📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂

𑀦𑀺𑀤𑀸𑀦𑀯𑀕𑁆𑀕-𑀅𑀝𑁆𑀞𑀓𑀣𑀸

𑁧. 𑀦𑀺𑀤𑀸𑀦𑀲𑀁𑀬𑀼𑀢𑁆𑀢𑀁

𑁧. 𑀩𑀼𑀤𑁆𑀥𑀯𑀕𑁆𑀕𑁄

𑁧. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺 𑁋 𑀦𑀺𑀤𑀸𑀦𑀯𑀕𑁆𑀕𑁂 𑀧𑀞𑀫𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀼𑀢𑁆𑀢𑀁. 𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀸 𑁋 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺, 𑀏𑀢𑁆𑀣 𑀢𑀢𑁆𑀭𑀸𑀢𑀺 𑀤𑁂𑀲𑀓𑀸𑀮𑀧𑀭𑀺𑀤𑀻𑀧𑀦𑀁. 𑀢𑀜𑁆𑀳𑀺 ‘‘𑀬𑀁 𑀲𑀫𑀬𑀁 𑀯𑀺𑀳𑀭𑀢𑀺, 𑀢𑀢𑁆𑀭 𑀲𑀫𑀬𑁂, 𑀬𑀲𑁆𑀫𑀺𑀜𑁆𑀘 𑀚𑁂𑀢𑀯𑀦𑁂 𑀯𑀺𑀳𑀭𑀢𑀺, 𑀢𑀢𑁆𑀭 𑀚𑁂𑀢𑀯𑀦𑁂’’𑀢𑀺 𑀤𑀻𑀧𑁂𑀢𑀺. 𑀪𑀸𑀲𑀺𑀢𑀩𑁆𑀩𑀬𑀼𑀢𑁆𑀢𑁂 𑀯𑀸 𑀤𑁂𑀲𑀓𑀸𑀮𑁂 𑀤𑀻𑀧𑁂𑀢𑀺. 𑀦 𑀳𑀺 𑀪𑀕𑀯𑀸 𑀅𑀬𑀼𑀢𑁆𑀢𑁂 𑀤𑁂𑀲𑁂 𑀓𑀸𑀮𑁂 𑀘 𑀥𑀫𑁆𑀫𑀁 𑀪𑀸𑀲𑀢𑀺. ‘‘𑀅𑀓𑀸𑀮𑁄 𑀔𑁄 𑀢𑀸𑀯 𑀩𑀸𑀳𑀺𑀬𑀸’’𑀢𑀺𑀆𑀤𑀺 (𑀉𑀤𑀸. 𑁧𑁦) 𑀘𑁂𑀢𑁆𑀣 𑀲𑀸𑀥𑀓𑀁. 𑀔𑁄𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂, 𑀅𑀯𑀥𑀸𑀭𑀡𑁂 𑀆𑀤𑀺𑀓𑀸𑀮𑀢𑁆𑀣𑁂 𑀯𑀸 𑀦𑀺𑀧𑀸𑀢𑁄. 𑀪𑀕𑀯𑀸𑀢𑀺 𑀮𑁄𑀓𑀕𑀭𑀼𑀤𑀻𑀧𑀦𑀁. 𑀪𑀺𑀓𑁆𑀔𑀽𑀢𑀺 𑀓𑀣𑀸𑀲𑀯𑀦𑀬𑀼𑀢𑁆𑀢𑀧𑀼𑀕𑁆𑀕𑀮𑀯𑀘𑀦𑀁. 𑀅𑀧𑀺𑀘𑁂𑀢𑁆𑀣 ‘‘𑀪𑀺𑀓𑁆𑀔𑀓𑁄𑀢𑀺 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀽𑀧𑀕𑀢𑁄𑀢𑀺 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁫; 𑀯𑀺𑀪. 𑁫𑁧𑁦) 𑀦𑀬𑁂𑀦 𑀯𑀘𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀫𑀦𑁆𑀢𑁂𑀲𑀻𑀢𑀺 𑀆𑀮𑀧𑀺, 𑀅𑀪𑀸𑀲𑀺, 𑀲𑀫𑁆𑀩𑁄𑀥𑁂𑀲𑀺, 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀅𑀜𑁆𑀜𑀢𑁆𑀭 𑀧𑀦 𑀜𑀸𑀧𑀦𑁂𑀧𑀺 𑀳𑁄𑀢𑀺. 𑀬𑀣𑀸𑀳 𑁋 ‘‘𑀆𑀫𑀦𑁆𑀢𑀬𑀸𑀫𑀺 𑀯𑁄, 𑀪𑀺𑀓𑁆𑀔𑀯𑁂, 𑀧𑀝𑀺𑀯𑁂𑀤𑀬𑀸𑀫𑀺 𑀯𑁄, 𑀪𑀺𑀓𑁆𑀔𑀯𑁂’’𑀢𑀺. 𑀧𑀓𑁆𑀓𑁄𑀲𑀦𑁂𑀧𑀺. 𑀬𑀣𑀸𑀳 𑁋 ‘‘𑀏𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀫𑀫 𑀯𑀘𑀦𑁂𑀦 𑀲𑀸𑀭𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀳𑀻’’𑀢𑀺 (𑀅. 𑀦𑀺. 𑁯.𑁧𑁧). 𑀪𑀺𑀓𑁆𑀔𑀯𑁄𑀢𑀺 𑀆𑀫𑀦𑁆𑀢𑀦𑀸𑀓𑀸𑀭𑀤𑀻𑀧𑀦𑀁. 𑀢𑀜𑁆𑀘 𑀪𑀺𑀓𑁆𑀔𑀦𑀲𑀻𑀮𑀢𑀸𑀤𑀺𑀕𑀼𑀡𑀬𑁄𑀕𑀲𑀺𑀤𑁆𑀥𑀢𑁆𑀢𑀸 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀦𑀲𑀻𑀮𑀢𑀸𑀕𑀼𑀡𑀬𑀼𑀢𑁆𑀢𑁄𑀧𑀺 𑀳𑀺 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀦𑀥𑀫𑁆𑀫𑀢𑀸𑀕𑀼𑀡𑀬𑀼𑀢𑁆𑀢𑁄𑀧𑀺 𑀪𑀺𑀓𑁆𑀔𑀦𑁂 𑀲𑀸𑀥𑀼𑀓𑀸𑀭𑀺𑀢𑀸𑀕𑀼𑀡𑀬𑀼𑀢𑁆𑀢𑁄𑀧𑀻𑀢𑀺 𑀲𑀤𑁆𑀤𑀯𑀺𑀤𑀽 𑀫𑀜𑁆𑀜𑀦𑁆𑀢𑀺. 𑀢𑁂𑀦 𑀘 𑀢𑁂𑀲𑀁 𑀪𑀺𑀓𑁆𑀔𑀦𑀲𑀻𑀮𑀢𑀸𑀤𑀺𑀕𑀼𑀡𑀬𑁄𑀕𑀲𑀺𑀤𑁆𑀥𑁂𑀦 𑀯𑀘𑀦𑁂𑀦 𑀳𑀻𑀦𑀸𑀥𑀺𑀓𑀚𑀦𑀲𑁂𑀯𑀺𑀢𑀯𑀼𑀢𑁆𑀢𑀺𑀁 𑀧𑀓𑀸𑀲𑁂𑀦𑁆𑀢𑁄 𑀉𑀤𑁆𑀥𑀢𑀤𑀻𑀦𑀪𑀸𑀯𑀦𑀺𑀕𑁆𑀕𑀳𑀁 𑀓𑀭𑁄𑀢𑀺. ‘‘𑀪𑀺𑀓𑁆𑀔𑀯𑁄’’𑀢𑀺 𑀇𑀫𑀺𑀦𑀸 𑀘 𑀓𑀭𑀼𑀡𑀸𑀯𑀺𑀧𑁆𑀨𑀸𑀭𑀲𑁄𑀫𑁆𑀫𑀳𑀤𑀬𑀦𑀬𑀦𑀦𑀺𑀧𑀸𑀢𑀧𑀼𑀩𑁆𑀩𑀗𑁆𑀕𑀫𑁂𑀦 𑀯𑀘𑀦𑁂𑀦 𑀢𑁂 𑀅𑀢𑁆𑀢𑀦𑁄 𑀅𑀪𑀺𑀫𑀼𑀔𑁂 𑀓𑀭𑁄𑀦𑁆𑀢𑁄 𑀢𑁂𑀦𑁂𑀯 𑀓𑀣𑁂𑀢𑀼𑀓𑀫𑁆𑀬𑀢𑀸𑀤𑀻𑀧𑀓𑁂𑀦 𑀦𑁂𑀲𑀁 𑀯𑀘𑀦𑁂𑀦 𑀲𑁄𑀢𑀼𑀓𑀫𑁆𑀬𑀢𑀁 𑀚𑀦𑁂𑀢𑀺, 𑀢𑁂𑀦𑁂𑀯 𑀘 𑀲𑀫𑁆𑀩𑁄𑀥𑀦𑀢𑁆𑀣𑁂𑀦 𑀲𑀸𑀥𑀼𑀓𑀁 𑀫𑀦𑀲𑀺𑀓𑀸𑀭𑁂𑀧𑀺 𑀦𑀺𑀬𑁄𑀚𑁂𑀢𑀺. 𑀲𑀸𑀥𑀼𑀓𑀁 𑀫𑀦𑀲𑀺𑀓𑀸𑀭𑀸𑀬𑀢𑁆𑀢𑀸 𑀳𑀺 𑀲𑀸𑀲𑀦𑀲𑀫𑁆𑀧𑀢𑁆𑀢𑀺.

𑀅𑀧𑀭𑁂𑀲𑀼𑀧𑀺 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀓𑀲𑁆𑀫𑀸 𑀪𑀺𑀓𑁆𑀔𑀽𑀬𑁂𑀯 𑀆𑀫𑀦𑁆𑀢𑁂𑀲𑀻𑀢𑀺 𑀘𑁂? 𑀚𑁂𑀝𑁆𑀞𑀲𑁂𑀝𑁆𑀞𑀸𑀲𑀦𑁆𑀦𑀲𑀤𑀸𑀲𑀦𑁆𑀦𑀺𑀳𑀺𑀢𑀪𑀸𑀯𑀢𑁄. 𑀲𑀩𑁆𑀩𑀧𑀭𑀺𑀲𑀲𑀸𑀥𑀸𑀭𑀡𑀸 𑀳𑀺 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸, 𑀧𑀭𑀺𑀲𑀸𑀬 𑀚𑁂𑀝𑁆𑀞𑀸 𑀪𑀺𑀓𑁆𑀔𑀽 𑀧𑀞𑀫𑀁 𑀉𑀧𑁆𑀧𑀦𑁆𑀦𑀢𑁆𑀢𑀸, 𑀲𑁂𑀝𑁆𑀞𑀸 𑀅𑀦𑀕𑀸𑀭𑀺𑀬𑀪𑀸𑀯𑀁 𑀆𑀤𑀺𑀁 𑀓𑀢𑁆𑀯𑀸 𑀲𑀢𑁆𑀣𑀼𑀘𑀭𑀺𑀬𑀸𑀦𑀼𑀯𑀺𑀥𑀸𑀬𑀓𑀢𑁆𑀢𑀸 𑀲𑀓𑀮𑀲𑀸𑀲𑀦𑀧𑀝𑀺𑀕𑁆𑀕𑀸𑀳𑀓𑀢𑁆𑀢𑀸 𑀘, 𑀆𑀲𑀦𑁆𑀦𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑁂𑀲𑀼 𑀲𑀢𑁆𑀣𑀼𑀲𑀦𑁆𑀢𑀺𑀓𑀢𑁆𑀢𑀸, 𑀲𑀤𑀸𑀲𑀦𑁆𑀦𑀺𑀳𑀺𑀢𑀸 𑀲𑀢𑁆𑀣𑀼𑀲𑀦𑁆𑀢𑀺𑀓𑀸𑀯𑀘𑀭𑀢𑁆𑀢𑀸𑀢𑀺. 𑀅𑀧𑀺𑀘 𑀢𑁂 𑀥𑀫𑁆𑀫𑀤𑁂𑀲𑀦𑀸𑀬 𑀪𑀸𑀚𑀦𑀁 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀢𑁆𑀢𑀺𑀲𑀩𑁆𑀪𑀸𑀯𑀢𑁄. 𑀯𑀺𑀲𑁂𑀲𑀢𑁄 𑀘 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽𑀬𑁂𑀯 𑀲𑀦𑁆𑀥𑀸𑀬 𑀅𑀬𑀁 𑀤𑁂𑀲𑀦𑀸𑀧𑀻𑀢𑀺 𑀏𑀯𑀁 𑀆𑀫𑀦𑁆𑀢𑁂𑀲𑀺.

𑀓𑀺𑀫𑀢𑁆𑀣𑀁 𑀧𑀦 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀧𑀞𑀫𑀁 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺, 𑀦 𑀥𑀫𑁆𑀫𑀫𑁂𑀯 𑀤𑁂𑀲𑁂𑀲𑀻𑀢𑀺? 𑀲𑀢𑀺𑀚𑀦𑀦𑀢𑁆𑀣𑀁. 𑀪𑀺𑀓𑁆𑀔𑀽 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑀸𑀧𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸𑀧𑀺 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀸𑀧𑀺 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑀸𑀧𑀺 𑀦𑀺𑀲𑀺𑀦𑁆𑀦𑀸 𑀳𑁄𑀦𑁆𑀢𑀺. 𑀢𑁂 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂 ‘‘𑀅𑀬𑀁 𑀤𑁂𑀲𑀦𑀸 𑀓𑀺𑀁𑀦𑀺𑀤𑀸𑀦𑀸 𑀓𑀺𑀁𑀧𑀘𑁆𑀘𑀬𑀸 𑀓𑀢𑀫𑀸𑀬 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀤𑁂𑀲𑀺𑀢𑀸’’𑀢𑀺 𑀲𑀮𑁆𑀮𑀓𑁆𑀔𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀤𑀼𑀕𑁆𑀕𑀳𑀺𑀢𑀁 𑀯𑀸 𑀕𑀡𑁆𑀳𑁂𑀬𑁆𑀬𑀼𑀁, 𑀦 𑀯𑀸 𑀕𑀡𑁆𑀳𑁂𑀬𑁆𑀬𑀼𑀁, 𑀢𑁂𑀦 𑀦𑁂𑀲𑀁 𑀲𑀢𑀺𑀚𑀦𑀦𑀢𑁆𑀣𑀁 𑀪𑀕𑀯𑀸 𑀧𑀞𑀫𑀁 𑀆𑀫𑀦𑁆𑀢𑁂𑀢𑁆𑀯𑀸 𑀧𑀘𑁆𑀙𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺.

𑀪𑀤𑀦𑁆𑀢𑁂𑀢𑀺 𑀕𑀸𑀭𑀯𑀯𑀘𑀦𑀫𑁂𑀢𑀁, 𑀲𑀢𑁆𑀣𑀼𑀦𑁄 𑀧𑀝𑀺𑀯𑀘𑀦𑀤𑀸𑀦𑀁 𑀯𑀸. 𑀅𑀧𑀺𑀘𑁂𑀢𑁆𑀣 ‘‘𑀪𑀺𑀓𑁆𑀔𑀯𑁄’’𑀢𑀺 𑀯𑀤𑀫𑀸𑀦𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀮𑀧𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀯𑀤𑀫𑀸𑀦𑀸 𑀢𑁂 𑀪𑀕𑀯𑀦𑁆𑀢𑀁 𑀧𑀘𑁆𑀘𑀸𑀮𑀧𑀦𑁆𑀢𑀺. 𑀢𑀣𑀸 𑀳𑀺 ‘‘𑀪𑀺𑀓𑁆𑀔𑀯𑁄’’𑀢𑀺 𑀪𑀕𑀯𑀸 𑀆𑀪𑀸𑀲𑀢𑀺, ‘‘𑀪𑀤𑀦𑁆𑀢𑁂’’𑀢𑀺 𑀧𑀘𑁆𑀘𑀸𑀪𑀸𑀲𑀦𑁆𑀢𑀺. ‘‘𑀪𑀺𑀓𑁆𑀔𑀯𑁄’’𑀢𑀺 𑀧𑀝𑀺𑀯𑀘𑀦𑀁 𑀤𑀸𑀧𑁂𑀢𑀺, ‘‘𑀪𑀤𑀦𑁆𑀢𑁂’’𑀢𑀺 𑀧𑀝𑀺𑀯𑀘𑀦𑀁 𑀤𑁂𑀦𑁆𑀢𑀺. 𑀢𑁂 𑀪𑀺𑀓𑁆𑀔𑀽𑀢𑀺 𑀬𑁂 𑀪𑀕𑀯𑀸 𑀆𑀫𑀦𑁆𑀢𑁂𑀲𑀺, 𑀢𑁂. 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀦𑁆𑀢𑀺 𑀪𑀕𑀯𑀢𑁄 𑀆𑀫𑀦𑁆𑀢𑀦𑀁 𑀧𑀢𑀺𑀅𑀲𑁆𑀲𑁄𑀲𑀼𑀁, 𑀅𑀪𑀺𑀫𑀼𑀔𑀸 𑀳𑀼𑀢𑁆𑀯𑀸 𑀲𑀼𑀡𑀺𑀁𑀲𑀼 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼 𑀧𑀝𑀺𑀕𑁆𑀕𑀳𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀪𑀕𑀯𑀸 𑀏𑀢𑀤𑀯𑁄𑀘𑀸𑀢𑀺, 𑀪𑀕𑀯𑀸 𑀏𑀢𑀁 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀲𑀓𑀮𑀲𑀼𑀢𑁆𑀢𑀁 𑀅𑀯𑁄𑀘. 𑀏𑀢𑁆𑀢𑀸𑀯𑀢𑀸 𑀬𑀁 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀲𑁆𑀲 𑀩𑀼𑀤𑁆𑀥𑀸𑀦𑀁 𑀤𑁂𑀲𑀦𑀸𑀜𑀸𑀡𑀕𑀫𑁆𑀪𑀻𑀭𑀪𑀸𑀯𑀲𑀁𑀲𑀽𑀘𑀓𑀲𑁆𑀲 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀼𑀔𑀸𑀯𑀕𑀸𑀳𑀡𑀢𑁆𑀣𑀁 𑀓𑀸𑀮𑀤𑁂𑀲𑀤𑁂𑀲𑀓𑀧𑀭𑀺𑀲𑀸𑀧𑀤𑁂𑀲𑀧𑁆𑀧𑀝𑀺𑀫𑀡𑁆𑀟𑀺𑀢𑀁 𑀦𑀺𑀤𑀸𑀦𑀁 𑀪𑀸𑀲𑀺𑀢𑀁, 𑀢𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀇𑀤𑀸𑀦𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀯𑁄𑀢𑀺𑀆𑀤𑀺𑀦𑀸 𑀦𑀬𑁂𑀦 𑀪𑀕𑀯𑀢𑀸 𑀦𑀺𑀓𑁆𑀔𑀺𑀢𑁆𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀁𑀯𑀡𑁆𑀡𑀦𑀸𑀬 𑀑𑀓𑀸𑀲𑁄 𑀅𑀦𑀼𑀧𑁆𑀧𑀢𑁆𑀢𑁄. 𑀲𑀸 𑀧𑀦𑁂𑀲𑀸 𑀲𑀼𑀢𑁆𑀢𑀯𑀡𑁆𑀡𑀦𑀸 𑀬𑀲𑁆𑀫𑀸 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀁 𑀯𑀺𑀘𑀸𑀭𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀸 𑀧𑀸𑀓𑀝𑀸 𑀳𑁄𑀢𑀺, 𑀢𑀲𑁆𑀫𑀸 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀁 𑀢𑀸𑀯 𑀯𑀺𑀘𑀸𑀭𑁂𑀲𑁆𑀲𑀸𑀫. 𑀘𑀢𑁆𑀢𑀸𑀭𑁄 𑀳𑀺 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸 𑁋 𑀅𑀢𑁆𑀢𑀚𑁆𑀛𑀸𑀲𑀬𑁄, 𑀧𑀭𑀚𑁆𑀛𑀸𑀲𑀬𑁄, 𑀧𑀼𑀘𑁆𑀙𑀸𑀯𑀲𑀺𑀓𑁄, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄𑀢𑀺. 𑀢𑀢𑁆𑀣 𑀬𑀸𑀦𑀺 𑀲𑀼𑀢𑁆𑀢𑀸𑀦𑀺 𑀪𑀕𑀯𑀸 𑀧𑀭𑁂𑀳𑀺 𑀅𑀦𑀚𑁆𑀛𑀺𑀝𑁆𑀞𑁄 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂𑀦𑁂𑀯 𑀓𑀣𑁂𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀤𑀲𑀩𑀮𑀲𑀼𑀢𑁆𑀢𑀦𑁆𑀢𑀳𑀸𑀭𑀓𑁄 𑀘𑀦𑁆𑀤𑁄𑀧𑀫-𑀯𑀻𑀡𑁄𑀧𑀫-𑀲𑀫𑁆𑀫𑀧𑁆𑀧𑀥𑀸𑀦-𑀇𑀤𑁆𑀥𑀺𑀧𑀸𑀤-𑀇𑀦𑁆𑀤𑁆𑀭𑀺𑀬𑀩𑀮-𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕-𑀲𑀼𑀢𑁆𑀢𑀦𑁆𑀢𑀳𑀸𑀭𑀓𑁄𑀢𑀺 𑀏𑀯𑀫𑀸𑀤𑀻𑀦𑀺, 𑀢𑁂𑀲𑀁 𑀅𑀢𑁆𑀢𑀚𑁆𑀛𑀸𑀲𑀬𑁄 𑀦𑀺𑀓𑁆𑀔𑁂𑀧𑁄.

𑀬𑀸𑀦𑀺 𑀧𑀦 ‘‘𑀧𑀭𑀺𑀧𑀓𑁆𑀓𑀸 𑀔𑁄 𑀭𑀸𑀳𑀼𑀮𑀲𑁆𑀲 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀥𑀫𑁆𑀫𑀸. 𑀬𑀁𑀦𑀽𑀦𑀸𑀳𑀁 𑀭𑀸𑀳𑀼𑀮𑀁 𑀉𑀢𑁆𑀢𑀭𑀺𑀁 𑀆𑀲𑀯𑀸𑀦𑀁 𑀔𑀬𑁂 𑀯𑀺𑀦𑁂𑀬𑁆𑀬’’𑀦𑁆𑀢𑀺 (𑀲𑀁. 𑀦𑀺. 𑁪.𑁧𑁨𑁧; 𑀫. 𑀦𑀺. 𑁩.𑁪𑁧𑁬) 𑀏𑀯𑀁 𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑀁 𑀔𑀦𑁆𑀢𑀺𑀁 𑀦𑀺𑀚𑁆𑀛𑀸𑀦𑀓𑁆𑀔𑀫𑀁 𑀫𑀦𑀁 𑀅𑀪𑀺𑀦𑀻𑀳𑀸𑀭𑀁 𑀩𑀼𑀚𑁆𑀛𑀦𑀪𑀸𑀯𑀜𑁆𑀘 𑀅𑀧𑁂𑀓𑁆𑀔𑀺𑀢𑁆𑀯𑀸 𑀧𑀭𑀚𑁆𑀛𑀸𑀲𑀬𑀯𑀲𑁂𑀦 𑀓𑀣𑀺𑀢𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀽𑀴𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀁, 𑀫𑀳𑀸𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀁, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀁, 𑀅𑀦𑀢𑁆𑀢𑀮𑀓𑁆𑀔𑀡𑀲𑀼𑀢𑁆𑀢𑀁, 𑀆𑀲𑀻𑀯𑀺𑀲𑁄𑀧𑀫𑀲𑀼𑀢𑁆𑀢𑀁, 𑀥𑀸𑀢𑀼𑀯𑀺𑀪𑀗𑁆𑀕𑀲𑀼𑀢𑁆𑀢𑀦𑁆𑀢𑀺, 𑀏𑀯𑀫𑀸𑀤𑀻𑀦𑀺, 𑀢𑁂𑀲𑀁 𑀧𑀭𑀚𑁆𑀛𑀸𑀲𑀬𑁄 𑀦𑀺𑀓𑁆𑀔𑁂𑀧𑁄.

𑀪𑀕𑀯𑀦𑁆𑀢𑀁 𑀧𑀦 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀘𑀢𑁆𑀢𑀸𑀭𑁄 𑀯𑀡𑁆𑀡𑀸 𑀦𑀸𑀕𑀸 𑀲𑀼𑀧𑀡𑁆𑀡𑀸 𑀕𑀦𑁆𑀥𑀩𑁆𑀩𑀸 𑀅𑀲𑀼𑀭𑀸 𑀬𑀓𑁆𑀔𑀸 𑀫𑀳𑀸𑀭𑀸𑀚𑀸𑀦𑁄 𑀢𑀸𑀯𑀢𑀺𑀁𑀲𑀸𑀤𑀬𑁄 𑀤𑁂𑀯𑀸 𑀫𑀳𑀸𑀩𑁆𑀭𑀳𑁆𑀫𑀸𑀢𑀺 𑀏𑀯𑀫𑀸𑀤𑀬𑁄 ‘‘𑀩𑁄𑀚𑁆𑀛𑀗𑁆𑀕𑀸 𑀩𑁄𑀚𑁆𑀛𑀗𑁆𑀕𑀸𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀦𑁆𑀢𑀺 𑁋 (𑀲𑀁. 𑀦𑀺. 𑁫.𑁨𑁦𑁨) 𑀦𑀻𑀯𑀭𑀡𑀸 𑀦𑀻𑀯𑀭𑀡𑀸𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀦𑁆𑀢𑀺 𑁋 𑀇𑀫𑁂 𑀦𑀼 𑀔𑁄, 𑀪𑀦𑁆𑀢𑁂, 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸, 𑀓𑀺𑀁𑀲𑀽𑀥 𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁮𑁩) 𑀦𑀬𑁂𑀦 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺. 𑀏𑀯𑀁 𑀧𑀼𑀝𑁆𑀞𑁂𑀦 𑀪𑀕𑀯𑀢𑀸 𑀬𑀸𑀦𑀺 𑀓𑀣𑀺𑀢𑀸𑀦𑀺 𑀩𑁄𑀚𑁆𑀛𑀗𑁆𑀕𑀲𑀁𑀬𑀼𑀢𑁆𑀢𑀸𑀤𑀻𑀦𑀺, 𑀬𑀸𑀦𑀺 𑀯𑀸 𑀧𑀦𑀜𑁆𑀜𑀸𑀦𑀺𑀧𑀺 𑀤𑁂𑀯𑀢𑀸𑀲𑀁𑀬𑀼𑀢𑁆𑀢, 𑀫𑀸𑀭𑀲𑀁𑀬𑀼𑀢𑁆𑀢, 𑀩𑁆𑀭𑀳𑁆𑀫𑀲𑀁𑀬𑀼𑀢𑁆𑀢, 𑀲𑀓𑁆𑀓𑀧𑀜𑁆𑀳, 𑀘𑀽𑀴𑀯𑁂𑀤𑀮𑁆𑀮, 𑀫𑀳𑀸𑀯𑁂𑀤𑀮𑁆𑀮, 𑀲𑀸𑀫𑀜𑁆𑀜𑀨𑀮𑀆𑀴𑀯𑀓, 𑀲𑀽𑀘𑀺𑀮𑁄𑀫, 𑀔𑀭𑀮𑁄𑀫𑀲𑀼𑀢𑁆𑀢𑀸𑀤𑀻𑀦𑀺, 𑀢𑁂𑀲𑀁 𑀧𑀼𑀘𑁆𑀙𑀸𑀯𑀲𑀺𑀓𑁄 𑀦𑀺𑀓𑁆𑀔𑁂𑀧𑁄.

𑀬𑀸𑀦𑀺 𑀧𑀦 𑀢𑀸𑀦𑀺 𑀉𑀧𑁆𑀧𑀦𑁆𑀦𑀁 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀓𑀣𑀺𑀢𑀸𑀦𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀥𑀫𑁆𑀫𑀤𑀸𑀬𑀸𑀤𑀁. 𑀘𑀽𑀴𑀲𑀻𑀳𑀦𑀸𑀤𑀲𑀼𑀢𑁆𑀢𑀁 𑀧𑀼𑀢𑁆𑀢𑀫𑀁𑀲𑀽𑀧𑀫𑀁 𑀤𑀸𑀭𑀼𑀓𑁆𑀔𑀦𑁆𑀥𑀽𑀧𑀫𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀽𑀧𑀫𑀁 𑀨𑁂𑀡𑀧𑀺𑀡𑁆𑀟𑀽𑀧𑀫𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑀽𑀧𑀫𑀦𑁆𑀢𑀺 𑀏𑀯𑀫𑀸𑀤𑀻𑀦𑀺, 𑀢𑁂𑀲𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄 𑀦𑀺𑀓𑁆𑀔𑁂𑀧𑁄.

𑀏𑀯𑀫𑁂𑀢𑁂𑀲𑀼 𑀘𑀢𑀽𑀲𑀼 𑀦𑀺𑀓𑁆𑀔𑁂𑀧𑁂𑀲𑀼 𑀇𑀫𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀼𑀢𑁆𑀢𑀲𑁆𑀲 𑀧𑀭𑀚𑁆𑀛𑀸𑀲𑀬𑁄 𑀦𑀺𑀓𑁆𑀔𑁂𑀧𑁄. 𑀧𑀭𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦 𑀳𑀺𑀤𑀁 𑀪𑀕𑀯𑀢𑀸 𑀦𑀺𑀓𑁆𑀔𑀺𑀢𑁆𑀢𑀁. 𑀓𑀢𑀫𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦𑀸𑀢𑀺? 𑀉𑀕𑁆𑀖𑀝𑀺𑀢𑀜𑁆𑀜𑀽𑀦𑀁. 𑀘𑀢𑁆𑀢𑀸𑀭𑁄 𑀳𑀺 𑀧𑀼𑀕𑁆𑀕𑀮𑀸 𑀉𑀕𑁆𑀖𑀝𑀺𑀢𑀜𑁆𑀜𑀽 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀦𑁂𑀬𑁆𑀬𑁄 𑀧𑀤𑀧𑀭𑀫𑁄𑀢𑀺. 𑀢𑀢𑁆𑀣 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀳 𑀉𑀤𑀸𑀳𑀝𑀯𑁂𑀮𑀸𑀬 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀉𑀕𑁆𑀖𑀝𑀺𑀢𑀜𑁆𑀜𑀽. 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁂 𑀯𑀺𑀪𑀚𑀺𑀬𑀫𑀸𑀦𑁂 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀯𑀺𑀧𑀜𑁆𑀘𑀺𑀢𑀜𑁆𑀜𑀽. 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀉𑀤𑁆𑀤𑁂𑀲𑀢𑁄 𑀧𑀭𑀺𑀧𑀼𑀘𑁆𑀙𑀢𑁄 𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄, 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀢𑁄, 𑀪𑀚𑀢𑁄, 𑀧𑀬𑀺𑀭𑀼𑀧𑀸𑀲𑀢𑁄, 𑀅𑀦𑀼𑀧𑀼𑀩𑁆𑀩𑁂𑀦 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀦𑁂𑀬𑁆𑀬𑁄. 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀩𑀳𑀼𑀫𑁆𑀧𑀺 𑀲𑀼𑀡𑀢𑁄, 𑀩𑀳𑀼𑀫𑁆𑀧𑀺 𑀥𑀸𑀭𑀬𑀢𑁄, 𑀩𑀳𑀼𑀫𑁆𑀧𑀺 𑀯𑀸𑀘𑀬𑀢𑁄 𑀦 𑀢𑀸𑀬 𑀚𑀸𑀢𑀺𑀬𑀸 𑀥𑀫𑁆𑀫𑀸𑀪𑀺𑀲𑀫𑀬𑁄 𑀳𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀧𑀤𑀧𑀭𑀫𑁄. 𑀇𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀧𑀼𑀕𑁆𑀕𑀮𑁂𑀲𑀼 𑀉𑀕𑁆𑀖𑀝𑀺𑀢𑀜𑁆𑀜𑀽𑀧𑀼𑀕𑁆𑀕𑀮𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀇𑀤𑀁 𑀲𑀼𑀢𑁆𑀢𑀁 𑀦𑀺𑀓𑁆𑀔𑀺𑀢𑁆𑀢𑀁.

𑀢𑀤𑀸 𑀓𑀺𑀭 𑀧𑀜𑁆𑀘𑀲𑀢𑀸 𑀚𑀦𑀧𑀤𑀯𑀸𑀲𑀺𑀓𑀸 𑀪𑀺𑀓𑁆𑀔𑀽 𑀲𑀩𑁆𑀩𑁂𑀯 𑀏𑀓𑀘𑀭𑀸 𑀤𑁆𑀯𑀺𑀘𑀭𑀸 𑀢𑀺𑀘𑀭𑀸 𑀘𑀢𑀼𑀘𑀭𑀸 𑀧𑀜𑁆𑀘𑀘𑀭𑀸 𑀲𑀪𑀸𑀕𑀯𑀼𑀢𑁆𑀢𑀺𑀦𑁄 𑀥𑀼𑀢𑀗𑁆𑀕𑀥𑀭𑀸 𑀆𑀭𑀤𑁆𑀥𑀯𑀻𑀭𑀺𑀬𑀸 𑀬𑀼𑀢𑁆𑀢𑀬𑁄𑀕𑀸 𑀯𑀺𑀧𑀲𑁆𑀲𑀓𑀸 𑀲𑀡𑁆𑀳𑀁 𑀲𑀼𑀔𑀼𑀫𑀁 𑀲𑀼𑀜𑁆𑀜𑀢𑀁 𑀧𑀘𑁆𑀘𑀬𑀸𑀓𑀸𑀭𑀤𑁂𑀲𑀦𑀁 𑀧𑀢𑁆𑀣𑀬𑀫𑀸𑀦𑀸 𑀲𑀸𑀬𑀦𑁆𑀳𑀲𑀫𑀬𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀯𑀦𑁆𑀤𑀺𑀢𑁆𑀯𑀸, 𑀭𑀢𑁆𑀢𑀓𑀫𑁆𑀩𑀮𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀧𑀫𑀸𑀦𑀸 𑀯𑀺𑀬 𑀤𑁂𑀲𑀦𑀁 𑀧𑀘𑁆𑀘𑀸𑀲𑀻𑀲𑀫𑀸𑀦𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀢𑁂𑀲𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀪𑀕𑀯𑀸 𑀇𑀤𑀁 𑀲𑀼𑀢𑁆𑀢𑀁 𑀆𑀭𑀪𑀺. 𑀬𑀣𑀸 𑀳𑀺 𑀙𑁂𑀓𑁄 𑀘𑀺𑀢𑁆𑀢𑀓𑀸𑀭𑁄 𑀅𑀧𑀭𑀺𑀓𑀫𑁆𑀫𑀓𑀢𑀪𑀺𑀢𑁆𑀢𑀺𑀁 𑀮𑀪𑀺𑀢𑁆𑀯𑀸, 𑀦 𑀆𑀤𑀺𑀢𑁄𑀯 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀲𑀺, 𑀫𑀳𑀸𑀫𑀢𑁆𑀢𑀺𑀓𑀮𑁂𑀧𑀸𑀤𑀻𑀳𑀺 𑀧𑀦 𑀪𑀺𑀢𑁆𑀢𑀺𑀧𑀭𑀺𑀓𑀫𑁆𑀫𑀁 𑀢𑀸𑀯 𑀓𑀢𑁆𑀯𑀸, 𑀓𑀢𑀧𑀭𑀺𑀓𑀫𑁆𑀫𑀸𑀬 𑀪𑀺𑀢𑁆𑀢𑀺𑀬𑀸 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀓𑀢𑀧𑀭𑀺𑀓𑀫𑁆𑀫𑀁 𑀧𑀦 𑀪𑀺𑀢𑁆𑀢𑀺𑀁 𑀮𑀪𑀺𑀢𑁆𑀯𑀸, 𑀪𑀺𑀢𑁆𑀢𑀺𑀧𑀭𑀺𑀓𑀫𑁆𑀫𑀩𑁆𑀬𑀸𑀧𑀸𑀭𑀁 𑀅𑀓𑀢𑁆𑀯𑀸, 𑀭𑀗𑁆𑀕𑀚𑀸𑀢𑀸𑀦𑀺 𑀬𑁄𑀚𑁂𑀢𑁆𑀯𑀸, 𑀯𑀝𑁆𑀝𑀺𑀓𑀁 𑀯𑀸 𑀢𑀽𑀮𑀺𑀓𑀁 𑀯𑀸 𑀆𑀤𑀸𑀬 𑀭𑀽𑀧𑀫𑁂𑀯 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀏𑀯𑀫𑁂𑀯 𑀪𑀕𑀯𑀸 𑀅𑀓𑀢𑀸𑀪𑀺𑀦𑀺𑀯𑁂𑀲𑀁 𑀆𑀤𑀺𑀓𑀫𑁆𑀫𑀺𑀓𑀓𑀼𑀮𑀧𑀼𑀢𑁆𑀢𑀁 𑀮𑀪𑀺𑀢𑁆𑀯𑀸 𑀦𑀸𑀲𑁆𑀲 𑀆𑀤𑀺𑀢𑁄𑀯 𑀅𑀭𑀳𑀢𑁆𑀢𑀧𑀤𑀝𑁆𑀞𑀸𑀦𑀁 𑀲𑀡𑁆𑀳𑀁 𑀲𑀼𑀔𑀼𑀫𑀁 𑀲𑀼𑀜𑁆𑀜𑀢𑀁 𑀯𑀺𑀧𑀲𑁆𑀲𑀦𑀸𑀮𑀓𑁆𑀔𑀡𑀁 𑀆𑀘𑀺𑀓𑁆𑀔𑀢𑀺, 𑀲𑀻𑀮𑀲𑀫𑀸𑀥𑀺𑀓𑀫𑁆𑀫𑀲𑁆𑀲𑀓𑀢𑀸𑀤𑀺𑀝𑁆𑀞𑀺𑀲𑀫𑁆𑀧𑀤𑀸𑀬 𑀧𑀦 𑀬𑁄𑀚𑁂𑀦𑁆𑀢𑁄 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀢𑀸𑀯 𑀆𑀘𑀺𑀓𑁆𑀔𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀪𑀺𑀓𑁆𑀔𑀼, 𑀆𑀤𑀺𑀫𑁂𑀯 𑀯𑀺𑀲𑁄𑀥𑁂𑀳𑀺 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀓𑁄 𑀘𑀸𑀤𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁? 𑀲𑀻𑀮𑀜𑁆𑀘 𑀲𑀼𑀯𑀺𑀲𑀼𑀤𑁆𑀥𑀁 𑀤𑀺𑀝𑁆𑀞𑀺 𑀘 𑀉𑀚𑀼𑀓𑀸. 𑀬𑀢𑁄 𑀔𑁄 𑀢𑁂, 𑀪𑀺𑀓𑁆𑀔𑀼, 𑀲𑀻𑀮𑀜𑁆𑀘 𑀲𑀼𑀯𑀺𑀲𑀼𑀤𑁆𑀥𑀁 𑀪𑀯𑀺𑀲𑁆𑀲𑀢𑀺 𑀤𑀺𑀝𑁆𑀞𑀺 𑀘 𑀉𑀚𑀼𑀓𑀸. 𑀢𑀢𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀢𑀺𑀯𑀺𑀥𑁂𑀦 𑀪𑀸𑀯𑁂𑀬𑁆𑀬𑀸𑀲𑀺. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥 𑀢𑁆𑀯𑀁, 𑀪𑀺𑀓𑁆𑀔𑀼, 𑀅𑀚𑁆𑀛𑀢𑁆𑀢𑀁 𑀯𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀸𑀳𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀩𑀳𑀺𑀤𑁆𑀥𑀸 𑀯𑀸 𑀓𑀸𑀬𑁂…𑀧𑁂… 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀯𑀸 𑀓𑀸𑀬𑁂…𑀧𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀸𑀳𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀬𑀢𑁄 𑀔𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀏𑀯𑀁 𑀢𑀺𑀯𑀺𑀥𑁂𑀦 𑀪𑀸𑀯𑁂𑀲𑁆𑀲𑀲𑀺, 𑀢𑀢𑁄 𑀢𑀼𑀬𑁆𑀳𑀁, 𑀪𑀺𑀓𑁆𑀔𑀼, 𑀬𑀸 𑀭𑀢𑁆𑀢𑀺 𑀯𑀸 𑀤𑀺𑀯𑀲𑁄 𑀯𑀸 𑀆𑀕𑀫𑀺𑀲𑁆𑀲𑀢𑀺, 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀦𑁄 𑀧𑀭𑀺𑀳𑀸𑀦𑀻’’𑀢𑀺 (𑀲𑀁. 𑀦𑀺. 𑁫.𑁩𑁬𑁯).

𑀏𑀯𑀁 𑀆𑀤𑀺𑀓𑀫𑁆𑀫𑀺𑀓𑀓𑀼𑀮𑀧𑀼𑀢𑁆𑀢𑀲𑁆𑀲 𑀲𑀻𑀮𑀓𑀣𑀸𑀬 𑀧𑀭𑀺𑀓𑀫𑁆𑀫𑀁 𑀓𑀣𑁂𑀢𑁆𑀯𑀸, 𑀅𑀭𑀳𑀢𑁆𑀢𑀧𑀤𑀝𑁆𑀞𑀸𑀦𑀁 𑀲𑀡𑁆𑀳𑀁 𑀲𑀼𑀔𑀼𑀫𑀁 𑀲𑀼𑀜𑁆𑀜𑀢𑀁 𑀯𑀺𑀧𑀲𑁆𑀲𑀦𑀸𑀮𑀓𑁆𑀔𑀡𑀁 𑀆𑀘𑀺𑀓𑁆𑀔𑀢𑀺.

𑀧𑀭𑀺𑀲𑀼𑀤𑁆𑀥𑀲𑀻𑀮𑀁 𑀧𑀦 𑀆𑀭𑀤𑁆𑀥𑀯𑀻𑀭𑀺𑀬𑀁 𑀬𑀼𑀢𑁆𑀢𑀬𑁄𑀕𑀁 𑀯𑀺𑀧𑀲𑁆𑀲𑀓𑀁 𑀮𑀪𑀺𑀢𑁆𑀯𑀸, 𑀦𑀸𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀆𑀘𑀺𑀓𑁆𑀔𑀢𑀺, 𑀉𑀚𑀼𑀓𑀫𑁂𑀯 𑀧𑀦 𑀅𑀭𑀳𑀢𑁆𑀢𑀧𑀤𑀝𑁆𑀞𑀸𑀦𑀁 𑀲𑀡𑁆𑀳𑀁 𑀲𑀼𑀔𑀼𑀫𑀁 𑀲𑀼𑀜𑁆𑀜𑀢𑀁 𑀯𑀺𑀧𑀲𑁆𑀲𑀦𑀸𑀮𑀓𑁆𑀔𑀡𑀁 𑀆𑀘𑀺𑀓𑁆𑀔𑀢𑀺. 𑀇𑀫𑁂 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀧𑀭𑀺𑀲𑁄𑀥𑁂𑀢𑁆𑀯𑀸 𑀞𑀺𑀢𑀸 𑀲𑀼𑀥𑀦𑁆𑀢𑀲𑀼𑀯𑀡𑁆𑀡𑀲𑀤𑀺𑀲𑀸 𑀲𑀼𑀧𑀭𑀺𑀫𑀚𑁆𑀚𑀺𑀢𑀫𑀡𑀺𑀓𑁆𑀔𑀦𑁆𑀥𑀲𑀦𑁆𑀦𑀺𑀪𑀸, 𑀏𑀓𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄𑀯 𑀦𑁂𑀲𑀁 𑀅𑀦𑀸𑀕𑀢𑁄. 𑀇𑀢𑀺 𑀢𑀲𑁆𑀲𑀸𑀕𑀫𑀦𑀢𑁆𑀣𑀸𑀬 𑀲𑀢𑁆𑀣𑀸 𑀢𑁂𑀲𑀁 𑀅𑀚𑁆𑀛𑀸𑀲𑀬𑀁 𑀅𑀧𑁂𑀓𑁆𑀔𑀫𑀸𑀦𑁄 𑀇𑀤𑀁 𑀲𑀼𑀢𑁆𑀢𑀁 𑀆𑀭𑀪𑀺.

𑀢𑀢𑁆𑀣 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑁆𑀢𑀺 𑀧𑀘𑁆𑀘𑀬𑀸𑀓𑀸𑀭𑀁. 𑀧𑀘𑁆𑀘𑀬𑀸𑀓𑀸𑀭𑁄 𑀳𑀺 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀘𑁆𑀘 𑀲𑀳𑀺𑀢𑁂 𑀥𑀫𑁆𑀫𑁂 𑀉𑀧𑁆𑀧𑀸𑀤𑁂𑀢𑀺. 𑀢𑀲𑁆𑀫𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀢𑁄 𑀕𑀳𑁂𑀢𑀩𑁆𑀩𑁄.

𑀯𑁄𑀢𑀺 𑀅𑀬𑀁 𑀯𑁄-𑀲𑀤𑁆𑀤𑁄 𑀧𑀘𑁆𑀘𑀢𑁆𑀢-𑀉𑀧𑀬𑁄𑀕𑀓𑀭𑀡-𑀲𑀫𑁆𑀧𑀤𑀸𑀦-𑀲𑀸𑀫𑀺𑀯𑀘𑀦-𑀧𑀤𑀧𑀽𑀭𑀡𑁂𑀲𑀼 𑀤𑀺𑀲𑁆𑀲𑀢𑀺. ‘‘𑀓𑀘𑁆𑀘𑀺 𑀧𑀦 𑀯𑁄 𑀅𑀦𑀼𑀭𑀼𑀤𑁆𑀥𑀸 𑀲𑀫𑀕𑁆𑀕𑀸 𑀲𑀫𑁆𑀫𑁄𑀤𑀫𑀸𑀦𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁨𑁬; 𑀫𑀳𑀸𑀯. 𑁪𑁬𑁬) 𑀳𑀺 𑀧𑀘𑁆𑀘𑀢𑁆𑀢𑁂 𑀤𑀺𑀲𑁆𑀲𑀢𑀺. ‘‘𑀕𑀘𑁆𑀙𑀣, 𑀪𑀺𑀓𑁆𑀔𑀯𑁂, 𑀧𑀡𑀸𑀫𑁂𑀫𑀺 𑀯𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁫𑁭) 𑀉𑀧𑀬𑁄𑀕𑁂. ‘‘𑀦 𑀯𑁄 𑀫𑀫 𑀲𑀦𑁆𑀢𑀺𑀓𑁂 𑀯𑀢𑁆𑀣𑀩𑁆𑀩’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁫𑁭) 𑀓𑀭𑀡𑁂. ‘‘𑀯𑀦𑀧𑀢𑁆𑀣𑀧𑀭𑀺𑀬𑀸𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁯𑁦) 𑀲𑀫𑁆𑀧𑀤𑀸𑀦𑁂. ‘‘𑀲𑀩𑁆𑀩𑁂𑀲𑀁 𑀯𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑀼𑀪𑀸𑀲𑀺𑀢’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁪𑁫) 𑀲𑀸𑀫𑀺𑀯𑀘𑀦𑁂. ‘‘𑀬𑁂 𑀳𑀺 𑀯𑁄 𑀅𑀭𑀺𑀬𑀸 𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁫) 𑀧𑀤𑀧𑀽𑀭𑀡𑀫𑀢𑁆𑀢𑁂. 𑀇𑀥 𑀧𑀦𑀸𑀬𑀁 𑀲𑀫𑁆𑀧𑀤𑀸𑀦𑁂 𑀤𑀝𑁆𑀞𑀩𑁆𑀩𑁄. 𑀪𑀺𑀓𑁆𑀔𑀯𑁂𑀢𑀺 𑀧𑀢𑀺𑀲𑁆𑀲𑀯𑁂𑀦 𑀅𑀪𑀺𑀫𑀼𑀔𑀻𑀪𑀽𑀢𑀸𑀦𑀁 𑀧𑀼𑀦 𑀆𑀮𑀧𑀦𑀁. 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀤𑁂𑀲𑀦𑀸𑀧𑀝𑀺𑀚𑀸𑀦𑀦𑀁. 𑀢𑀁 𑀲𑀼𑀡𑀸𑀣𑀸𑀢𑀺 𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀢𑀁 𑀤𑁂𑀲𑀦𑀁 𑀫𑀬𑀸 𑀯𑀼𑀘𑁆𑀘𑀫𑀸𑀦𑀁 𑀲𑀼𑀡𑀸𑀣.

𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣𑀸𑀢𑀺 𑀏𑀢𑁆𑀣 𑀧𑀦 𑀲𑀸𑀥𑀼𑀓𑀁 𑀲𑀸𑀥𑀽𑀢𑀺 𑀏𑀓𑀢𑁆𑀣𑀫𑁂𑀢𑀁. 𑀅𑀬𑀜𑁆𑀘 𑀲𑀸𑀥𑀼𑀲𑀤𑁆𑀤𑁄 𑀆𑀬𑀸𑀘𑀦-𑀲𑀫𑁆𑀧𑀝𑀺𑀘𑁆𑀙𑀦-𑀲𑀫𑁆𑀧𑀳𑀁𑀲𑀦-𑀲𑀼𑀦𑁆𑀤𑀭-𑀤𑀴𑁆𑀳𑀻𑀓𑀫𑁆𑀫𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀽’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁨𑁫𑁭; 𑀲𑀁. 𑀦𑀺. 𑁪.𑁬𑁫; 𑁫.𑁩𑁮𑁧) 𑀳𑀺 𑀆𑀬𑀸𑀘𑀦𑁂 𑀤𑀺𑀲𑁆𑀲𑀢𑀺. ‘‘𑀲𑀸𑀥𑀼, 𑀪𑀦𑁆𑀢𑁂𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁮𑁬) 𑀲𑀫𑁆𑀧𑀝𑀺𑀘𑁆𑀙𑀦𑁂. ‘‘𑀲𑀸𑀥𑀼 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁪𑁯) 𑀲𑀫𑁆𑀧𑀳𑀁𑀲𑀦𑁂.

‘‘𑀲𑀸𑀥𑀼 𑀥𑀫𑁆𑀫𑀭𑀼𑀘𑀻 𑀭𑀸𑀚𑀸, 𑀲𑀸𑀥𑀼 𑀧𑀜𑁆𑀜𑀸𑀡𑀯𑀸 𑀦𑀭𑁄;

𑀲𑀸𑀥𑀼 𑀫𑀺𑀢𑁆𑀢𑀸𑀦𑀫𑀤𑁆𑀤𑀼𑀩𑁆𑀪𑁄, 𑀧𑀸𑀧𑀲𑁆𑀲 𑀅𑀓𑀭𑀡𑀁 𑀲𑀼𑀔’’𑀦𑁆𑀢𑀺. 𑁋

𑀆𑀤𑀻𑀲𑀼 (𑀚𑀸. 𑁨.𑁧𑁮.𑁧𑁦𑁧) 𑀲𑀼𑀦𑁆𑀤𑀭𑁂. ‘‘𑀢𑁂𑀦 𑀳𑀺, 𑀩𑁆𑀭𑀸𑀳𑁆𑀫𑀡, 𑀲𑀸𑀥𑀼𑀓𑀁 𑀲𑀼𑀡𑀸𑀳𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁫.𑁧𑁯𑁨) 𑀲𑀸𑀥𑀼𑀓𑀲𑀤𑁆𑀤𑁄𑀬𑁂𑀯 𑀤𑀴𑁆𑀳𑀻𑀓𑀫𑁆𑀫𑁂 𑀆𑀡𑀢𑁆𑀢𑀺𑀬𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀇𑀥 𑀧𑀦𑀸𑀬𑀁 𑀏𑀢𑁆𑀣𑁂𑀯 𑀤𑀴𑁆𑀳𑀻𑀓𑀫𑁆𑀫𑁂 𑀆𑀡𑀢𑁆𑀢𑀺𑀬𑀸 𑀘 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀲𑀼𑀦𑁆𑀤𑀭𑀢𑁆𑀣𑁂𑀧𑀺 𑀯𑀝𑁆𑀝𑀢𑀺. 𑀤𑀴𑁆𑀳𑀻𑀓𑀭𑀡𑀢𑁆𑀣𑁂𑀦 𑀳𑀺 ‘‘𑀤𑀴𑁆𑀳𑀁 𑀇𑀫𑀁 𑀥𑀫𑁆𑀫𑀁 𑀲𑀼𑀡𑀸𑀣, 𑀲𑀼𑀕𑁆𑀕𑀳𑀺𑀢𑀁 𑀕𑀡𑁆𑀳𑀦𑁆𑀢𑀸’’, 𑀆𑀡𑀢𑁆𑀢𑀺𑀅𑀢𑁆𑀣𑁂𑀦 ‘‘𑀫𑀫 𑀆𑀡𑀢𑁆𑀢𑀺𑀬𑀸 𑀲𑀼𑀡𑀸𑀣’’ 𑀲𑀼𑀦𑁆𑀤𑀭𑀢𑁆𑀣𑁂𑀦 ‘‘𑀲𑀼𑀦𑁆𑀤𑀭𑀫𑀺𑀫𑀁 𑀪𑀤𑁆𑀤𑀓𑀁 𑀥𑀫𑁆𑀫𑀁 𑀲𑀼𑀡𑀸𑀣𑀸’’𑀢𑀺 𑀏𑀢𑀁 𑀤𑀻𑀧𑀺𑀢𑀁 𑀳𑁄𑀢𑀺. 𑀫𑀦𑀲𑀺 𑀓𑀭𑁄𑀣𑀸𑀢𑀺 𑀆𑀯𑀚𑁆𑀚𑁂𑀣. 𑀲𑀫𑀦𑁆𑀦𑀸𑀳𑀭𑀣𑀸𑀢𑀺 𑀅𑀢𑁆𑀣𑁄. 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸 𑀳𑀼𑀢𑁆𑀯𑀸 𑀦𑀺𑀲𑀸𑀫𑁂𑀣, 𑀘𑀺𑀢𑁆𑀢𑁂 𑀓𑀭𑁄𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀤𑀸𑀦𑁂𑀢𑁆𑀣 𑀢𑀁 𑀲𑀼𑀡𑀸𑀣𑀸𑀢𑀺 𑀲𑁄𑀢𑀺𑀦𑁆𑀤𑁆𑀭𑀺𑀬𑀯𑀺𑀓𑁆𑀔𑁂𑀧𑀦𑀺𑀯𑀸𑀭𑀡𑀫𑁂𑀢𑀁. 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣𑀸𑀢𑀺 𑀫𑀦𑀲𑀺𑀓𑀸𑀭𑁂 𑀤𑀴𑁆𑀳𑀻𑀓𑀫𑁆𑀫𑀦𑀺𑀬𑁄𑀚𑀦𑁂𑀦 𑀫𑀦𑀺𑀦𑁆𑀤𑁆𑀭𑀺𑀬𑀯𑀺𑀓𑁆𑀔𑁂𑀧𑀦𑀺𑀯𑀸𑀭𑀡𑀁. 𑀧𑀼𑀭𑀺𑀫𑀜𑁆𑀘𑁂𑀢𑁆𑀣 𑀩𑁆𑀬𑀜𑁆𑀚𑀦𑀯𑀺𑀧𑀮𑁆𑀮𑀸𑀲𑀕𑀸𑀳𑀦𑀺𑀯𑀸𑀭𑀡𑀁, 𑀧𑀘𑁆𑀙𑀺𑀫𑀁 𑀅𑀢𑁆𑀣𑀯𑀺𑀧𑀮𑁆𑀮𑀸𑀲𑀕𑀸𑀳𑀦𑀺𑀯𑀸𑀭𑀡𑀁. 𑀧𑀼𑀭𑀺𑀫𑁂𑀦 𑀘 𑀥𑀫𑁆𑀫𑀲𑁆𑀲𑀯𑀦𑁂 𑀦𑀺𑀬𑁄𑀚𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀲𑀼𑀢𑀸𑀦𑀁 𑀥𑀫𑁆𑀫𑀸𑀦𑀁 𑀥𑀸𑀭𑀡𑀽𑀧𑀧𑀭𑀺𑀓𑁆𑀔𑀸𑀲𑀼. 𑀧𑀼𑀭𑀺𑀫𑁂𑀦 𑀘 ‘‘𑀲𑀩𑁆𑀬𑀜𑁆𑀚𑀦𑁄 𑀅𑀬𑀁 𑀥𑀫𑁆𑀫𑁄, 𑀢𑀲𑁆𑀫𑀸 𑀲𑀯𑀦𑀻𑀬𑁄’’𑀢𑀺 𑀤𑀻𑀧𑁂𑀢𑀺, 𑀧𑀘𑁆𑀙𑀺𑀫𑁂𑀦 ‘‘𑀲𑀸𑀢𑁆𑀣𑁄, 𑀢𑀲𑁆𑀫𑀸 𑀫𑀦𑀲𑀺 𑀓𑀸𑀢𑀩𑁆𑀩𑁄’’𑀢𑀺. 𑀲𑀸𑀥𑀼𑀓𑀧𑀤𑀁 𑀯𑀸 𑀉𑀪𑀬𑀧𑀤𑁂𑀳𑀺 𑀬𑁄𑀚𑁂𑀢𑁆𑀯𑀸, ‘‘𑀬𑀲𑁆𑀫𑀸 𑀅𑀬𑀁 𑀥𑀫𑁆𑀫𑁄 𑀥𑀫𑁆𑀫𑀕𑀫𑁆𑀪𑀻𑀭𑁄 𑀘 𑀤𑁂𑀲𑀦𑀸𑀕𑀫𑁆𑀪𑀻𑀭𑁄 𑀘, 𑀢𑀲𑁆𑀫𑀸 𑀲𑀼𑀡𑀸𑀣 𑀲𑀸𑀥𑀼𑀓𑀁. 𑀬𑀲𑁆𑀫𑀸 𑀅𑀢𑁆𑀣𑀕𑀫𑁆𑀪𑀻𑀭𑁄 𑀘 𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑁄 𑀘, 𑀢𑀲𑁆𑀫𑀸 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣𑀸’’𑀢𑀺 𑀏𑀯𑀁 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀪𑀸𑀲𑀺𑀲𑁆𑀲𑀸𑀫𑀻𑀢𑀺 𑀤𑁂𑀲𑁂𑀲𑁆𑀲𑀸𑀫𑀺. ‘‘𑀢𑀁 𑀲𑀼𑀡𑀸𑀣𑀸’’𑀢𑀺 𑀏𑀢𑁆𑀣 𑀧𑀝𑀺𑀜𑁆𑀜𑀸𑀢𑀁 𑀤𑁂𑀲𑀦𑀁 𑀲𑀁𑀔𑀺𑀢𑁆𑀢𑀢𑁄𑀯 𑀦 𑀤𑁂𑀲𑁂𑀲𑁆𑀲𑀸𑀫𑀺, 𑀅𑀧𑀺𑀘 𑀔𑁄 𑀯𑀺𑀢𑁆𑀣𑀸𑀭𑀢𑁄𑀧𑀺 𑀦𑀁 𑀪𑀸𑀲𑀺𑀲𑁆𑀲𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀯𑀸𑀘𑀓𑀸𑀦𑀺 𑀳𑀺 𑀏𑀢𑀸𑀦𑀺 𑀧𑀤𑀸𑀦𑀺. 𑀬𑀣𑀸𑀳 𑀯𑀗𑁆𑀕𑀻𑀲𑀢𑁆𑀣𑁂𑀭𑁄 𑁋

‘‘𑀲𑀁𑀔𑀺𑀢𑁆𑀢𑁂𑀦𑀧𑀺 𑀤𑁂𑀲𑁂𑀢𑀺, 𑀯𑀺𑀢𑁆𑀣𑀸𑀭𑁂𑀦𑀧𑀺 𑀪𑀸𑀲𑀢𑀺;

𑀲𑀸𑀴𑀺𑀓𑀸𑀬𑀺𑀯 𑀦𑀺𑀕𑁆𑀖𑁄𑀲𑁄, 𑀧𑀝𑀺𑀪𑀸𑀦𑀁 𑀉𑀤𑀻𑀭𑀬𑀻’’𑀢𑀺. (𑀲𑀁. 𑀦𑀺. 𑁧.𑁨𑁧𑁪; 𑀣𑁂𑀭𑀕𑀸. 𑁧𑁨𑁪𑁧);

𑀏𑀯𑀁 𑀯𑀼𑀢𑁆𑀢𑁂 𑀉𑀲𑁆𑀲𑀸𑀳𑀚𑀸𑀢𑀸 𑀳𑀼𑀢𑁆𑀯𑀸 𑀏𑀯𑀁, 𑀪𑀦𑁆𑀢𑁂𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁 𑀲𑀢𑁆𑀣𑀼 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼, 𑀧𑀝𑀺𑀕𑁆𑀕𑀳𑁂𑀲𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀣 𑀦𑁂𑀲𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 𑀏𑀢𑀁 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 ‘‘𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄’’𑀢𑀺𑀆𑀤𑀺𑀁 𑀲𑀓𑀮𑀁 𑀲𑀼𑀢𑁆𑀢𑀁 𑀅𑀯𑁄𑀘. 𑀢𑀢𑁆𑀣 𑀓𑀢𑀫𑁄 𑀘, 𑀪𑀺𑀓𑁆𑀔𑀯𑁂, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀧𑀜𑁆𑀘𑀯𑀺𑀥𑀸 𑀳𑀺 𑀧𑀼𑀘𑁆𑀙𑀸 𑀅𑀤𑀺𑀝𑁆𑀞𑀚𑁄𑀢𑀦𑀸𑀧𑀼𑀘𑁆𑀙𑀸 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸𑀧𑀼𑀘𑁆𑀙𑀸 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀧𑀼𑀘𑁆𑀙𑀸 𑀅𑀦𑀼𑀫𑀢𑀺𑀧𑀼𑀘𑁆𑀙𑀸 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀢𑀺, 𑀢𑀸𑀲𑀁 𑀇𑀤𑀁 𑀦𑀸𑀦𑀢𑁆𑀢𑀁 𑁋

𑀓𑀢𑀫𑀸 𑀅𑀤𑀺𑀝𑁆𑀞𑀚𑁄𑀢𑀦𑀸 𑀧𑀼𑀘𑁆𑀙𑀸 (𑀫𑀳𑀸𑀦𑀺. 𑁧𑁫𑁦; 𑀘𑀽𑀴𑀦𑀺. 𑀧𑀼𑀡𑁆𑀡𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁧𑁨)? 𑀧𑀓𑀢𑀺𑀬𑀸 𑀮𑀓𑁆𑀔𑀡𑀁 𑀅𑀜𑁆𑀜𑀸𑀢𑀁 𑀳𑁄𑀢𑀺 𑀅𑀤𑀺𑀝𑁆𑀞𑀁 𑀅𑀢𑀼𑀮𑀺𑀢𑀁 𑀅𑀢𑀻𑀭𑀺𑀢𑀁 𑀅𑀯𑀺𑀪𑀽𑀢𑀁 𑀅𑀯𑀺𑀪𑀸𑀯𑀺𑀢𑀁. 𑀢𑀲𑁆𑀲 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬 𑀢𑀼𑀮𑀦𑀸𑀬 𑀢𑀻𑀭𑀡𑀸𑀬 𑀯𑀺𑀪𑀽𑀢𑀸𑀬 𑀯𑀺𑀪𑀸𑀯𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀅𑀬𑀁 𑀅𑀤𑀺𑀝𑁆𑀞𑀚𑁄𑀢𑀦𑀸𑀧𑀼𑀘𑁆𑀙𑀸.

𑀓𑀢𑀫𑀸 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸𑀧𑀼𑀘𑁆𑀙𑀸? 𑀧𑀓𑀢𑀺𑀬𑀸 𑀮𑀓𑁆𑀔𑀡𑀁 𑀜𑀸𑀢𑀁 𑀳𑁄𑀢𑀺 𑀤𑀺𑀝𑁆𑀞𑀁 𑀢𑀼𑀮𑀺𑀢𑀁 𑀢𑀻𑀭𑀺𑀢𑀁 𑀯𑀺𑀪𑀽𑀢𑀁 𑀯𑀺𑀪𑀸𑀯𑀺𑀢𑀁. 𑀲𑁄 𑀅𑀜𑁆𑀜𑁂𑀳𑀺 𑀧𑀡𑁆𑀟𑀺𑀢𑁂𑀳𑀺 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀅𑀬𑀁 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸𑀧𑀼𑀘𑁆𑀙𑀸.

𑀓𑀢𑀫𑀸 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀧𑀼𑀘𑁆𑀙𑀸? 𑀧𑀓𑀢𑀺𑀬𑀸 𑀲𑀁𑀲𑀬𑀧𑀓𑁆𑀔𑀦𑁆𑀤𑁄 𑀳𑁄𑀢𑀺 𑀯𑀺𑀫𑀢𑀺𑀧𑀓𑁆𑀔𑀦𑁆𑀤𑁄 𑀤𑁆𑀯𑁂𑀴𑁆𑀳𑀓𑀚𑀸𑀢𑁄 𑁋 ‘‘𑀏𑀯𑀁 𑀦𑀼 𑀔𑁄, 𑀦 𑀦𑀼 𑀔𑁄, 𑀓𑀣𑀁 𑀦𑀼 𑀔𑁄’’𑀢𑀺, 𑀲𑁄 𑀯𑀺𑀫𑀢𑀺𑀘𑁆𑀙𑁂𑀤𑀦𑀢𑁆𑀣𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀅𑀬𑀁 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀧𑀼𑀘𑁆𑀙𑀸.

𑀓𑀢𑀫𑀸 𑀅𑀦𑀼𑀫𑀢𑀺𑀧𑀼𑀘𑁆𑀙𑀸? 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀅𑀦𑀼𑀫𑀢𑀺𑀬𑀸 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑁋 ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸’’𑀢𑀺, 𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸𑀢𑀺, 𑀤𑀼𑀓𑁆𑀔𑀁, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 𑁋 ‘‘𑀏𑀢𑀁 𑀫𑀫 𑀏𑀲𑁄𑀳𑀫𑀲𑁆𑀫𑀺 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺, 𑀦𑁄 𑀳𑁂𑀢𑀁 𑀪𑀦𑁆𑀢𑁂𑀢𑀺 (𑀲𑀁. 𑀦𑀺. 𑁩.𑁭𑁯). 𑀅𑀬𑀁 𑀅𑀦𑀼𑀫𑀢𑀺𑀧𑀼𑀘𑁆𑀙𑀸.

𑀓𑀢𑀫𑀸 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸? 𑀪𑀕𑀯𑀸 𑀪𑀺𑀓𑁆𑀔𑀽𑀦𑀁 𑀓𑀣𑁂𑀢𑀼𑀓𑀫𑁆𑀬𑀢𑀸𑀬 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺 𑁋 ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀲𑀢𑀺𑀧𑀝𑁆𑀞𑀸𑀦𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄’’𑀢𑀺? 𑀅𑀬𑀁 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀢𑀺.

𑀢𑀢𑁆𑀣 𑀩𑀼𑀤𑁆𑀥𑀸𑀦𑀁 𑀧𑀼𑀭𑀺𑀫𑀸 𑀢𑀺𑀲𑁆𑀲𑁄 𑀧𑀼𑀘𑁆𑀙𑀸 𑀦𑀢𑁆𑀣𑀺. 𑀓𑀲𑁆𑀫𑀸? 𑀩𑀼𑀤𑁆𑀥𑀸𑀦𑀜𑁆𑀳𑀺 𑀢𑀻𑀲𑀼 𑀅𑀤𑁆𑀥𑀸𑀲𑀼 𑀓𑀺𑀜𑁆𑀘𑀺 𑀲𑀗𑁆𑀔𑀢𑀁 𑀅𑀤𑁆𑀥𑀸𑀯𑀺𑀫𑀼𑀢𑁆𑀢𑀁 𑀯𑀸 𑀅𑀲𑀗𑁆𑀔𑀢𑀁 𑀅𑀤𑀺𑀝𑁆𑀞𑀁 𑀅𑀚𑁄𑀢𑀺𑀢𑀁 𑀅𑀢𑀼𑀮𑀺𑀢𑀁 𑀅𑀢𑀻𑀭𑀺𑀢𑀁 𑀅𑀯𑀺𑀪𑀽𑀢𑀁 𑀅𑀯𑀺𑀪𑀸𑀯𑀺𑀢𑀁 𑀦𑀸𑀫 𑀦𑀢𑁆𑀣𑀺. 𑀢𑁂𑀦 𑀦𑁂𑀲𑀁 𑀅𑀤𑀺𑀝𑁆𑀞𑀚𑁄𑀢𑀦𑀸𑀧𑀼𑀘𑁆𑀙𑀸 𑀦𑀢𑁆𑀣𑀺. 𑀬𑀁 𑀧𑀦 𑀪𑀕𑀯𑀢𑀸 𑀅𑀢𑁆𑀢𑀦𑁄 𑀜𑀸𑀡𑁂𑀦 𑀧𑀝𑀺𑀯𑀺𑀤𑁆𑀥𑀁, 𑀢𑀲𑁆𑀲 𑀅𑀜𑁆𑀜𑁂𑀦 𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀤𑁂𑀯𑁂𑀦 𑀯𑀸 𑀫𑀸𑀭𑁂𑀦 𑀯𑀸 𑀩𑁆𑀭𑀳𑁆𑀫𑀼𑀦𑀸 𑀯𑀸 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀢𑁂𑀦𑀲𑁆𑀲 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸𑀧𑀼𑀘𑁆𑀙𑀸 𑀦𑀢𑁆𑀣𑀺. 𑀬𑀲𑁆𑀫𑀸 𑀧𑀦𑁂𑀲 𑀅𑀓𑀣𑀁𑀓𑀣𑀻 𑀢𑀺𑀡𑁆𑀡𑀯𑀺𑀘𑀺𑀓𑀺𑀘𑁆𑀙𑁄 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀳𑀢𑀲𑀁𑀲𑀬𑁄. 𑀢𑁂𑀦𑀲𑁆𑀲 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀧𑀼𑀘𑁆𑀙𑀸 𑀦𑀢𑁆𑀣𑀺. 𑀇𑀢𑀭𑀸 𑀧𑀦 𑀤𑁆𑀯𑁂 𑀧𑀼𑀘𑁆𑀙𑀸 𑀪𑀕𑀯𑀢𑁄 𑀅𑀢𑁆𑀣𑀺. 𑀢𑀸𑀲𑀼 𑀅𑀬𑀁 𑀓𑀣𑁂𑀢𑀼𑀓𑀫𑁆𑀬𑀢𑀸 𑀧𑀼𑀘𑁆𑀙𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀤𑀸𑀦𑀺 𑀢𑀸𑀯 𑀧𑀼𑀘𑁆𑀙𑀸𑀬 𑀧𑀼𑀝𑁆𑀞𑀁 𑀧𑀘𑁆𑀘𑀬𑀸𑀓𑀸𑀭𑀁 𑀯𑀺𑀪𑀚𑀦𑁆𑀢𑁄 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 𑀬𑀣𑀸 𑀦𑀸𑀫 ‘‘𑀧𑀺𑀢𑀭𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀆𑀭𑀤𑁆𑀥𑁄 ‘‘𑀢𑀺𑀲𑁆𑀲𑀲𑁆𑀲 𑀧𑀺𑀢𑀸 𑀲𑁄𑀡𑀲𑁆𑀲 𑀧𑀺𑀢𑀸’’𑀢𑀺 𑀧𑀞𑀫𑀢𑀭𑀁 𑀧𑀼𑀢𑁆𑀢𑀫𑁆𑀧𑀺 𑀓𑀣𑁂𑀢𑀺, 𑀏𑀯𑀫𑁂𑀯 𑀪𑀕𑀯𑀸 𑀧𑀘𑁆𑀘𑀬𑀁 𑀓𑀣𑁂𑀢𑀼𑀁 𑀆𑀭𑀤𑁆𑀥𑁄 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀗𑁆𑀔𑀸𑀭𑀸𑀤𑀻𑀦𑀁 𑀧𑀘𑁆𑀘𑀬𑁂 𑀅𑀯𑀺𑀚𑁆𑀚𑀸𑀤𑀺𑀥𑀫𑁆𑀫𑁂 𑀓𑀣𑁂𑀦𑁆𑀢𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀫𑁆𑀧𑀺 𑀓𑀣𑁂𑀲𑀺. 𑀆𑀳𑀸𑀭𑀯𑀕𑁆𑀕𑀲𑁆𑀲 𑀧𑀦 𑀧𑀭𑀺𑀬𑁄𑀲𑀸𑀦𑁂 ‘‘𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀜𑁆𑀘 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂 𑀘 𑀥𑀫𑁆𑀫𑁂’’𑀢𑀺 (𑀲𑀁. 𑀦𑀺. 𑁨.𑁨𑁦) 𑀉𑀪𑀬𑀁 𑀆𑀭𑀪𑀺𑀢𑁆𑀯𑀸 𑀉𑀪𑀬𑀫𑁆𑀧𑀺 𑀓𑀣𑁂𑀲𑀺. 𑀇𑀤𑀸𑀦𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺𑀆𑀤𑀻𑀲𑀼 𑀧𑀦 𑀅𑀯𑀺𑀚𑁆𑀚𑀸 𑀘 𑀲𑀸 𑀧𑀘𑁆𑀘𑀬𑁄 𑀘𑀸𑀢𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑁄. 𑀢𑀲𑁆𑀫𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀲𑀫𑁆𑀪𑀯𑀦𑁆𑀢𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁂𑀦 𑀧𑀦 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀸 𑀅𑀦𑀼𑀮𑁄𑀫𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀓𑀣𑀺𑀢𑀸, 𑀢𑀲𑁆𑀫𑀸 𑀲𑀸 𑀢𑀢𑁆𑀣 𑀓𑀣𑀺𑀢𑀯𑀲𑁂𑀦𑁂𑀯 𑀕𑀳𑁂𑀢𑀩𑁆𑀩𑀸.

𑀧𑀝𑀺𑀮𑁄𑀫𑀓𑀣𑀸𑀬𑀁 𑀧𑀦 𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯𑀸𑀢𑀺 𑀅𑀯𑀺𑀚𑁆𑀚𑀸𑀬 𑀢𑀼 𑀏𑀯. 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸𑀢𑀺 𑀯𑀺𑀭𑀸𑀕𑀲𑀗𑁆𑀔𑀸𑀢𑁂𑀦 𑀫𑀕𑁆𑀕𑁂𑀦 𑀅𑀲𑁂𑀲𑀦𑀺𑀭𑁄𑀥𑀸. 𑀲𑀗𑁆𑀔𑀸𑀭𑀦𑀺𑀭𑁄𑀥𑁄𑀢𑀺 𑀲𑀗𑁆𑀔𑀸𑀭𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁄 𑀳𑁄𑀢𑀺. 𑀏𑀯𑀁𑀦𑀺𑀭𑁄𑀥𑀸𑀦𑀁 𑀧𑀦 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀸𑀤𑀻𑀦𑀜𑁆𑀘 𑀦𑀺𑀭𑁄𑀥𑀸 𑀦𑀸𑀫𑀭𑀽𑀧𑀸𑀤𑀻𑀦𑀺 𑀦𑀺𑀭𑀼𑀤𑁆𑀥𑀸𑀦𑀺𑀬𑁂𑀯 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀲𑀗𑁆𑀔𑀸𑀭𑀦𑀺𑀭𑁄𑀥𑀸 𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁄𑀢𑀺𑀆𑀤𑀻𑀦𑀺 𑀯𑀢𑁆𑀯𑀸, 𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑁄 𑀳𑁄𑀢𑀻𑀢𑀺 𑀆𑀳. 𑀢𑀢𑁆𑀣 𑀓𑁂𑀯𑀮𑀲𑁆𑀲𑀸𑀢𑀺 𑀲𑀓𑀮𑀲𑁆𑀲, 𑀲𑀼𑀤𑁆𑀥𑀲𑁆𑀲 𑀯𑀸, 𑀲𑀢𑁆𑀢𑀯𑀺𑀭𑀳𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲𑀸𑀢𑀺 𑀤𑀼𑀓𑁆𑀔𑀭𑀸𑀲𑀺𑀲𑁆𑀲. 𑀦𑀺𑀭𑁄𑀥𑁄 𑀳𑁄𑀢𑀻𑀢𑀺 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺. 𑀇𑀢𑀺 𑀪𑀕𑀯𑀸 𑀅𑀦𑀼𑀮𑁄𑀫𑀢𑁄 𑀤𑁆𑀯𑀸𑀤𑀲𑀳𑀺 𑀧𑀤𑁂𑀳𑀺 𑀯𑀝𑁆𑀝𑀓𑀣𑀁 𑀓𑀣𑁂𑀢𑁆𑀯𑀸 𑀢𑀫𑁂𑀯 𑀯𑀝𑁆𑀝𑀁 𑀯𑀺𑀦𑀺𑀯𑀝𑁆𑀝𑁂𑀢𑁆𑀯𑀸 𑀧𑀝𑀺𑀮𑁄𑀫𑀢𑁄 𑀤𑁆𑀯𑀸𑀤𑀲𑀳𑀺 𑀧𑀤𑁂𑀳𑀺 𑀯𑀺𑀯𑀝𑁆𑀝𑀁 𑀓𑀣𑁂𑀦𑁆𑀢𑁄 𑀅𑀭𑀳𑀢𑁆𑀢𑁂𑀦 𑀤𑁂𑀲𑀦𑀸𑀬 𑀓𑀽𑀝𑀁 𑀕𑀡𑁆𑀳𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀢𑁂 𑀧𑀜𑁆𑀘𑀲𑀢𑀸 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀸 𑀉𑀕𑁆𑀖𑀝𑀺𑀢𑀜𑁆𑀜𑀽𑀧𑀼𑀕𑁆𑀕𑀮𑀸 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑁆𑀨𑀼𑀝𑁆𑀞𑀸𑀦𑀺 𑀧𑀭𑀺𑀧𑀸𑀓𑀕𑀢𑀸𑀦𑀺 𑀧𑀤𑀼𑀫𑀸𑀦𑀺 𑀯𑀺𑀬 𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀺𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑁂 𑀧𑀢𑀺𑀝𑁆𑀞𑀳𑀺𑀁𑀲𑀼.

𑀇𑀤𑀫𑀯𑁄𑀘 𑀪𑀕𑀯𑀸𑀢𑀺 𑀇𑀤𑀁 𑀯𑀝𑁆𑀝𑀯𑀺𑀯𑀝𑁆𑀝𑀯𑀲𑁂𑀦 𑀲𑀓𑀮𑀲𑀼𑀢𑁆𑀢𑀁 𑀪𑀕𑀯𑀸 𑀅𑀯𑁄𑀘. 𑀅𑀢𑁆𑀢𑀫𑀦𑀸 𑀢𑁂 𑀪𑀺𑀓𑁆𑀔𑀽𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑀸 𑀢𑁂 𑀧𑀜𑁆𑀘𑀲𑀢𑀸 𑀔𑀻𑀡𑀸𑀲𑀯𑀸 𑀪𑀺𑀓𑁆𑀔𑀽. 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀼𑀦𑁆𑀢𑀺 𑀓𑀭𑀯𑀻𑀓𑀭𑀼𑀢𑀫𑀜𑁆𑀚𑀼𑀦𑀸 𑀓𑀡𑁆𑀡𑀲𑀼𑀔𑁂𑀦 𑀧𑀡𑁆𑀟𑀺𑀢𑀚𑀦𑀳𑀤𑀬𑀸𑀦𑀁 𑀅𑀫𑀢𑀸𑀪𑀺𑀲𑁂𑀓𑀲𑀤𑀺𑀲𑁂𑀦 𑀩𑁆𑀭𑀳𑁆𑀫𑀲𑁆𑀲𑀭𑁂𑀦 𑀪𑀸𑀲𑀢𑁄 𑀪𑀕𑀯𑀢𑁄 𑀯𑀘𑀦𑀁 𑀅𑀪𑀺𑀦𑀦𑁆𑀤𑀺𑀁𑀲𑀼, 𑀅𑀦𑀼𑀫𑁄𑀤𑀺𑀁𑀲𑀼 𑀘𑁂𑀯 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼 𑀘𑀸𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀲𑀼𑀪𑀸𑀲𑀺𑀢𑀁 𑀲𑀼𑀮𑀧𑀺𑀢𑀁, 𑀲𑀸𑀥𑀼 𑀲𑀸𑀥𑀽𑀢𑀺 𑀢𑀸𑀤𑀺𑀦𑁄;

𑀅𑀦𑀼𑀫𑁄𑀤𑀫𑀸𑀦𑀸 𑀲𑀺𑀭𑀲𑀸, 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼 𑀪𑀺𑀓𑁆𑀔𑀯𑁄’’𑀢𑀺.

𑀧𑀞𑀫𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁨. 𑀤𑀼𑀢𑀺𑀬𑁂𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀧𑀞𑀫𑀁 𑀉𑀕𑁆𑀖𑀝𑀺𑀢𑀜𑁆𑀜𑀽𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦 𑀲𑀗𑁆𑀔𑁂𑀧𑀢𑁄 𑀤𑀲𑁆𑀲𑀺𑀢𑀁, 𑀇𑀤𑀁 𑀯𑀺𑀧𑀜𑁆𑀘𑀺𑀢𑀜𑁆𑀜𑀽𑀦𑀁 𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀲𑀼𑀢𑁆𑀢𑁂 𑀘𑀢𑀲𑁆𑀲𑁄 𑀯𑀮𑁆𑀮𑀺𑀳𑀸𑀭𑀓𑀧𑀼𑀭𑀺𑀲𑀽𑀧𑀫𑀸 𑀯𑀢𑁆𑀢𑀩𑁆𑀩𑀸, 𑀢𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀸 𑀏𑀯. 𑀬𑀣𑀸 𑀳𑀺 𑀯𑀮𑁆𑀮𑀺𑀳𑀸𑀭𑀓𑁄 𑀧𑀼𑀭𑀺𑀲𑁄 𑀯𑀮𑁆𑀮𑀺𑀬𑀸 𑀅𑀕𑁆𑀕𑀁 𑀤𑀺𑀲𑁆𑀯𑀸 𑀢𑀤𑀦𑀼𑀲𑀸𑀭𑁂𑀦 𑀫𑀽𑀮𑀁 𑀧𑀭𑀺𑀬𑁂𑀲𑀦𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀯𑀮𑁆𑀮𑀺𑀁 𑀫𑀽𑀮𑁂 𑀙𑁂𑀢𑁆𑀯𑀸 𑀆𑀤𑀸𑀬 𑀓𑀫𑁆𑀫𑁂 𑀉𑀧𑀦𑁂𑀬𑁆𑀬, 𑀏𑀯𑀁 𑀪𑀕𑀯𑀸 𑀯𑀺𑀢𑁆𑀣𑀸𑀭𑀤𑁂𑀲𑀦𑀁 𑀤𑁂𑀲𑁂𑀦𑁆𑀢𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑁆𑀲 𑀅𑀕𑁆𑀕𑀪𑀽𑀢𑀸 𑀚𑀭𑀸𑀫𑀭𑀡𑀸 𑀧𑀝𑁆𑀞𑀸𑀬 𑀬𑀸𑀯 𑀫𑀽𑀮𑀪𑀽𑀢𑀁 𑀅𑀯𑀺𑀚𑁆𑀚𑀸𑀧𑀤𑀁, 𑀢𑀸𑀯 𑀤𑁂𑀲𑀦𑀁 𑀆𑀳𑀭𑀺𑀢𑁆𑀯𑀸 𑀧𑀼𑀦 𑀯𑀝𑁆𑀝𑀯𑀺𑀯𑀝𑁆𑀝𑀁 𑀤𑁂𑀲𑁂𑀦𑁆𑀢𑁄 𑀦𑀺𑀝𑁆𑀞𑀧𑁂𑀲𑀺.

𑀢𑀢𑁆𑀭𑀸𑀬𑀁 𑀚𑀭𑀸𑀫𑀭𑀡𑀸𑀤𑀻𑀦𑀁 𑀯𑀺𑀢𑁆𑀣𑀸𑀭𑀤𑁂𑀲𑀦𑀸𑀬 𑀅𑀢𑁆𑀣𑀦𑀺𑀘𑁆𑀙𑀬𑁄 𑁋 𑀚𑀭𑀸𑀫𑀭𑀡𑀦𑀺𑀤𑁆𑀤𑁂𑀲𑁂 𑀢𑀸𑀯 𑀢𑁂𑀲𑀁 𑀢𑁂𑀲𑀦𑁆𑀢𑀺 𑀅𑀬𑀁 𑀲𑀗𑁆𑀔𑁂𑀧𑀢𑁄 𑀅𑀦𑁂𑀓𑁂𑀲𑀁 𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀦𑀺𑀤𑁆𑀤𑁂𑀲𑁄𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑁄. 𑀬𑀸 𑀤𑁂𑀯𑀤𑀢𑁆𑀢𑀲𑁆𑀲 𑀚𑀭𑀸, 𑀬𑀸 𑀲𑁄𑀫𑀤𑀢𑁆𑀢𑀲𑁆𑀲𑀸𑀢𑀺 𑀏𑀯𑀜𑁆𑀳𑀺 𑀤𑀺𑀯𑀲𑀫𑁆𑀧𑀺 𑀓𑀣𑁂𑀦𑁆𑀢𑀲𑁆𑀲 𑀦𑁂𑀯 𑀲𑀢𑁆𑀢𑀸 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀦𑁆𑀢𑀺. 𑀇𑀫𑁂𑀳𑀺 𑀧𑀦 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀦 𑀓𑁄𑀘𑀺 𑀲𑀢𑁆𑀢𑁄 𑀅𑀧𑀭𑀺𑀬𑀸𑀤𑀺𑀦𑁆𑀦𑁄 𑀳𑁄𑀢𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁, ‘‘𑀅𑀬𑀁 𑀲𑀗𑁆𑀔𑁂𑀧𑀢𑁄 𑀅𑀦𑁂𑀓𑁂𑀲𑀁 𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀦𑀺𑀤𑁆𑀤𑁂𑀲𑁄’’𑀢𑀺. 𑀢𑀫𑁆𑀳𑀺 𑀢𑀫𑁆𑀳𑀻𑀢𑀺 𑀅𑀬𑀁 𑀕𑀢𑀺𑀚𑀸𑀢𑀺𑀯𑀲𑁂𑀦 𑀅𑀦𑁂𑀓𑁂𑀲𑀁 𑀲𑀢𑁆𑀢𑀦𑀺𑀓𑀸𑀬𑀸𑀦𑀁 𑀲𑀸𑀥𑀸𑀭𑀡𑀦𑀺𑀤𑁆𑀤𑁂𑀲𑁄. 𑀲𑀢𑁆𑀢𑀦𑀺𑀓𑀸𑀬𑁂𑀢𑀺 𑀲𑀸𑀥𑀸𑀭𑀡𑀦𑀺𑀤𑁆𑀤𑁂𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀲𑀭𑀽𑀧𑀦𑀺𑀤𑀲𑁆𑀲𑀦𑀁. 𑀚𑀭𑀸 𑀚𑀻𑀭𑀡𑀢𑀸𑀢𑀺𑀆𑀤𑀻𑀲𑀼 𑀧𑀦 𑀚𑀭𑀸𑀢𑀺 𑀲𑀪𑀸𑀯𑀦𑀺𑀤𑁆𑀤𑁂𑀲𑁄. 𑀚𑀻𑀭𑀡𑀢𑀸𑀢𑀺 𑀆𑀓𑀸𑀭𑀦𑀺𑀤𑁆𑀤𑁂𑀲𑁄. 𑀔𑀡𑁆𑀟𑀺𑀘𑁆𑀘𑀦𑁆𑀢𑀺𑀆𑀤𑀬𑁄 𑀢𑀬𑁄 𑀓𑀸𑀮𑀸𑀢𑀺𑀓𑁆𑀓𑀫𑁂 𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑀸, 𑀧𑀘𑁆𑀙𑀺𑀫𑀸 𑀤𑁆𑀯𑁂 𑀧𑀓𑀢𑀺𑀦𑀺𑀤𑁆𑀤𑁂𑀲𑀸. 𑀅𑀬𑀜𑁆𑀳𑀺 𑀚𑀭𑀸𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀲𑀪𑀸𑀯𑀢𑁄 𑀤𑀻𑀧𑀺𑀢𑀸, 𑀢𑁂𑀦𑀲𑁆𑀲𑀸𑀬𑀁 𑀲𑀪𑀸𑀯𑀦𑀺𑀤𑁆𑀤𑁂𑀲𑁄. 𑀚𑀻𑀭𑀡𑀢𑀸𑀢𑀺 𑀇𑀫𑀺𑀦𑀸 𑀆𑀓𑀸𑀭𑀢𑁄, 𑀢𑁂𑀦𑀲𑁆𑀲𑀸𑀬𑀁 𑀆𑀓𑀸𑀭𑀦𑀺𑀤𑁆𑀤𑁂𑀲𑁄. 𑀔𑀡𑁆𑀟𑀺𑀘𑁆𑀘𑀦𑁆𑀢𑀺 𑀇𑀫𑀺𑀦𑀸 𑀓𑀸𑀮𑀸𑀢𑀺𑀓𑁆𑀓𑀫𑁂 𑀤𑀦𑁆𑀢𑀦𑀔𑀸𑀦𑀁 𑀔𑀡𑁆𑀟𑀺𑀢𑀪𑀸𑀯𑀓𑀭𑀡𑀓𑀺𑀘𑁆𑀘𑀢𑁄. 𑀧𑀸𑀮𑀺𑀘𑁆𑀘𑀦𑁆𑀢𑀺 𑀇𑀫𑀺𑀦𑀸 𑀓𑁂𑀲𑀮𑁄𑀫𑀸𑀦𑀁 𑀧𑀮𑀺𑀢𑀪𑀸𑀯𑀓𑀭𑀡𑀓𑀺𑀘𑁆𑀘𑀢𑁄. 𑀯𑀮𑀺𑀢𑁆𑀢𑀘𑀢𑀸𑀢𑀺 𑀇𑀫𑀺𑀦𑀸 𑀫𑀁𑀲𑀁 𑀫𑀺𑀮𑀸𑀧𑁂𑀢𑁆𑀯𑀸 𑀢𑀘𑀯𑀮𑀺𑀪𑀸𑀯𑀓𑀭𑀡𑀓𑀺𑀘𑁆𑀘𑀢𑁄 𑀤𑀻𑀧𑀺𑀢𑀸. 𑀢𑁂𑀦𑀲𑁆𑀲𑀸 𑀇𑀫𑁂 𑀔𑀡𑁆𑀟𑀺𑀘𑁆𑀘𑀦𑁆𑀢𑀺𑀆𑀤𑀬𑁄 𑀢𑀬𑁄 𑀓𑀸𑀮𑀸𑀢𑀺𑀓𑁆𑀓𑀫𑁂 𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑀸. 𑀢𑁂𑀳𑀺 𑀇𑀫𑁂𑀲𑀁 𑀯𑀺𑀓𑀸𑀭𑀸𑀦𑀁 𑀤𑀲𑁆𑀲𑀦𑀯𑀲𑁂𑀦 𑀧𑀸𑀓𑀝𑀻𑀪𑀽𑀢𑀸 𑀧𑀸𑀓𑀝𑀚𑀭𑀸 𑀤𑀲𑁆𑀲𑀺𑀢𑀸. 𑀬𑀣𑁂𑀯 𑀳𑀺 𑀉𑀤𑀓𑀲𑁆𑀲 𑀯𑀸 𑀯𑀸𑀢𑀲𑁆𑀲 𑀯𑀸 𑀅𑀕𑁆𑀕𑀺𑀦𑁄 𑀯𑀸 𑀢𑀺𑀡𑀭𑀼𑀓𑁆𑀔𑀸𑀤𑀻𑀦𑀁 𑀲𑀁𑀪𑀕𑁆𑀕𑀧𑀮𑀺𑀪𑀕𑁆𑀕𑀢𑀸𑀬 𑀯𑀸 𑀛𑀸𑀫𑀢𑀸𑀬 𑀯𑀸 𑀕𑀢𑀫𑀕𑁆𑀕𑁄 𑀧𑀸𑀓𑀝𑁄 𑀳𑁄𑀢𑀺, 𑀦 𑀘 𑀲𑁄 𑀕𑀢𑀫𑀕𑁆𑀕𑁄 𑀢𑀸𑀦𑁂𑀯 𑀉𑀤𑀓𑀸𑀤𑀻𑀦𑀺, 𑀏𑀯𑀫𑁂𑀯 𑀚𑀭𑀸𑀬 𑀤𑀦𑁆𑀢𑀸𑀤𑀻𑀲𑀼 𑀔𑀡𑁆𑀟𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀢𑀫𑀕𑁆𑀕𑁄 𑀧𑀸𑀓𑀝𑁄, 𑀘𑀓𑁆𑀔𑀼𑀁 𑀉𑀫𑁆𑀫𑀻𑀮𑁂𑀢𑁆𑀯𑀸𑀧𑀺 𑀕𑀬𑁆𑀳𑀢𑀺 𑀦 𑀘 𑀔𑀡𑁆𑀟𑀺𑀘𑁆𑀘𑀸𑀤𑀻𑀦𑁂𑀯 𑀚𑀭𑀸. 𑀦 𑀳𑀺 𑀚𑀭𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀳𑁄𑀢𑀺.

𑀆𑀬𑀼𑀦𑁄 𑀲𑀁𑀳𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑁄𑀢𑀺 𑀇𑀫𑁂𑀳𑀺 𑀧𑀦 𑀧𑀤𑁂𑀳𑀺 𑀓𑀸𑀮𑀸𑀢𑀺𑀓𑁆𑀓𑀫𑁂𑀬𑁂𑀯 𑀅𑀪𑀺𑀩𑁆𑀬𑀢𑁆𑀢𑀸𑀬 𑀆𑀬𑀼𑀓𑁆𑀔𑀬-𑀘𑀓𑁆𑀔𑀸𑀤𑀺𑀇𑀦𑁆𑀤𑁆𑀭𑀺𑀬-𑀧𑀭𑀺𑀧𑀸𑀓𑀲𑀜𑁆𑀜𑀺𑀢𑀸𑀬 𑀧𑀓𑀢𑀺𑀬𑀸 𑀤𑀻𑀧𑀺𑀢𑀸. 𑀢𑁂𑀦𑀲𑁆𑀲𑀺𑀫𑁂 𑀧𑀘𑁆𑀙𑀺𑀫𑀸 𑀤𑁆𑀯𑁂 𑀧𑀓𑀢𑀺𑀦𑀺𑀤𑁆𑀤𑁂𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀬𑀲𑁆𑀫𑀸 𑀚𑀭𑀁 𑀧𑀢𑁆𑀢𑀲𑁆𑀲 𑀆𑀬𑀼 𑀳𑀸𑀬𑀢𑀺, 𑀢𑀲𑁆𑀫𑀸 𑀚𑀭𑀸 ‘‘𑀆𑀬𑀼𑀦𑁄 𑀲𑀁𑀳𑀸𑀦𑀻’’𑀢𑀺 𑀨𑀮𑀽𑀧𑀘𑀸𑀭𑁂𑀦 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀘 𑀤𑀳𑀭𑀓𑀸𑀮𑁂 𑀲𑀼𑀧𑁆𑀧𑀲𑀦𑁆𑀦𑀸𑀦𑀺 𑀲𑀼𑀔𑀼𑀫𑀫𑁆𑀧𑀺 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀲𑀼𑀔𑁂𑀦𑁂𑀯 𑀕𑀡𑁆𑀳𑀦𑀲𑀫𑀢𑁆𑀣𑀸𑀦𑀺 𑀘𑀓𑁆𑀔𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀚𑀭𑀁 𑀧𑀢𑁆𑀢𑀲𑁆𑀲 𑀧𑀭𑀺𑀧𑀓𑁆𑀓𑀸𑀦𑀺 𑀆𑀮𑀼𑀴𑀺𑀢𑀸𑀦𑀺 𑀅𑀯𑀺𑀲𑀤𑀸𑀦𑀺, 𑀑𑀴𑀸𑀭𑀺𑀓𑀫𑁆𑀧𑀺 𑀅𑀢𑁆𑀢𑀦𑁄 𑀯𑀺𑀲𑀬𑀁 𑀕𑀳𑁂𑀢𑀼𑀁 𑀅𑀲𑀫𑀢𑁆𑀣𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀭𑀺𑀧𑀸𑀓𑁄’’𑀢𑀺 𑀨𑀮𑀽𑀧𑀘𑀸𑀭𑁂𑀦𑁂𑀯 𑀯𑀼𑀢𑁆𑀢𑀸.

𑀲𑀸 𑀧𑀦𑀸𑀬𑀁 𑀏𑀯𑀁 𑀦𑀺𑀤𑁆𑀤𑀺𑀝𑁆𑀞𑀸 𑀲𑀩𑁆𑀩𑀸𑀧𑀺 𑀚𑀭𑀸 𑀧𑀸𑀓𑀝𑀸 𑀧𑀝𑀺𑀘𑁆𑀙𑀦𑁆𑀦𑀸𑀢𑀺 𑀤𑀼𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀤𑀦𑁆𑀢𑀸𑀤𑀻𑀲𑀼 𑀔𑀡𑁆𑀟𑀸𑀤𑀺𑀪𑀸𑀯𑀤𑀲𑁆𑀲𑀦𑀢𑁄 𑀭𑀽𑀧𑀥𑀫𑁆𑀫𑁂𑀲𑀼 𑀚𑀭𑀸 𑀧𑀸𑀓𑀝𑀚𑀭𑀸 𑀦𑀸𑀫, 𑀅𑀭𑀽𑀧𑀥𑀫𑁆𑀫𑁂𑀲𑀼 𑀧𑀦 𑀚𑀭𑀸 𑀢𑀸𑀤𑀺𑀲𑀲𑁆𑀲 𑀯𑀺𑀓𑀸𑀭𑀲𑁆𑀲 𑀅𑀤𑀲𑁆𑀲𑀦𑀢𑁄 𑀧𑀝𑀺𑀘𑁆𑀙𑀦𑁆𑀦𑀚𑀭𑀸 𑀦𑀸𑀫. 𑀢𑀢𑁆𑀣 𑀬𑁆𑀯𑀸𑀬𑀁 𑀔𑀡𑁆𑀟𑀸𑀤𑀺𑀪𑀸𑀯𑁄 𑀤𑀺𑀲𑁆𑀲𑀢𑀺, 𑀲𑁄 𑀢𑀸𑀤𑀺𑀲𑀸𑀦𑀁 𑀤𑀦𑁆𑀢𑀸𑀤𑀻𑀦𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀯𑀡𑁆𑀡𑁄𑀬𑁂𑀯, 𑀢𑀁 𑀘𑀓𑁆𑀔𑀼𑀦𑀸 𑀤𑀺𑀲𑁆𑀯𑀸 𑀫𑀦𑁄𑀤𑁆𑀯𑀸𑀭𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀇𑀫𑁂 𑀤𑀦𑁆𑀢𑀸 𑀚𑀭𑀸𑀬 𑀧𑀳𑀝𑀸’’𑀢𑀺 𑀚𑀭𑀁 𑀚𑀸𑀦𑀸𑀢𑀺 𑀉𑀤𑀓𑀝𑁆𑀞𑀸𑀦𑁂 𑀩𑀤𑁆𑀥𑀸𑀦𑀺 𑀕𑁄𑀲𑀻𑀲𑀸𑀤𑀻𑀦𑀺 𑀑𑀮𑁄𑀓𑁂𑀢𑁆𑀯𑀸 𑀳𑁂𑀝𑁆𑀞𑀸 𑀉𑀤𑀓𑀲𑁆𑀲 𑀅𑀢𑁆𑀣𑀺𑀪𑀸𑀯𑀁 𑀚𑀸𑀦𑀦𑀁 𑀯𑀺𑀬. 𑀧𑀼𑀦 𑀅𑀯𑀻𑀘𑀺 𑀲𑀯𑀻𑀘𑀻𑀢𑀺 𑀏𑀯𑀫𑁆𑀧𑀺 𑀤𑀼𑀯𑀺𑀥𑀸 𑀳𑁄𑀢𑀺. 𑀢𑀢𑁆𑀣 𑀫𑀡𑀺-𑀓𑀦𑀓-𑀭𑀚𑀢-𑀧𑀯𑀸𑀴𑀘𑀦𑁆𑀤𑀲𑀽𑀭𑀺𑀬𑀸𑀤𑀻𑀦𑀁 𑀯𑀺𑀬 𑀫𑀦𑁆𑀤𑀤𑀲𑀓𑀸𑀤𑀻𑀲𑀼 𑀧𑀸𑀡𑀻𑀦𑀁 𑀯𑀺𑀬 𑀘 𑀧𑀼𑀧𑁆𑀨𑀨𑀮𑀧𑀮𑁆𑀮𑀯𑀸𑀤𑀻𑀲𑀼 𑀘 𑀅𑀧𑀸𑀡𑀻𑀦𑀁 𑀯𑀺𑀬 𑀅𑀦𑁆𑀢𑀭𑀦𑁆𑀢𑀭𑀸 𑀯𑀡𑁆𑀡𑀯𑀺𑀲𑁂𑀲𑀸𑀤𑀻𑀦𑀁 𑀤𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀚𑀭𑀸 𑀅𑀯𑀻𑀘𑀺𑀚𑀭𑀸 𑀦𑀸𑀫, 𑀦𑀺𑀭𑀦𑁆𑀢𑀭𑀚𑀭𑀸𑀢𑀺 𑀅𑀢𑁆𑀣𑁄. 𑀢𑀢𑁄 𑀅𑀜𑁆𑀜𑁂𑀲𑀼 𑀧𑀦 𑀬𑀣𑀸𑀯𑀼𑀢𑁆𑀢𑁂𑀲𑀼 𑀅𑀦𑁆𑀢𑀭𑀦𑁆𑀢𑀭𑀸 𑀯𑀡𑁆𑀡𑀯𑀺𑀲𑁂𑀲𑀸𑀤𑀻𑀦𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀚𑀭𑀸 𑀲𑀯𑀻𑀘𑀺𑀚𑀭𑀸 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀇𑀢𑁄 𑀧𑀭𑀁 𑀢𑁂𑀲𑀁 𑀢𑁂𑀲𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀘𑀼𑀢𑀺 𑀘𑀯𑀦𑀢𑀸𑀢𑀺𑀆𑀤𑀻𑀲𑀼 𑀧𑀦 𑀘𑀼𑀢𑀻𑀢𑀺 𑀘𑀯𑀦𑀓𑀯𑀲𑁂𑀦 𑀯𑀼𑀘𑁆𑀘𑀢𑀺, 𑀏𑀓𑀘𑀢𑀼𑀧𑀜𑁆𑀘𑀓𑁆𑀔𑀦𑁆𑀥𑀲𑀸𑀫𑀜𑁆𑀜𑀯𑀘𑀦𑀫𑁂𑀢𑀁. 𑀘𑀯𑀦𑀢𑀸𑀢𑀺 𑀪𑀸𑀯𑀯𑀘𑀦𑁂𑀦 𑀮𑀓𑁆𑀔𑀡𑀦𑀺𑀤𑀲𑁆𑀲𑀦𑀁. 𑀪𑁂𑀤𑁄𑀢𑀺 𑀘𑀼𑀢𑀺𑀓𑁆𑀔𑀦𑁆𑀥𑀸𑀦𑀁 𑀪𑀗𑁆𑀕𑀼𑀧𑁆𑀧𑀢𑁆𑀢𑀺𑀧𑀭𑀺𑀤𑀻𑀧𑀦𑀁. 𑀅𑀦𑁆𑀢𑀭𑀥𑀸𑀦𑀦𑁆𑀢𑀺 𑀖𑀝𑀲𑁆𑀲𑁂𑀯 𑀪𑀺𑀦𑁆𑀦𑀲𑁆𑀲 𑀪𑀺𑀦𑁆𑀦𑀸𑀦𑀁 𑀘𑀼𑀢𑀺𑀓𑁆𑀔𑀦𑁆𑀥𑀸𑀦𑀁 𑀬𑁂𑀦 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀞𑀸𑀦𑀸𑀪𑀸𑀯𑀧𑀭𑀺𑀤𑀻𑀧𑀦𑀁. 𑀫𑀘𑁆𑀘𑀼 𑀫𑀭𑀡𑀦𑁆𑀢𑀺 𑀫𑀘𑁆𑀘𑀼𑀲𑀗𑁆𑀔𑀸𑀢𑀁 𑀫𑀭𑀡𑀁, 𑀢𑁂𑀦 𑀲𑀫𑀼𑀘𑁆𑀙𑁂𑀤𑀫𑀭𑀡𑀸𑀤𑀻𑀦𑀺 𑀦𑀺𑀲𑁂𑀥𑁂𑀢𑀺. 𑀓𑀸𑀮𑁄 𑀦𑀸𑀫 𑀅𑀦𑁆𑀢𑀓𑁄, 𑀢𑀲𑁆𑀲 𑀓𑀺𑀭𑀺𑀬𑀸 𑀓𑀸𑀮𑀓𑀺𑀭𑀺𑀬𑀸. 𑀏𑀯𑀁 𑀢𑁂𑀦 𑀮𑁄𑀓𑀲𑀫𑁆𑀫𑀼𑀢𑀺𑀬𑀸 𑀫𑀭𑀡𑀁 𑀤𑀻𑀧𑁂𑀢𑀺.

𑀇𑀤𑀸𑀦𑀺 𑀧𑀭𑀫𑀢𑁆𑀣𑁂𑀦 𑀤𑀻𑀧𑁂𑀢𑀼𑀁 𑀔𑀦𑁆𑀥𑀸𑀦𑀁 𑀪𑁂𑀤𑁄𑀢𑀺𑀆𑀤𑀺𑀫𑀸𑀳. 𑀧𑀭𑀫𑀢𑁆𑀣𑁂𑀦 𑀳𑀺 𑀔𑀦𑁆𑀥𑀸𑀬𑁂𑀯 𑀪𑀺𑀚𑁆𑀚𑀦𑁆𑀢𑀺, 𑀦 𑀲𑀢𑁆𑀢𑁄 𑀦𑀸𑀫 𑀓𑁄𑀘𑀺 𑀫𑀭𑀢𑀺. 𑀔𑀦𑁆𑀥𑁂𑀲𑀼 𑀧𑀦 𑀪𑀺𑀚𑁆𑀚𑀫𑀸𑀦𑁂𑀲𑀼 𑀲𑀢𑁆𑀢𑁄 𑀫𑀭𑀢𑀺, 𑀪𑀺𑀦𑁆𑀦𑁂𑀲𑀼 𑀫𑀢𑁄𑀢𑀺 𑀯𑁄𑀳𑀸𑀭𑁄 𑀳𑁄𑀢𑀺. 𑀏𑀢𑁆𑀣 𑀘 𑀘𑀢𑀼𑀧𑀜𑁆𑀘𑀯𑁄𑀓𑀸𑀭𑀯𑀲𑁂𑀦 𑀔𑀦𑁆𑀥𑀸𑀦𑀁 𑀪𑁂𑀤𑁄, 𑀏𑀓𑀯𑁄𑀓𑀸𑀭𑀯𑀲𑁂𑀦 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄. 𑀘𑀢𑀼𑀯𑁄𑀓𑀸𑀭𑀯𑀲𑁂𑀦 𑀘 𑀔𑀦𑁆𑀥𑀸𑀦𑀁 𑀪𑁂𑀤𑁄, 𑀲𑁂𑀲𑀤𑁆𑀯𑀬𑀯𑀲𑁂𑀦 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀲𑁆𑀫𑀸? 𑀪𑀯𑀤𑁆𑀯𑀬𑁂𑀧𑀺 𑀭𑀽𑀧𑀓𑀸𑀬𑀲𑀗𑁆𑀔𑀸𑀢𑀲𑁆𑀲 𑀓𑀴𑁂𑀯𑀭𑀲𑁆𑀲 𑀲𑀩𑁆𑀪𑀸𑀯𑀢𑁄. 𑀅𑀣 𑀯𑀸 𑀬𑀲𑁆𑀫𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀻𑀲𑀼 𑀔𑀦𑁆𑀥𑀸 𑀪𑀺𑀚𑁆𑀚𑀦𑁆𑀢𑁂𑀯, 𑀦 𑀓𑀺𑀜𑁆𑀘𑀺 𑀦𑀺𑀓𑁆𑀔𑀺𑀧𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀯𑀲𑁂𑀦 𑀔𑀦𑁆𑀥𑀸𑀦𑀁 𑀪𑁂𑀤𑁄, 𑀫𑀦𑀼𑀲𑁆𑀲𑀸𑀤𑀻𑀲𑀼 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄. 𑀏𑀢𑁆𑀣 𑀘 𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑀓𑀸𑀭𑀡𑀢𑁄 𑀫𑀭𑀡𑀁 ‘‘𑀓𑀴𑁂𑀯𑀭𑀲𑁆𑀲 𑀦𑀺𑀓𑁆𑀔𑁂𑀧𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀇𑀢𑀺 𑀅𑀬𑀜𑁆𑀘 𑀚𑀭𑀸 𑀇𑀤𑀜𑁆𑀘 𑀫𑀭𑀡𑀁, 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂𑀢𑀺 𑀇𑀤𑀁 𑀉𑀪𑀬𑀫𑁆𑀧𑀺 𑀏𑀓𑀢𑁄 𑀓𑀢𑁆𑀯𑀸 𑀚𑀭𑀸𑀫𑀭𑀡𑀦𑁆𑀢𑀺 𑀓𑀣𑀻𑀬𑀢𑀺.

𑀚𑀸𑀢𑀺𑀦𑀺𑀤𑁆𑀤𑁂𑀲𑁂 𑀚𑀸𑀢𑀺 𑀲𑀜𑁆𑀚𑀸𑀢𑀻𑀢𑀺𑀆𑀤𑀻𑀲𑀼 𑀚𑀸𑀬𑀦𑀝𑁆𑀞𑁂𑀦 𑀚𑀸𑀢𑀺, 𑀲𑀸 𑀅𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀯𑀲𑁂𑀦 𑀬𑀼𑀢𑁆𑀢𑀸. 𑀲𑀜𑁆𑀚𑀸𑀬𑀦𑀝𑁆𑀞𑁂𑀦 𑀲𑀜𑁆𑀚𑀸𑀢𑀺, 𑀲𑀸 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀯𑀲𑁂𑀦 𑀬𑀼𑀢𑁆𑀢𑀸. 𑀑𑀓𑁆𑀓𑀫𑀦𑀝𑁆𑀞𑁂𑀦 𑀑𑀓𑁆𑀓𑀦𑁆𑀢𑀺, 𑀲𑀸 𑀅𑀡𑁆𑀟𑀚𑀚𑀮𑀸𑀩𑀼𑀚𑀯𑀲𑁂𑀦 𑀬𑀼𑀢𑁆𑀢𑀸. 𑀢𑁂 𑀳𑀺 𑀅𑀡𑁆𑀟𑀓𑁄𑀲𑀜𑁆𑀘 𑀯𑀢𑁆𑀣𑀺𑀓𑁄𑀲𑀜𑁆𑀘 𑀑𑀓𑁆𑀓𑀫𑀦𑁆𑀢𑀸 𑀧𑀯𑀺𑀲𑀦𑁆𑀢𑀸 𑀯𑀺𑀬 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀺. 𑀅𑀪𑀺𑀦𑀺𑀩𑁆𑀩𑀢𑁆𑀢𑀦𑀝𑁆𑀞𑁂𑀦 𑀅𑀪𑀺𑀦𑀺𑀩𑁆𑀩𑀢𑁆𑀢𑀺, 𑀲𑀸 𑀲𑀁𑀲𑁂𑀤𑀚𑀑𑀧𑀧𑀸𑀢𑀺𑀓𑀯𑀲𑁂𑀦 𑀬𑀼𑀢𑁆𑀢𑀸. 𑀢𑁂 𑀳𑀺 𑀧𑀸𑀓𑀝𑀸𑀬𑁂𑀯 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀅𑀬𑀁 𑀢𑀸𑀯 𑀯𑁄𑀳𑀸𑀭𑀤𑁂𑀲𑀦𑀸.

𑀇𑀤𑀸𑀦𑀺 𑀧𑀭𑀫𑀢𑁆𑀣𑀤𑁂𑀲𑀦𑀸 𑀳𑁄𑀢𑀺. 𑀔𑀦𑁆𑀥𑀸𑀬𑁂𑀯 𑀳𑀺 𑀧𑀭𑀫𑀢𑁆𑀣𑀢𑁄 𑀧𑀸𑀢𑀼𑀪𑀯𑀦𑁆𑀢𑀺, 𑀦 𑀲𑀢𑁆𑀢𑁄. 𑀢𑀢𑁆𑀣 𑀘 𑀔𑀦𑁆𑀥𑀸𑀦𑀦𑁆𑀢𑀺 𑀏𑀓𑀯𑁄𑀓𑀸𑀭𑀪𑀯𑁂 𑀏𑀓𑀲𑁆𑀲, 𑀘𑀢𑀼𑀯𑁄𑀓𑀸𑀭𑀪𑀯𑁂 𑀘𑀢𑀼𑀦𑁆𑀦𑀁, 𑀧𑀜𑁆𑀘𑀯𑁄𑀓𑀸𑀭𑀪𑀯𑁂 𑀧𑀜𑁆𑀘𑀦𑁆𑀦𑀫𑁆𑀧𑀺 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀢𑀼𑀪𑀸𑀯𑁄𑀢𑀺 𑀉𑀧𑁆𑀧𑀢𑁆𑀢𑀺. 𑀆𑀬𑀢𑀦𑀸𑀦𑀦𑁆𑀢𑀺 𑀏𑀢𑁆𑀣 𑀢𑀢𑁆𑀭 𑀢𑀢𑁆𑀭 𑀉𑀧𑁆𑀧𑀚𑁆𑀚𑀫𑀸𑀦𑀸𑀬𑀢𑀦𑀯𑀲𑁂𑀦 𑀲𑀗𑁆𑀕𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀝𑀺𑀮𑀸𑀪𑁄𑀢𑀺 𑀲𑀦𑁆𑀢𑀢𑀺𑀬𑀁 𑀧𑀸𑀢𑀼𑀪𑀸𑀯𑁄𑀬𑁂𑀯. 𑀧𑀸𑀢𑀼𑀪𑀯𑀦𑁆𑀢𑀸𑀦𑁂𑀯 𑀳𑀺 𑀢𑀸𑀦𑀺 𑀧𑀝𑀺𑀮𑀤𑁆𑀥𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀚𑀸𑀢𑀻𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀯𑁄𑀳𑀸𑀭𑀢𑁄 𑀧𑀭𑀫𑀢𑁆𑀣𑀢𑁄 𑀘 𑀤𑁂𑀲𑀺𑀢𑀸𑀬 𑀚𑀸𑀢𑀺𑀬𑀸 𑀦𑀺𑀕𑀫𑀦𑀁 𑀓𑀭𑁄𑀢𑀻𑀢𑀺.

𑀪𑀯𑀦𑀺𑀤𑁆𑀤𑁂𑀲𑁂 𑀓𑀸𑀫𑀪𑀯𑁄𑀢𑀺 𑀓𑀫𑁆𑀫𑀪𑀯𑁄 𑀘 𑀉𑀧𑀧𑀢𑁆𑀢𑀺𑀪𑀯𑁄 𑀘. 𑀢𑀢𑁆𑀣 𑀓𑀫𑁆𑀫𑀪𑀯𑁄 𑀦𑀸𑀫 𑀓𑀸𑀫𑀪𑀯𑀽𑀧𑀕𑀓𑀫𑁆𑀫𑀫𑁂𑀯. 𑀢𑀜𑁆𑀳𑀺 𑀢𑀢𑁆𑀣 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀓𑀸𑀭𑀡𑀢𑁆𑀢𑀸 ‘‘𑀲𑀼𑀔𑁄 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀸𑀤𑁄 (𑀥. 𑀧. 𑁧𑁯𑁪) 𑀤𑀼𑀓𑁆𑀔𑁄 𑀧𑀸𑀧𑀲𑁆𑀲 𑀉𑀘𑁆𑀘𑀬𑁄’’𑀢𑀺𑀆𑀤𑀻𑀦𑀺 (𑀥. 𑀧. 𑁧𑁧𑁭) 𑀯𑀺𑀬 𑀨𑀮𑀯𑁄𑀳𑀸𑀭𑁂𑀦 𑀪𑀯𑁄𑀢𑀺 𑀯𑀼𑀢𑁆𑀢𑀁. 𑀉𑀧𑀧𑀢𑁆𑀢𑀺𑀪𑀯𑁄 𑀦𑀸𑀫 𑀢𑁂𑀦 𑀓𑀫𑁆𑀫𑁂𑀦 𑀦𑀺𑀩𑁆𑀩𑀢𑁆𑀢𑀁 𑀉𑀧𑀸𑀤𑀺𑀡𑁆𑀡𑀓𑁆𑀔𑀦𑁆𑀥𑀧𑀜𑁆𑀘𑀓𑀁. 𑀢𑀜𑁆𑀳𑀺 𑀢𑀢𑁆𑀣 𑀪𑀯𑀢𑀻𑀢𑀺 𑀓𑀢𑁆𑀯𑀸 𑀪𑀯𑁄𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀣𑀸𑀧𑀺 𑀇𑀤𑀁 𑀓𑀫𑁆𑀫𑀜𑁆𑀘 𑀉𑀧𑀧𑀢𑁆𑀢𑀺𑀜𑁆𑀘 𑀉𑀪𑀬𑀫𑁆𑀧𑁂𑀢𑀫𑀺𑀥 ‘‘𑀓𑀸𑀫𑀪𑀯𑁄’’𑀢𑀺 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀭𑀽𑀧𑀸𑀭𑀽𑀧𑀪𑀯𑁂𑀲𑀽𑀢𑀺.

𑀉𑀧𑀸𑀤𑀸𑀦𑀦𑀺𑀤𑁆𑀤𑁂𑀲𑁂 𑀓𑀸𑀫𑀼𑀧𑀸𑀤𑀸𑀦𑀦𑁆𑀢𑀺𑀆𑀤𑀻𑀲𑀼 𑀯𑀢𑁆𑀣𑀼𑀓𑀸𑀫𑀁 𑀉𑀧𑀸𑀤𑀺𑀬𑀦𑁆𑀢𑀺 𑀏𑀢𑁂𑀦, 𑀲𑀬𑀁 𑀯𑀸 𑀢𑀁 𑀉𑀧𑀸𑀤𑀺𑀬𑀢𑀻𑀢𑀺 𑀓𑀸𑀫𑀼𑀧𑀸𑀤𑀸𑀦𑀁, 𑀓𑀸𑀫𑁄 𑀘 𑀲𑁄 𑀉𑀧𑀸𑀤𑀸𑀦𑀜𑁆𑀘𑀸𑀢𑀺 𑀓𑀸𑀫𑀼𑀧𑀸𑀤𑀸𑀦𑀁. 𑀉𑀧𑀸𑀤𑀸𑀦𑀦𑁆𑀢𑀺 𑀤𑀴𑁆𑀳𑀕𑁆𑀕𑀳𑀡𑀁 𑀯𑀼𑀘𑁆𑀘𑀢𑀺. 𑀤𑀴𑁆𑀳𑀢𑁆𑀣𑁄 𑀳𑀺 𑀏𑀢𑁆𑀣 𑀉𑀧𑀲𑀤𑁆𑀤𑁄 𑀉𑀧𑀸𑀬𑀸𑀲𑀉𑀧𑀓𑀝𑁆𑀞𑀸𑀤𑀻𑀲𑀼 𑀯𑀺𑀬. 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑀁, ‘‘𑀢𑀢𑁆𑀣 𑀓𑀢𑀫𑀁 𑀓𑀸𑀫𑀼𑀧𑀸𑀤𑀸𑀦𑀁? 𑀬𑁄 𑀓𑀸𑀫𑁂𑀲𑀼 𑀓𑀸𑀫𑀘𑁆𑀙𑀦𑁆𑀤𑁄’’𑀢𑀺 (𑀥. 𑀲. 𑁧𑁨𑁨𑁦; 𑀯𑀺𑀪. 𑁯𑁩𑁮) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀢𑀣𑀸 𑀤𑀺𑀝𑁆𑀞𑀺 𑀘 𑀲𑀸 𑀉𑀧𑀸𑀤𑀸𑀦𑀜𑁆𑀘𑀸𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀁. 𑀅𑀣 𑀯𑀸 𑀤𑀺𑀝𑁆𑀞𑀺𑀁 𑀉𑀧𑀸𑀤𑀺𑀬𑀢𑀺, 𑀉𑀧𑀸𑀤𑀺𑀬𑀦𑁆𑀢𑀺 𑀯𑀸 𑀏𑀢𑁂𑀦 𑀤𑀺𑀝𑁆𑀞𑀺𑀦𑁆𑀢𑀺 𑀤𑀺𑀝𑁆𑀞𑀼𑀧𑀸𑀤𑀸𑀦𑀁. 𑀉𑀧𑀸𑀤𑀺𑀬𑀢𑀺 𑀳𑀺 𑀧𑀼𑀭𑀺𑀫𑀤𑀺𑀝𑁆𑀞𑀺𑀁 𑀉𑀢𑁆𑀢𑀭𑀤𑀺𑀝𑁆𑀞𑀺, 𑀉𑀧𑀸𑀤𑀺𑀬𑀦𑁆𑀢𑀺 𑀘 𑀢𑀸𑀬 𑀤𑀺𑀝𑁆𑀞𑀺𑀁. 𑀬𑀣𑀸𑀳 𑁋 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜’’𑀦𑁆𑀢𑀺𑀆𑀤𑀺 (𑀫. 𑀦𑀺. 𑁩.𑁨𑁭). 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀯𑀚𑁆𑀚𑀲𑁆𑀲 𑀲𑀩𑁆𑀩𑀤𑀺𑀝𑁆𑀞𑀺𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑀁, ‘‘𑀢𑀢𑁆𑀣 𑀓𑀢𑀫𑀁 𑀤𑀺𑀝𑁆𑀞𑀼𑀧𑀸𑀤𑀸𑀦𑀁? 𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺 (𑀥. 𑀲. 𑁧𑁨𑁨𑁧) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀢𑀣𑀸 𑀲𑀻𑀮𑀩𑁆𑀩𑀢𑀫𑀼𑀧𑀸𑀤𑀺𑀬𑀦𑁆𑀢𑀺 𑀏𑀢𑁂𑀦, 𑀲𑀬𑀁 𑀯𑀸 𑀢𑀁 𑀉𑀧𑀸𑀤𑀺𑀬𑀢𑀺, 𑀲𑀻𑀮𑀩𑁆𑀩𑀢𑀜𑁆𑀘 𑀢𑀁 𑀉𑀧𑀸𑀤𑀸𑀦𑀜𑁆𑀘𑀸𑀢𑀺 𑀯𑀸 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁. 𑀕𑁄𑀲𑀻𑀮𑀕𑁄𑀯𑀢𑀸𑀤𑀻𑀦𑀺 𑀳𑀺 ‘‘𑀏𑀯𑀁 𑀲𑀼𑀤𑁆𑀥𑀻’’𑀢𑀺 (𑀥. 𑀲. 𑁧𑁨𑁨𑁨; 𑀯𑀺𑀪. 𑁯𑁩𑁮) 𑀅𑀪𑀺𑀦𑀺𑀯𑁂𑀲𑀢𑁄 𑀲𑀬𑀫𑁂𑀯 𑀉𑀧𑀸𑀤𑀸𑀦𑀸𑀦𑀻𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑀁, ‘‘𑀢𑀢𑁆𑀣 𑀓𑀢𑀫𑀁 𑀲𑀻𑀮𑀩𑁆𑀩𑀢𑀼𑀧𑀸𑀤𑀸𑀦𑀁? 𑀇𑀢𑁄 𑀩𑀳𑀺𑀤𑁆𑀥𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀲𑀻𑀮𑁂𑀦 𑀲𑀼𑀤𑁆𑀥𑀻’’𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀯𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸𑀤𑁄, 𑀉𑀧𑀸𑀤𑀺𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀉𑀧𑀸𑀤𑀸𑀦𑀁, 𑀓𑀺𑀁 𑀯𑀤𑀦𑁆𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀯𑀸? 𑀅𑀢𑁆𑀢𑀸𑀦𑀁. 𑀅𑀢𑁆𑀢𑀦𑁄 𑀯𑀸𑀤𑀼𑀧𑀸𑀤𑀸𑀦𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁. 𑀅𑀢𑁆𑀢𑀯𑀸𑀤𑀫𑀢𑁆𑀢𑀫𑁂𑀯 𑀯𑀸 𑀅𑀢𑁆𑀢𑀸𑀢𑀺 𑀉𑀧𑀸𑀤𑀺𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁. 𑀯𑀻𑀲𑀢𑀺𑀯𑀢𑁆𑀣𑀼𑀓𑀸𑀬 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀢𑀁, ‘‘𑀢𑀢𑁆𑀣 𑀓𑀢𑀫𑀁 𑀅𑀢𑁆𑀢𑀯𑀸𑀤𑀼𑀧𑀸𑀤𑀸𑀦𑀁? 𑀇𑀥 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻’’𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀢𑀡𑁆𑀳𑀸𑀦𑀺𑀤𑁆𑀤𑁂𑀲𑁂 𑀭𑀽𑀧𑀢𑀡𑁆𑀳𑀸…𑀧𑁂… 𑀥𑀫𑁆𑀫𑀢𑀡𑁆𑀳𑀸𑀢𑀺 𑀏𑀢𑀁 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀲𑀼 𑀚𑀯𑀦𑀯𑀻𑀣𑀺𑀬𑀸 𑀧𑀯𑀢𑁆𑀢𑀸𑀬 𑀢𑀡𑁆𑀳𑀸𑀬 ‘‘𑀲𑁂𑀝𑁆𑀞𑀺𑀧𑀼𑀢𑁆𑀢𑁄 𑀩𑁆𑀭𑀸𑀳𑁆𑀫𑀡𑀧𑀼𑀢𑁆𑀢𑁄’’𑀢𑀺 𑀏𑀯𑀫𑀸𑀤𑀻𑀲𑀼 𑀧𑀺𑀢𑀺𑀢𑁄 𑀦𑀸𑀫𑀁 𑀯𑀺𑀬 𑀧𑀺𑀢𑀺𑀲𑀤𑀺𑀲𑀸𑀭𑀫𑁆𑀫𑀡𑀢𑁄 𑀦𑀸𑀫𑀁. 𑀏𑀢𑁆𑀣 𑀘 𑀭𑀽𑀧𑀸𑀭𑀫𑁆𑀫𑀡𑀸 𑀢𑀡𑁆𑀳𑀸, 𑀭𑀽𑀧𑁂 𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸. 𑀲𑀸 𑀓𑀸𑀫𑀭𑀸𑀕𑀪𑀸𑀯𑁂𑀦 𑀭𑀽𑀧𑀁 𑀅𑀲𑁆𑀲𑀸𑀤𑁂𑀦𑁆𑀢𑀻 𑀧𑀯𑀢𑁆𑀢𑀫𑀸𑀦𑀸 𑀓𑀸𑀫𑀢𑀡𑁆𑀳𑀸, 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑀭𑀸𑀕𑀪𑀸𑀯𑁂𑀦 ‘‘𑀭𑀽𑀧𑀁 𑀦𑀺𑀘𑁆𑀘𑀁 𑀥𑀼𑀯𑀁 𑀲𑀲𑁆𑀲𑀢’’𑀦𑁆𑀢𑀺 𑀏𑀯𑀁 𑀅𑀲𑁆𑀲𑀸𑀤𑁂𑀦𑁆𑀢𑀻 𑀧𑀯𑀢𑁆𑀢𑀫𑀸𑀦𑀸 𑀪𑀯𑀢𑀡𑁆𑀳𑀸, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀳𑀕𑀢𑀭𑀸𑀕𑀪𑀸𑀯𑁂𑀦 ‘‘𑀭𑀽𑀧𑀁 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀺 𑀧𑁂𑀘𑁆𑀘 𑀦 𑀪𑀯𑀢𑀻’’𑀢𑀺 𑀏𑀯𑀁 𑀅𑀲𑁆𑀲𑀸𑀤𑁂𑀦𑁆𑀢𑀻 𑀧𑀯𑀢𑁆𑀢𑀫𑀸𑀦𑀸 𑀯𑀺𑀪𑀯𑀢𑀡𑁆𑀳𑀸𑀢𑀺 𑀭𑀽𑀧𑀢𑀡𑁆𑀳𑀸 𑀏𑀯𑀁 𑀢𑀺𑀯𑀺𑀥𑀸 𑀳𑁄𑀢𑀺. 𑀬𑀣𑀸 𑀘 𑀭𑀽𑀧𑀢𑀡𑁆𑀳𑀸, 𑀢𑀣𑀸 𑀲𑀤𑁆𑀤𑀢𑀡𑁆𑀳𑀸𑀤𑀬𑁄𑀧𑀻𑀢𑀺 𑀏𑀯𑀁 𑀢𑀸𑀦𑀺 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀅𑀚𑁆𑀛𑀢𑁆𑀢𑀭𑀽𑀧𑀸𑀤𑀻𑀲𑀼 𑀅𑀝𑁆𑀞𑀸𑀭𑀲, 𑀩𑀳𑀺𑀤𑁆𑀥𑀸𑀭𑀽𑀧𑀸𑀤𑀻𑀲𑀼 𑀅𑀝𑁆𑀞𑀸𑀭𑀲𑀸𑀢𑀺 𑀙𑀢𑁆𑀢𑀺𑀁𑀲. 𑀇𑀢𑀺 𑀅𑀢𑀻𑀢𑀸𑀦𑀺 𑀙𑀢𑁆𑀢𑀺𑀁𑀲, 𑀅𑀦𑀸𑀕𑀢𑀸𑀦𑀺 𑀙𑀢𑁆𑀢𑀺𑀁𑀲, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀙𑀢𑁆𑀢𑀺𑀁𑀲𑀸𑀢𑀺 𑀏𑀯𑀁 𑀅𑀝𑁆𑀞𑀲𑀢𑀁 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀳𑁄𑀦𑁆𑀢𑀺. ‘‘𑀅𑀚𑁆𑀛𑀢𑁆𑀢𑀺𑀓𑀲𑁆𑀲 𑀉𑀧𑀸𑀤𑀸𑀬 𑀅𑀲𑁆𑀫𑀻𑀢𑀺 𑀳𑁄𑀢𑀺, 𑀇𑀢𑁆𑀣𑀲𑁆𑀫𑀻𑀢𑀺 𑀳𑁄𑀢𑀻’’𑀢𑀺 (𑀯𑀺𑀪. 𑁯𑁭𑁩) 𑀯𑀸 𑀏𑀯𑀫𑀸𑀤𑀻𑀦𑀺 𑀅𑀚𑁆𑀛𑀢𑁆𑀢𑀺𑀓𑀭𑀽𑀧𑀸𑀤𑀺𑀦𑀺𑀲𑁆𑀲𑀺𑀢𑀸𑀦𑀺 𑀅𑀝𑁆𑀞𑀸𑀭𑀲, ‘‘𑀩𑀸𑀳𑀺𑀭𑀲𑁆𑀲 𑀉𑀧𑀸𑀤𑀸𑀬 𑀇𑀫𑀺𑀦𑀸 𑀅𑀲𑁆𑀫𑀻𑀢𑀺 𑀳𑁄𑀢𑀺, 𑀇𑀫𑀺𑀦𑀸 𑀇𑀢𑁆𑀣𑀲𑁆𑀫𑀻𑀢𑀺 𑀳𑁄𑀢𑀻’’𑀢𑀺 (𑀯𑀺𑀪. 𑁯𑁭𑁫) 𑀯𑀸 𑀏𑀯𑀫𑀸𑀤𑀻𑀦𑀺 𑀩𑀸𑀳𑀺𑀭𑀭𑀽𑀧𑀸𑀤𑀺𑀦𑀺𑀲𑁆𑀲𑀺𑀢𑀸𑀦𑀺 𑀅𑀝𑁆𑀞𑀸𑀭𑀲𑀸𑀢𑀺 𑀙𑀢𑁆𑀢𑀺𑀁𑀲, 𑀇𑀢𑀺 𑀅𑀢𑀻𑀢𑀸𑀦𑀺 𑀙𑀢𑁆𑀢𑀺𑀁𑀲, 𑀅𑀦𑀸𑀕𑀢𑀸𑀦𑀺 𑀙𑀢𑁆𑀢𑀺𑀁𑀲, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀺 𑀙𑀢𑁆𑀢𑀺𑀁𑀲𑀸𑀢𑀺 𑀏𑀯𑀫𑁆𑀧𑀺 𑀅𑀝𑁆𑀞𑀲𑀢𑀁 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀧𑀼𑀦 𑀲𑀗𑁆𑀕𑀳𑁂 𑀓𑀭𑀺𑀬𑀫𑀸𑀦𑁂 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀙𑀴𑁂𑀯 𑀢𑀡𑁆𑀳𑀸𑀓𑀸𑀬𑀸 𑀢𑀺𑀲𑁆𑀲𑁄𑀬𑁂𑀯 𑀓𑀸𑀫𑀢𑀡𑁆𑀳𑀸𑀤𑀬𑁄 𑀳𑁄𑀦𑁆𑀢𑀻𑀢𑀺. 𑀏𑀯𑀁 𑁋

‘‘𑀦𑀺𑀤𑁆𑀤𑁂𑀲𑀢𑁆𑀣𑁂𑀦 𑀦𑀺𑀤𑁆𑀤𑁂𑀲, 𑀯𑀺𑀢𑁆𑀣𑀸𑀭𑀸 𑀯𑀺𑀢𑁆𑀣𑀸𑀭𑀲𑁆𑀲 𑀘;

𑀧𑀼𑀦 𑀲𑀗𑁆𑀕𑀳𑀢𑁄 𑀢𑀡𑁆𑀳𑀸, 𑀯𑀺𑀜𑁆𑀜𑀸𑀢𑀩𑁆𑀩𑀸 𑀯𑀺𑀪𑀸𑀯𑀺𑀦𑀸’’𑀢𑀺.

𑀯𑁂𑀤𑀦𑀸𑀦𑀺𑀤𑁆𑀤𑁂𑀲𑁂 𑀯𑁂𑀤𑀦𑀸𑀓𑀸𑀬𑀸𑀢𑀺 𑀯𑁂𑀤𑀦𑀸𑀲𑀫𑀽𑀳𑀸. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸…𑀧𑁂… 𑀫𑀦𑁄𑀲𑀫𑁆𑀨𑀲𑁆𑀲𑀚𑀸𑀯𑁂𑀤𑀦𑀸𑀢𑀺 𑀏𑀢𑀁 ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀯𑁂𑀤𑀦𑀸 𑀅𑀢𑁆𑀣𑀺 𑀓𑀼𑀲𑀮𑀸, 𑀅𑀢𑁆𑀣𑀺 𑀅𑀓𑀼𑀲𑀮𑀸, 𑀅𑀢𑁆𑀣𑀺 𑀅𑀩𑁆𑀬𑀸𑀓𑀢𑀸’’𑀢𑀺 𑀏𑀯𑀁 𑀯𑀺𑀪𑀗𑁆𑀕𑁂 (𑀯𑀺𑀪. 𑁩𑁪) 𑀆𑀕𑀢𑀢𑁆𑀢𑀸 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀲𑀼 𑀧𑀯𑀢𑁆𑀢𑀸𑀦𑀁 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀯𑁂𑀤𑀦𑀸𑀦𑀁 ‘‘𑀲𑀸𑀭𑀺𑀧𑀼𑀢𑁆𑀢𑁄 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄’’𑀢𑀺 𑀏𑀯𑀫𑀸𑀤𑀻𑀲𑀼 𑀫𑀸𑀢𑀺𑀢𑁄 𑀦𑀸𑀫𑀁 𑀯𑀺𑀬 𑀫𑀸𑀢𑀺𑀲𑀤𑀺𑀲𑀢𑁄 𑀯𑀢𑁆𑀣𑀼𑀢𑁄 𑀦𑀸𑀫𑀁. 𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑁋 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀳𑁂𑀢𑀼 𑀚𑀸𑀢𑀸 𑀯𑁂𑀤𑀦𑀸 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸𑀢𑀺. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀬𑀁 𑀢𑀸𑀯𑁂𑀢𑁆𑀣 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀸 𑀓𑀣𑀸. 𑀯𑀺𑀧𑀸𑀓𑀯𑀲𑁂𑀦 𑀧𑀦 𑀘𑀓𑁆𑀔𑀼𑀤𑁆𑀯𑀸𑀭𑁂 𑀤𑁆𑀯𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀦𑀺, 𑀤𑁆𑀯𑁂 𑀫𑀦𑁄𑀥𑀸𑀢𑀼𑀬𑁄, 𑀢𑀺𑀲𑁆𑀲𑁄 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑁄𑀢𑀺 𑀏𑀢𑀸𑀳𑀺 𑀲𑀫𑁆𑀧𑀬𑀼𑀢𑁆𑀢𑀯𑀲𑁂𑀦 𑀯𑁂𑀤𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀲𑁂𑀯 𑀦𑀬𑁄 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼. 𑀫𑀦𑁄𑀤𑁆𑀯𑀸𑀭𑁂 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀧𑀬𑀼𑀢𑁆𑀢𑀸𑀯.

𑀨𑀲𑁆𑀲𑀦𑀺𑀤𑁆𑀤𑁂𑀲𑁂 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄𑀢𑀺 𑀘𑀓𑁆𑀔𑀼𑀫𑁆𑀳𑀺 𑀲𑀫𑁆𑀨𑀲𑁆𑀲𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄…𑀧𑁂… 𑀓𑀸𑀬𑀲𑀫𑁆𑀨𑀲𑁆𑀲𑁄𑀢𑀺 𑀏𑀢𑁆𑀢𑀸𑀯𑀢𑀸 𑀘 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀸 𑀧𑀜𑁆𑀘𑀯𑀢𑁆𑀣𑀼𑀓𑀸 𑀤𑀲 𑀨𑀲𑁆𑀲𑀸 𑀯𑀼𑀢𑁆𑀢𑀸 𑀳𑁄𑀦𑁆𑀢𑀺. 𑀫𑀦𑁄𑀲𑀫𑁆𑀨𑀲𑁆𑀲𑁄𑀢𑀺 𑀇𑀫𑀺𑀦𑀸 𑀲𑁂𑀲𑀩𑀸𑀯𑀻𑀲𑀢𑀺𑀮𑁄𑀓𑀺𑀬𑀯𑀺𑀧𑀸𑀓𑀫𑀦𑀲𑀫𑁆𑀧𑀬𑀼𑀢𑁆𑀢𑀸 𑀨𑀲𑁆𑀲𑀸.

𑀲𑀴𑀸𑀬𑀢𑀦𑀦𑀺𑀤𑁆𑀤𑁂𑀲𑁂 𑀘𑀓𑁆𑀔𑀸𑀬𑀢𑀦𑀦𑁆𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀘𑁂𑀯 𑀆𑀬𑀢𑀦𑀦𑀺𑀤𑁆𑀤𑁂𑀲𑁂 𑀘 𑀯𑀼𑀢𑁆𑀢𑀫𑁂𑀯.

𑀦𑀸𑀫𑀭𑀽𑀧𑀦𑀺𑀤𑁆𑀤𑁂𑀲𑁂 𑀦𑀫𑀦𑀮𑀓𑁆𑀔𑀡𑀁 𑀦𑀸𑀫𑀁. 𑀭𑀼𑀧𑁆𑀧𑀦𑀮𑀓𑁆𑀔𑀡𑀁 𑀭𑀽𑀧𑀁. 𑀯𑀺𑀪𑀚𑀦𑁂 𑀧𑀦𑀲𑁆𑀲 𑀯𑁂𑀤𑀦𑀸𑀢𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸𑀢𑀺 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀘𑁂𑀢𑀦𑀸 𑀨𑀲𑁆𑀲𑁄 𑀫𑀦𑀲𑀺𑀓𑀸𑀭𑁄𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀸𑀫𑀜𑁆𑀘 𑀅𑀜𑁆𑀜𑁂𑀧𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀲𑀗𑁆𑀕𑀳𑀺𑀢𑀸 𑀥𑀫𑁆𑀫𑀸 𑀲𑀦𑁆𑀢𑀺, 𑀇𑀫𑁂 𑀧𑀦 𑀢𑀬𑁄 𑀲𑀩𑁆𑀩𑀤𑀼𑀩𑁆𑀩𑀮𑁂𑀲𑀼𑀧𑀺 𑀘𑀺𑀢𑁆𑀢𑁂𑀲𑀼 𑀲𑀦𑁆𑀢𑀺, 𑀢𑀲𑁆𑀫𑀸 𑀏𑀢𑁂𑀲𑀁𑀬𑁂𑀯 𑀯𑀲𑁂𑀦𑁂𑀢𑁆𑀣 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀤𑀲𑁆𑀲𑀺𑀢𑁄. 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸𑀢𑀺 𑀏𑀢𑁆𑀣 𑀘𑀢𑁆𑀢𑀸𑀭𑁄𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀫𑀳𑀸𑀪𑀽𑀢𑀸𑀢𑀺 𑀧𑀣𑀯𑀻𑀆𑀧𑀢𑁂𑀚𑀯𑀸𑀬𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀬𑁂𑀦 𑀧𑀦 𑀓𑀸𑀭𑀡𑁂𑀦 𑀢𑀸𑀦𑀺 𑀫𑀳𑀸𑀪𑀽𑀢𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀬𑁄 𑀘𑁂𑀢𑁆𑀣 𑀅𑀜𑁆𑀜𑁄 𑀯𑀺𑀦𑀺𑀘𑁆𑀙𑀬𑀦𑀬𑁄, 𑀲𑁄 𑀲𑀩𑁆𑀩𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀭𑀽𑀧𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑁄. 𑀘𑀢𑀼𑀦𑁆𑀦𑀜𑁆𑀘 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀸𑀢𑀺 𑀏𑀢𑁆𑀣 𑀧𑀦 𑀘𑀢𑀼𑀦𑁆𑀦𑀦𑁆𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀧𑀸𑀤𑀸𑀬𑀸𑀢𑀺 𑀉𑀧𑀸𑀤𑀺𑀬𑀺𑀢𑁆𑀯𑀸, 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦𑀺𑀲𑁆𑀲𑀸𑀬𑀸𑀢𑀺𑀧𑀺 𑀏𑀓𑁂. ‘‘𑀯𑀢𑁆𑀢𑀫𑀸𑀦’’𑀦𑁆𑀢𑀺 𑀅𑀬𑀜𑁆𑀘𑁂𑀢𑁆𑀣 𑀧𑀸𑀞𑀲𑁂𑀲𑁄. 𑀲𑀫𑀽𑀳𑀢𑁆𑀣𑁂 𑀯𑀸 𑀏𑀢𑀁 𑀲𑀸𑀫𑀺𑀯𑀘𑀦𑀁, 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀲𑀫𑀽𑀳𑀁 𑀉𑀧𑀸𑀤𑀸𑀬 𑀯𑀢𑁆𑀢𑀫𑀸𑀦𑀁 𑀭𑀽𑀧𑀦𑁆𑀢𑀺 𑀏𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀬𑀸𑀦𑀺 𑀘 𑀘𑀢𑁆𑀢𑀸𑀭𑀺 𑀧𑀣𑀯𑀻𑀆𑀤𑀻𑀦𑀺 𑀫𑀳𑀸𑀪𑀽𑀢𑀸𑀦𑀺, 𑀬𑀜𑁆𑀘 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀯𑀢𑁆𑀢𑀫𑀸𑀦𑀁 𑀘𑀓𑁆𑀔𑀸𑀬𑀢𑀦𑀸𑀤𑀺𑀪𑁂𑀤𑁂𑀦 𑀅𑀪𑀺𑀥𑀫𑁆𑀫𑀧𑀸𑀴𑀺𑀬𑀫𑁂𑀯 𑀯𑀼𑀢𑁆𑀢𑀁 𑀢𑁂𑀯𑀻𑀲𑀢𑀺𑀯𑀺𑀥𑀁 𑀭𑀽𑀧𑀁, 𑀢𑀁 𑀲𑀩𑁆𑀩𑀫𑁆𑀧𑀺 𑀭𑀽𑀧𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀜𑁆𑀜𑀸𑀡𑀦𑀺𑀤𑁆𑀤𑁂𑀲𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀦𑁆𑀢𑀺 𑀘𑀓𑁆𑀔𑀼𑀫𑁆𑀳𑀺 𑀯𑀺𑀜𑁆𑀜𑀸𑀡𑀁, 𑀘𑀓𑁆𑀔𑀼𑀢𑁄 𑀯𑀸 𑀚𑀸𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀏𑀯𑀁 𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀯𑀺𑀜𑁆𑀜𑀸𑀡𑀸𑀦𑀺. 𑀇𑀢𑀭𑀁 𑀧𑀦 𑀫𑀦𑁄𑀬𑁂𑀯 𑀯𑀺𑀜𑁆𑀜𑀸𑀡𑀦𑁆𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀁. 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀯𑀚𑁆𑀚𑀺𑀢𑀢𑁂𑀪𑀽𑀫𑀓𑀯𑀺𑀧𑀸𑀓𑀘𑀺𑀢𑁆𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.

𑀲𑀗𑁆𑀔𑀸𑀭𑀦𑀺𑀤𑁆𑀤𑁂𑀲𑁂 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡𑁄 𑀲𑀗𑁆𑀔𑀸𑀭𑁄. 𑀯𑀺𑀪𑀚𑀦𑁂 𑀧𑀦𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄𑀢𑀺 𑀓𑀸𑀬𑀢𑁄 𑀧𑀯𑀢𑁆𑀢𑀲𑀗𑁆𑀔𑀸𑀭𑁄. 𑀓𑀸𑀬𑀤𑁆𑀯𑀸𑀭𑁂 𑀘𑁄𑀧𑀦𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀢𑁄 𑀅𑀝𑁆𑀞𑀦𑁆𑀦𑀁, 𑀅𑀓𑀼𑀲𑀮𑀢𑁄 𑀤𑁆𑀯𑀸𑀤𑀲𑀦𑁆𑀦𑀦𑁆𑀢𑀺 𑀯𑀻𑀲𑀢𑀺𑀬𑀸 𑀓𑀸𑀬𑀲𑀜𑁆𑀘𑁂𑀢𑀦𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀘𑀻𑀲𑀗𑁆𑀔𑀸𑀭𑁄𑀢𑀺 𑀯𑀘𑀦𑀢𑁄 𑀧𑀯𑀢𑁆𑀢𑀲𑀗𑁆𑀔𑀸𑀭𑁄, 𑀯𑀘𑀻𑀤𑁆𑀯𑀸𑀭𑁂 𑀯𑀘𑀦𑀪𑁂𑀤𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀯𑀻𑀲𑀢𑀺𑀬𑀸 𑀏𑀯 𑀯𑀘𑀻𑀲𑀜𑁆𑀘𑁂𑀢𑀦𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀘𑀺𑀢𑁆𑀢𑀲𑀗𑁆𑀔𑀸𑀭𑁄𑀢𑀺 𑀘𑀺𑀢𑁆𑀢𑀢𑁄 𑀧𑀯𑀢𑁆𑀢𑀲𑀗𑁆𑀔𑀸𑀭𑁄, 𑀓𑀸𑀬𑀯𑀘𑀻𑀤𑁆𑀯𑀸𑀭𑁂 𑀘𑁄𑀧𑀦𑀁 𑀅𑀓𑀢𑁆𑀯𑀸 𑀭𑀳𑁄 𑀦𑀺𑀲𑀻𑀤𑀺𑀢𑁆𑀯𑀸 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀧𑀯𑀢𑁆𑀢𑀸𑀦𑀁 𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀯𑀲𑁂𑀦 𑀏𑀓𑀽𑀦𑀢𑀺𑀁𑀲𑀫𑀦𑁄𑀲𑀜𑁆𑀘𑁂𑀢𑀦𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁.

𑀅𑀯𑀺𑀚𑁆𑀚𑀸𑀦𑀺𑀤𑁆𑀤𑁂𑀲𑁂 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀦𑁆𑀢𑀺 𑀤𑀼𑀓𑁆𑀔𑀲𑀘𑁆𑀘𑁂 𑀅𑀜𑁆𑀜𑀸𑀡𑀁, 𑀫𑁄𑀳𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀏𑀲 𑀦𑀬𑁄 𑀤𑀼𑀓𑁆𑀔𑀲𑀫𑀼𑀤𑀬𑁂 𑀅𑀜𑁆𑀜𑀸𑀡𑀦𑁆𑀢𑀺𑀆𑀤𑀻𑀲𑀼. 𑀢𑀢𑁆𑀣 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀁 𑀯𑁂𑀤𑀺𑀢𑀩𑁆𑀩𑀁 𑀅𑀦𑁆𑀢𑁄𑀕𑀥𑀢𑁄 𑀯𑀢𑁆𑀣𑀼𑀢𑁄 𑀆𑀭𑀫𑁆𑀫𑀡𑀢𑁄 𑀧𑀝𑀺𑀘𑁆𑀙𑀸𑀤𑀦𑀢𑁄 𑀘. 𑀢𑀣𑀸 𑀳𑀺 𑀢𑀁 𑀤𑀼𑀓𑁆𑀔𑀲𑀘𑁆𑀘𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀤𑀼𑀓𑁆𑀔𑁂 𑀅𑀦𑁆𑀢𑁄𑀕𑀥𑀁, 𑀤𑀼𑀓𑁆𑀔𑀲𑀘𑁆𑀘𑀜𑁆𑀘𑀲𑁆𑀲 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑁂𑀦 𑀯𑀢𑁆𑀣𑀼, 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑁂𑀦 𑀆𑀭𑀫𑁆𑀫𑀡𑀁, 𑀤𑀼𑀓𑁆𑀔𑀲𑀘𑁆𑀘𑀁 𑀏𑀢𑀁 𑀧𑀝𑀺𑀘𑁆𑀙𑀸𑀤𑁂𑀢𑀺 𑀢𑀲𑁆𑀲 𑀬𑀸𑀣𑀸𑀯𑀮𑀓𑁆𑀔𑀡𑀧𑀝𑀺𑀯𑁂𑀥𑀦𑀺𑀯𑀸𑀭𑀡𑁂𑀦 𑀜𑀸𑀡𑀧𑁆𑀧𑀯𑀢𑁆𑀢𑀺𑀬𑀸 𑀘𑁂𑀢𑁆𑀣 𑀅𑀧𑁆𑀧𑀤𑀸𑀦𑁂𑀦.

𑀤𑀼𑀓𑁆𑀔𑀲𑀫𑀼𑀤𑀬𑁂 𑀅𑀜𑁆𑀜𑀸𑀡𑀁 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀯𑁂𑀤𑀺𑀢𑀩𑁆𑀩𑀁 𑀯𑀢𑁆𑀣𑀼𑀢𑁄 𑀆𑀭𑀫𑁆𑀫𑀡𑀢𑁄 𑀧𑀝𑀺𑀘𑁆𑀙𑀸𑀤𑀦𑀢𑁄 𑀘. 𑀦𑀺𑀭𑁄𑀥𑁂 𑀧𑀝𑀺𑀧𑀤𑀸𑀬 𑀘 𑀅𑀜𑁆𑀜𑀸𑀡𑀁 𑀏𑀓𑁂𑀦𑁂𑀯 𑀓𑀸𑀭𑀡𑁂𑀦 𑀯𑁂𑀤𑀺𑀢𑀩𑁆𑀩𑀁 𑀧𑀝𑀺𑀘𑁆𑀙𑀸𑀤𑀦𑀢𑁄. 𑀦𑀺𑀭𑁄𑀥𑀧𑀝𑀺𑀧𑀤𑀸𑀦𑀜𑁆𑀳𑀺 𑀧𑀝𑀺𑀘𑁆𑀙𑀸𑀤𑀓𑀫𑁂𑀯 𑀅𑀜𑁆𑀜𑀸𑀡𑀁 𑀢𑁂𑀲𑀁 𑀬𑀸𑀣𑀸𑀯𑀮𑀓𑁆𑀔𑀡𑀧𑀝𑀺𑀯𑁂𑀥𑀦𑀺𑀯𑀸𑀭𑀡𑁂𑀦 𑀢𑁂𑀲𑀼 𑀘 𑀜𑀸𑀡𑀧𑁆𑀧𑀯𑀢𑁆𑀢𑀺𑀬𑀸 𑀅𑀧𑁆𑀧𑀤𑀸𑀦𑁂𑀦. 𑀦 𑀧𑀦 𑀢𑀁 𑀢𑀢𑁆𑀣 𑀅𑀦𑁆𑀢𑁄𑀕𑀥𑀁 𑀢𑀲𑁆𑀫𑀺𑀁 𑀲𑀘𑁆𑀘𑀤𑁆𑀯𑀬𑁂 𑀅𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸, 𑀦 𑀢𑀲𑁆𑀲 𑀢𑀁 𑀲𑀘𑁆𑀘𑀤𑁆𑀯𑀬𑀁 𑀯𑀢𑁆𑀣𑀼 𑀅𑀲𑀳𑀚𑀸𑀢𑀢𑁆𑀢𑀸, 𑀦𑀸𑀭𑀫𑁆𑀫𑀡𑀁, 𑀢𑀤𑀸𑀭𑀩𑁆𑀪 𑀅𑀧𑁆𑀧𑀯𑀢𑁆𑀢𑀦𑀢𑁄. 𑀧𑀘𑁆𑀙𑀺𑀫𑀜𑁆𑀳𑀺 𑀲𑀘𑁆𑀘𑀤𑁆𑀯𑀬𑀁 𑀕𑀫𑁆𑀪𑀻𑀭𑀢𑁆𑀢𑀸 𑀤𑀼𑀤𑁆𑀤𑀲𑀁, 𑀦 𑀢𑀢𑁆𑀣 𑀅𑀦𑁆𑀥𑀪𑀽𑀢𑀁 𑀅𑀜𑁆𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀧𑀼𑀭𑀺𑀫𑀁 𑀧𑀦 𑀯𑀘𑀦𑀻𑀬𑀢𑁆𑀢𑁂𑀦 𑀲𑀪𑀸𑀯𑀮𑀓𑁆𑀔𑀡𑀲𑁆𑀲 𑀤𑀼𑀤𑁆𑀤𑀲𑀢𑁆𑀢𑀸 𑀕𑀫𑁆𑀪𑀻𑀭𑀁, 𑀢𑀢𑁆𑀣 𑀯𑀺𑀧𑀮𑁆𑀮𑀸𑀲𑀕𑀸𑀳𑀯𑀲𑁂𑀦 𑀧𑀯𑀢𑁆𑀢𑀢𑀺.

𑀅𑀧𑀺𑀘 ‘‘𑀤𑀼𑀓𑁆𑀔𑁂’’𑀢𑀺 𑀏𑀢𑁆𑀢𑀸𑀯𑀢𑀸 𑀲𑀗𑁆𑀕𑀳𑀢𑁄 𑀯𑀢𑁆𑀣𑀼𑀢𑁄 𑀆𑀭𑀫𑁆𑀫𑀡𑀢𑁄 𑀓𑀺𑀘𑁆𑀘𑀢𑁄 𑀘 𑀅𑀯𑀺𑀚𑁆𑀚𑀸 𑀤𑀻𑀧𑀺𑀢𑀸. ‘‘𑀤𑀼𑀓𑁆𑀔𑀲𑀫𑀼𑀤𑀬𑁂’’𑀢𑀺 𑀏𑀢𑁆𑀢𑀸𑀯𑀢𑀸 𑀯𑀢𑁆𑀣𑀼𑀢𑁄 𑀆𑀭𑀫𑁆𑀫𑀡𑀢𑁄 𑀓𑀺𑀘𑁆𑀘𑀢𑁄 𑀘. ‘‘𑀤𑀼𑀓𑁆𑀔𑀦𑀺𑀭𑁄𑀥𑁂 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬𑀸’’𑀢𑀺 𑀏𑀢𑁆𑀢𑀸𑀯𑀢𑀸 𑀓𑀺𑀘𑁆𑀘𑀢𑁄. 𑀅𑀯𑀺𑀲𑁂𑀲𑀢𑁄 𑀧𑀦 ‘‘𑀅𑀜𑁆𑀜𑀸𑀡’’𑀦𑁆𑀢𑀺 𑀏𑀢𑁂𑀦 𑀲𑀪𑀸𑀯𑀢𑁄 𑀦𑀺𑀤𑁆𑀤𑀺𑀝𑁆𑀞𑀸𑀢𑀺 𑀜𑀸𑀢𑀩𑁆𑀩𑀸.

𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂𑀢𑀺 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂. 𑀦𑀺𑀭𑁄𑀥𑁄 𑀳𑁄𑀢𑀻𑀢𑀺 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺. 𑀅𑀧𑀺𑀘𑁂𑀢𑁆𑀣 𑀲𑀩𑁆𑀩𑁂𑀳𑁂𑀯 𑀢𑁂𑀳𑀺 𑀦𑀺𑀭𑁄𑀥𑀧𑀤𑁂𑀳𑀺 𑀦𑀺𑀩𑁆𑀩𑀸𑀦𑀁 𑀤𑁂𑀲𑀺𑀢𑀁. 𑀦𑀺𑀩𑁆𑀩𑀸𑀦𑀜𑁆𑀳𑀺 𑀆𑀕𑀫𑁆𑀫 𑀢𑁂 𑀢𑁂 𑀥𑀫𑁆𑀫𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀢𑁂𑀲𑀁 𑀢𑁂𑀲𑀁 𑀦𑀺𑀭𑁄𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀺 𑀪𑀕𑀯𑀸 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀤𑁆𑀯𑀸𑀤𑀲𑀳𑀺 𑀧𑀤𑁂𑀳𑀺 𑀯𑀝𑁆𑀝𑀯𑀺𑀯𑀝𑁆𑀝𑀁 𑀤𑁂𑀲𑁂𑀦𑁆𑀢𑁄 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀲𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀽𑀢𑀺.

𑀯𑀺𑀪𑀗𑁆𑀕𑀲𑀼𑀢𑁆𑀢𑀁 𑀤𑀼𑀢𑀺𑀬𑀁.

𑁩. 𑀧𑀝𑀺𑀧𑀤𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁩. 𑀢𑀢𑀺𑀬𑁂 𑀫𑀺𑀘𑁆𑀙𑀸𑀧𑀝𑀺𑀧𑀤𑀦𑁆𑀢𑀺 𑀅𑀬𑀁 𑀢𑀸𑀯 𑀅𑀦𑀺𑀬𑁆𑀬𑀸𑀦𑀺𑀓𑀧𑀝𑀺𑀧𑀤𑀸. 𑀦𑀦𑀼 𑀘 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄𑀧𑀺 𑀅𑀢𑁆𑀣𑀺 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑁄𑀧𑀺, 𑀲𑁄 𑀓𑀣𑀁 𑀫𑀺𑀘𑁆𑀙𑀸𑀧𑀝𑀺𑀧𑀤𑀸 𑀳𑁄𑀢𑀻𑀢𑀺. 𑀯𑀝𑁆𑀝𑀲𑀻𑀲𑀢𑁆𑀢𑀸. 𑀬𑀜𑁆𑀳𑀺 𑀓𑀺𑀜𑁆𑀘𑀺 𑀪𑀯𑀢𑁆𑀢𑀬𑀲𑀗𑁆𑀔𑀸𑀢𑀁 𑀯𑀝𑁆𑀝𑀁 𑀧𑀢𑁆𑀣𑁂𑀢𑁆𑀯𑀸 𑀧𑀯𑀢𑁆𑀢𑀺𑀢𑀁, 𑀅𑀦𑁆𑀢𑀫𑀲𑁄 𑀧𑀜𑁆𑀘𑀸𑀪𑀺𑀜𑁆𑀜𑀸 𑀅𑀝𑁆𑀞 𑀯𑀸 𑀧𑀦 𑀲𑀫𑀸𑀧𑀢𑁆𑀢𑀺𑀬𑁄, 𑀲𑀩𑁆𑀩𑀁 𑀢𑀁 𑀯𑀝𑁆𑀝𑀧𑀓𑁆𑀔𑀺𑀬𑀁 𑀯𑀝𑁆𑀝𑀲𑀻𑀲𑀦𑁆𑀢𑀺 𑀯𑀝𑁆𑀝𑀲𑀻𑀲𑀢𑁆𑀢𑀸 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀯 𑀳𑁄𑀢𑀺. 𑀬𑀁 𑀧𑀦 𑀓𑀺𑀜𑁆𑀘𑀺 𑀯𑀺𑀯𑀝𑁆𑀝𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀣𑁂𑀢𑁆𑀯𑀸 𑀧𑀯𑀢𑁆𑀢𑀺𑀢𑀁, 𑀅𑀦𑁆𑀢𑀫𑀲𑁄 𑀉𑀴𑀼𑀗𑁆𑀓𑀬𑀸𑀕𑀼𑀫𑀢𑁆𑀢𑀤𑀸𑀦𑀫𑁆𑀧𑀺 𑀧𑀡𑁆𑀡𑀫𑀼𑀝𑁆𑀞𑀺𑀤𑀸𑀦𑀫𑀢𑁆𑀢𑀫𑁆𑀧𑀺, 𑀲𑀩𑁆𑀩𑀁 𑀢𑀁 𑀯𑀺𑀯𑀝𑁆𑀝𑀧𑀓𑁆𑀔𑀺𑀬𑀁 𑀯𑀺𑀯𑀝𑁆𑀝𑀦𑀺𑀲𑁆𑀲𑀺𑀢𑀁, 𑀯𑀺𑀯𑀝𑁆𑀝𑀧𑀓𑁆𑀔𑀺𑀓𑀢𑁆𑀢𑀸 𑀲𑀫𑁆𑀫𑀸𑀧𑀝𑀺𑀧𑀤𑀸𑀯 𑀳𑁄𑀢𑀺. 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀳𑀺 𑀧𑀡𑁆𑀡𑀫𑀼𑀝𑁆𑀞𑀺𑀫𑀢𑁆𑀢𑀤𑀸𑀦𑀓𑀼𑀲𑀮𑀁 𑀯𑀸 𑀳𑁄𑀢𑀼 𑀫𑀳𑀦𑁆𑀢𑀁 𑀯𑁂𑀮𑀸𑀫𑀤𑀸𑀦𑀸𑀤𑀺𑀓𑀼𑀲𑀮𑀁 𑀯𑀸, 𑀲𑀘𑁂 𑀯𑀝𑁆𑀝𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀣𑁂𑀢𑁆𑀯𑀸 𑀯𑀝𑁆𑀝𑀦𑀺𑀲𑁆𑀲𑀺𑀢𑀯𑀲𑁂𑀦 𑀫𑀺𑀘𑁆𑀙𑀸 𑀞𑀧𑀺𑀢𑀁 𑀳𑁄𑀢𑀺, 𑀯𑀝𑁆𑀝𑀫𑁂𑀯 𑀆𑀳𑀭𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀦𑁄 𑀯𑀺𑀯𑀝𑁆𑀝𑀁. ‘‘𑀇𑀤𑀁 𑀫𑁂 𑀤𑀸𑀦𑀁 𑀆𑀲𑀯𑀓𑁆𑀔𑀬𑀸𑀯𑀳𑀁 𑀳𑁄𑀢𑀽’’𑀢𑀺 𑀏𑀯𑀁 𑀧𑀦 𑀯𑀺𑀯𑀝𑁆𑀝𑀁 𑀧𑀢𑁆𑀣𑁂𑀦𑁆𑀢𑁂𑀦 𑀯𑀺𑀯𑀝𑁆𑀝𑀯𑀲𑁂𑀦 𑀲𑀫𑁆𑀫𑀸 𑀞𑀧𑀺𑀢𑀁 𑀅𑀭𑀳𑀢𑁆𑀢𑀫𑁆𑀧𑀺 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀫𑁆𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁆𑀧𑀺 𑀤𑀸𑀢𑀼𑀁 𑀲𑀓𑁆𑀓𑁄𑀢𑀺𑀬𑁂𑀯, 𑀦 𑀅𑀭𑀳𑀢𑁆𑀢𑀁 𑀅𑀧𑁆𑀧𑀢𑁆𑀯𑀸 𑀧𑀭𑀺𑀬𑁄𑀲𑀸𑀦𑀁 𑀕𑀘𑁆𑀙𑀢𑀺. 𑀇𑀢𑀺 𑀅𑀦𑀼𑀮𑁄𑀫𑀯𑀲𑁂𑀦 𑀫𑀺𑀘𑁆𑀙𑀸𑀧𑀝𑀺𑀧𑀤𑀸, 𑀧𑀝𑀺𑀮𑁄𑀫𑀯𑀲𑁂𑀦 𑀲𑀫𑁆𑀫𑀸𑀧𑀝𑀺𑀧𑀤𑀸 𑀤𑁂𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀦𑀦𑀼 𑀘𑁂𑀢𑁆𑀣 𑀧𑀝𑀺𑀧𑀤𑀸 𑀧𑀼𑀘𑁆𑀙𑀺𑀢𑀸, 𑀦𑀺𑀩𑁆𑀩𑀸𑀦𑀁 𑀪𑀸𑀚𑀺𑀢𑀁, 𑀦𑀺𑀬𑁆𑀬𑀸𑀢𑀦𑁂𑀧𑀺 𑀧𑀝𑀺𑀧𑀤𑀸𑀯 𑀦𑀺𑀬𑁆𑀬𑀸𑀢𑀺𑀢𑀸. 𑀦 𑀘 𑀦𑀺𑀩𑁆𑀩𑀸𑀦𑀲𑁆𑀲 𑀧𑀝𑀺𑀧𑀤𑀸𑀢𑀺 𑀦𑀸𑀫𑀁, 𑀲𑀯𑀺𑀧𑀲𑁆𑀲𑀦𑀸𑀦𑀁 𑀧𑀦 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀫𑁂𑀢𑀁 𑀦𑀸𑀫𑀁, 𑀢𑀲𑁆𑀫𑀸 𑀧𑀼𑀘𑁆𑀙𑀸𑀦𑀺𑀬𑁆𑀬𑀸𑀢𑀦𑁂𑀳𑀺 𑀧𑀤𑀪𑀸𑀚𑀦𑀁 𑀦 𑀲𑀫𑁂𑀢𑀻𑀢𑀺. 𑀦𑁄 𑀦 𑀲𑀫𑁂𑀢𑀺, 𑀓𑀲𑁆𑀫𑀸? 𑀨𑀮𑁂𑀦 𑀧𑀝𑀺𑀧𑀤𑀸𑀬 𑀤𑀲𑁆𑀲𑀺𑀢𑀢𑁆𑀢𑀸. 𑀨𑀮𑁂𑀦 𑀳𑁂𑀢𑁆𑀣 𑀧𑀝𑀺𑀧𑀤𑀸 𑀤𑀲𑁆𑀲𑀺𑀢𑀸. ‘‘𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸 𑀲𑀗𑁆𑀔𑀸𑀭𑀦𑀺𑀭𑁄𑀥𑁄’’𑀢𑀺 𑀏𑀢𑀁 𑀦𑀺𑀭𑁄𑀥𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀬𑀲𑁆𑀲𑀸 𑀧𑀝𑀺𑀧𑀤𑀸𑀬 𑀨𑀮𑀁, 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀧𑀝𑀺𑀧𑀤𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑁂 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑀸𑀢𑀺 𑀏𑀢𑁆𑀣 𑀯𑀺𑀭𑀸𑀕𑁄 𑀦𑀺𑀭𑁄𑀥𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀅𑀲𑁂𑀲𑀯𑀺𑀭𑀸𑀕𑀸 𑀅𑀲𑁂𑀲𑀦𑀺𑀭𑁄𑀥𑀸𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄. 𑀬𑁂𑀦 𑀯𑀸 𑀯𑀺𑀭𑀸𑀕𑀲𑀗𑁆𑀔𑀸𑀢𑁂𑀦 𑀫𑀕𑁆𑀕𑁂𑀦 𑀅𑀲𑁂𑀲𑀦𑀺𑀭𑁄𑀥𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀏𑀢𑀁 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 𑀲𑀢𑀺 𑀲𑀸𑀦𑀼𑀪𑀸𑀯𑀸 𑀧𑀝𑀺𑀧𑀤𑀸 𑀯𑀺𑀪𑀢𑁆𑀢𑀸 𑀳𑁄𑀢𑀺. 𑀇𑀢𑀺 𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑁂 𑀯𑀝𑁆𑀝𑀯𑀺𑀯𑀝𑁆𑀝𑀫𑁂𑀯 𑀓𑀣𑀺𑀢𑀦𑁆𑀢𑀺. 𑀢𑀢𑀺𑀬𑀁.

𑁪. 𑀯𑀺𑀧𑀲𑁆𑀲𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁪. 𑀘𑀢𑀼𑀢𑁆𑀣𑁂 𑀯𑀺𑀧𑀲𑁆𑀲𑀺𑀲𑁆𑀲𑀸𑀢𑀺 𑀢𑀲𑁆𑀲 𑀓𑀺𑀭 𑀩𑁄𑀥𑀺𑀲𑀢𑁆𑀢𑀲𑁆𑀲 𑀬𑀣𑀸 𑀮𑁄𑀓𑀺𑀬𑀫𑀦𑀼𑀲𑁆𑀲𑀸𑀦𑀁 𑀓𑀺𑀜𑁆𑀘𑀺𑀤𑁂𑀯 𑀧𑀲𑁆𑀲𑀦𑁆𑀢𑀸𑀦𑀁 𑀧𑀭𑀺𑀢𑁆𑀢𑀓𑀫𑁆𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀲𑁆𑀲 𑀓𑀫𑁆𑀫𑀚𑀧𑀲𑀸𑀤𑀲𑁆𑀲 𑀤𑀼𑀩𑁆𑀩𑀮𑀢𑁆𑀢𑀸 𑀅𑀓𑁆𑀔𑀻𑀦𑀺 𑀯𑀺𑀧𑁆𑀨𑀦𑁆𑀤𑀦𑁆𑀢𑀺, 𑀦 𑀏𑀯𑀁 𑀯𑀺𑀧𑁆𑀨𑀦𑁆𑀤𑀺𑀁𑀲𑀼. 𑀩𑀮𑀯𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀲𑁆𑀲 𑀧𑀦 𑀓𑀫𑁆𑀫𑀚𑀧𑀲𑀸𑀤𑀲𑁆𑀲 𑀩𑀮𑀯𑀢𑁆𑀢𑀸 𑀅𑀯𑀺𑀧𑁆𑀨𑀦𑁆𑀤𑀦𑁆𑀢𑁂𑀳𑀺 𑀅𑀦𑀺𑀫𑀺𑀲𑁂𑀳𑀺 𑀏𑀯 𑀅𑀓𑁆𑀔𑀻𑀳𑀺 𑀧𑀲𑁆𑀲𑀺 𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀦𑀺𑀫𑀺𑀲𑀦𑁆𑀢𑁄 𑀓𑀼𑀫𑀸𑀭𑁄 𑀧𑁂𑀓𑁆𑀔𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 ‘𑀯𑀺𑀧𑀲𑁆𑀲𑀻 𑀯𑀺𑀧𑀲𑁆𑀲𑀻’𑀢𑁆𑀯𑁂𑀯 𑀲𑀫𑀜𑁆𑀜𑀸 𑀉𑀤𑀧𑀸𑀤𑀻’’𑀢𑀺 (𑀤𑀻. 𑀦𑀺. 𑁨.𑁪𑁦). 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀅𑀦𑁆𑀢𑀭𑀦𑁆𑀢𑀭𑀸 𑀦𑀺𑀫𑀺𑀲𑀚𑀦𑀺𑀢𑀦𑁆𑀥𑀓𑀸𑀭𑀯𑀺𑀭𑀳𑁂𑀦 𑀯𑀺𑀲𑀼𑀤𑁆𑀥𑀁 𑀧𑀲𑁆𑀲𑀢𑀺, 𑀯𑀺𑀯𑀝𑁂𑀳𑀺 𑀯𑀸 𑀅𑀓𑁆𑀔𑀻𑀳𑀺 𑀧𑀲𑁆𑀲𑀢𑀻𑀢𑀺 𑀯𑀺𑀧𑀲𑁆𑀲𑀻. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀧𑀘𑁆𑀙𑀺𑀫𑀪𑀯𑀺𑀓𑀸𑀦𑀁 𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑀸𑀦𑀁 𑀩𑀮𑀯𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀲𑁆𑀲 𑀓𑀫𑁆𑀫𑀚𑀧𑀲𑀸𑀤𑀲𑁆𑀲 𑀩𑀮𑀯𑀢𑁆𑀢𑀸 𑀅𑀓𑁆𑀔𑀻𑀦𑀺 𑀦 𑀯𑀺𑀧𑁆𑀨𑀦𑁆𑀤𑀦𑁆𑀢𑀺, 𑀲𑁄 𑀧𑀦 𑀩𑁄𑀥𑀺𑀲𑀢𑁆𑀢𑁄 𑀏𑀢𑁂𑀦𑁂𑀯 𑀦𑀸𑀫𑀁 𑀮𑀪𑀺.

𑀅𑀧𑀺𑀘 𑀯𑀺𑀘𑁂𑀬𑁆𑀬 𑀯𑀺𑀘𑁂𑀬𑁆𑀬 𑀧𑀲𑁆𑀲𑀢𑀻𑀢𑀺 𑀯𑀺𑀧𑀲𑁆𑀲𑀻, 𑀯𑀺𑀘𑀺𑀦𑀺𑀢𑁆𑀯𑀸 𑀯𑀺𑀘𑀺𑀦𑀺𑀢𑁆𑀯𑀸 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀤𑀺𑀯𑀲𑀁 𑀓𑀺𑀭 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀢𑁆𑀣𑁂 𑀅𑀦𑀼𑀲𑀸𑀲𑀦𑁆𑀢𑀲𑁆𑀲 𑀭𑀜𑁆𑀜𑁄 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀫𑀳𑀸𑀧𑀼𑀭𑀺𑀲𑀁 𑀆𑀳𑀭𑀺𑀢𑁆𑀯𑀸 𑀅𑀗𑁆𑀓𑁂 𑀞𑀧𑀬𑀺𑀁𑀲𑀼. 𑀢𑀲𑁆𑀲 𑀢𑀁 𑀅𑀗𑁆𑀓𑁂 𑀓𑀢𑁆𑀯𑀸 𑀧𑀮𑀸𑀴𑀬𑀫𑀸𑀦𑀲𑁆𑀲𑁂𑀯 𑀅𑀫𑀘𑁆𑀘𑀸 𑀲𑀸𑀫𑀺𑀓𑀁 𑀅𑀲𑁆𑀲𑀸𑀫𑀺𑀓𑀁 𑀅𑀓𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀅𑀦𑀢𑁆𑀢𑀫𑀦𑀲𑀤𑁆𑀤𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀭𑀸𑀚𑀸 ‘‘𑀓𑀺𑀫𑁂𑀢𑀁 𑀉𑀧𑀥𑀸𑀭𑁂𑀣𑀸’’𑀢𑀺 𑀆𑀳. 𑀉𑀧𑀥𑀸𑀭𑀬𑀫𑀸𑀦𑀸 𑀅𑀜𑁆𑀜𑀁 𑀅𑀤𑀺𑀲𑁆𑀯𑀸 ‘‘𑀅𑀝𑁆𑀝𑀲𑁆𑀲 𑀤𑀼𑀩𑁆𑀩𑀺𑀦𑀺𑀘𑁆𑀙𑀺𑀢𑀢𑁆𑀢𑀸 𑀏𑀯𑀁 𑀓𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀼𑀦 𑀲𑀸𑀫𑀺𑀓𑀫𑁂𑀯 𑀲𑀸𑀫𑀺𑀓𑀁 𑀓𑀢𑁆𑀯𑀸 ‘‘𑀜𑀢𑁆𑀯𑀸 𑀦𑀼 𑀔𑁄 𑀓𑀼𑀫𑀸𑀭𑁄 𑀏𑀯𑀁 𑀓𑀭𑁄𑀢𑀻’’𑀢𑀺? 𑀯𑀻𑀫𑀁𑀲𑀦𑁆𑀢𑀸 𑀧𑀼𑀦 𑀲𑀸𑀫𑀺𑀓𑀁 𑀅𑀲𑁆𑀲𑀸𑀫𑀺𑀓𑀫𑀓𑀁𑀲𑀼. 𑀧𑀼𑀦 𑀩𑁄𑀥𑀺𑀲𑀢𑁆𑀢𑁄 𑀢𑀣𑁂𑀯 𑀲𑀤𑁆𑀤𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀅𑀣 𑀭𑀸𑀚𑀸 ‘‘𑀚𑀸𑀦𑀸𑀢𑀺 𑀫𑀳𑀸𑀧𑀼𑀭𑀺𑀲𑁄’’𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀅𑀧𑁆𑀧𑀫𑀢𑁆𑀢𑁄 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀺𑀘𑁂𑀬𑁆𑀬 𑀯𑀺𑀘𑁂𑀬𑁆𑀬 𑀓𑀼𑀫𑀸𑀭𑁄 𑀅𑀢𑁆𑀣𑁂 𑀧𑀦𑀸𑀬𑀢𑀺 𑀜𑀸𑀬𑁂𑀦𑀸𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀧𑀲𑁆𑀲𑀺𑀲𑁆𑀲 𑀓𑀼𑀫𑀸𑀭𑀲𑁆𑀲 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 ‘𑀯𑀺𑀧𑀲𑁆𑀲𑀻 𑀯𑀺𑀧𑀲𑁆𑀲𑀻’𑀢𑁆𑀯𑁂𑀯 𑀲𑀫𑀜𑁆𑀜𑀸 𑀉𑀤𑀧𑀸𑀤𑀻’’𑀢𑀺 (𑀤𑀻. 𑀦𑀺. 𑁨.𑁪𑁧).

𑀪𑀕𑀯𑀢𑁄𑀢𑀺 𑀪𑀸𑀕𑁆𑀬𑀲𑀫𑁆𑀧𑀦𑁆𑀦𑀲𑁆𑀲. 𑀅𑀭𑀳𑀢𑁄𑀢𑀺 𑀭𑀸𑀕𑀸𑀤𑀺𑀅𑀭𑀻𑀦𑀁 𑀳𑀢𑀢𑁆𑀢𑀸, 𑀲𑀁𑀲𑀸𑀭𑀘𑀓𑁆𑀓𑀲𑁆𑀲 𑀯𑀸 𑀅𑀭𑀸𑀦𑀁 𑀳𑀢𑀢𑁆𑀢𑀸, 𑀧𑀘𑁆𑀘𑀬𑀸𑀦𑀁 𑀯𑀸 𑀅𑀭𑀳𑀢𑁆𑀢𑀸 𑀅𑀭𑀳𑀸𑀢𑀺 𑀏𑀯𑀁 𑀕𑀼𑀡𑀢𑁄 𑀉𑀧𑁆𑀧𑀦𑁆𑀦𑀦𑀸𑀫𑀥𑁂𑀬𑁆𑀬𑀲𑁆𑀲. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸𑀢𑀺 𑀲𑀫𑁆𑀫𑀸 𑀦𑀬𑁂𑀦 𑀳𑁂𑀢𑀼𑀦𑀸 𑀲𑀸𑀫𑀁 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁂𑀦 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀼𑀤𑁆𑀥𑀲𑁆𑀲. 𑀧𑀼𑀩𑁆𑀩𑁂𑀯 𑀲𑀫𑁆𑀩𑁄𑀥𑀸𑀢𑀺 𑀲𑀫𑁆𑀩𑁄𑀥𑁄 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡𑀁, 𑀢𑀢𑁄 𑀧𑀼𑀩𑁆𑀩𑁂𑀯. 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄𑀢𑀺 𑀏𑀢𑁆𑀣 𑀩𑁄𑀥𑀻𑀢𑀺 𑀜𑀸𑀡𑀁, 𑀩𑁄𑀥𑀺𑀫𑀸 𑀲𑀢𑁆𑀢𑁄 𑀩𑁄𑀥𑀺𑀲𑀢𑁆𑀢𑁄, 𑀜𑀸𑀡𑀯𑀸 𑀧𑀜𑁆𑀜𑀯𑀸 𑀧𑀡𑁆𑀟𑀺𑀢𑁄𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀜𑁆𑀳𑀺 𑀧𑀸𑀤𑀫𑀽𑀮𑁂 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀧𑀡𑁆𑀟𑀺𑀢𑁄𑀯 𑀲𑁄 𑀲𑀢𑁆𑀢𑁄, 𑀦 𑀅𑀦𑁆𑀥𑀩𑀸𑀮𑁄𑀢𑀺 𑀩𑁄𑀥𑀺𑀲𑀢𑁆𑀢𑁄. 𑀬𑀣𑀸 𑀯𑀸 𑀉𑀤𑀓𑀢𑁄 𑀉𑀕𑁆𑀕𑀦𑁆𑀢𑁆𑀯𑀸 𑀞𑀺𑀢𑀁 𑀧𑀭𑀺𑀧𑀸𑀓𑀕𑀢𑀁 𑀧𑀤𑀼𑀫𑀁 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑁆𑀨𑀲𑁆𑀲𑁂𑀦 𑀅𑀯𑀲𑁆𑀲𑀁 𑀩𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀩𑀼𑀚𑁆𑀛𑀦𑀓𑀧𑀤𑀼𑀫𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑁂 𑀩𑁆𑀬𑀸𑀓𑀭𑀡𑀲𑁆𑀲 𑀮𑀤𑁆𑀥𑀢𑁆𑀢𑀸 𑀅𑀯𑀲𑁆𑀲𑀁 𑀅𑀦𑀦𑁆𑀢𑀭𑀸𑀬𑁂𑀦 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀩𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀩𑀼𑀚𑁆𑀛𑀦𑀓𑀲𑀢𑁆𑀢𑁄𑀢𑀺𑀧𑀺 𑀩𑁄𑀥𑀺𑀲𑀢𑁆𑀢𑁄. 𑀬𑀸 𑀘 𑀏𑀲𑀸 𑀘𑀢𑀼𑀫𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀸 𑀩𑁄𑀥𑀺, 𑀢𑀁 𑀧𑀢𑁆𑀣𑀬𑀫𑀸𑀦𑁄 𑀧𑀯𑀢𑁆𑀢𑀢𑀻𑀢𑀺 𑀩𑁄𑀥𑀺𑀬𑀁 𑀲𑀢𑁆𑀢𑁄 𑀆𑀲𑀢𑁆𑀢𑁄𑀢𑀺𑀧𑀺 𑀩𑁄𑀥𑀺𑀲𑀢𑁆𑀢𑁄. 𑀏𑀯𑀁 𑀕𑀼𑀡𑀢𑁄 𑀉𑀧𑁆𑀧𑀦𑁆𑀦𑀦𑀸𑀫𑀯𑀲𑁂𑀦 𑀩𑁄𑀥𑀺𑀲𑀢𑁆𑀢𑀲𑁆𑀲𑁂𑀯 𑀲𑀢𑁄. 𑀓𑀺𑀘𑁆𑀙𑀦𑁆𑀢𑀺 𑀤𑀼𑀓𑁆𑀔𑀁. 𑀆𑀧𑀦𑁆𑀦𑁄𑀢𑀺 𑀅𑀦𑀼𑀧𑁆𑀧𑀢𑁆𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀳𑁄 𑀅𑀬𑀁 𑀲𑀢𑁆𑀢𑀮𑁄𑀓𑁄 𑀤𑀼𑀓𑁆𑀔𑀁 𑀅𑀦𑀼𑀧𑁆𑀧𑀢𑁆𑀢𑁄𑀢𑀺. 𑀘𑀯𑀢𑀺 𑀘 𑀉𑀧𑀧𑀚𑁆𑀚𑀢𑀺 𑀘𑀸𑀢𑀺 𑀇𑀤𑀁 𑀅𑀧𑀭𑀸𑀧𑀭𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀦𑀺𑀲𑁆𑀲𑀭𑀡𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀢𑀜𑁆𑀳𑀺 𑀚𑀭𑀸𑀫𑀭𑀡𑀤𑀼𑀓𑁆𑀔𑀢𑁄 𑀦𑀺𑀲𑁆𑀲𑀝𑀢𑁆𑀢𑀸 𑀢𑀲𑁆𑀲 𑀦𑀺𑀲𑁆𑀲𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀢𑀺 𑀓𑀢𑀭𑀲𑁆𑀫𑀺𑀁 𑀦𑀼 𑀔𑁄 𑀓𑀸𑀮𑁂.

𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸𑀢𑀺 𑀉𑀧𑀸𑀬𑀫𑀦𑀲𑀺𑀓𑀸𑀭𑁂𑀦 𑀧𑀣𑀫𑀦𑀲𑀺𑀓𑀸𑀭𑁂𑀦. 𑀅𑀳𑀼 𑀧𑀜𑁆𑀜𑀸𑀬 𑀅𑀪𑀺𑀲𑀫𑀬𑁄𑀢𑀺 𑀧𑀜𑁆𑀜𑀸𑀬 𑀲𑀤𑁆𑀥𑀺𑀁 𑀚𑀭𑀸𑀫𑀭𑀡𑀓𑀸𑀭𑀡𑀲𑁆𑀲 𑀅𑀪𑀺𑀲𑀫𑀬𑁄 𑀲𑀫𑀯𑀸𑀬𑁄 𑀲𑀫𑀸𑀬𑁄𑀕𑁄 𑀅𑀳𑁄𑀲𑀺, ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺 𑀇𑀤𑀁 𑀢𑁂𑀦 𑀤𑀺𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸 𑀅𑀳𑀼 𑀧𑀜𑁆𑀜𑀸𑀬𑀸𑀢𑀺 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦 𑀘 𑀧𑀜𑁆𑀜𑀸𑀬 𑀘 𑀅𑀪𑀺𑀲𑀫𑀬𑁄 𑀅𑀳𑀼. ‘‘𑀚𑀸𑀢𑀺𑀬𑀸 𑀔𑁄 𑀲𑀢𑀺 𑀚𑀭𑀸𑀫𑀭𑀡’’𑀦𑁆𑀢𑀺, 𑀏𑀯𑀁 𑀚𑀭𑀸𑀫𑀭𑀡𑀓𑀸𑀭𑀡𑀲𑁆𑀲 𑀧𑀝𑀺𑀯𑁂𑀥𑁄 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀇𑀢𑀺 𑀳𑀺𑀤𑀦𑁆𑀢𑀺 𑀏𑀯𑀫𑀺𑀤𑀁. 𑀲𑀫𑀼𑀤𑀬𑁄 𑀲𑀫𑀼𑀤𑀬𑁄𑀢𑀺 𑀏𑀓𑀸𑀤𑀲𑀲𑀼 𑀞𑀸𑀦𑁂𑀲𑀼 𑀲𑀗𑁆𑀔𑀸𑀭𑀸𑀤𑀻𑀦𑀁 𑀲𑀫𑀼𑀤𑀬𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀦𑀺𑀤𑁆𑀤𑀺𑀲𑀢𑀺. 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀽𑀢𑀺 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀦𑀁 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺. 𑀏𑀯𑀁 𑀇𑀢𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼, 𑀘𑀢𑀽𑀲𑀼 𑀯𑀸 𑀅𑀭𑀺𑀬𑀲𑀘𑁆𑀘𑀥𑀫𑁆𑀫𑁂𑀲𑀼. 𑀘𑀓𑁆𑀔𑀼𑀦𑁆𑀢𑀺𑀆𑀤𑀻𑀦𑀺 𑀜𑀸𑀡𑀯𑁂𑀯𑀘𑀦𑀸𑀦𑁂𑀯. 𑀜𑀸𑀡𑀫𑁂𑀯 𑀳𑁂𑀢𑁆𑀣 𑀤𑀲𑁆𑀲𑀦𑀝𑁆𑀞𑁂𑀦 𑀘𑀓𑁆𑀔𑀼, 𑀜𑀸𑀢𑀝𑁆𑀞𑁂𑀦 𑀜𑀸𑀡𑀁, 𑀧𑀚𑀸𑀦𑀦𑀝𑁆𑀞𑁂𑀦 𑀧𑀜𑁆𑀜𑀸, 𑀧𑀝𑀺𑀯𑁂𑀥𑀦𑀝𑁆𑀞𑁂𑀦 𑀯𑀺𑀚𑁆𑀚𑀸, 𑀑𑀪𑀸𑀲𑀦𑀝𑁆𑀞𑁂𑀦 𑀆𑀮𑁄𑀓𑁄𑀢𑀺 𑀯𑀼𑀢𑁆𑀢𑀁. 𑀢𑀁 𑀧𑀦𑁂𑀢𑀁 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀁 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦𑀺𑀭𑁄𑀥𑀯𑀸𑀭𑁂𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀢𑀼𑀢𑁆𑀣𑀁.

𑁫-𑁧𑁦. 𑀲𑀺𑀔𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫-𑁧𑁦. 𑀧𑀜𑁆𑀘𑀫𑀸𑀤𑀻𑀲𑀼 𑀲𑀺𑀔𑀺𑀲𑁆𑀲, 𑀪𑀺𑀓𑁆𑀔𑀯𑁂𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 ‘‘𑀲𑀺𑀔𑀺𑀲𑁆𑀲𑀧𑀺, 𑀪𑀺𑀓𑁆𑀔𑀯𑁂’’𑀢𑀺 𑀦 𑀏𑀯𑀁 𑀬𑁄𑀚𑁂𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀲𑁆𑀫𑀸? 𑀏𑀓𑀸𑀲𑀦𑁂 𑀅𑀤𑁂𑀲𑀺𑀢𑀢𑁆𑀢𑀸. 𑀦𑀸𑀦𑀸𑀞𑀸𑀦𑁂𑀲𑀼 𑀳𑀺 𑀏𑀢𑀸𑀦𑀺 𑀤𑁂𑀲𑀺𑀢𑀸𑀦𑀺, 𑀅𑀢𑁆𑀣𑁄 𑀧𑀦 𑀲𑀩𑁆𑀩𑀢𑁆𑀣 𑀲𑀤𑀺𑀲𑁄𑀬𑁂𑀯. 𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑀸𑀦𑀜𑁆𑀳𑀺 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀸𑀦𑀁 𑀦 𑀅𑀜𑁆𑀜𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀆𑀘𑀺𑀓𑁆𑀔𑀢𑀺 𑁋 ‘‘𑀅𑀢𑀻𑀢𑁂 𑀩𑁄𑀥𑀺𑀲𑀢𑁆𑀢𑀸 𑀧𑀘𑁆𑀘𑀬𑀸𑀓𑀸𑀭𑀁 𑀲𑀫𑁆𑀫𑀲𑀺𑀢𑁆𑀯𑀸 𑀩𑀼𑀤𑁆𑀥𑀸 𑀚𑀸𑀢𑀸’’𑀢𑀺. 𑀬𑀣𑀸 𑀧𑀦 𑀧𑀞𑀫𑀓𑀧𑁆𑀧𑀺𑀓𑀓𑀸𑀮𑁂 𑀤𑁂𑀯𑁂 𑀯𑀼𑀝𑁆𑀞𑁂 𑀉𑀤𑀓𑀲𑁆𑀲 𑀕𑀢𑀫𑀕𑁆𑀕𑁂𑀦𑁂𑀯 𑀅𑀧𑀭𑀸𑀧𑀭𑀁 𑀯𑀼𑀝𑁆𑀞𑀺𑀉𑀤𑀓𑀁 𑀕𑀘𑁆𑀙𑀢𑀺, 𑀏𑀯𑀁 𑀢𑁂𑀳𑀺 𑀢𑁂𑀳𑀺 𑀧𑀼𑀭𑀺𑀫𑀩𑀼𑀤𑁆𑀥𑁂𑀳𑀺 𑀕𑀢𑀫𑀕𑁆𑀕𑁂𑀦𑁂𑀯 𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀕𑀘𑁆𑀙𑀦𑁆𑀢𑀺. 𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑀸 𑀳𑀺 𑀆𑀦𑀸𑀧𑀸𑀦𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀧𑀘𑁆𑀘𑀬𑀸𑀓𑀸𑀭𑁂 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸 𑀢𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀲𑀫𑁆𑀫𑀲𑀺𑀢𑁆𑀯𑀸 𑀩𑀼𑀤𑁆𑀥𑀸 𑀳𑁄𑀦𑁆𑀢𑀻𑀢𑀺 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢𑀲𑀼 𑀲𑀼𑀢𑁆𑀢𑁂𑀲𑀼 𑀩𑀼𑀤𑁆𑀥𑀯𑀺𑀧𑀲𑁆𑀲𑀦𑀸 𑀦𑀸𑀫 𑀓𑀣𑀺𑀢𑀸𑀢𑀺.

𑀩𑀼𑀤𑁆𑀥𑀯𑀕𑁆𑀕𑁄 𑀧𑀞𑀫𑁄.

𑁨. 𑀆𑀳𑀸𑀭𑀯𑀕𑁆𑀕𑁄

𑁧. 𑀆𑀳𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧. 𑀆𑀳𑀸𑀭𑀯𑀕𑁆𑀕𑀲𑁆𑀲 𑀧𑀞𑀫𑁂 𑀆𑀳𑀸𑀭𑀸𑀢𑀺 𑀧𑀘𑁆𑀘𑀬𑀸. 𑀧𑀘𑁆𑀘𑀬𑀸 𑀳𑀺 𑀆𑀳𑀭𑀦𑁆𑀢𑀺 𑀅𑀢𑁆𑀢𑀦𑁄 𑀨𑀮𑀁, 𑀢𑀲𑁆𑀫𑀸 𑀆𑀳𑀸𑀭𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀪𑀽𑀢𑀸𑀦𑀁 𑀯𑀸 𑀲𑀢𑁆𑀢𑀸𑀦𑀦𑁆𑀢𑀺𑀆𑀤𑀻𑀲𑀼 𑀪𑀽𑀢𑀸𑀢𑀺 𑀚𑀸𑀢𑀸 𑀦𑀺𑀩𑁆𑀩𑀢𑁆𑀢𑀸. 𑀲𑀫𑁆𑀪𑀯𑁂𑀲𑀺𑀦𑁄𑀢𑀺 𑀬𑁂 𑀲𑀫𑁆𑀪𑀯𑀁 𑀚𑀸𑀢𑀺𑀁 𑀦𑀺𑀩𑁆𑀩𑀢𑁆𑀢𑀺𑀁 𑀏𑀲𑀦𑁆𑀢𑀺 𑀕𑀯𑁂𑀲𑀦𑁆𑀢𑀺. 𑀢𑀢𑁆𑀣 𑀘𑀢𑀽𑀲𑀼 𑀬𑁄𑀦𑀻𑀲𑀼 𑀅𑀡𑁆𑀟𑀚𑀚𑀮𑀸𑀩𑀼𑀚𑀸 𑀲𑀢𑁆𑀢𑀸 𑀬𑀸𑀯 𑀅𑀡𑁆𑀟𑀓𑁄𑀲𑀁 𑀯𑀢𑁆𑀣𑀺𑀓𑁄𑀲𑀜𑁆𑀘 𑀦 𑀪𑀺𑀦𑁆𑀤𑀦𑁆𑀢𑀺, 𑀢𑀸𑀯 𑀲𑀫𑁆𑀪𑀯𑁂𑀲𑀺𑀦𑁄 𑀦𑀸𑀫, 𑀅𑀡𑁆𑀟𑀓𑁄𑀲𑀁 𑀯𑀢𑁆𑀣𑀺𑀓𑁄𑀲𑀜𑁆𑀘 𑀪𑀺𑀦𑁆𑀤𑀺𑀢𑁆𑀯𑀸 𑀩𑀳𑀺 𑀦𑀺𑀓𑁆𑀔𑀦𑁆𑀢𑀸 𑀪𑀽𑀢𑀸 𑀦𑀸𑀫. 𑀲𑀁𑀲𑁂𑀤𑀚𑀸 𑀑𑀧𑀧𑀸𑀢𑀺𑀓𑀸 𑀘 𑀧𑀞𑀫𑀘𑀺𑀢𑁆𑀢𑀓𑁆𑀔𑀡𑁂 𑀲𑀫𑁆𑀪𑀯𑁂𑀲𑀺𑀦𑁄 𑀦𑀸𑀫, 𑀤𑀼𑀢𑀺𑀬𑀘𑀺𑀢𑁆𑀢𑀓𑁆𑀔𑀡𑀢𑁄 𑀧𑀪𑀼𑀢𑀺 𑀪𑀽𑀢𑀸 𑀦𑀸𑀫. 𑀬𑁂𑀦 𑀯𑀸 𑀇𑀭𑀺𑀬𑀸𑀧𑀣𑁂𑀦 𑀚𑀸𑀬𑀦𑁆𑀢𑀺, 𑀬𑀸𑀯 𑀢𑀢𑁄 𑀅𑀜𑁆𑀜𑀁 𑀦 𑀧𑀸𑀧𑀼𑀡𑀦𑁆𑀢𑀺, 𑀢𑀸𑀯 𑀲𑀫𑁆𑀪𑀯𑁂𑀲𑀺𑀦𑁄 𑀦𑀸𑀫, 𑀢𑀢𑁄 𑀧𑀭𑀁 𑀪𑀽𑀢𑀸 𑀦𑀸𑀫. 𑀅𑀣 𑀯𑀸 𑀪𑀽𑀢𑀸𑀢𑀺 𑀚𑀸𑀢𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀸, 𑀬𑁂 𑀪𑀽𑀢𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀸𑀬𑁂𑀯, 𑀦 𑀧𑀼𑀦 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀔𑀻𑀡𑀸𑀲𑀯𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀲𑀫𑁆𑀪𑀯𑀫𑁂𑀲𑀦𑁆𑀢𑀻𑀢𑀺 𑀲𑀫𑁆𑀪𑀯𑁂𑀲𑀺𑀦𑁄. 𑀅𑀧𑁆𑀧𑀳𑀻𑀦𑀪𑀯𑀲𑀁𑀬𑁄𑀚𑀦𑀢𑁆𑀢𑀸 𑀆𑀬𑀢𑀺𑀫𑁆𑀧𑀺 𑀲𑀫𑁆𑀪𑀯𑀁 𑀏𑀲𑀦𑁆𑀢𑀸𑀦𑀁 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀩𑁆𑀩𑀲𑀢𑁆𑀢𑁂 𑀧𑀭𑀺𑀬𑀸𑀤𑀺𑀬𑀢𑀺. 𑀯𑀸𑀲𑀤𑁆𑀤𑁄 𑀘𑁂𑀢𑁆𑀣 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀢𑀲𑁆𑀫𑀸 𑀪𑀽𑀢𑀸𑀦𑀜𑁆𑀘 𑀲𑀫𑁆𑀪𑀯𑁂𑀲𑀻𑀦𑀜𑁆𑀘𑀸𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀞𑀺𑀢𑀺𑀬𑀸𑀢𑀺 𑀞𑀺𑀢𑀢𑁆𑀣𑀁. 𑀅𑀦𑀼𑀕𑁆𑀕𑀳𑀸𑀬𑀸𑀢𑀺 𑀅𑀦𑀼𑀕𑁆𑀕𑀳𑀢𑁆𑀣𑀁. 𑀯𑀘𑀦𑀪𑁂𑀤𑁄𑀬𑁂𑀯 𑀘𑁂𑀲, 𑀅𑀢𑁆𑀣𑁄 𑀧𑀦 𑀤𑁆𑀯𑀺𑀦𑁆𑀦𑀫𑁆𑀧𑀺 𑀧𑀤𑀸𑀦𑀁 𑀏𑀓𑁄𑀬𑁂𑀯. 𑀅𑀣 𑀯𑀸 𑀞𑀺𑀢𑀺𑀬𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀩𑀦𑁆𑀥𑀯𑀲𑁂𑀦 𑀅𑀯𑀺𑀘𑁆𑀙𑁂𑀤𑀸𑀬. 𑀅𑀦𑀼𑀕𑁆𑀕𑀳𑀸𑀬𑀸𑀢𑀺 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀉𑀧𑁆𑀧𑀸𑀤𑀸𑀬. 𑀉𑀪𑁄𑀧𑀺 𑀘𑁂𑀢𑀸𑀦𑀺 ‘‘𑀪𑀽𑀢𑀸𑀦𑀁 𑀯𑀸 𑀞𑀺𑀢𑀺𑀬𑀸 𑀘𑁂𑀯 𑀅𑀦𑀼𑀕𑁆𑀕𑀳𑀸𑀬 𑀘, 𑀲𑀫𑁆𑀪𑀯𑁂𑀲𑀻𑀦𑀁 𑀯𑀸 𑀞𑀺𑀢𑀺𑀬𑀸 𑀘𑁂𑀯 𑀅𑀦𑀼𑀕𑁆𑀕𑀳𑀸𑀬 𑀘𑀸’’𑀢𑀺 𑀏𑀯𑀁 𑀉𑀪𑀬𑀢𑁆𑀣 𑀤𑀝𑁆𑀞𑀩𑁆𑀩𑀸𑀦𑀻𑀢𑀺.

𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄𑀢𑀺 𑀓𑀩𑀴𑀁 𑀓𑀢𑁆𑀯𑀸 𑀅𑀚𑁆𑀛𑁄𑀳𑀭𑀺𑀢𑀩𑁆𑀩𑀓𑁄 𑀆𑀳𑀸𑀭𑁄, 𑀑𑀤𑀦𑀓𑀼𑀫𑁆𑀫𑀸𑀲𑀸𑀤𑀺𑀯𑀢𑁆𑀣𑀼𑀓𑀸𑀬 𑀑𑀚𑀸𑀬𑁂𑀢𑀁 𑀅𑀥𑀺𑀯𑀘𑀦𑀁. 𑀑𑀴𑀸𑀭𑀺𑀓𑁄 𑀯𑀸 𑀲𑀼𑀔𑀼𑀫𑁄 𑀯𑀸𑀢𑀺 𑀯𑀢𑁆𑀣𑀼𑀑𑀴𑀸𑀭𑀺𑀓𑀢𑀸𑀬 𑀑𑀴𑀸𑀭𑀺𑀓𑁄, 𑀲𑀼𑀔𑀼𑀫𑀢𑀸𑀬 𑀲𑀼𑀔𑀼𑀫𑁄. 𑀲𑀪𑀸𑀯𑁂𑀦 𑀧𑀦 𑀲𑀼𑀔𑀼𑀫𑀭𑀽𑀧𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀲𑀼𑀔𑀼𑀫𑁄𑀯 𑀳𑁄𑀢𑀺. 𑀲𑀸𑀧𑀺 𑀘𑀲𑁆𑀲 𑀯𑀢𑁆𑀣𑀼𑀢𑁄 𑀑𑀴𑀸𑀭𑀺𑀓𑀢𑀸 𑀲𑀼𑀔𑀼𑀫𑀢𑀸 𑀘 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀯𑁂𑀤𑀺𑀢𑀩𑁆𑀩𑀸. 𑀓𑀼𑀫𑁆𑀪𑀻𑀮𑀸𑀦𑀜𑁆𑀳𑀺 𑀆𑀳𑀸𑀭𑀁 𑀉𑀧𑀸𑀤𑀸𑀬 𑀫𑁄𑀭𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀓𑀼𑀫𑁆𑀪𑀻𑀮𑀸 𑀓𑀺𑀭 𑀧𑀸𑀲𑀸𑀡𑁂 𑀕𑀺𑀮𑀦𑁆𑀢𑀺, 𑀢𑁂 𑀘 𑀦𑁂𑀲𑀁 𑀓𑀼𑀘𑁆𑀙𑀺𑀧𑁆𑀧𑀢𑁆𑀢𑀸 𑀯𑀺𑀮𑀻𑀬𑀦𑁆𑀢𑀺. 𑀫𑁄𑀭𑀸 𑀲𑀧𑁆𑀧𑀯𑀺𑀘𑁆𑀙𑀺𑀓𑀸𑀤𑀺𑀧𑀸𑀡𑁂 𑀔𑀸𑀤𑀦𑁆𑀢𑀺. 𑀫𑁄𑀭𑀸𑀦𑀁 𑀧𑀦 𑀆𑀳𑀸𑀭𑀁 𑀉𑀧𑀸𑀤𑀸𑀬 𑀢𑀭𑀘𑁆𑀙𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀢𑁂 𑀓𑀺𑀭 𑀢𑀺𑀯𑀲𑁆𑀲𑀙𑀟𑁆𑀟𑀺𑀢𑀸𑀦𑀺 𑀯𑀺𑀲𑀸𑀡𑀸𑀦𑀺 𑀘𑁂𑀯 𑀅𑀝𑁆𑀞𑀻𑀦𑀺 𑀘 𑀔𑀸𑀤𑀦𑁆𑀢𑀺, 𑀢𑀸𑀦𑀺 𑀘 𑀦𑁂𑀲𑀁 𑀔𑁂𑀴𑁂𑀦 𑀢𑁂𑀫𑀺𑀢𑀫𑀢𑁆𑀢𑀸𑀦𑁂𑀯 𑀓𑀦𑁆𑀤𑀫𑀽𑀮𑀁 𑀯𑀺𑀬 𑀫𑀼𑀤𑀼𑀓𑀸𑀦𑀺 𑀳𑁄𑀦𑁆𑀢𑀺. 𑀢𑀭𑀘𑁆𑀙𑀸𑀦𑀁 𑀆𑀳𑀸𑀭𑀁 𑀉𑀧𑀸𑀤𑀸𑀬 𑀳𑀢𑁆𑀣𑀻𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀢𑁂 𑀳𑀺 𑀦𑀸𑀦𑀸𑀭𑀼𑀓𑁆𑀔𑀲𑀸𑀔𑀸𑀤𑀬𑁄 𑀔𑀸𑀤𑀦𑁆𑀢𑀺. 𑀳𑀢𑁆𑀣𑀻𑀦𑀁 𑀆𑀳𑀸𑀭𑀢𑁄 𑀕𑀯𑀬𑀕𑁄𑀓𑀡𑁆𑀡𑀫𑀺𑀕𑀸𑀤𑀻𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀢𑁂 𑀓𑀺𑀭 𑀦𑀺𑀲𑁆𑀲𑀸𑀭𑀸𑀦𑀺 𑀦𑀸𑀦𑀸𑀭𑀼𑀓𑁆𑀔𑀧𑀡𑁆𑀡𑀸𑀤𑀻𑀦𑀺 𑀔𑀸𑀤𑀦𑁆𑀢𑀺. 𑀢𑁂𑀲𑀫𑁆𑀧𑀺 𑀆𑀳𑀸𑀭𑀢𑁄 𑀕𑀼𑀦𑁆𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀢𑁂 𑀅𑀮𑁆𑀮𑀲𑀼𑀓𑁆𑀔𑀢𑀺𑀡𑀸𑀦𑀺 𑀔𑀸𑀤𑀦𑁆𑀢𑀺. 𑀢𑁂𑀲𑀁 𑀆𑀳𑀸𑀭𑀢𑁄 𑀲𑀲𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀲𑀲𑀸𑀦𑀁 𑀆𑀳𑀸𑀭𑀢𑁄 𑀲𑀓𑀼𑀡𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀲𑀓𑀼𑀡𑀸𑀦𑀁 𑀆𑀳𑀸𑀭𑀢𑁄 𑀧𑀘𑁆𑀘𑀦𑁆𑀢𑀯𑀸𑀲𑀻𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀧𑀘𑁆𑀘𑀦𑁆𑀢𑀯𑀸𑀲𑀻𑀦𑀁 𑀆𑀳𑀸𑀭𑀢𑁄 𑀕𑀸𑀫𑀪𑁄𑀚𑀓𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀕𑀸𑀫𑀪𑁄𑀚𑀓𑀸𑀦𑀁 𑀆𑀳𑀸𑀭𑀢𑁄 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀢𑁂𑀲𑀫𑁆𑀧𑀺 𑀆𑀳𑀸𑀭𑀢𑁄 𑀘𑀓𑁆𑀓𑀯𑀢𑁆𑀢𑀺𑀦𑁄 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀘𑀓𑁆𑀓𑀯𑀢𑁆𑀢𑀺𑀦𑁄 𑀆𑀳𑀸𑀭𑀢𑁄 𑀪𑀼𑀫𑁆𑀫𑀸𑀦𑀁 𑀤𑁂𑀯𑀸𑀦𑀁 𑀆𑀳𑀸𑀭𑁄 𑀲𑀼𑀔𑀼𑀫𑁄. 𑀪𑀼𑀫𑁆𑀫𑀸𑀦𑀁 𑀤𑁂𑀯𑀸𑀦𑀁 𑀆𑀳𑀸𑀭𑀢𑁄 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁. 𑀏𑀯𑀁 𑀬𑀸𑀯 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻𑀦𑀁 𑀆𑀳𑀸𑀭𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀸. 𑀢𑁂𑀲𑀁 𑀧𑀦𑀸𑀳𑀸𑀭𑁄 𑀲𑀼𑀔𑀼𑀫𑁄𑀢𑁆𑀯𑁂𑀯 𑀦𑀺𑀝𑁆𑀞𑀁 𑀧𑀢𑁆𑀢𑁄.

