𑀺𑀬𑀢𑀸𑀬 𑀢𑁂 𑀲𑀢𑁆𑀢𑁂 𑀫𑀢𑁆𑀢𑀳𑀢𑁆𑀣𑀺𑀦𑁄 𑀯𑀺𑀬 𑀤𑀼𑀩𑁆𑀩𑀮𑀧𑀼𑀭𑀺𑀲𑀁 𑀅𑀥𑀺𑀪𑀯𑀺𑀢𑁆𑀯𑀸 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀆𑀧𑀸𑀤𑁂𑀦𑁆𑀢𑀸 𑀅𑀦𑁂𑀓𑀲𑀢𑀬𑁄𑀚𑀦𑀸𑀬𑀸𑀫𑀯𑀺𑀢𑁆𑀣𑀸𑀭𑀁 𑀲𑀼𑀦𑀺𑀘𑀺𑀢𑀁 𑀖𑀦𑀲𑀦𑁆𑀦𑀺𑀯𑁂𑀲𑀁 𑀓𑀡𑁆𑀝𑀓𑀤𑀼𑀕𑁆𑀕𑀫𑁆𑀧𑀺 𑀅𑀥𑀺𑀲𑁂𑀦𑁆𑀢𑀺. 𑀤𑀽𑀭𑀧𑀪𑁂𑀤𑀤𑀼𑀘𑁆𑀙𑁂𑀚𑁆𑀚𑀢𑀸𑀳𑀺 𑀤𑀼𑀩𑁆𑀩𑀺𑀲𑁄𑀥𑀺𑀬𑀢𑀁 𑀧𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀣𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘 𑀅𑀦𑁆𑀢𑁄 𑀅𑀫𑀝𑁆𑀞𑀢𑀸𑀬 𑀓𑀜𑁆𑀚𑀺𑀬𑀧𑀼𑀡𑁆𑀡𑀸 𑀮𑀸𑀩𑀼, 𑀘𑀺𑀭𑀧𑀸𑀭𑀺𑀯𑀸𑀲𑀺𑀓𑀢𑀸𑀬 𑀢𑀓𑁆𑀓𑀪𑀭𑀺𑀢𑀸 𑀘𑀸𑀝𑀺, 𑀲𑁆𑀦𑁂𑀳𑀢𑀺𑀦𑁆𑀢𑀤𑀼𑀩𑁆𑀩𑀮𑀪𑀸𑀯𑁂𑀦 𑀯𑀲𑀸𑀧𑀻𑀢𑀧𑀺𑀮𑁄𑀢𑀺𑀓𑀸, 𑀢𑁂𑀮𑀫𑀺𑀲𑁆𑀲𑀺𑀢𑀢𑀸𑀬 𑀅𑀜𑁆𑀚𑀦𑀫𑀓𑁆𑀔𑀺𑀢𑀳𑀢𑁆𑀣𑁄 𑀤𑀼𑀩𑁆𑀩𑀺𑀲𑁄𑀥𑀦𑀻𑀬𑀸 𑀯𑀼𑀢𑁆𑀢𑀸. 𑀳𑀻𑀦𑀽𑀧𑀫𑀸 𑀘𑁂𑀢𑀸 𑀭𑀽𑀧𑀧𑀩𑀦𑁆𑀥𑀪𑀸𑀯𑀢𑁄 𑀅𑀘𑀺𑀭𑀓𑀸𑀮𑀺𑀓𑀢𑁆𑀢𑀸 𑀘 𑀫𑀮𑀻𑀦𑀢𑀸𑀬, 𑀓𑀺𑀮𑁂𑀲𑀲𑀁𑀓𑀺𑀮𑁂𑀲𑁄 𑀏𑀯 𑀧𑀦 𑀤𑀼𑀩𑁆𑀩𑀺𑀲𑁄𑀥𑀦𑀻𑀬𑀢𑀭𑁄 ¶ 𑀅𑀦𑀸𑀤𑀺𑀓𑀸𑀮𑀺𑀓𑀢𑁆𑀢𑀸 𑀅𑀭𑀽𑀧𑀦𑀺𑀲𑁆𑀲𑀺𑀢𑀢𑁆𑀢𑀸 𑀘. 𑀢𑁂𑀦𑀸𑀳 ‘‘𑀅𑀢𑀺𑀲𑀁𑀓𑀺𑀮𑀺𑀝𑁆𑀞𑀸’’𑀢𑀺.

𑀬𑀣𑀸 𑀘 𑀤𑀼𑀩𑁆𑀩𑀺𑀲𑁄𑀥𑀦𑀻𑀬𑀢𑀭𑀢𑀸𑀬, 𑀏𑀯𑀁 𑀕𑀫𑁆𑀪𑀻𑀭𑀤𑀼𑀤𑁆𑀤𑀲𑀤𑀼𑀭𑀦𑀼𑀩𑁄𑀥𑀸𑀦𑀫𑁆𑀧𑀺 𑀯𑀼𑀢𑁆𑀢𑀉𑀧𑀫𑀸 𑀳𑀻𑀦𑀽𑀧𑀫𑀸𑀯. 𑀕𑀫𑁆𑀪𑀻𑀭𑁄𑀧𑀺 𑀥𑀫𑁆𑀫𑁄 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑁂𑀦 𑀜𑀸𑀡𑁂𑀦 𑀯𑀺𑀲𑀤𑀪𑀸𑀯𑀁 𑀆𑀧𑀦𑁆𑀦𑁂𑀦 𑀲𑀼𑀧𑀸𑀓𑀝𑁄 𑀪𑀯𑁂𑀬𑁆𑀬, 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀁 𑀧𑀦 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀧𑀝𑀺𑀩𑀤𑁆𑀥𑀁, 𑀲𑀸 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀸𑀥𑀻𑀦𑀸, 𑀢𑀁 𑀲𑀢𑁆𑀣𑀭𑀺 𑀥𑀫𑁆𑀫𑁂 𑀘 𑀧𑀲𑀸𑀤𑀸𑀬𑀢𑁆𑀢𑀁. 𑀲𑁄 𑀕𑀭𑀼𑀝𑁆𑀞𑀸𑀦𑀺𑀬𑀸𑀦𑀁 𑀅𑀚𑁆𑀛𑁂𑀲𑀦𑀳𑁂𑀢𑀼𑀓𑁄𑀢𑀺 𑀧𑀡𑀸𑀮𑀺𑀓𑀸𑀬 𑀲𑀢𑁆𑀢𑀸𑀦𑀁 𑀥𑀫𑁆𑀫𑀲𑀫𑁆𑀧𑀝𑀺𑀧𑀢𑁆𑀢𑀺𑀬𑀸 𑀩𑁆𑀭𑀳𑁆𑀫𑀸𑀬𑀸𑀘𑀦𑀸𑀦𑀺𑀫𑀺𑀢𑁆𑀢𑀦𑁆𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳.

𑀉𑀧𑀓𑁆𑀓𑀺𑀮𑁂𑀲𑀪𑀽𑀢𑀁 𑀅𑀧𑁆𑀧𑀁 𑀭𑀸𑀕𑀸𑀤𑀺𑀭𑀚𑀁 𑀏𑀢𑀲𑁆𑀲𑀸𑀢𑀺 𑀅𑀧𑁆𑀧𑀭𑀚𑀁, 𑀅𑀧𑁆𑀧𑀭𑀚𑀁 𑀅𑀓𑁆𑀔𑀺 𑀧𑀜𑁆𑀜𑀸𑀘𑀓𑁆𑀔𑀼 𑀬𑁂𑀲𑀁 𑀢𑁂 𑀢𑀁𑀲𑀪𑀸𑀯𑀸𑀢𑀺 𑀓𑀢𑁆𑀯𑀸 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀜𑁆𑀜𑀸𑀫𑀬𑁂’’𑀢𑀺𑀆𑀤𑀺𑀫𑀸𑀳. 𑀅𑀧𑁆𑀧𑀁 𑀭𑀸𑀕𑀸𑀤𑀺𑀭𑀚𑀁 𑀬𑁂𑀲𑀁 𑀢𑀁𑀲𑀪𑀸𑀯𑀸 𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀲𑁆𑀲𑀯𑀦𑀢𑀸𑀢𑀺 ‘‘𑀲𑀬𑀁 𑀅𑀪𑀺𑀜𑁆𑀜𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀓𑀭𑀡𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀅𑀲𑁆𑀲𑀯𑀦𑀢𑀸𑀬𑀸’’𑀢𑀺. 𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀲𑁂𑀦𑀸𑀢𑀺 𑀤𑀸𑀦𑀸𑀤𑀺𑀤𑀲𑀯𑀺𑀥𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀽𑀦𑀁 𑀯𑀲𑁂𑀦. 𑀢𑁂𑀦𑀸𑀳 ‘‘𑀓𑀢𑀸𑀥𑀺𑀓𑀸𑀭𑀸’’𑀢𑀺𑀆𑀤𑀺. 𑀧𑀧𑀜𑁆𑀘𑀲𑀽𑀤𑀦𑀺𑀬𑀁 (𑀫. 𑀦𑀺. 𑀅𑀝𑁆𑀞. 𑁧.𑁨𑁮𑁨) 𑀧𑀦 ‘‘𑀤𑁆𑀯𑀸𑀤𑀲𑀧𑀼𑀜𑁆𑀜𑀓𑀺𑀭𑀺𑀬𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀤𑀸𑀦𑀸𑀤𑀻𑀲𑀼 𑀲𑀭𑀡𑀕𑀫𑀦-𑀧𑀭𑀳𑀺𑀢𑀧𑀭𑀺𑀡𑀸𑀫𑀦𑀸𑀤𑀺𑀧𑀓𑁆𑀔𑀺𑀧𑀦𑀯𑀲𑁂𑀦 𑀯𑀼𑀢𑁆𑀢𑀁.

𑀭𑀸𑀕𑀸𑀤𑀺𑀫𑀮𑁂𑀦 𑀲𑀫𑀮𑁂𑀳𑀺 𑀧𑀽𑀭𑀡𑀸𑀤𑀻𑀳𑀺 𑀙𑀳𑀺 𑀲𑀢𑁆𑀣𑀸𑀭𑁂𑀳𑀺 𑀲𑀢𑁆𑀣𑀼𑀧𑀝𑀺𑀜𑁆𑀜𑁂𑀳𑀺 𑀓𑀩𑁆𑀩𑀭𑀘𑀦𑀸𑀯𑀲𑁂𑀦 𑀘𑀺𑀦𑁆𑀢𑀸𑀓𑀯𑀺𑀆𑀤𑀺𑀪𑀸𑀯𑁂 𑀞𑀢𑁆𑀯𑀸 𑀢𑀓𑁆𑀓𑀧𑀭𑀺𑀬𑀸𑀳𑀢𑀁 𑀯𑀻𑀫𑀁𑀲𑀸𑀦𑀼𑀘𑀭𑀺𑀢𑀁 𑀲𑀬𑀁𑀧𑀝𑀺𑀪𑀸𑀦𑀁 𑀘𑀺𑀦𑁆𑀢𑀺𑀢𑁄. 𑀢𑁂 𑀓𑀺𑀭 𑀩𑀼𑀤𑁆𑀥𑀓𑁄𑀮𑀸𑀳𑀮𑀸𑀦𑀼𑀲𑁆𑀲𑀯𑁂𑀦 ¶ 𑀲𑀜𑁆𑀚𑀸𑀢𑀓𑀼𑀢𑀽𑀳𑀮𑀁 𑀮𑁄𑀓𑀁 𑀯𑀜𑁆𑀘𑁂𑀦𑁆𑀢𑀸 𑀓𑁄𑀳𑀜𑁆𑀜𑁂 𑀞𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀝𑀺𑀚𑀸𑀦𑀦𑁆𑀢𑀸 𑀬𑀁 𑀓𑀜𑁆𑀘𑀺 𑀅𑀥𑀫𑁆𑀫𑀫𑁂𑀯 ‘‘𑀥𑀫𑁆𑀫𑁄’’𑀢𑀺 𑀤𑀻𑀧𑁂𑀲𑀼𑀁. 𑀢𑁂𑀦𑀸𑀳 ‘‘𑀢𑁂 𑀳𑀺 𑀧𑀼𑀭𑁂𑀢𑀭𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸’’𑀢𑀺𑀆𑀤𑀺. 𑀅𑀧𑀸𑀧𑀼𑀭𑁂𑀢𑀦𑁆𑀢𑀺 𑀏𑀢𑀁 𑀓𑀲𑁆𑀲𑀧𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀦𑁆𑀢𑀭𑀥𑀸𑀦𑀢𑁄 𑀧𑀪𑀼𑀢𑀺 𑀧𑀺𑀳𑀺𑀢𑀁 𑀦𑀺𑀩𑁆𑀩𑀸𑀦𑀫𑀳𑀸𑀤𑁆𑀯𑀸𑀭𑀁 𑀅𑀭𑀺𑀬𑀫𑀕𑁆𑀕𑀁 𑀲𑀤𑁆𑀥𑀫𑁆𑀫𑀤𑁂𑀲𑀦𑀸𑀳𑀢𑁆𑀣𑁂𑀦 𑀅𑀧𑀸𑀧𑀼𑀭 𑀯𑀺𑀯𑀭.

𑀲𑁂𑀮𑁄 𑀧𑀩𑁆𑀩𑀢𑁄 𑀉𑀘𑁆𑀘𑁄 𑀳𑁄𑀢𑀺 𑀣𑀺𑀭𑁄 𑀘, 𑀦 𑀧𑀁𑀲𑀼𑀧𑀩𑁆𑀩𑀢𑁄 𑀫𑀺𑀲𑁆𑀲𑀓𑀧𑀩𑁆𑀩𑀢𑁄 𑀘𑀸𑀢𑀺 𑀆𑀳 ‘‘𑀲𑁂𑀮𑁂 𑀬𑀣𑀸 𑀧𑀩𑁆𑀩𑀢𑀫𑀼𑀤𑁆𑀥𑀦𑀻’’𑀢𑀺. 𑀥𑀫𑁆𑀫𑀫𑀬𑀁 𑀧𑀸𑀲𑀸𑀤𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀫𑀸𑀳. 𑀲𑁄 𑀳𑀺 𑀲𑀩𑁆𑀩𑀲𑁄 𑀧𑀲𑀸𑀤𑀸𑀯𑀳𑁄, 𑀲𑀩𑁆𑀩𑀥𑀫𑁆𑀫𑁂 ¶ 𑀅𑀢𑀺𑀓𑁆𑀓𑀫𑁆𑀫 𑀅𑀩𑁆𑀪𑀼𑀕𑁆𑀕𑀢𑀝𑁆𑀞𑁂𑀦 𑀧𑀸𑀲𑀸𑀤𑀲𑀤𑀺𑀲𑁄 𑀘. 𑀧𑀜𑁆𑀜𑀸𑀧𑀭𑀺𑀬𑀸𑀬𑁄 𑀯𑀸 𑀇𑀥 𑀥𑀫𑁆𑀫-𑀲𑀤𑁆𑀤𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀜𑁆𑀜𑀸𑀫𑀬’’𑀦𑁆𑀢𑀺. 𑀲𑀸 𑀳𑀺 𑀅𑀩𑁆𑀪𑀼𑀕𑁆𑀕𑀢𑀝𑁆𑀞𑁂𑀦 𑀧𑀸𑀲𑀸𑀤𑁄𑀢𑀺 𑀅𑀪𑀺𑀥𑀫𑁆𑀫𑁂 𑀆𑀕𑀢𑀸. 𑀢𑀣𑀸 𑀘𑀸𑀳 𑁋

‘‘𑀧𑀜𑁆𑀜𑀸𑀧𑀸𑀲𑀸𑀤𑀫𑀸𑀭𑀼𑀬𑁆𑀳, 𑀅𑀲𑁄𑀓𑁄 𑀲𑁄𑀓𑀺𑀦𑀺𑀁 𑀧𑀚𑀁;

𑀧𑀩𑁆𑀩𑀢𑀝𑁆𑀞𑁄𑀯 𑀪𑀽𑀫𑀝𑁆𑀞𑁂, 𑀥𑀻𑀭𑁄 𑀩𑀸𑀮𑁂 𑀅𑀯𑁂𑀓𑁆𑀔𑀢𑀻’’𑀢𑀺. (𑀥. 𑀧. 𑁨𑁮);

𑀬𑀣𑀸 𑀳𑀻𑀢𑀺𑀆𑀤𑀻𑀲𑀼 𑀬𑀣𑀸 𑀘 𑀧𑀩𑁆𑀩𑀢𑁂 𑀞𑀢𑁆𑀯𑀸 𑀅𑀦𑁆𑀥𑀓𑀸𑀭𑁂 𑀳𑁂𑀝𑁆𑀞𑀸 𑀑𑀮𑁄𑀓𑁂𑀦𑁆𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀔𑁂𑀢𑁆𑀢𑀓𑁂𑀤𑀸𑀭𑀧𑀸𑀴𑀺𑀓𑀼𑀝𑀺𑀓𑀸𑀬𑁄 𑀢𑀢𑁆𑀣 𑀲𑀬𑀺𑀢𑀫𑀦𑀼𑀲𑁆𑀲𑀸 𑀘 𑀦 𑀧𑀜𑁆𑀜𑀸𑀬𑀦𑁆𑀢𑀺 𑀅𑀦𑀼𑀚𑁆𑀚𑀮𑀪𑀸𑀯𑀢𑁄, 𑀓𑀼𑀝𑀺𑀓𑀸𑀲𑀼 𑀧𑀦 𑀅𑀕𑁆𑀕𑀺𑀚𑀸𑀮𑀸 𑀧𑀜𑁆𑀜𑀸𑀬𑀢𑀺 𑀲𑀫𑀼𑀚𑁆𑀚𑀮𑀪𑀸𑀯𑀢𑁄, 𑀏𑀯𑀁 𑀥𑀫𑁆𑀫𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀲𑀢𑁆𑀢𑀮𑁄𑀓𑀁 𑀑𑀮𑁄𑀓𑀬𑀢𑁄 𑀪𑀕𑀯𑀢𑁄 𑀜𑀸𑀡𑀲𑁆𑀲 𑀆𑀧𑀸𑀣𑀁 𑀦𑀸𑀕𑀘𑁆𑀙𑀦𑁆𑀢𑀺 𑀅𑀓𑀢𑀓𑀮𑁆𑀬𑀸𑀡𑀸 𑀲𑀢𑁆𑀢𑀸, 𑀜𑀸𑀡𑀕𑁆𑀕𑀺𑀦𑀸 𑀅𑀦𑀼𑀚𑁆𑀚𑀮𑀪𑀸𑀯𑀢𑁄 𑀅𑀦𑀼𑀴𑀸𑀭𑀪𑀸𑀯𑀢𑁄 𑀘 𑀭𑀢𑁆𑀢𑀺𑀁 𑀔𑀺𑀢𑁆𑀢𑀸 𑀲𑀭𑀸 𑀯𑀺𑀬 𑀳𑁄𑀦𑁆𑀢𑀺, 𑀓𑀢𑀓𑀮𑁆𑀬𑀸𑀡𑀸 𑀧𑀦 𑀪𑀩𑁆𑀩𑀧𑀼𑀕𑁆𑀕𑀮𑀸 𑀤𑀽𑀭𑁂 𑀞𑀺𑀢𑀸𑀧𑀺 𑀪𑀕𑀯𑀢𑁄 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺 𑀧𑀭𑀺𑀧𑀓𑁆𑀓𑀜𑀸𑀡𑀕𑁆𑀕𑀺𑀢𑀸𑀬 𑀲𑀫𑀼𑀚𑁆𑀚𑀮𑀪𑀸𑀯𑀢𑁄 𑀉𑀴𑀸𑀭𑀲𑀦𑁆𑀢𑀸𑀦𑀢𑀸𑀬 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑁄 𑀯𑀺𑀬 𑀘𑀸𑀢𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀕𑀭𑀼𑀝𑁆𑀞𑀸𑀦𑀻𑀬𑀁 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀕𑀭𑀼𑀢𑀭𑀁 𑀧𑀬𑁄𑀚𑀦𑀁 𑀉𑀤𑁆𑀤𑀺𑀲𑁆𑀲 𑀅𑀪𑀺𑀧𑀢𑁆𑀣𑀦𑀸 𑀅𑀚𑁆𑀛𑁂𑀲𑀦𑀸, 𑀲𑀸𑀧𑀺 𑀅𑀢𑁆𑀣𑀢𑁄 𑀬𑀸𑀘𑀦𑀸𑀯 𑀳𑁄𑀢𑀻𑀢𑀺 𑀆𑀳 ‘‘𑀅𑀚𑁆𑀛𑁂𑀲𑀦𑀦𑁆𑀢𑀺 𑀬𑀸𑀘𑀦’’𑀦𑁆𑀢𑀺. 𑀧𑀤𑁂𑀲𑀯𑀺𑀲𑀬𑀁 𑀜𑀸𑀡𑀤𑀲𑁆𑀲𑀦𑀁 𑀅𑀳𑀼𑀢𑁆𑀯𑀸 𑀩𑀼𑀤𑁆𑀥𑀸𑀦𑀁𑀬𑁂𑀯 𑀆𑀯𑁂𑀡𑀺𑀓𑀪𑀸𑀯𑀢𑁄 𑀇𑀤𑀁 𑀜𑀸𑀡𑀤𑁆𑀯𑀬𑀁 ‘‘𑀩𑀼𑀤𑁆𑀥𑀘𑀓𑁆𑀔𑀽’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀇𑀫𑁂𑀲𑀜𑁆𑀳𑀺 𑀤𑁆𑀯𑀺𑀦𑁆𑀦𑀁 𑀜𑀸𑀡𑀸𑀦𑀁 ‘𑀩𑀼𑀤𑁆𑀥𑀘𑀓𑁆𑀔𑀽’𑀢𑀺 𑀦𑀸𑀫’’𑀦𑁆𑀢𑀺. 𑀢𑀺𑀡𑁆𑀡𑀁 𑀫𑀕𑁆𑀕𑁆𑀕𑀜𑀸𑀡𑀸𑀦𑀦𑁆𑀢𑀺 𑀳𑁂𑀝𑁆𑀞𑀺𑀫𑀸𑀦𑀁 𑀢𑀺𑀡𑁆𑀡𑀁 𑀫𑀕𑁆𑀕𑀜𑀸𑀡𑀸𑀦𑀁 ‘‘𑀥𑀫𑁆𑀫𑀘𑀓𑁆𑀔𑀽’’𑀢𑀺 𑀦𑀸𑀫𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀤𑀲𑁆𑀲𑀦𑀫𑀢𑁆𑀢𑀪𑀸𑀯𑀢𑁄. 𑀬𑀢𑁄 𑀢𑀸𑀦𑀺 𑀜𑀸𑀡𑀸𑀦𑀺 𑀯𑀺𑀚𑁆𑀚𑀽𑀧𑀫𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀺, 𑀅𑀕𑁆𑀕𑀫𑀕𑁆𑀕𑀜𑀸𑀡𑀁 𑀧𑀦 𑀜𑀸𑀡𑀓𑀺𑀘𑁆𑀘𑀲𑁆𑀲 𑀲𑀺𑀔𑀸𑀧𑁆𑀧𑀢𑁆𑀢𑀺𑀬𑀸 𑀤𑀲𑁆𑀲𑀦𑀫𑀢𑁆𑀢𑀁 𑀦 𑀳𑁄𑀢𑀻𑀢𑀺 ‘‘𑀥𑀫𑁆𑀫𑀘𑀓𑁆𑀔𑀽’’𑀢𑀺 𑀦 𑀯𑀼𑀘𑁆𑀘𑀢𑀺, 𑀬𑀢𑁄 𑀢𑀁 𑀯𑀚𑀺𑀭𑀽𑀧𑀫𑀪𑀸𑀯𑁂𑀦 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀅𑀧𑁆𑀧𑀭𑀚𑀓𑁆𑀔𑀚𑀸𑀢𑀺𑀓𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦. 𑀬𑀲𑁆𑀫𑀸 𑀫𑀦𑁆𑀤𑀓𑀺𑀮𑁂𑀲𑀸 ‘‘𑀅𑀧𑁆𑀧𑀭𑀚𑀓𑁆𑀔𑀸’’𑀢𑀺 𑀯𑀼𑀢𑁆𑀢𑀸, 𑀢𑀲𑁆𑀫𑀸 ¶ 𑀩𑀳𑀮𑀓𑀺𑀮𑁂𑀲𑀸 ‘‘𑀫𑀳𑀸𑀭𑀚𑀓𑁆𑀔𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀲𑀫𑀢𑁆𑀣𑀢𑀸𑀬 𑀢𑀺𑀓𑁆𑀔𑀸𑀦𑀺 𑀲𑀽𑀭𑀸𑀦𑀺 𑀯𑀺𑀲𑀤𑀸𑀦𑀺, 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀫𑀼𑀤𑀽𑀦𑀺. 𑀲𑀤𑁆𑀥𑀸𑀤𑀬𑁄 𑀆𑀓𑀸𑀭𑀸𑀢𑀺 𑀲𑀤𑁆𑀤𑀳𑀦𑀸𑀤𑀺𑀧𑁆𑀧𑀓𑀸𑀭𑁂 𑀯𑀤𑀢𑀺. 𑀲𑀼𑀦𑁆𑀤𑀭𑀸𑀢𑀺 𑀓𑀮𑁆𑀬𑀸𑀡𑀸. 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 𑀧𑀦 ‘‘𑀬𑁂𑀲𑀁 𑀆𑀲𑀬𑀸𑀤𑀬𑁄 𑀓𑁄𑀝𑁆𑀞𑀸𑀲𑀸 ¶ 𑀲𑀼𑀦𑁆𑀤𑀭𑀸, 𑀢𑁂 𑀲𑁆𑀯𑀸𑀓𑀸𑀭𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀇𑀫𑀸𑀬 𑀅𑀢𑁆𑀣𑀯𑀡𑁆𑀡𑀦𑀸𑀬 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀸𑀭𑀡𑀁 𑀦𑀸𑀫 𑀧𑀘𑁆𑀘𑀬𑀸𑀓𑀸𑀭𑁄, 𑀲𑀘𑁆𑀘𑀸𑀦𑀺 𑀯𑀸. 𑀧𑀭𑀮𑁄𑀓𑀦𑁆𑀢𑀺 𑀲𑀫𑁆𑀧𑀭𑀸𑀬𑀁. 𑀢𑀁 𑀤𑀼𑀓𑁆𑀔𑀸𑀯𑀳𑀁 𑀯𑀚𑁆𑀚𑀁 𑀯𑀺𑀬 𑀪𑀬𑀢𑁄 𑀧𑀲𑁆𑀲𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀧𑀭𑀮𑁄𑀓𑀜𑁆𑀘𑁂𑀯 𑀯𑀚𑁆𑀚𑀜𑁆𑀘 𑀪𑀬𑀢𑁄 𑀧𑀲𑁆𑀲𑀦𑁆𑀢𑀻’’𑀢𑀺. 𑀲𑀫𑁆𑀧𑀢𑁆𑀢𑀺𑀪𑀯𑀢𑁄 𑀯𑀸 𑀅𑀜𑁆𑀜𑀢𑁆𑀢𑀸 𑀯𑀺𑀧𑀢𑁆𑀢𑀺𑀪𑀯𑁄 𑀧𑀭𑀮𑁄𑀓𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀭…𑀧𑁂… 𑀧𑀲𑁆𑀲𑀦𑁆𑀢𑀻’’𑀢𑀺.

𑀅𑀬𑀁 𑀧𑀦𑁂𑀢𑁆𑀣 𑀧𑀸𑀴𑀻𑀢𑀺 𑀏𑀢𑁆𑀣 ‘‘𑀅𑀧𑁆𑀧𑀭𑀚𑀓𑁆𑀔𑀸’’𑀢𑀺 𑀧𑀤𑀸𑀦𑀁 𑀅𑀢𑁆𑀣𑀯𑀺𑀪𑀸𑀯𑀦𑁂 𑀅𑀬𑀁 𑀢𑀲𑁆𑀲 𑀢𑀣𑀸𑀪𑀸𑀯𑀲𑀸𑀥𑀦𑀧𑀸𑀴𑀺. 𑀲𑀤𑁆𑀥𑀸𑀤𑀻𑀦𑀜𑁆𑀳𑀺 𑀯𑀺𑀫𑀼𑀢𑁆𑀢𑀧𑀭𑀺𑀧𑀸𑀘𑀓𑀥𑀫𑁆𑀫𑀸𑀦𑀁 𑀩𑀮𑀯𑀪𑀸𑀯𑁄 𑀢𑀧𑁆𑀧𑀝𑀺𑀧𑀓𑁆𑀔𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀤𑀼𑀩𑁆𑀩𑀮𑀪𑀸𑀯𑁂 𑀲𑀢𑀺 𑀳𑁄𑀢𑀺. 𑀢𑁂𑀲𑀜𑁆𑀘 𑀩𑀮𑀯𑀪𑀸𑀯𑁄 𑀲𑀤𑁆𑀥𑀸𑀤𑀻𑀦𑀁 𑀤𑀼𑀩𑁆𑀩𑀮𑀪𑀸𑀯𑁂𑀢𑀺 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀓𑀥𑀫𑁆𑀫𑀸𑀦𑀁 𑀲𑀯𑀺𑀲𑁂𑀲𑀁 𑀅𑀢𑁆𑀣𑀺𑀢𑀸𑀦𑀢𑁆𑀣𑀺𑀢𑀸𑀯𑀲𑁂𑀦 𑀅𑀧𑁆𑀧𑀭𑀚𑀓𑁆𑀔𑀸 𑀫𑀳𑀸𑀭𑀚𑀓𑁆𑀔𑀸𑀢𑀺𑀆𑀤𑀬𑁄 𑀧𑀸𑀴𑀺𑀬𑀁 (𑀧𑀝𑀺. 𑀫. 𑁧.𑁧𑁧𑁧) 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑀺𑀢𑀸 ‘‘𑀲𑀤𑁆𑀥𑁄 𑀧𑀼𑀕𑁆𑀕𑀮𑁄 𑀅𑀧𑁆𑀧𑀭𑀚𑀓𑁆𑀔𑁄’’𑀢𑀺𑀆𑀤𑀺𑀦𑀸. 𑀔𑀦𑁆𑀥𑀸𑀤𑀬𑁄 𑀏𑀯 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄 𑀲𑀫𑁆𑀧𑀢𑁆𑀢𑀺𑀪𑀯𑀪𑀽𑀢𑁄 𑀮𑁄𑀓𑁄 𑀲𑀫𑁆𑀧𑀢𑁆𑀢𑀺𑀪𑀯𑀮𑁄𑀓𑁄, 𑀲𑀼𑀕𑀢𑀺𑀲𑀗𑁆𑀔𑀸𑀢𑁄 𑀉𑀧𑀧𑀢𑁆𑀢𑀺𑀪𑀯𑁄. 𑀲𑀫𑁆𑀧𑀢𑁆𑀢𑀺 𑀪𑀯𑀢𑀺 𑀏𑀢𑁂𑀦𑀸𑀢𑀺 𑀲𑀫𑁆𑀧𑀢𑁆𑀢𑀺𑀲𑀫𑁆𑀪𑀯𑀮𑁄𑀓𑁄, 𑀲𑀼𑀕𑀢𑀺𑀲𑀁𑀯𑀢𑁆𑀢𑀦𑀺𑀬𑁄 𑀓𑀫𑁆𑀫𑀪𑀯𑁄. 𑀤𑀼𑀕𑁆𑀕𑀢𑀺𑀲𑀗𑁆𑀔𑀸𑀢𑀉𑀧𑀧𑀢𑁆𑀢𑀺𑀪𑀯-𑀤𑀼𑀕𑁆𑀕𑀢𑀺𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀪𑀯𑀸 𑀯𑀺𑀧𑀢𑁆𑀢𑀺𑀪𑀯𑀮𑁄𑀓-𑀯𑀺𑀧𑀢𑁆𑀢𑀺𑀲𑀫𑁆𑀪𑀯𑀮𑁄𑀓𑀸. 𑀧𑀼𑀦 𑀏𑀓𑀓𑀤𑀼𑀓𑀸𑀤𑀺𑀯𑀲𑁂𑀦 𑀮𑁄𑀓𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀏𑀓𑁄 𑀮𑁄𑀓𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀳𑀸𑀭𑀸𑀤𑀬𑁄 𑀯𑀺𑀬 𑀳𑀺 𑀆𑀳𑀸𑀭𑀝𑁆𑀞𑀺𑀢𑀺𑀓𑀸 𑀲𑀗𑁆𑀔𑀸𑀭𑀸 𑀲𑀩𑁆𑀩𑁂 𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄𑀢𑀺. 𑀢𑀢𑁆𑀣 𑀏𑀓𑁄 𑀮𑁄𑀓𑁄 𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺 𑀬𑀸𑀬𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀓𑀣𑀸𑀬 𑀲𑀩𑁆𑀩𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸 𑀯𑀼𑀢𑁆𑀢𑀸, 𑀢𑀸𑀬 𑀲𑀩𑁆𑀩𑁄 𑀲𑀗𑁆𑀔𑀸𑀭𑀮𑁄𑀓𑁄 𑀏𑀓𑁄 𑀏𑀓𑀯𑀺𑀥𑁄 𑀧𑀓𑀸𑀭𑀦𑁆𑀢𑀭𑀲𑁆𑀲 𑀅𑀪𑀸𑀯𑀢𑁄. 𑀤𑁆𑀯𑁂 𑀮𑁄𑀓𑀸𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀸𑀫𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀦𑀺𑀩𑁆𑀩𑀸𑀦𑀲𑁆𑀲 𑀅𑀕𑁆𑀕𑀳𑀡𑀁 𑀢𑀲𑁆𑀲 𑀅𑀮𑁄𑀓𑀲𑀪𑀸𑀯𑀢𑁆𑀢𑀸.

𑀦𑀦𑀼 𑀘 ‘‘𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 𑀏𑀢𑁆𑀣 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀢𑀸𑀬 𑀫𑀕𑁆𑀕𑀨𑀮𑀸𑀦𑀫𑁆𑀧𑀺 𑀮𑁄𑀓𑀢𑀸 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺, 𑀧𑀭𑀺𑀜𑁆𑀜𑁂𑀬𑁆𑀬𑀸𑀦𑀁 𑀤𑀼𑀓𑁆𑀔𑀲𑀘𑁆𑀘𑀥𑀫𑁆𑀫𑀸𑀦𑀁 𑀇𑀥 ‘‘𑀮𑁄𑀓𑁄’’𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀅𑀣 𑀯𑀸 𑀦 𑀮𑀼𑀚𑁆𑀚𑀢𑀺 𑀦 𑀧𑀮𑀼𑀚𑁆𑀚𑀢𑀻𑀢𑀺 𑀬𑁄 𑀕𑀳𑀺𑀢𑁄 𑀢𑀣𑀸 𑀦 𑀳𑁄𑀢𑀺, 𑀲𑁄 𑀮𑁄𑀓𑁄𑀢𑀺 𑀢𑀁𑀕𑀳𑀡𑀭𑀳𑀺𑀢𑀸𑀦𑀁 𑀮𑁄𑀓𑀼𑀢𑁆𑀢𑀭𑀸𑀦𑀁 𑀦𑀢𑁆𑀣𑀺 𑀮𑁄𑀓𑀢𑀸. 𑀉𑀧𑀸𑀤𑀸𑀦𑀸𑀦𑀁 𑀆𑀭𑀫𑁆𑀫𑀡𑀪𑀽𑀢𑀸 𑀔𑀦𑁆𑀥𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀅𑀦𑀼𑀭𑁄𑀥𑀸𑀤𑀺𑀯𑀢𑁆𑀣𑀼𑀪𑀽𑀢𑀸 𑀮𑀸𑀪𑀸𑀤𑀬𑁄 𑀅𑀝𑁆𑀞 ¶ 𑀮𑁄𑀓𑀥𑀫𑁆𑀫𑀸. 𑀤𑀲𑀸𑀬𑀢𑀦𑀸𑀦𑀻𑀢𑀺 𑀤𑀲 𑀭𑀽𑀧𑀸𑀬𑀢𑀦𑀸𑀦𑀺. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀯𑀺𑀯𑀝𑁆𑀝𑀚𑁆𑀛𑀸𑀲𑀬𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀢𑀲𑁆𑀲 𑀘 𑀲𑀩𑁆𑀩𑀁 𑀢𑁂𑀪𑀽𑀫𑀓𑀓𑀫𑁆𑀫𑀁 𑀕𑀭𑀳𑀺𑀢𑀩𑁆𑀩𑀁 𑀯𑀚𑁆𑀚𑀺𑀢𑀩𑁆𑀩𑀜𑁆𑀘 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀩𑁆𑀩𑁂 𑀅𑀪𑀺𑀲𑀗𑁆𑀔𑀸𑀭𑀸 𑀯𑀚𑁆𑀚𑀸, 𑀲𑀩𑁆𑀩𑁂 𑀪𑀯𑀕𑀸𑀫𑀺𑀓𑀫𑁆𑀫𑀸 𑀯𑀚𑁆𑀚𑀸’’𑀢𑀺 ¶ . 𑀅𑀧𑁆𑀧𑀭𑀚𑀓𑁆𑀔𑀢𑀸𑀤𑀻𑀲𑀼 𑀧𑀜𑁆𑀘𑀲𑀼 𑀤𑀼𑀓𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀤𑀲 𑀤𑀲 𑀓𑀢𑁆𑀯𑀸 ‘‘𑀧𑀜𑁆𑀜𑀸𑀲𑀸𑀬 𑀆𑀓𑀸𑀭𑁂𑀳𑀺 𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀘 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑁄𑀧𑀭𑀺𑀬𑀢𑁆𑀢𑀁 𑀚𑀸𑀦𑀸𑀢𑀻𑀢𑀺 𑀓𑀢𑁆𑀯𑀸 𑀢𑀣𑀸 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀅𑀧𑁆𑀧𑀭𑀚𑀓𑁆𑀔𑀸𑀤𑀺𑀪𑀩𑁆𑀩𑀸𑀤𑀺𑀯𑀲𑁂𑀦 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀪𑀕𑀯𑀢𑁄 𑀢𑁂 𑀲𑀢𑁆𑀢𑀸 𑀧𑀼𑀜𑁆𑀚𑀧𑀼𑀜𑁆𑀚𑀸𑀯 𑀳𑀼𑀢𑁆𑀯𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀦 𑀏𑀓𑁂𑀓𑀸.

𑀉𑀧𑁆𑀧𑀮𑀸𑀦𑀺 𑀏𑀢𑁆𑀣 𑀲𑀦𑁆𑀢𑀻𑀢𑀺 𑀉𑀧𑁆𑀧𑀮𑀺𑀦𑀻. 𑀉𑀧𑁆𑀧𑀮𑀕𑀘𑁆𑀙𑁄𑀧𑀺 𑀚𑀮𑀸𑀲𑀬𑁄𑀧𑀺 𑀘. 𑀇𑀥 𑀧𑀦 𑀚𑀮𑀸𑀲𑀬𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀉𑀧𑁆𑀧𑀮𑀯𑀦𑁂’’𑀢𑀺. 𑀬𑀸𑀦𑀺 𑀳𑀺 𑀉𑀤𑀓𑀲𑁆𑀲 𑀅𑀦𑁆𑀢𑁄 𑀦𑀺𑀫𑀼𑀕𑁆𑀕𑀸𑀦𑁂𑀯 𑀳𑀼𑀢𑁆𑀯𑀸 𑀧𑀼𑀲𑀦𑁆𑀢𑀺 𑀯𑀟𑁆𑀠𑀦𑁆𑀢𑀺, 𑀢𑀸𑀦𑀺 𑀅𑀦𑁆𑀢𑁄𑀦𑀺𑀫𑀼𑀕𑁆𑀕𑀧𑁄𑀲𑀻𑀦𑀺. 𑀤𑀻𑀧𑀺𑀢𑀸𑀦𑀻𑀢𑀺 𑀅𑀝𑁆𑀞𑀓𑀣𑀸𑀬𑀁 𑀧𑀓𑀸𑀲𑀺𑀢𑀸𑀦𑀺, 𑀇𑀥𑁂𑀯 𑀯𑀸 ‘‘𑀅𑀜𑁆𑀜𑀸𑀦𑀺𑀧𑀻’’𑀢𑀺𑀆𑀤𑀺𑀦𑀸 𑀤𑀲𑁆𑀲𑀺𑀢𑀸𑀦𑀺. 𑀉𑀕𑁆𑀖𑀝𑀺𑀢𑀜𑁆𑀜𑀽𑀢𑀺 𑀉𑀕𑁆𑀖𑀝𑀦𑀁 𑀦𑀸𑀫 𑀜𑀸𑀡𑀼𑀕𑁆𑀖𑀝𑀦𑀁, 𑀜𑀸𑀡𑁂𑀦 𑀉𑀕𑁆𑀖𑀝𑀺𑀢𑀫𑀢𑁆𑀢𑁂𑀦𑁂𑀯 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀧𑀜𑁆𑀘𑀺𑀢𑀁 𑀯𑀺𑀢𑁆𑀣𑀸𑀭𑀺𑀢𑀫𑁂𑀯 𑀅𑀢𑁆𑀣𑀁 𑀚𑀸𑀦𑀸𑀢𑀻𑀢𑀺 𑀯𑀺𑀧𑀜𑁆𑀘𑀺𑀢𑀜𑁆𑀜𑀽. 𑀦𑀺𑀤𑁆𑀤𑁂𑀲𑀸𑀤𑀻𑀳𑀺 𑀥𑀫𑁆𑀫𑀸𑀪𑀺𑀲𑀫𑀬𑀸𑀬 𑀦𑁂𑀢𑀩𑁆𑀩𑁄𑀢𑀺 𑀦𑁂𑀬𑁆𑀬𑁄. 𑀧𑀚𑁆𑀚𑀢𑀺 𑀅𑀢𑁆𑀣𑁄 𑀏𑀢𑁂𑀦𑀸𑀢𑀺 𑀧𑀤𑀁, 𑀧𑀚𑁆𑀚𑀢𑁂 𑀜𑀸𑀬𑀢𑁂𑀢𑀺 𑀯𑀸 𑀧𑀤𑀁, 𑀢𑀤𑀢𑁆𑀣𑁄. 𑀧𑀤𑀁 𑀧𑀭𑀫𑀁 𑀏𑀢𑀲𑁆𑀲, 𑀦 𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑁄𑀢𑀺 𑀧𑀤𑀧𑀭𑀫𑁄.

𑀉𑀤𑀸𑀳𑀝𑀯𑁂𑀮𑀸𑀬𑀸𑀢𑀺 𑀉𑀤𑀸𑀳𑀸𑀭𑁂 𑀥𑀫𑁆𑀫𑀲𑁆𑀲 𑀉𑀤𑁆𑀤𑁂𑀲𑁂 𑀉𑀤𑀸𑀳𑀝𑀫𑀢𑁆𑀢𑁂𑀬𑁂𑀯. 𑀥𑀫𑁆𑀫𑀸𑀪𑀺𑀲𑀫𑀬𑁄𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀲𑁆𑀲 𑀜𑀸𑀡𑁂𑀦 𑀲𑀤𑁆𑀥𑀺𑀁 𑀅𑀪𑀺𑀲𑀫𑀬𑁄. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀁𑀔𑀺𑀢𑁆𑀢𑁂𑀦 𑀫𑀸𑀢𑀺𑀓𑀸𑀬 𑀞𑀧𑀺𑀬𑀫𑀸𑀦𑀸𑀬 𑀤𑁂𑀲𑀦𑀸𑀦𑀼𑀲𑀸𑀭𑁂𑀦 𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀢𑀼𑀁 𑀲𑀫𑀢𑁆𑀣𑁄 𑀧𑀼𑀕𑁆𑀕𑀮𑁄 ‘‘𑀉𑀕𑁆𑀖𑀝𑀺𑀢𑀜𑁆𑀜𑀽’’𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀲𑀁𑀔𑀺𑀢𑁆𑀢𑁂𑀦 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁂 𑀯𑀺𑀪𑀚𑀺𑀬𑀫𑀸𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀲𑀫𑀢𑁆𑀣𑁄 𑀧𑀼𑀕𑁆𑀕𑀮𑁄 ‘‘𑀯𑀺𑀧𑀜𑁆𑀘𑀺𑀢𑀜𑁆𑀜𑀽’’𑀢𑀺 𑀯𑀼𑀘𑁆𑀘𑀢𑀺. 𑀉𑀤𑁆𑀤𑁂𑀲𑀢𑁄𑀢𑀺 𑀉𑀤𑁆𑀤𑁂𑀲𑀳𑁂𑀢𑀼. 𑀉𑀤𑁆𑀤𑀺𑀲𑀦𑁆𑀢𑀲𑁆𑀲 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑀲𑁆𑀲 𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀧𑀼𑀘𑁆𑀙𑀢𑁄𑀢𑀺 𑀅𑀢𑁆𑀣𑀁 𑀧𑀭𑀺𑀧𑀼𑀘𑁆𑀙𑀦𑁆𑀢𑀲𑁆𑀲. 𑀅𑀦𑀼𑀧𑀼𑀩𑁆𑀩𑁂𑀦 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀻𑀢𑀺 𑀅𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺 𑀳𑁄𑀢𑀺. 𑀦 𑀢𑀸𑀬 𑀚𑀸𑀢𑀺𑀬𑀸 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀻𑀢𑀺 𑀢𑁂𑀦 𑀅𑀢𑁆𑀢𑀪𑀸𑀯𑁂𑀦 𑀫𑀕𑁆𑀕𑀁 𑀯𑀸 𑀨𑀮𑀁 𑀯𑀸 𑀅𑀦𑁆𑀢𑀫𑀲𑁄 𑀛𑀸𑀦𑀁 𑀯𑀸 𑀯𑀺𑀧𑀲𑁆𑀲𑀦𑀁 𑀯𑀸 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀤𑀧𑀭𑀫𑁄𑀢𑀺 𑀅𑀬𑀁 𑀧𑀼𑀕𑁆𑀕𑀮𑁄 𑀙𑀩𑁆𑀩𑀺𑀥𑀁 𑀩𑁆𑀬𑀜𑁆𑀚𑀦𑀧𑀤𑀁 𑀙𑀩𑁆𑀩𑀺𑀥𑀁 𑀅𑀢𑁆𑀣𑀧𑀤𑀦𑁆𑀢𑀺 𑀇𑀤𑀁 𑀧𑀤𑀫𑁂𑀯 𑀧𑀭𑀫𑀁 𑀅𑀲𑁆𑀲𑀸𑀢𑀺 𑀧𑀤𑀧𑀭𑀫𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄.

𑀯𑀸𑀲𑀦𑀸 ¶ 𑀳𑁄𑀢𑀻𑀢𑀺 𑀤𑁂𑀲𑀦𑀸 𑀨𑀮𑀯𑁄𑀳𑀸𑀭𑁂𑀦 𑀯𑀸𑀲𑀦𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑀸. 𑀦 𑀳𑀺 𑀓𑀸𑀘𑀺 𑀩𑀼𑀤𑁆𑀥𑀸𑀦𑀁 𑀤𑁂𑀲𑀦𑀸 𑀦𑀺𑀭𑀢𑁆𑀣𑀓𑀸. 𑀬𑁂𑀢𑀺 𑀬𑁂 𑀤𑀼𑀯𑀺𑀥𑁂 𑀧𑀼𑀕𑁆𑀕𑀮𑁂. 𑀯𑀺𑀪𑀗𑁆𑀕𑁂 𑀓𑀫𑁆𑀫𑀸𑀯𑀭𑀡𑁂𑀦𑀸𑀢𑀺 𑀧𑀜𑁆𑀘𑀯𑀺𑀥𑁂𑀦 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑁂𑀦. 𑀯𑀺𑀧𑀸𑀓𑀸𑀯𑀭𑀡𑁂𑀦𑀸𑀢𑀺 𑀅𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀸. 𑀬𑀲𑁆𑀫𑀸 𑀧𑀦 𑀤𑀼𑀳𑁂𑀢𑀼𑀓𑀸𑀦𑀫𑁆𑀧𑀺 𑀅𑀭𑀺𑀬𑀫𑀕𑁆𑀕𑀧𑀝𑀺𑀯𑁂𑀥𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀤𑀼𑀳𑁂𑀢𑀼𑀓𑀸 𑀧𑀝𑀺𑀲𑀦𑁆𑀥𑀺𑀧𑀺 𑀯𑀺𑀧𑀸𑀓𑀸𑀯𑀭𑀡𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀓𑀺𑀮𑁂𑀲𑀸𑀯𑀭𑀡𑁂𑀦𑀸𑀢𑀺 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸. 𑀅𑀲𑁆𑀲𑀤𑁆𑀥𑀸𑀢𑀺 𑀩𑀼𑀤𑁆𑀥𑀸𑀤𑀻𑀲𑀼 𑀲𑀤𑁆𑀥𑀸𑀭𑀳𑀺𑀢𑀸. 𑀅𑀘𑁆𑀙𑀦𑁆𑀤𑀺𑀓𑀸𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑀭𑀳𑀺𑀢𑀸. 𑀉𑀢𑁆𑀢𑀭𑀓𑀼𑀭𑀼𑀓𑀸 𑀫𑀦𑀼𑀲𑁆𑀲𑀸 𑀅𑀘𑁆𑀙𑀦𑁆𑀤𑀺𑀓𑀝𑁆𑀞𑀸𑀦𑀁 𑀧𑀯𑀺𑀝𑁆𑀞𑀸. 𑀤𑀼𑀧𑁆𑀧𑀜𑁆𑀜𑀸𑀢𑀺 𑀪𑀯𑀗𑁆𑀕𑀧𑀜𑁆𑀜𑀸𑀬 𑀧𑀭𑀺𑀳𑀻𑀦𑀸. 𑀪𑀯𑀗𑁆𑀕𑀧𑀜𑁆𑀜𑀸𑀬 ¶ 𑀧𑀦 𑀧𑀭𑀺𑀧𑀼𑀡𑁆𑀡𑀸𑀬𑀧𑀺 𑀬𑀲𑁆𑀲 𑀪𑀯𑀗𑁆𑀕𑀘𑀮𑀦𑀁 𑀮𑁄𑀓𑀼𑀢𑁆𑀢𑀭𑀲𑁆𑀲 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀲𑁄𑀧𑀺 𑀤𑀼𑀧𑁆𑀧𑀜𑁆𑀜𑁄 𑀏𑀯 𑀦𑀸𑀫. 𑀅𑀪𑀩𑁆𑀩𑀸 𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀦𑁆𑀢𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀲𑀗𑁆𑀔𑀸𑀢𑀁 𑀫𑀕𑁆𑀕𑀁 𑀑𑀓𑁆𑀓𑀫𑀺𑀢𑀼𑀁 𑀅𑀥𑀺𑀕𑀦𑁆𑀢𑀼𑀁 𑀅𑀪𑀩𑁆𑀩𑀸. 𑀦 𑀓𑀫𑁆𑀫𑀸𑀯𑀭𑀡𑁂𑀦𑀸𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀭𑀸𑀕𑀘𑀭𑀺𑀢𑀸𑀤𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁧.𑁪𑁩) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀦𑀺𑀩𑁆𑀩𑀸𑀦𑀲𑁆𑀲 𑀤𑁆𑀯𑀸𑀭𑀁 𑀧𑀯𑀺𑀲𑀦𑀫𑀕𑁆𑀕𑁄 𑀯𑀺𑀯𑀭𑀺𑀢𑁆𑀯𑀸 𑀞𑀧𑀺𑀢𑁄 𑀫𑀳𑀸𑀓𑀭𑀼𑀡𑀽𑀧𑀦𑀺𑀲𑁆𑀲𑀬𑁂𑀦 𑀲𑀬𑀫𑁆𑀪𑀼𑀜𑀸𑀡𑁂𑀦 𑀅𑀥𑀺𑀕𑀢𑀢𑁆𑀢𑀸. 𑀲𑀤𑁆𑀥𑀁 𑀧𑀫𑀼𑀜𑁆𑀘𑀦𑁆𑀢𑀽𑀢𑀺 𑀅𑀢𑁆𑀢𑀦𑁄 𑀲𑀤𑁆𑀥𑀁 𑀥𑀫𑁆𑀫𑀲𑀫𑁆𑀧𑀝𑀺𑀘𑁆𑀙𑀦𑀬𑁄𑀕𑁆𑀬𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀼, 𑀲𑀤𑁆𑀤𑀳𑀦𑀸𑀓𑀸𑀭𑁂𑀦 𑀦𑀁 𑀉𑀧𑀝𑁆𑀞𑀧𑁂𑀦𑁆𑀢𑀽𑀢𑀺 𑀅𑀢𑁆𑀣𑁄. 𑀲𑀼𑀔𑁂𑀦 𑀅𑀓𑀺𑀘𑁆𑀙𑁂𑀦 𑀧𑀯𑀢𑁆𑀢𑀦𑀻𑀬𑀢𑀸𑀬 𑀲𑀼𑀧𑁆𑀧𑀯𑀢𑁆𑀢𑀺𑀢𑀁. 𑀦 𑀪𑀸𑀲𑀺𑀁 𑀦 𑀪𑀸𑀲𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀲𑀺𑀁.

𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀉𑀧𑀕𑀢𑀸𑀦𑀁 𑀤𑁂𑀯𑀸𑀦𑀁 𑀩𑁆𑀭𑀳𑁆𑀫𑀸𑀦𑀜𑁆𑀘 𑀢𑀲𑁆𑀲 𑀧𑀼𑀭𑀢𑁄 𑀅𑀦𑁆𑀢𑀭𑀥𑀸𑀦𑀁 𑀦𑀸𑀫 𑀅𑀢𑀺𑀝𑁆𑀞𑀦𑀦𑁆𑀢𑀺 𑀆𑀳 ‘‘𑀲𑀓𑀝𑁆𑀞𑀸𑀦𑀫𑁂𑀯 𑀕𑀢𑁄’’𑀢𑀺. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀓𑁄 𑀥𑀫𑁆𑀫𑁄 𑀏𑀯 𑀯𑀺𑀦𑁂𑀬𑁆𑀬𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀦𑀝𑁆𑀞𑁂𑀦 𑀘𑀓𑁆𑀓𑀦𑁆𑀢𑀺 𑀥𑀫𑁆𑀫𑀘𑀓𑁆𑀓𑀁. 𑀅𑀣 𑀯𑀸 𑀘𑀓𑁆𑀓𑀦𑁆𑀢𑀺 𑀆𑀡𑀸. 𑀥𑀫𑁆𑀫𑀦𑁆𑀢𑀺 𑀤𑁂𑀲𑀦𑀸. 𑀅𑀣 𑀯𑀸 𑀅𑀢𑁆𑀣𑀥𑀫𑁆𑀫𑀢𑁄 𑀅𑀦𑀧𑁂𑀢𑀢𑁆𑀢𑀸 𑀥𑀫𑁆𑀫𑀜𑁆𑀘 𑀢𑀁 𑀧𑀯𑀢𑁆𑀢𑀦𑀝𑁆𑀞𑁂𑀦 𑀘𑀓𑁆𑀓𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁. 𑀥𑀫𑁆𑀫𑁂𑀦 𑀜𑀸𑀬𑁂𑀦 𑀘𑀓𑁆𑀓𑀦𑁆𑀢𑀺𑀧𑀺 𑀥𑀫𑁆𑀫𑀘𑀓𑁆𑀓𑀁. 𑀬𑀣𑀸𑀳 ‘‘𑀥𑀫𑁆𑀫𑀜𑁆𑀘 𑀧𑀯𑀢𑁆𑀢𑁂𑀢𑀺 𑀘𑀓𑁆𑀓𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀘𑀓𑁆𑀓𑀜𑁆𑀘 𑀧𑀯𑀢𑁆𑀢𑁂𑀢𑀺 𑀥𑀫𑁆𑀫𑀜𑁆𑀘𑀸𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀥𑀫𑁆𑀫𑁂𑀦 𑀧𑀯𑀢𑁆𑀢𑁂𑀢𑀻𑀢𑀺 𑀥𑀫𑁆𑀫𑀘𑀓𑁆𑀓𑀁, 𑀥𑀫𑁆𑀫𑀘𑀭𑀺𑀬𑀸𑀬 𑀧𑀯𑀢𑁆𑀢𑁂𑀢𑀻𑀢𑀺 𑀥𑀫𑁆𑀫𑀘𑀓𑁆𑀓’’𑀦𑁆𑀢𑀺𑀆𑀤𑀺 (𑀧𑀝𑀺. 𑀫. 𑁨.𑁪𑁦-𑁪𑁧). 𑀧𑀯𑀢𑁆𑀢𑁂𑀲𑀻𑀢𑀺 𑀧𑀝𑁆𑀞𑀧𑁂𑀲𑀺.

𑀩𑁆𑀭𑀳𑁆𑀫𑀸𑀬𑀸𑀘𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀕𑀸𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁩. 𑀅𑀬𑀁 ¶ 𑀯𑀺𑀢𑀓𑁆𑀓𑁄𑀢𑀺 𑀅𑀬𑀁 ‘‘𑀓𑀺𑀦𑁆𑀢𑀸𑀳𑀁 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀺𑀢𑀯𑀺𑀢𑀓𑁆𑀓𑁄. 𑀅𑀜𑁆𑀜𑀲𑁆𑀫𑀺𑀦𑁆𑀢𑀺 𑀧𑀭𑀲𑁆𑀫𑀺𑀁. 𑀅𑀢𑁆𑀢𑀸 𑀦 𑀳𑁄𑀢𑀻𑀢𑀺 𑀳𑀺 𑀅𑀜𑁆𑀜𑁄, 𑀧𑀭𑁄. 𑀲𑁄 𑀧𑀦𑁂𑀢𑁆𑀣 𑀦 𑀬𑁄 𑀓𑁄𑀘𑀺 𑀅𑀥𑀺𑀧𑁆𑀧𑁂𑀢𑁄, 𑀅𑀣 𑀔𑁄 𑀕𑀭𑀼𑀝𑁆𑀞𑀸𑀦𑀻𑀬𑁄. 𑀢𑁂𑀦𑀸𑀳 ‘‘𑀓𑀜𑁆𑀘𑀺 𑀕𑀭𑀼𑀝𑁆𑀞𑀸𑀦𑁂 𑀅𑀝𑁆𑀞𑀧𑁂𑀢𑁆𑀯𑀸’’𑀢𑀺. 𑀧𑀢𑀺𑀲𑁆𑀲𑀯𑀢𑀺 𑀕𑀭𑀼𑀦𑁄 ‘‘𑀆𑀫𑀸’’𑀢𑀺 𑀲𑀫𑁆𑀧𑀝𑀺𑀘𑁆𑀙𑀢𑀻𑀢𑀺 𑀧𑀢𑀺𑀲𑁆𑀲𑁄, 𑀦 𑀧𑀢𑀺𑀲𑁆𑀲𑁄𑀢𑀺 𑀅𑀧𑁆𑀧𑀢𑀺𑀲𑁆𑀲𑁄. 𑀧𑀢𑀺𑀲𑁆𑀲𑀬𑀭𑀳𑀺𑀢𑁄 𑀕𑀭𑀼𑀧𑀲𑁆𑀲𑀬𑀭𑀳𑀺𑀢𑁄𑀢𑀺 𑀅𑀢𑁆𑀣𑁄.

𑀲𑀤𑁂𑀯𑀓𑁂𑀢𑀺 𑀅𑀯𑀬𑀯𑁂𑀦 𑀯𑀺𑀕𑁆𑀕𑀳𑁄 𑀲𑀫𑀼𑀤𑀸𑀬𑁄 𑀲𑀫𑀸𑀲𑀢𑁆𑀣𑁄. 𑀲𑀤𑁂𑀯𑀓𑀕𑁆𑀕𑀳𑀡𑁂𑀦 𑀧𑀜𑁆𑀘𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁 𑀧𑀸𑀭𑀺𑀲𑁂𑀲𑀜𑀸𑀬𑁂𑀦 𑀇𑀢𑀭𑁂𑀲𑀁 𑀧𑀤𑀦𑁆𑀢𑀭𑁂𑀳𑀺 𑀲𑀗𑁆𑀕𑀳𑀺𑀢𑀢𑁆𑀢𑀸, 𑀲𑀫𑀸𑀭𑀓𑀕𑁆𑀕𑀳𑀡𑁂𑀦 𑀙𑀝𑁆𑀞𑀓𑀸𑀫𑀸𑀯𑀘𑀭𑀤𑁂𑀯𑀕𑁆𑀕𑀳𑀡𑀁 ¶ 𑀧𑀘𑁆𑀘𑀸𑀲𑀢𑁆𑀢𑀺𑀜𑀸𑀬𑁂𑀦. 𑀢𑀢𑁆𑀣 𑀳𑀺 𑀫𑀸𑀭𑁄 𑀚𑀸𑀢𑁄 𑀢𑀦𑁆𑀦𑀺𑀯𑀸𑀲𑀻 𑀘 𑀳𑁄𑀢𑀺. 𑀲𑀩𑁆𑀭𑀳𑁆𑀫𑀓𑀯𑀘𑀦𑁂𑀦 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀩𑁆𑀭𑀳𑁆𑀫𑀕𑁆𑀕𑀳𑀡𑀁 𑀧𑀘𑁆𑀘𑀸𑀲𑀢𑁆𑀢𑀺𑀜𑀸𑀬𑁂𑀦𑁂𑀯. ‘‘𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬𑀸’’𑀢𑀺 𑀲𑀸𑀲𑀦𑀲𑁆𑀲 𑀧𑀘𑁆𑀘𑀢𑁆𑀣𑀺𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀕𑁆𑀕𑀳𑀡𑀁. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁 𑀅𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀅𑀲𑀫𑀺𑀢𑀧𑀸𑀧𑀸𑀦𑀁 𑀅𑀩𑀸𑀳𑀺𑀢𑀧𑀸𑀧𑀸𑀦𑀜𑁆𑀘 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀢𑁂𑀦𑁂𑀯 𑀯𑀘𑀦𑁂𑀦 𑀕𑀳𑀺𑀢𑀢𑁆𑀢𑀸. 𑀓𑀸𑀫𑀁 ‘‘𑀲𑀤𑁂𑀯𑀓𑁂’’𑀢𑀺𑀆𑀤𑀺𑀯𑀺𑀲𑁂𑀲𑀦𑀸𑀦𑀁 𑀯𑀲𑁂𑀦 𑀲𑀢𑁆𑀢𑀯𑀺𑀲𑀬𑁄 𑀮𑁄𑀓𑀲𑀤𑁆𑀤𑁄𑀢𑀺 𑀯𑀺𑀜𑁆𑀜𑀸𑀬𑀢𑀺 𑀢𑀼𑀮𑁆𑀬𑀬𑁄𑀕𑀯𑀺𑀲𑀬𑀢𑁆𑀢𑀸 𑀢𑁂𑀲𑀁. ‘‘𑀲𑀮𑁄𑀫𑀓𑁄 𑀲𑀧𑀓𑁆𑀔𑀓𑁄’’𑀢𑀺𑀆𑀤𑀻𑀲𑀼 𑀧𑀦 𑀅𑀢𑀼𑀮𑁆𑀬𑀬𑁄𑀕𑁂𑀧𑀺 𑀅𑀬𑀁 𑀲𑀫𑀸𑀲𑁄 𑀮𑀩𑁆𑀪𑀢𑀻𑀢𑀺 𑀩𑁆𑀬𑀪𑀺𑀘𑀸𑀭𑀤𑀲𑁆𑀲𑀦𑀢𑁄 𑀧𑀚𑀸𑀕𑀳𑀡𑀦𑁆𑀢𑀺 𑀧𑀚𑀸𑀯𑀘𑀦𑁂𑀦 𑀲𑀢𑁆𑀢𑀮𑁄𑀓𑀕𑁆𑀕𑀳𑀡𑀁. 𑀤𑁂𑀯𑀪𑀸𑀯𑀲𑀸𑀫𑀜𑁆𑀜𑁂𑀦 𑀫𑀸𑀭𑀩𑁆𑀭𑀳𑁆𑀫𑁂𑀲𑀼 𑀕𑀳𑀺𑀢𑁂𑀲𑀼𑀧𑀺 𑀇𑀢𑀭𑁂𑀳𑀺 𑀢𑁂𑀲𑀁 𑀮𑀩𑁆𑀪𑀫𑀸𑀦𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀯𑀺𑀲𑀼𑀁 𑀕𑀳𑀡𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀸𑀭𑁄 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀫𑀸𑀭𑁄 𑀩𑁆𑀭𑀳𑁆𑀫𑀸𑀦𑀫𑁆𑀧𑀺 𑀯𑀺𑀘𑀓𑁆𑀔𑀼𑀓𑀫𑁆𑀫𑀸𑀬 𑀧𑀳𑁄𑀢𑀻𑀢𑀺 𑀆𑀳 ‘‘𑀲𑀩𑁆𑀩𑁂𑀲’’𑀦𑁆𑀢𑀺. 𑀉𑀧𑀭𑀻𑀢𑀺 𑀉𑀧𑀭𑀺𑀪𑀸𑀯𑁂. 𑀩𑁆𑀭𑀳𑁆𑀫𑀸𑀢𑀺 𑀤𑀲𑀲𑀳𑀲𑁆𑀲𑀺𑀩𑁆𑀭𑀳𑁆𑀫𑀸𑀦𑀁 𑀲𑀦𑁆𑀥𑀸𑀬𑀸𑀳. 𑀢𑀣𑀸 𑀘𑀸𑀳 ‘‘𑀤𑀲𑀳𑀺 𑀅𑀗𑁆𑀕𑀼𑀮𑀻𑀳𑀻’’𑀢𑀺𑀆𑀤𑀺. 𑀇𑀥 𑀤𑀻𑀖𑀦𑀺𑀓𑀸𑀬𑀸𑀤𑀬𑁄 𑀯𑀺𑀬 𑀩𑀸𑀳𑀺𑀭𑀓𑀸𑀦𑀫𑁆𑀧𑀺 𑀕𑀦𑁆𑀣𑀦𑀺𑀓𑀸𑀬𑁄 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀏𑀓𑀦𑀺𑀓𑀸𑀬𑀸𑀤𑀺𑀯𑀲𑁂𑀦𑀸’’𑀢𑀺.

𑀯𑀢𑁆𑀣𑀼𑀯𑀺𑀚𑁆𑀚𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑀺𑀚𑁆𑀚𑀸𑀝𑁆𑀞𑀸𑀦𑀸𑀦𑀺 𑀲𑀗𑁆𑀕𑀳𑀺𑀢𑀸𑀦𑀺. 𑀬𑀣𑀸𑀲𑀓𑀁 𑀓𑀫𑁆𑀫𑀓𑀺𑀮𑁂𑀲𑁂𑀳𑀺 𑀧𑀚𑀸𑀢𑀢𑁆𑀢𑀸 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀧𑀚𑀸, 𑀲𑀢𑁆𑀢𑀦𑀺𑀓𑀸𑀬𑁄. 𑀢𑀲𑁆𑀲𑀸 𑀧𑀚𑀸𑀬. 𑀲𑀤𑁂𑀯𑀫𑀦𑀼𑀲𑁆𑀲𑀸𑀬𑀸𑀢𑀺 𑀯𑀸 𑀇𑀫𑀺𑀦𑀸 𑀲𑀫𑁆𑀫𑀼𑀢𑀺𑀤𑁂𑀯𑀕𑁆𑀕𑀳𑀡𑀁 𑀢𑀤𑀯𑀲𑀺𑀝𑁆𑀞𑀫𑀦𑀼𑀲𑁆𑀲𑀮𑁄𑀓𑀕𑁆𑀕𑀳𑀡𑀜𑁆𑀘 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀪𑀸𑀕𑀲𑁄 𑀮𑁄𑀓𑀁 𑀕𑀳𑁂𑀢𑁆𑀯𑀸 𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀪𑀸𑀕𑀲𑁄 𑀮𑁄𑀓𑀁 𑀕𑀳𑁂𑀢𑁆𑀯𑀸 𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑁂𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀮𑁄𑀓𑀯𑀲𑁂𑀦 𑀯𑀼𑀢𑁆𑀢𑀸𑀦𑀺 ‘‘𑀮𑁄𑀓𑀻𑀬𑀦𑁆𑀢𑀺 𑀏𑀢𑁆𑀣 𑀓𑀫𑁆𑀫𑀓𑀫𑁆𑀫𑀨𑀮𑀸𑀦𑀻’’𑀢𑀺 ¶ 𑀓𑀢𑁆𑀯𑀸, 𑀧𑀚𑀸𑀯𑀲𑁂𑀦 ‘‘𑀳𑁂𑀢𑀼𑀧𑀘𑁆𑀘𑀬𑁂𑀳𑀺 𑀧𑀚𑀸𑀬𑀢𑀻’’𑀢𑀺 𑀓𑀢𑁆𑀯𑀸. 𑀲𑀻𑀮𑀲𑀫𑁆𑀧𑀦𑁆𑀦𑀢𑀭𑀦𑁆𑀢𑀺 𑀏𑀢𑁆𑀣 𑀧𑀭𑀺𑀧𑀼𑀡𑁆𑀡𑀲𑀫𑁆𑀧𑀦𑁆𑀦𑀢𑀸 𑀅𑀥𑀺𑀧𑁆𑀧𑁂𑀢𑀸 ‘‘𑀲𑀫𑁆𑀧𑀦𑁆𑀦𑀁 𑀲𑀸𑀮𑀺𑀓𑁂𑀤𑀸𑀭’’𑀦𑁆𑀢𑀺𑀆𑀤𑀻𑀲𑀼 (𑀚𑀸. 𑁧.𑁧𑁪.𑁧) 𑀯𑀺𑀬. 𑀢𑁂𑀦𑀸𑀳 ‘‘𑀅𑀥𑀺𑀓𑀢𑀭𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀧𑀭𑀺𑀧𑀼𑀡𑁆𑀡𑀫𑁆𑀧𑀺 ‘‘𑀅𑀥𑀺𑀓𑀢𑀭’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀫𑀭𑀳𑀢𑀺. 𑀲𑁂𑀲𑁂𑀲𑀽𑀢𑀺 ‘‘𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀢𑀭’’𑀦𑁆𑀢𑀺𑀆𑀤𑀻𑀲𑀼.

𑀓𑀸𑀭𑀡𑀦𑁆𑀢𑀺𑀆𑀤𑀻𑀲𑀼 𑀓𑀸𑀭𑀡𑀦𑁆𑀢𑀺 𑀬𑀼𑀢𑁆𑀢𑀺𑀁. 𑀅𑀢𑁆𑀣𑀦𑁆𑀢𑀺 𑀅𑀯𑀺𑀧𑀭𑀻𑀢𑀢𑁆𑀣𑀁. 𑀯𑀼𑀟𑁆𑀠𑀺𑀦𑁆𑀢𑀺 𑀅𑀪𑀺𑀯𑀼𑀟𑁆𑀠𑀺𑀦𑀺𑀫𑀺𑀢𑁆𑀢𑀁.

𑀇𑀫𑀺𑀦𑀸 𑀯𑀘𑀦𑁂𑀦𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀯𑀘𑀦𑁂𑀦. 𑀦 𑀓𑁂𑀯𑀮𑀁 𑀇𑀫𑀺𑀦𑀸𑀯, 𑀲𑀼𑀢𑁆𑀢𑀦𑁆𑀢𑀭𑀫𑁆𑀧𑀺 𑀆𑀦𑁂𑀢𑁆𑀯𑀸 𑀧𑀝𑀺𑀩𑀸𑀳𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀻’’𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀸 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬 (𑀤𑀻. 𑀦𑀺. 𑀅𑀝𑁆𑀞. 𑁩.𑁧𑁬𑁨) 𑀯𑀼𑀢𑁆𑀢𑀫𑁂𑀯. 𑀲𑀭𑀦𑁆𑀢𑀺 𑀓𑀭𑀡𑁂 𑀏𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀲𑀭𑀦𑁆𑀢𑁂𑀦𑀸’’𑀢𑀺, 𑀲𑀭𑀦𑁆𑀢𑀺 𑀯𑀸 𑀲𑀭𑀡𑀳𑁂𑀢𑀽𑀢𑀺 𑀅𑀢𑁆𑀣𑁄.

𑀕𑀸𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀩𑁆𑀭𑀳𑁆𑀫𑀤𑁂𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁪. 𑀏𑀓𑀓𑁄𑀢𑀺 ¶ 𑀯𑀺𑀯𑁂𑀓𑀝𑁆𑀞𑀺𑀢𑀢𑀸𑀬 𑀦𑀺𑀲𑁆𑀲𑀝𑁄. 𑀕𑀡𑀲𑀗𑁆𑀕𑀡𑀺𑀓𑀸𑀪𑀸𑀯𑁄 𑀢𑀲𑁆𑀲𑀸𑀦𑁂𑀦 𑀤𑀻𑀧𑀺𑀢𑁄, 𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀸𑀪𑀸𑀯𑁄 𑀧𑀦 ‘‘𑀅𑀧𑁆𑀧𑀫𑀢𑁆𑀢𑁄’’𑀢𑀺𑀆𑀤𑀻𑀳𑀺 𑀧𑀓𑀸𑀲𑀺𑀢𑁄. 𑀧𑁂𑀲𑀺𑀢𑀢𑁆𑀢𑁄𑀢𑀺 𑀦𑀺𑀩𑁆𑀩𑀸𑀦𑀁 𑀧𑀢𑀺 𑀧𑁂𑀲𑀺𑀢𑀘𑀺𑀢𑁆𑀢𑁄. 𑀲𑀫𑁆𑀫𑀤𑁂𑀯𑀸𑀢𑀺 𑀜𑀸𑀬𑁂𑀦𑁂𑀯. 𑀲𑁄 𑀧𑀦 𑀬𑀤𑀺 𑀆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀮𑀩𑁆𑀪𑀢𑀺, 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀅𑀣 𑀧𑀝𑀺𑀧𑀤𑀸𑀭𑀫𑁆𑀪𑀢𑁄 𑀧𑀝𑁆𑀞𑀸𑀬 𑀮𑀩𑁆𑀪𑀢𑀺, 𑀏𑀯𑀫𑁆𑀧𑀺 𑀯𑀝𑁆𑀝𑀢𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀯𑀸 𑀢𑀣𑀸 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑁂𑀦 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑀲𑁆𑀲 𑀲𑀺𑀔𑀸𑀧𑁆𑀧𑀢𑁆𑀢𑀢𑁆𑀢𑀸 𑀫𑀕𑁆𑀕𑀥𑀫𑁆𑀫𑁂𑀲𑀼 𑀯𑀺𑀬 𑀨𑀮𑀥𑀫𑁆𑀫𑁂𑀲𑀼𑀧𑀺 𑀲𑀸𑀢𑀺𑀲𑀬𑁄 𑀅𑀲𑀫𑁆𑀫𑁄𑀳𑁄𑀢𑀺 ‘‘𑀲𑀬𑀁 𑀅𑀪𑀺𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑀸𑀫𑀁 𑀚𑀸𑀦𑀺𑀢𑁆𑀯𑀸’’𑀢𑀺. 𑀬𑀣𑀸 𑀚𑀸𑀦𑀦𑀸 𑀧𑀦𑀲𑁆𑀲 𑀲𑀘𑁆𑀙𑀺𑀓𑀭𑀡𑀁 𑀅𑀢𑁆𑀢𑀧𑀘𑁆𑀘𑀓𑁆𑀔𑀓𑀺𑀭𑀺𑀬𑀸𑀢𑀺 ‘‘𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸’’𑀢𑀺. 𑀢𑀣𑀸 𑀲𑀘𑁆𑀙𑀺𑀓𑀺𑀭𑀺𑀬𑀸 𑀘𑀲𑁆𑀲 𑀯𑀺𑀧𑀲𑁆𑀲𑀦𑀸𑀧𑀝𑀺𑀮𑀸𑀪𑁄𑀢𑀺 ‘‘𑀉𑀧𑀲𑀫𑁆𑀧𑀚𑁆𑀚𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀧𑀝𑀺𑀮𑀪𑀺𑀢𑁆𑀯𑀸’’𑀢𑀺. 𑀏𑀢𑁂𑀦𑀸𑀢𑀺 ‘‘𑀔𑀻𑀡𑀸 𑀚𑀸𑀢𑀻’’𑀢𑀺𑀆𑀤𑀺𑀯𑀘𑀦𑁂𑀦.

𑀚𑀸𑀢𑀺 ¶ 𑀔𑀻𑀡𑀸𑀢𑀺 𑀏𑀢𑁆𑀣 𑀚𑀸𑀢𑀺𑀲𑀻𑀲𑁂𑀦 𑀢𑀩𑁆𑀩𑀺𑀓𑀸𑀭𑀯𑀦𑁆𑀢𑁄 𑀔𑀦𑁆𑀥𑀸 𑀯𑀼𑀢𑁆𑀢𑀸. 𑀧𑀼𑀩𑁆𑀩𑁂𑀯 𑀔𑀻𑀡𑀢𑁆𑀢𑀸𑀢𑀺 𑀫𑀕𑁆𑀕𑀸𑀥𑀺𑀕𑀫𑀦𑀢𑁄 𑀧𑀕𑁂𑀯 𑀅𑀢𑀻𑀢𑀪𑀸𑀯𑁂𑀦𑁂𑀯 𑀔𑀻𑀡𑀢𑁆𑀢𑀸. 𑀢𑀢𑁆𑀣 𑀅𑀦𑀸𑀕𑀢𑁂𑀲𑀼. 𑀯𑀸𑀬𑀸𑀫𑀸𑀪𑀸𑀯𑀢𑁄𑀢𑀺 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀅𑀦𑀸𑀕𑀢𑀪𑀸𑀯𑀲𑀸𑀫𑀜𑁆𑀜𑀁 𑀕𑀳𑁂𑀢𑁆𑀯𑀸 𑀮𑁂𑀲𑁂𑀦 𑀯𑀼𑀢𑁆𑀢𑀁. 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀯𑀺𑀚𑁆𑀚𑀫𑀸𑀦𑀢𑁆𑀢𑀸𑀢𑀺 𑀲𑀁𑀓𑀺𑀮𑀺𑀝𑁆𑀞𑀸 𑀘 𑀫𑀕𑁆𑀕𑀪𑀸𑀯𑀦𑀸𑀢𑀺 𑀲𑀺𑀬𑀸𑀢𑀺 𑀯𑀘𑀦𑀲𑁂𑀲𑁄. 𑀬𑀣𑀸 𑀅𑀚𑀸𑀢𑀨𑀮𑀢𑀭𑀼𑀡𑀭𑀼𑀓𑁆𑀔𑀫𑀽𑀮𑁂 𑀙𑀺𑀦𑁆𑀦𑁂 𑀆𑀬𑀢𑀺𑀉𑀧𑁆𑀧𑀚𑁆𑀚𑀦𑀸𑀭𑀳𑀸𑀦𑀺 𑀨𑀮𑀸𑀦𑀺 𑀙𑁂𑀤𑀦𑀧𑀘𑁆𑀘𑀬𑀸 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀦𑀝𑁆𑀞𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀏𑀯𑀫𑁂𑀯 𑀪𑀸𑀯𑀦𑀸𑀬 𑀅𑀲𑀢𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑀸 𑀓𑀺𑀮𑁂𑀲𑀸 𑀢𑀧𑁆𑀧𑀘𑁆𑀘𑀬𑀸 𑀚𑀸𑀢𑀺 𑀘 𑀫𑀕𑁆𑀕𑀪𑀸𑀯𑀦𑀸𑀬 𑀲𑀢𑀺 𑀦 𑀉𑀧𑁆𑀧𑀚𑁆𑀚𑀫𑀸𑀦𑀸 𑀧𑀳𑀻𑀦𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀫𑀕𑁆𑀕𑀲𑁆𑀲 𑀧𑀦𑀸’’𑀢𑀺𑀆𑀤𑀺𑀦𑀸. 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀢𑀁 𑀆𑀧𑀚𑁆𑀚𑀦𑁂𑀦 𑀜𑀸𑀡𑁂𑀦 𑀔𑀻𑀡𑀭𑀸𑀕𑀯𑀲𑁂𑀦.

𑀲𑁄𑀴𑀲𑀓𑀺𑀘𑁆𑀘𑀪𑀸𑀯𑀸𑀬𑀸𑀢𑀺 𑀲𑁄𑀴𑀲𑀓𑀺𑀘𑁆𑀘𑀢𑀸𑀬, 𑀲𑁄𑀴𑀲𑀯𑀺𑀥𑀲𑁆𑀲 𑀯𑀸 𑀓𑀺𑀘𑁆𑀘𑀲𑁆𑀲 𑀪𑀸𑀯𑀸𑀬 𑀉𑀧𑁆𑀧𑀸𑀤𑀦𑀸𑀬. 𑀧𑀸𑀴𑀺𑀬𑀁 𑀲𑀧𑀤𑀸𑀦𑀦𑁆𑀢𑀺 𑀲𑀧𑀤𑀸𑀦𑀘𑀸𑀭𑁄 𑀯𑀼𑀢𑁆𑀢𑁄 𑀪𑀸𑀯𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁂𑀦𑀸𑀢𑀺 𑀆𑀳 ‘‘𑀲𑀧𑀤𑀸𑀦𑀘𑀸𑀭’’𑀦𑁆𑀢𑀺. 𑀅𑀦𑀼𑀓𑁆𑀓𑀫𑁆𑀫𑀸𑀢𑀺 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸. 𑀆𑀳𑀼𑀢𑀺𑀧𑀺𑀡𑁆𑀟𑀦𑁆𑀢𑀺 𑀚𑀼𑀳𑀺𑀢𑀩𑁆𑀩𑀧𑀺𑀡𑁆𑀟𑀁, 𑀚𑀼𑀳𑀦𑀯𑀲𑁂𑀦 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀧𑀺𑀢𑀩𑁆𑀩𑀧𑀸𑀬𑀸𑀲𑀧𑀺𑀡𑁆𑀟𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀪𑀽𑀢𑀩𑀮𑀺𑀓𑀫𑁆𑀫𑀦𑁆𑀢𑀺 𑀢𑀣𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀩𑀮𑀺𑀓𑀫𑁆𑀫𑀓𑀭𑀡𑀁. 𑀳𑀭𑀺𑀢𑀼𑀧𑀮𑀺𑀢𑁆𑀢𑀦𑁆𑀢𑀺 𑀅𑀮𑁆𑀮𑀕𑁄𑀫𑀬𑁂𑀦 𑀓𑀢𑀧𑀭𑀺𑀪𑀡𑁆𑀟𑀁. 𑀯𑀦𑀫𑀸𑀮𑀧𑀭𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀫𑀦𑁄𑀳𑀭𑀸𑀳𑀺 𑀯𑀦𑀧𑀼𑀧𑁆𑀨𑀫𑀸𑀮𑀸𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑀁. 𑀥𑀽𑀫𑀓𑀝𑀘𑁆𑀙𑀽𑀢𑀺 𑀥𑀽𑀫𑀧𑀸𑀦𑀁. 𑀲𑀻𑀮𑀕𑀦𑁆𑀥𑀦𑁆𑀢𑀺 𑀲𑀻𑀮𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀓𑀺𑀢𑁆𑀢𑀺𑀕𑀦𑁆𑀥𑀁. 𑀖𑀸𑀬𑀫𑀸𑀦𑀲𑁆𑀲𑀸𑀢𑀺 𑀉𑀧𑀕𑀢𑀁 𑀕𑀡𑁆𑀳𑀦𑁆𑀢𑀲𑁆𑀲.

𑀇𑀫𑀫𑁆𑀳𑀸 ¶ 𑀞𑀸𑀦𑀸𑀢𑀺 𑀇𑀫𑀲𑁆𑀫𑀸 𑀫𑀦𑀼𑀲𑁆𑀲𑀸𑀦𑀁 𑀯𑀲𑀦𑀝𑁆𑀞𑀸𑀦𑀸, 𑀫𑀳𑀸𑀧𑀣𑀯𑀺𑀢𑀮𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀩𑁆𑀩𑀳𑁂𑀝𑁆𑀞𑀺𑀫𑁄𑀢𑀺 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀦𑀁 𑀯𑀸𑀲𑀩𑁆𑀭𑀳𑁆𑀫𑀮𑁄𑀓𑀫𑀸𑀳. 𑀩𑁆𑀭𑀳𑁆𑀫𑀧𑀣𑁄 𑀦𑀸𑀫 𑀘𑀢𑁆𑀢𑀸𑀭𑀺 𑀓𑀼𑀲𑀮𑀚𑁆𑀛𑀸𑀦𑀸𑀦𑀺 𑀩𑁆𑀭𑀳𑁆𑀫𑀮𑁄𑀓𑀫𑀕𑁆𑀕𑀪𑀸𑀯𑀢𑁄. 𑀚𑀻𑀯𑀺𑀢𑀧𑀣𑁄 𑀦𑀸𑀫 𑀚𑀻𑀯𑀺𑀢𑀧𑀯𑀢𑁆𑀢𑀺𑀉𑀧𑀸𑀬𑀪𑀸𑀯𑀢𑁄. ‘‘𑀪𑀼𑀜𑁆𑀚𑀢𑀼 𑀪𑀯𑀁 𑀫𑀳𑀸𑀩𑁆𑀭𑀳𑁆𑀫𑀸’’𑀢𑀺 𑀯𑀘𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀓𑀺𑀁 𑀚𑀧𑁆𑀧𑀲𑀻’’𑀢𑀺𑀆𑀤𑀺. 𑀢𑀺𑀡𑀩𑀻𑀚𑀸𑀦𑀻𑀢𑀺 𑀲𑀸𑀮𑀺𑀢𑀡𑁆𑀟𑀼𑀮𑀸𑀤𑀻𑀦𑀺. 𑀕𑁄𑀬𑀽𑀲𑀦𑁆𑀢𑀺 𑀔𑀻𑀭𑀁 𑀚𑀺𑀕𑀼𑀘𑁆𑀙𑀦𑁆𑀢𑁄 𑀯𑀤𑀢𑀺. 𑀅𑀬𑀫𑁆𑀧𑀺 𑀅𑀢𑁆𑀣𑁄 ‘‘𑀦𑁂𑀢𑀸𑀤𑀺𑀲𑁄 𑀩𑁆𑀭𑀳𑁆𑀫𑀪𑀓𑁆𑀔𑁄’’𑀢𑀺 𑀯𑀤𑀦𑁆𑀢𑁂𑀦 𑀤𑀻𑀧𑀺𑀢𑁄𑀢𑀺.

𑀅𑀢𑀺𑀤𑁂𑀯𑀧𑀢𑁆𑀢𑁄𑀧𑀺 𑀧𑀜𑁆𑀘𑀔𑀦𑁆𑀥𑀽𑀧𑀥𑀻𑀦𑀁 𑀅𑀢𑁆𑀣𑀺𑀢𑀸𑀬 𑀓𑀺𑀮𑁂𑀲𑀽𑀧𑀥𑀺𑀆𑀤𑀻𑀦𑀁𑀬𑁂𑀯 𑀯𑀺𑀭𑀳𑀺𑀢𑀪𑀸𑀯𑁄 𑀕𑀳𑀺𑀢𑁄. 𑀅𑀜𑁆𑀜𑀢𑁆𑀭 𑀳𑀺 𑀪𑀸𑀯𑀧𑀘𑁆𑀘𑀬𑀁 𑀢𑀤𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀅𑀢𑀺𑀤𑁂𑀯𑀪𑀸𑀯𑀁 𑀧𑀢𑁆𑀢𑁄’’𑀢𑀺. 𑀬𑀲𑁆𑀫𑀸 𑀩𑁆𑀭𑀳𑁆𑀫𑀸𑀦𑁄𑀧𑀺 𑀤𑁂𑀯𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀤𑁂𑀯𑀸 𑀏𑀯, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀢𑀺𑀩𑁆𑀭𑀳𑁆𑀫𑀪𑀸𑀯𑀁 𑀧𑀢𑁆𑀢𑁄’’𑀢𑀺.

𑀅𑀢𑁆𑀢𑀸𑀦𑀁 ¶ 𑀪𑀸𑀯𑁂𑀢𑁆𑀯𑀸𑀢𑀺 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀅𑀢𑁆𑀢𑀸𑀦𑀁 𑀯𑀟𑁆𑀠𑁂𑀢𑁆𑀯𑀸 𑀧𑀭𑀺𑀩𑁆𑀭𑀽𑀳𑀺𑀢𑁆𑀯𑀸 𑀞𑀺𑀢𑁄.

𑀧𑀼𑀣𑀼𑀚𑁆𑀚𑀦𑀸 𑀢𑀲𑀸 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀧𑀭𑀺𑀢𑁆𑀢𑀸𑀲𑀯𑀲𑁂𑀦 𑀢𑀸𑀲𑀦𑀢𑁄. 𑀔𑀻𑀡𑀸𑀲𑀯𑀸 𑀣𑀸𑀯𑀭𑀸 𑀦𑀸𑀫 𑀲𑀩𑁆𑀩𑀲𑁄 𑀕𑀢𑀻𑀲𑀼 𑀲𑀜𑁆𑀘𑀭𑀡𑀸𑀪𑀸𑀯𑀢𑁄. 𑀢𑀣𑀸 𑀳𑀺 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀲𑀩𑁆𑀩𑀲𑁄 𑀅𑀤𑀺𑀝𑁆𑀞𑀢𑁆𑀢𑀸 𑀪𑀯𑀤𑀸𑀬𑀚𑁆𑀚𑀲𑁆𑀲 𑀢𑀡𑁆𑀳𑀸𑀤𑀸𑀲𑀩𑁆𑀬𑀲𑁆𑀲 𑀪𑀸𑀯𑀢𑁄 𑀏𑀓𑀘𑁆𑀘𑀸𑀲𑀼 𑀕𑀢𑀻𑀲𑀼 𑀲𑀜𑁆𑀘𑀭𑀡𑀲𑀪𑀸𑀯𑀢𑁄 𑀲𑁂𑀓𑁆𑀔𑀸 𑀣𑀸𑀯𑀭𑀸 𑀦 𑀳𑁄𑀦𑁆𑀢𑀺. 𑀪𑀚𑀫𑀸𑀦𑀸𑀢𑀺 𑀪𑀚𑀸𑀧𑀺𑀬𑀫𑀸𑀦𑀸. 𑀣𑀸𑀯𑀭𑀧𑀓𑁆𑀔𑀫𑁂𑀯 𑀪𑀚𑀦𑁆𑀢𑀺 𑀲𑀩𑁆𑀩𑀲𑁂𑀝𑁆𑀞𑀧𑀓𑁆𑀔𑀁 𑀏𑀓𑀦𑁆𑀢𑀧𑀲𑀝𑁆𑀞𑀁 𑀪𑀚𑀫𑀸𑀦𑀪𑀸𑀯𑀁 𑀉𑀧𑀸𑀤𑀸𑀬.

𑀧𑀳𑀻𑀦𑀓𑀺𑀮𑁂𑀲𑁄 𑀔𑀻𑀡𑀸𑀲𑀯𑁄 𑀯𑀺𑀲𑁂𑀦𑁄. 𑀲𑀼𑀔𑀁 𑀆𑀬𑀢𑀺 𑀲𑀼𑀔𑀸𑀬𑀢𑀺, 𑀢𑀲𑁆𑀲 𑀓𑀸𑀭𑀓𑀁 𑀲𑀼𑀔𑀸𑀬𑀢𑀺𑀓𑀁.

𑀩𑁆𑀭𑀳𑁆𑀫𑀤𑁂𑀯𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀩𑀓𑀩𑁆𑀭𑀳𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁫. ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀲𑀲𑁆𑀲𑀢𑀤𑀺𑀝𑁆𑀞𑀺. 𑀲𑀳 𑀓𑀸𑀬𑁂𑀦𑀸𑀢𑀺 𑀲𑀳 𑀢𑁂𑀦 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑁂𑀦. 𑀩𑁆𑀭𑀳𑁆𑀫𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀩𑁆𑀭𑀳𑁆𑀫𑀯𑀢𑁆𑀣𑀼𑀁. 𑀅𑀦𑀺𑀘𑁆𑀘𑀁 ‘‘𑀦𑀺𑀘𑁆𑀘’’𑀦𑁆𑀢𑀺 𑀯𑀤𑀢𑀺 𑀅𑀦𑀺𑀘𑁆𑀘𑀢𑀸𑀬 𑀅𑀢𑁆𑀢𑀦𑁄 𑀅𑀧𑀜𑁆𑀜𑀸𑀬𑀫𑀸𑀦𑀢𑁆𑀢𑀸. 𑀣𑀺𑀭𑀦𑁆𑀢𑀺 𑀤𑀴𑁆𑀳𑀁, 𑀯𑀺𑀦𑀸𑀲𑀸𑀪𑀸𑀯𑀢𑁄 𑀲𑀸𑀭𑀪𑀽𑀢𑀦𑁆𑀢𑀺 𑀅𑀢𑁆𑀣𑁄. 𑀉𑀧𑁆𑀧𑀸𑀤𑀯𑀺𑀧𑀭𑀺𑀡𑀸𑀫𑀸𑀪𑀸𑀯𑀢𑁄 𑀲𑀤𑀸 𑀯𑀺𑀚𑁆𑀚𑀫𑀸𑀦𑀁. 𑀓𑁂𑀯𑀮𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀁. 𑀢𑁂𑀦𑀸𑀳 ‘‘𑀅𑀔𑀡𑁆𑀟’’𑀦𑁆𑀢𑀺. 𑀓𑁂𑀯𑀮𑀦𑁆𑀢𑀺 𑀯𑀸 𑀚𑀸𑀢𑀺𑀆𑀤𑀻𑀳𑀺 𑀅𑀲𑀫𑁆𑀫𑀺𑀲𑁆𑀲𑀁, 𑀯𑀺𑀭𑀳𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀧𑁆𑀧𑀸𑀤𑀸𑀤𑀻𑀦𑀁 𑀅𑀪𑀸𑀯𑀢𑁄 𑀏𑀯 𑀅𑀘𑀯𑀦𑀥𑀫𑁆𑀫𑀁. 𑀓𑁄𑀘𑀺 𑀚𑀸𑀬𑀦𑀓𑁄…𑀧𑁂… 𑀉𑀧𑀧𑀚𑁆𑀚𑀦𑀓𑁄 𑀯𑀸 𑀦𑀢𑁆𑀣𑀺 𑀦𑀺𑀘𑁆𑀘𑀪𑀸𑀯𑀢𑁄 ¶ 𑀞𑀸𑀦𑁂𑀦 𑀲𑀤𑁆𑀥𑀺𑀁 𑀢𑀦𑁆𑀦𑀺𑀯𑀸𑀲𑀻𑀦𑀁. 𑀦𑀺𑀘𑁆𑀘𑀪𑀸𑀯𑀜𑁆𑀳𑀺 𑀲𑁄 𑀧𑀝𑀺𑀚𑀸𑀦𑀸𑀢𑀺. 𑀢𑀺𑀲𑁆𑀲𑁄 𑀛𑀸𑀦𑀪𑀽𑀫𑀺𑀬𑁄𑀢𑀺 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀪𑀽𑀫𑀺𑀬𑁄. 𑀘𑀢𑀼𑀢𑁆𑀣𑀚𑁆𑀛𑀸𑀦𑀪𑀽𑀫𑀺𑀯𑀺𑀲𑁂𑀲𑀸 𑀳𑀺 𑀅𑀲𑀜𑁆𑀜𑀲𑀼𑀤𑁆𑀥𑀸𑀯𑀸𑀲𑀸𑀭𑀼𑀧𑁆𑀧𑀪𑀯𑀸. 𑀦𑀺𑀩𑁆𑀩𑀸𑀦𑀦𑁆𑀢𑀺 𑀯𑀸 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀦 𑀧𑀭𑀺𑀲𑀫𑀸𑀧𑀦𑀢𑁆𑀣𑁄, 𑀢𑀲𑁆𑀫𑀸 ‘‘𑀲𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 ‘‘𑀅𑀲𑀜𑁆𑀜…𑀧𑁂… 𑀪𑀯𑀸’’𑀢𑀺 𑀯𑀼𑀢𑁆𑀢𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀝𑀺𑀩𑀸𑀳𑀢𑀻𑀢𑀺 𑀲𑀦𑁆𑀢𑀁𑀬𑁂𑀯 𑀲𑀫𑀸𑀦𑀁 𑀅𑀚𑀸𑀦𑀦𑁆𑀢𑁄𑀯 ‘‘𑀦𑀢𑁆𑀣𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀏𑀓𑁂 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄.

𑀳𑁂𑀝𑁆𑀞𑀽𑀧𑀧𑀢𑁆𑀢𑀺𑀓𑁄𑀢𑀺 ¶ 𑀳𑁂𑀝𑁆𑀞𑀸 𑀪𑀽𑀫𑀻𑀲𑀼 𑀉𑀧𑁆𑀧𑀦𑁆𑀦𑀉𑀧𑀧𑀢𑁆𑀢𑀺𑀓𑁄. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀅𑀦𑀼𑀧𑁆𑀧𑀦𑁆𑀦𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀳𑁂𑀝𑁆𑀞𑀼𑀧𑀧𑀢𑁆𑀢𑀺𑀓𑀁 𑀓𑀢𑁆𑀯𑀸𑀢𑀺 𑀬𑀣𑀸𑀞𑀺𑀢𑀪𑀽𑀫𑀺𑀢𑁄 𑀳𑁂𑀝𑁆𑀞𑀸 𑀢𑀢𑀺𑀬𑀚𑁆𑀛𑀸𑀦𑀪𑀽𑀫𑀺𑀬𑀁 𑀉𑀧𑀧𑀢𑁆𑀢𑀺𑀛𑀸𑀦𑀁 𑀓𑀢𑁆𑀯𑀸, 𑀦 𑀉𑀧𑀭𑀺𑀛𑀸𑀦𑀲𑁆𑀲 𑀯𑀺𑀬 𑀧𑀢𑁆𑀣𑀦𑀸𑀫𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀞𑀫𑀓𑀸𑀮𑁂𑀢𑀺 𑀢𑀲𑁆𑀫𑀺𑀁 𑀪𑀯𑁂 𑀧𑀞𑀫𑀓𑀸𑀮𑁂. 𑀅𑀜𑁆𑀜𑀸𑀲𑀺 𑀆𑀲𑀦𑁆𑀦𑀪𑀸𑀯𑀢𑁄. 𑀉𑀪𑀬𑀦𑁆𑀢𑀺 𑀢𑀁 𑀢𑀁 𑀅𑀢𑁆𑀢𑀦𑀸 𑀓𑀢𑀓𑀫𑁆𑀫𑀜𑁆𑀘𑁂𑀯 𑀦𑀺𑀩𑁆𑀩𑀢𑁆𑀢𑀝𑁆𑀞𑀸𑀦𑀜𑁆𑀘𑀸𑀢𑀺 𑀉𑀪𑀬𑀁. 𑀧𑀫𑀼𑀲𑁆𑀲𑀺𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀁 𑀅𑀦𑀼𑀧𑀥𑀸𑀭𑁂𑀦𑁆𑀢𑁄.

𑀅𑀯𑀺𑀚𑁆𑀚𑀸𑀬 𑀕𑀢𑁄𑀢𑀺 𑀅𑀯𑀺𑀚𑁆𑀚𑀸𑀬 𑀲𑀳 𑀧𑀯𑀢𑁆𑀢𑁄. 𑀲𑀳𑀬𑁄𑀕𑁂 𑀳𑀺 𑀇𑀤𑀁 𑀓𑀭𑀡𑀯𑀘𑀦𑀁. 𑀢𑁂𑀦𑀸𑀳 ‘‘𑀲𑀫𑀦𑁆𑀦𑀸𑀕𑀢𑁄’’𑀢𑀺. 𑀅𑀜𑁆𑀜𑀸𑀡𑀻𑀢𑀺 𑀅𑀯𑀺𑀤𑁆𑀯𑀸. 𑀧𑀜𑁆𑀜𑀸𑀘𑀓𑁆𑀔𑀼𑀯𑀺𑀭𑀳𑀢𑁄 𑀅𑀦𑁆𑀥𑀻𑀪𑀽𑀢𑁄, 𑀅𑀦𑁆𑀥𑀪𑀸𑀯𑀁 𑀆𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀅𑀦𑀸𑀕𑀢𑁂 𑀲𑀤𑁆𑀤𑁄 𑀳𑁄𑀢𑀸𑀬𑀁 ‘‘𑀯𑀓𑁆𑀔𑀢𑀻’’𑀢𑀺 𑀬𑀢𑁆𑀭𑀲𑀤𑁆𑀤𑀧𑀬𑁄𑀕𑁂𑀦, 𑀅𑀢𑁆𑀣𑁄 𑀧𑀦 𑀯𑀢𑁆𑀢𑀫𑀸𑀦𑀓𑀸𑀮𑀺𑀓𑁄. 𑀢𑁂𑀦𑀸𑀳 ‘‘𑀪𑀡𑀢𑀻’’𑀢𑀺. 𑀢𑁂𑀦𑀸𑀳 ‘‘𑀬𑀢𑁆𑀭𑀸’’𑀢𑀺𑀆𑀤𑀺.

𑀫𑀕𑁆𑀕𑀘𑁄𑀭𑁄𑀢𑀺 𑀫𑀕𑁆𑀕𑀧𑀭𑀺𑀩𑀼𑀦𑁆𑀥𑀓𑀘𑁄𑀭𑁄. 𑀲𑀦𑁆𑀢𑀚𑁆𑀚𑀺𑀬𑀫𑀸𑀦𑁄𑀢𑀺 ‘‘𑀅𑀯𑀺𑀚𑁆𑀚𑀸𑀕𑀢𑁄 𑀯𑀢, 𑀪𑁄, 𑀩𑀓𑁄 𑀩𑁆𑀭𑀳𑁆𑀫𑀸’’𑀢𑀺𑀆𑀤𑀺𑀦𑀸 𑀲𑀦𑁆𑀢𑀚𑁆𑀚𑀺𑀬𑀫𑀸𑀦𑁄. 𑀲𑀢𑀺𑀁 𑀮𑀪𑀺𑀢𑁆𑀯𑀸𑀢𑀺 𑀢𑁂𑀦𑁂𑀯 𑀲𑀦𑁆𑀢𑀚𑁆𑀚𑀦𑁂𑀦 𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀧𑀼𑀭𑀺𑀫𑀚𑀸𑀢𑀺𑀯𑀺𑀲𑀬𑀁 𑀲𑀢𑀺𑀁 𑀮𑀪𑀺𑀢𑁆𑀯𑀸. 𑀦𑀺𑀧𑁆𑀧𑀻𑀴𑀺𑀢𑀼𑀓𑀸𑀫𑁄𑀢𑀺 𑀖𑀁𑀲𑁂𑀢𑀼𑀓𑀸𑀫𑁄 𑀤𑁄𑀲𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 ‘‘𑀇𑀤𑀁 𑀧𑀲𑁆𑀲 𑀬𑀸𑀯𑀜𑁆𑀘 𑀢𑁂 𑀅𑀧𑀭𑀤𑁆𑀥’’𑀦𑁆𑀢𑀺. 𑀧𑀼𑀜𑁆𑀜𑀓𑀫𑁆𑀫𑀸𑀢𑀺 𑀧𑀼𑀜𑁆𑀜𑀓𑀸𑀭𑀺𑀦𑁄. 𑀯𑁂𑀤𑁂𑀳𑀺 𑀜𑀸𑀡𑁂𑀳𑀺 𑀕𑀢𑀢𑁆𑀢𑀸 𑀧𑀯𑀢𑁆𑀢𑀢𑁆𑀢𑀸. 𑀅𑀦𑁆𑀢𑀺𑀫𑀸 𑀩𑁆𑀭𑀳𑁆𑀫𑀼𑀧𑀧𑀢𑁆𑀢𑀻𑀢𑀺 𑀲𑀩𑁆𑀩𑀧𑀘𑁆𑀙𑀺𑀫𑀸 𑀩𑁆𑀭𑀳𑁆𑀫𑀪𑀸𑀯𑀧𑁆𑀧𑀢𑁆𑀢𑀺. 𑀅𑀲𑁆𑀫𑀸𑀪𑀺𑀚𑀧𑁆𑀧𑀦𑁆𑀢𑀻𑀢𑀺 𑀅𑀲𑁆𑀫𑁂 𑀅𑀪𑀺𑀚𑀧𑁆𑀧𑀦𑁆𑀢𑀺. 𑀆𑀬𑀼𑀯𑀡𑁆𑀡𑀸𑀤𑀺𑀯𑀲𑁂𑀦 𑀩𑁆𑀭𑀽𑀳𑀺𑀢𑀕𑀼𑀡𑀢𑁆𑀢𑀸 𑀩𑁆𑀭𑀳𑁆𑀫𑀸. 𑀅𑀜𑁆𑀜𑁂𑀳𑀺 𑀫𑀳𑀦𑁆𑀢𑀸 𑀩𑁆𑀭𑀳𑁆𑀫𑀸 𑀫𑀳𑀸𑀩𑁆𑀭𑀳𑁆𑀫𑀸. 𑀅𑀪𑀺𑀪𑀽𑀢𑀺 𑀢𑀁 𑀩𑁆𑀭𑀳𑁆𑀫𑀮𑁄𑀓𑀁 𑀚𑁂𑀝𑁆𑀞𑀓𑀪𑀸𑀯𑁂𑀦 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑁄. 𑀅𑀦𑀪𑀺𑀪𑀽𑀢𑁄𑀢𑀺 𑀅𑀜𑁆𑀜𑁂𑀳𑀺 𑀦 𑀅𑀪𑀺𑀪𑀽𑀢𑁄. 𑀅𑀜𑁆𑀜𑀤𑀢𑁆𑀣𑀽𑀢𑀺 𑀏𑀓𑀁𑀲𑀯𑀘𑀦𑀫𑁂𑀢𑀁. 𑀤𑀲𑁆𑀲𑀦𑀯𑀲𑁂𑀦 𑀤𑀲𑁄, 𑀲𑀩𑁆𑀩𑀁 𑀧𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀲𑀯𑀢𑁆𑀢𑀻𑀢𑀺 𑀲𑀩𑁆𑀩𑀚𑀦𑀁 𑀯𑀲𑁂 𑀯𑀢𑁆𑀢𑁂𑀢𑀺. 𑀇𑀲𑁆𑀲𑀭𑁄𑀢𑀺 𑀮𑁄𑀓𑁂 𑀇𑀲𑁆𑀲𑀭𑁄. 𑀓𑀢𑁆𑀢𑀸 𑀦𑀺𑀫𑁆𑀫𑀸𑀢𑀸𑀢𑀺 𑀮𑁄𑀓𑀲𑁆𑀲 𑀓𑀢𑁆𑀢𑀸 𑀦𑀺𑀫𑁆𑀫𑀸𑀢𑀸. 𑀲𑁂𑀝𑁆𑀞𑁄 𑀲𑀚𑀺𑀢𑀸𑀢𑀺 𑀅𑀬𑀁 𑀮𑁄𑀓𑀲𑁆𑀲 𑀉𑀢𑁆𑀢𑀫𑁄 𑀲𑀁𑀯𑀺𑀪𑀚𑀺𑀢𑀸 𑀘. 𑀯𑀲𑀻 𑀧𑀺𑀢𑀸 𑀪𑀽𑀢𑀪𑀩𑁆𑀬𑀸𑀦𑀦𑁆𑀢𑀺 𑀆𑀘𑀺𑀡𑁆𑀡𑀯𑀲𑀺𑀢𑁆𑀢𑀸 𑀯𑀲𑀻, 𑀅𑀬𑀁 𑀧𑀺𑀢𑀸 𑀪𑀽𑀢𑀸𑀦𑀁 𑀦𑀺𑀩𑁆𑀩𑀢𑁆𑀢𑀸𑀦𑀁 𑀪𑀩𑁆𑀬𑀸𑀦𑀁 𑀲𑀫𑁆𑀪𑀯𑁂𑀲𑀻𑀦𑀦𑁆𑀢𑀺 𑀧𑀢𑁆𑀣𑁂𑀦𑁆𑀢𑀺 𑀯𑀺𑀓𑀢𑁆𑀣𑁂𑀦𑁆𑀢𑀺 𑀧𑀺𑀳𑁂𑀦𑁆𑀢𑀺 𑀫𑀸𑀦𑁂𑀦𑁆𑀢𑀺.

