📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂

𑀔𑀦𑁆𑀥𑀯𑀕𑁆𑀕-𑀅𑀝𑁆𑀞𑀓𑀣𑀸

𑁧. 𑀔𑀦𑁆𑀥𑀲𑀁𑀬𑀼𑀢𑁆𑀢𑀁

𑁧. 𑀦𑀓𑀼𑀮𑀧𑀺𑀢𑀼𑀯𑀕𑁆𑀕𑁄

𑁧. 𑀦𑀓𑀼𑀮𑀧𑀺𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀔𑀦𑁆𑀥𑀺𑀬𑀯𑀕𑁆𑀕𑀲𑁆𑀲 ¶ ¶ ¶ 𑀧𑀞𑀫𑁂 𑀪𑀕𑁆𑀕𑁂𑀲𑀽𑀢𑀺 𑀏𑀯𑀁𑀦𑀸𑀫𑀓𑁂 𑀚𑀦𑀧𑀤𑁂. 𑀲𑀼𑀲𑀼𑀫𑀸𑀭𑀕𑀺𑀭𑁂𑀢𑀺 𑀲𑀼𑀲𑀼𑀫𑀸𑀭𑀕𑀺𑀭𑀦𑀕𑀭𑁂. 𑀢𑀲𑁆𑀫𑀺𑀁 𑀓𑀺𑀭 𑀫𑀸𑀧𑀺𑀬𑀫𑀸𑀦𑁂 𑀲𑀼𑀲𑀼𑀫𑀸𑀭𑁄 𑀲𑀤𑁆𑀤𑀫𑀓𑀸𑀲𑀺, 𑀢𑁂𑀦𑀲𑁆𑀲 ‘‘𑀲𑀼𑀲𑀼𑀫𑀸𑀭𑀕𑀺𑀭’’𑀦𑁆𑀢𑁆𑀯𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀪𑁂𑀲𑀓𑀴𑀸𑀯𑀦𑁂𑀢𑀺 𑀪𑁂𑀲𑀓𑀴𑀸𑀬 𑀦𑀸𑀫 𑀬𑀓𑁆𑀔𑀺𑀦𑀺𑀬𑀸 𑀅𑀥𑀺𑀯𑀼𑀢𑁆𑀣𑀢𑁆𑀢𑀸 𑀏𑀯𑀁𑀮𑀤𑁆𑀥𑀦𑀸𑀫𑁂 𑀯𑀦𑁂. 𑀢𑀤𑁂𑀯 𑀫𑀺𑀕𑀕𑀡𑀲𑁆𑀲 ¶ 𑀅𑀪𑀬𑀢𑁆𑀣𑀸𑀬 𑀤𑀺𑀦𑁆𑀦𑀢𑁆𑀢𑀸 𑀫𑀺𑀕𑀤𑀸𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀪𑀕𑀯𑀸 𑀢𑀲𑁆𑀫𑀺𑀁 𑀚𑀦𑀧𑀤𑁂 𑀢𑀁 𑀦𑀕𑀭𑀁 𑀦𑀺𑀲𑁆𑀲𑀸𑀬 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀯𑀺𑀳𑀭𑀢𑀺. 𑀦𑀓𑀼𑀮𑀧𑀺𑀢𑀸𑀢𑀺 𑀦𑀓𑀼𑀮𑀲𑁆𑀲 𑀦𑀸𑀫 𑀤𑀸𑀭𑀓𑀲𑁆𑀲 𑀧𑀺𑀢𑀸.

𑀚𑀺𑀡𑁆𑀡𑁄𑀢𑀺 𑀚𑀭𑀸𑀚𑀺𑀡𑁆𑀡𑁄. 𑀯𑀼𑀟𑁆𑀠𑁄𑀢𑀺 𑀯𑀬𑁄𑀯𑀼𑀟𑁆𑀠𑁄. 𑀫𑀳𑀮𑁆𑀮𑀓𑁄𑀢𑀺 𑀚𑀸𑀢𑀺𑀫𑀳𑀮𑁆𑀮𑀓𑁄. 𑀅𑀤𑁆𑀥𑀕𑀢𑁄𑀢𑀺 𑀢𑀺𑀬𑀤𑁆𑀥𑀕𑀢𑁄. 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄𑀢𑀺 𑀢𑁂𑀲𑀼 𑀢𑀻𑀲𑀼 𑀅𑀤𑁆𑀥𑁂𑀲𑀼 𑀧𑀘𑁆𑀙𑀺𑀫𑀯𑀬𑀁 𑀅𑀦𑀼𑀧𑁆𑀧𑀢𑁆𑀢𑁄. 𑀆𑀢𑀼𑀭𑀓𑀸𑀬𑁄𑀢𑀺 𑀕𑀺𑀮𑀸𑀦𑀓𑀸𑀬𑁄. 𑀇𑀤𑀜𑁆𑀳𑀺 𑀲𑀭𑀻𑀭𑀁 𑀲𑀼𑀯𑀡𑁆𑀡𑀯𑀡𑁆𑀡𑀫𑁆𑀧𑀺 𑀦𑀺𑀘𑁆𑀘𑀧𑀕𑁆𑀖𑀭𑀡𑀝𑁆𑀞𑁂𑀦 𑀆𑀢𑀼𑀭𑀁𑀬𑁂𑀯 𑀦𑀸𑀫 ¶ . 𑀯𑀺𑀲𑁂𑀲𑁂𑀦 𑀧𑀦𑀲𑁆𑀲 𑀚𑀭𑀸𑀢𑀼𑀭𑀢𑀸 𑀩𑁆𑀬𑀸𑀥𑀸𑀢𑀼𑀭𑀢𑀸 𑀫𑀭𑀡𑀸𑀢𑀼𑀭𑀢𑀸𑀢𑀺 𑀢𑀺𑀲𑁆𑀲𑁄 𑀆𑀢𑀼𑀭𑀢𑀸 𑀳𑁄𑀦𑁆𑀢𑀺. 𑀢𑀸𑀲𑀼 𑀓𑀺𑀜𑁆𑀘𑀸𑀧𑀺 𑀏𑀲𑁄 𑀫𑀳𑀮𑁆𑀮𑀓𑀢𑁆𑀢𑀸 𑀚𑀭𑀸𑀢𑀼𑀭𑁄𑀯, 𑀅𑀪𑀺𑀡𑁆𑀳𑀭𑁄𑀕𑀢𑀸𑀬 𑀧𑀦𑀲𑁆𑀲 𑀩𑁆𑀬𑀸𑀥𑀸𑀢𑀼𑀭𑀢𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀅𑀪𑀺𑀓𑁆𑀔𑀡𑀸𑀢𑀗𑁆𑀓𑁄𑀢𑀺 𑀅𑀪𑀺𑀡𑁆𑀳𑀭𑁄𑀕𑁄 𑀦𑀺𑀭𑀦𑁆𑀢𑀭𑀭𑁄𑀕𑁄. 𑀅𑀦𑀺𑀘𑁆𑀘𑀤𑀲𑁆𑀲𑀸𑀯𑀻𑀢𑀺 𑀢𑀸𑀬 𑀆𑀢𑀼𑀭𑀢𑀸𑀬 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀆𑀕𑀦𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀓𑀤𑀸𑀘𑀺𑀤𑁂𑀯 𑀤𑀝𑁆𑀞𑀼𑀁 𑀮𑀪𑀸𑀫𑀺, 𑀦 𑀲𑀩𑁆𑀩𑀓𑀸𑀮𑀦𑁆𑀢𑀺 𑀅𑀢𑁆𑀣𑁄. 𑀫𑀦𑁄𑀪𑀸𑀯𑀦𑀻𑀬𑀸𑀦𑀦𑁆𑀢𑀺 𑀫𑀦𑀯𑀟𑁆𑀠𑀓𑀸𑀦𑀁 ¶ . 𑀬𑁂𑀲𑀼 𑀳𑀺 𑀤𑀺𑀝𑁆𑀞𑁂𑀲𑀼 𑀓𑀼𑀲𑀮𑀯𑀲𑁂𑀦 𑀘𑀺𑀢𑁆𑀢𑀁 𑀯𑀟𑁆𑀠𑀢𑀺, 𑀢𑁂 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀬𑁄 𑀫𑀳𑀸𑀣𑁂𑀭𑀸 𑀫𑀦𑁄𑀪𑀸𑀯𑀦𑀻𑀬𑀸 𑀦𑀸𑀫. 𑀅𑀦𑀼𑀲𑀸𑀲𑀢𑀽𑀢𑀺 𑀧𑀼𑀦𑀧𑁆𑀧𑀼𑀦𑀁 𑀲𑀸𑀲𑀢𑀼. 𑀧𑀼𑀭𑀺𑀫𑀜𑁆𑀳𑀺 𑀯𑀘𑀦𑀁 𑀑𑀯𑀸𑀤𑁄 𑀦𑀸𑀫, 𑀅𑀧𑀭𑀸𑀧𑀭𑀁 𑀅𑀦𑀼𑀲𑀸𑀲𑀦𑀻 𑀦𑀸𑀫. 𑀑𑀢𑀺𑀡𑁆𑀡𑁂 𑀯𑀸 𑀯𑀢𑁆𑀣𑀼𑀲𑁆𑀫𑀺𑀁 𑀯𑀘𑀦𑀁 𑀑𑀯𑀸𑀤𑁄 𑀦𑀸𑀫, 𑀅𑀦𑁄𑀢𑀺𑀡𑁆𑀡𑁂 𑀢𑀦𑁆𑀢𑀺𑀯𑀲𑁂𑀦 𑀯𑀸 𑀧𑀯𑁂𑀡𑀺𑀯𑀲𑁂𑀦 𑀯𑀸 𑀯𑀼𑀢𑁆𑀢𑀁 𑀅𑀦𑀼𑀲𑀸𑀲𑀦𑀻 𑀦𑀸𑀫. 𑀅𑀧𑀺𑀘 𑀑𑀯𑀸𑀤𑁄𑀢𑀺 𑀯𑀸 𑀅𑀦𑀼𑀲𑀸𑀲𑀦𑀻𑀢𑀺 𑀯𑀸 𑀅𑀢𑁆𑀣𑀢𑁄 𑀏𑀓𑀫𑁂𑀯, 𑀩𑁆𑀬𑀜𑁆𑀚𑀦𑀫𑀢𑁆𑀢𑀫𑁂𑀯 𑀦𑀸𑀦𑀁.

𑀆𑀢𑀼𑀭𑁄 𑀳𑀸𑀬𑀦𑁆𑀢𑀺 𑀆𑀢𑀼𑀭𑁄 𑀳𑀺 𑀅𑀬𑀁, 𑀲𑀼𑀯𑀡𑁆𑀡𑀯𑀡𑁆𑀡𑁄 𑀧𑀺𑀬𑀗𑁆𑀕𑀼𑀲𑀸𑀫𑁄𑀧𑀺 𑀲𑀫𑀸𑀦𑁄 𑀦𑀺𑀘𑁆𑀘𑀧𑀕𑁆𑀖𑀭𑀡𑀝𑁆𑀞𑁂𑀦 𑀆𑀢𑀼𑀭𑁄𑀬𑁂𑀯. 𑀅𑀡𑁆𑀟𑀪𑀽𑀢𑁄𑀢𑀺 𑀅𑀡𑁆𑀟𑀁 𑀯𑀺𑀬 𑀪𑀽𑀢𑁄 𑀤𑀼𑀩𑁆𑀩𑀮𑁄. 𑀬𑀣𑀸 𑀓𑀼𑀓𑁆𑀓𑀼𑀝𑀡𑁆𑀟𑀁 𑀯𑀸 𑀫𑀬𑀽𑀭𑀡𑁆𑀟𑀁 𑀯𑀸 𑀕𑁂𑀡𑁆𑀟𑀼𑀓𑀁 𑀯𑀺𑀬 𑀕𑀳𑁂𑀢𑁆𑀯𑀸 𑀔𑀺𑀧𑀦𑁆𑀢𑁂𑀦 𑀯𑀸 𑀧𑀳𑀭𑀦𑁆𑀢𑁂𑀦 𑀯𑀸 𑀦 𑀲𑀓𑁆𑀓𑀸 𑀓𑀻𑀴𑀺𑀢𑀼𑀁, 𑀢𑀸𑀯𑀤𑁂𑀯 𑀪𑀺𑀚𑁆𑀚𑀢𑀺, 𑀏𑀯𑀫𑀬𑀫𑁆𑀧𑀺 𑀓𑀸𑀬𑁄 𑀓𑀡𑁆𑀝𑀓𑁂𑀧𑀺 𑀔𑀸𑀡𑀼𑀓𑁂𑀧𑀺 𑀧𑀓𑁆𑀔𑀮𑀺𑀢𑀲𑁆𑀲 𑀪𑀺𑀚𑁆𑀚𑀢𑀻𑀢𑀺 𑀅𑀡𑁆𑀟𑀁 𑀯𑀺𑀬 𑀪𑀽𑀢𑁄𑀢𑀺 𑀅𑀡𑁆𑀟𑀪𑀽𑀢𑁄. 𑀧𑀭𑀺𑀬𑁄𑀦𑀤𑁆𑀥𑁄𑀢𑀺 𑀲𑀼𑀔𑀼𑀫𑁂𑀦 𑀙𑀯𑀺𑀫𑀢𑁆𑀢𑁂𑀦 𑀧𑀭𑀺𑀬𑁄𑀦𑀤𑁆𑀥𑁄. 𑀅𑀡𑁆𑀟𑀜𑁆𑀳𑀺 𑀲𑀸𑀭𑀢𑀘𑁂𑀦 𑀧𑀭𑀺𑀬𑁄𑀦𑀤𑁆𑀥𑀁, 𑀢𑁂𑀦 𑀟𑀁𑀲𑀫𑀓𑀲𑀸𑀤𑀬𑁄 𑀦𑀺𑀮𑀻𑀬𑀺𑀢𑁆𑀯𑀸𑀧𑀺 𑀙𑀯𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀬𑀽𑀲𑀁 𑀧𑀕𑁆𑀖𑀭𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀙𑀯𑀺𑀁 𑀙𑀺𑀦𑁆𑀤𑀺𑀢𑁆𑀯𑀸 𑀬𑀁 𑀇𑀘𑁆𑀙𑀦𑁆𑀢𑀺, 𑀢𑀁 𑀓𑀭𑁄𑀦𑁆𑀢𑀺. 𑀏𑀯𑀁 𑀲𑀼𑀔𑀼𑀫𑀸𑀬 𑀙𑀯𑀺𑀬𑀸 𑀧𑀭𑀺𑀬𑁄𑀦𑀤𑁆𑀥𑁄. 𑀓𑀺𑀫𑀜𑁆𑀜𑀢𑁆𑀭 𑀩𑀸𑀮𑁆𑀬𑀸𑀢𑀺 𑀩𑀸𑀮𑀪𑀸𑀯𑀢𑁄 𑀅𑀜𑁆𑀜𑀁 𑀓𑀺𑀫𑀢𑁆𑀣𑀺? 𑀩𑀸𑀮𑁄𑀬𑁂𑀯 𑀅𑀬𑀦𑁆𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀅𑀬𑀁 𑀓𑀸𑀬𑁄 𑀏𑀯𑀭𑀽𑀧𑁄, 𑀢𑀲𑁆𑀫𑀸.

𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀅𑀦𑀦𑁆𑀢𑀭𑀁 𑀧𑀭𑀺𑀡𑀸𑀬𑀓𑀭𑀢𑀦𑀲𑁆𑀲 𑀉𑀧𑀝𑁆𑀞𑀸𑀦𑀁 𑀕𑀘𑁆𑀙𑀦𑁆𑀢𑁄 𑀭𑀸𑀚𑀧𑀼𑀭𑀺𑀲𑁄 𑀯𑀺𑀬, 𑀲𑀤𑁆𑀥𑀫𑁆𑀫𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀪𑀕𑀯𑀢𑁄 𑀉𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸, 𑀅𑀦𑀦𑁆𑀢𑀭𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 ¶ 𑀅𑀧𑀘𑀺𑀢𑀺𑀁 𑀓𑀸𑀢𑀼𑀓𑀸𑀫𑁄 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄, 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀯𑀺𑀧𑁆𑀧𑀲𑀦𑁆𑀦𑀸𑀦𑀻𑀢𑀺 𑀲𑀼𑀝𑁆𑀞𑀼 𑀧𑀲𑀦𑁆𑀦𑀸𑀦𑀺. 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀫𑀦𑀘𑁆𑀙𑀝𑁆𑀞𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀧𑀭𑀺𑀲𑀼𑀤𑁆𑀥𑁄𑀢𑀺 𑀦𑀺𑀤𑁆𑀤𑁄𑀲𑁄. 𑀧𑀭𑀺𑀬𑁄𑀤𑀸𑀢𑁄𑀢𑀺 ¶ 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑀸𑀬𑁂𑀯 𑀳𑀺 𑀏𑀲 𑀧𑀭𑀺𑀬𑁄𑀤𑀸𑀢𑁄𑀢𑀺 𑀯𑀼𑀢𑁆𑀢𑁄, 𑀦 𑀲𑁂𑀢𑀪𑀸𑀯𑁂𑀦. 𑀏𑀢𑀲𑁆𑀲 𑀘 𑀧𑀭𑀺𑀬𑁄𑀤𑀸𑀢𑀢𑀁 𑀤𑀺𑀲𑁆𑀯𑀸𑀯 ¶ 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀺𑀧𑁆𑀧𑀲𑀦𑁆𑀦𑀢𑀁 𑀅𑀜𑁆𑀜𑀸𑀲𑀺. 𑀦𑀬𑀕𑁆𑀕𑀸𑀳𑀧𑀜𑁆𑀜𑀸 𑀓𑀺𑀭𑁂𑀲𑀸 𑀣𑁂𑀭𑀲𑁆𑀲.

𑀓𑀣𑀜𑁆𑀳𑀺 𑀦𑁄 𑀲𑀺𑀬𑀸𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀦 𑀮𑀤𑁆𑀥𑀸 𑀪𑀯𑀺𑀲𑁆𑀲𑀢𑀺? 𑀮𑀤𑁆𑀥𑀸𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀓𑀺𑀁 𑀤𑀻𑀧𑁂𑀢𑀺? 𑀲𑀢𑁆𑀣𑀼𑀯𑀺𑀲𑁆𑀲𑀸𑀲𑀺𑀓𑀪𑀸𑀯𑀁. 𑀅𑀬𑀁 𑀓𑀺𑀭 𑀲𑀢𑁆𑀣𑀼 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀺𑀢𑀺𑀧𑁂𑀫𑀁, 𑀉𑀧𑀸𑀲𑀺𑀓𑀸 𑀘𑀲𑁆𑀲 𑀫𑀸𑀢𑀺𑀧𑁂𑀫𑀁 𑀧𑀝𑀺𑀮𑀪𑀢𑀺. 𑀉𑀪𑁄𑀧𑀺 ‘‘𑀫𑀫 𑀧𑀼𑀢𑁆𑀢𑁄’’𑀢𑀺 𑀲𑀢𑁆𑀣𑀸𑀭𑀁 𑀯𑀤𑀦𑁆𑀢𑀺. 𑀪𑀯𑀦𑁆𑀢𑀭𑀕𑀢𑁄 𑀳𑀺 𑀦𑁂𑀲𑀁 𑀲𑀺𑀦𑁂𑀳𑁄. 𑀲𑀸 𑀓𑀺𑀭 𑀉𑀧𑀸𑀲𑀺𑀓𑀸 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀢𑀣𑀸𑀕𑀢𑀲𑁆𑀲 𑀫𑀸𑀢𑀸𑀯, 𑀲𑁄 𑀘, 𑀕𑀳𑀧𑀢𑀺, 𑀧𑀺𑀢𑀸𑀯 𑀅𑀳𑁄𑀲𑀺. 𑀧𑀼𑀦 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀉𑀧𑀸𑀲𑀺𑀓𑀸 𑀫𑀳𑀸𑀫𑀸𑀢𑀸, 𑀉𑀧𑀸𑀲𑀓𑁄 𑀫𑀳𑀸𑀧𑀺𑀢𑀸, 𑀢𑀣𑀸 𑀘𑀽𑀴𑀸𑀫𑀸𑀢𑀸 𑀘𑀽𑀴𑀧𑀺𑀢𑀸𑀢𑀺. 𑀏𑀯𑀁 𑀲𑀢𑁆𑀣𑀸 𑀤𑀺𑀬𑀟𑁆𑀠𑀅𑀢𑁆𑀢𑀪𑀸𑀯𑀲𑀳𑀲𑁆𑀲𑀁 𑀢𑁂𑀲𑀁𑀬𑁂𑀯 𑀳𑀢𑁆𑀣𑁂 𑀯𑀟𑁆𑀠𑀺𑀢𑁄. 𑀢𑁂𑀦𑁂𑀯 𑀢𑁂 𑀬𑀁 𑀦𑁂𑀯 𑀧𑀼𑀢𑁆𑀢𑀲𑁆𑀲, 𑀦 𑀧𑀺𑀢𑀼 𑀲𑀦𑁆𑀢𑀺𑀓𑁂 𑀓𑀣𑁂𑀢𑀼𑀁 𑀲𑀓𑁆𑀓𑀸, 𑀢𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀦𑀺𑀲𑀺𑀦𑁆𑀦𑀸 𑀓𑀣𑁂𑀦𑁆𑀢𑀺. 𑀇𑀫𑀺𑀦𑀸𑀬𑁂𑀯 𑀘 𑀓𑀸𑀭𑀡𑁂𑀦 𑀪𑀕𑀯𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀉𑀧𑀸𑀲𑀓𑀸𑀦𑀁 𑀯𑀺𑀲𑁆𑀲𑀸𑀲𑀺𑀓𑀸𑀦𑀁 𑀬𑀤𑀺𑀤𑀁 𑀦𑀓𑀼𑀮𑀧𑀺𑀢𑀸 𑀕𑀳𑀧𑀢𑀺, 𑀬𑀤𑀺𑀤𑀁 𑀦𑀓𑀼𑀮𑀫𑀸𑀢𑀸 𑀕𑀳𑀧𑀢𑀸𑀦𑀻’’𑀢𑀺 (𑀅. 𑀦𑀺. 𑁧.𑁨𑁫𑁭) 𑀢𑁂 𑀏𑀢𑀤𑀕𑁆𑀕𑁂 𑀞𑀧𑁂𑀲𑀺. 𑀇𑀢𑀺 𑀲𑁄 𑀇𑀫𑀁 𑀯𑀺𑀲𑁆𑀲𑀸𑀲𑀺𑀓𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀓𑀣𑀜𑁆𑀳𑀺 𑀦𑁄 𑀲𑀺𑀬𑀸𑀢𑀺 𑀆𑀳. 𑀅𑀫𑀢𑁂𑀦 𑀅𑀪𑀺𑀲𑀺𑀢𑁆𑀢𑁄𑀢𑀺 𑀦𑀲𑁆𑀲𑀺𑀥 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀛𑀸𑀦𑀁 𑀯𑀸 𑀯𑀺𑀧𑀲𑁆𑀲𑀦𑀸 𑀯𑀸 𑀫𑀕𑁆𑀕𑁄 𑀯𑀸 𑀨𑀮𑀁 𑀯𑀸 ‘‘𑀅𑀫𑀢𑀸𑀪𑀺𑀲𑁂𑀓𑁄’’𑀢𑀺 𑀤𑀝𑁆𑀞𑀩𑁆𑀩𑁄, 𑀫𑀥𑀼𑀭𑀥𑀫𑁆𑀫𑀤𑁂𑀲𑀦𑀸𑀬𑁂𑀯 𑀧𑀦 ‘‘𑀅𑀫𑀢𑀸𑀪𑀺𑀲𑁂𑀓𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀤𑀽𑀭𑀢𑁄𑀧𑀻𑀢𑀺 𑀢𑀺𑀭𑁄𑀭𑀝𑁆𑀞𑀸𑀧𑀺 𑀢𑀺𑀭𑁄𑀚𑀦𑀧𑀤𑀸𑀧𑀺.

𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄𑀢𑀺 𑀇𑀤𑀁 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻𑀢𑀺𑀆𑀤𑀻𑀲𑀼 𑀅𑀭𑀺𑀬𑀸𑀢𑀺 𑀆𑀭𑀓𑀢𑁆𑀢𑀸 𑀓𑀺𑀮𑁂𑀲𑁂𑀳𑀺, 𑀅𑀦𑀬𑁂 𑀦 𑀇𑀭𑀺𑀬𑀦𑀢𑁄, 𑀅𑀬𑁂 𑀇𑀭𑀺𑀬𑀦𑀢𑁄, 𑀲𑀤𑁂𑀯𑀓𑁂𑀦 𑀘 𑀮𑁄𑀓𑁂𑀦 𑀅𑀭𑀡𑀻𑀬𑀢𑁄 𑀩𑀼𑀤𑁆𑀥𑀸 𑀘 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀘 𑀩𑀼𑀤𑁆𑀥𑀲𑀸𑀯𑀓𑀸 𑀘 𑀯𑀼𑀘𑁆𑀘𑀦𑁆𑀢𑀺. 𑀩𑀼𑀤𑁆𑀥𑀸 𑀏𑀯 𑀯𑀸 𑀇𑀥 𑀅𑀭𑀺𑀬𑀸. 𑀬𑀣𑀸𑀳 𑁋 ‘‘𑀲𑀤𑁂𑀯𑀓𑁂, 𑀪𑀺𑀓𑁆𑀔𑀯𑁂, 𑀮𑁄𑀓𑁂…𑀧𑁂… 𑀢𑀣𑀸𑀕𑀢𑁄 𑀅𑀭𑀺𑀬𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 (𑀲𑀁. 𑀦𑀺. 𑁫.𑁧𑁦𑁯𑁮). 𑀲𑀧𑁆𑀧𑀼𑀭𑀺𑀲𑀸𑀦𑀦𑁆𑀢𑀺 𑀏𑀢𑁆𑀣 𑀧𑀦 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀢𑀣𑀸𑀕𑀢𑀲𑀸𑀯𑀓𑀸 𑀘 𑀲𑀧𑁆𑀧𑀼𑀭𑀺𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀳𑀺 𑀮𑁄𑀓𑀼𑀢𑁆𑀢𑀭𑀕𑀼𑀡𑀬𑁄𑀕𑁂𑀦 𑀲𑁄𑀪𑀦𑀸 𑀧𑀼𑀭𑀺𑀲𑀸𑀢𑀺 ¶ 𑀲𑀧𑁆𑀧𑀼𑀭𑀺𑀲𑀸. 𑀲𑀩𑁆𑀩𑁂𑀯 𑀯𑀸 𑀏𑀢𑁂 𑀤𑁆𑀯𑁂𑀥𑀸𑀧𑀺 𑀯𑀼𑀢𑁆𑀢𑀸. 𑀩𑀼𑀤𑁆𑀥𑀸𑀧𑀺 𑀳𑀺 𑀅𑀭𑀺𑀬𑀸 𑀘 𑀲𑀧𑁆𑀧𑀼𑀭𑀺𑀲𑀸 𑀘, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀩𑀼𑀤𑁆𑀥𑀲𑀸𑀯𑀓𑀸𑀧𑀺. 𑀬𑀣𑀸𑀳 𑁋

‘‘𑀬𑁄 ¶ ¶ 𑀯𑁂 𑀓𑀢𑀜𑁆𑀜𑀽 𑀓𑀢𑀯𑁂𑀤𑀺 𑀥𑀻𑀭𑁄,

𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀤𑀴𑁆𑀳𑀪𑀢𑁆𑀢𑀺 𑀘 𑀳𑁄𑀢𑀺;

𑀤𑀼𑀔𑀺𑀢𑀲𑁆𑀲 𑀲𑀓𑁆𑀓𑀘𑁆𑀘 𑀓𑀭𑁄𑀢𑀺 𑀓𑀺𑀘𑁆𑀘𑀁,

𑀢𑀣𑀸𑀯𑀺𑀥𑀁 𑀲𑀧𑁆𑀧𑀼𑀭𑀺𑀲𑀁 𑀯𑀤𑀦𑁆𑀢𑀻’’𑀢𑀺. (𑀚𑀸. 𑁨.𑁧𑁭.𑁭𑁮);

‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀤𑀴𑁆𑀳𑀪𑀢𑁆𑀢𑀺 𑀘 𑀳𑁄𑀢𑀻’’𑀢𑀺 𑀏𑀢𑁆𑀢𑀸𑀯𑀢𑀸 𑀳𑀺 𑀩𑀼𑀤𑁆𑀥𑀲𑀸𑀯𑀓𑁄 𑀯𑀼𑀢𑁆𑀢𑁄, 𑀓𑀢𑀜𑁆𑀜𑀼𑀢𑀸𑀤𑀻𑀳𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀸𑀢𑀺. 𑀇𑀤𑀸𑀦𑀺 𑀬𑁄 𑀢𑁂𑀲𑀁 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀲𑀻𑀮𑁄, 𑀦 𑀘 𑀤𑀲𑁆𑀲𑀦𑁂 𑀲𑀸𑀥𑀼𑀓𑀸𑀭𑀻, 𑀲𑁄 ‘‘𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀘 𑀘𑀓𑁆𑀔𑀼𑀦𑀸 𑀅𑀤𑀲𑁆𑀲𑀸𑀯𑀻, 𑀜𑀸𑀡𑁂𑀦 𑀅𑀤𑀲𑁆𑀲𑀸𑀯𑀻𑀢𑀺 𑀤𑀼𑀯𑀺𑀥𑁄. 𑀢𑁂𑀲𑀼 𑀜𑀸𑀡𑁂𑀦 𑀅𑀤𑀲𑁆𑀲𑀸𑀯𑀻 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀫𑀁𑀲𑀘𑀓𑁆𑀔𑀼𑀦𑀸 𑀳𑀺 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀯𑀸 𑀅𑀭𑀺𑀬𑀸 𑀤𑀺𑀝𑁆𑀞𑀸𑀧𑀺 𑀅𑀤𑀺𑀝𑁆𑀞𑀸𑀯 𑀳𑁄𑀦𑁆𑀢𑀺 𑀢𑁂𑀲𑀁 𑀘𑀓𑁆𑀔𑀽𑀦𑀁 𑀯𑀡𑁆𑀡𑀫𑀢𑁆𑀢𑀕𑁆𑀕𑀳𑀡𑀢𑁄 𑀦 𑀅𑀭𑀺𑀬𑀪𑀸𑀯𑀕𑁄𑀘𑀭𑀢𑁄. 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀬𑁄𑀧𑀺 𑀘𑀓𑁆𑀔𑀼𑀦𑀸 𑀅𑀭𑀺𑀬𑁂 𑀧𑀲𑁆𑀲𑀦𑁆𑀢𑀺, 𑀦 𑀘𑁂𑀢𑁂 𑀅𑀭𑀺𑀬𑀸𑀦𑀁 𑀤𑀲𑁆𑀲𑀸𑀯𑀺𑀦𑁄 𑀦𑀸𑀫.

𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀘𑀺𑀢𑁆𑀢𑀮𑀧𑀩𑁆𑀩𑀢𑀯𑀸𑀲𑀺𑀦𑁄 𑀓𑀺𑀭 𑀔𑀻𑀡𑀸𑀲𑀯𑀢𑁆𑀣𑁂𑀭𑀲𑁆𑀲 𑀉𑀧𑀝𑁆𑀞𑀸𑀓𑁄 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄 𑀏𑀓𑀤𑀺𑀯𑀲𑀁 𑀣𑁂𑀭𑁂𑀦 𑀲𑀤𑁆𑀥𑀺𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸, 𑀣𑁂𑀭𑀲𑁆𑀲 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸, 𑀧𑀺𑀝𑁆𑀞𑀺𑀢𑁄 𑀆𑀕𑀘𑁆𑀙𑀦𑁆𑀢𑁄 𑀣𑁂𑀭𑀁 𑀧𑀼𑀘𑁆𑀙𑀺 𑁋 ‘‘𑀅𑀭𑀺𑀬𑀸 𑀦𑀸𑀫, 𑀪𑀦𑁆𑀢𑁂, 𑀓𑀻𑀤𑀺𑀲𑀸’’𑀢𑀺? 𑀣𑁂𑀭𑁄 𑀆𑀳 𑁋 ‘‘𑀇𑀥𑁂𑀓𑀘𑁆𑀘𑁄 𑀫𑀳𑀮𑁆𑀮𑀓𑁄 𑀅𑀭𑀺𑀬𑀸𑀦𑀁 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀢𑁆𑀯𑀸 𑀲𑀳𑀘𑀭𑀦𑁆𑀢𑁄𑀧𑀺 𑀦𑁂𑀯 𑀅𑀭𑀺𑀬𑁂 𑀚𑀸𑀦𑀸𑀢𑀺, 𑀏𑀯𑀁 𑀤𑀼𑀚𑁆𑀚𑀸𑀦𑀸𑀯𑀼𑀲𑁄, 𑀅𑀭𑀺𑀬𑀸’’𑀢𑀺. 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀲𑁄 𑀦𑁂𑀯 𑀅𑀜𑁆𑀜𑀸𑀲𑀺. 𑀢𑀲𑁆𑀫𑀸 𑀦 𑀘𑀓𑁆𑀔𑀼𑀦𑀸 𑀤𑀲𑁆𑀲𑀦𑀁 𑀤𑀲𑁆𑀲𑀦𑀁, 𑀜𑀸𑀡𑁂𑀦 𑀤𑀲𑁆𑀲𑀦𑀫𑁂𑀯 𑀤𑀲𑁆𑀲𑀦𑀁. 𑀬𑀣𑀸𑀳 𑁋 ‘‘𑀓𑀺𑀁 𑀢𑁂, 𑀯𑀓𑁆𑀓𑀮𑀺, 𑀇𑀫𑀺𑀦𑀸 𑀧𑀽𑀢𑀺𑀓𑀸𑀬𑁂𑀦 𑀤𑀺𑀝𑁆𑀞𑁂𑀦? 𑀬𑁄 𑀔𑁄, 𑀯𑀓𑁆𑀓𑀮𑀺, 𑀥𑀫𑁆𑀫𑀁 𑀧𑀲𑁆𑀲𑀢𑀺, 𑀲𑁄 𑀫𑀁 𑀧𑀲𑁆𑀲𑀢𑀺. 𑀬𑁄 𑀫𑀁 𑀧𑀲𑁆𑀲𑀢𑀺, 𑀲𑁄 𑀥𑀫𑁆𑀫𑀁 𑀧𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁩.𑁮𑁭). 𑀢𑀲𑁆𑀫𑀸 𑀘𑀓𑁆𑀔𑀼𑀦𑀸 𑀧𑀲𑁆𑀲𑀦𑁆𑀢𑁄𑀧𑀺 𑀜𑀸𑀡𑁂𑀦 𑀅𑀭𑀺𑀬𑁂𑀳𑀺 𑀤𑀺𑀝𑁆𑀞𑀁 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀁 𑀅𑀧𑀲𑁆𑀲𑀦𑁆𑀢𑁄, 𑀅𑀭𑀺𑀬𑀸𑀥𑀺𑀕𑀢𑀜𑁆𑀘 𑀥𑀫𑁆𑀫𑀁 𑀅𑀦𑀥𑀺𑀕𑀘𑁆𑀙𑀦𑁆𑀢𑁄 𑀅𑀭𑀺𑀬𑀓𑀭𑀥𑀫𑁆𑀫𑀸𑀦𑀁 𑀅𑀭𑀺𑀬𑀪𑀸𑀯𑀲𑁆𑀲 𑀘 𑀅𑀤𑀺𑀝𑁆𑀞𑀢𑁆𑀢𑀸 ‘‘𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀸𑀯𑀻’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄𑀢𑀺, 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑁂 𑀅𑀭𑀺𑀬𑀥𑀫𑁆𑀫𑁂 𑀅𑀓𑀼𑀲𑀮𑁄. 𑀅𑀭𑀺𑀬𑀥𑀫𑁆𑀫𑁂 𑀅𑀯𑀺𑀦𑀻𑀢𑁄𑀢𑀺 𑀏𑀢𑁆𑀣 𑀧𑀦 𑁋

‘‘𑀤𑀼𑀯𑀺𑀥𑁄 𑀯𑀺𑀦𑀬𑁄 𑀦𑀸𑀫, 𑀏𑀓𑀫𑁂𑀓𑁂𑀢𑁆𑀣 𑀧𑀜𑁆𑀘𑀥𑀸;

𑀅𑀪𑀸𑀯𑀢𑁄 𑀢𑀲𑁆𑀲 𑀅𑀬𑀁, 𑀅𑀯𑀺𑀦𑀻𑀢𑁄𑀢𑀺 𑀯𑀼𑀘𑁆𑀘𑀢𑀺’’.

𑀅𑀬𑀜𑁆𑀳𑀺 ¶ ¶ ¶ 𑀲𑀁𑀯𑀭𑀯𑀺𑀦𑀬𑁄 𑀧𑀳𑀸𑀦𑀯𑀺𑀦𑀬𑁄𑀢𑀺 𑀤𑀼𑀯𑀺𑀥𑁄 𑀯𑀺𑀦𑀬𑁄. 𑀏𑀢𑁆𑀣 𑀘 𑀤𑀼𑀯𑀺𑀥𑁂𑀧𑀺 𑀯𑀺𑀦𑀬𑁂 𑀏𑀓𑀫𑁂𑀓𑁄 𑀯𑀺𑀦𑀬𑁄 𑀧𑀜𑁆𑀘𑀥𑀸 𑀪𑀺𑀚𑁆𑀚𑀢𑀺. 𑀲𑀁𑀯𑀭𑀯𑀺𑀦𑀬𑁄𑀧𑀺 𑀳𑀺 𑀲𑀻𑀮𑀲𑀁𑀯𑀭𑁄 𑀲𑀢𑀺𑀲𑀁𑀯𑀭𑁄 𑀜𑀸𑀡𑀲𑀁𑀯𑀭𑁄 𑀔𑀦𑁆𑀢𑀺𑀲𑀁𑀯𑀭𑁄 𑀯𑀻𑀭𑀺𑀬𑀲𑀁𑀯𑀭𑁄𑀢𑀺 𑀧𑀜𑁆𑀘𑀯𑀺𑀥𑁄. 𑀧𑀳𑀸𑀦𑀯𑀺𑀦𑀬𑁄𑀧𑀺 𑀢𑀤𑀗𑁆𑀕𑀧𑁆𑀧𑀳𑀸𑀦𑀁, 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀁 𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀦𑁆𑀢𑀺 𑀧𑀜𑁆𑀘𑀯𑀺𑀥𑁄.

𑀢𑀢𑁆𑀣 ‘‘𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀉𑀧𑁂𑀢𑁄 𑀳𑁄𑀢𑀺 𑀲𑀫𑀼𑀧𑁂𑀢𑁄’’𑀢𑀺 (𑀯𑀺𑀪. 𑁫𑁧𑁧) 𑀅𑀬𑀁 𑀲𑀻𑀮𑀲𑀁𑀯𑀭𑁄. ‘‘𑀭𑀓𑁆𑀔𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻’’𑀢𑀺 𑀅𑀬𑀁 (𑀤𑀻. 𑀦𑀺. 𑁧.𑁨𑁧𑁩; 𑀫. 𑀦𑀺. 𑁧.𑁨𑁯𑁫; 𑀲𑀁. 𑀦𑀺. 𑁪.𑁨𑁩𑁯; 𑀅. 𑀦𑀺. 𑁩.𑁧𑁬) 𑀲𑀢𑀺𑀲𑀁𑀯𑀭𑁄.

‘‘𑀬𑀸𑀦𑀺 𑀲𑁄𑀢𑀸𑀦𑀺 𑀮𑁄𑀓𑀲𑁆𑀫𑀺𑀁, (𑀅𑀚𑀺𑀢𑀸𑀢𑀺 𑀪𑀕𑀯𑀸)

𑀲𑀢𑀺 𑀢𑁂𑀲𑀁 𑀦𑀺𑀯𑀸𑀭𑀡𑀁;

𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀺,

𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂’’𑀢𑀺. (𑀲𑀼. 𑀦𑀺. 𑁧𑁦𑁪𑁧; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲.𑁪) 𑁋

𑀅𑀬𑀁 𑀜𑀸𑀡𑀲𑀁𑀯𑀭𑁄. ‘‘𑀔𑀫𑁄 𑀳𑁄𑀢𑀺 𑀲𑀻𑀢𑀲𑁆𑀲 𑀉𑀡𑁆𑀳𑀲𑁆𑀲𑀸’’𑀢𑀺 (𑀫. 𑀦𑀺. 𑁧.𑁨𑁪; 𑀅. 𑀦𑀺. 𑁪.𑁧𑁧𑁪; 𑁬.𑁫𑁮) 𑀅𑀬𑀁 𑀔𑀦𑁆𑀢𑀺𑀲𑀁𑀯𑀭𑁄. ‘‘𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀻’’𑀢𑀺 (𑀫. 𑀦𑀺. 𑁧.𑁨𑁬; 𑀅. 𑀦𑀺. 𑁪.𑁧𑁧𑁪; 𑁬.𑁫𑁮) 𑀅𑀬𑀁 𑀯𑀻𑀭𑀺𑀬𑀲𑀁𑀯𑀭𑁄. 𑀲𑀩𑁆𑀩𑁄𑀧𑀺 𑀘𑀸𑀬𑀁 𑀲𑀁𑀯𑀭𑁄 𑀬𑀣𑀸𑀲𑀓𑀁 𑀲𑀁𑀯𑀭𑀺𑀢𑀩𑁆𑀩𑀸𑀦𑀁 𑀯𑀺𑀦𑁂𑀢𑀩𑁆𑀩𑀸𑀦𑀜𑁆𑀘 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀲𑀁𑀯𑀭𑀡𑀢𑁄 ‘‘𑀲𑀁𑀯𑀭𑁄’’ 𑀯𑀺𑀦𑀬𑀦𑀢𑁄 ‘‘𑀯𑀺𑀦𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀢𑀸𑀯 𑀲𑀁𑀯𑀭𑀯𑀺𑀦𑀬𑁄 𑀧𑀜𑁆𑀘𑀥𑀸 𑀪𑀺𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀢𑀣𑀸 𑀬𑀁 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀸𑀤𑀻𑀲𑀼 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀲𑀼 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀤𑀻𑀧𑀸𑀮𑁄𑀓𑁂𑀦𑁂𑀯 𑀢𑀫𑀲𑁆𑀲, 𑀢𑁂𑀦 𑀢𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀢𑀲𑁆𑀲 𑀢𑀲𑁆𑀲 𑀅𑀦𑀢𑁆𑀣𑀲𑁆𑀲 𑀧𑀳𑀸𑀦𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑁂𑀦 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸, 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁂𑀦 𑀅𑀳𑁂𑀢𑀼𑀯𑀺𑀲𑀫𑀳𑁂𑀢𑀼𑀤𑀺𑀝𑁆𑀞𑀻𑀦𑀁, 𑀢𑀲𑁆𑀲𑁂𑀯 𑀅𑀧𑀭𑀪𑀸𑀕𑁂𑀦 𑀓𑀗𑁆𑀔𑀸𑀯𑀺𑀢𑀭𑀡𑁂𑀦 𑀓𑀣𑀁𑀓𑀣𑀻𑀪𑀸𑀯𑀲𑁆𑀲, 𑀓𑀮𑀸𑀧𑀲𑀫𑁆𑀫𑀲𑀦𑁂𑀦 ‘‘𑀅𑀳𑀁 𑀫𑀫𑀸’’𑀢𑀺 𑀕𑀸𑀳𑀲𑁆𑀲, 𑀫𑀕𑁆𑀕𑀸𑀫𑀕𑁆𑀕𑀯𑀯𑀢𑁆𑀣𑀸𑀦𑁂𑀦 𑀅𑀫𑀕𑁆𑀕𑁂 𑀫𑀕𑁆𑀕𑀲𑀜𑁆𑀜𑀸𑀬, 𑀉𑀤𑀬𑀤𑀲𑁆𑀲𑀦𑁂𑀦 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸, 𑀯𑀬𑀤𑀲𑁆𑀲𑀦𑁂𑀦 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸, 𑀪𑀬𑀤𑀲𑁆𑀲𑀦𑁂𑀦 𑀲𑀪𑀬𑁂 𑀅𑀪𑀬𑀲𑀜𑁆𑀜𑀸𑀬, 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀅𑀲𑁆𑀲𑀸𑀤𑀲𑀜𑁆𑀜𑀸𑀬, 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬 𑀅𑀪𑀺𑀭𑀢𑀺𑀲𑀜𑁆𑀜𑀸𑀬 ¶ , 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸𑀜𑀸𑀡𑁂𑀦 𑀅𑀫𑀼𑀘𑁆𑀘𑀺𑀢𑀼𑀓𑀸𑀫𑀢𑀸𑀬. 𑀉𑀧𑁂𑀓𑁆𑀔𑀸𑀜𑀸𑀡𑁂𑀦 𑀅𑀦𑀼𑀧𑁂𑀓𑁆𑀔𑀸𑀬, 𑀅𑀦𑀼𑀮𑁄𑀫𑁂𑀦 ¶ 𑀥𑀫𑁆𑀫𑀝𑁆𑀞𑀺𑀢𑀺𑀬𑀁 𑀦𑀺𑀩𑁆𑀩𑀸𑀦𑁂 𑀘 𑀧𑀝𑀺𑀮𑁄𑀫𑀪𑀸𑀯𑀲𑁆𑀲, 𑀕𑁄𑀢𑁆𑀭𑀪𑀼𑀦𑀸 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀕𑀸𑀳𑀲𑁆𑀲 𑀧𑀳𑀸𑀦𑀁, 𑀏𑀢𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑀁 𑀦𑀸𑀫.

𑀬𑀁 ¶ 𑀧𑀦 𑀉𑀧𑀘𑀸𑀭𑀧𑁆𑀧𑀦𑀸𑀪𑁂𑀤𑁂𑀦 𑀲𑀫𑀸𑀥𑀺𑀦𑀸 𑀧𑀯𑀢𑁆𑀢𑀺𑀪𑀸𑀯𑀦𑀺𑀯𑀸𑀭𑀡𑀢𑁄 𑀖𑀝𑀧𑁆𑀧𑀳𑀸𑀭𑁂𑀦𑁂𑀯 𑀉𑀤𑀓𑀧𑀺𑀝𑁆𑀞𑁂 𑀲𑁂𑀯𑀸𑀮𑀲𑁆𑀲, 𑀢𑁂𑀲𑀁 𑀢𑁂𑀲𑀁 𑀦𑀻𑀯𑀭𑀡𑀸𑀤𑀺𑀥𑀫𑁆𑀫𑀸𑀦𑀁 𑀧𑀳𑀸𑀦𑀁, 𑀏𑀢𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁 𑀦𑀸𑀫. 𑀬𑀁 𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀢𑀁𑀢𑀁𑀫𑀕𑁆𑀕𑀯𑀢𑁄 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 ‘‘𑀤𑀺𑀝𑁆𑀞𑀺𑀕𑀢𑀸𑀦𑀁 𑀧𑀳𑀸𑀦𑀸𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 (𑀥. 𑀲. 𑁨𑁭𑁭; 𑀯𑀺𑀪. 𑁬𑁨𑁮) 𑀯𑀼𑀢𑁆𑀢𑀲𑁆𑀲 𑀲𑀫𑀼𑀤𑀬𑀧𑀓𑁆𑀔𑀺𑀓𑀲𑁆𑀲 𑀓𑀺𑀮𑁂𑀲𑀕𑀡𑀲𑁆𑀲 𑀅𑀘𑁆𑀘𑀦𑁆𑀢𑀁 𑀅𑀧𑁆𑀧𑀯𑀢𑁆𑀢𑀺𑀪𑀸𑀯𑁂𑀦 𑀧𑀳𑀸𑀦𑀁, 𑀇𑀤𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁 𑀦𑀸𑀫. 𑀬𑀁 𑀧𑀦 𑀨𑀮𑀓𑁆𑀔𑀡𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀢𑁆𑀢𑀁 𑀓𑀺𑀮𑁂𑀲𑀸𑀦𑀁, 𑀏𑀢𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀁 𑀦𑀸𑀫.

𑀬𑀁 𑀲𑀩𑁆𑀩𑀲𑀗𑁆𑀔𑀢𑀦𑀺𑀲𑁆𑀲𑀝𑀢𑁆𑀢𑀸 𑀧𑀳𑀻𑀦𑀲𑀩𑁆𑀩𑀲𑀗𑁆𑀔𑀢𑀁 𑀦𑀺𑀩𑁆𑀩𑀸𑀦𑀁, 𑀏𑀢𑀁 𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀁 𑀦𑀸𑀫. 𑀲𑀩𑁆𑀩𑀫𑁆𑀧𑀺 𑀘𑁂𑀢𑀁 𑀧𑀳𑀸𑀦𑀁 𑀬𑀲𑁆𑀫𑀸 𑀘𑀸𑀕𑀝𑁆𑀞𑁂𑀦 𑀧𑀳𑀸𑀦𑀁, 𑀯𑀺𑀦𑀬𑀝𑁆𑀞𑁂𑀦 𑀯𑀺𑀦𑀬𑁄, 𑀢𑀲𑁆𑀫𑀸 ‘‘𑀧𑀳𑀸𑀦𑀯𑀺𑀦𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀁𑀢𑀁𑀧𑀳𑀸𑀦𑀯𑀢𑁄 𑀯𑀸 𑀢𑀲𑁆𑀲 𑀢𑀲𑁆𑀲 𑀯𑀺𑀦𑀬𑀲𑁆𑀲 𑀲𑀫𑁆𑀪𑀯𑀢𑁄𑀧𑁂𑀢𑀁 ‘‘𑀧𑀳𑀸𑀦𑀯𑀺𑀦𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀧𑀳𑀸𑀦𑀯𑀺𑀦𑀬𑁄𑀧𑀺 𑀧𑀜𑁆𑀘𑀥𑀸 𑀪𑀺𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀫𑀬𑀁 𑀲𑀗𑁆𑀔𑁂𑀧𑀢𑁄 𑀤𑀼𑀯𑀺𑀥𑁄, 𑀪𑁂𑀤𑀢𑁄 𑀘 𑀤𑀲𑀯𑀺𑀥𑁄 𑀯𑀺𑀦𑀬𑁄 𑀪𑀺𑀦𑁆𑀦𑀲𑀁𑀯𑀭𑀢𑁆𑀢𑀸 𑀧𑀳𑀸𑀢𑀩𑁆𑀩𑀲𑁆𑀲 𑀘 𑀅𑀧𑁆𑀧𑀳𑀻𑀦𑀢𑁆𑀢𑀸 𑀬𑀲𑁆𑀫𑀸 𑀏𑀢𑀲𑁆𑀲 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀪𑀸𑀯𑀢𑁄 𑀢𑀲𑁆𑀲 𑀅𑀬𑀁 ‘‘𑀅𑀯𑀺𑀦𑀻𑀢𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀏𑀲 𑀦𑀬𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀅𑀤𑀲𑁆𑀲𑀸𑀯𑀻 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑁄 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂 𑀅𑀯𑀺𑀦𑀻𑀢𑁄𑀢𑀺 𑀏𑀢𑁆𑀣𑀸𑀧𑀺. 𑀦𑀺𑀦𑁆𑀦𑀸𑀦𑀸𑀓𑀭𑀡𑀜𑁆𑀳𑀺 𑀏𑀢𑀁 𑀅𑀢𑁆𑀣𑀢𑁄. 𑀬𑀣𑀸𑀳 𑁋

‘‘𑀬𑁂𑀯 𑀢𑁂 𑀅𑀭𑀺𑀬𑀸, 𑀢𑁂𑀯 𑀢𑁂 𑀲𑀧𑁆𑀧𑀼𑀭𑀺𑀲𑀸. 𑀬𑁂𑀯 𑀢𑁂 𑀲𑀧𑁆𑀧𑀼𑀭𑀺𑀲𑀸, 𑀢𑁂𑀯 𑀢𑁂 𑀅𑀭𑀺𑀬𑀸. 𑀬𑁄 𑀏𑀯 𑀲𑁄 𑀅𑀭𑀺𑀬𑀸𑀦𑀁 𑀥𑀫𑁆𑀫𑁄, 𑀲𑁄 𑀏𑀯 𑀲𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀥𑀫𑁆𑀫𑁄. 𑀬𑁄 𑀏𑀯 𑀲𑁄 𑀲𑀧𑁆𑀧𑀼𑀭𑀺𑀲𑀸𑀦𑀁 𑀥𑀫𑁆𑀫𑁄, 𑀲𑁄 𑀏𑀯 𑀲𑁄 𑀅𑀭𑀺𑀬𑀸𑀦𑀁 𑀥𑀫𑁆𑀫𑁄. 𑀬𑁂𑀯 𑀢𑁂 𑀅𑀭𑀺𑀬𑀯𑀺𑀦𑀬𑀸, 𑀢𑁂𑀯 𑀢𑁂 𑀲𑀧𑁆𑀧𑀼𑀭𑀺𑀲𑀯𑀺𑀦𑀬𑀸. 𑀬𑁂𑀯 𑀢𑁂 𑀲𑀧𑁆𑀧𑀼𑀭𑀺𑀲𑀯𑀺𑀦𑀬𑀸 ¶ , 𑀢𑁂𑀯 𑀢𑁂 𑀅𑀭𑀺𑀬𑀯𑀺𑀦𑀬𑀸. 𑀅𑀭𑀺𑀬𑁂𑀢𑀺 𑀯𑀸 𑀲𑀧𑁆𑀧𑀼𑀭𑀺𑀲𑁂𑀢𑀺 𑀯𑀸, 𑀅𑀭𑀺𑀬𑀥𑀫𑁆𑀫𑁂𑀢𑀺 𑀯𑀸 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑁂𑀢𑀺 𑀯𑀸, 𑀅𑀭𑀺𑀬𑀯𑀺𑀦𑀬𑁂𑀢𑀺 𑀯𑀸 𑀲𑀧𑁆𑀧𑀼𑀭𑀺𑀲𑀯𑀺𑀦𑀬𑁂𑀢𑀺 𑀯𑀸 𑀏𑀲𑁂𑀲𑁂 𑀏𑀓𑁂 𑀏𑀓𑀝𑁆𑀞𑁂 𑀲𑀫𑁂 𑀲𑀫𑀪𑀸𑀕𑁂 𑀢𑀚𑁆𑀚𑀸𑀢𑁂 𑀢𑀜𑁆𑀜𑁂𑀯𑀸’’𑀢𑀺.

𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀇𑀥𑁂𑀓𑀘𑁆𑀘𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, ‘‘𑀬𑀁 𑀭𑀽𑀧𑀁, 𑀲𑁄 𑀅𑀳𑀁 ¶ , 𑀬𑁄 𑀅𑀳𑀁, 𑀢𑀁 𑀭𑀽𑀧’’𑀦𑁆𑀢𑀺 𑀭𑀽𑀧𑀜𑁆𑀘 ¶ 𑀅𑀢𑁆𑀢𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀢𑁂𑀮𑀧𑁆𑀧𑀤𑀻𑀧𑀲𑁆𑀲 𑀛𑀸𑀬𑀢𑁄 𑀬𑀸 𑀅𑀘𑁆𑀘𑀺, 𑀲𑁄 𑀯𑀡𑁆𑀡𑁄. 𑀬𑁄 𑀯𑀡𑁆𑀡𑁄, 𑀲𑀸 𑀅𑀘𑁆𑀘𑀻𑀢𑀺 𑀅𑀘𑁆𑀘𑀺𑀜𑁆𑀘 𑀯𑀡𑁆𑀡𑀜𑁆𑀘 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀺, 𑀏𑀯𑀫𑁂𑀯 𑀇𑀥𑁂𑀓𑀘𑁆𑀘𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺…𑀧𑁂… 𑀅𑀤𑁆𑀯𑀬𑀁 𑀲𑀫𑀦𑀼𑀧𑀲𑁆𑀲𑀢𑀻𑀢𑀺 𑀏𑀯𑀁 𑀭𑀽𑀧𑀁 ‘‘𑀅𑀢𑁆𑀢𑀸’’𑀢𑀺 𑀤𑀺𑀝𑁆𑀞𑀺𑀧𑀲𑁆𑀲𑀦𑀸𑀬 𑀧𑀲𑁆𑀲𑀢𑀺. 𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀦𑁆𑀢𑀺 𑀅𑀭𑀽𑀧𑀁 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀙𑀸𑀬𑀸𑀯𑀦𑁆𑀢𑀁 𑀭𑀼𑀓𑁆𑀔𑀁 𑀯𑀺𑀬 𑀢𑀁 𑀭𑀽𑀧𑀯𑀦𑁆𑀢𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀦𑁆𑀢𑀺 𑀅𑀭𑀽𑀧𑀫𑁂𑀯 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀧𑀼𑀧𑁆𑀨𑀲𑁆𑀫𑀺𑀁 𑀕𑀦𑁆𑀥𑀁 𑀯𑀺𑀬 𑀅𑀢𑁆𑀢𑀦𑀺 𑀭𑀽𑀧𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀦𑁆𑀢𑀺 𑀅𑀭𑀽𑀧𑀫𑁂𑀯 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀓𑀭𑀡𑁆𑀟𑀓𑁂 𑀫𑀡𑀺𑀁 𑀯𑀺𑀬 𑀢𑀁 𑀅𑀢𑁆𑀢𑀸𑀦𑀁 𑀭𑀽𑀧𑀲𑁆𑀫𑀺𑀁 𑀲𑀫𑀦𑀼𑀧𑀲𑁆𑀲𑀢𑀺. 𑀧𑀭𑀺𑀬𑀼𑀝𑁆𑀞𑀝𑁆𑀞𑀸𑀬𑀻𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀸𑀓𑀸𑀭𑁂𑀦 𑀅𑀪𑀺𑀪𑀯𑀦𑀸𑀓𑀸𑀭𑁂𑀦 𑀞𑀺𑀢𑁄, ‘‘𑀅𑀳𑀁 𑀭𑀽𑀧𑀁, 𑀫𑀫 𑀭𑀽𑀧’’𑀦𑁆𑀢𑀺 𑀏𑀯𑀁 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀕𑀡𑁆𑀳𑀦𑀓𑁄 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲 𑀢𑀁 𑀭𑀽𑀧𑀦𑁆𑀢𑀺 𑀢𑀲𑁆𑀲 𑀢𑀁 𑀏𑀯𑀁 𑀕𑀳𑀺𑀢𑀁 𑀭𑀽𑀧𑀁. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀣 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 𑀲𑀼𑀤𑁆𑀥𑀭𑀽𑀧𑀫𑁂𑀯 𑀅𑀢𑁆𑀢𑀸𑀢𑀺 𑀓𑀣𑀺𑀢𑀁. ‘‘𑀭𑀽𑀧𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀁, 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀁, 𑀯𑁂𑀤𑀦𑀁 𑀅𑀢𑁆𑀢𑀢𑁄…𑀧𑁂… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 𑀇𑀫𑁂𑀲𑀼 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀅𑀭𑀽𑀧𑀁 𑀅𑀢𑁆𑀢𑀸𑀢𑀺 𑀓𑀣𑀺𑀢𑀁. ‘‘𑀯𑁂𑀤𑀦𑀸𑀯𑀦𑁆𑀢𑀁 𑀯𑀸 𑀅𑀢𑁆𑀢𑀸𑀦𑀁, 𑀅𑀢𑁆𑀢𑀦𑀺 𑀯𑀸 𑀯𑁂𑀤𑀦𑀁, 𑀯𑁂𑀤𑀦𑀸𑀬 𑀯𑀸 𑀅𑀢𑁆𑀢𑀸𑀦’’𑀦𑁆𑀢𑀺 𑀏𑀯𑀁 𑀘𑀢𑀽𑀲𑀼 𑀔𑀦𑁆𑀥𑁂𑀲𑀼 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀯𑀲𑁂𑀦 𑀤𑁆𑀯𑀸𑀤𑀲𑀲𑀼 𑀞𑀸𑀦𑁂𑀲𑀼 𑀭𑀽𑀧𑀸𑀭𑀽𑀧𑀫𑀺𑀲𑁆𑀲𑀓𑁄 𑀅𑀢𑁆𑀢𑀸 𑀓𑀣𑀺𑀢𑁄. 𑀢𑀢𑁆𑀣 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀺, 𑀯𑁂𑀤𑀦𑀁… 𑀲𑀜𑁆𑀜𑀁… 𑀲𑀗𑁆𑀔𑀸𑀭𑁂… 𑀯𑀺𑀜𑁆𑀜𑀸𑀡𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀓𑀣𑀺𑀢𑀸, 𑀅𑀯𑀲𑁂𑀲𑁂𑀲𑀼 𑀲𑀲𑁆𑀲𑀢𑀤𑀺𑀝𑁆𑀞𑀻𑀢𑀺 𑀏𑀯𑀫𑁂𑀢𑁆𑀣 𑀧𑀦𑁆𑀦𑀭𑀲 𑀪𑀯𑀤𑀺𑀝𑁆𑀞𑀺𑀬𑁄 𑀧𑀜𑁆𑀘 𑀯𑀺𑀪𑀯𑀤𑀺𑀝𑁆𑀞𑀺𑀬𑁄 𑀳𑁄𑀦𑁆𑀢𑀺, 𑀢𑀸 𑀲𑀩𑁆𑀩𑀸𑀧𑀺 𑀫𑀕𑁆𑀕𑀸𑀯𑀭𑀡𑀸, 𑀦 𑀲𑀕𑁆𑀕𑀸𑀯𑀭𑀡𑀸, 𑀧𑀞𑀫𑀫𑀕𑁆𑀕𑀯𑀚𑁆𑀛𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 ¶ 𑀔𑁄, 𑀕𑀳𑀧𑀢𑀺, 𑀆𑀢𑀼𑀭𑀓𑀸𑀬𑁄 𑀘𑁂𑀯 𑀳𑁄𑀢𑀺 𑀆𑀢𑀼𑀭𑀘𑀺𑀢𑁆𑀢𑁄 𑀘𑀸𑀢𑀺 𑀓𑀸𑀬𑁄 𑀦𑀸𑀫 𑀩𑀼𑀤𑁆𑀥𑀸𑀦𑀫𑁆𑀧𑀺 𑀆𑀢𑀼𑀭𑁄𑀬𑁂𑀯. 𑀘𑀺𑀢𑁆𑀢𑀁 𑀧𑀦 𑀭𑀸𑀕𑀤𑁄𑀲𑀫𑁄𑀳𑀸𑀦𑀼𑀕𑀢𑀁 𑀆𑀢𑀼𑀭𑀁 𑀦𑀸𑀫, 𑀢𑀁 𑀇𑀥 𑀤𑀲𑁆𑀲𑀺𑀢𑀁. 𑀦𑁄 𑀘 𑀆𑀢𑀼𑀭𑀘𑀺𑀢𑁆𑀢𑁄𑀢𑀺 𑀇𑀥 𑀦𑀺𑀓𑁆𑀓𑀺𑀮𑁂𑀲𑀢𑀸𑀬 𑀘𑀺𑀢𑁆𑀢𑀲𑁆𑀲 𑀅𑀦𑀸𑀢𑀼𑀭𑀪𑀸𑀯𑁄 ¶ 𑀤𑀲𑁆𑀲𑀺𑀢𑁄. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀮𑁄𑀓𑀺𑀬𑀫𑀳𑀸𑀚𑀦𑁄 𑀆𑀢𑀼𑀭𑀓𑀸𑀬𑁄 𑀘𑁂𑀯 𑀆𑀢𑀼𑀭𑀘𑀺𑀢𑁆𑀢𑁄 𑀘𑀸𑀢𑀺 𑀤𑀲𑁆𑀲𑀺𑀢𑁄, 𑀔𑀻𑀡𑀸𑀲𑀯𑀸 𑀆𑀢𑀼𑀭𑀓𑀸𑀬𑀸 𑀅𑀦𑀸𑀢𑀼𑀭𑀘𑀺𑀢𑁆𑀢𑀸, 𑀲𑀢𑁆𑀢 𑀲𑁂𑀔𑀸 𑀦𑁂𑀯 𑀆𑀢𑀼𑀭𑀘𑀺𑀢𑁆𑀢𑀸, 𑀦 𑀅𑀦𑀸𑀢𑀼𑀭𑀘𑀺𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀪𑀚𑀫𑀸𑀦𑀸 𑀧𑀦 𑀅𑀦𑀸𑀢𑀼𑀭𑀘𑀺𑀢𑁆𑀢𑀢𑀁𑀬𑁂𑀯 𑀪𑀚𑀦𑁆𑀢𑀻𑀢𑀺. 𑀧𑀞𑀫𑀁.

𑁨. 𑀤𑁂𑀯𑀤𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁨. 𑀤𑀼𑀢𑀺𑀬𑁂 ¶ 𑀤𑁂𑀯𑀤𑀳𑀦𑁆𑀢𑀺 𑀤𑁂𑀯𑀸 𑀯𑀼𑀘𑁆𑀘𑀦𑁆𑀢𑀺 𑀭𑀸𑀚𑀸𑀦𑁄, 𑀢𑁂𑀲𑀁 𑀫𑀗𑁆𑀕𑀮𑀤𑀳𑁄, 𑀲𑀬𑀁𑀚𑀸𑀢𑁄 𑀯𑀸 𑀲𑁄 𑀤𑀳𑁄𑀢𑀺, 𑀢𑀲𑁆𑀫𑀸 ‘‘𑀤𑁂𑀯𑀤𑀳𑁄’’𑀢𑀺 𑀯𑀼𑀢𑁆𑀢𑁄. 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀦𑀺𑀕𑀫𑁄 𑀤𑁂𑀯𑀤𑀳𑀦𑁆𑀢𑁆𑀯𑁂𑀯 𑀦𑀧𑀼𑀁𑀲𑀓𑀮𑀺𑀗𑁆𑀕𑀯𑀲𑁂𑀦 𑀲𑀗𑁆𑀔𑀁 𑀕𑀢𑁄. 𑀧𑀘𑁆𑀙𑀸𑀪𑀽𑀫𑀕𑀫𑀺𑀓𑀸𑀢𑀺 𑀧𑀘𑁆𑀙𑀸𑀪𑀽𑀫𑀁 𑀅𑀧𑀭𑀤𑀺𑀲𑀸𑀬𑀁 𑀦𑀺𑀯𑀺𑀝𑁆𑀞𑀁 𑀚𑀦𑀧𑀤𑀁 𑀕𑀦𑁆𑀢𑀼𑀓𑀸𑀫𑀸. 𑀦𑀺𑀯𑀸𑀲𑀦𑁆𑀢𑀺 𑀢𑁂𑀫𑀸𑀲𑀁 𑀯𑀲𑁆𑀲𑀸𑀯𑀸𑀲𑀁. 𑀅𑀧𑀮𑁄𑀓𑀺𑀢𑁄𑀢𑀺 𑀆𑀧𑀼𑀘𑁆𑀙𑀺𑀢𑁄. 𑀅𑀧𑀮𑁄𑀓𑁂𑀣𑀸𑀢𑀺 𑀆𑀧𑀼𑀘𑁆𑀙𑀣. 𑀓𑀲𑁆𑀫𑀸 𑀣𑁂𑀭𑀁 𑀆𑀧𑀼𑀘𑁆𑀙𑀸𑀧𑁂𑀢𑀺? 𑀢𑁂 𑀲𑀪𑀸𑀭𑁂 𑀓𑀸𑀢𑀼𑀓𑀸𑀫𑀢𑀸𑀬. 𑀬𑁄 𑀳𑀺 𑀏𑀓𑀯𑀺𑀳𑀸𑀭𑁂 𑀯𑀲𑀦𑁆𑀢𑁄𑀧𑀺 𑀲𑀦𑁆𑀢𑀺𑀓𑀁 𑀦 𑀕𑀘𑁆𑀙𑀢𑀺 𑀧𑀓𑁆𑀓𑀫𑀦𑁆𑀢𑁄 𑀅𑀦𑀸𑀧𑀼𑀘𑁆𑀙𑀸 𑀧𑀓𑁆𑀓𑀫𑀢𑀺, 𑀅𑀬𑀁 𑀦𑀺𑀩𑁆𑀪𑀸𑀭𑁄 𑀦𑀸𑀫. 𑀬𑁄 𑀏𑀓𑀯𑀺𑀳𑀸𑀭𑁂 𑀯𑀲𑀦𑁆𑀢𑁄𑀧𑀺 𑀆𑀕𑀦𑁆𑀢𑁆𑀯𑀸 𑀧𑀲𑁆𑀲𑀢𑀺, 𑀧𑀓𑁆𑀓𑀫𑀦𑁆𑀢𑁄 𑀆𑀧𑀼𑀘𑁆𑀙𑀢𑀺, 𑀅𑀬𑀁 𑀲𑀪𑀸𑀭𑁄 𑀦𑀸𑀫. 𑀇𑀫𑁂𑀧𑀺 𑀪𑀺𑀓𑁆𑀔𑀽 𑀪𑀕𑀯𑀸 ‘‘𑀏𑀯𑀫𑀺𑀫𑁂 𑀲𑀻𑀮𑀸𑀤𑀻𑀳𑀺 𑀯𑀟𑁆𑀠𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀪𑀸𑀭𑁂 𑀓𑀸𑀢𑀼𑀓𑀸𑀫𑁄 𑀆𑀧𑀼𑀘𑁆𑀙𑀸𑀧𑁂𑀢𑀺.

𑀧𑀡𑁆𑀟𑀺𑀢𑁄𑀢𑀺 𑀥𑀸𑀢𑀼𑀓𑁄𑀲𑀮𑁆𑀮𑀸𑀤𑀺𑀦𑀸 𑀘𑀢𑀼𑀩𑁆𑀩𑀺𑀥𑁂𑀦 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀅𑀦𑀼𑀕𑁆𑀕𑀸𑀳𑀓𑁄𑀢𑀺 𑀆𑀫𑀺𑀲𑀸𑀦𑀼𑀕𑁆𑀕𑀳𑁂𑀦 𑀘 𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦 𑀘𑀸𑀢𑀺 𑀤𑁆𑀯𑀻𑀳𑀺𑀧𑀺 𑀅𑀦𑀼𑀕𑁆𑀕𑀳𑁂𑀳𑀺 𑀅𑀦𑀼𑀕𑁆𑀕𑀸𑀳𑀓𑁄. 𑀣𑁂𑀭𑁄 𑀓𑀺𑀭 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀯𑀺𑀬 𑀧𑀸𑀢𑁄𑀯 𑀧𑀺𑀡𑁆𑀟𑀸𑀬 𑀅𑀕𑀦𑁆𑀢𑁆𑀯𑀸 𑀲𑀩𑁆𑀩𑀪𑀺𑀓𑁆𑀔𑀽𑀲𑀼 𑀕𑀢𑁂𑀲𑀼 𑀲𑀓𑀮𑀁 𑀲𑀗𑁆𑀖𑀸𑀭𑀸𑀫𑀁 𑀅𑀦𑀼𑀯𑀺𑀘𑀭𑀦𑁆𑀢𑁄 𑀅𑀲𑀫𑁆𑀫𑀝𑁆𑀞𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀢𑀺, 𑀅𑀙𑀟𑁆𑀟𑀺𑀢𑀁 𑀓𑀘𑀯𑀭𑀁 𑀙𑀟𑁆𑀟𑁂𑀢𑀺, 𑀲𑀗𑁆𑀖𑀸𑀭𑀸𑀫𑁂 𑀤𑀼𑀦𑁆𑀦𑀺𑀓𑁆𑀔𑀺𑀢𑁆𑀢𑀸𑀦𑀺 𑀫𑀜𑁆𑀘𑀧𑀻𑀞𑀤𑀸𑀭𑀼𑀪𑀡𑁆𑀟𑀫𑀢𑁆𑀢𑀺𑀓𑀸𑀪𑀡𑁆𑀟𑀸𑀦𑀺 𑀧𑀝𑀺𑀲𑀸𑀫𑁂𑀢𑀺. 𑀓𑀺𑀁 𑀓𑀸𑀭𑀡𑀸? ‘‘𑀫𑀸 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑀸 𑀤𑀺𑀲𑁆𑀯𑀸 𑀧𑀭𑀺𑀪𑀯𑀁 𑀅𑀓𑀁𑀲𑀽’’𑀢𑀺. 𑀢𑀢𑁄 𑀕𑀺𑀮𑀸𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀕𑀺𑀮𑀸𑀦𑁂 𑀅𑀲𑁆𑀲𑀸𑀲𑁂𑀢𑁆𑀯𑀸 ‘‘𑀓𑁂𑀦𑀢𑁆𑀣𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀬𑁂𑀦 𑀅𑀢𑁆𑀣𑁄 𑀳𑁄𑀢𑀺, 𑀢𑀤𑀢𑁆𑀣𑀁 ¶ 𑀢𑁂𑀲𑀁 𑀤𑀳𑀭𑀲𑀸𑀫𑀡𑁂𑀭𑁂 𑀆𑀤𑀸𑀬 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀯𑀸 𑀲𑀪𑀸𑀕𑀝𑁆𑀞𑀸𑀦𑁂 𑀯𑀸 𑀪𑁂𑀲𑀚𑁆𑀚𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀢𑁂𑀲𑀁 𑀤𑀢𑁆𑀯𑀸, ‘‘𑀕𑀺𑀮𑀸𑀦𑀼𑀧𑀝𑁆𑀞𑀸𑀦𑀁 𑀦𑀸𑀫 𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺 𑀯𑀡𑁆𑀡𑀺𑀢𑀁, 𑀕𑀘𑁆𑀙𑀣 𑀲𑀧𑁆𑀧𑀼𑀭𑀺𑀲𑀸 𑀅𑀧𑁆𑀧𑀫𑀢𑁆𑀢𑀸 𑀳𑁄𑀣𑀸’’𑀢𑀺 𑀢𑁂 𑀧𑁂𑀲𑁂𑀢𑁆𑀯𑀸 𑀲𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀉𑀧𑀝𑁆𑀞𑀸𑀓𑀓𑀼𑀮𑁂 𑀯𑀸 𑀪𑀢𑁆𑀢𑀓𑀺𑀘𑁆𑀘𑀁 𑀓𑀢𑁆𑀯𑀸 𑀯𑀺𑀳𑀸𑀭𑀁 𑀕𑀘𑁆𑀙𑀢𑀺. 𑀇𑀤𑀁 𑀢𑀸𑀯𑀲𑁆𑀲 𑀦𑀺𑀩𑀤𑁆𑀥𑀯𑀸𑀲𑀝𑁆𑀞𑀸𑀦𑁂 𑀆𑀘𑀺𑀡𑁆𑀡𑀁.

𑀪𑀕𑀯𑀢𑀺 ¶ 𑀧𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁂 ‘‘𑀅𑀳𑀁 𑀅𑀕𑁆𑀕𑀲𑀸𑀯𑀓𑁄’’𑀢𑀺 𑀉𑀧𑀸𑀳𑀦𑀁 𑀆𑀭𑀼𑀬𑁆𑀳 𑀙𑀢𑁆𑀢𑀁 𑀕𑀳𑁂𑀢𑁆𑀯𑀸 𑀧𑀼𑀭𑀢𑁄 𑀧𑀼𑀭𑀢𑁄 𑀦 𑀕𑀘𑁆𑀙𑀢𑀺. 𑀬𑁂 𑀧𑀦 𑀢𑀢𑁆𑀣 𑀫𑀳𑀮𑁆𑀮𑀓𑀸 𑀯𑀸 𑀆𑀩𑀸𑀥𑀺𑀓𑀸 𑀯𑀸 𑀅𑀢𑀺𑀤𑀳𑀭𑀸 𑀯𑀸, 𑀢𑁂𑀲𑀁 𑀭𑀼𑀚𑁆𑀚𑀦𑀝𑁆𑀞𑀸𑀦𑀸𑀦𑀺 𑀢𑁂𑀮𑁂𑀦 𑀫𑀓𑁆𑀔𑀸𑀧𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀅𑀢𑁆𑀢𑀦𑁄 𑀤𑀳𑀭𑀲𑀸𑀫𑀡𑁂𑀭𑁂𑀳𑀺 𑀕𑀸𑀳𑀸𑀧𑁂𑀢𑁆𑀯𑀸 𑀢𑀁𑀤𑀺𑀯𑀲𑀁 𑀯𑀸 𑀤𑀼𑀢𑀺𑀬𑀤𑀺𑀯𑀲𑀁 𑀯𑀸 𑀢𑁂 𑀕𑀡𑁆𑀳𑀺𑀢𑁆𑀯𑀸𑀯 𑀕𑀘𑁆𑀙𑀢𑀺. 𑀏𑀓𑀤𑀺𑀯𑀲𑀜𑁆𑀳𑀺 𑀢𑀜𑁆𑀜𑁂𑀯 𑀆𑀬𑀲𑁆𑀫𑀦𑁆𑀢𑀁 𑀅𑀢𑀺𑀯𑀺𑀓𑀸𑀮𑁂 𑀲𑀫𑁆𑀧𑀢𑁆𑀢𑀢𑁆𑀢𑀸 𑀲𑁂𑀦𑀸𑀲𑀦𑀁 𑀅𑀮𑀪𑀺𑀢𑁆𑀯𑀸, 𑀘𑀻𑀯𑀭𑀓𑀼𑀝𑀺𑀬𑀁 𑀦𑀺𑀲𑀺𑀦𑁆𑀦𑀁 𑀤𑀺𑀲𑁆𑀯𑀸, 𑀲𑀢𑁆𑀣𑀸 𑀧𑀼𑀦𑀤𑀺𑀯𑀲𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸, 𑀳𑀢𑁆𑀣𑀺𑀯𑀸𑀦𑀭𑀢𑀺𑀢𑁆𑀢𑀺𑀭𑀯𑀢𑁆𑀣𑀼𑀁 𑀓𑀣𑁂𑀢𑁆𑀯𑀸, ‘‘𑀬𑀣𑀸𑀯𑀼𑀟𑁆𑀠𑀁 𑀲𑁂𑀦𑀸𑀲𑀦𑀁 𑀤𑀸𑀢𑀩𑁆𑀩’’𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀁 ¶ 𑀧𑀜𑁆𑀜𑀸𑀧𑁂𑀲𑀺. 𑀏𑀯𑀁 𑀢𑀸𑀯𑁂𑀲 𑀆𑀫𑀺𑀲𑀸𑀦𑀼𑀕𑁆𑀕𑀳𑁂𑀦 𑀅𑀦𑀼𑀕𑁆𑀕𑀡𑁆𑀳𑀸𑀢𑀺. 𑀑𑀯𑀤𑀦𑁆𑀢𑁄 𑀧𑀦𑁂𑀲 𑀲𑀢𑀯𑀸𑀭𑀫𑁆𑀧𑀺 𑀲𑀳𑀲𑁆𑀲𑀯𑀸𑀭𑀫𑁆𑀧𑀺 𑀢𑀸𑀯 𑀑𑀯𑀤𑀢𑀺, 𑀬𑀸𑀯 𑀲𑁄 𑀧𑀼𑀕𑁆𑀕𑀮𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀢𑀺, 𑀅𑀣 𑀦𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀜𑁆𑀜𑀁 𑀑𑀯𑀤𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀑𑀯𑀤𑀢𑁄 𑀘𑀲𑁆𑀲 𑀑𑀯𑀸𑀤𑁂 𑀞𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸 𑀕𑀡𑀦𑀧𑀣𑀁 𑀅𑀢𑀺𑀓𑁆𑀓𑀦𑁆𑀢𑀸. 𑀏𑀯𑀁 𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦 𑀅𑀦𑀼𑀕𑁆𑀕𑀡𑁆𑀳𑀸𑀢𑀺.

𑀧𑀘𑁆𑀘𑀲𑁆𑀲𑁄𑀲𑀼𑀦𑁆𑀢𑀺 𑀢𑁂 𑀪𑀺𑀓𑁆𑀔𑀽 ‘‘𑀅𑀫𑁆𑀳𑀸𑀓𑀁 𑀦𑁂𑀯 𑀉𑀧𑀚𑁆𑀛𑀸𑀬𑁄, 𑀦 𑀆𑀘𑀭𑀺𑀬𑁄 𑀦 𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑁄. 𑀓𑀺𑀁 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀓𑀭𑀺𑀲𑁆𑀲𑀸𑀫𑀸’’𑀢𑀺? 𑀢𑀼𑀡𑁆𑀳𑀻𑀪𑀸𑀯𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀲𑀢𑁆𑀣𑀼 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀏𑀴𑀕𑀮𑀸𑀕𑀼𑀫𑁆𑀩𑁂𑀢𑀺 𑀕𑀘𑁆𑀙𑀫𑀡𑁆𑀟𑀧𑀓𑁂. 𑀲𑁄 𑀓𑀺𑀭 𑀏𑀴𑀕𑀮𑀸𑀕𑀼𑀫𑁆𑀩𑁄 𑀥𑀼𑀯𑀲𑀮𑀺𑀮𑀝𑁆𑀞𑀸𑀦𑁂 𑀚𑀸𑀢𑁄. 𑀅𑀣𑁂𑀢𑁆𑀣 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀫𑀡𑁆𑀟𑀧𑀁 𑀓𑀢𑁆𑀯𑀸 𑀢𑀲𑁆𑀲 𑀉𑀧𑀭𑀺 𑀢𑀁 𑀕𑀼𑀫𑁆𑀩𑀁 𑀆𑀭𑁄𑀧𑁂𑀲𑀼𑀁, 𑀲𑁄 𑀢𑀁 𑀫𑀡𑁆𑀟𑀧𑀁 𑀙𑀸𑀤𑁂𑀲𑀺. 𑀅𑀣𑀲𑁆𑀲 𑀳𑁂𑀝𑁆𑀞𑀸 𑀇𑀝𑁆𑀞𑀓𑀸𑀳𑀺 𑀧𑀭𑀺𑀘𑀺𑀦𑀺𑀢𑁆𑀯𑀸 𑀯𑀸𑀮𑀺𑀓𑀁 𑀑𑀓𑀺𑀭𑀺𑀢𑁆𑀯𑀸 𑀆𑀲𑀦𑀁 𑀧𑀜𑁆𑀜𑀸𑀧𑀬𑀺𑀁𑀲𑀼. 𑀲𑀻𑀢𑀮𑀁 𑀤𑀺𑀯𑀸𑀝𑁆𑀞𑀸𑀦𑀁 𑀉𑀤𑀓𑀯𑀸𑀢𑁄 𑀯𑀸𑀬𑀢𑀺. 𑀣𑁂𑀭𑁄 𑀢𑀲𑁆𑀫𑀺𑀁 𑀦𑀺𑀲𑀻𑀤𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀏𑀴𑀕𑀮𑀸𑀕𑀼𑀫𑁆𑀩𑁂’’𑀢𑀺.

𑀦𑀸𑀦𑀸𑀯𑁂𑀭𑀚𑁆𑀚𑀕𑀢𑀦𑁆𑀢𑀺 𑀏𑀓𑀲𑁆𑀲 𑀭𑀜𑁆𑀜𑁄 𑀭𑀚𑁆𑀚𑀢𑁄 𑀦𑀸𑀦𑀸𑀯𑀺𑀥𑀁 𑀭𑀚𑁆𑀚𑀕𑀢𑀁. 𑀯𑀺𑀭𑀚𑁆𑀚𑀦𑁆𑀢𑀺 𑀅𑀜𑁆𑀜𑀁 𑀭𑀚𑁆𑀚𑀁. 𑀬𑀣𑀸 𑀳𑀺 𑀲𑀤𑁂𑀲𑀢𑁄 𑀅𑀜𑁆𑀜𑁄 𑀯𑀺𑀤𑁂𑀲𑁄, 𑀏𑀯𑀁 𑀦𑀺𑀯𑀼𑀢𑁆𑀣𑀭𑀚𑁆𑀚𑀢𑁄 𑀅𑀜𑁆𑀜𑀁 ¶ 𑀭𑀚𑁆𑀚𑀁 𑀯𑀺𑀭𑀚𑁆𑀚𑀁 𑀦𑀸𑀫, 𑀢𑀁 𑀯𑁂𑀭𑀚𑁆𑀚𑀦𑁆𑀢𑀺 𑀯𑀼𑀢𑁆𑀢𑀁. 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸𑀢𑀺 𑀩𑀺𑀫𑁆𑀩𑀺𑀲𑀸𑀭𑀓𑁄𑀲𑀮𑀭𑀸𑀚𑀸𑀤𑀬𑁄 𑀧𑀡𑁆𑀟𑀺𑀢𑀭𑀸𑀚𑀸𑀦𑁄. 𑀩𑁆𑀭𑀸𑀳𑁆𑀫𑀡𑀧𑀡𑁆𑀟𑀺𑀢𑀸𑀢𑀺 𑀘𑀗𑁆𑀓𑀻𑀢𑀸𑀭𑀼𑀓𑁆𑀔𑀸𑀤𑀬𑁄 𑀧𑀡𑁆𑀟𑀺𑀢𑀩𑁆𑀭𑀸𑀳𑁆𑀫𑀡𑀸. 𑀕𑀳𑀧𑀢𑀺𑀧𑀡𑁆𑀟𑀺𑀢𑀸𑀢𑀺 𑀘𑀺𑀢𑁆𑀢𑀲𑀼𑀤𑀢𑁆𑀢𑀸𑀤𑀬𑁄 𑀧𑀡𑁆𑀟𑀺𑀢𑀕𑀳𑀧𑀢𑀬𑁄. 𑀲𑀫𑀡𑀧𑀡𑁆𑀟𑀺𑀢𑀸𑀢𑀺 𑀲𑀪𑀺𑀬𑀧𑀺𑀮𑁄𑀢𑀺𑀓𑀸𑀤𑀬𑁄 𑀧𑀡𑁆𑀟𑀺𑀢𑀧𑀭𑀺𑀩𑁆𑀩𑀸𑀚𑀓𑀸 ¶ . 𑀯𑀻𑀫𑀁𑀲𑀓𑀸𑀢𑀺 𑀅𑀢𑁆𑀣𑀕𑀯𑁂𑀲𑀺𑀦𑁄. 𑀓𑀺𑀁𑀯𑀸𑀤𑀻𑀢𑀺 𑀓𑀺𑀁 𑀅𑀢𑁆𑀢𑀦𑁄 𑀤𑀲𑁆𑀲𑀦𑀁 𑀯𑀤𑀢𑀺, 𑀓𑀺𑀁 𑀮𑀤𑁆𑀥𑀺𑀓𑁄𑀢𑀺 𑀅𑀢𑁆𑀣𑁄. 𑀓𑀺𑀫𑀓𑁆𑀔𑀸𑀬𑀻𑀢𑀺 𑀓𑀺𑀁 𑀲𑀸𑀯𑀓𑀸𑀦𑀁 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀁 𑀆𑀘𑀺𑀓𑁆𑀔𑀢𑀺? 𑀥𑀫𑁆𑀫𑀲𑁆𑀲 𑀘𑀸𑀦𑀼𑀥𑀫𑁆𑀫𑀦𑁆𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀩𑁆𑀬𑀸𑀓𑀭𑀡𑀲𑁆𑀲 𑀅𑀦𑀼𑀩𑁆𑀬𑀸𑀓𑀭𑀡𑀁. 𑀲𑀳𑀥𑀫𑁆𑀫𑀺𑀓𑁄𑀢𑀺 𑀲𑀓𑀸𑀭𑀡𑁄. 𑀯𑀸𑀤𑀸𑀦𑀼𑀯𑀸𑀤𑁄𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀯𑀸𑀤𑀲𑁆𑀲 𑀅𑀦𑀼𑀯𑀸𑀤𑁄. ‘‘𑀯𑀸𑀤𑀸𑀦𑀼𑀧𑀸𑀢𑁄’’𑀢𑀺𑀧𑀺 𑀧𑀸𑀞𑁄, 𑀲𑀢𑁆𑀣𑀼 𑀯𑀸𑀤𑀲𑁆𑀲 𑀅𑀦𑀼𑀧𑀸𑀢𑁄 𑀅𑀦𑀼𑀧𑀢𑀦𑀁, 𑀅𑀦𑀼𑀕𑀫𑀦𑀦𑁆𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸𑀧𑀺 𑀯𑀸𑀤𑀁 𑀅𑀦𑀼𑀕𑀢𑁄 𑀯𑀸𑀤𑁄𑀬𑁂𑀯 𑀤𑀻𑀧𑀺𑀢𑁄 𑀳𑁄𑀢𑀺.