𑀏𑀢𑁆𑀣 𑀘 𑀑𑀴𑀸𑀭𑀺𑀓𑁂 𑀯𑀢𑁆𑀣𑀼𑀲𑁆𑀫𑀺𑀁 𑀑𑀚𑀸 𑀧𑀭𑀺𑀢𑁆𑀢𑀸 𑀳𑁄𑀢𑀺 𑀤𑀼𑀩𑁆𑀩𑀮𑀸, 𑀲𑀼𑀔𑀼𑀫𑁂 𑀩𑀮𑀯𑀢𑀻. 𑀢𑀣𑀸 𑀳𑀺 𑀏𑀓𑀧𑀢𑁆𑀢𑀧𑀽𑀭𑀫𑁆𑀧𑀺 𑀬𑀸𑀕𑀼𑀁 𑀧𑀻𑀢𑁄 𑀫𑀼𑀳𑀼𑀢𑁆𑀢𑁂𑀦𑁂𑀯 𑀚𑀺𑀖𑀘𑁆𑀙𑀺𑀢𑁄 𑀳𑁄𑀢𑀺 𑀬𑀁𑀓𑀺𑀜𑁆𑀘𑀺𑀤𑁂𑀯 𑀔𑀸𑀤𑀺𑀢𑀼𑀓𑀸𑀫𑁄, 𑀲𑀧𑁆𑀧𑀺𑀁 𑀧𑀦 𑀧𑀲𑀢𑀫𑀢𑁆𑀢𑀁 𑀧𑀺𑀯𑀺𑀢𑁆𑀯𑀸 𑀤𑀺𑀯𑀲𑀁 𑀅𑀪𑁄𑀢𑁆𑀢𑀼𑀓𑀸𑀫𑁄 𑀳𑁄𑀢𑀺. 𑀢𑀢𑁆𑀣 𑀯𑀢𑁆𑀣𑀼 𑀓𑀫𑁆𑀫𑀚𑀢𑁂𑀚𑀲𑀗𑁆𑀔𑀸𑀢𑀁 𑀧𑀭𑀺𑀲𑁆𑀲𑀬𑀁 𑀯𑀺𑀦𑁄𑀤𑁂𑀢𑀺, 𑀦 𑀧𑀦 𑀲𑀓𑁆𑀓𑁄𑀢𑀺 𑀧𑀸𑀮𑁂𑀢𑀼𑀁. 𑀑𑀚𑀸 𑀧𑀦 𑀧𑀸𑀮𑁂𑀢𑀺, 𑀦 𑀲𑀓𑁆𑀓𑁄𑀢𑀺 𑀧𑀭𑀺𑀲𑁆𑀲𑀬𑀁 𑀯𑀺𑀦𑁄𑀤𑁂𑀢𑀼𑀁. 𑀤𑁆𑀯𑁂 𑀧𑀦 𑀏𑀓𑀢𑁄 𑀳𑀼𑀢𑁆𑀯𑀸 𑀧𑀭𑀺𑀲𑁆𑀲𑀬𑀜𑁆𑀘𑁂𑀯 𑀯𑀺𑀦𑁄𑀤𑁂𑀦𑁆𑀢𑀺 𑀧𑀸𑀮𑁂𑀦𑁆𑀢𑀺 𑀘𑀸𑀢𑀺.

𑀨𑀲𑁆𑀲𑁄 𑀤𑀼𑀢𑀺𑀬𑁄𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺 𑀙𑀩𑁆𑀩𑀺𑀥𑁄𑀧𑀺 𑀨𑀲𑁆𑀲𑁄 𑀏𑀢𑁂𑀲𑀼 𑀘𑀢𑀽𑀲𑀼 𑀆𑀳𑀸𑀭𑁂𑀲𑀼 𑀤𑀼𑀢𑀺𑀬𑁄 𑀆𑀳𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀤𑁂𑀲𑀦𑀸𑀦𑀬𑁄 𑀏𑀯 𑀘𑁂𑀲, 𑀢𑀲𑁆𑀫𑀸 𑀇𑀫𑀺𑀦𑀸 𑀦𑀸𑀫 𑀓𑀸𑀭𑀡𑁂𑀦 𑀤𑀼𑀢𑀺𑀬𑁄 𑀢𑀢𑀺𑀬𑁄 𑀘𑀸𑀢𑀺 𑀇𑀤𑀫𑁂𑀢𑁆𑀣 𑀦 𑀕𑀯𑁂𑀲𑀺𑀢𑀩𑁆𑀩𑀁. 𑀫𑀦𑁄𑀲𑀜𑁆𑀘𑁂𑀢𑀦𑀸𑀢𑀺 𑀘𑁂𑀢𑀦𑀸𑀯 𑀯𑀼𑀘𑁆𑀘𑀢𑀺. 𑀯𑀺𑀜𑁆𑀜𑀸𑀡𑀦𑁆𑀢𑀺 𑀘𑀺𑀢𑁆𑀢𑀁. 𑀇𑀢𑀺 𑀪𑀕𑀯𑀸 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀉𑀧𑀸𑀤𑀺𑀡𑁆𑀡𑀓𑀅𑀦𑀼𑀧𑀸𑀤𑀺𑀡𑁆𑀡𑀓𑀯𑀲𑁂𑀦 𑀏𑀓𑀭𑀸𑀲𑀺𑀁 𑀓𑀢𑁆𑀯𑀸 𑀘𑀢𑁆𑀢𑀸𑀭𑁄 𑀆𑀳𑀸𑀭𑁂 𑀤𑀲𑁆𑀲𑁂𑀲𑀺. 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀳𑀺 𑀉𑀧𑀸𑀤𑀺𑀡𑁆𑀡𑀓𑁄𑀧𑀺 𑀅𑀢𑁆𑀣𑀺 𑀅𑀦𑀼𑀧𑀸𑀤𑀺𑀡𑁆𑀡𑀓𑁄𑀧𑀺, 𑀢𑀣𑀸 𑀨𑀲𑁆𑀲𑀸𑀤𑀬𑁄. 𑀢𑀢𑁆𑀣 𑀲𑀧𑁆𑀧𑀸𑀤𑀻𑀳𑀺 𑀕𑀺𑀮𑀺𑀢𑀸𑀦𑀁 𑀫𑀡𑁆𑀟𑀽𑀓𑀸𑀤𑀻𑀦𑀁 𑀯𑀲𑁂𑀦 𑀉𑀧𑀸𑀤𑀺𑀡𑁆𑀡𑀓𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀤𑀝𑁆𑀞𑀩𑁆𑀩𑁄. 𑀫𑀡𑁆𑀟𑀽𑀓𑀸𑀤𑀬𑁄 𑀳𑀺 𑀲𑀧𑁆𑀧𑀸𑀤𑀻𑀳𑀺 𑀕𑀺𑀮𑀺𑀢𑀸 𑀅𑀦𑁆𑀢𑁄𑀓𑀼𑀘𑁆𑀙𑀺𑀕𑀢𑀸𑀧𑀺 𑀓𑀺𑀜𑁆𑀘𑀺 𑀓𑀸𑀮𑀁 𑀚𑀻𑀯𑀦𑁆𑀢𑀺𑀬𑁂𑀯. 𑀢𑁂 𑀬𑀸𑀯 𑀉𑀧𑀸𑀤𑀺𑀡𑁆𑀡𑀓𑀧𑀓𑁆𑀔𑁂 𑀢𑀺𑀝𑁆𑀞𑀦𑁆𑀢𑀺, 𑀢𑀸𑀯 𑀆𑀳𑀸𑀭𑀢𑁆𑀣𑀁 𑀦 𑀲𑀸𑀥𑁂𑀦𑁆𑀢𑀺. 𑀪𑀺𑀚𑁆𑀚𑀺𑀢𑁆𑀯𑀸 𑀧𑀦 𑀅𑀦𑀼𑀧𑀸𑀤𑀺𑀡𑁆𑀡𑀓𑀧𑀓𑁆𑀔𑁂 𑀞𑀺𑀢𑀸 𑀲𑀸𑀥𑁂𑀦𑁆𑀢𑀺. 𑀢𑀤𑀸𑀧𑀺 𑀉𑀧𑀸𑀤𑀺𑀡𑁆𑀡𑀓𑀸𑀳𑀸𑀭𑁄𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺. 𑀇𑀤𑀁 𑀧𑀦 𑀆𑀘𑀭𑀺𑀬𑀸𑀦𑀁 𑀦 𑀭𑀼𑀘𑁆𑀘𑀢𑀻𑀢𑀺 𑀅𑀝𑁆𑀞𑀓𑀣𑀸𑀬𑀫𑁂𑀯 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀇𑀤𑀁 𑀯𑀼𑀢𑁆𑀢𑀁 𑁋 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀔𑀸𑀤𑀦𑁆𑀢𑀸𑀦𑀫𑁆𑀧𑀺 𑀅𑀔𑀸𑀤𑀦𑁆𑀢𑀸𑀦𑀫𑁆𑀧𑀺 𑀪𑀼𑀜𑁆𑀚𑀦𑁆𑀢𑀸𑀦𑀫𑁆𑀧𑀺 𑀅𑀪𑀼𑀜𑁆𑀚𑀦𑁆𑀢𑀸𑀦𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀦𑁂𑀯 𑀲𑀳𑀚𑀸𑀢𑀸 𑀓𑀫𑁆𑀫𑀚𑀸 𑀑𑀚𑀸 𑀦𑀸𑀫 𑀅𑀢𑁆𑀣𑀺, 𑀲𑀸 𑀬𑀸𑀯𑀧𑀺 𑀲𑀢𑁆𑀢𑀫𑀸 𑀤𑀺𑀯𑀲𑀸 𑀧𑀸𑀮𑁂𑀢𑀺, 𑀅𑀬𑀫𑁂𑀯 𑀉𑀧𑀸𑀤𑀺𑀡𑁆𑀡𑀓𑀓𑀩𑀴𑀻𑀓𑀸𑀭𑀸𑀳𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀪𑀽𑀫𑀓𑀯𑀺𑀧𑀸𑀓𑀯𑀲𑁂𑀦 𑀧𑀦 𑀉𑀧𑀸𑀤𑀺𑀡𑁆𑀡𑀓𑀨𑀲𑁆𑀲𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸, 𑀢𑁂𑀪𑀽𑀫𑀓𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀯𑀲𑁂𑀦 𑀅𑀦𑀼𑀧𑀸𑀤𑀺𑀡𑁆𑀡𑀓𑀸. 𑀮𑁄𑀓𑀼𑀢𑁆𑀢𑀭𑀸 𑀧𑀦 𑀭𑀼𑀴𑁆𑀳𑀻𑀯𑀲𑁂𑀦 𑀓𑀣𑀺𑀢𑀸𑀢𑀺.

𑀏𑀢𑁆𑀣𑀸𑀳 𑁋 ‘‘𑀬𑀤𑀺 𑀧𑀘𑁆𑀘𑀬𑀝𑁆𑀞𑁄 𑀆𑀳𑀸𑀭𑀝𑁆𑀞𑁄, 𑀅𑀣 𑀓𑀲𑁆𑀫𑀸 𑀅𑀜𑁆𑀜𑁂𑀲𑀼𑀧𑀺 𑀲𑀢𑁆𑀢𑀸𑀦𑀁 𑀧𑀘𑁆𑀘𑀬𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀇𑀫𑁂𑀬𑁂𑀯 𑀘𑀢𑁆𑀢𑀸𑀭𑁄 𑀯𑀼𑀢𑁆𑀢𑀸’’𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀚𑁆𑀛𑀢𑁆𑀢𑀺𑀓𑀲𑀦𑁆𑀢𑀢𑀺𑀬𑀸 𑀯𑀺𑀲𑁂𑀲𑀧𑀘𑁆𑀘𑀬𑀢𑁆𑀢𑀸. 𑀯𑀺𑀲𑁂𑀲𑀧𑀘𑁆𑀘𑀬𑁄 𑀳𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑀪𑀓𑁆𑀔𑀸𑀦𑀁 𑀲𑀢𑁆𑀢𑀸𑀦𑀁 𑀭𑀽𑀧𑀓𑀸𑀬𑀲𑁆𑀲 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄, 𑀦𑀸𑀫𑀓𑀸𑀬𑁂 𑀯𑁂𑀤𑀦𑀸𑀬 𑀨𑀲𑁆𑀲𑁄, 𑀯𑀺𑀜𑁆𑀜𑀸𑀡𑀲𑁆𑀲 𑀫𑀦𑁄𑀲𑀜𑁆𑀘𑁂𑀢𑀦𑀸, 𑀦𑀸𑀫𑀭𑀽𑀧𑀲𑁆𑀲 𑀯𑀺𑀜𑁆𑀜𑀸𑀡𑀁. 𑀬𑀣𑀸𑀳 𑁋 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀬𑀁 𑀓𑀸𑀬𑁄 𑀆𑀳𑀸𑀭𑀝𑁆𑀞𑀺𑀢𑀺𑀓𑁄 𑀆𑀳𑀸𑀭𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀺, 𑀅𑀦𑀸𑀳𑀸𑀭𑁄 𑀦𑁄 𑀢𑀺𑀝𑁆𑀞𑀢𑀺 (𑀲𑀁. 𑀦𑀺. 𑁫.𑁧𑁮𑁩), 𑀢𑀣𑀸 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧’’𑀦𑁆𑀢𑀺 (𑀲𑀁. 𑀦𑀺. 𑁨.𑁧; 𑀯𑀺𑀪. 𑁨𑁨𑁫).

𑀓𑁄 𑀧𑀦𑁂𑀢𑁆𑀣 𑀆𑀳𑀸𑀭𑁄 𑀓𑀺𑀁 𑀆𑀳𑀭𑀢𑀻𑀢𑀺? 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀑𑀚𑀝𑁆𑀞𑀫𑀓𑀭𑀽𑀧𑀸𑀦𑀺 𑀆𑀳𑀭𑀢𑀺 𑀨𑀲𑁆𑀲𑀸𑀳𑀸𑀭𑁄 𑀢𑀺𑀲𑁆𑀲𑁄 𑀯𑁂𑀤𑀦𑀸, 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀢𑀬𑁄 𑀪𑀯𑁂, 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀦𑁆𑀢𑀺.

𑀓𑀣𑀁? 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀢𑀸𑀯 𑀫𑀼𑀔𑁂 𑀞𑀧𑀺𑀢𑀫𑀢𑁆𑀢𑁂𑀬𑁂𑀯 𑀅𑀝𑁆𑀞 𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀤𑀦𑁆𑀢𑀯𑀺𑀘𑀼𑀡𑁆𑀡𑀺𑀢𑀁 𑀧𑀦 𑀅𑀚𑁆𑀛𑁄𑀳𑀭𑀺𑀬𑀫𑀸𑀦𑀁 𑀏𑀓𑁂𑀓𑀁 𑀲𑀺𑀢𑁆𑀣𑀁 𑀅𑀝𑁆𑀞𑀝𑁆𑀞𑀭𑀽𑀧𑀸𑀦𑀺 𑀲𑀫𑀼𑀝𑁆𑀞𑀸𑀧𑁂𑀢𑀺𑀬𑁂𑀯. 𑀏𑀯𑀁 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀑𑀚𑀝𑁆𑀞𑀫𑀓𑀭𑀽𑀧𑀸𑀦𑀺 𑀆𑀳𑀭𑀢𑀺. 𑀨𑀲𑁆𑀲𑀸𑀳𑀸𑀭𑁄 𑀧𑀦 𑀲𑀼𑀔𑀯𑁂𑀤𑀦𑀻𑀬𑁄 𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀫𑀸𑀦𑁄𑀬𑁂𑀯 𑀲𑀼𑀔𑀁 𑀯𑁂𑀤𑀦𑀁 𑀆𑀳𑀭𑀢𑀺, 𑀤𑀼𑀓𑁆𑀔𑀯𑁂𑀤𑀦𑀻𑀬𑁄 𑀤𑀼𑀓𑁆𑀔𑀁, 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑁄 𑀅𑀤𑀼𑀓𑁆𑀔𑀫𑀲𑀼𑀔𑀦𑁆𑀢𑀺 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀨𑀲𑁆𑀲𑀸𑀳𑀸𑀭𑁄 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀆𑀳𑀭𑀢𑀺.

𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀓𑀸𑀫𑀪𑀯𑀽𑀧𑀕𑀁 𑀓𑀫𑁆𑀫𑀁 𑀓𑀸𑀫𑀪𑀯𑀁 𑀆𑀳𑀭𑀢𑀺, 𑀭𑀽𑀧𑀸𑀭𑀽𑀧𑀪𑀯𑀽𑀧𑀕𑀸𑀦𑀺 𑀢𑀁 𑀢𑀁 𑀪𑀯𑀁. 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁄 𑀢𑀬𑁄 𑀪𑀯𑁂 𑀆𑀳𑀭𑀢𑀺. 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀧𑀦 𑀬𑁂 𑀘 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑀸 𑀢𑀬𑁄 𑀔𑀦𑁆𑀥𑀸, 𑀬𑀸𑀦𑀺 𑀘 𑀢𑀺𑀲𑀦𑁆𑀢𑀢𑀺𑀯𑀲𑁂𑀦 𑀢𑀺𑀁𑀲 𑀭𑀽𑀧𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀦𑀬𑁂𑀦 𑀢𑀸𑀦𑀺 𑀆𑀳𑀭𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀁 𑀆𑀳𑀭𑀢𑀻𑀢𑀺. 𑀏𑀢𑁆𑀣 𑀘 ‘‘𑀫𑀦𑁄𑀲𑀜𑁆𑀘𑁂𑀢𑀦𑀸 𑀢𑀬𑁄 𑀪𑀯𑁂 𑀆𑀳𑀭𑀢𑀻’’𑀢𑀺 𑀲𑀸𑀲𑀯𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸𑀯 𑀯𑀼𑀢𑁆𑀢𑀸. ‘‘𑀯𑀺𑀜𑁆𑀜𑀸𑀡𑀁 𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀁 𑀆𑀳𑀭𑀢𑀻’’𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀫𑁂𑀯 𑀯𑀼𑀢𑁆𑀢𑀁. 𑀅𑀯𑀺𑀲𑁂𑀲𑁂𑀦 𑀧𑀦 𑀢𑀁𑀲𑀫𑁆𑀧𑀬𑀼𑀢𑁆𑀢𑀢𑀁𑀲𑀫𑀼𑀝𑁆𑀞𑀸𑀦𑀥𑀫𑁆𑀫𑀸𑀦𑀁 𑀆𑀳𑀭𑀡𑀢𑁄𑀧𑁂𑀢𑁂 ‘‘𑀆𑀳𑀸𑀭𑀸’’𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀢𑁂𑀲𑀼 𑀘𑀢𑀽𑀲𑀼 𑀆𑀳𑀸𑀭𑁂𑀲𑀼 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑁄 𑀆𑀳𑀸𑀭𑀓𑀺𑀘𑁆𑀘𑀁 𑀲𑀸𑀥𑁂𑀢𑀺, 𑀨𑀲𑁆𑀲𑁄 𑀨𑀼𑀲𑀦𑁆𑀢𑁄𑀬𑁂𑀯 𑀫𑀦𑁄𑀲𑀜𑁆𑀘𑁂𑀢𑀦𑀸 𑀆𑀬𑀽𑀳𑀫𑀸𑀦𑀸𑀯, 𑀯𑀺𑀜𑁆𑀜𑀸𑀡𑀁 𑀯𑀺𑀚𑀸𑀦𑀦𑁆𑀢𑀫𑁂𑀯. 𑀓𑀣𑀁? 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀳𑀺 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑁄𑀬𑁂𑀯 𑀓𑀸𑀬𑀝𑁆𑀞𑀧𑀦𑁂𑀦 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀳𑁄𑀢𑀺. 𑀓𑀫𑁆𑀫𑀚𑀦𑀺𑀢𑁄𑀧𑀺 𑀳𑀺 𑀅𑀬𑀁 𑀓𑀸𑀬𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑁂𑀦 𑀉𑀧𑀢𑁆𑀣𑀤𑁆𑀥𑁄 𑀤𑀲𑀧𑀺 𑀯𑀲𑁆𑀲𑀸𑀦𑀺 𑀯𑀲𑁆𑀲𑀲𑀢𑀫𑁆𑀧𑀺 𑀬𑀸𑀯 𑀆𑀬𑀼𑀧𑀭𑀺𑀫𑀸𑀡𑀸 𑀢𑀺𑀝𑁆𑀞𑀢𑀺. 𑀬𑀣𑀸 𑀓𑀺𑀁? 𑀬𑀣𑀸 𑀫𑀸𑀢𑀼𑀬𑀸 𑀚𑀦𑀺𑀢𑁄𑀧𑀺 𑀤𑀸𑀭𑀓𑁄 𑀥𑀸𑀢𑀺𑀬𑀸 𑀣𑀜𑁆𑀜𑀸𑀤𑀻𑀦𑀺 𑀧𑀸𑀬𑁂𑀢𑁆𑀯𑀸 𑀧𑁄𑀲𑀺𑀬𑀫𑀸𑀦𑁄 𑀘𑀺𑀭𑀁 𑀢𑀺𑀝𑁆𑀞𑀢𑀺, 𑀬𑀣𑀸 𑀘 𑀉𑀧𑀢𑁆𑀣𑀫𑁆𑀪𑁂𑀦 𑀉𑀧𑀢𑁆𑀣𑀫𑁆𑀪𑀺𑀢𑀁 𑀕𑁂𑀳𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀬𑀣𑀸, 𑀫𑀳𑀸𑀭𑀸𑀚, 𑀕𑁂𑀳𑁂 𑀧𑀧𑀢𑀦𑁆𑀢𑁂 𑀅𑀜𑁆𑀜𑁂𑀦 𑀤𑀸𑀭𑀼𑀦𑀸 𑀉𑀧𑀢𑁆𑀣𑀫𑁆𑀪𑀺𑀢𑀁 𑀲𑀦𑁆𑀢𑀁 𑀏𑀯 𑀢𑀁 𑀕𑁂𑀳𑀁 𑀦 𑀧𑀢𑀢𑀺. 𑀏𑀯𑀫𑁂𑀯 𑀔𑁄, 𑀫𑀳𑀸𑀭𑀸𑀚, 𑀅𑀬𑀁 𑀓𑀸𑀬𑁄 𑀆𑀳𑀸𑀭𑀝𑁆𑀞𑀺𑀢𑀺𑀓𑁄 𑀆𑀳𑀸𑀭𑀁 𑀧𑀝𑀺𑀘𑁆𑀘 𑀢𑀺𑀝𑁆𑀞𑀢𑀻’’𑀢𑀺.

𑀏𑀯𑀁 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀉𑀧𑀢𑁆𑀣𑀫𑁆𑀪𑁂𑀦𑁆𑀢𑁄 𑀆𑀳𑀸𑀭𑀓𑀺𑀘𑁆𑀘𑀁 𑀲𑀸𑀥𑁂𑀢𑀺.

𑀏𑀯𑀁 𑀲𑀸𑀥𑁂𑀦𑁆𑀢𑁄𑀧𑀺 𑀘 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀤𑁆𑀯𑀺𑀦𑁆𑀦𑀁 𑀭𑀽𑀧𑀲𑀦𑁆𑀢𑀢𑀻𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀲𑁆𑀲 𑀘 𑀉𑀧𑀸𑀤𑀺𑀡𑁆𑀡𑀓𑀲𑁆𑀲 𑀘. 𑀓𑀫𑁆𑀫𑀚𑀸𑀦𑀁 𑀅𑀦𑀼𑀧𑀸𑀮𑀓𑁄 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀸𑀦𑀁 𑀚𑀦𑀓𑁄 𑀳𑀼𑀢𑁆𑀯𑀸𑀢𑀺. 𑀨𑀲𑁆𑀲𑁄 𑀧𑀦 𑀲𑀼𑀔𑀸𑀤𑀺𑀯𑀢𑁆𑀣𑀼𑀪𑀽𑀢𑀁 𑀆𑀭𑀫𑁆𑀫𑀡𑀁 𑀨𑀼𑀲𑀦𑁆𑀢𑁄𑀬𑁂𑀯 𑀲𑀼𑀔𑀸𑀤𑀺𑀯𑁂𑀤𑀦𑀸𑀧𑀯𑀢𑁆𑀢𑀦𑁂𑀦 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀳𑁄𑀢𑀺. 𑀫𑀦𑁄𑀲𑀜𑁆𑀘𑁂𑀢𑀦𑀸 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀯𑀲𑁂𑀦 𑀆𑀬𑀽𑀳𑀫𑀸𑀦𑀸𑀬𑁂𑀯 𑀪𑀯𑀫𑀽𑀮𑀦𑀺𑀧𑁆𑀨𑀸𑀤𑀦𑀢𑁄 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀳𑁄𑀢𑀺. 𑀯𑀺𑀜𑁆𑀜𑀸𑀡𑀁 𑀯𑀺𑀚𑀸𑀦𑀦𑁆𑀢𑀫𑁂𑀯 𑀦𑀸𑀫𑀭𑀽𑀧𑀧𑁆𑀧𑀯𑀢𑁆𑀢𑀦𑁂𑀦 𑀲𑀢𑁆𑀢𑀸𑀦𑀁 𑀞𑀺𑀢𑀺𑀬𑀸 𑀳𑁄𑀢𑀻𑀢𑀺.

𑀏𑀯𑀁 𑀉𑀧𑀢𑁆𑀣𑀫𑁆𑀪𑀦𑀸𑀤𑀺𑀯𑀲𑁂𑀦 𑀆𑀳𑀸𑀭𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑁂𑀲𑀼 𑀧𑀦𑁂𑀢𑁂𑀲𑀼 𑀘𑀢𑁆𑀢𑀸𑀭𑀺 𑀪𑀬𑀸𑀦𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀩𑀴𑀻𑀓𑀸𑀭𑀸𑀳𑀸𑀭𑁂 𑀦𑀺𑀓𑀦𑁆𑀢𑀺𑀬𑁂𑀯 𑀪𑀬𑀁, 𑀨𑀲𑁆𑀲𑁂 𑀉𑀧𑀕𑀫𑀦𑀫𑁂𑀯, 𑀫𑀦𑁄𑀲𑀜𑁆𑀘𑁂𑀢𑀦𑀸𑀬 𑀆𑀬𑀽𑀳𑀦𑀫𑁂𑀯, 𑀯𑀺𑀜𑁆𑀜𑀸𑀡𑁂 𑀅𑀪𑀺𑀦𑀺𑀧𑀸𑀢𑁄𑀬𑁂𑀯 𑀪𑀬𑀦𑁆𑀢𑀺. 𑀓𑀺𑀁 𑀓𑀸𑀭𑀡𑀸? 𑀓𑀩𑀴𑀻𑀓𑀸𑀭𑀸𑀳𑀸𑀭𑁂 𑀳𑀺 𑀦𑀺𑀓𑀦𑁆𑀢𑀺𑀁 𑀓𑀢𑁆𑀯𑀸 𑀲𑀻𑀢𑀸𑀤𑀻𑀦𑀁 𑀧𑀼𑀭𑀓𑁆𑀔𑀢𑀸 𑀲𑀢𑁆𑀢𑀸 𑀆𑀳𑀸𑀭𑀢𑁆𑀣𑀸𑀬 𑀫𑀼𑀤𑁆𑀤𑀸𑀕𑀡𑀦𑀸𑀤𑀺𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀸 𑀅𑀦𑀧𑁆𑀧𑀓𑀁 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀦𑁆𑀢𑀺. 𑀏𑀓𑀘𑁆𑀘𑁂 𑀘 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸𑀧𑀺 𑀯𑁂𑀚𑁆𑀚𑀓𑀫𑁆𑀫𑀸𑀤𑀺𑀓𑀸𑀬 𑀅𑀦𑁂𑀲𑀦𑀸𑀬 𑀆𑀳𑀸𑀭𑀁 𑀧𑀭𑀺𑀬𑁂𑀲𑀦𑁆𑀢𑀸 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀕𑀸𑀭𑀬𑁆𑀳𑀸 𑀳𑁄𑀦𑁆𑀢𑀺, 𑀲𑀫𑁆𑀧𑀭𑀸𑀬𑁂𑀧𑀺, ‘‘𑀢𑀲𑁆𑀲 𑀲𑀗𑁆𑀖𑀸𑀝𑀺𑀧𑀺 𑀆𑀤𑀺𑀢𑁆𑀢𑀸 𑀲𑀫𑁆𑀧𑀚𑁆𑀚𑀮𑀺𑀢𑀸’’𑀢𑀺𑀆𑀤𑀺𑀦𑀸 𑀮𑀓𑁆𑀔𑀡𑀲𑀁𑀬𑀼𑀢𑁆𑀢𑁂 (𑀲𑀁. 𑀦𑀺. 𑁨.𑁨𑁧𑁮) 𑀯𑀼𑀢𑁆𑀢𑀦𑀬𑁂𑀦 𑀲𑀫𑀡𑀧𑁂𑀢𑀸 𑀳𑁄𑀦𑁆𑀢𑀺. 𑀇𑀫𑀺𑀦𑀸 𑀢𑀸𑀯 𑀓𑀸𑀭𑀡𑁂𑀦 𑀓𑀩𑀴𑀻𑀓𑀸𑀭𑁂 𑀆𑀳𑀸𑀭𑁂 𑀦𑀺𑀓𑀦𑁆𑀢𑀺 𑀏𑀯 𑀪𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀨𑀲𑁆𑀲𑀁 𑀉𑀧𑀕𑀘𑁆𑀙𑀦𑁆𑀢𑀸𑀧𑀺 𑀨𑀲𑁆𑀲𑀲𑁆𑀲𑀸𑀤𑀺𑀦𑁄 𑀧𑀭𑁂𑀲𑀁 𑀭𑀓𑁆𑀔𑀺𑀢𑀕𑁄𑀧𑀺𑀢𑁂𑀲𑀼 𑀤𑀸𑀭𑀸𑀤𑀻𑀲𑀼 𑀪𑀡𑁆𑀟𑁂𑀲𑀼 𑀅𑀧𑀭𑀚𑁆𑀛𑀦𑁆𑀢𑀺, 𑀢𑁂 𑀲𑀳 𑀪𑀡𑁆𑀟𑁂𑀦 𑀪𑀡𑁆𑀟𑀲𑀸𑀫𑀺𑀓𑀸 𑀕𑀳𑁂𑀢𑁆𑀯𑀸 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀲𑀗𑁆𑀓𑀸𑀭𑀓𑀽𑀝𑁂 𑀙𑀟𑁆𑀟𑁂𑀦𑁆𑀢𑀺, 𑀭𑀜𑁆𑀜𑁄 𑀯𑀸 𑀦𑀺𑀬𑁆𑀬𑀸𑀤𑁂𑀦𑁆𑀢𑀺. 𑀢𑀢𑁄 𑀢𑁂 𑀭𑀸𑀚𑀸 𑀯𑀺𑀯𑀺𑀥𑀸 𑀓𑀫𑁆𑀫𑀓𑀸𑀭𑀡𑀸 𑀓𑀸𑀭𑀸𑀧𑁂𑀢𑀺. 𑀓𑀸𑀬𑀲𑁆𑀲 𑀘 𑀪𑁂𑀤𑀸 𑀤𑀼𑀕𑁆𑀕𑀢𑀺 𑀢𑁂𑀲𑀁 𑀧𑀸𑀝𑀺𑀓𑀗𑁆𑀔𑀸 𑀳𑁄𑀢𑀺. 𑀇𑀢𑀺 𑀨𑀲𑁆𑀲𑀲𑁆𑀲𑀸𑀤𑀫𑀽𑀮𑀓𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑁆𑀧𑀺 𑀲𑀫𑁆𑀧𑀭𑀸𑀬𑀺𑀓𑀫𑁆𑀧𑀺 𑀪𑀬𑀁 𑀲𑀩𑁆𑀩𑀫𑀸𑀕𑀢𑀫𑁂𑀯 𑀳𑁄𑀢𑀺. 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀨𑀲𑁆𑀲𑀸𑀳𑀸𑀭𑁂 𑀉𑀧𑀕𑀫𑀦𑀫𑁂𑀯 𑀪𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀬𑀽𑀳𑀦𑁂 𑀧𑀦 𑀢𑀫𑁆𑀫𑀽𑀮𑀓𑀁 𑀢𑀻𑀲𑀼 𑀪𑀯𑁂𑀲𑀼 𑀪𑀬𑀁 𑀲𑀩𑁆𑀩𑀁 𑀆𑀕𑀢𑀫𑁂𑀯 𑀳𑁄𑀢𑀺. 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁂 𑀆𑀬𑀽𑀳𑀦𑀫𑁂𑀯 𑀪𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀜𑁆𑀘 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀞𑀸𑀦𑁂 𑀅𑀪𑀺𑀦𑀺𑀧𑀢𑀢𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀝𑀺𑀲𑀦𑁆𑀥𑀺𑀦𑀸𑀫𑀭𑀽𑀧𑀁 𑀕𑀳𑁂𑀢𑁆𑀯𑀸𑀯 𑀦𑀺𑀩𑁆𑀩𑀢𑁆𑀢𑀢𑀺. 𑀢𑀲𑁆𑀫𑀺𑀜𑁆𑀘 𑀦𑀺𑀩𑁆𑀩𑀢𑁆𑀢𑁂 𑀲𑀩𑁆𑀩𑀪𑀬𑀸𑀦𑀺 𑀦𑀺𑀩𑁆𑀩𑀢𑁆𑀢𑀸𑀦𑀺𑀬𑁂𑀯 𑀳𑁄𑀦𑁆𑀢𑀺 𑀢𑀫𑁆𑀫𑀽𑀮𑀓𑀢𑁆𑀢𑀸𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀯𑀺𑀜𑁆𑀜𑀸𑀡𑀸𑀳𑀸𑀭𑁂 𑀅𑀪𑀺𑀦𑀺𑀧𑀸𑀢𑁄𑀬𑁂𑀯 𑀪𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀓𑀺𑀁𑀦𑀺𑀤𑀸𑀦𑀸𑀢𑀺𑀆𑀤𑀻𑀲𑀼 𑀦𑀺𑀤𑀸𑀦𑀸𑀤𑀻𑀦𑀺 𑀲𑀩𑁆𑀩𑀸𑀦𑁂𑀯 𑀓𑀸𑀭𑀡𑀯𑁂𑀯𑀘𑀦𑀸𑀦𑀺. 𑀓𑀸𑀭𑀡𑀜𑁆𑀳𑀺 𑀬𑀲𑁆𑀫𑀸 𑀨𑀮𑀁 𑀦𑀺𑀤𑁂𑀢𑀺, ‘‘𑀳𑀦𑁆𑀤 𑀦𑀁 𑀕𑀡𑁆𑀳𑀣𑀸’’𑀢𑀺 𑀅𑀧𑁆𑀧𑁂𑀢𑀺 𑀯𑀺𑀬, 𑀢𑀲𑁆𑀫𑀸 𑀦𑀺𑀤𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀫𑀸 𑀢𑀁 𑀢𑀢𑁄 𑀲𑀫𑀼𑀤𑁂𑀢𑀺 𑀚𑀸𑀬𑀢𑀺 𑀧𑀪𑀯𑀢𑀺, 𑀢𑀲𑁆𑀫𑀸 𑀲𑀫𑀼𑀤𑀬𑁄 𑀚𑀸𑀢𑀺 𑀧𑀪𑀯𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀧𑀤𑀢𑁆𑀣𑁄 𑁋 𑀓𑀺𑀁𑀦𑀺𑀤𑀸𑀦𑀁 𑀏𑀢𑁂𑀲𑀦𑁆𑀢𑀺 𑀓𑀺𑀁𑀦𑀺𑀤𑀸𑀦𑀸. 𑀓𑁄 𑀲𑀫𑀼𑀤𑀬𑁄 𑀏𑀢𑁂𑀲𑀦𑁆𑀢𑀺 𑀓𑀺𑀁𑀲𑀫𑀼𑀤𑀬𑀸. 𑀓𑀸 𑀚𑀸𑀢𑀺 𑀏𑀢𑁂𑀲𑀦𑁆𑀢𑀺 𑀓𑀺𑀁𑀚𑀸𑀢𑀺𑀓𑀸. 𑀓𑁄 𑀧𑀪𑀯𑁄 𑀏𑀢𑁂𑀲𑀦𑁆𑀢𑀺 𑀓𑀺𑀁𑀧𑀪𑀯𑀸. 𑀬𑀲𑁆𑀫𑀸 𑀧𑀦 𑀢𑁂𑀲𑀁 𑀢𑀡𑁆𑀳𑀸 𑀬𑀣𑀸𑀯𑀼𑀢𑁆𑀢𑁂𑀦 𑀅𑀢𑁆𑀣𑁂𑀦 𑀦𑀺𑀤𑀸𑀦𑀜𑁆𑀘𑁂𑀯 𑀲𑀫𑀼𑀤𑀬𑁄 𑀘 𑀚𑀸𑀢𑀺 𑀘 𑀧𑀪𑀯𑁄 𑀘, 𑀢𑀲𑁆𑀫𑀸 ‘‘𑀢𑀡𑁆𑀳𑀸𑀦𑀺𑀤𑀸𑀦𑀸’’𑀢𑀺𑀆𑀤𑀺𑀫𑀸𑀳. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀣 𑀘 𑀇𑀫𑁂 𑀘𑀢𑁆𑀢𑀸𑀭𑁄 𑀆𑀳𑀸𑀭𑀸 𑀢𑀡𑁆𑀳𑀸𑀦𑀺𑀤𑀸𑀦𑀸𑀢𑀺 𑀧𑀝𑀺𑀲𑀦𑁆𑀥𑀺𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑀸𑀦𑀁 𑀆𑀳𑀸𑀭𑀸𑀦𑀁 𑀧𑀼𑀭𑀺𑀫𑀢𑀡𑁆𑀳𑀸𑀦𑀁 𑀯𑀲𑁂𑀦 𑀦𑀺𑀤𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀣𑀁? 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀢𑀸𑀯 𑀧𑀭𑀺𑀧𑀼𑀡𑁆𑀡𑀸𑀬𑀢𑀦𑀸𑀦𑀁 𑀲𑀢𑁆𑀢𑀸𑀦𑀁 𑀲𑀢𑁆𑀢𑀲𑀦𑁆𑀢𑀢𑀺𑀯𑀲𑁂𑀦, 𑀲𑁂𑀲𑀸𑀦𑀁 𑀢𑀢𑁄 𑀊𑀦𑀊𑀦𑀲𑀦𑁆𑀢𑀢𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀭𑀽𑀧𑀩𑁆𑀪𑀦𑁆𑀢𑀭𑀁 𑀚𑀸𑀢𑀸 𑀑𑀚𑀸 𑀅𑀢𑁆𑀣𑀺, 𑀅𑀬𑀁 𑀢𑀡𑁆𑀳𑀸𑀦𑀺𑀤𑀸𑀦𑁄 𑀉𑀧𑀸𑀤𑀺𑀡𑁆𑀡𑀓𑀓𑀩𑀴𑀻𑀓𑀸𑀭𑀸𑀳𑀸𑀭𑁄. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀨𑀲𑁆𑀲𑀘𑁂𑀢𑀦𑀸 𑀲𑀬𑀜𑁆𑀘 𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀦𑁆𑀢𑀺 𑀇𑀫𑁂 𑀢𑀡𑁆𑀳𑀸𑀦𑀺𑀤𑀸𑀦𑀸 𑀉𑀧𑀸𑀤𑀺𑀡𑁆𑀡𑀓-𑀨𑀲𑁆𑀲𑀫𑀦𑁄𑀲𑀜𑁆𑀘𑁂𑀢𑀦𑀸-𑀯𑀺𑀜𑁆𑀜𑀸𑀡𑀸𑀳𑀸𑀭𑀸𑀢𑀺 𑀏𑀯𑀁 𑀢𑀸𑀯 𑀧𑀼𑀭𑀺𑀫𑀢𑀡𑁆𑀳𑀸𑀦𑀺𑀤𑀸𑀦𑀸 𑀧𑀝𑀺𑀲𑀦𑁆𑀥𑀺𑀓𑀸 𑀆𑀳𑀸𑀭𑀸. 𑀬𑀣𑀸 𑀘 𑀧𑀝𑀺𑀲𑀦𑁆𑀥𑀺𑀓𑀸, 𑀏𑀯𑀁 𑀢𑀢𑁄 𑀧𑀭𑀁 𑀧𑀞𑀫𑀪𑀯𑀗𑁆𑀕𑀘𑀺𑀢𑁆𑀢𑀓𑁆𑀔𑀡𑀸𑀤𑀺𑀦𑀺𑀩𑁆𑀩𑀢𑁆𑀢𑀸𑀧𑀺 𑀯𑁂𑀤𑀺𑀢𑀩𑁆𑀩𑀸.

𑀬𑀲𑁆𑀫𑀸 𑀧𑀦 𑀪𑀕𑀯𑀸 𑀦 𑀓𑁂𑀯𑀮𑀁 𑀆𑀳𑀸𑀭𑀸𑀦𑀫𑁂𑀯 𑀦𑀺𑀤𑀸𑀦𑀁 𑀚𑀸𑀦𑀸𑀢𑀺, 𑀆𑀳𑀸𑀭𑀦𑀺𑀤𑀸𑀦𑀪𑀽𑀢𑀸𑀬 𑀢𑀡𑁆𑀳𑀸𑀬𑀧𑀺, 𑀢𑀡𑁆𑀳𑀸𑀬 𑀦𑀺𑀤𑀸𑀦𑀸𑀦𑀁 𑀯𑁂𑀤𑀦𑀸𑀤𑀻𑀦𑀫𑁆𑀧𑀺 𑀦𑀺𑀤𑀸𑀦𑀁 𑀚𑀸𑀦𑀸𑀢𑀺𑀬𑁂𑀯, 𑀢𑀲𑁆𑀫𑀸 𑀢𑀡𑁆𑀳𑀸 𑀘𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀺𑀁𑀦𑀺𑀤𑀸𑀦𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀝𑁆𑀝𑀁 𑀤𑀲𑁆𑀲𑁂𑀢𑁆𑀯𑀸 𑀯𑀺𑀯𑀝𑁆𑀝𑀁 𑀤𑀲𑁆𑀲𑁂𑀲𑀺. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀞𑀸𑀦𑁂 𑀪𑀕𑀯𑀸 𑀅𑀢𑀻𑀢𑀸𑀪𑀺𑀫𑀼𑀔𑀁 𑀤𑁂𑀲𑀦𑀁 𑀓𑀢𑁆𑀯𑀸 𑀅𑀢𑀻𑀢𑁂𑀦 𑀯𑀝𑁆𑀝𑀁 𑀤𑀲𑁆𑀲𑁂𑀢𑀺. 𑀓𑀣𑀁? 𑀆𑀳𑀸𑀭𑀯𑀲𑁂𑀦 𑀳𑀺 𑀅𑀬𑀁 𑀅𑀢𑁆𑀢𑀪𑀸𑀯𑁄 𑀕𑀳𑀺𑀢𑁄.

𑀢𑀡𑁆𑀳𑀸𑀢𑀺 𑀇𑀫𑀲𑁆𑀲𑀢𑁆𑀢𑀪𑀸𑀯𑀲𑁆𑀲 𑀚𑀦𑀓𑀁 𑀓𑀫𑁆𑀫𑀁, 𑀯𑁂𑀤𑀦𑀸𑀨𑀲𑁆𑀲𑀲𑀴𑀸𑀬𑀢𑀦𑀦𑀸𑀫𑀭𑀽𑀧𑀯𑀺𑀜𑁆𑀜𑀸𑀡𑀸𑀦𑀺 𑀬𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀞𑀢𑁆𑀯𑀸 𑀓𑀫𑁆𑀫𑀁 𑀆𑀬𑀽𑀳𑀺𑀢𑀁, 𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀸𑀦𑀺, 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸 𑀢𑀲𑁆𑀲𑀢𑁆𑀢𑀪𑀸𑀯𑀲𑁆𑀲 𑀚𑀦𑀓𑀁 𑀓𑀫𑁆𑀫𑀁. 𑀇𑀢𑀺 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀅𑀢𑁆𑀢𑀪𑀸𑀯𑁄, 𑀤𑁆𑀯𑀻𑀲𑀼 𑀢𑀲𑁆𑀲 𑀚𑀦𑀓𑀁 𑀓𑀫𑁆𑀫𑀦𑁆𑀢𑀺 𑀲𑀗𑁆𑀔𑁂𑀧𑁂𑀦 𑀓𑀫𑁆𑀫𑀜𑁆𑀘𑁂𑀯 𑀓𑀫𑁆𑀫𑀯𑀺𑀧𑀸𑀓𑀜𑁆𑀘𑀸𑀢𑀺, 𑀤𑁆𑀯𑁂𑀧𑀺 𑀥𑀫𑁆𑀫𑁂 𑀤𑀲𑁆𑀲𑁂𑀦𑁆𑀢𑁂𑀦 𑀅𑀢𑀻𑀢𑀸𑀪𑀺𑀫𑀼𑀔𑀁 𑀤𑁂𑀲𑀦𑀁 𑀓𑀢𑁆𑀯𑀸 𑀅𑀢𑀻𑀢𑁂𑀦 𑀯𑀝𑁆𑀝𑀁 𑀤𑀲𑁆𑀲𑀺𑀢𑀁.

𑀢𑀢𑁆𑀭𑀸𑀬𑀁 𑀤𑁂𑀲𑀦𑀸 𑀅𑀦𑀸𑀕𑀢𑀲𑁆𑀲 𑀅𑀤𑀲𑁆𑀲𑀺𑀢𑀢𑁆𑀢𑀸 𑀅𑀧𑀭𑀺𑀧𑀼𑀡𑁆𑀡𑀸𑀢𑀺 𑀦 𑀤𑀝𑁆𑀞𑀩𑁆𑀩𑀸. 𑀦𑀬𑀢𑁄 𑀧𑀦 𑀧𑀭𑀺𑀧𑀼𑀡𑁆𑀡𑀸𑀢𑁆𑀯𑁂𑀯 𑀤𑀝𑁆𑀞𑀩𑁆𑀩𑀸. 𑀬𑀣𑀸 𑀳𑀺 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀉𑀤𑀓𑀧𑀺𑀝𑁆𑀞𑁂 𑀦𑀺𑀧𑀦𑁆𑀦𑀁 𑀲𑀼𑀁𑀲𑀼𑀫𑀸𑀭𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀧𑀭𑀪𑀸𑀕𑀁 𑀑𑀮𑁄𑀓𑁂𑀦𑁆𑀢𑁄 𑀕𑀻𑀯𑀁 𑀧𑀲𑁆𑀲𑁂𑀬𑁆𑀬, 𑀑𑀭𑀢𑁄 𑀧𑀺𑀝𑁆𑀞𑀺𑀁, 𑀧𑀭𑀺𑀬𑁄𑀲𑀸𑀦𑁂 𑀦𑀗𑁆𑀕𑀼𑀝𑁆𑀞𑀫𑀽𑀮𑀁, 𑀳𑁂𑀝𑁆𑀞𑀸 𑀓𑀼𑀘𑁆𑀙𑀺𑀁 𑀑𑀮𑁄𑀓𑁂𑀦𑁆𑀢𑁄 𑀧𑀦 𑀉𑀤𑀓𑀕𑀢𑀁 𑀅𑀕𑁆𑀕𑀦𑀗𑁆𑀕𑀼𑀝𑁆𑀞𑀜𑁆𑀘𑁂𑀯 𑀘𑀢𑁆𑀢𑀸𑀭𑁄 𑀘 𑀳𑀢𑁆𑀣𑀧𑀸𑀤𑁂 𑀦 𑀧𑀲𑁆𑀲𑁂𑀬𑁆𑀬, 𑀲𑁄 𑀦 𑀏𑀢𑁆𑀢𑀸𑀯𑀢𑀸 ‘‘𑀅𑀧𑀭𑀺𑀧𑀼𑀡𑁆𑀡𑁄 𑀲𑀼𑀁𑀲𑀼𑀫𑀸𑀭𑁄’’𑀢𑀺 𑀕𑀡𑁆𑀳𑀸𑀢𑀺, 𑀦𑀬𑀢𑁄 𑀧𑀦 𑀧𑀭𑀺𑀧𑀼𑀡𑁆𑀡𑁄𑀢𑁆𑀯𑁂𑀯 𑀕𑀡𑁆𑀳𑀸𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁.

𑀉𑀤𑀓𑀧𑀺𑀝𑁆𑀞𑁂 𑀦𑀺𑀧𑀦𑁆𑀦𑀲𑀼𑀁𑀲𑀼𑀫𑀸𑀭𑁄 𑀯𑀺𑀬 𑀳𑀺 𑀢𑁂𑀪𑀽𑀫𑀓𑀯𑀝𑁆𑀝𑀁. 𑀢𑀻𑀭𑁂 𑀞𑀺𑀢𑁄 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄. 𑀢𑁂𑀦 𑀧𑀼𑀭𑀺𑀲𑁂𑀦 𑀉𑀤𑀓𑀧𑀺𑀝𑁆𑀞𑁂 𑀲𑀼𑀁𑀲𑀼𑀫𑀸𑀭𑀲𑁆𑀲 𑀤𑀺𑀝𑁆𑀞𑀓𑀸𑀮𑁄 𑀯𑀺𑀬 𑀬𑁄𑀕𑀺𑀦𑀸 𑀆𑀳𑀸𑀭𑀯𑀲𑁂𑀦 𑀇𑀫𑀲𑁆𑀲𑀢𑁆𑀢𑀪𑀸𑀯𑀲𑁆𑀲 𑀤𑀺𑀝𑁆𑀞𑀓𑀸𑀮𑁄. 𑀧𑀭𑀢𑁄 𑀕𑀻𑀯𑀸𑀬 𑀤𑀺𑀝𑁆𑀞𑀓𑀸𑀮𑁄 𑀯𑀺𑀬 𑀇𑀫𑀲𑁆𑀲𑀢𑁆𑀢𑀪𑀸𑀯𑀲𑁆𑀲 𑀚𑀦𑀺𑀓𑀸𑀬 𑀢𑀡𑁆𑀳𑀸𑀬 𑀤𑀺𑀝𑁆𑀞𑀓𑀸𑀮𑁄. 𑀧𑀺𑀝𑁆𑀞𑀺𑀬𑀸 𑀤𑀺𑀝𑁆𑀞𑀓𑀸𑀮𑁄 𑀯𑀺𑀬 𑀬𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀓𑀫𑁆𑀫𑀁 𑀓𑀢𑀁, 𑀯𑁂𑀤𑀦𑀸𑀤𑀺𑀯𑀲𑁂𑀦 𑀢𑀲𑁆𑀲 𑀤𑀺𑀝𑁆𑀞𑀓𑀸𑀮𑁄. 𑀦𑀗𑁆𑀕𑀼𑀝𑁆𑀞𑀫𑀽𑀮𑀲𑁆𑀲 𑀤𑀺𑀝𑁆𑀞𑀓𑀸𑀮𑁄 𑀯𑀺𑀬 𑀢𑀲𑁆𑀲𑀢𑁆𑀢𑀪𑀸𑀯𑀲𑁆𑀲 𑀚𑀦𑀓𑀸𑀦𑀁 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀦𑀁 𑀤𑀺𑀝𑁆𑀞𑀓𑀸𑀮𑁄. 𑀳𑁂𑀝𑁆𑀞𑀸 𑀓𑀼𑀘𑁆𑀙𑀺𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀧𑀦 𑀅𑀕𑁆𑀕𑀦𑀗𑁆𑀕𑀼𑀝𑁆𑀞𑀜𑁆𑀘𑁂𑀯 𑀘𑀢𑁆𑀢𑀸𑀭𑁄 𑀘 𑀳𑀢𑁆𑀣𑀧𑀸𑀤𑁂 𑀅𑀤𑀺𑀲𑁆𑀯𑀸𑀧𑀺 ‘‘𑀅𑀧𑀭𑀺𑀧𑀼𑀡𑁆𑀡𑁄 𑀲𑀼𑀁𑀲𑀼𑀫𑀸𑀭𑁄’’𑀢𑀺 𑀅𑀕𑀳𑁂𑀢𑁆𑀯𑀸 𑀦𑀬𑀢𑁄 𑀧𑀭𑀺𑀧𑀼𑀡𑁆𑀡𑁄𑀢𑁆𑀯𑁂𑀯 𑀕𑀳𑀡𑀁 𑀯𑀺𑀬 𑀬𑀢𑁆𑀣 𑀬𑀢𑁆𑀣 𑀧𑀘𑁆𑀘𑀬𑀯𑀝𑁆𑀝𑀁 𑀧𑀸𑀴𑀺𑀬𑀁 𑀦 𑀆𑀕𑀢𑀁, 𑀢𑀢𑁆𑀣 𑀢𑀢𑁆𑀣 ‘‘𑀤𑁂𑀲𑀦𑀸 𑀅𑀧𑀭𑀺𑀧𑀼𑀡𑁆𑀡𑀸’’𑀢𑀺 𑀅𑀕𑀳𑁂𑀢𑁆𑀯𑀸 𑀦𑀬𑀢𑁄 𑀧𑀭𑀺𑀧𑀼𑀡𑁆𑀡𑀸𑀢𑁆𑀯𑁂𑀯 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀘 𑀆𑀳𑀸𑀭𑀢𑀡𑁆𑀳𑀸𑀦𑀁 𑀅𑀦𑁆𑀢𑀭𑁂 𑀏𑀓𑁄 𑀲𑀦𑁆𑀥𑀺, 𑀢𑀡𑁆𑀳𑀸𑀯𑁂𑀤𑀦𑀸𑀦𑀁 𑀅𑀦𑁆𑀢𑀭𑁂 𑀏𑀓𑁄, 𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀭𑀸𑀦𑀁 𑀅𑀦𑁆𑀢𑀭𑁂 𑀏𑀓𑁄𑀢𑀺 𑀏𑀯𑀁 𑀢𑀺𑀲𑀦𑁆𑀥𑀺𑀘𑀢𑀼𑀲𑀗𑁆𑀔𑁂𑀧𑀫𑁂𑀯 𑀯𑀝𑁆𑀝𑀁 𑀤𑀲𑁆𑀲𑀺𑀢𑀦𑁆𑀢𑀺. 𑀧𑀞𑀫𑀁.

𑁨. 𑀫𑁄𑀴𑀺𑀬𑀨𑀕𑁆𑀕𑀼𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨. 𑀤𑀼𑀢𑀺𑀬𑁂 𑀲𑀫𑁆𑀪𑀯𑁂𑀲𑀻𑀦𑀁 𑀯𑀸 𑀅𑀦𑀼𑀕𑁆𑀕𑀳𑀸𑀬𑀸𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀪𑀕𑀯𑀸 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀓𑀲𑁆𑀫𑀸? 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀦𑀺𑀲𑀺𑀦𑁆𑀦𑀢𑁆𑀢𑀸. 𑀢𑀲𑁆𑀲𑀜𑁆𑀳𑀺 𑀧𑀭𑀺𑀲𑀢𑀺 𑀫𑁄𑀴𑀺𑀬𑀨𑀕𑁆𑀕𑀼𑀦𑁄 𑀦𑀸𑀫 𑀪𑀺𑀓𑁆𑀔𑀼 𑀤𑀺𑀝𑁆𑀞𑀺𑀕𑀢𑀺𑀓𑁄 𑀦𑀺𑀲𑀺𑀦𑁆𑀦𑁄. 𑀅𑀣 𑀲𑀢𑁆𑀣𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀉𑀝𑁆𑀞𑀳𑀺𑀢𑁆𑀯𑀸 𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀅𑀣𑀲𑁆𑀲𑀸𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀻’’𑀢𑀺 𑀧𑀼𑀘𑁆𑀙𑀸𑀬 𑀑𑀓𑀸𑀲𑀤𑀸𑀦𑀢𑁆𑀣𑀁 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀫𑁄𑀴𑀺𑀬𑀨𑀕𑁆𑀕𑀼𑀦𑁄𑀢𑀺 𑀫𑁄𑀴𑀻𑀢𑀺 𑀘𑀽𑀴𑀸 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋

‘‘𑀙𑁂𑀢𑁆𑀯𑀸𑀦 𑀫𑁄𑀴𑀺𑀁 𑀯𑀭𑀕𑀦𑁆𑀥𑀯𑀸𑀲𑀺𑀢𑀁

𑀯𑁂𑀳𑀸𑀬𑀲𑀁 𑀉𑀓𑁆𑀔𑀺𑀧𑀺 𑀲𑀓𑁆𑀬𑀧𑀼𑀗𑁆𑀕𑀯𑁄;

𑀭𑀢𑀦𑀘𑀗𑁆𑀓𑁄𑀝𑀯𑀭𑁂𑀦 𑀯𑀸𑀲𑀯𑁄,

𑀲𑀳𑀲𑁆𑀲𑀦𑁂𑀢𑁆𑀢𑁄 𑀲𑀺𑀭𑀲𑀸 𑀧𑀝𑀺𑀕𑁆𑀕𑀳𑀻’’𑀢𑀺.

𑀲𑀸 𑀢𑀲𑁆𑀲 𑀕𑀺𑀳𑀺𑀓𑀸𑀮𑁂 𑀫𑀳𑀦𑁆𑀢𑀸 𑀅𑀳𑁄𑀲𑀺. 𑀢𑁂𑀦𑀲𑁆𑀲 ‘‘𑀫𑁄𑀴𑀺𑀬𑀨𑀕𑁆𑀕𑀼𑀦𑁄’’𑀢𑀺 𑀲𑀗𑁆𑀔𑀸 𑀉𑀤𑀧𑀸𑀤𑀺. 𑀧𑀩𑁆𑀩𑀚𑀺𑀢𑀫𑁆𑀧𑀺 𑀦𑀁 𑀢𑁂𑀦𑁂𑀯 𑀦𑀸𑀫𑁂𑀦 𑀲𑀜𑁆𑀚𑀸𑀦𑀦𑁆𑀢𑀺. 𑀏𑀢𑀤𑀯𑁄𑀘𑀸𑀢𑀺 𑀤𑁂𑀲𑀦𑀸𑀦𑀼𑀲𑀦𑁆𑀥𑀺𑀁 𑀖𑀝𑁂𑀦𑁆𑀢𑁄 𑀏𑀢𑀁 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀯𑀺𑀜𑁆𑀜𑀸𑀡𑀸𑀳𑀸𑀭𑀁 𑀆𑀳𑀸𑀭𑁂𑀢𑀻’’𑀢𑀺 𑀯𑀘𑀦𑀁 𑀅𑀯𑁄𑀘. 𑀢𑀲𑁆𑀲𑀢𑁆𑀣𑁄 𑁋 𑀪𑀦𑁆𑀢𑁂, 𑀓𑁄 𑀦𑀸𑀫 𑀲𑁄, 𑀬𑁄 𑀏𑀢𑀁 𑀯𑀺𑀜𑁆𑀜𑀸𑀡𑀸𑀳𑀸𑀭𑀁 𑀔𑀸𑀤𑀢𑀺 𑀯𑀸 𑀪𑀼𑀜𑁆𑀚𑀢𑀺 𑀯𑀸𑀢𑀺?

𑀓𑀲𑁆𑀫𑀸 𑀧𑀦𑀸𑀬𑀁 𑀇𑀢𑀭𑁂 𑀢𑀬𑁄 𑀆𑀳𑀸𑀭𑁂 𑀅𑀧𑀼𑀘𑁆𑀙𑀺𑀢𑁆𑀯𑀸 𑀇𑀫𑀫𑁂𑀯 𑀧𑀼𑀘𑁆𑀙𑀢𑀻𑀢𑀺? 𑀚𑀸𑀦𑀸𑀫𑀻𑀢𑀺 𑀮𑀤𑁆𑀥𑀺𑀬𑀸. 𑀲𑁄 𑀳𑀺 𑀫𑀳𑀦𑁆𑀢𑁂 𑀧𑀺𑀡𑁆𑀟𑁂 𑀓𑀢𑁆𑀯𑀸𑀯 𑀓𑀩𑀴𑀻𑀓𑀸𑀭𑀸𑀳𑀸𑀭𑀁 𑀪𑀼𑀜𑁆𑀚𑀦𑁆𑀢𑁂 𑀧𑀲𑁆𑀲𑀢𑀺, 𑀢𑁂𑀦𑀲𑁆𑀲 𑀢𑀁 𑀚𑀸𑀦𑀸𑀫𑀻𑀢𑀺 𑀮𑀤𑁆𑀥𑀺. 𑀢𑀺𑀢𑁆𑀢𑀺𑀭𑀯𑀝𑁆𑀝𑀓𑀫𑁄𑀭𑀓𑀼𑀓𑁆𑀓𑀼𑀝𑀸𑀤𑀬𑁄 𑀧𑀦 𑀫𑀸𑀢𑀼𑀲𑀫𑁆𑀨𑀲𑁆𑀲𑁂𑀦 𑀬𑀸𑀧𑁂𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀏𑀢𑁂 𑀨𑀲𑁆𑀲𑀸𑀳𑀸𑀭𑁂𑀦 𑀬𑀸𑀧𑁂𑀦𑁆𑀢𑀻’’𑀢𑀺 𑀢𑀲𑁆𑀲 𑀮𑀤𑁆𑀥𑀺. 𑀓𑀘𑁆𑀙𑀧𑀸 𑀧𑀦 𑀅𑀢𑁆𑀢𑀦𑁄 𑀉𑀢𑀼𑀲𑀫𑀬𑁂 𑀫𑀳𑀸𑀲𑀫𑀼𑀤𑁆𑀤𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀫𑀼𑀤𑁆𑀤𑀢𑀻𑀭𑁂 𑀯𑀸𑀮𑀺𑀓𑀦𑁆𑀢𑀭𑁂 𑀅𑀡𑁆𑀟𑀸𑀦𑀺 𑀞𑀧𑁂𑀢𑁆𑀯𑀸 𑀯𑀸𑀮𑀺𑀓𑀸𑀬 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀫𑁂𑀯 𑀑𑀢𑀭𑀦𑁆𑀢𑀺. 𑀢𑀸𑀦𑀺 𑀫𑀸𑀢𑀼𑀅𑀦𑀼𑀲𑁆𑀲𑀭𑀡𑀯𑀲𑁂𑀦 𑀦 𑀧𑀽𑀢𑀻𑀦𑀺 𑀳𑁄𑀦𑁆𑀢𑀺. 𑀢𑀸𑀦𑀺 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑁂𑀦 𑀬𑀸𑀧𑁂𑀦𑁆𑀢𑀻𑀢𑀺 𑀢𑀲𑁆𑀲 𑀮𑀤𑁆𑀥𑀺. 𑀓𑀺𑀜𑁆𑀘𑀸𑀧𑀺 𑀣𑁂𑀭𑀲𑁆𑀲 𑀅𑀬𑀁 𑀮𑀤𑁆𑀥𑀺, 𑀦 𑀧𑀦 𑀏𑀢𑀸𑀬 𑀮𑀤𑁆𑀥𑀺𑀬𑀸 𑀇𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺. 𑀤𑀺𑀝𑁆𑀞𑀺𑀕𑀢𑀺𑀓𑁄 𑀳𑀺 𑀉𑀫𑁆𑀫𑀢𑁆𑀢𑀓𑀲𑀤𑀺𑀲𑁄. 𑀬𑀣𑀸 𑀉𑀫𑁆𑀫𑀢𑁆𑀢𑀓𑁄 𑀧𑀘𑁆𑀙𑀺𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀁 𑀑𑀢𑀺𑀡𑁆𑀡𑁄 𑀕𑁄𑀫𑀬𑀫𑁆𑀧𑀺 𑀧𑀸𑀲𑀸𑀡𑀫𑁆𑀧𑀺 𑀕𑀽𑀣𑀫𑁆𑀧𑀺 𑀔𑀚𑁆𑀚𑀔𑀡𑁆𑀟𑀫𑁆𑀧𑀺 𑀢𑀁 𑀢𑀁 𑀫𑀦𑀸𑀧𑀫𑁆𑀧𑀺 𑀅𑀫𑀦𑀸𑀧𑀫𑁆𑀧𑀺 𑀕𑀳𑁂𑀢𑁆𑀯𑀸 𑀧𑀘𑁆𑀙𑀺𑀬𑀁 𑀧𑀓𑁆𑀔𑀺𑀧𑀢𑀺. 𑀏𑀯𑀫𑁂𑀯 𑀤𑀺𑀝𑁆𑀞𑀺𑀕𑀢𑀺𑀓𑁄 𑀬𑀼𑀢𑁆𑀢𑀫𑁆𑀧𑀺 𑀅𑀬𑀼𑀢𑁆𑀢𑀫𑁆𑀧𑀺 𑀧𑀼𑀘𑁆𑀙𑀢𑀺. 𑀲𑁄 ‘‘𑀓𑀲𑁆𑀫𑀸 𑀇𑀫𑀁 𑀧𑀼𑀘𑁆𑀙𑀲𑀻’’𑀢𑀺 𑀦 𑀦𑀺𑀕𑁆𑀕𑀳𑁂𑀢𑀩𑁆𑀩𑁄, 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀺𑀢𑀝𑁆𑀞𑀸𑀦𑁂 𑀧𑀦 𑀕𑀳𑀡𑀫𑁂𑀯 𑀦𑀺𑀲𑁂𑀥𑁂𑀢𑀩𑁆𑀩𑀁. 𑀢𑁂𑀦𑁂𑀯 𑀦𑀁 𑀪𑀕𑀯𑀸 ‘‘𑀓𑀲𑁆𑀫𑀸 𑀏𑀯𑀁 𑀧𑀼𑀘𑁆𑀙𑀲𑀻’’𑀢𑀺 𑀅𑀯𑀢𑁆𑀯𑀸 𑀕𑀳𑀺𑀢𑀕𑀸𑀳𑀫𑁂𑀯 𑀢𑀲𑁆𑀲 𑀫𑁄𑀘𑁂𑀢𑀼𑀁 𑀦𑁄 𑀓𑀮𑁆𑀮𑁄 𑀧𑀜𑁆𑀳𑁄𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀦𑁄 𑀓𑀮𑁆𑀮𑁄𑀢𑀺 𑀅𑀬𑀼𑀢𑁆𑀢𑁄. 𑀆𑀳𑀸𑀭𑁂𑀢𑀻𑀢𑀺 𑀅𑀳𑀁 𑀦 𑀯𑀤𑀸𑀫𑀻𑀢𑀺 𑀅𑀳𑀁 𑀓𑁄𑀘𑀺 𑀲𑀢𑁆𑀢𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸 𑀆𑀳𑀸𑀭𑁂𑀢𑀻𑀢𑀺 𑀦 𑀯𑀤𑀸𑀫𑀺. 𑀆𑀳𑀸𑀭𑁂𑀢𑀻𑀢𑀺 𑀘𑀸𑀳𑀁 𑀯𑀤𑁂𑀬𑁆𑀬𑀦𑁆𑀢𑀺 𑀬𑀤𑀺 𑀅𑀳𑀁 𑀆𑀳𑀸𑀭𑁂𑀢𑀻𑀢𑀺 𑀯𑀤𑁂𑀬𑁆𑀬𑀁. 𑀢𑀢𑁆𑀭𑀲𑁆𑀲 𑀓𑀮𑁆𑀮𑁄 𑀧𑀜𑁆𑀳𑁄𑀢𑀺 𑀢𑀲𑁆𑀫𑀺𑀁 𑀫𑀬𑀸 𑀏𑀯𑀁 𑀯𑀼𑀢𑁆𑀢𑁂 𑀅𑀬𑀁 𑀧𑀜𑁆𑀳𑁄 𑀬𑀼𑀢𑁆𑀢𑁄 𑀪𑀯𑁂𑀬𑁆𑀬. 𑀓𑀺𑀲𑁆𑀲 𑀦𑀼 𑀔𑁄, 𑀪𑀦𑁆𑀢𑁂, 𑀯𑀺𑀜𑁆𑀜𑀸𑀡𑀸𑀳𑀸𑀭𑁄𑀢𑀺, 𑀪𑀦𑁆𑀢𑁂, 𑀅𑀬𑀁 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀓𑀢𑀫𑀲𑁆𑀲 𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀭 𑀓𑀮𑁆𑀮𑀁 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺 𑀢𑀲𑁆𑀫𑀺𑀁 𑀏𑀯𑀁 𑀧𑀼𑀘𑁆𑀙𑀺𑀢𑁂 𑀧𑀜𑁆𑀳𑁂 𑀇𑀫𑀁 𑀯𑁂𑀬𑁆𑀬𑀸𑀓𑀭𑀡𑀁 𑀬𑀼𑀢𑁆𑀢𑀁 ‘‘𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀸 𑀧𑀘𑁆𑀘𑀬𑁄’’𑀢𑀺. 𑀏𑀢𑁆𑀣 𑀘 𑀯𑀺𑀜𑁆𑀜𑀸𑀡𑀸𑀳𑀸𑀭𑁄𑀢𑀺 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁. 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀻𑀢𑀺 𑀢𑁂𑀦𑁂𑀯 𑀯𑀺𑀜𑁆𑀜𑀸𑀡𑁂𑀦 𑀲𑀳𑀼𑀧𑁆𑀧𑀦𑁆𑀦𑀦𑀸𑀫𑀭𑀽𑀧𑀁. 𑀢𑀲𑁆𑀫𑀺𑀁 𑀪𑀽𑀢𑁂 𑀲𑀢𑀺 𑀲𑀴𑀸𑀬𑀢𑀦𑀦𑁆𑀢𑀺 𑀢𑀲𑁆𑀫𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺𑀲𑀗𑁆𑀔𑀸𑀢𑁂 𑀦𑀸𑀫𑀭𑀽𑀧𑁂 𑀚𑀸𑀢𑁂 𑀲𑀢𑀺 𑀲𑀴𑀸𑀬𑀢𑀦𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺 𑀇𑀥𑀸𑀧𑀺 𑀪𑀕𑀯𑀸 𑀉𑀢𑁆𑀢𑀭𑀺 𑀧𑀜𑁆𑀳𑀲𑁆𑀲 𑀑𑀓𑀸𑀲𑀁 𑀤𑁂𑀦𑁆𑀢𑁄 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀤𑀺𑀝𑁆𑀞𑀺𑀕𑀢𑀺𑀓𑁄 𑀳𑀺 𑀦𑀯𑀧𑀼𑀘𑁆𑀙𑀁 𑀉𑀧𑁆𑀧𑀸𑀤𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀦𑀺𑀤𑁆𑀤𑀺𑀝𑁆𑀞𑀁 𑀦𑀺𑀤𑁆𑀤𑀺𑀝𑁆𑀞𑀁𑀬𑁂𑀯 𑀧𑀦 𑀕𑀡𑁆𑀳𑀺𑀢𑁆𑀯𑀸 𑀧𑀼𑀘𑁆𑀙𑀢𑀺, 𑀢𑁂𑀦𑀲𑁆𑀲 𑀪𑀕𑀯𑀸 𑀑𑀓𑀸𑀲𑀁 𑀅𑀤𑀸𑀲𑀺. 𑀅𑀢𑁆𑀣𑁄 𑀧𑀦𑀲𑁆𑀲 𑀲𑀩𑁆𑀩𑀧𑀤𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑁄. ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀪𑀯𑀢𑀻’’𑀢𑀺 𑀓𑀲𑁆𑀫𑀸 𑀦 𑀧𑀼𑀘𑁆𑀙𑀢𑀺? 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀳𑀺 𑀲𑀢𑁆𑀢𑁄 𑀦𑀸𑀫 𑀪𑀽𑀢𑁄 𑀦𑀺𑀩𑁆𑀩𑀢𑁆𑀢𑁄𑀬𑁂𑀯𑀸𑀢𑀺 𑀮𑀤𑁆𑀥𑀺, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀮𑀤𑁆𑀥𑀺𑀯𑀺𑀭𑀼𑀤𑁆𑀥𑀁 𑀇𑀤𑀦𑁆𑀢𑀺 𑀦 𑀧𑀼𑀘𑁆𑀙𑀢𑀺. 𑀅𑀧𑀺𑀘 𑀇𑀤𑀧𑁆𑀧𑀘𑁆𑀘𑀬𑀸 𑀇𑀤𑀁 𑀇𑀤𑀧𑁆𑀧𑀘𑁆𑀘𑀬𑀸 𑀇𑀤𑀦𑁆𑀢𑀺 𑀩𑀳𑀽𑀲𑀼 𑀞𑀸𑀦𑁂𑀲𑀼 𑀓𑀣𑀺𑀢𑀢𑁆𑀢𑀸 𑀲𑀜𑁆𑀜𑀢𑁆𑀢𑀺𑀁 𑀉𑀧𑀕𑀢𑁄, 𑀢𑁂𑀦𑀸𑀧𑀺 𑀦 𑀧𑀼𑀘𑁆𑀙𑀢𑀺. 𑀲𑀢𑁆𑀣𑀸𑀧𑀺 ‘‘𑀇𑀫𑀲𑁆𑀲 𑀩𑀳𑀼𑀁 𑀧𑀼𑀘𑁆𑀙𑀦𑁆𑀢𑀲𑁆𑀲𑀸𑀧𑀺 𑀢𑀺𑀢𑁆𑀢𑀺 𑀦𑀢𑁆𑀣𑀺, 𑀢𑀼𑀘𑁆𑀙𑀧𑀼𑀘𑁆𑀙𑀫𑁂𑀯 𑀧𑀼𑀘𑁆𑀙𑀢𑀻’’𑀢𑀺 𑀇𑀢𑁄 𑀧𑀝𑁆𑀞𑀸𑀬 𑀤𑁂𑀲𑀦𑀁 𑀏𑀓𑀸𑀩𑀤𑁆𑀥𑀁 𑀓𑀢𑁆𑀯𑀸 𑀤𑁂𑀲𑁂𑀲𑀺. 𑀙𑀦𑁆𑀦𑀁 𑀢𑁆𑀯𑁂𑀯𑀸𑀢𑀺 𑀬𑀢𑁄 𑀧𑀝𑁆𑀞𑀸𑀬 𑀤𑁂𑀲𑀦𑀸𑀭𑀼𑀴𑁆𑀳𑀁, 𑀢𑀫𑁂𑀯 𑀕𑀳𑁂𑀢𑁆𑀯𑀸 𑀤𑁂𑀲𑀦𑀁 𑀯𑀺𑀯𑀝𑁆𑀝𑁂𑀦𑁆𑀢𑁄 𑀏𑀯𑀫𑀸𑀳. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀸𑀦𑀁 𑀅𑀦𑁆𑀢𑀭𑁂 𑀏𑀓𑁄 𑀲𑀦𑁆𑀥𑀺, 𑀯𑁂𑀤𑀦𑀸𑀢𑀡𑁆𑀳𑀸𑀦𑀁 𑀅𑀦𑁆𑀢𑀭𑁂 𑀏𑀓𑁄, 𑀪𑀯𑀚𑀸𑀢𑀻𑀦𑀁 𑀅𑀦𑁆𑀢𑀭𑁂 𑀏𑀓𑁄𑀢𑀺. 𑀤𑀼𑀢𑀺𑀬𑀁.

𑁩. 𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩. 𑀢𑀢𑀺𑀬𑁂 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸𑀢𑀺 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀅𑀲𑀫𑀢𑁆𑀣𑀸 𑀩𑀸𑀳𑀺𑀭𑀓𑀲𑀫𑀡𑀩𑁆𑀭𑀸𑀳𑁆𑀫𑀡𑀸. 𑀚𑀭𑀸𑀫𑀭𑀡𑀁 𑀦𑀧𑁆𑀧𑀚𑀸𑀦𑀦𑁆𑀢𑀻𑀢𑀺𑀆𑀤𑀻𑀲𑀼 𑀚𑀭𑀸𑀫𑀭𑀡𑀁 𑀦 𑀚𑀸𑀦𑀦𑁆𑀢𑀺 𑀤𑀼𑀓𑁆𑀔𑀲𑀘𑁆𑀘𑀯𑀲𑁂𑀦, 𑀚𑀭𑀸𑀫𑀭𑀡𑀲𑀫𑀼𑀤𑀬𑀁 𑀦 𑀚𑀸𑀦𑀦𑁆𑀢𑀺 𑀲𑀳 𑀢𑀡𑁆𑀳𑀸𑀬 𑀚𑀸𑀢𑀺 𑀚𑀭𑀸𑀫𑀭𑀡𑀲𑁆𑀲 𑀲𑀫𑀼𑀤𑀬𑁄𑀢𑀺 𑀲𑀫𑀼𑀤𑀬𑀲𑀘𑁆𑀘𑀯𑀲𑁂𑀦, 𑀚𑀭𑀸𑀫𑀭𑀡𑀦𑀺𑀭𑁄𑀥𑀁 𑀦 𑀚𑀸𑀦𑀦𑁆𑀢𑀺 𑀦𑀺𑀭𑁄𑀥𑀲𑀘𑁆𑀘𑀯𑀲𑁂𑀦, 𑀧𑀝𑀺𑀧𑀤𑀁 𑀦 𑀚𑀸𑀦𑀦𑁆𑀢𑀺 𑀫𑀕𑁆𑀕𑀲𑀘𑁆𑀘𑀯𑀲𑁂𑀦. 𑀚𑀸𑀢𑀺𑀁 𑀦 𑀚𑀸𑀦𑀦𑁆𑀢𑀺 𑀤𑀼𑀓𑁆𑀔𑀲𑀘𑁆𑀘𑀯𑀲𑁂𑀦, 𑀚𑀸𑀢𑀺𑀲𑀫𑀼𑀤𑀬𑀁 𑀦 𑀚𑀸𑀦𑀦𑁆𑀢𑀺 𑀲𑀳 𑀢𑀡𑁆𑀳𑀸𑀬 𑀪𑀯𑁄 𑀚𑀸𑀢𑀺𑀲𑀫𑀼𑀤𑀬𑁄𑀢𑀺 𑀲𑀫𑀼𑀤𑀬𑀲𑀘𑁆𑀘𑀯𑀲𑁂𑀦. 𑀏𑀯𑀁 𑀲𑀳 𑀢𑀡𑁆𑀳𑀸𑀬 𑀲𑀫𑀼𑀤𑀬𑀁 𑀬𑁄𑀚𑁂𑀢𑁆𑀯𑀸 𑀲𑀩𑁆𑀩𑀧𑀤𑁂𑀲𑀼 𑀘𑀢𑀼𑀲𑀘𑁆𑀘𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀸𑀫𑀜𑁆𑀜𑀢𑁆𑀣𑀁 𑀯𑀸 𑀩𑁆𑀭𑀳𑁆𑀫𑀜𑁆𑀜𑀢𑁆𑀣𑀁 𑀯𑀸𑀢𑀺 𑀏𑀢𑁆𑀣 𑀅𑀭𑀺𑀬𑀫𑀕𑁆𑀕𑁄 𑀲𑀸𑀫𑀜𑁆𑀜𑀜𑁆𑀘𑁂𑀯 𑀩𑁆𑀭𑀳𑁆𑀫𑀜𑁆𑀜𑀜𑁆𑀘. 𑀉𑀪𑀬𑀢𑁆𑀣𑀸𑀧𑀺 𑀧𑀦 𑀅𑀢𑁆𑀣𑁄 𑀦𑀸𑀫 𑀅𑀭𑀺𑀬𑀨𑀮𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀺 𑀪𑀕𑀯𑀸 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀏𑀓𑀸𑀤𑀲𑀲𑀼 𑀞𑀸𑀦𑁂𑀲𑀼 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀓𑀣𑁂𑀲𑀻𑀢𑀺. 𑀢𑀢𑀺𑀬𑀁.

𑁪. 𑀤𑀼𑀢𑀺𑀬𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪. 𑀘𑀢𑀼𑀢𑁆𑀣𑁂 𑀇𑀫𑁂 𑀥𑀫𑁆𑀫𑁂 𑀓𑀢𑀫𑁂 𑀥𑀫𑁆𑀫𑁂𑀢𑀺 𑀏𑀢𑁆𑀢𑀓𑀁 𑀧𑀧𑀜𑁆𑀘𑀁 𑀓𑀢𑁆𑀯𑀸 𑀓𑀣𑀺𑀢𑀁, 𑀤𑁂𑀲𑀦𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀚𑁆𑀛𑀸𑀲𑀬𑁂𑀦 𑀇𑀫𑁂 𑀥𑀫𑁆𑀫𑁂 𑀦𑀧𑁆𑀧𑀚𑀸𑀦𑀦𑁆𑀢𑀻𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀘𑀢𑀼𑀢𑁆𑀣𑀁.

𑁫. 𑀓𑀘𑁆𑀘𑀸𑀦𑀕𑁄𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫. 𑀧𑀜𑁆𑀘𑀫𑁂 𑀲𑀫𑁆𑀫𑀸𑀤𑀺𑀝𑁆𑀞𑀺 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀬𑀁 𑀧𑀡𑁆𑀟𑀺𑀢𑀸 𑀤𑁂𑀯𑀫𑀦𑀼𑀲𑁆𑀲𑀸 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀲𑀫𑁆𑀫𑀸𑀤𑀲𑁆𑀲𑀦𑀁 𑀯𑀤𑀦𑁆𑀢𑀺, 𑀲𑀩𑁆𑀩𑀫𑁆𑀧𑀺 𑀢𑀁 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀗𑁆𑀔𑀺𑀧𑀺𑀢𑁆𑀯𑀸 𑀧𑀼𑀘𑁆𑀙𑀢𑀺. 𑀤𑁆𑀯𑀬𑀦𑀺𑀲𑁆𑀲𑀺𑀢𑁄𑀢𑀺 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀦𑀺𑀲𑁆𑀲𑀺𑀢𑁄. 𑀬𑁂𑀪𑀼𑀬𑁆𑀬𑁂𑀦𑀸𑀢𑀺 𑀇𑀫𑀺𑀦𑀸 𑀞𑀧𑁂𑀢𑁆𑀯𑀸 𑀅𑀭𑀺𑀬𑀧𑀼𑀕𑁆𑀕𑀮𑁂 𑀲𑁂𑀲𑀫𑀳𑀸𑀚𑀦𑀁 𑀤𑀲𑁆𑀲𑁂𑀢𑀺. 𑀅𑀢𑁆𑀣𑀺𑀢𑀦𑁆𑀢𑀺 𑀲𑀲𑁆𑀲𑀢𑀁. 𑀦𑀢𑁆𑀣𑀺𑀢𑀦𑁆𑀢𑀺 𑀉𑀘𑁆𑀙𑁂𑀤𑀁. 𑀮𑁄𑀓𑀲𑀫𑀼𑀤𑀬𑀦𑁆𑀢𑀺 𑀮𑁄𑀓𑁄 𑀦𑀸𑀫 𑀲𑀗𑁆𑀔𑀸𑀭𑀮𑁄𑀓𑁄, 𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀺. 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄𑀢𑀺 𑀲𑀫𑁆𑀫𑀸𑀧𑀜𑁆𑀜𑀸 𑀦𑀸𑀫 𑀲𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑀧𑀜𑁆𑀜𑀸, 𑀢𑀸𑀬 𑀧𑀲𑁆𑀲𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀬𑀸 𑀮𑁄𑀓𑁂 𑀦𑀢𑁆𑀣𑀺𑀢𑀸𑀢𑀺 𑀲𑀗𑁆𑀔𑀸𑀭𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁂𑀲𑀼 𑀥𑀫𑁆𑀫𑁂𑀲𑀼 𑀧𑀜𑁆𑀜𑀸𑀬𑀦𑁆𑀢𑁂𑀲𑁆𑀯𑁂𑀯 𑀬𑀸 𑀦𑀢𑁆𑀣𑀻𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀲𑀸 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀮𑁄𑀓𑀦𑀺𑀭𑁄𑀥𑀦𑁆𑀢𑀺 𑀲𑀗𑁆𑀔𑀸𑀭𑀸𑀦𑀁 𑀪𑀗𑁆𑀕𑀁. 𑀬𑀸 𑀮𑁄𑀓𑁂 𑀅𑀢𑁆𑀣𑀺𑀢𑀸𑀢𑀺 𑀲𑀗𑁆𑀔𑀸𑀭𑀮𑁄𑀓𑁂 𑀪𑀺𑀚𑁆𑀚𑀫𑀸𑀦𑁂𑀲𑀼 𑀥𑀫𑁆𑀫𑁂𑀲𑀼 𑀧𑀜𑁆𑀜𑀸𑀬𑀦𑁆𑀢𑁂𑀲𑁆𑀯𑁂𑀯 𑀬𑀸 𑀅𑀢𑁆𑀣𑀻𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀲𑀸 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀅𑀧𑀺𑀘 𑀮𑁄𑀓𑀲𑀫𑀼𑀤𑀬𑀦𑁆𑀢𑀺 𑀅𑀦𑀼𑀮𑁄𑀫𑀧𑀘𑁆𑀘𑀬𑀸𑀓𑀸𑀭𑀁. 𑀮𑁄𑀓𑀦𑀺𑀭𑁄𑀥𑀦𑁆𑀢𑀺 𑀧𑀝𑀺𑀮𑁄𑀫𑀧𑀘𑁆𑀘𑀬𑀸𑀓𑀸𑀭𑀁. 𑀮𑁄𑀓𑀦𑀺𑀲𑁆𑀲𑀬𑁂 𑀧𑀲𑁆𑀲𑀦𑁆𑀢𑀲𑁆𑀲𑀸𑀧𑀺 𑀳𑀺 𑀧𑀘𑁆𑀘𑀬𑀸𑀦𑀁 𑀅𑀦𑀼𑀘𑁆𑀙𑁂𑀤𑁂𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀅𑀦𑀼𑀘𑁆𑀙𑁂𑀤𑀁 𑀧𑀲𑁆𑀲𑀢𑁄 𑀬𑀸 𑀦𑀢𑁆𑀣𑀻𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀲𑀸 𑀦 𑀳𑁄𑀢𑀺. 𑀧𑀘𑁆𑀘𑀬𑀦𑀺𑀭𑁄𑀥𑀁 𑀧𑀲𑁆𑀲𑀦𑁆𑀢𑀲𑁆𑀲𑀸𑀧𑀺 𑀧𑀘𑁆𑀘𑀬𑀦𑀺𑀭𑁄𑀥𑁂𑀦 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀦𑀺𑀭𑁄𑀥𑀁 𑀧𑀲𑁆𑀲𑀢𑁄 𑀬𑀸 𑀅𑀢𑁆𑀣𑀻𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀲𑀸 𑀦 𑀳𑁄𑀢𑀻𑀢𑀺 𑀅𑀬𑀫𑁆𑀧𑁂𑀢𑁆𑀣 𑀅𑀢𑁆𑀣𑁄.

𑀉𑀧𑀬𑀼𑀧𑀸𑀤𑀸𑀦𑀸𑀪𑀺𑀦𑀺𑀯𑁂𑀲𑀯𑀺𑀦𑀺𑀩𑀦𑁆𑀥𑁄𑀢𑀺 𑀉𑀧𑀬𑁂𑀳𑀺 𑀘 𑀉𑀧𑀸𑀤𑀸𑀦𑁂𑀳𑀺 𑀘 𑀅𑀪𑀺𑀦𑀺𑀯𑁂𑀲𑁂𑀳𑀺 𑀘 𑀯𑀺𑀦𑀺𑀩𑀦𑁆𑀥𑁄. 𑀢𑀢𑁆𑀣 𑀉𑀧𑀬𑀸𑀢𑀺 𑀤𑁆𑀯𑁂 𑀉𑀧𑀬𑀸 𑀢𑀡𑁆𑀳𑀼𑀧𑀬𑁄 𑀘 𑀤𑀺𑀝𑁆𑀞𑀼𑀧𑀬𑁄 𑀘. 𑀉𑀧𑀸𑀤𑀸𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄 𑀳𑀺 𑀬𑀲𑁆𑀫𑀸 𑀅𑀳𑀁 𑀫𑀫𑀦𑁆𑀢𑀺𑀆𑀤𑀻𑀳𑀺 𑀆𑀓𑀸𑀭𑁂𑀳𑀺 𑀢𑁂𑀪𑀽𑀫𑀓𑀥𑀫𑁆𑀫𑁂 𑀉𑀧𑁂𑀦𑁆𑀢𑀺 𑀉𑀧𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀉𑀧𑀬𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀢𑁂 𑀥𑀫𑁆𑀫𑁂 𑀉𑀧𑀸𑀤𑀺𑀬𑀦𑁆𑀢𑀺 𑀘𑁂𑀯 𑀅𑀪𑀺𑀦𑀺𑀯𑀺𑀲𑀦𑁆𑀢𑀺 𑀘, 𑀢𑀲𑁆𑀫𑀸 𑀉𑀧𑀸𑀤𑀸𑀦𑀸𑀢𑀺 𑀘 𑀅𑀪𑀺𑀦𑀺𑀯𑁂𑀲𑀸𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀢𑀸𑀳𑀺 𑀘𑀸𑀬𑀁 𑀮𑁄𑀓𑁄 𑀯𑀺𑀦𑀺𑀩𑀦𑁆𑀥𑁄. 𑀢𑁂𑀦𑀸𑀳 ‘‘𑀉𑀧𑀬𑀼𑀧𑀸𑀤𑀸𑀦𑀸𑀪𑀺𑀦𑀺𑀯𑁂𑀲𑀯𑀺𑀦𑀺𑀩𑀦𑁆𑀥𑁄’’𑀢𑀺.

𑀢𑀜𑁆𑀘𑀸𑀬𑀦𑁆𑀢𑀺 𑀢𑀜𑁆𑀘 𑀉𑀧𑀬𑀼𑀧𑀸𑀤𑀸𑀦𑀁 𑀅𑀬𑀁 𑀅𑀭𑀺𑀬𑀲𑀸𑀯𑀓𑁄. 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 𑀘𑀺𑀢𑁆𑀢𑀲𑁆𑀲 𑀧𑀢𑀺𑀝𑁆𑀞𑀸𑀦𑀪𑀽𑀢𑀁. 𑀅𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀦𑁆𑀢𑀺 𑀅𑀪𑀺𑀦𑀺𑀯𑁂𑀲𑀪𑀽𑀢𑀜𑁆𑀘 𑀅𑀦𑀼𑀲𑀬𑀪𑀽𑀢𑀜𑁆𑀘. 𑀢𑀡𑁆𑀳𑀸𑀤𑀺𑀝𑁆𑀞𑀻𑀲𑀼 𑀳𑀺 𑀅𑀓𑀼𑀲𑀮𑀘𑀺𑀢𑁆𑀢𑀁 𑀧𑀢𑀺𑀝𑁆𑀞𑀸𑀢𑀺, 𑀢𑀸 𑀘 𑀢𑀲𑁆𑀫𑀺𑀁 𑀅𑀪𑀺𑀦𑀺𑀯𑀺𑀲𑀦𑁆𑀢𑀺 𑀘𑁂𑀯 𑀅𑀦𑀼𑀲𑁂𑀦𑁆𑀢𑀺 𑀘, 𑀢𑀲𑁆𑀫𑀸 𑀢𑀤𑀼𑀪𑀬𑀁 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀁 𑀅𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀦𑁆𑀢𑀺 𑀘 𑀆𑀳. 𑀦 𑀉𑀧𑁂𑀢𑀻𑀢𑀺 𑀦 𑀉𑀧𑀕𑀘𑁆𑀙𑀢𑀺. 𑀦 𑀉𑀧𑀸𑀤𑀺𑀬𑀢𑀻𑀢𑀺 𑀦 𑀕𑀡𑁆𑀳𑀸𑀢𑀺. 𑀦𑀸𑀥𑀺𑀝𑁆𑀞𑀸𑀢𑀻𑀢𑀺 𑀦 𑀅𑀥𑀺𑀝𑁆𑀞𑀸𑀢𑀺, 𑀓𑀺𑀦𑁆𑀢𑀺? 𑀅𑀢𑁆𑀢𑀸 𑀫𑁂𑀢𑀺. 𑀤𑀼𑀓𑁆𑀔𑀫𑁂𑀯𑀸𑀢𑀺 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀫𑀢𑁆𑀢𑀫𑁂𑀯. 𑀦 𑀓𑀗𑁆𑀔𑀢𑀻𑀢𑀺 ‘‘𑀤𑀼𑀓𑁆𑀔𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀤𑀼𑀓𑁆𑀔𑀁 𑀦𑀺𑀭𑀼𑀚𑁆𑀛𑀢𑀺, 𑀦 𑀅𑀜𑁆𑀜𑁄 𑀏𑀢𑁆𑀣 𑀲𑀢𑁆𑀢𑁄 𑀦𑀸𑀫 𑀅𑀢𑁆𑀣𑀻’’𑀢𑀺 𑀓𑀗𑁆𑀔𑀁 𑀦 𑀓𑀭𑁄𑀢𑀺. 𑀦 𑀯𑀺𑀘𑀺𑀓𑀺𑀘𑁆𑀙𑀢𑀻𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀁 𑀉𑀧𑁆𑀧𑀸𑀤𑁂𑀢𑀺.

𑀅𑀧𑀭𑀧𑁆𑀧𑀘𑁆𑀘𑀬𑀸𑀢𑀺 𑀦 𑀧𑀭𑀧𑁆𑀧𑀘𑁆𑀘𑀬𑁂𑀦, 𑀅𑀜𑁆𑀜𑀲𑁆𑀲 𑀅𑀧𑀢𑁆𑀢𑀺𑀬𑀸𑀬𑁂𑀢𑁆𑀯𑀸 𑀅𑀢𑁆𑀢𑀧𑀘𑁆𑀘𑀓𑁆𑀔𑀜𑀸𑀡𑀫𑁂𑀯𑀲𑁆𑀲 𑀏𑀢𑁆𑀣 𑀳𑁄𑀢𑀻𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀓𑀘𑁆𑀘𑀸𑀦, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀳𑁄𑀢𑀻𑀢𑀺 𑀏𑀯𑀁 𑀲𑀢𑁆𑀢𑀲𑀜𑁆𑀜𑀸𑀬 𑀧𑀳𑀻𑀦𑀢𑁆𑀢𑀸 𑀏𑀢𑁆𑀢𑀓𑁂𑀦 𑀲𑀫𑁆𑀫𑀸𑀤𑀲𑁆𑀲𑀦𑀁 𑀦𑀸𑀫 𑀳𑁄𑀢𑀻𑀢𑀺 𑀫𑀺𑀲𑁆𑀲𑀓𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀆𑀳. 𑀅𑀬𑀫𑁂𑀓𑁄 𑀅𑀦𑁆𑀢𑁄𑀢𑀺 𑀏𑀲 𑀏𑀓𑁄 𑀦𑀺𑀓𑀽𑀝𑀦𑁆𑀢𑁄 𑀮𑀸𑀫𑀓𑀦𑁆𑀢𑁄 𑀧𑀞𑀫𑀓𑀁 𑀲𑀲𑁆𑀲𑀢𑀁. 𑀅𑀬𑀁 𑀤𑀼𑀢𑀺𑀬𑁄𑀢𑀺 𑀏𑀲 𑀤𑀼𑀢𑀺𑀬𑁄 𑀲𑀩𑁆𑀩𑀁 𑀦𑀢𑁆𑀣𑀻𑀢𑀺 𑀉𑀧𑁆𑀧𑀚𑁆𑀚𑀦𑀓𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑁄 𑀦𑀺𑀓𑀽𑀝𑀦𑁆𑀢𑁄 𑀮𑀸𑀫𑀓𑀦𑁆𑀢𑁄 𑀤𑀼𑀢𑀺𑀬𑀓𑁄 𑀉𑀘𑁆𑀙𑁂𑀤𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀧𑀜𑁆𑀘𑀫𑀁.

𑁬. 𑀥𑀫𑁆𑀫𑀓𑀣𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬. 𑀙𑀝𑁆𑀞𑁂 𑀦𑀺𑀩𑁆𑀩𑀺𑀤𑀸𑀬𑀸𑀢𑀺 𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀣𑀸𑀬. 𑀯𑀺𑀭𑀸𑀕𑀸𑀬𑀸𑀢𑀺 𑀯𑀺𑀭𑀚𑁆𑀚𑀦𑀢𑁆𑀣𑀸𑀬. 𑀦𑀺𑀭𑁄𑀥𑀸𑀬𑀸𑀢𑀺 𑀦𑀺𑀭𑀼𑀚𑁆𑀛𑀦𑀢𑁆𑀣𑀸𑀬. 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀲𑀻𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀧𑀝𑀺𑀧𑀦𑁆𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄𑀢𑀺 𑀮𑁄𑀓𑀼𑀢𑁆𑀢𑀭𑀲𑁆𑀲 𑀦𑀺𑀩𑁆𑀩𑀸𑀦𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫𑀪𑀽𑀢𑀁 𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑁄. 𑀅𑀦𑀼𑀥𑀫𑁆𑀫𑀪𑀽𑀢𑀦𑁆𑀢𑀺 𑀅𑀦𑀼𑀭𑀽𑀧𑀲𑀪𑀸𑀯𑀪𑀽𑀢𑀁. 𑀦𑀺𑀩𑁆𑀩𑀺𑀤𑀸 𑀯𑀺𑀭𑀸𑀕𑀸 𑀦𑀺𑀭𑁄𑀥𑀸𑀢𑀺 𑀦𑀺𑀩𑁆𑀩𑀺𑀤𑀸𑀬 𑀘𑁂𑀯 𑀯𑀺𑀭𑀸𑀕𑁂𑀦 𑀘 𑀦𑀺𑀭𑁄𑀥𑁂𑀦 𑀘. 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄𑀢𑀺 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀓𑀺𑀜𑁆𑀘𑀺 𑀥𑀫𑁆𑀫𑀁 𑀅𑀦𑀼𑀧𑀸𑀤𑀺𑀬𑀺𑀢𑁆𑀯𑀸 𑀯𑀺𑀫𑀼𑀢𑁆𑀢𑁄. 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄𑀢𑀺 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑁄. 𑀅𑀮𑀁 𑀯𑀘𑀦𑀸𑀬𑀸𑀢𑀺, 𑀏𑀯𑀁 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺, 𑀬𑀼𑀢𑁆𑀢𑁄 𑀅𑀦𑀼𑀘𑁆𑀙𑀯𑀺𑀓𑁄𑀢𑀺 𑀅𑀢𑁆𑀣𑁄. 𑀏𑀯𑀫𑁂𑀢𑁆𑀣 𑀏𑀓𑁂𑀦 𑀦𑀬𑁂𑀦 𑀥𑀫𑁆𑀫𑀓𑀣𑀺𑀓𑀲𑁆𑀲 𑀧𑀼𑀘𑁆𑀙𑀸 𑀓𑀣𑀺𑀢𑀸, 𑀤𑁆𑀯𑀻𑀳𑀺 𑀢𑀁 𑀯𑀺𑀲𑁂𑀲𑁂𑀢𑁆𑀯𑀸 𑀲𑁂𑀓𑁆𑀔𑀸𑀲𑁂𑀓𑁆𑀔𑀪𑀽𑀫𑀺𑀬𑁄 𑀦𑀺𑀤𑁆𑀤𑀺𑀝𑁆𑀞𑀸𑀢𑀺. 𑀙𑀝𑁆𑀞𑀁.

𑁭. 𑀅𑀘𑁂𑀮𑀓𑀲𑁆𑀲𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁭. 𑀲𑀢𑁆𑀢𑀫𑁂 𑀅𑀘𑁂𑀮𑁄 𑀓𑀲𑁆𑀲𑀧𑁄𑀢𑀺 𑀮𑀺𑀗𑁆𑀕𑁂𑀦 𑀅𑀘𑁂𑀮𑁄 𑀦𑀺𑀘𑁆𑀘𑁂𑀮𑁄, 𑀦𑀸𑀫𑁂𑀦 𑀓𑀲𑁆𑀲𑀧𑁄. 𑀤𑀽𑀭𑀢𑁄𑀯𑀸𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀧𑀭𑀺𑀯𑀼𑀢𑀁 𑀆𑀕𑀘𑁆𑀙𑀦𑁆𑀢𑀁 𑀤𑀽𑀭𑀢𑁄 𑀏𑀯 𑀅𑀤𑁆𑀤𑀲. 𑀓𑀺𑀜𑁆𑀘𑀺𑀤𑁂𑀯 𑀤𑁂𑀲𑀦𑁆𑀢𑀺 𑀓𑀺𑀜𑁆𑀘𑀺𑀤𑁂𑀯 𑀓𑀸𑀭𑀡𑀁. 𑀑𑀓𑀸𑀲𑀦𑁆𑀢𑀺 𑀧𑀜𑁆𑀳𑀩𑁆𑀬𑀸𑀓𑀭𑀡𑀲𑁆𑀲 𑀔𑀡𑀁 𑀓𑀸𑀮𑀁. 𑀅𑀦𑁆𑀢𑀭𑀖𑀭𑀦𑁆𑀢𑀺 ‘‘𑀦 𑀧𑀮𑁆𑀮𑀢𑁆𑀣𑀺𑀓𑀸𑀬 𑀅𑀦𑁆𑀢𑀭𑀖𑀭𑁂 𑀦𑀺𑀲𑀻𑀤𑀺𑀲𑁆𑀲𑀸𑀫𑀻’’𑀢𑀺 𑀏𑀢𑁆𑀣 𑀅𑀦𑁆𑀢𑁄𑀦𑀺𑀯𑁂𑀲𑀦𑀁 𑀅𑀦𑁆𑀢𑀭𑀖𑀭𑀁. ‘‘𑀑𑀓𑁆𑀔𑀺𑀢𑁆𑀢𑀘𑀓𑁆𑀔𑀼 𑀅𑀦𑁆𑀢𑀭𑀖𑀭𑁂 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀏𑀢𑁆𑀣 𑀇𑀦𑁆𑀤𑀔𑀻𑀮𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑁄𑀕𑀸𑀫𑁄. 𑀇𑀥𑀸𑀧𑀺 𑀅𑀬𑀫𑁂𑀯 𑀅𑀥𑀺𑀧𑁆𑀧𑁂𑀢𑁄. 𑀬𑀤𑀸𑀓𑀗𑁆𑀔𑀲𑀻𑀢𑀺 𑀬𑀁 𑀇𑀘𑁆𑀙𑀲𑀺.

𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀓𑀣𑁂𑀢𑀼𑀓𑀸𑀫𑁄 𑀬𑀸𑀯𑀢𑀢𑀺𑀬𑀁 𑀧𑀝𑀺𑀓𑁆𑀔𑀺𑀧𑀻𑀢𑀺? 𑀕𑀸𑀭𑀯𑀚𑀦𑀦𑀢𑁆𑀣𑀁. 𑀤𑀺𑀝𑁆𑀞𑀺𑀕𑀢𑀺𑀓𑀸 𑀳𑀺 𑀔𑀺𑀧𑁆𑀧𑀁 𑀓𑀣𑀺𑀬𑀫𑀸𑀦𑁂 𑀕𑀸𑀭𑀯𑀁 𑀦 𑀓𑀭𑁄𑀦𑁆𑀢𑀺, ‘‘𑀲𑀫𑀡𑀁 𑀕𑁄𑀢𑀫𑀁 𑀉𑀧𑀲𑀗𑁆𑀓𑀫𑀺𑀢𑀼𑀫𑁆𑀧𑀺 𑀧𑀼𑀘𑁆𑀙𑀺𑀢𑀼𑀫𑁆𑀧𑀺 𑀲𑀼𑀓𑀭𑀁, 𑀧𑀼𑀘𑁆𑀙𑀺𑀢𑀫𑀢𑁆𑀢𑁂𑀬𑁂𑀯 𑀓𑀣𑁂𑀢𑀻’’𑀢𑀺 𑀯𑀘𑀦𑀫𑁆𑀧𑀺 𑀦 𑀲𑀤𑁆𑀤𑀳𑀦𑁆𑀢𑀺. 𑀤𑁆𑀯𑁂 𑀢𑀬𑁄 𑀯𑀸𑀭𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀧𑀦 𑀕𑀸𑀭𑀯𑀁 𑀓𑀭𑁄𑀦𑁆𑀢𑀺, ‘‘𑀲𑀫𑀡𑀁 𑀕𑁄𑀢𑀫𑀁 𑀉𑀧𑀲𑀗𑁆𑀓𑀫𑀺𑀢𑀼𑀫𑁆𑀧𑀺 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀫𑁆𑀧𑀺 𑀤𑀼𑀓𑁆𑀓𑀭’’𑀦𑁆𑀢𑀺 𑀬𑀸𑀯𑀢𑀢𑀺𑀬𑀁 𑀬𑀸𑀘𑀺𑀢𑁂 𑀓𑀣𑀺𑀬𑀫𑀸𑀦𑀁 𑀲𑀼𑀲𑁆𑀲𑀽𑀲𑀦𑁆𑀢𑀺 𑀲𑀤𑁆𑀤𑀳𑀦𑁆𑀢𑀺. 𑀇𑀢𑀺 𑀪𑀕𑀯𑀸 ‘‘𑀅𑀬𑀁 𑀲𑀼𑀲𑁆𑀲𑀽𑀲𑀺𑀲𑁆𑀲𑀢𑀺 𑀲𑀤𑁆𑀤𑀳𑀺𑀲𑁆𑀲𑀢𑀻’’𑀢𑀺 𑀬𑀸𑀯𑀢𑀢𑀺𑀬𑀁 𑀬𑀸𑀘𑀸𑀧𑁂𑀢𑁆𑀯𑀸 𑀓𑀣𑁂𑀲𑀺. 𑀅𑀧𑀺𑀘 𑀬𑀣𑀸 𑀪𑀺𑀲𑀓𑁆𑀓𑁄 𑀢𑁂𑀮𑀁 𑀯𑀸 𑀨𑀸𑀡𑀺𑀢𑀁 𑀯𑀸 𑀧𑀘𑀦𑁆𑀢𑁄 𑀫𑀼𑀤𑀼𑀧𑀸𑀓𑀔𑀭𑀧𑀸𑀓𑀸𑀦𑀁 𑀧𑀸𑀓𑀓𑀸𑀮𑀁 𑀆𑀕𑀫𑀬𑀫𑀸𑀦𑁄 𑀧𑀸𑀓𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀑𑀢𑀸𑀭𑁂𑀢𑀺. 𑀏𑀯𑀁 𑀪𑀕𑀯𑀸 𑀲𑀢𑁆𑀢𑀸𑀦𑀁 𑀜𑀸𑀡𑀧𑀭𑀺𑀧𑀸𑀓𑀁 𑀆𑀕𑀫𑀬𑀫𑀸𑀦𑁄 ‘‘𑀏𑀢𑁆𑀢𑀓𑁂𑀦 𑀓𑀸𑀮𑁂𑀦 𑀇𑀫𑀲𑁆𑀲 𑀜𑀸𑀡𑀁 𑀧𑀭𑀺𑀧𑀸𑀓𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸𑀯 𑀬𑀸𑀯𑀢𑀢𑀺𑀬𑀁 𑀬𑀸𑀘𑀸𑀧𑁂𑀲𑀺.

𑀫𑀸 𑀳𑁂𑀯𑀁, 𑀓𑀲𑁆𑀲𑀧𑀸𑀢𑀺, 𑀓𑀲𑁆𑀲𑀧, 𑀫𑀸 𑀏𑀯𑀁 𑀪𑀡𑀺. 𑀲𑀬𑀁𑀓𑀢𑀁 𑀤𑀼𑀓𑁆𑀔𑀦𑁆𑀢𑀺 𑀳𑀺 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺, 𑀅𑀢𑁆𑀢𑀸 𑀦𑀸𑀫 𑀓𑁄𑀘𑀺 𑀤𑀼𑀓𑁆𑀔𑀲𑁆𑀲 𑀓𑀸𑀭𑀓𑁄 𑀦𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. 𑀧𑀭𑀢𑁄𑀧𑀺 𑀏𑀲𑁂𑀯 𑀦𑀬𑁄. 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀅𑀓𑀸𑀭𑀡𑁂𑀦 𑀬𑀤𑀺𑀘𑁆𑀙𑀸𑀬 𑀉𑀧𑁆𑀧𑀦𑁆𑀦𑀁. 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄𑀢𑀺 𑀓𑀲𑁆𑀫𑀸 𑀏𑀯𑀫𑀸𑀳? 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀬𑀁 ‘𑀲𑀬𑀁𑀓𑀢𑀁 𑀤𑀼𑀓𑁆𑀔’𑀦𑁆𑀢𑀺𑀆𑀤𑀺𑀦𑀸 𑀧𑀼𑀝𑁆𑀞𑁄 ‘𑀫𑀸 𑀳𑁂𑀯’𑀦𑁆𑀢𑀺 𑀯𑀤𑀢𑀺, ‘𑀦𑀢𑁆𑀣𑀻’𑀢𑀺 𑀧𑀼𑀝𑁆𑀞𑁄 ‘𑀅𑀢𑁆𑀣𑀻’𑀢𑀺 𑀯𑀤𑀢𑀺. ‘𑀪𑀯𑀁 𑀕𑁄𑀢𑀫𑁄 𑀤𑀼𑀓𑁆𑀔𑀁 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀻’𑀢𑀺 𑀧𑀼𑀝𑁆𑀞𑁄 ‘𑀚𑀸𑀦𑀸𑀫𑀺 𑀔𑁆𑀯𑀸𑀳’𑀦𑁆𑀢𑀺 𑀯𑀤𑀢𑀺. 𑀓𑀺𑀜𑁆𑀘𑀺 𑀦𑀼 𑀔𑁄 𑀫𑀬𑀸 𑀯𑀺𑀭𑀚𑁆𑀛𑀺𑀢𑁆𑀯𑀸 𑀧𑀼𑀘𑁆𑀙𑀺𑀢𑁄’’𑀢𑀺 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀧𑀼𑀘𑁆𑀙𑀫𑁂𑀯 𑀲𑁄𑀥𑁂𑀦𑁆𑀢𑁄 𑀏𑀯𑀫𑀸𑀳. 𑀆𑀘𑀺𑀓𑁆𑀔𑀢𑀼 𑀘 𑀫𑁂, 𑀪𑀦𑁆𑀢𑁂, 𑀪𑀕𑀯𑀸𑀢𑀺 𑀇𑀥 𑀲𑀢𑁆𑀣𑀭𑀺 𑀲𑀜𑁆𑀚𑀸𑀢𑀕𑀸𑀭𑀯𑁄 ‘‘𑀪𑀯’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀪𑀕𑀯𑀸’’𑀢𑀺 𑀯𑀤𑀢𑀺.

𑀲𑁄 𑀓𑀭𑁄𑀢𑀻𑀢𑀺𑀆𑀤𑀺, ‘‘𑀲𑀬𑀁𑀓𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀮𑀤𑁆𑀥𑀺𑀬𑀸 𑀧𑀝𑀺𑀲𑁂𑀥𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀲𑀢𑁄𑀢𑀺 𑀇𑀤𑀁 𑀪𑀼𑀫𑁆𑀫𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀢𑀲𑁆𑀫𑀸 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄 𑁋 𑀲𑁄 𑀓𑀭𑁄𑀢𑀺 𑀲𑁄 𑀧𑀝𑀺𑀲𑀁𑀯𑁂𑀤𑀬𑀢𑀻𑀢𑀺 𑀔𑁄, 𑀓𑀲𑁆𑀲𑀧, 𑀆𑀤𑀺𑀫𑁆𑀳𑀺𑀬𑁂𑀯 𑀏𑀯𑀁 𑀲𑀢𑀺 𑀧𑀘𑁆𑀙𑀸 𑀲𑀬𑀁𑀓𑀢𑀁 𑀤𑀼𑀓𑁆𑀔𑀦𑁆𑀢𑀺 𑀅𑀬𑀁 𑀮𑀤𑁆𑀥𑀺 𑀳𑁄𑀢𑀺. 𑀏𑀢𑁆𑀣 𑀘 𑀤𑀼𑀓𑁆𑀔𑀦𑁆𑀢𑀺 𑀯𑀝𑁆𑀝𑀤𑀼𑀓𑁆𑀔𑀁 𑀅𑀥𑀺𑀧𑁆𑀧𑁂𑀢𑀁. 𑀇𑀢𑀺 𑀯𑀤𑀦𑁆𑀢𑀺 𑀏𑀢𑀲𑁆𑀲 𑀧𑀼𑀭𑀺𑀫𑁂𑀦 𑀆𑀤𑀺𑀲𑀤𑁆𑀤𑁂𑀦 𑀅𑀦𑀦𑁆𑀢𑀭𑁂𑀦 𑀘 𑀲𑀲𑁆𑀲𑀢𑀲𑀤𑁆𑀤𑁂𑀦 𑀲𑀫𑁆𑀩𑀦𑁆𑀥𑁄 𑀳𑁄𑀢𑀺. ‘‘𑀤𑀻𑀧𑁂𑀢𑀺 𑀕𑀡𑁆𑀳𑀸𑀢𑀻’’𑀢𑀺 𑀅𑀬𑀁 𑀧𑀦𑁂𑀢𑁆𑀣 𑀧𑀸𑀞𑀲𑁂𑀲𑁄. 𑀇𑀤𑀜𑁆𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀢𑀺 𑀏𑀯𑀁 𑀯𑀤𑀦𑁆𑀢𑁄 𑀆𑀤𑀺𑀢𑁄𑀯 𑀲𑀲𑁆𑀲𑀢𑀁 𑀤𑀻𑀧𑁂𑀢𑀺, 𑀲𑀲𑁆𑀲𑀢𑀁 𑀕𑀡𑁆𑀳𑀸𑀢𑀺. 𑀓𑀲𑁆𑀫𑀸? 𑀢𑀲𑁆𑀲 𑀳𑀺 𑀢𑀁 𑀤𑀲𑁆𑀲𑀦𑀁 𑀏𑀢𑀁 𑀧𑀭𑁂𑀢𑀺, 𑀓𑀸𑀭𑀓𑀜𑁆𑀘 𑀯𑁂𑀤𑀓𑀜𑁆𑀘 𑀏𑀓𑀫𑁂𑀯 𑀕𑀡𑁆𑀳𑀦𑁆𑀢𑀁 𑀏𑀢𑀁 𑀲𑀲𑁆𑀲𑀢𑀁 𑀉𑀧𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑀅𑀜𑁆𑀜𑁄 𑀓𑀭𑁄𑀢𑀻𑀢𑀺𑀆𑀤𑀺 𑀧𑀦 ‘‘𑀧𑀭𑀁𑀓𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀮𑀤𑁆𑀥𑀺𑀬𑀸 𑀧𑀝𑀺𑀲𑁂𑀥𑀦𑀢𑁆𑀣𑀁 𑀯𑀼𑀢𑁆𑀢𑀁. ‘‘𑀆𑀤𑀺𑀢𑁄 𑀲𑀢𑁄’’𑀢𑀺 𑀇𑀤𑀁 𑀧𑀦 𑀇𑀥𑀸𑀧𑀺 𑀆𑀳𑀭𑀺𑀢𑀩𑁆𑀩𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀅𑀜𑁆𑀜𑁄 𑀓𑀭𑁄𑀢𑀺 𑀅𑀜𑁆𑀜𑁄 𑀧𑀝𑀺𑀲𑀁𑀯𑁂𑀤𑀺𑀬𑀢𑀻𑀢𑀺 𑀔𑁄 𑀧𑀦, 𑀓𑀲𑁆𑀲𑀧, 𑀆𑀤𑀺𑀫𑁆𑀳𑀺𑀬𑁂𑀯 𑀏𑀯𑀁 𑀲𑀢𑀺, 𑀧𑀘𑁆𑀙𑀸 ‘‘𑀓𑀸𑀭𑀓𑁄 𑀇𑀥𑁂𑀯 𑀉𑀘𑁆𑀙𑀺𑀚𑁆𑀚𑀢𑀺, 𑀢𑁂𑀦 𑀓𑀢𑀁 𑀅𑀜𑁆𑀜𑁄 𑀧𑀝𑀺𑀲𑀁𑀯𑁂𑀤𑀺𑀬𑀢𑀻’’𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀸𑀬 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀲𑀤𑁆𑀥𑀺𑀁 𑀲𑀫𑁆𑀧𑀬𑀼𑀢𑁆𑀢𑀸𑀬 𑀯𑁂𑀤𑀦𑀸𑀬 𑀅𑀪𑀺𑀢𑀼𑀦𑁆𑀦𑀲𑁆𑀲 𑀯𑀺𑀤𑁆𑀥𑀲𑁆𑀲 𑀲𑀢𑁄 ‘‘𑀧𑀭𑀁𑀓𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀅𑀬𑀁 𑀮𑀤𑁆𑀥𑀺 𑀳𑁄𑀢𑀻𑀢𑀺. 𑀇𑀢𑀺 𑀯𑀤𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀬𑁄𑀚𑀦𑀸 𑁋 𑀏𑀯𑀜𑁆𑀘 𑀯𑀤𑀦𑁆𑀢𑁄 𑀆𑀤𑀺𑀢𑁄𑀯 𑀉𑀘𑁆𑀙𑁂𑀤𑀁 𑀤𑀻𑀧𑁂𑀢𑀺, 𑀉𑀘𑁆𑀙𑁂𑀤𑀁 𑀕𑀡𑁆𑀳𑀸𑀢𑀺. 𑀓𑀲𑁆𑀫𑀸? 𑀢𑀲𑁆𑀲 𑀳𑀺 𑀢𑀁 𑀤𑀲𑁆𑀲𑀦𑀁 𑀏𑀢𑀁 𑀧𑀭𑁂𑀢𑀺, 𑀏𑀢𑀁 𑀉𑀘𑁆𑀙𑁂𑀤𑀁 𑀉𑀧𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄.

𑀏𑀢𑁂 𑀢𑁂𑀢𑀺 𑀬𑁂 𑀲𑀲𑁆𑀲𑀢𑀼𑀘𑁆𑀙𑁂𑀤𑀲𑀗𑁆𑀔𑀸𑀢𑁂 𑀉𑀪𑁄 𑀅𑀦𑁆𑀢𑁂 (𑀅𑀦𑀼𑀧𑀕𑀫𑁆𑀫 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀏𑀢𑁂 𑀢𑁂, 𑀓𑀲𑁆𑀲𑀧, 𑀉𑀪𑁄 𑀅𑀦𑁆𑀢𑁂) 𑀅𑀦𑀼𑀧𑀕𑀫𑁆𑀫 𑀧𑀳𑀸𑀬 𑀅𑀦𑀮𑁆𑀮𑀻𑀬𑀺𑀢𑁆𑀯𑀸 𑀫𑀚𑁆𑀛𑁂𑀦 𑀢𑀣𑀸𑀕𑀢𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀤𑀸𑀬 𑀞𑀺𑀢𑁄 𑀤𑁂𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀓𑀢𑀭𑀁 𑀥𑀫𑁆𑀫𑀦𑁆𑀢𑀺 𑀘𑁂? 𑀬𑀤𑀺𑀤𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺. 𑀏𑀢𑁆𑀣 𑀳𑀺 𑀓𑀸𑀭𑀡𑀢𑁄 𑀨𑀮𑀁, 𑀓𑀸𑀭𑀡𑀦𑀺𑀭𑁄𑀥𑁂𑀦 𑀘𑀲𑁆𑀲 𑀦𑀺𑀭𑁄𑀥𑁄 𑀤𑀻𑀧𑀺𑀢𑁄, 𑀦 𑀓𑁄𑀘𑀺 𑀓𑀸𑀭𑀓𑁄 𑀯𑀸 𑀯𑁂𑀤𑀓𑁄 𑀯𑀸 𑀦𑀺𑀤𑁆𑀤𑀺𑀝𑁆𑀞𑁄. 𑀏𑀢𑁆𑀢𑀸𑀯𑀢𑀸 𑀲𑁂𑀲𑀧𑀜𑁆𑀳𑀸 𑀧𑀝𑀺𑀲𑁂𑀥𑀺𑀢𑀸 𑀳𑁄𑀦𑁆𑀢𑀺. 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫𑀸𑀢𑀺 𑀇𑀫𑀺𑀦𑀸 𑀳𑀺 𑀢𑀢𑀺𑀬𑀧𑀜𑁆𑀳𑁄 𑀧𑀝𑀺𑀓𑁆𑀔𑀺𑀢𑁆𑀢𑁄. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀇𑀫𑀺𑀦𑀸 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀢𑀸 𑀘𑁂𑀯 𑀅𑀚𑀸𑀦𑀦𑀜𑁆𑀘 𑀧𑀝𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀮𑀪𑁂𑀬𑁆𑀬𑀦𑁆𑀢𑀺 𑀇𑀤𑀁 𑀲𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀪𑀺𑀓𑁆𑀔𑀼𑀪𑀸𑀯𑀁 𑀧𑀢𑁆𑀣𑀬𑀫𑀸𑀦𑁄 𑀆𑀳. 𑀅𑀣 𑀪𑀕𑀯𑀸 𑀬𑁄𑀦𑁂𑀦 𑀔𑀦𑁆𑀥𑀓𑁂 𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑁄 (𑀫𑀳𑀸𑀯. 𑁮𑁬) 𑀧𑀜𑁆𑀜𑀢𑁆𑀢𑁄, 𑀬𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀺𑀢𑁄 ‘‘𑀅𑀳𑀁, 𑀪𑀦𑁆𑀢𑁂, 𑀇𑀢𑁆𑀣𑀦𑁆𑀦𑀸𑀫𑁄 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀆𑀓𑀗𑁆𑀔𑀸𑀫𑀺 𑀉𑀧𑀲𑀫𑁆𑀧𑀤𑀁. 𑀲𑁆𑀯𑀸𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀧𑀭𑀺𑀯𑀸𑀲𑀁 𑀬𑀸𑀘𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀫𑀸𑀤𑀺𑀬𑀺𑀢𑁆𑀯𑀸 𑀧𑀭𑀺𑀯𑀲𑀢𑀺, 𑀢𑀁 𑀲𑀦𑁆𑀥𑀸𑀬 𑀬𑁄 𑀔𑁄, 𑀓𑀲𑁆𑀲𑀧, 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀩𑁆𑀩𑀚𑁆𑀚𑀦𑁆𑀢𑀺 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀧𑀭𑀺𑀯𑀲𑀺𑀢𑁆𑀯𑀸𑀬𑁂𑀯 𑀳𑀺 𑀧𑀩𑁆𑀩𑀚𑁆𑀚𑀁 𑀮𑀪𑀢𑀺. 𑀉𑀧𑀲𑀫𑁆𑀧𑀤𑀢𑁆𑀣𑀺𑀓𑁂𑀦 𑀧𑀦 𑀦𑀸𑀢𑀺𑀓𑀸𑀮𑁂𑀦 𑀕𑀸𑀫𑀧𑁆𑀧𑀯𑁂𑀲𑀦𑀸𑀤𑀻𑀦𑀺 𑀅𑀝𑁆𑀞 𑀯𑀢𑁆𑀢𑀸𑀦𑀺 𑀧𑀽𑀭𑁂𑀦𑁆𑀢𑁂𑀦 𑀧𑀭𑀺𑀯𑀲𑀺𑀢𑀩𑁆𑀩𑀁. 𑀆𑀭𑀤𑁆𑀥𑀘𑀺𑀢𑁆𑀢𑀸𑀢𑀺 𑀅𑀝𑁆𑀞𑀯𑀢𑁆𑀢𑀧𑀽𑀭𑀡𑁂𑀦 𑀢𑀼𑀝𑁆𑀞𑀘𑀺𑀢𑁆𑀢𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦𑁂𑀲 𑀢𑀺𑀢𑁆𑀣𑀺𑀬𑀧𑀭𑀺𑀯𑀸𑀲𑁄 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀧𑀩𑁆𑀩𑀚𑁆𑀚𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁮𑁬) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀺𑀘 𑀫𑀬𑀸𑀢𑀺 𑀅𑀬𑀫𑁂𑀢𑁆𑀣 𑀧𑀸𑀞𑁄, 𑀅𑀜𑁆𑀜𑀢𑁆𑀣 𑀧𑀦 ‘‘𑀅𑀧𑀺𑀘 𑀫𑁂𑀢𑁆𑀣𑀸’’𑀢𑀺. 𑀧𑀼𑀕𑁆𑀕𑀮𑀯𑁂𑀫𑀢𑁆𑀢𑀢𑀸 𑀯𑀺𑀤𑀺𑀢𑀸𑀢𑀺 𑀧𑀼𑀕𑁆𑀕𑀮𑀦𑀸𑀦𑀢𑁆𑀢𑀁 𑀯𑀺𑀤𑀺𑀢𑀁. ‘‘𑀅𑀬𑀁 𑀧𑀼𑀕𑁆𑀕𑀮𑁄 𑀧𑀭𑀺𑀯𑀸𑀲𑀸𑀭𑀳𑁄, 𑀅𑀬𑀁 𑀦 𑀧𑀭𑀺𑀯𑀸𑀲𑀸𑀭𑀳𑁄’’𑀢𑀺 𑀇𑀤𑀁 𑀫𑀬𑁆𑀳𑀁 𑀧𑀸𑀓𑀝𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁄 𑀓𑀲𑁆𑀲𑀧𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑁄 𑀅𑀘𑁆𑀙𑀭𑀺𑀬𑀁 𑀩𑀼𑀤𑁆𑀥𑀲𑀸𑀲𑀦𑀁, 𑀬𑀢𑁆𑀣 𑀏𑀯𑀁 𑀖𑀁𑀲𑀺𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀬𑀼𑀢𑁆𑀢𑀫𑁂𑀯 𑀕𑀡𑁆𑀳𑀦𑁆𑀢𑀺, 𑀅𑀬𑀼𑀢𑁆𑀢𑀁 𑀙𑀟𑁆𑀟𑁂𑀦𑁆𑀢𑀻’’𑀢𑀺. 𑀢𑀢𑁄 𑀲𑀼𑀝𑁆𑀞𑀼𑀢𑀭𑀁 𑀧𑀩𑁆𑀩𑀚𑁆𑀚𑀸𑀬 𑀲𑀜𑁆𑀚𑀸𑀢𑀼𑀲𑁆𑀲𑀸𑀳𑁄 𑀲𑀘𑁂, 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀅𑀣 𑀪𑀕𑀯𑀸 𑀢𑀲𑁆𑀲 𑀢𑀺𑀩𑁆𑀩𑀘𑁆𑀙𑀦𑁆𑀤𑀢𑀁 𑀯𑀺𑀤𑀺𑀢𑁆𑀯𑀸 ‘‘𑀦 𑀓𑀲𑁆𑀲𑀧𑁄 𑀧𑀭𑀺𑀯𑀸𑀲𑀁 𑀅𑀭𑀳𑀢𑀻’’𑀢𑀺 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀕𑀘𑁆𑀙, 𑀪𑀺𑀓𑁆𑀔𑀼, 𑀓𑀲𑁆𑀲𑀧𑀁 𑀦𑀳𑀸𑀧𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀆𑀦𑁂𑀳𑀻’’𑀢𑀺. 𑀲𑁄 𑀢𑀣𑀸 𑀓𑀢𑁆𑀯𑀸 𑀢𑀁 𑀧𑀩𑁆𑀩𑀸𑀚𑁂𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀪𑀕𑀯𑀸 𑀕𑀡𑁂 𑀦𑀺𑀲𑀻𑀤𑀺𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑀅𑀮𑀢𑁆𑀣 𑀔𑁄 𑀅𑀘𑁂𑀮𑁄 𑀓𑀲𑁆𑀲𑀧𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀅𑀮𑀢𑁆𑀣 𑀉𑀧𑀲𑀫𑁆𑀧𑀤𑀦𑁆𑀢𑀺. 𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑁄𑀢𑀺𑀆𑀤𑀺 𑀲𑁂𑀲𑀁 𑀩𑁆𑀭𑀸𑀳𑁆𑀫𑀡𑀲𑀁𑀬𑀼𑀢𑁆𑀢𑁂 (𑀲𑀁. 𑀦𑀺. 𑁧.𑁧𑁮𑁭) 𑀯𑀼𑀢𑁆𑀢𑀫𑁂𑀯𑀸𑀢𑀺. 𑀲𑀢𑁆𑀢𑀫𑀁.

𑁮. 𑀢𑀺𑀫𑁆𑀩𑀭𑀼𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮. 𑀅𑀝𑁆𑀞𑀫𑁂 𑀲𑀸 𑀯𑁂𑀤𑀦𑀸𑀢𑀺𑀆𑀤𑀺 ‘‘𑀲𑀬𑀁𑀓𑀢𑀁 𑀲𑀼𑀔𑀤𑀼𑀓𑁆𑀔’’𑀦𑁆𑀢𑀺 𑀮𑀤𑁆𑀥𑀺𑀬𑀸 𑀦𑀺𑀲𑁂𑀥𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀏𑀢𑁆𑀣𑀸𑀧𑀺 𑀲𑀢𑁄𑀢𑀺 𑀪𑀼𑀫𑁆𑀫𑀢𑁆𑀣𑁂𑀬𑁂𑀯 𑀲𑀸𑀫𑀺𑀯𑀘𑀦𑀁. 𑀢𑀢𑁆𑀭𑀸𑀬𑀁 𑀅𑀢𑁆𑀣𑀤𑀻𑀧𑀦𑀸 𑁋 ‘‘𑀲𑀸 𑀯𑁂𑀤𑀦𑀸, 𑀲𑁄 𑀯𑁂𑀤𑀺𑀬𑀢𑀻’’𑀢𑀺 𑀔𑁄, 𑀢𑀺𑀫𑁆𑀩𑀭𑀼𑀓, 𑀆𑀤𑀺𑀫𑁆𑀳𑀺𑀬𑁂𑀯 𑀏𑀯𑀁 𑀲𑀢𑀺 ‘‘𑀲𑀬𑀁𑀓𑀢𑀁 𑀲𑀼𑀔𑀤𑀼𑀓𑁆𑀔’’𑀦𑁆𑀢𑀺 𑀅𑀬𑀁 𑀮𑀤𑁆𑀥𑀺 𑀳𑁄𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀯𑁂𑀤𑀦𑀸𑀬 𑀏𑀯 𑀯𑁂𑀤𑀦𑀸 𑀓𑀢𑀸 𑀳𑁄𑀢𑀺. 𑀏𑀯𑀜𑁆𑀘 𑀯𑀤𑀦𑁆𑀢𑁄 𑀇𑀫𑀺𑀲𑁆𑀲𑀸 𑀯𑁂𑀤𑀦𑀸𑀬 𑀧𑀼𑀩𑁆𑀩𑁂𑀧𑀺 𑀅𑀢𑁆𑀣𑀺𑀢𑀁 𑀅𑀦𑀼𑀚𑀸𑀦𑀸𑀢𑀺, 𑀲𑀲𑁆𑀲𑀢𑀁 𑀤𑀻𑀧𑁂𑀢𑀺 𑀲𑀲𑁆𑀲𑀢𑀁 𑀕𑀡𑁆𑀳𑀸𑀢𑀺. 𑀓𑀲𑁆𑀫𑀸? 𑀢𑀲𑁆𑀲 𑀳𑀺 𑀢𑀁 𑀤𑀲𑁆𑀲𑀦𑀁 𑀏𑀢𑀁 𑀧𑀭𑁂𑀢𑀺, 𑀏𑀢𑀁 𑀲𑀲𑁆𑀲𑀢𑀁 𑀉𑀧𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀭𑀺𑀫𑀜𑁆𑀳𑀺 𑀅𑀢𑁆𑀣𑀁 𑀲𑀦𑁆𑀥𑀸𑀬𑁂𑀯𑁂𑀢𑀁 𑀪𑀕𑀯𑀢𑀸 𑀯𑀼𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 𑀢𑀁 𑀬𑁄𑀚𑁂𑀢𑁆𑀯𑀸𑀯𑀲𑁆𑀲 𑀅𑀢𑁆𑀣𑁄 𑀤𑀻𑀧𑀺𑀢𑁄. 𑀏𑀯𑀫𑁆𑀧𑀸𑀳𑀁 𑀦 𑀯𑀤𑀸𑀫𑀻𑀢𑀺 𑀅𑀳𑀁 ‘‘𑀲𑀸 𑀯𑁂𑀤𑀦𑀸, 𑀲𑁄 𑀯𑁂𑀤𑀺𑀬𑀢𑀻’’𑀢𑀺 𑀏𑀯𑀫𑁆𑀧𑀺 𑀦 𑀯𑀤𑀸𑀫𑀺. ‘‘𑀲𑀬𑀁𑀓𑀢𑀁 𑀲𑀼𑀔𑀤𑀼𑀓𑁆𑀔’’𑀦𑁆𑀢𑀺 𑀏𑀯𑀫𑁆𑀧𑀺 𑀦 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀅𑀜𑁆𑀜𑀸 𑀯𑁂𑀤𑀦𑀸𑀢𑀺𑀆𑀤𑀺 ‘‘𑀧𑀭𑀁𑀓𑀢𑀁 𑀲𑀼𑀔𑀤𑀼𑀓𑁆𑀔’’𑀦𑁆𑀢𑀺 𑀮𑀤𑁆𑀥𑀺𑀬𑀸 𑀧𑀝𑀺𑀲𑁂𑀥𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀇𑀥𑀸𑀧𑀺 𑀅𑀬𑀁 𑀅𑀢𑁆𑀣𑀬𑁄𑀚𑀦𑀸 𑁋‘‘𑀅𑀜𑁆𑀜𑀸 𑀯𑁂𑀤𑀦𑀸 𑀅𑀜𑁆𑀜𑁄 𑀯𑁂𑀤𑀺𑀬𑀢𑀻’’𑀢𑀺 𑀔𑁄, 𑀢𑀺𑀫𑁆𑀩𑀭𑀼𑀓, 𑀆𑀤𑀺𑀫𑁆𑀳𑀺𑀬𑁂𑀯 𑀏𑀯𑀁 𑀲𑀢𑀺 𑀧𑀘𑁆𑀙𑀸 𑀬𑀸 𑀧𑀼𑀭𑀺𑀫𑀧𑀓𑁆𑀔𑁂 𑀓𑀸𑀭𑀓𑀯𑁂𑀤𑀦𑀸, 𑀲𑀸 𑀉𑀘𑁆𑀙𑀺𑀦𑁆𑀦𑀸. 𑀢𑀸𑀬 𑀧𑀦 𑀓𑀢𑀁 𑀅𑀜𑁆𑀜𑁄 𑀯𑁂𑀤𑀺𑀬𑀢𑀻𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀸𑀬 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀲𑀤𑁆𑀥𑀺𑀁 𑀲𑀫𑁆𑀧𑀬𑀼𑀢𑁆𑀢𑀸𑀬 𑀯𑁂𑀤𑀦𑀸𑀬 𑀅𑀪𑀺𑀢𑀼𑀦𑁆𑀦𑀲𑁆𑀲 𑀲𑀢𑁄 ‘‘𑀧𑀭𑀁𑀓𑀢𑀁 𑀲𑀼𑀔𑀤𑀼𑀓𑁆𑀔’’𑀦𑁆𑀢𑀺 𑀅𑀬𑀁 𑀮𑀤𑁆𑀥𑀺 𑀳𑁄𑀢𑀺. 𑀏𑀯𑀜𑁆𑀘 𑀯𑀤𑀦𑁆𑀢𑁄 𑀓𑀸𑀭𑀓𑁄 𑀉𑀘𑁆𑀙𑀺𑀦𑁆𑀦𑁄, 𑀅𑀜𑁆𑀜𑁂𑀦 𑀧𑀝𑀺𑀲𑀦𑁆𑀥𑀺 𑀕𑀳𑀺𑀢𑀸𑀢𑀺 𑀉𑀘𑁆𑀙𑁂𑀤𑀁 𑀤𑀻𑀧𑁂𑀢𑀺, 𑀉𑀘𑁆𑀙𑁂𑀤𑀁 𑀕𑀡𑁆𑀳𑀸𑀢𑀺. 𑀓𑀲𑁆𑀫𑀸? 𑀢𑀲𑁆𑀲 𑀳𑀺 𑀢𑀁 𑀤𑀲𑁆𑀲𑀦𑀁 𑀏𑀢𑀁 𑀧𑀭𑁂𑀢𑀺, 𑀏𑀢𑀁 𑀉𑀘𑁆𑀙𑁂𑀤𑀁 𑀉𑀧𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀇𑀥𑀸𑀧𑀺 𑀳𑀺 𑀇𑀫𑀸𑀦𑀺 𑀧𑀤𑀸𑀦𑀺 𑀅𑀝𑁆𑀞𑀓𑀣𑀸𑀬𑀁 𑀆𑀳𑀭𑀺𑀢𑁆𑀯𑀸 𑀬𑁄𑀚𑀺𑀢𑀸𑀦𑁂𑀯. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑁂𑀤𑀦𑀸𑀲𑀼𑀔𑀤𑀼𑀓𑁆𑀔𑀁 𑀓𑀣𑀺𑀢𑀁. 𑀢𑀜𑁆𑀘 𑀔𑁄 𑀯𑀺𑀧𑀸𑀓𑀲𑀼𑀔𑀤𑀼𑀓𑁆𑀔𑀫𑁂𑀯 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀫𑀁.

𑁯. 𑀩𑀸𑀮𑀧𑀡𑁆𑀟𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯. 𑀦𑀯𑀫𑁂 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀲𑁆𑀲𑀸𑀢𑀺 𑀅𑀯𑀺𑀚𑁆𑀚𑀸𑀬 𑀦𑀺𑀯𑀸𑀭𑀺𑀢𑀲𑁆𑀲. 𑀏𑀯𑀫𑀬𑀁 𑀓𑀸𑀬𑁄 𑀲𑀫𑀼𑀤𑀸𑀕𑀢𑁄𑀢𑀺 𑀏𑀯𑀁 𑀅𑀯𑀺𑀚𑁆𑀚𑀸𑀬 𑀦𑀺𑀯𑀸𑀭𑀺𑀢𑀢𑁆𑀢𑀸 𑀢𑀡𑁆𑀳𑀸𑀬 𑀘 𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸𑀬𑁂𑀯 𑀅𑀬𑀁 𑀓𑀸𑀬𑁄 𑀦𑀺𑀩𑁆𑀩𑀢𑁆𑀢𑁄. 𑀅𑀬𑀜𑁆𑀘𑁂𑀯 𑀓𑀸𑀬𑁄𑀢𑀺 𑀅𑀬𑀜𑁆𑀘𑀲𑁆𑀲 𑀅𑀢𑁆𑀢𑀦𑁄 𑀲𑀯𑀺𑀜𑁆𑀜𑀸𑀡𑀓𑁄 𑀓𑀸𑀬𑁄. 𑀩𑀳𑀺𑀤𑁆𑀥𑀸 𑀘 𑀦𑀸𑀫𑀭𑀽𑀧𑀦𑁆𑀢𑀺 𑀩𑀳𑀺𑀤𑁆𑀥𑀸 𑀘 𑀧𑀭𑁂𑀲𑀁 𑀲𑀯𑀺𑀜𑁆𑀜𑀸𑀡𑀓𑁄 𑀓𑀸𑀬𑁄. 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀙𑀳𑀺 𑀆𑀬𑀢𑀦𑁂𑀳𑀺 𑀘𑀸𑀧𑀺 𑀅𑀬𑀁 𑀅𑀢𑁆𑀣𑁄 𑀤𑀻𑀧𑁂𑀢𑀩𑁆𑀩𑁄𑀯. 𑀇𑀢𑁆𑀣𑁂𑀢𑀁 𑀤𑁆𑀯𑀬𑀦𑁆𑀢𑀺 𑀏𑀯𑀫𑁂𑀢𑀁 𑀤𑁆𑀯𑀬𑀁. 𑀤𑁆𑀯𑀬𑀁 𑀧𑀝𑀺𑀘𑁆𑀘 𑀨𑀲𑁆𑀲𑁄𑀢𑀺 𑀅𑀜𑁆𑀜𑀢𑁆𑀣 𑀘𑀓𑁆𑀔𑀼𑀭𑀽𑀧𑀸𑀤𑀻𑀦𑀺 𑀤𑁆𑀯𑀬𑀸𑀦𑀺 𑀧𑀝𑀺𑀘𑁆𑀘 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀬𑁄 𑀯𑀼𑀢𑁆𑀢𑀸, 𑀇𑀥 𑀧𑀦 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺. 𑀫𑀳𑀸𑀤𑁆𑀯𑀬𑀁 𑀦𑀸𑀫 𑀓𑀺𑀭𑁂𑀢𑀁. 𑀲𑀴𑁂𑀯𑀸𑀬𑀢𑀦𑀸𑀦𑀻𑀢𑀺 𑀲𑀴𑁂𑀯 𑀨𑀲𑁆𑀲𑀸𑀬𑀢𑀦𑀸𑀦𑀺 𑀨𑀲𑁆𑀲𑀓𑀸𑀭𑀡𑀸𑀦𑀺. 𑀬𑁂𑀳𑀺 𑀨𑀼𑀝𑁆𑀞𑁄𑀢𑀺 𑀬𑁂𑀳𑀺 𑀓𑀸𑀭𑀡𑀪𑀽𑀢𑁂𑀳𑀺 𑀆𑀬𑀢𑀦𑁂𑀳𑀺 𑀉𑀧𑁆𑀧𑀦𑁆𑀦𑁂𑀦 𑀨𑀲𑁆𑀲𑁂𑀦 𑀨𑀼𑀝𑁆𑀞𑁄. 𑀅𑀜𑁆𑀜𑀢𑀭𑁂𑀦𑀸𑀢𑀺 𑀏𑀢𑁆𑀣 𑀧𑀭𑀺𑀧𑀼𑀡𑁆𑀡𑀯𑀲𑁂𑀦 𑀅𑀜𑁆𑀜𑀢𑀭𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀩𑀸𑀮𑀧𑀡𑁆𑀟𑀺𑀢𑀸𑀦𑀁 𑀓𑀸𑀬𑀦𑀺𑀩𑁆𑀩𑀢𑁆𑀢𑀦𑀸𑀤𑀺𑀫𑁆𑀳𑀺. 𑀓𑁄 𑀅𑀥𑀺𑀧𑁆𑀧𑀬𑀸𑀲𑁄𑀢𑀺 𑀓𑁄 𑀅𑀥𑀺𑀓𑀧𑀬𑁄𑀕𑁄.

𑀪𑀕𑀯𑀁𑀫𑀽𑀮𑀓𑀸𑀢𑀺 𑀪𑀕𑀯𑀸 𑀫𑀽𑀮𑀁 𑀏𑀢𑁂𑀲𑀦𑁆𑀢𑀺 𑀪𑀕𑀯𑀁𑀫𑀽𑀮𑀓𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀫𑁂, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀥𑀫𑁆𑀫𑀸 𑀧𑀼𑀩𑁆𑀩𑁂 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀉𑀧𑁆𑀧𑀸𑀤𑀺𑀢𑀸, 𑀢𑀲𑁆𑀫𑀺𑀁 𑀧𑀭𑀺𑀦𑀺𑀩𑁆𑀩𑀼𑀢𑁂 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀅𑀜𑁆𑀜𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀇𑀫𑁂 𑀥𑀫𑁆𑀫𑁂 𑀉𑀧𑁆𑀧𑀸𑀤𑁂𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀸𑀳𑁄𑀲𑀺, 𑀪𑀕𑀯𑀢𑀸 𑀧𑀦 𑀦𑁄 𑀇𑀫𑁂 𑀥𑀫𑁆𑀫𑀸 𑀉𑀧𑁆𑀧𑀸𑀤𑀺𑀢𑀸. 𑀪𑀕𑀯𑀦𑁆𑀢𑀜𑁆𑀳𑀺 𑀦𑀺𑀲𑁆𑀲𑀸𑀬 𑀫𑀬𑀁 𑀇𑀫𑁂 𑀥𑀫𑁆𑀫𑁂 𑀆𑀚𑀸𑀦𑀸𑀫 𑀧𑀝𑀺𑀯𑀺𑀚𑁆𑀛𑀸𑀫𑀸𑀢𑀺 𑀏𑀯𑀁 𑀪𑀕𑀯𑀁𑀫𑀽𑀮𑀓𑀸 𑀦𑁄, 𑀪𑀦𑁆𑀢𑁂, 𑀥𑀫𑁆𑀫𑀸𑀢𑀺. 𑀪𑀕𑀯𑀁𑀦𑁂𑀢𑁆𑀢𑀺𑀓𑀸𑀢𑀺 𑀪𑀕𑀯𑀸 𑀳𑀺 𑀥𑀫𑁆𑀫𑀸𑀦𑀁 𑀦𑁂𑀢𑀸 𑀯𑀺𑀦𑁂𑀢𑀸 𑀅𑀦𑀼𑀦𑁂𑀢𑀸, 𑀬𑀣𑀸𑀲𑀪𑀸𑀯𑀢𑁄 𑀧𑀸𑀝𑀺𑀬𑁂𑀓𑁆𑀓𑀁 𑀧𑀸𑀝𑀺𑀬𑁂𑀓𑁆𑀓𑀁 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀸𑀢𑀺 𑀥𑀫𑁆𑀫𑀸 𑀪𑀕𑀯𑀁𑀦𑁂𑀢𑁆𑀢𑀺𑀓𑀸 𑀦𑀸𑀫 𑀳𑁄𑀦𑁆𑀢𑀺. 𑀪𑀕𑀯𑀁𑀧𑀝𑀺𑀲𑀭𑀡𑀸𑀢𑀺 𑀘𑀢𑀼𑀪𑀽𑀫𑀓𑀥𑀫𑁆𑀫𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀫𑀸𑀦𑀸 𑀪𑀕𑀯𑀢𑀺 𑀧𑀝𑀺𑀲𑀭𑀦𑁆𑀢𑀺 𑀦𑀸𑀫𑀸𑀢𑀺 𑀪𑀕𑀯𑀁𑀧𑀝𑀺𑀲𑀭𑀡𑀸. 𑀧𑀝𑀺𑀲𑀭𑀦𑁆𑀢𑀻𑀢𑀺 𑀲𑀫𑁄𑀲𑀭𑀦𑁆𑀢𑀺. 𑀅𑀧𑀺𑀘 𑀫𑀳𑀸𑀩𑁄𑀥𑀺𑀫𑀡𑁆𑀟𑁂 𑀦𑀺𑀲𑀺𑀦𑁆𑀦𑀲𑁆𑀲 𑀪𑀕𑀯𑀢𑁄 𑀧𑀝𑀺𑀯𑁂𑀥𑀯𑀲𑁂𑀦 𑀨𑀲𑁆𑀲𑁄 𑀆𑀕𑀘𑁆𑀙𑀢𑀺 ‘‘𑀅𑀳𑀁 𑀪𑀕𑀯𑀸 𑀓𑀺𑀦𑁆𑀦𑀸𑀫𑁄’’𑀢𑀺? 𑀢𑁆𑀯𑀁 𑀨𑀼𑀲𑀦𑀝𑁆𑀞𑁂𑀦 𑀨𑀲𑁆𑀲𑁄 𑀦𑀸𑀫. 𑀯𑁂𑀤𑀦𑀸, 𑀲𑀜𑁆𑀜𑀸, 𑀲𑀗𑁆𑀔𑀸𑀭𑀸, 𑀯𑀺𑀜𑁆𑀜𑀸𑀡𑀁 𑀆𑀕𑀘𑁆𑀙𑀢𑀺 ‘‘𑀅𑀳𑀁 𑀪𑀕𑀯𑀸 𑀓𑀺𑀦𑁆𑀦𑀸𑀫’’𑀦𑁆𑀢𑀺, 𑀢𑁆𑀯𑀁 𑀯𑀺𑀚𑀸𑀦𑀦𑀝𑁆𑀞𑁂𑀦 𑀯𑀺𑀜𑁆𑀜𑀸𑀡𑀁 𑀦𑀸𑀫𑀸𑀢𑀺 𑀏𑀯𑀁 𑀘𑀢𑀼𑀪𑀽𑀫𑀓𑀥𑀫𑁆𑀫𑀸𑀦𑀁 𑀬𑀣𑀸𑀲𑀪𑀸𑀯𑀢𑁄 𑀧𑀸𑀝𑀺𑀬𑁂𑀓𑁆𑀓𑀁 𑀧𑀸𑀝𑀺𑀬𑁂𑀓𑁆𑀓𑀁 𑀦𑀸𑀫𑀁 𑀕𑀡𑁆𑀳𑀦𑁆𑀢𑁄 𑀪𑀕𑀯𑀸 𑀥𑀫𑁆𑀫𑁂 𑀧𑀝𑀺𑀲𑀭𑀢𑀻𑀢𑀺 𑀪𑀕𑀯𑀁𑀧𑀝𑀺𑀲𑀭𑀡𑀸. 𑀪𑀕𑀯𑀦𑁆𑀢𑀁𑀬𑁂𑀯 𑀧𑀝𑀺𑀪𑀸𑀢𑀽𑀢𑀺 𑀪𑀕𑀯𑀢𑁄𑀯 𑀏𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑁄 𑀉𑀧𑀝𑁆𑀞𑀸𑀢𑀼, 𑀢𑀼𑀫𑁆𑀳𑁂𑀬𑁂𑀯 𑀦𑁄 𑀓𑀣𑁂𑀢𑁆𑀯𑀸 𑀤𑁂𑀣𑀸𑀢𑀺 𑀅𑀢𑁆𑀣𑁄.

𑀲𑀸 𑀘𑁂𑀯 𑀅𑀯𑀺𑀚𑁆𑀚𑀸𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀲𑀸 𑀅𑀯𑀺𑀚𑁆𑀚𑀸 𑀘 𑀢𑀡𑁆𑀳𑀸 𑀘 𑀓𑀫𑁆𑀫𑀁 𑀚𑀯𑀸𑀧𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀸, 𑀬𑀣𑀸 𑀧𑀦 𑀅𑀚𑁆𑀚𑀸𑀧𑀺 𑀬𑀁 𑀳𑀺𑀬𑁆𑀬𑁄 𑀪𑁂𑀲𑀚𑁆𑀚𑀁 𑀧𑀻𑀢𑀁, 𑀢𑀤𑁂𑀯 𑀪𑁄𑀚𑀦𑀁 𑀪𑀼𑀜𑁆𑀚𑀸𑀢𑀺 𑀲𑀭𑀺𑀓𑁆𑀔𑀓𑀢𑁆𑀢𑁂𑀦 𑀢𑀤𑁂𑀯𑀸𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀥𑀸𑀧𑀺 𑀲𑀸 𑀘𑁂𑀯 𑀅𑀯𑀺𑀚𑁆𑀚𑀸 𑀲𑀸 𑀘 𑀢𑀡𑁆𑀳𑀸𑀢𑀺 𑀇𑀤𑀫𑁆𑀧𑀺 𑀲𑀭𑀺𑀓𑁆𑀔𑀓𑀢𑁆𑀢𑁂𑀦 𑀯𑀼𑀢𑁆𑀢𑀁. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁. 𑀤𑀼𑀓𑁆𑀔𑀓𑁆𑀔𑀬𑀸𑀬𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀔𑀬𑀢𑁆𑀣𑀸𑀬. 𑀓𑀸𑀬𑀽𑀧𑀕𑁄 𑀳𑁄𑀢𑀻𑀢𑀺 𑀅𑀜𑁆𑀜𑀁 𑀧𑀝𑀺𑀲𑀦𑁆𑀥𑀺𑀓𑀸𑀬𑀁 𑀉𑀧𑀕𑀦𑁆𑀢𑀸 𑀳𑁄𑀢𑀺. 𑀬𑀤𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺 𑀬𑁄 𑀅𑀬𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄, 𑀅𑀬𑀁 𑀩𑀸𑀮𑀢𑁄 𑀧𑀡𑁆𑀟𑀺𑀢𑀲𑁆𑀲 𑀯𑀺𑀲𑁂𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀩𑁆𑀩𑁄𑀧𑀺 𑀲𑀧𑀝𑀺𑀲𑀦𑁆𑀥𑀺𑀓𑁄 𑀧𑀼𑀣𑀼𑀚𑁆𑀚𑀦𑁄 ‘‘𑀩𑀸𑀮𑁄’’𑀢𑀺, 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑁄 𑀔𑀻𑀡𑀸𑀲𑀯𑁄 ‘‘𑀧𑀡𑁆𑀟𑀺𑀢𑁄’’𑀢𑀺 𑀯𑀼𑀢𑁆𑀢𑁄. 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀦𑁄 𑀧𑀦 ‘‘𑀧𑀡𑁆𑀟𑀺𑀢𑀸’’𑀢𑀺 𑀯𑀸 ‘‘𑀩𑀸𑀮𑀸’’𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑀸, 𑀪𑀚𑀫𑀸𑀦𑀸 𑀧𑀦 𑀧𑀡𑁆𑀟𑀺𑀢𑀧𑀓𑁆𑀔𑀁 𑀪𑀚𑀦𑁆𑀢𑀺. 𑀦𑀯𑀫𑀁.

𑁧𑁦. 𑀧𑀘𑁆𑀘𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦. 𑀤𑀲𑀫𑁂 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀜𑁆𑀘 𑀯𑁄 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑁂 𑀘 𑀥𑀫𑁆𑀫𑁂𑀢𑀺 𑀲𑀢𑁆𑀣𑀸 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀘𑁆𑀘𑀬𑁂 𑀘 𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑁂 𑀘 𑀲𑀪𑀸𑀯𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀉𑀪𑀬𑀁 𑀆𑀭𑀪𑀺. 𑀉𑀧𑁆𑀧𑀸𑀤𑀸 𑀯𑀸 𑀢𑀣𑀸𑀕𑀢𑀸𑀦𑀦𑁆𑀢𑀺 𑀢𑀣𑀸𑀕𑀢𑀸𑀦𑀁 𑀉𑀧𑁆𑀧𑀸𑀤𑁂𑀧𑀺, 𑀩𑀼𑀤𑁆𑀥𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀅𑀦𑀼𑀧𑁆𑀧𑀦𑁆𑀦𑁂𑀲𑀼𑀧𑀺 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁, 𑀚𑀸𑀢𑀺𑀬𑁂𑀯 𑀚𑀭𑀸𑀫𑀭𑀡𑀲𑁆𑀲 𑀧𑀘𑁆𑀘𑀬𑁄. 𑀞𑀺𑀢𑀸𑀯 𑀲𑀸 𑀥𑀸𑀢𑀽𑀢𑀺 𑀞𑀺𑀢𑁄𑀯 𑀲𑁄 𑀧𑀘𑁆𑀘𑀬𑀲𑀪𑀸𑀯𑁄, 𑀦 𑀓𑀤𑀸𑀘𑀺 𑀚𑀸𑀢𑀺 𑀚𑀭𑀸𑀫𑀭𑀡𑀲𑁆𑀲 𑀧𑀘𑁆𑀘𑀬𑁄 𑀦 𑀳𑁄𑀢𑀺. 𑀥𑀫𑁆𑀫𑀝𑁆𑀞𑀺𑀢𑀢𑀸 𑀥𑀫𑁆𑀫𑀦𑀺𑀬𑀸𑀫𑀢𑀸𑀢𑀺 𑀇𑀫𑁂𑀳𑀺𑀧𑀺 𑀤𑁆𑀯𑀻𑀳𑀺 𑀧𑀘𑁆𑀘𑀬𑀫𑁂𑀯 𑀓𑀣𑁂𑀢𑀺. 𑀧𑀘𑁆𑀘𑀬𑁂𑀦 𑀳𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸 𑀢𑀺𑀝𑁆𑀞𑀦𑁆𑀢𑀺, 𑀢𑀲𑁆𑀫𑀸 𑀧𑀘𑁆𑀘𑀬𑁄𑀯 ‘‘𑀥𑀫𑁆𑀫𑀝𑁆𑀞𑀺𑀢𑀢𑀸’’𑀢𑀺 𑀯𑀼𑀘𑁆𑀘𑀢𑀺. 𑀧𑀘𑁆𑀘𑀬𑁄 𑀥𑀫𑁆𑀫𑁂 𑀦𑀺𑀬𑀫𑁂𑀢𑀺, 𑀢𑀲𑁆𑀫𑀸 ‘‘𑀥𑀫𑁆𑀫𑀦𑀺𑀬𑀸𑀫𑀢𑀸’’𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀧𑁆𑀧𑀘𑁆𑀘𑀬𑀢𑀸𑀢𑀺 𑀇𑀫𑁂𑀲𑀁 𑀚𑀭𑀸𑀫𑀭𑀡𑀸𑀤𑀻𑀦𑀁 𑀧𑀘𑁆𑀘𑀬𑀸 𑀇𑀤𑀧𑁆𑀧𑀘𑁆𑀘𑀬𑀸, 𑀇𑀤𑀧𑁆𑀧𑀘𑁆𑀘𑀬𑀸𑀯 𑀇𑀤𑀧𑁆𑀧𑀘𑁆𑀘𑀬𑀢𑀸. 𑀢𑀦𑁆𑀢𑀺 𑀢𑀁 𑀧𑀘𑁆𑀘𑀬𑀁. 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀻𑀢𑀺 𑀜𑀸𑀡𑁂𑀦 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺. 𑀅𑀪𑀺𑀲𑀫𑁂𑀢𑀻𑀢𑀺 𑀜𑀸𑀡𑁂𑀦 𑀅𑀪𑀺𑀲𑀫𑀸𑀕𑀘𑁆𑀙𑀢𑀺. 𑀆𑀘𑀺𑀓𑁆𑀔𑀢𑀻𑀢𑀺 𑀓𑀣𑁂𑀢𑀺. 𑀤𑁂𑀲𑁂𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀜𑁆𑀜𑀸𑀧𑁂𑀢𑀻𑀢𑀺 𑀚𑀸𑀦𑀸𑀧𑁂𑀢𑀺. 𑀧𑀝𑁆𑀞𑀧𑁂𑀢𑀻𑀢𑀺 𑀜𑀸𑀡𑀫𑀼𑀔𑁂 𑀞𑀧𑁂𑀢𑀺. 𑀯𑀺𑀯𑀭𑀢𑀻𑀢𑀺 𑀯𑀺𑀯𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀯𑀺𑀪𑀚𑀢𑀻𑀢𑀺 𑀯𑀺𑀪𑀸𑀕𑀢𑁄 𑀤𑀲𑁆𑀲𑁂𑀢𑀺. 𑀉𑀢𑁆𑀢𑀸𑀦𑀻𑀓𑀭𑁄𑀢𑀻𑀢𑀺 𑀧𑀸𑀓𑀝𑀁 𑀓𑀭𑁄𑀢𑀺. 𑀧𑀲𑁆𑀲𑀣𑀸𑀢𑀺 𑀘𑀸𑀳𑀸𑀢𑀺 𑀧𑀲𑁆𑀲𑀣 𑀇𑀢𑀺 𑀘 𑀯𑀤𑀢𑀺. 𑀓𑀺𑀦𑁆𑀢𑀺? 𑀚𑀸𑀢𑀺𑀧𑀘𑁆𑀘𑀬𑀸, 𑀪𑀺𑀓𑁆𑀔𑀯𑁂, 𑀚𑀭𑀸𑀫𑀭𑀡𑀦𑁆𑀢𑀺𑀆𑀤𑀺.

𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂𑀢𑀺 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂. 𑀬𑀸 𑀢𑀢𑁆𑀭𑀸𑀢𑀺 𑀬𑀸 𑀢𑁂𑀲𑀼 ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺𑀆𑀤𑀻𑀲𑀼. 𑀢𑀣𑀢𑀸𑀢𑀺𑀆𑀤𑀻𑀦𑀺 𑀧𑀘𑁆𑀘𑀬𑀸𑀓𑀸𑀭𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. 𑀲𑁄 𑀢𑁂𑀳𑀺 𑀢𑁂𑀳𑀺 𑀧𑀘𑁆𑀘𑀬𑁂𑀳𑀺 𑀅𑀦𑀽𑀦𑀸𑀥𑀺𑀓𑁂𑀳𑁂𑀯 𑀢𑀲𑁆𑀲 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀲𑀫𑁆𑀪𑀯𑀢𑁄 𑀢𑀣𑀢𑀸𑀢𑀺, 𑀲𑀸𑀫𑀕𑁆𑀕𑀺𑀁 𑀉𑀧𑀕𑀢𑁂𑀲𑀼 𑀧𑀘𑁆𑀘𑀬𑁂𑀲𑀼 𑀫𑀼𑀳𑀼𑀢𑁆𑀢𑀫𑁆𑀧𑀺 𑀢𑀢𑁄 𑀦𑀺𑀩𑁆𑀩𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀲𑀫𑁆𑀪𑀯𑀸𑀪𑀸𑀯𑀢𑁄 𑀅𑀯𑀺𑀢𑀣𑀢𑀸𑀢𑀺, 𑀅𑀜𑁆𑀜𑀥𑀫𑁆𑀫𑀧𑀘𑁆𑀘𑀬𑁂𑀳𑀺 𑀅𑀜𑁆𑀜𑀥𑀫𑁆𑀫𑀸𑀦𑀼𑀧𑁆𑀧𑀢𑁆𑀢𑀺𑀢𑁄 𑀅𑀦𑀜𑁆𑀜𑀣𑀢𑀸𑀢𑀺, 𑀚𑀭𑀸𑀫𑀭𑀡𑀸𑀤𑀻𑀦𑀁 𑀧𑀘𑁆𑀘𑀬𑀢𑁄 𑀯𑀸 𑀧𑀘𑁆𑀘𑀬𑀲𑀫𑀽𑀳𑀢𑁄 𑀯𑀸 𑀇𑀤𑀧𑁆𑀧𑀘𑁆𑀘𑀬𑀢𑀸𑀢𑀺 𑀯𑀼𑀢𑁆𑀢𑁄. 𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀇𑀫𑁂𑀲𑀁 𑀧𑀘𑁆𑀘𑀬𑀸 𑀇𑀤𑀧𑁆𑀧𑀘𑁆𑀘𑀬𑀸, 𑀇𑀤𑀧𑁆𑀧𑀘𑁆𑀘𑀬𑀸 𑀏𑀯 𑀇𑀤𑀧𑁆𑀧𑀘𑁆𑀘𑀬𑀢𑀸, 𑀇𑀤𑀧𑁆𑀧𑀘𑁆𑀘𑀬𑀸𑀦𑀁 𑀯𑀸 𑀲𑀫𑀽𑀳𑁄 𑀇𑀤𑀧𑁆𑀧𑀘𑁆𑀘𑀬𑀢𑀸. 𑀮𑀓𑁆𑀔𑀡𑀁 𑀧𑀦𑁂𑀢𑁆𑀣 𑀲𑀤𑁆𑀤𑀲𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀁.

𑀅𑀦𑀺𑀘𑁆𑀘𑀦𑁆𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀁. 𑀏𑀢𑁆𑀣 𑀘 𑀅𑀦𑀺𑀘𑁆𑀘𑀦𑁆𑀢𑀺 𑀦 𑀚𑀭𑀸𑀫𑀭𑀡𑀁 𑀅𑀦𑀺𑀘𑁆𑀘𑀁, 𑀅𑀦𑀺𑀘𑁆𑀘𑀲𑀪𑀸𑀯𑀸𑀦𑀁 𑀧𑀦 𑀔𑀦𑁆𑀥𑀸𑀦𑀁 𑀚𑀭𑀸𑀫𑀭𑀡𑀢𑁆𑀢𑀸 𑀅𑀦𑀺𑀘𑁆𑀘𑀁 𑀦𑀸𑀫 𑀚𑀸𑀢𑀁. 𑀲𑀗𑁆𑀔𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀲𑀗𑁆𑀔𑀢𑀦𑁆𑀢𑀺 𑀧𑀘𑁆𑀘𑀬𑁂𑀳𑀺 𑀲𑀫𑀸𑀕𑀦𑁆𑀢𑁆𑀯𑀸 𑀓𑀢𑀁. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀦𑁆𑀢𑀺 𑀧𑀘𑁆𑀘𑀬𑁂 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀁. 𑀔𑀬𑀥𑀫𑁆𑀫𑀦𑁆𑀢𑀺 𑀔𑀬𑀲𑀪𑀸𑀯𑀁. 𑀯𑀬𑀥𑀫𑁆𑀫𑀦𑁆𑀢𑀺 𑀯𑀺𑀕𑀘𑁆𑀙𑀦𑀓𑀲𑀪𑀸𑀯𑀁. 𑀯𑀺𑀭𑀸𑀕𑀥𑀫𑁆𑀫𑀦𑁆𑀢𑀺 𑀯𑀺𑀭𑀚𑁆𑀚𑀦𑀓𑀲𑀪𑀸𑀯𑀁. 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀦𑀺𑀭𑀼𑀚𑁆𑀛𑀦𑀓𑀲𑀪𑀸𑀯𑀁. 𑀚𑀸𑀢𑀺𑀬𑀸𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀦𑀺𑀘𑁆𑀘𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀚𑀦𑀓𑀧𑀘𑁆𑀘𑀬𑀸𑀦𑀁 𑀯𑀸 𑀓𑀺𑀘𑁆𑀘𑀸𑀦𑀼𑀪𑀸𑀯𑀓𑁆𑀔𑀡𑁂 𑀤𑀺𑀝𑁆𑀞𑀢𑁆𑀢𑀸 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦𑁂𑀢𑁆𑀣 𑀅𑀦𑀺𑀘𑁆𑀘𑀸𑀢𑀺𑀆𑀤𑀻𑀦𑀺 𑀬𑀼𑀚𑁆𑀚𑀦𑁆𑀢𑀺𑀬𑁂𑀯. 𑀪𑀯𑀸𑀤𑀬𑁄 𑀅𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑀸𑀬𑁂𑀯.

𑀲𑀫𑁆𑀫𑀧𑁆𑀧𑀜𑁆𑀜𑀸𑀬𑀸𑀢𑀺 𑀲𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬. 𑀧𑀼𑀩𑁆𑀩𑀦𑁆𑀢𑀦𑁆𑀢𑀺 𑀧𑀼𑀭𑀺𑀫𑀁 𑀅𑀢𑀻𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀳𑁄𑀲𑀺𑀁 𑀦𑀼 𑀔𑁄𑀢𑀺𑀆𑀤𑀻𑀲𑀼 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀦𑀦𑀼 𑀔𑁄’’𑀢𑀺 𑀲𑀲𑁆𑀲𑀢𑀸𑀓𑀸𑀭𑀜𑁆𑀘 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀢𑁆𑀢𑀺𑀆𑀓𑀸𑀭𑀜𑁆𑀘 𑀦𑀺𑀲𑁆𑀲𑀸𑀬 𑀅𑀢𑀻𑀢𑁂 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀢𑀜𑁆𑀘 𑀅𑀯𑀺𑀚𑁆𑀚𑀫𑀸𑀦𑀢𑀜𑁆𑀘 𑀓𑀗𑁆𑀔𑀢𑀺. 𑀓𑀺𑀁 𑀓𑀸𑀭𑀡𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀉𑀫𑁆𑀫𑀢𑁆𑀢𑀓𑁄 𑀯𑀺𑀬 𑀩𑀸𑀮𑀧𑀼𑀣𑀼𑀚𑁆𑀚𑀦𑁄 𑀬𑀣𑀸 𑀯𑀸 𑀢𑀣𑀸 𑀯𑀸 𑀧𑀯𑀢𑁆𑀢𑀢𑀺. 𑀓𑀺𑀁 𑀦𑀼 𑀔𑁄 𑀅𑀳𑁄𑀲𑀺𑀦𑁆𑀢𑀺 𑀚𑀸𑀢𑀺𑀮𑀺𑀗𑁆𑀕𑀼𑀧𑀧𑀢𑁆𑀢𑀺𑀬𑁄 𑀦𑀺𑀲𑁆𑀲𑀸𑀬 ‘‘𑀔𑀢𑁆𑀢𑀺𑀬𑁄 𑀦𑀼 𑀔𑁄 𑀅𑀳𑁄𑀲𑀺𑀁, 𑀩𑁆𑀭𑀸𑀳𑁆𑀫𑀡𑀯𑁂𑀲𑁆𑀲𑀲𑀼𑀤𑁆𑀤𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀅𑀜𑁆𑀜𑀢𑀭𑁄’’𑀢𑀺 𑀓𑀗𑁆𑀔𑀢𑀺. 𑀓𑀣𑀁 𑀦𑀼 𑀔𑁄𑀢𑀺 𑀲𑀡𑁆𑀞𑀸𑀦𑀸𑀓𑀸𑀭𑀁 𑀦𑀺𑀲𑁆𑀲𑀸𑀬 ‘‘𑀤𑀻𑀖𑁄 𑀦𑀼 𑀔𑁄 𑀅𑀳𑁄𑀲𑀺𑀁 𑀭𑀲𑁆𑀲𑀑𑀤𑀸𑀢𑀓𑀡𑁆𑀳𑀧𑀫𑀸𑀡𑀺𑀓𑀅𑀧𑁆𑀧𑀫𑀸𑀡𑀺𑀓𑀸𑀤𑀻𑀦𑀁 𑀅𑀜𑁆𑀜𑀢𑀭𑁄’’𑀢𑀺 𑀓𑀗𑁆𑀔𑀢𑀺. 𑀓𑁂𑀘𑀺 𑀧𑀦 ‘‘𑀇𑀲𑁆𑀲𑀭𑀦𑀺𑀫𑁆𑀫𑀸𑀦𑀸𑀤𑀻𑀦𑀺 𑀦𑀺𑀲𑁆𑀲𑀸𑀬 ‘𑀓𑁂𑀦 𑀦𑀼 𑀔𑁄 𑀓𑀸𑀭𑀡𑁂𑀦 𑀅𑀳𑁄𑀲𑀺’𑀦𑁆𑀢𑀺 𑀳𑁂𑀢𑀼𑀢𑁄 𑀓𑀗𑁆𑀔𑀢𑀻’’𑀢𑀺 𑀯𑀤𑀦𑁆𑀢𑀺. 𑀓𑀺𑀁 𑀳𑀼𑀢𑁆𑀯𑀸 𑀓𑀺𑀁 𑀅𑀳𑁄𑀲𑀺𑀦𑁆𑀢𑀺 𑀚𑀸𑀢𑀺𑀆𑀤𑀻𑀦𑀺 𑀦𑀺𑀲𑁆𑀲𑀸𑀬 ‘‘𑀔𑀢𑁆𑀢𑀺𑀬𑁄 𑀳𑀼𑀢𑁆𑀯𑀸 𑀦𑀼 𑀔𑁄 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺𑀁…𑀧𑁂… 𑀤𑁂𑀯𑁄 𑀳𑀼𑀢𑁆𑀯𑀸 𑀫𑀦𑀼𑀲𑁆𑀲𑁄’’𑀢𑀺 𑀅𑀢𑁆𑀢𑀦𑁄 𑀧𑀭𑀫𑁆𑀧𑀭𑀁 𑀓𑀗𑁆𑀔𑀢𑀺. 𑀲𑀩𑁆𑀩𑀢𑁆𑀣𑁂𑀯 𑀧𑀦 𑀅𑀤𑁆𑀥𑀸𑀦𑀦𑁆𑀢𑀺 𑀓𑀸𑀮𑀸𑀥𑀺𑀯𑀘𑀦𑀫𑁂𑀢𑀁. 𑀅𑀧𑀭𑀦𑁆𑀢𑀦𑁆𑀢𑀺 𑀅𑀦𑀸𑀕𑀢𑀁 𑀅𑀦𑁆𑀢𑀁. 𑀪𑀯𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀦𑀦𑀼 𑀔𑁄𑀢𑀺 𑀲𑀲𑁆𑀲𑀢𑀸𑀓𑀸𑀭𑀜𑁆𑀘 𑀉𑀘𑁆𑀙𑁂𑀤𑀸𑀓𑀸𑀭𑀜𑁆𑀘 𑀦𑀺𑀲𑁆𑀲𑀸𑀬 𑀅𑀦𑀸𑀕𑀢𑁂 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀢𑀜𑁆𑀘 𑀅𑀯𑀺𑀚𑁆𑀚𑀫𑀸𑀦𑀢𑀜𑁆𑀘 𑀓𑀗𑁆𑀔𑀢𑀺. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯.

𑀏𑀢𑀭𑀳𑀺 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀤𑁆𑀥𑀸𑀦𑀦𑁆𑀢𑀺 𑀇𑀤𑀸𑀦𑀺 𑀯𑀸 𑀧𑀝𑀺𑀲𑀦𑁆𑀥𑀺𑀫𑀸𑀤𑀺𑀁 𑀓𑀢𑁆𑀯𑀸 𑀘𑀼𑀢𑀺𑀧𑀭𑀺𑀬𑀦𑁆𑀢𑀁 𑀲𑀩𑁆𑀩𑀫𑁆𑀧𑀺 𑀯𑀢𑁆𑀢𑀫𑀸𑀦𑀓𑀸𑀮𑀁 𑀕𑀳𑁂𑀢𑁆𑀯𑀸. 𑀅𑀚𑁆𑀛𑀢𑁆𑀢𑀁 𑀓𑀣𑀁𑀓𑀣𑀻 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀢𑀦𑁄 𑀔𑀦𑁆𑀥𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀻 𑀪𑀯𑀺𑀲𑁆𑀲𑀢𑀺. 𑀅𑀳𑀁 𑀦𑀼 𑀔𑁄𑀲𑁆𑀫𑀻𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀺𑀪𑀸𑀯𑀁 𑀓𑀗𑁆𑀔𑀢𑀺. 𑀬𑀼𑀢𑁆𑀢𑀁 𑀧𑀦𑁂𑀢𑀦𑁆𑀢𑀺? 𑀬𑀼𑀢𑁆𑀢𑀁 𑀅𑀬𑀼𑀢𑁆𑀢𑀦𑁆𑀢𑀺 𑀓𑀸 𑀏𑀢𑁆𑀣 𑀘𑀺𑀦𑁆𑀢𑀸. 𑀅𑀧𑀺𑀘𑁂𑀢𑁆𑀣 𑀇𑀤𑀁 𑀯𑀢𑁆𑀣𑀼𑀫𑁆𑀧𑀺 𑀉𑀤𑀸𑀳𑀭𑀦𑁆𑀢𑀺 𑁋 𑀘𑀽𑀴𑀫𑀸𑀢𑀸𑀬 𑀓𑀺𑀭 𑀧𑀼𑀢𑁆𑀢𑁄 𑀫𑀼𑀡𑁆𑀟𑁄, 𑀫𑀳𑀸𑀫𑀸𑀢𑀸𑀬 𑀧𑀼𑀢𑁆𑀢𑁄 𑀅𑀫𑀼𑀡𑁆𑀟𑁄, 𑀢𑀁 𑀧𑀼𑀢𑁆𑀢𑀁 𑀫𑀼𑀡𑁆𑀟𑁂𑀲𑀼𑀁, 𑀲𑁄 𑀉𑀝𑁆𑀞𑀸𑀬 ‘‘𑀅𑀳𑀁 𑀦𑀼 𑀔𑁄 𑀘𑀽𑀴𑀫𑀸𑀢𑀸𑀬 𑀧𑀼𑀢𑁆𑀢𑁄’’𑀢𑀺 𑀘𑀺𑀦𑁆𑀢𑁂𑀲𑀺. 𑀏𑀯𑀁 𑀅𑀳𑀁 𑀦𑀼 𑀔𑁄𑀲𑁆𑀫𑀻𑀢𑀺 𑀓𑀗𑁆𑀔𑀸 𑀳𑁄𑀢𑀺. 𑀦𑁄 𑀦𑀼 𑀔𑁄𑀲𑁆𑀫𑀻𑀢𑀺 𑀅𑀢𑁆𑀢𑀦𑁄 𑀦𑀢𑁆𑀣𑀺𑀪𑀸𑀯𑀁 𑀓𑀗𑁆𑀔𑀢𑀺. 𑀢𑀢𑁆𑀭𑀸𑀧𑀺 𑀇𑀤𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀫𑀘𑁆𑀙𑁂 𑀕𑀡𑁆𑀳𑀦𑁆𑀢𑁄 𑀉𑀤𑀓𑁂 𑀘𑀺𑀭𑀝𑁆𑀞𑀸𑀦𑁂𑀦 𑀲𑀻𑀢𑀺𑀪𑀽𑀢𑀁 𑀅𑀢𑁆𑀢𑀦𑁄 𑀊𑀭𑀼𑀁 𑀫𑀘𑁆𑀙𑁄𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀳𑀭𑀺. 𑀅𑀧𑀭𑁄 𑀲𑀼𑀲𑀸𑀦𑀧𑀲𑁆𑀲𑁂 𑀔𑁂𑀢𑁆𑀢𑀁 𑀭𑀓𑁆𑀔𑀦𑁆𑀢𑁄 𑀪𑀻𑀢𑁄 𑀲𑀗𑁆𑀓𑀼𑀝𑀺𑀢𑁄 𑀲𑀬𑀺, 𑀲𑁄 𑀧𑀝𑀺𑀩𑀼𑀚𑁆𑀛𑀺𑀢𑁆𑀯𑀸 𑀅𑀢𑁆𑀢𑀦𑁄 𑀚𑀡𑁆𑀡𑀼𑀓𑀸𑀦𑀺 𑀤𑁆𑀯𑁂 𑀬𑀓𑁆𑀔𑀸𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀳𑀭𑀺. 𑀏𑀯𑀁 𑀦𑁄 𑀦𑀼 𑀔𑁄𑀲𑁆𑀫𑀻𑀢𑀺 𑀓𑀗𑁆𑀔𑀢𑀺.

𑀓𑀺𑀁 𑀦𑀼 𑀔𑁄𑀲𑁆𑀫𑀻𑀢𑀺 𑀔𑀢𑁆𑀢𑀺𑀬𑁄𑀯 𑀲𑀫𑀸𑀦𑁄 𑀅𑀢𑁆𑀢𑀦𑁄 𑀔𑀢𑁆𑀢𑀺𑀬𑀪𑀸𑀯𑀁 𑀓𑀗𑁆𑀔𑀢𑀺. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀤𑁂𑀯𑁄 𑀧𑀦 𑀲𑀫𑀸𑀦𑁄 𑀤𑁂𑀯𑀪𑀸𑀯𑀁 𑀅𑀚𑀸𑀦𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀲𑁄𑀧𑀺 𑀧𑀦 ‘‘𑀅𑀳𑀁 𑀭𑀽𑀧𑀻 𑀦𑀼 𑀔𑁄 𑀅𑀭𑀽𑀧𑀻 𑀦𑀼 𑀔𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀗𑁆𑀔𑀢𑀺. 𑀔𑀢𑁆𑀢𑀺𑀬𑀸𑀤𑀬𑁄 𑀓𑀲𑁆𑀫𑀸 𑀦 𑀚𑀸𑀦𑀦𑁆𑀢𑀻𑀢𑀺 𑀘𑁂? 𑀅𑀧𑀘𑁆𑀘𑀓𑁆𑀔𑀸 𑀢𑁂𑀲𑀁 𑀢𑀢𑁆𑀣 𑀢𑀢𑁆𑀣 𑀓𑀼𑀮𑁂 𑀉𑀧𑁆𑀧𑀢𑁆𑀢𑀺. 𑀕𑀳𑀝𑁆𑀞𑀸𑀧𑀺 𑀘 𑀧𑁄𑀢𑁆𑀣𑀮𑀺𑀓𑀸𑀤𑀬𑁄 𑀧𑀩𑁆𑀩𑀚𑀺𑀢𑀲𑀜𑁆𑀜𑀺𑀦𑁄, 𑀧𑀩𑁆𑀩𑀚𑀺𑀢𑀸𑀧𑀺 ‘‘𑀓𑀼𑀧𑁆𑀧𑀁 𑀦𑀼 𑀔𑁄 𑀫𑁂 𑀓𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀕𑀳𑀝𑁆𑀞𑀲𑀜𑁆𑀜𑀺𑀦𑁄. 𑀫𑀦𑀼𑀲𑁆𑀲𑀸𑀧𑀺 𑀘 𑀭𑀸𑀚𑀸𑀦𑁄 𑀯𑀺𑀬 𑀅𑀢𑁆𑀢𑀦𑀺 𑀤𑁂𑀯𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀺. 𑀓𑀣𑀁 𑀦𑀼 𑀔𑁄𑀲𑁆𑀫𑀻𑀢𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀓𑁂𑀯𑀮𑀜𑁆𑀳𑁂𑀢𑁆𑀣 𑀅𑀩𑁆𑀪𑀦𑁆𑀢𑀭𑁂 𑀚𑀻𑀯𑁄 𑀦𑀸𑀫 𑀅𑀢𑁆𑀣𑀻𑀢𑀺 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀲𑀡𑁆𑀞𑀸𑀦𑀸𑀓𑀸𑀭𑀁 𑀦𑀺𑀲𑁆𑀲𑀸𑀬 ‘‘𑀤𑀻𑀖𑁄 𑀦𑀼 𑀔𑁄𑀲𑁆𑀫𑀺 𑀭𑀲𑁆𑀲𑀘𑀢𑀼𑀭𑀲𑁆𑀲𑀙𑀴𑀁𑀲𑀅𑀝𑁆𑀞𑀁𑀲𑀲𑁄𑀴𑀲𑀁𑀲𑀸𑀤𑀻𑀦𑀁 𑀅𑀜𑁆𑀜𑀢𑀭𑀧𑁆𑀧𑀓𑀸𑀭𑁄’’𑀢𑀺 𑀓𑀗𑁆𑀔𑀦𑁆𑀢𑁄 𑀓𑀣𑀁 𑀦𑀼 𑀔𑁄𑀲𑁆𑀫𑀻𑀢𑀺? 𑀓𑀗𑁆𑀔𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀭𑀻𑀭𑀲𑀡𑁆𑀞𑀸𑀦𑀁 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑀸𑀦𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀓𑀼𑀢𑁄 𑀆𑀕𑀢𑁄 𑀲𑁄 𑀓𑀼𑀳𑀺𑀁 𑀕𑀸𑀫𑀻 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀢𑀪𑀸𑀯𑀲𑁆𑀲 𑀆𑀕𑀢𑀺𑀕𑀢𑀺𑀝𑁆𑀞𑀸𑀦𑀁 𑀓𑀗𑁆𑀔𑀦𑁆𑀢𑁄 𑀏𑀯𑀁 𑀓𑀗𑁆𑀔𑀢𑀺. 𑀅𑀭𑀺𑀬𑀲𑀸𑀯𑀓𑀲𑁆𑀲𑀸𑀢𑀺 𑀇𑀥 𑀲𑁄𑀢𑀸𑀧𑀦𑁆𑀦𑁄 𑀅𑀥𑀺𑀧𑁆𑀧𑁂𑀢𑁄, 𑀇𑀢𑀭𑁂𑀧𑀺 𑀧𑀦 𑀢𑀬𑁄 𑀅𑀯𑀸𑀭𑀺𑀢𑀸𑀬𑁂𑀯𑀸𑀢𑀺. 𑀤𑀲𑀫𑀁.

𑀆𑀳𑀸𑀭𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀤𑀲𑀩𑀮𑀯𑀕𑁆𑀕𑁄

𑁧. 𑀤𑀲𑀩𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧. 𑀤𑀲𑀩𑀮𑀯𑀕𑁆𑀕𑀲𑁆𑀲 𑀧𑀞𑀫𑀁 𑀤𑀼𑀢𑀺𑀬𑀲𑁆𑀲𑁂𑀯 𑀲𑀗𑁆𑀔𑁂𑀧𑁄.

𑁨. 𑀤𑀼𑀢𑀺𑀬𑀤𑀲𑀩𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨. 𑀤𑀼𑀢𑀺𑀬𑀁 𑀪𑀕𑀯𑀢𑀸 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀲𑀩𑀮𑀲𑀫𑀦𑁆𑀦𑀸𑀕𑀢𑁄𑀢𑀺 𑀤𑀲𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄. 𑀩𑀮𑀜𑁆𑀘 𑀦𑀸𑀫𑁂𑀢𑀁 𑀤𑀼𑀯𑀺𑀥𑀁 𑀓𑀸𑀬𑀩𑀮𑀜𑁆𑀘 𑀜𑀸𑀡𑀩𑀮𑀜𑁆𑀘. 𑀢𑁂𑀲𑀼 𑀢𑀣𑀸𑀕𑀢𑀲𑁆𑀲 𑀓𑀸𑀬𑀩𑀮𑀁 𑀳𑀢𑁆𑀣𑀺𑀓𑀼𑀮𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑁄𑀭𑀸𑀡𑁂𑀳𑀺 𑁋

‘‘𑀓𑀸𑀴𑀸𑀯𑀓𑀜𑁆𑀘 𑀕𑀗𑁆𑀕𑁂𑀬𑁆𑀬𑀁, 𑀧𑀡𑁆𑀟𑀭𑀁 𑀢𑀫𑁆𑀩𑀧𑀺𑀗𑁆𑀕𑀮𑀁;

𑀕𑀦𑁆𑀥𑀫𑀗𑁆𑀕𑀮𑀳𑁂𑀫𑀜𑁆𑀘, 𑀉𑀧𑁄𑀲𑀣𑀙𑀤𑁆𑀤𑀦𑁆𑀢𑀺𑀫𑁂 𑀤𑀲𑀸’’𑀢𑀺.(𑀫. 𑀦𑀺. 𑀅𑀝𑁆𑀞. 𑁧.𑁧𑁪𑁮; 𑀯𑀺𑀪. 𑀅𑀝𑁆𑀞. 𑁭𑁬𑁦); 𑁋

𑀇𑀫𑀸𑀦𑀺 𑀤𑀲 𑀳𑀢𑁆𑀣𑀺𑀓𑀼𑀮𑀸𑀦𑀺. 𑀢𑀢𑁆𑀣 𑀓𑀸𑀴𑀸𑀯𑀓𑀦𑁆𑀢𑀺 𑀧𑀓𑀢𑀺𑀳𑀢𑁆𑀣𑀺𑀓𑀼𑀮𑀁 𑀤𑀝𑁆𑀞𑀩𑁆𑀩𑀁. 𑀬𑀁 𑀤𑀲𑀦𑁆𑀦𑀁 𑀧𑀼𑀭𑀺𑀲𑀸𑀦𑀁 𑀓𑀸𑀬𑀩𑀮𑀁, 𑀢𑀁 𑀏𑀓𑀲𑁆𑀲 𑀓𑀸𑀴𑀸𑀯𑀓𑀲𑁆𑀲 𑀳𑀢𑁆𑀣𑀺𑀦𑁄. 𑀬𑀁 𑀤𑀲𑀦𑁆𑀦𑀁 𑀓𑀸𑀴𑀸𑀯𑀓𑀸𑀦𑀁 𑀩𑀮𑀁, 𑀢𑀁 𑀏𑀓𑀲𑁆𑀲 𑀕𑀗𑁆𑀕𑁂𑀬𑁆𑀬𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀕𑀗𑁆𑀕𑁂𑀬𑁆𑀬𑀸𑀦𑀁, 𑀢𑀁 𑀏𑀓𑀲𑁆𑀲 𑀧𑀡𑁆𑀟𑀭𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀧𑀡𑁆𑀟𑀭𑀸𑀦𑀁, 𑀢𑀁 𑀏𑀓𑀲𑁆𑀲 𑀢𑀫𑁆𑀩𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀢𑀫𑁆𑀩𑀸𑀦𑀁, 𑀢𑀁 𑀏𑀓𑀲𑁆𑀲 𑀧𑀺𑀗𑁆𑀕𑀮𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀧𑀺𑀗𑁆𑀕𑀮𑀸𑀦𑀁, 𑀢𑀁 𑀏𑀓𑀲𑁆𑀲 𑀕𑀦𑁆𑀥𑀳𑀢𑁆𑀣𑀺𑀦𑁄. 𑀬𑀁 𑀤𑀲𑀦𑁆𑀦𑀁 𑀕𑀦𑁆𑀥𑀳𑀢𑁆𑀣𑀻𑀦𑀁, 𑀢𑀁 𑀏𑀓𑀲𑁆𑀲 𑀫𑀗𑁆𑀕𑀮𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀫𑀗𑁆𑀕𑀮𑀸𑀦𑀁, 𑀢𑀁 𑀏𑀓𑀲𑁆𑀲 𑀳𑁂𑀫𑀯𑀢𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀳𑁂𑀫𑀯𑀢𑀸𑀦𑀁, 𑀢𑀁 𑀏𑀓𑀲𑁆𑀲 𑀉𑀧𑁄𑀲𑀣𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀉𑀧𑁄𑀲𑀣𑀸𑀦𑀁, 𑀢𑀁 𑀏𑀓𑀲𑁆𑀲 𑀙𑀤𑁆𑀤𑀦𑁆𑀢𑀲𑁆𑀲. 𑀬𑀁 𑀤𑀲𑀦𑁆𑀦𑀁 𑀙𑀤𑁆𑀤𑀦𑁆𑀢𑀸𑀦𑀁, 𑀢𑀁 𑀏𑀓𑀲𑁆𑀲 𑀢𑀣𑀸𑀕𑀢𑀲𑁆𑀲. 𑀦𑀸𑀭𑀸𑀬𑀦𑀲𑀗𑁆𑀖𑀸𑀢𑀩𑀮𑀦𑁆𑀢𑀺𑀧𑀺 𑀇𑀤𑀫𑁂𑀯 𑀯𑀼𑀘𑁆𑀘𑀢𑀺. 𑀢𑀤𑁂𑀢𑀁 𑀧𑀓𑀢𑀺𑀳𑀢𑁆𑀣𑀺𑀕𑀡𑀦𑀸𑀬 𑀳𑀢𑁆𑀣𑀻𑀦𑀁 𑀓𑁄𑀝𑀺𑀲𑀳𑀲𑁆𑀲𑀸𑀦𑀁, 𑀧𑀼𑀭𑀺𑀲𑀕𑀡𑀦𑀸𑀬 𑀤𑀲𑀦𑁆𑀦𑀁 𑀧𑀼𑀭𑀺𑀲𑀓𑁄𑀝𑀺𑀲𑀳𑀲𑁆𑀲𑀸𑀦𑀁 𑀩𑀮𑀁 𑀳𑁄𑀢𑀺. 𑀇𑀤𑀁 𑀢𑀸𑀯 𑀢𑀣𑀸𑀕𑀢𑀲𑁆𑀲 𑀓𑀸𑀬𑀩𑀮𑀁. ‘‘𑀤𑀲𑀩𑀮𑀲𑀫𑀦𑁆𑀦𑀸𑀕𑀢𑁄’’𑀢𑀺 𑀏𑀢𑁆𑀣 𑀧𑀦 𑀏𑀢𑀁 𑀲𑀗𑁆𑀕𑀳𑀁 𑀦 𑀕𑀘𑁆𑀙𑀢𑀺. 𑀏𑀢𑀜𑁆𑀳𑀺 𑀩𑀸𑀳𑀺𑀭𑀓𑀁 𑀮𑀸𑀫𑀓𑀁 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀁 𑀲𑀻𑀳𑀸𑀤𑀻𑀦𑀫𑁆𑀧𑀺 𑀳𑁄𑀢𑀺. 𑀏𑀢𑀜𑁆𑀳𑀺 𑀦𑀺𑀲𑁆𑀲𑀸𑀬 𑀤𑀼𑀓𑁆𑀔𑀧𑀭𑀺𑀜𑁆𑀜𑀸 𑀯𑀸 𑀲𑀫𑀼𑀤𑀬𑀧𑁆𑀧𑀳𑀸𑀦𑀁 𑀯𑀸 𑀫𑀕𑁆𑀕𑀪𑀸𑀯𑀦𑀸 𑀯𑀸 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸 𑀯𑀸 𑀦𑀢𑁆𑀣𑀺. 𑀅𑀜𑁆𑀜𑀁 𑀧𑀦 𑀤𑀲𑀲𑀼 𑀞𑀸𑀦𑁂𑀲𑀼 𑀅𑀓𑀫𑁆𑀧𑀦𑀢𑁆𑀣𑁂𑀦 𑀉𑀧𑀢𑁆𑀣𑀫𑁆𑀪𑀦𑀢𑁆𑀣𑁂𑀦 𑀘 𑀤𑀲𑀯𑀺𑀥𑀁 𑀜𑀸𑀡𑀩𑀮𑀁 𑀦𑀸𑀫 𑀅𑀢𑁆𑀣𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀤𑀲𑀩𑀮𑀲𑀫𑀦𑁆𑀦𑀸𑀕𑀢𑁄’’𑀢𑀺.

𑀓𑀢𑀫𑀁 𑀧𑀦 𑀢𑀦𑁆𑀢𑀺? 𑀞𑀸𑀦𑀸𑀝𑁆𑀞𑀸𑀦𑀸𑀤𑀻𑀦𑀁 𑀬𑀣𑀸𑀪𑀽𑀢𑀁 𑀚𑀸𑀦𑀦𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀞𑀸𑀦𑀜𑁆𑀘 𑀞𑀸𑀦𑀢𑁄 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄 𑀚𑀸𑀦𑀦𑀁 𑀏𑀓𑀁, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀁 𑀞𑀸𑀦𑀲𑁄 𑀳𑁂𑀢𑀼𑀲𑁄 𑀬𑀣𑀸𑀪𑀽𑀢𑀁 𑀯𑀺𑀧𑀸𑀓𑀚𑀸𑀦𑀦𑀁 𑀏𑀓𑀁, 𑀲𑀩𑁆𑀩𑀢𑁆𑀣𑀕𑀸𑀫𑀺𑀦𑀺𑀧𑀝𑀺𑀧𑀤𑀸𑀚𑀸𑀦𑀦𑀁 𑀏𑀓𑀁, 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀮𑁄𑀓𑀚𑀸𑀦𑀦𑀁 𑀏𑀓𑀁, 𑀧𑀭𑀲𑀢𑁆𑀢𑀸𑀦𑀁 𑀧𑀭𑀧𑀼𑀕𑁆𑀕𑀮𑀸𑀦𑀁 𑀦𑀸𑀦𑀸𑀥𑀺𑀫𑀼𑀢𑁆𑀢𑀺𑀓𑀢𑀸𑀚𑀸𑀦𑀦𑀁 𑀏𑀓𑀁, 𑀢𑁂𑀲𑀁𑀬𑁂𑀯 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀚𑀸𑀦𑀦𑀁 𑀏𑀓𑀁, 𑀛𑀸𑀦𑀯𑀺𑀫𑁄𑀓𑁆𑀔𑀲𑀫𑀸𑀥𑀺𑀲𑀫𑀸𑀧𑀢𑁆𑀢𑀻𑀦𑀁 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀯𑀼𑀝𑁆𑀞𑀸𑀦𑀚𑀸𑀦𑀦𑀁 𑀏𑀓𑀁, 𑀧𑀼𑀩𑁆𑀩𑁂𑀦𑀺𑀯𑀸𑀲𑀚𑀸𑀦𑀦𑀁 𑀏𑀓𑀁, 𑀲𑀢𑁆𑀢𑀸𑀦𑀁 𑀘𑀼𑀢𑀽𑀧𑀧𑀸𑀢𑀚𑀸𑀦𑀦𑀁 𑀏𑀓𑀁, 𑀆𑀲𑀯𑀓𑁆𑀔𑀬𑀚𑀸𑀦𑀦𑀁 𑀏𑀓𑀦𑁆𑀢𑀺. 𑀅𑀪𑀺𑀥𑀫𑁆𑀫𑁂 𑀧𑀦 𑁋

‘‘𑀇𑀥 𑀢𑀣𑀸𑀕𑀢𑁄 𑀞𑀸𑀦𑀜𑁆𑀘 𑀞𑀸𑀦𑀢𑁄 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀬𑀫𑁆𑀧𑀺 𑀢𑀣𑀸𑀕𑀢𑁄 𑀞𑀸𑀦𑀜𑁆𑀘 𑀞𑀸𑀦𑀢𑁄 𑀅𑀝𑁆𑀞𑀸𑀦𑀜𑁆𑀘 𑀅𑀝𑁆𑀞𑀸𑀦𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺. 𑀇𑀤𑀫𑁆𑀧𑀺 𑀢𑀣𑀸𑀕𑀢𑀲𑁆𑀲 𑀢𑀣𑀸𑀕𑀢𑀩𑀮𑀁 𑀳𑁄𑀢𑀺, 𑀬𑀁 𑀩𑀮𑀁 𑀆𑀕𑀫𑁆𑀫 𑀢𑀣𑀸𑀕𑀢𑁄 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺, 𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀻’’𑀢𑀺.

𑀆𑀤𑀺𑀦𑀸 (𑀯𑀺𑀪. 𑁭𑁬𑁦) 𑀦𑀬𑁂𑀦 𑀯𑀺𑀢𑁆𑀣𑀸𑀭𑀢𑁄 𑀆𑀕𑀢𑀸𑀦𑁂𑀯. 𑀅𑀢𑁆𑀣𑀯𑀡𑁆𑀡𑀦𑀸𑀧𑀺 𑀦𑁂𑀲𑀁 𑀯𑀺𑀪𑀗𑁆𑀕𑀝𑁆𑀞𑀓𑀣𑀸𑀬𑀜𑁆𑀘𑁂𑀯 (𑀯𑀺𑀪. 𑀅𑀝𑁆𑀞. 𑁭𑁬𑁦) 𑀧𑀧𑀜𑁆𑀘𑀲𑀽𑀤𑀦𑀺𑀬𑀸 𑀘 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬 (𑀫. 𑀦𑀺. 𑀅𑀝𑁆𑀞. 𑁧.𑁧𑁪𑁮) 𑀲𑀩𑁆𑀩𑀸𑀓𑀸𑀭𑀢𑁄 𑀯𑀼𑀢𑁆𑀢𑀸. 𑀲𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀸.

𑀘𑀢𑀽𑀳𑀺 𑀘 𑀯𑁂𑀲𑀸𑀭𑀚𑁆𑀚𑁂𑀳𑀻𑀢𑀺 𑀏𑀢𑁆𑀣 𑀲𑀸𑀭𑀚𑁆𑀚𑀧𑀝𑀺𑀧𑀓𑁆𑀔𑀁 𑀯𑁂𑀲𑀸𑀭𑀚𑁆𑀚𑀁, 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑁂𑀲𑀸𑀭𑀚𑁆𑀚𑀪𑀸𑀯𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀲𑁄𑀫𑀦𑀲𑁆𑀲𑀫𑀬𑀜𑀸𑀡𑀲𑁆𑀲𑁂𑀢𑀁 𑀦𑀸𑀫𑀁. 𑀓𑀢𑀫𑁂𑀲𑀼 𑀘𑀢𑀽𑀲𑀼? ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄 𑀇𑀫𑁂 𑀥𑀫𑁆𑀫𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸’’𑀢𑀺𑀆𑀤𑀻𑀲𑀼 𑀘𑁄𑀤𑀦𑀸𑀯𑀢𑁆𑀣𑀽𑀲𑀼. 𑀢𑀢𑁆𑀭𑀸𑀬𑀁 𑀧𑀸𑀴𑀺 𑁋

‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲 𑀯𑁂𑀲𑀸𑀭𑀚𑁆𑀚𑀸𑀦𑀺…𑀧𑁂…. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? ‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄 𑀇𑀫𑁂 𑀥𑀫𑁆𑀫𑀸 𑀅𑀦𑀪𑀺𑀲𑀫𑁆𑀩𑀼𑀤𑁆𑀥𑀸’𑀢𑀺 𑀢𑀢𑁆𑀭 𑀯𑀢 𑀫𑀁 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀓𑁄𑀘𑀺 𑀯𑀸 𑀮𑁄𑀓𑀲𑁆𑀫𑀺𑀁 𑀲𑀳 𑀥𑀫𑁆𑀫𑁂𑀦 𑀧𑀝𑀺𑀘𑁄𑀤𑁂𑀲𑁆𑀲𑀢𑀻𑀢𑀺 𑀦𑀺𑀫𑀺𑀢𑁆𑀢𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀦 𑀲𑀫𑀦𑀼𑀧𑀲𑁆𑀲𑀸𑀫𑀺. 𑀏𑀢𑀫𑀳𑀁, 𑀪𑀺𑀓𑁆𑀔𑀯𑁂, 𑀦𑀺𑀫𑀺𑀢𑁆𑀢𑀁 𑀅𑀲𑀫𑀦𑀼𑀧𑀲𑁆𑀲𑀦𑁆𑀢𑁄 𑀔𑁂𑀫𑀧𑁆𑀧𑀢𑁆𑀢𑁄 𑀅𑀪𑀬𑀧𑁆𑀧𑀢𑁆𑀢𑁄 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀯𑀺𑀳𑀭𑀸𑀫𑀺. ‘𑀔𑀻𑀡𑀸𑀲𑀯𑀲𑁆𑀲 𑀢𑁂 𑀧𑀝𑀺𑀚𑀸𑀦𑀢𑁄 𑀇𑀫𑁂 𑀆𑀲𑀯𑀸 𑀅𑀧𑀭𑀺𑀓𑁆𑀔𑀻𑀡𑀸’𑀢𑀺 𑀢𑀢𑁆𑀭 𑀯𑀢 𑀫𑀁…𑀧𑁂… ‘𑀬𑁂 𑀔𑁄 𑀧𑀦 𑀢𑁂 𑀅𑀦𑁆𑀢𑀭𑀸𑀬𑀺𑀓𑀸 𑀥𑀫𑁆𑀫𑀸 𑀯𑀼𑀢𑁆𑀢𑀸, 𑀢𑁂 𑀧𑀝𑀺𑀲𑁂𑀯𑀢𑁄 𑀦𑀸𑀮𑀁 𑀅𑀦𑁆𑀢𑀭𑀸𑀬𑀸𑀬𑀸’𑀢𑀺 𑀢𑀢𑁆𑀭 𑀯𑀢 𑀫𑀁…𑀧𑁂… ‘𑀬𑀲𑁆𑀲 𑀔𑁄 𑀧𑀦 𑀢𑁂 𑀅𑀢𑁆𑀣𑀸𑀬 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀲𑁄 𑀦 𑀦𑀺𑀬𑁆𑀬𑀸𑀢𑀺 𑀢𑀓𑁆𑀓𑀭𑀲𑁆𑀲 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀸𑀬𑀸’𑀢𑀺 𑀢𑀢𑁆𑀭 𑀯𑀢 𑀫𑀁 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸…𑀧𑁂… 𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀯𑀺𑀳𑀭𑀸𑀫𑀻’’𑀢𑀺 (𑀅. 𑀦𑀺. 𑁪.𑁮).