𑀏𑀢𑀦𑁆𑀢𑀺 ¶ ¶ 𑀯𑀺𑀧𑀭𑀻𑀢𑀲𑀜𑁆𑀜𑀸𑀯𑀲𑁂𑀦 ‘‘𑀇𑀤𑀁 𑀦𑀺𑀘𑁆𑀘𑀁 𑀇𑀤𑀁 𑀥𑀼𑀯𑀁 𑀇𑀤𑀁 𑀲𑀲𑁆𑀲𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁 𑀏𑀢𑀁 𑀅𑀧𑁆𑀧𑀁 𑀧𑀭𑀺𑀢𑁆𑀢𑀓𑀦𑁆𑀢𑀺 𑀢𑀁 𑀪𑀕𑀯𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀢𑀁 𑀧𑀦 ‘‘𑀏𑀓𑀲𑁆𑀫𑀺𑀁 𑀓𑁄𑀲𑀮𑀓𑁂 𑀢𑀺𑀮𑀯𑀸𑀳𑁂 𑀯𑀲𑁆𑀲𑀲𑀢𑁂 𑀯𑀲𑁆𑀲𑀲𑀢𑁂 𑀏𑀓𑁂𑀓𑀢𑀺𑀮𑀼𑀤𑁆𑀥𑀸𑀭𑁂 𑀓𑀬𑀺𑀭𑀫𑀸𑀦𑁂 𑀢𑀺𑀮𑀸𑀦𑀺 𑀧𑀭𑀺𑀓𑁆𑀔𑀬𑀁 𑀕𑀘𑁆𑀙𑀦𑁆𑀢𑀺, 𑀦 𑀢𑁆𑀯𑁂𑀯 𑀅𑀩𑁆𑀩𑀼𑀤𑁂 𑀆𑀬𑀽’’𑀢𑀺 𑀏𑀯𑀁 𑀯𑀼𑀢𑁆𑀢𑁄 𑀅𑀩𑁆𑀩𑀼𑀤𑁄, 𑀢𑀁𑀯𑀲𑁂𑀦 𑀯𑀻𑀲𑀢𑀺𑀕𑀼𑀡𑀁 𑀦𑀺𑀭𑀩𑁆𑀩𑀼𑀤𑁄, 𑀢𑁂𑀲𑀁 𑀦𑀺𑀭𑀩𑁆𑀩𑀼𑀤𑀸𑀦𑀁 𑀯𑀲𑁂𑀦 𑀦𑀺𑀭𑀩𑁆𑀩𑀼𑀤𑀲𑀢𑀲𑀳𑀲𑁆𑀲𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀧𑀤𑀼𑀫𑁂 𑀆𑀬𑀼𑀦𑁄 𑀯𑀲𑁆𑀲𑀕𑀡𑀦𑀸 𑀇𑀫𑀲𑁆𑀫𑀺𑀁𑀬𑁂𑀯 𑀲𑀁𑀬𑀼𑀢𑁆𑀢𑁂 𑀧𑀭𑀢𑁄 𑀆𑀕𑀫𑀺𑀲𑁆𑀲𑀢𑀺. 𑀅𑀦𑀦𑁆𑀢𑀤𑀲𑁆𑀲𑀻𑀢𑀺 𑀅𑀦𑀦𑁆𑀢𑀲𑁆𑀲 𑀜𑁂𑀬𑁆𑀬𑀲𑁆𑀲 𑀅𑀦𑀯𑀲𑁂𑀲𑀢𑁄 𑀤𑀲𑁆𑀲𑀻. 𑀯𑀢𑀲𑀻𑀮𑀯𑀢𑁆𑀢𑀦𑁆𑀢𑀺 𑀲𑀫𑀸𑀤𑀸𑀦𑀯𑀲𑁂𑀦 𑀯𑀢𑀪𑀽𑀢𑀁 𑀘𑀸𑀭𑀺𑀢𑁆𑀢𑀲𑀻𑀮𑀯𑀲𑁂𑀦 𑀲𑀫𑀸𑀘𑀺𑀡𑁆𑀡𑀢𑁆𑀢𑀸 𑀲𑀻𑀮𑀯𑀢𑁆𑀢𑀁. 𑀢𑀁 𑀧𑀦 𑀏𑀓𑀫𑁂𑀯𑀸𑀢𑀺 𑀆𑀳 ‘‘𑀲𑀻𑀮𑀫𑁂𑀯𑀸’’𑀢𑀺.

𑀅𑀧𑀸𑀬𑁂𑀲𑀻𑀢𑀺 𑀏𑀢𑁆𑀣 𑀬𑀤𑀸 𑀲𑁄 𑀧𑀺𑀧𑀸𑀲𑀺𑀢𑁂 𑀫𑀦𑀼𑀲𑁆𑀲𑁂 𑀧𑀸𑀦𑀻𑀬𑀁 𑀧𑀸𑀬𑁂𑀲𑀺, 𑀢𑀁 𑀲𑀫𑀼𑀤𑀸𑀕𑀫𑀢𑁄 𑀧𑀝𑁆𑀞𑀸𑀬 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀭𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀧𑀼𑀩𑁆𑀩𑁂𑀢𑀺 𑀧𑀼𑀭𑀺𑀫𑀚𑀸𑀢𑀺𑀬𑀁. 𑀏𑀲 𑀩𑁆𑀭𑀳𑁆𑀫𑀸 ‘‘𑀚𑀭𑀸𑀫𑀭𑀡𑀲𑁆𑀲 𑀅𑀦𑁆𑀢𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀅𑀚𑁆𑀛𑀸𑀲𑀬𑀯𑀲𑁂𑀦 𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺, 𑀲𑁄 𑀢𑀢𑁆𑀣 𑀦𑀺𑀩𑁆𑀩𑀸𑀦𑀲𑀜𑁆𑀜𑀻 𑀅𑀳𑁄𑀲𑀺. 𑀛𑀸𑀦𑀭𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀢𑀻𑀢𑀺 𑀢𑀤𑀸 𑀢𑀲𑁆𑀲𑀸 𑀓𑀺𑀭𑀺𑀬𑀸𑀬 𑀅𑀯𑀺𑀘𑁆𑀙𑁂𑀤𑀢𑁄 𑀧𑀯𑀢𑁆𑀢𑀺𑀁 𑀉𑀧𑀸𑀤𑀸𑀬 𑀯𑀢𑁆𑀢𑀫𑀸𑀦𑀧𑀬𑁄𑀕𑁄. 𑀭𑀢𑁆𑀢𑀦𑁆𑀥𑀓𑀸𑀭𑁂 𑀧𑀼𑀭𑀢𑁄 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀲𑁆𑀲 𑀲𑀓𑀝𑀲𑁆𑀲 𑀅𑀦𑀼𑀲𑁆𑀲𑀭𑀡𑀯𑀲𑁂𑀦 𑀕𑀘𑁆𑀙𑀦𑁆𑀢𑀸𑀦𑀁 𑀲𑀓𑀝𑀸𑀦𑀁 𑀦𑀺𑀯𑀢𑁆𑀢𑀦𑀁 𑀳𑁄𑀢𑀻𑀢𑀺 ‘‘𑀲𑀩𑁆𑀩𑀲𑀓𑀝𑀸𑀦𑀺 𑀢𑀣𑁂𑀯 𑀦𑀺𑀯𑀢𑁆𑀢𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁.

𑀓𑀫𑁆𑀫𑀲𑀚𑁆𑀚𑀸𑀢𑀺 𑀬𑀼𑀤𑁆𑀥𑀲𑀚𑁆𑀚𑀸. 𑀯𑀺𑀮𑁄𑀧𑀦𑁆𑀢𑀺 𑀯𑀺𑀮𑀼𑀢𑁆𑀢𑀪𑀡𑁆𑀟𑀁. 𑀏𑀡𑀺𑀓𑀽𑀮𑀲𑁆𑀫𑀺𑀦𑁆𑀢𑀺 𑀏𑀢𑁆𑀣 ‘‘𑀧𑀦𑀺𑀳𑀢𑀸𑀬 𑀦𑀺𑀘𑁆𑀘𑀕𑀗𑁆𑀕𑀸𑀬 𑀦𑀸𑀫’’𑀦𑁆𑀢𑀺 𑀓𑁂𑀘𑀺. ‘‘𑀏𑀡𑀺𑀫𑀺𑀕𑀩𑀳𑀼𑀮𑀢𑀸𑀬 𑀲𑁄 𑀕𑀗𑁆𑀕𑀸𑀬 𑀢𑀻𑀭𑀧𑁆𑀧𑀤𑁂𑀲𑁄 𑀏𑀡𑀺𑀓𑀽𑀮𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀅𑀧𑀭𑁂. 𑀕𑀗𑁆𑀕𑁂𑀬𑁆𑀬𑀓𑁄𑀢𑀺 𑀕𑀗𑁆𑀕𑀸𑀲𑀦𑁆𑀦𑀺𑀯𑀸𑀲𑀻.

𑀩𑀤𑁆𑀥𑀘𑀭𑁄𑀢𑀺 𑀧𑀝𑀺𑀩𑀤𑁆𑀥𑀘𑀭𑀺𑀬𑁄. 𑀢𑁂𑀦𑀸𑀳 ‘‘𑀅𑀦𑁆𑀢𑁂𑀯𑀸𑀲𑀺𑀓𑁄’’𑀢𑀺. 𑀬𑀲𑁆𑀫𑀸 𑀩𑀼𑀤𑁆𑀥𑁄 𑀲𑀩𑁆𑀩𑀜𑁆𑀜𑀽, 𑀢𑀲𑁆𑀫𑀸 𑀅𑀜𑁆𑀜𑀸𑀲𑀺, 𑀇𑀥 𑀫𑀬𑁆𑀳𑀁 𑀧𑀫𑀼𑀝𑁆𑀞𑀜𑁆𑀘 𑀲𑀩𑁆𑀩𑀁 𑀚𑀸𑀦𑀸𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀩𑁆𑀩𑀁 𑀩𑁆𑀭𑀳𑁆𑀫𑀮𑁄𑀓𑀁 𑀑𑀪𑀸𑀲𑀬𑀦𑁆𑀢𑁄 𑀲𑀩𑁆𑀩𑀫𑁆𑀧𑀺𑀫𑀁 𑀩𑁆𑀭𑀳𑁆𑀫𑀮𑁄𑀓𑀁 𑀪𑀕𑀯𑀸 𑀑𑀪𑀸𑀲𑀁 𑀅𑀪𑀺𑀪𑀯𑀺𑀢𑁆𑀯𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀅𑀢𑁆𑀢𑀦𑁄 𑀑𑀪𑀸𑀲𑀁 𑀑𑀪𑀸𑀲𑁂𑀦𑁆𑀢𑁄 𑀢𑀺𑀝𑁆𑀞𑀢𑀺.

𑀩𑀓𑀩𑁆𑀭𑀳𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀜𑁆𑀜𑀢𑀭𑀩𑁆𑀭𑀳𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁬. 𑀢𑁂𑀚𑁄𑀓𑀲𑀺𑀡𑀧𑀭𑀺𑀓𑀫𑁆𑀫𑀁 ¶ 𑀓𑀢𑁆𑀯𑀸𑀢𑀺 ‘‘𑀢𑁂𑀚𑁄𑀓𑀲𑀺𑀡𑀧𑀭𑀺𑀓𑀫𑁆𑀫𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀏𑀯𑁂𑀢𑁆𑀣 𑀢𑁂𑀚𑁄𑀓𑀲𑀺𑀡𑀧𑀭𑀺𑀓𑀫𑁆𑀫𑀁. 𑀦 𑀳𑀺 𑀩𑀼𑀤𑁆𑀥𑀸𑀦𑀁 𑀅𑀜𑁆𑀜𑁂𑀲𑀁 𑀯𑀺𑀬 𑀢𑀢𑁆𑀣 𑀛𑀸𑀦𑀲𑀫𑀸𑀧𑀚𑁆𑀚𑀦𑁂𑀦 ¶ 𑀧𑀭𑀺𑀓𑀫𑁆𑀫𑀧𑀧𑀜𑁆𑀘𑁄 𑀅𑀢𑁆𑀣𑀺 𑀲𑀩𑁆𑀩𑀢𑁆𑀣𑁂𑀯 𑀘𑀺𑀡𑁆𑀡𑀯𑀲𑀻𑀪𑀸𑀯𑀲𑁆𑀲 𑀧𑀭𑀫𑀼𑀓𑁆𑀓𑀁𑀲𑀪𑀸𑀯𑀧𑁆𑀧𑀢𑁆𑀢𑀢𑁆𑀢𑀸. 𑀢𑀲𑁆𑀲 𑀓𑀺𑀭 𑀩𑁆𑀭𑀳𑁆𑀫𑀼𑀦𑁄 ‘‘𑀬𑀣𑀸𑀳𑀁 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄 𑀅𑀜𑁆𑀜𑁄 𑀦𑀢𑁆𑀣𑀻’’𑀢𑀺 𑀮𑀤𑁆𑀥𑀺, 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀦𑀢𑁆𑀣𑀺 𑀲𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸, 𑀬𑁄 𑀇𑀥 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺. 𑀪𑀕𑀯𑀸 𑀢𑀲𑁆𑀲 𑀢𑀁 𑀮𑀤𑁆𑀥𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀢𑁂𑀚𑁄𑀥𑀸𑀢𑀼𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀲𑁆𑀲 𑀉𑀧𑀭𑀺 𑀆𑀓𑀸𑀲𑁂 𑀦𑀺𑀲𑀻𑀤𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑁂𑀚𑁄𑀥𑀸𑀢𑀼𑀁…𑀧𑁂… 𑀢𑀣𑀸𑀕𑀢𑀁 𑀤𑀺𑀲𑁆𑀯𑀸’’𑀢𑀺. 𑀅𑀝𑁆𑀞𑀺𑀯𑁂𑀥𑀁 𑀯𑀺𑀬𑀁 𑀯𑀺𑀚𑁆𑀛𑀺𑀢𑀩𑁆𑀩𑁄 𑀅𑀝𑁆𑀞𑀺𑀯𑁂𑀥𑀻, 𑀬𑀣𑀸 𑀅𑀝𑁆𑀞𑀺𑀁 𑀯𑀺𑀚𑁆𑀛𑀺𑀢𑁆𑀯𑀸 𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀢𑀺𑀝𑁆𑀞𑀢𑀺, 𑀏𑀯𑀁 𑀯𑀺𑀚𑁆𑀛𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦 𑀅𑀝𑁆𑀞𑀺𑀯𑁂𑀥𑀻 𑀯𑀺𑀬 𑀅𑀝𑁆𑀞𑀺𑀯𑁂𑀥𑀻, 𑀬𑀣𑀸 𑀲𑁄 𑀮𑀤𑁆𑀥𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀏𑀯𑀁 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀸𑀦𑀦𑁆𑀢𑀺 𑀫𑀳𑀸𑀓𑀲𑁆𑀲𑀧𑀫𑀳𑀸𑀓𑀧𑁆𑀧𑀺𑀦𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀸𑀦𑀁.

𑀅𑀜𑁆𑀜𑀩𑁆𑀭𑀳𑁆𑀫𑀲𑀭𑀻𑀭𑀯𑀺𑀫𑀸𑀦𑀸𑀮𑀗𑁆𑀓𑀸𑀭𑀸𑀤𑀻𑀦𑀁 𑀧𑀪𑀸𑀢𑀺 𑀩𑁆𑀭𑀳𑁆𑀫𑀸𑀦𑀁 𑀲𑀭𑀻𑀭𑀧𑁆𑀧𑀪𑀸 𑀯𑀺𑀫𑀸𑀦𑀧𑁆𑀧𑀪𑀸 𑀅𑀮𑀗𑁆𑀓𑀸𑀭𑀯𑀢𑁆𑀣𑀸𑀤𑀻𑀦𑀁 𑀧𑀪𑀸𑀢𑀺 𑀇𑀫𑀲𑁆𑀫𑀺𑀁 𑀩𑁆𑀭𑀳𑁆𑀫𑀮𑁄𑀓𑁂 𑀇𑀫𑀸 𑀲𑀩𑁆𑀩𑀸 𑀧𑀪𑀸 𑀅𑀢𑁆𑀢𑀦𑁄 𑀧𑀪𑀲𑁆𑀲𑀭𑀪𑀸𑀯𑁂𑀦 𑀅𑀪𑀺𑀪𑀯𑀦𑁆𑀢𑀁. 𑀦𑀢𑁆𑀣𑀺 𑀫𑁂 𑀲𑀸𑀢𑀺 𑀇𑀤𑀸𑀦𑀺 𑀫𑁂 𑀲𑀸 𑀤𑀺𑀝𑁆𑀞𑀺 𑀦𑀢𑁆𑀣𑀺, ‘‘𑀦𑀢𑁆𑀣𑀺 𑀲𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸, 𑀬𑁄 𑀇𑀥 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀅𑀬𑀁 𑀮𑀤𑁆𑀥𑀺 𑀦𑀢𑁆𑀣𑀺. 𑀢𑁂𑀦𑀸𑀳 ‘‘𑀢𑀢𑁆𑀭𑀸𑀲𑁆𑀲…𑀧𑁂… 𑀧𑀳𑀻𑀦𑀸’’𑀢𑀺. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀲𑀫𑀸𑀕𑀫𑁂. 𑀬𑀣𑀸 𑀢𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀲𑀩𑁆𑀩𑀲𑁄 𑀤𑀺𑀝𑁆𑀞𑀺𑀕𑀢𑀁 𑀯𑀺𑀫𑀼𑀘𑁆𑀘𑀢𑀺 𑀥𑀫𑁆𑀫𑀘𑀓𑁆𑀔𑀼 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀫𑀳𑀦𑁆𑀢𑀁 𑀥𑀫𑁆𑀫𑀤𑁂𑀲𑀦𑀁 𑀤𑁂𑀲𑁂𑀲𑀺.

‘‘𑀅𑀚𑁆𑀚𑀸𑀧𑀺 𑀢𑁂, 𑀆𑀯𑀼𑀲𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀢𑀢𑁆𑀢𑀓𑁂𑀦𑁂𑀯. 𑀲𑀭𑀽𑀧𑁂𑀦 𑀯𑀼𑀢𑁆𑀢𑀸𑀢𑀺 𑀧𑀞𑀫𑁂𑀦 𑀧𑀸𑀤𑁂𑀦 𑀘𑀢𑀲𑁆𑀲𑁄, 𑀤𑀼𑀢𑀺𑀬𑁂𑀦 𑀏𑀓𑀦𑁆𑀢𑀺 𑀏𑀯𑀁 𑀧𑀜𑁆𑀘 𑀅𑀪𑀺𑀜𑁆𑀜𑀸 𑀲𑀭𑀽𑀧𑁂𑀦 𑀯𑀼𑀢𑁆𑀢𑀸. 𑀓𑀲𑁆𑀫𑀸 𑀏𑀢𑁆𑀣 𑀤𑀺𑀩𑁆𑀩𑀲𑁄𑀢𑀁 𑀦𑀸𑀕𑀢𑀦𑁆𑀢𑀺? 𑀆𑀳 ‘‘𑀢𑀸𑀲𑀁 𑀯𑀲𑁂𑀦 𑀆𑀕𑀢𑀫𑁂𑀯𑀸’’𑀢𑀺. 𑀬𑁂𑀦 𑀇𑀫𑀸 𑀮𑁄𑀓𑀼𑀢𑁆𑀢𑀭𑀸 𑀅𑀪𑀺𑀜𑁆𑀜𑀸 𑀅𑀥𑀺𑀕𑀢𑀸, 𑀦 𑀢𑀲𑁆𑀲 𑀤𑀺𑀩𑁆𑀩𑀲𑁄𑀢𑀲𑀫𑁆𑀧𑀸𑀤𑀦𑀁 𑀪𑀸𑀭𑀺𑀬𑀁 𑀧𑀝𑀺𑀧𑀓𑁆𑀔𑀯𑀺𑀕𑀫𑁂𑀦 𑀲𑀼𑀔𑁂𑀦𑁂𑀯 𑀇𑀚𑁆𑀛𑀦𑀢𑁄.

𑀅𑀜𑁆𑀜𑀢𑀭𑀩𑁆𑀭𑀳𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀩𑁆𑀭𑀳𑁆𑀫𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁭. 𑀧𑀘𑁆𑀘𑁂𑀓𑀁 ¶ 𑀤𑁆𑀯𑀸𑀭𑀩𑀸𑀳𑀦𑁆𑀢𑀺 𑀧𑀘𑁆𑀘𑁂𑀓𑀁 𑀤𑁆𑀯𑀸𑀭𑀩𑀸𑀳𑀁. 𑀧𑀘𑁆𑀘𑁂𑀓-𑀲𑀤𑁆𑀤𑁄 𑀘𑁂𑀢𑁆𑀣 𑀆𑀯𑀼𑀢𑁆𑀢𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄; ‘‘𑀧𑀘𑁆𑀘𑁂𑀓𑀁 𑀧𑀘𑁆𑀘𑁂𑀓’’𑀦𑁆𑀢𑀺 𑀆𑀳 ‘‘𑀏𑀓𑁂𑀓𑁄 𑀏𑀓𑁂𑀓’’𑀦𑁆𑀢𑀺. 𑀢𑁂𑀲𑀼 𑀳𑀺 𑀏𑀓𑁄 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸 𑀕𑀦𑁆𑀥𑀓𑀼𑀝𑀺𑀬𑀸 𑀏𑀓𑀤𑁆𑀯𑀸𑀭𑀩𑀸𑀳𑀁 𑀦𑀺𑀲𑁆𑀲𑀸𑀬 𑀞𑀺𑀢𑁄, 𑀅𑀧𑀭𑁄 𑀅𑀜𑁆𑀜𑀁. 𑀧𑀘𑁆𑀘𑁂𑀓𑀩𑁆𑀭𑀳𑁆𑀫𑀸𑀢𑀺 𑀘 𑀏𑀓𑀘𑀸𑀭𑀻 𑀩𑁆𑀭𑀳𑁆𑀫𑀸, 𑀦 𑀧𑀭𑀺𑀲𑀘𑀸𑀭𑀻 𑀩𑁆𑀭𑀳𑁆𑀫𑀸𑀢𑀺 𑀅𑀢𑁆𑀣𑁄. 𑀲𑀫𑀺𑀤𑁆𑀥𑀺 𑀦𑀸𑀫 𑀲𑀕𑁆𑀕𑁂 𑀲𑀼𑀔𑀼𑀧𑀓𑀭𑀡𑁂𑀳𑀺, 𑀩𑁆𑀭𑀳𑁆𑀫𑀸𑀦𑀜𑁆𑀘 𑀛𑀸𑀦𑀁 𑀲𑀼𑀔𑀼𑀧𑀓𑀭𑀡𑀦𑁆𑀢𑀺 𑀛𑀸𑀦𑀲𑀼𑀔𑁂𑀦 𑀲𑀫𑀺𑀤𑁆𑀥𑁄𑀢𑀺. 𑀲𑀫𑁆𑀧𑀢𑁆𑀢𑀺𑀬𑀸 𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀢𑀸 𑀩𑁆𑀭𑀳𑁆𑀫𑀸𑀦𑀜𑁆𑀘 𑀅𑀪𑀺𑀜𑁆𑀜𑀸𑀕𑀼𑀡𑁂𑀳𑀺 𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀻𑀢𑀺 ¶ 𑀆𑀳 ‘‘𑀨𑀻𑀢𑁄𑀢𑀺 𑀅𑀪𑀺𑀜𑁆𑀜𑀸𑀧𑀼𑀧𑁆𑀨𑁂𑀳𑀺 𑀲𑀼𑀧𑀼𑀧𑁆𑀨𑀺𑀢𑁄’’𑀢𑀺. 𑀅𑀲𑀳𑀦𑁆𑀢𑁄𑀢𑀺 𑀦𑀲𑀳𑀦𑁆𑀢𑁄 𑀦𑀭𑁄𑀘𑁂𑀦𑁆𑀢𑁄.

𑀲𑀢𑀧𑀤𑀦𑁆𑀢𑀺 𑀲𑀢𑀲𑀤𑁆𑀤𑁄. 𑀭𑀽𑀧𑀯𑀲𑁂𑀦𑀸𑀢𑀺 𑀭𑀽𑀧𑀲𑀤𑁆𑀤𑀯𑀲𑁂𑀦, 𑀭𑀽𑀧𑀲𑀤𑁆𑀤𑁂𑀦 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄. 𑀢𑀣𑀸 𑀧𑀦𑁆𑀢𑀺𑀯𑀲𑁂𑀦𑀸𑀢𑀺 𑀏𑀢𑁆𑀣𑀸𑀧𑀺. 𑀏𑀓𑀘𑁆𑀘𑁂𑀢𑀺 𑀏𑀓𑁂 𑀫𑀺𑀕𑀸𑀭𑀻, 𑀢𑁂𑀲𑀁 𑀩𑁆𑀬𑀕𑁆𑀖𑀻𑀦𑀺𑀲𑀸𑀭𑀽𑀧𑀓𑀸𑀦𑀁 𑀧𑀜𑁆𑀘𑀲𑀢𑀸𑀦𑀻𑀢𑀺 𑀅𑀢𑁆𑀣𑁄. ‘‘𑀓𑀲𑁆𑀲 𑀅𑀜𑁆𑀜𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀫𑀸𑀦𑀲𑀫𑁆𑀧𑀢𑁆𑀢𑀺𑀬𑀁 𑀯𑀺𑀫𑁆𑀳𑀬𑀓𑁆𑀔𑀺𑀓𑁄 𑀅𑀳𑀗𑁆𑀓𑀸𑀭𑀯𑀲𑁂𑀦 𑀯𑀤𑀢𑀺. 𑀭𑀡𑀦𑁆𑀢𑀺 𑀦𑀺𑀦𑁆𑀤𑀦𑁆𑀢𑀺 𑀏𑀢𑁂𑀳𑀻𑀢𑀺 𑀭𑀡𑀸, 𑀤𑁄𑀲𑀸. 𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀦𑁆𑀦𑀺𑀧𑀸𑀢𑁂 𑀯𑀺𑀓𑀸𑀭𑀼𑀧𑁆𑀧𑀢𑁆𑀢𑀺 𑀭𑀼𑀧𑁆𑀧𑀦𑀁 𑀭𑀽𑀧𑀲𑁆𑀲 𑀧𑀯𑁂𑀥𑀦𑀦𑁆𑀢𑀺 𑀆𑀳 ‘‘𑀲𑀻𑀢𑀸𑀤𑀻𑀳𑀺 𑀘 𑀦𑀺𑀘𑁆𑀘𑀁 𑀧𑀯𑁂𑀥𑀺𑀢’’𑀦𑁆𑀢𑀺. 𑀲𑀼𑀫𑁂𑀥𑁄 𑀲𑀼𑀦𑁆𑀤𑀭𑀧𑀜𑁆𑀜𑁄 𑀲𑁄 𑀲𑀢𑁆𑀣𑀸 𑀭𑀽𑀧𑁂 𑀦 𑀭𑀫𑀢𑀺, 𑀓𑀺𑀁 𑀧𑀦 𑀫𑀦𑁆𑀤𑀧𑀜𑁆𑀜𑁄 𑀭𑀽𑀧𑁂 𑀲𑀭𑀡𑀜𑁆𑀘 𑀧𑀯𑁂𑀥𑀺𑀢𑀜𑁆𑀘 𑀅𑀧𑀲𑁆𑀲𑀦𑁆𑀢𑁄 𑀭𑀫𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀩𑁆𑀭𑀳𑁆𑀫𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀓𑁄𑀓𑀸𑀮𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁮. 𑀧𑀫𑀸𑀡𑀓𑀭𑀸𑀦𑀁 𑀭𑀸𑀕𑀸𑀤𑀻𑀦𑀁 𑀅𑀪𑀸𑀯𑀢𑁄 𑀔𑀻𑀡𑀸𑀲𑀯𑁄 𑀭𑀸𑀕𑀸𑀤𑀺𑀯𑀲𑁂𑀦 𑀦 𑀲𑀓𑁆𑀓𑀸 𑀇𑀫𑀁 𑀧𑀫𑀸𑀢𑀼𑀦𑁆𑀢𑀺 𑀅𑀧𑁆𑀧𑀫𑁂𑀬𑁆𑀬𑁄, 𑀅𑀧𑁆𑀧𑀫𑁂𑀬𑁆𑀬𑀸𑀦𑀺 𑀯𑀸 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑀢𑁆𑀢𑀸 𑀧𑀫𑀺𑀢𑀁 𑀧𑀫𑁂𑀬𑁆𑀬𑀁 𑀢𑀲𑁆𑀲 𑀓𑀢𑁄 𑀧𑀭𑀺𑀫𑁂𑀬𑁆𑀬𑁄 𑀦𑀢𑁆𑀣𑀺. 𑀢𑁂𑀦𑀸𑀳 ‘‘𑀔𑀻𑀡𑀸𑀲𑀯𑁄…𑀧𑁂… 𑀤𑀻𑀧𑁂𑀢𑀻’’𑀢𑀺. 𑀢𑀦𑁆𑀢𑀺 𑀔𑀻𑀡𑀸𑀲𑀯𑀁. 𑀧𑀫𑁂𑀢𑀼𑀁 𑀭𑀦𑁆𑀥𑀕𑀯𑁂𑀲𑀻 𑀳𑀼𑀢𑁆𑀯𑀸 𑀯𑀚𑁆𑀚𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁. 𑀬𑀣𑀸𑀲𑀪𑀸𑀯𑀢𑁄 𑀢𑀲𑁆𑀲 𑀫𑀺𑀦𑀦𑁂 𑀦𑀺𑀳𑀻𑀦𑀧𑀜𑁆𑀜𑀢𑀸𑀬 𑀅𑀯𑀓𑀼𑀚𑁆𑀚𑀧𑀜𑁆𑀜𑀁.

𑀓𑁄𑀓𑀸𑀮𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀓𑀢𑀫𑁄𑀤𑀓𑀢𑀺𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭𑁯. 𑀓𑀺𑀁 ¶ 𑀓𑀼𑀲𑀮𑀕𑀯𑁂𑀲𑀺𑀢𑀸𑀬 ‘‘𑀓𑀺𑀁 𑀓𑀼𑀲𑀮𑀁 𑀅𑀓𑀼𑀲𑀮’’𑀦𑁆𑀢𑀺𑀆𑀤𑀺𑀦𑀸 𑀓𑀺𑀦𑁆𑀢𑀺 𑀲𑀼𑀡𑀸𑀢𑀺 𑀏𑀢𑀸𑀬𑀸𑀢𑀺 𑀓𑀺𑀲𑁆𑀲 𑀯𑀸 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸.

𑀓𑀢𑀫𑁄𑀤𑀓𑀢𑀺𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀢𑀼𑀭𑀽𑀩𑁆𑀭𑀳𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁦. 𑀆𑀩𑀸𑀥𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀆𑀩𑀸𑀥𑀺𑀓𑁄. 𑀅𑀦𑀦𑁆𑀢𑀭𑀲𑀼𑀢𑁆𑀢𑁂𑀢𑀺 𑀅𑀦𑀸𑀕𑀢𑀸𑀦𑀦𑁆𑀢𑀭𑁂 𑀲𑀼𑀢𑁆𑀢𑁂. 𑀯𑀭𑀸𑀓𑁄𑀢𑀺 ¶ 𑀅𑀦𑀼𑀕𑁆𑀕𑀳𑀯𑀘𑀦𑀫𑁂𑀯, 𑀦 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀯𑀘𑀦𑀁. 𑀧𑀺𑀬𑀲𑀻𑀮𑀸𑀢𑀺 𑀇𑀫𑀺𑀦𑀸 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 ‘‘𑀧𑁂𑀲𑀮𑀸’’𑀢𑀺 𑀧𑀤𑀲𑀺𑀤𑁆𑀥𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀩𑀭𑀓𑁆𑀔𑀻𑀦𑀻𑀢𑀺 𑀩𑁆𑀬𑀸𑀥𑀺𑀩𑀮𑁂𑀦 𑀧𑀭𑀺𑀪𑀺𑀦𑁆𑀦𑀯𑀡𑁆𑀡𑀢𑀸𑀬 𑀓𑀩𑀭𑀪𑀽𑀢𑀸𑀦𑀺 𑀅𑀓𑁆𑀔𑀻𑀦𑀺. 𑀬𑀢𑁆𑀢𑀓𑀦𑁆𑀢𑀺 𑀬𑀁 𑀢𑁆𑀯𑀁 𑀪𑀕𑀯𑀢𑁄 𑀯𑀘𑀦𑀁 𑀅𑀜𑁆𑀜𑀣𑀸 𑀓𑀭𑁄𑀲𑀺, 𑀢𑀢𑁆𑀢𑀓𑀁 𑀢𑀬𑀸 𑀅𑀧𑀭𑀤𑁆𑀥𑀁, 𑀢𑀲𑁆𑀲 𑀧𑀫𑀸𑀡𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀅𑀦𑀸𑀕𑀸𑀫𑀺𑀦𑁄 𑀦𑀸𑀫 𑀓𑀸𑀫𑀘𑁆𑀙𑀦𑁆𑀤𑀩𑁆𑀬𑀸𑀧𑀸𑀤𑀸 𑀧𑀳𑀻𑀦𑀸 𑀳𑁄𑀦𑁆𑀢𑀺, 𑀢𑁆𑀯𑀜𑁆𑀘 𑀤𑀺𑀝𑁆𑀞𑁄 𑀓𑀸𑀫𑀘𑁆𑀙𑀦𑁆𑀤𑀩𑁆𑀬𑀸𑀧𑀸𑀤𑀯𑀲𑁂𑀦 𑀇𑀥𑀸𑀕𑀢𑁄, 𑀢𑀲𑁆𑀫𑀸 𑀬𑀸𑀯 𑀢𑁂 𑀇𑀤𑀁 𑀅𑀧𑀭𑀤𑁆𑀥𑀦𑁆𑀢𑀺 𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄𑀢𑀺 𑀅𑀧𑁆𑀧𑀢𑁆𑀢𑀤𑀺𑀝𑁆𑀞𑀺𑀦𑀺𑀫𑀺𑀢𑁆𑀢𑁄. 𑀕𑀺𑀮𑀯𑀺𑀲𑁄 𑀯𑀺𑀬 𑀯𑀺𑀲𑀁 𑀕𑀺𑀮𑀺𑀢𑁆𑀯𑀸 𑀞𑀺𑀢𑁄 𑀯𑀺𑀬. 𑀓𑀼𑀞𑀸𑀭𑀺𑀲𑀤𑀺𑀲𑀸 𑀫𑀽𑀮𑀧𑀘𑁆𑀙𑀺𑀦𑁆𑀤𑀦𑀝𑁆𑀞𑁂𑀦. 𑀉𑀢𑁆𑀢𑀫𑀢𑁆𑀣𑁂𑀢𑀺 𑀅𑀭𑀳𑀢𑁆𑀢𑁂. 𑀔𑀻𑀡𑀸𑀲𑀯𑁄𑀢𑀺 𑀯𑀤𑀢𑀺 𑀲𑀼𑀦𑀓𑁆𑀔𑀢𑁆𑀢𑁄 𑀯𑀺𑀬 𑀅𑀘𑁂𑀮𑀁 𑀓𑁄𑀭𑀓𑁆𑀔𑀢𑁆𑀢𑀺𑀬𑀁. 𑀬𑁄 𑀅𑀕𑁆𑀕𑀲𑀸𑀯𑀓𑁄 𑀯𑀺𑀬 𑀧𑀲𑀁𑀲𑀺𑀢𑀩𑁆𑀩𑁄 𑀔𑀻𑀡𑀸𑀲𑀯𑁄, 𑀢𑀁 ‘‘𑀤𑀼𑀲𑁆𑀲𑀻𑀮𑁄 𑀅𑀬’’𑀦𑁆𑀢𑀺 𑀬𑁄 𑀯𑀸 𑀯𑀤𑀢𑀺. 𑀲𑀫𑀓𑁄𑀯 𑀯𑀺𑀧𑀸𑀓𑁄𑀢𑀺 𑀧𑀲𑀁𑀲𑀺𑀬𑀦𑀺𑀦𑁆𑀤𑀸 𑀯𑀺𑀚𑁆𑀚𑀫𑀸𑀦𑀕𑀼𑀡𑀧𑀭𑀺𑀥𑀁𑀲𑀦𑀯𑀲𑁂𑀦 𑀧𑀯𑀢𑁆𑀢𑀸 𑀬𑀸𑀯 𑀫𑀳𑀸𑀲𑀸𑀯𑀚𑁆𑀚𑀢𑀸𑀬 𑀓𑀝𑀼𑀓𑀢𑀭𑀯𑀺𑀧𑀸𑀓𑀸, 𑀢𑀸𑀯 𑀦𑀺𑀦𑁆𑀤𑀺𑀬𑀧𑀲𑀁𑀲𑀸𑀧𑀺 𑀫𑀳𑀸𑀲𑀸𑀯𑀚𑁆𑀚𑀢𑀸𑀬 𑀲𑀫𑀯𑀺𑀧𑀸𑀓𑀸 𑀢𑀢𑁆𑀣 𑀅𑀯𑀺𑀚𑁆𑀚𑀫𑀸𑀦𑀕𑀼𑀡𑀲𑀫𑀸𑀭𑁄𑀧𑀦𑁂𑀦 𑀅𑀢𑁆𑀢𑀦𑁄 𑀧𑀭𑁂𑀲𑀁 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄 𑀧𑀲𑀁𑀲𑀺𑀬𑁂𑀦 𑀢𑀲𑁆𑀲 𑀲𑀫𑀪𑀸𑀯𑀓𑀭𑀡𑀢𑁄 𑀘. 𑀮𑁄𑀓𑁂𑀧𑀺 𑀳𑀺 𑀅𑀬𑀁 𑀧𑀼𑀭𑁂 𑀲𑀫𑀡𑀕𑀸𑀭𑀬𑁆𑀳𑁄 𑀳𑁄𑀢𑀺, 𑀧𑀕𑁂𑀯 𑀤𑀼𑀧𑁆𑀧𑀝𑀺𑀧𑀦𑁆𑀦𑀤𑀼𑀧𑁆𑀧𑀝𑀺𑀧𑀦𑁆𑀦𑁄𑀢𑀺 𑀲𑀫𑀁 𑀓𑀭𑁄𑀦𑁆𑀢𑀻𑀢𑀺.

𑀲𑀓𑁂𑀦𑀸𑀢𑀺 𑀅𑀢𑁆𑀢𑀦𑁄 𑀲𑀸𑀧𑀢𑁂𑀬𑁆𑀬𑁂𑀦. 𑀅𑀬𑀁 𑀅𑀧𑁆𑀧𑀫𑀢𑁆𑀢𑀓𑁄 𑀅𑀧𑀭𑀸𑀥𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀢𑁆𑀢𑀸 𑀲𑀧𑁆𑀧𑀢𑀺𑀓𑀸𑀭𑀢𑁆𑀢𑀸 𑀘 𑀢𑀲𑁆𑀲. 𑀅𑀬𑀁 𑀫𑀳𑀦𑁆𑀢𑀢𑀭𑁄 𑀓𑀮𑀺 𑀓𑀢𑀽𑀧𑀘𑀺𑀢𑀲𑁆𑀲 𑀲𑀫𑁆𑀧𑀭𑀸𑀬𑀺𑀓𑀢𑁆𑀢𑀸 𑀅𑀧𑁆𑀧𑀢𑀺𑀓𑀸𑀭𑀢𑁆𑀢𑀸 𑀘.

‘‘𑀦𑀺𑀭𑀩𑁆𑀩𑀼𑀤𑁄’’𑀢𑀺 ¶ 𑀕𑀡𑀦𑀸𑀯𑀺𑀲𑁂𑀲𑁄 𑀏𑀓𑁄𑀢𑀺 𑀆𑀳 ‘‘𑀦𑀺𑀭𑀩𑁆𑀩𑀼𑀤𑀕𑀡𑀦𑀸𑀬𑀸’’𑀢𑀺, 𑀲𑀢𑀲𑀳𑀲𑁆𑀲𑀁 𑀦𑀺𑀭𑀩𑁆𑀩𑀼𑀤𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀭𑀩𑁆𑀩𑀼𑀤𑀧𑀭𑀺𑀕𑀡𑀦𑀁 𑀧𑀦 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀬𑀫𑀭𑀺𑀬𑀕𑀭𑀳𑀻 𑀦𑀺𑀭𑀬𑀁 𑀉𑀧𑁂𑀢𑀻𑀢𑀺 𑀏𑀢𑁆𑀣 𑀬𑀣𑀸𑀯𑀼𑀢𑁆𑀢𑀁 𑀆𑀬𑀼𑀧𑁆𑀧𑀫𑀸𑀡𑀁 𑀧𑀸𑀓𑀢𑀺𑀓𑁂𑀦 𑀅𑀭𑀺𑀬𑀽𑀧𑀯𑀸𑀤𑀺𑀦𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀅𑀕𑁆𑀕𑀲𑀸𑀯𑀓𑀸𑀦𑀁 𑀧𑀦 𑀕𑀼𑀡𑀫𑀳𑀦𑁆𑀢𑀢𑀸𑀬 𑀢𑀢𑁄𑀧𑀺 𑀅𑀢𑀺𑀯𑀺𑀬 𑀫𑀳𑀦𑁆𑀢𑀢𑀭𑀸 𑀏𑀯𑀸’’𑀢𑀺 𑀯𑀤𑀦𑁆𑀢𑀺.

𑀢𑀼𑀭𑀽𑀩𑁆𑀭𑀳𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀓𑁄𑀓𑀸𑀮𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁧. 𑀤𑁆𑀯𑁂 𑀓𑁄𑀓𑀸𑀮𑀺𑀓𑀦𑀸𑀫𑀓𑀸 𑀪𑀺𑀓𑁆𑀔𑀽, 𑀢𑀢𑁄 𑀇𑀥 𑀅𑀥𑀺𑀧𑁆𑀧𑁂𑀢𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑁋 ‘‘𑀓𑁄 𑀅𑀬𑀁 𑀓𑁄𑀓𑀸𑀮𑀺𑀓𑁄’’𑀢𑀺? 𑀧𑀼𑀘𑁆𑀙𑀸. 𑀲𑀼𑀢𑁆𑀢𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀓𑀲𑁆𑀫𑀸 𑀘 𑀉𑀧𑀲𑀗𑁆𑀓𑀫𑀻’’𑀢𑀺? 𑀧𑀼𑀘𑁆𑀙𑀸 ¶ . 𑀅𑀬𑀁 𑀓𑀺𑀭𑀸𑀢𑀺𑀆𑀤𑀺 𑀬𑀣𑀸𑀓𑁆𑀓𑀫𑀁 𑀢𑀸𑀲𑀁 𑀯𑀺𑀲𑁆𑀲𑀚𑁆𑀚𑀦𑀁. 𑀯𑀺𑀯𑁂𑀓𑀯𑀸𑀲𑀁 𑀯𑀲𑀺𑀢𑀼𑀓𑀸𑀫𑀢𑁆𑀢𑀸 𑀅𑀧𑁆𑀧𑀺𑀘𑁆𑀙𑀢𑀸𑀬 𑀘 𑀫𑀸 𑀓𑀲𑁆𑀲𑀘𑀺…𑀧𑁂… 𑀯𑀲𑀺𑀁𑀲𑀼.

𑀧𑀓𑁆𑀓𑀫𑀺𑀲𑁆𑀲𑀦𑁆𑀢𑀻𑀢𑀺 𑀆𑀖𑀸𑀢𑀁 𑀉𑀧𑁆𑀧𑀸𑀤𑁂𑀲𑀺 𑀅𑀢𑁆𑀢𑀦𑁄 𑀇𑀘𑁆𑀙𑀸𑀯𑀺𑀖𑀸𑀢𑀦𑀢𑁄. 𑀣𑁂𑀭𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀤𑀬𑀺𑀁𑀲𑀼 𑀧𑀬𑀼𑀢𑁆𑀢𑀯𑀸𑀘𑀸𑀬 𑀅𑀓𑀢𑀢𑁆𑀢𑀸 𑀣𑁂𑀭𑁂𑀳𑀺 𑀘 𑀅𑀤𑀻𑀧𑀺𑀢𑀢𑁆𑀢𑀸. 𑀧𑀼𑀩𑁆𑀩𑁂𑀧𑀺…𑀧𑁂… 𑀫𑀜𑁆𑀜𑁂𑀢𑀺 𑀇𑀫𑀺𑀦𑀸 𑀣𑁂𑀭𑀸𑀦𑀁 𑀓𑁄𑀳𑀜𑁆𑀜𑁂 𑀞𑀺𑀢𑀪𑀸𑀯𑀁 𑀆𑀲𑀗𑁆𑀓𑀢𑀺 𑀅𑀯𑀡𑁂 𑀯𑀡𑀁 𑀧𑀲𑁆𑀲𑀦𑁆𑀢𑁄 𑀯𑀺𑀬, 𑀲𑀼𑀤𑁆𑀥𑁂 𑀆𑀤𑀸𑀲𑀢𑀮𑁂 𑀮𑁂𑀔𑀁 𑀉𑀝𑁆𑀞𑀸𑀧𑁂𑀦𑁆𑀢𑁄 𑀯𑀺𑀬 𑀘.

𑀅𑀧𑀭𑀚𑁆𑀛𑀺𑀢𑁆𑀯𑀸𑀢𑀺 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 ‘‘𑀧𑀸𑀧𑀪𑀺𑀓𑁆𑀔𑀽 𑀚𑀸𑀢𑀸’’𑀢𑀺 𑀯𑀢𑁆𑀯𑀸. 𑀆𑀳 ‘‘𑀲𑀤𑁆𑀥𑀸𑀬 𑀆𑀓𑀭𑁄 𑀧𑀲𑀸𑀤𑀸𑀯𑀳𑁄’’𑀢𑀺. 𑀧𑀯𑀢𑁆𑀢𑀲𑀤𑁆𑀥𑀸𑀬𑀺𑀓𑁄 𑀯𑀸𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀲𑀤𑁆𑀥𑀸𑀢𑀩𑁆𑀩𑀯𑀘𑀦𑁄’’𑀢𑀺.

𑀧𑀻𑀴𑀓𑀸 𑀦𑀸𑀫 𑀩𑀸𑀳𑀺𑀭𑀢𑁄 𑀧𑀝𑁆𑀞𑀸𑀬 𑀅𑀝𑁆𑀞𑀺𑀁 𑀪𑀺𑀦𑁆𑀤𑀢𑀺, 𑀇𑀫𑀸 𑀧𑀦 𑀧𑀞𑀫𑀁𑀬𑁂𑀯 𑀅𑀝𑁆𑀞𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀉𑀕𑁆𑀕𑀢𑀸. 𑀢𑀭𑀼𑀡𑀩𑁂𑀮𑀼𑀯𑀫𑀢𑁆𑀢𑀺𑀬𑁄𑀢𑀺 𑀢𑀭𑀼𑀡𑀩𑀺𑀮𑁆𑀮𑀨𑀮𑀫𑀢𑁆𑀢𑀺𑀬𑁄. 𑀯𑀺𑀲𑀕𑀺𑀮𑀺𑀢𑁄𑀢𑀺 𑀔𑀺𑀢𑁆𑀢𑀧𑀳𑀭𑀡𑁄. 𑀢𑀜𑁆𑀘 𑀩𑀴𑀺𑀲𑀁 𑀯𑀺𑀲𑀲𑀫𑀜𑁆𑀜𑀸 𑀮𑁄𑀓𑁂. ‘‘𑀆𑀭𑀓𑁆𑀔𑀤𑁂𑀯𑀢𑀸𑀦𑀁 𑀲𑀼𑀢𑁆𑀯𑀸’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄.

𑀫𑀕𑀥𑀭𑀝𑁆𑀞𑁂 ¶ 𑀲𑀁𑀯𑁄𑀳𑀸𑀭𑀢𑁄 𑀫𑀸𑀕𑀥𑀓𑁄 𑀧𑀢𑁆𑀢𑁄, 𑀢𑁂𑀦. 𑀢𑀺𑀮𑀲𑀓𑀝𑀁 𑀢𑀺𑀮𑀯𑀸𑀳𑀸𑀏𑀢𑀺 𑀯𑀼𑀢𑁆𑀢𑁄. 𑀧𑀘𑁆𑀘𑀺𑀢𑀩𑁆𑀩𑀝𑁆𑀞𑀸𑀦𑀲𑁆𑀲𑀸𑀢𑀺 𑀦𑀺𑀭𑀬𑀤𑀼𑀓𑁆𑀔𑁂𑀦 𑀧𑀘𑁆𑀘𑀺𑀢𑀩𑁆𑀩𑀧𑀤𑁂𑀲𑀲𑁆𑀲. 𑀏𑀢𑀁 ‘‘𑀅𑀩𑁆𑀩𑀼𑀤𑁄’’𑀢𑀺 𑀦𑀸𑀫𑀁.

𑀯𑀲𑁆𑀲𑀕𑀡𑀦𑀸𑀢𑀺 𑀏𑀓𑀢𑁄 𑀧𑀝𑁆𑀞𑀸𑀬 𑀤𑀲𑀕𑀼𑀡𑀺𑀢𑀁 𑀅𑀩𑁆𑀩𑀼𑀤𑀆𑀬𑀼𑀫𑁆𑀳𑀺, 𑀢𑀢𑁄 𑀧𑀭𑀁 𑀯𑀻𑀲𑀢𑀺𑀕𑀼𑀡𑀁 𑀦𑀺𑀭𑀩𑁆𑀩𑀼𑀤𑀸𑀤𑀻𑀲𑀼 𑀯𑀲𑁆𑀲𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀩𑁆𑀩𑀢𑁆𑀣𑀸𑀢𑀺 𑀅𑀩𑀩𑀸𑀤𑀻𑀲𑀼 𑀧𑀤𑀼𑀫𑀧𑀭𑀺𑀬𑁄𑀲𑀸𑀦𑁂𑀲𑀼 𑀲𑀩𑁆𑀩𑁂𑀲𑀼 𑀦𑀺𑀭𑀬𑁂𑀲𑀼. 𑀏𑀲𑁂𑀯 𑀦𑀬𑁄𑀢𑀺 𑀳𑁂𑀝𑁆𑀞𑀺𑀫𑀢𑁄 𑀉𑀧𑀭𑀺𑀫𑀲𑁆𑀲 𑀉𑀧𑀭𑀺𑀫𑀲𑁆𑀲 𑀯𑀻𑀲𑀢𑀺𑀕𑀼𑀡𑀢𑀁 𑀅𑀢𑀺𑀤𑀺𑀲𑀢𑀺.

𑀓𑁄𑀓𑀸𑀮𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀲𑀦𑀗𑁆𑀓𑀼𑀫𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁨. 𑀧𑁄𑀭𑀸𑀡𑀓𑀢𑁆𑀢𑀸𑀢𑀺 ¶ 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀘𑀺𑀭𑀓𑀸𑀮𑀢𑁆𑀢𑀸. 𑀚𑀸𑀢𑀢𑁆𑀢𑀸 𑀚𑀦𑁄, 𑀢𑀁 𑀇𑀢𑁄 𑀚𑀦𑁂𑀢𑁄, 𑀢𑀲𑁆𑀫𑀺𑀁. 𑀔𑀢𑁆𑀢𑀺𑀬𑁄 𑀲𑁂𑀝𑁆𑀞𑁄 𑀮𑁄𑀓𑀫𑀭𑀺𑀬𑀸𑀤𑀧𑀭𑀺𑀧𑀸𑀮𑀦𑀸𑀤𑀺𑀦𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀁 𑀲𑀢𑁆𑀢𑀸𑀦𑀁 𑀦𑀺𑀬𑁄𑀚𑀦𑁂𑀦 𑀩𑀳𑀼𑀓𑀸𑀭𑀢𑁆𑀢𑀸. 𑀲𑁄 𑀳𑀺 𑀧𑀭𑁂 𑀢𑀣𑀸 𑀧𑀝𑀺𑀧𑀸𑀤𑁂𑀦𑁆𑀢𑁄 𑀲𑀬𑀫𑁆𑀧𑀺 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑁄𑀬𑁂𑀯 𑀳𑁄𑀢𑀻𑀢𑀺 𑀲𑁂𑀝𑁆𑀞𑁄 𑀯𑀼𑀢𑁆𑀢𑁄. 𑀧𑀝𑀺𑀧𑀓𑁆𑀔𑀯𑀺𑀚𑁆𑀛𑀦𑀝𑁆𑀞𑁂𑀦 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀤𑀻𑀦𑀁 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦 𑀯𑀺𑀚𑁆𑀚𑀸𑀢𑀺. 𑀲𑀤𑁆𑀥𑀸𑀳𑀺𑀭𑁄𑀢𑁆𑀢𑀧𑁆𑀧𑀩𑀸𑀳𑀼𑀲𑀘𑁆𑀘𑀯𑀻𑀭𑀺𑀬𑀲𑀢𑀺𑀧𑀜𑁆𑀜𑀸𑀢𑀺 𑀇𑀫𑁂 𑀲𑀢𑁆𑀢 𑀲𑀤𑁆𑀥𑀫𑁆𑀫𑀸. 𑀘𑀭𑀦𑁆𑀢𑀺 𑀅𑀕𑀢𑀧𑀼𑀩𑁆𑀩𑀁 𑀤𑀺𑀲𑀁 𑀏𑀢𑁂𑀳𑀻𑀢𑀺 𑀘𑀭𑀡𑀸𑀦𑀺, 𑀲𑀻𑀮𑀸𑀤𑀬𑁄 𑀧𑀦𑁆𑀦𑀭𑀲 𑀥𑀫𑁆𑀫𑀸.