𑀅𑀯𑀺𑀕𑀢𑀭𑀸𑀕𑀲𑁆𑀲𑀸𑀢𑀺𑀆𑀤𑀻𑀲𑀼 𑀢𑀡𑁆𑀳𑀸𑀯𑀲𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀡𑁆𑀳𑀸 𑀳𑀺 𑀭𑀚𑁆𑀚𑀦𑀢𑁄 𑀭𑀸𑀕𑁄, 𑀙𑀦𑁆𑀤𑀺𑀬𑀦𑀢𑁄 𑀙𑀦𑁆𑀤𑁄, 𑀧𑀺𑀬𑀸𑀬𑀦𑀝𑁆𑀞𑁂𑀦 𑀧𑁂𑀫𑀁, 𑀧𑀺𑀯𑀺𑀢𑀼𑀓𑀸𑀫𑀝𑁆𑀞𑁂𑀦 𑀧𑀺𑀧𑀸𑀲𑀸, 𑀅𑀦𑀼𑀤𑀳𑀦𑀝𑁆𑀞𑁂𑀦 𑀧𑀭𑀺𑀴𑀸𑀳𑁄𑀢𑀺 𑀯𑀼𑀘𑁆𑀘𑀢𑀺. 𑀅𑀓𑀼𑀲𑀮𑁂 𑀘𑀸𑀯𑀼𑀲𑁄, 𑀥𑀫𑁆𑀫𑁂𑀢𑀺𑀆𑀤𑀺 𑀓𑀲𑁆𑀫𑀸 𑀆𑀭𑀤𑁆𑀥𑀁? 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀅𑀯𑀻𑀢𑀭𑀸𑀕𑀲𑁆𑀲 𑀆𑀤𑀻𑀦𑀯𑀁 ¶ , 𑀯𑀻𑀢𑀭𑀸𑀕𑀲𑁆𑀲 𑀘 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀢𑀼𑀁. 𑀢𑀢𑁆𑀭 𑀅𑀯𑀺𑀖𑀸𑀢𑁄𑀢𑀺 𑀦𑀺𑀤𑁆𑀤𑀼𑀓𑁆𑀔𑁄. 𑀅𑀦𑀼𑀧𑀸𑀬𑀸𑀲𑁄𑀢𑀺 𑀦𑀺𑀭𑀼𑀧𑀢𑀸𑀧𑁄. 𑀅𑀧𑀭𑀺𑀴𑀸𑀳𑁄𑀢𑀺 𑀦𑀺𑀤𑁆𑀤𑀸𑀳𑁄. 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀢𑀺𑀬𑀁.

𑁩. 𑀳𑀸𑀮𑀺𑀤𑁆𑀤𑀺𑀓𑀸𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩. 𑀢𑀢𑀺𑀬𑁂 𑀅𑀯𑀦𑁆𑀢𑀻𑀲𑀽𑀢𑀺 𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑀲𑀗𑁆𑀔𑀸𑀢𑁂 𑀅𑀯𑀦𑁆𑀢𑀺𑀭𑀝𑁆𑀞𑁂. 𑀓𑀼𑀭𑀭𑀖𑀭𑁂𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀧𑀧𑀸𑀢𑁂𑀢𑀺 𑀏𑀓𑀢𑁄 𑀧𑀧𑀸𑀢𑁂. 𑀢𑀲𑁆𑀲 𑀓𑀺𑀭 𑀧𑀩𑁆𑀩𑀢𑀲𑁆𑀲 𑀏𑀓𑀁 𑀧𑀲𑁆𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀢𑀺𑀢𑀁 𑀯𑀺𑀬 𑀅𑀳𑁄𑀲𑀺. ‘‘𑀧𑀯𑀢𑁆𑀢𑁂’’𑀢𑀺𑀧𑀺 𑀧𑀸𑀞𑁄, 𑀦𑀸𑀦𑀸𑀢𑀺𑀢𑁆𑀣𑀺𑀬𑀸𑀦𑀁 𑀮𑀤𑁆𑀥𑀺𑀧𑀯𑀢𑁆𑀢𑀝𑁆𑀞𑀸𑀦𑁂𑀢𑀺 𑀅𑀢𑁆𑀣𑁄. 𑀇𑀢𑀺 𑀣𑁂𑀭𑁄 𑀢𑀲𑁆𑀫𑀺𑀁 𑀭𑀝𑁆𑀞𑁂 𑀢𑀁 𑀦𑀕𑀭𑀁 𑀦𑀺𑀲𑁆𑀲𑀸𑀬 𑀢𑀲𑁆𑀫𑀺𑀁 𑀧𑀩𑁆𑀩𑀢𑁂 𑀯𑀺𑀳𑀭𑀢𑀺. 𑀳𑀸𑀮𑀺𑀤𑁆𑀤𑀺𑀓𑀸𑀦𑀻𑀢𑀺 𑀏𑀯𑀁𑀦𑀸𑀫𑀓𑁄. 𑀅𑀝𑁆𑀞𑀓𑀯𑀕𑁆𑀕𑀺𑀬𑁂 𑀫𑀸𑀕𑀡𑁆𑀟𑀺𑀬𑀧𑀜𑁆𑀳𑁂𑀢𑀺 𑀅𑀝𑁆𑀞𑀓𑀯𑀕𑁆𑀕𑀺𑀓𑀫𑁆𑀳𑀺 𑀫𑀸𑀕𑀡𑁆𑀟𑀺𑀬𑀧𑀜𑁆𑀳𑁄 𑀦𑀸𑀫 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀧𑀜𑁆𑀳𑁂. 𑀭𑀽𑀧𑀥𑀸𑀢𑀽𑀢𑀺 𑀭𑀽𑀧𑀓𑁆𑀔𑀦𑁆𑀥𑁄 𑀅𑀥𑀺𑀧𑁆𑀧𑁂𑀢𑁄. 𑀭𑀽𑀧𑀥𑀸𑀢𑀼𑀭𑀸𑀕𑀯𑀺𑀦𑀺𑀩𑀤𑁆𑀥𑀦𑁆𑀢𑀺 𑀭𑀽𑀧𑀥𑀸𑀢𑀼𑀫𑁆𑀳𑀺 𑀭𑀸𑀕𑁂𑀦 𑀯𑀺𑀦𑀺𑀩𑀤𑁆𑀥𑀁 ¶ . 𑀯𑀺𑀜𑁆𑀜𑀸𑀡𑀦𑁆𑀢𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑀁. 𑀑𑀓𑀲𑀸𑀭𑀻𑀢𑀺 𑀕𑁂𑀳𑀲𑀸𑀭𑀻 𑀆𑀮𑀬𑀲𑀸𑀭𑀻.

𑀓𑀲𑁆𑀫𑀸 ¶ 𑀧𑀦𑁂𑀢𑁆𑀣 ‘‘𑀯𑀺𑀜𑁆𑀜𑀸𑀡𑀥𑀸𑀢𑀼 𑀔𑁄, 𑀕𑀳𑀧𑀢𑀻’’𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺? 𑀲𑀫𑁆𑀫𑁄𑀳𑀯𑀺𑀖𑀸𑀢𑀢𑁆𑀣𑀁. ‘‘𑀑𑀓𑁄’’𑀢𑀺 𑀳𑀺 𑀅𑀢𑁆𑀣𑀢𑁄 𑀧𑀘𑁆𑀘𑀬𑁄 𑀯𑀼𑀘𑁆𑀘𑀢𑀺, 𑀧𑀼𑀭𑁂𑀚𑀸𑀢𑀜𑁆𑀘 𑀓𑀫𑁆𑀫𑀯𑀺𑀜𑁆𑀜𑀸𑀡𑀁 𑀧𑀘𑁆𑀙𑀸𑀚𑀸𑀢𑀲𑁆𑀲 𑀓𑀫𑁆𑀫𑀯𑀺𑀜𑁆𑀜𑀸𑀡𑀲𑁆𑀲𑀧𑀺 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑁆𑀲𑀧𑀺 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀜𑁆𑀘 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑁆𑀲𑀧𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑀲𑁆𑀲𑀧𑀺 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀓𑀢𑀭𑀁 𑀦𑀼 𑀔𑁄 𑀇𑀥 𑀯𑀺𑀜𑁆𑀜𑀸𑀡’’𑀦𑁆𑀢𑀺? 𑀲𑀫𑁆𑀫𑁄𑀳𑁄 𑀪𑀯𑁂𑀬𑁆𑀬, 𑀢𑀲𑁆𑀲 𑀯𑀺𑀖𑀸𑀢𑀢𑁆𑀣𑀁 𑀢𑀁 𑀅𑀕𑀳𑁂𑀢𑁆𑀯𑀸 𑀅𑀲𑀫𑁆𑀪𑀺𑀦𑁆𑀦𑀸𑀯 𑀤𑁂𑀲𑀦𑀸 𑀓𑀢𑀸. 𑀅𑀧𑀺𑀘 𑀆𑀭𑀫𑁆𑀫𑀡𑀯𑀲𑁂𑀦 𑀘𑀢𑀲𑁆𑀲𑁄 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀯𑀼𑀢𑁆𑀢𑀸𑀢𑀺 𑀢𑀸 𑀤𑀲𑁆𑀲𑁂𑀢𑀼𑀫𑁆𑀧𑀺 𑀇𑀥 𑀯𑀺𑀜𑁆𑀜𑀸𑀡𑀁 𑀦 𑀕𑀳𑀺𑀢𑀁.

𑀉𑀧𑀬𑀼𑀧𑀸𑀤𑀸𑀦𑀸𑀢𑀺 𑀢𑀡𑁆𑀳𑀽𑀧𑀬𑀤𑀺𑀝𑁆𑀞𑀽𑀧𑀬𑀯𑀲𑁂𑀦 𑀤𑁆𑀯𑁂 𑀉𑀧𑀬𑀸, 𑀓𑀸𑀫𑀼𑀧𑀸𑀤𑀸𑀦𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀦𑀸𑀦𑀺 𑀘. 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀸𑀦𑀼𑀲𑀬𑀸𑀢𑀺 𑀅𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀪𑀽𑀢𑀸 𑀘𑁂𑀯 𑀅𑀪𑀺𑀦𑀺𑀯𑁂𑀲𑀪𑀽𑀢𑀸 𑀘 𑀅𑀦𑀼𑀲𑀬𑀪𑀽𑀢𑀸 𑀘. 𑀢𑀣𑀸𑀕𑀢𑀲𑁆𑀲𑀸𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲. 𑀲𑀩𑁆𑀩𑁂𑀲𑀫𑁆𑀧𑀺 𑀳𑀺 𑀔𑀻𑀡𑀸𑀲𑀯𑀸𑀦𑀁 𑀏𑀢𑁂 𑀧𑀳𑀻𑀦𑀸𑀯, 𑀲𑀢𑁆𑀣𑀼 𑀧𑀦 𑀔𑀻𑀡𑀸𑀲𑀯𑀪𑀸𑀯𑁄 𑀮𑁄𑀓𑁂 𑀅𑀢𑀺𑀧𑀸𑀓𑀝𑁄𑀢𑀺 𑀉𑀧𑀭𑀺𑀫𑀓𑁄𑀝𑀺𑀬𑀸 𑀏𑀯𑀁 𑀯𑀼𑀢𑁆𑀢𑀁. 𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸𑀢𑀺 𑀇𑀥 𑀯𑀺𑀜𑁆𑀜𑀸𑀡𑀁 𑀓𑀲𑁆𑀫𑀸 𑀕𑀳𑀺𑀢𑀁? 𑀓𑀺𑀮𑁂𑀲𑀧𑁆𑀧𑀳𑀸𑀦𑀤𑀲𑁆𑀲𑀦𑀢𑁆𑀣𑀁. 𑀓𑀺𑀮𑁂𑀲𑀸 𑀳𑀺 𑀦 𑀓𑁂𑀯𑀮𑀁 𑀘𑀢𑀽𑀲𑀼𑀬𑁂𑀯 𑀔𑀦𑁆𑀥𑁂𑀲𑀼 𑀧𑀳𑀻𑀦𑀸 𑀧𑀳𑀻𑀬𑀦𑁆𑀢𑀺, 𑀧𑀜𑁆𑀘𑀲𑀼𑀧𑀺 𑀧𑀳𑀻𑀬𑀦𑁆𑀢𑀺𑀬𑁂𑀯𑀸𑀢𑀺 𑀓𑀺𑀮𑁂𑀲𑀧𑁆𑀧𑀳𑀸𑀦𑀤𑀲𑁆𑀲𑀦𑀢𑁆𑀣𑀁 𑀕𑀳𑀺𑀢𑀁. 𑀏𑀯𑀁 𑀔𑁄, 𑀕𑀳𑀧𑀢𑀺, 𑀅𑀦𑁄𑀓𑀲𑀸𑀭𑀻 𑀳𑁄𑀢𑀻𑀢𑀺 𑀏𑀯𑀁 𑀓𑀫𑁆𑀫𑀯𑀺𑀜𑁆𑀜𑀸𑀡𑁂𑀦 𑀑𑀓𑀁 𑀅𑀲𑀭𑀦𑁆𑀢𑁂𑀦 𑀅𑀦𑁄𑀓𑀲𑀸𑀭𑀻 𑀦𑀸𑀫 𑀳𑁄𑀢𑀺.

𑀭𑀽𑀧𑀦𑀺𑀫𑀺𑀢𑁆𑀢𑀦𑀺𑀓𑁂𑀢𑀯𑀺𑀲𑀸𑀭𑀯𑀺𑀦𑀺𑀩𑀦𑁆𑀥𑀸𑀢𑀺 ¶ 𑀭𑀽𑀧𑀫𑁂𑀯 𑀓𑀺𑀮𑁂𑀲𑀸𑀦𑀁 𑀧𑀘𑁆𑀘𑀬𑀝𑁆𑀞𑁂𑀦 𑀦𑀺𑀫𑀺𑀢𑁆𑀢𑀁, 𑀆𑀭𑀫𑁆𑀫𑀡𑀓𑀺𑀭𑀺𑀬𑀲𑀗𑁆𑀔𑀸𑀢𑀦𑀺𑀯𑀸𑀲𑀦𑀝𑁆𑀞𑀸𑀦𑀝𑁆𑀞𑁂𑀦 𑀦𑀺𑀓𑁂𑀢𑀦𑁆𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀦𑀺𑀓𑁂𑀢𑀁. 𑀯𑀺𑀲𑀸𑀭𑁄 𑀘 𑀯𑀺𑀦𑀺𑀩𑀦𑁆𑀥𑁄 𑀘 𑀯𑀺𑀲𑀸𑀭𑀯𑀺𑀦𑀺𑀩𑀦𑁆𑀥𑀸. 𑀉𑀪𑀬𑁂𑀦𑀧𑀺 𑀳𑀺 𑀓𑀺𑀮𑁂𑀲𑀸𑀦𑀁 𑀧𑀢𑁆𑀣𑀝𑀪𑀸𑀯𑁄 𑀘 𑀯𑀺𑀦𑀺𑀩𑀦𑁆𑀥𑀦𑀪𑀸𑀯𑁄 𑀘 𑀯𑀼𑀢𑁆𑀢𑁄, 𑀭𑀽𑀧𑀦𑀺𑀫𑀺𑀢𑁆𑀢𑀦𑀺𑀓𑁂𑀢𑁂 𑀯𑀺𑀲𑀸𑀭𑀯𑀺𑀦𑀺𑀩𑀦𑁆𑀥𑀸𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀦𑀺𑀓𑁂𑀢𑀯𑀺𑀲𑀸𑀭𑀯𑀺𑀦𑀺𑀩𑀦𑁆𑀥𑀸, 𑀢𑀲𑁆𑀫𑀸 𑀭𑀽𑀧𑀦𑀺𑀫𑀺𑀢𑁆𑀢𑀦𑀺𑀓𑁂𑀢𑀫𑁆𑀳𑀺 𑀉𑀧𑁆𑀧𑀦𑁆𑀦𑁂𑀦 ¶ 𑀓𑀺𑀮𑁂𑀲𑀯𑀺𑀲𑀸𑀭𑁂𑀦 𑀘𑁂𑀯 𑀓𑀺𑀮𑁂𑀲𑀩𑀦𑁆𑀥𑀦𑁂𑀦 𑀘𑀸𑀢𑀺 𑀅𑀢𑁆𑀣𑁄. 𑀦𑀺𑀓𑁂𑀢𑀲𑀸𑀭𑀻𑀢𑀺 𑀯𑀼𑀘𑁆𑀘𑀢𑀻𑀢𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀦𑀺𑀯𑀸𑀲𑀦𑀝𑁆𑀞𑀸𑀦𑀁 𑀲𑀸𑀭𑀻𑀢𑀺 𑀯𑀼𑀘𑁆𑀘𑀢𑀺. 𑀧𑀳𑀻𑀦𑀸𑀢𑀺 𑀢𑁂 𑀭𑀽𑀧𑀦𑀺𑀫𑀺𑀢𑁆𑀢𑀦𑀺𑀓𑁂𑀢𑀓𑀺𑀮𑁂𑀲𑀯𑀺𑀲𑀸𑀭𑀯𑀺𑀦𑀺𑀩𑀦𑁆𑀥𑀸 𑀧𑀳𑀻𑀦𑀸.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀧𑀜𑁆𑀘𑀓𑁆𑀔𑀦𑁆𑀥𑀸 ‘‘𑀑𑀓𑀸’’𑀢𑀺 𑀯𑀼𑀢𑁆𑀢𑀸, 𑀙 𑀆𑀭𑀫𑁆𑀫𑀡𑀸𑀦𑀺 ‘‘𑀦𑀺𑀓𑁂𑀢’’𑀦𑁆𑀢𑀺? 𑀙𑀦𑁆𑀤𑀭𑀸𑀕𑀲𑁆𑀲 𑀩𑀮𑀯𑀤𑀼𑀩𑁆𑀩𑀮𑀢𑀸𑀬. 𑀲𑀫𑀸𑀦𑁂𑀧𑀺 𑀳𑀺 𑀏𑀢𑁂𑀲𑀁 𑀆𑀮𑀬𑀝𑁆𑀞𑁂𑀦 𑀯𑀺𑀲𑀬𑀪𑀸𑀯𑁂 𑀑𑀓𑁄𑀢𑀺 𑀦𑀺𑀘𑁆𑀘𑀦𑀺𑀯𑀸𑀲𑀦𑀝𑁆𑀞𑀸𑀦𑀕𑁂𑀳𑀫𑁂𑀯 𑀯𑀼𑀘𑁆𑀘𑀢𑀺, 𑀦𑀺𑀓𑁂𑀢𑀦𑁆𑀢𑀺 ¶ ‘‘𑀅𑀚𑁆𑀚 𑀅𑀲𑀼𑀓𑀝𑁆𑀞𑀸𑀦𑁂 𑀓𑀻𑀴𑀺𑀲𑁆𑀲𑀸𑀫𑀸’’𑀢𑀺 𑀓𑀢𑀲𑀗𑁆𑀓𑁂𑀢𑀝𑁆𑀞𑀸𑀦𑀁 𑀦𑀺𑀯𑀸𑀲𑀝𑁆𑀞𑀸𑀦𑀁 𑀉𑀬𑁆𑀬𑀸𑀦𑀸𑀤𑀺. 𑀢𑀢𑁆𑀣 𑀬𑀣𑀸 𑀧𑀼𑀢𑁆𑀢𑀤𑀸𑀭𑀥𑀦𑀥𑀜𑁆𑀜𑀧𑀼𑀡𑁆𑀡𑀕𑁂𑀳𑁂 𑀙𑀦𑁆𑀤𑀭𑀸𑀕𑁄 𑀩𑀮𑀯𑀸 𑀳𑁄𑀢𑀺, 𑀏𑀯𑀁 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀔𑀦𑁆𑀥𑁂𑀲𑀼. 𑀬𑀣𑀸 𑀧𑀦 𑀉𑀬𑁆𑀬𑀸𑀦𑀝𑁆𑀞𑀸𑀦𑀸𑀤𑀻𑀲𑀼 𑀢𑀢𑁄 𑀤𑀼𑀩𑁆𑀩𑀮𑀢𑀭𑁄 𑀳𑁄𑀢𑀺, 𑀏𑀯𑀁 𑀩𑀸𑀳𑀺𑀭𑁂𑀲𑀼 𑀙𑀲𑀼 𑀆𑀭𑀫𑁆𑀫𑀡𑁂𑀲𑀽𑀢𑀺 𑀙𑀦𑁆𑀤𑀭𑀸𑀕𑀲𑁆𑀲 𑀩𑀮𑀯𑀤𑀼𑀩𑁆𑀩𑀮𑀢𑀸𑀬 𑀏𑀯𑀁 𑀤𑁂𑀲𑀦𑀸 𑀓𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀲𑀼𑀔𑀺𑀢𑁂𑀲𑀼 𑀲𑀼𑀔𑀺𑀢𑁄𑀢𑀺 𑀉𑀧𑀝𑁆𑀞𑀸𑀓𑁂𑀲𑀼 𑀥𑀦𑀥𑀜𑁆𑀜𑀮𑀸𑀪𑀸𑀤𑀺𑀯𑀲𑁂𑀦 𑀲𑀼𑀔𑀺𑀢𑁂𑀲𑀼 ‘‘𑀇𑀤𑀸𑀦𑀸𑀳𑀁 𑀫𑀦𑀸𑀧𑀁 𑀪𑁄𑀚𑀦𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀕𑁂𑀳𑀲𑀺𑀢𑀲𑀼𑀔𑁂𑀦 𑀲𑀼𑀔𑀺𑀢𑁄 𑀳𑁄𑀢𑀺, 𑀢𑁂𑀳𑀺 𑀧𑀢𑁆𑀢𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁄 𑀯𑀺𑀬 𑀘𑀭𑀢𑀺. 𑀤𑀼𑀓𑁆𑀔𑀺𑀢𑁂𑀲𑀼 𑀤𑀼𑀓𑁆𑀔𑀺𑀢𑁄𑀢𑀺 𑀢𑁂𑀲𑀁 𑀓𑁂𑀦𑀘𑀺𑀤𑁂𑀯 𑀓𑀸𑀭𑀡𑁂𑀦 𑀤𑀼𑀓𑁆𑀔𑁂 𑀉𑀧𑁆𑀧𑀦𑁆𑀦𑁂 𑀲𑀬𑀁 𑀤𑁆𑀯𑀺𑀕𑀼𑀡𑁂𑀦 𑀤𑀼𑀓𑁆𑀔𑁂𑀦 𑀤𑀼𑀓𑁆𑀔𑀺𑀢𑁄 𑀳𑁄𑀢𑀺. 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀽𑀢𑀺 𑀓𑀺𑀘𑁆𑀘𑀲𑀗𑁆𑀔𑀸𑀢𑁂𑀲𑀼 𑀓𑀭𑀡𑀻𑀬𑁂𑀲𑀼. 𑀢𑁂𑀲𑀼 𑀬𑁄𑀕𑀁 𑀆𑀧𑀚𑁆𑀚𑀢𑀻𑀢𑀺 𑀉𑀧𑀬𑁄𑀕𑀁 𑀲𑀬𑀁 𑀢𑁂𑀲𑀁 𑀓𑀺𑀘𑁆𑀘𑀸𑀦𑀁 𑀓𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺. 𑀓𑀸𑀫𑁂𑀲𑀽𑀢𑀺 𑀯𑀢𑁆𑀣𑀼𑀓𑀸𑀫𑁂𑀲𑀼. 𑀏𑀯𑀁 𑀔𑁄, 𑀕𑀳𑀧𑀢𑀺, 𑀓𑀸𑀫𑁂𑀳𑀺 𑀅𑀭𑀺𑀢𑁆𑀢𑁄 𑀳𑁄𑀢𑀻𑀢𑀺 𑀏𑀯𑀁 𑀓𑀺𑀮𑁂𑀲𑀓𑀸𑀫𑁂𑀳𑀺 𑀅𑀭𑀺𑀢𑁆𑀢𑁄 𑀳𑁄𑀢𑀺 𑀅𑀦𑁆𑀢𑁄 𑀓𑀸𑀫𑀸𑀦𑀁 𑀪𑀸𑀯𑁂𑀦 𑀅𑀢𑀼𑀘𑁆𑀙𑁄. 𑀲𑀼𑀓𑁆𑀓𑀧𑀓𑁆𑀔𑁄 𑀢𑁂𑀲𑀁 𑀅𑀪𑀸𑀯𑁂𑀦 𑀭𑀺𑀢𑁆𑀢𑁄 𑀢𑀼𑀘𑁆𑀙𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀧𑀼𑀭𑀓𑁆𑀔𑀭𑀸𑀦𑁄𑀢𑀺 𑀯𑀝𑁆𑀝𑀁 𑀧𑀼𑀭𑀢𑁄 𑀓𑀼𑀭𑀼𑀫𑀸𑀦𑁄. 𑀏𑀯𑀁𑀭𑀽𑀧𑁄 𑀲𑀺𑀬𑀦𑁆𑀢𑀺𑀆𑀤𑀻𑀲𑀼 𑀤𑀻𑀖𑀭𑀲𑁆𑀲𑀓𑀸𑀴𑁄𑀤𑀸𑀢𑀸𑀤𑀻𑀲𑀼 𑀭𑀽𑀧𑁂𑀲𑀼 ‘‘𑀏𑀯𑀁𑀭𑀽𑀧𑁄 𑀦𑀸𑀫 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑁂𑀢𑀺. 𑀲𑀼𑀔𑀸𑀤𑀻𑀲𑀼 𑀯𑁂𑀤𑀦𑀸𑀲𑀼 𑀏𑀯𑀁𑀯𑁂𑀤𑀦𑁄 𑀦𑀸𑀫; 𑀦𑀻𑀮𑀲𑀜𑁆𑀜𑀸𑀤𑀻𑀲𑀼 𑀲𑀜𑁆𑀜𑀸𑀲𑀼 𑀏𑀯𑀁 𑀲𑀜𑁆𑀜𑁄 𑀦𑀸𑀫; 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀲𑀼 𑀲𑀗𑁆𑀔𑀸𑀭𑁂𑀲𑀼 𑀏𑀯𑀁𑀲𑀗𑁆𑀔𑀸𑀭𑁄 𑀦𑀸𑀫; 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 ¶ 𑀯𑀺𑀜𑁆𑀜𑀸𑀡𑁂𑀲𑀼 ‘‘𑀏𑀯𑀁 𑀯𑀺𑀜𑁆𑀜𑀸𑀡𑁄 𑀦𑀸𑀫 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑁂𑀢𑀺.

𑀅𑀧𑀼𑀭𑀓𑁆𑀔𑀭𑀸𑀦𑁄𑀢𑀺 ¶ 𑀯𑀝𑁆𑀝𑀁 𑀧𑀼𑀭𑀢𑁄 𑀅𑀓𑀼𑀭𑀼𑀫𑀸𑀦𑁄. 𑀲𑀳𑀺𑀢𑀁 𑀫𑁂, 𑀅𑀲𑀳𑀺𑀢𑀁 𑀢𑁂𑀢𑀺 𑀢𑀼𑀬𑁆𑀳𑀁 𑀯𑀘𑀦𑀁 𑀅𑀲𑀳𑀺𑀢𑀁 𑀅𑀲𑀺𑀮𑀺𑀝𑁆𑀞𑀁, 𑀫𑀬𑁆𑀳𑀁 𑀲𑀳𑀺𑀢𑀁 𑀲𑀺𑀮𑀺𑀝𑁆𑀞𑀁 𑀫𑀥𑀼𑀭𑀧𑀸𑀦𑀲𑀤𑀺𑀲𑀁. 𑀅𑀥𑀺𑀘𑀺𑀡𑁆𑀡𑀁 𑀢𑁂 𑀯𑀺𑀧𑀭𑀸𑀯𑀢𑁆𑀢𑀦𑁆𑀢𑀺 𑀬𑀁 𑀢𑀼𑀬𑁆𑀳𑀁 𑀤𑀻𑀖𑁂𑀦 𑀓𑀸𑀮𑁂𑀦 𑀧𑀭𑀺𑀘𑀺𑀢𑀁 𑀲𑀼𑀧𑁆𑀧𑀕𑀼𑀡𑀁, 𑀢𑀁 𑀫𑀫 𑀯𑀸𑀤𑀁 𑀆𑀕𑀫𑁆𑀫 𑀲𑀩𑁆𑀩𑀁 𑀔𑀡𑁂𑀦 𑀯𑀺𑀧𑀭𑀸𑀯𑀢𑁆𑀢𑀁 𑀦𑀺𑀯𑀢𑁆𑀢𑀁. 𑀆𑀭𑁄𑀧𑀺𑀢𑁄 𑀢𑁂 𑀯𑀸𑀤𑁄𑀢𑀺 𑀢𑀼𑀬𑁆𑀳𑀁 𑀤𑁄𑀲𑁄 𑀫𑀬𑀸 𑀆𑀭𑁄𑀧𑀺𑀢𑁄. 𑀘𑀭 𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀬𑀸𑀢𑀺 𑀢𑀁 𑀢𑀁 𑀆𑀘𑀭𑀺𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀉𑀢𑁆𑀢𑀭𑀺 𑀧𑀭𑀺𑀬𑁂𑀲𑀦𑁆𑀢𑁄 𑀇𑀫𑀲𑁆𑀲 𑀯𑀸𑀤𑀲𑁆𑀲 𑀫𑁄𑀓𑁆𑀔𑀸𑀬 𑀘𑀭 𑀆𑀳𑀺𑀡𑁆𑀟𑀸𑀳𑀺. 𑀦𑀺𑀩𑁆𑀩𑁂𑀞𑁂𑀳𑀺 𑀯𑀸 𑀲𑀘𑁂 𑀧𑀳𑁄𑀲𑀻𑀢𑀺 𑀅𑀣 𑀲𑀬𑀫𑁂𑀯 𑀧𑀳𑁄𑀲𑀺, 𑀇𑀥𑁂𑀯 𑀦𑀺𑀩𑁆𑀩𑁂𑀞𑁂𑀳𑀻𑀢𑀺. 𑀢𑀢𑀺𑀬𑀁.

𑁪. 𑀤𑀼𑀢𑀺𑀬𑀳𑀸𑀮𑀺𑀤𑁆𑀤𑀺𑀓𑀸𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪. 𑀘𑀢𑀼𑀢𑁆𑀣𑁂 ¶ 𑀲𑀓𑁆𑀓𑀧𑀜𑁆𑀳𑁂𑀢𑀺 𑀘𑀽𑀴𑀲𑀓𑁆𑀓𑀧𑀜𑁆𑀳𑁂, 𑀫𑀳𑀸𑀲𑀓𑁆𑀓𑀧𑀜𑁆𑀳𑁂𑀧𑁂𑀢𑀁 𑀯𑀼𑀢𑁆𑀢𑀫𑁂𑀯. 𑀢𑀡𑁆𑀳𑀸𑀲𑀗𑁆𑀔𑀬𑀯𑀺𑀫𑀼𑀢𑁆𑀢𑀸𑀢𑀺 𑀢𑀡𑁆𑀳𑀸𑀲𑀗𑁆𑀔𑀬𑁂 𑀦𑀺𑀩𑁆𑀩𑀸𑀦𑁂 𑀢𑀤𑀸𑀭𑀫𑁆𑀫𑀡𑀸𑀬 𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀸. 𑀅𑀘𑁆𑀘𑀦𑁆𑀢𑀦𑀺𑀝𑁆𑀞𑀸𑀢𑀺 𑀅𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀦𑀺𑀝𑁆𑀞𑀸 𑀲𑀢𑀢𑀦𑀺𑀝𑁆𑀞𑀸. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀘𑀢𑀼𑀢𑁆𑀣𑀁.

𑁫. 𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁫. 𑀧𑀜𑁆𑀘𑀫𑁂 𑀲𑀫𑀸𑀥𑀺𑀦𑁆𑀢𑀺 𑀇𑀤𑀁 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀧𑀭𑀺𑀳𑀸𑀬𑀦𑁆𑀢𑁂 𑀤𑀺𑀲𑁆𑀯𑀸, ‘‘𑀘𑀺𑀢𑁆𑀢𑁂𑀓𑀕𑁆𑀕𑀢𑀁 𑀮𑀪𑀦𑁆𑀢𑀸𑀦𑀁 𑀇𑀫𑁂𑀲𑀁 𑀓𑀫𑁆𑀫𑀝𑁆𑀞𑀸𑀦𑀁 𑀨𑀸𑀢𑀺𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀆𑀳. 𑀅𑀪𑀺𑀦𑀦𑁆𑀤𑀢𑀻𑀢𑀺 𑀧𑀢𑁆𑀣𑁂𑀢𑀺. 𑀅𑀪𑀺𑀯𑀤𑀢𑀻𑀢𑀺 𑀢𑀸𑀬 𑀅𑀪𑀺𑀦𑀦𑁆𑀤𑀦𑀸𑀬 ‘‘𑀅𑀳𑁄 𑀧𑀺𑀬𑀁 𑀇𑀝𑁆𑀞𑀁 𑀓𑀦𑁆𑀢𑀁 𑀫𑀦𑀸𑀧’’𑀦𑁆𑀢𑀺 𑀯𑀤𑀢𑀺. 𑀯𑀸𑀘𑀁 𑀅𑀪𑀺𑀦𑀦𑁆𑀤𑀦𑁆𑀢𑁄𑀧𑀺 𑀘 𑀢𑀁 𑀆𑀭𑀫𑁆𑀫𑀡𑀁 𑀦𑀺𑀲𑁆𑀲𑀸𑀬 𑀏𑀯𑀁 𑀮𑁄𑀪𑀁 𑀉𑀧𑁆𑀧𑀸𑀤𑁂𑀦𑁆𑀢𑁄 𑀅𑀪𑀺𑀯𑀤𑀢𑀺𑀬𑁂𑀯 𑀦𑀸𑀫. 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀻𑀢𑀺 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀬𑀸 ¶ 𑀭𑀽𑀧𑁂 𑀦𑀦𑁆𑀤𑀻𑀢𑀺 𑀬𑀸 𑀲𑀸 𑀭𑀽𑀧𑁂 𑀩𑀮𑀯𑀧𑀢𑁆𑀣𑀦𑀸𑀲𑀗𑁆𑀔𑀸𑀢𑀸 𑀦𑀦𑁆𑀤𑀻. 𑀢𑀤𑀼𑀧𑀸𑀤𑀸𑀦𑀦𑁆𑀢𑀺 𑀢𑀁 𑀕𑀳𑀡𑀝𑁆𑀞𑁂𑀦 𑀉𑀧𑀸𑀤𑀸𑀦𑀁. 𑀦𑀸𑀪𑀺𑀦𑀦𑁆𑀤𑀢𑀻𑀢𑀺 𑀦 𑀧𑀢𑁆𑀣𑁂𑀢𑀺. 𑀦𑀸𑀪𑀺𑀯𑀤𑀢𑀻𑀢𑀺 𑀧𑀢𑁆𑀣𑀦𑀸𑀯𑀲𑁂𑀦 𑀦 ‘‘𑀇𑀝𑁆𑀞𑀁 𑀓𑀦𑁆𑀢’’𑀦𑁆𑀢𑀺 𑀯𑀤𑀢𑀺. 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑁂𑀦 𑀘𑁂𑀢𑀲𑀸 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔’’𑀦𑁆𑀢𑀺 𑀯𑀘𑀻𑀪𑁂𑀤𑀁 𑀓𑀭𑁄𑀦𑁆𑀢𑁄𑀧𑀺 𑀦𑀸𑀪𑀺𑀯𑀤𑀢𑀺𑀬𑁂𑀯. 𑀧𑀜𑁆𑀘𑀫𑀁.

𑁬. 𑀧𑀝𑀺𑀲𑀮𑁆𑀮𑀸𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁬. 𑀙𑀝𑁆𑀞𑁂 𑀧𑀝𑀺𑀲𑀮𑁆𑀮𑀸𑀡𑁂𑀢𑀺 𑀇𑀤𑀁 𑀪𑀕𑀯𑀸 𑀢𑁂 𑀪𑀺𑀓𑁆𑀔𑀽 𑀓𑀸𑀬𑀯𑀺𑀯𑁂𑀓𑁂𑀦 𑀧𑀭𑀺𑀳𑀸𑀬𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀓𑀸𑀬𑀯𑀺𑀯𑁂𑀓𑀁 𑀮𑀪𑀦𑁆𑀢𑀸𑀦𑀁 𑀇𑀫𑁂𑀲𑀁 𑀓𑀫𑁆𑀫𑀝𑁆𑀞𑀸𑀦𑀁 𑀨𑀸𑀢𑀺𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀆𑀳. 𑀙𑀝𑁆𑀞𑀁.

𑁭. 𑀉𑀧𑀸𑀤𑀸𑀧𑀭𑀺𑀢𑀲𑁆𑀲𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁭. 𑀲𑀢𑁆𑀢𑀫𑁂 ¶ 𑀉𑀧𑀸𑀤𑀸𑀧𑀭𑀺𑀢𑀲𑁆𑀲𑀦𑀦𑁆𑀢𑀺 𑀕𑀳𑀡𑁂𑀦 𑀉𑀧𑁆𑀧𑀦𑁆𑀦𑀁 𑀧𑀭𑀺𑀢𑀲𑁆𑀲𑀦𑀁. 𑀅𑀦𑀼𑀧𑀸𑀤𑀸𑀅𑀧𑀭𑀺𑀢𑀲𑁆𑀲𑀦𑀦𑁆𑀢𑀺 𑀅𑀕𑁆𑀕𑀳𑀡𑁂𑀦 𑀅𑀧𑀭𑀺𑀢𑀲𑁆𑀲𑀦𑀁. 𑀭𑀽𑀧𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀭𑀺𑀯𑀢𑁆𑀢𑀺𑀯𑀺𑀜𑁆𑀜𑀸𑀡𑀁 𑀳𑁄𑀢𑀻𑀢𑀺 ‘‘𑀫𑀫 𑀭𑀽𑀧𑀁 𑀯𑀺𑀧𑀭𑀺𑀡𑀢’’𑀦𑁆𑀢𑀺 𑀯𑀸 ‘‘𑀅𑀳𑀼 𑀯𑀢 𑀫𑁂𑀢𑀁, 𑀤𑀸𑀦𑀺 𑀯𑀢 𑀫𑁂 𑀦𑀢𑁆𑀣𑀻’’𑀢𑀺 𑀯𑀸 𑀆𑀤𑀺𑀦𑀸 𑀦𑀬𑁂𑀦 𑀓𑀫𑁆𑀫𑀯𑀺𑀜𑁆𑀜𑀸𑀡𑀁 𑀭𑀽𑀧𑀲𑁆𑀲 𑀪𑁂𑀤𑀸𑀦𑀼𑀧𑀭𑀺𑀯𑀢𑁆𑀢𑀺 𑀳𑁄𑀢𑀺. 𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀭𑀺𑀯𑀢𑁆𑀢𑀺𑀚𑀸𑀢𑀺 𑀯𑀺𑀧𑀭𑀺𑀡𑀸𑀫𑀲𑁆𑀲 𑀅𑀦𑀼𑀧𑀭𑀺𑀯𑀢𑁆𑀢𑀺𑀢𑁄 𑀯𑀺𑀧𑀭𑀺𑀡𑀸𑀫𑀸𑀭𑀫𑁆𑀫𑀡𑀘𑀺𑀢𑁆𑀢𑀢𑁄 ¶ 𑀚𑀸𑀢𑀸. 𑀧𑀭𑀺𑀢𑀲𑁆𑀲𑀦𑀸 𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑀸𑀢𑀺 𑀢𑀡𑁆𑀳𑀸𑀧𑀭𑀺𑀢𑀲𑁆𑀲𑀦𑀸 𑀘 𑀅𑀓𑀼𑀲𑀮𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑀸 𑀘. 𑀘𑀺𑀢𑁆𑀢𑀦𑁆𑀢𑀺 𑀓𑀼𑀲𑀮𑀘𑀺𑀢𑁆𑀢𑀁. 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀻𑀢𑀺 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀉𑀢𑁆𑀢𑀸𑀲𑀯𑀸𑀢𑀺 𑀲𑀉𑀢𑁆𑀢𑀸𑀲𑁄. 𑀯𑀺𑀖𑀸𑀢𑀯𑀸𑀢𑀺 𑀲𑀯𑀺𑀖𑀸𑀢𑁄 𑀲𑀤𑀼𑀓𑁆𑀔𑁄. 𑀅𑀧𑁂𑀓𑁆𑀔𑀯𑀸𑀢𑀺 𑀲𑀸𑀮𑀬𑁄. 𑀉𑀧𑀸𑀤𑀸𑀬 𑀘 𑀧𑀭𑀺𑀢𑀲𑁆𑀲𑀢𑀻𑀢𑀺 𑀕𑀡𑁆𑀳𑀺𑀢𑁆𑀯𑀸 𑀧𑀭𑀺𑀢𑀲𑁆𑀲𑀓𑁄 𑀦𑀸𑀫 𑀳𑁄𑀢𑀺. 𑀦 𑀭𑀽𑀧𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀭𑀺𑀯𑀢𑁆𑀢𑀻𑀢𑀺 𑀔𑀻𑀡𑀸𑀲𑀯𑀲𑁆𑀲 𑀓𑀫𑁆𑀫𑀯𑀺𑀜𑁆𑀜𑀸𑀡𑀫𑁂𑀯 𑀦𑀢𑁆𑀣𑀺, 𑀢𑀲𑁆𑀫𑀸 𑀭𑀽𑀧𑀪𑁂𑀤𑀸𑀦𑀼𑀧𑀭𑀺𑀯𑀢𑁆𑀢𑀺 𑀦 𑀳𑁄𑀢𑀻𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀲𑀢𑁆𑀢𑀫𑀁.

𑁮. 𑀤𑀼𑀢𑀺𑀬𑀉𑀧𑀸𑀤𑀸𑀧𑀭𑀺𑀢𑀲𑁆𑀲𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁮. 𑀅𑀝𑁆𑀞𑀫𑁂 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀤𑁂𑀲𑀦𑀸 𑀓𑀢𑀸. 𑀇𑀢𑀺 𑀧𑀝𑀺𑀧𑀸𑀝𑀺𑀬𑀸 𑀘𑀢𑀽𑀲𑀼 𑀲𑀼𑀢𑁆𑀢𑁂𑀲𑀼 𑀯𑀝𑁆𑀝𑀯𑀺𑀯𑀝𑁆𑀝𑀫𑁂𑀯 𑀓𑀣𑀺𑀢𑀁. 𑀅𑀝𑁆𑀞𑀫𑀁.

𑁯. 𑀓𑀸𑀮𑀢𑁆𑀢𑀬𑀅𑀦𑀺𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸

𑁯. 𑀦𑀯𑀫𑁂 ¶ 𑀓𑁄 𑀧𑀦 𑀯𑀸𑀤𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲𑀸𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀳𑀺 𑀓𑀣𑀸𑀯 𑀓𑀸, 𑀅𑀦𑀺𑀘𑁆𑀘𑀫𑁂𑀯 𑀢𑀁. 𑀢𑁂 𑀓𑀺𑀭 𑀪𑀺𑀓𑁆𑀔𑀽 𑀅𑀢𑀻𑀢𑀸𑀦𑀸𑀕𑀢𑀁 𑀅𑀦𑀺𑀘𑁆𑀘𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀺𑀮𑀫𑀺𑀁𑀲𑀼, 𑀅𑀣 𑀦𑁂𑀲𑀁 𑀇𑀢𑁄 𑀅𑀢𑀻𑀢𑀸𑀦𑀸𑀕𑀢𑁂𑀧𑀺 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀦𑀺𑀘𑁆𑀘’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁂 𑀩𑀼𑀚𑁆𑀛𑀺𑀲𑁆𑀲𑀦𑁆𑀢𑀻𑀢𑀺 𑀅𑀚𑁆𑀛𑀸𑀲𑀬𑀁 𑀯𑀺𑀤𑀺𑀢𑁆𑀯𑀸 𑀲𑀢𑁆𑀣𑀸 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁂𑀦 𑀇𑀫𑀁 𑀤𑁂𑀲𑀦𑀁 𑀤𑁂𑀲𑁂𑀲𑀺. 𑀦𑀯𑀫𑀁.

𑁧𑁦-𑁧𑁧. 𑀓𑀸𑀮𑀢𑁆𑀢𑀬𑀤𑀼𑀓𑁆𑀔𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦-𑁧𑁧. 𑀤𑀲𑀫𑁂𑀓𑀸𑀤𑀲𑀫𑀸𑀦𑀺 ¶ 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀧𑀤𑁂𑀳𑀺 𑀯𑀺𑀲𑁂𑀲𑁂𑀢𑁆𑀯𑀸 𑀢𑀣𑀸𑀭𑀽𑀧𑁂𑀦𑁂𑀯 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁂𑀦 𑀓𑀣𑀺𑀢𑀸𑀦𑀻𑀢𑀺. 𑀤𑀲𑀫𑁂𑀓𑀸𑀤𑀲𑀫𑀸𑀦𑀺.

𑀦𑀓𑀼𑀮𑀧𑀺𑀢𑀼𑀯𑀕𑁆𑀕𑁄 𑀧𑀞𑀫𑁄.

𑁨. 𑀅𑀦𑀺𑀘𑁆𑀘𑀯𑀕𑁆𑀕𑁄

𑁧-𑁧𑁦. 𑀅𑀦𑀺𑀘𑁆𑀘𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁨-𑁨𑁧. 𑀅𑀦𑀺𑀘𑁆𑀘𑀯𑀕𑁆𑀕𑁂 𑀧𑀭𑀺𑀬𑁄𑀲𑀸𑀦𑀲𑀼𑀢𑁆𑀢𑀁 𑀧𑀼𑀘𑁆𑀙𑀸𑀯𑀲𑀺𑀓𑀁, 𑀲𑁂𑀲𑀸𑀦𑀺 𑀢𑀣𑀸 𑀢𑀣𑀸 𑀩𑀼𑀚𑁆𑀛𑀦𑀓𑀸𑀦𑀜𑁆𑀘 𑀯𑀲𑁂𑀦 𑀤𑁂𑀲𑀺𑀢𑀸𑀦𑀻𑀢𑀺. 𑀧𑀞𑀫𑀸𑀤𑀻𑀦𑀺.

𑀅𑀦𑀺𑀘𑁆𑀘𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀪𑀸𑀭𑀯𑀕𑁆𑀕𑁄

𑁧. 𑀪𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨. 𑀪𑀸𑀭𑀯𑀕𑁆𑀕𑀲𑁆𑀲 ¶ 𑀧𑀞𑀫𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀢𑀺𑀲𑁆𑀲 𑀯𑀘𑀦𑀻𑀬𑀦𑁆𑀢𑀺 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀇𑀢𑀺 𑀅𑀲𑁆𑀲 𑀯𑀘𑀦𑀻𑀬𑀁, 𑀏𑀯𑀁 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀸𑀭𑁄𑀢𑀺 𑀬𑁂 𑀇𑀫𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸, 𑀅𑀬𑀁 𑀪𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀓𑁂𑀦𑀝𑁆𑀞𑁂𑀦𑀸𑀢𑀺? 𑀧𑀭𑀺𑀳𑀸𑀭𑀪𑀸𑀭𑀺𑀬𑀝𑁆𑀞𑁂𑀦. 𑀏𑀢𑁂𑀲𑀜𑁆𑀳𑀺 𑀞𑀸𑀧𑀦𑀕𑀫𑀦𑀦𑀺𑀲𑀻𑀤𑀸𑀧𑀦𑀦𑀺𑀧𑀚𑁆𑀚𑀸𑀧𑀦𑀦𑁆𑀳𑀸𑀧𑀦𑀫𑀡𑁆𑀟𑀦𑀔𑀸𑀤𑀸𑀧𑀦𑀪𑀼𑀜𑁆𑀚𑀸𑀧𑀦𑀸𑀤𑀺𑀧𑀭𑀺𑀳𑀸𑀭𑁄 𑀪𑀸𑀭𑀺𑀬𑁄𑀢𑀺 𑀧𑀭𑀺𑀳𑀸𑀭𑀪𑀸𑀭𑀺𑀬𑀝𑁆𑀞𑁂𑀦 𑀪𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁𑀦𑀸𑀫𑁄𑀢𑀺 𑀢𑀺𑀲𑁆𑀲𑁄 𑀤𑀢𑁆𑀢𑁄𑀢𑀺𑀆𑀤𑀺𑀦𑀸𑀫𑁄. 𑀏𑀯𑀁𑀕𑁄𑀢𑁆𑀢𑁄𑀢𑀺 𑀓𑀡𑁆𑀳𑀸𑀬𑀦𑁄 𑀯𑀘𑁆𑀙𑀸𑀬𑀦𑁄𑀢𑀺𑀆𑀤𑀺𑀕𑁄𑀢𑁆𑀢𑁄. 𑀇𑀢𑀺 𑀯𑁄𑀳𑀸𑀭𑀫𑀢𑁆𑀢𑀲𑀺𑀤𑁆𑀥𑀁 𑀧𑀼𑀕𑁆𑀕𑀮𑀁 ‘‘𑀪𑀸𑀭𑀳𑀸𑀭𑁄’’𑀢𑀺 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀧𑀼𑀕𑁆𑀕𑀮𑁄 ¶ 𑀳𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂𑀬𑁂𑀯 ¶ 𑀔𑀦𑁆𑀥𑀪𑀸𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀤𑀲𑀧𑀺 𑀯𑀲𑁆𑀲𑀸𑀦𑀺 𑀯𑀻𑀲𑀢𑀺𑀧𑀺 𑀯𑀲𑁆𑀲𑀲𑀢𑀫𑁆𑀧𑀻𑀢𑀺 𑀬𑀸𑀯𑀚𑀻𑀯𑀁 𑀇𑀫𑀁 𑀔𑀦𑁆𑀥𑀪𑀸𑀭𑀁 𑀦𑁆𑀳𑀸𑀧𑁂𑀦𑁆𑀢𑁄 𑀪𑁄𑀚𑁂𑀦𑁆𑀢𑁄 𑀫𑀼𑀤𑀼𑀲𑀫𑁆𑀨𑀲𑁆𑀲𑀫𑀜𑁆𑀘𑀧𑀻𑀞𑁂𑀲𑀼 𑀦𑀺𑀲𑀻𑀤𑀸𑀧𑁂𑀦𑁆𑀢𑁄 𑀦𑀺𑀧𑀚𑁆𑀚𑀸𑀧𑁂𑀦𑁆𑀢𑁄 𑀧𑀭𑀺𑀳𑀭𑀺𑀢𑁆𑀯𑀸 𑀘𑀼𑀢𑀺𑀓𑁆𑀔𑀡𑁂 𑀙𑀟𑁆𑀟𑁂𑀢𑁆𑀯𑀸 𑀧𑀼𑀦 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀅𑀧𑀭𑀁 𑀔𑀦𑁆𑀥𑀪𑀸𑀭𑀁 𑀆𑀤𑀺𑀬𑀢𑀺, 𑀢𑀲𑁆𑀫𑀸 𑀪𑀸𑀭𑀳𑀸𑀭𑁄𑀢𑀺 𑀚𑀸𑀢𑁄.

𑀧𑁄𑀦𑁄𑀪𑀯𑀺𑀓𑀸𑀢𑀺 𑀧𑀼𑀦𑀩𑁆𑀪𑀯𑀦𑀺𑀩𑁆𑀩𑀢𑁆𑀢𑀺𑀓𑀸. 𑀦𑀦𑁆𑀤𑀻𑀭𑀸𑀕𑀲𑀳𑀕𑀢𑀸𑀢𑀺 𑀦𑀦𑁆𑀤𑀺𑀭𑀸𑀕𑁂𑀦 𑀲𑀳 𑀏𑀓𑀢𑁆𑀢𑀫𑁂𑀯 𑀕𑀢𑀸. 𑀢𑀩𑁆𑀪𑀸𑀯𑀲𑀳𑀕𑀢𑀜𑁆𑀳𑀺 𑀇𑀥 𑀅𑀥𑀺𑀧𑁆𑀧𑁂𑀢𑀁. 𑀢𑀢𑁆𑀭 𑀢𑀢𑁆𑀭𑀸𑀪𑀺𑀦𑀦𑁆𑀤𑀺𑀦𑀻𑀢𑀺 𑀉𑀧𑀧𑀢𑁆𑀢𑀺𑀝𑁆𑀞𑀸𑀦𑁂 𑀯𑀸 𑀭𑀽𑀧𑀸𑀤𑀻𑀲𑀼 𑀯𑀸 𑀆𑀭𑀫𑁆𑀫𑀡𑁂𑀲𑀼 𑀢𑀢𑁆𑀣 𑀢𑀢𑁆𑀣 𑀅𑀪𑀺𑀦𑀦𑁆𑀤𑀦𑀲𑀻𑀮𑀸𑀯. 𑀓𑀸𑀫𑀢𑀡𑁆𑀳𑀸𑀤𑀻𑀲𑀼 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄 𑀓𑀸𑀫𑀢𑀡𑁆𑀳𑀸 𑀦𑀸𑀫, 𑀭𑀽𑀧𑀸𑀭𑀽𑀧𑀪𑀯𑀭𑀸𑀕𑁄 𑀛𑀸𑀦𑀦𑀺𑀓𑀦𑁆𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑁄 𑀭𑀸𑀕𑁄𑀢𑀺 𑀅𑀬𑀁 𑀪𑀯𑀢𑀡𑁆𑀳𑀸 𑀦𑀸𑀫, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀳𑀕𑀢𑁄 𑀭𑀸𑀕𑁄 𑀯𑀺𑀪𑀯𑀢𑀡𑁆𑀳𑀸 𑀦𑀸𑀫. 𑀪𑀸𑀭𑀸𑀤𑀸𑀦𑀦𑁆𑀢𑀺 𑀪𑀸𑀭𑀕𑀳𑀡𑀁. 𑀢𑀡𑁆𑀳𑀸𑀬 𑀳𑀺 𑀏𑀲 𑀪𑀸𑀭𑀁 𑀆𑀤𑀺𑀬𑀢𑀺. 𑀅𑀲𑁂𑀲𑀯𑀺𑀭𑀸𑀕𑀦𑀺𑀭𑁄𑀥𑁄𑀢𑀺𑀆𑀤𑀺 𑀲𑀩𑁆𑀩𑀁 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀢𑀜𑁆𑀳𑀺 𑀆𑀕𑀫𑁆𑀫 𑀢𑀡𑁆𑀳𑀸 𑀅𑀲𑁂𑀲𑀢𑁄 𑀯𑀺𑀭𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀺 𑀘𑀚𑀺𑀬𑀢𑀺 𑀧𑀝𑀺𑀦𑀺𑀲𑁆𑀲𑀚𑁆𑀚𑀺𑀬𑀢𑀺 𑀯𑀺𑀫𑀼𑀘𑁆𑀘𑀢𑀺, 𑀦𑀢𑁆𑀣𑀺 𑀘𑁂𑀢𑁆𑀣 𑀓𑀸𑀫𑀸𑀮𑀬𑁄 𑀯𑀸 𑀤𑀺𑀝𑁆𑀞𑀸𑀮𑀬𑁄 𑀯𑀸𑀢𑀺 𑀦𑀺𑀩𑁆𑀩𑀸𑀦𑀁 𑀏𑀢𑀸𑀦𑀺 𑀦𑀸𑀫𑀸𑀦𑀺 𑀮𑀪𑀢𑀺. 𑀲𑀫𑀽𑀮𑀁 𑀢𑀡𑁆𑀳𑀦𑁆𑀢𑀺 𑀢𑀡𑁆𑀳𑀸𑀬 𑀅𑀯𑀺𑀚𑁆𑀚𑀸 𑀫𑀽𑀮𑀁 𑀦𑀸𑀫. 𑀅𑀩𑁆𑀩𑀼𑀬𑁆𑀳𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀢𑀁 𑀲𑀫𑀽𑀮𑀓𑀁 𑀉𑀤𑁆𑀥𑀭𑀺𑀢𑁆𑀯𑀸. 𑀦𑀺𑀘𑁆𑀙𑀸𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀦𑀺𑀢𑁆𑀢𑀡𑁆𑀳𑁄 𑀧𑀭𑀺𑀦𑀺𑀩𑁆𑀩𑀼𑀢𑁄 𑀦𑀸𑀫𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀧𑀞𑀫𑀁.

𑁨. 𑀧𑀭𑀺𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩. 𑀤𑀼𑀢𑀺𑀬𑁂 ¶ 𑀧𑀭𑀺𑀜𑁆𑀜𑁂𑀬𑁆𑀬𑁂𑀢𑀺 𑀧𑀭𑀺𑀚𑀸𑀦𑀺𑀢𑀩𑁆𑀩𑁂, 𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩𑁂𑀢𑀺 𑀅𑀢𑁆𑀣𑁄. 𑀧𑀭𑀺𑀜𑁆𑀜𑀦𑁆𑀢𑀺 𑀅𑀘𑁆𑀘𑀦𑁆𑀢𑀧𑀭𑀺𑀜𑁆𑀜𑀁, 𑀲𑀫𑀢𑀺𑀓𑁆𑀓𑀫𑀦𑁆𑀢𑀺 𑀅𑀢𑁆𑀣𑁄. 𑀭𑀸𑀕𑀓𑁆𑀔𑀬𑁄𑀢𑀺𑀆𑀤𑀺 𑀦𑀺𑀩𑁆𑀩𑀸𑀦𑀲𑁆𑀲 𑀦𑀸𑀫𑀁. 𑀢𑀜𑁆𑀳𑀺 𑀅𑀘𑁆𑀘𑀦𑁆𑀢𑀧𑀭𑀺𑀜𑁆𑀜𑀸 𑀦𑀸𑀫. 𑀤𑀼𑀢𑀺𑀬𑀁.

𑁩. 𑀅𑀪𑀺𑀚𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪. 𑀢𑀢𑀺𑀬𑁂 𑀅𑀪𑀺𑀚𑀸𑀦𑀦𑁆𑀢𑀺 𑀅𑀪𑀺𑀚𑀸𑀦𑀦𑁆𑀢𑁄. 𑀇𑀫𑀺𑀦𑀸 𑀜𑀸𑀢𑀧𑀭𑀺𑀜𑁆𑀜𑀸 𑀓𑀣𑀺𑀢𑀸, 𑀤𑀼𑀢𑀺𑀬𑀧𑀤𑁂𑀦 𑀢𑀻𑀭𑀡𑀧𑀭𑀺𑀜𑁆𑀜𑀸, 𑀢𑀢𑀺𑀬𑀘𑀢𑀼𑀢𑁆𑀣𑁂𑀳𑀺 𑀧𑀳𑀸𑀦𑀧𑀭𑀺𑀜𑁆𑀜𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀢𑀺𑀲𑁆𑀲𑁄 𑀧𑀭𑀺𑀜𑁆𑀜𑀸 𑀓𑀣𑀺𑀢𑀸𑀢𑀺. 𑀢𑀢𑀺𑀬𑀁.

𑁪-𑁯. 𑀙𑀦𑁆𑀤𑀭𑀸𑀕𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁫-𑁩𑁦. 𑀘𑀢𑀼𑀢𑁆𑀣𑀸𑀤𑀻𑀦𑀺 ¶ ¶ 𑀥𑀸𑀢𑀼𑀲𑀁𑀬𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀧𑀝𑀺𑀧𑀸𑀝𑀺𑀬𑀸 𑀧𑀦𑁂𑀢𑁆𑀣 𑀧𑀜𑁆𑀘𑀫𑀙𑀝𑁆𑀞𑀲𑀢𑁆𑀢𑀫𑁂𑀲𑀼 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀓𑀣𑀺𑀢𑀸𑀦𑀺, 𑀅𑀝𑁆𑀞𑀫𑀦𑀯𑀫𑁂𑀲𑀼 𑀯𑀝𑁆𑀝𑀯𑀺𑀯𑀝𑁆𑀝𑀁. 𑀘𑀢𑀼𑀢𑁆𑀣𑀸𑀤𑀻𑀦𑀺.

𑁧𑁦. 𑀅𑀖𑀫𑀽𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀤𑀲𑀫𑁂 𑀅𑀖𑀦𑁆𑀢𑀺 𑀤𑀼𑀓𑁆𑀔𑀁. 𑀏𑀯𑀫𑁂𑀢𑁆𑀣 𑀤𑀼𑀓𑁆𑀔𑀮𑀓𑁆𑀔𑀡𑀫𑁂𑀯 𑀓𑀣𑀺𑀢𑀁. 𑀤𑀲𑀫𑀁.

𑁧𑁧. 𑀧𑀪𑀗𑁆𑀕𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨. 𑀏𑀓𑀸𑀤𑀲𑀫𑁂 𑀧𑀪𑀗𑁆𑀕𑀼𑀦𑁆𑀢𑀺 𑀧𑀪𑀺𑀚𑁆𑀚𑀦𑀲𑀪𑀸𑀯𑀁. 𑀏𑀯𑀫𑀺𑀥 𑀅𑀦𑀺𑀘𑁆𑀘𑀮𑀓𑁆𑀔𑀡𑀫𑁂𑀯 𑀓𑀣𑀺𑀢𑀦𑁆𑀢𑀺. 𑀏𑀓𑀸𑀤𑀲𑀫𑀁.

𑀪𑀸𑀭𑀯𑀕𑁆𑀕𑁄 𑀢𑀢𑀺𑀬𑁄.

𑁪. 𑀦𑀢𑀼𑀫𑁆𑀳𑀸𑀓𑀯𑀕𑁆𑀕𑁄

𑁧. 𑀦𑀢𑀼𑀫𑁆𑀳𑀸𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁩. 𑀦𑀢𑀼𑀫𑁆𑀳𑀸𑀓𑀯𑀕𑁆𑀕𑀲𑁆𑀲 𑀧𑀞𑀫𑁂 𑀧𑀚𑀳𑀣𑀸𑀢𑀺 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀧𑀚𑀳𑀣. 𑀢𑀺𑀡𑀸𑀤𑀻𑀲𑀼 𑀢𑀺𑀡𑀁 𑀦𑀸𑀫 𑀅𑀦𑁆𑀢𑁄𑀨𑁂𑀕𑁆𑀕𑀼 𑀩𑀳𑀺𑀲𑀸𑀭𑀁 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀺. 𑀓𑀝𑁆𑀞𑀁 ¶ 𑀦𑀸𑀫 𑀅𑀦𑁆𑀢𑁄𑀲𑀸𑀭𑀁 𑀩𑀳𑀺𑀨𑁂𑀕𑁆𑀕𑀼 𑀔𑀤𑀺𑀭𑀲𑀸𑀮𑀲𑀸𑀓𑀧𑀦𑀲𑀸𑀤𑀺. 𑀲𑀸𑀔𑀸 𑀦𑀸𑀫 𑀭𑀼𑀓𑁆𑀔𑀲𑁆𑀲 𑀩𑀸𑀳𑀸 𑀯𑀺𑀬 𑀦𑀺𑀓𑁆𑀔𑀦𑁆𑀢𑀸. 𑀧𑀮𑀸𑀲𑀁 𑀦𑀸𑀫 𑀢𑀸𑀮𑀦𑀸𑀴𑀺𑀓𑁂𑀭𑀧𑀡𑁆𑀡𑀸𑀤𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀦𑀢𑀼𑀫𑁆𑀳𑀸𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪. 𑀤𑀼𑀢𑀺𑀬𑀁 ¶ 𑀯𑀺𑀦𑀸 𑀉𑀧𑀫𑀸𑀬 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑁂𑀦 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀁.

𑁩. 𑀅𑀜𑁆𑀜𑀢𑀭𑀪𑀺𑀓𑁆𑀔𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫. 𑀢𑀢𑀺𑀬𑁂 𑀭𑀽𑀧𑀜𑁆𑀘𑁂, 𑀪𑀦𑁆𑀢𑁂, 𑀅𑀦𑀼𑀲𑁂𑀢𑀻𑀢𑀺 𑀬𑀤𑀺 𑀭𑀽𑀧𑀁 𑀅𑀦𑀼𑀲𑁂𑀢𑀺. 𑀢𑁂𑀦 𑀲𑀗𑁆𑀔𑀁 𑀕𑀘𑁆𑀙𑀢𑀻𑀢𑀺 𑀓𑀸𑀫𑀭𑀸𑀕𑀸𑀤𑀻𑀲𑀼 𑀬𑁂𑀦 𑀅𑀦𑀼𑀲𑀬𑁂𑀦 𑀢𑀁 𑀭𑀽𑀧𑀁 𑀅𑀦𑀼𑀲𑁂𑀢𑀺, 𑀢𑁂𑀦𑁂𑀯 𑀅𑀦𑀼𑀲𑀬𑁂𑀦 ‘‘𑀭𑀢𑁆𑀢𑁄 𑀤𑀼𑀝𑁆𑀞𑁄 𑀫𑀽𑀴𑁆𑀳𑁄’’𑀢𑀺 𑀧𑀡𑁆𑀡𑀢𑁆𑀢𑀺𑀁 𑀕𑀘𑁆𑀙𑀢𑀺. 𑀦 𑀢𑁂𑀦 𑀲𑀗𑁆𑀔𑀁 𑀕𑀘𑁆𑀙𑀢𑀻𑀢𑀺 𑀢𑁂𑀦 𑀅𑀪𑀽𑀢𑁂𑀦 𑀅𑀦𑀼𑀲𑀬𑁂𑀦 ‘‘𑀭𑀢𑁆𑀢𑁄 𑀤𑀼𑀝𑁆𑀞𑁄 𑀫𑀽𑀴𑁆𑀳𑁄’’𑀢𑀺 𑀲𑀗𑁆𑀔𑀁 𑀦 𑀕𑀘𑁆𑀙𑀢𑀻𑀢𑀺. 𑀢𑀢𑀺𑀬𑀁.

𑁪. 𑀤𑀼𑀢𑀺𑀬𑀅𑀜𑁆𑀜𑀢𑀭𑀪𑀺𑀓𑁆𑀔𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬. 𑀘𑀢𑀼𑀢𑁆𑀣𑁂 ¶ 𑀢𑀁 𑀅𑀦𑀼𑀫𑀻𑀬𑀢𑀻𑀢𑀺 𑀢𑀁 𑀅𑀦𑀼𑀲𑀬𑀺𑀢𑀁 𑀭𑀽𑀧𑀁 𑀫𑀭𑀦𑁆𑀢𑁂𑀦 𑀅𑀦𑀼𑀲𑀬𑁂𑀦 𑀅𑀦𑀼𑀫𑀭𑀢𑀺. 𑀦 𑀳𑀺 𑀆𑀭𑀫𑁆𑀫𑀡𑁂 𑀪𑀺𑀚𑁆𑀚𑀫𑀸𑀦𑁂 𑀢𑀤𑀸𑀭𑀫𑁆𑀫𑀡𑀸 𑀥𑀫𑁆𑀫𑀸 𑀢𑀺𑀝𑁆𑀞𑀦𑁆𑀢𑀺. 𑀬𑀁 𑀅𑀦𑀼𑀫𑀻𑀬𑀢𑀻𑀢𑀺 𑀬𑀁 𑀭𑀽𑀧𑀁 𑀬𑁂𑀦 𑀅𑀦𑀼𑀲𑀬𑁂𑀦 𑀅𑀦𑀼𑀫𑀭𑀢𑀺. 𑀢𑁂𑀦 𑀲𑀗𑁆𑀔𑀁 𑀕𑀘𑁆𑀙𑀢𑀻𑀢𑀺 𑀢𑁂𑀦 𑀅𑀦𑀼𑀲𑀬𑁂𑀦 ‘‘𑀭𑀢𑁆𑀢𑁄 𑀤𑀼𑀝𑁆𑀞𑁄 𑀫𑀽𑀴𑁆𑀳𑁄’’𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀺. 𑀅𑀣 𑀯𑀸 𑀬𑀦𑁆𑀢𑀺 𑀓𑀭𑀡𑀯𑀘𑀦𑀫𑁂𑀢𑀁, 𑀬𑁂𑀦 𑀅𑀦𑀼𑀲𑀬𑁂𑀦 𑀅𑀦𑀼𑀫𑀻𑀬𑀢𑀺, 𑀢𑁂𑀦 ‘‘𑀭𑀢𑁆𑀢𑁄 𑀤𑀼𑀝𑁆𑀞𑁄 𑀫𑀽𑀴𑁆𑀳𑁄’’𑀢𑀺 𑀲𑀗𑁆𑀔𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀘𑀢𑀼𑀢𑁆𑀣𑀁.

𑁫-𑁬. 𑀆𑀦𑀦𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁭-𑁩𑁮. 𑀧𑀜𑁆𑀘𑀫𑁂 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀻𑀢𑀺 𑀥𑀭𑀫𑀸𑀦𑀲𑁆𑀲 𑀚𑀻𑀯𑀫𑀸𑀦𑀲𑁆𑀲 𑀚𑀭𑀸 𑀧𑀜𑁆𑀜𑀸𑀬𑀢𑀺. 𑀞𑀺𑀢𑀻𑀢𑀺 𑀳𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑀗𑁆𑀔𑀸𑀢𑀸𑀬 𑀅𑀦𑀼𑀧𑀸𑀮𑀦𑀸𑀬 𑀦𑀸𑀫𑀁. 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀚𑀭𑀸𑀬. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀉𑀧𑁆𑀧𑀸𑀤𑁄 𑀚𑀸𑀢𑀺 𑀅𑀓𑁆𑀔𑀸𑀢𑁄, 𑀪𑀗𑁆𑀕𑁄 𑀯𑀼𑀢𑁆𑀢𑁄 𑀯𑀬𑁄𑀢𑀺 𑀘;

𑀅𑀜𑁆𑀜𑀣𑀢𑁆𑀢𑀁 𑀚𑀭𑀸 𑀯𑀼𑀢𑁆𑀢𑀸, 𑀞𑀺𑀢𑀻 𑀘 𑀅𑀦𑀼𑀧𑀸𑀮𑀦𑀸’’𑀢𑀺.

𑀏𑀯𑀁 ¶ 𑀏𑀓𑁂𑀓𑀲𑁆𑀲 𑀔𑀦𑁆𑀥𑀲𑁆𑀲 𑀉𑀧𑁆𑀧𑀸𑀤𑀚𑀭𑀸𑀪𑀗𑁆𑀕𑀲𑀗𑁆𑀔𑀸𑀢𑀸𑀦𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀳𑁄𑀦𑁆𑀢𑀺 𑀬𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀢𑀲𑁆𑀲 𑀲𑀗𑁆𑀔𑀢𑀮𑀓𑁆𑀔𑀡𑀸𑀦𑀻’’𑀢𑀺 (𑀅. 𑀦𑀺. 𑁩.𑁪𑁭).

𑀢𑀢𑁆𑀣 ¶ 𑀲𑀗𑁆𑀔𑀢𑀁 𑀦𑀸𑀫 𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑁄 𑀬𑁄 𑀓𑁄𑀘𑀺 𑀲𑀗𑁆𑀔𑀸𑀭𑁄. 𑀲𑀗𑁆𑀔𑀸𑀭𑁄 𑀘 𑀦 𑀮𑀓𑁆𑀔𑀡𑀁, 𑀮𑀓𑁆𑀔𑀡𑀁 𑀦 𑀲𑀗𑁆𑀔𑀸𑀭𑁄, 𑀦 𑀘 𑀲𑀗𑁆𑀔𑀸𑀭𑁂𑀦 𑀯𑀺𑀦𑀸 𑀮𑀓𑁆𑀔𑀡𑀁 𑀧𑀜𑁆𑀜𑀸𑀧𑁂𑀢𑀼𑀁 𑀲𑀓𑁆𑀓𑀸, 𑀦𑀸𑀧𑀺 𑀮𑀓𑁆𑀔𑀡𑀁 𑀯𑀺𑀦𑀸 𑀲𑀗𑁆𑀔𑀸𑀭𑁄, 𑀮𑀓𑁆𑀔𑀡𑁂𑀦 𑀧𑀦 𑀲𑀗𑁆𑀔𑀸𑀭𑁄 𑀧𑀸𑀓𑀝𑁄 𑀳𑁄𑀢𑀺. 𑀬𑀣𑀸 𑀳𑀺 𑀦 𑀘 𑀕𑀸𑀯𑀻𑀬𑁂𑀯 𑀮𑀓𑁆𑀔𑀡𑀁, 𑀮𑀓𑁆𑀔𑀡𑀫𑁂𑀯 𑀦 𑀕𑀸𑀯𑀻, 𑀦𑀸𑀧𑀺 𑀕𑀸𑀯𑀺𑀁 𑀫𑀼𑀜𑁆𑀘𑀺𑀢𑁆𑀯𑀸 𑀮𑀓𑁆𑀔𑀡𑀁 𑀧𑀜𑁆𑀜𑀸𑀧𑁂𑀢𑀼𑀁 𑀲𑀓𑁆𑀓𑀸, 𑀦𑀸𑀧𑀺 𑀮𑀓𑁆𑀔𑀡𑀁 𑀫𑀼𑀜𑁆𑀘𑀺𑀢𑁆𑀯𑀸 𑀕𑀸𑀯𑀺𑀁, 𑀮𑀓𑁆𑀔𑀡𑁂𑀦 𑀧𑀦 𑀕𑀸𑀯𑀻 𑀧𑀸𑀓𑀝𑀸 𑀳𑁄𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀲𑀗𑁆𑀔𑀸𑀭𑀸𑀦𑀁 𑀉𑀧𑁆𑀧𑀸𑀤𑀓𑁆𑀔𑀡𑁂 𑀲𑀗𑁆𑀔𑀸𑀭𑁄𑀧𑀺 𑀉𑀧𑁆𑀧𑀸𑀤𑀮𑀓𑁆𑀔𑀡𑀫𑁆𑀧𑀺 𑀓𑀸𑀮𑀲𑀗𑁆𑀔𑀸𑀢𑁄 𑀢𑀲𑁆𑀲 𑀔𑀡𑁄𑀧𑀺 𑀧𑀜𑁆𑀜𑀸𑀬𑀢𑀺. ‘‘𑀉𑀧𑁆𑀧𑀸𑀤𑁄𑀧𑀻’’𑀢𑀺 ¶ 𑀯𑀼𑀢𑁆𑀢𑁂 𑀲𑀗𑁆𑀔𑀸𑀭𑁄𑀧𑀺 𑀚𑀭𑀸𑀮𑀓𑁆𑀔𑀡𑀫𑁆𑀧𑀺 𑀓𑀸𑀮𑀲𑀗𑁆𑀔𑀸𑀢𑁄 𑀢𑀲𑁆𑀲 𑀔𑀡𑁄𑀧𑀺 𑀧𑀜𑁆𑀜𑀸𑀬𑀢𑀺. 𑀪𑀗𑁆𑀕𑀓𑁆𑀔𑀡𑁂 𑀲𑀗𑁆𑀔𑀸𑀭𑁄𑀧𑀺 𑀢𑀁𑀮𑀓𑁆𑀔𑀡𑀫𑁆𑀧𑀺 𑀓𑀸𑀮𑀲𑀗𑁆𑀔𑀸𑀢𑁄 𑀢𑀲𑁆𑀲 𑀔𑀡𑁄𑀧𑀺 𑀧𑀜𑁆𑀜𑀸𑀬𑀢𑀺. 𑀅𑀧𑀭𑁂 𑀧𑀦 𑀯𑀤𑀦𑁆𑀢𑀺 ‘‘𑀅𑀭𑀽𑀧𑀥𑀫𑁆𑀫𑀸𑀦𑀁 𑀚𑀭𑀸𑀔𑀡𑁄 𑀦𑀸𑀫 𑀦 𑀲𑀓𑁆𑀓𑀸 𑀧𑀜𑁆𑀜𑀸𑀧𑁂𑀢𑀼𑀁, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀘 ‘𑀯𑁂𑀤𑀦𑀸𑀬 𑀉𑀧𑁆𑀧𑀸𑀤𑁄 𑀧𑀜𑁆𑀜𑀸𑀬𑀢𑀺, 𑀯𑀬𑁄 𑀧𑀜𑁆𑀜𑀸𑀬𑀢𑀺, 𑀞𑀺𑀢𑀸𑀬 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀻’𑀢𑀺 𑀯𑀤𑀦𑁆𑀢𑁄 𑀅𑀭𑀽𑀧𑀥𑀫𑁆𑀫𑀸𑀦𑀫𑁆𑀧𑀺 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀧𑀜𑁆𑀜𑀸𑀧𑁂𑀢𑀺, 𑀢𑀸𑀦𑀺 𑀅𑀢𑁆𑀣𑀺𑀓𑁆𑀔𑀡𑀁 𑀉𑀧𑀸𑀤𑀸𑀬 𑀮𑀩𑁆𑀪𑀦𑁆𑀢𑀻’’𑀢𑀺 𑀯𑀢𑁆𑀯𑀸 𑁋

‘‘𑀅𑀢𑁆𑀣𑀺𑀢𑀸 𑀲𑀩𑁆𑀩𑀥𑀫𑁆𑀫𑀸𑀦𑀁, 𑀞𑀺𑀢𑀺 𑀦𑀸𑀫 𑀧𑀯𑀼𑀘𑁆𑀘𑀢𑀺;

𑀢𑀲𑁆𑀲𑁂𑀯 𑀪𑁂𑀤𑁄 𑀫𑀭𑀡𑀁, 𑀲𑀩𑁆𑀩𑀤𑀸 𑀲𑀩𑁆𑀩𑀧𑀸𑀡𑀺𑀦’’𑀦𑁆𑀢𑀺. 𑁋

𑀇𑀫𑀸𑀬 𑀆𑀘𑀭𑀺𑀬𑀕𑀸𑀣𑀸𑀬 𑀢𑀫𑀢𑁆𑀣𑀁 𑀲𑀸𑀥𑁂𑀦𑁆𑀢𑀺. 𑀅𑀣 𑀯𑀸 𑀲𑀦𑁆𑀢𑀢𑀺𑀯𑀲𑁂𑀦 𑀞𑀸𑀦𑀁 𑀞𑀺𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀘 𑀯𑀤𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀲𑀼𑀢𑁆𑀢𑁂 𑀅𑀬𑀁 𑀯𑀺𑀲𑁂𑀲𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀆𑀘𑀭𑀺𑀬𑀫𑀢𑀺𑀬𑀸 𑀲𑀼𑀢𑁆𑀢𑀁 𑀅𑀧𑀝𑀺𑀩𑀸𑀳𑁂𑀢𑁆𑀯𑀸 𑀲𑀼𑀢𑁆𑀢𑀫𑁂𑀯 𑀧𑀫𑀸𑀡𑀁 𑀓𑀢𑁆𑀢𑀩𑁆𑀩𑀁. 𑀙𑀝𑁆𑀞𑀁 𑀉𑀢𑁆𑀢𑀸𑀦𑀫𑁂𑀯. 𑀧𑀜𑁆𑀘𑀫𑀙𑀝𑁆𑀞𑀸𑀦𑀺.

𑁭-𑁧𑁦. 𑀅𑀦𑀼𑀥𑀫𑁆𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁯-𑁪𑁨. 𑀲𑀢𑁆𑀢𑀫𑁂 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸𑀢𑀺 𑀦𑀯𑀦𑁆𑀦𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁 𑀅𑀦𑀼𑀮𑁄𑀫𑀥𑀫𑁆𑀫𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀲𑁆𑀲. 𑀅𑀬𑀫𑀦𑀼𑀥𑀫𑁆𑀫𑁄𑀢𑀺 𑀅𑀬𑀁 𑀅𑀦𑀼𑀮𑁄𑀫𑀥𑀫𑁆𑀫𑁄 𑀳𑁄𑀢𑀺. 𑀦𑀺𑀩𑁆𑀩𑀺𑀤𑀸𑀩𑀳𑀼𑀮𑁄𑀢𑀺 𑀉𑀓𑁆𑀓𑀡𑁆𑀞𑀦𑀩𑀳𑀼𑀮𑁄 ¶ 𑀳𑀼𑀢𑁆𑀯𑀸. 𑀧𑀭𑀺𑀚𑀸𑀦𑀸𑀢𑀻𑀢𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀸𑀢𑀺. 𑀧𑀭𑀺𑀫𑀼𑀘𑁆𑀘𑀢𑀻𑀢𑀺 𑀫𑀕𑁆𑀕𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀸𑀬 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀧𑀭𑀺𑀫𑀼𑀘𑁆𑀘𑀢𑀺. 𑀏𑀯𑀁 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀫𑀕𑁆𑀕𑁄𑀯 𑀓𑀣𑀺𑀢𑁄 𑀳𑁄𑀢𑀺, 𑀢𑀣𑀸 𑀇𑀢𑁄 𑀧𑀭𑁂𑀲𑀼 𑀢𑀻𑀲𑀼. 𑀇𑀥 𑀧𑀦 𑀅𑀦𑀼𑀧𑀲𑁆𑀲𑀦𑀸 𑀅𑀦𑀺𑀬𑀫𑀺𑀢𑀸, 𑀢𑁂𑀲𑀼 ¶ 𑀦𑀺𑀬𑀫𑀺𑀢𑀸. 𑀢𑀲𑁆𑀫𑀸 𑀇𑀥𑀸𑀧𑀺 𑀲𑀸 𑀢𑀢𑁆𑀣 𑀦𑀺𑀬𑀫𑀺𑀢𑀯𑀲𑁂𑀦𑁂𑀯 𑀦𑀺𑀬𑀫𑁂𑀢𑀩𑁆𑀩𑀸. 𑀦 𑀳𑀺 𑀲𑀓𑁆𑀓𑀸 𑀢𑀻𑀲𑀼 𑀅𑀜𑁆𑀜𑀢𑀭𑀁 𑀅𑀦𑀼𑀧𑀲𑁆𑀲𑀦𑀁 𑀯𑀺𑀦𑀸 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁 𑀧𑀭𑀺𑀚𑀸𑀦𑀺𑀢𑀼𑀁 𑀯𑀸𑀢𑀺. 𑀲𑀢𑁆𑀢𑀫𑀸𑀤𑀻𑀦𑀺.

𑀦𑀢𑀼𑀫𑁆𑀳𑀸𑀓𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑁫. 𑀅𑀢𑁆𑀢𑀤𑀻𑀧𑀯𑀕𑁆𑀕𑁄

𑁧. 𑀅𑀢𑁆𑀢𑀤𑀻𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁩. 𑀅𑀢𑁆𑀢𑀤𑀻𑀧𑀯𑀕𑁆𑀕𑀲𑁆𑀲 ¶ 𑀧𑀞𑀫𑁂 𑀅𑀢𑁆𑀢𑀤𑀻𑀧𑀸𑀢𑀺 𑀅𑀢𑁆𑀢𑀸𑀦𑀁 𑀤𑀻𑀧𑀁 𑀢𑀸𑀡𑀁 𑀮𑁂𑀡𑀁 𑀕𑀢𑀺𑀁 𑀧𑀭𑀸𑀬𑀡𑀁 𑀧𑀢𑀺𑀝𑁆𑀞𑀁 𑀓𑀢𑁆𑀯𑀸 𑀯𑀺𑀳𑀭𑀣𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀲𑀭𑀡𑀸𑀢𑀺 𑀇𑀤𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀦𑀜𑁆𑀜𑀲𑀭𑀡𑀸𑀢𑀺 𑀇𑀤𑀁 𑀅𑀜𑁆𑀜𑀲𑁆𑀲 𑀲𑀭𑀡𑀧𑀝𑀺𑀓𑁆𑀔𑁂𑀧𑀯𑀘𑀦𑀁. 𑀦 𑀳𑀺 𑀅𑀜𑁆𑀜𑁄 𑀅𑀜𑁆𑀜𑀲𑁆𑀲 𑀲𑀭𑀡𑀁 𑀳𑁄𑀢𑀺 𑀅𑀜𑁆𑀜𑀲𑁆𑀲 𑀯𑀸𑀬𑀸𑀫𑁂𑀦 𑀅𑀜𑁆𑀜𑀲𑁆𑀲 𑀅𑀲𑀺𑀚𑁆𑀛𑀦𑀢𑁄, 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀅𑀢𑁆𑀢𑀸 𑀳𑀺 𑀅𑀢𑁆𑀢𑀦𑁄 𑀦𑀸𑀣𑁄,

𑀓𑁄 𑀳𑀺 𑀦𑀸𑀣𑁄 𑀧𑀭𑁄 𑀲𑀺𑀬𑀸’’𑀢𑀺. (𑀥. 𑀧. 𑁧𑁬𑁦);

𑀢𑁂𑀦𑀸𑀳 ‘‘𑀅𑀦𑀜𑁆𑀜𑀲𑀭𑀡𑀸’’𑀢𑀺. 𑀓𑁄 𑀧𑀦𑁂𑀢𑁆𑀣 𑀅𑀢𑁆𑀢𑀸 𑀦𑀸𑀫? 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄. 𑀢𑁂𑀦𑁂𑀯𑀸𑀳 𑁋 ‘‘𑀥𑀫𑁆𑀫𑀤𑀻𑀧𑀸 𑀥𑀫𑁆𑀫𑀲𑀭𑀡𑀸 𑀅𑀦𑀜𑁆𑀜𑀲𑀭𑀡𑀸’’𑀢𑀺. 𑀬𑁄𑀦𑀻𑀢𑀺 𑀓𑀸𑀭𑀡𑀁 𑁋 ‘‘𑀬𑁄𑀦𑀺 𑀳𑁂𑀲𑀸, 𑀪𑀽𑀫𑀺𑀚, 𑀨𑀮𑀲𑁆𑀲 𑀅𑀥𑀺𑀕𑀫𑀸𑀬𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁨𑁨𑁭) 𑀯𑀺𑀬. 𑀓𑀺𑀁𑀧𑀳𑁄𑀢𑀺𑀓𑀸𑀢𑀺 𑀓𑀺𑀁𑀧𑀪𑀼𑀢𑀺𑀓𑀸, 𑀓𑀼𑀢𑁄 𑀧𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄? 𑀭𑀽𑀧𑀲𑁆𑀲 𑀢𑁆𑀯𑁂𑀯𑀸𑀢𑀺 𑀇𑀤𑀁 𑀢𑁂𑀲𑀁𑀬𑁂𑀯 𑀲𑁄𑀓𑀸𑀤𑀻𑀦𑀁 𑀧𑀳𑀸𑀦𑀤𑀲𑁆𑀲𑀦𑀢𑁆𑀣𑀁 𑀆𑀭𑀤𑁆𑀥𑀁. 𑀦 𑀧𑀭𑀺𑀢𑀲𑁆𑀲𑀢𑀻𑀢𑀺 𑀦 𑀕𑀡𑁆𑀳𑀸𑀢𑀺 𑀦 𑀕𑀳𑀢𑀺. 𑀢𑀤𑀗𑁆𑀕𑀦𑀺𑀩𑁆𑀩𑀼𑀢𑁄𑀢𑀺 𑀢𑁂𑀦 𑀯𑀺𑀧𑀲𑁆𑀲𑀦𑀗𑁆𑀕𑁂𑀦 𑀓𑀺𑀮𑁂𑀲𑀸𑀦𑀁 𑀦𑀺𑀩𑁆𑀩𑀼𑀢𑀢𑁆𑀢𑀸 𑀢𑀤𑀗𑁆𑀕𑀦𑀺𑀩𑁆𑀩𑀼𑀢𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀺𑀧𑀲𑁆𑀲𑀦𑀸𑀯 𑀓𑀣𑀺𑀢𑀸. 𑀧𑀞𑀫𑀁.