𑀆𑀲𑀪𑀁 𑀞𑀸𑀦𑀦𑁆𑀢𑀺 𑀲𑁂𑀝𑁆𑀞𑀝𑁆𑀞𑀸𑀦𑀁 𑀉𑀢𑁆𑀢𑀫𑀝𑁆𑀞𑀸𑀦𑀁. 𑀆𑀲𑀪𑀸 𑀯𑀸 𑀧𑀼𑀩𑁆𑀩𑀩𑀼𑀤𑁆𑀥𑀸, 𑀢𑁂𑀲𑀁 𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀕𑀯𑀲𑀢𑀚𑁂𑀝𑁆𑀞𑀓𑁄 𑀉𑀲𑀪𑁄, 𑀕𑀯𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀯𑀲𑀪𑁄, 𑀯𑀚𑀲𑀢𑀚𑁂𑀝𑁆𑀞𑀓𑁄 𑀯𑀸 𑀉𑀲𑀪𑁄, 𑀯𑀚𑀲𑀳𑀲𑁆𑀲𑀚𑁂𑀝𑁆𑀞𑀓𑁄 𑀯𑀲𑀪𑁄, 𑀲𑀩𑁆𑀩𑀕𑀯𑀲𑁂𑀝𑁆𑀞𑁄 𑀲𑀩𑁆𑀩𑀧𑀭𑀺𑀲𑁆𑀲𑀬𑀲𑀳𑁄 𑀲𑁂𑀢𑁄 𑀧𑀸𑀲𑀸𑀤𑀺𑀓𑁄 𑀫𑀳𑀸𑀪𑀸𑀭𑀯𑀳𑁄 𑀅𑀲𑀦𑀺𑀲𑀢𑀲𑀤𑁆𑀤𑁂𑀳𑀺𑀧𑀺 𑀅𑀲𑀫𑁆𑀧𑀓𑀫𑁆𑀧𑀺𑀬𑁄 𑀦𑀺𑀲𑀪𑁄, 𑀲𑁄 𑀇𑀥 𑀉𑀲𑀪𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀇𑀤𑀫𑁆𑀧𑀺 𑀳𑀺 𑀢𑀲𑁆𑀲 𑀧𑀭𑀺𑀬𑀸𑀬𑀯𑀘𑀦𑀁. 𑀉𑀲𑀪𑀲𑁆𑀲 𑀇𑀤𑀦𑁆𑀢𑀺 𑀆𑀲𑀪𑀁. 𑀞𑀸𑀦𑀦𑁆𑀢𑀺 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀅𑀯𑀝𑁆𑀞𑀸𑀦𑀁 (𑀫. 𑀦𑀺. 𑁧.𑁧𑁫𑁦). 𑀇𑀤𑀁 𑀧𑀦 𑀆𑀲𑀪𑀁 𑀯𑀺𑀬𑀸𑀢𑀺 𑀆𑀲𑀪𑀁. 𑀬𑀣𑁂𑀯 𑀳𑀺 𑀦𑀺𑀲𑀪𑀲𑀗𑁆𑀔𑀸𑀢𑁄 𑀉𑀲𑀪𑁄 𑀉𑀲𑀪𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀅𑀘𑀮𑀝𑁆𑀞𑀸𑀦𑁂𑀦 𑀢𑀺𑀝𑁆𑀞𑀢𑀺, 𑀏𑀯𑀁 𑀢𑀣𑀸𑀕𑀢𑁄𑀧𑀺 𑀤𑀲𑀳𑀺 𑀢𑀣𑀸𑀕𑀢𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀘𑀢𑀽𑀳𑀺 𑀯𑁂𑀲𑀸𑀭𑀚𑁆𑀚𑀧𑀸𑀤𑁂𑀳𑀺 𑀅𑀝𑁆𑀞𑀧𑀭𑀺𑀲𑀧𑀣𑀯𑀺𑀁 𑀉𑀧𑁆𑀧𑀻𑀴𑁂𑀢𑁆𑀯𑀸 𑀲𑀤𑁂𑀯𑀓𑁂 𑀮𑁄𑀓𑁂 𑀓𑁂𑀦𑀘𑀺 𑀧𑀘𑁆𑀘𑀢𑁆𑀣𑀺𑀓𑁂𑀦 𑀧𑀘𑁆𑀘𑀸𑀫𑀺𑀢𑁆𑀢𑁂𑀦 𑀅𑀓𑀫𑁆𑀧𑀺𑀬𑁄 𑀅𑀘𑀮𑀝𑁆𑀞𑀸𑀦𑁂𑀦 𑀢𑀺𑀝𑁆𑀞𑀢𑀺. 𑀏𑀯𑀁 𑀢𑀺𑀝𑁆𑀞𑀫𑀸𑀦𑁄 𑀘 𑀢𑀁 𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀺 𑀉𑀧𑀕𑀘𑁆𑀙𑀢𑀺 𑀦 𑀧𑀘𑁆𑀘𑀓𑁆𑀔𑀸𑀢𑀺, 𑀅𑀢𑁆𑀢𑀦𑀺 𑀆𑀭𑁄𑀧𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀆𑀲𑀪𑀁 𑀞𑀸𑀦𑀁 𑀧𑀝𑀺𑀚𑀸𑀦𑀸𑀢𑀻’’𑀢𑀺.

𑀧𑀭𑀺𑀲𑀸𑀲𑀽𑀢𑀺 ‘‘𑀅𑀝𑁆𑀞 𑀔𑁄 𑀇𑀫𑀸, 𑀲𑀸𑀭𑀺𑀧𑀼𑀢𑁆𑀢, 𑀧𑀭𑀺𑀲𑀸. 𑀓𑀢𑀫𑀸 𑀅𑀝𑁆𑀞? 𑀔𑀢𑁆𑀢𑀺𑀬𑀧𑀭𑀺𑀲𑀸 𑀩𑁆𑀭𑀸𑀳𑁆𑀫𑀡𑀧𑀭𑀺𑀲𑀸 𑀕𑀳𑀧𑀢𑀺𑀧𑀭𑀺𑀲𑀸 𑀲𑀫𑀡𑀧𑀭𑀺𑀲𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀧𑀭𑀺𑀲𑀸 𑀢𑀸𑀯𑀢𑀺𑀁𑀲𑀧𑀭𑀺𑀲𑀸 𑀫𑀸𑀭𑀧𑀭𑀺𑀲𑀸 𑀩𑁆𑀭𑀳𑁆𑀫𑀧𑀭𑀺𑀲𑀸’’𑀢𑀺, 𑀇𑀫𑀸𑀲𑀼 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼. 𑀲𑀻𑀳𑀦𑀸𑀤𑀁 𑀦𑀤𑀢𑀻𑀢𑀺 𑀲𑁂𑀝𑁆𑀞𑀦𑀸𑀤𑀁 𑀅𑀪𑀻𑀢𑀦𑀸𑀤𑀁 𑀦𑀤𑀢𑀺, 𑀲𑀻𑀳𑀦𑀸𑀤𑀲𑀤𑀺𑀲𑀁 𑀯𑀸 𑀦𑀸𑀤𑀁 𑀦𑀤𑀢𑀺. 𑀅𑀬𑀫𑀢𑁆𑀣𑁄 𑀲𑀻𑀳𑀦𑀸𑀤𑀲𑀼𑀢𑁆𑀢𑁂𑀦 𑀤𑀻𑀧𑁂𑀢𑀩𑁆𑀩𑁄. 𑀬𑀣𑀸 𑀯𑀸 𑀲𑀻𑀳𑁄 𑀲𑀳𑀦𑀢𑁄 𑀘𑁂𑀯 𑀳𑀦𑀦𑀢𑁄 𑀘 𑀲𑀻𑀳𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀢𑀣𑀸𑀕𑀢𑁄 𑀮𑁄𑀓𑀥𑀫𑁆𑀫𑀸𑀦𑀁 𑀲𑀳𑀦𑀢𑁄 𑀧𑀭𑀧𑁆𑀧𑀯𑀸𑀤𑀸𑀦𑀜𑁆𑀘 𑀳𑀦𑀦𑀢𑁄 𑀲𑀻𑀳𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀯𑀼𑀢𑁆𑀢𑀲𑁆𑀲 𑀲𑀻𑀳𑀲𑁆𑀲 𑀦𑀸𑀤𑀁 𑀲𑀻𑀳𑀦𑀸𑀤𑀁. 𑀢𑀢𑁆𑀣 𑀬𑀣𑀸 𑀲𑀻𑀳𑁄 𑀲𑀻𑀳𑀩𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀩𑁆𑀩𑀢𑁆𑀣 𑀯𑀺𑀲𑀸𑀭𑀤𑁄 𑀯𑀺𑀕𑀢𑀮𑁄𑀫𑀳𑀁𑀲𑁄 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀏𑀯𑀁 𑀢𑀣𑀸𑀕𑀢𑀲𑀻𑀳𑁄𑀧𑀺 𑀢𑀣𑀸𑀕𑀢𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀯𑀺𑀲𑀸𑀭𑀤𑁄 𑀯𑀺𑀕𑀢𑀮𑁄𑀫𑀳𑀁𑀲𑁄, ‘‘𑀇𑀢𑀺 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀦𑀸𑀦𑀸𑀯𑀺𑀥𑀤𑁂𑀲𑀦𑀸𑀯𑀺𑀮𑀸𑀲𑀲𑀫𑁆𑀧𑀦𑁆𑀦𑀁 𑀲𑀻𑀳𑀦𑀸𑀤𑀁 𑀦𑀤𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀭𑀺𑀲𑀸𑀲𑀼 𑀲𑀻𑀳𑀦𑀸𑀤𑀁 𑀦𑀤𑀢𑀻’’𑀢𑀺.

𑀩𑁆𑀭𑀳𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀻𑀢𑀺 𑀏𑀢𑁆𑀣 𑀩𑁆𑀭𑀳𑁆𑀫𑀦𑁆𑀢𑀺 𑀲𑁂𑀝𑁆𑀞𑀁 𑀉𑀢𑁆𑀢𑀫𑀁, 𑀯𑀺𑀲𑀼𑀤𑁆𑀥𑀲𑁆𑀲 𑀥𑀫𑁆𑀫𑀘𑀓𑁆𑀓𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑀁 𑀧𑀦 𑀥𑀫𑁆𑀫𑀘𑀓𑁆𑀓𑀁 𑀤𑀼𑀯𑀺𑀥𑀁 𑀳𑁄𑀢𑀺 𑀧𑀝𑀺𑀯𑁂𑀥𑀜𑀸𑀡𑀜𑁆𑀘 𑀤𑁂𑀲𑀦𑀸𑀜𑀸𑀡𑀜𑁆𑀘. 𑀢𑀢𑁆𑀣 𑀧𑀜𑁆𑀜𑀸𑀧𑀪𑀸𑀯𑀺𑀢𑀁 𑀅𑀢𑁆𑀢𑀦𑁄 𑀅𑀭𑀺𑀬𑀨𑀮𑀸𑀯𑀳𑀁 𑀧𑀝𑀺𑀯𑁂𑀥𑀜𑀸𑀡𑀁, 𑀓𑀭𑀼𑀡𑀸𑀧𑀪𑀸𑀯𑀺𑀢𑀁 𑀲𑀸𑀯𑀓𑀸𑀦𑀁 𑀅𑀭𑀺𑀬𑀨𑀮𑀸𑀯𑀳𑀁 𑀤𑁂𑀲𑀦𑀸𑀜𑀸𑀡𑀁. 𑀢𑀢𑁆𑀣 𑀧𑀝𑀺𑀯𑁂𑀥𑀜𑀸𑀡𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀜𑁆𑀳𑀺 𑀅𑀪𑀺𑀦𑀺𑀓𑁆𑀔𑀫𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫. 𑀢𑀼𑀲𑀺𑀢𑀪𑀯𑀦𑀢𑁄 𑀯𑀸 𑀬𑀸𑀯 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀅𑀭𑀳𑀢𑁆𑀢𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫. 𑀤𑀻𑀧𑀗𑁆𑀓𑀭𑀢𑁄 𑀯𑀸 𑀧𑀝𑁆𑀞𑀸𑀬 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀦𑀸𑀫. 𑀤𑁂𑀲𑀦𑀸𑀜𑀸𑀡𑀫𑁆𑀧𑀺 𑀧𑀯𑀢𑁆𑀢𑀫𑀸𑀦𑀁 𑀧𑀯𑀢𑁆𑀢𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀜𑁆𑀳𑀺 𑀬𑀸𑀯 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀸 𑀧𑀯𑀢𑁆𑀢𑀫𑀸𑀦𑀁, 𑀨𑀮𑀓𑁆𑀔𑀡𑁂 𑀧𑀯𑀢𑁆𑀢𑀁 𑀦𑀸𑀫. 𑀢𑁂𑀲𑀼 𑀧𑀝𑀺𑀯𑁂𑀥𑀜𑀸𑀡𑀁 𑀮𑁄𑀓𑀼𑀢𑁆𑀢𑀭𑀁, 𑀤𑁂𑀲𑀦𑀸𑀜𑀸𑀡𑀁 𑀮𑁄𑀓𑀺𑀬𑀁. 𑀉𑀪𑀬𑀫𑁆𑀧𑀺 𑀧𑀦𑁂𑀢𑀁 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀁 𑀩𑀼𑀤𑁆𑀥𑀸𑀦𑀁𑀬𑁂𑀯 𑀑𑀭𑀲𑀜𑀸𑀡𑀁.

𑀇𑀤𑀸𑀦𑀺 𑀬𑀁 𑀇𑀫𑀺𑀦𑀸 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀇𑀢𑀺 𑀭𑀽𑀧𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀢𑀺 𑀭𑀽𑀧𑀦𑁆𑀢𑀺 𑀇𑀤𑀁 𑀭𑀽𑀧𑀁 𑀏𑀢𑁆𑀢𑀓𑀁 𑀭𑀽𑀧𑀁, 𑀇𑀢𑁄 𑀉𑀤𑁆𑀥𑀁 𑀭𑀽𑀧𑀁 𑀦𑀢𑁆𑀣𑀻𑀢𑀺 𑀭𑀼𑀧𑁆𑀧𑀦𑀲𑀪𑀸𑀯𑀜𑁆𑀘𑁂𑀯 𑀪𑀽𑀢𑀼𑀧𑀸𑀤𑀸𑀬𑀪𑁂𑀤𑀜𑁆𑀘 𑀆𑀤𑀺𑀁 𑀓𑀢𑁆𑀯𑀸 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀯𑀲𑁂𑀦 𑀅𑀦𑀯𑀲𑁂𑀲𑀭𑀽𑀧𑀧𑀭𑀺𑀕𑁆𑀕𑀳𑁄 𑀯𑀼𑀢𑁆𑀢𑁄. 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄𑀢𑀺 𑀇𑀫𑀺𑀦𑀸 𑀏𑀯𑀁 𑀧𑀭𑀺𑀕𑁆𑀕𑀳𑀺𑀢𑀲𑁆𑀲 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄 𑀯𑀼𑀢𑁆𑀢𑁄. 𑀢𑀢𑁆𑀣 𑀇𑀢𑀻𑀢𑀺 𑀏𑀯𑀁 𑀲𑀫𑀼𑀤𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀯𑀺𑀢𑁆𑀣𑀸𑀭𑁄 ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄 𑀢𑀡𑁆𑀳𑀸𑀲𑀫𑀼𑀤𑀬𑀸, 𑀓𑀫𑁆𑀫𑀲𑀫𑀼𑀤𑀬𑀸 𑀆𑀳𑀸𑀭𑀲𑀫𑀼𑀤𑀬𑀸 𑀭𑀽𑀧𑀲𑀫𑀼𑀤𑀬𑁄𑀢𑀺 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀉𑀤𑀬𑀁 𑀧𑀲𑁆𑀲𑀢𑀻’’𑀢𑀺 (𑀧𑀝𑀺. 𑀫. 𑁧.𑁫𑁦) 𑀏𑀯𑀁 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀣𑀗𑁆𑀕𑀫𑁂𑀧𑀺 ‘‘𑀅𑀯𑀺𑀚𑁆𑀚𑀸𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄…𑀧𑁂… 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁 𑀧𑀲𑁆𑀲𑀦𑁆𑀢𑁄𑀧𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑀁 𑀧𑀲𑁆𑀲𑀢𑀻’’𑀢𑀺 𑀅𑀬𑀁 𑀯𑀺𑀢𑁆𑀣𑀸𑀭𑁄.

𑀇𑀢𑀺 𑀯𑁂𑀤𑀦𑀸𑀢𑀺𑀆𑀤𑀻𑀲𑀼𑀧𑀺 𑀅𑀬𑀁 𑀯𑁂𑀤𑀦𑀸 𑀏𑀢𑁆𑀢𑀓𑀸 𑀯𑁂𑀤𑀦𑀸, 𑀇𑀢𑁄 𑀉𑀤𑁆𑀥𑀁 𑀯𑁂𑀤𑀦𑀸 𑀦𑀢𑁆𑀣𑀺, 𑀅𑀬𑀁 𑀲𑀜𑁆𑀜𑀸, 𑀇𑀫𑁂 𑀲𑀗𑁆𑀔𑀸𑀭𑀸, 𑀇𑀤𑀁 𑀯𑀺𑀜𑁆𑀜𑀸𑀡𑀁 𑀏𑀢𑁆𑀢𑀓𑀁 𑀯𑀺𑀜𑁆𑀜𑀸𑀡𑀁, 𑀇𑀢𑁄 𑀉𑀤𑁆𑀥𑀁 𑀯𑀺𑀜𑁆𑀜𑀸𑀡𑀁 𑀦𑀢𑁆𑀣𑀻𑀢𑀺 𑀯𑁂𑀤𑀬𑀺𑀢𑀲𑀜𑁆𑀚𑀸𑀦𑀦𑀅𑀪𑀺𑀲𑀗𑁆𑀔𑀭𑀡𑀯𑀺𑀚𑀸𑀦𑀦𑀲𑀪𑀸𑀯𑀜𑁆𑀘𑁂𑀯 𑀲𑀼𑀔𑀸𑀤𑀺𑀭𑀽𑀧𑀲𑀜𑁆𑀜𑀸𑀤𑀺𑀨𑀲𑁆𑀲𑀸𑀤𑀺𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀪𑁂𑀤𑀜𑁆𑀘 𑀆𑀤𑀺𑀁 𑀓𑀢𑁆𑀯𑀸 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀯𑀲𑁂𑀦 𑀅𑀦𑀯𑀲𑁂𑀲𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀧𑀭𑀺𑀕𑁆𑀕𑀳𑁄 𑀯𑀼𑀢𑁆𑀢𑁄. 𑀇𑀢𑀺 𑀯𑁂𑀤𑀦𑀸𑀬 𑀲𑀫𑀼𑀤𑀬𑁄𑀢𑀺𑀆𑀤𑀻𑀳𑀺 𑀧𑀦 𑀏𑀯𑀁 𑀧𑀭𑀺𑀕𑁆𑀕𑀳𑀺𑀢𑀸𑀦𑀁 𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀸𑀦𑀁 𑀲𑀫𑀼𑀤𑀬𑁄 𑀯𑀼𑀢𑁆𑀢𑁄. 𑀢𑀢𑁆𑀭𑀸𑀧𑀺 𑀇𑀢𑀻𑀢𑀺 𑀏𑀯𑀁 𑀲𑀫𑀼𑀤𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀲𑀫𑁆𑀧𑀺 𑀯𑀺𑀢𑁆𑀣𑀸𑀭𑁄 ‘‘𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑀸 𑀯𑁂𑀤𑀦𑀸𑀲𑀫𑀼𑀤𑀬𑁄’’𑀢𑀺 (𑀧𑀝𑀺. 𑀫. 𑁧.𑁫𑁦) 𑀭𑀽𑀧𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀢𑀻𑀲𑀼 𑀔𑀦𑁆𑀥𑁂𑀲𑀼 ‘‘𑀆𑀳𑀸𑀭𑀲𑀫𑀼𑀤𑀬𑀸’’𑀢𑀺 𑀅𑀯𑀢𑁆𑀯𑀸 ‘‘𑀨𑀲𑁆𑀲𑀲𑀫𑀼𑀤𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀁, 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂 ‘‘𑀦𑀸𑀫𑀭𑀽𑀧𑀲𑀫𑀼𑀤𑀬𑀸’’𑀢𑀺. 𑀅𑀢𑁆𑀣𑀗𑁆𑀕𑀫𑀧𑀤𑀫𑁆𑀧𑀺 𑀢𑁂𑀲𑀁𑀬𑁂𑀯 𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀉𑀤𑀬𑀩𑁆𑀩𑀬𑀯𑀺𑀦𑀺𑀘𑁆𑀙𑀬𑁄 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑁄.

𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀻𑀢𑀺 𑀅𑀬𑀫𑁆𑀧𑀺 𑀅𑀧𑀭𑁄 𑀲𑀻𑀳𑀦𑀸𑀤𑁄. 𑀢𑀲𑁆𑀲𑀢𑁆𑀣𑁄 𑁋 𑀇𑀫𑀲𑁆𑀫𑀺𑀁 𑀅𑀯𑀺𑀚𑁆𑀚𑀸𑀤𑀺𑀓𑁂 𑀧𑀘𑁆𑀘𑀬𑁂 𑀲𑀢𑀺 𑀇𑀤𑀁 𑀲𑀗𑁆𑀔𑀸𑀭𑀸𑀤𑀺𑀓𑀁 𑀨𑀮𑀁 𑀳𑁄𑀢𑀺. 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀫𑀲𑁆𑀲 𑀅𑀯𑀺𑀚𑁆𑀚𑀸𑀤𑀺𑀓𑀲𑁆𑀲 𑀧𑀘𑁆𑀘𑀬𑀲𑁆𑀲 𑀉𑀧𑁆𑀧𑀸𑀤𑀸 𑀇𑀤𑀁 𑀲𑀗𑁆𑀔𑀸𑀭𑀸𑀤𑀺𑀓𑀁 𑀨𑀮𑀁 𑀉𑀧𑁆𑀧𑀚𑁆𑀚𑀢𑀺. 𑀇𑀫𑀲𑁆𑀫𑀺𑀁 𑀅𑀲𑀢𑀺 𑀇𑀤𑀁 𑀦 𑀳𑁄𑀢𑀻𑀢𑀺 𑀇𑀫𑀲𑁆𑀫𑀺𑀁 𑀅𑀯𑀺𑀚𑁆𑀚𑀸𑀤𑀺𑀓𑁂 𑀧𑀘𑁆𑀘𑀬𑁂 𑀅𑀲𑀢𑀺 𑀇𑀤𑀁 𑀲𑀗𑁆𑀔𑀸𑀭𑀸𑀤𑀺𑀓𑀁 𑀨𑀮𑀁 𑀦 𑀳𑁄𑀢𑀺. 𑀇𑀫𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀇𑀫𑀲𑁆𑀲 𑀅𑀯𑀺𑀚𑁆𑀚𑀸𑀤𑀺𑀓𑀲𑁆𑀲 𑀧𑀘𑁆𑀘𑀬𑀲𑁆𑀲 𑀦𑀺𑀭𑁄𑀥𑀸 𑀇𑀤𑀁 𑀲𑀗𑁆𑀔𑀸𑀭𑀸𑀤𑀺𑀓𑀁 𑀨𑀮𑀁 𑀦𑀺𑀭𑀼𑀚𑁆𑀛𑀢𑀺. 𑀇𑀤𑀸𑀦𑀺 𑀬𑀣𑀸 𑀢𑀁 𑀳𑁄𑀢𑀺 𑀘𑁂𑀯 𑀦𑀺𑀭𑀼𑀚𑁆𑀛𑀢𑀺 𑀘, 𑀢𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 𑀬𑀤𑀺𑀤𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺𑀆𑀤𑀺𑀫𑀸𑀳.

𑀏𑀯𑀁 𑀲𑁆𑀯𑀸𑀓𑁆𑀔𑀸𑀢𑁄𑀢𑀺 𑀏𑀯𑀁 𑀧𑀜𑁆𑀘𑀓𑁆𑀔𑀦𑁆𑀥𑀯𑀺𑀪𑀚𑀦𑀸𑀤𑀺𑀯𑀲𑁂𑀦 𑀲𑀼𑀝𑁆𑀞𑀼 𑀅𑀓𑁆𑀔𑀸𑀢𑁄 𑀓𑀣𑀺𑀢𑁄. 𑀥𑀫𑁆𑀫𑁄𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀧𑀘𑁆𑀘𑀬𑀸𑀓𑀸𑀭𑀥𑀫𑁆𑀫𑁄. 𑀉𑀢𑁆𑀢𑀸𑀦𑁄𑀢𑀺 𑀅𑀦𑀺𑀓𑀼𑀚𑁆𑀚𑀺𑀢𑁄. 𑀯𑀺𑀯𑀝𑁄𑀢𑀺 𑀯𑀺𑀯𑀭𑀺𑀢𑁆𑀯𑀸 𑀞𑀧𑀺𑀢𑁄. 𑀧𑀓𑀸𑀲𑀺𑀢𑁄𑀢𑀺 𑀤𑀻𑀧𑀺𑀢𑁄 𑀚𑁄𑀢𑀺𑀢𑁄. 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑁄𑀢𑀺 𑀧𑀺𑀮𑁄𑀢𑀺𑀓𑀸 𑀯𑀼𑀘𑁆𑀘𑀢𑀺 𑀙𑀺𑀦𑁆𑀦𑀁 𑀪𑀺𑀦𑁆𑀦𑀁 𑀢𑀢𑁆𑀣 𑀢𑀢𑁆𑀣 𑀲𑀺𑀩𑁆𑀩𑀺𑀢𑀕𑀡𑁆𑀞𑀺𑀢𑀁 𑀚𑀺𑀡𑁆𑀡𑀯𑀢𑁆𑀣𑀁, 𑀢𑀁 𑀬𑀲𑁆𑀲 𑀦𑀢𑁆𑀣𑀻𑀢𑀺 𑀅𑀝𑁆𑀞𑀳𑀢𑁆𑀣𑀁 𑀦𑀯𑀳𑀢𑁆𑀣𑀁 𑀯𑀸 𑀅𑀳𑀢𑀲𑀸𑀝𑀓𑀁 𑀦𑀺𑀯𑀢𑁆𑀣𑁄, 𑀲𑁄 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑁄 𑀦𑀸𑀫. 𑀅𑀬𑀫𑁆𑀧𑀺 𑀥𑀫𑁆𑀫𑁄 𑀢𑀸𑀤𑀺𑀲𑁄. 𑀦 𑀳𑁂𑀢𑁆𑀣 𑀓𑁄𑀳𑀜𑁆𑀜𑀸𑀤𑀺𑀯𑀲𑁂𑀦 𑀙𑀺𑀦𑁆𑀦𑀪𑀺𑀦𑁆𑀦𑀲𑀺𑀩𑁆𑀩𑀺𑀢𑀕𑀡𑁆𑀞𑀺𑀢𑀪𑀸𑀯𑁄 𑀅𑀢𑁆𑀣𑀺. 𑀅𑀧𑀺𑀘 𑀔𑀼𑀤𑁆𑀤𑀓𑀲𑀸𑀝𑀓𑁄𑀧𑀺 𑀧𑀺𑀮𑁄𑀢𑀺𑀓𑀸𑀢𑀺 𑀯𑀼𑀘𑁆𑀘𑀢𑀺, 𑀲𑀸 𑀬𑀲𑁆𑀲 𑀦𑀢𑁆𑀣𑀺, 𑀅𑀝𑁆𑀞𑀦𑀯𑀳𑀢𑁆𑀣𑁄 𑀫𑀳𑀸𑀧𑀝𑁄 𑀅𑀢𑁆𑀣𑀺, 𑀲𑁄𑀧𑀺 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑁄, 𑀅𑀧𑀕𑀢𑀧𑀺𑀮𑁄𑀢𑀺𑀓𑁄𑀢𑀺 𑀅𑀢𑁆𑀣𑁄. 𑀢𑀸𑀤𑀺𑀲𑁄 𑀅𑀬𑀁 𑀥𑀫𑁆𑀫𑁄. 𑀬𑀣𑀸 𑀳𑀺 𑀘𑀢𑀼𑀳𑀢𑁆𑀣𑀁 𑀲𑀸𑀝𑀓𑀁 𑀕𑀳𑁂𑀢𑁆𑀯𑀸 𑀧𑀭𑀺𑀕𑁆𑀕𑀳𑀡𑀁 𑀓𑀭𑁄𑀦𑁆𑀢𑁄 𑀧𑀼𑀭𑀺𑀲𑁄 𑀇𑀢𑁄 𑀘𑀺𑀢𑁄 𑀘 𑀅𑀜𑁆𑀙𑀦𑁆𑀢𑁄 𑀓𑀺𑀮𑀫𑀢𑀺, 𑀏𑀯𑀁 𑀩𑀸𑀳𑀺𑀭𑀓𑀲𑀫𑀬𑁂 𑀧𑀩𑁆𑀩𑀚𑀺𑀢𑀸 𑀅𑀢𑁆𑀢𑀦𑁄 𑀧𑀭𑀺𑀢𑁆𑀢𑀓𑀁 𑀥𑀫𑁆𑀫𑀁 ‘‘𑀏𑀯𑀁 𑀲𑀢𑀺 𑀏𑀯𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀓𑀧𑁆𑀧𑁂𑀢𑁆𑀯𑀸 𑀓𑀧𑁆𑀧𑁂𑀢𑁆𑀯𑀸 𑀯𑀟𑁆𑀠𑁂𑀦𑁆𑀢𑀸 𑀓𑀺𑀮𑀫𑀦𑁆𑀢𑀺. 𑀬𑀣𑀸 𑀧𑀦 𑀅𑀝𑁆𑀞𑀳𑀢𑁆𑀣𑀦𑀯𑀳𑀢𑁆𑀣𑁂𑀦 𑀧𑀭𑀺𑀕𑁆𑀕𑀳𑀡𑀁 𑀓𑀭𑁄𑀦𑁆𑀢𑁄 𑀬𑀣𑀸𑀭𑀼𑀘𑀺 𑀧𑀸𑀭𑀼𑀧𑀢𑀺 𑀦 𑀓𑀺𑀮𑀫𑀢𑀺, 𑀦𑀢𑁆𑀣𑀺 𑀢𑀢𑁆𑀣 𑀅𑀜𑁆𑀙𑀺𑀢𑁆𑀯𑀸 𑀯𑀟𑁆𑀠𑀦𑀓𑀺𑀘𑁆𑀘𑀁; 𑀏𑀯𑀁 𑀇𑀫𑀲𑁆𑀫𑀺𑀫𑁆𑀧𑀺 𑀥𑀫𑁆𑀫𑁂 𑀓𑀧𑁆𑀧𑁂𑀢𑁆𑀯𑀸 𑀓𑀧𑁆𑀧𑁂𑀢𑁆𑀯𑀸 𑀯𑀺𑀪𑀚𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀢𑁂𑀳𑀺 𑀢𑁂𑀳𑀺 𑀓𑀸𑀭𑀡𑁂𑀳𑀺 𑀫𑀬𑀸𑀯 𑀅𑀬𑀁 𑀥𑀫𑁆𑀫𑁄 𑀲𑀼𑀯𑀺𑀪𑀢𑁆𑀢𑁄 𑀲𑀼𑀯𑀺𑀢𑁆𑀣𑀸𑀭𑀺𑀢𑁄𑀢𑀺 𑀇𑀤𑀫𑁆𑀧𑀺 𑀲𑀦𑁆𑀥𑀸𑀬 ‘‘𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑁄’’𑀢𑀺 𑀆𑀳. 𑀅𑀧𑀺𑀘 𑀓𑀘𑀯𑀭𑁄𑀧𑀺 𑀧𑀺𑀮𑁄𑀢𑀺𑀓𑀸𑀢𑀺 𑀯𑀼𑀘𑁆𑀘𑀢𑀺, 𑀇𑀫𑀲𑁆𑀫𑀺𑀜𑁆𑀘 𑀲𑀸𑀲𑀦𑁂 𑀲𑀫𑀡𑀓𑀘𑀯𑀭𑀁 𑀦𑀸𑀫 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀮𑀪𑀢𑀺. 𑀢𑁂𑀦𑁂𑀯𑀸𑀳 𑁋

‘‘𑀓𑀸𑀭𑀡𑁆𑀟𑀯𑀁 𑀦𑀺𑀤𑁆𑀥𑀫𑀣, 𑀓𑀲𑀫𑁆𑀩𑀼𑀁 𑀅𑀧𑀓𑀲𑁆𑀲𑀣;

𑀢𑀢𑁄 𑀧𑀮𑀸𑀧𑁂 𑀯𑀸𑀳𑁂𑀣, 𑀅𑀲𑁆𑀲𑀫𑀡𑁂 𑀲𑀫𑀡𑀫𑀸𑀦𑀺𑀦𑁂.

‘‘𑀦𑀺𑀤𑁆𑀥𑀫𑀺𑀢𑁆𑀯𑀸𑀦 𑀧𑀸𑀧𑀺𑀘𑁆𑀙𑁂, 𑀧𑀸𑀧𑀆𑀘𑀸𑀭𑀕𑁄𑀘𑀭𑁂;

𑀲𑀼𑀤𑁆𑀥𑀸 𑀲𑀼𑀤𑁆𑀥𑁂𑀳𑀺 𑀲𑀁𑀯𑀸𑀲𑀁, 𑀓𑀧𑁆𑀧𑀬𑀯𑁆𑀳𑁄 𑀧𑀢𑀺𑀲𑁆𑀲𑀢𑀸;

𑀢𑀢𑁄 𑀲𑀫𑀕𑁆𑀕𑀸 𑀦𑀺𑀧𑀓𑀸, 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀣𑀸’’𑀢𑀺. (𑀅. 𑀦𑀺. 𑁮.𑁧𑁦);

𑀇𑀢𑀺 𑀲𑀫𑀡𑀓𑀘𑀯𑀭𑀲𑁆𑀲 𑀙𑀺𑀦𑁆𑀦𑀢𑁆𑀢𑀸𑀧𑀺 𑀅𑀬𑀁 𑀥𑀫𑁆𑀫𑁄 𑀙𑀺𑀦𑁆𑀦𑀧𑀺𑀮𑁄𑀢𑀺𑀓𑁄 𑀦𑀸𑀫 𑀳𑁄𑀢𑀺.

𑀅𑀮𑀫𑁂𑀯𑀸𑀢𑀺 𑀬𑀼𑀢𑁆𑀢𑀫𑁂𑀯. 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑁂𑀦𑀸𑀢𑀺 𑀲𑀤𑁆𑀥𑀸𑀬 𑀧𑀩𑁆𑀩𑀚𑀺𑀢𑁂𑀦. 𑀓𑀼𑀮𑀧𑀼𑀢𑁆𑀢𑁂𑀦𑀸𑀢𑀺 𑀤𑁆𑀯𑁂 𑀓𑀼𑀮𑀧𑀼𑀢𑁆𑀢𑀸 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑁄 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑁄 𑀘. 𑀢𑀢𑁆𑀣 𑀬𑁄 𑀬𑀢𑁄 𑀓𑀼𑀢𑁄𑀘𑀺 𑀓𑀼𑀮𑀸 𑀧𑀩𑁆𑀩𑀚𑀺𑀢𑁆𑀯𑀸 𑀲𑀻𑀮𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀓𑁆𑀔𑀦𑁆𑀥𑁂 𑀧𑀽𑀭𑁂𑀢𑀺, 𑀅𑀬𑀁 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑁄 𑀦𑀸𑀫. 𑀬𑁄 𑀧𑀦 𑀬𑀲𑀓𑀼𑀮𑀧𑀼𑀢𑁆𑀢𑀸𑀤𑀬𑁄 𑀯𑀺𑀬 𑀚𑀸𑀢𑀺𑀲𑀫𑁆𑀧𑀦𑁆𑀦𑀓𑀼𑀮𑀸 𑀧𑀩𑁆𑀩𑀚𑀺𑀢𑁄, 𑀅𑀬𑀁 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑁄 𑀦𑀸𑀫. 𑀢𑁂𑀲𑀼 𑀇𑀥 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑁄 𑀅𑀥𑀺𑀧𑁆𑀧𑁂𑀢𑁄. 𑀲𑀘𑁂 𑀧𑀦 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑁄 𑀆𑀘𑀸𑀭𑀯𑀸 𑀳𑁄𑀢𑀺, 𑀅𑀬𑀁 𑀉𑀢𑁆𑀢𑀫𑁄𑀬𑁂𑀯. 𑀏𑀯𑀭𑀽𑀧𑁂𑀦 𑀓𑀼𑀮𑀧𑀼𑀢𑁆𑀢𑁂𑀦. 𑀯𑀻𑀭𑀺𑀬𑀁 𑀆𑀭𑀪𑀺𑀢𑀼𑀦𑁆𑀢𑀺 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀯𑀻𑀭𑀺𑀬𑀁 𑀓𑀸𑀢𑀼𑀁. 𑀇𑀤𑀸𑀦𑀺𑀲𑁆𑀲 𑀘𑀢𑀼𑀭𑀗𑁆𑀕𑀁 𑀤𑀲𑁆𑀲𑁂𑀦𑁆𑀢𑁄 𑀓𑀸𑀫𑀁 𑀢𑀘𑁄 𑀘𑀸𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀳𑀺 𑀢𑀘𑁄 𑀏𑀓𑀁 𑀅𑀗𑁆𑀕𑀁, 𑀦𑁆𑀳𑀸𑀭𑀼 𑀏𑀓𑀁, 𑀅𑀝𑁆𑀞𑀺 𑀏𑀓𑀁, 𑀫𑀁𑀲𑀮𑁄𑀳𑀺𑀢𑀁 𑀏𑀓𑀦𑁆𑀢𑀺. 𑀇𑀤𑀜𑁆𑀘 𑀧𑀦 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀳𑀦𑁆𑀢𑁂𑀦 𑀦𑀯𑀲𑀼 𑀞𑀸𑀦𑁂𑀲𑀼 𑀲𑀫𑀸𑀥𑀸𑀢𑀩𑁆𑀩𑀁 𑀧𑀼𑀭𑁂𑀪𑀢𑁆𑀢𑁂 𑀧𑀘𑁆𑀙𑀸𑀪𑀢𑁆𑀢𑁂 𑀧𑀼𑀭𑀺𑀫𑀬𑀸𑀫𑁂 𑀫𑀚𑁆𑀛𑀺𑀫𑀬𑀸𑀫𑁂 𑀧𑀘𑁆𑀙𑀺𑀫𑀬𑀸𑀫𑁂 𑀕𑀫𑀦𑁂 𑀞𑀸𑀦𑁂 𑀦𑀺𑀲𑀚𑁆𑀚𑀸𑀬 𑀲𑀬𑀦𑁂𑀢𑀺.

𑀤𑀼𑀓𑁆𑀔𑀁, 𑀪𑀺𑀓𑁆𑀔𑀯𑁂, 𑀓𑀼𑀲𑀻𑀢𑁄 𑀯𑀺𑀳𑀭𑀢𑀻𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀬𑁄 𑀓𑀼𑀲𑀻𑀢𑁄 𑀧𑀼𑀕𑁆𑀕𑀮𑁄, 𑀲𑁄 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺. 𑀩𑀸𑀳𑀺𑀭𑀲𑀫𑀬𑁂 𑀧𑀦 𑀬𑁄 𑀓𑀼𑀲𑀻𑀢𑁄, 𑀲𑁄 𑀲𑀼𑀔𑀁 𑀯𑀺𑀳𑀭𑀢𑀺. 𑀯𑁄𑀓𑀺𑀡𑁆𑀡𑁄𑀢𑀺 𑀫𑀺𑀲𑁆𑀲𑀻𑀪𑀽𑀢𑁄. 𑀲𑀤𑀢𑁆𑀣𑀦𑁆𑀢𑀺 𑀲𑁄𑀪𑀦𑀁 𑀯𑀸 𑀅𑀢𑁆𑀣𑀁 𑀲𑀓𑀁 𑀯𑀸 𑀅𑀢𑁆𑀣𑀁, 𑀉𑀪𑀬𑁂𑀦𑀸𑀧𑀺 𑀅𑀭𑀳𑀢𑁆𑀢𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀧𑀭𑀺𑀳𑀸𑀧𑁂𑀢𑀻𑀢𑀺 𑀳𑀸𑀧𑁂𑀢𑀺 𑀦 𑀧𑀸𑀧𑀼𑀡𑀸𑀢𑀺. 𑀓𑀼𑀲𑀻𑀢𑀧𑀼𑀕𑁆𑀕𑀮𑀲𑁆𑀲 𑀳𑀺 𑀙 𑀤𑁆𑀯𑀸𑀭𑀸𑀦𑀺 𑀅𑀕𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀻𑀡𑀺 𑀓𑀫𑁆𑀫𑀸𑀦𑀺 𑀅𑀧𑀭𑀺𑀲𑀼𑀤𑁆𑀥𑀸𑀦𑀺, 𑀆𑀚𑀻𑀯𑀝𑁆𑀞𑀫𑀓𑀁 𑀲𑀻𑀮𑀁 𑀅𑀧𑀭𑀺𑀬𑁄𑀤𑀸𑀢𑀁, 𑀪𑀺𑀦𑁆𑀦𑀸𑀚𑀻𑀯𑁄 𑀓𑀼𑀮𑀽𑀧𑀓𑁄 𑀳𑁄𑀢𑀺. 𑀲𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀅𑀓𑁆𑀔𑀺𑀫𑁆𑀳𑀺 𑀧𑀢𑀺𑀢𑀭𑀚𑀁 𑀯𑀺𑀬 𑀉𑀧𑀖𑀸𑀢𑀓𑀭𑁄 𑀳𑀼𑀢𑁆𑀯𑀸 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺, 𑀧𑀻𑀞𑀫𑀤𑁆𑀤𑀦𑁄 𑀘𑁂𑀯 𑀳𑁄𑀢𑀺 𑀮𑀡𑁆𑀟𑀧𑀽𑀭𑀓𑁄 𑀘, 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀤𑀼𑀮𑁆𑀮𑀪𑀁 𑀔𑀡𑀁 𑀯𑀺𑀭𑀸𑀥𑁂𑀢𑀺, 𑀢𑁂𑀦 𑀪𑀼𑀢𑁆𑀢𑁄 𑀭𑀝𑁆𑀞𑀧𑀺𑀡𑁆𑀟𑁄𑀧𑀺 𑀦 𑀫𑀳𑀧𑁆𑀨𑀮𑁄 𑀳𑁄𑀢𑀺.

𑀆𑀭𑀤𑁆𑀥𑀯𑀻𑀭𑀺𑀬𑁄 𑀘 𑀔𑁄, 𑀪𑀺𑀓𑁆𑀔𑀯𑁂𑀢𑀺 𑀆𑀭𑀤𑁆𑀥𑀯𑀻𑀭𑀺𑀬𑁄 𑀧𑀼𑀕𑁆𑀕𑀮𑁄 𑀇𑀫𑀲𑁆𑀫𑀺𑀁𑀬𑁂𑀯 𑀲𑀸𑀲𑀦𑁂 𑀲𑀼𑀔𑀁 𑀯𑀺𑀳𑀭𑀢𑀺. 𑀩𑀸𑀳𑀺𑀭𑀲𑀫𑀬𑁂 𑀧𑀦 𑀬𑁄 𑀆𑀭𑀤𑁆𑀥𑀯𑀻𑀭𑀺𑀬𑁄, 𑀲𑁄 𑀤𑀼𑀓𑁆𑀔𑀁 𑀯𑀺𑀳𑀭𑀢𑀺. 𑀧𑀯𑀺𑀯𑀺𑀢𑁆𑀢𑁄𑀢𑀺 𑀯𑀺𑀯𑀺𑀢𑁆𑀢𑁄 𑀯𑀺𑀬𑀼𑀢𑁆𑀢𑁄 𑀳𑀼𑀢𑁆𑀯𑀸. 𑀲𑀤𑀢𑁆𑀣𑀁 𑀧𑀭𑀺𑀧𑀽𑀭𑁂𑀢𑀻𑀢𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲 𑀳𑀺 𑀙 𑀤𑁆𑀯𑀸𑀭𑀸𑀦𑀺 𑀲𑀼𑀕𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀻𑀡𑀺 𑀓𑀫𑁆𑀫𑀸𑀦𑀺 𑀧𑀭𑀺𑀲𑀼𑀤𑁆𑀥𑀸𑀦𑀺, 𑀆𑀚𑀻𑀯𑀝𑁆𑀞𑀫𑀓𑀁 𑀲𑀻𑀮𑀁 𑀧𑀭𑀺𑀬𑁄𑀤𑀸𑀢𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀅𑀓𑁆𑀔𑀺𑀫𑁆𑀳𑀺 𑀲𑀼𑀲𑀻𑀢𑀮𑀜𑁆𑀚𑀦𑀁 𑀯𑀺𑀬 𑀥𑀸𑀢𑀼𑀕𑀢𑀘𑀦𑁆𑀤𑀦𑀁 𑀯𑀺𑀬 𑀘 𑀫𑀦𑀸𑀧𑁄 𑀳𑀼𑀢𑁆𑀯𑀸 𑀲𑀼𑀔𑀁 𑀯𑀺𑀳𑀭𑀢𑀺, 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀁 𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀲𑀢𑁆𑀣𑀸 𑀳𑀺 𑁋

‘‘𑀘𑀺𑀭𑀁 𑀚𑀻𑀯 𑀫𑀳𑀸𑀯𑀻𑀭, 𑀓𑀧𑁆𑀧𑀁 𑀢𑀺𑀝𑁆𑀞 𑀫𑀳𑀸𑀫𑀼𑀦𑀻’’𑀢𑀺 𑁋

𑀏𑀯𑀁 𑀕𑁄𑀢𑀫𑀺𑀬𑀸 𑀯𑀦𑁆𑀤𑀺𑀢𑁄, ‘‘𑀦 𑀔𑁄, 𑀕𑁄𑀢𑀫𑀺, 𑀢𑀣𑀸𑀕𑀢𑀸 𑀏𑀯𑀁 𑀯𑀦𑁆𑀤𑀺𑀢𑀩𑁆𑀩𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀸𑀬 𑀬𑀸𑀘𑀺𑀢𑁄 𑀯𑀦𑁆𑀤𑀺𑀢𑀩𑁆𑀩𑀸𑀓𑀸𑀭𑀁 𑀆𑀘𑀺𑀓𑁆𑀔𑀦𑁆𑀢𑁄 𑀏𑀯𑀫𑀸𑀳 𑁋

‘‘𑀆𑀭𑀤𑁆𑀥𑀯𑀻𑀭𑀺𑀬𑁂 𑀧𑀳𑀺𑀢𑀢𑁆𑀢𑁂, 𑀦𑀺𑀘𑁆𑀘𑀁 𑀤𑀴𑁆𑀳𑀧𑀭𑀓𑁆𑀓𑀫𑁂;

𑀲𑀫𑀕𑁆𑀕𑁂 𑀲𑀸𑀯𑀓𑁂 𑀧𑀲𑁆𑀲, 𑀏𑀲𑀸 𑀩𑀼𑀤𑁆𑀥𑀸𑀦 𑀯𑀦𑁆𑀤𑀦𑀸’’𑀢𑀺. (𑀅𑀧. 𑀣𑁂𑀭𑀻 𑁨.𑁨.𑁧𑁭𑁧);

𑀏𑀯𑀁 𑀆𑀭𑀤𑁆𑀥𑀯𑀻𑀭𑀺𑀬𑁄 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀁 𑀕𑀳𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀤𑀼𑀮𑁆𑀮𑀪𑀁 𑀔𑀡𑀁 𑀦 𑀯𑀺𑀭𑀸𑀥𑁂𑀢𑀺. 𑀢𑀲𑁆𑀲 𑀳𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀥𑀫𑁆𑀫𑀤𑁂𑀲𑀦𑀸 𑀲𑀗𑁆𑀖𑀲𑀼𑀧𑁆𑀧𑀝𑀺𑀧𑀢𑁆𑀢𑀺 𑀲𑀨𑀮𑀸 𑀳𑁄𑀢𑀺 𑀲𑀉𑀤𑁆𑀭𑀬𑀸, 𑀭𑀝𑁆𑀞𑀧𑀺𑀡𑁆𑀟𑁄𑀧𑀺 𑀢𑁂𑀦 𑀪𑀼𑀢𑁆𑀢𑁄 𑀫𑀳𑀧𑁆𑀨𑀮𑁄 𑀳𑁄𑀢𑀺.

𑀳𑀻𑀦𑁂𑀦 𑀅𑀕𑁆𑀕𑀲𑁆𑀲𑀸𑀢𑀺 𑀳𑀻𑀦𑀸𑀬 𑀲𑀤𑁆𑀥𑀸𑀬 𑀳𑀻𑀦𑁂𑀦 𑀯𑀻𑀭𑀺𑀬𑁂𑀦 𑀳𑀻𑀦𑀸𑀬 𑀲𑀢𑀺𑀬𑀸 𑀳𑀻𑀦𑁂𑀦 𑀲𑀫𑀸𑀥𑀺𑀦𑀸 𑀳𑀻𑀦𑀸𑀬 𑀧𑀜𑁆𑀜𑀸𑀬 𑀅𑀕𑁆𑀕𑀲𑀗𑁆𑀔𑀸𑀢𑀲𑁆𑀲 𑀅𑀭𑀳𑀢𑁆𑀢𑀲𑁆𑀲 𑀧𑀢𑁆𑀢𑀺 𑀦𑀸𑀫 𑀦 𑀳𑁄𑀢𑀺. 𑀅𑀕𑁆𑀕𑁂𑀦 𑀘 𑀔𑁄𑀢𑀺 𑀅𑀕𑁆𑀕𑁂𑀳𑀺 𑀲𑀤𑁆𑀥𑀸𑀤𑀻𑀳𑀺 𑀅𑀕𑁆𑀕𑀲𑁆𑀲 𑀅𑀭𑀳𑀢𑁆𑀢𑀲𑁆𑀲 𑀧𑀢𑁆𑀢𑀺 𑀳𑁄𑀢𑀺. 𑀫𑀡𑁆𑀟𑀧𑁂𑀬𑁆𑀬𑀦𑁆𑀢𑀺 𑀧𑀲𑀦𑁆𑀦𑀝𑁆𑀞𑁂𑀦 𑀫𑀡𑁆𑀟𑀁, 𑀧𑀸𑀢𑀩𑁆𑀩𑀝𑁆𑀞𑁂𑀦 𑀧𑁂𑀬𑁆𑀬𑀁. 𑀬𑀜𑁆𑀳𑀺 𑀧𑀺𑀯𑀺𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀬𑀁 𑀧𑀢𑀺𑀢𑁄 𑀯𑀺𑀲𑀜𑁆𑀜𑀻 𑀅𑀢𑁆𑀢𑀦𑁄 𑀲𑀸𑀝𑀓𑀸𑀤𑀻𑀦𑀫𑁆𑀧𑀺 𑀅𑀲𑁆𑀲𑀸𑀫𑀺𑀓𑁄 𑀳𑁄𑀢𑀺, 𑀢𑀁 𑀧𑀲𑀦𑁆𑀦𑀫𑁆𑀧𑀺 𑀦 𑀧𑀸𑀢𑀩𑁆𑀩𑀁, 𑀫𑀬𑁆𑀳𑀁 𑀧𑀦 𑀲𑀸𑀲𑀦𑀁 𑀏𑀯𑀁 𑀧𑀲𑀦𑁆𑀦𑀜𑁆𑀘 𑀧𑀸𑀢𑀩𑁆𑀩𑀜𑁆𑀘𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀡𑁆𑀟𑀧𑁂𑀬𑁆𑀬’’𑀦𑁆𑀢𑀺 𑀆𑀳.

𑀢𑀢𑁆𑀣 𑀢𑀺𑀯𑀺𑀥𑁄 𑀫𑀡𑁆𑀟𑁄 𑁋 𑀤𑁂𑀲𑀦𑀸𑀫𑀡𑁆𑀟𑁄, 𑀧𑀝𑀺𑀕𑁆𑀕𑀳𑀫𑀡𑁆𑀟𑁄, 𑀩𑁆𑀭𑀳𑁆𑀫𑀘𑀭𑀺𑀬𑀫𑀡𑁆𑀟𑁄𑀢𑀺. 𑀓𑀢𑀫𑁄 𑀤𑁂𑀲𑀦𑀸𑀫𑀡𑁆𑀟𑁄? 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀆𑀘𑀺𑀓𑁆𑀔𑀦𑀸 𑀤𑁂𑀲𑀦𑀸 𑀧𑀜𑁆𑀜𑀸𑀧𑀦𑀸 𑀧𑀝𑁆𑀞𑀧𑀦𑀸 𑀯𑀺𑀯𑀭𑀡𑀸 𑀯𑀺𑀪𑀚𑀦𑀸 𑀉𑀢𑁆𑀢𑀸𑀦𑀻𑀓𑀫𑁆𑀫𑀁, 𑀘𑀢𑀼𑀦𑁆𑀦𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀁…𑀧𑁂… 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀆𑀘𑀺𑀓𑁆𑀔𑀦𑀸…𑀧𑁂… 𑀉𑀢𑁆𑀢𑀸𑀦𑀻𑀓𑀫𑁆𑀫𑀁, 𑀅𑀬𑀁 𑀤𑁂𑀲𑀦𑀸𑀫𑀡𑁆𑀟𑁄. 𑀓𑀢𑀫𑁄 𑀧𑀝𑀺𑀕𑁆𑀕𑀳𑀫𑀡𑁆𑀟𑁄? 𑀪𑀺𑀓𑁆𑀔𑀽 𑀪𑀺𑀓𑁆𑀔𑀼𑀦𑀺𑀬𑁄 𑀉𑀧𑀸𑀲𑀓𑀸 𑀉𑀧𑀸𑀲𑀺𑀓𑀸𑀬𑁄 𑀤𑁂𑀯𑀸 𑀫𑀦𑀼𑀲𑁆𑀲𑀸 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 𑀓𑁂𑀘𑀺 𑀯𑀺𑀜𑁆𑀜𑀸𑀢𑀸𑀭𑁄, 𑀅𑀬𑀁 𑀧𑀝𑀺𑀕𑁆𑀕𑀳𑀫𑀡𑁆𑀟𑁄. 𑀓𑀢𑀫𑁄 𑀩𑁆𑀭𑀳𑁆𑀫𑀘𑀭𑀺𑀬𑀫𑀡𑁆𑀟𑁄? 𑀅𑀬𑀫𑁂𑀯 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀲𑀫𑁆𑀫𑀸𑀤𑀺𑀝𑁆𑀞𑀺…𑀧𑁂… 𑀲𑀫𑁆𑀫𑀸𑀲𑀫𑀸𑀥𑀺, 𑀅𑀬𑀁 𑀩𑁆𑀭𑀳𑁆𑀫𑀘𑀭𑀺𑀬𑀫𑀡𑁆𑀟𑁄. 𑀅𑀧𑀺𑀘 𑀅𑀥𑀺𑀫𑁄𑀓𑁆𑀔𑀫𑀡𑁆𑀟𑁄 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀅𑀲𑁆𑀲𑀤𑁆𑀥𑀺𑀬𑀁 𑀓𑀲𑀝𑁄, 𑀅𑀲𑁆𑀲𑀤𑁆𑀥𑀺𑀬𑀁 𑀓𑀲𑀝𑀁 𑀙𑀟𑁆𑀟𑁂𑀢𑁆𑀯𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑁄𑀓𑁆𑀔𑀫𑀡𑁆𑀟𑀁 𑀧𑀺𑀯𑀢𑀻𑀢𑀺 𑀫𑀡𑁆𑀟𑀧𑁂𑀬𑁆𑀬𑀦𑁆𑀢𑀺𑀆𑀤𑀺𑀦𑀸𑀧𑀺 (𑀧𑀝𑀺. 𑀫. 𑁧.𑁨𑁩𑁮) 𑀦𑀬𑁂𑀦𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀢𑁆𑀣𑀸 𑀲𑀫𑁆𑀫𑀼𑀔𑀻𑀪𑀽𑀢𑁄𑀢𑀺 𑀇𑀤𑀫𑁂𑀢𑁆𑀣 𑀓𑀸𑀭𑀡𑀯𑀘𑀦𑀁. 𑀬𑀲𑁆𑀫𑀸 𑀲𑀢𑁆𑀣𑀸 𑀲𑀫𑁆𑀫𑀼𑀔𑀻𑀪𑀽𑀢𑁄, 𑀢𑀲𑁆𑀫𑀸 𑀯𑀻𑀭𑀺𑀬𑀲𑀫𑁆𑀧𑀬𑁄𑀕𑀁 𑀓𑀢𑁆𑀯𑀸 𑀧𑀺𑀯𑀣 𑀏𑀢𑀁 𑀫𑀡𑁆𑀟𑀁. 𑀩𑀸𑀳𑀺𑀭𑀓𑀜𑁆𑀳𑀺 𑀪𑁂𑀲𑀚𑁆𑀚𑀫𑀡𑁆𑀟𑀫𑁆𑀧𑀺 𑀯𑁂𑀚𑁆𑀚𑀲𑁆𑀲 𑀅𑀲𑀫𑁆𑀫𑀼𑀔𑀸 𑀧𑀺𑀯𑀦𑁆𑀢𑀸𑀦𑀁 𑀧𑀫𑀸𑀡𑀁 𑀯𑀸 𑀉𑀕𑁆𑀕𑀫𑀦𑀁 𑀯𑀸 𑀦𑀺𑀕𑁆𑀕𑀫𑀦𑀁 𑀯𑀸 𑀦 𑀚𑀸𑀦𑀸𑀫𑀸𑀢𑀺 𑀆𑀲𑀗𑁆𑀓𑀸 𑀳𑁄𑀢𑀺. 𑀯𑁂𑀚𑁆𑀚𑀲𑀫𑁆𑀫𑀼𑀔𑀸 𑀧𑀦 ‘‘𑀯𑁂𑀚𑁆𑀚𑁄 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀦𑀺𑀭𑀸𑀲𑀗𑁆𑀓𑀸 𑀧𑀺𑀯𑀦𑁆𑀢𑀺. 𑀏𑀯𑀫𑁂𑀯 𑀅𑀫𑁆𑀳𑀸𑀓𑀁 𑀥𑀫𑁆𑀫𑀲𑁆𑀲𑀸𑀫𑀺 𑀲𑀢𑁆𑀣𑀸 𑀲𑀫𑁆𑀫𑀼𑀔𑀻𑀪𑀽𑀢𑁄𑀢𑀺 𑀯𑀻𑀭𑀺𑀬𑀁 𑀓𑀢𑁆𑀯𑀸 𑀧𑀺𑀯𑀣𑀸𑀢𑀺 𑀫𑀡𑁆𑀟𑀧𑀸𑀦𑁂 𑀦𑁂𑀲𑀁 𑀦𑀺𑀬𑁄𑀚𑁂𑀦𑁆𑀢𑁄 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀨𑀮𑀸𑀢𑀺 𑀲𑀸𑀦𑀺𑀲𑀁𑀲𑀸. 𑀲𑀉𑀤𑁆𑀭𑀬𑀸𑀢𑀺 𑀲𑀯𑀟𑁆𑀠𑀺. 𑀇𑀤𑀸𑀦𑀺 𑀦𑀺𑀬𑁄𑀚𑀦𑀸𑀦𑀼𑀭𑀽𑀧𑀁 𑀲𑀺𑀓𑁆𑀔𑀺𑀢𑀩𑁆𑀩𑀢𑀁 𑀦𑀺𑀤𑁆𑀤𑀺𑀲𑀦𑁆𑀢𑁄 𑀅𑀢𑁆𑀢𑀢𑁆𑀣𑀁 𑀯𑀸 𑀳𑀺, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀢𑁆𑀢𑀢𑁆𑀣𑀦𑁆𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀪𑀽𑀢𑀁 𑀅𑀭𑀳𑀢𑁆𑀢𑀁. 𑀅𑀧𑁆𑀧𑀫𑀸𑀤𑁂𑀦 𑀲𑀫𑁆𑀧𑀸𑀤𑁂𑀢𑀼𑀦𑁆𑀢𑀺 𑀅𑀧𑁆𑀧𑀫𑀸𑀤𑁂𑀦 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀸𑀢𑀼𑀁. 𑀧𑀭𑀢𑁆𑀣𑀦𑁆𑀢𑀺 𑀧𑀘𑁆𑀘𑀬𑀤𑀸𑀬𑀓𑀸𑀦𑀁 𑀫𑀳𑀧𑁆𑀨𑀮𑀸𑀦𑀺𑀲𑀁𑀲𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀤𑀼𑀢𑀺𑀬𑀁.

𑁩. 𑀉𑀧𑀦𑀺𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩. 𑀢𑀢𑀺𑀬𑁂 ‘‘𑀚𑀸𑀦𑀢𑁄 𑀅𑀳’’𑀦𑁆𑀢𑀺𑀆𑀤𑀻𑀲𑀼 𑀚𑀸𑀦𑀢𑁄𑀢𑀺 𑀚𑀸𑀦𑀦𑁆𑀢𑀲𑁆𑀲. 𑀧𑀲𑁆𑀲𑀢𑁄𑀢𑀺 𑀧𑀲𑁆𑀲𑀦𑁆𑀢𑀲𑁆𑀲. 𑀤𑁆𑀯𑁂𑀧𑀺 𑀧𑀤𑀸𑀦𑀺 𑀏𑀓𑀢𑁆𑀣𑀸𑀦𑀺, 𑀩𑁆𑀬𑀜𑁆𑀚𑀦𑀫𑁂𑀯 𑀦𑀸𑀦𑀁. 𑀏𑀯𑀁 𑀲𑀦𑁆𑀢𑁂𑀧𑀺 ‘‘𑀚𑀸𑀦𑀢𑁄’’𑀢𑀺 𑀜𑀸𑀡𑀮𑀓𑁆𑀔𑀡𑀁 𑀉𑀧𑀸𑀤𑀸𑀬 𑀧𑀼𑀕𑁆𑀕𑀮𑀁 𑀦𑀺𑀤𑁆𑀤𑀺𑀲𑀢𑀺. 𑀚𑀸𑀦𑀦𑀮𑀓𑁆𑀔𑀡𑀜𑁆𑀳𑀺 𑀜𑀸𑀡𑀁. ‘‘𑀧𑀲𑁆𑀲𑀢𑁄’’𑀢𑀺 𑀜𑀸𑀡𑀧𑁆𑀧𑀪𑀸𑀯𑀁 𑀉𑀧𑀸𑀤𑀸𑀬. 𑀧𑀲𑁆𑀲𑀦𑀧𑁆𑀧𑀪𑀸𑀯𑀜𑁆𑀳𑀺 𑀜𑀸𑀡𑀁, 𑀜𑀸𑀡𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀘𑀓𑁆𑀔𑀼𑀫𑀸 𑀯𑀺𑀬 𑀘𑀓𑁆𑀔𑀼𑀦𑀸 𑀭𑀽𑀧𑀸𑀦𑀺, 𑀜𑀸𑀡𑁂𑀦 𑀯𑀺𑀯𑀝𑁂 𑀥𑀫𑁆𑀫𑁂 𑀧𑀲𑁆𑀲𑀢𑀺. 𑀆𑀲𑀯𑀸𑀦𑀁 𑀔𑀬𑀦𑁆𑀢𑀺 𑀏𑀢𑁆𑀣 𑀆𑀲𑀯𑀸𑀦𑀁 𑀧𑀳𑀸𑀦𑀁 𑀅𑀲𑀫𑀼𑀧𑁆𑀧𑀸𑀤𑁄 𑀔𑀻𑀡𑀸𑀓𑀸𑀭𑁄 𑀦𑀢𑁆𑀣𑀺𑀪𑀸𑀯𑁄𑀢𑀺 𑀅𑀬𑀫𑁆𑀧𑀺 𑀆𑀲𑀯𑀓𑁆𑀔𑀬𑁄𑀢𑀺 𑀯𑀼𑀘𑁆𑀘𑀢𑀺, 𑀪𑀗𑁆𑀕𑁄𑀧𑀺 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺𑀧𑀺. ‘‘𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺’’𑀦𑁆𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁪𑁩𑁮; 𑀯𑀺𑀪. 𑁮𑁩𑁧) 𑀳𑀺 𑀔𑀻𑀡𑀸𑀓𑀸𑀭𑁄 𑀆𑀲𑀯𑀓𑁆𑀔𑀬𑁄𑀢𑀺 𑀯𑀼𑀘𑁆𑀘𑀢𑀺. ‘‘𑀬𑁄 𑀆𑀲𑀯𑀸𑀦𑀁 𑀔𑀬𑁄 𑀯𑀬𑁄 𑀪𑁂𑀤𑁄 𑀧𑀭𑀺𑀪𑁂𑀤𑁄 𑀅𑀦𑀺𑀘𑁆𑀘𑀢𑀸 𑀅𑀦𑁆𑀢𑀭𑀥𑀸𑀦’’𑀦𑁆𑀢𑀺 (𑀯𑀺𑀪. 𑁩𑁫𑁪) 𑀏𑀢𑁆𑀣 𑀪𑀗𑁆𑀕𑁄.

‘‘𑀲𑁂𑀓𑁆𑀔𑀲𑁆𑀲 𑀲𑀺𑀓𑁆𑀔𑀫𑀸𑀦𑀲𑁆𑀲, 𑀉𑀚𑀼𑀫𑀕𑁆𑀕𑀸𑀦𑀼𑀲𑀸𑀭𑀺𑀦𑁄;

𑀔𑀬𑀲𑁆𑀫𑀺𑀁 𑀧𑀞𑀫𑀁 𑀜𑀸𑀡𑀁, 𑀢𑀢𑁄 𑀅𑀜𑁆𑀜𑀸 𑀅𑀦𑀦𑁆𑀢𑀭𑀸’’𑀢𑀺. (𑀇𑀢𑀺𑀯𑀼. 𑁬𑁨); 𑁋

𑀏𑀢𑁆𑀣 𑀫𑀕𑁆𑀕𑁄. 𑀲𑁄 𑀳𑀺 𑀆𑀲𑀯𑁂 𑀔𑁂𑀧𑁂𑀦𑁆𑀢𑁄 𑀯𑀽𑀧𑀲𑀫𑁂𑀦𑁆𑀢𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀆𑀲𑀯𑀸𑀦𑀁 𑀔𑀬𑁄𑀢𑀺 𑀯𑀼𑀢𑁆𑀢𑁄. ‘‘𑀆𑀲𑀯𑀸𑀦𑀁 𑀔𑀬𑀸 𑀲𑀫𑀡𑁄 𑀳𑁄𑀢𑀻’’𑀢𑀺 𑀏𑀢𑁆𑀣 𑀨𑀮𑀁. 𑀢𑀜𑁆𑀳𑀺 𑀆𑀲𑀯𑀸𑀦𑀁 𑀔𑀻𑀡𑀦𑁆𑀢𑁂 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀆𑀲𑀯𑀸𑀦𑀁 𑀔𑀬𑁄𑀢𑀺 𑀯𑀼𑀢𑁆𑀢𑀁.

‘‘𑀆𑀲𑀯𑀸 𑀢𑀲𑁆𑀲 𑀯𑀟𑁆𑀠𑀦𑁆𑀢𑀺, 𑀆𑀭𑀸 𑀲𑁄 𑀆𑀲𑀯𑀓𑁆𑀔𑀬𑀸’’𑀢𑀺; (𑀥. 𑀧. 𑁨𑁫𑁩) 𑁋

𑀏𑀢𑁆𑀣 𑀦𑀺𑀩𑁆𑀩𑀸𑀦𑀁. 𑀢𑀜𑁆𑀳𑀺 𑀆𑀕𑀫𑁆𑀫 𑀆𑀲𑀯𑀸 𑀔𑀻𑀬𑀦𑁆𑀢𑀺, 𑀢𑀲𑁆𑀫𑀸 𑀆𑀲𑀯𑀸𑀦𑀁 𑀔𑀬𑁄𑀢𑀺 𑀯𑀼𑀢𑁆𑀢𑀁. 𑀇𑀥 𑀧𑀦 𑀫𑀕𑁆𑀕𑀨𑀮𑀸𑀦𑀺 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀦𑁄 𑀅𑀚𑀸𑀦𑀢𑁄 𑀦𑁄 𑀅𑀧𑀲𑁆𑀲𑀢𑁄𑀢𑀺 𑀬𑁄 𑀧𑀦 𑀦 𑀚𑀸𑀦𑀸𑀢𑀺 𑀦 𑀧𑀲𑁆𑀲𑀢𑀺, 𑀢𑀲𑁆𑀲 𑀦𑁄 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀦 𑀬𑁂 𑀅𑀚𑀸𑀦𑀢𑁄 𑀅𑀧𑀲𑁆𑀲𑀢𑁄𑀧𑀺 𑀲𑀁𑀲𑀸𑀭𑀸𑀤𑀻𑀳𑀺𑀬𑁂𑀯 𑀲𑀼𑀤𑁆𑀥𑀺𑀁 𑀯𑀤𑀦𑁆𑀢𑀺, 𑀢𑁂 𑀧𑀝𑀺𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺. 𑀧𑀼𑀭𑀺𑀫𑁂𑀦 𑀧𑀤𑀤𑁆𑀯𑀬𑁂𑀦 𑀉𑀧𑀸𑀬𑁄 𑀯𑀼𑀢𑁆𑀢𑁄, 𑀇𑀫𑀺𑀦𑀸 𑀅𑀦𑀼𑀧𑀸𑀬𑀁 𑀧𑀝𑀺𑀲𑁂𑀥𑁂𑀢𑀺.

𑀇𑀤𑀸𑀦𑀺 𑀬𑀁 𑀚𑀸𑀦𑀢𑁄 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀓𑀸𑀫𑁄 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀚𑀸𑀦𑀢𑁄𑀢𑀺 𑀧𑀼𑀘𑁆𑀙𑀁 𑀆𑀭𑀪𑀺. 𑀢𑀢𑁆𑀣 𑀚𑀸𑀦𑀦𑀸 𑀩𑀳𑀼𑀯𑀺𑀥𑀸. 𑀤𑀩𑁆𑀩𑀚𑀸𑀢𑀺𑀓𑁄 𑀏𑀯 𑀳𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀙𑀢𑁆𑀢𑀁 𑀓𑀸𑀢𑀼𑀁 𑀚𑀸𑀦𑀸𑀢𑀺, 𑀓𑁄𑀘𑀺 𑀘𑀻𑀯𑀭𑀸𑀤𑀻𑀦𑀁 𑀅𑀜𑁆𑀜𑀢𑀭𑀁, 𑀢𑀲𑁆𑀲 𑀈𑀤𑀺𑀲𑀸𑀦𑀺 𑀓𑀫𑁆𑀫𑀸𑀦𑀺 𑀯𑀢𑁆𑀢𑀲𑀻𑀲𑁂 𑀞𑀢𑁆𑀯𑀸 𑀓𑀭𑁄𑀦𑁆𑀢𑀲𑁆𑀲 𑀲𑀸 𑀚𑀸𑀦𑀦𑀸 𑀲𑀕𑁆𑀕𑀫𑀕𑁆𑀕𑀨𑀮𑀸𑀦𑀁 𑀧𑀤𑀝𑁆𑀞𑀸𑀦𑀁 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀬𑁄 𑀧𑀦 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀯𑁂𑀚𑁆𑀚𑀓𑀫𑁆𑀫𑀸𑀤𑀻𑀦𑀺 𑀓𑀸𑀢𑀼𑀁 𑀚𑀸𑀦𑀸𑀢𑀺, 𑀢𑀲𑁆𑀲𑁂𑀯𑀁 𑀚𑀸𑀦𑀢𑁄 𑀆𑀲𑀯𑀸 𑀯𑀟𑁆𑀠𑀦𑁆𑀢𑀺𑀬𑁂𑀯. 𑀢𑀲𑁆𑀫𑀸 𑀬𑀁 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀘 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀺, 𑀢𑀤𑁂𑀯 𑀤𑀲𑁆𑀲𑁂𑀦𑁆𑀢𑁄 𑀇𑀢𑀺 𑀭𑀽𑀧𑀦𑁆𑀢𑀺𑀆𑀤𑀺𑀫𑀸𑀳. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀚𑀸𑀦𑀢𑁄𑀢𑀺 𑀏𑀯𑀁 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁 𑀚𑀸𑀦𑀦𑁆𑀢𑀲𑁆𑀲. 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀻𑀢𑀺 𑀆𑀲𑀯𑀸𑀦𑀁 𑀔𑀬𑀦𑁆𑀢𑁂 𑀚𑀸𑀢𑀢𑁆𑀢𑀸 ‘‘𑀆𑀲𑀯𑀸𑀦𑀁 𑀔𑀬𑁄’’𑀢𑀺 𑀮𑀤𑁆𑀥𑀦𑀸𑀫𑀁 𑀅𑀭𑀳𑀢𑁆𑀢𑀁 𑀳𑁄𑀢𑀺.

𑀏𑀯𑀁 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀇𑀤𑀸𑀦𑀺 𑀔𑀻𑀡𑀸𑀲𑀯𑀲𑁆𑀲 𑀆𑀕𑀫𑀦𑀻𑀬𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀤𑀲𑁆𑀲𑁂𑀢𑀼𑀁 𑀬𑀫𑁆𑀧𑀺𑀲𑁆𑀲 𑀢𑀁, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀔𑀬𑀲𑁆𑀫𑀺𑀁 𑀔𑀬𑁂𑀜𑀸𑀡𑀦𑁆𑀢𑀺 𑀆𑀲𑀯𑀓𑁆𑀔𑀬𑀲𑀗𑁆𑀔𑀸𑀢𑁂 𑀅𑀭𑀳𑀢𑁆𑀢𑀨𑀮𑁂 𑀧𑀝𑀺𑀮𑀤𑁆𑀥𑁂 𑀲𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. 𑀢𑀜𑁆𑀳𑀺 𑀅𑀭𑀳𑀢𑁆𑀢𑀨𑀮𑀲𑀗𑁆𑀔𑀸𑀢𑁂 𑀔𑀬𑀲𑁆𑀫𑀺𑀁 𑀧𑀞𑀫𑀯𑀸𑀭𑀁 𑀉𑀧𑁆𑀧𑀦𑁆𑀦𑁂 𑀧𑀘𑁆𑀙𑀸 𑀉𑀧𑁆𑀧𑀦𑁆𑀦𑀢𑁆𑀢𑀸 𑀔𑀬𑁂𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀉𑀧𑀦𑀺𑀲𑀦𑁆𑀢𑀺 𑀲𑀓𑀸𑀭𑀡𑀁 𑀲𑀧𑁆𑀧𑀘𑁆𑀘𑀬𑀁. 𑀯𑀺𑀫𑀼𑀢𑁆𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺. 𑀲𑀸 𑀳𑀺𑀲𑁆𑀲 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 𑀳𑁄𑀢𑀺. 𑀏𑀯𑀁 𑀇𑀢𑁄 𑀧𑀭𑁂𑀲𑀼𑀧𑀺 𑀮𑀩𑁆𑀪𑀫𑀸𑀦𑀯𑀲𑁂𑀦 𑀧𑀘𑁆𑀘𑀬𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀭𑀸𑀕𑁄𑀢𑀺 𑀫𑀕𑁆𑀕𑁄. 𑀲𑁄 𑀳𑀺 𑀓𑀺𑀮𑁂𑀲𑁂 𑀯𑀺𑀭𑀸𑀚𑁂𑀦𑁆𑀢𑁄 𑀔𑁂𑀧𑁂𑀦𑁆𑀢𑁄 𑀉𑀧𑁆𑀧𑀦𑁆𑀦𑁄, 𑀢𑀲𑁆𑀫𑀸 𑀯𑀺𑀭𑀸𑀕𑁄𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀩𑁆𑀩𑀺𑀤𑀸𑀢𑀺 𑀦𑀺𑀩𑁆𑀩𑀺𑀤𑀸𑀜𑀸𑀡𑀁. 𑀏𑀢𑁂𑀦 𑀩𑀮𑀯𑀯𑀺𑀧𑀲𑁆𑀲𑀦𑀁 𑀤𑀲𑁆𑀲𑁂𑀢𑀺. 𑀩𑀮𑀯𑀯𑀺𑀧𑀲𑁆𑀲𑀦𑀸𑀢𑀺 𑀪𑀬𑀢𑀽𑀧𑀝𑁆𑀞𑀸𑀦𑁂 𑀜𑀸𑀡𑀁 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑁂 𑀜𑀸𑀡𑀁 𑀫𑀼𑀜𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀜𑀸𑀡𑀦𑁆𑀢𑀺 𑀘𑀢𑀼𑀦𑁆𑀦𑀁 𑀜𑀸𑀡𑀸𑀦𑀁 𑀅𑀥𑀺𑀯𑀘𑀦𑀁. 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀬𑀣𑀸𑀲𑀪𑀸𑀯𑀚𑀸𑀦𑀦𑀲𑀗𑁆𑀔𑀸𑀢𑀁 𑀤𑀲𑁆𑀲𑀦𑀁. 𑀏𑀢𑁂𑀦 𑀢𑀭𑀼𑀡𑀯𑀺𑀧𑀲𑁆𑀲𑀦𑀁 𑀤𑀲𑁆𑀲𑁂𑀢𑀺. 𑀢𑀭𑀼𑀡𑀯𑀺𑀧𑀲𑁆𑀲𑀦𑀸 𑀳𑀺 𑀩𑀮𑀯𑀯𑀺𑀧𑀲𑁆𑀲𑀦𑀸𑀬 𑀧𑀘𑁆𑀘𑀬𑁄 𑀳𑁄𑀢𑀺. 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀢𑀺 𑀲𑀗𑁆𑀔𑀸𑀭𑀧𑀭𑀺𑀘𑁆𑀙𑁂𑀤𑁂 𑀜𑀸𑀡𑀁 𑀓𑀗𑁆𑀔𑀸𑀯𑀺𑀢𑀭𑀡𑁂 𑀜𑀸𑀡𑀁 𑀲𑀫𑁆𑀫𑀲𑀦𑁂 𑀜𑀸𑀡𑀁 𑀫𑀕𑁆𑀕𑀸𑀫𑀕𑁆𑀕𑁂 𑀜𑀸𑀡𑀦𑁆𑀢𑀺 𑀘𑀢𑀼𑀦𑁆𑀦𑀁 𑀜𑀸𑀡𑀸𑀦𑀁 𑀅𑀥𑀺𑀯𑀘𑀦𑀁. 𑀲𑀫𑀸𑀥𑀻𑀢𑀺 𑀧𑀸𑀤𑀓𑀚𑁆𑀛𑀸𑀦𑀲𑀫𑀸𑀥𑀺. 𑀲𑁄 𑀳𑀺 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀬 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑀼𑀔𑀦𑁆𑀢𑀺 𑀅𑀧𑁆𑀧𑀦𑀸𑀬 𑀧𑀼𑀩𑁆𑀩𑀪𑀸𑀕𑀲𑀼𑀔𑀁. 𑀢𑀜𑁆𑀳𑀺 𑀧𑀸𑀤𑀓𑀚𑁆𑀛𑀸𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀧𑀲𑁆𑀲𑀤𑁆𑀥𑀻𑀢𑀺 𑀤𑀭𑀣𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺. 𑀲𑀸 𑀳𑀺 𑀅𑀧𑁆𑀧𑀦𑀸𑀧𑀼𑀩𑁆𑀩𑀪𑀸𑀕𑀲𑁆𑀲 𑀲𑀼𑀔𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀧𑀻𑀢𑀻𑀢𑀺 𑀩𑀮𑀯𑀧𑀻𑀢𑀺. 𑀲𑀸 𑀳𑀺 𑀤𑀭𑀣𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀧𑀸𑀫𑁄𑀚𑁆𑀚𑀦𑁆𑀢𑀺 𑀤𑀼𑀩𑁆𑀩𑀮𑀧𑀻𑀢𑀺. 𑀲𑀸 𑀳𑀺 𑀩𑀮𑀯𑀧𑀻𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑀤𑁆𑀥𑀸𑀢𑀺 𑀅𑀧𑀭𑀸𑀧𑀭𑀁 𑀉𑀧𑁆𑀧𑀚𑁆𑀚𑀦𑀲𑀤𑁆𑀥𑀸. 𑀲𑀸 𑀳𑀺 𑀤𑀼𑀩𑁆𑀩𑀮𑀧𑀻𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀤𑀼𑀓𑁆𑀔𑀦𑁆𑀢𑀺 𑀯𑀝𑁆𑀝𑀤𑀼𑀓𑁆𑀔𑀁. 𑀢𑀜𑁆𑀳𑀺 𑀅𑀧𑀭𑀸𑀧𑀭𑀲𑀤𑁆𑀥𑀸𑀬 𑀧𑀘𑁆𑀘𑀬𑁄 𑀳𑁄𑀢𑀺. 𑀚𑀸𑀢𑀻𑀢𑀺 𑀲𑀯𑀺𑀓𑀸𑀭𑀸 𑀔𑀦𑁆𑀥𑀚𑀸𑀢𑀺. 𑀲𑀸 𑀳𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀪𑀯𑁄𑀢𑀺 𑀓𑀫𑁆𑀫𑀪𑀯𑁄. (𑀲𑁄 𑀳𑀺 𑀲𑀯𑀺𑀓𑀸𑀭𑀸𑀬 𑀚𑀸𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺.) 𑀏𑀢𑁂𑀦𑀼𑀧𑀸𑀬𑁂𑀦 𑀲𑁂𑀲𑀧𑀤𑀸𑀦𑀺𑀧𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀣𑀼𑀮𑁆𑀮𑀨𑀼𑀲𑀺𑀢𑀓𑁂𑀢𑀺 𑀫𑀳𑀸𑀨𑀼𑀲𑀺𑀢𑀓𑁂. 𑀧𑀩𑁆𑀩𑀢𑀓𑀦𑁆𑀤𑀭𑀧𑀤𑀭𑀲𑀸𑀔𑀸𑀢𑀺 𑀏𑀢𑁆𑀣 𑀓𑀦𑁆𑀤𑀭𑀁 𑀦𑀸𑀫 ‘𑀓’𑀦𑁆𑀢𑀺𑀮𑀤𑁆𑀥𑀦𑀸𑀫𑁂𑀦 𑀉𑀤𑀓𑁂𑀦 𑀤𑀸𑀭𑀺𑀢𑁄 𑀉𑀤𑀓𑀪𑀺𑀦𑁆𑀦𑁄 𑀧𑀩𑁆𑀩𑀢𑀧𑀤𑁂𑀲𑁄, 𑀬𑁄 ‘‘𑀦𑀺𑀢𑀫𑁆𑀩𑁄’’𑀢𑀺𑀧𑀺 ‘‘𑀦𑀤𑀻𑀓𑀼𑀜𑁆𑀙𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀧𑀤𑀭𑀁 𑀦𑀸𑀫 𑀅𑀝𑁆𑀞𑀫𑀸𑀲𑁂 𑀤𑁂𑀯𑁂 𑀅𑀯𑀲𑁆𑀲𑀦𑁆𑀢𑁂 𑀨𑀮𑀺𑀢𑁄 𑀪𑀽𑀫𑀺𑀧𑁆𑀧𑀤𑁂𑀲𑁄. 𑀲𑀸𑀔𑀸𑀢𑀺 𑀓𑀼𑀲𑀼𑀫𑁆𑀪𑀕𑀸𑀫𑀺𑀦𑀺𑀬𑁄 𑀔𑀼𑀤𑁆𑀤𑀓𑀫𑀸𑀢𑀺𑀓𑀸𑀬𑁄. 𑀓𑀼𑀲𑁄𑀩𑁆𑀪𑀸𑀢𑀺 𑀔𑀼𑀤𑁆𑀤𑀓𑀆𑀯𑀸𑀝𑀸. 𑀫𑀳𑀸𑀲𑁄𑀩𑁆𑀪𑀸𑀢𑀺 𑀫𑀳𑀸𑀆𑀯𑀸𑀝𑀸. 𑀓𑀼𑀦𑁆𑀦𑀤𑀺𑀬𑁄𑀢𑀺 𑀔𑀼𑀤𑁆𑀤𑀓𑀦𑀤𑀺𑀬𑁄. 𑀫𑀳𑀸𑀦𑀤𑀺𑀬𑁄𑀢𑀺 𑀕𑀗𑁆𑀕𑀸𑀬𑀫𑀼𑀦𑀸𑀤𑀺𑀓𑀸 𑀫𑀳𑀸𑀲𑀭𑀺𑀢𑀸. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀅𑀯𑀺𑀚𑁆𑀚𑀽𑀧𑀦𑀺𑀲𑀸 𑀲𑀗𑁆𑀔𑀸𑀭𑀸𑀢𑀺𑀆𑀤𑀻𑀲𑀼 𑀅𑀯𑀺𑀚𑁆𑀚𑀸 𑀧𑀩𑁆𑀩𑀢𑁄𑀢𑀺 𑀤𑀝𑁆𑀞𑀩𑁆𑀩𑀸. 𑀅𑀪𑀺𑀲𑀗𑁆𑀔𑀸𑀭𑀸 𑀫𑁂𑀖𑁄𑀢𑀺, 𑀯𑀺𑀜𑁆𑀜𑀸𑀡𑀸𑀤𑀺𑀯𑀝𑁆𑀝𑀁 𑀓𑀦𑁆𑀤𑀭𑀸𑀤𑀬𑁄𑀢𑀺, 𑀯𑀺𑀫𑀼𑀢𑁆𑀢𑀺 𑀲𑀸𑀕𑀭𑁄𑀢𑀺.

𑀬𑀣𑀸 𑀧𑀩𑁆𑀩𑀢𑀫𑀢𑁆𑀣𑀓𑁂 𑀤𑁂𑀯𑁄 𑀯𑀲𑁆𑀲𑀺𑀢𑁆𑀯𑀸 𑀧𑀩𑁆𑀩𑀢𑀓𑀦𑁆𑀤𑀭𑀸𑀤𑀻𑀦𑀺 𑀧𑀽𑀭𑁂𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀫𑀳𑀸𑀲𑀫𑀼𑀤𑁆𑀤𑀁 𑀲𑀸𑀕𑀭𑀁 𑀧𑀽𑀭𑁂𑀢𑀺, 𑀏𑀯𑀁 𑀅𑀯𑀺𑀚𑁆𑀚𑀸𑀧𑀩𑁆𑀩𑀢𑀫𑀢𑁆𑀣𑀓𑁂 𑀢𑀸𑀯 𑀅𑀪𑀺𑀲𑀗𑁆𑀔𑀸𑀭𑀫𑁂𑀖𑀲𑁆𑀲 𑀯𑀲𑁆𑀲𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀲𑁆𑀲𑀼𑀢𑀯𑀸 𑀳𑀺 𑀩𑀸𑀮𑀧𑀼𑀣𑀼𑀚𑁆𑀚𑀦𑁄 𑀅𑀯𑀺𑀚𑁆𑀚𑀸𑀬 𑀅𑀜𑁆𑀜𑀸𑀡𑀻 𑀳𑀼𑀢𑁆𑀯𑀸 𑀢𑀡𑁆𑀳𑀸𑀬 𑀅𑀪𑀺𑀮𑀸𑀲𑀁 𑀓𑀢𑁆𑀯𑀸 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁 𑀆𑀬𑀽𑀳𑀢𑀺, 𑀢𑀁 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺, 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀦𑀸𑀫𑀭𑀽𑀧𑀸𑀤𑀻𑀦𑀁. 𑀇𑀢𑀺 𑀧𑀩𑁆𑀩𑀢𑀫𑀢𑁆𑀣𑀓𑁂 𑀯𑀼𑀝𑁆𑀞𑀤𑁂𑀯𑀲𑁆𑀲 𑀓𑀦𑁆𑀤𑀭𑀸𑀤𑀬𑁄 𑀧𑀽𑀭𑁂𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀆𑀳𑀘𑁆𑀘 𑀞𑀺𑀢𑀓𑀸𑀮𑁄 𑀯𑀺𑀬 𑀅𑀯𑀺𑀚𑁆𑀚𑀸𑀧𑀩𑁆𑀩𑀢𑀫𑀢𑁆𑀣𑀓𑁂 𑀯𑀼𑀝𑁆𑀞𑀲𑁆𑀲 𑀅𑀪𑀺𑀲𑀗𑁆𑀔𑀸𑀭𑀫𑁂𑀖𑀲𑁆𑀲 𑀧𑀭𑀫𑁆𑀧𑀭𑀧𑀘𑁆𑀘𑀬𑀢𑀸𑀬 𑀅𑀦𑀼𑀧𑀼𑀩𑁆𑀩𑁂𑀦 𑀯𑀺𑀜𑁆𑀜𑀸𑀡𑀸𑀤𑀺𑀯𑀝𑁆𑀝𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑀓𑀸𑀮𑁄. 𑀩𑀼𑀤𑁆𑀥𑀯𑀘𑀦𑀁 𑀧𑀦 𑀧𑀸𑀴𑀺𑀬𑀁 𑀅𑀕𑀳𑀺𑀢𑀫𑁆𑀧𑀺 ‘‘𑀇𑀥 𑀢𑀣𑀸𑀕𑀢𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺, 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀻’’𑀢𑀺 𑀇𑀫𑀸𑀬 𑀧𑀸𑀴𑀺𑀬𑀸 𑀯𑀲𑁂𑀦 𑀕𑀳𑀺𑀢𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀸 𑀳𑀺 𑀢𑀲𑁆𑀲 𑀓𑀼𑀮𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺, 𑀲𑀸 𑀓𑀫𑁆𑀫𑀪𑀯𑀧𑀘𑁆𑀘𑀬𑀸 𑀲𑀯𑀺𑀓𑀸𑀭𑀸 𑀚𑀸𑀢𑀺 𑀦𑀸𑀫. 𑀲𑁄 𑀩𑀼𑀤𑁆𑀥𑀸𑀦𑀁 𑀯𑀸 𑀩𑀼𑀤𑁆𑀥𑀲𑀸𑀯𑀓𑀸𑀦𑀁 𑀯𑀸 𑀲𑀫𑁆𑀫𑀼𑀔𑀻𑀪𑀸𑀯𑀁 𑀆𑀕𑀫𑁆𑀫 𑀯𑀝𑁆𑀝𑀤𑁄𑀲𑀤𑀻𑀧𑀓𑀁 𑀮𑀓𑁆𑀔𑀡𑀸𑀳𑀝𑀁 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀯𑀝𑁆𑀝𑀯𑀲𑁂𑀦 𑀧𑀻𑀴𑀺𑀢𑁄 𑀳𑁄𑀢𑀺, 𑀏𑀯𑀫𑀲𑁆𑀲 𑀲𑀯𑀺𑀓𑀸𑀭𑀸 𑀔𑀦𑁆𑀥𑀚𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑁄 𑀯𑀝𑁆𑀝𑀤𑀼𑀓𑁆𑀔𑁂𑀦 𑀧𑀻𑀴𑀺𑀢𑁄 𑀅𑀧𑀭𑀸𑀧𑀭𑀁 𑀲𑀤𑁆𑀥𑀁 𑀚𑀦𑁂𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀢𑀺, 𑀏𑀯𑀫𑀲𑁆𑀲 𑀯𑀝𑁆𑀝𑀤𑀼𑀓𑁆𑀔𑀁 𑀅𑀧𑀭𑀸𑀧𑀭𑀲𑀤𑁆𑀥𑀸𑀬 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑁄 𑀧𑀩𑁆𑀩𑀚𑁆𑀚𑀸𑀫𑀢𑁆𑀢𑁂𑀦𑁂𑀯 𑀅𑀲𑀦𑁆𑀢𑀼𑀝𑁆𑀞𑁄 𑀊𑀦𑀧𑀜𑁆𑀘𑀯𑀲𑁆𑀲𑀓𑀸𑀮𑁂 𑀦𑀺𑀲𑁆𑀲𑀬𑀁 𑀕𑀳𑁂𑀢𑁆𑀯𑀸 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀦𑁆𑀢𑁄 𑀤𑁆𑀯𑁂𑀫𑀸𑀢𑀺𑀓𑀸 𑀧𑀕𑀼𑀡𑀁 𑀓𑀢𑁆𑀯𑀸 𑀓𑀫𑁆𑀫𑀸𑀓𑀫𑁆𑀫𑀁 𑀉𑀕𑁆𑀕𑀳𑁂𑀢𑁆𑀯𑀸 𑀬𑀸𑀯 𑀅𑀭𑀳𑀢𑁆𑀢𑀸 𑀦𑀺𑀚𑁆𑀚𑀝𑀁 𑀓𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀯𑀲𑀦𑁆𑀢𑁄 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀓𑀫𑁆𑀫𑀁 𑀆𑀭𑀪𑀢𑀺, 𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀦𑀺𑀲𑁆𑀲𑀸𑀬 𑀤𑀼𑀩𑁆𑀩𑀮𑀧𑀻𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀢𑀤𑀲𑁆𑀲 𑀲𑀤𑁆𑀥𑀽𑀧𑀦𑀺𑀲𑀁 𑀧𑀸𑀫𑁄𑀚𑁆𑀚𑀁, 𑀢𑀁 𑀩𑀮𑀯𑀧𑀻𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀩𑀮𑀯𑀧𑀻𑀢𑀺 𑀤𑀭𑀣𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸, 𑀲𑀸 𑀅𑀧𑁆𑀧𑀦𑀸𑀧𑀼𑀩𑁆𑀩𑀪𑀸𑀕𑀲𑀼𑀔𑀲𑁆𑀲, 𑀢𑀁 𑀲𑀼𑀔𑀁 𑀧𑀸𑀤𑀓𑀚𑁆𑀛𑀸𑀦𑀲𑀫𑀸𑀥𑀺𑀲𑁆𑀲. 𑀲𑁄 𑀲𑀫𑀸𑀥𑀺𑀦𑀸 𑀘𑀺𑀢𑁆𑀢𑀓𑀮𑁆𑀮𑀢𑀁 𑀚𑀦𑁂𑀢𑁆𑀯𑀸 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀬 𑀓𑀫𑁆𑀫𑀁 𑀓𑀭𑁄𑀢𑀺. 𑀇𑀘𑁆𑀘𑀲𑁆𑀲 𑀧𑀸𑀤𑀓𑀚𑁆𑀛𑀸𑀦𑀲𑀫𑀸𑀥𑀺 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀬 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀭𑀼𑀡𑀯𑀺𑀧𑀲𑁆𑀲𑀦𑀸 𑀩𑀮𑀯𑀯𑀺𑀧𑀲𑁆𑀲𑀦𑀸𑀬, 𑀩𑀮𑀯𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑀲𑁆𑀲, 𑀫𑀕𑁆𑀕𑁄 𑀨𑀮𑀯𑀺𑀫𑀼𑀢𑁆𑀢𑀺𑀬𑀸, 𑀨𑀮𑀯𑀺𑀫𑀼𑀢𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲𑀸𑀢𑀺. 𑀏𑀯𑀁 𑀤𑁂𑀯𑀲𑁆𑀲 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀕𑀭𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑀓𑀸𑀮𑁄 𑀯𑀺𑀬 𑀔𑀻𑀡𑀸𑀲𑀯𑀲𑁆𑀲 𑀯𑀺𑀫𑀼𑀢𑁆𑀢𑀺𑀲𑀸𑀕𑀭𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀢𑀢𑀺𑀬𑀁.

𑁪. 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪. 𑀘𑀢𑀼𑀢𑁆𑀣𑁂 𑀧𑀸𑀯𑀺𑀲𑀻𑀢𑀺 𑀧𑀯𑀺𑀝𑁆𑀞𑁄. 𑀲𑁄 𑀘 𑀦 𑀢𑀸𑀯 𑀧𑀯𑀺𑀝𑁆𑀞𑁄, ‘‘𑀧𑀯𑀺𑀲𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀧𑀦 𑀏𑀯𑀁 𑀯𑀼𑀢𑁆𑀢𑁄. 𑀬𑀣𑀸 𑀓𑀺𑀁? 𑀬𑀣𑀸 ‘‘𑀕𑀸𑀫𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀦𑁆𑀢𑀧𑀼𑀭𑀺𑀲𑁄 𑀢𑀁 𑀕𑀸𑀫𑀁 𑀅𑀧𑁆𑀧𑀢𑁆𑀢𑁄𑀧𑀺 ‘‘𑀓𑀳𑀁 𑀇𑀢𑁆𑀣𑀦𑁆𑀦𑀸𑀫𑁄’’𑀢𑀺 𑀯𑀼𑀢𑁆𑀢𑁂 ‘‘𑀕𑀸𑀫𑀁 𑀕𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁. 𑀅𑀢𑀺𑀧𑁆𑀧𑀕𑁄𑀢𑀺 𑀢𑀤𑀸 𑀓𑀺𑀭 𑀣𑁂𑀭𑀲𑁆𑀲 𑀅𑀢𑀺𑀧𑁆𑀧𑀕𑁄𑀬𑁂𑀯 𑀦𑀺𑀓𑁆𑀔𑀦𑁆𑀢𑀤𑀺𑀯𑀲𑁄 𑀅𑀳𑁄𑀲𑀺, 𑀅𑀢𑀺𑀧𑁆𑀧𑀕𑁄𑀬𑁂𑀯 𑀦𑀺𑀓𑁆𑀔𑀦𑁆𑀢𑀪𑀺𑀓𑁆𑀔𑀽 𑀩𑁄𑀥𑀺𑀬𑀗𑁆𑀕𑀡𑁂 𑀘𑁂𑀢𑀺𑀬𑀗𑁆𑀕𑀡𑁂 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀝𑁆𑀞𑀸𑀦𑁂𑀢𑀺 𑀇𑀫𑁂𑀲𑀼 𑀞𑀸𑀦𑁂𑀲𑀼 𑀬𑀸𑀯 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸 𑀳𑁄𑀢𑀺, 𑀢𑀸𑀯 𑀧𑀧𑀜𑁆𑀘𑀁 𑀓𑀭𑁄𑀦𑁆𑀢𑀺. 𑀣𑁂𑀭𑀲𑁆𑀲 𑀧𑀦 ‘‘𑀬𑀸𑀯 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸 𑀳𑁄𑀢𑀺, 𑀢𑀸𑀯 𑀧𑀭𑀺𑀩𑁆𑀩𑀸𑀚𑀓𑁂𑀳𑀺 𑀲𑀤𑁆𑀥𑀺𑀁 𑀏𑀓𑀤𑁆𑀯𑁂𑀓𑀣𑀸𑀯𑀸𑀭𑁂 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑀬𑀢𑁄 𑀬𑀁𑀦𑀽𑀦𑀸𑀳𑀦𑁆𑀢𑀺 𑀏𑀢𑀤𑀳𑁄𑀲𑀺. 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄𑀢𑀺 𑀲𑁄 𑀓𑀺𑀭 𑀆𑀭𑀸𑀫𑁄 𑀤𑀓𑁆𑀔𑀺𑀡𑀤𑁆𑀯𑀸𑀭𑀲𑁆𑀲 𑀘 𑀯𑁂𑀴𑀼𑀯𑀦𑀲𑁆𑀲 𑀘 𑀅𑀦𑁆𑀢𑀭𑀸 𑀅𑀳𑁄𑀲𑀺. 𑀇𑀥𑀸𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀯𑀸𑀤𑁂𑀲𑀼. 𑀓𑀺𑀁𑀯𑀸𑀤𑀻 𑀓𑀺𑀫𑀓𑁆𑀔𑀸𑀬𑀻𑀢𑀺 𑀓𑀺𑀁 𑀯𑀤𑀢𑀺 𑀓𑀺𑀁 𑀆𑀘𑀺𑀓𑁆𑀔𑀢𑀺, 𑀓𑀺𑀁 𑀏𑀢𑁆𑀣 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀤𑀲𑁆𑀲𑀦𑀦𑁆𑀢𑀺 𑀧𑀼𑀘𑁆𑀙𑀦𑁆𑀢𑀺. 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀫𑀸𑀢𑀺, 𑀪𑁄𑀢𑀸 𑀕𑁄𑀢𑀫𑁂𑀦 𑀬𑀁 𑀯𑀼𑀢𑁆𑀢𑀁 𑀓𑀸𑀭𑀡𑀁, 𑀢𑀲𑁆𑀲 𑀅𑀦𑀼𑀓𑀸𑀭𑀡𑀁 𑀓𑀣𑁂𑀬𑁆𑀬𑀸𑀫. 𑀲𑀳𑀥𑀫𑁆𑀫𑀺𑀓𑁄 𑀯𑀸𑀤𑀸𑀦𑀼𑀧𑀸𑀢𑁄𑀢𑀺 𑀧𑀭𑁂𑀳𑀺 𑀯𑀼𑀢𑁆𑀢𑀓𑀸𑀭𑀡𑁂𑀦 𑀲𑀓𑀸𑀭𑀡𑁄 𑀳𑀼𑀢𑁆𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀸𑀤𑀸𑀦𑀼𑀧𑀸𑀢𑁄 𑀯𑀸𑀤𑀧𑁆𑀧𑀯𑀢𑁆𑀢𑀺 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀢𑀩𑁆𑀩𑀁 𑀓𑀸𑀭𑀡𑀁 𑀓𑁄𑀘𑀺 𑀅𑀧𑁆𑀧𑀫𑀢𑁆𑀢𑀓𑁄𑀧𑀺 𑀓𑀣𑀁 𑀦𑀸𑀕𑀘𑁆𑀙𑁂𑀬𑁆𑀬? 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑀣𑀁 𑀲𑀩𑁆𑀩𑀸𑀓𑀸𑀭𑁂𑀦𑀧𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀯𑀸𑀤𑁂 𑀕𑀸𑀭𑀬𑁆𑀳𑀁 𑀓𑀸𑀭𑀡𑀁 𑀦 𑀪𑀯𑁂𑀬𑁆𑀬𑀸𑀢𑀺?

𑀇𑀢𑀺 𑀯𑀤𑀦𑁆𑀢𑀺 𑀨𑀲𑁆𑀲𑀧𑀘𑁆𑀘𑀬𑀸 𑀤𑀼𑀓𑁆𑀔𑀦𑁆𑀢𑀺 𑀏𑀯𑀁 𑀯𑀤𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀘𑀢𑀽𑀲𑀼 𑀯𑀸𑀤𑁂𑀲𑀼. 𑀢𑁂 𑀯𑀢 𑀅𑀜𑁆𑀜𑀢𑁆𑀭 𑀨𑀲𑁆𑀲𑀸𑀢𑀺 𑀇𑀤𑀁 ‘‘𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸’’𑀢𑀺 𑀧𑀝𑀺𑀜𑁆𑀜𑀸𑀬 𑀲𑀸𑀥𑀓𑀯𑀘𑀦𑀁. 𑀬𑀲𑁆𑀫𑀸 𑀳𑀺 𑀦 𑀯𑀺𑀦𑀸 𑀨𑀲𑁆𑀲𑁂𑀦 𑀤𑀼𑀓𑁆𑀔𑀧𑀝𑀺𑀲𑀁𑀯𑁂𑀤𑀦𑀸 𑀅𑀢𑁆𑀣𑀺, 𑀢𑀲𑁆𑀫𑀸 𑀚𑀸𑀦𑀺𑀢𑀩𑁆𑀩𑀫𑁂𑀢𑀁 𑀬𑀣𑀸 ‘‘𑀢𑀤𑀧𑀺 𑀨𑀲𑁆𑀲𑀧𑀘𑁆𑀘𑀬𑀸’’𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑀲𑀸𑀥𑀼, 𑀲𑀸𑀥𑀼, 𑀆𑀦𑀦𑁆𑀤𑀸𑀢𑀺 𑀅𑀬𑀁 𑀲𑀸𑀥𑀼𑀓𑀸𑀭𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀤𑀺𑀦𑁆𑀦𑁄, 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀧𑀦 𑀲𑀤𑁆𑀥𑀺𑀁 𑀪𑀕𑀯𑀸 𑀆𑀫𑀦𑁆𑀢𑁂𑀲𑀺. 𑀏𑀓𑀫𑀺𑀤𑀸𑀳𑀦𑁆𑀢𑀺 𑀏𑀢𑁆𑀣 𑀇𑀥𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀏𑀓𑀁 𑀲𑀫𑀬𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀘𑀦𑀁 ‘‘𑀦 𑀓𑁂𑀯𑀮𑀁 𑀲𑀸𑀭𑀺𑀧𑀼𑀢𑁆𑀢𑁄𑀯 𑀭𑀸𑀚𑀕𑀳𑀁 𑀧𑀯𑀺𑀝𑁆𑀞𑁄, 𑀅𑀳𑀫𑁆𑀧𑀺 𑀧𑀸𑀯𑀺𑀲𑀺𑀁. 𑀦 𑀓𑁂𑀯𑀮𑀜𑁆𑀘 𑀢𑀲𑁆𑀲𑁂𑀯𑀸𑀬𑀁 𑀯𑀺𑀢𑀓𑁆𑀓𑁄 𑀉𑀧𑁆𑀧𑀦𑁆𑀦𑁄, 𑀫𑀬𑁆𑀳𑀫𑁆𑀧𑀺 𑀉𑀧𑁆𑀧𑀚𑁆𑀚𑀺. 𑀦 𑀓𑁂𑀯𑀮𑀜𑁆𑀘 𑀢𑀲𑁆𑀲𑁂𑀯 𑀲𑀸 𑀢𑀺𑀢𑁆𑀣𑀺𑀬𑁂𑀳𑀺 𑀲𑀤𑁆𑀥𑀺𑀁 𑀓𑀣𑀸 𑀚𑀸𑀢𑀸, 𑀫𑀬𑁆𑀳𑀫𑁆𑀧𑀺 𑀚𑀸𑀢𑀧𑀼𑀩𑁆𑀩𑀸’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁.

𑀅𑀘𑁆𑀙𑀭𑀺𑀬𑀁 𑀅𑀩𑁆𑀪𑀼𑀢𑀦𑁆𑀢𑀺 𑀉𑀪𑀬𑀫𑁆𑀧𑁂𑀢𑀁 𑀯𑀺𑀫𑁆𑀳𑀬𑀤𑀻𑀧𑀦𑀫𑁂𑀯. 𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑀅𑀘𑁆𑀙𑀭𑀁 𑀧𑀳𑀭𑀺𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀅𑀘𑁆𑀙𑀭𑀺𑀬𑀁. 𑀅𑀪𑀽𑀢𑀧𑀼𑀩𑁆𑀩𑀁 𑀪𑀽𑀢𑀦𑁆𑀢𑀺 𑀅𑀩𑁆𑀪𑀼𑀢𑀁. 𑀏𑀓𑁂𑀦 𑀧𑀤𑁂𑀦𑀸𑀢𑀺 ‘‘𑀨𑀲𑁆𑀲𑀧𑀘𑁆𑀘𑀬𑀸 𑀤𑀼𑀓𑁆𑀔’’𑀦𑁆𑀢𑀺 𑀇𑀫𑀺𑀦𑀸 𑀏𑀓𑁂𑀦 𑀧𑀤𑁂𑀦. 𑀏𑀢𑁂𑀦 𑀳𑀺 𑀲𑀩𑁆𑀩𑀯𑀸𑀤𑀸𑀦𑀁 𑀧𑀝𑀺𑀓𑁆𑀔𑁂𑀧𑀢𑁆𑀣𑁄 𑀯𑀼𑀢𑁆𑀢𑁄. 𑀏𑀲𑁂𑀯𑀢𑁆𑀣𑁄𑀢𑀺 𑀏𑀲𑁄𑀬𑁂𑀯 𑀨𑀲𑁆𑀲𑀧𑀘𑁆𑀘𑀬𑀸 𑀤𑀼𑀓𑁆𑀔𑀦𑁆𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀢𑁆𑀣𑁄. 𑀢𑀜𑁆𑀜𑁂𑀯𑁂𑀢𑁆𑀣 𑀧𑀝𑀺𑀪𑀸𑀢𑀽𑀢𑀺 𑀢𑀜𑁆𑀜𑁂𑀯𑁂𑀢𑁆𑀣 𑀉𑀧𑀝𑁆𑀞𑀸𑀢𑀼. 𑀇𑀤𑀸𑀦𑀺 𑀣𑁂𑀭𑁄 𑀚𑀭𑀸𑀫𑀭𑀡𑀸𑀤𑀺𑀓𑀸𑀬 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸𑀬 𑀢𑀁 𑀅𑀢𑁆𑀣𑀕𑀫𑁆𑀪𑀻𑀭𑀜𑁆𑀘𑁂𑀯 𑀕𑀫𑁆𑀪𑀻𑀭𑀸𑀯𑀪𑀸𑀲𑀜𑁆𑀘 𑀓𑀭𑁄𑀦𑁆𑀢𑁄 𑀲𑀘𑁂 𑀫𑀁, 𑀪𑀦𑁆𑀢𑁂𑀢𑀺𑀆𑀤𑀺𑀁 𑀯𑀢𑁆𑀯𑀸 𑀬𑀁𑀫𑀽𑀮𑀓𑀸 𑀓𑀣𑀸 𑀉𑀧𑁆𑀧𑀦𑁆𑀦𑀸, 𑀢𑀤𑁂𑀯 𑀧𑀤𑀁 𑀕𑀳𑁂𑀢𑁆𑀯𑀸 𑀯𑀺𑀯𑀝𑁆𑀝𑀁 𑀤𑀲𑁆𑀲𑁂𑀦𑁆𑀢𑁄 𑀙𑀦𑁆𑀦𑀁𑀢𑁆𑀯𑁂𑀯𑀸𑀢𑀺𑀆𑀤𑀺𑀫𑀸𑀳. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀘𑀢𑀼𑀢𑁆𑀣𑀁.

𑁫. 𑀪𑀽𑀫𑀺𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫-𑁨𑁬. 𑀧𑀜𑁆𑀘𑀫𑁂 𑀪𑀽𑀫𑀺𑀚𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁. 𑀲𑁂𑀲𑀫𑀺𑀥𑀸𑀧𑀺 𑀧𑀼𑀭𑀺𑀫𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀬𑀲𑁆𑀫𑀸 𑀇𑀤𑀁 𑀲𑀼𑀔𑀤𑀼𑀓𑁆𑀔𑀁 𑀦 𑀓𑁂𑀯𑀮𑀁 𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺, 𑀓𑀸𑀬𑁂𑀦𑀧𑀺 𑀓𑀭𑀺𑀬𑀫𑀸𑀦𑀁 𑀓𑀭𑀻𑀬𑀢𑀺, 𑀯𑀸𑀘𑀸𑀬𑀧𑀺 𑀫𑀦𑀲𑀸𑀧𑀺, 𑀅𑀢𑁆𑀢𑀦𑀸𑀧𑀺 𑀓𑀭𑀺𑀬𑀫𑀸𑀦𑀁 𑀓𑀭𑀻𑀬𑀢𑀺, 𑀧𑀭𑁂𑀦𑀧𑀺 𑀓𑀭𑀺𑀬𑀫𑀸𑀦𑀁 𑀓𑀭𑀻𑀬𑀢𑀺, 𑀲𑀫𑁆𑀧𑀚𑀸𑀦𑁂𑀦𑀧𑀺 𑀓𑀭𑀺𑀬𑀫𑀸𑀦𑀁 𑀓𑀭𑀻𑀬𑀢𑀺, 𑀅𑀲𑀫𑁆𑀧𑀚𑀸𑀦𑁂𑀦𑀧𑀺, 𑀢𑀲𑁆𑀫𑀸 𑀢𑀲𑁆𑀲 𑀅𑀧𑀭𑀫𑁆𑀧𑀺 𑀧𑀘𑁆𑀘𑀬𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 𑀓𑀸𑀬𑁂 𑀯𑀸 𑀳𑀸𑀦𑀦𑁆𑀤, 𑀲𑀢𑀻𑀢𑀺𑀆𑀤𑀺𑀫𑀸𑀳. 𑀓𑀸𑀬𑀲𑀜𑁆𑀘𑁂𑀢𑀦𑀸𑀳𑁂𑀢𑀽𑀢𑀺 𑀓𑀸𑀬𑀤𑁆𑀯𑀸𑀭𑁂 𑀉𑀧𑁆𑀧𑀦𑁆𑀦𑀘𑁂𑀢𑀦𑀸𑀳𑁂𑀢𑀼. 𑀯𑀘𑀻𑀲𑀜𑁆𑀘𑁂𑀢𑀦𑀸𑀫𑀦𑁄𑀲𑀜𑁆𑀘𑁂𑀢𑀦𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀓𑀸𑀬𑀤𑁆𑀯𑀸𑀭𑁂 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀓𑀼𑀲𑀮𑀯𑀲𑁂𑀦 𑀯𑀻𑀲𑀢𑀺 𑀘𑁂𑀢𑀦𑀸 𑀮𑀩𑁆𑀪𑀦𑁆𑀢𑀺, 𑀢𑀣𑀸 𑀯𑀘𑀻𑀤𑁆𑀯𑀸𑀭𑁂. 𑀫𑀦𑁄𑀤𑁆𑀯𑀸𑀭𑁂 𑀦𑀯𑀳𑀺 𑀭𑀽𑀧𑀸𑀭𑀽𑀧𑀘𑁂𑀢𑀦𑀸𑀳𑀺 𑀲𑀤𑁆𑀥𑀺𑀁 𑀏𑀓𑀽𑀦𑀢𑀺𑀁𑀲𑀸𑀢𑀺 𑀢𑀻𑀲𑀼 𑀤𑁆𑀯𑀸𑀭𑁂𑀲𑀼 𑀏𑀓𑀽𑀦𑀲𑀢𑁆𑀢𑀢𑀺 𑀘𑁂𑀢𑀦𑀸 𑀳𑁄𑀦𑁆𑀢𑀺, 𑀢𑀧𑁆𑀧𑀘𑁆𑀘𑀬𑀁 𑀯𑀺𑀧𑀸𑀓𑀲𑀼𑀔𑀤𑀼𑀓𑁆𑀔𑀁 𑀤𑀲𑁆𑀲𑀺𑀢𑀁. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀘𑀸𑀢𑀺 𑀇𑀤𑀁 𑀢𑀸𑀧𑀺 𑀘𑁂𑀢𑀦𑀸 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀢𑀁 𑀬𑀣𑀸𑀯𑀼𑀢𑁆𑀢𑀘𑁂𑀢𑀦𑀸𑀪𑁂𑀤𑀁 𑀓𑀸𑀬𑀲𑀗𑁆𑀔𑀸𑀭𑀜𑁆𑀘𑁂𑀯 𑀯𑀘𑀻𑀲𑀗𑁆𑀔𑀸𑀭𑀜𑁆𑀘 𑀫𑀦𑁄𑀲𑀗𑁆𑀔𑀸𑀭𑀜𑁆𑀘 𑀧𑀭𑁂𑀳𑀺 𑀅𑀦𑀼𑀲𑁆𑀲𑀸𑀳𑀺𑀢𑁄 𑀲𑀸𑀫𑀁 𑀅𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑁂𑀦 𑀓𑀭𑁄𑀢𑀺, 𑀧𑀭𑁂𑀳𑀺 𑀓𑀸𑀭𑀺𑀬𑀫𑀸𑀦𑁄 𑀲𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑁂𑀦𑀸𑀧𑀺 𑀓𑀭𑁄𑀢𑀺, ‘‘𑀇𑀤𑀁 𑀦𑀸𑀫 𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀏𑀯𑀭𑀽𑀧𑁄 𑀦𑀸𑀫 𑀯𑀺𑀧𑀸𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺, 𑀏𑀯𑀁 𑀓𑀫𑁆𑀫𑀜𑁆𑀘 𑀯𑀺𑀧𑀸𑀓𑀜𑁆𑀘 𑀚𑀸𑀦𑀦𑁆𑀢𑁄𑀧𑀺 𑀓𑀭𑁄𑀢𑀺, 𑀫𑀸𑀢𑀸𑀧𑀺𑀢𑀽𑀲𑀼 𑀘𑁂𑀢𑀺𑀬𑀯𑀦𑁆𑀤𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑁂𑀲𑀼 𑀅𑀦𑀼𑀓𑀭𑁄𑀦𑁆𑀢𑀸 𑀤𑀸𑀭𑀓𑀸 𑀯𑀺𑀬 𑀓𑁂𑀯𑀮𑀁 𑀓𑀫𑁆𑀫𑀫𑁂𑀯 𑀚𑀸𑀦𑀦𑁆𑀢𑁄 ‘‘𑀇𑀫𑀲𑁆𑀲 𑀧𑀦 𑀓𑀫𑁆𑀫𑀲𑁆𑀲 𑀅𑀬𑀁 𑀯𑀺𑀧𑀸𑀓𑁄’’𑀢𑀺 𑀯𑀺𑀧𑀸𑀓𑀁 𑀅𑀚𑀸𑀦𑀦𑁆𑀢𑁄𑀧𑀺 𑀓𑀭𑁄𑀢𑀺, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀢𑀼𑀁 𑀲𑀸𑀫𑀁 𑀯𑀸 𑀢𑀁, 𑀆𑀦𑀦𑁆𑀤, 𑀓𑀸𑀬𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀇𑀫𑁂𑀲𑀼, 𑀆𑀦𑀦𑁆𑀤, 𑀥𑀫𑁆𑀫𑁂𑀲𑀽𑀢𑀺 𑀬𑁂 𑀇𑀫𑁂 ‘‘𑀲𑀸𑀫𑀁 𑀯𑀸 𑀢𑀁, 𑀆𑀦𑀦𑁆𑀤, 𑀓𑀸𑀬𑀲𑀗𑁆𑀔𑀸𑀭’’𑀦𑁆𑀢𑀺𑀆𑀤𑀻𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀼𑀢𑁆𑀢𑀸 𑀙𑀲𑀢𑁆𑀢𑀢𑀺 𑀤𑁆𑀯𑁂𑀲𑀢𑀸 𑀘𑁂𑀢𑀦𑀸𑀥𑀫𑁆𑀫𑀸, 𑀇𑀫𑁂𑀲𑀼 𑀥𑀫𑁆𑀫𑁂𑀲𑀼 𑀅𑀯𑀺𑀚𑁆𑀚𑀸 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀅𑀦𑀼𑀧𑀢𑀺𑀢𑀸. 𑀲𑀩𑁆𑀩𑁂𑀧𑀺 𑀳𑀺 𑀢𑁂 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀇𑀤𑀸𑀦𑀺 𑀯𑀺𑀯𑀝𑁆𑀝𑀁 𑀤𑀲𑁆𑀲𑁂𑀦𑁆𑀢𑁄 𑀅𑀯𑀺𑀚𑁆𑀚𑀸𑀬 𑀢𑁆𑀯𑁂𑀯𑀸𑀢𑀺𑀆𑀤𑀺𑀫𑀸𑀳. 𑀲𑁄 𑀓𑀸𑀬𑁄 𑀦 𑀳𑁄𑀢𑀻𑀢𑀺 𑀬𑀲𑁆𑀫𑀺𑀁 𑀓𑀸𑀬𑁂 𑀲𑀢𑀺 𑀓𑀸𑀬𑀲𑀜𑁆𑀘𑁂𑀢𑀦𑀸𑀧𑀘𑁆𑀘𑀬𑀁 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀓𑀸𑀬𑁄 𑀦 𑀳𑁄𑀢𑀺. 𑀯𑀸𑀘𑀸𑀫𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀧𑀺𑀘 𑀓𑀸𑀬𑁄𑀢𑀺 𑀘𑁂𑀢𑀦𑀸𑀓𑀸𑀬𑁄, 𑀯𑀸𑀘𑀸𑀧𑀺 𑀘𑁂𑀢𑀦𑀸𑀯𑀸𑀘𑀸, 𑀫𑀦𑁄𑀧𑀺 𑀓𑀫𑁆𑀫𑀫𑀦𑁄𑀬𑁂𑀯. 𑀤𑁆𑀯𑀸𑀭𑀓𑀸𑀬𑁄 𑀯𑀸 𑀓𑀸𑀬𑁄. 𑀯𑀸𑀘𑀸𑀫𑀦𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀔𑀻𑀡𑀸𑀲𑀯𑁄 𑀘𑁂𑀢𑀺𑀬𑀁 𑀯𑀦𑁆𑀤𑀢𑀺, 𑀥𑀫𑁆𑀫𑀁 𑀪𑀡𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀢𑀺, 𑀓𑀣𑀫𑀲𑁆𑀲 𑀓𑀸𑀬𑀸𑀤𑀬𑁄 𑀦 𑀳𑁄𑀦𑁆𑀢𑀻𑀢𑀺? 𑀅𑀯𑀺𑀧𑀸𑀓𑀢𑁆𑀢𑀸. 𑀔𑀻𑀡𑀸𑀲𑀯𑁂𑀦 𑀳𑀺 𑀓𑀢𑀁 𑀓𑀫𑁆𑀫𑀁 𑀦𑁂𑀯 𑀓𑀼𑀲𑀮𑀁 𑀳𑁄𑀢𑀺 𑀦𑀸𑀓𑀼𑀲𑀮𑀁. 𑀅𑀯𑀺𑀧𑀸𑀓𑀁 𑀳𑀼𑀢𑁆𑀯𑀸 𑀓𑀺𑀭𑀺𑀬𑀸𑀫𑀢𑁆𑀢𑁂 𑀢𑀺𑀝𑁆𑀞𑀢𑀺, 𑀢𑁂𑀦𑀲𑁆𑀲 𑀢𑁂 𑀓𑀸𑀬𑀸𑀤𑀬𑁄 𑀦 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁.

𑀔𑁂𑀢𑁆𑀢𑀁 𑀢𑀁 𑀦 𑀳𑁄𑀢𑀻𑀢𑀺𑀆𑀤𑀻𑀲𑀼𑀧𑀺 𑀯𑀺𑀭𑀼𑀳𑀦𑀝𑁆𑀞𑁂𑀦 𑀢𑀁 𑀔𑁂𑀢𑁆𑀢𑀁 𑀦 𑀳𑁄𑀢𑀺, 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀯𑀢𑁆𑀣𑀼 𑀦 𑀳𑁄𑀢𑀺, 𑀧𑀘𑁆𑀘𑀬𑀝𑁆𑀞𑁂𑀦 𑀆𑀬𑀢𑀦𑀁 𑀦 𑀳𑁄𑀢𑀺, 𑀓𑀸𑀭𑀡𑀝𑁆𑀞𑁂𑀦 𑀅𑀥𑀺𑀓𑀭𑀡𑀁 𑀦 𑀳𑁄𑀢𑀺. 𑀲𑀜𑁆𑀘𑁂𑀢𑀦𑀸𑀫𑀽𑀮𑀓𑀜𑁆𑀳𑀺 𑀅𑀚𑁆𑀛𑀢𑁆𑀢𑀁 𑀲𑀼𑀔𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀲𑀸 𑀲𑀜𑁆𑀘𑁂𑀢𑀦𑀸 𑀏𑀢𑁂𑀲𑀁 𑀯𑀺𑀭𑀼𑀳𑀦𑀸𑀤𑀻𑀦𑀁 𑀅𑀢𑁆𑀣𑀸𑀦𑀁 𑀅𑀪𑀸𑀯𑁂𑀦 𑀢𑀲𑁆𑀲 𑀲𑀼𑀔𑀤𑀼𑀓𑁆𑀔𑀲𑁆𑀲 𑀦𑁂𑀯 𑀔𑁂𑀢𑁆𑀢𑀁, 𑀦 𑀯𑀢𑁆𑀣𑀼 𑀦 𑀆𑀬𑀢𑀦𑀁, 𑀦 𑀅𑀥𑀺𑀓𑀭𑀡𑀁 𑀳𑁄𑀢𑀻𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑁂𑀤𑀦𑀸𑀤𑀻𑀲𑀼 𑀲𑀼𑀔𑀤𑀼𑀓𑁆𑀔𑀫𑁂𑀯 𑀓𑀣𑀺𑀢𑀁, 𑀢𑀜𑁆𑀘 𑀔𑁄 𑀯𑀺𑀧𑀸𑀓𑀫𑁂𑀯𑀸𑀢𑀺. 𑀧𑀜𑁆𑀘𑀫𑀁.

𑀙𑀝𑁆𑀞𑀁 𑀉𑀧𑀯𑀸𑀡𑀲𑀼𑀢𑁆𑀢𑀁 𑀉𑀢𑁆𑀢𑀸𑀦𑀫𑁂𑀯. 𑀏𑀢𑁆𑀣 𑀧𑀦 𑀯𑀝𑁆𑀝𑀤𑀼𑀓𑁆𑀔𑀫𑁂𑀯 𑀓𑀣𑀺𑀢𑀦𑁆𑀢𑀺. 𑀙𑀝𑁆𑀞𑀁.

𑁭. 𑀧𑀘𑁆𑀘𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭-𑁨𑁮. 𑀲𑀢𑁆𑀢𑀫𑁂 𑀧𑀝𑀺𑀧𑀸𑀝𑀺𑀬𑀸 𑀯𑀼𑀢𑁆𑀢𑁂𑀲𑀼 𑀧𑀭𑀺𑀬𑁄𑀲𑀸𑀦𑀧𑀤𑀁 𑀕𑀳𑁂𑀢𑁆𑀯𑀸 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀚𑀭𑀸𑀫𑀭𑀡𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀧𑀘𑁆𑀘𑀬𑀁 𑀧𑀚𑀸𑀦𑀸𑀢𑀻𑀢𑀺 𑀏𑀯𑀁 𑀤𑀼𑀓𑁆𑀔𑀲𑀘𑁆𑀘𑀯𑀲𑁂𑀦 𑀧𑀘𑁆𑀘𑀬𑀁 𑀚𑀸𑀦𑀸𑀢𑀺. 𑀧𑀘𑁆𑀘𑀬𑀲𑀫𑀼𑀤𑀬𑀸𑀤𑀬𑁄𑀧𑀺 𑀲𑀫𑀼𑀤𑀬𑀲𑀘𑁆𑀘𑀸𑀤𑀻𑀦𑀁𑀬𑁂𑀯 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄𑀢𑀺 𑀫𑀕𑁆𑀕𑀤𑀺𑀝𑁆𑀞𑀺𑀬𑀸 𑀲𑀫𑁆𑀧𑀦𑁆𑀦𑁄. 𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀆𑀕𑀢𑁄 𑀇𑀫𑀁 𑀲𑀤𑁆𑀥𑀫𑁆𑀫𑀦𑁆𑀢𑀺 𑀫𑀕𑁆𑀕𑀲𑀤𑁆𑀥𑀫𑁆𑀫𑀁 𑀆𑀕𑀢𑁄. 𑀧𑀲𑁆𑀲𑀢𑀻𑀢𑀺 𑀫𑀕𑁆𑀕𑀲𑀤𑁆𑀥𑀫𑁆𑀫𑀫𑁂𑀯 𑀧𑀲𑁆𑀲𑀢𑀺. 𑀲𑁂𑀓𑁆𑀔𑁂𑀦 𑀜𑀸𑀡𑁂𑀦𑀸𑀢𑀺 𑀫𑀕𑁆𑀕𑀜𑀸𑀡𑁂𑀦𑁂𑀯. 𑀲𑁂𑀓𑁆𑀔𑀸𑀬 𑀯𑀺𑀚𑁆𑀚𑀸𑀬𑀸𑀢𑀺 𑀫𑀕𑁆𑀕𑀯𑀺𑀚𑁆𑀚𑀸𑀬 𑀏𑀯. 𑀥𑀫𑁆𑀫𑀲𑁄𑀢𑀁 𑀲𑀫𑀸𑀧𑀦𑁆𑀦𑁄𑀢𑀺 𑀫𑀕𑁆𑀕𑀲𑀗𑁆𑀔𑀸𑀢𑀫𑁂𑀯 𑀥𑀫𑁆𑀫𑀲𑁄𑀢𑀁 𑀲𑀫𑀸𑀧𑀦𑁆𑀦𑁄. 𑀅𑀭𑀺𑀬𑁄𑀢𑀺 𑀧𑀼𑀣𑀼𑀚𑁆𑀚𑀦𑀪𑀽𑀫𑀺𑀁 𑀅𑀢𑀺𑀓𑁆𑀓𑀦𑁆𑀢𑁄. 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄𑀢𑀺 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀅𑀫𑀢𑀤𑁆𑀯𑀸𑀭𑀁 𑀆𑀳𑀘𑁆𑀘 𑀢𑀺𑀝𑁆𑀞𑀢𑀻𑀢𑀺 𑀅𑀫𑀢𑀁 𑀦𑀸𑀫 𑀦𑀺𑀩𑁆𑀩𑀸𑀦𑀁, 𑀢𑀲𑁆𑀲 𑀤𑁆𑀯𑀸𑀭𑀁 𑀅𑀭𑀺𑀬𑀫𑀕𑁆𑀕𑀁 𑀆𑀳𑀘𑁆𑀘 𑀢𑀺𑀝𑁆𑀞𑀢𑀻𑀢𑀺. 𑀅𑀝𑁆𑀞𑀫𑀁 𑀉𑀢𑁆𑀢𑀸𑀦𑀫𑁂𑀯. 𑀲𑀢𑁆𑀢𑀫𑀅𑀝𑁆𑀞𑀫𑀸𑀦𑀺.

𑁯. 𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯-𑁩𑁦. 𑀦𑀯𑀫𑀁 𑀅𑀓𑁆𑀔𑀭𑀪𑀸𑀡𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀚𑁆𑀛𑀸𑀲𑀬𑁂𑀦 𑀯𑀼𑀢𑁆𑀢𑀁. 𑀢𑁂 𑀳𑀺 𑀧𑀭𑀻𑀢𑀺 𑀉𑀧𑀲𑀕𑁆𑀕𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑁂 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀦𑀯𑀫𑀁.

𑀤𑀲𑀫𑁂 𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯. 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀲𑀼𑀢𑁆𑀢𑁂𑀲𑀼 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑁄𑀯 𑀓𑀣𑀺𑀢𑁄. 𑀤𑀲𑀫𑀁.

𑀤𑀲𑀩𑀮𑀯𑀕𑁆𑀕𑁄 𑀢𑀢𑀺𑀬𑁄.

𑁪. 𑀓𑀴𑀸𑀭𑀔𑀢𑁆𑀢𑀺𑀬𑀯𑀕𑁆𑀕𑁄

𑁧. 𑀪𑀽𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀓𑀴𑀸𑀭𑀔𑀢𑁆𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀅𑀚𑀺𑀢𑀧𑀜𑁆𑀳𑁂𑀢𑀺 𑀅𑀚𑀺𑀢𑀫𑀸𑀡𑀯𑁂𑀦 𑀧𑀼𑀘𑁆𑀙𑀺𑀢𑀧𑀜𑁆𑀳𑁂. 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂𑀢𑀺 𑀲𑀗𑁆𑀔𑀸𑀢𑀥𑀫𑁆𑀫𑀸 𑀯𑀼𑀘𑁆𑀘𑀦𑁆𑀢𑀺 𑀜𑀸𑀢𑀥𑀫𑁆𑀫𑀸 𑀢𑀼𑀮𑀺𑀢𑀥𑀫𑁆𑀫𑀸 𑀢𑀻𑀭𑀺𑀢𑀥𑀫𑁆𑀫𑀸. 𑀲𑁂𑀓𑁆𑀔𑀸𑀢𑀺 𑀲𑀢𑁆𑀢 𑀲𑁂𑀓𑁆𑀔𑀸. 𑀧𑀼𑀣𑀽𑀢𑀺 𑀢𑁂𑀬𑁂𑀯 𑀲𑀢𑁆𑀢 𑀚𑀦𑁂 𑀲𑀦𑁆𑀥𑀸𑀬 𑀧𑀼𑀣𑀽𑀢𑀺 𑀯𑀼𑀢𑁆𑀢𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀦𑀺𑀧𑀓𑁄𑀢𑀺 𑀦𑁂𑀧𑀓𑁆𑀓𑀁 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀢𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀦𑀺𑀧𑀓𑁄, 𑀢𑁆𑀯𑀁 𑀧𑀡𑁆𑀟𑀺𑀢𑁄 𑀧𑀩𑁆𑀭𑀽𑀳𑀻𑀢𑀺 𑀬𑀸𑀘𑀢𑀺. 𑀇𑀭𑀺𑀬𑀦𑁆𑀢𑀺 𑀯𑀼𑀢𑁆𑀢𑀺𑀁 𑀆𑀘𑀸𑀭𑀁 𑀕𑁄𑀘𑀭𑀁 𑀯𑀺𑀳𑀸𑀭𑀁 𑀧𑀝𑀺𑀧𑀢𑁆𑀢𑀺𑀁. 𑀫𑀸𑀭𑀺𑀲𑀸𑀢𑀺 𑀪𑀕𑀯𑀦𑁆𑀢𑀁 𑀆𑀮𑀧𑀢𑀺. 𑀲𑁂𑀓𑁆𑀔𑀸𑀦𑀜𑁆𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀦𑀜𑁆𑀘 𑀔𑀻𑀡𑀸𑀲𑀯𑀸𑀦𑀜𑁆𑀘 𑀧𑀝𑀺𑀧𑀢𑁆𑀢𑀺𑀁 𑀫𑀬𑀸 𑀧𑀼𑀘𑁆𑀙𑀺𑀢𑁄 𑀧𑀡𑁆𑀟𑀺𑀢, 𑀫𑀸𑀭𑀺𑀲, 𑀫𑀬𑁆𑀳𑀁 𑀓𑀣𑁂𑀳𑀻𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄.

𑀢𑀼𑀡𑁆𑀳𑀻 𑀅𑀳𑁄𑀲𑀻𑀢𑀺 𑀓𑀲𑁆𑀫𑀸 𑀬𑀸𑀯 𑀢𑀢𑀺𑀬𑀁 𑀧𑀼𑀝𑁆𑀞𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺? 𑀓𑀺𑀁 𑀧𑀜𑁆𑀳𑁂 𑀓𑀗𑁆𑀔𑀢𑀺, 𑀉𑀤𑀸𑀳𑀼 𑀅𑀚𑁆𑀛𑀸𑀲𑀬𑁂𑀢𑀺? 𑀅𑀚𑁆𑀛𑀸𑀲𑀬𑁂 𑀓𑀗𑁆𑀔𑀢𑀺, 𑀦𑁄 𑀧𑀜𑁆𑀳𑁂. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀲𑀢𑁆𑀣𑀸 𑀫𑀁 𑀲𑁂𑀓𑁆𑀔𑀸𑀲𑁂𑀓𑁆𑀔𑀸𑀦𑀁 𑀆𑀕𑀫𑀦𑀻𑀬𑀧𑀝𑀺𑀧𑀤𑀁 𑀓𑀣𑀸𑀧𑁂𑀢𑀼𑀓𑀸𑀫𑁄; 𑀲𑀸 𑀘 𑀔𑀦𑁆𑀥𑀯𑀲𑁂𑀦 𑀥𑀸𑀢𑀼𑀯𑀲𑁂𑀦 𑀆𑀬𑀢𑀦𑀯𑀲𑁂𑀦 𑀧𑀘𑁆𑀘𑀬𑀸𑀓𑀸𑀭𑀯𑀲𑁂𑀦𑀸𑀢𑀺 𑀩𑀳𑀽𑀳𑀺 𑀓𑀸𑀭𑀡𑁂𑀳𑀺 𑀲𑀓𑁆𑀓𑀸 𑀓𑀣𑁂𑀢𑀼𑀁. 𑀓𑀣𑀁 𑀓𑀣𑁂𑀦𑁆𑀢𑁄 𑀦𑀼 𑀔𑁄 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺? 𑀅𑀣 𑀲𑀢𑁆𑀣𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀞𑀧𑁂𑀢𑁆𑀯𑀸 𑀫𑀁 𑀅𑀜𑁆𑀜𑁄 𑀧𑀢𑁆𑀢𑀁 𑀆𑀤𑀸𑀬 𑀘𑀭𑀦𑁆𑀢𑁄 𑀲𑀸𑀯𑀓𑁄 𑀦𑀸𑀫 𑀧𑀜𑁆𑀜𑀸𑀬 𑀲𑀸𑀭𑀺𑀧𑀼𑀢𑁆𑀢𑀲𑀫𑁄 𑀦𑀢𑁆𑀣𑀺. 𑀅𑀬𑀫𑁆𑀧𑀺 𑀫𑀬𑀸 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀬𑀸𑀯 𑀢𑀢𑀺𑀬𑀁 𑀢𑀼𑀡𑁆𑀳𑀻 𑀏𑀯. 𑀧𑀜𑁆𑀳𑁂 𑀦𑀼 𑀔𑁄 𑀓𑀗𑁆𑀔𑀢𑀺, 𑀉𑀤𑀸𑀳𑀼 𑀅𑀚𑁆𑀛𑀸𑀲𑀬𑁂’’𑀢𑀺. 𑀅𑀣 ‘‘𑀅𑀚𑁆𑀛𑀸𑀲𑀬𑁂’’𑀢𑀺 𑀜𑀢𑁆𑀯𑀸 𑀧𑀜𑁆𑀳𑀓𑀣𑀦𑀢𑁆𑀣𑀸𑀬 𑀦𑀬𑀁 𑀤𑀤𑀫𑀸𑀦𑁄 𑀪𑀽𑀢𑀫𑀺𑀤𑀦𑁆𑀢𑀺, 𑀲𑀸𑀭𑀺𑀧𑀼𑀢𑁆𑀢, 𑀧𑀲𑁆𑀲𑀲𑀻𑀢𑀺 𑀆𑀳.

𑀢𑀢𑁆𑀣 𑀪𑀽𑀢𑀦𑁆𑀢𑀺 𑀚𑀸𑀢𑀁 𑀦𑀺𑀩𑁆𑀩𑀢𑁆𑀢𑀁, 𑀔𑀦𑁆𑀥𑀧𑀜𑁆𑀘𑀓𑀲𑁆𑀲𑁂𑀢𑀁 𑀦𑀸𑀫𑀁. 𑀇𑀢𑀺 𑀲𑀢𑁆𑀣𑀸 ‘‘𑀧𑀜𑁆𑀘𑀓𑁆𑀔𑀦𑁆𑀥𑀯𑀲𑁂𑀦, 𑀲𑀸𑀭𑀺𑀧𑀼𑀢𑁆𑀢, 𑀇𑀫𑀁 𑀧𑀜𑁆𑀳𑀁 𑀓𑀣𑁂𑀳𑀻’’𑀢𑀺 𑀣𑁂𑀭𑀲𑁆𑀲 𑀦𑀬𑀁 𑀤𑁂𑀢𑀺. 𑀲𑀳𑀦𑀬𑀤𑀸𑀦𑁂𑀦 𑀧𑀦 𑀣𑁂𑀭𑀲𑁆𑀲 𑀢𑀻𑀭𑁂 𑀞𑀺𑀢𑀧𑀼𑀭𑀺𑀲𑀲𑁆𑀲 𑀯𑀺𑀯𑀝𑁄 𑀏𑀓𑀗𑁆𑀕𑀡𑁄 𑀫𑀳𑀸𑀲𑀫𑀼𑀤𑁆𑀤𑁄 𑀯𑀺𑀬 𑀦𑀬𑀲𑀢𑁂𑀦 𑀦𑀬𑀲𑀳𑀲𑁆𑀲𑁂𑀦 𑀧𑀜𑁆𑀳𑀩𑁆𑀬𑀸𑀓𑀭𑀡𑀁 𑀉𑀧𑀝𑁆𑀞𑀸𑀲𑀺. 𑀅𑀣 𑀦𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑀪𑀽𑀢𑀫𑀺𑀤𑀦𑁆𑀢𑀺, 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀽𑀢𑀫𑀺𑀤𑀦𑁆𑀢𑀺 𑀇𑀤𑀁 𑀦𑀺𑀩𑁆𑀩𑀢𑁆𑀢𑀁 𑀔𑀦𑁆𑀥𑀧𑀜𑁆𑀘𑀓𑀁. 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑀻𑀢𑀺 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀲𑀫𑁆𑀫𑀸 𑀧𑀲𑁆𑀲𑀢𑀺. 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻𑀢𑀺 𑀲𑀻𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀦𑀺𑀩𑁆𑀩𑀺𑀤𑀸𑀤𑀻𑀦𑀁 𑀅𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀢𑀤𑀸𑀳𑀸𑀭𑀲𑀫𑁆𑀪𑀯𑀦𑁆𑀢𑀺 𑀇𑀤𑀁 𑀓𑀲𑁆𑀫𑀸 𑀆𑀭𑀪𑀺? 𑀏𑀢𑀁 𑀔𑀦𑁆𑀥𑀧𑀜𑁆𑀘𑀓𑀁 𑀆𑀳𑀸𑀭𑀁 𑀧𑀝𑀺𑀘𑁆𑀘 𑀞𑀺𑀢𑀁, 𑀢𑀲𑁆𑀫𑀸 𑀢𑀁 𑀆𑀳𑀸𑀭𑀲𑀫𑁆𑀪𑀯𑀁 𑀦𑀸𑀫 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀆𑀭𑀪𑀺. 𑀇𑀢𑀺 𑀇𑀫𑀺𑀦𑀸𑀧𑀺 𑀧𑀭𑀺𑀬𑀸𑀬𑁂𑀦 𑀲𑁂𑀓𑁆𑀔𑀧𑀝𑀺𑀧𑀤𑀸 𑀓𑀣𑀺𑀢𑀸 𑀳𑁄𑀢𑀺. 𑀢𑀤𑀸𑀳𑀸𑀭𑀦𑀺𑀭𑁄𑀥𑀸𑀢𑀺 𑀢𑁂𑀲𑀁 𑀆𑀳𑀸𑀭𑀸𑀦𑀁 𑀦𑀺𑀭𑁄𑀥𑁂𑀦. 𑀇𑀤𑀁 𑀓𑀲𑁆𑀫𑀸 𑀆𑀭𑀪𑀺? 𑀢𑀜𑁆𑀳𑀺 𑀔𑀦𑁆𑀥𑀧𑀜𑁆𑀘𑀓𑀁 𑀆𑀳𑀸𑀭𑀦𑀺𑀭𑁄𑀥𑀸 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀢𑀁 𑀆𑀳𑀸𑀭𑀦𑀺𑀭𑁄𑀥𑀲𑀫𑁆𑀪𑀯𑀁 𑀦𑀸𑀫 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀆𑀭𑀪𑀺. 𑀇𑀢𑀺 𑀇𑀫𑀺𑀦𑀸𑀧𑀺 𑀧𑀭𑀺𑀬𑀸𑀬𑁂𑀦 𑀲𑁂𑀓𑁆𑀔𑀲𑁆𑀲𑁂𑀯 𑀧𑀝𑀺𑀧𑀤𑀸 𑀓𑀣𑀺𑀢𑀸. 𑀦𑀺𑀩𑁆𑀩𑀺𑀤𑀸𑀢𑀺 𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀓𑀸𑀭𑀡𑀯𑀘𑀦𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀦𑀼𑀧𑀸𑀤𑀸 𑀯𑀺𑀫𑀼𑀢𑁆𑀢𑁄𑀢𑀺 𑀘𑀢𑀽𑀳𑀺 𑀉𑀧𑀸𑀤𑀸𑀦𑁂𑀳𑀺 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀕𑀳𑁂𑀢𑁆𑀯𑀸 𑀯𑀺𑀫𑀼𑀢𑁆𑀢𑁄. 𑀲𑀸𑀥𑀼 𑀲𑀸𑀥𑀽𑀢𑀺 𑀇𑀫𑀺𑀦𑀸 𑀣𑁂𑀭𑀲𑁆𑀲 𑀩𑁆𑀬𑀸𑀓𑀭𑀡𑀁 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀲𑀬𑀫𑁆𑀧𑀺 𑀢𑀣𑁂𑀯 𑀩𑁆𑀬𑀸𑀓𑀭𑁄𑀦𑁆𑀢𑁄 𑀧𑀼𑀦 ‘‘𑀪𑀽𑀢𑀫𑀺𑀤’’𑀦𑁆𑀢𑀺𑀆𑀤𑀺𑀫𑀸𑀳𑀸𑀢𑀺. 𑀧𑀞𑀫𑀁.

𑁨. 𑀓𑀴𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨. 𑀤𑀼𑀢𑀺𑀬𑁂 𑀓𑀴𑀸𑀭𑀔𑀢𑁆𑀢𑀺𑀬𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁. 𑀤𑀦𑁆𑀢𑀸 𑀧𑀦𑀲𑁆𑀲 𑀓𑀴𑀸𑀭𑀸 𑀯𑀺𑀲𑀫𑀲𑀡𑁆𑀞𑀸𑀦𑀸, 𑀢𑀲𑁆𑀫𑀸 ‘‘𑀓𑀴𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀳𑀻𑀦𑀸𑀬𑀸𑀯𑀢𑁆𑀢𑁄𑀢𑀺 𑀳𑀻𑀦𑀲𑁆𑀲 𑀕𑀺𑀳𑀺𑀪𑀸𑀯𑀲𑁆𑀲 𑀅𑀢𑁆𑀣𑀸𑀬 𑀦𑀺𑀯𑀢𑁆𑀢𑁄. 𑀅𑀲𑁆𑀲𑀸𑀲𑀫𑀮𑀢𑁆𑀣𑀸𑀢𑀺 𑀅𑀲𑁆𑀲𑀸𑀲𑀁 𑀅𑀯𑀲𑁆𑀲𑀬𑀁 𑀧𑀢𑀺𑀝𑁆𑀞𑀁 𑀦 𑀳𑀺 𑀦𑀽𑀦 𑀅𑀮𑀢𑁆𑀣, 𑀢𑀬𑁄 𑀫𑀕𑁆𑀕𑁂 𑀢𑀻𑀡𑀺 𑀘 𑀨𑀮𑀸𑀦𑀺 𑀦𑀽𑀦 𑀦𑀸𑀮𑀢𑁆𑀣𑀸𑀢𑀺 𑀤𑀻𑀧𑁂𑀢𑀺. 𑀬𑀤𑀺 𑀳𑀺 𑀢𑀸𑀦𑀺 𑀮𑀪𑁂𑀬𑁆𑀬, 𑀦 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑁂𑀬𑁆𑀬𑀸𑀢𑀺 𑀅𑀬𑀁 𑀣𑁂𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀦 𑀔𑁆𑀯𑀸𑀳𑀁, 𑀆𑀯𑀼𑀲𑁄𑀢𑀺 𑀅𑀳𑀁 𑀔𑁄, 𑀆𑀯𑀼𑀲𑁄, ‘‘𑀅𑀲𑁆𑀲𑀸𑀲𑀁 𑀧𑀢𑁆𑀢𑁄, 𑀦 𑀧𑀢𑁆𑀢𑁄’’𑀢𑀺 𑀦 𑀓𑀗𑁆𑀔𑀸𑀫𑀺. 𑀣𑁂𑀭𑀲𑁆𑀲 𑀳𑀺 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁 𑀅𑀯𑀲𑁆𑀲𑀬𑁄, 𑀢𑀲𑁆𑀫𑀸 𑀲𑁄 𑀦 𑀓𑀗𑁆𑀔𑀢𑀺. 𑀆𑀬𑀢𑀺𑀁 𑀧𑀦𑀸𑀯𑀼𑀲𑁄𑀢𑀺 𑀇𑀫𑀺𑀦𑀸 ‘‘𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺 𑀢𑀼𑀫𑁆𑀳𑀸𑀓𑀁 𑀉𑀕𑁆𑀖𑀸𑀝𑀺𑀢𑀸, 𑀦 𑀉𑀕𑁆𑀖𑀸𑀝𑀺𑀢𑀸’’𑀢𑀺 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀁 𑀧𑀼𑀘𑁆𑀙𑀢𑀺. 𑀦 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀯𑀺𑀘𑀺𑀓𑀺𑀘𑁆𑀙𑀸𑀫𑀻𑀢𑀺 𑀇𑀫𑀺𑀦𑀸 𑀣𑁂𑀭𑁄 𑀢𑀢𑁆𑀣 𑀯𑀺𑀘𑀺𑀓𑀺𑀘𑁆𑀙𑀸𑀪𑀸𑀯𑀁 𑀤𑀻𑀧𑁂𑀢𑀺.

𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 ‘‘𑀇𑀫𑀁 𑀲𑀼𑀢𑀓𑀸𑀭𑀡𑀁 𑀪𑀕𑀯𑀢𑁄 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀉𑀧𑀲𑀗𑁆𑀓𑀫𑀺. 𑀅𑀜𑁆𑀜𑀸 𑀩𑁆𑀬𑀸𑀓𑀢𑀸𑀢𑀺 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀢𑀁. 𑀔𑀻𑀡𑀸 𑀚𑀸𑀢𑀻𑀢𑀺 𑀦 𑀣𑁂𑀭𑁂𑀦 𑀏𑀯𑀁 𑀩𑁆𑀬𑀸𑀓𑀢𑀸, 𑀅𑀬𑀁 𑀧𑀦 𑀣𑁂𑀭𑁄 𑀢𑀼𑀝𑁆𑀞𑁄 𑀧𑀲𑀦𑁆𑀦𑁄 𑀏𑀯𑀁 𑀧𑀤𑀩𑁆𑀬𑀜𑁆𑀚𑀦𑀸𑀦𑀺 𑀆𑀭𑁄𑀧𑁂𑀢𑁆𑀯𑀸 𑀆𑀳. 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀻𑀢𑀺 𑀢𑀁 𑀲𑀼𑀢𑁆𑀯𑀸 𑀲𑀢𑁆𑀣𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀸𑀭𑀺𑀧𑀼𑀢𑁆𑀢𑁄 𑀥𑀻𑀭𑁄 𑀕𑀫𑁆𑀪𑀻𑀭𑁄. 𑀦 𑀲𑁄 𑀓𑁂𑀦𑀘𑀺 𑀓𑀸𑀭𑀡𑁂𑀦 𑀏𑀯𑀁 𑀩𑁆𑀬𑀸𑀓𑀭𑀺𑀲𑁆𑀲𑀢𑀺. 𑀲𑀁𑀔𑀺𑀢𑁆𑀢𑁂𑀦 𑀧𑀦 𑀧𑀜𑁆𑀳𑁄 𑀩𑁆𑀬𑀸𑀓𑀢𑁄 𑀪𑀯𑀺𑀲𑁆𑀲𑀢𑀺. 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀦𑀁 𑀧𑀜𑁆𑀳𑀁 𑀩𑁆𑀬𑀸𑀓𑀭𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀺.

𑀲𑀘𑁂 𑀢𑀁 𑀲𑀸𑀭𑀺𑀧𑀼𑀢𑁆𑀢𑀸𑀢𑀺 𑀇𑀤𑀁 𑀪𑀕𑀯𑀸 ‘‘𑀦 𑀏𑀲 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀅𑀜𑁆𑀜𑀁 𑀩𑁆𑀬𑀸𑀓𑀭𑀺𑀲𑁆𑀲𑀢𑀺, 𑀧𑀜𑁆𑀳𑀫𑁂𑀢𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀢𑀁 𑀓𑀣𑁂𑀦𑁆𑀢𑁄𑀯 𑀅𑀜𑁆𑀜𑀁 𑀩𑁆𑀬𑀸𑀓𑀭𑀺𑀲𑁆𑀲𑀢𑀻’’𑀢𑀺 𑀅𑀜𑁆𑀜𑀁 𑀩𑁆𑀬𑀸𑀓𑀭𑀸𑀧𑁂𑀢𑀼𑀁 𑀏𑀯𑀁 𑀧𑀼𑀘𑁆𑀙𑀺. 𑀬𑀁𑀦𑀺𑀤𑀸𑀦𑀸𑀯𑀼𑀲𑁄, 𑀚𑀸𑀢𑀻𑀢𑀺, 𑀆𑀯𑀼𑀲𑁄, 𑀅𑀬𑀁 𑀚𑀸𑀢𑀺 𑀦𑀸𑀫 𑀬𑀁𑀧𑀘𑁆𑀘𑀬𑀸, 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀔𑀬𑀸 𑀔𑀻𑀡𑀲𑁆𑀫𑀺𑀁 𑀚𑀸𑀢𑀺𑀬𑀸 𑀧𑀘𑁆𑀘𑀬𑁂 𑀚𑀸𑀢𑀺𑀲𑀗𑁆𑀔𑀸𑀢𑀁 𑀨𑀮𑀁 𑀔𑀻𑀡𑀦𑁆𑀢𑀺 𑀯𑀺𑀤𑀺𑀢𑀁. 𑀇𑀥𑀸𑀧𑀺 𑀘 𑀣𑁂𑀭𑁄 𑀧𑀜𑁆𑀳𑁂 𑀅𑀓𑀗𑁆𑀔𑀺𑀢𑁆𑀯𑀸 𑀅𑀚𑁆𑀛𑀸𑀲𑀬𑁂 𑀓𑀗𑁆𑀔𑀢𑀺. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀜𑁆𑀜𑀸 𑀦𑀸𑀫 𑀢𑀡𑁆𑀳𑀸 𑀔𑀻𑀡𑀸, 𑀉𑀧𑀸𑀤𑀸𑀦𑀁 𑀔𑀻𑀡𑀁, 𑀪𑀯𑁄 𑀔𑀻𑀡𑁄, 𑀧𑀘𑁆𑀘𑀬𑁄 𑀔𑀻𑀡𑁄, 𑀓𑀺𑀮𑁂𑀲𑀸 𑀔𑀻𑀡𑀸𑀢𑀺𑀆𑀤𑀻𑀳𑀺 𑀩𑀳𑀽𑀳𑀺 𑀓𑀸𑀭𑀡𑁂𑀳𑀺 𑀲𑀓𑁆𑀓𑀸 𑀩𑁆𑀬𑀸𑀓𑀸𑀢𑀼𑀁, 𑀓𑀣𑀁 𑀓𑀣𑁂𑀦𑁆𑀢𑁄 𑀧𑀦 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀁 𑀕𑀳𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺.

𑀓𑀺𑀜𑁆𑀘𑀸𑀧𑀺 𑀏𑀯𑀁 𑀅𑀚𑁆𑀛𑀸𑀲𑀬𑁂 𑀓𑀗𑁆𑀔𑀢𑀺, 𑀧𑀜𑁆𑀳𑀁 𑀧𑀦 𑀅𑀝𑁆𑀞𑀧𑁂𑀢𑁆𑀯𑀸𑀯 𑀧𑀘𑁆𑀘𑀬𑀸𑀓𑀸𑀭𑀯𑀲𑁂𑀦 𑀩𑁆𑀬𑀸𑀓𑀸𑀲𑀺. 𑀲𑀢𑁆𑀣𑀸𑀧𑀺 𑀧𑀘𑁆𑀘𑀬𑀸𑀓𑀸𑀭𑀯𑀲𑁂𑀦𑁂𑀯 𑀩𑁆𑀬𑀸𑀓𑀭𑀸𑀧𑁂𑀢𑀼𑀓𑀸𑀫𑁄, 𑀢𑀲𑁆𑀫𑀸 𑀏𑀲 𑀩𑁆𑀬𑀸𑀓𑀭𑁄𑀦𑁆𑀢𑁄𑀯 𑀅𑀚𑁆𑀛𑀸𑀲𑀬𑀁 𑀕𑀡𑁆𑀳𑀺. 𑀢𑀸𑀯𑀤𑁂𑀯 ‘‘𑀕𑀳𑀺𑀢𑁄 𑀫𑁂 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑁄’’𑀢𑀺 𑀅𑀜𑁆𑀜𑀸𑀲𑀺. 𑀅𑀣𑀲𑁆𑀲 𑀦𑀬𑀲𑀢𑁂𑀦 𑀦𑀬𑀲𑀳𑀲𑁆𑀲𑁂𑀦 𑀧𑀜𑁆𑀳𑀩𑁆𑀬𑀸𑀓𑀭𑀡𑀁 𑀉𑀧𑀝𑁆𑀞𑀸𑀲𑀺. 𑀬𑀲𑁆𑀫𑀸 𑀧𑀦 𑀪𑀕𑀯𑀸 𑀉𑀢𑁆𑀢𑀭𑀺 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀢𑀲𑁆𑀫𑀸 𑀢𑁂𑀦 𑀢𑀁 𑀩𑁆𑀬𑀸𑀓𑀭𑀡𑀁 𑀅𑀦𑀼𑀫𑁄𑀤𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀣𑀁 𑀚𑀸𑀦𑀢𑁄 𑀧𑀦 𑀢𑁂𑀢𑀺 𑀇𑀤𑀁 𑀓𑀲𑁆𑀫𑀸 𑀆𑀭𑀪𑀺? 𑀲𑀯𑀺𑀲𑀬𑁂 𑀲𑀻𑀳𑀦𑀸𑀤𑀁 𑀦𑀤𑀸𑀧𑁂𑀢𑀼𑀁. 𑀣𑁂𑀭𑁄 𑀓𑀺𑀭 𑀲𑀽𑀓𑀭𑀦𑀺𑀔𑀸𑀢𑀮𑁂𑀡𑀤𑁆𑀯𑀸𑀭𑁂 𑀤𑀻𑀖𑀦𑀔𑀧𑀭𑀺𑀩𑁆𑀩𑀸𑀚𑀓𑀲𑁆𑀲 𑀯𑁂𑀤𑀦𑀸𑀧𑀭𑀺𑀕𑁆𑀕𑀳𑀲𑀼𑀢𑁆𑀢𑁂 𑀓𑀣𑀺𑀬𑀫𑀸𑀦𑁂 𑀢𑀸𑀮𑀯𑀡𑁆𑀝𑀁 𑀕𑀳𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀩𑀻𑀚𑀬𑀫𑀸𑀦𑁄 𑀞𑀺𑀢𑁄 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁 𑀅𑀥𑀺𑀕𑀢𑁄, 𑀅𑀬𑀫𑀲𑁆𑀲 𑀲𑀯𑀺𑀲𑀬𑁄. 𑀇𑀫𑀲𑁆𑀫𑀺𑀁 𑀲𑀯𑀺𑀲𑀬𑁂 𑀞𑀺𑀢𑁄 𑀲𑀻𑀳𑀦𑀸𑀤𑀁 𑀦𑀤𑀺𑀲𑁆𑀲𑀢𑀻𑀢𑀺 𑀦𑀁 𑀲𑀦𑁆𑀥𑀸𑀬 𑀲𑀢𑁆𑀣𑀸 𑀇𑀤𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀅𑀦𑀺𑀘𑁆𑀘𑀸𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀸. 𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀲𑀼𑀔𑀸 𑀯𑁂𑀤𑀦𑀸 𑀞𑀺𑀢𑀺𑀲𑀼𑀔𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀸, 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀞𑀺𑀢𑀺𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀲𑀼𑀔𑀸, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀜𑀸𑀡𑀲𑀼𑀔𑀸 𑀅𑀜𑁆𑀜𑀸𑀡𑀤𑀼𑀓𑁆𑀔𑀸, 𑀯𑀺𑀧𑀭𑀺𑀡𑀸𑀫𑀓𑁄𑀝𑀺𑀬𑀸 𑀧𑀦 𑀲𑀩𑁆𑀩𑀸𑀯 𑀤𑀼𑀓𑁆𑀔𑀸 𑀦𑀸𑀫 𑀚𑀸𑀢𑀸. 𑀯𑀺𑀤𑀺𑀢𑀦𑁆𑀢𑀺 𑀬𑀲𑁆𑀫𑀸 𑀏𑀯𑀁 𑀯𑁂𑀤𑀦𑀸𑀢𑁆𑀢𑀬𑀁 𑀤𑀼𑀓𑁆𑀔𑀦𑁆𑀢𑀺 𑀯𑀺𑀤𑀺𑀢𑀁, 𑀢𑀲𑁆𑀫𑀸 𑀬𑀸 𑀢𑀢𑁆𑀣 𑀢𑀡𑁆𑀳𑀸, 𑀲𑀸 𑀦 𑀉𑀧𑀝𑁆𑀞𑀸𑀲𑀻𑀢𑀺 𑀤𑀲𑁆𑀲𑁂𑀢𑀺.

𑀲𑀸𑀥𑀼 𑀲𑀸𑀥𑀽𑀢𑀺 𑀣𑁂𑀭𑀲𑁆𑀲 𑀯𑁂𑀤𑀦𑀸𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑁂 𑀲𑀫𑁆𑀧𑀳𑀁𑀲𑀦𑀁. 𑀣𑁂𑀭𑁄 𑀳𑀺 𑀯𑁂𑀤𑀦𑀸 𑀏𑀓𑀸𑀢𑀺 𑀯𑀸 𑀤𑁆𑀯𑁂 𑀢𑀺𑀲𑁆𑀲𑁄 𑀘𑀢𑀲𑁆𑀲𑁄𑀢𑀺 𑀯𑀸 𑀅𑀯𑀼𑀢𑁆𑀢𑁂𑀧𑀺 𑀯𑀼𑀢𑁆𑀢𑀦𑀬𑁂𑀦 𑀢𑀸𑀲𑀁 𑀢𑀺𑀲𑁆𑀲𑁄𑀢𑀺 𑀧𑀭𑀺𑀘𑁆𑀙𑁂𑀤𑀁 𑀅𑀜𑁆𑀜𑀸𑀲𑀺, 𑀢𑁂𑀦 𑀢𑀁 𑀪𑀕𑀯𑀸 𑀲𑀫𑁆𑀧𑀳𑀁𑀲𑀦𑁆𑀢𑁄 𑀏𑀯𑀫𑀸𑀳. 𑀤𑀼𑀓𑁆𑀔𑀲𑁆𑀫𑀺𑀦𑁆𑀢𑀺 𑀇𑀤𑀁 𑀪𑀕𑀯𑀸 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀆𑀳 𑁋 ‘‘𑀲𑀸𑀭𑀺𑀧𑀼𑀢𑁆𑀢, 𑀬𑀁 𑀢𑀬𑀸 ‘𑀇𑀫𑀺𑀦𑀸 𑀓𑀸𑀭𑀡𑁂𑀦 𑀯𑁂𑀤𑀦𑀸𑀲𑀼 𑀢𑀡𑁆𑀳𑀸 𑀦 𑀉𑀧𑀝𑁆𑀞𑀸𑀲𑀻’𑀢𑀺 𑀩𑁆𑀬𑀸𑀓𑀢𑀁, 𑀢𑀁 𑀲𑀼𑀩𑁆𑀬𑀸𑀓𑀢𑀁. ‘𑀢𑀺𑀲𑁆𑀲𑁄 𑀯𑁂𑀤𑀦𑀸’𑀢𑀺 𑀯𑀺𑀪𑀚𑀦𑁆𑀢𑁂𑀦 𑀧𑀦 𑀢𑁂 𑀅𑀢𑀺𑀧𑁆𑀧𑀧𑀜𑁆𑀘𑁄 𑀓𑀢𑁄, 𑀢𑀁 ‘𑀤𑀼𑀓𑁆𑀔𑀲𑁆𑀫𑀺’𑀦𑁆𑀢𑀺 𑀩𑁆𑀬𑀸𑀓𑀭𑁄𑀦𑁆𑀢𑁂𑀦𑀧𑀺 𑀳𑀺 𑀢𑁂 𑀲𑀼𑀩𑁆𑀬𑀸𑀓𑀢𑀫𑁂𑀯 𑀪𑀯𑁂𑀬𑁆𑀬. 𑀬𑀁𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀜𑀸𑀢𑀫𑀢𑁆𑀢𑁂𑀧𑀺 𑀳𑀺 𑀯𑁂𑀤𑀦𑀸𑀲𑀼 𑀢𑀡𑁆𑀳𑀸 𑀦 𑀢𑀺𑀝𑁆𑀞𑀢𑀺’’.

𑀓𑀣𑀁 𑀯𑀺𑀫𑁄𑀓𑁆𑀔𑀸𑀢𑀺 𑀓𑀢𑀭𑀸 𑀯𑀺𑀫𑁄𑀓𑁆𑀔𑀸, 𑀓𑀢𑀭𑁂𑀦 𑀯𑀺𑀫𑁄𑀓𑁆𑀔𑁂𑀦 𑀢𑀬𑀸 𑀅𑀜𑁆𑀜𑀸 𑀩𑁆𑀬𑀸𑀓𑀢𑀸𑀢𑀺 𑀅𑀢𑁆𑀣𑁄? 𑀅𑀚𑁆𑀛𑀢𑁆𑀢𑀁 𑀯𑀺𑀫𑁄𑀓𑁆𑀔𑀸𑀢𑀺 𑀅𑀚𑁆𑀛𑀢𑁆𑀢𑀯𑀺𑀫𑁄𑀓𑁆𑀔𑁂𑀦, 𑀅𑀚𑁆𑀛𑀢𑁆𑀢𑀲𑀗𑁆𑀔𑀸𑀭𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀢𑁆𑀢𑀅𑀭𑀳𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀅𑀚𑁆𑀛𑀢𑁆𑀢𑀁 𑀅𑀪𑀺𑀦𑀺𑀯𑁂𑀲𑁄 𑀅𑀚𑁆𑀛𑀢𑁆𑀢𑀁 𑀯𑀼𑀝𑁆𑀞𑀸𑀦𑀁, 𑀅𑀚𑁆𑀛𑀢𑁆𑀢𑀁 𑀅𑀪𑀺𑀦𑀺𑀯𑁂𑀲𑁄 𑀩𑀳𑀺𑀤𑁆𑀥𑀸 𑀯𑀼𑀝𑁆𑀞𑀸𑀦𑀁, 𑀩𑀳𑀺𑀤𑁆𑀥𑀸 𑀅𑀪𑀺𑀦𑀺𑀯𑁂𑀲𑁄 𑀩𑀳𑀺𑀤𑁆𑀥𑀸 𑀯𑀼𑀝𑁆𑀞𑀸𑀦𑀁, 𑀩𑀳𑀺𑀤𑁆𑀥𑀸 𑀅𑀪𑀺𑀦𑀺𑀯𑁂𑀲𑁄 𑀅𑀚𑁆𑀛𑀢𑁆𑀢𑀁 𑀯𑀼𑀝𑁆𑀞𑀸𑀦𑀦𑁆𑀢𑀺. 𑀅𑀚𑁆𑀛𑀢𑁆𑀢𑀜𑁆𑀳𑀺 𑀅𑀪𑀺𑀦𑀺𑀯𑁂𑀲𑀺𑀢𑁆𑀯𑀸 𑀩𑀳𑀺𑀤𑁆𑀥𑀸𑀥𑀫𑁆𑀫𑀸𑀧𑀺 𑀤𑀝𑁆𑀞𑀩𑁆𑀩𑀸𑀬𑁂𑀯, 𑀩𑀳𑀺𑀤𑁆𑀥𑀸 𑀅𑀪𑀺𑀦𑀺𑀯𑁂𑀲𑀺𑀢𑁆𑀯𑀸 𑀅𑀚𑁆𑀛𑀢𑁆𑀢𑀥𑀫𑁆𑀫𑀸𑀧𑀺. 𑀢𑀲𑁆𑀫𑀸 𑀓𑁄𑀘𑀺 𑀪𑀺𑀓𑁆𑀔𑀼 𑀅𑀚𑁆𑀛𑀢𑁆𑀢𑀁 𑀲𑀗𑁆𑀔𑀸𑀭𑁂𑀲𑀼 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸 𑀢𑁂 𑀯𑀯𑀢𑁆𑀣𑀧𑁂𑀢𑁆𑀯𑀸 𑀩𑀳𑀺𑀤𑁆𑀥𑀸 𑀑𑀢𑀸𑀭𑁂𑀢𑀺, 𑀩𑀳𑀺𑀤𑁆𑀥𑀸𑀧𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀼𑀦 𑀅𑀚𑁆𑀛𑀢𑁆𑀢𑀁 𑀑𑀢𑀸𑀭𑁂𑀢𑀺, 𑀢𑀲𑁆𑀲 𑀅𑀚𑁆𑀛𑀢𑁆𑀢 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑀓𑀸𑀮𑁂 𑀫𑀕𑁆𑀕𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀇𑀢𑀺 𑀅𑀚𑁆𑀛𑀢𑁆𑀢𑀁 𑀅𑀪𑀺𑀦𑀺𑀯𑁂𑀲𑁄 𑀅𑀚𑁆𑀛𑀢𑁆𑀢𑀁 𑀯𑀼𑀝𑁆𑀞𑀸𑀦𑀁 𑀦𑀸𑀫. 𑀓𑁄𑀘𑀺 𑀅𑀚𑁆𑀛𑀢𑁆𑀢𑀁 𑀲𑀗𑁆𑀔𑀸𑀭𑁂𑀲𑀼 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸 𑀢𑁂 𑀯𑀯𑀢𑁆𑀣𑀧𑁂𑀢𑁆𑀯𑀸 𑀩𑀳𑀺𑀤𑁆𑀥𑀸 𑀑𑀢𑀸𑀭𑁂𑀢𑀺, 𑀢𑀲𑁆𑀲 𑀩𑀳𑀺𑀤𑁆𑀥𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑀓𑀸𑀮𑁂 𑀫𑀕𑁆𑀕𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀇𑀢𑀺 𑀅𑀚𑁆𑀛𑀢𑁆𑀢𑀁 𑀅𑀪𑀺𑀦𑀺𑀯𑁂𑀲𑁄 𑀩𑀳𑀺𑀤𑁆𑀥𑀸 𑀯𑀼𑀝𑁆𑀞𑀸𑀦𑀁 𑀦𑀸𑀫. 𑀓𑁄𑀘𑀺 𑀩𑀳𑀺𑀤𑁆𑀥𑀸 𑀲𑀗𑁆𑀔𑀸𑀭𑁂𑀲𑀼 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸, 𑀢𑁂 𑀯𑀯𑀢𑁆𑀣𑀧𑁂𑀢𑁆𑀯𑀸 𑀅𑀚𑁆𑀛𑀢𑁆𑀢𑀁 𑀑𑀢𑀸𑀭𑁂𑀢𑀺, 𑀅𑀚𑁆𑀛𑀢𑁆𑀢𑀫𑁆𑀧𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀼𑀦 𑀩𑀳𑀺𑀤𑁆𑀥𑀸 𑀑𑀢𑀸𑀭𑁂𑀢𑀺, 𑀢𑀲𑁆𑀲 𑀩𑀳𑀺𑀤𑁆𑀥𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑀓𑀸𑀮𑁂 𑀫𑀕𑁆𑀕𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀇𑀢𑀺 𑀩𑀳𑀺𑀤𑁆𑀥𑀸 𑀅𑀪𑀺𑀦𑀺𑀯𑁂𑀲𑁄 𑀩𑀳𑀺𑀤𑁆𑀥𑀸 𑀯𑀼𑀝𑁆𑀞𑀸𑀦𑀁 𑀦𑀸𑀫. 𑀓𑁄𑀘𑀺 𑀩𑀳𑀺𑀤𑁆𑀥𑀸 𑀲𑀗𑁆𑀔𑀸𑀭𑁂𑀲𑀼 𑀜𑀸𑀡𑀁 𑀑𑀢𑀸𑀭𑁂𑀢𑁆𑀯𑀸 𑀢𑁂 𑀯𑀯𑀢𑁆𑀣𑀧𑁂𑀢𑁆𑀯𑀸 𑀅𑀚𑁆𑀛𑀢𑁆𑀢𑀁 𑀑𑀢𑀸𑀭𑁂𑀢𑀺, 𑀢𑀲𑁆𑀲 𑀅𑀚𑁆𑀛𑀢𑁆𑀢𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑀓𑀸𑀮𑁂 𑀫𑀕𑁆𑀕𑀯𑀼𑀝𑁆𑀞𑀸𑀦𑀁 𑀳𑁄𑀢𑀺. 𑀇𑀢𑀺 𑀩𑀳𑀺𑀤𑁆𑀥𑀸 𑀅𑀪𑀺𑀦𑀺𑀯𑁂𑀲𑁄 𑀅𑀚𑁆𑀛𑀢𑁆𑀢𑀁 𑀯𑀼𑀝𑁆𑀞𑀸𑀦𑀁 𑀦𑀸𑀫. 𑀢𑀢𑁆𑀭 𑀣𑁂𑀭𑁄 ‘‘𑀅𑀚𑁆𑀛𑀢𑁆𑀢𑀲𑀗𑁆𑀔𑀸𑀭𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀢𑁂𑀲𑀁 𑀯𑀯𑀢𑁆𑀣𑀸𑀦𑀓𑀸𑀮𑁂 𑀫𑀕𑁆𑀕𑀯𑀼𑀝𑁆𑀞𑀸𑀦𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄𑀲𑁆𑀫𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀅𑀚𑁆𑀛𑀢𑁆𑀢𑀁 𑀯𑀺𑀫𑁄𑀓𑁆𑀔𑀸 𑀔𑁆𑀯𑀸𑀳𑀁, 𑀆𑀯𑀼𑀲𑁄𑀢𑀺 𑀆𑀳.

𑀲𑀩𑁆𑀩𑀼𑀧𑀸𑀤𑀸𑀦𑀓𑁆𑀔𑀬𑀸𑀢𑀺 𑀲𑀩𑁆𑀩𑁂𑀲𑀁 𑀘𑀢𑀼𑀦𑁆𑀦𑀫𑁆𑀧𑀺 𑀉𑀧𑀸𑀤𑀸𑀦𑀸𑀦𑀁 𑀔𑀬𑁂𑀦. 𑀢𑀣𑀸 𑀲𑀢𑁄 𑀯𑀺𑀳𑀭𑀸𑀫𑀻𑀢𑀺 𑀢𑁂𑀦𑀸𑀓𑀸𑀭𑁂𑀦 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀯𑀺𑀳𑀭𑀸𑀫𑀺. 𑀬𑀣𑀸 𑀲𑀢𑀁 𑀯𑀺𑀳𑀭𑀦𑁆𑀢𑀦𑁆𑀢𑀺 𑀬𑁂𑀦𑀸𑀓𑀸𑀭𑁂𑀦 𑀫𑀁 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀁 𑀯𑀺𑀳𑀭𑀦𑁆𑀢𑀁. 𑀆𑀲𑀯𑀸 𑀦𑀸𑀦𑀼𑀲𑁆𑀲𑀯𑀦𑁆𑀢𑀻𑀢𑀺 𑀘𑀓𑁆𑀔𑀼𑀢𑁄 𑀭𑀽𑀧𑁂 𑀲𑀯𑀦𑁆𑀢𑀺 𑀆𑀲𑀯𑀦𑁆𑀢𑀺 𑀲𑀦𑁆𑀤𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀏𑀯𑀁 𑀙𑀳𑀺 𑀤𑁆𑀯𑀸𑀭𑁂𑀳𑀺 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀲𑀯𑀦𑀥𑀫𑁆𑀫𑀸 𑀓𑀸𑀫𑀸𑀲𑀯𑀸𑀤𑀬𑁄 𑀆𑀲𑀯𑀸 𑀦𑀸𑀦𑀼𑀲𑁆𑀲𑀯𑀦𑁆𑀢𑀺 𑀦𑀸𑀦𑀼𑀧𑁆𑀧𑀯𑀟𑁆𑀠𑀦𑁆𑀢𑀺, 𑀬𑀣𑀸 𑀫𑁂 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀸𑀦𑀜𑁆𑀘 𑀦𑀸𑀯𑀚𑀸𑀦𑀸𑀫𑀻𑀢𑀺 𑀅𑀢𑁆𑀢𑀸𑀦𑀜𑁆𑀘 𑀦 𑀅𑀯𑀚𑀸𑀦𑀸𑀫𑀺. 𑀇𑀫𑀺𑀦𑀸 𑀑𑀫𑀸𑀦𑀧𑀳𑀸𑀦𑀁 𑀓𑀣𑀺𑀢𑀁. 𑀏𑀯𑀜𑁆𑀳𑀺 𑀲𑀢𑀺 𑀧𑀚𑀸𑀦𑀦𑀸 𑀧𑀲𑀦𑁆𑀦𑀸 𑀳𑁄𑀢𑀺.

𑀲𑀫𑀡𑁂𑀦𑀸𑀢𑀺 𑀩𑀼𑀤𑁆𑀥𑀲𑀫𑀡𑁂𑀦. 𑀢𑁂𑀲𑁆𑀯𑀸𑀳𑀁 𑀦 𑀓𑀗𑁆𑀔𑀸𑀫𑀻𑀢𑀺 𑀢𑁂𑀲𑀼 𑀅𑀳𑀁 ‘‘𑀓𑀢𑀭𑁄 𑀓𑀸𑀫𑀸𑀲𑀯𑁄, 𑀓𑀢𑀭𑁄 𑀪𑀯𑀸𑀲𑀯𑁄, 𑀓𑀢𑀭𑁄 𑀤𑀺𑀝𑁆𑀞𑀸𑀲𑀯𑁄, 𑀓𑀢𑀭𑁄 𑀅𑀯𑀺𑀚𑁆𑀚𑀸𑀲𑀯𑁄’’𑀢𑀺 𑀏𑀯𑀁 𑀲𑀭𑀽𑀧𑀪𑁂𑀤𑀢𑁄𑀧𑀺, ‘‘𑀘𑀢𑁆𑀢𑀸𑀭𑁄 𑀆𑀲𑀯𑀸’’𑀢𑀺 𑀏𑀯𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑀢𑁄𑀧𑀺 𑀦 𑀓𑀗𑁆𑀔𑀸𑀫𑀺. 𑀢𑁂 𑀫𑁂 𑀧𑀳𑀻𑀦𑀸𑀢𑀺 𑀦 𑀯𑀺𑀘𑀺𑀓𑀺𑀘𑁆𑀙𑀸𑀫𑀻𑀢𑀺 𑀢𑁂 𑀫𑀬𑁆𑀳𑀁 𑀧𑀳𑀻𑀦𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀁 𑀦 𑀉𑀧𑁆𑀧𑀸𑀤𑁂𑀫𑀺. 𑀇𑀤𑀁 𑀪𑀕𑀯𑀸 ‘‘𑀏𑀯𑀁 𑀩𑁆𑀬𑀸𑀓𑀭𑁄𑀦𑁆𑀢𑁂𑀦𑀧𑀺 𑀢𑀬𑀸 𑀲𑀼𑀩𑁆𑀬𑀸𑀓𑀢𑀁 𑀪𑀯𑁂𑀬𑁆𑀬 ‘𑀅𑀚𑁆𑀛𑀢𑁆𑀢𑀁 𑀯𑀺𑀫𑁄𑀓𑁆𑀔𑀸 𑀔𑁆𑀯𑀸𑀳𑀁, 𑀆𑀯𑀼𑀲𑁄’𑀢𑀺𑀆𑀤𑀻𑀦𑀺 𑀧𑀦 𑀢𑁂 𑀯𑀤𑀦𑁆𑀢𑁂𑀦 𑀅𑀢𑀺𑀧𑁆𑀧𑀧𑀜𑁆𑀘𑁄 𑀓𑀢𑁄’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳.

𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀻𑀢𑀺 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀯𑀺𑀳𑀸𑀭𑀁 𑀅𑀦𑁆𑀢𑁄𑀫𑀳𑀸𑀕𑀦𑁆𑀥𑀓𑀼𑀝𑀺𑀁 𑀧𑀸𑀯𑀺𑀲𑀺 𑀅𑀲𑀫𑁆𑀪𑀺𑀦𑁆𑀦𑀸𑀬 𑀏𑀯 𑀧𑀭𑀺𑀲𑀸𑀬. 𑀓𑀲𑁆𑀫𑀸? 𑀩𑀼𑀤𑁆𑀥𑀸 𑀳𑀺 𑀅𑀦𑀺𑀝𑁆𑀞𑀺𑀢𑀸𑀬 𑀤𑁂𑀲𑀦𑀸𑀬 𑀅𑀲𑀫𑁆𑀪𑀺𑀦𑁆𑀦𑀸𑀬 𑀧𑀭𑀺𑀲𑀸𑀬 𑀉𑀝𑁆𑀞𑀸𑀬𑀸𑀲𑀦𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀦𑁆𑀢𑀸 𑀧𑀼𑀕𑁆𑀕𑀮𑀣𑁄𑀫𑀦𑀢𑁆𑀣𑀁 𑀯𑀸 𑀧𑀯𑀺𑀲𑀦𑁆𑀢𑀺 𑀥𑀫𑁆𑀫𑀣𑁄𑀫𑀦𑀢𑁆𑀣𑀁 𑀯𑀸. 𑀢𑀢𑁆𑀣 𑀧𑀼𑀕𑁆𑀕𑀮𑀣𑁄𑀫𑀦𑀢𑁆𑀣𑀁 𑀧𑀯𑀺𑀲𑀦𑁆𑀢𑁄 𑀲𑀢𑁆𑀣𑀸 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀁 𑀫𑀬𑀸 𑀲𑀁𑀔𑀺𑀢𑁆𑀢𑁂𑀦 𑀉𑀤𑁆𑀤𑁂𑀲𑀁 𑀉𑀤𑁆𑀤𑀺𑀝𑁆𑀞𑀁 𑀯𑀺𑀢𑁆𑀣𑀸𑀭𑁂𑀦 𑀘 𑀅𑀯𑀺𑀪𑀢𑁆𑀢𑀁 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸 𑀪𑀺𑀓𑁆𑀔𑀽 𑀉𑀕𑁆𑀕𑀳𑁂𑀢𑁆𑀯𑀸 𑀆𑀦𑀦𑁆𑀤𑀁 𑀯𑀸 𑀓𑀘𑁆𑀘𑀸𑀬𑀦𑀁 𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺, 𑀢𑁂 𑀫𑀬𑁆𑀳𑀁 𑀜𑀸𑀡𑁂𑀦 𑀲𑀁𑀲𑀦𑁆𑀤𑁂𑀢𑁆𑀯𑀸 𑀓𑀣𑁂𑀲𑁆𑀲𑀦𑁆𑀢𑀺, 𑀢𑀢𑁄𑀧𑀺 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀸 𑀧𑀼𑀦 𑀫𑀁 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺. 𑀢𑁂𑀲𑀫𑀳𑀁 ‘𑀲𑀼𑀓𑀣𑀺𑀢𑀁, 𑀪𑀺𑀓𑁆𑀔𑀯𑁂, 𑀆𑀦𑀦𑁆𑀤𑁂𑀦, 𑀲𑀼𑀓𑀣𑀺𑀢𑀁 𑀓𑀘𑁆𑀘𑀸𑀬𑀦𑁂𑀦, 𑀫𑀁 𑀘𑁂𑀧𑀺 𑀢𑀼𑀫𑁆𑀳𑁂 𑀏𑀢𑀫𑀢𑁆𑀣𑀁 𑀧𑀼𑀘𑁆𑀙𑁂𑀬𑁆𑀬𑀸𑀣, 𑀅𑀳𑀫𑁆𑀧𑀺 𑀦𑀁 𑀏𑀯𑀫𑁂𑀯 𑀩𑁆𑀬𑀸𑀓𑀭𑁂𑀬𑁆𑀬’𑀦𑁆𑀢𑀺 𑀏𑀯𑀁 𑀢𑁂 𑀧𑀼𑀕𑁆𑀕𑀮𑁂 𑀣𑁄𑀫𑁂𑀲𑁆𑀲𑀸𑀫𑀺. 𑀢𑀢𑁄 𑀢𑁂𑀲𑀼 𑀕𑀸𑀭𑀯𑀁 𑀚𑀦𑁂𑀢𑁆𑀯𑀸 𑀪𑀺𑀓𑁆𑀔𑀽 𑀉𑀧𑀲𑀗𑁆𑀓𑀫𑀺𑀲𑁆𑀲𑀦𑁆𑀢𑀺, 𑀢𑁂𑀧𑀺 𑀪𑀺𑀓𑁆𑀔𑀽 𑀅𑀢𑁆𑀣𑁂 𑀘 𑀥𑀫𑁆𑀫𑁂 𑀘 𑀦𑀺𑀬𑁄𑀚𑁂𑀲𑁆𑀲𑀦𑁆𑀢𑀺, 𑀢𑁂 𑀢𑁂𑀳𑀺 𑀦𑀺𑀬𑁄𑀚𑀺𑀢𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀧𑀭𑀺𑀧𑀽𑀭𑁂𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺.

𑀅𑀣 𑀯𑀸 𑀧𑀦𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘‘𑀏𑀲 𑀫𑀬𑀺 𑀧𑀓𑁆𑀓𑀦𑁆𑀢𑁂 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑀁 𑀓𑀭𑀺𑀲𑁆𑀲𑀢𑀺, 𑀅𑀣 𑀦𑀁 𑀅𑀳𑀫𑁆𑀧𑀺 𑀢𑀣𑁂𑀯 𑀣𑁄𑀫𑁂𑀲𑁆𑀲𑀸𑀫𑀺, 𑀢𑀁 𑀫𑀫 𑀣𑁄𑀫𑀦𑀁 𑀲𑀼𑀢𑁆𑀯𑀸 𑀕𑀸𑀭𑀯𑀚𑀸𑀢𑀸 𑀪𑀺𑀓𑁆𑀔𑀽 𑀇𑀫𑀁 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀁, 𑀯𑀘𑀦𑀜𑁆𑀘𑀲𑁆𑀲 𑀲𑁄𑀢𑀩𑁆𑀩𑀁 𑀲𑀤𑁆𑀥𑀸𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀢𑀁 𑀢𑁂𑀲𑀁 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺 𑀥𑀫𑁆𑀫𑀣𑁄𑀫𑀦𑀢𑁆𑀣𑀁 𑀧𑀯𑀺𑀲𑀦𑁆𑀢𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺 𑀬𑀣𑀸 𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑁂 𑀘𑀺𑀦𑁆𑀢𑁂𑀲𑀺. 𑀢𑀢𑁆𑀭 𑀳𑀺𑀲𑁆𑀲 𑀏𑀯𑀁 𑀅𑀳𑁄𑀲𑀺 𑁋 ‘‘𑀫𑀬𑀺 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁂 𑀆𑀫𑀺𑀲𑀤𑀸𑀬𑀸𑀤𑀁 𑀕𑀭𑀳𑀦𑁆𑀢𑁄 𑀥𑀫𑁆𑀫𑀤𑀸𑀬𑀸𑀤𑀜𑁆𑀘 𑀣𑁄𑀫𑁂𑀦𑁆𑀢𑁄 𑀇𑀫𑀺𑀲𑁆𑀲𑀁𑀬𑁂𑀯 𑀧𑀭𑀺𑀲𑀢𑀺 𑀦𑀺𑀲𑀺𑀦𑁆𑀦𑁄 𑀲𑀸𑀭𑀺𑀧𑀼𑀢𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀢𑀺, 𑀏𑀯𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀫𑁆𑀳𑀸𑀓𑀁 𑀏𑀓𑀚𑁆𑀛𑀸𑀲𑀬𑀸𑀬 𑀫𑀢𑀺𑀬𑀸 𑀤𑁂𑀲𑀺𑀢𑀸 𑀅𑀬𑀁 𑀤𑁂𑀲𑀦𑀸 𑀅𑀕𑁆𑀕𑀸 𑀘 𑀕𑀭𑀼𑀓𑀸 𑀘 𑀪𑀯𑀺𑀲𑁆𑀲𑀢𑀺 𑀧𑀸𑀲𑀸𑀡𑀘𑁆𑀙𑀢𑁆𑀢𑀲𑀤𑀺𑀲𑀸’’𑀢𑀺.

𑀇𑀥 𑀧𑀦 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀉𑀓𑁆𑀓𑀁𑀲𑁂𑀢𑁆𑀯𑀸 𑀧𑀓𑀸𑀲𑁂𑀢𑁆𑀯𑀸 𑀞𑀧𑁂𑀢𑀼𑀓𑀸𑀫𑁄 𑀧𑀼𑀕𑁆𑀕𑀮𑀣𑁄𑀫𑀦𑀢𑁆𑀣𑀁 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺. 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀪𑀕𑀯𑀸 𑀦𑀺𑀲𑀺𑀦𑁆𑀦𑀸𑀲𑀦𑁂𑀬𑁂𑀯 𑀅𑀦𑁆𑀢𑀭𑀳𑀺𑀢𑁄 𑀘𑀺𑀢𑁆𑀢𑀕𑀢𑀺𑀬𑀸 𑀯𑀺𑀳𑀸𑀭𑀁 𑀧𑀯𑀺𑀲𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀬𑀤𑀺 𑀳𑀺 𑀓𑀸𑀬𑀕𑀢𑀺𑀬𑀸 𑀕𑀘𑁆𑀙𑁂𑀬𑁆𑀬, 𑀲𑀩𑁆𑀩𑀸 𑀧𑀭𑀺𑀲𑀸 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀕𑀘𑁆𑀙𑁂𑀬𑁆𑀬, 𑀲𑀸 𑀏𑀓𑀯𑀸𑀭𑀁 𑀪𑀺𑀦𑁆𑀦𑀸 𑀧𑀼𑀦 𑀤𑀼𑀲𑁆𑀲𑀦𑁆𑀦𑀺𑀧𑀸𑀢𑀸 𑀪𑀯𑁂𑀬𑁆𑀬𑀸𑀢𑀺 𑀪𑀕𑀯𑀸 𑀅𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀘𑀺𑀢𑁆𑀢𑀕𑀢𑀺𑀬𑀸 𑀏𑀯 𑀧𑀸𑀯𑀺𑀲𑀺.

𑀏𑀯𑀁 𑀧𑀯𑀺𑀝𑁆𑀞𑁂 𑀧𑀦 𑀪𑀕𑀯𑀢𑀺 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀸𑀦𑀼𑀭𑀽𑀧𑀫𑁂𑀯 𑀲𑀻𑀳𑀦𑀸𑀤𑀁 𑀦𑀤𑀺𑀢𑀼𑀓𑀸𑀫𑁄 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺. 𑀧𑀼𑀩𑁆𑀩𑁂 𑀅𑀧𑁆𑀧𑀝𑀺𑀲𑀁𑀯𑀺𑀤𑀺𑀢𑀦𑁆𑀢𑀺 𑀇𑀤𑀁 𑀦𑀸𑀫 𑀧𑀼𑀘𑁆𑀙𑀺𑀲𑁆𑀲𑀢𑀻𑀢𑀺 𑀧𑀼𑀩𑁆𑀩𑁂 𑀫𑀬𑀸 𑀅𑀯𑀺𑀤𑀺𑀢𑀁 𑀅𑀜𑁆𑀜𑀸𑀢𑀁. 𑀧𑀞𑀫𑀁 𑀧𑀜𑁆𑀳𑀦𑁆𑀢𑀺, ‘‘𑀲𑀘𑁂 𑀢𑀁, 𑀲𑀸𑀭𑀺𑀧𑀼𑀢𑁆𑀢, 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑀓𑀣𑀁 𑀚𑀸𑀦𑀢𑀸 𑀧𑀦 𑀢𑀬𑀸, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀓𑀣𑀁 𑀧𑀲𑁆𑀲𑀢𑀸 𑀅𑀜𑁆𑀜𑀸 𑀩𑁆𑀬𑀸𑀓𑀢𑀸 𑀔𑀻𑀡𑀸 𑀚𑀸𑀢𑀻’’𑀢𑀺 𑀇𑀫𑀁 𑀧𑀞𑀫𑀁 𑀧𑀜𑁆𑀳𑀁. 𑀤𑀦𑁆𑀥𑀸𑀬𑀺𑀢𑀢𑁆𑀢𑀦𑁆𑀢𑀺 𑀲𑀢𑁆𑀣𑀼 𑀆𑀲𑀬𑀚𑀸𑀦𑀦𑀢𑁆𑀣𑀁 𑀤𑀦𑁆𑀥𑀪𑀸𑀯𑁄 𑀅𑀲𑀻𑀖𑀢𑀸. 𑀧𑀞𑀫𑀁 𑀧𑀜𑁆𑀳𑀁 𑀅𑀦𑀼𑀫𑁄𑀤𑀻𑀢𑀺, ‘‘𑀚𑀸𑀢𑀺 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀓𑀺𑀁𑀦𑀺𑀤𑀸𑀦𑀸’’𑀢𑀺 𑀇𑀫𑀁 𑀤𑀼𑀢𑀺𑀬𑀁 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁄, ‘‘𑀬𑀁𑀦𑀺𑀤𑀸𑀦𑀸𑀯𑀼𑀲𑁄, 𑀚𑀸𑀢𑀻’’𑀢𑀺 𑀏𑀯𑀁 𑀯𑀺𑀲𑁆𑀲𑀚𑁆𑀚𑀺𑀢𑀁 𑀧𑀞𑀫𑀁 𑀧𑀜𑁆𑀳𑀁 𑀅𑀦𑀼𑀫𑁄𑀤𑀺.

𑀏𑀢𑀤𑀳𑁄𑀲𑀻𑀢𑀺 𑀪𑀕𑀯𑀢𑀸 𑀅𑀦𑀼𑀫𑁄𑀤𑀺𑀢𑁂 𑀦𑀬𑀲𑀢𑁂𑀦 𑀦𑀬𑀲𑀳𑀲𑁆𑀲𑁂𑀦 𑀧𑀜𑁆𑀳𑀲𑁆𑀲 𑀏𑀓𑀗𑁆𑀕𑀡𑀺𑀓𑀪𑀸𑀯𑁂𑀦 𑀧𑀸𑀓𑀝𑀻𑀪𑀽𑀢𑀢𑁆𑀢𑀸 𑀏𑀢𑀁 𑀅𑀳𑁄𑀲𑀺. 𑀤𑀺𑀯𑀲𑀫𑁆𑀧𑀸𑀳𑀁 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀩𑁆𑀬𑀸𑀓𑀭𑁂𑀬𑁆𑀬𑀦𑁆𑀢𑀺 𑀲𑀓𑀮𑀤𑀺𑀯𑀲𑀫𑁆𑀧𑀺 𑀅𑀳𑀁 𑀪𑀕𑀯𑀢𑁄 𑀏𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀢𑁆𑀣𑀁 𑀧𑀼𑀝𑁆𑀞𑁄 𑀲𑀓𑀮𑀤𑀺𑀯𑀲𑀫𑁆𑀧𑀺 𑀅𑀜𑁆𑀜𑀫𑀜𑁆𑀜𑁂𑀳𑀺 𑀧𑀤𑀩𑁆𑀬𑀜𑁆𑀚𑀦𑁂𑀳𑀺 𑀩𑁆𑀬𑀸𑀓𑀭𑁂𑀬𑁆𑀬𑀁. 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀣𑁂𑀭𑁄 𑀉𑀴𑀸𑀭𑀲𑀻𑀳𑀦𑀸𑀤𑀁 𑀦𑀤𑀢𑀺, 𑀲𑀼𑀓𑀸𑀭𑀡𑀁 𑀏𑀢𑀁, 𑀤𑀲𑀩𑀮𑀲𑁆𑀲 𑀦𑀁 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀲𑀸 𑀳𑀺 𑀪𑀺𑀓𑁆𑀔𑀼 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀥𑀫𑁆𑀫𑀥𑀸𑀢𑀽𑀢𑀺 𑀏𑀢𑁆𑀣 𑀥𑀫𑁆𑀫𑀥𑀸𑀢𑀽𑀢𑀺 𑀧𑀘𑁆𑀘𑀬𑀸𑀓𑀸𑀭𑀲𑁆𑀲 𑀯𑀺𑀯𑀝𑀪𑀸𑀯𑀤𑀲𑁆𑀲𑀦𑀲𑀫𑀢𑁆𑀣𑀁 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁. 𑀲𑀸𑀯𑀓𑀸𑀦𑀜𑁆𑀳𑀺 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀕𑀢𑀺𑀓𑀫𑁂𑀯 𑀳𑁄𑀢𑀺. 𑀬𑀣𑀸 𑀩𑀼𑀤𑁆𑀥𑀸𑀦𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀸𑀓𑀝𑀸 𑀳𑁄𑀦𑁆𑀢𑀺, 𑀏𑀯𑀁 𑀣𑁂𑀭𑀲𑁆𑀲 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁 𑀲𑀩𑁆𑀩𑁂𑀧𑀺 𑀲𑀸𑀯𑀓𑀜𑀸𑀡𑀲𑁆𑀲 𑀕𑁄𑀘𑀭𑀥𑀫𑁆𑀫𑁂 𑀚𑀸𑀦𑀸𑀢𑀻𑀢𑀺. 𑀤𑀼𑀢𑀺𑀬𑀁.

𑁩. 𑀜𑀸𑀡𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁩. 𑀢𑀢𑀺𑀬𑁂 𑀢𑀁 𑀲𑀼𑀡𑀸𑀣𑀸𑀢𑀺 𑀢𑀁 𑀜𑀸𑀡𑀯𑀢𑁆𑀣𑀼𑀤𑁂𑀲𑀦𑀁 𑀲𑀼𑀡𑀸𑀣. 𑀜𑀸𑀡𑀯𑀢𑁆𑀣𑀽𑀦𑀻𑀢𑀺 𑀘𑁂𑀢𑁆𑀣 𑀜𑀸𑀡𑀫𑁂𑀯 𑀜𑀸𑀡𑀯𑀢𑁆𑀣𑀽𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀚𑀭𑀸𑀫𑀭𑀡𑁂 𑀜𑀸𑀡𑀦𑁆𑀢𑀺𑀆𑀤𑀻𑀲𑀼 𑀘𑀢𑀽𑀲𑀼 𑀧𑀞𑀫𑀁 𑀲𑀯𑀦𑀫𑀬𑀜𑀸𑀡𑀁 𑀲𑀫𑁆𑀫𑀲𑀦𑀜𑀸𑀡𑀁 𑀧𑀝𑀺𑀯𑁂𑀥𑀜𑀸𑀡𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀯𑀝𑁆𑀝𑀢𑀺, 𑀢𑀣𑀸 𑀤𑀼𑀢𑀺𑀬𑀁. 𑀢𑀢𑀺𑀬𑀁 𑀧𑀦 𑀞𑀧𑁂𑀢𑁆𑀯𑀸 𑀲𑀫𑁆𑀫𑀲𑀦𑀜𑀸𑀡𑀁 𑀢𑀺𑀯𑀺𑀥𑀫𑁂𑀯 𑀳𑁄𑀢𑀺, 𑀢𑀣𑀸 𑀘𑀢𑀼𑀢𑁆𑀣𑀁. 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀲𑀼 𑀳𑀺 𑀲𑀫𑁆𑀫𑀲𑀦𑀁 𑀦𑀸𑀫 𑀦𑀢𑁆𑀣𑀺. 𑀚𑀸𑀢𑀺𑀬𑀸 𑀜𑀸𑀡𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀺𑀦𑀸 𑀥𑀫𑁆𑀫𑁂𑀦𑀸𑀢𑀺 𑀇𑀫𑀺𑀦𑀸 𑀘𑀢𑀼𑀲𑀘𑁆𑀘𑀥𑀫𑁆𑀫𑁂𑀦 𑀯𑀸 𑀫𑀕𑁆𑀕𑀜𑀸𑀡𑀥𑀫𑁆𑀫𑁂𑀦 𑀯𑀸.

𑀤𑀺𑀝𑁆𑀞𑁂𑀦𑀸𑀢𑀺𑀆𑀤𑀻𑀲𑀼 𑀤𑀺𑀝𑁆𑀞𑁂𑀦𑀸𑀢𑀺 𑀜𑀸𑀡𑀘𑀓𑁆𑀔𑀼𑀦𑀸 𑀤𑀺𑀝𑁆𑀞𑁂𑀦. 𑀯𑀺𑀤𑀺𑀢𑁂𑀦𑀸𑀢𑀺 𑀧𑀜𑁆𑀜𑀸𑀬 𑀯𑀺𑀤𑀺𑀢𑁂𑀦. 𑀅𑀓𑀸𑀮𑀺𑀓𑁂𑀦𑀸𑀢𑀺 𑀓𑀺𑀜𑁆𑀘𑀺 𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀝𑀺𑀯𑁂𑀥𑀸𑀦𑀦𑁆𑀢𑀭𑀁𑀬𑁂𑀯 𑀨𑀮𑀤𑀸𑀬𑀓𑁂𑀦. 𑀧𑀢𑁆𑀢𑁂𑀦𑀸𑀢𑀺 𑀅𑀥𑀺𑀕𑀢𑁂𑀦. 𑀧𑀭𑀺𑀬𑁄𑀕𑀸𑀴𑁆𑀳𑁂𑀦𑀸𑀢𑀺 𑀧𑀭𑀺𑀬𑁄𑀕𑀸𑀳𑀺𑀢𑁂𑀦 𑀧𑀜𑁆𑀜𑀸𑀬 𑀅𑀦𑀼𑀧𑀯𑀺𑀝𑁆𑀞𑁂𑀦. 𑀅𑀢𑀻𑀢𑀸𑀦𑀸𑀕𑀢𑁂 𑀦𑀬𑀁 𑀦𑁂𑀢𑀻𑀢𑀺 ‘‘𑀬𑁂 𑀔𑁄 𑀓𑁂𑀘𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀢𑀻𑀢𑁂 𑀘 𑀅𑀦𑀸𑀕𑀢𑁂 𑀘 𑀦𑀬𑀁 𑀦𑁂𑀢𑀺. 𑀏𑀢𑁆𑀣 𑀘 𑀦 𑀘𑀢𑀼𑀲𑀘𑁆𑀘𑀥𑀫𑁆𑀫𑁂𑀦 𑀯𑀸 𑀫𑀕𑁆𑀕𑀜𑀸𑀡𑀥𑀫𑁆𑀫𑁂𑀦 𑀯𑀸 𑀲𑀓𑁆𑀓𑀸 𑀅𑀢𑀻𑀢𑀸𑀦𑀸𑀕𑀢𑁂 𑀦𑀬𑀁 𑀦𑁂𑀢𑀼𑀁, 𑀘𑀢𑀼𑀲𑀘𑁆𑀘𑁂 𑀧𑀦 𑀫𑀕𑁆𑀕𑀜𑀸𑀡𑁂𑀦 𑀧𑀝𑀺𑀯𑀺𑀤𑁆𑀥𑁂 𑀧𑀭𑀢𑁄 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀦𑀸𑀫 𑀳𑁄𑀢𑀺. 𑀢𑁂𑀦 𑀦𑀬𑀁 𑀦𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀩𑁆𑀪𑀜𑁆𑀜𑀁𑀲𑀽𑀢𑀺 𑀅𑀪𑀺𑀅𑀜𑁆𑀜𑀁𑀲𑀼 𑀚𑀸𑀦𑀺𑀁𑀲𑀼. 𑀲𑁂𑀬𑁆𑀬𑀣𑀸𑀧𑀸𑀳𑀁, 𑀏𑀢𑀭𑀳𑀻𑀢𑀺 𑀬𑀣𑀸 𑀅𑀳𑀁 𑀏𑀢𑀭𑀳𑀺 𑀘𑀢𑀼𑀲𑀘𑁆𑀘𑀯𑀲𑁂𑀦 𑀚𑀸𑀦𑀸𑀫𑀺. 𑀅𑀦𑁆𑀯𑀬𑁂 𑀜𑀸𑀡𑀦𑁆𑀢𑀺 𑀅𑀦𑀼𑀅𑀬𑁂 𑀜𑀸𑀡𑀁, 𑀥𑀫𑁆𑀫𑀜𑀸𑀡𑀲𑁆𑀲 𑀅𑀦𑀼𑀕𑀫𑀦𑁂 𑀜𑀸𑀡𑀁, 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲𑁂𑀢𑀁 𑀦𑀸𑀫𑀁. 𑀥𑀫𑁆𑀫𑁂 𑀜𑀸𑀡𑀦𑁆𑀢𑀺 𑀫𑀕𑁆𑀕𑀜𑀸𑀡𑀁. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀔𑀻𑀡𑀸𑀲𑀯𑀲𑁆𑀲 𑀲𑁂𑀓𑁆𑀔𑀪𑀽𑀫𑀺 𑀓𑀣𑀺𑀢𑀸 𑀳𑁄𑀢𑀺. 𑀢𑀢𑀺𑀬𑀁.

𑁪. 𑀤𑀼𑀢𑀺𑀬𑀜𑀸𑀡𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪. 𑀘𑀢𑀼𑀢𑁆𑀣𑁂 𑀲𑀢𑁆𑀢𑀲𑀢𑁆𑀢𑀭𑀻𑀢𑀺 𑀲𑀢𑁆𑀢 𑀘 𑀲𑀢𑁆𑀢𑀭𑀺 𑀘. 𑀩𑁆𑀬𑀜𑁆𑀚𑀦𑀪𑀸𑀡𑀓𑀸 𑀓𑀺𑀭 𑀢𑁂 𑀪𑀺𑀓𑁆𑀔𑀽, 𑀩𑀳𑀼𑀩𑁆𑀬𑀜𑁆𑀚𑀦𑀁 𑀓𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑁂 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑀲𑁆𑀫𑀸 𑀢𑁂𑀲𑀁 𑀅𑀚𑁆𑀛𑀸𑀲𑀬𑁂𑀦 𑀇𑀤𑀁 𑀲𑀼𑀢𑁆𑀢𑀁 𑀯𑀼𑀢𑁆𑀢𑀁. 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀦𑁆𑀢𑀺 𑀧𑀘𑁆𑀘𑀬𑀸𑀓𑀸𑀭𑁂 𑀜𑀸𑀡𑀁. 𑀧𑀘𑁆𑀘𑀬𑀸𑀓𑀸𑀭𑁄 𑀳𑀺 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀝𑁆𑀞𑀺𑀢𑀺𑀓𑀸𑀭𑀡𑀢𑁆𑀢𑀸 𑀥𑀫𑁆𑀫𑀝𑁆𑀞𑀺𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀏𑀢𑁆𑀣 𑀜𑀸𑀡𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁, 𑀏𑀢𑀲𑁆𑀲𑁂𑀯 𑀙𑀩𑁆𑀩𑀺𑀥𑀲𑁆𑀲 𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀔𑀬𑀥𑀫𑁆𑀫𑀦𑁆𑀢𑀺 𑀔𑀬𑀕𑀫𑀦𑀲𑀪𑀸𑀯𑀁. 𑀯𑀬𑀥𑀫𑁆𑀫𑀦𑁆𑀢𑀺 𑀯𑀬𑀕𑀫𑀦𑀲𑀪𑀸𑀯𑀁. 𑀯𑀺𑀭𑀸𑀕𑀥𑀫𑁆𑀫𑀦𑁆𑀢𑀺 𑀯𑀺𑀭𑀚𑁆𑀚𑀦𑀲𑀪𑀸𑀯𑀁. 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑀁. 𑀲𑀢𑁆𑀢𑀲𑀢𑁆𑀢𑀭𑀻𑀢𑀺 𑀏𑀓𑁂𑀓𑀲𑁆𑀫𑀺𑀁 𑀲𑀢𑁆𑀢 𑀲𑀢𑁆𑀢 𑀓𑀢𑁆𑀯𑀸 𑀏𑀓𑀸𑀤𑀲𑀲𑀼 𑀧𑀤𑁂𑀲𑀼 𑀲𑀢𑁆𑀢𑀲𑀢𑁆𑀢𑀭𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀺𑀧𑀲𑁆𑀲𑀦𑀸𑀧𑀝𑀺𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸. 𑀘𑀢𑀼𑀢𑁆𑀣𑀁.

𑁫. 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫. 𑀧𑀜𑁆𑀘𑀫𑁂 𑀲𑀫𑀼𑀤𑀬𑁄 𑀳𑁄𑀢𑀻𑀢𑀺 𑀲𑀢𑁆𑀣𑀸 𑀇𑀥𑁂𑀯 𑀤𑁂𑀲𑀦𑀁 𑀑𑀲𑀸𑀧𑁂𑀲𑀺. 𑀓𑀺𑀁𑀓𑀸𑀭𑀡𑀸𑀢𑀺? 𑀤𑀺𑀝𑁆𑀞𑀺𑀕𑀢𑀺𑀓𑀲𑁆𑀲 𑀑𑀓𑀸𑀲𑀤𑀸𑀦𑀢𑁆𑀣𑀁. 𑀢𑀲𑁆𑀲𑀜𑁆𑀳𑀺 𑀧𑀭𑀺𑀲𑀢𑀺 𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑁄 𑀤𑀺𑀝𑁆𑀞𑀺𑀕𑀢𑀺𑀓𑁄 𑀅𑀢𑁆𑀣𑀺, 𑀲𑁄 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀢𑀺, 𑀅𑀣𑀲𑁆𑀲𑀸𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑁆𑀲𑀸𑀫𑀻𑀢𑀺 𑀢𑀲𑁆𑀲 𑀑𑀓𑀸𑀲𑀤𑀸𑀦𑀢𑁆𑀣𑀁 𑀤𑁂𑀲𑀦𑀁 𑀑𑀲𑀸𑀧𑁂𑀲𑀺. 𑀦𑁄 𑀓𑀮𑁆𑀮𑁄 𑀧𑀜𑁆𑀳𑁄𑀢𑀺 𑀅𑀬𑀼𑀢𑁆𑀢𑁄 𑀧𑀜𑁆𑀳𑁄. 𑀤𑀼𑀧𑁆𑀧𑀜𑁆𑀳𑁄 𑀏𑀲𑁄𑀢𑀺 𑀅𑀢𑁆𑀣𑁄. 𑀦𑀦𑀼 𑀘 ‘‘𑀓𑀢𑀫𑀁 𑀦𑀼 𑀔𑁄, 𑀪𑀦𑁆𑀢𑁂, 𑀚𑀭𑀸𑀫𑀭𑀡’’𑀦𑁆𑀢𑀺? 𑀇𑀤𑀁 𑀲𑀼𑀧𑀼𑀘𑁆𑀙𑀺𑀢𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 𑀲𑀼𑀧𑀼𑀘𑁆𑀙𑀺𑀢𑀁, 𑀬𑀣𑀸 𑀧𑀦 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑁂 𑀲𑀼𑀯𑀡𑁆𑀡𑀣𑀸𑀮𑁂 𑀯𑀟𑁆𑀠𑀺𑀢𑀲𑁆𑀲 𑀲𑀼𑀪𑁄𑀚𑀦𑀲𑁆𑀲 𑀫𑀢𑁆𑀣𑀓𑁂 𑀆𑀫𑀮𑀓𑀫𑀢𑁆𑀢𑁂𑀧𑀺 𑀕𑀽𑀣𑀧𑀺𑀡𑁆𑀟𑁂 𑀞𑀧𑀺𑀢𑁂 𑀲𑀩𑁆𑀩𑀁 𑀪𑁄𑀚𑀦𑀁 𑀤𑀼𑀩𑁆𑀪𑁄𑀚𑀦𑀁 𑀳𑁄𑀢𑀺 𑀙𑀟𑁆𑀟𑁂𑀢𑀩𑁆𑀩𑀁, 𑀏𑀯𑀫𑁂𑀯 ‘‘𑀓𑀲𑁆𑀲 𑀘 𑀧𑀦𑀺𑀤𑀁 𑀚𑀭𑀸𑀫𑀭𑀡’’𑀦𑁆𑀢𑀺? 𑀇𑀫𑀺𑀦𑀸 𑀲𑀢𑁆𑀢𑀽𑀧𑀮𑀤𑁆𑀥𑀺𑀯𑀸𑀤𑀧𑀤𑁂𑀦 𑀕𑀽𑀣𑀧𑀺𑀡𑁆𑀟𑁂𑀦 𑀢𑀁 𑀪𑁄𑀚𑀦𑀁 𑀤𑀼𑀩𑁆𑀪𑁄𑀚𑀦𑀁 𑀯𑀺𑀬 𑀅𑀬𑀫𑁆𑀧𑀺 𑀲𑀩𑁆𑀩𑁄 𑀤𑀼𑀧𑁆𑀧𑀜𑁆𑀳𑁄𑀯 𑀚𑀸𑀢𑁄𑀢𑀺.

𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄𑀢𑀺 𑀅𑀭𑀺𑀬𑀫𑀕𑁆𑀕𑀯𑀸𑀲𑁄. 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀬𑀲𑁆𑀲 𑀳𑀺 𑀅𑀬𑀁 𑀤𑀺𑀝𑁆𑀞𑀺, 𑀲𑁄 ‘‘𑀚𑀻𑀯𑁂 𑀉𑀘𑁆𑀙𑀺𑀚𑁆𑀚𑀫𑀸𑀦𑁂 𑀲𑀭𑀻𑀭𑀁 𑀉𑀘𑁆𑀙𑀺𑀚𑁆𑀚𑀢𑀺, 𑀲𑀭𑀻𑀭𑁂 𑀉𑀘𑁆𑀙𑀺𑀚𑁆𑀚𑀦𑁆𑀢𑁂 𑀚𑀻𑀯𑀺𑀢𑀁 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀕𑀡𑁆𑀳𑀸𑀢𑀺. 𑀏𑀯𑀁 𑀕𑀡𑁆𑀳𑀢𑁄 𑀲𑀸 𑀤𑀺𑀝𑁆𑀞𑀺 ‘‘𑀲𑀢𑁆𑀢𑁄 𑀉𑀘𑁆𑀙𑀺𑀚𑁆𑀚𑀢𑀻’’𑀢𑀺 𑀕𑀳𑀺𑀢𑀢𑁆𑀢𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀦𑀸𑀫 𑀳𑁄𑀢𑀺. 𑀲𑀘𑁂 𑀧𑀦 𑀲𑀗𑁆𑀔𑀸𑀭𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑁂𑀯 𑀦𑀺𑀭𑀼𑀚𑁆𑀛𑀦𑁆𑀢𑀺 𑀘𑀸𑀢𑀺 𑀕𑀡𑁆𑀳𑁂𑀬𑁆𑀬, 𑀲𑀸𑀲𑀦𑀸𑀯𑀘𑀭𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀦𑀸𑀫 𑀪𑀯𑁂𑀬𑁆𑀬. 𑀅𑀭𑀺𑀬𑀫𑀕𑁆𑀕𑁄 𑀘 𑀦𑀸𑀫𑁂𑀲𑁄 𑀯𑀝𑁆𑀝𑀁 𑀦𑀺𑀭𑁄𑀥𑁂𑀦𑁆𑀢𑁄 𑀯𑀝𑁆𑀝𑀁 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀤𑁂𑀯 𑀢𑀁 𑀯𑀝𑁆𑀝𑀁 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀕𑀳𑀺𑀢𑀸𑀓𑀸𑀭𑀲𑁆𑀲 𑀲𑀫𑁆𑀪𑀯𑁂 𑀲𑀢𑀺 𑀯𑀺𑀦𑀸𑀯 𑀫𑀕𑁆𑀕𑀪𑀸𑀯𑀦𑀸𑀬 𑀦𑀺𑀭𑀼𑀚𑁆𑀛𑀢𑀻𑀢𑀺 𑀫𑀕𑁆𑀕𑀪𑀸𑀯𑀦𑀸 𑀦𑀺𑀭𑀢𑁆𑀣𑀓𑀸 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦 𑀳𑁄𑀢𑀻’’𑀢𑀺.

𑀤𑀼𑀢𑀺𑀬𑀦𑀬𑁂 𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀬𑀲𑁆𑀲 𑀅𑀬𑀁 𑀤𑀺𑀝𑁆𑀞𑀺, 𑀲𑁄 ‘‘𑀲𑀭𑀻𑀭𑀁 𑀇𑀥𑁂𑀯 𑀉𑀘𑁆𑀙𑀺𑀚𑁆𑀚𑀢𑀺, 𑀦 𑀚𑀻𑀯𑀺𑀢𑀁, 𑀚𑀻𑀯𑀺𑀢𑀁 𑀧𑀦 𑀧𑀜𑁆𑀚𑀭𑀢𑁄 𑀲𑀓𑀼𑀡𑁄 𑀯𑀺𑀬 𑀬𑀣𑀸𑀲𑀼𑀔𑀁 𑀕𑀘𑁆𑀙𑀢𑀻’’𑀢𑀺 𑀕𑀡𑁆𑀳𑀸𑀢𑀺. 𑀏𑀯𑀁 𑀕𑀡𑁆𑀳𑀢𑁄 𑀲𑀸 𑀤𑀺𑀝𑁆𑀞𑀺 ‘‘𑀇𑀫𑀲𑁆𑀫𑀸 𑀮𑁄𑀓𑀸 𑀚𑀻𑀯𑀺𑀢𑀁 𑀧𑀭𑀮𑁄𑀓𑀁 𑀕𑀢’’𑀦𑁆𑀢𑀺 𑀕𑀳𑀺𑀢𑀢𑁆𑀢𑀸 𑀲𑀲𑁆𑀲𑀢𑀤𑀺𑀝𑁆𑀞𑀺 𑀦𑀸𑀫 𑀳𑁄𑀢𑀺. 𑀅𑀬𑀜𑁆𑀘 𑀅𑀭𑀺𑀬𑀫𑀕𑁆𑀕𑁄 𑀢𑁂𑀪𑀽𑀫𑀓𑀯𑀝𑁆𑀝𑀁 𑀯𑀺𑀯𑀝𑁆𑀝𑁂𑀦𑁆𑀢𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀏𑀓𑀲𑀗𑁆𑀔𑀸𑀭𑁂𑀧𑀺 𑀦𑀺𑀘𑁆𑀘𑁂 𑀥𑀼𑀯𑁂 𑀲𑀲𑁆𑀲𑀢𑁂 𑀲𑀢𑀺 𑀉𑀧𑁆𑀧𑀦𑁆𑀦𑁄𑀧𑀺 𑀯𑀝𑁆𑀝𑀁 𑀯𑀺𑀯𑀝𑁆𑀝𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀫𑀕𑁆𑀕𑀪𑀸𑀯𑀦𑀸 𑀦𑀺𑀭𑀢𑁆𑀣𑀓𑀸 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭𑀦𑁆𑀢𑀺 𑀯𑀸 𑀪𑀺𑀓𑁆𑀔𑀼 𑀤𑀺𑀝𑁆𑀞𑀺𑀬𑀸 𑀲𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦 𑀳𑁄𑀢𑀻’’𑀢𑀺.

𑀯𑀺𑀲𑀽𑀓𑀸𑀬𑀺𑀓𑀸𑀦𑀻𑀢𑀺𑀆𑀤𑀺 𑀲𑀩𑁆𑀩𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑁂𑀯𑀘𑀦𑀫𑁂𑀯. 𑀲𑀸 𑀳𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀯𑀺𑀦𑀺𑀯𑀺𑀚𑁆𑀛𑀦𑀝𑁆𑀞𑁂𑀦 𑀯𑀺𑀲𑀽𑀓𑀫𑀺𑀯 𑀅𑀢𑁆𑀢𑀸𑀦𑀁 𑀆𑀯𑀭𑀡𑀢𑁄 𑀯𑀺𑀲𑀽𑀓𑀸𑀬𑀺𑀓𑀁, 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀅𑀦𑀦𑀼𑀯𑀢𑁆𑀢𑀺𑀢𑁆𑀯𑀸 𑀢𑀲𑁆𑀲𑀸 𑀯𑀺𑀭𑁄𑀥𑁂𑀦 𑀧𑀯𑀢𑁆𑀢𑀦𑀢𑁄 𑀯𑀺𑀲𑁂𑀯𑀺𑀢𑀁, 𑀓𑀤𑀸𑀘𑀺 𑀉𑀘𑁆𑀙𑁂𑀤𑀲𑁆𑀲 𑀓𑀤𑀸𑀘𑀺 𑀲𑀲𑁆𑀲𑀢𑀲𑁆𑀲 𑀕𑀳𑀡𑀢𑁄 𑀯𑀺𑀭𑀽𑀧𑀁 𑀨𑀦𑁆𑀤𑀺𑀢𑀁 𑀯𑀺𑀧𑁆𑀨𑀦𑁆𑀤𑀺𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀸𑀮𑀸𑀯𑀢𑁆𑀣𑀼𑀓𑀢𑀸𑀦𑀻𑀢𑀺 𑀢𑀸𑀮𑀯𑀢𑁆𑀣𑀼 𑀯𑀺𑀬 𑀓𑀢𑀸𑀦𑀺, 𑀧𑀼𑀦 𑀅𑀯𑀺𑀭𑀼𑀳𑀡𑀝𑁆𑀞𑁂𑀦 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀢𑀸𑀮𑁄 𑀯𑀺𑀬 𑀲𑀫𑀽𑀮𑀁 𑀢𑀸𑀮𑀁 𑀉𑀤𑁆𑀥𑀭𑀺𑀢𑁆𑀯𑀸 𑀢𑀲𑁆𑀲 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀁 𑀯𑀺𑀬 𑀘 𑀓𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀦𑀪𑀸𑀯𑀁𑀓𑀢𑀸𑀦𑀻𑀢𑀺 𑀅𑀦𑀼𑀅𑀪𑀸𑀯𑀁 𑀓𑀢𑀸𑀦𑀻𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬. 𑀙𑀝𑁆𑀞𑁂 𑀇𑀢𑀺 𑀯𑀸, 𑀪𑀺𑀓𑁆𑀔𑀯𑁂, 𑀬𑁄 𑀯𑀤𑁂𑀬𑁆𑀬𑀸𑀢𑀺 𑀢𑀲𑁆𑀲𑀁 𑀧𑀭𑀺𑀲𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑁄 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑁄 𑀅𑀢𑁆𑀣𑀺, 𑀲𑁄 𑀧𑀦 𑀅𑀯𑀺𑀲𑀸𑀭𑀤𑀥𑀸𑀢𑀼𑀓𑁄 𑀉𑀝𑁆𑀞𑀸𑀬 𑀤𑀲𑀩𑀮𑀁 𑀧𑀼𑀘𑁆𑀙𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀅𑀚𑁆𑀛𑀸𑀲𑀬𑁂𑀦 𑀲𑀬𑀫𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀲𑀢𑁆𑀣𑀸 𑀏𑀯𑀫𑀸𑀳. 𑀙𑀝𑁆𑀞𑀁.

𑁭. 𑀦𑀢𑀼𑀫𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭. 𑀲𑀢𑁆𑀢𑀫𑁂 𑀦 𑀢𑀼𑀫𑁆𑀳𑀸𑀓𑀦𑁆𑀢𑀺 𑀅𑀢𑁆𑀢𑀦𑀺 𑀳𑀺 𑀲𑀢𑀺 𑀅𑀢𑁆𑀢𑀦𑀺𑀬𑀁 𑀦𑀸𑀫 𑀳𑁄𑀢𑀺. 𑀅𑀢𑁆𑀢𑀸𑀬𑁂𑀯 𑀘 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀦 𑀢𑀼𑀫𑁆𑀳𑀸𑀓’’𑀦𑁆𑀢𑀺 𑀆𑀳. 𑀦𑀧𑀺 𑀅𑀜𑁆𑀜𑁂𑀲𑀦𑁆𑀢𑀺 𑀅𑀜𑁆𑀜𑁄 𑀦𑀸𑀫 𑀧𑀭𑁂𑀲𑀁 𑀅𑀢𑁆𑀢𑀸, 𑀢𑀲𑁆𑀫𑀺𑀁 𑀲𑀢𑀺 𑀅𑀜𑁆𑀜𑁂𑀲𑀁 𑀦𑀸𑀫 𑀲𑀺𑀬𑀸, 𑀲𑁄𑀧𑀺 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀦𑀧𑀺 𑀅𑀜𑁆𑀜𑁂𑀲’’𑀦𑁆𑀢𑀺 𑀆𑀳. 𑀧𑀼𑀭𑀸𑀡𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀦𑁆𑀢𑀺 𑀦𑀬𑀺𑀤𑀁 𑀧𑀼𑀭𑀸𑀡𑀓𑀫𑁆𑀫𑀫𑁂𑀯, 𑀧𑀼𑀭𑀸𑀡𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑁄 𑀧𑀦𑁂𑀲 𑀓𑀸𑀬𑁄, 𑀢𑀲𑁆𑀫𑀸 𑀧𑀘𑁆𑀘𑀬𑀯𑁄𑀳𑀸𑀭𑁂𑀦 𑀏𑀯𑀁 𑀯𑀼𑀢𑁆𑀢𑁄. 𑀅𑀪𑀺𑀲𑀗𑁆𑀔𑀢𑀦𑁆𑀢𑀺𑀆𑀤𑀺 𑀓𑀫𑁆𑀫𑀯𑁄𑀳𑀸𑀭𑀲𑁆𑀲𑁂𑀯 𑀯𑀲𑁂𑀦 𑀧𑀼𑀭𑀺𑀫𑀮𑀺𑀗𑁆𑀕𑀲𑀪𑀸𑀕𑀢𑀸𑀬 𑀯𑀼𑀢𑁆𑀢𑀁, 𑀅𑀬𑀁 𑀧𑀦𑁂𑀢𑁆𑀣 𑀅𑀢𑁆𑀣𑁄 𑁋 𑀅𑀪𑀺𑀲𑀗𑁆𑀔𑀢𑀦𑁆𑀢𑀺 𑀧𑀘𑁆𑀘𑀬𑁂𑀳𑀺 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀅𑀪𑀺𑀲𑀜𑁆𑀘𑁂𑀢𑀬𑀺𑀢𑀦𑁆𑀢𑀺 𑀘𑁂𑀢𑀦𑀸𑀯𑀢𑁆𑀣𑀼𑀓𑁄 𑀘𑁂𑀢𑀦𑀸𑀫𑀽𑀮𑀓𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀯𑁂𑀤𑀦𑀺𑀬𑀦𑁆𑀢𑀺 𑀯𑁂𑀤𑀦𑀺𑀬𑀯𑀢𑁆𑀣𑀽𑀢𑀺 𑀤𑀝𑁆𑀞𑀩𑁆𑀩𑁄. 𑀲𑀢𑁆𑀢𑀫𑀁.

𑁮. 𑀘𑁂𑀢𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮. 𑀅𑀝𑁆𑀞𑀫𑁂 𑀬𑀜𑁆𑀘, 𑀪𑀺𑀓𑁆𑀔𑀯𑁂, 𑀘𑁂𑀢𑁂𑀢𑀻𑀢𑀺 𑀬𑀁 𑀘𑁂𑀢𑀦𑀁 𑀘𑁂𑀢𑁂𑀢𑀺, 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀬𑀜𑁆𑀘 𑀧𑀓𑀧𑁆𑀧𑁂𑀢𑀻𑀢𑀺 𑀬𑀁 𑀧𑀓𑀧𑁆𑀧𑀦𑀁 𑀧𑀓𑀧𑁆𑀧𑁂𑀢𑀺, 𑀧𑀯𑀢𑁆𑀢𑁂𑀢𑀺𑀘𑁆𑀘𑁂𑀯 𑀅𑀢𑁆𑀣𑁄. 𑀬𑀜𑁆𑀘 𑀅𑀦𑀼𑀲𑁂𑀢𑀻𑀢𑀺 𑀬𑀜𑁆𑀘 𑀅𑀦𑀼𑀲𑀬𑀁 𑀅𑀦𑀼𑀲𑁂𑀢𑀺, 𑀧𑀯𑀢𑁆𑀢𑁂𑀢𑀺𑀘𑁆𑀘𑁂𑀯 𑀅𑀢𑁆𑀣𑁄. 𑀏𑀢𑁆𑀣 𑀘 𑀘𑁂𑀢𑁂𑀢𑀻𑀢𑀺 𑀢𑁂𑀪𑀽𑀫𑀓𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀕𑀳𑀺𑀢𑀸, 𑀧𑀓𑀧𑁆𑀧𑁂𑀢𑀻𑀢𑀺 𑀅𑀝𑁆𑀞𑀲𑀼 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑁂𑀲𑀼 𑀢𑀡𑁆𑀳𑀸𑀤𑀺𑀝𑁆𑀞𑀺𑀓𑀧𑁆𑀧𑀸 𑀕𑀳𑀺𑀢𑀸, 𑀅𑀦𑀼𑀲𑁂𑀢𑀻𑀢𑀺 𑀤𑁆𑀯𑀸𑀤𑀲𑀦𑁆𑀦𑀁 𑀘𑁂𑀢𑀦𑀸𑀦𑀁 𑀲𑀳𑀚𑀸𑀢𑀓𑁄𑀝𑀺𑀬𑀸 𑀘𑁂𑀯 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀘 𑀅𑀦𑀼𑀲𑀬𑁄 𑀕𑀳𑀺𑀢𑁄. 𑀆𑀭𑀫𑁆𑀫𑀡𑀫𑁂𑀢𑀁 𑀳𑁄𑀢𑀻𑀢𑀺 (𑀘𑁂𑀢𑀦𑀸𑀤𑀺𑀥𑀫𑁆𑀫𑀚𑀸𑀢𑁂 𑀲𑀢𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀅𑀯𑀸𑀭𑀺𑀢𑀢𑁆𑀢𑀸) 𑀏𑀢𑀁 𑀘𑁂𑀢𑀦𑀸𑀤𑀺𑀥𑀫𑁆𑀫𑀚𑀸𑀢𑀁 𑀧𑀘𑁆𑀘𑀬𑁄 𑀳𑁄𑀢𑀺. 𑀧𑀘𑁆𑀘𑀬𑁄 𑀳𑀺 𑀇𑀥 𑀆𑀭𑀫𑁆𑀫𑀡𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀺𑀬𑀸𑀢𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑀲𑁆𑀲 𑀞𑀺𑀢𑀢𑁆𑀣𑀁. 𑀆𑀭𑀫𑁆𑀫𑀡𑁂 𑀲𑀢𑀻𑀢𑀺 𑀢𑀲𑁆𑀫𑀺𑀁 𑀧𑀘𑁆𑀘𑀬𑁂 𑀲𑀢𑀺. 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲 𑀳𑁄𑀢𑀻𑀢𑀺 𑀢𑀲𑁆𑀲 𑀓𑀫𑁆𑀫𑀯𑀺𑀜𑁆𑀜𑀸𑀡𑀲𑁆𑀲 𑀧𑀢𑀺𑀝𑁆𑀞𑀸 𑀳𑁄𑀢𑀺. 𑀢𑀲𑁆𑀫𑀺𑀁 𑀧𑀢𑀺𑀝𑁆𑀞𑀺𑀢𑁂 𑀯𑀺𑀜𑁆𑀜𑀸𑀡𑁂𑀢𑀺 𑀢𑀲𑁆𑀫𑀺𑀁 𑀓𑀫𑁆𑀫𑀯𑀺𑀜𑁆𑀜𑀸𑀡𑁂 𑀧𑀢𑀺𑀝𑁆𑀞𑀺𑀢𑁂. 𑀯𑀺𑀭𑀽𑀴𑁆𑀳𑁂𑀢𑀺 𑀓𑀫𑁆𑀫𑀁 𑀚𑀯𑀸𑀧𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑀲𑀫𑀢𑁆𑀣𑀢𑀸𑀬 𑀦𑀺𑀩𑁆𑀩𑀢𑁆𑀢𑀫𑀽𑀮𑁂 𑀚𑀸𑀢𑁂. 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀻𑀢𑀺 𑀧𑀼𑀦𑀩𑁆𑀪𑀯𑀲𑀗𑁆𑀔𑀸𑀢𑀸 𑀅𑀪𑀺𑀦𑀺𑀩𑁆𑀩𑀢𑁆𑀢𑀺.

𑀦𑁄 𑀘𑁂, 𑀪𑀺𑀓𑁆𑀔𑀯𑁂, 𑀘𑁂𑀢𑁂𑀢𑀻𑀢𑀺 𑀇𑀫𑀺𑀦𑀸 𑀢𑁂𑀪𑀽𑀫𑀓𑀘𑁂𑀢𑀦𑀸𑀬 𑀅𑀧𑁆𑀧𑀯𑀢𑁆𑀢𑀦𑀓𑁆𑀔𑀡𑁄 𑀯𑀼𑀢𑁆𑀢𑁄. 𑀦𑁄 𑀘𑁂 𑀧𑀓𑀧𑁆𑀧𑁂𑀢𑀻𑀢𑀺 𑀇𑀫𑀺𑀦𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀓𑀧𑁆𑀧𑀸𑀦𑀁 𑀅𑀧𑁆𑀧𑀯𑀢𑁆𑀢𑀦𑀓𑁆𑀔𑀡𑁄. 𑀅𑀣 𑀘𑁂 𑀅𑀦𑀼𑀲𑁂𑀢𑀻𑀢𑀺 𑀇𑀫𑀺𑀦𑀸 𑀢𑁂𑀪𑀽𑀫𑀓𑀯𑀺𑀧𑀸𑀓𑁂𑀲𑀼 𑀧𑀭𑀺𑀢𑁆𑀢𑀓𑀺𑀭𑀺𑀬𑀸𑀲𑀼 𑀭𑀽𑀧𑁂𑀢𑀺 𑀏𑀢𑁆𑀣 𑀅𑀧𑁆𑀧𑀳𑀻𑀦𑀓𑁄𑀝𑀺𑀬𑀸 𑀅𑀦𑀼𑀲𑀬𑁄 𑀕𑀳𑀺𑀢𑁄. 𑀆𑀭𑀫𑁆𑀫𑀡𑀫𑁂𑀢𑀁 𑀳𑁄𑀢𑀻𑀢𑀺 𑀅𑀦𑀼𑀲𑀬𑁂 𑀲𑀢𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀅𑀯𑀸𑀭𑀺𑀢𑀢𑁆𑀢𑀸 𑀏𑀢𑀁 𑀅𑀦𑀼𑀲𑀬𑀚𑀸𑀢𑀁 𑀧𑀘𑁆𑀘𑀬𑁄𑀯 𑀳𑁄𑀢𑀺.

𑀦𑁄 𑀘𑁂𑀯 𑀘𑁂𑀢𑁂𑀢𑀻𑀢𑀺𑀆𑀤𑀻𑀲𑀼 𑀧𑀞𑀫𑀧𑀤𑁂 𑀢𑁂𑀪𑀽𑀫𑀓𑀓𑀼𑀲𑀮𑀸𑀓𑀼𑀲𑀮𑀘𑁂𑀢𑀦𑀸 𑀦𑀺𑀯𑀢𑁆𑀢𑀸, 𑀤𑀼𑀢𑀺𑀬𑀧𑀤𑁂 𑀅𑀝𑁆𑀞𑀲𑀼 𑀘𑀺𑀢𑁆𑀢𑁂𑀲𑀼 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄, 𑀢𑀢𑀺𑀬𑀧𑀤𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀲𑀼 𑀥𑀫𑁆𑀫𑁂𑀲𑀼 𑀬𑁄 𑀅𑀧𑁆𑀧𑀳𑀻𑀦𑀓𑁄𑀝𑀺𑀬𑀸 𑀅𑀦𑀼𑀲𑀬𑀺𑀢𑁄 𑀅𑀦𑀼𑀲𑀬𑁄, 𑀲𑁄 𑀦𑀺𑀯𑀢𑁆𑀢𑁄.

𑀅𑀧𑀺𑀘𑁂𑀢𑁆𑀣 𑀅𑀲𑀫𑁆𑀫𑁄𑀳𑀢𑁆𑀣𑀁 𑀘𑁂𑀢𑁂𑀢𑀺 𑀧𑀓𑀧𑁆𑀧𑁂𑀢𑀺 𑀅𑀦𑀼𑀲𑁂𑀢𑀺, 𑀘𑁂𑀢𑁂𑀢𑀺 𑀦 𑀧𑀓𑀧𑁆𑀧𑁂𑀢𑀺 𑀅𑀦𑀼𑀲𑁂𑀢𑀺, 𑀦 𑀘𑁂𑀢𑁂𑀢𑀺 𑀦 𑀧𑀓𑀧𑁆𑀧𑁂𑀢𑀺 𑀅𑀦𑀼𑀲𑁂𑀢𑀺, 𑀦 𑀘𑁂𑀢𑁂𑀢𑀺 𑀦 𑀧𑀓𑀧𑁆𑀧𑁂𑀢𑀺 𑀦 𑀅𑀦𑀼𑀲𑁂𑀢𑀻𑀢𑀺 𑀇𑀤𑀫𑁆𑀧𑀺 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀧𑀞𑀫𑀦𑀬𑁂 𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑁄 𑀤𑀲𑁆𑀲𑀺𑀢𑁄. 𑀤𑀼𑀢𑀺𑀬𑀦𑀬𑁂 𑀘𑁂𑀢𑁂𑀢𑀻𑀢𑀺 𑀢𑁂𑀪𑀽𑀫𑀓𑀓𑀼𑀲𑀮𑀘𑁂𑀢𑀦𑀸 𑀘𑁂𑀯 𑀘𑀢𑀲𑁆𑀲𑁄 𑀘 𑀅𑀓𑀼𑀲𑀮𑀘𑁂𑀢𑀦𑀸 𑀕𑀳𑀺𑀢𑀸. 𑀦 𑀧𑀓𑀧𑁆𑀧𑁂𑀢𑀻𑀢𑀺 𑀅𑀝𑁆𑀞𑀲𑀼 𑀘𑀺𑀢𑁆𑀢𑁂𑀲𑀼 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄 𑀦𑀺𑀯𑀢𑁆𑀢𑀸. 𑀅𑀦𑀼𑀲𑁂𑀢𑀻𑀢𑀺 𑀢𑁂𑀪𑀽𑀫𑀓𑀓𑀼𑀲𑀮𑁂 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸, 𑀘𑀢𑀽𑀲𑀼 𑀅𑀓𑀼𑀲𑀮𑀘𑁂𑀢𑀦𑀸𑀲𑀼 𑀲𑀳𑀚𑀸𑀢𑀓𑁄𑀝𑀺𑀬𑀸 𑀘𑁂𑀯 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀘 𑀅𑀦𑀼𑀲𑀬𑁄 𑀕𑀳𑀺𑀢𑁄. 𑀢𑀢𑀺𑀬𑀦𑀬𑁂 𑀦 𑀘𑁂𑀢𑁂𑀢𑀻𑀢𑀺 𑀢𑁂𑀪𑀽𑀫𑀓𑀓𑀼𑀲𑀮𑀸𑀓𑀼𑀲𑀮𑀁 𑀦𑀺𑀯𑀢𑁆𑀢𑀁, 𑀦 𑀧𑀓𑀧𑁆𑀧𑁂𑀢𑀻𑀢𑀺 𑀅𑀝𑁆𑀞𑀲𑀼 𑀘𑀺𑀢𑁆𑀢𑁂𑀲𑀼 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄 𑀦𑀺𑀯𑀢𑁆𑀢𑀸, 𑀅𑀦𑀼𑀲𑁂𑀢𑀻𑀢𑀺 𑀲𑀼𑀢𑁆𑀢𑁂 𑀆𑀕𑀢𑀁 𑀯𑀸𑀭𑁂𑀢𑁆𑀯𑀸 𑀢𑁂𑀪𑀽𑀫𑀓𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀸𑀭𑀽𑀧𑁂𑀲𑀼 𑀅𑀧𑁆𑀧𑀳𑀻𑀦𑀓𑁄𑀝𑀺𑀬𑀸 𑀉𑀧𑀦𑀺𑀲𑁆𑀲𑀬𑁄 𑀕𑀳𑀺𑀢𑁄. 𑀘𑀢𑀼𑀢𑁆𑀣𑀦𑀬𑁄 𑀧𑀼𑀭𑀺𑀫𑀲𑀤𑀺𑀲𑁄𑀯.

𑀢𑀤𑀧𑁆𑀧𑀢𑀺𑀝𑁆𑀞𑀺𑀢𑁂𑀢𑀺 𑀢𑀲𑁆𑀫𑀺𑀁 𑀅𑀧𑁆𑀧𑀢𑀺𑀝𑁆𑀞𑀺𑀢𑁂. 𑀅𑀯𑀺𑀭𑀽𑀴𑁆𑀳𑁂𑀢𑀺 𑀓𑀫𑁆𑀫𑀁 𑀚𑀯𑀸𑀧𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑀲𑀫𑀢𑁆𑀣𑀢𑀸𑀬 𑀅𑀦𑀺𑀩𑁆𑀩𑀢𑁆𑀢𑀫𑀽𑀮𑁂. 𑀏𑀢𑁆𑀣 𑀧𑀦 𑀓𑀺𑀁 𑀓𑀣𑀺𑀢𑀦𑁆𑀢𑀺? 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀓𑀺𑀘𑁆𑀘𑀁, 𑀔𑀻𑀡𑀸𑀲𑀯𑀲𑁆𑀲 𑀓𑀺𑀘𑁆𑀘𑀓𑀭𑀡𑀦𑁆𑀢𑀺𑀧𑀺 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀏𑀢𑁆𑀣 𑀘 𑀯𑀺𑀜𑁆𑀜𑀸𑀡𑀲𑁆𑀲 𑀘𑁂𑀯 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀲𑁆𑀲 𑀘 𑀅𑀦𑁆𑀢𑀭𑁂 𑀏𑀓𑁄 𑀲𑀦𑁆𑀥𑀺, 𑀯𑁂𑀤𑀦𑀸𑀢𑀡𑁆𑀳𑀸𑀦𑀫𑀦𑁆𑀢𑀭𑁂 𑀏𑀓𑁄, 𑀪𑀯𑀚𑀸𑀢𑀻𑀦𑀫𑀦𑁆𑀢𑀭𑁂 𑀏𑀓𑁄𑀢𑀺. 𑀅𑀝𑁆𑀞𑀫𑀁.

𑁯. 𑀤𑀼𑀢𑀺𑀬𑀘𑁂𑀢𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯. 𑀦𑀯𑀫𑁂 𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀸𑀦𑀁 𑀅𑀦𑁆𑀢𑀭𑁂 𑀏𑀓𑁄 𑀲𑀦𑁆𑀥𑀺, 𑀯𑁂𑀤𑀦𑀸𑀢𑀡𑁆𑀳𑀸𑀦𑀫𑀦𑁆𑀢𑀭𑁂 𑀏𑀓𑁄, 𑀪𑀯𑀚𑀸𑀢𑀻𑀦𑀫𑀦𑁆𑀢𑀭𑁂 𑀏𑀓𑁄𑀢𑀺. 𑀦𑀯𑀫𑀁.

𑁧𑁦. 𑀢𑀢𑀺𑀬𑀘𑁂𑀢𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁦. 𑀤𑀲𑀫𑁂 𑀦𑀢𑀻𑀢𑀺 𑀢𑀡𑁆𑀳𑀸. 𑀲𑀸 𑀳𑀺 𑀧𑀺𑀬𑀭𑀽𑀧𑁂𑀲𑀼 𑀭𑀽𑀧𑀸𑀤𑀻𑀲𑀼 𑀦𑀫𑀦𑀝𑁆𑀞𑁂𑀦 ‘‘𑀦𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀆𑀕𑀢𑀺 𑀕𑀢𑀺 𑀳𑁄𑀢𑀻𑀢𑀺 𑀆𑀕𑀢𑀺𑀫𑁆𑀳𑀺 𑀕𑀢𑀺 𑀳𑁄𑀢𑀺, 𑀆𑀕𑀢𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀓𑀫𑁆𑀫𑁂 𑀯𑀸 𑀓𑀫𑁆𑀫𑀦𑀺𑀫𑀺𑀢𑁆𑀢𑁂 𑀯𑀸 𑀕𑀳𑀺𑀦𑀺𑀫𑀺𑀢𑁆𑀢𑁂 𑀯𑀸 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀜𑁆𑀜𑀸𑀡𑀲𑁆𑀲 𑀕𑀢𑀺 𑀳𑁄𑀢𑀺. 𑀘𑀼𑀢𑀽𑀧𑀧𑀸𑀢𑁄𑀢𑀺 𑀏𑀯𑀁 𑀯𑀺𑀜𑁆𑀜𑀸𑀡𑀲𑁆𑀲 𑀆𑀕𑀢𑁂 𑀧𑀝𑀺𑀲𑀦𑁆𑀥𑀺𑀯𑀺𑀲𑀬𑁂 𑀕𑀢𑀺𑀬𑀸 𑀲𑀢𑀺 𑀇𑀢𑁄 𑀘𑀯𑀦𑀲𑀗𑁆𑀔𑀸𑀢𑀸 𑀘𑀼𑀢𑀺, 𑀢𑀢𑁆𑀣𑀽𑀧𑀧𑀢𑁆𑀢𑀺𑀲𑀗𑁆𑀔𑀸𑀢𑁄 𑀉𑀧𑀧𑀸𑀢𑁄𑀢𑀺 𑀅𑀬𑀁 𑀘𑀼𑀢𑀽𑀧𑀧𑀸𑀢𑁄 𑀦𑀸𑀫 𑀳𑁄𑀢𑀺. 𑀏𑀯𑀁 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀦𑀢𑀺𑀬𑀸 𑀘 𑀆𑀕𑀢𑀺𑀕𑀢𑀺𑀬𑀸 𑀘 𑀅𑀦𑁆𑀢𑀭𑁂 𑀏𑀓𑁄𑀯 𑀲𑀦𑁆𑀥𑀺 𑀓𑀣𑀺𑀢𑁄𑀢𑀺. 𑀤𑀲𑀫𑀁.

𑀓𑀴𑀸𑀭𑀔𑀢𑁆𑀢𑀺𑀬𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑁫. 𑀕𑀳𑀧𑀢𑀺𑀯𑀕𑁆𑀕𑁄

𑁧. 𑀧𑀜𑁆𑀘𑀯𑁂𑀭𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧. 𑀕𑀳𑀧𑀢𑀺𑀯𑀕𑁆𑀕𑀲𑁆𑀲 𑀧𑀞𑀫𑁂 𑀬𑀢𑁄𑀢𑀺 𑀬𑀤𑀸. 𑀪𑀬𑀸𑀦𑀺 𑀯𑁂𑀭𑀸𑀦𑀻𑀢𑀺 𑀪𑀬𑀯𑁂𑀭𑀘𑁂𑀢𑀦𑀸𑀬𑁄. 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀳𑀻𑀢𑀺 𑀤𑀼𑀯𑀺𑀥𑀁 𑀲𑁄𑀢𑀸𑀧𑀢𑁆𑀢𑀺𑀬𑀸 𑀅𑀗𑁆𑀕𑀁, (𑀲𑁄𑀢𑀸𑀧𑀢𑁆𑀢𑀺𑀬𑀸 𑀘 𑀅𑀗𑁆𑀕𑀁,) 𑀬𑀁 𑀧𑀼𑀩𑁆𑀩𑀪𑀸𑀕𑁂 𑀲𑁄𑀢𑀸𑀧𑀢𑁆𑀢𑀺𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀢𑀺, ‘‘𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑁄 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁧𑁧) 𑀏𑀯𑀁 𑀆𑀕𑀢𑀁, 𑀧𑀝𑀺𑀮𑀤𑁆𑀥𑀕𑀼𑀡𑀲𑁆𑀲 𑀘 𑀲𑁄𑀢𑀸𑀧𑀢𑁆𑀢𑀺𑀁 𑀧𑀢𑁆𑀯𑀸 𑀞𑀺𑀢𑀲𑁆𑀲 𑀅𑀗𑁆𑀕𑀁, 𑀬𑀁 𑀲𑁄𑀢𑀸𑀧𑀦𑁆𑀦𑀲𑁆𑀲 𑀅𑀗𑁆𑀕𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀸𑀤𑀻𑀦𑀁 𑀏𑀢𑀁 𑀅𑀥𑀺𑀯𑀘𑀦𑀁. 𑀇𑀤𑀫𑀺𑀥 𑀅𑀥𑀺𑀧𑁆𑀧𑁂𑀢𑀁. 𑀅𑀭𑀺𑀬𑁄𑀢𑀺 𑀦𑀺𑀤𑁆𑀤𑁄𑀲𑁄 𑀦𑀺𑀭𑀼𑀧𑀸𑀭𑀫𑁆𑀪𑁄. 𑀜𑀸𑀬𑁄𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁 𑀜𑀢𑁆𑀯𑀸 𑀞𑀺𑀢𑀜𑀸𑀡𑀫𑁆𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄𑀧𑀺. 𑀬𑀣𑀸𑀳 𑁋 ‘‘𑀜𑀸𑀬𑁄 𑀯𑀼𑀘𑁆𑀘𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄, 𑀅𑀭𑀺𑀬𑁄𑀧𑀺 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀜𑀸𑀬𑁄’’𑀢𑀺. 𑀧𑀜𑁆𑀜𑀸𑀬𑀸𑀢𑀺 𑀅𑀧𑀭𑀸𑀧𑀭𑀁 𑀉𑀧𑁆𑀧𑀦𑁆𑀦𑀸𑀬 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬. 𑀲𑀼𑀤𑀺𑀝𑁆𑀞𑁄 𑀳𑁄𑀢𑀻𑀢𑀺 𑀅𑀧𑀭𑀸𑀧𑀭𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀤𑀲𑁆𑀲𑀦𑀯𑀲𑁂𑀦 𑀲𑀼𑀝𑁆𑀞𑀼 𑀤𑀺𑀝𑁆𑀞𑁄.

𑀔𑀻𑀡𑀦𑀺𑀭𑀬𑁄𑀢𑀺𑀆𑀤𑀻𑀲𑀼 𑀆𑀬𑀢𑀺𑀁 𑀢𑀢𑁆𑀣 𑀅𑀦𑀼𑀧𑁆𑀧𑀚𑁆𑀚𑀦𑀢𑀸𑀬 𑀔𑀻𑀡𑁄 𑀦𑀺𑀭𑀬𑁄 𑀫𑀬𑁆𑀳𑀦𑁆𑀢𑀺 𑀲𑁄 𑀅𑀳𑀁 𑀔𑀻𑀡𑀦𑀺𑀭𑀬𑁄. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀲𑁄𑀢𑀸𑀧𑀦𑁆𑀦𑁄𑀢𑀺 𑀫𑀕𑁆𑀕𑀲𑁄𑀢𑀁 𑀆𑀧𑀦𑁆𑀦𑁄. 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄𑀢𑀺 𑀦 𑀯𑀺𑀦𑀺𑀧𑀸𑀢𑀲𑀪𑀸𑀯𑁄. 𑀦𑀺𑀬𑀢𑁄𑀢𑀺 𑀧𑀞𑀫𑀫𑀕𑁆𑀕𑀲𑀗𑁆𑀔𑀸𑀢𑁂𑀦 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁂𑀦 𑀦𑀺𑀬𑀢𑁄. 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑁄𑀢𑀺 𑀉𑀢𑁆𑀢𑀭𑀺𑀫𑀕𑁆𑀕𑀢𑁆𑀢𑀬𑀲𑀗𑁆𑀔𑀸𑀢𑁄 𑀲𑀫𑁆𑀩𑁄𑀥𑀺 𑀧𑀭𑀁 𑀅𑀬𑀦𑀁 𑀫𑀬𑁆𑀳𑀦𑁆𑀢𑀺 𑀲𑁄𑀳𑀁 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑁄, 𑀢𑀁 𑀲𑀫𑁆𑀩𑁄𑀥𑀺𑀁 𑀅𑀯𑀲𑁆𑀲𑀁 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑀓𑁄𑀢𑀺 𑀅𑀢𑁆𑀣𑁄.

𑀧𑀸𑀡𑀸𑀢𑀺𑀧𑀸𑀢𑀧𑀘𑁆𑀘𑀬𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑀓𑀸𑀭𑀡𑀸. 𑀪𑀬𑀁 𑀯𑁂𑀭𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓𑀁. 𑀯𑁂𑀭𑀜𑁆𑀘 𑀦𑀸𑀫𑁂𑀢𑀁 𑀤𑀼𑀯𑀺𑀥𑀁 𑀳𑁄𑀢𑀺 𑀩𑀸𑀳𑀺𑀭𑀁 𑀅𑀚𑁆𑀛𑀢𑁆𑀢𑀺𑀓𑀦𑁆𑀢𑀺. 𑀏𑀓𑁂𑀦 𑀳𑀺 𑀏𑀓𑀲𑁆𑀲 𑀧𑀺𑀢𑀸 𑀫𑀸𑀭𑀺𑀢𑁄 𑀳𑁄𑀢𑀺, 𑀲𑁄 𑀘𑀺𑀦𑁆𑀢𑁂𑀲𑀺 ‘‘𑀏𑀢𑁂𑀦 𑀓𑀺𑀭 𑀫𑁂 𑀧𑀺𑀢𑀸 𑀫𑀸𑀭𑀺𑀢𑁄, 𑀅𑀳𑀫𑁆𑀧𑀺 𑀢𑀁𑀬𑁂𑀯 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀦𑀺𑀲𑀺𑀢𑀁 𑀲𑀢𑁆𑀣𑀁 𑀆𑀤𑀸𑀬 𑀘𑀭𑀢𑀺. 𑀬𑀸 𑀢𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑀯𑁂𑀭𑀘𑁂𑀢𑀦𑀸, 𑀇𑀤𑀁 𑀩𑀸𑀳𑀺𑀭𑀁 𑀯𑁂𑀭𑀁 𑀦𑀸𑀫. 𑀬𑀸 𑀧𑀦 𑀇𑀢𑀭𑀲𑁆𑀲 ‘‘𑀅𑀬𑀁 𑀓𑀺𑀭 𑀫𑀁 𑀫𑀸𑀭𑁂𑀲𑁆𑀲𑀸𑀫𑀻𑀢𑀺 𑀘𑀭𑀢𑀺, 𑀅𑀳𑀫𑁂𑀯 𑀦𑀁 𑀧𑀞𑀫𑀢𑀭𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀘𑁂𑀢𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀇𑀤𑀁 𑀅𑀚𑁆𑀛𑀢𑁆𑀢𑀺𑀓𑀁 𑀯𑁂𑀭𑀁 𑀦𑀸𑀫. 𑀇𑀤𑀁 𑀢𑀸𑀯 𑀉𑀪𑀬𑀫𑁆𑀧𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀫𑁂𑀯. 𑀬𑀸 𑀧𑀦 𑀢𑀁 𑀦𑀺𑀭𑀬𑁂 𑀉𑀧𑁆𑀧𑀦𑁆𑀦𑀁 𑀤𑀺𑀲𑁆𑀯𑀸 ‘‘𑀏𑀢𑀁 𑀧𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀚𑀮𑀺𑀢𑀁 𑀅𑀬𑀫𑀼𑀕𑁆𑀕𑀭𑀁 𑀕𑀡𑁆𑀳𑀢𑁄 𑀦𑀺𑀭𑀬𑀧𑀸𑀮𑀲𑁆𑀲 𑀘𑁂𑀢𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀇𑀤𑀫𑀲𑁆𑀲 𑀲𑀫𑁆𑀧𑀭𑀸𑀬𑀺𑀓𑀁 𑀩𑀸𑀳𑀺𑀭𑀯𑁂𑀭𑀁. 𑀬𑀸 𑀘𑀲𑁆𑀲 ‘‘𑀅𑀬𑀁 𑀦𑀺𑀤𑁆𑀤𑁄𑀲𑀁 𑀫𑀁 𑀧𑀳𑀭𑀺𑀲𑁆𑀲𑀸𑀫𑀻𑀢𑀺 𑀆𑀕𑀘𑁆𑀙𑀢𑀺, 𑀅𑀳𑀫𑁂𑀯 𑀦𑀁 𑀧𑀞𑀫𑀢𑀭𑀁 𑀧𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀘𑁂𑀢𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀇𑀤𑀫𑀲𑁆𑀲 𑀲𑀫𑁆𑀧𑀭𑀸𑀬𑀺𑀓𑀁 𑀅𑀚𑁆𑀛𑀢𑁆𑀢𑀯𑁂𑀭𑀁. 𑀬𑀁 𑀧𑀦𑁂𑀢𑀁 𑀩𑀸𑀳𑀺𑀭𑀯𑁂𑀭𑀁, 𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀼𑀕𑁆𑀕𑀮𑀯𑁂𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀤𑀼𑀓𑁆𑀔𑀁 𑀤𑁄𑀫𑀦𑀲𑁆𑀲𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓𑀫𑁂𑀯. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀲𑁂𑀲𑀧𑀤𑁂𑀲𑀼𑀧𑀺 ‘‘𑀇𑀫𑀺𑀦𑀸 𑀫𑀫 𑀪𑀡𑁆𑀟𑀁 𑀳𑀝𑀁, 𑀫𑀬𑁆𑀳𑀁 𑀤𑀸𑀭𑁂𑀲𑀼 𑀘𑀸𑀭𑀺𑀢𑁆𑀢𑀁 𑀆𑀧𑀦𑁆𑀦𑀁, 𑀫𑀼𑀲𑀸 𑀯𑀢𑁆𑀯𑀸 𑀅𑀢𑁆𑀣𑁄 𑀪𑀕𑁆𑀕𑁄, 𑀲𑀼𑀭𑀸𑀫𑀤𑀫𑀢𑁆𑀢𑁂𑀦 𑀇𑀤𑀁 𑀦𑀸𑀫 𑀓𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑁂𑀭𑀼𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦𑀸𑀢𑀺 𑀅𑀥𑀺𑀕𑀢𑁂𑀦 𑀅𑀘𑀮𑀧𑁆𑀧𑀲𑀸𑀤𑁂𑀦. 𑀅𑀭𑀺𑀬𑀓𑀦𑁆𑀢𑁂𑀳𑀻𑀢𑀺 𑀧𑀜𑁆𑀘𑀳𑀺 𑀲𑀻𑀮𑁂𑀳𑀺. 𑀢𑀸𑀦𑀺 𑀳𑀺 𑀅𑀭𑀺𑀬𑀸𑀦𑀁 𑀓𑀦𑁆𑀢𑀸𑀦𑀺 𑀧𑀺𑀬𑀸𑀦𑀺. 𑀪𑀯𑀦𑁆𑀢𑀭𑀕𑀢𑀸𑀧𑀺 𑀅𑀭𑀺𑀬𑀸 𑀢𑀸𑀦𑀺 𑀦 𑀯𑀺𑀚𑀳𑀦𑁆𑀢𑀺, 𑀢𑀲𑁆𑀫𑀸 ‘‘𑀅𑀭𑀺𑀬𑀓𑀦𑁆𑀢𑀸𑀦𑀻’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑁂𑀲𑀫𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀅𑀦𑀼𑀲𑁆𑀲𑀢𑀺𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀫𑁂𑀯. 𑀧𑀞𑀫𑀁.

𑁨. 𑀤𑀼𑀢𑀺𑀬𑀧𑀜𑁆𑀘𑀯𑁂𑀭𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁨. 𑀤𑀼𑀢𑀺𑀬𑁂 𑀪𑀺𑀓𑁆𑀔𑀽𑀦𑀁 𑀓𑀣𑀺𑀢𑀪𑀸𑀯𑀫𑀢𑁆𑀢𑀫𑁂𑀯 𑀯𑀺𑀲𑁂𑀲𑁄. 𑀤𑀼𑀢𑀺𑀬𑀁.

𑁩. 𑀤𑀼𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁩. 𑀢𑀢𑀺𑀬𑁂 𑀤𑀼𑀓𑁆𑀔𑀲𑁆𑀲𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲. 𑀲𑀫𑀼𑀤𑀬𑀦𑁆𑀢𑀺 𑀤𑁆𑀯𑁂 𑀲𑀫𑀼𑀤𑀬𑀸 𑀔𑀡𑀺𑀓𑀲𑀫𑀼𑀤𑀬𑁄 𑀘 𑀧𑀘𑁆𑀘𑀬𑀲𑀫𑀼𑀤𑀬𑁄 𑀘. 𑀧𑀘𑁆𑀘𑀬𑀲𑀫𑀼𑀤𑀬𑀁 𑀧𑀲𑁆𑀲𑀦𑁆𑀢𑁄𑀧𑀺 𑀪𑀺𑀓𑁆𑀔𑀼 𑀔𑀡𑀺𑀓𑀲𑀫𑀼𑀤𑀬𑀁 𑀧𑀲𑁆𑀲𑀢𑀺, 𑀔𑀡𑀺𑀓𑀲𑀫𑀼𑀤𑀬𑀁 𑀧𑀲𑁆𑀲𑀦𑁆𑀢𑁄𑀧𑀺 𑀧𑀘𑁆𑀘𑀬𑀲𑀫𑀼𑀤𑀬𑀁 𑀧𑀲𑁆𑀲𑀢𑀺. 𑀅𑀢𑁆𑀣𑀗𑁆𑀕𑀫𑁄𑀧𑀺 𑀅𑀘𑁆𑀘𑀦𑁆𑀢𑀢𑁆𑀣𑀗𑁆𑀕𑀫𑁄 𑀪𑁂𑀤𑀢𑁆𑀣𑀗𑁆𑀕𑀫𑁄𑀢𑀺 𑀤𑀼𑀯𑀺𑀥𑁄. 𑀅𑀘𑁆𑀘𑀦𑁆𑀢𑀢𑁆𑀣𑀗𑁆𑀕𑀫𑀁 𑀧𑀲𑁆𑀲𑀦𑁆𑀢𑁄𑀧𑀺 𑀪𑁂𑀤𑀢𑁆𑀣𑀗𑁆𑀕𑀫𑀁 𑀧𑀲𑁆𑀲𑀢𑀺, 𑀪𑁂𑀤𑀢𑁆𑀣𑀗𑁆𑀕𑀫𑀁 𑀧𑀲𑁆𑀲𑀦𑁆𑀢𑁄𑀧𑀺 𑀅𑀘𑁆𑀘𑀦𑁆𑀢𑀢𑁆𑀣𑀗𑁆𑀕𑀫𑀁 𑀧𑀲𑁆𑀲𑀢𑀺. 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀇𑀤𑀁 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑀅𑀢𑁆𑀣𑀗𑁆𑀕𑀫𑀁 𑀦𑀺𑀩𑁆𑀩𑀢𑁆𑀢𑀺𑀪𑁂𑀤𑀁 𑀦𑀸𑀫 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣𑀸𑀢𑀺 𑀅𑀢𑁆𑀣𑁄. 𑀧𑀝𑀺𑀘𑁆𑀘𑀸𑀢𑀺 𑀦𑀺𑀲𑁆𑀲𑀬𑀯𑀲𑁂𑀦 𑀘𑁂𑀯 𑀆𑀭𑀫𑁆𑀫𑀡𑀯𑀲𑁂𑀦 𑀘 𑀧𑀘𑁆𑀘𑀬𑀁 𑀓𑀢𑁆𑀯𑀸. 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺 𑀨𑀲𑁆𑀲𑁄𑀢𑀺 𑀢𑀺𑀡𑁆𑀡𑀁 𑀲𑀗𑁆𑀕𑀢𑀺𑀬𑀸 𑀨𑀲𑁆𑀲𑁄. 𑀅𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀲𑁆𑀲 𑀲𑀫𑀼𑀤𑀬𑁄𑀢𑀺 𑀅𑀬𑀁 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀦𑀺𑀩𑁆𑀩𑀢𑁆𑀢𑀺 𑀦𑀸𑀫. 𑀅𑀢𑁆𑀣𑀗𑁆𑀕𑀫𑁄𑀢𑀺 𑀪𑁂𑀤𑁄. 𑀏𑀯𑀜𑁆𑀳𑀺 𑀯𑀝𑁆𑀝𑀤𑀼𑀓𑁆𑀔𑀁 𑀪𑀺𑀦𑁆𑀦𑀁 𑀳𑁄𑀢𑀺 𑀅𑀧𑁆𑀧𑀝𑀺𑀲𑀦𑁆𑀥𑀺𑀬𑀁. 𑀢𑀢𑀺𑀬𑀁.

𑁪. 𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪. 𑀘𑀢𑀼𑀢𑁆𑀣𑁂 𑀮𑁄𑀓𑀲𑁆𑀲𑀸𑀢𑀺 𑀲𑀗𑁆𑀔𑀸𑀭𑀮𑁄𑀓𑀲𑁆𑀲. 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀘𑀢𑀼𑀢𑁆𑀣𑀁.

𑁫. 𑀜𑀸𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁫. 𑀧𑀜𑁆𑀘𑀫𑁂 𑀜𑀸𑀢𑀺𑀓𑁂𑀢𑀺 𑀤𑁆𑀯𑀺𑀦𑁆𑀦𑀁 𑀜𑀸𑀢𑀓𑀸𑀦𑀁 𑀕𑀸𑀫𑁂. 𑀕𑀺𑀜𑁆𑀚𑀓𑀸𑀯𑀲𑀣𑁂𑀢𑀺 𑀇𑀝𑁆𑀞𑀓𑀸𑀳𑀺 𑀓𑀢𑁂 𑀫𑀳𑀸𑀧𑀸𑀲𑀸𑀤𑁂. 𑀥𑀫𑁆𑀫𑀧𑀭𑀺𑀬𑀸𑀬𑀦𑁆𑀢𑀺 𑀥𑀫𑁆𑀫𑀓𑀸𑀭𑀡𑀁. 𑀉𑀧𑀲𑁆𑀲𑀼𑀢𑀻𑀢𑀺 𑀉𑀧𑀲𑁆𑀲𑀼𑀢𑀺𑀝𑁆𑀞𑀸𑀦𑀁, 𑀬𑀁 𑀞𑀸𑀦𑀁 𑀉𑀧𑀕𑀢𑁂𑀦 𑀲𑀓𑁆𑀓𑀸 𑀳𑁄𑀢𑀺 𑀪𑀕𑀯𑀢𑁄 𑀲𑀤𑁆𑀤𑀁 𑀲𑁄𑀢𑀼𑀁, 𑀢𑀢𑁆𑀣 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀲𑁄 𑀓𑀺𑀭 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑀲𑀫𑁆𑀫𑀚𑁆𑀚𑀦𑀢𑁆𑀣𑀁 𑀆𑀕𑀢𑁄 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀧𑀳𑀸𑀬 𑀪𑀕𑀯𑀢𑁄 𑀥𑀫𑁆𑀫𑀖𑁄𑀲𑀁 𑀲𑀼𑀡𑀦𑁆𑀢𑁄 𑀅𑀝𑁆𑀞𑀸𑀲𑀺. 𑀅𑀤𑁆𑀤𑀲𑀸𑀢𑀺 𑀢𑀤𑀸 𑀓𑀺𑀭 𑀪𑀕𑀯𑀢𑁄 𑀆𑀤𑀺𑀢𑁄𑀯 𑀧𑀘𑁆𑀘𑀬𑀸𑀓𑀸𑀭𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 ‘‘𑀇𑀤𑀁 𑀇𑀫𑀺𑀦𑀸 𑀧𑀘𑁆𑀘𑀬𑁂𑀦 𑀳𑁄𑀢𑀺, 𑀇𑀤𑀁 𑀇𑀫𑀺𑀦𑀸’’𑀢𑀺 𑀆𑀯𑀚𑁆𑀚𑀢𑁄 𑀬𑀸𑀯 𑀪𑀯𑀕𑁆𑀕𑀸 𑀏𑀓𑀗𑁆𑀕𑀡𑀁 𑀅𑀳𑁄𑀲𑀺, 𑀲𑀢𑁆𑀣𑀸 𑀫𑀦𑀲𑀺𑀓𑀸𑀭𑀁 𑀧𑀳𑀸𑀬 𑀯𑀘𑀲𑀸 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑁄 𑀬𑀣𑀸𑀦𑀼𑀲𑀦𑁆𑀥𑀺𑀦𑀸 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀢𑁆𑀯𑀸, ‘‘𑀅𑀧𑀺 𑀦𑀼 𑀔𑁄 𑀇𑀫𑀁 𑀥𑀫𑁆𑀫𑀧𑀭𑀺𑀬𑀸𑀬𑀁 𑀓𑁄𑀘𑀺 𑀅𑀲𑁆𑀲𑁄𑀲𑀻’’𑀢𑀺 𑀆𑀯𑀚𑁆𑀚𑁂𑀦𑁆𑀢𑁄 𑀢𑀁 𑀪𑀺𑀓𑁆𑀔𑀼𑀫𑀤𑁆𑀤𑀲. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀤𑁆𑀤𑀲𑀸 𑀔𑁄 𑀪𑀕𑀯𑀸’’𑀢𑀺.

𑀅𑀲𑁆𑀲𑁄𑀲𑀺 𑀦𑁄𑀢𑀺 𑀅𑀲𑁆𑀲𑁄𑀲𑀺 𑀦𑀼. 𑀅𑀣 𑀯𑀸 𑀅𑀲𑁆𑀲𑁄𑀲𑀺 𑀦𑁄𑀢𑀺 𑀅𑀫𑁆𑀳𑀸𑀓𑀁 𑀪𑀸𑀲𑀦𑁆𑀢𑀸𑀦𑀁 𑀅𑀲𑁆𑀲𑁄𑀲𑀻𑀢𑀺. 𑀉𑀕𑁆𑀕𑀡𑁆𑀳𑀸𑀳𑀻𑀢𑀺𑀆𑀤𑀻𑀲𑀼 𑀲𑀼𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑁄𑀯 𑀧𑀕𑀼𑀡𑀁 𑀓𑀭𑁄𑀦𑁆𑀢𑁄 𑀉𑀕𑁆𑀕𑀡𑁆𑀳𑀸𑀢𑀺 𑀦𑀸𑀫. 𑀧𑀤𑀸𑀦𑀼𑀧𑀤𑀁 𑀖𑀝𑁂𑀢𑁆𑀯𑀸 𑀯𑀸𑀘𑀸𑀬 𑀧𑀭𑀺𑀘𑀺𑀢𑀁 𑀓𑀭𑁄𑀦𑁆𑀢𑁄 𑀧𑀭𑀺𑀬𑀸𑀧𑀼𑀡𑀸𑀢𑀺 𑀦𑀸𑀫. 𑀉𑀪𑀬𑀣𑀸𑀧𑀺 𑀧𑀕𑀼𑀡𑀁 𑀆𑀥𑀸𑀭𑀧𑁆𑀧𑀢𑁆𑀢𑀁 𑀓𑀭𑁄𑀦𑁆𑀢𑁄 𑀥𑀸𑀭𑁂𑀢𑀺 𑀦𑀸𑀫. 𑀅𑀢𑁆𑀣𑀲𑀁𑀳𑀺𑀢𑁄𑀢𑀺 𑀓𑀸𑀭𑀡𑀦𑀺𑀲𑁆𑀲𑀺𑀢𑁄. 𑀆𑀤𑀺𑀩𑁆𑀭𑀳𑁆𑀫𑀘𑀭𑀺𑀬𑀓𑁄𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀆𑀤𑀺 𑀧𑀢𑀺𑀝𑁆𑀞𑀸𑀦𑀪𑀽𑀢𑁄. 𑀇𑀢𑀺 𑀢𑀻𑀲𑀼𑀧𑀺 𑀇𑀫𑁂𑀲𑀼 𑀲𑀼𑀢𑁆𑀢𑁂𑀲𑀼 𑀯𑀝𑁆𑀝𑀯𑀺𑀯𑀝𑁆𑀝𑀫𑁂𑀯 𑀓𑀣𑀺𑀢𑀁. 𑀧𑀜𑁆𑀘𑀫𑀁.

𑁬. 𑀅𑀜𑁆𑀜𑀢𑀭𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁬. 𑀙𑀝𑁆𑀞𑁂 𑀅𑀜𑁆𑀜𑀢𑀭𑁄𑀢𑀺 𑀦𑀸𑀫𑀯𑀲𑁂𑀦 𑀅𑀧𑀸𑀓𑀝𑁄 𑀅𑀜𑁆𑀜𑀢𑀭𑁄 𑀩𑁆𑀭𑀸𑀳𑁆𑀫𑀡𑁄. 𑀙𑀝𑁆𑀞𑀁.

𑁭. 𑀚𑀸𑀡𑀼𑀲𑁆𑀲𑁄𑀡𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭. 𑀲𑀢𑁆𑀢𑀫𑁂 𑀚𑀸𑀡𑀼𑀲𑁆𑀲𑁄𑀡𑀻𑀢𑀺 𑀞𑀸𑀦𑀦𑁆𑀢𑀭𑀯𑀲𑁂𑀦 𑀏𑀯𑀁𑀮𑀤𑁆𑀥𑀦𑀸𑀫𑁄 𑀅𑀲𑀻𑀢𑀺𑀓𑁄𑀝𑀺𑀯𑀺𑀪𑀯𑁄 𑀫𑀳𑀸𑀧𑀼𑀭𑁄𑀳𑀺𑀢𑁄. 𑀲𑀢𑁆𑀢𑀫𑀁.

𑁮. 𑀮𑁄𑀓𑀸𑀬𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮. 𑀅𑀝𑁆𑀞𑀫𑁂 𑀮𑁄𑀓𑀸𑀬𑀢𑀺𑀓𑁄𑀢𑀺 𑀯𑀺𑀢𑀡𑁆𑀟𑀲𑀢𑁆𑀣𑁂 𑀮𑁄𑀓𑀸𑀬𑀢𑁂 𑀓𑀢𑀧𑀭𑀺𑀘𑀬𑁄. 𑀚𑁂𑀝𑁆𑀞𑀫𑁂𑀢𑀁 𑀮𑁄𑀓𑀸𑀬𑀢𑀦𑁆𑀢𑀺 𑀧𑀞𑀫𑀁 𑀮𑁄𑀓𑀸𑀬𑀢𑀁. 𑀮𑁄𑀓𑀸𑀬𑀢𑀦𑁆𑀢𑀺 𑀘 𑀮𑁄𑀓𑀲𑁆𑀲𑁂𑀯 𑀆𑀬𑀢𑀁, 𑀩𑀸𑀮𑀧𑀼𑀣𑀼𑀚𑁆𑀚𑀦𑀮𑁄𑀓𑀲𑁆𑀲 𑀆𑀬𑀢𑀁, 𑀫𑀳𑀦𑁆𑀢𑀁 𑀕𑀫𑁆𑀪𑀻𑀭𑀦𑁆𑀢𑀺 𑀉𑀧𑀥𑀸𑀭𑀺𑀢𑀩𑁆𑀩𑀁 𑀧𑀭𑀺𑀢𑁆𑀢𑀁 𑀪𑀸𑀯𑀁 𑀤𑀺𑀝𑁆𑀞𑀺𑀕𑀢𑀁. 𑀏𑀓𑀢𑁆𑀢𑀦𑁆𑀢𑀺 𑀏𑀓𑀲𑀪𑀸𑀯𑀁, 𑀦𑀺𑀘𑁆𑀘𑀲𑀪𑀸𑀯𑀫𑁂𑀯𑀸𑀢𑀺 𑀧𑀼𑀘𑁆𑀙𑀢𑀺. 𑀧𑀼𑀣𑀼𑀢𑁆𑀢𑀦𑁆𑀢𑀺 𑀧𑀼𑀭𑀺𑀫𑀲𑀪𑀸𑀯𑁂𑀦 𑀦𑀸𑀦𑀸𑀲𑀪𑀸𑀯𑀁, 𑀤𑁂𑀯𑀫𑀦𑀼𑀲𑁆𑀲𑀸𑀤𑀺𑀪𑀸𑀯𑁂𑀦 𑀧𑀞𑀫𑀁 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀦 𑀳𑁄𑀢𑀻𑀢𑀺 𑀉𑀘𑁆𑀙𑁂𑀤𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀢𑀺. 𑀏𑀯𑀫𑁂𑀢𑁆𑀣 ‘‘𑀲𑀩𑁆𑀩𑀫𑀢𑁆𑀣𑀺, 𑀲𑀩𑁆𑀩𑀫𑁂𑀓𑀢𑁆𑀢’’𑀦𑁆𑀢𑀺 𑀇𑀫𑀸 𑀤𑁆𑀯𑁂𑀧𑀺 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑁄, ‘‘𑀲𑀩𑁆𑀩𑀁 𑀦𑀢𑁆𑀣𑀺, 𑀲𑀩𑁆𑀩𑀁 𑀧𑀼𑀣𑀼𑀢𑁆𑀢’’𑀦𑁆𑀢𑀺 𑀇𑀫𑀸 𑀤𑁆𑀯𑁂 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀝𑁆𑀞𑀫𑀁.

𑁯. 𑀅𑀭𑀺𑀬𑀲𑀸𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁯. 𑀦𑀯𑀫𑁂 𑀓𑀺𑀁 𑀦𑀼 𑀔𑁄𑀢𑀺 𑀲𑀁𑀲𑀬𑀼𑀧𑁆𑀧𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀁. 𑀲𑀫𑀼𑀤𑀬𑀢𑀻𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀦𑀯𑀫𑀁.

𑁧𑁦. 𑀤𑀼𑀢𑀺𑀬𑀅𑀭𑀺𑀬𑀲𑀸𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦. 𑀤𑀲𑀫𑁂 𑀤𑁆𑀯𑁂𑀧𑀺 𑀦𑀬𑀸 𑀏𑀓𑀢𑁄 𑀯𑀼𑀢𑁆𑀢𑀸. 𑀇𑀤𑀫𑁂𑀯 𑀧𑀼𑀭𑀺𑀫𑁂𑀦 𑀦𑀸𑀦𑀢𑁆𑀢𑀁, 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯𑀸𑀢𑀺. 𑀤𑀲𑀫𑀁.

𑀕𑀳𑀧𑀢𑀺𑀯𑀕𑁆𑀕𑁄 𑀧𑀜𑁆𑀘𑀫𑁄.

𑁬. 𑀤𑀼𑀓𑁆𑀔𑀯𑀕𑁆𑀕𑁄

𑁧. 𑀧𑀭𑀺𑀯𑀻𑀫𑀁𑀲𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧. 𑀤𑀼𑀓𑁆𑀔𑀯𑀕𑁆𑀕𑀲𑁆𑀲 𑀧𑀞𑀫𑁂 𑀧𑀭𑀺𑀯𑀻𑀫𑀁𑀲𑀫𑀸𑀦𑁄𑀢𑀺 𑀉𑀧𑀧𑀭𑀺𑀓𑁆𑀔𑀫𑀸𑀦𑁄. 𑀚𑀭𑀸𑀫𑀭𑀡𑀦𑁆𑀢𑀺 𑀓𑀲𑁆𑀫𑀸 𑀚𑀭𑀸𑀫𑀭𑀡𑀁 𑀏𑀓𑀫𑁂𑀯 ‘‘𑀅𑀦𑁂𑀓𑀯𑀺𑀥𑀁 𑀦𑀸𑀦𑀧𑁆𑀧𑀓𑀸𑀭𑀓’’𑀦𑁆𑀢𑀺 𑀯𑀢𑁆𑀯𑀸 𑀕𑀳𑀺𑀢𑀦𑁆𑀢𑀺 𑀘𑁂? 𑀢𑀲𑁆𑀫𑀺𑀁 𑀕𑀳𑀺𑀢𑁂 𑀲𑀩𑁆𑀩𑀤𑀼𑀓𑁆𑀔𑀲𑁆𑀲 𑀕𑀳𑀺𑀢𑀢𑁆𑀢𑀸. 𑀬𑀣𑀸 𑀳𑀺 𑀘𑀽𑀴𑀸𑀬 𑀕𑀳𑀺𑀢𑁂 𑀧𑀼𑀭𑀺𑀲𑁂 𑀲𑁄 𑀧𑀼𑀭𑀺𑀲𑁄 𑀕𑀳𑀺𑀢𑁄𑀯 𑀳𑁄𑀢𑀺, 𑀏𑀯𑀁 𑀚𑀭𑀸𑀫𑀭𑀡𑁂 𑀕𑀳𑀺𑀢𑁂 𑀲𑀩𑁆𑀩𑀤𑀼𑀓𑁆𑀔𑀁 𑀕𑀳𑀺𑀢𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀸 ‘‘𑀬𑀁 𑀔𑁄 𑀇𑀤𑀁 𑀅𑀦𑁂𑀓𑀯𑀺𑀥𑀁 𑀦𑀸𑀦𑀧𑁆𑀧𑀓𑀸𑀭𑀓𑀁 𑀤𑀼𑀓𑁆𑀔𑀁 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀦𑁆𑀳𑀢𑁆𑀯𑀸 𑀞𑀺𑀢𑀁 𑀧𑀼𑀭𑀺𑀲𑀁 𑀯𑀺𑀬 𑀲𑀩𑁆𑀩𑀤𑀼𑀓𑁆𑀔𑀁 𑀤𑀲𑁆𑀲𑁂𑀢𑁆𑀯𑀸 𑀢𑀁 𑀘𑀽𑀴𑀸𑀬 𑀕𑀡𑁆𑀳𑀦𑁆𑀢𑁄 𑀯𑀺𑀬 𑀚𑀭𑀸𑀫𑀭𑀡𑀁 𑀕𑀡𑁆𑀳𑀺.

𑀚𑀭𑀸𑀫𑀭𑀡𑀦𑀺𑀭𑁄𑀥𑀲𑀸𑀭𑀼𑀧𑁆𑀧𑀕𑀸𑀫𑀺𑀦𑀻𑀢𑀺 𑀚𑀭𑀸𑀫𑀭𑀡𑀦𑀺𑀭𑁄𑀥𑀲𑁆𑀲 𑀲𑀸𑀭𑀼𑀧𑁆𑀧𑀪𑀸𑀯𑁂𑀦 𑀦𑀺𑀓𑁆𑀓𑀺𑀮𑁂𑀲𑀢𑀸𑀬 𑀧𑀭𑀺𑀲𑀼𑀤𑁆𑀥𑀢𑀸𑀬 𑀲𑀤𑀺𑀲𑀸𑀯 𑀳𑀼𑀢𑁆𑀯𑀸 𑀕𑀸𑀫𑀺𑀦𑀻𑀢𑀺 𑀅𑀢𑁆𑀣𑁄. 𑀢𑀣𑀸 𑀧𑀝𑀺𑀧𑀦𑁆𑀦𑁄 𑀘 𑀳𑁄𑀢𑀻𑀢𑀺 𑀬𑀣𑀸 𑀢𑀁 𑀧𑀝𑀺𑀧𑀦𑁆𑀦𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀅𑀦𑀼𑀥𑀫𑁆𑀫𑀘𑀸𑀭𑀻𑀢𑀺 𑀦𑀺𑀩𑁆𑀩𑀸𑀦𑀥𑀫𑁆𑀫𑀁 𑀅𑀦𑀼𑀕𑀢𑀁 𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀁 𑀘𑀭𑀢𑀺, 𑀧𑀽𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀓𑁆𑀔𑀬𑀸𑀬 𑀧𑀝𑀺𑀧𑀦𑁆𑀦𑁄𑀢𑀺 𑀲𑀻𑀮𑀁 𑀆𑀤𑀺𑀁 𑀓𑀢𑁆𑀯𑀸 𑀚𑀭𑀸𑀫𑀭𑀡𑀤𑀼𑀓𑁆𑀔𑀲𑁆𑀲 𑀦𑀺𑀭𑁄𑀥𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑁄. 𑀲𑀗𑁆𑀔𑀸𑀭𑀦𑀺𑀭𑁄𑀥𑀸𑀬𑀸𑀢𑀺 𑀲𑀗𑁆𑀔𑀸𑀭𑀤𑀼𑀓𑁆𑀔𑀲𑁆𑀲 𑀦𑀺𑀭𑁄𑀥𑀢𑁆𑀣𑀸𑀬. 𑀏𑀢𑁆𑀢𑀸𑀯𑀢𑀸 𑀬𑀸𑀯 𑀅𑀭𑀳𑀢𑁆𑀢𑀸 𑀤𑁂𑀲𑀦𑀸 𑀓𑀣𑀺𑀢𑀸.

𑀇𑀤𑀸𑀦𑀺 𑀅𑀭𑀳𑀢𑁆𑀢𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀁 𑀲𑀢𑀢𑀯𑀺𑀳𑀸𑀭𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀤𑁂𑀲𑀦𑀸 𑀦𑀺𑀯𑀢𑁆𑀢𑁂𑀢𑀩𑁆𑀩𑀸 𑀲𑀺𑀬𑀸, 𑀢𑀣𑀸 𑀅𑀓𑀢𑁆𑀯𑀸 𑀅𑀯𑀺𑀚𑁆𑀚𑀸𑀕𑀢𑁄𑀢𑀺 𑀇𑀤𑀁 𑀓𑀲𑁆𑀫𑀸 𑀕𑀡𑁆𑀳𑀸𑀢𑀻𑀢𑀺? 𑀔𑀻𑀡𑀸𑀲𑀯𑀲𑁆𑀲 𑀲𑀫𑀢𑀺𑀓𑁆𑀓𑀦𑁆𑀢𑀯𑀝𑁆𑀝𑀤𑀼𑀓𑁆𑀔𑀤𑀲𑁆𑀲𑀦𑀢𑁆𑀣𑀁. 𑀅𑀧𑀺𑀘 𑀧𑀼𑀦 𑀯𑀝𑁆𑀝𑀁 𑀆𑀭𑀪𑀺𑀢𑁆𑀯𑀸 𑀯𑀺𑀯𑀝𑁆𑀝𑁂 𑀓𑀣𑀺𑀬𑀫𑀸𑀦𑁂 𑀩𑀼𑀚𑁆𑀛𑀦𑀓𑀲𑀢𑁆𑀢𑁄 𑀘𑁂𑀢𑁆𑀣 𑀅𑀢𑁆𑀣𑀺, 𑀢𑀲𑁆𑀲 𑀅𑀚𑁆𑀛𑀸𑀲𑀬𑀯𑀲𑁂𑀦𑀸𑀧𑀺 𑀇𑀤𑀁 𑀕𑀡𑁆𑀳𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀕𑀢𑁄𑀢𑀺 𑀅𑀯𑀺𑀚𑁆𑀚𑀸𑀬 𑀕𑀢𑁄 𑀉𑀧𑀕𑀢𑁄 𑀲𑀫𑀦𑁆𑀦𑀸𑀕𑀢𑁄. 𑀧𑀼𑀭𑀺𑀲𑀧𑀼𑀕𑁆𑀕𑀮𑁄𑀢𑀺 𑀧𑀼𑀭𑀺𑀲𑁄𑀬𑁂𑀯 𑀧𑀼𑀕𑁆𑀕𑀮𑁄. 𑀉𑀪𑀬𑁂𑀦𑀸𑀧𑀺 𑀲𑀫𑁆𑀫𑀼𑀢𑀺𑀓𑀣𑀁 𑀓𑀣𑁂𑀢𑀺. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀲𑀫𑁆𑀫𑀼𑀢𑀺𑀓𑀣𑀸 𑀧𑀭𑀫𑀢𑁆𑀣𑀓𑀣𑀸𑀢𑀺 𑀤𑁆𑀯𑁂 𑀓𑀣𑀸 𑀳𑁄𑀦𑁆𑀢𑀺. 𑀢𑀢𑁆𑀣 ‘‘𑀲𑀢𑁆𑀢𑁄 𑀦𑀭𑁄 𑀧𑀼𑀭𑀺𑀲𑁄 𑀧𑀼𑀕𑁆𑀕𑀮𑁄 𑀢𑀺𑀲𑁆𑀲𑁄 𑀦𑀸𑀕𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀲𑀫𑁆𑀫𑀼𑀢𑀺𑀓𑀣𑀸 𑀦𑀸𑀫. ‘‘𑀔𑀦𑁆𑀥𑀸 𑀥𑀸𑀢𑀼𑀬𑁄 𑀆𑀬𑀢𑀦𑀸𑀦𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀧𑀭𑀫𑀢𑁆𑀣𑀓𑀣𑀸 𑀦𑀸𑀫. 𑀧𑀭𑀫𑀢𑁆𑀣𑀁 𑀓𑀣𑁂𑀦𑁆𑀢𑀸𑀧𑀺 𑀲𑀫𑁆𑀫𑀼𑀢𑀺𑀁 𑀅𑀫𑀼𑀜𑁆𑀘𑀺𑀢𑁆𑀯𑀸 𑀓𑀣𑁂𑀦𑁆𑀢𑀺. 𑀢𑁂 𑀲𑀫𑁆𑀫𑀼𑀢𑀺𑀁 𑀓𑀣𑁂𑀦𑁆𑀢𑀸𑀧𑀺 𑀧𑀭𑀫𑀢𑁆𑀣𑀁 𑀓𑀣𑁂𑀦𑁆𑀢𑀸𑀧𑀺 𑀲𑀘𑁆𑀘𑀫𑁂𑀯 𑀓𑀣𑁂𑀦𑁆𑀢𑀺. 𑀢𑁂𑀦𑁂𑀯 𑀯𑀼𑀢𑁆𑀢𑀁 𑁋

‘‘𑀤𑀼𑀯𑁂 𑀲𑀘𑁆𑀘𑀸𑀦𑀺 𑀅𑀓𑁆𑀔𑀸𑀲𑀺, 𑀲𑀫𑁆𑀩𑀼𑀤𑁆𑀥𑁄 𑀯𑀤𑀢𑀁 𑀯𑀭𑁄;

𑀲𑀫𑁆𑀫𑀼𑀢𑀺𑀁 𑀧𑀭𑀫𑀢𑁆𑀣𑀜𑁆𑀘, 𑀢𑀢𑀺𑀬𑀁 𑀦𑀽𑀧𑀮𑀩𑁆𑀪𑀢𑀺;

𑀲𑀗𑁆𑀓𑁂𑀢𑀯𑀘𑀦𑀁 𑀲𑀘𑁆𑀘𑀁, 𑀮𑁄𑀓𑀲𑀫𑁆𑀫𑀼𑀢𑀺𑀓𑀸𑀭𑀡𑀁;

𑀧𑀭𑀫𑀢𑁆𑀣𑀯𑀘𑀦𑀁 𑀲𑀘𑁆𑀘𑀁, 𑀥𑀫𑁆𑀫𑀸𑀦𑀁 𑀪𑀽𑀢𑀮𑀓𑁆𑀔𑀡’’𑀦𑁆𑀢𑀺.

𑀧𑀼𑀜𑁆𑀜𑀁 𑀘𑁂 𑀲𑀗𑁆𑀔𑀸𑀭𑀦𑁆𑀢𑀺 𑀢𑁂𑀭𑀲𑀘𑁂𑀢𑀦𑀸𑀪𑁂𑀤𑀁 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁. 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀓𑀭𑁄𑀢𑀺. 𑀧𑀼𑀜𑁆𑀜𑀽𑀧𑀕𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀦𑁆𑀢𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑀁 𑀓𑀫𑁆𑀫𑀧𑀼𑀜𑁆𑀜𑁂𑀦 𑀉𑀧𑀕𑀢𑀁 𑀲𑀫𑁆𑀧𑀬𑀼𑀢𑁆𑀢𑀁 𑀳𑁄𑀢𑀺, 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁 𑀯𑀺𑀧𑀸𑀓𑀧𑀼𑀜𑁆𑀜𑁂𑀦. 𑀅𑀧𑀼𑀜𑁆𑀜𑀁 𑀘𑁂 𑀲𑀗𑁆𑀔𑀸𑀭𑀦𑁆𑀢𑀺 𑀤𑁆𑀯𑀸𑀤𑀲𑀘𑁂𑀢𑀦𑀸𑀪𑁂𑀤𑀁 𑀅𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑁄𑀢𑀺. 𑀆𑀦𑁂𑀜𑁆𑀚𑀁 𑀘𑁂 𑀲𑀗𑁆𑀔𑀸𑀭𑀦𑁆𑀢𑀺 𑀘𑀢𑀼𑀘𑁂𑀢𑀦𑀸𑀪𑁂𑀤𑀁 𑀆𑀦𑁂𑀜𑁆𑀚𑀸𑀪𑀺𑀲𑀗𑁆𑀔𑀸𑀭𑀁. 𑀆𑀦𑁂𑀜𑁆𑀚𑀽𑀧𑀕𑀁 𑀳𑁄𑀢𑀺 𑀯𑀺𑀜𑁆𑀜𑀸𑀡𑀦𑁆𑀢𑀺 𑀓𑀫𑁆𑀫𑀸𑀦𑁂𑀜𑁆𑀚𑁂𑀦 𑀓𑀫𑁆𑀫𑀯𑀺𑀜𑁆𑀜𑀸𑀡𑀁, 𑀯𑀺𑀧𑀸𑀓𑀸𑀦𑁂𑀜𑁆𑀚𑁂𑀦 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀁 𑀉𑀧𑀕𑀢𑀁 𑀳𑁄𑀢𑀺. 𑀏𑀢𑁆𑀣 𑀘 𑀢𑀺𑀯𑀺𑀥𑀲𑁆𑀲 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀕𑀳𑀺𑀢𑀢𑁆𑀢𑀸 𑀤𑁆𑀯𑀸𑀤𑀲𑀧𑀤𑀺𑀓𑁄 𑀧𑀘𑁆𑀘𑀬𑀸𑀓𑀸𑀭𑁄 𑀕𑀳𑀺𑀢𑁄𑀯 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀯𑀝𑁆𑀝𑀁 𑀤𑀲𑁆𑀲𑀺𑀢𑀁.

𑀇𑀤𑀸𑀦𑀺 𑀯𑀺𑀯𑀝𑁆𑀝𑀁 𑀤𑀲𑁆𑀲𑁂𑀦𑁆𑀢𑁄 𑀬𑀢𑁄 𑀔𑁄, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀯𑀺𑀚𑁆𑀚𑀸𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀅𑀜𑁆𑀜𑀸𑀡𑀁. 𑀯𑀺𑀚𑁆𑀚𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁. 𑀏𑀢𑁆𑀣 𑀘 𑀧𑀞𑀫𑀫𑁂𑀯 𑀅𑀯𑀺𑀚𑁆𑀚𑀸𑀬 𑀧𑀳𑀻𑀦𑀸𑀬 𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸 𑀧𑀦 𑀘𑀢𑀼𑀭𑀗𑁆𑀕𑁂𑀧𑀺 𑀢𑀫𑁂 𑀭𑀢𑁆𑀢𑀺𑀁 𑀧𑀤𑀻𑀧𑀼𑀚𑁆𑀚𑀮𑁂𑀦 𑀅𑀦𑁆𑀥𑀓𑀸𑀭𑁄 𑀧𑀳𑀻𑀬𑀢𑀺, 𑀏𑀯𑀁 𑀯𑀺𑀚𑁆𑀚𑀼𑀧𑁆𑀧𑀸𑀤𑀸 𑀅𑀯𑀺𑀚𑁆𑀚𑀸𑀬 𑀧𑀳𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀦 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀻𑀢𑀺 𑀮𑁄𑀓𑁂 𑀓𑀺𑀜𑁆𑀘𑀺 𑀥𑀫𑁆𑀫𑀁 𑀦 𑀕𑀡𑁆𑀳𑀸𑀢𑀺 𑀦 𑀧𑀭𑀸𑀫𑀲𑀢𑀺. 𑀅𑀦𑀼𑀧𑀸𑀤𑀺𑀬𑀁 𑀦 𑀧𑀭𑀺𑀢𑀲𑁆𑀲𑀢𑀻𑀢𑀺 𑀅𑀦𑀼𑀧𑀸𑀤𑀺𑀬𑀦𑁆𑀢𑁄 𑀅𑀕𑀡𑁆𑀳𑀦𑁆𑀢𑁄 𑀦𑁂𑀯 𑀢𑀡𑁆𑀳𑀸𑀧𑀭𑀺𑀢𑀲𑁆𑀲𑀦𑀸𑀬, 𑀦 𑀪𑀬𑀧𑀭𑀺𑀢𑀲𑁆𑀲𑀦𑀸𑀬 𑀧𑀭𑀺𑀢𑀲𑁆𑀲𑀢𑀺, 𑀦 𑀢𑀡𑁆𑀳𑀸𑀬𑀢𑀺 𑀦 𑀪𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀢𑁆𑀢𑀜𑁆𑀜𑁂𑀯𑀸𑀢𑀺 𑀲𑀬𑀫𑁂𑀯 𑀅𑀢𑁆𑀢𑀦𑀸𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀦 𑀅𑀜𑁆𑀜𑀲𑁆𑀲 𑀆𑀦𑀼𑀪𑀸𑀯𑁂𑀦.

𑀲𑁄 𑀲𑀼𑀔𑀁 𑀘𑁂 𑀯𑁂𑀤𑀦𑀦𑁆𑀢𑀺 𑀇𑀤𑀁 𑀓𑀲𑁆𑀫𑀸 𑀆𑀭𑀪𑀺? 𑀔𑀻𑀡𑀸𑀲𑀯𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀤𑀲𑁆𑀲𑁂𑀢𑁆𑀯𑀸 𑀲𑀢𑀢𑀯𑀺𑀳𑀸𑀭𑀁 𑀤𑀲𑁆𑀲𑁂𑀢𑀼𑀁 𑀆𑀭𑀪𑀺. 𑀅𑀦𑀚𑁆𑀛𑁄𑀲𑀺𑀢𑀸𑀢𑀺 𑀢𑀡𑁆𑀳𑀸𑀬 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀅𑀕𑀳𑀺𑀢𑀸. 𑀅𑀣 𑀤𑀼𑀓𑁆𑀔𑀯𑁂𑀤𑀦𑀸 𑀓𑀲𑁆𑀫𑀸 𑀯𑀼𑀢𑁆𑀢𑀸, 𑀓𑀺𑀁 𑀢𑀫𑁆𑀧𑀺 𑀅𑀪𑀺𑀦𑀦𑁆𑀤𑀦𑁆𑀢𑁄 𑀅𑀢𑁆𑀣𑀻𑀢𑀺? 𑀆𑀫 𑀅𑀢𑁆𑀣𑀺. 𑀲𑀼𑀔𑀁 𑀅𑀪𑀺𑀦𑀦𑁆𑀤𑀦𑁆𑀢𑁄𑀬𑁂𑀯 𑀳𑀺 𑀤𑀼𑀓𑁆𑀔𑀁 𑀅𑀪𑀺𑀦𑀦𑁆𑀤𑀢𑀺 𑀦𑀸𑀫 𑀤𑀼𑀓𑁆𑀔𑀁 𑀧𑀢𑁆𑀯𑀸 𑀲𑀼𑀔𑀁 𑀧𑀢𑁆𑀣𑀦𑀢𑁄 𑀲𑀼𑀔𑀲𑁆𑀲 𑀘 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑁄𑀢𑀺. 𑀓𑀸𑀬𑀧𑀭𑀺𑀬𑀦𑁆𑀢𑀺𑀓𑀦𑁆𑀢𑀺 𑀓𑀸𑀬𑀧𑀭𑀺𑀘𑁆𑀙𑀺𑀦𑁆𑀦𑀁, 𑀬𑀸𑀯 𑀧𑀜𑁆𑀘𑀤𑁆𑀯𑀸𑀭𑀓𑀸𑀬𑁄 𑀧𑀯𑀢𑁆𑀢𑀢𑀺, 𑀢𑀸𑀯 𑀧𑀯𑀢𑁆𑀢𑀁 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑁂𑀤𑀦𑀦𑁆𑀢𑀺 𑀅𑀢𑁆𑀣𑁄. 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓𑀦𑁆𑀢𑀺 𑀚𑀻𑀯𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑀁. 𑀬𑀸𑀯 𑀚𑀻𑀯𑀺𑀢𑀁 𑀧𑀯𑀢𑁆𑀢𑀢𑀺, 𑀢𑀸𑀯 𑀧𑀯𑀢𑁆𑀢𑀁 𑀫𑀦𑁄𑀤𑁆𑀯𑀸𑀭𑀺𑀓𑀯𑁂𑀤𑀦𑀦𑁆𑀢𑀺 𑀅𑀢𑁆𑀣𑁄.

𑀢𑀢𑁆𑀣 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑁂𑀤𑀦𑀸 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀞𑀫𑀁 𑀦𑀺𑀭𑀼𑀚𑁆𑀛𑀢𑀺, 𑀫𑀦𑁄𑀤𑁆𑀯𑀸𑀭𑀺𑀓𑀯𑁂𑀤𑀦𑀸 𑀧𑀞𑀫𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀦𑀺𑀭𑀼𑀚𑁆𑀛𑀢𑀺. 𑀲𑀸 𑀳𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀯𑀢𑁆𑀣𑀼𑀭𑀽𑀧𑀲𑁆𑀫𑀺𑀁𑀬𑁂𑀯 𑀧𑀢𑀺𑀝𑁆𑀞𑀸𑀢𑀺. 𑀧𑀜𑁆𑀘𑀤𑁆𑀯𑀸𑀭𑀺𑀓𑀸 𑀧𑀯𑀢𑁆𑀢𑁂 𑀧𑀜𑁆𑀘𑀤𑁆𑀯𑀸𑀭𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀸 𑀧𑀞𑀫𑀯𑀬𑁂 𑀯𑀻𑀲𑀢𑀺𑀯𑀲𑁆𑀲𑀓𑀸𑀮𑁂 𑀭𑀚𑁆𑀚𑀦𑀤𑀼𑀲𑁆𑀲𑀦𑀫𑀼𑀬𑁆𑀳𑀦𑀯𑀲𑁂𑀦 𑀅𑀥𑀺𑀫𑀢𑁆𑀢𑀸 𑀩𑀮𑀯𑀢𑀻 𑀳𑁄𑀢𑀺, 𑀧𑀡𑁆𑀡𑀸𑀲𑀯𑀲𑁆𑀲𑀓𑀸𑀮𑁂 𑀞𑀺𑀢𑀸 𑀳𑁄𑀢𑀺, 𑀲𑀝𑁆𑀞𑀺𑀯𑀲𑁆𑀲𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀭𑀺𑀳𑀸𑀬𑀫𑀸𑀦𑀸 𑀅𑀲𑀻𑀢𑀺𑀦𑀯𑀼𑀢𑀺𑀯𑀲𑁆𑀲𑀓𑀸𑀮𑁂 𑀫𑀦𑁆𑀤𑀸 𑀳𑁄𑀢𑀺. 𑀢𑀤𑀸 𑀳𑀺 𑀲𑀢𑁆𑀢𑀸 ‘‘𑀘𑀺𑀭𑀭𑀢𑁆𑀢𑀁 𑀏𑀓𑀢𑁄 𑀦𑀺𑀲𑀻𑀤𑀺𑀫𑁆𑀳𑀸 𑀦𑀺𑀧𑀚𑁆𑀚𑀺𑀫𑁆𑀳𑀸’’𑀢𑀺 𑀯𑀤𑀦𑁆𑀢𑁂𑀧𑀺 ‘‘𑀦 𑀲𑀜𑁆𑀚𑀸𑀦𑀸𑀫𑀸’’𑀢𑀺 𑀯𑀤𑀦𑁆𑀢𑀺. 𑀅𑀥𑀺𑀫𑀢𑁆𑀢𑀸𑀦𑀺𑀧𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀸𑀦𑀺 ‘‘𑀦 𑀧𑀲𑁆𑀲𑀸𑀫 𑀦 𑀲𑀼𑀡𑀸𑀫’’, ‘‘𑀲𑀼𑀕𑀦𑁆𑀥𑀁 𑀤𑀼𑀕𑁆𑀕𑀦𑁆𑀥𑀁 𑀯𑀸 𑀲𑀸𑀤𑀼𑀁 𑀅𑀲𑀸𑀤𑀼𑀁 𑀯𑀸 𑀣𑀤𑁆𑀥𑀁 𑀫𑀼𑀤𑀼𑀓𑀦𑁆𑀢𑀺 𑀯𑀸 𑀦 𑀚𑀸𑀦𑀸𑀫𑀸’’𑀢𑀺 𑀯𑀤𑀦𑁆𑀢𑀺. 𑀇𑀢𑀺 𑀦𑁂𑀲𑀁 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑁂𑀤𑀦𑀸 𑀪𑀕𑁆𑀕𑀸 𑀳𑁄𑀢𑀺, 𑀫𑀦𑁄𑀤𑁆𑀯𑀸𑀭𑀺𑀓𑀸𑀯 𑀧𑀯𑀢𑁆𑀢𑀢𑀺. 𑀲𑀸𑀧𑀺 𑀅𑀦𑀼𑀧𑀼𑀩𑁆𑀩𑁂𑀦 𑀧𑀭𑀺𑀳𑀸𑀬𑀫𑀸𑀦𑀸 𑀫𑀭𑀡𑀲𑀫𑀬𑁂 𑀳𑀤𑀬𑀓𑁄𑀝𑀺𑀁𑀬𑁂𑀯 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑀺. 𑀬𑀸𑀯 𑀧𑀦𑁂𑀲𑀸 𑀧𑀯𑀢𑁆𑀢𑀢𑀺, 𑀢𑀸𑀯 𑀲𑀢𑁆𑀢𑁄 𑀚𑀻𑀯𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀬𑀤𑀸 𑀦𑀧𑁆𑀧𑀯𑀢𑁆𑀢𑀢𑀺, 𑀢𑀤𑀸 𑀫𑀢𑁄 𑀦𑀺𑀭𑀼𑀤𑁆𑀥𑁄𑀢𑀺 𑀯𑀼𑀘𑁆𑀘𑀢𑀺.

𑀲𑁆𑀯𑀸𑀬𑀫𑀢𑁆𑀣𑁄 𑀯𑀸𑀧𑀺𑀬𑀸 𑀤𑀻𑀧𑁂𑀢𑀩𑁆𑀩𑁄 𑁋

𑀬𑀣𑀸 𑀳𑀺 𑀧𑀼𑀭𑀺𑀲𑁄 𑀧𑀜𑁆𑀘𑀉𑀤𑀓𑀫𑀕𑁆𑀕𑀲𑀫𑁆𑀧𑀦𑁆𑀦𑀁 𑀯𑀸𑀧𑀺𑀁 𑀓𑀭𑁂𑀬𑁆𑀬, 𑀧𑀞𑀫𑀁 𑀤𑁂𑀯𑁂 𑀯𑀼𑀝𑁆𑀞𑁂 𑀧𑀜𑁆𑀘𑀳𑀺 𑀉𑀤𑀓𑀫𑀕𑁆𑀕𑁂𑀳𑀺 𑀉𑀤𑀓𑀁 𑀧𑀯𑀺𑀲𑀺𑀢𑁆𑀯𑀸 𑀅𑀦𑁆𑀢𑁄𑀯𑀸𑀧𑀺𑀬𑀁 𑀆𑀯𑀸𑀝𑁂 𑀧𑀽𑀭𑁂𑀬𑁆𑀬, 𑀧𑀼𑀦𑀧𑁆𑀧𑀼𑀦𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀉𑀤𑀓𑀫𑀕𑁆𑀕𑁂 𑀧𑀽𑀭𑁂𑀢𑁆𑀯𑀸 𑀕𑀸𑀯𑀼𑀢𑀟𑁆𑀠𑀬𑁄𑀚𑀦𑀫𑀢𑁆𑀢𑀁 𑀑𑀢𑁆𑀣𑀭𑀺𑀢𑁆𑀯𑀸 𑀉𑀤𑀓𑀁 𑀢𑀺𑀝𑁆𑀞𑁂𑀬𑁆𑀬 𑀢𑀢𑁄 𑀢𑀢𑁄 𑀯𑀺𑀲𑁆𑀲𑀦𑁆𑀤𑀫𑀸𑀦𑀁, 𑀅𑀣 𑀦𑀺𑀤𑁆𑀥𑀫𑀦𑀢𑀼𑀫𑁆𑀩𑁂 𑀯𑀺𑀯𑀭𑀺𑀢𑁆𑀯𑀸 𑀔𑁂𑀢𑁆𑀢𑁂𑀲𑀼 𑀓𑀫𑁆𑀫𑁂 𑀓𑀭𑀺𑀬𑀫𑀸𑀦𑁂 𑀉𑀤𑀓𑀁 𑀦𑀺𑀓𑁆𑀔𑀫𑀦𑁆𑀢𑀁, 𑀲𑀲𑁆𑀲𑀧𑀸𑀓𑀓𑀸𑀮𑁂 (𑀉𑀤𑀓𑀁 𑀦𑀺𑀓𑁆𑀔𑀫𑀦𑁆𑀢𑀁,) 𑀉𑀤𑀓𑀁 𑀧𑀭𑀺𑀳𑀻𑀦𑀁 ‘‘𑀫𑀘𑁆𑀙𑁂 𑀕𑀡𑁆𑀳𑀸𑀫𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑁂𑀬𑁆𑀬, 𑀢𑀢𑁄 𑀓𑀢𑀺𑀧𑀸𑀳𑁂𑀦 𑀆𑀯𑀸𑀝𑁂𑀲𑀼𑀬𑁂𑀯 𑀉𑀤𑀓𑀁 𑀲𑀡𑁆𑀞𑀳𑁂𑀬𑁆𑀬. 𑀬𑀸𑀯 𑀧𑀦 𑀢𑀁 𑀆𑀯𑀸𑀝𑁂𑀲𑀼 𑀳𑁄𑀢𑀺, 𑀢𑀸𑀯 ‘‘𑀫𑀳𑀸𑀯𑀸𑀧𑀺𑀬𑀁 𑀉𑀤𑀓𑀁 𑀅𑀢𑁆𑀣𑀻’’𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀬𑀤𑀸 𑀧𑀦 𑀢𑀢𑁆𑀣 𑀙𑀺𑀚𑁆𑀚𑀢𑀺, 𑀢𑀤𑀸 ‘‘𑀯𑀸𑀧𑀺𑀬𑀁 𑀉𑀤𑀓𑀁 𑀦𑀢𑁆𑀣𑀻’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁.

𑀧𑀞𑀫𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀧𑀜𑁆𑀘𑀳𑀺 𑀫𑀕𑁆𑀕𑁂𑀳𑀺 𑀉𑀤𑀓𑁂 𑀧𑀯𑀺𑀲𑀦𑁆𑀢𑁂 𑀆𑀯𑀸𑀝𑀸𑀦𑀁 𑀧𑀽𑀭𑀡𑀓𑀸𑀮𑁄 𑀯𑀺𑀬 𑀳𑀺 𑀧𑀞𑀫𑀫𑁂𑀯 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀫𑀦𑁄𑀤𑁆𑀯𑀸𑀭𑀺𑀓𑀯𑁂𑀤𑀦𑀸𑀬 𑀯𑀢𑁆𑀣𑀼𑀭𑀽𑀧𑁂 𑀧𑀢𑀺𑀝𑁆𑀞𑀺𑀢𑀓𑀸𑀮𑁄, 𑀧𑀼𑀦𑀧𑁆𑀧𑀼𑀦𑀁 𑀤𑁂𑀯𑁂 𑀯𑀲𑁆𑀲𑀦𑁆𑀢𑁂 𑀧𑀜𑁆𑀘𑀦𑁆𑀦𑀁 𑀫𑀕𑁆𑀕𑀸𑀦𑀁 𑀧𑀽𑀭𑀺𑀢𑀓𑀸𑀮𑁄 𑀯𑀺𑀬 𑀧𑀯𑀢𑁆𑀢𑁂 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑁂𑀤𑀦𑀸𑀬 𑀧𑀯𑀢𑁆𑀢𑀺𑀓𑀸𑀮𑁄, 𑀕𑀸𑀯𑀼𑀢𑀟𑁆𑀠𑀬𑁄𑀚𑀦𑀫𑀢𑁆𑀢𑀁 𑀅𑀚𑁆𑀛𑁄𑀢𑁆𑀣𑀭𑀡𑀁 𑀯𑀺𑀬 𑀧𑀞𑀫𑀯𑀬𑁂 𑀯𑀻𑀲𑀢𑀺𑀯𑀲𑁆𑀲𑀓𑀸𑀮𑁂 𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀢𑀲𑁆𑀲𑀸 𑀅𑀥𑀺𑀫𑀢𑁆𑀢𑀩𑀮𑀯𑀪𑀸𑀯𑁄, 𑀬𑀸𑀯 𑀯𑀸𑀧𑀺𑀢𑁄 𑀉𑀤𑀓𑀁 𑀦 𑀦𑀺𑀕𑁆𑀕𑀘𑁆𑀙𑀢𑀺, 𑀢𑀸𑀯 𑀧𑀽𑀭𑀸𑀬 𑀯𑀸𑀧𑀺𑀬𑀸 𑀞𑀺𑀢𑀓𑀸𑀮𑁄 𑀯𑀺𑀬 𑀧𑀜𑁆𑀜𑀸𑀲𑀯𑀲𑁆𑀲𑀓𑀸𑀮𑁂 𑀢𑀲𑁆𑀲𑀸 𑀞𑀺𑀢𑀓𑀸𑀮𑁄, 𑀦𑀺𑀤𑁆𑀥𑀫𑀦𑀢𑀼𑀫𑁆𑀩𑁂𑀲𑀼 𑀯𑀺𑀯𑀝𑁂𑀲𑀼 𑀓𑀫𑁆𑀫𑀦𑁆𑀢𑁂 𑀓𑀭𑀺𑀬𑀫𑀸𑀦𑁂 𑀉𑀤𑀓𑀲𑁆𑀲 𑀦𑀺𑀓𑁆𑀔𑀫𑀦𑀓𑀸𑀮𑁄 𑀯𑀺𑀬 𑀲𑀝𑁆𑀞𑀺𑀯𑀲𑁆𑀲𑀓𑀸𑀮𑀢𑁄 𑀧𑀝𑁆𑀞𑀸𑀬 𑀢𑀲𑁆𑀲𑀸 𑀧𑀭𑀺𑀳𑀸𑀦𑀺, 𑀉𑀤𑀓𑁂 𑀪𑀝𑁆𑀞𑁂 𑀉𑀤𑀓𑀫𑀕𑁆𑀕𑁂𑀲𑀼 𑀧𑀭𑀺𑀢𑁆𑀢𑁄𑀤𑀓𑀲𑁆𑀲 𑀞𑀺𑀢𑀓𑀸𑀮𑁄 𑀯𑀺𑀬 𑀅𑀲𑀻𑀢𑀺𑀦𑀯𑀼𑀢𑀺𑀯𑀲𑁆𑀲𑀓𑀸𑀮𑁂 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑁂𑀤𑀦𑀸𑀬 𑀫𑀦𑁆𑀤𑀓𑀸𑀮𑁄, 𑀆𑀯𑀸𑀝𑁂𑀲𑀼𑀬𑁂𑀯 𑀉𑀤𑀓𑀲𑁆𑀲 𑀧𑀢𑀺𑀝𑁆𑀞𑀸𑀦𑀓𑀸𑀮𑁄 𑀯𑀺𑀬 𑀳𑀤𑀬𑀯𑀢𑁆𑀣𑀼𑀓𑁄𑀝𑀺𑀁 𑀦𑀺𑀲𑁆𑀲𑀸𑀬 𑀫𑀦𑁄𑀤𑁆𑀯𑀸𑀭𑀺𑀓𑀯𑁂𑀤𑀦𑀸𑀬 𑀧𑀯𑀢𑁆𑀢𑀺𑀓𑀸𑀮𑁄, 𑀆𑀯𑀸𑀝𑁂𑀲𑀼 𑀧𑀭𑀺𑀢𑁆𑀢𑁂𑀧𑀺 𑀉𑀤𑀓𑁂 𑀲𑀢𑀺 ‘‘𑀯𑀸𑀧𑀺𑀬𑀁 𑀉𑀤𑀓𑀁 𑀅𑀢𑁆𑀣𑀻’’𑀢𑀺 𑀯𑀢𑁆𑀢𑀩𑁆𑀩𑀓𑀸𑀮𑁄 𑀯𑀺𑀬 𑀬𑀸𑀯 𑀲𑀸 𑀧𑀯𑀢𑁆𑀢𑀢𑀺, 𑀢𑀸𑀯 ‘‘𑀲𑀢𑁆𑀢𑁄 𑀚𑀻𑀯𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀧𑀦 𑀆𑀯𑀸𑀝𑁂𑀲𑀼 𑀉𑀤𑀓𑁂 𑀙𑀺𑀦𑁆𑀦𑁂 ‘‘𑀦𑀢𑁆𑀣𑀺 𑀯𑀸𑀧𑀺𑀬𑀁 𑀉𑀤𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀫𑀦𑁄𑀤𑁆𑀯𑀸𑀭𑀺𑀓𑀯𑁂𑀤𑀦𑀸𑀬 𑀅𑀧𑁆𑀧𑀯𑀢𑁆𑀢𑀫𑀸𑀦𑀸𑀬 ‘‘𑀲𑀢𑁆𑀢𑁄 𑀫𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀁 𑀯𑁂𑀤𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀺𑀓𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄’’𑀢𑀺.

𑀓𑀸𑀬𑀲𑁆𑀲 𑀪𑁂𑀤𑀸𑀢𑀺 𑀓𑀸𑀬𑀲𑁆𑀲 𑀪𑁂𑀤𑁂𑀦. 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸 𑀉𑀤𑁆𑀥𑀦𑁆𑀢𑀺 𑀚𑀻𑀯𑀺𑀢𑀓𑁆𑀔𑀬𑀢𑁄 𑀉𑀤𑁆𑀥𑀁. 𑀇𑀥𑁂𑀯𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀭𑀢𑁄 𑀅𑀕𑀦𑁆𑀢𑁆𑀯𑀸 𑀇𑀥𑁂𑀯. 𑀲𑀻𑀢𑀻𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀧𑀯𑀢𑁆𑀢𑀺𑀯𑀺𑀧𑁆𑀨𑀦𑁆𑀤𑀤𑀭𑀣𑀭𑀳𑀺𑀢𑀸𑀦𑀺 𑀲𑀻𑀢𑀸𑀦𑀺 𑀅𑀧𑁆𑀧𑀯𑀢𑁆𑀢𑀦𑀥𑀫𑁆𑀫𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺. 𑀲𑀭𑀻𑀭𑀸𑀦𑀻𑀢𑀺 𑀥𑀸𑀢𑀼𑀲𑀭𑀻𑀭𑀸𑀦𑀺. 𑀅𑀯𑀲𑀺𑀲𑁆𑀲𑀦𑁆𑀢𑀻𑀢𑀺 𑀅𑀯𑀲𑀺𑀝𑁆𑀞𑀸𑀦𑀺 𑀪𑀯𑀺𑀲𑁆𑀲𑀦𑁆𑀢𑀺.

𑀓𑀼𑀫𑁆𑀪𑀓𑀸𑀭𑀧𑀸𑀓𑀸𑀢𑀺 𑀓𑀼𑀫𑁆𑀪𑀓𑀸𑀭𑀲𑁆𑀲 𑀪𑀸𑀚𑀦𑀧𑀘𑀦𑀝𑁆𑀞𑀸𑀦𑀢𑁄. 𑀧𑀝𑀺𑀲𑀺𑀲𑁆𑀲𑁂𑀬𑁆𑀬𑀸𑀢𑀺 𑀞𑀧𑁂𑀬𑁆𑀬. 𑀓𑀧𑀮𑁆𑀮𑀸𑀦𑀻𑀢𑀺 𑀲𑀳 𑀫𑀼𑀔𑀯𑀝𑁆𑀝𑀺𑀬𑀸 𑀏𑀓𑀸𑀩𑀤𑁆𑀥𑀸𑀦𑀺 𑀓𑀼𑀫𑁆𑀪𑀓𑀧𑀮𑁆𑀮𑀸𑀦𑀺. 𑀅𑀯𑀲𑀺𑀲𑁆𑀲𑁂𑀬𑁆𑀬𑀼𑀦𑁆𑀢𑀺 𑀢𑀺𑀝𑁆𑀞𑁂𑀬𑁆𑀬𑀼𑀁. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀆𑀤𑀺𑀢𑁆𑀢𑀓𑀼𑀫𑁆𑀪𑀓𑀸𑀭𑀧𑀸𑀓𑁄 𑀯𑀺𑀬 𑀳𑀺 𑀢𑀬𑁄 𑀪𑀯𑀸 𑀤𑀝𑁆𑀞𑀩𑁆𑀩𑀸, 𑀓𑀼𑀫𑁆𑀪𑀓𑀸𑀭𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄, 𑀧𑀸𑀓𑀢𑁄 𑀓𑀼𑀫𑁆𑀪𑀓𑀸𑀭𑀪𑀸𑀚𑀦𑀸𑀦𑀁 𑀦𑀻𑀳𑀭𑀡𑀤𑀡𑁆𑀟𑀓𑁄 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁, 𑀲𑀫𑁄 𑀪𑀽𑀫𑀺𑀪𑀸𑀕𑁄 𑀯𑀺𑀬 𑀅𑀲𑀗𑁆𑀔𑀢𑀁 𑀦𑀺𑀩𑁆𑀩𑀸𑀦𑀢𑀮𑀁, 𑀤𑀡𑁆𑀟𑀓𑁂𑀦 𑀉𑀡𑁆𑀳𑀓𑀼𑀫𑁆𑀪𑀁 𑀆𑀓𑀟𑁆𑀠𑀺𑀢𑁆𑀯𑀸 𑀲𑀫𑁂 𑀪𑀽𑀫𑀺𑀪𑀸𑀕𑁂 𑀓𑀼𑀫𑁆𑀪𑀲𑁆𑀲 𑀞𑀧𑀺𑀢𑀓𑀸𑀮𑁄 𑀯𑀺𑀬 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 𑀭𑀽𑀧𑀲𑀢𑁆𑀢𑀓𑀁 𑀅𑀭𑀽𑀧𑀲𑀢𑁆𑀢𑀓𑀁 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑁂 𑀘 𑀧𑀕𑀼𑀡𑁂 𑀯𑀺𑀪𑀽𑀢𑁂 𑀉𑀧𑀝𑁆𑀞𑀳𑀫𑀸𑀦𑁂 𑀢𑀣𑀸𑀭𑀽𑀧𑀁 𑀉𑀢𑀼𑀲𑀧𑁆𑀧𑀸𑀬𑀸𑀤𑀺𑀁 𑀮𑀪𑀺𑀢𑁆𑀯𑀸 𑀏𑀓𑀸𑀲𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀘𑀢𑀽𑀳𑀺 𑀅𑀧𑀸𑀬𑁂𑀳𑀺 𑀅𑀢𑁆𑀢𑀪𑀸𑀯𑀁 𑀉𑀤𑁆𑀥𑀭𑀺𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀅𑀲𑀗𑁆𑀔𑀢𑁂 𑀦𑀺𑀩𑁆𑀩𑀸𑀦𑀢𑀮𑁂 𑀞𑀺𑀢𑀓𑀸𑀮𑁄 𑀤𑀝𑁆𑀞𑀩𑁆𑀩𑁄. 𑀔𑀻𑀡𑀸𑀲𑀯𑁄 𑀧𑀦 𑀉𑀡𑁆𑀳𑀓𑀼𑀫𑁆𑀪𑁄 𑀯𑀺𑀬 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀤𑀺𑀯𑀲𑁂𑀬𑁂𑀯 𑀦 𑀧𑀭𑀺𑀦𑀺𑀩𑁆𑀩𑀸𑀢𑀺, 𑀲𑀸𑀲𑀦𑀧𑁆𑀧𑀯𑁂𑀡𑀺𑀁 𑀧𑀦 𑀖𑀝𑀬𑀫𑀸𑀦𑁄 𑀧𑀡𑁆𑀡𑀸𑀲𑀲𑀝𑁆𑀞𑀺𑀯𑀲𑁆𑀲𑀸𑀦𑀺 𑀞𑀢𑁆𑀯𑀸 𑀘𑀭𑀺𑀫𑀓𑀘𑀺𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀉𑀧𑀸𑀤𑀺𑀡𑁆𑀡𑀓𑀓𑁆𑀔𑀦𑁆𑀥𑀪𑁂𑀤𑀸 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀢𑀺. 𑀅𑀣𑀲𑁆𑀲 𑀓𑀼𑀫𑁆𑀪𑀲𑁆𑀲 𑀯𑀺𑀬 𑀓𑀧𑀮𑁆𑀮𑀸𑀦𑀺 𑀅𑀦𑀼𑀧𑀸𑀤𑀺𑀡𑁆𑀡𑀓𑀲𑀭𑀻𑀭𑀸𑀦𑁂𑀯 𑀅𑀯𑀲𑀺𑀲𑁆𑀲𑀦𑁆𑀢𑀻𑀢𑀺. 𑀲𑀭𑀻𑀭𑀸𑀦𑀺 𑀅𑀯𑀲𑀺𑀲𑁆𑀲𑀦𑁆𑀢𑀻𑀢𑀺 𑀧𑀚𑀸𑀦𑀸𑀢𑀻𑀢𑀺 𑀇𑀤𑀁 𑀧𑀦 𑀔𑀻𑀡𑀸𑀲𑀯𑀲𑁆𑀲 𑀅𑀦𑀼𑀬𑁄𑀕𑀸𑀭𑁄𑀧𑀦𑀢𑁆𑀣𑀁 𑀯𑀼𑀢𑁆𑀢𑀁.

𑀯𑀺𑀜𑁆𑀜𑀸𑀡𑀁 𑀧𑀜𑁆𑀜𑀸𑀬𑁂𑀣𑀸𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀧𑀜𑁆𑀜𑀸𑀬𑁂𑀣. 𑀲𑀸𑀥𑀼 𑀲𑀸𑀥𑀽𑀢𑀺 𑀣𑁂𑀭𑀸𑀦𑀁 𑀩𑁆𑀬𑀸𑀓𑀭𑀡𑀁 𑀲𑀫𑁆𑀧𑀳𑀁𑀲𑀢𑀺. 𑀏𑀯𑀫𑁂𑀢𑀦𑁆𑀢𑀺 𑀬𑀤𑁂𑀢𑀁 𑀢𑀺𑀯𑀺𑀥𑁂 𑀅𑀪𑀺𑀲𑀗𑁆𑀔𑀸𑀭𑁂 𑀅𑀲𑀢𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀲𑁆𑀲 𑀅𑀧𑁆𑀧𑀜𑁆𑀜𑀸𑀡𑀦𑁆𑀢𑀺𑀆𑀤𑀺, 𑀏𑀯𑀫𑁂𑀯 𑀏𑀢𑀁. 𑀅𑀥𑀺𑀫𑀼𑀘𑁆𑀘𑀣𑀸𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀲𑀗𑁆𑀔𑀸𑀢𑀁 𑀅𑀥𑀺𑀫𑁄𑀓𑁆𑀔𑀁 𑀧𑀝𑀺𑀮𑀪𑀣. 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸𑀢𑀺 𑀅𑀬𑀫𑁂𑀯 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑁄 𑀅𑀬𑀁 𑀧𑀭𑀺𑀘𑁆𑀙𑁂𑀤𑁄, 𑀬𑀤𑀺𑀤𑀁 𑀦𑀺𑀩𑁆𑀩𑀸𑀦𑀦𑁆𑀢𑀺. 𑀧𑀞𑀫𑀁.

𑁨. 𑀉𑀧𑀸𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨. 𑀤𑀼𑀢𑀺𑀬𑁂 𑀉𑀧𑀸𑀤𑀸𑀦𑀺𑀬𑁂𑀲𑀽𑀢𑀺 𑀘𑀢𑀼𑀦𑁆𑀦𑀁 𑀉𑀧𑀸𑀤𑀸𑀦𑀸𑀦𑀁 𑀧𑀘𑁆𑀘𑀬𑁂𑀲𑀼 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼. 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄𑀢𑀺 𑀅𑀲𑁆𑀲𑀸𑀤𑀁 𑀅𑀦𑀼𑀧𑀲𑁆𑀲𑀦𑁆𑀢𑀲𑁆𑀲. 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑁂. 𑀢𑀤𑀸𑀳𑀸𑀭𑁄𑀢𑀺 𑀢𑀁𑀧𑀘𑁆𑀘𑀬𑁄. 𑀢𑀤𑀼𑀧𑀸𑀤𑀸𑀦𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀯𑀺𑀬 𑀳𑀺 𑀢𑀬𑁄 𑀪𑀯𑀸, 𑀢𑁂𑀪𑀽𑀫𑀓𑀯𑀝𑁆𑀝𑀦𑁆𑀢𑀺𑀧𑀺 𑀏𑀢𑀤𑁂𑀯, 𑀅𑀕𑁆𑀕𑀺𑀚𑀕𑁆𑀕𑀓𑀧𑀼𑀭𑀺𑀲𑁄 𑀯𑀺𑀬 𑀯𑀝𑁆𑀝𑀦𑀺𑀲𑁆𑀲𑀺𑀢𑁄 𑀩𑀸𑀮𑀧𑀼𑀣𑀼𑀚𑁆𑀚𑀦𑁄, 𑀲𑀼𑀓𑁆𑀔𑀢𑀺𑀡𑀕𑁄𑀫𑀬𑀸𑀤𑀺𑀧𑀓𑁆𑀔𑀺𑀧𑀦𑀁 𑀯𑀺𑀬 𑀅𑀲𑁆𑀲𑀸𑀤𑀸𑀦𑀼𑀧𑀲𑁆𑀲𑀺𑀦𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀢𑀡𑁆𑀳𑀸𑀤𑀺𑀯𑀲𑁂𑀦 𑀙𑀳𑀺 𑀤𑁆𑀯𑀸𑀭𑁂𑀳𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀓𑀭𑀡𑀁. 𑀢𑀺𑀡𑀕𑁄𑀫𑀬𑀸𑀤𑀻𑀲𑀼 𑀔𑀻𑀡𑁂𑀲𑀼 𑀧𑀼𑀦𑀧𑁆𑀧𑀼𑀦𑀁 𑀢𑁂𑀲𑀁 𑀧𑀓𑁆𑀔𑀺𑀧𑀦𑁂𑀦 𑀅𑀕𑁆𑀕𑀺𑀓𑁆𑀔𑀦𑁆𑀥𑀲𑁆𑀲 𑀯𑀟𑁆𑀠𑀦𑀁 𑀯𑀺𑀬 𑀩𑀸𑀮𑀧𑀼𑀣𑀼𑀚𑁆𑀚𑀦𑀲𑁆𑀲 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀬𑀣𑀸𑀯𑀼𑀢𑁆𑀢𑀓𑀫𑁆𑀫𑀸𑀬𑀽𑀳𑀦𑁂𑀦 𑀅𑀧𑀭𑀸𑀧𑀭𑀁 𑀯𑀝𑁆𑀝𑀤𑀼𑀓𑁆𑀔𑀦𑀺𑀩𑁆𑀩𑀢𑁆𑀢𑀦𑀁.

𑀦 𑀓𑀸𑀮𑁂𑀦 𑀓𑀸𑀮𑀁 𑀲𑀼𑀓𑁆𑀔𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀢𑀜𑁆𑀳𑀺 𑀓𑁄𑀘𑀺 𑀅𑀢𑁆𑀣𑀓𑀸𑀫𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀪𑁄 𑀓𑀲𑁆𑀫𑀸 𑀉𑀝𑁆𑀞𑀸𑀬 𑀲𑀫𑀼𑀝𑁆𑀞𑀸𑀬 𑀓𑀮𑀸𑀧𑁂 𑀩𑀦𑁆𑀥𑀺𑀢𑁆𑀯𑀸 𑀲𑀼𑀓𑁆𑀔𑀢𑀺𑀡𑀓𑀝𑁆𑀞𑀸𑀦𑀁 𑀧𑀘𑁆𑀙𑀺𑀬𑀜𑁆𑀘 𑀧𑀽𑀭𑁂𑀢𑁆𑀯𑀸 𑀲𑀼𑀓𑁆𑀔𑀕𑁄𑀫𑀬𑀸𑀦𑀺 𑀧𑀓𑁆𑀔𑀺𑀧𑀦𑁆𑀢𑁄 𑀏𑀢𑀁 𑀅𑀕𑁆𑀕𑀺𑀁 𑀚𑀸𑀮𑁂𑀲𑀺? 𑀅𑀧𑀺 𑀦𑀼 𑀢𑁂 𑀅𑀢𑁆𑀣𑀺 𑀇𑀢𑁄𑀦𑀺𑀤𑀸𑀦𑀁 𑀓𑀸𑀘𑀺 𑀯𑀟𑁆𑀠𑀻𑀢𑀺? 𑀯𑀁𑀲𑀸𑀕𑀢𑀫𑁂𑀢𑀁 𑀪𑁄 𑀅𑀫𑁆𑀳𑀸𑀓𑀁, 𑀇𑀢𑁄𑀦𑀺𑀤𑀸𑀦𑀁 𑀧𑀦 𑀫𑁂 𑀅𑀯𑀟𑁆𑀠𑀺𑀬𑁂𑀯, 𑀓𑀼𑀢𑁄 𑀯𑀟𑁆𑀠𑀺? 𑀅𑀳𑀜𑁆𑀳𑀺 𑀇𑀫𑀁 𑀅𑀕𑁆𑀕𑀺𑀁 𑀚𑀕𑁆𑀕𑀦𑁆𑀢𑁄 𑀦𑁂𑀯 𑀦𑁆𑀳𑀸𑀬𑀺𑀢𑀼𑀁 𑀦 𑀪𑀼𑀜𑁆𑀚𑀺𑀢𑀼𑀁 𑀦 𑀦𑀺𑀧𑀚𑁆𑀚𑀺𑀢𑀼𑀁 𑀮𑀪𑀸𑀫𑀻𑀢𑀺. 𑀢𑁂𑀦 𑀳𑀺 𑀪𑁄 𑀓𑀺𑀁 𑀢𑁂 𑀇𑀫𑀺𑀦𑀸 𑀦𑀺𑀭𑀢𑁆𑀣𑀓𑁂𑀦 𑀅𑀕𑁆𑀕𑀺𑀚𑀸𑀮𑀦𑁂𑀦? 𑀏𑀳𑀺 𑀢𑁆𑀯𑀁 𑀏𑀢𑀸𑀦𑀺 𑀆𑀪𑀢𑀸𑀦𑀺 𑀢𑀺𑀡𑀸𑀤𑀻𑀦𑀺 𑀏𑀢𑁆𑀣 𑀦𑀺𑀓𑁆𑀔𑀺𑀧, 𑀢𑀸𑀦𑀺 𑀲𑀬𑀫𑁂𑀯 𑀛𑀸𑀬𑀺𑀲𑁆𑀲𑀦𑁆𑀢𑀺, 𑀢𑁆𑀯𑀁 𑀧𑀦 𑀅𑀲𑀼𑀓𑀲𑁆𑀫𑀺𑀁 𑀞𑀸𑀦𑁂 𑀲𑀻𑀢𑁄𑀤𑀓𑀸 𑀧𑁄𑀓𑁆𑀔𑀭𑀡𑀻 𑀅𑀢𑁆𑀣𑀺, 𑀢𑀢𑁆𑀣 𑀦𑁆𑀳𑀢𑁆𑀯𑀸, 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑁂𑀳𑀺 𑀅𑀢𑁆𑀢𑀸𑀦𑀁 𑀫𑀡𑁆𑀟𑁂𑀢𑁆𑀯𑀸 𑀲𑀼𑀦𑀺𑀯𑀢𑁆𑀣𑁄 𑀲𑀼𑀧𑀸𑀭𑀼𑀢𑁄𑀯 𑀧𑀸𑀤𑀼𑀓𑀸𑀳𑀺 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀧𑀸𑀲𑀸𑀤𑀯𑀭𑀫𑀸𑀭𑀼𑀬𑁆𑀳 𑀯𑀸𑀢𑀧𑀸𑀦𑀁 𑀯𑀺𑀯𑀭𑀺𑀢𑁆𑀯𑀸 𑀫𑀳𑀸𑀯𑀻𑀣𑀺𑀬𑀁 𑀯𑀺𑀭𑁄𑀘𑀫𑀸𑀦𑁄 𑀦𑀺𑀲𑀻𑀤 𑀏𑀓𑀕𑁆𑀕𑁄 𑀲𑀼𑀔𑀲𑀫𑀧𑁆𑀧𑀺𑀢𑁄 𑀳𑀼𑀢𑁆𑀯𑀸, 𑀢𑀢𑁆𑀣 𑀢𑁂 𑀦𑀺𑀲𑀺𑀦𑁆𑀦𑀲𑁆𑀲 𑀢𑀺𑀡𑀸𑀤𑀻𑀦𑀁 𑀔𑀬𑁂𑀦 𑀲𑀬𑀫𑁂𑀯 𑀅𑀬𑀁 𑀅𑀕𑁆𑀕𑀺 𑀅𑀧𑁆𑀧𑀡𑁆𑀡𑀢𑁆𑀢𑀺𑀪𑀸𑀯𑀁 𑀕𑀫𑀺𑀲𑁆𑀲𑀢𑀻’’𑀢𑀺. 𑀲𑁄 𑀢𑀣𑀸 𑀓𑀭𑁂𑀬𑁆𑀬. 𑀢𑀣𑁂𑀯 𑀘 𑀢𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲 𑀲𑁄 𑀅𑀕𑁆𑀕𑀺 𑀉𑀧𑀸𑀤𑀸𑀦𑀓𑁆𑀔𑀬𑁂𑀦 𑀅𑀧𑁆𑀧𑀡𑁆𑀡𑀢𑁆𑀢𑀺𑀪𑀸𑀯𑀁 𑀕𑀘𑁆𑀙𑁂𑀬𑁆𑀬. 𑀇𑀤𑀁 𑀲𑀦𑁆𑀥𑀸𑀬𑁂𑀢𑀁 ‘‘𑀦 𑀓𑀸𑀮𑁂𑀦 𑀓𑀸𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀧𑀦 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀘𑀢𑁆𑀢𑀸𑀮𑀻𑀲𑀸𑀬 𑀓𑀝𑁆𑀞𑀯𑀸𑀳𑀸𑀦𑀁 𑀚𑀮𑀫𑀸𑀦𑁄 𑀫𑀳𑀸𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀯𑀺𑀬 𑀳𑀺 𑀢𑁂𑀪𑀽𑀫𑀓𑀯𑀝𑁆𑀝𑀁 𑀤𑀝𑁆𑀞𑀩𑁆𑀩𑀁, 𑀅𑀕𑁆𑀕𑀺𑀚𑀕𑁆𑀕𑀦𑀓𑀧𑀼𑀭𑀺𑀲𑁄 𑀯𑀺𑀬 𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀓𑁄 𑀬𑁄𑀕𑀸𑀯𑀘𑀭𑁄, 𑀅𑀢𑁆𑀣𑀓𑀸𑀫𑁄 𑀧𑀼𑀭𑀺𑀲𑁄 𑀯𑀺𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀢𑁂𑀦 𑀧𑀼𑀭𑀺𑀲𑁂𑀦 𑀢𑀲𑁆𑀲 𑀤𑀺𑀦𑁆𑀦𑀑𑀯𑀸𑀤𑁄 𑀯𑀺𑀬 𑀢𑀣𑀸𑀕𑀢𑁂𑀦 ‘‘𑀏𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼 𑀦𑀺𑀩𑁆𑀩𑀺𑀦𑁆𑀤, 𑀏𑀯𑀁 𑀯𑀝𑁆𑀝𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀲𑁆𑀲𑀲𑀻’’𑀢𑀺 𑀢𑀲𑁆𑀲 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀓𑀣𑀺𑀢𑀓𑀸𑀮𑁄, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀧𑀸𑀲𑀸𑀤𑁂 𑀦𑀺𑀲𑀺𑀦𑁆𑀦𑀓𑀸𑀮𑁄 𑀯𑀺𑀬 𑀬𑁄𑀕𑀺𑀦𑁄 𑀲𑀼𑀕𑀢𑁄𑀯𑀸𑀤𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀼𑀜𑁆𑀜𑀸𑀕𑀸𑀭𑀁 𑀧𑀯𑀺𑀝𑁆𑀞𑀲𑁆𑀲 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀬𑀣𑀸𑀦𑀼𑀭𑀽𑀧𑀁 𑀆𑀳𑀸𑀭𑀲𑀧𑁆𑀧𑀸𑀬𑀸𑀤𑀺𑀁 𑀮𑀪𑀺𑀢𑁆𑀯𑀸, 𑀏𑀓𑀸𑀲𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀅𑀕𑁆𑀕𑀨𑀮𑁂 𑀧𑀢𑀺𑀝𑁆𑀞𑀺𑀢𑀓𑀸𑀮𑁄, 𑀢𑀲𑁆𑀲 𑀦𑁆𑀳𑀸𑀦𑀯𑀺𑀮𑁂𑀧𑀦𑀸𑀤𑀻𑀳𑀺 𑀲𑀼𑀥𑁄𑀢𑀫𑀡𑁆𑀟𑀺𑀢𑀓𑀸𑀬𑀢𑁆𑀢𑀸 𑀢𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑀲𑁆𑀲 𑀏𑀓𑀕𑁆𑀕𑀲𑀼𑀔𑀲𑀫𑀧𑁆𑀧𑀺𑀢𑀓𑀸𑀮𑁄 𑀯𑀺𑀬 𑀬𑁄𑀕𑀺𑀦𑁄 𑀅𑀭𑀺𑀬𑀫𑀕𑁆𑀕𑀧𑁄𑀓𑁆𑀔𑀭𑀡𑀺𑀬𑀁 𑀫𑀕𑁆𑀕𑀜𑀸𑀡𑁄𑀤𑀓𑁂𑀦 𑀲𑀼𑀦𑁆𑀳𑀸𑀢𑀲𑀼𑀥𑁄𑀢𑀓𑀺𑀮𑁂𑀲𑀫𑀮𑀲𑁆𑀲 𑀳𑀺𑀭𑁄𑀢𑁆𑀢𑀧𑁆𑀧𑀲𑀸𑀝𑀓𑁂 𑀦𑀺𑀯𑀸𑀲𑁂𑀢𑁆𑀯𑀸 𑀲𑀻𑀮𑀯𑀺𑀮𑁂𑀧𑀦𑀸𑀦𑀼𑀮𑀺𑀢𑁆𑀢𑀲𑁆𑀲 𑀅𑀭𑀳𑀢𑁆𑀢𑀫𑀡𑁆𑀟𑀦𑁂𑀦 𑀅𑀢𑁆𑀢𑀪𑀸𑀯𑀁 𑀫𑀡𑁆𑀟𑁂𑀢𑁆𑀯𑀸 𑀯𑀺𑀫𑀼𑀢𑁆𑀢𑀺𑀧𑀼𑀧𑁆𑀨𑀤𑀸𑀫𑀁 𑀧𑀺𑀴𑀦𑁆𑀥𑀺𑀢𑁆𑀯𑀸 𑀇𑀤𑁆𑀥𑀺𑀧𑀸𑀤𑀧𑀸𑀤𑀼𑀓𑀸 𑀆𑀭𑀼𑀬𑁆𑀳 𑀦𑀺𑀩𑁆𑀩𑀸𑀦𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀥𑀫𑁆𑀫𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀲𑀢𑀺𑀧𑀝𑁆𑀞𑀸𑀦𑀫𑀳𑀸𑀯𑀻𑀣𑀺𑀬𑀁 𑀯𑀺𑀭𑁄𑀘𑀫𑀸𑀦𑀲𑁆𑀲 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑀸𑀮𑁄. 𑀢𑀲𑁆𑀲 𑀧𑀦 𑀧𑀼𑀭𑀺𑀲𑀲𑁆𑀲 𑀢𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑀲𑁆𑀲 𑀢𑀺𑀡𑀸𑀤𑀻𑀦𑀁 𑀔𑀬𑁂𑀦 𑀅𑀕𑁆𑀕𑀺𑀓𑁆𑀔𑀦𑁆𑀥𑀲𑁆𑀲 𑀅𑀧𑁆𑀧𑀡𑁆𑀡𑀢𑁆𑀢𑀺𑀕𑀫𑀦𑀓𑀸𑀮𑁄 𑀯𑀺𑀬 𑀔𑀻𑀡𑀸𑀲𑀯𑀲𑁆𑀲 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀉𑀧𑀸𑀤𑀺𑀡𑁆𑀡𑀓𑀓𑁆𑀔𑀦𑁆𑀥𑀪𑁂𑀤𑁂𑀦 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀫𑀳𑀸𑀯𑀝𑁆𑀝𑀯𑀽𑀧𑀲𑀫𑁄 𑀤𑀝𑁆𑀞𑀩𑁆𑀩𑁄. 𑀤𑀼𑀢𑀺𑀬𑀁.

𑁩. 𑀲𑀁𑀬𑁄𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁩. 𑀢𑀢𑀺𑀬𑁂 𑀲𑀁𑀬𑁄𑀚𑀦𑀺𑀬𑁂𑀲𑀽𑀢𑀺 𑀤𑀲𑀦𑁆𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀘𑁆𑀘𑀬𑁂𑀲𑀼. 𑀛𑀸𑀬𑁂𑀬𑁆𑀬𑀸𑀢𑀺 𑀚𑀮𑁂𑀬𑁆𑀬. 𑀢𑁂𑀮𑀁 𑀆𑀲𑀺𑀜𑁆𑀘𑁂𑀬𑁆𑀬 𑀯𑀝𑁆𑀝𑀺𑀁 𑀉𑀧𑀲𑀁𑀳𑀭𑁂𑀬𑁆𑀬𑀸𑀢𑀺 𑀤𑀻𑀧𑀧𑀝𑀺𑀚𑀕𑁆𑀕𑀦𑀢𑁆𑀣𑀁 𑀢𑁂𑀮𑀪𑀸𑀚𑀦𑀜𑁆𑀘 𑀫𑀳𑀦𑁆𑀢𑀜𑁆𑀘 𑀯𑀝𑁆𑀝𑀺𑀓𑀧𑀸𑀮𑀁 𑀕𑀳𑁂𑀢𑁆𑀯𑀸 𑀲𑀫𑀻𑀧𑁂 𑀦𑀺𑀘𑁆𑀘𑀁 𑀞𑀺𑀢𑁄𑀯 𑀢𑁂𑀮𑁂 𑀔𑀻𑀡𑁂 𑀢𑁂𑀮𑀁 𑀆𑀲𑀺𑀜𑁆𑀘𑁂𑀬𑁆𑀬, 𑀯𑀝𑁆𑀝𑀺𑀬𑀸 𑀔𑀻𑀡𑀸𑀬 𑀯𑀝𑁆𑀝𑀺𑀁 𑀉𑀧𑀲𑀁𑀳𑀭𑁂𑀬𑁆𑀬. 𑀲𑁂𑀲𑀫𑁂𑀢𑁆𑀣 𑀲𑀤𑁆𑀥𑀺𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑁂𑀦 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀢𑀢𑀺𑀬𑀁.

𑁪. 𑀤𑀼𑀢𑀺𑀬𑀲𑀁𑀬𑁄𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁪. 𑀘𑀢𑀼𑀢𑁆𑀣𑁂 𑀉𑀧𑀫𑀁 𑀧𑀞𑀫𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀲𑁂𑀲𑀁 𑀢𑀸𑀤𑀺𑀲𑀫𑁂𑀯. 𑀘𑀢𑀼𑀢𑁆𑀣𑀁.

𑁫. 𑀫𑀳𑀸𑀭𑀼𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁫. 𑀧𑀜𑁆𑀘𑀫𑁂 𑀉𑀤𑁆𑀥𑀁 𑀑𑀚𑀁 𑀅𑀪𑀺𑀳𑀭𑀦𑁆𑀢𑀻𑀢𑀺 𑀧𑀣𑀯𑀻𑀭𑀲𑀜𑁆𑀘 𑀆𑀧𑁄𑀭𑀲𑀜𑁆𑀘 𑀉𑀧𑀭𑀺 𑀆𑀭𑁄𑀧𑁂𑀦𑁆𑀢𑀺. 𑀑𑀚𑀸𑀬 𑀆𑀭𑁄𑀧𑀺𑀢𑀢𑁆𑀢𑀸 𑀳𑀢𑁆𑀣𑀲𑀢𑀼𑀩𑁆𑀩𑁂𑀥𑀲𑁆𑀲 𑀭𑀼𑀓𑁆𑀔𑀲𑁆𑀲 𑀅𑀗𑁆𑀓𑀼𑀭𑀕𑁆𑀕𑁂𑀲𑀼 𑀩𑀺𑀦𑁆𑀤𑀼𑀩𑀺𑀦𑁆𑀤𑀽𑀦𑀺 𑀯𑀺𑀬 𑀳𑀼𑀢𑁆𑀯𑀸 𑀲𑀺𑀦𑁂𑀳𑁄 𑀢𑀺𑀝𑁆𑀞𑀢𑀺. 𑀇𑀤𑀁 𑀧𑀦𑁂𑀢𑁆𑀣 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀫𑀳𑀸𑀭𑀼𑀓𑁆𑀔𑁄 𑀯𑀺𑀬 𑀳𑀺 𑀢𑁂𑀪𑀽𑀫𑀓𑀯𑀝𑁆𑀝𑀁, 𑀫𑀽𑀮𑀸𑀦𑀺 𑀯𑀺𑀬 𑀆𑀬𑀢𑀦𑀸𑀦𑀺, 𑀫𑀽𑀮𑁂𑀳𑀺 𑀑𑀚𑀸𑀬 𑀆𑀭𑁄𑀳𑀦𑀁 𑀯𑀺𑀬 𑀙𑀳𑀺 𑀤𑁆𑀯𑀸𑀭𑁂𑀳𑀺 𑀓𑀫𑁆𑀫𑀸𑀭𑁄𑀳𑀦𑀁, 𑀑𑀚𑀸𑀬 𑀅𑀪𑀺𑀭𑀼𑀴𑁆𑀳𑀢𑁆𑀢𑀸 𑀫𑀳𑀸𑀭𑀼𑀓𑁆𑀔𑀲𑁆𑀲 𑀬𑀸𑀯𑀓𑀧𑁆𑀧𑀝𑁆𑀞𑀸𑀦𑀁 𑀯𑀺𑀬 𑀯𑀝𑁆𑀝𑀦𑀺𑀲𑁆𑀲𑀺𑀢𑀩𑀸𑀮𑀧𑀼𑀣𑀼𑀚𑁆𑀚𑀦𑀲𑁆𑀲 𑀙𑀳𑀺 𑀤𑁆𑀯𑀸𑀭𑁂𑀳𑀺 𑀓𑀫𑁆𑀫𑀁 𑀆𑀬𑀽𑀳𑀦𑁆𑀢𑀲𑁆𑀲 𑀅𑀧𑀭𑀸𑀧𑀭𑀁 𑀯𑀝𑁆𑀝𑀲𑁆𑀲 𑀯𑀟𑁆𑀠𑀦𑀯𑀲𑁂𑀦 𑀤𑀻𑀖𑀭𑀢𑁆𑀢𑀁 𑀞𑀸𑀦𑀁.

𑀓𑀼𑀤𑁆𑀤𑀸𑀮𑀧𑀺𑀝𑀓𑀦𑁆𑀢𑀺 𑀓𑀼𑀤𑁆𑀤𑀸𑀮𑀜𑁆𑀘𑁂𑀯 𑀧𑀘𑁆𑀙𑀺𑀪𑀸𑀚𑀦𑀜𑁆𑀘. 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑀺𑀦𑁆𑀤𑁂𑀬𑁆𑀬𑀸𑀢𑀺 𑀔𑀼𑀤𑁆𑀤𑀓𑀫𑀳𑀦𑁆𑀢𑀸𑀦𑀺 𑀔𑀡𑁆𑀟𑀸𑀔𑀡𑁆𑀟𑀸𑀦𑀺 𑀓𑀭𑁄𑀦𑁆𑀢𑁄 𑀙𑀺𑀦𑁆𑀤𑁂𑀬𑁆𑀬. 𑀇𑀤𑀁 𑀧𑀦𑁂𑀢𑁆𑀣 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀇𑀥𑀸𑀧𑀺 𑀳𑀺 𑀫𑀳𑀸𑀭𑀼𑀓𑁆𑀔𑁄 𑀯𑀺𑀬 𑀢𑁂𑀪𑀽𑀫𑀓𑀯𑀝𑁆𑀝𑀁, 𑀭𑀼𑀓𑁆𑀔𑀁 𑀦𑀸𑀲𑁂𑀢𑀼𑀓𑀸𑀫𑁄 𑀧𑀼𑀭𑀺𑀲𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄, 𑀓𑀼𑀤𑁆𑀤𑀸𑀮𑁄 𑀯𑀺𑀬 𑀜𑀸𑀡𑀁, 𑀧𑀘𑁆𑀙𑀺 𑀯𑀺𑀬 𑀲𑀫𑀸𑀥𑀺, 𑀭𑀼𑀓𑁆𑀔𑀘𑁆𑀙𑁂𑀤𑀦𑀨𑀭𑀲𑀼 𑀯𑀺𑀬 𑀜𑀸𑀡𑀁, 𑀭𑀼𑀓𑁆𑀔𑀲𑁆𑀲 𑀫𑀽𑀮𑁂 𑀙𑀺𑀦𑁆𑀦𑀓𑀸𑀮𑁄 𑀯𑀺𑀬 𑀬𑁄𑀕𑀺𑀦𑁄 𑀆𑀘𑀭𑀺𑀬𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀧𑀜𑁆𑀜𑀸, 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀙𑀺𑀦𑁆𑀤𑀦𑀓𑀸𑀮𑁄 𑀯𑀺𑀬 𑀲𑀗𑁆𑀔𑁂𑀧𑀢𑁄 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀫𑀦𑀲𑀺𑀓𑀸𑀭𑁄, 𑀨𑀸𑀮𑀦𑀁 𑀯𑀺𑀬 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀸𑀬 𑀓𑁄𑀝𑁆𑀞𑀸𑀲𑁂𑀲𑀼 𑀯𑀺𑀢𑁆𑀣𑀸𑀭𑀫𑀦𑀲𑀺𑀓𑀸𑀭𑁄, 𑀲𑀓𑀮𑀺𑀓𑀁 𑀲𑀓𑀮𑀺𑀓𑀁 𑀓𑀭𑀡𑀓𑀸𑀮𑁄 𑀯𑀺𑀬 𑀉𑀧𑀸𑀤𑀸𑀭𑀽𑀧𑀲𑁆𑀲 𑀘𑁂𑀯 𑀭𑀽𑀧𑀓𑁆𑀔𑀦𑁆𑀥𑀸𑀭𑀫𑁆𑀫𑀡𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀯𑀲𑁂𑀦 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑁄, 𑀫𑀽𑀮𑀸𑀦𑀁 𑀉𑀧𑀘𑁆𑀙𑁂𑀤𑀦𑀁 𑀯𑀺𑀬 𑀢𑀲𑁆𑀲𑁂𑀯 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑀧𑀭𑀺𑀬𑁂𑀲𑀦𑀁, 𑀯𑀸𑀢𑀸𑀢𑀧𑁂 𑀯𑀺𑀲𑁄𑀲𑁂𑀢𑁆𑀯𑀸 𑀅𑀕𑁆𑀕𑀺𑀦𑀸 𑀟𑀳𑀦𑀓𑀸𑀮𑁄 𑀯𑀺𑀬 𑀅𑀦𑀼𑀧𑀼𑀩𑁆𑀩𑁂𑀦 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀜𑁆𑀜𑀢𑀭𑀁 𑀲𑀧𑁆𑀧𑀸𑀬𑀁 𑀮𑀪𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑁂 𑀯𑀺𑀪𑀽𑀢𑁂 𑀉𑀧𑀝𑁆𑀞𑀳𑀫𑀸𑀦𑁂 𑀏𑀓𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀲𑁆𑀲 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀅𑀕𑁆𑀕𑀨𑀮𑀧𑁆𑀧𑀢𑁆𑀢𑀺, 𑀫𑀲𑀺𑀓𑀭𑀡𑀁 𑀯𑀺𑀬 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀤𑀺𑀯𑀲𑁂𑀬𑁂𑀯 𑀅𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀲𑁆𑀲 𑀬𑀸𑀯𑀢𑀸𑀬𑀼𑀓𑀁 𑀞𑀺𑀢 𑀓𑀸𑀮𑁄, 𑀫𑀳𑀸𑀯𑀸𑀢𑁂 𑀑𑀧𑀼𑀦𑀦𑀁 𑀦𑀤𑀺𑀬𑀸 𑀧𑀯𑀸𑀳𑀦𑀁 𑀯𑀺𑀬 𑀘 𑀉𑀧𑀸𑀤𑀺𑀡𑁆𑀡𑀓𑀓𑁆𑀔𑀦𑁆𑀥𑀪𑁂𑀤𑁂𑀦 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀯𑀝𑁆𑀝𑀯𑀽𑀧𑀲𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀫𑀳𑀸𑀭𑀼𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁬. 𑀙𑀝𑁆𑀞𑁂𑀧𑀺 𑀉𑀧𑀫𑀁 𑀧𑀞𑀫𑀁 𑀯𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀇𑀤𑀫𑁂𑀯 𑀦𑀸𑀦𑀢𑁆𑀢𑀁. 𑀙𑀝𑁆𑀞𑀁.

𑁭. 𑀢𑀭𑀼𑀡𑀭𑀼𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁭-𑁫𑁯. 𑀲𑀢𑁆𑀢𑀫𑁂 𑀢𑀭𑀼𑀡𑁄𑀢𑀺 𑀅𑀚𑀸𑀢𑀨𑀮𑁄. 𑀧𑀮𑀺𑀫𑀚𑁆𑀚𑁂𑀬𑁆𑀬𑀸𑀢𑀺 𑀲𑁄𑀥𑁂𑀬𑁆𑀬. 𑀧𑀁𑀲𑀼𑀁 𑀤𑀤𑁂𑀬𑁆𑀬𑀸𑀢𑀺 𑀣𑀤𑁆𑀥𑀨𑀭𑀼𑀲𑀧𑀁𑀲𑀼𑀁 𑀳𑀭𑀺𑀢𑁆𑀯𑀸 𑀫𑀼𑀤𑀼𑀕𑁄𑀫𑀬𑀘𑀼𑀡𑁆𑀡𑀫𑀺𑀲𑁆𑀲𑀁 𑀫𑀥𑀼𑀭𑀧𑀁𑀲𑀼𑀁 𑀧𑀓𑁆𑀔𑀺𑀧𑁂𑀬𑁆𑀬. 𑀯𑀼𑀤𑁆𑀥𑀺𑀦𑁆𑀢𑀺 𑀯𑀼𑀤𑁆𑀥𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀼𑀧𑁆𑀨𑀽𑀧𑀕𑁄 𑀧𑀼𑀧𑁆𑀨𑀁, 𑀨𑀮𑀽𑀧𑀕𑁄 𑀨𑀮𑀁 𑀕𑀡𑁆𑀳𑁂𑀬𑁆𑀬. 𑀇𑀤𑀁 𑀧𑀦𑁂𑀢𑁆𑀣 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀢𑀭𑀼𑀡𑀭𑀼𑀓𑁆𑀔𑁄 𑀯𑀺𑀬 𑀳𑀺 𑀢𑁂𑀪𑀽𑀫𑀓𑀯𑀝𑁆𑀝𑀁, 𑀭𑀼𑀓𑁆𑀔𑀚𑀕𑁆𑀕𑀓𑁄 𑀧𑀼𑀭𑀺𑀲𑁄 𑀯𑀺𑀬 𑀯𑀝𑁆𑀝𑀦𑀺𑀲𑁆𑀲𑀺𑀢𑁄 𑀧𑀼𑀣𑀼𑀚𑁆𑀚𑀦𑁄, 𑀫𑀽𑀮𑀨𑀮𑀲𑀦𑁆𑀢𑀸𑀦𑀸𑀤𑀻𑀦𑀺 𑀯𑀺𑀬 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀬𑀽𑀳𑀦𑀁, 𑀭𑀼𑀓𑁆𑀔𑀲𑁆𑀲 𑀯𑀼𑀟𑁆𑀠𑀺𑀆𑀧𑀚𑁆𑀚𑀦𑀁 𑀯𑀺𑀬 𑀧𑀼𑀣𑀼𑀚𑁆𑀚𑀦𑀲𑁆𑀲 𑀢𑀻𑀳𑀺 𑀤𑁆𑀯𑀸𑀭𑁂𑀳𑀺 𑀓𑀫𑁆𑀫𑀁 𑀆𑀬𑀽𑀳𑀢𑁄 𑀅𑀧𑀭𑀸𑀧𑀭𑀁 𑀯𑀝𑁆𑀝𑀧𑁆𑀧𑀯𑀢𑁆𑀢𑀺. 𑀯𑀺𑀯𑀝𑁆𑀝𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀅𑀝𑁆𑀞𑀫𑀦𑀯𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯. 𑀲𑀢𑁆𑀢𑀫𑀸𑀤𑀻𑀦𑀺.

𑁧𑁦. 𑀦𑀺𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁦. 𑀤𑀲𑀫𑁂 𑀓𑀼𑀭𑀽𑀲𑀼 𑀯𑀺𑀳𑀭𑀢𑀻𑀢𑀺 𑀓𑀼𑀭𑀽𑀢𑀺 𑀏𑀯𑀁 𑀩𑀳𑀼𑀯𑀘𑀦𑀯𑀲𑁂𑀦 𑀮𑀤𑁆𑀥𑀯𑁄𑀳𑀸𑀭𑁂 𑀚𑀦𑀧𑀤𑁂 𑀯𑀺𑀳𑀭𑀢𑀺. 𑀓𑀫𑁆𑀫𑀸𑀲𑀥𑀫𑁆𑀫𑀁 𑀦𑀸𑀫 𑀓𑀼𑀭𑀽𑀦𑀁 𑀦𑀺𑀕𑀫𑁄𑀢𑀺 𑀏𑀯𑀁𑀦𑀸𑀫𑀓𑁄 𑀓𑀼𑀭𑀽𑀦𑀁 𑀦𑀺𑀕𑀫𑁄, 𑀢𑀁 𑀕𑁄𑀘𑀭𑀕𑀸𑀫𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀆𑀬𑀲𑁆𑀫𑀸𑀢𑀺 𑀧𑀺𑀬𑀯𑀘𑀦𑀫𑁂𑀢𑀁 𑀕𑀭𑀼𑀯𑀘𑀦𑀫𑁂𑀢𑀁. 𑀆𑀦𑀦𑁆𑀤𑁄𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀦𑀸𑀫𑀁. 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀻𑀢𑀺 𑀙 𑀦𑀺𑀲𑀚𑁆𑀚𑀤𑁄𑀲𑁂 𑀯𑀺𑀯𑀚𑁆𑀚𑁂𑀦𑁆𑀢𑁄 𑀤𑀓𑁆𑀔𑀺𑀡𑀚𑀸𑀡𑀼𑀫𑀡𑁆𑀟𑀮𑀲𑁆𑀲 𑀅𑀪𑀺𑀫𑀼𑀔𑀝𑁆𑀞𑀸𑀦𑁂 𑀙𑀩𑁆𑀩𑀡𑁆𑀡𑀸𑀦𑀁 𑀩𑀼𑀤𑁆𑀥𑀭𑀲𑁆𑀫𑀻𑀦𑀁 𑀅𑀦𑁆𑀢𑁄 𑀧𑀯𑀺𑀲𑀺𑀢𑁆𑀯𑀸 𑀧𑀲𑀦𑁆𑀦𑀮𑀸𑀔𑀸𑀭𑀲𑀁 𑀯𑀺𑀕𑀸𑀳𑀦𑁆𑀢𑁄 𑀯𑀺𑀬 𑀲𑀼𑀯𑀡𑁆𑀡𑀧𑀝𑀁 𑀧𑀸𑀭𑀼𑀧𑀦𑁆𑀢𑁄 𑀯𑀺𑀬 𑀭𑀢𑁆𑀢𑀓𑀫𑁆𑀩𑀮𑀯𑀺𑀢𑀸𑀦𑀫𑀚𑁆𑀛𑀁 𑀧𑀯𑀺𑀲𑀦𑁆𑀢𑁄 𑀯𑀺𑀬 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀦𑀺𑀲𑀻𑀤𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀻’’𑀢𑀺.

𑀓𑀸𑀬 𑀧𑀦 𑀯𑁂𑀮𑀸𑀬 𑀓𑁂𑀦 𑀓𑀸𑀭𑀡𑁂𑀦 𑀅𑀬𑀫𑀸𑀬𑀲𑁆𑀫𑀸 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀦𑁆𑀢𑁄𑀢𑀺? 𑀲𑀸𑀬𑀦𑁆𑀳𑀯𑁂𑀮𑀸𑀬 𑀧𑀘𑁆𑀘𑀬𑀸𑀓𑀸𑀭𑀧𑀜𑁆𑀳𑀁 𑀧𑀼𑀘𑁆𑀙𑀦𑀓𑀸𑀭𑀡𑁂𑀦. 𑀢𑀁 𑀤𑀺𑀯𑀲𑀁 𑀓𑀺𑀭 𑀅𑀬𑀫𑀸𑀬𑀲𑁆𑀫𑀸 𑀓𑀼𑀮𑀲𑀗𑁆𑀕𑀳𑀢𑁆𑀣𑀸𑀬 𑀖𑀭𑀤𑁆𑀯𑀸𑀭𑁂 𑀖𑀭𑀤𑁆𑀯𑀸𑀭𑁂 𑀲𑀳𑀲𑁆𑀲𑀪𑀡𑁆𑀟𑀺𑀓𑀁 𑀦𑀺𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀓𑀫𑁆𑀫𑀸𑀲𑀥𑀫𑁆𑀫𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀲𑀢𑁆𑀣𑀼 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀲𑀢𑁆𑀣𑀭𑀺 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀝𑁆𑀞𑁂 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀤𑀺𑀯𑀸𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀓𑁆𑀓𑀦𑁆𑀢𑁂𑀲𑀼 𑀤𑀺𑀯𑀸𑀝𑁆𑀞𑀸𑀦𑀁 𑀧𑀝𑀺𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀘𑀫𑁆𑀫𑀓𑁆𑀔𑀡𑁆𑀟𑀁 𑀧𑀜𑁆𑀜𑀧𑁂𑀢𑁆𑀯𑀸 𑀉𑀤𑀓𑀢𑀼𑀫𑁆𑀩𑀢𑁄 𑀉𑀤𑀓𑁂𑀦 𑀳𑀢𑁆𑀣𑀧𑀸𑀤𑁂 𑀲𑀻𑀢𑀮𑀁 𑀓𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸. 𑀅𑀣 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀯𑀲𑁂𑀦 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀧𑀘𑁆𑀘𑀬𑀸𑀓𑀸𑀭𑁂 𑀜𑀸𑀡𑀁 𑀑𑀢𑀸𑀭𑁂𑀲𑀺. 𑀲𑁄 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑀁, 𑀅𑀦𑁆𑀢𑀢𑁄 𑀧𑀝𑁆𑀞𑀸𑀬 𑀆𑀤𑀺𑀁, 𑀉𑀪𑀬𑀦𑁆𑀢𑀢𑁄 𑀧𑀝𑁆𑀞𑀸𑀬 𑀫𑀚𑁆𑀛𑀁, 𑀫𑀚𑁆𑀛𑀢𑁄 𑀧𑀝𑁆𑀞𑀸𑀬 𑀉𑀪𑁄 𑀅𑀦𑁆𑀢𑁂 𑀧𑀸𑀧𑁂𑀦𑁆𑀢𑁄 𑀢𑀺𑀓𑁆𑀔𑀢𑁆𑀢𑀼𑀁 𑀤𑁆𑀯𑀸𑀤𑀲𑀧𑀤𑀁 𑀧𑀘𑁆𑀘𑀬𑀸𑀓𑀸𑀭𑀁 𑀲𑀫𑁆𑀫𑀲𑀺. 𑀢𑀲𑁆𑀲𑁂𑀯𑀁 𑀲𑀫𑁆𑀫𑀲𑀦𑁆𑀢𑀲𑁆𑀲 𑀧𑀘𑁆𑀘𑀬𑀸𑀓𑀸𑀭𑁄 𑀯𑀺𑀪𑀽𑀢𑁄 𑀳𑀼𑀢𑁆𑀯𑀸 𑀉𑀢𑁆𑀢𑀸𑀦𑀓𑀼𑀢𑁆𑀢𑀸𑀦𑀓𑁄 𑀯𑀺𑀬 𑀉𑀧𑀝𑁆𑀞𑀸𑀲𑀺. 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀧𑀘𑁆𑀘𑀬𑀸𑀓𑀸𑀭𑁄 𑀲𑀩𑁆𑀩𑀩𑀼𑀤𑁆𑀥𑁂𑀳𑀺 𑀕𑀫𑁆𑀪𑀻𑀭𑁄 𑀘𑁂𑀯 𑀕𑀫𑁆𑀪𑀻𑀭𑀸𑀯𑀪𑀸𑀲𑁄 𑀘𑀸𑀢𑀺 𑀓𑀣𑀺𑀢𑁄, 𑀫𑀬𑁆𑀳𑀁 𑀔𑁄 𑀧𑀦 𑀧𑀤𑁂𑀲𑀜𑀸𑀡𑁂 𑀞𑀺𑀢𑀲𑁆𑀲 𑀲𑀸𑀯𑀓𑀲𑁆𑀲 𑀲𑀢𑁄 𑀉𑀢𑁆𑀢𑀸𑀦𑁄 𑀯𑀺𑀬 𑀯𑀺𑀪𑀽𑀢𑁄 𑀧𑀸𑀓𑀝𑁄 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀫𑀬𑁆𑀳𑀁𑀬𑁂𑀯 𑀦𑀼 𑀔𑁄 𑀏𑀲 𑀉𑀢𑁆𑀢𑀸𑀦𑀓𑁄 𑀯𑀺𑀬 𑀉𑀧𑀝𑁆𑀞𑀸𑀢𑀺, 𑀉𑀤𑀸𑀳𑀼 𑀅𑀜𑁆𑀜𑁂𑀲𑀫𑁆𑀧𑀻𑀢𑀺 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀦𑀓𑀸𑀭𑀡𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀢𑁄 𑀉𑀝𑁆𑀞𑀸𑀬 𑀘𑀫𑁆𑀫𑀓𑁆𑀔𑀡𑁆𑀟𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀆𑀤𑀸𑀬 𑀲𑀸𑀬𑀦𑁆𑀳𑀲𑀫𑀬𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀸𑀬𑀦𑁆𑀳𑀯𑁂𑀮𑀸𑀬𑀁 𑀧𑀘𑁆𑀘𑀬𑀸𑀓𑀸𑀭𑀧𑀜𑁆𑀳𑀁 𑀧𑀼𑀘𑁆𑀙𑀦𑀓𑀸𑀭𑀡𑁂𑀦 𑀉𑀧𑀲𑀗𑁆𑀓𑀫𑀦𑁆𑀢𑁄’’𑀢𑀺.

𑀬𑀸𑀯 𑀕𑀫𑁆𑀪𑀻𑀭𑁄𑀢𑀺 𑀏𑀢𑁆𑀣 𑀬𑀸𑀯𑀲𑀤𑁆𑀤𑁄 𑀧𑀫𑀸𑀡𑀸𑀢𑀺𑀓𑁆𑀓𑀫𑁂. 𑀅𑀢𑀺𑀓𑁆𑀓𑀫𑁆𑀫 𑀧𑀫𑀸𑀡𑀁 𑀕𑀫𑁆𑀪𑀻𑀭𑁄, 𑀅𑀢𑀺𑀕𑀫𑁆𑀪𑀻𑀭𑁄𑀢𑀺 𑀅𑀢𑁆𑀣𑁄. 𑀕𑀫𑁆𑀪𑀻𑀭𑀸𑀯𑀪𑀸𑀲𑁄𑀢𑀺 𑀕𑀫𑁆𑀪𑀻𑀭𑁄𑀯 𑀳𑀼𑀢𑁆𑀯𑀸 𑀅𑀯𑀪𑀸𑀲𑀢𑀺, 𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀜𑁆𑀳𑀺 𑀉𑀢𑁆𑀢𑀸𑀦𑀫𑁂𑀯 𑀕𑀫𑁆𑀪𑀻𑀭𑀸𑀯𑀪𑀸𑀲𑀁 𑀳𑁄𑀢𑀺 𑀧𑀽𑀢𑀺𑀧𑀡𑁆𑀡𑀭𑀲𑀯𑀲𑁂𑀦 𑀓𑀸𑀴𑀯𑀡𑁆𑀡𑀁 𑀧𑀼𑀭𑀸𑀡𑀉𑀤𑀓𑀁 𑀯𑀺𑀬. 𑀢𑀜𑁆𑀳𑀺 𑀚𑀸𑀡𑀼𑀧𑁆𑀧𑀫𑀸𑀡𑀫𑁆𑀧𑀺 𑀲𑀢𑀧𑁄𑀭𑀺𑀲𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀏𑀓𑀁 𑀕𑀫𑁆𑀪𑀻𑀭𑀁 𑀉𑀢𑁆𑀢𑀸𑀦𑀸𑀯𑀪𑀸𑀲𑀁 𑀳𑁄𑀢𑀺 𑀫𑀡𑀺𑀪𑀸𑀲𑀁 𑀯𑀺𑀧𑁆𑀧𑀲𑀦𑁆𑀦𑀉𑀤𑀓𑀁 𑀯𑀺𑀬. 𑀢𑀜𑁆𑀳𑀺 𑀲𑀢𑀧𑁄𑀭𑀺𑀲𑀫𑁆𑀧𑀺 𑀚𑀸𑀡𑀼𑀧𑁆𑀧𑀫𑀸𑀡𑀁 𑀯𑀺𑀬 𑀔𑀸𑀬𑀢𑀺. 𑀏𑀓𑀁 𑀉𑀢𑁆𑀢𑀸𑀦𑀁 𑀉𑀢𑁆𑀢𑀸𑀦𑀸𑀯𑀪𑀸𑀲𑀁 𑀳𑁄𑀢𑀺 𑀧𑀸𑀢𑀺𑀆𑀤𑀻𑀲𑀼 𑀉𑀤𑀓𑀁 𑀯𑀺𑀬. 𑀏𑀓𑀁 𑀕𑀫𑁆𑀪𑀻𑀭𑀁 𑀕𑀫𑁆𑀪𑀻𑀭𑀸𑀯𑀪𑀸𑀲𑀁 𑀳𑁄𑀢𑀺 𑀲𑀺𑀦𑁂𑀭𑀼𑀧𑀸𑀤𑀓𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀯𑀺𑀬. 𑀏𑀯𑀁 𑀉𑀤𑀓𑀫𑁂𑀯 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀢𑀺. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 𑀧𑀦𑁂𑀢𑀁 𑀦𑀢𑁆𑀣𑀺. 𑀅𑀬𑀜𑁆𑀳𑀺 𑀕𑀫𑁆𑀪𑀻𑀭𑁄 𑀘 𑀕𑀫𑁆𑀪𑀻𑀭𑀸𑀯𑀪𑀸𑀲𑁄 𑀘𑀸𑀢𑀺 𑀏𑀓𑀫𑁂𑀯 𑀦𑀸𑀫𑀁 𑀮𑀪𑀢𑀺. 𑀏𑀯𑀭𑀽𑀧𑁄 𑀲𑀫𑀸𑀦𑁄𑀧𑀺 𑀅𑀣 𑀘 𑀧𑀦 𑀫𑁂 𑀉𑀢𑁆𑀢𑀸𑀦𑀓𑀼𑀢𑁆𑀢𑀸𑀦𑀓𑁄 𑀯𑀺𑀬 𑀔𑀸𑀬𑀢𑀺, 𑀢𑀤𑀺𑀤𑀁 𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀯𑀺𑀫𑁆𑀳𑀬𑀁 𑀧𑀓𑀸𑀲𑁂𑀦𑁆𑀢𑁄 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀼𑀡𑁆𑀳𑀻𑀪𑀽𑀢𑁄 𑀦𑀺𑀲𑀻𑀤𑀺.

𑀪𑀕𑀯𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀆𑀦𑀦𑁆𑀤𑁄 𑀪𑀯𑀕𑁆𑀕𑀕𑀳𑀡𑀸𑀬 𑀳𑀢𑁆𑀣𑀁 𑀧𑀲𑀸𑀭𑁂𑀦𑁆𑀢𑁄 𑀯𑀺𑀬 𑀲𑀺𑀦𑁂𑀭𑀼𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀺𑀜𑁆𑀚𑀁 𑀦𑀻𑀳𑀭𑀺𑀢𑀼𑀁 𑀯𑀸𑀬𑀫𑀫𑀸𑀦𑁄 𑀯𑀺𑀬 𑀯𑀺𑀦𑀸 𑀦𑀸𑀯𑀸𑀬 𑀫𑀳𑀸𑀲𑀫𑀼𑀤𑁆𑀤𑀁 𑀢𑀭𑀺𑀢𑀼𑀓𑀸𑀫𑁄 𑀯𑀺𑀬 𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀣𑀯𑁄𑀚𑀁 𑀕𑀳𑁂𑀢𑀼𑀁 𑀯𑀸𑀬𑀫𑀫𑀸𑀦𑁄 𑀯𑀺𑀬 𑀩𑀼𑀤𑁆𑀥𑀯𑀺𑀲𑀬𑀁 𑀧𑀜𑁆𑀳𑀁 𑀅𑀢𑁆𑀢𑀦𑁄 𑀉𑀢𑁆𑀢𑀸𑀦𑀼𑀢𑁆𑀢𑀸𑀦𑀦𑁆𑀢𑀺 𑀯𑀤𑀢𑀺, 𑀳𑀦𑁆𑀤𑀲𑁆𑀲 𑀕𑀫𑁆𑀪𑀻𑀭𑀪𑀸𑀯𑀁 𑀆𑀘𑀺𑀓𑁆𑀔𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀫𑀸 𑀳𑁂𑀯𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀫𑀸 𑀳𑁂𑀯𑀦𑁆𑀢𑀺 𑀳-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁, 𑀏𑀯𑀁 𑀫𑀸 𑀪𑀡𑀻𑀢𑀺 𑀅𑀢𑁆𑀣𑁄. ‘‘𑀫𑀸 𑀳𑁂𑀯’’𑀦𑁆𑀢𑀺 𑀘 𑀇𑀤𑀁 𑀯𑀘𑀦𑀁 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀉𑀲𑁆𑀲𑀸𑀤𑁂𑀦𑁆𑀢𑁄𑀧𑀺 𑀪𑀡𑀢𑀺 𑀅𑀧𑀲𑀸𑀤𑁂𑀦𑁆𑀢𑁄𑀧𑀺. 𑀢𑀢𑁆𑀣 𑀉𑀲𑁆𑀲𑀸𑀤𑁂𑀦𑁆𑀢𑁄𑀧𑀻𑀢𑀺, 𑀆𑀦𑀦𑁆𑀤, 𑀢𑁆𑀯𑀁 𑀫𑀳𑀸𑀧𑀜𑁆𑀜𑁄 𑀯𑀺𑀲𑀤𑀜𑀸𑀡𑁄, 𑀢𑁂𑀦 𑀢𑁂 𑀕𑀫𑁆𑀪𑀻𑀭𑁄𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀉𑀢𑁆𑀢𑀸𑀦𑀓𑁄 𑀯𑀺𑀬 𑀔𑀸𑀬𑀢𑀺, 𑀅𑀜𑁆𑀜𑁂𑀲𑀁 𑀧𑀦𑁂𑀲 𑀉𑀢𑁆𑀢𑀸𑀦𑀓𑁄𑀢𑀺 𑀦 𑀲𑀮𑁆𑀮𑀓𑁆𑀔𑁂𑀢𑀩𑁆𑀩𑁄, 𑀕𑀫𑁆𑀪𑀻𑀭𑁄𑀬𑁂𑀯 𑀘 𑀲𑁄 𑀕𑀫𑁆𑀪𑀻𑀭𑀸𑀯𑀪𑀸𑀲𑁄 𑀘.

𑀢𑀢𑁆𑀣 𑀘𑀢𑀲𑁆𑀲𑁄 𑀉𑀧𑀫𑀸 𑀯𑀤𑀦𑁆𑀢𑀺 𑁋 𑀙 𑀫𑀸𑀲𑁂 𑀲𑀼𑀪𑁄𑀚𑀦𑀭𑀲𑀧𑀼𑀝𑁆𑀞𑀲𑁆𑀲 𑀓𑀺𑀭 𑀓𑀢𑀬𑁄𑀕𑀲𑁆𑀲 𑀫𑀳𑀸𑀫𑀮𑁆𑀮𑀲𑁆𑀲 𑀲𑀫𑀚𑁆𑀚𑀲𑀫𑀬𑁂 𑀓𑀢𑀫𑀮𑁆𑀮𑀧𑀸𑀲𑀸𑀡𑀧𑀭𑀺𑀘𑀬𑀲𑁆𑀲 𑀬𑀼𑀤𑁆𑀥𑀪𑀽𑀫𑀺𑀁 𑀕𑀘𑁆𑀙𑀦𑁆𑀢𑀲𑁆𑀲 𑀅𑀦𑁆𑀢𑀭𑀸 𑀫𑀮𑁆𑀮𑀧𑀸𑀲𑀸𑀡𑀁 𑀤𑀲𑁆𑀲𑁂𑀲𑀼𑀁. 𑀲𑁄 ‘‘𑀓𑀺𑀁 𑀏𑀢’’𑀦𑁆𑀢𑀺 𑀆𑀳. 𑀫𑀮𑁆𑀮𑀧𑀸𑀲𑀸𑀡𑁄𑀢𑀺. 𑀆𑀳𑀭𑀣 𑀦𑀦𑁆𑀢𑀺. ‘‘𑀉𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀓𑁄𑀫𑀸’’𑀢𑀺 𑀯𑀼𑀢𑁆𑀢𑁂 𑀲𑀬𑀁 𑀕𑀦𑁆𑀢𑁆𑀯𑀸 ‘‘𑀓𑀼𑀳𑀺𑀁 𑀇𑀫𑀲𑁆𑀲 𑀪𑀸𑀭𑀺𑀬𑀝𑁆𑀞𑀸𑀦’’𑀦𑁆𑀢𑀺 𑀯𑀢𑁆𑀯𑀸 𑀤𑁆𑀯𑀻𑀳𑀺 𑀳𑀢𑁆𑀣𑁂𑀳𑀺 𑀤𑁆𑀯𑁂 𑀧𑀸𑀲𑀸𑀡𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀓𑀻𑀴𑀸𑀕𑀼𑀴𑁂 𑀯𑀺𑀬 𑀔𑀺𑀧𑀺𑀢𑁆𑀯𑀸 𑀅𑀕𑀫𑀸𑀲𑀺. 𑀢𑀢𑁆𑀣 𑀫𑀮𑁆𑀮𑀲𑁆𑀲 𑀫𑀮𑁆𑀮𑀧𑀸𑀲𑀸𑀡𑁄 𑀮𑀳𑀼𑀓𑁄𑀢𑀺 𑀦 𑀅𑀜𑁆𑀜𑁂𑀲𑀫𑁆𑀧𑀺 𑀮𑀳𑀼𑀓𑁄𑀢𑀺 𑀯𑀢𑁆𑀢𑀩𑁆𑀩𑁄. 𑀙 𑀫𑀸𑀲𑁂 𑀲𑀼𑀪𑁄𑀚𑀦𑀭𑀲𑀧𑀼𑀝𑁆𑀞𑁄 𑀫𑀮𑁆𑀮𑁄 𑀯𑀺𑀬 𑀳𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄. 𑀬𑀣𑀸 𑀫𑀮𑁆𑀮𑀲𑁆𑀲 𑀫𑀳𑀸𑀩𑀮𑀢𑀸𑀬 𑀫𑀮𑁆𑀮𑀧𑀸𑀲𑀸𑀡𑁄 𑀮𑀳𑀼𑀓𑁄, 𑀏𑀯𑀁 𑀣𑁂𑀭𑀲𑁆𑀲 𑀫𑀳𑀸𑀧𑀜𑁆𑀜𑀢𑀸𑀬 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀉𑀢𑁆𑀢𑀸𑀦𑁄𑀢𑀺 𑀯𑀢𑁆𑀢𑀩𑁆𑀩𑁄, 𑀲𑁄 𑀅𑀜𑁆𑀜𑁂𑀲𑀁 𑀉𑀢𑁆𑀢𑀸𑀦𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄.

𑀫𑀳𑀸𑀲𑀫𑀼𑀤𑁆𑀤𑁂 𑀘 𑀢𑀺𑀫𑀺 𑀦𑀸𑀫 𑀫𑀳𑀸𑀫𑀘𑁆𑀙𑁄 𑀤𑁆𑀯𑀺𑀬𑁄𑀚𑀦𑀲𑀢𑀺𑀓𑁄, 𑀢𑀺𑀫𑀺𑀗𑁆𑀕𑀮𑁄 𑀢𑀺𑀬𑁄𑀚𑀦𑀲𑀢𑀺𑀓𑁄, 𑀢𑀺𑀫𑀺𑀭𑀧𑀺𑀗𑁆𑀕𑀮𑁄 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑁄, 𑀆𑀦𑀦𑁆𑀤𑁄 𑀢𑀺𑀫𑀺𑀦𑀦𑁆𑀤𑁄 𑀅𑀚𑁆𑀛𑀸𑀭𑁄𑀳𑁄 𑀫𑀳𑀸𑀢𑀺𑀫𑀻𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀬𑁄𑀚𑀦𑀲𑀳𑀲𑁆𑀲𑀺𑀓𑀸. 𑀢𑀢𑁆𑀣 𑀢𑀺𑀫𑀺𑀭𑀧𑀺𑀗𑁆𑀕𑀮𑁂𑀦𑁂𑀯 𑀤𑀻𑀧𑁂𑀦𑁆𑀢𑀺. 𑀢𑀲𑁆𑀲 𑀓𑀺𑀭 𑀤𑀓𑁆𑀔𑀺𑀡𑀓𑀡𑁆𑀡𑀁 𑀘𑀸𑀮𑁂𑀦𑁆𑀢𑀲𑁆𑀲 𑀧𑀜𑁆𑀘𑀬𑁄𑀚𑀦𑀲𑀢𑁂 𑀧𑀤𑁂𑀲𑁂 𑀉𑀤𑀓𑀁 𑀘𑀮𑀢𑀺, 𑀢𑀣𑀸 𑀯𑀸𑀫𑀓𑀡𑁆𑀡𑀁, 𑀢𑀣𑀸 𑀦𑀗𑁆𑀕𑀼𑀝𑁆𑀞𑀁, 𑀢𑀣𑀸 𑀲𑀻𑀲𑀁. 𑀤𑁆𑀯𑁂 𑀧𑀦 𑀓𑀡𑁆𑀡𑁂 𑀘𑀸𑀮𑁂𑀢𑁆𑀯𑀸 𑀦𑀗𑁆𑀕𑀼𑀝𑁆𑀞𑁂𑀦 𑀧𑀳𑀭𑀺𑀢𑁆𑀯𑀸 𑀲𑀻𑀲𑀁 𑀅𑀧𑀭𑀸𑀧𑀭𑀁 𑀓𑀢𑁆𑀯𑀸 𑀓𑀻𑀴𑀺𑀢𑀼𑀁 𑀆𑀭𑀤𑁆𑀥𑀲𑁆𑀲 𑀲𑀢𑁆𑀢𑀝𑁆𑀞𑀬𑁄𑀚𑀦𑀲𑀢𑁂 𑀞𑀸𑀦𑁂 𑀪𑀸𑀚𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀉𑀤𑁆𑀥𑀦𑁂 𑀆𑀭𑁄𑀧𑀺𑀢𑀁 𑀯𑀺𑀬 𑀉𑀤𑀓𑀁 𑀧𑀓𑁆𑀓𑀼𑀣𑀢𑀺. 𑀬𑁄𑀚𑀦𑀲𑀢𑀫𑀢𑁆𑀢𑁂 𑀧𑀤𑁂𑀲𑁂 𑀉𑀤𑀓𑀁 𑀧𑀺𑀝𑁆𑀞𑀺𑀁 𑀙𑀸𑀤𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑀁 𑀫𑀳𑀸𑀲𑀫𑀼𑀤𑁆𑀤𑁄 𑀕𑀫𑁆𑀪𑀻𑀭𑁄𑀢𑀺 𑀯𑀤𑀦𑁆𑀢𑀺, 𑀓𑀼𑀢𑀲𑁆𑀲 𑀕𑀫𑁆𑀪𑀻𑀭𑀢𑀸, 𑀫𑀬𑀁 𑀧𑀺𑀝𑁆𑀞𑀺𑀫𑀢𑁆𑀢𑀘𑁆𑀙𑀸𑀤𑀦𑀫𑁆𑀧𑀺 𑀉𑀤𑀓𑀁 𑀦 𑀮𑀪𑀸𑀫𑀸’’𑀢𑀺. 𑀢𑀢𑁆𑀣 𑀓𑀸𑀬𑀽𑀧𑀧𑀦𑁆𑀦𑀲𑁆𑀲 𑀢𑀺𑀫𑀺𑀭𑀧𑀺𑀗𑁆𑀕𑀮𑀲𑁆𑀲 𑀫𑀳𑀸𑀲𑀫𑀼𑀤𑁆𑀤𑁄 𑀉𑀢𑁆𑀢𑀸𑀦𑁄𑀢𑀺 𑀅𑀜𑁆𑀜𑁂𑀲𑀜𑁆𑀘 𑀔𑀼𑀤𑁆𑀤𑀓𑀫𑀘𑁆𑀙𑀸𑀦𑀁 𑀉𑀢𑁆𑀢𑀸𑀦𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄, 𑀏𑀯𑀫𑁂𑀯 𑀜𑀸𑀡𑀽𑀧𑀧𑀦𑁆𑀦𑀲𑁆𑀲 𑀣𑁂𑀭𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀉𑀢𑁆𑀢𑀸𑀦𑁄𑀢𑀺 𑀅𑀜𑁆𑀜𑁂𑀲𑀫𑁆𑀧𑀺 𑀉𑀢𑁆𑀢𑀸𑀦𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀲𑀼𑀧𑀡𑁆𑀡𑀭𑀸𑀚𑀸 𑀘 𑀤𑀺𑀬𑀟𑁆𑀠𑀬𑁄𑀚𑀦𑀲𑀢𑀺𑀓𑁄 𑀳𑁄𑀢𑀺. 𑀢𑀲𑁆𑀲 𑀤𑀓𑁆𑀔𑀺𑀡𑀧𑀓𑁆𑀔𑁄 𑀧𑀜𑁆𑀜𑀸𑀲𑀬𑁄𑀚𑀦𑀺𑀓𑁄 𑀳𑁄𑀢𑀺, 𑀢𑀣𑀸 𑀯𑀸𑀫𑀧𑀓𑁆𑀔𑁄, 𑀧𑀺𑀜𑁆𑀙𑀯𑀝𑁆𑀝𑀺 𑀘 𑀲𑀝𑁆𑀞𑀺𑀬𑁄𑀚𑀦𑀺𑀓𑀸, 𑀕𑀻𑀯𑀸 𑀢𑀺𑀁𑀲𑀬𑁄𑀚𑀦𑀺𑀓𑀸, 𑀫𑀼𑀔𑀁 𑀦𑀯𑀬𑁄𑀚𑀦𑀁, 𑀧𑀸𑀤𑀸 𑀤𑁆𑀯𑀸𑀤𑀲𑀬𑁄𑀚𑀦𑀺𑀓𑀸, 𑀢𑀲𑁆𑀫𑀺𑀁 𑀲𑀼𑀧𑀡𑁆𑀡𑀯𑀸𑀢𑀁 𑀤𑀲𑁆𑀲𑁂𑀢𑀼𑀁 𑀆𑀭𑀤𑁆𑀥𑁂 𑀲𑀢𑁆𑀢𑀝𑁆𑀞𑀬𑁄𑀚𑀦𑀲𑀢𑀁 𑀞𑀸𑀦𑀁 𑀦𑀧𑁆𑀧𑀳𑁄𑀢𑀺. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑀁 𑀆𑀓𑀸𑀲𑁄 𑀅𑀦𑀦𑁆𑀢𑁄𑀢𑀺 𑀯𑀤𑀦𑁆𑀢𑀺, 𑀓𑀼𑀢𑀲𑁆𑀲 𑀅𑀦𑀦𑁆𑀢𑀢𑀸, 𑀫𑀬𑀁 𑀧𑀓𑁆𑀔𑀯𑀸𑀢𑀧𑁆𑀧𑀢𑁆𑀣𑀭𑀡𑁄𑀓𑀸𑀲𑀫𑁆𑀧𑀺 𑀦 𑀮𑀪𑀸𑀫𑀸’’𑀢𑀺. 𑀢𑀢𑁆𑀣 𑀓𑀸𑀬𑀽𑀧𑀧𑀦𑁆𑀦𑀲𑁆𑀲 𑀲𑀼𑀧𑀡𑁆𑀡𑀭𑀜𑁆𑀜𑁄 𑀆𑀓𑀸𑀲𑁄 𑀧𑀭𑀺𑀢𑁆𑀢𑁄𑀢𑀺 𑀅𑀜𑁆𑀜𑁂𑀲𑀜𑁆𑀘 𑀔𑀼𑀤𑁆𑀤𑀓𑀧𑀓𑁆𑀔𑀻𑀦𑀁 𑀧𑀭𑀺𑀢𑁆𑀢𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄, 𑀏𑀯𑀫𑁂𑀯 𑀜𑀸𑀡𑀽𑀧𑀧𑀦𑁆𑀦𑀲𑁆𑀲 𑀣𑁂𑀭𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀉𑀢𑁆𑀢𑀸𑀦𑁄𑀢𑀺 𑀅𑀜𑁆𑀜𑁂𑀲𑀫𑁆𑀧𑀺 𑀉𑀢𑁆𑀢𑀸𑀦𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄.

𑀭𑀸𑀳𑀼 𑀅𑀲𑀼𑀭𑀺𑀦𑁆𑀤𑁄 𑀧𑀦 𑀧𑀸𑀤𑀦𑁆𑀢𑀢𑁄 𑀬𑀸𑀯 𑀓𑁂𑀲𑀦𑁆𑀢𑀸 𑀬𑁄𑀚𑀦𑀸𑀦𑀁 𑀘𑀢𑁆𑀢𑀸𑀭𑀺 𑀲𑀳𑀲𑁆𑀲𑀸𑀦𑀺 𑀅𑀝𑁆𑀞 𑀘 𑀲𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀲𑁆𑀲 𑀤𑁆𑀯𑀺𑀦𑁆𑀦𑀁 𑀩𑀸𑀳𑀸𑀦𑀁 𑀅𑀦𑁆𑀢𑀭𑁂 𑀤𑁆𑀯𑀸𑀤𑀲𑀬𑁄𑀚𑀦𑀲𑀢𑀺𑀓𑀁, 𑀩𑀳𑀮𑀢𑁆𑀢𑁂𑀦 𑀙𑀬𑁄𑀚𑀦𑀲𑀢𑀺𑀓𑀁, 𑀳𑀢𑁆𑀣𑀧𑀸𑀤𑀢𑀮𑀸𑀦𑀺 𑀢𑀺𑀬𑁄𑀚𑀦𑀲𑀢𑀺𑀓𑀸𑀦𑀺, 𑀢𑀣𑀸 𑀫𑀼𑀔𑀁, 𑀏𑀓𑀗𑁆𑀕𑀼𑀮𑀺𑀧𑀩𑁆𑀩𑀁 𑀧𑀜𑁆𑀜𑀸𑀲𑀬𑁄𑀚𑀦𑀁, 𑀢𑀣𑀸 𑀪𑀫𑀼𑀓𑀦𑁆𑀢𑀭𑀁, 𑀦𑀮𑀸𑀝𑀁 𑀢𑀺𑀬𑁄𑀚𑀦𑀲𑀢𑀺𑀓𑀁, 𑀲𑀻𑀲𑀁 𑀦𑀯𑀬𑁄𑀚𑀦𑀲𑀢𑀺𑀓𑀁. 𑀢𑀲𑁆𑀲 𑀫𑀳𑀸𑀲𑀫𑀼𑀤𑁆𑀤𑀁 𑀑𑀢𑀺𑀡𑁆𑀡𑀲𑁆𑀲 𑀕𑀫𑁆𑀪𑀻𑀭𑀁 𑀉𑀤𑀓𑀁 𑀚𑀸𑀡𑀼𑀧𑁆𑀧𑀫𑀸𑀡𑀁 𑀳𑁄𑀢𑀺. 𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀬𑀁 𑀫𑀳𑀸𑀲𑀫𑀼𑀤𑁆𑀤𑁄 𑀕𑀫𑁆𑀪𑀻𑀭𑁄𑀢𑀺 𑀯𑀤𑀦𑁆𑀢𑀺. 𑀓𑀼𑀢𑀲𑁆𑀲 𑀕𑀫𑁆𑀪𑀻𑀭𑀢𑀸? 𑀫𑀬𑀁 𑀚𑀸𑀡𑀼𑀧𑁆𑀧𑀝𑀺𑀘𑁆𑀙𑀸𑀤𑀦𑀫𑀢𑁆𑀢𑀫𑁆𑀧𑀺 𑀉𑀤𑀓𑀁 𑀦 𑀮𑀪𑀸𑀫𑀸’’𑀢𑀺. 𑀢𑀢𑁆𑀣 𑀓𑀸𑀬𑀽𑀧𑀧𑀦𑁆𑀦𑀲𑁆𑀲 𑀭𑀸𑀳𑀼𑀦𑁄 𑀫𑀳𑀸𑀲𑀫𑀼𑀤𑁆𑀤𑁄 𑀉𑀢𑁆𑀢𑀸𑀦𑁄𑀢𑀺 𑀅𑀜𑁆𑀜𑁂𑀲𑀜𑁆𑀘 𑀉𑀢𑁆𑀢𑀸𑀦𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀏𑀯𑀫𑁂𑀯 𑀜𑀸𑀡𑀽𑀧𑀧𑀦𑁆𑀦𑀲𑁆𑀲 𑀣𑁂𑀭𑀲𑁆𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀉𑀢𑁆𑀢𑀸𑀦𑁄𑀢𑀺 𑀅𑀜𑁆𑀜𑁂𑀲𑀫𑁆𑀧𑀺 𑀉𑀢𑁆𑀢𑀸𑀦𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀏𑀢𑀫𑀢𑁆𑀣𑀁 𑀲𑀦𑁆𑀥𑀸𑀬 𑀪𑀕𑀯𑀸 𑀫𑀸 𑀳𑁂𑀯𑀁, 𑀆𑀦𑀦𑁆𑀤, 𑀫𑀸 𑀳𑁂𑀯𑀁, 𑀆𑀦𑀦𑁆𑀤𑀸𑀢𑀺 𑀆𑀳.

𑀣𑁂𑀭𑀲𑁆𑀲 𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀕𑀫𑁆𑀪𑀻𑀭𑁄 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀉𑀢𑁆𑀢𑀸𑀦𑁄𑀢𑀺 𑀉𑀧𑀝𑁆𑀞𑀸𑀲𑀺. 𑀓𑀢𑀫𑁂𑀳𑀺 𑀘𑀢𑀽𑀳𑀺? 𑀧𑀼𑀩𑁆𑀩𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀢𑀺𑀢𑁆𑀣𑀯𑀸𑀲𑁂𑀦 𑀲𑁄𑀢𑀸𑀧𑀦𑁆𑀦𑀢𑀸𑀬 𑀩𑀳𑀼𑀲𑁆𑀲𑀼𑀢𑀪𑀸𑀯𑁂𑀦𑀸𑀢𑀺.

𑀇𑀢𑁄 𑀓𑀺𑀭 𑀲𑀢𑀲𑀳𑀲𑁆𑀲𑀺𑀫𑁂 𑀓𑀧𑁆𑀧𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀲𑀢𑁆𑀣𑀸 𑀮𑁄𑀓𑁂 𑀉𑀧𑁆𑀧𑀚𑁆𑀚𑀺. 𑀢𑀲𑁆𑀲 𑀳𑀁𑀲𑀯𑀢𑀻 𑀦𑀸𑀫 𑀦𑀕𑀭𑀁 𑀅𑀳𑁄𑀲𑀺, 𑀆𑀦𑀦𑁆𑀤𑁄 𑀦𑀸𑀫 𑀭𑀸𑀚𑀸 𑀧𑀺𑀢𑀸, 𑀲𑀼𑀫𑁂𑀥𑀸 𑀦𑀸𑀫 𑀤𑁂𑀯𑀻 𑀫𑀸𑀢𑀸, 𑀩𑁄𑀥𑀺𑀲𑀢𑁆𑀢𑁄 𑀉𑀢𑁆𑀢𑀭𑀓𑀼𑀫𑀸𑀭𑁄 𑀦𑀸𑀫 𑀅𑀳𑁄𑀲𑀺. 𑀲𑁄 𑀧𑀼𑀢𑁆𑀢𑀲𑁆𑀲 𑀚𑀸𑀢𑀤𑀺𑀯𑀲𑁂 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑁆𑀯𑀸 𑀧𑀥𑀸𑀦𑀫𑀦𑀼𑀬𑀼𑀢𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸, ‘‘𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭’’𑀦𑁆𑀢𑀺 𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 𑀲𑀢𑁆𑀢𑀸𑀳𑀁 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 ‘‘𑀧𑀣𑀯𑀺𑀬𑀁 𑀧𑀸𑀤𑀁 𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀧𑀸𑀤𑀁 𑀅𑀪𑀺𑀦𑀻𑀳𑀭𑀺. 𑀅𑀣 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀫𑀳𑀦𑁆𑀢𑀁 𑀧𑀤𑀼𑀫𑀁 𑀉𑀝𑁆𑀞𑀸𑀲𑀺. 𑀢𑀲𑁆𑀲 𑀥𑀼𑀭𑀧𑀢𑁆𑀢𑀸𑀦𑀺 𑀦𑀯𑀼𑀢𑀺𑀳𑀢𑁆𑀣𑀸𑀦𑀺, 𑀓𑁂𑀲𑀭𑀁 𑀢𑀺𑀁𑀲𑀳𑀢𑁆𑀣𑀁, 𑀓𑀡𑁆𑀡𑀺𑀓𑀸 𑀤𑁆𑀯𑀸𑀤𑀲𑀳𑀢𑁆𑀣𑀸, 𑀦𑀯𑀖𑀝𑀧𑁆𑀧𑀫𑀸𑀡𑀸 𑀭𑁂𑀡𑀼 𑀅𑀳𑁄𑀲𑀺.

𑀲𑀢𑁆𑀣𑀸 𑀧𑀦 𑀉𑀩𑁆𑀩𑁂𑀥𑀢𑁄 𑀅𑀝𑁆𑀞𑀧𑀜𑁆𑀜𑀸𑀲𑀳𑀢𑁆𑀣𑁄 𑀅𑀳𑁄𑀲𑀺, 𑀢𑀲𑁆𑀲 𑀉𑀪𑀺𑀦𑁆𑀦𑀁 𑀩𑀸𑀳𑀸𑀦𑀫𑀦𑁆𑀢𑀭𑀁 𑀅𑀝𑁆𑀞𑀸𑀭𑀲𑀳𑀢𑁆𑀣𑀁, 𑀦𑀮𑀸𑀝𑀁 𑀧𑀜𑁆𑀘𑀳𑀢𑁆𑀣𑀁, 𑀳𑀢𑁆𑀣𑀧𑀸𑀤𑀸 𑀏𑀓𑀸𑀤𑀲𑀳𑀢𑁆𑀣𑀸. 𑀢𑀲𑁆𑀲 𑀏𑀓𑀸𑀤𑀲𑀳𑀢𑁆𑀣𑁂𑀦 𑀧𑀸𑀤𑁂𑀦 𑀤𑁆𑀯𑀸𑀤𑀲𑀳𑀢𑁆𑀣𑀸𑀬 𑀓𑀡𑁆𑀡𑀺𑀓𑀸𑀬 𑀅𑀓𑁆𑀓𑀦𑁆𑀢𑀫𑀢𑁆𑀢𑀸𑀬 𑀦𑀯𑀖𑀝𑀧𑁆𑀧𑀫𑀸𑀡𑀸 𑀭𑁂𑀡𑀼 𑀉𑀝𑁆𑀞𑀸𑀬 𑀅𑀝𑁆𑀞𑀧𑀜𑁆𑀜𑀸𑀲𑀳𑀢𑁆𑀣𑀁 𑀧𑀤𑁂𑀲𑀁 𑀉𑀕𑁆𑀕𑀦𑁆𑀢𑁆𑀯𑀸 𑀑𑀓𑀺𑀡𑁆𑀡𑀫𑀦𑁄𑀲𑀺𑀮𑀸𑀘𑀼𑀡𑁆𑀡𑀁 𑀯𑀺𑀬 𑀧𑀘𑁆𑀘𑁄𑀓𑀺𑀡𑁆𑀡𑀁. 𑀢𑀤𑀼𑀧𑀸𑀤𑀸𑀬 𑀪𑀕𑀯𑀸 ‘‘𑀧𑀤𑀼𑀫𑀼𑀢𑁆𑀢𑀭𑁄’’𑀢𑁆𑀯𑁂𑀯 𑀧𑀜𑁆𑀜𑀸𑀬𑀺𑀢𑁆𑀣. 𑀢𑀲𑁆𑀲 𑀤𑁂𑀯𑀺𑀮𑁄 𑀘 𑀲𑀼𑀚𑀸𑀢𑁄 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀅𑀳𑁂𑀲𑀼𑀁, 𑀅𑀫𑀺𑀢𑀸 𑀘 𑀅𑀲𑀫𑀸 𑀘 𑀤𑁆𑀯𑁂 𑀅𑀕𑁆𑀕𑀲𑀸𑀯𑀺𑀓𑀸, 𑀲𑀼𑀫𑀦𑁄 𑀦𑀸𑀫 𑀉𑀧𑀝𑁆𑀞𑀸𑀓𑁄. 𑀧𑀤𑀼𑀫𑀼𑀢𑁆𑀢𑀭𑁄 𑀪𑀕𑀯𑀸 𑀧𑀺𑀢𑀼𑀲𑀗𑁆𑀕𑀳𑀁 𑀓𑀼𑀭𑀼𑀫𑀸𑀦𑁄 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀧𑀭𑀺𑀯𑀸𑀭𑁄 𑀳𑀁𑀲𑀯𑀢𑀺𑀬𑀸 𑀭𑀸𑀚𑀥𑀸𑀦𑀺𑀬𑀸 𑀯𑀲𑀢𑀺.

𑀓𑀦𑀺𑀝𑁆𑀞𑀪𑀸𑀢𑀸 𑀧𑀦𑀲𑁆𑀲 𑀲𑀼𑀫𑀦𑀓𑀼𑀫𑀸𑀭𑁄 𑀦𑀸𑀫. 𑀢𑀲𑁆𑀲 𑀭𑀸𑀚𑀸 𑀳𑀁𑀲𑀯𑀢𑀺𑀢𑁄 𑀯𑀻𑀲𑀬𑁄𑀚𑀦𑀲𑀢𑁂 𑀪𑁄𑀕𑀁 𑀅𑀤𑀸𑀲𑀺. 𑀲𑁄 𑀓𑀤𑀸𑀘𑀺 𑀆𑀕𑀦𑁆𑀢𑁆𑀯𑀸 𑀧𑀺𑀢𑀭𑀜𑁆𑀘 𑀲𑀢𑁆𑀣𑀸𑀭𑀜𑁆𑀘 𑀧𑀲𑁆𑀲𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀧𑀘𑁆𑀘𑀦𑁆𑀢𑁄 𑀓𑀼𑀧𑀺𑀢𑁄. 𑀲𑀼𑀫𑀦𑁄 𑀭𑀜𑁆𑀜𑁄 𑀲𑀸𑀲𑀦𑀁 𑀧𑁂𑀲𑁂𑀲𑀺. 𑀭𑀸𑀚𑀸 ‘‘𑀢𑁆𑀯𑀁 𑀫𑀬𑀸, 𑀢𑀸𑀢, 𑀓𑀲𑁆𑀫𑀸 𑀞𑀧𑀺𑀢𑁄’’𑀢𑀺 𑀧𑀝𑀺𑀧𑁂𑀲𑁂𑀲𑀺. 𑀲𑁄 𑀘𑁄𑀭𑁂 𑀯𑀽𑀧𑀲𑀫𑁂𑀢𑁆𑀯𑀸 ‘‘𑀉𑀧𑀲𑀦𑁆𑀢𑁄, 𑀤𑁂𑀯, 𑀚𑀦𑀧𑀤𑁄’’𑀢𑀺 𑀭𑀜𑁆𑀜𑁄 𑀧𑁂𑀲𑁂𑀲𑀺. 𑀭𑀸𑀚𑀸 𑀢𑀼𑀝𑁆𑀞𑁄 ‘‘𑀲𑀻𑀖𑀁 𑀫𑀫 𑀧𑀼𑀢𑁆𑀢𑁄 𑀆𑀕𑀘𑁆𑀙𑀢𑀽’’𑀢𑀺 𑀆𑀳. 𑀢𑀲𑁆𑀲 𑀲𑀳𑀲𑁆𑀲𑀫𑀢𑁆𑀢𑀸 𑀅𑀫𑀘𑁆𑀘𑀸 𑀳𑁄𑀦𑁆𑀢𑀺. 𑀲𑁄 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀧𑀺𑀢𑀸 𑀢𑀼𑀝𑁆𑀞𑁄 𑀲𑀘𑁂 𑀫𑁂 𑀯𑀭𑀁 𑀤𑁂𑀢𑀺, 𑀓𑀺𑀁 𑀕𑀡𑁆𑀳𑀸𑀫𑀻’’𑀢𑀺? 𑀅𑀣 𑀦𑀁 𑀏𑀓𑀘𑁆𑀘𑁂 ‘‘𑀳𑀢𑁆𑀣𑀺𑀁 𑀕𑀡𑁆𑀳𑀣, 𑀅𑀲𑁆𑀲𑀁 𑀕𑀡𑁆𑀳𑀣, 𑀚𑀦𑀧𑀤𑀁 𑀕𑀡𑁆𑀳𑀣, 𑀲𑀢𑁆𑀢𑀭𑀢𑀦𑀸𑀦𑀺 𑀕𑀡𑁆𑀳𑀣𑀸’’𑀢𑀺 𑀆𑀳𑀁𑀲𑀼. 𑀅𑀧𑀭𑁂 ‘‘𑀢𑀼𑀫𑁆𑀳𑁂 𑀧𑀣𑀯𑀺𑀲𑁆𑀲𑀭𑀲𑁆𑀲 𑀧𑀼𑀢𑁆𑀢𑀸, 𑀦 𑀢𑀼𑀫𑁆𑀳𑀸𑀓𑀁 𑀥𑀦𑀁 𑀤𑀼𑀮𑁆𑀮𑀪𑀁, 𑀮𑀤𑁆𑀥𑀫𑁆𑀧𑀺 𑀘𑁂𑀢𑀁 𑀲𑀩𑁆𑀩𑀁 𑀧𑀳𑀸𑀬 𑀕𑀫𑀦𑀻𑀬𑀁, 𑀧𑀼𑀜𑁆𑀜𑀫𑁂𑀯 𑀏𑀓𑀁 𑀆𑀤𑀸𑀬 𑀕𑀫𑀦𑀻𑀬𑀁, 𑀢𑀲𑁆𑀫𑀸 𑀤𑁂𑀯𑁂 𑀯𑀭𑀁 𑀤𑀤𑀫𑀸𑀦𑁂 𑀢𑁂𑀫𑀸𑀲𑀁 𑀧𑀤𑀼𑀫𑀼𑀢𑁆𑀢𑀭𑀁 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀸𑀢𑀼𑀁 𑀯𑀭𑀁 𑀕𑀡𑁆𑀳𑀣𑀸’’𑀢𑀺. 𑀲𑁄 ‘‘𑀢𑀼𑀫𑁆𑀳𑁂 𑀫𑀬𑁆𑀳𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀸 𑀦𑀸𑀫, 𑀫𑀫𑁂𑀢𑀁 𑀘𑀺𑀢𑁆𑀢𑀁 𑀦𑀢𑁆𑀣𑀺, 𑀢𑀼𑀫𑁆𑀳𑁂𑀳𑀺 𑀧𑀦 𑀉𑀧𑁆𑀧𑀸𑀤𑀺𑀢𑀁, 𑀏𑀯𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺, 𑀕𑀦𑁆𑀢𑁆𑀯𑀸 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀺𑀢𑀭𑀸 𑀆𑀮𑀺𑀗𑁆𑀕𑁂𑀢𑁆𑀯𑀸, 𑀫𑀢𑁆𑀣𑀓𑁂 𑀘𑀼𑀫𑁆𑀩𑀺𑀢𑁆𑀯𑀸 ‘‘𑀯𑀭𑀁 𑀢𑁂, 𑀧𑀼𑀢𑁆𑀢, 𑀤𑁂𑀫𑀻’’𑀢𑀺 𑀯𑀼𑀢𑁆𑀢𑁂 ‘‘𑀇𑀘𑁆𑀙𑀸𑀫𑀳𑀁, 𑀫𑀳𑀸𑀭𑀸𑀚, 𑀪𑀕𑀯𑀦𑁆𑀢𑀁 𑀢𑁂𑀫𑀸𑀲𑀁 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀳𑀦𑁆𑀢𑁄 𑀚𑀻𑀯𑀺𑀢𑀁 𑀅𑀯𑀜𑁆𑀛𑀁 𑀓𑀸𑀢𑀼𑀁, 𑀇𑀤𑀁 𑀫𑁂 𑀯𑀭𑀁 𑀤𑁂𑀳𑀻’’𑀢𑀺 𑀆𑀳. 𑀦 𑀲𑀓𑁆𑀓𑀸, 𑀢𑀸𑀢, 𑀅𑀜𑁆𑀜𑀁 𑀯𑀭𑁂𑀳𑀻𑀢𑀺. 𑀤𑁂𑀯, 𑀔𑀢𑁆𑀢𑀺𑀬𑀸𑀦𑀁 𑀦𑀸𑀫 𑀤𑁆𑀯𑁂𑀓𑀣𑀸 𑀦𑀢𑁆𑀣𑀺, 𑀏𑀢𑀫𑁂𑀯 𑀫𑁂 𑀤𑁂𑀳𑀺, 𑀦 𑀫𑀫𑀜𑁆𑀜𑁂𑀦 𑀅𑀢𑁆𑀣𑁄𑀢𑀺. 𑀢𑀸𑀢, 𑀩𑀼𑀤𑁆𑀥𑀸𑀦𑀁 𑀦𑀸𑀫 𑀘𑀺𑀢𑁆𑀢𑀁 𑀤𑀼𑀚𑁆𑀚𑀸𑀦𑀁, 𑀲𑀘𑁂 𑀪𑀕𑀯𑀸 𑀦 𑀇𑀘𑁆𑀙𑀺𑀲𑁆𑀲𑀢𑀺, 𑀫𑀬𑀸 𑀤𑀺𑀦𑁆𑀦𑀫𑁆𑀧𑀺 𑀓𑀺𑀁 𑀪𑀯𑀺𑀲𑁆𑀲𑀢𑀻𑀢𑀺? ‘‘𑀲𑀸𑀥𑀼, 𑀤𑁂𑀯, 𑀅𑀳𑀁 𑀪𑀕𑀯𑀢𑁄 𑀘𑀺𑀢𑁆𑀢𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀳𑀸𑀭𑀁 𑀕𑀢𑁄.