𑀲𑀦𑀗𑁆𑀓𑀼𑀫𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑁂𑀯𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁩. 𑀅𑀧𑁆𑀧𑀜𑁆𑀜𑀢𑁆𑀢𑁂 𑀏𑀯 𑀲𑀺𑀓𑁆𑀔𑀸𑀧𑀤𑁂 𑀙𑁂𑀚𑁆𑀚𑀕𑀸𑀫𑀺𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀲𑀮𑀺𑀗𑁆𑀕𑁂𑀦𑁂𑀯 𑀘 𑀞𑀺𑀢𑀢𑁆𑀢𑀸 ‘‘𑀤𑁂𑀯𑀤𑀢𑁆𑀢𑁄 𑀲𑀸𑀲𑀦𑀢𑁄 𑀧𑀓𑁆𑀓𑀦𑁆𑀢𑁄’’𑀢𑀺 𑀦 𑀯𑀢𑁆𑀢𑀩𑁆𑀩𑁄𑀢𑀺 𑀅𑀘𑀺𑀭𑀧𑀓𑁆𑀓𑀦𑁆𑀢𑁂𑀢𑀺 𑀏𑀢𑁆𑀣 ‘‘𑀲𑀸𑀲𑀦𑀢𑁄 𑀧𑀓𑁆𑀓𑀦𑁆𑀢𑁂’’𑀢𑀺 𑀅𑀯𑀢𑁆𑀯𑀸 ‘‘𑀯𑁂𑀴𑀼𑀯𑀦𑀢𑁄 ¶ 𑀕𑀬𑀸𑀲𑀻𑀲𑀁 𑀕𑀢𑁂’’𑀢𑀺 𑀯𑀼𑀢𑁆𑀢𑀁. 𑀧𑀓𑀢𑀢𑁆𑀢𑁄 𑀳𑀺 𑀪𑀺𑀓𑁆𑀔𑀼𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬, 𑀦 𑀅𑀧𑀓𑀢𑀢𑁆𑀢𑁄𑀢𑀺. 𑀯𑀴𑀯𑀸𑀬𑀸𑀢𑀺 𑀯𑀴𑀯𑀸𑀬 𑀓𑀼𑀘𑁆𑀙𑀺𑀬𑀁 𑀚𑀸𑀢𑀁.

𑀤𑁂𑀯𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀦𑁆𑀥𑀓𑀯𑀺𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁪. 𑀚𑀦𑀢𑀦𑁆𑀢𑀺 𑀚𑀦𑀸𑀦𑀁 𑀲𑀫𑀽𑀳𑀁, 𑀚𑀦𑀲𑀜𑁆𑀘𑀭𑀡𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀧𑀘𑀸𑀭𑁂𑀢𑀺 𑀬𑀢𑁆𑀢𑀓𑁂 𑀓𑀲𑀦𑀸𑀤𑀺𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀸𑀦𑀁 𑀲𑀜𑁆𑀘𑀸𑀭𑁄 𑀳𑁄𑀢𑀺, 𑀏𑀢𑁆𑀢𑀓𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀦𑀼𑀧𑀘𑀸𑀭𑁂. 𑀲𑀁𑀬𑁄𑀚𑀦𑀯𑀺𑀧𑁆𑀧𑀫𑁄𑀓𑁆𑀔𑀸𑀢𑀺 𑀲𑀁𑀬𑁄𑀚𑀦𑀯𑀺𑀫𑁄𑀓𑁆𑀔𑀳𑁂𑀢𑀼. 𑀯𑀺𑀯𑁂𑀓𑀭𑀢𑀺𑀁 𑀧𑀯𑀺𑀯𑁂𑀓𑀲𑀼𑀔𑀚𑁆𑀛𑀸𑀦𑀁 𑀅𑀮𑀪𑀦𑁆𑀢𑁄. 𑀘𑀺𑀢𑁆𑀢𑀸𑀦𑀼𑀭𑀓𑁆𑀔𑀡𑀢𑁆𑀣𑀦𑁆𑀢𑀺 𑀧𑀼𑀩𑁆𑀩𑁂 𑀫𑀁 𑀫𑀦𑀼𑀲𑁆𑀲𑀸 ‘‘𑀅𑀭𑀜𑁆𑀜𑀯𑀸𑀲𑁂𑀦 𑀧𑀯𑀺𑀯𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄 𑀆𑀭𑀤𑁆𑀥𑀯𑀻𑀭𑀺𑀬𑁄’’𑀢𑀺 𑀫𑀜𑁆𑀜𑀺𑀁𑀲𑀼, 𑀇𑀤𑀸𑀦𑀺 𑀕𑀸𑀫𑀦𑁆𑀢𑁂 𑀯𑀲𑀦𑁆𑀢𑀁 𑀤𑀺𑀲𑁆𑀯𑀸 𑀕𑀡𑀲𑀗𑁆𑀕𑀡𑀺𑀓𑀸𑀬 𑀦𑀺𑀯𑀼𑀝𑁆𑀞𑁄𑀢𑀺 𑀅𑀧𑁆𑀧𑀲𑀸𑀤𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀬𑀤𑀺𑀧𑀺 𑀫𑁂 𑀇𑀥 𑀅𑀪𑀺𑀭𑀢𑀺 𑀦𑀢𑁆𑀣𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀇𑀥𑁂𑀯 𑀯𑀲𑀺𑀲𑁆𑀲𑀸𑀫𑀻𑀢𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁂𑀦 𑀳𑀼𑀢𑁆𑀯𑀸 𑀦 𑀯𑀲𑀺𑀢𑀩𑁆𑀩𑀁, 𑀓𑁄 𑀅𑀢𑁆𑀣𑁄 𑀘𑀺𑀢𑁆𑀢𑀯𑀲𑀁 𑀕𑀦𑁆𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀢𑀺𑀧𑀝𑁆𑀞𑀸𑀦𑀧𑀭𑀸𑀬𑀡𑁄𑀢𑀺 ¶ 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀭𑀢𑁄. 𑀏𑀯𑀁 𑀳𑀺𑀲𑁆𑀲 𑀕𑀡𑀯𑀸𑀲𑁄𑀧𑀺 𑀧𑀸𑀲𑀁𑀲𑁄 𑀯𑀺𑀯𑁂𑀓𑀯𑀸𑀲𑁂𑀦 𑀯𑀺𑀦𑀸 𑀲𑀫𑀡𑀓𑀺𑀘𑁆𑀘𑀲𑁆𑀲 𑀅𑀲𑀺𑀚𑁆𑀛𑀦𑀢𑁄.

𑀯𑀝𑁆𑀝𑀪𑀬𑀢𑁄 𑀧𑀫𑀼𑀢𑁆𑀢𑁄 𑀅𑀚𑁆𑀛𑀸𑀲𑀬𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦𑀺𑀲𑀻𑀤𑀺 𑀢𑀢𑁆𑀣 𑀪𑀺𑀓𑁆𑀔𑀽𑀢𑀺 𑀇𑀫𑀺𑀦𑀸 𑀲𑀢𑁆𑀢𑀽𑀧𑀮𑀤𑁆𑀥𑀺𑀬𑀸 𑀅𑀦𑀺𑀲𑁆𑀲𑀺𑀢𑀢𑁆𑀢𑀸 𑀬𑀣𑀸𑀭𑀼𑀘𑀺𑀬𑀸 𑀢𑁂𑀲𑀁 𑀦𑀺𑀲𑀚𑁆𑀚𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀇𑀫𑀺𑀦𑀸’’𑀢𑀺𑀆𑀤𑀺.

𑀇𑀫𑀺𑀦𑀸 𑀘 𑀇𑀫𑀺𑀦𑀸 𑀘 𑀆𑀓𑀸𑀭𑁂𑀦 𑀚𑀸𑀢𑀦𑁆𑀢𑀺 𑀦 𑀅𑀦𑀼𑀲𑁆𑀲𑀯𑀤𑀲𑁆𑀲𑀦𑀫𑁂𑀢𑀁, 𑀦 𑀅𑀦𑀼𑀲𑁆𑀲𑀯𑀕𑁆𑀕𑀳𑀡𑀁. 𑀢𑀓𑁆𑀓𑀳𑁂𑀢𑀼 𑀦𑀬𑀳𑁂𑀢𑀼 𑀯𑀸 𑀦 𑀯𑀤𑀸𑀫𑀻𑀢𑀺 𑀬𑁄𑀚𑀦𑀸. 𑀧𑀺𑀝𑀓𑀁 𑀕𑀦𑁆𑀣𑁄 𑀲𑀫𑁆𑀧𑀤𑀻𑀬𑀢𑀺 𑀏𑀢𑀲𑁆𑀲𑀸𑀢𑀺 𑀧𑀺𑀝𑀓𑀲𑀫𑁆𑀧𑀤𑀸𑀦𑀁, 𑀕𑀦𑁆𑀣𑀲𑁆𑀲 𑀉𑀕𑁆𑀕𑀡𑁆𑀳𑀦𑀢𑁄 𑀢𑁂𑀦 𑀧𑀺𑀝𑀓𑀲𑁆𑀲 𑀉𑀕𑁆𑀕𑀡𑁆𑀳𑀦𑀓𑀪𑀸𑀯𑁂𑀦, 𑀓𑁂𑀦𑀘𑀺 𑀕𑀦𑁆𑀣𑀸𑀦𑀼𑀲𑀸𑀭𑁂𑀦 𑀏𑀯𑀁 𑀦 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀲𑁆𑀲 𑀲𑁂𑀝𑁆𑀞𑀲𑁆𑀲 𑀥𑀫𑁆𑀫𑀲𑁆𑀲 𑀘𑀭𑀺𑀬𑀁 𑀯𑀸𑀘𑀲𑀺𑀓𑀁 𑀧𑀯𑀢𑁆𑀢𑀢𑀻𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁, 𑀥𑀫𑁆𑀫𑀤𑁂𑀲𑀦𑀸. 𑀪𑀸𑀯𑀺𑀢𑁂𑀦 𑀫𑀭𑀡𑀲𑁆𑀲 𑀲𑀩𑁆𑀩𑀲𑁄 𑀪𑀸𑀕𑁂𑀦 𑀯𑀺𑀧𑁆𑀧𑀳𑀸𑀦𑁂𑀦 𑀫𑀭𑀡𑀧𑀭𑀺𑀘𑁆𑀘𑀸𑀕𑀻𑀦𑀁. 𑀢𑁂 𑀘 𑀔𑀻𑀡𑀚𑀸𑀢𑀺𑀓𑀸𑀢𑀺 𑀆𑀳 ‘‘𑀔𑀻𑀡𑀸𑀲𑀯𑀸𑀦’’𑀦𑁆𑀢𑀺.

𑀤𑀲𑀥𑀸 ¶ 𑀤𑀲𑀸𑀢𑀺 𑀤𑀲𑀓𑁆𑀔𑀢𑁆𑀢𑀼𑀁 𑀤𑀲. 𑀅𑀜𑁆𑀜𑀦𑁆𑀢𑀺 𑀧𑀜𑁆𑀘𑀲𑀢𑀸𑀥𑀺𑀓𑀲𑀳𑀲𑁆𑀲𑀢𑁄 𑀅𑀜𑁆𑀜𑀁. 𑀧𑀼𑀜𑁆𑀜𑀪𑀸𑀕𑀺𑀦𑁄𑀢𑀺 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀧𑀼𑀜𑁆𑀜𑀲𑁆𑀲 𑀪𑀸𑀕𑀺𑀦𑁄 𑀢𑀲𑁆𑀲𑀸 𑀤𑁂𑀲𑀦𑀸𑀬 𑀏𑀢𑁆𑀢𑀓𑀸 𑀲𑀢𑁆𑀢𑀸 𑀚𑀸𑀢𑀸𑀢𑀺 𑀕𑀡𑁂𑀢𑀼𑀁 𑀅𑀳𑀁 𑀦 𑀲𑀓𑁆𑀓𑁄𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀩𑁆𑀭𑀳𑁆𑀫𑀥𑀫𑁆𑀫𑀤𑁂𑀲𑀦𑀦𑁆𑀢𑀺 𑀩𑁆𑀭𑀳𑁆𑀫𑀼𑀦𑀸 𑀯𑀼𑀢𑁆𑀢𑀁 𑀆𑀳.

𑀅𑀦𑁆𑀥𑀓𑀯𑀺𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀭𑀼𑀡𑀯𑀢𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁫. 𑀅𑀪𑀺𑀪𑀽 𑀲𑀫𑁆𑀪𑀯𑁄𑀢𑀺 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀫𑀳𑀸𑀣𑁂𑀭𑀸𑀦𑀁 𑀦𑀸𑀫𑀸𑀦𑀺. 𑀢𑁂𑀲𑀁 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁂 𑀤𑁆𑀯𑁂 𑀢𑀲𑁆𑀲 𑀪𑀕𑀯𑀢𑁄 𑀅𑀕𑁆𑀕𑀲𑀸𑀯𑀓𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀯𑀚𑁆𑀛𑀸𑀬𑀦𑁆𑀢𑀻𑀢𑀺 𑀳𑁂𑀝𑁆𑀞𑀸 𑀓𑀢𑁆𑀯𑀸 𑀘𑀺𑀦𑁆𑀢𑁂𑀦𑁆𑀢𑀺. 𑀔𑀺𑀬𑁆𑀬𑀦𑁆𑀢𑀺 𑀢𑀁 𑀮𑀸𑀫𑀓𑀢𑁄 𑀘𑀺𑀦𑁆𑀢𑁂𑀢𑀩𑁆𑀩𑀢𑀁 𑀧𑀸𑀧𑁂𑀦𑁆𑀢𑀺 𑀧𑀸𑀧𑀓𑀢𑀁 𑀓𑀭𑁄𑀦𑁆𑀢𑀺. 𑀯𑀺𑀢𑁆𑀣𑀸𑀭𑀬𑀦𑁆𑀢𑀸𑀢𑀺 𑀢𑀫𑁂𑀯 𑀮𑀸𑀫𑀓𑀢𑁄 𑀘𑀺𑀦𑁆𑀢𑁂𑀢𑀩𑁆𑀩𑀢𑀁 𑀯𑁂𑀧𑀼𑀮𑁆𑀮𑀁 𑀧𑀸𑀧𑁂𑀦𑁆𑀢𑀸. 𑀲𑀩𑁆𑀩𑁂 𑀧𑀸𑀲𑀡𑁆𑀟𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀫𑀬𑁂 𑀲𑀺𑀤𑁆𑀥𑀦𑁆𑀢𑁂 𑀲𑀩𑁆𑀩𑁂 𑀤𑁂𑀯𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀫𑀬𑁂 𑀧𑀝𑀺𑀮𑀸𑀪𑁂 𑀧𑀝𑀺𑀮𑀤𑁆𑀥𑀅𑀢𑁆𑀣𑁂 𑀧𑀼𑀭𑀺𑀲𑀓𑀸𑀭𑀁 𑀯𑀡𑁆𑀡𑀬𑀦𑁆𑀢𑀻𑀢𑀺 𑀬𑁄𑀚𑀦𑀸.

𑀆𑀭𑀫𑁆𑀪𑀯𑀻𑀭𑀺𑀬𑀦𑁆𑀢𑀺 𑀫𑀘𑁆𑀘𑀼𑀲𑁂𑀦𑀸𑀲𑀗𑁆𑀔𑀸𑀢𑀓𑀺𑀮𑁂𑀲𑀥𑀼𑀦𑀦𑁂 𑀆𑀭𑀫𑁆𑀪𑀯𑀻𑀭𑀺𑀬𑀁, 𑀬𑀸 ‘‘𑀆𑀭𑀫𑁆𑀪𑀥𑀸𑀢𑀽’’𑀢𑀺 𑀯𑀼𑀘𑁆𑀘𑀢𑀺 ¶ . 𑀦𑀺𑀓𑁆𑀓𑀫𑀯𑀻𑀭𑀺𑀬𑀦𑁆𑀢𑀺 𑀓𑁄𑀲𑀚𑁆𑀚𑀧𑀝𑀺𑀧𑀓𑁆𑀔𑀪𑀽𑀢𑀁 𑀯𑀻𑀭𑀺𑀬𑀁, 𑀬𑀸 ‘‘𑀦𑀺𑀓𑁆𑀓𑀫𑀥𑀸𑀢𑀽’’𑀢𑀺 𑀯𑀼𑀘𑁆𑀘𑀢𑀺. 𑀧𑀬𑁄𑀕𑀁 𑀓𑀭𑁄𑀣𑀸𑀢𑀺 𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀦𑀢𑁄 𑀢𑀢𑁄𑀧𑀺 𑀩𑀮𑀯𑀢𑀭𑀁 𑀪𑀸𑀯𑀦𑀸𑀪𑀺𑀬𑁄𑀕𑀁 𑀧𑀯𑀢𑁆𑀢𑁂𑀣𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀧𑀭𑀓𑁆𑀓𑀫𑀣𑀸’’𑀢𑀺. 𑀓𑀺𑀮𑁂𑀲𑀲𑁂𑀦𑀸 𑀦𑀸𑀫 𑀭𑀸𑀕𑀸𑀤𑀺𑀓𑀺𑀮𑁂𑀲𑀲𑀫𑀽𑀳𑁄, 𑀲𑁄 𑀫𑀭𑀡𑀧𑀘𑁆𑀘𑀬𑀪𑀸𑀯𑀢𑁄 ‘‘𑀫𑀘𑁆𑀘𑀼𑀦𑁄 𑀲𑁂𑀦𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑀜𑁆𑀳𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀫𑀳𑀸𑀲𑁂𑀦𑁂𑀦 𑀫𑀘𑁆𑀘𑀼𑀦𑀸’’𑀢𑀺 (𑀫. 𑀦𑀺. 𑁩.𑁨𑁭𑁨, 𑁨𑁭𑁫, 𑁨𑁭𑁬). 𑀔𑀦𑁆𑀥𑀸𑀦𑀁 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀚𑀸𑀢𑀺, 𑀢𑀤𑀜𑁆𑀜𑀁 𑀧𑀦 𑀢𑁂𑀲𑀁 𑀧𑀝𑀺𑀧𑀸𑀝𑀺 𑀧𑀯𑀢𑁆𑀢𑀁 𑀲𑀁𑀲𑀸𑀭𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀚𑀸𑀢𑀺𑀜𑁆𑀘 𑀲𑀁𑀲𑀸𑀭𑀜𑁆𑀘𑀸’’𑀢𑀺. 𑀬𑀲𑁆𑀫𑀸 ‘‘𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄’’𑀢𑀺𑀆𑀤𑀻𑀲𑀼 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑁂 𑀆𑀤𑀸𑀦𑀦𑀺𑀓𑁆𑀔𑁂𑀧𑀧𑀭𑀺𑀘𑁆𑀙𑀺𑀦𑁆𑀦𑀔𑀦𑁆𑀥𑀧𑁆𑀧𑀯𑀢𑁆𑀢𑀺 ‘‘𑀚𑀸𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀲𑀸 𑀏𑀯 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀸 𑀅𑀧𑀭𑀸𑀧𑀭𑀁 𑀧𑀯𑀢𑁆𑀢𑀫𑀸𑀦𑁄 𑀲𑀁𑀲𑀸𑀭𑁄 ‘‘𑀇𑀢𑁄 𑀘𑀺𑀢𑁄 𑀲𑀁𑀲𑀭𑀡’’𑀦𑁆𑀢𑀺 𑀓𑀢𑁆𑀯𑀸, 𑀢𑀲𑁆𑀫𑀸 𑀆𑀳 ‘‘𑀚𑀸𑀢𑀺𑀲𑀗𑁆𑀔𑀸𑀢𑀁 𑀯𑀸 𑀲𑀁𑀲𑀸𑀭’’𑀦𑁆𑀢𑀺. 𑀧𑀭𑀺𑀘𑁆𑀙𑁂𑀤𑀦𑁆𑀢𑀺 𑀧𑀭𑀺𑀬𑁄𑀲𑀸𑀦𑀁. 𑀑𑀪𑀸𑀲𑀁 𑀨𑀭𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀆𑀮𑁄𑀓𑀝𑁆𑀞𑀸𑀦𑁂𑀢𑀺 𑀅𑀢𑁆𑀢𑀦𑀸 ¶ 𑀓𑀢𑀆𑀮𑁄𑀓𑀝𑁆𑀞𑀸𑀦𑁂. 𑀆𑀮𑁄𑀓𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀅𑀦𑁆𑀥𑀓𑀸𑀭𑀝𑁆𑀞𑀸𑀦𑁂 𑀆𑀮𑁄𑀓𑀤𑀲𑁆𑀲𑀦𑀁 𑀯𑀺𑀬 𑀆𑀮𑁄𑀓𑀝𑁆𑀞𑀸𑀦𑁂 𑀆𑀮𑁄𑀓𑀤𑀲𑁆𑀲𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀢𑀲𑁆𑀫𑀸 𑀢𑁂𑀲𑀁 𑀲𑀢𑁆𑀢𑀸𑀦𑀁 ‘‘𑀓𑀺𑀁 𑀆𑀮𑁄𑀓𑁄 𑀅𑀬𑀁, 𑀓𑀲𑁆𑀲 𑀦𑀼 𑀔𑁄 𑀅𑀬𑀁 𑀆𑀮𑁄𑀓𑁄’’𑀢𑀺? 𑀯𑀺𑀘𑀺𑀦𑀦𑁆𑀢𑀸𑀦𑀁 𑀘𑀺𑀦𑁆𑀢𑁂𑀦𑁆𑀢𑀸𑀦𑀁. 𑀲𑀩𑁆𑀩𑁂𑀢𑀺 𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀁 𑀲𑀩𑁆𑀩𑁂 𑀤𑁂𑀯𑀫𑀦𑀼𑀲𑁆𑀲𑀸. 𑀑𑀲𑀝𑀸𑀬 𑀧𑀭𑀺𑀲𑀸𑀬𑀸𑀢𑀺 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀁 𑀲𑀩𑁆𑀩𑁄𑀲𑀝𑀸𑀬 𑀧𑀭𑀺𑀘𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑀸𑀬 𑀧𑀭𑀺𑀲𑀸𑀬. 𑀲𑀤𑁆𑀤𑀁 𑀲𑀼𑀡𑀺𑀁𑀲𑀽𑀢𑀺 𑀦 𑀓𑁂𑀯𑀮𑀁 𑀲𑀤𑁆𑀤𑀫𑁂𑀯 𑀲𑀼𑀡𑀺𑀁𑀲𑀼, 𑀅𑀣 𑀔𑁄 𑀅𑀢𑁆𑀣𑁄𑀧𑀻𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑁄 𑀢𑁂𑀲𑀁 𑀧𑀓𑀢𑀺𑀲𑀯𑀦𑀼𑀧𑀘𑀸𑀭𑁂 𑀯𑀺𑀬 𑀧𑀸𑀓𑀝𑁄 𑀅𑀳𑁄𑀲𑀺, 𑀢𑀺𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀯𑀺𑀜𑁆𑀜𑀸𑀧𑁂𑀲𑀻𑀢𑀺.

𑀅𑀭𑀼𑀡𑀯𑀢𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁬. 𑀏𑀯𑀁 𑀢𑀁 𑀓𑀼𑀲𑀺𑀦𑀸𑀭𑀸𑀬 𑀳𑁄𑀢𑀻𑀢𑀺 𑀬𑀣𑀸 𑀅𑀦𑀼𑀭𑁄𑀥𑀧𑀼𑀭𑀲𑁆𑀲 𑀣𑀽𑀧𑀸𑀭𑀸𑀫𑁄 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀤𑀺𑀲𑀸𑀬𑀁, 𑀏𑀯𑀁 𑀢𑀁 𑀉𑀬𑁆𑀬𑀸𑀦𑀁 𑀓𑀼𑀲𑀺𑀦𑀸𑀭𑀸𑀬 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀤𑀺𑀲𑀸𑀬𑀁 𑀳𑁄𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀦𑀕𑀭𑀁 𑀧𑀯𑀺𑀲𑀺𑀢𑀼𑀓𑀸𑀫𑀸 𑀉𑀬𑁆𑀬𑀸𑀦𑀢𑁄 𑀉𑀧𑁂𑀘𑁆𑀘 𑀯𑀢𑁆𑀢𑀦𑁆𑀢𑀺 𑀕𑀘𑁆𑀙𑀦𑁆𑀢𑀺 𑀏𑀢𑁂𑀦𑀸𑀢𑀺 𑀉𑀧𑀯𑀢𑁆𑀢𑀦𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸. 𑀢𑀦𑁆𑀢𑀺 𑀲𑀸𑀮𑀧𑀦𑁆𑀢𑀺𑀪𑀸𑀯𑁂𑀦 𑀞𑀺𑀢𑀁 𑀲𑀸𑀮𑀯𑀦𑀁. 𑀅𑀦𑁆𑀢𑀭𑁂𑀦𑀸𑀢𑀺 𑀯𑁂𑀫𑀚𑁆𑀛𑁂. 𑀅𑀧𑁆𑀧𑀫𑀚𑁆𑀚𑀦𑀁 𑀅𑀧𑁆𑀧𑀫𑀸𑀤𑁄, 𑀲𑁄 𑀧𑀦 𑀅𑀢𑁆𑀣𑀢𑁄 𑀜𑀸𑀡𑀽𑀧𑀲𑀁𑀳𑀺𑀢𑀸 𑀲𑀢𑀺. 𑀬𑀲𑁆𑀫𑀸 𑀢𑀢𑁆𑀣 𑀲𑀢𑀺𑀬𑀸 𑀩𑁆𑀬𑀸𑀧𑀸𑀭𑁄 𑀲𑀸𑀢𑀺𑀲𑀬𑁄, 𑀢𑀲𑁆𑀫𑀸 ‘‘𑀲𑀢𑀺𑀅𑀯𑀺𑀧𑁆𑀧𑀯𑀸𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀫𑀸𑀤𑀧𑀤𑁂𑀬𑁂𑀯 𑀧𑀓𑁆𑀔𑀺𑀧𑀺𑀢𑁆𑀯𑀸 𑀅𑀪𑀸𑀲𑀺 𑀅𑀢𑁆𑀣𑀢𑁄 𑀢𑀲𑁆𑀲 𑀲𑀓𑀮𑀲𑁆𑀲 𑀩𑀼𑀤𑁆𑀥𑀯𑀘𑀦𑀲𑁆𑀲 𑀲𑀗𑁆𑀕𑀡𑁆𑀳𑀦𑀢𑁄.

𑀛𑀸𑀦𑀸𑀤𑀻𑀲𑀼 𑀘𑀺𑀢𑁆𑀢𑁂 𑀘 𑀧𑀭𑀫𑀼𑀓𑁆𑀓𑀁𑀲𑀕𑀢𑀯𑀲𑀻𑀪𑀸𑀯𑀢𑀸𑀬 ‘‘𑀏𑀢𑁆𑀢𑀓𑁂 𑀓𑀸𑀮𑁂 𑀏𑀢𑁆𑀢𑀓𑀸 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 ¶ 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀁 𑀧𑀭𑀺𑀦𑀺𑀩𑁆𑀩𑀸𑀦𑀧𑀭𑀺𑀓𑀫𑁆𑀫𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀣𑁂𑀭𑁄𑀢𑀺 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄.

𑀅𑀬𑀫𑁆𑀧𑀺 𑀘𑀸𑀢𑀺 𑀬𑀣𑀸𑀯𑀼𑀢𑁆𑀢𑀧𑀜𑁆𑀘𑀲𑀝𑁆𑀞𑀺𑀬𑀸 𑀛𑀸𑀦𑀸𑀦𑀁 𑀲𑀫𑀸𑀧𑀦𑁆𑀦𑀓𑀣𑀸𑀧𑀺 𑀲𑀗𑁆𑀔𑁂𑀧𑀓𑀣𑀸 𑀏𑀯. 𑀓𑀲𑁆𑀫𑀸? 𑀬𑀲𑁆𑀫𑀸 𑀪𑀕𑀯𑀸 𑀢𑀤𑀸 𑀤𑁂𑀯𑀲𑀺𑀓𑀁 𑀯𑀴𑀜𑁆𑀚𑀦𑀲𑀫𑀸𑀧𑀢𑁆𑀢𑀺𑀬𑁄 𑀲𑀩𑁆𑀩𑀸𑀧𑀺 𑀅𑀧𑀭𑀺𑀳𑀸𑀧𑁂𑀢𑁆𑀯𑀸 𑀲𑀫𑀸𑀧𑀚𑁆𑀚𑀺 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀺𑀩𑁆𑀩𑀸𑀦𑀧𑀼𑀭𑀁 𑀧𑀯𑀺𑀲𑀦𑁆𑀢𑁄’’𑀢𑀺𑀆𑀤𑀺𑀫𑀸𑀳. 𑀘𑀢𑀼𑀯𑀻𑀲𑀢𑀺…𑀧𑁂… 𑀧𑀯𑀺𑀲𑀺𑀢𑁆𑀯𑀸𑀢𑀺 𑀏𑀢𑁆𑀣 𑀓𑁂𑀘𑀺 𑀢𑀸𑀯 𑀆𑀳𑀼 ¶ ‘‘𑀪𑀕𑀯𑀸 𑀤𑁂𑀯𑀲𑀺𑀓𑀁 𑀤𑁆𑀯𑀸𑀤𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀤𑁆𑀯𑀸𑀤𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀫𑁂𑀯 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀤𑀸𑀧𑀺 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸 𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 ‘𑀢𑀣𑀸𑀕𑀢𑀁, 𑀪𑀺𑀓𑁆𑀔𑀯𑁂, 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀤𑁆𑀯𑁂 𑀯𑀺𑀢𑀓𑁆𑀓𑀸 𑀩𑀳𑀼𑀮𑀁 𑀲𑀫𑀼𑀤𑀸𑀘𑀭𑀦𑁆𑀢𑀺 𑀔𑁂𑀫𑁄 𑀘 𑀯𑀺𑀢𑀓𑁆𑀓𑁄 𑀧𑀯𑀺𑀯𑁂𑀓𑁄 𑀘 𑀯𑀺𑀢𑀓𑁆𑀓𑁄’𑀢𑀺 (𑀇𑀢𑀺𑀯𑀼. 𑁩𑁮). 𑀔𑁂𑀫𑁄 𑀳𑀺 𑀯𑀺𑀢𑀓𑁆𑀓𑁄 𑀪𑀕𑀯𑀢𑁄 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑁄, 𑀧𑀯𑀺𑀯𑁂𑀓𑀯𑀺𑀢𑀓𑁆𑀓𑁄 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀁. 𑀩𑀼𑀤𑁆𑀥𑀸𑀦𑀁 𑀳𑀺 𑀪𑀯𑀗𑁆𑀕𑀧𑀭𑀺𑀯𑀸𑀲𑁄 𑀮𑀳𑀼𑀓𑁄 𑀫𑀢𑁆𑀣𑀓𑀧𑁆𑀧𑀢𑁆𑀢𑁄 𑀲𑀫𑀸𑀧𑀢𑁆𑀢𑀻𑀲𑀼 𑀯𑀲𑀻𑀪𑀸𑀯𑁄, 𑀢𑀲𑁆𑀫𑀸 𑀲𑀫𑀸𑀧𑀚𑁆𑀚𑀦𑀯𑀼𑀝𑁆𑀞𑀸𑀦𑀸𑀦𑀺 𑀓𑀢𑀺𑀧𑀬𑀘𑀺𑀢𑁆𑀢𑀓𑁆𑀔𑀡𑁂𑀳𑁂𑀯 𑀇𑀚𑁆𑀛𑀦𑁆𑀢𑀺. 𑀧𑀜𑁆𑀘 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀬𑁄 𑀘𑀢𑀲𑁆𑀲𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀅𑀧𑁆𑀧𑀫𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀬𑀸 𑀲𑀤𑁆𑀥𑀺𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺 𑀘𑀸𑀢𑀺 𑀤𑁆𑀯𑀸𑀤𑀲𑁂𑀢𑀸 𑀲𑀫𑀸𑀧𑀢𑁆𑀢𑀺𑀬𑁄 𑀪𑀕𑀯𑀸 𑀧𑀘𑁆𑀘𑁂𑀓𑀁 𑀤𑀺𑀯𑀲𑁂 𑀤𑀺𑀯𑀲𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀓𑁆𑀔𑀢𑁆𑀢𑀼𑀁 𑀧𑀼𑀭𑁂𑀪𑀢𑁆𑀢𑀁 𑀲𑀫𑀸𑀧𑀚𑁆𑀚𑀢𑀺, 𑀢𑀣𑀸 𑀧𑀘𑁆𑀙𑀸𑀪𑀢𑁆𑀢𑀦𑁆𑀢𑀺 𑀏𑀯𑀁 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸 𑀤𑁂𑀯𑀲𑀺𑀓𑀁 𑀯𑀴𑀜𑁆𑀚𑀦𑀓𑀓𑀲𑀺𑀡𑀲𑀫𑀸𑀧𑀢𑁆𑀢𑀺𑀬𑁄’’𑀢𑀺.

𑀅𑀧𑀭𑁂 𑀧𑀦𑀸𑀳𑀼 ‘‘𑀬𑀁 𑀢𑀁 𑀪𑀕𑀯𑀢𑀸 𑀅𑀪𑀺𑀲𑀫𑁆𑀩𑁄𑀥𑀺𑀤𑀺𑀯𑀲𑁂 𑀧𑀘𑁆𑀙𑀺𑀫𑀬𑀸𑀫𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀫𑀼𑀔𑁂𑀦 𑀧𑀝𑀺𑀮𑁄𑀫𑀦𑀬𑁂𑀦 𑀚𑀭𑀸𑀫𑀭𑀡𑀢𑁄 𑀧𑀝𑁆𑀞𑀸𑀬 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸 𑀅𑀦𑀼𑀧𑀤𑀥𑀫𑁆𑀫𑀯𑀺𑀧𑀲𑁆𑀲𑀦𑀁 𑀆𑀭𑀪𑀦𑁆𑀢𑁂𑀦 𑀬𑀣𑀸 𑀦𑀸𑀫 𑀧𑀼𑀭𑀺𑀲𑁄 𑀲𑀼𑀯𑀺𑀤𑀼𑀕𑁆𑀕𑀁 𑀫𑀳𑀸𑀕𑀳𑀦𑀁 𑀫𑀳𑀸𑀯𑀦𑀁 𑀙𑀺𑀦𑁆𑀤𑀦𑁆𑀢𑁄 𑀅𑀦𑁆𑀢𑀭𑀦𑁆𑀢𑀭𑀸 𑀦𑀺𑀲𑀸𑀦𑀲𑀺𑀮𑀸𑀬𑀁 𑀨𑀭𑀲𑀼𑀁 𑀦𑀺𑀲𑀺𑀢𑀁 𑀓𑀭𑁄𑀢𑀺, 𑀏𑀯𑀫𑁂𑀯𑀁 𑀦𑀺𑀲𑀸𑀦𑀲𑀺𑀮𑀸𑀲𑀤𑀺𑀲𑀺𑀬𑁄 𑀲𑀫𑀸𑀧𑀢𑁆𑀢𑀺𑀬𑁄 𑀅𑀦𑁆𑀢𑀭𑀦𑁆𑀢𑀭𑀸 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀜𑀸𑀡𑀲𑁆𑀲 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀁 𑀲𑀫𑁆𑀧𑀸𑀤𑁂𑀢𑀼𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀘𑁆𑀘𑁂𑀓𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑁂𑀲𑀼 𑀮𑀓𑁆𑀔𑀓𑁄𑀝𑀺𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀯𑀲𑁂𑀦 𑀲𑀫𑁆𑀫𑀲𑀦𑀜𑀸𑀡𑀁 𑀧𑀯𑀢𑁆𑀢𑁂𑀢𑀺, 𑀢𑀤𑀦𑀼𑀲𑀸𑀭𑁂𑀦 𑀪𑀕𑀯𑀸 𑀩𑀼𑀤𑁆𑀥𑀪𑀽𑀢𑁄𑀧𑀺 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀤𑀺𑀯𑀲𑁂 𑀤𑀺𑀯𑀲𑁂 𑀮𑀓𑁆𑀔𑀓𑁄𑀝𑀺𑀨𑀮𑀲𑀫𑀸𑀧𑀢𑁆𑀢𑀺𑀬𑁄 𑀲𑀫𑀸𑀧𑀚𑁆𑀚𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, ‘𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸 𑀲𑀫𑀸𑀧𑀢𑁆𑀢𑀺𑀬𑁄 𑀧𑀯𑀺𑀲𑀺𑀢𑁆𑀯𑀸’’’𑀢𑀺.

𑀇𑀫𑀸𑀦𑀺 𑀤𑁆𑀯𑁂𑀧𑀺 𑀲𑀫𑀦𑀦𑁆𑀢𑀭𑀸𑀦𑁂𑀯 𑀧𑀘𑁆𑀘𑀯𑁂𑀓𑁆𑀔𑀡𑀸𑀬𑀧𑀺 𑀬𑁂𑀪𑀼𑀬𑁆𑀬𑁂𑀦 𑀦𑀸𑀦𑀦𑁆𑀢𑀭𑀺𑀬𑀓𑀢𑀸𑀬 𑀛𑀸𑀦𑀧𑀓𑁆𑀔𑀺𑀓𑀪𑀸𑀯𑀢𑁄. 𑀬𑀲𑁆𑀫𑀸 𑀲𑀩𑁆𑀩𑀧𑀘𑁆𑀙𑀺𑀫𑀁 𑀪𑀯𑀗𑁆𑀕𑀘𑀺𑀢𑁆𑀢𑀁 𑀢𑀢𑁄 𑀢𑀢𑁄 ¶ 𑀘𑀯𑀦𑀢𑁄 ‘‘𑀘𑀼𑀢𑀻’’𑀢𑀺 𑀯𑀼𑀘𑁆𑀘𑀢𑀺 ¶ , 𑀢𑀲𑁆𑀫𑀸 𑀦 𑀓𑁂𑀯𑀮𑀁 𑀅𑀬𑀫𑁂𑀯 𑀪𑀕𑀯𑀸, 𑀅𑀣 𑀔𑁄 𑀲𑀩𑁆𑀩𑁂𑀧𑀺 𑀲𑀢𑁆𑀢𑀸 𑀪𑀯𑀗𑁆𑀕𑀘𑀺𑀢𑁆𑀢𑁂𑀦𑁂𑀯 𑀘𑀯𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑁂 𑀳𑀺 𑀓𑁂𑀘𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀤𑀼𑀓𑁆𑀔𑀲𑀘𑁆𑀘𑁂𑀦𑀸𑀢𑀺 𑀤𑀼𑀓𑁆𑀔𑀲𑀘𑁆𑀘𑀧𑀭𑀺𑀬𑀸𑀧𑀦𑁆𑀦𑁂𑀦 𑀘𑀼𑀢𑀺𑀘𑀺𑀢𑁆𑀢𑁂𑀦 𑀓𑀸𑀮𑀁 𑀓𑀸𑀮𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀺, 𑀓𑀸𑀮𑀕𑀫𑀦𑀢𑁄 𑀯𑀸 𑀓𑀭𑁄𑀦𑁆𑀢𑀺 𑀧𑁂𑀘𑁆𑀘𑀸𑀢𑀺.

𑀧𑀝𑀺𑀪𑀸𑀕𑀧𑀼𑀕𑁆𑀕𑀮𑀯𑀺𑀭𑀳𑀺𑀢𑁄 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀅𑀲𑀤𑀺𑀲𑀢𑀸𑀬 𑀲𑀤𑀺𑀲𑀧𑀼𑀕𑁆𑀕𑀮𑀭𑀳𑀺𑀢𑁄. 𑀲𑀗𑁆𑀔𑀸𑀭𑀸 𑀯𑀽𑀧𑀲𑀫𑁆𑀫𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀽𑀧𑀲𑀫𑁄𑀢𑀺 𑀏𑀯𑀁 𑀲𑀗𑁆𑀔𑀸𑀢𑀁 𑀜𑀸𑀢𑀁 𑀓𑀣𑀺𑀢𑀁 𑀦𑀺𑀩𑁆𑀩𑀸𑀦𑀫𑁂𑀯 𑀲𑀼𑀔𑀦𑁆𑀢𑀺. 𑀮𑁄𑀫𑀳𑀁𑀲𑀦𑀓𑁄𑀢𑀺 𑀮𑁄𑀫𑀸𑀦𑀁 𑀳𑀝𑁆𑀞𑀪𑀸𑀯𑀸𑀧𑀸𑀤𑀦𑁄. 𑀪𑀺𑀁𑀲𑀦𑀓𑁄𑀢𑀺 𑀅𑀯𑀻𑀢𑀭𑀸𑀕𑀸𑀦𑀁 𑀪𑀬𑀚𑀦𑀓𑁄 𑀆𑀲𑀺 𑀅𑀳𑁄𑀲𑀺. 𑀲𑀩𑁆𑀩𑀸𑀓𑀸𑀭𑀯𑀭𑀕𑀼𑀡𑀽𑀧𑁂𑀢𑁂𑀢𑀺 𑀲𑀩𑁆𑀩𑁂𑀳𑀺 𑀆𑀓𑀸𑀭𑀯𑀭𑁂𑀳𑀺 𑀉𑀢𑁆𑀢𑀫𑀓𑀸𑀭𑀡𑁂𑀳𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑁂. 𑀅𑀲𑀗𑁆𑀓𑀼𑀝𑀺𑀢𑁂𑀦𑀸𑀢𑀺 𑀅𑀓𑀼𑀝𑀺𑀢𑁂𑀦 𑀯𑀺𑀧𑁆𑀨𑀸𑀭𑀺𑀓𑀸𑀪𑀸𑀯𑀢𑁄. 𑀲𑀼𑀯𑀺𑀓𑀲𑀺𑀢𑁂𑀦𑁂𑀯𑀸𑀢𑀺 𑀧𑀻𑀢𑀺𑀲𑁄𑀫𑀦𑀲𑁆𑀲𑀬𑁄𑀕𑀢𑁄 𑀲𑀼𑀝𑁆𑀞𑀼 𑀯𑀺𑀓𑀲𑀺𑀢𑁂𑀦. 𑀯𑁂𑀤𑀦𑀁 𑀅𑀥𑀺𑀯𑀸𑀲𑁂𑀲𑀺 𑀲𑀪𑀸𑀯𑀲𑀫𑀼𑀤𑀬𑀸𑀤𑀺𑀢𑁄 𑀲𑀼𑀝𑁆𑀞𑀼 𑀧𑀜𑁆𑀜𑀸𑀢𑀢𑁆𑀢𑀸. 𑀅𑀦𑀸𑀯𑀭𑀡𑀯𑀺𑀫𑁄𑀓𑁆𑀔𑁄 𑀲𑀩𑁆𑀩𑀲𑁄 𑀦𑀺𑀩𑁆𑀩𑀺𑀤𑀪𑀸𑀯𑁄. 𑀢𑁂𑀦𑀸𑀳 ‘‘𑀅𑀧𑀜𑁆𑀜𑀢𑁆𑀢𑀺𑀪𑀸𑀯𑀽𑀧𑀕𑀫𑁄’’𑀢𑀺. 𑀧𑀚𑁆𑀚𑁄𑀢𑀦𑀺𑀩𑁆𑀩𑀸𑀦𑀲𑀤𑀺𑀲𑁄𑀢𑀺 𑀧𑀤𑀻𑀧𑀲𑁆𑀲 𑀦𑀺𑀩𑁆𑀩𑀸𑀦𑀲𑀤𑀺𑀲𑁄 𑀢𑀢𑁆𑀣 𑀯𑀺𑀮𑀻𑀬𑀺𑀢𑁆𑀯𑀸 𑀅𑀯𑀝𑁆𑀞𑀸𑀦𑀸𑀪𑀸𑀯𑀢𑁄.

𑀧𑀭𑀺𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀩𑁆𑀭𑀳𑁆𑀫𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁭. 𑀩𑁆𑀭𑀸𑀳𑁆𑀫𑀡𑀲𑀁𑀬𑀼𑀢𑁆𑀢𑀁

𑁧. 𑀅𑀭𑀳𑀦𑁆𑀢𑀯𑀕𑁆𑀕𑁄

𑁧. 𑀥𑀦𑀜𑁆𑀚𑀸𑀦𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁭. 𑀥𑀦𑀜𑁆𑀚𑀸𑀦𑀺𑀕𑁄𑀢𑁆𑀢𑀸𑀢𑀺 ¶ ¶ 𑀏𑀢𑁆𑀣 𑀧𑀼𑀩𑁆𑀩𑀧𑀼𑀭𑀺𑀲𑀢𑁄 𑀆𑀕𑀢𑀲𑁆𑀲 𑀓𑀼𑀮𑀯𑀁𑀲𑀲𑁆𑀲 𑀦𑀸𑀫𑀸𑀪𑀺𑀥𑀸𑀦𑀲𑀗𑁆𑀔𑀸𑀢𑀁 𑀕𑀁 𑀢𑀸𑀬𑀢𑀻𑀢𑀺 𑀕𑁄𑀢𑁆𑀢𑀁. (𑀓𑀺𑀁 𑀧𑀦 𑀢𑀦𑁆𑀢𑀺? 𑀅𑀜𑁆𑀜𑀓𑀼𑀮𑀧𑀭𑀫𑁆𑀧𑀭𑀸𑀲𑀸𑀥𑀸𑀭𑀡𑀁 𑀢𑀲𑁆𑀲 𑀓𑀼𑀮𑀲𑁆𑀲 𑀆𑀤𑀺𑀧𑀼𑀭𑀺𑀲𑀲𑀫𑀼𑀤𑀸𑀕𑀢𑀁 𑀢𑀁𑀓𑀼𑀮𑀧𑀭𑀺𑀬𑀸𑀧𑀦𑁆𑀦𑀲𑀸𑀥𑀸𑀭𑀡𑀁 𑀲𑀸𑀫𑀜𑁆𑀜𑀭𑀽𑀧𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.) 𑀥𑀦𑀜𑁆𑀚𑀸𑀦𑀺𑀕𑁄𑀢𑁆𑀢𑀁 𑀏𑀢𑀺𑀲𑁆𑀲𑀦𑁆𑀢𑀺 𑀥𑀦𑀜𑁆𑀚𑀸𑀦𑀺𑀕𑁄𑀢𑁆𑀢𑀸. 𑀢𑀲𑁆𑀲𑀸 𑀉𑀤𑀸𑀦𑀲𑁆𑀲 𑀓𑀸𑀭𑀡𑀁 𑀧𑀼𑀘𑁆𑀙𑀺𑀢𑁆𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀲𑁄 𑀓𑀺𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀸𑀦𑀸𑀭𑀲𑀪𑁄𑀚𑀦𑀁 𑀤𑁂𑀢𑀻𑀢𑀺 𑀬𑁄𑀚𑀦𑀸. 𑀧𑀜𑁆𑀘𑀕𑁄𑀭𑀲𑀲𑀫𑁆𑀧𑀸𑀤𑀺𑀢𑀁 𑀲𑀸𑀮𑀺𑀪𑀢𑁆𑀢𑀁 𑀲𑀽𑀧𑀲𑀸𑀓𑀩𑁆𑀬𑀜𑁆𑀚𑀦𑀁 𑀦𑀸𑀦𑀸𑀭𑀲𑀁 𑀩𑁆𑀭𑀸𑀳𑁆𑀫𑀡𑀪𑁄𑀚𑀦𑀁. 𑀫𑀡𑁆𑀟𑀮𑀕𑁆𑀕𑀔𑀕𑁆𑀕𑀦𑁆𑀢𑀺 𑀫𑀡𑁆𑀟𑀮𑀕𑁆𑀕𑀲𑀗𑁆𑀔𑀸𑀢𑀁 𑀔𑀕𑁆𑀕𑀁. 𑀤𑀼𑀯𑀺𑀥𑁄 𑀳𑀺 𑀔𑀕𑁆𑀕𑁄 𑀫𑀡𑁆𑀟𑀮𑀕𑁆𑀕𑁄 𑀤𑀻𑀖𑀕𑁆𑀕𑁄𑀢𑀺. 𑀢𑀢𑁆𑀣 𑀬𑀲𑁆𑀲 𑀅𑀕𑁆𑀕𑁄 𑀫𑀡𑁆𑀟𑀮𑀸𑀓𑀸𑀭𑁂𑀦 𑀞𑀺𑀢𑁄, 𑀲𑁄 𑀫𑀡𑁆𑀟𑀮𑀕𑁆𑀕𑁄. 𑀬𑀲𑁆𑀲 𑀧𑀦 𑀅𑀲𑀺𑀧𑀼𑀢𑁆𑀢𑀺𑀓𑀸 𑀯𑀺𑀬 𑀤𑀻𑀖𑁄, 𑀲𑁄 𑀤𑀻𑀖𑀕𑁆𑀕𑁄.

𑀲𑀸𑀲𑀦𑀸𑀢𑀺 𑀅𑀦𑀼𑀲𑀸𑀲𑀦𑀸. ‘‘𑀦𑀫𑁄…𑀧𑁂… 𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀸 𑀧𑀜𑁆𑀘𑀧𑀤𑀺𑀓𑀕𑀸𑀣𑀸. 𑀲𑀢𑁆𑀣𑀼𑀲𑀸𑀲𑀦𑁂 𑀳𑀺 𑀮𑁄𑀓𑀺𑀬𑀘𑁆𑀙𑀦𑁆𑀤𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀏𑀲𑀸 𑀧𑀜𑁆𑀘𑀧𑀤𑀺𑀓𑀕𑀸𑀣𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀑𑀓𑁆𑀓𑀸𑀯𑀭𑀥𑀭𑀸𑀢𑀺 𑀧𑀼𑀩𑁆𑀩𑀧𑀼𑀭𑀺𑀲𑀲𑀗𑁆𑀔𑀸𑀢𑀉𑀓𑁆𑀓𑀸𑀓𑀯𑀁𑀲𑀯𑀭𑀥𑀸𑀭𑀺𑀓𑀸. 𑀲𑀓𑁆𑀓𑀸𑀢𑀺 𑀲𑀓𑁆𑀓𑀼𑀡𑁂𑀬𑁆𑀬𑀁.

𑀏𑀯𑀦𑁆𑀢𑀺 ‘‘𑀲𑀘𑁂 𑀫𑁂 𑀅𑀗𑁆𑀕𑀫𑀗𑁆𑀕𑀸𑀦𑀻’’𑀢𑀺𑀆𑀤𑀺𑀦𑀸 𑀇𑀫𑀺𑀦𑀸 𑀧𑀓𑀸𑀭𑁂𑀦. ‘‘𑀧𑀜𑁆𑀘 𑀕𑀸𑀣𑀸𑀲𑀢𑀸𑀦𑀺 𑀧𑀦 𑀅𑀝𑁆𑀞𑀓𑀣𑀁 𑀆𑀭𑀼𑀴𑁆𑀳𑀸𑀦𑀺, 𑀇𑀥 𑀧𑀦 𑀤𑁆𑀯𑁂 𑀏𑀯 𑀉𑀤𑁆𑀥𑀝𑀸’’𑀢𑀺 𑀯𑀤𑀦𑁆𑀢𑀺. 𑀧𑀳𑀭𑀺𑀢𑀼𑀁 𑀯𑀸𑀢𑀺 𑀏𑀓𑀯𑀸𑀭𑀫𑁆𑀧𑀺 𑀳𑀢𑁆𑀣𑁂𑀦 𑀯𑀸 𑀧𑀸𑀤𑁂𑀦 𑀯𑀸 𑀧𑀳𑀭𑀺𑀢𑀼𑀫𑁆𑀧𑀺 𑀧𑀭𑀸𑀫𑀲𑀺𑀢𑀼𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀲𑁄 𑀳𑀺 𑀢𑀲𑁆𑀲𑀸 𑀅𑀭𑀺𑀬𑀲𑀸𑀯𑀺𑀓𑀸𑀬 𑀆𑀦𑀼𑀪𑀸𑀯𑁂𑀦 𑀅𑀢𑁆𑀢𑀦𑁄 𑀲𑀸𑀫𑀢𑁆𑀣𑀺𑀬𑁂𑀦 𑀯𑀲𑁂 𑀯𑀢𑁆𑀢𑀸𑀧𑀦𑀢𑁆𑀣𑀁 𑀲𑀦𑁆𑀢𑀚𑁆𑀚𑀺𑀢𑁆𑀯𑀸𑀧𑀺 𑀢𑀤𑀦𑀼𑀯𑀢𑁆𑀢𑀦𑁆𑀢𑁄 𑀦𑀺𑀩𑁆𑀩𑀺𑀲𑁄 𑀅𑀳𑁄𑀲𑀺. 𑀢𑁂𑀦𑀸𑀳 ‘‘𑀪𑁄𑀢𑀻’’𑀢𑀺𑀆𑀤𑀺.

𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀲𑀸𑀫𑀺𑀓𑀩𑁆𑀭𑀸𑀳𑁆𑀫𑀡𑀲𑁆𑀲. 𑀉𑀧𑀲𑀁𑀳𑀭𑀦𑁆𑀢𑀻𑀢𑀺 𑀉𑀧𑀦𑁂𑀦𑁆𑀢𑀻. 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 ¶ 𑀢𑀲𑁆𑀫𑀺𑀁 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀓𑀸𑀮𑁂 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀤𑀼𑀓𑁆𑀔𑀸’’𑀢𑀺 𑀪𑀕𑀯𑀢𑁄 ¶ 𑀯𑀘𑀦𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 ‘‘𑀤𑀲𑀩𑀮𑀲𑁆𑀲 𑀪𑀕𑀯𑀢𑁄’’𑀢𑀺𑀆𑀤𑀻𑀲𑀼 𑀬𑀣𑀸𑀧𑀭𑀺𑀘𑀺𑀢𑀁 𑀕𑀼𑀡𑀧𑀤𑀁 𑀅𑀦𑀼𑀲𑁆𑀲𑀭𑀺. 𑀢𑁂𑀦𑀸𑀳 ‘‘𑀤𑀲𑀩𑀮𑀁 𑀲𑀭𑀻’’𑀢𑀺.