𑁨. 𑀧𑀝𑀺𑀧𑀤𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪. 𑀤𑀼𑀢𑀺𑀬𑁂 ¶ 𑀤𑀼𑀓𑁆𑀔𑀲𑀫𑀼𑀤𑀬𑀕𑀸𑀫𑀺𑀦𑀻 𑀲𑀫𑀦𑀼𑀧𑀲𑁆𑀲𑀦𑀸𑀢𑀺 𑀬𑀲𑁆𑀫𑀸 𑀲𑀓𑁆𑀓𑀸𑀬𑁄 𑀤𑀼𑀓𑁆𑀔𑀁, 𑀢𑀲𑁆𑀲 𑀘 𑀲𑀫𑀼𑀤𑀬𑀕𑀸𑀫𑀺𑀦𑀻 𑀧𑀝𑀺𑀧𑀤𑀸 𑀦𑀸𑀫 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 𑀏𑀯𑀁 ¶ 𑀤𑀺𑀝𑁆𑀞𑀺𑀲𑀫𑀦𑀼𑀧𑀲𑁆𑀲𑀦𑀸 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀤𑀼𑀓𑁆𑀔𑀲𑀫𑀼𑀤𑀬𑀕𑀸𑀫𑀺𑀦𑀻 𑀲𑀫𑀦𑀼𑀧𑀲𑁆𑀲𑀦𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀳𑁄𑀢𑀺. 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀲𑀫𑀦𑀼𑀧𑀲𑁆𑀲𑀦𑀸𑀢𑀺 𑀏𑀢𑁆𑀣 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀘𑀢𑀼𑀫𑀕𑁆𑀕𑀜𑀸𑀡𑀁 ‘‘𑀲𑀫𑀦𑀼𑀧𑀲𑁆𑀲𑀦𑀸’’𑀢𑀺 𑀯𑀼𑀢𑁆𑀢𑀁. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁. 𑀤𑀼𑀢𑀺𑀬𑀁.

𑁩. 𑀅𑀦𑀺𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁫. 𑀢𑀢𑀺𑀬𑁂 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀦𑁆𑀢𑀺 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀁. 𑀯𑀺𑀭𑀚𑁆𑀚𑀢𑀺 𑀯𑀺𑀫𑀼𑀘𑁆𑀘𑀢𑀻𑀢𑀺 𑀫𑀕𑁆𑀕𑀓𑁆𑀔𑀡𑁂 𑀯𑀺𑀭𑀚𑁆𑀚𑀢𑀺, 𑀨𑀮𑀓𑁆𑀔𑀡𑁂 𑀯𑀺𑀫𑀼𑀘𑁆𑀘𑀢𑀺. 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀻𑀢𑀺 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁂𑀦 ¶ 𑀦𑀺𑀭𑀼𑀤𑁆𑀥𑁂𑀳𑀺 𑀆𑀲𑀯𑁂𑀳𑀺 𑀅𑀕𑀳𑁂𑀢𑁆𑀯𑀸 𑀇𑀢𑀺 𑀯𑀺𑀫𑀼𑀘𑁆𑀘𑀢𑀺. 𑀭𑀽𑀧𑀥𑀸𑀢𑀼𑀬𑀸𑀢𑀺𑀆𑀤𑀺 𑀧𑀘𑁆𑀘𑀯𑁂𑀓𑁆𑀔𑀡𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑀳 𑀨𑀮𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀤𑀲𑁆𑀲𑀦𑀢𑁆𑀣𑀦𑁆𑀢𑀺𑀧𑀺 𑀯𑀤𑀦𑁆𑀢𑀺𑀬𑁂𑀯. 𑀞𑀺𑀢𑀦𑁆𑀢𑀺 𑀉𑀧𑀭𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀸𑀪𑀸𑀯𑁂𑀦 𑀞𑀺𑀢𑀁. 𑀞𑀺𑀢𑀢𑁆𑀢𑀸 𑀲𑀦𑁆𑀢𑀼𑀲𑁆𑀲𑀺𑀢𑀦𑁆𑀢𑀺 𑀧𑀢𑁆𑀢𑀩𑁆𑀩𑀁 𑀧𑀢𑁆𑀢𑀪𑀸𑀯𑁂𑀦 𑀲𑀦𑁆𑀢𑀼𑀝𑁆𑀞𑀁. 𑀧𑀘𑁆𑀘𑀢𑁆𑀢𑀁𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀻𑀢𑀺 𑀲𑀬𑀫𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀢𑀺. 𑀢𑀢𑀺𑀬𑀁.

𑁪. 𑀤𑀼𑀢𑀺𑀬𑀅𑀦𑀺𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁬. 𑀘𑀢𑀼𑀢𑁆𑀣𑁂 𑀧𑀼𑀩𑁆𑀩𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑁄𑀢𑀺 𑀧𑀼𑀩𑁆𑀩𑀦𑁆𑀢𑀁 𑀅𑀦𑀼𑀕𑀢𑀸 𑀅𑀝𑁆𑀞𑀸𑀭𑀲 𑀤𑀺𑀝𑁆𑀞𑀺𑀬𑁄 𑀦 𑀳𑁄𑀦𑁆𑀢𑀺. 𑀅𑀧𑀭𑀦𑁆𑀢𑀸𑀦𑀼𑀤𑀺𑀝𑁆𑀞𑀺𑀬𑁄𑀢𑀺 𑀅𑀧𑀭𑀦𑁆𑀢𑀁 𑀅𑀦𑀼𑀕𑀢𑀸 𑀘𑀢𑀼𑀘𑀢𑁆𑀢𑀸𑀮𑀻𑀲 𑀤𑀺𑀝𑁆𑀞𑀺𑀬𑁄 𑀦 𑀳𑁄𑀦𑁆𑀢𑀺. 𑀣𑀸𑀫𑀲𑁄 𑀧𑀭𑀸𑀫𑀸𑀲𑁄𑀢𑀺 𑀤𑀺𑀝𑁆𑀞𑀺𑀣𑀸𑀫𑀲𑁄 𑀘𑁂𑀯 𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑁄 𑀘 𑀦 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀧𑀞𑀫𑀫𑀕𑁆𑀕𑁄 𑀤𑀲𑁆𑀲𑀺𑀢𑁄. 𑀇𑀤𑀸𑀦𑀺 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀢𑀬𑁄 𑀫𑀕𑁆𑀕𑁂 𑀘 𑀨𑀮𑀸𑀦𑀺 𑀘 𑀤𑀲𑁆𑀲𑁂𑀢𑀼𑀁 𑀭𑀽𑀧𑀲𑁆𑀫𑀺𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀅𑀣 𑀯𑀸 𑀤𑀺𑀝𑁆𑀞𑀺𑀬𑁄 𑀦𑀸𑀫 𑀯𑀺𑀧𑀲𑁆𑀲𑀦𑀸𑀬 𑀏𑀯 𑀧𑀳𑀻𑀦𑀸, 𑀇𑀤𑀁 𑀧𑀦 𑀉𑀧𑀭𑀺 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀘𑀢𑁆𑀢𑀸𑀭𑁄 𑀫𑀕𑁆𑀕𑁂 𑀤𑀲𑁆𑀲𑁂𑀢𑀼𑀁 𑀆𑀭𑀤𑁆𑀥𑀁. 𑀘𑀢𑀼𑀢𑁆𑀣𑀁.

𑁫. 𑀲𑀫𑀦𑀼𑀧𑀲𑁆𑀲𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭. 𑀧𑀜𑁆𑀘𑀫𑁂 ¶ 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀲𑀫𑀦𑀼𑀧𑀲𑁆𑀲𑀦𑁆𑀢𑀺 𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀕𑀸𑀳𑀯𑀲𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑁂 𑀲𑀫𑀦𑀼𑀧𑀲𑁆𑀲𑀦𑁆𑀢𑀺, 𑀅𑀧𑀭𑀺𑀧𑀼𑀡𑁆𑀡𑀕𑀸𑀳𑀯𑀲𑁂𑀦 𑀏𑀢𑁂𑀲𑀁 𑀅𑀜𑁆𑀜𑀢𑀭𑀁. 𑀇𑀢𑀺 𑀅𑀬𑀜𑁆𑀘𑁂𑀯 𑀲𑀫𑀦𑀼𑀧𑀲𑁆𑀲𑀦𑀸𑀢𑀺 𑀇𑀢𑀺 𑀅𑀬𑀜𑁆𑀘 𑀤𑀺𑀝𑁆𑀞𑀺𑀲𑀫𑀦𑀼𑀧𑀲𑁆𑀲𑀦𑀸. 𑀅𑀲𑁆𑀫𑀻𑀢𑀺 𑀘𑀲𑁆𑀲 𑀅𑀯𑀺𑀕𑀢𑀁 𑀳𑁄𑀢𑀻𑀢𑀺 𑀬𑀲𑁆𑀲 𑀅𑀬𑀁 𑀲𑀫𑀦𑀼𑀧𑀲𑁆𑀲𑀦𑀸 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀅𑀲𑁆𑀫𑀻𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀁 𑀧𑀧𑀜𑁆𑀘𑀢𑁆𑀢𑀬𑀁 𑀅𑀯𑀺𑀕𑀢𑀫𑁂𑀯 𑀳𑁄𑀢𑀺. 𑀧𑀜𑁆𑀘𑀦𑁆𑀦𑀁 ¶ 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀯𑀓𑁆𑀓𑀦𑁆𑀢𑀺 𑀳𑁄𑀢𑀻𑀢𑀺 𑀢𑀲𑁆𑀫𑀺𑀁 𑀓𑀺𑀮𑁂𑀲𑀚𑀸𑀢𑁂 𑀲𑀢𑀺 𑀓𑀫𑁆𑀫𑀓𑀺𑀮𑁂𑀲𑀧𑀘𑁆𑀘𑀬𑀸𑀦𑀁 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺.

𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀫𑀦𑁄𑀢𑀺 𑀇𑀤𑀁 𑀓𑀫𑁆𑀫𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀥𑀫𑁆𑀫𑀸𑀢𑀺 𑀆𑀭𑀫𑁆𑀫𑀡𑀁. 𑀅𑀯𑀺𑀚𑁆𑀚𑀸𑀥𑀸𑀢𑀽𑀢𑀺 𑀚𑀯𑀦𑀓𑁆𑀔𑀡𑁂 𑀅𑀯𑀺𑀚𑁆𑀚𑀸. 𑀅𑀯𑀺𑀚𑁆𑀚𑀸𑀲𑀫𑁆𑀨𑀲𑁆𑀲𑀚𑁂𑀦𑀸𑀢𑀺 𑀅𑀯𑀺𑀚𑁆𑀚𑀸𑀲𑀫𑁆𑀧𑀬𑀼𑀢𑁆𑀢𑀨𑀲𑁆𑀲𑀢𑁄 ¶ 𑀚𑀸𑀢𑁂𑀦. 𑀅𑀧𑀺𑀘 𑀫𑀦𑁄𑀢𑀺 𑀪𑀯𑀗𑁆𑀕𑀓𑁆𑀔𑀡𑁂 𑀯𑀺𑀧𑀸𑀓𑀫𑀦𑁄𑀥𑀸𑀢𑀼, 𑀆𑀯𑀚𑁆𑀚𑀦𑀓𑁆𑀔𑀡𑁂 𑀓𑀺𑀭𑀺𑀬𑀫𑀦𑁄𑀥𑀸𑀢𑀼. 𑀥𑀫𑁆𑀫𑀸𑀤𑀬𑁄 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀯. 𑀅𑀲𑁆𑀫𑀻𑀢𑀺𑀧𑀺𑀲𑁆𑀲 𑀳𑁄𑀢𑀻𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀅𑀲𑁆𑀫𑀻𑀢𑀺 𑀏𑀯𑀫𑁆𑀧𑀺𑀲𑁆𑀲 𑀳𑁄𑀢𑀺. 𑀇𑀢𑁄 𑀧𑀭𑁂𑀲𑀼 𑀅𑀬𑀫𑀳𑀫𑀲𑁆𑀫𑀻𑀢𑀺 𑀭𑀽𑀧𑀸𑀤𑀻𑀲𑀼 𑀓𑀺𑀜𑁆𑀘𑀺𑀤𑁂𑀯 𑀥𑀫𑁆𑀫𑀁 𑀕𑀳𑁂𑀢𑁆𑀯𑀸 ‘‘𑀅𑀬𑀁 𑀅𑀳𑀫𑀲𑁆𑀫𑀻’’𑀢𑀺 𑀅𑀢𑁆𑀢𑀤𑀺𑀝𑁆𑀞𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀪𑀯𑀺𑀲𑁆𑀲𑀦𑁆𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺𑀯𑀲𑁂𑀦. 𑀦 𑀪𑀯𑀺𑀲𑁆𑀲𑀦𑁆𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀯𑀲𑁂𑀦. 𑀭𑀽𑀧𑀻 𑀪𑀯𑀺𑀲𑁆𑀲𑀦𑁆𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀲𑀲𑁆𑀲𑀢𑀫𑁂𑀯 𑀪𑀚𑀦𑁆𑀢𑀺. 𑀅𑀣𑁂𑀢𑁆𑀣𑀸𑀢𑀺 𑀅𑀣 𑀢𑁂𑀦𑁂𑀯𑀸𑀓𑀸𑀭𑁂𑀦 𑀞𑀺𑀢𑁂𑀲𑀼 𑀏𑀢𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼. 𑀅𑀯𑀺𑀚𑁆𑀚𑀸 𑀧𑀳𑀻𑀬𑀢𑀻𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀅𑀜𑁆𑀜𑀸𑀡𑀪𑀽𑀢𑀸 𑀅𑀯𑀺𑀚𑁆𑀚𑀸 𑀧𑀳𑀻𑀬𑀢𑀺. 𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀫𑁂𑀢𑁆𑀣 𑀅𑀲𑁆𑀫𑀻𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀬𑁄. 𑀓𑀫𑁆𑀫𑀲𑁆𑀲 𑀧𑀜𑁆𑀘𑀦𑁆𑀦𑀜𑁆𑀘 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀦𑁆𑀢𑀭𑁂 𑀏𑀓𑁄 𑀲𑀦𑁆𑀥𑀺, 𑀯𑀺𑀧𑀸𑀓𑀫𑀦𑀁 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀧𑀓𑁆𑀔𑀺𑀓𑀁 𑀓𑀢𑁆𑀯𑀸 𑀧𑀜𑁆𑀘𑀦𑁆𑀦𑀜𑁆𑀘 𑀇𑀦𑁆𑀤𑁆𑀭𑀺𑀬𑀸𑀦𑀁 𑀓𑀫𑁆𑀫𑀲𑁆𑀲 𑀘 𑀅𑀦𑁆𑀢𑀭𑁂 𑀏𑀓𑁄 𑀲𑀦𑁆𑀥𑀻𑀢𑀺. 𑀇𑀢𑀺 𑀢𑀬𑁄 𑀧𑀧𑀜𑁆𑀘𑀸 𑀅𑀢𑀻𑀢𑁄 𑀅𑀤𑁆𑀥𑀸, 𑀇𑀦𑁆𑀤𑁆𑀭𑀺𑀬𑀸𑀤𑀻𑀦𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁄 𑀅𑀤𑁆𑀥𑀸, 𑀢𑀢𑁆𑀣 𑀓𑀫𑁆𑀫𑀫𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀦𑀸𑀕𑀢𑀲𑁆𑀲 𑀧𑀘𑁆𑀘𑀬𑁄 𑀤𑀲𑁆𑀲𑀺𑀢𑁄𑀢𑀺. 𑀧𑀜𑁆𑀘𑀫𑀁.

𑁬. 𑀔𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮. 𑀙𑀝𑁆𑀞𑁂 𑀭𑀽𑀧𑀓𑁆𑀔𑀦𑁆𑀥𑁄 𑀓𑀸𑀫𑀸𑀯𑀘𑀭𑁄, 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀘𑀢𑀼𑀪𑀽𑀫𑀓𑀸. 𑀲𑀸𑀲𑀯𑀦𑁆𑀢𑀺 𑀆𑀲𑀯𑀸𑀦𑀁 𑀆𑀭𑀫𑁆𑀫𑀡𑀪𑀸𑀯𑁂𑀦 𑀧𑀘𑁆𑀘𑀬𑀪𑀽𑀢𑀁. 𑀉𑀧𑀸𑀤𑀸𑀦𑀺𑀬𑀦𑁆𑀢𑀺 𑀢𑀣𑁂𑀯 𑀘 𑀉𑀧𑀸𑀤𑀸𑀦𑀸𑀦𑀁 𑀧𑀘𑁆𑀘𑀬𑀪𑀽𑀢𑀁. 𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑁋 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑁂𑀳𑀺 𑀲𑀳 𑀆𑀲𑀯𑁂𑀳𑀻𑀢𑀺 𑀲𑀸𑀲𑀯𑀁. 𑀉𑀧𑀸𑀤𑀸𑀢𑀩𑁆𑀩𑀦𑁆𑀢𑀺 𑀉𑀧𑀸𑀤𑀸𑀦𑀺𑀬𑀁. 𑀇𑀥𑀸𑀧𑀺 ¶ 𑀭𑀽𑀧𑀓𑁆𑀔𑀦𑁆𑀥𑁄 𑀓𑀸𑀫𑀸𑀯𑀘𑀭𑁄, 𑀅𑀯𑀲𑁂𑀲𑀸 𑀢𑁂𑀪𑀽𑀫𑀓𑀸 𑀯𑀺𑀧𑀲𑁆𑀲𑀦𑀸𑀘𑀸𑀭𑀯𑀲𑁂𑀦 𑀯𑀼𑀢𑁆𑀢𑀸. 𑀏𑀯𑀫𑁂𑀢𑁆𑀣 𑀭𑀽𑀧𑀁 𑀭𑀸𑀲𑀝𑁆𑀞𑁂𑀦 𑀔𑀦𑁆𑀥𑁂𑀲𑀼 𑀧𑀯𑀺𑀝𑁆𑀞𑀁, 𑀲𑀸𑀲𑀯𑀭𑀸𑀲𑀝𑁆𑀞𑁂𑀦 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼. 𑀯𑁂𑀤𑀦𑀸𑀤𑀬𑁄 𑀲𑀸𑀲𑀯𑀸𑀧𑀺 𑀅𑀢𑁆𑀣𑀺, 𑀅𑀦𑀸𑀲𑀯𑀸𑀧𑀺 𑀅𑀢𑁆𑀣𑀺. 𑀢𑁂 𑀭𑀸𑀲𑀝𑁆𑀞𑁂𑀦 𑀲𑀩𑁆𑀩𑁂𑀧𑀺 𑀔𑀦𑁆𑀥𑁂𑀲𑀼 𑀧𑀯𑀺𑀝𑁆𑀞𑀸, 𑀢𑁂𑀪𑀽𑀫𑀓𑀸 𑀧𑀦𑁂𑀢𑁆𑀣 𑀲𑀸𑀲𑀯𑀝𑁆𑀞𑁂𑀦 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀧𑀯𑀺𑀝𑁆𑀞𑀸𑀢𑀺. 𑀙𑀝𑁆𑀞𑀁.

𑁭-𑁮. 𑀲𑁄𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁯-𑁫𑁦. 𑀲𑀢𑁆𑀢𑀫𑁂 ¶ ¶ 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀯𑀺𑀲𑀺𑀝𑁆𑀞𑁄 𑀉𑀢𑁆𑀢𑀫𑁄 𑀅𑀳𑀫𑀲𑁆𑀫𑀺. 𑀓𑀺𑀫𑀜𑁆𑀜𑀢𑁆𑀭 𑀬𑀣𑀸𑀪𑀽𑀢𑀲𑁆𑀲 𑀅𑀤𑀲𑁆𑀲𑀦𑀸𑀢𑀺 𑀬𑀣𑀸𑀪𑀽𑀢𑀲𑁆𑀲 𑀅𑀤𑀲𑁆𑀲𑀦𑀢𑁄 𑀅𑀜𑁆𑀜𑀁 𑀓𑀺𑀁 𑀪𑀯𑁂𑀬𑁆𑀬? 𑀅𑀤𑀲𑁆𑀲𑀦𑀁 𑀅𑀜𑁆𑀜𑀸𑀡𑀫𑁂𑀯 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺𑀲𑁆𑀲 𑀢𑁂 𑀧𑀭𑀺𑀯𑀝𑁆𑀝𑀁 𑀯𑀚𑀺𑀭𑀪𑁂𑀤𑀤𑁂𑀲𑀦𑀁 𑀆𑀭𑀪𑀦𑁆𑀢𑁄 𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀲𑁄𑀡𑁄𑀢𑀺𑀆𑀤𑀺𑀫𑀸𑀳. 𑀅𑀝𑁆𑀞𑀫𑀁 𑀉𑀢𑁆𑀢𑀸𑀦𑀫𑁂𑀯. 𑀲𑀢𑁆𑀢𑀫𑀅𑀝𑁆𑀞𑀫𑀸𑀦𑀺.

𑁯-𑁧𑁦. 𑀦𑀦𑁆𑀤𑀺𑀓𑁆𑀔𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫𑁧-𑁫𑁨. 𑀦𑀯𑀫𑀤𑀲𑀫𑁂𑀲𑀼 𑀦𑀦𑁆𑀤𑀺𑀓𑁆𑀔𑀬𑀸 𑀭𑀸𑀕𑀓𑁆𑀔𑀬𑁄, 𑀭𑀸𑀕𑀓𑁆𑀔𑀬𑀸 𑀦𑀦𑁆𑀤𑀺𑀓𑁆𑀔𑀬𑁄𑀢𑀺 𑀇𑀤𑀁 𑀦𑀦𑁆𑀤𑀻𑀢𑀺 𑀯𑀸 𑀭𑀸𑀕𑁄𑀢𑀺 𑀯𑀸 𑀇𑀫𑁂𑀲𑀁 𑀅𑀢𑁆𑀣𑀢𑁄 𑀦𑀺𑀦𑁆𑀦𑀸𑀦𑀸𑀓𑀭𑀡𑀢𑀸𑀬 𑀯𑀼𑀢𑁆𑀢𑀁. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬 𑀯𑀸 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀦𑀦𑁆𑀤𑀺𑀁 𑀧𑀚𑀳𑀢𑀺, 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀬 𑀯𑀺𑀭𑀚𑁆𑀚𑀦𑁆𑀢𑁄 𑀭𑀸𑀕𑀁 𑀧𑀚𑀳𑀢𑀺. 𑀏𑀢𑁆𑀢𑀸𑀯𑀢𑀸 𑀯𑀺𑀧𑀲𑁆𑀲𑀦𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 ‘‘𑀭𑀸𑀕𑀓𑁆𑀔𑀬𑀸 𑀦𑀦𑁆𑀤𑀺𑀓𑁆𑀔𑀬𑁄’’𑀢𑀺 𑀇𑀥 𑀫𑀕𑁆𑀕𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀦𑀦𑁆𑀤𑀺𑀭𑀸𑀕𑀓𑁆𑀔𑀬𑀸 𑀘𑀺𑀢𑁆𑀢𑀁 𑀯𑀺𑀫𑀼𑀢𑁆𑀢’’𑀦𑁆𑀢𑀺 𑀨𑀮𑀁 𑀤𑀲𑁆𑀲𑀺𑀢𑀦𑁆𑀢𑀺. 𑀦𑀯𑀫𑀤𑀲𑀫𑀸𑀦𑀺.

𑀅𑀢𑁆𑀢𑀤𑀻𑀧𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀫𑀽𑀮𑀧𑀡𑁆𑀡𑀸𑀲𑀓𑁄 𑀲𑀫𑀢𑁆𑀢𑁄.

𑁬. 𑀉𑀧𑀬𑀯𑀕𑁆𑀕𑁄

𑁧. 𑀉𑀧𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁩. 𑀉𑀧𑀬𑀯𑀕𑁆𑀕𑀲𑁆𑀲 ¶ 𑀧𑀞𑀫𑁂 𑀉𑀧𑀬𑁄𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑁂 𑀉𑀧𑀕𑀢𑁄. 𑀯𑀺𑀜𑁆𑀜𑀸𑀡𑀦𑁆𑀢𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑀁. 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀓𑀫𑁆𑀫𑀁 𑀚𑀯𑀸𑀧𑁂𑀢𑁆𑀯𑀸 𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑀲𑀫𑀢𑁆𑀣𑀢𑀸𑀬 𑀯𑀼𑀤𑁆𑀥𑀺𑀆𑀤𑀻𑀦𑀺 𑀆𑀧𑀚𑁆𑀚𑁂𑀬𑁆𑀬. 𑀯𑀺𑀜𑁆𑀜𑀸𑀡𑀼𑀧𑀬𑀦𑁆𑀢𑀺 𑀧𑀤𑀲𑁆𑀲 𑀅𑀕𑁆𑀕𑀳𑀡𑁂 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯. 𑀯𑁄𑀘𑁆𑀙𑀺𑀚𑁆𑀚𑀢𑀸𑀭𑀫𑁆𑀫𑀡𑀦𑁆𑀢𑀺 ¶ 𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑀲𑀫𑀢𑁆𑀣𑀢𑀸𑀬 𑀅𑀪𑀸𑀯𑁂𑀦 𑀆𑀭𑀫𑁆𑀫𑀡𑀁 𑀯𑁄𑀘𑁆𑀙𑀺𑀚𑁆𑀚𑀢𑀺. 𑀧𑀢𑀺𑀝𑁆𑀞𑀸 𑀯𑀺𑀜𑁆𑀜𑀸𑀡𑀲𑁆𑀲𑀸𑀢𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑀲𑁆𑀲 𑀧𑀢𑀺𑀝𑁆𑀞𑀸 𑀦 𑀳𑁄𑀢𑀺. 𑀢𑀤𑀧𑁆𑀧𑀢𑀺𑀝𑁆𑀞𑀺𑀢𑀦𑁆𑀢𑀺 𑀢𑀁 𑀅𑀧𑁆𑀧𑀢𑀺𑀝𑁆𑀞𑀺𑀢𑀁. 𑀅𑀦𑀪𑀺𑀲𑀗𑁆𑀔𑀘𑁆𑀘 𑀯𑀺𑀫𑀼𑀢𑁆𑀢𑀦𑁆𑀢𑀺 𑀧𑀝𑀺𑀲𑀦𑁆𑀥𑀺𑀁 𑀅𑀦𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀯𑀺𑀫𑀼𑀢𑁆𑀢𑀁. 𑀧𑀞𑀫𑀁.

𑁨. 𑀩𑀻𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁪. 𑀤𑀼𑀢𑀺𑀬𑁂 𑀩𑀻𑀚𑀚𑀸𑀢𑀸𑀦𑀻𑀢𑀺 𑀩𑀻𑀚𑀸𑀦𑀺. 𑀫𑀽𑀮𑀩𑀻𑀚𑀦𑁆𑀢𑀺 𑀯𑀘𑀁 𑀯𑀘𑀢𑁆𑀢𑀁 𑀳𑀮𑀺𑀤𑁆𑀤𑀁 𑀲𑀺𑀗𑁆𑀕𑀺𑀯𑁂𑀭𑀦𑁆𑀢𑀺 𑀏𑀯𑀫𑀸𑀤𑀺. 𑀔𑀦𑁆𑀥𑀩𑀻𑀚𑀦𑁆𑀢𑀺 𑀅𑀲𑁆𑀲𑀢𑁆𑀣𑁄 𑀦𑀺𑀕𑁆𑀭𑁄𑀥𑁄𑀢𑀺 𑀏𑀯𑀫𑀸𑀤𑀺. 𑀨𑀮𑀼𑀩𑀻𑀚𑀦𑁆𑀢𑀺 ¶ 𑀉𑀘𑁆𑀙𑀼 𑀯𑁂𑀴𑀼 𑀦𑀴𑁄𑀢𑀺 𑀏𑀯𑀫𑀸𑀤𑀺. 𑀅𑀕𑁆𑀕𑀩𑀻𑀚𑀦𑁆𑀢𑀺 𑀅𑀚𑁆𑀚𑀼𑀓𑀁 𑀨𑀡𑀺𑀚𑁆𑀚𑀓𑀦𑁆𑀢𑀺 𑀏𑀯𑀫𑀸𑀤𑀺. 𑀩𑀻𑀚𑀩𑀻𑀚𑀦𑁆𑀢𑀺 𑀲𑀸𑀮𑀺𑀯𑀻𑀳𑀺𑀆𑀤𑀺 𑀧𑀼𑀩𑁆𑀩𑀡𑁆𑀡𑀜𑁆𑀘𑁂𑀯 𑀫𑀼𑀕𑁆𑀕𑀫𑀸𑀲𑀸𑀤𑀺 𑀅𑀧𑀭𑀡𑁆𑀡𑀜𑁆𑀘. 𑀅𑀔𑀡𑁆𑀟𑀸𑀦𑀻𑀢𑀺 𑀅𑀪𑀺𑀦𑁆𑀦𑀸𑀦𑀺. 𑀪𑀺𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀩𑀻𑀚𑀁 𑀩𑀻𑀚𑀢𑁆𑀣𑀸𑀬 𑀦 𑀉𑀧𑀓𑀧𑁆𑀧𑀢𑀺. 𑀅𑀧𑀽𑀢𑀺𑀓𑀸𑀦𑀻𑀢𑀺 𑀉𑀤𑀓𑀢𑁂𑀫𑀦𑁂𑀦 𑀅𑀧𑀽𑀢𑀺𑀓𑀸𑀦𑀺. 𑀧𑀽𑀢𑀺𑀩𑀻𑀚𑀜𑁆𑀳𑀺 𑀩𑀻𑀚𑀢𑁆𑀣𑀸𑀬 𑀦 𑀉𑀧𑀓𑀧𑁆𑀧𑀢𑀺. 𑀅𑀯𑀸𑀢𑀸𑀢𑀧𑀳𑀢𑀸𑀦𑀻𑀢𑀺 𑀯𑀸𑀢𑁂𑀦 𑀘 𑀆𑀢𑀧𑁂𑀦 𑀘 𑀦 𑀳𑀢𑀸𑀦𑀺, 𑀦𑀺𑀭𑁄𑀚𑀢𑀁 𑀦 𑀧𑀸𑀧𑀺𑀢𑀸𑀦𑀺. 𑀦𑀺𑀭𑁄𑀚𑀜𑁆𑀳𑀺 𑀓𑀲𑀝𑀁 𑀩𑀻𑀚𑀁 𑀩𑀻𑀚𑀢𑁆𑀣𑀸𑀬 𑀦 𑀉𑀧𑀓𑀧𑁆𑀧𑀢𑀺. 𑀲𑀸𑀭𑀸𑀤𑀸𑀦𑀻𑀢𑀺 𑀕𑀳𑀺𑀢𑀲𑀸𑀭𑀸𑀦𑀺 𑀧𑀢𑀺𑀝𑁆𑀞𑀺𑀢𑀲𑀸𑀭𑀸𑀦𑀺. 𑀦𑀺𑀲𑁆𑀲𑀸𑀭𑀜𑁆𑀳𑀺 𑀩𑀻𑀚𑀁 𑀩𑀻𑀚𑀢𑁆𑀣𑀸𑀬 𑀦 𑀉𑀧𑀓𑀧𑁆𑀧𑀢𑀺. 𑀲𑀼𑀔𑀲𑀬𑀺𑀢𑀸𑀦𑀻𑀢𑀺 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀓𑁄𑀝𑁆𑀞𑁂 𑀧𑀓𑁆𑀔𑀺𑀢𑁆𑀢𑀦𑀺𑀬𑀸𑀫𑁂𑀦𑁂𑀯 𑀲𑀼𑀔𑀁 𑀲𑀬𑀺𑀢𑀸𑀦𑀺. 𑀧𑀣𑀯𑀻𑀢𑀺 𑀳𑁂𑀝𑁆𑀞𑀸 𑀧𑀢𑀺𑀝𑁆𑀞𑀸𑀦𑀧𑀣𑀯𑀻. 𑀆𑀧𑁄𑀢𑀺 𑀉𑀧𑀭𑀺𑀲𑁆𑀦𑁂𑀳𑀦𑀆𑀧𑁄. 𑀘𑀢𑀲𑁆𑀲𑁄 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄𑀢𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀪𑀽𑀢𑀸 𑀭𑀽𑀧𑀸𑀤𑀬𑁄 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸. 𑀢𑁂 𑀳𑀺 𑀆𑀭𑀫𑁆𑀫𑀡𑀯𑀲𑁂𑀦 𑀧𑀢𑀺𑀝𑁆𑀞𑀸𑀪𑀽𑀢𑀢𑁆𑀢𑀸 𑀧𑀣𑀯𑀻𑀥𑀸𑀢𑀼𑀲𑀤𑀺𑀲𑀸. 𑀦𑀦𑁆𑀤𑀺𑀭𑀸𑀕𑁄 𑀲𑀺𑀦𑁂𑀳𑀦𑀝𑁆𑀞𑁂𑀦 𑀆𑀧𑁄𑀥𑀸𑀢𑀼𑀲𑀤𑀺𑀲𑁄. 𑀯𑀺𑀜𑁆𑀜𑀸𑀡𑀁 𑀲𑀸𑀳𑀸𑀭𑀦𑁆𑀢𑀺 𑀲𑀧𑁆𑀧𑀘𑁆𑀘𑀬𑀁 𑀓𑀫𑁆𑀫𑀯𑀺𑀜𑁆𑀜𑀸𑀡𑀁. 𑀢𑀜𑁆𑀳𑀺 𑀩𑀻𑀚𑀁 𑀯𑀺𑀬 𑀧𑀣𑀯𑀺𑀬𑀁 𑀆𑀭𑀫𑁆𑀫𑀡𑀧𑀣𑀯𑀺𑀬𑀁 𑀯𑀺𑀭𑀼𑀳𑀢𑀺. 𑀤𑀼𑀢𑀺𑀬𑀁.

𑁩. 𑀉𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁫. 𑀢𑀢𑀺𑀬𑁂 ¶ ¶ 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀩𑀮𑀯𑀲𑁄𑀫𑀦𑀲𑁆𑀲𑀲𑀫𑀼𑀝𑁆𑀞𑀸𑀦𑀁 𑀉𑀤𑀸𑀦𑀁 𑀉𑀤𑀸𑀳𑀭𑀺. 𑀓𑀺𑀁 𑀦𑀺𑀲𑁆𑀲𑀸𑀬 𑀧𑀦𑁂𑀲 𑀪𑀕𑀯𑀢𑁄 𑀉𑀧𑁆𑀧𑀦𑁆𑀦𑁄𑀢𑀺. 𑀲𑀸𑀲𑀦𑀲𑁆𑀲 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀁. 𑀓𑀣𑀁? 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺, ‘‘𑀢𑀬𑁄𑀫𑁂 𑀉𑀧𑀦𑀺𑀲𑁆𑀲𑀬𑀸 𑁋 𑀤𑀸𑀦𑀽𑀧𑀦𑀺𑀲𑁆𑀲𑀬𑁄 𑀲𑀻𑀮𑀽𑀧𑀦𑀺𑀲𑁆𑀲𑀬𑁄 𑀪𑀸𑀯𑀦𑀽𑀧𑀦𑀺𑀲𑁆𑀲𑀬𑁄 𑀘𑀸’’𑀢𑀺. 𑀢𑁂𑀲𑀼 𑀤𑀸𑀦𑀲𑀻𑀮𑀽𑀧𑀦𑀺𑀲𑁆𑀲𑀬𑀸 𑀤𑀼𑀩𑁆𑀩𑀮𑀸, 𑀪𑀸𑀯𑀦𑀽𑀧𑀦𑀺𑀲𑁆𑀲𑀬𑁄 𑀩𑀮𑀯𑀸. 𑀤𑀸𑀦𑀲𑀻𑀮𑀽𑀧𑀦𑀺𑀲𑁆𑀲𑀬𑀸 𑀳𑀺 𑀢𑀬𑁄 𑀫𑀕𑁆𑀕𑁂 𑀘 𑀨𑀮𑀸𑀦𑀺 𑀘 𑀧𑀸𑀧𑁂𑀦𑁆𑀢𑀺, 𑀪𑀸𑀯𑀦𑀽𑀧𑀦𑀺𑀲𑁆𑀲𑀬𑁄 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑀺. 𑀇𑀢𑀺 𑀤𑀼𑀩𑁆𑀩𑀮𑀽𑀧𑀦𑀺𑀲𑁆𑀲𑀬𑁂 𑀧𑀢𑀺𑀝𑁆𑀞𑀺𑀢𑁄 𑀪𑀺𑀓𑁆𑀔𑀼 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀩𑀦𑁆𑀥𑀦𑀸𑀦𑀺 𑀙𑁂𑀢𑁆𑀯𑀸 𑀢𑀻𑀡𑀺 𑀫𑀕𑁆𑀕𑀨𑀮𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑀺, ‘‘𑀅𑀳𑁄 𑀲𑀸𑀲𑀦𑀁 𑀦𑀺𑀬𑁆𑀬𑀸𑀦𑀺𑀓’’𑀦𑁆𑀢𑀺 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀅𑀬𑀁 𑀉𑀤𑀧𑀸𑀤𑀺.

𑀢𑀢𑁆𑀣 ‘‘𑀤𑀼𑀩𑁆𑀩𑀮𑀽𑀧𑀦𑀺𑀲𑁆𑀲𑀬𑁂 𑀞𑀢𑁆𑀯𑀸 𑀖𑀝𑀫𑀸𑀦𑁄 𑀢𑀻𑀡𑀺 𑀫𑀕𑁆𑀕𑀨𑀮𑀸𑀦𑀺 𑀧𑀸𑀧𑀼𑀡𑀸𑀢𑀻’’𑀢𑀺 𑀇𑀫𑀲𑁆𑀲𑀢𑁆𑀣𑀲𑁆𑀲𑀸𑀯𑀺𑀪𑀸𑀯𑀦𑀢𑁆𑀣𑀁 𑀫𑀺𑀮𑀓𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼 𑀯𑁂𑀤𑀺𑀢𑀩𑁆𑀩𑀁 𑁋 𑀲𑁄 𑀓𑀺𑀭 𑀕𑀺𑀳𑀺𑀓𑀸𑀮𑁂 𑀧𑀸𑀡𑀸𑀢𑀺𑀧𑀸𑀢𑀓𑀫𑁆𑀫𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁄 𑀅𑀭𑀜𑁆𑀜𑁂 𑀧𑀸𑀲𑀲𑀢𑀜𑁆𑀘𑁂𑀯 𑀅𑀤𑀽𑀳𑀮𑀲𑀢𑀜𑁆𑀘 𑀬𑁄𑀚𑁂𑀲𑀺. 𑀅𑀣𑁂𑀓𑀤𑀺𑀯𑀲𑀁 𑀅𑀗𑁆𑀕𑀸𑀭𑀧𑀓𑁆𑀓𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀧𑀸𑀲𑀝𑁆𑀞𑀸𑀦𑁂𑀲𑀼 𑀯𑀺𑀘𑀭𑀦𑁆𑀢𑁄 𑀧𑀺𑀧𑀸𑀲𑀸𑀪𑀺𑀪𑀽𑀢𑁄 𑀏𑀓𑀲𑁆𑀲 𑀅𑀭𑀜𑁆𑀜𑀯𑀸𑀲𑀺𑀢𑁆𑀣𑁂𑀭𑀲𑁆𑀲 ¶ 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀘𑀗𑁆𑀓𑀫𑀦𑁆𑀢𑀲𑁆𑀲 𑀅𑀯𑀺𑀤𑀽𑀭𑁂 𑀞𑀺𑀢𑀁 𑀧𑀸𑀦𑀻𑀬𑀖𑀝𑀁 𑀯𑀺𑀯𑀭𑀺, 𑀳𑀢𑁆𑀣𑀢𑁂𑀫𑀦𑀫𑀢𑁆𑀢𑀫𑁆𑀧𑀺 𑀉𑀤𑀓𑀁 𑀦𑀸𑀤𑁆𑀤𑀲. 𑀲𑁄 𑀓𑀼𑀚𑁆𑀛𑀺𑀢𑁆𑀯𑀸 𑀆𑀳 𑁋 ‘‘𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼 𑀢𑀼𑀫𑁆𑀳𑁂 𑀕𑀳𑀧𑀢𑀺𑀓𑁂𑀳𑀺 𑀤𑀺𑀦𑁆𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀪𑀼𑀜𑁆𑀚𑀺𑀢𑁆𑀯𑀸 𑀲𑀼𑀧𑀣, 𑀧𑀸𑀦𑀻𑀬𑀖𑀝𑁂 𑀅𑀜𑁆𑀚𑀮𑀺𑀫𑀢𑁆𑀢𑀫𑁆𑀧𑀺 𑀉𑀤𑀓𑀁 𑀦 𑀞𑀧𑁂𑀣, 𑀦 𑀬𑀼𑀢𑁆𑀢𑀫𑁂𑀢’’𑀦𑁆𑀢𑀺. 𑀣𑁂𑀭𑁄 ‘‘𑀫𑀬𑀸 𑀧𑀸𑀦𑀻𑀬𑀖𑀝𑁄 𑀧𑀽𑀭𑁂𑀢𑁆𑀯𑀸 𑀞𑀧𑀺𑀢𑁄, 𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺? 𑀕𑀦𑁆𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀧𑀭𑀺𑀧𑀼𑀡𑁆𑀡𑀖𑀝𑀁 𑀤𑀺𑀲𑁆𑀯𑀸 𑀧𑀸𑀦𑀻𑀬𑀲𑀗𑁆𑀔𑀁 𑀧𑀽𑀭𑁂𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀤𑁆𑀯𑀢𑁆𑀢𑀺𑀲𑀗𑁆𑀔𑀧𑀽𑀭𑀁 𑀧𑀺𑀯𑀺𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀏𑀯𑀁 𑀧𑀽𑀭𑀺𑀢𑀖𑀝𑁄 𑀦𑀸𑀫 𑀫𑀫 𑀓𑀫𑁆𑀫𑀁 𑀆𑀕𑀫𑁆𑀫 𑀢𑀢𑁆𑀢𑀓𑀧𑀸𑀮𑁄 𑀯𑀺𑀬 𑀚𑀸𑀢𑁄. 𑀓𑀺𑀁 𑀦𑀼 𑀔𑁄 𑀅𑀦𑀸𑀕𑀢𑁂 𑀅𑀢𑁆𑀢𑀪𑀸𑀯𑁂 𑀪𑀯𑀺𑀲𑁆𑀲𑀢𑀻’’𑀢𑀺? 𑀲𑀁𑀯𑀺𑀕𑁆𑀕𑀘𑀺𑀢𑁆𑀢𑁄 𑀥𑀦𑀼𑀁 𑀙𑀟𑁆𑀟𑁂𑀢𑁆𑀯𑀸, ‘‘𑀧𑀩𑁆𑀩𑀸𑀚𑁂𑀣 𑀫𑀁, 𑀪𑀦𑁆𑀢𑁂’’𑀢𑀺 𑀆𑀳. 𑀣𑁂𑀭𑁄 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 𑀢𑀁 𑀧𑀩𑁆𑀩𑀸𑀚𑁂𑀲𑀺.

𑀢𑀲𑁆𑀲 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀩𑀳𑀽𑀦𑀁 𑀫𑀺𑀕𑀲𑀽𑀓𑀭𑀸𑀦𑀁 𑀫𑀸𑀭𑀺𑀢𑀝𑁆𑀞𑀸𑀦𑀁 𑀧𑀸𑀲𑀅𑀤𑀽𑀳𑀮𑀸𑀦𑀜𑁆𑀘 𑀬𑁄𑀚𑀺𑀢𑀝𑁆𑀞𑀸𑀦𑀁 𑀉𑀧𑀝𑁆𑀞𑀸𑀢𑀺. 𑀢𑀁 𑀅𑀦𑀼𑀲𑁆𑀲𑀭𑀢𑁄 𑀲𑀭𑀻𑀭𑁂 𑀤𑀸𑀳𑁄 𑀉𑀧𑁆𑀧𑀚𑁆𑀚𑀢𑀺, 𑀓𑀽𑀝𑀕𑁄𑀡𑁄 𑀯𑀺𑀬 𑀓𑀫𑁆𑀫𑀝𑁆𑀞𑀸𑀦𑀫𑁆𑀧𑀺 𑀯𑀻𑀣𑀺𑀁 𑀦 𑀧𑀝𑀺𑀧𑀚𑁆𑀚𑀢𑀺. 𑀲𑁄 ‘‘𑀓𑀺𑀁 𑀓𑀭𑀺𑀲𑁆𑀲𑀸𑀫𑀺 𑀪𑀺𑀓𑁆𑀔𑀼𑀪𑀸𑀯𑁂𑀦𑀸’’𑀢𑀺 ¶ ? 𑀅𑀦𑀪𑀺𑀭𑀢𑀺𑀬𑀸 𑀧𑀻𑀴𑀺𑀢𑁄 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀆𑀳 𑁋 ‘‘𑀦 𑀲𑀓𑁆𑀓𑁄𑀫𑀺, 𑀪𑀦𑁆𑀢𑁂, 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼’’𑀦𑁆𑀢𑀺. 𑀅𑀣 𑀦𑀁 𑀣𑁂𑀭𑁄 ‘‘𑀳𑀢𑁆𑀣𑀓𑀫𑁆𑀫𑀁 𑀓𑀭𑁄𑀳𑀻’’𑀢𑀺 𑀆𑀳. 𑀲𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀉𑀤𑀼𑀫𑁆𑀩𑀭𑀸𑀤𑀬𑁄 𑀅𑀮𑁆𑀮𑀭𑀼𑀓𑁆𑀔𑁂 𑀙𑀺𑀦𑁆𑀤𑀺𑀢𑁆𑀯𑀸 ¶ 𑀫𑀳𑀦𑁆𑀢𑀁 𑀭𑀸𑀲𑀺𑀁 𑀓𑀢𑁆𑀯𑀸, ‘‘𑀇𑀤𑀸𑀦𑀺 𑀓𑀺𑀁 𑀓𑀭𑁄𑀫𑀻’’𑀢𑀺 𑀧𑀼𑀘𑁆𑀙𑀺? 𑀛𑀸𑀧𑁂𑀳𑀺 𑀦𑀦𑁆𑀢𑀺. 𑀲𑁄 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀛𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄, ‘‘𑀪𑀦𑁆𑀢𑁂, 𑀦 𑀲𑀓𑁆𑀓𑁄𑀫𑀻’’𑀢𑀺 𑀆𑀳. 𑀣𑁂𑀭𑁄 ‘‘𑀢𑁂𑀦 𑀳𑀺 𑀅𑀧𑁂𑀳𑀻’’𑀢𑀺 𑀧𑀣𑀯𑀺𑀁 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀅𑀯𑀻𑀘𑀺𑀢𑁄 𑀔𑀚𑁆𑀚𑁄𑀧𑀦𑀓𑀫𑀢𑁆𑀢𑀁 𑀅𑀕𑁆𑀕𑀺𑀁 𑀦𑀻𑀳𑀭𑀺𑀢𑁆𑀯𑀸 𑀢𑀢𑁆𑀣 𑀧𑀓𑁆𑀔𑀺𑀧𑀺. 𑀲𑁄 𑀢𑀸𑀯 𑀫𑀳𑀦𑁆𑀢𑀁 𑀭𑀸𑀲𑀺𑀁 𑀲𑀼𑀓𑁆𑀔𑀧𑀡𑁆𑀡𑀁 𑀯𑀺𑀬 𑀔𑀡𑁂𑀦 𑀛𑀸𑀧𑁂𑀲𑀺. 𑀅𑀣𑀲𑁆𑀲 𑀣𑁂𑀭𑁄 𑀅𑀯𑀻𑀘𑀺𑀁 𑀤𑀲𑁆𑀲𑁂𑀢𑁆𑀯𑀸, ‘‘𑀲𑀘𑁂 𑀯𑀺𑀩𑁆𑀪𑀫𑀺𑀲𑁆𑀲𑀲𑀺, 𑀏𑀢𑁆𑀣 𑀧𑀘𑁆𑀘𑀺𑀲𑁆𑀲𑀲𑀻’’𑀢𑀺 𑀲𑀁𑀯𑁂𑀕𑀁 𑀚𑀦𑁂𑀲𑀺. 𑀲𑁄 𑀅𑀯𑀻𑀘𑀺𑀤𑀲𑁆𑀲𑀦𑀢𑁄 𑀧𑀝𑁆𑀞𑀸𑀬 𑀧𑀯𑁂𑀥𑀫𑀸𑀦𑁄 ‘‘𑀦𑀺𑀬𑁆𑀬𑀸𑀦𑀺𑀓𑀁, 𑀪𑀦𑁆𑀢𑁂, 𑀩𑀼𑀤𑁆𑀥𑀲𑀸𑀲𑀦’’𑀦𑁆𑀢𑀺 𑀧𑀼𑀘𑁆𑀙𑀺, 𑀆𑀫𑀸𑀯𑀼𑀲𑁄𑀢𑀺. 𑀪𑀦𑁆𑀢𑁂, 𑀩𑀼𑀤𑁆𑀥𑀲𑀸𑀲𑀦𑀲𑁆𑀲 𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑁂 𑀲𑀢𑀺 𑀫𑀺𑀮𑀓𑁄 𑀅𑀢𑁆𑀢𑀫𑁄𑀓𑁆𑀔𑀁 𑀓𑀭𑀺𑀲𑁆𑀲𑀢𑀺, 𑀫𑀸 𑀘𑀺𑀦𑁆𑀢𑀬𑀺𑀢𑁆𑀣𑀸𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑀺 𑀖𑀝𑁂𑀢𑀺, 𑀢𑀲𑁆𑀲 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀧𑀽𑀭𑁂𑀢𑀺, 𑀦𑀺𑀤𑁆𑀤𑀸𑀬 𑀩𑀸𑀥𑀬𑀫𑀸𑀦𑀸𑀬 𑀢𑀺𑀦𑁆𑀢𑀁 𑀧𑀮𑀸𑀮𑀁 𑀲𑀻𑀲𑁂 𑀞𑀧𑁂𑀢𑁆𑀯𑀸 𑀧𑀸𑀤𑁂 𑀲𑁄𑀡𑁆𑀟𑀺𑀬𑀁 𑀑𑀢𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀢𑀺. 𑀲𑁄 𑀏𑀓𑀤𑀺𑀯𑀲𑀁 𑀧𑀸𑀦𑀻𑀬𑀁 ¶ 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀖𑀝𑀁 𑀊𑀭𑀼𑀫𑁆𑀳𑀺 𑀞𑀧𑁂𑀢𑁆𑀯𑀸 𑀉𑀤𑀓𑀫𑀡𑀺𑀓𑀸𑀦𑀁 𑀧𑀘𑁆𑀙𑁂𑀤𑀁 𑀆𑀕𑀫𑀬𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀅𑀣 𑀔𑁄 𑀣𑁂𑀭𑁄 𑀲𑀸𑀫𑀡𑁂𑀭𑀲𑁆𑀲 𑀇𑀫𑀁 𑀉𑀤𑁆𑀤𑁂𑀲𑀁 𑀤𑁂𑀢𑀺 𑁋

‘‘𑀉𑀝𑁆𑀞𑀸𑀦𑀯𑀢𑁄 𑀲𑀢𑀻𑀫𑀢𑁄,

𑀲𑀼𑀘𑀺𑀓𑀫𑁆𑀫𑀲𑁆𑀲 𑀦𑀺𑀲𑀫𑁆𑀫𑀓𑀸𑀭𑀺𑀦𑁄;

𑀲𑀜𑁆𑀜𑀢𑀲𑁆𑀲 𑀥𑀫𑁆𑀫𑀚𑀻𑀯𑀺𑀦𑁄,

𑀅𑀧𑁆𑀧𑀫𑀢𑁆𑀢𑀲𑁆𑀲 𑀬𑀲𑁄𑀪𑀺𑀯𑀟𑁆𑀠𑀢𑀻’’𑀢𑀺. (𑀥. 𑀧. 𑁨𑁪);

𑀲𑁄 𑀘𑀢𑀼𑀧𑁆𑀧𑀤𑀺𑀓𑀫𑁆𑀧𑀺 𑀢𑀁 𑀕𑀸𑀣𑀁 𑀅𑀢𑁆𑀢𑀦𑀺𑀬𑁂𑀯 𑀉𑀧𑀦𑁂𑀲𑀺 𑁋 ‘‘𑀉𑀝𑁆𑀞𑀸𑀦𑀯𑀢𑀸 𑀦𑀸𑀫 𑀫𑀸𑀤𑀺𑀲𑁂𑀦 𑀪𑀯𑀺𑀢𑀩𑁆𑀩𑀁. 𑀲𑀢𑀺𑀫𑀢𑀸𑀧𑀺 𑀫𑀸𑀤𑀺𑀲𑁂𑀦𑁂𑀯…𑀧𑁂… 𑀅𑀧𑁆𑀧𑀫𑀢𑁆𑀢𑁂𑀦𑀧𑀺 𑀫𑀸𑀤𑀺𑀲𑁂𑀦𑁂𑀯 𑀪𑀯𑀺𑀢𑀩𑁆𑀩’’𑀦𑁆𑀢𑀺. 𑀏𑀯𑀁 𑀢𑀁 𑀕𑀸𑀣𑀁 𑀅𑀢𑁆𑀢𑀦𑀺 𑀉𑀧𑀦𑁂𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀧𑀤𑀯𑀸𑀭𑁂 𑀞𑀺𑀢𑁄 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑀸𑀕𑀸𑀫𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀳𑀝𑁆𑀞𑀢𑀼𑀝𑁆𑀞𑁄 𑁋

‘‘𑀅𑀮𑁆𑀮𑀁 𑀧𑀮𑀸𑀮𑀧𑀼𑀜𑁆𑀚𑀸𑀳𑀁, 𑀲𑀻𑀲𑁂𑀦𑀸𑀤𑀸𑀬 𑀘𑀗𑁆𑀓𑀫𑀺𑀁;

𑀧𑀢𑁆𑀢𑁄𑀲𑁆𑀫𑀺 𑀢𑀢𑀺𑀬𑀁 𑀞𑀸𑀦𑀁, 𑀏𑀢𑁆𑀣 𑀫𑁂 𑀦𑀢𑁆𑀣𑀺 𑀲𑀁𑀲𑀬𑁄’’𑀢𑀺. 𑁋

𑀇𑀫𑀁 𑀉𑀤𑀸𑀦𑀕𑀸𑀣𑀁 𑀆𑀳. 𑀏𑀯𑀁 ¶ 𑀤𑀼𑀩𑁆𑀩𑀮𑀽𑀧𑀦𑀺𑀲𑁆𑀲𑀬𑁂 𑀞𑀺𑀢𑁄 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀢𑀻𑀡𑀺 𑀫𑀕𑁆𑀕𑀨𑀮𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀦𑁄 𑀘𑀲𑁆𑀲𑀁, 𑀦𑁄 𑀘 ¶ 𑀫𑁂 𑀲𑀺𑀬𑀸, 𑀦𑀸𑀪𑀯𑀺𑀲𑁆𑀲, 𑀦 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀅𑀥𑀺𑀫𑀼𑀘𑁆𑀘𑀫𑀸𑀦𑁄 𑀪𑀺𑀓𑁆𑀔𑀼 𑀙𑀺𑀦𑁆𑀤𑁂𑀬𑁆𑀬 𑀑𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀻’’𑀢𑀺.

𑀢𑀢𑁆𑀣 𑀦𑁄 𑀘𑀲𑁆𑀲𑀁, 𑀦𑁄 𑀘 𑀫𑁂 𑀲𑀺𑀬𑀸𑀢𑀺 𑀲𑀘𑁂 𑀅𑀳𑀁 𑀦 𑀪𑀯𑁂𑀬𑁆𑀬𑀁, 𑀫𑀫 𑀧𑀭𑀺𑀓𑁆𑀔𑀸𑀭𑁄𑀧𑀺 𑀦 𑀪𑀯𑁂𑀬𑁆𑀬. 𑀲𑀘𑁂 𑀯𑀸 𑀧𑀦 𑀫𑁂 𑀅𑀢𑀻𑀢𑁂 𑀓𑀫𑁆𑀫𑀸𑀪𑀺𑀲𑀗𑁆𑀔𑀸𑀭𑁄 𑀦𑀸𑀪𑀯𑀺𑀲𑁆𑀲, 𑀇𑀤𑀁 𑀫𑁂 𑀏𑀢𑀭𑀳𑀺 𑀔𑀦𑁆𑀥𑀧𑀜𑁆𑀘𑀓𑀁 𑀦 𑀪𑀯𑁂𑀬𑁆𑀬. 𑀦𑀸𑀪𑀯𑀺𑀲𑁆𑀲, 𑀦 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀇𑀤𑀸𑀦𑀺 𑀧𑀦 𑀢𑀣𑀸 𑀧𑀭𑀓𑁆𑀓𑀫𑀺𑀲𑁆𑀲𑀸𑀫𑀺, 𑀬𑀣𑀸 𑀫𑁂 𑀆𑀬𑀢𑀺𑀁 𑀔𑀦𑁆𑀥𑀸𑀪𑀺𑀦𑀺𑀩𑁆𑀩𑀢𑁆𑀢𑀓𑁄 𑀓𑀫𑁆𑀫𑀲𑀗𑁆𑀔𑀸𑀭𑁄 𑀦 𑀪𑀯𑀺𑀲𑁆𑀲𑀢𑀺, 𑀢𑀲𑁆𑀫𑀺𑀁 𑀅𑀲𑀢𑀺 𑀆𑀬𑀢𑀺𑀁 𑀧𑀝𑀺𑀲𑀦𑁆𑀥𑀺 𑀦𑀸𑀫 𑀦 𑀫𑁂 𑀪𑀯𑀺𑀲𑁆𑀲𑀢𑀺. 𑀏𑀯𑀁 𑀅𑀥𑀺𑀫𑀼𑀘𑁆𑀘𑀫𑀸𑀦𑁄𑀢𑀺 𑀏𑀯𑀁 𑀅𑀥𑀺𑀫𑀼𑀘𑁆𑀘𑀦𑁆𑀢𑁄 𑀪𑀺𑀓𑁆𑀔𑀼 𑀤𑀼𑀩𑁆𑀩𑀮𑀽𑀧𑀦𑀺𑀲𑁆𑀲𑀬𑁂 𑀞𑀺𑀢𑁄 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀙𑀺𑀦𑁆𑀤𑁂𑀬𑁆𑀬. 𑀏𑀯𑀁 𑀯𑀼𑀢𑁆𑀢𑁂𑀢𑀺 𑀏𑀯𑀁 𑀲𑀸𑀲𑀦𑀲𑁆𑀲 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀁 𑀆𑀯𑀚𑁆𑀚𑁂𑀦𑁆𑀢𑁂𑀦 𑀪𑀕𑀯𑀢𑀸 ¶ 𑀇𑀫𑀲𑁆𑀫𑀺𑀁 𑀉𑀤𑀸𑀦𑁂 𑀯𑀼𑀢𑁆𑀢𑁂. 𑀭𑀽𑀧𑀁 𑀯𑀺𑀪𑀯𑀺𑀲𑁆𑀲𑀢𑀻𑀢𑀺 𑀭𑀽𑀧𑀁 𑀪𑀺𑀚𑁆𑀚𑀺𑀲𑁆𑀲𑀢𑀺. 𑀭𑀽𑀧𑀲𑁆𑀲 𑀯𑀺𑀪𑀯𑀸𑀢𑀺 𑀯𑀺𑀪𑀯𑀤𑀲𑁆𑀲𑀦𑁂𑀦 𑀲𑀳𑀯𑀺𑀧𑀲𑁆𑀲𑀦𑁂𑀦. 𑀲𑀳𑀯𑀺𑀧𑀲𑁆𑀲𑀦𑀓𑀸 𑀳𑀺 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀭𑀽𑀧𑀸𑀤𑀻𑀦𑀁 𑀯𑀺𑀪𑀯𑀤𑀲𑁆𑀲𑀦𑀁 𑀦𑀸𑀫. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀏𑀯𑀁 𑀅𑀥𑀺𑀫𑀼𑀘𑁆𑀘𑀫𑀸𑀦𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀙𑀺𑀦𑁆𑀤𑁂𑀬𑁆𑀬𑀸𑀢𑀺, 𑀪𑀦𑁆𑀢𑁂, 𑀏𑀯𑀁 𑀅𑀥𑀺𑀫𑀼𑀘𑁆𑀘𑀫𑀸𑀦𑁄 𑀪𑀺𑀓𑁆𑀔𑀼 𑀙𑀺𑀦𑁆𑀤𑁂𑀬𑁆𑀬𑁂𑀯 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺. 𑀓𑀲𑁆𑀫𑀸 𑀦 𑀙𑀺𑀦𑁆𑀤𑀺𑀲𑁆𑀲𑀢𑀻𑀢𑀺?

𑀇𑀤𑀸𑀦𑀺 𑀉𑀧𑀭𑀺 𑀫𑀕𑁆𑀕𑀨𑀮𑀁 𑀧𑀼𑀘𑁆𑀙𑀦𑁆𑀢𑁄 𑀓𑀣𑀁 𑀧𑀦, 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑀦𑁆𑀢𑀭𑀸𑀢𑀺 𑀤𑁆𑀯𑁂 𑀅𑀦𑀦𑁆𑀢𑀭𑀸𑀦𑀺 𑀆𑀲𑀦𑁆𑀦𑀸𑀦𑀦𑁆𑀢𑀭𑀜𑁆𑀘 𑀤𑀽𑀭𑀸𑀦𑀦𑁆𑀢𑀭𑀜𑁆𑀘. 𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑀲𑁆𑀲 𑀆𑀲𑀦𑁆𑀦𑀸𑀦𑀦𑁆𑀢𑀭𑀁 𑀦𑀸𑀫, 𑀨𑀮𑀲𑁆𑀲 𑀤𑀽𑀭𑀸𑀦𑀦𑁆𑀢𑀭𑀁 𑀦𑀸𑀫. 𑀢𑀁 𑀲𑀦𑁆𑀥𑀸𑀬 ‘‘𑀓𑀣𑀁 𑀧𑀦, 𑀪𑀦𑁆𑀢𑁂, 𑀚𑀸𑀦𑀢𑁄 𑀓𑀣𑀁 𑀧𑀲𑁆𑀲𑀢𑁄 𑀯𑀺𑀧𑀲𑁆𑀲𑀦𑀸𑀦𑀦𑁆𑀢𑀭𑀸 ‘𑀆𑀲𑀯𑀸𑀦𑀁 ¶ 𑀔𑀬𑁄’𑀢𑀺 𑀲𑀗𑁆𑀔𑀁 𑀕𑀢𑀁 𑀅𑀭𑀳𑀢𑁆𑀢𑀨𑀮𑀁 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀢𑀺. 𑀅𑀢𑀲𑀺𑀢𑀸𑀬𑁂𑀢𑀺 𑀅𑀢𑀲𑀺𑀢𑀩𑁆𑀩𑁂 𑀅𑀪𑀸𑀬𑀺𑀢𑀩𑁆𑀩𑁂 𑀞𑀸𑀦𑀫𑁆𑀳𑀺. 𑀢𑀸𑀲𑀁 𑀆𑀧𑀚𑁆𑀚𑀢𑀻𑀢𑀺 𑀪𑀬𑀁 𑀆𑀧𑀚𑁆𑀚𑀢𑀺. 𑀢𑀸𑀲𑁄 𑀳𑁂𑀲𑁄𑀢𑀺 𑀬𑀸 𑀏𑀲𑀸 ‘‘𑀦𑁄 𑀘𑀲𑁆𑀲𑀁, 𑀦𑁄 𑀘 𑀫𑁂 𑀲𑀺𑀬𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀤𑀼𑀩𑁆𑀩𑀮𑀯𑀺𑀧𑀲𑁆𑀲𑀦𑀸, 𑀲𑀸 𑀬𑀲𑁆𑀫𑀸 𑀅𑀢𑁆𑀢𑀲𑀺𑀦𑁂𑀳𑀁 𑀧𑀭𑀺𑀬𑀸𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀢𑀸𑀲𑁄 𑀦𑀸𑀫 𑀳𑁄𑀢𑀺. 𑀲𑁄 𑀳𑀺 ‘‘𑀇𑀤𑀸𑀦𑀸𑀳𑀁 𑀉𑀘𑁆𑀙𑀺𑀚𑁆𑀚𑀺𑀲𑁆𑀲𑀸𑀫𑀺, 𑀦 𑀤𑀸𑀦𑀺 𑀓𑀺𑀜𑁆𑀘𑀺 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀸𑀦𑀁 𑀧𑀧𑀸𑀢𑁂 𑀧𑀢𑀦𑁆𑀢𑀁 𑀯𑀺𑀬 𑀧𑀲𑁆𑀲𑀢𑀺 𑀅𑀜𑁆𑀜𑀢𑀭𑁄 𑀩𑁆𑀭𑀸𑀳𑁆𑀫𑀡𑁄 𑀯𑀺𑀬. 𑀮𑁄𑀳𑀧𑀸𑀲𑀸𑀤𑀲𑁆𑀲 𑀓𑀺𑀭 𑀳𑁂𑀝𑁆𑀞𑀸 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑁄 𑀢𑀺𑀮𑀓𑁆𑀔𑀡𑀸𑀳𑀢𑀁 𑀥𑀫𑁆𑀫𑀁 𑀧𑀭𑀺𑀯𑀢𑁆𑀢𑁂𑀢𑀺. 𑀅𑀣 𑀅𑀜𑁆𑀜𑀢𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀏𑀓𑀫𑀦𑁆𑀢𑁂 𑀞𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀲𑁆𑀲 𑀲𑀗𑁆𑀔𑀸𑀭𑀸 𑀲𑀼𑀜𑁆𑀜𑀢𑁄 𑀉𑀧𑀝𑁆𑀞𑀳𑀺𑀁𑀲𑀼. 𑀲𑁄 𑀧𑀧𑀸𑀢𑁂 𑀧𑀢𑀦𑁆𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀯𑀺𑀯𑀝𑀤𑁆𑀯𑀸𑀭𑁂𑀦 𑀢𑀢𑁄 𑀧𑀮𑀸𑀬𑀺𑀢𑁆𑀯𑀸 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸, 𑀧𑀼𑀢𑁆𑀢𑀁 𑀉𑀭𑁂 𑀲𑀬𑀸𑀧𑁂𑀢𑁆𑀯𑀸, ‘‘𑀢𑀸𑀢, 𑀲𑀓𑁆𑀬𑀲𑀫𑀬𑀁 𑀆𑀯𑀚𑁆𑀚𑁂𑀦𑁆𑀢𑁄 𑀫𑀦𑀫𑁆𑀳𑀺 𑀦𑀝𑁆𑀞𑁄’’𑀢𑀺 𑀆𑀳. 𑀦 𑀳𑁂𑀲𑁄 𑀪𑀺𑀓𑁆𑀔𑀼 𑀢𑀸𑀲𑁄𑀢𑀺 𑀏𑀲𑀸 𑀏𑀯𑀁 𑀧𑀯𑀢𑁆𑀢𑀸 𑀩𑀮𑀯𑀯𑀺𑀧𑀲𑁆𑀲𑀦𑀸 𑀲𑀼𑀢𑀯𑀢𑁄 𑀅𑀭𑀺𑀬𑀲𑀸𑀯𑀓𑀲𑁆𑀲 𑀦 𑀢𑀸𑀲𑁄 ¶ 𑀦𑀸𑀫 𑀳𑁄𑀢𑀺. 𑀦 𑀳𑀺 𑀢𑀲𑁆𑀲 𑀏𑀯𑀁 𑀳𑁄𑀢𑀺 ‘‘𑀅𑀳𑀁 𑀉𑀘𑁆𑀙𑀺𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀸 ‘‘𑀯𑀺𑀦𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀯𑀸𑀢𑀺. 𑀏𑀯𑀁 𑀧𑀦 𑀳𑁄𑀢𑀺 ‘‘𑀲𑀗𑁆𑀔𑀸𑀭𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀲𑀗𑁆𑀔𑀸𑀭𑀸𑀯 𑀦𑀺𑀭𑀼𑀚𑁆𑀛𑀦𑁆𑀢𑀻’’𑀢𑀺. 𑀢𑀢𑀺𑀬𑀁.

𑁪. 𑀉𑀧𑀸𑀤𑀸𑀦𑀧𑀭𑀺𑀧𑀯𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁬. 𑀘𑀢𑀼𑀢𑁆𑀣𑁂 𑀘𑀢𑀼𑀧𑀭𑀺𑀯𑀝𑁆𑀝𑀦𑁆𑀢𑀺 𑀏𑀓𑁂𑀓𑀲𑁆𑀫𑀺𑀁 𑀔𑀦𑁆𑀥𑁂 𑀘𑀢𑀼𑀦𑁆𑀦𑀁 𑀧𑀭𑀺𑀯𑀝𑁆𑀝𑀦𑀯𑀲𑁂𑀦. 𑀭𑀽𑀧𑀁 𑀅𑀩𑁆𑀪𑀜𑁆𑀜𑀸𑀲𑀺𑀦𑁆𑀢𑀺 𑀭𑀽𑀧𑀁 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺 𑀅𑀪𑀺𑀜𑁆𑀜𑀸𑀲𑀺𑀁. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀘𑀢𑀼𑀲𑀘𑁆𑀘𑀯𑀲𑁂𑀦𑁂𑀯 ¶ 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀳𑀸𑀭𑀲𑀫𑀼𑀤𑀬𑀸𑀢𑀺 𑀏𑀢𑁆𑀣 𑀲𑀘𑁆𑀙𑀦𑁆𑀤𑀭𑀸𑀕𑁄 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀆𑀳𑀸𑀭𑁄 𑀦𑀸𑀫. 𑀧𑀝𑀺𑀧𑀦𑁆𑀦𑀸𑀢𑀺 𑀲𑀻𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀺. 𑀕𑀸𑀥𑀦𑁆𑀢𑀻𑀢𑀺 𑀧𑀢𑀺𑀝𑁆𑀞𑀳𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀲𑁂𑀓𑁆𑀔𑀪𑀽𑀫𑀺𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀅𑀲𑁂𑀓𑁆𑀔𑀪𑀽𑀫𑀺𑀁 𑀓𑀣𑁂𑀦𑁆𑀢𑁄 𑀬𑁂 𑀘 𑀔𑁄 𑀓𑁂𑀘𑀺, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀲𑀼𑀯𑀺𑀫𑀼𑀢𑁆𑀢𑀸𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑀸. 𑀓𑁂𑀯𑀮𑀺𑀦𑁄𑀢𑀺 𑀲𑀓𑀮𑀺𑀦𑁄 ¶ 𑀓𑀢𑀲𑀩𑁆𑀩𑀓𑀺𑀘𑁆𑀘𑀸. 𑀯𑀝𑁆𑀝𑀁 𑀢𑁂𑀲𑀁 𑀦𑀢𑁆𑀣𑀺 𑀧𑀜𑁆𑀜𑀸𑀧𑀦𑀸𑀬𑀸𑀢𑀺 𑀬𑁂𑀦 𑀢𑁂 𑀅𑀯𑀲𑀺𑀝𑁆𑀞𑁂𑀦 𑀯𑀝𑁆𑀝𑁂𑀦 𑀧𑀜𑁆𑀜𑀸𑀧𑁂𑀬𑁆𑀬𑀼𑀁, 𑀢𑀁 𑀦𑁂𑀲𑀁 𑀯𑀝𑁆𑀝𑀁 𑀦𑀢𑁆𑀣𑀺 𑀧𑀜𑁆𑀜𑀸𑀧𑀦𑀸𑀬. 𑀅𑀣 𑀯𑀸 𑀯𑀝𑁆𑀝𑀦𑁆𑀢𑀺 𑀓𑀸𑀭𑀡𑀁, 𑀧𑀜𑁆𑀜𑀸𑀧𑀦𑀸𑀬 𑀓𑀸𑀭𑀡𑀁 𑀦𑀢𑁆𑀣𑀻𑀢𑀺. 𑀏𑀢𑁆𑀢𑀸𑀯𑀢𑀸 𑀅𑀲𑁂𑀓𑁆𑀔𑀪𑀽𑀫𑀺𑀯𑀸𑀭𑁄 𑀓𑀣𑀺𑀢𑁄. 𑀘𑀢𑀼𑀢𑁆𑀣𑀁.

𑁫. 𑀲𑀢𑁆𑀢𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁭. 𑀧𑀜𑁆𑀘𑀫𑁂 𑀲𑀢𑁆𑀢𑀝𑁆𑀞𑀸𑀦𑀓𑀼𑀲𑀮𑁄𑀢𑀺 𑀲𑀢𑁆𑀢𑀲𑀼 𑀑𑀓𑀸𑀲𑁂𑀲𑀼 𑀙𑁂𑀓𑁄. 𑀯𑀼𑀲𑀺𑀢𑀯𑀸𑀢𑀺 𑀯𑀼𑀲𑀺𑀢𑀯𑀸𑀲𑁄. 𑀉𑀢𑁆𑀢𑀫𑀧𑀼𑀭𑀺𑀲𑁄𑀢𑀺 𑀲𑁂𑀝𑁆𑀞𑀧𑀼𑀭𑀺𑀲𑁄. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀁 𑀧𑀦 𑀲𑀼𑀢𑁆𑀢𑀁 𑀉𑀲𑁆𑀲𑀤𑀦𑀦𑁆𑀤𑀺𑀬𑀜𑁆𑀘𑁂𑀯 𑀧𑀮𑁄𑀪𑀦𑀻𑀬𑀜𑁆𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀳𑀺 𑀭𑀸𑀚𑀸 𑀯𑀺𑀚𑀺𑀢𑀲𑀗𑁆𑀕𑀸𑀫𑁄 𑀲𑀗𑁆𑀕𑀸𑀫𑁂 𑀯𑀺𑀚𑀬𑀺𑀦𑁄 𑀬𑁄𑀥𑁂 𑀉𑀘𑁆𑀘𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀢𑁂𑀲𑀁 𑀲𑀓𑁆𑀓𑀸𑀭𑀁 𑀓𑀭𑁄𑀢𑀺. 𑀓𑀺𑀁 𑀓𑀸𑀭𑀡𑀸? 𑀏𑀢𑁂𑀲𑀁 𑀲𑀓𑁆𑀓𑀸𑀭𑀁 𑀤𑀺𑀲𑁆𑀯𑀸 𑀲𑁂𑀲𑀸𑀧𑀺 𑀲𑀽𑀭𑀸 𑀪𑀯𑀺𑀢𑀼𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀻𑀢𑀺, 𑀏𑀯𑀫𑁂𑀯 𑀪𑀕𑀯𑀸 𑀅𑀧𑁆𑀧𑀫𑁂𑀬𑁆𑀬𑀁 𑀓𑀸𑀮𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀫𑀳𑀸𑀩𑁄𑀥𑀺𑀫𑀡𑁆𑀟𑁂 𑀓𑀺𑀮𑁂𑀲𑀫𑀸𑀭𑀯𑀺𑀚𑀬𑀁 𑀓𑀢𑁆𑀯𑀸 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀲𑀸𑀯𑀢𑁆𑀣𑀺𑀬𑀁 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀇𑀫𑀁 𑀲𑀼𑀢𑁆𑀢𑀁 𑀤𑁂𑀲𑁂𑀦𑁆𑀢𑁄 𑀔𑀻𑀡𑀸𑀲𑀯𑁂 𑀉𑀓𑁆𑀔𑀺𑀧𑀺𑀢𑁆𑀯𑀸 𑀣𑁄𑀫𑁂𑀲𑀺 𑀯𑀡𑁆𑀡𑁂𑀲𑀺. 𑀓𑀺𑀁 𑀓𑀸𑀭𑀡𑀸? 𑀏𑀯𑀁 𑀅𑀯𑀲𑁂𑀲𑀸 𑀲𑁂𑀓𑁆𑀔𑀧𑀼𑀕𑁆𑀕𑀮𑀸 𑀅𑀭𑀳𑀢𑁆𑀢𑀨𑀮𑀁 𑀧𑀢𑁆𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀻𑀢𑀺. 𑀏𑀯𑀫𑁂𑀢𑀁 𑀲𑀼𑀢𑁆𑀢𑀁 𑀔𑀻𑀡𑀸𑀲𑀯𑀸𑀦𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀲𑀁𑀲𑀺𑀢𑀢𑁆𑀢𑀸 𑀉𑀲𑁆𑀲𑀤𑀦𑀦𑁆𑀤𑀺𑀬𑀁, 𑀲𑁂𑀓𑁆𑀔𑀸𑀦𑀁 𑀧𑀮𑁄𑀪𑀺𑀢𑀢𑁆𑀢𑀸 𑀧𑀮𑁄𑀪𑀦𑀻𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀯𑀁 ¶ 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀢𑁆𑀢𑀝𑁆𑀞𑀸𑀦𑀓𑀼𑀲𑀮𑁄 𑀳𑁄𑀢𑀻𑀢𑀺 𑀏𑀢𑁆𑀢𑀸𑀯𑀢𑀸 𑀘𑁂𑀢𑁆𑀣 𑀫𑀕𑁆𑀕𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀧𑁂𑀢𑁆𑀯𑀸𑀧𑀺 𑀧𑀼𑀦 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀢𑀺𑀯𑀺𑀥𑀽𑀧𑀧𑀭𑀺𑀓𑁆𑀔𑀻 𑀳𑁄𑀢𑀻𑀢𑀺 𑀇𑀤𑀁 ‘‘𑀔𑀻𑀡𑀸𑀲𑀯𑁄 𑀬𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀲𑀢𑀢𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑀺, 𑀢𑀁 𑀲𑀢𑁆𑀢𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸 𑀦 𑀳𑁄𑀢𑀺, 𑀥𑀸𑀢𑀼𑀆𑀤𑀺𑀫𑀢𑁆𑀢𑀫𑁂𑀯 𑀧𑀦 𑀳𑁄𑀢𑀻’’𑀢𑀺 𑀏𑀯𑀁 𑀔𑀻𑀡𑀸𑀲𑀯𑀲𑁆𑀲 𑀲𑀢𑀢𑀯𑀺𑀳𑀸𑀭𑀜𑁆𑀘, ‘‘𑀇𑀫𑁂𑀲𑀼 𑀥𑀫𑁆𑀫𑁂𑀲𑀼 𑀓𑀫𑁆𑀫𑀁 𑀓𑀢𑁆𑀯𑀸 𑀅𑀬𑀁 𑀆𑀕𑀢𑁄’’𑀢𑀺 𑀆𑀕𑀫𑀦𑀻𑀬𑀧𑀝𑀺𑀧𑀤𑀜𑁆𑀘 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀥𑀸𑀢𑀼𑀲𑁄 𑀉𑀧𑀧𑀭𑀺𑀓𑁆𑀔𑀢𑀻𑀢𑀺 𑀥𑀸𑀢𑀼𑀲𑀪𑀸𑀯𑁂𑀦 𑀧𑀲𑁆𑀲𑀢𑀺 𑀑𑀮𑁄𑀓𑁂𑀢𑀺. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀜𑁆𑀘𑀫𑀁.

𑁬. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁮. 𑀙𑀝𑁆𑀞𑁂 ¶ ¶ 𑀓𑁄 𑀅𑀥𑀺𑀧𑁆𑀧𑀬𑀸𑀲𑁄𑀢𑀺 𑀓𑁄 𑀅𑀥𑀺𑀓𑀧𑀬𑁄𑀕𑁄. 𑀅𑀦𑀼𑀧𑁆𑀧𑀦𑁆𑀦𑀲𑁆𑀲𑀸𑀢𑀺 𑀇𑀫𑀜𑁆𑀳𑀺 𑀫𑀕𑁆𑀕𑀁 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀉𑀧𑁆𑀧𑀸𑀤𑁂𑀲𑀺, 𑀅𑀦𑁆𑀢𑀭𑀸 𑀅𑀜𑁆𑀜𑁄 𑀲𑀢𑁆𑀣𑀸 𑀉𑀧𑁆𑀧𑀸𑀤𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀇𑀢𑀺 𑀪𑀕𑀯𑀸 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸 𑀦𑀸𑀫. 𑀦𑀕𑀭𑁄𑀧𑀫𑀲𑁆𑀫𑀺𑀜𑁆𑀳𑀺 𑀅𑀯𑀴𑀜𑁆𑀚𑀦𑀝𑁆𑀞𑀸𑀦𑁂𑀲𑀼 𑀧𑀼𑀭𑀸𑀡𑀫𑀕𑁆𑀕𑁄 𑀚𑀸𑀢𑁄, 𑀇𑀥 𑀅𑀯𑀢𑁆𑀢𑀫𑀸𑀦𑀝𑁆𑀞𑁂𑀦 𑀅𑀦𑀼𑀧𑁆𑀧𑀦𑁆𑀦𑀫𑀕𑁆𑀕𑁄 𑀦𑀸𑀫. 𑀅𑀲𑀜𑁆𑀚𑀸𑀢𑀲𑁆𑀲𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀦𑀓𑁆𑀔𑀸𑀢𑀲𑁆𑀲𑀸𑀢𑀺 𑀅𑀓𑀣𑀺𑀢𑀲𑁆𑀲. 𑀫𑀕𑁆𑀕𑀁 𑀚𑀸𑀦𑀸𑀢𑀻𑀢𑀺 𑀫𑀕𑁆𑀕𑀜𑁆𑀜𑀽. 𑀫𑀕𑁆𑀕𑀁 𑀯𑀺𑀤𑀺𑀢𑀁 𑀧𑀸𑀓𑀝𑀁 𑀅𑀓𑀸𑀲𑀻𑀢𑀺 𑀫𑀕𑁆𑀕𑀯𑀺𑀤𑀽. 𑀫𑀕𑁆𑀕𑁂 𑀘 𑀅𑀫𑀕𑁆𑀕𑁂 𑀘 𑀓𑁄𑀯𑀺𑀤𑁄𑀢𑀺 𑀫𑀕𑁆𑀕𑀓𑁄𑀯𑀺𑀤𑁄. 𑀫𑀕𑁆𑀕𑀸𑀦𑀼𑀕𑀸𑀢𑀺 𑀫𑀕𑁆𑀕𑀁 𑀅𑀦𑀼𑀕𑀘𑁆𑀙𑀦𑁆𑀢𑀸. 𑀧𑀘𑁆𑀙𑀸 𑀲𑀫𑀦𑁆𑀦𑀸𑀕𑀢𑀸𑀢𑀺 𑀅𑀳𑀁 𑀧𑀞𑀫𑀁 𑀕𑀢𑁄, 𑀲𑀸𑀯𑀓𑀸 𑀧𑀘𑁆𑀙𑀸 𑀲𑀫𑀦𑁆𑀦𑀸𑀕𑀢𑀸. 𑀙𑀝𑁆𑀞𑀁.

𑁭. 𑀅𑀦𑀢𑁆𑀢𑀮𑀓𑁆𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁯. 𑀲𑀢𑁆𑀢𑀫𑁂 𑀧𑀜𑁆𑀘𑀯𑀕𑁆𑀕𑀺𑀬𑁂𑀢𑀺 𑀅𑀜𑁆𑀜𑀸𑀲𑀺 𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀸𑀤𑀺𑀓𑁂 𑀧𑀜𑁆𑀘 𑀚𑀦𑁂 𑀧𑀼𑀭𑀸𑀡𑀼𑀧𑀝𑁆𑀞𑀸𑀓𑁂. 𑀆𑀫𑀦𑁆𑀢𑁂𑀲𑀻𑀢𑀺 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀤𑀺𑀯𑀲𑁂 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀢𑁄 𑀧𑀝𑁆𑀞𑀸𑀬 𑀅𑀦𑀼𑀓𑁆𑀓𑀫𑁂𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁂 ‘‘𑀇𑀤𑀸𑀦𑀺 𑀦𑁂𑀲𑀁 𑀆𑀲𑀯𑀓𑁆𑀔𑀬𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀧𑀜𑁆𑀘𑀫𑀺𑀬𑀁 𑀧𑀓𑁆𑀔𑀲𑁆𑀲 𑀆𑀫𑀦𑁆𑀢𑁂𑀲𑀺. 𑀏𑀢𑀤𑀯𑁄𑀘𑀸𑀢𑀺 𑀏𑀢𑀁 ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀢𑁆𑀢𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 𑀅𑀦𑀢𑁆𑀢𑀮𑀓𑁆𑀔𑀡𑀲𑀼𑀢𑁆𑀢𑀁 𑀅𑀯𑁄𑀘. 𑀢𑀢𑁆𑀣 𑀅𑀦𑀢𑁆𑀢𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀅𑀦𑀢𑁆𑀢𑀸. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂𑀢𑀺 𑀇𑀤𑀁 𑀓𑀲𑁆𑀫𑀸 𑀆𑀭𑀤𑁆𑀥𑀁? 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦 𑀅𑀦𑀢𑁆𑀢𑀮𑀓𑁆𑀔𑀡𑀫𑁂𑀯 𑀓𑀣𑀺𑀢𑀁, 𑀦 𑀅𑀦𑀺𑀘𑁆𑀘𑀤𑀼𑀓𑁆𑀔𑀮𑀓𑁆𑀔𑀡𑀸𑀦𑀺, 𑀇𑀤𑀸𑀦𑀺 𑀢𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀲𑀫𑁄𑀥𑀸𑀦𑁂𑀢𑁆𑀯𑀸 𑀢𑀻𑀡𑀺𑀧𑀺 𑀮𑀓𑁆𑀔𑀡𑀸𑀦𑀺 𑀤𑀲𑁆𑀲𑁂𑀢𑀼𑀁 𑀇𑀤𑀫𑀸𑀭𑀤𑁆𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸, 𑀢𑀲𑁆𑀫𑀸. 𑀬𑀁𑀓𑀺𑀜𑁆𑀘𑀺 𑀭𑀽𑀧𑀦𑁆𑀢𑀺𑀆𑀤𑀻𑀲𑀼 𑀯𑀺𑀢𑁆𑀣𑀸𑀭𑀓𑀣𑀸 ¶ 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀧𑀜𑁆𑀜𑀸𑀪𑀸𑀯𑀦𑀸𑀥𑀺𑀓𑀸𑀭𑁂 𑀔𑀦𑁆𑀥𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀸𑀯. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀅𑀦𑀢𑁆𑀢𑀮𑀓𑁆𑀔𑀡𑀫𑁂𑀯 𑀓𑀣𑀺𑀢𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀫𑀳𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁦. 𑀅𑀝𑁆𑀞𑀫𑁂 𑀏𑀓𑀦𑁆𑀢𑀤𑀼𑀓𑁆𑀔𑀦𑁆𑀢𑀺𑀆𑀤𑀻𑀦𑀺 𑀥𑀸𑀢𑀼𑀲𑀁𑀬𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀅𑀝𑁆𑀞𑀫𑀁.