𑀢𑁂𑀦 𑀘 𑀲𑀫𑀬𑁂𑀦 𑀪𑀢𑁆𑀢𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀝𑁆𑀞𑁄 𑀳𑁄𑀢𑀺. 𑀲𑁄 𑀫𑀡𑁆𑀟𑀮𑀫𑀸𑀴𑁂 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀢𑁂 𑀦𑀁 𑀆𑀳𑀁𑀲𑀼 𑁋 ‘‘𑀭𑀸𑀚𑀧𑀼𑀢𑁆𑀢 𑀓𑀲𑁆𑀫𑀸 𑀆𑀕𑀢𑁄𑀲𑀻’’𑀢𑀺? 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬, 𑀤𑀲𑁆𑀲𑁂𑀣 𑀫𑁂 𑀪𑀕𑀯𑀦𑁆𑀢𑀦𑁆𑀢𑀺. ‘‘𑀦 𑀫𑀬𑀁, 𑀭𑀸𑀚𑀧𑀼𑀢𑁆𑀢, 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀲𑀢𑁆𑀣𑀸𑀭𑀁 𑀤𑀝𑁆𑀞𑀼𑀁 𑀮𑀪𑀸𑀫𑀸’’𑀢𑀺. 𑀓𑁄 𑀧𑀦, 𑀪𑀦𑁆𑀢𑁂, 𑀮𑀪𑀢𑀻𑀢𑀺? 𑀲𑀼𑀫𑀦𑀢𑁆𑀣𑁂𑀭𑁄 𑀦𑀸𑀫 𑀭𑀸𑀚𑀧𑀼𑀢𑁆𑀢𑀸𑀢𑀺. 𑀲𑁄 ‘‘𑀓𑀼𑀳𑀺𑀁 𑀪𑀦𑁆𑀢𑁂 𑀣𑁂𑀭𑁄’’𑀢𑀺? 𑀣𑁂𑀭𑀲𑁆𑀲 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀧𑀼𑀘𑁆𑀙𑀺𑀢𑁆𑀯𑀸 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑁋 ‘‘𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀧𑀲𑁆𑀲𑀺𑀢𑀼𑀁, 𑀤𑀲𑁆𑀲𑁂𑀣 𑀫𑁂 𑀪𑀕𑀯𑀦𑁆𑀢’’𑀦𑁆𑀢𑀺 𑀆𑀳. 𑀣𑁂𑀭𑁄 ‘‘𑀏𑀳𑀺, 𑀭𑀸𑀚𑀧𑀼𑀢𑁆𑀢𑀸’’𑀢𑀺 𑀢𑀁 𑀕𑀳𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑁂 𑀞𑀧𑁂𑀢𑁆𑀯𑀸 𑀕𑀦𑁆𑀥𑀓𑀼𑀝𑀺𑀁 𑀆𑀭𑀼𑀳𑀺. 𑀅𑀣 𑀦𑀁 𑀪𑀕𑀯𑀸 ‘‘𑀲𑀼𑀫𑀦, 𑀓𑀲𑁆𑀫𑀸 𑀆𑀕𑀢𑁄𑀲𑀻’’𑀢𑀺 𑀆𑀳. 𑀭𑀸𑀚𑀧𑀼𑀢𑁆𑀢𑁄, 𑀪𑀦𑁆𑀢𑁂, 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀆𑀕𑀢𑁄𑀢𑀺. 𑀢𑁂𑀦 𑀳𑀺 𑀪𑀺𑀓𑁆𑀔𑀼 𑀆𑀲𑀦𑀁 𑀧𑀜𑁆𑀜𑀧𑁂𑀳𑀻𑀢𑀺. 𑀣𑁂𑀭𑁄 𑀆𑀲𑀦𑀁 𑀧𑀜𑁆𑀜𑀧𑁂𑀲𑀺. 𑀦𑀺𑀲𑀻𑀤𑀺 𑀪𑀕𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂. 𑀭𑀸𑀚𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀅𑀓𑀸𑀲𑀺, ‘‘𑀓𑀤𑀸 𑀆𑀕𑀢𑁄𑀲𑀺 𑀭𑀸𑀚𑀧𑀼𑀢𑁆𑀢𑀸’’𑀢𑀺? 𑀪𑀦𑁆𑀢𑁂, 𑀢𑀼𑀫𑁆𑀳𑁂𑀲𑀼 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀝𑁆𑀞𑁂𑀲𑀼, 𑀪𑀺𑀓𑁆𑀔𑀽 𑀧𑀦 ‘‘𑀦 𑀫𑀬𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀪𑀕𑀯𑀦𑁆𑀢𑀁 𑀤𑀝𑁆𑀞𑀼𑀁 𑀮𑀪𑀸𑀫𑀸’’𑀢𑀺 𑀫𑀁 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀧𑀸𑀳𑁂𑀲𑀼𑀁, 𑀣𑁂𑀭𑁄 𑀧𑀦 𑀏𑀓𑀯𑀘𑀦𑁂𑀦𑁂𑀯 𑀤𑀲𑁆𑀲𑁂𑀲𑀺, 𑀣𑁂𑀭𑁄, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀲𑀸𑀲𑀦𑁂 𑀯𑀮𑁆𑀮𑀪𑁄 𑀫𑀜𑁆𑀜𑁂𑀢𑀺. 𑀆𑀫, 𑀭𑀸𑀚𑀓𑀼𑀫𑀸𑀭, 𑀯𑀮𑁆𑀮𑀪𑁄 𑀏𑀲 𑀪𑀺𑀓𑁆𑀔𑀼 𑀫𑀬𑁆𑀳𑀁 𑀲𑀸𑀲𑀦𑁂𑀢𑀺. 𑀪𑀦𑁆𑀢𑁂, 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑁂 𑀓𑀺𑀁 𑀓𑀢𑁆𑀯𑀸 𑀯𑀮𑁆𑀮𑀪𑁄 𑀳𑁄𑀢𑀻𑀢𑀺? 𑀤𑀸𑀦𑀁 𑀤𑀢𑁆𑀯𑀸 𑀲𑀻𑀮𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀓𑀢𑁆𑀯𑀸, 𑀓𑀼𑀫𑀸𑀭𑀸𑀢𑀺. 𑀪𑀕𑀯𑀸 𑀅𑀳𑀫𑁆𑀧𑀺 𑀣𑁂𑀭𑁄 𑀯𑀺𑀬 𑀩𑀼𑀤𑁆𑀥𑀲𑀸𑀲𑀦𑁂 𑀯𑀮𑁆𑀮𑀪𑁄 𑀳𑁄𑀢𑀼𑀓𑀸𑀫𑁄, 𑀢𑁂𑀫𑀸𑀲𑀁 𑀫𑁂 𑀯𑀲𑁆𑀲𑀸𑀯𑀸𑀲𑀁 𑀅𑀥𑀺𑀯𑀸𑀲𑁂𑀣𑀸𑀢𑀺. 𑀪𑀕𑀯𑀸, ‘‘𑀅𑀢𑁆𑀣𑀺 𑀦𑀼 𑀔𑁄 𑀕𑀢𑁂𑀦 𑀅𑀢𑁆𑀣𑁄’’𑀢𑀺 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀢𑁆𑀣𑀻’’𑀢𑀺 𑀤𑀺𑀲𑁆𑀯𑀸 ‘‘𑀲𑀼𑀜𑁆𑀜𑀸𑀕𑀸𑀭𑁂 𑀔𑁄, 𑀭𑀸𑀚𑀓𑀼𑀫𑀸𑀭, 𑀢𑀣𑀸𑀕𑀢𑀸 𑀅𑀪𑀺𑀭𑀫𑀦𑁆𑀢𑀻’’𑀢𑀺 𑀆𑀳. 𑀓𑀼𑀫𑀸𑀭𑁄 ‘‘𑀅𑀜𑁆𑀜𑀸𑀢𑀁 𑀪𑀕𑀯𑀸, 𑀅𑀜𑁆𑀜𑀸𑀢𑀁 𑀲𑀼𑀕𑀢𑀸’’𑀢𑀺 𑀯𑀢𑁆𑀯𑀸 𑁋 ‘‘𑀅𑀳𑀁, 𑀪𑀦𑁆𑀢𑁂, 𑀧𑀼𑀭𑀺𑀫𑀢𑀭𑀁 𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑀁 𑀓𑀸𑀭𑁂𑀫𑀺, 𑀫𑀬𑀸 𑀧𑁂𑀲𑀺𑀢𑁂 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀆𑀕𑀘𑁆𑀙𑀣𑀸’’𑀢𑀺 𑀧𑀝𑀺𑀜𑁆𑀜𑀁 𑀕𑀳𑁂𑀢𑁆𑀯𑀸 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀤𑀺𑀦𑁆𑀦𑀸 𑀫𑁂, 𑀤𑁂𑀯, 𑀪𑀕𑀯𑀢𑀸 𑀧𑀝𑀺𑀜𑁆𑀜𑀸, 𑀫𑀬𑀸 𑀧𑀳𑀺𑀢𑁂 𑀢𑀼𑀫𑁆𑀳𑁂 𑀪𑀕𑀯𑀦𑁆𑀢𑀁 𑀧𑁂𑀲𑁂𑀬𑁆𑀬𑀸𑀣𑀸’’𑀢𑀺 𑀧𑀺𑀢𑀭𑀁 𑀯𑀦𑁆𑀤𑀺𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑁄𑀚𑀦𑁂 𑀬𑁄𑀚𑀦𑁂 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀯𑀻𑀲𑀬𑁄𑀚𑀦𑀲𑀢𑀁 𑀅𑀤𑁆𑀥𑀸𑀦𑀁 𑀕𑀢𑁄. 𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀦𑀕𑀭𑁂 𑀯𑀺𑀳𑀸𑀭𑀝𑁆𑀞𑀸𑀦𑀁 𑀯𑀺𑀘𑀺𑀦𑀦𑁆𑀢𑁄 𑀲𑁄𑀪𑀦𑀲𑁆𑀲 𑀦𑀸𑀫 𑀓𑀼𑀝𑀼𑀫𑁆𑀩𑀺𑀓𑀲𑁆𑀲 𑀉𑀬𑁆𑀬𑀸𑀦𑀁 𑀤𑀺𑀲𑁆𑀯𑀸 𑀲𑀢𑀲𑀳𑀲𑁆𑀲𑁂𑀦 𑀓𑀺𑀡𑀺𑀢𑁆𑀯𑀸 𑀲𑀢𑀲𑀳𑀲𑁆𑀲𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀺𑀳𑀸𑀭𑀁 𑀓𑀸𑀭𑁂𑀲𑀺. 𑀢𑀢𑁆𑀣 𑀪𑀕𑀯𑀢𑁄 𑀕𑀦𑁆𑀥𑀓𑀼𑀝𑀺𑀁, 𑀲𑁂𑀲𑀪𑀺𑀓𑁆𑀔𑀽𑀦𑀜𑁆𑀘 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀢𑁆𑀣𑀸𑀬 𑀓𑀼𑀝𑀺𑀮𑁂𑀡𑀫𑀡𑁆𑀟𑀧𑁂 𑀓𑀸𑀭𑀸𑀧𑁂𑀢𑁆𑀯𑀸 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑀁 𑀤𑁆𑀯𑀸𑀭𑀓𑁄𑀝𑁆𑀞𑀓𑀜𑁆𑀘 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀺𑀢𑀼 𑀲𑀦𑁆𑀢𑀺𑀓𑀁 𑀧𑁂𑀲𑁂𑀲𑀺 ‘‘𑀦𑀺𑀝𑁆𑀞𑀺𑀢𑀁 𑀫𑀬𑁆𑀳𑀁 𑀓𑀺𑀘𑁆𑀘𑀁, 𑀲𑀢𑁆𑀣𑀸𑀭𑀁 𑀧𑀳𑀺𑀡𑀣𑀸’’𑀢𑀺.

𑀭𑀸𑀚𑀸 𑀪𑀕𑀯𑀦𑁆𑀢𑀁 𑀪𑁄𑀚𑁂𑀢𑁆𑀯𑀸 ‘‘𑀪𑀕𑀯𑀸 𑀲𑀼𑀫𑀦𑀲𑁆𑀲 𑀓𑀺𑀘𑁆𑀘𑀁 𑀦𑀺𑀝𑁆𑀞𑀺𑀢𑀁, 𑀢𑀼𑀫𑁆𑀳𑀸𑀓𑀁 𑀆𑀕𑀫𑀦𑀁 𑀧𑀘𑁆𑀘𑀸𑀲𑀻𑀲𑀢𑀻’’𑀢𑀺. 𑀪𑀕𑀯𑀸 𑀲𑀢𑀲𑀳𑀲𑁆𑀲𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄 𑀬𑁄𑀚𑀦𑁂 𑀬𑁄𑀚𑀦𑁂 𑀯𑀺𑀳𑀸𑀭𑁂𑀲𑀼 𑀯𑀲𑀫𑀸𑀦𑁄 𑀅𑀕𑀫𑀸𑀲𑀺. 𑀓𑀼𑀫𑀸𑀭𑁄 ‘‘𑀲𑀢𑁆𑀣𑀸 𑀆𑀕𑀘𑁆𑀙𑀢𑀻’’𑀢𑀺 𑀲𑀼𑀢𑁆𑀯𑀸 𑀬𑁄𑀚𑀦𑀁 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑁄 𑀯𑀺𑀳𑀸𑀭𑀁 𑀧𑀯𑁂𑀲𑁂𑀢𑁆𑀯𑀸 𑁋

‘‘𑀲𑀢𑀲𑀳𑀲𑁆𑀲𑁂𑀦 𑀫𑁂 𑀓𑀻𑀢𑀁, 𑀲𑀢𑀲𑀳𑀲𑁆𑀲𑁂𑀦 𑀫𑀸𑀧𑀺𑀢𑀁;

𑀲𑁄𑀪𑀦𑀁 𑀦𑀸𑀫 𑀉𑀬𑁆𑀬𑀸𑀦𑀁 𑀧𑀝𑀺𑀕𑁆𑀕𑀡𑁆𑀳, 𑀫𑀳𑀸𑀫𑀼𑀦𑀻’’𑀢𑀺. 𑁋

𑀯𑀺𑀳𑀸𑀭𑀁 𑀦𑀺𑀬𑁆𑀬𑀸𑀢𑁂𑀲𑀺. 𑀲𑁄 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀤𑀸𑀦𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀤𑀸𑀭𑁂 𑀘 𑀅𑀫𑀘𑁆𑀘𑁂 𑀘 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀳 𑁋‘‘𑀲𑀢𑁆𑀣𑀸 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀁 𑀤𑀽𑀭𑀢𑁄 𑀆𑀕𑀢𑁄, 𑀩𑀼𑀤𑁆𑀥𑀸 𑀘 𑀦𑀸𑀫 𑀥𑀫𑁆𑀫𑀕𑀭𑀼𑀦𑁄𑀯, 𑀦𑀸𑀫𑀺𑀲𑀕𑀭𑀼𑀓𑀸. 𑀢𑀲𑁆𑀫𑀸 𑀅𑀳𑀁 𑀇𑀫𑀁 𑀢𑁂𑀫𑀸𑀲𑀁 𑀤𑁆𑀯𑁂 𑀲𑀸𑀝𑀓𑁂 𑀦𑀺𑀯𑀸𑀲𑁂𑀢𑁆𑀯𑀸 𑀤𑀲 𑀲𑀻𑀮𑀸𑀦𑀺 𑀲𑀫𑀸𑀤𑀺𑀬𑀺𑀢𑁆𑀯𑀸 𑀇𑀥𑁂𑀯 𑀯𑀲𑀺𑀲𑁆𑀲𑀸𑀫𑀺, 𑀢𑀼𑀫𑁆𑀳𑁂 𑀔𑀻𑀡𑀸𑀲𑀯𑀲𑀢𑀲𑀳𑀲𑁆𑀲𑀲𑁆𑀲 𑀇𑀫𑀺𑀦𑀸𑀯 𑀦𑀻𑀳𑀸𑀭𑁂𑀦 𑀢𑁂𑀫𑀸𑀲𑀁 𑀤𑀸𑀦𑀁 𑀤𑀤𑁂𑀬𑁆𑀬𑀸𑀣𑀸’’𑀢𑀺.

𑀲𑁄 𑀲𑀼𑀫𑀦𑀢𑁆𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀲𑀪𑀸𑀕𑁂𑀬𑁂𑀯 𑀞𑀸𑀦𑁂 𑀯𑀲𑀦𑁆𑀢𑁄 𑀬𑀁 𑀣𑁂𑀭𑁄 𑀪𑀕𑀯𑀢𑁄 𑀯𑀢𑁆𑀢𑀁 𑀓𑀭𑁄𑀢𑀺, 𑀢𑀁 𑀲𑀩𑁆𑀩𑀁 𑀤𑀺𑀲𑁆𑀯𑀸, ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀏𑀓𑀦𑁆𑀢𑀯𑀮𑁆𑀮𑀪𑁄 𑀏𑀲 𑀣𑁂𑀭𑁄, 𑀏𑀢𑀲𑁆𑀲𑁂𑀯 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀉𑀧𑀓𑀝𑁆𑀞𑀸𑀬 𑀧𑀯𑀸𑀭𑀡𑀸𑀬 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀪𑀺𑀓𑁆𑀔𑀽𑀲𑀢𑀲𑀳𑀲𑁆𑀲𑀲𑁆𑀲 𑀧𑀸𑀤𑀫𑀽𑀮𑁂 𑀢𑀺𑀘𑀻𑀯𑀭𑀁 𑀞𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀬𑀤𑁂𑀢𑀁 𑀫𑀬𑀸 𑀫𑀕𑁆𑀕𑁂 𑀬𑁄𑀚𑀦𑀦𑁆𑀢𑀭𑀺𑀓𑀯𑀺𑀳𑀸𑀭𑀓𑀸𑀭𑀸𑀧𑀦𑀢𑁄 𑀧𑀝𑁆𑀞𑀸𑀬 𑀧𑀼𑀜𑁆𑀜𑀁 𑀓𑀢𑀁, 𑀢𑀁 𑀦𑁂𑀯 𑀲𑀓𑁆𑀓𑀲𑀫𑁆𑀧𑀢𑁆𑀢𑀺𑀁, 𑀦 𑀫𑀸𑀭𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀁 𑀧𑀢𑁆𑀣𑀬𑀦𑁆𑀢𑁂𑀦, 𑀩𑀼𑀤𑁆𑀥𑀲𑁆𑀲 𑀧𑀦 𑀉𑀧𑀝𑁆𑀞𑀸𑀓𑀪𑀸𑀯𑀁 𑀧𑀢𑁆𑀣𑁂𑀦𑁆𑀢𑁂𑀦 𑀓𑀢𑀁. 𑀢𑀲𑁆𑀫𑀸 𑀅𑀳𑀫𑁆𑀧𑀺 𑀪𑀕𑀯𑀸 𑀅𑀦𑀸𑀕𑀢𑁂 𑀲𑀼𑀫𑀦𑀢𑁆𑀣𑁂𑀭𑁄 𑀯𑀺𑀬 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀉𑀧𑀝𑁆𑀞𑀸𑀓𑁄 𑀳𑁄𑀫𑀻’’𑀢𑀺 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀧𑀢𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀧𑀦𑁆𑀦𑁄. 𑀪𑀕𑀯𑀸 ‘‘𑀫𑀳𑀦𑁆𑀢𑀁 𑀓𑀼𑀮𑀧𑀼𑀢𑁆𑀢𑀲𑁆𑀲 𑀘𑀺𑀢𑁆𑀢𑀁, 𑀇𑀚𑁆𑀛𑀺𑀲𑁆𑀲𑀢𑀺 𑀦𑀼 𑀔𑁄, 𑀦𑁄’’𑀢𑀺 𑀑𑀮𑁄𑀓𑁂𑀦𑁆𑀢𑁄, ‘‘𑀅𑀦𑀸𑀕𑀢𑁂 𑀇𑀢𑁄 𑀲𑀢𑀲𑀳𑀲𑁆𑀲𑀺𑀫𑁂 𑀓𑀧𑁆𑀧𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲𑁂𑀯 𑀉𑀧𑀝𑁆𑀞𑀸𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑁋

‘‘𑀇𑀘𑁆𑀙𑀺𑀢𑀁 𑀧𑀢𑁆𑀣𑀺𑀢𑀁 𑀢𑀼𑀬𑁆𑀳𑀁, 𑀲𑀩𑁆𑀩𑀫𑁂𑀯 𑀲𑀫𑀺𑀚𑁆𑀛𑀢𑀼;

𑀲𑀩𑁆𑀩𑁂 𑀧𑀽𑀭𑁂𑀦𑁆𑀢𑀼 𑀲𑀗𑁆𑀓𑀧𑁆𑀧𑀸, 𑀘𑀦𑁆𑀤𑁄 𑀧𑀦𑁆𑀦𑀭𑀲𑁄 𑀬𑀣𑀸’’𑀢𑀺. 𑁋

𑀆𑀳. 𑀓𑀼𑀫𑀸𑀭𑁄 𑀲𑀼𑀢𑁆𑀯𑀸 ‘‘𑀩𑀼𑀤𑁆𑀥𑀸 𑀦𑀸𑀫 𑀅𑀤𑁆𑀯𑁂𑀚𑁆𑀛𑀓𑀣𑀸 𑀳𑁄𑀦𑁆𑀢𑀻’’𑀢𑀺 𑀤𑀼𑀢𑀺𑀬𑀤𑀺𑀯𑀲𑁂𑀬𑁂𑀯 𑀢𑀲𑁆𑀲 𑀪𑀕𑀯𑀢𑁄 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀕𑀘𑁆𑀙𑀦𑁆𑀢𑁄 𑀯𑀺𑀬 𑀅𑀳𑁄𑀲𑀺. 𑀲𑁄 𑀢𑀲𑁆𑀫𑀺𑀁 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀯𑀲𑁆𑀲𑀲𑀢𑀲𑀳𑀲𑁆𑀲𑀁 𑀤𑀸𑀦𑀁 𑀤𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂𑀧𑀺 𑀧𑀺𑀡𑁆𑀟𑀸𑀬 𑀘𑀭𑀢𑁄 𑀣𑁂𑀭𑀲𑁆𑀲 𑀧𑀢𑁆𑀢𑀕𑁆𑀕𑀳𑀡𑀢𑁆𑀣𑀁 𑀉𑀢𑁆𑀢𑀭𑀺𑀲𑀸𑀝𑀓𑀁 𑀤𑀢𑁆𑀯𑀸 𑀧𑀽𑀚𑀁 𑀅𑀓𑀸𑀲𑀺. 𑀧𑀼𑀦 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀩𑀸𑀭𑀸𑀡𑀲𑀺𑀭𑀸𑀚𑀸 𑀳𑀼𑀢𑁆𑀯𑀸 𑀅𑀝𑁆𑀞𑀦𑁆𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀧𑀡𑁆𑀡𑀲𑀸𑀮𑀸𑀬𑁄 𑀓𑀸𑀭𑁂𑀢𑁆𑀯𑀸 𑀫𑀡𑀺𑀆𑀥𑀸𑀭𑀓𑁂 𑀉𑀧𑀝𑁆𑀞𑀧𑁂𑀢𑁆𑀯𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀤𑀲𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀉𑀧𑀝𑁆𑀞𑀸𑀦𑀁 𑀅𑀓𑀸𑀲𑀺. 𑀏𑀢𑀸𑀦𑀺 𑀧𑀸𑀓𑀝𑀝𑁆𑀞𑀸𑀦𑀸𑀦𑀺.

𑀓𑀧𑁆𑀧𑀲𑀢𑀲𑀳𑀲𑁆𑀲𑀁 𑀧𑀦 𑀤𑀸𑀦𑀁 𑀤𑀤𑀫𑀸𑀦𑁄𑀯 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁂𑀦 𑀲𑀤𑁆𑀥𑀺𑀁 𑀢𑀼𑀲𑀺𑀢𑀧𑀼𑀭𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀢𑀢𑁄 𑀘𑀼𑀢𑁄 𑀅𑀫𑀺𑀢𑁄𑀤𑀦𑀲𑀓𑁆𑀓𑀲𑁆𑀲 𑀕𑁂𑀳𑁂 𑀧𑀝𑀺𑀲𑀦𑁆𑀥𑀺𑀁 𑀕𑀳𑁂𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀓𑀢𑀸𑀪𑀺𑀦𑀺𑀓𑁆𑀔𑀫𑀦𑁄 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸 𑀧𑀞𑀫𑀕𑀫𑀦𑁂𑀦 𑀓𑀧𑀺𑀮𑀯𑀢𑁆𑀣𑀼𑀁 𑀆𑀕𑀦𑁆𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑀦𑁆𑀢𑁂 𑀪𑀕𑀯𑀢𑀺 𑀪𑀕𑀯𑀢𑁄 𑀧𑀭𑀺𑀯𑀸𑀭𑀢𑁆𑀣𑀁 𑀭𑀸𑀚𑀓𑀼𑀫𑀸𑀭𑁂𑀲𑀼 𑀧𑀩𑁆𑀩𑀚𑀦𑁆𑀢𑁂𑀲𑀼 𑀪𑀤𑁆𑀤𑀺𑀬𑀸𑀤𑀻𑀳𑀺 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀦𑀘𑀺𑀭𑀲𑁆𑀲𑁂𑀯 𑀆𑀬𑀲𑁆𑀫𑀢𑁄 𑀧𑀼𑀡𑁆𑀡𑀲𑁆𑀲 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀳𑀺. 𑀏𑀯𑀫𑁂𑀲 𑀆𑀬𑀲𑁆𑀫𑀸 𑀧𑀼𑀩𑁆𑀩𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄, 𑀢𑀲𑁆𑀲𑀺𑀫𑀸𑀬 𑀧𑀼𑀩𑁆𑀩𑀽𑀧𑀦𑀺𑀲𑁆𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀕𑀫𑁆𑀪𑀻𑀭𑁄𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀉𑀢𑁆𑀢𑀸𑀦𑀓𑁄 𑀯𑀺𑀬 𑀉𑀧𑀝𑁆𑀞𑀸𑀲𑀺.

𑀢𑀺𑀢𑁆𑀣𑀯𑀸𑀲𑁄𑀢𑀺 𑀧𑀦 𑀕𑀭𑀽𑀦𑀁 𑀲𑀦𑁆𑀢𑀺𑀓𑁂 𑀉𑀕𑁆𑀕𑀳𑀡𑀲𑀯𑀦𑀧𑀭𑀺𑀧𑀼𑀘𑁆𑀙𑀦𑀥𑀸𑀭𑀡𑀸𑀦𑀺 𑀯𑀼𑀘𑁆𑀘𑀦𑁆𑀢𑀺. 𑀲𑁄 𑀣𑁂𑀭𑀲𑁆𑀲 𑀅𑀢𑀺𑀯𑀺𑀬 𑀧𑀭𑀺𑀲𑀼𑀤𑁆𑀥𑁄. 𑀢𑁂𑀦𑀸𑀧𑀺𑀲𑁆𑀲𑀸𑀬𑀁 𑀕𑀫𑁆𑀪𑀻𑀭𑁄𑀧𑀺 𑀉𑀢𑁆𑀢𑀸𑀦𑀓𑁄 𑀯𑀺𑀬 𑀉𑀧𑀝𑁆𑀞𑀸𑀲𑀺. 𑀲𑁄𑀢𑀸𑀧𑀦𑁆𑀦𑀸𑀦𑀜𑁆𑀘 𑀦𑀸𑀫 𑀧𑀘𑁆𑀘𑀬𑀸𑀓𑀸𑀭𑁄 𑀉𑀢𑁆𑀢𑀸𑀦𑀓𑁄 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀅𑀬𑀜𑁆𑀘 𑀆𑀬𑀲𑁆𑀫𑀸 𑀲𑁄𑀢𑀸𑀧𑀦𑁆𑀦𑁄. 𑀩𑀳𑀼𑀲𑁆𑀲𑀼𑀢𑀸𑀦𑀁 𑀘𑀢𑀼𑀳𑀢𑁆𑀣𑁂 𑀑𑀯𑀭𑀓𑁂 𑀧𑀤𑀻𑀧𑁂 𑀚𑀮𑀫𑀸𑀦𑁂 𑀫𑀜𑁆𑀘𑀧𑀻𑀞𑀁 𑀯𑀺𑀬 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑁄 𑀧𑀸𑀓𑀝𑁄 𑀳𑁄𑀢𑀺, 𑀅𑀬𑀜𑁆𑀘 𑀆𑀬𑀲𑁆𑀫𑀸 𑀩𑀳𑀼𑀲𑁆𑀲𑀼𑀢𑀸𑀦𑀁 𑀅𑀕𑁆𑀕𑁄. 𑀇𑀢𑀺 𑀩𑀸𑀳𑀼𑀲𑀘𑁆𑀘𑀪𑀸𑀯𑁂𑀦𑀧𑀺𑀲𑁆𑀲 𑀕𑀫𑁆𑀪𑀻𑀭𑁄𑀧𑀺 𑀧𑀘𑁆𑀘𑀬𑀸𑀓𑀸𑀭𑁄 𑀉𑀢𑁆𑀢𑀸𑀦𑀓𑁄 𑀯𑀺𑀬 𑀉𑀧𑀝𑁆𑀞𑀸𑀲𑀺. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀘𑀢𑀽𑀳𑀺 𑀕𑀫𑁆𑀪𑀻𑀭𑀢𑀸𑀳𑀺 𑀕𑀫𑁆𑀪𑀻𑀭𑁄. 𑀲𑀸 𑀧𑀦𑀲𑁆𑀲 𑀕𑀫𑁆𑀪𑀻𑀭𑀢𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀸𑀯. 𑀲𑀸 𑀲𑀩𑁆𑀩𑀸𑀧𑀺 𑀣𑁂𑀭𑀲𑁆𑀲 𑀉𑀢𑁆𑀢𑀸𑀦𑀓𑀸 𑀯𑀺𑀬 𑀉𑀧𑀝𑁆𑀞𑀸𑀲𑀺. 𑀢𑁂𑀦 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀉𑀲𑁆𑀲𑀸𑀤𑁂𑀦𑁆𑀢𑁄 𑀫𑀸 𑀳𑁂𑀯𑀦𑁆𑀢𑀺𑀆𑀤𑀺𑀫𑀸𑀳. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀆𑀦𑀦𑁆𑀤, 𑀢𑁆𑀯𑀁 𑀫𑀳𑀸𑀧𑀜𑁆𑀜𑁄 𑀯𑀺𑀲𑀤𑀜𑀸𑀡𑁄, 𑀢𑁂𑀦 𑀢𑁂 𑀕𑀫𑁆𑀪𑀻𑀭𑁄𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀉𑀢𑁆𑀢𑀸𑀦𑀓𑁄 𑀯𑀺𑀬 𑀔𑀸𑀬𑀢𑀺. 𑀢𑀲𑁆𑀫𑀸 ‘‘𑀫𑀬𑁆𑀳𑀫𑁂𑀯 𑀦𑀼 𑀔𑁄 𑀏𑀲 𑀉𑀢𑁆𑀢𑀸𑀦𑀓𑁄 𑀯𑀺𑀬 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺, 𑀉𑀤𑀸𑀳𑀼 𑀅𑀜𑁆𑀜𑁂𑀲𑀫𑁆𑀧𑀻’’𑀢𑀺 𑀫𑀸 𑀏𑀯𑀁 𑀅𑀯𑀘.

𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀅𑀧𑀲𑀸𑀤𑁂𑀦𑁆𑀢𑁄’’𑀢𑀺, 𑀢𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀆𑀦𑀦𑁆𑀤, ‘‘𑀅𑀣 𑀘 𑀧𑀦 𑀫𑁂 𑀉𑀢𑁆𑀢𑀸𑀦𑀓𑀼𑀢𑁆𑀢𑀸𑀦𑀓𑁄 𑀯𑀺𑀬 𑀔𑀸𑀬𑀢𑀻’’𑀢𑀺 𑀫𑀸 𑀳𑁂𑀯𑀁 𑀅𑀯𑀘. 𑀬𑀤𑀺 𑀳𑀺 𑀢𑁂 𑀏𑀲 𑀉𑀢𑁆𑀢𑀸𑀦𑀓𑀼𑀢𑁆𑀢𑀸𑀦𑀓𑁄 𑀯𑀺𑀬 𑀔𑀸𑀬𑀢𑀺, 𑀓𑀲𑁆𑀫𑀸 𑀢𑁆𑀯𑀁 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀲𑁄𑀢𑀸𑀧𑀦𑁆𑀦𑁄 𑀦𑀸𑀳𑁄𑀲𑀺, 𑀫𑀬𑀸 𑀤𑀺𑀦𑁆𑀦𑀦𑀬𑁂 𑀞𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀝𑀺𑀯𑀺𑀚𑁆𑀛𑀺? 𑀆𑀦𑀦𑁆𑀤, 𑀇𑀤𑀁 𑀦𑀺𑀩𑁆𑀩𑀸𑀦𑀫𑁂𑀯 𑀕𑀫𑁆𑀪𑀻𑀭𑀁, 𑀧𑀘𑁆𑀘𑀬𑀸𑀓𑀸𑀭𑁄 𑀧𑀦 𑀉𑀢𑁆𑀢𑀸𑀦𑀓𑁄 𑀚𑀸𑀢𑁄, 𑀅𑀣 𑀓𑀲𑁆𑀫𑀸 𑀑𑀴𑀸𑀭𑀺𑀓𑀁 𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁 𑀧𑀝𑀺𑀖𑀲𑀁𑀬𑁄𑀚𑀦𑀁 𑀑𑀴𑀸𑀭𑀺𑀓𑀁 𑀓𑀸𑀫𑀭𑀸𑀕𑀸𑀦𑀼𑀲𑀬𑀁 𑀧𑀝𑀺𑀖𑀸𑀦𑀼𑀲𑀬𑀦𑁆𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀓𑀺𑀮𑁂𑀲𑁂 𑀲𑀫𑀼𑀕𑁆𑀖𑀸𑀢𑁂𑀢𑁆𑀯𑀸 𑀲𑀓𑀤𑀸𑀕𑀸𑀫𑀺𑀨𑀮𑀁 𑀦 𑀲𑀘𑁆𑀙𑀺𑀓𑀭𑁄𑀲𑀺, 𑀢𑁂𑀬𑁂𑀯 𑀅𑀡𑀼𑀲𑀳𑀕𑀢𑁂 𑀘𑀢𑁆𑀢𑀸𑀭𑁄 𑀓𑀺𑀮𑁂𑀲𑁂 𑀲𑀫𑀼𑀕𑁆𑀖𑀸𑀢𑁂𑀢𑁆𑀯𑀸 𑀅𑀦𑀸𑀕𑀸𑀫𑀺𑀨𑀮𑀁 𑀦 𑀲𑀘𑁆𑀙𑀺𑀓𑀭𑁄𑀲𑀺, 𑀭𑀽𑀧𑀭𑀸𑀕𑀸𑀤𑀻𑀦𑀺 𑀧𑀜𑁆𑀘 𑀲𑀁𑀬𑁄𑀚𑀦𑀸𑀦𑀺, 𑀫𑀸𑀦𑀸𑀦𑀼𑀲𑀬𑀁 𑀪𑀯𑀭𑀸𑀕𑀸𑀦𑀼𑀲𑀬𑀁 𑀅𑀯𑀺𑀚𑁆𑀚𑀸𑀦𑀼𑀲𑀬𑀦𑁆𑀢𑀺 𑀇𑀫𑁂 𑀅𑀝𑁆𑀞 𑀓𑀺𑀮𑁂𑀲𑁂 𑀲𑀫𑀼𑀕𑁆𑀖𑀸𑀢𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀦 𑀲𑀘𑁆𑀙𑀺𑀓𑀭𑁄𑀲𑀺? 𑀓𑀲𑁆𑀫𑀸 𑀯𑀸 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀁 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀧𑀽𑀭𑀺𑀢𑀧𑀸𑀭𑀫𑀺𑀦𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀯𑀺𑀬 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁 𑀦 𑀧𑀝𑀺𑀯𑀺𑀚𑁆𑀛𑀲𑀺, 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀸𑀦𑀺 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀽𑀭𑀺𑀢𑀧𑀸𑀭𑀫𑀺𑀦𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀯𑀺𑀬 𑀘 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁 𑀦 𑀧𑀝𑀺𑀯𑀺𑀚𑁆𑀛𑀲𑀺? 𑀬𑀤𑀺 𑀯𑀸 𑀢𑁂 𑀲𑀩𑁆𑀩𑀣𑀸𑀯 𑀏𑀲 𑀉𑀢𑁆𑀢𑀸𑀦𑀓𑁄 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀲𑀺. 𑀅𑀣 𑀓𑀲𑁆𑀫𑀸 𑀲𑀢𑀲𑀳𑀲𑁆𑀲𑀓𑀧𑁆𑀧𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀝𑁆𑀞 𑀲𑁄𑀴𑀲 𑀯𑀸 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀽𑀭𑀺𑀢𑀧𑀸𑀭𑀫𑀺𑀦𑁄 𑀩𑀼𑀤𑁆𑀥𑀸 𑀯𑀺𑀬 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀦 𑀲𑀘𑁆𑀙𑀺𑀓𑀭𑁄𑀲𑀺? 𑀓𑀺𑀁 𑀅𑀦𑀢𑁆𑀣𑀺𑀓𑁄𑀲𑀺 𑀏𑀢𑁂𑀳𑀺 𑀯𑀺𑀲𑁂𑀲𑀸𑀥𑀺𑀕𑀫𑁂𑀳𑀺? 𑀧𑀲𑁆𑀲 𑀬𑀸𑀯 𑀘 𑀢𑁂 𑀅𑀧𑀭𑀤𑁆𑀥𑀁, 𑀢𑁆𑀯𑀁 𑀦𑀸𑀫 𑀲𑀸𑀯𑀓𑀧𑀤𑁂𑀲𑀜𑀸𑀡𑁂 𑀞𑀺𑀢𑁄 𑀅𑀢𑀺𑀕𑀫𑁆𑀪𑀻𑀭𑀁 𑀧𑀘𑁆𑀘𑀬𑀸𑀓𑀸𑀭𑀁 ‘‘𑀉𑀢𑁆𑀢𑀸𑀦𑀓𑁄 𑀯𑀺𑀬 𑀫𑁂 𑀉𑀧𑀝𑁆𑀞𑀸𑀢𑀻’’𑀢𑀺 𑀯𑀤𑀲𑀺. 𑀢𑀲𑁆𑀲 𑀢𑁂 𑀇𑀤𑀁 𑀯𑀘𑀦𑀁 𑀩𑀼𑀤𑁆𑀥𑀸𑀦𑀁 𑀓𑀣𑀸𑀬 𑀧𑀘𑁆𑀘𑀦𑀻𑀓𑀁 𑀳𑁄𑀢𑀺. 𑀢𑀸𑀤𑀺𑀲𑁂𑀦 𑀦𑀸𑀫 𑀪𑀺𑀓𑁆𑀔𑀼𑀦𑀸 𑀩𑀼𑀤𑁆𑀥𑀸𑀦𑀁 𑀓𑀣𑀸𑀬 𑀧𑀘𑁆𑀘𑀦𑀻𑀓𑀁 𑀓𑀣𑁂𑀢𑀩𑁆𑀩𑀦𑁆𑀢𑀺 𑀦 𑀬𑀼𑀢𑁆𑀢𑀫𑁂𑀢𑀁. 𑀦𑀦𑀼 𑀫𑀬𑁆𑀳𑀁, 𑀆𑀦𑀦𑁆𑀤, 𑀇𑀫𑀁 𑀧𑀘𑁆𑀘𑀬𑀸𑀓𑀸𑀭𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀯𑀸𑀬𑀫𑀦𑁆𑀢𑀲𑁆𑀲𑁂𑀯 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺. 𑀧𑀘𑁆𑀘𑀬𑀸𑀓𑀸𑀭𑀧𑀝𑀺𑀯𑀺𑀚𑁆𑀛𑀦𑀢𑁆𑀣𑀸𑀬 𑀘 𑀧𑀦 𑀫𑁂 𑀅𑀤𑀺𑀦𑁆𑀦𑀤𑀸𑀦𑀁 𑀦𑀸𑀫 𑀦𑀢𑁆𑀣𑀺, 𑀅𑀧𑀽𑀭𑀺𑀢𑀧𑀸𑀭𑀫𑀻 𑀦𑀸𑀫 𑀦𑀢𑁆𑀣𑀺. ‘‘𑀅𑀚𑁆𑀚 𑀧𑀘𑁆𑀘𑀬𑀸𑀓𑀸𑀭𑀁 𑀧𑀝𑀺𑀯𑀺𑀚𑁆𑀛𑀺𑀲𑁆𑀲𑀸𑀫𑀻’’𑀢𑀺 𑀧𑀦 𑀫𑁂 𑀦𑀺𑀭𑀼𑀲𑁆𑀲𑀸𑀳𑀁 𑀯𑀺𑀬 𑀫𑀸𑀭𑀩𑀮𑀁 𑀯𑀺𑀥𑀫𑀦𑁆𑀢𑀲𑁆𑀲 𑀅𑀬𑀁 𑀫𑀳𑀸𑀧𑀣𑀯𑀻 𑀤𑁆𑀯𑀗𑁆𑀕𑀼𑀮𑀫𑀢𑁆𑀢𑀫𑁆𑀧𑀺 𑀦𑀸𑀓𑀫𑁆𑀧𑀺, 𑀢𑀣𑀸 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀁, 𑀫𑀚𑁆𑀛𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀲𑀫𑁆𑀧𑀸𑀤𑁂𑀦𑁆𑀢𑀲𑁆𑀲. 𑀧𑀘𑁆𑀙𑀺𑀫𑀬𑀸𑀫𑁂 𑀧𑀦 𑀫𑁂 𑀩𑀮𑀯𑀧𑀘𑁆𑀘𑀽𑀲𑀲𑀫𑀬𑁂, ‘‘𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀦𑀯𑀳𑀺 𑀆𑀓𑀸𑀭𑁂𑀳𑀺 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺 𑀤𑀺𑀝𑁆𑀞𑀫𑀢𑁆𑀢𑁂𑀬𑁂𑀯 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀅𑀬𑀤𑀡𑁆𑀟𑁂𑀦 𑀆𑀓𑁄𑀝𑀺𑀢𑀓𑀁𑀲𑀣𑀸𑀮𑁄 𑀯𑀺𑀬 𑀯𑀺𑀭𑀯𑀲𑀢𑀁 𑀯𑀺𑀭𑀯𑀲𑀳𑀲𑁆𑀲𑀁 𑀫𑀼𑀜𑁆𑀘𑀫𑀸𑀦𑀸 𑀯𑀸𑀢𑀸𑀳𑀢𑁂 𑀧𑀤𑀼𑀫𑀺𑀦𑀺𑀧𑀡𑁆𑀡𑁂 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀧𑀓𑀫𑁆𑀧𑀺𑀢𑁆𑀣. 𑀏𑀯𑀁 𑀕𑀫𑁆𑀪𑀻𑀭𑁄 𑀘𑀸𑀬𑀁, 𑀆𑀦𑀦𑁆𑀤, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁄 𑀕𑀫𑁆𑀪𑀻𑀭𑀸𑀯𑀪𑀸𑀲𑁄 𑀘, 𑀏𑀢𑀲𑁆𑀲, 𑀆𑀦𑀦𑁆𑀤, 𑀥𑀫𑁆𑀫𑀲𑁆𑀲 𑀅𑀦𑀦𑀼𑀩𑁄𑀥𑀸…𑀧𑁂… 𑀦𑀸𑀢𑀺𑀯𑀢𑁆𑀢𑀢𑀻𑀢𑀺.

𑀏𑀢𑀲𑁆𑀲 𑀥𑀫𑁆𑀫𑀲𑁆𑀲𑀸𑀢𑀺 𑀏𑀢𑀲𑁆𑀲 𑀧𑀘𑁆𑀘𑀬𑀥𑀫𑁆𑀫𑀲𑁆𑀲. 𑀅𑀦𑀦𑀼𑀩𑁄𑀥𑀸𑀢𑀺 𑀜𑀸𑀢𑀧𑀭𑀺𑀜𑁆𑀜𑀸𑀯𑀲𑁂𑀦 𑀅𑀦𑀦𑀼𑀩𑀼𑀚𑁆𑀛𑀦𑀸. 𑀅𑀧𑁆𑀧𑀝𑀺𑀯𑁂𑀥𑀸𑀢𑀺 𑀢𑀻𑀭𑀡𑀧𑁆𑀧𑀳𑀸𑀦𑀧𑀭𑀺𑀜𑁆𑀜𑀸𑀯𑀲𑁂𑀦 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑀸. 𑀢𑀦𑁆𑀢𑀸𑀓𑀼𑀮𑀓𑀚𑀸𑀢𑀸𑀢𑀺 𑀢𑀦𑁆𑀢𑀁 𑀯𑀺𑀬 𑀆𑀓𑀼𑀮𑀚𑀸𑀢𑀸. 𑀬𑀣𑀸 𑀦𑀸𑀫 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀁 𑀫𑀽𑀲𑀺𑀓𑀘𑁆𑀙𑀺𑀦𑁆𑀦𑀁 𑀧𑁂𑀲𑀓𑀸𑀭𑀸𑀦𑀁 𑀢𑀦𑁆𑀢𑀁 𑀢𑀳𑀺𑀁 𑀢𑀳𑀺𑀁 𑀆𑀓𑀼𑀮𑀁 𑀳𑁄𑀢𑀺, ‘‘𑀇𑀤𑀁 𑀅𑀕𑁆𑀕𑀁, 𑀇𑀤𑀁 𑀫𑀽𑀮’’𑀦𑁆𑀢𑀺 𑀅𑀕𑁆𑀕𑁂𑀦 𑀯𑀸 𑀅𑀕𑁆𑀕𑀁, 𑀫𑀽𑀮𑁂𑀦 𑀯𑀸 𑀫𑀽𑀮𑀁 𑀲𑀫𑀸𑀦𑁂𑀢𑀼𑀁 𑀤𑀼𑀓𑁆𑀓𑀭𑀁 𑀳𑁄𑀢𑀺. 𑀏𑀯𑀫𑁂𑀯 𑀲𑀢𑁆𑀢𑀸 𑀇𑀫𑀲𑁆𑀫𑀺𑀁 𑀧𑀘𑁆𑀘𑀬𑀸𑀓𑀸𑀭𑁂 𑀔𑀮𑀺𑀢𑀸 𑀆𑀓𑀼𑀮𑀸 𑀩𑁆𑀬𑀸𑀓𑀼𑀮𑀸 𑀳𑁄𑀦𑁆𑀢𑀺, 𑀦 𑀲𑀓𑁆𑀓𑁄𑀦𑁆𑀢𑀺 𑀧𑀘𑁆𑀘𑀬𑀸𑀓𑀸𑀭𑀁 𑀉𑀚𑀼𑀁 𑀓𑀸𑀢𑀼𑀁. 𑀢𑀢𑁆𑀣 𑀢𑀦𑁆𑀢𑀁 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁂 𑀞𑀢𑁆𑀯𑀸 𑀲𑀓𑁆𑀓𑀸𑀧𑀺 𑀪𑀯𑁂𑀬𑁆𑀬 𑀉𑀚𑀼𑀁 𑀓𑀸𑀢𑀼𑀁, 𑀞𑀧𑁂𑀢𑁆𑀯𑀸 𑀧𑀦 𑀤𑁆𑀯𑁂 𑀩𑁄𑀥𑀺𑀲𑀢𑁆𑀢𑁂 𑀅𑀜𑁆𑀜𑁄 𑀲𑀢𑁆𑀢𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀧𑀘𑁆𑀘𑀬𑀸𑀓𑀸𑀭𑀁 𑀉𑀚𑀼𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀬𑀣𑀸 𑀧𑀦 𑀆𑀓𑀼𑀮𑀁 𑀢𑀦𑁆𑀢𑀁 𑀓𑀜𑁆𑀚𑀺𑀬𑀁 𑀤𑀢𑁆𑀯𑀸 𑀓𑁄𑀘𑁆𑀙𑁂𑀦 𑀧𑀳𑀝𑀁 𑀢𑀢𑁆𑀣 𑀢𑀢𑁆𑀣 𑀕𑀼𑀴𑀓𑀚𑀸𑀢𑀁 𑀳𑁄𑀢𑀺 𑀕𑀡𑁆𑀞𑀺𑀩𑀤𑁆𑀥𑀁, 𑀏𑀯𑀫𑀺𑀫𑁂 𑀲𑀢𑁆𑀢𑀸 𑀧𑀘𑁆𑀘𑀬𑁂𑀲𑀼 𑀧𑀓𑁆𑀔𑀮𑀺𑀢𑁆𑀯𑀸 𑀧𑀘𑁆𑀘𑀬𑁂 𑀉𑀚𑀼𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢𑀯𑀲𑁂𑀦 𑀕𑀼𑀴𑀓𑀚𑀸𑀢𑀸 𑀳𑁄𑀦𑁆𑀢𑀺 𑀕𑀡𑁆𑀞𑀺𑀩𑀤𑁆𑀥𑀸. 𑀬𑁂 𑀳𑀺 𑀓𑁂𑀘𑀺 𑀤𑀺𑀝𑁆𑀞𑀺𑀬𑁄 𑀲𑀦𑁆𑀦𑀺𑀲𑁆𑀲𑀺𑀢𑀸, 𑀲𑀩𑁆𑀩𑁂 𑀢𑁂 𑀧𑀘𑁆𑀘𑀬𑀁 𑀉𑀚𑀼𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀬𑁂𑀯.

𑀓𑀼𑀮𑀸𑀕𑀡𑁆𑀞𑀺𑀓𑀚𑀸𑀢𑀸𑀢𑀺 𑀓𑀼𑀮𑀸𑀕𑀡𑁆𑀞𑀺𑀓𑀁 𑀯𑀼𑀘𑁆𑀘𑀢𑀺 𑀧𑁂𑀲𑀓𑀸𑀭𑀓𑀜𑁆𑀚𑀺𑀬𑀲𑀼𑀢𑁆𑀢𑀁. 𑀓𑀼𑀮𑀸 𑀦𑀸𑀫 𑀲𑀓𑀼𑀡𑀺𑀓𑀸, 𑀢𑀲𑁆𑀲𑀸 𑀓𑀼𑀮𑀸𑀯𑀓𑁄𑀢𑀺𑀧𑀺 𑀏𑀓𑁂. 𑀬𑀣𑀸 𑀳𑀺 𑀢𑀤𑀼𑀪𑀬𑀫𑁆𑀧𑀺 𑀆𑀓𑀼𑀮𑀁 𑀅𑀕𑁆𑀕𑁂𑀦 𑀯𑀸 𑀅𑀕𑁆𑀕𑀁, 𑀫𑀽𑀮𑁂𑀦 𑀯𑀸 𑀫𑀽𑀮𑀁 𑀲𑀫𑀸𑀦𑁂𑀢𑀼𑀁 𑀤𑀼𑀓𑁆𑀓𑀭𑀦𑁆𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁.

𑀫𑀼𑀜𑁆𑀚𑀧𑀩𑁆𑀩𑀚𑀪𑀽𑀢𑀸𑀢𑀺 𑀫𑀼𑀜𑁆𑀚𑀢𑀺𑀡𑀁 𑀯𑀺𑀬 𑀧𑀩𑁆𑀩𑀚𑀢𑀺𑀡𑀁 𑀯𑀺𑀬 𑀘 𑀪𑀽𑀢𑀸 𑀢𑀸𑀤𑀺𑀲𑀸 𑀚𑀸𑀢𑀸. 𑀬𑀣𑀸 𑀳𑀺 𑀢𑀸𑀦𑀺 𑀢𑀺𑀡𑀸𑀦𑀺 𑀓𑁄𑀝𑁆𑀝𑁂𑀢𑁆𑀯𑀸 𑀓𑀢𑀭𑀚𑁆𑀚𑀼 𑀚𑀺𑀡𑁆𑀡𑀓𑀸𑀮𑁂 𑀓𑀢𑁆𑀣𑀘𑀺 𑀧𑀢𑀺𑀢𑀁 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀢𑀺𑀡𑀸𑀦𑀁 ‘‘𑀇𑀤𑀁 𑀅𑀕𑁆𑀕𑀁, 𑀇𑀤𑀁 𑀫𑀽𑀮’’𑀦𑁆𑀢𑀺 𑀅𑀕𑁆𑀕𑁂𑀦 𑀯𑀸 𑀅𑀕𑁆𑀕𑀁, 𑀫𑀽𑀮𑁂𑀦 𑀯𑀸 𑀫𑀽𑀮𑀁 𑀲𑀫𑀸𑀦𑁂𑀢𑀼𑀁 𑀤𑀼𑀓𑁆𑀓𑀭𑀁, 𑀢𑀫𑁆𑀧𑀺 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁂 𑀞𑀢𑁆𑀯𑀸 𑀲𑀓𑁆𑀓𑀸 𑀪𑀯𑁂𑀬𑁆𑀬 𑀉𑀚𑀼𑀁 𑀓𑀸𑀢𑀼𑀁, 𑀞𑀧𑁂𑀢𑁆𑀯𑀸 𑀧𑀦 𑀤𑁆𑀯𑁂 𑀩𑁄𑀥𑀺𑀲𑀢𑁆𑀢𑁂 𑀅𑀜𑁆𑀜𑁄 𑀲𑀢𑁆𑀢𑁄 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀧𑀘𑁆𑀘𑀬𑀸𑀓𑀸𑀭𑀁 𑀉𑀚𑀼𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺, 𑀏𑀯𑀫𑀬𑀁 𑀧𑀚𑀸 𑀧𑀘𑁆𑀘𑀬𑀁 𑀉𑀚𑀼𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀤𑀺𑀝𑁆𑀞𑀺𑀕𑀢𑀯𑀲𑁂𑀦 𑀕𑀡𑁆𑀞𑀺𑀓𑀚𑀸𑀢𑀸 𑀳𑀼𑀢𑁆𑀯𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀲𑀁𑀲𑀸𑀭𑀁 𑀦𑀸𑀢𑀺𑀯𑀢𑁆𑀢𑀢𑀺.

𑀢𑀢𑁆𑀣 𑀅𑀧𑀸𑀬𑁄𑀢𑀺 𑀦𑀺𑀭𑀬𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀧𑁂𑀢𑁆𑀢𑀺𑀯𑀺𑀲𑀬𑀅𑀲𑀼𑀭𑀓𑀸𑀬𑀸. 𑀲𑀩𑁆𑀩𑁂𑀧𑀺 𑀳𑀺 𑀢𑁂 𑀯𑀟𑁆𑀠𑀺𑀲𑀗𑁆𑀔𑀸𑀢𑀲𑁆𑀲 𑀅𑀬𑀲𑁆𑀲 𑀅𑀪𑀸𑀯𑀢𑁄 ‘‘𑀅𑀧𑀸𑀬𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸 𑀤𑀼𑀓𑁆𑀔𑀲𑁆𑀲 𑀕𑀢𑀺𑀪𑀸𑀯𑀢𑁄 𑀤𑀼𑀕𑁆𑀕𑀢𑀺, 𑀲𑀼𑀔𑀲𑀫𑀼𑀲𑁆𑀲𑀬𑀢𑁄 𑀯𑀺𑀦𑀺𑀧𑀢𑀺𑀢𑀢𑁆𑀢𑀸 𑀯𑀺𑀦𑀺𑀧𑀸𑀢𑁄. 𑀇𑀢𑀭𑁄 𑀧𑀦 𑁋

‘‘𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀺, 𑀥𑀸𑀢𑀼𑀆𑀬𑀢𑀦𑀸𑀦 𑀘;

𑀅𑀩𑁆𑀪𑁄𑀘𑁆𑀙𑀺𑀦𑁆𑀦𑀁 𑀯𑀢𑁆𑀢𑀫𑀸𑀦𑀸, 𑀲𑀁𑀲𑀸𑀭𑁄𑀢𑀺 𑀧𑀯𑀼𑀘𑁆𑀘𑀢𑀺’’.

𑀢𑀁 𑀲𑀩𑁆𑀩𑀫𑁆𑀧𑀺 𑀦𑀸𑀢𑀺𑀯𑀢𑁆𑀢𑀢𑀺 𑀦𑀸𑀢𑀺𑀓𑁆𑀓𑀫𑀢𑀺, 𑀅𑀣 𑀔𑁄 𑀘𑀼𑀢𑀺𑀢𑁄 𑀧𑀝𑀺𑀲𑀦𑁆𑀥𑀺𑀁, 𑀧𑀝𑀺𑀲𑀦𑁆𑀥𑀺𑀢𑁄 𑀘𑀼𑀢𑀺𑀦𑁆𑀢𑀺 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀘𑀼𑀢𑀺𑀧𑀝𑀺𑀲𑀦𑁆𑀥𑀺𑀬𑁄 𑀕𑀡𑁆𑀳𑀫𑀸𑀦𑀸 𑀢𑀻𑀲𑀼 𑀪𑀯𑁂𑀲𑀼 𑀘𑀢𑀽𑀲𑀼 𑀬𑁄𑀦𑀻𑀲𑀼 𑀧𑀜𑁆𑀘𑀲𑀼 𑀕𑀢𑀻𑀲𑀼 𑀲𑀢𑁆𑀢𑀲𑀼 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀻𑀲𑀼 𑀦𑀯𑀲𑀼 𑀲𑀢𑁆𑀢𑀸𑀯𑀸𑀲𑁂𑀲𑀼 𑀫𑀳𑀸𑀲𑀫𑀼𑀤𑁆𑀤𑁂 𑀯𑀸𑀢𑀓𑁆𑀔𑀺𑀢𑁆𑀢𑀸 𑀦𑀸𑀯𑀸 𑀯𑀺𑀬 𑀬𑀦𑁆𑀢𑁂 𑀬𑀼𑀢𑁆𑀢𑀕𑁄𑀡𑁄 𑀯𑀺𑀬 𑀘 𑀧𑀭𑀺𑀩𑁆𑀪𑀫𑀢𑀺𑀬𑁂𑀯. 𑀇𑀢𑀺 𑀲𑀩𑁆𑀩𑀫𑁂𑀢𑀁 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀅𑀧𑀲𑀸𑀤𑁂𑀦𑁆𑀢𑁄 𑀆𑀳. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺. 𑀤𑀲𑀫𑀁.

𑀤𑀼𑀓𑁆𑀔𑀯𑀕𑁆𑀕𑁄 𑀙𑀝𑁆𑀞𑁄.

𑁭. 𑀫𑀳𑀸𑀯𑀕𑁆𑀕𑁄

𑁧. 𑀅𑀲𑁆𑀲𑀼𑀢𑀯𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁧. 𑀫𑀳𑀸𑀯𑀕𑁆𑀕𑀲𑁆𑀲 𑀧𑀞𑀫𑁂 𑀅𑀲𑁆𑀲𑀼𑀢𑀯𑀸𑀢𑀺 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀧𑀘𑁆𑀘𑀬𑀸𑀓𑀸𑀭𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀲𑀼 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀺𑀦𑀺𑀘𑁆𑀙𑀬𑀭𑀳𑀺𑀢𑁄. 𑀧𑀼𑀣𑀼𑀚𑁆𑀚𑀦𑁄𑀢𑀺 𑀧𑀼𑀣𑀽𑀦𑀁 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀓𑀺𑀮𑁂𑀲𑀸𑀤𑀻𑀦𑀁 𑀚𑀦𑀦𑀸𑀤𑀺𑀓𑀸𑀭𑀡𑁂𑀳𑀺 𑀧𑀼𑀣𑀼𑀚𑁆𑀚𑀦𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀧𑀼𑀣𑀼 𑀓𑀺𑀮𑁂𑀲𑁂 𑀚𑀦𑁂𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸’’𑀢𑀺 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀅𑀧𑀺𑀘 𑀧𑀼𑀣𑀽𑀦𑀁 𑀕𑀡𑀦𑀧𑀣𑀫𑀢𑀻𑀢𑀸𑀦𑀁 𑀅𑀭𑀺𑀬𑀥𑀫𑁆𑀫𑀧𑀭𑀫𑁆𑀫𑀼𑀔𑀸𑀦𑀁 𑀦𑀻𑀘𑀥𑀫𑁆𑀫𑀲𑀫𑀸𑀘𑀸𑀭𑀸𑀦𑀁 𑀚𑀦𑀸𑀦𑀁 𑀅𑀦𑁆𑀢𑁄𑀕𑀥𑀢𑁆𑀢𑀸𑀧𑀺 𑀧𑀼𑀣𑀼𑀚𑁆𑀚𑀦𑁄, 𑀧𑀼𑀣𑀼 𑀯𑀸 𑀅𑀬𑀁 𑀯𑀺𑀲𑀼𑀁𑀬𑁂𑀯 𑀲𑀗𑁆𑀔𑀁 𑀕𑀢𑁄, 𑀯𑀺𑀲𑀁𑀲𑀝𑁆𑀞𑁄 𑀲𑀻𑀮𑀲𑀼𑀢𑀸𑀤𑀺𑀕𑀼𑀡𑀬𑀼𑀢𑁆𑀢𑁂𑀳𑀺 𑀅𑀭𑀺𑀬𑁂𑀳𑀺 𑀚𑀦𑁄𑀢𑀺 𑀧𑀼𑀣𑀼𑀚𑁆𑀚𑀦𑁄. 𑀏𑀯𑀫𑁂𑀢𑁂𑀳𑀺 ‘‘𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄’’𑀢𑀺 𑀤𑁆𑀯𑀻𑀳𑀺𑀧𑀺 𑀧𑀤𑁂𑀳𑀺 𑀬𑁂 𑀢𑁂 𑁋

‘‘𑀤𑀼𑀯𑁂 𑀧𑀼𑀣𑀼𑀚𑁆𑀚𑀦𑀸 𑀯𑀼𑀢𑁆𑀢𑀸, 𑀩𑀼𑀤𑁆𑀥𑁂𑀦𑀸𑀤𑀺𑀘𑁆𑀘𑀩𑀦𑁆𑀥𑀼𑀦𑀸;

𑀅𑀦𑁆𑀥𑁄 𑀧𑀼𑀣𑀼𑀚𑁆𑀚𑀦𑁄 𑀏𑀓𑁄, 𑀓𑀮𑁆𑀬𑀸𑀡𑁂𑀓𑁄 𑀧𑀼𑀣𑀼𑀚𑁆𑀚𑀦𑁄’’𑀢𑀺. (𑀫𑀳𑀸𑀦𑀺. 𑁯𑁪); 𑁋

𑀤𑁆𑀯𑁂 𑀧𑀼𑀣𑀼𑀚𑁆𑀚𑀦𑀸 𑀯𑀼𑀢𑁆𑀢𑀸, 𑀢𑁂𑀲𑀼 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑁄 𑀕𑀳𑀺𑀢𑁄. 𑀇𑀫𑀲𑁆𑀫𑀺𑀦𑁆𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀘𑁆𑀘𑀓𑁆𑀔𑀓𑀸𑀬𑀁 𑀤𑀲𑁆𑀲𑁂𑀢𑀺. 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀫𑀺𑀦𑁆𑀢𑀺 𑀘𑀢𑀼𑀫𑀳𑀸𑀪𑀽𑀢𑀓𑀸𑀬𑁂 𑀘𑀢𑀼𑀫𑀳𑀸𑀪𑀽𑀢𑁂𑀳𑀺 𑀦𑀺𑀩𑁆𑀩𑀢𑁆𑀢𑁂 𑀘𑀢𑀼𑀫𑀳𑀸𑀪𑀽𑀢𑀫𑀬𑁂𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬𑀸𑀢𑀺 𑀉𑀓𑁆𑀓𑀡𑁆𑀞𑁂𑀬𑁆𑀬. 𑀯𑀺𑀭𑀚𑁆𑀚𑁂𑀬𑁆𑀬𑀸𑀢𑀺 𑀦 𑀭𑀚𑁆𑀚𑁂𑀬𑁆𑀬. 𑀯𑀺𑀫𑀼𑀘𑁆𑀘𑁂𑀬𑁆𑀬𑀸𑀢𑀺 𑀫𑀼𑀘𑁆𑀘𑀺𑀢𑀼𑀓𑀸𑀫𑁄 𑀪𑀯𑁂𑀬𑁆𑀬. 𑀆𑀘𑀬𑁄𑀢𑀺 𑀯𑀼𑀟𑁆𑀠𑀺. 𑀅𑀧𑀘𑀬𑁄𑀢𑀺 𑀧𑀭𑀺𑀳𑀸𑀦𑀺. 𑀆𑀤𑀸𑀦𑀦𑁆𑀢𑀺 𑀦𑀺𑀩𑁆𑀩𑀢𑁆𑀢𑀺. 𑀦𑀺𑀓𑁆𑀔𑁂𑀧𑀦𑀦𑁆𑀢𑀺 𑀪𑁂𑀤𑁄.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀇𑀫𑁂 𑀘𑀢𑁆𑀢𑀸𑀭𑁄 𑀯𑀼𑀟𑁆𑀠𑀺𑀳𑀸𑀦𑀺𑀦𑀺𑀩𑁆𑀩𑀢𑁆𑀢𑀺𑀪𑁂𑀤𑀸 𑀧𑀜𑁆𑀜𑀸𑀬𑀦𑁆𑀢𑀺, 𑀢𑀲𑁆𑀫𑀸 𑀢𑀁𑀓𑀸𑀭𑀡𑀸𑀢𑀺 𑀅𑀢𑁆𑀣𑁄. 𑀇𑀢𑀺 𑀪𑀕𑀯𑀸 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁂 𑀓𑀸𑀬𑁂 𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑀼𑀁 𑀅𑀬𑀼𑀢𑁆𑀢𑀭𑀽𑀧𑀁 𑀓𑀢𑁆𑀯𑀸 𑀅𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑀼𑀁 𑀬𑀼𑀢𑁆𑀢𑀭𑀽𑀧𑀁 𑀓𑀭𑁄𑀢𑀺. 𑀓𑀲𑁆𑀫𑀸? 𑀢𑁂𑀲𑀜𑁆𑀳𑀺 𑀪𑀺𑀓𑁆𑀔𑀽𑀦𑀁 𑀭𑀽𑀧𑀲𑁆𑀫𑀺𑀁 𑀕𑀸𑀳𑁄 𑀩𑀮𑀯𑀸 𑀅𑀥𑀺𑀫𑀢𑁆𑀢𑁄, 𑀢𑁂𑀦 𑀢𑁂𑀲𑀁 𑀭𑀽𑀧𑁂 𑀕𑀸𑀳𑀲𑁆𑀲 𑀧𑀭𑀺𑀕𑁆𑀕𑀳𑁂𑀢𑀩𑁆𑀩𑀭𑀽𑀧𑀢𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀓𑁆𑀓𑀟𑁆𑀠𑀦𑁆𑀢𑁄 𑀅𑀭𑀽𑀧𑁂 𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀁 𑀏𑀯𑀫𑀸𑀳.

𑀘𑀺𑀢𑁆𑀢𑀦𑁆𑀢𑀺𑀆𑀤𑀺 𑀲𑀩𑁆𑀩𑀁 𑀫𑀦𑀸𑀬𑀢𑀦𑀲𑁆𑀲𑁂𑀯 𑀦𑀸𑀫𑀁. 𑀢𑀜𑁆𑀳𑀺 𑀘𑀺𑀢𑁆𑀢𑀯𑀢𑁆𑀣𑀼𑀢𑀸𑀬 𑀘𑀺𑀢𑁆𑀢𑀕𑁄𑀘𑀭𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀘𑀺𑀢𑁆𑀢𑀢𑀸𑀬 𑀘 𑀘𑀺𑀢𑁆𑀢𑀁, 𑀫𑀦𑀦𑀝𑁆𑀞𑁂𑀦 𑀫𑀦𑁄, 𑀯𑀺𑀚𑀸𑀦𑀦𑀝𑁆𑀞𑁂𑀦 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀦𑀸𑀮𑀦𑁆𑀢𑀺 𑀦 𑀲𑀫𑀢𑁆𑀣𑁄. 𑀅𑀚𑁆𑀛𑁄𑀲𑀺𑀢𑀦𑁆𑀢𑀺 𑀢𑀡𑁆𑀳𑀸𑀬 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀕𑀳𑀺𑀢𑀁. 𑀫𑀫𑀸𑀬𑀺𑀢𑀦𑁆𑀢𑀺 𑀢𑀡𑁆𑀳𑀸𑀫𑀫𑀢𑁆𑀢𑁂𑀦 𑀫𑀫 𑀇𑀤𑀦𑁆𑀢𑀺 𑀕𑀳𑀺𑀢𑀁. 𑀧𑀭𑀸𑀫𑀝𑁆𑀞𑀦𑁆𑀢𑀺 𑀤𑀺𑀝𑁆𑀞𑀺𑀬𑀸 𑀧𑀭𑀸𑀫𑀲𑀺𑀢𑁆𑀯𑀸 𑀕𑀳𑀺𑀢𑀁. 𑀏𑀢𑀁 𑀫𑀫𑀸𑀢𑀺 𑀢𑀡𑁆𑀳𑀸𑀕𑀸𑀳𑁄, 𑀢𑁂𑀦 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀁 𑀕𑀳𑀺𑀢𑀁 𑀳𑁄𑀢𑀺. 𑀏𑀲𑁄𑀳𑀫𑀲𑁆𑀫𑀻𑀢𑀺 𑀫𑀸𑀦𑀕𑀸𑀳𑁄, 𑀢𑁂𑀦 𑀦𑀯 𑀫𑀸𑀦𑀸 𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀏𑀲𑁄 𑀫𑁂 𑀅𑀢𑁆𑀢𑀸𑀢𑀺 𑀤𑀺𑀝𑁆𑀞𑀺𑀕𑀸𑀳𑁄, 𑀢𑁂𑀦 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄 𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀯𑀁 𑀤𑀻𑀖𑀭𑀢𑁆𑀢𑀁 𑀕𑀳𑀺𑀢𑀁, 𑀢𑀲𑁆𑀫𑀸 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁 𑀦 𑀲𑀫𑀢𑁆𑀣𑁄.

𑀯𑀭𑀁, 𑀪𑀺𑀓𑁆𑀔𑀯𑁂𑀢𑀺 𑀇𑀤𑀁 𑀓𑀲𑁆𑀫𑀸 𑀆𑀳? 𑀧𑀞𑀫𑀜𑁆𑀳𑀺 𑀢𑁂𑀦 𑀭𑀽𑀧𑀁 𑀧𑀭𑀺𑀕𑁆𑀕𑀳𑁂𑀢𑀼𑀁 𑀅𑀬𑀼𑀢𑁆𑀢𑀭𑀽𑀧𑀁 𑀓𑀢𑀁, 𑀅𑀭𑀽𑀧𑀁 𑀬𑀼𑀢𑁆𑀢𑀭𑀽𑀧𑀁, 𑀅𑀣 ‘‘𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀭𑀽𑀧𑀢𑁄 𑀕𑀸𑀳𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀭𑀽𑀧𑀁 𑀕𑀢𑁄’’𑀢𑀺 𑀜𑀢𑁆𑀯𑀸 𑀢𑀁 𑀦𑀺𑀓𑁆𑀓𑀟𑁆𑀠𑀺𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀅𑀢𑁆𑀢𑀢𑁄 𑀉𑀧𑀕𑀘𑁆𑀙𑁂𑀬𑁆𑀬𑀸𑀢𑀺 𑀅𑀢𑁆𑀢𑀸𑀢𑀺 𑀕𑀡𑁆𑀳𑁂𑀬𑁆𑀬. 𑀪𑀺𑀬𑁆𑀬𑁄𑀧𑀻𑀢𑀺 𑀯𑀲𑁆𑀲𑀲𑀢𑀢𑁄 𑀉𑀤𑁆𑀥𑀫𑁆𑀧𑀺. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀏𑀯𑀫𑀸𑀳? 𑀓𑀺𑀁 𑀅𑀢𑀺𑀭𑁂𑀓𑀯𑀲𑁆𑀲𑀲𑀢𑀁 𑀢𑀺𑀝𑁆𑀞𑀫𑀸𑀦𑀁 𑀭𑀽𑀧𑀁 𑀦𑀸𑀫 𑀅𑀢𑁆𑀣𑀺? 𑀦𑀦𑀼 𑀧𑀞𑀫𑀯𑀬𑁂 𑀧𑀯𑀢𑁆𑀢𑀁 𑀭𑀽𑀧𑀁 𑀫𑀚𑁆𑀛𑀺𑀫𑀯𑀬𑀁 𑀦 𑀧𑀸𑀧𑀼𑀡𑀸𑀢𑀺, 𑀫𑀚𑁆𑀛𑀺𑀫𑀯𑀬𑁂 𑀧𑀯𑀢𑁆𑀢𑀁 𑀧𑀘𑁆𑀙𑀺𑀫𑀯𑀬𑀁, 𑀧𑀼𑀭𑁂𑀪𑀢𑁆𑀢𑁂 𑀧𑀯𑀢𑁆𑀢𑀁 𑀧𑀘𑁆𑀙𑀸𑀪𑀢𑁆𑀢𑀁, 𑀧𑀘𑁆𑀙𑀸𑀪𑀢𑁆𑀢𑁂 𑀧𑀯𑀢𑁆𑀢𑀁 𑀧𑀞𑀫𑀬𑀸𑀫𑀁, 𑀧𑀞𑀫𑀬𑀸𑀫𑁂 𑀧𑀯𑀢𑁆𑀢𑀁 𑀫𑀚𑁆𑀛𑀺𑀫𑀬𑀸𑀫𑀁, 𑀫𑀚𑁆𑀛𑀺𑀫𑀬𑀸𑀫𑁂 𑀧𑀯𑀢𑁆𑀢𑀁 𑀧𑀘𑁆𑀙𑀺𑀫𑀬𑀸𑀫𑀁 𑀦 𑀧𑀸𑀧𑀼𑀡𑀸𑀢𑀺? 𑀢𑀣𑀸 𑀕𑀫𑀦𑁂 𑀧𑀯𑀢𑁆𑀢𑀁 𑀞𑀸𑀦𑀁, 𑀞𑀸𑀦𑁂 𑀧𑀯𑀢𑁆𑀢𑀁 𑀦𑀺𑀲𑀚𑁆𑀚𑀁, 𑀦𑀺𑀲𑀚𑁆𑀚𑀸𑀬 𑀧𑀯𑀢𑁆𑀢𑀁 𑀲𑀬𑀦𑀁 𑀦 𑀧𑀸𑀧𑀼𑀡𑀸𑀢𑀺. 𑀏𑀓𑀇𑀭𑀺𑀬𑀸𑀧𑀣𑁂𑀧𑀺 𑀧𑀸𑀤𑀲𑁆𑀲 𑀉𑀤𑁆𑀥𑀭𑀡𑁂 𑀧𑀯𑀢𑁆𑀢𑀁 𑀅𑀢𑀺𑀳𑀭𑀡𑀁, 𑀅𑀢𑀺𑀳𑀭𑀡𑁂 𑀧𑀯𑀢𑁆𑀢𑀁 𑀯𑀻𑀢𑀺𑀳𑀭𑀡𑀁, 𑀯𑀻𑀢𑀺𑀳𑀭𑀡𑁂 𑀧𑀯𑀢𑁆𑀢𑀁 𑀯𑁄𑀲𑁆𑀲𑀚𑁆𑀚𑀦𑀁, 𑀯𑁄𑀲𑁆𑀲𑀚𑁆𑀚𑀦𑁂 𑀧𑀯𑀢𑁆𑀢𑀁 𑀲𑀦𑁆𑀦𑀺𑀓𑁆𑀔𑁂𑀧𑀦𑀁, 𑀲𑀦𑁆𑀦𑀺𑀓𑁆𑀔𑁂𑀧𑀦𑁂 𑀧𑀯𑀢𑁆𑀢𑀁 𑀲𑀦𑁆𑀦𑀺𑀭𑀼𑀚𑁆𑀛𑀦𑀁 𑀦 𑀧𑀸𑀧𑀼𑀡𑀸𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀑𑀥𑀺 𑀑𑀥𑀺 𑀧𑀩𑁆𑀩𑀁 𑀧𑀩𑁆𑀩𑀁 𑀳𑀼𑀢𑁆𑀯𑀸 𑀢𑀢𑁆𑀢𑀓𑀧𑀸𑀮𑁂 𑀧𑀓𑁆𑀔𑀺𑀢𑁆𑀢𑀢𑀺𑀮𑀸 𑀯𑀺𑀬 𑀧𑀝𑀧𑀝𑀸𑀬𑀦𑁆𑀢𑀸 𑀲𑀗𑁆𑀔𑀸𑀭𑀸 𑀪𑀺𑀚𑁆𑀚𑀦𑁆𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁. 𑀬𑀣𑀸 𑀧𑀦 𑀧𑀤𑀻𑀧𑀲𑁆𑀲 𑀚𑀮𑀢𑁄 𑀚𑀸𑀢𑀸 𑀢𑀁 𑀢𑀁 𑀯𑀝𑁆𑀝𑀺𑀧𑁆𑀧𑀤𑁂𑀲𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀪𑀺𑀚𑁆𑀚𑀢𑀺, 𑀅𑀣 𑀘 𑀧𑀦 𑀧𑀯𑁂𑀡𑀺𑀲𑀫𑁆𑀩𑀦𑁆𑀥𑀯𑀲𑁂𑀦 𑀲𑀩𑁆𑀩𑀭𑀢𑁆𑀢𑀺𑀁 𑀚𑀮𑀺𑀢𑁄 𑀧𑀤𑀻𑀧𑁄𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀫𑀺𑀥𑀸𑀧𑀺 𑀧𑀯𑁂𑀡𑀺𑀯𑀲𑁂𑀦 𑀅𑀬𑀫𑁆𑀧𑀺 𑀓𑀸𑀬𑁄 𑀏𑀯𑀁 𑀘𑀺𑀭𑀝𑁆𑀞𑀺𑀢𑀺𑀓𑁄 𑀯𑀺𑀬 𑀓𑀢𑁆𑀯𑀸 𑀤𑀲𑁆𑀲𑀺𑀢𑁄.

𑀭𑀢𑁆𑀢𑀺𑀬𑀸 𑀘 𑀤𑀺𑀯𑀲𑀲𑁆𑀲 𑀘𑀸𑀢𑀺 𑀭𑀢𑁆𑀢𑀺𑀫𑁆𑀳𑀺 𑀘 𑀤𑀺𑀯𑀲𑁂 𑀘. 𑀪𑀼𑀫𑁆𑀫𑀢𑁆𑀣𑁂 𑀳𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀅𑀜𑁆𑀜𑀤𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀅𑀜𑁆𑀜𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀬𑀁 𑀭𑀢𑁆𑀢𑀺𑀁 𑀉𑀧𑁆𑀧𑀚𑁆𑀚𑀢𑀺 𑀘 𑀦𑀺𑀭𑀼𑀚𑁆𑀛𑀢𑀺 𑀘, 𑀢𑀢𑁄 𑀅𑀜𑁆𑀜𑀤𑁂𑀯 𑀤𑀺𑀯𑀸 𑀉𑀧𑁆𑀧𑀚𑁆𑀚𑀢𑀺 𑀘 𑀦𑀺𑀭𑀼𑀚𑁆𑀛𑀢𑀺 𑀘𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀦𑀼𑀧𑁆𑀧𑀦𑁆𑀦𑀫𑁂𑀯 𑀅𑀜𑁆𑀜𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀏𑀯𑀁 𑀧𑀦 𑀅𑀢𑁆𑀣𑁄 𑀦 𑀕𑀳𑁂𑀢𑀩𑁆𑀩𑁄. ‘‘𑀭𑀢𑁆𑀢𑀺𑀬𑀸 𑀘 𑀤𑀺𑀯𑀲𑀲𑁆𑀲 𑀘𑀸’’𑀢𑀺 𑀇𑀤𑀁 𑀧𑀼𑀭𑀺𑀫𑀧𑀯𑁂𑀡𑀺𑀢𑁄 𑀧𑀭𑀺𑀢𑁆𑀢𑀓𑀁 𑀧𑀯𑁂𑀡𑀺𑀁 𑀕𑀳𑁂𑀢𑁆𑀯𑀸 𑀧𑀯𑁂𑀡𑀺𑀯𑀲𑁂𑀦𑁂𑀯 𑀯𑀼𑀢𑁆𑀢𑀁, 𑀏𑀓𑀭𑀢𑁆𑀢𑀺𑀁 𑀧𑀦 𑀏𑀓𑀤𑀺𑀯𑀲𑀁 𑀯𑀸 𑀏𑀓𑀫𑁂𑀯 𑀘𑀺𑀢𑁆𑀢𑀁 𑀞𑀸𑀢𑀼𑀁 𑀲𑀫𑀢𑁆𑀣𑀁 𑀦𑀸𑀫 𑀦𑀢𑁆𑀣𑀺. 𑀏𑀓𑀲𑁆𑀫𑀺𑀜𑁆𑀳𑀺 𑀅𑀘𑁆𑀙𑀭𑀸𑀓𑁆𑀔𑀡𑁂 𑀅𑀦𑁂𑀓𑀸𑀦𑀺 𑀘𑀺𑀢𑁆𑀢𑀓𑁄𑀝𑀺𑀲𑀢𑀲𑀳𑀲𑁆𑀲𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀫𑀺𑀮𑀺𑀦𑁆𑀤𑀧𑀜𑁆𑀳𑁂 𑁋

‘‘𑀯𑀸𑀳𑀲𑀢𑀁 𑀔𑁄, 𑀫𑀳𑀸𑀭𑀸𑀚, 𑀯𑀻𑀳𑀻𑀦𑀁, 𑀅𑀟𑁆𑀠𑀘𑀽𑀴𑀜𑁆𑀘 𑀯𑀸𑀳𑀸, 𑀯𑀻𑀳𑀺𑀲𑀢𑁆𑀢𑀫𑁆𑀩𑀡𑀸𑀦𑀺, 𑀤𑁆𑀯𑁂 𑀘 𑀢𑀼𑀫𑁆𑀩𑀸, 𑀏𑀓𑀘𑁆𑀙𑀭𑀸𑀓𑁆𑀔𑀡𑁂 𑀧𑀯𑀢𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀏𑀢𑁆𑀢𑀓𑀸 𑀯𑀻𑀳𑀻 𑀮𑀓𑁆𑀔𑀁 𑀞𑀧𑀻𑀬𑀫𑀸𑀦𑀸 𑀧𑀭𑀺𑀓𑁆𑀔𑀬𑀁 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑁂𑀬𑁆𑀬𑀼’’𑀦𑁆𑀢𑀺.

𑀧𑀯𑀦𑁂𑀢𑀺 𑀫𑀳𑀸𑀯𑀦𑁂. 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀕𑀡𑁆𑀳𑀸𑀢𑀺, 𑀢𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀜𑁆𑀜𑀁 𑀕𑀡𑁆𑀳𑀸𑀢𑀻𑀢𑀺 𑀇𑀫𑀺𑀦𑀸 𑀦 𑀲𑁄 𑀕𑀡𑁆𑀳𑀺𑀢𑀩𑁆𑀩𑀲𑀸𑀔𑀁 𑀅𑀮𑀪𑀺𑀢𑁆𑀯𑀸 𑀪𑀽𑀫𑀺𑀁 𑀑𑀢𑀭𑀢𑀺. 𑀅𑀣 𑀔𑁄 𑀢𑀲𑁆𑀫𑀺𑀁 𑀫𑀳𑀸𑀯𑀦𑁂 𑀯𑀺𑀘𑀭𑀦𑁆𑀢𑁄 𑀢𑀁 𑀢𑀁 𑀲𑀸𑀔𑀁 𑀕𑀡𑁆𑀳𑀦𑁆𑀢𑁄𑀬𑁂𑀯 𑀘𑀭𑀢𑀻𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀅𑀭𑀜𑁆𑀜𑀫𑀳𑀸𑀯𑀦𑀁 𑀯𑀺𑀬 𑀳𑀺 𑀆𑀭𑀫𑁆𑀫𑀡𑀯𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀺𑀁 𑀯𑀦𑁂 𑀯𑀺𑀘𑀭𑀡𑀫𑀓𑁆𑀓𑀝𑁄 𑀯𑀺𑀬 𑀆𑀭𑀫𑁆𑀫𑀡𑀯𑀦𑁂 𑀉𑀧𑁆𑀧𑀚𑁆𑀚𑀦𑀓𑀘𑀺𑀢𑁆𑀢𑀁. 𑀲𑀸𑀔𑀸𑀕𑀳𑀡𑀁 𑀯𑀺𑀬 𑀆𑀭𑀫𑁆𑀫𑀡𑁂 𑀮𑀼𑀩𑁆𑀪𑀦𑀁. 𑀬𑀣𑀸 𑀲𑁄 𑀅𑀭𑀜𑁆𑀜𑁂 𑀯𑀺𑀘𑀭𑀦𑁆𑀢𑁄 𑀫𑀓𑁆𑀓𑀝𑁄 𑀢𑀁 𑀢𑀁 𑀲𑀸𑀔𑀁 𑀧𑀳𑀸𑀬 𑀢𑀁 𑀢𑀁 𑀲𑀸𑀔𑀁 𑀕𑀡𑁆𑀳𑀸𑀢𑀺, 𑀏𑀯𑀫𑀺𑀤𑀁 𑀆𑀭𑀫𑁆𑀫𑀡𑀯𑀦𑁂 𑀯𑀺𑀘𑀭𑀦𑁆𑀢𑀁 𑀘𑀺𑀢𑁆𑀢𑀫𑁆𑀧𑀺 𑀓𑀤𑀸𑀘𑀺 𑀭𑀽𑀧𑀸𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺, 𑀓𑀤𑀸𑀘𑀺 𑀲𑀤𑁆𑀤𑀸𑀤𑀻𑀲𑀼 𑀅𑀜𑁆𑀜𑀢𑀭𑀁, 𑀓𑀤𑀸𑀘𑀺 𑀅𑀢𑀻𑀢𑀁, 𑀓𑀤𑀸𑀘𑀺 𑀅𑀦𑀸𑀕𑀢𑀁 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸, 𑀢𑀣𑀸 𑀓𑀤𑀸𑀘𑀺 𑀅𑀚𑁆𑀛𑀢𑁆𑀢𑀁, 𑀓𑀤𑀸𑀘𑀺 𑀩𑀸𑀳𑀺𑀭𑀁. 𑀬𑀣𑀸 𑀘 𑀲𑁄 𑀅𑀭𑀜𑁆𑀜𑁂 𑀯𑀺𑀘𑀭𑀦𑁆𑀢𑁄 𑀫𑀓𑁆𑀓𑀝𑁄 𑀲𑀸𑀔𑀁 𑀅𑀮𑀪𑀺𑀢𑁆𑀯𑀸 𑀑𑀭𑀼𑀬𑁆𑀳 𑀪𑀽𑀫𑀺𑀬𑀁 𑀦𑀺𑀲𑀺𑀦𑁆𑀦𑁄𑀢𑀺 𑀦 𑀯𑀢𑁆𑀢𑀩𑁆𑀩𑁄, 𑀏𑀓𑀁 𑀧𑀦 𑀧𑀡𑁆𑀡𑀲𑀸𑀔𑀁 𑀕𑀳𑁂𑀢𑁆𑀯𑀸𑀯 𑀦𑀺𑀲𑀻𑀤𑀢𑀺, 𑀏𑀯𑀫𑁂𑀯 𑀆𑀭𑀫𑁆𑀫𑀡𑀯𑀦𑁂 𑀯𑀺𑀘𑀭𑀦𑁆𑀢𑀁 𑀘𑀺𑀢𑁆𑀢𑀫𑁆𑀧𑀺 𑀏𑀓𑀁 𑀑𑀮𑀼𑀩𑁆𑀪𑀸𑀭𑀫𑁆𑀫𑀡𑀁 𑀅𑀮𑀪𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀏𑀓𑀚𑀸𑀢𑀺𑀬𑀁 𑀧𑀦 𑀆𑀭𑀫𑁆𑀫𑀡𑀁 𑀕𑀳𑁂𑀢𑁆𑀯𑀸𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀘 𑀧𑀦 𑀪𑀕𑀯𑀢𑀸 𑀭𑀽𑀧𑀢𑁄 𑀦𑀻𑀳𑀭𑀺𑀢𑁆𑀯𑀸 𑀅𑀭𑀽𑀧𑁂 𑀕𑀸𑀳𑁄 𑀧𑀢𑀺𑀝𑁆𑀞𑀸𑀧𑀺𑀢𑁄, 𑀅𑀭𑀽𑀧𑀢𑁄 𑀦𑀻𑀳𑀭𑀺𑀢𑁆𑀯𑀸 𑀭𑀽𑀧𑁂.

𑀇𑀤𑀸𑀦𑀺 𑀢𑀁 𑀉𑀪𑀬𑀢𑁄 𑀦𑀺𑀓𑁆𑀓𑀟𑁆𑀠𑀺𑀢𑀼𑀓𑀸𑀫𑁄 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄𑀢𑀺 𑀤𑁂𑀲𑀦𑀁 𑀆𑀭𑀪𑀺. 𑀅𑀬𑀁 𑀧𑀦𑀢𑁆𑀣𑁄 𑀆𑀲𑀻𑀯𑀺𑀲𑀤𑀝𑁆𑀞𑀽𑀧𑀫𑀸𑀬 𑀤𑀻𑀧𑁂𑀢𑀩𑁆𑀩𑁄 𑁋 𑀏𑀓𑁄 𑀓𑀺𑀭 𑀧𑀼𑀭𑀺𑀲𑁄 𑀆𑀲𑀻𑀯𑀺𑀲𑁂𑀦 𑀤𑀝𑁆𑀞𑁄, 𑀅𑀣𑀲𑁆𑀲 𑀯𑀺𑀲𑀁 𑀳𑀭𑀺𑀲𑁆𑀲𑀸𑀫𑀻𑀢𑀺 𑀙𑁂𑀓𑁄 𑀪𑀺𑀲𑀓𑁆𑀓𑁄 𑀆𑀕𑀦𑁆𑀢𑁆𑀯𑀸 𑀯𑀫𑀦𑀁 𑀓𑀸𑀭𑁂𑀢𑁆𑀯𑀸 𑀳𑁂𑀝𑁆𑀞𑀸 𑀕𑀭𑀼𑀴𑁄, 𑀉𑀧𑀭𑀺 𑀦𑀸𑀕𑁄𑀢𑀺 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀯𑀺𑀲𑀁 𑀉𑀧𑀭𑀺 𑀆𑀭𑁄𑀧𑁂𑀲𑀺. 𑀲𑁄 𑀬𑀸𑀯 𑀅𑀓𑁆𑀔𑀺𑀧𑁆𑀧𑀤𑁂𑀲𑀸 𑀆𑀭𑀼𑀴𑁆𑀳𑀪𑀸𑀯𑀁 𑀜𑀢𑁆𑀯𑀸 ‘‘𑀇𑀢𑁄 𑀧𑀭𑀁 𑀅𑀪𑀺𑀭𑀼𑀳𑀺𑀢𑀼𑀁 𑀦 𑀤𑀲𑁆𑀲𑀸𑀫𑀺, 𑀤𑀝𑁆𑀞𑀝𑁆𑀞𑀸𑀦𑁂𑀬𑁂𑀯 𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀉𑀧𑀭𑀺 𑀕𑀭𑀼𑀴𑁄, 𑀳𑁂𑀝𑁆𑀞𑀸 𑀦𑀸𑀕𑁄𑀢𑀺 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀓𑀡𑁆𑀡𑁂 𑀥𑀼𑀫𑁂𑀢𑁆𑀯𑀸 𑀤𑀡𑁆𑀟𑀓𑁂𑀦 𑀧𑀳𑀭𑀺𑀢𑁆𑀯𑀸 𑀯𑀺𑀲𑀁 𑀑𑀢𑀸𑀭𑁂𑀢𑁆𑀯𑀸 𑀤𑀝𑁆𑀞𑀝𑁆𑀞𑀸𑀦𑁂𑀬𑁂𑀯 𑀞𑀧𑁂𑀲𑀺. 𑀢𑀢𑁆𑀭𑀲𑁆𑀲 𑀞𑀺𑀢𑀪𑀸𑀯𑀁 𑀜𑀢𑁆𑀯𑀸 𑀅𑀕𑀤𑀮𑁂𑀧𑁂𑀦 𑀯𑀺𑀲𑀁 𑀦𑀺𑀫𑁆𑀫𑀣𑁂𑀢𑁆𑀯𑀸 𑀦𑁆𑀳𑀸𑀧𑁂𑀢𑁆𑀯𑀸 ‘‘𑀲𑀼𑀔𑀻 𑀳𑁄𑀳𑀻’’𑀢𑀺 𑀯𑀢𑁆𑀯𑀸 𑀬𑁂𑀦𑀓𑀸𑀫𑀁 𑀧𑀓𑁆𑀓𑀸𑀫𑀺.

𑀢𑀢𑁆𑀣 𑀆𑀲𑀻𑀯𑀺𑀲𑁂𑀦 𑀤𑀝𑁆𑀞𑀲𑁆𑀲 𑀓𑀸𑀬𑁂 𑀯𑀺𑀲𑀧𑀢𑀺𑀝𑁆𑀞𑀸𑀦𑀁 𑀯𑀺𑀬 𑀇𑀫𑁂𑀲𑀁 𑀪𑀺𑀓𑁆𑀔𑀽𑀦𑀁 𑀭𑀽𑀧𑁂 𑀅𑀥𑀺𑀫𑀢𑁆𑀢𑀕𑀸𑀳𑀓𑀸𑀮𑁄, 𑀙𑁂𑀓𑁄 𑀪𑀺𑀲𑀓𑁆𑀓𑁄 𑀯𑀺𑀬 𑀢𑀣𑀸𑀕𑀢𑁄, 𑀫𑀦𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀉𑀧𑀭𑀺 𑀯𑀺𑀲𑀲𑁆𑀲 𑀆𑀭𑁄𑀧𑀺𑀢𑀓𑀸𑀮𑁄 𑀯𑀺𑀬 𑀢𑀣𑀸𑀕𑀢𑁂𑀦 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀭𑀽𑀧𑀢𑁄 𑀕𑀸𑀳𑀁 𑀦𑀻𑀳𑀭𑀺𑀢𑁆𑀯𑀸 𑀅𑀭𑀽𑀧𑁂 𑀧𑀢𑀺𑀝𑁆𑀞𑀸𑀧𑀺𑀢𑀓𑀸𑀮𑁄, 𑀬𑀸𑀯 𑀅𑀓𑁆𑀔𑀺𑀧𑁆𑀧𑀤𑁂𑀲𑀸 𑀆𑀭𑀼𑀴𑁆𑀳𑀯𑀺𑀲𑀲𑁆𑀲 𑀉𑀧𑀭𑀺 𑀅𑀪𑀺𑀭𑀼𑀳𑀺𑀢𑀼𑀁 𑀅𑀤𑀢𑁆𑀯𑀸 𑀧𑀼𑀦 𑀫𑀦𑁆𑀢𑀩𑀮𑁂𑀦 𑀑𑀢𑀸𑀭𑁂𑀢𑁆𑀯𑀸 𑀤𑀝𑁆𑀞𑀝𑁆𑀞𑀸𑀦𑁂𑀬𑁂𑀯 𑀞𑀧𑀦𑀁 𑀯𑀺𑀬 𑀲𑀢𑁆𑀣𑀸𑀭𑀸 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀭𑀽𑀧𑀢𑁄 𑀕𑀸𑀳𑀁 𑀦𑀻𑀳𑀭𑀺𑀢𑁆𑀯𑀸 𑀭𑀽𑀧𑁂 𑀧𑀢𑀺𑀝𑁆𑀞𑀸𑀧𑀺𑀢𑀓𑀸𑀮𑁄. 𑀤𑀝𑁆𑀞𑀝𑁆𑀞𑀸𑀦𑁂 𑀞𑀺𑀢𑀲𑁆𑀲 𑀯𑀺𑀲𑀲𑁆𑀲 𑀅𑀕𑀤𑀮𑁂𑀧𑁂𑀦 𑀦𑀺𑀫𑁆𑀫𑀣𑀦𑀁 𑀯𑀺𑀬 𑀉𑀪𑀬𑀢𑁄 𑀕𑀸𑀳𑀁 𑀦𑀻𑀳𑀭𑀡𑀢𑁆𑀣𑀸𑀬 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀆𑀭𑀤𑁆𑀥𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀦𑀺𑀩𑁆𑀩𑀺𑀦𑁆𑀤𑀁 𑀯𑀺𑀭𑀚𑁆𑀚𑀢𑀻𑀢𑀺 𑀇𑀫𑀺𑀦𑀸 𑀫𑀕𑁆𑀕𑁄 𑀓𑀣𑀺𑀢𑁄, 𑀯𑀺𑀭𑀸𑀕𑀸 𑀯𑀺𑀫𑀼𑀘𑁆𑀘𑀢𑀻𑀢𑀺 𑀨𑀮𑀁, 𑀯𑀺𑀫𑀼𑀢𑁆𑀢𑀲𑁆𑀫𑀺𑀦𑁆𑀢𑀺𑀆𑀤𑀺𑀦𑀸 𑀧𑀘𑁆𑀘𑀯𑁂𑀓𑁆𑀔𑀡𑀸. 𑀧𑀞𑀫𑀁.

𑁨. 𑀤𑀼𑀢𑀺𑀬𑀅𑀲𑁆𑀲𑀼𑀢𑀯𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁨. 𑀤𑀼𑀢𑀺𑀬𑁂 𑀲𑀼𑀔𑀯𑁂𑀤𑀦𑀺𑀬𑀦𑁆𑀢𑀺 𑀲𑀼𑀔𑀯𑁂𑀤𑀦𑀸𑀬 𑀧𑀘𑁆𑀘𑀬𑀁. 𑀨𑀲𑁆𑀲𑀦𑁆𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀺𑀁. 𑀦𑀦𑀼 𑀘 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄 𑀲𑀼𑀔𑀯𑁂𑀤𑀦𑀸𑀬 𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺? 𑀲𑀳𑀚𑀸𑀢𑀧𑀘𑁆𑀘𑀬𑁂𑀦 𑀦 𑀳𑁄𑀢𑀺, 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁂𑀦 𑀧𑀦 𑀚𑀯𑀦𑀯𑁂𑀤𑀦𑀸𑀬 𑀳𑁄𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀲𑁄𑀢𑀲𑀫𑁆𑀨𑀲𑁆𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑀚𑁆𑀚𑀦𑁆𑀢𑀺 𑀢𑀚𑁆𑀚𑀸𑀢𑀺𑀓𑀁 𑀢𑀲𑁆𑀲𑀸𑀭𑀼𑀧𑁆𑀧𑀁, 𑀢𑀲𑁆𑀲 𑀨𑀲𑁆𑀲𑀲𑁆𑀲 𑀅𑀦𑀼𑀭𑀽𑀧𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀯𑁂𑀤𑀦𑀺𑀬𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑀗𑁆𑀖𑀝𑁆𑀝𑀦𑀲𑀫𑁄𑀥𑀸𑀦𑀸𑀢𑀺 𑀲𑀗𑁆𑀖𑀝𑁆𑀝𑀦𑁂𑀦 𑀘𑁂𑀯 𑀲𑀫𑁄𑀥𑀸𑀦𑁂𑀦 𑀘, 𑀲𑀗𑁆𑀖𑀝𑁆𑀝𑀦𑀲𑀫𑁆𑀧𑀺𑀡𑁆𑀟𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀉𑀲𑁆𑀫𑀸𑀢𑀺 𑀉𑀡𑁆𑀳𑀸𑀓𑀸𑀭𑁄. 𑀢𑁂𑀚𑁄 𑀅𑀪𑀺𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀅𑀕𑁆𑀕𑀺𑀘𑀼𑀡𑁆𑀡𑁄 𑀦𑀺𑀓𑁆𑀔𑀫𑀢𑀻𑀢𑀺 𑀦 𑀕𑀳𑁂𑀢𑀩𑁆𑀩𑀁, 𑀉𑀲𑁆𑀫𑀸𑀓𑀸𑀭𑀲𑁆𑀲𑁂𑀯 𑀧𑀦 𑀏𑀢𑀁 𑀯𑁂𑀯𑀘𑀦𑀁. 𑀢𑀢𑁆𑀣 𑀤𑁆𑀯𑀺𑀦𑁆𑀦𑀁 𑀓𑀝𑁆𑀞𑀸𑀦𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀅𑀭𑀡𑀻𑀦𑀁. 𑀢𑀢𑁆𑀣 𑀅𑀥𑁄𑀅𑀭𑀡𑀻 𑀯𑀺𑀬 𑀯𑀢𑁆𑀣𑀼, 𑀉𑀢𑁆𑀢𑀭𑀸𑀭𑀡𑀻 𑀯𑀺𑀬 𑀆𑀭𑀫𑁆𑀫𑀡𑀁, 𑀲𑀗𑁆𑀖𑀝𑁆𑀝𑀦𑀁 𑀯𑀺𑀬 𑀨𑀲𑁆𑀲𑁄, 𑀉𑀲𑁆𑀫𑀸𑀥𑀸𑀢𑀼 𑀯𑀺𑀬 𑀯𑁂𑀤𑀦𑀸. 𑀤𑀼𑀢𑀺𑀬𑀁.

𑁩. 𑀧𑀼𑀢𑁆𑀢𑀫𑀁𑀲𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁩. 𑀢𑀢𑀺𑀬𑁂 𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑀸𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀬𑀲𑁆𑀫𑀸 𑀧𑀦𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄 𑀦𑀺𑀓𑁆𑀔𑁂𑀧𑁄, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀢𑁆𑀯𑀸𑀯𑁂𑀢𑁆𑀣 𑀅𑀦𑀼𑀧𑀼𑀩𑁆𑀩𑀧𑀤𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫𑀺. 𑀓𑀢𑀭𑀸𑀬 𑀧𑀦 𑀇𑀤𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺? 𑀮𑀸𑀪𑀲𑀓𑁆𑀓𑀸𑀭𑁂𑀦. 𑀪𑀕𑀯𑀢𑁄 𑀓𑀺𑀭 𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀉𑀧𑁆𑀧𑀚𑁆𑀚𑀺, 𑀬𑀣𑀸 𑀢𑀁 𑀘𑀢𑁆𑀢𑀸𑀭𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑁂 𑀧𑀽𑀭𑀺𑀢𑀤𑀸𑀦𑀧𑀸𑀭𑀫𑀻𑀲𑀜𑁆𑀘𑀬𑀲𑁆𑀲. 𑀲𑀩𑁆𑀩𑀤𑀺𑀲𑀸𑀲𑀼 𑀳𑀺𑀲𑁆𑀲 𑀬𑀫𑀓𑀫𑀳𑀸𑀫𑁂𑀖𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀫𑀳𑁄𑀖𑀁 𑀯𑀺𑀬 𑀲𑀩𑁆𑀩𑀧𑀸𑀭𑀫𑀺𑀬𑁄 ‘‘𑀏𑀓𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀯𑀺𑀧𑀸𑀓𑀁 𑀤𑀲𑁆𑀲𑀸𑀫𑀸’’𑀢𑀺 𑀲𑀫𑁆𑀧𑀺𑀡𑁆𑀟𑀺𑀢𑀸 𑀯𑀺𑀬 𑀮𑀸𑀪𑀲𑀓𑁆𑀓𑀸𑀭𑀫𑀳𑁄𑀖𑀁 𑀦𑀺𑀩𑁆𑀩𑀢𑁆𑀢𑀬𑀺𑀁𑀲𑀼. 𑀢𑀢𑁄 𑀢𑀢𑁄 𑀅𑀦𑁆𑀦𑀧𑀸𑀦𑀬𑀸𑀦𑀯𑀢𑁆𑀣𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀸𑀤𑀺𑀳𑀢𑁆𑀣𑀸 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀆𑀕𑀦𑁆𑀢𑁆𑀯𑀸, ‘‘𑀓𑀳𑀁 𑀩𑀼𑀤𑁆𑀥𑁄, 𑀓𑀳𑀁 𑀪𑀕𑀯𑀸, 𑀓𑀳𑀁 𑀤𑁂𑀯𑀤𑁂𑀯𑁄 𑀦𑀭𑀸𑀲𑀪𑁄 𑀧𑀼𑀭𑀺𑀲𑀲𑀻𑀳𑁄’’𑀢𑀺? 𑀪𑀕𑀯𑀦𑁆𑀢𑀁 𑀧𑀭𑀺𑀬𑁂𑀲𑀦𑁆𑀢𑀺. 𑀲𑀓𑀝𑀲𑀢𑁂𑀳𑀺𑀧𑀺 𑀧𑀘𑁆𑀘𑀬𑁂 𑀆𑀳𑀭𑀺𑀢𑁆𑀯𑀸 𑀑𑀓𑀸𑀲𑀁 𑀅𑀮𑀪𑀫𑀸𑀦𑀸 𑀲𑀫𑀦𑁆𑀢𑀸 𑀕𑀸𑀯𑀼𑀢𑀧𑁆𑀧𑀫𑀸𑀡𑀫𑁆𑀧𑀺 𑀲𑀓𑀝𑀥𑀼𑀭𑁂𑀦 𑀲𑀓𑀝𑀥𑀼𑀭𑀁 𑀆𑀳𑀘𑁆𑀘 𑀢𑀺𑀝𑁆𑀞𑀦𑁆𑀢𑀺 𑀘𑁂𑀯 𑀅𑀦𑀼𑀧𑁆𑀧𑀯𑀢𑁆𑀢𑀦𑁆𑀢𑀺 𑀘 𑀅𑀦𑁆𑀥𑀓𑀯𑀺𑀦𑁆𑀤𑀩𑁆𑀭𑀸𑀳𑁆𑀫𑀡𑀸𑀤𑀬𑁄 𑀯𑀺𑀬. 𑀲𑀩𑁆𑀩𑀁 𑀔𑀦𑁆𑀥𑀓𑁂 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑁂𑀲𑀼 𑀘 𑀆𑀕𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀬𑀣𑀸 𑀪𑀕𑀯𑀢𑁄, 𑀏𑀯𑀁 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲𑀸𑀧𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋

‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀕𑀯𑀸 𑀲𑀓𑁆𑀓𑀢𑁄 𑀳𑁄𑀢𑀺 𑀕𑀭𑀼𑀓𑀢𑁄 𑀫𑀸𑀦𑀺𑀢𑁄 𑀧𑀽𑀚𑀺𑀢𑁄 𑀅𑀧𑀘𑀺𑀢𑁄 𑀮𑀸𑀪𑀻 𑀘𑀻𑀯𑀭-𑀧𑀺𑀡𑁆𑀟𑀧𑀸𑀢-𑀲𑁂𑀦𑀸𑀲𑀦-𑀕𑀺𑀮𑀸𑀦-𑀧𑀘𑁆𑀘𑀬-𑀪𑁂𑀲𑀚𑁆𑀚-𑀧𑀭𑀺𑀓𑁆𑀔𑀸𑀭𑀸𑀦𑀁. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀔𑁄 𑀲𑀓𑁆𑀓𑀢𑁄 𑀳𑁄𑀢𑀺…𑀧𑁂… 𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺 (𑀉𑀤𑀸. 𑁧𑁪; 𑀲𑀁. 𑀦𑀺. 𑁨.𑁭𑁦).

𑀢𑀣𑀸 ‘‘𑀬𑀸𑀯𑀢𑀸 𑀔𑁄, 𑀘𑀼𑀦𑁆𑀤, 𑀏𑀢𑀭𑀳𑀺 𑀲𑀗𑁆𑀖𑁄 𑀯𑀸 𑀕𑀡𑁄 𑀯𑀸 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀦𑀸𑀳𑀁, 𑀘𑀼𑀦𑁆𑀤, 𑀅𑀜𑁆𑀜𑀁 𑀏𑀓𑀲𑀗𑁆𑀖𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺 𑀏𑀯𑀁 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑀢𑁆𑀢𑀁 𑀬𑀣𑀭𑀺𑀯𑀸𑀬𑀁, 𑀘𑀼𑀦𑁆𑀤, 𑀪𑀺𑀓𑁆𑀔𑀼𑀲𑀗𑁆𑀖𑁄’’𑀢𑀺 (𑀤𑀻. 𑀦𑀺. 𑁩.𑁧𑁭𑁬).

𑀲𑁆𑀯𑀸𑀬𑀁 𑀪𑀕𑀯𑀢𑁄 𑀘 𑀲𑀗𑁆𑀖𑀲𑁆𑀲 𑀘 𑀉𑀧𑁆𑀧𑀦𑁆𑀦𑁄 𑀮𑀸𑀪𑀲𑀓𑁆𑀓𑀸𑀭𑁄 𑀏𑀓𑀢𑁄 𑀳𑀼𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀫𑀳𑀸𑀦𑀤𑀻𑀦𑀁 𑀉𑀤𑀓𑀁 𑀯𑀺𑀬 𑀅𑀧𑁆𑀧𑀫𑁂𑀬𑁆𑀬𑁄 𑀅𑀳𑁄𑀲𑀺. 𑀅𑀣 𑀲𑀢𑁆𑀣𑀸 𑀭𑀳𑁄𑀕𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀳𑀸𑀮𑀸𑀪𑀲𑀓𑁆𑀓𑀸𑀭𑁄 𑀅𑀢𑀻𑀢𑀩𑀼𑀤𑁆𑀥𑀸𑀦𑀫𑁆𑀧𑀺 𑀏𑀯𑀭𑀽𑀧𑁄 𑀅𑀳𑁄𑀲𑀺, 𑀅𑀦𑀸𑀕𑀢𑀸𑀦𑀫𑁆𑀧𑀺 𑀏𑀯𑀭𑀽𑀧𑁄 𑀪𑀯𑀺𑀲𑁆𑀲𑀢𑀺. 𑀓𑀺𑀁 𑀦𑀼 𑀔𑁄 𑀪𑀺𑀓𑁆𑀔𑀽 𑀆𑀳𑀸𑀭𑀧𑀭𑀺𑀕𑁆𑀕𑀸𑀳𑀓𑁂𑀦 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀲𑀫𑀦𑁆𑀦𑀸𑀕𑀢𑀸 𑀫𑀚𑁆𑀛𑀢𑁆𑀢𑀸 𑀦𑀺𑀘𑁆𑀙𑀦𑁆𑀤𑀭𑀸𑀕𑀸 𑀳𑀼𑀢𑁆𑀯𑀸 𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀦 𑀲𑀓𑁆𑀓𑁄𑀦𑁆𑀢𑀻’’𑀢𑀺?

𑀲𑁄 𑀅𑀤𑁆𑀤𑀲 𑀏𑀓𑀘𑁆𑀘𑁂 𑀅𑀥𑀼𑀦𑀸 𑀧𑀩𑁆𑀩𑀚𑀺𑀢𑁂 𑀓𑀼𑀮𑀧𑀼𑀢𑁆𑀢𑁂 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑁂. 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀬𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁂𑀦 𑀦 𑀘𑀻𑀯𑀭𑀸𑀤𑀺𑀳𑁂𑀢𑀼 𑀧𑀽𑀭𑀺𑀢𑀸, 𑀉𑀢𑁆𑀢𑀫𑀨𑀮𑀲𑁆𑀲 𑀧𑀦 𑀅𑀭𑀳𑀢𑁆𑀢𑀲𑁆𑀲𑀢𑁆𑀣𑀸𑀬 𑀧𑀽𑀭𑀺𑀢𑀸. 𑀇𑀫𑁂𑀧𑀺 𑀪𑀺𑀓𑁆𑀔𑀽 𑀫𑀫 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀦𑁆𑀢𑀸 𑀦 𑀘𑀻𑀯𑀭𑀸𑀤𑀺𑀳𑁂𑀢𑀼 𑀧𑀩𑁆𑀩𑀚𑀺𑀢𑀸, 𑀅𑀭𑀳𑀢𑁆𑀢𑀲𑁆𑀲𑁂𑀯 𑀧𑀦 𑀅𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑀸. 𑀢𑁂 𑀇𑀤𑀸𑀦𑀺 𑀅𑀲𑀸𑀭𑀫𑁂𑀯 𑀲𑀸𑀭𑀁 𑀅𑀦𑀢𑁆𑀣𑀫𑁂𑀯 𑀘 𑀅𑀢𑁆𑀣𑀁 𑀓𑀭𑁄𑀦𑁆𑀢𑀻’’𑀢𑀺 𑀏𑀯𑀫𑀲𑁆𑀲 𑀥𑀫𑁆𑀫𑀲𑀁𑀯𑁂𑀕𑁄 𑀉𑀤𑀧𑀸𑀤𑀺. 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀧𑀜𑁆𑀘𑀫𑀁 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀢𑀼𑀁 𑀲𑀓𑁆𑀓𑀸 𑀅𑀪𑀯𑀺𑀲𑁆𑀲, 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑀸𑀳𑀸𑀭𑀧𑀭𑀺𑀪𑁄𑀕𑁄 𑀧𑀜𑁆𑀘𑀫𑀁 𑀧𑀸𑀭𑀸𑀚𑀺𑀓𑀁 𑀓𑀢𑁆𑀯𑀸 𑀧𑀜𑁆𑀜𑀧𑁂𑀢𑀩𑁆𑀩𑁄 𑀪𑀯𑁂𑀬𑁆𑀬. 𑀦 𑀧𑀦 𑀲𑀓𑁆𑀓𑀸 𑀏𑀯𑀁 𑀓𑀸𑀢𑀼𑀁, 𑀥𑀼𑀯𑀧𑀝𑀺𑀲𑁂𑀯𑀦𑀝𑁆𑀞𑀸𑀦𑀜𑁆𑀳𑁂𑀢𑀁 𑀲𑀢𑁆𑀢𑀸𑀦𑀁. 𑀬𑀣𑀸 𑀧𑀦 𑀓𑀣𑀺𑀢𑁂 𑀧𑀜𑁆𑀘𑀫𑀁 𑀧𑀸𑀭𑀸𑀚𑀺𑀓𑀁 𑀯𑀺𑀬 𑀦𑀁 𑀧𑀲𑁆𑀲𑀺𑀲𑁆𑀲𑀦𑁆𑀢𑀺. 𑀏𑀯𑀁 𑀥𑀫𑁆𑀫𑀸𑀤𑀸𑀲𑀁 𑀲𑀁𑀯𑀭𑀁 𑀫𑀭𑀺𑀬𑀸𑀤𑀁 𑀞𑀧𑁂𑀲𑁆𑀲𑀸𑀫𑀺, 𑀬𑀁 𑀆𑀯𑀚𑁆𑀚𑀺𑀢𑁆𑀯𑀸 𑀆𑀯𑀚𑁆𑀚𑀺𑀢𑁆𑀯𑀸 𑀅𑀦𑀸𑀕𑀢𑁂 𑀪𑀺𑀓𑁆𑀔𑀽 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑁂 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺. 𑀇𑀫𑀸𑀬 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀇𑀫𑀁 𑀧𑀼𑀢𑁆𑀢𑀫𑀁𑀲𑀽𑀧𑀫𑀲𑀼𑀢𑁆𑀢𑀦𑁆𑀢𑀁 𑀦𑀺𑀓𑁆𑀔𑀺𑀧𑀺. 𑀢𑀢𑁆𑀣 𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑀸𑀢𑀺𑀆𑀤𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀘𑀢𑁆𑀢𑀸𑀭𑁄 𑀧𑀦 𑀆𑀳𑀸𑀭𑁂 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀇𑀤𑀸𑀦𑀺 𑀢𑁂𑀲𑀼 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑀼𑀁 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄 𑀤𑀝𑁆𑀞𑀩𑁆𑀩𑁄𑀢𑀺𑀆𑀤𑀺𑀫𑀸𑀳? 𑀢𑀢𑁆𑀣 𑀚𑀸𑀬𑀫𑁆𑀧𑀢𑀺𑀓𑀸𑀢𑀺 𑀚𑀸𑀬𑀸 𑀘𑁂𑀯 𑀧𑀢𑀺 𑀘. 𑀧𑀭𑀺𑀢𑁆𑀢𑀁 𑀲𑀫𑁆𑀩𑀮𑀦𑁆𑀢𑀺 𑀧𑀼𑀝𑀪𑀢𑁆𑀢𑀲𑀢𑁆𑀢𑀼𑀫𑁄𑀤𑀓𑀸𑀤𑀻𑀦𑀁 𑀅𑀜𑁆𑀜𑀢𑀭𑀁 𑀅𑀧𑁆𑀧𑀫𑀢𑁆𑀢𑀓𑀁 𑀧𑀸𑀣𑁂𑀬𑁆𑀬𑀁. 𑀓𑀦𑁆𑀢𑀸𑀭𑀫𑀕𑁆𑀕𑀦𑁆𑀢𑀺 𑀓𑀦𑁆𑀢𑀸𑀭𑀪𑀽𑀢𑀁 𑀫𑀕𑁆𑀕𑀁, 𑀓𑀦𑁆𑀢𑀸𑀭𑁂 𑀯𑀸 𑀫𑀕𑁆𑀕𑀁. 𑀓𑀦𑁆𑀢𑀸𑀭𑀦𑁆𑀢𑀺 𑀘𑁄𑀭𑀓𑀦𑁆𑀢𑀸𑀭𑀁 𑀯𑀸𑀴𑀓𑀦𑁆𑀢𑀸𑀭𑀁 𑀅𑀫𑀦𑀼𑀲𑁆𑀲𑀓𑀦𑁆𑀢𑀸𑀭𑀁 𑀦𑀺𑀭𑀼𑀤𑀓𑀓𑀦𑁆𑀢𑀸𑀭𑀁 𑀅𑀧𑁆𑀧𑀪𑀓𑁆𑀔𑀓𑀦𑁆𑀢𑀸𑀭𑀦𑁆𑀢𑀺 𑀧𑀜𑁆𑀘𑀯𑀺𑀥𑀁. 𑀢𑁂𑀲𑀼 𑀬𑀢𑁆𑀣 𑀘𑁄𑀭𑀪𑀬𑀁 𑀅𑀢𑁆𑀣𑀺, 𑀢𑀁 𑀘𑁄𑀭𑀓𑀦𑁆𑀢𑀸𑀭𑀁. 𑀬𑀢𑁆𑀣 𑀲𑀻𑀳𑀩𑁆𑀬𑀕𑁆𑀖𑀸𑀤𑀬𑁄 𑀯𑀸𑀴𑀸 𑀅𑀢𑁆𑀣𑀺, 𑀢𑀁 𑀯𑀸𑀴𑀓𑀦𑁆𑀢𑀸𑀭𑀁. 𑀬𑀢𑁆𑀣 𑀩𑀮𑀯𑀸𑀫𑀼𑀔𑀬𑀓𑁆𑀔𑀺𑀦𑀺𑀆𑀤𑀻𑀦𑀁 𑀅𑀫𑀦𑀼𑀲𑁆𑀲𑀸𑀦𑀁 𑀯𑀲𑁂𑀦 𑀪𑀬𑀁 𑀅𑀢𑁆𑀣𑀺, 𑀢𑀁 𑀅𑀫𑀦𑀼𑀲𑁆𑀲𑀓𑀦𑁆𑀢𑀸𑀭𑀁. 𑀬𑀢𑁆𑀣 𑀧𑀸𑀢𑀼𑀁 𑀯𑀸 𑀦𑁆𑀳𑀸𑀬𑀺𑀢𑀼𑀁 𑀯𑀸 𑀉𑀤𑀓𑀁 𑀦𑀢𑁆𑀣𑀺, 𑀢𑀁 𑀦𑀺𑀭𑀼𑀤𑀓𑀓𑀦𑁆𑀢𑀸𑀭𑀁. 𑀬𑀢𑁆𑀣 𑀔𑀸𑀤𑀺𑀢𑀩𑁆𑀩𑀁 𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀁 𑀯𑀸 𑀅𑀦𑁆𑀢𑀫𑀲𑁄 𑀓𑀦𑁆𑀤𑀫𑀽𑀮𑀸𑀤𑀺𑀫𑀢𑁆𑀢𑀫𑁆𑀧𑀺 𑀦𑀢𑁆𑀣𑀺, 𑀢𑀁 𑀅𑀧𑁆𑀧𑀪𑀓𑁆𑀔𑀓𑀦𑁆𑀢𑀸𑀭𑀁 𑀦𑀸𑀫. 𑀬𑀢𑁆𑀣 𑀧𑀦𑁂𑀢𑀁 𑀧𑀜𑁆𑀘𑀯𑀺𑀥𑀫𑁆𑀧𑀺 𑀪𑀬𑀁 𑀅𑀢𑁆𑀣𑀺, 𑀢𑀁 𑀓𑀦𑁆𑀢𑀸𑀭𑀫𑁂𑀯. 𑀢𑀁 𑀧𑀦𑁂𑀢𑀁 𑀏𑀓𑀸𑀳𑀤𑁆𑀯𑀻𑀳𑀢𑀻𑀳𑀸𑀤𑀺𑀯𑀲𑁂𑀦 𑀦𑀺𑀢𑁆𑀣𑀭𑀺𑀢𑀩𑁆𑀩𑀫𑁆𑀧𑀺 𑀅𑀢𑁆𑀣𑀺, 𑀦 𑀢𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁. 𑀇𑀥 𑀧𑀦 𑀦𑀺𑀭𑀼𑀤𑀓𑀁 𑀅𑀧𑁆𑀧𑀪𑀓𑁆𑀔𑀁 𑀬𑁄𑀚𑀦𑀲𑀢𑀺𑀓𑀓𑀦𑁆𑀢𑀸𑀭𑀁 𑀅𑀥𑀺𑀧𑁆𑀧𑁂𑀢𑀁. 𑀏𑀯𑀭𑀽𑀧𑁂 𑀓𑀦𑁆𑀢𑀸𑀭𑁂 𑀫𑀕𑁆𑀕𑀁. 𑀧𑀝𑀺𑀧𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀙𑀸𑀢𑀓𑀪𑀬𑁂𑀦 𑀘𑁂𑀯 𑀭𑁄𑀕𑀪𑀬𑁂𑀦 𑀘 𑀭𑀸𑀚𑀪𑀬𑁂𑀦 𑀘 𑀉𑀧𑀤𑁆𑀤𑀼𑀢𑀸 𑀧𑀝𑀺𑀧𑀚𑁆𑀚𑁂𑀬𑁆𑀬𑀼𑀁 ‘‘𑀏𑀢𑀁 𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀭𑀺𑀢𑁆𑀯𑀸 𑀥𑀫𑁆𑀫𑀺𑀓𑀲𑁆𑀲 𑀭𑀜𑁆𑀜𑁄 𑀦𑀺𑀭𑀼𑀧𑀤𑁆𑀤𑀯𑁂 𑀭𑀝𑁆𑀞𑁂 𑀲𑀼𑀔𑀁 𑀯𑀲𑀺𑀲𑁆𑀲𑀸𑀫𑀸’’𑀢𑀺 𑀫𑀜𑁆𑀜𑀫𑀸𑀦𑀸.

𑀏𑀓𑀧𑀼𑀢𑁆𑀢𑀓𑁄𑀢𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀳𑀺𑀢𑁄 𑀅𑀦𑀼𑀓𑀫𑁆𑀧𑀺𑀢𑀩𑁆𑀩𑀬𑀼𑀢𑁆𑀢𑁄 𑀅𑀣𑀺𑀭𑀲𑀭𑀻𑀭𑁄 𑀏𑀓𑀧𑀼𑀢𑁆𑀢𑀓𑁄. 𑀯𑀮𑁆𑀮𑀽𑀭𑀜𑁆𑀘 𑀲𑁄𑀡𑁆𑀟𑀺𑀓𑀜𑁆𑀘𑀸𑀢𑀺 𑀖𑀦𑀖𑀦𑀝𑁆𑀞𑀸𑀦𑀢𑁄 𑀕𑀳𑁂𑀢𑁆𑀯𑀸 𑀯𑀮𑁆𑀮𑀽𑀭𑀁, 𑀅𑀝𑁆𑀞𑀺𑀦𑀺𑀲𑁆𑀲𑀺𑀢𑀲𑀺𑀭𑀸𑀦𑀺𑀲𑁆𑀲𑀺𑀢𑀝𑁆𑀞𑀸𑀦𑀸𑀦𑀺 𑀕𑀳𑁂𑀢𑁆𑀯𑀸 𑀲𑀽𑀮𑀫𑀁𑀲𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀧𑀝𑀺𑀧𑀺𑀲𑁂𑀬𑁆𑀬𑀼𑀦𑁆𑀢𑀺 𑀧𑀳𑀭𑁂𑀬𑁆𑀬𑀼𑀁. 𑀓𑀳𑀁 𑀏𑀓𑀧𑀼𑀢𑁆𑀢𑀓𑀸𑀢𑀺 𑀅𑀬𑀁 𑀢𑁂𑀲𑀁 𑀧𑀭𑀺𑀤𑁂𑀯𑀦𑀸𑀓𑀸𑀭𑁄.

𑀅𑀬𑀁 𑀧𑀦𑁂𑀢𑁆𑀣 𑀪𑀽𑀢𑀫𑀢𑁆𑀣𑀁 𑀓𑀢𑁆𑀯𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀗𑁆𑀔𑁂𑀧𑀢𑁄 𑀅𑀢𑁆𑀣𑀯𑀡𑁆𑀡𑀦𑀸 𑁋 𑀤𑁆𑀯𑁂 𑀓𑀺𑀭 𑀚𑀸𑀬𑀫𑁆𑀧𑀢𑀺𑀓𑀸 𑀧𑀼𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀭𑀺𑀢𑁆𑀢𑁂𑀦 𑀧𑀸𑀣𑁂𑀬𑁆𑀬𑁂𑀦 𑀬𑁄𑀚𑀦𑀲𑀢𑀺𑀓𑀁 𑀓𑀦𑁆𑀢𑀸𑀭𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺𑀁𑀲𑀼. 𑀢𑁂𑀲𑀁 𑀧𑀜𑁆𑀜𑀸𑀲𑀬𑁄𑀚𑀦𑀸𑀦𑀺 𑀕𑀦𑁆𑀢𑁆𑀯𑀸 𑀧𑀸𑀣𑁂𑀬𑁆𑀬𑀁 𑀦𑀺𑀝𑁆𑀞𑀸𑀲𑀺, 𑀢𑁂 𑀔𑀼𑀧𑁆𑀧𑀺𑀧𑀸𑀲𑀸𑀢𑀼𑀭𑀸 𑀯𑀺𑀭𑀴𑀘𑁆𑀙𑀸𑀬𑀸𑀬𑀁 𑀦𑀺𑀲𑀻𑀤𑀺𑀁𑀲𑀼. 𑀢𑀢𑁄 𑀧𑀼𑀭𑀺𑀲𑁄 𑀪𑀭𑀺𑀬𑀁 𑀆𑀳 𑁋 ‘‘𑀪𑀤𑁆𑀤𑁂 𑀇𑀢𑁄 𑀲𑀫𑀦𑁆𑀢𑀸 𑀧𑀜𑁆𑀜𑀸𑀲𑀬𑁄𑀚𑀦𑀸𑀦𑀺 𑀕𑀸𑀫𑁄 𑀯𑀸 𑀦𑀺𑀕𑀫𑁄 𑀯𑀸 𑀦𑀢𑁆𑀣𑀺. 𑀢𑀲𑁆𑀫𑀸 𑀬𑀁 𑀢𑀁 𑀧𑀼𑀭𑀺𑀲𑁂𑀦 𑀓𑀸𑀢𑀩𑁆𑀩𑀁 𑀩𑀳𑀼𑀫𑁆𑀧𑀺 𑀓𑀲𑀺𑀕𑁄𑀭𑀓𑁆𑀔𑀸𑀤𑀺𑀓𑀫𑁆𑀫𑀁, 𑀦 𑀤𑀸𑀦𑀺 𑀲𑀓𑁆𑀓𑀸 𑀢𑀁 𑀫𑀬𑀸 𑀓𑀸𑀢𑀼𑀁, 𑀏𑀳𑀺 𑀫𑀁 𑀫𑀸𑀭𑁂𑀢𑁆𑀯𑀸 𑀉𑀧𑀟𑁆𑀠𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀉𑀧𑀟𑁆𑀠𑀁 𑀧𑀸𑀣𑁂𑀬𑁆𑀬𑀁 𑀓𑀢𑁆𑀯𑀸 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀭𑀸𑀳𑀻’’𑀢𑀺. 𑀧𑀼𑀦 𑀲𑀸𑀧𑀺 𑀢𑀁 𑀆𑀳 𑁋 ‘‘𑀲𑀸𑀫𑀺 𑀫𑀬𑀸 𑀤𑀸𑀦𑀺 𑀬𑀁 𑀢𑀁 𑀇𑀢𑁆𑀣𑀺𑀬𑀸 𑀓𑀸𑀢𑀩𑁆𑀩𑀁 𑀩𑀳𑀼𑀫𑁆𑀧𑀺 𑀲𑀼𑀢𑁆𑀢𑀓𑀦𑁆𑀢𑀦𑀸𑀤𑀺𑀓𑀫𑁆𑀫𑀁, 𑀢𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀏𑀳𑀺 𑀫𑀁 𑀫𑀸𑀭𑁂𑀢𑁆𑀯𑀸 𑀉𑀧𑀟𑁆𑀠𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀉𑀧𑀟𑁆𑀠𑀁 𑀧𑀸𑀣𑁂𑀬𑁆𑀬𑀁 𑀓𑀢𑁆𑀯𑀸 𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀭𑀸𑀳𑀻’’𑀢𑀺. 𑀧𑀼𑀦 𑀲𑁄𑀧𑀺 𑀢𑀁 𑀆𑀳 𑁋 ‘‘𑀪𑀤𑁆𑀤𑁂 𑀫𑀸𑀢𑀼𑀕𑀸𑀫𑀫𑀭𑀡𑁂𑀦 𑀤𑁆𑀯𑀺𑀦𑁆𑀦𑀁 𑀫𑀭𑀡𑀁 𑀧𑀜𑁆𑀜𑀸𑀬𑀢𑀺. 𑀦 𑀳𑀺 𑀫𑀦𑁆𑀤𑁄 𑀓𑀼𑀫𑀸𑀭𑁄 𑀫𑀸𑀢𑀭𑀸 𑀯𑀺𑀦𑀸 𑀚𑀻𑀯𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀬𑀤𑀺 𑀧𑀦 𑀫𑀬𑀁 𑀚𑀻𑀯𑀸𑀫. 𑀧𑀼𑀦 𑀤𑀸𑀭𑀓𑀁 𑀮𑀪𑁂𑀬𑁆𑀬𑀸𑀫. 𑀳𑀦𑁆𑀤 𑀤𑀸𑀦𑀺 𑀧𑀼𑀢𑁆𑀢𑀓𑀁 𑀫𑀸𑀭𑁂𑀢𑁆𑀯𑀸, 𑀫𑀁𑀲𑀁 𑀕𑀳𑁂𑀢𑁆𑀯𑀸 𑀓𑀦𑁆𑀢𑀸𑀭𑀁 𑀦𑀺𑀢𑁆𑀣𑀭𑀸𑀫𑀸’’𑀢𑀺. 𑀢𑀢𑁄 𑀫𑀸𑀢𑀸 𑀧𑀼𑀢𑁆𑀢𑀫𑀸𑀳 𑁋 ‘‘𑀢𑀸𑀢, 𑀧𑀺𑀢𑀼𑀲𑀦𑁆𑀢𑀺𑀓𑀁 𑀕𑀘𑁆𑀙𑀸’’𑀢𑀺, 𑀲𑁄 𑀅𑀕𑀫𑀸𑀲𑀺. 𑀅𑀣𑀲𑁆𑀲 𑀧𑀺𑀢𑀸, ‘‘𑀫𑀬𑀸 ‘𑀧𑀼𑀢𑁆𑀢𑀓𑀁 𑀧𑁄𑀲𑁂𑀲𑁆𑀲𑀸𑀫𑀻’𑀢𑀺 𑀓𑀲𑀺𑀕𑁄𑀭𑀓𑁆𑀔𑀸𑀤𑀻𑀳𑀺 𑀅𑀦𑀧𑁆𑀧𑀓𑀁 𑀤𑀼𑀓𑁆𑀔𑀫𑀦𑀼𑀪𑀽𑀢𑀁, 𑀦 𑀲𑀓𑁆𑀓𑁄𑀫𑀺 𑀅𑀳𑀁 𑀧𑀼𑀢𑁆𑀢𑀁 𑀫𑀸𑀭𑁂𑀢𑀼𑀁, 𑀢𑁆𑀯𑀁𑀬𑁂𑀯 𑀢𑀯 𑀧𑀼𑀢𑁆𑀢𑀁 𑀫𑀸𑀭𑁂𑀳𑀻’’𑀢𑀺 𑀯𑀢𑁆𑀯𑀸, ‘‘𑀢𑀸𑀢 𑀫𑀸𑀢𑀼𑀲𑀦𑁆𑀢𑀺𑀓𑀁 𑀕𑀘𑁆𑀙𑀸’’𑀢𑀺 𑀆𑀳. 𑀲𑁄 𑀅𑀕𑀫𑀸𑀲𑀺. 𑀅𑀣𑀲𑁆𑀲 𑀫𑀸𑀢𑀸𑀧𑀺, ‘‘𑀫𑀬𑀸 𑀧𑀼𑀢𑁆𑀢𑀁 𑀧𑀢𑁆𑀣𑁂𑀦𑁆𑀢𑀺𑀬𑀸 𑀕𑁄𑀯𑀢𑀓𑀼𑀓𑁆𑀓𑀼𑀭𑀯𑀢𑀤𑁂𑀯𑀢𑀸𑀬𑀸𑀘𑀦𑀸𑀤𑀻𑀳𑀺𑀧𑀺 𑀢𑀸𑀯 𑀅𑀦𑀧𑁆𑀧𑀓𑀁 𑀤𑀼𑀓𑁆𑀔𑀫𑀦𑀼𑀪𑀽𑀢𑀁, 𑀓𑁄 𑀧𑀦 𑀯𑀸𑀤𑁄 𑀓𑀼𑀘𑁆𑀙𑀺𑀦𑀸 𑀧𑀭𑀺𑀳𑀭𑀦𑁆𑀢𑀺𑀬𑀸? 𑀦 𑀲𑀓𑁆𑀓𑁄𑀫𑀺 𑀅𑀳𑀁 𑀧𑀼𑀢𑁆𑀢𑀁 𑀫𑀸𑀭𑁂𑀢𑀼’’𑀦𑁆𑀢𑀺 𑀯𑀢𑁆𑀯𑀸 ‘‘𑀢𑀸𑀢, 𑀧𑀺𑀢𑀼𑀲𑀦𑁆𑀢𑀺𑀓𑀫𑁂𑀯 𑀕𑀘𑁆𑀙𑀸’’𑀢𑀺 𑀆𑀳. 𑀏𑀯𑀁 𑀲𑁄 𑀤𑁆𑀯𑀺𑀦𑁆𑀦𑀫𑀦𑁆𑀢𑀭𑀸 𑀕𑀘𑁆𑀙𑀦𑁆𑀢𑁄𑀬𑁂𑀯 𑀫𑀢𑁄. 𑀢𑁂 𑀢𑀁 𑀤𑀺𑀲𑁆𑀯𑀸 𑀧𑀭𑀺𑀤𑁂𑀯𑀺𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦 𑀫𑀁𑀲𑀸𑀦𑀺 𑀕𑀳𑁂𑀢𑁆𑀯𑀸 𑀔𑀸𑀤𑀦𑁆𑀢𑀸 𑀧𑀓𑁆𑀓𑀫𑀺𑀁𑀲𑀼.

𑀢𑁂𑀲𑀁 𑀲𑁄 𑀧𑀼𑀢𑁆𑀢𑀫𑀁𑀲𑀸𑀳𑀸𑀭𑁄 𑀦𑀯𑀳𑀺 𑀓𑀸𑀭𑀡𑁂𑀳𑀺 𑀧𑀝𑀺𑀓𑀽𑀮𑀢𑁆𑀢𑀸 𑀦𑁂𑀯 𑀤𑀯𑀸𑀬 𑀳𑁄𑀢𑀺, 𑀦 𑀫𑀤𑀸𑀬, 𑀦 𑀫𑀡𑁆𑀟𑀦𑀸𑀬, 𑀦 𑀯𑀺𑀪𑀽𑀲𑀦𑀸𑀬, 𑀓𑁂𑀯𑀮𑀁 𑀓𑀦𑁆𑀢𑀸𑀭𑀦𑀺𑀢𑁆𑀣𑀭𑀡𑀢𑁆𑀣𑀸𑀬𑁂𑀯 𑀳𑁄𑀢𑀺. 𑀓𑀢𑀫𑁂𑀳𑀺 𑀦𑀯𑀳𑀺 𑀓𑀸𑀭𑀡𑁂𑀳𑀺 𑀧𑀝𑀺𑀓𑀽𑀮𑁄𑀢𑀺 𑀘𑁂? 𑀲𑀚𑀸𑀢𑀺𑀫𑀁𑀲𑀢𑀸𑀬 𑀜𑀸𑀢𑀺𑀫𑀁𑀲𑀢𑀸𑀬 𑀧𑀼𑀢𑁆𑀢𑀫𑀁𑀲𑀢𑀸𑀬 𑀧𑀺𑀬𑀧𑀼𑀢𑁆𑀢𑀫𑀁𑀲𑀢𑀸𑀬 𑀢𑀭𑀼𑀡𑀫𑀁𑀲𑀢𑀸𑀬 𑀆𑀫𑀓𑀫𑀁𑀲𑀢𑀸𑀬 𑀅𑀪𑁄𑀕𑀫𑀁𑀲𑀢𑀸𑀬 𑀅𑀮𑁄𑀡𑀢𑀸𑀬 𑀅𑀥𑀽𑀧𑀺𑀢𑀢𑀸𑀬𑀸𑀢𑀺. 𑀏𑀯𑀜𑁆𑀳𑀺 𑀢𑁂 𑀦𑀯𑀳𑀺 𑀓𑀸𑀭𑀡𑁂𑀳𑀺 𑀧𑀝𑀺𑀓𑀽𑀮𑀁 𑀢𑀁 𑀧𑀼𑀢𑁆𑀢𑀫𑀁𑀲𑀁 𑀔𑀸𑀤𑀦𑁆𑀢𑀸 𑀦 𑀲𑀸𑀭𑀢𑁆𑀢𑀸 𑀕𑀺𑀤𑁆𑀥𑀫𑀸𑀦𑀲𑀸 𑀳𑀼𑀢𑁆𑀯𑀸 𑀔𑀸𑀤𑀺𑀁𑀲𑀼, 𑀫𑀚𑁆𑀛𑀢𑁆𑀢𑀪𑀸𑀯𑁂𑀬𑁂𑀯 𑀧𑀦 𑀦𑀺𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑁂 𑀞𑀺𑀢𑀸 𑀔𑀸𑀤𑀺𑀁𑀲𑀼. 𑀦 𑀅𑀝𑁆𑀞𑀺𑀦𑁆𑀳𑀸𑀭𑀼𑀘𑀫𑁆𑀫𑀦𑀺𑀲𑁆𑀲𑀺𑀢𑀝𑁆𑀞𑀸𑀦𑀸𑀦𑀺 𑀅𑀧𑀦𑁂𑀢𑁆𑀯𑀸 𑀣𑀽𑀮𑀣𑀽𑀮𑀁 𑀯𑀭𑀫𑀁𑀲𑀫𑁂𑀯 𑀔𑀸𑀤𑀺𑀁𑀲𑀼, 𑀳𑀢𑁆𑀣𑀲𑀫𑁆𑀧𑀢𑁆𑀢𑀁 𑀫𑀁𑀲𑀫𑁂𑀯 𑀧𑀦 𑀔𑀸𑀤𑀺𑀁𑀲𑀼. 𑀦 𑀬𑀸𑀯𑀤𑀢𑁆𑀣𑀁 𑀓𑀡𑁆𑀞𑀧𑁆𑀧𑀫𑀸𑀡𑀁 𑀓𑀢𑁆𑀯𑀸 𑀔𑀸𑀤𑀺𑀁𑀲𑀼, 𑀣𑁄𑀓𑀁 𑀣𑁄𑀓𑀁 𑀧𑀦 𑀏𑀓𑀤𑀺𑀯𑀲𑀁 𑀬𑀸𑀧𑀦𑀫𑀢𑁆𑀢𑀫𑁂𑀯 𑀔𑀸𑀤𑀺𑀁𑀲𑀼. 𑀦 𑀅𑀜𑁆𑀜𑀫𑀜𑁆𑀜𑀁 𑀫𑀘𑁆𑀙𑀭𑀸𑀬𑀦𑁆𑀢𑀸 𑀔𑀸𑀤𑀺𑀁𑀲𑀼, 𑀯𑀺𑀕𑀢𑀫𑀘𑁆𑀙𑁂𑀭𑀫𑀮𑁂𑀦 𑀧𑀦 𑀧𑀭𑀺𑀲𑀼𑀤𑁆𑀥𑁂𑀦𑁂𑀯 𑀘𑁂𑀢𑀲𑀸 𑀔𑀸𑀤𑀺𑀁𑀲𑀼. 𑀦 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀫𑀺𑀕𑀫𑀁𑀲𑀁 𑀯𑀸 𑀫𑁄𑀭𑀫𑀁𑀲𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀁 𑀔𑀸𑀤𑀸𑀫𑀸𑀢𑀺 𑀲𑀫𑁆𑀫𑀽𑀴𑁆𑀳𑀸 𑀔𑀸𑀤𑀺𑀁𑀲𑀼, 𑀧𑀺𑀬𑀧𑀼𑀢𑁆𑀢𑀫𑀁𑀲𑀪𑀸𑀯𑀁 𑀧𑀦 𑀚𑀸𑀦𑀦𑁆𑀢𑀸𑀯 𑀔𑀸𑀤𑀺𑀁𑀲𑀼. 𑀦 ‘‘𑀅𑀳𑁄 𑀯𑀢 𑀫𑀬𑀁 𑀧𑀼𑀦𑀧𑀺 𑀏𑀯𑀭𑀽𑀧𑀁 𑀧𑀼𑀢𑁆𑀢𑀫𑀁𑀲𑀁 𑀔𑀸𑀤𑁂𑀬𑁆𑀬𑀸𑀫𑀸’’𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀔𑀸𑀤𑀺𑀁𑀲𑀼, 𑀧𑀢𑁆𑀣𑀦𑀁 𑀧𑀦 𑀯𑀻𑀢𑀺𑀯𑀢𑁆𑀢𑀸𑀯 𑀳𑀼𑀢𑁆𑀯𑀸 𑀔𑀸𑀤𑀺𑀁𑀲𑀼. 𑀦 ‘‘𑀏𑀢𑁆𑀢𑀓𑀁 𑀓𑀦𑁆𑀢𑀸𑀭𑁂 𑀔𑀸𑀤𑀺𑀢𑁆𑀯𑀸 𑀅𑀯𑀲𑀺𑀝𑁆𑀞𑀁 𑀓𑀦𑁆𑀢𑀸𑀭𑀁 𑀅𑀢𑀺𑀓𑁆𑀓𑀫𑁆𑀫 𑀮𑁄𑀡𑀫𑁆𑀩𑀺𑀮𑀸𑀤𑀻𑀳𑀺 𑀬𑁄𑀚𑁂𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀸’’𑀢𑀺 𑀲𑀦𑁆𑀦𑀺𑀥𑀺𑀁 𑀅𑀓𑀁𑀲𑀼, 𑀓𑀦𑁆𑀢𑀸𑀭𑀧𑀭𑀺𑀬𑁄𑀲𑀸𑀦𑁂 𑀧𑀦 ‘‘𑀧𑀼𑀭𑁂 𑀫𑀳𑀸𑀚𑀦𑁄 𑀧𑀲𑁆𑀲𑀢𑀻’’𑀢𑀺 𑀪𑀽𑀫𑀺𑀬𑀁 𑀯𑀸 𑀦𑀺𑀔𑀡𑀺𑀁𑀲𑀼, 𑀅𑀕𑁆𑀕𑀺𑀦𑀸 𑀯𑀸 𑀛𑀸𑀧𑀬𑀺𑀁𑀲𑀼. 𑀦 ‘‘𑀓𑁄𑀘𑀺 𑀅𑀜𑁆𑀜𑁄 𑀅𑀫𑁆𑀳𑁂 𑀯𑀺𑀬 𑀏𑀯𑀭𑀽𑀧𑀁 𑀧𑀼𑀢𑁆𑀢𑀫𑀁𑀲𑀁 𑀔𑀸𑀤𑀺𑀢𑀼𑀁 𑀦 𑀮𑀪𑀢𑀻’’𑀢𑀺 𑀫𑀸𑀦𑀁 𑀯𑀸 𑀤𑀧𑁆𑀧𑀁 𑀯𑀸 𑀅𑀓𑀁𑀲𑀼, 𑀦𑀺𑀳𑀢𑀫𑀸𑀦𑀸 𑀧𑀦 𑀦𑀺𑀳𑀢𑀤𑀧𑁆𑀧𑀸 𑀳𑀼𑀢𑁆𑀯𑀸 𑀔𑀸𑀤𑀺𑀁𑀲𑀼. ‘‘𑀓𑀺𑀁 𑀇𑀫𑀺𑀦𑀸 𑀅𑀮𑁄𑀡𑁂𑀦 𑀅𑀦𑀫𑁆𑀩𑀺𑀮𑁂𑀦 𑀅𑀥𑀽𑀧𑀺𑀢𑁂𑀦 𑀤𑀼𑀕𑁆𑀕𑀦𑁆𑀥𑁂𑀦𑀸’’𑀢𑀺 𑀦 𑀳𑀻𑀴𑁂𑀢𑁆𑀯𑀸 𑀔𑀸𑀤𑀺𑀁𑀲𑀼, 𑀳𑀻𑀴𑀦𑀁 𑀧𑀦 𑀯𑀻𑀢𑀺𑀯𑀢𑁆𑀢𑀸 𑀳𑀼𑀢𑁆𑀯𑀸 𑀔𑀸𑀤𑀺𑀁𑀲𑀼. 𑀦 ‘‘𑀢𑀼𑀬𑁆𑀳𑀁 𑀪𑀸𑀕𑁄 𑀫𑀬𑁆𑀳𑀁 𑀪𑀸𑀕𑁄 𑀢𑀯 𑀧𑀼𑀢𑁆𑀢𑁄 𑀫𑀫 𑀧𑀼𑀢𑁆𑀢𑁄’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀅𑀢𑀺𑀫𑀜𑁆𑀜𑀺𑀁𑀲𑀼. 𑀲𑀫𑀕𑁆𑀕𑀸 𑀧𑀦 𑀲𑀫𑁆𑀫𑁄𑀤𑀫𑀸𑀦𑀸 𑀳𑀼𑀢𑁆𑀯𑀸 𑀔𑀸𑀤𑀺𑀁𑀲𑀼. 𑀇𑀫𑀁 𑀦𑁂𑀲𑀁 𑀏𑀯𑀭𑀽𑀧𑀁 𑀦𑀺𑀘𑁆𑀙𑀦𑁆𑀤𑀭𑀸𑀕𑀸𑀤𑀺𑀧𑀭𑀺𑀪𑁄𑀕𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀲𑀢𑁆𑀣𑀸 𑀪𑀺𑀓𑁆𑀔𑀼𑀲𑀗𑁆𑀖𑀫𑁆𑀧𑀺 𑀢𑀁 𑀓𑀸𑀭𑀡𑀁 𑀅𑀦𑀼𑀚𑀸𑀦𑀸𑀧𑁂𑀦𑁆𑀢𑁄 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀅𑀧𑀺 𑀦𑀼 𑀢𑁂 𑀤𑀯𑀸𑀬 𑀯𑀸 𑀆𑀳𑀸𑀭𑀁 𑀆𑀳𑀸𑀭𑁂𑀬𑁆𑀬𑀼𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀯𑀸𑀬 𑀯𑀸𑀢𑀺𑀆𑀤𑀻𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁮) 𑀯𑀺𑀢𑁆𑀣𑀸𑀭𑀺𑀢𑀸𑀦𑁂𑀯. 𑀓𑀦𑁆𑀢𑀸𑀭𑀲𑁆𑀲𑀸𑀢𑀺 𑀦𑀺𑀢𑁆𑀢𑀺𑀡𑁆𑀡𑀸𑀯𑀲𑁂𑀲𑀲𑁆𑀲 𑀓𑀦𑁆𑀢𑀸𑀭𑀲𑁆𑀲.

𑀏𑀯𑀫𑁂𑀯 𑀔𑁄𑀢𑀺 𑀦𑀯𑀦𑁆𑀦𑀁 𑀧𑀸𑀝𑀺𑀓𑀼𑀮𑁆𑀬𑀸𑀦𑀁 𑀯𑀲𑁂𑀦 𑀧𑀺𑀬𑀧𑀼𑀢𑁆𑀢𑀫𑀁𑀲𑀲𑀤𑀺𑀲𑁄 𑀓𑀢𑁆𑀯𑀸 𑀤𑀝𑁆𑀞𑀩𑁆𑀩𑁄𑀢𑀺 𑀅𑀢𑁆𑀣𑁄. 𑀓𑀢𑀫𑁂𑀲𑀁 𑀦𑀯𑀦𑁆𑀦𑀁? 𑀕𑀫𑀦𑀧𑀸𑀝𑀺𑀓𑀼𑀮𑁆𑀬𑀢𑀸𑀤𑀻𑀦𑀁. 𑀕𑀫𑀦𑀧𑀸𑀝𑀺𑀓𑀼𑀮𑁆𑀬𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄𑀧𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀺, 𑀧𑀭𑀺𑀬𑁂𑀲𑀦𑀧𑀸𑀝𑀺𑀓𑀼𑀮𑁆𑀬𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄𑀧𑀺, 𑀧𑀭𑀺𑀪𑁄𑀕𑀦𑀺𑀥𑀸𑀦𑀆𑀲𑀬𑀧𑀭𑀺𑀧𑀓𑁆𑀓𑀸𑀧𑀭𑀺𑀧𑀓𑁆𑀓𑀲𑀫𑁆𑀫𑀓𑁆𑀔𑀡𑀦𑀺𑀲𑁆𑀲𑀦𑁆𑀤𑀧𑀸𑀝𑀺𑀓𑀼𑀮𑁆𑀬𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄𑀧𑀺, 𑀢𑀸𑀦𑀺 𑀧𑀦𑁂𑀢𑀸𑀦𑀺 𑀕𑀫𑀦𑀧𑀸𑀝𑀺𑀓𑀼𑀮𑁆𑀬𑀢𑀸𑀤𑀻𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁯𑁪) 𑀆𑀳𑀸𑀭𑀧𑀸𑀝𑀺𑀓𑀼𑀮𑁆𑀬𑀢𑀸𑀦𑀺𑀤𑁆𑀤𑁂𑀲𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑁂𑀯. 𑀇𑀢𑀺 𑀇𑀫𑁂𑀲𑀁 𑀦𑀯𑀦𑁆𑀦𑀁 𑀧𑀸𑀝𑀺𑀓𑀼𑀮𑁆𑀬𑀸𑀦𑀁 𑀯𑀲𑁂𑀦 𑀧𑀼𑀢𑁆𑀢𑀫𑀁𑀲𑀽𑀧𑀫𑀁 𑀓𑀢𑁆𑀯𑀸 𑀆𑀳𑀸𑀭𑁄 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄.

𑀬𑀣𑀸 𑀢𑁂 𑀚𑀸𑀬𑀫𑁆𑀧𑀢𑀺𑀓𑀸 𑀧𑀸𑀝𑀺𑀓𑀼𑀮𑁆𑀬𑀁 𑀧𑀺𑀬𑀧𑀼𑀢𑁆𑀢𑀫𑀁𑀲𑀁 𑀔𑀸𑀤𑀦𑁆𑀢𑀸 𑀦 𑀲𑀸𑀭𑀢𑁆𑀢𑀸 𑀕𑀺𑀤𑁆𑀥𑀫𑀸𑀦𑀲𑀸 𑀳𑀼𑀢𑁆𑀯𑀸 𑀔𑀸𑀤𑀺𑀁𑀲𑀼, 𑀫𑀚𑁆𑀛𑀢𑁆𑀢𑀪𑀸𑀯𑁂𑀬𑁂𑀯 𑀦𑀺𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑁂 𑀞𑀺𑀢𑀸 𑀔𑀸𑀤𑀺𑀁𑀲𑀼, 𑀏𑀯𑀁 𑀦𑀺𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑀁 𑀓𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄. 𑀬𑀣𑀸 𑀘 𑀢𑁂 𑀦 𑀅𑀝𑁆𑀞𑀺𑀦𑁆𑀳𑀸𑀭𑀼𑀘𑀫𑁆𑀫𑀦𑀺𑀲𑁆𑀲𑀺𑀢𑀁 𑀅𑀧𑀦𑁂𑀢𑁆𑀯𑀸 𑀣𑀽𑀮𑀣𑀽𑀮𑀁 𑀯𑀭𑀫𑀁𑀲𑀫𑁂𑀯 𑀔𑀸𑀤𑀺𑀁𑀲𑀼, 𑀳𑀢𑁆𑀣𑀲𑀫𑁆𑀧𑀢𑁆𑀢𑀫𑁂𑀯 𑀧𑀦 𑀔𑀸𑀤𑀺𑀁𑀲𑀼, 𑀏𑀯𑀁 𑀲𑀼𑀓𑁆𑀔𑀪𑀢𑁆𑀢𑀫𑀦𑁆𑀤𑀩𑁆𑀬𑀜𑁆𑀚𑀦𑀸𑀤𑀻𑀦𑀺 𑀧𑀺𑀝𑁆𑀞𑀺𑀳𑀢𑁆𑀣𑁂𑀦 𑀅𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀝𑁆𑀝𑀓𑁂𑀦 𑀯𑀺𑀬 𑀓𑀼𑀓𑁆𑀓𑀼𑀝𑁂𑀦 𑀯𑀺𑀬 𑀘 𑀑𑀥𑀺𑀁 𑀅𑀤𑀲𑁆𑀲𑁂𑀢𑁆𑀯𑀸 𑀢𑀢𑁄 𑀢𑀢𑁄 𑀲𑀧𑁆𑀧𑀺𑀫𑀁𑀲𑀸𑀤𑀺𑀲𑀁𑀲𑀝𑁆𑀞𑀯𑀭𑀪𑁄𑀚𑀦𑀁𑀬𑁂𑀯 𑀯𑀺𑀘𑀺𑀦𑀺𑀢𑁆𑀯𑀸 𑀅𑀪𑀼𑀜𑁆𑀚𑀦𑁆𑀢𑁂𑀦 𑀲𑀻𑀳𑁂𑀦 𑀯𑀺𑀬 𑀲𑀧𑀤𑀸𑀦𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄.

𑀬𑀣𑀸 𑀘 𑀢𑁂 𑀦 𑀬𑀸𑀯𑀤𑀢𑁆𑀣𑀁 𑀓𑀡𑁆𑀞𑀧𑁆𑀧𑀫𑀸𑀡𑀁 𑀔𑀸𑀤𑀺𑀁𑀲𑀼, 𑀣𑁄𑀓𑀁 𑀣𑁄𑀓𑀁 𑀧𑀦 𑀏𑀓𑁂𑀓𑀤𑀺𑀯𑀲𑀁 𑀬𑀸𑀧𑀦𑀫𑀢𑁆𑀢𑀫𑁂𑀯 𑀔𑀸𑀤𑀺𑀁𑀲𑀼, 𑀏𑀯𑀫𑁂𑀯 𑀆𑀳𑀭𑀳𑀢𑁆𑀣𑀓𑀸𑀤𑀺𑀩𑁆𑀭𑀸𑀳𑁆𑀫𑀡𑀸𑀦𑀁 𑀅𑀜𑁆𑀜𑀢𑀭𑁂𑀦 𑀯𑀺𑀬 𑀬𑀸𑀯𑀤𑀢𑁆𑀣𑀁 𑀉𑀤𑀭𑀸𑀯𑀤𑁂𑀳𑀓𑀁 𑀅𑀪𑀼𑀜𑁆𑀚𑀦𑁆𑀢𑁂𑀦 𑀘𑀢𑀼𑀦𑁆𑀦𑀁 𑀧𑀜𑁆𑀘𑀦𑁆𑀦𑀁 𑀯𑀸 𑀆𑀮𑁄𑀧𑀸𑀦𑀁 𑀑𑀓𑀸𑀲𑀁 𑀞𑀧𑁂𑀢𑁆𑀯𑀸𑀯 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀯𑀺𑀬 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄. 𑀲𑁄 𑀓𑀺𑀭 𑀧𑀜𑁆𑀘𑀘𑀢𑁆𑀢𑀸𑀮𑀻𑀲 𑀯𑀲𑁆𑀲𑀸𑀦𑀺 𑀢𑀺𑀝𑁆𑀞𑀫𑀸𑀦𑁄 ‘‘𑀧𑀘𑁆𑀙𑀸𑀪𑀢𑁆𑀢𑁂 𑀅𑀫𑁆𑀩𑀺𑀮𑀼𑀕𑁆𑀕𑀸𑀭𑀲𑀫𑀼𑀝𑁆𑀞𑀸𑀧𑀓𑀁 𑀓𑀢𑁆𑀯𑀸 𑀏𑀓𑀤𑀺𑀯𑀲𑀫𑁆𑀧𑀺 𑀆𑀳𑀸𑀭𑀁 𑀦 𑀆𑀳𑀸𑀭𑁂𑀲𑀺’’𑀦𑁆𑀢𑀺 𑀯𑀢𑁆𑀯𑀸 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁄 𑀇𑀫𑀁 𑀕𑀸𑀣𑀫𑀸𑀳 𑁋

‘‘𑀘𑀢𑁆𑀢𑀸𑀭𑁄 𑀧𑀜𑁆𑀘 𑀆𑀮𑁄𑀧𑁂, 𑀅𑀪𑀼𑀢𑁆𑀯𑀸 𑀉𑀤𑀓𑀁 𑀧𑀺𑀯𑁂;

𑀅𑀮𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺. (𑀣𑁂𑀭𑀕𑀸. 𑁯𑁮𑁩);

𑀬𑀣𑀸 𑀘 𑀢𑁂 𑀦 𑀅𑀜𑁆𑀜𑀫𑀜𑁆𑀜𑀁 𑀫𑀘𑁆𑀙𑀭𑀸𑀬𑀦𑁆𑀢𑀸 𑀔𑀸𑀤𑀺𑀁𑀲𑀼, 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀧𑀦 𑀧𑀭𑀺𑀲𑀼𑀤𑁆𑀥𑁂𑀦𑁂𑀯 𑀘𑁂𑀢𑀲𑀸 𑀔𑀸𑀤𑀺𑀁𑀲𑀼, 𑀏𑀯𑀫𑁂𑀯 𑀧𑀺𑀡𑁆𑀟𑀧𑀸𑀢𑀁 𑀮𑀪𑀺𑀢𑁆𑀯𑀸 𑀅𑀫𑀘𑁆𑀙𑀭𑀸𑀬𑀺𑀢𑁆𑀯𑀸 ‘‘𑀇𑀫𑀁 𑀲𑀩𑁆𑀩𑀁 𑀕𑀡𑁆𑀳𑀦𑁆𑀢𑀲𑁆𑀲 𑀲𑀩𑁆𑀩𑀁 𑀤𑀲𑁆𑀲𑀸𑀫𑀺, 𑀉𑀧𑀟𑁆𑀠𑀁 𑀕𑀡𑁆𑀳𑀦𑁆𑀢𑀲𑁆𑀲 𑀉𑀧𑀟𑁆𑀠𑀁, 𑀲𑀘𑁂 𑀕𑀳𑀺𑀢𑀸𑀯𑀲𑁂𑀲𑁄 𑀪𑀯𑀺𑀲𑁆𑀲𑀢𑀺, 𑀅𑀢𑁆𑀢𑀦𑀸 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀲𑀸𑀭𑀡𑀻𑀬𑀥𑀫𑁆𑀫𑁂 𑀞𑀺𑀢𑁂𑀦𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄. 𑀬𑀣𑀸 𑀘 𑀢𑁂 𑀦 ‘‘𑀅𑀜𑁆𑀜𑀁 𑀓𑀺𑀜𑁆𑀘𑀺 𑀫𑀬𑀁 𑀫𑀺𑀕𑀫𑀁𑀲𑀁 𑀯𑀸 𑀫𑁄𑀭𑀫𑀁𑀲𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀁 𑀔𑀸𑀤𑀸𑀫𑀸’’𑀢𑀺 𑀲𑀫𑁆𑀫𑀽𑀴𑁆𑀳𑀸 𑀔𑀸𑀤𑀺𑀁𑀲𑀼, 𑀧𑀺𑀬𑀧𑀼𑀢𑁆𑀢𑀫𑀁𑀲𑀪𑀸𑀯𑀁 𑀧𑀦 𑀚𑀸𑀦𑀦𑁆𑀢𑀸𑀯 𑀔𑀸𑀤𑀺𑀁𑀲𑀼, 𑀏𑀯𑀫𑁂𑀯 𑀧𑀺𑀡𑁆𑀟𑀧𑀸𑀢𑀁 𑀮𑀪𑀺𑀢𑁆𑀯𑀸 ‘‘𑀅𑀳𑀁 𑀔𑀸𑀤𑀸𑀫𑀺 𑀪𑀼𑀜𑁆𑀚𑀸𑀫𑀻’’𑀢𑀺 𑀅𑀢𑁆𑀢𑀽𑀧𑀮𑀤𑁆𑀥𑀺𑀲𑀫𑁆𑀫𑁄𑀳𑀁 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 ‘‘𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀦 𑀚𑀸𑀦𑀸𑀢𑀺 ‘𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀓𑀸𑀬𑀁 𑀯𑀟𑁆𑀠𑁂𑀫𑀻’𑀢𑀺, 𑀓𑀸𑀬𑁄𑀧𑀺 𑀦 𑀚𑀸𑀦𑀸𑀢𑀺 ‘𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀫𑀁 𑀯𑀟𑁆𑀠𑁂𑀢𑀻’’’𑀢𑀺, 𑀏𑀯𑀁 𑀲𑀫𑁆𑀫𑁄𑀳𑀁 𑀧𑀳𑀸𑀬 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄. 𑀲𑀢𑀺𑀲𑀫𑁆𑀧𑀚𑀜𑁆𑀜𑀯𑀲𑁂𑀦𑀸𑀧𑀺 𑀘𑁂𑀲 𑀅𑀲𑀫𑁆𑀫𑀽𑀴𑁆𑀳𑁂𑀦𑁂𑀯 𑀳𑀼𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄.

𑀬𑀣𑀸 𑀘 𑀢𑁂 𑀦 ‘‘𑀅𑀳𑁄 𑀯𑀢 𑀫𑀬𑀁 𑀧𑀼𑀦𑀧𑀺 𑀏𑀯𑀭𑀽𑀧𑀁 𑀧𑀼𑀢𑁆𑀢𑀫𑀁𑀲𑀁 𑀔𑀸𑀤𑁂𑀬𑁆𑀬𑀸𑀫𑀸’’𑀢𑀺 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀔𑀸𑀤𑀺𑀁𑀲𑀼, 𑀧𑀢𑁆𑀣𑀦𑀁 𑀧𑀦 𑀯𑀻𑀢𑀺𑀯𑀢𑁆𑀢𑀸𑀯 𑀳𑀼𑀢𑁆𑀯𑀸 𑀔𑀸𑀤𑀺𑀁𑀲𑀼, 𑀏𑀯𑀫𑁂𑀯 𑀧𑀡𑀻𑀢𑀪𑁄𑀚𑀦𑀁 𑀮𑀤𑁆𑀥𑀸 ‘𑀅𑀳𑁄 𑀯𑀢𑀸𑀳𑀁 𑀲𑁆𑀯𑁂𑀧𑀺 𑀧𑀼𑀦𑀤𑀺𑀯𑀲𑁂𑀧𑀺 𑀏𑀯𑀭𑀽𑀧𑀁 𑀮𑀪𑁂𑀬𑁆𑀬𑀁’, 𑀮𑀽𑀔𑀁 𑀯𑀸 𑀧𑀦 𑀮𑀤𑁆𑀥𑀸 ‘‘𑀳𑀺𑀬𑁆𑀬𑁄 𑀯𑀺𑀬 𑀫𑁂 𑀅𑀚𑁆𑀚 𑀧𑀡𑀻𑀢𑀪𑁄𑀚𑀦𑀁 𑀦 𑀮𑀤𑁆𑀥’’𑀦𑁆𑀢𑀺 𑀧𑀢𑁆𑀣𑀦𑀁 𑀯𑀸 𑀅𑀦𑀼𑀲𑁄𑀘𑀦𑀁 𑀯𑀸 𑀅𑀓𑀢𑁆𑀯𑀸 𑀦𑀺𑀢𑁆𑀢𑀡𑁆𑀳𑁂𑀦 𑁋

‘‘𑀅𑀢𑀻𑀢𑀁 𑀦𑀸𑀦𑀼𑀲𑁄𑀘𑀸𑀫𑀺, 𑀦𑀧𑁆𑀧𑀚𑀧𑁆𑀧𑀸𑀫𑀺𑀦𑀸𑀕𑀢𑀁;

𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦 𑀬𑀸𑀧𑁂𑀫𑀺, 𑀢𑁂𑀦 𑀯𑀡𑁆𑀡𑁄 𑀧𑀲𑀻𑀤𑀢𑀻’’𑀢𑀺. (𑀚𑀸. 𑁨.𑁨𑁨.𑁯𑁦) 𑁋

𑀇𑀫𑀁 𑀑𑀯𑀸𑀤𑀁 𑀅𑀦𑀼𑀲𑁆𑀲𑀭𑀦𑁆𑀢𑁂𑀦 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀦𑁂𑀯 𑀬𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄.

𑀬𑀣𑀸 𑀘 𑀢𑁂 𑀦 ‘‘𑀏𑀢𑁆𑀢𑀓𑀁 𑀓𑀦𑁆𑀢𑀸𑀭𑁂 𑀔𑀸𑀤𑀺𑀢𑁆𑀯𑀸 𑀅𑀯𑀲𑀺𑀝𑁆𑀞𑀁 𑀓𑀦𑁆𑀢𑀸𑀭𑀁 𑀅𑀢𑀺𑀓𑁆𑀓𑀫𑁆𑀫 𑀮𑁄𑀡𑀫𑁆𑀩𑀺𑀮𑀸𑀤𑀻𑀳𑀺 𑀬𑁄𑀚𑁂𑀢𑁆𑀯𑀸 𑀔𑀸𑀤𑀺𑀲𑁆𑀲𑀸𑀫𑀸’’𑀢𑀺 𑀲𑀦𑁆𑀦𑀺𑀥𑀺𑀁 𑀅𑀓𑀁𑀲𑀼, 𑀓𑀦𑁆𑀢𑀸𑀭𑀧𑀭𑀺𑀬𑁄𑀲𑀸𑀦𑁂 𑀧𑀦 ‘‘𑀧𑀼𑀭𑁂 𑀫𑀳𑀸𑀚𑀦𑁄 𑀧𑀲𑁆𑀲𑀢𑀻’’𑀢𑀺 𑀪𑀽𑀫𑀺𑀬𑀁 𑀯𑀸 𑀦𑀺𑀔𑀡𑀺𑀁𑀲𑀼, 𑀅𑀕𑁆𑀕𑀺𑀦𑀸 𑀯𑀸 𑀛𑀸𑀧𑀬𑀺𑀁𑀲𑀼, 𑀏𑀯𑀫𑁂𑀯 𑁋

‘‘𑀅𑀦𑁆𑀦𑀸𑀦𑀫𑀣𑁄 𑀧𑀸𑀦𑀸𑀦𑀁,

𑀔𑀸𑀤𑀦𑀻𑀬𑀸𑀦𑀁 𑀅𑀣𑁄𑀧𑀺 𑀯𑀢𑁆𑀣𑀸𑀦𑀁;

𑀮𑀤𑁆𑀥𑀸 𑀦 𑀲𑀦𑁆𑀦𑀺𑀥𑀺𑀁 𑀓𑀬𑀺𑀭𑀸,

𑀦 𑀘 𑀧𑀭𑀺𑀢𑁆𑀢𑀲𑁂 𑀢𑀸𑀦𑀺 𑀅𑀮𑀪𑀫𑀸𑀦𑁄’’𑀢𑀺. (𑀲𑀼. 𑀦𑀺. 𑁯𑁩𑁦); 𑁋

𑀇𑀫𑀁 𑀑𑀯𑀸𑀤𑀁 𑀅𑀦𑀼𑀲𑁆𑀲𑀭𑀦𑁆𑀢𑁂𑀦 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀬𑀁 𑀬𑀁 𑀮𑀪𑀢𑀺, 𑀢𑀢𑁄 𑀢𑀢𑁄 𑀅𑀢𑁆𑀢𑀦𑁄 𑀬𑀸𑀧𑀦𑀫𑀢𑁆𑀢𑀁 𑀕𑀳𑁂𑀢𑁆𑀯𑀸, 𑀲𑁂𑀲𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀦𑁆𑀦𑀺𑀥𑀺𑀁 𑀧𑀭𑀺𑀯𑀚𑁆𑀚𑀦𑁆𑀢𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄. 𑀬𑀣𑀸 𑀘 𑀢𑁂 𑀦 ‘‘𑀓𑁄𑀘𑀺 𑀅𑀜𑁆𑀜𑁄 𑀅𑀫𑁆𑀳𑁂 𑀯𑀺𑀬 𑀏𑀯𑀭𑀽𑀧𑀁 𑀧𑀼𑀢𑁆𑀢𑀫𑀁𑀲𑀁 𑀔𑀸𑀤𑀺𑀢𑀼𑀁 𑀦 𑀮𑀪𑀢𑀻’’𑀢𑀺 𑀫𑀸𑀦𑀁 𑀯𑀸 𑀤𑀧𑁆𑀧𑀁 𑀯𑀸 𑀅𑀓𑀁𑀲𑀼, 𑀦𑀺𑀳𑀢𑀫𑀸𑀦𑀸 𑀧𑀦 𑀦𑀺𑀳𑀢𑀤𑀧𑁆𑀧𑀸 𑀳𑀼𑀢𑁆𑀯𑀸 𑀔𑀸𑀤𑀺𑀁𑀲𑀼, 𑀏𑀯𑀫𑁂𑀯 𑀧𑀡𑀻𑀢𑀪𑁄𑀚𑀦𑀁 𑀮𑀪𑀺𑀢𑁆𑀯𑀸 ‘‘𑀅𑀳𑀫𑀲𑁆𑀫𑀺 𑀮𑀸𑀪𑀻 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀸𑀤𑀻𑀦’’𑀦𑁆𑀢𑀺 𑀦 𑀫𑀸𑀦𑁄 𑀯𑀸 𑀤𑀧𑁆𑀧𑁄 𑀯𑀸 𑀓𑀸𑀢𑀩𑁆𑀩𑁄. ‘‘𑀦𑀸𑀬𑀁 𑀧𑀩𑁆𑀩𑀚𑁆𑀚𑀸 𑀘𑀻𑀯𑀭𑀸𑀤𑀺𑀳𑁂𑀢𑀼, 𑀅𑀭𑀳𑀢𑁆𑀢𑀳𑁂𑀢𑀼 𑀧𑀦𑀸𑀬𑀁 𑀧𑀩𑁆𑀩𑀚𑁆𑀚𑀸’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀦𑀺𑀳𑀢𑀫𑀸𑀦𑀤𑀧𑁆𑀧𑁂𑀦𑁂𑀯 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄.

𑀬𑀣𑀸 𑀘 𑀢𑁂 ‘‘𑀓𑀺𑀁 𑀇𑀫𑀺𑀦𑀸 𑀅𑀮𑁄𑀡𑁂𑀦 𑀅𑀦𑀫𑁆𑀩𑀺𑀮𑁂𑀦 𑀅𑀥𑀽𑀧𑀺𑀢𑁂𑀦 𑀤𑀼𑀕𑁆𑀕𑀦𑁆𑀥𑁂𑀦𑀸’’𑀢𑀺 𑀳𑀻𑀴𑁂𑀢𑁆𑀯𑀸 𑀦 𑀔𑀸𑀤𑀺𑀁𑀲𑀼, 𑀳𑀻𑀴𑀦𑀁 𑀧𑀦 𑀯𑀻𑀢𑀺𑀯𑀢𑁆𑀢𑀸 𑀳𑀼𑀢𑁆𑀯𑀸 𑀔𑀸𑀤𑀺𑀁𑀲𑀼, 𑀏𑀯𑀫𑁂𑀯 𑀧𑀺𑀡𑁆𑀟𑀧𑀸𑀢𑀁 𑀮𑀪𑀺𑀢𑁆𑀯𑀸 ‘‘𑀓𑀺𑀁 𑀇𑀫𑀺𑀦𑀸 𑀅𑀲𑁆𑀲𑀕𑁄𑀡𑀪𑀢𑁆𑀢𑀲𑀤𑀺𑀲𑁂𑀦 𑀮𑀽𑀔𑁂𑀦 𑀦𑀺𑀭𑀲𑁂𑀦, 𑀲𑀼𑀯𑀸𑀦𑀤𑁄𑀡𑀺𑀬𑀁 𑀢𑀁 𑀧𑀓𑁆𑀔𑀺𑀧𑀣𑀸’’𑀢𑀺 𑀏𑀯𑀁 𑀧𑀺𑀡𑁆𑀟𑀧𑀸𑀢𑀁 𑀯𑀸 ‘‘𑀓𑁄 𑀇𑀫𑀁 𑀪𑀼𑀜𑁆𑀚𑀺𑀲𑁆𑀲𑀢𑀺, 𑀓𑀸𑀓𑀲𑀼𑀦𑀔𑀸𑀤𑀻𑀦𑀁 𑀤𑁂𑀳𑀻’’𑀢𑀺 𑀏𑀯𑀁 𑀤𑀸𑀬𑀓𑀁 𑀯𑀸 𑀅𑀳𑀻𑀴𑁂𑀦𑁆𑀢𑁂𑀦 𑁋

‘‘𑀲 𑀧𑀢𑁆𑀢𑀧𑀸𑀡𑀺 𑀯𑀺𑀘𑀭𑀦𑁆𑀢𑁄, 𑀅𑀫𑀽𑀕𑁄 𑀫𑀽𑀕𑀲𑀫𑁆𑀫𑀢𑁄;

𑀅𑀧𑁆𑀧𑀁 𑀤𑀸𑀦𑀁 𑀦 𑀳𑀻𑀴𑁂𑀬𑁆𑀬, 𑀤𑀸𑀢𑀸𑀭𑀁 𑀦𑀸𑀯𑀚𑀸𑀦𑀺𑀬𑀸’’𑀢𑀺. (𑀲𑀼. 𑀦𑀺. 𑁭𑁧𑁮); 𑁋

𑀇𑀫𑀁 𑀑𑀯𑀸𑀤𑀁 𑀅𑀦𑀼𑀲𑁆𑀲𑀭𑀦𑁆𑀢𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑁄. 𑀬𑀣𑀸 𑀘 𑀢𑁂 𑀦 ‘‘𑀢𑀼𑀬𑁆𑀳𑀁 𑀪𑀸𑀕𑁄, 𑀫𑀬𑁆𑀳𑀁 𑀪𑀸𑀕𑁄, 𑀢𑀯 𑀧𑀼𑀢𑁆𑀢𑁄 𑀫𑀫 𑀧𑀼𑀢𑁆𑀢𑁄’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀅𑀢𑀺𑀫𑀜𑁆𑀜𑀺𑀁𑀲𑀼, 𑀲𑀫𑀕𑁆𑀕𑀸 𑀧𑀦, 𑀲𑀫𑁆𑀫𑁄𑀤𑀫𑀸𑀦𑀸 𑀳𑀼𑀢𑁆𑀯𑀸 𑀔𑀸𑀤𑀺𑀁𑀲𑀼, 𑀏𑀯𑀫𑁂𑀯𑀁 𑀧𑀺𑀡𑁆𑀟𑀧𑀸𑀢𑀁 𑀮𑀪𑀺𑀢𑁆𑀯𑀸 𑀬𑀣𑀸 𑀏𑀓𑀘𑁆𑀘𑁄 ‘‘𑀓𑁄 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀤𑀲𑁆𑀲𑀢𑀺 𑀦𑀺𑀓𑁆𑀓𑀸𑀭𑀡𑀸 𑀉𑀫𑁆𑀫𑀸𑀭𑁂𑀲𑀼 𑀧𑀓𑁆𑀔𑀮𑀦𑁆𑀢𑀸𑀦𑀁 𑀆𑀳𑀺𑀡𑁆𑀟𑀦𑁆𑀢𑀸𑀦𑀁 𑀯𑀺𑀚𑀸𑀢𑀫𑀸𑀢𑀸𑀧𑀺 𑀯𑁄 𑀤𑀸𑀢𑀩𑁆𑀩𑀁 𑀦 𑀫𑀜𑁆𑀜𑀢𑀺, 𑀫𑀬𑀁 𑀧𑀦 𑀕𑀢𑀕𑀢𑀝𑁆𑀞𑀸𑀦𑁂 𑀧𑀡𑀻𑀢𑀸𑀦𑀺 𑀘𑀻𑀯𑀭𑀸𑀤𑀻𑀦𑀺 𑀮𑀪𑀸𑀫𑀸’’𑀢𑀺 𑀲𑀻𑀮𑀯𑀦𑁆𑀢𑁂 𑀲𑀩𑁆𑀭𑀳𑁆𑀫𑀘𑀸𑀭𑀻 𑀅𑀢𑀺𑀫𑀜𑁆𑀜𑀢𑀺, 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀲𑁄 𑀢𑁂𑀦 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀡𑁆𑀡𑀘𑀺𑀢𑁆𑀢𑁄 𑀅𑀜𑁆𑀜𑁂 𑀧𑁂𑀲𑀮𑁂 𑀪𑀺𑀓𑁆𑀔𑀽 𑀅𑀢𑀺𑀫𑀜𑁆𑀜𑀢𑀺. 𑀢𑀜𑁆𑀳𑀺 𑀢𑀲𑁆𑀲, 𑀪𑀺𑀓𑁆𑀔𑀯𑁂, 𑀫𑁄𑀖𑀧𑀼𑀭𑀺𑀲𑀲𑁆𑀲 𑀳𑁄𑀢𑀺 𑀤𑀻𑀖𑀭𑀢𑁆𑀢𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬𑀸’’𑀢𑀺 (𑀲𑀁. 𑀦𑀺. 𑁨.𑁧𑁬𑁧).

𑀏𑀯𑀁 𑀓𑀜𑁆𑀘𑀺 𑀅𑀦𑀢𑀺𑀫𑀜𑁆𑀜𑀺𑀢𑁆𑀯𑀸 𑀲𑀩𑁆𑀩𑁂𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀲𑀤𑁆𑀥𑀺𑀁 𑀲𑀫𑀕𑁆𑀕𑁂𑀦 𑀲𑀫𑁆𑀫𑁄𑀤𑀫𑀸𑀦𑁂𑀦 𑀳𑀼𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁.

𑀧𑀭𑀺𑀜𑁆𑀜𑀸𑀢𑁂𑀢𑀺 𑀜𑀸𑀢𑀧𑀭𑀺𑀜𑁆𑀜𑀸 𑀢𑀻𑀭𑀡𑀧𑀭𑀺𑀜𑁆𑀜𑀸 𑀧𑀳𑀸𑀦𑀧𑀭𑀺𑀜𑁆𑀜𑀸𑀢𑀺 𑀇𑀫𑀸𑀳𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀜𑁆𑀜𑀸𑀢𑁂. 𑀓𑀣𑀁? 𑀇𑀥 𑀪𑀺𑀓𑁆𑀔𑀼 ‘‘𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀦𑀸𑀫 𑀅𑀬𑀁 𑀲𑀯𑀢𑁆𑀣𑀼𑀓𑀯𑀲𑁂𑀦 𑀑𑀚𑀝𑁆𑀞𑀫𑀓𑀭𑀽𑀧𑀁 𑀳𑁄𑀢𑀺, 𑀑𑀚𑀝𑁆𑀞𑀫𑀓𑀭𑀽𑀧𑀁 𑀓𑀢𑁆𑀣 𑀧𑀝𑀺𑀳𑀜𑁆𑀜𑀢𑀺? 𑀚𑀺𑀯𑁆𑀳𑀸𑀧𑀲𑀸𑀤𑁂, 𑀚𑀺𑀯𑁆𑀳𑀸𑀧𑀲𑀸𑀤𑁄 𑀓𑀺𑀦𑁆𑀦𑀺𑀲𑁆𑀲𑀺𑀢𑁄? 𑀘𑀢𑀼𑀫𑀳𑀸𑀪𑀽𑀢𑀦𑀺𑀲𑁆𑀲𑀺𑀢𑁄. 𑀇𑀢𑀺 𑀑𑀚𑀝𑁆𑀞𑀫𑀓𑀁 𑀚𑀺𑀯𑁆𑀳𑀸𑀧𑀲𑀸𑀤𑁄 𑀢𑀲𑁆𑀲 𑀧𑀘𑁆𑀘𑀬𑀸𑀦𑀺 𑀫𑀳𑀸𑀪𑀽𑀢𑀸𑀦𑀻𑀢𑀺 𑀇𑀫𑁂 𑀥𑀫𑁆𑀫𑀸 𑀭𑀽𑀧𑀓𑁆𑀔𑀦𑁆𑀥𑁄 𑀦𑀸𑀫, 𑀢𑀁 𑀧𑀭𑀺𑀕𑁆𑀕𑀡𑁆𑀳𑀢𑁄 𑀉𑀧𑁆𑀧𑀦𑁆𑀦𑀸 𑀨𑀲𑁆𑀲𑀧𑀜𑁆𑀘𑀫𑀓𑀸 𑀥𑀫𑁆𑀫𑀸 𑀘𑀢𑁆𑀢𑀸𑀭𑁄 𑀅𑀭𑀽𑀧𑀓𑁆𑀔𑀦𑁆𑀥𑀸. 𑀇𑀢𑀺 𑀲𑀩𑁆𑀩𑁂𑀧𑀺𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑀸 𑀲𑀗𑁆𑀔𑁂𑀧𑀢𑁄 𑀦𑀸𑀫𑀭𑀽𑀧𑀫𑀢𑁆𑀢𑀁 𑀳𑁄𑀢𑀻’’𑀢𑀺 𑀧𑀚𑀸𑀦𑀸𑀢𑀺. 𑀲𑁄 𑀢𑁂 𑀥𑀫𑁆𑀫𑁂 𑀲𑀭𑀲𑀮𑀓𑁆𑀔𑀡𑀢𑁄 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑁂𑀲𑀁 𑀧𑀘𑁆𑀘𑀬𑀁 𑀧𑀭𑀺𑀬𑁂𑀲𑀦𑁆𑀢𑁄 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀁 𑀧𑀲𑁆𑀲𑀢𑀺. 𑀏𑀢𑁆𑀢𑀸𑀯𑀢𑀸𑀦𑁂𑀦 𑀓𑀩𑀴𑀻𑀓𑀸𑀭𑀸𑀳𑀸𑀭𑀫𑀼𑀔𑁂𑀦 𑀲𑀧𑁆𑀧𑀘𑁆𑀘𑀬𑀲𑁆𑀲 𑀦𑀸𑀫𑀭𑀽𑀧𑀲𑁆𑀲 𑀬𑀸𑀣𑀸𑀯𑀢𑁄 𑀤𑀺𑀝𑁆𑀞𑀢𑁆𑀢𑀸 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀜𑀸𑀢𑀧𑀭𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀢𑁄 𑀳𑁄𑀢𑀺. 𑀲𑁄 𑀢𑀤𑁂𑀯 𑀲𑀧𑁆𑀧𑀘𑁆𑀘𑀬𑀁 𑀦𑀸𑀫𑀭𑀽𑀧𑀁 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀆𑀭𑁄𑀧𑁂𑀢𑁆𑀯𑀸 𑀲𑀢𑁆𑀢𑀦𑁆𑀦𑀁 𑀅𑀦𑀼𑀧𑀲𑁆𑀲𑀦𑀸𑀦𑀁 𑀯𑀲𑁂𑀦 𑀲𑀫𑁆𑀫𑀲𑀢𑀺. 𑀏𑀢𑁆𑀢𑀸𑀯𑀢𑀸𑀦𑁂𑀦 𑀲𑁄 𑀢𑀺𑀮𑀓𑁆𑀔𑀡𑀧𑀝𑀺𑀯𑁂𑀥𑀲𑀫𑁆𑀫𑀲𑀦𑀜𑀸𑀡𑀲𑀗𑁆𑀔𑀸𑀢𑀸𑀬 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀢𑁄 𑀳𑁄𑀢𑀺. 𑀢𑀲𑁆𑀫𑀺𑀁𑀬𑁂𑀯 𑀦𑀸𑀫𑀭𑀽𑀧𑁂 𑀙𑀦𑁆𑀤𑀭𑀸𑀕𑀸𑀯𑀓𑀟𑁆𑀠𑀦𑁂𑀦 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀭𑀺𑀚𑀸𑀦𑀢𑀸 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀢𑁄 𑀳𑁄𑀢𑀻𑀢𑀺.

𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀲𑀫𑁆𑀪𑀯𑁄 𑀭𑀸𑀕𑁄 𑀧𑀭𑀺𑀜𑁆𑀜𑀸𑀢𑁄 𑀳𑁄𑀢𑀺. 𑀏𑀢𑁆𑀣 𑀧𑀦 𑀢𑀺𑀲𑁆𑀲𑁄 𑀧𑀭𑀺𑀜𑁆𑀜𑀸 𑀏𑀓𑀧𑀭𑀺𑀜𑁆𑀜𑀸 𑀲𑀩𑁆𑀩𑀧𑀭𑀺𑀜𑁆𑀜𑀸 𑀫𑀽𑀮𑀧𑀭𑀺𑀜𑁆𑀜𑀸𑀢𑀺. 𑀓𑀢𑀫𑀸 𑀏𑀓𑀧𑀭𑀺𑀜𑁆𑀜𑀸? 𑀬𑁄 𑀪𑀺𑀓𑁆𑀔𑀼 𑀚𑀺𑀯𑁆𑀳𑀸𑀤𑁆𑀯𑀸𑀭𑁂 𑀏𑀓𑀭𑀲𑀢𑀡𑁆𑀳𑀁 𑀧𑀭𑀺𑀚𑀸𑀦𑀸𑀢𑀺, 𑀢𑁂𑀦 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄 𑀧𑀭𑀺𑀜𑁆𑀜𑀸𑀢𑁄𑀯 𑀳𑁄𑀢𑀻𑀢𑀺. 𑀓𑀲𑁆𑀫𑀸? 𑀢𑀲𑁆𑀲𑀸𑀬𑁂𑀯 𑀢𑀢𑁆𑀣 𑀉𑀧𑁆𑀧𑀚𑁆𑀚𑀦𑀢𑁄. 𑀲𑀸𑀬𑁂𑀯 𑀳𑀺 𑀢𑀡𑁆𑀳𑀸 𑀘𑀓𑁆𑀔𑀼𑀤𑁆𑀯𑀸𑀭𑁂 𑀉𑀧𑁆𑀧𑀦𑁆𑀦𑀸 𑀭𑀽𑀧𑀭𑀸𑀕𑁄 𑀦𑀸𑀫 𑀳𑁄𑀢𑀺, 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑀸 𑀲𑀤𑁆𑀤𑀭𑀸𑀕𑀸𑀤𑀬𑁄. 𑀇𑀢𑀺 𑀬𑀣𑀸 𑀏𑀓𑀲𑁆𑀲𑁂𑀯 𑀘𑁄𑀭𑀲𑁆𑀲 𑀧𑀜𑁆𑀘𑀫𑀕𑁆𑀕𑁂 𑀳𑀦𑀢𑁄 𑀏𑀓𑀲𑁆𑀫𑀺𑀁 𑀫𑀕𑁆𑀕𑁂 𑀕𑀳𑁂𑀢𑁆𑀯𑀸 𑀲𑀻𑀲𑁂 𑀙𑀺𑀦𑁆𑀦𑁂 𑀧𑀜𑁆𑀘𑀧𑀺 𑀫𑀕𑁆𑀕𑀸 𑀔𑁂𑀫𑀸 𑀳𑁄𑀦𑁆𑀢𑀺, 𑀏𑀯𑀁 𑀚𑀺𑀯𑁆𑀳𑀸𑀤𑁆𑀯𑀸𑀭𑁂 𑀭𑀲𑀢𑀡𑁆𑀳𑀸𑀬 𑀧𑀭𑀺𑀜𑁆𑀜𑀸𑀢𑀸𑀬 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄 𑀧𑀭𑀺𑀜𑁆𑀜𑀸𑀢𑁄 𑀳𑁄𑀢𑀻𑀢𑀺 𑀅𑀬𑀁 𑀏𑀓𑀧𑀭𑀺𑀜𑁆𑀜𑀸 𑀦𑀸𑀫.

𑀓𑀢𑀫𑀸 𑀲𑀩𑁆𑀩𑀧𑀭𑀺𑀜𑁆𑀜𑀸? 𑀧𑀢𑁆𑀢𑁂 𑀧𑀓𑁆𑀔𑀺𑀢𑁆𑀢𑀧𑀺𑀡𑁆𑀟𑀧𑀸𑀢𑀲𑁆𑀫𑀺𑀜𑁆𑀳𑀺 𑀏𑀓𑀲𑁆𑀫𑀺𑀁𑀬𑁂𑀯 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑁄 𑀮𑀩𑁆𑀪𑀢𑀺. 𑀓𑀣𑀁? 𑀧𑀭𑀺𑀲𑀼𑀤𑁆𑀥𑀁 𑀢𑀸𑀯𑀲𑁆𑀲 𑀯𑀡𑁆𑀡𑀁 𑀑𑀮𑁄𑀓𑀬𑀢𑁄 𑀭𑀽𑀧𑀭𑀸𑀕𑁄 𑀳𑁄𑀢𑀺, 𑀉𑀡𑁆𑀳𑁂 𑀲𑀧𑁆𑀧𑀺𑀫𑁆𑀳𑀺 𑀢𑀢𑁆𑀣 𑀆𑀲𑀺𑀜𑁆𑀘𑀦𑁆𑀢𑁂 𑀧𑀝𑀧𑀝𑀸𑀢𑀺 𑀲𑀤𑁆𑀤𑁄 𑀉𑀝𑁆𑀞𑀳𑀢𑀺, 𑀢𑀣𑀸𑀭𑀽𑀧𑀁 𑀔𑀸𑀤𑀦𑀻𑀬𑀁 𑀯𑀸 𑀔𑀸𑀤𑀦𑁆𑀢𑀲𑁆𑀲 𑀫𑀼𑀭𑀼𑀫𑀼𑀭𑀽𑀢𑀺 𑀲𑀤𑁆𑀤𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀅𑀲𑁆𑀲𑀸𑀤𑀬𑀢𑁄 𑀲𑀤𑁆𑀤𑀭𑀸𑀕𑁄. 𑀚𑀻𑀭𑀓𑀸𑀤𑀺𑀯𑀲𑀕𑀦𑁆𑀥𑀁 𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲 𑀕𑀦𑁆𑀥𑀭𑀸𑀕𑁄, 𑀲𑀸𑀤𑀼𑀭𑀲𑀯𑀲𑁂𑀦 𑀭𑀲𑀭𑀸𑀕𑁄. 𑀫𑀼𑀤𑀼𑀪𑁄𑀚𑀦𑀁 𑀨𑀲𑁆𑀲𑀯𑀦𑁆𑀢𑀦𑁆𑀢𑀺 𑀅𑀲𑁆𑀲𑀸𑀤𑀬𑀢𑁄 𑀨𑁄𑀝𑁆𑀞𑀩𑁆𑀩𑀭𑀸𑀕𑁄. 𑀇𑀢𑀺 𑀇𑀫𑀲𑁆𑀫𑀺𑀁 𑀆𑀳𑀸𑀭𑁂 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀦𑀺𑀘𑁆𑀙𑀦𑁆𑀤𑀭𑀸𑀕𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀢𑁆𑀢𑁂 𑀲𑀩𑁆𑀩𑁄𑀧𑀺 𑀲𑁄 𑀧𑀭𑀺𑀜𑁆𑀜𑀸𑀢𑁄 𑀳𑁄𑀢𑀻𑀢𑀺 𑀅𑀬𑀁 𑀲𑀩𑁆𑀩𑀧𑀭𑀺𑀜𑁆𑀜𑀸 𑀦𑀸𑀫.

𑀓𑀢𑀫𑀸 𑀫𑀽𑀮𑀧𑀭𑀺𑀜𑁆𑀜𑀸? 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑀲𑁆𑀲 𑀳𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀫𑀽𑀮𑀁. 𑀓𑀲𑁆𑀫𑀸? 𑀢𑀲𑁆𑀫𑀺𑀁 𑀲𑀢𑀺 𑀢𑀲𑁆𑀲𑀼𑀧𑁆𑀧𑀢𑁆𑀢𑀺𑀢𑁄. 𑀩𑁆𑀭𑀸𑀳𑁆𑀫𑀡𑀢𑀺𑀲𑁆𑀲𑀪𑀬𑁂 𑀓𑀺𑀭 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀚𑀸𑀬𑀫𑁆𑀧𑀢𑀺𑀓𑀸𑀦𑀁 𑀉𑀧𑀦𑀺𑀚𑁆𑀛𑀸𑀦𑀘𑀺𑀢𑁆𑀢𑀁 𑀦𑀸𑀫 𑀦𑀸𑀳𑁄𑀲𑀺. 𑀓𑀲𑁆𑀫𑀸? 𑀆𑀳𑀸𑀭𑀫𑀦𑁆𑀤𑀢𑀸𑀬. 𑀪𑀬𑁂 𑀧𑀦 𑀯𑀽𑀧𑀲𑀦𑁆𑀢𑁂 𑀬𑁄𑀚𑀦𑀲𑀢𑀺𑀓𑁄 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁄 𑀤𑀸𑀭𑀓𑀸𑀦𑀁 𑀚𑀸𑀢𑀫𑀗𑁆𑀕𑀮𑁂𑀳𑀺 𑀏𑀓𑀫𑀗𑁆𑀕𑀮𑁄 𑀅𑀳𑁄𑀲𑀺. 𑀇𑀢𑀺 𑀫𑀽𑀮𑀪𑀽𑀢𑁂 𑀆𑀳𑀸𑀭𑁂 𑀧𑀭𑀺𑀜𑁆𑀜𑀸𑀢𑁂 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄 𑀧𑀭𑀺𑀜𑁆𑀜𑀸𑀢𑁄𑀯 𑀳𑁄𑀢𑀻𑀢𑀺 𑀅𑀬𑀁 𑀫𑀽𑀮𑀧𑀭𑀺𑀜𑁆𑀜𑀸 𑀦𑀸𑀫.

𑀦𑀢𑁆𑀣𑀺 𑀢𑀁 𑀲𑀁𑀬𑁄𑀚𑀦𑀦𑁆𑀢𑀺 𑀢𑁂𑀦 𑀭𑀸𑀕𑁂𑀦 𑀲𑀤𑁆𑀥𑀺𑀁 𑀧𑀳𑀸𑀦𑁂𑀓𑀝𑁆𑀞𑀢𑀸𑀬 𑀧𑀳𑀻𑀦𑀢𑁆𑀢𑀸 𑀦𑀢𑁆𑀣𑀺. 𑀏𑀯𑀫𑀬𑀁 𑀤𑁂𑀲𑀦𑀸 𑀬𑀸𑀯 𑀅𑀦𑀸𑀕𑀸𑀫𑀺𑀫𑀕𑁆𑀕𑀸 𑀓𑀣𑀺𑀢𑀸. ‘‘𑀏𑀢𑁆𑀢𑀓𑁂𑀦 𑀧𑀦 𑀫𑀸 𑀯𑁄𑀲𑀸𑀦𑀁 𑀆𑀧𑀚𑁆𑀚𑀺𑀁𑀲𑀽’’𑀢𑀺 𑀏𑀢𑁂𑀲𑀁𑀬𑁂𑀯 𑀭𑀽𑀧𑀸𑀤𑀻𑀦𑀁 𑀯𑀲𑁂𑀦 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀬𑀸𑀯 𑀅𑀭𑀳𑀢𑁆𑀢𑀸 𑀓𑀣𑁂𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀧𑀞𑀫𑀸𑀳𑀸𑀭𑁄 (𑀦𑀺𑀝𑁆𑀞𑀺𑀢𑁄).

𑀤𑀼𑀢𑀺𑀬𑁂 𑀦𑀺𑀘𑁆𑀘𑀫𑁆𑀫𑀸𑀢𑀺 𑀔𑀼𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀺𑀗𑁆𑀕𑀫𑀽𑀮𑀸 𑀲𑀓𑀮𑀲𑀭𑀻𑀭𑀢𑁄 𑀉𑀤𑁆𑀤𑀸𑀮𑀺𑀢𑀘𑀫𑁆𑀫𑀸 𑀓𑀺𑀁𑀲𑀼𑀓𑀭𑀸𑀲𑀺𑀯𑀡𑁆𑀡𑀸. 𑀓𑀲𑁆𑀫𑀸 𑀧𑀦 𑀅𑀜𑁆𑀜𑀁 𑀳𑀢𑁆𑀣𑀺𑀅𑀲𑁆𑀲𑀕𑁄𑀡𑀸𑀤𑀺𑀉𑀧𑀫𑀁 𑀅𑀕𑀳𑁂𑀢𑁆𑀯𑀸 𑀦𑀺𑀘𑁆𑀘𑀫𑁆𑀫𑀕𑀸𑀯𑀽𑀧𑀫𑀸 𑀕𑀳𑀺𑀢𑀸𑀢𑀺? 𑀢𑀺𑀢𑀺𑀓𑁆𑀔𑀺𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑀤𑀻𑀧𑀦𑀢𑁆𑀣𑀁. 𑀫𑀸𑀢𑀼𑀕𑀸𑀫𑁄 𑀳𑀺 𑀉𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀯𑁂𑀤𑀦𑀁 𑀢𑀺𑀢𑀺𑀓𑁆𑀔𑀺𑀢𑀼𑀁 𑀅𑀥𑀺𑀯𑀸𑀲𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀫𑁂𑀯 𑀨𑀲𑁆𑀲𑀸𑀳𑀸𑀭𑁄 𑀅𑀩𑀮𑁄 𑀤𑀼𑀩𑁆𑀩𑀮𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀲𑀤𑀺𑀲𑀫𑁂𑀯 𑀉𑀧𑀫𑀁 𑀆𑀳𑀭𑀺. 𑀓𑀼𑀝𑁆𑀝𑀦𑁆𑀢𑀺 𑀲𑀺𑀮𑀸𑀓𑀼𑀝𑁆𑀝𑀸𑀤𑀻𑀦𑀁 𑀅𑀜𑁆𑀜𑀢𑀭𑀁. 𑀓𑀼𑀝𑁆𑀝𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀦𑀸𑀫 𑀉𑀡𑁆𑀡𑀦𑀸𑀪𑀺𑀲𑀭𑀩𑀽𑀫𑀽𑀲𑀺𑀓𑀸𑀤𑀬𑁄. 𑀭𑀼𑀓𑁆𑀔𑀦𑀺𑀲𑁆𑀲𑀺𑀢𑀸𑀢𑀺 𑀉𑀘𑁆𑀘𑀸𑀮𑀺𑀗𑁆𑀕𑀧𑀸𑀡𑀓𑀸𑀤𑀬𑁄. 𑀉𑀤𑀓𑀦𑀺𑀲𑁆𑀲𑀺𑀢𑀸𑀢𑀺 𑀫𑀘𑁆𑀙𑀲𑀼𑀁𑀲𑀼𑀫𑀸𑀭𑀸𑀤𑀬𑁄. 𑀆𑀓𑀸𑀲𑀦𑀺𑀲𑁆𑀲𑀺𑀢𑀸𑀢𑀺 𑀟𑀁𑀲𑀫𑀓𑀲𑀓𑀸𑀓𑀓𑀼𑀮𑀮𑀸𑀤𑀬𑁄. 𑀔𑀸𑀤𑁂𑀬𑁆𑀬𑀼𑀦𑁆𑀢𑀺 𑀮𑀼𑀜𑁆𑀘𑀺𑀢𑁆𑀯𑀸 𑀔𑀸𑀤𑁂𑀬𑁆𑀬𑀼𑀁. 𑀲𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀢𑀁 𑀢𑀁𑀞𑀸𑀦𑀲𑀦𑁆𑀦𑀺𑀲𑁆𑀲𑀬𑀫𑀽𑀮𑀺𑀓𑀁 𑀧𑀸𑀡𑀔𑀸𑀤𑀦𑀪𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀦𑁂𑀯 𑀅𑀢𑁆𑀢𑀦𑁄 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁, 𑀦 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀲𑀭𑀻𑀭𑀲𑀫𑁆𑀩𑀸𑀳𑀦𑀉𑀡𑁆𑀳𑁄𑀤𑀓𑀸𑀦𑀺 𑀇𑀘𑁆𑀙𑀢𑀺, 𑀏𑀯𑀫𑁂𑀯 𑀪𑀺𑀓𑁆𑀔𑀼 𑀨𑀲𑁆𑀲𑀸𑀳𑀸𑀭𑀫𑀽𑀮𑀓𑀁 𑀓𑀺𑀮𑁂𑀲𑀧𑀸𑀡𑀓𑀔𑀸𑀤𑀦𑀪𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀢𑁂𑀪𑀽𑀫𑀓𑀨𑀲𑁆𑀲𑁂𑀦 𑀅𑀦𑀢𑁆𑀣𑀺𑀓𑁄 𑀳𑁄𑀢𑀺.

𑀨𑀲𑁆𑀲𑁂, 𑀪𑀺𑀓𑁆𑀔𑀯𑁂, 𑀆𑀳𑀸𑀭𑁂 𑀧𑀭𑀺𑀜𑁆𑀜𑀸𑀢𑁂𑀢𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀜𑁆𑀜𑀸𑀢𑁂. 𑀇𑀥𑀸𑀧𑀺 𑀢𑀺𑀲𑁆𑀲𑁄 𑀧𑀭𑀺𑀜𑁆𑀜𑀸. 𑀢𑀢𑁆𑀣 ‘‘𑀨𑀲𑁆𑀲𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀢𑁂𑀲𑀁 𑀯𑀢𑁆𑀣𑀸𑀭𑀫𑁆𑀫𑀡𑀸𑀦𑀺 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 𑀏𑀯𑀁 𑀲𑀧𑁆𑀧𑀘𑁆𑀘𑀬𑀲𑁆𑀲 𑀦𑀸𑀫𑀭𑀽𑀧𑀲𑁆𑀲 𑀬𑀸𑀣𑀸𑀯𑀢𑁄 𑀤𑀲𑁆𑀲𑀦𑀁 𑀜𑀸𑀢𑀧𑀭𑀺𑀜𑁆𑀜𑀸. 𑀢𑀢𑁆𑀣𑁂𑀯 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀲𑀢𑁆𑀢𑀦𑁆𑀦𑀁 𑀅𑀦𑀼𑀧𑀲𑁆𑀲𑀦𑀸𑀦𑀁 𑀯𑀲𑁂𑀦 𑀅𑀦𑀺𑀘𑁆𑀘𑀸𑀤𑀺𑀢𑁄 𑀢𑀼𑀮𑀦𑀁 𑀢𑀻𑀭𑀡𑀧𑀭𑀺𑀜𑁆𑀜𑀸. 𑀢𑀲𑁆𑀫𑀺𑀁𑀬𑁂𑀯 𑀧𑀦 𑀦𑀸𑀫𑀭𑀽𑀧𑁂 𑀙𑀦𑁆𑀤𑀭𑀸𑀕𑀦𑀺𑀓𑁆𑀓𑀟𑁆𑀠𑀦𑁄 𑀅𑀭𑀳𑀢𑁆𑀢𑀫𑀕𑁆𑀕𑁄 𑀧𑀳𑀸𑀦𑀧𑀭𑀺𑀜𑁆𑀜𑀸. 𑀢𑀺𑀲𑁆𑀲𑁄 𑀯𑁂𑀤𑀦𑀸𑀢𑀺 𑀏𑀯𑀁 𑀨𑀲𑁆𑀲𑀸𑀳𑀸𑀭𑁂 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀜𑁆𑀜𑀸𑀢𑁂 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀧𑀭𑀺𑀜𑁆𑀜𑀸𑀢𑀸𑀯 𑀳𑁄𑀦𑁆𑀢𑀺 𑀢𑀫𑁆𑀫𑀽𑀮𑀓𑀢𑁆𑀢𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀘. 𑀇𑀢𑀺 𑀨𑀲𑁆𑀲𑀸𑀳𑀸𑀭𑀯𑀲𑁂𑀦 𑀤𑁂𑀲𑀦𑀸 𑀬𑀸𑀯 𑀅𑀭𑀳𑀢𑁆𑀢𑀸 𑀓𑀣𑀺𑀢𑀸. 𑀤𑀼𑀢𑀺𑀬𑀸𑀳𑀸𑀭𑁄.

𑀢𑀢𑀺𑀬𑁂 𑀅𑀗𑁆𑀕𑀸𑀭𑀓𑀸𑀲𑀽𑀢𑀺 𑀅𑀗𑁆𑀕𑀸𑀭𑀸𑀦𑀁 𑀓𑀸𑀲𑀼. 𑀓𑀸𑀲𑀽𑀢𑀺 𑀭𑀸𑀲𑀺𑀧𑀺 𑀯𑀼𑀘𑁆𑀘𑀢𑀺 𑀆𑀯𑀸𑀝𑁄𑀧𑀺.

‘‘𑀅𑀗𑁆𑀕𑀸𑀭𑀓𑀸𑀲𑀼𑀁 𑀅𑀧𑀭𑁂 𑀨𑀼𑀡𑀦𑁆𑀢𑀺,

𑀦𑀭𑀸 𑀭𑀼𑀤𑀦𑁆𑀢𑀸 𑀧𑀭𑀺𑀤𑀟𑁆𑀠𑀕𑀢𑁆𑀢𑀸;

𑀪𑀬𑀜𑁆𑀳𑀺 𑀫𑀁 𑀯𑀺𑀦𑁆𑀤𑀢𑀺 𑀲𑀽𑀢 𑀤𑀺𑀲𑁆𑀯𑀸,

𑀧𑀼𑀘𑁆𑀙𑀸𑀫𑀺 𑀢𑀁 𑀫𑀸𑀢𑀮𑀺 𑀤𑁂𑀯𑀲𑀸𑀭𑀣𑀻’’𑀢𑀺. (𑀚𑀸. 𑁨.𑁨𑁨.𑁪𑁬𑁨); 𑁋

𑀏𑀢𑁆𑀣 𑀭𑀸𑀲𑀺 ‘‘𑀓𑀸𑀲𑀽’’𑀢𑀺 𑀯𑀼𑀢𑁆𑀢𑁄.