𑀔𑀦𑁆𑀢𑀺𑀲𑁄𑀭𑀘𑁆𑀘𑀭𑀳𑀺𑀢𑀢𑀸𑀬 𑀓𑀼𑀚𑁆𑀛𑀺𑀢𑁆𑀯𑀸. 𑀪𑀺𑀚𑁆𑀚𑀺𑀢𑁆𑀯𑀸𑀢𑀺 𑀲𑀁𑀬𑀢𑀸𑀪𑀸𑀯𑀢𑁄 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀦𑁆𑀢𑀭𑁂 𑀫𑁂𑀢𑁆𑀢𑀺𑀪𑁂𑀤𑁂𑀦 𑀪𑀺𑀚𑁆𑀚𑀺𑀢𑁆𑀯𑀸. 𑀏𑀯𑀫𑁂𑀯𑀸𑀢𑀺 𑀬𑀣𑀸 𑀏𑀢𑀭𑀳𑀺 𑀅𑀓𑀸𑀭𑀡𑁂𑀦, 𑀏𑀯𑀫𑁂𑀯 𑀅𑀜𑁆𑀜𑀤𑀸𑀧𑀺 𑀅𑀓𑀸𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀦𑀺𑀓𑁆𑀓𑀸𑀭𑀡𑀢𑀸𑀤𑀻𑀧𑀦𑁂 𑀏𑀯𑀁-𑀲𑀤𑁆𑀤𑁄, 𑀏𑀯-𑀲𑀤𑁆𑀤𑁄 𑀧𑀦 𑀅𑀯𑀥𑀸𑀭𑀡𑀢𑁆𑀣𑁄. 𑀦𑀺𑀓𑁆𑀓𑀸𑀭𑀡𑀢𑀸 𑀘 𑀦𑀸𑀫 𑀦𑀺𑀭𑀢𑁆𑀣𑀓𑀢𑀸, 𑀦𑀺𑀭𑀢𑁆𑀣𑀓𑀯𑀺𑀧𑁆𑀧𑀮𑀸𑀧𑀪𑀸𑀯𑁂𑀦𑁂𑀢𑁆𑀣 𑀏𑀯𑀁-𑀲𑀤𑁆𑀤𑀲𑁆𑀲 𑀕𑀳𑀡𑁂 𑀧𑀯𑀢𑁆𑀢𑀺 𑀕𑀯𑁂𑀲𑀺𑀢𑀩𑁆𑀩𑀸. 𑀕𑀭𑀳𑀢𑁆𑀣𑁄 𑀯𑀸𑀬𑀁 𑀏𑀯𑀁-𑀲𑀤𑁆𑀤𑁄 𑀅𑀦𑁂𑀓𑀢𑁆𑀣𑀢𑁆𑀢𑀸 𑀦𑀺𑀧𑀸𑀢𑀸𑀦𑀁. 𑀕𑀭𑀳𑀢𑁆𑀣𑀢𑀸 𑀘𑀲𑁆𑀲 𑀯𑀲𑀮𑀺𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀢𑁄 𑀧𑀸𑀓𑀝𑀸 𑀏𑀯.

𑀕𑀸𑀫𑀦𑀺𑀕𑀫𑀭𑀝𑁆𑀞𑀧𑀽𑀚𑀺𑀢𑁄𑀢𑀺 𑀇𑀫𑀺𑀦𑀸 𑀕𑀸𑀫𑀦𑀺𑀕𑀫𑀭𑀝𑁆𑀞𑀲𑀸𑀫𑀺𑀓𑁂𑀳𑀺 𑀧𑀽𑀚𑀺𑀢𑀪𑀸𑀯𑁄 𑀤𑀻𑀧𑀺𑀢𑁄 𑀕𑀸𑀫𑀸𑀤𑀻𑀦𑀁 𑀢𑁂𑀲𑀁 𑀯𑀲𑁂 𑀯𑀢𑁆𑀢𑀦𑀢𑁄. 𑀅𑀲𑀼𑀓𑀲𑁆𑀲 𑀦𑀸𑀫 𑀧𑀼𑀕𑁆𑀕𑀮𑀲𑁆𑀲. 𑀲𑁂𑀲𑀦𑁆𑀢𑀺 𑀅𑀪𑀺𑀓𑁆𑀓𑀦𑁆𑀢𑀦𑁆𑀢𑀺𑀆𑀤𑀺, 𑀬𑀫𑁆𑀧𑀺 𑀘𑀜𑁆𑀜𑀁 𑀇𑀥𑀸𑀕𑀢𑀁 𑀳𑁂𑀝𑁆𑀞𑀸 𑀯𑀡𑁆𑀡𑀺𑀢𑀜𑁆𑀘.

𑀥𑀦𑀜𑁆𑀚𑀸𑀦𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀓𑁆𑀓𑁄𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁮. 𑀪𑀸𑀭𑀤𑁆𑀯𑀸𑀚𑁄𑀯 𑀲𑁄𑀢𑀺 𑀪𑀸𑀭𑀤𑁆𑀯𑀸𑀚𑁄 𑀦𑀸𑀫 𑀏𑀯 𑀲𑁄 𑀩𑁆𑀭𑀸𑀳𑁆𑀫𑀡𑁄. 𑀕𑁄𑀢𑁆𑀢𑀯𑀲𑁂𑀦 𑀳𑀺 𑀢𑀬𑀺𑀤𑀁 𑀦𑀸𑀫𑀁, 𑀯𑀺𑀲𑁂𑀲𑁂𑀦 𑀧𑀦𑁂𑀢𑀁 𑀚𑀸𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀘𑀫𑀢𑁆𑀢𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀚𑀸𑀦𑀺𑀓𑀢𑀸𑀢𑀺 𑀜𑀸𑀢𑀺𑀯𑀕𑁆𑀕𑀳𑀸𑀦𑀺𑀓𑀢𑀸. 𑀧𑀓𑁆𑀔𑁄 𑀪𑀺𑀦𑁆𑀦𑁄𑀢𑀺 𑀢𑀢𑁄 𑀏𑀯 𑀜𑀸𑀢𑀺𑀧𑀓𑁆𑀔𑁄 𑀦𑀝𑁆𑀞𑁄. 𑀬𑀣𑀸 𑀤𑁄𑀫𑀦𑀲𑁆𑀲𑀺𑀢𑁄 𑀅𑀦𑀢𑁆𑀢𑀫𑀦𑁄𑀢𑀺 𑀯𑀢𑁆𑀢𑀩𑁆𑀩𑀁 𑀮𑀪𑀢𑀺, 𑀏𑀯𑀁 𑀓𑀼𑀧𑀺𑀢𑁄𑀢𑀺 𑀆𑀳 ‘‘𑀤𑁄𑀫𑀦𑀲𑁆𑀲𑁂𑀦 𑀘𑀸’’𑀢𑀺. 𑀤𑀲𑀳𑀻𑀢𑀺 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀯𑀲𑁂𑀦 𑀯𑀼𑀢𑁆𑀢𑀁 𑀧𑀜𑁆𑀘𑀳𑀺 𑀕𑀸𑀣𑀸𑀲𑀢𑁂𑀳𑀺 𑀅𑀓𑁆𑀓𑁄𑀲𑀦𑁆𑀢𑁄 𑀢𑀣𑀸 𑀅𑀓𑁆𑀓𑁄𑀲𑁂𑀬𑁆𑀬𑀸𑀢𑀺 𑀓𑀢𑁆𑀯𑀸. 𑀢𑀢𑁆𑀣 𑀧𑀦 𑀬𑁂𑀦 𑀓𑁂𑀦𑀘𑀺 𑀅𑀓𑁆𑀓𑁄𑀲𑀦𑁆𑀢𑁄𑀧𑀺 𑀅𑀓𑁆𑀓𑁄𑀲𑀢𑀺𑀬𑁂𑀯 𑀦𑀸𑀫. 𑀓𑀭𑁄𑀲𑀺 𑀫𑀫 𑀪𑀸𑀢𑀺𑀓𑀲𑁆𑀲 𑀧𑀩𑁆𑀩𑀚𑁆𑀚𑀁.

𑀲𑀫𑁆𑀪𑀼𑀜𑁆𑀚𑀢𑀻𑀢𑀺 𑀲𑀫𑁆𑀪𑁄𑀕𑀁 𑀓𑀭𑁄𑀢𑀺. 𑀅𑀓𑁆𑀓𑁄𑀲𑀸𑀤𑀻𑀳𑀺 𑀏𑀓𑀢𑁄 𑀪𑀼𑀜𑁆𑀚𑀢𑀺. 𑀯𑀻𑀢𑀺𑀳𑀭𑀢𑀻𑀢𑀺 𑀩𑁆𑀬𑀢𑀺𑀳𑀸𑀭𑀁 𑀓𑀭𑁄𑀢𑀺, 𑀅𑀓𑁆𑀓𑁄𑀲𑀢𑁄 𑀧𑀘𑁆𑀘𑀓𑁆𑀓𑁄𑀲𑀦𑀸𑀤𑀺𑀦𑀸 𑀯𑀺𑀦𑀺𑀫𑀬𑀁 ¶ 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀓𑀢𑀲𑁆𑀲 𑀧𑀝𑀺𑀓𑀸𑀭𑀁 𑀓𑀭𑁄𑀢𑀻’’𑀢𑀺. 𑀅𑀲𑁆𑀲 𑀅𑀦𑀼𑀲𑁆𑀲𑀯𑀯𑀲𑁂𑀦 𑀲𑀼𑀢𑁆𑀯𑀸 ‘‘𑀲𑀧𑀢𑀺 𑀫’’𑀦𑁆𑀢𑀺 𑀲𑀜𑁆𑀜𑀺𑀦𑁄 𑀪𑀬𑀁 𑀉𑀧𑁆𑀧𑀚𑁆𑀚𑀻𑀢𑀺 𑀬𑁄𑀚𑀦𑀸. 𑀅𑀲𑁆𑀲𑀸𑀢𑀺 𑀩𑁆𑀭𑀸𑀳𑁆𑀫𑀡𑀲𑁆𑀲. 𑀲𑀼𑀢𑁆𑀯𑀸𑀢𑀺 𑀧𑀤𑀁 𑀉𑀪𑀬𑀢𑁆𑀣𑀸𑀧𑀺 𑀬𑁄𑀚𑁂𑀢𑀩𑁆𑀩𑀁 ‘‘𑀢𑀯𑁂𑀯𑁂𑀢𑀁 𑀩𑁆𑀭𑀸𑀳𑁆𑀫𑀡𑀸𑀢𑀺 ¶ 𑀲𑀼𑀢𑁆𑀯𑀸, 𑀅𑀦𑀼𑀲𑁆𑀲𑀯𑀯𑀲𑁂𑀦 𑀲𑀼𑀢𑁆𑀯𑀸’’𑀢𑀺 𑀘. 𑀓𑀸𑀫𑀁 𑀓𑀺𑀲𑀯𑀘𑁆𑀙𑀸𑀤𑀬𑁄 𑀲𑀧𑀦𑀁 𑀦𑀸𑀤𑀁𑀲𑀼, 𑀤𑁂𑀯𑀢𑀸𑀦𑀁𑀬𑁂𑀯 𑀳𑀺 𑀲𑁄 𑀅𑀢𑁆𑀣𑁄, 𑀲𑀢𑁆𑀢𑀸𑀦𑀁 𑀧𑀦 𑀢𑀣𑀸 𑀲𑀜𑁆𑀜𑀸 𑀉𑀧𑁆𑀧𑀦𑁆𑀦𑀸, 𑀲𑁄𑀧𑀺 𑀢𑀣𑀸𑀲𑀜𑁆𑀜𑀻 𑀅𑀳𑁄𑀲𑀺. 𑀢𑁂𑀦𑀸𑀳 ‘‘𑀅𑀦𑀼𑀲𑁆𑀲𑀯𑀯𑀲𑁂𑀦𑀸’’𑀢𑀺.

𑀤𑀦𑁆𑀢𑀲𑁆𑀲 𑀲𑀩𑁆𑀩𑀲𑁄 𑀤𑀫𑀣𑀁 𑀉𑀧𑀕𑀢𑀢𑁆𑀢𑀸. 𑀦𑀺𑀩𑁆𑀩𑀺𑀲𑁂𑀯𑀦𑀲𑁆𑀲𑀸𑀢𑀺 𑀭𑀸𑀕𑀤𑁄𑀲𑀸𑀤𑀺𑀳𑁂𑀢𑀼𑀓𑀯𑀺𑀧𑁆𑀨𑀦𑁆𑀤𑀦𑀭𑀳𑀺𑀢𑀲𑁆𑀲. 𑀢𑀲𑁆𑀲𑁂𑀯𑀸𑀢𑀺 𑀧𑀝𑀺𑀓𑀼𑀚𑁆𑀛𑀦𑁆𑀢𑀲𑁆𑀲𑁂𑀯 𑀧𑀼𑀕𑁆𑀕𑀮𑀲𑁆𑀲 𑀢𑁂𑀦 𑀓𑁄𑀥𑁂𑀦 𑀧𑀸𑀧𑀁 𑀳𑁄𑀢𑀺 𑀧𑀸𑀧𑀲𑁆𑀲 𑀲𑀦𑁆𑀢𑀸𑀦𑀦𑁆𑀢𑀭𑀲𑀗𑁆𑀓𑀦𑁆𑀢𑀺𑀬𑀸 𑀅𑀪𑀸𑀯𑀢𑁄. 𑀓𑁂𑀘𑀺 𑀧𑀦 ‘‘𑀢𑀲𑁆𑀲𑁂𑀯𑀸𑀢𑀺 𑀢𑀲𑁆𑀲𑁂𑀯 𑀧𑀝𑀺𑀓𑀼𑀚𑁆𑀛𑀦𑁆𑀢𑀧𑀼𑀭𑀺𑀲𑀲𑁆𑀲 𑀢𑁂𑀦 𑀧𑀝𑀺𑀓𑀼𑀚𑁆𑀛𑀦𑁂𑀦. 𑀧𑀸𑀧𑀺𑀬𑁄𑀢𑀺 𑀧𑀝𑀺𑀓𑀼𑀚𑁆𑀛𑀦𑁆𑀢𑀧𑀼𑀕𑁆𑀕𑀮𑀲𑁆𑀲 𑀮𑀸𑀫𑀓𑀢𑀭𑁄’’𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀳𑀼𑀢𑁆𑀯𑀸 𑀧𑀝𑀺𑀲𑀗𑁆𑀔𑀸𑀦𑁂 𑀞𑀺𑀢𑁄 𑀅𑀥𑀺𑀯𑀸𑀲𑁂𑀢𑀺, 𑀦 𑀲𑀳𑁄 𑀫𑀽𑀴𑁆𑀳𑁄 𑀳𑀼𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀪𑀺𑀦𑁆𑀦𑀁 𑀢𑀺𑀓𑀺𑀘𑁆𑀙𑀦𑁆𑀢𑀦𑁆𑀢𑀺 𑀉𑀪𑀺𑀦𑁆𑀦𑀁 𑀉𑀧𑁆𑀧𑀦𑁆𑀦𑀓𑁄𑀥𑀲𑀗𑁆𑀔𑀸𑀢𑀁 𑀓𑀺𑀮𑁂𑀲𑀩𑁆𑀬𑀸𑀥𑀺𑀁 𑀢𑀺𑀓𑀺𑀘𑁆𑀙𑀦𑁆𑀢𑀁 𑀯𑀽𑀧𑀲𑀫𑁂𑀦𑁆𑀢𑀁 𑀢𑀁 𑀧𑀼𑀕𑁆𑀕𑀮𑀁. 𑀬𑁄 𑀧𑀼𑀕𑁆𑀕𑀮𑁄𑀢𑀺𑀆𑀤𑀺𑀦𑀸 𑀧𑀼𑀭𑀺𑀫𑀸𑀲𑀼 𑀕𑀸𑀣𑀸𑀲𑀼 𑀧𑀯𑀢𑁆𑀢𑀺𑀢𑀸𑀦𑀺 𑀧𑀤𑀸𑀦𑀺 𑀲𑀫𑁆𑀩𑀦𑁆𑀥𑀺𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀬𑀸𑀣𑀸𑀯𑀢𑁄 𑀯𑀺𑀦𑀻𑀢𑀸 𑀅𑀭𑀺𑀬𑀥𑀫𑁆𑀫𑀲𑁆𑀲 𑀓𑁄𑀯𑀺𑀤𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀆𑀳 ‘‘𑀥𑀫𑁆𑀫𑀲𑁆𑀲𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀥𑀫𑁆𑀫𑀲𑁆𑀲𑀸’’𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀘𑀢𑀼𑀲𑀘𑁆𑀘𑀥𑀫𑁆𑀫𑀲𑁆𑀲 𑀯𑀸’’𑀢𑀺.

𑀅𑀓𑁆𑀓𑁄𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀲𑀼𑀭𑀺𑀦𑁆𑀤𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁯. 𑀢𑁂𑀦𑁂𑀯𑀸𑀢𑀺 𑀪𑀸𑀢𑀼𑀧𑀩𑁆𑀩𑀚𑀺𑀢𑁂𑀦𑁂𑀯. 𑀅𑀲𑁆𑀲𑁂𑀯𑀸𑀢𑀺 𑀢𑀺𑀢𑀺𑀓𑁆𑀔𑀲𑁆𑀲. ‘‘𑀢𑀁 𑀚𑀬𑀁 𑀳𑁄𑀢𑀻’’𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀲𑁄 𑀚𑀬𑁄 𑀳𑁄𑀢𑀻’’𑀢𑀺, 𑀤𑀼𑀚𑁆𑀚𑀬𑀁 𑀓𑁄𑀥𑀁 𑀢𑀺𑀢𑀺𑀓𑁆𑀔𑀸𑀬 𑀚𑀺𑀦𑀦𑁆𑀢𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀫𑀸 𑀢𑀺𑀢𑀺𑀓𑁆𑀔𑀸𑀤𑀬𑁄 𑀦 𑀓𑁄𑀥𑀯𑀲𑀺𑀓𑀁 𑀥𑀼𑀭𑀁, 𑀢𑀁 𑀧𑀦 𑀩𑀸𑀮𑀸𑀦𑀁 𑀫𑀜𑁆𑀜𑀦𑀸𑀫𑀢𑁆𑀢𑀦𑁆𑀢𑀺 ¶ 𑀇𑀥 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀓𑀢𑀫𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀚𑀸𑀦𑀢𑁄𑀯 𑀚𑀬𑁄 𑀦 𑀅𑀯𑀺𑀚𑀸𑀦𑀢𑁄 𑀢𑀺𑀢𑀺𑀓𑁆𑀔𑀸𑀬 𑀅𑀪𑀸𑀯𑀢𑁄. 𑀦 𑀳𑀺 𑀅𑀯𑀺𑀚𑀸𑀦𑀦𑁆𑀢𑁄 𑀅𑀦𑁆𑀥𑀩𑀸𑀮𑁄 𑀓𑁄𑀥𑀁 𑀯𑀺𑀚𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀓𑁂𑀯𑀮𑀁 𑀚𑀬𑀁 𑀫𑀜𑁆𑀜𑀢𑀺 𑀓𑀺𑀮𑁂𑀲𑁂𑀳𑀺 𑀧𑀭𑀸𑀚𑀺𑀢𑁄 𑀲𑀫𑀸𑀦𑁄𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀲𑀼𑀭𑀺𑀦𑁆𑀤𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀩𑀺𑀮𑀗𑁆𑀕𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁦. 𑀲𑀼𑀤𑁆𑀥𑀦𑁆𑀢𑀺 𑀓𑁂𑀯𑀮𑀁 𑀲𑀫𑁆𑀪𑀸𑀭𑀯𑀺𑀭𑀳𑀺𑀢𑀁. 𑀲𑀫𑁆𑀪𑀸𑀭𑀬𑀼𑀢𑁆𑀢𑀦𑁆𑀢𑀺 𑀓𑀝𑀼𑀓𑀪𑀡𑁆𑀟𑀸𑀤𑀺𑀲𑀫𑁆𑀪𑀸𑀭𑀲𑀳𑀺𑀢𑀁. 𑀓𑀜𑁆𑀚𑀺𑀢𑁄 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀓𑀜𑁆𑀚𑀺𑀓𑀁, 𑀆𑀭𑀦𑀸𑀮𑀁, 𑀩𑀺𑀮𑀗𑁆𑀕𑀦𑁆𑀢𑀺 𑀅𑀢𑁆𑀣𑁄. 𑀦𑀸𑀫𑀁 𑀕𑀳𑀺𑀢𑀁 𑀲𑀗𑁆𑀕𑀻𑀢𑀺𑀓𑀸𑀮𑁂 ‘‘𑀩𑀺𑀮𑀗𑁆𑀕𑀺𑀓𑀪𑀸𑀭𑀤𑁆𑀯𑀸𑀚𑁄’’𑀢𑀺 ¶ 𑀯𑀺𑀲𑁂𑀲𑀦𑀯𑀲𑁂𑀦. 𑀢𑀬𑁄𑀢𑀺 𑀥𑀦𑀜𑁆𑀚𑀸𑀦𑀺𑀬𑀸 𑀲𑀸𑀫𑀺𑀓𑁄 𑀪𑀸𑀭𑀤𑁆𑀯𑀸𑀚𑁄, 𑀅𑀓𑁆𑀓𑁄𑀲𑀓𑀪𑀸𑀭𑀤𑁆𑀯𑀸𑀚𑁄, 𑀅𑀲𑀼𑀦𑁆𑀤𑀭𑀺𑀓𑀪𑀸𑀭𑀤𑁆𑀯𑀸𑀚𑁄𑀢𑀺 𑀆𑀤𑀺𑀢𑁄 𑀢𑀻𑀲𑀼 𑀲𑀼𑀢𑁆𑀢𑁂𑀲𑀼 𑀆𑀕𑀢𑀸 𑀢𑀬𑁄. 𑀫𑁂𑀢𑀺 𑀫𑀬𑁆𑀳𑀁.

𑀩𑀺𑀮𑀗𑁆𑀕𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀳𑀺𑀁𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁧. 𑀏𑀲𑀸𑀢𑀺 𑀩𑁆𑀭𑀸𑀳𑁆𑀫𑀡𑁄. ‘‘𑀅𑀳𑀺𑀁𑀲𑀓𑁄 𑀅𑀳’’𑀦𑁆𑀢𑀺 𑀢𑀤𑀢𑁆𑀣𑀁 𑀲𑀸𑀥𑁂𑀢𑀼𑀁 𑀇𑀘𑁆𑀙𑀸𑀬 𑀓𑀣𑁂𑀲𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀳𑀺𑀁𑀲𑀓𑀧𑀜𑁆𑀳𑀁 𑀧𑀼𑀘𑁆𑀙𑀻’’𑀢𑀺. 𑀢𑀣𑀸 𑀘𑁂 𑀅𑀲𑁆𑀲𑀸𑀢𑀺 𑀬𑀣𑀸 𑀢𑁂 𑀦𑀸𑀫𑀲𑁆𑀲 𑀅𑀢𑁆𑀣𑁄, 𑀢𑀣𑀸 𑀘𑁂𑀢𑀁 𑀪𑀯𑁂𑀬𑁆𑀬𑀸𑀲𑀺 𑀅𑀦𑁆𑀯𑀢𑁆𑀣𑀦𑀸𑀫𑀓𑁄 𑀪𑀯𑁂𑀬𑁆𑀬𑀸𑀲𑀺 𑀅𑀳𑀺𑀁𑀲𑀓𑁄 𑀏𑀯 𑀲𑀺𑀬𑀸𑀢𑀺. 𑀦 𑀤𑀼𑀓𑁆𑀔𑀸𑀧𑁂𑀢𑀺 𑀤𑀼𑀓𑁆𑀔𑀫𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀢𑀺, 𑀤𑀼𑀓𑁆𑀔𑀢𑁄 𑀅𑀧𑀦𑁂𑀢𑀻𑀢𑀺 𑀅𑀢𑁆𑀣𑁄.

𑀅𑀳𑀺𑀁𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀚𑀝𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁨. 𑀚𑀝𑀸𑀧𑀜𑁆𑀳𑀲𑁆𑀲𑀸𑀢𑀺 ‘‘𑀅𑀦𑁆𑀢𑁄𑀚𑀝𑀸 𑀩𑀳𑀺𑀚𑀝𑀸’’𑀢𑀺 𑀏𑀯𑀁 𑀚𑀝𑀸𑀧𑀭𑀺𑀬𑀸𑀬𑀲𑁆𑀲 𑀧𑀜𑁆𑀳𑀲𑁆𑀲.

𑀚𑀝𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀼𑀤𑁆𑀥𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁩. 𑀲𑀼𑀤𑁆𑀥𑀺𑀓𑀧𑀜𑁆𑀳𑀲𑁆𑀲𑀸𑀢𑀺 ¶ ‘‘𑀦𑀸𑀩𑁆𑀭𑀸𑀳𑁆𑀫𑀡𑁄 𑀲𑀼𑀚𑁆𑀛𑀢𑀻’’𑀢𑀺 𑀏𑀯𑀁 𑀲𑀼𑀤𑁆𑀥𑀲𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀧𑀜𑁆𑀳𑀲𑁆𑀲. 𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀧𑀜𑁆𑀘𑀯𑀺𑀥𑀦𑀺𑀬𑀫𑀮𑀓𑁆𑀔𑀡𑁂𑀦 𑀲𑀻𑀮𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀢𑀧𑁄𑀓𑀫𑁆𑀫𑀦𑁆𑀢𑀺 𑀅𑀦𑀲𑀦𑀧𑀜𑁆𑀘𑀸𑀢𑀧𑀢𑀧𑁆𑀧𑀦𑀸𑀤𑀺𑀧𑀭𑀺𑀪𑁂𑀤𑀦𑀢𑀧𑁄𑀓𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺. 𑀯𑀺𑀚𑁆𑀚𑀸𑀢𑀺 𑀢𑀬𑁄 𑀯𑁂𑀤𑀸𑀢𑀺 𑀯𑀤𑀦𑁆𑀢𑀺 ‘‘𑀢𑀸𑀬 𑀇𑀥𑀮𑁄𑀓𑀢𑁆𑀣𑀁 𑀧𑀭𑀮𑁄𑀓𑀢𑁆𑀣𑀁 𑀜𑀸𑀬𑀦𑁆𑀢𑀻’’𑀢𑀺 𑀓𑀢𑁆𑀯𑀸. 𑀕𑁄𑀢𑁆𑀢𑀘𑀭𑀡𑀦𑁆𑀢𑀺 𑀕𑁄𑀢𑁆𑀢𑀲𑀗𑁆𑀔𑀸𑀢𑀁 𑀘𑀭𑀡𑀁. 𑀩𑁆𑀭𑀸𑀳𑁆𑀫𑀡𑁄 𑀲𑀼𑀚𑁆𑀛𑀢𑀺 𑀚𑁂𑀝𑁆𑀞𑀚𑀸𑀢𑀺𑀓𑀢𑁆𑀢𑀸. 𑀢𑀣𑀸 𑀳𑀺 𑀲𑁄 𑀏𑀯 𑀢𑀧𑀁 𑀆𑀘𑀭𑀺𑀢𑀼𑀁 𑀮𑀪𑀢𑀺, 𑀦 𑀇𑀢𑀭𑁄. 𑀅𑀜𑁆𑀜𑀸 𑀮𑀸𑀫𑀺𑀓𑀸 𑀧𑀚𑀸𑀢𑀺 𑀇𑀢𑀭𑀯𑀡𑁆𑀡𑀁 𑀯𑀤𑀢𑀺. 𑀯𑀘𑀦𑀲𑀳𑀲𑁆𑀲𑀫𑁆𑀧𑀻𑀢𑀺 𑀕𑀸𑀣𑀸𑀦𑁂𑀓𑀲𑀳𑀲𑁆𑀲𑀫𑁆𑀧𑀺. 𑀅𑀦𑁆𑀢𑁄 𑀓𑀺𑀮𑁂𑀲𑁂𑀳𑀺 𑀧𑀽𑀢𑀺𑀓𑁄 𑀲𑀪𑀸𑀯𑁂𑀦 𑀧𑀽𑀢𑀺𑀓𑁄. 𑀓𑀺𑀮𑀺𑀝𑁆𑀞𑁂𑀳𑀺 𑀓𑀸𑀬𑀓𑀫𑁆𑀫𑀸𑀤𑀻𑀳𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀳𑀺.

𑀲𑀼𑀤𑁆𑀥𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀕𑁆𑀕𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁪. 𑀅𑀕𑁆𑀕𑀺𑀧𑀭𑀺𑀘𑀭𑀡𑀯𑀲𑁂𑀦𑀸𑀢𑀺 ¶ 𑀅𑀕𑁆𑀕𑀺𑀳𑀼𑀢𑁆𑀢𑀚𑀼𑀳𑀦𑀯𑀲𑁂𑀦. 𑀲𑀦𑁆𑀦𑀺𑀳𑀺𑀢𑁄𑀢𑀺 𑀫𑀺𑀲𑁆𑀲𑀻𑀪𑀸𑀯𑀁 𑀲𑀫𑁆𑀧𑀸𑀧𑀺𑀢𑁄. 𑀢𑀣𑀸𑀪𑀽𑀢𑁄 𑀘 𑀲𑁄 𑀲𑀧𑁆𑀧𑀺𑀦𑀸 𑀲𑀤𑁆𑀥𑀺𑀁 𑀬𑁄𑀚𑀺𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀲𑀁𑀬𑁄𑀚𑀺𑀢𑁄’’𑀢𑀺. 𑀅𑀧𑀸𑀬𑀫𑀕𑁆𑀕𑀁 𑀑𑀓𑁆𑀓𑀫𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀤𑀻𑀦𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀲𑀫𑀼𑀧𑁆𑀧𑀸𑀤𑀦𑀢𑁄. 𑀢𑁂𑀦𑀸𑀳 ‘‘𑀇𑀫𑀁 𑀮𑀤𑁆𑀥𑀺’’𑀦𑁆𑀢𑀺𑀆𑀤𑀺.

𑀚𑀸𑀢𑀺𑀬𑀸𑀢𑀺 𑀲𑀤𑁄𑀲𑀓𑀺𑀭𑀺𑀬𑀸𑀧𑀭𑀸𑀥𑀲𑁆𑀲 𑀅𑀲𑀫𑁆𑀪𑀯𑁂𑀦 𑀧𑀭𑀺𑀲𑀼𑀤𑁆𑀥𑀸𑀬 𑀚𑀸𑀢𑀺𑀬𑀸. 𑀦𑀸𑀦𑀧𑁆𑀧𑀓𑀸𑀭𑁂 𑀅𑀝𑁆𑀞𑀸𑀭𑀲𑀯𑀺𑀚𑁆𑀚𑀸𑀝𑁆𑀞𑀸𑀦𑀲𑀜𑁆𑀜𑀺𑀢𑁂 𑀕𑀦𑁆𑀣𑁂. 𑀲𑀼𑀢𑀯𑀸𑀢𑀺 𑀲𑀼𑀢𑁆𑀯𑀸 𑀦𑀺𑀝𑁆𑀞𑀁 𑀧𑀢𑁆𑀢𑁄 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦𑀸𑀢𑀺 𑀇𑀤𑀁 𑀮𑁄𑀓𑁂 𑀲𑀸𑀲𑀦𑁂 𑀘 𑀦𑀺𑀭𑀼𑀴𑁆𑀳𑀢𑀸𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀜𑁆𑀜𑁂 𑀳𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀚𑀸𑀦𑀦𑁆𑀢𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑁂𑀦𑁂𑀯 𑀚𑀸𑀦𑀦𑁆𑀢𑀺, 𑀪𑀕𑀯𑀸 𑀧𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦𑀧𑀺 𑀚𑀸𑀦𑀸𑀢𑀺. 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀩𑁆𑀩𑀲𑁄 𑀚𑀸𑀢𑀺 𑀔𑀻𑀬𑀢𑀺 𑀏𑀢𑁂𑀦𑀸𑀢𑀺 𑀚𑀸𑀢𑀺𑀓𑁆𑀔𑀬𑁄, 𑀅𑀕𑁆𑀕𑀫𑀕𑁆𑀕𑁄 ¶ , 𑀢𑁂𑀦 𑀧𑀢𑁆𑀢𑀩𑁆𑀩𑀢𑁆𑀢𑀸 𑀆𑀧𑀦𑁆𑀦𑀢𑁆𑀢𑀸 𑀘 𑀚𑀸𑀢𑀺𑀓𑁆𑀔𑀬𑁄 𑀅𑀭𑀳𑀢𑁆𑀢𑀁. 𑀚𑀸𑀦𑀺𑀢𑁆𑀯𑀸 𑀯𑁄𑀲𑀺𑀢𑀯𑁄𑀲𑀸𑀦𑁄𑀢𑀺 𑀯𑀺𑀚𑀸𑀦𑀺𑀢𑀩𑁆𑀩𑀁 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀫𑀕𑁆𑀕𑀜𑀸𑀡𑁂𑀦 𑀚𑀸𑀦𑀺𑀢𑁆𑀯𑀸 𑀲𑁄𑀴𑀲𑀦𑁆𑀦𑀫𑁆𑀧𑀺 𑀓𑀺𑀘𑁆𑀘𑀸𑀦𑀁 𑀯𑁄𑀲𑀺𑀢𑀯𑁄𑀲𑀸𑀦𑁄.

𑀉𑀧𑁆𑀧𑀢𑁆𑀢𑀺𑀁 𑀤𑀻𑀧𑁂𑀢𑁆𑀯𑀸𑀢𑀺 𑀧𑀸𑀬𑀲𑀤𑀸𑀦𑀲𑁆𑀲 𑀆𑀕𑀫𑀦𑀁 𑀧𑀓𑀸𑀲𑁂𑀢𑁆𑀯𑀸. 𑀕𑀸𑀣𑀸𑀳𑀺 𑀅𑀪𑀺𑀕𑀻𑀢𑀦𑁆𑀢𑀺 𑀤𑁆𑀯𑀻𑀳𑀺 𑀕𑀸𑀣𑀸𑀳𑀺 𑀫𑀬𑀸 𑀅𑀪𑀺𑀕𑀻𑀢𑀁. 𑀅𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀪𑀼𑀜𑁆𑀚𑀺𑀢𑀼𑀁 𑀦 𑀬𑀼𑀢𑁆𑀢𑀁. ‘‘𑀅𑀪𑁄𑀚𑀦𑁂𑀬𑁆𑀬’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀪𑀕𑀯𑀢𑁄 𑀅𑀚𑁆𑀛𑀸𑀲𑀬𑁄 𑀅𑀘𑁆𑀘𑀦𑁆𑀢𑀫𑁂𑀯 𑀲𑀼𑀤𑁆𑀥𑁄𑀢𑀺? 𑀲𑀘𑁆𑀘𑀫𑁂𑀢𑀁, 𑀩𑁆𑀭𑀸𑀳𑁆𑀫𑀡𑁄 𑀧𑀦 𑀧𑀼𑀩𑁆𑀩𑁂 𑀅𑀤𑀸𑀢𑀼𑀓𑀸𑀫𑁄 𑀧𑀘𑁆𑀙𑀸 𑀕𑀸𑀣𑀸 𑀲𑀼𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀬 𑀫𑀼𑀤𑀼𑀳𑀤𑀬𑁄 𑀳𑀼𑀢𑁆𑀯𑀸 𑀤𑀸𑀢𑀼𑀓𑀸𑀫𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀢𑀁 𑀪𑀺𑀓𑁆𑀔𑀽𑀦𑀁 𑀅𑀦𑀸𑀕𑀢𑁂 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑀢𑁆𑀣𑀁 𑀧𑀝𑀺𑀓𑁆𑀔𑀺𑀧𑀺. 𑀢𑀣𑀸 𑀳𑀺 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑁂 𑀘 𑀏𑀯𑀫𑁂𑀯 𑀧𑀝𑀺𑀧𑀚𑁆𑀚𑀺. 𑀢𑁂𑀦𑀸𑀳 ‘‘𑀢𑁆𑀯𑀁 𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺. 𑀓𑀺𑀮𑀜𑁆𑀚𑀫𑁆𑀳𑀺…𑀧𑁂… 𑀧𑀓𑀸𑀲𑀺𑀢𑀸𑀢𑀺 𑀏𑀢𑁂𑀦 𑀕𑀸𑀣𑀁 𑀉𑀤𑁆𑀤𑁂𑀲𑀝𑁆𑀞𑀸𑀦𑁂𑀯 𑀞𑀧𑁂𑀢𑁆𑀯𑀸 𑀪𑀕𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀲𑀻𑀢𑀺 𑀤𑀲𑁆𑀲𑁂𑀢𑀺. 𑀕𑀸𑀬𑀦𑁂𑀦𑀸𑀢𑀺 𑀕𑀸𑀬𑀦𑀓𑁂𑀦, 𑀕𑀸𑀦𑁂𑀦 𑀯𑀸. 𑀅𑀢𑁆𑀣𑀜𑁆𑀘 𑀥𑀫𑁆𑀫𑀜𑁆𑀘𑀸𑀢𑀺 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀳𑀺𑀢𑀜𑁆𑀘𑁂𑀯 𑀢𑀲𑁆𑀲 𑀓𑀸𑀭𑀡𑀜𑁆𑀘. 𑀲𑀫𑁆𑀧𑀲𑁆𑀲𑀦𑁆𑀢𑀸𑀦𑀦𑁆𑀢𑀺 𑀲𑀫𑁆𑀫𑀤𑁂𑀯 𑀧𑀲𑁆𑀲𑀦𑁆𑀢𑀸𑀦𑀁. 𑀥𑀫𑁆𑀫𑁄𑀢𑀺 𑀧𑀯𑁂𑀡𑀺𑀆𑀕𑀢𑁄 𑀘𑀸𑀭𑀺𑀢𑁆𑀢𑀥𑀫𑁆𑀫𑁄 𑀦 𑀳𑁄𑀢𑀺. 𑀪𑁄𑀚𑀦𑁂𑀲𑀼 𑀉𑀓𑁆𑀓𑀁𑀲𑀕𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀥𑀸𑀪𑁄𑀚𑀦’’𑀦𑁆𑀢𑀺 𑀆𑀳. 𑀥𑀫𑁆𑀫𑁂 𑀲𑀢𑀻𑀢𑀺 𑀅𑀭𑀺𑀬𑀸𑀦𑀁 𑀆𑀘𑀸𑀭𑀥𑀫𑁆𑀫𑁂 𑀲𑀢𑀺 𑀢𑀁 𑀆𑀮𑀫𑁆𑀩𑀺𑀢𑁆𑀯𑀸 𑀚𑀻𑀯𑀦𑁆𑀢𑀸𑀦𑀁 𑀏𑀢𑀤𑁂𑀯 𑀲𑁂𑀝𑁆𑀞𑀦𑁆𑀢𑀺 ‘‘𑀲𑁄𑀫𑀁 𑀪𑀼𑀜𑁆𑀚𑁂𑀬𑁆𑀬 𑀧𑀸𑀬𑀲’’𑀦𑁆𑀢𑀺 𑀢𑀁 𑀆𑀭𑀩𑁆𑀪 𑀓𑀣𑀸𑀬 𑀉𑀧𑁆𑀧𑀦𑁆𑀦𑀢𑁆𑀢𑀸.

𑀲𑀮𑁆𑀮𑀓𑁆𑀔𑁂𑀢𑀺 𑀅𑀬𑀁 𑀩𑁆𑀭𑀸𑀳𑁆𑀫𑀡𑁄. 𑀲𑁂𑀲𑀸 𑀧𑀘𑁆𑀘𑀬𑀸 𑀦𑀺𑀤𑁆𑀤𑁄𑀲𑀸 𑀢𑁂 𑀆𑀭𑀩𑁆𑀪 𑀓𑀣𑀸𑀬 𑀅𑀧𑁆𑀧𑀯𑀢𑁆𑀢𑀺𑀢𑀢𑁆𑀢𑀸. 𑀓𑀼𑀓𑁆𑀓𑀼𑀘𑁆𑀘𑀯𑀽𑀧𑀲𑀦𑁆𑀢𑀦𑁆𑀢𑀺 ¶ 𑀅𑀕𑁆𑀕𑀺𑀆𑀳𑀺𑀢𑀧𑀤𑀲𑁆𑀲 𑀯𑀺𑀬 𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀦𑁆𑀦𑁂𑀦 𑀧𑀸𑀦𑁂𑀦𑀸𑀢𑀺 𑀮𑀓𑁆𑀔𑀡𑀯𑀘𑀦𑀫𑁂𑀢𑀁 𑀬𑀣𑀸 ‘‘𑀓𑀸𑀓𑁂𑀳𑀺 𑀲𑀧𑁆𑀧𑀺 𑀭𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺. 𑀢𑁂𑀦𑀸𑀳 ‘‘𑀤𑁂𑀲𑀦𑀸𑀫𑀢𑁆𑀢𑀫𑁂𑀢’’𑀦𑁆𑀢𑀺. 𑀩𑀳𑀼𑀲𑀲𑁆𑀲𑀨𑀮𑀤𑀸𑀬𑀓𑀁 𑀲𑀼𑀔𑁂𑀢𑁆𑀢𑀁 𑀯𑀺𑀬 𑀧𑀝𑀺𑀬𑀢𑁆𑀢𑀦𑁆𑀢𑀺 𑀲𑀫𑁆𑀫𑀸 𑀓𑀲𑀦𑀩𑀻𑀚𑀦𑀉𑀤𑀓𑀸𑀦𑀬𑀦𑀸𑀧𑀦𑀬𑀦𑀸𑀤𑀺𑀦𑀸 𑀲𑀼𑀲𑀚𑁆𑀚𑀺𑀢𑀁 𑀔𑁂𑀢𑁆𑀢𑀁 𑀯𑀺𑀬 𑀲𑀻𑀮𑀸𑀤𑀺𑀕𑀼𑀡𑀯𑀺𑀲𑁂𑀲𑀲𑀫𑁆𑀧𑀸𑀤𑀦𑁂𑀦 𑀧𑀝𑀺𑀬𑀢𑁆𑀢𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀏𑀢𑀁.

𑀅𑀕𑁆𑀕𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀲𑀼𑀦𑁆𑀤𑀭𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁫. 𑀆𑀦𑁂𑀢𑁆𑀯𑀸 ¶ 𑀳𑀼𑀦𑀺𑀢𑀩𑁆𑀩𑀢𑁄 𑀆𑀳𑀼𑀢𑀺. 𑀲𑀧𑁆𑀧𑀺𑀫𑀥𑀼𑀧𑀸𑀬𑀲𑀸𑀤𑀻𑀳𑀺 𑀅𑀕𑁆𑀕𑀺𑀁 𑀚𑀼𑀳𑁄𑀢𑀺 𑀏𑀢𑁆𑀣𑀸𑀢𑀺 𑀅𑀕𑁆𑀕𑀺𑀳𑀼𑀢𑁆𑀢𑀁, 𑀲𑀸𑀥𑀺𑀝𑁆𑀞𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀅𑀕𑁆𑀬𑀸𑀬𑀢𑀦’’𑀦𑁆𑀢𑀺𑀆𑀤𑀺. 𑀲𑀼𑀯𑀺𑀲𑁄𑀥𑀺𑀢𑁄 𑀘𑀲𑁆𑀲𑀸𑀢𑀺 𑀦𑀺𑀳𑀻𑀦𑀚𑀸𑀢𑀺𑀓𑀸𑀦𑀁 𑀅𑀦𑁂𑀦 𑀲𑀼𑀝𑁆𑀞𑀼 𑀯𑀺𑀲𑁄𑀥𑀺𑀢𑁄 𑀘 𑀪𑀯𑁂𑀬𑁆𑀬. ‘‘𑀫𑁂’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄.

𑀅𑀨𑀮𑀁 𑀓𑀭𑁄𑀢𑀻𑀢𑀺 𑀇𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑁂𑀫𑀻𑀢𑀺 𑀧𑀤𑀁. 𑀢𑀸𑀯 𑀅𑀦𑀦𑁆𑀢𑀭𑀲𑀼𑀢𑁆𑀢𑀯𑀡𑁆𑀡𑀦𑀸𑀬 𑀆𑀕𑀢𑀲𑀤𑀺𑀲𑀫𑁂𑀯𑀸𑀢𑀺 𑀧𑁂𑀬𑁆𑀬𑀸𑀮𑀯𑀲𑁂𑀦 𑀞𑀧𑁂𑀲𑀺, 𑀦 𑀲𑀧𑁆𑀧𑀺𑀲𑀗𑁆𑀔𑀸𑀭𑀝𑁆𑀞𑀧𑀦𑀁. 𑀳𑀺𑀫𑀧𑀸𑀢𑀲𑁆𑀲 𑀘 𑀲𑀻𑀢𑀯𑀸𑀢𑀲𑁆𑀲 𑀘 𑀧𑀝𑀺𑀩𑀸𑀳𑀦𑀢𑁆𑀣𑀦𑁆𑀢𑀺 𑀅𑀓𑀸𑀭𑀡𑀫𑁂𑀢𑀦𑁆𑀢𑀺 𑀢𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀅𑀜𑁆𑀜𑀫𑁂𑀯 𑀲𑀼𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀝𑀺𑀩𑀮𑁄𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀜𑁆𑀚𑀸𑀦𑀺𑀢𑁆𑀯𑀸𑀢𑀺 ‘‘𑀦𑀸𑀬𑀁 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀲𑀜𑁆𑀚𑀸𑀦𑀺𑀢𑁆𑀯𑀸.

𑀦𑀻𑀘𑀓𑁂𑀲𑀦𑁆𑀢𑀦𑁆𑀢𑀺 𑀭𑀲𑁆𑀲𑀓𑁂𑀲𑀦𑁆𑀢𑀁. 𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀼𑀤𑁆𑀥𑀺𑀅𑀢𑁆𑀣𑀸 𑀲𑀺𑀔𑀸𑀢𑀺 𑀆𑀳 ‘‘𑀧𑀯𑀢𑁆𑀢𑀫𑀢𑁆𑀢𑀫𑁆𑀧𑀺, 𑀲𑀺𑀔𑀁 𑀅𑀤𑀺𑀲𑁆𑀯𑀸’’𑀢𑀺, ‘‘𑀧𑀭𑀫𑀳𑀁𑀲𑀧𑀭𑀺𑀓𑁆𑀔𑀸𑀤𑀺𑀦𑀸’’𑀢𑀺 𑀓𑁂𑀘𑀺.

𑀅𑀓𑀸𑀭𑀡𑀁 𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀲𑁆𑀲 𑀚𑀸𑀢𑀺 𑀅𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀳𑁂𑀢𑀽𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀅𑀧𑀝𑀺𑀓𑁆𑀔𑁂𑀧𑀪𑀸𑀯𑀢𑁄. 𑀏𑀢𑀦𑁆𑀢𑀺 𑀲𑀻𑀮𑀸𑀤𑀺𑀪𑁂𑀤𑀁 𑀘𑀭𑀡𑀁. 𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀲𑁆𑀲 𑀓𑀸𑀭𑀡𑀁 𑀅𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀓𑀸𑀭𑀓𑀧𑀸𑀧𑀥𑀫𑁆𑀫𑀸𑀦𑀁 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀧𑀚𑀳𑀦𑀢𑁄. 𑀅𑀲𑁆𑀲𑀸𑀢𑀺 𑀩𑁆𑀭𑀸𑀳𑁆𑀫𑀡𑀲𑁆𑀲. 𑀢𑀫𑀢𑁆𑀣𑀦𑁆𑀢𑀺 𑀢𑀁 𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀲𑁆𑀲 𑀓𑀸𑀭𑀡𑀢𑀸𑀲𑀗𑁆𑀔𑀸𑀢𑀫𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀦𑁆𑀢𑁄. 𑀲𑀸𑀮𑀸𑀤𑀺𑀓𑀝𑁆𑀞𑀸 𑀚𑀸𑀢𑁄𑀯𑀸𑀢𑀺 𑀲𑀸𑀮𑀸𑀤𑀺𑀯𑀺𑀲𑀼𑀤𑁆𑀥𑀓𑀝𑁆𑀞𑀸𑀯 𑀚𑀸𑀢𑁄. 𑀲𑀸𑀧𑀸𑀦𑀤𑁄𑀡𑀺𑀆𑀤𑀺𑀅𑀯𑀺𑀲𑀼𑀤𑁆𑀥𑀓𑀝𑁆𑀞𑀸 𑀚𑀸𑀢𑁄 𑀅𑀕𑁆𑀕𑀺𑀓𑀺𑀘𑁆𑀘𑀁 𑀦 𑀘 𑀦 𑀓𑀭𑁄𑀢𑀺. 𑀏𑀯𑀦𑁆𑀢𑀺 𑀬𑀣𑀸 𑀅𑀕𑁆𑀕𑀺 𑀬𑀢𑁄 𑀓𑀼𑀢𑁄𑀘𑀺 𑀚𑀸𑀢𑁄𑀧𑀺 𑀅𑀕𑁆𑀕𑀺𑀓𑀺𑀘𑁆𑀘𑀁 𑀓𑀭𑁄𑀢𑀺𑀬𑁂𑀯, 𑀏𑀯𑀁 𑀘𑀡𑁆𑀟𑀸𑀮𑀓𑀼𑀮𑀸𑀤𑀻𑀲𑀼 𑀚𑀸𑀢𑁄𑀧𑀺 𑀤𑀓𑁆𑀔𑀺𑀡𑁂𑀬𑁆𑀬𑁄 𑀦 𑀦 𑀳𑁄𑀢𑀺 𑀕𑀼𑀡𑀲𑀫𑁆𑀧𑀤𑀸𑀯𑀲𑁂𑀦 𑀅𑀭𑀺𑀬𑀸𑀦𑀁 𑀯𑀁𑀲𑁂 𑀧𑀚𑀸𑀢𑀢𑁆𑀢𑀸𑀢𑀺 𑀆𑀳 ‘‘𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸 𑀚𑀸𑀢𑀺𑀫𑀸’’𑀢𑀺. 𑀥𑀺𑀢𑀺𑀬𑀸 𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸 𑀧𑀫𑀼𑀔𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀥𑀺𑀢𑀺𑀬𑀸𑀢𑀺 𑀯𑀻𑀭𑀺𑀬𑁂𑀦. 𑀢𑀜𑁆𑀳𑀺 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀦𑀧𑀭𑀺𑀩𑁆𑀭𑀽𑀳𑀦𑁂𑀳𑀺 𑀢𑁂 𑀥𑀸𑀭𑁂𑀢𑀺. 𑀳𑀺𑀭𑀺𑀬𑀸 𑀤𑁄𑀲𑁂 𑀦𑀺𑀲𑁂𑀥𑁂𑀢𑀺, 𑀲𑀫𑁆𑀫𑀤𑁂𑀯 𑀧𑀸𑀧𑀸𑀦𑀁 𑀚𑀺𑀕𑀼𑀘𑁆𑀙𑀦𑁂 𑀲𑀢𑀺 𑀢𑁂𑀲𑀁 𑀧𑀯𑀢𑁆𑀢𑀺𑀬𑀸 𑀅𑀯𑀲𑀭𑁄 𑀏𑀯 ¶ 𑀦𑀢𑁆𑀣𑀺. 𑀫𑁄𑀦𑀥𑀫𑁆𑀫𑁂𑀦 𑀜𑀸𑀡𑀲𑀗𑁆𑀔𑀸𑀢𑁂𑀦 𑀑𑀢𑁆𑀢𑀧𑁆𑀧𑀥𑀫𑁆𑀫𑁂𑀦. 𑀓𑀸𑀭𑀡𑀸𑀓𑀸𑀭𑀡𑀚𑀸𑀦𑀦𑀓𑁄𑀢𑀺 𑀢𑁂𑀲𑀁 𑀢𑁂𑀲𑀁 ¶ 𑀥𑀫𑁆𑀫𑀸𑀦𑀁 𑀬𑀣𑀸𑀪𑀽𑀢𑀁 𑀞𑀸𑀦𑀁, 𑀧𑀸𑀧𑀥𑀫𑁆𑀫𑀸𑀦𑀁 𑀯𑀸 𑀯𑀺𑀧𑁆𑀧𑀓𑀸𑀭𑀲𑀪𑀸𑀯𑀝𑁆𑀞𑀸𑀦𑀁 𑀚𑀸𑀦𑀦𑀓𑁄.

𑀧𑀭𑀫𑀢𑁆𑀣𑀲𑀘𑁆𑀘𑁂𑀦 𑀦𑀺𑀩𑁆𑀩𑀸𑀦𑁂𑀦 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀤𑀦𑁆𑀢𑁄. 𑀇𑀦𑁆𑀤𑁆𑀭𑀺𑀬𑀤𑀫𑁂𑀦𑀸𑀢𑀺 𑀢𑀢𑁄 𑀏𑀯 𑀅𑀭𑀺𑀬𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂𑀦 𑀉𑀧𑀕𑀢𑁄. 𑀯𑀺𑀤𑀦𑁆𑀢𑀺 𑀢𑁂𑀳𑀺 𑀲𑀘𑁆𑀘𑀸𑀦𑀻𑀢𑀺 𑀯𑁂𑀤𑀸. 𑀫𑀕𑁆𑀕𑀯𑁂𑀤𑀸𑀦𑀁 𑀅𑀦𑁆𑀢𑀦𑁆𑀢𑀺 𑀅𑀭𑀺𑀬𑀨𑀮𑀁. 𑀓𑀺𑀮𑁂𑀲𑀸𑀦𑀁 𑀅𑀦𑁆𑀢𑀦𑁆𑀢𑀺 𑀢𑁂𑀲𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀝𑁆𑀞𑀸𑀦𑀁. 𑀬𑀜𑁆𑀜𑁄𑀢𑀺 𑀅𑀕𑁆𑀕𑀨𑀮𑀁. 𑀦𑀺𑀭𑀢𑁆𑀣𑀓𑀦𑁆𑀢𑀺 𑀅𑀨𑀮𑀁 𑀢𑁂𑀲𑀁 𑀅𑀦𑀸𑀕𑀫𑀦𑀢𑁄, 𑀆𑀕𑀢𑀸𑀦𑀫𑁆𑀧𑀺 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀸𑀪𑀸𑀯𑀢𑁄. 𑀚𑀼𑀳𑀢𑀺 𑀤𑁂𑀢𑀺.