𑁯. 𑀆𑀤𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁧. 𑀦𑀯𑀫𑁂 ¶ ¶ 𑀆𑀤𑀺𑀢𑁆𑀢𑀦𑁆𑀢𑀺 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺 𑀆𑀤𑀺𑀢𑁆𑀢𑀁 𑀧𑀚𑁆𑀚𑀮𑀺𑀢𑀁. 𑀇𑀢𑀺 𑀤𑁆𑀯𑀻𑀲𑀼𑀧𑀺 𑀇𑀫𑁂𑀲𑀼 𑀲𑀼𑀢𑁆𑀢𑁂𑀲𑀼 𑀤𑀼𑀓𑁆𑀔𑀮𑀓𑁆𑀔𑀡𑀫𑁂𑀯 𑀓𑀣𑀺𑀢𑀁. 𑀦𑀯𑀫𑀁.

𑁧𑁦. 𑀦𑀺𑀭𑀼𑀢𑁆𑀢𑀺𑀧𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁨. 𑀤𑀲𑀫𑁂 𑀦𑀺𑀭𑀼𑀢𑁆𑀢𑀺𑀬𑁄𑀯 𑀦𑀺𑀭𑀼𑀢𑁆𑀢𑀺𑀧𑀣𑀸, 𑀅𑀣 𑀯𑀸 𑀦𑀺𑀭𑀼𑀢𑁆𑀢𑀺𑀬𑁄 𑀘 𑀢𑀸 𑀦𑀺𑀭𑀼𑀢𑁆𑀢𑀺𑀯𑀲𑁂𑀦 𑀯𑀺𑀜𑁆𑀜𑀸𑀢𑀩𑁆𑀩𑀸𑀦𑀁 𑀅𑀢𑁆𑀣𑀸𑀦𑀁 𑀧𑀣𑀢𑁆𑀢𑀸 𑀧𑀣𑀸 𑀘𑀸𑀢𑀺 𑀦𑀺𑀭𑀼𑀢𑁆𑀢𑀺𑀧𑀣𑀸. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀻𑀡𑀺𑀧𑀺 𑀘𑁂𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀅𑀲𑀁𑀓𑀺𑀡𑁆𑀡𑀸𑀢𑀺 𑀅𑀯𑀺𑀚𑀳𑀺𑀢𑀸, ‘‘𑀓𑁄 𑀇𑀫𑁂𑀳𑀺 𑀅𑀢𑁆𑀣𑁄’’𑀢𑀺 𑀯𑀢𑁆𑀯𑀸 𑀅𑀙𑀟𑁆𑀟𑀺𑀢𑀸. 𑀅𑀲𑀁𑀓𑀺𑀡𑁆𑀡𑀧𑀼𑀩𑁆𑀩𑀸𑀢𑀺 𑀅𑀢𑀻𑀢𑁂𑀧𑀺 𑀦 𑀚𑀳𑀺𑀢𑀧𑀼𑀩𑁆𑀩𑀸. 𑀦 𑀲𑀁𑀓𑀻𑀬𑀦𑁆𑀢𑀻𑀢𑀺 𑀏𑀢𑀭𑀳𑀺𑀧𑀺 ‘‘𑀓𑀺𑀫𑁂𑀢𑁂𑀳𑀻’’𑀢𑀺 𑀦 𑀙𑀟𑁆𑀟𑀻𑀬𑀦𑁆𑀢𑀺. 𑀦 𑀲𑀁𑀓𑀻𑀬𑀺𑀲𑁆𑀲𑀦𑁆𑀢𑀻𑀢𑀺 𑀅𑀦𑀸𑀕𑀢𑁂𑀧𑀺 𑀦 𑀙𑀟𑁆𑀟𑀻𑀬𑀺𑀲𑁆𑀲𑀦𑁆𑀢𑀺. 𑀅𑀧𑁆𑀧𑀝𑀺𑀓𑀼𑀝𑁆𑀞𑀸𑀢𑀺 𑀅𑀧𑁆𑀧𑀝𑀺𑀩𑀸𑀳𑀺𑀢𑀸. 𑀅𑀢𑀻𑀢𑀦𑁆𑀢𑀺 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀪𑀗𑁆𑀕𑀫𑁂𑀯 𑀯𑀸 𑀅𑀢𑀺𑀓𑁆𑀓𑀦𑁆𑀢𑀁. 𑀦𑀺𑀭𑀼𑀤𑁆𑀥𑀦𑁆𑀢𑀺 𑀤𑁂𑀲𑀦𑁆𑀢𑀭𑀁 𑀅𑀲𑀗𑁆𑀓𑀫𑀺𑀢𑁆𑀯𑀸 𑀢𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀁 𑀯𑀽𑀧𑀲𑀦𑁆𑀢𑀁. 𑀯𑀺𑀧𑀭𑀺𑀡𑀢𑀦𑁆𑀢𑀺 𑀯𑀺𑀧𑀭𑀺𑀡𑀸𑀫𑀁 𑀕𑀢𑀁 𑀦𑀝𑁆𑀞𑀁. 𑀅𑀚𑀸𑀢𑀦𑁆𑀢𑀺 𑀅𑀦𑀼𑀧𑁆𑀧𑀦𑁆𑀦𑀁. 𑀅𑀧𑀸𑀢𑀼𑀪𑀽𑀢𑀦𑁆𑀢𑀺 𑀅𑀧𑀸𑀓𑀝𑀻𑀪𑀽𑀢𑀁.

𑀉𑀓𑁆𑀓𑀮𑀸𑀢𑀺 𑀉𑀓𑁆𑀓𑀮𑀚𑀦𑀧𑀤𑀯𑀸𑀲𑀺𑀦𑁄. 𑀯𑀲𑁆𑀲𑀪𑀜𑁆𑀜𑀸𑀢𑀺 𑀯𑀲𑁆𑀲𑁄 𑀘 𑀪𑀜𑁆𑀜𑁄 𑀘. 𑀤𑁆𑀯𑁂𑀧𑀺 𑀳𑀺 𑀢𑁂 𑀫𑀽𑀮𑀤𑀺𑀝𑁆𑀞𑀺𑀕𑀢𑀺𑀓𑀸. 𑀅𑀳𑁂𑀢𑀼𑀓𑀯𑀸𑀤𑀸𑀢𑀺𑀆𑀤𑀻𑀲𑀼 ‘‘𑀦𑀢𑁆𑀣𑀺 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄’’𑀢𑀺 𑀕𑀳𑀺𑀢𑀢𑁆𑀢𑀸 𑀅𑀳𑁂𑀢𑀼𑀓𑀯𑀸𑀤𑀸. ‘‘𑀓𑀭𑁄𑀢𑁄 𑀦 𑀓𑀭𑀻𑀬𑀢𑀺 𑀧𑀸𑀧’’𑀦𑁆𑀢𑀺 𑀕𑀳𑀺𑀢𑀢𑁆𑀢𑀸 𑀅𑀓𑀺𑀭𑀺𑀬𑀯𑀸𑀤𑀸. ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀕𑀳𑀡𑀢𑁄 𑀦𑀢𑁆𑀣𑀺𑀓𑀯𑀸𑀤𑀸. 𑀢𑀢𑁆𑀣 𑀇𑀫𑁂 𑀤𑁆𑀯𑁂 𑀚𑀦𑀸, 𑀢𑀺𑀲𑁆𑀲𑁄 𑀤𑀺𑀝𑁆𑀞𑀺𑀬𑁄, 𑀓𑀺𑀁 𑀏𑀓𑁂𑀓𑀲𑁆𑀲 𑀤𑀺𑀬𑀟𑁆𑀠𑀸 𑀳𑁄𑀢𑀻𑀢𑀺? 𑀦 𑀢𑀣𑀸, 𑀬𑀣𑀸 𑀧𑀦 𑀏𑀓𑁄 𑀪𑀺𑀓𑁆𑀔𑀼 𑀧𑀝𑀺𑀧𑀸𑀝𑀺𑀬𑀸 𑀘𑀢𑁆𑀢𑀸𑀭𑀺𑀧𑀺 𑀛𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑀺 ¶ , 𑀏𑀯𑀫𑁂𑀢𑁆𑀣 𑀏𑀓𑁂𑀓𑁄 𑀢𑀺𑀲𑁆𑀲𑁄𑀧𑀺 𑀤𑀺𑀝𑁆𑀞𑀺𑀬𑁄 𑀦𑀺𑀩𑁆𑀩𑀢𑁆𑀢𑁂𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. ‘‘𑀦𑀢𑁆𑀣𑀺 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀆𑀳𑀭𑀦𑁆𑀢𑀲𑁆𑀲 𑀅𑀪𑀺𑀦𑀦𑁆𑀤𑀦𑁆𑀢𑀲𑁆𑀲 𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲 𑀫𑀕𑁆𑀕𑀤𑀲𑁆𑀲𑀦𑀁 𑀯𑀺𑀬 𑀳𑁄𑀢𑀺. 𑀲𑁄 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺, 𑀲𑁄 𑀏𑀓𑀦𑁆𑀢𑀓𑀸𑀴𑀓𑁄𑀢𑀺 ¶ 𑀯𑀼𑀘𑁆𑀘𑀢𑀺. 𑀬𑀣𑀸 𑀧𑀦 𑀅𑀳𑁂𑀢𑀼𑀓𑀤𑀺𑀝𑁆𑀞𑀺𑀬𑀁, 𑀏𑀯𑀁 ‘‘𑀓𑀭𑁄𑀢𑁄 𑀦 𑀓𑀭𑀻𑀬𑀢𑀺 𑀧𑀸𑀧𑀁, 𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺 𑀇𑀫𑁂𑀲𑀼𑀧𑀺 𑀞𑀸𑀦𑁂𑀲𑀼 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺.

𑀦 𑀕𑀭𑀳𑀺𑀢𑀩𑁆𑀩𑀁 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑀁 𑀅𑀫𑀜𑁆𑀜𑀺𑀁𑀲𑀽𑀢𑀺 𑀏𑀢𑁆𑀣 ‘‘𑀬𑀤𑁂𑀢𑀁 𑀅𑀢𑀻𑀢𑀁 𑀦𑀸𑀫, 𑀦𑀬𑀺𑀤𑀁 𑀅𑀢𑀻𑀢𑀁, 𑀇𑀤𑀫𑀲𑁆𑀲 𑀅𑀦𑀸𑀕𑀢𑀁 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸’’𑀢𑀺 𑀯𑀤𑀦𑁆𑀢𑁄 𑀕𑀭𑀳𑀢𑀺 𑀦𑀸𑀫. 𑀢𑀢𑁆𑀣 𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀓𑀺𑀁 𑀇𑀫𑀺𑀦𑀸 𑀕𑀭𑀳𑀺𑀢𑁂𑀦𑀸’’𑀢𑀺? 𑀯𑀤𑀦𑁆𑀢𑁄 ¶ 𑀧𑀝𑀺𑀓𑁆𑀓𑁄𑀲𑀢𑀺 𑀦𑀸𑀫. 𑀇𑀫𑁂 𑀧𑀦 𑀦𑀺𑀭𑀼𑀢𑁆𑀢𑀺𑀧𑀣𑁂 𑀢𑁂𑀧𑀺 𑀅𑀘𑁆𑀘𑀦𑁆𑀢𑀓𑀸𑀴𑀓𑀸 𑀤𑀺𑀝𑁆𑀞𑀺𑀕𑀢𑀺𑀓𑀸 𑀦 𑀕𑀭𑀳𑀺𑀢𑀩𑁆𑀩𑁂 𑀦 𑀧𑀝𑀺𑀓𑁆𑀓𑁄𑀲𑀺𑀢𑀩𑁆𑀩𑁂 𑀫𑀜𑁆𑀜𑀺𑀁𑀲𑀼. 𑀅𑀢𑀻𑀢𑀁 𑀧𑀦 𑀅𑀢𑀻𑀢𑀫𑁂𑀯, 𑀅𑀦𑀸𑀕𑀢𑀁 𑀅𑀦𑀸𑀕𑀢𑀫𑁂𑀯, 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁂𑀯 𑀓𑀣𑀬𑀺𑀁𑀲𑀼. 𑀦𑀺𑀦𑁆𑀤𑀸𑀖𑀝𑁆𑀝𑀦𑀩𑁆𑀬𑀸𑀭𑁄𑀲𑀉𑀧𑀸𑀭𑀫𑁆𑀪𑀪𑀬𑀸𑀢𑀺 𑀯𑀺𑀜𑁆𑀜𑀽𑀦𑀁 𑀲𑀦𑁆𑀢𑀺𑀓𑀸 𑀦𑀺𑀦𑁆𑀤𑀸𑀪𑀬𑁂𑀦 𑀘 𑀖𑀝𑁆𑀝𑀦𑀪𑀬𑁂𑀦 𑀘 𑀤𑁄𑀲𑀸𑀭𑁄𑀧𑀦𑀪𑀬𑁂𑀦 𑀘 𑀉𑀧𑀸𑀭𑀫𑁆𑀪𑀪𑀬𑁂𑀦 𑀘. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀘𑀢𑀼𑀪𑀽𑀫𑀺𑀓𑀔𑀦𑁆𑀥𑀸𑀦𑀁 𑀧𑀡𑁆𑀡𑀢𑁆𑀢𑀺 𑀓𑀣𑀺𑀢𑀸𑀢𑀺. 𑀤𑀲𑀫𑀁.

𑀉𑀧𑀬𑀯𑀕𑁆𑀕𑁄 𑀙𑀝𑁆𑀞𑁄.

𑁭. 𑀅𑀭𑀳𑀦𑁆𑀢𑀯𑀕𑁆𑀕𑁄

𑁧. 𑀉𑀧𑀸𑀤𑀺𑀬𑀫𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁩. 𑀅𑀭𑀳𑀦𑁆𑀢𑀯𑀕𑁆𑀕𑀲𑁆𑀲 𑀧𑀞𑀫𑁂 𑀉𑀧𑀸𑀤𑀺𑀬𑀫𑀸𑀦𑁄𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀕𑀡𑁆𑀳𑀫𑀸𑀦𑁄. 𑀩𑀤𑁆𑀥𑁄 𑀫𑀸𑀭𑀲𑁆𑀲𑀸𑀢𑀺 𑀫𑀸𑀭𑀲𑁆𑀲 𑀧𑀸𑀲𑁂𑀦 𑀩𑀤𑁆𑀥𑁄 𑀦𑀸𑀫. 𑀫𑀼𑀢𑁆𑀢𑁄 𑀧𑀸𑀧𑀺𑀫𑀢𑁄𑀢𑀺 𑀧𑀸𑀧𑀺𑀫𑀢𑁄 𑀧𑀸𑀲𑁂𑀦 𑀫𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀧𑀞𑀫𑀁.

𑁨. 𑀫𑀜𑁆𑀜𑀫𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁪. 𑀤𑀼𑀢𑀺𑀬𑁂 𑀫𑀜𑁆𑀜𑀫𑀸𑀦𑁄𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀳𑀺 𑀫𑀜𑁆𑀜𑀫𑀸𑀦𑁄. 𑀤𑀼𑀢𑀺𑀬𑀁.

𑁩. 𑀅𑀪𑀺𑀦𑀦𑁆𑀤𑀫𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁫. 𑀢𑀢𑀺𑀬𑁂 ¶ 𑀅𑀪𑀺𑀦𑀦𑁆𑀤𑀫𑀸𑀦𑁄𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀅𑀪𑀺𑀦𑀦𑁆𑀤𑀦𑀸𑀳𑀺𑀬𑁂𑀯 𑀅𑀪𑀺𑀦𑀦𑁆𑀤𑀫𑀸𑀦𑁄. 𑀢𑀢𑀺𑀬𑀁.

𑁪-𑁫. 𑀅𑀦𑀺𑀘𑁆𑀘𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁬𑁬-𑁬𑁮. 𑀘𑀢𑀼𑀢𑁆𑀣𑁂 𑀙𑀦𑁆𑀤𑁄𑀢𑀺 𑀢𑀡𑁆𑀳𑀸𑀙𑀦𑁆𑀤𑁄. 𑀧𑀜𑁆𑀘𑀫𑀙𑀝𑁆𑀞𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀘𑀢𑀼𑀢𑁆𑀣𑀸𑀤𑀻𑀦𑀺.

𑁭. 𑀅𑀦𑀢𑁆𑀢𑀦𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁯. 𑀲𑀢𑁆𑀢𑀫𑁂 ¶ 𑀅𑀦𑀢𑁆𑀢𑀦𑀺𑀬𑀦𑁆𑀢𑀺 𑀦 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁, 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀪𑀸𑀯𑁂𑀦 𑀲𑀼𑀜𑁆𑀜𑀢𑀦𑁆𑀢𑀺 𑀅𑀢𑁆𑀣𑁄. 𑀲𑀢𑁆𑀢𑀫𑀁.

𑁮-𑁧𑁦. 𑀭𑀚𑀦𑀻𑀬𑀲𑀡𑁆𑀞𑀺𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁦-𑁭𑁨. 𑀅𑀝𑁆𑀞𑀫𑁂 ¶ 𑀭𑀚𑀦𑀻𑀬𑀲𑀡𑁆𑀞𑀺𑀢𑀦𑁆𑀢𑀺 𑀭𑀚𑀦𑀻𑀬𑁂𑀦 𑀆𑀓𑀸𑀭𑁂𑀦 𑀲𑀡𑁆𑀞𑀺𑀢𑀁, 𑀭𑀸𑀕𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦 𑀞𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀦𑀯𑀫𑀤𑀲𑀫𑀸𑀦𑀺 𑀭𑀸𑀳𑀼𑀮𑀲𑀁𑀬𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺. 𑀅𑀝𑁆𑀞𑀫𑀸𑀤𑀻𑀦𑀺.

𑀅𑀭𑀳𑀦𑁆𑀢𑀯𑀕𑁆𑀕𑁄 𑀲𑀢𑁆𑀢𑀫𑁄.

𑁮. 𑀔𑀚𑁆𑀚𑀦𑀻𑀬𑀯𑀕𑁆𑀕𑁄

𑁧-𑁩. 𑀅𑀲𑁆𑀲𑀸𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁩-𑁭𑁫. 𑀔𑀚𑁆𑀚𑀦𑀻𑀬𑀯𑀕𑁆𑀕𑀲𑁆𑀲 ¶ 𑀆𑀤𑀺𑀢𑁄 𑀢𑀻𑀲𑀼 𑀲𑀼𑀢𑁆𑀢𑁂𑀲𑀼 𑀘𑀢𑀼𑀲𑀘𑁆𑀘𑀫𑁂𑀯 𑀓𑀣𑀺𑀢𑀁. 𑀧𑀞𑀫𑀸𑀤𑀻𑀦𑀺.

𑁪. 𑀅𑀭𑀳𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁬. 𑀘𑀢𑀼𑀢𑁆𑀣𑁂 𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀯𑀸𑀲𑀸𑀢𑀺, 𑀪𑀺𑀓𑁆𑀔𑀯𑁂, 𑀬𑀢𑁆𑀢𑀓𑀸 𑀲𑀢𑁆𑀢𑀸𑀯𑀸𑀲𑀸 𑀦𑀸𑀫 𑀅𑀢𑁆𑀣𑀺. 𑀬𑀸𑀯𑀢𑀸 𑀪𑀯𑀕𑁆𑀕𑀦𑁆𑀢𑀺 𑀬𑀢𑁆𑀢𑀓𑀁 𑀪𑀯𑀕𑁆𑀕𑀁 𑀦𑀸𑀫 𑀅𑀢𑁆𑀣𑀺. 𑀏𑀢𑁂 𑀅𑀕𑁆𑀕𑀸 𑀏𑀢𑁂 𑀲𑁂𑀝𑁆𑀞𑀸𑀢𑀺 𑀏𑀢𑁂 𑀅𑀕𑁆𑀕𑀪𑀽𑀢𑀸 𑀘𑁂𑀯 𑀲𑁂𑀝𑁆𑀞𑀪𑀽𑀢𑀸 𑀘. 𑀬𑀤𑀺𑀤𑀁 𑀅𑀭𑀳𑀦𑁆𑀢𑁄𑀢𑀺 𑀬𑁂 𑀇𑀫𑁂 𑀅𑀭𑀳𑀦𑁆𑀢𑁄 𑀦𑀸𑀫. 𑀇𑀤𑀫𑁆𑀧𑀺 𑀲𑀼𑀢𑁆𑀢𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀉𑀲𑁆𑀲𑀤𑀦𑀦𑁆𑀤𑀺𑀬𑀜𑁆𑀘 𑀧𑀮𑁄𑀪𑀦𑀻𑀬𑀜𑁆𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀣𑀸𑀧𑀭𑀁 𑀏𑀢𑀤𑀯𑁄𑀘𑀸𑀢𑀺 𑀢𑀤𑀢𑁆𑀣𑀧𑀭𑀺𑀤𑀻𑀧𑀦𑀸𑀳𑀺 𑀘𑁂𑀯 𑀯𑀺𑀲𑁂𑀲𑀢𑁆𑀣𑀧𑀭𑀺𑀤𑀻𑀧𑀦𑀸𑀳𑀺 𑀘 𑀕𑀸𑀣𑀸𑀳𑀺 𑀏𑀢𑀁 ‘‘𑀲𑀼𑀔𑀺𑀦𑁄 𑀯𑀢 𑀅𑀭𑀳𑀦𑁆𑀢𑁄’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀢𑀢𑁆𑀣 𑀲𑀼𑀔𑀺𑀦𑁄𑀢𑀺 𑀛𑀸𑀦𑀲𑀼𑀔𑁂𑀦 𑀫𑀕𑁆𑀕𑀲𑀼𑀔𑁂𑀦 𑀨𑀮𑀲𑀼𑀔𑁂𑀦 𑀘 𑀲𑀼𑀔𑀺𑀢𑀸. 𑀢𑀡𑁆𑀳𑀸 𑀢𑁂𑀲𑀁 𑀦 𑀯𑀺𑀚𑁆𑀚𑀢𑀻𑀢𑀺 𑀢𑁂𑀲𑀁 𑀅𑀧𑀸𑀬𑀤𑀼𑀓𑁆𑀔𑀚𑀦𑀺𑀓𑀸 𑀢𑀡𑁆𑀳𑀸 𑀦 𑀯𑀚𑁆𑀚𑀢𑀺. 𑀏𑀯𑀁 𑀢𑁂 𑀇𑀫𑀲𑁆𑀲𑀧𑀺 𑀢𑀡𑁆𑀳𑀸𑀫𑀽𑀮𑀓𑀲𑁆𑀲 𑀅𑀪𑀸𑀯𑁂𑀦 𑀲𑀼𑀔𑀺𑀢𑀸𑀯. 𑀅𑀲𑁆𑀫𑀺𑀫𑀸𑀦𑁄 𑀲𑀫𑀼𑀘𑁆𑀙𑀺𑀦𑁆𑀦𑁄𑀢𑀺 𑀦𑀯𑀯𑀺𑀥𑁄 𑀅𑀲𑁆𑀫𑀺𑀫𑀸𑀦𑁄 ¶ 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑁄. 𑀫𑁄𑀳𑀚𑀸𑀮𑀁 𑀧𑀤𑀸𑀮𑀺𑀢𑀦𑁆𑀢𑀺 𑀜𑀸𑀡𑁂𑀦 𑀅𑀯𑀺𑀚𑁆𑀚𑀸𑀚𑀸𑀮𑀁 𑀨𑀸𑀮𑀺𑀢𑀁.

𑀅𑀦𑁂𑀚𑀦𑁆𑀢𑀺 𑀏𑀚𑀸𑀲𑀗𑁆𑀔𑀸𑀢𑀸𑀬 𑀢𑀡𑁆𑀳𑀸𑀬 𑀧𑀳𑀸𑀦𑀪𑀽𑀢𑀁 𑀅𑀭𑀳𑀢𑁆𑀢𑀁. 𑀅𑀦𑀼𑀧𑀮𑀺𑀢𑁆𑀢𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀮𑁂𑀧𑁂𑀳𑀺 𑀅𑀮𑀺𑀢𑁆𑀢𑀸. 𑀩𑁆𑀭𑀳𑁆𑀫𑀪𑀽𑀢𑀸𑀢𑀺 𑀲𑁂𑀝𑁆𑀞𑀪𑀽𑀢𑀸. 𑀧𑀭𑀺𑀜𑁆𑀜𑀸𑀬𑀸𑀢𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀺𑀢𑁆𑀯𑀸. 𑀲𑀢𑁆𑀢𑀲𑀤𑁆𑀥𑀫𑁆𑀫𑀕𑁄𑀘𑀭𑀸𑀢𑀺 𑀲𑀤𑁆𑀥𑀸 𑀳𑀺𑀭𑀻 ¶ 𑀑𑀢𑁆𑀢𑀧𑁆𑀧𑀁 𑀩𑀸𑀳𑀼𑀲𑀘𑁆𑀘𑀁 𑀆𑀭𑀤𑁆𑀥𑀯𑀻𑀭𑀺𑀬𑀢𑀸 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀢𑀸 𑀧𑀜𑁆𑀜𑀸𑀢𑀺 𑀇𑀫𑁂 𑀲𑀢𑁆𑀢 𑀲𑀤𑁆𑀥𑀫𑁆𑀫𑀸 𑀕𑁄𑀘𑀭𑁄 𑀏𑀢𑁂𑀲𑀦𑁆𑀢𑀺 𑀲𑀢𑁆𑀢𑀲𑀤𑁆𑀥𑀫𑁆𑀫𑀕𑁄𑀘𑀭𑀸.

𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑀸𑀢𑀺 𑀲𑀢𑁆𑀢𑀳𑀺 𑀩𑁄𑀚𑁆𑀛𑀗𑁆𑀕𑀭𑀢𑀦𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀅𑀦𑀼𑀯𑀺𑀘𑀭𑀦𑁆𑀢𑀻𑀢𑀺 𑀮𑁄𑀓𑀺𑀬𑀫𑀳𑀸𑀚𑀦𑀸𑀧𑀺 ¶ 𑀅𑀦𑀼𑀯𑀺𑀘𑀭𑀦𑁆𑀢𑀺𑀬𑁂𑀯. 𑀇𑀥 𑀧𑀦 𑀔𑀻𑀡𑀸𑀲𑀯𑀸𑀦𑀁 𑀦𑀺𑀭𑀸𑀲𑀗𑁆𑀓𑀘𑀸𑀭𑁄 𑀦𑀸𑀫 𑀕𑀳𑀺𑀢𑁄. 𑀢𑁂𑀦𑁂𑀯𑀸𑀳 ‘‘𑀧𑀳𑀻𑀦𑀪𑀬𑀪𑁂𑀭𑀯𑀸’’𑀢𑀺. 𑀢𑀢𑁆𑀣 𑀪𑀬𑀁 𑀪𑀬𑀫𑁂𑀯, 𑀪𑁂𑀭𑀯𑀁 𑀩𑀮𑀯𑀪𑀬𑀁. 𑀤𑀲𑀳𑀗𑁆𑀕𑁂𑀳𑀺 𑀲𑀫𑁆𑀧𑀦𑁆𑀦𑀸𑀢𑀺 𑀅𑀲𑁂𑀓𑁆𑀔𑁂𑀳𑀺 𑀤𑀲𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀸. 𑀫𑀳𑀸𑀦𑀸𑀕𑀸𑀢𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀫𑀳𑀸𑀦𑀸𑀕𑀸. 𑀲𑀫𑀸𑀳𑀺𑀢𑀸𑀢𑀺 𑀉𑀧𑀘𑀸𑀭𑀧𑁆𑀧𑀦𑀸𑀳𑀺 𑀲𑀫𑀸𑀳𑀺𑀢𑀸. 𑀢𑀡𑁆𑀳𑀸 𑀢𑁂𑀲𑀁 𑀦 𑀯𑀺𑀚𑁆𑀚𑀢𑀻𑀢𑀺 ‘‘𑀊𑀦𑁄 𑀮𑁄𑀓𑁄 𑀅𑀢𑀺𑀢𑁆𑀢𑁄 𑀢𑀡𑁆𑀳𑀸𑀤𑀸𑀲𑁄𑀢𑀺 𑀔𑁄, 𑀫𑀳𑀸𑀭𑀸𑀚, 𑀢𑁂𑀦 𑀪𑀕𑀯𑀢𑀸’’𑀢𑀺 (𑀫. 𑀦𑀺. 𑁨.𑁩𑁦𑁫) 𑀏𑀯𑀁 𑀯𑀼𑀢𑁆𑀢𑀸 𑀤𑀸𑀲𑀓𑀸𑀭𑀺𑀓𑀸 𑀢𑀡𑁆𑀳𑀸𑀧𑀺 𑀢𑁂𑀲𑀁 𑀦𑀢𑁆𑀣𑀺. 𑀇𑀫𑀺𑀦𑀸 𑀔𑀻𑀡𑀸𑀲𑀯𑀸𑀦𑀁 𑀪𑀼𑀚𑀺𑀲𑁆𑀲𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀅𑀲𑁂𑀔𑀜𑀸𑀡𑀦𑁆𑀢𑀺 𑀅𑀭𑀳𑀢𑁆𑀢𑀨𑀮𑀜𑀸𑀡𑀁. 𑀅𑀦𑁆𑀢𑀺𑀫𑁄𑀬𑀁 𑀲𑀫𑀼𑀲𑁆𑀲𑀬𑁄𑀢𑀺 𑀧𑀘𑁆𑀙𑀺𑀫𑁄 𑀅𑀬𑀁 𑀅𑀢𑁆𑀢𑀪𑀸𑀯𑁄. 𑀬𑁄 𑀲𑀸𑀭𑁄 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲𑀸𑀢𑀺 𑀲𑀸𑀭𑁄 𑀦𑀸𑀫 𑀨𑀮𑀁. 𑀢𑀲𑁆𑀫𑀺𑀁 𑀅𑀧𑀭𑀧𑀘𑁆𑀘𑀬𑀸𑀢𑀺 𑀢𑀲𑁆𑀫𑀺𑀁 𑀅𑀭𑀺𑀬𑀨𑀮𑁂, 𑀦 𑀅𑀜𑁆𑀜𑀁 𑀧𑀢𑁆𑀢𑀺𑀬𑀸𑀬𑀦𑁆𑀢𑀺, 𑀧𑀘𑁆𑀘𑀓𑁆𑀔𑀢𑁄𑀯 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑀸. 𑀯𑀺𑀥𑀸𑀲𑀼 𑀦 𑀯𑀺𑀓𑀫𑁆𑀧𑀦𑁆𑀢𑀻𑀢𑀺 𑀢𑀻𑀲𑀼 𑀫𑀸𑀦𑀓𑁄𑀝𑁆𑀞𑀸𑀲𑁂𑀲𑀼 𑀦 𑀯𑀺𑀓𑀫𑁆𑀧𑀦𑁆𑀢𑀺. 𑀤𑀦𑁆𑀢𑀪𑀽𑀫𑀺𑀦𑁆𑀢𑀺 𑀅𑀭𑀳𑀢𑁆𑀢𑀁. 𑀯𑀺𑀚𑀺𑀢𑀸𑀯𑀺𑀦𑁄𑀢𑀺 𑀭𑀸𑀕𑀸𑀤𑀬𑁄 𑀯𑀺𑀚𑁂𑀢𑁆𑀯𑀸 𑀞𑀺𑀢𑀸.

𑀉𑀤𑁆𑀥𑀦𑁆𑀢𑀺𑀆𑀤𑀻𑀲𑀼 𑀉𑀤𑁆𑀥𑀁 𑀯𑀼𑀘𑁆𑀘𑀢𑀺 𑀓𑁂𑀲𑀫𑀢𑁆𑀣𑀓𑁄, 𑀅𑀧𑀸𑀘𑀻𑀦𑀁 𑀧𑀸𑀤𑀢𑀮𑀁, 𑀢𑀺𑀭𑀺𑀬𑀁 𑀯𑁂𑀫𑀚𑁆𑀛𑀁. 𑀉𑀤𑁆𑀥𑀁 𑀯𑀸 𑀅𑀢𑀻𑀢𑀁, 𑀅𑀧𑀸𑀘𑀻𑀦𑀁 𑀅𑀦𑀸𑀕𑀢𑀁, 𑀢𑀺𑀭𑀺𑀬𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁. 𑀉𑀤𑁆𑀥𑀁 𑀯𑀸 𑀯𑀼𑀘𑁆𑀘𑀢𑀺 𑀤𑁂𑀯𑀮𑁄𑀓𑁄, 𑀅𑀧𑀸𑀘𑀻𑀦𑀁 𑀅𑀧𑀸𑀬𑀮𑁄𑀓𑁄, 𑀢𑀺𑀭𑀺𑀬𑀁 𑀫𑀦𑀼𑀲𑁆𑀲𑀮𑁄𑀓𑁄. 𑀦𑀦𑁆𑀤𑀻 𑀢𑁂𑀲𑀁 𑀦 𑀯𑀺𑀚𑁆𑀚𑀢𑀻𑀢𑀺 𑀏𑀢𑁂𑀲𑀼 𑀞𑀸𑀦𑁂𑀲𑀼 𑀲𑀗𑁆𑀔𑁂𑀧𑀢𑁄 𑀯𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀔𑀦𑁆𑀥𑁂𑀲𑀼 𑀢𑁂𑀲𑀁 𑀢𑀡𑁆𑀳𑀸 𑀦𑀢𑁆𑀣𑀺. 𑀇𑀥 𑀯𑀝𑁆𑀝𑀫𑀽𑀮𑀓𑀢𑀡𑁆𑀳𑀸𑀬 ¶ 𑀅𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀩𑀼𑀤𑁆𑀥𑀸𑀢𑀺 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑀸.

𑀇𑀤𑀁 𑀧𑀦𑁂𑀢𑁆𑀣 𑀲𑀻𑀳𑀦𑀸𑀤𑀲𑀫𑁄𑀥𑀸𑀦𑀁 𑁋 ‘‘𑀯𑀺𑀫𑀼𑀢𑁆𑀢𑀺𑀲𑀼𑀔𑁂𑀦𑀫𑁆𑀳𑀸 𑀲𑀼𑀔𑀺𑀢𑀸, 𑀤𑀼𑀓𑁆𑀔𑀚𑀦𑀺𑀓𑀸 𑀦𑁄 𑀢𑀡𑁆𑀳𑀸 𑀧𑀳𑀻𑀦𑀸, 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀜𑁆𑀜𑀸𑀢𑀸, 𑀤𑀸𑀲𑀓𑀸𑀭𑀺𑀓𑀢𑀡𑁆𑀳𑀸 𑀘𑁂𑀯 𑀯𑀝𑁆𑀝𑀫𑀽𑀮𑀺𑀓𑀢𑀡𑁆𑀳𑀸 𑀘 𑀧𑀳𑀻𑀦𑀸, 𑀅𑀦𑀼𑀢𑁆𑀢𑀭𑀫𑁆𑀳𑀸 𑀅𑀲𑀤𑀺𑀲𑀸, 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑀸’’𑀢𑀺 𑀪𑀯𑀧𑀺𑀝𑁆𑀞𑁂 𑀞𑀢𑁆𑀯𑀸 𑀅𑀪𑀻𑀢𑀦𑀸𑀤𑀲𑀗𑁆𑀔𑀸𑀢𑀁 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑀺 𑀔𑀻𑀡𑀸𑀲𑀯𑀸𑀢𑀺. 𑀘𑀢𑀼𑀢𑁆𑀣𑀁.

𑁫. 𑀤𑀼𑀢𑀺𑀬𑀅𑀭𑀳𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁭. 𑀧𑀜𑁆𑀘𑀫𑀁 ¶ 𑀯𑀺𑀦𑀸 𑀕𑀸𑀣𑀸𑀳𑀺 𑀲𑀼𑀤𑁆𑀥𑀺𑀓𑀫𑁂𑀯 𑀓𑀢𑁆𑀯𑀸 𑀓𑀣𑀺𑀬𑀫𑀸𑀦𑀁 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑁂𑀦 𑀯𑀼𑀢𑁆𑀢𑀁. 𑀧𑀜𑁆𑀘𑀫𑀁.

𑁬. 𑀲𑀻𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁮. 𑀙𑀝𑁆𑀞𑁂 ¶ 𑀲𑀻𑀳𑁄𑀢𑀺 𑀘𑀢𑁆𑀢𑀸𑀭𑁄 𑀲𑀻𑀳𑀸 𑁋 𑀢𑀺𑀡𑀲𑀻𑀳𑁄, 𑀓𑀸𑀴𑀲𑀻𑀳𑁄, 𑀧𑀡𑁆𑀟𑀼𑀲𑀻𑀳𑁄, 𑀓𑁂𑀲𑀭𑀲𑀻𑀳𑁄𑀢𑀺. 𑀢𑁂𑀲𑀼 𑀢𑀺𑀡𑀲𑀻𑀳𑁄 𑀓𑀧𑁄𑀢𑀯𑀡𑁆𑀡𑀕𑀸𑀯𑀺𑀲𑀤𑀺𑀲𑁄 𑀢𑀺𑀡𑀪𑀓𑁆𑀔𑁄 𑀘 𑀳𑁄𑀢𑀺. 𑀓𑀸𑀴𑀲𑀻𑀳𑁄 𑀓𑀸𑀴𑀕𑀸𑀯𑀺𑀲𑀤𑀺𑀲𑁄 𑀢𑀺𑀡𑀪𑀓𑁆𑀔𑁄𑀬𑁂𑀯. 𑀧𑀡𑁆𑀟𑀼𑀲𑀻𑀳𑁄 𑀧𑀡𑁆𑀟𑀼𑀧𑀮𑀸𑀲𑀯𑀡𑁆𑀡𑀕𑀸𑀯𑀺𑀲𑀤𑀺𑀲𑁄 𑀫𑀁𑀲𑀪𑀓𑁆𑀔𑁄. 𑀓𑁂𑀲𑀭𑀲𑀻𑀳𑁄 𑀮𑀸𑀔𑀸𑀭𑀲𑀧𑀭𑀺𑀓𑀫𑁆𑀫𑀓𑀢𑁂𑀦𑁂𑀯 𑀫𑀼𑀔𑁂𑀦 𑀅𑀕𑁆𑀕𑀦𑀗𑁆𑀕𑀼𑀝𑁆𑀞𑁂𑀦 𑀘𑀢𑀽𑀳𑀺 𑀘 𑀧𑀸𑀤𑀧𑀭𑀺𑀬𑀦𑁆𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄, 𑀫𑀢𑁆𑀣𑀓𑀢𑁄𑀧𑀺𑀲𑁆𑀲 𑀧𑀝𑁆𑀞𑀸𑀬 𑀮𑀸𑀔𑀸𑀢𑀽𑀮𑀺𑀓𑀸𑀬 𑀓𑀢𑁆𑀯𑀸 𑀯𑀺𑀬 𑀢𑀺𑀲𑁆𑀲𑁄 𑀭𑀸𑀚𑀺𑀬𑁄 𑀧𑀺𑀝𑁆𑀞𑀺𑀫𑀚𑁆𑀛𑁂𑀦 𑀕𑀦𑁆𑀢𑁆𑀯𑀸 𑀅𑀦𑁆𑀢𑀭𑀲𑀢𑁆𑀣𑀺𑀫𑁆𑀳𑀺 𑀤𑀓𑁆𑀔𑀺𑀡𑀸𑀯𑀢𑁆𑀢𑀸 𑀳𑀼𑀢𑁆𑀯𑀸 𑀞𑀺𑀢𑀸, 𑀔𑀦𑁆𑀥𑁂 𑀧𑀦𑀲𑁆𑀲 𑀲𑀢𑀲𑀳𑀲𑁆𑀲𑀕𑁆𑀖𑀦𑀺𑀓𑀓𑀫𑁆𑀩𑀮𑀧𑀭𑀺𑀓𑁆𑀔𑁂𑀧𑁄 𑀯𑀺𑀬 𑀓𑁂𑀲𑀭𑀪𑀸𑀭𑁄 𑀳𑁄𑀢𑀺, 𑀅𑀯𑀲𑁂𑀲𑀝𑁆𑀞𑀸𑀦𑀁 𑀧𑀭𑀺𑀲𑀼𑀤𑁆𑀥𑀁 𑀲𑀸𑀮𑀺𑀧𑀺𑀝𑁆𑀞𑀲𑀗𑁆𑀔𑀘𑀼𑀡𑁆𑀡𑀧𑀺𑀘𑀼𑀯𑀡𑁆𑀡𑀁 𑀳𑁄𑀢𑀺. 𑀇𑀫𑁂𑀲𑀼 𑀘𑀢𑀽𑀲𑀼 𑀲𑀻𑀳𑁂𑀲𑀼 𑀅𑀬𑀁 𑀓𑁂𑀲𑀭𑀲𑀻𑀳𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄.

𑀫𑀺𑀕𑀭𑀸𑀚𑀸𑀢𑀺 𑀫𑀺𑀕𑀕𑀡𑀲𑁆𑀲 𑀭𑀸𑀚𑀸. 𑀆𑀲𑀬𑀸𑀢𑀺 𑀯𑀲𑀦𑀝𑁆𑀞𑀸𑀦𑀢𑁄 𑀲𑀼𑀯𑀡𑁆𑀡𑀕𑀼𑀳𑀢𑁄 𑀯𑀸 𑀭𑀚𑀢𑀫𑀡𑀺𑀨𑀮𑀺𑀓𑀫𑀦𑁄𑀲𑀺𑀮𑀸𑀕𑀼𑀳𑀢𑁄 𑀯𑀸 𑀦𑀺𑀓𑁆𑀔𑀫𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀓𑁆𑀔𑀫𑀫𑀸𑀦𑁄 𑀧𑀦𑁂𑀲 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀦𑀺𑀓𑁆𑀔𑀫𑀢𑀺 𑀅𑀦𑁆𑀥𑀓𑀸𑀭𑀧𑀻𑀴𑀺𑀢𑁄 𑀯𑀸 𑀆𑀮𑁄𑀓𑀢𑁆𑀣𑀸𑀬, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀧𑀻𑀴𑀺𑀢𑁄 𑀯𑀸 𑀢𑁂𑀲𑀁 𑀯𑀺𑀲𑁆𑀲𑀚𑁆𑀚𑀦𑀢𑁆𑀣𑀸𑀬, 𑀚𑀺𑀖𑀘𑁆𑀙𑀸𑀧𑀻𑀴𑀺𑀢𑁄 𑀯𑀸 𑀕𑁄𑀘𑀭𑀢𑁆𑀣𑀸𑀬, 𑀲𑀫𑁆𑀪𑀯𑀧𑀻𑀴𑀺𑀢𑁄 𑀯𑀸 𑀅𑀲𑁆𑀲𑀤𑁆𑀥𑀫𑁆𑀫𑀧𑀝𑀺𑀲𑁂𑀯𑀦𑀢𑁆𑀣𑀸𑀬. 𑀇𑀥 𑀧𑀦 𑀕𑁄𑀘𑀭𑀢𑁆𑀣𑀸𑀬 𑀦𑀺𑀓𑁆𑀔𑀦𑁆𑀢𑁄𑀢𑀺 𑀅𑀥𑀺𑀧𑁆𑀧𑁂𑀢𑁄.

𑀯𑀺𑀚𑀫𑁆𑀪𑀢𑀻𑀢𑀺 ¶ 𑀲𑀼𑀯𑀡𑁆𑀡𑀢𑀮𑁂 𑀯𑀸 𑀭𑀚𑀢𑀫𑀡𑀺𑀨𑀮𑀺𑀓𑀫𑀦𑁄𑀲𑀺𑀮𑀸𑀢𑀮𑀸𑀦𑀁 𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀤𑁆𑀯𑁂 𑀧𑀘𑁆𑀙𑀺𑀫𑀧𑀸𑀤𑁂 𑀲𑀫𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 𑀧𑀼𑀭𑀺𑀫𑀧𑀸𑀤𑁂 𑀧𑀼𑀭𑀢𑁄 𑀧𑀲𑀸𑀭𑁂𑀢𑁆𑀯𑀸 𑀲𑀭𑀻𑀭𑀲𑁆𑀲 𑀧𑀘𑁆𑀙𑀸𑀪𑀸𑀕𑀁 𑀆𑀓𑀟𑁆𑀠𑀺𑀢𑁆𑀯𑀸 𑀧𑀼𑀭𑀺𑀫𑀪𑀸𑀕𑀁 𑀅𑀪𑀺𑀳𑀭𑀺𑀢𑁆𑀯𑀸 𑀧𑀺𑀝𑁆𑀞𑀺𑀁 𑀦𑀸𑀫𑁂𑀢𑁆𑀯𑀸 𑀕𑀻𑀯𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀲𑀦𑀺𑀲𑀤𑁆𑀤𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀦𑀸𑀲𑀧𑀼𑀝𑀸𑀦𑀺 𑀧𑁄𑀣𑁂𑀢𑁆𑀯𑀸 𑀲𑀭𑀻𑀭𑀮𑀕𑁆𑀕𑀁 𑀭𑀚𑀁 𑀯𑀺𑀥𑀼𑀦𑀦𑁆𑀢𑁄 𑀯𑀺𑀚𑀫𑁆𑀪𑀢𑀺. 𑀯𑀺𑀚𑀫𑁆𑀪𑀦𑀪𑀽𑀫𑀺𑀬𑀜𑁆𑀘 𑀧𑀦 𑀢𑀭𑀼𑀡𑀯𑀘𑁆𑀙𑀓𑁄 𑀯𑀺𑀬 𑀅𑀧𑀭𑀸𑀧𑀭𑀁 𑀚𑀯𑀢𑀺. 𑀚𑀯𑀢𑁄 𑀧𑀦𑀲𑁆𑀲 𑀲𑀭𑀻𑀭𑀁 𑀅𑀦𑁆𑀥𑀓𑀸𑀭𑁂 𑀧𑀭𑀺𑀩𑁆𑀪𑀫𑀦𑁆𑀢𑀁 𑀅𑀮𑀸𑀢𑀁 𑀯𑀺𑀬 𑀔𑀸𑀬𑀢𑀺.

𑀅𑀦𑀼𑀯𑀺𑀮𑁄𑀓𑁂𑀢𑀻𑀢𑀺 ¶ 𑀓𑀲𑁆𑀫𑀸 𑀅𑀦𑀼𑀯𑀺𑀮𑁄𑀓𑁂𑀢𑀺? 𑀧𑀭𑀸𑀦𑀼𑀤𑁆𑀤𑀬𑀢𑀸𑀬. 𑀢𑀲𑁆𑀫𑀺𑀁 𑀓𑀺𑀭 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑁂 𑀧𑀧𑀸𑀢𑀸𑀯𑀸𑀝𑀸𑀤𑀻𑀲𑀼 𑀯𑀺𑀲𑀫𑀝𑁆𑀞𑀸𑀦𑁂𑀲𑀼 𑀘𑀭𑀦𑁆𑀢𑀸 𑀳𑀢𑁆𑀣𑀺𑀕𑁄𑀓𑀡𑁆𑀡𑀫𑀳𑀺𑀁𑀲𑀸𑀤𑀬𑁄 𑀧𑀸𑀡𑀸 𑀧𑀧𑀸𑀢𑁂𑀧𑀺 𑀆𑀯𑀸𑀝𑁂𑀧𑀺 𑀧𑀢𑀦𑁆𑀢𑀺, 𑀢𑁂𑀲𑀁 𑀅𑀦𑀼𑀤𑁆𑀤𑀬𑀸𑀬 𑀅𑀦𑀼𑀯𑀺𑀮𑁄𑀓𑁂𑀢𑀺. 𑀓𑀺𑀁 𑀧𑀦𑀲𑁆𑀲 𑀮𑀼𑀤𑁆𑀤𑀓𑀫𑁆𑀫𑀲𑁆𑀲 𑀧𑀭𑀫𑀁𑀲𑀔𑀸𑀤𑀺𑀦𑁄 𑀅𑀦𑀼𑀤𑁆𑀤𑀬𑀸 𑀦𑀸𑀫 𑀅𑀢𑁆𑀣𑀻𑀢𑀺? 𑀆𑀫 𑀅𑀢𑁆𑀣𑀺. 𑀢𑀣𑀸 𑀳𑁂𑀲 ‘‘𑀓𑀺𑀁 𑀫𑁂 𑀩𑀳𑀽𑀳𑀺 𑀖𑀸𑀢𑀺𑀢𑁂𑀳𑀻’’𑀢𑀺? 𑀅𑀢𑁆𑀢𑀦𑁄 𑀕𑁄𑀘𑀭𑀢𑁆𑀣𑀸𑀬𑀧𑀺 ¶ 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀦 𑀕𑀡𑁆𑀳𑀸𑀢𑀺, 𑀏𑀯𑀁 𑀅𑀦𑀼𑀤𑁆𑀤𑀬𑀁 𑀓𑀭𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺𑀘𑁂𑀢𑀁 𑁋 ‘‘𑀫𑀸𑀳𑀁 𑀔𑁄 𑀔𑀼𑀤𑁆𑀤𑀓𑁂 𑀧𑀸𑀡𑁂 𑀯𑀺𑀲𑀫𑀕𑀢𑁂 𑀲𑀗𑁆𑀖𑀸𑀢𑀁 𑀆𑀧𑀸𑀤𑁂𑀲𑀺’’𑀦𑁆𑀢𑀺 (𑀅. 𑀦𑀺. 𑁧𑁦.𑁨𑁧).

𑀲𑀻𑀳𑀦𑀸𑀤𑀁 𑀦𑀤𑀢𑀻𑀢𑀺 𑀢𑀺𑀓𑁆𑀔𑀢𑁆𑀢𑀼𑀁 𑀢𑀸𑀯 𑀅𑀪𑀻𑀢𑀦𑀸𑀤𑀁 𑀦𑀤𑀢𑀺. 𑀏𑀯𑀜𑁆𑀘 𑀧𑀦𑀲𑁆𑀲 𑀯𑀺𑀚𑀫𑁆𑀪𑀦𑀪𑀽𑀫𑀺𑀬𑀁 𑀞𑀢𑁆𑀯𑀸 𑀦𑀤𑀦𑁆𑀢𑀲𑁆𑀲 𑀲𑀤𑁆𑀤𑁄 𑀲𑀫𑀦𑁆𑀢𑀸 𑀢𑀺𑀬𑁄𑀚𑀦𑀧𑀤𑁂𑀲𑀁 𑀏𑀓𑀦𑀺𑀦𑁆𑀦𑀸𑀤𑀁 𑀓𑀭𑁄𑀢𑀺, 𑀢𑀫𑀲𑁆𑀲 𑀦𑀺𑀦𑁆𑀦𑀸𑀤𑀁 𑀲𑀼𑀢𑁆𑀯𑀸 𑀢𑀺𑀬𑁄𑀚𑀦𑀩𑁆𑀪𑀦𑁆𑀢𑀭𑀕𑀢𑀸 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀕𑀡𑀸 𑀬𑀣𑀸𑀞𑀸𑀦𑁂 𑀞𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀕𑁄𑀘𑀭𑀸𑀬 𑀧𑀓𑁆𑀓𑀫𑀢𑀻𑀢𑀺 𑀆𑀳𑀸𑀭𑀢𑁆𑀣𑀸𑀬 𑀕𑀘𑁆𑀙𑀢𑀺. 𑀓𑀣𑀁? 𑀲𑁄 𑀳𑀺 𑀯𑀺𑀚𑀫𑁆𑀪𑀦𑀪𑀽𑀫𑀺𑀬𑀁 𑀞𑀢𑁆𑀯𑀸 𑀤𑀓𑁆𑀔𑀺𑀡𑀢𑁄 𑀯𑀸 𑀯𑀸𑀫𑀢𑁄 𑀯𑀸 𑀉𑀧𑁆𑀧𑀢𑀦𑁆𑀢𑁄 𑀉𑀲𑀪𑀫𑀢𑁆𑀢𑀁 𑀞𑀸𑀦𑀁 𑀕𑀡𑁆𑀳𑀸𑀢𑀺, 𑀉𑀤𑁆𑀥𑀁 𑀉𑀧𑁆𑀧𑀢𑀦𑁆𑀢𑁄 𑀘𑀢𑁆𑀢𑀸𑀭𑀺𑀧𑀺 𑀅𑀝𑁆𑀞𑀧𑀺 𑀉𑀲𑀪𑀸𑀦𑀺 𑀉𑀧𑁆𑀧𑀢𑀢𑀺, 𑀲𑀫𑀝𑁆𑀞𑀸𑀦𑁂 𑀉𑀚𑀼𑀓𑀁 𑀧𑀓𑁆𑀔𑀦𑁆𑀤𑀦𑁆𑀢𑁄 𑀲𑁄𑀴𑀲𑀉𑀲𑀪𑀫𑀢𑁆𑀢𑀫𑁆𑀧𑀺 𑀯𑀻𑀲𑀢𑀺𑀉𑀲𑀪𑀫𑀢𑁆𑀢𑀫𑁆𑀧𑀺 𑀞𑀸𑀦𑀁 𑀧𑀓𑁆𑀔𑀦𑁆𑀤𑀢𑀺, 𑀣𑀮𑀸 𑀯𑀸 𑀧𑀩𑁆𑀩𑀢𑀸 𑀯𑀸 𑀧𑀓𑁆𑀔𑀦𑁆𑀤𑀦𑁆𑀢𑁄 𑀲𑀝𑁆𑀞𑀺𑀉𑀲𑀪𑀫𑀢𑁆𑀢𑀫𑁆𑀧𑀺 𑀅𑀲𑀻𑀢𑀺𑀉𑀲𑀪𑀫𑀢𑁆𑀢𑀫𑁆𑀧𑀺 𑀞𑀸𑀦𑀁 𑀧𑀓𑁆𑀔𑀦𑁆𑀤𑀢𑀺, 𑀅𑀦𑁆𑀢𑀭𑀸𑀫𑀕𑁆𑀕𑁂 𑀭𑀼𑀓𑁆𑀔𑀁 𑀯𑀸 𑀧𑀩𑁆𑀩𑀢𑀁 𑀯𑀸 𑀤𑀺𑀲𑁆𑀯𑀸 𑀢𑀁 𑀧𑀭𑀺𑀳𑀭𑀦𑁆𑀢𑁄 𑀯𑀸𑀫𑀢𑁄 𑀯𑀸 𑀤𑀓𑁆𑀔𑀺𑀡𑀢𑁄 𑀯𑀸, 𑀉𑀲𑀪𑀫𑀢𑁆𑀢𑀫𑁆𑀧𑀺 𑀅𑀧𑀓𑁆𑀓𑀫𑀢𑀺. 𑀢𑀢𑀺𑀬𑀁 𑀧𑀦 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀢𑁂𑀦𑁂𑀯 ¶ 𑀲𑀤𑁆𑀥𑀺𑀁 𑀢𑀺𑀬𑁄𑀚𑀦𑁂 𑀞𑀸𑀦𑁂 𑀧𑀜𑁆𑀜𑀸𑀬𑀢𑀺. 𑀢𑀺𑀬𑁄𑀚𑀦𑀁 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑁄 𑀅𑀢𑁆𑀢𑀦𑁄𑀯 𑀦𑀸𑀤𑀲𑁆𑀲 𑀅𑀦𑀼𑀦𑀸𑀤𑀁 𑀲𑀼𑀡𑀸𑀢𑀺. 𑀏𑀯𑀁 𑀲𑀻𑀖𑁂𑀦 𑀚𑀯𑁂𑀦 𑀧𑀓𑁆𑀓𑀫𑀢𑀻𑀢𑀺.

𑀬𑁂𑀪𑀼𑀬𑁆𑀬𑁂𑀦𑀸𑀢𑀺 𑀧𑀸𑀬𑁂𑀦. 𑀪𑀬𑀁 𑀲𑀁𑀯𑁂𑀕𑀁 𑀲𑀦𑁆𑀢𑀸𑀲𑀦𑁆𑀢𑀺 𑀲𑀩𑁆𑀩𑀁 𑀘𑀺𑀢𑁆𑀢𑀼𑀢𑁆𑀭𑀸𑀲𑀲𑁆𑀲𑁂𑀯 𑀦𑀸𑀫𑀁. 𑀲𑀻𑀳𑀲𑁆𑀲 𑀳𑀺 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀩𑀳𑀽 𑀲𑀢𑁆𑀢𑀸 𑀪𑀸𑀬𑀦𑁆𑀢𑀺, 𑀅𑀧𑁆𑀧𑀓𑀸 𑀦 𑀪𑀸𑀬𑀦𑁆𑀢𑀺. 𑀓𑁂 𑀧𑀦 𑀢𑁂𑀢𑀺? 𑀲𑀫𑀲𑀻𑀳𑁄 𑀳𑀢𑁆𑀣𑀸𑀚𑀸𑀦𑀻𑀬𑁄 𑀅𑀲𑁆𑀲𑀸𑀚𑀸𑀦𑀻𑀬𑁄 𑀉𑀲𑀪𑀸𑀚𑀸𑀦𑀻𑀬𑁄 𑀧𑀼𑀭𑀺𑀲𑀸𑀚𑀸𑀦𑀻𑀬𑁄 𑀔𑀻𑀡𑀸𑀲𑀯𑁄𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁂 𑀦 𑀪𑀸𑀬𑀦𑁆𑀢𑀻𑀢𑀺? 𑀲𑀫𑀲𑀻𑀳𑁄 𑀦𑀸𑀫 ‘‘𑀚𑀸𑀢𑀺𑀕𑁄𑀢𑁆𑀢𑀓𑀼𑀮𑀲𑀽𑀭𑀪𑀸𑀯𑁂𑀳𑀺 𑀲𑀫𑀸𑀦𑁄𑀲𑁆𑀫𑀻’’𑀢𑀺 𑀦 𑀪𑀸𑀬𑀢𑀺, 𑀳𑀢𑁆𑀣𑀸𑀚𑀸𑀦𑀻𑀬𑀸𑀤𑀬𑁄 𑀅𑀢𑁆𑀢𑀦𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀩𑀮𑀯𑀢𑀸𑀬 𑀦 𑀪𑀸𑀬𑀦𑁆𑀢𑀺, 𑀔𑀻𑀡𑀸𑀲𑀯𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑀳𑀻𑀦𑀢𑁆𑀢𑀸 𑀦 𑀪𑀸𑀬𑀢𑀺.

𑀩𑀺𑀮𑀸𑀲𑀬𑀸𑀢𑀺 ¶ 𑀩𑀺𑀮𑁂 𑀲𑀬𑀦𑁆𑀢𑀸 𑀩𑀺𑀮𑀯𑀸𑀲𑀺𑀦𑁄 𑀅𑀳𑀺𑀦𑀓𑀼𑀮𑀕𑁄𑀥𑀸𑀤𑀬𑁄. 𑀤𑀓𑀸𑀲𑀬𑀸𑀢𑀺 𑀉𑀤𑀓𑀯𑀸𑀲𑀺𑀦𑁄 𑀫𑀘𑁆𑀙𑀓𑀘𑁆𑀙𑀧𑀸𑀤𑀬𑁄. 𑀯𑀦𑀸𑀲𑀬𑀸𑀢𑀺 𑀯𑀦𑀯𑀸𑀲𑀺𑀦𑁄 𑀳𑀢𑁆𑀣𑀺𑀅𑀲𑁆𑀲𑀕𑁄𑀓𑀡𑁆𑀡𑀫𑀺𑀕𑀸𑀤𑀬𑁄. 𑀧𑀯𑀺𑀲𑀦𑁆𑀢𑀻𑀢𑀺 ‘‘𑀇𑀤𑀸𑀦𑀺 𑀆𑀕𑀦𑁆𑀢𑁆𑀯𑀸 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀫𑀕𑁆𑀕𑀁 𑀑𑀮𑁄𑀓𑁂𑀦𑁆𑀢𑀸𑀯 𑀧𑀯𑀺𑀲𑀦𑁆𑀢𑀺. 𑀤𑀴𑁆𑀳𑁂𑀳𑀻𑀢𑀺 𑀣𑀺𑀭𑁂𑀳𑀺. 𑀯𑀭𑀢𑁆𑀢𑁂𑀳𑀻𑀢𑀺 𑀘𑀫𑁆𑀫𑀭𑀚𑁆𑀚𑀽𑀳𑀺. 𑀫𑀳𑀺𑀤𑁆𑀥𑀺𑀓𑁄𑀢𑀺𑀆𑀤𑀻𑀲𑀼 𑀯𑀺𑀚𑀫𑁆𑀪𑀦𑀪𑀽𑀫𑀺𑀬𑀁 𑀞𑀢𑁆𑀯𑀸 𑀤𑀓𑁆𑀔𑀺𑀡𑀧𑀲𑁆𑀲𑀸𑀤𑀻𑀳𑀺 𑀉𑀲𑀪𑀫𑀢𑁆𑀢𑀁, 𑀉𑀚𑀼𑀓𑀁 𑀯𑀻𑀲𑀢𑀺𑀉𑀲𑀪𑀫𑀢𑁆𑀢𑀸𑀤𑀺𑀮𑀗𑁆𑀖𑀦𑀯𑀲𑁂𑀦 𑀫𑀳𑀺𑀤𑁆𑀥𑀺𑀓𑀢𑀸, 𑀲𑁂𑀲𑀫𑀺𑀕𑀸𑀦𑀁 𑀅𑀥𑀺𑀧𑀢𑀺𑀪𑀸𑀯𑁂𑀦 𑀫𑀳𑁂𑀲𑀓𑁆𑀔𑀢𑀸, 𑀲𑀫𑀦𑁆𑀢𑀸 𑀢𑀺𑀬𑁄𑀚𑀦𑁂 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀧𑀮𑀸𑀬𑀦𑁆𑀢𑀸𑀦𑀁 𑀯𑀲𑁂𑀦 𑀫𑀳𑀸𑀦𑀼𑀪𑀸𑀯𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀫𑁂𑀯 ¶ 𑀔𑁄𑀢𑀺 𑀪𑀕𑀯𑀸 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑁂𑀲𑀼 𑀢𑀣𑀸 𑀢𑀣𑀸 𑀅𑀢𑁆𑀢𑀸𑀦𑀁 𑀓𑀣𑁂𑀲𑀺. ‘‘𑀲𑀻𑀳𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺 (𑀅. 𑀦𑀺. 𑁫.𑁯𑁯; 𑁧𑁦.𑁨𑁧) 𑀇𑀫𑀲𑁆𑀫𑀺𑀁 𑀢𑀸𑀯 𑀲𑀼𑀢𑁆𑀢𑁂 𑀲𑀻𑀳𑀲𑀤𑀺𑀲𑀁 𑀅𑀢𑁆𑀢𑀸𑀦𑀁 𑀓𑀣𑁂𑀲𑀺. ‘‘𑀪𑀺𑀲𑀓𑁆𑀓𑁄 𑀲𑀮𑁆𑀮𑀓𑀢𑁆𑀢𑁄𑀢𑀺 𑀔𑁄, 𑀲𑀼𑀦𑀓𑁆𑀔𑀢𑁆𑀢, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀫. 𑀦𑀺. 𑁩.𑁬𑁫) 𑀇𑀫𑀲𑁆𑀫𑀺𑀁 𑀯𑁂𑀚𑁆𑀚𑀲𑀤𑀺𑀲𑀁. ‘‘𑀩𑁆𑀭𑀸𑀳𑁆𑀫𑀡𑁄𑀢𑀺, 𑀪𑀺𑀓𑁆𑀔𑀯𑁂, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀅. 𑀦𑀺. 𑁮.𑁮𑁫) 𑀇𑀫𑀲𑁆𑀫𑀺𑀁 𑀩𑁆𑀭𑀸𑀳𑁆𑀫𑀡𑀲𑀤𑀺𑀲𑀁. ‘‘𑀧𑀼𑀭𑀺𑀲𑁄 𑀫𑀕𑁆𑀕𑀓𑀼𑀲𑀮𑁄𑀢𑀺 𑀔𑁄, 𑀢𑀺𑀲𑁆𑀲, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀲𑀁. 𑀦𑀺. 𑁩.𑁮𑁪) 𑀇𑀫𑀲𑁆𑀫𑀺𑀁 𑀫𑀕𑁆𑀕𑀤𑁂𑀲𑀓𑀧𑀼𑀭𑀺𑀲𑀲𑀤𑀺𑀲𑀁. ‘‘𑀭𑀸𑀚𑀸𑀳𑀫𑀲𑁆𑀫𑀺 𑀲𑁂𑀮𑀸’’𑀢𑀺 (𑀲𑀼. 𑀦𑀺. 𑁫𑁫𑁯) 𑀇𑀫𑀲𑁆𑀫𑀺𑀁 𑀭𑀸𑀚𑀲𑀤𑀺𑀲𑀁. ‘‘𑀲𑀻𑀳𑁄𑀢𑀺 𑀔𑁄 𑀢𑀣𑀸𑀕𑀢𑀲𑁆𑀲𑁂𑀢𑀁 ¶ 𑀅𑀥𑀺𑀯𑀘𑀦’’𑀦𑁆𑀢𑀺 (𑀅. 𑀦𑀺. 𑁫.𑁯𑁯; 𑁧𑁦.𑁨𑁧) 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀲𑀻𑀳𑀲𑀤𑀺𑀲𑀫𑁂𑀯 𑀓𑀢𑁆𑀯𑀸 𑀅𑀢𑁆𑀢𑀸𑀦𑀁 𑀓𑀣𑁂𑀦𑁆𑀢𑁄 𑀏𑀯𑀫𑀸𑀳.

𑀢𑀢𑁆𑀭𑀸𑀬𑀁 𑀲𑀤𑀺𑀲𑀢𑀸 𑁋 𑀲𑀻𑀳𑀲𑁆𑀲 𑀓𑀜𑁆𑀘𑀦𑀕𑀼𑀳𑀸𑀤𑀻𑀲𑀼 𑀯𑀲𑀦𑀓𑀸𑀮𑁄 𑀯𑀺𑀬 𑀳𑀺 𑀢𑀣𑀸𑀕𑀢𑀲𑁆𑀲 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀓𑀢𑀸𑀪𑀺𑀦𑀻𑀳𑀸𑀭𑀲𑁆𑀲 𑀅𑀧𑀭𑀺𑀫𑀺𑀢𑀓𑀸𑀮𑀁 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀧𑀘𑁆𑀙𑀺𑀫𑀪𑀯𑁂 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑁂𑀦 𑀘𑁂𑀯 𑀫𑀸𑀢𑀼𑀓𑀼𑀘𑁆𑀙𑀺𑀢𑁄 𑀦𑀺𑀓𑁆𑀔𑀫𑀦𑁂𑀦 𑀘 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀓𑀫𑁆𑀧𑁂𑀢𑁆𑀯𑀸 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀤𑀺𑀲𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑀲𑁆𑀲 𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀦𑀺𑀯𑀸𑀲𑀓𑀸𑀮𑁄 𑀤𑀝𑁆𑀞𑀩𑁆𑀩𑁄. 𑀲𑀻𑀳𑀲𑁆𑀲 𑀓𑀜𑁆𑀘𑀦𑀕𑀼𑀳𑀸𑀤𑀺𑀢𑁄 𑀦𑀺𑀓𑁆𑀔𑀦𑁆𑀢𑀓𑀸𑀮𑁄 𑀯𑀺𑀬 𑀢𑀣𑀸𑀕𑀢𑀲𑁆𑀲 𑀏𑀓𑀽𑀦𑀢𑀺𑀁𑀲𑁂 𑀲𑀁𑀯𑀘𑁆𑀙𑀭𑁂 𑀯𑀺𑀯𑀝𑁂𑀦 𑀤𑁆𑀯𑀸𑀭𑁂𑀦 𑀓𑀡𑁆𑀟𑀓𑀁 𑀆𑀭𑀼𑀬𑁆𑀳 𑀙𑀦𑁆𑀦𑀲𑀳𑀸𑀬𑀲𑁆𑀲 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀻𑀡𑀺 𑀭𑀚𑁆𑀚𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀦𑁄𑀫𑀸𑀦𑀤𑀻𑀢𑀻𑀭𑁂 𑀩𑁆𑀭𑀳𑁆𑀫𑀼𑀦𑀸 𑀤𑀺𑀦𑁆𑀦𑀸𑀦𑀺 𑀓𑀸𑀲𑀸𑀬𑀸𑀦𑀺 ¶ 𑀧𑀭𑀺𑀤𑀳𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀭𑀸𑀚𑀕𑀳𑀁 𑀕𑀦𑁆𑀢𑁆𑀯𑀸 𑀢𑀢𑁆𑀣 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀡𑁆𑀟𑀯𑀕𑀺𑀭𑀺𑀧𑀩𑁆𑀪𑀸𑀭𑁂 𑀓𑀢𑀪𑀢𑁆𑀢𑀓𑀺𑀘𑁆𑀘𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸, 𑀧𑀞𑀫𑀫𑁂𑀯 𑀫𑀕𑀥𑀭𑀝𑁆𑀞𑀁 𑀆𑀕𑀫𑀦𑀢𑁆𑀣𑀸𑀬 𑀬𑀸𑀯 𑀭𑀜𑁆𑀜𑁄 𑀧𑀝𑀺𑀜𑁆𑀜𑀸𑀤𑀸𑀦𑀓𑀸𑀮𑁄.

𑀲𑀻𑀳𑀲𑁆𑀲 𑀯𑀺𑀚𑀫𑁆𑀪𑀦𑀓𑀸𑀮𑁄 𑀯𑀺𑀬 𑀢𑀣𑀸𑀕𑀢𑀲𑁆𑀲 𑀤𑀺𑀦𑁆𑀦𑀧𑀝𑀺𑀜𑁆𑀜𑀲𑁆𑀲 𑀆𑀴𑀸𑀭𑀓𑀸𑀮𑀸𑀫𑀉𑀧𑀲𑀗𑁆𑀓𑀫𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀲𑀼𑀚𑀸𑀢𑀸𑀬 𑀤𑀺𑀦𑁆𑀦𑀧𑀸𑀬𑀸𑀲𑀲𑁆𑀲 𑀏𑀓𑀽𑀦𑀧𑀡𑁆𑀡𑀸𑀲𑀸𑀬 𑀧𑀺𑀡𑁆𑀟𑁂𑀳𑀺 𑀧𑀭𑀺𑀪𑀼𑀢𑁆𑀢𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀻𑀳𑀲𑁆𑀲 𑀓𑁂𑀲𑀭𑀯𑀺𑀥𑀼𑀦𑀦𑀁 𑀯𑀺𑀬 𑀲𑀸𑀬𑀦𑁆𑀳𑀲𑀫𑀬𑁂 𑀲𑁄𑀢𑁆𑀢𑀺𑀬𑁂𑀦 𑀤𑀺𑀦𑁆𑀦𑀸 𑀅𑀝𑁆𑀞 𑀢𑀺𑀡𑀫𑀼𑀝𑁆𑀞𑀺𑀬𑁄 𑀕𑀳𑁂𑀢𑁆𑀯𑀸 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀤𑁂𑀯𑀢𑀸𑀳𑀺 𑀣𑁄𑀫𑀺𑀬𑀫𑀸𑀦𑀲𑁆𑀲 𑀕𑀦𑁆𑀥𑀸𑀤𑀻𑀳𑀺 𑀧𑀽𑀚𑀺𑀬𑀫𑀸𑀦𑀲𑁆𑀲 𑀢𑀺𑀓𑁆𑀔𑀢𑁆𑀢𑀼𑀁 𑀩𑁄𑀥𑀺𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀘𑀼𑀤𑁆𑀤𑀲𑀳𑀢𑁆𑀣𑀼𑀩𑁆𑀩𑁂𑀥𑁂 𑀞𑀸𑀦𑁂 𑀢𑀺𑀡𑀲𑀦𑁆𑀣𑀭𑀁 𑀲𑀦𑁆𑀣𑀭𑀺𑀢𑁆𑀯𑀸 𑀘𑀢𑀼𑀭𑀗𑁆𑀕𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀢𑀁𑀔𑀡𑀁𑀬𑁂𑀯 𑀫𑀸𑀭𑀩𑀮𑀁 𑀯𑀺𑀥𑀫𑀺𑀢𑁆𑀯𑀸 𑀢𑀻𑀲𑀼 𑀬𑀸𑀫𑁂𑀲𑀼 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀯𑀺𑀲𑁄𑀥𑁂𑀢𑁆𑀯𑀸 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀫𑀳𑀸𑀲𑀫𑀼𑀤𑁆𑀤𑀁 𑀬𑀫𑀓𑀜𑀸𑀡𑀫𑀦𑁆𑀣𑀦𑁂𑀦 𑀫𑀦𑁆𑀣𑁂𑀦𑁆𑀢𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂 𑀧𑀝𑀺𑀯𑀺𑀤𑁆𑀥𑁂 𑀢𑀤𑀦𑀼𑀪𑀸𑀯𑁂𑀦 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀓𑀫𑁆𑀧𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀻𑀳𑀲𑁆𑀲 ¶ 𑀘𑀢𑀼𑀤𑁆𑀤𑀺𑀲𑀸𑀯𑀺𑀮𑁄𑀓𑀦𑀁 𑀯𑀺𑀬 𑀧𑀝𑀺𑀯𑀺𑀤𑁆𑀥𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀲𑀢𑁆𑀢𑀲𑀢𑁆𑀢𑀸𑀳𑀁 𑀩𑁄𑀥𑀺𑀫𑀡𑁆𑀟𑁂 𑀯𑀺𑀳𑀭𑀺𑀢𑁆𑀯𑀸 𑀧𑀭𑀺𑀪𑀼𑀢𑁆𑀢𑀫𑀥𑀼𑀧𑀺𑀡𑁆𑀟𑀺𑀓𑀸𑀳𑀸𑀭𑀲𑁆𑀲 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 ¶ 𑀥𑀫𑁆𑀫𑀤𑁂𑀲𑀦𑀸𑀬𑀸𑀘𑀦𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀢𑀢𑁆𑀣 𑀯𑀺𑀳𑀭𑀦𑁆𑀢𑀲𑁆𑀲 𑀏𑀓𑀸𑀤𑀲𑀫𑁂 𑀤𑀺𑀯𑀲𑁂 ‘‘𑀲𑁆𑀯𑁂 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀘𑁆𑀘𑀽𑀲𑀲𑀫𑀬𑁂 ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬’’𑀦𑁆𑀢𑀺? 𑀆𑀴𑀸𑀭𑀼𑀤𑀓𑀸𑀦𑀁 𑀓𑀸𑀮𑀗𑁆𑀓𑀢𑀪𑀸𑀯𑀁 𑀜𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀢𑁆𑀣𑀸𑀬 𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀑𑀮𑁄𑀓𑀦𑀁 𑀤𑀝𑁆𑀞𑀩𑁆𑀩𑀁. 𑀲𑀻𑀳𑀲𑁆𑀲 𑀕𑁄𑀘𑀭𑀢𑁆𑀣𑀸𑀬 𑀢𑀺𑀬𑁄𑀚𑀦𑀁 𑀕𑀫𑀦𑀓𑀸𑀮𑁄 𑀯𑀺𑀬 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 ‘‘𑀧𑀜𑁆𑀘𑀯𑀕𑁆𑀕𑀺𑀬𑀸𑀦𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺 𑀧𑀘𑁆𑀙𑀸𑀪𑀢𑁆𑀢𑁂 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀅𑀝𑁆𑀞𑀸𑀭𑀲𑀬𑁄𑀚𑀦𑀫𑀕𑁆𑀕𑀁 𑀕𑀫𑀦𑀓𑀸𑀮𑁄.

𑀲𑀻𑀳𑀦𑀸𑀤𑀓𑀸𑀮𑁄 𑀯𑀺𑀬 𑀢𑀣𑀸𑀕𑀢𑀲𑁆𑀲 𑀅𑀝𑁆𑀞𑀸𑀭𑀲𑀬𑁄𑀚𑀦𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀲𑀜𑁆𑀜𑀸𑀧𑁂𑀢𑁆𑀯𑀸 𑀅𑀘𑀮𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀲𑁆𑀲 𑀤𑀲𑀳𑀺 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀳𑀺 𑀲𑀦𑁆𑀦𑀺𑀧𑀢𑀺𑀢𑁂𑀦 𑀤𑁂𑀯𑀕𑀡𑁂𑀦 𑀧𑀭𑀺𑀯𑀼𑀢𑀲𑁆𑀲 ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀸 𑀧𑀩𑁆𑀩𑀚𑀺𑀢𑁂𑀦 𑀦 𑀲𑁂𑀯𑀺𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁩) 𑀦𑀬𑁂𑀦 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀧𑀤𑁂 𑀤𑁂𑀲𑀺𑀬𑀫𑀸𑀦𑁂 𑀢𑀣𑀸𑀕𑀢𑀲𑀻𑀳𑀲𑁆𑀲 𑀥𑀫𑁆𑀫𑀖𑁄𑀲𑁄 𑀳𑁂𑀝𑁆𑀞𑀸 𑀅𑀯𑀻𑀘𑀺𑀁 𑀉𑀧𑀭𑀺 𑀪𑀯𑀕𑁆𑀕𑀁 𑀕𑀳𑁂𑀢𑁆𑀯𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 ¶ 𑀧𑀝𑀺𑀘𑁆𑀙𑀸𑀤𑁂𑀲𑀺. 𑀲𑀻𑀳𑀲𑁆𑀲 𑀲𑀤𑁆𑀤𑁂𑀦 𑀔𑀼𑀤𑁆𑀤𑀓𑀧𑀸𑀡𑀸𑀦𑀁 𑀲𑀦𑁆𑀢𑀸𑀲𑀁 𑀆𑀧𑀚𑁆𑀚𑀦𑀓𑀸𑀮𑁄 𑀯𑀺𑀬 𑀢𑀣𑀸𑀕𑀢𑀲𑁆𑀲 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀤𑀻𑀧𑁂𑀢𑁆𑀯𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑁄𑀴𑀲𑀳𑀸𑀓𑀸𑀭𑁂𑀳𑀺 𑀲𑀝𑁆𑀞𑀺𑀬𑀸 𑀘 𑀦𑀬𑀲𑀳𑀲𑁆𑀲𑁂𑀳𑀺 𑀯𑀺𑀪𑀚𑀺𑀢𑁆𑀯𑀸 𑀥𑀫𑁆𑀫𑀁 𑀓𑀣𑁂𑀦𑁆𑀢𑀲𑁆𑀲 𑀤𑀻𑀖𑀸𑀬𑀼𑀓𑀤𑁂𑀯𑀢𑀸𑀦𑀁 𑀜𑀸𑀡𑀲𑀦𑁆𑀢𑀸𑀲𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄.

𑀬𑀤𑀸𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂. 𑀢𑀣𑀸𑀕𑀢𑁄𑀢𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀢𑀣𑀸𑀕𑀢𑁄 𑁋 𑀢𑀣𑀸 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀸 𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀮𑀓𑁆𑀔𑀡𑀁 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀢𑀣𑀸𑀕𑀢𑁄, 𑀢𑀣𑀤𑀲𑁆𑀲𑀺𑀢𑀸𑀬 𑀢𑀣𑀸𑀕𑀢𑁄, 𑀢𑀣𑀸𑀯𑀸𑀤𑀺𑀢𑀸𑀬 𑀢𑀣𑀸𑀕𑀢𑁄, 𑀢𑀣𑀸𑀓𑀸𑀭𑀺𑀢𑀸𑀬 𑀢𑀣𑀸𑀕𑀢𑁄. 𑀅𑀪𑀺𑀪𑀯𑀦𑀝𑁆𑀞𑁂𑀦 𑀢𑀣𑀸𑀕𑀢𑁄𑀢𑀺. 𑀢𑁂𑀲𑀁 𑀯𑀺𑀢𑁆𑀣𑀸𑀭𑁄 𑀩𑁆𑀭𑀳𑁆𑀫𑀚𑀸𑀮𑀯𑀡𑁆𑀡𑀦𑀸𑀬𑀫𑁆𑀧𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁭) 𑀫𑀽𑀮𑀧𑀭𑀺𑀬𑀸𑀬𑀯𑀡𑁆𑀡𑀦𑀸𑀬𑀫𑁆𑀧𑀺 (𑀫. 𑀦𑀺. 𑀅𑀝𑁆𑀞. 𑁧.𑁧𑁨) 𑀯𑀼𑀢𑁆𑀢𑁄𑀬𑁂𑀯. 𑀮𑁄𑀓𑁂𑀢𑀺 𑀲𑀢𑁆𑀢𑀮𑁄𑀓𑁂. 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀩𑁄𑀥𑀺𑀧𑀮𑁆𑀮𑀗𑁆𑀓𑀸 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀸 𑀯𑀸 𑀉𑀧𑁆𑀧𑀚𑁆𑀚𑀢𑀺 𑀦𑀸𑀫 ¶ , 𑀅𑀭𑀳𑀢𑁆𑀢𑀨𑀮𑁂 𑀧𑀦 𑀧𑀢𑁆𑀢𑁂 𑀉𑀧𑁆𑀧𑀦𑁆𑀦𑁄 𑀦𑀸𑀫. 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀢𑀺𑀆𑀤𑀻𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀦𑀺𑀤𑁆𑀤𑁂𑀲𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑀺.

𑀇𑀢𑀺 𑀭𑀽𑀧𑀦𑁆𑀢𑀺 𑀇𑀤𑀁 𑀭𑀽𑀧𑀁 𑀏𑀢𑁆𑀢𑀓𑀁 𑀭𑀽𑀧𑀁, 𑀦 𑀇𑀢𑁄 𑀪𑀺𑀬𑁆𑀬𑁄 𑀭𑀽𑀧𑀁 𑀅𑀢𑁆𑀣𑀻𑀢𑀺. 𑀏𑀢𑁆𑀢𑀸𑀯𑀢𑀸 𑀲𑀪𑀸𑀯𑀢𑁄 𑀲𑀭𑀲𑀢𑁄 𑀧𑀭𑀺𑀬𑀦𑁆𑀢𑀢𑁄 𑀧𑀭𑀺𑀘𑁆𑀙𑁂𑀤𑀢𑁄 𑀧𑀭𑀺𑀘𑁆𑀙𑀺𑀦𑁆𑀤𑀦𑀢𑁄 𑀬𑀸𑀯𑀢𑀸 𑀘𑀢𑁆𑀢𑀸𑀭𑁄 𑀘 𑀫𑀳𑀸𑀪𑀽𑀢𑀸 𑀘𑀢𑀼𑀦𑁆𑀦𑀜𑁆𑀘 ¶ 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧𑀁, 𑀢𑀁 𑀲𑀩𑁆𑀩𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀇𑀢𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄𑀢𑀺 𑀅𑀬𑀁 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄 𑀦𑀸𑀫. 𑀏𑀢𑁆𑀢𑀸𑀯𑀢𑀸 𑀳𑀺 ‘‘𑀆𑀳𑀸𑀭𑀲𑀫𑀼𑀤𑀬𑁄 𑀭𑀽𑀧𑀲𑀫𑀼𑀤𑀬𑁄’’𑀢𑀺𑀆𑀤𑀺 𑀲𑀩𑁆𑀩𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀇𑀢𑀺 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄𑀢𑀺 𑀅𑀬𑀁 𑀭𑀽𑀧𑀲𑁆𑀲 𑀅𑀢𑁆𑀣𑀗𑁆𑀕𑀫𑁄. 𑀇𑀫𑀺𑀦𑀸𑀧𑀺 ‘‘𑀆𑀳𑀸𑀭𑀦𑀺𑀭𑁄𑀥𑀸 𑀭𑀽𑀧𑀦𑀺𑀭𑁄𑀥𑁄’’𑀢𑀺𑀆𑀤𑀺 𑀲𑀩𑁆𑀩𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀇𑀢𑀺 𑀯𑁂𑀤𑀦𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀯𑀡𑁆𑀡𑀯𑀦𑁆𑀢𑁄𑀢𑀺 𑀲𑀭𑀻𑀭𑀯𑀡𑁆𑀡𑁂𑀦 𑀯𑀡𑁆𑀡𑀯𑀦𑁆𑀢𑁄. 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸𑀢𑀺 𑀇𑀫𑀁 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀧𑀡𑁆𑀡𑀸𑀲𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑀁 𑀢𑀣𑀸𑀕𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸. 𑀬𑁂𑀪𑀼𑀬𑁆𑀬𑁂𑀦𑀸𑀢𑀺 𑀇𑀥 𑀓𑁂 𑀞𑀧𑁂𑀢𑀺? 𑀅𑀭𑀺𑀬𑀲𑀸𑀯𑀓𑁂 𑀤𑁂𑀯𑁂. 𑀢𑁂𑀲𑀜𑁆𑀳𑀺 𑀔𑀻𑀡𑀸𑀲𑀯𑀢𑁆𑀢𑀸 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑀫𑁆𑀧𑀺 𑀦 𑀉𑀧𑁆𑀧𑀚𑁆𑀚𑀢𑀺, 𑀲𑀁𑀯𑀺𑀕𑁆𑀕𑀲𑁆𑀲 𑀬𑁄𑀦𑀺𑀲𑁄 𑀧𑀥𑀸𑀦𑁂𑀦 𑀧𑀢𑁆𑀢𑀩𑁆𑀩𑀁 ¶ 𑀧𑀢𑁆𑀢𑀢𑀸𑀬 𑀜𑀸𑀡𑀲𑀁𑀯𑁂𑀕𑁄𑀧𑀺. 𑀇𑀢𑀭𑁂𑀲𑀁 𑀧𑀦 𑀤𑁂𑀯𑀸𑀦𑀁 ‘‘𑀢𑀸𑀲𑁄 𑀳𑁂𑀲𑁄 𑀪𑀺𑀓𑁆𑀔𑀽’’𑀢𑀺 𑀅𑀦𑀺𑀘𑁆𑀘𑀢𑀁 𑀫𑀦𑀲𑀺𑀓𑀭𑁄𑀦𑁆𑀢𑀸𑀦𑀁 𑀘𑀺𑀢𑁆𑀢𑀼𑀢𑁆𑀭𑀸𑀲𑀪𑀬𑀫𑁆𑀧𑀺, 𑀩𑀮𑀯𑀯𑀺𑀧𑀲𑁆𑀲𑀦𑀸𑀓𑀸𑀮𑁂 𑀜𑀸𑀡𑀪𑀬𑀫𑁆𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀪𑁄𑀢𑀺 𑀥𑀫𑁆𑀫𑀸𑀮𑀧𑀦𑀫𑀢𑁆𑀢𑀫𑁂𑀢𑀁. 𑀲𑀓𑁆𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸. 𑀇𑀢𑀺 𑀢𑁂𑀲𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀯𑀝𑁆𑀝𑀤𑁄𑀲𑀁 𑀤𑀲𑁆𑀲𑁂𑀢𑁆𑀯𑀸 𑀢𑀺𑀮𑀓𑁆𑀔𑀡𑀸𑀳𑀢𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁂 𑀜𑀸𑀡𑀪𑀬𑀁 𑀦𑀸𑀫 𑀑𑀓𑁆𑀓𑀫𑀢𑀺.