‘‘𑀓𑀺𑀦𑁆𑀦𑀼 𑀲𑀦𑁆𑀢𑀭𑀫𑀸𑀦𑁄𑀯, 𑀓𑀸𑀲𑀼𑀁 𑀔𑀦𑀲𑀺 𑀲𑀸𑀭𑀣𑀻’’𑀢𑀺? (𑀚𑀸. 𑁨.𑁨𑁨.𑁩). 𑁋

𑀏𑀢𑁆𑀣 𑀆𑀯𑀸𑀝𑁄. 𑀇𑀥𑀸𑀧𑀺 𑀅𑀬𑀫𑁂𑀯 𑀅𑀥𑀺𑀧𑁆𑀧𑁂𑀢𑁄. 𑀲𑀸𑀥𑀺𑀓𑀧𑁄𑀭𑀺𑀲𑀸𑀢𑀺 𑀅𑀢𑀺𑀭𑁂𑀓𑀧𑁄𑀭𑀺𑀲𑀸 𑀧𑀜𑁆𑀘𑀭𑀢𑀦𑀧𑁆𑀧𑀫𑀸𑀡𑀸. 𑀯𑀻𑀢𑀘𑁆𑀘𑀺𑀓𑀸𑀦𑀁 𑀯𑀻𑀢𑀥𑀽𑀫𑀸𑀦𑀦𑁆𑀢𑀺 𑀏𑀢𑁂𑀦𑀲𑁆𑀲 𑀫𑀳𑀸𑀧𑀭𑀺𑀴𑀸𑀳𑀢𑀁 𑀤𑀲𑁆𑀲𑁂𑀢𑀺. 𑀚𑀸𑀮𑀸𑀬 𑀯𑀸 𑀳𑀺 𑀥𑀽𑀫𑁂 𑀯𑀸 𑀲𑀢𑀺 𑀯𑀸𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀧𑀭𑀺𑀴𑀸𑀳𑁄 𑀫𑀳𑀸 𑀦 𑀳𑁄𑀢𑀺, 𑀢𑀤𑀪𑀸𑀯𑁂 𑀯𑀸𑀢𑀸𑀪𑀸𑀯𑀢𑁄 𑀧𑀭𑀺𑀴𑀸𑀳𑁄 𑀫𑀳𑀸 𑀳𑁄𑀢𑀺. 𑀆𑀭𑀓𑀸𑀯𑀲𑁆𑀲𑀸𑀢𑀺 𑀤𑀽𑀭𑁂𑀬𑁂𑀯 𑀪𑀯𑁂𑀬𑁆𑀬.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀅𑀗𑁆𑀕𑀸𑀭𑀓𑀸𑀲𑀼 𑀯𑀺𑀬 𑀳𑀺 𑀢𑁂𑀪𑀽𑀫𑀓𑀯𑀝𑁆𑀝𑀁 𑀤𑀝𑁆𑀞𑀩𑁆𑀩𑀁. 𑀚𑀻𑀯𑀺𑀢𑀼𑀓𑀸𑀫𑁄 𑀧𑀼𑀭𑀺𑀲𑁄 𑀯𑀺𑀬 𑀯𑀝𑁆𑀝𑀦𑀺𑀲𑁆𑀲𑀺𑀢𑁄 𑀩𑀸𑀮𑀧𑀼𑀣𑀼𑀚𑁆𑀚𑀦𑁄. 𑀤𑁆𑀯𑁂 𑀩𑀮𑀯𑀦𑁆𑀢𑁄 𑀧𑀼𑀭𑀺𑀲𑀸 𑀯𑀺𑀬 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀁. 𑀢𑁂𑀲𑀁 𑀢𑀁 𑀧𑀼𑀭𑀺𑀲𑀁 𑀦𑀸𑀦𑀸𑀩𑀸𑀳𑀸𑀲𑀼 𑀕𑀳𑁂𑀢𑁆𑀯𑀸 𑀅𑀗𑁆𑀕𑀸𑀭𑀓𑀸𑀲𑀼𑀁 𑀉𑀧𑀓𑀟𑁆𑀠𑀦𑀓𑀸𑀮𑁄 𑀯𑀺𑀬 𑀧𑀼𑀣𑀼𑀚𑁆𑀚𑀦𑀲𑁆𑀲 𑀓𑀫𑁆𑀫𑀸𑀬𑀽𑀳𑀦𑀓𑀸𑀮𑁄. 𑀓𑀫𑁆𑀫𑀜𑁆𑀳𑀺 𑀆𑀬𑀽𑀳𑀺𑀬𑀫𑀸𑀦𑀫𑁂𑀯 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀢𑀺 𑀦𑀸𑀫. 𑀅𑀗𑁆𑀕𑀸𑀭𑀓𑀸𑀲𑀼𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀯𑀺𑀬 𑀓𑀫𑁆𑀫𑀦𑀺𑀤𑀸𑀦𑀁 𑀯𑀝𑁆𑀝𑀤𑀼𑀓𑁆𑀔𑀁 𑀯𑁂𑀤𑀺𑀢𑀩𑁆𑀩𑀁.

𑀧𑀭𑀺𑀜𑁆𑀜𑀸𑀢𑁂𑀢𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀜𑁆𑀜𑀸𑀢𑁂. 𑀧𑀭𑀺𑀜𑁆𑀜𑀸𑀬𑁄𑀚𑀦𑀸 𑀧𑀦𑁂𑀢𑁆𑀣 𑀨𑀲𑁆𑀲𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀢𑀺𑀲𑁆𑀲𑁄 𑀢𑀡𑁆𑀳𑀸𑀢𑀺 𑀓𑀸𑀫𑀢𑀡𑁆𑀳𑀸 𑀪𑀯𑀢𑀡𑁆𑀳𑀸 𑀯𑀺𑀪𑀯𑀢𑀡𑁆𑀳𑀸𑀢𑀺 𑀇𑀫𑀸 𑀧𑀭𑀺𑀜𑁆𑀜𑀸𑀢𑀸 𑀳𑁄𑀦𑁆𑀢𑀺. 𑀓𑀲𑁆𑀫𑀸? 𑀢𑀡𑁆𑀳𑀸𑀫𑀽𑀮𑀓𑀢𑁆𑀢𑀸 𑀫𑀦𑁄𑀲𑀜𑁆𑀘𑁂𑀢𑀦𑀸𑀬. 𑀦 𑀳𑀺 𑀳𑁂𑀢𑀼𑀫𑁆𑀳𑀺 𑀅𑀧𑁆𑀧𑀳𑀻𑀦𑁂 𑀨𑀮𑀁 𑀧𑀳𑀻𑀬𑀢𑀺. 𑀇𑀢𑀺 𑀫𑀦𑁄𑀲𑀜𑁆𑀘𑁂𑀢𑀦𑀸𑀳𑀸𑀭𑀯𑀲𑁂𑀦𑀧𑀺 𑀬𑀸𑀯 𑀅𑀭𑀳𑀢𑁆𑀢𑀸 𑀤𑁂𑀲𑀦𑀸 𑀓𑀣𑀺𑀢𑀸. 𑀢𑀢𑀺𑀬𑀸𑀳𑀸𑀭𑁄.

𑀘𑀢𑀼𑀢𑁆𑀣𑁂 𑀆𑀕𑀼𑀘𑀸𑀭𑀺𑀦𑁆𑀢𑀺 𑀧𑀸𑀧𑀘𑀸𑀭𑀺𑀁 𑀤𑁄𑀲𑀓𑀸𑀭𑀓𑀁. 𑀓𑀣𑀁 𑀲𑁄 𑀧𑀼𑀭𑀺𑀲𑁄𑀢𑀺 𑀲𑁄 𑀧𑀼𑀭𑀺𑀲𑁄 𑀓𑀣𑀁𑀪𑀽𑀢𑁄, 𑀓𑀺𑀁 𑀬𑀸𑀧𑁂𑀢𑀺, 𑀦 𑀬𑀸𑀧𑁂𑀢𑀻𑀢𑀺 𑀧𑀼𑀘𑁆𑀙𑀢𑀺? 𑀢𑀣𑁂𑀯 𑀤𑁂𑀯 𑀚𑀻𑀯𑀢𑀻𑀢𑀺 𑀬𑀣𑀸 𑀧𑀼𑀩𑁆𑀩𑁂, 𑀇𑀤𑀸𑀦𑀺𑀧𑀺 𑀢𑀣𑁂𑀯 𑀚𑀻𑀯𑀢𑀺.

𑀏𑀯𑀫𑁂𑀯 𑀔𑁄𑀢𑀺 𑀇𑀥𑀸𑀧𑀺 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀭𑀸𑀚𑀸 𑀯𑀺𑀬 𑀳𑀺 𑀓𑀫𑁆𑀫𑀁 𑀤𑀝𑁆𑀞𑀩𑁆𑀩𑀁, 𑀆𑀕𑀼𑀘𑀸𑀭𑀻 𑀧𑀼𑀭𑀺𑀲𑁄 𑀯𑀺𑀬 𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑁄 𑀩𑀸𑀮𑀧𑀼𑀣𑀼𑀚𑁆𑀚𑀦𑁄, 𑀢𑀻𑀡𑀺 𑀲𑀢𑁆𑀢𑀺𑀲𑀢𑀸𑀦𑀺 𑀯𑀺𑀬 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁, 𑀆𑀕𑀼𑀘𑀸𑀭𑀺𑀁 𑀧𑀼𑀭𑀺𑀲𑀁 ‘‘𑀢𑀻𑀳𑀺 𑀲𑀢𑁆𑀢𑀺𑀲𑀢𑁂𑀳𑀺 𑀳𑀦𑀣𑀸’’𑀢𑀺 𑀭𑀜𑁆𑀜𑀸 𑀆𑀡𑀢𑁆𑀢𑀓𑀸𑀮𑁄 𑀯𑀺𑀬 𑀓𑀫𑁆𑀫𑀭𑀜𑁆𑀜𑀸 𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀧𑀼𑀣𑀼𑀚𑁆𑀚𑀦𑀁 𑀕𑀳𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀬𑀁 𑀧𑀓𑁆𑀔𑀺𑀧𑀦𑀓𑀸𑀮𑁄. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀢𑀻𑀡𑀺 𑀲𑀢𑁆𑀢𑀺𑀲𑀢𑀸𑀦𑀺 𑀯𑀺𑀬 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁, 𑀲𑀢𑁆𑀢𑀻𑀲𑀼 𑀧𑀦 𑀤𑀼𑀓𑁆𑀔𑀁 𑀦𑀢𑁆𑀣𑀺, 𑀲𑀢𑁆𑀢𑀻𑀳𑀺 𑀧𑀳𑀝𑀯𑀡𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀏𑀯𑀫𑁂𑀯 𑀧𑀝𑀺𑀲𑀦𑁆𑀥𑀺𑀬𑀫𑁆𑀧𑀺 𑀤𑀼𑀓𑁆𑀔𑀁 𑀦𑀢𑁆𑀣𑀺, 𑀤𑀺𑀦𑁆𑀦𑀸𑀬 𑀧𑀦 𑀧𑀝𑀺𑀲𑀦𑁆𑀥𑀺𑀬𑀸 𑀧𑀯𑀢𑁆𑀢𑁂 𑀯𑀺𑀧𑀸𑀓𑀤𑀼𑀓𑁆𑀔𑀁 𑀲𑀢𑁆𑀢𑀺𑀧𑀳𑀝𑀯𑀡𑀫𑀽𑀮𑀓𑀁 𑀤𑀼𑀓𑁆𑀔𑀁 𑀯𑀺𑀬 𑀳𑁄𑀢𑀺.

𑀧𑀭𑀺𑀜𑁆𑀜𑀸𑀢𑁂𑀢𑀺 𑀢𑀻𑀳𑁂𑀯 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀜𑁆𑀜𑀸𑀢𑁂. 𑀇𑀥𑀸𑀧𑀺 𑀧𑀭𑀺𑀜𑁆𑀜𑀸𑀬𑁄𑀚𑀦𑀸 𑀨𑀲𑁆𑀲𑀸𑀳𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀦𑀸𑀫𑀭𑀽𑀧𑀦𑁆𑀢𑀺 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀁. 𑀯𑀺𑀜𑁆𑀜𑀸𑀡𑀲𑁆𑀫𑀺𑀜𑁆𑀳𑀺 𑀧𑀭𑀺𑀜𑁆𑀜𑀸𑀢𑁂 𑀢𑀁 𑀧𑀭𑀺𑀜𑁆𑀜𑀸𑀢𑀫𑁂𑀯 𑀳𑁄𑀢𑀺 𑀢𑀫𑁆𑀫𑀽𑀮𑀓𑀢𑁆𑀢𑀸 𑀲𑀳𑀼𑀧𑁆𑀧𑀦𑁆𑀦𑀢𑁆𑀢𑀸 𑀘. 𑀇𑀢𑀺 𑀯𑀺𑀜𑁆𑀜𑀸𑀡𑀸𑀳𑀸𑀭𑀯𑀲𑁂𑀦𑀧𑀺 𑀬𑀸𑀯 𑀅𑀭𑀳𑀢𑁆𑀢𑀸 𑀤𑁂𑀲𑀦𑀸 𑀓𑀣𑀺𑀢𑀸𑀢𑀺. 𑀘𑀢𑀼𑀢𑁆𑀣𑀸𑀳𑀸𑀭𑁄. 𑀢𑀢𑀺𑀬𑀁.

𑁪. 𑀅𑀢𑁆𑀣𑀺𑀭𑀸𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁪. 𑀘𑀢𑀼𑀢𑁆𑀣𑁂 𑀭𑀸𑀕𑁄𑀢𑀺𑀆𑀤𑀻𑀦𑀺 𑀮𑁄𑀪𑀲𑁆𑀲𑁂𑀯 𑀦𑀸𑀫𑀸𑀦𑀺. 𑀲𑁄 𑀳𑀺 𑀭𑀜𑁆𑀚𑀦𑀯𑀲𑁂𑀦 𑀭𑀸𑀕𑁄, 𑀦𑀦𑁆𑀤𑀦𑀯𑀲𑁂𑀦 𑀦𑀦𑁆𑀤𑀻, 𑀢𑀡𑁆𑀳𑀸𑀬𑀦𑀯𑀲𑁂𑀦 𑀢𑀡𑁆𑀳𑀸𑀢𑀺 𑀯𑀼𑀘𑁆𑀘𑀢𑀺. 𑀧𑀢𑀺𑀝𑁆𑀞𑀺𑀢𑀁 𑀢𑀢𑁆𑀣 𑀯𑀺𑀜𑁆𑀜𑀸𑀡𑀁 𑀯𑀺𑀭𑀽𑀴𑁆𑀳𑀦𑁆𑀢𑀺 𑀓𑀫𑁆𑀫𑀁 𑀚𑀯𑀸𑀧𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑀲𑀫𑀢𑁆𑀣𑀢𑀸𑀬 𑀧𑀢𑀺𑀝𑁆𑀞𑀺𑀢𑀜𑁆𑀘𑁂𑀯 𑀯𑀺𑀭𑀽𑀴𑁆𑀳𑀜𑁆𑀘. 𑀬𑀢𑁆𑀣𑀸𑀢𑀺 𑀢𑁂𑀪𑀽𑀫𑀓𑀯𑀝𑁆𑀝𑁂 𑀪𑀼𑀫𑁆𑀫𑀁, 𑀲𑀩𑁆𑀩𑀢𑁆𑀣 𑀯𑀸 𑀧𑀼𑀭𑀺𑀫𑀧𑀼𑀭𑀺𑀫𑀧𑀤𑁂 𑀏𑀢𑀁 𑀪𑀼𑀫𑁆𑀫𑀁. 𑀅𑀢𑁆𑀣𑀺 𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀯𑀼𑀤𑁆𑀥𑀻𑀢𑀺 𑀇𑀤𑀁 𑀇𑀫𑀲𑁆𑀫𑀺𑀁 𑀯𑀺𑀧𑀸𑀓𑀯𑀝𑁆𑀝𑁂 𑀞𑀺𑀢𑀲𑁆𑀲 𑀆𑀬𑀢𑀺𑀯𑀝𑁆𑀝𑀳𑁂𑀢𑀼𑀓𑁂 𑀲𑀗𑁆𑀔𑀸𑀭𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀢𑁆𑀣 𑀅𑀢𑁆𑀣𑀺 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀻𑀢𑀺 𑀬𑀲𑁆𑀫𑀺𑀁 𑀞𑀸𑀦𑁂 𑀆𑀬𑀢𑀺𑀁 𑀧𑀼𑀦𑀩𑁆𑀪𑀯𑀸𑀪𑀺𑀦𑀺𑀩𑁆𑀩𑀢𑁆𑀢𑀺 𑀅𑀢𑁆𑀣𑀺.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀭𑀚𑀓𑀘𑀺𑀢𑁆𑀢𑀓𑀸𑀭𑀸 𑀯𑀺𑀬 𑀳𑀺 𑀲𑀳𑀓𑀫𑁆𑀫𑀲𑀫𑁆𑀪𑀸𑀭𑀁 𑀓𑀫𑁆𑀫𑀁, 𑀨𑀮𑀓𑀪𑀺𑀢𑁆𑀢𑀺𑀤𑀼𑀲𑁆𑀲𑀧𑀝𑀸 𑀯𑀺𑀬 𑀢𑁂𑀪𑀽𑀫𑀓𑀯𑀝𑁆𑀝𑀁. 𑀬𑀣𑀸 𑀭𑀚𑀓𑀘𑀺𑀢𑁆𑀢𑀓𑀸𑀭𑀸 𑀧𑀭𑀺𑀲𑀼𑀤𑁆𑀥𑁂𑀲𑀼 𑀨𑀮𑀓𑀸𑀤𑀻𑀲𑀼 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺, 𑀏𑀯𑀫𑁂𑀯 𑀲𑀲𑀫𑁆𑀪𑀸𑀭𑀓𑀓𑀫𑁆𑀫𑀁 𑀪𑀯𑁂𑀲𑀼 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀢𑁆𑀣 𑀬𑀣𑀸 𑀅𑀓𑀼𑀲𑀮𑁂𑀦 𑀘𑀺𑀢𑁆𑀢𑀓𑀸𑀭𑁂𑀦 𑀲𑀫𑀼𑀝𑁆𑀞𑀸𑀧𑀺𑀢𑀁 𑀭𑀽𑀧𑀁 𑀯𑀺𑀭𑀽𑀧𑀁 𑀳𑁄𑀢𑀺 𑀤𑀼𑀲𑁆𑀲𑀡𑁆𑀞𑀺𑀢𑀁 𑀅𑀫𑀦𑀸𑀧𑀁, 𑀏𑀯𑀫𑁂𑀯 𑀏𑀓𑀘𑁆𑀘𑁄 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀓𑀭𑁄𑀢𑀺, 𑀢𑀁 𑀓𑀫𑁆𑀫𑀁 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀁 𑀘𑀓𑁆𑀔𑀸𑀤𑀻𑀦𑀁 𑀲𑀫𑁆𑀧𑀢𑁆𑀢𑀺𑀁 𑀅𑀤𑀢𑁆𑀯𑀸 𑀤𑀼𑀩𑁆𑀩𑀡𑁆𑀡𑀁 𑀤𑀼𑀲𑁆𑀲𑀡𑁆𑀞𑀺𑀢𑀁 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺 𑀅𑀫𑀦𑀸𑀧𑀁 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀬𑀣𑀸 𑀧𑀦 𑀓𑀼𑀲𑀮𑁂𑀦 𑀘𑀺𑀢𑁆𑀢𑀓𑀸𑀭𑁂𑀦 𑀲𑀫𑀼𑀝𑁆𑀞𑀸𑀧𑀺𑀢𑀁 𑀭𑀽𑀧𑀁 𑀲𑀼𑀭𑀽𑀧𑀁 𑀳𑁄𑀢𑀺 𑀲𑀼𑀲𑀡𑁆𑀞𑀺𑀢𑀁 𑀫𑀦𑀸𑀧𑀁, 𑀏𑀯𑀫𑁂𑀯 𑀏𑀓𑀘𑁆𑀘𑁄 𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀓𑀭𑁄𑀢𑀺, 𑀢𑀁 𑀓𑀫𑁆𑀫𑀁 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀁 𑀘𑀓𑁆𑀔𑀸𑀤𑀻𑀦𑀁 𑀲𑀫𑁆𑀧𑀢𑁆𑀢𑀺𑀁 𑀤𑀢𑁆𑀯𑀸 𑀲𑀼𑀯𑀡𑁆𑀡𑀁 𑀲𑀼𑀲𑀡𑁆𑀞𑀺𑀢𑀁 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀯𑀺𑀬 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺.

𑀏𑀢𑁆𑀣 𑀘 𑀆𑀳𑀸𑀭𑀁 𑀯𑀺𑀜𑁆𑀜𑀸𑀡𑁂𑀦 𑀲𑀤𑁆𑀥𑀺𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀆𑀳𑀸𑀭𑀦𑀸𑀫𑀭𑀽𑀧𑀸𑀦𑀁 𑀅𑀦𑁆𑀢𑀭𑁂 𑀏𑀓𑁄 𑀲𑀦𑁆𑀥𑀺, 𑀯𑀺𑀧𑀸𑀓𑀯𑀺𑀥𑀺𑀁 𑀦𑀸𑀫𑀭𑀽𑀧𑁂𑀦 𑀲𑀗𑁆𑀔𑀺𑀧𑀺𑀢𑁆𑀯𑀸 𑀦𑀸𑀫𑀭𑀽𑀧𑀲𑀗𑁆𑀔𑀸𑀭𑀸𑀦𑀁 𑀅𑀦𑁆𑀢𑀭𑁂 𑀏𑀓𑁄 𑀲𑀦𑁆𑀥𑀺, 𑀲𑀗𑁆𑀔𑀸𑀭𑀸𑀦𑀜𑁆𑀘 𑀆𑀬𑀢𑀺𑀪𑀯𑀲𑁆𑀲 𑀘 𑀅𑀦𑁆𑀢𑀭𑁂 𑀏𑀓𑁄 𑀲𑀦𑁆𑀥𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀓𑀽𑀝𑀸𑀕𑀸𑀭𑀦𑁆𑀢𑀺 𑀏𑀓𑀓𑀡𑁆𑀡𑀺𑀓𑀁 𑀕𑀸𑀳𑀸𑀧𑁂𑀢𑁆𑀯𑀸 𑀓𑀢𑀁 𑀅𑀕𑀸𑀭𑀁. 𑀓𑀽𑀝𑀸𑀕𑀸𑀭𑀲𑀸𑀮𑀸𑀢𑀺 𑀤𑁆𑀯𑁂 𑀓𑀡𑁆𑀡𑀺𑀓𑁂 𑀕𑀳𑁂𑀢𑁆𑀯𑀸 𑀓𑀢𑀲𑀸𑀮𑀸. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀔𑀻𑀡𑀸𑀲𑀯𑀲𑁆𑀲 𑀓𑀫𑁆𑀫𑀁 𑀲𑀽𑀭𑀺𑀬𑀭𑀲𑁆𑀫𑀺𑀲𑀫𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀽𑀭𑀺𑀬𑀭𑀲𑁆𑀫𑀺 𑀧𑀦 𑀅𑀢𑁆𑀣𑀺, 𑀲𑀸 𑀓𑁂𑀯𑀮𑀁 𑀧𑀢𑀺𑀝𑁆𑀞𑀸𑀬 𑀅𑀪𑀸𑀯𑁂𑀦 𑀅𑀧𑁆𑀧𑀢𑀺𑀝𑁆𑀞𑀸 𑀦𑀸𑀫 𑀚𑀸𑀢𑀸, 𑀔𑀻𑀡𑀸𑀲𑀯𑀲𑁆𑀲 𑀓𑀫𑁆𑀫𑀁 𑀦𑀢𑁆𑀣𑀺𑀢𑀸𑀬 𑀏𑀯 𑀅𑀧𑁆𑀧𑀢𑀺𑀝𑁆𑀞𑀁. 𑀢𑀲𑁆𑀲 𑀳𑀺 𑀓𑀸𑀬𑀸𑀤𑀬𑁄 𑀅𑀢𑁆𑀣𑀺, 𑀢𑁂𑀳𑀺 𑀧𑀦 𑀓𑀢𑀓𑀫𑁆𑀫𑀁 𑀓𑀼𑀲𑀮𑀸𑀓𑀼𑀲𑀮𑀁 𑀦𑀸𑀫 𑀦 𑀳𑁄𑀢𑀺, 𑀓𑀺𑀭𑀺𑀬𑀫𑀢𑁆𑀢𑁂 𑀞𑀢𑁆𑀯𑀸 𑀅𑀯𑀺𑀧𑀸𑀓𑀁 𑀳𑁄𑀢𑀺. 𑀏𑀯𑀫𑀲𑁆𑀲 𑀓𑀫𑁆𑀫𑀁 𑀦𑀢𑁆𑀣𑀺𑀢𑀸𑀬 𑀏𑀯 𑀅𑀧𑁆𑀧𑀢𑀺𑀝𑁆𑀞𑀁 𑀦𑀸𑀫 𑀚𑀸𑀢𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀦𑀕𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁫. 𑀧𑀜𑁆𑀘𑀫𑁂 𑀦𑀸𑀫𑀭𑀽𑀧𑁂 𑀔𑁄 𑀲𑀢𑀺 𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀢𑁆𑀣 ‘‘𑀲𑀗𑁆𑀔𑀸𑀭𑁂𑀲𑀼 𑀲𑀢𑀺 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀘 ‘‘𑀅𑀯𑀺𑀚𑁆𑀚𑀸𑀬 𑀲𑀢𑀺 𑀲𑀗𑁆𑀔𑀸𑀭𑀸’’𑀢𑀺 𑀘 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬, 𑀢𑀤𑀼𑀪𑀬𑀫𑁆𑀧𑀺 𑀦 𑀯𑀼𑀢𑁆𑀢𑀁. 𑀓𑀲𑁆𑀫𑀸? 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸 𑀳𑀺 𑀢𑀢𑀺𑀬𑁄 𑀪𑀯𑁄, 𑀢𑁂𑀳𑀺 𑀲𑀤𑁆𑀥𑀺𑀁 𑀅𑀬𑀁 𑀯𑀺𑀧𑀲𑁆𑀲𑀦𑀸 𑀦 𑀖𑀝𑀻𑀬𑀢𑀺. 𑀫𑀳𑀸𑀧𑀼𑀭𑀺𑀲𑁄 𑀳𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀜𑁆𑀘𑀯𑁄𑀓𑀸𑀭𑀯𑀲𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑁄𑀢𑀺.

𑀦𑀦𑀼 𑀘 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑁂𑀲𑀼 𑀅𑀤𑀺𑀝𑁆𑀞𑁂𑀲𑀼 𑀦 𑀲𑀓𑁆𑀓𑀸 𑀩𑀼𑀤𑁆𑀥𑁂𑀦 𑀪𑀯𑀺𑀢𑀼𑀦𑁆𑀢𑀺. 𑀲𑀘𑁆𑀘𑀁 𑀦 𑀲𑀓𑁆𑀓𑀸, 𑀇𑀫𑀺𑀦𑀸 𑀧𑀦 𑀢𑁂 𑀪𑀯𑀉𑀧𑀸𑀤𑀸𑀦𑀢𑀡𑁆𑀳𑀸𑀯𑀲𑁂𑀦 𑀤𑀺𑀝𑁆𑀞𑀸𑀯. 𑀢𑀲𑁆𑀫𑀸 𑀬𑀣𑀸 𑀦𑀸𑀫 𑀕𑁄𑀥𑀁 𑀅𑀦𑀼𑀩𑀦𑁆𑀥𑀦𑁆𑀢𑁄 𑀧𑀼𑀭𑀺𑀲𑁄 𑀢𑀁 𑀓𑀽𑀧𑀁 𑀧𑀯𑀺𑀝𑁆𑀞𑀁 𑀤𑀺𑀲𑁆𑀯𑀸 𑀑𑀢𑀭𑀺𑀢𑁆𑀯𑀸 𑀧𑀯𑀺𑀝𑁆𑀞𑀝𑁆𑀞𑀸𑀦𑀁 𑀔𑀡𑀺𑀢𑁆𑀯𑀸 𑀕𑁄𑀥𑀁 𑀕𑀳𑁂𑀢𑁆𑀯𑀸 𑀧𑀓𑁆𑀓𑀫𑁂𑀬𑁆𑀬, 𑀦 𑀧𑀭𑀪𑀸𑀕𑀁 𑀔𑀦𑁂𑀬𑁆𑀬, 𑀓𑀲𑁆𑀫𑀸? 𑀓𑀲𑁆𑀲𑀘𑀺 𑀦𑀢𑁆𑀣𑀺𑀢𑀸𑀬. 𑀏𑀯𑀁 𑀫𑀳𑀸𑀧𑀼𑀭𑀺𑀲𑁄𑀧𑀺 𑀕𑁄𑀥𑀁 𑀅𑀦𑀼𑀩𑀦𑁆𑀥𑀦𑁆𑀢𑁄 𑀧𑀼𑀭𑀺𑀲𑁄 𑀯𑀺𑀬 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀚𑀭𑀸𑀫𑀭𑀡𑀢𑁄 𑀧𑀝𑁆𑀞𑀸𑀬 ‘‘𑀇𑀫𑀲𑁆𑀲 𑀅𑀬𑀁 𑀧𑀘𑁆𑀘𑀬𑁄, 𑀇𑀫𑀲𑁆𑀲 𑀅𑀬𑀁 𑀧𑀘𑁆𑀘𑀬𑁄’’𑀢𑀺 𑀧𑀭𑀺𑀬𑁂𑀲𑀦𑁆𑀢𑁄 𑀬𑀸𑀯 𑀦𑀸𑀫𑀭𑀽𑀧𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀁 𑀤𑀺𑀲𑁆𑀯𑀸 𑀢𑀲𑁆𑀲𑀧𑀺 𑀧𑀘𑁆𑀘𑀬𑀁 𑀧𑀭𑀺𑀬𑁂𑀲𑀦𑁆𑀢𑁄 𑀯𑀺𑀜𑁆𑀜𑀸𑀡𑀫𑁂𑀯 𑀅𑀤𑁆𑀤𑀲. 𑀢𑀢𑁄 ‘‘𑀏𑀢𑁆𑀢𑀓𑁄 𑀧𑀜𑁆𑀘𑀯𑁄𑀓𑀸𑀭𑀪𑀯𑀯𑀲𑁂𑀦 𑀲𑀫𑁆𑀫𑀲𑀦𑀘𑀸𑀭𑁄’’𑀢𑀺 𑀯𑀺𑀧𑀲𑁆𑀲𑀦𑀁 𑀧𑀝𑀺𑀦𑀺𑀯𑀢𑁆𑀢𑁂𑀲𑀺, 𑀧𑀭𑀢𑁄 𑀢𑀼𑀘𑁆𑀙𑀓𑀽𑀧𑀲𑁆𑀲 𑀅𑀪𑀺𑀦𑁆𑀦𑀝𑁆𑀞𑀸𑀦𑀁 𑀯𑀺𑀬 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀤𑁆𑀯𑀬𑀁 𑀅𑀢𑁆𑀣𑀺, 𑀢𑀤𑁂𑀢𑀁 𑀳𑁂𑀝𑁆𑀞𑀸 𑀯𑀺𑀧𑀲𑁆𑀲𑀦𑀸𑀬 𑀕𑀳𑀺𑀢𑀢𑁆𑀢𑀸 𑀧𑀸𑀝𑀺𑀬𑁂𑀓𑁆𑀓𑀁 𑀲𑀫𑁆𑀫𑀲𑀦𑀽𑀧𑀕𑀁 𑀦 𑀳𑁄𑀢𑀻𑀢𑀺 𑀦 𑀅𑀕𑁆𑀕𑀳𑁂𑀲𑀺.

𑀧𑀘𑁆𑀘𑀼𑀤𑀸𑀯𑀢𑁆𑀢𑀢𑀻𑀢𑀺 𑀧𑀝𑀺𑀦𑀺𑀯𑀢𑁆𑀢𑀢𑀺. 𑀓𑀢𑀫𑀁 𑀧𑀦𑁂𑀢𑁆𑀣 𑀯𑀺𑀜𑁆𑀜𑀸𑀡𑀁 𑀧𑀘𑁆𑀘𑀼𑀤𑀸𑀯𑀢𑁆𑀢𑀢𑀻𑀢𑀺? 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀫𑁆𑀧𑀺 𑀯𑀺𑀧𑀲𑁆𑀲𑀦𑀸𑀯𑀺𑀜𑁆𑀜𑀸𑀡𑀫𑁆𑀧𑀺. 𑀢𑀢𑁆𑀣 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀁 𑀧𑀘𑁆𑀘𑀬𑀢𑁄 𑀧𑀝𑀺𑀦𑀺𑀯𑀢𑁆𑀢𑀢𑀺, 𑀯𑀺𑀧𑀲𑁆𑀲𑀦𑀸𑀯𑀺𑀜𑁆𑀜𑀸𑀡𑀁 𑀆𑀭𑀫𑁆𑀫𑀡𑀢𑁄. 𑀉𑀪𑀬𑀫𑁆𑀧𑀺 𑀦𑀸𑀫𑀭𑀽𑀧𑀁 𑀦𑀸𑀢𑀺𑀓𑁆𑀓𑀫𑀢𑀺, 𑀦𑀸𑀫𑀭𑀽𑀧𑀢𑁄 𑀧𑀭𑀁 𑀦 𑀕𑀘𑁆𑀙𑀢𑀺. 𑀏𑀢𑁆𑀢𑀸𑀯𑀢𑀸 𑀚𑀸𑀬𑁂𑀣 𑀯𑀸𑀢𑀺𑀆𑀤𑀻𑀲𑀼 𑀯𑀺𑀜𑁆𑀜𑀸𑀡𑁂 𑀦𑀸𑀫𑀭𑀽𑀧𑀲𑁆𑀲 𑀧𑀘𑁆𑀘𑀬𑁂 𑀳𑁄𑀦𑁆𑀢𑁂, 𑀦𑀸𑀫𑀭𑀽𑀧𑁂 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁂 𑀳𑁄𑀦𑁆𑀢𑁂, 𑀤𑁆𑀯𑀻𑀲𑀼𑀧𑀺 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑁂𑀲𑀼 𑀳𑁄𑀦𑁆𑀢𑁂𑀲𑀼 𑀏𑀢𑁆𑀢𑀓𑁂𑀦 𑀚𑀸𑀬𑁂𑀣 𑀯𑀸 𑀉𑀧𑀧𑀚𑁆𑀚𑁂𑀣 𑀯𑀸. 𑀇𑀢𑁄 𑀳𑀺 𑀧𑀭𑀁 𑀓𑀺𑀫𑀜𑁆𑀜𑀁 𑀚𑀸𑀬𑁂𑀣 𑀯𑀸 𑀉𑀧𑀧𑀚𑁆𑀚𑁂𑀣 𑀯𑀸, 𑀦𑀦𑀼 𑀏𑀢𑀤𑁂𑀯 𑀚𑀸𑀬𑀢𑀺 𑀘 𑀉𑀧𑀧𑀚𑁆𑀚𑀢𑀺 𑀘𑀸𑀢𑀺?

𑀏𑀯𑀁 𑀲𑀤𑁆𑀥𑀺𑀁 𑀅𑀧𑀭𑀸𑀧𑀭𑀘𑀼𑀢𑀺𑀧𑀝𑀺𑀲𑀦𑁆𑀥𑀻𑀳𑀺 𑀧𑀜𑁆𑀘 𑀧𑀤𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀢𑀁 𑀏𑀢𑁆𑀢𑀸𑀯𑀢𑀸𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀦𑀺𑀬𑁆𑀬𑀸𑀢𑁂𑀦𑁆𑀢𑁄 𑀬𑀤𑀺𑀤𑀁 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺 𑀯𑀢𑁆𑀯𑀸 𑀢𑀢𑁄 𑀧𑀭𑀁 𑀅𑀦𑀼𑀮𑁄𑀫𑀧𑀘𑁆𑀘𑀬𑀸𑀓𑀸𑀭𑀯𑀲𑁂𑀦 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀫𑀽𑀮𑀓𑀁 𑀆𑀬𑀢𑀺𑀚𑀭𑀸𑀫𑀭𑀡𑀁 𑀤𑀲𑁆𑀲𑁂𑀢𑀼𑀁 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀦𑁆𑀢𑀺𑀆𑀤𑀺𑀫𑀸𑀳.

𑀅𑀜𑁆𑀚𑀲𑀦𑁆𑀢𑀺 𑀫𑀕𑁆𑀕𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀉𑀤𑁆𑀥𑀸𑀧𑀯𑀦𑁆𑀢𑀦𑁆𑀢𑀺 𑀆𑀧𑀢𑁄 𑀉𑀕𑁆𑀕𑀢𑀢𑁆𑀢𑀸 𑀉𑀤𑁆𑀥𑀸𑀧𑀦𑁆𑀢𑀺 𑀮𑀤𑁆𑀥𑀯𑁄𑀳𑀸𑀭𑁂𑀦 𑀧𑀸𑀓𑀸𑀭𑀯𑀢𑁆𑀣𑀼𑀦𑀸 𑀲𑀫𑀦𑁆𑀦𑀸𑀕𑀢𑀁. 𑀭𑀫𑀡𑀻𑀬𑀦𑁆𑀢𑀺 𑀲𑀫𑀦𑁆𑀢𑀸 𑀘𑀢𑀼𑀦𑁆𑀦𑀁 𑀤𑁆𑀯𑀸𑀭𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀘 𑀦𑀸𑀦𑀸𑀪𑀡𑁆𑀟𑀸𑀦𑀁 𑀲𑀫𑁆𑀧𑀢𑁆𑀢𑀺𑀬𑀸 𑀭𑀫𑀡𑀻𑀬𑀁. 𑀫𑀸𑀧𑁂𑀳𑀻𑀢𑀺 𑀫𑀳𑀸𑀚𑀦𑀁 𑀧𑁂𑀲𑁂𑀢𑁆𑀯𑀸 𑀯𑀸𑀲𑀁 𑀓𑀸𑀭𑁂𑀳𑀺. 𑀫𑀸𑀧𑁂𑀬𑁆𑀬𑀸𑀢𑀺 𑀯𑀸𑀲𑀁 𑀓𑀸𑀭𑁂𑀬𑁆𑀬. 𑀓𑀸𑀭𑁂𑀦𑁆𑀢𑁄 𑀘 𑀧𑀞𑀫𑀁 𑀅𑀝𑁆𑀞𑀸𑀭𑀲 𑀫𑀦𑀼𑀲𑁆𑀲𑀓𑁄𑀝𑀺𑀬𑁄 𑀧𑁂𑀲𑁂𑀢𑁆𑀯𑀸 ‘‘𑀲𑀫𑁆𑀧𑀼𑀡𑁆𑀡’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦 𑀢𑀸𑀯 𑀲𑀫𑁆𑀧𑀼𑀡𑁆𑀡’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀧𑀭𑀸𑀦𑀺 𑀧𑀜𑁆𑀘𑀓𑀼𑀮𑀸𑀦𑀺 𑀧𑁂𑀲𑁂𑀬𑁆𑀬. 𑀧𑀼𑀦 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦 𑀢𑀸𑀯 𑀲𑀫𑁆𑀧𑀼𑀡𑁆𑀡’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀧𑀭𑀸𑀦𑀺 𑀧𑀜𑁆𑀘𑀧𑀜𑁆𑀜𑀸𑀲𑀓𑀼𑀮𑀸𑀦𑀺 𑀧𑁂𑀲𑁂𑀬𑁆𑀬. 𑀧𑀼𑀦 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦 𑀢𑀸𑀯 𑀲𑀫𑁆𑀧𑀼𑀡𑁆𑀡’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀧𑀭𑀸𑀦𑀺 𑀢𑀺𑀁𑀲 𑀓𑀼𑀮𑀸𑀦𑀺 𑀧𑁂𑀲𑁂𑀬𑁆𑀬. 𑀧𑀼𑀦 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦 𑀢𑀸𑀯 𑀲𑀫𑁆𑀧𑀼𑀡𑁆𑀡’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀧𑀭𑀁 𑀓𑀼𑀮𑀲𑀳𑀲𑁆𑀲𑀁 𑀧𑁂𑀲𑁂𑀬𑁆𑀬. 𑀧𑀼𑀦 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦 𑀢𑀸𑀯 𑀲𑀫𑁆𑀧𑀼𑀡𑁆𑀡’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀧𑀭𑀸𑀦𑀺 𑀏𑀓𑀸𑀤𑀲𑀦𑀳𑀼𑀢𑀸𑀦𑀺 𑀓𑀼𑀮𑀸𑀦𑀺 𑀧𑁂𑀲𑁂𑀬𑁆𑀬. 𑀧𑀼𑀦 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀦 𑀢𑀸𑀯 𑀲𑀫𑁆𑀧𑀼𑀡𑁆𑀡’’𑀦𑁆𑀢𑀺 𑀯𑀼𑀢𑁆𑀢𑁂 𑀅𑀧𑀭𑀸𑀦𑀺 𑀘𑀢𑀼𑀭𑀸𑀲𑀻𑀢𑀺𑀓𑀼𑀮𑀲𑀳𑀲𑁆𑀲𑀸𑀦𑀺 𑀧𑁂𑀲𑁂𑀬𑁆𑀬. 𑀧𑀼𑀦 ‘‘𑀲𑀫𑁆𑀧𑀼𑀡𑁆𑀡’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁂, ‘‘𑀫𑀳𑀸𑀭𑀸𑀚, 𑀓𑀺𑀁 𑀯𑀤𑁂𑀲𑀺? 𑀫𑀳𑀦𑁆𑀢𑀁 𑀦𑀕𑀭𑀁 𑀅𑀲𑀫𑁆𑀩𑀸𑀥𑀁, 𑀇𑀫𑀺𑀦𑀸 𑀦𑀬𑁂𑀦 𑀓𑀼𑀮𑀸𑀦𑀺 𑀧𑁂𑀲𑁂𑀢𑁆𑀯𑀸 𑀦 𑀲𑀓𑁆𑀓𑀸 𑀧𑀽𑀭𑁂𑀢𑀼𑀁, 𑀪𑁂𑀭𑀺𑀁 𑀧𑀦 𑀘𑀭𑀸𑀧𑁂𑀢𑁆𑀯𑀸 ‘𑀅𑀫𑁆𑀳𑀸𑀓𑀁 𑀦𑀕𑀭𑀁 𑀇𑀫𑀸𑀬 𑀘 𑀇𑀫𑀸𑀬 𑀘 𑀲𑀫𑁆𑀧𑀢𑁆𑀢𑀺𑀬𑀸 𑀲𑀫𑁆𑀧𑀦𑁆𑀦𑀁, 𑀬𑁂 𑀢𑀢𑁆𑀣 𑀯𑀲𑀺𑀢𑀼𑀓𑀸𑀫𑀸, 𑀬𑀣𑀸𑀲𑀼𑀔𑀁 𑀕𑀘𑁆𑀙𑀦𑁆𑀢𑀼, 𑀇𑀫𑀜𑁆𑀘𑀺𑀫𑀜𑁆𑀘 𑀧𑀭𑀺𑀳𑀸𑀭𑀁 𑀮𑀪𑀺𑀲𑁆𑀲𑀦𑁆𑀢𑀻’𑀢𑀺 𑀦𑀕𑀭𑀲𑁆𑀲 𑀘𑁂𑀯 𑀯𑀡𑁆𑀡𑀁 𑀮𑁄𑀓𑀲𑁆𑀲 𑀘 𑀧𑀭𑀺𑀳𑀸𑀭𑀮𑀸𑀪𑀁 𑀖𑁄𑀲𑀸𑀧𑁂𑀣𑀸’’𑀢𑀺 𑀯𑀤𑁂𑀬𑁆𑀬. 𑀲𑁄 𑀏𑀯𑀁 𑀓𑀭𑁂𑀬𑁆𑀬. 𑀢𑀢𑁄 𑀫𑀦𑀼𑀲𑁆𑀲𑀸 𑀦𑀕𑀭𑀕𑀼𑀡𑀜𑁆𑀘𑁂𑀯 𑀧𑀭𑀺𑀳𑀸𑀭𑀮𑀸𑀪𑀜𑁆𑀘 𑀲𑀼𑀢𑁆𑀯𑀸 𑀲𑀩𑁆𑀩𑀤𑀺𑀲𑀸𑀳𑀺 𑀲𑀫𑁄𑀲𑀭𑀺𑀢𑁆𑀯𑀸 𑀦𑀕𑀭𑀁 𑀧𑀽𑀭𑁂𑀬𑁆𑀬𑀼𑀁. 𑀢𑀁 𑀅𑀧𑀭𑁂𑀦 𑀲𑀫𑀬𑁂𑀦 𑀇𑀤𑁆𑀥𑀜𑁆𑀘𑁂𑀯 𑀅𑀲𑁆𑀲 𑀨𑀻𑀢𑀜𑁆𑀘. 𑀢𑀁 𑀲𑀦𑁆𑀥𑀸𑀬 𑀢𑀤𑀲𑁆𑀲 𑀦𑀕𑀭𑀁 𑀅𑀧𑀭𑁂𑀦 𑀲𑀫𑀬𑁂𑀦 𑀇𑀤𑁆𑀥𑀜𑁆𑀘𑁂𑀯 𑀨𑀻𑀢𑀜𑁆𑀘𑀸𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀇𑀤𑁆𑀥𑀦𑁆𑀢𑀺 𑀲𑀫𑀺𑀤𑁆𑀥𑀁 𑀲𑀼𑀪𑀺𑀓𑁆𑀔𑀁. 𑀨𑀻𑀢𑀦𑁆𑀢𑀺 𑀲𑀩𑁆𑀩𑀲𑀫𑁆𑀧𑀢𑁆𑀢𑀻𑀳𑀺 𑀧𑀼𑀧𑁆𑀨𑀺𑀢𑀁. 𑀩𑀸𑀳𑀼𑀚𑀜𑁆𑀜𑀦𑁆𑀢𑀺 𑀩𑀳𑀽𑀳𑀺 𑀜𑀸𑀢𑀩𑁆𑀩𑀁, 𑀩𑀳𑀼𑀚𑀦𑀸𑀦𑀁 𑀳𑀺𑀢𑀁 𑀯𑀸. ‘‘𑀩𑀳𑀼𑀚𑀦’’𑀦𑁆𑀢𑀺𑀧𑀺 𑀧𑀸𑀞𑁄. 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀦𑁆𑀢𑀺 𑀫𑀦𑀼𑀲𑁆𑀲𑁂𑀳𑀺 𑀆𑀓𑀺𑀡𑁆𑀡𑀁 𑀦𑀺𑀭𑀦𑁆𑀢𑀭𑀁 𑀨𑀼𑀝𑁆𑀞𑀁. 𑀯𑀼𑀟𑁆𑀠𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀦𑁆𑀢𑀺 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀜𑁆𑀘𑁂𑀯 𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀜𑁆𑀘, 𑀲𑁂𑀝𑁆𑀞𑀪𑀸𑀯𑀜𑁆𑀘𑁂𑀯 𑀯𑀺𑀧𑀼𑀮𑀪𑀸𑀯𑀜𑁆𑀘 𑀧𑀢𑁆𑀢𑀁, 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀅𑀕𑁆𑀕𑀦𑀕𑀭𑀁 𑀚𑀸𑀢𑀦𑁆𑀢𑀺 𑀅𑀢𑁆𑀣𑁄.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀅𑀭𑀜𑁆𑀜𑀧𑀯𑀦𑁂 𑀘𑀭𑀫𑀸𑀦𑀧𑀼𑀭𑀺𑀲𑁄 𑀯𑀺𑀬 𑀳𑀺 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑀢𑁄 𑀧𑀝𑁆𑀞𑀸𑀬 𑀧𑀸𑀭𑀫𑀺𑀬𑁄 𑀧𑀽𑀭𑀬𑀫𑀸𑀦𑁄 𑀫𑀳𑀸𑀧𑀼𑀭𑀺𑀲𑁄 𑀤𑀝𑁆𑀞𑀩𑁆𑀩𑁄, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀼𑀩𑁆𑀩𑀓𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀅𑀦𑀼𑀬𑀸𑀢𑀫𑀕𑁆𑀕𑀤𑀲𑁆𑀲𑀦𑀁 𑀯𑀺𑀬 𑀫𑀳𑀸𑀲𑀢𑁆𑀢𑀲𑁆𑀲 𑀅𑀦𑀼𑀧𑀼𑀩𑁆𑀩𑁂𑀦 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀲𑁆𑀲 𑀤𑀲𑁆𑀲𑀦𑀁, 𑀧𑀼𑀭𑀺𑀲𑀲𑁆𑀲 𑀢𑀁 𑀏𑀓𑀧𑀤𑀺𑀓𑀫𑀕𑁆𑀕𑀁 𑀅𑀦𑀼𑀕𑀘𑁆𑀙𑀢𑁄 𑀅𑀧𑀭𑀪𑀸𑀕𑁂 𑀫𑀳𑀸𑀫𑀕𑁆𑀕𑀤𑀲𑁆𑀲𑀦𑀁 𑀯𑀺𑀬 𑀫𑀳𑀸𑀲𑀢𑁆𑀢𑀲𑁆𑀲 𑀉𑀧𑀭𑀺𑀯𑀺𑀧𑀲𑁆𑀲𑀦𑀸𑀬 𑀘𑀺𑀡𑁆𑀡𑀦𑁆𑀢𑁂 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀤𑀲𑁆𑀲𑀦𑀁, 𑀧𑀼𑀭𑀺𑀲𑀲𑁆𑀲 𑀢𑁂𑀦𑁂𑀯 𑀫𑀕𑁆𑀕𑁂𑀦 𑀕𑀘𑁆𑀙𑀢𑁄 𑀧𑀼𑀭𑀢𑁄 𑀦𑀕𑀭𑀤𑀲𑁆𑀲𑀦𑀁 𑀯𑀺𑀬 𑀢𑀣𑀸𑀕𑀢𑀲𑁆𑀲 𑀦𑀺𑀩𑁆𑀩𑀸𑀦𑀦𑀕𑀭𑀤𑀲𑁆𑀲𑀦𑀁, 𑀩𑀳𑀺𑀦𑀕𑀭𑀁 𑀧𑀦𑁂𑀢𑁆𑀣 𑀅𑀜𑁆𑀜𑁂𑀦 𑀤𑀺𑀝𑁆𑀞𑀁, 𑀅𑀜𑁆𑀜𑁂𑀦 𑀫𑀦𑀼𑀲𑁆𑀲𑀯𑀸𑀲𑀁 𑀓𑀢𑀁, 𑀦𑀺𑀩𑁆𑀩𑀸𑀦𑀦𑀕𑀭𑀁 𑀲𑀢𑁆𑀣𑀸 𑀲𑀬𑀫𑁂𑀯 𑀧𑀲𑁆𑀲𑀺, 𑀲𑀬𑀁 𑀯𑀸𑀲𑀫𑀓𑀸𑀲𑀺. 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀘𑀢𑀼𑀦𑁆𑀦𑀁 𑀤𑁆𑀯𑀸𑀭𑀸𑀦𑀁 𑀤𑀺𑀝𑁆𑀞𑀓𑀸𑀮𑁄 𑀯𑀺𑀬 𑀢𑀣𑀸𑀕𑀢𑀲𑁆𑀲 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁 𑀤𑀺𑀝𑁆𑀞𑀓𑀸𑀮𑁄, 𑀢𑀲𑁆𑀲 𑀘𑀢𑀽𑀳𑀺 𑀤𑁆𑀯𑀸𑀭𑁂𑀳𑀺 𑀦𑀕𑀭𑀁 𑀧𑀯𑀺𑀝𑁆𑀞𑀓𑀸𑀮𑁄 𑀯𑀺𑀬 𑀢𑀣𑀸𑀕𑀢𑀲𑁆𑀲 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀦𑀺𑀩𑁆𑀩𑀸𑀦𑀁 𑀧𑀯𑀺𑀝𑁆𑀞𑀓𑀸𑀮𑁄, 𑀢𑀲𑁆𑀲 𑀦𑀕𑀭𑀩𑁆𑀪𑀦𑁆𑀢𑀭𑁂 𑀪𑀡𑁆𑀟𑀯𑀯𑀢𑁆𑀣𑀸𑀦𑀓𑀸𑀮𑁄 𑀯𑀺𑀬 𑀢𑀣𑀸𑀕𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦 𑀧𑀭𑁄𑀧𑀡𑁆𑀡𑀸𑀲𑀓𑀼𑀲𑀮𑀥𑀫𑁆𑀫𑀯𑀯𑀢𑁆𑀣𑀸𑀦𑀓𑀸𑀮𑁄. 𑀦𑀕𑀭𑀲𑁆𑀲 𑀅𑀕𑀸𑀭𑀓𑀭𑀡𑀢𑁆𑀣𑀁 𑀓𑀼𑀮𑀧𑀭𑀺𑀬𑁂𑀲𑀦𑀓𑀸𑀮𑁄 𑀯𑀺𑀬 𑀲𑀢𑁆𑀣𑀼 𑀨𑀮𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀯𑁂𑀦𑁂𑀬𑁆𑀬𑀲𑀢𑁆𑀢𑁂 𑀯𑁄𑀮𑁄𑀓𑀦𑀓𑀸𑀮𑁄, 𑀢𑁂𑀦 𑀧𑀼𑀭𑀺𑀲𑁂𑀦 𑀬𑀸𑀘𑀺𑀢𑀲𑁆𑀲 𑀭𑀜𑁆𑀜𑁄 𑀏𑀓𑀁 𑀫𑀳𑀸𑀓𑀼𑀝𑀼𑀫𑁆𑀩𑀺𑀓𑀁 𑀤𑀺𑀝𑁆𑀞𑀓𑀸𑀮𑁄 𑀯𑀺𑀬 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀬𑀸𑀘𑀺𑀢𑀲𑁆𑀲 𑀪𑀕𑀯𑀢𑁄 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀁 𑀤𑀺𑀝𑁆𑀞𑀓𑀸𑀮𑁄, 𑀭𑀜𑁆𑀜𑁄 𑀫𑀳𑀸𑀓𑀼𑀝𑀼𑀫𑁆𑀩𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀦𑀕𑀭𑀯𑀸𑀲𑀁 𑀓𑀭𑁄𑀳𑀻’’𑀢𑀺 𑀧𑀳𑀺𑀢𑀓𑀸𑀮𑁄 𑀯𑀺𑀬 𑀪𑀕𑀯𑀢𑁄 𑀏𑀓𑀲𑁆𑀫𑀺𑀁 𑀧𑀘𑁆𑀙𑀸𑀪𑀢𑁆𑀢𑁂 𑀅𑀝𑁆𑀞𑀸𑀭𑀲𑀬𑁄𑀚𑀦𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀤𑀺𑀯𑀲𑁂 𑀩𑀸𑀭𑀸𑀡𑀲𑀺𑀬𑀁 𑀇𑀲𑀺𑀧𑀢𑀦𑀁 𑀧𑀯𑀺𑀲𑀺𑀢𑁆𑀯𑀸 𑀣𑁂𑀭𑀁 𑀓𑀸𑀬𑀲𑀓𑁆𑀔𑀺𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑀺𑀢𑀓𑀸𑀮𑁄, 𑀫𑀳𑀸𑀓𑀼𑀝𑀼𑀫𑁆𑀩𑀺𑀓𑁂𑀦 𑀅𑀝𑁆𑀞𑀸𑀭𑀲 𑀧𑀼𑀭𑀺𑀲𑀓𑁄𑀝𑀺𑀬𑁄 𑀕𑀳𑁂𑀢𑁆𑀯𑀸 𑀦𑀕𑀭𑀁 𑀅𑀚𑁆𑀛𑀸𑀯𑀼𑀝𑁆𑀞𑀓𑀸𑀮𑁄 𑀯𑀺𑀬 𑀢𑀣𑀸𑀕𑀢𑁂𑀦 𑀥𑀫𑁆𑀫𑀘𑀓𑁆𑀓𑁂 𑀧𑀯𑀢𑁆𑀢𑀺𑀢𑁂 𑀣𑁂𑀭𑀲𑁆𑀲 𑀅𑀝𑁆𑀞𑀸𑀭𑀲𑀳𑀺 𑀩𑁆𑀭𑀳𑁆𑀫𑀓𑁄𑀝𑀻𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑀓𑀸𑀮𑁄, 𑀏𑀯𑀁 𑀦𑀺𑀩𑁆𑀩𑀸𑀦𑀦𑀕𑀭𑀁 𑀧𑀞𑀫𑀁 𑀆𑀯𑀸𑀲𑀺𑀢𑀁, 𑀢𑀢𑁄 𑀲𑀫𑁆𑀧𑀼𑀡𑁆𑀡𑀁 𑀦𑀕𑀭𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀦 𑀢𑀸𑀯𑀸𑀢𑀺 𑀯𑀼𑀢𑁆𑀢𑁂 𑀧𑀜𑁆𑀘 𑀓𑀼𑀮𑀸𑀦𑀺 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀘𑀢𑀼𑀭𑀸𑀲𑀻𑀢𑀺𑀓𑀼𑀮𑀲𑀳𑀲𑁆𑀲𑀧𑁂𑀲𑀦𑀁 𑀯𑀺𑀬 𑀢𑀣𑀸𑀕𑀢𑀲𑁆𑀲 𑀧𑀜𑁆𑀘𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀅𑀦𑀢𑁆𑀢𑀮𑀓𑁆𑀔𑀡𑀲𑀼𑀢𑁆𑀢𑀸𑀤𑀻𑀦𑀺 𑀤𑁂𑀲𑁂𑀢𑁆𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀆𑀤𑀺𑀁 𑀓𑀢𑁆𑀯𑀸 𑀬𑀲𑀧𑀫𑀼𑀔𑀸 𑀧𑀜𑁆𑀘𑀧𑀡𑁆𑀡𑀸𑀲 𑀓𑀼𑀮𑀧𑀼𑀢𑁆𑀢𑀸, 𑀢𑀺𑀁𑀲 𑀪𑀤𑁆𑀤𑀯𑀕𑁆𑀕𑀺𑀬𑀸, 𑀲𑀳𑀲𑁆𑀲𑀧𑀼𑀭𑀸𑀡𑀚𑀝𑀺𑀮𑀸, 𑀩𑀺𑀫𑁆𑀩𑀺𑀲𑀸𑀭𑀧𑀫𑀼𑀔𑀸𑀦𑀺 𑀏𑀓𑀸𑀤𑀲𑀧𑀼𑀭𑀺𑀲𑀦𑀳𑀼𑀢𑀸𑀦𑀺, 𑀢𑀺𑀭𑁄𑀓𑀼𑀝𑁆𑀝𑀸𑀦𑀼𑀫𑁄𑀤𑀦𑁂 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀻𑀢𑀺 𑀏𑀢𑁆𑀢𑀓𑀲𑁆𑀲 𑀚𑀦𑀲𑁆𑀲 𑀅𑀭𑀺𑀬𑀫𑀕𑁆𑀕𑀁 𑀑𑀢𑀸𑀭𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀦𑀕𑀭𑀁 𑀧𑁂𑀲𑀺𑀢𑀓𑀸𑀮𑁄, 𑀅𑀣 𑀢𑁂𑀦 𑀦𑀬𑁂𑀦 𑀦𑀕𑀭𑁂 𑀅𑀧𑀽𑀭𑀺𑀬𑀫𑀸𑀦𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀦𑀕𑀭𑀲𑁆𑀲 𑀯𑀡𑁆𑀡𑀖𑁄𑀲𑀦𑀁 𑀓𑀼𑀮𑀸𑀦𑀁 𑀧𑀭𑀺𑀳𑀸𑀭𑀮𑀸𑀪𑀖𑁄𑀲𑀦𑀁 𑀯𑀺𑀬 𑀘 𑀫𑀸𑀲𑀲𑁆𑀲 𑀅𑀝𑁆𑀞 𑀤𑀺𑀯𑀲𑁂 𑀢𑀢𑁆𑀣 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀓𑀣𑀺𑀓𑀸𑀦𑀁 𑀦𑀺𑀩𑁆𑀩𑀸𑀦𑀯𑀡𑁆𑀡𑀲𑁆𑀲 𑀘𑁂𑀯 𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀸𑀦𑀁 𑀚𑀸𑀢𑀺𑀓𑀦𑁆𑀢𑀸𑀭𑀸𑀤𑀺𑀦𑀺𑀢𑁆𑀣𑀭𑀡𑀸𑀦𑀺𑀲𑀁𑀲𑀲𑁆𑀲 𑀘 𑀖𑁄𑀲𑀦𑀁, 𑀢𑀢𑁄 𑀲𑀩𑁆𑀩𑀤𑀺𑀲𑀸𑀳𑀺 𑀆𑀕𑀦𑁆𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀦𑀕𑀭𑀲𑀫𑁄𑀲𑀭𑀡𑀁 𑀯𑀺𑀬 𑀢𑀢𑁆𑀣 𑀢𑀢𑁆𑀣 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀢𑀢𑁄 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀦𑀼𑀮𑁄𑀫𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸𑀦𑀁 𑀅𑀧𑀭𑀺𑀫𑀸𑀡𑀸𑀦𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀦𑀺𑀩𑁆𑀩𑀸𑀦𑀲𑀫𑁄𑀲𑀭𑀡𑀁 𑀤𑀝𑁆𑀞𑀩𑁆𑀩𑀁.

𑀧𑀼𑀭𑀸𑀡𑀁 𑀫𑀕𑁆𑀕𑀦𑁆𑀢𑀺 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁. 𑀅𑀬𑀜𑁆𑀳𑀺 𑀅𑀭𑀺𑀬𑀫𑀕𑁆𑀕𑁄 𑀧𑀯𑀸𑀭𑀡𑀲𑀼𑀢𑁆𑀢𑁂 (𑀲𑀁. 𑀦𑀺. 𑁧.𑁨𑁧𑁫) 𑀅𑀯𑀢𑁆𑀢𑀫𑀸𑀦𑀓𑀝𑁆𑀞𑁂𑀦 ‘‘𑀅𑀦𑀼𑀧𑁆𑀧𑀦𑁆𑀦𑀫𑀕𑁆𑀕𑁄’’𑀢𑀺 𑀯𑀼𑀢𑁆𑀢𑁄, 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀯𑀴𑀜𑁆𑀚𑀦𑀝𑁆𑀞𑁂𑀦 ‘‘𑀧𑀼𑀭𑀸𑀡𑀫𑀕𑁆𑀕𑁄’’𑀢𑀺. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀁 𑀲𑀓𑀮𑀲𑀸𑀲𑀦𑀁. 𑀇𑀤𑁆𑀥𑀦𑁆𑀢𑀺 𑀛𑀸𑀦𑀲𑁆𑀲𑀸𑀤𑁂𑀦 𑀲𑀫𑀺𑀤𑁆𑀥𑀁 𑀲𑀼𑀪𑀺𑀓𑁆𑀔𑀁. 𑀨𑀻𑀢𑀦𑁆𑀢𑀺 𑀅𑀪𑀺𑀜𑁆𑀜𑀸𑀪𑀭𑀡𑁂𑀳𑀺 𑀧𑀼𑀧𑁆𑀨𑀺𑀢𑀁. 𑀯𑀺𑀢𑁆𑀣𑀸𑀭𑀺𑀓𑀦𑁆𑀢𑀺 𑀯𑀺𑀢𑁆𑀣𑀺𑀡𑁆𑀡𑀁. 𑀩𑀸𑀳𑀼𑀚𑀜𑁆𑀜𑀦𑁆𑀢𑀺 𑀩𑀳𑀼𑀚𑀦𑀯𑀺𑀜𑁆𑀜𑁂𑀬𑁆𑀬𑀁. 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢𑀦𑁆𑀢𑀺 𑀬𑀸𑀯 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀧𑀭𑀺𑀘𑁆𑀙𑁂𑀤𑁄 𑀅𑀢𑁆𑀣𑀺, 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀲𑀼𑀧𑁆𑀧𑀓𑀸𑀲𑀺𑀢𑀁 𑀲𑀼𑀤𑁂𑀲𑀺𑀢𑀁 𑀢𑀣𑀸𑀕𑀢𑁂𑀦𑀸𑀢𑀺. 𑀧𑀜𑁆𑀘𑀫𑀁.

𑁬. 𑀲𑀫𑁆𑀫𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁬. 𑀙𑀝𑁆𑀞𑁂 𑀆𑀫𑀦𑁆𑀢𑁂𑀲𑀻𑀢𑀺 𑀓𑀲𑁆𑀫𑀸 𑀆𑀫𑀦𑁆𑀢𑁂𑀲𑀺? 𑀬𑀲𑁆𑀫𑀸𑀲𑁆𑀲 𑀲𑀼𑀔𑀼𑀫𑀸 𑀢𑀺𑀮𑀓𑁆𑀔𑀡𑀸𑀳𑀢𑀸 𑀥𑀫𑁆𑀫𑀤𑁂𑀲𑀦𑀸 𑀉𑀧𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁 𑀓𑀺𑀭 𑀚𑀦𑀧𑀤𑁂 𑀫𑀦𑀼𑀲𑁆𑀲𑀸 𑀲𑀳𑁂𑀢𑀼𑀓𑀸 𑀧𑀜𑁆𑀜𑀯𑀦𑁆𑀢𑁄. 𑀲𑀺𑀦𑀺𑀤𑁆𑀥𑀸𑀦𑀺 𑀓𑀺𑀭𑁂𑀢𑁆𑀣 𑀪𑁄𑀚𑀦𑀸𑀦𑀺, 𑀢𑀸𑀦𑀺𑀲𑁂𑀯𑀢𑁄 𑀚𑀦𑀲𑁆𑀲 𑀧𑀜𑁆𑀜𑀸 𑀯𑀟𑁆𑀠𑀢𑀺, 𑀢𑁂 𑀕𑀫𑁆𑀪𑀻𑀭𑀁 𑀢𑀺𑀮𑀓𑁆𑀔𑀡𑀸𑀳𑀢𑀁 𑀥𑀫𑁆𑀫𑀓𑀣𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀫𑀢𑁆𑀣𑀸 𑀳𑁄𑀦𑁆𑀢𑀺. 𑀢𑁂𑀦𑁂𑀯 𑀪𑀕𑀯𑀸 𑀤𑀻𑀖𑀫𑀚𑁆𑀛𑀺𑀫𑁂𑀲𑀼 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀸𑀦𑀺 (𑀤𑀻. 𑀦𑀺. 𑁨.𑁩𑁭𑁨 𑀆𑀤𑀬𑁄) 𑀫𑀳𑀸𑀦𑀺𑀤𑀸𑀦𑀁 (𑀤𑀻. 𑀦𑀺. 𑁨.𑁯𑁫 𑀆𑀤𑀬𑁄), 𑀆𑀦𑁂𑀜𑁆𑀚𑀲𑀧𑁆𑀧𑀸𑀬𑀁 (𑀫. 𑀦𑀺. 𑁩.𑁬𑁬 𑀆𑀤𑀬𑁄), 𑀲𑀁𑀬𑀼𑀢𑁆𑀢𑀓𑁂 𑀘𑀽𑀴𑀦𑀺𑀤𑀸𑀦𑀸𑀤𑀺𑀲𑀼𑀢𑁆𑀢𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀅𑀜𑁆𑀜𑀸𑀦𑀺 𑀕𑀫𑁆𑀪𑀻𑀭𑀸𑀦𑀺 𑀲𑀼𑀢𑁆𑀢𑀸𑀦𑀺 𑀢𑀢𑁆𑀣𑁂𑀯 𑀓𑀣𑁂𑀲𑀺. 𑀲𑀫𑁆𑀫𑀲𑀣 𑀦𑁄𑀢𑀺 𑀲𑀫𑁆𑀫𑀲𑀣 𑀦𑀼. 𑀅𑀦𑁆𑀢𑀭𑀁 𑀲𑀫𑁆𑀫𑀲𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑀁 𑀧𑀘𑁆𑀘𑀬𑀲𑀫𑁆𑀫𑀲𑀦𑀁. 𑀦 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀘𑀺𑀢𑁆𑀢𑀁 𑀆𑀭𑀸𑀥𑁂𑀲𑀻𑀢𑀺 𑀧𑀘𑁆𑀘𑀬𑀸𑀓𑀸𑀭𑀯𑀲𑁂𑀦 𑀩𑁆𑀬𑀸𑀓𑀸𑀭𑀸𑀧𑁂𑀢𑀼𑀓𑀸𑀫𑀲𑁆𑀲 𑀪𑀕𑀯𑀢𑁄 𑀢𑀣𑀸 𑀅𑀩𑁆𑀬𑀸𑀓𑀭𑀺𑀢𑁆𑀯𑀸 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀯𑀲𑁂𑀦 𑀩𑁆𑀬𑀸𑀓𑀭𑁄𑀦𑁆𑀢𑁄 𑀅𑀚𑁆𑀛𑀸𑀲𑀬𑀁 𑀕𑀳𑁂𑀢𑀼𑀁 𑀦𑀸𑀲𑀓𑁆𑀔𑀺.

𑀏𑀢𑀤𑀯𑁄𑀘𑀸𑀢𑀺 𑀤𑁂𑀲𑀦𑀸 𑀬𑀣𑀸𑀦𑀼𑀲𑀦𑁆𑀥𑀺𑀁 𑀦 𑀕𑀢𑀸, 𑀤𑁂𑀲𑀦𑀸𑀬 𑀬𑀣𑀸𑀦𑀼𑀲𑀦𑁆𑀥𑀺𑀕𑀫𑀦𑀢𑁆𑀣𑀁 𑀏𑀢𑀤𑀯𑁄𑀘. 𑀢𑁂𑀦𑀳𑀸𑀦𑀦𑁆𑀤, 𑀲𑀼𑀡𑀸𑀣𑀸𑀢𑀺 𑀇𑀤𑀁 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀅𑀲𑀫𑁆𑀪𑀺𑀦𑁆𑀦𑀧𑀤𑀁. 𑀅𑀜𑁆𑀜𑀢𑁆𑀣 𑀳𑀺 𑀏𑀯𑀁 𑀯𑀼𑀢𑁆𑀢𑀁 𑀦𑀸𑀫 𑀦𑀢𑁆𑀣𑀺. 𑀉𑀧𑀥𑀺𑀦𑀺𑀤𑀸𑀦𑀦𑁆𑀢𑀺 𑀔𑀦𑁆𑀥𑀼𑀧𑀥𑀺𑀦𑀺𑀤𑀸𑀦𑀁. 𑀔𑀦𑁆𑀥𑀧𑀜𑁆𑀘𑀓𑀜𑁆𑀳𑁂𑀢𑁆𑀣 𑀉𑀧𑀥𑀻𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀉𑀧𑁆𑀧𑀚𑁆𑀚𑀢𑀻𑀢𑀺 𑀚𑀸𑀬𑀢𑀺. 𑀦𑀺𑀯𑀺𑀲𑀢𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀧𑀯𑀢𑁆𑀢𑀺𑀯𑀲𑁂𑀦 𑀧𑀢𑀺𑀝𑁆𑀞𑀳𑀢𑀺.

𑀬𑀁 𑀔𑁄 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀦𑁆𑀢𑀺 𑀬𑀁 𑀮𑁄𑀓𑀲𑁆𑀫𑀺𑀁 𑀧𑀺𑀬𑀲𑀪𑀸𑀯𑀜𑁆𑀘𑁂𑀯 𑀫𑀥𑀼𑀭𑀲𑀪𑀸𑀯𑀜𑁆𑀘. 𑀘𑀓𑁆𑀔𑀼𑀁 𑀮𑁄𑀓𑁂𑀢𑀺𑀆𑀤𑀻𑀲𑀼 𑀮𑁄𑀓𑀲𑁆𑀫𑀺𑀜𑁆𑀳𑀺 𑀘𑀓𑁆𑀔𑀸𑀤𑀻𑀲𑀼 𑀫𑀫𑀢𑁆𑀢𑁂𑀦 𑀅𑀪𑀺𑀦𑀺𑀯𑀺𑀝𑁆𑀞𑀸 𑀲𑀢𑁆𑀢𑀸 𑀲𑀫𑁆𑀧𑀢𑁆𑀢𑀺𑀬𑀁 𑀧𑀢𑀺𑀝𑁆𑀞𑀺𑀢𑀸 𑀅𑀢𑁆𑀢𑀦𑁄 𑀘𑀓𑁆𑀔𑀼𑀁 𑀆𑀤𑀸𑀲𑀸𑀤𑀻𑀲𑀼 𑀦𑀺𑀫𑀺𑀢𑁆𑀢𑀕𑁆𑀕𑀳𑀡𑀸𑀦𑀼𑀲𑀸𑀭𑁂𑀦 𑀯𑀺𑀧𑁆𑀧𑀲𑀦𑁆𑀦𑀧𑀜𑁆𑀘𑀧𑀲𑀸𑀤𑀁 𑀲𑀼𑀯𑀡𑁆𑀡𑀯𑀺𑀫𑀸𑀦𑁂 𑀉𑀕𑁆𑀖𑀸𑀝𑀺𑀢𑀫𑀡𑀺𑀲𑀻𑀳𑀧𑀜𑁆𑀚𑀭𑀁 𑀯𑀺𑀬 𑀫𑀜𑁆𑀜𑀦𑁆𑀢𑀺, 𑀲𑁄𑀢𑀁 𑀭𑀚𑀢𑀧𑀦𑀸𑀴𑀺𑀓𑀁 𑀯𑀺𑀬 𑀧𑀸𑀫𑀗𑁆𑀕𑀲𑀼𑀢𑁆𑀢𑀁 𑀯𑀺𑀬 𑀘 𑀫𑀜𑁆𑀜𑀦𑁆𑀢𑀺, 𑀢𑀼𑀗𑁆𑀕𑀦𑀸𑀲𑀸𑀢𑀺 𑀮𑀤𑁆𑀥𑀯𑁄𑀳𑀸𑀭𑀁 𑀖𑀸𑀦𑀁 𑀯𑀝𑁆𑀝𑁂𑀢𑁆𑀯𑀸 𑀞𑀧𑀺𑀢𑀳𑀭𑀺𑀢𑀸𑀮𑀯𑀝𑁆𑀝𑀺𑀁 𑀯𑀺𑀬 𑀫𑀜𑁆𑀜𑀦𑁆𑀢𑀺, 𑀚𑀺𑀯𑁆𑀳𑀁 𑀭𑀢𑁆𑀢𑀓𑀫𑁆𑀩𑀮𑀧𑀝𑀮𑀁 𑀯𑀺𑀬 𑀫𑀼𑀤𑀼𑀲𑀺𑀦𑀺𑀤𑁆𑀥𑀫𑀥𑀼𑀭𑀭𑀲𑀤𑀁 𑀫𑀜𑁆𑀜𑀦𑁆𑀢𑀺, 𑀓𑀸𑀬𑀁 𑀲𑀸𑀮𑀮𑀝𑁆𑀞𑀺𑀁 𑀯𑀺𑀬 𑀲𑀼𑀯𑀡𑁆𑀡𑀢𑁄𑀭𑀡𑀁 𑀯𑀺𑀬 𑀘 𑀫𑀜𑁆𑀜𑀦𑁆𑀢𑀺, 𑀫𑀦𑀁 𑀅𑀜𑁆𑀜𑁂𑀲𑀁 𑀫𑀦𑁂𑀦 𑀅𑀲𑀤𑀺𑀲𑀁 𑀉𑀴𑀸𑀭𑀁 𑀫𑀜𑁆𑀜𑀦𑁆𑀢𑀺.

𑀦𑀺𑀘𑁆𑀘𑀢𑁄 𑀅𑀤𑁆𑀤𑀓𑁆𑀔𑀼𑀦𑁆𑀢𑀺 𑀦𑀺𑀘𑁆𑀘𑀦𑁆𑀢𑀺 𑀅𑀤𑁆𑀤𑀲𑀁𑀲𑀼. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦 𑀧𑀭𑀺𑀫𑀼𑀘𑁆𑀘𑀺𑀁𑀲𑀼 𑀤𑀼𑀓𑁆𑀔𑀲𑁆𑀫𑀸𑀢𑀺 𑀲𑀓𑀮𑀲𑁆𑀫𑀸𑀧𑀺 𑀯𑀝𑁆𑀝𑀤𑀼𑀓𑁆𑀔𑀸 𑀦 𑀧𑀭𑀺𑀫𑀼𑀘𑁆𑀘𑀺𑀁𑀲𑀼. 𑀤𑀓𑁆𑀔𑀺𑀲𑁆𑀲𑀦𑁆𑀢𑀻𑀢𑀺 𑀧𑀲𑁆𑀲𑀺𑀲𑁆𑀲𑀦𑁆𑀢𑀺. 𑀆𑀧𑀸𑀦𑀻𑀬𑀓𑀁𑀲𑁄𑀢𑀺 𑀲𑀭𑀓𑀲𑁆𑀲 𑀦𑀸𑀫𑀁. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀆𑀧𑀁 𑀧𑀺𑀯𑀦𑁆𑀢𑀺, 𑀢𑀲𑁆𑀫𑀸 ‘‘𑀆𑀧𑀸𑀦𑀻𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀆𑀧𑀸𑀦𑀻𑀬𑁄 𑀘 𑀲𑁄 𑀓𑀁𑀲𑁄 𑀘𑀸𑀢𑀺 𑀆𑀧𑀸𑀦𑀻𑀬𑀓𑀁𑀲𑁄. 𑀲𑀼𑀭𑀸𑀫𑀡𑁆𑀟𑀲𑀭𑀓𑀲𑁆𑀲𑁂𑀢𑀁 𑀦𑀸𑀫𑀁. ‘‘𑀯𑀡𑁆𑀡𑀲𑀫𑁆𑀧𑀦𑁆𑀦𑁄’’𑀢𑀺𑀆𑀤𑀺𑀯𑀘𑀦𑀢𑁄 𑀧𑀦 𑀓𑀁𑀲𑁂 𑀞𑀺𑀢𑀧𑀸𑀦𑀫𑁂𑀯 𑀏𑀯𑀁 𑀯𑀼𑀢𑁆𑀢𑀁. 𑀖𑀫𑁆𑀫𑀸𑀪𑀺𑀢𑀢𑁆𑀢𑁄𑀢𑀺 𑀖𑀫𑁆𑀫𑁂𑀦 𑀅𑀪𑀺𑀢𑀢𑁆𑀢𑁄. 𑀖𑀫𑁆𑀫𑀧𑀭𑁂𑀢𑁄𑀢𑀺 𑀖𑀫𑁆𑀫𑁂𑀦 𑀨𑀼𑀝𑁆𑀞𑁄, 𑀅𑀦𑀼𑀕𑀢𑁄𑀢𑀺 𑀅𑀢𑁆𑀣𑁄. 𑀧𑀺𑀯𑀢𑁄 𑀳𑀺 𑀔𑁄 𑀢𑀁 𑀙𑀸𑀤𑁂𑀲𑁆𑀲𑀢𑀻𑀢𑀺 𑀧𑀺𑀯𑀦𑁆𑀢𑀲𑁆𑀲 𑀢𑀁 𑀧𑀸𑀦𑀻𑀬𑀁 𑀯𑀡𑁆𑀡𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀭𑀼𑀘𑁆𑀘𑀺𑀲𑁆𑀲𑀢𑀺, 𑀲𑀓𑀮𑀲𑀭𑀻𑀭𑀁 𑀯𑀸 𑀨𑀭𑀺𑀢𑁆𑀯𑀸 𑀢𑀼𑀝𑁆𑀞𑀺𑀁 𑀉𑀧𑁆𑀧𑀸𑀤𑀬𑀫𑀸𑀦𑀁 𑀞𑀲𑁆𑀲𑀢𑀺. 𑀅𑀧𑁆𑀧𑀝𑀺𑀲𑀗𑁆𑀔𑀸𑀢𑀺 𑀅𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀆𑀧𑀸𑀦𑀻𑀬𑀓𑀁𑀲𑁄 𑀯𑀺𑀬 𑀳𑀺 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁 𑀆𑀭𑀫𑁆𑀫𑀡𑀁 𑀤𑀝𑁆𑀞𑀩𑁆𑀩𑀁, 𑀖𑀫𑁆𑀫𑀸𑀪𑀺𑀢𑀢𑁆𑀢𑀧𑀼𑀭𑀺𑀲𑁄 𑀯𑀺𑀬 𑀯𑀝𑁆𑀝𑀦𑀺𑀲𑁆𑀲𑀺𑀢𑁄 𑀧𑀼𑀣𑀼𑀚𑁆𑀚𑀦𑁄, 𑀆𑀧𑀸𑀦𑀻𑀬𑀓𑀁𑀲𑁂𑀦 𑀦𑀺𑀫𑀦𑁆𑀢𑀦𑀧𑀼𑀭𑀺𑀲𑁄 𑀯𑀺𑀬 𑀮𑁄𑀓𑁂 𑀧𑀺𑀬𑀭𑀽𑀧𑁂𑀦 𑀲𑀸𑀢𑀭𑀽𑀧𑁂𑀦 𑀆𑀭𑀫𑁆𑀫𑀡𑁂𑀦 𑀦𑀺𑀫𑀦𑁆𑀢𑀓𑀚𑀦𑁄, 𑀆𑀧𑀸𑀦𑀻𑀬𑀓𑀁𑀲𑁂 𑀲𑀫𑁆𑀧𑀢𑁆𑀢𑀺𑀜𑁆𑀘 𑀆𑀤𑀻𑀦𑀯𑀜𑁆𑀘 𑀆𑀭𑁄𑀘𑁂𑀦𑁆𑀢𑁄 𑀆𑀧𑀸𑀦𑀓𑀫𑀦𑀼𑀲𑁆𑀲𑁄 𑀯𑀺𑀬 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀤𑀺𑀓𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁄. 𑀬𑀣𑁂𑀯 𑀳𑀺 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀧𑀮𑁄𑀓𑀺𑀢𑀫𑀦𑀼𑀲𑁆𑀲𑁄 𑀆𑀧𑀸𑀦𑀻𑀬𑀓𑀁𑀲𑁂 𑀕𑀼𑀡𑀜𑁆𑀘 𑀆𑀤𑀻𑀦𑀯𑀜𑁆𑀘 𑀆𑀭𑁄𑀘𑁂𑀢𑀺, 𑀏𑀯𑀫𑁂𑀯 𑀆𑀘𑀭𑀺𑀬𑁄 𑀯𑀸 𑀉𑀧𑀚𑁆𑀛𑀸𑀬𑁄 𑀯𑀸 𑀪𑀺𑀓𑁆𑀔𑀼𑀦𑁄 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀅𑀲𑁆𑀲𑀸𑀤𑀜𑁆𑀘 𑀦𑀺𑀲𑁆𑀲𑀭𑀡𑀜𑁆𑀘 𑀓𑀣𑁂𑀢𑀺.

𑀢𑀢𑁆𑀣 𑀬𑀣𑀸 𑀆𑀧𑀸𑀦𑀻𑀬𑀓𑀁𑀲𑀫𑁆𑀳𑀺 𑀕𑀼𑀡𑁂 𑀘 𑀆𑀤𑀻𑀦𑀯𑁂 𑀘 𑀆𑀭𑁄𑀘𑀺𑀢𑁂 𑀲𑁄 𑀧𑀼𑀭𑀺𑀲𑁄 𑀧𑀺𑀬𑀯𑀡𑁆𑀡𑀸𑀤𑀺𑀲𑀫𑁆𑀧𑀤𑀸𑀬𑀫𑁂𑀯 𑀲𑀜𑁆𑀚𑀸𑀢𑀯𑁂𑀕𑁄 ‘‘𑀲𑀘𑁂 𑀫𑀭𑀡𑀁 𑀪𑀯𑀺𑀲𑁆𑀲𑀢𑀺, 𑀧𑀘𑁆𑀙𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀲𑀳𑀲𑀸 𑀅𑀧𑁆𑀧𑀝𑀺𑀲𑀗𑁆𑀔𑀸𑀬 𑀢𑀁 𑀧𑀺𑀯𑀺𑀢𑁆𑀯𑀸 𑀫𑀭𑀡𑀁 𑀯𑀸 𑀫𑀭𑀡𑀫𑀢𑁆𑀢𑀁 𑀯𑀸 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀺, 𑀏𑀯𑀫𑁂𑀯, 𑀪𑀺𑀓𑁆𑀔𑀼, ‘‘𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀤𑀲𑁆𑀲𑀦𑀸𑀤𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀲𑁄𑀫𑀦𑀲𑁆𑀲𑀫𑀢𑁆𑀢𑀫𑁂𑀯 𑀅𑀲𑁆𑀲𑀸𑀤𑁄, 𑀆𑀤𑀻𑀦𑀯𑁄 𑀧𑀦 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑁄 𑀩𑀳𑀼 𑀦𑀸𑀦𑀧𑁆𑀧𑀓𑀸𑀭𑁄, 𑀅𑀧𑁆𑀧𑀲𑁆𑀲𑀸𑀤𑀸 𑀓𑀸𑀫𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸’’𑀢𑀺 𑀏𑀯𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀆𑀦𑀺𑀲𑀁𑀲𑀜𑁆𑀘 𑀆𑀤𑀻𑀦𑀯𑀜𑁆𑀘 𑀓𑀣𑁂𑀢𑁆𑀯𑀸 𑁋 ‘‘𑀲𑀫𑀡𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀪𑀯 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀚𑀸𑀕𑀭𑀺𑀬𑀁 𑀅𑀦𑀼𑀬𑀼𑀢𑁆𑀢𑁄’’𑀢𑀺 𑀏𑀯𑀁 𑀑𑀯𑀤𑀺𑀢𑁄𑀧𑀺 𑀅𑀲𑁆𑀲𑀸𑀤𑀩𑀤𑁆𑀥𑀘𑀺𑀢𑁆𑀢𑀢𑀸𑀬 ‘‘𑀲𑀘𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀆𑀤𑀻𑀦𑀯𑁄 𑀪𑀯𑀺𑀲𑁆𑀲𑀢𑀺, 𑀧𑀘𑁆𑀙𑀸 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂 𑀅𑀧𑀲𑀸𑀤𑁂𑀢𑁆𑀯𑀸 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀦𑀺 𑀘𑁂𑀯 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀜𑁆𑀘 𑀧𑀳𑀸𑀬 𑀮𑁄𑀓𑀸𑀫𑀺𑀲𑀓𑀣𑀁 𑀓𑀣𑁂𑀦𑁆𑀢𑁄 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑀢𑀸𑀬 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀢𑀺. 𑀢𑀢𑁄 𑀤𑀼𑀘𑁆𑀘𑀭𑀺𑀢𑀸𑀦𑀺 𑀧𑀽𑀭𑁂𑀦𑁆𑀢𑁄 𑀲𑀦𑁆𑀥𑀺𑀘𑁆𑀙𑁂𑀤𑀦𑀸𑀤𑀺𑀓𑀸𑀮𑁂 ‘‘𑀘𑁄𑀭𑁄 𑀅𑀬’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀭𑀜𑁆𑀜𑁄 𑀤𑀲𑁆𑀲𑀺𑀢𑁄 𑀇𑀥𑁂𑀯 𑀳𑀢𑁆𑀣𑀧𑀸𑀤𑀸𑀤𑀺𑀙𑁂𑀤𑀦𑀁 𑀧𑀢𑁆𑀯𑀸 𑀲𑀫𑁆𑀧𑀭𑀸𑀬𑁂 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑁄𑀢𑀺.

𑀧𑀸𑀦𑀻𑀬𑁂𑀦 𑀯𑀸 𑀯𑀺𑀦𑁂𑀢𑀼𑀦𑁆𑀢𑀺 𑀲𑀻𑀢𑁂𑀦 𑀯𑀸𑀭𑀺𑀦𑀸 𑀳𑀭𑀺𑀢𑀼𑀁. 𑀤𑀥𑀺𑀫𑀡𑁆𑀟𑀓𑁂𑀦𑀸𑀢𑀺 𑀤𑀥𑀺𑀫𑀡𑁆𑀟𑀦𑀫𑀢𑁆𑀢𑁂𑀦. 𑀪𑀝𑁆𑀞𑀮𑁄𑀡𑀺𑀓𑀸𑀬𑀸𑀢𑀺 𑀲𑀮𑁄𑀡𑁂𑀦 𑀲𑀢𑁆𑀢𑀼𑀧𑀸𑀦𑀻𑀬𑁂𑀦. 𑀮𑁄𑀡𑀲𑁄𑀯𑀻𑀭𑀓𑁂𑀦𑀸𑀢𑀺 𑀲𑀩𑁆𑀩𑀥𑀜𑁆𑀜𑀨𑀮𑀓𑀴𑀻𑀭𑀸𑀤𑀻𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀮𑁄𑀡𑀲𑁄𑀯𑀻𑀭𑀓𑀁 𑀦𑀸𑀫 𑀓𑀭𑁄𑀦𑁆𑀢𑀺, 𑀢𑁂𑀦.

𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀧𑀦𑁂𑀢𑁆𑀣 𑁋 𑀖𑀫𑁆𑀫𑀸𑀪𑀺𑀢𑀢𑁆𑀢𑀧𑀼𑀭𑀺𑀲𑁄 𑀯𑀺𑀬 𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀓𑀸𑀮𑁂 𑀬𑁄𑀕𑀸𑀯𑀘𑀭𑁄 𑀤𑀝𑁆𑀞𑀩𑁆𑀩𑁄, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀧𑀝𑀺𑀲𑀗𑁆𑀔𑀸 𑀆𑀧𑀸𑀦𑀻𑀬𑀓𑀁𑀲𑀁 𑀧𑀳𑀸𑀬 𑀧𑀸𑀦𑀻𑀬𑀸𑀤𑀻𑀳𑀺 𑀧𑀺𑀧𑀸𑀲𑀲𑁆𑀲 𑀯𑀺𑀦𑁄𑀤𑀦𑀁 𑀯𑀺𑀬 𑀪𑀺𑀓𑁆𑀔𑀼𑀦𑁄 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀑𑀯𑀸𑀤𑁂 𑀞𑀢𑁆𑀯𑀸 𑀙𑀤𑁆𑀯𑀸𑀭𑀸𑀤𑀻𑀦𑀺 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑀲𑁆𑀲 𑀅𑀭𑀳𑀢𑁆𑀢𑀨𑀮𑀸𑀥𑀺𑀕𑀫𑁄, 𑀧𑀸𑀦𑀻𑀬𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀧𑀸𑀦𑀸𑀦𑀺 𑀯𑀺𑀬 𑀳𑀺 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸, 𑀢𑁂𑀲𑀼 𑀅𑀜𑁆𑀜𑀢𑀭𑀁 𑀧𑀺𑀯𑀺𑀢𑁆𑀯𑀸 𑀲𑀼𑀭𑀸𑀧𑀺𑀧𑀸𑀲𑀺𑀢𑀁 𑀯𑀺𑀦𑁄𑀤𑁂𑀢𑁆𑀯𑀸 𑀲𑀼𑀔𑀺𑀦𑁄 𑀬𑁂𑀦 𑀓𑀸𑀫𑀁 𑀕𑀫𑀦𑀁 𑀯𑀺𑀬 𑀔𑀻𑀡𑀸𑀲𑀯𑀲𑁆𑀲 𑀘𑀢𑀼𑀫𑀕𑁆𑀕𑀧𑀸𑀦𑀁 𑀧𑀺𑀯𑀺𑀢𑁆𑀯𑀸 𑀢𑀡𑁆𑀳𑀁 𑀯𑀺𑀦𑁄𑀤𑁂𑀢𑁆𑀯𑀸 𑀅𑀕𑀢𑀧𑀼𑀩𑁆𑀩𑀁 𑀦𑀺𑀩𑁆𑀩𑀸𑀦𑀤𑀺𑀲𑀁 𑀕𑀫𑀦𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀙𑀝𑁆𑀞𑀁.

𑁭. 𑀦𑀴𑀓𑀮𑀸𑀧𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁭. 𑀲𑀢𑁆𑀢𑀫𑁂 𑀓𑀺𑀦𑁆𑀦𑀼 𑀔𑁄, 𑀆𑀯𑀼𑀲𑁄𑀢𑀺 𑀓𑀲𑁆𑀫𑀸 𑀧𑀼𑀘𑁆𑀙𑀢𑀺? ‘‘𑀏𑀯𑀁 𑀧𑀼𑀝𑁆𑀞𑁄 𑀓𑀣𑀁 𑀦𑀼 𑀔𑁄 𑀩𑁆𑀬𑀸𑀓𑀭𑁂𑀬𑁆𑀬𑀸’’𑀢𑀺. 𑀣𑁂𑀭𑀲𑁆𑀲 𑀅𑀚𑁆𑀛𑀸𑀲𑀬𑀚𑀸𑀦𑀦𑀢𑁆𑀣𑀁. 𑀅𑀧𑀺𑀘 𑀅𑀢𑀻𑀢𑁂 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸 𑀇𑀫𑀁 𑀧𑀜𑁆𑀳𑀁 𑀯𑀺𑀦𑀺𑀘𑁆𑀙𑀬𑀺𑀁𑀲𑀽𑀢𑀺 𑀅𑀦𑀸𑀕𑀢𑁂 𑀪𑀺𑀓𑁆𑀔𑀽 𑀚𑀸𑀦𑀺𑀲𑁆𑀲𑀦𑁆𑀢𑀻𑀢𑀺𑀧𑀺 𑀧𑀼𑀘𑁆𑀙𑀢𑀺. 𑀇𑀤𑀸𑀦𑁂𑀯 𑀔𑁄 𑀫𑀬𑀦𑁆𑀢𑀺 𑀇𑀤𑀁 𑀣𑁂𑀭𑁄 𑀬𑀲𑁆𑀲 𑀦𑀸𑀫𑀭𑀽𑀧𑀲𑁆𑀲 𑀯𑀺𑀜𑁆𑀜𑀸𑀡𑀁 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀁, 𑀢𑀤𑁂𑀯 𑀦𑀸𑀫𑀭𑀽𑀧𑀁 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄𑀢𑀺 𑀯𑀼𑀢𑁆𑀢𑀢𑁆𑀢𑀸 𑀆𑀳. 𑀦𑀴𑀓𑀮𑀸𑀧𑀺𑀬𑁄𑀢𑀺 𑀇𑀥 𑀧𑀦 𑀅𑀬𑀓𑀮𑀸𑀧𑀸𑀤𑀺𑀯𑀲𑁂𑀦 𑀉𑀧𑀫𑀁 𑀅𑀦𑀸𑀳𑀭𑀺𑀢𑁆𑀯𑀸 𑀯𑀺𑀜𑁆𑀜𑀸𑀡𑀦𑀸𑀫𑀭𑀽𑀧𑀸𑀦𑀁 𑀅𑀩𑀮𑀤𑀼𑀩𑁆𑀩𑀮𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀅𑀬𑀁 𑀉𑀧𑀫𑀸 𑀆𑀪𑀢𑀸.

𑀦𑀺𑀭𑁄𑀥𑁄 𑀳𑁄𑀢𑀻𑀢𑀺 𑀏𑀢𑁆𑀢𑀓𑁂 𑀞𑀸𑀦𑁂 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀧𑀜𑁆𑀘𑀯𑁄𑀓𑀸𑀭𑀪𑀯𑀯𑀲𑁂𑀦 𑀤𑁂𑀲𑀦𑀸 𑀓𑀣𑀺𑀢𑀸. 𑀙𑀢𑁆𑀢𑀺𑀁𑀲𑀸𑀬 𑀯𑀢𑁆𑀣𑀽𑀳𑀻𑀢𑀺 𑀳𑁂𑀝𑁆𑀞𑀸 𑀯𑀺𑀲𑁆𑀲𑀚𑁆𑀚𑀺𑀢𑁂𑀲𑀼 𑀤𑁆𑀯𑀸𑀤𑀲𑀲𑀼 𑀧𑀤𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀯𑀲𑁂𑀦 𑀙𑀢𑁆𑀢𑀺𑀁𑀲𑀸𑀬 𑀓𑀸𑀭𑀡𑁂𑀳𑀺. 𑀏𑀢𑁆𑀣 𑀘 𑀧𑀞𑀫𑁄 𑀥𑀫𑁆𑀫𑀓𑀣𑀺𑀓𑀕𑀼𑀡𑁄, 𑀤𑀼𑀢𑀺𑀬𑀸 𑀧𑀝𑀺𑀧𑀢𑁆𑀢𑀺, 𑀢𑀢𑀺𑀬𑀁 𑀧𑀝𑀺𑀧𑀢𑁆𑀢𑀺𑀨𑀮𑀁. 𑀢𑀢𑁆𑀣 𑀧𑀞𑀫𑀦𑀬𑁂𑀦 𑀤𑁂𑀲𑀦𑀸𑀲𑀫𑁆𑀧𑀢𑁆𑀢𑀺 𑀓𑀣𑀺𑀢𑀸, 𑀤𑀼𑀢𑀺𑀬𑁂𑀦 𑀲𑁂𑀓𑁆𑀔𑀪𑀽𑀫𑀺, 𑀢𑀢𑀺𑀬𑁂𑀦 𑀅𑀲𑁂𑀓𑁆𑀔𑀪𑀽𑀫𑀻𑀢𑀺. 𑀲𑀢𑁆𑀢𑀫𑀁.

𑁮. 𑀓𑁄𑀲𑀫𑁆𑀩𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁮. 𑀅𑀝𑁆𑀞𑀫𑁂 𑀅𑀜𑁆𑀜𑀢𑁆𑀭𑁂𑀯𑀸𑀢𑀺 𑀏𑀓𑀘𑁆𑀘𑁄 𑀳𑀺 𑀧𑀭𑀲𑁆𑀲 𑀲𑀤𑁆𑀤𑀳𑀺𑀢𑁆𑀯𑀸 𑀬𑀁 𑀏𑀲 𑀪𑀡𑀢𑀺, 𑀢𑀁 𑀪𑀽𑀢𑀦𑁆𑀢𑀺 𑀕𑀡𑁆𑀳𑀸𑀢𑀺. 𑀅𑀧𑀭𑀲𑁆𑀲 𑀦𑀺𑀲𑀻𑀤𑀺𑀢𑁆𑀯𑀸 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀬𑀁 𑀓𑀸𑀭𑀡𑀁 𑀭𑀼𑀘𑁆𑀘𑀢𑀺, 𑀲𑁄 ‘‘𑀅𑀢𑁆𑀣𑀺 𑀏𑀢’’𑀦𑁆𑀢𑀺 𑀭𑀼𑀘𑀺𑀬𑀸 𑀕𑀡𑁆𑀳𑀸𑀢𑀺. 𑀏𑀓𑁄 ‘‘𑀘𑀺𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀏𑀯𑀁 𑀅𑀦𑀼𑀲𑁆𑀲𑀯𑁄 𑀅𑀢𑁆𑀣𑀺, 𑀪𑀽𑀢𑀫𑁂𑀢’’𑀦𑁆𑀢𑀺 𑀅𑀦𑀼𑀲𑁆𑀲𑀯𑁂𑀦 𑀕𑀡𑁆𑀳𑀸𑀢𑀺. 𑀅𑀜𑁆𑀜𑀲𑁆𑀲 𑀯𑀺𑀢𑀓𑁆𑀓𑀬𑀢𑁄 𑀏𑀓𑀁 𑀓𑀸𑀭𑀡𑀁 𑀉𑀧𑀝𑁆𑀞𑀸𑀢𑀺, 𑀲𑁄 ‘‘𑀅𑀢𑁆𑀣𑁂𑀢’’𑀦𑁆𑀢𑀺 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦 𑀕𑀡𑁆𑀳𑀸𑀢𑀺. 𑀅𑀧𑀭𑀲𑁆𑀲 𑀘𑀺𑀦𑁆𑀢𑀬𑀢𑁄 𑀏𑀓𑀸 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, 𑀬𑀸𑀬𑀲𑁆𑀲 𑀢𑀁 𑀓𑀸𑀭𑀡𑀁 𑀦𑀺𑀚𑁆𑀛𑀸𑀬𑀦𑁆𑀢𑀲𑁆𑀲 𑀔𑀫𑀢𑀺, 𑀲𑁄 ‘‘𑀅𑀢𑁆𑀣𑁂𑀢’’𑀦𑁆𑀢𑀺 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀕𑀡𑁆𑀳𑀸𑀢𑀺. 𑀣𑁂𑀭𑁄 𑀧𑀦 𑀧𑀜𑁆𑀘𑀧𑀺 𑀏𑀢𑀸𑀦𑀺 𑀓𑀸𑀭𑀡𑀸𑀦𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀘𑀓𑁆𑀔𑀜𑀸𑀡𑁂𑀦 𑀧𑀝𑀺𑀯𑀺𑀤𑁆𑀥𑀪𑀸𑀯𑀁 𑀧𑀼𑀘𑁆𑀙𑀦𑁆𑀢𑁄 𑀅𑀜𑁆𑀜𑀢𑁆𑀭𑁂𑀯, 𑀆𑀯𑀼𑀲𑁄 𑀫𑀼𑀲𑀺𑀮, 𑀲𑀤𑁆𑀥𑀸𑀬𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀜𑁆𑀜𑀢𑁆𑀭𑁂𑀯𑀸𑀢𑀺 𑀲𑀤𑁆𑀥𑀸𑀤𑀻𑀦𑀺 𑀓𑀸𑀭𑀡𑀸𑀦𑀺 𑀞𑀧𑁂𑀢𑁆𑀯𑀸, 𑀯𑀺𑀦𑀸 𑀏𑀢𑁂𑀳𑀺 𑀓𑀸𑀭𑀡𑁂𑀳𑀻𑀢𑀺 𑀅𑀢𑁆𑀣𑁄. 𑀪𑀯𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀦𑁆𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁.

𑀢𑀼𑀡𑁆𑀳𑀻 𑀅𑀳𑁄𑀲𑀻𑀢𑀺 𑀣𑁂𑀭𑁄 𑀔𑀻𑀡𑀸𑀲𑀯𑁄, 𑀅𑀳𑀁 𑀧𑀦 𑀔𑀻𑀡𑀸𑀲𑀯𑁄𑀢𑀺 𑀯𑀸 𑀦 𑀯𑀸𑀢𑀺 𑀯𑀸 𑀅𑀯𑀢𑁆𑀯𑀸 𑀢𑀼𑀡𑁆𑀳𑀻𑀬𑁂𑀯 𑀅𑀳𑁄𑀲𑀺. 𑀆𑀬𑀲𑁆𑀫𑀸 𑀦𑀸𑀭𑀤𑁄 𑀆𑀬𑀲𑁆𑀫𑀦𑁆𑀢𑀁 𑀧𑀯𑀺𑀝𑁆𑀞𑀁 𑀏𑀢𑀤𑀯𑁄𑀘𑀸𑀢𑀺 𑀓𑀲𑁆𑀫𑀸 𑀅𑀯𑁄𑀘? 𑀲𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀪𑀯𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁 𑀦𑀸𑀫𑀸𑀢𑀺 𑀲𑁂𑀔𑁂𑀳𑀺𑀧𑀺 𑀚𑀸𑀦𑀺𑀢𑀩𑁆𑀩𑁄 𑀧𑀜𑁆𑀳𑁄 𑀏𑀲, 𑀅𑀬𑀁 𑀧𑀦 𑀣𑁂𑀭𑁄 𑀇𑀫𑀁 𑀣𑁂𑀭𑀁 𑀅𑀲𑁂𑀔𑀪𑀽𑀫𑀺𑀬𑀸 𑀓𑀸𑀭𑁂𑀢𑀺, 𑀇𑀫𑀁 𑀞𑀸𑀦𑀁 𑀚𑀸𑀦𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀏𑀢𑀁 𑀅𑀯𑁄𑀘.

𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀲𑀼𑀤𑀺𑀝𑁆𑀞𑀦𑁆𑀢𑀺 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀲𑀼𑀝𑁆𑀞𑀼 𑀤𑀺𑀝𑁆𑀞𑀁. 𑀦 𑀘𑀫𑁆𑀳𑀺 𑀅𑀭𑀳𑀦𑁆𑀢𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑁂 𑀞𑀺𑀢𑀢𑁆𑀢𑀸 𑀅𑀭𑀳𑀁 𑀦 𑀳𑁄𑀫𑀻𑀢𑀺 𑀤𑀻𑀧𑁂𑀢𑀺. 𑀬𑀁 𑀧𑀦𑀲𑁆𑀲 𑀇𑀤𑀸𑀦𑀺 ‘‘𑀪𑀯𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀜𑀸𑀡𑀁, 𑀢𑀁 𑀏𑀓𑀽𑀦𑀯𑀻𑀲𑀢𑀺𑀬𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀳𑀺 𑀯𑀺𑀫𑀼𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. 𑀉𑀤𑀧𑀸𑀦𑁄𑀢𑀺 𑀯𑀻𑀲𑀢𑀺𑀁𑀲𑀳𑀢𑁆𑀣𑀕𑀫𑁆𑀪𑀻𑀭𑁄 𑀧𑀸𑀦𑀻𑀬𑀓𑀽𑀧𑁄. 𑀉𑀤𑀓𑀯𑀸𑀭𑀓𑁄𑀢𑀺 𑀉𑀤𑀓𑀉𑀲𑁆𑀲𑀺𑀜𑁆𑀘𑀦𑀯𑀸𑀭𑀓𑁄. 𑀉𑀤𑀓𑀦𑁆𑀢𑀺 𑀳𑀺 𑀔𑁄 𑀜𑀸𑀡𑀁 𑀅𑀲𑁆𑀲𑀸𑀢𑀺 𑀢𑀻𑀭𑁂 𑀞𑀺𑀢𑀲𑁆𑀲 𑀑𑀮𑁄𑀓𑀬𑀢𑁄 𑀏𑀯𑀁 𑀜𑀸𑀡𑀁 𑀪𑀯𑁂𑀬𑁆𑀬. 𑀦 𑀘 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸𑀢𑀺 𑀉𑀤𑀓𑀁 𑀧𑀦 𑀦𑀻𑀳𑀭𑀺𑀢𑁆𑀯𑀸 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀺𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬. 𑀉𑀤𑀧𑀸𑀦𑁂 𑀉𑀤𑀓𑀤𑀲𑁆𑀲𑀦𑀁 𑀯𑀺𑀬 𑀳𑀺 𑀅𑀦𑀸𑀕𑀸𑀫𑀺𑀦𑁄 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀁, 𑀖𑀫𑁆𑀫𑀸𑀪𑀺𑀢𑀢𑁆𑀢𑀧𑀼𑀭𑀺𑀲𑁄 𑀯𑀺𑀬 𑀅𑀦𑀸𑀕𑀸𑀫𑀻, 𑀉𑀤𑀓𑀯𑀸𑀭𑀓𑁄 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑁄, 𑀬𑀣𑀸 𑀖𑀫𑁆𑀫𑀸𑀪𑀺𑀢𑀢𑁆𑀢𑀧𑀼𑀭𑀺𑀲𑁄 𑀉𑀤𑀧𑀸𑀦𑁂 𑀉𑀤𑀓𑀁 𑀧𑀲𑁆𑀲𑀢𑀺. 𑀏𑀯𑀁 𑀅𑀦𑀸𑀕𑀸𑀫𑀻 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦 ‘‘𑀉𑀧𑀭𑀺 𑀅𑀭𑀳𑀢𑁆𑀢𑀨𑀮𑀲𑀫𑀬𑁄 𑀦𑀸𑀫 𑀅𑀢𑁆𑀣𑀻’’𑀢𑀺 𑀚𑀸𑀦𑀸𑀢𑀺. 𑀬𑀣𑀸 𑀧𑀦 𑀲𑁄 𑀧𑀼𑀭𑀺𑀲𑁄 𑀉𑀤𑀓𑀯𑀸𑀭𑀓𑀲𑁆𑀲 𑀦𑀢𑁆𑀣𑀺𑀢𑀸𑀬 𑀉𑀤𑀓𑀁 𑀦𑀻𑀳𑀭𑀺𑀢𑁆𑀯𑀸 𑀓𑀸𑀬𑁂𑀦 𑀨𑀼𑀲𑀺𑀢𑀼𑀁 𑀦 𑀮𑀪𑀢𑀺, 𑀏𑀯𑀁 𑀅𑀦𑀸𑀕𑀸𑀫𑀻 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀦𑀢𑁆𑀣𑀺𑀢𑀸𑀬 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀦𑀺𑀲𑀻𑀤𑀺𑀢𑀼𑀁 𑀦 𑀮𑀪𑀢𑀺. 𑀅𑀝𑁆𑀞𑀫𑀁.

𑁯. 𑀉𑀧𑀬𑀦𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁯. 𑀦𑀯𑀫𑁂 𑀉𑀧𑀬𑀦𑁆𑀢𑁄𑀢𑀺 𑀉𑀤𑀓𑀯𑀟𑁆𑀠𑀦𑀲𑀫𑀬𑁂 𑀉𑀧𑀭𑀺 𑀕𑀘𑁆𑀙𑀦𑁆𑀢𑁄. 𑀫𑀳𑀸𑀦𑀤𑀺𑀬𑁄𑀢𑀺 𑀕𑀗𑁆𑀕𑀸𑀬𑀫𑀼𑀦𑀸𑀤𑀺𑀓𑀸 𑀫𑀳𑀸𑀲𑀭𑀺𑀢𑀸𑀬𑁄. 𑀉𑀧𑀬𑀸𑀧𑁂𑀢𑀻𑀢𑀺 𑀉𑀧𑀭𑀺 𑀬𑀸𑀧𑁂𑀢𑀺, 𑀯𑀟𑁆𑀠𑁂𑀢𑀺 𑀧𑀽𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀸 𑀉𑀧𑀬𑀦𑁆𑀢𑀻𑀢𑀺 𑀅𑀯𑀺𑀚𑁆𑀚𑀸 𑀉𑀧𑀭𑀺 𑀕𑀘𑁆𑀙𑀦𑁆𑀢𑀻 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀓𑁆𑀓𑀼𑀡𑀦𑁆𑀢𑀻. 𑀲𑀗𑁆𑀔𑀸𑀭𑁂 𑀉𑀧𑀬𑀸𑀧𑁂𑀢𑀻𑀢𑀺 𑀲𑀗𑁆𑀔𑀸𑀭𑁂 𑀉𑀧𑀭𑀺 𑀬𑀸𑀧𑁂𑀢𑀺 𑀯𑀟𑁆𑀠𑁂𑀢𑀺. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀧𑀬𑀦𑁆𑀢𑁄𑀢𑀺 𑀅𑀧𑀕𑀘𑁆𑀙𑀦𑁆𑀢𑁄 𑀑𑀲𑀭𑀦𑁆𑀢𑁄. 𑀅𑀯𑀺𑀚𑁆𑀚𑀸 𑀅𑀧𑀬𑀦𑁆𑀢𑀻𑀢𑀺 𑀅𑀯𑀺𑀚𑁆𑀚𑀸 𑀅𑀧𑀕𑀘𑁆𑀙𑀫𑀸𑀦𑀸 𑀑𑀲𑀭𑀫𑀸𑀦𑀸 𑀉𑀧𑀭𑀺 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀗𑁆𑀔𑀸𑀭𑁂 𑀅𑀧𑀬𑀸𑀧𑁂𑀢𑀻𑀢𑀺 𑀲𑀗𑁆𑀔𑀸𑀭𑁂 𑀅𑀧𑀕𑀘𑁆𑀙𑀸𑀧𑁂𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀧𑀤𑁂𑀲𑀼. 𑀦𑀯𑀫𑀁.

𑁧𑁦. 𑀲𑀼𑀲𑀺𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁦. 𑀤𑀲𑀫𑁂 𑀕𑀭𑀼𑀓𑀢𑁄𑀢𑀺 𑀲𑀩𑁆𑀩𑁂𑀳𑀺 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀘𑀺𑀢𑁆𑀢𑁂𑀦 𑀕𑀭𑀼𑀓𑀢𑁄. 𑀫𑀸𑀦𑀺𑀢𑁄𑀢𑀺 𑀫𑀦𑁂𑀦 𑀧𑀺𑀬𑀸𑀬𑀺𑀢𑁄. 𑀧𑀽𑀚𑀺𑀢𑁄𑀢𑀺 𑀘𑀢𑀼𑀧𑀘𑁆𑀘𑀬𑀧𑀽𑀚𑀸𑀬 𑀧𑀽𑀚𑀺𑀢𑁄. 𑀅𑀧𑀘𑀺𑀢𑁄𑀢𑀺 𑀦𑀻𑀘𑀯𑀼𑀢𑁆𑀢𑀺𑀓𑀭𑀡𑁂𑀦 𑀅𑀧𑀘𑀺𑀢𑁄. 𑀲𑀢𑁆𑀣𑀸𑀭𑀜𑁆𑀳𑀺 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀸𑀤𑀻𑀳𑀺 𑀑𑀢𑀭𑀦𑁆𑀢𑀺 𑀫𑀕𑁆𑀕𑀁 𑀤𑁂𑀦𑁆𑀢𑀺, 𑀅𑀁𑀲𑀓𑀽𑀝𑀢𑁄 𑀲𑀸𑀝𑀓𑀁 𑀅𑀧𑀦𑁂𑀦𑁆𑀢𑀺, 𑀆𑀲𑀦𑀢𑁄 𑀯𑀼𑀝𑁆𑀞𑀳𑀦𑁆𑀢𑀺 𑀯𑀦𑁆𑀤𑀦𑁆𑀢𑀺. 𑀏𑀯𑀁 𑀲𑁄 𑀢𑁂𑀳𑀺 𑀅𑀧𑀘𑀺𑀢𑁄 𑀦𑀸𑀫 𑀳𑁄𑀢𑀺. 𑀲𑀼𑀲𑀺𑀫𑁄𑀢𑀺 𑀏𑀯𑀁𑀦𑀸𑀫𑀓𑁄 𑀯𑁂𑀤𑀗𑁆𑀕𑁂𑀲𑀼 𑀓𑀼𑀲𑀮𑁄 𑀧𑀡𑁆𑀟𑀺𑀢𑀧𑀭𑀺𑀩𑁆𑀩𑀸𑀚𑀓𑁄. 𑀏𑀳𑀺 𑀢𑁆𑀯𑀦𑁆𑀢𑀺 𑀢𑁂𑀲𑀁 𑀓𑀺𑀭 𑀏𑀢𑀤𑀳𑁄𑀲𑀺 𑁋 ‘‘𑀲𑀫𑀡𑁄 𑀕𑁄𑀢𑀫𑁄 𑀦 𑀚𑀸𑀢𑀺𑀕𑁄𑀢𑁆𑀢𑀸𑀤𑀻𑀦𑀺 𑀆𑀕𑀫𑁆𑀫 𑀮𑀸𑀪𑀕𑁆𑀕𑀧𑁆𑀧𑀢𑁆𑀢𑁄 𑀚𑀸𑀢𑁄, 𑀓𑀯𑀺𑀲𑁂𑀝𑁆𑀞𑁄 𑀧𑀦𑁂𑀲 𑀉𑀢𑁆𑀢𑀫𑀓𑀯𑀺𑀢𑀸𑀬 𑀲𑀸𑀯𑀓𑀸𑀦𑀁 𑀕𑀦𑁆𑀣𑀁 𑀩𑀦𑁆𑀥𑀺𑀢𑁆𑀯𑀸 𑀤𑁂𑀢𑀺, 𑀢𑀁 𑀢𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀉𑀧𑀝𑁆𑀞𑀸𑀓𑀸𑀦𑀁 𑀉𑀧𑀦𑀺𑀲𑀺𑀦𑁆𑀦𑀓𑀣𑀫𑁆𑀧𑀺 𑀅𑀦𑀼𑀫𑁄𑀤𑀦𑀫𑁆𑀧𑀺 𑀲𑀭𑀪𑀜𑁆𑀜𑀫𑁆𑀧𑀻𑀢𑀺 𑀏𑀯𑀫𑀸𑀤𑀻𑀦𑀺 𑀓𑀣𑁂𑀦𑁆𑀢𑀺, 𑀢𑁂 𑀢𑁂𑀲𑀁 𑀧𑀲𑀦𑁆𑀦𑀸 𑀮𑀸𑀪𑀁 𑀉𑀧𑀲𑀁𑀳𑀭𑀦𑁆𑀢𑀺. 𑀲𑀘𑁂 𑀫𑀬𑀁 𑀬𑀁 𑀲𑀫𑀡𑁄 𑀕𑁄𑀢𑀫𑁄 𑀚𑀸𑀦𑀸𑀢𑀺, 𑀢𑀢𑁄 𑀣𑁄𑀓𑀁 𑀚𑀸𑀦𑁂𑀬𑁆𑀬𑀸𑀫, 𑀅𑀢𑁆𑀢𑀦𑁄 𑀲𑀫𑀬𑀁 𑀢𑀢𑁆𑀣 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀬𑀫𑁆𑀧𑀺 𑀉𑀧𑀝𑁆𑀞𑀸𑀓𑀸𑀦𑀁 𑀓𑀣𑁂𑀬𑁆𑀬𑀸𑀫, 𑀢𑀢𑁄 𑀏𑀢𑁂𑀳𑀺 𑀮𑀸𑀪𑀺𑀢𑀭𑀸 𑀪𑀯𑁂𑀬𑁆𑀬𑀸𑀫. 𑀓𑁄 𑀦𑀼 𑀔𑁄 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀔𑀺𑀧𑁆𑀧𑀫𑁂𑀯 𑀉𑀕𑁆𑀕𑀡𑁆𑀳𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺. 𑀢𑁂 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀲𑀼𑀲𑀺𑀫𑁄 𑀧𑀝𑀺𑀩𑀮𑁄’’𑀢𑀺 𑀤𑀺𑀲𑁆𑀯𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀫𑀸𑀳𑀁𑀲𑀼.

𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀓𑀲𑁆𑀫𑀸 𑀉𑀧𑀲𑀗𑁆𑀓𑀫𑀺? 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺, ‘‘𑀓𑀲𑁆𑀲 𑀦𑀼 𑀔𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀅𑀳𑀁 𑀇𑀫𑀁 𑀥𑀫𑁆𑀫𑀁 𑀔𑀺𑀧𑁆𑀧𑀁 𑀮𑀤𑁆𑀥𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺? 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀫𑀡𑁄 𑀕𑁄𑀢𑀫𑁄 𑀕𑀭𑀼 𑀢𑁂𑀚𑀼𑀲𑁆𑀲𑀤𑁄 𑀦𑀺𑀬𑀫𑀫𑀦𑀼𑀬𑀼𑀢𑁆𑀢𑁄, 𑀦 𑀲𑀓𑁆𑀓𑀸 𑀅𑀓𑀸𑀮𑁂 𑀉𑀧𑀲𑀗𑁆𑀓𑀫𑀺𑀢𑀼𑀁, 𑀅𑀜𑁆𑀜𑁂𑀧𑀺 𑀩𑀳𑀽 𑀔𑀢𑁆𑀢𑀺𑀬𑀸𑀤𑀬𑁄 𑀲𑀫𑀡𑀁 𑀕𑁄𑀢𑀫𑀁 𑀉𑀧𑀲𑀗𑁆𑀓𑀫𑀦𑁆𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀲𑀫𑀬𑁂 𑀦 𑀲𑀓𑁆𑀓𑀸 𑀉𑀧𑀲𑀗𑁆𑀓𑀫𑀺𑀢𑀼𑀁. 𑀲𑀸𑀯𑀓𑁂𑀲𑀼𑀧𑀺𑀲𑁆𑀲 𑀲𑀸𑀭𑀺𑀧𑀼𑀢𑁆𑀢𑁄 𑀫𑀳𑀸𑀧𑀜𑁆𑀜𑁄 𑀯𑀺𑀧𑀲𑁆𑀲𑀦𑀸𑀮𑀓𑁆𑀔𑀡𑀫𑁆𑀳𑀺 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀲𑀫𑀸𑀥𑀺𑀮𑀓𑁆𑀔𑀡𑀲𑁆𑀫𑀺𑀁 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄, 𑀫𑀳𑀸𑀓𑀲𑁆𑀲𑀧𑁄 𑀥𑀼𑀢𑀗𑁆𑀕𑀥𑀭𑁂𑀲𑀼 𑀅𑀦𑀼𑀭𑀼𑀤𑁆𑀥𑁄 𑀤𑀺𑀩𑁆𑀩𑀘𑀓𑁆𑀔𑀼𑀓𑁂𑀲𑀼, 𑀧𑀼𑀡𑁆𑀡𑁄 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄 𑀥𑀫𑁆𑀫𑀓𑀣𑀺𑀓𑁂𑀲𑀼, 𑀉𑀧𑀸𑀮𑀺𑀢𑁆𑀣𑁂𑀭𑁄 𑀯𑀺𑀦𑀬𑀥𑀭𑁂𑀲𑀼 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄, 𑀅𑀬𑀁 𑀧𑀦 𑀆𑀦𑀦𑁆𑀤𑁄 𑀩𑀳𑀼𑀲𑁆𑀲𑀼𑀢𑁄 𑀢𑀺𑀧𑀺𑀝𑀓𑀥𑀭𑁄, 𑀲𑀢𑁆𑀣𑀸𑀧𑀺𑀲𑁆𑀲 𑀢𑀢𑁆𑀣 𑀢𑀢𑁆𑀣 𑀓𑀣𑀺𑀢𑀁 𑀥𑀫𑁆𑀫𑀁 𑀆𑀳𑀭𑀺𑀢𑁆𑀯𑀸 𑀓𑀣𑁂𑀢𑀺, 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄, 𑀅𑀝𑁆𑀞𑀦𑁆𑀦𑀁 𑀯𑀭𑀸𑀦𑀁 𑀮𑀸𑀪𑀻, 𑀘𑀢𑀽𑀳𑀺 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀢𑀲𑁆𑀲 𑀲𑀫𑀻𑀧𑀁 𑀕𑀢𑁄 𑀔𑀺𑀧𑁆𑀧𑀁 𑀥𑀫𑁆𑀫𑀁 𑀮𑀤𑁆𑀥𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀸 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀓𑀲𑁆𑀫𑀸 𑀲𑀬𑀁 𑀅𑀧𑀩𑁆𑀩𑀸𑀚𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺? 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀬𑀁 𑀢𑀺𑀢𑁆𑀣𑀺𑀬𑀲𑀫𑀬𑁂 𑀧𑀸𑀝𑀺𑀬𑁂𑀓𑁆𑀓𑁄 ‘𑀅𑀳𑀁 𑀲𑀢𑁆𑀣𑀸’𑀢𑀺 𑀧𑀝𑀺𑀚𑀸𑀦𑀦𑁆𑀢𑁄 𑀘𑀭𑀢𑀺, 𑀧𑀩𑁆𑀩𑀚𑀺𑀢𑁆𑀯𑀸 𑀲𑀸𑀲𑀦𑀲𑁆𑀲 𑀅𑀮𑀸𑀪𑀸𑀬𑀧𑀺 𑀧𑀭𑀺𑀲𑀓𑁆𑀓𑁂𑀬𑁆𑀬. 𑀦 𑀔𑁄 𑀧𑀦𑀲𑁆𑀲𑀸𑀳𑀁 𑀅𑀚𑁆𑀛𑀸𑀲𑀬𑀁 𑀆𑀚𑀸𑀦𑀸𑀫𑀺, 𑀲𑀢𑁆𑀣𑀸 𑀚𑀸𑀦𑀺𑀲𑁆𑀲𑀢𑀻’’𑀢𑀺. 𑀢𑀲𑁆𑀫𑀸 𑀢𑀁 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀢𑁂𑀦𑀳𑀸𑀦𑀦𑁆𑀤, 𑀲𑀼𑀲𑀺𑀫𑀁 𑀧𑀩𑁆𑀩𑀸𑀚𑁂𑀣𑀸𑀢𑀺 𑀲𑀢𑁆𑀣𑀸 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀧𑀭𑀺𑀩𑁆𑀩𑀸𑀚𑀓𑁄 𑀢𑀺𑀢𑁆𑀣𑀺𑀬𑀲𑀫𑀬𑁂 ‘𑀅𑀳𑀁 𑀧𑀸𑀝𑀺𑀬𑁂𑀓𑁆𑀓𑁄 𑀲𑀢𑁆𑀣𑀸’𑀢𑀺 𑀧𑀝𑀺𑀚𑀸𑀦𑀫𑀸𑀦𑁄 𑀘𑀭𑀢𑀺, ‘𑀇𑀥 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀺𑀢𑀼𑀁 𑀇𑀘𑁆𑀙𑀸𑀫𑀻’𑀢𑀺 𑀓𑀺𑀭 𑀯𑀤𑀢𑀺. 𑀓𑀺𑀁 𑀦𑀼 𑀔𑁄 𑀫𑀬𑀺 𑀧𑀲𑀦𑁆𑀦𑁄, 𑀉𑀤𑀸𑀳𑀼 𑀫𑀬𑁆𑀳𑀁 𑀲𑀸𑀯𑀓𑁂𑀲𑀼, 𑀉𑀤𑀸𑀳𑀼 𑀫𑀬𑁆𑀳𑀁 𑀯𑀸 𑀫𑀫 𑀲𑀸𑀯𑀓𑀸𑀦𑀁 𑀯𑀸 𑀥𑀫𑁆𑀫𑀓𑀣𑀸𑀬 𑀧𑀲𑀦𑁆𑀦𑁄’’𑀢𑀺? 𑀅𑀣𑀲𑁆𑀲 𑀏𑀓𑀝𑁆𑀞𑀸𑀦𑁂𑀧𑀺 𑀧𑀲𑀸𑀤𑀸𑀪𑀸𑀯𑀁 𑀜𑀢𑁆𑀯𑀸, ‘‘𑀅𑀬𑀁 𑀫𑀫 𑀲𑀸𑀲𑀦𑁂 𑀥𑀫𑁆𑀫𑀁 𑀣𑁂𑀦𑁂𑀲𑁆𑀲𑀸𑀫𑀻𑀢𑀺 𑀧𑀩𑁆𑀩𑀚𑀢𑀺. 𑀇𑀢𑀺𑀲𑁆𑀲 𑀆𑀕𑀫𑀦𑀁 𑀅𑀧𑀭𑀺𑀲𑀼𑀤𑁆𑀥𑀁; 𑀦𑀺𑀧𑁆𑀨𑀢𑁆𑀢𑀺 𑀦𑀼 𑀔𑁄 𑀓𑀻𑀤𑀺𑀲𑀸’’𑀢𑀺? 𑀑𑀮𑁄𑀓𑁂𑀦𑁆𑀢𑁄 ‘‘𑀓𑀺𑀜𑁆𑀘𑀸𑀧𑀺 ‘𑀥𑀫𑁆𑀫𑀁 𑀣𑁂𑀦𑁂𑀲𑁆𑀲𑀸𑀫𑀻’𑀢𑀺 𑀧𑀩𑁆𑀩𑀚𑀢𑀺, 𑀓𑀢𑀺𑀧𑀸𑀳𑁂𑀦𑁂𑀯 𑀧𑀦 𑀖𑀝𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 ‘‘𑀢𑁂𑀦𑀳𑀸𑀦𑀦𑁆𑀤, 𑀲𑀼𑀲𑀺𑀫𑀁 𑀧𑀩𑁆𑀩𑀸𑀚𑁂𑀣𑀸’’𑀢𑀺 𑀆𑀳.

𑀅𑀜𑁆𑀜𑀸 𑀩𑁆𑀬𑀸𑀓𑀢𑀸 𑀳𑁄𑀢𑀻𑀢𑀺 𑀢𑁂 𑀓𑀺𑀭 𑀪𑀺𑀓𑁆𑀔𑀽 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀢𑁂𑀫𑀸𑀲𑀁 𑀯𑀲𑁆𑀲𑀁 𑀯𑀲𑀦𑁆𑀢𑀸 𑀢𑀲𑁆𑀫𑀺𑀁𑀬𑁂𑀯 𑀅𑀦𑁆𑀢𑁄𑀢𑁂𑀫𑀸𑀲𑁂 𑀖𑀝𑁂𑀦𑁆𑀢𑀸 𑀯𑀸𑀬𑀫𑀦𑁆𑀢𑀸 𑀅𑀭𑀳𑀢𑁆𑀢𑀁 𑀧𑀝𑀺𑀮𑀪𑀺𑀁𑀲𑀼. 𑀢𑁂 ‘‘𑀧𑀝𑀺𑀮𑀤𑁆𑀥𑀕𑀼𑀡𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑁆𑀲𑀸𑀫𑀸’’𑀢𑀺 𑀧𑀯𑀸𑀭𑀺𑀢𑀧𑀯𑀸𑀭𑀡𑀸 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀧𑀝𑀺𑀮𑀤𑁆𑀥𑀕𑀼𑀡𑀁 𑀆𑀭𑁄𑀘𑁂𑀲𑀼𑀁. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀅𑀜𑁆𑀜𑀸𑀢𑀺 𑀅𑀭𑀳𑀢𑁆𑀢𑀲𑁆𑀲 𑀦𑀸𑀫𑀁. 𑀩𑁆𑀬𑀸𑀓𑀢𑀸𑀢𑀺 𑀆𑀭𑁄𑀘𑀺𑀢𑀸. 𑀅𑀲𑁆𑀲𑁄𑀲𑀻𑀢𑀺 𑀲𑁄 𑀓𑀺𑀭 𑀑𑀳𑀺𑀢𑀲𑁄𑀢𑁄 𑀳𑀼𑀢𑁆𑀯𑀸 𑀢𑁂𑀲𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀞𑀺𑀢𑀝𑁆𑀞𑀸𑀦𑀁 𑀕𑀘𑁆𑀙𑀢𑀺 𑀢𑀁 𑀢𑀁 𑀓𑀣𑀁 𑀲𑀼𑀡𑀺𑀢𑀼𑀓𑀸𑀫𑁄. 𑀬𑁂𑀦 𑀢𑁂 𑀪𑀺𑀓𑁆𑀔𑀽 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀓𑀲𑁆𑀫𑀸 𑀉𑀧𑀲𑀗𑁆𑀓𑀫𑀺? 𑀢𑀁 𑀓𑀺𑀭𑀲𑁆𑀲 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀏𑀢𑀤𑀳𑁄𑀲𑀺 𑁋 ‘‘𑀅𑀜𑁆𑀜𑀸 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀧𑀭𑀫𑀧𑁆𑀧𑀫𑀸𑀡𑀁 𑀲𑀸𑀭𑀪𑀽𑀢𑀸 𑀆𑀘𑀭𑀺𑀬𑀫𑀼𑀝𑁆𑀞𑀺 𑀫𑀜𑁆𑀜𑁂 𑀪𑀯𑀺𑀲𑁆𑀲𑀢𑀺, 𑀧𑀼𑀘𑁆𑀙𑀺𑀢𑁆𑀯𑀸 𑀦𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀫𑀸 𑀉𑀧𑀲𑀗𑁆𑀓𑀫𑀺.

𑀅𑀦𑁂𑀓𑀯𑀺𑀳𑀺𑀢𑀦𑁆𑀢𑀺 𑀅𑀦𑁂𑀓𑀯𑀺𑀥𑀁. 𑀇𑀤𑁆𑀥𑀺𑀯𑀺𑀥𑀦𑁆𑀢𑀺 𑀇𑀤𑁆𑀥𑀺𑀓𑁄𑀝𑁆𑀞𑀸𑀲𑀁. 𑀆𑀯𑀺𑀪𑀸𑀯𑀁 𑀢𑀺𑀭𑁄𑀪𑀸𑀯𑀦𑁆𑀢𑀺 𑀆𑀯𑀺𑀪𑀸𑀯𑀁 𑀕𑀳𑁂𑀢𑁆𑀯𑀸 𑀢𑀺𑀭𑁄𑀪𑀸𑀯𑀁, 𑀢𑀺𑀭𑁄𑀪𑀸𑀯𑀁 𑀕𑀳𑁂𑀢𑁆𑀯𑀸 𑀆𑀯𑀺𑀪𑀸𑀯𑀁 𑀓𑀸𑀢𑀼𑀁 𑀲𑀓𑁆𑀓𑁄𑀣𑀸𑀢𑀺 𑀧𑀼𑀘𑁆𑀙𑀢𑀺. 𑀢𑀺𑀭𑁄𑀓𑀼𑀝𑁆𑀝𑀦𑁆𑀢𑀺 𑀧𑀭𑀓𑀼𑀝𑁆𑀝𑀁. 𑀇𑀢𑀭𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀦𑁆𑀢𑀺 𑀉𑀫𑁆𑀫𑀼𑀚𑁆𑀚𑀦𑀜𑁆𑀘 𑀦𑀺𑀫𑀼𑀚𑁆𑀚𑀦𑀜𑁆𑀘. 𑀧𑀮𑁆𑀮𑀗𑁆𑀓𑁂𑀦𑀸𑀢𑀺 𑀧𑀮𑁆𑀮𑀗𑁆𑀓𑀩𑀦𑁆𑀥𑀦𑁂𑀦. 𑀓𑀫𑀣𑀸𑀢𑀺 𑀦𑀺𑀲𑀻𑀤𑀺𑀢𑀼𑀁 𑀯𑀸 𑀕𑀦𑁆𑀢𑀼𑀁 𑀯𑀸 𑀲𑀓𑁆𑀓𑁄𑀣𑀸𑀢𑀺 𑀧𑀼𑀘𑁆𑀙𑀢𑀺? 𑀧𑀓𑁆𑀔𑀻 𑀲𑀓𑀼𑀡𑁄𑀢𑀺 𑀧𑀓𑁆𑀔𑀬𑀼𑀢𑁆𑀢𑁄 𑀲𑀓𑀼𑀡𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀇𑀫𑀲𑁆𑀲 𑀇𑀤𑁆𑀥𑀺𑀯𑀺𑀥𑀲𑁆𑀲, 𑀇𑀢𑁄 𑀧𑀭𑁂𑀲𑀁 𑀤𑀺𑀩𑁆𑀩𑀲𑁄𑀢𑀸𑀤𑀻𑀦𑀜𑁆𑀘 𑀯𑀡𑁆𑀡𑀦𑀸𑀦𑀬𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀲𑀦𑁆𑀢𑀸 𑀯𑀺𑀫𑁄𑀓𑁆𑀔𑀸𑀢𑀺 𑀅𑀗𑁆𑀕𑀲𑀦𑁆𑀢𑀢𑀸𑀬 𑀘𑁂𑀯 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬 𑀘 𑀲𑀦𑁆𑀢𑀸 𑀆𑀭𑀼𑀧𑁆𑀧𑀯𑀺𑀫𑁄𑀓𑁆𑀔𑀸. 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸𑀢𑀺 𑀦𑀸𑀫𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀧𑀝𑀺𑀮𑀪𑀺𑀢𑁆𑀯𑀸. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀸 𑀔𑁄 𑀫𑀬𑀁, 𑀆𑀯𑀼𑀲𑁄𑀢𑀺, 𑀆𑀯𑀼𑀲𑁄, 𑀫𑀬𑀁 𑀦𑀺𑀚𑁆𑀛𑀸𑀦𑀓𑀸 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸 𑀧𑀜𑁆𑀜𑀸𑀫𑀢𑁆𑀢𑁂𑀦𑁂𑀯 𑀯𑀺𑀫𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀆𑀚𑀸𑀦𑁂𑀬𑁆𑀬𑀸𑀲𑀺 𑀯𑀸 𑀢𑁆𑀯𑀁, 𑀆𑀯𑀼𑀲𑁄 𑀲𑀼𑀲𑀺𑀫, 𑀦 𑀯𑀸 𑀢𑁆𑀯𑀁 𑀆𑀚𑀸𑀦𑁂𑀬𑁆𑀬𑀸𑀲𑀻𑀢𑀺 𑀓𑀲𑁆𑀫𑀸 𑀏𑀯𑀫𑀸𑀳𑀁𑀲𑀼? 𑀏𑀯𑀁 𑀓𑀺𑀭 𑀦𑁂𑀲𑀁 𑀅𑀳𑁄𑀲𑀺 𑁋 ‘‘𑀫𑀬𑀁 𑀇𑀫𑀲𑁆𑀲 𑀅𑀚𑁆𑀛𑀸𑀲𑀬𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀸𑀫, 𑀤𑀲𑀩𑀮𑀁 𑀧𑀦 𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀓𑁆𑀓𑀗𑁆𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀁, 𑀢𑀁 𑀧𑀞𑀫𑀢𑀭𑀁 𑀉𑀧𑁆𑀧𑀚𑁆𑀚𑀢𑀺. 𑀦𑀺𑀩𑁆𑀩𑀸𑀦𑁂 𑀜𑀸𑀡𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀬 𑀘𑀺𑀡𑁆𑀡𑀦𑁆𑀢𑁂 𑀧𑀯𑀢𑁆𑀢𑀫𑀕𑁆𑀕𑀜𑀸𑀡𑀁, 𑀢𑀁 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀏𑀯𑀫𑀸𑀳.

𑀆𑀚𑀸𑀦𑁂𑀬𑁆𑀬𑀸𑀲𑀺 𑀯𑀸𑀢𑀺𑀆𑀤𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁? 𑀯𑀺𑀦𑀸𑀧𑀺 𑀲𑀫𑀸𑀥𑀺𑀁 𑀏𑀯𑀁 𑀜𑀸𑀡𑀼𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁. 𑀇𑀤𑀜𑁆𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀼𑀲𑀺𑀫, 𑀫𑀕𑁆𑀕𑁄 𑀯𑀸 𑀨𑀮𑀁 𑀯𑀸 𑀦 𑀲𑀫𑀸𑀥𑀺𑀦𑀺𑀲𑁆𑀲𑀦𑁆𑀤𑁄, 𑀦 𑀲𑀫𑀸𑀥𑀺𑀆𑀦𑀺𑀲𑀁𑀲𑁄, 𑀦 𑀲𑀫𑀸𑀥𑀺𑀲𑁆𑀲 𑀦𑀺𑀧𑁆𑀨𑀢𑁆𑀢𑀺, 𑀯𑀺𑀧𑀲𑁆𑀲𑀦𑀸𑀬 𑀧𑀦𑁂𑀲𑁄 𑀦𑀺𑀲𑁆𑀲𑀦𑁆𑀤𑁄, 𑀯𑀺𑀧𑀲𑁆𑀲𑀦𑀸𑀬 𑀆𑀦𑀺𑀲𑀁𑀲𑁄, 𑀯𑀺𑀧𑀲𑁆𑀲𑀦𑀸𑀬 𑀦𑀺𑀧𑁆𑀨𑀢𑁆𑀢𑀺, 𑀢𑀲𑁆𑀫𑀸 𑀚𑀸𑀦𑁂𑀬𑁆𑀬𑀸𑀲𑀺 𑀯𑀸 𑀢𑁆𑀯𑀁, 𑀦 𑀯𑀸 𑀢𑁆𑀯𑀁 𑀚𑀸𑀦𑁂𑀬𑁆𑀬𑀸𑀲𑀺, 𑀅𑀣 𑀔𑁄 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁 𑀧𑀼𑀩𑁆𑀩𑁂, 𑀧𑀘𑁆𑀙𑀸 𑀦𑀺𑀩𑁆𑀩𑀸𑀦𑁂 𑀜𑀸𑀡𑀦𑁆𑀢𑀺.

𑀇𑀤𑀸𑀦𑀺𑀲𑁆𑀲 𑀧𑀝𑀺𑀯𑁂𑀥𑀪𑀩𑁆𑀩𑀢𑀁 𑀜𑀢𑁆𑀯𑀸 𑀢𑁂𑀧𑀭𑀺𑀯𑀝𑁆𑀝𑀁 𑀥𑀫𑁆𑀫𑀤𑁂𑀲𑀦𑀁 𑀤𑁂𑀲𑁂𑀦𑁆𑀢𑁄 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀼𑀲𑀺𑀫? 𑀭𑀽𑀧𑀁 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸𑀢𑀺𑀆𑀤𑀺𑀫𑀸𑀳? 𑀢𑁂 𑀧𑀭𑀺𑀯𑀝𑁆𑀝𑀤𑁂𑀲𑀦𑀸𑀯𑀲𑀸𑀦𑁂 𑀧𑀦 𑀣𑁂𑀭𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀇𑀤𑀸𑀦𑀺𑀲𑁆𑀲 𑀅𑀦𑀼𑀬𑁄𑀕𑀁 𑀆𑀭𑁄𑀧𑁂𑀦𑁆𑀢𑁄 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺, 𑀲𑀼𑀲𑀺𑀫, 𑀧𑀲𑁆𑀲𑀲𑀻𑀢𑀺𑀆𑀤𑀺𑀫𑀸𑀳. 𑀅𑀧𑀺 𑀧𑀦 𑀢𑁆𑀯𑀁, 𑀲𑀼𑀲𑀺𑀫𑀸𑀢𑀺 𑀇𑀤𑀁 𑀓𑀲𑁆𑀫𑀸 𑀆𑀭𑀪𑀺? 𑀦𑀺𑀚𑁆𑀛𑀸𑀦𑀓𑀸𑀦𑀁 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀪𑀺𑀓𑁆𑀔𑀽𑀦𑀁 𑀧𑀸𑀓𑀝𑀓𑀭𑀡𑀢𑁆𑀣𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀦 𑀓𑁂𑀯𑀮𑀁 𑀢𑁆𑀯𑀫𑁂𑀯 𑀦𑀺𑀚𑁆𑀛𑀸𑀦𑀓𑁄 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑁄, 𑀏𑀢𑁂𑀧𑀺 𑀪𑀺𑀓𑁆𑀔𑀽 𑀏𑀯𑀭𑀽𑀧𑀸𑀬𑁂𑀯𑀸𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀧𑀸𑀓𑀝𑀫𑁂𑀯𑀸𑀢𑀺. 𑀤𑀲𑀫𑀁.

𑀫𑀳𑀸𑀯𑀕𑁆𑀕𑁄 𑀲𑀢𑁆𑀢𑀫𑁄.

𑁮. 𑀲𑀫𑀡𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁄

𑁧. 𑀚𑀭𑀸𑀫𑀭𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁧-𑁭𑁨. 𑀲𑀫𑀡𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁂 𑀚𑀭𑀸𑀫𑀭𑀡𑀸𑀤𑀻𑀲𑀼 𑀏𑀓𑁂𑀓𑀧𑀤𑀯𑀲𑁂𑀦 𑀏𑀓𑁂𑀓𑀁 𑀓𑀢𑁆𑀯𑀸 𑀏𑀓𑀸𑀤𑀲 𑀲𑀼𑀢𑁆𑀢𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯𑀸𑀢𑀺.

𑀲𑀫𑀡𑀩𑁆𑀭𑀸𑀳𑁆𑀫𑀡𑀯𑀕𑁆𑀕𑁄 𑀅𑀝𑁆𑀞𑀫𑁄.

𑁯. 𑀅𑀦𑁆𑀢𑀭𑀧𑁂𑀬𑁆𑀬𑀸𑀮𑀁

𑁧. 𑀲𑀢𑁆𑀣𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁩. 𑀇𑀢𑁄 𑀧𑀭𑀁 ‘‘𑀲𑀢𑁆𑀣𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑁄’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀤𑁆𑀯𑀸𑀤𑀲 𑀅𑀦𑁆𑀢𑀭𑀧𑁂𑀬𑁆𑀬𑀸𑀮𑀯𑀕𑁆𑀕𑀸 𑀦𑀸𑀫 𑀳𑁄𑀦𑁆𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀢𑀣𑀸 𑀢𑀣𑀸 𑀩𑀼𑀚𑁆𑀛𑀦𑀓𑀸𑀦𑀁 𑀯𑁂𑀦𑁂𑀬𑁆𑀬𑀧𑀼𑀕𑁆𑀕𑀮𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀯𑀼𑀢𑁆𑀢𑀸. 𑀢𑀢𑁆𑀣 𑀲𑀢𑁆𑀣𑀸𑀢𑀺 𑀩𑀼𑀤𑁆𑀥𑁄 𑀯𑀸 𑀳𑁄𑀢𑀼 𑀲𑀸𑀯𑀓𑁄 𑀯𑀸, 𑀬𑀁 𑀦𑀺𑀲𑁆𑀲𑀸𑀬 𑀫𑀕𑁆𑀕𑀜𑀸𑀡𑀁 𑀮𑀪𑀢𑀺, 𑀅𑀬𑀁 𑀲𑀢𑁆𑀣𑀸 𑀦𑀸𑀫, 𑀲𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄. 𑀲𑀺𑀓𑁆𑀔𑀸 𑀓𑀭𑀡𑀻𑀬𑀸𑀢𑀺 𑀢𑀺𑀯𑀺𑀥𑀸𑀧𑀺 𑀲𑀺𑀓𑁆𑀔𑀸 𑀓𑀸𑀢𑀩𑁆𑀩𑀸. 𑀬𑁄𑀕𑀸𑀤𑀻𑀲𑀼 𑀬𑁄𑀕𑁄𑀢𑀺 𑀧𑀬𑁄𑀕𑁄. 𑀙𑀦𑁆𑀤𑁄𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀓𑀼𑀲𑀮𑀘𑁆𑀙𑀦𑁆𑀤𑁄. 𑀉𑀲𑁆𑀲𑁄𑀴𑁆𑀳𑀻𑀢𑀺 𑀲𑀩𑁆𑀩𑀲𑀳𑀁 𑀅𑀥𑀺𑀫𑀢𑁆𑀢𑀯𑀻𑀭𑀺𑀬𑀁. 𑀅𑀧𑁆𑀧𑀝𑀺𑀯𑀸𑀦𑀻𑀢𑀺 𑀅𑀦𑀺𑀯𑀢𑁆𑀢𑀦𑀸. 𑀆𑀢𑀧𑁆𑀧𑀦𑁆𑀢𑀺 𑀓𑀺𑀮𑁂𑀲𑀢𑀸𑀧𑀦𑀯𑀻𑀭𑀺𑀬𑀫𑁂𑀯. 𑀲𑀸𑀢𑀘𑁆𑀘𑀦𑁆𑀢𑀺 𑀲𑀢𑀢𑀓𑀺𑀭𑀺𑀬𑀁. 𑀲𑀢𑀻𑀢𑀺 𑀚𑀭𑀸𑀫𑀭𑀡𑀸𑀤𑀺𑀯𑀲𑁂𑀦 𑀘𑀢𑀼𑀲𑀘𑁆𑀘𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀢𑀺. 𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀢𑀸𑀤𑀺𑀲𑀫𑁂𑀯 𑀜𑀸𑀡𑀁. 𑀅𑀧𑁆𑀧𑀫𑀸𑀤𑁄𑀢𑀺 𑀲𑀘𑁆𑀘𑀪𑀸𑀯𑀦𑀸𑀬 𑀅𑀧𑁆𑀧𑀫𑀸𑀤𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀦𑁆𑀢𑀭𑀧𑁂𑀬𑁆𑀬𑀸𑀮𑁄 𑀦𑀯𑀫𑁄.

𑀦𑀺𑀤𑀸𑀦𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀪𑀺𑀲𑀫𑀬𑀲𑀁𑀬𑀼𑀢𑁆𑀢𑀁

𑁧. 𑀦𑀔𑀲𑀺𑀔𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁪. 𑀅𑀪𑀺𑀲𑀫𑀬𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀦𑀔𑀲𑀺𑀔𑀸𑀬𑀦𑁆𑀢𑀺 𑀫𑀁𑀲𑀝𑁆𑀞𑀸𑀦𑁂𑀦 𑀯𑀺𑀫𑀼𑀢𑁆𑀢𑁂 𑀦𑀔𑀕𑁆𑀕𑁂. 𑀦𑀔𑀲𑀺𑀔𑀸 𑀘 𑀦𑀸𑀫 𑀮𑁄𑀓𑀺𑀬𑀸𑀦𑀁 𑀫𑀳𑀢𑀻𑀧𑀺 𑀳𑁄𑀢𑀺, 𑀲𑀢𑁆𑀣𑀼 𑀧𑀦 𑀭𑀢𑁆𑀢𑀼𑀧𑁆𑀧𑀮𑀧𑀢𑁆𑀢𑀓𑁄𑀝𑀺 𑀯𑀺𑀬 𑀲𑀼𑀔𑀼𑀫𑀸. 𑀓𑀣𑀁 𑀧𑀦𑁂𑀢𑁆𑀣 𑀧𑀁𑀲𑀼 𑀧𑀢𑀺𑀝𑁆𑀞𑀺𑀢𑁄𑀢𑀺? 𑀅𑀥𑀺𑀝𑁆𑀞𑀸𑀦𑀩𑀮𑁂𑀦. 𑀪𑀕𑀯𑀢𑀸 𑀳𑀺 𑀅𑀢𑁆𑀣𑀁 𑀜𑀸𑀧𑁂𑀢𑀼𑀓𑀸𑀫𑁂𑀦 𑀅𑀥𑀺𑀝𑁆𑀞𑀸𑀦𑀩𑀮𑁂𑀦 𑀢𑀢𑁆𑀣 𑀧𑀢𑀺𑀝𑁆𑀞𑀸𑀧𑀺𑀢𑁄. 𑀲𑀢𑀺𑀫𑀁 𑀓𑀮𑀦𑁆𑀢𑀺 𑀫𑀳𑀸𑀧𑀣𑀯𑀺𑀬𑀸 𑀧𑀁𑀲𑀼𑀁 𑀲𑀢𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀢𑀢𑁄 𑀏𑀓𑀓𑁄𑀝𑁆𑀞𑀸𑀲𑀁. 𑀧𑀭𑀢𑁄𑀧𑀺 𑀏𑀲𑁂𑀯 𑀦𑀬𑁄. 𑀅𑀪𑀺𑀲𑀫𑁂𑀢𑀸𑀯𑀺𑀦𑁄𑀢𑀺 𑀧𑀜𑁆𑀜𑀸𑀬 𑀅𑀭𑀺𑀬𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁂𑀢𑁆𑀯𑀸 𑀞𑀺𑀢𑀲𑁆𑀲. 𑀧𑀼𑀭𑀺𑀫𑀁 𑀤𑀼𑀓𑁆𑀔𑀓𑁆𑀔𑀦𑁆𑀥𑀁 𑀧𑀭𑀺𑀓𑁆𑀔𑀻𑀡𑀁 𑀧𑀭𑀺𑀬𑀸𑀤𑀺𑀡𑁆𑀡𑀁 𑀉𑀧𑀦𑀺𑀥𑀸𑀬𑀸𑀢𑀺 𑀏𑀢𑀤𑁂𑀯 𑀩𑀳𑀼𑀢𑀭𑀁 𑀤𑀼𑀓𑁆𑀔𑀁, 𑀬𑀤𑀺𑀤𑀁 𑀧𑀭𑀺𑀓𑁆𑀔𑀻𑀡𑀦𑁆𑀢𑀺 𑀏𑀯𑀁 𑀧𑀞𑀫𑀁 𑀯𑀼𑀢𑁆𑀢𑀁 𑀤𑀼𑀓𑁆𑀔𑀓𑁆𑀔𑀦𑁆𑀥𑀁 𑀉𑀧𑀦𑀺𑀥𑀸𑀬, 𑀜𑀸𑀡𑁂𑀦 𑀢𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀞𑀧𑁂𑀢𑁆𑀯𑀸 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀓𑀢𑀫𑀁 𑀧𑀦𑁂𑀢𑁆𑀣 𑀧𑀼𑀭𑀺𑀫𑀤𑀼𑀓𑁆𑀔𑀁 𑀦𑀸𑀫? 𑀬𑀁 𑀧𑀭𑀺𑀓𑁆𑀔𑀻𑀡𑀁. 𑀓𑀢𑀫𑀁 𑀧𑀦 𑀧𑀭𑀺𑀓𑁆𑀔𑀻𑀡𑀁? 𑀬𑀁 𑀧𑀞𑀫𑀫𑀕𑁆𑀕𑀲𑁆𑀲 𑀅𑀪𑀸𑀯𑀺𑀢𑀢𑁆𑀢𑀸 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀓𑀢𑀫𑀁 𑀧𑀦 𑀉𑀧𑀦𑀺𑀥𑀸𑀬? 𑀬𑀁 𑀲𑀢𑁆𑀢𑀲𑀼 𑀅𑀢𑁆𑀢𑀪𑀸𑀯𑁂𑀲𑀼 𑀅𑀧𑀸𑀬𑁂 𑀅𑀝𑁆𑀞𑀫𑀜𑁆𑀘 𑀧𑀝𑀺𑀲𑀦𑁆𑀥𑀺𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀲𑀩𑁆𑀩𑀁 𑀢𑀁 𑀧𑀭𑀺𑀓𑁆𑀔𑀻𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀢𑁆𑀢𑀓𑁆𑀔𑀢𑁆𑀢𑀼𑀦𑁆𑀢𑀺 𑀲𑀢𑁆𑀢 𑀯𑀸𑀭𑁂, 𑀲𑀢𑁆𑀢𑀲𑀼 𑀅𑀢𑁆𑀢𑀪𑀸𑀯𑁂𑀲𑀽𑀢𑀺 𑀅𑀢𑁆𑀣𑁄. 𑀧𑀭𑀫𑀢𑀸𑀢𑀺 𑀇𑀤𑀫𑀲𑁆𑀲 𑀧𑀭𑀁 𑀧𑀫𑀸𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀫𑀳𑀢𑁆𑀣𑀺𑀬𑁄𑀢𑀺 𑀫𑀳𑀢𑁄 𑀅𑀢𑁆𑀣𑀲𑁆𑀲 𑀦𑀺𑀧𑁆𑀨𑀸𑀤𑀓𑁄. 𑀧𑀞𑀫𑀁.

𑁨. 𑀧𑁄𑀓𑁆𑀔𑀭𑀡𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁫. 𑀤𑀼𑀢𑀺𑀬𑁂 𑀧𑁄𑀓𑁆𑀔𑀭𑀡𑀻𑀢𑀺 𑀯𑀸𑀧𑀻. 𑀉𑀩𑁆𑀩𑁂𑀥𑁂𑀦𑀸𑀢𑀺 𑀕𑀫𑁆𑀪𑀻𑀭𑀢𑀸𑀬. 𑀲𑀫𑀢𑀺𑀢𑁆𑀢𑀺𑀓𑀸𑀢𑀺 𑀫𑀼𑀔𑀯𑀝𑁆𑀝𑀺𑀲𑀫𑀸. 𑀓𑀸𑀓𑀧𑁂𑀬𑁆𑀬𑀸𑀢𑀺 𑀲𑀓𑁆𑀓𑀸 𑀳𑁄𑀢𑀺 𑀢𑀻𑀭𑁂 𑀞𑀺𑀢𑁂𑀦 𑀓𑀸𑀓𑁂𑀦 𑀧𑀓𑀢𑀺𑀬𑀸𑀧𑀺 𑀫𑀼𑀔𑀢𑀼𑀡𑁆𑀟𑀺𑀓𑀁 𑀑𑀢𑀸𑀭𑁂𑀢𑁆𑀯𑀸 𑀧𑀸𑀢𑀼𑀁. 𑀤𑀼𑀢𑀺𑀬𑀁.

𑁩. 𑀲𑀁𑀪𑁂𑀚𑁆𑀚𑀉𑀤𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁬-𑁭𑁭. 𑀢𑀢𑀺𑀬𑁂 𑀬𑀢𑁆𑀣𑀺𑀫𑀸𑀢𑀺 𑀬𑀲𑁆𑀫𑀺𑀁 𑀲𑀫𑁆𑀪𑀺𑀚𑁆𑀚𑀝𑁆𑀞𑀸𑀦𑁂 𑀇𑀫𑀸. 𑀲𑀁𑀲𑀦𑁆𑀤𑀦𑁆𑀢𑀻𑀢𑀺 𑀲𑀫𑀸𑀕𑀦𑁆𑀢𑁆𑀯𑀸 𑀲𑀦𑁆𑀤𑀦𑁆𑀢𑀺. 𑀲𑀫𑁂𑀦𑁆𑀢𑀻𑀢𑀺 𑀲𑀫𑀸𑀕𑀘𑁆𑀙𑀦𑁆𑀢𑀺. 𑀤𑁆𑀯𑁂 𑀯𑀸 𑀢𑀺 𑀯𑀸𑀢𑀺 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸. 𑀉𑀤𑀓𑀨𑀼𑀲𑀺𑀢𑀸𑀦𑀻𑀢𑀺 𑀉𑀤𑀓𑀩𑀺𑀦𑁆𑀤𑀽𑀦𑀺. 𑀲𑀁𑀪𑁂𑀚𑁆𑀚𑀉𑀤𑀓𑀦𑁆𑀢𑀺 𑀅𑀜𑁆𑀜𑀸𑀳𑀺 𑀦𑀤𑀻𑀳𑀺 𑀲𑀤𑁆𑀥𑀺𑀁 𑀲𑀫𑁆𑀪𑀺𑀦𑁆𑀦𑀝𑁆𑀞𑀸𑀦𑁂 𑀉𑀤𑀓𑀁. 𑀘𑀢𑀼𑀢𑁆𑀣𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺.

𑁫. 𑀧𑀣𑀯𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁮-𑁮𑁪. 𑀧𑀜𑁆𑀘𑀫𑁂 𑀫𑀳𑀸𑀧𑀣𑀯𑀺𑀬𑀸𑀢𑀺 𑀘𑀓𑁆𑀓𑀯𑀸𑀴𑀩𑁆𑀪𑀦𑁆𑀢𑀭𑀸𑀬 𑀫𑀳𑀸𑀧𑀣𑀯𑀺𑀬𑀸 𑀉𑀤𑁆𑀥𑀭𑀺𑀢𑁆𑀯𑀸. 𑀓𑁄𑀮𑀝𑁆𑀞𑀺𑀫𑀢𑁆𑀢𑀺𑀬𑁄𑀢𑀺 𑀧𑀤𑀭𑀝𑁆𑀞𑀺𑀧𑀫𑀸𑀡𑀸. 𑀕𑀼𑀴𑀺𑀓𑀸𑀢𑀺 𑀫𑀢𑁆𑀢𑀺𑀓𑀕𑀼𑀴𑀺𑀓𑀸. 𑀉𑀧𑀦𑀺𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀞𑀧𑁂𑀬𑁆𑀬. 𑀙𑀝𑁆𑀞𑀸𑀤𑀻𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀺𑀬𑁄𑀲𑀸𑀦𑁂 𑀧𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀲𑀫𑀡𑀩𑁆𑀭𑀸𑀳𑁆𑀫𑀡𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀅𑀥𑀺𑀕𑀫𑁄𑀢𑀺 𑀩𑀸𑀳𑀺𑀭𑀓𑀸𑀦𑀁 𑀲𑀩𑁆𑀩𑁄𑀧𑀺 𑀕𑀼𑀡𑀸𑀥𑀺𑀕𑀫𑁄 𑀧𑀞𑀫𑀫𑀕𑁆𑀕𑁂𑀦 𑀅𑀥𑀺𑀕𑀢𑀕𑀼𑀡𑀸𑀦𑀁 𑀲𑀢𑀪𑀸𑀕𑀫𑁆𑀧𑀺 𑀲𑀳𑀲𑁆𑀲𑀪𑀸𑀕𑀫𑁆𑀧𑀺 𑀲𑀢𑀲𑀳𑀲𑁆𑀲𑀪𑀸𑀕𑀫𑁆𑀧𑀺 𑀦 𑀉𑀧𑀕𑀘𑁆𑀙𑀢𑀻𑀢𑀺. 𑀧𑀜𑁆𑀘𑀫𑀸𑀤𑀻𑀦𑀺.

𑀅𑀪𑀺𑀲𑀫𑀬𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀥𑀸𑀢𑀼𑀲𑀁𑀬𑀼𑀢𑁆𑀢𑀁

𑁧. 𑀦𑀸𑀦𑀢𑁆𑀢𑀯𑀕𑁆𑀕𑁄

𑁧.𑀥𑀸𑀢𑀼𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁫. 𑀥𑀸𑀢𑀼𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀦𑀺𑀲𑁆𑀲𑀢𑁆𑀢𑀝𑁆𑀞𑀲𑀼𑀜𑁆𑀜𑀢𑀝𑁆𑀞𑀲𑀗𑁆𑀔𑀸𑀢𑁂𑀦 𑀲𑀪𑀸𑀯𑀝𑁆𑀞𑁂𑀦 𑀥𑀸𑀢𑀽𑀢𑀺 𑀮𑀤𑁆𑀥𑀦𑀸𑀫𑀸𑀦𑀁 𑀥𑀫𑁆𑀫𑀸𑀦𑀁 𑀦𑀸𑀦𑀸𑀲𑀪𑀸𑀯𑁄 𑀥𑀸𑀢𑀼𑀦𑀸𑀦𑀢𑁆𑀢𑀁. 𑀘𑀓𑁆𑀔𑀼𑀥𑀸𑀢𑀽𑀢𑀺𑀆𑀤𑀻𑀲𑀼 𑀘𑀓𑁆𑀔𑀼𑀧𑀲𑀸𑀤𑁄 𑀘𑀓𑁆𑀔𑀼𑀥𑀸𑀢𑀼, 𑀭𑀽𑀧𑀸𑀭𑀫𑁆𑀫𑀡𑀁 𑀭𑀽𑀧𑀥𑀸𑀢𑀼, 𑀘𑀓𑁆𑀔𑀼𑀧𑀲𑀸𑀤𑀯𑀢𑁆𑀣𑀼𑀓𑀁 𑀘𑀺𑀢𑁆𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼. 𑀲𑁄𑀢𑀧𑀲𑀸𑀤𑁄 𑀲𑁄𑀢𑀥𑀸𑀢𑀼, 𑀲𑀤𑁆𑀤𑀸𑀭𑀫𑁆𑀫𑀡𑀁 𑀲𑀤𑁆𑀤𑀥𑀸𑀢𑀼, 𑀲𑁄𑀢𑀧𑀲𑀸𑀤𑀯𑀢𑁆𑀣𑀼𑀓𑀁 𑀘𑀺𑀢𑁆𑀢𑀁 𑀲𑁄𑀢𑀯𑀺𑀜𑁆𑀜𑀸𑀡𑀥𑀸𑀢𑀼. 𑀖𑀸𑀦𑀧𑀲𑀸𑀤𑁄 𑀖𑀸𑀦𑀥𑀸𑀢𑀼, 𑀕𑀦𑁆𑀥𑀸𑀭𑀫𑁆𑀫𑀡𑀁 𑀕𑀦𑁆𑀥𑀥𑀸𑀢𑀼, 𑀖𑀸𑀦𑀧𑀲𑀸𑀤𑀯𑀢𑁆𑀣𑀼𑀓𑀁 𑀘𑀺𑀢𑁆𑀢𑀁 𑀖𑀸𑀦𑀯𑀺𑀜𑁆𑀜𑀸𑀡𑀥𑀸𑀢𑀼. 𑀚𑀺𑀯𑁆𑀳𑀸𑀧𑀲𑀸𑀤𑁄 𑀚𑀺𑀯𑁆𑀳𑀸𑀥𑀸𑀢𑀼, 𑀭𑀲𑀸𑀭𑀫𑁆𑀫𑀡𑀁 𑀭𑀲𑀥𑀸𑀢𑀼, 𑀚𑀺𑀯𑁆𑀳𑀸𑀧𑀲𑀸𑀤𑀯𑀢𑁆𑀣𑀼𑀓𑀁 𑀘𑀺𑀢𑁆𑀢𑀁 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀥𑀸𑀢𑀼. 𑀓𑀸𑀬𑀧𑀲𑀸𑀤𑁄 𑀓𑀸𑀬𑀥𑀸𑀢𑀼, 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀁 𑀨𑁄𑀝𑁆𑀞𑀩𑁆𑀩𑀥𑀸𑀢𑀼, 𑀓𑀸𑀬𑀧𑀲𑀸𑀤𑀯𑀢𑁆𑀣𑀼𑀓𑀁 𑀘𑀺𑀢𑁆𑀢𑀁 𑀓𑀸𑀬𑀯𑀺𑀜𑁆𑀜𑀸𑀡𑀥𑀸𑀢𑀼. 𑀢𑀺𑀲𑁆𑀲𑁄 𑀫𑀦𑁄𑀥𑀸𑀢𑀼𑀬𑁄 𑀫𑀦𑁄𑀥𑀸𑀢𑀼, 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀔𑀦𑁆𑀥𑀸 𑀲𑀼𑀔𑀼𑀫𑀭𑀽𑀧𑀸𑀦𑀺 𑀦𑀺𑀩𑁆𑀩𑀸𑀦𑀜𑁆𑀘 𑀥𑀫𑁆𑀫𑀥𑀸𑀢𑀼, 𑀲𑀩𑁆𑀩𑀫𑁆𑀧𑀺 𑀫𑀦𑁄𑀯𑀺𑀜𑁆𑀜𑀸𑀡𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺. 𑀏𑀢𑁆𑀣 𑀘 𑀲𑁄𑀴𑀲 𑀥𑀸𑀢𑀼𑀬𑁄 𑀓𑀸𑀫𑀸𑀯𑀘𑀭𑀸, 𑀅𑀯𑀲𑀸𑀦𑁂 𑀤𑁆𑀯𑁂 𑀘𑀢𑀼𑀪𑀽𑀫𑀺𑀓𑀸𑀢𑀺. 𑀧𑀞𑀫𑀁.

𑁨. 𑀨𑀲𑁆𑀲𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁬. 𑀤𑀼𑀢𑀺𑀬𑁂 𑀉𑀧𑁆𑀧𑀚𑁆𑀚𑀢𑀺 𑀨𑀲𑁆𑀲𑀦𑀸𑀦𑀢𑁆𑀢𑀦𑁆𑀢𑀺 𑀦𑀸𑀦𑀸𑀲𑀪𑀸𑀯𑁄 𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀢𑁆𑀣 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀬𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀸, 𑀫𑀦𑁄𑀲𑀫𑁆𑀨𑀲𑁆𑀲𑁄 𑀫𑀦𑁄𑀤𑁆𑀯𑀸𑀭𑁂 𑀧𑀞𑀫𑀚𑀯𑀦𑀲𑀫𑁆𑀧𑀬𑀼𑀢𑁆𑀢𑁄, 𑀢𑀲𑁆𑀫𑀸. 𑀫𑀦𑁄𑀥𑀸𑀢𑀼𑀁 𑀧𑀝𑀺𑀘𑁆𑀘𑀸𑀢𑀺 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀓𑀺𑀭𑀺𑀬𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀁 𑀧𑀝𑀺𑀘𑁆𑀘 𑀧𑀞𑀫𑀚𑀯𑀦𑀲𑀫𑁆𑀨𑀲𑁆𑀲𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀤𑀼𑀢𑀺𑀬𑀁.

𑁩. 𑀦𑁄𑀨𑀲𑁆𑀲𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁭. 𑀢𑀢𑀺𑀬𑁂 𑀦𑁄 𑀫𑀦𑁄𑀲𑀫𑁆𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀫𑀦𑁄𑀥𑀸𑀢𑀽𑀢𑀺 𑀫𑀦𑁄𑀤𑁆𑀯𑀸𑀭𑁂 𑀧𑀞𑀫𑀚𑀯𑀦𑀲𑀫𑁆𑀧𑀬𑀼𑀢𑁆𑀢𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀆𑀯𑀚𑁆𑀚𑀦𑀓𑀺𑀭𑀺𑀬𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀦𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀢𑀺𑀬𑀁.

𑁪. 𑀯𑁂𑀤𑀦𑀸𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁮. 𑀘𑀢𑀼𑀢𑁆𑀣𑁂 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀫𑀦𑁄𑀥𑀸𑀢𑀼𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀸𑀧𑀺 𑀢𑀲𑁆𑀫𑀺𑀁 𑀤𑁆𑀯𑀸𑀭𑁂 𑀯𑁂𑀤𑀦𑀸 𑀯𑀢𑁆𑀢𑁂𑀬𑁆𑀬𑀼𑀁, 𑀦𑀺𑀩𑁆𑀩𑀢𑁆𑀢𑀺𑀨𑀸𑀲𑀼𑀓𑀢𑁆𑀣𑀁 𑀧𑀦 𑀅𑀦𑀦𑁆𑀢𑀭𑀁 𑀲𑀫𑁆𑀧𑀝𑀺𑀘𑁆𑀙𑀦𑀯𑁂𑀤𑀦𑀫𑁂𑀯 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀼𑀢𑁆𑀢𑀁. 𑀫𑀦𑁄𑀲𑀫𑁆𑀨𑀲𑁆𑀲𑀁 𑀧𑀝𑀺𑀘𑁆𑀘𑀸𑀢𑀺 𑀫𑀦𑁄𑀤𑁆𑀯𑀸𑀭𑁂 𑀆𑀯𑀚𑁆𑀚𑀦𑀲𑀫𑁆𑀨𑀲𑁆𑀲𑀁 𑀧𑀝𑀺𑀘𑁆𑀘 𑀧𑀞𑀫𑀚𑀯𑀦𑀯𑁂𑀤𑀦𑀸, 𑀧𑀞𑀫𑀚𑀯𑀦𑀲𑀫𑁆𑀨𑀲𑁆𑀲𑀁 𑀧𑀝𑀺𑀘𑁆𑀘 𑀤𑀼𑀢𑀺𑀬𑀚𑀯𑀦𑀯𑁂𑀤𑀦𑀸𑀢𑀺 𑀅𑀬𑀫𑀥𑀺𑀧𑁆𑀧𑀸𑀬𑁄. 𑀘𑀢𑀼𑀢𑁆𑀣𑀁.

𑁫. 𑀤𑀼𑀢𑀺𑀬𑀯𑁂𑀤𑀦𑀸𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁯. 𑀧𑀜𑁆𑀘𑀫𑁂 𑀢𑀢𑀺𑀬𑀘𑀢𑀼𑀢𑁆𑀣𑁂𑀲𑀼 𑀯𑀼𑀢𑁆𑀢𑀦𑀬𑀸𑀯 𑀏𑀓𑀢𑁄 𑀓𑀢𑁆𑀯𑀸 𑀤𑁂𑀲𑀺𑀢𑀸𑀢𑀺. 𑀇𑀢𑀺 𑀤𑀼𑀢𑀺𑀬𑀸𑀤𑀻𑀲𑀼 𑀘𑀢𑀽𑀲𑀼 𑀲𑀼𑀢𑁆𑀢𑁂𑀲𑀼 𑀫𑀦𑁄𑀥𑀸𑀢𑀼𑀁 𑀫𑀦𑁄𑀥𑀸𑀢𑀽𑀢𑀺 𑀅𑀕𑀳𑁂𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀫𑀦𑁄𑀥𑀸𑀢𑀽𑀢𑀺 𑀕𑀳𑀺𑀢𑀁. 𑀲𑀩𑁆𑀩𑀸𑀦𑀺 𑀘𑁂𑀢𑀸𑀦𑀺 𑀢𑀣𑀸 𑀢𑀣𑀸 𑀓𑀣𑀺𑀢𑁂 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑁂𑀦 𑀤𑁂𑀲𑀺𑀢𑀸𑀦𑀺. 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀜𑁆𑀘𑀫𑀁.

𑁬. 𑀩𑀸𑀳𑀺𑀭𑀥𑀸𑀢𑀼𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁦. 𑀙𑀝𑁆𑀞𑁂 𑀧𑀦 𑀧𑀜𑁆𑀘 𑀥𑀸𑀢𑀼𑀬𑁄 𑀓𑀸𑀫𑀸𑀯𑀘𑀭𑀸, 𑀥𑀫𑁆𑀫𑀥𑀸𑀢𑀼 𑀘𑀢𑀼𑀪𑀽𑀫𑀺𑀓𑀸𑀢𑀺. 𑀙𑀝𑁆𑀞𑀁.

𑁭. 𑀲𑀜𑁆𑀜𑀸𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁧. 𑀲𑀢𑁆𑀢𑀫𑁂 𑀭𑀽𑀧𑀥𑀸𑀢𑀽𑀢𑀺 𑀆𑀧𑀸𑀣𑁂 𑀧𑀢𑀺𑀢𑀁 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸 𑀲𑀸𑀝𑀓𑀯𑁂𑀞𑀦𑀸𑀤𑀺𑀯𑀢𑁆𑀣𑀼𑀓𑀁 𑀭𑀽𑀧𑀸𑀭𑀫𑁆𑀫𑀡𑀁. 𑀭𑀽𑀧𑀲𑀜𑁆𑀜𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀲𑀜𑁆𑀜𑀸. 𑀭𑀽𑀧𑀲𑀗𑁆𑀓𑀧𑁆𑀧𑁄𑀢𑀺 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀳𑀺 𑀢𑀻𑀳𑀺 𑀘𑀺𑀢𑁆𑀢𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑁄 𑀲𑀗𑁆𑀓𑀧𑁆𑀧𑁄. 𑀭𑀽𑀧𑀘𑁆𑀙𑀦𑁆𑀤𑁄𑀢𑀺 𑀭𑀽𑀧𑁂 𑀙𑀦𑁆𑀤𑀺𑀓𑀢𑀝𑁆𑀞𑁂𑀦 𑀙𑀦𑁆𑀤𑁄. 𑀭𑀽𑀧𑀧𑀭𑀺𑀴𑀸𑀳𑁄𑀢𑀺 𑀭𑀽𑀧𑁂 𑀅𑀦𑀼𑀟𑀳𑀦𑀝𑁆𑀞𑁂𑀦 𑀧𑀭𑀺𑀴𑀸𑀳𑁄. 𑀭𑀽𑀧𑀧𑀭𑀺𑀬𑁂𑀲𑀦𑀸𑀢𑀺 𑀧𑀭𑀺𑀴𑀸𑀳𑁂 𑀉𑀧𑁆𑀧𑀦𑁆𑀦𑁂 𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑁂 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀭𑀽𑀧𑀲𑁆𑀲 𑀧𑀝𑀺𑀮𑀸𑀪𑀢𑁆𑀣𑀸𑀬 𑀧𑀭𑀺𑀬𑁂𑀲𑀦𑀸. 𑀏𑀢𑁆𑀣 𑀘 𑀲𑀜𑁆𑀜𑀸𑀲𑀗𑁆𑀓𑀧𑁆𑀧𑀙𑀦𑁆𑀤𑀸 𑀏𑀓𑀚𑀯𑀦𑀯𑀸𑀭𑁂𑀧𑀺 𑀦𑀸𑀦𑀸𑀚𑀯𑀦𑀯𑀸𑀭𑁂𑀧𑀺 𑀮𑀩𑁆𑀪𑀦𑁆𑀢𑀺, 𑀧𑀭𑀺𑀴𑀸𑀳𑀧𑀭𑀺𑀬𑁂𑀲𑀦𑀸 𑀧𑀦 𑀦𑀸𑀦𑀸𑀚𑀯𑀦𑀯𑀸𑀭𑁂𑀬𑁂𑀯 𑀮𑀩𑁆𑀪𑀦𑁆𑀢𑀻𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀥𑀸𑀢𑀼𑀦𑀸𑀦𑀢𑁆𑀢𑀦𑁆𑀢𑀺 𑀏𑀢𑁆𑀣 𑀘 𑀏𑀯𑀁 𑀭𑀽𑀧𑀸𑀤𑀺𑀦𑀸𑀦𑀸𑀲𑀪𑀸𑀯𑀁 𑀥𑀸𑀢𑀼𑀁 𑀧𑀝𑀺𑀘𑁆𑀘 𑀭𑀽𑀧𑀲𑀜𑁆𑀜𑀸𑀤𑀺𑀦𑀸𑀦𑀸𑀲𑀪𑀸𑀯𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀢𑁆𑀢𑀫𑀁.

𑁮. 𑀦𑁄𑀧𑀭𑀺𑀬𑁂𑀲𑀦𑀸𑀦𑀸𑀦𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁨. 𑀅𑀝𑁆𑀞𑀫𑁂 𑀦𑁄 𑀥𑀫𑁆𑀫𑀧𑀭𑀺𑀬𑁂𑀲𑀦𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀥𑀫𑁆𑀫𑀧𑀭𑀺𑀴𑀸𑀳𑁄𑀢𑀺 𑀏𑀯𑀁 𑀆𑀕𑀢𑀁 𑀧𑀝𑀺𑀲𑁂𑀥𑀫𑀢𑁆𑀢𑀫𑁂𑀯 𑀦𑀸𑀦𑀁. 𑀅𑀝𑁆𑀞𑀫𑀁.

𑁯. 𑀩𑀸𑀳𑀺𑀭𑀨𑀲𑁆𑀲𑀦𑀸𑀦𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁩-𑁯𑁪. 𑀦𑀯𑀫𑁂 𑀉𑀧𑁆𑀧𑀚𑁆𑀚𑀢𑀺 𑀭𑀽𑀧𑀲𑀜𑁆𑀜𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀆𑀭𑀫𑁆𑀫𑀡𑁂 𑀉𑀧𑁆𑀧𑀚𑁆𑀚𑀢𑀺 𑀲𑀜𑁆𑀜𑀸. 𑀭𑀽𑀧𑀲𑀗𑁆𑀓𑀧𑁆𑀧𑁄𑀢𑀺 𑀢𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂 𑀢𑀻𑀳𑀺 𑀘𑀺𑀢𑁆𑀢𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀲𑀗𑁆𑀓𑀧𑁆𑀧𑁄. 𑀭𑀽𑀧𑀲𑀫𑁆𑀨𑀲𑁆𑀲𑁄𑀢𑀺 𑀢𑀤𑁂𑀯𑀸𑀭𑀫𑁆𑀫𑀡𑀁 𑀨𑀼𑀲𑀫𑀸𑀦𑁄 𑀨𑀲𑁆𑀲𑁄. 𑀯𑁂𑀤𑀦𑀸𑀢𑀺 𑀢𑀤𑁂𑀯 𑀆𑀭𑀫𑁆𑀫𑀡𑀁 𑀅𑀦𑀼𑀪𑀯𑀫𑀸𑀦𑀸 𑀯𑁂𑀤𑀦𑀸. 𑀙𑀦𑁆𑀤𑀸𑀤𑀬𑁄 𑀯𑀼𑀢𑁆𑀢𑀦𑀬𑀸𑀯. 𑀭𑀽𑀧𑀮𑀸𑀪𑁄𑀢𑀺 𑀧𑀭𑀺𑀬𑁂𑀲𑀺𑀢𑁆𑀯𑀸 𑀮𑀤𑁆𑀥𑀁 𑀲𑀳 𑀢𑀡𑁆𑀳𑀸𑀬 𑀆𑀭𑀫𑁆𑀫𑀡𑀁 ‘‘𑀭𑀽𑀧𑀮𑀸𑀪𑁄’’𑀢𑀺 𑀯𑀼𑀢𑁆𑀢𑀁. 𑀅𑀬𑀁 𑀢𑀸𑀯 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀦𑀬𑁄 𑀏𑀓𑀲𑁆𑀫𑀺𑀁 𑀬𑁂𑀯𑀸𑀭𑀫𑁆𑀫𑀡𑁂 𑀲𑀩𑁆𑀩𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑁄. 𑀅𑀧𑀭𑁄 𑀆𑀕𑀦𑁆𑀢𑀼𑀓𑀸𑀭𑀫𑁆𑀫𑀡𑀫𑀺𑀲𑁆𑀲𑀓𑁄 𑀳𑁄𑀢𑀺 𑁋 𑀭𑀽𑀧𑀲𑀜𑁆𑀜𑀸 𑀭𑀽𑀧𑀲𑀗𑁆𑀓𑀧𑁆𑀧𑁄 𑀨𑀲𑁆𑀲𑁄 𑀯𑁂𑀤𑀦𑀸𑀢𑀺 𑀇𑀫𑁂 𑀢𑀸𑀯 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀥𑀼𑀯𑀧𑀭𑀺𑀪𑁄𑀕𑁂 𑀦𑀺𑀩𑀤𑁆𑀥𑀸𑀭𑀫𑁆𑀫𑀡𑁂 𑀳𑁄𑀦𑁆𑀢𑀺. 𑀦𑀺𑀩𑀤𑁆𑀥𑀸𑀭𑀫𑁆𑀫𑀡𑀜𑁆𑀳𑀺 𑀇𑀝𑁆𑀞𑀁 𑀓𑀦𑁆𑀢𑀁 𑀫𑀦𑀸𑀧𑀁 𑀧𑀺𑀬𑀁 𑀬𑀁𑀓𑀺𑀜𑁆𑀘𑀺 𑀯𑀺𑀬 𑀉𑀧𑀝𑁆𑀞𑀸𑀢𑀺, 𑀆𑀕𑀦𑁆𑀢𑀼𑀓𑀸𑀭𑀫𑁆𑀫𑀡𑀁 𑀧𑀦 𑀬𑀁𑀓𑀺𑀜𑁆𑀘𑀺 𑀲𑀫𑀸𑀦𑀫𑁆𑀧𑀺 𑀔𑁄𑀪𑁂𑀢𑁆𑀯𑀸 𑀢𑀺𑀝𑁆𑀞𑀢𑀺.

𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀅𑀫𑀘𑁆𑀘𑀧𑀼𑀢𑁆𑀢𑁄 𑀕𑀸𑀫𑀺𑀬𑁂𑀳𑀺 𑀧𑀭𑀺𑀯𑀸𑀭𑀺𑀢𑁄 𑀕𑀸𑀫𑀫𑀚𑁆𑀛𑁂 𑀞𑀢𑁆𑀯𑀸 𑀓𑀫𑁆𑀫𑀁 𑀓𑀭𑁄𑀢𑀺. 𑀢𑀲𑁆𑀫𑀺𑀜𑁆𑀘𑀲𑁆𑀲 𑀲𑀫𑀬𑁂 𑀉𑀧𑀸𑀲𑀺𑀓𑀸 𑀦𑀤𑀺𑀁 𑀕𑀦𑁆𑀢𑁆𑀯𑀸 𑀦𑁆𑀳𑀢𑁆𑀯𑀸 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀥𑀸𑀢𑀺𑀕𑀡𑀧𑀭𑀺𑀯𑀼𑀢𑀸 𑀕𑁂𑀳𑀁 𑀕𑀘𑁆𑀙𑀢𑀺. 𑀲𑁄 𑀤𑀽𑀭𑀢𑁄 𑀤𑀺𑀲𑁆𑀯𑀸 ‘‘𑀆𑀕𑀦𑁆𑀢𑀼𑀓𑀫𑀸𑀢𑀼𑀕𑀸𑀫𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 ‘‘𑀕𑀘𑁆𑀙, 𑀪𑀡𑁂 𑀚𑀸𑀦𑀸𑀳𑀺, 𑀓𑀸 𑀏𑀲𑀸’’𑀢𑀺 𑀧𑀼𑀭𑀺𑀲𑀁 𑀧𑁂𑀲𑁂𑀲𑀺. 𑀲𑁄 𑀕𑀦𑁆𑀢𑁆𑀯𑀸 𑀢𑀁 𑀤𑀺𑀲𑁆𑀯𑀸 𑀧𑀘𑁆𑀘𑀸𑀕𑀢𑁄, ‘‘𑀓𑀸 𑀏𑀲𑀸’’𑀢𑀺 𑀧𑀼𑀝𑁆𑀞𑁄 𑀬𑀣𑀸𑀲𑀪𑀸𑀯𑀁 𑀆𑀭𑁄𑀘𑁂𑀲𑀺. 𑀏𑀯𑀁 𑀆𑀕𑀦𑁆𑀢𑀼𑀓𑀸𑀭𑀫𑁆𑀫𑀡𑀁 𑀔𑁄𑀪𑁂𑀢𑀺. 𑀢𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁄 𑀙𑀦𑁆𑀤𑁄 𑀭𑀽𑀧𑀙𑀦𑁆𑀤𑁄 𑀦𑀸𑀫, 𑀢𑀤𑁂𑀯 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑁄 𑀧𑀭𑀺𑀴𑀸𑀳𑁄 𑀭𑀽𑀧𑀧𑀭𑀺𑀴𑀸𑀳𑁄 𑀦𑀸𑀫, 𑀲𑀳𑀸𑀬𑁂 𑀕𑀡𑁆𑀳𑀺𑀢𑁆𑀯𑀸 𑀢𑀲𑁆𑀲 𑀧𑀭𑀺𑀬𑁂𑀲𑀦𑀁 𑀭𑀽𑀧𑀧𑀭𑀺𑀬𑁂𑀲𑀦𑀸 𑀦𑀸𑀫, 𑀧𑀭𑀺𑀬𑁂𑀲𑀺𑀢𑁆𑀯𑀸 𑀮𑀤𑁆𑀥𑀁 𑀲𑀳 𑀢𑀡𑁆𑀳𑀸𑀬 𑀆𑀭𑀫𑁆𑀫𑀡𑀁 𑀭𑀽𑀧𑀮𑀸𑀪𑁄 𑀦𑀸𑀫.

𑀉𑀭𑀼𑀯𑀮𑁆𑀮𑀺𑀬𑀯𑀸𑀲𑀻 𑀘𑀽𑀴𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀓𑀺𑀜𑁆𑀘𑀸𑀧𑀺 𑀪𑀕𑀯𑀢𑀸 𑀨𑀲𑁆𑀲𑀯𑁂𑀤𑀦𑀸 𑀧𑀸𑀴𑀺𑀬𑀸 𑀫𑀚𑁆𑀛𑁂 𑀕𑀳𑀺𑀢𑀸, 𑀧𑀸𑀴𑀺𑀁 𑀧𑀦 𑀧𑀭𑀺𑀯𑀝𑁆𑀝𑁂𑀢𑁆𑀯𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀆𑀭𑀫𑁆𑀫𑀡𑁂 𑀉𑀧𑁆𑀧𑀦𑁆𑀦𑀸 𑀲𑀜𑁆𑀜𑀸 𑀭𑀽𑀧𑀲𑀜𑁆𑀜𑀸, 𑀢𑀲𑁆𑀫𑀺𑀁𑀬𑁂𑀯 𑀲𑀗𑁆𑀓𑀧𑁆𑀧𑁄 𑀭𑀽𑀧𑀲𑀗𑁆𑀓𑀧𑁆𑀧𑁄 𑀢𑀲𑁆𑀫𑀺𑀁 𑀙𑀦𑁆𑀤𑁄 𑀭𑀽𑀧𑀘𑁆𑀙𑀦𑁆𑀤𑁄, 𑀢𑀲𑁆𑀫𑀺𑀁 𑀧𑀭𑀺𑀴𑀸𑀳𑁄 𑀭𑀽𑀧𑀧𑀭𑀺𑀴𑀸𑀳𑁄, 𑀢𑀲𑁆𑀫𑀺𑀁 𑀧𑀭𑀺𑀬𑁂𑀲𑀦𑀸 𑀭𑀽𑀧𑀧𑀭𑀺𑀬𑁂𑀲𑀦𑀸, 𑀧𑀭𑀺𑀬𑁂𑀲𑀺𑀢𑁆𑀯𑀸 𑀮𑀤𑁆𑀥𑀁 𑀲𑀳 𑀢𑀡𑁆𑀳𑀸𑀬 𑀆𑀭𑀫𑁆𑀫𑀡𑀁 𑀭𑀽𑀧𑀮𑀸𑀪𑁄. 𑀏𑀯𑀁 𑀮𑀤𑁆𑀥𑀸𑀭𑀫𑁆𑀫𑀡𑁂 𑀧𑀦 𑀨𑀼𑀲𑀦𑀁 𑀨𑀲𑁆𑀲𑁄, 𑀅𑀦𑀼𑀪𑀯𑀦𑀁 𑀯𑁂𑀤𑀦𑀸. 𑀭𑀽𑀧𑀲𑀫𑁆𑀨𑀲𑁆𑀲𑁄 𑀭𑀽𑀧𑀲𑀫𑁆𑀨𑀲𑁆𑀲𑀚𑀸 𑀯𑁂𑀤𑀦𑀸𑀢𑀺 𑀇𑀤𑀁 𑀤𑁆𑀯𑀬𑀁 𑀮𑀩𑁆𑀪𑀢𑀻’’𑀢𑀺. 𑀅𑀧𑀭𑀫𑁆𑀧𑀺 𑀅𑀯𑀺𑀪𑀽𑀢𑀯𑀸𑀭𑀁 𑀦𑀸𑀫 𑀕𑀡𑁆𑀳𑀦𑁆𑀢𑀺. 𑀆𑀭𑀫𑁆𑀫𑀡𑀜𑁆𑀳𑀺 𑀲𑀸𑀡𑀺𑀧𑀸𑀓𑀸𑀭𑁂𑀳𑀺 𑀯𑀸 𑀧𑀭𑀺𑀓𑁆𑀔𑀺𑀢𑁆𑀢𑀁 𑀢𑀺𑀡𑀧𑀡𑁆𑀡𑀸𑀤𑀻𑀳𑀺 𑀯𑀸 𑀧𑀝𑀺𑀘𑁆𑀙𑀦𑁆𑀦𑀁 𑀳𑁄𑀢𑀺, 𑀢𑀁 ‘‘𑀉𑀧𑀟𑁆𑀠𑀁 𑀤𑀺𑀝𑁆𑀞𑀁 𑀫𑁂 𑀆𑀭𑀫𑁆𑀫𑀡𑀁, 𑀲𑀼𑀝𑁆𑀞𑀼 𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀑𑀮𑁄𑀓𑀬𑀢𑁄 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀉𑀧𑁆𑀧𑀦𑁆𑀦𑀸 𑀲𑀜𑁆𑀜𑀸 𑀭𑀽𑀧𑀲𑀜𑁆𑀜𑀸 𑀦𑀸𑀫. 𑀢𑀲𑁆𑀫𑀺𑀁𑀬𑁂𑀯 𑀉𑀧𑁆𑀧𑀦𑁆𑀦𑀸 𑀲𑀗𑁆𑀓𑀧𑁆𑀧𑀸𑀤𑀬𑁄 𑀭𑀽𑀧𑀲𑀗𑁆𑀓𑀧𑁆𑀧𑀸𑀤𑀬𑁄 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣𑀸𑀧𑀺 𑀘 𑀲𑀜𑁆𑀜𑀸𑀲𑀗𑁆𑀓𑀧𑁆𑀧𑀨𑀲𑁆𑀲𑀯𑁂𑀤𑀦𑀸𑀙𑀦𑁆𑀤𑀸 𑀏𑀓𑀚𑀯𑀦𑀯𑀸𑀭𑁂𑀧𑀺 𑀦𑀸𑀦𑀸𑀚𑀯𑀦𑀯𑀸𑀭𑁂𑀧𑀺 𑀮𑀩𑁆𑀪𑀦𑁆𑀢𑀺, 𑀧𑀭𑀺𑀴𑀸𑀳𑀧𑀭𑀺𑀬𑁂𑀲𑀦𑀸𑀮𑀸𑀪𑀸 𑀦𑀸𑀦𑀸𑀚𑀯𑀦𑀯𑀸𑀭𑁂𑀬𑁂𑀯𑀸𑀢𑀺. 𑀤𑀲𑀫𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀦𑀯𑀫𑀤𑀲𑀫𑀸𑀦𑀺.

𑀦𑀸𑀦𑀢𑁆𑀢𑀯𑀕𑁆𑀕𑁄 𑀧𑀞𑀫𑁄.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀲𑀢𑁆𑀢𑀥𑀸𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁫. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀆𑀪𑀸𑀥𑀸𑀢𑀽𑀢𑀺 𑀆𑀮𑁄𑀓𑀥𑀸𑀢𑀼. 𑀆𑀮𑁄𑀓𑀲𑁆𑀲𑀧𑀺 𑀆𑀮𑁄𑀓𑀓𑀲𑀺𑀡𑁂 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀚𑁆𑀛𑀸𑀦𑀲𑁆𑀲𑀸𑀧𑀻𑀢𑀺 𑀲𑀳𑀸𑀭𑀫𑁆𑀫𑀡𑀲𑁆𑀲 𑀛𑀸𑀦𑀲𑁆𑀲 𑀏𑀢𑀁 𑀦𑀸𑀫𑀁. 𑀲𑀼𑀪𑀥𑀸𑀢𑀽𑀢𑀺 𑀲𑀼𑀪𑀓𑀲𑀺𑀡𑁂 𑀉𑀧𑁆𑀧𑀦𑁆𑀦𑀚𑁆𑀛𑀸𑀦𑀯𑀲𑁂𑀦 𑀲𑀳𑀸𑀭𑀫𑁆𑀫𑀡𑀚𑁆𑀛𑀸𑀦𑀫𑁂𑀯. 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀫𑁂𑀯 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀥𑀸𑀢𑀼. 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑁄𑀯 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀥𑀸𑀢𑀼. 𑀇𑀢𑀺 𑀪𑀕𑀯𑀸 𑀅𑀦𑀼𑀲𑀦𑁆𑀥𑀺𑀓𑀼𑀲𑀮𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀢𑁆𑀣 𑀦𑀺𑀲𑀻𑀤𑀺𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀓𑀸𑀫𑀲𑁆𑀲 𑀑𑀓𑀸𑀲𑀁 𑀤𑁂𑀦𑁆𑀢𑁄 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑀅𑀦𑁆𑀥𑀓𑀸𑀭𑀁 𑀧𑀝𑀺𑀘𑁆𑀘𑀸𑀢𑀺 𑀅𑀦𑁆𑀥𑀓𑀸𑀭𑁄 𑀳𑀺 𑀆𑀮𑁄𑀓𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄, 𑀆𑀮𑁄𑀓𑁄𑀧𑀺 𑀅𑀦𑁆𑀥𑀓𑀸𑀭𑁂𑀦. 𑀅𑀦𑁆𑀥𑀓𑀸𑀭𑁂𑀦 𑀳𑀺 𑀲𑁄 𑀧𑀸𑀓𑀝𑁄 𑀳𑁄𑀢𑀺. 𑀢𑀲𑁆𑀫𑀸 ‘‘𑀅𑀦𑁆𑀥𑀓𑀸𑀭𑀁 𑀧𑀝𑀺𑀘𑁆𑀘 𑀧𑀜𑁆𑀜𑀸𑀬𑀢𑀻’’𑀢𑀺 𑀆𑀳. 𑀅𑀲𑀼𑀪𑀁 𑀧𑀝𑀺𑀘𑁆𑀘𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀲𑀼𑀪𑀜𑁆𑀳𑀺 𑀲𑀼𑀪𑁂𑀦, 𑀲𑀼𑀪𑀜𑁆𑀘 𑀅𑀲𑀼𑀪𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀁, 𑀅𑀲𑀼𑀪𑁂 𑀲𑀢𑀺 𑀲𑀼𑀪𑀁 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀭𑀽𑀧𑀁 𑀧𑀝𑀺𑀘𑁆𑀘𑀸𑀢𑀺 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀁 𑀧𑀝𑀺𑀘𑁆𑀘. 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀬𑀸 𑀳𑀺 𑀲𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀫𑀸𑀧𑀢𑁆𑀢𑀺 𑀦𑀸𑀫 𑀳𑁄𑀢𑀺 𑀭𑀽𑀧𑀲𑀫𑀢𑀺𑀓𑁆𑀓𑀫𑁄 𑀯𑀸, 𑀢𑀲𑁆𑀫𑀸 𑀏𑀯𑀫𑀸𑀳. 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀥𑀸𑀢𑀼𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀦𑀺𑀭𑁄𑀥𑀁 𑀧𑀝𑀺𑀘𑁆𑀘𑀸𑀢𑀺 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀧𑀝𑀺𑀲𑀗𑁆𑀔𑀸𑀅𑀧𑁆𑀧𑀯𑀢𑁆𑀢𑀺𑀁 𑀧𑀝𑀺𑀘𑁆𑀘. 𑀔𑀦𑁆𑀥𑀦𑀺𑀭𑁄𑀥𑀜𑁆𑀳𑀺 𑀧𑀝𑀺𑀘𑁆𑀘 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀦𑀸𑀫 𑀧𑀜𑁆𑀜𑀸𑀬𑀢𑀺, 𑀦 𑀔𑀦𑁆𑀥𑀧𑀯𑀢𑁆𑀢𑀺𑀁, 𑀢𑀲𑁆𑀫𑀸 𑀏𑀯𑀫𑀸𑀳. 𑀏𑀢𑁆𑀣 𑀘 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄𑀯 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀓𑀣𑀁 𑀲𑀫𑀸𑀧𑀢𑁆𑀢𑀺 𑀧𑀢𑁆𑀢𑀩𑁆𑀩𑀸𑀢𑀺 𑀓𑀣𑀁 𑀲𑀫𑀸𑀧𑀢𑁆𑀢𑀺𑀬𑁄 𑀓𑀻𑀤𑀺𑀲𑀸 𑀲𑀫𑀸𑀧𑀢𑁆𑀢𑀺𑀬𑁄 𑀦𑀸𑀫 𑀳𑀼𑀢𑁆𑀯𑀸 𑀧𑀢𑁆𑀢𑀩𑁆𑀩𑀸𑀢𑀺? 𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺 𑀧𑀢𑁆𑀢𑀩𑁆𑀩𑀸𑀢𑀺 𑀲𑀜𑁆𑀜𑀸𑀬 𑀅𑀢𑁆𑀣𑀺𑀪𑀸𑀯𑁂𑀦 𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀬𑁄 𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀬𑁄 𑀦𑀸𑀫 𑀳𑀼𑀢𑁆𑀯𑀸 𑀧𑀢𑁆𑀢𑀩𑁆𑀩𑀸. 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀫𑀸𑀧𑀢𑁆𑀢𑀺 𑀧𑀢𑁆𑀢𑀩𑁆𑀩𑀸𑀢𑀺 𑀲𑀼𑀔𑀼𑀫𑀲𑀗𑁆𑀔𑀸𑀭𑀸𑀦𑀁 𑀅𑀯𑀲𑀺𑀝𑁆𑀞𑀢𑀸𑀬 𑀲𑀗𑁆𑀔𑀸𑀭𑀸𑀯𑀲𑁂𑀲𑀲𑀫𑀸𑀧𑀢𑁆𑀢𑀺 𑀦𑀸𑀫 𑀳𑀼𑀢𑁆𑀯𑀸 𑀧𑀢𑁆𑀢𑀩𑁆𑀩𑀸. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀧𑀢𑁆𑀢𑀩𑁆𑀩𑀸𑀢𑀺 𑀦𑀺𑀭𑁄𑀥𑁄𑀯 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀦𑀸𑀫 𑀳𑀼𑀢𑁆𑀯𑀸 𑀧𑀢𑁆𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀧𑀞𑀫𑀁.

𑁨. 𑀲𑀦𑀺𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁬. 𑀤𑀼𑀢𑀺𑀬𑁂 𑀲𑀦𑀺𑀤𑀸𑀦𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀫𑁂𑀢𑀁, 𑀲𑀦𑀺𑀤𑀸𑀦𑁄 𑀲𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀫𑀥𑀸𑀢𑀼𑀁, 𑀪𑀺𑀓𑁆𑀔𑀯𑁂, 𑀧𑀝𑀺𑀘𑁆𑀘𑀸𑀢𑀺 𑀏𑀢𑁆𑀣 𑀓𑀸𑀫𑀯𑀺𑀢𑀓𑁆𑀓𑁄𑀧𑀺 𑀓𑀸𑀫𑀥𑀸𑀢𑀼 𑀓𑀸𑀫𑀸𑀯𑀘𑀭𑀥𑀫𑁆𑀫𑀸𑀧𑀺, 𑀯𑀺𑀲𑁂𑀲𑀢𑁄 𑀲𑀩𑁆𑀩𑀸𑀓𑀼𑀲𑀮𑀫𑁆𑀧𑀺. 𑀬𑀣𑀸𑀳 𑁋

‘‘𑀢𑀢𑁆𑀣 𑀓𑀢𑀫𑀸 𑀓𑀸𑀫𑀥𑀸𑀢𑀼? 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑁄 𑀢𑀓𑁆𑀓𑁄 𑀯𑀺𑀢𑀓𑁆𑀓𑁄 𑀲𑀗𑁆𑀓𑀧𑁆𑀧𑁄 𑀅𑀧𑁆𑀧𑀦𑀸 𑀩𑁆𑀬𑀧𑁆𑀧𑀦𑀸 𑀘𑁂𑀢𑀲𑁄 𑀅𑀪𑀺𑀦𑀺𑀭𑁄𑀧𑀦𑀸 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀓𑀸𑀫𑀥𑀸𑀢𑀼. 𑀳𑁂𑀝𑁆𑀞𑀢𑁄 𑀅𑀯𑀻𑀘𑀺𑀦𑀺𑀭𑀬𑀁 𑀧𑀭𑀺𑀬𑀦𑁆𑀢𑀁 𑀓𑀭𑀺𑀢𑁆𑀯𑀸 𑀉𑀧𑀭𑀺𑀢𑁄 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀻 𑀤𑁂𑀯𑁂 𑀅𑀦𑁆𑀢𑁄𑀓𑀭𑀺𑀢𑁆𑀯𑀸 𑀬𑀁 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀏𑀢𑁆𑀣𑀸𑀯𑀘𑀭𑀸 𑀏𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀸 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸 𑀭𑀽𑀧𑀸 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀓𑀸𑀫𑀥𑀸𑀢𑀼. 𑀲𑀩𑁆𑀩𑁂𑀧𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀓𑀸𑀫𑀥𑀸𑀢𑀽’’𑀢𑀺 (𑀯𑀺𑀪. 𑁧𑁮𑁨).

𑀏𑀢𑁆𑀣 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀸 𑀅𑀲𑀫𑁆𑀪𑀺𑀦𑁆𑀦𑀸𑀢𑀺 𑀤𑁆𑀯𑁂 𑀓𑀣𑀸 𑀳𑁄𑀦𑁆𑀢𑀺. 𑀓𑀣𑀁? 𑀓𑀸𑀫𑀥𑀸𑀢𑀼𑀕𑁆𑀕𑀳𑀡𑁂𑀦 𑀳𑀺 𑀩𑁆𑀬𑀸𑀧𑀸𑀤𑀥𑀸𑀢𑀼𑀯𑀺𑀳𑀺𑀁𑀲𑀸𑀥𑀸𑀢𑀼𑀬𑁄 𑀕𑀳𑀺𑀢𑀸 𑀳𑁄𑀦𑁆𑀢𑀻𑀢𑀺 𑀅𑀬𑀁 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀸. 𑀢𑀸𑀲𑀁 𑀧𑀦 𑀤𑁆𑀯𑀺𑀦𑁆𑀦𑀁 𑀥𑀸𑀢𑀽𑀦𑀁 𑀯𑀺𑀲𑀼𑀁 𑀆𑀕𑀢𑀢𑁆𑀢𑀸 𑀲𑁂𑀲𑀥𑀫𑁆𑀫𑀸 𑀓𑀸𑀫𑀥𑀸𑀢𑀽𑀢𑀺 𑀅𑀬𑀁 𑀅𑀲𑀫𑁆𑀪𑀺𑀦𑁆𑀦𑀓𑀣𑀸. 𑀅𑀬𑀫𑀺𑀥 𑀕𑀳𑁂𑀢𑀩𑁆𑀩𑀸 𑀇𑀫𑀁 𑀓𑀸𑀫𑀥𑀸𑀢𑀼𑀁 𑀆𑀭𑀫𑁆𑀫𑀡𑀯𑀲𑁂𑀦 𑀯𑀸 𑀲𑀫𑁆𑀧𑀬𑁄𑀕𑀯𑀲𑁂𑀦 𑀯𑀸 𑀧𑀝𑀺𑀘𑁆𑀘 𑀓𑀸𑀫𑀲𑀜𑁆𑀜𑀸 𑀦𑀸𑀫 𑀉𑀧𑁆𑀧𑀚𑁆𑀚𑀢𑀺. 𑀓𑀸𑀫𑀲𑀜𑁆𑀜𑀁 𑀧𑀝𑀺𑀘𑁆𑀘𑀸𑀢𑀺 𑀓𑀸𑀫𑀲𑀜𑁆𑀜𑀁 𑀧𑀦 𑀲𑀫𑁆𑀧𑀬𑁄𑀕𑀯𑀲𑁂𑀦 𑀯𑀸 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀯𑀸 𑀧𑀝𑀺𑀘𑁆𑀘 𑀓𑀸𑀫𑀲𑀗𑁆𑀓𑀧𑁆𑀧𑁄 𑀦𑀸𑀫 𑀉𑀧𑁆𑀧𑀚𑁆𑀚𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀻𑀳𑀺 𑀞𑀸𑀦𑁂𑀳𑀻𑀢𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺. 𑀫𑀺𑀘𑁆𑀙𑀸 𑀧𑀝𑀺𑀧𑀚𑁆𑀚𑀢𑀻𑀢𑀺 𑀅𑀬𑀸𑀣𑀸𑀯𑀧𑀝𑀺𑀧𑀤𑀁 𑀅𑀦𑀺𑀬𑁆𑀬𑀸𑀦𑀺𑀓𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀢𑀺.

𑀩𑁆𑀬𑀸𑀧𑀸𑀤𑀥𑀸𑀢𑀼𑀁, 𑀪𑀺𑀓𑁆𑀔𑀯𑁂𑀢𑀺 𑀏𑀢𑁆𑀣 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄𑀧𑀺 𑀩𑁆𑀬𑀸𑀧𑀸𑀤𑀥𑀸𑀢𑀼 𑀩𑁆𑀬𑀸𑀧𑀸𑀤𑁄𑀧𑀺. 𑀬𑀣𑀸𑀳 𑁋

‘‘𑀢𑀢𑁆𑀣 𑀓𑀢𑀫𑀸 𑀩𑁆𑀬𑀸𑀧𑀸𑀤𑀥𑀸𑀢𑀼? 𑀩𑁆𑀬𑀸𑀧𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑁄 𑀢𑀓𑁆𑀓𑁄 𑀯𑀺𑀢𑀓𑁆𑀓𑁄…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀩𑁆𑀬𑀸𑀧𑀸𑀤𑀥𑀸𑀢𑀼. 𑀤𑀲𑀲𑀼 𑀆𑀖𑀸𑀢𑀯𑀢𑁆𑀣𑀽𑀲𑀼 𑀘𑀺𑀢𑁆𑀢𑀲𑁆𑀲 𑀆𑀖𑀸𑀢𑁄 𑀧𑀝𑀺𑀯𑀺𑀭𑁄𑀥𑁄 𑀓𑁄𑀧𑁄 𑀧𑀓𑁄𑀧𑁄…𑀧𑁂… 𑀅𑀦𑀢𑁆𑀢𑀫𑀦𑀢𑀸 𑀘𑀺𑀢𑁆𑀢𑀲𑁆𑀲, 𑀅𑀬𑀁 𑀯𑀼𑀘𑁆𑀘𑀢𑀺 𑀩𑁆𑀬𑀸𑀧𑀸𑀤𑀥𑀸𑀢𑀽’’𑀢𑀺 (𑀯𑀺𑀪. 𑁧𑁮𑁨).

𑀇𑀫𑀁 𑀩𑁆𑀬𑀸𑀧𑀸𑀤𑀥𑀸𑀢𑀼𑀁 𑀲𑀳𑀚𑀸𑀢𑀧𑀘𑁆𑀘𑀬𑀸𑀤𑀺𑀯𑀲𑁂𑀦 𑀧𑀝𑀺𑀘𑁆𑀘 𑀩𑁆𑀬𑀸𑀧𑀸𑀤𑀲𑀜𑁆𑀜𑀸 𑀦𑀸𑀫 𑀉𑀧𑁆𑀧𑀚𑁆𑀚𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀯𑀺𑀳𑀺𑀁𑀲𑀸𑀥𑀸𑀢𑀼𑀁, 𑀪𑀺𑀓𑁆𑀔𑀯𑁂𑀢𑀺 𑀏𑀢𑁆𑀣 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄𑀧𑀺 𑀯𑀺𑀳𑀺𑀁𑀲𑀸𑀥𑀸𑀢𑀼 𑀯𑀺𑀳𑀺𑀁𑀲𑀸𑀧𑀺. 𑀬𑀣𑀸𑀳 𑁋

‘‘𑀢𑀢𑁆𑀣 𑀓𑀢𑀫𑀸 𑀯𑀺𑀳𑀺𑀁𑀲𑀸𑀥𑀸𑀢𑀼? 𑀯𑀺𑀳𑀺𑀁𑀲𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀢𑀓𑁆𑀓𑁄 𑀯𑀺𑀢𑀓𑁆𑀓𑁄…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀯𑀺𑀳𑀺𑀁𑀲𑀸𑀥𑀸𑀢𑀼. 𑀇𑀥𑁂𑀓𑀘𑁆𑀘𑁄 𑀧𑀸𑀡𑀺𑀦𑀸 𑀯𑀸 𑀮𑁂𑀟𑁆𑀟𑀼𑀦𑀸 𑀯𑀸 𑀤𑀡𑁆𑀟𑁂𑀦 𑀯𑀸 𑀲𑀢𑁆𑀣𑁂𑀦 𑀯𑀸 𑀭𑀚𑁆𑀚𑀼𑀬𑀸 𑀯𑀸 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀦 𑀯𑀸 𑀲𑀢𑁆𑀢𑁂 𑀯𑀺𑀳𑁂𑀞𑁂𑀢𑀺. 𑀬𑀸 𑀏𑀯𑀭𑀽𑀧𑀸 𑀳𑁂𑀞𑀦𑀸 𑀯𑀺𑀳𑁂𑀞𑀦𑀸 𑀳𑀺𑀁𑀲𑀦𑀸 𑀯𑀺𑀳𑀺𑀁𑀲𑀦𑀸 𑀭𑁄𑀲𑀦𑀸 𑀧𑀭𑀽𑀧𑀖𑀸𑀢𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀯𑀺𑀳𑀺𑀁𑀲𑀸𑀥𑀸𑀢𑀽’’𑀢𑀺 (𑀯𑀺𑀪. 𑁧𑁮𑁨).