𑀲𑀼𑀬𑀺𑀝𑁆𑀞𑀦𑁆𑀢𑀺 𑀲𑀼𑀤𑀸𑀦𑀁 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀮𑀸𑀪𑁂𑀦. 𑀲𑀼𑀳𑀼𑀢𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀣 𑀯𑀸 𑀲𑀼𑀬𑀺𑀝𑁆𑀞𑀦𑁆𑀢𑀺 𑀲𑀼𑀝𑁆𑀞𑀼 𑀲𑀫𑁆𑀫𑀤𑁂𑀯 𑀬𑀺𑀝𑁆𑀞𑀁 𑀲𑀸𑀭𑁂 𑀉𑀧𑀦𑀻𑀢𑀁 𑀫𑀫 𑀇𑀤𑀁 𑀤𑁂𑀬𑁆𑀬𑀯𑀢𑁆𑀣𑀼. 𑀲𑀼𑀳𑀼𑀢𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀉𑀧𑀳𑀝𑀫𑀢𑁆𑀢𑁂𑀢𑀺 𑀩𑁆𑀭𑀸𑀳𑁆𑀫𑀡𑁂𑀦 ‘‘𑀪𑀼𑀜𑁆𑀚𑀢𑀼 𑀪𑀯’’𑀦𑁆𑀢𑀺 𑀉𑀧𑀦𑀻𑀢𑀫𑀢𑁆𑀢𑁂. 𑀦𑀺𑀩𑁆𑀩𑀢𑁆𑀢𑀺𑀢𑁄𑀚𑀫𑁂𑀯𑀸𑀢𑀺 𑀲𑀯𑀢𑁆𑀣𑀼𑀓𑀁 𑀅𑀕𑁆𑀕𑀳𑁂𑀢𑁆𑀯𑀸 𑀯𑀢𑁆𑀣𑀼𑀢𑁄 𑀯𑀺𑀯𑁂𑀘𑀺𑀢𑀑𑀚𑀫𑁂𑀯. 𑀢𑁂𑀦 𑀢𑀁 𑀲𑀼𑀔𑀼𑀫𑀢𑁆𑀢𑀁 𑀕𑀢𑀦𑁆𑀢𑀺 𑀢𑀁 𑀳𑀩𑁆𑀬𑀲𑁂𑀲𑀁 𑀲𑀩𑁆𑀩𑀲𑁄 𑀲𑀼𑀔𑀼𑀫𑀪𑀸𑀯𑀁 𑀕𑀢𑀦𑁆𑀢𑀺 𑀑𑀚𑀸𑀬 𑀅𑀦𑁄𑀴𑀸𑀭𑀺𑀓𑀢𑀸𑀬 𑀧𑀼𑀭𑀺𑀫𑀸𑀓𑀸𑀭𑁂𑀦𑁂𑀯 𑀧𑀜𑁆𑀜𑀸𑀬𑀫𑀸𑀦𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀧𑀦 𑀑𑀚𑀸𑀬 𑀏𑀯 𑀓𑁂𑀯𑀮𑀸𑀬 𑀕𑀳𑀡𑀁 𑀲𑀦𑁆𑀥𑀸𑀬. 𑀲𑀸 𑀳𑀺 𑀅𑀯𑀺𑀦𑀺𑀩𑁆𑀪𑁄𑀕𑀯𑀼𑀢𑁆𑀢𑀺𑀢𑀸𑀬 𑀯𑀺𑀲𑀼𑀁 𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀤𑁂𑀯𑀢𑀸𑀳𑀺𑀧𑀺 𑀲𑀯𑀢𑁆𑀣𑀼𑀓𑀸 𑀕𑀬𑁆𑀳𑀢𑀺. 𑀫𑀦𑀼𑀲𑁆𑀲𑀸𑀦𑀁 𑀯𑀢𑁆𑀣𑀽𑀢𑀺 𑀓𑀭𑀚𑀓𑀸𑀬𑀫𑀸𑀳. 𑀑𑀴𑀸𑀭𑀺𑀓𑀯𑀢𑁆𑀣𑀼𑀢𑀸𑀬 𑀤𑁂𑀯𑀸𑀦𑀁 𑀯𑀺𑀬 𑀕𑀳𑀡𑀻 𑀦 𑀢𑀺𑀓𑁆𑀔𑀸𑀢𑀺 𑀤𑀺𑀩𑁆𑀩𑁄𑀚𑀲𑀫𑁆𑀫𑀺𑀲𑁆𑀲𑀢𑀸𑀬 𑀲𑀫𑁆𑀫𑀸 𑀧𑀭𑀺𑀡𑀸𑀫𑀁 𑀦 𑀕𑀘𑁆𑀙𑀢𑀺. 𑀲𑀼𑀔𑀼𑀫𑀸𑀧𑀺 𑀲𑀫𑀸𑀦𑀸 𑀤𑀺𑀩𑁆𑀩𑁄𑀚𑀸 𑀢𑁂𑀦 𑀧𑀸𑀬𑀲𑁂𑀦 𑀫𑀺𑀲𑁆𑀲𑀺𑀢𑀸 𑀑𑀴𑀸𑀭𑀺𑀓𑀲𑀫𑁆𑀫𑀺𑀲𑁆𑀲𑀢𑀸𑀬 𑀲𑀼𑀔𑀼𑀫𑀯𑀢𑁆𑀣𑀼𑀓𑀸𑀦𑀁 𑀤𑁂𑀯𑀸𑀦𑀁 𑀲𑀼𑀔𑀤𑀸 𑀦 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀕𑁄𑀬𑀽𑀲𑁂 𑀧𑀦𑀸’’𑀢𑀺𑀆𑀤𑀺𑀦𑀸. 𑀧𑀭𑀺𑀪𑁄𑀕𑀯𑀢𑁆𑀣𑀼𑀦𑁄 𑀑𑀴𑀸𑀭𑀺𑀓𑀢𑀸𑀬 𑀯𑀸 𑀤𑁂𑀯𑀸𑀦𑀁 𑀤𑀼𑀓𑁆𑀓𑀭𑀁 𑀲𑀫𑁆𑀫𑀸 𑀧𑀭𑀺𑀡𑀸𑀫𑁂𑀢𑀼𑀁, 𑀤𑀺𑀩𑁆𑀩𑁄𑀚𑀸𑀬 𑀕𑀭𑀼𑀢𑀭𑀪𑀸𑀯𑁂𑀦 𑀫𑀦𑀼𑀲𑁆𑀲𑀸𑀦𑀁. 𑀢𑁂𑀦𑀸𑀳 𑀪𑀕𑀯𑀸 ‘‘𑀦 𑀔𑁆𑀯𑀸𑀳’’𑀦𑁆𑀢𑀺𑀆𑀤𑀺. 𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀸 𑀢𑁂𑀚𑁄𑀥𑀸𑀢𑀼 𑀛𑀸𑀦𑀸𑀦𑀼𑀪𑀸𑀯𑀲𑀦𑁆𑀢𑁂𑀚𑀺𑀢𑀸 𑀢𑀺𑀓𑁆𑀔𑀢𑀭𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀝𑁆𑀞…𑀧𑁂… 𑀧𑀭𑀺𑀡𑀸𑀫𑁂𑀬𑁆𑀬𑀸’’𑀢𑀺. 𑀪𑀕𑀯𑀢𑁄 𑀧𑀦 𑀲𑀼𑀤𑁆𑀥𑁂𑀦𑁂𑀯 𑀧𑀭𑀺𑀡𑀫𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀸𑀓𑀢𑀺𑀓𑁂𑀦𑁂𑀯𑀸’’𑀢𑀺, 𑀛𑀸𑀦𑀸𑀦𑀼𑀪𑀸𑀯𑀧𑁆𑀧𑀢𑁆𑀢𑁂𑀦 𑀛𑀸𑀦𑁂𑀦 𑀯𑀺𑀦𑀸 𑀲𑀪𑀸𑀯𑀲𑀺𑀤𑁆𑀥𑁂𑀦𑁂𑀯.

‘‘𑀅𑀧𑁆𑀧𑀳𑀭𑀺𑀢𑁂’’𑀢𑀺 𑀏𑀢𑁆𑀣 𑀅𑀧𑁆𑀧-𑀲𑀤𑁆𑀤𑁄 ‘‘𑀅𑀧𑁆𑀧𑀺𑀘𑁆𑀙𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀅𑀪𑀸𑀯𑀢𑁆𑀣𑁄𑀢𑀺 𑀆𑀳 ‘‘𑀅𑀧𑁆𑀧𑀳𑀭𑀺𑀢𑁂𑀢𑀺 𑀅𑀳𑀭𑀺𑀢𑁂’’𑀢𑀺. 𑀧𑀸𑀢𑀺𑀲𑀢𑁂𑀧𑀺 𑀧𑀸𑀬𑀲𑁂. 𑀦 𑀆𑀮𑀼𑀴𑀢𑀻𑀢𑀺 𑀦 𑀆𑀯𑀺𑀮𑀁 𑀳𑁄𑀢𑀺. 𑀅𑀦𑀸𑀕𑀦𑁆𑀢𑀸𑀯 𑀕𑀘𑁆𑀙𑁂𑀬𑁆𑀬 ‘‘𑀅𑀢𑁆𑀢𑀦𑀸𑀧𑀺 ¶ 𑀦 𑀧𑀭𑀺𑀪𑀼𑀜𑁆𑀚𑀺, 𑀅𑀜𑁆𑀜𑁂𑀲𑀁 𑀦 𑀤𑀸𑀧𑁂𑀲𑀺, 𑀓𑁂𑀯𑀮𑀁 𑀧𑀸𑀬𑀲𑀁 𑀦𑀸𑀲𑁂𑀲𑀻’’𑀢𑀺 𑀤𑁄𑀫𑀦𑀲𑁆𑀲𑀧𑁆𑀧𑀢𑁆𑀢𑁄.

𑀤𑀸𑀭𑀼 ¶ 𑀲𑀫𑀸𑀤𑀳𑀸𑀦𑁄𑀢𑀺 𑀤𑀸𑀭𑀼𑀳𑀭𑀺𑀤𑁆𑀤𑀺 𑀤𑀸𑀭𑀼𑀲𑁆𑀫𑀺𑀁 𑀢𑀲𑁆𑀲 𑀤𑀳𑀦𑁆𑀢𑁄. 𑀬𑀤𑀻𑀢𑀺𑀆𑀤𑀺 𑀤𑀸𑀭𑀼𑀛𑀸𑀧𑀦𑀲𑁆𑀲 𑀩𑀳𑀺𑀤𑁆𑀥𑀪𑀸𑀯𑀲𑀸𑀥𑀦𑀁 𑀅𑀲𑀼𑀤𑁆𑀥𑀳𑁂𑀢𑀽𑀦𑀁 𑀧𑀝𑀺𑀧𑀓𑁆𑀔𑀸𑀪𑀸𑀯𑀢𑁄 𑀢𑀲𑁆𑀲. 𑀔𑀦𑁆𑀥𑀸𑀤𑀻𑀲𑀼 𑀓𑀼𑀲𑀮𑀸𑀢𑀺 𑀢𑁂𑀲𑀼 𑀲𑀪𑀸𑀯𑀢𑁄 𑀲𑀫𑀼𑀤𑀬𑀢𑁄 𑀅𑀢𑁆𑀣𑀗𑁆𑀕𑀫𑀢𑁄 𑀅𑀲𑁆𑀲𑀸𑀤𑀢𑁄 𑀆𑀤𑀻𑀦𑀯𑀢𑁄 𑀦𑀺𑀲𑁆𑀲𑀭𑀡𑀢𑁄 𑀚𑀸𑀦𑀦𑀢𑁄 𑀙𑁂𑀓𑀸 𑀧𑀡𑁆𑀟𑀺𑀢𑀸. 𑀜𑀸𑀡𑀚𑁄𑀢𑀺𑀦𑁆𑀢𑀺 𑀜𑀸𑀡𑀫𑀬𑀁 𑀚𑁄𑀢𑀺𑀁. 𑀚𑀸𑀮𑁂𑀫𑀻𑀢𑀺 𑀧𑀚𑁆𑀚𑀮𑀺𑀢𑀁 𑀓𑀭𑁄𑀫𑀺. 𑀦𑀺𑀘𑁆𑀘𑀁 𑀧𑀚𑁆𑀚𑀮𑀺𑀢𑀕𑁆𑀕𑀺 𑀲𑀩𑁆𑀩𑀢𑁆𑀣𑀓𑀫𑁂𑀯 𑀯𑀺𑀕𑀢𑀲𑀫𑁆𑀫𑁄𑀳𑀦𑁆𑀥𑀓𑀸𑀭𑀢𑀸𑀬 𑀏𑀓𑁄𑀪𑀸𑀲𑀪𑀸𑀯𑀢𑁄. 𑀲𑀩𑁆𑀩𑀲𑁄 𑀯𑀺𑀓𑁆𑀔𑁂𑀧𑀸𑀪𑀸𑀯𑀢𑁄 𑀦𑀺𑀘𑁆𑀘𑀲𑀫𑀸𑀳𑀺𑀢𑀢𑁆𑀢𑁄. 𑀏𑀯𑀁 𑀯𑀤𑀢𑀻𑀢𑀺 𑀘𑀭𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀕𑀳𑁂𑀢𑁆𑀯𑀸 𑀘𑀭𑀸𑀫𑀻𑀢𑀺 𑀏𑀯𑀁 𑀯𑀢𑁆𑀢𑀫𑀸𑀦𑀁 𑀯𑀺𑀬 𑀯𑀤𑀢𑀺 𑀆𑀲𑀦𑁆𑀦𑀢𑀁 𑀳𑀤𑀬𑁂 𑀞𑀧𑁂𑀢𑁆𑀯𑀸.

𑀔𑀸𑀭𑀺𑀪𑀸𑀭𑁄𑀢𑀺 𑀔𑀸𑀭𑀺𑀪𑀸𑀭𑀲𑀤𑀺𑀲𑁄. 𑀢𑁂𑀦𑀸𑀳 ‘‘𑀬𑀣𑀸’’𑀢𑀺𑀆𑀤𑀺. 𑀔𑀦𑁆𑀥𑁂𑀦 𑀯𑀬𑁆𑀳𑀫𑀸𑀦𑁄𑀢𑀺 𑀓𑀸𑀚𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀔𑀦𑁆𑀥𑁂𑀦 𑀯𑀬𑁆𑀳𑀫𑀸𑀦𑁄. 𑀧𑀣𑀯𑀺𑀬𑀸 𑀲𑀤𑁆𑀥𑀺𑀁 𑀨𑀼𑀲𑁂𑀢𑀺 𑀪𑀸𑀭𑀲𑁆𑀲 𑀕𑀭𑀼𑀓𑀪𑀸𑀯𑁂𑀦 𑀓𑀸𑀚𑀲𑁆𑀲 𑀧𑀭𑀺𑀡𑀫𑀦𑁂𑀦. 𑀫𑀸𑀦𑁂𑀦 𑀅𑀢𑁆𑀢𑀦𑁄 𑀚𑀸𑀢𑀺𑀆𑀤𑀻𑀦𑀺 𑀧𑀕𑁆𑀕𑀡𑁆𑀳𑀢𑁄 𑀅𑀜𑁆𑀜𑀲𑁆𑀲 𑀢𑀸𑀦𑀺 𑀦 𑀲𑀳𑀢𑀻𑀢𑀺 𑀆𑀳 𑁋 ‘‘𑀢𑀢𑁆𑀣 𑀢𑀢𑁆𑀣 𑀇𑀲𑁆𑀲𑀁 𑀉𑀧𑁆𑀧𑀸𑀤𑁂𑀦𑁆𑀢𑁄’’𑀢𑀺, 𑀢𑀢𑁆𑀣 𑀢𑀢𑁆𑀣 𑀚𑀸𑀢𑀺𑀆𑀤𑀺𑀫𑀸𑀦𑀯𑀢𑁆𑀣𑀼𑀲𑁆𑀫𑀺𑀁 𑀕𑀭𑀼𑀢𑀭𑀕𑁆𑀕𑀳𑀡𑁂𑀦 𑀲𑀁𑀲𑀻𑀤𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑁄𑀥𑁄 𑀥𑀽𑀫𑁄𑀢𑀺 𑀬𑀣𑀸𑀧𑀺 𑀪𑀸𑀲𑀼𑀭𑁄 𑀅𑀕𑁆𑀕𑀺 𑀥𑀽𑀫𑁂𑀦 𑀉𑀧𑀓𑁆𑀓𑀺𑀮𑀺𑀝𑁆𑀞𑁄, 𑀏𑀯𑀁 𑀓𑁄𑀥𑁂𑀦 𑀉𑀧𑀓𑁆𑀓𑀺𑀮𑀺𑀝𑁆𑀞𑁄. 𑀜𑀸𑀡𑀕𑁆𑀕𑀻𑀢𑀺 𑀢𑀲𑁆𑀲 𑀓𑁄𑀥𑁄 𑀥𑀽𑀫𑁄. 𑀫𑀼𑀲𑀸𑀯𑀸𑀤𑁄𑀯 𑀫𑁄𑀲𑀯𑀚𑁆𑀚𑀁. 𑀬𑀣𑀸 𑀜𑀸𑀡𑁂 𑀲𑀢𑀺 𑀫𑀼𑀲𑀸𑀯𑀸𑀤𑁄 𑀦𑀢𑁆𑀣𑀺, 𑀏𑀯𑀁 𑀫𑀼𑀲𑀸𑀯𑀸𑀤𑁂 𑀲𑀢𑀺 𑀜𑀸𑀡𑀫𑁆𑀧𑀻𑀢𑀺 𑀢𑁂𑀦 𑀢𑀁 𑀦𑀺𑀭𑁄𑀥𑀺𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀆𑀳 𑁋 ‘‘𑀫𑀼𑀲𑀸𑀯𑀸𑀤𑁂𑀦 𑀧𑀝𑀺𑀘𑁆𑀙𑀦𑁆𑀦𑀁 𑀜𑀸𑀡’’𑀦𑁆𑀢𑀺. 𑀬𑀣𑀸 𑀲𑀼𑀚𑀸𑀬 𑀯𑀺𑀦𑀸 𑀩𑁆𑀭𑀸𑀳𑁆𑀫𑀡𑀸𑀦𑀁 𑀬𑀸𑀕𑁄 𑀦 𑀇𑀚𑁆𑀛𑀢𑀺, 𑀏𑀯𑀁 𑀧𑀳𑀽𑀢𑀚𑀺𑀯𑁆𑀳𑀸𑀬 𑀯𑀺𑀦𑀸 𑀲𑀢𑁆𑀣𑀼 𑀥𑀫𑁆𑀫𑀬𑀸𑀕𑁄 𑀦 𑀇𑀚𑁆𑀛𑀢𑀻𑀢𑀺 𑀚𑀺𑀯𑁆𑀳𑀸 𑀲𑀼𑀚𑀸𑀧𑀭𑀺𑀬𑀸𑀬𑀸 𑀯𑀼𑀢𑁆𑀢𑀸. 𑀚𑁄𑀢𑀺 𑀞𑀺𑀬𑀢𑀺 𑀏𑀢𑁆𑀣𑀸𑀢𑀺 𑀚𑁄𑀢𑀺𑀝𑁆𑀞𑀸𑀦𑀁 𑀯𑁂𑀤𑀺, 𑀬𑀁 𑀅𑀕𑁆𑀕𑀺𑀓𑀼𑀡𑁆𑀟𑀁. 𑀲𑀢𑁆𑀢𑀸𑀦𑀁 𑀳𑀤𑀬𑀁 𑀚𑁄𑀢𑀺𑀝𑁆𑀞𑀸𑀦𑀁 𑀜𑀸𑀡𑀕𑁆𑀕𑀺𑀦𑁄 𑀢𑀢𑁆𑀣 𑀲𑀫𑀼𑀚𑁆𑀚𑀮𑀦𑀢𑁄. 𑀅𑀢𑁆𑀢𑀸𑀢𑀺 𑀘𑀺𑀢𑁆𑀢𑀁 ‘‘𑀆𑀳𑀺𑀢𑁄 𑀅𑀳𑀁 𑀫𑀸𑀦𑁄 𑀏𑀢𑁆𑀣𑀸’’𑀢𑀺 𑀓𑀢𑁆𑀯𑀸.

𑀥𑀫𑁆𑀫𑁄 𑀭𑀳𑀤𑁄𑀢𑀺 𑀅𑀲𑁆𑀲𑀤𑁆𑀥𑀺𑀬𑀸𑀤𑀺𑀆𑀮𑀲𑀺𑀬𑀸𑀪𑀸𑀯𑀢𑁄 𑀓𑀺𑀮𑁂𑀲𑀫𑀮𑀧𑀓𑁆𑀔𑀸𑀮𑀦𑀢𑁄 𑀧𑀭𑀫𑀕𑁆𑀕𑀺𑀦𑀺𑀩𑁆𑀩𑀼𑀢𑀸𑀯𑀳𑀦𑀢𑁄 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑁄 𑀅𑀦𑀸𑀯𑀺𑀮𑁄 𑀭𑀳𑀤𑁄. 𑀳𑁂𑀝𑁆𑀞𑀼𑀧𑀭𑀺𑀬𑀯𑀸𑀮𑀼𑀓𑀸𑀢𑀺 𑀯𑀺𑀧𑀭𑀺𑀯𑀢𑁆𑀢𑀺𑀢𑀯𑀸𑀮𑀼𑀓𑀸 𑀳𑀼𑀢𑁆𑀯𑀸. 𑀆𑀮𑀼𑀴𑀸𑀢𑀺 ¶ 𑀆𑀓𑀼𑀮𑀚𑀸𑀢𑀸. 𑀧𑀡𑁆𑀟𑀺𑀢𑀸𑀦𑀁 𑀧𑀲𑀢𑁆𑀣𑁄𑀢𑀺 𑀧𑀡𑁆𑀟𑀺𑀢𑀸𑀦𑀁 𑀧𑀼𑀭𑀢𑁄 𑀲𑁂𑀝𑁆𑀞𑁄. 𑀲𑁂𑀝𑁆𑀞𑀪𑀸𑀯𑁂𑀦 𑀲𑀦𑁆𑀢𑁄 𑀧𑀸𑀲𑀁𑀲𑁄 𑀳𑀼𑀢𑁆𑀯𑀸 𑀓𑀺𑀮𑁂𑀲𑁂 𑀪𑀺𑀦𑁆𑀤𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀢𑀻𑀢𑀺 𑀲𑀩𑁆𑀪𑀻𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 ‘‘𑀉𑀢𑁆𑀢𑀫𑀝𑁆𑀞𑁂𑀦𑀸’’𑀢𑀺. 𑀢𑀣𑀸 𑀘𑀸𑀳 𑀪𑀕𑀯𑀸 ‘‘𑀫𑀕𑁆𑀕𑀸𑀦𑀝𑁆𑀞𑀗𑁆𑀕𑀺𑀓𑁄 𑀲𑁂𑀝𑁆𑀞𑁄’’𑀢𑀺 (𑀥. 𑀧. 𑁨𑁭𑁩).

𑀯𑀘𑀻𑀲𑀘𑁆𑀘𑀦𑁆𑀢𑀺 𑀇𑀫𑀺𑀦𑀸 ‘‘𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀸 𑀯𑀸𑀘𑀸 𑀲𑀼𑀧𑀭𑀺𑀲𑀼𑀤𑁆𑀥𑀸 𑀳𑁄𑀢𑀻’’𑀢𑀺 𑀲𑀫𑁆𑀫𑀸𑀯𑀸𑀘𑀁 𑀤𑀲𑁆𑀲𑁂𑀢𑀺. 𑀲𑀘𑁆𑀘𑀲𑀁𑀬𑀫𑀧𑀤𑁂𑀳𑀺 𑀤𑀲𑁆𑀲𑀺𑀢𑀸 𑀫𑀕𑁆𑀕𑀥𑀫𑁆𑀫𑀸 𑀇𑀥 ‘‘𑀥𑀫𑁆𑀫𑁄’’𑀢𑀺 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 𑁋 ‘‘𑀥𑀫𑁆𑀫𑁄𑀢𑀺 𑀇𑀫𑀺𑀦𑀸…𑀧𑁂… 𑀤𑀲𑁆𑀲𑁂𑀢𑀻’’𑀢𑀺. 𑀫𑀕𑁆𑀕𑀲𑀘𑁆𑀘𑀁 𑀕𑀳𑀺𑀢𑀁 𑀅𑀦𑀦𑁆𑀢𑀭𑀕𑀸𑀣𑀸𑀬 𑀅𑀦𑁂𑀓𑁂𑀳𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸. 𑀅𑀢𑁆𑀣𑀢𑁄𑀢𑀺 𑀧𑀼𑀩𑁆𑀩𑀗𑁆𑀕𑀫𑀢𑁆𑀢𑀸𑀤𑀺𑀅𑀢𑁆𑀣𑀢𑁄. 𑀢𑀸𑀬 𑀳𑀺 𑀲𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺𑀬𑀸 𑀇𑀢𑀭𑁂 𑀲𑀩𑁆𑀩𑁂𑀧𑀺 𑀢𑀤𑀦𑀼𑀯𑀢𑁆𑀢𑀺𑀓𑀸 ¶ 𑀳𑁄𑀦𑁆𑀢𑀺. 𑀢𑀕𑁆𑀕𑀢𑀺𑀓𑀢𑁆𑀢𑀸𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀉𑀧𑀓𑀸𑀭𑀓𑀪𑀸𑀯𑁂𑀦 𑀢𑀸𑀬 𑀲𑀫𑀸𑀦𑀕𑀢𑀺𑀓𑀢𑁆𑀢𑀸. 𑀆𑀭𑀫𑁆𑀫𑀡𑀜𑁆𑀳𑀺 𑀯𑀺𑀢𑀓𑁆𑀓𑁂𑀦𑀸𑀳𑀝𑀁 𑀧𑀜𑁆𑀜𑀸 𑀯𑀺𑀘𑀺𑀦𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀢𑀣𑀸 𑀳𑀺 𑀲𑁄 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀁 𑀕𑀢𑁄. 𑀥𑀫𑁆𑀫𑁄𑀢𑀺 𑀲𑀪𑀸𑀯𑀢𑁄 𑀲𑀫𑀸𑀥𑀺 𑀕𑀳𑀺𑀢𑁄, 𑀇𑀢𑀭𑁂 𑀤𑁆𑀯𑁂 𑀢𑀤𑀼𑀧𑀓𑀸𑀭𑀢𑁆𑀢𑀸. 𑀢𑀣𑀸 𑀳𑀺 ‘‘𑀏𑀯𑀁𑀥𑀫𑁆𑀫𑀸 𑀢𑁂 𑀪𑀕𑀯𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁧𑁩; 𑀫. 𑀦𑀺. 𑁩.𑁧𑁯𑁭; 𑀲𑀁. 𑀦𑀺. 𑁫.𑁩𑁭𑁮) 𑀲𑀫𑀸𑀥𑀺 ‘‘𑀥𑀫𑁆𑀫𑁄’’𑀢𑀺 𑀯𑀼𑀢𑁆𑀢𑁄. 𑀧𑀭𑀫𑀢𑁆𑀣𑀲𑀘𑁆𑀘𑀁 𑀕𑀳𑀺𑀢𑀁 𑀲𑀩𑁆𑀩𑁂𑀲𑀁 𑀲𑁂𑀝𑁆𑀞𑀪𑀸𑀯𑀢𑁄. 𑀬𑀣𑀸𑀳 𑁋 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸 𑀯𑀸 𑀅𑀲𑀗𑁆𑀔𑀢𑀸 𑀯𑀸, 𑀯𑀺𑀭𑀸𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 (𑀇𑀢𑀺𑀯𑀼. 𑁯𑁦; 𑀅. 𑀦𑀺. 𑁪.𑁩𑁪). 𑀅𑀢𑁆𑀣𑀢𑁄𑀢𑀺 𑀢𑀢𑁄 𑀏𑀯 𑀧𑀭𑀫𑀢𑁆𑀣𑀢𑁄, 𑀅𑀦𑀦𑁆𑀢𑀭𑀁 𑀯𑀼𑀘𑁆𑀘𑀫𑀸𑀦𑀸𑀦𑀁 𑀯𑀸 𑀫𑀕𑁆𑀕𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀪𑀸𑀯𑀢𑁄. 𑀧𑀜𑁆𑀘𑀗𑁆𑀕𑀸𑀦𑀺 𑀕𑀳𑀺𑀢𑀸𑀦𑀺 𑀢𑀸𑀲𑀁 𑀫𑀕𑁆𑀕𑀪𑀸𑀯𑀢𑁄. 𑀢𑀻𑀡𑀺 𑀅𑀗𑁆𑀕𑀸𑀦𑀺. 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑀸𑀫𑀸𑀢𑀺 𑀏𑀢𑀁 𑀦𑀺𑀩𑁆𑀩𑀸𑀦𑀕𑀸𑀫𑀺 𑀉𑀢𑁆𑀢𑀫𑀝𑁆𑀞𑁂𑀦 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑀸𑀫. 𑀫𑀚𑁆𑀛𑁂 𑀲𑀺𑀢𑀸𑀢𑀺 𑀮𑀻𑀦𑀼𑀤𑁆𑀥𑀘𑁆𑀘𑀸𑀤𑀺𑀅𑀦𑁆𑀢𑀤𑁆𑀯𑀬𑀯𑀺𑀯𑀚𑁆𑀚𑀦𑁂𑀦 𑀫𑀚𑁆𑀛𑁂 𑀫𑀚𑁆𑀛𑀺𑀫𑀧𑀝𑀺𑀧𑀤𑀸𑀪𑀸𑀯𑀦𑀁 𑀦𑀺𑀲𑁆𑀲𑀺𑀢𑀸. 𑀲𑀲𑁆𑀲𑀢𑀼𑀘𑁆𑀙𑁂𑀤𑀕𑁆𑀕𑀳𑀡𑀁 𑀳𑁂𑀢𑁆𑀣 𑀧𑀥𑀸𑀦𑀢𑀸𑀬 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀲𑁂𑀝𑁆𑀞𑀧𑁆𑀧𑀢𑁆𑀢𑀻𑀢𑀺 𑀲𑁂𑀝𑁆𑀞𑀪𑀸𑀯𑀧𑁆𑀧𑀢𑁆𑀢𑀺. 𑀢-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄𑀢𑀺 ‘‘𑀲 𑀉𑀚𑀼𑀪𑀽𑀢𑁂𑀲𑀽’’𑀢𑀺 𑀯𑀢𑁆𑀢𑀩𑁆𑀩𑁂 𑀫𑀚𑁆𑀛𑁂 𑀢-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, ‘‘𑀲 𑀤𑀼𑀚𑁆𑀚𑀼𑀪𑀽𑀢𑁂𑀲𑀽𑀢𑀺 𑀓𑁂𑀘𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀤-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀲-𑀇𑀢𑀺 𑀲𑀼𑀦𑁆𑀤𑀭𑀺𑀓𑁄 𑀩𑁆𑀭𑀸𑀳𑁆𑀫𑀡𑁄 𑀯𑀼𑀢𑁆𑀢𑁄𑀢𑀺 𑀓𑀢𑁆𑀯𑀸 𑀆𑀳 ‘‘𑀲 𑀢𑁆𑀯’’𑀦𑁆𑀢𑀺, 𑀲𑁄 𑀢𑁆𑀯𑀦𑁆𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁄 𑀲𑀸𑀭𑀺𑀬𑁄 𑀧𑀭𑀺𑀥𑀸𑀦𑀪𑀽𑀢𑀸 𑀅𑀮𑀗𑁆𑀓𑀸𑀭𑀸 𑀏𑀢𑀲𑁆𑀲𑀸𑀢𑀺 𑀥𑀫𑁆𑀫𑀲𑀸𑀭𑀻. 𑀅𑀣 𑀯𑀸 𑀥𑀫𑁆𑀫𑁂𑀳𑀺 𑀲𑀸𑀭𑀺𑀢𑀯𑀸𑀢𑀺 𑀥𑀫𑁆𑀫𑀲𑀸𑀭𑀻, 𑀢𑁂𑀳𑀺 𑀲𑀸𑀭𑁂𑀢𑁆𑀯𑀸 𑀞𑀺𑀢𑀯𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀓𑀼𑀲𑀮𑀥𑀫𑁆𑀫𑁂𑀳𑀻’’𑀢𑀺𑀆𑀤𑀺.

𑀲𑀼𑀦𑁆𑀤𑀭𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀩𑀳𑀼𑀥𑀻𑀢𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁬. 𑀲𑀫𑀦𑁆𑀢𑀢𑁄𑀢𑀺 ¶ 𑀤𑀓𑁆𑀔𑀺𑀡𑀯𑀸𑀫𑀸𑀦𑀁 𑀯𑀲𑁂𑀦 𑀲𑀫𑀦𑁆𑀢𑀢𑁄. 𑀊𑀭𑀼𑀩𑀤𑁆𑀥𑀸𑀲𑀦𑀦𑁆𑀢𑀺 𑀊𑀭𑀽𑀦𑀁 𑀩𑀦𑁆𑀥𑀦𑀯𑀲𑁂𑀦 𑀦𑀺𑀲𑀚𑁆𑀚𑀦𑀁. 𑀤𑁆𑀯𑀺𑀦𑁆𑀦𑀁 𑀊𑀭𑀽𑀦𑀁 𑀅𑀜𑁆𑀜𑀫𑀜𑁆𑀜𑀩𑀦𑁆𑀥𑀦𑀯𑀲𑁂𑀦 𑀆𑀪𑀼𑀚𑀺𑀢𑀸𑀓𑀸𑀭𑀁 𑀲𑀦𑁆𑀥𑀸𑀬𑀸𑀳 ‘‘𑀆𑀪𑀼𑀚𑀺𑀢𑁆𑀯𑀸𑀢𑀺 𑀩𑀦𑁆𑀥𑀺𑀢𑁆𑀯𑀸’’𑀢𑀺. 𑀳𑁂𑀝𑁆𑀞𑀺𑀫𑀓𑀸𑀬𑀲𑁆𑀲 𑀅𑀦𑀼𑀚𑀼𑀓𑀁 𑀞𑀧𑀦𑀁 𑀦𑀺𑀲𑀚𑁆𑀚𑀸𑀯𑀘𑀦𑁂𑀦𑁂𑀯 𑀩𑁄𑀥𑀺𑀢𑀦𑁆𑀢𑀺 ‘‘𑀉𑀚𑀼𑀁 𑀓𑀸𑀬’’𑀦𑁆𑀢𑀺 𑀏𑀢𑁆𑀣 𑀓𑀸𑀬-𑀲𑀤𑁆𑀤𑁄 𑀉𑀧𑀭𑀺𑀫𑀓𑀸𑀬𑀯𑀺𑀲𑀬𑁄𑀢𑀺 𑀆𑀳 ‘‘𑀉𑀧𑀭𑀺𑀫𑀁 𑀲𑀭𑀻𑀭𑀁 𑀉𑀚𑀼𑀓𑀁 𑀞𑀧𑁂𑀢𑁆𑀯𑀸’’𑀢𑀺. 𑀢𑀁 𑀧𑀦 𑀉𑀚𑀼𑀓𑀝𑁆𑀞𑀧𑀦𑀁 𑀲𑀭𑀽𑀧𑀢𑁄 𑀧𑀬𑁄𑀚𑀦𑀢𑁄 𑀘 𑀤𑀲𑁆𑀲𑁂𑀢𑀼𑀁 ‘‘𑀅𑀝𑁆𑀞𑀸𑀭𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀫𑀼𑀔𑀦𑁆𑀢𑀺 𑀏𑀢𑁆𑀣 𑀧𑀭𑀺-𑀲𑀤𑁆𑀤𑁄 𑀅𑀪𑀺𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄𑀢𑀺 𑀆𑀳 ‘‘𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀫𑀼𑀔’’𑀦𑁆𑀢𑀺, 𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑀢𑁄 𑀦𑀺𑀯𑀸𑀭𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁𑀬𑁂𑀯 𑀧𑀼𑀭𑁂𑀓𑁆𑀔𑀢𑁄𑀢𑀺 𑀅𑀢𑁆𑀣𑁄. 𑀧𑀭𑀺𑀕𑁆𑀕𑀳𑀝𑁆𑀞𑁄 ‘‘𑀧𑀭𑀺𑀡𑀸𑀬𑀺𑀓𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀫𑀼𑀔𑀦𑁆𑀢𑀺 𑀦𑀺𑀬𑁆𑀬𑀸𑀦𑀝𑁆𑀞𑁄 ‘‘𑀲𑀼𑀜𑁆𑀜𑀢𑀯𑀺𑀫𑁄𑀓𑁆𑀔𑀫𑀼𑀔’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀧𑀝𑀺𑀧𑀓𑁆𑀔𑀢𑁄 𑀦𑀺𑀕𑁆𑀕𑀫𑀦𑀝𑁆𑀞𑁄 𑀳𑀺 𑀦𑀺𑀬𑁆𑀬𑀸𑀦𑀝𑁆𑀞𑁄, 𑀢𑀲𑁆𑀫𑀸 𑀧𑀭𑀺𑀕𑁆𑀕𑀳𑀺𑀢𑀦𑀺𑀬𑁆𑀬𑀸𑀦𑀦𑁆𑀢𑀺 𑀲𑀩𑁆𑀩𑀣𑀸 𑀕𑀳𑀺𑀢𑀲𑀫𑁆𑀫𑁄𑀲𑀁 𑀧𑀭𑀺𑀘𑁆𑀘𑀢𑁆𑀢𑀲𑀫𑁆𑀫𑁄𑀲𑀁 𑀲𑀢𑀺𑀁 𑀓𑀢𑁆𑀯𑀸 𑀧𑀭𑀫𑀁 𑀲𑀢𑀺𑀦𑁂𑀧𑀓𑁆𑀓𑀁 𑀉𑀧𑀝𑁆𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀙𑀩𑁆𑀩𑀡𑁆𑀡𑀸…𑀧𑁂… 𑀦𑀺𑀲𑀻𑀤𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀲𑀸𑀤𑀲𑀜𑁆𑀚𑀸𑀦𑀦𑀢𑁆𑀣𑀁. 𑀅𑀝𑀯𑀺𑀫𑀼𑀔𑀸 𑀘𑀭𑀫𑀸𑀦𑀸𑀢𑀺 𑀕𑁄𑀘𑀭𑀁 𑀕𑀡𑁆𑀳𑀦𑁆𑀢𑀸.

𑀅𑀚𑁆𑀚𑀲𑀝𑁆𑀞𑀺𑀦𑁆𑀢𑀺 ¶ 𑀅𑀚𑁆𑀚 𑀙𑀦𑁆𑀦𑀁 𑀧𑀽𑀭𑀡𑀻 𑀲𑀝𑁆𑀞𑀻 𑀤𑀺𑀯𑀲𑀯𑀼𑀢𑁆𑀢𑀺, 𑀅𑀚𑁆𑀚 𑀆𑀤𑀺𑀁 𑀓𑀢𑁆𑀯𑀸 𑀙 𑀤𑀺𑀯𑀲𑁂𑀢𑀺 𑀅𑀢𑁆𑀣𑁄. 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀅𑀚𑁆𑀚 𑀙𑀤𑀺𑀯𑀲𑀫𑀢𑁆𑀢𑀓𑀸𑀢𑀺 𑀅𑀚𑁆𑀚𑀢𑁄 𑀙𑀝𑁆𑀞𑀤𑀺𑀯𑀲𑀫𑀢𑁆𑀢𑀓𑀸. 𑀮𑀸𑀫𑀓𑀸𑀢𑀺 𑀦𑀺𑀳𑀻𑀦𑀸 𑀦𑀺𑀧𑁆𑀨𑀮𑀸. 𑀢𑁂𑀦𑀸𑀳 ‘‘𑀢𑀺𑀮𑀔𑀸𑀡𑀼𑀓𑀸’’𑀢𑀺𑀆𑀤𑀺.

𑀉𑀲𑁆𑀲𑀸𑀳𑁂𑀦𑀸𑀢𑀺 𑀉𑀤𑁆𑀥𑀁 𑀉𑀤𑁆𑀥𑀁 𑀧𑀲𑀸𑀭𑁂𑀦 𑀅𑀪𑀺𑀪𑀯𑀦𑁂𑀦. 𑀢𑀁 𑀧𑀦 𑀦𑁂𑀲𑀁 𑀅𑀪𑀺𑀪𑀯𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀡𑁆𑀡𑀦𑀗𑁆𑀕𑀼𑀝𑁆𑀞𑀸𑀤𑀻𑀦𑀻’’𑀢𑀺𑀆𑀤𑀺𑀫𑀸𑀳.

‘‘𑀉𑀧𑁆𑀧𑀸𑀝𑀓𑀧𑀸𑀡𑀓𑀸’’𑀢𑀺 𑀢𑀘𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀯𑀺𑀬 𑀔𑀸𑀤𑀓𑀧𑀸𑀡𑀓𑀸 𑀊𑀓𑀸𑀫𑀗𑁆𑀕𑀼𑀮𑀸𑀤𑀬𑁄.

𑀓𑀴𑀸𑀭𑀧𑀺𑀗𑁆𑀕𑀮𑀸𑀢𑀺 𑀦𑀺𑀓𑁆𑀔𑀦𑁆𑀢𑀧𑀺𑀗𑁆𑀕𑀮𑀓𑁆𑀔𑀺𑀓𑀸, 𑀓𑀴𑀸𑀭𑀧𑀺𑀗𑁆𑀕𑀮𑀸𑀢𑀺 𑀯𑀸 𑀭𑀢𑁆𑀢𑀕𑀢𑁆𑀢𑀸 𑀘 𑀧𑀺𑀗𑁆𑀕𑀮𑀘𑀓𑁆𑀔𑀼𑀓𑀸 𑀘. 𑀢𑀺𑀮𑀓𑀸𑀳𑀢𑀸𑀢𑀺 𑀆𑀳𑀢𑀢𑀺𑀮𑀓𑀸, 𑀢𑀺𑀮𑀧𑁆𑀧𑀫𑀸𑀡𑁂𑀳𑀺 𑀩𑀺𑀦𑁆𑀤𑀽𑀳𑀺 𑀲𑀫𑀦𑁆𑀢𑀢𑁄 𑀲𑀦𑁆𑀣𑀢𑀲𑀭𑀻𑀭𑀸.

𑀧𑀝𑀺𑀕𑀸𑀣𑀸𑀳𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀯𑀟𑁆𑀠𑁂𑀲𑀻𑀢𑀺 𑀧𑀓𑀢𑀺𑀬𑀸 𑀢𑀲𑁆𑀲 𑀅𑀢𑁆𑀢𑀦𑀸 𑀓𑀣𑁂𑀢𑀩𑁆𑀩𑀁 𑀥𑀫𑁆𑀫𑀤𑁂𑀲𑀦𑀁 𑀧𑀩𑁆𑀩𑀚𑁆𑀚𑀸𑀕𑀼𑀡𑀓𑀺𑀢𑁆𑀢𑀦𑀯𑀲𑁂𑀦 𑀲𑀢𑁆𑀢𑀳𑀺 𑀯𑀟𑁆𑀠𑁂𑀲𑀺. 𑀧𑀩𑁆𑀩𑀚𑀺𑀢𑁆𑀯𑀸𑀢𑀺 ¶ 𑀇𑀡𑀸𑀬𑀺𑀓𑀸𑀦𑀁 𑀅𑀢𑁆𑀢𑀦𑁄 𑀧𑀮𑀺𑀩𑁄𑀥𑀁 𑀢𑀣𑀸 𑀢𑀣𑀸 𑀚𑀸𑀦𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸.

𑀬𑀣𑀸 𑀘 𑀢𑀢𑁆𑀣 𑀪𑀕𑀯𑀸 𑀧𑀝𑀺𑀧𑀚𑁆𑀚𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀦 𑀤𑀺𑀯𑀲𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀁 𑀢𑀁 𑀓𑀼𑀮𑀖𑀭𑀁 𑀧𑁂𑀲𑁂𑀢𑁆𑀯𑀸𑀢𑀺 𑀢𑀁 𑀢𑀁 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀻𑀢𑀭𑀁 𑀢𑀲𑁆𑀲 𑀢𑀲𑁆𑀲𑀸𑀦𑀼𑀘𑁆𑀙𑀯𑀺𑀓𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀤𑁂𑀦𑁆𑀢𑁄 𑀢𑀁 𑀢𑀁 𑀓𑀼𑀮𑀖𑀭𑀁 𑀧𑁂𑀲𑁂𑀢𑁆𑀯𑀸 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑁂 𑀕𑀭𑀼𑀓𑀭𑀡𑀸𑀪𑀸𑀯𑀢𑁄.

‘‘𑀦𑀝𑁆𑀞𑁂 𑀫𑀢𑁂 𑀧𑀩𑁆𑀩𑀚𑀺𑀢𑁂, 𑀦𑀧𑀼𑀁𑀲𑀓𑁂𑀧𑀺 𑀪𑀢𑁆𑀢𑀭𑀺;

𑀇𑀢𑁆𑀣𑀺𑀬𑀸 𑀧𑀢𑀺𑀲𑁂𑀝𑁆𑀞𑀸𑀬, 𑀦 𑀅𑀜𑁆𑀜𑁄 𑀧𑀢𑀺 𑀇𑀘𑁆𑀙𑀺𑀬𑁄’’𑀢𑀺. 𑁋

𑀅𑀬𑀜𑁆𑀳𑀺 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑁄. 𑀅𑀬𑁆𑀬𑀺𑀓𑀝𑁆𑀞𑀸𑀦𑁂𑀢𑀺 𑀫𑀸𑀢𑀸𑀫𑀳𑀺𑀝𑁆𑀞𑀸𑀦𑁂 𑀞𑀧𑁂𑀲𑀺 𑀲𑀢𑁆𑀣𑀼 𑀘𑀺𑀢𑁆𑀢𑀸𑀭𑀸𑀥𑀦𑀯𑀲𑁂𑀦𑀸𑀢𑀺.

𑀩𑀳𑀼𑀥𑀻𑀢𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀧𑀸𑀲𑀓𑀯𑀕𑁆𑀕𑁄

𑁧. 𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁭. 𑀤𑀓𑁆𑀔𑀺𑀡𑀸𑀕𑀺𑀭𑀺𑀲𑁆𑀫𑀺𑀦𑁆𑀢𑀺 ¶ 𑀤𑀓𑁆𑀔𑀺𑀡𑀸𑀕𑀺𑀭𑀺𑀚𑀦𑀧𑀤𑁂, 𑀢𑀲𑁆𑀫𑀺𑀁 𑀤𑀓𑁆𑀔𑀺𑀡𑀸𑀕𑀺𑀭𑀺𑀚𑀦𑀧𑀤𑁂 𑀤𑀓𑁆𑀔𑀺𑀡𑀸𑀕𑀺𑀭𑀺𑀯𑀺𑀳𑀸𑀭𑁂. 𑀔𑀦𑁆𑀥𑁂𑀲𑀼 𑀞𑀧𑁂𑀢𑁆𑀯𑀸 𑀬𑀼𑀕𑁂 𑀬𑁄𑀢𑁆𑀢𑁂𑀳𑀻𑀢𑀺 𑀬𑁄𑀢𑁆𑀢𑀭𑀚𑁆𑀚𑀽𑀳𑀺 𑀬𑀼𑀢𑁆𑀢𑀸𑀦𑀺 𑀧𑀬𑁄𑀚𑀺𑀢𑀸𑀦𑀺 𑀇𑀘𑁆𑀘𑁂𑀯 𑀅𑀢𑁆𑀣𑁄.

𑀧𑀞𑀫𑀤𑀺𑀯𑀲𑁂𑀢𑀺 𑀯𑀧𑀦𑀤𑀺𑀯𑀲𑁂𑀲𑀼 𑀧𑀞𑀫𑀤𑀺𑀯𑀲𑁂 𑀆𑀭𑀤𑁆𑀥𑀤𑀺𑀯𑀲𑁂. 𑀧𑀜𑁆𑀘𑀗𑁆𑀕𑀸𑀦𑀺𑀧𑀺 𑀧𑀭𑀺𑀧𑀼𑀡𑁆𑀡𑀸𑀦𑀺, 𑀧𑀕𑁂𑀯 𑀇𑀢𑀭𑀗𑁆𑀕𑀸𑀦𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀭𑀺𑀧𑀼𑀡𑁆𑀡𑀧𑀜𑁆𑀘𑀗𑁆𑀕𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀳𑀭𑀺𑀢𑀸𑀮𑀫𑀦𑁄𑀲𑀺𑀮𑀸𑀅𑀜𑁆𑀚𑀦𑁂𑀳𑀺 𑀉𑀭𑀢𑁆𑀣𑀦𑀸𑀤𑀻𑀲𑀼 𑀞𑀧𑀺𑀢𑀢𑁆𑀢𑀸 𑀆𑀪𑀸𑀬 𑀉𑀚𑁆𑀚𑀮𑀕𑀢𑁆𑀢𑀸. 𑀅𑀯𑀲𑁂𑀲𑀸 𑀩𑀮𑀻𑀩𑀤𑁆𑀤𑀸. 𑀓𑀺𑀮𑀦𑁆𑀢𑀕𑁄𑀡𑀁 𑀫𑁄𑀘𑁂𑀢𑁆𑀯𑀸 𑀅𑀓𑀺𑀮𑀦𑁆𑀢𑀲𑁆𑀲 𑀬𑁄𑀚𑀦𑀁 𑀓𑀺𑀮𑀦𑁆𑀢𑀧𑀭𑀺𑀯𑀢𑁆𑀢𑀦𑀁.

𑀲𑀻𑀳𑀓𑀼𑀡𑁆𑀟𑀮𑀸𑀦𑀻𑀢𑀺 𑀲𑀻𑀳𑀫𑀼𑀔𑀓𑀼𑀡𑁆𑀟𑀮𑀸𑀦𑀺. 𑀩𑁆𑀭𑀳𑁆𑀫𑀯𑁂𑀞𑀦𑀦𑁆𑀢𑀺 𑀩𑁆𑀭𑀳𑁆𑀫𑀼𑀦𑁄 𑀯𑁂𑀞𑀦𑀲𑀤𑀺𑀲𑀁, 𑀅𑀲𑁆𑀲𑀦𑀔𑀯𑁂𑀞𑀦𑀲𑀤𑀺𑀲𑀦𑁆𑀢𑀺 𑀅𑀢𑁆𑀣𑁄.