𑀅𑀪𑀺𑀜𑁆𑀜𑀸𑀬𑀸𑀢𑀺 𑀚𑀸𑀦𑀺𑀢𑁆𑀯𑀸. 𑀥𑀫𑁆𑀫𑀘𑀓𑁆𑀓𑀦𑁆𑀢𑀺 𑀧𑀝𑀺𑀯𑁂𑀥𑀜𑀸𑀡𑀫𑁆𑀧𑀺 𑀤𑁂𑀲𑀦𑀸𑀜𑀸𑀡𑀫𑁆𑀧𑀺. 𑀧𑀝𑀺𑀯𑁂𑀥𑀜𑀸𑀡𑀁 𑀦𑀸𑀫 𑀬𑁂𑀦 𑀜𑀸𑀡𑁂𑀦 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑁄𑀴𑀲𑀳𑀸𑀓𑀸𑀭𑁂𑀳𑀺 𑀲𑀝𑁆𑀞𑀺𑀬𑀸 𑀘 𑀦𑀬𑀲𑀳𑀲𑁆𑀲𑁂𑀳𑀺 𑀧𑀝𑀺𑀯𑀺𑀚𑁆𑀛𑀺. 𑀤𑁂𑀲𑀦𑀸𑀜𑀸𑀡𑀁 𑀦𑀸𑀫 𑀬𑁂𑀦 𑀜𑀸𑀡𑁂𑀦 𑀢𑀺𑀧𑀭𑀺𑀯𑀝𑁆𑀝𑀁 𑀤𑁆𑀯𑀸𑀤𑀲𑀸𑀓𑀸𑀭𑀁 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀲𑀺. 𑀉𑀪𑀬𑀫𑁆𑀧𑀺 𑀢𑀁 𑀤𑀲𑀩𑀮𑀲𑁆𑀲 𑀉𑀭𑁂 𑀚𑀸𑀢𑀜𑀸𑀡𑀫𑁂𑀯. 𑀢𑁂𑀲𑀼 ¶ 𑀇𑀥 𑀤𑁂𑀲𑀦𑀸𑀜𑀸𑀡𑀁 𑀕𑀳𑁂𑀢𑀩𑁆𑀩𑀁. 𑀢𑀁 𑀧𑀦𑁂𑀲 𑀬𑀸𑀯 𑀅𑀝𑁆𑀞𑀸𑀭𑀲𑀳𑀺 𑀩𑁆𑀭𑀳𑁆𑀫𑀓𑁄𑀝𑀻𑀳𑀺 𑀲𑀤𑁆𑀥𑀺𑀁 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀯 𑀧𑀯𑀢𑁆𑀢𑁂𑀢𑀺 𑀦𑀸𑀫. 𑀢𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂 𑀧𑀯𑀢𑁆𑀢𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀲𑀤𑀺𑀲𑀧𑀼𑀕𑁆𑀕𑀮𑀭𑀳𑀺𑀢𑁄. 𑀬𑀲𑀲𑁆𑀲𑀺𑀦𑁄𑀢𑀺 𑀧𑀭𑀺𑀯𑀸𑀭𑀲𑀫𑁆𑀧𑀦𑁆𑀦𑀸. 𑀢𑀸𑀤𑀺𑀦𑁄𑀢𑀺 𑀮𑀸𑀪𑀸𑀮𑀸𑀪𑀸𑀤𑀻𑀳𑀺 𑀏𑀓𑀲𑀤𑀺𑀲𑀲𑁆𑀲. 𑀙𑀝𑁆𑀞𑀁.

𑁭. 𑀔𑀚𑁆𑀚𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁯. 𑀲𑀢𑁆𑀢𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀦𑁆𑀢𑀺 𑀦 𑀇𑀤𑀁 𑀅𑀪𑀺𑀜𑁆𑀜𑀸𑀯𑀲𑁂𑀦 𑀅𑀦𑀼𑀲𑁆𑀲𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀧𑀦 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀦𑁆𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑁂 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 𑁋 ‘‘𑀲𑀩𑁆𑀩𑁂𑀢𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂 𑀅𑀦𑀼𑀲𑁆𑀲𑀭𑀦𑁆𑀢𑀺, 𑀏𑀢𑁂𑀲𑀁 𑀯𑀸 𑀅𑀜𑁆𑀜𑀢𑀭’’𑀦𑁆𑀢𑀺. 𑀅𑀪𑀺𑀜𑁆𑀜𑀸𑀯𑀲𑁂𑀦 𑀳𑀺 𑀲𑀫𑀦𑀼𑀲𑁆𑀲𑀭𑀦𑁆𑀢𑀲𑁆𑀲 ¶ 𑀔𑀦𑁆𑀥𑀸𑀧𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀧𑀺 𑀔𑀦𑁆𑀥𑀧𑀝𑀺𑀩𑀤𑁆𑀥𑀸𑀧𑀺 𑀧𑀡𑁆𑀡𑀢𑁆𑀢𑀺𑀧𑀺 𑀆𑀭𑀫𑁆𑀫𑀡𑀁 𑀳𑁄𑀢𑀺𑀬𑁂𑀯. 𑀭𑀽𑀧𑀁𑀬𑁂𑀯 𑀅𑀦𑀼𑀲𑁆𑀲𑀭𑀢𑀻𑀢𑀺 𑀏𑀯𑀜𑁆𑀳𑀺 𑀅𑀦𑀼𑀲𑁆𑀲𑀭𑀦𑁆𑀢𑁄 𑀦 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀲𑀢𑁆𑀢𑀁 𑀯𑀸 𑀧𑀼𑀕𑁆𑀕𑀮𑀁 𑀯𑀸 𑀅𑀦𑀼𑀲𑁆𑀲𑀭𑀢𑀺, 𑀅𑀢𑀻𑀢𑁂 𑀧𑀦 𑀦𑀺𑀭𑀼𑀤𑁆𑀥𑀁 𑀭𑀽𑀧𑀓𑁆𑀔𑀦𑁆𑀥𑀫𑁂𑀯 𑀅𑀦𑀼𑀲𑁆𑀲𑀭𑀢𑀺. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺. 𑀲𑀼𑀜𑁆𑀜𑀢𑀸𑀧𑀩𑁆𑀩𑀁 𑀦𑀺𑀝𑁆𑀞𑀺𑀢𑀁.

𑀇𑀤𑀸𑀦𑀺 𑀲𑀼𑀜𑁆𑀜𑀢𑀸𑀬 𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀼𑀁 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀯𑀤𑁂𑀣𑀸𑀢𑀺𑀆𑀤𑀺𑀫𑀸𑀳. 𑀬𑀣𑀸 𑀳𑀺 𑀦𑀝𑁆𑀞𑀁 𑀕𑁄𑀡𑀁 𑀧𑀭𑀺𑀬𑁂𑀲𑀫𑀸𑀦𑁄 𑀧𑀼𑀭𑀺𑀲𑁄 𑀕𑁄𑀕𑀡𑁂 𑀘𑀭𑀫𑀸𑀦𑁂 𑀭𑀢𑁆𑀢𑀁 𑀯𑀸 𑀓𑀸𑀴𑀁 𑀯𑀸 𑀩𑀮𑀻𑀩𑀤𑁆𑀤𑀁 𑀤𑀺𑀲𑁆𑀯𑀸𑀧𑀺 𑀦 𑀏𑀢𑁆𑀢𑀓𑁂𑀦𑁂𑀯 ‘‘𑀅𑀬𑀁 𑀫𑀬𑁆𑀳𑀁 𑀕𑁄𑀡𑁄’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 ¶ 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺. 𑀓𑀲𑁆𑀫𑀸? 𑀅𑀜𑁆𑀜𑁂𑀲𑀫𑁆𑀧𑀺 𑀢𑀸𑀤𑀺𑀲𑀸𑀦𑀁 𑀅𑀢𑁆𑀣𑀺𑀢𑀸𑀬. 𑀲𑀭𑀻𑀭𑀧𑀤𑁂𑀲𑁂 𑀧𑀦𑀲𑁆𑀲 𑀲𑀢𑁆𑀢𑀺𑀲𑀽𑀮𑀸𑀤𑀺𑀮𑀓𑁆𑀔𑀡𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑀬𑁆𑀳𑀁 𑀲𑀦𑁆𑀢𑀓𑁄’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀳𑁄𑀢𑀺, 𑀏𑀯𑀫𑁂𑀯 𑀲𑀼𑀜𑁆𑀜𑀢𑀸𑀬 𑀓𑀣𑀺𑀢𑀸𑀬𑀧𑀺 𑀬𑀸𑀯 𑀲𑀼𑀜𑁆𑀜𑀢𑀸𑀮𑀓𑁆𑀔𑀡𑀁 𑀦 𑀓𑀣𑀻𑀬𑀢𑀺, 𑀢𑀸𑀯 𑀲𑀸 𑀅𑀓𑀣𑀺𑀢𑀸𑀯 𑀳𑁄𑀢𑀺, 𑀮𑀓𑁆𑀔𑀡𑁂 𑀧𑀦 𑀓𑀣𑀺𑀢𑁂 𑀓𑀣𑀺𑀢𑀸 𑀦𑀸𑀫 𑀳𑁄𑀢𑀺. 𑀕𑁄𑀡𑁄 𑀯𑀺𑀬 𑀳𑀺 𑀲𑀼𑀜𑁆𑀜𑀢𑀸, 𑀕𑁄𑀡𑀮𑀓𑁆𑀔𑀡𑀁 𑀯𑀺𑀬 𑀲𑀼𑀜𑁆𑀜𑀢𑀸𑀮𑀓𑁆𑀔𑀡𑀁. 𑀬𑀣𑀸 𑀕𑁄𑀡𑀮𑀓𑁆𑀔𑀡𑁂 𑀅𑀲𑀮𑁆𑀮𑀓𑁆𑀔𑀺𑀢𑁂 𑀕𑁄𑀡𑁄 𑀦 𑀲𑀼𑀝𑁆𑀞𑀼 𑀲𑀮𑁆𑀮𑀓𑁆𑀔𑀺𑀢𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀧𑀦 𑀲𑀮𑁆𑀮𑀓𑁆𑀔𑀺𑀢𑁂 𑀲𑁄 𑀲𑀮𑁆𑀮𑀓𑁆𑀔𑀺𑀢𑁄 𑀦𑀸𑀫 𑀳𑁄𑀢𑀺, 𑀏𑀯𑀫𑁂𑀯 𑀲𑀼𑀜𑁆𑀜𑀢𑀸𑀮𑀓𑁆𑀔𑀡𑁂 𑀅𑀓𑀣𑀺𑀢𑁂 𑀲𑀼𑀜𑁆𑀜𑀢𑀸 𑀅𑀓𑀣𑀺𑀢𑀸𑀯 𑀳𑁄𑀢𑀺, 𑀢𑀲𑁆𑀫𑀺𑀁 𑀧𑀦 𑀓𑀣𑀺𑀢𑁂 𑀲𑀸 𑀓𑀣𑀺𑀢𑀸 𑀦𑀸𑀫 ¶ 𑀳𑁄𑀢𑀻𑀢𑀺 𑀲𑀼𑀜𑁆𑀜𑀢𑀸𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀼𑀁 𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀽𑀧𑀁 𑀯𑀤𑁂𑀣𑀸𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀓𑀺𑀜𑁆𑀘𑀸𑀢𑀺 𑀓𑀸𑀭𑀡𑀧𑀼𑀘𑁆𑀙𑀸, 𑀓𑁂𑀦 𑀓𑀸𑀭𑀡𑁂𑀦 𑀭𑀽𑀧𑀁 𑀯𑀤𑁂𑀣, 𑀓𑁂𑀦 𑀓𑀸𑀭𑀡𑁂𑀦𑁂𑀢𑀁 𑀭𑀽𑀧𑀁 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀭𑀼𑀧𑁆𑀧𑀢𑀻𑀢𑀺 𑀔𑁄𑀢𑀺 𑀏𑀢𑁆𑀣 𑀇𑀢𑀻𑀢𑀺 𑀓𑀸𑀭𑀡𑀼𑀤𑁆𑀤𑁂𑀲𑁄, 𑀬𑀲𑁆𑀫𑀸 𑀭𑀼𑀧𑁆𑀧𑀢𑀺, 𑀢𑀲𑁆𑀫𑀸 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀭𑀼𑀧𑁆𑀧𑀢𑀻𑀢𑀺 𑀓𑀼𑀧𑁆𑀧𑀢𑀺 𑀖𑀝𑁆𑀝𑀻𑀬𑀢𑀺 𑀧𑀻𑀴𑀻𑀬𑀢𑀺, 𑀪𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀲𑀻𑀢𑁂𑀦𑀧𑀺 𑀭𑀼𑀧𑁆𑀧𑀢𑀻𑀢𑀺𑀆𑀤𑀻𑀲𑀼 𑀲𑀻𑀢𑁂𑀦 𑀢𑀸𑀯 𑀭𑀼𑀧𑁆𑀧𑀦𑀁 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑁂 𑀧𑀸𑀓𑀝𑀁. 𑀢𑀺𑀡𑁆𑀡𑀁 𑀢𑀺𑀡𑁆𑀡𑀜𑁆𑀳𑀺 𑀘𑀓𑁆𑀓𑀯𑀸𑀴𑀸𑀦𑀁 𑀅𑀦𑁆𑀢𑀭𑁂 𑀏𑀓𑁂𑀓𑁄 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑁄 𑀦𑀸𑀫 𑀳𑁄𑀢𑀺 𑀅𑀝𑁆𑀞𑀬𑁄𑀚𑀦𑀲𑀳𑀲𑁆𑀲𑀧𑁆𑀧𑀫𑀸𑀡𑁄. 𑀬𑀲𑁆𑀲 𑀦𑁂𑀯 𑀳𑁂𑀝𑁆𑀞𑀸 𑀧𑀣𑀯𑀻 𑀅𑀢𑁆𑀣𑀺, 𑀦 𑀉𑀧𑀭𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀤𑀻𑀧𑀫𑀡𑀺𑀆𑀮𑁄𑀓𑁄, 𑀦𑀺𑀘𑁆𑀘𑀦𑁆𑀥𑀓𑀸𑀭𑁄. 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀸𑀦𑀁 𑀢𑀺𑀕𑀸𑀯𑀼𑀢𑁄 𑀅𑀢𑁆𑀢𑀪𑀸𑀯𑁄 𑀳𑁄𑀢𑀺, 𑀢𑁂 𑀯𑀕𑁆𑀕𑀼𑀮𑀺𑀬𑁄 𑀯𑀺𑀬 𑀧𑀩𑁆𑀩𑀢𑀧𑀸𑀤𑁂 𑀤𑀻𑀖𑀧𑀼𑀣𑀼𑀮𑁂𑀳𑀺 𑀦𑀔𑁂𑀳𑀺 𑀮𑀕𑁆𑀕𑀺𑀢𑁆𑀯𑀸 𑀅𑀯𑀁𑀲𑀺𑀭𑀸 𑀑𑀮𑀫𑁆𑀩𑀦𑁆𑀢𑀺. 𑀬𑀤𑀸 𑀲𑀁𑀲𑀧𑁆𑀧𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀢𑁆𑀣𑀧𑀸𑀲𑀸𑀕𑀢𑀸 𑀳𑁄𑀦𑁆𑀢𑀺, 𑀅𑀣 ‘‘𑀪𑀓𑁆𑀔𑁄 𑀦𑁄 𑀮𑀤𑁆𑀥𑁄’’𑀢𑀺? 𑀫𑀜𑁆𑀜𑀫𑀸𑀦𑀸 𑀢𑀢𑁆𑀣 𑀩𑁆𑀬𑀸𑀯𑀝𑀸 𑀯𑀺𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀮𑁄𑀓𑀲𑀦𑁆𑀥𑀸𑀭𑀓𑁂 𑀉𑀤𑀓𑁂 𑀧𑀢𑀦𑁆𑀢𑀺, 𑀯𑀸𑀢𑁂 𑀧𑀳𑀭𑀦𑁆𑀢𑁂𑀧𑀺 𑀫𑀥𑀼𑀓𑀨𑀮𑀸𑀦𑀺 𑀯𑀺𑀬 𑀙𑀺𑀚𑁆𑀚𑀺𑀢𑁆𑀯𑀸 𑀉𑀤𑀓𑁂 𑀧𑀢𑀦𑁆𑀢𑀺, 𑀧𑀢𑀺𑀢𑀫𑀢𑁆𑀢𑀸𑀯 𑀅𑀘𑁆𑀘𑀦𑁆𑀢𑀔𑀸𑀭𑁂 𑀉𑀤𑀓𑁂 𑀢𑀢𑁆𑀢𑀢𑁂𑀮𑁂 𑀧𑀢𑀺𑀢𑀧𑀺𑀝𑁆𑀞𑀧𑀺𑀡𑁆𑀟𑀺 𑀯𑀺𑀬 𑀧𑀝𑀧𑀝𑀸𑀬𑀫𑀸𑀦𑀸 𑀯𑀺𑀮𑀻𑀬𑀦𑁆𑀢𑀺. 𑀏𑀯𑀁 𑀲𑀻𑀢𑁂𑀦 𑀭𑀼𑀧𑁆𑀧𑀦𑀁 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑁂 ¶ 𑀧𑀸𑀓𑀝𑀁. 𑀫𑀳𑀺𑀁𑀲𑀓𑀭𑀝𑁆𑀞𑀸𑀤𑀻𑀲𑀼𑀧𑀺 𑀳𑀺𑀫𑀧𑀸𑀢𑀲𑀻𑀢𑀮𑁂𑀲𑀼 𑀧𑀤𑁂𑀲𑁂𑀲𑀼 𑀏𑀢𑀁 𑀧𑀸𑀓𑀝𑀫𑁂𑀯. 𑀢𑀢𑁆𑀣 𑀳𑀺 𑀲𑀢𑁆𑀢𑀸 𑀲𑀻𑀢𑁂𑀦 𑀪𑀺𑀦𑁆𑀦𑀲𑀭𑀻𑀭𑀸 𑀚𑀻𑀯𑀺𑀢𑀓𑁆𑀔𑀬𑀫𑁆𑀧𑀺 𑀧𑀸𑀧𑀼𑀡𑀦𑁆𑀢𑀺.

𑀉𑀡𑁆𑀳𑁂𑀦 𑀭𑀼𑀧𑁆𑀧𑀦𑀁 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁂 𑀧𑀸𑀓𑀝𑀁 𑀳𑁄𑀢𑀺. 𑀚𑀺𑀖𑀘𑁆𑀙𑀸𑀬 𑀭𑀼𑀧𑁆𑀧𑀦𑀁 𑀧𑁂𑀢𑁆𑀢𑀺𑀯𑀺𑀲𑀬𑁂 𑀘𑁂𑀯 𑀤𑀼𑀩𑁆𑀪𑀺𑀓𑁆𑀔𑀓𑀸𑀮𑁂 𑀘 𑀧𑀸𑀓𑀝𑀁. 𑀧𑀺𑀧𑀸𑀲𑀸𑀬 𑀭𑀼𑀧𑁆𑀧𑀦𑀁 𑀓𑀸𑀮𑀓𑀜𑁆𑀚𑀺𑀓𑀸𑀤𑀻𑀲𑀼 𑀧𑀸𑀓𑀝𑀁. 𑀏𑀓𑁄 𑀓𑀺𑀭 𑀓𑀸𑀮𑀓𑀜𑁆𑀚𑀺𑀓𑀅𑀲𑀼𑀭𑁄 𑀧𑀺𑀧𑀸𑀲𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ¶ 𑀬𑁄𑀚𑀦𑀕𑀫𑁆𑀪𑀻𑀭𑀯𑀺𑀢𑁆𑀣𑀸𑀭𑀁 𑀫𑀳𑀸𑀕𑀗𑁆𑀕𑀁 𑀑𑀢𑀭𑀺, 𑀢𑀲𑁆𑀲 𑀕𑀢𑀕𑀢𑀝𑁆𑀞𑀸𑀦𑁂 𑀉𑀤𑀓𑀁 𑀙𑀺𑀚𑁆𑀚𑀢𑀺, 𑀥𑀽𑀫𑁄 𑀉𑀕𑁆𑀕𑀘𑁆𑀙𑀢𑀺, 𑀢𑀢𑁆𑀢𑁂 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀘𑀗𑁆𑀓𑀫𑀦𑀓𑀸𑀮𑁄 𑀯𑀺𑀬 𑀳𑁄𑀢𑀺. 𑀢𑀲𑁆𑀲 𑀉𑀤𑀓𑀲𑀤𑁆𑀤𑀁 𑀲𑀼𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀦𑁆𑀢𑀲𑁆𑀲𑁂𑀯 𑀭𑀢𑁆𑀢𑀺 𑀯𑀺𑀪𑀸𑀬𑀺. 𑀅𑀣 𑀦𑀁 𑀧𑀸𑀢𑁄𑀯 𑀪𑀺𑀓𑁆𑀔𑀸𑀘𑀸𑀭𑀁 ¶ 𑀕𑀘𑁆𑀙𑀦𑁆𑀢𑀸 𑀢𑀺𑀁𑀲𑀫𑀢𑁆𑀢𑀸 𑀧𑀺𑀡𑁆𑀟𑀘𑀸𑀭𑀺𑀓𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 ‘‘𑀓𑁄 𑀦𑀸𑀫 𑀢𑁆𑀯𑀁 𑀲𑀧𑁆𑀧𑀼𑀭𑀺𑀲𑀸’’𑀢𑀺? 𑀧𑀼𑀘𑁆𑀙𑀺𑀁𑀲𑀼. ‘‘𑀧𑁂𑀢𑁄𑀳𑀫𑀲𑁆𑀫𑀺, 𑀪𑀦𑁆𑀢𑁂’’𑀢𑀺. ‘‘𑀓𑀺𑀁 𑀧𑀭𑀺𑀬𑁂𑀲𑀲𑀻’’𑀢𑀺? ‘‘𑀧𑀸𑀦𑀻𑀬𑀁, 𑀪𑀦𑁆𑀢𑁂’’𑀢𑀺. ‘‘𑀅𑀬𑀁 𑀕𑀗𑁆𑀕𑀸 𑀧𑀭𑀺𑀧𑀼𑀡𑁆𑀡𑀸, 𑀓𑀺𑀁 𑀢𑁆𑀯𑀁 𑀦 𑀧𑀲𑁆𑀲𑀲𑀻’’𑀢𑀺? ‘‘𑀦 𑀉𑀧𑀓𑀧𑁆𑀧𑀢𑀺, 𑀪𑀦𑁆𑀢𑁂’’𑀢𑀺. 𑀢𑁂𑀦 𑀳𑀺 𑀕𑀗𑁆𑀕𑀸𑀧𑀺𑀝𑁆𑀞𑁂 𑀦𑀺𑀧𑀚𑁆𑀚, 𑀫𑀼𑀔𑁂 𑀢𑁂 𑀧𑀸𑀦𑀻𑀬𑀁 𑀆𑀲𑀺𑀜𑁆𑀘𑀺𑀲𑁆𑀲𑀸𑀫𑀸’’𑀢𑀺. 𑀲𑁄 𑀯𑀸𑀮𑀺𑀓𑀸𑀧𑀼𑀴𑀺𑀦𑁂 𑀉𑀢𑁆𑀢𑀸𑀦𑁄 𑀦𑀺𑀧𑀚𑁆𑀚𑀺. 𑀪𑀺𑀓𑁆𑀔𑀽 𑀢𑀺𑀁𑀲𑀫𑀢𑁆𑀢𑁂 𑀧𑀢𑁆𑀢𑁂 𑀦𑀻𑀳𑀭𑀺𑀢𑁆𑀯𑀸 𑀉𑀤𑀓𑀁 𑀆𑀳𑀭𑀺𑀢𑁆𑀯𑀸 𑀢𑀲𑁆𑀲 𑀫𑀼𑀔𑁂 𑀆𑀲𑀺𑀜𑁆𑀘𑀺𑀁𑀲𑀼. 𑀢𑁂𑀲𑀁 𑀢𑀣𑀸 𑀓𑀭𑁄𑀦𑁆𑀢𑀸𑀦𑀁𑀬𑁂𑀯 𑀯𑁂𑀮𑀸 𑀉𑀧𑀓𑀝𑁆𑀞𑀸 𑀚𑀸𑀢𑀸. 𑀢𑀢𑁄 ‘‘𑀪𑀺𑀓𑁆𑀔𑀸𑀘𑀸𑀭𑀓𑀸𑀮𑁄 𑀅𑀫𑁆𑀳𑀸𑀓𑀁 𑀲𑀧𑁆𑀧𑀼𑀭𑀺𑀲, 𑀓𑀘𑁆𑀘𑀺 𑀢𑁂 𑀅𑀲𑁆𑀲𑀸𑀤𑀫𑀢𑁆𑀢𑀸 𑀮𑀤𑁆𑀥𑀸’’𑀢𑀺 𑀆𑀳𑀁𑀲𑀼. 𑀧𑁂𑀢𑁄 ‘‘𑀲𑀘𑁂 𑀫𑁂, 𑀪𑀦𑁆𑀢𑁂, 𑀢𑀺𑀁𑀲𑀫𑀢𑁆𑀢𑀸𑀦𑀁 𑀅𑀬𑁆𑀬𑀸𑀦𑀁 𑀢𑀺𑀁𑀲𑀧𑀢𑁆𑀢𑁂𑀳𑀺 𑀆𑀲𑀺𑀢𑁆𑀢𑀉𑀤𑀓𑀢𑁄 𑀅𑀟𑁆𑀠𑀧𑀲𑀢𑀫𑀢𑁆𑀢𑀫𑁆𑀧𑀺 𑀧𑀭𑀕𑀮𑀁 𑀕𑀢𑀁, 𑀧𑁂𑀢𑀢𑁆𑀢𑀪𑀸𑀯𑀢𑁄 𑀫𑁄𑀓𑁆𑀔𑁄 𑀫𑀸 𑀳𑁄𑀢𑀽’’𑀢𑀺 𑀆𑀳. 𑀏𑀯𑀁 𑀧𑀺𑀧𑀸𑀲𑀸𑀬 𑀭𑀼𑀧𑁆𑀧𑀦𑀁 𑀧𑁂𑀢𑁆𑀢𑀺𑀯𑀺𑀲𑀬𑁂 𑀧𑀸𑀓𑀝𑀁.

𑀟𑀁𑀲𑀸𑀤𑀻𑀳𑀺 𑀭𑀼𑀧𑁆𑀧𑀦𑀁 𑀟𑀁𑀲𑀫𑀓𑁆𑀔𑀺𑀓𑀸𑀤𑀺𑀩𑀳𑀼𑀮𑁂𑀲𑀼 𑀧𑀤𑁂𑀲𑁂𑀲𑀼 𑀧𑀸𑀓𑀝𑀁. 𑀏𑀢𑁆𑀣 𑀘 𑀟𑀁𑀲𑀸𑀢𑀺 𑀧𑀺𑀗𑁆𑀕𑀮𑀫𑀓𑁆𑀔𑀺𑀓𑀸. 𑀫𑀓𑀲𑀸𑀢𑀺 𑀫𑀓𑀲𑀸𑀯. 𑀯𑀸𑀢𑀸𑀢𑀺 𑀓𑀼𑀘𑁆𑀙𑀺𑀯𑀸𑀢𑀧𑀺𑀝𑁆𑀞𑀺𑀯𑀸𑀢𑀸𑀤𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀲𑀭𑀻𑀭𑀲𑁆𑀫𑀺𑀜𑁆𑀳𑀺 𑀯𑀸𑀢𑀭𑁄𑀕𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀳𑀢𑁆𑀣𑀧𑀸𑀤𑀧𑀺𑀝𑁆𑀞𑀺𑀆𑀤𑀻𑀦𑀺 𑀪𑀺𑀦𑁆𑀤𑀢𑀺, 𑀓𑀸𑀡𑀁 𑀓𑀭𑁄𑀢𑀺, 𑀔𑀼𑀚𑁆𑀚𑀁 𑀓𑀭𑁄𑀢𑀺, 𑀧𑀻𑀞𑀲𑀧𑁆𑀧𑀺𑀁 𑀓𑀭𑁄𑀢𑀺. 𑀆𑀢𑀧𑁄𑀢𑀺 𑀲𑀽𑀭𑀺𑀬𑀸𑀢𑀧𑁄. 𑀢𑁂𑀦 𑀭𑀼𑀧𑁆𑀧𑀦𑀁 𑀫𑀭𑀼𑀓𑀦𑁆𑀢𑀸𑀭𑀸𑀤𑀻𑀲𑀼 𑀧𑀸𑀓𑀝𑀁. 𑀏𑀓𑀸 𑀓𑀺𑀭 𑀇𑀢𑁆𑀣𑀻 𑀫𑀭𑀼𑀓𑀦𑁆𑀢𑀸𑀭𑁂 𑀭𑀢𑁆𑀢𑀺𑀁 𑀲𑀢𑁆𑀣𑀢𑁄 𑀑𑀳𑀻𑀦𑀸 𑀤𑀺𑀯𑀸 𑀲𑀽𑀭𑀺𑀬𑁂 𑀉𑀕𑁆𑀕𑀘𑁆𑀙𑀦𑁆𑀢𑁂 𑀯𑀸𑀮𑀺𑀓𑀸𑀬 𑀢𑀧𑁆𑀧𑀫𑀸𑀦𑀸𑀬 𑀧𑀸𑀤𑁂 𑀞𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀲𑀻𑀲𑀢𑁄 𑀧𑀘𑁆𑀙𑀺𑀁 𑀑𑀢𑀸𑀭𑁂𑀢𑁆𑀯𑀸 𑀅𑀓𑁆𑀓𑀫𑀺. 𑀓𑀫𑁂𑀦 𑀧𑀘𑁆𑀙𑀺𑀬𑀸 𑀉𑀡𑁆𑀳𑀸𑀪𑀺𑀢𑀢𑁆𑀢𑀸𑀬 𑀞𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀢𑀲𑁆𑀲𑀸 𑀉𑀧𑀭𑀺 𑀲𑀸𑀝𑀓𑀁 𑀞𑀧𑁂𑀢𑁆𑀯𑀸 𑀅𑀓𑁆𑀓𑀫𑀺. 𑀢𑀲𑁆𑀫𑀺𑀫𑁆𑀧𑀺 𑀲𑀦𑁆𑀢𑀢𑁆𑀢𑁂 𑀅𑀢𑁆𑀢𑀦𑁄 𑀅𑀗𑁆𑀓𑁂𑀦 𑀕𑀳𑀺𑀢𑀧𑀼𑀢𑁆𑀢𑀓𑀁 𑀅𑀥𑁄𑀫𑀼𑀔𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀓𑀦𑁆𑀤𑀦𑁆𑀢𑀁𑀬𑁂𑀯 𑀅𑀓𑁆𑀓𑀫𑀺𑀢𑁆𑀯𑀸 𑀲𑀤𑁆𑀥𑀺𑀁 𑀢𑁂𑀦 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀉𑀡𑁆𑀳𑀸𑀪𑀺𑀢𑀢𑁆𑀢𑀸 𑀓𑀸𑀮𑀫𑀓𑀸𑀲𑀺.

𑀲𑀭𑀻𑀲𑀧𑀸𑀢𑀺 ¶ 𑀬𑁂 𑀓𑁂𑀘𑀺 𑀤𑀻𑀖𑀚𑀸𑀢𑀺𑀓𑀸 𑀲𑀭𑀦𑁆𑀢𑀸 𑀕𑀘𑁆𑀙𑀦𑁆𑀢𑀺. 𑀢𑁂𑀲𑀁 𑀲𑀫𑁆𑀨𑀲𑁆𑀲𑁂𑀦 𑀭𑀼𑀧𑁆𑀧𑀦𑀁 𑀆𑀲𑀻𑀯𑀺𑀲𑀤𑀝𑁆𑀞𑀓𑀸𑀤𑀻𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀇𑀢𑀺 𑀪𑀕𑀯𑀢𑀸 𑀬𑀸𑀦𑀺 𑀇𑀫𑀸𑀦𑀺 𑀲𑀸𑀫𑀜𑁆𑀜𑀧𑀘𑁆𑀘𑀢𑁆𑀢𑀯𑀲𑁂𑀦 𑀥𑀫𑁆𑀫𑀸𑀦𑀁 𑀤𑁆𑀯𑁂 𑀮𑀓𑁆𑀔𑀡𑀸𑀦𑀺, 𑀢𑁂𑀲𑀼 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀢𑀸𑀯 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀁 𑀤𑀲𑁆𑀲𑀺𑀢𑀁. 𑀭𑀽𑀧𑀓𑁆𑀔𑀦𑁆𑀥𑀲𑁆𑀲𑁂𑀯 𑀳𑀺 𑀏𑀢𑀁, 𑀦 𑀯𑁂𑀤𑀦𑀸𑀤𑀻𑀦𑀁 ¶ , 𑀢𑀲𑁆𑀫𑀸 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀦𑁆𑀢𑀺 ¶ 𑀯𑀼𑀘𑁆𑀘𑀢𑀺. 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀮𑀓𑁆𑀔𑀡𑀁 𑀧𑀦 𑀯𑁂𑀤𑀦𑀸𑀤𑀻𑀦𑀫𑁆𑀧𑀺 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀲𑀸𑀫𑀜𑁆𑀜𑀮𑀓𑁆𑀔𑀡𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀓𑀺𑀜𑁆𑀘, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀁 𑀯𑀤𑁂𑀣𑀸𑀢𑀺𑀆𑀤𑀻𑀲𑀼 𑀧𑀼𑀭𑀺𑀫𑀲𑀤𑀺𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀬𑀁 𑀧𑀦 𑀧𑀼𑀭𑀺𑀫𑁂𑀦 𑀅𑀲𑀤𑀺𑀲𑀁, 𑀢𑀲𑁆𑀲𑀸𑀬𑀁 𑀯𑀺𑀪𑀸𑀯𑀦𑀸 𑁋 𑀲𑀼𑀔𑀫𑁆𑀧𑀺 𑀯𑁂𑀤𑀬𑀢𑀻𑀢𑀺 𑀲𑀼𑀔𑀁 𑀆𑀭𑀫𑁆𑀫𑀡𑀁 𑀯𑁂𑀤𑁂𑀢𑀺 𑀅𑀦𑀼𑀪𑀯𑀢𑀺. 𑀧𑀭𑀢𑁄 𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀓𑀣𑀁 𑀧𑀦𑁂𑀢𑀁 𑀆𑀭𑀫𑁆𑀫𑀡𑀁 𑀲𑀼𑀔𑀁 𑀤𑀼𑀓𑁆𑀔𑀁 𑀅𑀤𑀼𑀓𑁆𑀔𑀫𑀲𑀼𑀔𑀁 𑀦𑀸𑀫 𑀚𑀸𑀢𑀦𑁆𑀢𑀺? 𑀲𑀼𑀔𑀸𑀤𑀻𑀦𑀁 𑀧𑀘𑁆𑀘𑀬𑀢𑁄. 𑀲𑁆𑀯𑀸𑀬𑀫𑀢𑁆𑀣𑁄 ‘‘𑀬𑀲𑁆𑀫𑀸 𑀘 𑀔𑁄, 𑀫𑀳𑀸𑀮𑀺, 𑀭𑀽𑀧𑀁 𑀲𑀼𑀔𑀁 𑀲𑀼𑀔𑀸𑀦𑀼𑀧𑀢𑀺𑀢𑀁 𑀲𑀼𑀔𑀸𑀯𑀓𑁆𑀓𑀦𑁆𑀢’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀫𑀳𑀸𑀮𑀺𑀲𑀼𑀢𑁆𑀢𑁂 (𑀲𑀁. 𑀦𑀺. 𑁩.𑁬𑁦) 𑀆𑀕𑀢𑁄𑀬𑁂𑀯. 𑀯𑁂𑀤𑀬𑀢𑀻𑀢𑀺 𑀏𑀢𑁆𑀣 𑀘 𑀯𑁂𑀤𑀦𑀸𑀯 𑀯𑁂𑀤𑀬𑀢𑀺, 𑀦 𑀅𑀜𑁆𑀜𑁄 𑀲𑀢𑁆𑀢𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸. 𑀯𑁂𑀤𑀦𑀸 𑀳𑀺 𑀯𑁂𑀤𑀬𑀺𑀢𑀮𑀓𑁆𑀔𑀡𑀸, 𑀢𑀲𑁆𑀫𑀸 𑀯𑀢𑁆𑀣𑀸𑀭𑀫𑁆𑀫𑀡𑀁 𑀧𑀝𑀺𑀘𑁆𑀘 𑀯𑁂𑀤𑀦𑀸𑀯 𑀯𑁂𑀤𑀬𑀢𑀻𑀢𑀺. 𑀏𑀯𑀫𑀺𑀥 𑀪𑀕𑀯𑀸 𑀯𑁂𑀤𑀦𑀸𑀬𑀧𑀺 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀫𑁂𑀯 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀲𑀺.

𑀦𑀻𑀮𑀫𑁆𑀧𑀺 𑀲𑀜𑁆𑀚𑀸𑀦𑀸𑀢𑀻𑀢𑀺 𑀦𑀻𑀮𑀧𑀼𑀧𑁆𑀨𑁂 𑀯𑀸 𑀯𑀢𑁆𑀣𑁂 𑀯𑀸 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀉𑀧𑀘𑀸𑀭𑀁 𑀯𑀸 𑀅𑀧𑁆𑀧𑀦𑀁 𑀯𑀸 𑀧𑀸𑀧𑁂𑀦𑁆𑀢𑁄 𑀲𑀜𑁆𑀚𑀸𑀦𑀸𑀢𑀺. 𑀅𑀬𑀜𑁆𑀳𑀺 𑀲𑀜𑁆𑀜𑀸 𑀦𑀸𑀫 𑀧𑀭𑀺𑀓𑀫𑁆𑀫𑀲𑀜𑁆𑀜𑀸𑀧𑀺 𑀉𑀧𑀘𑀸𑀭𑀲𑀜𑁆𑀜𑀸𑀧𑀺 𑀅𑀧𑁆𑀧𑀦𑀸𑀲𑀜𑁆𑀜𑀸𑀧𑀺 𑀯𑀝𑁆𑀝𑀢𑀺, 𑀦𑀻𑀮𑀁 𑀦𑀻𑀮𑀦𑁆𑀢𑀺 𑀉𑀧𑁆𑀧𑀚𑁆𑀚𑀦𑀲𑀜𑁆𑀜𑀸𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀧𑀻𑀢𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀥𑀸𑀧𑀺 𑀪𑀕𑀯𑀸 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀸𑀬 𑀲𑀜𑁆𑀜𑀸𑀬 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀫𑁂𑀯 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀲𑀺.

𑀭𑀽𑀧𑀁 𑀭𑀽𑀧𑀢𑁆𑀢𑀸𑀬 𑀲𑀗𑁆𑀔𑀢𑀫𑀪𑀺𑀲𑀗𑁆𑀔𑀭𑁄𑀦𑁆𑀢𑀻𑀢𑀺 𑀬𑀣𑀸 𑀬𑀸𑀕𑀼𑀫𑁂𑀯 𑀬𑀸𑀕𑀼𑀢𑁆𑀢𑀸𑀬, 𑀧𑀽𑀯𑀫𑁂𑀯 𑀧𑀽𑀯𑀢𑁆𑀢𑀸𑀬 𑀧𑀘𑀢𑀺 𑀦𑀸𑀫, 𑀏𑀯𑀁 𑀧𑀘𑁆𑀘𑀬𑁂𑀳𑀺 𑀲𑀫𑀸𑀕𑀦𑁆𑀢𑁆𑀯𑀸 𑀓𑀢𑀪𑀸𑀯𑁂𑀦 𑀲𑀗𑁆𑀔𑀢𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀭𑀽𑀧𑀫𑁂𑀯 𑀭𑀽𑀧𑀢𑁆𑀢𑀸𑀬 𑀬𑀣𑀸 𑀅𑀪𑀺𑀲𑀗𑁆𑀔𑀢𑀁 𑀭𑀽𑀧𑀁 𑀦𑀸𑀫 𑀳𑁄𑀢𑀺, 𑀢𑀣𑀢𑁆𑀢𑀸𑀬 𑀭𑀽𑀧𑀪𑀸𑀯𑀸𑀬 𑀅𑀪𑀺𑀲𑀗𑁆𑀔𑀭𑁄𑀢𑀺 𑀆𑀬𑀽𑀳𑀢𑀺 𑀲𑀫𑁆𑀧𑀺𑀡𑁆𑀟𑁂𑀢𑀺, 𑀦𑀺𑀧𑁆𑀨𑀸𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦𑁂𑀢𑁆𑀣 𑀲𑀗𑁆𑀔𑁂𑀧𑁄 𑁋 𑀅𑀢𑁆𑀢𑀦𑀸 𑀲𑀳 𑀚𑀸𑀬𑀫𑀸𑀦𑀁 𑀭𑀽𑀧𑀁 𑀲𑀫𑁆𑀧𑀬𑀼𑀢𑁆𑀢𑁂 𑀘 𑀯𑁂𑀤𑀦𑀸𑀤𑀬𑁄 𑀥𑀫𑁆𑀫𑁂 𑀅𑀪𑀺𑀲𑀗𑁆𑀔𑀭𑁄𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺. 𑀇𑀥𑀸𑀧𑀺 𑀪𑀕𑀯𑀸 𑀘𑁂𑀢𑀬𑀺𑀢𑀮𑀓𑁆𑀔𑀡𑀲𑁆𑀲 𑀲𑀗𑁆𑀔𑀸𑀭𑀲𑁆𑀲 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀫𑁂𑀯 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀲𑀺.

𑀅𑀫𑁆𑀩𑀺𑀮𑀫𑁆𑀧𑀺 ¶ 𑀯𑀺𑀚𑀸𑀦𑀸𑀢𑀻𑀢𑀺 𑀅𑀫𑁆𑀩𑀅𑀫𑁆𑀩𑀸𑀝𑀓𑀫𑀸𑀢𑀼𑀮𑀼𑀗𑁆𑀕𑀸𑀤𑀺𑀅𑀫𑁆𑀩𑀺𑀮𑀁 ‘‘𑀅𑀫𑁆𑀩𑀺𑀮’’𑀦𑁆𑀢𑀺 𑀯𑀺𑀚𑀸𑀦𑀸𑀢𑀺. 𑀏𑀲𑁂𑀯 ¶ 𑀦𑀬𑁄 𑀲𑀩𑁆𑀩𑀧𑀤𑁂𑀲𑀼. 𑀅𑀧𑀺 𑀘𑁂𑀢𑁆𑀣 𑀢𑀺𑀢𑁆𑀢𑀓𑀦𑁆𑀢𑀺 𑀦𑀺𑀫𑁆𑀩𑀧𑀝𑁄𑀮𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀁 𑀓𑀝𑀼𑀓𑀦𑁆𑀢𑀺 𑀧𑀺𑀧𑁆𑀧𑀮𑀺𑀫𑀭𑀺𑀘𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀁. 𑀫𑀥𑀼𑀭𑀦𑁆𑀢𑀺 𑀲𑀧𑁆𑀧𑀺𑀨𑀸𑀡𑀺𑀢𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀁 ¶ . 𑀔𑀸𑀭𑀺𑀓𑀦𑁆𑀢𑀺 𑀯𑀸𑀢𑀺𑀗𑁆𑀕𑀡𑀦𑀸𑀴𑀺𑀓𑁂𑀭 𑀘𑀢𑀼𑀭𑀲𑁆𑀲𑀯𑀮𑁆𑀮𑀺𑀯𑁂𑀢𑁆𑀢𑀗𑁆𑀓𑀼𑀭𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀁. 𑀅𑀔𑀸𑀭𑀺𑀓𑀦𑁆𑀢𑀺 𑀬𑀁 𑀯𑀸 𑀢𑀁 𑀯𑀸 𑀨𑀮𑀚𑀸𑀢𑀁 𑀓𑀸𑀭𑀧𑀡𑁆𑀡𑀸𑀤𑀺𑀫𑀺𑀲𑁆𑀲𑀓𑀧𑀡𑁆𑀡𑀁. 𑀮𑁄𑀡𑀺𑀓𑀦𑁆𑀢𑀺 𑀮𑁄𑀡𑀬𑀸𑀕𑀼𑀮𑁄𑀡𑀫𑀘𑁆𑀙𑀮𑁄𑀡𑀪𑀢𑁆𑀢𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀁. 𑀅𑀮𑁄𑀡𑀺𑀓𑀦𑁆𑀢𑀺𑀅𑀮𑁄𑀡𑀬𑀸𑀕𑀼𑀅𑀮𑁄𑀡𑀫𑀘𑁆𑀙𑀅𑀮𑁄𑀡𑀪𑀢𑁆𑀢𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀁. 𑀢𑀲𑁆𑀫𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑀲𑁆𑀫𑀸 𑀇𑀫𑀁 𑀅𑀫𑁆𑀩𑀺𑀮𑀸𑀤𑀺𑀪𑁂𑀤𑀁 𑀅𑀜𑁆𑀜𑀫𑀜𑁆𑀜𑀯𑀺𑀲𑀺𑀝𑁆𑀞𑁂𑀦 𑀅𑀫𑁆𑀩𑀺𑀮𑀸𑀤𑀺𑀪𑀸𑀯𑁂𑀦 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀏𑀯𑀫𑀺𑀥𑀸𑀧𑀺 𑀪𑀕𑀯𑀸 𑀯𑀺𑀚𑀸𑀦𑀦𑀮𑀓𑁆𑀔𑀡𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀫𑁂𑀯 𑀪𑀸𑀚𑁂𑀢𑁆𑀯𑀸 𑀤𑀲𑁆𑀲𑁂𑀲𑀺.

𑀬𑀲𑁆𑀫𑀸 𑀧𑀦 𑀆𑀭𑀫𑁆𑀫𑀡𑀲𑁆𑀲 𑀆𑀓𑀸𑀭𑀲𑀡𑁆𑀞𑀸𑀦𑀕𑀳𑀡𑀯𑀲𑁂𑀦 𑀲𑀜𑁆𑀜𑀸 𑀧𑀸𑀓𑀝𑀸 𑀳𑁄𑀢𑀺, 𑀢𑀲𑁆𑀫𑀸 𑀲𑀸 𑀘𑀓𑁆𑀔𑀼𑀤𑁆𑀯𑀸𑀭𑁂 𑀯𑀺𑀪𑀢𑁆𑀢𑀸. 𑀬𑀲𑁆𑀫𑀸 𑀯𑀺𑀦𑀸𑀧𑀺 𑀆𑀓𑀸𑀭𑀲𑀡𑁆𑀞𑀸𑀦𑀸 𑀆𑀭𑀫𑁆𑀫𑀡𑀲𑁆𑀲 𑀧𑀘𑁆𑀘𑀢𑁆𑀢𑀪𑁂𑀤𑀕𑀳𑀡𑀯𑀲𑁂𑀦 𑀯𑀺𑀜𑁆𑀜𑀸𑀡𑀁 𑀧𑀸𑀓𑀝𑀁 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀚𑀺𑀯𑁆𑀳𑀸𑀤𑁆𑀯𑀸𑀭𑁂 𑀯𑀺𑀪𑀢𑁆𑀢𑀁. 𑀇𑀫𑁂𑀲𑀁 𑀧𑀦 𑀲𑀜𑁆𑀜𑀸𑀯𑀺𑀜𑁆𑀜𑀸𑀡𑀧𑀜𑁆𑀜𑀸𑀦𑀁 𑀅𑀲𑀫𑁆𑀫𑁄𑀳𑀢𑁄 𑀲𑀪𑀸𑀯𑀲𑀮𑁆𑀮𑀓𑁆𑀔𑀡𑀢𑁆𑀣𑀁 𑀲𑀜𑁆𑀚𑀸𑀦𑀸𑀢𑀺, 𑀯𑀺𑀚𑀸𑀦𑀸𑀢𑀺, 𑀧𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 𑀯𑀺𑀲𑁂𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀉𑀧𑀲𑀕𑁆𑀕𑀫𑀢𑁆𑀢𑀫𑁂𑀯 𑀯𑀺𑀲𑁂𑀲𑁄, 𑀚𑀸𑀦𑀸𑀢𑀻𑀢𑀺 𑀧𑀤𑀁 𑀧𑀦 𑀅𑀯𑀺𑀲𑁂𑀲𑁄. 𑀢𑀲𑁆𑀲𑀧𑀺 𑀚𑀸𑀦𑀦𑀝𑁆𑀞𑁂𑀦 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀜𑁆𑀜𑀸 𑀳𑀺 𑀦𑀻𑀮𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀲𑀜𑁆𑀚𑀸𑀦𑀦𑀫𑀢𑁆𑀢𑀫𑁂𑀯, 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸𑀢𑀺 𑀮𑀓𑁆𑀔𑀡𑀧𑀝𑀺𑀯𑁂𑀥𑀁 𑀧𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀯𑀺𑀜𑁆𑀜𑀸𑀡𑀁 𑀦𑀻𑀮𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀜𑁆𑀘𑁂𑀯 𑀚𑀸𑀦𑀸𑀢𑀺, 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀮𑀓𑁆𑀔𑀡𑀧𑀝𑀺𑀯𑁂𑀥𑀜𑁆𑀘 𑀧𑀸𑀧𑁂𑀢𑀺, 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀧𑀦 𑀫𑀕𑁆𑀕𑀧𑀸𑀢𑀼𑀪𑀸𑀯𑀁 𑀧𑀸𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀧𑀜𑁆𑀜𑀸 𑀦𑀻𑀮𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀫𑁆𑀧𑀺 𑀚𑀸𑀦𑀸𑀢𑀺, 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀮𑀓𑁆𑀔𑀡𑀧𑀝𑀺𑀯𑁂𑀥𑀫𑁆𑀧𑀺 𑀧𑀸𑀧𑁂𑀢𑀺, 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀫𑀕𑁆𑀕𑀧𑀸𑀢𑀼𑀪𑀸𑀯𑀫𑁆𑀧𑀺 𑀧𑀸𑀧𑁂𑀢𑀺.

𑀬𑀣𑀸 𑀳𑀺 𑀳𑁂𑀭𑀜𑁆𑀜𑀺𑀓𑀨𑀮𑀓𑁂 𑀓𑀳𑀸𑀧𑀡𑀭𑀸𑀲𑀺𑀫𑁆𑀳𑀺 𑀓𑀢𑁂 𑀅𑀚𑀸𑀢𑀩𑀼𑀤𑁆𑀥𑀺𑀤𑀸𑀭𑀓𑁄 ¶ 𑀕𑀸𑀫𑀺𑀓𑀧𑀼𑀭𑀺𑀲𑁄 𑀫𑀳𑀸𑀳𑁂𑀭𑀜𑁆𑀜𑀺𑀓𑁄𑀢𑀺 𑀢𑀻𑀲𑀼 𑀚𑀦𑁂𑀲𑀼 𑀑𑀮𑁄𑀓𑁂𑀢𑁆𑀯𑀸 𑀞𑀺𑀢𑁂𑀲𑀼 𑀅𑀚𑀸𑀢𑀩𑀼𑀤𑁆𑀥𑀺𑀤𑀸𑀭𑀓𑁄 𑀓𑀳𑀸𑀧𑀡𑀸𑀦𑀁 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀘𑀢𑀼𑀭𑀲𑁆𑀲𑀫𑀡𑁆𑀟𑀮𑀸𑀤𑀺𑀪𑀸𑀯𑀫𑁂𑀯 𑀚𑀸𑀦𑀸𑀢𑀺, ‘‘𑀇𑀤𑀁 𑀫𑀦𑀼𑀲𑁆𑀲𑀸𑀦𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀁 𑀭𑀢𑀦𑀲𑀫𑁆𑀫𑀢’’𑀦𑁆𑀢𑀺 𑀦 𑀚𑀸𑀦𑀸𑀢𑀺. 𑀕𑀸𑀫𑀺𑀓𑀧𑀼𑀭𑀺𑀲𑁄 𑀘𑀺𑀢𑁆𑀢𑀸𑀤𑀺𑀪𑀸𑀯𑀜𑁆𑀘 𑀚𑀸𑀦𑀸𑀢𑀺, 𑀫𑀦𑀼𑀲𑁆𑀲𑀸𑀦𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀭𑀢𑀦𑀲𑀫𑁆𑀫𑀢𑀪𑀸𑀯𑀜𑁆𑀘, ‘‘𑀅𑀬𑀁 𑀓𑀽𑀝𑁄, 𑀅𑀬𑀁 𑀙𑁂𑀓𑁄, 𑀅𑀬𑀁 𑀓𑀭𑀝𑁄, 𑀅𑀬𑀁 𑀲𑀡𑁆𑀳𑁄’’𑀢𑀺 𑀦 𑀚𑀸𑀦𑀸𑀢𑀺. 𑀫𑀳𑀸𑀳𑁂𑀭𑀜𑁆𑀜𑀺𑀓𑁄 𑀘𑀺𑀢𑁆𑀢𑀸𑀤𑀺𑀪𑀸𑀯𑀫𑁆𑀧𑀺 𑀭𑀢𑀦𑀲𑀫𑁆𑀫𑀢𑀪𑀸𑀯𑀫𑁆𑀧𑀺 𑀓𑀽𑀝𑀸𑀤𑀺𑀪𑀸𑀯𑀫𑁆𑀧𑀺 𑀚𑀸𑀦𑀸𑀢𑀺. 𑀚𑀸𑀦𑀦𑁆𑀢𑁄 𑀘 𑀧𑀦 ¶ 𑀭𑀽𑀧𑀁 𑀤𑀺𑀲𑁆𑀯𑀸𑀧𑀺 𑀲𑀤𑁆𑀤𑀁 𑀲𑀼𑀢𑁆𑀯𑀸𑀧𑀺 𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸𑀧𑀺 𑀭𑀲𑀁 𑀲𑀸𑀬𑀺𑀢𑁆𑀯𑀸𑀧𑀺 𑀳𑀢𑁆𑀣𑁂𑀦 𑀕𑀭𑀼𑀮𑀳𑀼𑀪𑀸𑀯𑀁 𑀉𑀧𑀥𑀸𑀭𑁂𑀢𑁆𑀯𑀸𑀧𑀺 ‘‘𑀅𑀲𑀼𑀓𑀕𑀸𑀫𑁂 𑀓𑀢𑁄’’𑀢𑀺𑀧𑀺 𑀚𑀸𑀦𑀸𑀢𑀺, ‘‘𑀅𑀲𑀼𑀓𑀦𑀺𑀕𑀫𑁂 𑀅𑀲𑀼𑀓𑀦𑀕𑀭𑁂 𑀅𑀲𑀼𑀓𑀧𑀩𑁆𑀩𑀢𑀘𑁆𑀙𑀸𑀬𑀸𑀬 ¶ 𑀅𑀲𑀼𑀓𑀦𑀤𑀻𑀢𑀻𑀭𑁂 𑀓𑀢𑁄’’𑀢𑀺𑀧𑀺, ‘‘𑀅𑀲𑀼𑀓𑀸𑀘𑀭𑀺𑀬𑁂𑀦 𑀓𑀢𑁄’’𑀢𑀺𑀧𑀺 𑀚𑀸𑀦𑀸𑀢𑀺. 𑀏𑀯𑀫𑁂𑀯 𑀲𑀜𑁆𑀜𑀸 𑀅𑀚𑀸𑀢𑀩𑀼𑀤𑁆𑀥𑀺𑀤𑀸𑀭𑀓𑀲𑁆𑀲 𑀓𑀳𑀸𑀧𑀡𑀤𑀲𑁆𑀲𑀦𑀁 𑀯𑀺𑀬 𑀦𑀻𑀮𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀫𑀢𑁆𑀢𑀫𑁂𑀯 𑀚𑀸𑀦𑀸𑀢𑀺. 𑀯𑀺𑀜𑁆𑀜𑀸𑀡𑀁 𑀕𑀸𑀫𑀺𑀓𑀧𑀼𑀭𑀺𑀲𑀲𑁆𑀲 𑀓𑀳𑀸𑀧𑀡𑀤𑀲𑁆𑀲𑀦𑀁 𑀯𑀺𑀬 𑀦𑀻𑀮𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀫𑁆𑀧𑀺 𑀚𑀸𑀦𑀸𑀢𑀺, 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀮𑀓𑁆𑀔𑀡𑀧𑀝𑀺𑀯𑁂𑀥𑀫𑁆𑀧𑀺 𑀧𑀸𑀧𑁂𑀢𑀺. 𑀧𑀜𑁆𑀜𑀸 𑀫𑀳𑀸𑀳𑁂𑀭𑀜𑁆𑀜𑀺𑀓𑀲𑁆𑀲 𑀓𑀳𑀸𑀧𑀡𑀤𑀲𑁆𑀲𑀦𑀁 𑀯𑀺𑀬 𑀦𑀻𑀮𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀫𑁆𑀧𑀺 𑀚𑀸𑀦𑀸𑀢𑀺, 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀮𑀓𑁆𑀔𑀡𑀧𑀝𑀺𑀯𑁂𑀥𑀫𑁆𑀧𑀺 𑀧𑀸𑀧𑁂𑀢𑀺, 𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀫𑀕𑁆𑀕𑀧𑀸𑀢𑀼𑀪𑀸𑀯𑀫𑁆𑀧𑀺 𑀧𑀸𑀧𑁂𑀢𑀺.

𑀲𑁄 𑀧𑀦 𑀦𑁂𑀲𑀁 𑀯𑀺𑀲𑁂𑀲𑁄 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑁄. 𑀢𑁂𑀦𑀸𑀳 𑀆𑀬𑀲𑁆𑀫𑀸 𑀦𑀸𑀕𑀲𑁂𑀦𑁄 𑁋

‘‘𑀤𑀼𑀓𑁆𑀓𑀭𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀓𑀢𑀦𑁆𑀢𑀺. 𑀓𑀺𑀁, 𑀪𑀦𑁆𑀢𑁂 𑀦𑀸𑀕𑀲𑁂𑀦, 𑀪𑀕𑀯𑀢𑀸 𑀤𑀼𑀓𑁆𑀓𑀭𑀁 𑀓𑀢𑀦𑁆𑀢𑀺? 𑀤𑀼𑀓𑁆𑀓𑀭𑀁, 𑀫𑀳𑀸𑀭𑀸𑀚, 𑀪𑀕𑀯𑀢𑀸 𑀓𑀢𑀁, 𑀇𑀫𑁂𑀲𑀁 𑀅𑀭𑀽𑀧𑀻𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀥𑀫𑁆𑀫𑀸𑀦𑀁 𑀏𑀓𑀸𑀭𑀫𑁆𑀫𑀡𑁂 𑀯𑀢𑁆𑀢𑀫𑀸𑀦𑀸𑀦𑀁 𑀯𑀯𑀢𑁆𑀣𑀸𑀦𑀁 𑀅𑀓𑁆𑀔𑀸𑀢𑀁 ‘𑀅𑀬𑀁 𑀨𑀲𑁆𑀲𑁄, 𑀅𑀬𑀁 𑀯𑁂𑀤𑀦𑀸, 𑀅𑀬𑀁 𑀲𑀜𑁆𑀜𑀸, 𑀅𑀬𑀁 𑀘𑁂𑀢𑀦𑀸, 𑀇𑀤𑀁 𑀘𑀺𑀢𑁆𑀢’’’𑀦𑁆𑀢𑀺 (𑀫𑀺. 𑀧. 𑁨.𑁭.𑁧𑁬).

𑀬𑀣𑀸 𑀳𑀺 𑀢𑀺𑀮𑀢𑁂𑀮𑀁 𑀲𑀸𑀲𑀧𑀢𑁂𑀮𑀁 𑀫𑀥𑀼𑀓𑀢𑁂𑀮𑀁 𑀏𑀭𑀡𑁆𑀟𑀓𑀢𑁂𑀮𑀁 𑀯𑀲𑀸𑀢𑁂𑀮𑀦𑁆𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀢𑁂𑀮𑀸𑀦𑀺 𑀏𑀓𑀘𑀸𑀝𑀺𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀺𑀯𑀲𑀁 𑀬𑀫𑀓𑀫𑀦𑁆𑀣𑁂 𑀳𑀺 𑀫𑀦𑁆𑀣𑁂𑀢𑁆𑀯𑀸 𑀢𑀢𑁄 ‘‘𑀇𑀤𑀁 𑀢𑀺𑀮𑀢𑁂𑀮𑀁, 𑀇𑀤𑀁 𑀲𑀸𑀲𑀧𑀢𑁂𑀮’’𑀦𑁆𑀢𑀺 𑀏𑀓𑁂𑀓𑀲𑁆𑀲 ¶ 𑀧𑀸𑀝𑀺𑀬𑁂𑀓𑁆𑀓𑀁 𑀉𑀤𑁆𑀥𑀭𑀡𑀁 𑀦𑀸𑀫 𑀤𑀼𑀓𑁆𑀓𑀭𑀁, 𑀇𑀤𑀁 𑀢𑀢𑁄 𑀤𑀼𑀓𑁆𑀓𑀭𑀢𑀭𑀁. 𑀪𑀕𑀯𑀸 𑀧𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀥𑀫𑁆𑀫𑀺𑀲𑁆𑀲𑀭𑁄 𑀥𑀫𑁆𑀫𑀭𑀸𑀚𑀸 𑀇𑀫𑁂𑀲𑀁 𑀅𑀭𑀽𑀧𑀻𑀦𑀁 𑀥𑀫𑁆𑀫𑀸𑀦𑀁 𑀏𑀓𑀸𑀭𑀫𑁆𑀫𑀡𑁂 𑀯𑀢𑁆𑀢𑀫𑀸𑀦𑀸𑀦𑀁 𑀯𑀯𑀢𑁆𑀣𑀸𑀦𑀁 𑀅𑀓𑀸𑀲𑀺. 𑀧𑀜𑁆𑀘𑀦𑁆𑀦𑀁 𑀫𑀳𑀸𑀦𑀤𑀻𑀦𑀁 𑀲𑀫𑀼𑀤𑁆𑀤𑀁 𑀧𑀯𑀺𑀝𑁆𑀞𑀝𑁆𑀞𑀸𑀦𑁂 ‘‘𑀇𑀤𑀁 𑀕𑀗𑁆𑀕𑀸𑀬 𑀉𑀤𑀓𑀁, 𑀇𑀤𑀁 𑀬𑀫𑀼𑀦𑀸𑀬𑀸’’𑀢𑀺 𑀏𑀯𑀁 𑀧𑀸𑀝𑀺𑀬𑁂𑀓𑁆𑀓𑀁 𑀉𑀤𑀓𑀼𑀤𑁆𑀥𑀭𑀡𑁂𑀦𑀸𑀧𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀢𑀺 𑀧𑀞𑀫𑀧𑀩𑁆𑀩𑁂𑀦 𑀲𑀼𑀜𑁆𑀜𑀢𑀁, 𑀤𑀼𑀢𑀺𑀬𑁂𑀦 𑀲𑀼𑀜𑁆𑀜𑀢𑀸𑀮𑀓𑁆𑀔𑀡𑀦𑁆𑀢𑀺 𑀤𑁆𑀯𑀻𑀳𑀺 𑀧𑀩𑁆𑀩𑁂𑀳𑀺 𑀅𑀦𑀢𑁆𑀢𑀮𑀓𑁆𑀔𑀡𑀁 𑀓𑀣𑁂𑀢𑁆𑀯𑀸 𑀇𑀤𑀸𑀦𑀺 𑀤𑀼𑀓𑁆𑀔𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀼𑀁 𑀢𑀢𑁆𑀭, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀔𑀚𑁆𑀚𑀸𑀫𑀻𑀢𑀺 𑀦 𑀭𑀽𑀧𑀁 𑀲𑀼𑀦𑀔𑁄 𑀯𑀺𑀬 𑀫𑀁𑀲𑀁 𑀮𑀼𑀜𑁆𑀘𑀺𑀢𑁆𑀯𑀸 𑀮𑀼𑀜𑁆𑀘𑀺𑀢𑁆𑀯𑀸 𑀔𑀸𑀤𑀢𑀺, 𑀬𑀣𑀸 𑀧𑀦 𑀓𑀺𑀮𑀺𑀝𑁆𑀞𑀯𑀢𑁆𑀣𑀦𑀺𑀯𑀢𑁆𑀣𑁄 𑀢𑀢𑁄𑀦𑀺𑀤𑀸𑀦𑀁 𑀧𑀻𑀴𑀁 𑀲𑀦𑁆𑀥𑀸𑀬 ‘‘𑀔𑀸𑀤𑀢𑀺 𑀫𑀁 ¶ 𑀯𑀢𑁆𑀣’’𑀦𑁆𑀢𑀺 𑀪𑀡𑀢𑀺, 𑀏𑀯𑀫𑀺𑀤𑀫𑁆𑀧𑀺 𑀧𑀻𑀴𑀁 𑀉𑀧𑁆𑀧𑀸𑀤𑁂𑀦𑁆𑀢𑀁 𑀔𑀸𑀤𑀢𑀺 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀝𑀺𑀧𑀦𑁆𑀦𑁄 𑀳𑁄𑀢𑀻𑀢𑀺 𑀲𑀻𑀮𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀧𑀝𑀺𑀧𑀦𑁆𑀦𑁄 𑀳𑁄𑀢𑀺. 𑀬𑁄 𑀧𑀦𑁂𑀢𑁆𑀣 𑀩𑀮𑀯𑀜𑀸𑀡𑁄 𑀢𑀺𑀓𑁆𑀔𑀩𑀼𑀤𑁆𑀥𑀺 𑀜𑀸𑀡𑀼𑀢𑁆𑀢𑀭𑁄 𑀬𑁄𑀕𑀸𑀯𑀘𑀭𑁄 𑀧𑀥𑀸𑀦𑀪𑀽𑀫𑀺𑀬𑀁 𑀯𑀸𑀬𑀫𑀦𑁆𑀢𑁄 𑀔𑀸𑀡𑀼𑀦𑀸 𑀯𑀸 𑀓𑀡𑁆𑀝𑀓𑁂𑀦 𑀯𑀸 𑀯𑀺𑀤𑁆𑀥𑁄 𑀆𑀯𑀼𑀥𑁂𑀦 𑀯𑀸 𑀧𑀳𑀝𑁄 𑀩𑁆𑀬𑀕𑁆𑀖𑀸𑀤𑀻𑀳𑀺 𑀯𑀸 𑀕𑀳𑁂𑀢𑁆𑀯𑀸 𑀔𑀚𑁆𑀚𑀫𑀸𑀦𑁄 𑀢𑀁 𑀯𑁂𑀤𑀦𑀁 𑀅𑀩𑁆𑀩𑁄𑀳𑀸𑀭𑀺𑀓𑀁 ¶ 𑀓𑀢𑁆𑀯𑀸 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀲𑀫𑁆𑀫𑀲𑀦𑁆𑀢𑁄 𑀅𑀭𑀳𑀢𑁆𑀢𑀫𑁂𑀯 𑀕𑀡𑁆𑀳𑀸𑀢𑀺, 𑀅𑀬𑀁 𑀯𑁂𑀤𑀦𑀸𑀬 𑀦𑀺𑀩𑁆𑀩𑀺𑀤𑀸𑀬 𑀯𑀺𑀭𑀸𑀕𑀸𑀬 𑀦𑀺𑀭𑁄𑀥𑀸𑀬 𑀧𑀝𑀺𑀧𑀦𑁆𑀦𑁄 𑀦𑀸𑀫 𑀯𑀼𑀘𑁆𑀘𑀢𑀺 𑀧𑀻𑀢𑀫𑀮𑁆𑀮𑀢𑁆𑀣𑁂𑀭𑁄 𑀯𑀺𑀬 𑀓𑀼𑀝𑀼𑀫𑁆𑀩𑀺𑀬𑀧𑀼𑀢𑁆𑀢𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀺𑀬 𑀯𑀢𑁆𑀢𑀦𑀺𑀅𑀝𑀯𑀺𑀬𑀁 𑀢𑀺𑀁𑀲𑀫𑀢𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀜𑁆𑀜𑀢𑀭𑁄 𑀩𑁆𑀬𑀕𑁆𑀖𑀫𑀼𑀔𑁂 𑀦𑀺𑀧𑀦𑁆𑀦𑀪𑀺𑀓𑁆𑀔𑀼 𑀯𑀺𑀬 𑀓𑀡𑁆𑀝𑀓𑁂𑀦 𑀯𑀺𑀤𑁆𑀥𑀢𑁆𑀣𑁂𑀭𑁄 𑀯𑀺𑀬 𑀘.

𑀤𑁆𑀯𑀸𑀤𑀲𑀲𑀼 𑀓𑀺𑀭 𑀪𑀺𑀓𑁆𑀔𑀽𑀲𑀼 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀅𑀭𑀜𑁆𑀜𑁂 𑀧𑀥𑀸𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑁂𑀲𑀼 𑀏𑀓𑁄 𑀲𑀽𑀭𑀺𑀬𑁂 𑀅𑀢𑁆𑀣𑀗𑁆𑀕𑀢𑀫𑀢𑁆𑀢𑁂𑀬𑁂𑀯 𑀖𑀡𑁆𑀝𑀺𑀁 𑀧𑀳𑀭𑀺𑀢𑁆𑀯𑀸 𑀘𑀗𑁆𑀓𑀫𑀁 𑀑𑀭𑀼𑀬𑁆𑀳 𑀘𑀗𑁆𑀓𑀫𑀦𑁆𑀢𑁄 ¶ 𑀢𑀺𑀭𑀺𑀬𑀁 𑀦𑀺𑀫𑁆𑀫𑀣𑁂𑀦𑁆𑀢𑁄 𑀢𑀺𑀡𑀧𑀝𑀺𑀘𑁆𑀙𑀦𑁆𑀦𑀁 𑀓𑀡𑁆𑀝𑀓𑀁 𑀅𑀓𑁆𑀓𑀫𑀺. 𑀓𑀡𑁆𑀝𑀓𑁄 𑀧𑀺𑀝𑁆𑀞𑀺𑀧𑀸𑀤𑁂𑀦 𑀦𑀺𑀓𑁆𑀔𑀦𑁆𑀢𑁄. 𑀢𑀢𑁆𑀢𑀨𑀸𑀮𑁂𑀦 𑀯𑀺𑀦𑀺𑀯𑀺𑀤𑁆𑀥𑀓𑀸𑀮𑁄 𑀯𑀺𑀬 𑀯𑁂𑀤𑀦𑀸 𑀯𑀢𑁆𑀢𑀢𑀺. 𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀓𑀺𑀁 𑀇𑀫𑀁 𑀓𑀡𑁆𑀝𑀓𑀁 𑀉𑀤𑁆𑀥𑀭𑀸𑀫𑀺, 𑀉𑀤𑀸𑀳𑀼 𑀧𑀓𑀢𑀺𑀬𑀸 𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑀓𑀡𑁆𑀝𑀓’’𑀦𑁆𑀢𑀺? 𑀢𑀲𑁆𑀲 𑀏𑀯𑀫𑀳𑁄𑀲𑀺 𑁋 ‘‘𑀇𑀫𑀺𑀦𑀸 𑀓𑀡𑁆𑀝𑀓𑁂𑀦 𑀯𑀺𑀤𑁆𑀥𑀢𑁆𑀢𑀸 𑀦𑀺𑀭𑀬𑀸𑀤𑀻𑀲𑀼 𑀪𑀬𑀁 𑀦𑀸𑀫 𑀦𑀢𑁆𑀣𑀺, 𑀧𑀓𑀢𑀺𑀬𑀸 𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑀓𑀡𑁆𑀝𑀓𑀁𑀬𑁂𑀯𑀸’’𑀢𑀺. 𑀲𑁄 𑀢𑀁 𑀯𑁂𑀤𑀦𑀁 𑀅𑀩𑁆𑀩𑁄𑀳𑀸𑀭𑀺𑀓𑀁 𑀓𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀘𑀗𑁆𑀓𑀫𑀺𑀢𑁆𑀯𑀸 𑀯𑀺𑀪𑀸𑀢𑀸𑀬 𑀭𑀢𑁆𑀢𑀺𑀬𑀸 𑀅𑀜𑁆𑀜𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀺. 𑀲𑁄 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂’’𑀢𑀺 𑀧𑀼𑀘𑁆𑀙𑀺? ‘‘𑀓𑀡𑁆𑀝𑀓𑁂𑀦𑀫𑁆𑀳𑀺, 𑀆𑀯𑀼𑀲𑁄, 𑀯𑀺𑀤𑁆𑀥𑁄’’𑀢𑀺. ‘‘𑀓𑀸𑀬 𑀯𑁂𑀮𑀸𑀬, 𑀪𑀦𑁆𑀢𑁂’’𑀢𑀺? ‘‘𑀲𑀸𑀬𑀫𑁂𑀯, 𑀆𑀯𑀼𑀲𑁄’’𑀢𑀺. ‘‘𑀓𑀲𑁆𑀫𑀸 𑀦 𑀅𑀫𑁆𑀳𑁂 𑀧𑀓𑁆𑀓𑁄𑀲𑀺𑀢𑁆𑀣, 𑀓𑀡𑁆𑀝𑀓𑀁 𑀉𑀤𑁆𑀥𑀭𑀺𑀢𑁆𑀯𑀸 𑀢𑀢𑁆𑀣 𑀢𑁂𑀮𑀫𑁆𑀧𑀺 𑀲𑀺𑀜𑁆𑀘𑁂𑀬𑁆𑀬𑀸𑀫𑀸’’𑀢𑀺? ‘‘𑀧𑀓𑀢𑀺𑀬𑀸 𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑀓𑀡𑁆𑀝𑀓𑀫𑁂𑀯 𑀉𑀤𑁆𑀥𑀭𑀺𑀢𑀼𑀁 𑀯𑀸𑀬𑀫𑀺𑀫𑁆𑀳𑀸, 𑀆𑀯𑀼𑀲𑁄’’𑀢𑀺. ‘‘𑀲𑀓𑁆𑀓𑀼𑀡𑀺𑀢𑁆𑀣, 𑀪𑀦𑁆𑀢𑁂, 𑀉𑀤𑁆𑀥𑀭𑀺𑀢𑀼’’𑀦𑁆𑀢𑀺. ‘‘𑀏𑀓𑀤𑁂𑀲𑀫𑀢𑁆𑀢𑁂𑀦 𑀫𑁂, 𑀆𑀯𑀼𑀲𑁄, 𑀉𑀤𑁆𑀥𑀝𑁄’’𑀢𑀺. 𑀲𑁂𑀲𑀯𑀢𑁆𑀣𑀽𑀦𑀺 𑀤𑀻𑀖𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁭𑁩; 𑀫. 𑀦𑀺. 𑀅𑀝𑁆𑀞. 𑁧.𑁧𑁦𑁬) 𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑀦𑀺𑀤𑁆𑀤𑁂𑀲𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑁂𑀯.

𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂𑀢𑀺 𑀓𑀲𑁆𑀫𑀸 𑀆𑀭𑀤𑁆𑀥𑀁? 𑀇𑀫𑀲𑁆𑀫𑀺𑀁 𑀧𑀩𑁆𑀩𑁂 𑀤𑀼𑀓𑁆𑀔𑀮𑀓𑁆𑀔𑀡𑀫𑁂𑀯 𑀓𑀣𑀺𑀢𑀁, 𑀦 𑀅𑀦𑀺𑀘𑁆𑀘𑀮𑀓𑁆𑀔𑀡𑀁. 𑀢𑀁 𑀤𑀲𑁆𑀲𑁂𑀢𑀼𑀁 𑀇𑀤𑀫𑀸𑀭𑀤𑁆𑀥𑀁. 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀫𑁆𑀧𑀺 𑀆𑀭𑀤𑁆𑀥𑀫𑁂𑀯. 𑀅𑀧𑀘𑀺𑀦𑀸𑀢𑀺 𑀦𑁄 𑀆𑀘𑀺𑀦𑀸𑀢𑀻𑀢𑀺 𑀯𑀝𑁆𑀝𑀁 𑀯𑀺𑀦𑀸𑀲𑁂𑀢𑀺, 𑀦𑁂𑀯 𑀘𑀺𑀦𑀸𑀢𑀺. 𑀧𑀚𑀳𑀢𑀺 𑀦 𑀉𑀧𑀸𑀤𑀺𑀬𑀢𑀻𑀢𑀺 𑀢𑀤𑁂𑀯 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀦 ¶ 𑀕𑀡𑁆𑀳𑀸𑀢𑀺. 𑀯𑀺𑀲𑀺𑀦𑁂𑀢𑀺 𑀦 𑀉𑀲𑁆𑀲𑀺𑀦𑁂𑀢𑀻𑀢𑀺 𑀯𑀺𑀓𑀺𑀭𑀢𑀺 𑀦 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀯𑀺𑀥𑀽𑀧𑁂𑀢𑀺 𑀦 𑀲𑀦𑁆𑀥𑀽𑀧𑁂𑀢𑀻𑀢𑀺 𑀦𑀺𑀩𑁆𑀩𑀸𑀧𑁂𑀢𑀺 𑀦 𑀚𑀸𑀮𑀸𑀧𑁂𑀢𑀺.

𑀏𑀯𑀁 𑀧𑀲𑁆𑀲𑀁, 𑀪𑀺𑀓𑁆𑀔𑀯𑁂𑀢𑀺 𑀇𑀤𑀁 𑀓𑀲𑁆𑀫𑀸 𑀆𑀭𑀤𑁆𑀥𑀁? 𑀯𑀝𑁆𑀝𑀁 𑀯𑀺𑀦𑀸𑀲𑁂𑀢𑁆𑀯𑀸 𑀞𑀺𑀢𑀁 𑀫𑀳𑀸𑀔𑀻𑀡𑀸𑀲𑀯𑀁 𑀤𑀲𑁆𑀲𑁂𑀲𑁆𑀲𑀸𑀫𑀻𑀢𑀺 𑀆𑀭𑀤𑁆𑀥𑀁. 𑀏𑀢𑁆𑀢𑀓𑁂𑀦 𑀯𑀸 𑀞𑀸𑀦𑁂𑀦 𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸, 𑀇𑀤𑀸𑀦𑀺 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀘𑀢𑁆𑀢𑀸𑀭𑁄 𑀫𑀕𑁆𑀕𑁂 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀆𑀭𑀤𑁆𑀥𑀁. 𑀅𑀣 𑀯𑀸 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦 𑀧𑀞𑀫𑀫𑀕𑁆𑀕𑁄 𑀓𑀣𑀺𑀢𑁄, 𑀇𑀤𑀸𑀦𑀺 𑀲𑀳 ¶ 𑀯𑀺𑀧𑀲𑁆𑀲𑀦𑀸𑀬 𑀢𑀬𑁄 𑀫𑀕𑁆𑀕𑁂 𑀤𑀲𑁆𑀲𑁂𑀢𑀼𑀁 𑀇𑀤𑀫𑀸𑀭𑀤𑁆𑀥𑀁. 𑀏𑀢𑁆𑀢𑀓𑁂𑀦 𑀯𑀸 𑀞𑀸𑀦𑁂𑀦 𑀢𑀻𑀡𑀺 𑀫𑀕𑁆𑀕𑀸𑀦𑀺 𑀓𑀣𑀺𑀢𑀸𑀦𑀺, 𑀇𑀤𑀸𑀦𑀺 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀅𑀭𑀳𑀢𑁆𑀢𑀫𑀕𑁆𑀕𑀁 𑀤𑀲𑁆𑀲𑁂𑀢𑀼𑀫𑁆𑀧𑀺 𑀇𑀤𑀁 𑀆𑀭𑀤𑁆𑀥𑀫𑁂𑀯.

𑀲𑀧𑀚𑀸𑀧𑀢𑀺𑀓𑀸𑀢𑀺 ¶ 𑀲𑀤𑁆𑀥𑀺𑀁 𑀧𑀚𑀸𑀧𑀢𑀺𑀦𑀸 𑀤𑁂𑀯𑀭𑀸𑀚𑁂𑀦. 𑀆𑀭𑀓𑀸𑀯 𑀦𑀫𑀲𑁆𑀲𑀦𑁆𑀢𑀻𑀢𑀺 𑀤𑀽𑀭𑀢𑁄𑀯 𑀦𑀫𑀲𑁆𑀲𑀦𑁆𑀢𑀺, 𑀤𑀽𑀭𑁂𑀧𑀺 𑀞𑀺𑀢𑀁 𑀦𑀫𑀲𑁆𑀲𑀦𑁆𑀢𑀺𑀬𑁂𑀯 𑀆𑀬𑀲𑁆𑀫𑀦𑁆𑀢𑀁 𑀦𑀻𑀢𑀢𑁆𑀣𑁂𑀭𑀁 𑀯𑀺𑀬.

𑀣𑁂𑀭𑁄 𑀓𑀺𑀭 𑀧𑀼𑀧𑁆𑀨𑀘𑁆𑀙𑀟𑁆𑀟𑀓𑀓𑀼𑀮𑀢𑁄 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀺𑀢𑁄, 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀳𑀁 𑀅𑀚𑁆𑀚𑁂𑀯 𑀧𑀩𑁆𑀩𑀚𑀺𑀢𑁄 𑀅𑀚𑁆𑀚𑁂𑀯 𑀫𑁂 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀢𑁆𑀢𑀁, 𑀘𑀢𑀼𑀧𑀘𑁆𑀘𑀬𑀲𑀦𑁆𑀢𑁄𑀲𑀪𑀸𑀯𑀦𑀸𑀭𑀸𑀫𑀫𑀡𑁆𑀟𑀺𑀢𑀁 𑀫𑀳𑀸𑀅𑀭𑀺𑀬𑀯𑀁𑀲𑀧𑀝𑀺𑀧𑀤𑀁 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺. 𑀲𑁄 𑀧𑀁𑀲𑀼𑀓𑀽𑀮𑀢𑁆𑀣𑀸𑀬 𑀲𑀸𑀯𑀢𑁆𑀣𑀺𑀁 𑀧𑀯𑀺𑀲𑀺𑀢𑁆𑀯𑀸 𑀘𑁄𑀴𑀓𑀁 𑀧𑀭𑀺𑀬𑁂𑀲𑀦𑁆𑀢𑁄 𑀯𑀺𑀘𑀭𑀺. 𑀅𑀣𑁂𑀓𑁄 𑀫𑀳𑀸𑀩𑁆𑀭𑀳𑁆𑀫𑀸 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀫𑀦𑀼𑀲𑁆𑀲𑀧𑀣𑀁 𑀑𑀮𑁄𑀓𑁂𑀦𑁆𑀢𑁄 𑀣𑁂𑀭𑀁 𑀤𑀺𑀲𑁆𑀯𑀸 𑁋 ‘‘𑀅𑀚𑁆𑀚𑁂𑀯 𑀧𑀩𑁆𑀩𑀚𑀺𑀢𑁆𑀯𑀸 𑀅𑀚𑁆𑀚𑁂𑀯 𑀔𑀼𑀭𑀕𑁆𑀕𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀫𑀳𑀸𑀅𑀭𑀺𑀬𑀯𑀁𑀲𑀧𑀝𑀺𑀧𑀤𑀁 𑀧𑀽𑀭𑁂𑀢𑀼𑀁 𑀘𑁄𑀴𑀓𑀁 𑀧𑀭𑀺𑀬𑁂𑀲𑀢𑀻’’𑀢𑀺 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀦𑀫𑀲𑁆𑀲𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀢𑀫𑀜𑁆𑀜𑁄 𑀫𑀳𑀸𑀩𑁆𑀭𑀳𑁆𑀫𑀸 𑀤𑀺𑀲𑁆𑀯𑀸 ‘‘𑀓𑀁 𑀦𑀫𑀲𑁆𑀲𑀲𑀻’’𑀢𑀺? 𑀧𑀼𑀘𑁆𑀙𑀺. 𑀦𑀻𑀢𑀢𑁆𑀣𑁂𑀭𑀁 𑀦𑀫𑀲𑁆𑀲𑀸𑀫𑀻𑀢𑀺. 𑀓𑀺𑀁 𑀓𑀸𑀭𑀡𑀸𑀢𑀺? 𑀅𑀚𑁆𑀚𑁂𑀯 𑀧𑀩𑁆𑀩𑀚𑀺𑀢𑁆𑀯𑀸 𑀅𑀚𑁆𑀚𑁂𑀯 𑀔𑀼𑀭𑀕𑁆𑀕𑁂 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀫𑀳𑀸𑀅𑀭𑀺𑀬𑀯𑀁𑀲𑀧𑀝𑀺𑀧𑀤𑀁 𑀧𑀽𑀭𑁂𑀢𑀼𑀁 𑀘𑁄𑀴𑀓𑀁 𑀧𑀭𑀺𑀬𑁂𑀲𑀢𑀻𑀢𑀺. 𑀲𑁄𑀧𑀺 𑀦𑀁 𑀦𑀫𑀲𑁆𑀲𑀫𑀸𑀦𑁄 𑀅𑀝𑁆𑀞𑀸𑀲𑀺. 𑀅𑀣𑀜𑁆𑀜𑁄, 𑀅𑀣𑀜𑁆𑀜𑁄𑀢𑀺 𑀲𑀢𑁆𑀢𑀲𑀢𑀸 𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀦𑀫𑀲𑁆𑀲𑀫𑀸𑀦𑀸 𑀅𑀝𑁆𑀞𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀢𑀸 𑀤𑁂𑀯𑀢𑀸 𑀲𑀢𑁆𑀢𑀲𑀢𑀸 𑀉𑀴𑀸𑀭𑀸,

𑀩𑁆𑀭𑀳𑁆𑀫𑀸 𑀯𑀺𑀫𑀸𑀦𑀸 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸;

𑀦𑀻𑀢𑀁 𑀦𑀫𑀲𑁆𑀲𑀦𑁆𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑀸,

‘𑀔𑀻𑀡𑀸𑀲𑀯𑁄 𑀕𑀡𑁆𑀳𑀢𑀺 𑀧𑀁𑀲𑀼𑀓𑀽𑀮𑀁’’’.