𑀇𑀫𑀁 𑀯𑀺𑀳𑀺𑀁𑀲𑀸𑀥𑀸𑀢𑀼𑀁 𑀲𑀳𑀚𑀸𑀢𑀧𑀘𑁆𑀘𑀬𑀸𑀤𑀺𑀯𑀲𑁂𑀦 𑀧𑀝𑀺𑀘𑁆𑀘 𑀯𑀺𑀳𑀺𑀁𑀲𑀸𑀲𑀜𑁆𑀜𑀸 𑀦𑀸𑀫 𑀉𑀧𑁆𑀧𑀚𑁆𑀚𑀢𑀺. 𑀲𑁂𑀲𑀫𑀺𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀢𑀺𑀡𑀤𑀸𑀬𑁂𑀢𑀺 𑀢𑀺𑀡𑀕𑀳𑀦𑁂 𑀅𑀭𑀜𑁆𑀜𑁂. 𑀅𑀦𑀬𑀩𑁆𑀬𑀲𑀦𑀦𑁆𑀢𑀺 𑀅𑀯𑀼𑀟𑁆𑀠𑀺𑀁 𑀯𑀺𑀦𑀸𑀲𑀁. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀲𑀼𑀓𑁆𑀔𑀢𑀺𑀡𑀤𑀸𑀬𑁄 𑀯𑀺𑀬 𑀆𑀭𑀫𑁆𑀫𑀡𑀁 𑀤𑀝𑁆𑀞𑀩𑁆𑀩𑀁, 𑀢𑀺𑀡𑀼𑀓𑁆𑀓𑀸 𑀯𑀺𑀬 𑀅𑀓𑀼𑀲𑀮𑀲𑀜𑁆𑀜𑀸, 𑀢𑀺𑀡𑀓𑀝𑁆𑀞𑀦𑀺𑀲𑁆𑀲𑀺𑀢𑀸 𑀧𑀸𑀡𑀸 𑀯𑀺𑀬 𑀇𑀫𑁂 𑀲𑀢𑁆𑀢𑀸. 𑀬𑀣𑀸 𑀲𑀼𑀓𑁆𑀔𑀢𑀺𑀡𑀤𑀸𑀬𑁂 𑀞𑀧𑀺𑀢𑀁 𑀢𑀺𑀡𑀼𑀓𑁆𑀓𑀁 𑀔𑀺𑀧𑁆𑀧𑀁 𑀯𑀸𑀬𑀫𑀺𑀢𑁆𑀯𑀸 𑀅𑀦𑀺𑀩𑁆𑀩𑀸𑀧𑁂𑀦𑁆𑀢𑀲𑁆𑀲 𑀢𑁂 𑀧𑀸𑀡𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑀦𑁆𑀢𑀺. 𑀏𑀯𑀫𑁂𑀯 𑀬𑁂 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀉𑀧𑁆𑀧𑀦𑁆𑀦𑀁 𑀅𑀓𑀼𑀲𑀮𑀲𑀜𑁆𑀜𑀁 𑀯𑀺𑀓𑁆𑀔𑀫𑁆𑀪𑀦𑀢𑀤𑀗𑁆𑀕𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂𑀳𑀺 𑀦𑀧𑁆𑀧𑀚𑀳𑀦𑁆𑀢𑀺, 𑀢𑁂 𑀤𑀼𑀓𑁆𑀔𑀁 𑀯𑀺𑀳𑀭𑀦𑁆𑀢𑀺.

𑀯𑀺𑀲𑀫𑀕𑀢𑀦𑁆𑀢𑀺 𑀭𑀸𑀕𑀯𑀺𑀲𑀫𑀸𑀤𑀻𑀦𑀺 𑀅𑀦𑀼𑀕𑀢𑀁 𑀅𑀓𑀼𑀲𑀮𑀲𑀜𑁆𑀜𑀁. 𑀦 𑀔𑀺𑀧𑁆𑀧𑀫𑁂𑀯 𑀧𑀚𑀳𑀢𑀻𑀢𑀺 𑀯𑀺𑀓𑁆𑀔𑀫𑁆𑀪𑀦𑀸𑀤𑀺𑀯𑀲𑁂𑀦 𑀲𑀻𑀖𑀁 𑀦𑀧𑁆𑀧𑀚𑀳𑀢𑀺. 𑀦 𑀯𑀺𑀦𑁄𑀤𑁂𑀢𑀻𑀢𑀺 𑀦 𑀦𑀻𑀳𑀭𑀢𑀺. 𑀦 𑀩𑁆𑀬𑀦𑁆𑀢𑀻𑀓𑀭𑁄𑀢𑀻𑀢𑀺 𑀪𑀗𑁆𑀕𑀫𑀢𑁆𑀢𑀫𑁆𑀧𑀺 𑀅𑀦𑀯𑀲𑁂𑀲𑁂𑀦𑁆𑀢𑁄 𑀦 𑀯𑀺𑀕𑀢𑀦𑁆𑀢𑀁 𑀓𑀭𑁄𑀢𑀺. 𑀦 𑀅𑀦𑀪𑀸𑀯𑀁 𑀕𑀫𑁂𑀢𑀻𑀢𑀺 𑀦 𑀅𑀦𑀼𑀅𑀪𑀸𑀯𑀁 𑀕𑀫𑁂𑀢𑀺. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀦 𑁋 𑀓𑀸𑀭𑁄 𑀆𑀳𑀭𑀺𑀢𑀩𑁆𑀩𑁄. 𑀧𑀸𑀝𑀺𑀓𑀗𑁆𑀔𑀸𑀢𑀺 𑀧𑀸𑀝𑀺𑀓𑀗𑁆𑀔𑀺𑀢𑀩𑁆𑀩𑀸 𑀇𑀘𑁆𑀙𑀺𑀢𑀩𑁆𑀩𑀸.

𑀦𑁂𑀓𑁆𑀔𑀫𑁆𑀫𑀥𑀸𑀢𑀼𑀁, 𑀪𑀺𑀓𑁆𑀔𑀯𑁂𑀢𑀺 𑀏𑀢𑁆𑀣 𑀦𑁂𑀓𑁆𑀔𑀫𑁆𑀫𑀯𑀺𑀢𑀓𑁆𑀓𑁄𑀧𑀺 𑀦𑁂𑀓𑁆𑀔𑀫𑁆𑀫𑀥𑀸𑀢𑀼 𑀲𑀩𑁆𑀩𑁂𑀧𑀺 𑀓𑀼𑀲𑀮𑀸 𑀥𑀫𑁆𑀫𑀸. 𑀬𑀣𑀸𑀳 𑁋

‘‘𑀢𑀢𑁆𑀣 𑀓𑀢𑀫𑀸 𑀦𑁂𑀓𑁆𑀔𑀫𑁆𑀫𑀥𑀸𑀢𑀼? 𑀦𑁂𑀓𑁆𑀔𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑁄 𑀢𑀓𑁆𑀓𑁄 𑀯𑀺𑀢𑀓𑁆𑀓𑁄…𑀧𑁂… 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀦𑁂𑀓𑁆𑀔𑀫𑁆𑀫𑀥𑀸𑀢𑀽’’𑀢𑀺 (𑀯𑀺𑀪. 𑁧𑁮𑁨).

𑀇𑀥𑀸𑀧𑀺 𑀤𑀼𑀯𑀺𑀥𑀸 𑀓𑀣𑀸. 𑀦𑁂𑀓𑁆𑀔𑀫𑁆𑀫𑀥𑀸𑀢𑀼𑀕𑁆𑀕𑀳𑀡𑁂𑀦 𑀳𑀺 𑀇𑀢𑀭𑀸𑀧𑀺 𑀤𑁆𑀯𑁂 𑀥𑀸𑀢𑀼𑀬𑁄 𑀕𑀳𑀡𑀁 𑀕𑀘𑁆𑀙𑀦𑁆𑀢𑀺 𑀓𑀼𑀲𑀮𑀥𑀫𑁆𑀫𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸, 𑀅𑀬𑀁 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀸. 𑀢𑀸 𑀧𑀦 𑀥𑀸𑀢𑀼𑀬𑁄 𑀯𑀺𑀲𑀼𑀁 𑀤𑀻𑀧𑁂𑀢𑀩𑁆𑀩𑀸𑀢𑀺 𑀢𑀸 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀲𑀩𑁆𑀩𑀓𑀼𑀲𑀮𑀸 𑀦𑁂𑀓𑁆𑀔𑀫𑁆𑀫𑀥𑀸𑀢𑀽𑀢𑀺 𑀅𑀬𑀁 𑀅𑀲𑀫𑁆𑀪𑀺𑀦𑁆𑀦𑀸. 𑀇𑀫𑀁 𑀦𑁂𑀓𑁆𑀔𑀫𑁆𑀫𑀥𑀸𑀢𑀼𑀁 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀧𑀝𑀺𑀘𑁆𑀘 𑀦𑁂𑀓𑁆𑀔𑀫𑁆𑀫𑀲𑀜𑁆𑀜𑀸 𑀦𑀸𑀫 𑀉𑀧𑁆𑀧𑀚𑁆𑀚𑀢𑀺. 𑀲𑀜𑁆𑀜𑀸𑀤𑀻𑀦𑀺 𑀧𑀝𑀺𑀘𑁆𑀘 𑀯𑀺𑀢𑀓𑁆𑀓𑀸𑀤𑀬𑁄 𑀬𑀣𑀸𑀦𑀼𑀭𑀽𑀧𑀁.

𑀅𑀩𑁆𑀬𑀸𑀧𑀸𑀤𑀥𑀸𑀢𑀼𑀁, 𑀪𑀺𑀓𑁆𑀔𑀯𑁂𑀢𑀺 𑀏𑀢𑁆𑀣 𑀅𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄𑀧𑀺 𑀅𑀩𑁆𑀬𑀸𑀧𑀸𑀤𑀥𑀸𑀢𑀼 𑀅𑀩𑁆𑀬𑀸𑀧𑀸𑀤𑁄𑀧𑀺. 𑀬𑀣𑀸𑀳 𑁋

‘‘𑀢𑀢𑁆𑀣 𑀓𑀢𑀫𑀸 𑀅𑀩𑁆𑀬𑀸𑀧𑀸𑀤𑀥𑀸𑀢𑀼? 𑀅𑀩𑁆𑀬𑀸𑀧𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑁄 𑀢𑀓𑁆𑀓𑁄…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀩𑁆𑀬𑀸𑀧𑀸𑀤𑀥𑀸𑀢𑀼. 𑀬𑀸 𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀺 𑀫𑁂𑀢𑁆𑀢𑀸𑀬𑀦𑀸 𑀫𑁂𑀢𑁆𑀢𑀸𑀬𑀺𑀢𑀢𑁆𑀢𑀁 𑀫𑁂𑀢𑁆𑀢𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀩𑁆𑀬𑀸𑀧𑀸𑀤𑀥𑀸𑀢𑀽’’𑀢𑀺 (𑀯𑀺𑀪. 𑁧𑁮𑁨).

𑀇𑀫𑀁 𑀅𑀩𑁆𑀬𑀸𑀧𑀸𑀤𑀥𑀸𑀢𑀼𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀩𑁆𑀬𑀸𑀧𑀸𑀤𑀲𑀜𑁆𑀜𑀸 𑀦𑀸𑀫 𑀉𑀧𑁆𑀧𑀚𑁆𑀚𑀢𑀺.

𑀅𑀯𑀺𑀳𑀺𑀁𑀲𑀸𑀥𑀸𑀢𑀼𑀁, 𑀪𑀺𑀓𑁆𑀔𑀯𑁂𑀢𑀺 𑀏𑀢𑁆𑀣𑀸𑀧𑀺 𑀅𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄𑀧𑀺 𑀅𑀯𑀺𑀳𑀺𑀁𑀲𑀸𑀥𑀸𑀢𑀼 𑀓𑀭𑀼𑀡𑀸𑀧𑀺. 𑀬𑀣𑀸𑀳 𑁋

‘‘𑀢𑀢𑁆𑀣 𑀓𑀢𑀫𑀸 𑀅𑀯𑀺𑀳𑀺𑀁𑀲𑀸𑀥𑀸𑀢𑀼? 𑀅𑀯𑀺𑀳𑀺𑀁𑀲𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀢𑀓𑁆𑀓𑁄…𑀧𑁂… 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀯𑀺𑀳𑀺𑀁𑀲𑀸𑀥𑀸𑀢𑀼. 𑀬𑀸 𑀲𑀢𑁆𑀢𑁂𑀲𑀼 𑀓𑀭𑀼𑀡𑀸 𑀓𑀭𑀼𑀡𑀸𑀬𑀦𑀸 𑀓𑀭𑀼𑀡𑀸𑀬𑀺𑀢𑀢𑁆𑀢𑀁 𑀓𑀭𑀼𑀡𑀸𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀯𑀺𑀳𑀺𑀁𑀲𑀸𑀥𑀸𑀢𑀽’’𑀢𑀺 (𑀯𑀺𑀪. 𑁧𑁮𑁨).

𑀇𑀫𑀁 𑀅𑀯𑀺𑀳𑀺𑀁𑀲𑀸𑀥𑀸𑀢𑀼𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀯𑀺𑀳𑀺𑀁𑀲𑀸𑀲𑀜𑁆𑀜𑀸 𑀦𑀸𑀫 𑀉𑀧𑁆𑀧𑀚𑁆𑀚𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀤𑀼𑀢𑀺𑀬𑀁.

𑁩. 𑀕𑀺𑀜𑁆𑀚𑀓𑀸𑀯𑀲𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁭. 𑀢𑀢𑀺𑀬𑁂 𑀥𑀸𑀢𑀼𑀁, 𑀪𑀺𑀓𑁆𑀔𑀯𑁂𑀢𑀺 𑀇𑀢𑁄 𑀧𑀝𑁆𑀞𑀸𑀬 𑀅𑀚𑁆𑀛𑀸𑀲𑀬𑀁 𑀥𑀸𑀢𑀽𑀢𑀺 𑀤𑀻𑀧𑁂𑀢𑀺. 𑀉𑀧𑁆𑀧𑀚𑁆𑀚𑀢𑀺 𑀲𑀜𑁆𑀜𑀸𑀢𑀺 𑀅𑀚𑁆𑀛𑀸𑀲𑀬𑀁 𑀧𑀝𑀺𑀘𑁆𑀘 𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺, 𑀯𑀺𑀢𑀓𑁆𑀓𑁄 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀇𑀥𑀸𑀧𑀺 ‘‘𑀓𑀘𑁆𑀘𑀸𑀦𑁄 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀢𑀻’’𑀢𑀺 𑀢𑀲𑁆𑀲 𑀑𑀓𑀸𑀲𑀤𑀸𑀦𑀢𑁆𑀣𑀁 𑀏𑀢𑁆𑀢𑀸𑀯𑀢𑀸𑀯 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀲𑀽𑀢𑀺 𑀙𑀲𑀼 𑀲𑀢𑁆𑀣𑀸𑀭𑁂𑀲𑀼. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀢𑀺 𑀫𑀬𑀫𑀲𑁆𑀫 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀢𑀺. 𑀓𑀺𑀁 𑀧𑀝𑀺𑀘𑁆𑀘 𑀧𑀜𑁆𑀜𑀸𑀬𑀢𑀻𑀢𑀺 𑀓𑀺𑀲𑁆𑀫𑀺𑀁 𑀲𑀢𑀺 𑀳𑁄𑀢𑀻𑀢𑀺? 𑀲𑀢𑁆𑀣𑀸𑀭𑀸𑀦𑀁 𑀉𑀧𑁆𑀧𑀦𑁆𑀦𑀁 𑀤𑀺𑀝𑁆𑀞𑀺𑀁 𑀧𑀼𑀘𑁆𑀙𑀢𑀺. 𑀅𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀲𑀼 𑀢𑁂𑀲𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀏𑀢𑁂𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀁 𑀢𑀺𑀢𑁆𑀣𑀺𑀬𑀲𑀸𑀯𑀓𑀸𑀦𑀫𑁆𑀧𑀺 𑀤𑀺𑀝𑁆𑀞𑀺𑀁 𑀧𑀼𑀘𑁆𑀙𑀢𑀺𑀬𑁂𑀯.

𑀇𑀤𑀸𑀦𑀺 𑀬𑀲𑁆𑀫𑀸 𑀢𑁂𑀲𑀁 𑀅𑀯𑀺𑀚𑁆𑀚𑀸𑀥𑀸𑀢𑀼𑀁 𑀧𑀝𑀺𑀘𑁆𑀘 𑀲𑀸 𑀤𑀺𑀝𑁆𑀞𑀺 𑀳𑁄𑀢𑀺, 𑀅𑀯𑀺𑀚𑁆𑀚𑀸𑀥𑀸𑀢𑀼 𑀘 𑀦𑀸𑀫 𑀫𑀳𑀢𑀻 𑀥𑀸𑀢𑀼, 𑀢𑀲𑁆𑀫𑀸 𑀫𑀳𑀢𑀺𑀁 𑀥𑀸𑀢𑀼𑀁 𑀧𑀝𑀺𑀘𑁆𑀘 𑀢𑀲𑁆𑀲𑀸 𑀉𑀧𑁆𑀧𑀢𑁆𑀢𑀺𑀁 𑀤𑀻𑀧𑁂𑀦𑁆𑀢𑁄 𑀫𑀳𑀢𑀻 𑀔𑁄 𑀏𑀲𑀸𑀢𑀺𑀆𑀤𑀺𑀫𑀸𑀳. 𑀳𑀻𑀦𑀁, 𑀓𑀘𑁆𑀘𑀸𑀦, 𑀥𑀸𑀢𑀼𑀁 𑀧𑀝𑀺𑀘𑁆𑀘𑀸𑀢𑀺 𑀳𑀻𑀦𑀁 𑀅𑀚𑁆𑀛𑀸𑀲𑀬𑀁 𑀧𑀝𑀺𑀘𑁆𑀘. 𑀧𑀡𑀺𑀥𑀻𑀢𑀺 𑀘𑀺𑀢𑁆𑀢𑀝𑁆𑀞𑀧𑀦𑀁. 𑀲𑀸 𑀧𑀦𑁂𑀲𑀸 𑀇𑀢𑁆𑀣𑀺𑀪𑀸𑀯𑀁 𑀯𑀸 𑀫𑀓𑁆𑀓𑀝𑀸𑀤𑀺𑀢𑀺𑀭𑀘𑁆𑀙𑀸𑀦𑀪𑀸𑀯𑀁 𑀯𑀸 𑀧𑀢𑁆𑀣𑁂𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺. 𑀳𑀻𑀦𑁄 𑀧𑀼𑀕𑁆𑀕𑀮𑁄𑀢𑀺 𑀬𑀲𑁆𑀲𑁂𑀢𑁂 𑀳𑀻𑀦𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀩𑁆𑀩𑁄 𑀲𑁄 𑀧𑀼𑀕𑁆𑀕𑀮𑁄𑀧𑀺 𑀳𑀻𑀦𑁄 𑀦𑀸𑀫. 𑀳𑀻𑀦𑀸 𑀯𑀸𑀘𑀸𑀢𑀺 𑀬𑀸 𑀢𑀲𑁆𑀲 𑀯𑀸𑀘𑀸, 𑀲𑀸𑀧𑀺 𑀳𑀻𑀦𑀸. 𑀳𑀻𑀦𑀁 𑀆𑀘𑀺𑀓𑁆𑀔𑀢𑀻𑀢𑀺 𑀲𑁄 𑀆𑀘𑀺𑀓𑁆𑀔𑀦𑁆𑀢𑁄𑀧𑀺 𑀳𑀻𑀦𑀫𑁂𑀯 𑀆𑀘𑀺𑀓𑁆𑀔𑀢𑀺, 𑀤𑁂𑀲𑁂𑀦𑁆𑀢𑁄𑀧𑀺 𑀳𑀻𑀦𑀫𑁂𑀯 𑀤𑁂𑀲𑁂𑀢𑀻𑀢𑀺 𑀲𑀩𑁆𑀩𑀧𑀤𑀸𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀉𑀧𑀧𑀢𑁆𑀢𑀻𑀢𑀺 𑀤𑁆𑀯𑁂 𑀉𑀧𑀧𑀢𑁆𑀢𑀺𑀬𑁄 𑀧𑀝𑀺𑀮𑀸𑀪𑁄 𑀘 𑀦𑀺𑀩𑁆𑀩𑀢𑁆𑀢𑀺 𑀘. 𑀦𑀺𑀩𑁆𑀩𑀢𑁆𑀢𑀺 𑀳𑀻𑀦𑀓𑀼𑀮𑀸𑀤𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀧𑀝𑀺𑀮𑀸𑀪𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑁆𑀔𑀡𑁂 𑀳𑀻𑀦𑀢𑁆𑀢𑀺𑀓𑀯𑀲𑁂𑀦. 𑀓𑀣𑀁? 𑀢𑀲𑁆𑀲 𑀳𑀺 𑀧𑀜𑁆𑀘𑀲𑀼 𑀦𑀻𑀘𑀓𑀼𑀮𑁂𑀲𑀼 𑀉𑀧𑁆𑀧𑀚𑁆𑀚𑀦𑀢𑁄 𑀳𑀻𑀦𑀸 𑀦𑀺𑀩𑁆𑀩𑀢𑁆𑀢𑀺, 𑀯𑁂𑀲𑁆𑀲𑀲𑀼𑀤𑁆𑀤𑀓𑀼𑀮𑁂𑀲𑀼 𑀉𑀧𑁆𑀧𑀚𑁆𑀚𑀦𑀢𑁄 𑀫𑀚𑁆𑀛𑀺𑀫𑀸, 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀓𑀼𑀮𑁂𑀲𑀼 𑀉𑀧𑁆𑀧𑀚𑁆𑀚𑀦𑀢𑁄 𑀧𑀡𑀻𑀢𑀸. 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀧𑀦 𑀧𑀝𑀺𑀮𑀸𑀪𑀢𑁄 𑀳𑀻𑀦𑁄 𑀧𑀝𑀺𑀮𑀸𑀪𑁄, 𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀁 𑀧𑀝𑀺𑀮𑀸𑀪𑀢𑁄 𑀫𑀚𑁆𑀛𑀺𑀫𑁄, 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁 𑀧𑀝𑀺𑀮𑀸𑀪𑀢𑁄 𑀧𑀡𑀻𑀢𑁄. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀦𑀺𑀩𑁆𑀩𑀢𑁆𑀢𑀺𑀬𑁂𑀯 𑀅𑀥𑀺𑀧𑁆𑀧𑁂𑀢𑀸𑀢𑀺. 𑀢𑀢𑀺𑀬𑀁.

𑁪. 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁮. 𑀘𑀢𑀼𑀢𑁆𑀣𑁂 𑀲𑀁𑀲𑀦𑁆𑀤𑀦𑁆𑀢𑀻𑀢𑀺 𑀏𑀓𑀢𑁄 𑀳𑁄𑀦𑁆𑀢𑀺. 𑀲𑀫𑁂𑀦𑁆𑀢𑀻𑀢𑀺 𑀲𑀫𑀸𑀕𑀘𑁆𑀙𑀦𑁆𑀢𑀺, 𑀦𑀺𑀭𑀦𑁆𑀢𑀭𑀸 𑀳𑁄𑀦𑁆𑀢𑀺. 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑀸𑀢𑀺 𑀳𑀻𑀦𑀚𑁆𑀛𑀸𑀲𑀬𑀸. 𑀓𑀮𑁆𑀬𑀸𑀡𑀸𑀥𑀺𑀫𑀼𑀢𑁆𑀢𑀺𑀓𑀸𑀢𑀺 𑀓𑀮𑁆𑀬𑀸𑀡𑀚𑁆𑀛𑀸𑀲𑀬𑀸. 𑀘𑀢𑀼𑀢𑁆𑀣𑀁.

𑁫. 𑀘𑀗𑁆𑀓𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁯. 𑀧𑀜𑁆𑀘𑀫𑁂 𑀧𑀲𑁆𑀲𑀣 𑀦𑁄𑀢𑀺 𑀧𑀲𑁆𑀲𑀣 𑀦𑀼. 𑀲𑀩𑁆𑀩𑁂 𑀔𑁄 𑀏𑀢𑁂𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀪𑀕𑀯𑀢𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀳𑀸𑀧𑀜𑁆𑀜𑀸𑀦𑀁 𑀬𑀤𑀺𑀤𑀁 𑀲𑀸𑀭𑀺𑀧𑀼𑀢𑁆𑀢𑁄’’𑀢𑀺 (𑀅. 𑀦𑀺. 𑁧.𑁧𑁮𑁯) 𑀫𑀳𑀸𑀧𑀜𑁆𑀜𑁂𑀲𑀼 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄. 𑀇𑀢𑀺 𑀦𑀁 ‘‘𑀔𑀦𑁆𑀥𑀦𑁆𑀢𑀭𑀁 𑀥𑀸𑀢𑁆𑀯𑀦𑁆𑀢𑀭𑀁 𑀆𑀬𑀢𑀦𑀦𑁆𑀢𑀭𑀁 𑀲𑀢𑀺𑀧𑀝𑁆𑀞𑀸𑀦𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀦𑁆𑀢𑀭𑀁 𑀢𑀺𑀮𑀓𑁆𑀔𑀡𑀸𑀳𑀢𑀁 𑀕𑀫𑁆𑀪𑀻𑀭𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺 𑀫𑀳𑀸𑀧𑀜𑁆𑀜𑀸𑀯 𑀧𑀭𑀺𑀯𑀸𑀭𑁂𑀦𑁆𑀢𑀺. 𑀲𑁄𑀧𑀺 𑀢𑁂𑀲𑀁 𑀧𑀣𑀯𑀺𑀁 𑀧𑀢𑁆𑀣𑀭𑁂𑀦𑁆𑀢𑁄 𑀯𑀺𑀬 𑀲𑀺𑀦𑁂𑀭𑀼𑀧𑀸𑀤𑀢𑁄 𑀯𑀸𑀮𑀺𑀓𑀁 𑀉𑀤𑁆𑀥𑀭𑀦𑁆𑀢𑁄 𑀯𑀺𑀬 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀪𑀺𑀦𑁆𑀤𑀦𑁆𑀢𑁄 𑀯𑀺𑀬 𑀲𑀺𑀦𑁂𑀭𑀼𑀁 𑀉𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀆𑀓𑀸𑀲𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀯𑀺𑀬 𑀘𑀦𑁆𑀤𑀺𑀫𑀲𑀽𑀭𑀺𑀬𑁂 𑀉𑀝𑁆𑀞𑀸𑀧𑁂𑀦𑁆𑀢𑁄 𑀯𑀺𑀬 𑀘 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀺𑀢𑀁 𑀓𑀣𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀩𑁆𑀩𑁂 𑀔𑁄 𑀏𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀫𑀳𑀸𑀧𑀜𑁆𑀜𑀸’’𑀢𑀺.

𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄𑀧𑀺 𑀪𑀕𑀯𑀢𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀬𑀤𑀺𑀤𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄’’𑀢𑀺 𑀇𑀤𑁆𑀥𑀺𑀫𑀦𑁆𑀢𑁂𑀲𑀼 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄. 𑀇𑀢𑀺 𑀦𑀁 ‘‘𑀧𑀭𑀺𑀓𑀫𑁆𑀫𑀁 𑀆𑀦𑀺𑀲𑀁𑀲𑀁 𑀅𑀥𑀺𑀝𑁆𑀞𑀸𑀦𑀁 𑀯𑀺𑀓𑀼𑀩𑁆𑀩𑀦𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺 𑀇𑀤𑁆𑀥𑀺𑀫𑀦𑁆𑀢𑁄𑀯 𑀧𑀭𑀺𑀯𑀸𑀭𑁂𑀦𑁆𑀢𑀺. 𑀲𑁄𑀧𑀺 𑀢𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀺𑀢𑀁 𑀓𑀣𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀩𑁆𑀩𑁂 𑀔𑁄 𑀏𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀫𑀳𑀺𑀤𑁆𑀥𑀺𑀓𑀸’’𑀢𑀺.

𑀫𑀳𑀸𑀓𑀲𑁆𑀲𑀧𑁄𑀧𑀺 𑀪𑀕𑀯𑀢𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀼𑀢𑀯𑀸𑀤𑀸𑀦𑀁 𑀬𑀤𑀺𑀤𑀁 𑀫𑀳𑀸𑀓𑀲𑁆𑀲𑀧𑁄’’𑀢𑀺 𑀥𑀼𑀢𑀯𑀸𑀤𑁂𑀲𑀼 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄. 𑀇𑀢𑀺 𑀦𑀁 ‘‘𑀥𑀼𑀢𑀗𑁆𑀕𑀧𑀭𑀺𑀳𑀸𑀭𑀁 𑀆𑀦𑀺𑀲𑀁𑀲𑀁 𑀲𑀫𑁄𑀥𑀸𑀦𑀁 𑀅𑀥𑀺𑀝𑁆𑀞𑀸𑀦𑀁 𑀪𑁂𑀤𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺 𑀥𑀼𑀢𑀯𑀸𑀤𑀸𑀯 𑀧𑀭𑀺𑀯𑀸𑀭𑁂𑀦𑁆𑀢𑀺. 𑀲𑁄𑀧𑀺 𑀢𑁂𑀲𑀁 𑀢𑀣𑁂𑀯 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀺𑀢𑀁 𑀩𑁆𑀬𑀸𑀓𑀭𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀩𑁆𑀩𑁂 𑀔𑁄 𑀏𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀥𑀼𑀢𑀯𑀸𑀤𑀸’’𑀢𑀺.

𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄𑀧𑀺 𑀪𑀕𑀯𑀢𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀦𑀁 𑀬𑀤𑀺𑀤𑀁 𑀅𑀦𑀼𑀭𑀼𑀤𑁆𑀥𑁄’’𑀢𑀺 (𑀅. 𑀦𑀺. 𑁧.𑁧𑁯𑁨) 𑀤𑀺𑀩𑁆𑀩𑀘𑀓𑁆𑀔𑀼𑀓𑁂𑀲𑀼 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄. 𑀇𑀢𑀺 𑀦𑀁 ‘‘𑀤𑀺𑀩𑁆𑀩𑀘𑀓𑁆𑀔𑀼𑀲𑁆𑀲 𑀧𑀭𑀺𑀓𑀫𑁆𑀫𑀁 𑀆𑀦𑀺𑀲𑀁𑀲𑀁 𑀉𑀧𑀓𑁆𑀓𑀺𑀮𑁂𑀲𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀓𑀸𑀯 𑀧𑀭𑀺𑀯𑀸𑀭𑁂𑀦𑁆𑀢𑀺. 𑀲𑁄𑀧𑀺 𑀢𑁂𑀲𑀁 𑀢𑀣𑁂𑀯 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀺𑀢𑀁 𑀓𑀣𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀩𑁆𑀩𑁂 𑀔𑁄 𑀏𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀤𑀺𑀩𑁆𑀩𑀘𑀓𑁆𑀔𑀼𑀓𑀸’’𑀢𑀺.

𑀧𑀼𑀡𑁆𑀡𑀢𑁆𑀣𑁂𑀭𑁄𑀧𑀺 𑀪𑀕𑀯𑀢𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀓𑀣𑀺𑀓𑀸𑀦𑀁 𑀬𑀤𑀺𑀤𑀁 𑀧𑀼𑀡𑁆𑀡𑁄 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄’’𑀢𑀺 (𑀅. 𑀦𑀺. 𑁧.𑁧𑁯𑁬) 𑀥𑀫𑁆𑀫𑀓𑀣𑀺𑀓𑁂𑀲𑀼 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄. 𑀇𑀢𑀺 𑀦𑀁 ‘‘𑀥𑀫𑁆𑀫𑀓𑀣𑀸𑀬 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀕𑀫𑁆𑀪𑀻𑀭𑀼𑀢𑁆𑀢𑀸𑀦𑀯𑀺𑀘𑀺𑀢𑁆𑀭𑀓𑀣𑀸𑀤𑀻𑀲𑀼 𑀢𑀁 𑀢𑀁 𑀆𑀓𑀸𑀭𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺 𑀥𑀫𑁆𑀫𑀓𑀣𑀺𑀓𑀸𑀯 𑀧𑀭𑀺𑀯𑀸𑀭𑁂𑀦𑁆𑀢𑀺. 𑀲𑁄𑀧𑀺 𑀢𑁂𑀲𑀁 ‘‘𑀆𑀯𑀼𑀲𑁄, 𑀥𑀫𑁆𑀫𑀓𑀣𑀺𑀓𑁂𑀦 𑀦𑀸𑀫 𑀆𑀤𑀺𑀢𑁄 𑀧𑀭𑀺𑀲𑀁 𑀯𑀡𑁆𑀡𑁂𑀢𑀼𑀁 𑀯𑀝𑁆𑀝𑀢𑀺, 𑀫𑀚𑁆𑀛𑁂 𑀲𑀼𑀜𑁆𑀜𑀢𑀁 𑀧𑀓𑀸𑀲𑁂𑀢𑀼𑀁, 𑀅𑀦𑁆𑀢𑁂 𑀘𑀢𑀼𑀲𑀘𑁆𑀘𑀯𑀲𑁂𑀦 𑀓𑀽𑀝𑀁 𑀕𑀡𑁆𑀳𑀺𑀢𑀼’’𑀦𑁆𑀢𑀺 𑀏𑀯𑀁 𑀢𑀁 𑀢𑀁 𑀥𑀫𑁆𑀫𑀓𑀣𑀸𑀦𑀬𑀁 𑀆𑀘𑀺𑀓𑁆𑀔𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀩𑁆𑀩𑁂 𑀔𑁄 𑀏𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀥𑀫𑁆𑀫𑀓𑀣𑀺𑀓𑀸’’𑀢𑀺.

𑀉𑀧𑀸𑀮𑀺𑀢𑁆𑀣𑁂𑀭𑁄𑀧𑀺 𑀪𑀕𑀯𑀢𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀺𑀦𑀬𑀥𑀭𑀸𑀦𑀁 𑀬𑀤𑀺𑀤𑀁 𑀉𑀧𑀸𑀮𑀻’’𑀢𑀺 (𑀅. 𑀦𑀺. 𑁧.𑁨𑁨𑁮) 𑀯𑀺𑀦𑀬𑀥𑀭𑁂𑀲𑀼 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄. 𑀇𑀢𑀺 𑀦𑀁 ‘‘𑀕𑀭𑀼𑀓𑀮𑀳𑀼𑀓𑀁 𑀲𑀢𑁂𑀓𑀺𑀘𑁆𑀙𑀅𑀢𑁂𑀓𑀺𑀘𑁆𑀙𑀁 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺 𑀯𑀺𑀦𑀬𑀥𑀭𑀸𑀯 𑀧𑀭𑀺𑀯𑀸𑀭𑁂𑀦𑁆𑀢𑀺. 𑀲𑁄𑀧𑀺 𑀢𑁂𑀲𑀁 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀺𑀢𑀁 𑀢𑀣𑁂𑀯 𑀓𑀣𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀩𑁆𑀩𑁂 𑀔𑁄 𑀏𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀯𑀺𑀦𑀬𑀥𑀭𑀸’’𑀢𑀺.

𑀆𑀦𑀦𑁆𑀤𑀢𑁆𑀣𑁂𑀭𑁄𑀧𑀺 𑀪𑀕𑀯𑀢𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀬𑀤𑀺𑀤𑀁 𑀆𑀦𑀦𑁆𑀤𑁄’’𑀢𑀺 (𑀅. 𑀦𑀺. 𑁧.𑁨𑁨𑁩) 𑀩𑀳𑀼𑀲𑁆𑀲𑀼𑀢𑁂𑀲𑀼 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄. 𑀇𑀢𑀺 𑀦𑀁 ‘‘𑀤𑀲𑀯𑀺𑀥𑀁 𑀩𑁆𑀬𑀜𑁆𑀚𑀦𑀩𑀼𑀤𑁆𑀥𑀺𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀅𑀦𑀼𑀲𑀦𑁆𑀥𑀺𑀁 𑀧𑀼𑀩𑁆𑀩𑀸𑀧𑀭𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺 𑀩𑀳𑀼𑀲𑁆𑀲𑀼𑀢𑀸𑀯 𑀧𑀭𑀺𑀯𑀸𑀭𑁂𑀦𑁆𑀢𑀺. 𑀲𑁄𑀧𑀺 𑀢𑁂𑀲𑀁 ‘‘𑀇𑀤𑀁 𑀏𑀯𑀁 𑀯𑀢𑁆𑀢𑀩𑁆𑀩𑀁, 𑀇𑀤𑀁 𑀏𑀯𑀁 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀲𑀩𑁆𑀩𑀁 𑀓𑀣𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀩𑁆𑀩𑁂 𑀔𑁄 𑀏𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀩𑀳𑀼𑀲𑁆𑀲𑀼𑀢𑀸’’𑀢𑀺.

𑀤𑁂𑀯𑀤𑀢𑁆𑀢𑁄 𑀧𑀦 𑀧𑀸𑀧𑀺𑀘𑁆𑀙𑁄 𑀇𑀘𑁆𑀙𑀸𑀧𑀓𑀢𑁄, 𑀢𑁂𑀦 𑀦𑀁 ‘‘𑀓𑀼𑀮𑀲𑀗𑁆𑀕𑀡𑁆𑀳𑀦𑀧𑀭𑀺𑀳𑀸𑀭𑀁 𑀦𑀸𑀦𑀧𑁆𑀧𑀓𑀸𑀭𑀓𑀁 𑀓𑁄𑀳𑀜𑁆𑀜𑀢𑀁 𑀧𑀼𑀘𑁆𑀙𑀺𑀲𑁆𑀲𑀸𑀫𑀸’’𑀢𑀺 𑀧𑀸𑀧𑀺𑀘𑁆𑀙𑀸𑀯 𑀧𑀭𑀺𑀯𑀸𑀭𑁂𑀦𑁆𑀢𑀺. 𑀲𑁄𑀧𑀺 𑀢𑁂𑀲𑀁 𑀢𑀁 𑀢𑀁 𑀦𑀺𑀬𑀸𑀫𑀁 𑀆𑀘𑀺𑀓𑁆𑀔𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀩𑁆𑀩𑁂 𑀔𑁄 𑀏𑀢𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀧𑀸𑀧𑀺𑀘𑁆𑀙𑀸’’𑀢𑀺.

𑀓𑀲𑁆𑀫𑀸 𑀧𑀦𑁂𑀢𑁂 𑀅𑀯𑀺𑀤𑀽𑀭𑁂 𑀘𑀗𑁆𑀓𑀫𑀺𑀁𑀲𑀽𑀢𑀺. ‘‘𑀤𑁂𑀯𑀤𑀢𑁆𑀢𑁄 𑀲𑀢𑁆𑀣𑀭𑀺 𑀧𑀤𑀼𑀝𑁆𑀞𑀘𑀺𑀢𑁆𑀢𑁄 𑀅𑀦𑀢𑁆𑀣𑀫𑁆𑀧𑀺 𑀓𑀸𑀢𑀼𑀁 𑀉𑀧𑀓𑁆𑀓𑀫𑁂𑀬𑁆𑀬𑀸’’𑀢𑀺 𑀆𑀭𑀓𑁆𑀔𑀕𑁆𑀕𑀳𑀡𑀢𑁆𑀣𑀁. 𑀅𑀣 𑀤𑁂𑀯𑀤𑀢𑁆𑀢𑁄 𑀓𑀲𑁆𑀫𑀸 𑀘𑀗𑁆𑀓𑀫𑀻𑀢𑀺? ‘‘𑀅𑀓𑀸𑀭𑀓𑁄 𑀅𑀬𑀁, 𑀬𑀤𑀺 𑀓𑀸𑀭𑀓𑁄 𑀪𑀯𑁂𑀬𑁆𑀬, 𑀦 𑀇𑀥 𑀆𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀅𑀢𑁆𑀢𑀦𑁄 𑀓𑀢𑀤𑁄𑀲𑀧𑀝𑀺𑀘𑁆𑀙𑀸𑀤𑀦𑀢𑁆𑀣𑀁. 𑀓𑀺𑀁 𑀧𑀦 𑀤𑁂𑀯𑀤𑀢𑁆𑀢𑁄 𑀪𑀕𑀯𑀢𑁄 𑀅𑀦𑀢𑁆𑀣𑀁 𑀓𑀸𑀢𑀼𑀁 𑀲𑀫𑀢𑁆𑀣𑁄, 𑀪𑀕𑀯𑀢𑁄 𑀯𑀸 𑀆𑀭𑀓𑁆𑀔𑀓𑀺𑀘𑁆𑀘𑀁 𑀅𑀢𑁆𑀣𑀻𑀢𑀺? 𑀦𑀢𑁆𑀣𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀆𑀦𑀦𑁆𑀤, 𑀅𑀦𑀯𑀓𑀸𑀲𑁄, 𑀬𑀁 𑀢𑀣𑀸𑀕𑀢𑁄 𑀧𑀭𑀽𑀧𑀓𑁆𑀓𑀫𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬𑀸’’𑀢𑀺 (𑀘𑀽𑀴𑀯. 𑁩𑁪𑁧). 𑀪𑀺𑀓𑁆𑀔𑀽 𑀧𑀦 𑀲𑀢𑁆𑀣𑀭𑀺 𑀕𑀸𑀭𑀯𑁂𑀦 𑀆𑀕𑀢𑀸. 𑀢𑁂𑀦𑁂𑀯 𑀪𑀕𑀯𑀸 𑀏𑀯𑀁 𑀯𑀢𑁆𑀯𑀸 ‘‘𑀯𑀺𑀲𑁆𑀲𑀚𑁆𑀚𑁂𑀳𑀺, 𑀆𑀦𑀦𑁆𑀤, 𑀪𑀺𑀓𑁆𑀔𑀼𑀲𑀗𑁆𑀖’’𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀸𑀧𑁂𑀲𑀺. 𑀧𑀜𑁆𑀘𑀫𑀁.

𑁬. 𑀲𑀕𑀸𑀣𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁦. 𑀙𑀝𑁆𑀞𑁂 𑀕𑀽𑀣𑁄 𑀕𑀽𑀣𑁂𑀦 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀻𑀢𑀺 𑀲𑀫𑀼𑀤𑁆𑀤𑀦𑁆𑀢𑀭𑁂 𑀚𑀦𑀧𑀤𑀦𑁆𑀢𑀭𑁂 𑀘𑀓𑁆𑀓𑀯𑀸𑀴𑀦𑁆𑀢𑀭𑁂 𑀞𑀺𑀢𑁄𑀧𑀺 𑀯𑀡𑁆𑀡𑁂𑀦𑀧𑀺 𑀕𑀦𑁆𑀥𑁂𑀦𑀧𑀺 𑀭𑀲𑁂𑀦𑀧𑀺 𑀦𑀸𑀦𑀢𑁆𑀢𑀁 𑀅𑀦𑀼𑀧𑀕𑀘𑁆𑀙𑀦𑁆𑀢𑁄 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀺, 𑀏𑀓𑀲𑀤𑀺𑀲𑁄𑀯 𑀳𑁄𑀢𑀺 𑀦𑀺𑀭𑀦𑁆𑀢𑀭𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀅𑀦𑀺𑀝𑁆𑀞𑀉𑀧𑀫𑀸 𑀳𑀻𑀦𑀚𑁆𑀛𑀸𑀲𑀬𑀸𑀦𑀁 𑀳𑀻𑀦𑀅𑀚𑁆𑀛𑀸𑀲𑀬𑀲𑁆𑀲 𑀲𑀭𑀺𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀆𑀳𑀝𑀸, 𑀔𑀻𑀭𑀸𑀤𑀺𑀯𑀺𑀲𑀺𑀝𑁆𑀞𑁄𑀧𑀫𑀸 𑀓𑀮𑁆𑀬𑀸𑀡𑀚𑁆𑀛𑀸𑀲𑀬𑀸𑀦𑀁 𑀅𑀚𑁆𑀛𑀸𑀲𑀬𑀲𑁆𑀲 𑀲𑀭𑀺𑀓𑁆𑀔𑀪𑀸𑀯𑀤𑀲𑁆𑀲𑀦𑀢𑁆𑀣𑀁.

𑀲𑀁𑀲𑀕𑁆𑀕𑀸𑀢𑀺 𑀤𑀲𑁆𑀲𑀦𑀲𑀯𑀦𑀲𑀁𑀲𑀕𑁆𑀕𑀸𑀤𑀺𑀯𑀢𑁆𑀣𑀼𑀓𑁂𑀦 𑀢𑀡𑁆𑀳𑀸𑀲𑁆𑀦𑁂𑀳𑁂𑀦. 𑀯𑀦𑀣𑁄 𑀚𑀸𑀢𑁄𑀢𑀺 𑀓𑀺𑀮𑁂𑀲𑀯𑀦𑀁 𑀚𑀸𑀢𑀁. 𑀅𑀲𑀁𑀲𑀕𑁆𑀕𑁂𑀦 𑀙𑀺𑀚𑁆𑀚𑀢𑀻𑀢𑀺 𑀏𑀓𑀢𑁄 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀦𑀺 𑀅𑀓𑀭𑁄𑀦𑁆𑀢𑀲𑁆𑀲 𑀅𑀲𑀁𑀲𑀕𑁆𑀕𑁂𑀦 𑀅𑀤𑀲𑁆𑀲𑀦𑁂𑀦 𑀙𑀺𑀚𑁆𑀚𑀢𑀺. 𑀲𑀸𑀥𑀼𑀚𑀻𑀯𑀻𑀢𑀺 𑀧𑀭𑀺𑀲𑀼𑀤𑁆𑀥𑀚𑀻𑀯𑀺𑀢𑀁 𑀚𑀻𑀯𑀫𑀸𑀦𑁄. 𑀲𑀳𑀸𑀯𑀲𑁂𑀢𑀺 𑀲𑀳𑀯𑀸𑀲𑀁 𑀯𑀲𑁂𑀬𑁆𑀬. 𑀙𑀝𑁆𑀞𑀁.

𑁭. 𑀅𑀲𑁆𑀲𑀤𑁆𑀥𑀲𑀁𑀲𑀦𑁆𑀤𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁧. 𑀲𑀢𑁆𑀢𑀫𑁂 𑀅𑀲𑁆𑀲𑀤𑁆𑀥𑀸 𑀅𑀲𑁆𑀲𑀤𑁆𑀥𑁂𑀳𑀻𑀢𑀺𑀆𑀤𑀻𑀲𑀼 𑀩𑀼𑀤𑁆𑀥𑁂 𑀯𑀸 𑀥𑀫𑁆𑀫𑁂 𑀯𑀸 𑀲𑀗𑁆𑀖𑁂 𑀯𑀸 𑀲𑀤𑁆𑀥𑀸𑀯𑀺𑀭𑀳𑀺𑀢𑀸 𑀦𑀺𑀭𑁄𑀚𑀸 𑀦𑀺𑀭𑀲𑀸 𑀧𑀼𑀕𑁆𑀕𑀮𑀸 𑀲𑀫𑀼𑀤𑁆𑀤𑀲𑁆𑀲 𑀑𑀭𑀺𑀫𑀢𑀻𑀭𑁂 𑀞𑀺𑀢𑀸 𑀧𑀸𑀭𑀺𑀫𑀢𑀻𑀭𑁂𑀧𑀺 𑀞𑀺𑀢𑁂𑀳𑀺 𑀅𑀲𑁆𑀲𑀤𑁆𑀥𑁂𑀳𑀺 𑀲𑀤𑁆𑀥𑀺𑀁 𑀢𑀸𑀬 𑀅𑀲𑁆𑀲𑀤𑁆𑀥𑀢𑀸𑀬 𑀏𑀓𑀲𑀤𑀺𑀲𑀸 𑀦𑀺𑀭𑀦𑁆𑀢𑀭𑀸 𑀳𑁄𑀦𑁆𑀢𑀺. 𑀢𑀣𑀸 𑀅𑀳𑀺𑀭𑀺𑀓𑀸 𑀪𑀺𑀦𑁆𑀦𑀫𑀭𑀺𑀬𑀸𑀤𑀸 𑀅𑀮𑀚𑁆𑀚𑀺𑀧𑀼𑀕𑁆𑀕𑀮𑀸 𑀅𑀳𑀺𑀭𑀺𑀓𑁂𑀳𑀺, 𑀅𑀦𑁄𑀢𑁆𑀢𑀧𑁆𑀧𑀺𑀦𑁄 𑀧𑀸𑀧𑀓𑀺𑀭𑀺𑀬𑀸𑀬 𑀅𑀪𑀸𑀬𑀫𑀸𑀦𑀸 𑀅𑀦𑁄𑀢𑁆𑀢𑀧𑁆𑀧𑀻𑀳𑀺, 𑀅𑀧𑁆𑀧𑀲𑁆𑀲𑀼𑀢𑀸 𑀲𑀼𑀢𑀯𑀺𑀭𑀳𑀺𑀢𑀸 𑀅𑀧𑁆𑀧𑀲𑁆𑀲𑀼𑀢𑁂𑀳𑀺, 𑀓𑀼𑀲𑀻𑀢𑀸 𑀆𑀮𑀲𑀺𑀬𑀧𑀼𑀕𑁆𑀕𑀮𑀸 𑀓𑀼𑀲𑀻𑀢𑁂𑀳𑀺, 𑀫𑀼𑀝𑁆𑀞𑀲𑁆𑀲𑀢𑀺𑀦𑁄 𑀪𑀢𑁆𑀢𑀦𑀺𑀓𑁆𑀔𑀺𑀢𑁆𑀢𑀓𑀸𑀓𑀫𑀁𑀲𑀦𑀺𑀓𑁆𑀔𑀺𑀢𑁆𑀢𑀲𑀺𑀗𑁆𑀕𑀸𑀮𑀲𑀤𑀺𑀲𑀸 𑀫𑀼𑀝𑁆𑀞𑀲𑁆𑀲𑀢𑀻𑀳𑀺, 𑀤𑀼𑀧𑁆𑀧𑀜𑁆𑀜𑀸 𑀔𑀦𑁆𑀥𑀸𑀤𑀺𑀧𑀭𑀺𑀘𑁆𑀙𑁂𑀤𑀺𑀓𑀸𑀬 𑀧𑀜𑁆𑀜𑀸𑀬 𑀅𑀪𑀸𑀯𑁂𑀦 𑀦𑀺𑀧𑁆𑀧𑀜𑁆𑀜𑀸 𑀢𑀸𑀤𑀺𑀲𑁂𑀳𑁂𑀯 𑀤𑀼𑀧𑁆𑀧𑀜𑁆𑀜𑁂𑀳𑀺, 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀸 𑀘𑁂𑀢𑀺𑀬𑀯𑀦𑁆𑀤𑀦𑀸𑀤𑀺𑀓𑀺𑀘𑁆𑀘𑀧𑀲𑀼𑀢𑀸 𑀲𑀤𑁆𑀥𑁂𑀳𑀺, 𑀳𑀺𑀭𑀺𑀫𑀦𑀸 𑀮𑀚𑁆𑀚𑀺𑀧𑀼𑀕𑁆𑀕𑀮𑀸 𑀳𑀺𑀭𑀺𑀫𑀦𑁂𑀳𑀺, 𑀑𑀢𑁆𑀢𑀧𑁆𑀧𑀺𑀦𑁄 𑀧𑀸𑀧𑀪𑀻𑀭𑀼𑀓𑀸 𑀑𑀢𑁆𑀢𑀧𑁆𑀧𑀻𑀳𑀺, 𑀩𑀳𑀼𑀲𑁆𑀲𑀼𑀢𑀸 𑀲𑀼𑀢𑀥𑀭𑀸 𑀆𑀕𑀫𑀥𑀭𑀸 𑀢𑀦𑁆𑀢𑀺𑀧𑀸𑀮𑀓𑀸 𑀯𑀁𑀲𑀸𑀦𑀼𑀭𑀓𑁆𑀔𑀓𑀸 𑀩𑀳𑀼𑀲𑁆𑀲𑀼𑀢𑁂𑀳𑀺, 𑀆𑀭𑀤𑁆𑀥𑀯𑀻𑀭𑀺𑀬𑀸 𑀧𑀭𑀺𑀧𑀼𑀡𑁆𑀡𑀧𑀭𑀓𑁆𑀓𑀫𑀸 𑀆𑀭𑀤𑁆𑀥𑀯𑀻𑀭𑀺𑀬𑁂𑀳𑀺, 𑀉𑀧𑀝𑁆𑀞𑀺𑀢𑀲𑁆𑀲𑀢𑀻 𑀲𑀩𑁆𑀩𑀓𑀺𑀘𑁆𑀘𑀧𑀭𑀺𑀕𑁆𑀕𑀸𑀳𑀺𑀓𑀸𑀬 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀸 𑀉𑀧𑀝𑁆𑀞𑀺𑀢𑀲𑁆𑀲𑀢𑀻𑀳𑀺, 𑀧𑀜𑁆𑀜𑀯𑀦𑁆𑀢𑁄 𑀫𑀳𑀸𑀧𑀜𑁆𑀜𑁂𑀳𑀺 𑀯𑀚𑀺𑀭𑀽𑀧𑀫𑀜𑀸𑀡𑁂𑀳𑀺 𑀧𑀜𑁆𑀜𑀯𑀦𑁆𑀢𑁂𑀳𑀺 𑀲𑀤𑁆𑀥𑀺𑀁 𑀤𑀽𑀭𑁂 𑀞𑀺𑀢𑀸𑀧𑀺 𑀢𑀸𑀬 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀬𑀸 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑁂𑀦𑁆𑀢𑀺. 𑀲𑀢𑁆𑀢𑀫𑀁.

𑁮-𑁧𑁨. 𑀅𑀲𑁆𑀲𑀤𑁆𑀥𑀫𑀽𑀮𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁨-𑁧𑁦𑁬. 𑀅𑀝𑁆𑀞𑀫𑀸𑀤𑀻𑀦𑀺 𑀢𑁂𑀬𑁂𑀯 𑀅𑀲𑁆𑀲𑀤𑁆𑀥𑀸𑀤𑀺𑀥𑀫𑁆𑀫𑁂 𑀢𑀺𑀓𑀯𑀲𑁂𑀦 𑀓𑀢𑁆𑀯𑀸 𑀤𑁂𑀲𑀺𑀢𑀸𑀦𑀺. 𑀢𑀢𑁆𑀣 𑀅𑀝𑁆𑀞𑀫𑁂 𑀅𑀲𑁆𑀲𑀤𑁆𑀥𑀸𑀤𑀺𑀫𑀽𑀮𑀓𑀸 𑀓𑀡𑁆𑀳𑀧𑀓𑁆𑀔𑀲𑀼𑀓𑁆𑀓𑀧𑀓𑁆𑀔𑀯𑀲𑁂𑀦 𑀧𑀜𑁆𑀘 𑀢𑀺𑀓𑀸 𑀯𑀼𑀢𑁆𑀢𑀸, 𑀦𑀯𑀫𑁂 𑀅𑀳𑀺𑀭𑀺𑀓𑀫𑀽𑀮𑀓𑀸 𑀘𑀢𑁆𑀢𑀸𑀭𑁄. 𑀤𑀲𑀫𑁂 𑀅𑀦𑁄𑀢𑁆𑀢𑀧𑁆𑀧𑀫𑀽𑀮𑀓𑀸 𑀢𑀬𑁄, 𑀏𑀓𑀸𑀤𑀲𑀫𑁂 𑀅𑀧𑁆𑀧𑀲𑁆𑀲𑀼𑀢𑀫𑀽𑀮𑀓𑀸 𑀤𑁆𑀯𑁂, 𑀤𑁆𑀯𑀸𑀤𑀲𑀫𑁂 𑀓𑀼𑀲𑀻𑀢𑀫𑀽𑀮𑀓𑁄 𑀏𑀓𑁄 𑀢𑀺𑀓𑁄 𑀯𑀼𑀢𑁆𑀢𑁄𑀢𑀺 𑀲𑀩𑁆𑀩𑁂𑀧𑀺 𑀧𑀜𑁆𑀘𑀲𑀼 𑀲𑀼𑀢𑁆𑀢𑀦𑁆𑀢𑁂𑀲𑀼 𑀧𑀦𑁆𑀦𑀭𑀲 𑀢𑀺𑀓𑀸 𑀳𑁄𑀦𑁆𑀢𑀺. 𑀧𑀦𑁆𑀦𑀭𑀲 𑀘𑁂𑀢𑁂 𑀲𑀼𑀢𑁆𑀢𑀦𑁆𑀢𑀸𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀬𑀁 𑀢𑀺𑀓𑀧𑁂𑀬𑁆𑀬𑀸𑀮𑁄 𑀦𑀸𑀫. 𑀅𑀝𑁆𑀞𑀫𑀸𑀤𑀻𑀦𑀺.

𑀤𑀼𑀢𑀺𑀬𑁄 𑀯𑀕𑁆𑀕𑁄.

𑁩. 𑀓𑀫𑁆𑀫𑀧𑀣𑀯𑀕𑁆𑀕𑁄

𑁧-𑁨. 𑀅𑀲𑀫𑀸𑀳𑀺𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁭-𑁧𑁦𑁮. 𑀇𑀢𑁄 𑀧𑀭𑁂𑀲𑀼 𑀧𑀞𑀫𑀁 𑀅𑀲𑁆𑀲𑀤𑁆𑀥𑀸𑀤𑀺𑀧𑀜𑁆𑀘𑀓𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀣𑀸 𑀤𑀼𑀢𑀺𑀬𑀁. 𑀧𑀞𑀫𑁂 𑀧𑀦 𑀅𑀲𑀫𑀸𑀳𑀺𑀢𑀧𑀤𑀁 𑀘𑀢𑀼𑀢𑁆𑀣𑀁, 𑀤𑀼𑀢𑀺𑀬𑁂 𑀤𑀼𑀲𑁆𑀲𑀻𑀮𑀧𑀤𑀁. 𑀏𑀯𑀁 𑀯𑀼𑀘𑁆𑀘𑀫𑀸𑀦𑁂 𑀩𑀼𑀚𑁆𑀛𑀦𑀓𑀧𑀼𑀕𑁆𑀕𑀮𑀸𑀦𑀁 𑀅𑀚𑁆𑀛𑀸𑀲𑀬𑁂𑀦 𑀳𑀺 𑀏𑀢𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀏𑀢𑁆𑀣 𑀅𑀲𑀫𑀸𑀳𑀺𑀢𑀸𑀢𑀺 𑀉𑀧𑀘𑀸𑀭𑀧𑁆𑀧𑀦𑀸𑀲𑀫𑀸𑀥𑀺𑀭𑀳𑀺𑀢𑀸. 𑀤𑀼𑀲𑁆𑀲𑀻𑀮𑀸𑀢𑀺 𑀦𑀺𑀲𑁆𑀲𑀻𑀮𑀸. 𑀧𑀞𑀫𑀤𑀼𑀢𑀺𑀬𑀸𑀦𑀺.

𑁩-𑁫. 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁯-𑁧𑁧𑁧. 𑀢𑀢𑀺𑀬𑀁 𑀧𑀜𑁆𑀘𑀓𑀫𑁆𑀫𑀧𑀣𑀯𑀲𑁂𑀦 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀯𑀼𑀢𑁆𑀢𑀁, 𑀘𑀢𑀼𑀢𑁆𑀣𑀁 𑀲𑀢𑁆𑀢𑀓𑀫𑁆𑀫𑀧𑀣𑀯𑀲𑁂𑀦, 𑀧𑀜𑁆𑀘𑀫𑀁 𑀤𑀲𑀓𑀫𑁆𑀫𑀧𑀣𑀯𑀲𑁂𑀦. 𑀢𑀢𑁆𑀣 𑀢𑀢𑀺𑀬𑁂 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀬𑀺𑀦𑁄𑀢𑀺 𑀲𑀼𑀭𑀸𑀫𑁂𑀭𑀬𑀲𑀗𑁆𑀔𑀸𑀢𑀁 𑀫𑀚𑁆𑀚𑀁 𑀬𑀸𑀬 𑀧𑀫𑀸𑀤𑀘𑁂𑀢𑀦𑀸𑀬 𑀧𑀺𑀯𑀦𑁆𑀢𑀺, 𑀲𑀸 ‘‘𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀺𑀁 𑀢𑀺𑀝𑁆𑀞𑀦𑁆𑀢𑀻𑀢𑀺 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀬𑀺𑀦𑁄. 𑀅𑀬𑀁 𑀢𑀸𑀯𑁂𑀢𑁆𑀣 𑀅𑀲𑀸𑀥𑀸𑀭𑀡𑀧𑀤𑀲𑁆𑀲 𑀅𑀢𑁆𑀣𑁄.

𑀧𑀜𑁆𑀘𑀫𑁂 𑀧𑀸𑀡𑀁 𑀅𑀢𑀺𑀧𑀸𑀢𑁂𑀦𑁆𑀢𑀻𑀢𑀺 𑀧𑀸𑀡𑀸𑀢𑀺𑀧𑀸𑀢𑀺𑀦𑁄, 𑀧𑀸𑀡𑀖𑀸𑀢𑀺𑀓𑀸𑀢𑀺 𑀅𑀢𑁆𑀣𑁄. 𑀅𑀤𑀺𑀦𑁆𑀦𑀁 𑀆𑀤𑀺𑀬𑀦𑁆𑀢𑀻𑀢𑀺 𑀅𑀤𑀺𑀦𑁆𑀦𑀸𑀤𑀸𑀬𑀺𑀦𑁄, 𑀧𑀭𑀲𑁆𑀲𑀳𑀸𑀭𑀺𑀦𑁄𑀢𑀺 𑀅𑀢𑁆𑀣𑁄. 𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀺𑀮𑁂𑀲𑀓𑀸𑀫𑁂𑀦 𑀫𑀺𑀘𑁆𑀙𑀸 𑀘𑀭𑀦𑁆𑀢𑀻𑀢𑀺 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀺𑀦𑁄. 𑀫𑀼𑀲𑀸 𑀯𑀤𑀦𑁆𑀢𑀻𑀢𑀺 𑀫𑀼𑀲𑀸𑀯𑀸𑀤𑀺𑀦𑁄, 𑀧𑀭𑁂𑀲𑀁 𑀅𑀢𑁆𑀣𑀪𑀜𑁆𑀚𑀓𑀁 𑀢𑀼𑀘𑁆𑀙𑀁 𑀅𑀮𑀺𑀓𑀁 𑀯𑀸𑀘𑀁 𑀪𑀸𑀲𑀺𑀢𑀸𑀭𑁄𑀢𑀺 𑀅𑀢𑁆𑀣𑁄. 𑀧𑀺𑀲𑀼𑀡𑀸 𑀯𑀸𑀘𑀸 𑀏𑀢𑁂𑀲𑀦𑁆𑀢𑀺 𑀧𑀺𑀲𑀼𑀡𑀯𑀸𑀘𑀸. 𑀫𑀫𑁆𑀫𑀘𑁆𑀙𑁂𑀤𑀺𑀓𑀸 𑀨𑀭𑀼𑀲𑀸 𑀯𑀸𑀘𑀸 𑀏𑀢𑁂𑀲𑀦𑁆𑀢𑀺 𑀨𑀭𑀼𑀲𑀯𑀸𑀘𑀸. 𑀲𑀫𑁆𑀨𑀁 𑀦𑀺𑀭𑀢𑁆𑀣𑀓𑀁 𑀯𑀘𑀦𑀁 𑀧𑀮𑀧𑀦𑁆𑀢𑀻𑀢𑀺 𑀲𑀫𑁆𑀨𑀧𑁆𑀧𑀮𑀸𑀧𑀺𑀦𑁄. 𑀅𑀪𑀺𑀚𑁆𑀛𑀸𑀬𑀦𑁆𑀢𑀻𑀢𑀺 𑀅𑀪𑀺𑀚𑁆𑀛𑀸𑀮𑀼𑀦𑁄, 𑀧𑀭𑀪𑀡𑁆𑀟𑁂 𑀮𑀼𑀩𑁆𑀪𑀦𑀲𑀻𑀮𑀸𑀢𑀺 𑀅𑀢𑁆𑀣𑁄. 𑀩𑁆𑀬𑀸𑀧𑀦𑁆𑀦𑀁 𑀧𑀽𑀢𑀺𑀪𑀽𑀢𑀁 𑀘𑀺𑀢𑁆𑀢𑀫𑁂𑀢𑁂𑀲𑀦𑁆𑀢𑀺 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑀸. 𑀫𑀺𑀘𑁆𑀙𑀸 𑀧𑀸𑀧𑀺𑀓𑀸 𑀯𑀺𑀜𑁆𑀜𑀼𑀕𑀭𑀳𑀺𑀢𑀸 𑀏𑀢𑁂𑀲𑀁 𑀤𑀺𑀝𑁆𑀞𑀻𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸, 𑀓𑀫𑁆𑀫𑀧𑀣𑀧𑀭𑀺𑀬𑀸𑀧𑀦𑁆𑀦𑀸𑀬 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀯𑀢𑁆𑀣𑀼𑀓𑀸𑀬 𑀫𑀺𑀘𑁆𑀙𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀸𑀬 𑀅𑀦𑀺𑀬𑁆𑀬𑀸𑀦𑀺𑀓𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀫𑀸 𑀲𑁄𑀪𑀦𑀸 𑀯𑀺𑀜𑁆𑀜𑀼𑀧𑀲𑀢𑁆𑀣𑀸 𑀏𑀢𑁂𑀲𑀁 𑀤𑀺𑀝𑁆𑀞𑀻𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸, 𑀓𑀫𑁆𑀫𑀧𑀣𑀧𑀭𑀺𑀬𑀸𑀧𑀦𑁆𑀦𑀸𑀬 ‘‘𑀅𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀓𑀸𑀬 𑀓𑀫𑁆𑀫𑀲𑁆𑀲𑀓𑀢𑀤𑀺𑀝𑁆𑀞𑀺𑀬𑀸 𑀲𑀫𑁆𑀫𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀸𑀬 𑀫𑀕𑁆𑀕𑀤𑀺𑀝𑁆𑀞𑀺𑀬𑀸 𑀘 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀢𑀸𑀯𑁂𑀢𑁆𑀣 𑀅𑀦𑀼𑀢𑁆𑀢𑀸𑀦𑀸𑀦𑀁 𑀧𑀤𑀸𑀦𑀁 𑀧𑀤𑀯𑀡𑁆𑀡𑀦𑀸𑀫𑀢𑁆𑀢𑀁.

𑀬𑁄 𑀧𑀦 𑀢𑁂𑀲𑀁 𑀧𑀸𑀡𑀸𑀢𑀺𑀧𑀸𑀢𑁄 𑀅𑀤𑀺𑀦𑁆𑀦𑀸𑀤𑀸𑀦𑀁 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄 𑀫𑀼𑀲𑀸𑀯𑀸𑀤𑁄 𑀧𑀺𑀲𑀼𑀡𑀯𑀸𑀘𑀸 𑀨𑀭𑀼𑀲𑀯𑀸𑀘𑀸 𑀲𑀫𑁆𑀨𑀧𑁆𑀧𑀮𑀸𑀧𑁄 𑀅𑀪𑀺𑀚𑁆𑀛𑀸 𑀩𑁆𑀬𑀸𑀧𑀸𑀤𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀓𑀡𑁆𑀳𑀧𑀓𑁆𑀔𑁂 𑀤𑀲𑀯𑀺𑀥𑁄 𑀅𑀢𑁆𑀣𑁄 𑀳𑁄𑀢𑀺. 𑀢𑀢𑁆𑀣 𑀧𑀸𑀡𑀲𑁆𑀲 𑀅𑀢𑀺𑀧𑀸𑀢𑁄 𑀧𑀸𑀡𑀸𑀢𑀺𑀧𑀸𑀢𑁄, 𑀧𑀸𑀡𑀯𑀥𑁄 𑀧𑀸𑀡𑀖𑀸𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀸𑀡𑁄𑀢𑀺 𑀘𑁂𑀢𑁆𑀣 𑀯𑁄𑀳𑀸𑀭𑀢𑁄 𑀲𑀢𑁆𑀢𑁄, 𑀧𑀭𑀫𑀢𑁆𑀣𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀢𑀲𑁆𑀫𑀺𑀁 𑀧𑀦 𑀧𑀸𑀡𑁂 𑀧𑀸𑀡𑀲𑀜𑁆𑀜𑀺𑀦𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑀸𑀦𑀁 𑀅𑀜𑁆𑀜𑀢𑀭𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀯𑀥𑀓𑀘𑁂𑀢𑀦𑀸 𑀧𑀸𑀡𑀸𑀢𑀺𑀧𑀸𑀢𑁄. 𑀲𑁄 𑀕𑀼𑀡𑀯𑀺𑀭𑀳𑀺𑀢𑁂𑀲𑀼 𑀢𑀺𑀭𑀘𑁆𑀙𑀸𑀦𑀕𑀢𑀸𑀤𑀻𑀲𑀼 𑀧𑀸𑀡𑁂𑀲𑀼 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀫𑀳𑀸𑀲𑀭𑀻𑀭𑁂 𑀫𑀳𑀸𑀲𑀸𑀯𑀚𑁆𑀚𑁄. 𑀓𑀲𑁆𑀫𑀸? 𑀧𑀬𑁄𑀕𑀫𑀳𑀦𑁆𑀢𑀢𑀸𑀬, 𑀧𑀬𑁄𑀕𑀲𑀫𑀢𑁆𑀢𑁂𑀧𑀺 𑀯𑀢𑁆𑀣𑀼𑀫𑀳𑀦𑁆𑀢𑀢𑀸𑀬. 𑀕𑀼𑀡𑀯𑀦𑁆𑀢𑁂𑀲𑀼 𑀫𑀦𑀼𑀲𑁆𑀲𑀸𑀤𑀻𑀲𑀼 𑀅𑀧𑁆𑀧𑀕𑀼𑀡𑁂 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀫𑀳𑀸𑀕𑀼𑀡𑁂 𑀫𑀳𑀸𑀲𑀸𑀯𑀚𑁆𑀚𑁄. 𑀲𑀭𑀻𑀭𑀕𑀼𑀡𑀸𑀦𑀁 𑀧𑀦 𑀲𑀫𑀪𑀸𑀯𑁂 𑀲𑀢𑀺 𑀓𑀺𑀮𑁂𑀲𑀸𑀦𑀁 𑀉𑀧𑀓𑁆𑀓𑀫𑀸𑀦𑀜𑁆𑀘 𑀫𑀼𑀤𑀼𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀢𑀺𑀩𑁆𑀩𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀲𑁆𑀲 𑀧𑀜𑁆𑀘 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺 𑁋 𑀧𑀸𑀡𑁄, 𑀧𑀸𑀡𑀲𑀜𑁆𑀜𑀺𑀢𑀸, 𑀯𑀥𑀓𑀘𑀺𑀢𑁆𑀢𑀁, 𑀉𑀧𑀓𑁆𑀓𑀫𑁄, 𑀢𑁂𑀦 𑀫𑀭𑀡𑀦𑁆𑀢𑀺. 𑀙 𑀧𑀬𑁄𑀕𑀸 𑀲𑀸𑀳𑀢𑁆𑀣𑀺𑀓𑁄, 𑀆𑀡𑀢𑁆𑀢𑀺𑀓𑁄, 𑀦𑀺𑀲𑁆𑀲𑀕𑁆𑀕𑀺𑀬𑁄, 𑀣𑀸𑀯𑀭𑁄, 𑀯𑀺𑀚𑁆𑀚𑀸𑀫𑀬𑁄, 𑀇𑀤𑁆𑀥𑀺𑀫𑀬𑁄𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑁂 𑀅𑀢𑀺𑀧𑁆𑀧𑀧𑀜𑁆𑀘𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀦 𑀯𑀺𑀢𑁆𑀣𑀸𑀭𑀬𑀸𑀫, 𑀅𑀜𑁆𑀜𑀜𑁆𑀘 𑀏𑀯𑀭𑀽𑀧𑀁. 𑀅𑀢𑁆𑀣𑀺𑀓𑁂𑀳𑀺 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀁 𑀯𑀺𑀦𑀬𑀝𑁆𑀞𑀓𑀣𑀁 (𑀧𑀸𑀭𑀸. 𑀅𑀝𑁆𑀞. 𑁧𑁭𑁨) 𑀑𑀮𑁄𑀓𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑁄.

𑀅𑀤𑀺𑀦𑁆𑀦𑀲𑁆𑀲 𑀆𑀤𑀸𑀦𑀁 𑀅𑀤𑀺𑀦𑁆𑀦𑀸𑀤𑀸𑀦𑀁, 𑀧𑀭𑀲𑁆𑀲𑀳𑀭𑀡𑀁 𑀣𑁂𑀬𑁆𑀬𑀁 𑀘𑁄𑀭𑀺𑀓𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀣 𑀅𑀤𑀺𑀦𑁆𑀦𑀦𑁆𑀢𑀺 𑀧𑀭𑀧𑀭𑀺𑀕𑁆𑀕𑀳𑀺𑀢𑀁, 𑀬𑀢𑁆𑀣 𑀧𑀭𑁄 𑀬𑀣𑀸𑀓𑀸𑀫𑀓𑀸𑀭𑀺𑀢𑀁 𑀆𑀧𑀚𑁆𑀚𑀦𑁆𑀢𑁄 𑀅𑀤𑀡𑁆𑀟𑀸𑀭𑀳𑁄 𑀅𑀦𑀼𑀧𑀯𑀚𑁆𑀚𑁄 𑀳𑁄𑀢𑀺. 𑀢𑀲𑁆𑀫𑀺𑀁 𑀧𑀦 𑀧𑀭𑀧𑀭𑀺𑀕𑁆𑀕𑀳𑀺𑀢𑁂 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀺𑀦𑁄 𑀢𑀤𑀸𑀤𑀸𑀬𑀓𑀉𑀧𑀓𑁆𑀓𑀫𑀲𑀫𑀼𑀝𑁆𑀞𑀸𑀧𑀺𑀓𑀸 𑀣𑁂𑀬𑁆𑀬𑀘𑁂𑀢𑀦𑀸 𑀅𑀤𑀺𑀦𑁆𑀦𑀸𑀤𑀸𑀦𑀁. 𑀢𑀁 𑀳𑀻𑀦𑁂 𑀧𑀭𑀲𑀦𑁆𑀢𑀓𑁂 𑀅𑀧𑁆𑀧𑀲𑀸𑀯𑀚𑁆𑀚𑀁, 𑀧𑀡𑀻𑀢𑁂 𑀫𑀳𑀸𑀲𑀸𑀯𑀚𑁆𑀚𑀁. 𑀓𑀲𑁆𑀫𑀸? 𑀯𑀢𑁆𑀣𑀼𑀧𑀡𑀻𑀢𑀢𑀸𑀬. 𑀯𑀢𑁆𑀣𑀼𑀲𑀫𑀢𑁆𑀢𑁂 𑀲𑀢𑀺 𑀕𑀼𑀡𑀸𑀥𑀺𑀓𑀸𑀦𑀁 𑀲𑀦𑁆𑀢𑀓𑁂 𑀯𑀢𑁆𑀣𑀼𑀲𑁆𑀫𑀺𑀁 𑀫𑀳𑀸𑀲𑀸𑀯𑀚𑁆𑀚𑀁, 𑀢𑀁 𑀢𑀁 𑀕𑀼𑀡𑀸𑀥𑀺𑀓𑀁 𑀉𑀧𑀸𑀤𑀸𑀬 𑀢𑀢𑁄 𑀢𑀢𑁄 𑀳𑀻𑀦𑀕𑀼𑀡𑀲𑁆𑀲 𑀲𑀦𑁆𑀢𑀓𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀧𑁆𑀧𑀲𑀸𑀯𑀚𑁆𑀚𑀁.

𑀢𑀲𑁆𑀲 𑀧𑀜𑁆𑀘 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺 𑁋 𑀧𑀭𑀧𑀭𑀺𑀕𑁆𑀕𑀳𑀺𑀢𑀁, 𑀧𑀭𑀧𑀭𑀺𑀕𑁆𑀕𑀳𑀺𑀢𑀲𑀜𑁆𑀜𑀺𑀢𑀸, 𑀣𑁂𑀬𑁆𑀬𑀘𑀺𑀢𑁆𑀢𑀁, 𑀉𑀧𑀓𑁆𑀓𑀫𑁄, 𑀢𑁂𑀦 𑀳𑀭𑀡𑀦𑁆𑀢𑀺. 𑀙 𑀧𑀬𑁄𑀕𑀸 𑀲𑀸𑀳𑀢𑁆𑀣𑀺𑀓𑀸𑀤𑀬𑁄𑀯. 𑀢𑁂 𑀘 𑀔𑁄 𑀬𑀣𑀸𑀦𑀼𑀭𑀽𑀧𑀁 𑀣𑁂𑀬𑁆𑀬𑀸𑀯𑀳𑀸𑀭𑁄, 𑀧𑀲𑀬𑁆𑀳𑀸𑀯𑀳𑀸𑀭𑁄, 𑀧𑀝𑀺𑀘𑁆𑀙𑀦𑁆𑀦𑀸𑀯𑀳𑀸𑀭𑁄, 𑀧𑀭𑀺𑀓𑀧𑁆𑀧𑀸𑀯𑀳𑀸𑀭𑁄, 𑀓𑀼𑀲𑀸𑀯𑀳𑀸𑀭𑁄𑀢𑀺 𑀇𑀫𑁂𑀲𑀁 𑀅𑀯𑀳𑀸𑀭𑀸𑀦𑀁 𑀯𑀲𑁂𑀦 𑀧𑀯𑀢𑁆𑀢𑀸𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁯𑁨) 𑀯𑀼𑀢𑁆𑀢𑁄.

𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄𑀢𑀺 𑀏𑀢𑁆𑀣 𑀧𑀦 𑀓𑀸𑀫𑁂𑀲𑀽𑀢𑀺 𑀫𑁂𑀣𑀼𑀦𑀲𑀫𑀸𑀘𑀸𑀭𑁂𑀲𑀼. 𑀫𑀺𑀘𑁆𑀙𑀸𑀘𑀸𑀭𑁄𑀢𑀺 𑀏𑀓𑀦𑁆𑀢𑀦𑀺𑀦𑁆𑀤𑀺𑀢𑁄 𑀮𑀸𑀫𑀓𑀸𑀘𑀸𑀭𑁄. 𑀮𑀓𑁆𑀔𑀡𑀢𑁄 𑀧𑀦 𑀅𑀲𑀤𑁆𑀥𑀫𑁆𑀫𑀸𑀥𑀺𑀧𑁆𑀧𑀸𑀬𑁂𑀦 𑀓𑀸𑀬𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀸 𑀅𑀕𑀫𑀦𑀻𑀬𑀝𑁆𑀞𑀸𑀦𑀯𑀻𑀢𑀺𑀓𑁆𑀓𑀫𑀘𑁂𑀢𑀦𑀸 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄. 𑀢𑀢𑁆𑀣 𑀅𑀕𑀫𑀦𑀻𑀬𑀝𑁆𑀞𑀸𑀦𑀁 𑀦𑀸𑀫 𑀧𑀼𑀭𑀺𑀲𑀸𑀦𑀁 𑀢𑀸𑀯 𑀫𑀸𑀢𑀼𑀭𑀓𑁆𑀔𑀺𑀢𑀸 𑀧𑀺𑀢𑀼𑀭𑀓𑁆𑀔𑀺𑀢𑀸 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀸 𑀪𑀸𑀢𑀼𑀭𑀓𑁆𑀔𑀺𑀢𑀸 𑀪𑀕𑀺𑀦𑀺𑀭𑀓𑁆𑀔𑀺𑀢𑀸 𑀜𑀸𑀢𑀺𑀭𑀓𑁆𑀔𑀺𑀢𑀸 𑀕𑁄𑀢𑁆𑀢𑀭𑀓𑁆𑀔𑀺𑀢𑀸 𑀥𑀫𑁆𑀫𑀭𑀓𑁆𑀔𑀺𑀢𑀸 𑀲𑀸𑀭𑀓𑁆𑀔𑀸 𑀲𑀧𑀭𑀺𑀤𑀡𑁆𑀟𑀸𑀢𑀺 𑀫𑀸𑀢𑀼𑀭𑀓𑁆𑀔𑀺𑀢𑀸𑀤𑀬𑁄 𑀤𑀲, 𑀥𑀦𑀓𑁆𑀓𑀻𑀢𑀸 𑀙𑀦𑁆𑀤𑀯𑀸𑀲𑀺𑀦𑀻 𑀪𑁄𑀕𑀯𑀸𑀲𑀺𑀦𑀻 𑀧𑀝𑀯𑀸𑀲𑀺𑀦𑀻 𑀑𑀤𑀧𑀢𑁆𑀢𑀓𑀺𑀦𑀻 𑀑𑀪𑀢𑀘𑀼𑀫𑁆𑀩𑀝𑀸 𑀤𑀸𑀲𑀻 𑀘 𑀪𑀭𑀺𑀬𑀸 𑀘 𑀓𑀫𑁆𑀫𑀓𑀸𑀭𑀻 𑀘 𑀪𑀭𑀺𑀬𑀸 𑀘 𑀥𑀚𑀸𑀳𑀝𑀸 𑀫𑀼𑀳𑀼𑀢𑁆𑀢𑀺𑀓𑀸𑀢𑀺 𑀏𑀢𑀸 𑀥𑀦𑀓𑁆𑀓𑀻𑀢𑀸𑀤𑀬𑁄 𑀤𑀲𑀸𑀢𑀺 𑀯𑀻𑀲𑀢𑀺 𑀇𑀢𑁆𑀣𑀺𑀬𑁄. 𑀇𑀢𑁆𑀣𑀻𑀲𑀼 𑀧𑀦 𑀤𑁆𑀯𑀺𑀦𑁆𑀦𑀁 𑀲𑀸𑀭𑀓𑁆𑀔𑀲𑀧𑀭𑀺𑀤𑀡𑁆𑀟𑀸𑀦𑀁, 𑀤𑀲𑀦𑁆𑀦𑀜𑁆𑀘 𑀥𑀦𑀓𑁆𑀓𑀻𑀢𑀸𑀤𑀻𑀦𑀦𑁆𑀢𑀺 𑀤𑁆𑀯𑀸𑀤𑀲𑀦𑁆𑀦𑀁 𑀇𑀢𑁆𑀣𑀻𑀦𑀁 𑀅𑀜𑁆𑀜𑁂 𑀧𑀼𑀭𑀺𑀲𑀸. 𑀇𑀤𑀁 𑀅𑀕𑀫𑀦𑀻𑀬𑀝𑁆𑀞𑀸𑀦𑀁 𑀦𑀸𑀫. 𑀲𑁄 𑀧𑀦𑁂𑀲 𑀫𑀺𑀘𑁆𑀙𑀸𑀘𑀸𑀭𑁄 𑀲𑀻𑀮𑀸𑀤𑀺𑀕𑀼𑀡𑀭𑀳𑀺𑀢𑁂 𑀅𑀕𑀫𑀦𑀻𑀬𑀝𑁆𑀞𑀸𑀦𑁂 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀲𑀻𑀮𑀸𑀤𑀺𑀕𑀼𑀡𑀲𑀫𑁆𑀧𑀦𑁆𑀦𑁂 𑀫𑀳𑀸𑀲𑀸𑀯𑀚𑁆𑀚𑁄. 𑀢𑀲𑁆𑀲 𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸 𑁋 𑀅𑀕𑀫𑀦𑀻𑀬𑀯𑀢𑁆𑀣𑀼, 𑀢𑀲𑁆𑀫𑀺𑀁 𑀲𑁂𑀯𑀦𑀘𑀺𑀢𑁆𑀢𑀁, 𑀲𑁂𑀯𑀦𑀧𑁆𑀧𑀬𑁄𑀕𑁄, 𑀫𑀕𑁆𑀕𑁂𑀦𑀫𑀕𑁆𑀕𑀧𑀝𑀺𑀧𑀢𑁆𑀢𑀺𑀅𑀥𑀺𑀯𑀸𑀲𑀦𑀦𑁆𑀢𑀺. 𑀏𑀓𑁄 𑀧𑀬𑁄𑀕𑁄 𑀲𑀸𑀳𑀢𑁆𑀣𑀺𑀓𑁄 𑀏𑀯.

𑀫𑀼𑀲𑀸𑀢𑀺 𑀯𑀺𑀲𑀁𑀯𑀸𑀤𑀦𑀧𑀼𑀭𑁂𑀓𑁆𑀔𑀸𑀭𑀲𑁆𑀲 𑀅𑀢𑁆𑀣𑀪𑀜𑁆𑀚𑀦𑀓𑁄 𑀯𑀘𑀻𑀧𑀬𑁄𑀕𑁄 𑀓𑀸𑀬𑀧𑁆𑀧𑀬𑁄𑀕𑁄 𑀯𑀸, 𑀯𑀺𑀲𑀁𑀯𑀸𑀤𑀦𑀸𑀥𑀺𑀧𑁆𑀧𑀸𑀬𑁂𑀦 𑀧𑀦𑀲𑁆𑀲 𑀧𑀭𑀯𑀺𑀲𑀁𑀯𑀸𑀤𑀦𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸, 𑀫𑀼𑀲𑀸𑀯𑀸𑀤𑁄. 𑀅𑀧𑀭𑁄 𑀦𑀬𑁄 𑁋 𑀫𑀼𑀲𑀸𑀢𑀺 𑀅𑀪𑀽𑀢𑀁 𑀅𑀢𑀘𑁆𑀙𑀁 𑀯𑀢𑁆𑀣𑀼. 𑀯𑀸𑀤𑁄𑀢𑀺 𑀢𑀲𑁆𑀲 𑀪𑀽𑀢𑀢𑁄 𑀢𑀘𑁆𑀙𑀢𑁄 𑀯𑀺𑀜𑁆𑀜𑀸𑀧𑀦𑀁. 𑀮𑀓𑁆𑀔𑀡𑀢𑁄 𑀧𑀦 𑀅𑀢𑀣𑀁 𑀯𑀢𑁆𑀣𑀼𑀁 𑀢𑀣𑀢𑁄 𑀧𑀭𑀁 𑀯𑀺𑀜𑁆𑀜𑀸𑀧𑁂𑀢𑀼𑀓𑀸𑀫𑀲𑁆𑀲 𑀢𑀣𑀸𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀫𑀼𑀲𑀸𑀯𑀸𑀤𑁄. 𑀲𑁄 𑀬𑀫𑀢𑁆𑀣𑀁 𑀪𑀜𑁆𑀚𑀢𑀺, 𑀢𑀲𑁆𑀲 𑀅𑀧𑁆𑀧𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀫𑀳𑀦𑁆𑀢𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑁄. 𑀅𑀧𑀺 𑀘 𑀕𑀳𑀝𑁆𑀞𑀸𑀦𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀅𑀤𑀸𑀢𑀼𑀓𑀸𑀫𑀢𑀸𑀬 𑀦𑀢𑁆𑀣𑀻𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁄 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀲𑀓𑁆𑀔𑀺𑀦𑀸 𑀳𑀼𑀢𑁆𑀯𑀸 𑀅𑀢𑁆𑀣𑀪𑀜𑁆𑀚𑀦𑀢𑁆𑀣𑀁 𑀯𑀼𑀢𑁆𑀢𑁄 𑀫𑀳𑀸𑀲𑀸𑀯𑀚𑁆𑀚𑁄. 𑀧𑀩𑁆𑀩𑀚𑀺𑀢𑀸𑀦𑀁 𑀅𑀧𑁆𑀧𑀓𑀫𑁆𑀧𑀺 𑀢𑁂𑀮𑀁 𑀯𑀸 𑀲𑀧𑁆𑀧𑀺𑀁 𑀯𑀸 𑀮𑀪𑀺𑀢𑁆𑀯𑀸 𑀳𑀲𑀸𑀥𑀺𑀧𑁆𑀧𑀸𑀬𑁂𑀦 ‘‘𑀅𑀚𑁆𑀚 𑀕𑀸𑀫𑁂 𑀢𑁂𑀮𑀁 𑀦𑀤𑀻 𑀫𑀜𑁆𑀜𑁂 𑀲𑀦𑁆𑀤𑀢𑀻’’𑀢𑀺 𑀧𑀽𑀭𑀡𑀓𑀣𑀸𑀦𑀬𑁂𑀦 𑀧𑀯𑀢𑁆𑀢𑁄 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀅𑀤𑀺𑀝𑁆𑀞𑀁𑀬𑁂𑀯 𑀧𑀦 ‘‘𑀤𑀺𑀝𑁆𑀞’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀤𑀦𑁆𑀢𑀸𑀦𑀁 𑀫𑀳𑀸𑀲𑀸𑀯𑀚𑁆𑀚𑁄. 𑀢𑀲𑁆𑀲 𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺 𑁋 𑀅𑀢𑀣𑀁 𑀯𑀢𑁆𑀣𑀼, 𑀯𑀺𑀲𑀁𑀯𑀸𑀤𑀦𑀘𑀺𑀢𑁆𑀢𑀁, 𑀢𑀚𑁆𑀚𑁄 𑀯𑀸𑀬𑀸𑀫𑁄, 𑀧𑀭𑀲𑁆𑀲 𑀢𑀤𑀢𑁆𑀣𑀯𑀺𑀚𑀸𑀦𑀦𑀦𑁆𑀢𑀺. 𑀏𑀓𑁄 𑀧𑀬𑁄𑀕𑁄 𑀲𑀸𑀳𑀢𑁆𑀣𑀺𑀓𑁄𑀯. 𑀲𑁄 𑀓𑀸𑀬𑁂𑀦 𑀯𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀯𑀸𑀘𑀸𑀬 𑀯𑀸 𑀧𑀭𑀯𑀺𑀲𑀁𑀯𑀸𑀤𑀓𑀓𑀺𑀭𑀺𑀬𑀸𑀓𑀭𑀡𑁂 𑀤𑀝𑁆𑀞𑀩𑁆𑀩𑁄. 𑀢𑀸𑀬 𑀘𑁂 𑀓𑀺𑀭𑀺𑀬𑀸𑀬 𑀧𑀭𑁄 𑀢𑀫𑀢𑁆𑀣𑀁 𑀚𑀸𑀦𑀸𑀢𑀺, 𑀅𑀬𑀁 𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀸𑀧𑀺𑀓𑀘𑁂𑀢𑀦𑀸𑀓𑁆𑀔𑀡𑁂𑀬𑁂𑀯 𑀫𑀼𑀲𑀸𑀯𑀸𑀤𑀓𑀫𑁆𑀫𑀼𑀦𑀸 𑀩𑀚𑁆𑀛𑀢𑀺.

𑀧𑀺𑀲𑀼𑀡𑀯𑀸𑀘𑀸𑀢𑀺𑀆𑀤𑀻𑀲𑀼 𑀬𑀸𑀬 𑀯𑀸𑀘𑀸𑀬, 𑀬𑀲𑁆𑀲 𑀢𑀁 𑀯𑀸𑀘𑀁 𑀪𑀸𑀲𑀢𑀺, 𑀢𑀲𑁆𑀲 𑀳𑀤𑀬𑁂 𑀅𑀢𑁆𑀢𑀦𑁄 𑀧𑀺𑀬𑀪𑀸𑀯𑀁, 𑀧𑀭𑀲𑁆𑀲 𑀘 𑀲𑀼𑀜𑁆𑀜𑀪𑀸𑀯𑀁 𑀓𑀭𑁄𑀢𑀺, 𑀲𑀸 𑀧𑀺𑀲𑀼𑀡𑀯𑀸𑀘𑀸. 𑀬𑀸𑀬 𑀧𑀦 𑀅𑀢𑁆𑀢𑀸𑀦𑀫𑁆𑀧𑀺 𑀧𑀭𑀫𑁆𑀧𑀺 𑀨𑀭𑀼𑀲𑀁 𑀓𑀭𑁄𑀢𑀺, 𑀬𑀸 𑀯𑀸𑀘𑀸 𑀲𑀬𑀫𑁆𑀧𑀺 𑀨𑀭𑀼𑀲𑀸, 𑀦𑁂𑀯 𑀓𑀡𑁆𑀡𑀲𑀼𑀔𑀸 𑀦 𑀳𑀤𑀬𑀗𑁆𑀕𑀫𑀸, 𑀅𑀬𑀁 𑀨𑀭𑀼𑀲𑀯𑀸𑀘𑀸. 𑀬𑁂𑀦 𑀧𑀦 𑀲𑀫𑁆𑀨𑀁 𑀧𑀮𑀧𑀢𑀺 𑀦𑀺𑀭𑀢𑁆𑀣𑀓𑀁, 𑀲𑁄 𑀲𑀫𑁆𑀨𑀧𑁆𑀧𑀮𑀸𑀧𑁄. 𑀢𑁂𑀲𑀁 𑀫𑀽𑀮𑀪𑀽𑀢𑀸 𑀘𑁂𑀢𑀦𑀸𑀧𑀺 𑀧𑀺𑀲𑀼𑀡𑀯𑀸𑀘𑀸𑀤𑀺𑀦𑀸𑀫𑀫𑁂𑀯 𑀮𑀪𑀢𑀺. 𑀲𑀸 𑀏𑀯 𑀘 𑀇𑀥 𑀅𑀥𑀺𑀧𑁆𑀧𑁂𑀢𑀸𑀢𑀺.

𑀢𑀢𑁆𑀣 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀲𑁆𑀲 𑀧𑀭𑁂𑀲𑀁 𑀯𑀸 𑀪𑁂𑀤𑀸𑀬, 𑀅𑀢𑁆𑀢𑀦𑁄 𑀧𑀺𑀬𑀓𑀫𑁆𑀬𑀢𑀸𑀬 𑀯𑀸 𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀧𑀺𑀲𑀼𑀡𑀯𑀸𑀘𑀸. 𑀲𑀸 𑀬𑀲𑁆𑀲 𑀪𑁂𑀤𑀁 𑀓𑀭𑁄𑀢𑀺, 𑀢𑀲𑁆𑀲 𑀅𑀧𑁆𑀧𑀕𑀼𑀡𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀫𑀳𑀸𑀕𑀼𑀡𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑀸. 𑀢𑀲𑁆𑀲𑀸 𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸 𑁋 𑀪𑀺𑀦𑁆𑀤𑀺𑀢𑀩𑁆𑀩𑁄 𑀧𑀭𑁄, 𑀇𑀢𑀺 𑀇𑀫𑁂 𑀦𑀸𑀦𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀯𑀺𑀦𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀪𑁂𑀤𑀧𑀼𑀭𑁂𑀓𑁆𑀔𑀸𑀭𑀢𑀸, 𑀇𑀢𑀺 𑀅𑀳𑀁 𑀧𑀺𑀬𑁄 𑀪𑀯𑀺𑀲𑁆𑀲𑀸𑀫𑀺 𑀯𑀺𑀲𑁆𑀲𑀸𑀲𑀺𑀓𑁄𑀢𑀺 𑀧𑀺𑀬𑀓𑀫𑁆𑀬𑀢𑀸 𑀯𑀸, 𑀢𑀚𑁆𑀚𑁄 𑀯𑀸𑀬𑀸𑀫𑁄, 𑀢𑀲𑁆𑀲 𑀢𑀤𑀢𑁆𑀣𑀯𑀺𑀚𑀸𑀦𑀦𑀦𑁆𑀢𑀺.

𑀧𑀭𑀲𑁆𑀲 𑀫𑀫𑁆𑀫𑀘𑁆𑀙𑁂𑀤𑀓𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀏𑀓𑀦𑁆𑀢𑀨𑀭𑀼𑀲𑀘𑁂𑀢𑀦𑀸 𑀨𑀭𑀼𑀲𑀯𑀸𑀘𑀸. 𑀢𑀲𑁆𑀲𑀸 𑀆𑀯𑀺𑀪𑀸𑀯𑀢𑁆𑀣𑀫𑀺𑀤𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀤𑀸𑀭𑀓𑁄 𑀫𑀸𑀢𑀼 𑀯𑀘𑀦𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀅𑀭𑀜𑁆𑀜𑀁 𑀕𑀘𑁆𑀙𑀢𑀺. 𑀫𑀸𑀢𑀸 𑀢𑀁 𑀦𑀺𑀯𑀢𑁆𑀢𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻, ‘‘𑀘𑀡𑁆𑀟𑀸 𑀢𑀁 𑀫𑀳𑀺𑀁𑀲𑀻 𑀅𑀦𑀼𑀩𑀦𑁆𑀥𑀢𑀽’’𑀢𑀺 𑀅𑀓𑁆𑀓𑁄𑀲𑀺. 𑀅𑀣𑀲𑁆𑀲 𑀢𑀣𑁂𑀯 𑀅𑀭𑀜𑁆𑀜𑁂 𑀫𑀳𑀺𑀁𑀲𑀻 𑀉𑀝𑁆𑀞𑀸𑀲𑀺. 𑀤𑀸𑀭𑀓𑁄, ‘‘𑀬𑀁 𑀫𑀫 𑀫𑀸𑀢𑀸 𑀫𑀼𑀔𑁂𑀦 𑀓𑀣𑁂𑀲𑀺, 𑀢𑀁 𑀫𑀸 𑀳𑁄𑀢𑀼, 𑀬𑀁 𑀘𑀺𑀢𑁆𑀢𑁂𑀦 𑀘𑀺𑀦𑁆𑀢𑁂𑀲𑀺, 𑀢𑀁 𑀳𑁄𑀢𑀽’’𑀢𑀺 𑀲𑀘𑁆𑀘𑀓𑀺𑀭𑀺𑀬𑀁 𑀅𑀓𑀸𑀲𑀺. 𑀫𑀳𑀺𑀁𑀲𑀻 𑀢𑀢𑁆𑀣𑁂𑀯 𑀩𑀤𑁆𑀥𑀸 𑀯𑀺𑀬 𑀅𑀝𑁆𑀞𑀸𑀲𑀺. 𑀏𑀯𑀁 𑀫𑀫𑁆𑀫𑀘𑁆𑀙𑁂𑀤𑀓𑁄𑀧𑀺 𑀧𑀬𑁄𑀕𑁄 𑀘𑀺𑀢𑁆𑀢𑀲𑀡𑁆𑀳𑀢𑀸𑀬 𑀨𑀭𑀼𑀲𑀯𑀸𑀘𑀸 𑀦 𑀳𑁄𑀢𑀺. 𑀫𑀸𑀢𑀸𑀧𑀺𑀢𑀭𑁄 𑀳𑀺 𑀓𑀤𑀸𑀘𑀺 𑀧𑀼𑀢𑁆𑀢𑀓𑁂 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀘𑁄𑀭𑀸 𑀯𑁄 𑀔𑀡𑁆𑀟𑀸𑀔𑀡𑁆𑀟𑀺𑀓𑀁 𑀓𑀭𑁄𑀦𑁆𑀢𑀽’’𑀢𑀺, 𑀉𑀧𑁆𑀧𑀮𑀧𑀢𑁆𑀢𑀫𑁆𑀧𑀺 𑀘 𑀦𑁂𑀲𑀁 𑀉𑀧𑀭𑀺 𑀧𑀢𑀦𑁆𑀢𑀁 𑀦 𑀇𑀘𑁆𑀙𑀦𑁆𑀢𑀺. 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀘 𑀓𑀤𑀸𑀘𑀺 𑀦𑀺𑀲𑁆𑀲𑀺𑀢𑀓𑁂 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀓𑀺𑀁 𑀇𑀫𑁂 𑀅𑀳𑀺𑀭𑀺𑀓𑀸 𑀅𑀦𑁄𑀢𑁆𑀢𑀧𑁆𑀧𑀺𑀦𑁄 𑀘𑀭𑀦𑁆𑀢𑀺, 𑀦𑀺𑀤𑁆𑀥𑀫𑀣 𑀦𑁂’’𑀢𑀺. 𑀅𑀣 𑀘 𑀦𑁂𑀲𑀁 𑀆𑀕𑀫𑀸𑀥𑀺𑀕𑀫𑀲𑀫𑁆𑀧𑀢𑁆𑀢𑀺𑀁 𑀇𑀘𑁆𑀙𑀦𑁆𑀢𑀺. 𑀬𑀣𑀸 𑀘 𑀘𑀺𑀢𑁆𑀢𑀲𑀡𑁆𑀳𑀢𑀸𑀬 𑀨𑀭𑀼𑀲𑀯𑀸𑀘𑀸 𑀦 𑀳𑁄𑀢𑀺, 𑀏𑀯𑀁 𑀯𑀘𑀦𑀲𑀡𑁆𑀳𑀢𑀸𑀬 𑀅𑀨𑀭𑀼𑀲𑀯𑀸𑀘𑀸𑀧𑀺 𑀦 𑀳𑁄𑀢𑀺. 𑀦 𑀳𑀺 𑀫𑀸𑀭𑀸𑀧𑁂𑀢𑀼𑀓𑀸𑀫𑀲𑁆𑀲 ‘‘𑀇𑀫𑀁 𑀲𑀼𑀔𑀁 𑀲𑀬𑀸𑀧𑁂𑀣𑀸’’𑀢𑀺 𑀯𑀘𑀦𑀁 𑀅𑀨𑀭𑀼𑀲𑀯𑀸𑀘𑀸 𑀳𑁄𑀢𑀺. 𑀘𑀺𑀢𑁆𑀢𑀨𑀭𑀼𑀲𑀢𑀸𑀬 𑀧𑀦𑁂𑀲𑀸 𑀨𑀭𑀼𑀲𑀯𑀸𑀘𑀸𑀯. 𑀲𑀸 𑀬𑀁 𑀲𑀦𑁆𑀥𑀸𑀬 𑀧𑀯𑀢𑁆𑀢𑀺𑀢𑀸, 𑀢𑀲𑁆𑀲 𑀅𑀧𑁆𑀧𑀕𑀼𑀡𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀫𑀳𑀸𑀕𑀼𑀡𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑀸. 𑀢𑀲𑁆𑀲𑀸 𑀢𑀬𑁄 𑀲𑀫𑁆𑀪𑀸𑀭𑀸 𑁋 𑀅𑀓𑁆𑀓𑁄𑀲𑀺𑀢𑀩𑁆𑀩𑁄 𑀧𑀭𑁄, 𑀓𑀼𑀧𑀺𑀢𑀘𑀺𑀢𑁆𑀢𑀁, 𑀅𑀓𑁆𑀓𑁄𑀲𑀦𑀸𑀢𑀺.

𑀅𑀦𑀢𑁆𑀣𑀯𑀺𑀜𑁆𑀜𑀸𑀧𑀺𑀓𑀸 𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀅𑀓𑀼𑀲𑀮𑀘𑁂𑀢𑀦𑀸 𑀲𑀫𑁆𑀨𑀧𑁆𑀧𑀮𑀸𑀧𑁄. 𑀲𑁄 𑀆𑀲𑁂𑀯𑀦𑀫𑀦𑁆𑀤𑀢𑀸𑀬 𑀅𑀧𑁆𑀧𑀲𑀸𑀯𑀚𑁆𑀚𑁄, 𑀆𑀲𑁂𑀯𑀦𑀫𑀳𑀦𑁆𑀢𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑁄. 𑀢𑀲𑁆𑀲 𑀤𑁆𑀯𑁂 𑀲𑀫𑁆𑀪𑀸𑀭𑀸 𑁋 𑀪𑀸𑀭𑀢𑀬𑀼𑀤𑁆𑀥-𑀲𑀻𑀢𑀸𑀳𑀭𑀡𑀸𑀤𑀺-𑀦𑀺𑀭𑀢𑁆𑀣𑀓𑀓𑀣𑀸-𑀧𑀼𑀭𑁂𑀓𑁆𑀔𑀸𑀭𑀢𑀸, 𑀢𑀣𑀸𑀭𑀽𑀧𑀻𑀓𑀣𑀸𑀓𑀣𑀦𑀜𑁆𑀘𑀸𑀢𑀺.

𑀅𑀪𑀺𑀚𑁆𑀛𑀸𑀬𑀢𑀻𑀢𑀺 𑀅𑀪𑀺𑀚𑁆𑀛𑀸. 𑀧𑀭𑀪𑀡𑁆𑀟𑀸𑀪𑀺𑀫𑀼𑀔𑀻 𑀳𑀼𑀢𑁆𑀯𑀸 𑀢𑀦𑁆𑀦𑀺𑀦𑁆𑀦𑀢𑀸𑀬 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀲𑀸 ‘‘𑀅𑀳𑁄 𑀯𑀢𑀺𑀤𑀁 𑀫𑀫𑀲𑁆𑀲𑀸’’𑀢𑀺 𑀏𑀯𑀁 𑀧𑀭𑀪𑀡𑁆𑀟𑀸𑀪𑀺𑀚𑁆𑀛𑀸𑀬𑀦𑀮𑀓𑁆𑀔𑀡𑀸 𑀅𑀤𑀺𑀦𑁆𑀦𑀸𑀤𑀸𑀦𑀁 𑀯𑀺𑀬 𑀅𑀧𑁆𑀧𑀲𑀸𑀯𑀚𑁆𑀚𑀸 𑀫𑀳𑀸𑀲𑀸𑀯𑀚𑁆𑀚𑀸 𑀘. 𑀢𑀲𑁆𑀲𑀸 𑀤𑁆𑀯𑁂 𑀲𑀫𑁆𑀪𑀸𑀭𑀸 𑀧𑀭𑀪𑀡𑁆𑀟𑀁 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀜𑁆𑀘. 𑀧𑀭𑀪𑀡𑁆𑀟𑀯𑀢𑁆𑀣𑀼𑀓𑁂 𑀳𑀺 𑀮𑁄𑀪𑁂 𑀉𑀧𑁆𑀧𑀦𑁆𑀦𑁂𑀧𑀺 𑀦 𑀢𑀸𑀯 𑀓𑀫𑁆𑀫𑀧𑀣𑀪𑁂𑀤𑁄 𑀳𑁄𑀢𑀺, 𑀬𑀸𑀯 𑀦 ‘‘𑀅𑀳𑁄 𑀯𑀢𑀺𑀤𑀁 𑀫𑀫𑀲𑁆𑀲𑀸’’𑀢𑀺 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑁂𑀢𑀻𑀢𑀺.

𑀳𑀺𑀢𑀲𑀼𑀔𑀁 𑀩𑁆𑀬𑀸𑀧𑀸𑀤𑀬𑀢𑀻𑀢𑀺, 𑀩𑁆𑀬𑀸𑀧𑀸𑀤𑁄. 𑀲𑁄 𑀧𑀭𑀯𑀺𑀦𑀸𑀲𑀸𑀬 𑀫𑀦𑁄𑀧𑀤𑁄𑀲𑀮𑀓𑁆𑀔𑀡𑁄. 𑀨𑀭𑀼𑀲𑀯𑀸𑀘𑀸 𑀯𑀺𑀬 𑀅𑀧𑁆𑀧𑀲𑀸𑀯𑀚𑁆𑀚𑁄 𑀫𑀳𑀸𑀲𑀸𑀯𑀚𑁆𑀚𑁄 𑀘. 𑀢𑀲𑁆𑀲 𑀤𑁆𑀯𑁂 𑀲𑀫𑁆𑀪𑀸𑀭𑀸 𑀧𑀭𑀲𑀢𑁆𑀢𑁄 𑀘, 𑀢𑀲𑁆𑀲 𑀘 𑀯𑀺𑀦𑀸𑀲𑀘𑀺𑀦𑁆𑀢𑀸. 𑀧𑀭𑀲𑀢𑁆𑀢𑀯𑀢𑁆𑀣𑀼𑀓𑁂 𑀳𑀺 𑀓𑁄𑀥𑁂 𑀉𑀧𑁆𑀧𑀦𑁆𑀦𑁂𑀧𑀺 𑀦 𑀢𑀸𑀯 𑀓𑀫𑁆𑀫𑀧𑀣𑀪𑁂𑀤𑁄 𑀳𑁄𑀢𑀺, 𑀬𑀸𑀯 𑀦 ‘‘𑀅𑀳𑁄 𑀯𑀢𑀸𑀬𑀁 𑀉𑀘𑁆𑀙𑀺𑀚𑁆𑀚𑁂𑀬𑁆𑀬 𑀯𑀺𑀦𑀲𑁆𑀲𑁂𑀬𑁆𑀬𑀸’’𑀢𑀺 𑀢𑀲𑁆𑀲 𑀯𑀺𑀦𑀸𑀲𑀁 𑀘𑀺𑀦𑁆𑀢𑁂𑀢𑀺.

𑀬𑀣𑀸𑀪𑀼𑀘𑁆𑀘𑀕𑀳𑀡𑀸𑀪𑀸𑀯𑁂𑀦 𑀫𑀺𑀘𑁆𑀙𑀸 𑀧𑀲𑁆𑀲𑀢𑀻𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀲𑀸 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀧𑀭𑀻𑀢𑀤𑀲𑁆𑀲𑀦𑀮𑀓𑁆𑀔𑀡𑀸 𑀲𑀫𑁆𑀨𑀧𑁆𑀧𑀮𑀸𑀧𑁄 𑀯𑀺𑀬 𑀅𑀧𑁆𑀧𑀲𑀸𑀯𑀚𑁆𑀚𑀸 𑀫𑀳𑀸𑀲𑀸𑀯𑀚𑁆𑀚𑀸 𑀘. 𑀅𑀧𑀺 𑀘 𑀅𑀦𑀺𑀬𑀢𑀸 𑀅𑀧𑁆𑀧𑀲𑀸𑀯𑀚𑁆𑀚𑀸, 𑀦𑀺𑀬𑀢𑀸 𑀫𑀳𑀸𑀲𑀸𑀯𑀚𑁆𑀚𑀸. 𑀢𑀲𑁆𑀲𑀸 𑀤𑁆𑀯𑁂 𑀲𑀫𑁆𑀪𑀸𑀭𑀸 𑁋 𑀯𑀢𑁆𑀣𑀼𑀦𑁄 𑀘 𑀕𑀳𑀺𑀢𑀸𑀓𑀸𑀭𑀯𑀺𑀧𑀭𑀻𑀢𑀢𑀸 𑀬𑀣𑀸 𑀘 𑀦𑀁 𑀕𑀡𑁆𑀳𑀸𑀢𑀺, 𑀢𑀣𑀸𑀪𑀸𑀯𑁂𑀦 𑀢𑀲𑁆𑀲𑀸 𑀉𑀧𑀝𑁆𑀞𑀸𑀦𑀦𑁆𑀢𑀺.

𑀇𑀫𑁂𑀲𑀁 𑀧𑀦 𑀤𑀲𑀦𑁆𑀦𑀁 𑀅𑀓𑀼𑀲𑀮𑀓𑀫𑁆𑀫𑀧𑀣𑀸𑀦𑀁 𑀥𑀫𑁆𑀫𑀢𑁄 𑀓𑁄𑀝𑁆𑀞𑀸𑀲𑀢𑁄 𑀆𑀭𑀫𑁆𑀫𑀡𑀢𑁄 𑀯𑁂𑀤𑀦𑀸𑀢𑁄 𑀫𑀽𑀮𑀢𑁄𑀢𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀥𑀫𑁆𑀫𑀢𑁄𑀢𑀺 𑀏𑀢𑁂𑀲𑀼 𑀳𑀺 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀘𑁂𑀢𑀦𑀸𑀥𑀫𑁆𑀫𑀸𑀯 𑀳𑁄𑀦𑁆𑀢𑀺, 𑀅𑀪𑀺𑀚𑁆𑀛𑀸𑀤𑀬𑁄 𑀢𑀺𑀲𑁆𑀲𑁄 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸. 𑀓𑁄𑀝𑁆𑀞𑀸𑀲𑀢𑁄𑀢𑀺 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘𑀸𑀢𑀺 𑀇𑀫𑁂 𑀅𑀝𑁆𑀞 𑀓𑀫𑁆𑀫𑀧𑀣𑀸 𑀏𑀯 𑀳𑁄𑀦𑁆𑀢𑀺, 𑀦𑁄 𑀫𑀽𑀮𑀸𑀦𑀺, 𑀅𑀪𑀺𑀚𑁆𑀛𑀸𑀩𑁆𑀬𑀸𑀧𑀸𑀤𑀸 𑀓𑀫𑁆𑀫𑀧𑀣𑀸 𑀘𑁂𑀯 𑀫𑀽𑀮𑀸𑀦𑀺 𑀘. 𑀅𑀪𑀺𑀚𑁆𑀛𑀸 𑀳𑀺 𑀫𑀽𑀮𑀁 𑀧𑀢𑁆𑀯𑀸 𑀮𑁄𑀪𑁄 𑀅𑀓𑀼𑀲𑀮𑀫𑀽𑀮𑀁 𑀳𑁄𑀢𑀺, 𑀩𑁆𑀬𑀸𑀧𑀸𑀤𑁄 𑀤𑁄𑀲𑁄 𑀅𑀓𑀼𑀲𑀮𑀫𑀽𑀮𑀁.

𑀆𑀭𑀫𑁆𑀫𑀡𑀢𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀭𑀫𑁆𑀫𑀡𑀢𑁄 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀁 𑀲𑀢𑁆𑀢𑀸𑀭𑀫𑁆𑀫𑀡𑀁 𑀯𑀸 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀁 𑀯𑀸, 𑀫𑀺𑀘𑁆𑀙𑀸𑀘𑀸𑀭𑁄 𑀨𑁄𑀝𑁆𑀞𑀩𑁆𑀩𑀯𑀲𑁂𑀦 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑁄𑀯, 𑀲𑀢𑁆𑀢𑀸𑀭𑀫𑁆𑀫𑀡𑁄𑀢𑀺𑀧𑀺 𑀏𑀓𑁂. 𑀫𑀼𑀲𑀸𑀯𑀸𑀤𑁄 𑀲𑀢𑁆𑀢𑀸𑀭𑀫𑁆𑀫𑀡𑁄 𑀯𑀸 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑁄 𑀯𑀸, 𑀢𑀣𑀸 𑀧𑀺𑀲𑀼𑀡𑀯𑀸𑀘𑀸. 𑀨𑀭𑀼𑀲𑀯𑀸𑀘𑀸 𑀲𑀢𑁆𑀢𑀸𑀭𑀫𑁆𑀫𑀡𑀸𑀯. 𑀲𑀫𑁆𑀨𑀧𑁆𑀧𑀮𑀸𑀧𑁄 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀯𑀲𑁂𑀦 𑀲𑀢𑁆𑀢𑀸𑀭𑀫𑁆𑀫𑀡𑁄 𑀯𑀸 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑁄 𑀯𑀸, 𑀢𑀣𑀸 𑀅𑀪𑀺𑀚𑁆𑀛𑀸. 𑀩𑁆𑀬𑀸𑀧𑀸𑀤𑁄 𑀲𑀢𑁆𑀢𑀸𑀭𑀫𑁆𑀫𑀡𑁄𑀯. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀢𑁂𑀪𑀽𑀫𑀓𑀥𑀫𑁆𑀫𑀯𑀲𑁂𑀦 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀸.

𑀯𑁂𑀤𑀦𑀸𑀢𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑁄 𑀤𑀼𑀓𑁆𑀔𑀯𑁂𑀤𑀦𑁄 𑀳𑁄𑀢𑀺. 𑀓𑀺𑀜𑁆𑀘𑀸𑀧𑀺 𑀳𑀺 𑀭𑀸𑀚𑀸𑀦𑁄 𑀘𑁄𑀭𑀁 𑀤𑀺𑀲𑁆𑀯𑀸 𑀳𑀲𑀫𑀸𑀦𑀸𑀧𑀺 ‘‘𑀕𑀘𑁆𑀙𑀣 𑀦𑀁 𑀖𑀸𑀢𑁂𑀣𑀸’’𑀢𑀺 𑀯𑀤𑀦𑁆𑀢𑀺, 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸 𑀧𑀦 𑀦𑁂𑀲𑀁 𑀤𑀼𑀓𑁆𑀔𑀲𑀫𑁆𑀧𑀬𑀼𑀢𑁆𑀢𑀸𑀯 𑀳𑁄𑀢𑀺. 𑀅𑀤𑀺𑀦𑁆𑀦𑀸𑀤𑀸𑀦𑀁 𑀢𑀺𑀯𑁂𑀤𑀦𑀁, 𑀫𑀺𑀘𑁆𑀙𑀸𑀘𑀸𑀭𑁄 𑀲𑀼𑀔𑀫𑀚𑁆𑀛𑀢𑁆𑀢𑀯𑀲𑁂𑀦 𑀤𑁆𑀯𑀺𑀯𑁂𑀤𑀦𑁄, 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑀺𑀢𑁆𑀢𑁂 𑀧𑀦 𑀫𑀚𑁆𑀛𑀢𑁆𑀢𑀯𑁂𑀤𑀦𑁄 𑀦 𑀳𑁄𑀢𑀺. 𑀫𑀼𑀲𑀸𑀯𑀸𑀤𑁄 𑀢𑀺𑀯𑁂𑀤𑀦𑁄, 𑀢𑀣𑀸 𑀧𑀺𑀲𑀼𑀡𑀯𑀸𑀘𑀸 𑀨𑀭𑀼𑀲𑀯𑀸𑀘𑀸 𑀤𑀼𑀓𑁆𑀔𑀯𑁂𑀤𑀦𑀸, 𑀲𑀫𑁆𑀨𑀧𑁆𑀧𑀮𑀸𑀧𑁄 𑀢𑀺𑀯𑁂𑀤𑀦𑁄, 𑀅𑀪𑀺𑀚𑁆𑀛𑀸 𑀲𑀼𑀔𑀫𑀚𑁆𑀛𑀢𑁆𑀢𑀯𑀲𑁂𑀦 𑀤𑁆𑀯𑀺𑀯𑁂𑀤𑀦𑀸, 𑀢𑀣𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀩𑁆𑀬𑀸𑀧𑀸𑀤𑁄 𑀤𑀼𑀓𑁆𑀔𑀯𑁂𑀤𑀦𑁄.

𑀫𑀽𑀮𑀢𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑁄 𑀤𑁄𑀲𑀫𑁄𑀳𑀯𑀲𑁂𑀦 𑀤𑁆𑀯𑀺𑀫𑀽𑀮𑀓𑁄 𑀳𑁄𑀢𑀺, 𑀅𑀤𑀺𑀦𑁆𑀦𑀸𑀤𑀸𑀦𑀁 𑀤𑁄𑀲𑀫𑁄𑀳𑀯𑀲𑁂𑀦 𑀯𑀸 𑀮𑁄𑀪𑀫𑁄𑀳𑀯𑀲𑁂𑀦 𑀯𑀸, 𑀫𑀺𑀘𑁆𑀙𑀸𑀘𑀸𑀭𑁄 𑀮𑁄𑀪𑀫𑁄𑀳𑀯𑀲𑁂𑀦. 𑀫𑀼𑀲𑀸𑀯𑀸𑀤𑁄 𑀤𑁄𑀲𑀫𑁄𑀳𑀯𑀲𑁂𑀦 𑀯𑀸 𑀮𑁄𑀪𑀫𑁄𑀳𑀯𑀲𑁂𑀦 𑀯𑀸, 𑀢𑀣𑀸 𑀧𑀺𑀲𑀼𑀡𑀯𑀸𑀘𑀸 𑀲𑀫𑁆𑀨𑀧𑁆𑀧𑀮𑀸𑀧𑁄 𑀘. 𑀨𑀭𑀼𑀲𑀯𑀸𑀘𑀸 𑀤𑁄𑀲𑀫𑁄𑀳𑀯𑀲𑁂𑀦, 𑀅𑀪𑀺𑀚𑁆𑀛𑀸 𑀫𑁄𑀳𑀯𑀲𑁂𑀦 𑀏𑀓𑀫𑀽𑀮𑀸, 𑀢𑀣𑀸 𑀩𑁆𑀬𑀸𑀧𑀸𑀤𑁄. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀮𑁄𑀪𑀫𑁄𑀳𑀯𑀲𑁂𑀦 𑀤𑁆𑀯𑀺𑀫𑀽𑀮𑀸𑀢𑀺.

𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸𑀢𑀺𑀆𑀤𑀻𑀲𑀼 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀯𑀼𑀢𑁆𑀢𑀢𑁆𑀣𑀸 𑀏𑀯. 𑀬𑀸𑀬 𑀧𑀦 𑀯𑀺𑀭𑀢𑀺𑀬𑀸 𑀏𑀢𑁂 𑀧𑀝𑀺𑀯𑀺𑀭𑀢𑀸 𑀦𑀸𑀫 𑀳𑁄𑀦𑁆𑀢𑀺, 𑀲𑀸 𑀪𑁂𑀤𑀢𑁄 𑀢𑀺𑀯𑀺𑀥𑀸 𑀳𑁄𑀢𑀺 𑀲𑀫𑁆𑀧𑀢𑁆𑀢𑀯𑀺𑀭𑀢𑀺 𑀲𑀫𑀸𑀤𑀸𑀦𑀯𑀺𑀭𑀢𑀺 𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀻𑀢𑀺. 𑀢𑀢𑁆𑀣 𑀅𑀲𑀫𑀸𑀤𑀺𑀦𑁆𑀦𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀢𑁆𑀢𑀦𑁄 𑀚𑀸𑀢𑀺𑀯𑀬𑀩𑀸𑀳𑀼𑀲𑀘𑁆𑀘𑀸𑀤𑀻𑀦𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 ‘‘𑀅𑀬𑀼𑀢𑁆𑀢𑀁 𑀅𑀫𑁆𑀳𑀸𑀓𑀁 𑀏𑀯𑀭𑀽𑀧𑀁 𑀓𑀸𑀢𑀼’’𑀦𑁆𑀢𑀺 𑀲𑀫𑁆𑀧𑀢𑁆𑀢𑀁 𑀯𑀢𑁆𑀣𑀼𑀁 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀯𑀺𑀭𑀢𑀺 𑀲𑀫𑁆𑀧𑀢𑁆𑀢𑀯𑀺𑀭𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸 𑀲𑀻𑀳𑀴𑀤𑀻𑀧𑁂 𑀘𑀓𑁆𑀓𑀦𑀉𑀧𑀸𑀲𑀓𑀲𑁆𑀲 𑀯𑀺𑀬. 𑀢𑀲𑁆𑀲 𑀓𑀺𑀭 𑀤𑀳𑀭𑀓𑀸𑀮𑁂𑀬𑁂𑀯 𑀫𑀸𑀢𑀼 𑀭𑁄𑀕𑁄 𑀉𑀧𑁆𑀧𑀚𑁆𑀚𑀺. 𑀯𑁂𑀚𑁆𑀚𑁂𑀦 𑀘 ‘‘𑀅𑀮𑁆𑀮𑀲𑀲𑀓𑀫𑀁𑀲𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁄 𑀘𑀓𑁆𑀓𑀦𑀲𑁆𑀲 𑀪𑀸𑀢𑀸 ‘‘𑀕𑀘𑁆𑀙 𑀢𑀸𑀢 𑀔𑁂𑀢𑁆𑀢𑀁 𑀆𑀳𑀺𑀡𑁆𑀟𑀸𑀳𑀻’’𑀢𑀺 𑀘𑀓𑁆𑀓𑀦𑀁 𑀧𑁂𑀲𑁂𑀲𑀺. 𑀲𑁄 𑀢𑀢𑁆𑀣 𑀕𑀢𑁄. 𑀢𑀲𑁆𑀫𑀺𑀜𑁆𑀘 𑀲𑀫𑀬𑁂 𑀏𑀓𑁄 𑀲𑀲𑁄 𑀢𑀭𑀼𑀡𑀲𑀲𑁆𑀲𑀁 𑀔𑀸𑀤𑀺𑀢𑀼𑀁 𑀆𑀕𑀢𑁄 𑀳𑁄𑀢𑀺. 𑀲𑁄 𑀢𑀁 𑀤𑀺𑀲𑁆𑀯𑀸 𑀯𑁂𑀕𑁂𑀦 𑀥𑀸𑀯𑀦𑁆𑀢𑁄 𑀯𑀮𑁆𑀮𑀺𑀬𑀸 𑀩𑀤𑁆𑀥𑁄 ‘‘𑀓𑀺𑀭𑀺 𑀓𑀺𑀭𑀻’’𑀢𑀺 𑀲𑀤𑁆𑀤𑀫𑀓𑀸𑀲𑀺. 𑀘𑀓𑁆𑀓𑀦𑁄 𑀢𑁂𑀦 𑀲𑀤𑁆𑀤𑁂𑀦 𑀕𑀦𑁆𑀢𑁆𑀯𑀸 𑀢𑀁 𑀕𑀳𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 ‘‘𑀫𑀸𑀢𑀼 𑀪𑁂𑀲𑀚𑁆𑀚𑀁 𑀓𑀭𑁄𑀫𑀻’’𑀢𑀺. 𑀧𑀼𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀦 𑀫𑁂𑀢𑀁 𑀧𑀢𑀺𑀭𑀽𑀧𑀁, 𑀬𑁆𑀯𑀸𑀳𑀁 𑀫𑀸𑀢𑀼 𑀚𑀻𑀯𑀺𑀢𑀓𑀸𑀭𑀡𑀸 𑀧𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬’’𑀦𑁆𑀢𑀺. 𑀅𑀣 𑀦𑀁 ‘‘𑀕𑀘𑁆𑀙 𑀅𑀭𑀜𑁆𑀜𑁂 𑀲𑀲𑁂𑀳𑀺 𑀲𑀤𑁆𑀥𑀺𑀁 𑀢𑀺𑀡𑁄𑀤𑀓𑀁 𑀧𑀭𑀺𑀪𑀼𑀜𑁆𑀚𑀸’’𑀢𑀺 𑀫𑀼𑀜𑁆𑀘𑀺. 𑀪𑀸𑀢𑀭𑀸 𑀘 ‘‘𑀓𑀺𑀁 𑀢𑀸𑀢 𑀲𑀲𑁄 𑀮𑀤𑁆𑀥𑁄’’𑀢𑀺? 𑀧𑀼𑀘𑁆𑀙𑀺𑀢𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺. 𑀢𑀢𑁄 𑀦𑀁 𑀪𑀸𑀢𑀸 𑀧𑀭𑀺𑀪𑀸𑀲𑀺. 𑀲𑁄 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀬𑀢𑁄𑀳𑀁 𑀚𑀸𑀢𑁄, 𑀦𑀸𑀪𑀺𑀚𑀸𑀦𑀸𑀫𑀺 𑀲𑀜𑁆𑀘𑀺𑀘𑁆𑀘 𑀧𑀸𑀡𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀸’’𑀢𑀺 𑀲𑀘𑁆𑀘𑀁 𑀯𑀢𑁆𑀯𑀸 𑀅𑀝𑁆𑀞𑀸𑀲𑀺, 𑀢𑀸𑀯𑀤𑁂𑀯 𑀘𑀲𑁆𑀲 𑀫𑀸𑀢𑀸 𑀅𑀭𑁄𑀕𑀸 𑀅𑀳𑁄𑀲𑀺.

𑀲𑀫𑀸𑀤𑀺𑀦𑁆𑀦𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀦 𑀲𑀺𑀓𑁆𑀔𑀸𑀧𑀤𑀲𑀫𑀸𑀤𑀸𑀦𑁂 𑀘 𑀢𑀢𑀼𑀢𑁆𑀢𑀭𑀺 𑀘 𑀅𑀢𑁆𑀢𑀦𑁄 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀯𑀢𑁆𑀣𑀼𑀁 𑀅𑀯𑀻𑀢𑀺𑀓𑁆𑀓𑀫𑀦𑁆𑀢𑀸𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀯𑀺𑀭𑀢𑀺 𑀲𑀫𑀸𑀤𑀸𑀦𑀯𑀺𑀭𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀉𑀢𑁆𑀢𑀭𑀯𑀟𑁆𑀠𑀫𑀸𑀦𑀧𑀩𑁆𑀩𑀢𑀯𑀸𑀲𑀻𑀉𑀧𑀸𑀲𑀓𑀲𑁆𑀲 𑀯𑀺𑀬. 𑀲𑁄 𑀓𑀺𑀭 𑀅𑀫𑁆𑀩𑀭𑀺𑀬𑀯𑀺𑀳𑀸𑀭𑀯𑀸𑀲𑀻𑀧𑀺𑀗𑁆𑀕𑀮𑀩𑀼𑀤𑁆𑀥𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀕𑀳𑁂𑀢𑁆𑀯𑀸 𑀔𑁂𑀢𑁆𑀢𑀁 𑀓𑀲𑀢𑀺. 𑀅𑀣𑀲𑁆𑀲 𑀕𑁄𑀡𑁄 𑀦𑀝𑁆𑀞𑁄, 𑀲𑁄 𑀢𑀁 𑀕𑀯𑁂𑀲𑀦𑁆𑀢𑁄 𑀉𑀢𑁆𑀢𑀭𑀯𑀟𑁆𑀠𑀫𑀸𑀦𑀧𑀩𑁆𑀩𑀢𑀁 𑀆𑀭𑀼𑀳𑀺, 𑀢𑀢𑁆𑀭 𑀦𑀁 𑀫𑀳𑀸𑀲𑀧𑁆𑀧𑁄 𑀅𑀕𑁆𑀕𑀳𑁂𑀲𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑀸𑀬 𑀢𑀺𑀔𑀺𑀡𑀸𑀬 𑀯𑀸𑀲𑀺𑀬𑀸 𑀲𑀻𑀲𑀁 𑀙𑀺𑀦𑁆𑀤𑀸𑀫𑀻’’𑀢𑀺. 𑀧𑀼𑀦 𑀘𑀺𑀦𑁆𑀢𑁂𑀲𑀺 𑁋 ‘‘𑀦 𑀫𑁂𑀢𑀁 𑀧𑀢𑀺𑀭𑀽𑀧𑀁, 𑀬𑁆𑀯𑀸𑀳𑀁 𑀪𑀸𑀯𑀦𑀻𑀬𑀲𑁆𑀲 𑀕𑀭𑀼𑀦𑁄 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀸𑀧𑀤𑀁 𑀕𑀳𑁂𑀢𑁆𑀯𑀸 𑀪𑀺𑀦𑁆𑀤𑁂𑀬𑁆𑀬’’𑀦𑁆𑀢𑀺. 𑀏𑀯𑀁 𑀬𑀸𑀯𑀢𑀢𑀺𑀬𑀁 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀸𑀫𑀺, 𑀦 𑀲𑀺𑀓𑁆𑀔𑀸𑀧𑀤’’𑀦𑁆𑀢𑀺 𑀅𑀁𑀲𑁂 𑀞𑀧𑀺𑀢𑀁 𑀢𑀺𑀔𑀺𑀡𑀤𑀡𑁆𑀟𑀯𑀸𑀲𑀺𑀁 𑀅𑀭𑀜𑁆𑀜𑁂 𑀙𑀟𑁆𑀟𑁂𑀲𑀺. 𑀢𑀸𑀯𑀤𑁂𑀯 𑀫𑀳𑀸𑀯𑀸𑀴𑁄 𑀦𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀕𑀫𑀸𑀲𑀻𑀢𑀺.

𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀯𑀺𑀭𑀢𑀺 𑀲𑀫𑀼𑀘𑁆𑀙𑁂𑀤𑀯𑀺𑀭𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀬𑀲𑁆𑀲𑀸 𑀉𑀧𑁆𑀧𑀢𑁆𑀢𑀺𑀢𑁄 𑀧𑀪𑀼𑀢𑀺 𑀧𑀸𑀡𑀁 𑀖𑀸𑀢𑁂𑀲𑁆𑀲𑀸𑀫𑀻𑀢𑀺 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀚𑁆𑀚𑀢𑀻𑀢𑀺.

𑀬𑀣𑀸 𑀘 𑀅𑀓𑀼𑀲𑀮𑀸𑀦𑀁, 𑀏𑀯𑀁 𑀇𑀫𑁂𑀲𑀫𑁆𑀧𑀺 𑀓𑀼𑀲𑀮𑀓𑀫𑁆𑀫𑀧𑀣𑀸𑀦𑀁 𑀥𑀫𑁆𑀫𑀢𑁄 𑀓𑁄𑀝𑁆𑀞𑀸𑀲𑀢𑁄 𑀆𑀭𑀫𑁆𑀫𑀡𑀢𑁄 𑀯𑁂𑀤𑀦𑀸𑀢𑁄 𑀫𑀽𑀮𑀢𑁄𑀢𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀥𑀫𑁆𑀫𑀢𑁄𑀢𑀺 𑀏𑀢𑁂𑀲𑀼 𑀳𑀺 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀘𑁂𑀢𑀦𑀸𑀧𑀺 𑀯𑀝𑁆𑀝𑀦𑁆𑀢𑀺 𑀯𑀺𑀭𑀢𑀺𑀬𑁄𑀧𑀺, 𑀅𑀦𑁆𑀢𑁂 𑀢𑀬𑁄 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀯.

𑀓𑁄𑀝𑁆𑀞𑀸𑀲𑀢𑁄𑀢𑀺 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀓𑀫𑁆𑀫𑀧𑀣𑀸 𑀏𑀯, 𑀦 𑀫𑀽𑀮𑀸𑀦𑀺, 𑀅𑀦𑁆𑀢𑁂 𑀢𑀬𑁄 𑀓𑀫𑁆𑀫𑀧𑀣𑀸 𑀘𑁂𑀯 𑀫𑀽𑀮𑀸𑀦𑀺 𑀘. 𑀅𑀦𑀪𑀺𑀚𑁆𑀛𑀸 𑀳𑀺 𑀫𑀽𑀮𑀁 𑀧𑀢𑁆𑀯𑀸 𑀅𑀮𑁄𑀪𑁄 𑀓𑀼𑀲𑀮𑀫𑀽𑀮𑀁 𑀳𑁄𑀢𑀺, 𑀅𑀩𑁆𑀬𑀸𑀧𑀸𑀤𑁄 𑀅𑀤𑁄𑀲𑁄 𑀓𑀼𑀲𑀮𑀫𑀽𑀮𑀁, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀅𑀫𑁄𑀳𑁄 𑀓𑀼𑀲𑀮𑀫𑀽𑀮𑀁.

𑀆𑀭𑀫𑁆𑀫𑀡𑀢𑁄𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁. 𑀆𑀭𑀫𑁆𑀫𑀡𑀸𑀦𑁂𑀯 𑀏𑀢𑁂𑀲𑀁 𑀆𑀭𑀫𑁆𑀫𑀡𑀸𑀦𑀺. 𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀯𑀢𑁆𑀣𑀼𑀢𑁄𑀬𑁂𑀯 𑀳𑀺 𑀯𑀺𑀭𑀢𑀺 𑀦𑀸𑀫 𑀳𑁄𑀢𑀺. 𑀬𑀣𑀸 𑀧𑀦 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁄 𑀅𑀭𑀺𑀬𑀫𑀕𑁆𑀕𑁄 𑀓𑀺𑀮𑁂𑀲𑁂 𑀧𑀚𑀳𑀢𑀺, 𑀏𑀯𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀸𑀤𑀺𑀆𑀭𑀫𑁆𑀫𑀡𑀸𑀧𑁂𑀢𑁂 𑀓𑀫𑁆𑀫𑀧𑀣𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀺 𑀤𑀼𑀲𑁆𑀲𑀻𑀮𑁆𑀬𑀸𑀦𑀺 𑀧𑀚𑀳𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀯𑁂𑀤𑀦𑀸𑀢𑁄𑀢𑀺 𑀲𑀩𑁆𑀩𑁂 𑀲𑀼𑀔𑀯𑁂𑀤𑀦𑀸 𑀯𑀸 𑀳𑁄𑀦𑁆𑀢𑀺 𑀫𑀚𑁆𑀛𑀢𑁆𑀢𑀯𑁂𑀤𑀦𑀸 𑀯𑀸. 𑀓𑀼𑀲𑀮𑀁 𑀧𑀢𑁆𑀯𑀸 𑀳𑀺 𑀤𑀼𑀓𑁆𑀔𑀯𑁂𑀤𑀦𑀸 𑀦𑀸𑀫 𑀦𑀢𑁆𑀣𑀺.

𑀫𑀽𑀮𑀢𑁄𑀢𑀺 𑀧𑀝𑀺𑀧𑀸𑀝𑀺𑀬𑀸 𑀲𑀢𑁆𑀢 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀯𑀺𑀭𑀫𑀦𑁆𑀢𑀲𑁆𑀲 𑀅𑀮𑁄𑀪𑀅𑀤𑁄𑀲𑀅𑀫𑁄𑀳𑀯𑀲𑁂𑀦 𑀢𑀺𑀫𑀽𑀮𑀸 𑀳𑁄𑀦𑁆𑀢𑀺, 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀯𑀺𑀭𑀫𑀦𑁆𑀢𑀲𑁆𑀲 𑀤𑁆𑀯𑀺𑀫𑀽𑀮𑀸. 𑀅𑀦𑀪𑀺𑀚𑁆𑀛𑀸 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀯𑀺𑀭𑀫𑀦𑁆𑀢𑀲𑁆𑀲 𑀤𑁆𑀯𑀺𑀫𑀽𑀮𑀸 𑀳𑁄𑀢𑀺, 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀦 𑀏𑀓𑀫𑀽𑀮𑀸. 𑀅𑀮𑁄𑀪𑁄 𑀧𑀦 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀫𑀽𑀮𑀁 𑀦 𑀳𑁄𑀢𑀺. 𑀅𑀩𑁆𑀬𑀸𑀧𑀸𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀫𑁆𑀫𑀸𑀤𑀺𑀝𑁆𑀞𑀺 𑀅𑀮𑁄𑀪𑀅𑀤𑁄𑀲𑀯𑀲𑁂𑀦 𑀤𑁆𑀯𑀺𑀫𑀽𑀮𑀸𑀯𑀸𑀢𑀺. 𑀢𑀢𑀺𑀬𑀸𑀤𑀻𑀦𑀺.

𑁬. 𑀅𑀝𑁆𑀞𑀗𑁆𑀕𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁨. 𑀙𑀝𑁆𑀞𑀁 𑀅𑀝𑁆𑀞𑀫𑀕𑁆𑀕𑀗𑁆𑀕𑀯𑀲𑁂𑀦 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀙𑀝𑁆𑀞𑀁.

𑁭. 𑀤𑀲𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁩. 𑀲𑀢𑁆𑀢𑀫𑀁 𑀤𑀲𑀫𑀺𑀘𑁆𑀙𑀢𑁆𑀢𑀲𑀫𑁆𑀫𑀢𑁆𑀢𑀯𑀲𑁂𑀦. 𑀢𑀢𑁆𑀣 𑀫𑀺𑀘𑁆𑀙𑀸𑀜𑀸𑀡𑀺𑀦𑁄𑀢𑀺 𑀫𑀺𑀘𑁆𑀙𑀸𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀢𑁆𑀣𑁄. 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀦𑁄𑀢𑀺 𑀅𑀦𑀺𑀬𑁆𑀬𑀸𑀦𑀺𑀓𑀯𑀺𑀫𑀼𑀢𑁆𑀢𑀺𑀦𑁄 𑀓𑀼𑀲𑀮𑀯𑀺𑀫𑀼𑀢𑁆𑀢𑀻𑀢𑀺 𑀕𑀳𑁂𑀢𑁆𑀯𑀸 𑀞𑀺𑀢𑀸. 𑀲𑀫𑁆𑀫𑀸𑀜𑀸𑀡𑀺𑀦𑁄𑀢𑀺 𑀲𑀫𑁆𑀫𑀸𑀧𑀘𑁆𑀘𑀯𑁂𑀓𑁆𑀔𑀡𑀸. 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺𑀦𑁄𑀢𑀺 𑀦𑀺𑀬𑁆𑀬𑀸𑀦𑀺𑀓𑀸𑀬 𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑀸𑀢𑀺. 𑀲𑀢𑁆𑀢𑀫𑀁.

𑀓𑀫𑁆𑀫𑀧𑀣𑀯𑀕𑁆𑀕𑁄 𑀢𑀢𑀺𑀬𑁄.

𑁪. 𑀘𑀢𑀼𑀢𑁆𑀣𑀯𑀕𑁆𑀕𑁄

𑁧. 𑀘𑀢𑀼𑀥𑀸𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁪. 𑀘𑀢𑀼𑀢𑁆𑀣𑀯𑀕𑁆𑀕𑀲𑁆𑀲 𑀧𑀞𑀫𑁂 𑀧𑀣𑀯𑀻𑀥𑀸𑀢𑀽𑀢𑀺 𑀧𑀢𑀺𑀝𑁆𑀞𑀸𑀥𑀸𑀢𑀼. 𑀆𑀧𑁄𑀥𑀸𑀢𑀽𑀢𑀺 𑀆𑀩𑀦𑁆𑀥𑀦𑀥𑀸𑀢𑀼. 𑀢𑁂𑀚𑁄𑀥𑀸𑀢𑀽𑀢𑀺 𑀧𑀭𑀺𑀧𑀸𑀘𑀦𑀥𑀸𑀢𑀼. 𑀯𑀸𑀬𑁄𑀥𑀸𑀢𑀽𑀢𑀺 𑀯𑀺𑀢𑁆𑀣𑀫𑁆𑀪𑀦𑀥𑀸𑀢𑀼. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀯𑀻𑀲𑀢𑀺𑀓𑁄𑀝𑁆𑀞𑀸𑀲𑀸𑀤𑀺𑀯𑀲𑁂𑀦 𑀏𑀢𑀸 𑀓𑀣𑁂𑀢𑀩𑁆𑀩𑀸. 𑀧𑀞𑀫𑀁.

𑁨. 𑀧𑀼𑀩𑁆𑀩𑁂𑀲𑀫𑁆𑀩𑁄𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁫. 𑀤𑀼𑀢𑀺𑀬𑁂 𑀅𑀬𑀁 𑀧𑀣𑀯𑀻𑀥𑀸𑀢𑀼𑀬𑀸 𑀅𑀲𑁆𑀲𑀸𑀤𑁄𑀢𑀺 𑀅𑀬𑀁 𑀧𑀣𑀯𑀻𑀥𑀸𑀢𑀼𑀦𑀺𑀲𑁆𑀲𑀬𑁄 𑀅𑀲𑁆𑀲𑀸𑀤𑁄. 𑀲𑁆𑀯𑀸𑀬𑀁 𑀓𑀸𑀬𑀁 𑀅𑀩𑁆𑀪𑀼𑀦𑁆𑀦𑀸𑀫𑁂𑀢𑁆𑀯𑀸 𑀉𑀤𑀭𑀁 𑀧𑀲𑀸𑀭𑁂𑀢𑁆𑀯𑀸, ‘‘𑀇𑀥 𑀫𑁂 𑀅𑀗𑁆𑀕𑀼𑀮𑀁 𑀧𑀯𑁂𑀲𑀺𑀢𑀼𑀁 𑀯𑀸𑀬𑀫𑀣𑀸’’𑀢𑀺 𑀯𑀸 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸, ‘‘𑀇𑀫𑀁 𑀦𑀸𑀫𑁂𑀢𑀼𑀁 𑀯𑀸𑀬𑀫𑀣𑀸’’𑀢𑀺 𑀯𑀸 𑀯𑀤𑀢𑀺, 𑀏𑀯𑀁 𑀧𑀯𑀢𑁆𑀢𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀦𑀺𑀘𑁆𑀘𑀸𑀢𑀺𑀆𑀤𑀻𑀲𑀼 𑀳𑀼𑀢𑁆𑀯𑀸 𑀅𑀪𑀸𑀯𑀸𑀓𑀸𑀭𑁂𑀦 𑀅𑀦𑀺𑀘𑁆𑀘𑀸, 𑀧𑀝𑀺𑀧𑀻𑀴𑀦𑀸𑀓𑀸𑀭𑁂𑀦 𑀤𑀼𑀓𑁆𑀔𑀸, 𑀲𑀪𑀸𑀯𑀯𑀺𑀕𑀫𑀸𑀓𑀸𑀭𑁂𑀦 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸. 𑀅𑀬𑀁 𑀧𑀣𑀯𑀻𑀥𑀸𑀢𑀼𑀬𑀸 𑀆𑀤𑀻𑀦𑀯𑁄𑀢𑀺 𑀬𑁂𑀦 𑀆𑀓𑀸𑀭𑁂𑀦 𑀲𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸, 𑀅𑀬𑀫𑀸𑀓𑀸𑀭𑁄 𑀧𑀣𑀯𑀻𑀥𑀸𑀢𑀼𑀬𑀸 𑀆𑀤𑀻𑀦𑀯𑁄𑀢𑀺 𑀅𑀢𑁆𑀣𑁄. 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀧𑀣𑀯𑀻𑀥𑀸𑀢𑀼𑀬𑀸 𑀙𑀦𑁆𑀤𑀭𑀸𑀕𑁄 𑀯𑀺𑀦𑀻𑀬𑀢𑀺 𑀘𑁂𑀯 𑀧𑀳𑀻𑀬𑀢𑀺 𑀘, 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑀫𑀲𑁆𑀲𑀸 𑀦𑀺𑀲𑁆𑀲𑀭𑀡𑀁.

𑀅𑀬𑀁 𑀆𑀧𑁄𑀥𑀸𑀢𑀼𑀬𑀸 𑀅𑀲𑁆𑀲𑀸𑀤𑁄𑀢𑀺 𑀅𑀬𑀁 𑀆𑀧𑁄𑀥𑀸𑀢𑀼𑀦𑀺𑀲𑁆𑀲𑀬𑁄 𑀅𑀲𑁆𑀲𑀸𑀤𑁄. 𑀲𑁆𑀯𑀸𑀬𑀁 𑀅𑀜𑁆𑀜𑀁 𑀆𑀧𑁄𑀥𑀸𑀢𑀼𑀬𑀸 𑀉𑀧𑀤𑁆𑀤𑀼𑀢𑀁 𑀤𑀺𑀲𑁆𑀯𑀸, ‘‘𑀓𑀺𑀁 𑀅𑀬𑀁 𑀦𑀺𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀲𑁆𑀲𑀸𑀯𑀝𑁆𑀞𑀸𑀦𑀸𑀪𑀺𑀫𑀼𑀔𑁄 𑀦𑀺𑀓𑁆𑀔𑀫𑀢𑀺 𑀘𑁂𑀯 𑀧𑀯𑀺𑀲𑀢𑀺 𑀘, 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺𑀲𑁆𑀲 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀲𑁂𑀤𑀢𑀺𑀦𑁆𑀢𑀁 𑀯𑀢𑁆𑀣𑀁 𑀧𑀻𑀴𑁂𑀢𑀩𑁆𑀩𑀢𑀸𑀓𑀸𑀭𑀁 𑀧𑀸𑀧𑀼𑀡𑀸𑀢𑀺, 𑀅𑀦𑀼𑀫𑁄𑀤𑀦𑀫𑀢𑁆𑀢𑀫𑁆𑀧𑀺 𑀓𑀣𑁂𑀦𑁆𑀢𑀲𑁆𑀲 𑀢𑀸𑀮𑀯𑀡𑁆𑀝𑀁 𑀕𑀡𑁆𑀳𑀺𑀢𑀩𑁆𑀩𑀁 𑀳𑁄𑀢𑀺, 𑀫𑀬𑀁 𑀧𑀦 𑀲𑀸𑀬𑀁 𑀦𑀺𑀧𑀦𑁆𑀦𑀸 𑀧𑀸𑀢𑁄𑀯 𑀉𑀝𑁆𑀞𑀳𑀸𑀫, 𑀫𑀸𑀲𑀧𑀼𑀡𑁆𑀡𑀖𑀝𑁄 𑀯𑀺𑀬 𑀦𑁄 𑀲𑀭𑀻𑀭𑀁, 𑀫𑀳𑀸𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀲𑁂𑀤𑀫𑀢𑁆𑀢𑀫𑁆𑀧𑀺 𑀦𑁄 𑀦 𑀉𑀧𑁆𑀧𑀚𑁆𑀚𑀢𑀺, 𑀅𑀲𑀦𑀺𑀲𑀤𑁆𑀤𑁂𑀦 𑀯𑀺𑀬 𑀥𑀫𑁆𑀫𑀁 𑀓𑀣𑁂𑀦𑁆𑀢𑀸𑀦𑀁 𑀲𑀭𑀻𑀭𑁂 𑀉𑀲𑀼𑀫𑀸𑀓𑀸𑀭𑀫𑀢𑁆𑀢𑀫𑁆𑀧𑀺 𑀦𑁄 𑀦𑀢𑁆𑀣𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀅𑀬𑀁 𑀢𑁂𑀚𑁄𑀥𑀸𑀢𑀼𑀬𑀸 𑀅𑀲𑁆𑀲𑀸𑀤𑁄𑀢𑀺 𑀅𑀬𑀁 𑀢𑁂𑀚𑁄𑀥𑀸𑀢𑀼𑀦𑀺𑀲𑁆𑀲𑀬𑁄 𑀅𑀲𑁆𑀲𑀸𑀤𑁄. 𑀲𑁆𑀯𑀸𑀬𑀁 𑀲𑀻𑀢𑀕𑀳𑀡𑀺𑀓𑁂 𑀤𑀺𑀲𑁆𑀯𑀸, ‘‘𑀓𑀺𑀁 𑀇𑀫𑁂 𑀓𑀺𑀜𑁆𑀘𑀺𑀤𑁂𑀯 𑀬𑀸𑀕𑀼𑀪𑀢𑁆𑀢𑀔𑀚𑁆𑀚𑀫𑀢𑁆𑀢𑀁 𑀅𑀚𑁆𑀛𑁄𑀳𑀭𑀺𑀢𑁆𑀯𑀸 𑀣𑀤𑁆𑀥𑀓𑀼𑀘𑁆𑀙𑀺𑀦𑁄 𑀦𑀺𑀲𑀻𑀤𑀺𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀅𑀗𑁆𑀕𑀸𑀭𑀓𑀝𑀸𑀳𑀁 𑀧𑀭𑀺𑀬𑁂𑀲𑀦𑁆𑀢𑀺, 𑀨𑀼𑀲𑀺𑀢𑀫𑀢𑁆𑀢𑁂𑀲𑀼𑀧𑀺 𑀲𑀭𑀻𑀭𑁂 𑀧𑀢𑀺𑀢𑁂𑀲𑀼 𑀅𑀗𑁆𑀕𑀸𑀭𑀓𑀝𑀸𑀳𑀁 𑀑𑀢𑁆𑀣𑀭𑀺𑀢𑁆𑀯𑀸 𑀧𑀸𑀭𑀼𑀧𑀺𑀢𑁆𑀯𑀸𑀯 𑀦𑀺𑀧𑀚𑁆𑀚𑀦𑁆𑀢𑀺? 𑀫𑀬𑀁 𑀧𑀦 𑀅𑀢𑀺𑀣𑀤𑁆𑀥𑀫𑁆𑀧𑀺 𑀫𑀁𑀲𑀁 𑀯𑀸 𑀧𑀽𑀯𑀁 𑀯𑀸 𑀔𑀸𑀤𑀸𑀫, 𑀓𑀼𑀘𑁆𑀙𑀺𑀧𑀽𑀭𑀁 𑀪𑀢𑁆𑀢𑀁 𑀪𑀼𑀜𑁆𑀚𑀸𑀫, 𑀢𑀸𑀯𑀤𑁂𑀯 𑀦𑁄 𑀲𑀩𑁆𑀩𑀁 𑀨𑁂𑀡𑀧𑀺𑀡𑁆𑀟𑁄 𑀯𑀺𑀬 𑀯𑀺𑀮𑀻𑀬𑀢𑀺, 𑀲𑀢𑁆𑀢𑀸𑀳𑀯𑀤𑁆𑀤𑀮𑀺𑀓𑀸𑀬 𑀯𑀢𑁆𑀢𑀫𑀸𑀦𑀸𑀬 𑀲𑀭𑀻𑀭𑁂 𑀲𑀻𑀢𑀸𑀦𑀼𑀤𑀳𑀦𑀫𑀢𑁆𑀢𑀫𑁆𑀧𑀺 𑀦𑁄 𑀦𑀢𑁆𑀣𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄.

𑀅𑀬𑀁 𑀯𑀸𑀬𑁄𑀥𑀸𑀢𑀼𑀬𑀸 𑀅𑀲𑁆𑀲𑀸𑀤𑁄𑀢𑀺 𑀅𑀬𑀁 𑀯𑀸𑀬𑁄𑀥𑀸𑀢𑀼𑀦𑀺𑀲𑁆𑀲𑀬𑁄 𑀅𑀲𑁆𑀲𑀸𑀤𑁄. 𑀲𑁆𑀯𑀸𑀬𑀁 𑀅𑀜𑁆𑀜𑁂 𑀯𑀸𑀢𑀪𑀻𑀭𑀼𑀓𑁂 𑀤𑀺𑀲𑁆𑀯𑀸, ‘‘𑀇𑀫𑁂𑀲𑀁 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀅𑀦𑀼𑀫𑁄𑀤𑀦𑀫𑀢𑁆𑀢𑀫𑁆𑀧𑀺 𑀓𑀣𑁂𑀦𑁆𑀢𑀸𑀦𑀁 𑀲𑀭𑀻𑀭𑀁 𑀯𑀸𑀢𑁄 𑀯𑀺𑀚𑁆𑀛𑀢𑀺, 𑀕𑀸𑀯𑀼𑀢𑀫𑀢𑁆𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀕𑀢𑀸𑀦𑀁 𑀳𑀢𑁆𑀣𑀧𑀸𑀤𑀸 𑀲𑀻𑀤𑀦𑁆𑀢𑀺, 𑀧𑀺𑀝𑁆𑀞𑀺 𑀭𑀼𑀚𑁆𑀚𑀢𑀺, 𑀓𑀼𑀘𑁆𑀙𑀺𑀯𑀸𑀢𑀲𑀻𑀲𑀯𑀸𑀢𑀓𑀡𑁆𑀡𑀯𑀸𑀢𑀸𑀤𑀻𑀳𑀺 𑀦𑀺𑀘𑁆𑀘𑀼𑀧𑀤𑁆𑀤𑀼𑀢𑀸 𑀢𑁂𑀮𑀨𑀸𑀡𑀺𑀢𑀸𑀤𑀻𑀦𑀺 𑀯𑀸𑀢𑀪𑁂𑀲𑀚𑁆𑀚𑀸𑀦𑁂𑀯 𑀓𑀭𑁄𑀦𑁆𑀢𑀸 𑀅𑀢𑀺𑀦𑀸𑀫𑁂𑀦𑁆𑀢𑀺, 𑀅𑀫𑁆𑀳𑀸𑀓𑀁 𑀧𑀦 𑀫𑀳𑀸𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀫𑁆𑀧𑀺 𑀢𑀺𑀬𑀸𑀫𑀭𑀢𑁆𑀢𑀺𑀁 𑀥𑀫𑁆𑀫𑀁 𑀓𑀣𑁂𑀦𑁆𑀢𑀸𑀦𑀫𑁆𑀧𑀺 𑀏𑀓𑀤𑀺𑀯𑀲𑁂𑀦𑁂𑀯 𑀤𑀲 𑀬𑁄𑀚𑀦𑀸𑀦𑀺 𑀕𑀘𑁆𑀙𑀦𑁆𑀢𑀸𑀦𑀫𑁆𑀧𑀺 𑀳𑀢𑁆𑀣𑀧𑀸𑀤𑀲𑀁𑀲𑀻𑀤𑀦𑀫𑀢𑁆𑀢𑀁 𑀯𑀸 𑀧𑀺𑀝𑁆𑀞𑀺𑀭𑀼𑀚𑁆𑀚𑀦𑀫𑀢𑁆𑀢𑀁 𑀯𑀸 𑀦 𑀳𑁄𑀢𑀻’’𑀢𑀺, 𑀏𑀯𑀁 𑀧𑀯𑀢𑁆𑀢𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀧𑀯𑀢𑁆𑀢𑀸 𑀳𑀺 𑀏𑀢𑀸 𑀥𑀸𑀢𑀼𑀬𑁄 𑀅𑀲𑁆𑀲𑀸𑀤𑁂𑀦𑁆𑀢𑀺 𑀦𑀸𑀫.

𑀅𑀩𑁆𑀪𑀜𑁆𑀜𑀸𑀲𑀺𑀦𑁆𑀢𑀺 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦 𑀅𑀜𑁆𑀜𑀸𑀲𑀺𑀁. 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀦𑁆𑀢𑀺 𑀉𑀢𑁆𑀢𑀭𑀯𑀺𑀭𑀳𑀺𑀢𑀁 𑀲𑀩𑁆𑀩𑀲𑁂𑀝𑁆𑀞𑀁 𑀲𑀫𑁆𑀫𑀸 𑀲𑀸𑀫𑀜𑁆𑀘 𑀩𑁄𑀥𑀺𑀁, 𑀅𑀣 𑀯𑀸 𑀧𑀲𑀢𑁆𑀣𑀁 𑀲𑀼𑀦𑁆𑀤𑀭𑀜𑁆𑀘 𑀩𑁄𑀥𑀺𑀁. 𑀩𑁄𑀥𑀻𑀢𑀺 𑀭𑀼𑀓𑁆𑀔𑁄𑀧𑀺 𑀫𑀕𑁆𑀕𑁄𑀧𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁆𑀧𑀺 𑀦𑀺𑀩𑁆𑀩𑀸𑀦𑀫𑁆𑀧𑀺. ‘‘𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 (𑀫𑀳𑀸𑀯. 𑁧; 𑀉𑀤𑀸. 𑁧) 𑀘 ‘‘𑀅𑀦𑁆𑀢𑀭𑀸 𑀘 𑀩𑁄𑀥𑀺𑀁 𑀅𑀦𑁆𑀢𑀭𑀸 𑀘 𑀕𑀬’’𑀦𑁆𑀢𑀺 (𑀫𑀳𑀸𑀯. 𑁧𑁧; 𑀫.𑀦𑀺. 𑁧.𑁨𑁮𑁫) 𑀘 𑀆𑀕𑀢𑀝𑁆𑀞𑀸𑀦𑁂𑀲𑀼 𑀳𑀺 𑀭𑀼𑀓𑁆𑀔𑁄 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀺. ‘‘𑀩𑁄𑀥𑀺 𑀯𑀼𑀘𑁆𑀘𑀢𑀺 𑀘𑀢𑀽𑀲𑀼 𑀫𑀕𑁆𑀕𑁂𑀲𑀼 𑀜𑀸𑀡’’𑀦𑁆𑀢𑀺 (𑀘𑀽𑀴𑀦𑀺. 𑀔𑀕𑁆𑀕𑀯𑀺𑀲𑀸𑀡𑀲𑀼𑀢𑁆𑀢𑀦𑀺𑀤𑁆𑀤𑁂𑀲 𑁧𑁨𑁧) 𑀆𑀕𑀢𑀝𑁆𑀞𑀸𑀦𑁂 𑀫𑀕𑁆𑀕𑁄. ‘‘𑀧𑀧𑁆𑀧𑁄𑀢𑀺 𑀩𑁄𑀥𑀺𑀁 𑀯𑀭𑀪𑀽𑀭𑀺𑀫𑁂𑀥𑀲𑁄’’𑀢𑀺 (𑀤𑀻. 𑀦𑀺. 𑁩.𑁨𑁧𑁭) 𑀆𑀕𑀢𑀝𑁆𑀞𑀸𑀦𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. ‘‘𑀧𑀢𑁆𑀯𑀸𑀦 𑀩𑁄𑀥𑀺𑀁 𑀅𑀫𑀢𑀁 𑀅𑀲𑀗𑁆𑀔𑀢’’𑀦𑁆𑀢𑀺 𑀆𑀕𑀢𑀝𑁆𑀞𑀸𑀦𑁂 𑀦𑀺𑀩𑁆𑀩𑀸𑀦𑀁. 𑀇𑀥 𑀧𑀦 𑀪𑀕𑀯𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀥𑀺𑀧𑁆𑀧𑁂𑀢𑁄.

𑀲𑀸𑀯𑀓𑀸𑀦𑀁 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀦𑀼𑀢𑁆𑀢𑀭𑀸 𑀩𑁄𑀥𑀺 𑀳𑁄𑀢𑀺, 𑀦 𑀳𑁄𑀢𑀻𑀢𑀺? 𑀦 𑀳𑁄𑀢𑀺. 𑀓𑀲𑁆𑀫𑀸? 𑀅𑀲𑀩𑁆𑀩𑀕𑀼𑀡𑀤𑀸𑀬𑀓𑀢𑁆𑀢𑀸. 𑀢𑁂𑀲𑀜𑁆𑀳𑀺 𑀓𑀲𑁆𑀲𑀘𑀺 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀭𑀳𑀢𑁆𑀢𑀨𑀮𑀫𑁂𑀯 𑀤𑁂𑀢𑀺, 𑀓𑀲𑁆𑀲𑀘𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀓𑀲𑁆𑀲𑀘𑀺 𑀙 𑀅𑀪𑀺𑀜𑁆𑀜𑀸, 𑀓𑀲𑁆𑀲𑀘𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸, 𑀓𑀲𑁆𑀲𑀘𑀺 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀫𑁆𑀧𑀺 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀫𑁂𑀯 𑀤𑁂𑀢𑀺. 𑀩𑀼𑀤𑁆𑀥𑀸𑀦𑀁 𑀧𑀦 𑀲𑀩𑁆𑀩𑀕𑀼𑀡𑀲𑀫𑁆𑀧𑀢𑁆𑀢𑀺𑀁 𑀤𑁂𑀢𑀺 𑀅𑀪𑀺𑀲𑁂𑀓𑁄 𑀯𑀺𑀬 𑀭𑀜𑁆𑀜𑁄 𑀲𑀩𑁆𑀩𑀮𑁄𑀓𑀺𑀲𑁆𑀲𑀭𑀺𑀬𑀪𑀸𑀯𑀁. 𑀢𑀲𑁆𑀫𑀸 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺𑀧𑀺 𑀅𑀦𑀼𑀢𑁆𑀢𑀭𑀸 𑀩𑁄𑀥𑀺 𑀦 𑀳𑁄𑀢𑀺.

𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀧𑀘𑁆𑀘𑀜𑁆𑀜𑀸𑀲𑀺𑀦𑁆𑀢𑀺 ‘‘𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀅𑀳𑀁 𑀧𑀢𑁆𑀢𑁄 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑁄’’𑀢𑀺 𑀏𑀯𑀁 𑀧𑀝𑀺𑀚𑀸𑀦𑀺𑀁. 𑀜𑀸𑀡𑀜𑁆𑀘 𑀧𑀦 𑀫𑁂 𑀤𑀲𑁆𑀲𑀦𑀁 𑀉𑀤𑀧𑀸𑀤𑀻𑀢𑀺 𑀅𑀥𑀺𑀕𑀢𑀕𑀼𑀡𑀤𑀲𑁆𑀲𑀦𑀲𑀫𑀢𑁆𑀣𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀜𑁆𑀘 𑀫𑁂 𑀉𑀤𑀧𑀸𑀤𑀺. 𑀅𑀓𑀼𑀧𑁆𑀧𑀸 𑀫𑁂 𑀯𑀺𑀫𑀼𑀢𑁆𑀢𑀻𑀢𑀺 ‘‘𑀅𑀬𑀁 𑀫𑀬𑁆𑀳𑀁 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺 𑀅𑀓𑀼𑀧𑁆𑀧𑀸’’𑀢𑀺 𑀏𑀯𑀁 𑀜𑀸𑀡𑀁 𑀉𑀤𑀧𑀸𑀤𑀺. 𑀢𑀢𑁆𑀣 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀅𑀓𑀼𑀧𑁆𑀧𑀢𑀸 𑀯𑁂𑀤𑀺𑀢𑀩𑁆𑀩𑀸 𑀓𑀸𑀭𑀡𑀢𑁄 𑀘 𑀆𑀭𑀫𑁆𑀫𑀡𑀢𑁄 𑀘. 𑀲𑀸 𑀳𑀺 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀲𑀫𑀼𑀘𑁆𑀙𑀺𑀦𑁆𑀦𑀓𑀺𑀮𑁂𑀲𑀸𑀦𑀁 𑀧𑀼𑀦 𑀅𑀦𑀺𑀯𑀢𑁆𑀢𑀦𑀢𑀸𑀬 𑀓𑀸𑀭𑀡𑀢𑁄𑀧𑀺 𑀅𑀓𑀼𑀧𑁆𑀧𑀸, 𑀅𑀓𑀼𑀧𑁆𑀧𑀥𑀫𑁆𑀫𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀸𑀬 𑀆𑀭𑀫𑁆𑀫𑀡𑀢𑁄𑀧𑀺 𑀅𑀓𑀼𑀧𑁆𑀧𑀸. 𑀅𑀦𑁆𑀢𑀺𑀫𑀸𑀢𑀺 𑀧𑀘𑁆𑀙𑀺𑀫𑀸. 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄𑀢𑀺 𑀇𑀤𑀸𑀦𑀺 𑀧𑀼𑀦 𑀅𑀜𑁆𑀜𑁄 𑀪𑀯𑁄 𑀦𑀸𑀫 𑀦𑀢𑁆𑀣𑀻𑀢𑀺.

𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀓𑀣𑀺𑀢𑀸𑀦𑀺. 𑀓𑀣𑀁? 𑀘𑀢𑀽𑀲𑀼 𑀳𑀺 𑀥𑀸𑀢𑀽𑀲𑀼 𑀅𑀲𑁆𑀲𑀸𑀤𑁄 𑀲𑀫𑀼𑀤𑀬𑀲𑀘𑁆𑀘𑀁, 𑀆𑀤𑀻𑀦𑀯𑁄 𑀤𑀼𑀓𑁆𑀔𑀲𑀘𑁆𑀘𑀁, 𑀦𑀺𑀲𑁆𑀲𑀭𑀡𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑁆𑀧𑀚𑀸𑀦𑀦𑁄 𑀫𑀕𑁆𑀕𑁄 𑀫𑀕𑁆𑀕𑀲𑀘𑁆𑀘𑀁. 𑀯𑀺𑀢𑁆𑀣𑀸𑀭𑀯𑀲𑁂𑀦𑀧𑀺 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀏𑀢𑁆𑀣 𑀳𑀺 𑀬𑀁 𑀧𑀣𑀯𑀻𑀥𑀸𑀢𑀼𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀧𑀣𑀯𑀻𑀥𑀸𑀢𑀼𑀬𑀸 𑀅𑀲𑁆𑀲𑀸𑀤𑁄𑀢𑀺 𑀧𑀳𑀸𑀦𑀧𑀝𑀺𑀯𑁂𑀥𑁄 𑀲𑀫𑀼𑀤𑀬𑀲𑀘𑁆𑀘𑀁. 𑀬𑀸 𑀧𑀣𑀯𑀻𑀥𑀸𑀢𑀼 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸, 𑀅𑀬𑀁 𑀧𑀣𑀯𑀻𑀥𑀸𑀢𑀼𑀬𑀸, 𑀆𑀤𑀻𑀦𑀯𑁄𑀢𑀺 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑁄 𑀤𑀼𑀓𑁆𑀔𑀲𑀘𑁆𑀘𑀁. 𑀬𑁄 𑀧𑀣𑀯𑀻𑀥𑀸𑀢𑀼𑀬𑀸 𑀙𑀦𑁆𑀤𑀭𑀸𑀕𑀯𑀺𑀦𑀬𑁄 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁, 𑀇𑀤𑀁 𑀧𑀣𑀯𑀻𑀥𑀸𑀢𑀼𑀬𑀸 𑀦𑀺𑀲𑁆𑀲𑀭𑀡𑀦𑁆𑀢𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀧𑀝𑀺𑀯𑁂𑀥𑁄 𑀦𑀺𑀭𑁄𑀥𑀲𑀘𑁆𑀘𑀁. 𑀬𑀸 𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀤𑀺𑀝𑁆𑀞𑀺 𑀲𑀗𑁆𑀓𑀧𑁆𑀧𑁄 𑀯𑀸𑀘𑀸 𑀓𑀫𑁆𑀫𑀦𑁆𑀢𑁄 𑀆𑀚𑀻𑀯𑁄 𑀯𑀸𑀬𑀸𑀫𑁄 𑀲𑀢𑀺 𑀲𑀫𑀸𑀥𑀺, 𑀅𑀬𑀁 𑀪𑀸𑀯𑀦𑀸𑀧𑀝𑀺𑀯𑁂𑀥𑁄 𑀫𑀕𑁆𑀕𑀲𑀘𑁆𑀘𑀦𑁆𑀢𑀺. 𑀤𑀼𑀢𑀺𑀬𑀁.

𑁩. 𑀅𑀘𑀭𑀺𑀁𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁬. 𑀢𑀢𑀺𑀬𑁂 𑀅𑀘𑀭𑀺𑀦𑁆𑀢𑀺 𑀜𑀸𑀡𑀘𑀸𑀭𑁂𑀦 𑀅𑀘𑀭𑀺𑀁, 𑀅𑀦𑀼𑀪𑀯𑀦𑀘𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀬𑀸𑀯𑀢𑀸𑀢𑀺 𑀬𑀢𑁆𑀢𑀓𑁄. 𑀢𑀢𑀺𑀬𑀁.

𑁪. 𑀦𑁄𑀘𑁂𑀤𑀁𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁭. 𑀘𑀢𑀼𑀢𑁆𑀣𑁂 𑀦𑀺𑀲𑁆𑀲𑀝𑀸𑀢𑀺𑀆𑀤𑀻𑀦𑀺 𑀆𑀤𑀺𑀢𑁄 𑀯𑀼𑀢𑁆𑀢𑀧𑀝𑀺𑀲𑁂𑀥𑁂𑀦 𑀬𑁄𑀚𑁂𑀢𑁆𑀯𑀸 ‘‘𑀦 𑀦𑀺𑀲𑁆𑀲𑀝𑀸, 𑀦 𑀯𑀺𑀲𑀁𑀬𑀼𑀢𑁆𑀢𑀸, 𑀦 𑀯𑀺𑀧𑁆𑀧𑀫𑀼𑀢𑁆𑀢𑀸, 𑀦 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸 𑀯𑀺𑀳𑀭𑀺𑀁𑀲𑀽’’𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀤𑀼𑀢𑀺𑀬𑀦𑀬𑁂 𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦𑀸𑀢𑀺 𑀦𑀺𑀫𑁆𑀫𑀭𑀺𑀬𑀸𑀤𑀺𑀓𑀢𑁂𑀦. 𑀢𑀢𑁆𑀣 𑀤𑀼𑀯𑀺𑀥𑀸 𑀫𑀭𑀺𑀬𑀸𑀤𑀸 𑀓𑀺𑀮𑁂𑀲𑀫𑀭𑀺𑀬𑀸𑀤𑀸 𑀯𑀝𑁆𑀝𑀫𑀭𑀺𑀬𑀸𑀤𑀸𑀢𑀺. 𑀢𑀢𑁆𑀣 𑀘 𑀬𑀲𑁆𑀲 𑀉𑀧𑀟𑁆𑀠𑀸 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀉𑀧𑀟𑁆𑀠𑀸 𑀅𑀧𑁆𑀧𑀳𑀻𑀦𑀸, 𑀯𑀝𑁆𑀝𑀁 𑀯𑀸 𑀧𑀦 𑀉𑀧𑀟𑁆𑀠𑀁 𑀧𑀳𑀻𑀦𑀁, 𑀉𑀧𑀟𑁆𑀠𑀁 𑀅𑀧𑁆𑀧𑀳𑀻𑀦𑀁, 𑀢𑀲𑁆𑀲 𑀘𑀺𑀢𑁆𑀢𑀁 𑀧𑀳𑀻𑀦𑀓𑀺𑀮𑁂𑀲𑁂 𑀯𑀸 𑀯𑀝𑁆𑀝𑀁 𑀯𑀸 𑀲𑀦𑁆𑀥𑀸𑀬 𑀯𑀺𑀫𑀭𑀺𑀬𑀸𑀤𑀺𑀓𑀢𑀁, 𑀅𑀧𑁆𑀧𑀳𑀻𑀦𑀓𑀺𑀮𑁂𑀲𑁂 𑀯𑀸 𑀯𑀝𑁆𑀝𑀁 𑀯𑀸 𑀲𑀦𑁆𑀥𑀸𑀬 𑀦 𑀯𑀺𑀫𑀭𑀺𑀬𑀸𑀤𑀺𑀓𑀢𑀁. 𑀇𑀥 𑀧𑀦 𑀉𑀪𑀬𑀲𑁆𑀲𑀸𑀧𑀺 𑀧𑀳𑀻𑀦𑀢𑁆𑀢𑀸 ‘‘𑀯𑀺𑀫𑀭𑀺𑀬𑀸𑀤𑀺𑀓𑀢𑁂𑀦 𑀘𑁂𑀢𑀲𑀸’’𑀢𑀺 𑀯𑀼𑀢𑁆𑀢𑀁, 𑀫𑀭𑀺𑀬𑀸𑀤𑀁 𑀅𑀓𑀢𑁆𑀯𑀸 𑀞𑀺𑀢𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀭𑀺𑀬𑀸𑀤𑁂𑀦 𑀘𑁂𑀢𑀲𑀸𑀢𑀺 𑀅𑀢𑁆𑀣𑁄. 𑀇𑀢𑀺 𑀢𑀻𑀲𑀼𑀧𑀺 𑀇𑀫𑁂𑀲𑀼 𑀲𑀼𑀢𑁆𑀢𑁂𑀲𑀼 𑀘𑀢𑀼𑀲𑀘𑁆𑀘𑀫𑁂𑀯 𑀓𑀣𑀺𑀢𑀁. 𑀘𑀢𑀼𑀢𑁆𑀣𑀁.

𑁫. 𑀏𑀓𑀦𑁆𑀢𑀤𑀼𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁮. 𑀧𑀜𑁆𑀘𑀫𑁂 𑀏𑀓𑀦𑁆𑀢𑀤𑀼𑀓𑁆𑀔𑀸𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀲𑁆𑀲 𑀢𑀢𑁆𑀢𑀓𑀸𑀭𑁄 𑀯𑀺𑀬 𑀏𑀓𑀦𑁆𑀢𑁂𑀦𑁂𑀯 𑀤𑀼𑀓𑁆𑀔𑀸. 𑀤𑀼𑀓𑁆𑀔𑀸𑀦𑀼𑀧𑀢𑀺𑀢𑀸𑀢𑀺 𑀤𑀼𑀓𑁆𑀔𑁂𑀦 𑀅𑀦𑀼𑀧𑀢𑀺𑀢𑀸. 𑀤𑀼𑀓𑁆𑀔𑀸𑀯𑀓𑁆𑀓𑀦𑁆𑀢𑀸𑀢𑀺 𑀤𑀼𑀓𑁆𑀔𑁂𑀦 𑀑𑀓𑁆𑀓𑀦𑁆𑀢𑀸 𑀑𑀢𑀺𑀡𑁆𑀡𑀸. 𑀲𑀼𑀔𑀸𑀢𑀺 𑀲𑀼𑀔𑀯𑁂𑀤𑀦𑀸𑀬 𑀧𑀘𑁆𑀘𑀬𑀪𑀽𑀢𑀸. 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀤𑀼𑀓𑁆𑀔𑀮𑀓𑁆𑀔𑀡𑀁 𑀓𑀣𑀺𑀢𑀁. 𑀧𑀜𑁆𑀘𑀫𑀁.

𑁬-𑁧𑁦. 𑀅𑀪𑀺𑀦𑀦𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁯-𑁧𑁨𑁩. 𑀙𑀝𑁆𑀞𑀲𑀢𑁆𑀢𑀫𑁂𑀲𑀼 𑀯𑀺𑀯𑀝𑁆𑀝𑀁, 𑀅𑀯𑀲𑀸𑀦𑁂 𑀢𑀻𑀲𑀼 𑀘𑀢𑀼𑀲𑀘𑁆𑀘𑀫𑁂𑀯𑀸𑀢𑀺. 𑀙𑀝𑁆𑀞𑀸𑀤𑀻𑀦𑀺.

𑀘𑀢𑀼𑀢𑁆𑀣𑁄 𑀯𑀕𑁆𑀕𑁄.

𑀥𑀸𑀢𑀼𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀦𑀫𑀢𑀕𑁆𑀕𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧. 𑀢𑀺𑀡𑀓𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁪. 𑀅𑀦𑀫𑀢𑀕𑁆𑀕𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀅𑀦𑀫𑀢𑀕𑁆𑀕𑁄𑀢𑀺 𑀅𑀦𑀼 𑀅𑀫𑀢𑀕𑁆𑀕𑁄, 𑀯𑀲𑁆𑀲𑀲𑀢𑀁 𑀯𑀲𑁆𑀲𑀲𑀳𑀲𑁆𑀲𑀁 𑀜𑀸𑀡𑁂𑀦 𑀅𑀦𑀼𑀕𑀦𑁆𑀢𑁆𑀯𑀸𑀧𑀺 𑀅𑀫𑀢𑀕𑁆𑀕𑁄 𑀅𑀯𑀺𑀤𑀺𑀢𑀕𑁆𑀕𑁄, 𑀦𑀸𑀲𑁆𑀲 𑀲𑀓𑁆𑀓𑀸 𑀇𑀢𑁄 𑀯𑀸 𑀏𑀢𑁆𑀢𑁄 𑀯𑀸 𑀅𑀕𑁆𑀕𑀁 𑀚𑀸𑀦𑀺𑀢𑀼𑀁, 𑀅𑀧𑀭𑀺𑀘𑁆𑀙𑀺𑀦𑁆𑀦𑀧𑀼𑀩𑁆𑀩𑀸𑀧𑀭𑀓𑁄𑀝𑀺𑀓𑁄𑀢𑀺 𑀅𑀢𑁆𑀣𑁄. 𑀲𑀁𑀲𑀸𑀭𑁄𑀢𑀺 𑀔𑀦𑁆𑀥𑀸𑀤𑀻𑀦𑀁 𑀅𑀯𑀺𑀘𑁆𑀙𑀺𑀦𑁆𑀦𑀧𑁆𑀧𑀯𑀢𑁆𑀢𑀸 𑀧𑀝𑀺𑀧𑀸𑀝𑀺. 𑀧𑀼𑀩𑁆𑀩𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀧𑀼𑀭𑀺𑀫𑀫𑀭𑀺𑀬𑀸𑀤𑀸 𑀦 𑀤𑀺𑀲𑁆𑀲𑀢𑀺. 𑀬𑀤𑀕𑁆𑀕𑁂𑀦 𑀘𑀲𑁆𑀲 𑀧𑀼𑀭𑀺𑀫𑀸 𑀓𑁄𑀝𑀺 𑀦 𑀧𑀜𑁆𑀜𑀸𑀬𑀢𑀺, 𑀧𑀘𑁆𑀙𑀺𑀫𑀸𑀧𑀺 𑀢𑀤𑀕𑁆𑀕𑁂𑀦𑁂𑀯 𑀦 𑀧𑀜𑁆𑀜𑀸𑀬𑀢𑀺, 𑀯𑁂𑀫𑀚𑁆𑀛𑁂𑀬𑁂𑀯 𑀧𑀦 𑀲𑀢𑁆𑀢𑀸 𑀲𑀁𑀲𑀭𑀦𑁆𑀢𑀺. 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑁂𑀬𑁆𑀬𑀸𑀢𑀺 𑀇𑀤𑀁 𑀉𑀧𑀫𑀸𑀬 𑀔𑀼𑀤𑁆𑀤𑀓𑀢𑁆𑀢𑀸 𑀯𑀼𑀢𑁆𑀢𑀁. 𑀩𑀸𑀳𑀺𑀭𑀲𑀫𑀬𑀲𑁆𑀫𑀺𑀜𑁆𑀳𑀺 𑀅𑀢𑁆𑀣𑁄 𑀧𑀭𑀺𑀢𑁆𑀢𑁄 𑀳𑁄𑀢𑀺, 𑀉𑀧𑀫𑀸 𑀫𑀳𑀢𑀻. ‘‘𑀳𑀢𑁆𑀣𑀻 𑀯𑀺𑀬 𑀅𑀬𑀁 𑀕𑁄𑀡𑁄, 𑀕𑁄𑀡𑁄 𑀯𑀺𑀬 𑀲𑀽𑀓𑀭𑁄, 𑀲𑀫𑀼𑀤𑁆𑀤𑁄 𑀯𑀺𑀬 𑀢𑀴𑀸𑀓’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑁂 𑀦 𑀢𑁂𑀲𑀁 𑀢𑀸𑀤𑀺𑀲𑀁 𑀧𑀫𑀸𑀡𑀁 𑀳𑁄𑀢𑀺. 𑀩𑀼𑀤𑁆𑀥𑀲𑀫𑀬𑁂 𑀧𑀦 𑀉𑀧𑀫𑀸 𑀧𑀭𑀺𑀢𑁆𑀢𑀸, 𑀅𑀢𑁆𑀣𑁄 𑀫𑀳𑀸. 𑀧𑀸𑀴𑀺𑀬𑀜𑁆𑀳𑀺 𑀏𑀓𑁄 𑀚𑀫𑁆𑀩𑀼𑀤𑀻𑀧𑁄 𑀕𑀳𑀺𑀢𑁄, 𑀏𑀯𑀭𑀽𑀧𑀸𑀦𑀁 𑀧𑀦 𑀚𑀫𑁆𑀩𑀼𑀤𑀻𑀧𑀸𑀦𑀁 𑀲𑀢𑁂𑀧𑀺 𑀲𑀳𑀲𑁆𑀲𑁂𑀧𑀺 𑀲𑀢𑀲𑀳𑀲𑁆𑀲𑁂𑀧𑀺 𑀢𑀺𑀡𑀸𑀤𑀻𑀦𑀺 𑀢𑁂𑀦 𑀉𑀧𑀓𑁆𑀓𑀫𑁂𑀦 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑁂𑀬𑁆𑀬𑀼𑀁, 𑀦 𑀢𑁆𑀯𑁂𑀯 𑀧𑀼𑀭𑀺𑀲𑀲𑁆𑀲 𑀫𑀸𑀢𑀼 𑀫𑀸𑀢𑀭𑁄𑀢𑀺. 𑀤𑀼𑀓𑁆𑀔𑀁 𑀧𑀘𑁆𑀘𑀦𑀼𑀪𑀽𑀢𑀦𑁆𑀢𑀺 𑀢𑀼𑀫𑁆𑀳𑁂𑀳𑀺 𑀤𑀼𑀓𑁆𑀔𑀁 𑀅𑀦𑀼𑀪𑀽𑀢𑀁. 𑀢𑀺𑀩𑁆𑀩𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀩𑁆𑀬𑀲𑀦𑀦𑁆𑀢𑀺 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀅𑀦𑁂𑀓𑀯𑀺𑀥𑀁. 𑀓𑀝𑀲𑀻𑀢𑀺 𑀲𑀼𑀲𑀸𑀦𑀁, 𑀧𑀣𑀯𑀻𑀬𑁂𑀯 𑀯𑀸. 𑀲𑀸 𑀳𑀺 𑀧𑀼𑀦𑀧𑁆𑀧𑀼𑀦𑀁 𑀫𑀭𑀦𑁆𑀢𑁂𑀳𑀺 𑀲𑀭𑀻𑀭𑀦𑀺𑀓𑁆𑀔𑁂𑀧𑁂𑀦 𑀯𑀟𑁆𑀠𑀺𑀢𑀸. 𑀅𑀮𑀫𑁂𑀯𑀸𑀢𑀺 𑀬𑀼𑀢𑁆𑀢𑀫𑁂𑀯. 𑀧𑀞𑀫𑀁.

𑁨. 𑀧𑀣𑀯𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁫. 𑀤𑀼𑀢𑀺𑀬𑁂 𑀫𑀳𑀸𑀧𑀣𑀯𑀺𑀦𑁆𑀢𑀺 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀁 𑀫𑀳𑀸𑀧𑀣𑀯𑀺𑀁. 𑀦𑀺𑀓𑁆𑀔𑀺𑀧𑁂𑀬𑁆𑀬𑀸𑀢𑀺 𑀢𑀁 𑀧𑀣𑀯𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢𑀧𑁆𑀧𑀫𑀸𑀡𑀁 𑀕𑀼𑀴𑀺𑀓𑀁 𑀓𑀭𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀧𑁂𑀬𑁆𑀬. 𑀤𑀼𑀢𑀺𑀬𑀁.

𑁩. 𑀅𑀲𑁆𑀲𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁬. 𑀢𑀢𑀺𑀬𑁂 𑀓𑀦𑁆𑀤𑀦𑁆𑀢𑀸𑀦𑀦𑁆𑀢𑀺 𑀲𑀲𑀤𑁆𑀤𑀁 𑀭𑀼𑀤𑀫𑀸𑀦𑀸𑀦𑀁. 𑀧𑀲𑁆𑀲𑀦𑁆𑀦𑀦𑁆𑀢𑀺 𑀲𑀦𑁆𑀤𑀺𑀢𑀁 𑀧𑀯𑀢𑁆𑀢𑀁. 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀽𑀢𑀺 𑀲𑀺𑀦𑁂𑀭𑀼𑀭𑀲𑁆𑀫𑀻𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑁂𑀲𑀼 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼. 𑀲𑀺𑀦𑁂𑀭𑀼𑀲𑁆𑀲 𑀳𑀺 𑀧𑀸𑀘𑀻𑀦𑀧𑀲𑁆𑀲𑀁 𑀭𑀚𑀢𑀫𑀬𑀁, 𑀤𑀓𑁆𑀔𑀺𑀡𑀧𑀲𑁆𑀲𑀁 𑀫𑀡𑀺𑀫𑀬𑀁, 𑀧𑀘𑁆𑀙𑀺𑀫𑀧𑀲𑁆𑀲𑀁 𑀨𑀮𑀺𑀓𑀫𑀬𑀁, 𑀉𑀢𑁆𑀢𑀭𑀧𑀲𑁆𑀲𑀁 𑀲𑀼𑀯𑀡𑁆𑀡𑀫𑀬𑀁. 𑀧𑀼𑀩𑁆𑀩𑀤𑀓𑁆𑀔𑀺𑀡𑀧𑀲𑁆𑀲𑁂𑀳𑀺 𑀦𑀺𑀓𑁆𑀔𑀦𑁆𑀢𑀸 𑀭𑀚𑀢𑀫𑀡𑀺𑀭𑀲𑁆𑀫𑀺𑀬𑁄 𑀏𑀓𑀢𑁄 𑀳𑀼𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀧𑀺𑀝𑁆𑀞𑁂𑀦 𑀕𑀦𑁆𑀢𑁆𑀯𑀸 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀆𑀳𑀘𑁆𑀘 𑀢𑀺𑀝𑁆𑀞𑀦𑁆𑀢𑀺, 𑀤𑀓𑁆𑀔𑀺𑀡𑀧𑀘𑁆𑀙𑀺𑀫𑀧𑀲𑁆𑀲𑁂𑀳𑀺 𑀦𑀺𑀓𑁆𑀔𑀦𑁆𑀢𑀸 𑀫𑀡𑀺𑀨𑀮𑀺𑀓𑀭𑀲𑁆𑀫𑀺𑀬𑁄, 𑀧𑀘𑁆𑀙𑀺𑀫𑀼𑀢𑁆𑀢𑀭𑀧𑀲𑁆𑀲𑁂𑀳𑀺 𑀦𑀺𑀓𑁆𑀔𑀦𑁆𑀢𑀸 𑀨𑀮𑀺𑀓𑀲𑀼𑀯𑀡𑁆𑀡𑀭𑀲𑁆𑀫𑀺𑀬𑁄, 𑀉𑀢𑁆𑀢𑀭𑀧𑀸𑀘𑀻𑀦𑀧𑀲𑁆𑀲𑁂𑀳𑀺 𑀦𑀺𑀓𑁆𑀔𑀦𑁆𑀢𑀸 𑀲𑀼𑀯𑀡𑁆𑀡𑀭𑀚𑀢𑀭𑀲𑁆𑀫𑀺𑀬𑁄 𑀏𑀓𑀢𑁄 𑀳𑀼𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀧𑀺𑀝𑁆𑀞𑁂𑀦 𑀕𑀦𑁆𑀢𑁆𑀯𑀸 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀆𑀳𑀘𑁆𑀘 𑀢𑀺𑀝𑁆𑀞𑀦𑁆𑀢𑀺. 𑀢𑀸𑀲𑀁 𑀭𑀲𑁆𑀫𑀻𑀦𑀁 𑀅𑀦𑁆𑀢𑀭𑁂𑀲𑀼 𑀘𑀢𑁆𑀢𑀸𑀭𑁄 𑀫𑀳𑀸𑀲𑀫𑀼𑀤𑁆𑀤𑀸 𑀳𑁄𑀦𑁆𑀢𑀺. 𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀽’’𑀢𑀺. 𑀜𑀸𑀢𑀺𑀩𑁆𑀬𑀲𑀦𑀦𑁆𑀢𑀺𑀆𑀤𑀻𑀲𑀼 𑀩𑁆𑀬𑀲𑀦𑀦𑁆𑀢𑀺 𑀯𑀺𑀅𑀲𑀦𑀁, 𑀯𑀺𑀦𑀸𑀲𑁄𑀢𑀺 𑀅𑀢𑁆𑀣𑁄. 𑀜𑀸𑀢𑀻𑀦𑀁 𑀩𑁆𑀬𑀲𑀦𑀁 𑀜𑀸𑀢𑀺𑀩𑁆𑀬𑀲𑀦𑀁, 𑀪𑁄𑀕𑀸𑀦𑀁 𑀩𑁆𑀬𑀲𑀦𑀁 𑀪𑁄𑀕𑀩𑁆𑀬𑀲𑀦𑀁. 𑀭𑁄𑀕𑁄 𑀧𑀦 𑀲𑀬𑀫𑁂𑀯 𑀆𑀭𑁄𑀕𑁆𑀬𑀁 𑀯𑀺𑀬𑀲𑀢𑀺 𑀯𑀺𑀦𑀸𑀲𑁂𑀢𑀻𑀢𑀺 𑀩𑁆𑀬𑀲𑀦𑀁, 𑀭𑁄𑀕𑁄𑀯 𑀩𑁆𑀬𑀲𑀦𑀁 𑀭𑁄𑀕𑀩𑁆𑀬𑀲𑀦𑀁. 𑀢𑀢𑀺𑀬𑀁.

𑁪. 𑀔𑀻𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁭. 𑀘𑀢𑀼𑀢𑁆𑀣𑁂 𑀫𑀸𑀢𑀼𑀣𑀜𑁆𑀜𑀦𑁆𑀢𑀺 𑀏𑀓𑀦𑀸𑀫𑀺𑀓𑀸𑀬 𑀫𑀦𑀼𑀲𑁆𑀲𑀫𑀸𑀢𑀼 𑀔𑀻𑀭𑀁. 𑀇𑀫𑁂𑀲𑀜𑁆𑀳𑀺 𑀲𑀢𑁆𑀢𑀸𑀦𑀁 𑀕𑀡𑁆𑀟𑀼𑀧𑁆𑀧𑀸𑀤𑀓𑀺𑀧𑀺𑀮𑁆𑀮𑀺𑀓𑀸𑀤𑀻𑀲𑀼 𑀯𑀸 𑀫𑀘𑁆𑀙𑀓𑀘𑁆𑀙𑀧𑀸𑀤𑀻𑀲𑀼 𑀯𑀸 𑀧𑀓𑁆𑀔𑀺𑀚𑀸𑀢𑁂𑀲𑀼 𑀯𑀸 𑀦𑀺𑀩𑁆𑀩𑀢𑁆𑀢𑀓𑀸𑀮𑁂 𑀫𑀸𑀢𑀼𑀔𑀻𑀭𑀫𑁂𑀯 𑀦𑀢𑁆𑀣𑀺, 𑀅𑀚𑀧𑀲𑀼𑀫𑀳𑀺𑀁𑀲𑀸𑀤𑀻𑀲𑀼 𑀦𑀺𑀩𑁆𑀩𑀢𑁆𑀢𑀓𑀸𑀮𑁂 𑀔𑀻𑀭𑀁 𑀅𑀢𑁆𑀣𑀺, 𑀢𑀣𑀸 𑀫𑀦𑀼𑀲𑁆𑀲𑁂𑀲𑀼. 𑀢𑀢𑁆𑀣 𑀅𑀚𑀸𑀤𑀺𑀓𑀸𑀮𑁂 𑀘 𑀫𑀦𑀼𑀲𑁆𑀲𑁂𑀲𑀼 𑀘𑀸𑀧𑀺 ‘‘𑀤𑁂𑀯𑀻 𑀲𑀼𑀫𑀦𑀸 𑀢𑀺𑀲𑁆𑀲𑀸’’𑀢𑀺 𑀏𑀯𑀁 𑀦𑀸𑀦𑀸𑀦𑀸𑀫𑀺𑀓𑀸𑀦𑀁 𑀓𑀼𑀘𑁆𑀙𑀺𑀬𑀁 𑀦𑀺𑀩𑁆𑀩𑀢𑁆𑀢𑀓𑀸𑀮𑁂 𑀅𑀕𑁆𑀕𑀳𑁂𑀢𑁆𑀯𑀸 𑀢𑀺𑀲𑁆𑀲𑀸𑀢𑀺 𑀏𑀓𑀦𑀸𑀫𑀺𑀓𑀸𑀬 𑀏𑀯 𑀫𑀸𑀢𑀼 𑀓𑀼𑀘𑁆𑀙𑀺𑀬𑀁 𑀦𑀺𑀩𑁆𑀩𑀢𑁆𑀢𑀓𑀸𑀮𑁂 𑀧𑀻𑀢𑀁 𑀣𑀜𑁆𑀜𑀁 𑀘𑀢𑀽𑀲𑀼 𑀫𑀳𑀸𑀲𑀫𑀼𑀤𑁆𑀤𑁂𑀲𑀼 𑀉𑀤𑀓𑀢𑁄 𑀩𑀳𑀼𑀢𑀭𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀘𑀢𑀼𑀢𑁆𑀣𑀁.

𑁫. 𑀧𑀩𑁆𑀩𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁮. 𑀧𑀜𑁆𑀘𑀫𑁂 𑀲𑀓𑁆𑀓𑀸 𑀧𑀦, 𑀪𑀦𑁆𑀢𑁂𑀢𑀺 𑀲𑁄 𑀓𑀺𑀭 𑀪𑀺𑀓𑁆𑀔𑀼 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀢𑁆𑀣𑀸 𑀅𑀦𑀫𑀢𑀕𑁆𑀕𑀲𑁆𑀲 𑀲𑀁𑀲𑀸𑀭𑀲𑁆𑀲 𑀤𑀻𑀖𑀢𑀫𑀢𑁆𑀢𑀸 ‘𑀦 𑀲𑀼𑀓𑀭𑀁 𑀦 𑀲𑀼𑀓𑀭’𑀦𑁆𑀢𑀺 𑀓𑀣𑁂𑀢𑀺𑀬𑁂𑀯, 𑀓𑀣𑀁 𑀦𑀘𑁆𑀙𑀺𑀦𑁆𑀤𑀢𑀺, 𑀲𑀓𑁆𑀓𑀸 𑀦𑀼 𑀔𑁄 𑀉𑀧𑀫𑀁 𑀓𑀸𑀭𑀸𑀧𑁂𑀢𑀼’’𑀦𑁆𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀓𑀸𑀲𑀺𑀓𑁂𑀦𑀸𑀢𑀺 𑀢𑀬𑁄 𑀓𑀧𑁆𑀧𑀸𑀲𑀁𑀲𑀽 𑀏𑀓𑀢𑁄 𑀕𑀳𑁂𑀢𑁆𑀯𑀸 𑀓𑀦𑁆𑀢𑀺𑀢𑀲𑀼𑀢𑁆𑀢𑀫𑀬𑁂𑀦 𑀅𑀢𑀺𑀲𑀼𑀔𑀼𑀫𑀯𑀢𑁆𑀣𑁂𑀦. 𑀢𑁂𑀦 𑀧𑀦 𑀧𑀭𑀺𑀫𑀝𑁆𑀞𑁂 𑀓𑀺𑀢𑁆𑀢𑀓𑀁 𑀔𑀻𑀬𑁂𑀬𑁆𑀬𑀸𑀢𑀺. 𑀲𑀸𑀲𑀧𑀫𑀢𑁆𑀢𑀁. 𑀧𑀜𑁆𑀘𑀫𑀁.

𑁬. 𑀲𑀸𑀲𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁯. 𑀙𑀝𑁆𑀞𑁂 𑀆𑀬𑀲𑀁 𑀦𑀕𑀭𑀦𑁆𑀢𑀺 𑀆𑀬𑀲𑁂𑀦 𑀧𑀸𑀓𑀸𑀭𑁂𑀦 𑀧𑀭𑀺𑀓𑁆𑀔𑀺𑀢𑁆𑀢𑀁 𑀦𑀕𑀭𑀁, 𑀦 𑀧𑀦 𑀅𑀦𑁆𑀢𑁄 𑀆𑀬𑀲𑁂𑀳𑀺 𑀏𑀓𑀪𑀽𑀫𑀺𑀓𑀸𑀤𑀺𑀧𑀸𑀲𑀸𑀤𑁂𑀳𑀺 𑀆𑀓𑀺𑀡𑁆𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀙𑀝𑁆𑀞𑀁.

𑁭. 𑀲𑀸𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁦. 𑀲𑀢𑁆𑀢𑀫𑁂 𑀅𑀦𑀼𑀲𑁆𑀲𑀭𑁂𑀬𑁆𑀬𑀼𑀦𑁆𑀢𑀺 𑀏𑀓𑁂𑀦 𑀓𑀧𑁆𑀧𑀲𑀢𑀲𑀳𑀲𑁆𑀲𑁂 𑀅𑀦𑀼𑀲𑁆𑀲𑀭𑀺𑀢𑁂 𑀅𑀧𑀭𑁄 𑀢𑀲𑁆𑀲 𑀞𑀺𑀢𑀝𑁆𑀞𑀸𑀦𑀢𑁄 𑀅𑀜𑁆𑀜𑀁 𑀲𑀢𑀲𑀳𑀲𑁆𑀲𑀁, 𑀅𑀜𑁆𑀜𑁄𑀧𑀺 𑀅𑀜𑁆𑀜𑀦𑁆𑀢𑀺 𑀏𑀯𑀁 𑀘𑀢𑁆𑀢𑀸𑀭𑁄𑀧𑀺 𑀘𑀢𑁆𑀢𑀸𑀭𑀺𑀲𑀢𑀲𑀳𑀲𑁆𑀲𑀸𑀦𑀺 𑀅𑀦𑀼𑀲𑁆𑀲𑀭𑁂𑀬𑁆𑀬𑀼𑀁. 𑀲𑀢𑁆𑀢𑀫𑀁.

𑁮-𑁯. 𑀕𑀗𑁆𑀕𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁩𑁧-𑁧𑁩𑁨. 𑀅𑀝𑁆𑀞𑀫𑁂 𑀬𑀸 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀯𑀸𑀮𑀺𑀓𑀸𑀢𑀺 𑀬𑀸 𑀏𑀢𑀲𑁆𑀫𑀺𑀁 𑀆𑀬𑀸𑀫𑀢𑁄 𑀧𑀜𑁆𑀘𑀬𑁄𑀚𑀦𑀲𑀢𑀺𑀓𑁂 𑀅𑀦𑁆𑀢𑀭𑁂 𑀯𑀸𑀮𑀺𑀓𑀸. 𑀦𑀯𑀫𑁂 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺. 𑀅𑀝𑁆𑀞𑀫𑀦𑀯𑀫𑀸𑀦𑀺.

𑁧𑁦. 𑀧𑀼𑀕𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁩. 𑀤𑀲𑀫𑁂 𑀅𑀝𑁆𑀞𑀺𑀓𑀗𑁆𑀓𑀮𑁄𑀢𑀺𑀆𑀤𑀻𑀦𑀺 𑀢𑀻𑀡𑀺𑀧𑀺 𑀭𑀸𑀲𑀺𑀯𑁂𑀯𑀘𑀦𑀸𑀦𑁂𑀯. 𑀇𑀫𑁂𑀲𑀁 𑀧𑀦 𑀲𑀢𑁆𑀢𑀸𑀦𑀁 𑀲𑀅𑀝𑁆𑀞𑀺𑀓𑀸𑀮𑀢𑁄 𑀅𑀦𑀝𑁆𑀞𑀺𑀓𑀸𑀮𑁄𑀯 𑀩𑀳𑀼𑀢𑀭𑁄. 𑀕𑀡𑁆𑀟𑀼𑀧𑁆𑀧𑀸𑀤𑀓𑀸𑀤𑀺𑀧𑀸𑀡𑀪𑀽𑀢𑀸𑀦𑀜𑁆𑀳𑀺 𑀏𑀢𑁂𑀲𑀁 𑀅𑀝𑁆𑀞𑀺𑀫𑁂𑀯 𑀦𑀢𑁆𑀣𑀺, 𑀫𑀘𑁆𑀙𑀓𑀘𑁆𑀙𑀧𑀸𑀤𑀺𑀪𑀽𑀢𑀸𑀦𑀁 𑀧𑀦 𑀅𑀝𑁆𑀞𑀺𑀫𑁂𑀯 𑀩𑀳𑀼𑀢𑀭𑀁, 𑀢𑀲𑁆𑀫𑀸 𑀅𑀦𑀝𑁆𑀞𑀺𑀓𑀸𑀮𑀜𑁆𑀘 𑀩𑀳𑀼𑀅𑀝𑁆𑀞𑀺𑀓𑀸𑀮𑀜𑁆𑀘 𑀅𑀕𑁆𑀕𑀳𑁂𑀢𑁆𑀯𑀸 𑀲𑀫𑀝𑁆𑀞𑀺𑀓𑀸𑀮𑁄𑀯 𑀕𑀳𑁂𑀢𑀩𑁆𑀩𑁄. 𑀉𑀢𑁆𑀢𑀭𑁄 𑀕𑀺𑀚𑁆𑀛𑀓𑀽𑀝𑀲𑁆𑀲𑀸𑀢𑀺 𑀕𑀺𑀚𑁆𑀛𑀓𑀽𑀝𑀲𑁆𑀲 𑀉𑀢𑁆𑀢𑀭𑀧𑀲𑁆𑀲𑁂 𑀞𑀺𑀢𑁄. 𑀫𑀕𑀥𑀸𑀦𑀁 𑀕𑀺𑀭𑀺𑀩𑁆𑀩𑀚𑁂𑀢𑀺 𑀫𑀕𑀥𑀭𑀝𑁆𑀞𑀲𑁆𑀲 𑀕𑀺𑀭𑀺𑀩𑁆𑀩𑀚𑁂, 𑀕𑀺𑀭𑀺𑀧𑀭𑀺𑀓𑁆𑀔𑁂𑀧𑁂 𑀞𑀺𑀢𑁄𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀤𑀲𑀫𑀁.

𑀧𑀞𑀫𑁄 𑀯𑀕𑁆𑀕𑁄.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧. 𑀤𑀼𑀕𑁆𑀕𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁪. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀤𑀼𑀕𑁆𑀕𑀢𑀦𑁆𑀢𑀺 𑀤𑀮𑀺𑀤𑁆𑀤𑀁 𑀓𑀧𑀡𑀁. 𑀤𑀼𑀭𑀽𑀧𑁂𑀢𑀦𑁆𑀢𑀺 𑀤𑀼𑀲𑁆𑀲𑀡𑁆𑀞𑀸𑀦𑁂𑀳𑀺 𑀳𑀢𑁆𑀣𑀧𑀸𑀤𑁂𑀳𑀺 𑀉𑀧𑁂𑀢𑀁. 𑀧𑀞𑀫𑀁.

𑁨. 𑀲𑀼𑀔𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁫. 𑀤𑀼𑀢𑀺𑀬𑁂 𑀲𑀼𑀔𑀺𑀢𑀦𑁆𑀢𑀺 𑀲𑀼𑀔𑀲𑀫𑀧𑁆𑀧𑀺𑀢𑀁 𑀫𑀳𑀤𑁆𑀥𑀦𑀁 𑀫𑀳𑀸𑀪𑁄𑀕𑀁. 𑀲𑀼𑀲𑀚𑁆𑀚𑀺𑀢𑀦𑁆𑀢𑀺 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀳𑀢𑁆𑀣𑀺𑀓𑁆𑀔𑀦𑁆𑀥𑀕𑀢𑀁 𑀫𑀳𑀸𑀧𑀭𑀺𑀯𑀸𑀭𑀁. 𑀤𑀼𑀢𑀺𑀬𑀁.

𑁩. 𑀢𑀺𑀁𑀲𑀫𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁬. 𑀢𑀢𑀺𑀬𑁂 𑀧𑀸𑀯𑁂𑀬𑁆𑀬𑀓𑀸𑀢𑀺 𑀧𑀸𑀯𑁂𑀬𑁆𑀬𑀤𑁂𑀲𑀯𑀸𑀲𑀺𑀦𑁄. 𑀲𑀩𑁆𑀩𑁂 𑀆𑀭𑀜𑁆𑀜𑀺𑀓𑀸𑀢𑀺𑀆𑀤𑀻𑀲𑀼 𑀥𑀼𑀢𑀗𑁆𑀕𑀲𑀫𑀸𑀤𑀸𑀦𑀯𑀲𑁂𑀦 𑀢𑁂𑀲𑀁 𑀆𑀭𑀜𑁆𑀜𑀺𑀓𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑁂 𑀲𑀲𑀁𑀬𑁄𑀚𑀦𑀸𑀢𑀺 𑀲𑀩𑁆𑀩𑁂 𑀲𑀩𑀦𑁆𑀥𑀦𑀸, 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀦𑀸𑀕𑀸𑀫𑀺𑀦𑁄. 𑀢𑁂𑀲𑀼 𑀳𑀺 𑀧𑀼𑀣𑀼𑀚𑁆𑀚𑀦𑁄 𑀯𑀸 𑀔𑀻𑀡𑀸𑀲𑀯𑁄 𑀯𑀸 𑀦𑀢𑁆𑀣𑀺. 𑀕𑀼𑀦𑁆𑀦𑀦𑁆𑀢𑀺𑀆𑀤𑀻𑀲𑀼 𑀲𑁂𑀢𑀓𑀸𑀴𑀸𑀤𑀺𑀯𑀡𑁆𑀡𑁂𑀲𑀼 𑀏𑀓𑁂𑀓𑀯𑀡𑁆𑀡𑀓𑀸𑀮𑁄𑀯 𑀕𑀳𑁂𑀢𑀩𑁆𑀩𑁄. 𑀧𑀸𑀭𑀺𑀧𑀦𑁆𑀣𑀓𑀸𑀢𑀺 𑀧𑀭𑀺𑀧𑀦𑁆𑀣𑁂 𑀢𑀺𑀝𑁆𑀞𑀦𑀓𑀸 𑀧𑀦𑁆𑀣𑀖𑀸𑀢𑀘𑁄𑀭𑀸. 𑀧𑀸𑀭𑀤𑀸𑀭𑀺𑀓𑀸𑀢𑀺 𑀧𑀭𑀤𑀸𑀭𑀘𑀸𑀭𑀺𑀢𑁆𑀢𑀁 𑀆𑀧𑀚𑁆𑀚𑀦𑀓𑀸. 𑀢𑀢𑀺𑀬𑀁.