𑀩𑀼𑀤𑁆𑀥𑀸𑀦𑀁 ¶ 𑀓𑀺𑀘𑁆𑀘𑀸𑀦𑀺 𑀓𑀸𑀮𑀯𑀲𑁂𑀦 𑀯𑀺𑀪𑀢𑁆𑀢𑀸𑀦𑀺 𑀧𑀜𑁆𑀘 𑀓𑀺𑀘𑁆𑀘𑀸𑀦𑀺 𑀪𑀯𑀦𑁆𑀢𑀺. 𑀧𑀼𑀭𑁂𑀪𑀢𑁆𑀢𑀓𑀺𑀘𑁆𑀘𑀦𑁆𑀢𑀺 𑀪𑀢𑁆𑀢𑀢𑁄 𑀧𑀼𑀩𑁆𑀩𑁂 𑀩𑀼𑀤𑁆𑀥𑁂𑀦 𑀓𑀸𑀢𑀩𑁆𑀩𑀓𑀺𑀘𑁆𑀘𑀁. 𑀯𑀻𑀢𑀺𑀦𑀸𑀫𑁂𑀢𑁆𑀯𑀸𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸. 𑀓𑀤𑀸𑀘𑀺 𑀏𑀓𑁄𑀢𑀺𑀆𑀤𑀺 𑀢𑁂𑀲𑀁 𑀢𑁂𑀲𑀁 𑀯𑀺𑀦𑁂𑀬𑁆𑀬𑀸𑀦𑀁 𑀯𑀺𑀦𑀬𑀦𑀸𑀦𑀼𑀭𑀽𑀧𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀁. 𑀧𑀓𑀢𑀺𑀬𑀸𑀢𑀺 𑀧𑀓𑀢𑀺𑀩𑀼𑀤𑁆𑀥𑀯𑁂𑀲𑁂𑀦. 𑀩𑀼𑀤𑁆𑀥𑀸𑀦𑀁 𑀳𑀺 𑀭𑀽𑀧𑀓𑀸𑀬𑀲𑁆𑀲 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀧𑀝𑀺𑀫𑀡𑁆𑀟𑀺𑀢-𑀩𑀸𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲- 𑀮𑀓𑁆𑀔𑀡-𑀓𑀸𑀬𑀧𑁆𑀧𑀪𑀸-𑀩𑁆𑀬𑀸𑀫𑀧𑁆𑀧𑀪𑀸-𑀓𑁂𑀢𑀼𑀫𑀸𑀮𑀸𑀯𑀺𑀘𑀺𑀢𑁆𑀢𑀢𑀸 𑀩𑀼𑀤𑁆𑀥𑀯𑁂𑀲𑁄. 𑀓𑀤𑀸𑀘𑀺 𑀅𑀦𑁂𑀓𑁂𑀳𑀺 𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀯𑀢𑁆𑀢𑀫𑀸𑀦𑁂𑀳𑀻𑀢𑀺 𑀇𑀫𑀺𑀦𑀸 𑀧𑀸𑀭𑀫𑀻𑀦𑀁 𑀦𑀺𑀲𑁆𑀲𑀦𑁆𑀤𑀪𑀽𑀢𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀸𑀦𑀺 𑀭𑀼𑀘𑀺𑀯𑀲𑁂𑀦𑁂𑀯 𑀧𑀓𑀸𑀲𑀦𑀓𑀸𑀦𑀺 𑀪𑀯𑀦𑁆𑀢𑀺, 𑀦 𑀲𑀩𑁆𑀩𑀤𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀇𑀦𑁆𑀤𑀔𑀻𑀮𑀲𑁆𑀲 𑀅𑀦𑁆𑀢𑁄 𑀞𑀧𑀺𑀢𑀫𑀢𑁆𑀢𑁂 𑀤𑀓𑁆𑀔𑀺𑀡𑀧𑀸𑀤𑁂’’𑀢𑀺𑀆𑀤𑀺𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀪𑀕𑀯𑀢𑁄 𑀓𑀸𑀬𑁂 𑀧𑀻𑀢𑀭𑀲𑁆𑀫𑀻𑀦𑀁 𑀬𑁂𑀪𑀼𑀬𑁆𑀬𑀢𑀸𑀬 ‘‘𑀲𑀼𑀯𑀡𑁆𑀡𑀭𑀲𑀲𑀺𑀜𑁆𑀘𑀦𑀸𑀦𑀺 𑀯𑀺𑀬𑀸’’𑀢𑀺 𑀯𑀢𑁆𑀯𑀸 𑀓𑀸𑀬𑀫𑁆𑀳𑀺 𑀦𑀻𑀮𑀸𑀤𑀺𑀭𑀲𑁆𑀫𑀻𑀳𑀺 𑀢𑀳𑀁 𑀢𑀳𑀁 𑀧𑀻𑀢𑀫𑀺𑀲𑁆𑀲𑀺𑀢𑀁 𑀲𑀦𑁆𑀥𑀸𑀬 ‘‘𑀯𑀺𑀘𑀺𑀢𑁆𑀭𑀧𑀝𑀧𑀭𑀺𑀓𑁆𑀔𑀺𑀢𑁆𑀢𑀸𑀦𑀺 𑀯𑀺𑀬 𑀘𑀸’’𑀢𑀺 𑀯𑀼𑀢𑁆𑀢𑀁. 𑀫𑀥𑀼𑀭𑁂𑀦𑀸𑀓𑀸𑀭𑁂𑀦 𑀲𑀤𑁆𑀤𑀁 𑀓𑀭𑁄𑀦𑁆𑀢𑀺 𑀢𑀼𑀝𑁆𑀞𑀭𑀯𑀭𑀯𑀦𑀢𑁄.

𑀢𑀢𑁆𑀣𑀸𑀢𑀺 ¶ 𑀯𑀺𑀳𑀸𑀭𑁂. 𑀕𑀦𑁆𑀥𑀫𑀡𑁆𑀟𑀮𑀫𑀸𑀴𑁂𑀢𑀺 𑀳𑀢𑁆𑀣𑁂𑀦 𑀓𑀢𑀧𑀭𑀺𑀪𑀡𑁆𑀟𑁂 𑀲𑀫𑁄𑀲𑀭𑀺𑀢𑀕𑀦𑁆𑀥𑀧𑀼𑀧𑁆𑀨𑀤𑀸𑀫𑁂 𑀫𑀡𑁆𑀟𑀮𑀫𑀸𑀴𑁂.

𑀉𑀧𑀝𑁆𑀞𑀸𑀦𑁂𑀢𑀺 𑀧𑀫𑀼𑀔𑁂. ‘‘𑀑𑀯𑀤𑀢𑀻’’𑀢𑀺 𑀯𑀢𑁆𑀯𑀸 𑀢𑀢𑁆𑀣𑁄𑀯𑀸𑀤𑀁 𑀲𑀸𑀫𑀜𑁆𑀜𑀢𑁄 𑀤𑀲𑁆𑀲𑁂𑀢𑀼𑀁, ‘‘𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀫𑁆𑀧𑀢𑁆𑀢𑀻𑀢𑀺 𑀘𑀓𑁆𑀔𑀸𑀤𑀺𑀇𑀦𑁆𑀤𑁆𑀭𑀺𑀬𑀧𑀸𑀭𑀺𑀧𑀽𑀭𑀺 𑀘𑁂𑀯 𑀳𑀢𑁆𑀣𑀸𑀤𑀺𑀲𑀫𑁆𑀧𑀤𑀸 𑀘. 𑀲𑀫𑀲𑁆𑀲𑀸𑀲𑀺𑀢𑀓𑀸𑀬𑁄 𑀓𑀺𑀮𑀫𑀣𑀯𑀺𑀦𑁄𑀤𑀦𑁂𑀦. ‘‘𑀢𑀜𑁆𑀘 𑀔𑁄 𑀲𑀫𑀸𑀧𑀚𑁆𑀚𑀦𑁂𑀦𑀸’’𑀢𑀺 𑀯𑀤𑀦𑁆𑀢𑀺. 𑀤𑀼𑀢𑀺𑀬𑀪𑀸𑀕𑁂𑀢𑀺 𑀇𑀫𑀺𑀦𑀸 𑀅𑀧𑀭𑀪𑀸𑀕𑀁 𑀢𑀬𑁄 𑀪𑀸𑀕𑁂 𑀓𑀢𑁆𑀯𑀸 𑀢𑀢𑁆𑀣 𑀧𑀼𑀭𑀺𑀫𑀪𑀸𑀕𑀁 𑀲𑁂𑀬𑁆𑀬𑀦𑀺𑀲𑀚𑁆𑀚𑀸𑀯𑀲𑁂𑀦 𑀲𑀫𑀸𑀧𑀢𑁆𑀢𑀻𑀳𑀺 𑀯𑀻𑀢𑀺𑀦𑀸𑀫𑁂𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀮𑁄𑀓𑀦𑁆𑀢𑀺 𑀭𑀸𑀚𑀕𑀳𑀸𑀤𑀻𑀲𑀼 𑀬𑀁 𑀢𑀤𑀸 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀺, 𑀢𑀢𑁆𑀣 𑀅𑀜𑁆𑀜𑀢𑁆𑀣 𑀯𑀸 𑀩𑀼𑀚𑁆𑀛𑀦𑀓𑀁 𑀯𑀺𑀦𑁂𑀬𑁆𑀬𑀲𑀢𑁆𑀢𑀮𑁄𑀓𑀁 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀯𑁄𑀮𑁄𑀓𑁂𑀢𑀺. 𑀓𑀸𑀮𑀬𑀼𑀢𑁆𑀢𑀦𑁆𑀢𑀺 𑀢𑁂𑀲𑀁 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀓𑀸𑀮𑀸𑀦𑀼𑀭𑀽𑀧𑀁. 𑀲𑀫𑀬𑀬𑀼𑀢𑁆𑀢𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑀫𑀬𑀬𑀼𑀢𑁆𑀢𑀦𑁆𑀢𑀺 𑀯𑀸 𑀢𑁂𑀳𑀺 𑀆𑀚𑀸𑀦𑀺𑀢𑀩𑁆𑀩𑀯𑀺𑀲𑁂𑀲𑀧𑀝𑀺𑀮𑀸𑀪𑀸𑀦𑀼𑀭𑀽𑀧𑀁.

𑀧𑀝𑀺𑀲𑀮𑁆𑀮𑀻𑀦𑁄𑀢𑀺 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀦𑁆𑀦𑁄. 𑀅𑀥𑀺𑀧𑁆𑀧𑀸𑀬𑀁 𑀲𑀫𑁆𑀧𑀸𑀤𑁂𑀦𑁆𑀢𑁄 𑀢𑀁 𑀅𑀯𑀺𑀭𑀸𑀥𑁂𑀦𑁆𑀢𑁄, 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀦𑁆𑀢𑀺 𑀅𑀢𑁆𑀣𑁄.

𑀲𑀓𑀮…𑀧𑁂… 𑀤𑁂𑀯𑀢𑀸𑀬𑁄𑀢𑀺 𑀏𑀢𑁆𑀣 𑀮𑁄𑀓𑀥𑀸𑀢𑀼𑀲𑀸𑀓𑀮𑁆𑀬𑀁 𑀤𑀝𑁆𑀞𑀩𑁆𑀩𑀁, 𑀦 𑀤𑁂𑀯𑀢𑀸𑀲𑀸𑀓𑀮𑁆𑀬𑀁. 𑀦 𑀳𑀺 𑀫𑀳𑀸𑀲𑀫𑀬𑁂 𑀯𑀺𑀬 𑀲𑀩𑁆𑀩𑀤𑀸 𑀫𑀚𑁆𑀛𑀺𑀫𑀬𑀸𑀫𑁂 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 ¶ 𑀲𑀩𑁆𑀩𑀢𑁆𑀣 𑀲𑀩𑁆𑀩𑀸 𑀤𑁂𑀯𑀢𑀸 𑀲𑀢𑁆𑀣𑀼 𑀲𑀫𑀻𑀧𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀓𑀺𑀮𑀸𑀲𑀼𑀪𑀸𑀯𑁄 𑀓𑀺𑀮𑀫𑀣𑁄.

𑀯𑀺𑀳𑀸𑀭𑀘𑀻𑀯𑀭𑀧𑀭𑀺𑀯𑀢𑁆𑀢𑀦𑀯𑀲𑁂𑀦𑀸𑀢𑀺 𑀯𑀺𑀳𑀸𑀭𑁂 𑀦𑀺𑀯𑀢𑁆𑀣𑀦𑀺𑀯𑀸𑀲𑀦𑀧𑀭𑀺𑀯𑀢𑁆𑀢𑀦𑀯𑀲𑁂𑀦. 𑀆𑀤𑀺𑀬𑀺𑀢𑁆𑀯𑀸𑀢𑀺 𑀧𑀸𑀭𑀼𑀧𑀦𑀯𑀲𑁂𑀦 𑀕𑀳𑁂𑀢𑁆𑀯𑀸. 𑀢𑁂𑀦𑀸𑀳 ‘‘𑀥𑀸𑀭𑁂𑀢𑁆𑀯𑀸’’𑀢𑀺. 𑀪𑀺𑀓𑁆𑀔𑀸𑀘𑀸𑀭𑀦𑁆𑀢𑀺 𑀪𑀺𑀓𑁆𑀔𑀢𑁆𑀣𑀁 𑀘𑀭𑀺𑀢𑀩𑁆𑀩𑀝𑁆𑀞𑀸𑀦𑀁.

𑀅𑀢𑀺𑀭𑁄𑀘𑀫𑀸𑀦𑀦𑁆𑀢𑀺 𑀢𑀁 𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀲𑀫𑀦𑁆𑀢𑀢𑁄 𑀲𑀩𑁆𑀩𑀤𑀺𑀲𑀸𑀲𑀼 𑀯𑀺𑀭𑁄𑀘𑀫𑀸𑀦𑀁. 𑀲𑀭𑀻𑀭𑀧𑁆𑀧𑀪𑀦𑁆𑀢𑀺 𑀅𑀢𑁆𑀢𑀦𑁄 𑀲𑀭𑀻𑀭𑀧𑁆𑀧𑀪𑀁. 𑀚𑀗𑁆𑀕𑀫𑀁 𑀯𑀺𑀬 𑀧𑀤𑀼𑀫𑀲𑀭𑀦𑁆𑀢𑀺 𑀭𑀢𑀦𑀫𑀬𑀓𑀺𑀜𑁆𑀚𑀓𑁆𑀔𑀁 𑀭𑀚𑀢𑀫𑀬𑀓𑀡𑁆𑀡𑀺𑀓𑀁 𑀲𑀫𑀦𑁆𑀢𑀢𑁄 𑀲𑀫𑁆𑀨𑀼𑀮𑁆𑀮𑀺𑀢𑀓𑀜𑁆𑀘𑀦𑀧𑀤𑀼𑀫𑀁 𑀲𑀜𑁆𑀘𑀸𑀭𑀺𑀫𑀲𑀭𑀁 𑀯𑀺𑀬. 𑀕𑀕𑀦𑀢𑀮𑀦𑁆𑀢𑀺 𑀅𑀩𑁆𑀪𑀫𑀳𑀺𑀓𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀯𑀺𑀕𑀫𑁂𑀦 𑀲𑀼𑀯𑀺𑀲𑀼𑀤𑁆𑀥𑀆𑀓𑀸𑀲𑀢𑀮𑀁 𑀯𑀺𑀬. 𑀢𑀫𑁆𑀧𑀺 𑀳𑀺 𑀢𑀸𑀭𑀸𑀕𑀡𑀓𑀺𑀭𑀡𑀚𑀸𑀮𑀲𑀫𑀼𑀚𑁆𑀚𑀮𑀢𑀸𑀬 𑀲𑀫𑀦𑁆𑀢𑀢𑁄 𑀯𑀺𑀭𑁄𑀘𑀢𑀺. 𑀓𑀦𑀓𑀲𑀺𑀔𑀭𑀦𑁆𑀢𑀺 𑀓𑀦𑀓𑀕𑀺𑀭𑀺𑀲𑀺𑀔𑀭𑀁. 𑀲𑀺𑀭𑀺𑀬𑀸 𑀚𑀮𑀫𑀸𑀦𑀦𑁆𑀢𑀺 𑀲𑀩𑁆𑀩𑀲𑁄 𑀅𑀦𑀯𑀚𑁆𑀚𑀸𑀬 𑀲𑀩𑁆𑀩𑀸𑀓𑀸𑀭𑁂𑀦 𑀧𑀭𑀺𑀧𑀼𑀡𑁆𑀡𑀓𑀸𑀬𑀢𑀸𑀬 𑀅𑀦𑀜𑁆𑀜𑀲𑀸𑀥𑀸𑀭𑀡𑀸𑀬 𑀭𑀽𑀧𑀓𑀸𑀬𑀲𑀺𑀭𑀺𑀬𑀸 𑀲𑀫𑀼𑀚𑁆𑀚𑀮𑀁, 𑀬𑀲𑁆𑀲𑀸 𑀭𑀼𑀘𑀺𑀭𑀪𑀸𑀯𑁄 𑀯𑀺𑀤𑁆𑀥𑁂 𑀯𑀺𑀕𑀢𑀯𑀮𑀸𑀳𑀓𑁂 𑀧𑀼𑀡𑁆𑀡𑀫𑀸𑀲𑀺𑀬𑀁 𑀧𑀭𑀺𑀧𑀼𑀡𑁆𑀡𑀓𑀮𑀫𑀦𑁄𑀫𑀫𑀡𑁆𑀟𑀮𑀁 𑀘𑀦𑁆𑀤𑀫𑀡𑁆𑀟𑀮𑀁 𑀅𑀢𑀺𑀭𑁄𑀘𑀢𑀺, 𑀧𑀪𑀲𑁆𑀲𑀭𑀪𑀸𑀯𑁄 𑀲𑀳𑀲𑁆𑀲𑀭𑀁𑀲𑀺𑀓𑀺𑀭𑀡𑀢𑁂𑀚𑁄𑀚𑀸𑀮𑀲𑀫𑀼𑀚𑁆𑀚𑀮𑀁 𑀲𑀽𑀭𑀺𑀬𑀫𑀡𑁆𑀟𑀮𑀁 𑀅𑀪𑀺𑀪𑀯𑀢𑀺, 𑀳𑁂𑀫𑀲𑀫𑀼𑀚𑁆𑀚𑀮𑀪𑀸𑀯𑁄 ¶ 𑀢𑀤𑀼𑀪𑀬𑁂 𑀅𑀪𑀺𑀪𑀼𑀬𑁆𑀬 𑀧𑀯𑀢𑁆𑀢𑀫𑀸𑀦𑀁 𑀏𑀓𑀓𑁆𑀔𑀡𑁂 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀯𑀺𑀚𑁆𑀚𑁄𑀢𑀦𑀲𑀫𑀢𑁆𑀣-𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀧𑀪𑀸𑀲𑀫𑀼𑀤𑀬𑀁 𑀅𑀪𑀺𑀯𑀺𑀳𑀘𑁆𑀘 𑀪𑀸𑀲𑀢𑀺 𑀢𑀧𑀢𑀺 𑀯𑀺𑀭𑁄𑀘𑀢𑀺.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑁂𑀢𑀺 𑀲𑀫𑀦𑁆𑀢𑀢𑁄 𑀧𑀲𑀸𑀤𑀸𑀯𑀳𑁂. 𑀢𑀜𑁆𑀘 𑀔𑁄 𑀲𑀩𑁆𑀩𑀲𑁄 𑀲𑀭𑀺𑀢𑀩𑁆𑀩𑀢𑀸𑀬𑀸𑀢𑀺 𑀆𑀳 ‘‘𑀧𑀲𑀸𑀤𑀦𑀻𑀬𑁂’’𑀢𑀺. 𑀉𑀢𑁆𑀢𑀫𑀤𑀫𑀣𑀲𑀫𑀣𑀫𑀦𑀼𑀧𑁆𑀧𑀢𑁆𑀢𑁂𑀢𑀺 𑀓𑀸𑀬𑀯𑀸𑀘𑀸𑀳𑀺 𑀅𑀦𑀼𑀢𑁆𑀢𑀭𑀁 𑀤𑀦𑁆𑀢𑀪𑀸𑀯𑀜𑁆𑀘𑁂𑀯 𑀅𑀦𑀼𑀢𑁆𑀢𑀭𑀁 𑀘𑀺𑀢𑁆𑀢𑀯𑀽𑀧𑀲𑀫𑀜𑁆𑀘 𑀲𑀫𑁆𑀧𑀢𑁆𑀢𑁂. 𑀅𑀧𑁆𑀧𑀲𑀸𑀤𑁂𑀦𑀸𑀢𑀺 𑀧𑀲𑀸𑀤𑀸𑀪𑀸𑀯𑁂𑀦, 𑀧𑀲𑀸𑀤𑀧𑀝𑀺𑀓𑁆𑀔𑁂𑀧𑁂𑀦 𑀯𑀸 𑀅𑀲𑁆𑀲𑀤𑁆𑀥𑀺𑀬𑁂𑀦. 𑀉𑀪𑀬𑀣𑀸𑀧𑀺 𑀦𑁄𑀢𑀺 𑀅𑀧𑁆𑀧𑀲𑀸𑀤𑁄 𑀫𑀘𑁆𑀙𑀭𑀺𑀬𑀦𑁆𑀢𑀺 𑀉𑀪𑀬𑀣𑀸𑀧𑀺 𑀦𑁄 𑀏𑀯, 𑀅𑀣 𑀔𑁄 𑀅𑀦𑀢𑁆𑀢𑀫𑀦𑀢𑀸𑀬 𑀉𑀧𑀸𑀭𑀫𑁆𑀪𑀸𑀥𑀺𑀧𑁆𑀧𑀸𑀬𑁂𑀦 𑀅𑀧𑀲𑀸𑀤𑁂𑀦𑁆𑀢𑁄, 𑀪𑀕𑀯𑀢𑁄 𑀫𑀼𑀔𑀢𑁄 𑀓𑀺𑀜𑁆𑀘𑀺 𑀤𑁂𑀲𑁂𑀢𑀼𑀓𑀸𑀫𑁄 𑀯𑀸 𑀏𑀯𑀫𑀸𑀳. 𑀢𑀢𑁆𑀣 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀕𑀯𑀢𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀅𑀢𑀺𑀢𑁆𑀢𑀦𑁆𑀢𑀺 𑀢𑀺𑀢𑁆𑀢𑀺𑀁 𑀅𑀕𑀘𑁆𑀙𑀦𑁆𑀢𑀁. 𑀓𑀫𑁆𑀫𑀪𑀗𑁆𑀕𑀦𑁆𑀢𑀺 𑀓𑀫𑁆𑀫𑀳𑀸𑀦𑀺𑀁.

𑀢𑀺𑀓𑁆𑀔𑀧𑀜𑁆𑀜𑁄 𑀏𑀲 𑀩𑁆𑀭𑀸𑀳𑁆𑀫𑀡𑁄, 𑀢𑀣𑀸 𑀳𑀺 𑀦 𑀘𑀺𑀭𑀲𑁆𑀲𑁂𑀯 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀺. 𑀓𑀣𑀸𑀧𑀯𑀢𑁆𑀢𑀦𑀢𑁆𑀣𑀫𑁆𑀧𑀺 𑀏𑀯𑀫𑀸𑀳 𑁋 ‘‘𑀏𑀯𑀁 𑀅𑀳𑀁 𑀇𑀫𑀲𑁆𑀲 𑀓𑀜𑁆𑀘𑀺 𑀥𑀫𑁆𑀫𑀁 𑀲𑁄𑀢𑀼𑀁 ¶ 𑀮𑀪𑀺𑀲𑁆𑀲𑀸𑀫𑀻’’𑀢𑀺. 𑀯𑁂𑀦𑁂𑀬𑁆𑀬𑀯𑀲𑁂𑀦𑀸𑀢𑀺 𑀅𑀢𑁆𑀢𑀦𑁄 𑀓𑀲𑀦𑀓𑀸𑀭𑀺𑀪𑀸𑀯𑀓𑀺𑀢𑁆𑀢𑀦𑀫𑀼𑀔𑁂𑀦 𑀯𑀺𑀦𑁂𑀢𑀩𑁆𑀩𑀧𑀼𑀕𑁆𑀕𑀮𑀯𑀲𑁂𑀦.

𑀑𑀴𑀸𑀭𑀺𑀓𑀸𑀦𑀻𑀢𑀺 𑀧𑀸𑀓𑀢𑀺𑀓𑀸𑀦𑀺. ‘‘𑀏𑀲 𑀉𑀢𑁆𑀢𑀫𑀤𑀓𑁆𑀔𑀺𑀡𑁂𑀬𑁆𑀬𑁄’’𑀢𑀺 𑀲𑀜𑁆𑀚𑀸𑀢𑀩𑀳𑀼𑀫𑀸𑀦𑁄. 𑀧𑀸𑀴𑀺𑀬𑀁 ‘‘𑀬𑀼𑀕𑀁 𑀯𑀸 𑀦𑀗𑁆𑀕𑀮𑀁 𑀯𑀸’’𑀢𑀺 𑀯𑀸-𑀲𑀤𑁆𑀤𑁄 𑀅𑀯𑀼𑀢𑁆𑀢𑀯𑀺𑀓𑀧𑁆𑀧𑀢𑁆𑀣𑁄. 𑀢𑁂𑀦 𑀩𑀻𑀚𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 𑀩𑀻𑀚𑀁 𑀯𑀸 𑀈𑀲𑀁 𑀯𑀸 𑀧𑀭𑀺𑀕𑁆𑀕𑀳𑀬𑁄𑀢𑁆𑀢𑀸𑀦𑀺 𑀯𑀸𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀢𑀣𑀸 𑀳𑀺 𑀪𑀕𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀝𑀺𑀯𑀘𑀦𑀁 𑀤𑁂𑀦𑁆𑀢𑁄 ‘‘𑀲𑀤𑁆𑀥𑀸 𑀩𑀻𑀚’’𑀦𑁆𑀢𑀺𑀆𑀤𑀺𑀫𑀸𑀳. 𑀧𑀼𑀩𑁆𑀩𑀥𑀫𑁆𑀫𑀲𑀪𑀸𑀕𑀢𑀸𑀬𑀸𑀢𑀺 𑀧𑀞𑀫𑀁 𑀕𑀳𑀺𑀢𑀥𑀫𑁆𑀫𑀲𑀪𑀸𑀕𑀢𑀸𑀬. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀅𑀝𑁆𑀞𑀓𑀣𑀸𑀭𑀼𑀴𑁆𑀳𑀫𑁂𑀯 𑀕𑀳𑁂𑀢𑀩𑁆𑀩𑀜𑁆𑀘 𑀲𑀤𑁆𑀤𑀢𑁄 𑀅𑀢𑁆𑀣𑀸𑀧𑀢𑁆𑀢𑀺𑀢𑁄 𑀯𑀸 𑀇𑀥 𑀤𑀝𑁆𑀞𑀩𑁆𑀩𑀁. 𑀩𑀼𑀤𑁆𑀥𑀸𑀦𑀁 𑀆𑀦𑀼𑀪𑀸𑀯𑁄 𑀅𑀬𑀁, 𑀬𑀤𑀺𑀤𑀁 𑀧𑀲𑀗𑁆𑀕𑀸𑀕𑀢𑀥𑀫𑁆𑀫𑀫𑀼𑀔𑁂𑀦 𑀤𑁂𑀲𑀦𑀁 𑀆𑀭𑀪𑀺𑀢𑁆𑀯𑀸 𑀯𑁂𑀦𑁂𑀬𑁆𑀬𑀯𑀺𑀦𑀬𑀦𑀁.

𑀅𑀦𑀦𑀼𑀲𑀦𑁆𑀥𑀺𑀓𑀸𑀢𑀺 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀯𑀲𑁂𑀦 𑀅𑀦𑀦𑀼𑀲𑀦𑁆𑀥𑀺𑀓𑀸. 𑀏𑀯𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁂𑀦. 𑀏𑀢𑁆𑀣𑀸𑀢𑀺 𑀏𑀢𑀺𑀲𑁆𑀲𑀸 𑀤𑁂𑀲𑀦𑀸𑀬. 𑀲𑁄𑀢𑀺 𑀪𑀕𑀯𑀸. 𑀢𑀲𑁆𑀲𑀸𑀢𑀺 𑀩𑁆𑀭𑀸𑀳𑁆𑀫𑀡𑀲𑁆𑀲. 𑀅𑀦𑀼𑀓𑀫𑁆𑀧𑀸𑀬𑀸𑀢𑀺 𑀅𑀲𑀩𑁆𑀩𑀜𑁆𑀜𑀽 𑀳𑀺 𑀲𑀢𑀺𑀧𑀺 𑀅𑀦𑀼𑀓𑀫𑁆𑀧𑀸𑀬 𑀧𑀼𑀘𑁆𑀙𑀺𑀢𑀫𑀢𑁆𑀢𑁂 𑀢𑀺𑀝𑁆𑀞𑁂𑀬𑁆𑀬, 𑀢𑀣𑀸 𑀚𑀸𑀦𑀦𑁆𑀢𑁄𑀧𑀺 𑀅𑀦𑀦𑀼𑀓𑀫𑁆𑀧𑀓𑁄, 𑀪𑀕𑀯𑀸 𑀧𑀦 𑀉𑀪𑀬𑀥𑀫𑁆𑀫𑀧𑀸𑀭𑀺𑀧𑀽𑀭𑀺𑀬𑀸 ‘‘𑀇𑀤𑀁 𑀅𑀧𑀼𑀘𑁆𑀙𑀺𑀢’’𑀦𑁆𑀢𑀺 𑀅𑀧𑀭𑀺𑀳𑀸𑀧𑁂𑀢𑁆𑀯𑀸 𑀓𑀣𑁂𑀢𑀺. 𑀲𑀫𑀽𑀮𑀦𑁆𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑀻𑀚𑀲𑁆𑀲 𑀓𑀲𑀺𑀬𑀸 𑀫𑀽𑀮𑀪𑀸𑀯𑁄 𑀦𑀸𑀦𑀦𑁆𑀢𑀭𑀺𑀬𑀢𑁄 𑀢𑀧𑁆𑀧𑀫𑀸𑀡𑀯𑀺𑀥𑀸𑀦𑀢𑁄 𑀘𑀸𑀢𑀺 𑀆𑀳 ‘‘𑀢𑀲𑁆𑀫𑀺𑀁…𑀧𑁂… 𑀓𑀢𑁆𑀢𑀩𑁆𑀩𑀢𑁄’’𑀢𑀺. 𑀢𑁂𑀦 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀘 ¶ 𑀩𑀻𑀚𑀲𑁆𑀲 𑀓𑀲𑀺𑀬𑀸 𑀫𑀽𑀮𑀪𑀸𑀯𑀁 𑀯𑀺𑀪𑀸𑀯𑁂𑀢𑀺. 𑀓𑀼𑀲𑀮𑀸𑀢𑀺 𑀇𑀫𑀺𑀦𑀸 𑀅𑀓𑀼𑀲𑀮𑀸 𑀢𑀢𑁄 𑀅𑀜𑁆𑀜𑀣𑀸𑀧𑀺 𑀓𑀭𑁄𑀦𑁆𑀢𑀺, 𑀢𑀁 𑀧𑀦 𑀅𑀧𑁆𑀧𑀫𑀸𑀡𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀢𑀲𑁆𑀲𑀸𑀢𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀩𑀻𑀚𑀝𑁆𑀞𑀸𑀦𑀺𑀬𑀲𑁆𑀲 𑀥𑀫𑁆𑀫𑀲𑁆𑀲 𑀘 𑀉𑀧𑀓𑀸𑀭𑀪𑀸𑀯𑀢𑁄. 𑀥𑀫𑁆𑀫𑀲𑀫𑁆𑀩𑀦𑁆𑀥𑀲𑀫𑀢𑁆𑀣𑀪𑀸𑀯𑀢𑁄𑀢𑀺 𑀢𑀣𑀸 𑀯𑀼𑀢𑁆𑀢𑀥𑀫𑁆𑀫𑀲𑁆𑀲 𑀨𑀮𑁂𑀦 𑀲𑀫𑁆𑀩𑀦𑁆𑀥𑀺𑀢𑀼𑀁 𑀬𑁄𑀚𑁂𑀢𑀼𑀁 𑀲𑀫𑀢𑁆𑀣𑀪𑀸𑀯𑀢𑁄. 𑀢𑀧𑁄 𑀯𑀼𑀝𑁆𑀞𑀻𑀢𑀺 𑀯𑀼𑀢𑁆𑀢𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀅𑀬𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀲𑁆𑀲𑀓𑀲𑁆𑀲 𑀉𑀧𑀓𑀸𑀭𑀲𑁆𑀲 𑀩𑀻𑀚𑀲𑁆𑀲 𑀅𑀦𑀦𑁆𑀢𑀭𑀁 𑀯𑀼𑀝𑁆𑀞𑀺 𑀯𑀼𑀘𑁆𑀘𑀫𑀸𑀦𑀸 𑀅𑀝𑁆𑀞𑀸𑀦𑁂 𑀯𑀼𑀢𑁆𑀢𑀸 𑀦𑀸𑀫 𑀦 𑀳𑁄𑀢𑀺. 𑀓𑀲𑁆𑀫𑀸? 𑀩𑀻𑀚𑀲𑁆𑀲 𑀯𑀧𑁆𑀧𑀓𑀸𑀮𑁂 𑀅𑀦𑀼𑀭𑀽𑀧𑀸𑀬 𑀯𑀼𑀝𑁆𑀞𑀺𑀬𑀸 𑀇𑀘𑁆𑀙𑀺𑀢𑀩𑁆𑀩𑀢𑁄, 𑀢𑀲𑁆𑀫𑀸 𑀅𑀯𑀲𑀸𑀦𑁂 𑀫𑀚𑁆𑀛𑁂 𑀯𑀸 𑀯𑀼𑀘𑁆𑀘𑀫𑀸𑀦𑀸𑀬 𑀥𑀫𑁆𑀫𑀲𑀫𑁆𑀩𑀦𑁆𑀥𑀲𑀫𑀢𑁆𑀣𑀢𑀸 𑀢𑀲𑁆𑀲𑀸 𑀯𑀺𑀪𑀸𑀯𑀺𑀢𑀸 𑀦 𑀲𑀺𑀬𑀸. 𑀅𑀢𑁆𑀢𑀦𑁄 𑀅𑀯𑀺𑀲𑀬𑁂𑀢𑀺 𑀛𑀸𑀦𑀸𑀤𑀺𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂. 𑀧𑀘𑁆𑀙𑀸𑀧𑀻𑀢𑀺 𑀓𑀲𑀺𑀲𑀫𑁆𑀪𑀸𑀭𑀓𑀣𑀦𑀢𑁄 𑀧𑀘𑁆𑀙𑀸𑀧𑀺. 𑀯𑀢𑁆𑀢𑀩𑁆𑀩𑁄𑀢𑀺 𑀏𑀓𑀦𑁆𑀢𑁂𑀦 𑀯𑀢𑁆𑀢𑀩𑁆𑀩𑁄. 𑀢𑀤𑀦𑀦𑁆𑀢𑀭𑀁𑀬𑁂𑀯𑀸𑀢𑀺 𑀩𑀻𑀚𑀸𑀦𑀦𑁆𑀢𑀭𑀁𑀬𑁂𑀯. 𑀯𑀼𑀘𑁆𑀘𑀫𑀸𑀦𑀸 𑀯𑀼𑀝𑁆𑀞𑀺 𑀲𑀫𑀢𑁆𑀣𑀸 𑀳𑁄𑀢𑀺 ¶ , 𑀩𑀻𑀚𑀲𑁆𑀲 𑀨𑀮𑁂𑀦 𑀲𑀫𑁆𑀩𑀦𑁆𑀥𑀦𑁂 𑀲𑀫𑀢𑁆𑀣𑀸𑀢𑀺 𑀤𑀻𑀧𑀺𑀢𑀸 𑀳𑁄𑀢𑀺 𑀅𑀦𑀦𑁆𑀢𑀭𑀯𑀘𑀦𑁂𑀦𑁂𑀯 𑀢𑀲𑁆𑀲𑀸 𑀆𑀲𑀦𑁆𑀦𑀉𑀧𑀓𑀸𑀭𑀢𑁆𑀢𑀤𑀻𑀧𑀦𑀢𑁄.

𑀲𑀫𑁆𑀧𑀲𑀸𑀤𑀮𑀓𑁆𑀔𑀡𑀸𑀢𑀺 𑀧𑀲𑀻𑀤𑀺𑀢𑀩𑁆𑀩𑁂 𑀯𑀢𑁆𑀣𑀼𑀲𑁆𑀫𑀺𑀁 𑀲𑀫𑁆𑀫𑀤𑁂𑀯 𑀧𑀲𑀻𑀤𑀦𑀮𑀓𑁆𑀔𑀡𑀸. 𑀑𑀓𑀧𑁆𑀧𑀦𑀮𑀓𑁆𑀔𑀡𑀸𑀢𑀺 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀦𑁄 𑀏𑀯𑀫𑁂𑀢𑀦𑁆𑀢𑀺 𑀧𑀓𑁆𑀔𑀦𑁆𑀤𑀦𑀮𑀓𑁆𑀔𑀡𑀸. 𑀫𑀽𑀮𑀩𑀻𑀚𑀦𑁆𑀢𑀺𑀆𑀤𑀻𑀲𑀼 𑀫𑀽𑀮𑀫𑁂𑀯 𑀩𑀻𑀚𑀁 𑀫𑀽𑀮𑀩𑀻𑀚𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺 𑀩𑀻𑀚𑀕𑀸𑀫𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀪𑀽𑀢𑀕𑀸𑀫𑁄 𑀧𑀦 𑀫𑀽𑀮𑀁 𑀩𑀻𑀚𑀁 𑀏𑀢𑀲𑁆𑀲𑀸𑀢𑀺 𑀫𑀽𑀮𑀩𑀻𑀚𑀦𑁆𑀢𑀺𑀆𑀤𑀺𑀦𑀸 𑀯𑁂𑀤𑀺𑀢𑀩𑁆𑀩𑁄. 𑀩𑀻𑀚𑀩𑀻𑀚𑀦𑁆𑀢𑀺 𑀧𑀜𑁆𑀘𑀫𑀁 𑀧𑀦 𑀧𑀘𑁆𑀘𑀬𑀦𑁆𑀢𑀭𑀲𑀫𑀯𑀸𑀬𑁂 𑀲𑀤𑀺𑀲𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑁂𑀲𑀓𑀸𑀭𑀡𑀪𑀸𑀯𑀢𑁄 𑀯𑀺𑀭𑀽𑀳𑀦𑀲𑀫𑀢𑁆𑀣𑁂 𑀲𑀸𑀭𑀨𑀮𑁂 𑀦𑀺𑀭𑀼𑀴𑁆𑀳𑁄 𑀩𑀻𑀚𑀲𑀤𑁆𑀤𑁄 𑀢𑀤𑀢𑁆𑀣𑀲𑀺𑀤𑁆𑀥𑀺𑀬𑀸 𑀫𑀽𑀮𑀸𑀤𑀻𑀲𑀼𑀧𑀺 𑀓𑁂𑀲𑀼𑀘𑀺 𑀧𑀯𑀢𑁆𑀢𑀢𑀻𑀢𑀺 𑀢𑀢𑁄 𑀦𑀺𑀯𑀢𑁆𑀢𑀦𑀢𑁆𑀣𑀁 𑀏𑀓𑁂𑀦 𑀩𑀻𑀚-𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀩𑀻𑀚𑀩𑀻𑀚’’𑀦𑁆𑀢𑀺 ‘‘𑀤𑀼𑀓𑁆𑀔𑀤𑀼𑀓𑁆𑀔𑀁 𑀭𑀽𑀧𑀭𑀽𑀧’’𑀦𑁆𑀢𑀺 𑀘 𑀬𑀣𑀸. 𑀏𑀯𑀫𑁆𑀧𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀇𑀫𑀲𑁆𑀲𑀧𑀺 𑀦𑀺𑀧𑁆𑀧𑀭𑀺𑀬𑀸𑀬𑁄𑀯 𑀩𑀻𑀚𑀪𑀸𑀯𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑀁 𑀲𑀩𑁆𑀩𑀫𑁆𑀧𑀺…𑀧𑁂… 𑀕𑀘𑁆𑀙𑀢𑀻’’𑀢𑀺.

𑀇𑀤𑀸𑀦𑀺 𑀓𑀣𑀜𑁆𑀘𑀺 𑀯𑀢𑁆𑀢𑀩𑁆𑀩𑁂 𑀲𑀤𑁆𑀥𑀸𑀬 𑀑𑀧𑀫𑁆𑀫𑀢𑁆𑀢𑁂 𑀩𑀻𑀚𑁂 𑀲𑀤𑁆𑀥𑀸𑀬 𑀩𑀻𑀚𑀪𑀸𑀯𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀢𑀢𑁆𑀣 𑀬𑀣𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀓𑀸𑀫𑀁 𑀲𑀤𑁆𑀥𑀽𑀧𑀦𑀺𑀲𑀁 𑀲𑀻𑀮𑀁, 𑀢𑀣𑀸𑀧𑀺 𑀲𑀫𑀸𑀥𑀺𑀲𑁆𑀲 𑀯𑀺𑀬 𑀲𑀩𑁆𑀩𑁂𑀲𑀫𑁆𑀧𑀺 𑀅𑀦𑀯𑀚𑁆𑀚𑀥𑀫𑁆𑀫𑀸𑀦𑀁 𑀆𑀤𑀺𑀫𑀽𑀮𑀪𑀸𑀯𑀢𑁄 𑀲𑀤𑁆𑀥𑀸𑀬𑀧𑀺 𑀧𑀢𑀺𑀝𑁆𑀞𑀸 𑀳𑁄𑀢𑀻𑀢𑀺 𑀆𑀳 ‘‘𑀳𑁂𑀝𑁆𑀞𑀸 𑀲𑀻𑀮𑀫𑀽𑀮𑁂𑀦 𑀧𑀢𑀺𑀝𑁆𑀞𑀸𑀢𑀻’’𑀢𑀺. 𑀬𑀲𑁆𑀫𑀸 𑀲𑀩𑁆𑀩𑀲𑁆𑀲𑁂𑀯 𑀧𑀼𑀕𑁆𑀕𑀮𑀲𑁆𑀲 𑀲𑀤𑁆𑀥𑀸𑀯𑀲𑁂𑀦 𑀲𑀫𑀣𑀯𑀺𑀧𑀲𑁆𑀲𑀦𑀸𑀭𑀫𑁆𑀪𑁄, 𑀢𑀲𑁆𑀫𑀸 𑀲𑀸 ‘‘𑀉𑀧𑀭𑀺 𑀲𑀫𑀣𑀯𑀺𑀧𑀲𑁆𑀲𑀦𑀗𑁆𑀓𑀼𑀭𑀁 𑀉𑀝𑁆𑀞𑀸𑀧𑁂𑀢𑀻’’𑀢𑀺 𑀯𑀼𑀢𑁆𑀢𑀸. 𑀢𑀦𑁆𑀢𑀺 𑀥𑀜𑁆𑀜𑀩𑀻𑀚𑀁. 𑀧𑀣𑀯𑀺𑀭𑀲𑀁 𑀆𑀧𑁄𑀭𑀲𑀦𑁆𑀢𑀺 𑀲𑀲𑀫𑁆𑀪𑀸𑀭𑀧𑀣𑀯𑀻𑀆𑀧𑁂𑀲𑀼 𑀮𑀩𑁆𑀪𑀫𑀸𑀦𑀁 𑀭𑀲𑀁. 𑀕𑀳𑁂𑀢𑁆𑀯𑀸𑀢𑀺 𑀧𑀘𑁆𑀘𑀬𑀧𑀭𑀫𑁆𑀧𑀭𑀸𑀬 𑀕𑀳𑁂𑀢𑁆𑀯𑀸. 𑀥𑀜𑁆𑀜𑀧𑀭𑀺𑀧𑀸𑀓𑀕𑀳𑀡𑀢𑁆𑀣𑀦𑁆𑀢𑀺 𑀥𑀜𑁆𑀜𑀧𑀭𑀺𑀧𑀸𑀓𑀦𑀺𑀩𑁆𑀩𑀢𑁆𑀢𑀺𑀅𑀢𑁆𑀣𑀁. 𑀭𑀲𑀦𑁆𑀢𑀺 𑀲𑀤𑁆𑀥𑀸𑀲𑀻𑀮𑀫𑀽𑀮𑀳𑁂𑀢𑀼𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀭𑀲𑀁 𑀆𑀤𑀺𑀬𑀺𑀢𑁆𑀯𑀸. 𑀅𑀭𑀺𑀬𑀫𑀕𑁆𑀕𑀦𑀸𑀴𑁂𑀦𑀸𑀢𑀺 𑀅𑀭𑀺𑀬𑀫𑀕𑁆𑀕𑀲𑁄𑀢𑁂𑀦 𑀅𑀭𑀺𑀬𑀨𑀮𑀥𑀜𑁆𑀜𑀧𑀭𑀺𑀧𑀸𑀓𑀕𑀳𑀡𑀢𑁆𑀣𑀦𑁆𑀢𑀺 𑀅𑀭𑀺𑀬𑀨𑀮𑀫𑁂𑀯 ¶ 𑀥𑀦𑀸𑀬𑀺𑀢𑀩𑁆𑀩𑀢𑁄 𑀥𑀜𑁆𑀜𑀁 𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀅𑀢𑁆𑀣𑀁. 𑀥𑀜𑁆𑀜𑀦𑀸𑀴𑀁 𑀦𑀸𑀫 𑀓𑀡𑁆𑀟𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑁄 𑀧𑀘𑁆𑀙𑀺𑀫𑀤𑁂𑀲𑁄, 𑀓𑀡𑁆𑀟𑁄 𑀢𑀩𑁆𑀪𑀦𑁆𑀢𑀭𑁄 𑀢𑀁𑀦𑀺𑀲𑁆𑀲𑀬𑁄𑀬𑁂𑀯 𑀤𑀡𑁆𑀟𑁄. 𑀧𑀲𑀯𑁄 𑀦𑀸𑀫 𑀧𑀼𑀧𑁆𑀨𑀁. 𑀯𑀼𑀤𑁆𑀥𑀺𑀦𑁆𑀢𑀺 𑀅𑀯𑀬𑀯𑀧𑀸𑀭𑀺𑀧𑀽𑀭𑀺𑀯𑀲𑁂𑀦 𑀯𑀼𑀤𑁆𑀥𑀺𑀁. 𑀯𑀺𑀭𑀽𑀴𑁆𑀳𑀺𑀦𑁆𑀢𑀺 𑀫𑀽𑀮𑀲𑀦𑁆𑀢𑀸𑀦𑀤𑀴𑁆𑀳𑀢𑀸𑀬 𑀯𑀺𑀭𑀼𑀴𑁆𑀳𑀢𑀁. 𑀯𑁂𑀧𑀼𑀮𑁆𑀮𑀦𑁆𑀢𑀺 𑀧𑀢𑁆𑀢𑀦𑀸𑀴𑀸𑀤𑀻𑀳𑀺 𑀯𑀺𑀧𑀼𑀮𑀪𑀸𑀯𑀁. 𑀔𑀻𑀭𑀁 𑀚𑀦𑁂𑀢𑁆𑀯𑀸𑀢𑀺 𑀢𑀭𑀼𑀡𑀲𑀮𑀸𑀝𑀼𑀓𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀢𑀡𑁆𑀟𑀼𑀮𑀲𑁆𑀲 𑀩𑀻𑀚𑀲𑁆𑀲 𑀩𑀻𑀚𑀪𑀽𑀢𑀁 𑀔𑀻𑀭𑀁 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀏𑀲𑀸𑀢𑀺 𑀲𑀤𑁆𑀥𑀸. 𑀧𑀢𑀺𑀝𑁆𑀞𑀳𑀺𑀢𑁆𑀯𑀸𑀢𑀺 𑀓𑀫𑁆𑀫𑀧𑀣𑀸𑀓𑀫𑁆𑀫𑀧𑀣𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀳𑀺𑀢𑁂𑀦 𑀆𑀤𑀺𑀢𑁄 𑀧𑀯𑀢𑁆𑀢𑀲𑀻𑀮𑀫𑀢𑁆𑀢𑁂𑀦 𑀧𑀢𑀺𑀝𑁆𑀞𑀳𑀺𑀢𑁆𑀯𑀸. 𑀯𑀼𑀤𑁆𑀥𑀺𑀦𑁆𑀢𑀺𑀆𑀤𑀻𑀲𑀼 𑀲𑀼𑀧𑀭𑀺𑀲𑀼𑀤𑁆𑀥𑀸𑀳𑀺 𑀲𑀻𑀮𑀘𑀺𑀢𑁆𑀢𑀯𑀺𑀲𑀼𑀤𑁆𑀥𑀻𑀳𑀺 𑀯𑀼𑀤𑁆𑀥𑀺𑀁, 𑀤𑀺𑀝𑁆𑀞𑀺𑀓𑀗𑁆𑀔𑀸𑀯𑀺𑀢𑀭𑀡𑀯𑀺𑀲𑀼𑀤𑁆𑀥𑀻𑀳𑀺 𑀯𑀺𑀭𑀽𑀴𑁆𑀳𑀺𑀁. 𑀫𑀕𑁆𑀕𑀸𑀫𑀕𑁆𑀕𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀻𑀳𑀺 𑀯𑁂𑀧𑀼𑀮𑁆𑀮𑀁 𑀧𑀢𑁆𑀯𑀸. 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀔𑀻𑀭𑀦𑁆𑀢𑀺 ¶ 𑀲𑀸𑀤𑀼𑀭𑀲𑀲𑀼𑀯𑀺𑀲𑀼𑀤𑁆𑀥𑀺𑀪𑀸𑀯𑀢𑁄 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀲𑀗𑁆𑀔𑀸𑀢𑀁 𑀔𑀻𑀭𑀁 𑀚𑀦𑁂𑀢𑁆𑀯𑀸. 𑀅𑀦𑁂𑀓…𑀧𑁂… 𑀨𑀮𑀦𑁆𑀢𑀺 𑀅𑀦𑁂𑀓𑀧𑀝𑀺𑀲𑀫𑁆𑀪𑀺𑀤𑀸-𑀅𑀦𑁂𑀓𑀸𑀪𑀺𑀜𑁆𑀜𑀸𑀡𑀧𑀭𑀺𑀧𑀼𑀡𑁆𑀡𑀁 𑀅𑀭𑀳𑀢𑁆𑀢𑀨𑀮𑀲𑀻𑀲𑀁 𑀦𑀺𑀧𑁆𑀨𑀸𑀤𑁂𑀢𑀺.

𑀩𑀻𑀚𑀓𑀺𑀘𑁆𑀘𑀓𑀭𑀡𑀢𑁄𑀢𑀺 𑀩𑀻𑀚𑀓𑀺𑀘𑁆𑀘𑀲𑁆𑀲 𑀓𑀭𑀡𑀢𑁄. 𑀬𑀜𑁆𑀳𑀺 𑀢𑀁𑀲𑀤𑀺𑀲𑀲𑁆𑀲 𑀯𑀺𑀲𑀤𑀺𑀲𑀲𑁆𑀲 𑀘 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀧𑀢𑀺𑀝𑁆𑀞𑀸𑀧𑀦𑀲𑀫𑁆𑀩𑀦𑁆𑀥𑀦𑀦𑀺𑀧𑁆𑀨𑀸𑀤𑀦𑀲𑀗𑁆𑀔𑀸𑀢𑀁 𑀩𑀻𑀚𑀲𑁆𑀲 𑀓𑀺𑀘𑁆𑀘𑀁, 𑀢𑀲𑁆𑀲 𑀓𑀭𑀡𑀢𑁄 𑀦𑀺𑀩𑁆𑀩𑀢𑁆𑀢𑀦𑀢𑁄 ‘‘𑀏𑀯𑀁 𑀲𑀤𑁆𑀥𑀸 𑀩𑀻𑀚𑀓𑀺𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀲𑀤𑁆𑀥𑀸𑀬 𑀓𑀼𑀲𑀮𑀥𑀫𑁆𑀫𑀸𑀦𑀁 𑀩𑀻𑀚𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀸 𑀘𑀸𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀺. 𑀇𑀤𑀸𑀦𑀺 𑀢𑀢𑁆𑀣 𑀆𑀕𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀤𑁆𑀥𑀸𑀚𑀸𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀬𑀣𑀸 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀲𑁆𑀲 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀘, 𑀏𑀯𑀁 𑀅𑀦𑀯𑀲𑁂𑀲𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀲𑀤𑁆𑀥𑀸 𑀫𑀽𑀮𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀯𑀻𑀭𑀺𑀬𑀜𑁆𑀘 𑀅𑀓𑀼𑀲𑀮𑀥𑀫𑁆𑀫𑁂, 𑀤𑀼𑀓𑁆𑀓𑀭𑀓𑀸𑀭𑀺𑀓𑀸 𑀥𑀼𑀢𑀗𑁆𑀕𑀜𑁆𑀘 𑀅𑀓𑀼𑀲𑀮𑀥𑀫𑁆𑀫𑁂 𑀘𑁂𑀯 𑀓𑀸𑀬𑀜𑁆𑀘 𑀢𑀧𑀢𑀺 𑀯𑀺𑀩𑀸𑀥𑀢𑀻𑀢𑀺 𑀢𑀧𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀅𑀥𑀺𑀧𑁆𑀧𑁂𑀢𑁄 𑀯𑀻𑀭𑀺𑀬𑀲𑁆𑀲 𑀥𑁄𑀭𑀬𑁆𑀳𑀪𑀸𑀯𑁂𑀦 𑀕𑀬𑁆𑀳𑀫𑀸𑀦𑀢𑁆𑀢𑀸, 𑀇𑀢𑀭𑁂𑀲𑀁 𑀯𑀼𑀝𑁆𑀞𑀺𑀪𑀸𑀯𑀲𑁆𑀲 𑀅𑀦𑀼𑀬𑀼𑀜𑁆𑀚𑀫𑀸𑀦𑀢𑁆𑀢𑀸. 𑀆𑀤𑀺-𑀲𑀤𑁆𑀤𑁂𑀦 𑀓𑀮𑀮𑀗𑁆𑀕𑀸𑀭𑀯𑀼𑀝𑁆𑀞𑀺𑀆𑀤𑀻𑀦𑀁 𑀲𑀗𑁆𑀕𑀳𑁄. 𑀲𑀫𑀦𑀼𑀕𑁆𑀕𑀳𑀺𑀢𑀦𑁆𑀢𑀺 𑀉𑀧𑀕𑀢𑀁. 𑀯𑀺𑀭𑀼𑀳𑀦𑀸𑀫𑀺𑀮𑀸𑀬𑀦𑀦𑀺𑀧𑁆𑀨𑀢𑁆𑀢𑀺𑀯𑀘𑀦𑁂𑀳𑀺 𑀥𑀜𑁆𑀜𑀩𑀻𑀚𑀲𑀦𑁆𑀢𑀸𑀦𑀲𑁆𑀲 𑀯𑀺𑀬 𑀢𑁂𑀲𑀁 𑀯𑀼𑀤𑁆𑀥𑀺𑀬𑀸 𑀲𑀤𑁆𑀥𑀸𑀩𑀻𑀚𑀲𑀦𑁆𑀢𑀸𑀦𑀲𑁆𑀲 𑀢𑀧𑁄𑀯𑀼𑀝𑁆𑀞𑀺𑀬𑀸 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀉𑀧𑀓𑀸𑀭𑀢𑀁 𑀤𑀲𑁆𑀲𑁂𑀢𑀺.

𑀧𑀼𑀭𑀺𑀫𑀧𑀤𑁂𑀲𑀼𑀧𑀻𑀢𑀺 𑀅𑀧𑀺-𑀲𑀤𑁆𑀤𑁂𑀦 𑀧𑀭𑀧𑀤𑁂𑀲𑀼𑀧𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 ‘‘𑀳𑀺𑀭𑀻 𑀫𑁂 𑀈𑀲𑀸, 𑀫𑀦𑁄 𑀫𑁂 𑀬𑁄𑀢𑁆𑀢’’𑀦𑁆𑀢𑀺 𑀇𑀘𑁆𑀙𑀺𑀢𑀢𑁆𑀢𑀸, ‘‘𑀲𑀢𑀺 𑀫𑁂’’𑀢𑀺 𑀏𑀢𑁆𑀣 𑀫𑁂-𑀲𑀤𑁆𑀤𑁄 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑁄. 𑀉𑀤𑀓𑀫𑁆𑀧𑀺 𑀢𑀸𑀯 𑀤𑀸𑀢𑀩𑁆𑀩𑀁 𑀳𑁄𑀢𑀺 𑀦𑀤𑀻𑀢𑀴𑀸𑀓𑀸𑀤𑀺𑀢𑁄 𑀆𑀦𑁂𑀢𑁆𑀯𑀸. 𑀯𑀻𑀭𑀺𑀬𑀩𑀮𑀻𑀩𑀤𑁆𑀤𑁂 𑀘𑀢𑀼𑀩𑁆𑀩𑀺𑀥𑁂 𑀬𑁄𑀚𑁂𑀢𑁆𑀯𑀸. 𑀦𑀺𑀘𑁆𑀘𑀓𑀸𑀮𑀁 𑀅𑀢𑁆𑀣𑀻𑀢𑀺 𑀯𑀘𑀦𑀲𑁂𑀲𑁄.

𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸 𑀅𑀥𑀺𑀧𑁆𑀧𑁂𑀢𑀸 𑀅𑀫𑀢𑀧𑁆𑀨𑀮𑀸𑀬 𑀓𑀲𑀺𑀬𑀸 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀯𑀺𑀧𑀲𑁆𑀲𑀦𑀸 𑀧𑀜𑁆𑀜𑀸 ¶ 𑀘𑀸𑀢𑀺 𑀤𑀼𑀯𑀺𑀥𑀸𑀧𑀺 𑀧𑀜𑁆𑀜𑀸 𑀉𑀧𑀦𑀺𑀲𑁆𑀲𑀬𑀸 𑀳𑁄𑀢𑀺 𑀯𑀺𑀲𑀺𑀝𑁆𑀞𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀬𑀣𑀸 𑀳𑀻’’𑀢𑀺𑀆𑀤𑀺. 𑀧𑀜𑁆𑀜𑀸𑀢𑀺 𑀧𑀓𑀸𑀭𑁂𑀳𑀺 𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸. 𑀧𑀜𑁆𑀜𑀯𑀢𑀁 𑀧𑀜𑁆𑀜𑀸 𑀧𑀼𑀭𑀢𑁄 𑀳𑁄𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑀪𑀸𑀯𑀢𑁄, 𑀲𑀳𑀚𑀸𑀢𑀸𑀥𑀺𑀧𑀢𑀻𑀲𑀼 𑀘 𑀉𑀓𑁆𑀓𑀝𑁆𑀞𑀪𑀸𑀯𑀢𑁄. 𑀲𑀺𑀭𑀻𑀢𑀺 𑀲𑁄𑀪𑀕𑁆𑀕𑀁. 𑀲𑀢𑀁 𑀥𑀫𑁆𑀫𑀸 𑀲𑀤𑁆𑀥𑀸𑀤𑀬𑁄, 𑀅𑀦𑁆𑀯𑀸𑀬𑀺𑀓𑀸𑀢𑀺 𑀅𑀦𑀼𑀕𑀸𑀫𑀺𑀦𑁄. 𑀈𑀲𑀸𑀩𑀤𑁆𑀥𑀸 𑀳𑁄𑀢𑀻𑀢𑀺 𑀳𑀺𑀭𑀺𑀲𑀗𑁆𑀔𑀸𑀢𑀈𑀲𑀸𑀬 𑀩𑀤𑁆𑀥𑀸 𑀳𑁄𑀢𑀺 ¶ , 𑀧𑀜𑁆𑀜𑀸𑀬 𑀓𑀤𑀸𑀘𑀺 𑀅𑀧𑁆𑀧𑀬𑁄𑀕𑀢𑁄 𑀫𑀦𑁄𑀲𑀻𑀲𑁂𑀦 𑀲𑀫𑀸𑀥𑀺 𑀇𑀥 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀫𑀦𑁄𑀲𑀗𑁆𑀔𑀸𑀢𑀲𑁆𑀲 𑀲𑀫𑀸𑀥𑀺𑀬𑁄𑀢𑁆𑀢𑀲𑁆𑀲𑀸’’𑀢𑀺. 𑀲𑀫𑀁 𑀉𑀧𑀦𑁂𑀢𑁆𑀯𑀸 𑀩𑀦𑁆𑀥𑀺𑀢𑁆𑀯𑀸 𑀩𑀤𑁆𑀥𑀭𑀚𑁆𑀚𑀼𑀓𑀢𑁆𑀢𑀸 𑀲𑀫𑀸𑀥𑀺𑀬𑁄𑀢𑁆𑀢𑀁. 𑀏𑀓𑀢𑁄 𑀕𑀫𑀦𑀦𑁆𑀢𑀺 𑀮𑀻𑀦𑀘𑁆𑀘𑀸𑀭𑀤𑁆𑀥𑀲𑀗𑁆𑀔𑀸𑀢𑀁 𑀏𑀓𑀧𑀲𑁆𑀲𑀢𑁄 𑀕𑀫𑀦𑀁 𑀯𑀸𑀭𑁂𑀢𑀺. 𑀫𑀚𑁆𑀛𑀺𑀫𑀸𑀬 𑀯𑀺𑀧𑀲𑁆𑀲𑀦𑀸𑀯𑀻𑀣𑀺𑀬𑀸 𑀧𑀝𑀺𑀧𑀸𑀤𑀦𑀢𑁄 𑀓𑀸𑀬𑀸𑀤𑀻𑀲𑀼 𑀲𑀼𑀪𑀲𑀼𑀔𑀦𑀺𑀘𑁆𑀘𑀢𑁆𑀢𑀪𑀸𑀯𑀯𑀺𑀕𑀫𑀦𑁂 𑀧𑀜𑁆𑀜𑀸𑀬 𑀯𑀺𑀲𑁂𑀲𑀧𑀘𑁆𑀘𑀬𑀸 𑀲𑀢𑀻𑀢𑀺 𑀯𑀼𑀢𑁆𑀢𑀁 𑁋 ‘‘𑀲𑀢𑀺𑀬𑀼𑀢𑁆𑀢𑀸 𑀧𑀜𑁆𑀜𑀸’’𑀢𑀺 𑀢𑀲𑁆𑀲𑀸 𑀲𑀢𑀺𑀯𑀺𑀧𑁆𑀧𑀬𑁄𑀕𑀸𑀲𑀩𑁆𑀪𑀸𑀯𑀢𑁄. 𑀲𑀦𑁆𑀢𑀢𑀺𑀖𑀦𑀸𑀤𑀻𑀦𑀁 𑀅𑀬𑀁 𑀯𑀺𑀲𑁂𑀲𑁄 𑁋 𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦𑀁 𑀥𑀫𑁆𑀫𑀸𑀦𑀁 𑀦𑀺𑀭𑀦𑁆𑀢𑀭𑀢𑀸𑀬 𑀏𑀓𑀻𑀪𑀽𑀢𑀸𑀦𑀁 𑀯𑀺𑀬 𑀧𑀯𑀢𑁆𑀢𑀺 𑀲𑀦𑁆𑀢𑀢𑀺𑀖𑀦𑀢𑀸, 𑀏𑀓𑀲𑀫𑀽𑀳𑀯𑀲𑁂𑀦 𑀏𑀓𑀻𑀪𑀽𑀢𑀸𑀦𑀫𑀺𑀯 𑀧𑀯𑀢𑁆𑀢𑀺 𑀲𑀫𑀽𑀳𑀖𑀦𑀢𑀸, 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀓𑀺𑀘𑁆𑀘𑀪𑁂𑀤𑀯𑀲𑁂𑀦 𑀏𑀓𑀻𑀪𑀽𑀢𑀸𑀦𑀫𑀺𑀯 𑀧𑀯𑀢𑁆𑀢𑀺. 𑀓𑀺𑀘𑁆𑀘𑀖𑀦𑀢𑀸, 𑀏𑀓𑀸𑀭𑀫𑁆𑀫𑀡𑀯𑀲𑁂𑀦 𑀏𑀓𑀻𑀪𑀽𑀢𑀸𑀦𑀫𑀺𑀯 𑀧𑀯𑀢𑁆𑀢𑀺 𑀆𑀭𑀫𑁆𑀫𑀡𑀖𑀦𑀢𑀸. 𑀲𑀩𑁆𑀩𑁂𑀲𑀁, 𑀲𑀩𑁆𑀩𑀸𑀦𑀺 𑀯𑀸 𑀓𑀺𑀮𑁂𑀲𑀸𑀦𑀁 𑀫𑀽𑀮𑀲𑀦𑁆𑀢𑀸𑀦𑀓𑀸𑀦𑀺 𑀲𑀩𑁆𑀩…𑀧𑁂… 𑀲𑀦𑁆𑀢𑀸𑀦𑀓𑀸𑀦𑀺. 𑀅𑀦𑀼𑀧𑁆𑀧𑀬𑁄𑀕𑁄 𑀳𑀺 𑀅𑀢𑁆𑀣𑁄. 𑀧𑀤𑀸𑀮𑁂𑀢𑀻𑀢𑀺 𑀪𑀺𑀦𑁆𑀤𑀢𑀺 𑀲𑀫𑀼𑀘𑁆𑀙𑀺𑀦𑁆𑀤𑀢𑀺. 𑀲𑀸 𑀘 𑀔𑁄 ‘‘𑀧𑀤𑀸𑀮𑁂𑀢𑀻’’𑀢𑀺 𑀯𑀼𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀸𑀯 𑀧𑀜𑁆𑀜𑀸 𑀅𑀦𑀼𑀲𑀬𑀧𑁆𑀧𑀳𑀸𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀲𑀦𑁆𑀢𑀢𑀺𑀖𑀦𑀸𑀤𑀺𑀪𑁂𑀤𑀦𑀸 𑀧𑀦 𑀮𑁄𑀓𑀺𑀬𑀸𑀧𑀺 𑀳𑁄𑀢𑀺 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀖𑀦𑀯𑀺𑀦𑀺𑀩𑁆𑀪𑁄𑀕𑀲𑁆𑀲 𑀦𑀺𑀧𑁆𑀨𑀸𑀤𑀦𑀢𑁄. 𑀢𑁂𑀦𑀸𑀳 ‘‘𑀇𑀢𑀭𑀸 𑀧𑀦 𑀮𑁄𑀓𑀺𑀓𑀸𑀧𑀺 𑀲𑀺𑀬𑀸’’𑀢𑀺.

𑀳𑀺𑀭𑀻𑀬𑀢𑀻𑀢𑀺 𑀮𑀚𑁆𑀚𑀢𑀺, 𑀚𑀺𑀕𑀼𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸 ‘‘𑀧𑀸𑀧𑀓𑁂𑀳𑀺 𑀥𑀫𑁆𑀫𑁂𑀳𑀻’’𑀢𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁 𑀤𑀝𑁆𑀞𑀩𑁆𑀩𑀁, 𑀳𑁂𑀢𑀼𑀫𑁆𑀳𑀺 𑀯𑀸 𑀓𑀭𑀡𑀯𑀘𑀦𑀁. 𑀑𑀢𑁆𑀢𑀧𑁆𑀧𑀫𑁆𑀧𑀺 𑀕𑀳𑀺𑀢𑀫𑁂𑀯, 𑀦 𑀳𑀺 𑀮𑀚𑁆𑀚𑀦𑀁 𑀦𑀺𑀩𑁆𑀪𑀬𑀁 𑀧𑀸𑀧𑀪𑀬𑀁 𑀯𑀸 𑀅𑀮𑀚𑁆𑀚𑀦𑀁 𑀅𑀢𑁆𑀣𑀻𑀢𑀺. 𑀭𑀼𑀓𑁆𑀔𑀮𑀝𑁆𑀞𑀻𑀢𑀺 𑀭𑀼𑀓𑁆𑀔𑀤𑀡𑁆𑀟𑁄. 𑀢𑁂𑀦 𑀧𑀤𑁂𑀲𑁂𑀦 𑀓𑀲𑀦𑀢𑁄 𑀯𑀺𑀲𑁂𑀲𑀢𑁄 𑀦𑀗𑁆𑀕𑀮𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀈𑀲𑀸 𑀬𑀼𑀕𑀦𑀗𑁆𑀕𑀮𑀁 𑀥𑀸𑀭𑁂𑀢𑀻’’𑀢𑀺. 𑀓𑀸𑀫𑀁 𑀧𑀜𑁆𑀜𑀸𑀭𑀳𑀺𑀢𑀸 𑀳𑀺𑀭𑀻 𑀅𑀢𑁆𑀣𑀺, 𑀳𑀺𑀭𑀺𑀭𑀳𑀺𑀢𑀸 𑀧𑀦 𑀧𑀜𑁆𑀜𑀸 𑀦𑀢𑁆𑀣𑁂𑀯𑀸𑀢𑀺 𑀆𑀳 ‘‘𑀳𑀺𑀭𑀺…𑀧𑁂… 𑀅𑀪𑀸𑀯𑀢𑁄’’𑀢𑀺. 𑀲𑀦𑁆𑀥𑀺𑀝𑁆𑀞𑀸𑀦𑁂 𑀓𑀫𑁆𑀧𑀦𑀸𑀪𑀸𑀯𑀢𑁄 𑀅𑀘𑀮𑀁. 𑀣𑀺𑀭𑀪𑀸𑀯𑁂𑀦 𑀅𑀲𑀺𑀣𑀺𑀮𑀁. 𑀳𑀺𑀭𑀺𑀧𑀝𑀺𑀩𑀤𑁆𑀥𑀧𑀜𑁆𑀜𑀸 𑀧𑀝𑀺𑀧𑀓𑁆𑀔𑀯𑀲𑁂𑀦 𑀘 𑀅𑀲𑀺𑀣𑀺𑀮𑀪𑀸𑀯𑁂𑀦 𑀘 𑀅𑀘𑀮𑀸 𑀅𑀲𑀺𑀣𑀺𑀮𑀸𑀢𑀺 𑀆𑀳 ‘‘𑀅𑀩𑁆𑀩𑁄𑀓𑀺𑀡𑁆𑀡𑀸 𑀅𑀳𑀺𑀭𑀺𑀓𑁂𑀦𑀸’’𑀢𑀺. 𑀦𑀸𑀴𑀺𑀬𑀸 𑀫𑀺𑀦𑀫𑀸𑀦𑀧𑀼𑀭𑀺𑀲𑁄 𑀯𑀺𑀬 𑀆𑀭𑀫𑁆𑀫𑀡𑀁 𑀫𑀼𑀦𑀸𑀢𑀺 𑀧𑀭𑀺𑀘𑁆𑀙𑁂𑀤𑀢𑁄 𑀚𑀸𑀦𑀸𑀢𑀻𑀢𑀺 𑀫𑀦𑁄. 𑀫𑀦𑁄𑀲𑀻𑀲𑁂𑀦𑀸𑀢𑀺 𑀫𑀦𑀲𑁄 𑀅𑀧𑀤𑁂𑀲𑁂𑀦. 𑀢𑀁𑀲𑀫𑁆𑀧𑀬𑀼𑀢𑁆𑀢𑁄𑀢𑀺 𑀇𑀫𑀺𑀦𑀸 𑀓𑀼𑀦𑁆𑀢𑀲𑀳𑀘𑀭𑀡𑀢𑁄 𑀧𑀼𑀭𑀺𑀲𑁄 𑀓𑀼𑀦𑁆𑀢𑁄 𑀯𑀺𑀬 𑀫𑀦𑀲𑀳𑀘𑀭𑀡𑀲𑀫𑀸𑀥𑀺 ‘‘𑀫𑀦𑁄’’𑀢𑀺 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀸𑀭𑀣𑀺𑀦𑀸𑀢𑀺 𑀓𑀲𑁆𑀲𑀓𑁂𑀦. 𑀲𑁄 𑀳𑀺 𑀇𑀥 𑀩𑀮𑀻𑀩𑀤𑁆𑀤𑀸𑀦𑀁 𑀲𑀸𑀭𑀡𑀢𑁄 𑀧𑀸𑀘𑀦𑀢𑁄 ‘‘𑀲𑀸𑀭𑀣𑀻’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀏𑀓𑀸𑀩𑀦𑁆𑀥𑀦𑀦𑁆𑀢𑀺 𑀏𑀓𑀸𑀩𑀤𑁆𑀥𑀓𑀭𑀡𑀁. 𑀲𑀓𑀓𑀺𑀘𑁆𑀘𑁂𑀢𑀺 𑀲𑀓𑀓𑀺𑀘𑁆𑀘𑁂𑀦 𑀬𑀼𑀢𑁆𑀢𑁂. 𑀢𑁂𑀦 𑀳𑀺 𑀈𑀲𑀸𑀤𑀻𑀲𑀼 ¶ 𑀬𑀣𑀸𑀭𑀳𑀁 𑀩𑀦𑁆𑀥𑀺𑀢𑁆𑀯𑀸 𑀏𑀓𑀸𑀩𑀤𑁆𑀥𑁂𑀲𑀼 𑀓𑀢𑁂𑀲𑀼 𑀦𑀗𑁆𑀕𑀮𑁂𑀲𑀼 𑀓𑀺𑀘𑁆𑀘𑀁 𑀇𑀚𑁆𑀛𑀢𑀺, 𑀦𑁄 𑀅𑀜𑁆𑀜𑀣𑀸𑀢𑀺 𑀢𑀁 ‘‘𑀲𑀓𑀓𑀺𑀘𑁆𑀘𑁂 𑀧𑀝𑀺𑀧𑀸𑀤𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀯𑀺𑀓𑁆𑀔𑁂𑀧𑀲𑀪𑀸𑀯𑁂𑀦𑀸𑀢𑀺 𑀅𑀢𑁆𑀢𑀦𑁄 𑀅𑀯𑀺𑀓𑁆𑀔𑁂𑀧𑀲𑀪𑀸𑀯𑁂𑀦 ¶ . 𑀩𑀦𑁆𑀥𑀺𑀢𑁆𑀯𑀸𑀢𑀺 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑁂𑀦 𑀅𑀢𑁆𑀢𑀦𑀸 𑀲𑀫𑁆𑀩𑀦𑁆𑀥𑀺𑀢𑁆𑀯𑀸. 𑀲𑀓𑀓𑀺𑀘𑁆𑀘𑁂𑀢𑀺 𑀳𑀺𑀭𑀻𑀆𑀤𑀻𑀳𑀺 𑀬𑀣𑀸𑀲𑀓𑀁 𑀓𑀢𑁆𑀢𑀩𑁆𑀩𑁂 𑀓𑀺𑀘𑁆𑀘𑁂.

𑀘𑀺𑀭𑀓𑀢𑀸𑀤𑀺𑀫𑀢𑁆𑀣𑀦𑁆𑀢𑀺 𑀘𑀺𑀭𑀪𑀸𑀲𑀺𑀢𑀫𑁆𑀧𑀺 𑀅𑀢𑁆𑀣𑀁. 𑀲𑀭𑀢𑀺 𑀅𑀦𑀼𑀲𑁆𑀲𑀭𑀢𑀺 𑀓𑀸𑀬𑀸𑀤𑀺𑀁 𑀅𑀲𑀼𑀪𑀸𑀤𑀺𑀢𑁄 𑀦𑀺𑀚𑁆𑀛𑀸𑀬𑀢𑀺. 𑀨𑀸𑀮𑁂𑀢𑀻𑀢𑀺 𑀧𑀤𑀸𑀮𑁂𑀢𑀺. 𑀧𑀸𑀚𑁂𑀦𑁆𑀢𑀺 𑀕𑀫𑁂𑀦𑁆𑀢𑀻𑀢𑀺 𑀢𑀁 𑀧𑀸𑀚𑀦𑀁. 𑀇𑀥 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 ‘‘𑀧𑀸𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁 𑀚-𑀓𑀸𑀭𑀲𑁆𑀲 𑀘-𑀓𑀸𑀭𑀁 𑀓𑀢𑁆𑀯𑀸. 𑀨𑀸𑀮𑀧𑀸𑀘𑀦𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀳𑀺 𑀩𑁆𑀭𑀸𑀳𑁆𑀫𑀡…𑀧𑁂… 𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀬𑀣𑀸’’𑀢𑀺𑀆𑀤𑀺𑀫𑀸𑀳. 𑀦𑀗𑁆𑀕𑀮𑀁 𑀅𑀦𑀼𑀭𑀓𑁆𑀔𑀢𑀺 𑀪𑀺𑀚𑁆𑀚𑀦𑀨𑀸𑀮𑀦𑀢𑁄. 𑀧𑀼𑀭𑀢𑁄 𑀘𑀲𑁆𑀲 𑀕𑀘𑁆𑀙𑀢𑀻𑀢𑀺 𑀅𑀲𑁆𑀲 𑀦𑀗𑁆𑀕𑀮𑀲𑁆𑀲 𑀓𑀲𑁆𑀲𑀦𑁂 𑀪𑀽𑀫𑀺𑀬𑀸 𑀯𑀺𑀮𑀺𑀔𑀦𑁂 𑀧𑀼𑀭𑀢𑁄 𑀕𑀘𑁆𑀙𑀢𑀺 𑀧𑀼𑀩𑁆𑀩𑀗𑁆𑀕𑀫𑀸 𑀳𑁄𑀢𑀺. 𑀕𑀢𑀺𑀬𑁄𑀢𑀺 𑀧𑀯𑀢𑁆𑀢𑀺𑀬𑁄. 𑀲𑀫𑀦𑁆𑀯𑁂𑀲𑀫𑀸𑀦𑀸𑀢𑀺 𑀲𑀭𑀡𑀯𑀲𑁂𑀦 𑀕𑀯𑁂𑀲𑀫𑀸𑀦𑀸. 𑀆𑀭𑀫𑁆𑀫𑀡𑁂 𑀯𑀸 𑀓𑀸𑀬𑀸𑀤𑀺𑀓𑁂 𑀉𑀧𑀝𑁆𑀞𑀸𑀧𑀬𑀫𑀸𑀦𑀸 𑀅𑀲𑀼𑀪𑀸𑀤𑀺𑀯𑀲𑁂𑀦 𑀧𑀜𑁆𑀜𑀸𑀦𑀗𑁆𑀕𑀮𑀁 𑀭𑀓𑁆𑀔𑀢𑀺. 𑀲𑀪𑀸𑀯𑀸𑀲𑀪𑀸𑀯𑀽𑀧𑀕𑀫𑁂 𑀨𑀸𑀮𑁄 𑀯𑀺𑀬 𑀦𑀗𑁆𑀕𑀮𑀲𑁆𑀲 ‘‘𑀆𑀭𑀓𑁆𑀔𑀸’’𑀢𑀺 𑀯𑀼𑀢𑁆𑀢𑀸 ‘‘𑀲𑀩𑁆𑀩𑀸𑀦𑀢𑁆𑀣𑀢𑁄 𑀲𑀢𑀺 𑀭𑀓𑁆𑀔𑀢𑀻’’𑀢𑀺 𑀓𑀢𑁆𑀯𑀸. 𑀢𑀣𑀸 𑀳𑁂𑀲𑀸 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀘𑀺𑀭𑀓𑀢𑀘𑀺𑀭𑀪𑀸𑀲𑀺𑀢𑀸𑀦𑀁 𑀅𑀲𑀫𑁆𑀫𑀼𑀲𑁆𑀲𑀦𑀯𑀲𑁂𑀦 𑀲𑀢𑀺 𑀧𑀜𑁆𑀜𑀸𑀦𑀗𑁆𑀕𑀮𑀲𑁆𑀲 𑀧𑀼𑀭𑀢𑁄 𑀳𑁄𑀢𑀻𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀧𑀼𑀭𑀢𑁄𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀢𑀺…𑀧𑁂… 𑀦𑁄 𑀧𑀫𑀼𑀝𑁆𑀞𑁂’’𑀢𑀺 𑀆𑀳. 𑀲𑀢𑀺𑀧𑀭𑀺𑀘𑀺𑀢𑁂𑀢𑀺 𑀲𑀢𑀺𑀬𑀸 𑀧𑀝𑁆𑀞𑀸𑀧𑀺𑀢𑁂. ‘‘𑀉𑀧𑀝𑁆𑀞𑀸𑀧𑀺𑀢𑁂’’𑀢𑀺𑀧𑀺 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄. 𑀲𑀁𑀲𑀻𑀤𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀲𑀓𑀺𑀘𑁆𑀘𑀓𑀺𑀭𑀺𑀬𑀸𑀬 𑀲𑀁𑀲𑀻𑀤𑀦𑀁 𑀓𑀸𑀢𑀼𑀁 𑀦 𑀤𑁂𑀢𑀺. 𑀓𑁄𑀲𑀚𑁆𑀚𑀲𑀗𑁆𑀔𑀸𑀢𑀁 𑀲𑀁𑀲𑀻𑀤𑀦𑀁 𑀓𑁄𑀲𑀚𑁆𑀚𑀲𑀁𑀲𑀻𑀤𑀦𑀁.

𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀯𑀼𑀢𑁆𑀢𑀁 𑀓𑀸𑀬𑀺𑀓𑀯𑀸𑀘𑀲𑀺𑀓𑀲𑀁𑀬𑀫𑀲𑁆𑀲 𑀓𑀣𑀺𑀢𑀢𑁆𑀢𑀸. 𑀆𑀳𑀸𑀭𑁂 𑀉𑀤𑀭𑁂 𑀬𑀢𑁄𑀢𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀆𑀳𑀸𑀭𑁂 𑀲𑀁𑀬𑀢𑀪𑀸𑀯𑀤𑀲𑁆𑀲𑀦𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑀸𑀬 𑀘𑀢𑀽𑀲𑀼𑀧𑀺 𑀧𑀘𑁆𑀘𑀬𑁂𑀲𑀼 𑀲𑀁𑀬𑀢𑀪𑀸𑀯𑁄 𑀤𑀻𑀧𑀺𑀢𑁄𑀢𑀺 𑀆𑀳 ‘‘𑀆𑀳𑀸𑀭𑀫𑀼𑀔𑁂𑀦𑀸’’𑀢𑀺𑀆𑀤𑀺. 𑀲𑀁𑀬𑀢𑀪𑀸𑀯𑁄 𑀘𑁂𑀢𑁆𑀣 𑀧𑀘𑁆𑀘𑀬𑀳𑁂𑀢𑀼 𑀅𑀦𑁂𑀲𑀦𑀸𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 ‘‘𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑁄𑀢𑀺 𑀅𑀢𑁆𑀣𑁄’’𑀢𑀺. 𑀪𑁄𑀚𑀦𑀲𑀤𑁆𑀤𑁄 𑀆𑀳𑀸𑀭𑀧𑀭𑀺𑀪𑁄𑀕𑁂 𑀦𑀺𑀭𑀼𑀴𑁆𑀳𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀫𑀼𑀔𑁂𑀦𑀸’’𑀢𑀺. 𑀧𑀭𑀺𑀪𑀼𑀜𑁆𑀚𑀦𑀝𑁆𑀞𑁂𑀦 𑀧𑀦 𑀪𑁄𑀚𑀦𑀲𑀤𑁆𑀤𑀫𑀼𑀔𑁂𑀦𑀸𑀢𑀺 𑀯𑀼𑀢𑁆𑀢𑁂 𑀅𑀥𑀺𑀧𑁆𑀧𑁂𑀢𑀢𑁆𑀣𑁄 𑀮𑀩𑁆𑀪𑀢𑁂𑀯. 𑀢𑁂𑀦𑀸𑀢𑀺 𑀓𑀸𑀬𑀕𑀼𑀢𑁆𑀢𑀸𑀢𑀺𑀆𑀤𑀺𑀯𑀘𑀦𑁂𑀦. 𑀦 𑀯𑀺𑀮𑀼𑀫𑁆𑀧𑀦𑁆𑀢𑀻𑀢𑀺 ‘‘𑀤𑀻𑀧𑁂𑀢𑀻’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄.

𑀤𑁆𑀯𑀻𑀳𑀸𑀓𑀸𑀭𑁂𑀳𑀻𑀢𑀺 ¶ 𑀅𑀤𑀺𑀝𑁆𑀞𑀸𑀤𑀻𑀦𑀁 𑀅𑀤𑀺𑀝𑁆𑀞𑀸𑀤𑀺𑀯𑀲𑁂𑀦 𑀤𑀺𑀝𑁆𑀞𑀸𑀤𑀻𑀦𑀜𑁆𑀘 𑀤𑀺𑀝𑁆𑀞𑀸𑀤𑀺𑀯𑀲𑁂𑀦𑀸𑀢𑀺 𑀏𑀯𑀁 𑀤𑁆𑀯𑀺𑀧𑁆𑀧𑀓𑀸𑀭𑁂𑀳𑀺. 𑀅𑀯𑀺𑀲𑀁𑀯𑀸𑀤𑀦𑀁 𑀅𑀯𑀺𑀢𑀣𑀓𑀣𑀦𑀁. 𑀙𑁂𑀤𑀦𑀁 𑀫𑀽𑀮𑀧𑁆𑀧𑀤𑁂𑀲𑁂 𑀦𑀺𑀓𑀦𑁆𑀢𑀦𑀁. 𑀮𑀼𑀦𑀦𑀁 𑀬𑀢𑁆𑀣 𑀓𑀢𑁆𑀣𑀘𑀺 𑀙𑁂𑀤𑀦𑀁. 𑀉𑀧𑁆𑀧𑀸𑀝𑀦𑀁 𑀉𑀫𑁆𑀫𑀽𑀮𑀦𑀁. 𑀅𑀲𑀺𑀢𑁂𑀦𑀸𑀢𑀺 𑀤𑀢𑁆𑀢𑁂𑀦, 𑀮𑀸𑀬𑀺𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀯𑀺𑀲𑀁𑀯𑀸𑀤𑀦𑀲𑀗𑁆𑀔𑀸𑀢𑀸𑀦𑀁 𑀢𑀺𑀡𑀸𑀦𑀁, 𑀅𑀝𑁆𑀞𑀦𑁆𑀦𑀁 𑀅𑀦𑀭𑀺𑀬𑀯𑁄𑀳𑀸𑀭𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸𑀪𑀽𑀢𑀜𑀸𑀡𑀦𑁆𑀢𑀺 𑀦𑀸𑀫 𑀭𑀽𑀧𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁. 𑀲𑀘𑁆𑀘𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁 𑀅𑀯𑀺𑀧𑀭𑀻𑀢𑀯𑀼𑀢𑁆𑀢𑀺𑀓𑀢𑁆𑀢𑀸 ‘‘𑀙𑁂𑀤𑀓𑀁’’ 𑀙𑀺𑀦𑁆𑀤𑀦𑀓𑀁. 𑀦𑀺𑀤𑁆𑀤𑀸𑀦𑀦𑁆𑀢𑀺 𑀦𑀺𑀤𑁆𑀤𑀸𑀬𑀓𑀁. 𑀇𑀤𑀫𑁂𑀯 𑀲𑀘𑁆𑀘𑀁 ¶ 𑀫𑁄𑀖𑀫𑀜𑁆𑀜𑀦𑁆𑀢𑀺 𑀤𑀺𑀝𑁆𑀞𑀺 ‘‘𑀤𑀺𑀝𑁆𑀞𑀺𑀲𑀘𑁆𑀘’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀤𑁆𑀯𑀻𑀲𑀼 𑀯𑀺𑀓𑀧𑁆𑀧𑁂𑀲𑀽𑀢𑀺 𑀪𑀸𑀯𑀓𑀢𑁆𑀢𑀼𑀲𑀸𑀥𑀦𑀯𑀲𑁂𑀦 𑀤𑁆𑀯𑀻𑀲𑀼 𑀯𑀺𑀓𑀧𑁆𑀧𑁂𑀲𑀼. ‘‘𑀦𑀺𑀤𑁆𑀤𑀸𑀦’’𑀦𑁆𑀢𑀺 𑀉𑀧𑀬𑁄𑀕𑀯𑀲𑁂𑀦𑁂𑀯 𑀅𑀢𑁆𑀣𑁄.

𑀲𑀻𑀮𑀫𑁂𑀯 ‘‘𑀲𑁄𑀭𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀲𑀼𑀝𑁆𑀞𑀼 𑀑𑀭𑀢𑀲𑁆𑀲 𑀓𑀫𑁆𑀫’’𑀦𑁆𑀢𑀺 𑀓𑀢𑁆𑀯𑀸. 𑀲𑀗𑁆𑀔𑀸𑀭𑀤𑀼𑀓𑁆𑀔𑀸𑀤𑀻𑀦𑀁 𑀅𑀪𑀸𑀯𑀢𑁄 𑀲𑀼𑀦𑁆𑀤𑀭𑀪𑀸𑀯𑀢𑁄 𑀲𑀼𑀦𑁆𑀤𑀭𑁂 𑀦𑀺𑀩𑁆𑀩𑀸𑀦𑁂 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀭𑀢𑀢𑁆𑀢𑀸 𑀲𑀼𑀭𑀢𑁄, 𑀅𑀭𑀳𑀸. 𑀢𑀲𑁆𑀲 𑀪𑀸𑀯𑁄 𑀲𑁄𑀭𑀘𑁆𑀘𑀁, 𑀅𑀭𑀳𑀢𑁆𑀢𑀁. 𑀅𑀧𑁆𑀧𑀫𑁄𑀘𑀦𑀫𑁂𑀯 𑀅𑀘𑁆𑀘𑀦𑁆𑀢𑀸𑀬 𑀧𑀫𑁄𑀘𑀦𑀁 𑀦 𑀳𑁄𑀢𑀺.

𑀬𑀤𑀕𑁆𑀕𑁂𑀦 𑀯𑀺𑀧𑀲𑁆𑀲𑀦𑀸𑀬 𑀧𑀜𑁆𑀜𑀸𑀬 𑀢𑀁𑀲𑀳𑀕𑀢𑀯𑀻𑀭𑀺𑀬𑀲𑁆𑀲 𑀘 𑀦𑀗𑁆𑀕𑀮𑀥𑁄𑀭𑀬𑁆𑀳𑀢𑀸, 𑀢𑀣𑀸𑀧𑀯𑀢𑁆𑀢𑀓𑀼𑀲𑀮𑀪𑀸𑀯𑀦𑀸𑀬 𑀘 𑀓𑀲𑀺𑀪𑀸𑀯𑁄 𑀘, 𑀢𑀤𑀕𑁆𑀕𑁂𑀦 𑀢𑀢𑁄 𑀧𑀼𑀭𑁂𑀢𑀭𑀁 𑀧𑀯𑀢𑁆𑀢𑀧𑀜𑁆𑀜𑀸𑀯𑀻𑀭𑀺𑀬𑀧𑀸𑀭𑀫𑀻𑀦𑀁 𑀦𑀗𑁆𑀕𑀮𑀥𑁄𑀭𑀬𑁆𑀳𑀢𑀸, 𑀢𑀣𑀸𑀧𑀯𑀢𑁆𑀢𑀓𑀼𑀲𑀮𑀪𑀸𑀯𑀦𑀸𑀬 𑀘 𑀓𑀲𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀥𑀼𑀭𑀁 𑀯𑀳𑀢𑀻𑀢𑀺 𑀥𑁄𑀭𑀬𑁆𑀳𑀁. 𑀬𑀣𑀸𑀯𑀼𑀢𑁆𑀢𑀁 𑀖𑀦𑀦𑁆𑀢𑀺 𑀅𑀲𑁆𑀫𑀺𑀫𑀸𑀦𑀸𑀤𑀺𑀪𑁂𑀤𑀁 𑀖𑀦𑀁. 𑀯𑀳𑀺𑀢𑀩𑁆𑀩𑀸 𑀆𑀤𑀺𑀪𑀽𑀢𑀸 𑀥𑀼𑀭𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀥𑀼𑀭𑀸, 𑀧𑀼𑀭𑀺𑀫𑀥𑀼𑀭𑀯𑀸𑀳𑀓𑀸. 𑀢𑀁𑀫𑀽𑀮𑀓𑀸 𑀅𑀧𑀭𑀁 𑀥𑀼𑀭𑀁 𑀯𑀳𑀦𑁆𑀢𑀸 𑀥𑁄𑀭𑀬𑁆𑀳𑀸. 𑀥𑀼𑀭𑀸 𑀘 𑀥𑁄𑀭𑀬𑁆𑀳𑀸 𑀘 𑀥𑀼𑀭𑀥𑁄𑀭𑀬𑁆𑀳𑀁 𑀏𑀓𑀢𑁆𑀢𑀯𑀲𑁂𑀦. 𑀯𑀳𑀦𑁆𑀢𑀦𑁆𑀢𑀺 𑀓𑀲𑀦𑁂𑀦 𑀧𑀯𑀢𑁆𑀢𑀦𑁆𑀢𑀁.

𑀓𑀸𑀫𑀬𑁄𑀕𑀸𑀤𑀻𑀳𑀺 𑀬𑁄𑀕𑁂𑀳𑀺 𑀔𑁂𑀫𑀢𑁆𑀢𑀸 𑀅𑀦𑀼𑀧𑀤𑁆𑀤𑀯𑀢𑁆𑀢𑀸. 𑀢𑀁 𑀦𑀺𑀩𑁆𑀩𑀸𑀦𑀁 𑀅𑀥𑀺𑀓𑀺𑀘𑁆𑀘 𑀉𑀤𑁆𑀤𑀺𑀲𑁆𑀲. 𑀯𑀸𑀳𑀻𑀬𑀢𑀺 𑀯𑀺𑀧𑀲𑁆𑀲𑀦𑀸𑀬 𑀲𑀳𑀕𑀢𑀁. 𑀅𑀪𑀺𑀫𑀼𑀔𑀁 𑀯𑀸𑀳𑀻𑀬𑀢𑀺 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦𑀁. 𑀔𑁂𑀢𑁆𑀢𑀓𑁄𑀝𑀺𑀦𑁆𑀢𑀺 𑀔𑁂𑀢𑁆𑀢𑀫𑀭𑀺𑀬𑀸𑀤𑀁. 𑀤𑀺𑀝𑁆𑀞𑁂𑀓𑀝𑁆𑀞𑁂𑀢𑀺 𑀤𑀺𑀝𑁆𑀞𑀺𑀬𑀸 𑀲𑀳𑀚𑀸𑀢𑁂𑀓𑀝𑁆𑀞𑁂 𑀧𑀳𑀸𑀦𑁂𑀓𑀝𑁆𑀞𑁂 𑀘. 𑀑𑀴𑀸𑀭𑀺𑀓𑁂𑀢𑀺 𑀉𑀧𑀭𑀺𑀫𑀕𑁆𑀕𑀯𑀚𑁆𑀛𑁂 𑀉𑀧𑀸𑀤𑀸𑀬 𑀯𑀼𑀢𑁆𑀢𑀁, 𑀅𑀜𑁆𑀜𑀣𑀸 𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑀸𑀧𑀺 𑀤𑀼𑀢𑀺𑀬𑀫𑀕𑁆𑀕𑀯𑀚𑁆𑀛𑁂𑀳𑀺 𑀑𑀴𑀸𑀭𑀺𑀓𑀸𑀢𑀺. 𑀅𑀡𑀼𑀲𑀳𑀕𑀢𑁂𑀢𑀺 𑀅𑀡𑀼𑀪𑀽𑀢𑁂. 𑀇𑀤𑀁 𑀳𑁂𑀝𑁆𑀞𑀺𑀫𑀫𑀕𑁆𑀕𑀯𑀚𑁆𑀛𑁂 𑀉𑀧𑀸𑀤𑀸𑀬 𑀯𑀼𑀢𑁆𑀢𑀁. 𑀲𑀩𑁆𑀩𑀓𑀺𑀮𑁂𑀲𑁂 𑀅𑀯𑀲𑀺𑀝𑁆𑀞𑀲𑀩𑁆𑀩𑀓𑀺𑀮𑁂𑀲𑁂 𑀧𑀚𑀳𑀦𑁆𑀢𑀁 𑀅𑀦𑀺𑀯𑀢𑁆𑀢𑀦𑁆𑀢𑀁 𑀕𑀘𑁆𑀙𑀢𑀺 𑀧𑀼𑀦 𑀧𑀳𑀸𑀢𑀩𑁆𑀩𑀢𑀸𑀬 𑀅𑀪𑀸𑀯𑀢𑁄. 𑀅𑀦𑀺𑀯𑀢𑁆𑀢𑀦𑁆𑀢𑀦𑁆𑀢𑀺 𑀦 𑀦𑀺𑀯𑀢𑁆𑀢𑀦𑁆𑀢𑀁, 𑀬𑀣𑀸 𑀦𑀺𑀯𑀢𑁆𑀢𑀦𑀁 𑀦 ¶ 𑀳𑁄𑀢𑀺, 𑀏𑀯𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀦𑀺𑀯𑀢𑁆𑀢𑀦𑀭𑀳𑀺𑀢’’𑀦𑁆𑀢𑀺𑀆𑀤𑀺. 𑀏𑀢𑀁 𑀧𑀦 𑀢𑀯 𑀥𑀼𑀭𑀥𑁄𑀭𑀬𑁆𑀳𑀁.

𑀏𑀯𑀫𑁂𑀲𑀸 𑀓𑀲𑀻𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀘𑁆𑀘𑀸𑀫𑀲𑀦𑀁. 𑀢𑁂𑀦𑀸𑀳 ‘‘𑀦𑀺𑀕𑀫𑀦𑀁 𑀓𑀭𑁄𑀦𑁆𑀢𑁄’’𑀢𑀺. 𑀯𑀼𑀢𑁆𑀢𑀲𑁆𑀲𑁂𑀯 𑀳𑀺 𑀅𑀢𑁆𑀣𑀲𑁆𑀲 𑀧𑀼𑀦 𑀯𑀘𑀦𑀁. 𑀧𑀜𑁆𑀜𑀸𑀦𑀗𑁆𑀕𑀮𑁂𑀦 𑀲𑀢𑀺𑀨𑀸𑀮𑀁 𑀆𑀓𑁄𑀝𑁂𑀢𑁆𑀯𑀸𑀢𑀺 𑀧𑀜𑁆𑀜𑀸𑀲𑀗𑁆𑀔𑀸𑀢𑁂𑀦 𑀦𑀗𑁆𑀕𑀮𑁂𑀦 𑀲𑀤𑁆𑀥𑀺𑀁 𑀲𑀢𑀺𑀨𑀸𑀮𑀲𑁆𑀲 𑀏𑀓𑀸𑀩𑀤𑁆𑀥𑀪𑀸𑀯𑀓𑀭𑀡𑁂𑀦 𑀆𑀓𑁄𑀝𑁂𑀢𑁆𑀯𑀸. 𑀓𑀝𑁆𑀞𑀸𑀢𑀺 𑀏𑀢𑁆𑀣 ‘‘𑀓𑀲𑀻’’𑀢𑀺 𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁 ‘‘𑀓𑀝𑁆𑀞𑀸 𑀓𑀲𑀻’’𑀢𑀺. 𑀓𑀫𑁆𑀫𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀓𑀲𑀺𑀓𑀫𑁆𑀫𑀲𑁆𑀲 𑀧𑀭𑀺𑀬𑁄𑀲𑀸𑀦𑀪𑀽𑀢𑀁. 𑀬𑀤𑀺𑀧𑀺 𑀧𑀼𑀩𑁆𑀩𑁂 ‘‘𑀧𑀜𑁆𑀜𑀸 𑀫𑁂 𑀬𑀼𑀕𑀦𑀗𑁆𑀕𑀮’’𑀦𑁆𑀢𑀺𑀆𑀤𑀺𑀦𑀸 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀯𑀲𑁂𑀦𑀸𑀬𑀁 𑀅𑀫𑀢𑀧𑁆𑀨𑀮𑀸 𑀓𑀲𑀺 𑀤𑀲𑁆𑀲𑀺𑀢𑀸, 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀧𑀦 𑀪𑀕𑀯𑀢𑁄 𑀤𑁂𑀲𑀦𑀸 𑀲𑀩𑁆𑀩𑀲𑁆𑀲𑀧𑀺 𑀲𑀢𑁆𑀢𑀦𑀺𑀓𑀸𑀬𑀲𑁆𑀲 𑀲𑀸𑀥𑀸𑀭𑀡𑀸 𑀏𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀸 𑀔𑁄 𑀧𑀦𑁂𑀲𑀸’’𑀢𑀺𑀆𑀤𑀺𑀫𑀸𑀳.

𑀤𑀺𑀯𑀲𑁂𑀬𑁂𑀯𑀸𑀢𑀺 ¶ 𑀢𑀁𑀤𑀺𑀯𑀲𑁂 𑀏𑀯. 𑀆𑀤𑀺𑀫𑀸𑀳𑀸𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀓𑀣𑀸𑀧𑀭𑀺𑀬𑁄𑀲𑀸𑀦𑁂 𑀧𑀸𑀞𑀧𑀤𑁂𑀲𑁄 𑀕𑀳𑀺𑀢𑁄𑀢𑀺 𑀢𑀤𑀜𑁆𑀜𑀁 ‘‘𑀏𑀯𑀁 𑀯𑀼𑀢𑁆𑀢𑁂’’𑀢𑀺𑀆𑀤𑀺𑀧𑀸𑀞𑀁 𑀲𑀦𑁆𑀥𑀸𑀬 ‘‘𑀢𑀢𑁄 𑀧𑀭𑀜𑁆𑀘𑀸’’𑀢𑀺 𑀆𑀳.

𑀓𑀲𑀺𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀤𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁮. 𑀏𑀢𑀁 𑀯𑀼𑀢𑁆𑀢𑀦𑁆𑀢𑀺 ‘‘𑀑𑀤𑀦𑁂𑀦 𑀧𑀽𑀭𑁂𑀲𑀻’’𑀢𑀺 𑀏𑀢𑀁 𑀯𑀘𑀦𑀁 𑀯𑀼𑀢𑁆𑀢𑀁. ‘‘𑀕𑀳𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀸𑀳𑁄𑀲𑀻𑀢𑀺 𑀪𑀕𑀯𑀢𑁄 𑀅𑀥𑀺𑀝𑁆𑀞𑀸𑀦𑀩𑀮𑁂𑀦𑀸’’𑀢𑀺 𑀯𑀤𑀦𑁆𑀢𑀺. 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀯𑀺𑀦𑁂𑀢𑀼𑀓𑀸𑀫𑀢𑀸𑀬 𑀓𑀺𑀭 𑀪𑀕𑀯𑀸 𑀢𑀣𑀸 𑀅𑀓𑀸𑀲𑀺.

𑀉𑀧𑀸𑀭𑀫𑁆𑀪𑀪𑀬𑁂𑀦𑀸𑀢𑀺 𑀧𑀭𑀽𑀧𑀯𑀸𑀤𑀪𑀬𑁂𑀦. 𑀅𑀯𑀢𑁆𑀯𑀸𑀯 𑀦𑀺𑀯𑀢𑁆𑀢𑁄 ‘‘𑀅𑀩𑁆𑀪𑀸𑀕𑀢𑁄𑀧𑀺 𑀧𑀸𑀲𑀡𑁆𑀟𑁄 𑀯𑀸𑀘𑀸𑀫𑀢𑁆𑀢𑁂𑀦𑀧𑀺 𑀦 𑀧𑀽𑀚𑁂𑀢𑀩𑁆𑀩𑁄’’𑀢𑀺 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑁂 𑀯𑀼𑀢𑁆𑀢𑀢𑁆𑀢𑀸. 𑀧𑀓𑁆𑀓𑀦𑁆𑀢𑁄𑀢𑀺 𑀩𑁆𑀭𑀸𑀳𑁆𑀫𑀡𑀲𑁆𑀲 𑀥𑀫𑁆𑀫𑀁 𑀅𑀯𑀢𑁆𑀯𑀸 𑀧𑀓𑁆𑀓𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦 𑀢𑀸𑀯 𑀜𑀸𑀡𑀁 𑀧𑀭𑀺𑀧𑀓𑁆𑀓𑀦𑁆𑀢𑀺. 𑀏𑀢𑀁 𑀯𑀘𑀦𑀁…𑀧𑁂… 𑀫𑀕𑀫𑀸𑀲𑀺 ‘‘𑀧𑀼𑀦𑀧𑁆𑀧𑀼𑀦𑀜𑁆𑀘𑁂𑀯 𑀯𑀧𑀦𑁆𑀢𑀺 𑀩𑀻𑀚’’𑀦𑁆𑀢𑀺𑀆𑀤𑀺𑀦𑀸 ¶ 𑀥𑀫𑁆𑀫𑀁 𑀓𑀣𑁂𑀢𑀼𑀁 𑀅𑀯𑀲𑁆𑀲𑀁 𑀆𑀓𑀗𑁆𑀔𑀦𑁆𑀢𑁄. 𑀧𑀓𑀸𑀭𑀢𑁄 𑀓𑀲𑁆𑀲𑀢𑀻𑀢𑀺 𑀧𑀓𑀝𑁆𑀞𑀓𑁄, 𑀭𑀲𑀢𑀡𑁆𑀳𑀸𑀬 𑀧𑀓𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀭𑀲𑀕𑀺𑀤𑁆𑀥𑁄’’𑀢𑀺.

‘‘𑀧𑀼𑀦𑀧𑁆𑀧𑀼𑀦𑀜𑁆𑀘𑁂𑀯 𑀯𑀧𑀦𑁆𑀢𑀺 𑀩𑀻𑀚’’𑀦𑁆𑀢𑀺 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀩𑀻𑀚𑀦𑁆𑀢𑀺 𑀘 𑀇𑀢𑀺-𑀲𑀤𑁆𑀤𑁄 𑀦𑀺𑀤𑀲𑁆𑀲𑀦𑀢𑁆𑀣𑁄 𑀯𑀸. 𑀢𑁂𑀦 𑀅𑀯𑀬𑀯𑁂𑀦 𑀲𑀫𑀼𑀤𑀸𑀬𑀁 𑀦𑀺𑀤𑀲𑁆𑀲𑁂𑀢𑀺. 𑀑𑀲𑀓𑁆𑀓𑀲𑀻𑀢𑀺 𑀲𑀗𑁆𑀓𑁄𑀘𑀲𑀺. 𑀯𑀼𑀢𑁆𑀢𑀦𑁆𑀢𑀺 𑀯𑀧𑀦𑀁 𑀓𑀢𑀁. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀮𑀫𑁂𑀢𑁆𑀢𑀸𑀯𑀢𑀸’’𑀢𑀺. ‘‘𑀯𑀲𑁆𑀲𑀺𑀢𑁆𑀯𑀸’’𑀢𑀺 𑀯𑀼𑀝𑁆𑀞𑀺𑀁 𑀧𑀯𑀢𑁆𑀢𑁂𑀢𑁆𑀯𑀸.

𑀤𑁂𑀲𑀦𑀸…𑀧𑁂… 𑀤𑀲𑁆𑀲𑁂𑀢𑀺 𑀩𑁆𑀭𑀸𑀳𑁆𑀫𑀡𑁂𑀦 𑀯𑀼𑀢𑁆𑀢𑀁 𑀅𑀬𑀼𑀢𑁆𑀢𑀯𑀘𑀦𑀁 𑀧𑀭𑀺𑀯𑀝𑁆𑀝𑁂𑀦𑁆𑀢𑁄𑀧𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀪𑀺𑀓𑁆𑀔𑀸𑀘𑀭𑀺𑀬𑀸 𑀦𑀸𑀫 𑀪𑀺𑀓𑁆𑀔𑀽𑀦𑀁 𑀓𑀸𑀬𑀕𑀢𑀸 𑀯𑀼𑀢𑁆𑀢𑀻𑀢𑀺. 𑀔𑀻𑀭𑀁 𑀳𑀢𑁆𑀣𑁂𑀦 𑀦𑀬𑀦𑁆𑀢𑀻𑀢𑀺 𑀯𑀸 𑀔𑀻𑀭𑀦𑀺𑀓𑀸. 𑀓𑀺𑀮𑀫𑀢𑀻𑀢𑀺 𑀢𑀁𑀢𑀁𑀓𑀺𑀘𑁆𑀘𑀓𑀭𑀡𑀯𑀲𑁂𑀦 𑀔𑀺𑀚𑁆𑀚𑀢𑀺. 𑀨𑀦𑁆𑀤𑀢𑀻𑀢𑀺 𑀅𑀦𑀢𑁆𑀣𑀲𑀫𑀸𑀬𑁄𑀕𑀯𑀲𑁂𑀦 𑀯𑀺𑀧𑁆𑀨𑀦𑁆𑀤𑀢𑀺. 𑀅𑀧𑀼𑀦𑀩𑁆𑀪𑀯𑀸𑀬𑀸𑀢𑀺 𑀆𑀬𑀢𑀺𑀁 𑀅𑀦𑀼𑀧𑁆𑀧𑀢𑁆𑀢𑀺𑀬𑀸. 𑀫𑀕𑁆𑀕𑁄 𑀦𑀸𑀫𑀸𑀢𑀺 𑀉𑀧𑀸𑀬𑁄 𑀦𑀸𑀫 𑀦𑀺𑀩𑁆𑀩𑀸𑀦𑀁, 𑀢𑀲𑁆𑀫𑀺𑀁 𑀮𑀤𑁆𑀥𑁂 𑀧𑀼𑀦𑀩𑁆𑀪𑀯𑀸𑀪𑀸𑀯𑀢𑁄. ‘‘𑀧𑀼𑀦𑀧𑁆𑀧𑀼𑀦’’𑀦𑁆𑀢𑀺 𑀯𑀘𑀦𑀁 𑀉𑀧𑀸𑀤𑀸𑀬 𑀩𑀻𑀚𑀯𑀧𑀦𑀸𑀤𑀬𑁄 𑀧𑀼𑀦𑀧𑁆𑀧𑀼𑀦𑀥𑀫𑁆𑀫𑀸 𑀦𑀸𑀫 𑀚𑀸𑀢𑀸𑀢𑀺 𑀆𑀳 ‘‘𑀲𑁄𑀴𑀲 𑀧𑀼𑀦𑀧𑁆𑀧𑀼𑀦𑀥𑀫𑁆𑀫𑁂 𑀤𑁂𑀲𑁂𑀦𑁆𑀢𑁂𑀦𑀸’’𑀢𑀺.