‘‘𑀢𑀸 ¶ 𑀤𑁂𑀯𑀢𑀸 𑀲𑀢𑁆𑀢𑀲𑀢𑀸 𑀉𑀴𑀸𑀭𑀸,

𑀩𑁆𑀭𑀳𑁆𑀫𑀸 𑀯𑀺𑀫𑀸𑀦𑀸 𑀅𑀪𑀺𑀦𑀺𑀓𑁆𑀔𑀫𑀺𑀢𑁆𑀯𑀸;

𑀦𑀻𑀢𑀁 𑀦𑀫𑀲𑁆𑀲𑀦𑁆𑀢𑀺 𑀧𑀲𑀦𑁆𑀦𑀘𑀺𑀢𑁆𑀢𑀸,

‘𑀔𑀻𑀡𑀸𑀲𑀯𑁄 𑀓𑀬𑀺𑀭𑀢𑀺 𑀧𑀁𑀲𑀼𑀓𑀽𑀮𑀁’’’.

‘‘‘𑀔𑀻𑀡𑀸𑀲𑀯𑁄 ¶ 𑀥𑁄𑀯𑀢𑀺 𑀧𑀁𑀲𑀼𑀓𑀽𑀮𑀁’;

‘𑀔𑀻𑀡𑀸𑀲𑀯𑁄 𑀭𑀚𑀢𑀺 𑀧𑀁𑀲𑀼𑀓𑀽𑀮𑀁’;

‘𑀔𑀻𑀡𑀸𑀲𑀯𑁄 𑀧𑀸𑀭𑀼𑀧𑀢𑀺 𑀧𑀁𑀲𑀓𑀽𑀮’’’𑀦𑁆𑀢𑀺.

𑀇𑀢𑀺 𑀪𑀕𑀯𑀸 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀤𑁂𑀲𑀦𑀁 𑀢𑀻𑀳𑀺 𑀪𑀯𑁂𑀳𑀺 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀭𑀳𑀢𑁆𑀢𑀲𑁆𑀲 𑀓𑀽𑀝𑀁 𑀕𑀡𑁆𑀳𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀲𑀢𑁆𑀢𑀫𑀁.

𑁮. 𑀧𑀺𑀡𑁆𑀟𑁄𑀮𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁦. 𑀅𑀝𑁆𑀞𑀫𑁂 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀧𑀓𑀭𑀡𑁂𑀢𑀺 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀓𑀸𑀭𑀡𑁂. 𑀧𑀡𑀸𑀫𑁂𑀢𑁆𑀯𑀸𑀢𑀺 𑀦𑀻𑀳𑀭𑀺𑀢𑁆𑀯𑀸. 𑀓𑀺𑀲𑁆𑀫𑀺𑀁 𑀧𑀦 𑀓𑀸𑀭𑀡𑁂 𑀏𑀢𑁂 𑀪𑀕𑀯𑀢𑀸 𑀧𑀡𑀸𑀫𑀺𑀢𑀸𑀢𑀺? 𑀏𑀓𑀲𑁆𑀫𑀺𑀜𑁆𑀳𑀺 ¶ 𑀅𑀦𑁆𑀢𑁄𑀯𑀲𑁆𑀲𑁂 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀲𑀺𑀢𑁆𑀯𑀸 𑀯𑀼𑀢𑁆𑀣𑀯𑀲𑁆𑀲𑁄 𑀧𑀯𑀸𑀭𑁂𑀢𑁆𑀯𑀸 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀲𑀸𑀯𑀢𑁆𑀣𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀓𑀧𑀺𑀮𑀯𑀢𑁆𑀣𑀼𑀁 𑀧𑀢𑁆𑀯𑀸 𑀦𑀺𑀕𑁆𑀭𑁄𑀥𑀸𑀭𑀸𑀫𑀁 𑀧𑀸𑀯𑀺𑀲𑀺. 𑀲𑀓𑁆𑀬𑀭𑀸𑀚𑀸𑀦𑁄 ‘‘𑀲𑀢𑁆𑀣𑀸 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑁂 𑀓𑀧𑁆𑀧𑀺𑀬𑀸𑀦𑀺 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀦𑀺 𑀘𑁂𑀯 𑀧𑀸𑀦𑀓𑀸𑀦𑀺 𑀘 𑀓𑀸𑀚𑀲𑀢𑁂𑀳𑀺 𑀕𑀸𑀳𑀸𑀧𑁂𑀢𑁆𑀯𑀸 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑀸 𑀏𑀓𑀫𑀦𑁆𑀢𑁂 𑀦𑀺𑀲𑀻𑀤𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁 𑀫𑀥𑀼𑀭𑀥𑀫𑁆𑀫𑀓𑀣𑀁 𑀓𑀣𑁂𑀦𑁆𑀢𑁄 𑀦𑀺𑀲𑀻𑀤𑀺. 𑀢𑀲𑁆𑀫𑀺𑀁 𑀔𑀡𑁂 𑀏𑀓𑀘𑁆𑀘𑁂 𑀪𑀺𑀓𑁆𑀔𑀽 𑀲𑁂𑀦𑀸𑀲𑀦𑀁 𑀧𑀝𑀺𑀚𑀕𑁆𑀕𑀦𑁆𑀢𑀺, 𑀏𑀓𑀘𑁆𑀘𑁂 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀧𑀜𑁆𑀜𑀸𑀧𑁂𑀦𑁆𑀢𑀺, 𑀲𑀸𑀫𑀡𑁂𑀭𑀸 𑀅𑀧𑁆𑀧𑀳𑀭𑀺𑀢𑀁 𑀓𑀭𑁄𑀦𑁆𑀢𑀺. 𑀪𑀸𑀚𑀦𑀻𑀬𑀝𑁆𑀞𑀸𑀦𑁂 𑀲𑀫𑁆𑀧𑀢𑁆𑀢𑀪𑀺𑀓𑁆𑀔𑀽𑀧𑀺 𑀅𑀢𑁆𑀣𑀺, 𑀅𑀲𑀫𑁆𑀧𑀢𑁆𑀢𑀪𑀺𑀓𑁆𑀔𑀽𑀧𑀺 𑀅𑀢𑁆𑀣𑀺. 𑀲𑀫𑁆𑀧𑀢𑁆𑀢𑀸 𑀅𑀲𑀫𑁆𑀧𑀢𑁆𑀢𑀸𑀦𑀁 𑀮𑀸𑀪𑀁 𑀕𑀡𑁆𑀳𑀦𑁆𑀢𑀸, ‘‘𑀅𑀫𑁆𑀳𑀸𑀓𑀁 𑀤𑁂𑀣, 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀲𑁆𑀲 𑀤𑁂𑀣 𑀉𑀧𑀚𑁆𑀛𑀸𑀬𑀲𑁆𑀲 𑀤𑁂𑀣𑀸’’𑀢𑀺 𑀓𑀣𑁂𑀦𑁆𑀢𑀸 𑀫𑀳𑀸𑀲𑀤𑁆𑀤𑀫𑀓𑀁𑀲𑀼. 𑀲𑀢𑁆𑀣𑀸 𑀲𑀼𑀢𑁆𑀯𑀸 𑀣𑁂𑀭𑀁 𑀧𑀼𑀘𑁆𑀙𑀺 ‘‘𑀓𑁂 𑀧𑀦 𑀢𑁂, 𑀆𑀦𑀦𑁆𑀤, 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀓𑁂𑀯𑀝𑁆𑀝𑀸 𑀫𑀜𑁆𑀜𑁂 𑀫𑀘𑁆𑀙𑀯𑀺𑀮𑁄𑀧𑁂’’𑀢𑀺? 𑀣𑁂𑀭𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀲𑀢𑁆𑀣𑀸 𑀲𑀼𑀢𑁆𑀯𑀸 ‘‘𑀆𑀫𑀺𑀲𑀳𑁂𑀢𑀼, 𑀆𑀦𑀦𑁆𑀤, 𑀪𑀺𑀓𑁆𑀔𑀽 𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑀻’’𑀢𑀺 𑀆𑀳. ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀅𑀦𑀦𑀼𑀘𑁆𑀙𑀯𑀺𑀓𑀁, 𑀆𑀦𑀦𑁆𑀤, 𑀅𑀧𑁆𑀧𑀢𑀺𑀭𑀽𑀧𑀁. 𑀦 ¶ 𑀳𑀺 𑀫𑀬𑀸 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀘𑀻𑀯𑀭𑀸𑀤𑀺𑀳𑁂𑀢𑀼 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸, 𑀦𑀸𑀧𑀺 𑀇𑀫𑁂 𑀪𑀺𑀓𑁆𑀔𑀽 𑀘𑀻𑀯𑀭𑀸𑀤𑀺𑀳𑁂𑀢𑀼 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸, 𑀅𑀭𑀳𑀢𑁆𑀢𑀳𑁂𑀢𑀼 𑀧𑀩𑁆𑀩𑀚𑀺𑀢𑁆𑀯𑀸 𑀅𑀦𑀢𑁆𑀣𑀁 𑀅𑀢𑁆𑀣𑀲𑀤𑀺𑀲𑀁 𑀅𑀲𑀸𑀭𑀁 𑀲𑀸𑀭𑀲𑀤𑀺𑀲𑀁 𑀓𑀭𑁄𑀦𑁆𑀢𑀺, 𑀕𑀘𑁆𑀙𑀸𑀦𑀦𑁆𑀤, 𑀢𑁂 𑀪𑀺𑀓𑁆𑀔𑀽 𑀧𑀡𑀸𑀫𑁂𑀳𑀻’’𑀢𑀺.

𑀧𑀼𑀩𑁆𑀩𑀡𑁆𑀳𑀲𑀫𑀬𑀦𑁆𑀢𑀺 𑀤𑀼𑀢𑀺𑀬𑀤𑀺𑀯𑀲𑁂 𑀧𑀼𑀩𑁆𑀩𑀡𑁆𑀳𑀲𑀫𑀬𑀁. 𑀩𑁂𑀮𑀼𑀯𑀮𑀝𑁆𑀞𑀺𑀓𑀸𑀬 𑀫𑀽𑀮𑁂𑀢𑀺 𑀢𑀭𑀼𑀡𑀩𑁂𑀮𑀼𑀯𑀭𑀼𑀓𑁆𑀔𑀫𑀽𑀮𑁂. 𑀧𑀩𑀸𑀴𑁆𑀳𑁄𑀢𑀺 𑀧𑀩𑀸𑀳𑀺𑀢𑁄. 𑀧𑀯𑀸𑀴𑁆𑀳𑁄𑀢𑀺𑀧𑀺 𑀧𑀸𑀞𑁄, 𑀧𑀯𑀸𑀳𑀺𑀢𑁄𑀢𑀺 𑀅𑀢𑁆𑀣𑁄. 𑀉𑀪𑀬𑀫𑁆𑀧𑀺 𑀦𑀻𑀳𑀝𑀪𑀸𑀯𑀫𑁂𑀯 ¶ 𑀤𑀻𑀧𑁂𑀢𑀺. 𑀲𑀺𑀬𑀸 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀧𑀲𑀸𑀤𑀜𑁆𑀜𑀣𑀢𑁆𑀢𑀁 𑀯𑀸 𑀪𑀸𑀯𑀜𑁆𑀜𑀣𑀢𑁆𑀢𑀁 𑀯𑀸 𑀪𑀯𑁂𑀬𑁆𑀬. 𑀓𑀣𑀁? ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀫𑀬𑀁 𑀮𑀳𑀼𑀓𑁂 𑀓𑀸𑀭𑀡𑁂 𑀧𑀡𑀸𑀫𑀺𑀢𑀸’’𑀢𑀺 ¶ 𑀧𑀲𑀸𑀤𑀁 𑀫𑀦𑁆𑀤𑀁 𑀓𑀭𑁄𑀦𑁆𑀢𑀸𑀦𑀁 𑀧𑀲𑀸𑀤𑀜𑁆𑀜𑀣𑀢𑁆𑀢𑀁 𑀦𑀸𑀫 𑀳𑁄𑀢𑀺. 𑀲𑀮𑀺𑀗𑁆𑀕𑁂𑀦𑁂𑀯 𑀢𑀺𑀢𑁆𑀣𑀸𑀬𑀢𑀦𑀁 𑀧𑀓𑁆𑀓𑀫𑀦𑁆𑀢𑀸𑀦𑀁 𑀪𑀸𑀯𑀜𑁆𑀜𑀣𑀢𑁆𑀢𑀁 𑀦𑀸𑀫. 𑀲𑀺𑀬𑀸 𑀯𑀺𑀧𑀭𑀺𑀡𑀸𑀫𑁄𑀢𑀺 𑀏𑀢𑁆𑀣 𑀧𑀦 ‘‘𑀫𑀬𑀁 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀁 𑀕𑀡𑁆𑀳𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀸𑀢𑀺 𑀧𑀩𑁆𑀩𑀚𑀺𑀢𑀸, 𑀦𑀁 𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀁 𑀓𑀺𑀁 𑀅𑀫𑁆𑀳𑀸𑀓𑀁 𑀧𑀩𑁆𑀩𑀚𑁆𑀚𑀸𑀬𑀸’’𑀢𑀺? 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀦𑀁 𑀯𑀺𑀧𑀭𑀺𑀡𑀸𑀫𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀯𑀘𑁆𑀙𑀲𑁆𑀲𑀸𑀢𑀺 𑀔𑀻𑀭𑀽𑀧𑀓𑀯𑀘𑁆𑀙𑀲𑁆𑀲. 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀫𑀺𑀮𑀸𑀬𑀦𑀅𑀜𑁆𑀜𑀣𑀢𑁆𑀢𑀁. 𑀔𑀻𑀭𑀽𑀧𑀓𑁄 𑀳𑀺 𑀯𑀘𑁆𑀙𑁄 𑀫𑀸𑀢𑀼 𑀅𑀤𑀲𑁆𑀲𑀦𑁂𑀦 𑀔𑀻𑀭𑀁 𑀅𑀮𑀪𑀦𑁆𑀢𑁄 𑀫𑀺𑀮𑀸𑀬𑀢𑀺 𑀓𑀫𑁆𑀧𑀢𑀺 𑀧𑀯𑁂𑀥𑀢𑀺. 𑀯𑀺𑀧𑀭𑀺𑀡𑀸𑀫𑁄𑀢𑀺 𑀫𑀭𑀡𑀁. 𑀲𑁄 𑀳𑀺 𑀔𑀻𑀭𑀁 𑀅𑀮𑀪𑀫𑀸𑀦𑁄 𑀔𑀻𑀭𑀧𑀺𑀧𑀸𑀲𑀸𑀬 𑀲𑀼𑀲𑁆𑀲𑀦𑁆𑀢𑁄 𑀧𑀢𑀺𑀢𑁆𑀯𑀸 𑀫𑀭𑀢𑀺.

𑀩𑀻𑀚𑀸𑀦𑀁 𑀢𑀭𑀼𑀡𑀸𑀦𑀦𑁆𑀢𑀺 𑀉𑀤𑀓𑁂𑀦 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑀸𑀦𑀁 𑀯𑀺𑀭𑀽𑀴𑁆𑀳𑀩𑀻𑀚𑀸𑀦𑀁. 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀫𑀺𑀮𑀸𑀬𑀦𑀜𑁆𑀜𑀣𑀢𑁆𑀢𑀫𑁂𑀯. 𑀢𑀸𑀦𑀺 𑀳𑀺 𑀉𑀤𑀓𑀁 𑀅𑀮𑀪𑀦𑁆𑀢𑀸𑀦𑀺 𑀫𑀺𑀮𑀸𑀬𑀦𑁆𑀢𑀺. 𑀯𑀺𑀧𑀭𑀺𑀡𑀸𑀫𑁄𑀢𑀺 𑀯𑀺𑀦𑀸𑀲𑁄. 𑀢𑀸𑀦𑀺 𑀳𑀺 𑀉𑀤𑀓𑀁 𑀅𑀮𑀪𑀦𑁆𑀢𑀸𑀦𑀺 𑀲𑀼𑀓𑁆𑀔𑀺𑀢𑁆𑀯𑀸 𑀯𑀺𑀦𑀲𑁆𑀲𑀦𑁆𑀢𑀺, 𑀧𑀮𑀸𑀮𑀫𑁂𑀯 𑀳𑁄𑀦𑁆𑀢𑀺. 𑀅𑀦𑀼𑀕𑁆𑀕𑀳𑀺𑀢𑁄𑀢𑀺 𑀆𑀫𑀺𑀲𑀸𑀦𑀼𑀕𑁆𑀕𑀳𑁂𑀦 𑀘𑁂𑀯 𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦 𑀘 𑀅𑀦𑀼𑀕𑁆𑀕𑀳𑀺𑀢𑁄. 𑀅𑀦𑀼𑀕𑁆𑀕𑀡𑁆𑀳𑁂𑀬𑁆𑀬𑀦𑁆𑀢𑀺 𑀤𑁆𑀯𑀻𑀳𑀺𑀧𑀺 𑀏𑀢𑁂𑀳𑀺 𑀅𑀦𑀼𑀕𑁆𑀕𑀳𑁂𑀳𑀺 𑀅𑀦𑀼𑀕𑁆𑀕𑀡𑁆𑀳𑁂𑀬𑁆𑀬𑀁. 𑀅𑀘𑀺𑀭𑀧𑀩𑁆𑀩𑀚𑀺𑀢𑀸 𑀳𑀺 𑀲𑀸𑀫𑀡𑁂𑀭𑀸 𑀘𑁂𑀯 𑀤𑀳𑀭𑀪𑀺𑀓𑁆𑀔𑀽 𑀘 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀯𑁂𑀓𑀮𑁆𑀮𑁂 𑀯𑀸 𑀲𑀢𑀺 𑀕𑁂𑀮𑀜𑁆𑀜𑁂 𑀯𑀸 𑀲𑀢𑁆𑀣𑀸𑀭𑀸 𑀯𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀯𑀸 𑀆𑀫𑀺𑀲𑀸𑀦𑀼𑀕𑁆𑀕𑀳𑁂𑀦 𑀅𑀦𑀦𑀼𑀕𑁆𑀕𑀳𑀺𑀢𑀸 𑀓𑀺𑀮𑀫𑀦𑁆𑀢𑀸 𑀦 𑀲𑀓𑁆𑀓𑁄𑀦𑁆𑀢𑀺 𑀲𑀚𑁆𑀛𑀸𑀬𑀁 𑀯𑀸 𑀫𑀦𑀲𑀺𑀓𑀸𑀭𑀁 𑀯𑀸 𑀓𑀸𑀢𑀼𑀁, 𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦 𑀅𑀦𑀦𑀼𑀕𑁆𑀕𑀳𑀺𑀢𑀸 𑀉𑀤𑁆𑀤𑁂𑀲𑁂𑀦 𑀘𑁂𑀯 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀬𑀸 𑀘 𑀧𑀭𑀺𑀳𑀸𑀬𑀫𑀸𑀦𑀸 𑀦 𑀲𑀓𑁆𑀓𑁄𑀦𑁆𑀢𑀺 𑀅𑀓𑀼𑀲𑀮𑀁 𑀧𑀭𑀺𑀯𑀚𑁆𑀚𑁂𑀢𑁆𑀯𑀸 𑀓𑀼𑀲𑀮𑀁 𑀪𑀸𑀯𑁂𑀢𑀼𑀁. 𑀇𑀫𑁂𑀳𑀺 𑀧𑀦 𑀤𑁆𑀯𑀻𑀳𑀺 𑀅𑀦𑀼𑀕𑁆𑀕𑀳𑁂𑀳𑀺 𑀅𑀦𑀼𑀕𑁆𑀕𑀳𑀺𑀢𑀸 𑀓𑀸𑀬𑁂𑀦 𑀅𑀓𑀺𑀮𑀫𑀦𑁆𑀢𑀸 𑀲𑀚𑁆𑀛𑀸𑀬𑀫𑀦𑀲𑀺𑀓𑀸𑀭𑁂 𑀧𑀯𑀢𑁆𑀢𑀺𑀢𑁆𑀯𑀸 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑀸 ¶ 𑀅𑀧𑀭𑀪𑀸𑀕𑁂 𑀢𑀁 𑀅𑀦𑀼𑀕𑁆𑀕𑀳𑀁 𑀅𑀮𑀪𑀦𑁆𑀢𑀸𑀧𑀺 𑀢𑁂𑀦𑁂𑀯 𑀧𑀼𑀭𑀺𑀫𑀸𑀦𑀼𑀕𑁆𑀕𑀳𑁂𑀦 𑀮𑀤𑁆𑀥𑀩𑀮𑀸 𑀲𑀸𑀲𑀦𑁂 𑀧𑀢𑀺𑀝𑁆𑀞𑀳𑀦𑁆𑀢𑀺, 𑀢𑀲𑁆𑀫𑀸 𑀪𑀕𑀯𑀢𑁄 𑀏𑀯𑀁 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺.

𑀪𑀕𑀯𑀢𑁄 𑀧𑀼𑀭𑀢𑁄 𑀧𑀸𑀢𑀼𑀭𑀳𑁄𑀲𑀻𑀢𑀺 𑀲𑀢𑁆𑀣𑀼 𑀘𑀺𑀢𑁆𑀢𑀁 𑀜𑀢𑁆𑀯𑀸 𑁋 ‘‘𑀇𑀫𑁂 𑀪𑀺𑀓𑁆𑀔𑀽 𑀪𑀕𑀯𑀢𑀸 𑀧𑀡𑀸𑀫𑀺𑀢𑀸, 𑀇𑀤𑀸𑀦𑀺 𑀦𑁂𑀲𑀁 𑀅𑀦𑀼𑀕𑁆𑀕𑀳𑀁 𑀓𑀸𑀢𑀼𑀓𑀸𑀫𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺, 𑀓𑀸𑀭𑀡𑀁 𑀪𑀕𑀯𑀸 𑀘𑀺𑀦𑁆𑀢𑁂𑀲𑀺, 𑀅𑀳𑀫𑁂𑀢𑁆𑀣 𑀉𑀲𑁆𑀲𑀸𑀳𑀁 𑀚𑀦𑁂𑀲𑁆𑀲𑀸𑀫𑀻’’𑀢𑀺 𑀧𑀼𑀭𑀢𑁄 𑀧𑀸𑀓𑀝𑁄 𑀅𑀳𑁄𑀲𑀺. 𑀲𑀦𑁆𑀢𑁂𑀢𑁆𑀣 𑀪𑀺𑀓𑁆𑀔𑀽𑀢𑀺 𑀇𑀤𑀁 𑀲𑁄 𑀫𑀳𑀸𑀩𑁆𑀭𑀳𑁆𑀫𑀸 𑀬𑀣𑀸 𑀦𑀸𑀫 𑀩𑁆𑀬𑀢𑁆𑀢𑁄 𑀲𑀽𑀤𑁄 𑀬𑀤𑁂𑀯 ¶ 𑀅𑀫𑁆𑀩𑀺𑀮𑀕𑁆𑀕𑀸𑀤𑀻𑀲𑀼 𑀭𑀲𑀚𑀸𑀢𑀁 𑀭𑀜𑁆𑀜𑁄 𑀭𑀼𑀘𑁆𑀘𑀢𑀺, 𑀢𑀁 𑀅𑀪𑀺𑀲𑀗𑁆𑀔𑀸𑀭𑁂𑀦 𑀲𑀸𑀤𑀼𑀢𑀭𑀁 𑀓𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀉𑀧𑀦𑀸𑀫𑁂𑀢𑀺, 𑀏𑀯𑀫𑁂𑀯 𑀅𑀢𑁆𑀢𑀦𑁄 𑀩𑁆𑀬𑀢𑁆𑀢𑀢𑀸𑀬 𑀪𑀕𑀯𑀢𑀸 𑀆𑀳𑀝𑀉𑀧𑀫𑀁𑀬𑁂𑀯 𑀏𑀯𑀫𑁂𑀢𑀁 𑀪𑀕𑀯𑀸𑀢𑀺𑀆𑀤𑀺𑀯𑀘𑀦𑁂𑀳𑀺 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀬𑀸𑀘𑀦𑁆𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀦𑀼𑀕𑁆𑀕𑀳𑀓𑀭𑀡𑀢𑁆𑀣𑀁 𑀯𑀤𑀢𑀺 ¶ . 𑀢𑀢𑁆𑀣 𑀅𑀪𑀺𑀦𑀦𑁆𑀤𑀢𑀽𑀢𑀺 ‘‘𑀫𑀫 𑀲𑀦𑁆𑀢𑀺𑀓𑀁 𑀪𑀺𑀓𑁆𑀔𑀼𑀲𑀗𑁆𑀖𑁄 𑀆𑀕𑀘𑁆𑀙𑀢𑀽’’𑀢𑀺. 𑀏𑀯𑀫𑀲𑁆𑀲 𑀆𑀕𑀫𑀦𑀁 𑀲𑀫𑁆𑀧𑀺𑀬𑀸𑀬𑀫𑀸𑀦𑁄 𑀅𑀪𑀺𑀦𑀦𑁆𑀤𑀢𑀼. 𑀅𑀪𑀺𑀯𑀤𑀢𑀽𑀢𑀺 𑀆𑀕𑀢𑀲𑁆𑀲 𑀘 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀁 𑀤𑀤𑀦𑁆𑀢𑁄 𑀅𑀪𑀺𑀯𑀤𑀢𑀼.

𑀧𑀝𑀺𑀲𑀮𑁆𑀮𑀸𑀦𑀸𑀢𑀺 𑀏𑀓𑀻𑀪𑀸𑀯𑀸. 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀸𑀲𑀻𑀢𑀺 𑀇𑀤𑁆𑀥𑀺𑀁 𑀅𑀓𑀸𑀲𑀺. 𑀏𑀓𑀤𑁆𑀯𑀻𑀳𑀺𑀓𑀸𑀬𑀸𑀢𑀺 𑀏𑀓𑁂𑀓𑁄 𑀘𑁂𑀯 𑀤𑁆𑀯𑁂 𑀤𑁆𑀯𑁂 𑀘 𑀳𑀼𑀢𑁆𑀯𑀸. 𑀲𑀸𑀭𑀚𑁆𑀚𑀫𑀸𑀦𑀭𑀽𑀧𑀸𑀢𑀺 𑀑𑀢𑁆𑀢𑀧𑁆𑀧𑀫𑀸𑀦𑀲𑀪𑀸𑀯𑀸 𑀪𑀸𑀬𑀫𑀸𑀦𑀸. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀢𑁂𑀲𑀁 𑀢𑀣𑀸 𑀉𑀧𑀲𑀗𑁆𑀓𑀫𑀦𑀸𑀬 𑀇𑀤𑁆𑀥𑀺𑀫𑀓𑀸𑀲𑀻𑀢𑀺? 𑀳𑀺𑀢𑀧𑀢𑁆𑀣𑀦𑀸𑀬. 𑀬𑀤𑀺 𑀳𑀺 𑀢𑁂 𑀯𑀕𑁆𑀕𑀯𑀕𑁆𑀕𑀸 𑀳𑀼𑀢𑁆𑀯𑀸 𑀆𑀕𑀘𑁆𑀙𑁂𑀬𑁆𑀬𑀼𑀁, ‘‘𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀸𑀫𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄 𑀏𑀓𑀤𑀺𑀯𑀲𑀫𑁆𑀧𑀺 𑀢𑀢𑁆𑀣 𑀯𑀲𑀺𑀢𑀼𑀁 𑀦𑀸𑀲𑀓𑁆𑀔𑀺, 𑀯𑁂𑀕𑁂𑀦𑁂𑀯 𑀆𑀕𑀢𑁄’’𑀢𑀺 𑀓𑁂𑀴𑀺𑀫𑁆𑀧𑀺 𑀓𑀭𑁂𑀬𑁆𑀬𑀼𑀁. 𑀅𑀣 𑀦𑁂𑀲𑀁 𑀦𑁂𑀯 𑀩𑀼𑀤𑁆𑀥𑀕𑀸𑀭𑀯𑀁 𑀧𑀘𑁆𑀘𑀼𑀧𑀝𑁆𑀞𑀳𑁂𑀬𑁆𑀬, 𑀦 𑀥𑀫𑁆𑀫𑀤𑁂𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀲𑀫𑀢𑁆𑀣𑀸 𑀪𑀯𑁂𑀬𑁆𑀬𑀼𑀁. 𑀲𑀪𑀬𑀸𑀦𑀁 𑀧𑀦 𑀲𑀲𑀸𑀭𑀚𑁆𑀚𑀸𑀦𑀁 𑀏𑀓𑀤𑁆𑀯𑀻𑀳𑀺𑀓𑀸𑀬 𑀆𑀕𑀘𑁆𑀙𑀦𑁆𑀢𑀸𑀦𑀁 𑀩𑀼𑀤𑁆𑀥𑀕𑀸𑀭𑀯𑀜𑁆𑀘𑁂𑀯 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀺𑀲𑁆𑀲𑀢𑀺, 𑀥𑀫𑁆𑀫𑀤𑁂𑀲𑀦𑀜𑁆𑀘 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑁂𑀲𑀁 𑀳𑀺𑀢𑀧𑀢𑁆𑀣𑀦𑀸𑀬 𑀢𑀣𑀸𑀭𑀽𑀧𑀁 𑀇𑀤𑁆𑀥𑀺𑀁 𑀅𑀓𑀸𑀲𑀺.

𑀦𑀺𑀲𑀻𑀤𑀺𑀁𑀲𑀽𑀢𑀺 𑀢𑁂𑀲𑀼 𑀳𑀺 𑀲𑀸𑀭𑀚𑁆𑀚𑀫𑀸𑀦𑀭𑀽𑀧𑁂𑀲𑀼 𑀆𑀕𑀘𑁆𑀙𑀦𑁆𑀢𑁂𑀲𑀼 𑀏𑀓𑁄 𑀪𑀺𑀓𑁆𑀔𑀼 ‘‘𑀫𑀫𑀁𑀬𑁂𑀯 𑀲𑀢𑁆𑀣𑀸 𑀑𑀮𑁄𑀓𑁂𑀢𑀺, 𑀫𑀁𑀬𑁂𑀯 𑀫𑀜𑁆𑀜𑁂 𑀦𑀺𑀕𑁆𑀕𑀡𑁆𑀳𑀺𑀢𑀼𑀓𑀸𑀫𑁄’’𑀢𑀺 𑀲𑀡𑀺𑀓𑀁 𑀆𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺, 𑀅𑀣𑀜𑁆𑀜𑁄 𑀅𑀣𑀜𑁆𑀜𑁄𑀢𑀺 𑀏𑀯𑀁 𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑀸𑀦𑀺 𑀦𑀺𑀲𑀻𑀤𑀺𑀁𑀲𑀼. 𑀏𑀯𑀁 𑀦𑀺𑀲𑀺𑀦𑁆𑀦𑀁 𑀧𑀦 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀻𑀤𑀦𑁆𑀢𑀭𑁂 𑀲𑀦𑁆𑀦𑀺𑀲𑀺𑀦𑁆𑀦𑀁 𑀫𑀳𑀸𑀲𑀫𑀼𑀤𑁆𑀤𑀁 ¶ 𑀯𑀺𑀬 𑀦𑀺𑀯𑀸𑀢𑁂 𑀧𑀤𑀻𑀧𑀁 𑀯𑀺𑀬 𑀘 𑀦𑀺𑀘𑁆𑀘𑀮𑀁 𑀤𑀺𑀲𑁆𑀯𑀸 𑀲𑀢𑁆𑀣𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂𑀲𑀁 ¶ 𑀪𑀺𑀓𑁆𑀔𑀽𑀦𑀁 𑀓𑀻𑀤𑀺𑀲𑀻 𑀥𑀫𑁆𑀫𑀤𑁂𑀲𑀦𑀸 𑀯𑀝𑁆𑀝𑀢𑀻’’𑀢𑀺? 𑀅𑀣𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀇𑀫𑁂 𑀆𑀳𑀸𑀭𑀳𑁂𑀢𑀼 𑀧𑀡𑀸𑀫𑀺𑀢𑀸, 𑀧𑀺𑀡𑁆𑀟𑀺𑀬𑀸𑀮𑁄𑀧𑀥𑀫𑁆𑀫𑀤𑁂𑀲𑀦𑀸𑀯 𑀦𑁂𑀲𑀁 𑀲𑀧𑁆𑀧𑀸𑀬𑀸, 𑀢𑀁 𑀤𑀲𑁆𑀲𑁂𑀢𑁆𑀯𑀸 𑀫𑀢𑁆𑀣𑀓𑁂 𑀢𑀺𑀧𑀭𑀺𑀯𑀝𑁆𑀝𑀤𑁂𑀲𑀦𑀁 𑀤𑁂𑀲𑁂𑀲𑁆𑀲𑀸𑀫𑀺, 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑀩𑁆𑀩𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀻’’𑀢𑀺. 𑀅𑀣 𑀦𑁂𑀲𑀁 𑀢𑀁 𑀥𑀫𑁆𑀫𑀤𑁂𑀲𑀦𑀁 𑀤𑁂𑀲𑁂𑀦𑁆𑀢𑁄 𑀅𑀦𑁆𑀢𑀫𑀺𑀤𑀁, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀅𑀦𑁆𑀢𑀦𑁆𑀢𑀺 𑀧𑀘𑁆𑀙𑀺𑀫𑀁 𑀮𑀸𑀫𑀓𑀁. 𑀬𑀤𑀺𑀤𑀁 𑀧𑀺𑀡𑁆𑀟𑁄𑀮𑁆𑀬𑀦𑁆𑀢𑀺 𑀬𑀁 𑀏𑀯𑀁 𑀧𑀺𑀡𑁆𑀟𑀧𑀭𑀺𑀬𑁂𑀲𑀦𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀲𑁆𑀲 𑀚𑀻𑀯𑀺𑀢𑀁. 𑀅𑀬𑀁 𑀧𑀦𑁂𑀢𑁆𑀣 𑀧𑀤𑀢𑁆𑀣𑁄 𑁋 𑀧𑀺𑀡𑁆𑀟𑀸𑀬 𑀉𑀮𑀢𑀻𑀢𑀺 𑀧𑀺𑀡𑁆𑀟𑁄𑀮𑁄, 𑀧𑀺𑀡𑁆𑀟𑁄𑀮𑀲𑁆𑀲 𑀓𑀫𑁆𑀫𑀁 𑀧𑀺𑀡𑁆𑀟𑁄𑀮𑁆𑀬𑀁, 𑀧𑀺𑀡𑁆𑀟𑀧𑀭𑀺𑀬𑁂𑀲𑀦𑁂𑀦 𑀦𑀺𑀧𑁆𑀨𑀸𑀤𑀺𑀢𑀚𑀻𑀯𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀪𑀺𑀲𑀸𑀧𑁄𑀢𑀺 𑀅𑀓𑁆𑀓𑁄𑀲𑁄. 𑀓𑀼𑀧𑀺𑀢𑀸 𑀳𑀺 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀧𑀘𑁆𑀘𑀢𑁆𑀣𑀺𑀓𑀁 ‘‘𑀘𑀻𑀯𑀭𑀁 𑀦𑀺𑀯𑀸𑀲𑁂𑀢𑁆𑀯𑀸 𑀓𑀧𑀸𑀮𑀁 𑀕𑀳𑁂𑀢𑁆𑀯𑀸 𑀧𑀺𑀡𑁆𑀟𑀁 𑀧𑀭𑀺𑀬𑁂𑀲𑀫𑀸𑀦𑁄 𑀘𑀭𑀺𑀲𑁆𑀲𑀢𑀻’’𑀢𑀺 𑀅𑀓𑁆𑀓𑁄𑀲𑀦𑁆𑀢𑀺. 𑀅𑀣 𑀯𑀸 𑀧𑀦 ‘‘𑀓𑀺𑀁 𑀢𑀼𑀬𑁆𑀳𑀁 𑀅𑀓𑀸𑀢𑀩𑁆𑀩𑀁 𑀅𑀢𑁆𑀣𑀺, 𑀬𑁄 𑀢𑁆𑀯𑀁 𑀏𑀯𑀁 𑀩𑀮𑀯𑀸 𑀯𑀻𑀭𑀺𑀬𑀲𑀫𑁆𑀧𑀦𑁆𑀦𑁄𑀧𑀺 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀳𑀸𑀬 𑀓𑀧𑀡𑁄 𑀯𑀺𑀬 𑀧𑀺𑀡𑁆𑀟𑁄𑀮𑁄 𑀯𑀺𑀘𑀭𑀲𑀺 𑀧𑀢𑁆𑀢𑀧𑀸𑀡𑀻’’𑀢𑀺? 𑀏𑀯𑀫𑁆𑀧𑀺 ¶ 𑀅𑀓𑁆𑀓𑁄𑀲𑀦𑁆𑀢𑀺𑀬𑁂𑀯. 𑀢𑀜𑁆𑀘 𑀔𑁄 𑀏𑀢𑀦𑁆𑀢𑀺 𑀏𑀯𑀁 𑀢𑀁 𑀅𑀪𑀺𑀲𑀸𑀧𑀁 𑀲𑀫𑀸𑀦𑀫𑁆𑀧𑀺 𑀧𑀺𑀡𑁆𑀟𑁄𑀮𑁆𑀬𑀁. 𑀓𑀼𑀮𑀧𑀼𑀢𑁆𑀢𑀸 𑀉𑀧𑁂𑀦𑁆𑀢𑀺 𑀅𑀢𑁆𑀣𑀯𑀲𑀺𑀓𑀸𑀢𑀺 𑀫𑀫 𑀲𑀸𑀲𑀦𑁂 𑀚𑀸𑀢𑀺𑀓𑀼𑀮𑀧𑀼𑀢𑁆𑀢𑀸 𑀘 𑀆𑀘𑀸𑀭𑀓𑀼𑀮𑀧𑀼𑀢𑁆𑀢𑀸 𑀘 𑀅𑀢𑁆𑀣𑀯𑀲𑀺𑀓𑀸 𑀓𑀸𑀭𑀡𑀯𑀲𑀺𑀓𑀸 𑀳𑀼𑀢𑁆𑀯𑀸 𑀓𑀸𑀭𑀡𑀯𑀲𑀁 𑀧𑀝𑀺𑀘𑁆𑀘 𑀉𑀧𑁂𑀦𑁆𑀢𑀺.

𑀭𑀸𑀚𑀸𑀪𑀺𑀦𑀻𑀢𑀸𑀢𑀺𑀆𑀤𑀻𑀲𑀼 𑀬𑁂 𑀭𑀜𑁆𑀜𑁄 𑀲𑀦𑁆𑀢𑀓𑀁 𑀔𑀸𑀤𑀺𑀢𑁆𑀯𑀸 𑀭𑀜𑁆𑀜𑀸 𑀩𑀦𑁆𑀥𑀦𑀸𑀕𑀸𑀭𑁂 𑀩𑀦𑁆𑀥𑀸𑀧𑀺𑀢𑀸 𑀧𑀮𑀸𑀬𑀺𑀢𑁆𑀯𑀸 𑀧𑀩𑁆𑀩𑀚𑀦𑁆𑀢𑀺, 𑀢𑁂 𑀭𑀸𑀚𑀸𑀪𑀺𑀦𑀻𑀢𑀸 𑀦𑀸𑀫. 𑀢𑁂 𑀳𑀺 𑀭𑀜𑁆𑀜𑀸 𑀩𑀦𑁆𑀥𑀦𑀁 𑀅𑀪𑀺𑀦𑀻𑀢𑀢𑁆𑀢𑀸 𑀭𑀸𑀚𑀸𑀪𑀺𑀦𑀻𑀢𑀸 𑀦𑀸𑀫. 𑀬𑁂 𑀧𑀦 𑀘𑁄𑀭𑁂𑀳𑀺 𑀅𑀝𑀯𑀺𑀬𑀁 𑀕𑀳𑁂𑀢𑁆𑀯𑀸 𑀏𑀓𑀘𑁆𑀘𑁂𑀲𑀼 𑀫𑀸𑀭𑀺𑀬𑀫𑀸𑀦𑁂𑀲𑀼 𑀏𑀓𑀘𑁆𑀘𑁂 ‘‘𑀫𑀬𑀁 𑀲𑀸𑀫𑀺 𑀢𑀼𑀫𑁆𑀳𑁂𑀳𑀺 𑀯𑀺𑀲𑁆𑀲𑀝𑁆𑀞𑀸 𑀕𑁂𑀳𑀁 𑀅𑀦𑀚𑁆𑀛𑀸𑀯𑀲𑀺𑀢𑁆𑀯𑀸 𑀧𑀩𑁆𑀩𑀚𑀺𑀲𑁆𑀲𑀸𑀫, 𑀢𑀢𑁆𑀣 𑀬𑀁 𑀬𑀁 𑀩𑀼𑀤𑁆𑀥𑀧𑀽𑀚𑀸𑀤𑀺𑀧𑀼𑀜𑁆𑀜𑀁 𑀓𑀭𑀺𑀲𑁆𑀲𑀸𑀫, 𑀢𑀢𑁄 𑀢𑀼𑀫𑁆𑀳𑀸𑀓𑀁 𑀧𑀢𑁆𑀢𑀺𑀁 𑀤𑀲𑁆𑀲𑀸𑀫𑀸’’𑀢𑀺 𑀢𑁂𑀳𑀺 𑀯𑀺𑀲𑁆𑀲𑀝𑁆𑀞𑀸 𑀧𑀩𑁆𑀩𑀚𑀦𑁆𑀢𑀺, 𑀢𑁂 𑀘𑁄𑀭𑀸𑀪𑀺𑀦𑀻𑀢𑀸 𑀦𑀸𑀫. 𑀢𑁂𑀧𑀺 𑀳𑀺 𑀘𑁄𑀭𑁂𑀳𑀺 𑀫𑀸𑀭𑁂𑀢𑀩𑁆𑀩𑀢𑀁 𑀅𑀪𑀺𑀦𑀻𑀢𑀸𑀢𑀺 𑀘𑁄𑀭𑀸𑀪𑀺𑀦𑀻𑀢𑀸 𑀦𑀸𑀫. 𑀬𑁂 𑀧𑀦 𑀇𑀡𑀁 𑀕𑀳𑁂𑀢𑁆𑀯𑀸 𑀧𑀝𑀺𑀤𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀧𑀮𑀸𑀬𑀺𑀢𑁆𑀯𑀸 𑀧𑀩𑁆𑀩𑀚𑀦𑁆𑀢𑀺, 𑀢𑁂 𑀇𑀡𑀝𑁆𑀝𑀸 𑀦𑀸𑀫, 𑀇𑀡𑀧𑀻𑀴𑀺𑀢𑀸𑀢𑀺 𑀅𑀢𑁆𑀣𑁄 ¶ . 𑀇𑀡𑀝𑁆𑀞𑀸𑀢𑀺𑀧𑀺 𑀧𑀸𑀞𑁄, 𑀇𑀡𑁂 𑀞𑀺𑀢𑀸𑀢𑀺 𑀅𑀢𑁆𑀣𑁄. 𑀬𑁂 𑀭𑀸𑀚𑀘𑁄𑀭𑀙𑀸𑀢𑀓𑀭𑁄𑀕𑀪𑀬𑀸𑀦𑀁 𑀅𑀜𑁆𑀜𑀢𑀭𑁂𑀦 𑀅𑀪𑀺𑀪𑀽𑀢𑀸 𑀉𑀧𑀤𑁆𑀤𑀼𑀢𑀸 𑀧𑀩𑁆𑀩𑀚𑀦𑁆𑀢𑀺, 𑀢𑁂 𑀪𑀬𑀝𑁆𑀝𑀸 𑀦𑀸𑀫, 𑀪𑀬𑀧𑀻𑀴𑀺𑀢𑀸𑀢𑀺 𑀅𑀢𑁆𑀣𑁄. 𑀪𑀬𑀝𑁆𑀞𑀸𑀢𑀺𑀧𑀺 𑀧𑀸𑀞𑁄, 𑀪𑀬𑁂 ¶ 𑀞𑀺𑀢𑀸𑀢𑀺 𑀅𑀢𑁆𑀣𑁄. 𑀆𑀚𑀻𑀯𑀺𑀓𑀸𑀧𑀓𑀢𑀸𑀢𑀺 𑀆𑀚𑀻𑀯𑀺𑀓𑀸𑀬 𑀉𑀧𑀤𑁆𑀤𑀼𑀢𑀸 𑀅𑀪𑀺𑀪𑀽𑀢𑀸, 𑀧𑀼𑀢𑁆𑀢𑀤𑀸𑀭𑀁 𑀧𑁄𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀑𑀢𑀺𑀡𑁆𑀡𑀸𑀫𑁆𑀳𑀸𑀢𑀺 𑀅𑀦𑁆𑀢𑁄 𑀅𑀦𑀼𑀧𑀯𑀺𑀝𑁆𑀞𑀸.

𑀲𑁄 𑀘 𑀳𑁄𑀢𑀺 𑀅𑀪𑀺𑀚𑁆𑀛𑀸𑀮𑀽𑀢𑀺 𑀇𑀤𑀁 𑀲𑁄 𑀓𑀼𑀮𑀧𑀼𑀢𑁆𑀢𑁄 ‘‘𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀯𑀲𑁂𑀦 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁄, 𑀅𑀧𑀭𑀪𑀸𑀕𑁂, 𑀢𑀁 𑀧𑀩𑁆𑀩𑀚𑁆𑀚𑀁 𑀢𑀣𑀸𑀭𑀽𑀧𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀪𑀺𑀚𑁆𑀛𑀸𑀮𑀽𑀢𑀺 𑀧𑀭𑀪𑀡𑁆𑀟𑀸𑀦𑀁 𑀅𑀪𑀺𑀚𑁆𑀛𑀸𑀬𑀺𑀢𑀸. 𑀢𑀺𑀩𑁆𑀩𑀲𑀸𑀭𑀸𑀕𑁄𑀢𑀺 𑀩𑀳𑀮𑀭𑀸𑀕𑁄. 𑀩𑁆𑀬𑀸𑀧𑀦𑁆𑀦𑀘𑀺𑀢𑁆𑀢𑁄𑀢𑀺 𑀧𑀽𑀢𑀺𑀪𑀸𑀯𑁂𑀦 𑀯𑀺𑀧𑀦𑁆𑀦𑀘𑀺𑀢𑁆𑀢𑁄. 𑀧𑀤𑀼𑀝𑁆𑀞𑀫𑀦𑀲𑀗𑁆𑀓𑀧𑁆𑀧𑁄𑀢𑀺 𑀢𑀺𑀔𑀺𑀡𑀲𑀺𑀗𑁆𑀕𑁄 𑀯𑀺𑀬 𑀕𑁄𑀡𑁄 𑀤𑀼𑀝𑁆𑀞𑀘𑀺𑀢𑁆𑀢𑁄. 𑀫𑀼𑀝𑁆𑀞𑀲𑁆𑀲𑀢𑀻𑀢𑀺 𑀪𑀢𑁆𑀢𑀦𑀺𑀓𑁆𑀔𑀺𑀢𑁆𑀢𑀓𑀸𑀓𑁄 𑀯𑀺𑀬 𑀦𑀝𑁆𑀞𑀲𑁆𑀲𑀢𑀺, 𑀇𑀥 𑀓𑀢𑀁 𑀏𑀢𑁆𑀣 𑀦𑀲𑁆𑀲𑀢𑀺. 𑀅𑀲𑀫𑁆𑀧𑀚𑀸𑀦𑁄𑀢𑀺 𑀦𑀺𑀧𑁆𑀧𑀜𑁆𑀜𑁄. 𑀔𑀦𑁆𑀥𑀸𑀤𑀺𑀧𑀭𑀺𑀘𑁆𑀙𑁂𑀤𑀭𑀳𑀺𑀢𑁄. 𑀅𑀲𑀫𑀸𑀳𑀺𑀢𑁄𑀢𑀺 𑀘𑀡𑁆𑀟𑀲𑁄𑀢𑁂 𑀩𑀤𑁆𑀥𑀦𑀸𑀯𑀸 𑀯𑀺𑀬 𑀉𑀧𑀘𑀸𑀭𑀧𑁆𑀧𑀦𑀸𑀪𑀸𑀯𑁂𑀦 𑀅𑀲𑀡𑁆𑀞𑀺𑀢𑁄. 𑀯𑀺𑀩𑁆𑀪𑀦𑁆𑀢𑀘𑀺𑀢𑁆𑀢𑁄𑀢𑀺 𑀩𑀦𑁆𑀥𑀸𑀭𑀼𑀴𑁆𑀳𑀫𑀕𑁄 𑀯𑀺𑀬 𑀲𑀦𑁆𑀢𑀫𑀦𑁄. 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑁄𑀢𑀺 𑀬𑀣𑀸 𑀕𑀺𑀳𑀻 𑀧𑀼𑀢𑁆𑀢𑀥𑀻𑀢𑀭𑁄 𑀑𑀮𑁄𑀓𑁂𑀦𑁆𑀢𑁄 𑀅𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁄 𑀳𑁄𑀢𑀺, 𑀏𑀯𑀁 𑀅𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑁄.

𑀙𑀯𑀸𑀮𑀸𑀢𑀦𑁆𑀢𑀺 𑀙𑀯𑀸𑀦𑀁 𑀤𑀟𑁆𑀠𑀝𑁆𑀞𑀸𑀦𑁂 𑀅𑀮𑀸𑀢𑀁. 𑀉𑀪𑀢𑁄𑀧𑀤𑀺𑀢𑁆𑀢𑀁 𑀫𑀚𑁆𑀛𑁂 𑀕𑀽𑀣𑀕𑀢𑀦𑁆𑀢𑀺 𑀧𑀫𑀸𑀡𑁂𑀦 𑀅𑀝𑁆𑀞𑀗𑁆𑀕𑀼𑀮𑀫𑀢𑁆𑀢𑀁 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀆𑀤𑀺𑀢𑁆𑀢𑀁 𑀫𑀚𑁆𑀛𑁂 𑀕𑀽𑀣𑀫𑀓𑁆𑀔𑀺𑀢𑀁. 𑀦𑁂𑀯 𑀕𑀸𑀫𑁂𑀢𑀺 ¶ 𑀲𑀘𑁂 𑀳𑀺 𑀢𑀁 𑀬𑀼𑀕𑀦𑀗𑁆𑀕𑀮𑀕𑁄𑀧𑀸𑀦𑀲𑀺𑀧𑀓𑁆𑀔𑀧𑀸𑀲𑀓𑀸𑀤𑀻𑀦𑀁 ¶ 𑀅𑀢𑁆𑀣𑀸𑀬 𑀉𑀧𑀦𑁂𑀢𑀼𑀁 𑀲𑀓𑁆𑀓𑀸 𑀅𑀲𑁆𑀲, 𑀕𑀸𑀫𑁂 𑀓𑀝𑁆𑀞𑀢𑁆𑀣𑀁 𑀨𑀭𑁂𑀬𑁆𑀬. 𑀲𑀘𑁂 𑀔𑁂𑀢𑁆𑀢𑀓𑀼𑀝𑀺𑀬𑀁 𑀓𑀝𑁆𑀞𑀢𑁆𑀣𑀭𑀫𑀜𑁆𑀘𑀓𑀸𑀤𑀻𑀦𑀁 𑀅𑀢𑁆𑀣𑀸𑀬 𑀉𑀧𑀦𑁂𑀢𑀼𑀁 𑀲𑀓𑁆𑀓𑀸, 𑀅𑀭𑀜𑁆𑀜𑁂 𑀓𑀝𑁆𑀞𑀢𑁆𑀣𑀁 𑀨𑀭𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀉𑀪𑀬𑀣𑀸𑀧𑀺 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁. 𑀕𑀺𑀳𑀺𑀪𑁄𑀕𑀸 𑀘 𑀧𑀭𑀺𑀳𑀻𑀦𑁄𑀢𑀺 𑀬𑁄 𑀅𑀕𑀸𑀭𑁂 𑀯𑀲𑀦𑁆𑀢𑁂𑀳𑀺 𑀕𑀺𑀳𑀻𑀳𑀺 𑀤𑀸𑀬𑀚𑁆𑀚𑁂 𑀪𑀸𑀚𑀺𑀬𑀫𑀸𑀦𑁂 𑀪𑁄𑀕𑁄 𑀮𑀤𑁆𑀥𑀩𑁆𑀩𑁄 𑀅𑀲𑁆𑀲, 𑀢𑀢𑁄 𑀘 𑀧𑀭𑀺𑀳𑀻𑀦𑁄. 𑀲𑀸𑀫𑀜𑁆𑀜𑀢𑁆𑀣𑀜𑁆𑀘𑀸𑀢𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀑𑀯𑀸𑀤𑁂 𑀞𑀢𑁆𑀯𑀸 𑀧𑀭𑀺𑀬𑀢𑁆𑀢𑀺𑀧𑀝𑀺𑀯𑁂𑀥𑀯𑀲𑁂𑀦 𑀧𑀢𑁆𑀢𑀩𑁆𑀩𑀁 𑀲𑀸𑀫𑀜𑁆𑀜𑀢𑁆𑀣𑀜𑁆𑀘. 𑀇𑀫𑀜𑁆𑀘 𑀧𑀦 𑀉𑀧𑀫𑀁 𑀲𑀢𑁆𑀣𑀸 𑀦 𑀤𑀼𑀲𑁆𑀲𑀻𑀮𑀲𑁆𑀲 𑀯𑀲𑁂𑀦 𑀆𑀳𑀭𑀺, 𑀧𑀭𑀺𑀲𑀼𑀤𑁆𑀥𑀲𑀻𑀮𑀲𑁆𑀲 𑀧𑀦 𑀅𑀮𑀲𑀲𑁆𑀲 𑀅𑀪𑀺𑀚𑁆𑀛𑀸𑀤𑀻𑀳𑀺 𑀤𑁄𑀲𑁂𑀳𑀺 𑀉𑀧𑀳𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀇𑀫𑀁 𑀉𑀧𑀫𑀁 𑀆𑀳𑀭𑀺.

𑀢𑀬𑁄𑀫𑁂, 𑀪𑀺𑀓𑁆𑀔𑀯𑁂𑀢𑀺 𑀓𑀲𑁆𑀫𑀸 𑀆𑀭𑀤𑁆𑀥𑀁? 𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀙𑀯𑀸𑀮𑀸𑀢𑀲𑀤𑀺𑀲𑀪𑀸𑀯𑁄 𑀦𑁂𑀯 𑀫𑀸𑀢𑀸𑀧𑀺𑀢𑀽𑀳𑀺 𑀓𑀢𑁄, 𑀦 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺, 𑀇𑀫𑁂𑀳𑀺 𑀧𑀦 𑀧𑀸𑀧𑀯𑀺𑀢𑀓𑁆𑀓𑁂𑀳𑀺 𑀓𑀢𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀆𑀭𑀤𑁆𑀥𑀁. 𑀅𑀦𑀺𑀫𑀺𑀢𑁆𑀢𑀁 𑀯𑀸 𑀲𑀫𑀸𑀥𑀺𑀦𑁆𑀢𑀺 ¶ 𑀯𑀺𑀧𑀲𑁆𑀲𑀦𑀸𑀲𑀫𑀸𑀥𑀺𑀁. 𑀲𑁄 𑀳𑀺 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀲𑀫𑀼𑀕𑁆𑀖𑀸𑀢𑀦𑁂𑀦 𑀅𑀦𑀺𑀫𑀺𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀘 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀫𑀺𑀲𑁆𑀲𑀓𑀸, 𑀅𑀦𑀺𑀫𑀺𑀢𑁆𑀢𑀲𑀫𑀸𑀥𑀺 𑀧𑀼𑀩𑁆𑀩𑀪𑀸𑀕𑁄. 𑀅𑀦𑀺𑀫𑀺𑀢𑁆𑀢𑀲𑀫𑀸𑀥𑀺 𑀯𑀸 𑀫𑀺𑀲𑁆𑀲𑀓𑁄, 𑀲𑀢𑀺𑀧𑀝𑁆𑀞𑀸𑀦𑀸 𑀧𑀼𑀩𑁆𑀩𑀪𑀸𑀕𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀤𑁆𑀯𑁂𑀫𑀸, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀬𑁄𑀢𑀺 𑀇𑀤𑀁 𑀧𑀦 𑀦 𑀓𑁂𑀯𑀮𑀁 𑀅𑀦𑀺𑀫𑀺𑀢𑁆𑀢𑀲𑀫𑀸𑀥𑀺𑀪𑀸𑀯𑀦𑀸 𑀇𑀫𑁂𑀲𑀁𑀬𑁂𑀯 𑀢𑀺𑀡𑁆𑀡𑀁 𑀫𑀳𑀸𑀯𑀺𑀢𑀓𑁆𑀓𑀸𑀦𑀁 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀢𑀺, 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀻𑀦𑀫𑁆𑀧𑀺 𑀧𑀦 𑀲𑀫𑀼𑀕𑁆𑀖𑀸𑀢𑀁 𑀓𑀭𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀦 𑀯𑀚𑁆𑀚𑀯𑀸 𑀅𑀲𑁆𑀲𑀦𑁆𑀢𑀺 𑀦𑀺𑀤𑁆𑀤𑁄𑀲𑁄 𑀪𑀯𑁂𑀬𑁆𑀬𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀇𑀢𑀺 𑀪𑀕𑀯𑀸 𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑁂 𑀤𑁂𑀲𑀦𑀁 𑀢𑀻𑀳𑀺 𑀪𑀯𑁂𑀳𑀺 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀭𑀳𑀢𑁆𑀢𑁂𑀦 𑀓𑀽𑀝𑀁 𑀕𑀡𑁆𑀳𑀺. 𑀤𑁂𑀲𑀦𑀸𑀯𑀲𑀸𑀦𑁂 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀽𑀢𑀺. 𑀅𑀝𑁆𑀞𑀫𑀁.

𑁯. 𑀧𑀸𑀮𑀺𑀮𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁧. 𑀦𑀯𑀫𑁂 ¶ 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀻𑀢𑀺 𑀓𑁄𑀲𑀫𑁆𑀩𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀓𑀮𑀳𑀓𑀸𑀮𑁂 𑀲𑀢𑁆𑀣𑀸 𑀏𑀓𑀤𑀺𑀯𑀲𑀁 𑀤𑀻𑀖𑀻𑀢𑀺𑀲𑁆𑀲 𑀓𑁄𑀲𑀮𑀭𑀜𑁆𑀜𑁄 𑀯𑀢𑁆𑀣𑀼𑀁 𑀆𑀳𑀭𑀺𑀢𑁆𑀯𑀸 ‘‘𑀦 𑀳𑀺 𑀯𑁂𑀭𑁂𑀦 𑀯𑁂𑀭𑀸𑀦𑀺, 𑀲𑀫𑁆𑀫𑀦𑁆𑀢𑀻𑀥 𑀓𑀼𑀤𑀸𑀘𑀦’’𑀦𑁆𑀢𑀺𑀆𑀤𑀻𑀳𑀺 (𑀥. 𑀧. 𑁫) 𑀕𑀸𑀣𑀸𑀳𑀺 𑀑𑀯𑀤𑀢𑀺. 𑀢𑀁𑀤𑀺𑀯𑀲𑀁 𑀢𑁂𑀲𑀁 𑀓𑀮𑀳𑀁 𑀓𑀭𑁄𑀦𑁆𑀢𑀸𑀦𑀁𑀬𑁂𑀯 𑀭𑀢𑁆𑀢𑀺 𑀯𑀺𑀪𑀸𑀢𑀸. 𑀤𑀼𑀢𑀺𑀬𑀤𑀺𑀯𑀲𑁂𑀧𑀺 𑀪𑀕𑀯𑀸 𑀢𑀫𑁂𑀯 𑀯𑀢𑁆𑀣𑀼𑀁 𑀓𑀣𑁂𑀲𑀺. 𑀢𑀁𑀤𑀺𑀯𑀲𑀫𑁆𑀧𑀺 𑀢𑁂𑀲𑀁 𑀓𑀮𑀳𑀁 𑀓𑀭𑁄𑀦𑁆𑀢𑀸𑀦𑀁𑀬𑁂𑀯 𑀭𑀢𑁆𑀢𑀺 𑀯𑀺𑀪𑀸𑀢𑀸. 𑀢𑀢𑀺𑀬𑀤𑀺𑀯𑀲𑁂𑀧𑀺 𑀪𑀕𑀯𑀸 𑀢𑀫𑁂𑀯 𑀯𑀢𑁆𑀣𑀼𑀁 𑀓𑀣𑁂𑀲𑀺. 𑀅𑀣 𑀦𑀁 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀏𑀯𑀫𑀸𑀳 𑁋 ‘‘𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄, 𑀪𑀦𑁆𑀢𑁂, 𑀪𑀕𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀼, 𑀫𑀬𑀫𑁂𑀢𑁂𑀦 𑀪𑀡𑁆𑀟𑀦𑁂𑀦 ¶ 𑀓𑀮𑀳𑁂𑀦 𑀯𑀺𑀕𑁆𑀕𑀳𑁂𑀦 𑀯𑀺𑀯𑀸𑀤𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀸𑀫𑀸’’𑀢𑀺. 𑀲𑀢𑁆𑀣𑀸 ‘‘𑀧𑀭𑀺𑀬𑀸𑀤𑀺𑀡𑁆𑀡𑀭𑀽𑀧𑀘𑀺𑀢𑁆𑀢𑀸 𑀔𑁄 𑀇𑀫𑁂 𑀫𑁄𑀖𑀧𑀼𑀭𑀺𑀲𑀸, 𑀦 𑀇𑀫𑁂 𑀲𑀓𑁆𑀓𑀸 𑀲𑀜𑁆𑀜𑀸𑀧𑁂𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀓𑀺𑀁 𑀫𑀬𑁆𑀳𑀁 𑀇𑀫𑁂𑀳𑀺, 𑀏𑀓𑀘𑀸𑀭𑀯𑀸𑀲𑀁 𑀯𑀲𑀺𑀲𑁆𑀲𑀸𑀫𑀻’’𑀢𑀺? 𑀲𑁄 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸 𑀓𑁄𑀲𑀫𑁆𑀩𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀜𑁆𑀘𑀺𑀧𑀺 𑀅𑀦𑀸𑀫𑀦𑁆𑀢𑁂𑀢𑁆𑀯𑀸 𑀏𑀓𑁄𑀯 𑀅𑀤𑀼𑀢𑀺𑀬𑁄 𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺.

𑀬𑀲𑁆𑀫𑀺𑀁, 𑀆𑀯𑀼𑀲𑁄, 𑀲𑀫𑀬𑁂𑀢𑀺 𑀇𑀤𑀁 𑀣𑁂𑀭𑁄 𑀬𑀲𑁆𑀫𑀸𑀲𑁆𑀲 𑀅𑀚𑁆𑀚 𑀪𑀕𑀯𑀸 𑀏𑀓𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀧𑀓𑁆𑀓𑀫𑀺𑀲𑁆𑀲𑀢𑀺, 𑀅𑀚𑁆𑀚 𑀤𑁆𑀯𑀻𑀳𑀺, 𑀅𑀚𑁆𑀚 𑀲𑀢𑁂𑀦, 𑀅𑀚𑁆𑀚 𑀲𑀳𑀲𑁆𑀲𑁂𑀦, 𑀅𑀚𑁆𑀚 𑀏𑀓𑀓𑁄𑀯𑀸𑀢𑀺 𑀲𑀩𑁆𑀩𑁄 𑀪𑀕𑀯𑀢𑁄 𑀘𑀸𑀭𑁄 𑀯𑀺𑀤𑀺𑀢𑁄 𑀧𑀸𑀓𑀝𑁄 𑀧𑀘𑁆𑀘𑀓𑁆𑀔𑁄, 𑀢𑀲𑁆𑀫𑀸 𑀆𑀳.

𑀅𑀦𑀼𑀧𑀼𑀩𑁆𑀩𑁂𑀦𑀸𑀢𑀺 ¶ 𑀕𑀸𑀫𑀦𑀺𑀕𑀫𑀧𑀝𑀺𑀧𑀸𑀝𑀺𑀬𑀸 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑁄 𑀏𑀓𑀘𑀸𑀭𑀯𑀸𑀲𑀁 𑀢𑀸𑀯 𑀯𑀲𑀫𑀸𑀦𑀁 𑀪𑀺𑀓𑁆𑀔𑀼𑀁 𑀧𑀲𑁆𑀲𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸 𑀩𑀸𑀮𑀓𑀮𑁄𑀡𑀓𑀸𑀭𑀕𑀸𑀫𑀁 𑀅𑀕𑀫𑀸𑀲𑀺. 𑀢𑀢𑁆𑀣 𑀪𑀕𑀼𑀢𑁆𑀣𑁂𑀭𑀲𑁆𑀲 𑀲𑀓𑀮𑀧𑀘𑁆𑀙𑀸𑀪𑀢𑁆𑀢𑀜𑁆𑀘𑁂𑀯 𑀢𑀺𑀬𑀸𑀫𑀭𑀢𑁆𑀢𑀺𑀜𑁆𑀘 𑀏𑀓𑀘𑀸𑀭𑀯𑀸𑀲𑁂 𑀆𑀦𑀺𑀲𑀁𑀲𑀁 𑀓𑀣𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀢𑁂𑀦 𑀧𑀘𑁆𑀙𑀸𑀲𑀫𑀡𑁂𑀦 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀢𑀁 𑀢𑀢𑁆𑀣𑁂𑀯 𑀦𑀺𑀯𑀢𑁆𑀢𑁂𑀢𑁆𑀯𑀸 ‘‘𑀲𑀫𑀕𑁆𑀕𑀯𑀸𑀲𑀁 𑀯𑀲𑀫𑀸𑀦𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑁂 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀧𑀸𑀘𑀻𑀦𑀯𑀁𑀲𑀫𑀺𑀕𑀤𑀸𑀬𑀁 𑀅𑀕𑀫𑀸𑀲𑀺. 𑀢𑁂𑀲𑀫𑁆𑀧𑀺 𑀲𑀓𑀮𑀧𑀘𑁆𑀙𑀸𑀪𑀢𑁆𑀢𑀜𑁆𑀘𑁂𑀯 𑀢𑀺𑀬𑀸𑀫𑀭𑀢𑁆𑀢𑀺𑀜𑁆𑀘 𑀏𑀓𑀘𑀸𑀭𑀯𑀸𑀲𑁂 𑀆𑀦𑀺𑀲𑀁𑀲𑀁 𑀓𑀣𑁂𑀢𑁆𑀯𑀸 𑀢𑁂 𑀢𑀢𑁆𑀣𑁂𑀯 𑀦𑀺𑀯𑀢𑁆𑀢𑁂𑀢𑁆𑀯𑀸 𑀏𑀓𑀓𑁄𑀯 𑀧𑀸𑀮𑀺𑀮𑁂𑀬𑁆𑀬 𑀦𑀕𑀭𑀸𑀪𑀺𑀫𑀼𑀔𑁄 𑀧𑀓𑁆𑀓𑀫𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀧𑀸𑀮𑀺𑀮𑁂𑀬𑁆𑀬𑀦𑀕𑀭𑀁 𑀲𑀫𑁆𑀧𑀢𑁆𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀬𑁂𑀦 𑀧𑀸𑀮𑀺𑀮𑁂𑀬𑁆𑀬𑀓𑀁, 𑀢𑀤𑀯𑀲𑀭𑀻’’𑀢𑀺.

𑀪𑀤𑁆𑀤𑀲𑀸𑀮𑀫𑀽𑀮𑁂𑀢𑀺 𑀧𑀸𑀮𑀺𑀮𑁂𑀬𑁆𑀬𑀯𑀸𑀲𑀺𑀦𑁄 𑀪𑀕𑀯𑀢𑁄 𑀤𑀸𑀦𑀁 𑀤𑀢𑁆𑀯𑀸 ¶ 𑀧𑀸𑀮𑀺𑀮𑁂𑀬𑁆𑀬𑀢𑁄 𑀅𑀯𑀺𑀤𑀽𑀭𑁂 𑀭𑀓𑁆𑀔𑀺𑀢𑀯𑀦𑀲𑀡𑁆𑀟𑁄 𑀦𑀸𑀫 𑀅𑀢𑁆𑀣𑀺, 𑀢𑀢𑁆𑀣 𑀪𑀕𑀯𑀢𑁄 𑀧𑀡𑁆𑀡𑀲𑀸𑀮𑀁 𑀓𑀢𑁆𑀯𑀸 ‘‘𑀏𑀢𑁆𑀣 𑀯𑀲𑀣𑀸’’𑀢𑀺 𑀧𑀝𑀺𑀜𑁆𑀜𑀁 𑀓𑀸𑀭𑁂𑀢𑁆𑀯𑀸 𑀯𑀸𑀲𑀬𑀺𑀁𑀲𑀼. 𑀪𑀤𑁆𑀤𑀲𑀸𑀮𑁄 𑀧𑀦 𑀢𑀢𑁆𑀣𑁂𑀓𑁄 𑀫𑀦𑀸𑀧𑁄 𑀮𑀤𑁆𑀥𑀓𑁄 𑀲𑀸𑀮𑀭𑀼𑀓𑁆𑀔𑁄. 𑀪𑀕𑀯𑀸 𑀢𑀁 𑀦𑀕𑀭𑀁 𑀉𑀧𑀦𑀺𑀲𑁆𑀲𑀸𑀬 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂 𑀧𑀡𑁆𑀡𑀲𑀸𑀮𑀲𑀫𑀻𑀧𑁂 𑀢𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀯𑀺𑀳𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀪𑀤𑁆𑀤𑀲𑀸𑀮𑀫𑀽𑀮𑁂’’𑀢𑀺.

𑀏𑀯𑀁 𑀯𑀺𑀳𑀭𑀦𑁆𑀢𑁂 𑀧𑀦𑁂𑀢𑁆𑀣 𑀢𑀣𑀸𑀕𑀢𑁂 𑀅𑀜𑁆𑀜𑀢𑀭𑁄 𑀳𑀢𑁆𑀣𑀺𑀦𑀸𑀕𑁄 𑀳𑀢𑁆𑀣𑀺𑀦𑀻𑀳𑀺 𑀳𑀢𑁆𑀣𑀺𑀧𑁄𑀢𑀓𑀸𑀤𑀻𑀳𑀺 𑀕𑁄𑀘𑀭𑀪𑀽𑀫𑀺𑀢𑀺𑀢𑁆𑀣𑁄𑀕𑀸𑀳𑀦𑀸𑀤𑀻𑀲𑀼 𑀉𑀩𑁆𑀩𑀸𑀴𑁆𑀳𑁄 𑀬𑀽𑀣𑁂 𑀉𑀓𑁆𑀓𑀡𑁆𑀞𑀺𑀢𑁄 ‘‘𑀓𑀺𑀁 𑀫𑁂 𑀇𑀫𑁂𑀳𑀺 𑀳𑀢𑁆𑀣𑀻𑀳𑀻’’𑀢𑀺? 𑀬𑀽𑀣𑀁 𑀧𑀳𑀸𑀬 𑀫𑀦𑀼𑀲𑁆𑀲𑀧𑀣𑀁 𑀕𑀘𑁆𑀙𑀦𑁆𑀢𑁄 𑀧𑀸𑀮𑀺𑀮𑁂𑀬𑁆𑀬𑀓𑀯𑀦𑀲𑀡𑁆𑀟𑁂 𑀪𑀕𑀯𑀦𑁆𑀢𑀁 𑀤𑀺𑀲𑁆𑀯𑀸 𑀖𑀝𑀲𑀳𑀲𑁆𑀲𑁂𑀦 𑀦𑀺𑀩𑁆𑀩𑀸𑀧𑀺𑀢𑀲𑀦𑁆𑀢𑀸𑀧𑁄 𑀯𑀺𑀬 𑀦𑀺𑀩𑁆𑀩𑀼𑀢𑁄 𑀳𑀼𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀅𑀝𑁆𑀞𑀸𑀲𑀺. 𑀲𑁄 𑀢𑀢𑁄 𑀧𑀝𑁆𑀞𑀸𑀬 𑀲𑀢𑁆𑀣𑀼 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀭𑁄𑀦𑁆𑀢𑁄 𑀫𑀼𑀔𑀥𑁄𑀯𑀦𑀁 ¶ 𑀤𑁂𑀢𑀺, 𑀦𑁆𑀳𑀸𑀦𑁄𑀤𑀓𑀁 𑀆𑀳𑀭𑀢𑀺, 𑀤𑀦𑁆𑀢𑀓𑀝𑁆𑀞𑀁 𑀤𑁂𑀢𑀺, 𑀧𑀭𑀺𑀯𑁂𑀡𑀁 𑀲𑀫𑁆𑀫𑀚𑁆𑀚𑀢𑀺, 𑀅𑀭𑀜𑁆𑀜𑀢𑁄 𑀫𑀥𑀼𑀭𑀸𑀦𑀺 𑀨𑀮𑀸𑀨𑀮𑀸𑀦𑀺 𑀆𑀳𑀭𑀺𑀢𑁆𑀯𑀸 𑀲𑀢𑁆𑀣𑀼𑀦𑁄 𑀤𑁂𑀢𑀺. 𑀲𑀢𑁆𑀣𑀸 𑀧𑀭𑀺𑀪𑁄𑀕𑀁 𑀓𑀭𑁄𑀢𑀺.

𑀏𑀓𑀤𑀺𑀯𑀲𑀁 𑀲𑀢𑁆𑀣𑀸 𑀭𑀢𑁆𑀢𑀺𑀪𑀸𑀕𑀲𑀫𑀦𑀦𑁆𑀢𑀭𑁂 𑀘𑀗𑁆𑀓𑀫𑀺𑀢𑁆𑀯𑀸 𑀧𑀸𑀲𑀸𑀡𑀨𑀮𑀓𑁂 𑀦𑀺𑀲𑀻𑀤𑀺. 𑀳𑀢𑁆𑀣𑀻𑀧𑀺 𑀅𑀯𑀺𑀤𑀽𑀭𑁂 𑀞𑀸𑀦𑁂 𑀅𑀝𑁆𑀞𑀸𑀲𑀺. 𑀲𑀢𑁆𑀣𑀸 𑀧𑀘𑁆𑀙𑀢𑁄 𑀑𑀮𑁄𑀓𑁂𑀢𑁆𑀯𑀸 𑀦 𑀓𑀺𑀜𑁆𑀘𑀺 𑀅𑀤𑁆𑀤𑀲, 𑀏𑀯𑀁 𑀧𑀼𑀭𑀢𑁄 𑀘 𑀉𑀪𑀬𑀧𑀲𑁆𑀲𑁂𑀲𑀼 𑀘. 𑀅𑀣𑀲𑁆𑀲 ‘‘𑀲𑀼𑀔𑀁 𑀯𑀢𑀸𑀳𑀁 𑀅𑀜𑁆𑀜𑀢𑁆𑀭 𑀢𑁂𑀳𑀺 𑀪𑀡𑁆𑀟𑀦𑀓𑀸𑀭𑀓𑁂𑀳𑀺 𑀯𑀲𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺. 𑀳𑀢𑁆𑀣𑀺𑀦𑁄𑀧𑀺 ‘‘𑀫𑀬𑀸 𑀦𑀸𑀫𑀺𑀢𑀲𑀸𑀔𑀁 𑀅𑀜𑁆𑀜𑁂 𑀔𑀸𑀤𑀦𑁆𑀢𑀸 𑀦𑀢𑁆𑀣𑀻’’𑀢𑀺𑀆𑀤𑀻𑀦𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀲𑀼𑀔𑀁 𑀯𑀢 𑀏𑀓𑀓𑁄𑀯 ¶ 𑀯𑀲𑀸𑀫𑀺, 𑀲𑀢𑁆𑀣𑀼 𑀯𑀢𑁆𑀢𑀁 𑀓𑀸𑀢𑀼𑀁 𑀮𑀪𑀸𑀫𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺. 𑀲𑀢𑁆𑀣𑀸 𑀅𑀢𑁆𑀢𑀦𑁄 𑀘𑀺𑀢𑁆𑀢𑀁 𑀑𑀮𑁄𑀓𑁂𑀢𑁆𑀯𑀸 𑁋 ‘‘𑀫𑀫 𑀢𑀸𑀯 𑀈𑀤𑀺𑀲𑀁 𑀘𑀺𑀢𑁆𑀢𑀁, 𑀓𑀻𑀤𑀺𑀲𑀁 𑀦𑀼 𑀔𑁄 𑀳𑀢𑁆𑀣𑀺𑀲𑁆𑀲𑀸’’𑀢𑀺 𑀢𑀲𑁆𑀲𑀸𑀧𑀺 𑀢𑀸𑀤𑀺𑀲𑀫𑁂𑀯 𑀤𑀺𑀲𑁆𑀯𑀸 ‘‘𑀲𑀫𑁂𑀢𑀺 𑀦𑁄 𑀘𑀺𑀢𑁆𑀢’’𑀦𑁆𑀢𑀺 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀏𑀢𑀁 𑀦𑀸𑀕𑀲𑁆𑀲 𑀦𑀸𑀕𑁂𑀦, 𑀈𑀲𑀸𑀤𑀦𑁆𑀢𑀲𑁆𑀲 𑀳𑀢𑁆𑀣𑀺𑀦𑁄;

𑀲𑀫𑁂𑀢𑀺 𑀘𑀺𑀢𑁆𑀢𑀁 𑀘𑀺𑀢𑁆𑀢𑁂𑀦, 𑀬𑀤𑁂𑀓𑁄 𑀭𑀫𑀢𑀻 𑀯𑀦𑁂’’𑀢𑀺. (𑀫𑀳𑀸𑀯. 𑁪𑁬𑁭);

𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽𑀢𑀺 𑀅𑀣 𑀏𑀯𑀁 𑀢𑀣𑀸𑀕𑀢𑁂 𑀢𑀢𑁆𑀣 𑀯𑀺𑀳𑀭𑀦𑁆𑀢𑁂 𑀧𑀜𑁆𑀘𑀲𑀢𑀸 𑀤𑀺𑀲𑀸𑀲𑀼 𑀯𑀲𑁆𑀲𑀁𑀯𑀼𑀢𑁆𑀣𑀸 𑀪𑀺𑀓𑁆𑀔𑀽. 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄𑀢𑀺 ‘‘𑀲𑀢𑁆𑀣𑀸 𑀓𑀺𑀭 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀸𑀫𑁂𑀢𑁆𑀯𑀸 𑀅𑀭𑀜𑁆𑀜𑀁 𑀧𑀯𑀺𑀝𑁆𑀞𑁄’’𑀢𑀺 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄, 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼.

𑀅𑀦𑀦𑁆𑀢𑀭𑀸 ¶ 𑀆𑀲𑀯𑀸𑀦𑀁 𑀔𑀬𑁄𑀢𑀺 𑀫𑀕𑁆𑀕𑀸𑀦𑀦𑁆𑀢𑀭𑀁 𑀅𑀭𑀳𑀢𑁆𑀢𑀨𑀮𑀁. 𑀯𑀺𑀘𑀬𑀲𑁄𑀢𑀺 𑀯𑀺𑀘𑀬𑁂𑀦, 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀲𑀪𑀸𑀯𑀯𑀺𑀘𑀺𑀦𑀦𑀲𑀫𑀢𑁆𑀣𑁂𑀦 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁄𑀢𑀺 𑀲𑀸𑀲𑀦𑀥𑀫𑁆𑀫𑁄. 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸𑀢𑀺𑀆𑀤𑀺 𑀬𑁂 𑀬𑁂 𑀓𑁄𑀝𑁆𑀞𑀸𑀲𑁂 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀥𑀫𑁆𑀫𑁄 𑀤𑁂𑀲𑀺𑀢𑁄, 𑀢𑁂𑀲𑀁 𑀧𑀓𑀸𑀲𑀦𑀢𑁆𑀣𑀸𑀬 𑀯𑀼𑀢𑁆𑀢𑀁. 𑀲𑀫𑀦𑀼𑀧𑀲𑁆𑀲𑀦𑀸𑀢𑀺 𑀤𑀺𑀝𑁆𑀞𑀺𑀲𑀫𑀦𑀼𑀧𑀲𑁆𑀲𑀦𑀸. 𑀲𑀗𑁆𑀔𑀸𑀭𑁄 𑀲𑁄𑀢𑀺 𑀤𑀺𑀝𑁆𑀞𑀺𑀲𑀗𑁆𑀔𑀸𑀭𑁄 𑀲𑁄. 𑀢𑀢𑁄𑀚𑁄 𑀲𑁄 𑀲𑀗𑁆𑀔𑀸𑀭𑁄𑀢𑀺 𑀢𑀢𑁄 𑀢𑀡𑁆𑀳𑀸𑀢𑁄 𑀲𑁄 𑀲𑀗𑁆𑀔𑀸𑀭𑁄 𑀚𑀸𑀢𑁄. 𑀢𑀡𑁆𑀳𑀸𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀘𑀺𑀢𑁆𑀢𑁂𑀲𑀼𑀧𑀺 𑀘𑀢𑀽𑀲𑀼 𑀘𑀺𑀢𑁆𑀢𑁂𑀲𑀼 𑀏𑀲 𑀚𑀸𑀬𑀢𑀺. 𑀲𑀸𑀧𑀺 𑀢𑀡𑁆𑀳𑀸𑀢𑀺 𑀲𑀸 𑀤𑀺𑀝𑁆𑀞𑀺𑀲𑀗𑁆𑀔𑀸𑀭𑀲𑁆𑀲 𑀧𑀘𑁆𑀘𑀬𑀪𑀽𑀢𑀸 𑀢𑀡𑁆𑀳𑀸. 𑀲𑀸𑀧𑀺 𑀯𑁂𑀤𑀦𑀸𑀢𑀺 𑀲𑀸 𑀢𑀡𑁆𑀳𑀸𑀬 𑀧𑀘𑁆𑀘𑀬𑀪𑀽𑀢𑀸 𑀯𑁂𑀤𑀦𑀸. 𑀲𑁄𑀧𑀺 𑀨𑀲𑁆𑀲𑁄𑀢𑀺 𑀲𑁄 𑀯𑁂𑀤𑀦𑀸𑀬 𑀧𑀘𑁆𑀘𑀬𑁄 𑀅𑀯𑀺𑀚𑁆𑀚𑀸𑀲𑀫𑁆𑀨𑀲𑁆𑀲𑁄. 𑀲𑀸𑀧𑀺 𑀅𑀯𑀺𑀚𑁆𑀚𑀸𑀢𑀺 𑀲𑀸 𑀨𑀲𑁆𑀲𑀲𑀫𑁆𑀧𑀬𑀼𑀢𑁆𑀢𑀸 𑀅𑀯𑀺𑀚𑁆𑀚𑀸.

𑀦𑁄 𑀘𑀲𑁆𑀲𑀁 ¶ , 𑀦𑁄 𑀘 𑀫𑁂 𑀲𑀺𑀬𑀸𑀢𑀺 𑀲𑀘𑁂 𑀅𑀳𑀁 𑀦 𑀪𑀯𑁂𑀬𑁆𑀬𑀁, 𑀫𑀫 𑀧𑀭𑀺𑀓𑁆𑀔𑀸𑀭𑁄𑀧𑀺 𑀦 𑀪𑀯𑁂𑀬𑁆𑀬. 𑀦𑀸𑀪𑀯𑀺𑀲𑁆𑀲𑀁, 𑀦 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀲𑀘𑁂 𑀧𑀦 𑀆𑀬𑀢𑀺𑀫𑁆𑀧𑀺 𑀅𑀳𑀁 𑀦 𑀪𑀯𑀺𑀲𑁆𑀲𑀸𑀫𑀺, 𑀏𑀯𑀁 𑀫𑀫 𑀧𑀭𑀺𑀓𑁆𑀔𑀸𑀭𑁄𑀧𑀺 𑀦 𑀪𑀯𑀺𑀲𑁆𑀲𑀢𑀺. 𑀏𑀢𑁆𑀢𑀓𑁂 𑀞𑀸𑀦𑁂 𑀪𑀕𑀯𑀸 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀕𑀳𑀺𑀢𑀕𑀳𑀺𑀢𑀤𑀺𑀝𑁆𑀞𑀺𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀦𑁆𑀢𑁄 𑀆𑀕𑀢𑁄 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁂𑀦𑀧𑀺 𑀤𑁂𑀲𑀦𑀸𑀯𑀺𑀮𑀸𑀲𑁂𑀦𑀧𑀺. 𑀢𑀢𑁄𑀚𑁄 𑀲𑁄 𑀲𑀗𑁆𑀔𑀸𑀭𑁄𑀢𑀺 𑀢𑀡𑁆𑀳𑀸𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂 𑀯𑀺𑀘𑀺𑀓𑀺𑀘𑁆𑀙𑀸𑀯 𑀦𑀢𑁆𑀣𑀺, 𑀓𑀣𑀁 𑀯𑀺𑀘𑀺𑀓𑀺𑀘𑁆𑀙𑀸𑀲𑀗𑁆𑀔𑀸𑀭𑁄 𑀢𑀡𑁆𑀳𑀸𑀢𑁄 𑀚𑀸𑀬𑀢𑀻𑀢𑀺? 𑀅𑀧𑁆𑀧𑀳𑀻𑀦𑀢𑁆𑀢𑀸. 𑀬𑀲𑁆𑀲 𑀳𑀺 𑀢𑀡𑁆𑀳𑀸𑀬 𑀅𑀧𑁆𑀧𑀳𑀻𑀦𑀸𑀬 𑀲𑁄 ¶ 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀺𑀬𑀸𑀧𑀺 𑀏𑀲𑁂𑀯 𑀦𑀬𑁄 𑀮𑀩𑁆𑀪𑀢𑀺𑀬𑁂𑀯 𑀘𑀢𑀽𑀲𑀼 𑀳𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀲𑀫𑁆𑀧𑀬𑀼𑀢𑁆𑀢𑀤𑀺𑀝𑁆𑀞𑀺 𑀦𑀸𑀫 𑀦𑀢𑁆𑀣𑀺. 𑀬𑀲𑁆𑀫𑀸 𑀧𑀦 𑀢𑀡𑁆𑀳𑀸𑀬 𑀅𑀧𑁆𑀧𑀳𑀻𑀦𑀢𑁆𑀢𑀸 𑀲𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀁 𑀲𑀦𑁆𑀥𑀸𑀬 𑀢𑀢𑁆𑀭𑀸𑀧𑀺 𑀅𑀬𑀫𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀢𑁂𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸. 𑀦𑀯𑀫𑀁.