𑁪-𑁯. 𑀫𑀸𑀢𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁩𑁭-𑁧𑁪𑁨. 𑀘𑀢𑀼𑀢𑁆𑀣𑀸𑀤𑀻𑀲𑀼 𑀮𑀺𑀗𑁆𑀕𑀦𑀺𑀬𑀫𑁂𑀦 𑀘𑁂𑀯 𑀘𑀓𑁆𑀓𑀯𑀸𑀴𑀦𑀺𑀬𑀫𑁂𑀦 𑀘 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀭𑀺𑀲𑀸𑀦𑀜𑁆𑀳𑀺 𑀫𑀸𑀢𑀼𑀕𑀸𑀫𑀓𑀸𑀮𑁄, 𑀫𑀸𑀢𑀼𑀕𑀸𑀫𑀸𑀦𑀜𑁆𑀘 𑀧𑀼𑀭𑀺𑀲𑀓𑀸𑀮𑁄𑀢𑀺 𑀏𑀯𑀫𑁂𑀢𑁆𑀣 𑀮𑀺𑀗𑁆𑀕𑀦𑀺𑀬𑀫𑁄. 𑀇𑀫𑀫𑁆𑀳𑀸 𑀘𑀓𑁆𑀓𑀯𑀸𑀴𑀸 𑀲𑀢𑁆𑀢𑀸 𑀧𑀭𑀘𑀓𑁆𑀓𑀯𑀸𑀴𑀁, 𑀧𑀭𑀘𑀓𑁆𑀓𑀯𑀸𑀴𑀸 𑀘 𑀇𑀫𑀁 𑀘𑀓𑁆𑀓𑀯𑀸𑀴𑀁 𑀲𑀁𑀲𑀭𑀦𑁆𑀢𑀺. 𑀢𑁂𑀲𑀼 𑀇𑀫𑀲𑁆𑀫𑀺𑀁 𑀘𑀓𑁆𑀓𑀯𑀸𑀴𑁂 𑀫𑀸𑀢𑀼𑀕𑀸𑀫𑀓𑀸𑀮𑁂 𑀫𑀸𑀢𑀼𑀪𑀽𑀢𑀜𑁆𑀜𑁂𑀯 𑀤𑀲𑁆𑀲𑁂𑀦𑁆𑀢𑁄 𑀬𑁄 𑀦𑀫𑀸𑀢𑀸𑀪𑀽𑀢𑀧𑀼𑀩𑁆𑀩𑁄𑀢𑀺 𑀆𑀳. 𑀬𑁄 𑀦𑀧𑀺𑀢𑀸𑀪𑀽𑀢𑀧𑀼𑀩𑁆𑀩𑁄𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀘𑀢𑀼𑀢𑁆𑀣𑀸𑀤𑀻𑀦𑀺.

𑁧𑁦. 𑀯𑁂𑀧𑀼𑀮𑁆𑀮𑀧𑀩𑁆𑀩𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁩. 𑀤𑀲𑀫𑁂 𑀪𑀽𑀢𑀧𑀼𑀩𑁆𑀩𑀦𑁆𑀢𑀺 𑀅𑀢𑀻𑀢𑀓𑀸𑀮𑁂 𑀏𑀓𑀁 𑀅𑀧𑀤𑀸𑀦𑀁 𑀆𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀲𑀫𑀜𑁆𑀜𑀸 𑀉𑀤𑀧𑀸𑀤𑀻𑀢𑀺 𑀧𑀜𑁆𑀜𑀢𑁆𑀢𑀺 𑀅𑀳𑁄𑀲𑀺. 𑀘𑀢𑀽𑀳𑁂𑀦 𑀆𑀭𑁄𑀳𑀦𑁆𑀢𑀻𑀢𑀺 𑀇𑀤𑀁 𑀣𑀸𑀫𑀫𑀚𑁆𑀛𑀺𑀫𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀕𑁆𑀕𑀦𑁆𑀢𑀺 𑀉𑀢𑁆𑀢𑀫𑀁. 𑀪𑀤𑁆𑀤𑀬𑀼𑀕𑀦𑁆𑀢𑀺 𑀲𑀼𑀦𑁆𑀤𑀭𑀬𑀼𑀕𑀮𑀁. 𑀢𑀻𑀳𑁂𑀦 𑀆𑀭𑁄𑀳𑀦𑁆𑀢𑀻𑀢𑀺 𑀏𑀢𑁆𑀢𑀸𑀯𑀢𑀸 𑀓𑀺𑀭 𑀤𑁆𑀯𑀺𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀅𑀦𑁆𑀢𑀭𑁂 𑀬𑁄𑀚𑀦𑀁 𑀧𑀣𑀯𑀻 𑀉𑀲𑁆𑀲𑀦𑁆𑀦𑀸, 𑀲𑁄 𑀧𑀩𑁆𑀩𑀢𑁄 𑀢𑀺𑀬𑁄𑀚𑀦𑀼𑀩𑁆𑀩𑁂𑀥𑁄 𑀚𑀸𑀢𑁄.

𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄𑀢𑀺 𑀯𑀲𑁆𑀲𑀲𑀢𑀢𑁄 𑀉𑀢𑁆𑀢𑀭𑀺𑀁 𑀅𑀧𑁆𑀧𑀁 𑀤𑀲 𑀯𑀸 𑀯𑀻𑀲𑀁 𑀯𑀸 𑀯𑀲𑁆𑀲𑀸𑀦𑀺. 𑀧𑀼𑀦 𑀯𑀲𑁆𑀲𑀲𑀢𑀫𑁂𑀯 𑀚𑀻𑀯𑀦𑀓𑁄 𑀦𑀸𑀫 𑀦𑀢𑁆𑀣𑀺, 𑀉𑀢𑁆𑀢𑀫𑀓𑁄𑀝𑀺𑀬𑀸 𑀧𑀦 𑀲𑀝𑁆𑀞𑀺 𑀯𑀸 𑀅𑀲𑀻𑀢𑀺 𑀯𑀸 𑀯𑀲𑁆𑀲𑀸𑀦𑀺 𑀚𑀻𑀯𑀦𑁆𑀢𑀺. 𑀯𑀲𑁆𑀲𑀲𑀢𑀁 𑀧𑀦 𑀅𑀧𑁆𑀧𑀢𑁆𑀯𑀸 𑀧𑀜𑁆𑀘𑀯𑀲𑁆𑀲𑀤𑀲𑀯𑀲𑁆𑀲𑀸𑀤𑀺𑀓𑀸𑀮𑁂 𑀫𑀻𑀬𑀫𑀸𑀦𑀸𑀯 𑀩𑀳𑀼𑀓𑀸. 𑀏𑀢𑁆𑀣 𑀘 𑀓𑀓𑀼𑀲𑀦𑁆𑀥𑁄 𑀪𑀕𑀯𑀸 𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀓𑀸𑀮𑁂, 𑀓𑁄𑀡𑀸𑀕𑀫𑀦𑁄 𑀢𑀺𑀁𑀲𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀓𑀸𑀮𑁂 𑀦𑀺𑀩𑁆𑀩𑀢𑁆𑀢𑁄𑀢𑀺 𑀇𑀤𑀁 𑀅𑀦𑀼𑀧𑀼𑀩𑁆𑀩𑁂𑀦 𑀧𑀭𑀺𑀳𑀻𑀦𑀲𑀤𑀺𑀲𑀁 𑀓𑀢𑀁, 𑀦 𑀧𑀦 𑀏𑀯𑀁 𑀧𑀭𑀺𑀳𑀻𑀦𑀁, 𑀯𑀟𑁆𑀠𑀺𑀢𑁆𑀯𑀸 𑀯𑀟𑁆𑀠𑀺𑀢𑁆𑀯𑀸 𑀧𑀭𑀺𑀳𑀻𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀣𑀁? 𑀓𑀓𑀼𑀲𑀦𑁆𑀥𑁄 𑀢𑀸𑀯 𑀪𑀕𑀯𑀸 𑀇𑀫𑀲𑁆𑀫𑀺𑀁𑀬𑁂𑀯 𑀓𑀧𑁆𑀧𑁂 𑀘𑀢𑁆𑀢𑀸𑀮𑀻𑀲𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀓𑀸𑀮𑁂 𑀦𑀺𑀩𑁆𑀩𑀢𑁆𑀢𑁄 𑀆𑀬𑀼𑀧𑁆𑀧𑀫𑀸𑀡𑀁 𑀧𑀜𑁆𑀘 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀘𑀢𑁆𑀢𑀸𑀭𑁄 𑀞𑀢𑁆𑀯𑀸 𑀧𑀜𑁆𑀘𑀫𑁂 𑀯𑀺𑀚𑁆𑀚𑀫𑀸𑀦𑁂𑀬𑁂𑀯 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀢𑀁 𑀆𑀬𑀼 𑀧𑀭𑀺𑀳𑀸𑀬𑀫𑀸𑀦𑀁 𑀤𑀲𑀯𑀲𑁆𑀲𑀓𑀸𑀮𑀁 𑀧𑀢𑁆𑀯𑀸 𑀧𑀼𑀦 𑀯𑀟𑁆𑀠𑀫𑀸𑀦𑀁 𑀅𑀲𑀗𑁆𑀔𑁂𑀬𑁆𑀬𑀁 𑀳𑀼𑀢𑁆𑀯𑀸 𑀢𑀢𑁄 𑀧𑀭𑀺𑀳𑀸𑀬𑀫𑀸𑀦𑀁 𑀢𑀺𑀁𑀲𑀯𑀲𑁆𑀲𑀲𑀳𑀲𑁆𑀲𑀸𑀬𑀼𑀓𑀓𑀸𑀮𑁂 𑀞𑀺𑀢𑀁, 𑀢𑀤𑀸 𑀓𑁄𑀡𑀸𑀕𑀫𑀦𑁄 𑀦𑀺𑀩𑁆𑀩𑀢𑁆𑀢𑁄. 𑀢𑀲𑁆𑀫𑀺𑀫𑁆𑀧𑀺 𑀢𑀣𑁂𑀯 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀁 𑀆𑀬𑀼 𑀤𑀲𑀯𑀲𑁆𑀲𑀓𑀸𑀮𑀁 𑀧𑀢𑁆𑀯𑀸 𑀧𑀼𑀦 𑀯𑀟𑁆𑀠𑀫𑀸𑀦𑀁 𑀅𑀲𑀗𑁆𑀔𑁂𑀬𑁆𑀬𑀁 𑀳𑀼𑀢𑁆𑀯𑀸 𑀧𑀭𑀺𑀳𑀸𑀬𑀺𑀢𑁆𑀯𑀸 𑀯𑀻𑀲𑀯𑀲𑁆𑀲𑀲𑀳𑀲𑁆𑀲𑀓𑀸𑀮𑁂 𑀞𑀺𑀢𑀁, 𑀢𑀤𑀸 𑀓𑀲𑁆𑀲𑀧𑁄 𑀪𑀕𑀯𑀸 𑀦𑀺𑀩𑁆𑀩𑀢𑁆𑀢𑁄. 𑀢𑀲𑁆𑀫𑀺𑀫𑁆𑀧𑀺 𑀢𑀣𑁂𑀯 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑀁 𑀆𑀬𑀼 𑀤𑀲𑀯𑀲𑁆𑀲𑀓𑀸𑀮𑀁 𑀧𑀢𑁆𑀯𑀸 𑀧𑀼𑀦 𑀯𑀟𑁆𑀠𑀫𑀸𑀦𑀁 𑀅𑀲𑀗𑁆𑀔𑁂𑀬𑁆𑀬𑀁 𑀳𑀼𑀢𑁆𑀯𑀸 𑀧𑀭𑀺𑀳𑀸𑀬𑀺𑀢𑁆𑀯𑀸 𑀯𑀲𑁆𑀲𑀲𑀢𑀓𑀸𑀮𑀁 𑀧𑀢𑁆𑀢𑀁, 𑀅𑀣 𑀅𑀫𑁆𑀳𑀸𑀓𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀦𑀺𑀩𑁆𑀩𑀢𑁆𑀢𑁄. 𑀏𑀯𑀁 𑀅𑀦𑀼𑀧𑀼𑀩𑁆𑀩𑁂𑀦 𑀧𑀭𑀺𑀳𑀸𑀬𑀺𑀢𑁆𑀯𑀸 𑀯𑀟𑁆𑀠𑀺𑀢𑁆𑀯𑀸 𑀯𑀟𑁆𑀠𑀺𑀢𑁆𑀯𑀸 𑀧𑀭𑀺𑀳𑀻𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀘 𑀬𑀁 𑀆𑀬𑀼𑀧𑀭𑀺𑀫𑀸𑀡𑁂𑀲𑀼 𑀫𑀦𑁆𑀤𑁂𑀲𑀼 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀢𑀤𑁂𑀯 𑀆𑀬𑀼𑀧𑀭𑀺𑀫𑀸𑀡𑀁 𑀳𑁄𑀢𑀻𑀢𑀺. 𑀤𑀲𑀫𑀁.

𑀤𑀼𑀢𑀺𑀬𑁄 𑀯𑀕𑁆𑀕𑁄.

𑀅𑀦𑀫𑀢𑀕𑁆𑀕𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑀁

𑁧. 𑀲𑀦𑁆𑀢𑀼𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁪. 𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀲𑀦𑁆𑀢𑀼𑀝𑁆𑀞𑀸𑀬𑀦𑁆𑀢𑀺 𑀲𑀦𑁆𑀢𑀼𑀝𑁆𑀞𑁄 𑀅𑀬𑀁. 𑀇𑀢𑀭𑀻𑀢𑀭𑁂𑀦𑀸𑀢𑀺 𑀦 𑀣𑀽𑀮𑀲𑀼𑀔𑀼𑀫𑀮𑀽𑀔𑀧𑀡𑀻𑀢𑀣𑀺𑀭𑀚𑀺𑀡𑁆𑀡𑀸𑀦𑀁 𑀬𑁂𑀦 𑀓𑁂𑀦𑀘𑀺, 𑀅𑀣 𑀔𑁄 𑀬𑀣𑀸𑀮𑀤𑁆𑀥𑀸𑀤𑀻𑀦𑀁 𑀇𑀢𑀭𑀻𑀢𑀭𑁂𑀦 𑀬𑁂𑀦 𑀓𑁂𑀦𑀘𑀺 𑀲𑀦𑁆𑀢𑀼𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀘𑀻𑀯𑀭𑀲𑁆𑀫𑀺𑀜𑁆𑀳𑀺 𑀢𑀬𑁄 𑀲𑀦𑁆𑀢𑁄𑀲𑀸 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄 𑀬𑀣𑀸𑀩𑀮𑀲𑀦𑁆𑀢𑁄𑀲𑁄 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄𑀢𑀺. 𑀧𑀺𑀡𑁆𑀟𑀧𑀸𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑁂𑀲𑀁 𑀅𑀬𑀁 𑀧𑀪𑁂𑀤𑀲𑀁𑀯𑀡𑁆𑀡𑀦𑀸 𑁋 𑀇𑀥 𑀪𑀺𑀓𑁆𑀔𑀼 𑀘𑀻𑀯𑀭𑀁 𑀮𑀪𑀢𑀺 𑀲𑀼𑀦𑁆𑀤𑀭𑀁 𑀯𑀸 𑀅𑀲𑀼𑀦𑁆𑀤𑀭𑀁 𑀯𑀸, 𑀲𑁄 𑀢𑁂𑀦𑁂𑀯 𑀬𑀸𑀧𑁂𑀢𑀺, 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺. 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀅𑀣 𑀧𑀦 𑀧𑀓𑀢𑀺𑀤𑀼𑀩𑁆𑀩𑀮𑁄 𑀯𑀸 𑀳𑁄𑀢𑀺 𑀆𑀩𑀸𑀥𑀚𑀭𑀸𑀪𑀺𑀪𑀽𑀢𑁄 𑀯𑀸, 𑀕𑀭𑀼𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑁄 𑀓𑀺𑀮𑀫𑀢𑀺, 𑀲𑁄 𑀲𑀪𑀸𑀕𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀮𑀳𑀼𑀓𑁂𑀦 𑀬𑀸𑀧𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀧𑀡𑀻𑀢𑀧𑀘𑁆𑀘𑀬𑀮𑀸𑀪𑀻 𑀳𑁄𑀢𑀺, 𑀲𑁄 𑀧𑀝𑁆𑀝𑀘𑀻𑀯𑀭𑀸𑀤𑀻𑀦𑀁 𑀅𑀜𑁆𑀜𑀢𑀭𑀁 𑀫𑀳𑀕𑁆𑀖𑀘𑀻𑀯𑀭𑀁 𑀩𑀳𑀽𑀦𑀺 𑀯𑀸 𑀘𑀻𑀯𑀭𑀸𑀦𑀺 𑀮𑀪𑀺𑀢𑁆𑀯𑀸 𑁋 ‘‘𑀇𑀤𑀁 𑀣𑁂𑀭𑀸𑀦𑀁 𑀘𑀺𑀭𑀧𑀩𑁆𑀩𑀚𑀺𑀢𑀸𑀦𑀁, 𑀇𑀤𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀅𑀦𑀼𑀭𑀽𑀧𑀁, 𑀇𑀤𑀁 𑀕𑀺𑀮𑀸𑀦𑀸𑀦𑀁, 𑀇𑀤𑀁 𑀅𑀧𑁆𑀧𑀮𑀸𑀪𑀻𑀦𑀁 𑀳𑁄𑀢𑀽’’𑀢𑀺 𑀤𑀢𑁆𑀯𑀸 𑀢𑁂𑀲𑀁 𑀧𑀼𑀭𑀸𑀡𑀘𑀻𑀯𑀭𑀁 𑀯𑀸 𑀲𑀗𑁆𑀓𑀸𑀭𑀓𑀽𑀝𑀸𑀤𑀺𑀢𑁄 𑀯𑀸 𑀧𑀦 𑀦𑀦𑁆𑀢𑀓𑀸𑀦𑀺 𑀉𑀘𑁆𑀘𑀺𑀦𑀺𑀢𑁆𑀯𑀸 𑀢𑁂𑀳𑀺 𑀲𑀗𑁆𑀖𑀸𑀝𑀺𑀁 𑀓𑀢𑁆𑀯𑀸 𑀥𑀸𑀭𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀘𑀻𑀯𑀭𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀥 𑀧𑀦 𑀪𑀺𑀓𑁆𑀔𑀼 𑀧𑀺𑀡𑁆𑀟𑀧𑀸𑀢𑀁 𑀮𑀪𑀢𑀺 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸, 𑀲𑁄 𑀢𑁂𑀦𑁂𑀯 𑀬𑀸𑀧𑁂𑀢𑀺, 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺. 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀬𑀣𑀸𑀮𑀸𑀪 𑀲𑀦𑁆𑀢𑁄𑀲𑁄. 𑀬𑁄 𑀧𑀦 𑀅𑀢𑁆𑀢𑀦𑁄 𑀧𑀓𑀢𑀺𑀯𑀺𑀭𑀼𑀤𑁆𑀥𑀁 𑀯𑀸 𑀩𑁆𑀬𑀸𑀥𑀺𑀯𑀺𑀭𑀼𑀤𑁆𑀥𑀁 𑀯𑀸 𑀧𑀺𑀡𑁆𑀟𑀧𑀸𑀢𑀁 𑀮𑀪𑀢𑀺, 𑀬𑁂𑀦𑀲𑁆𑀲 𑀧𑀭𑀺𑀪𑀼𑀢𑁆𑀢𑁂𑀦 𑀅𑀨𑀸𑀲𑀼 𑀳𑁄𑀢𑀺, 𑀲𑁄 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀁 𑀤𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑁄 𑀲𑀧𑁆𑀧𑀸𑀬𑀪𑁄𑀚𑀦𑀁 𑀪𑀼𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀩𑀳𑀼𑀁 𑀧𑀡𑀻𑀢𑀁 𑀧𑀺𑀡𑁆𑀟𑀧𑀸𑀢𑀁 𑀮𑀪𑀢𑀺, 𑀲𑁄 𑀢𑀁 𑀘𑀻𑀯𑀭𑀁 𑀯𑀺𑀬 𑀘𑀺𑀭𑀧𑀩𑁆𑀩𑀚𑀺𑀢-𑀩𑀳𑀼𑀲𑁆𑀲𑀼𑀢-𑀅𑀧𑁆𑀧𑀮𑀸𑀪𑀕𑀺𑀮𑀸𑀦𑀸𑀦𑀁 𑀤𑀢𑁆𑀯𑀸, 𑀢𑁂𑀲𑀁 𑀯𑀸 𑀲𑁂𑀲𑀓𑀁 𑀧𑀺𑀡𑁆𑀟𑀸𑀬 𑀯𑀸 𑀘𑀭𑀺𑀢𑁆𑀯𑀸 𑀫𑀺𑀲𑁆𑀲𑀓𑀸𑀳𑀸𑀭𑀁 𑀪𑀼𑀜𑁆𑀚𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀧𑀺𑀡𑁆𑀟𑀧𑀸𑀢𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀥 𑀧𑀦 𑀪𑀺𑀓𑁆𑀔𑀼 𑀲𑁂𑀦𑀸𑀲𑀦𑀁 𑀮𑀪𑀢𑀺 𑀫𑀦𑀸𑀧𑀁 𑀯𑀸 𑀅𑀫𑀦𑀸𑀧𑀁 𑀯𑀸, 𑀲𑁄 𑀢𑁂𑀦 𑀦𑁂𑀯 𑀲𑁄𑀫𑀦𑀲𑁆𑀲𑀁 𑀦 𑀧𑀝𑀺𑀖𑀁 𑀉𑀧𑁆𑀧𑀸𑀤𑁂𑀢𑀺, 𑀅𑀦𑁆𑀢𑀫𑀲𑁄 𑀢𑀺𑀡𑀲𑀦𑁆𑀣𑀸𑀭𑀓𑁂𑀦𑀸𑀧𑀺 𑀬𑀣𑀸𑀮𑀤𑁆𑀥𑁂𑀦𑁂𑀯 𑀢𑀼𑀲𑁆𑀲𑀢𑀺. 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀬𑁄 𑀧𑀦 𑀅𑀢𑁆𑀢𑀦𑁄 𑀧𑀓𑀢𑀺𑀯𑀺𑀭𑀼𑀤𑁆𑀥𑀁 𑀯𑀸 𑀩𑁆𑀬𑀸𑀥𑀺𑀯𑀺𑀭𑀼𑀤𑁆𑀥𑀁 𑀯𑀸 𑀲𑁂𑀦𑀸𑀲𑀦𑀁 𑀮𑀪𑀢𑀺, 𑀬𑀢𑁆𑀣𑀲𑁆𑀲 𑀯𑀲𑀢𑁄 𑀅𑀨𑀸𑀲𑀼 𑀳𑁄𑀢𑀺, 𑀲𑁄 𑀢𑀁 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀓𑁂 𑀲𑀧𑁆𑀧𑀸𑀬𑀲𑁂𑀦𑀸𑀲𑀦𑁂 𑀯𑀲𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀫𑀳𑀸𑀧𑀼𑀜𑁆𑀜𑁄 𑀮𑁂𑀡𑀫𑀡𑁆𑀟𑀧𑀓𑀽𑀝𑀸𑀕𑀸𑀭𑀸𑀤𑀻𑀦𑀺 𑀩𑀳𑀽𑀦𑀺 𑀧𑀡𑀻𑀢𑀲𑁂𑀦𑀸𑀲𑀦𑀸𑀦𑀺 𑀮𑀪𑀢𑀺, 𑀲𑁄 𑀢𑀸𑀦𑀺 𑀘𑀻𑀯𑀭𑀸𑀤𑀻𑀦𑀺 𑀯𑀺𑀬 𑀘𑀺𑀭𑀧𑀩𑁆𑀩𑀚𑀺𑀢𑀩𑀳𑀼𑀲𑁆𑀲𑀼𑀢𑀅𑀧𑁆𑀧𑀮𑀸𑀪𑀕𑀺𑀮𑀸𑀦𑀸𑀦𑀁 𑀤𑀢𑁆𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀲𑁂𑀦𑀸𑀲𑀦𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄. 𑀬𑁄𑀧𑀺 ‘‘𑀉𑀢𑁆𑀢𑀫𑀲𑁂𑀦𑀸𑀲𑀦𑀁 𑀦𑀸𑀫 𑀧𑀫𑀸𑀤𑀝𑁆𑀞𑀸𑀦𑀁, 𑀢𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲 𑀣𑀺𑀦𑀫𑀺𑀤𑁆𑀥𑀁 𑀑𑀓𑁆𑀓𑀫𑀢𑀺, 𑀦𑀺𑀤𑁆𑀤𑀸𑀪𑀺𑀪𑀽𑀢𑀲𑁆𑀲 𑀧𑀝𑀺𑀩𑀼𑀚𑁆𑀛𑀢𑁄 𑀧𑀸𑀧𑀯𑀺𑀢𑀓𑁆𑀓𑀸 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀺𑀢𑁆𑀯𑀸 𑀢𑀸𑀤𑀺𑀲𑀁 𑀲𑁂𑀦𑀸𑀲𑀦𑀁 𑀧𑀢𑁆𑀢𑀫𑁆𑀧𑀺 𑀦 𑀲𑀫𑁆𑀧𑀝𑀺𑀘𑁆𑀙𑀢𑀺, 𑀲𑁄 𑀢𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀩𑁆𑀪𑁄𑀓𑀸𑀲𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼 𑀯𑀲𑀦𑁆𑀢𑁄 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑁆𑀧𑀺 𑀲𑁂𑀦𑀸𑀲𑀦𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄.

𑀇𑀥 𑀧𑀦 𑀪𑀺𑀓𑁆𑀔𑀼 𑀪𑁂𑀲𑀚𑁆𑀚𑀁 𑀮𑀪𑀢𑀺 𑀮𑀽𑀔𑀁 𑀯𑀸 𑀧𑀡𑀻𑀢𑀁 𑀯𑀸, 𑀲𑁄 𑀬𑀁 𑀮𑀪𑀢𑀺 𑀢𑁂𑀦𑁂𑀯 𑀢𑀼𑀲𑁆𑀲𑀢𑀺, 𑀅𑀜𑁆𑀜𑀁 𑀦 𑀧𑀢𑁆𑀣𑁂𑀢𑀺, 𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀺. 𑀅𑀬𑀫𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀬𑁄 𑀧𑀦 𑀢𑁂𑀮𑁂𑀦𑀢𑁆𑀣𑀺𑀓𑁄 𑀨𑀸𑀡𑀺𑀢𑀁 𑀮𑀪𑀢𑀺, 𑀲𑁄 𑀢𑀁 𑀲𑀪𑀸𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀢𑁆𑀯𑀸 𑀢𑀲𑁆𑀲 𑀳𑀢𑁆𑀣𑀢𑁄 𑀢𑁂𑀮𑀁 𑀕𑀳𑁂𑀢𑁆𑀯𑀸 𑀯𑀸 𑀅𑀜𑁆𑀜𑀤𑁂𑀯 𑀯𑀸 𑀧𑀭𑀺𑀬𑁂𑀲𑀺𑀢𑁆𑀯𑀸 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀩𑀮𑀲𑀦𑁆𑀢𑁄𑀲𑁄. 𑀅𑀧𑀭𑁄 𑀫𑀳𑀸𑀧𑀼𑀜𑁆𑀜𑁄 𑀩𑀳𑀼𑀁 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀺𑀧𑀡𑀻𑀢𑀪𑁂𑀲𑀚𑁆𑀚𑀁 𑀮𑀪𑀢𑀺, 𑀲𑁄 𑀢𑀁 𑀘𑀻𑀯𑀭𑀁 𑀯𑀺𑀬 𑀘𑀺𑀭𑀧𑀩𑁆𑀩𑀚𑀺𑀢-𑀩𑀳𑀼𑀲𑁆𑀲𑀼𑀢-𑀅𑀧𑁆𑀧𑀮𑀸𑀪𑀕𑀺𑀮𑀸𑀦𑀸𑀦𑀁 𑀤𑀢𑁆𑀯𑀸 𑀢𑁂𑀲𑀁 𑀆𑀪𑀢𑁂𑀦 𑀬𑁂𑀦 𑀓𑁂𑀦𑀘𑀺 𑀬𑀸𑀧𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀬𑁄 𑀧𑀦 𑀏𑀓𑀲𑁆𑀫𑀺𑀁 𑀪𑀸𑀚𑀦𑁂 𑀫𑀼𑀢𑁆𑀢𑀳𑀭𑀻𑀢𑀓𑀁 𑀞𑀧𑁂𑀢𑁆𑀯𑀸 𑀏𑀓𑀲𑁆𑀫𑀺𑀁 𑀘𑀢𑀼𑀫𑀥𑀼𑀭𑀁 ‘‘𑀕𑀡𑁆𑀳, 𑀪𑀦𑁆𑀢𑁂, 𑀬𑀤𑀺𑀘𑁆𑀙𑀲𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀲𑀘𑀲𑁆𑀲 𑀢𑁂𑀲𑀼 𑀅𑀜𑁆𑀜𑀢𑀭𑁂𑀦𑀧𑀺 𑀭𑁄𑀕𑁄 𑀯𑀽𑀧𑀲𑀫𑁆𑀫𑀢𑀺, 𑀅𑀣 ‘‘𑀫𑀼𑀢𑁆𑀢𑀳𑀭𑀻𑀢𑀓𑀁 𑀦𑀸𑀫 𑀩𑀼𑀤𑁆𑀥𑀸𑀤𑀻𑀳𑀺 𑀯𑀡𑁆𑀡𑀺𑀢’’𑀦𑁆𑀢𑀺 𑀘𑀢𑀼𑀫𑀥𑀼𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀼𑀢𑁆𑀢𑀳𑀭𑀻𑀢𑀓𑁂𑀦 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑁄 𑀧𑀭𑀫𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺. 𑀅𑀬𑀫𑀲𑁆𑀲 𑀕𑀺𑀮𑀸𑀦𑀧𑀘𑁆𑀘𑀬𑁂 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄. 𑀇𑀢𑀺 𑀇𑀫𑁂 𑀢𑀬𑁄 𑀲𑀦𑁆𑀢𑁄𑀲𑁂 𑀲𑀦𑁆𑀥𑀸𑀬 ‘‘𑀲𑀦𑁆𑀢𑀼𑀝𑁆𑀞𑀸𑀬𑀁, 𑀪𑀺𑀓𑁆𑀔𑀯𑁂, 𑀓𑀲𑁆𑀲𑀧𑁄 𑀇𑀢𑀭𑀻𑀢𑀭𑁂𑀦 𑀘𑀻𑀯𑀭𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀯𑀡𑁆𑀡𑀯𑀸𑀤𑀻𑀢𑀺 𑀏𑀓𑁄 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺, 𑀲𑀦𑁆𑀢𑁄𑀲𑀲𑁆𑀲 𑀯𑀡𑁆𑀡𑀁 𑀦 𑀓𑀣𑁂𑀢𑀺. 𑀏𑀓𑁄 𑀦 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺, 𑀲𑀦𑁆𑀢𑁄𑀲𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑀺. 𑀏𑀓𑁄 𑀦𑁂𑀯 𑀲𑀦𑁆𑀢𑀼𑀝𑁆𑀞𑁄 𑀳𑁄𑀢𑀺, 𑀦 𑀲𑀦𑁆𑀢𑁄𑀲𑀲𑁆𑀲 𑀯𑀡𑁆𑀡𑀁 𑀓𑀣𑁂𑀢𑀺. 𑀏𑀓𑁄 𑀲𑀦𑁆𑀢𑀼𑀝𑁆𑀞𑁄 𑀘 𑀳𑁄𑀢𑀺, 𑀲𑀦𑁆𑀢𑁄𑀲𑀲𑁆𑀲 𑀘 𑀯𑀡𑁆𑀡𑀁 𑀓𑀣𑁂𑀢𑀺. 𑀅𑀬𑀁 𑀢𑀸𑀤𑀺𑀲𑁄𑀢𑀺 𑀤𑀲𑁆𑀲𑁂𑀢𑀼𑀁 𑀇𑀢𑀭𑀻𑀢𑀭𑀘𑀻𑀯𑀭𑀲𑀦𑁆𑀢𑀼𑀝𑁆𑀞𑀺𑀬𑀸 𑀘 𑀯𑀡𑁆𑀡𑀯𑀸𑀤𑀻𑀢𑀺 𑀯𑀼𑀢𑁆𑀢𑀁. 𑀅𑀦𑁂𑀲𑀦𑀦𑁆𑀢𑀺 𑀤𑀽𑀢𑁂𑀬𑁆𑀬𑀧𑀳𑀺𑀡𑀕𑀫𑀦𑀸𑀦𑀼𑀬𑁄𑀕𑀧𑁆𑀧𑀪𑁂𑀤𑀁 𑀦𑀸𑀦𑀧𑁆𑀧𑀓𑀸𑀭𑀁 𑀅𑀦𑁂𑀲𑀦𑀁. 𑀅𑀮𑀤𑁆𑀥𑀸𑀢𑀺 𑀅𑀮𑀪𑀺𑀢𑁆𑀯𑀸. 𑀬𑀣𑀸 𑀘 𑀏𑀓𑀘𑁆𑀘𑁄 ‘‘𑀓𑀣𑀁 𑀦𑀼 𑀔𑁄 𑀘𑀻𑀯𑀭𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀜𑁆𑀜𑀯𑀦𑁆𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀓𑁄𑀳𑀜𑁆𑀜𑀁 𑀓𑀭𑁄𑀦𑁆𑀢𑁄 𑀉𑀢𑁆𑀢𑀲𑀢𑀺 𑀧𑀭𑀺𑀢𑀲𑁆𑀲𑀢𑀺, 𑀅𑀬𑀁 𑀏𑀯𑀁 𑀅𑀮𑀤𑁆𑀥𑀸 𑀘 𑀘𑀻𑀯𑀭𑀁 𑀦 𑀧𑀭𑀺𑀢𑀲𑁆𑀲𑀢𑀺. 𑀮𑀤𑁆𑀥𑀸 𑀘𑀸𑀢𑀺 𑀥𑀫𑁆𑀫𑁂𑀦 𑀲𑀫𑁂𑀦 𑀮𑀪𑀺𑀢𑁆𑀯𑀸. 𑀅𑀕𑀥𑀺𑀢𑁄𑀢𑀺 𑀯𑀺𑀕𑀢𑀮𑁄𑀪𑀕𑁂𑀥𑁄. 𑀅𑀫𑀼𑀘𑁆𑀙𑀺𑀢𑁄𑀢𑀺 𑀅𑀥𑀺𑀫𑀢𑁆𑀢𑀢𑀡𑁆𑀳𑀸𑀬 𑀫𑀼𑀘𑁆𑀙𑀁 𑀅𑀦𑀸𑀧𑀦𑁆𑀦𑁄. 𑀅𑀦𑀚𑁆𑀛𑀸𑀧𑀦𑁆𑀦𑁄𑀢𑀺 𑀢𑀡𑁆𑀳𑀸𑀬 𑀅𑀦𑁄𑀢𑁆𑀣𑀝𑁄 𑀅𑀧𑀭𑀺𑀬𑁄𑀦𑀤𑁆𑀥𑁄. 𑀆𑀤𑀻𑀦𑀯𑀤𑀲𑁆𑀲𑀸𑀯𑀻𑀢𑀺 𑀅𑀦𑁂𑀲𑀦𑀸𑀧𑀢𑁆𑀢𑀺𑀬𑀜𑁆𑀘 𑀕𑀥𑀺𑀢𑀧𑀭𑀺𑀪𑁄𑀕𑁂 𑀘 𑀆𑀤𑀻𑀦𑀯𑀁 𑀧𑀲𑁆𑀲𑀫𑀸𑀦𑁄. 𑀦𑀺𑀲𑁆𑀲𑀭𑀡𑀧𑀜𑁆𑀜𑁄𑀢𑀺, ‘‘𑀬𑀸𑀯𑀤𑁂𑀯 𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀦𑀺𑀲𑁆𑀲𑀭𑀡𑀫𑁂𑀯 𑀚𑀸𑀦𑀦𑁆𑀢𑁄 𑀧𑀭𑀺𑀪𑀼𑀜𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀭𑀻𑀢𑀭𑁂𑀦 𑀧𑀺𑀡𑁆𑀟𑀧𑀸𑀢𑁂𑀦𑀸𑀢𑀺𑀆𑀤𑀻𑀲𑀼𑀧𑀺 𑀬𑀣𑀸𑀮𑀤𑁆𑀥𑀸𑀤𑀻𑀦𑀁 𑀬𑁂𑀦 𑀓𑁂𑀦𑀘𑀺 𑀧𑀺𑀡𑁆𑀟𑀧𑀸𑀢𑁂𑀦, 𑀬𑁂𑀦 𑀓𑁂𑀦𑀘𑀺 𑀲𑁂𑀦𑀸𑀲𑀦𑁂𑀦, 𑀬𑁂𑀦 𑀓𑁂𑀦𑀘𑀺 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁂𑀦𑀸𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀓𑀲𑁆𑀲𑀧𑁂𑀦 𑀯𑀸 𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀑𑀯𑀤𑀺𑀲𑁆𑀲𑀸𑀫𑀻𑀢𑀺 𑀏𑀢𑁆𑀣 𑀬𑀣𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀢𑀻𑀳𑀺 𑀲𑀦𑁆𑀢𑁄𑀲𑁂𑀳𑀺 𑀲𑀦𑁆𑀢𑀼𑀝𑁆𑀞𑁄, 𑀢𑀼𑀫𑁆𑀳𑁂𑀧𑀺 𑀢𑀣𑀸𑀭𑀽𑀧𑀸 𑀪𑀯𑀣𑀸𑀢𑀺 𑀑𑀯𑀤𑀦𑁆𑀢𑁄 𑀓𑀲𑁆𑀲𑀧𑁂𑀦 𑀑𑀯𑀤𑀢𑀺 𑀦𑀸𑀫. 𑀬𑁄 𑀯𑀸 𑀧𑀦𑀲𑁆𑀲 𑀓𑀲𑁆𑀲𑀧𑀲𑀤𑀺𑀲𑁄𑀢𑀺 𑀏𑀢𑁆𑀣𑀸𑀧𑀺 𑀬𑁄 𑀯𑀸 𑀧𑀦𑀜𑁆𑀜𑁄𑀧𑀺 𑀓𑀲𑁆𑀲𑀧𑀲𑀤𑀺𑀲𑁄 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀯𑀺𑀬 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀢𑀻𑀳𑀺 𑀲𑀦𑁆𑀢𑁄𑀲𑁂𑀳𑀺 𑀲𑀦𑁆𑀢𑀼𑀝𑁆𑀞𑁄 𑀪𑀯𑁂𑀬𑁆𑀬, 𑀢𑀼𑀫𑁆𑀳𑁂𑀧𑀺 𑀢𑀣𑀸𑀭𑀽𑀧𑀸 𑀪𑀯𑀣𑀸𑀢𑀺 𑀑𑀯𑀤𑀦𑁆𑀢𑁄 𑀓𑀲𑁆𑀲𑀧𑀲𑀤𑀺𑀲𑁂𑀦 𑀑𑀯𑀤𑀢𑀺 𑀦𑀸𑀫. 𑀢𑀣𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀇𑀫𑀸𑀬 𑀇𑀫𑀲𑁆𑀫𑀺𑀁 𑀲𑀦𑁆𑀢𑀼𑀝𑁆𑀞𑀺𑀲𑀼𑀢𑁆𑀢𑁂 𑀯𑀼𑀢𑁆𑀢𑀲𑀮𑁆𑀮𑁂𑀔𑀸𑀘𑀸𑀭𑀧𑀝𑀺𑀧𑀢𑁆𑀢𑀺𑀬𑀸 𑀓𑀣𑀦𑀁 𑀦𑀸𑀫 𑀪𑀸𑀭𑁄, 𑀅𑀫𑁆𑀳𑀸𑀓𑀫𑁆𑀧𑀺 𑀇𑀫𑀁 𑀧𑀝𑀺𑀧𑀢𑁆𑀢𑀺𑀁 𑀧𑀭𑀺𑀧𑀽𑀭𑀁 𑀓𑀢𑁆𑀯𑀸 𑀧𑀽𑀭𑀡𑀁 𑀪𑀸𑀭𑁄𑀬𑁂𑀯, 𑀆𑀕𑀢𑁄 𑀔𑁄 𑀧𑀦 𑀪𑀸𑀭𑁄 𑀕𑀳𑁂𑀢𑀩𑁆𑀩𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀬𑀣𑀸 𑀫𑀬𑀸 𑀓𑀣𑀺𑀢𑀁, 𑀢𑀣𑀢𑁆𑀢𑀸𑀬 𑀢𑀣𑀸𑀪𑀸𑀯𑀸𑀬 𑀢𑀼𑀫𑁆𑀳𑁂𑀳𑀺𑀧𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀦𑁆𑀢𑀺. 𑀧𑀞𑀫𑀁.

𑁨. 𑀅𑀦𑁄𑀢𑁆𑀢𑀧𑁆𑀧𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁫. 𑀤𑀼𑀢𑀺𑀬𑁂 𑀅𑀦𑀸𑀢𑀸𑀧𑀻𑀢𑀺 𑀬𑀁 𑀯𑀻𑀭𑀺𑀬𑀁 𑀓𑀺𑀮𑁂𑀲𑁂 𑀆𑀢𑀧𑀢𑀺, 𑀢𑁂𑀦 𑀭𑀳𑀺𑀢𑁄. 𑀅𑀦𑁄𑀢𑁆𑀢𑀧𑁆𑀧𑀻𑀢𑀺 𑀦𑀺𑀩𑁆𑀪𑀬𑁄 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀢𑁄 𑀓𑀼𑀲𑀮𑀸𑀦𑀼𑀧𑁆𑀧𑀢𑁆𑀢𑀺𑀢𑁄 𑀘 𑀪𑀬𑀭𑀳𑀺𑀢𑁄. 𑀲𑀫𑁆𑀩𑁄𑀥𑀸𑀬𑀸𑀢𑀺 𑀲𑀫𑁆𑀩𑀼𑀚𑁆𑀛𑀦𑀢𑁆𑀣𑀸𑀬. 𑀦𑀺𑀩𑁆𑀩𑀸𑀦𑀸𑀬𑀸𑀢𑀺 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀅𑀦𑀼𑀢𑁆𑀢𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀲𑁆𑀲𑀸𑀢𑀺 𑀅𑀭𑀳𑀢𑁆𑀢𑀲𑁆𑀲 𑀢𑀜𑁆𑀳𑀺 𑀅𑀦𑀼𑀢𑁆𑀢𑀭𑀜𑁆𑀘𑁂𑀯 𑀘𑀢𑀽𑀳𑀺 𑀘 𑀬𑁄𑀕𑁂𑀳𑀺 𑀔𑁂𑀫𑀁.

𑀅𑀦𑀼𑀧𑁆𑀧𑀦𑁆𑀦𑀸𑀢𑀺𑀆𑀤𑀻𑀲𑀼 𑀬𑁂 𑀧𑀼𑀩𑁆𑀩𑁂 𑀅𑀧𑁆𑀧𑀝𑀺𑀮𑀤𑁆𑀥𑀧𑀼𑀩𑁆𑀩𑀁 𑀘𑀻𑀯𑀭𑀸𑀤𑀺𑀁 𑀯𑀸 𑀧𑀘𑁆𑀘𑀬𑀁 𑀉𑀧𑀝𑁆𑀞𑀸𑀓𑀲𑀤𑁆𑀥𑀺𑀯𑀺𑀳𑀸𑀭𑀺𑀓-𑀅𑀦𑁆𑀢𑁂𑀯𑀸𑀲𑀻𑀦𑀁 𑀯𑀸 𑀅𑀜𑁆𑀜𑀢𑀭𑀢𑁄 𑀫𑀦𑀼𑀜𑁆𑀜𑀯𑀢𑁆𑀣𑀼𑀁 𑀧𑀝𑀺𑀮𑀪𑀺𑀢𑁆𑀯𑀸 𑀢𑀁 𑀲𑀼𑀪𑀁 𑀲𑀼𑀔𑀦𑁆𑀢𑀺 𑀅𑀬𑁄𑀦𑀺𑀲𑁄 𑀕𑀡𑁆𑀳𑀦𑁆𑀢𑀲𑁆𑀲 𑀅𑀜𑁆𑀜𑀢𑀭𑀁 𑀯𑀸 𑀧𑀦 𑀅𑀦𑀦𑀼𑀪𑀽𑀢𑀧𑀼𑀩𑁆𑀩𑀁 𑀆𑀭𑀫𑁆𑀫𑀡𑀁 𑀬𑀣𑀸 𑀢𑀣𑀸 𑀯𑀸 𑀅𑀬𑁄𑀦𑀺𑀲𑁄 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀮𑁄𑀪𑀸𑀤𑀬𑁄 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂 𑀅𑀦𑀼𑀧𑁆𑀧𑀦𑁆𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀜𑁆𑀜𑀣𑀸 𑀳𑀺 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀅𑀦𑀼𑀧𑁆𑀧𑀦𑁆𑀦𑀸 𑀦𑀸𑀫 𑀧𑀸𑀧𑀓𑀸 𑀥𑀫𑁆𑀫𑀸 𑀦𑀢𑁆𑀣𑀺. 𑀅𑀦𑀼𑀪𑀽𑀢𑀧𑀼𑀩𑁆𑀩𑁂𑀧𑀺 𑀘 𑀯𑀢𑁆𑀣𑀼𑀫𑁆𑀳𑀺 𑀆𑀭𑀫𑁆𑀫𑀡𑁂 𑀯𑀸 𑀬𑀲𑁆𑀲 𑀧𑀓𑀢𑀺𑀩𑀼𑀤𑁆𑀥𑀺𑀬𑀸 𑀯𑀸 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀬 𑀯𑀸 𑀧𑀭𑀺𑀬𑀢𑁆𑀢𑀺𑀦𑀯𑀓𑀫𑁆𑀫𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀦𑀁 𑀯𑀸 𑀅𑀜𑁆𑀜𑀢𑀭𑀯𑀲𑁂𑀦 𑀧𑀼𑀩𑁆𑀩𑁂 𑀅𑀦𑀼𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀢𑀸𑀤𑀺𑀲𑁂𑀦 𑀧𑀘𑁆𑀘𑀬𑁂𑀦 𑀲𑀳𑀲𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀇𑀫𑁂𑀧𑀺 ‘‘𑀅𑀦𑀼𑀧𑁆𑀧𑀦𑁆𑀦𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀲𑀼𑀬𑁂𑀯 𑀧𑀦 𑀯𑀢𑁆𑀣𑀸𑀭𑀫𑁆𑀫𑀡𑁂𑀲𑀼 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀦𑀧𑁆𑀧𑀳𑀻𑀬𑀦𑁆𑀢𑀺 𑀦𑀸𑀫, 𑀢𑁂 ‘‘𑀉𑀧𑁆𑀧𑀦𑁆𑀦𑀸 𑀅𑀧𑁆𑀧𑀳𑀻𑀬𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’’𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀉𑀧𑁆𑀧𑀦𑁆𑀦𑀸𑀦𑀼𑀧𑁆𑀧𑀦𑁆𑀦𑀪𑁂𑀤𑁄 𑀘 𑀧𑀳𑀸𑀦𑀧𑁆𑀧𑀳𑀸𑀦𑀯𑀺𑀥𑀸𑀦𑀜𑁆𑀘 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀜𑀸𑀡𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀦𑀺𑀤𑁆𑀤𑁂𑀲𑁂 𑀓𑀣𑀺𑀢𑀁.

𑀅𑀦𑀼𑀧𑁆𑀧𑀦𑁆𑀦𑀸 𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀅𑀧𑁆𑀧𑀝𑀺𑀮𑀤𑁆𑀥𑀸𑀧𑀺 𑀲𑀻𑀮𑀲𑀫𑀸𑀥𑀺𑀫𑀕𑁆𑀕𑀨𑀮𑀲𑀗𑁆𑀔𑀸𑀢𑀸 𑀅𑀦𑀯𑀚𑁆𑀚𑀥𑀫𑁆𑀫𑀸. 𑀉𑀧𑁆𑀧𑀦𑁆𑀦𑀸𑀢𑀺 𑀢𑁂𑀬𑁂𑀯 𑀧𑀝𑀺𑀮𑀤𑁆𑀥𑀸. 𑀦𑀺𑀭𑀼𑀚𑁆𑀛𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼𑀦𑁆𑀢𑀺 𑀢𑁂 𑀲𑀻𑀮𑀸𑀤𑀺𑀥𑀫𑁆𑀫𑀸 𑀧𑀭𑀺𑀳𑀸𑀦𑀺𑀯𑀲𑁂𑀦 𑀧𑀼𑀦 𑀅𑀦𑀼𑀧𑁆𑀧𑀢𑁆𑀢𑀺𑀬𑀸 𑀦𑀺𑀭𑀼𑀚𑁆𑀛𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣 𑀘 𑀮𑁄𑀓𑀺𑀬𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀮𑁄𑀓𑀼𑀢𑁆𑀢𑀭𑀸𑀦𑀁 𑀧𑀭𑀺𑀳𑀸𑀦𑀺 𑀦𑀢𑁆𑀣𑀻𑀢𑀺. ‘‘𑀉𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀞𑀺𑀢𑀺𑀬𑀸’’𑀢𑀺 𑀇𑀫𑀲𑁆𑀲 𑀧𑀦 𑀲𑀫𑁆𑀫𑀧𑁆𑀧𑀥𑀸𑀦𑀲𑁆𑀲 𑀯𑀲𑁂𑀦𑀸𑀬𑀁 𑀤𑁂𑀲𑀦𑀸 𑀓𑀢𑀸. 𑀤𑀼𑀢𑀺𑀬𑀫𑀕𑁆𑀕𑁄 𑀯𑀸 𑀲𑀻𑀖𑀁 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑁄, 𑀧𑀞𑀫𑀫𑀕𑁆𑀕𑁄 𑀦𑀺𑀭𑀼𑀚𑁆𑀛𑀫𑀸𑀦𑁄 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀸𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀫𑁆𑀫𑀧𑁆𑀧𑀥𑀸𑀦𑀸 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀓𑀣𑀺𑀢𑀸𑀢𑀺. 𑀤𑀼𑀢𑀺𑀬𑀁.

𑁩. 𑀘𑀦𑁆𑀤𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁬. 𑀢𑀢𑀺𑀬𑁂 𑀘𑀦𑁆𑀤𑀽𑀧𑀫𑀸𑀢𑀺 𑀘𑀦𑁆𑀤𑀲𑀤𑀺𑀲𑀸 𑀳𑀼𑀢𑁆𑀯𑀸. 𑀓𑀺𑀁 𑀧𑀭𑀺𑀫𑀡𑁆𑀟𑀮𑀢𑀸𑀬? 𑀦𑁄, 𑀅𑀧𑀺𑀘 𑀔𑁄 𑀬𑀣𑀸 𑀘𑀦𑁆𑀤𑁄 𑀕𑀕𑀦𑀢𑀮𑀁 𑀧𑀓𑁆𑀔𑀦𑁆𑀤𑀫𑀸𑀦𑁄 𑀦 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀲𑀦𑁆𑀣𑀯𑀁 𑀯𑀸 𑀲𑀺𑀦𑁂𑀳𑀁 𑀯𑀸 𑀆𑀮𑀬𑀁 𑀯𑀸 𑀦𑀺𑀓𑀦𑁆𑀢𑀺𑀁 𑀯𑀸 𑀧𑀢𑁆𑀣𑀦𑀁 𑀯𑀸 𑀧𑀭𑀺𑀬𑀼𑀝𑁆𑀞𑀸𑀦𑀁 𑀯𑀸 𑀓𑀭𑁄𑀢𑀺, 𑀦 𑀘 𑀦 𑀳𑁄𑀢𑀺 𑀫𑀳𑀸𑀚𑀦𑀲𑁆𑀲 𑀧𑀺𑀬𑁄 𑀫𑀦𑀸𑀧𑁄, 𑀢𑀼𑀫𑁆𑀳𑁂𑀧𑀺 𑀏𑀯𑀁 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀲𑀦𑁆𑀣𑀯𑀸𑀤𑀻𑀦𑀁 𑀅𑀓𑀭𑀡𑁂𑀦 𑀩𑀳𑀼𑀚𑀦𑀲𑁆𑀲 𑀧𑀺𑀬𑀸 𑀫𑀦𑀸𑀧𑀸 𑀘𑀦𑁆𑀤𑀽𑀧𑀫𑀸 𑀳𑀼𑀢𑁆𑀯𑀸 𑀔𑀢𑁆𑀢𑀺𑀬𑀓𑀼𑀮𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀣𑀸𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀬𑀣𑀸 𑀘𑀦𑁆𑀤𑁄 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀢𑀺, 𑀆𑀮𑁄𑀓𑀁 𑀨𑀭𑀢𑀺, 𑀏𑀯𑀁 𑀓𑀺𑀮𑁂𑀲𑀦𑁆𑀥𑀓𑀸𑀭𑀯𑀺𑀥𑀫𑀦𑁂𑀦 𑀜𑀸𑀡𑀸𑀮𑁄𑀓𑀨𑀭𑀡𑁂𑀦 𑀘𑀸𑀧𑀺 𑀘𑀦𑁆𑀤𑀽𑀧𑀫𑀸 𑀳𑀼𑀢𑁆𑀯𑀸𑀢𑀺 𑀏𑀯𑀫𑀸𑀤𑀻𑀳𑀺𑀧𑀺 𑀦𑀬𑁂𑀳𑀺 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀅𑀧𑀓𑀲𑁆𑀲𑁂𑀯 𑀓𑀸𑀬𑀁 𑀅𑀧𑀓𑀲𑁆𑀲 𑀘𑀺𑀢𑁆𑀢𑀦𑁆𑀢𑀺 𑀢𑁂𑀦𑁂𑀯 𑀲𑀦𑁆𑀣𑀯𑀸𑀤𑀻𑀦𑀁 𑀅𑀓𑀭𑀡𑁂𑀦 𑀓𑀸𑀬𑀜𑁆𑀘 𑀘𑀺𑀢𑁆𑀢𑀜𑁆𑀘 𑀅𑀧𑀓𑀲𑁆𑀲𑀺𑀢𑁆𑀯𑀸, 𑀅𑀧𑀦𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑁄 𑀳𑀺 𑀪𑀺𑀓𑁆𑀔𑀼 𑀅𑀭𑀜𑁆𑀜𑁂𑀧𑀺 𑀦 𑀯𑀲𑀢𑀺, 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄𑀧𑀺 𑀯𑀺𑀢𑀓𑁆𑀓𑁂𑀢𑀺, 𑀅𑀬𑀁 𑀦𑁂𑀯 𑀓𑀸𑀬𑀁 𑀅𑀧𑀓𑀲𑁆𑀲𑀢𑀺, 𑀦 𑀘𑀺𑀢𑁆𑀢𑀁. 𑀬𑁄 𑀳𑀺 𑀅𑀭𑀜𑁆𑀜𑁂𑀧𑀺 𑀔𑁄 𑀯𑀺𑀳𑀭𑀢𑀺, 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀧𑀦 𑀯𑀺𑀢𑀓𑁆𑀓𑁂𑀢𑀺, 𑀅𑀬𑀁 𑀓𑀸𑀬𑀫𑁂𑀯 𑀅𑀧𑀓𑀲𑁆𑀲𑀢𑀺, 𑀦 𑀘𑀺𑀢𑁆𑀢𑀁. 𑀬𑁄 𑀕𑀸𑀫𑀦𑁆𑀢𑁂 𑀯𑀲𑀢𑀺, 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄𑀧𑀺 𑀔𑁄 𑀦 𑀘 𑀯𑀺𑀢𑀓𑁆𑀓𑁂𑀢𑀺, 𑀅𑀬𑀁 𑀘𑀺𑀢𑁆𑀢𑀫𑁂𑀯 𑀅𑀧𑀓𑀲𑁆𑀲𑀢𑀺, 𑀦 𑀓𑀸𑀬𑀁. 𑀬𑁄 𑀧𑀦 𑀅𑀭𑀜𑁆𑀜𑁂 𑀘𑁂𑀯 𑀯𑀲𑀢𑀺, 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀘 𑀦 𑀯𑀺𑀢𑀓𑁆𑀓𑁂𑀢𑀺, 𑀅𑀬𑀁 𑀉𑀪𑀬𑀫𑁆𑀧𑀺 𑀅𑀧𑀓𑀲𑁆𑀲𑀢𑀺. 𑀏𑀯𑀭𑀽𑀧𑀸 𑀳𑀼𑀢𑁆𑀯𑀸 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀣𑀸𑀢𑀺 𑀤𑀻𑀧𑁂𑀦𑁆𑀢𑁄 ‘‘𑀅𑀧𑀓𑀲𑁆𑀲𑁂𑀯 𑀓𑀸𑀬𑀁 𑀅𑀧𑀓𑀲𑁆𑀲 𑀘𑀺𑀢𑁆𑀢’’𑀦𑁆𑀢𑀺 𑀆𑀳.

𑀦𑀺𑀘𑁆𑀘𑀦𑀯𑀓𑀸𑀢𑀺 𑀦𑀺𑀘𑁆𑀘𑀁 𑀦𑀯𑀓𑀸𑀯, 𑀆𑀕𑀦𑁆𑀢𑀼𑀓𑀲𑀤𑀺𑀲𑀸 𑀏𑀯 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀆𑀕𑀦𑁆𑀢𑀼𑀓𑁄 𑀳𑀺 𑀧𑀝𑀺𑀧𑀸𑀝𑀺𑀬𑀸 𑀲𑀫𑁆𑀧𑀢𑁆𑀢𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀲𑀘𑁂 𑀦𑀁 𑀖𑀭𑀲𑀸𑀫𑀺𑀓𑀸 𑀤𑀺𑀲𑁆𑀯𑀸, ‘‘𑀅𑀫𑁆𑀳𑀸𑀓𑀁 𑀧𑀼𑀢𑁆𑀢𑀪𑀸𑀢𑀭𑁄 𑀯𑀺𑀧𑁆𑀧𑀯𑀸𑀲𑀁 𑀕𑀢𑀸 𑀏𑀯𑀁 𑀯𑀺𑀘𑀭𑀺𑀁𑀲𑀽’’𑀢𑀺 𑀅𑀦𑀼𑀓𑀫𑁆𑀧𑀫𑀸𑀦𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑁄𑀚𑁂𑀦𑁆𑀢𑀺, 𑀪𑀼𑀢𑁆𑀢𑀫𑀢𑁆𑀢𑁄𑀬𑁂𑀯 ‘‘𑀢𑀼𑀫𑁆𑀳𑀸𑀓𑀁 𑀪𑀸𑀚𑀦𑀁 𑀕𑀡𑁆𑀳𑀣𑀸’’𑀢𑀺 𑀉𑀝𑁆𑀞𑀸𑀬 𑀧𑀓𑁆𑀓𑀫𑀢𑀺, 𑀦 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀦𑁆𑀣𑀯𑀁 𑀯𑀸 𑀓𑀭𑁄𑀢𑀺, 𑀦 𑀓𑀺𑀘𑁆𑀘𑀓𑀭𑀡𑀻𑀬𑀸𑀦𑀺 𑀯𑀸 𑀲𑀁𑀯𑀺𑀤𑀳𑀢𑀺, 𑀏𑀯𑀁 𑀢𑀼𑀫𑁆𑀳𑁂𑀧𑀺 𑀧𑀝𑀺𑀧𑀸𑀝𑀺𑀬𑀸 𑀲𑀫𑁆𑀧𑀢𑁆𑀢𑀖𑀭𑀁 𑀧𑀯𑀺𑀲𑀺𑀢𑁆𑀯𑀸 𑀬𑀁 𑀇𑀭𑀺𑀬𑀸𑀧𑀣𑁂𑀲𑀼 𑀧𑀲𑀦𑁆𑀦𑀸 𑀫𑀦𑀼𑀲𑁆𑀲𑀸 𑀤𑁂𑀦𑁆𑀢𑀺, 𑀢𑀁 𑀕𑀳𑁂𑀢𑁆𑀯𑀸 𑀙𑀺𑀦𑁆𑀦𑀲𑀦𑁆𑀣𑀯𑀸, 𑀢𑁂𑀲𑀁 𑀓𑀺𑀘𑁆𑀘𑀓𑀭𑀡𑀻𑀬𑁂 𑀅𑀩𑁆𑀬𑀸𑀯𑀝𑀸 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀣𑀸𑀢𑀺 𑀤𑀻𑀧𑁂𑀢𑀺.

𑀇𑀫𑀲𑁆𑀲 𑀧𑀦 𑀦𑀺𑀘𑁆𑀘𑀦𑀯𑀓𑀪𑀸𑀯𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁 𑀤𑁆𑀯𑁂𑀪𑀸𑀢𑀺𑀓𑀯𑀢𑁆𑀣𑀼 𑀓𑀣𑁂𑀢𑀩𑁆𑀩𑀁 𑁋 𑀯𑀲𑀸𑀴𑀦𑀕𑀭𑀕𑀸𑀫𑀢𑁄 𑀓𑀺𑀭 𑀤𑁆𑀯𑁂 𑀪𑀸𑀢𑀺𑀓𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀸, 𑀢𑁂 𑀘𑀽𑀴𑀦𑀸𑀕𑀢𑁆𑀣𑁂𑀭𑁄 𑀘 𑀫𑀳𑀸𑀦𑀸𑀕𑀢𑁆𑀣𑁂𑀭𑁄 𑀘𑀸𑀢𑀺 𑀧𑀜𑁆𑀜𑀸𑀬𑀺𑀁𑀲𑀼. 𑀢𑁂 𑀘𑀺𑀢𑁆𑀢𑀮𑀧𑀩𑁆𑀩𑀢𑁂 𑀢𑀺𑀁𑀲 𑀯𑀲𑁆𑀲𑀸𑀦𑀺 𑀯𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸 ‘‘𑀫𑀸𑀢𑀭𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀆𑀕𑀦𑁆𑀢𑁆𑀯𑀸 𑀯𑀲𑀸𑀴𑀦𑀕𑀭𑀯𑀺𑀳𑀸𑀭𑁂 𑀯𑀲𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀫𑀸𑀢𑀼𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀼. 𑀫𑀸𑀢𑀸𑀧𑀺 𑀢𑁂𑀲𑀁 𑀉𑀴𑀼𑀗𑁆𑀓𑁂𑀦 𑀬𑀸𑀕𑀼𑀁 𑀦𑀻𑀳𑀭𑀺𑀢𑁆𑀯𑀸 𑀏𑀓𑀲𑁆𑀲 𑀧𑀢𑁆𑀢𑁂 𑀆𑀓𑀺𑀭𑀺. 𑀢𑀲𑁆𑀲𑀸 𑀢𑀁 𑀑𑀮𑁄𑀓𑀬𑀫𑀸𑀦𑀸𑀬 𑀧𑀼𑀢𑁆𑀢𑀲𑀺𑀦𑁂𑀳𑁄 𑀉𑀧𑁆𑀧𑀚𑁆𑀚𑀺. 𑀅𑀣 𑀦𑀁 𑀆𑀳 𑁋 ‘‘𑀢𑁆𑀯𑀁, 𑀢𑀸𑀢, 𑀫𑀬𑁆𑀳𑀁 𑀧𑀼𑀢𑁆𑀢𑁄 𑀫𑀳𑀸𑀦𑀸𑀕𑁄’’𑀢𑀺. 𑀣𑁂𑀭𑁄 ‘‘𑀧𑀘𑁆𑀙𑀺𑀫𑀁 𑀣𑁂𑀭𑀁 𑀧𑀼𑀘𑁆𑀙 𑀉𑀧𑀸𑀲𑀺𑀓𑁂’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀧𑀘𑁆𑀙𑀺𑀫𑀣𑁂𑀭𑀲𑁆𑀲𑀧𑀺 𑀬𑀸𑀕𑀼𑀁 𑀤𑀢𑁆𑀯𑀸, ‘‘𑀢𑀸𑀢, 𑀢𑁆𑀯𑀁 𑀫𑀬𑁆𑀳𑀁 𑀧𑀼𑀢𑁆𑀢𑁄 𑀘𑀽𑀴𑀦𑀸𑀕𑁄’’𑀢𑀺 𑀧𑀼𑀘𑁆𑀙𑀺? 𑀣𑁂𑀭𑁄 ‘‘𑀓𑀺𑀁, 𑀉𑀧𑀸𑀲𑀺𑀓𑁂, 𑀧𑀼𑀭𑀺𑀫𑀁 𑀣𑁂𑀭𑀁 𑀦 𑀧𑀼𑀘𑁆𑀙𑀲𑀻’’𑀢𑀺? 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀏𑀯𑀁 𑀫𑀸𑀢𑀭𑀸𑀧𑀺 𑀲𑀤𑁆𑀥𑀺𑀁 𑀙𑀺𑀦𑁆𑀦𑀲𑀦𑁆𑀣𑀯𑁄 𑀪𑀺𑀓𑁆𑀔𑀼 𑀦𑀺𑀘𑁆𑀘𑀦𑀯𑀓𑁄 𑀦𑀸𑀫 𑀳𑁄𑀢𑀺.

𑀅𑀧𑁆𑀧𑀕𑀩𑁆𑀪𑀸𑀢𑀺 𑀦 𑀧𑀕𑀩𑁆𑀪𑀸, 𑀅𑀝𑁆𑀞𑀝𑁆𑀞𑀸𑀦𑁂𑀦 𑀓𑀸𑀬𑀧𑀸𑀕𑀩𑁆𑀪𑀺𑀬𑁂𑀦, 𑀘𑀢𑀼𑀝𑁆𑀞𑀸𑀦𑁂𑀦 𑀯𑀘𑀻𑀧𑀸𑀕𑀩𑁆𑀪𑀺𑀬𑁂𑀦, 𑀅𑀦𑁂𑀓𑀝𑁆𑀞𑀸𑀦𑁂𑀦 𑀫𑀦𑁄𑀧𑀸𑀕𑀩𑁆𑀪𑀺𑀬𑁂𑀦 𑀘 𑀯𑀺𑀭𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀝𑁆𑀞𑀸𑀦𑀁 𑀓𑀸𑀬𑀧𑀸𑀕𑀩𑁆𑀪𑀺𑀬𑀁 𑀦𑀸𑀫 𑀲𑀗𑁆𑀖𑀕𑀡𑀧𑀼𑀕𑁆𑀕𑀮-𑀪𑁄𑀚𑀦𑀲𑀸𑀮𑀸-𑀚𑀦𑁆𑀢𑀸𑀖𑀭𑀦𑀳𑀸𑀦𑀢𑀺𑀢𑁆𑀣-𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕-𑀅𑀦𑁆𑀢𑀭𑀖𑀭𑀧𑁆𑀧𑀯𑁂𑀲𑀦𑁂𑀲𑀼 𑀓𑀸𑀬𑁂𑀦 𑀅𑀧𑁆𑀧𑀢𑀺𑀭𑀽𑀧𑀓𑀭𑀡𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀇𑀥𑁂𑀓𑀘𑁆𑀘𑁄 𑀲𑀗𑁆𑀖𑀫𑀚𑁆𑀛𑁂 𑀧𑀮𑁆𑀮𑀢𑁆𑀣𑀺𑀓𑀸𑀬 𑀯𑀸 𑀦𑀺𑀲𑀻𑀤𑀢𑀺 𑀧𑀸𑀤𑁂 𑀧𑀸𑀤𑀁 𑀆𑀥𑀸𑀬𑀺𑀢𑁆𑀯𑀸 𑀯𑀸𑀢𑀺 𑀏𑀯𑀫𑀸𑀤𑀺 (𑀫𑀳𑀸𑀦𑀺. 𑁧𑁬𑁫). 𑀢𑀣𑀸 𑀕𑀡𑀫𑀚𑁆𑀛𑁂. 𑀕𑀡𑀫𑀚𑁆𑀛𑁂𑀢𑀺 𑀘𑀢𑀼𑀧𑀭𑀺𑀲𑀲𑀦𑁆𑀦𑀺𑀧𑀸𑀢𑁂 𑀯𑀸 𑀲𑀼𑀢𑁆𑀢𑀦𑁆𑀢𑀺𑀓𑀕𑀡𑀸𑀤𑀺𑀲𑀦𑁆𑀦𑀺𑀧𑀸𑀢𑁂 𑀯𑀸. 𑀢𑀣𑀸 𑀯𑀼𑀟𑁆𑀠𑀢𑀭𑁂 𑀧𑀼𑀕𑁆𑀕𑀮𑁂. 𑀪𑁄𑀚𑀦𑀲𑀸𑀮𑀸𑀬 𑀧𑀦 𑀯𑀼𑀟𑁆𑀠𑀸𑀦𑀁 𑀆𑀲𑀦𑀁 𑀦 𑀤𑁂𑀢𑀺, 𑀦𑀯𑀸𑀦𑀁 𑀆𑀲𑀦𑀁 𑀧𑀝𑀺𑀩𑀸𑀳𑀢𑀺. 𑀢𑀣𑀸 𑀚𑀦𑁆𑀢𑀸𑀖𑀭𑁂. 𑀯𑀼𑀟𑁆𑀠𑁂 𑀘𑁂𑀢𑁆𑀣 𑀅𑀦𑀸𑀧𑀼𑀘𑁆𑀙𑀸 𑀅𑀕𑁆𑀕𑀺𑀚𑀮𑀦𑀸𑀤𑀻𑀦𑀺 𑀓𑀭𑁄𑀢𑀺. 𑀦𑁆𑀳𑀸𑀦𑀢𑀺𑀢𑁆𑀣𑁂 𑀘 𑀬𑀤𑀺𑀤𑀁 ‘‘𑀤𑀳𑀭𑁄 𑀯𑀼𑀟𑁆𑀠𑁄𑀢𑀺 𑀧𑀫𑀸𑀡𑀁 𑀅𑀓𑀢𑁆𑀯𑀸 𑀆𑀕𑀢𑀧𑀝𑀺𑀧𑀸𑀝𑀺𑀬𑀸 𑀦𑁆𑀳𑀸𑀬𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀅𑀦𑀸𑀤𑀺𑀬𑀦𑁆𑀢𑁄 𑀧𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 𑀉𑀤𑀓𑀁 𑀑𑀢𑀭𑀺𑀢𑁆𑀯𑀸 𑀯𑀼𑀟𑁆𑀠𑁂 𑀘 𑀦𑀯𑁂 𑀘 𑀩𑀸𑀥𑀢𑀺. 𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑁂 𑀧𑀦 𑀅𑀕𑁆𑀕𑀸𑀲𑀦𑀅𑀕𑁆𑀕𑁄𑀤𑀓𑀅𑀕𑁆𑀕𑀧𑀺𑀡𑁆𑀟𑀸𑀦𑀁 𑀅𑀢𑁆𑀣𑀸𑀬 𑀧𑀼𑀭𑀢𑁄 𑀕𑀘𑁆𑀙𑀢𑀺 𑀩𑀸𑀳𑀸𑀬 𑀩𑀸𑀳𑀁 𑀧𑀳𑀭𑀦𑁆𑀢𑁄. 𑀅𑀦𑁆𑀢𑀭𑀖𑀭𑀧𑁆𑀧𑀯𑁂𑀲𑀦𑁂 𑀯𑀼𑀟𑁆𑀠𑁂𑀳𑀺 𑀧𑀞𑀫𑀢𑀭𑀁 𑀧𑀯𑀺𑀲𑀢𑀺, 𑀤𑀳𑀭𑁂𑀳𑀺 𑀲𑀤𑁆𑀥𑀺𑀁 𑀓𑀸𑀬𑀓𑀻𑀴𑀦𑀓𑀁 𑀓𑀭𑁄𑀢𑀻𑀢𑀺 𑀏𑀯𑀫𑀸𑀤𑀺.

𑀘𑀢𑀼𑀝𑁆𑀞𑀸𑀦𑀁 𑀯𑀘𑀻𑀧𑀸𑀕𑀩𑁆𑀪𑀺𑀬𑀁 𑀦𑀸𑀫 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀅𑀦𑁆𑀢𑀭𑀖𑀭𑁂𑀲𑀼 𑀅𑀧𑁆𑀧𑀢𑀺𑀭𑀽𑀧𑀯𑀸𑀘𑀸𑀦𑀺𑀘𑁆𑀙𑀸𑀭𑀡𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀇𑀥𑁂𑀓𑀘𑁆𑀘𑁄 𑀲𑀗𑁆𑀖𑀫𑀚𑁆𑀛𑁂 𑀅𑀦𑀸𑀧𑀼𑀘𑁆𑀙𑀸 𑀥𑀫𑁆𑀫𑀁 𑀪𑀸𑀲𑀢𑀺. 𑀢𑀣𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀕𑀡𑀲𑁆𑀲 𑀫𑀚𑁆𑀛𑁂 𑀧𑀼𑀕𑁆𑀕𑀮𑀲𑁆𑀲 𑀘 𑀲𑀦𑁆𑀢𑀺𑀓𑁂, 𑀢𑀢𑁆𑀣𑁂𑀯 𑀫𑀦𑀼𑀲𑁆𑀲𑁂𑀳𑀺 𑀧𑀜𑁆𑀳𑀁 𑀧𑀼𑀝𑁆𑀞𑁄 𑀯𑀼𑀟𑁆𑀠𑀢𑀭𑀁 𑀅𑀦𑀸𑀧𑀼𑀘𑁆𑀙𑀸 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀅𑀦𑁆𑀢𑀭𑀖𑀭𑁂 𑀧𑀦 ‘‘𑀇𑀢𑁆𑀣𑀦𑁆𑀦𑀸𑀫𑁂 𑀓𑀺𑀁 𑀅𑀢𑁆𑀣𑀺? 𑀓𑀺𑀁 𑀬𑀸𑀕𑀼, 𑀉𑀤𑀸𑀳𑀼 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁? 𑀓𑀺𑀁 𑀫𑁂 𑀤𑀲𑁆𑀲𑀲𑀺? 𑀓𑀺𑀁 𑀅𑀚𑁆𑀚 𑀔𑀸𑀤𑀺𑀲𑁆𑀲𑀸𑀫? 𑀓𑀺𑀁 𑀪𑀼𑀜𑁆𑀚𑀺𑀲𑁆𑀲𑀸𑀫? 𑀓𑀺𑀁 𑀧𑀺𑀯𑀺𑀲𑁆𑀲𑀸𑀫𑀸’’𑀢𑀺𑀆𑀤𑀻𑀦𑀺 𑀪𑀸𑀲𑀢𑀺.

𑀅𑀦𑁂𑀓𑀝𑁆𑀞𑀸𑀦𑀁 𑀫𑀦𑁄𑀧𑀸𑀕𑀩𑁆𑀪𑀺𑀬𑀁 𑀦𑀸𑀫 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀓𑀸𑀬𑀯𑀸𑀘𑀸𑀳𑀺 𑀅𑀚𑁆𑀛𑀸𑀘𑀸𑀭𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸𑀧𑀺 𑀫𑀦𑀲𑀸𑀯 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀦𑀁 𑀯𑀺𑀢𑀓𑁆𑀓𑀦𑀁. 𑀅𑀧𑀺𑀘 𑀤𑀼𑀲𑁆𑀲𑀻𑀮𑀲𑁆𑀲𑁂𑀯 𑀲𑀢𑁄 ‘‘𑀲𑀻𑀮𑀯𑀸𑀢𑀺 𑀫𑀁 𑀚𑀦𑁄 𑀚𑀸𑀦𑀸𑀢𑀽’’𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀧𑀸𑀧𑀺𑀘𑁆𑀙𑀢𑀸𑀧𑀺 𑀫𑀦𑁄𑀧𑀸𑀕𑀩𑁆𑀪𑀺𑀬𑀁. 𑀇𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀇𑀫𑁂𑀲𑀁 𑀧𑀸𑀕𑀩𑁆𑀪𑀺𑀬𑀸𑀦𑀁 𑀅𑀪𑀸𑀯𑁂𑀦 𑀅𑀧𑁆𑀧𑀕𑀩𑁆𑀪𑀸 𑀳𑀼𑀢𑁆𑀯𑀸 𑀉𑀧𑀲𑀗𑁆𑀓𑀫𑀣𑀸𑀢𑀺 𑀯𑀤𑀢𑀺.

𑀚𑀭𑀼𑀤𑀧𑀸𑀦𑀦𑁆𑀢𑀺 𑀚𑀺𑀡𑁆𑀡𑀓𑀽𑀧𑀁. 𑀧𑀩𑁆𑀩𑀢𑀯𑀺𑀲𑀫𑀦𑁆𑀢𑀺 𑀧𑀩𑁆𑀩𑀢𑁂 𑀯𑀺𑀲𑀫𑀁 𑀧𑀧𑀸𑀢𑀝𑁆𑀞𑀸𑀦𑀁. 𑀦𑀤𑀻𑀯𑀺𑀤𑀼𑀕𑁆𑀕𑀦𑁆𑀢𑀺 𑀦𑀤𑀺𑀬𑀸 𑀯𑀺𑀤𑀼𑀕𑁆𑀕𑀁 𑀙𑀺𑀦𑁆𑀦𑀢𑀝𑀝𑁆𑀞𑀸𑀦𑀁. 𑀅𑀧𑀓𑀲𑁆𑀲𑁂𑀯 𑀓𑀸𑀬𑀦𑁆𑀢𑀺 𑀢𑀸𑀤𑀺𑀲𑀸𑀦𑀺 𑀞𑀸𑀦𑀸𑀦𑀺 𑀬𑁄 𑀔𑀺𑀟𑁆𑀟𑀸𑀤𑀺𑀧𑀲𑀼𑀢𑁄 𑀓𑀸𑀬𑀁 𑀅𑀦𑀧𑀓𑀲𑁆𑀲 𑀏𑀓𑀢𑁄𑀪𑀸𑀭𑀺𑀬𑀁 𑀅𑀓𑀢𑁆𑀯𑀸𑀯 𑀯𑀸𑀬𑀼𑀧𑀢𑁆𑀣𑀫𑁆𑀪𑀓𑀁 𑀅𑀕𑁆𑀕𑀸𑀳𑀸𑀧𑁂𑀢𑁆𑀯𑀸 𑀘𑀺𑀢𑁆𑀢𑀫𑁆𑀧𑀺 𑀅𑀦𑀧𑀓𑀲𑁆𑀲 ‘‘𑀏𑀢𑁆𑀣 𑀧𑀢𑀺𑀢𑁄 𑀳𑀢𑁆𑀣𑀧𑀸𑀤𑀪𑀜𑁆𑀚𑀦𑀸𑀤𑀻𑀦𑀺 𑀧𑀸𑀧𑀼𑀡𑀸𑀢𑀻’’𑀢𑀺 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀺𑀢𑀸𑀬 𑀅𑀦𑀼𑀩𑁆𑀩𑁂𑀚𑁂𑀢𑁆𑀯𑀸 𑀲𑀫𑁆𑀧𑀺𑀬𑀸𑀬𑀫𑀸𑀦𑁄 𑀑𑀮𑁄𑀓𑁂𑀢𑀺, 𑀲𑁄 𑀧𑀢𑀺𑀢𑁆𑀯𑀸 𑀳𑀢𑁆𑀣𑀧𑀸𑀤𑀪𑀜𑁆𑀚𑀦𑀸𑀤𑀺𑀅𑀦𑀢𑁆𑀣𑀁 𑀧𑀸𑀧𑀼𑀡𑀸𑀢𑀺. 𑀬𑁄 𑀧𑀦 𑀉𑀤𑀓𑀢𑁆𑀣𑀺𑀓𑁄 𑀯𑀸 𑀅𑀜𑁆𑀜𑁂𑀦 𑀯𑀸 𑀓𑁂𑀦𑀘𑀺 𑀓𑀺𑀘𑁆𑀘𑁂𑀦 𑀑𑀮𑁄𑀓𑁂𑀢𑀼𑀓𑀸𑀫𑁄 𑀓𑀸𑀬𑀁 𑀅𑀧𑀓𑀲𑁆𑀲 𑀏𑀓𑀢𑁄 𑀪𑀸𑀭𑀺𑀬𑀁 𑀓𑀢𑁆𑀯𑀸 𑀯𑀸𑀬𑀼𑀧𑀢𑁆𑀣𑀫𑁆𑀪𑀓𑀁 𑀕𑀸𑀳𑀸𑀧𑁂𑀢𑁆𑀯𑀸, 𑀘𑀺𑀢𑁆𑀢𑀫𑁆𑀧𑀺 𑀅𑀧𑀓𑀲𑁆𑀲 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀲𑀁𑀯𑁂𑀚𑁂𑀢𑁆𑀯𑀸 𑀑𑀮𑁄𑀓𑁂𑀢𑀺, 𑀲𑁄 𑀦 𑀧𑀢𑀢𑀺, 𑀬𑀣𑀸𑀭𑀼𑀘𑀺𑀁 𑀑𑀮𑁄𑀓𑁂𑀢𑁆𑀯𑀸 𑀲𑀼𑀔𑀻 𑀬𑁂𑀦𑀓𑀸𑀫𑀁 𑀧𑀓𑁆𑀓𑀫𑀢𑀺.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀚𑀭𑀼𑀤𑀧𑀸𑀦𑀸𑀤𑀬𑁄 𑀯𑀺𑀬 𑀳𑀺 𑀘𑀢𑁆𑀢𑀸𑀭𑀺 𑀓𑀼𑀮𑀸𑀦𑀺, 𑀑𑀮𑁄𑀓𑀦𑀧𑀼𑀭𑀺𑀲𑁄 𑀯𑀺𑀬 𑀪𑀺𑀓𑁆𑀔𑀼. 𑀬𑀣𑀸 𑀅𑀦𑀧𑀓𑀝𑁆𑀞𑀓𑀸𑀬𑀘𑀺𑀢𑁆𑀢𑁄 𑀢𑀸𑀦𑀺 𑀑𑀮𑁄𑀓𑁂𑀦𑁆𑀢𑁄 𑀧𑀼𑀭𑀺𑀲𑁄 𑀢𑀢𑁆𑀣 𑀧𑀢𑀢𑀺, 𑀏𑀯𑀁 𑀅𑀭𑀓𑁆𑀔𑀺𑀢𑁂𑀳𑀺 𑀓𑀸𑀬𑀸𑀤𑀻𑀳𑀺 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀦𑁆𑀢𑁄 𑀪𑀺𑀓𑁆𑀔𑀼 𑀓𑀼𑀮𑁂𑀲𑀼 𑀩𑀚𑁆𑀛𑀢𑀺, 𑀢𑀢𑁄 𑀦𑀸𑀦𑀧𑁆𑀧𑀓𑀸𑀭𑀁 𑀲𑀻𑀮𑀧𑀸𑀤𑀪𑀜𑁆𑀚𑀦𑀸𑀤𑀺𑀅𑀦𑀢𑁆𑀣𑀁 𑀧𑀸𑀧𑀼𑀡𑀸𑀢𑀺. 𑀬𑀣𑀸 𑀧𑀦 𑀅𑀧𑀓𑀝𑁆𑀞𑀓𑀸𑀬𑀘𑀺𑀢𑁆𑀢𑁄 𑀧𑀼𑀭𑀺𑀲𑁄 𑀢𑀢𑁆𑀣 𑀦 𑀧𑀢𑀢𑀺, 𑀏𑀯𑀁 𑀭𑀓𑁆𑀔𑀺𑀢𑁂𑀦𑁂𑀯 𑀓𑀸𑀬𑁂𑀦 𑀭𑀓𑁆𑀔𑀺𑀢𑁂𑀳𑀺 𑀘𑀺𑀢𑁆𑀢𑁂𑀳𑀺 𑀭𑀓𑁆𑀔𑀺𑀢𑀸𑀬 𑀯𑀸𑀘𑀸𑀬 𑀲𑀼𑀧𑁆𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸 𑀅𑀧𑀓𑀝𑁆𑀞𑀓𑀸𑀬𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀦𑁆𑀢𑁄 𑀪𑀺𑀓𑁆𑀔𑀼 𑀓𑀼𑀮𑁂𑀲𑀼 𑀦 𑀩𑀚𑁆𑀛𑀢𑀺. 𑀅𑀣𑀲𑁆𑀲 𑀬𑀣𑀸 𑀢𑀢𑁆𑀣 𑀅𑀧𑀢𑀺𑀢𑀲𑁆𑀲 𑀧𑀼𑀭𑀺𑀲𑀲𑁆𑀲, 𑀦 𑀧𑀸𑀤𑀸 𑀪𑀜𑁆𑀚𑀦𑁆𑀢𑀺, 𑀏𑀯𑀁 𑀲𑀻𑀮𑀧𑀸𑀤𑁄 𑀦 𑀪𑀺𑀚𑁆𑀚𑀢𑀺. 𑀬𑀣𑀸 𑀳𑀢𑁆𑀣𑀸 𑀦 𑀪𑀜𑁆𑀚𑀦𑁆𑀢𑀺, 𑀏𑀯𑀁 𑀲𑀤𑁆𑀥𑀸𑀳𑀢𑁆𑀣𑁄 𑀦 𑀪𑀺𑀚𑁆𑀚𑀢𑀺. 𑀬𑀣𑀸 𑀓𑀼𑀘𑁆𑀙𑀺 𑀦 𑀪𑀺𑀚𑁆𑀚𑀢𑀺, 𑀏𑀯𑀁 𑀲𑀫𑀸𑀥𑀺𑀓𑀼𑀘𑁆𑀙𑀺 𑀦 𑀪𑀺𑀚𑁆𑀚𑀢𑀺. 𑀬𑀣𑀸 𑀲𑀻𑀲𑀁 𑀦 𑀪𑀺𑀚𑁆𑀚𑀢𑀺, 𑀏𑀯𑀁 𑀜𑀸𑀡𑀲𑀻𑀲𑀁 𑀦 𑀪𑀺𑀚𑁆𑀚𑀢𑀺, 𑀬𑀣𑀸 𑀘 𑀢𑀁 𑀔𑀸𑀡𑀼𑀓𑀡𑁆𑀝𑀓𑀸𑀤𑀬𑁄 𑀦 𑀯𑀺𑀚𑁆𑀛𑀦𑁆𑀢𑀺, 𑀏𑀯𑀫𑀺𑀫𑀁 𑀭𑀸𑀕𑀓𑀡𑁆𑀝𑀓𑀸𑀤𑀬𑁄 𑀦 𑀯𑀺𑀚𑁆𑀛𑀦𑁆𑀢𑀺. 𑀬𑀣𑀸 𑀲𑁄 𑀦𑀺𑀭𑀼𑀧𑀤𑁆𑀤𑀯𑁄 𑀬𑀣𑀸𑀭𑀼𑀘𑀺 𑀑𑀮𑁄𑀓𑁂𑀢𑁆𑀯𑀸 𑀲𑀼𑀔𑀻 𑀬𑁂𑀦𑀓𑀸𑀫𑀁 𑀧𑀓𑁆𑀓𑀫𑀢𑀺, 𑀏𑀯𑀁 𑀪𑀺𑀓𑁆𑀔𑀼 𑀓𑀼𑀮𑀸𑀦𑀺 𑀦𑀺𑀲𑁆𑀲𑀸𑀬 𑀘𑀻𑀯𑀭𑀸𑀤𑀬𑁄 𑀧𑀘𑁆𑀘𑀬𑁂 𑀧𑀝𑀺𑀲𑁂𑀯𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀲𑀼𑀔𑁂𑀦 𑀲𑀼𑀔𑀺𑀢𑁄 𑀬𑁂𑀦𑀓𑀸𑀫𑀁 𑀅𑀕𑀢𑀧𑀼𑀩𑁆𑀩𑀁 𑀦𑀺𑀩𑁆𑀩𑀸𑀦𑀤𑀺𑀲𑀁 𑀕𑀘𑁆𑀙𑀢𑀺.

𑀇𑀤𑀸𑀦𑀺 𑀬𑁄 𑀳𑀻𑀦𑀸𑀥𑀺𑀫𑀼𑀢𑁆𑀢𑀺𑀓𑁄 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑁄 𑀏𑀯𑀁 𑀯𑀤𑁂𑀬𑁆𑀬 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 ‘𑀢𑀺𑀯𑀺𑀥𑀁 𑀧𑀸𑀕𑀩𑁆𑀪𑀺𑀬𑀁 𑀧𑀳𑀸𑀬 𑀦𑀺𑀘𑁆𑀘𑀦𑀯𑀓𑀢𑁆𑀢𑁂𑀦 𑀘𑀦𑁆𑀤𑀽𑀧𑀫𑀸 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀣𑀸’𑀢𑀺 𑀯𑀤𑀦𑁆𑀢𑁄 𑀅𑀝𑁆𑀞𑀸𑀦𑁂 𑀞𑀧𑁂𑀢𑀺, 𑀅𑀲𑀬𑁆𑀳𑀁 𑀪𑀸𑀭𑀁 𑀆𑀭𑁄𑀧𑁂𑀢𑀺, 𑀬𑀁 𑀦 𑀲𑀓𑁆𑀓𑀸 𑀓𑀸𑀢𑀼𑀁 𑀢𑀁 𑀓𑀸𑀭𑁂𑀢𑀻’’𑀢𑀺, 𑀢𑀲𑁆𑀲 𑀯𑀸𑀤𑀧𑀣𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸, ‘‘𑀲𑀓𑁆𑀓𑀸 𑀏𑀯𑀁 𑀓𑀸𑀢𑀼𑀁, 𑀅𑀢𑁆𑀣𑀺 𑀏𑀯𑀭𑀽𑀧𑁄 𑀪𑀺𑀓𑁆𑀔𑀽’’𑀢𑀺 𑀤𑀲𑁆𑀲𑁂𑀦𑁆𑀢𑁄 𑀓𑀲𑁆𑀲𑀧𑁄, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳.

𑀆𑀓𑀸𑀲𑁂 𑀧𑀸𑀡𑀺𑀁 𑀘𑀸𑀮𑁂𑀲𑀻𑀢𑀺 𑀦𑀻𑀮𑁂 𑀕𑀕𑀦𑀦𑁆𑀢𑀭𑁂 𑀬𑀫𑀓𑀯𑀺𑀚𑁆𑀚𑀼𑀢𑀁 𑀘𑀸𑀭𑀬𑀫𑀸𑀦𑁄 𑀯𑀺𑀬 𑀳𑁂𑀝𑁆𑀞𑀸𑀪𑀸𑀕𑀁 𑀉𑀧𑀭𑀺𑀪𑀸𑀕𑀁 𑀉𑀪𑀢𑁄𑀧𑀲𑁆𑀲𑁂𑀲𑀼 𑀧𑀸𑀡𑀺𑀁 𑀲𑀜𑁆𑀘𑀸𑀭𑁂𑀲𑀺. 𑀇𑀤𑀜𑁆𑀘 𑀧𑀦 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀅𑀲𑀫𑁆𑀪𑀺𑀦𑁆𑀦𑀧𑀤𑀁 𑀦𑀸𑀫. 𑀅𑀢𑁆𑀢𑀫𑀦𑁄𑀢𑀺 𑀢𑀼𑀝𑁆𑀞𑀘𑀺𑀢𑁆𑀢𑁄 𑀲𑀓𑀫𑀦𑁄, 𑀦 𑀤𑁄𑀫𑀦𑀲𑁆𑀲𑁂𑀦 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑀺𑀢𑀫𑀦𑁄. 𑀓𑀲𑁆𑀲𑀧𑀲𑁆𑀲, 𑀪𑀺𑀓𑁆𑀔𑀯𑁂𑀢𑀺 𑀇𑀤𑀫𑁆𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀭𑀯𑀸𑀤𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀣𑀺 𑀏𑀯𑀭𑀽𑀧𑁄 𑀪𑀺𑀓𑁆𑀔𑀽𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁.

𑀧𑀲𑀦𑁆𑀦𑀸𑀓𑀸𑀭𑀁 𑀓𑀭𑁂𑀬𑁆𑀬𑀼𑀦𑁆𑀢𑀺 𑀘𑀻𑀯𑀭𑀸𑀤𑀬𑁄 𑀧𑀘𑁆𑀘𑀬𑁂 𑀤𑀤𑁂𑀬𑁆𑀬𑀼𑀁. 𑀢𑀣𑀢𑁆𑀢𑀸𑀬 𑀧𑀝𑀺𑀧𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀲𑀻𑀮𑀲𑁆𑀲 𑀆𑀕𑀢𑀝𑁆𑀞𑀸𑀦𑁂 𑀲𑀻𑀮𑀁 𑀧𑀽𑀭𑀬𑀫𑀸𑀦𑀸, 𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑀨𑀮𑀸𑀦𑀁 𑀆𑀕𑀢𑀝𑁆𑀞𑀸𑀦𑁂 𑀢𑀸𑀦𑀺 𑀢𑀸𑀦𑀺 𑀲𑀫𑁆𑀧𑀸𑀤𑀬𑀫𑀸𑀦𑀸 𑀢𑀣𑀸𑀪𑀸𑀯𑀸𑀬 𑀧𑀝𑀺𑀧𑀚𑁆𑀚𑁂𑀬𑁆𑀬𑀼𑀁. 𑀅𑀦𑀼𑀤𑀬𑀦𑁆𑀢𑀺 𑀭𑀓𑁆𑀔𑀡𑀪𑀸𑀯𑀁. 𑀅𑀦𑀼𑀓𑀫𑁆𑀧𑀦𑁆𑀢𑀺 𑀫𑀼𑀤𑀼𑀘𑀺𑀢𑁆𑀢𑀢𑀁. 𑀉𑀪𑀬𑀜𑁆𑀘𑁂𑀢𑀁 𑀓𑀸𑀭𑀼𑀜𑁆𑀜𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀓𑀲𑁆𑀲𑀧𑁄, 𑀪𑀺𑀓𑁆𑀔𑀯𑁂𑀢𑀺 𑀇𑀤𑀫𑁆𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀭𑀯𑀸𑀤𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀢𑁆𑀣𑀺 𑀏𑀯𑀭𑀽𑀧𑁄 𑀪𑀺𑀓𑁆𑀔𑀽𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀓𑀲𑁆𑀲𑀧𑁂𑀦 𑀯𑀸𑀢𑀺 𑀏𑀢𑁆𑀣 𑀘𑀦𑁆𑀤𑁄𑀧𑀫𑀸𑀤𑀺𑀯𑀲𑁂𑀦 𑀬𑁄𑀚𑀦𑀁 𑀓𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑀺𑀬𑀁.

𑁪. 𑀓𑀼𑀮𑀽𑀧𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁭. 𑀘𑀢𑀼𑀢𑁆𑀣𑁂 𑀓𑀼𑀮𑀽𑀧𑀓𑁄𑀢𑀺 𑀓𑀼𑀮𑀖𑀭𑀸𑀦𑀁 𑀉𑀧𑀕𑀦𑁆𑀢𑀸. 𑀤𑁂𑀦𑁆𑀢𑀼𑀬𑁂𑀯 𑀫𑁂𑀢𑀺 𑀤𑀤𑀦𑁆𑀢𑀼𑀬𑁂𑀯 𑀫𑀬𑁆𑀳𑀁. 𑀲𑀦𑁆𑀤𑀻𑀬𑀢𑀻𑀢𑀺 𑀅𑀝𑁆𑀝𑀻𑀬𑀢𑀺 𑀧𑀻𑀴𑀺𑀬𑀢𑀺. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀘𑀢𑀼𑀢𑁆𑀣𑀁.

𑁫. 𑀚𑀺𑀡𑁆𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁮. 𑀧𑀜𑁆𑀘𑀫𑁂 𑀚𑀺𑀡𑁆𑀡𑁄𑀢𑀺 𑀣𑁂𑀭𑁄 𑀫𑀳𑀮𑁆𑀮𑀓𑁄. 𑀕𑀭𑀼𑀓𑀸𑀦𑀻𑀢𑀺 𑀢𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸 𑀮𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀙𑀺𑀦𑁆𑀦𑀪𑀺𑀦𑁆𑀦𑀝𑁆𑀞𑀸𑀦𑁂 𑀲𑀼𑀢𑁆𑀢𑀲𑀁𑀲𑀺𑀩𑁆𑀩𑀦𑁂𑀦 𑀘𑁂𑀯 𑀅𑀕𑁆𑀕𑀴𑀤𑀸𑀦𑁂𑀦 𑀘 𑀅𑀦𑁂𑀓𑀸𑀦𑀺 𑀧𑀝𑀮𑀸𑀦𑀺 𑀳𑀼𑀢𑁆𑀯𑀸 𑀕𑀭𑀼𑀓𑀸𑀦𑀺 𑀚𑀸𑀢𑀸𑀦𑀺. 𑀦𑀺𑀩𑁆𑀩𑀲𑀦𑀸𑀦𑀻𑀢𑀺 𑀧𑀼𑀩𑁆𑀩𑁂 𑀪𑀕𑀯𑀢𑀸 𑀦𑀺𑀯𑀸𑀲𑁂𑀢𑁆𑀯𑀸 𑀅𑀧𑀦𑀻𑀢𑀢𑀸𑀬 𑀏𑀯𑀁𑀮𑀤𑁆𑀥𑀦𑀸𑀫𑀸𑀦𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀢𑁆𑀯𑀁 𑀚𑀺𑀡𑁆𑀡𑁄 𑀘𑁂𑀯 𑀕𑀭𑀼𑀧𑀁𑀲𑀼𑀓𑀽𑀮𑁄 𑀘. 𑀕𑀳𑀧𑀢𑀸𑀦𑀻𑀢𑀺 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀕𑀳𑀧𑀢𑀻𑀳𑀺 𑀤𑀺𑀦𑁆𑀦𑀘𑀻𑀯𑀭𑀸𑀦𑀺 𑀥𑀸𑀭𑁂𑀳𑀻𑀢𑀺 𑀯𑀤𑀢𑀺. 𑀦𑀺𑀫𑀦𑁆𑀢𑀦𑀸𑀦𑀻𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀦𑀺𑀫𑀦𑁆𑀢𑀦𑀸𑀦𑀺 𑀪𑀼𑀜𑁆𑀚𑀸𑀳𑀻𑀢𑀺 𑀯𑀤𑀢𑀺. 𑀫𑀫 𑀘 𑀲𑀦𑁆𑀢𑀺𑀓𑁂𑀢𑀺 𑀆𑀭𑀜𑁆𑀜𑀺𑀓𑀗𑁆𑀕𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑁂𑀬𑁂𑀯 𑀯𑀲𑀸𑀳𑀻𑀢𑀺 𑀯𑀤𑀢𑀺.

𑀦𑀦𑀼 𑀘 𑀬𑀣𑀸 𑀭𑀸𑀚𑀸 𑀲𑁂𑀦𑀸𑀧𑀢𑀺𑀁 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀢𑀲𑁆𑀲 𑀭𑀸𑀚𑀽𑀧𑀝𑁆𑀞𑀸𑀦𑀸𑀤𑀺𑀦𑀸 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀆𑀭𑀸𑀥𑁂𑀦𑁆𑀢𑀲𑁆𑀲𑁂𑀯 𑀢𑀁 𑀞𑀸𑀦𑀦𑁆𑀢𑀭𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀲𑁆𑀲 𑀤𑀤𑀫𑀸𑀦𑁄 𑀅𑀬𑀼𑀢𑁆𑀢𑀁 𑀦𑀸𑀫 𑀓𑀭𑁄𑀢𑀺, 𑀏𑀯𑀁 𑀲𑀢𑁆𑀣𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀢𑁆𑀣𑀸𑀬 𑀢𑀺𑀕𑀸𑀯𑀼𑀢𑀁 𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀭𑀸𑀚𑀕𑀳𑀲𑁆𑀲 𑀘 𑀦𑀸𑀴𑀦𑁆𑀤𑀸𑀬 𑀘 𑀅𑀦𑁆𑀢𑀭𑁂 𑀩𑀳𑀼𑀧𑀼𑀢𑁆𑀢𑀓𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑁄 𑀢𑀻𑀳𑀺 𑀑𑀯𑀸𑀤𑁂𑀳𑀺 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀅𑀢𑁆𑀢𑀦𑁄 𑀘𑀻𑀯𑀭𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀣𑁂𑀭𑀁 𑀚𑀸𑀢𑀺𑀆𑀭𑀜𑁆𑀜𑀺𑀓𑀗𑁆𑀕𑀜𑁆𑀘𑁂𑀯 𑀚𑀸𑀢𑀺𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀜𑁆𑀘 𑀅𑀓𑀸𑀲𑀺, 𑀲𑁄 𑀢𑀲𑁆𑀫𑀺𑀁 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁂𑀦 𑀲𑀢𑁆𑀣𑀼 𑀘𑀺𑀢𑁆𑀢𑀁 𑀆𑀭𑀸𑀥𑁂𑀦𑁆𑀢𑀲𑁆𑀲𑁂𑀯 𑀧𑀁𑀲𑀼𑀓𑀽𑀮𑀸𑀤𑀻𑀦𑀺 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸 𑀕𑀳𑀧𑀢𑀺𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀸𑀤𑀻𑀲𑀼 𑀦𑀺𑀬𑁄𑀚𑁂𑀦𑁆𑀢𑁄 𑀅𑀬𑀼𑀢𑁆𑀢𑀁 𑀦𑀸𑀫 𑀓𑀭𑁄𑀢𑀻𑀢𑀺. 𑀦 𑀓𑀭𑁄𑀢𑀺. 𑀓𑀲𑁆𑀫𑀸? 𑀅𑀢𑁆𑀢𑀚𑁆𑀛𑀸𑀲𑀬𑀢𑁆𑀢𑀸. 𑀦 𑀳𑀺 𑀲𑀢𑁆𑀣𑀸 𑀥𑀼𑀢𑀗𑁆𑀕𑀸𑀦𑀺 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑀼𑀓𑀸𑀫𑁄, 𑀬𑀣𑀸 𑀧𑀦 𑀅𑀖𑀝𑁆𑀝𑀺𑀢𑀸 𑀪𑁂𑀭𑀺𑀆𑀤𑀬𑁄 𑀲𑀤𑁆𑀤𑀁 𑀦 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, 𑀏𑀯𑀁 𑀅𑀖𑀝𑁆𑀝𑀺𑀢𑀸 𑀏𑀯𑀭𑀽𑀧𑀸 𑀧𑀼𑀕𑁆𑀕𑀮𑀸 𑀦 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑀻𑀢𑀺 𑀦𑀤𑀸𑀧𑁂𑀢𑀼𑀓𑀸𑀫𑁄 𑀲𑀻𑀳𑀦𑀸𑀤𑀚𑁆𑀛𑀸𑀲𑀬𑁂𑀦 𑀏𑀯𑀫𑀸𑀳. 𑀣𑁂𑀭𑁄𑀧𑀺 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑁂𑀦𑁂𑀯 ‘‘𑀅𑀳𑀁 𑀔𑁄, 𑀪𑀦𑁆𑀢𑁂, 𑀤𑀻𑀖𑀭𑀢𑁆𑀢𑀁 𑀆𑀭𑀜𑁆𑀜𑀺𑀓𑁄 𑀘𑁂𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀻𑀳𑀦𑀸𑀤𑀁 𑀦𑀤𑀢𑀺.

𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀦𑁆𑀢𑀺 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑁄 𑀦𑀸𑀫 𑀆𑀭𑀜𑁆𑀜𑀺𑀓𑀲𑁆𑀲𑁂𑀯 𑀮𑀩𑁆𑀪𑀢𑀺, 𑀦𑁄 𑀕𑀸𑀫𑀦𑁆𑀢𑀯𑀸𑀲𑀺𑀦𑁄. 𑀕𑀸𑀫𑀦𑁆𑀢𑀲𑁆𑀫𑀺𑀜𑁆𑀳𑀺 𑀯𑀲𑀦𑁆𑀢𑁄 𑀤𑀸𑀭𑀓𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀅𑀲𑀧𑁆𑀧𑀸𑀬𑀭𑀽𑀧𑀸𑀦𑀺 𑀧𑀲𑁆𑀲𑀢𑀺, 𑀅𑀲𑀧𑁆𑀧𑀸𑀬𑁂 𑀲𑀤𑁆𑀤𑁂 𑀲𑀼𑀡𑀸𑀢𑀺, 𑀢𑁂𑀦𑀲𑁆𑀲 𑀅𑀦𑀪𑀺𑀭𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀆𑀭𑀜𑁆𑀜𑀺𑀓𑁄 𑀧𑀦 𑀕𑀸𑀯𑀼𑀢𑀁 𑀯𑀸 𑀅𑀟𑁆𑀠𑀬𑁄𑀚𑀦𑀁 𑀯𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀭𑀜𑁆𑀜𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀯𑀲𑀦𑁆𑀢𑁄 𑀤𑀻𑀧𑀺𑀩𑁆𑀬𑀕𑁆𑀖𑀲𑀻𑀳𑀸𑀤𑀻𑀦𑀁 𑀲𑀤𑁆𑀤𑁂 𑀲𑀼𑀡𑀸𑀢𑀺, 𑀬𑁂𑀲𑀁 𑀲𑀯𑀦𑀧𑀘𑁆𑀘𑀬𑀸 𑀅𑀫𑀸𑀦𑀼𑀲𑀺𑀓𑀸𑀲𑀯𑀦𑀭𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀲𑀼𑀜𑁆𑀜𑀸𑀕𑀸𑀭𑀁 𑀧𑀯𑀺𑀝𑁆𑀞𑀲𑁆𑀲, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀅𑀫𑀸𑀦𑀼𑀲𑀻 𑀭𑀢𑀻 𑀳𑁄𑀢𑀺, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄.

‘‘𑀬𑀢𑁄 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢𑀁. (𑀥. 𑀧. 𑁩𑁭𑁩-𑁩𑁭𑁪);

‘‘𑀧𑀼𑀭𑀢𑁄 𑀧𑀘𑁆𑀙𑀢𑁄 𑀯𑀸𑀧𑀺, 𑀅𑀧𑀭𑁄 𑀘𑁂 𑀦 𑀯𑀺𑀚𑁆𑀚𑀢𑀺;

𑀢𑀢𑁆𑀣𑁂𑀯 𑀨𑀸𑀲𑀼 𑀪𑀯𑀢𑀺, 𑀏𑀓𑀲𑁆𑀲 𑀭𑀫𑀢𑁄 𑀯𑀦𑁂’’𑀢𑀺.

𑀢𑀣𑀸 𑀧𑀺𑀡𑁆𑀟𑀧𑀸𑀢𑀺𑀓𑀲𑁆𑀲𑁂𑀯 𑀮𑀩𑁆𑀪𑀢𑀺, 𑀦𑁄 𑀅𑀧𑀺𑀡𑁆𑀟𑀧𑀸𑀢𑀺𑀓𑀲𑁆𑀲. 𑀅𑀧𑀺𑀡𑁆𑀟𑀧𑀸𑀢𑀺𑀓𑁄 𑀳𑀺 𑀅𑀓𑀸𑀮𑀘𑀸𑀭𑀻 𑀳𑁄𑀢𑀺, 𑀢𑀼𑀭𑀺𑀢𑀘𑀸𑀭𑀁 𑀕𑀘𑁆𑀙𑀢𑀺, 𑀧𑀭𑀺𑀯𑀢𑁆𑀢𑁂𑀢𑀺, 𑀧𑀮𑀺𑀩𑀼𑀤𑁆𑀥𑁄𑀯 𑀕𑀘𑁆𑀙𑀢𑀺, 𑀢𑀢𑁆𑀣 𑀘 𑀩𑀳𑀼𑀲𑀁𑀲𑀬𑁄 𑀳𑁄𑀢𑀺. 𑀧𑀺𑀡𑁆𑀟𑀧𑀸𑀢𑀺𑀓𑁄 𑀧𑀦 𑀦 𑀅𑀓𑀸𑀮𑀘𑀸𑀭𑀻 𑀳𑁄𑀢𑀺, 𑀦 𑀢𑀼𑀭𑀺𑀢𑀘𑀸𑀭𑀁 𑀕𑀘𑁆𑀙𑀢𑀺, 𑀦 𑀧𑀭𑀺𑀯𑀢𑁆𑀢𑁂𑀢𑀺, 𑀅𑀧𑀮𑀺𑀩𑀼𑀤𑁆𑀥𑁄𑀯 𑀕𑀘𑁆𑀙𑀢𑀺, 𑀢𑀢𑁆𑀣 𑀘 𑀦 𑀩𑀳𑀼𑀲𑀁𑀲𑀬𑁄 𑀳𑁄𑀢𑀺.

𑀓𑀣𑀁? 𑀅𑀧𑀺𑀡𑁆𑀟𑀧𑀸𑀢𑀺𑀓𑁄 𑀳𑀺 𑀕𑀸𑀫𑀢𑁄 𑀤𑀽𑀭𑀯𑀺𑀳𑀸𑀭𑁂 𑀯𑀲𑀫𑀸𑀦𑁄 𑀓𑀸𑀮𑀲𑁆𑀲𑁂𑀯 ‘‘𑀬𑀸𑀕𑀼𑀁 𑀯𑀸 𑀧𑀸𑀭𑀺𑀯𑀸𑀲𑀺𑀓𑀪𑀢𑁆𑀢𑀁 𑀯𑀸 𑀮𑀘𑁆𑀙𑀸𑀫𑀺, 𑀆𑀲𑀦𑀲𑀸𑀮𑀸𑀬 𑀯𑀸 𑀧𑀦 𑀉𑀤𑁆𑀤𑁂𑀲𑀪𑀢𑁆𑀢𑀸𑀤𑀻𑀲𑀼 𑀓𑀺𑀜𑁆𑀘𑀺𑀤𑁂𑀯 𑀫𑀬𑁆𑀳𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀫𑀓𑁆𑀓𑀝𑀓𑀲𑀼𑀢𑁆𑀢𑀸𑀦𑀺 𑀙𑀺𑀦𑁆𑀤𑀦𑁆𑀢𑁄 𑀲𑀬𑀺𑀢𑀕𑁄𑀭𑀽𑀧𑀸𑀦𑀺 𑀉𑀝𑁆𑀞𑀸𑀧𑁂𑀦𑁆𑀢𑁄 𑀧𑀸𑀢𑁄𑀯 𑀕𑀘𑁆𑀙𑀦𑁆𑀢𑁄 𑀅𑀓𑀸𑀮𑀘𑀸𑀭𑀻 𑀳𑁄𑀢𑀺. 𑀫𑀦𑀼𑀲𑁆𑀲𑁂 𑀔𑁂𑀢𑁆𑀢𑀓𑀫𑁆𑀫𑀸𑀤𑀻𑀦𑀁 𑀅𑀢𑁆𑀣𑀸𑀬 𑀕𑁂𑀳𑀸 𑀦𑀺𑀓𑁆𑀔𑀦𑁆𑀢𑁂𑀬𑁂𑀯 𑀲𑀫𑁆𑀧𑀸𑀧𑀼𑀡𑀺𑀢𑀼𑀁 𑀫𑀺𑀕𑀁 𑀅𑀦𑀼𑀩𑀦𑁆𑀥𑀦𑁆𑀢𑁄 𑀯𑀺𑀬 𑀯𑁂𑀕𑁂𑀦 𑀕𑀘𑁆𑀙𑀦𑁆𑀢𑁄 𑀢𑀼𑀭𑀺𑀢𑀘𑀸𑀭𑀻 𑀳𑁄𑀢𑀺. 𑀅𑀦𑁆𑀢𑀭𑀸 𑀓𑀺𑀜𑁆𑀘𑀺𑀤𑁂𑀯 𑀤𑀺𑀲𑁆𑀯𑀸 ‘‘𑀅𑀲𑀼𑀓𑀉𑀧𑀸𑀲𑀓𑁄 𑀯𑀸 𑀅𑀲𑀼𑀓𑀉𑀧𑀸𑀲𑀺𑀓𑀸 𑀯𑀸 𑀕𑁂𑀳𑁂, 𑀦𑁄 𑀕𑁂𑀳𑁂’’𑀢𑀺 𑀧𑀼𑀘𑁆𑀙𑀢𑀺, ‘‘𑀦𑁄 𑀕𑁂𑀳𑁂’’𑀢𑀺 𑀲𑀼𑀢𑁆𑀯𑀸 ‘‘𑀇𑀤𑀸𑀦𑀺 𑀓𑀼𑀢𑁄 𑀮𑀪𑀺𑀲𑁆𑀲𑀸𑀫𑀻’’𑀢𑀺? 𑀅𑀕𑁆𑀕𑀺𑀤𑀟𑁆𑀠𑁄 𑀯𑀺𑀬 𑀧𑀯𑁂𑀥𑀢𑀺, 𑀲𑀬𑀁 𑀧𑀘𑁆𑀙𑀺𑀫𑀤𑀺𑀲𑀁 𑀕𑀦𑁆𑀢𑀼𑀓𑀸𑀫𑁄 𑀧𑀸𑀘𑀻𑀦𑀤𑀺𑀲𑀸𑀬 𑀲𑀮𑀸𑀓𑀁 𑀮𑀪𑀺𑀢𑁆𑀯𑀸 𑀅𑀜𑁆𑀜𑀁 𑀧𑀘𑁆𑀙𑀺𑀫𑀤𑀺𑀲𑀸𑀬 𑀮𑀤𑁆𑀥𑀲𑀮𑀸𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀳𑀁 𑀧𑀘𑁆𑀙𑀺𑀫𑀤𑀺𑀲𑀁 𑀕𑀫𑀺𑀲𑁆𑀲𑀸𑀫𑀺, 𑀫𑀫 𑀲𑀮𑀸𑀓𑀁 𑀢𑀼𑀫𑁆𑀳𑁂 𑀕𑀡𑁆𑀳𑀣, 𑀢𑀼𑀫𑁆𑀳𑀸𑀓𑀁 𑀲𑀮𑀸𑀓𑀁 𑀫𑀬𑁆𑀳𑀁 𑀤𑁂𑀣𑀸’’𑀢𑀺 𑀲𑀮𑀸𑀓𑀁 𑀧𑀭𑀺𑀯𑀢𑁆𑀢𑁂𑀢𑀺. 𑀏𑀓𑀁 𑀯𑀸 𑀧𑀦 𑀲𑀮𑀸𑀓𑀪𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 ‘‘𑀅𑀧𑀭𑀲𑁆𑀲𑀸𑀧𑀺 𑀲𑀮𑀸𑀓𑀪𑀢𑁆𑀢𑀲𑁆𑀲 𑀧𑀢𑁆𑀢𑀁 𑀤𑁂𑀣𑀸’’𑀢𑀺 𑀫𑀦𑀼𑀲𑁆𑀲𑁂𑀳𑀺 𑀯𑀼𑀢𑁆𑀢𑁂, ‘‘𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀁 𑀤𑁂𑀣, 𑀅𑀳𑀁 𑀫𑀬𑁆𑀳𑀁 𑀧𑀢𑁆𑀢𑁂 𑀪𑀢𑁆𑀢𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀁 𑀤𑀲𑁆𑀲𑀸𑀫𑀻’’𑀢𑀺 𑀅𑀜𑁆𑀜𑀲𑁆𑀲 𑀧𑀢𑁆𑀢𑀁 𑀤𑀸𑀧𑁂𑀢𑁆𑀯𑀸 𑀪𑀢𑁆𑀢𑁂 𑀆𑀳𑀝𑁂 𑀅𑀢𑁆𑀢𑀦𑁄 𑀧𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀢𑁆𑀢𑀁 𑀧𑀝𑀺𑀤𑁂𑀦𑁆𑀢𑁄 𑀧𑀢𑁆𑀢𑀁 𑀧𑀭𑀺𑀯𑀢𑁆𑀢𑁂𑀢𑀺 𑀦𑀸𑀫. 𑀯𑀺𑀳𑀸𑀭𑁂 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀬𑁄 𑀫𑀳𑀸𑀤𑀸𑀦𑀁 𑀤𑁂𑀦𑁆𑀢𑀺, 𑀇𑀫𑀺𑀦𑀸 𑀘 𑀪𑀺𑀬𑁆𑀬𑁄 𑀤𑀽𑀭𑀕𑀸𑀫𑁂 𑀲𑀮𑀸𑀓𑀸 𑀮𑀤𑁆𑀥𑀸, 𑀢𑀢𑁆𑀣 𑀅𑀕𑀘𑁆𑀙𑀦𑁆𑀢𑁄 𑀧𑀼𑀦 𑀲𑀢𑁆𑀢𑀸𑀳𑀁 𑀲𑀮𑀸𑀓𑀁 𑀦 𑀮𑀪𑀢𑀻𑀢𑀺 𑀅𑀮𑀸𑀪𑀪𑀬𑁂𑀦 𑀕𑀘𑁆𑀙𑀢𑀺, 𑀏𑀯𑀁 𑀕𑀘𑁆𑀙𑀦𑁆𑀢𑁄 𑀧𑀮𑀺𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀕𑀘𑁆𑀙𑀢𑀺 𑀦𑀸𑀫. 𑀬𑀲𑁆𑀲 𑀘𑁂𑀲 𑀲𑀮𑀸𑀓𑀪𑀢𑁆𑀢𑀸𑀤𑀺𑀦𑁄 𑀅𑀢𑁆𑀣𑀸𑀬 𑀕𑀘𑁆𑀙𑀢𑀺, ‘‘𑀢𑀁 𑀤𑀲𑁆𑀲𑀦𑁆𑀢𑀺 𑀦𑀼 𑀔𑁄 𑀫𑁂, 𑀉𑀤𑀸𑀳𑀼 𑀦 𑀤𑀲𑁆𑀲𑀦𑁆𑀢𑀺, 𑀧𑀡𑀻𑀢𑀁 𑀦𑀼 𑀔𑁄 𑀤𑀲𑁆𑀲𑀦𑁆𑀢𑀺, 𑀉𑀤𑀸𑀳𑀼 𑀮𑀽𑀔𑀁, 𑀣𑁄𑀓𑀁 𑀦𑀼 𑀔𑁄, 𑀉𑀤𑀸𑀳𑀼 𑀩𑀳𑀼𑀓𑀁, 𑀲𑀻𑀢𑀮𑀁 𑀦𑀼 𑀔𑁄, 𑀉𑀤𑀸𑀳𑀼 𑀉𑀡𑁆𑀳’’𑀦𑁆𑀢𑀺 𑀏𑀯𑀁 𑀢𑀢𑁆𑀣 𑀘 𑀩𑀳𑀼𑀲𑀁𑀲𑀬𑁄 𑀳𑁄𑀢𑀺.

𑀧𑀺𑀡𑁆𑀟𑀧𑀸𑀢𑀺𑀓𑁄 𑀧𑀦 𑀓𑀸𑀮𑀲𑁆𑀲𑁂𑀯 𑀯𑀼𑀝𑁆𑀞𑀸𑀬 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀢𑁆𑀯𑀸 𑀲𑀭𑀻𑀭𑀁 𑀧𑀝𑀺𑀚𑀕𑁆𑀕𑀺𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀢𑁆𑀯𑀸 𑀓𑀸𑀮𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀉𑀴𑀼𑀗𑁆𑀓𑀪𑀺𑀓𑁆𑀔𑀸𑀤𑀻𑀦𑀺 𑀤𑀸𑀢𑀼𑀁 𑀧𑀳𑁄𑀦𑀓𑀓𑀸𑀮𑁂 𑀕𑀘𑁆𑀙𑀢𑀻𑀢𑀺 𑀦 𑀅𑀓𑀸𑀮𑀘𑀸𑀭𑀻 𑀳𑁄𑀢𑀺, 𑀏𑀓𑁂𑀓𑀁 𑀧𑀤𑀯𑀸𑀭𑀁 𑀙 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑁆𑀢𑁄 𑀕𑀘𑁆𑀙𑀢𑀻𑀢𑀺 𑀦 𑀢𑀼𑀭𑀺𑀢𑀘𑀸𑀭𑀻 𑀳𑁄𑀢𑀺, 𑀅𑀢𑁆𑀢𑀦𑁄 𑀕𑀭𑀼𑀪𑀸𑀯𑁂𑀦 ‘‘𑀅𑀲𑀼𑀓𑁄 𑀕𑁂𑀳𑁂, 𑀦 𑀕𑁂𑀳𑁂’’𑀢𑀺 𑀦 𑀧𑀼𑀘𑁆𑀙𑀢𑀺, 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺𑀬𑁂𑀯 𑀦 𑀕𑀡𑁆𑀳𑀸𑀢𑀺. 𑀅𑀕𑀡𑁆𑀳𑀦𑁆𑀢𑁄 𑀓𑀺𑀁 𑀧𑀭𑀺𑀯𑀢𑁆𑀢𑁂𑀲𑁆𑀲𑀢𑀺? 𑀦 𑀅𑀜𑁆𑀜𑀲𑁆𑀲 𑀯𑀲𑁂𑀦 𑀧𑀮𑀺𑀩𑀼𑀤𑁆𑀥𑁄𑀯 𑀳𑁄𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀬𑀣𑀸𑀭𑀼𑀘𑀺 𑀕𑀘𑁆𑀙𑀢𑀺, 𑀇𑀢𑀭𑁄 𑀯𑀺𑀬 𑀦 𑀩𑀳𑀼𑀲𑀁𑀲𑀬𑁄 𑀳𑁄𑀢𑀺. 𑀏𑀓𑀲𑁆𑀫𑀺𑀁 𑀕𑀸𑀫𑁂 𑀯𑀸 𑀯𑀻𑀣𑀺𑀬𑀸 𑀯𑀸 𑀅𑀮𑀪𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀘𑀭𑀢𑀺. 𑀢𑀲𑁆𑀫𑀺𑀫𑁆𑀧𑀺 𑀅𑀮𑀪𑀺𑀢𑁆𑀯𑀸 𑀅𑀜𑁆𑀜𑀢𑁆𑀣 𑀘𑀭𑀦𑁆𑀢𑁄 𑀫𑀺𑀲𑁆𑀲𑀓𑁄𑀤𑀦𑀁 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀅𑀫𑀢𑀁 𑀯𑀺𑀬 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀕𑀘𑁆𑀙𑀢𑀺.

𑀧𑀁𑀲𑀼𑀓𑀽𑀮𑀺𑀓𑀲𑁆𑀲𑁂𑀯 𑀮𑀩𑁆𑀪𑀢𑀺, 𑀦𑁄 𑀅𑀧𑀁𑀲𑀼𑀓𑀽𑀮𑀺𑀓𑀲𑁆𑀲. 𑀅𑀧𑀁𑀲𑀼𑀓𑀽𑀮𑀺𑀓𑁄 𑀳𑀺 𑀯𑀲𑁆𑀲𑀸𑀯𑀸𑀲𑀺𑀓𑀁 𑀧𑀭𑀺𑀬𑁂𑀲𑀦𑁆𑀢𑁄 𑀘𑀭𑀢𑀺, 𑀦 𑀲𑁂𑀦𑀸𑀲𑀦𑀲𑀧𑁆𑀧𑀸𑀬𑀁 𑀧𑀭𑀺𑀬𑁂𑀲𑀢𑀺. 𑀧𑀁𑀲𑀼𑀓𑀽𑀮𑀺𑀓𑁄 𑀧𑀦 𑀦 𑀯𑀲𑁆𑀲𑀸𑀯𑀸𑀲𑀺𑀓𑀁 𑀧𑀭𑀺𑀬𑁂𑀲𑀦𑁆𑀢𑁄 𑀘𑀭𑀢𑀺, 𑀲𑁂𑀦𑀸𑀲𑀦𑀲𑀧𑁆𑀧𑀸𑀬𑀫𑁂𑀯 𑀧𑀭𑀺𑀬𑁂𑀲𑀢𑀺. 𑀢𑁂𑀘𑀻𑀯𑀭𑀺𑀓𑀲𑁆𑀲𑁂𑀯 𑀮𑀩𑁆𑀪𑀢𑀺, 𑀦 𑀇𑀢𑀭𑀲𑁆𑀲. 𑀅𑀢𑁂𑀘𑀻𑀯𑀭𑀺𑀓𑁄 𑀳𑀺 𑀩𑀳𑀼𑀪𑀡𑁆𑀟𑁄 𑀩𑀳𑀼𑀧𑀭𑀺𑀓𑁆𑀔𑀸𑀭𑁄 𑀳𑁄𑀢𑀺, 𑀢𑁂𑀦𑀲𑁆𑀲 𑀨𑀸𑀲𑀼𑀯𑀺𑀳𑀸𑀭𑁄 𑀦𑀢𑁆𑀣𑀺. 𑀅𑀧𑁆𑀧𑀺𑀘𑁆𑀙𑀸𑀤𑀻𑀦𑀜𑁆𑀘𑁂𑀯 𑀮𑀩𑁆𑀪𑀢𑀺, 𑀦 𑀇𑀢𑀭𑁂𑀲𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀢𑁆𑀢𑀦𑁄 𑀘 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀲𑀫𑁆𑀧𑀲𑁆𑀲𑀫𑀸𑀦𑁄’’𑀢𑀺. 𑀧𑀜𑁆𑀘𑀫𑀁.

𑁬. 𑀑𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁯. 𑀙𑀝𑁆𑀞𑁂 𑀅𑀳𑀁 𑀯𑀸𑀢𑀺 𑀓𑀲𑁆𑀫𑀸 𑀆𑀳? 𑀣𑁂𑀭𑀁 𑀅𑀢𑁆𑀢𑀦𑁄 𑀞𑀸𑀦𑁂 𑀞𑀧𑀦𑀢𑁆𑀣𑀁. 𑀓𑀺𑀁 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀦𑀢𑁆𑀣𑀻𑀢𑀺? 𑀅𑀢𑁆𑀣𑀺. 𑀏𑀯𑀁 𑀧𑀦𑀲𑁆𑀲 𑀅𑀳𑁄𑀲𑀺 ‘‘𑀇𑀫𑁂 𑀦 𑀘𑀺𑀭𑀁 𑀞𑀲𑁆𑀲𑀦𑁆𑀢𑀺, 𑀓𑀲𑁆𑀲𑀧𑁄 𑀧𑀦 𑀯𑀻𑀲𑀯𑀲𑁆𑀲𑀲𑀢𑀸𑀬𑀼𑀓𑁄, 𑀲𑁄 𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀢𑁆𑀢𑀧𑀡𑁆𑀡𑀺𑀕𑀼𑀳𑀸𑀬𑀁 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑀁 𑀓𑀢𑁆𑀯𑀸 𑀫𑀫 𑀲𑀸𑀲𑀦𑀁 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀧𑀭𑀺𑀫𑀸𑀡𑀓𑀸𑀮𑀧𑀯𑀢𑁆𑀢𑀦𑀓𑀁 𑀓𑀭𑀺𑀲𑁆𑀲𑀢𑀺, 𑀅𑀢𑁆𑀢𑀦𑁄 𑀢𑀁 𑀞𑀸𑀦𑁂 𑀞𑀧𑁂𑀫𑀺, 𑀏𑀯𑀁 𑀪𑀺𑀓𑁆𑀔𑀽 𑀓𑀲𑁆𑀲𑀧𑀲𑁆𑀲 𑀲𑀼𑀲𑁆𑀲𑀽𑀲𑀺𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀤𑀼𑀩𑁆𑀩𑀘𑀸𑀢𑀺 𑀤𑀼𑀓𑁆𑀔𑁂𑀦 𑀯𑀢𑁆𑀢𑀩𑁆𑀩𑀸. 𑀤𑁄𑀯𑀘𑀲𑁆𑀲𑀓𑀭𑀡𑁂𑀳𑀻𑀢𑀺 𑀤𑀼𑀩𑁆𑀩𑀘𑀪𑀸𑀯𑀓𑀭𑀡𑁂𑀳𑀺. 𑀅𑀧𑁆𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀺𑀦𑁄𑀢𑀺 𑀅𑀦𑀼𑀲𑀸𑀲𑀦𑀺𑀁 𑀲𑀼𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀦 𑀕𑀡𑁆𑀳𑀦𑁆𑀢𑀺 𑀬𑀣𑀸𑀦𑀼𑀲𑀺𑀝𑁆𑀞𑀁 𑀦 𑀧𑀝𑀺𑀧𑀚𑁆𑀚𑀦𑁆𑀢𑀺, 𑀅𑀧𑁆𑀧𑀝𑀺𑀧𑀚𑁆𑀚𑀦𑁆𑀢𑀸 𑀯𑀸𑀫𑀕𑀸𑀳𑀺𑀦𑁄 𑀦𑀸𑀫 𑀚𑀸𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀘𑁆𑀘𑀸𑀯𑀤𑀦𑁆𑀢𑁂𑀢𑀺 𑀅𑀢𑀺𑀓𑁆𑀓𑀫𑁆𑀫 𑀯𑀤𑀦𑁆𑀢𑁂, 𑀲𑀼𑀢𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀅𑀢𑀺𑀯𑀺𑀬 𑀯𑀸𑀤𑀁 𑀓𑀭𑁄𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀓𑁄 𑀩𑀳𑀼𑀢𑀭𑀁 𑀪𑀸𑀲𑀺𑀲𑁆𑀲𑀢𑀻𑀢𑀺 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑀓𑁄 𑀩𑀳𑀼𑀁 𑀪𑀸𑀲𑀺𑀲𑁆𑀲𑀢𑀺, 𑀓𑀺𑀁 𑀢𑁆𑀯𑀁, 𑀉𑀤𑀸𑀳𑀼 𑀅𑀳𑀦𑁆𑀢𑀺? 𑀓𑁄 𑀲𑀼𑀦𑁆𑀤𑀭𑀢𑀭𑀦𑁆𑀢𑀺, 𑀏𑀓𑁄 𑀩𑀳𑀼𑀁 𑀪𑀸𑀲𑀦𑁆𑀢𑁄 𑀅𑀲𑀳𑀺𑀢𑀁 𑀅𑀫𑀥𑀼𑀭𑀁 𑀪𑀸𑀲𑀢𑀺, 𑀏𑀓𑁄 𑀲𑀳𑀺𑀢𑀁 𑀫𑀥𑀼𑀭𑀁, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀓𑁄 𑀲𑀼𑀦𑁆𑀤𑀭𑀢𑀭’’𑀦𑁆𑀢𑀺? 𑀏𑀓𑁄 𑀧𑀦 𑀩𑀳𑀼𑀜𑁆𑀘 𑀲𑀼𑀦𑁆𑀤𑀭𑀜𑁆𑀘 𑀓𑀣𑁂𑀦𑁆𑀢𑁄 𑀘𑀺𑀭𑀁 𑀦 𑀪𑀸𑀲𑀢𑀺, 𑀮𑀳𑀼𑀜𑁆𑀜𑁂𑀯 𑀉𑀝𑁆𑀞𑀸𑀢𑀺, 𑀏𑀓𑁄 𑀅𑀤𑁆𑀥𑀸𑀦𑀁 𑀧𑀸𑀧𑁂𑀢𑀺, 𑀢𑀁 𑀲𑀦𑁆𑀥𑀸𑀬𑀸𑀳 ‘‘𑀓𑁄 𑀘𑀺𑀭𑀢𑀭’’𑀦𑁆𑀢𑀺? 𑀙𑀝𑁆𑀞𑀁.

𑁭. 𑀤𑀼𑀢𑀺𑀬𑀑𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁦. 𑀲𑀢𑁆𑀢𑀫𑁂 𑀲𑀤𑁆𑀥𑀸𑀢𑀺 𑀑𑀓𑀧𑁆𑀧𑀦𑀲𑀤𑁆𑀥𑀸. 𑀯𑀻𑀭𑀺𑀬𑀦𑁆𑀢𑀺 𑀓𑀸𑀬𑀺𑀓𑀘𑁂𑀢𑀲𑀺𑀓𑀁 𑀯𑀻𑀭𑀺𑀬𑀁. 𑀧𑀜𑁆𑀜𑀸𑀢𑀺 𑀓𑀼𑀲𑀮𑀥𑀫𑁆𑀫𑀚𑀸𑀦𑀦𑀧𑀜𑁆𑀜𑀸. 𑀦 𑀲𑀦𑁆𑀢𑀺 𑀪𑀺𑀓𑁆𑀔𑀽 𑀑𑀯𑀸𑀤𑀓𑀸𑀢𑀺 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀑𑀯𑀸𑀤𑀓𑀸 𑀅𑀦𑀼𑀲𑀸𑀲𑀓𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀸 𑀦𑀢𑁆𑀣𑀻𑀢𑀺 𑀇𑀤𑀁, 𑀪𑀦𑁆𑀢𑁂, 𑀧𑀭𑀺𑀳𑀸𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀢𑁆𑀢𑀫𑀁.

𑁮. 𑀢𑀢𑀺𑀬𑀑𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁧. 𑀅𑀝𑁆𑀞𑀫𑁂 𑀢𑀣𑀸 𑀳𑀺 𑀧𑀦𑀸𑀢𑀺 𑀧𑀼𑀩𑁆𑀩𑁂 𑀲𑁄𑀯𑀘𑀲𑁆𑀲𑀢𑀸𑀬, 𑀏𑀢𑀭𑀳𑀺 𑀘 𑀤𑁄𑀯𑀘𑀲𑁆𑀲𑀢𑀸𑀬 𑀓𑀸𑀭𑀡𑀧𑀝𑁆𑀞𑀧𑀦𑁂 𑀦𑀺𑀧𑀸𑀢𑁄. 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀣𑁂𑀭𑁂𑀲𑀼. 𑀓𑁄 𑀦𑀸𑀫𑀸𑀬𑀁 𑀪𑀺𑀓𑁆𑀔𑀽𑀢𑀺 𑀓𑁄 𑀦𑀸𑀫𑁄 𑀅𑀬𑀁 𑀪𑀺𑀓𑁆𑀔𑀼? 𑀓𑀺𑀁 𑀢𑀺𑀲𑁆𑀲𑀢𑁆𑀣𑁂𑀭𑁄 𑀓𑀺𑀁 𑀦𑀸𑀕𑀢𑁆𑀣𑁂𑀭𑁄𑀢𑀺? 𑀢𑀢𑁆𑀭𑀸𑀢𑀺 𑀢𑀲𑁆𑀫𑀺𑀁 𑀏𑀯𑀁 𑀲𑀓𑁆𑀓𑀸𑀭𑁂 𑀓𑀬𑀺𑀭𑀫𑀸𑀦𑁂. 𑀢𑀣𑀢𑁆𑀢𑀸𑀬𑀸𑀢𑀺 𑀢𑀣𑀸𑀪𑀸𑀯𑀸𑀬, 𑀆𑀭𑀜𑁆𑀜𑀺𑀓𑀸𑀤𑀺𑀪𑀸𑀯𑀸𑀬𑀸𑀢𑀺 𑀅𑀢𑁆𑀣𑁄. 𑀲𑀩𑁆𑀭𑀳𑁆𑀫𑀘𑀸𑀭𑀺𑀓𑀸𑀫𑁄𑀢𑀺 ‘‘𑀇𑀫𑁂 𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀘𑀭𑀦𑁆𑀢𑀽’’𑀢𑀺 𑀏𑀯𑀁 𑀓𑀸𑀫𑁂𑀢𑀺 𑀇𑀘𑁆𑀙𑀢𑀺 𑀧𑀢𑁆𑀣𑁂𑀢𑀻𑀢𑀺 𑀲𑀩𑁆𑀭𑀳𑁆𑀫𑀘𑀸𑀭𑀺𑀓𑀸𑀫𑁄. 𑀢𑀣𑀢𑁆𑀢𑀸𑀬𑀸𑀢𑀺 𑀮𑀸𑀪𑀲𑀓𑁆𑀓𑀸𑀭𑀦𑀺𑀩𑁆𑀩𑀢𑁆𑀢𑀦𑀢𑁆𑀣𑀸𑀬. 𑀩𑁆𑀭𑀳𑁆𑀫𑀘𑀸𑀭𑀼𑀧𑀤𑁆𑀤𑀯𑁂𑀦𑀸𑀢𑀺 𑀬𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀅𑀥𑀺𑀫𑀢𑁆𑀢𑀘𑁆𑀙𑀦𑁆𑀤𑀭𑀸𑀕𑁄 𑀉𑀧𑀤𑁆𑀤𑀯𑁄𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀦 𑀉𑀧𑀤𑁆𑀤𑀼𑀢𑀸. 𑀅𑀪𑀺𑀧𑀢𑁆𑀣𑀦𑀸𑀢𑀺 𑀅𑀥𑀺𑀫𑀢𑁆𑀢𑀧𑀢𑁆𑀣𑀦𑀸. 𑀩𑁆𑀭𑀳𑁆𑀫𑀘𑀸𑀭𑀺𑀅𑀪𑀺𑀧𑀢𑁆𑀣𑀦𑁂𑀦𑀸𑀢𑀺 𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀅𑀥𑀺𑀫𑀢𑁆𑀢𑀧𑀢𑁆𑀣𑀦𑀸𑀲𑀗𑁆𑀔𑀸𑀢𑁂𑀦 𑀘𑀢𑀼𑀧𑀘𑁆𑀘𑀬𑀪𑀸𑀯𑁂𑀦. 𑀅𑀝𑁆𑀞𑀫𑀁.

𑁯. 𑀛𑀸𑀦𑀸𑀪𑀺𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁨. 𑀦𑀯𑀫𑁂 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫𑀻𑀢𑀺 𑀬𑀸𑀯𑀤𑁂𑀯 𑀇𑀘𑁆𑀙𑀸𑀫𑀺. 𑀬𑀸𑀦𑀺 𑀧𑀦 𑀇𑀢𑁄 𑀧𑀭𑀁 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀘𑀢𑁆𑀢𑀸𑀭𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺, 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀢𑀺𑀆𑀤𑀺𑀦𑀸 𑀦𑀬𑁂𑀦 𑀘𑀢𑀲𑁆𑀲𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄, 𑀲𑀩𑁆𑀩𑀲𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀦𑁆𑀢𑀺 𑀏𑀯𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺, 𑀅𑀦𑁂𑀓𑀯𑀺𑀳𑀺𑀢𑀁 𑀇𑀤𑁆𑀥𑀺𑀯𑀺𑀥𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀜𑁆𑀘 𑀮𑁄𑀓𑀺𑀓𑀸𑀪𑀺𑀜𑁆𑀜𑀸 𑀘 𑀯𑀼𑀢𑁆𑀢𑀸. 𑀢𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀅𑀦𑀼𑀧𑀤𑀯𑀡𑁆𑀡𑀦𑀸𑀬 𑀘𑁂𑀯 𑀪𑀸𑀯𑀦𑀸𑀯𑀺𑀥𑀸𑀦𑁂𑀦 𑀘 𑀲𑀤𑁆𑀥𑀺𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁬𑁯) 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀙𑀴𑀪𑀺𑀜𑁆𑀜𑀸𑀬 𑀧𑀦 𑀆𑀲𑀯𑀸𑀦𑀁 𑀔𑀬𑀸𑀢𑀺 𑀆𑀲𑀯𑀸𑀦𑀁 𑀔𑀬𑁂𑀦. 𑀅𑀦𑀸𑀲𑀯𑀦𑁆𑀢𑀺 𑀆𑀲𑀯𑀸𑀦𑀁 𑀅𑀧𑀘𑁆𑀘𑀬𑀪𑀽𑀢𑀁. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀅𑀭𑀳𑀢𑁆𑀢𑀨𑀮𑀲𑀫𑀸𑀥𑀺𑀁. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀅𑀭𑀳𑀢𑁆𑀢𑀨𑀮𑀧𑀜𑁆𑀜𑀁. 𑀦𑀯𑀫𑀁.

𑁧𑁦. 𑀉𑀧𑀲𑁆𑀲𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁩. 𑀤𑀲𑀫𑁂 𑀆𑀬𑀸𑀫, 𑀪𑀦𑁆𑀢𑁂𑀢𑀺 𑀓𑀲𑁆𑀫𑀸 𑀪𑀺𑀓𑁆𑀔𑀼𑀦𑀻𑀉𑀧𑀲𑁆𑀲𑀬𑀕𑀫𑀦𑀁 𑀬𑀸𑀘𑀢𑀺? 𑀦 𑀮𑀸𑀪𑀲𑀓𑁆𑀓𑀸𑀭𑀳𑁂𑀢𑀼, 𑀓𑀫𑁆𑀫𑀝𑁆𑀞𑀸𑀦𑀢𑁆𑀣𑀺𑀓𑀸 𑀧𑀦𑁂𑀢𑁆𑀣 𑀪𑀺𑀓𑁆𑀔𑀼𑀦𑀺𑀬𑁄 𑀅𑀢𑁆𑀣𑀺, 𑀢𑀸 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀸𑀧𑁂𑀲𑁆𑀲𑀸𑀫𑀻𑀢𑀺 𑀬𑀸𑀘𑀢𑀺. 𑀦𑀦𑀼 𑀘 𑀲𑁄 𑀲𑀬𑀫𑁆𑀧𑀺 𑀢𑁂𑀧𑀺𑀝𑀓𑁄 𑀩𑀳𑀼𑀲𑁆𑀲𑀼𑀢𑁄, 𑀓𑀺𑀁 𑀲𑀬𑀁 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺? 𑀦𑁄 𑀦 𑀲𑀓𑁆𑀓𑁄𑀢𑀺. 𑀩𑀼𑀤𑁆𑀥𑀧𑀝𑀺𑀪𑀸𑀕𑀲𑁆𑀲 𑀧𑀦 𑀲𑀸𑀯𑀓𑀲𑁆𑀲 𑀓𑀣𑀁 𑀲𑀤𑁆𑀥𑀸𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀻𑀢𑀺 𑀬𑀸𑀘𑀢𑀺. 𑀩𑀳𑀼𑀓𑀺𑀘𑁆𑀘𑁄 𑀢𑁆𑀯𑀁 𑀩𑀳𑀼𑀓𑀭𑀡𑀻𑀬𑁄𑀢𑀺 𑀓𑀺𑀁 𑀣𑁂𑀭𑁄 𑀦𑀯𑀓𑀫𑁆𑀫𑀸𑀤𑀺𑀧𑀲𑀼𑀢𑁄, 𑀬𑁂𑀦 𑀦𑀁 𑀏𑀯𑀫𑀸𑀳𑀸𑀢𑀺? 𑀦𑁄, 𑀲𑀢𑁆𑀣𑀭𑀺 𑀧𑀦 𑀧𑀭𑀺𑀦𑀺𑀩𑁆𑀩𑀼𑀢𑁂 𑀘𑀢𑀲𑁆𑀲𑁄 𑀧𑀭𑀺𑀲𑀸 𑀆𑀦𑀦𑁆𑀤𑀢𑁆𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀇𑀤𑀸𑀦𑀺 𑀓𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀘𑀭𑀣, 𑀓𑀲𑁆𑀲 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀣, 𑀓𑀲𑁆𑀲 𑀫𑀼𑀔𑁄𑀤𑀓𑀁 𑀤𑁂𑀣𑀸’’𑀢𑀺 𑀭𑁄𑀤𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑀺. 𑀣𑁂𑀭𑁄 ‘‘𑀅𑀦𑀺𑀘𑁆𑀘𑀸 𑀲𑀗𑁆𑀔𑀸𑀭𑀸, 𑀯𑀼𑀤𑁆𑀥𑀲𑀭𑀻𑀭𑁂𑀧𑀺 𑀦𑀺𑀮𑁆𑀮𑀚𑁆𑀚𑁄𑀯 𑀫𑀘𑁆𑀘𑀼𑀭𑀸𑀚𑀸 𑀧𑀳𑀭𑀺. 𑀏𑀲𑀸 𑀲𑀗𑁆𑀔𑀸𑀭𑀸𑀦𑀁 𑀥𑀫𑁆𑀫𑀢𑀸, 𑀫𑀸 𑀲𑁄𑀘𑀺𑀢𑁆𑀣, 𑀫𑀸 𑀧𑀭𑀺𑀤𑁂𑀯𑀺𑀢𑁆𑀣𑀸’’𑀢𑀺 𑀧𑀭𑀺𑀲𑀁 𑀲𑀜𑁆𑀜𑀸𑀧𑁂𑀢𑀺. 𑀇𑀤𑀫𑀲𑁆𑀲 𑀩𑀳𑀼𑀓𑀺𑀘𑁆𑀘𑀁. 𑀢𑀁 𑀲𑀦𑁆𑀥𑀸𑀬 𑀣𑁂𑀭𑁄 𑀏𑀯𑀫𑀸𑀳. 𑀲𑀦𑁆𑀤𑀲𑁆𑀲𑁂𑀲𑀻𑀢𑀺 𑀧𑀝𑀺𑀧𑀢𑁆𑀢𑀺𑀕𑀼𑀡𑀁 𑀤𑀲𑁆𑀲𑁂𑀲𑀺. 𑀲𑀫𑀸𑀤𑀧𑁂𑀲𑀻𑀢𑀺 𑀕𑀡𑁆𑀳𑀸𑀧𑁂𑀲𑀺. 𑀲𑀫𑀼𑀢𑁆𑀢𑁂𑀚𑁂𑀲𑀻𑀢𑀺 𑀲𑀫𑀼𑀲𑁆𑀲𑀸𑀳𑁂𑀲𑀺. 𑀲𑀫𑁆𑀧𑀳𑀁𑀲𑁂𑀲𑀻𑀢𑀺 𑀧𑀝𑀺𑀮𑀤𑁆𑀥𑀕𑀼𑀡𑁂𑀦 𑀫𑁄𑀤𑀸𑀧𑁂𑀲𑀺.

𑀣𑀼𑀮𑁆𑀮𑀢𑀺𑀲𑁆𑀲𑀸𑀢𑀺 𑀲𑀭𑀻𑀭𑁂𑀦 𑀣𑀽𑀮𑀸, 𑀦𑀸𑀫𑁂𑀦 𑀢𑀺𑀲𑁆𑀲𑀸. 𑀯𑁂𑀤𑁂𑀳𑀫𑀼𑀦𑀺𑀦𑁄𑀢𑀺 𑀧𑀡𑁆𑀟𑀺𑀢𑀫𑀼𑀦𑀺𑀦𑁄. 𑀧𑀡𑁆𑀟𑀺𑀢𑁄 𑀳𑀺 𑀜𑀸𑀡𑀲𑀗𑁆𑀔𑀸𑀢𑁂𑀦 𑀯𑁂𑀤𑁂𑀦 𑀈𑀳𑀢𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀭𑁄𑀢𑀺, 𑀢𑀲𑁆𑀫𑀸 ‘‘𑀯𑁂𑀤𑁂𑀳𑁄’’𑀢𑀺 𑀯𑀼𑀘𑁆𑀘𑀢𑀺. 𑀯𑁂𑀤𑁂𑀳𑁄 𑀘 𑀲𑁄 𑀫𑀼𑀦𑀺 𑀘𑀸𑀢𑀺, 𑀯𑁂𑀤𑁂𑀳𑀫𑀼𑀦𑀺. 𑀥𑀫𑁆𑀫𑀁 𑀪𑀸𑀲𑀺𑀢𑀩𑁆𑀩𑀁 𑀫𑀜𑁆𑀜𑀢𑀻𑀢𑀺 𑀢𑀺𑀧𑀺𑀝𑀓𑀥𑀭𑀲𑁆𑀲 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑀲𑁆𑀲 𑀲𑀫𑁆𑀫𑀼𑀔𑁂 𑀲𑀬𑀁 𑀅𑀭𑀜𑁆𑀜𑀯𑀸𑀲𑀻 𑀧𑀁𑀲𑀼𑀓𑀽𑀮𑀺𑀓𑁄 𑀲𑀫𑀸𑀦𑁄 ‘‘𑀥𑀫𑁆𑀫𑀓𑀣𑀺𑀓𑁄 𑀅𑀳’’𑀦𑁆𑀢𑀺 𑀥𑀫𑁆𑀫𑀁 𑀪𑀸𑀲𑀺𑀢𑀩𑁆𑀩𑀁 𑀫𑀜𑁆𑀜𑀢𑀺. 𑀇𑀤𑀁 𑀓𑀺𑀁 𑀧𑀦, 𑀓𑀣𑀁 𑀧𑀦𑀸𑀢𑀺? 𑀅𑀯𑀚𑀸𑀦𑀫𑀸𑀦𑀸 𑀪𑀡𑀢𑀺. 𑀅𑀲𑁆𑀲𑁄𑀲𑀻𑀢𑀺 𑀅𑀜𑁆𑀜𑁂𑀦 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑀺𑀢𑀯𑀲𑁂𑀦 𑀅𑀲𑁆𑀲𑁄𑀲𑀺. 𑀆𑀕𑀫𑁂𑀳𑀺 𑀢𑁆𑀯𑀁, 𑀆𑀯𑀼𑀲𑁄𑀢𑀺 𑀢𑀺𑀝𑁆𑀞 𑀢𑁆𑀯𑀁, 𑀆𑀯𑀼𑀲𑁄. 𑀫𑀸 𑀢𑁂 𑀲𑀗𑁆𑀖𑁄 𑀉𑀢𑁆𑀢𑀭𑀺 𑀉𑀧𑀧𑀭𑀺𑀓𑁆𑀔𑀻𑀢𑀺 𑀫𑀸 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀢𑀺𑀭𑁂𑀓𑀑𑀓𑀸𑀲𑁂 𑀢𑀁 𑀉𑀧𑀧𑀭𑀺𑀓𑁆𑀔𑀻𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀆𑀦𑀦𑁆𑀤𑁂𑀦 𑀩𑀼𑀤𑁆𑀥𑀧𑀝𑀺𑀪𑀸𑀕𑁄 𑀲𑀸𑀯𑀓𑁄 𑀯𑀸𑀭𑀺𑀢𑁄, 𑀏𑀓𑀸 𑀪𑀺𑀓𑁆𑀔𑀼𑀦𑀻 𑀦 𑀯𑀸𑀭𑀺𑀢𑀸, 𑀢𑀸𑀬 𑀲𑀤𑁆𑀥𑀺𑀁 𑀲𑀦𑁆𑀣𑀯𑁄 𑀯𑀸 𑀲𑀺𑀦𑁂𑀳𑁄 𑀯𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀫𑀸 𑀢𑀁 𑀲𑀗𑁆𑀖𑁄 𑀏𑀯𑀁 𑀅𑀫𑀜𑁆𑀜𑀻𑀢𑀺.

𑀇𑀤𑀸𑀦𑀺 𑀅𑀢𑁆𑀢𑀦𑁄 𑀩𑀼𑀤𑁆𑀥𑀧𑀝𑀺𑀪𑀸𑀕𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀯𑀼𑀲𑁄𑀢𑀺𑀆𑀤𑀺𑀫𑀸𑀳? 𑀲𑀢𑁆𑀢𑀭𑀢𑀦𑀦𑁆𑀢𑀺 𑀲𑀢𑁆𑀢𑀳𑀢𑁆𑀣𑀧𑁆𑀧𑀫𑀸𑀡𑀁. 𑀦𑀸𑀕𑀦𑁆𑀢𑀺 𑀳𑀢𑁆𑀣𑀺𑀁. 𑀅𑀟𑁆𑀠𑀝𑁆𑀞𑀭𑀢𑀦𑀁 𑀯𑀸𑀢𑀺 𑀅𑀟𑁆𑀠𑀭𑀢𑀦𑁂𑀦 𑀊𑀦𑀅𑀝𑁆𑀞𑀭𑀢𑀦𑀁, 𑀧𑀼𑀭𑀺𑀫𑀧𑀸𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑀼𑀫𑁆𑀪𑀸 𑀯𑀺𑀤𑀢𑁆𑀣𑀸𑀥𑀺𑀓𑀲𑀢𑁆𑀢𑀳𑀢𑁆𑀣𑀼𑀩𑁆𑀩𑁂𑀥𑀦𑁆𑀢𑀺 𑀅𑀢𑁆𑀣𑁄. 𑀢𑀸𑀮𑀧𑀢𑁆𑀢𑀺𑀓𑀸𑀬𑀸𑀢𑀺 𑀢𑀭𑀼𑀡𑀢𑀸𑀮𑀧𑀡𑁆𑀡𑁂𑀦. 𑀘𑀯𑀺𑀢𑁆𑀣𑀸𑀢𑀺 𑀘𑀼𑀢𑀸, 𑀦 𑀫𑀢𑀸 𑀯𑀸 𑀦𑀝𑁆𑀞𑀸 𑀯𑀸, 𑀩𑀼𑀤𑁆𑀥𑀧𑀝𑀺𑀪𑀸𑀕𑀲𑁆𑀲 𑀧𑀦 𑀲𑀸𑀯𑀓𑀲𑁆𑀲 𑀉𑀧𑀯𑀸𑀤𑀁 𑀯𑀢𑁆𑀯𑀸 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁂 𑀙𑀳𑀺 𑀅𑀪𑀺𑀜𑁆𑀜𑀸𑀳𑀺 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁂 𑀢𑀲𑁆𑀲𑀸 𑀓𑀸𑀲𑀸𑀯𑀸𑀦𑀺 𑀓𑀡𑁆𑀝𑀓𑀲𑀸𑀔𑀸 𑀯𑀺𑀬 𑀓𑀘𑁆𑀙𑀼𑀲𑀸𑀔𑀸 𑀯𑀺𑀬 𑀘 𑀲𑀭𑀻𑀭𑀁 𑀔𑀸𑀤𑀺𑀢𑀼𑀁 𑀆𑀭𑀤𑁆𑀥𑀸𑀦𑀺, 𑀢𑀸𑀦𑀺 𑀳𑀸𑀭𑁂𑀢𑁆𑀯𑀸 𑀲𑁂𑀢𑀓𑀸𑀦𑀺 𑀦𑀺𑀯𑀢𑁆𑀣𑀓𑁆𑀔𑀡𑁂𑀬𑁂𑀯𑀲𑁆𑀲𑀸 𑀘𑀺𑀢𑁆𑀢𑀲𑁆𑀲𑀸𑀤𑁄 𑀉𑀤𑀧𑀸𑀤𑀻𑀢𑀺. 𑀤𑀲𑀫𑀁.

𑁧𑁧. 𑀘𑀻𑀯𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁪. 𑀏𑀓𑀸𑀤𑀲𑀫𑁂 𑀤𑀓𑁆𑀔𑀺𑀡𑀸𑀕𑀺𑀭𑀺𑀲𑁆𑀫𑀺𑀦𑁆𑀢𑀺 𑀭𑀸𑀚𑀕𑀳𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀲𑁆𑀲 𑀕𑀺𑀭𑀺𑀦𑁄 𑀤𑀓𑁆𑀔𑀺𑀡𑀪𑀸𑀕𑁂 𑀚𑀦𑀧𑀤𑁄 𑀤𑀓𑁆𑀔𑀺𑀡𑀸𑀕𑀺𑀭𑀺 𑀦𑀸𑀫, 𑀢𑀲𑁆𑀫𑀺𑀁 𑀘𑀸𑀭𑀺𑀓𑀁 𑀘𑀭𑀢𑀻𑀢𑀺 𑀅𑀢𑁆𑀣𑁄. 𑀘𑀸𑀭𑀺𑀓𑀸 𑀘 𑀦𑀸𑀫 𑀤𑀼𑀯𑀺𑀥𑀸 𑀳𑁄𑀢𑀺 𑀢𑀼𑀭𑀺𑀢𑀘𑀸𑀭𑀺𑀓𑀸 𑀘 𑀅𑀢𑀼𑀭𑀺𑀢𑀘𑀸𑀭𑀺𑀓𑀸 𑀘. 𑀢𑀢𑁆𑀣 𑀬𑀁 𑀏𑀓𑀘𑁆𑀘𑁄 𑀏𑀓𑀁 𑀓𑀸𑀲𑀸𑀯𑀁 𑀦𑀺𑀯𑀸𑀲𑁂𑀢𑁆𑀯𑀸 𑀏𑀓𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀅𑀁𑀲𑁂 𑀮𑀕𑁆𑀕𑁂𑀢𑁆𑀯𑀸 𑀙𑀢𑁆𑀢𑀁 𑀆𑀤𑀸𑀬 𑀲𑀭𑀻𑀭𑀢𑁄 𑀲𑁂𑀤𑁂𑀳𑀺 𑀧𑀕𑁆𑀖𑀭𑀦𑁆𑀢𑁂𑀳𑀺 𑀤𑀺𑀯𑀲𑁂𑀦 𑀲𑀢𑁆𑀢𑀝𑁆𑀞𑀬𑁄𑀚𑀦𑀸𑀦𑀺 𑀕𑀘𑁆𑀙𑀢𑀺, 𑀬𑀁 𑀯𑀸 𑀧𑀦 𑀩𑀼𑀤𑁆𑀥𑀸 𑀓𑀺𑀜𑁆𑀘𑀺𑀤𑁂𑀯 𑀩𑁄𑀥𑀦𑁂𑀬𑁆𑀬𑀲𑀢𑁆𑀢𑀁 𑀤𑀺𑀲𑁆𑀯𑀸 𑀬𑁄𑀚𑀦𑀲𑀢𑀫𑁆𑀧𑀺 𑀬𑁄𑀚𑀦𑀲𑀳𑀲𑁆𑀲𑀫𑁆𑀧𑀺 𑀔𑀡𑁂𑀦 𑀕𑀘𑁆𑀙𑀦𑁆𑀢𑀺, 𑀏𑀲𑀸 𑀢𑀼𑀭𑀺𑀢𑀘𑀸𑀭𑀺𑀓𑀸 𑀦𑀸𑀫. 𑀤𑁂𑀯𑀲𑀺𑀓𑀁 𑀧𑀦 𑀕𑀸𑀯𑀼𑀢𑀁 𑀅𑀟𑁆𑀠𑀬𑁄𑀚𑀦𑀁 𑀢𑀺𑀕𑀸𑀯𑀼𑀢𑀁 𑀬𑁄𑀚𑀦𑀦𑁆𑀢𑀺 𑀏𑀢𑁆𑀢𑀓𑀁 𑀅𑀤𑁆𑀥𑀸𑀦𑀁 𑀅𑀚𑁆𑀚𑀢𑀦𑀸𑀬 𑀦𑀺𑀫𑀦𑁆𑀢𑀦𑀁 𑀅𑀥𑀺𑀯𑀸𑀲𑀬𑀢𑁄 𑀚𑀦𑀲𑀗𑁆𑀕𑀳𑀁 𑀓𑀭𑁄𑀢𑁄 𑀕𑀫𑀦𑀁, 𑀏𑀲𑀸 𑀅𑀢𑀼𑀭𑀺𑀢𑀘𑀸𑀭𑀺𑀓𑀸 𑀦𑀸𑀫. 𑀅𑀬𑀁 𑀇𑀥 𑀅𑀥𑀺𑀧𑁆𑀧𑁂𑀢𑀸.

𑀦𑀦𑀼 𑀘 𑀣𑁂𑀭𑁄 𑀧𑀜𑁆𑀘𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀙𑀸𑀬𑀸 𑀯𑀺𑀬 𑀤𑀲𑀩𑀮𑀲𑁆𑀲 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀕𑀘𑁆𑀙𑀦𑁆𑀢𑁄𑀯 𑀅𑀳𑁄𑀲𑀺, ‘‘𑀓𑀳𑀁 𑀆𑀦𑀦𑁆𑀤𑁄’’𑀢𑀺 𑀯𑀘𑀦𑀲𑁆𑀲 𑀑𑀓𑀸𑀲𑀫𑁂𑀯 𑀦 𑀅𑀤𑀸𑀲𑀺, 𑀲𑁄 𑀓𑀺𑀲𑁆𑀫𑀺𑀁 𑀓𑀸𑀮𑁂 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀘𑀸𑀭𑀺𑀓𑀁 𑀘𑀭𑀺𑀢𑀼𑀁 𑀑𑀓𑀸𑀲𑀁 𑀮𑀪𑀢𑀻𑀢𑀺? 𑀲𑀢𑁆𑀣𑀼 𑀧𑀭𑀺𑀦𑀺𑀩𑁆𑀩𑀸𑀦𑀲𑀁𑀯𑀘𑁆𑀙𑀭𑁂. 𑀧𑀭𑀺𑀦𑀺𑀩𑁆𑀩𑀼𑀢𑁂 𑀓𑀺𑀭 𑀲𑀢𑁆𑀣𑀭𑀺 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀲𑀢𑁆𑀣𑀼 𑀧𑀭𑀺𑀦𑀺𑀩𑁆𑀩𑀸𑀦𑁂 𑀲𑀦𑁆𑀦𑀺𑀧𑀢𑀺𑀢𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 𑀦𑀺𑀲𑀻𑀤𑀺𑀢𑁆𑀯𑀸 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀸𑀬𑀦𑀢𑁆𑀣𑀁 𑀧𑀜𑁆𑀘𑀲𑀢𑁂 𑀪𑀺𑀓𑁆𑀔𑀽 𑀉𑀘𑁆𑀘𑀺𑀦𑀺𑀢𑁆𑀯𑀸, ‘‘𑀆𑀯𑀼𑀲𑁄, 𑀫𑀬𑀁 𑀭𑀸𑀚𑀕𑀳𑁂 𑀯𑀲𑁆𑀲𑀁 𑀯𑀲𑀦𑁆𑀢𑀸 𑀥𑀫𑁆𑀫𑀯𑀺𑀦𑀬𑀁 𑀲𑀗𑁆𑀕𑀸𑀬𑀺𑀲𑁆𑀲𑀸𑀫, 𑀢𑀼𑀫𑁆𑀳𑁂 𑀧𑀼𑀭𑁂 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀅𑀢𑁆𑀢𑀦𑁄 𑀧𑀮𑀺𑀩𑁄𑀥𑀁 𑀉𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀭𑀸𑀚𑀕𑀳𑁂 𑀲𑀦𑁆𑀦𑀺𑀧𑀢𑀣𑀸’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑀸 𑀭𑀸𑀚𑀕𑀳𑀁 𑀕𑀢𑁄. 𑀆𑀦𑀦𑁆𑀤𑀢𑁆𑀣𑁂𑀭𑁄𑀧𑀺 𑀪𑀕𑀯𑀢𑁄 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀫𑀳𑀸𑀚𑀦𑀁 𑀲𑀜𑁆𑀜𑀸𑀧𑁂𑀦𑁆𑀢𑁄 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀢𑀢𑁄 𑀦𑀺𑀓𑁆𑀔𑀫𑁆𑀫 𑀭𑀸𑀚𑀕𑀳𑀁 𑀕𑀘𑁆𑀙𑀦𑁆𑀢𑁄 𑀤𑀓𑁆𑀔𑀺𑀡𑀸𑀕𑀺𑀭𑀺𑀲𑁆𑀫𑀺𑀁 𑀘𑀸𑀭𑀺𑀓𑀁 𑀘𑀭𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀬𑁂𑀪𑀼𑀬𑁆𑀬𑁂𑀦 𑀓𑀼𑀫𑀸𑀭𑀪𑀽𑀢𑀸𑀢𑀺 𑀬𑁂 𑀢𑁂 𑀳𑀻𑀦𑀸𑀬𑀸𑀯𑀢𑁆𑀢𑀸 𑀦𑀸𑀫, 𑀢𑁂 𑀬𑁂𑀪𑀼𑀬𑁆𑀬𑁂𑀦 𑀓𑀼𑀫𑀸𑀭𑀓𑀸 𑀤𑀳𑀭𑀸 𑀢𑀭𑀼𑀡𑀸 𑀏𑀓𑀯𑀲𑁆𑀲𑀺𑀓𑀤𑁆𑀯𑁂𑀯𑀲𑁆𑀲𑀺𑀓𑀸 𑀪𑀺𑀓𑁆𑀔𑀽 𑀘𑁂𑀯 𑀅𑀦𑀼𑀧𑀲𑀫𑁆𑀧𑀦𑁆𑀦𑀓𑀼𑀫𑀸𑀭𑀓𑀸 𑀘. 𑀓𑀲𑁆𑀫𑀸 𑀧𑀦𑁂𑀢𑁂 𑀧𑀩𑁆𑀩𑀚𑀺𑀢𑀸, 𑀓𑀲𑁆𑀫𑀸 𑀳𑀻𑀦𑀸𑀬𑀸𑀯𑀢𑁆𑀢𑀸𑀢𑀺? 𑀢𑁂𑀲𑀁 𑀓𑀺𑀭 𑀫𑀸𑀢𑀸𑀧𑀺𑀢𑀭𑁄 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀆𑀦𑀦𑁆𑀤𑀢𑁆𑀣𑁂𑀭𑁄 𑀲𑀢𑁆𑀣𑀼 𑀯𑀺𑀲𑁆𑀲𑀸𑀲𑀺𑀓𑁄 𑀅𑀝𑁆𑀞 𑀯𑀭𑁂 𑀬𑀸𑀘𑀺𑀢𑁆𑀯𑀸 𑀉𑀧𑀝𑁆𑀞𑀳𑀢𑀺, 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀲𑀢𑁆𑀣𑀸𑀭𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀁 𑀲𑀓𑁆𑀓𑁄𑀢𑀺, 𑀅𑀫𑁆𑀳𑀸𑀓𑀁 𑀤𑀸𑀭𑀓𑁂 𑀏𑀢𑀲𑁆𑀲 𑀲𑀦𑁆𑀢𑀺𑀓𑁂 𑀧𑀩𑁆𑀩𑀸𑀚𑁂𑀫, 𑀲𑁄 𑀲𑀢𑁆𑀣𑀸𑀭𑀁 𑀕𑀳𑁂𑀢𑁆𑀯𑀸 𑀆𑀕𑀫𑀺𑀲𑁆𑀲𑀢𑀺, 𑀢𑀲𑁆𑀫𑀺𑀁 𑀆𑀕𑀢𑁂 𑀫𑀬𑀁 𑀫𑀳𑀸𑀲𑀓𑁆𑀓𑀸𑀭𑀁 𑀓𑀸𑀢𑀼𑀁 𑀮𑀪𑀺𑀲𑁆𑀲𑀸𑀫𑀸’’𑀢𑀺. 𑀇𑀫𑀺𑀦𑀸 𑀢𑀸𑀯 𑀓𑀸𑀭𑀡𑁂𑀦 𑀦𑁂𑀲𑀁 𑀜𑀸𑀢𑀓𑀸 𑀢𑁂 𑀧𑀩𑁆𑀩𑀸𑀚𑁂𑀲𑀼𑀁. 𑀲𑀢𑁆𑀣𑀭𑀺 𑀧𑀦 𑀧𑀭𑀺𑀦𑀺𑀩𑁆𑀩𑀼𑀢𑁂 𑀢𑁂𑀲𑀁 𑀲𑀸 𑀧𑀢𑁆𑀣𑀦𑀸 𑀉𑀧𑀘𑁆𑀙𑀺𑀦𑁆𑀦𑀸, 𑀅𑀣 𑀢𑁂 𑀏𑀓𑀤𑀺𑀯𑀲𑁂𑀦𑁂𑀯 𑀉𑀧𑁆𑀧𑀩𑁆𑀩𑀸𑀚𑁂𑀲𑀼𑀁.

𑀬𑀣𑀸𑀪𑀺𑀭𑀦𑁆𑀢𑀦𑁆𑀢𑀺 𑀬𑀣𑀸𑀭𑀼𑀘𑀺𑀬𑀸 𑀬𑀣𑀸𑀅𑀚𑁆𑀛𑀸𑀲𑀬𑁂𑀦. 𑀢𑀺𑀓𑀪𑁄𑀚𑀦𑀁 𑀧𑀜𑁆𑀜𑀢𑁆𑀢𑀦𑁆𑀢𑀺, 𑀇𑀤𑀁 ‘‘𑀕𑀡𑀪𑁄𑀚𑀦𑁂 𑀅𑀜𑁆𑀜𑀢𑁆𑀭 𑀲𑀫𑀬𑀸 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁨𑁧𑁧). 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 𑀢𑀺𑀡𑁆𑀡𑀁 𑀚𑀦𑀸𑀦𑀁 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑀁 𑀲𑀸𑀤𑀺𑀬𑀺𑀢𑁆𑀯𑀸 𑀏𑀓𑀢𑁄 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀸𑀦𑀫𑁆𑀧𑀺 𑀅𑀦𑀸𑀧𑀢𑁆𑀢𑀺, 𑀢𑀲𑁆𑀫𑀸 ‘‘𑀢𑀺𑀓𑀪𑁄𑀚𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀤𑀼𑀫𑁆𑀫𑀗𑁆𑀓𑀽𑀦𑀁 𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀳𑀸𑀬𑀸𑀢𑀺 𑀤𑀼𑀲𑁆𑀲𑀻𑀮𑀧𑀼𑀕𑁆𑀕𑀮𑀸𑀦𑀁 𑀦𑀺𑀕𑁆𑀕𑀡𑁆𑀳𑀦𑀢𑁆𑀣𑀁. 𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬𑀸𑀢𑀺 𑀤𑀼𑀫𑁆𑀫𑀗𑁆𑀓𑀽𑀦𑀁 𑀦𑀺𑀕𑁆𑀕𑀳𑁂𑀦𑁂𑀯 𑀧𑁂𑀲𑀮𑀸𑀦𑀁 𑀉𑀧𑁄𑀲𑀣𑀧𑀯𑀸𑀭𑀡𑀸 𑀯𑀢𑁆𑀢𑀦𑁆𑀢𑀺, 𑀲𑀫𑀕𑁆𑀕𑀯𑀸𑀲𑁄 𑀳𑁄𑀢𑀺, 𑀅𑀬𑀁 𑀢𑁂𑀲𑀁 𑀨𑀸𑀲𑀼𑀯𑀺𑀳𑀸𑀭𑁄 𑀳𑁄𑀢𑀺, 𑀇𑀫𑀲𑁆𑀲 𑀨𑀸𑀲𑀼𑀯𑀺𑀳𑀸𑀭𑀲𑁆𑀲 𑀅𑀢𑁆𑀣𑀸𑀬. 𑀫𑀸 𑀧𑀸𑀧𑀺𑀘𑁆𑀙𑀸 𑀧𑀓𑁆𑀔𑀁 𑀦𑀺𑀲𑁆𑀲𑀸𑀬 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬𑀼𑀦𑁆𑀢𑀺 𑀬𑀣𑀸 𑀤𑁂𑀯𑀤𑀢𑁆𑀢𑁄 𑀲𑀧𑀭𑀺𑀲𑁄 𑀓𑀼𑀮𑁂𑀲𑀼 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑁄 𑀧𑀸𑀧𑀺𑀘𑁆𑀙𑁂 𑀦𑀺𑀲𑁆𑀲𑀸𑀬 𑀲𑀗𑁆𑀖𑀁 𑀪𑀺𑀦𑁆𑀤𑀺, 𑀏𑀯𑀁 𑀅𑀜𑁆𑀜𑁂𑀧𑀺 𑀧𑀸𑀧𑀺𑀘𑁆𑀙𑀸 𑀕𑀡𑀩𑀦𑁆𑀥𑁂𑀦 𑀓𑀼𑀮𑁂𑀲𑀼 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀫𑀸𑀦𑀸 𑀕𑀡𑀁 𑀯𑀟𑁆𑀠𑁂𑀢𑁆𑀯𑀸 𑀢𑀁 𑀧𑀓𑁆𑀔𑀁 𑀦𑀺𑀲𑁆𑀲𑀸𑀬 𑀫𑀸 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬𑀼𑀦𑁆𑀢𑀺, 𑀇𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀧𑀜𑁆𑀜𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀼𑀮𑀸𑀦𑀼𑀤𑁆𑀤𑀬𑀢𑀸𑀬 𑀘𑀸𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑁂 𑀉𑀧𑁄𑀲𑀣𑀧𑀯𑀸𑀭𑀡𑀁 𑀓𑀢𑁆𑀯𑀸 𑀲𑀫𑀕𑁆𑀕𑀯𑀸𑀲𑀁 𑀯𑀲𑀦𑁆𑀢𑁂 𑀫𑀦𑀼𑀲𑁆𑀲𑀸 𑀲𑀮𑀸𑀓𑀪𑀢𑁆𑀢𑀸𑀤𑀻𑀦𑀺 𑀤𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑀸 𑀪𑀯𑀦𑁆𑀢𑀺, 𑀇𑀢𑀺 𑀇𑀫𑀸𑀬 𑀓𑀼𑀮𑀸𑀦𑀼𑀤𑁆𑀤𑀬𑀢𑀸𑀬 𑀘 𑀧𑀜𑁆𑀜𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀲𑀲𑁆𑀲𑀖𑀸𑀢𑀁 𑀫𑀜𑁆𑀜𑁂 𑀘𑀭𑀲𑀻𑀢𑀺 𑀲𑀲𑁆𑀲𑀁 𑀖𑀸𑀢𑁂𑀦𑁆𑀢𑁄 𑀯𑀺𑀬 𑀆𑀳𑀺𑀡𑁆𑀟𑀲𑀺. 𑀓𑀼𑀮𑀽𑀧𑀖𑀸𑀢𑀁 𑀫𑀜𑁆𑀜𑁂 𑀘𑀭𑀲𑀻𑀢𑀺 𑀓𑀼𑀮𑀸𑀦𑀺 𑀉𑀧𑀖𑀸𑀢𑁂𑀦𑁆𑀢𑁄 𑀯𑀺𑀬 𑀳𑀦𑀦𑁆𑀢𑁄 𑀯𑀺𑀬 𑀆𑀳𑀺𑀡𑁆𑀟𑀲𑀺. 𑀑𑀮𑀼𑀚𑁆𑀚𑀢𑀻𑀢𑀺 𑀯𑀺𑀲𑁂𑀲𑁂𑀦 𑀧𑀮𑀼𑀚𑁆𑀚𑀢𑀺 𑀪𑀺𑀚𑁆𑀚𑀢𑀺. 𑀧𑀮𑀼𑀚𑁆𑀚𑀦𑁆𑀢𑀺 𑀔𑁄 𑀢𑁂, 𑀆𑀯𑀼𑀲𑁄, 𑀦𑀯𑀧𑁆𑀧𑀸𑀬𑀸𑀢𑀺, 𑀆𑀯𑀼𑀲𑁄, 𑀏𑀢𑁂 𑀢𑀼𑀬𑁆𑀳𑀁 𑀧𑀸𑀬𑁂𑀦 𑀬𑁂𑀪𑀼𑀬𑁆𑀬𑁂𑀦 𑀦𑀯𑀓𑀸 𑀏𑀓𑀯𑀲𑁆𑀲𑀺𑀓𑀤𑀼𑀯𑀲𑁆𑀲𑀺𑀓𑀸 𑀤𑀳𑀭𑀸 𑀘𑁂𑀯 𑀲𑀸𑀫𑀡𑁂𑀭𑀸 𑀘 𑀧𑀮𑀼𑀚𑁆𑀚𑀦𑁆𑀢𑀺 𑀪𑀺𑀚𑁆𑀚𑀦𑁆𑀢𑀺. 𑀦 𑀯𑀸𑀬𑀁 𑀓𑀼𑀫𑀸𑀭𑀓𑁄 𑀫𑀢𑁆𑀢𑀫𑀜𑁆𑀜𑀸𑀲𑀻𑀢𑀺 𑀅𑀬𑀁 𑀓𑀼𑀫𑀸𑀭𑀓𑁄 𑀅𑀢𑁆𑀢𑀦𑁄 𑀧𑀫𑀸𑀡𑀁 𑀦 𑀚𑀸𑀦𑀸𑀢𑀻𑀢𑀺 𑀣𑁂𑀭𑀁 𑀢𑀚𑁆𑀚𑁂𑀦𑁆𑀢𑁄 𑀆𑀳.

𑀓𑀼𑀫𑀸𑀭𑀓𑀯𑀸𑀤𑀸 𑀦 𑀫𑀼𑀘𑁆𑀘𑀸𑀫𑀸𑀢𑀺 𑀓𑀼𑀫𑀸𑀭𑀓𑀯𑀸𑀤𑀢𑁄 𑀦 𑀫𑀼𑀘𑁆𑀘𑀸𑀫. 𑀢𑀣𑀸 𑀳𑀺 𑀧𑀦 𑀢𑁆𑀯𑀦𑁆𑀢𑀺 𑀇𑀤𑀫𑀲𑁆𑀲 𑀏𑀯𑀁 𑀯𑀢𑁆𑀢𑀩𑁆𑀩𑀢𑀸𑀬 𑀓𑀸𑀭𑀡𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀲𑁆𑀫𑀸 𑀢𑁆𑀯𑀁 𑀇𑀫𑁂𑀳𑀺 𑀦𑀯𑁂𑀳𑀺 𑀪𑀺𑀓𑁆𑀔𑀽𑀳𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀭𑀳𑀺𑀢𑁂𑀳𑀺 𑀲𑀤𑁆𑀥𑀺𑀁 𑀯𑀺𑀘𑀭𑀲𑀺, 𑀢𑀲𑁆𑀫𑀸 𑀓𑀼𑀫𑀸𑀭𑀓𑁂𑀳𑀺 𑀲𑀤𑁆𑀥𑀺𑀁 𑀯𑀺𑀘𑀭𑀦𑁆𑀢𑁄 𑀓𑀼𑀫𑀸𑀭𑀓𑁄𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀲𑀻𑀢𑀺.

𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑁄 𑀲𑀫𑀸𑀦𑁄𑀢𑀺 𑀇𑀤𑀁 𑀬𑀲𑁆𑀫𑀸 𑀣𑁂𑀭𑀲𑁆𑀲 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀦𑁂𑀯 𑀆𑀘𑀭𑀺𑀬𑁄 𑀦 𑀉𑀧𑀚𑁆𑀛𑀸𑀬𑁄 𑀧𑀜𑁆𑀜𑀸𑀬𑀢𑀺, 𑀲𑀬𑀁 𑀓𑀸𑀲𑀸𑀬𑀸𑀦𑀺 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀦𑁆𑀢𑁄, 𑀢𑀲𑁆𑀫𑀸 𑀅𑀦𑀢𑁆𑀢𑀫𑀦𑀢𑀸𑀬 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑀼𑀩𑁆𑀩𑀢𑀁 𑀆𑀭𑁄𑀧𑀬𑀫𑀸𑀦𑀸 𑀆𑀳.

𑀲𑀳𑀲𑀸𑀢𑀺 𑀏𑀢𑁆𑀣 𑀭𑀸𑀕𑀫𑁄𑀳𑀘𑀸𑀭𑁄𑀧𑀺 𑀲𑀳𑀲𑀸𑀘𑀸𑀭𑁄, 𑀇𑀤𑀁 𑀧𑀦 𑀤𑁄𑀲𑀘𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀧𑁆𑀧𑀝𑀺𑀲𑀗𑁆𑀔𑀸𑀢𑀺 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸, 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀧𑀩𑁆𑀩𑀚𑁆𑀚𑀁 𑀲𑁄𑀥𑁂𑀦𑁆𑀢𑁄 𑀬𑀢𑁆𑀯𑀸𑀳𑀁, 𑀆𑀯𑀼𑀲𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀉𑀤𑁆𑀤𑀺𑀲𑀺𑀢𑀼𑀦𑁆𑀢𑀺 𑀞𑀧𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀜𑁆𑀜𑀁 𑀫𑀬𑁆𑀳𑀁 𑀲𑀢𑁆𑀣𑀸𑀢𑀺 𑀏𑀯𑀁 𑀉𑀤𑁆𑀤𑀺𑀲𑀺𑀢𑀼𑀁 𑀦 𑀚𑀸𑀦𑀸𑀫𑀺. 𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄𑀢𑀺𑀆𑀤𑀻𑀲𑀼 𑀲𑀘𑁂𑀧𑀺 𑀲𑀝𑁆𑀞𑀺𑀳𑀢𑁆𑀣𑁂 𑀖𑀭𑁂 𑀬𑁄𑀚𑀦𑀲𑀢𑀦𑁆𑀢𑀭𑁂𑀧𑀺 𑀯𑀸 𑀤𑁆𑀯𑁂 𑀚𑀸𑀬𑀫𑁆𑀧𑀢𑀺𑀓𑀸 𑀯𑀲𑀦𑁆𑀢𑀺, 𑀢𑀣𑀸𑀧𑀺 𑀢𑁂𑀲𑀁 𑀲𑀓𑀺𑀜𑁆𑀘𑀦𑀲𑀧𑀮𑀺𑀩𑁄𑀥𑀝𑁆𑀞𑁂𑀦 𑀖𑀭𑀸𑀯𑀸𑀲𑁄 𑀲𑀫𑁆𑀩𑀸𑀥𑁄𑀬𑁂𑀯. 𑀭𑀚𑀸𑀧𑀣𑁄𑀢𑀺 𑀭𑀸𑀕𑀭𑀚𑀸𑀤𑀻𑀦𑀁 𑀉𑀝𑁆𑀞𑀸𑀦𑀝𑁆𑀞𑀸𑀦𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. ‘‘𑀆𑀕𑀫𑀦𑀧𑀣𑁄’’𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀅𑀮𑀕𑁆𑀕𑀦𑀝𑁆𑀞𑁂𑀦 𑀅𑀩𑁆𑀪𑁄𑀓𑀸𑀲𑁄 𑀯𑀺𑀬𑀸𑀢𑀺 𑀅𑀩𑁆𑀪𑁄𑀓𑀸𑀲𑁄. 𑀧𑀩𑁆𑀩𑀚𑀺𑀢𑁄 𑀳𑀺 𑀓𑀽𑀝𑀸𑀕𑀸𑀭𑀭𑀢𑀦𑀫𑀬𑀧𑀸𑀲𑀸𑀤𑀤𑁂𑀯𑀯𑀺𑀫𑀸𑀦𑀸𑀤𑀻𑀲𑀼 𑀧𑀺𑀳𑀺𑀢𑀤𑁆𑀯𑀸𑀭𑀯𑀸𑀢𑀧𑀸𑀦𑁂𑀲𑀼 𑀧𑀝𑀺𑀘𑁆𑀙𑀦𑁆𑀦𑁂𑀲𑀼 𑀯𑀲𑀦𑁆𑀢𑁄𑀧𑀺 𑀦𑁂𑀯 𑀮𑀕𑁆𑀕𑀢𑀺 𑀦 𑀲𑀚𑁆𑀚𑀢𑀺 𑀦 𑀩𑀚𑁆𑀛𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸’’𑀢𑀺. 𑀅𑀧𑀺𑀘 𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄 𑀓𑀼𑀲𑀮𑀓𑀺𑀭𑀺𑀬𑀸𑀬 𑀑𑀓𑀸𑀲𑀸𑀪𑀸𑀯𑀢𑁄 𑀭𑀚𑀸𑀧𑀣𑁄 𑀅𑀲𑀁𑀯𑀼𑀢𑀲𑀗𑁆𑀓𑀸𑀭𑀝𑁆𑀞𑀸𑀦𑀁 𑀯𑀺𑀬 𑀭𑀚𑀸𑀦𑀁, 𑀓𑀺𑀮𑁂𑀲𑀭𑀚𑀸𑀦𑀁 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀢𑁄, 𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸 𑀓𑀼𑀲𑀮𑀓𑀺𑀭𑀺𑀬𑀸𑀬 𑀬𑀣𑀸 𑀲𑀼𑀔𑀁 𑀑𑀓𑀸𑀲𑀲𑀩𑁆𑀪𑀸𑀯𑀢𑁄.

𑀦𑀬𑀺𑀤𑀁 𑀲𑀼𑀓𑀭𑀁…𑀧𑁂… 𑀧𑀩𑁆𑀩𑀚𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀅𑀬𑀁 𑀲𑀗𑁆𑀔𑁂𑀧𑀓𑀣𑀸 𑁋 𑀬𑀤𑁂𑀢𑀁 𑀲𑀺𑀓𑁆𑀔𑀢𑁆𑀢𑀬𑀩𑁆𑀭𑀳𑁆𑀫𑀘𑀭𑀺𑀬𑀁 𑀏𑀓𑀫𑁆𑀧𑀺 𑀤𑀺𑀯𑀲𑀁 𑀅𑀔𑀡𑁆𑀟𑀁 𑀓𑀢𑁆𑀯𑀸 𑀘𑀭𑀺𑀫𑀓𑀘𑀺𑀢𑁆𑀢𑀁 𑀧𑀸𑀧𑁂𑀢𑀩𑁆𑀩𑀢𑀸𑀬 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁 𑀘𑀭𑀺𑀢𑀩𑁆𑀩𑀁, 𑀏𑀓𑀤𑀺𑀯𑀲𑀫𑁆𑀧𑀺 𑀘 𑀓𑀺𑀮𑁂𑀲𑀫𑀮𑁂𑀦 𑀅𑀫𑀮𑀻𑀦𑀁 𑀓𑀢𑁆𑀯𑀸 𑀘𑀭𑀺𑀫𑀓𑀘𑀺𑀢𑁆𑀢𑀁 𑀧𑀸𑀧𑁂𑀢𑀩𑁆𑀩𑀢𑀸𑀬 𑀏𑀓𑀦𑁆𑀢𑀧𑀭𑀺𑀲𑀼𑀤𑁆𑀥𑀁, 𑀲𑀗𑁆𑀔𑀮𑀺𑀔𑀺𑀢𑀁 𑀮𑀺𑀔𑀺𑀢𑀲𑀗𑁆𑀔𑀲𑀤𑀺𑀲𑀁 𑀥𑁄𑀢𑀲𑀗𑁆𑀔𑀲𑀧𑁆𑀧𑀝𑀺𑀪𑀸𑀕𑀁 𑀘𑀭𑀺𑀢𑀩𑁆𑀩𑀁, 𑀇𑀤𑀁 𑀦 𑀲𑀼𑀓𑀭𑀁 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀸 𑀅𑀕𑀸𑀭𑀫𑀚𑁆𑀛𑁂 𑀯𑀲𑀦𑁆𑀢𑁂𑀦 𑀏𑀓𑀦𑁆𑀢𑀧𑀭𑀺𑀧𑀼𑀡𑁆𑀡𑀁…𑀧𑁂… 𑀘𑀭𑀺𑀢𑀼𑀁, 𑀬𑀁𑀦𑀽𑀦𑀸𑀳𑀁 𑀓𑁂𑀲𑀫𑀲𑁆𑀲𑀼𑀁 𑀑𑀳𑀸𑀭𑁂𑀢𑁆𑀯𑀸 𑀓𑀲𑀸𑀬𑀭𑀲𑀧𑀻𑀢𑀢𑀸𑀬 𑀓𑀸𑀲𑀸𑀬𑀸𑀦𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀦𑁆𑀢𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀸𑀦𑀺 𑀯𑀢𑁆𑀣𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀧𑀭𑀺𑀤𑀳𑀺𑀢𑁆𑀯𑀸 𑀅𑀕𑀸𑀭𑀲𑁆𑀫𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑁂𑀬𑁆𑀬𑀦𑁆𑀢𑀺. 𑀏𑀢𑁆𑀣 𑀘 𑀬𑀲𑁆𑀫𑀸 𑀅𑀕𑀸𑀭𑀲𑁆𑀲 𑀳𑀺𑀢𑀁 𑀓𑀲𑀺𑀯𑀡𑀺𑀚𑁆𑀚𑀸𑀤𑀺𑀓𑀫𑁆𑀫𑀁 𑀅𑀕𑀸𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀧𑀩𑁆𑀩𑀚𑁆𑀚𑀸𑀬 𑀦𑀢𑁆𑀣𑀺, 𑀢𑀲𑁆𑀫𑀸 𑀧𑀩𑁆𑀩𑀚𑁆𑀚𑀸 𑀅𑀦𑀕𑀸𑀭𑀺𑀬𑀸𑀢𑀺 𑀜𑀸𑀢𑀩𑁆𑀩𑀸, 𑀢𑀁 𑀅𑀦𑀕𑀸𑀭𑀺𑀬𑀁. 𑀧𑀩𑁆𑀩𑀚𑁂𑀬𑁆𑀬𑀦𑁆𑀢𑀺 𑀧𑀝𑀺𑀧𑀚𑁆𑀚𑁂𑀬𑁆𑀬𑀁.

𑀧𑀝𑀧𑀺𑀮𑁄𑀢𑀺𑀓𑀸𑀦𑀦𑁆𑀢𑀺 𑀚𑀺𑀡𑁆𑀡𑀧𑀺𑀮𑁄𑀢𑀺𑀓𑀸𑀦𑀁 𑀢𑁂𑀭𑀲𑀳𑀢𑁆𑀣𑁄𑀧𑀺 𑀳𑀺 𑀦𑀯𑀲𑀸𑀝𑀓𑁄 𑀤𑀲𑀸𑀦𑀁 𑀙𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀺𑀮𑁄𑀢𑀺𑀓𑀸𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀺 𑀫𑀳𑀸𑀭𑀳𑀸𑀦𑀺 𑀯𑀢𑁆𑀣𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑀁 𑀲𑀗𑁆𑀖𑀸𑀝𑀺𑀁 𑀲𑀦𑁆𑀥𑀸𑀬 ‘‘𑀧𑀝𑀧𑀺𑀮𑁄𑀢𑀺𑀓𑀸𑀦𑀁 𑀲𑀗𑁆𑀖𑀸𑀝𑀺’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄𑀢𑀺 𑀅𑀟𑁆𑀠𑀬𑁄𑀚𑀦𑀢𑁄 𑀧𑀝𑁆𑀞𑀸𑀬 𑀫𑀕𑁆𑀕𑁄 𑀅𑀤𑁆𑀥𑀸𑀦𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀅𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄, 𑀤𑀻𑀖𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀬𑀣𑀸 𑀏𑀲 𑀧𑀩𑁆𑀩𑀚𑀺𑀢𑁄, 𑀬𑀣𑀸 𑀘 𑀅𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄, 𑀇𑀫𑀲𑁆𑀲𑀢𑁆𑀣𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑀓𑀣𑁂𑀢𑀩𑁆𑀩𑀸 𑁋 𑀅𑀢𑀻𑀢𑁂 𑀓𑀺𑀭 𑀓𑀧𑁆𑀧𑀲𑀢𑀲𑀳𑀲𑁆𑀲𑀫𑀢𑁆𑀣𑀓𑁂 𑀧𑀤𑀼𑀫𑀼𑀢𑁆𑀢𑀭𑁄 𑀦𑀸𑀫 𑀲𑀢𑁆𑀣𑀸 𑀉𑀤𑀧𑀸𑀤𑀺, 𑀢𑀲𑁆𑀫𑀺𑀁 𑀳𑀁𑀲𑀯𑀢𑀻𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀔𑁂𑀫𑁂 𑀫𑀺𑀕𑀤𑀸𑀬𑁂 𑀯𑀺𑀳𑀭𑀦𑁆𑀢𑁂 𑀯𑁂𑀤𑁂𑀳𑁄 𑀦𑀸𑀫 𑀓𑀼𑀝𑀼𑀫𑁆𑀩𑀺𑀓𑁄 𑀅𑀲𑀻𑀢𑀺𑀓𑁄𑀝𑀺𑀥𑀦𑀯𑀺𑀪𑀯𑁄 𑀧𑀸𑀢𑁄𑀯 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀽𑀚𑁂𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀲𑀢𑁆𑀣𑀸 𑀫𑀳𑀸𑀦𑀺𑀲𑀪𑀢𑁆𑀣𑁂𑀭𑀁 𑀦𑀸𑀫 𑀢𑀢𑀺𑀬𑀲𑀸𑀯𑀓𑀁 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀥𑀼𑀢𑀯𑀸𑀤𑀸𑀦𑀁 𑀬𑀤𑀺𑀤𑀁 𑀦𑀺𑀲𑀪𑁄’’𑀢𑀺 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺. 𑀉𑀧𑀸𑀲𑀓𑁄 𑀢𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑁄 𑀥𑀫𑁆𑀫𑀓𑀣𑀸𑀯𑀲𑀸𑀦𑁂 𑀫𑀳𑀸𑀚𑀦𑁂 𑀉𑀝𑁆𑀞𑀸𑀬 𑀕𑀢𑁂 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀲𑁆𑀯𑁂 𑀫𑀬𑁆𑀳𑀁 𑀪𑀺𑀓𑁆𑀔𑀁 𑀅𑀥𑀺𑀯𑀸𑀲𑁂𑀣𑀸’’𑀢𑀺 𑀆𑀳. 𑀫𑀳𑀸 𑀔𑁄, 𑀉𑀧𑀸𑀲𑀓, 𑀪𑀺𑀓𑁆𑀔𑀼𑀲𑀗𑁆𑀖𑁄𑀢𑀺. 𑀓𑀺𑀢𑁆𑀢𑀓𑁄 𑀪𑀕𑀯𑀸𑀢𑀺. 𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀦𑁆𑀢𑀺. 𑀪𑀦𑁆𑀢𑁂, 𑀏𑀓𑀁 𑀲𑀸𑀫𑀡𑁂𑀭𑀫𑁆𑀧𑀺 𑀯𑀺𑀳𑀸𑀭𑁂 𑀅𑀲𑁂𑀲𑁂𑀢𑁆𑀯𑀸 𑀪𑀺𑀓𑁆𑀔𑀁 𑀅𑀥𑀺𑀯𑀸𑀲𑁂𑀣𑀸𑀢𑀺. 𑀲𑀢𑁆𑀣𑀸 𑀅𑀥𑀺𑀯𑀸𑀲𑁂𑀲𑀺. 𑀉𑀧𑀸𑀲𑀓𑁄 𑀲𑀢𑁆𑀣𑀼 𑀅𑀥𑀺𑀯𑀸𑀲𑀦𑀁 𑀯𑀺𑀤𑀺𑀢𑁆𑀯𑀸 𑀕𑁂𑀳𑀁 𑀕𑀦𑁆𑀢𑁆𑀯𑀸 𑀫𑀳𑀸𑀤𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀲𑀢𑁆𑀣𑀼 𑀓𑀸𑀮𑀁 𑀆𑀭𑁄𑀘𑀸𑀧𑁂𑀲𑀺. 𑀲𑀢𑁆𑀣𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑁄 𑀉𑀧𑀸𑀲𑀓𑀲𑁆𑀲 𑀖𑀭𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀤𑀓𑁆𑀔𑀺𑀡𑁄𑀤𑀓𑀸𑀯𑀲𑀸𑀦𑁂 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀁 𑀅𑀓𑀸𑀲𑀺. 𑀉𑀧𑀸𑀲𑀓𑁄𑀧𑀺 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺.

𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀫𑀳𑀸𑀦𑀺𑀲𑀪𑀢𑁆𑀣𑁂𑀭𑁄 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁄 𑀢𑀫𑁂𑀯 𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀺. 𑀉𑀧𑀸𑀲𑀓𑁄 𑀤𑀺𑀲𑁆𑀯𑀸 𑀉𑀝𑁆𑀞𑀸𑀬 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀯𑀦𑁆𑀤𑀺𑀢𑁆𑀯𑀸 ‘‘𑀧𑀢𑁆𑀢𑀁, 𑀪𑀦𑁆𑀢𑁂, 𑀦𑁄 𑀤𑁂𑀣𑀸’’𑀢𑀺 𑀆𑀳. 𑀣𑁂𑀭𑁄 𑀧𑀢𑁆𑀢𑀁 𑀅𑀤𑀸𑀲𑀺. 𑀪𑀦𑁆𑀢𑁂, 𑀇𑀥𑁂𑀯 𑀧𑀯𑀺𑀲𑀣, 𑀲𑀢𑁆𑀣𑀸𑀧𑀺 𑀕𑁂𑀳𑁂 𑀦𑀺𑀲𑀺𑀦𑁆𑀦𑁄𑀢𑀺. 𑀦 𑀯𑀝𑁆𑀝𑀺𑀲𑁆𑀲𑀢𑀺 𑀉𑀧𑀸𑀲𑀓𑀸𑀢𑀺. 𑀉𑀧𑀸𑀲𑀓𑁄 𑀣𑁂𑀭𑀲𑁆𑀲 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀺𑀡𑁆𑀟𑀧𑀸𑀢𑀲𑁆𑀲 𑀧𑀽𑀭𑁂𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀅𑀤𑀸𑀲𑀺. 𑀢𑀢𑁄 𑀣𑁂𑀭𑀁 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀪𑀦𑁆𑀢𑁂, 𑀫𑀳𑀸𑀦𑀺𑀲𑀪𑀢𑁆𑀣𑁂𑀭𑁄 ‘𑀲𑀢𑁆𑀣𑀸 𑀕𑁂𑀳𑁂 𑀦𑀺𑀲𑀺𑀦𑁆𑀦𑁄’𑀢𑀺 𑀯𑀼𑀢𑁆𑀢𑁂𑀧𑀺 𑀧𑀯𑀺𑀲𑀺𑀢𑀼𑀁 𑀦 𑀇𑀘𑁆𑀙𑀺, 𑀅𑀢𑁆𑀣𑀺 𑀦𑀼 𑀔𑁄 𑀏𑀢𑀲𑁆𑀲 𑀢𑀼𑀫𑁆𑀳𑀸𑀓𑀁 𑀕𑀼𑀡𑁂𑀳𑀺 𑀅𑀢𑀺𑀭𑁂𑀓𑁄 𑀕𑀼𑀡𑁄’’𑀢𑀺. 𑀩𑀼𑀤𑁆𑀥𑀸𑀦𑀜𑁆𑀘 𑀯𑀡𑁆𑀡𑀫𑀘𑁆𑀙𑁂𑀭𑀁 𑀦𑀸𑀫 𑀦𑀢𑁆𑀣𑀺. 𑀅𑀣 𑀲𑀢𑁆𑀣𑀸 𑀏𑀯𑀫𑀸𑀳 𑁋 ‘‘𑀉𑀧𑀸𑀲𑀓, 𑀫𑀬𑀁 𑀪𑀺𑀓𑁆𑀔𑀁 𑀆𑀕𑀫𑀬𑀫𑀸𑀦𑀸 𑀕𑁂𑀳𑁂 𑀦𑀺𑀲𑀻𑀤𑀸𑀫, 𑀲𑁄 𑀪𑀺𑀓𑁆𑀔𑀼 𑀦 𑀏𑀯𑀁 𑀦𑀺𑀲𑀻𑀤𑀺𑀢𑁆𑀯𑀸 𑀪𑀺𑀓𑁆𑀔𑀁 𑀉𑀤𑀺𑀓𑁆𑀔𑀢𑀺. 𑀫𑀬𑀁 𑀕𑀸𑀫𑀦𑁆𑀢𑀲𑁂𑀦𑀸𑀲𑀦𑁂 𑀯𑀲𑀸𑀫, 𑀲𑁄 𑀅𑀭𑀜𑁆𑀜𑀲𑁆𑀫𑀺𑀁𑀬𑁂𑀯 𑀯𑀲𑀢𑀺. 𑀫𑀬𑀁 𑀙𑀦𑁆𑀦𑁂 𑀯𑀲𑀸𑀫, 𑀲𑁄 𑀅𑀩𑁆𑀪𑁄𑀓𑀸𑀲𑀫𑁆𑀳𑀺𑀬𑁂𑀯 𑀯𑀲𑀢𑀺. 𑀇𑀢𑀺 𑀢𑀲𑁆𑀲 𑀅𑀬𑀜𑁆𑀘 𑀅𑀬𑀜𑁆𑀘 𑀕𑀼𑀡𑁄’’𑀢𑀺 𑀫𑀳𑀸𑀲𑀫𑀼𑀤𑁆𑀤𑀁 𑀧𑀽𑀭𑀬𑀫𑀸𑀦𑁄𑀯 𑀓𑀣𑁂𑀲𑀺. 𑀉𑀧𑀸𑀲𑀓𑁄 𑀧𑀓𑀢𑀺𑀬𑀸𑀧𑀺 𑀚𑀮𑀫𑀸𑀦𑀤𑀻𑀧𑁄 𑀢𑁂𑀮𑁂𑀦 𑀆𑀲𑀺𑀢𑁆𑀢𑁄 𑀯𑀺𑀬 𑀲𑀼𑀝𑁆𑀞𑀼𑀢𑀭𑀁 𑀧𑀲𑀦𑁆𑀦𑁄 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀫𑀬𑁆𑀳𑀁 𑀅𑀜𑁆𑀜𑀸𑀬 𑀲𑀫𑁆𑀧𑀢𑁆𑀢𑀺𑀬𑀸, 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀥𑀼𑀢𑀯𑀸𑀤𑀸𑀦𑀁 𑀅𑀕𑁆𑀕𑀪𑀸𑀯𑀢𑁆𑀣𑀸𑀬 𑀧𑀢𑁆𑀣𑀦𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺?

𑀲𑁄 𑀧𑀼𑀦𑀧𑀺 𑀲𑀢𑁆𑀣𑀸𑀭𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀢𑁂𑀦𑁂𑀯 𑀦𑀺𑀬𑀸𑀫𑁂𑀦 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀅𑀝𑁆𑀞𑀲𑀝𑁆𑀞𑀺𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑀲𑁆𑀲 𑀢𑀺𑀘𑀻𑀯𑀭𑀸𑀦𑀺 𑀤𑀢𑁆𑀯𑀸 𑀲𑀢𑁆𑀣𑀼 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀬𑀁 𑀫𑁂, 𑀪𑀦𑁆𑀢𑁂, 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀤𑀸𑀦𑀁 𑀤𑁂𑀦𑁆𑀢𑀲𑁆𑀲 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁 𑀫𑁂𑀢𑁆𑀢𑀁 𑀯𑀘𑀻𑀓𑀫𑁆𑀫𑀁 𑀫𑁂𑀢𑁆𑀢𑀁 𑀫𑀦𑁄𑀓𑀫𑁆𑀫𑀁, 𑀇𑀫𑀺𑀦𑀸𑀳𑀁 𑀦 𑀅𑀜𑁆𑀜𑀁 𑀤𑁂𑀯𑀲𑀫𑁆𑀧𑀢𑁆𑀢𑀺𑀁 𑀯𑀸 𑀲𑀓𑁆𑀓𑀫𑀸𑀭𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀁 𑀯𑀸 𑀧𑀢𑁆𑀣𑁂𑀫𑀺, 𑀇𑀤𑀁 𑀧𑀦 𑀫𑁂 𑀓𑀫𑁆𑀫𑀁 𑀅𑀦𑀸𑀕𑀢𑁂 𑀏𑀓𑀲𑁆𑀲 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀺𑀓𑁂 𑀫𑀳𑀸𑀦𑀺𑀲𑀪𑀢𑁆𑀣𑁂𑀭𑁂𑀦 𑀧𑀢𑁆𑀢𑀝𑁆𑀞𑀸𑀦𑀦𑁆𑀢𑀭𑀁 𑀧𑀸𑀧𑀼𑀡𑀦𑀢𑁆𑀣𑀸𑀬 𑀢𑁂𑀭𑀲𑀥𑀼𑀢𑀗𑁆𑀕𑀥𑀭𑀸𑀦𑀁 𑀅𑀕𑁆𑀕𑀪𑀸𑀯𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀽’’𑀢𑀺. 𑀲𑀢𑁆𑀣𑀸 ‘‘𑀫𑀳𑀦𑁆𑀢𑀁 𑀞𑀸𑀦𑀁 𑀇𑀫𑀺𑀦𑀸 𑀧𑀢𑁆𑀣𑀺𑀢𑀁, 𑀲𑀫𑀺𑀚𑁆𑀛𑀺𑀲𑁆𑀲𑀢𑀺 𑀦𑀼 𑀔𑁄’’𑀢𑀺 𑀑𑀮𑁄𑀓𑁂𑀦𑁆𑀢𑁄 𑀲𑀫𑀺𑀚𑁆𑀛𑀦𑀪𑀸𑀯𑀁 𑀤𑀺𑀲𑁆𑀯𑀸 𑀆𑀳 𑁋 ‘‘𑀫𑀦𑀸𑀧𑀁 𑀢𑁂 𑀞𑀸𑀦𑀁 𑀧𑀢𑁆𑀣𑀺𑀢𑀁, 𑀅𑀦𑀸𑀕𑀢𑁂 𑀲𑀢𑀲𑀳𑀲𑁆𑀲𑀓𑀧𑁆𑀧𑀫𑀢𑁆𑀣𑀓𑁂 𑀕𑁄𑀢𑀫𑁄 𑀦𑀸𑀫 𑀩𑀼𑀤𑁆𑀥𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀲𑁆𑀲 𑀢𑁆𑀯𑀁 𑀢𑀢𑀺𑀬𑀲𑀸𑀯𑀓𑁄 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄 𑀦𑀸𑀫 𑀪𑀯𑀺𑀲𑁆𑀲𑀲𑀻’’𑀢𑀺. 𑀢𑀁 𑀲𑀼𑀢𑁆𑀯𑀸 𑀉𑀧𑀸𑀲𑀓𑁄 ‘‘𑀩𑀼𑀤𑁆𑀥𑀸𑀦𑀁 𑀤𑁆𑀯𑁂 𑀓𑀣𑀸 𑀦𑀸𑀫 𑀦𑀢𑁆𑀣𑀻’’𑀢𑀺 𑀧𑀼𑀦𑀤𑀺𑀯𑀲𑁂 𑀧𑀢𑁆𑀢𑀩𑁆𑀩𑀁 𑀯𑀺𑀬 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀅𑀫𑀜𑁆𑀜𑀺𑀢𑁆𑀣. 𑀲𑁄 𑀬𑀸𑀯𑀢𑀸𑀬𑀼𑀓𑀁 𑀲𑀻𑀮𑀁 𑀭𑀓𑁆𑀔𑀺𑀢𑁆𑀯𑀸 𑀢𑀢𑁆𑀣 𑀓𑀸𑀮𑀗𑁆𑀓𑀢𑁄 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀺.

𑀢𑀢𑁄 𑀧𑀝𑁆𑀞𑀸𑀬 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀦𑁆𑀢𑁄 𑀇𑀢𑁄 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀯𑀺𑀧𑀲𑁆𑀲𑀺𑀫𑁆𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀩𑀦𑁆𑀥𑀼𑀫𑀢𑀻𑀦𑀕𑀭𑀁 𑀦𑀺𑀲𑁆𑀲𑀸𑀬 𑀔𑁂𑀫𑁂 𑀫𑀺𑀕𑀤𑀸𑀬𑁂 𑀯𑀺𑀳𑀭𑀦𑁆𑀢𑁂 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀭𑀺𑀚𑀺𑀡𑁆𑀡𑁂