𑁧𑁦. 𑀧𑀼𑀡𑁆𑀡𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁨. 𑀤𑀲𑀫𑁂 𑀢𑀤𑀳𑀼𑀧𑁄𑀲𑀣𑁂𑀢𑀺𑀆𑀤𑀺 𑀧𑀯𑀸𑀭𑀡𑀲𑀼𑀢𑁆𑀢𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀓𑀺𑀜𑁆𑀘𑀺𑀤𑁂𑀯 𑀤𑁂𑀲𑀦𑁆𑀢𑀺 𑀓𑀺𑀜𑁆𑀘𑀺 𑀓𑀸𑀭𑀡𑀁. 𑀲𑀓𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀧𑀼𑀘𑁆𑀙 𑀬𑀤𑀸𑀓𑀗𑁆𑀔𑀲𑀻𑀢𑀺 𑀓𑀲𑁆𑀫𑀸 𑀏𑀯𑀫𑀸𑀳? 𑀲𑁄 𑀓𑀺𑀭 𑀪𑀺𑀓𑁆𑀔𑀼 𑀧𑀜𑁆𑀘𑀲𑀢𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑁄. 𑀆𑀘𑀭𑀺𑀬𑁂 ¶ 𑀧𑀦 𑀞𑀺𑀢𑀓𑁂 𑀧𑀼𑀘𑁆𑀙𑀦𑁆𑀢𑁂 𑀲𑀘𑁂 𑀢𑁂 𑀪𑀺𑀓𑁆𑀔𑀽 𑀦𑀺𑀲𑀻𑀤𑀦𑁆𑀢𑀺, 𑀲𑀢𑁆𑀣𑀭𑀺 𑀕𑀸𑀭𑀯𑀁 𑀓𑀢𑀁 𑀳𑁄𑀢𑀺, 𑀆𑀘𑀭𑀺𑀬𑁂 𑀅𑀕𑀸𑀭𑀯𑀁. 𑀲𑀘𑁂 𑀉𑀝𑁆𑀞𑀳𑀦𑁆𑀢𑀺, 𑀆𑀘𑀭𑀺𑀬𑁂 𑀕𑀸𑀭𑀯𑀁 𑀓𑀢𑀁 𑀳𑁄𑀢𑀺, 𑀲𑀢𑁆𑀣𑀭𑀺 𑀅𑀕𑀸𑀭𑀯𑀁. 𑀇𑀢𑀺 𑀦𑁂𑀲𑀁 𑀘𑀺𑀢𑁆𑀢𑀁 𑀅𑀦𑁂𑀓𑀕𑁆𑀕𑀁 𑀪𑀯𑀺𑀲𑁆𑀲𑀢𑀺, 𑀤𑁂𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀢𑀲𑁆𑀫𑀺𑀁 𑀧𑀦 𑀦𑀺𑀲𑀻𑀤𑀺𑀢𑁆𑀯𑀸 𑀧𑀼𑀘𑁆𑀙𑀦𑁆𑀢𑁂 𑀢𑁂𑀲𑀁 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀪𑀯𑀺𑀲𑁆𑀲𑀢𑀺, 𑀤𑁂𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀻𑀢𑀺 𑀜𑀢𑁆𑀯𑀸 𑀪𑀕𑀯𑀸 𑀏𑀯𑀫𑀸𑀳. 𑀇𑀫𑁂 𑀦𑀼 𑀔𑁄, 𑀪𑀦𑁆𑀢𑁂𑀢𑀺 𑀅𑀬𑀁 𑀣𑁂𑀭𑁄 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀆𑀘𑀭𑀺𑀬𑁄, 𑀧𑀜𑁆𑀘𑀓𑁆𑀔𑀦𑁆𑀥𑀫𑀢𑁆𑀢𑀫𑁆𑀧𑀺 𑀦𑀧𑁆𑀧𑀚𑀸𑀦𑀸𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑁂𑀦 𑀧𑀦 ‘‘𑀇𑀫𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸, 𑀦 𑀅𑀜𑁆𑀜𑁂’’𑀢𑀺 𑀏𑀯𑀁 𑀚𑀸𑀦𑀦𑁆𑀢𑁂𑀦 𑀯𑀺𑀬 𑀳𑀼𑀢𑁆𑀯𑀸 𑀧𑀼𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀧𑀼𑀘𑁆𑀙𑀢𑀺. 𑀢𑁂𑀧𑀺 𑀘𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀸 ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 ‘𑀅𑀳𑀁 𑀚𑀸𑀦𑀸𑀫𑀻’𑀢𑀺 𑀦 𑀓𑀣𑁂𑀢𑀺, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀧𑀦 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀺𑀢𑁆𑀯𑀸𑀯 𑀓𑀣𑁂𑀢𑀻’’𑀢𑀺 𑀲𑁄𑀢𑀩𑁆𑀩𑀁 𑀲𑀤𑁆𑀥𑀸𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀻𑀢𑀺𑀧𑀺 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀧𑀼𑀘𑁆𑀙𑀢𑀺.

𑀙𑀦𑁆𑀤𑀫𑀽𑀮𑀓𑀸𑀢𑀺 𑀢𑀡𑁆𑀳𑀸𑀙𑀦𑁆𑀤𑀫𑀽𑀮𑀓𑀸. 𑀦 𑀔𑁄 𑀪𑀺𑀓𑁆𑀔𑀼 𑀢𑀜𑁆𑀜𑁂𑀯 𑀉𑀧𑀸𑀤𑀸𑀦𑀁 𑀢𑁂 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀢𑀺 𑀬𑀲𑁆𑀫𑀸 𑀙𑀦𑁆𑀤𑀭𑀸𑀕𑀫𑀢𑁆𑀢𑀁 𑀧𑀜𑁆𑀘𑀓𑁆𑀔𑀦𑁆𑀥𑀸 𑀦 𑀳𑁄𑀢𑀺, 𑀢𑀲𑁆𑀫𑀸 𑀇𑀤𑀁 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀲𑀳𑀚𑀸𑀢𑀢𑁄 𑀯𑀸 𑀆𑀭𑀫𑁆𑀫𑀡𑀢𑁄 𑀯𑀸 𑀔𑀦𑁆𑀥𑁂 𑀫𑀼𑀜𑁆𑀘𑀺𑀢𑁆𑀯𑀸 𑀉𑀧𑀸𑀤𑀸𑀦𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀦𑀸𑀧𑀺 𑀅𑀜𑁆𑀜𑀢𑁆𑀭 𑀧𑀜𑁆𑀘𑀳𑀺 ¶ 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀳𑀺 𑀉𑀧𑀸𑀤𑀸𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀡𑁆𑀳𑀸𑀲𑀫𑁆𑀧𑀬𑀼𑀢𑁆𑀢𑀲𑁆𑀫𑀺𑀜𑁆𑀳𑀺 𑀘𑀺𑀢𑁆𑀢𑁂 𑀯𑀢𑁆𑀢𑀫𑀸𑀦𑁂 𑀢𑀁𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀞𑀧𑁂𑀢𑁆𑀯𑀸 𑀢𑀁 𑀢𑀡𑁆𑀳𑀁 𑀲𑁂𑀲𑀸 𑀅𑀭𑀽𑀧𑀥𑀫𑁆𑀫𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸𑀢𑀺 𑀲𑀳𑀚𑀸𑀢𑀢𑁄𑀧𑀺 𑀔𑀦𑁆𑀥𑁂 𑀫𑀼𑀜𑁆𑀘𑀺𑀢𑁆𑀯𑀸 𑀉𑀧𑀸𑀤𑀸𑀦𑀁 𑀦𑀢𑁆𑀣𑀺. 𑀉𑀧𑀸𑀤𑀸𑀦𑀲𑁆𑀲 𑀧𑀦 𑀭𑀽𑀧𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀢𑁄 𑀆𑀭𑀫𑁆𑀫𑀡𑀢𑁄𑀧𑀺 𑀧𑀜𑁆𑀘𑀓𑁆𑀔𑀦𑁆𑀥𑁂 𑀫𑀼𑀜𑁆𑀘𑀺𑀢𑁆𑀯𑀸 𑀉𑀧𑀸𑀤𑀸𑀦𑀁 𑀦𑀢𑁆𑀣𑀺. 𑀙𑀦𑁆𑀤𑀭𑀸𑀕𑀯𑁂𑀫𑀢𑁆𑀢𑀢𑀸𑀢𑀺 𑀙𑀦𑁆𑀤𑀭𑀸𑀕𑀦𑀸𑀦𑀢𑁆𑀢𑀁. 𑀏𑀯𑀁 𑀔𑁄 𑀪𑀺𑀓𑁆𑀔𑀽𑀢𑀺 𑀏𑀯𑀁 𑀭𑀽𑀧𑀸𑀭𑀫𑁆𑀫𑀡𑀲𑁆𑀲 𑀙𑀦𑁆𑀤𑀭𑀸𑀕𑀲𑁆𑀲 ¶ 𑀯𑁂𑀤𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀆𑀭𑀫𑁆𑀫𑀡𑀁 𑀅𑀓𑀭𑀡𑀢𑁄 𑀲𑀺𑀬𑀸 𑀙𑀦𑁆𑀤𑀭𑀸𑀕𑀯𑁂𑀫𑀢𑁆𑀢𑀢𑀸. 𑀔𑀦𑁆𑀥𑀸𑀥𑀺𑀯𑀘𑀦𑀦𑁆𑀢𑀺 ¶ 𑀔𑀦𑁆𑀥𑀸𑀢𑀺 𑀅𑀬𑀁 𑀧𑀜𑁆𑀜𑀢𑁆𑀢𑀺. 𑀅𑀬𑀁 𑀧𑀦 𑀅𑀦𑀼𑀲𑀦𑁆𑀥𑀺 𑀦 𑀖𑀝𑀺𑀬𑀢𑀺, 𑀓𑀺𑀜𑁆𑀘𑀸𑀧𑀺 𑀦 𑀖𑀝𑀺𑀬𑀢𑀺, 𑀲𑀸𑀦𑀼𑀲𑀦𑁆𑀥𑀺𑀓𑀸𑀯 𑀧𑀼𑀘𑁆𑀙𑀸, 𑀲𑀸𑀦𑀼𑀲𑀦𑁆𑀥𑀺𑀓𑀁 𑀯𑀺𑀲𑁆𑀲𑀚𑁆𑀚𑀦𑀁. 𑀅𑀬𑀜𑁆𑀳𑀺 𑀣𑁂𑀭𑁄 𑀢𑁂𑀲𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀚𑁆𑀛𑀸𑀲𑀬𑁂𑀦 𑀧𑀼𑀘𑁆𑀙𑀢𑀺, 𑀲𑀢𑁆𑀣𑀸𑀧𑀺 𑀢𑁂𑀲𑀁 𑀢𑁂𑀲𑀁 𑀅𑀚𑁆𑀛𑀸𑀲𑀬𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀤𑀲𑀫𑀁.

𑀇𑀫𑀲𑁆𑀲 𑀘 𑀧𑀦 𑀯𑀕𑁆𑀕𑀲𑁆𑀲 𑀏𑀓𑁂𑀓𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀜𑁆𑀘𑀲𑀢𑀸 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸𑀢𑀺.

𑀔𑀚𑁆𑀚𑀦𑀻𑀬𑀯𑀕𑁆𑀕𑁄 𑀅𑀝𑁆𑀞𑀫𑁄.

𑁯. 𑀣𑁂𑀭𑀯𑀕𑁆𑀕𑁄

𑁧. 𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁩. 𑀣𑁂𑀭𑀯𑀕𑁆𑀕𑀲𑁆𑀲 𑀧𑀞𑀫𑁂 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄𑀢𑀺, 𑀫𑀦𑁆𑀢𑀸𑀡𑀺𑀬𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀼𑀢𑁆𑀢𑁄. 𑀉𑀧𑀸𑀤𑀸𑀬𑀸𑀢𑀺 𑀆𑀕𑀫𑁆𑀫 𑀆𑀭𑀩𑁆𑀪 𑀲𑀦𑁆𑀥𑀸𑀬 𑀧𑀝𑀺𑀘𑁆𑀘. 𑀅𑀲𑁆𑀫𑀻𑀢𑀺 𑀳𑁄𑀢𑀻𑀢𑀺 𑀅𑀲𑁆𑀫𑀻𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀧𑀧𑀜𑁆𑀘𑀢𑁆𑀢𑀬𑀁 𑀳𑁄𑀢𑀺. 𑀤𑀳𑀭𑁄𑀢𑀺 𑀢𑀭𑀼𑀡𑁄. 𑀬𑀼𑀯𑀸𑀢𑀺 𑀬𑁄𑀩𑁆𑀩𑀦𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀫𑀡𑁆𑀟𑀦𑀓𑀚𑀸𑀢𑀺𑀓𑁄𑀢𑀺 𑀫𑀡𑁆𑀟𑀦𑀓𑀲𑀪𑀸𑀯𑁄 𑀫𑀡𑁆𑀟𑀦𑀓𑀲𑀻𑀮𑁄. 𑀫𑀼𑀔𑀦𑀺𑀫𑀺𑀢𑁆𑀢𑀦𑁆𑀢𑀺 𑀫𑀼𑀔𑀧𑀝𑀺𑀩𑀺𑀫𑁆𑀩𑀁. 𑀢𑀜𑁆𑀳𑀺 𑀧𑀭𑀺𑀲𑀼𑀤𑁆𑀥𑀁 𑀆𑀤𑀸𑀲𑀫𑀡𑁆𑀟𑀮𑀁 𑀧𑀝𑀺𑀘𑁆𑀘 𑀧𑀜𑁆𑀜𑀸𑀬𑀢𑀺. 𑀓𑀺𑀁 𑀧𑀦 𑀢𑀁 𑀑𑀮𑁄𑀓𑀬𑀢𑁄 𑀲𑀓𑀫𑀼𑀔𑀁 𑀧𑀜𑁆𑀜𑀸𑀬𑀢𑀺, 𑀧𑀭𑀫𑀼𑀔𑀦𑁆𑀢𑀺? 𑀬𑀤𑀺 𑀲𑀓𑀁 𑀪𑀯𑁂𑀬𑁆𑀬, 𑀧𑀭𑀫𑁆𑀫𑀼𑀔𑀁 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑁂𑀬𑁆𑀬, 𑀅𑀣 𑀧𑀭𑀲𑁆𑀲 𑀪𑀯𑁂𑀬𑁆𑀬, 𑀯𑀡𑁆𑀡𑀸𑀤𑀻𑀳𑀺 𑀅𑀲𑀤𑀺𑀲𑀁 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑁂𑀬𑁆𑀬. 𑀢𑀲𑁆𑀫𑀸 𑀦 𑀢𑀁 𑀅𑀢𑁆𑀢𑀦𑁄, 𑀦 𑀧𑀭𑀲𑁆𑀲, 𑀆𑀤𑀸𑀲𑀁 𑀧𑀦 𑀦𑀺𑀲𑁆𑀲𑀸𑀬 𑀦𑀺𑀪𑀸𑀲𑀭𑀽𑀧𑀁 𑀦𑀸𑀫 𑀢𑀁 𑀧𑀜𑁆𑀜𑀸𑀬𑀢𑀻𑀢𑀺 𑀯𑀤𑀦𑁆𑀢𑀺. 𑀅𑀣 𑀬𑀁 𑀉𑀤𑀓𑁂 𑀧𑀜𑁆𑀜𑀸𑀬𑀢𑀺, 𑀢𑀁 𑀓𑁂𑀦 𑀓𑀸𑀭𑀡𑁂𑀦𑀸𑀢𑀺 ¶ ? 𑀫𑀳𑀸𑀪𑀽𑀢𑀸𑀦𑀁 𑀯𑀺𑀲𑀼𑀤𑁆𑀥𑀢𑀸𑀬. 𑀥𑀫𑁆𑀫𑁄 𑀫𑁂 𑀅𑀪𑀺𑀲𑀫𑀺𑀢𑁄𑀢𑀺 𑀫𑀬𑀸 𑀜𑀸𑀡𑁂𑀦 𑀘𑀢𑀼𑀲𑀘𑁆𑀘𑀥𑀫𑁆𑀫𑁄 𑀅𑀪𑀺𑀲𑀫𑀸𑀕𑀢𑁄, 𑀲𑁄𑀢𑀸𑀧𑀦𑁆𑀦𑁄𑀲𑁆𑀫𑀺 𑀚𑀸𑀢𑁄𑀢𑀺 𑀓𑀣𑁂𑀲𑀺. 𑀧𑀞𑀫𑀁.

𑁨. 𑀢𑀺𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁪. 𑀤𑀼𑀢𑀺𑀬𑁂 ¶ ¶ 𑀫𑀥𑀼𑀭𑀓𑀚𑀸𑀢𑁄 𑀯𑀺𑀬𑀸𑀢𑀺 𑀲𑀜𑁆𑀚𑀸𑀢𑀕𑀭𑀼𑀪𑀸𑀯𑁄 𑀯𑀺𑀬 𑀅𑀓𑀫𑁆𑀫𑀜𑁆𑀜𑁄. 𑀤𑀺𑀲𑀸𑀧𑀺 𑀫𑁂𑀢𑀺 𑀅𑀬𑀁 𑀧𑀼𑀭𑀢𑁆𑀣𑀺𑀫𑀸 𑀅𑀬𑀁 𑀤𑀓𑁆𑀔𑀺𑀡𑀸𑀢𑀺 𑀏𑀯𑀁 𑀤𑀺𑀲𑀸𑀧𑀺 𑀫𑀬𑁆𑀳𑀁 𑀦 𑀧𑀓𑁆𑀔𑀸𑀬𑀦𑁆𑀢𑀺, 𑀦 𑀧𑀸𑀓𑀝𑀸 𑀳𑁄𑀦𑁆𑀢𑀻𑀢𑀺 𑀯𑀤𑀢𑀺. 𑀥𑀫𑁆𑀫𑀸𑀧𑀺 𑀫𑀁 𑀦 𑀧𑀝𑀺𑀪𑀦𑁆𑀢𑀻𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸𑀧𑀺 𑀫𑀬𑁆𑀳𑀁 𑀦 𑀉𑀧𑀝𑁆𑀞𑀳𑀦𑁆𑀢𑀺, 𑀉𑀕𑁆𑀕𑀳𑀺𑀢𑀁 𑀲𑀚𑁆𑀛𑀸𑀬𑀺𑀢𑀁 𑀦 𑀤𑀺𑀲𑁆𑀲𑀢𑀻𑀢𑀺 𑀯𑀤𑀢𑀺. 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀦𑁄 𑀫𑀳𑀸𑀯𑀺𑀘𑀺𑀓𑀺𑀘𑁆𑀙𑀸. 𑀦 𑀳𑀺 𑀢𑀲𑁆𑀲 ‘‘𑀲𑀸𑀲𑀦𑀁 𑀦𑀺𑀬𑁆𑀬𑀸𑀦𑀺𑀓𑀁 𑀦𑀼 𑀔𑁄, 𑀦 𑀦𑀼 𑀔𑁄’’𑀢𑀺 𑀯𑀺𑀫𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀧𑀦𑀲𑁆𑀲 𑀳𑁄𑀢𑀺 ‘‘𑀲𑀓𑁆𑀔𑀺𑀲𑁆𑀲𑀸𑀫𑀺 𑀦𑀼 𑀔𑁄 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁, 𑀉𑀤𑀸𑀳𑀼 𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑀫𑀢𑁆𑀢𑀫𑁂𑀯 𑀓𑀭𑀺𑀲𑁆𑀲𑀸𑀫𑀻’’𑀢𑀺.

𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀬𑀣𑀸 𑀳𑀺 𑀦𑀺𑀦𑁆𑀦𑀁 𑀧𑀮𑁆𑀮𑀮𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀤𑀲𑁆𑀲𑀦𑀭𑀸𑀫𑀡𑁂𑀬𑁆𑀬𑀓𑀫𑀢𑁆𑀢𑀁 𑀅𑀢𑁆𑀣𑀺, 𑀬𑁄 𑀧𑀦𑁂𑀢𑁆𑀣 𑀑𑀢𑀭𑀢𑀺, 𑀢𑀁 𑀘𑀡𑁆𑀟𑀫𑀻𑀦𑀸𑀓𑀼𑀮𑀢𑀸𑀬 𑀆𑀓𑀟𑁆𑀠𑀺𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀢𑀺, 𑀏𑀯𑀫𑁂𑀯𑀁 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀦𑀁 𑀆𑀭𑀫𑁆𑀫𑀡𑁂 𑀭𑀸𑀫𑀡𑁂𑀬𑁆𑀬𑀓𑀫𑀢𑁆𑀢𑀁 𑀅𑀢𑁆𑀣𑀺, 𑀬𑁄 𑀧𑀦𑁂𑀢𑁆𑀣 𑀕𑁂𑀥𑀁 𑀆𑀧𑀚𑁆𑀚𑀢𑀺, 𑀢𑀁 𑀆𑀓𑀟𑁆𑀠𑀺𑀢𑁆𑀯𑀸 𑀦𑀺𑀭𑀬𑀸𑀤𑀻𑀲𑀼 𑀏𑀯 𑀧𑀓𑁆𑀔𑀺𑀧𑀦𑁆𑀢𑀺. 𑀅𑀧𑁆𑀧𑀲𑁆𑀲𑀸𑀤𑀸 𑀳𑀺 𑀓𑀸𑀫𑀸 𑀩𑀳𑀼𑀤𑀼𑀓𑁆𑀔𑀸 𑀩𑀳𑀼𑀧𑀸𑀬𑀸𑀲𑀸, 𑀆𑀤𑀻𑀦𑀯𑁄 𑀏𑀢𑁆𑀣 𑀪𑀺𑀬𑁆𑀬𑁄𑀢𑀺 𑀇𑀫𑀁 𑀅𑀢𑁆𑀣𑀯𑀲𑀁 𑀧𑀝𑀺𑀘𑁆𑀘 ‘‘𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀳𑀫𑀦𑀼𑀕𑁆𑀕𑀳𑁂𑀦𑀸𑀢𑀺 𑀅𑀳𑀁 𑀥𑀫𑁆𑀫𑀸𑀫𑀺𑀲𑀸𑀦𑀼𑀕𑁆𑀕𑀳𑁂𑀳𑀺 ¶ 𑀅𑀦𑀼𑀕𑁆𑀕𑀡𑁆𑀳𑀸𑀫𑀺. 𑀅𑀪𑀺𑀦𑀦𑁆𑀤𑀻𑀢𑀺 𑀲𑀫𑁆𑀧𑀝𑀺𑀘𑁆𑀙𑀺. 𑀦 𑀓𑁂𑀯𑀮𑀜𑁆𑀘 𑀅𑀪𑀺𑀦𑀦𑁆𑀤𑀺, 𑀇𑀫𑀁 𑀧𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸 𑀅𑀲𑁆𑀲𑀸𑀲𑀁 𑀮𑀪𑀺𑀢𑁆𑀯𑀸 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀓𑀢𑀺𑀧𑀸𑀳𑁂𑀦 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺. 𑀤𑀼𑀢𑀺𑀬𑀁.

𑁩. 𑀬𑀫𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁫. 𑀢𑀢𑀺𑀬𑁂 𑀤𑀺𑀝𑁆𑀞𑀺𑀕𑀢𑀦𑁆𑀢𑀺 𑀲𑀘𑁂 𑀳𑀺𑀲𑁆𑀲 𑀏𑀯𑀁 𑀪𑀯𑁂𑀬𑁆𑀬 ‘‘𑀲𑀗𑁆𑀔𑀸𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑁂𑀯 𑀦𑀺𑀭𑀼𑀚𑁆𑀛𑀦𑁆𑀢𑀺 𑀘, 𑀲𑀗𑁆𑀔𑀸𑀭𑀧𑁆𑀧𑀯𑀢𑁆𑀢𑀫𑁂𑀯 𑀅𑀧𑁆𑀧𑀯𑀢𑁆𑀢𑀁 𑀳𑁄𑀢𑀻’’𑀢𑀺, 𑀤𑀺𑀝𑁆𑀞𑀺𑀕𑀢𑀁 𑀦𑀸𑀫 𑀦 𑀪𑀯𑁂𑀬𑁆𑀬, 𑀲𑀸𑀲𑀦𑀸𑀯𑀘𑀭𑀺𑀓𑀁 𑀜𑀸𑀡𑀁 𑀪𑀯𑁂𑀬𑁆𑀬. 𑀬𑀲𑁆𑀫𑀸 𑀧𑀦𑀲𑁆𑀲 ‘‘𑀲𑀢𑁆𑀢𑁄 𑀉𑀘𑁆𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀻’’𑀢𑀺 𑀅𑀳𑁄𑀲𑀺, 𑀢𑀲𑁆𑀫𑀸 𑀤𑀺𑀝𑁆𑀞𑀺𑀕𑀢𑀁 𑀦𑀸𑀫 𑀚𑀸𑀢𑀁. 𑀣𑀸𑀫𑀲𑀸 𑀧𑀭𑀸𑀫𑀸𑀲𑀸𑀢𑀺 𑀤𑀺𑀝𑁆𑀞𑀺𑀣𑀸𑀫𑁂𑀦 𑀘𑁂𑀯 𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑁂𑀦 𑀘.

𑀬𑁂𑀦𑀸𑀬𑀲𑁆𑀫𑀸 ¶ 𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀬𑀣𑀸 𑀦𑀸𑀫 𑀧𑀘𑁆𑀘𑀦𑁆𑀢𑁂 𑀓𑀼𑀧𑀺𑀢𑁂 𑀢𑀁 𑀯𑀽𑀧𑀲𑀫𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀭𑀸𑀚𑀧𑀼𑀭𑀺𑀲𑀸 𑀲𑁂𑀦𑀸𑀧𑀢𑀺𑀲𑁆𑀲 𑀯𑀸 𑀭𑀜𑁆𑀜𑁄 𑀯𑀸 𑀲𑀦𑁆𑀢𑀺𑀓𑀁 𑀕𑀘𑁆𑀙𑀦𑁆𑀢𑀺, 𑀏𑀯𑀁 𑀤𑀺𑀝𑁆𑀞𑀺𑀕𑀢𑀯𑀲𑁂𑀦 𑀢𑀲𑁆𑀫𑀺𑀁 𑀣𑁂𑀭𑁂 𑀓𑀼𑀧𑀺𑀢𑁂 𑀢𑀁 𑀯𑀽𑀧𑀲𑀫𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀢𑁂 𑀪𑀺𑀓𑁆𑀔𑀽 𑀬𑁂𑀦 𑀥𑀫𑁆𑀫𑀭𑀸𑀚𑀲𑁆𑀲 𑀥𑀫𑁆𑀫𑀲𑁂𑀦𑀸𑀧𑀢𑀺 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 ¶ , 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀏𑀯𑀁𑀩𑁆𑀬𑀸𑀔𑁄𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀯𑀺𑀬 𑀣𑁂𑀭𑀲𑁆𑀲 𑀲𑀫𑁆𑀫𑀼𑀔𑀸 𑀧𑀕𑁆𑀕𑀬𑁆𑀳 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀑𑀮𑀫𑁆𑀩𑀦𑁆𑀢𑁂𑀦 𑀳𑀤𑀬𑁂𑀦 ‘‘𑀏𑀯𑀁𑀩𑁆𑀬𑀸𑀔𑁄’’𑀢𑀺 𑀆𑀳. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀯𑀼𑀲𑁄𑀢𑀺? 𑀇𑀤𑀁 𑀣𑁂𑀭𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸, ‘‘𑀦𑀸𑀬𑀁 𑀅𑀢𑁆𑀢𑀦𑁄 𑀮𑀤𑁆𑀥𑀺𑀬𑀁 𑀤𑁄𑀲𑀁 𑀧𑀲𑁆𑀲𑀢𑀺, 𑀥𑀫𑁆𑀫𑀤𑁂𑀲𑀦𑀸𑀬 𑀅𑀲𑁆𑀲 𑀢𑀁 𑀧𑀸𑀓𑀝𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀺𑀧𑀭𑀺𑀯𑀝𑁆𑀝𑀁 𑀤𑁂𑀲𑀦𑀁 𑀤𑁂𑀲𑁂𑀢𑀼𑀁 𑀆𑀭𑀪𑀺.

𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀯𑀼𑀲𑁄 𑀬𑀫𑀓, 𑀭𑀽𑀧𑀁 𑀢𑀣𑀸𑀕𑀢𑁄𑀢𑀺 𑀇𑀤𑀁 𑀓𑀲𑁆𑀫𑀸 𑀆𑀭𑀤𑁆𑀥𑀁? 𑀅𑀦𑀼𑀬𑁄𑀕𑀯𑀢𑁆𑀢𑀁 𑀤𑀸𑀧𑀦𑀢𑁆𑀣𑀁. 𑀢𑀺𑀧𑀭𑀺𑀯𑀝𑁆𑀝𑀤𑁂𑀲𑀦𑀸𑀯𑀲𑀸𑀦𑀲𑁆𑀫𑀺𑀜𑁆𑀳𑀺 𑀣𑁂𑀭𑁄 𑀲𑁄𑀢𑀸𑀧𑀦𑁆𑀦𑁄 𑀚𑀸𑀢𑁄. 𑀅𑀣 𑀦𑀁 𑀅𑀦𑀼𑀬𑁄𑀕𑀯𑀢𑁆𑀢𑀁 𑀤𑀸𑀧𑁂𑀢𑀼𑀁 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀻’’𑀢𑀺𑀆𑀤𑀺𑀫𑀸𑀳? 𑀢𑀣𑀸𑀕𑀢𑁄𑀢𑀺 ¶ 𑀲𑀢𑁆𑀢𑁄. 𑀭𑀽𑀧𑀁 𑀯𑁂𑀤𑀦𑀸 𑀲𑀜𑁆𑀜𑀸 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀇𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑁂 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 ‘‘𑀢𑀣𑀸𑀕𑀢𑁄’’𑀢𑀺 𑀲𑀫𑀦𑀼𑀧𑀲𑁆𑀲𑀲𑀻𑀢𑀺 𑀧𑀼𑀘𑁆𑀙𑀢𑀺. 𑀏𑀢𑁆𑀣 𑀘 𑀢𑁂, 𑀆𑀯𑀼𑀲𑁄𑀢𑀺 𑀇𑀤𑀁 𑀣𑁂𑀭𑀲𑁆𑀲 𑀅𑀦𑀼𑀬𑁄𑀕𑁂 𑀪𑀼𑀫𑁆𑀫𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀏𑀢𑁆𑀣 𑀘 𑀢𑁂 𑀏𑀢𑁆𑀢𑀓𑁂 𑀞𑀸𑀦𑁂 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀘𑁆𑀘𑀢𑁄 𑀣𑀺𑀭𑀢𑁄 𑀲𑀢𑁆𑀢𑁂 𑀅𑀦𑀼𑀧𑀮𑀩𑁆𑀪𑀺𑀬𑀫𑀸𑀦𑁂𑀢𑀺. 𑀲𑀘𑁂 𑀢𑀁, 𑀆𑀯𑀼𑀲𑁄𑀢𑀺 𑀇𑀤𑀫𑁂𑀢𑀁 𑀅𑀜𑁆𑀜𑀁 𑀩𑁆𑀬𑀸𑀓𑀭𑀸𑀧𑁂𑀢𑀼𑀓𑀸𑀫𑁄 𑀧𑀼𑀘𑁆𑀙𑀢𑀺. 𑀬𑀁 𑀤𑀼𑀓𑁆𑀔𑀁 𑀢𑀁 𑀦𑀺𑀭𑀼𑀤𑁆𑀥𑀦𑁆𑀢𑀺 𑀬𑀁 𑀤𑀼𑀓𑁆𑀔𑀁, 𑀢𑀤𑁂𑀯 𑀦𑀺𑀭𑀼𑀤𑁆𑀥𑀁, 𑀅𑀜𑁆𑀜𑁄 𑀲𑀢𑁆𑀢𑁄 𑀦𑀺𑀭𑀼𑀚𑁆𑀛𑀦𑀓𑁄 𑀦𑀸𑀫 𑀦𑀢𑁆𑀣𑀺, 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄.

𑀏𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲𑀸𑀢𑀺 𑀏𑀢𑀲𑁆𑀲 𑀧𑀞𑀫𑀫𑀕𑁆𑀕𑀲𑁆𑀲. 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀜𑀸𑀡𑀸𑀬𑀸𑀢𑀺 𑀅𑀢𑀺𑀭𑁂𑀓𑀧𑁆𑀧𑀫𑀸𑀡𑀲𑁆𑀲 𑀜𑀸𑀡𑀲𑁆𑀲 𑀅𑀢𑁆𑀣𑀸𑀬, 𑀲𑀳𑀯𑀺𑀧𑀲𑁆𑀲𑀦𑀓𑀸𑀦𑀁 𑀉𑀧𑀭𑀺 𑀘 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀆𑀯𑀺𑀪𑀸𑀯𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀆𑀭𑀓𑁆𑀔𑀲𑀫𑁆𑀧𑀦𑁆𑀦𑁄𑀢𑀺 𑀅𑀦𑁆𑀢𑁄𑀆𑀭𑀓𑁆𑀔𑁂𑀦 𑀘𑁂𑀯 𑀩𑀳𑀺𑀆𑀭𑀓𑁆𑀔𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄. 𑀅𑀬𑁄𑀕𑀓𑁆𑀔𑁂𑀫𑀓𑀸𑀫𑁄𑀢𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀔𑁂𑀫𑀪𑀸𑀯𑀁 𑀅𑀦𑀺𑀘𑁆𑀙𑀦𑁆𑀢𑁄. 𑀧𑀲𑀬𑁆𑀳𑀸𑀢𑀺 𑀧𑀲𑀬𑁆𑀳𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸. 𑀅𑀦𑀼𑀧𑀔𑀚𑁆𑀚𑀸𑀢𑀺 𑀅𑀦𑀼𑀧𑀯𑀺𑀲𑀺𑀢𑁆𑀯𑀸.

𑀧𑀼𑀩𑁆𑀩𑀼𑀝𑁆𑀞𑀸𑀬𑀻𑀢𑀺𑀆𑀤𑀻𑀲𑀼 𑀤𑀽𑀭𑀢𑁄𑀯 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑀆𑀲𑀦𑀢𑁄 𑀧𑀞𑀫𑀢𑀭𑀁 𑀯𑀼𑀝𑁆𑀞𑀸𑀢𑀻𑀢𑀺 𑀧𑀼𑀩𑁆𑀩𑀼𑀝𑁆𑀞𑀸𑀬𑀻. 𑀢𑀲𑁆𑀲 𑀆𑀲𑀦𑀁 𑀤𑀢𑁆𑀯𑀸 𑀢𑀲𑁆𑀫𑀺𑀁 𑀦𑀺𑀲𑀺𑀦𑁆𑀦𑁂 𑀧𑀘𑁆𑀙𑀸 𑀦𑀺𑀧𑀢𑀢𑀺 𑀦𑀺𑀲𑀻𑀤𑀢𑀻𑀢𑀺, 𑀧𑀘𑁆𑀙𑀸𑀦𑀺𑀧𑀸𑀢𑀻. 𑀧𑀸𑀢𑁄𑀯 𑀯𑀼𑀝𑁆𑀞𑀸𑀬 ‘‘𑀏𑀢𑁆𑀢𑀓𑀸 𑀓𑀲𑀺𑀢𑀼𑀁 𑀕𑀘𑁆𑀙𑀣, 𑀏𑀢𑁆𑀢𑀓𑀸 𑀯𑀧𑀺𑀢𑀼’’𑀦𑁆𑀢𑀺 𑀯𑀸 𑀲𑀩𑁆𑀩𑀧𑀞𑀫𑀁 𑀯𑀼𑀝𑁆𑀞𑀸𑀢𑀻𑀢𑀺 𑀧𑀼𑀩𑁆𑀩𑀼𑀝𑁆𑀞𑀸𑀬𑀻. 𑀲𑀸𑀬𑀁 𑀲𑀩𑁆𑀩𑁂𑀲𑀼 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀢𑁂𑀲𑀼 𑀕𑁂𑀳𑀲𑁆𑀲 𑀲𑀫𑀦𑁆𑀢𑀢𑁄 𑀆𑀭𑀓𑁆𑀔𑀁 𑀲𑀁𑀯𑀺𑀥𑀸𑀬 𑀤𑁆𑀯𑀸𑀭𑀸𑀦𑀺 𑀣𑀓𑁂𑀢𑁆𑀯𑀸 𑀲𑀩𑁆𑀩𑀧𑀘𑁆𑀙𑀸 𑀦𑀺𑀧𑀚𑁆𑀚𑀦𑀢𑁄𑀧𑀺 𑀧𑀘𑁆𑀙𑀸𑀦𑀺𑀧𑀸𑀢𑀻. ‘‘𑀓𑀺𑀁 𑀓𑀭𑁄𑀫𑀺 ¶ , 𑀅𑀬𑁆𑀬𑀧𑀼𑀢𑁆𑀢 ¶ ? 𑀓𑀺𑀁 𑀓𑀭𑁄𑀫𑀺 𑀅𑀬𑁆𑀬𑀧𑀼𑀢𑁆𑀢𑀸’’𑀢𑀺? 𑀫𑀼𑀔𑀁 𑀑𑀮𑁄𑀓𑁂𑀦𑁆𑀢𑁄 𑀓𑀺𑀁𑀓𑀸𑀭𑀁 𑀧𑀝𑀺𑀲𑀸𑀯𑁂𑀢𑀻𑀢𑀺 𑀓𑀺𑀁𑀓𑀸𑀭𑀧𑀝𑀺𑀲𑁆𑀲𑀸𑀯𑀻. 𑀫𑀦𑀸𑀧𑀁 𑀘𑀭𑀢𑀻𑀢𑀺 𑀫𑀦𑀸𑀧𑀘𑀸𑀭𑀻. 𑀧𑀺𑀬𑀁 𑀯𑀤𑀢𑀻𑀢𑀺 𑀧𑀺𑀬𑀯𑀸𑀤𑀻. 𑀫𑀺𑀢𑁆𑀢𑀢𑁄𑀧𑀺 𑀦𑀁 𑀲𑀤𑁆𑀤𑀳𑁂𑀬𑁆𑀬𑀸𑀢𑀺 𑀫𑀺𑀢𑁆𑀢𑁄 𑀫𑁂 𑀅𑀬𑀦𑁆𑀢𑀺 𑀲𑀤𑁆𑀤𑀳𑁂𑀬𑁆𑀬. 𑀯𑀺𑀲𑁆𑀲𑀸𑀲𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀏𑀓𑀢𑁄 𑀧𑀸𑀦𑀪𑁄𑀚𑀦𑀸𑀤𑀺𑀁 𑀓𑀭𑁄𑀦𑁆𑀢𑁄 𑀯𑀺𑀲𑁆𑀲𑀸𑀲𑀺𑀓𑁄 𑀪𑀯𑁂𑀬𑁆𑀬. 𑀲𑀁𑀯𑀺𑀲𑁆𑀲𑀢𑁆𑀣𑁄𑀢𑀺 𑀲𑀼𑀝𑁆𑀞𑀼 𑀯𑀺𑀲𑁆𑀲𑀢𑁆𑀣𑁄.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀩𑀸𑀮𑀕𑀳𑀧𑀢𑀺𑀧𑀼𑀢𑁆𑀢𑁄 𑀯𑀺𑀬 𑀳𑀺 𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑀓𑀸𑀮𑁂 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄 ¶ , 𑀯𑀥𑀓𑀧𑀘𑁆𑀘𑀸𑀫𑀺𑀢𑁆𑀢𑁄 𑀯𑀺𑀬 𑀅𑀩𑀮𑀤𑀼𑀩𑁆𑀩𑀮𑀸 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀯𑀥𑀓𑀧𑀘𑁆𑀘𑀸𑀫𑀺𑀢𑁆𑀢𑀲𑁆𑀲 ‘‘𑀩𑀸𑀮𑀕𑀳𑀧𑀢𑀺𑀧𑀼𑀢𑁆𑀢𑀁 𑀉𑀧𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀕𑀢𑀓𑀸𑀮𑁄 𑀯𑀺𑀬 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀉𑀧𑀕𑀢𑀸 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀢𑀲𑁆𑀲 𑀳𑀺 ‘‘𑀦 𑀫𑁂 𑀅𑀬𑀁 𑀲𑀳𑀸𑀬𑁄, 𑀯𑀥𑀓𑀧𑀘𑁆𑀘𑀢𑁆𑀣𑀺𑀓𑁄 𑀅𑀬’’𑀦𑁆𑀢𑀺 𑀅𑀚𑀸𑀦𑀦𑀓𑀸𑀮𑁄 𑀯𑀺𑀬 𑀯𑀝𑁆𑀝𑀦𑀺𑀲𑁆𑀲𑀺𑀢𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀜𑁆𑀘𑀓𑁆𑀔𑀦𑁆𑀥𑁂 ‘‘𑀦 𑀇𑀫𑁂 𑀫𑀬𑁆𑀳’’𑀦𑁆𑀢𑀺 𑀅𑀕𑀳𑁂𑀢𑁆𑀯𑀸 ‘‘𑀫𑀫 𑀭𑀽𑀧𑀁, 𑀫𑀫 𑀯𑁂𑀤𑀦𑀸, 𑀫𑀫 𑀲𑀜𑁆𑀜𑀸, 𑀫𑀫 𑀲𑀗𑁆𑀔𑀸𑀭𑀸, 𑀫𑀫 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀕𑀳𑀺𑀢𑀓𑀸𑀮𑁄, 𑀯𑀥𑀓𑀧𑀘𑁆𑀘𑀢𑁆𑀣𑀺𑀓𑀲𑁆𑀲 ‘‘𑀫𑀺𑀢𑁆𑀢𑁄 𑀫𑁂 𑀅𑀬’’𑀦𑁆𑀢𑀺 𑀕𑀳𑁂𑀢𑁆𑀯𑀸 𑀲𑀓𑁆𑀓𑀸𑀭𑀓𑀭𑀡𑀓𑀸𑀮𑁄 𑀯𑀺𑀬 ‘‘𑀫𑀫 𑀇𑀫𑁂’’𑀢𑀺 𑀕𑀳𑁂𑀢𑁆𑀯𑀸 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑁆𑀳𑀸𑀧𑀦𑀪𑁄𑀚𑀦𑀸𑀤𑀻𑀳𑀺 𑀲𑀓𑁆𑀓𑀸𑀭𑀓𑀭𑀡𑀓𑀸𑀮𑁄, ‘‘𑀅𑀢𑀺𑀯𑀺𑀲𑁆𑀲𑀢𑁆𑀣𑁄 𑀫𑁂 𑀅𑀬’’𑀦𑁆𑀢𑀺 𑀜𑀢𑁆𑀯𑀸 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀲𑁆𑀲𑁂𑀯 𑀅𑀲𑀺𑀦𑀸 𑀲𑀻𑀲𑀘𑁆𑀙𑀺𑀦𑁆𑀤𑀦𑀁 𑀯𑀺𑀬 𑀯𑀺𑀲𑁆𑀲𑀢𑁆𑀣𑀲𑁆𑀲 𑀩𑀸𑀮𑀧𑀼𑀣𑀼𑀚𑁆𑀚𑀦𑀲𑁆𑀲 𑀢𑀺𑀔𑀺𑀡𑁂𑀳𑀺 𑀪𑀺𑀚𑁆𑀚𑀫𑀸𑀦𑁂𑀳𑀺 𑀔𑀦𑁆𑀥𑁂𑀳𑀺 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀉𑀧𑁂𑀢𑀻𑀢𑀺 𑀉𑀧𑀕𑀘𑁆𑀙𑀢𑀺. 𑀉𑀧𑀸𑀤𑀺𑀬𑀢𑀻𑀢𑀺 𑀕𑀡𑁆𑀳𑀸𑀢𑀺. 𑀅𑀥𑀺𑀝𑁆𑀞𑀸𑀢𑀻𑀢𑀺 𑀅𑀥𑀺𑀢𑀺𑀝𑁆𑀞𑀢𑀺. 𑀅𑀢𑁆𑀢𑀸 𑀫𑁂𑀢𑀺 𑀅𑀬𑀁 𑀫𑁂 𑀅𑀢𑁆𑀢𑀸𑀢𑀺. 𑀲𑀼𑀢𑀯𑀸 𑀘 𑀔𑁄, 𑀆𑀯𑀼𑀲𑁄, 𑀅𑀭𑀺𑀬𑀲𑀸𑀯𑀓𑁄𑀢𑀺 𑀬𑀣𑀸 𑀧𑀦 𑀧𑀡𑁆𑀟𑀺𑀢𑁄 𑀕𑀳𑀧𑀢𑀺𑀧𑀼𑀢𑁆𑀢𑁄 𑀏𑀯𑀁 𑀉𑀧𑀕𑀢𑀁 𑀧𑀘𑁆𑀘𑀢𑁆𑀣𑀺𑀓𑀁 ‘‘𑀧𑀘𑁆𑀘𑀢𑁆𑀣𑀺𑀓𑁄 𑀫𑁂 𑀅𑀬’’𑀦𑁆𑀢𑀺 𑀜𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑁄 𑀢𑀸𑀦𑀺 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀓𑀸𑀭𑁂𑀢𑁆𑀯𑀸 𑀅𑀦𑀢𑁆𑀣𑀁 𑀧𑀭𑀺𑀳𑀭𑀢𑀺, 𑀅𑀢𑁆𑀣𑀁 𑀧𑀸𑀧𑀼𑀡𑀸𑀢𑀺, 𑀏𑀯𑀁 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄𑀧𑀺 ‘‘𑀦 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀳𑀦𑁆𑀢𑀺 𑀯𑀸 𑀫𑀫𑀦𑁆𑀢𑀺 𑀯𑀸 𑀅𑀕𑀳𑁂𑀢𑁆𑀯𑀸, ‘‘𑀧𑀘𑁆𑀘𑀢𑁆𑀣𑀺𑀓𑀸 𑀫𑁂 𑀏𑀢𑁂’’𑀢𑀺 𑀜𑀢𑁆𑀯𑀸 𑀭𑀽𑀧𑀲𑀢𑁆𑀢𑀓𑀅𑀭𑀽𑀧𑀲𑀢𑁆𑀢𑀓𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀬 𑀬𑁄𑀚𑁂𑀢𑁆𑀯𑀸𑀯 𑀢𑀢𑁄𑀦𑀺𑀤𑀸𑀦𑀁 𑀤𑀼𑀓𑁆𑀔𑀁 𑀧𑀭𑀺𑀯𑀚𑁆𑀚𑁂𑀢𑁆𑀯𑀸 𑀅𑀕𑁆𑀕𑀨𑀮𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀢𑀢𑀺𑀬𑀁.

𑁪. 𑀅𑀦𑀼𑀭𑀸𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁬. 𑀘𑀢𑀼𑀢𑁆𑀣𑁂 𑀅𑀭𑀜𑁆𑀜𑀓𑀼𑀝𑀺𑀓𑀸𑀬𑀦𑁆𑀢𑀺 𑀢𑀲𑁆𑀲𑁂𑀯 𑀯𑀺𑀳𑀸𑀭𑀲𑁆𑀲 𑀧𑀘𑁆𑀘𑀦𑁆𑀢𑁂 𑀧𑀡𑁆𑀡𑀲𑀸𑀮𑀸𑀬𑀁. 𑀢𑀁 𑀢𑀣𑀸𑀕𑀢𑁄𑀢𑀺 𑀢𑀼𑀫𑁆𑀳𑀸𑀓𑀁 𑀲𑀢𑁆𑀣𑀸 𑀢𑀣𑀸𑀕𑀢𑁄 𑀢𑀁 𑀲𑀢𑁆𑀢𑀁 ¶ 𑀢𑀣𑀸𑀕𑀢𑀁. 𑀅𑀜𑁆𑀜𑀢𑁆𑀭 𑀇𑀫𑁂𑀳𑀻𑀢𑀺 𑀢𑀲𑁆𑀲 𑀓𑀺𑀭 𑀏𑀯𑀁 𑀅𑀳𑁄𑀲𑀺 ¶ ‘‘𑀇𑀫𑁂 𑀲𑀸𑀲𑀦𑀲𑁆𑀲 𑀧𑀝𑀺𑀧𑀓𑁆𑀔𑀸 𑀧𑀝𑀺𑀯𑀺𑀮𑁄𑀫𑀸, 𑀬𑀣𑀸 𑀇𑀫𑁂 𑀪𑀡𑀦𑁆𑀢𑀺, 𑀦 𑀏𑀯𑀁 𑀲𑀢𑁆𑀣𑀸 𑀧𑀜𑁆𑀜𑀸𑀧𑁂𑀲𑁆𑀲𑀢𑀺, 𑀅𑀜𑁆𑀜𑀣𑀸 𑀧𑀜𑁆𑀜𑀸𑀧𑁂𑀲𑁆𑀲𑀢𑀻’’𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀏𑀯𑀁 𑀯𑀼𑀢𑁆𑀢𑁂 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀢𑀺 𑀏𑀯𑀁 𑀣𑁂𑀭𑁂𑀦 𑀅𑀢𑁆𑀢𑀦𑁄 𑀘 𑀧𑀭𑁂𑀲𑀜𑁆𑀘 𑀲𑀫𑀬𑀁 𑀅𑀚𑀸𑀦𑀺𑀢𑁆𑀯𑀸 𑀯𑀼𑀢𑁆𑀢𑁂 𑀏𑀓𑀤𑁂𑀲𑁂𑀦 𑀲𑀸𑀲𑀦𑀲𑀫𑀬𑀁 𑀚𑀸𑀦𑀦𑁆𑀢𑀸 ¶ 𑀣𑁂𑀭𑀲𑁆𑀲 𑀯𑀸𑀤𑁂 𑀤𑁄𑀲𑀁 𑀤𑀸𑀢𑀼𑀓𑀸𑀫𑀸 𑀢𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀸𑀥𑀁 𑀏𑀢𑀤𑀯𑁄𑀘𑀼𑀁.

𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀅𑀦𑀼𑀭𑀸𑀥𑀸𑀢𑀺 𑀲𑀢𑁆𑀣𑀸 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀮𑀤𑁆𑀥𑀺𑀬𑀁 𑀤𑁄𑀲𑀁 𑀦 𑀚𑀸𑀦𑀸𑀢𑀺, 𑀓𑀸𑀭𑀓𑁄 𑀧𑀦𑁂𑀲 𑀬𑀼𑀢𑁆𑀢𑀬𑁄𑀕𑁄, 𑀥𑀫𑁆𑀫𑀤𑁂𑀲𑀦𑀸𑀬 𑀏𑀯 𑀦𑀁 𑀚𑀸𑀦𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀢𑀺𑀧𑀭𑀺𑀯𑀝𑁆𑀝𑀁 𑀤𑁂𑀲𑀦𑀁 𑀤𑁂𑀲𑁂𑀢𑀼𑀓𑀸𑀫𑁄 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀦𑀼𑀭𑀸𑀥𑀸’’𑀢𑀺𑀆𑀤𑀺𑀫𑀸𑀳. 𑀅𑀣𑀲𑁆𑀲 𑀢𑀸𑀬 𑀤𑁂𑀲𑀦𑀸𑀬 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀲𑁆𑀲 𑀅𑀦𑀼𑀬𑁄𑀕𑀯𑀢𑁆𑀢𑀁 𑀆𑀭𑁄𑀧𑁂𑀦𑁆𑀢𑁄 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀅𑀦𑀼𑀭𑀸𑀥? 𑀭𑀽𑀧𑀁 𑀢𑀣𑀸𑀕𑀢𑁄𑀢𑀺𑀆𑀤𑀺𑀫𑀸𑀳. 𑀤𑀼𑀓𑁆𑀔𑀜𑁆𑀘𑁂𑀯 𑀧𑀜𑁆𑀜𑀧𑁂𑀫𑀺, 𑀤𑀼𑀓𑁆𑀔𑀲𑁆𑀲 𑀘 𑀦𑀺𑀭𑁄𑀥𑀦𑁆𑀢𑀺 𑀯𑀝𑁆𑀝𑀤𑀼𑀓𑁆𑀔𑀜𑁆𑀘𑁂𑀯 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀘 𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀧𑀜𑁆𑀜𑀧𑁂𑀫𑀺. 𑀤𑀼𑀓𑁆𑀔𑀦𑁆𑀢𑀺 𑀯𑀸 𑀯𑀘𑀦𑁂𑀦 𑀤𑀼𑀓𑁆𑀔𑀲𑀘𑁆𑀘𑀁 𑀕𑀳𑀺𑀢𑀁. 𑀢𑀲𑁆𑀫𑀺𑀁 𑀕𑀳𑀺𑀢𑁂 𑀲𑀫𑀼𑀤𑀬𑀲𑀘𑁆𑀘𑀁 𑀕𑀳𑀺𑀢𑀫𑁂𑀯 𑀳𑁄𑀢𑀺, 𑀢𑀲𑁆𑀲 𑀫𑀽𑀮𑀢𑁆𑀢𑀸. 𑀦𑀺𑀭𑁄𑀥𑀦𑁆𑀢𑀺 𑀯𑀘𑀦𑁂𑀦 𑀦𑀺𑀭𑁄𑀥𑀲𑀘𑁆𑀘𑀁 𑀕𑀳𑀺𑀢𑀁. 𑀢𑀲𑁆𑀫𑀺𑀁 𑀕𑀳𑀺𑀢𑁂 𑀫𑀕𑁆𑀕𑀲𑀘𑁆𑀘𑀁 𑀕𑀳𑀺𑀢𑀫𑁂𑀯 𑀳𑁄𑀢𑀺 𑀢𑀲𑁆𑀲 𑀉𑀧𑀸𑀬𑀢𑁆𑀢𑀸. 𑀇𑀢𑀺 𑀧𑀼𑀩𑁆𑀩𑁂 𑀘𑀸𑀳𑀁, 𑀅𑀦𑀼𑀭𑀸𑀥, 𑀏𑀢𑀭𑀳𑀺 𑀘 𑀘𑀢𑀼𑀲𑀘𑁆𑀘𑀫𑁂𑀯 𑀧𑀜𑁆𑀜𑀧𑁂𑀫𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀁 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀯𑀺𑀯𑀝𑁆𑀝𑀫𑁂𑀯 𑀓𑀣𑀺𑀢𑀁. 𑀘𑀢𑀼𑀢𑁆𑀣𑀁.

𑁫. 𑀯𑀓𑁆𑀓𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁭. 𑀧𑀜𑁆𑀘𑀫𑁂 𑀓𑀼𑀫𑁆𑀪𑀓𑀸𑀭𑀦𑀺𑀯𑁂𑀲𑀦𑁂𑀢𑀺 𑀓𑀼𑀫𑁆𑀪𑀓𑀸𑀭𑀲𑀸𑀮𑀸𑀬𑀁. 𑀣𑁂𑀭𑁄 𑀓𑀺𑀭 𑀯𑀼𑀢𑁆𑀣𑀯𑀲𑁆𑀲𑁄 𑀧𑀯𑀸𑀭𑁂𑀢𑁆𑀯𑀸 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬 𑀆𑀕𑀘𑁆𑀙𑀢𑀺. 𑀢𑀲𑁆𑀲 𑀦𑀕𑀭𑀫𑀚𑁆𑀛𑁂 𑀫𑀳𑀸𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑀺, 𑀧𑀸𑀤𑀸 𑀦 𑀯𑀳𑀦𑁆𑀢𑀺. 𑀅𑀣 𑀦𑀁 𑀫𑀜𑁆𑀘𑀓𑀲𑀺𑀯𑀺𑀓𑀸𑀬 𑀓𑀼𑀫𑁆𑀪𑀓𑀸𑀭𑀲𑀸𑀮𑀁 𑀆𑀳𑀭𑀺𑀁𑀲𑀼. 𑀲𑀸 𑀘 𑀲𑀸𑀮𑀸 𑀢𑁂𑀲𑀁 𑀓𑀫𑁆𑀫𑀲𑀸𑀮𑀸, 𑀦 𑀦𑀺𑀯𑁂𑀲𑀦𑀲𑀸𑀮𑀸. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀓𑀼𑀫𑁆𑀪𑀓𑀸𑀭𑀦𑀺𑀯𑁂𑀲𑀦𑁂 𑀯𑀺𑀳𑀭𑀢𑀻’’𑀢𑀺. 𑀩𑀸𑀴𑁆𑀳𑀕𑀺𑀮𑀸𑀦𑁄𑀢𑀺 𑀅𑀥𑀺𑀫𑀢𑁆𑀢𑀕𑀺𑀮𑀸𑀦𑁄. 𑀲𑀫𑀥𑁄𑀲𑀻𑀢𑀺 𑀲𑀫𑀦𑁆𑀢𑀢𑁄 𑀅𑀥𑁄𑀲𑀺, 𑀘𑀮𑀦𑀸𑀓𑀸𑀭𑁂𑀦 𑀅𑀧𑀘𑀺𑀢𑀺𑀁 𑀤𑀲𑁆𑀲𑁂𑀲𑀺. 𑀯𑀢𑁆𑀢𑀁 𑀓𑀺𑀭𑁂𑀢𑀁 𑀩𑀸𑀴𑁆𑀳𑀕𑀺𑀮𑀸𑀦𑁂𑀦𑀧𑀺 𑀩𑀼𑀟𑁆𑀠𑀢𑀭𑀁 𑀤𑀺𑀲𑁆𑀯𑀸 𑀉𑀝𑁆𑀞𑀸𑀦𑀸𑀓𑀸𑀭𑁂𑀦 𑀅𑀧𑀘𑀺𑀢𑀺 𑀤𑀲𑁆𑀲𑁂𑀢𑀩𑁆𑀩𑀸. 𑀢𑁂𑀦 𑀧𑀦 ‘‘𑀫𑀸 𑀘𑀮𑀺 𑀫𑀸 𑀘𑀮𑀻’’𑀢𑀺 𑀯𑀢𑁆𑀢𑀩𑁆𑀩𑁄. 𑀲𑀦𑁆𑀢𑀺𑀫𑀸𑀦𑀺 𑀆𑀲𑀦𑀸𑀦𑀻𑀢𑀺 𑀩𑀼𑀤𑁆𑀥𑀓𑀸𑀮𑀲𑁆𑀫𑀺𑀜𑁆𑀳𑀺 𑀏𑀓𑀲𑁆𑀲𑀧𑀺 𑀪𑀺𑀓𑁆𑀔𑀼𑀦𑁄 ¶ 𑀯𑀲𑀦𑀝𑁆𑀞𑀸𑀦𑁂 ¶ ‘‘𑀲𑀘𑁂 𑀲𑀢𑁆𑀣𑀸 𑀆𑀕𑀘𑁆𑀙𑀺𑀲𑁆𑀲𑀢𑀺, 𑀇𑀥 𑀦𑀺𑀲𑀻𑀤𑀺𑀲𑁆𑀲𑀢𑀻’’𑀢𑀺 𑀆𑀲𑀦𑀁 𑀧𑀜𑁆𑀜𑀢𑁆𑀢𑀫𑁂𑀯 𑀳𑁄𑀢𑀺 𑀅𑀦𑁆𑀢𑀫𑀲𑁄 𑀨𑀮𑀓𑀫𑀢𑁆𑀢𑀫𑁆𑀧𑀺 𑀧𑀡𑁆𑀡𑀲𑀦𑁆𑀣𑀸𑀭𑀫𑀢𑁆𑀢𑀫𑁆𑀧𑀺. 𑀔𑀫𑀦𑀻𑀬𑀁 𑀬𑀸𑀧𑀦𑀻𑀬𑀦𑁆𑀢𑀺 𑀓𑀘𑁆𑀘𑀺 𑀤𑀼𑀓𑁆𑀔𑀁 𑀔𑀫𑀺𑀢𑀼𑀁 𑀇𑀭𑀺𑀬𑀸𑀧𑀣𑀁 𑀯𑀸 𑀬𑀸𑀧𑁂𑀢𑀼𑀁 𑀲𑀓𑁆𑀓𑀸𑀢𑀺 𑀧𑀼𑀘𑁆𑀙𑀢𑀺. 𑀧𑀝𑀺𑀓𑁆𑀓𑀫𑀦𑁆𑀢𑀻𑀢𑀺 𑀦𑀺𑀯𑀢𑁆𑀢𑀦𑁆𑀢𑀺. 𑀅𑀪𑀺𑀓𑁆𑀓𑀫𑀦𑁆𑀢𑀻𑀢𑀺 𑀅𑀥𑀺𑀕𑀘𑁆𑀙𑀦𑁆𑀢𑀺 ¶ . 𑀧𑀝𑀺𑀓𑁆𑀓𑀫𑁄𑀲𑀸𑀦𑀦𑁆𑀢𑀺 𑀧𑀝𑀺𑀓𑁆𑀓𑀫𑁄 𑀏𑀢𑀸𑀲𑀁. 𑀲𑀻𑀮𑀢𑁄 𑀦 𑀉𑀧𑀯𑀤𑀢𑀻𑀢𑀺 𑀲𑀻𑀮𑀁 𑀆𑀭𑀩𑁆𑀪 𑀲𑀻𑀮𑀪𑀸𑀯𑁂𑀦 𑀦 𑀉𑀧𑀯𑀤𑀢𑀺. 𑀘𑀺𑀭𑀧𑀝𑀺𑀓𑀸𑀳𑀦𑁆𑀢𑀺 𑀘𑀺𑀭𑀧𑀝𑀺𑀓𑁄 𑀅𑀳𑀁, 𑀘𑀺𑀭𑀢𑁄 𑀧𑀝𑁆𑀞𑀸𑀬 𑀅𑀳𑀦𑁆𑀢𑀺 𑀅𑀢𑁆𑀣𑁄. 𑀧𑀽𑀢𑀺𑀓𑀸𑀬𑁂𑀦𑀸𑀢𑀺 𑀅𑀢𑁆𑀢𑀦𑁄 𑀲𑀼𑀯𑀡𑁆𑀡𑀯𑀡𑁆𑀡𑀫𑁆𑀧𑀺 𑀓𑀸𑀬𑀁 𑀪𑀕𑀯𑀸 𑀥𑀼𑀯𑀧𑀕𑁆𑀖𑀭𑀡𑀝𑁆𑀞𑁂𑀦 𑀏𑀯𑀫𑀸𑀳. 𑀬𑁄 𑀔𑁄, 𑀯𑀓𑁆𑀓𑀮𑀺, 𑀥𑀫𑁆𑀫𑀦𑁆𑀢𑀺 𑀇𑀥 𑀪𑀕𑀯𑀸 ‘‘𑀥𑀫𑁆𑀫𑀓𑀸𑀬𑁄 𑀔𑁄, 𑀫𑀳𑀸𑀭𑀸𑀚, 𑀢𑀣𑀸𑀕𑀢𑁄’’𑀢𑀺 𑀯𑀼𑀢𑁆𑀢𑀁 𑀥𑀫𑁆𑀫𑀓𑀸𑀬𑀢𑀁 𑀤𑀲𑁆𑀲𑁂𑀢𑀺. 𑀦𑀯𑀯𑀺𑀥𑁄 𑀳𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀢𑀣𑀸𑀕𑀢𑀲𑁆𑀲 𑀓𑀸𑀬𑁄 𑀦𑀸𑀫.

𑀇𑀤𑀸𑀦𑀺 𑀣𑁂𑀭𑀲𑁆𑀲 𑀢𑀺𑀧𑀭𑀺𑀯𑀝𑁆𑀝𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀦𑁆𑀢𑁄 𑀢𑀁 𑀓𑀺𑀁 𑀫𑀜𑁆𑀜𑀲𑀻𑀢𑀺𑀆𑀤𑀺𑀫𑀸𑀳. 𑀓𑀸𑀴𑀲𑀺𑀮𑀸𑀢𑀺 𑀓𑀸𑀴𑀲𑀺𑀮𑀸𑀯𑀺𑀳𑀸𑀭𑁄. 𑀯𑀺𑀫𑁄𑀓𑁆𑀔𑀸𑀬𑀸𑀢𑀺 𑀫𑀕𑁆𑀕𑀯𑀺𑀫𑁄𑀓𑁆𑀔𑀢𑁆𑀣𑀸𑀬. 𑀲𑀼𑀯𑀺𑀫𑀼𑀢𑁆𑀢𑁄 𑀯𑀺𑀫𑀼𑀘𑁆𑀘𑀺𑀲𑁆𑀲𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑁄 𑀳𑀼𑀢𑁆𑀯𑀸 𑀯𑀺𑀫𑀼𑀘𑁆𑀘𑀺𑀲𑁆𑀲𑀢𑀺. 𑀢𑀸 𑀓𑀺𑀭 𑀤𑁂𑀯𑀢𑀸 ‘‘𑀬𑁂𑀦 𑀦𑀻𑀳𑀸𑀭𑁂𑀦 𑀇𑀫𑀺𑀦𑀸 𑀯𑀺𑀧𑀲𑁆𑀲𑀦𑀸 𑀆𑀭𑀤𑁆𑀥𑀸, 𑀅𑀦𑀦𑁆𑀢𑀭𑀸𑀬𑁂𑀦 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀏𑀯𑀫𑀸𑀳𑀁𑀲𑀼. 𑀅𑀧𑀸𑀧𑀓𑀦𑁆𑀢𑀺 𑀅𑀮𑀸𑀫𑀓𑀁. 𑀲𑀢𑁆𑀣𑀁 𑀆𑀳𑀭𑁂𑀲𑀻𑀢𑀺 𑀣𑁂𑀭𑁄 𑀓𑀺𑀭 𑀅𑀥𑀺𑀫𑀸𑀦𑀺𑀓𑁄 𑀅𑀳𑁄𑀲𑀺. 𑀲𑁄 𑀲𑀫𑀸𑀥𑀺𑀯𑀺𑀧𑀲𑁆𑀲𑀦𑀸𑀳𑀺 𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀁 𑀓𑀺𑀮𑁂𑀲𑀸𑀦𑀁 𑀲𑀫𑀼𑀤𑀸𑀘𑀸𑀭𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀔𑀻𑀡𑀸𑀲𑀯𑁄𑀫𑁆𑀳𑀻’’𑀢𑀺 𑀲𑀜𑁆𑀜𑀻 𑀳𑀼𑀢𑁆𑀯𑀸 ‘‘𑀓𑀺𑀁 𑀫𑁂 𑀇𑀫𑀺𑀦𑀸 𑀤𑀼𑀓𑁆𑀔𑁂𑀦 𑀚𑀻𑀯𑀺𑀢𑁂𑀦? 𑀲𑀢𑁆𑀣𑀁 𑀆𑀳𑀭𑀺𑀢𑁆𑀯𑀸 𑀫𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀺𑀔𑀺𑀡𑁂𑀦 𑀲𑀢𑁆𑀣𑁂𑀦 𑀓𑀡𑁆𑀞𑀦𑀸𑀴𑀁 𑀙𑀺𑀦𑁆𑀤𑀺. 𑀅𑀣𑀲𑁆𑀲 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀺. 𑀲𑁄 𑀢𑀲𑁆𑀫𑀺𑀁 𑀔𑀡𑁂 𑀅𑀢𑁆𑀢𑀦𑁄 𑀧𑀼𑀣𑀼𑀚𑁆𑀚𑀦𑀪𑀸𑀯𑀁 𑀜𑀢𑁆𑀯𑀸 𑀅𑀯𑀺𑀲𑁆𑀲𑀝𑁆𑀞𑀓𑀫𑁆𑀫𑀝𑁆𑀞𑀸𑀦𑀢𑁆𑀢𑀸 𑀲𑀻𑀖𑀁 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀆𑀤𑀸𑀬 𑀲𑀫𑁆𑀫𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑁆𑀯𑀸𑀯 𑀓𑀸𑀮𑀫𑀓𑀸𑀲𑀺. 𑀧𑀘𑁆𑀘𑀯𑁂𑀓𑁆𑀔𑀡𑀸 𑀧𑀦𑀲𑁆𑀲 𑀘 𑀓𑀣𑀁 𑀅𑀳𑁄𑀲𑀻𑀢𑀺? 𑀔𑀻𑀡𑀸𑀲𑀯𑀲𑁆𑀲 𑀏𑀓𑀽𑀦𑀯𑀻𑀲𑀢𑀺 ¶ 𑀧𑀘𑁆𑀘𑀯𑁂𑀓𑁆𑀔𑀡𑀸 𑀦 𑀲𑀩𑁆𑀩𑀸𑀯 𑀅𑀯𑀲𑁆𑀲𑀁 𑀮𑀤𑁆𑀥𑀩𑁆𑀩𑀸, 𑀢𑀺𑀔𑀺𑀡𑁂𑀦𑀸𑀧𑀺 𑀧𑀦 𑀅𑀲𑀺𑀦𑀸 𑀲𑀻𑀲𑁂 𑀙𑀺𑀚𑁆𑀚𑀦𑁆𑀢𑁂 𑀏𑀓𑀁 𑀤𑁆𑀯𑁂 𑀜𑀸𑀡𑀸𑀦𑀺 𑀅𑀯𑀲𑁆𑀲𑀁 𑀉𑀧𑁆𑀧𑀚𑁆𑀚𑀦𑁆𑀢𑀺.

𑀯𑀺𑀯𑀢𑁆𑀢𑀓𑁆𑀔𑀦𑁆𑀥𑀦𑁆𑀢𑀺 𑀧𑀭𑀺𑀯𑀢𑁆𑀢𑀓𑁆𑀔𑀦𑁆𑀥𑀁. 𑀲𑁂𑀫𑀸𑀦𑀦𑁆𑀢𑀺 𑀲𑀬𑀫𑀸𑀦𑀁. 𑀣𑁂𑀭𑁄 𑀓𑀺𑀭 𑀉𑀢𑁆𑀢𑀸𑀦𑀓𑁄 𑀦𑀺𑀧𑀦𑁆𑀦𑁄 𑀲𑀢𑁆𑀣𑀁 𑀆𑀳𑀭𑀺. 𑀢𑀲𑁆𑀲 𑀲𑀭𑀻𑀭𑀁 𑀬𑀣𑀸𑀞𑀺𑀢𑀫𑁂𑀯 𑀅𑀳𑁄𑀲𑀺. 𑀲𑀻𑀲𑀁 𑀧𑀦 𑀤𑀓𑁆𑀔𑀺𑀡𑀧𑀲𑁆𑀲𑁂𑀦 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀭𑀺𑀬𑀲𑀸𑀯𑀓𑀸 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀤𑀓𑁆𑀔𑀺𑀡𑀧𑀲𑁆𑀲𑁂𑀦𑁂𑀯 𑀓𑀸𑀮𑀁 𑀓𑀭𑁄𑀦𑁆𑀢𑀺. 𑀢𑁂𑀦𑀲𑁆𑀲 𑀲𑀭𑀻𑀭𑀁 𑀬𑀣𑀸𑀞𑀺𑀢𑀁𑀬𑁂𑀯 𑀅𑀳𑁄𑀲𑀺. 𑀲𑀻𑀲𑀁 𑀧𑀦 𑀤𑀓𑁆𑀔𑀺𑀡𑀧𑀲𑁆𑀲𑁂𑀦 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀞𑀺𑀢𑀁. 𑀢𑀁 𑀲𑀦𑁆𑀥𑀸𑀬 𑀯𑀺𑀯𑀢𑁆𑀢𑀓𑁆𑀔𑀦𑁆𑀥𑁄 𑀦𑀸𑀫 𑀚𑀸𑀢𑁄𑀢𑀺𑀧𑀺 𑀯𑀤𑀦𑁆𑀢𑀺. 𑀥𑀽𑀫𑀸𑀬𑀺𑀢𑀢𑁆𑀢𑀦𑁆𑀢𑀺 𑀥𑀽𑀫𑀸𑀬𑀦𑀪𑀸𑀯𑀁 ¶ . 𑀢𑀺𑀫𑀺𑀭𑀸𑀬𑀺𑀢𑀢𑁆𑀢𑀦𑁆𑀢𑀺 𑀢𑀺𑀫𑀺𑀭𑀸𑀬𑀦𑀪𑀸𑀯𑀁. 𑀥𑀽𑀫𑀯𑀮𑀸𑀳𑀓𑀁 𑀯𑀺𑀬 𑀢𑀺𑀫𑀺𑀭𑀯𑀮𑀸𑀳𑀓𑀁 𑀯𑀺𑀬 𑀘𑀸𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀫𑀁.

𑁬. 𑀅𑀲𑁆𑀲𑀚𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁮. 𑀙𑀝𑁆𑀞𑁂 𑀓𑀲𑁆𑀲𑀧𑀓𑀸𑀭𑀸𑀫𑁂𑀢𑀺 𑀓𑀲𑁆𑀲𑀧𑀲𑁂𑀝𑁆𑀞𑀺𑀦𑀸 𑀓𑀸𑀭𑀺𑀢𑁂 𑀆𑀭𑀸𑀫𑁂. 𑀓𑀸𑀬𑀲𑀗𑁆𑀔𑀸𑀭𑁂𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 ¶ . 𑀲𑁄 𑀳𑀺 𑀢𑁂 𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀦 𑀧𑀲𑁆𑀲𑀫𑁆𑀪𑀺𑀢𑁆𑀯𑀸 𑀧𑀲𑁆𑀲𑀫𑁆𑀪𑀺𑀢𑁆𑀯𑀸 𑀯𑀺𑀳𑀸𑀲𑀺. 𑀏𑀯𑀁 𑀳𑁄𑀢𑀻𑀢𑀺 𑀇𑀤𑀸𑀦𑀺 𑀢𑀁 𑀲𑀫𑀸𑀥𑀺𑀁 𑀅𑀧𑁆𑀧𑀝𑀺𑀮𑀪𑀦𑁆𑀢𑀲𑁆𑀲 𑀏𑀯𑀁 𑀳𑁄𑀢𑀺. 𑀦𑁄 𑀘𑀲𑁆𑀲𑀸𑀳𑀁 𑀧𑀭𑀺𑀳𑀸𑀬𑀸𑀫𑀻𑀢𑀺 𑀓𑀘𑁆𑀘𑀺 𑀦𑀼 𑀔𑁄 𑀅𑀳𑀁 𑀲𑀸𑀲𑀦𑀢𑁄 𑀦 𑀧𑀭𑀺𑀳𑀸𑀬𑀸𑀫𑀺? 𑀢𑀲𑁆𑀲 𑀓𑀺𑀭 𑀆𑀩𑀸𑀥𑀤𑁄𑀲𑁂𑀦 𑀅𑀧𑁆𑀧𑀺𑀢𑀧𑁆𑀧𑀺𑀢𑀸 𑀲𑀫𑀸𑀧𑀢𑁆𑀢𑀺 𑀧𑀭𑀺𑀳𑀸𑀬𑀺, 𑀢𑀲𑁆𑀫𑀸 𑀏𑀯𑀁 𑀘𑀺𑀦𑁆𑀢𑁂𑀲𑀺. 𑀲𑀫𑀸𑀥𑀺𑀲𑀸𑀭𑀓𑀸 𑀲𑀫𑀸𑀥𑀺𑀲𑀸𑀫𑀜𑁆𑀜𑀸𑀢𑀺 𑀲𑀫𑀸𑀥𑀺𑀁𑀬𑁂𑀯 𑀲𑀸𑀭𑀜𑁆𑀘 𑀲𑀸𑀫𑀜𑁆𑀜𑀜𑁆𑀘 𑀫𑀜𑁆𑀜𑀦𑁆𑀢𑀺. 𑀫𑀬𑁆𑀳𑀁 𑀧𑀦 𑀲𑀸𑀲𑀦𑁂 𑀦 𑀏𑀢𑀁 𑀲𑀸𑀭𑀁, 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀸𑀦𑀺 𑀲𑀸𑀭𑀁. 𑀲𑁄 𑀢𑁆𑀯𑀁 𑀲𑀫𑀸𑀥𑀺𑀢𑁄 𑀧𑀭𑀺𑀳𑀸𑀬𑀦𑁆𑀢𑁄 𑀓𑀲𑁆𑀫𑀸 𑀘𑀺𑀦𑁆𑀢𑁂𑀲𑀺 ‘‘𑀲𑀸𑀲𑀦𑀢𑁄 𑀧𑀭𑀺𑀳𑀸𑀬𑀸𑀫𑀻’’𑀢𑀺. 𑀏𑀯𑀁 𑀣𑁂𑀭𑀁 𑀅𑀲𑁆𑀲𑀸𑀲𑁂𑀢𑁆𑀯𑀸 𑀇𑀤𑀸𑀦𑀺𑀲𑁆𑀲 𑀢𑀺𑀧𑀭𑀺𑀯𑀝𑁆𑀝𑀁 𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀦𑁆𑀢𑁄 𑀢𑀁 𑀓𑀺𑀁 𑀫𑀜𑁆𑀜𑀲𑀻𑀢𑀺𑀆𑀤𑀺𑀫𑀸𑀳. 𑀅𑀣𑀲𑁆𑀲 𑀢𑀺𑀧𑀭𑀺𑀯𑀝𑁆𑀝𑀤𑁂𑀲𑀦𑀸𑀯𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑀲𑁆𑀲 𑀲𑀢𑀢𑀯𑀺𑀳𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 𑀲𑁄 𑀲𑀼𑀔𑀁 𑀘𑁂 𑀯𑁂𑀤𑀦𑀁 𑀯𑁂𑀤𑀬𑀢𑀻𑀢𑀺𑀆𑀤𑀺𑀫𑀸𑀳 ¶ . 𑀢𑀢𑁆𑀣 𑀅𑀦𑀪𑀺𑀦𑀦𑁆𑀤𑀺𑀢𑀸𑀢𑀺 𑀧𑀚𑀸𑀦𑀸𑀢𑀻𑀢𑀺 𑀲𑀼𑀔𑀯𑁂𑀤𑀦𑀸𑀬 𑀢𑀸𑀯 𑀅𑀪𑀺𑀦𑀦𑁆𑀤𑀦𑀸 𑀳𑁄𑀢𑀼, 𑀤𑀼𑀓𑁆𑀔𑀯𑁂𑀤𑀦𑀸𑀬 𑀓𑀣𑀁 𑀳𑁄𑀢𑀻𑀢𑀺? 𑀤𑀼𑀓𑁆𑀔𑀁 𑀧𑀢𑁆𑀯𑀸 𑀲𑀼𑀔𑀁 𑀧𑀢𑁆𑀣𑁂𑀢𑀺, 𑀬𑀤𑀕𑁆𑀕𑁂𑀦 𑀲𑀼𑀔𑀁 𑀧𑀢𑁆𑀣𑁂𑀢𑀺, 𑀢𑀤𑀕𑁆𑀕𑁂𑀦 𑀤𑀼𑀓𑁆𑀔𑀁 𑀧𑀢𑁆𑀣𑁂𑀢𑀺𑀬𑁂𑀯. 𑀲𑀼𑀔𑀯𑀺𑀧𑀭𑀺𑀡𑀸𑀫𑁂𑀦 𑀳𑀺 𑀤𑀼𑀓𑁆𑀔𑀁 𑀆𑀕𑀢𑀫𑁂𑀯 𑀳𑁄𑀢𑀻𑀢𑀺 𑀏𑀯𑀁 𑀤𑀼𑀓𑁆𑀔𑁂 𑀅𑀪𑀺𑀦𑀦𑁆𑀤𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺. 𑀙𑀝𑁆𑀞𑀁.

𑁭. 𑀔𑁂𑀫𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁯. 𑀲𑀢𑁆𑀢𑀫𑁂 𑀅𑀢𑁆𑀢𑀦𑀺𑀬𑀦𑁆𑀢𑀺 𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀚𑀸𑀢𑀁. 𑀅𑀲𑁆𑀫𑀻𑀢𑀺 𑀅𑀥𑀺𑀕𑀢𑀦𑁆𑀢𑀺 𑀅𑀲𑁆𑀫𑀻𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀢𑀡𑁆𑀳𑀸𑀫𑀸𑀦𑀸 𑀅𑀥𑀺𑀕𑀢𑀸. 𑀲𑀦𑁆𑀥𑀸𑀯𑀦𑀺𑀓𑀸𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀕𑀫𑀦𑀸𑀕𑀫𑀦𑁂𑀦. 𑀉𑀧𑀲𑀗𑁆𑀓𑀫𑀻𑀢𑀺 𑀩𑀤𑀭𑀺𑀓𑀸𑀭𑀸𑀫𑀢𑁄 𑀕𑀸𑀯𑀼𑀢𑀫𑀢𑁆𑀢𑀁 𑀖𑁄𑀲𑀺𑀢𑀸𑀭𑀸𑀫𑀁 𑀅𑀕𑀫𑀸𑀲𑀺. 𑀤𑀸𑀲𑀓𑀢𑁆𑀣𑁂𑀭𑁄 𑀧𑀦 𑀘𑀢𑀼𑀓𑁆𑀔𑀢𑁆𑀢𑀼𑀁 𑀕𑀫𑀦𑀸𑀕𑀫𑀦𑁂𑀦 𑀢𑀁𑀤𑀺𑀯𑀲𑀁 𑀤𑁆𑀯𑀺𑀬𑁄𑀚𑀦𑀁 𑀅𑀤𑁆𑀥𑀸𑀦𑀁 𑀆𑀳𑀺𑀡𑁆𑀟𑀺. 𑀓𑀲𑁆𑀫𑀸 𑀧𑀦 𑀢𑀁 𑀣𑁂𑀭𑀸 𑀧𑀳𑀺𑀡𑀺𑀁𑀲𑀼? 𑀯𑀺𑀲𑁆𑀲𑀼𑀢𑀲𑁆𑀲 𑀥𑀫𑁆𑀫𑀓𑀣𑀺𑀓𑀲𑁆𑀲 𑀲𑀦𑁆𑀢𑀺𑀓𑀸 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀸𑀢𑀺. 𑀲𑀬𑀁 𑀓𑀲𑁆𑀫𑀸 𑀦 𑀕𑀢𑀸𑀢𑀺? 𑀣𑁂𑀭𑀲𑁆𑀲 𑀯𑀲𑀦𑀝𑁆𑀞𑀸𑀦𑀁 𑀅𑀭𑀜𑁆𑀜𑀁 𑀲𑀫𑁆𑀩𑀸𑀥𑀁, 𑀢𑀢𑁆𑀣 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀣𑁂𑀭𑀸𑀦𑀁 𑀞𑀸𑀢𑀼𑀁 𑀯𑀸 𑀦𑀺𑀲𑀻𑀤𑀺𑀢𑀼𑀁 𑀯𑀸 𑀑𑀓𑀸𑀲𑁄 𑀦𑀢𑁆𑀣𑀻𑀢𑀺 𑀦 𑀕𑀢𑀸. ‘‘𑀇𑀥𑀸𑀕𑀦𑁆𑀢𑁆𑀯𑀸 𑀅𑀫𑁆𑀳𑀸𑀓𑀁 𑀥𑀫𑁆𑀫𑀁 𑀓𑀣𑁂𑀢𑀽’’𑀢𑀺𑀧𑀺 ¶ 𑀓𑀲𑁆𑀫𑀸 𑀧𑀦 𑀦 𑀧𑀳𑀺𑀡𑀺𑀁𑀲𑀽𑀢𑀺? 𑀣𑁂𑀭𑀲𑁆𑀲 𑀆𑀩𑀸𑀥𑀺𑀓𑀢𑁆𑀢𑀸. 𑀅𑀣 𑀓𑀲𑁆𑀫𑀸 𑀧𑀼𑀦𑀧𑁆𑀧𑀼𑀦𑀁 𑀧𑀳𑀺𑀡𑀺𑀁𑀲𑀽𑀢𑀺? 𑀲𑀬𑀫𑁂𑀯 𑀜𑀢𑁆𑀯𑀸 𑀅𑀫𑁆𑀳𑀸𑀓𑀁 𑀓𑀣𑁂𑀢𑀼𑀁 𑀆𑀕𑀫𑀺𑀲𑁆𑀲𑀢𑀻𑀢𑀺. 𑀣𑁂𑀭𑁄𑀧𑀺 𑀢𑁂𑀲𑀁 𑀅𑀚𑁆𑀛𑀸𑀲𑀬𑀁 𑀜𑀢𑁆𑀯𑀸𑀯 𑀅𑀕𑀫𑀸𑀲𑀻𑀢𑀺.

𑀦 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀭𑀽𑀧𑀦𑁆𑀢𑀺 𑀬𑁄 𑀳𑀺 𑀭𑀽𑀧𑀫𑁂𑀯 𑀅𑀲𑁆𑀫𑀻𑀢𑀺 𑀯𑀤𑀢𑀺, 𑀢𑁂𑀦 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀧𑀘𑁆𑀘𑀓𑁆𑀔𑀸𑀢𑀸 𑀳𑁄𑀦𑁆𑀢𑀺. 𑀬𑁄 𑀅𑀜𑁆𑀜𑀢𑁆𑀭 𑀭𑀽𑀧𑀸 𑀯𑀤𑀢𑀺, 𑀢𑁂𑀦 𑀭𑀽𑀧𑀁 𑀧𑀘𑁆𑀘𑀓𑁆𑀔𑀸𑀢𑀁 𑀳𑁄𑀢𑀺. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀣𑁂𑀭𑀲𑁆𑀲 𑀧𑀦 𑀲𑀫𑀽𑀳𑀢𑁄 𑀧𑀜𑁆𑀘𑀲𑀼𑀧𑀺 𑀔𑀦𑁆𑀥𑁂𑀲𑀼 𑀅𑀲𑁆𑀫𑀻𑀢𑀺 𑀅𑀥𑀺𑀕𑀢𑁄, 𑀢𑀲𑁆𑀫𑀸 ¶ 𑀏𑀯𑀫𑀸𑀳. 𑀳𑁄𑀢𑁂𑀯𑀸𑀢𑀺 𑀳𑁄𑀢𑀺𑀬𑁂𑀯. 𑀅𑀦𑀼𑀲𑀳𑀕𑀢𑁄𑀢𑀺 𑀲𑀼𑀔𑀼𑀫𑁄. 𑀊𑀲𑁂𑀢𑀺 𑀙𑀸𑀭𑀺𑀓𑀸𑀔𑀸𑀭𑁂. 𑀔𑀸𑀭𑁂𑀢𑀺 𑀊𑀲𑀔𑀸𑀭𑁂. 𑀲𑀫𑁆𑀫𑀤𑁆𑀤𑀺𑀢𑁆𑀯𑀸𑀢𑀺 𑀢𑁂𑀫𑁂𑀢𑁆𑀯𑀸 𑀔𑀸𑀤𑁂𑀢𑁆𑀯𑀸.

𑀏𑀯𑀫𑁂𑀯 ¶ 𑀔𑁄𑀢𑀺 𑀏𑀢𑁆𑀣 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀓𑀺𑀮𑀺𑀝𑁆𑀞𑀯𑀢𑁆𑀣𑀁 𑀯𑀺𑀬 𑀳𑀺 𑀧𑀼𑀣𑀼𑀚𑁆𑀚𑀦𑀲𑁆𑀲 𑀘𑀺𑀢𑁆𑀢𑀸𑀘𑀸𑀭𑁄, 𑀢𑀬𑁄 𑀔𑀸𑀭𑀸 𑀯𑀺𑀬 𑀢𑀺𑀲𑁆𑀲𑁄 𑀅𑀦𑀼𑀧𑀲𑁆𑀲𑀦𑀸, 𑀢𑀻𑀳𑀺 𑀔𑀸𑀭𑁂𑀳𑀺 𑀥𑁄𑀢𑀯𑀢𑁆𑀣𑀁 𑀯𑀺𑀬 𑀤𑁂𑀲𑀦𑀸𑀬 𑀫𑀤𑁆𑀤𑀺𑀢𑁆𑀯𑀸 𑀞𑀺𑀢𑁄 𑀅𑀦𑀸𑀕𑀸𑀫𑀺𑀦𑁄 𑀘𑀺𑀢𑁆𑀢𑀸𑀘𑀸𑀭𑁄, 𑀅𑀦𑀼𑀲𑀳𑀕𑀢𑁄 𑀊𑀲𑀸𑀤𑀺𑀕𑀦𑁆𑀥𑁄 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑀯𑀚𑁆𑀛𑀸 𑀓𑀺𑀮𑁂𑀲𑀸, 𑀕𑀦𑁆𑀥𑀓𑀭𑀡𑁆𑀟𑀓𑁄 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀕𑀦𑁆𑀥𑀓𑀭𑀡𑁆𑀟𑀓𑀁 𑀆𑀕𑀫𑁆𑀫 𑀅𑀦𑀼𑀲𑀳𑀕𑀢𑀸𑀦𑀁 𑀊𑀲𑀕𑀦𑁆𑀥𑀸𑀤𑀻𑀦𑀁 𑀲𑀫𑀼𑀕𑁆𑀖𑀸𑀢𑁄 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑀓𑀺𑀮𑁂𑀲𑀓𑁆𑀔𑀬𑁄, 𑀕𑀦𑁆𑀥𑀧𑀭𑀺𑀪𑀸𑀯𑀺𑀢𑀯𑀢𑁆𑀣𑀁 𑀦𑀺𑀯𑀸𑀲𑁂𑀢𑁆𑀯𑀸 𑀙𑀡𑀤𑀺𑀯𑀲𑁂 𑀅𑀦𑁆𑀢𑀭𑀯𑀻𑀣𑀺𑀬𑀁 𑀲𑀼𑀕𑀦𑁆𑀥𑀕𑀦𑁆𑀥𑀺𑀦𑁄 𑀯𑀺𑀘𑀭𑀡𑀁 𑀯𑀺𑀬 𑀔𑀻𑀡𑀸𑀲𑀯𑀲𑁆𑀲 𑀲𑀻𑀮𑀕𑀦𑁆𑀥𑀸𑀤𑀻𑀳𑀺 𑀤𑀲 𑀤𑀺𑀲𑀸 𑀉𑀧𑀯𑀸𑀬𑀦𑁆𑀢𑀲𑁆𑀲 𑀬𑀣𑀸𑀓𑀸𑀫𑀘𑀸𑀭𑁄.

𑀆𑀘𑀺𑀓𑁆𑀔𑀺𑀢𑀼𑀦𑁆𑀢𑀺 𑀓𑀣𑁂𑀢𑀼𑀁. 𑀤𑁂𑀲𑁂𑀢𑀼𑀦𑁆𑀢𑀺 𑀧𑀓𑀸𑀲𑁂𑀢𑀼𑀁. 𑀧𑀜𑁆𑀜𑀸𑀧𑁂𑀢𑀼𑀦𑁆𑀢𑀺 𑀚𑀸𑀦𑀸𑀧𑁂𑀢𑀼𑀁. 𑀧𑀝𑁆𑀞𑀧𑁂𑀢𑀼𑀦𑁆𑀢𑀺 𑀧𑀢𑀺𑀝𑁆𑀞𑀸𑀧𑁂𑀢𑀼𑀁. 𑀯𑀺𑀯𑀭𑀺𑀢𑀼𑀦𑁆𑀢𑀺 𑀯𑀺𑀯𑀝𑀁 𑀓𑀸𑀢𑀼𑀁. 𑀯𑀺𑀪𑀚𑀺𑀢𑀼𑀦𑁆𑀢𑀺 𑀲𑀼𑀯𑀺𑀪𑀢𑁆𑀢𑀁 𑀓𑀸𑀢𑀼𑀁. 𑀉𑀢𑁆𑀢𑀸𑀦𑀻𑀓𑀸𑀢𑀼𑀦𑁆𑀢𑀺 𑀉𑀢𑁆𑀢𑀸𑀦𑀓𑀁 𑀓𑀸𑀢𑀼𑀁. 𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀣𑁂𑀭𑀸𑀦𑀦𑁆𑀢𑀺 𑀢𑁂 𑀓𑀺𑀭 𑀣𑁂𑀭𑁂𑀦 𑀓𑀣𑀺𑀢𑀓𑀣𑀺𑀢𑀝𑁆𑀞𑀸𑀦𑁂 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀉𑀧𑀭𑀽𑀧𑀭𑀺 𑀲𑀫𑁆𑀫𑀲𑀦𑁆𑀢𑀸 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼. 𑀣𑁂𑀭𑁄𑀧𑀺 𑀅𑀜𑁆𑀜𑁂𑀦 𑀦𑀻𑀳𑀸𑀭𑁂𑀦 𑀅𑀓𑀣𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀲𑀳𑀕𑀢𑀘𑀺𑀢𑁆𑀢𑁂𑀦𑁂𑀯 𑀓𑀣𑁂𑀲𑀺. 𑀢𑀲𑁆𑀫𑀸 𑀲𑁄𑀧𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀝𑁆𑀞𑀺𑀫𑀢𑁆𑀢𑀸𑀦𑀁 𑀣𑁂𑀭𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀸𑀦𑀺 𑀯𑀺𑀫𑀼𑀘𑁆𑀘𑀺𑀁𑀲𑀼 𑀆𑀬𑀲𑁆𑀫𑀢𑁄 𑀔𑁂𑀫𑀓𑀲𑁆𑀲 𑀘𑀸’’𑀢𑀺. 𑀲𑀢𑁆𑀢𑀫𑀁.

𑁮. 𑀙𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁦. 𑀅𑀝𑁆𑀞𑀫𑁂 ¶ 𑀆𑀬𑀲𑁆𑀫𑀸 𑀙𑀦𑁆𑀦𑁄𑀢𑀺 𑀢𑀣𑀸𑀕𑀢𑁂𑀦 𑀲𑀤𑁆𑀥𑀺𑀁 𑀏𑀓𑀤𑀺𑀯𑀲𑁂 𑀚𑀸𑀢𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀤𑀺𑀯𑀲𑁂 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀼𑀦 𑀅𑀧𑀭𑀪𑀸𑀕𑁂 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑁄 𑀅𑀫𑁆𑀳𑀸𑀓𑀁 𑀥𑀫𑁆𑀫𑁄’’𑀢𑀺 𑀏𑀯𑀁 𑀫𑀓𑁆𑀔𑀻 𑀘𑁂𑀯 𑀧𑀴𑀸𑀲𑀻 𑀘 𑀳𑀼𑀢𑁆𑀯𑀸 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀨𑀭𑀼𑀲𑀯𑀸𑀘𑀸𑀬 𑀲𑀗𑁆𑀖𑀝𑁆𑀝𑀦𑀁 𑀓𑀭𑁄𑀦𑁆𑀢𑁄 𑀣𑁂𑀭𑁄. 𑀅𑀯𑀸𑀧𑀼𑀭𑀡𑀁 𑀆𑀤𑀸𑀬𑀸𑀢𑀺 𑀓𑀼𑀜𑁆𑀘𑀺𑀓𑀁 𑀕𑀳𑁂𑀢𑁆𑀯𑀸. 𑀯𑀺𑀳𑀸𑀭𑁂𑀦 𑀯𑀺𑀳𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸𑀢𑀺 𑀏𑀓𑀁 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁄 𑀅𑀜𑁆𑀜𑀁, 𑀢𑀢𑁄 𑀅𑀜𑁆𑀜𑀦𑁆𑀢𑀺 𑀏𑀯𑀁 𑀢𑁂𑀦 𑀢𑁂𑀦 𑀯𑀺𑀳𑀸𑀭𑁂𑀦 𑀢𑀁 𑀢𑀁 𑀯𑀺𑀳𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸. 𑀏𑀢𑀤𑀯𑁄𑀘 𑀑𑀯𑀤𑀦𑁆𑀢𑀼 𑀫𑀦𑁆𑀢𑀺 𑀓𑀲𑁆𑀫𑀸 𑀏𑀯𑀁 𑀫𑀳𑀦𑁆𑀢𑁂𑀦 𑀉𑀲𑁆𑀲𑀸𑀳𑁂𑀦 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀏𑀢𑀁 𑀅𑀯𑁄𑀘𑀸𑀢𑀺? 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑀢𑀸𑀬. 𑀢𑀲𑁆𑀲 𑀳𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀢𑁆𑀣𑀭𑀺 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀧𑁂𑀲𑀺𑀢𑁄 𑀆𑀬𑀲𑁆𑀫𑀸 ¶ 𑀆𑀦𑀦𑁆𑀤𑁄 𑀓𑁄𑀲𑀫𑁆𑀩𑀺𑀁 ¶ 𑀕𑀦𑁆𑀢𑁆𑀯𑀸 𑀩𑁆𑀭𑀳𑁆𑀫𑀤𑀡𑁆𑀟𑀁 𑀅𑀤𑀸𑀲𑀺. 𑀲𑁄 𑀤𑀺𑀦𑁆𑀦𑁂 𑀩𑁆𑀭𑀳𑁆𑀫𑀤𑀡𑁆𑀟𑁂 𑀲𑀜𑁆𑀚𑀸𑀢𑀧𑀭𑀺𑀴𑀸𑀳𑁄 𑀯𑀺𑀲𑀜𑁆𑀜𑀻𑀪𑀽𑀢𑁄 𑀧𑀢𑀺𑀢𑁆𑀯𑀸 𑀧𑀼𑀦 𑀲𑀜𑁆𑀜𑀁 𑀮𑀪𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑀁 𑀕𑀢𑁄, 𑀲𑁄 𑀢𑁂𑀦 𑀲𑀤𑁆𑀥𑀺𑀁 𑀓𑀺𑀜𑁆𑀘𑀺 𑀦 𑀓𑀣𑁂𑀲𑀺. 𑀅𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺, 𑀲𑁄𑀧𑀺 𑀦 𑀓𑀣𑁂𑀲𑀻𑀢𑀺 𑀏𑀯𑀁 𑀲𑀓𑀮𑀯𑀺𑀳𑀸𑀭𑀁 𑀯𑀺𑀘𑀭𑀺𑀢𑁆𑀯𑀸 𑀦𑀺𑀩𑁆𑀩𑀺𑀦𑁆𑀦𑁄 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀉𑀧𑁆𑀧𑀦𑁆𑀦𑀲𑀁𑀯𑁂𑀕𑁄 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀏𑀯𑀁 𑀅𑀯𑁄𑀘.

𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸𑀢𑀺 𑀲𑀩𑁆𑀩𑁂 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸. 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸𑀢𑀺 𑀲𑀩𑁆𑀩𑁂 𑀘𑀢𑀼𑀪𑀽𑀫𑀓𑀥𑀫𑁆𑀫𑀸 𑀅𑀦𑀢𑁆𑀢𑀸. 𑀇𑀢𑀺 𑀲𑀩𑁆𑀩𑁂𑀧𑀺 𑀢𑁂 𑀪𑀺𑀓𑁆𑀔𑀽 𑀣𑁂𑀭𑀁 𑀑𑀯𑀤𑀦𑁆𑀢𑀸 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀅𑀦𑀢𑁆𑀢𑀮𑀓𑁆𑀔𑀡𑀦𑁆𑀢𑀺 𑀤𑁆𑀯𑁂𑀯 𑀮𑀓𑁆𑀔𑀡𑀸𑀦𑀺 𑀓𑀣𑁂𑀢𑁆𑀯𑀸 𑀤𑀼𑀓𑁆𑀔𑀮𑀓𑁆𑀔𑀡𑀁 𑀦 𑀓𑀣𑀬𑀺𑀁𑀲𑀼. 𑀓𑀲𑁆𑀫𑀸? 𑀏𑀯𑀁 𑀓𑀺𑀭 𑀦𑁂𑀲𑀁 𑀅𑀳𑁄𑀲𑀺 𑁋 ‘‘𑀅𑀬𑀁 𑀪𑀺𑀓𑁆𑀔𑀼 𑀯𑀸𑀤𑀻 𑀤𑀼𑀓𑁆𑀔𑀮𑀓𑁆𑀔𑀡𑁂 𑀧𑀜𑁆𑀜𑀸𑀧𑀺𑀬𑀫𑀸𑀦𑁂 𑀭𑀽𑀧𑀁 𑀤𑀼𑀓𑁆𑀔𑀁…𑀧𑁂… 𑀯𑀺𑀜𑁆𑀜𑀸𑀡𑀁 𑀤𑀼𑀓𑁆𑀔𑀁, 𑀫𑀕𑁆𑀕𑁄 𑀤𑀼𑀓𑁆𑀔𑁄, 𑀨𑀮𑀁 𑀤𑀼𑀓𑁆𑀔𑀦𑁆𑀢𑀺 ‘𑀢𑀼𑀫𑁆𑀳𑁂 𑀤𑀼𑀓𑁆𑀔𑀧𑁆𑀧𑀢𑁆𑀢𑀸 𑀪𑀺𑀓𑁆𑀔𑀽 𑀦𑀸𑀫𑀸’𑀢𑀺 𑀕𑀳𑀡𑀁 𑀕𑀡𑁆𑀳𑁂𑀬𑁆𑀬, 𑀬𑀣𑀸 𑀕𑀳𑀡𑀁 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀦𑀺𑀤𑁆𑀤𑁄𑀲𑀫𑁂𑀯𑀲𑁆𑀲 𑀓𑀢𑁆𑀯𑀸 𑀓𑀣𑁂𑀲𑁆𑀲𑀸𑀫𑀸’’𑀢𑀺 𑀤𑁆𑀯𑁂𑀯 𑀮𑀓𑁆𑀔𑀡𑀸𑀦𑀺 𑀓𑀣𑀬𑀺𑀁𑀲𑀼.

𑀧𑀭𑀺𑀢𑀲𑁆𑀲𑀦𑀸 𑀉𑀧𑀸𑀤𑀸𑀦𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀧𑀭𑀺𑀢𑀲𑁆𑀲𑀦𑀸 𑀘 𑀉𑀧𑀸𑀤𑀸𑀦𑀜𑁆𑀘 𑀉𑀧𑁆𑀧𑀚𑁆𑀚𑀢𑀺. 𑀧𑀘𑁆𑀘𑀼𑀤𑀸𑀯𑀢𑁆𑀢𑀢𑀺 𑀫𑀸𑀦𑀲𑀁, 𑀅𑀣 𑀓𑁄 𑀘𑀭𑀳𑀺 𑀫𑁂 𑀅𑀢𑁆𑀢𑀸𑀢𑀺 𑀬𑀤𑀺 𑀭𑀽𑀧𑀸𑀤𑀻𑀲𑀼 𑀏𑀓𑁄𑀧𑀺 𑀅𑀦𑀢𑁆𑀢𑀸, 𑀅𑀣 𑀓𑁄 𑀦𑀸𑀫 𑀫𑁂 𑀅𑀢𑁆𑀢𑀸𑀢𑀺 𑀏𑀯𑀁 𑀧𑀝𑀺𑀦𑀺𑀯𑀢𑁆𑀢𑀢𑀺 ‘‘𑀫𑀬𑁆𑀳𑀁 𑀫𑀸𑀦𑀲’’𑀦𑁆𑀢𑀺. 𑀅𑀬𑀁 𑀓𑀺𑀭 𑀣𑁂𑀭𑁄 𑀧𑀘𑁆𑀘𑀬𑁂 𑀅𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀲𑀺, 𑀲𑀸𑀲𑁆𑀲 𑀤𑀼𑀩𑁆𑀩𑀮𑀯𑀺𑀧𑀲𑁆𑀲𑀦𑀸 𑀅𑀢𑁆𑀢𑀕𑀸𑀳𑀁 𑀧𑀭𑀺𑀬𑀸𑀤𑀸𑀢𑀼𑀁 𑀅𑀲𑀓𑁆𑀓𑀼𑀡𑀦𑁆𑀢𑀻 𑀲𑀗𑁆𑀔𑀸𑀭𑁂𑀲𑀼 𑀲𑀼𑀜𑁆𑀜𑀢𑁄 ¶ 𑀉𑀧𑀝𑁆𑀞𑀳𑀦𑁆𑀢𑁂𑀲𑀼 ‘‘𑀉𑀘𑁆𑀙𑀺𑀚𑁆𑀚𑀺𑀲𑁆𑀲𑀸𑀫𑀺 𑀯𑀺𑀦𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀘𑁂𑀯 𑀧𑀭𑀺𑀢𑀲𑁆𑀲𑀦𑀸𑀬 𑀘 𑀧𑀘𑁆𑀘𑀬𑁄 𑀅𑀳𑁄𑀲𑀺. 𑀲𑁄 𑀘 𑀅𑀢𑁆𑀢𑀸𑀦𑀁 𑀧𑀸𑀧𑀢𑁂 𑀧𑀧𑀢𑀦𑁆𑀢𑀁 𑀯𑀺𑀬 𑀤𑀺𑀲𑁆𑀯𑀸, ‘‘𑀧𑀭𑀺𑀢𑀲𑁆𑀲𑀦𑀸 𑀉𑀧𑀸𑀤𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀧𑀘𑁆𑀘𑀼𑀤𑀸𑀯𑀢𑁆𑀢𑀢𑀺 𑀫𑀸𑀦𑀲𑀁, 𑀅𑀣 𑀓𑁄 𑀘𑀭𑀳𑀺 𑀫𑁂 𑀅𑀢𑁆𑀢𑀸’’𑀢𑀺 𑀆𑀳. 𑀦 𑀔𑁄 𑀧𑀦𑁂𑀯𑀁 𑀥𑀫𑁆𑀫𑀁 𑀧𑀲𑁆𑀲𑀢𑁄 𑀳𑁄𑀢𑀻𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀧𑀲𑁆𑀲𑀦𑁆𑀢𑀲𑁆𑀲 𑀏𑀯𑀁 𑀦 𑀳𑁄𑀢𑀺. 𑀢𑀸𑀯𑀢𑀺𑀓𑀸 𑀯𑀺𑀲𑁆𑀲𑀝𑁆𑀞𑀻𑀢𑀺 𑀢𑀢𑁆𑀢𑀓𑁄 𑀯𑀺𑀲𑁆𑀲𑀸𑀲𑁄. 𑀲𑀫𑁆𑀫𑀼𑀔𑀸 𑀫𑁂𑀢𑀦𑁆𑀢𑀺 𑀣𑁂𑀭𑁄 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸, ‘‘𑀓𑀻𑀤𑀺𑀲𑀸 𑀦𑀼 𑀔𑁄 𑀇𑀫𑀲𑁆𑀲 𑀥𑀫𑁆𑀫𑀤𑁂𑀲𑀦𑀸 𑀲𑀧𑁆𑀧𑀸𑀬𑀸’’𑀢𑀺? 𑀘𑀺𑀦𑁆𑀢𑁂𑀦𑁆𑀢𑁄 𑀢𑁂𑀧𑀺𑀝𑀓𑀁 ¶ 𑀩𑀼𑀤𑁆𑀥𑀯𑀘𑀦𑀁 𑀯𑀺𑀘𑀺𑀦𑀺𑀢𑁆𑀯𑀸 𑀓𑀘𑁆𑀘𑀸𑀦𑀲𑀼𑀢𑁆𑀢𑀁 (𑀲𑀁. 𑀦𑀺. 𑁨.𑁧𑁫) 𑀅𑀤𑁆𑀤𑀲 ‘‘𑀇𑀤𑀁 𑀆𑀤𑀺𑀢𑁄𑀯 𑀤𑀺𑀝𑁆𑀞𑀺𑀯𑀺𑀦𑀺𑀯𑁂𑀞𑀦𑀁 𑀓𑀢𑁆𑀯𑀸 𑀫𑀚𑁆𑀛𑁂 𑀩𑀼𑀤𑁆𑀥𑀩𑀮𑀁 𑀤𑀻𑀧𑁂𑀢𑁆𑀯𑀸 𑀲𑀡𑁆𑀳𑀲𑀼𑀔𑀼𑀫𑀧𑀘𑁆𑀘𑀬𑀸𑀓𑀸𑀭𑀁 𑀧𑀓𑀸𑀲𑀬𑀫𑀸𑀦𑀁 𑀕𑀢𑀁, 𑀇𑀤𑀫𑀲𑁆𑀲 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀫𑁆𑀫𑀼𑀔𑀸 𑀫𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀝𑁆𑀞𑀫𑀁.

𑁯-𑁧𑁦. 𑀭𑀸𑀳𑀼𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁧-𑁯𑁨. 𑀦𑀯𑀫𑀤𑀲𑀫𑀸𑀦𑀺 ¶ 𑀭𑀸𑀳𑀼𑀮𑀲𑀁𑀬𑀼𑀢𑁆𑀢𑁂 (𑀲𑀁. 𑀦𑀺. 𑁨.𑁧𑁮𑁮) 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀓𑁂𑀯𑀮𑀁 𑀳𑁂𑀢𑀸𑀦𑀺 𑀅𑀬𑀁 𑀣𑁂𑀭𑀯𑀕𑁆𑀕𑁄𑀢𑀺 𑀓𑀢𑁆𑀯𑀸 𑀇𑀥𑀸𑀕𑀢𑀸𑀦𑀻𑀢𑀺. 𑀦𑀯𑀫𑀤𑀲𑀫𑀸𑀦𑀺.

𑀣𑁂𑀭𑀯𑀕𑁆𑀕𑁄 𑀦𑀯𑀫𑁄.

𑁧𑁦. 𑀧𑀼𑀧𑁆𑀨𑀯𑀕𑁆𑀕𑁄

𑁧. 𑀦𑀤𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁩. 𑀧𑀼𑀧𑁆𑀨𑀯𑀕𑁆𑀕𑀲𑁆𑀲 𑀧𑀞𑀫𑁂 𑀧𑀩𑁆𑀩𑀢𑁂𑀬𑁆𑀬𑀸𑀢𑀺 𑀧𑀩𑁆𑀩𑀢𑁂 𑀧𑀯𑀢𑁆𑀢𑀸. 𑀑𑀳𑀸𑀭𑀺𑀦𑀻𑀢𑀺 𑀲𑁄𑀢𑁂 𑀧𑀢𑀺𑀢𑀧𑀢𑀺𑀢𑀸𑀦𑀺 𑀢𑀺𑀡𑀧𑀡𑁆𑀡𑀓𑀝𑁆𑀞𑀸𑀤𑀻𑀦𑀺 𑀳𑁂𑀝𑁆𑀞𑀸𑀳𑀸𑀭𑀺𑀦𑀻. 𑀤𑀽𑀭𑀗𑁆𑀕𑀫𑀸𑀢𑀺 𑀦𑀺𑀓𑁆𑀔𑀦𑁆𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀘𑀢𑀼𑀧𑀜𑁆𑀘𑀬𑁄𑀚𑀦𑀲𑀢𑀕𑀸𑀫𑀺𑀦𑀻. 𑀲𑀻𑀖𑀲𑁄𑀢𑀸𑀢𑀺 𑀘𑀡𑁆𑀟𑀲𑁄𑀢𑀸. 𑀓𑀸𑀲𑀸𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀢𑀺𑀡𑀚𑀸𑀢𑀸𑀦𑀺. 𑀭𑀼𑀓𑁆𑀔𑀸𑀢𑀺 𑀏𑀭𑀡𑁆𑀟𑀸𑀤𑀬𑁄 𑀤𑀼𑀩𑁆𑀩𑀮𑀭𑀼𑀓𑁆𑀔𑀸. 𑀢𑁂 𑀦𑀁 𑀅𑀚𑁆𑀛𑁄𑀮𑀫𑁆𑀩𑁂𑀬𑁆𑀬𑀼𑀦𑁆𑀢𑀺 𑀢𑁂 𑀢𑀻𑀭𑁂 𑀚𑀸𑀢𑀸𑀧𑀺 𑀑𑀦𑀫𑀺𑀢𑁆𑀯𑀸 𑀅𑀕𑁆𑀕𑁂𑀳𑀺 𑀉𑀤𑀓𑀁 𑀨𑀼𑀲𑀦𑁆𑀢𑁂𑀳𑀺 𑀅𑀥𑀺𑀑𑀮𑀫𑁆𑀩𑁂𑀬𑁆𑀬𑀼𑀁, 𑀉𑀧𑀭𑀺 𑀮𑀫𑁆𑀩𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀧𑀮𑀼𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀲𑀫𑀽𑀮𑀫𑀢𑁆𑀢𑀺𑀓𑀸𑀬 𑀲𑀤𑁆𑀥𑀺𑀁 𑀲𑀻𑀲𑁂 𑀧𑀢𑁂𑀬𑁆𑀬𑀼𑀁. 𑀲𑁄 𑀢𑁂𑀳𑀺 𑀅𑀚𑁆𑀛𑁄𑀢𑁆𑀣𑀝𑁄 𑀯𑀸𑀮𑀼𑀓𑀫𑀢𑁆𑀢𑀺𑀓𑁄𑀤𑀓𑁂𑀳𑀺 𑀫𑀼𑀔𑀁 𑀧𑀯𑀺𑀲𑀦𑁆𑀢𑁂𑀳𑀺 𑀫𑀳𑀸𑀯𑀺𑀦𑀸𑀲𑀁 𑀧𑀸𑀧𑀼𑀡𑁂𑀬𑁆𑀬.

𑀏𑀯𑀫𑁂𑀯 ¶ 𑀔𑁄𑀢𑀺 𑀏𑀢𑁆𑀣 𑀲𑁄𑀢𑁂 𑀧𑀢𑀺𑀢𑀧𑀼𑀭𑀺𑀲𑁄 𑀯𑀺𑀬 𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀺𑀢𑁄 𑀩𑀸𑀮𑀧𑀼𑀣𑀼𑀚𑁆𑀚𑀦𑁄 𑀤𑀝𑁆𑀞𑀩𑁆𑀩𑁄, 𑀉𑀪𑀢𑁄𑀢𑀻𑀭𑁂 𑀓𑀸𑀲𑀸𑀤𑀬𑁄 𑀯𑀺𑀬 𑀤𑀼𑀩𑁆𑀩𑀮𑀧𑀜𑁆𑀘𑀓𑁆𑀔𑀦𑁆𑀥𑀸, ‘‘𑀇𑀫𑁂 𑀕𑀳𑀺𑀢𑀸𑀧𑀺 𑀫𑀁 𑀢𑀸𑀭𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀚𑀸𑀦𑀺𑀢𑁆𑀯𑀸 𑀕𑀳𑀡𑀁 𑀯𑀺𑀬 𑀇𑀫𑁂 𑀔𑀦𑁆𑀥𑀸 ‘‘𑀦 𑀫𑀬𑁆𑀳𑀁 𑀲𑀳𑀸𑀬𑀸’’𑀢𑀺 𑀩𑀸𑀮𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀚𑀸𑀦𑀺𑀢𑁆𑀯𑀸 𑀘𑀢𑀽𑀳𑀺 𑀕𑀸𑀳𑁂𑀳𑀺 𑀕𑀳𑀡𑀁, 𑀕𑀳𑀺𑀢𑀕𑀳𑀺𑀢𑀸𑀦𑀁 𑀧𑀮𑀼𑀚𑁆𑀚𑀦𑀢𑁆𑀢𑀸 𑀧𑀼𑀭𑀺𑀲𑀲𑁆𑀲 𑀩𑁆𑀬𑀲𑀦𑀧𑁆𑀧𑀢𑁆𑀢𑀺 𑀯𑀺𑀬 𑀘𑀢𑀽𑀳𑀺 𑀕𑀸𑀳𑁂𑀳𑀺 𑀕𑀳𑀺𑀢𑀸𑀦𑀁 𑀔𑀦𑁆𑀥𑀸𑀦𑀁 𑀯𑀺𑀧𑀭𑀺𑀡𑀸𑀫𑁂 𑀩𑀸𑀮𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑁄𑀓𑀸𑀤𑀺𑀩𑁆𑀬𑀲𑀦𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀞𑀫𑀁.

𑁨. 𑀧𑀼𑀧𑁆𑀨𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁪. 𑀤𑀼𑀢𑀺𑀬𑁂 ¶ ¶ 𑀯𑀺𑀯𑀤𑀢𑀻𑀢𑀺 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸 𑀅𑀲𑀼𑀪’’𑀦𑁆𑀢𑀺 𑀬𑀣𑀸𑀲𑀪𑀸𑀯𑁂𑀦 𑀯𑀤𑀦𑁆𑀢𑁂𑀦 𑀲𑀤𑁆𑀥𑀺𑀁 ‘‘𑀦𑀺𑀘𑁆𑀘𑀁 𑀲𑀼𑀔𑀁 𑀅𑀢𑁆𑀢𑀸 𑀲𑀼𑀪’’𑀦𑁆𑀢𑀺 𑀯𑀤𑀦𑁆𑀢𑁄 𑀯𑀺𑀯𑀤𑀢𑀺. 𑀮𑁄𑀓𑀥𑀫𑁆𑀫𑁄𑀢𑀺 𑀔𑀦𑁆𑀥𑀧𑀜𑁆𑀘𑀓𑀁. 𑀢𑀜𑁆𑀳𑀺 𑀮𑀼𑀚𑁆𑀚𑀦𑀲𑀪𑀸𑀯𑀢𑁆𑀢𑀸 𑀮𑁄𑀓𑀥𑀫𑁆𑀫𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀦𑁆𑀢𑀺 𑀓𑀭𑁄𑀫𑀻𑀢𑀺 𑀓𑀣𑀁 𑀓𑀭𑁄𑀫𑀺? 𑀫𑀬𑁆𑀳𑀜𑁆𑀳𑀺 𑀧𑀝𑀺𑀧𑀢𑁆𑀢𑀺𑀓𑀣𑀦𑀫𑁂𑀯 𑀪𑀸𑀭𑁄, 𑀧𑀝𑀺𑀧𑀢𑁆𑀢𑀺𑀧𑀽𑀭𑀡𑀁 𑀧𑀦 𑀓𑀼𑀮𑀧𑀼𑀢𑁆𑀢𑀸𑀦𑀁 𑀪𑀸𑀭𑁄𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀢𑀬𑁄 𑀮𑁄𑀓𑀸 𑀓𑀣𑀺𑀢𑀸. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀮𑁄𑀓𑁂𑀦𑀸’’𑀢𑀺 𑀏𑀢𑁆𑀣 𑀳𑀺 𑀲𑀢𑁆𑀢𑀮𑁄𑀓𑁄 𑀓𑀣𑀺𑀢𑁄, ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀮𑁄𑀓𑁂 𑀮𑁄𑀓𑀥𑀫𑁆𑀫𑁄’’𑀢𑀺 𑀏𑀢𑁆𑀣 𑀲𑀗𑁆𑀔𑀸𑀭𑀮𑁄𑀓𑁄, ‘‘𑀢𑀣𑀸𑀕𑀢𑁄 𑀮𑁄𑀓𑁂 𑀚𑀸𑀢𑁄 𑀮𑁄𑀓𑁂 𑀲𑀁𑀯𑀟𑁆𑀠𑁄’’𑀢𑀺 𑀏𑀢𑁆𑀣 𑀑𑀓𑀸𑀲𑀮𑁄𑀓𑁄 𑀓𑀣𑀺𑀢𑁄. 𑀤𑀼𑀢𑀺𑀬𑀁.

𑁩. 𑀨𑁂𑀡𑀧𑀺𑀡𑁆𑀟𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁫. 𑀢𑀢𑀺𑀬𑁂 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀢𑀻𑀭𑁂𑀢𑀺 𑀅𑀬𑀼𑀚𑁆𑀛𑀧𑀼𑀭𑀯𑀸𑀲𑀺𑀦𑁄 𑀅𑀧𑀭𑀺𑀫𑀸𑀡𑀪𑀺𑀓𑁆𑀔𑀼𑀧𑀭𑀺𑀯𑀸𑀭𑀁 𑀘𑀸𑀭𑀺𑀓𑀁 𑀘𑀭𑀫𑀸𑀦𑀁 𑀢𑀣𑀸𑀕𑀢𑀁 𑀅𑀢𑁆𑀢𑀦𑁄 𑀦𑀕𑀭𑀁 𑀲𑀫𑁆𑀧𑀢𑁆𑀢𑀁 𑀤𑀺𑀲𑁆𑀯𑀸 𑀏𑀓𑀲𑁆𑀫𑀺𑀁 𑀕𑀗𑁆𑀕𑀸𑀬 𑀦𑀺𑀯𑀢𑁆𑀢𑀦𑀝𑁆𑀞𑀸𑀦𑁂 𑀫𑀳𑀸𑀯𑀦𑀲𑀡𑁆𑀟𑀫𑀡𑁆𑀟𑀺𑀢𑀧𑁆𑀧𑀤𑁂𑀲𑁂 𑀲𑀢𑁆𑀣𑀼 𑀯𑀺𑀳𑀸𑀭𑀁 𑀓𑀢𑁆𑀯𑀸 𑀅𑀤𑀁𑀲𑀼. 𑀪𑀕𑀯𑀸 𑀢𑀢𑁆𑀣 𑀯𑀺𑀳𑀭𑀢𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀕𑀗𑁆𑀕𑀸𑀬 𑀦𑀤𑀺𑀬𑀸 𑀢𑀻𑀭𑁂’’𑀢𑀺. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀯𑀲𑀦𑁆𑀢𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀗𑁆𑀕𑀸𑀢𑀻𑀭𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀆𑀕𑀘𑁆𑀙𑀦𑁆𑀢𑀁 𑀫𑀳𑀦𑁆𑀢𑀁 𑀨𑁂𑀡𑀧𑀺𑀡𑁆𑀟𑀁 𑀤𑀺𑀲𑁆𑀯𑀸, ‘‘𑀫𑀫 𑀲𑀸𑀲𑀦𑁂 𑀧𑀜𑁆𑀘𑀓𑁆𑀔𑀦𑁆𑀥𑀦𑀺𑀲𑁆𑀲𑀺𑀢𑀁 𑀏𑀓𑀁 𑀥𑀫𑁆𑀫𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺.

𑀫𑀳𑀦𑁆𑀢𑀁 ¶ 𑀨𑁂𑀡𑀧𑀺𑀡𑁆𑀟𑀦𑁆𑀢𑀺 𑀉𑀝𑁆𑀞𑀸𑀦𑀼𑀝𑁆𑀞𑀸𑀦𑁂 𑀩𑀤𑀭𑀧𑀓𑁆𑀓𑀧𑁆𑀧𑀫𑀸𑀡𑀢𑁄 𑀧𑀝𑁆𑀞𑀸𑀬 𑀅𑀦𑀼𑀲𑁄𑀢𑀸𑀕𑀫𑀦𑁂𑀦 𑀅𑀦𑀼𑀧𑀼𑀩𑁆𑀩𑁂𑀦 𑀧𑀯𑀟𑁆𑀠𑀺𑀢𑁆𑀯𑀸 𑀧𑀩𑁆𑀩𑀢𑀓𑀽𑀝𑀫𑀢𑁆𑀢𑀁 𑀚𑀸𑀢𑀁, 𑀬𑀢𑁆𑀣 𑀉𑀤𑀓𑀲𑀧𑁆𑀧𑀸𑀤𑀬𑁄 𑀅𑀦𑁂𑀓𑀧𑀸𑀡𑀬𑁄 𑀦𑀺𑀯𑀲𑀦𑁆𑀢𑀺, 𑀏𑀯𑀭𑀽𑀧𑀁 𑀫𑀳𑀦𑁆𑀢𑀁 𑀨𑁂𑀡𑀧𑀺𑀡𑁆𑀟𑀁. 𑀆𑀯𑀳𑁂𑀬𑁆𑀬𑀸𑀢𑀺 𑀆𑀳𑀭𑁂𑀬𑁆𑀬. 𑀲𑁄 𑀧𑀦𑀸𑀬𑀁 𑀨𑁂𑀡𑀧𑀺𑀡𑁆𑀟𑁄 𑀉𑀝𑁆𑀞𑀺𑀢𑀝𑁆𑀞𑀸𑀦𑁂𑀧𑀺 𑀪𑀺𑀚𑁆𑀚𑀢𑀺 ¶ , 𑀣𑁄𑀓𑀁 𑀕𑀦𑁆𑀢𑁆𑀯𑀸𑀧𑀺, 𑀏𑀓𑀤𑁆𑀯𑀺𑀬𑁄𑀚𑀦𑀸𑀤𑀺𑀯𑀲𑁂𑀦 𑀤𑀽𑀭𑀁 𑀕𑀦𑁆𑀢𑁆𑀯𑀸𑀧𑀺, 𑀅𑀦𑁆𑀢𑀭𑀸 𑀧𑀦 𑀅𑀪𑀺𑀚𑁆𑀚𑀦𑁆𑀢𑁄𑀧𑀺 𑀫𑀳𑀸𑀲𑀫𑀼𑀤𑁆𑀤𑀁 𑀧𑀢𑁆𑀯𑀸 𑀅𑀯𑀲𑁆𑀲𑀫𑁂𑀯 𑀪𑀺𑀚𑁆𑀚𑀢𑀺. 𑀦𑀺𑀚𑁆𑀛𑀸𑀬𑁂𑀬𑁆𑀬𑀸𑀢𑀺 𑀑𑀮𑁄𑀓𑁂𑀬𑁆𑀬. 𑀬𑁄𑀦𑀺𑀲𑁄 𑀉𑀧𑀧𑀭𑀺𑀓𑁆𑀔𑁂𑀬𑁆𑀬𑀸𑀢𑀺 𑀓𑀸𑀭𑀡𑁂𑀦 𑀉𑀧𑀧𑀭𑀺𑀓𑁆𑀔𑁂𑀬𑁆𑀬. 𑀓𑀺𑀜𑁆𑀳𑀺 𑀲𑀺𑀬𑀸, 𑀪𑀺𑀓𑁆𑀔𑀯𑁂, 𑀨𑁂𑀡𑀧𑀺𑀡𑁆𑀟𑁂 𑀲𑀸𑀭𑁄𑀢𑀺, 𑀪𑀺𑀓𑁆𑀔𑀯𑁂, 𑀨𑁂𑀡𑀧𑀺𑀡𑁆𑀟𑀫𑁆𑀳𑀺 𑀲𑀸𑀭𑁄 𑀦𑀸𑀫 𑀓𑀺𑀁 𑀪𑀯𑁂𑀬𑁆𑀬? 𑀯𑀺𑀮𑀻𑀬𑀺𑀢𑁆𑀯𑀸 𑀯𑀺𑀤𑁆𑀥𑀁𑀲𑁂𑀬𑁆𑀬𑁂𑀯.

𑀏𑀯𑀫𑁂𑀯 ¶ 𑀔𑁄𑀢𑀺 𑀬𑀣𑀸 𑀨𑁂𑀡𑀧𑀺𑀡𑁆𑀟𑁄 𑀦𑀺𑀲𑁆𑀲𑀸𑀭𑁄, 𑀏𑀯𑀁 𑀭𑀽𑀧𑀫𑁆𑀧𑀺 𑀦𑀺𑀘𑁆𑀘𑀲𑀸𑀭𑀥𑀼𑀯𑀲𑀸𑀭𑀅𑀢𑁆𑀢𑀲𑀸𑀭𑀯𑀺𑀭𑀳𑁂𑀦 𑀦𑀺𑀲𑁆𑀲𑀸𑀭𑀫𑁂𑀯. 𑀬𑀣𑀸 𑀘 𑀲𑁄 ‘‘𑀇𑀫𑀺𑀦𑀸 𑀧𑀢𑁆𑀢𑀁 𑀯𑀸 𑀣𑀸𑀮𑀓𑀁 𑀯𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸, 𑀕𑀳𑀺𑀢𑁄𑀧𑀺 𑀢𑀫𑀢𑁆𑀣𑀁 𑀦 𑀲𑀸𑀥𑁂𑀢𑀺, 𑀪𑀺𑀚𑁆𑀚𑀢𑀺 𑀏𑀯, 𑀏𑀯𑀁 𑀭𑀽𑀧𑀫𑁆𑀧𑀺 𑀦𑀺𑀘𑁆𑀘𑀦𑁆𑀢𑀺 𑀯𑀸 𑀥𑀼𑀯𑀦𑁆𑀢𑀺 𑀯𑀸 𑀅𑀳𑀦𑁆𑀢𑀺 𑀯𑀸 𑀫𑀫𑀦𑁆𑀢𑀺 𑀯𑀸 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸, 𑀕𑀳𑀺𑀢𑀫𑁆𑀧𑀺 𑀦 𑀢𑀣𑀸 𑀢𑀺𑀝𑁆𑀞𑀢𑀺, 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸 𑀅𑀲𑀼𑀪𑀜𑁆𑀜𑁂𑀯 𑀳𑁄𑀢𑀻𑀢𑀺 𑀏𑀯𑀁 𑀨𑁂𑀡𑀧𑀺𑀡𑁆𑀟𑀲𑀤𑀺𑀲𑀫𑁂𑀯 𑀳𑁄𑀢𑀺. 𑀬𑀣𑀸 𑀯𑀸 𑀧𑀦 𑀨𑁂𑀡𑀧𑀺𑀡𑁆𑀟𑁄 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑁄 𑀅𑀦𑁂𑀓𑀲𑀦𑁆𑀥𑀺𑀖𑀝𑀺𑀢𑁄 𑀩𑀳𑀽𑀦𑀁 𑀉𑀤𑀓𑀲𑀧𑁆𑀧𑀸𑀤𑀻𑀦𑀁 𑀧𑀸𑀡𑀸𑀦𑀁 𑀆𑀯𑀸𑀲𑁄, 𑀏𑀯𑀁 𑀭𑀽𑀧𑀫𑁆𑀧𑀺 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁 𑀅𑀦𑁂𑀓𑀲𑀦𑁆𑀥𑀺𑀖𑀝𑀺𑀢𑀁, 𑀓𑀼𑀮𑀯𑀲𑁂𑀦𑁂𑀯𑁂𑀢𑁆𑀣 𑀅𑀲𑀻𑀢𑀺 𑀓𑀺𑀫𑀺𑀓𑀼𑀮𑀸𑀦𑀺 𑀯𑀲𑀦𑁆𑀢𑀺, 𑀢𑀤𑁂𑀯 𑀢𑁂𑀲𑀁 𑀲𑀽𑀢𑀺𑀖𑀭𑀫𑁆𑀧𑀺 𑀯𑀘𑁆𑀘𑀓𑀼𑀝𑀺𑀧𑀺 𑀕𑀺𑀮𑀸𑀦𑀲𑀸𑀮𑀸𑀧𑀺 𑀲𑀼𑀲𑀸𑀦𑀫𑁆𑀧𑀺, 𑀦 𑀢𑁂 𑀅𑀜𑁆𑀜𑀢𑁆𑀣 𑀕𑀦𑁆𑀢𑁆𑀯𑀸 𑀕𑀩𑁆𑀪𑀯𑀼𑀝𑁆𑀞𑀸𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀏𑀯𑀫𑁆𑀧𑀺 𑀨𑁂𑀡𑀧𑀺𑀡𑁆𑀟𑀲𑀤𑀺𑀲𑀁.

𑀬𑀣𑀸 𑀘 𑀨𑁂𑀡𑀧𑀺𑀡𑁆𑀟𑁄 𑀆𑀤𑀺𑀢𑁄 𑀩𑀤𑀭𑀧𑀓𑁆𑀓𑀫𑀢𑁆𑀢𑁄 𑀳𑀼𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀧𑀩𑁆𑀩𑀢𑀓𑀽𑀝𑀫𑀢𑁆𑀢𑁄𑀧𑀺 𑀳𑁄𑀢𑀺, 𑀏𑀯𑀁 𑀭𑀽𑀧𑀫𑁆𑀧𑀺 𑀆𑀤𑀺𑀢𑁄 𑀓𑀮𑀮𑀫𑀢𑁆𑀢𑀁 𑀳𑀼𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀩𑁆𑀬𑀸𑀫𑀫𑀢𑁆𑀢𑀫𑁆𑀧𑀺 𑀕𑁄𑀫𑀳𑀺𑀁𑀲𑀳𑀢𑁆𑀣𑀺𑀆𑀤𑀻𑀦𑀁 𑀯𑀲𑁂𑀦 𑀧𑀩𑁆𑀩𑀢𑀓𑀽𑀝𑀸𑀤𑀺𑀫𑀢𑁆𑀢𑀁 𑀳𑁄𑀢𑀺 𑀫𑀘𑁆𑀙𑀓𑀘𑁆𑀙𑀧𑀸𑀤𑀻𑀦𑀁 𑀯𑀲𑁂𑀦 𑀅𑀦𑁂𑀓𑀬𑁄𑀚𑀦𑀲𑀢𑀧𑀫𑀸𑀡𑀫𑁆𑀧𑀺, 𑀏𑀯𑀫𑁆𑀧𑀺 𑀨𑁂𑀡𑀧𑀺𑀡𑁆𑀟𑀲𑀤𑀺𑀲𑀁. 𑀬𑀣𑀸 𑀘 𑀨𑁂𑀡𑀧𑀺𑀡𑁆𑀟𑁄 𑀉𑀝𑁆𑀞𑀺𑀢𑀫𑀢𑁆𑀢𑁄𑀧𑀺 𑀪𑀺𑀚𑁆𑀚𑀢𑀺, 𑀣𑁄𑀓𑀁 𑀕𑀦𑁆𑀢𑁆𑀯𑀸𑀧𑀺, 𑀤𑀽𑀭𑀁 𑀕𑀦𑁆𑀢𑁆𑀯𑀸𑀧𑀺, 𑀲𑀫𑀼𑀤𑁆𑀤𑀁 𑀧𑀢𑁆𑀯𑀸 𑀧𑀦 𑀅𑀯𑀲𑁆𑀲𑀫𑁂𑀯 𑀪𑀺𑀚𑁆𑀚𑀢𑀺, 𑀏𑀯𑀫𑁂𑀯𑀁 𑀭𑀽𑀧𑀫𑁆𑀧𑀺 𑀓𑀮𑀮𑀪𑀸𑀯𑁂𑀧𑀺 𑀪𑀺𑀚𑁆𑀚𑀢𑀺 𑀅𑀩𑁆𑀩𑀼𑀤𑀸𑀤𑀺𑀪𑀸𑀯𑁂𑀧𑀺, 𑀅𑀦𑁆𑀢𑀭𑀸 𑀧𑀦 𑀅𑀪𑀺𑀚𑁆𑀚𑀫𑀸𑀦𑀫𑁆𑀧𑀺 𑀯𑀲𑁆𑀲𑀲𑀢𑀸𑀬𑀼𑀓𑀸𑀦𑀁 𑀯𑀲𑁆𑀲𑀲𑀢𑀁 𑀧𑀢𑁆𑀯𑀸 𑀅𑀯𑀲𑁆𑀲𑀫𑁂𑀯 𑀪𑀺𑀚𑁆𑀚𑀢𑀺, 𑀫𑀭𑀡𑀫𑀼𑀔𑁂 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀳𑁄𑀢𑀺, 𑀏𑀯𑀫𑁆𑀧𑀺 𑀨𑁂𑀡𑀧𑀺𑀡𑁆𑀟𑀲𑀤𑀺𑀲𑀁.

𑀓𑀺𑀜𑁆𑀳𑀺 ¶ ¶ 𑀲𑀺𑀬𑀸, 𑀪𑀺𑀓𑁆𑀔𑀯𑁂, 𑀯𑁂𑀤𑀦𑀸𑀬 𑀲𑀸𑀭𑁄𑀢𑀺𑀆𑀤𑀻𑀲𑀼 𑀯𑁂𑀤𑀦𑀸𑀤𑀻𑀦𑀁 𑀧𑀼𑀩𑁆𑀩𑀼𑀴𑀸𑀤𑀻𑀳𑀺 𑀏𑀯𑀁 𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀳𑀺 𑀧𑀼𑀩𑁆𑀩𑀼𑀴𑁄 𑀅𑀲𑀸𑀭𑁄 𑀏𑀯𑀁 𑀯𑁂𑀤𑀦𑀸𑀧𑀺. 𑀬𑀣𑀸 𑀘 𑀲𑁄 𑀅𑀩𑀮𑁄 𑀅𑀕𑀬𑁆𑀳𑀽𑀧𑀕𑁄, 𑀦 𑀲𑀓𑁆𑀓𑀸 𑀢𑀁 𑀕𑀳𑁂𑀢𑁆𑀯𑀸 𑀨𑀮𑀓𑀁 𑀯𑀸 𑀆𑀲𑀦𑀁 𑀯𑀸 𑀓𑀸𑀢𑀼𑀁, 𑀕𑀳𑀺𑀢𑁄𑀧𑀺 𑀪𑀺𑀚𑁆𑀚𑀢𑁂𑀯, 𑀏𑀯𑀁 𑀯𑁂𑀤𑀦𑀸𑀧𑀺 𑀅𑀩𑀮𑀸 𑀅𑀕𑀬𑁆𑀳𑀽𑀧𑀕𑀸, 𑀦 𑀲𑀓𑁆𑀓𑀸 𑀦𑀺𑀘𑁆𑀘𑀸𑀢𑀺 𑀯𑀸 𑀥𑀼𑀯𑀸𑀢𑀺 𑀯𑀸 𑀕𑀳𑁂𑀢𑀼𑀁, 𑀕𑀳𑀺𑀢𑀸𑀧𑀺 𑀦 𑀢𑀣𑀸 𑀢𑀺𑀝𑁆𑀞𑀢𑀺, 𑀏𑀯𑀁 𑀅𑀕𑀬𑁆𑀳𑀽𑀧𑀕𑀢𑀸𑀬𑀧𑀺 𑀯𑁂𑀤𑀦𑀸 𑀧𑀼𑀩𑁆𑀩𑀼𑀴𑀲𑀤𑀺𑀲𑀸. 𑀬𑀣𑀸 𑀧𑀦 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀉𑀤𑀓𑀩𑀺𑀦𑁆𑀤𑀼𑀫𑁆𑀳𑀺 𑀧𑀼𑀩𑁆𑀩𑀼𑀴𑁄 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀪𑀺𑀚𑁆𑀚𑀢𑀺 𑀘, 𑀦 𑀘𑀺𑀭𑀝𑁆𑀞𑀺𑀢𑀺𑀓𑁄 𑀳𑁄𑀢𑀺, 𑀏𑀯𑀁 𑀯𑁂𑀤𑀦𑀸𑀧𑀺 𑀉𑀧𑁆𑀧𑀚𑁆𑀚𑀢𑀺 𑀘𑁂𑀯 𑀪𑀺𑀚𑁆𑀚𑀢𑀺 𑀘, 𑀦 𑀘𑀺𑀭𑀝𑁆𑀞𑀺𑀢𑀺𑀓𑀸 𑀳𑁄𑀢𑀺. 𑀏𑀓𑀘𑁆𑀙𑀭𑀓𑁆𑀔𑀡𑁂 𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀢𑀺. 𑀬𑀣𑀸 𑀘 𑀧𑀼𑀩𑁆𑀩𑀼𑀴𑁄 𑀉𑀤𑀓𑀢𑀮𑀁, 𑀉𑀤𑀓𑀩𑀺𑀦𑁆𑀤𑀼𑀁, 𑀉𑀤𑀓𑀚𑀮𑁆𑀮𑀁, 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀧𑀼𑀝𑀁 𑀓𑀢𑁆𑀯𑀸 𑀕𑀳𑀡𑀯𑀸𑀢𑀜𑁆𑀘𑀸𑀢𑀺 𑀘𑀢𑁆𑀢𑀸𑀭𑀺 𑀓𑀸𑀭𑀡𑀸𑀦𑀺 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀯𑁂𑀤𑀦𑀸𑀧𑀺 𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀁 𑀓𑀺𑀮𑁂𑀲𑀚𑀮𑁆𑀮𑀁 𑀨𑀲𑁆𑀲𑀲𑀗𑁆𑀖𑀝𑁆𑀝𑀦𑀜𑁆𑀘𑀸𑀢𑀺 𑀘𑀢𑁆𑀢𑀸𑀭𑀺 𑀓𑀸𑀭𑀡𑀸𑀦𑀺 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀫𑁆𑀧𑀺 𑀯𑁂𑀤𑀦𑀸 𑀧𑀼𑀩𑁆𑀩𑀼𑀴𑀲𑀤𑀺𑀲𑀸.

𑀲𑀜𑁆𑀜𑀸𑀧𑀺 ¶ 𑀅𑀲𑀸𑀭𑀓𑀝𑁆𑀞𑁂𑀦 𑀫𑀭𑀻𑀘𑀺𑀲𑀤𑀺𑀲𑀸. 𑀢𑀣𑀸 𑀅𑀕𑀬𑁆𑀳𑀽𑀧𑀕𑀝𑁆𑀞𑁂𑀦. 𑀦 𑀳𑀺 𑀲𑀓𑁆𑀓𑀸 𑀢𑀁 𑀕𑀳𑁂𑀢𑁆𑀯𑀸 𑀧𑀺𑀯𑀺𑀢𑀼𑀁 𑀯𑀸 𑀦𑁆𑀳𑀸𑀬𑀺𑀢𑀼𑀁 𑀯𑀸 𑀪𑀸𑀚𑀦𑀁 𑀯𑀸 𑀧𑀽𑀭𑁂𑀢𑀼𑀁. 𑀅𑀧𑀺𑀘 𑀬𑀣𑀸 𑀫𑀭𑀻𑀘𑀺 𑀯𑀺𑀧𑁆𑀨𑀦𑁆𑀤𑀢𑀺, 𑀲𑀜𑁆𑀚𑀸𑀢𑀽𑀫𑀺𑀯𑁂𑀕𑀸 𑀯𑀺𑀬 𑀔𑀸𑀬𑀢𑀺, 𑀏𑀯𑀁 𑀦𑀻𑀮𑀲𑀜𑁆𑀜𑀸𑀤𑀺𑀪𑁂𑀤𑀸 𑀲𑀜𑁆𑀜𑀸𑀧𑀺 𑀦𑀻𑀮𑀸𑀤𑀺𑀅𑀦𑀼𑀪𑀯𑀦𑀢𑁆𑀣𑀸𑀬 𑀨𑀦𑁆𑀤𑀢𑀺 𑀯𑀺𑀧𑁆𑀨𑀦𑁆𑀤𑀢𑀺. 𑀬𑀣𑀸 𑀘 𑀫𑀭𑀻𑀘𑀺 𑀫𑀳𑀸𑀚𑀦𑀁 𑀯𑀺𑀧𑁆𑀧𑀮𑀫𑁆𑀪𑁂𑀢𑀺 ‘‘𑀧𑀼𑀡𑁆𑀡𑀯𑀸𑀧𑀺 𑀯𑀺𑀬 𑀧𑀼𑀡𑁆𑀡𑀦𑀤𑀻 𑀯𑀺𑀬 𑀤𑀺𑀲𑁆𑀲𑀢𑀻’’𑀢𑀺 𑀯𑀤𑀸𑀧𑁂𑀢𑀺, 𑀏𑀯𑀁 𑀲𑀜𑁆𑀜𑀸𑀧𑀺 𑀯𑀺𑀧𑁆𑀧𑀮𑀫𑁆𑀪𑁂𑀢𑀺, ‘‘𑀇𑀤𑀁 𑀦𑀻𑀮𑀓𑀁 𑀲𑀼𑀪𑀁 𑀲𑀼𑀔𑀁 𑀦𑀺𑀘𑁆𑀘’’𑀦𑁆𑀢𑀺 𑀯𑀤𑀸𑀧𑁂𑀢𑀺. 𑀧𑀻𑀢𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀲𑀜𑁆𑀜𑀸 𑀯𑀺𑀧𑁆𑀧𑀮𑀫𑁆𑀪𑀦𑁂𑀦𑀸𑀧𑀺 𑀫𑀭𑀻𑀘𑀺𑀲𑀤𑀺𑀲𑀸.

𑀅𑀓𑀼𑀓𑁆𑀓𑀼𑀓𑀚𑀸𑀢𑀦𑁆𑀢𑀺 𑀅𑀦𑁆𑀢𑁄 𑀅𑀲𑀜𑁆𑀚𑀸𑀢𑀖𑀦𑀤𑀡𑁆𑀟𑀓𑀁. 𑀲𑀗𑁆𑀔𑀸𑀭𑀸𑀧𑀺 𑀅𑀲𑀸𑀭𑀓𑀝𑁆𑀞𑁂𑀦 𑀓𑀤𑀮𑀺𑀓𑁆𑀔𑀦𑁆𑀥𑀲𑀤𑀺𑀲𑀸, 𑀢𑀣𑀸 𑀅𑀕𑀬𑁆𑀳𑀽𑀧𑀕𑀝𑁆𑀞𑁂𑀦 ¶ . 𑀬𑀣𑁂𑀯 𑀳𑀺 𑀓𑀤𑀮𑀺𑀓𑁆𑀔𑀦𑁆𑀥𑀢𑁄 𑀓𑀺𑀜𑁆𑀘𑀺 𑀕𑀳𑁂𑀢𑁆𑀯𑀸 𑀦 𑀲𑀓𑁆𑀓𑀸 𑀕𑁄𑀧𑀸𑀦𑀲𑀺𑀆𑀤𑀻𑀦𑀁 𑀅𑀢𑁆𑀣𑀸𑀬 𑀉𑀧𑀦𑁂𑀢𑀼𑀁, 𑀉𑀧𑀦𑀻𑀢𑀫𑁆𑀧𑀺 𑀦 𑀢𑀣𑀸 𑀳𑁄𑀢𑀺, 𑀏𑀯𑀁 𑀲𑀗𑁆𑀔𑀸𑀭𑀸𑀧𑀺 𑀦 𑀲𑀓𑁆𑀓𑀸 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀳𑁂𑀢𑀼𑀁, 𑀕𑀳𑀺𑀢𑀸𑀧𑀺 𑀦 𑀢𑀣𑀸 𑀳𑁄𑀦𑁆𑀢𑀺. 𑀬𑀣𑀸 𑀘 𑀓𑀤𑀮𑀺𑀓𑁆𑀔𑀦𑁆𑀥𑁄 𑀩𑀳𑀼𑀧𑀢𑁆𑀢𑀯𑀝𑁆𑀝𑀺𑀲𑀫𑁄𑀥𑀸𑀦𑁄 𑀳𑁄𑀢𑀺, 𑀏𑀯𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀩𑀳𑀼𑀥𑀫𑁆𑀫𑀲𑀫𑁄𑀥𑀸𑀦𑁄. 𑀬𑀣𑀸 𑀘 𑀓𑀤𑀮𑀺𑀓𑁆𑀔𑀦𑁆𑀥𑁄 𑀦𑀸𑀦𑀸𑀮𑀓𑁆𑀔𑀡𑁄. 𑀅𑀜𑁆𑀜𑁄𑀬𑁂𑀯 𑀳𑀺 𑀩𑀸𑀳𑀺𑀭𑀸𑀬 𑀧𑀢𑁆𑀢𑀯𑀝𑁆𑀝𑀺𑀬𑀸 𑀯𑀡𑁆𑀡𑁄, 𑀅𑀜𑁆𑀜𑁄 𑀢𑀢𑁄 𑀅𑀩𑁆𑀪𑀦𑁆𑀢𑀭𑀅𑀩𑁆𑀪𑀦𑁆𑀢𑀭𑀸𑀦𑀁, 𑀏𑀯𑀫𑁂𑀯 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀧𑀺 ¶ 𑀅𑀜𑁆𑀜𑀤𑁂𑀯 𑀨𑀲𑁆𑀲𑀲𑁆𑀲 𑀮𑀓𑁆𑀔𑀡𑀁, 𑀅𑀜𑁆𑀜𑀸 𑀘𑁂𑀢𑀦𑀸𑀤𑀻𑀦𑀁, 𑀲𑀫𑁄𑀥𑀸𑀦𑁂𑀢𑁆𑀯𑀸 𑀧𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀯 𑀯𑀼𑀘𑁆𑀘𑀢𑀻𑀢𑀺 𑀏𑀯𑀫𑁆𑀧𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀓𑀤𑀮𑀺𑀓𑁆𑀔𑀦𑁆𑀥𑀲𑀤𑀺𑀲𑁄.

𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄𑀢𑀺 𑀫𑀁𑀲𑀘𑀓𑁆𑀔𑀼𑀦𑀸 𑀘𑁂𑀯 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀘𑀸𑀢𑀺 𑀤𑁆𑀯𑀻𑀳𑀺 𑀘𑀓𑁆𑀔𑀽𑀳𑀺 𑀘𑀓𑁆𑀔𑀼𑀫𑀸. 𑀫𑀁𑀲𑀘𑀓𑁆𑀔𑀼𑀫𑁆𑀧𑀺 𑀳𑀺𑀲𑁆𑀲 𑀧𑀭𑀺𑀲𑀼𑀤𑁆𑀥𑀁 𑀯𑀝𑁆𑀝𑀢𑀺 𑀅𑀧𑀕𑀢𑀧𑀝𑀮𑀧𑀺𑀴𑀓𑀁, 𑀧𑀜𑁆𑀜𑀸𑀘𑀓𑁆𑀔𑀼𑀫𑁆𑀧𑀺 𑀅𑀲𑀸𑀭𑀪𑀸𑀯𑀤𑀲𑁆𑀲𑀦𑀲𑀫𑀢𑁆𑀣𑀁. 𑀯𑀺𑀜𑁆𑀜𑀸𑀡𑀫𑁆𑀧𑀺 𑀅𑀲𑀸𑀭𑀓𑀝𑁆𑀞𑁂𑀦 𑀫𑀸𑀬𑀸𑀲𑀤𑀺𑀲𑀁, 𑀢𑀣𑀸 𑀅𑀕𑀬𑁆𑀳𑀽𑀧𑀕𑀝𑁆𑀞𑁂𑀦. 𑀬𑀣𑀸 𑀘 𑀫𑀸𑀬𑀸 𑀇𑀢𑁆𑀢𑀭𑀸 𑀮𑀳𑀼𑀧𑀘𑁆𑀘𑀼𑀧𑀝𑁆𑀞𑀸𑀦𑀸, 𑀏𑀯𑀁 𑀯𑀺𑀜𑁆𑀜𑀸𑀡𑀁. 𑀢𑀜𑁆𑀳𑀺 𑀢𑀢𑁄𑀧𑀺 𑀇𑀢𑁆𑀢𑀭𑀢𑀭𑀜𑁆𑀘𑁂𑀯 𑀮𑀳𑀼𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀭𑀜𑁆𑀘. 𑀢𑁂𑀦𑁂𑀯 𑀳𑀺 𑀘𑀺𑀢𑁆𑀢𑁂𑀦 𑀧𑀼𑀭𑀺𑀲𑁄 𑀆𑀕𑀢𑁄 𑀯𑀺𑀬 𑀕𑀢𑁄 𑀯𑀺𑀬 𑀞𑀺𑀢𑁄 𑀯𑀺𑀬 𑀦𑀺𑀲𑀺𑀦𑁆𑀦𑁄 𑀯𑀺𑀬 𑀳𑁄𑀢𑀺. 𑀅𑀜𑁆𑀜𑀤𑁂𑀯 𑀘 𑀆𑀕𑀫𑀦𑀓𑀸𑀮𑁂 𑀘𑀺𑀢𑁆𑀢𑀁, 𑀅𑀜𑁆𑀜𑀁 𑀕𑀫𑀦𑀓𑀸𑀮𑀸𑀤𑀻𑀲𑀼. 𑀏𑀯𑀫𑁆𑀧𑀺 𑀯𑀺𑀜𑁆𑀜𑀸𑀡𑀁 𑀫𑀸𑀬𑀸𑀲𑀤𑀺𑀲𑀁. 𑀫𑀸𑀬𑀸 𑀘 𑀫𑀳𑀸𑀚𑀦𑀁 𑀯𑀜𑁆𑀘𑁂𑀢𑀺, 𑀬𑀁𑀓𑀺𑀜𑁆𑀘𑀺𑀤𑁂𑀯 ‘‘𑀇𑀤𑀁 𑀲𑀼𑀯𑀡𑁆𑀡𑀁 𑀭𑀚𑀢𑀁 𑀫𑀼𑀢𑁆𑀢𑀸’’𑀢𑀺 𑀕𑀸𑀳𑀸𑀧𑁂𑀢𑀺, 𑀯𑀺𑀜𑁆𑀜𑀸𑀡𑀫𑁆𑀧𑀺 𑀫𑀳𑀸𑀚𑀦𑀁 𑀯𑀜𑁆𑀘𑁂𑀢𑀺. 𑀢𑁂𑀦𑁂𑀯 𑀳𑀺 𑀘𑀺𑀢𑁆𑀢𑁂𑀦 𑀆𑀕𑀘𑁆𑀙𑀦𑁆𑀢𑀁 𑀯𑀺𑀬 𑀕𑀘𑁆𑀙𑀦𑁆𑀢𑀁 𑀯𑀺𑀬 𑀞𑀺𑀢𑀁 𑀯𑀺𑀬 𑀦𑀺𑀲𑀺𑀦𑁆𑀦𑀁 𑀯𑀺𑀬 𑀓𑀢𑁆𑀯𑀸 𑀕𑀸𑀳𑀸𑀧𑁂𑀢𑀺. 𑀅𑀜𑁆𑀜𑀤𑁂𑀯 𑀘 𑀆𑀕𑀫𑀦𑁂 𑀘𑀺𑀢𑁆𑀢𑀁, 𑀅𑀜𑁆𑀜𑀁 𑀕𑀫𑀦𑀸𑀤𑀻𑀲𑀼. 𑀏𑀯𑀫𑁆𑀧𑀺 𑀯𑀺𑀜𑁆𑀜𑀸𑀡𑀁 𑀫𑀸𑀬𑀸𑀲𑀤𑀺𑀲𑀁.

𑀪𑀽𑀭𑀺𑀧𑀜𑁆𑀜𑁂𑀦𑀸𑀢𑀺 𑀲𑀡𑁆𑀳𑀧𑀜𑁆𑀜𑁂𑀦 𑀘𑁂𑀯 𑀯𑀺𑀧𑀼𑀮𑀯𑀺𑀢𑁆𑀣𑀢𑀧𑀜𑁆𑀜𑁂𑀦 𑀘. 𑀆𑀬𑀽𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀉𑀲𑁆𑀫𑀸𑀢𑀺 ¶ 𑀓𑀫𑁆𑀫𑀚𑀢𑁂𑀚𑁄𑀥𑀸𑀢𑀼. 𑀧𑀭𑀪𑀢𑁆𑀢𑀦𑁆𑀢𑀺 𑀦𑀸𑀦𑀸𑀯𑀺𑀥𑀸𑀦𑀁 𑀓𑀺𑀫𑀺𑀕𑀡𑀸𑀤𑀻𑀦𑀁 𑀪𑀢𑁆𑀢𑀁 𑀳𑀼𑀢𑁆𑀯𑀸. 𑀏𑀢𑀸𑀤𑀺𑀲𑀸𑀬𑀁 𑀲𑀦𑁆𑀢𑀸𑀦𑁄𑀢𑀺 𑀏𑀢𑀸𑀤𑀺𑀲𑀻 𑀅𑀬𑀁 𑀧𑀯𑁂𑀡𑀻 𑀫𑀢𑀓𑀲𑁆𑀲 ¶ 𑀬𑀸𑀯 𑀲𑀼𑀲𑀸𑀦𑀸 𑀖𑀝𑁆𑀝𑀻𑀬𑀢𑀻𑀢𑀺. 𑀫𑀸𑀬𑀸𑀬𑀁 𑀩𑀸𑀮𑀮𑀸𑀧𑀺𑀦𑀻𑀢𑀺 𑀬𑁆𑀯𑀸𑀬𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀦𑀸𑀫, 𑀅𑀬𑀁 𑀩𑀸𑀮𑀫𑀳𑀸𑀚𑀦𑀮𑀧𑀸𑀧𑀦𑀺𑀓𑀫𑀸𑀬𑀸 𑀦𑀸𑀫. 𑀯𑀥𑀓𑁄𑀢𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺 𑀅𑀬𑀁 𑀔𑀦𑁆𑀥𑀲𑀗𑁆𑀔𑀸𑀢𑁄 𑀯𑀥𑀓𑁄 𑀅𑀜𑁆𑀜𑀫𑀜𑁆𑀜𑀖𑀸𑀢𑀦𑁂𑀦𑀧𑀺, 𑀔𑀦𑁆𑀥𑁂𑀲𑀼 𑀲𑀢𑀺 𑀯𑀥𑁄 𑀧𑀜𑁆𑀜𑀸𑀬𑀢𑀻𑀢𑀺𑀧𑀺. 𑀏𑀓𑀸 𑀳𑀺 𑀧𑀣𑀯𑀻𑀥𑀸𑀢𑀼 𑀪𑀺𑀚𑁆𑀚𑀫𑀸𑀦𑀸 𑀲𑁂𑀲𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸𑀯 𑀪𑀺𑀚𑁆𑀚𑀢𑀺, 𑀢𑀣𑀸 𑀆𑀧𑁄𑀥𑀸𑀢𑀼𑀆𑀤𑀬𑁄. 𑀭𑀽𑀧𑀓𑁆𑀔𑀦𑁆𑀥𑁄 𑀘 𑀪𑀺𑀚𑁆𑀚𑀫𑀸𑀦𑁄 𑀅𑀭𑀽𑀧𑀓𑁆𑀔𑀦𑁆𑀥𑁂 𑀕𑀳𑁂𑀢𑁆𑀯𑀸𑀯 𑀪𑀺𑀚𑁆𑀚𑀢𑀺, 𑀢𑀣𑀸 𑀅𑀭𑀽𑀧𑀓𑁆𑀔𑀦𑁆𑀥𑁂𑀲𑀼 𑀯𑁂𑀤𑀦𑀸𑀤𑀬𑁄 𑀲𑀜𑁆𑀜𑀸𑀤𑀺𑀓𑁂. 𑀘𑀢𑁆𑀢𑀸𑀭𑁄𑀧𑀺 𑀘𑁂𑀢𑁂 𑀯𑀢𑁆𑀣𑀼𑀭𑀽𑀧𑀦𑁆𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀯𑀥𑀦𑁂𑀦𑁂𑀢𑁆𑀣 𑀯𑀥𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀔𑀦𑁆𑀥𑁂𑀲𑀼 𑀧𑀦 𑀲𑀢𑀺 𑀯𑀥𑀩𑀦𑁆𑀥𑀦𑀘𑁆𑀙𑁂𑀤𑀸𑀤𑀻𑀦𑀺 𑀲𑀫𑁆𑀪𑀯𑀦𑁆𑀢𑀺, 𑀏𑀯𑀁 𑀏𑀢𑁂𑀲𑀼 𑀲𑀢𑀺 𑀯𑀥𑀪𑀸𑀯𑀢𑁄𑀧𑀺 𑀯𑀥𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀩𑁆𑀩𑀲𑀁𑀬𑁄𑀕𑀦𑁆𑀢𑀺 𑀲𑀩𑁆𑀩𑀁 𑀤𑀲𑀯𑀺𑀥𑀫𑁆𑀧𑀺 𑀲𑀁𑀬𑁄𑀚𑀦𑀁. 𑀅𑀘𑁆𑀘𑀼𑀢𑀁 𑀧𑀤𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀢𑀢𑀺𑀬𑀁.

𑁪-𑁬. 𑀕𑁄𑀫𑀬𑀧𑀺𑀡𑁆𑀟𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁬-𑁯𑁮. 𑀘𑀢𑀼𑀢𑁆𑀣𑁂 ¶ 𑀲𑀲𑁆𑀲𑀢𑀺𑀲𑀫𑀦𑁆𑀢𑀺 𑀲𑀺𑀦𑁂𑀭𑀼𑀫𑀳𑀸𑀧𑀣𑀯𑀻𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀤𑀻𑀳𑀺 𑀲𑀲𑁆𑀲𑀢𑀻𑀳𑀺 𑀲𑀫𑀁. 𑀧𑀭𑀺𑀢𑁆𑀢𑀁 𑀕𑁄𑀫𑀬𑀧𑀺𑀡𑁆𑀟𑀦𑁆𑀢𑀺 𑀅𑀧𑁆𑀧𑀫𑀢𑁆𑀢𑀓𑀁 𑀫𑀥𑀼𑀓𑀧𑀼𑀧𑁆𑀨𑀧𑁆𑀧𑀫𑀸𑀡𑀁 𑀕𑁄𑀫𑀬𑀔𑀡𑁆𑀟𑀁. 𑀓𑀼𑀢𑁄 𑀧𑀦𑀸𑀦𑁂𑀦𑁂𑀢𑀁 𑀮𑀤𑁆𑀥𑀦𑁆𑀢𑀺. 𑀧𑀭𑀺𑀪𑀡𑁆𑀟𑀓𑀭𑀡𑀢𑁆𑀣𑀸𑀬 𑀆𑀪𑀢𑀢𑁄 𑀕𑀳𑀺𑀢𑀦𑁆𑀢𑀺 𑀏𑀓𑁂. 𑀅𑀢𑁆𑀣𑀲𑁆𑀲 𑀧𑀦 𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀇𑀤𑁆𑀥𑀺𑀬𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀳𑀢𑁆𑀣𑀸𑀭𑀼𑀴𑁆𑀳𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺. 𑀅𑀢𑁆𑀢𑀪𑀸𑀯𑀧𑀝𑀺𑀮𑀸𑀪𑁄𑀢𑀺 𑀧𑀝𑀺𑀮𑀤𑁆𑀥𑀅𑀢𑁆𑀢𑀪𑀸𑀯𑁄. 𑀦 𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀧𑀜𑁆𑀜𑀸𑀬𑁂𑀣𑀸𑀢𑀺 𑀅𑀬𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦𑀸𑀫 𑀦 𑀧𑀜𑁆𑀜𑀸𑀬𑁂𑀬𑁆𑀬. 𑀫𑀕𑁆𑀕𑁄 𑀳𑀺 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑁂 𑀯𑀺𑀯𑀝𑁆𑀝𑁂𑀦𑁆𑀢𑁄 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀺 𑀘 𑀏𑀢𑁆𑀢𑀓𑁄 𑀅𑀢𑁆𑀢𑀪𑀸𑀯𑁄 𑀦𑀺𑀘𑁆𑀘𑁄 𑀪𑀯𑁂𑀬𑁆𑀬, 𑀫𑀕𑁆𑀕𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀧𑀺 𑀲𑀗𑁆𑀔𑀸𑀭𑀯𑀝𑁆𑀝𑀁 𑀯𑀺𑀯𑀝𑁆𑀝𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬𑀸𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄 𑀦 𑀧𑀜𑁆𑀜𑀸𑀬𑁂𑀣.

𑀇𑀤𑀸𑀦𑀺 𑀲𑀘𑁂 𑀓𑁄𑀘𑀺 𑀲𑀗𑁆𑀔𑀸𑀭𑁄 𑀦𑀺𑀘𑁆𑀘𑁄 𑀪𑀯𑁂𑀬𑁆𑀬, 𑀫𑀬𑀸 𑀫𑀳𑀸𑀲𑀼𑀤𑀲𑁆𑀲𑀦𑀭𑀸𑀚𑀓𑀸𑀮𑁂 𑀅𑀦𑀼𑀪𑀽𑀢𑀸 𑀲𑀫𑁆𑀧𑀢𑁆𑀢𑀺 𑀦𑀺𑀘𑁆𑀘𑀸 𑀪𑀯𑁂𑀬𑁆𑀬, 𑀲𑀸𑀧𑀺 𑀘 𑀅𑀦𑀺𑀘𑁆𑀘𑀸𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 𑀪𑀽𑀢𑀧𑀼𑀩𑁆𑀩𑀸𑀳𑀁 𑀪𑀺𑀓𑁆𑀔𑀼 𑀭𑀸𑀚𑀸 𑀅𑀳𑁄𑀲𑀺𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀼𑀲𑀸𑀯𑀢𑀻𑀭𑀸𑀚𑀥𑀸𑀦𑀺𑀧𑁆𑀧𑀫𑀼𑀔𑀸𑀦𑀻𑀢𑀺 𑀓𑀼𑀲𑀸𑀯𑀢𑀻𑀭𑀸𑀚𑀥𑀸𑀦𑀻 𑀢𑁂𑀲𑀁 𑀦𑀕𑀭𑀸𑀦𑀁 𑀧𑀫𑀼𑀔𑀸, 𑀲𑀩𑁆𑀩𑀲𑁂𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀲𑀸𑀭𑀫𑀬𑀸𑀦𑀻𑀢𑀺 ¶ 𑀭𑀢𑁆𑀢𑀘𑀦𑁆𑀤𑀦𑀲𑀸𑀭𑀫𑀬𑀸𑀦𑀺. 𑀉𑀧𑀥𑀸𑀦𑀁 𑀧𑀦 𑀲𑀩𑁆𑀩𑁂𑀲𑀁 𑀲𑀼𑀢𑁆𑀢𑀫𑀬𑀫𑁂𑀯. 𑀕𑁄𑀡𑀓𑀢𑁆𑀣𑀢𑀸𑀦𑀻𑀢𑀺 𑀘𑀢𑀼𑀭𑀗𑁆𑀕𑀼𑀮𑀸𑀥𑀺𑀓𑀮𑁄𑀫𑁂𑀦 𑀓𑀸𑀴𑀓𑁄𑀚𑀯𑁂𑀦 𑀅𑀢𑁆𑀣𑀢𑀸𑀦𑀺, 𑀬𑀁 𑀫𑀳𑀸𑀧𑀺𑀝𑁆𑀞𑀺𑀬𑀓𑁄𑀚𑀯𑁄𑀢𑀺 𑀯𑀤𑀦𑁆𑀢𑀺. 𑀧𑀝𑀓𑀢𑁆𑀣𑀢𑀸𑀦𑀻𑀢𑀺 𑀉𑀪𑀢𑁄𑀮𑁄𑀫𑁂𑀦 𑀉𑀡𑁆𑀡𑀸𑀫𑀬𑁂𑀦 𑀲𑁂𑀢𑀓𑀫𑁆𑀩𑀮𑁂𑀦 𑀅𑀢𑁆𑀣𑀢𑀸𑀦𑀺. 𑀧𑀝𑀮𑀺𑀓𑀢𑁆𑀣𑀢𑀸𑀦𑀻𑀢𑀺 𑀖𑀦𑀧𑀼𑀧𑁆𑀨𑁂𑀦 𑀉𑀡𑁆𑀡𑀸𑀫𑀬𑀅𑀢𑁆𑀣𑀭𑀡𑁂𑀦 𑀅𑀢𑁆𑀣𑀢𑀸𑀦𑀺. 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀸𑀦𑀻𑀢𑀺 𑀓𑀤𑀮𑀺𑀫𑀺𑀕𑀘𑀫𑁆𑀫𑀫𑀬𑁂𑀦 ¶ 𑀉𑀢𑁆𑀢𑀫𑀧𑀘𑁆𑀘𑀢𑁆𑀣𑀭𑀡𑁂𑀦 𑀅𑀢𑁆𑀣𑀢𑀸𑀦𑀺. 𑀢𑀁 𑀓𑀺𑀭 𑀧𑀘𑁆𑀘𑀢𑁆𑀣𑀭𑀡𑀁 𑀲𑁂𑀢𑀯𑀢𑁆𑀣𑀲𑁆𑀲 𑀉𑀧𑀭𑀺 𑀓𑀤𑀮𑀺𑀫𑀺𑀕𑀘𑀫𑁆𑀫𑀁 𑀅𑀢𑁆𑀣𑀭𑀺𑀢𑁆𑀯𑀸 𑀲𑀺𑀩𑁆𑀩𑁂𑀢𑁆𑀯𑀸 𑀓𑀭𑁄𑀦𑁆𑀢𑀺. 𑀲𑀉𑀢𑁆𑀢𑀭𑀘𑁆𑀙𑀤𑀸𑀦𑀻𑀢𑀺 𑀲𑀳 𑀉𑀢𑁆𑀢𑀭𑀘𑁆𑀙𑀤𑁂𑀦, 𑀉𑀧𑀭𑀺 𑀩𑀤𑁆𑀥𑁂𑀦 𑀭𑀢𑁆𑀢𑀯𑀺𑀢𑀸𑀦𑁂𑀦 𑀲𑀤𑁆𑀥𑀺𑀦𑁆𑀢𑀺 𑀅𑀢𑁆𑀣𑁄. 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀻𑀢𑀺 𑀲𑀻𑀲𑀽𑀧𑀥𑀸𑀦𑀜𑁆𑀘 𑀧𑀸𑀤𑀽𑀧𑀥𑀸𑀦𑀜𑁆𑀘𑀸𑀢𑀺 𑀧𑀮𑁆𑀮𑀗𑁆𑀓𑀸𑀦𑀁 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀸𑀦𑀺. 𑀯𑁂𑀚𑀬𑀦𑁆𑀢𑀭𑀣𑀧𑁆𑀧𑀫𑀼𑀔𑀸𑀦𑀻𑀢𑀺 𑀏𑀢𑁆𑀣 𑀯𑁂𑀚𑀬𑀦𑁆𑀢𑁄 𑀦𑀸𑀫 𑀢𑀲𑁆𑀲 𑀭𑀜𑁆𑀜𑁄 𑀭𑀣𑁄, 𑀬𑀲𑁆𑀲 𑀘𑀓𑁆𑀓𑀸𑀦𑀁 𑀇𑀦𑁆𑀤𑀦𑀻𑀮𑀫𑀡𑀺𑀫𑀬𑀸 𑀦𑀸𑀪𑀺, 𑀲𑀢𑁆𑀢𑀭𑀢𑀦𑀫𑀬𑀸 𑀅𑀭𑀸, 𑀧𑀯𑀸𑀴𑀫𑀬𑀸 𑀦𑁂𑀫𑀺, 𑀭𑀚𑀢𑀫𑀬𑁄 𑀅𑀓𑁆𑀔𑁄, 𑀇𑀦𑁆𑀤𑀦𑀻𑀮𑀫𑀡𑀺𑀫𑀬𑀁 𑀉𑀧𑀓𑁆𑀔𑀭𑀁, 𑀭𑀚𑀢𑀫𑀬𑀁 𑀓𑀼𑀩𑁆𑀩𑀭𑀁. 𑀲𑁄 𑀢𑁂𑀲𑀁 𑀭𑀣𑀸𑀦𑀁 𑀧𑀫𑀼𑀔𑁄 𑀅𑀕𑁆𑀕𑁄. 𑀤𑀼𑀓𑀽𑀮𑀲𑀦𑁆𑀤𑀸𑀦𑀸𑀦𑀻𑀢𑀺 𑀤𑀼𑀓𑀽𑀮𑀲𑀦𑁆𑀣𑀭𑀸𑀦𑀺. 𑀓𑀁𑀲𑀽𑀧𑀥𑀸𑀭𑀡𑀸𑀦𑀻𑀢𑀺 𑀭𑀚𑀢𑀫𑀬𑀤𑁄𑀳𑀪𑀸𑀚𑀦𑀸𑀦𑀺. 𑀯𑀢𑁆𑀣𑀓𑁄𑀝𑀺𑀲𑀳𑀲𑁆𑀲𑀸𑀦𑀻𑀢𑀺 𑀬𑀣𑀸𑀭𑀼𑀘𑀺𑀢𑀁 ¶ 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀢𑀻𑀢𑀺 𑀦𑁆𑀳𑀢𑁆𑀯𑀸 𑀞𑀺𑀢𑀓𑀸𑀮𑁂 𑀉𑀧𑀦𑀻𑀢𑀯𑀢𑁆𑀣𑀸𑀦𑁂𑀯 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀪𑀢𑁆𑀢𑀸𑀪𑀺𑀳𑀸𑀭𑁄𑀢𑀺 𑀅𑀪𑀺𑀳𑀭𑀺𑀢𑀩𑁆𑀩𑀪𑀢𑁆𑀢𑀁.

𑀬𑀫𑀳𑀁 𑀢𑁂𑀦 𑀲𑀫𑀬𑁂𑀦 𑀅𑀚𑁆𑀛𑀸𑀯𑀲𑀸𑀫𑀻𑀢𑀺 𑀬𑀢𑁆𑀣 𑀯𑀲𑀸𑀫𑀺, 𑀢𑀁 𑀏𑀓𑀜𑁆𑀜𑁂𑀯 𑀦𑀕𑀭𑀁 𑀳𑁄𑀢𑀺, 𑀅𑀯𑀲𑁂𑀲𑁂𑀲𑀼 𑀧𑀼𑀢𑁆𑀢𑀥𑀻𑀢𑀸𑀤𑀬𑁄 𑀘𑁂𑀯 𑀤𑀸𑀲𑀫𑀦𑀼𑀲𑁆𑀲𑀸 𑀘 𑀯𑀲𑀺𑀁𑀲𑀼. 𑀧𑀸𑀲𑀸𑀤𑀓𑀽𑀝𑀸𑀕𑀸𑀭𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀮𑁆𑀮𑀗𑁆𑀓𑀸𑀤𑀻𑀲𑀼 𑀏𑀓𑀁𑀬𑁂𑀯 𑀲𑀬𑀁 𑀧𑀭𑀺𑀪𑀼𑀜𑁆𑀚𑀢𑀺, 𑀲𑁂𑀲𑀸 𑀧𑀼𑀢𑁆𑀢𑀸𑀤𑀻𑀦𑀁 𑀧𑀭𑀺𑀪𑁄𑀕𑀸 𑀳𑁄𑀦𑁆𑀢𑀺. 𑀇𑀢𑁆𑀣𑀻𑀲𑀼 𑀏𑀓𑀸𑀯 𑀧𑀘𑁆𑀘𑀼𑀧𑀝𑁆𑀞𑀸𑀢𑀺, 𑀲𑁂𑀲𑀸 𑀧𑀭𑀺𑀯𑀸𑀭𑀫𑀢𑁆𑀢𑀸 𑀳𑁄𑀦𑁆𑀢𑀺. 𑀯𑁂𑀮𑀸𑀫𑀺𑀓𑀸𑀢𑀺 𑀔𑀢𑁆𑀢𑀺𑀬𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀺𑀬𑀸, 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀔𑀢𑁆𑀢𑀺𑀬𑀸𑀦𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀚𑀸𑀢𑀸. 𑀧𑀭𑀺𑀤𑀳𑀸𑀫𑀻𑀢𑀺 ¶ 𑀏𑀓𑀁𑀬𑁂𑀯 𑀤𑀼𑀲𑁆𑀲𑀬𑀼𑀕𑀁 𑀦𑀺𑀯𑀸𑀲𑁂𑀫𑀺, 𑀲𑁂𑀲𑀸𑀦𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀸𑀦𑀁 𑀅𑀲𑀻𑀢𑀺𑀲𑀳𑀲𑁆𑀲𑀸𑀥𑀺𑀓𑀸𑀦𑀁 𑀲𑁄𑀴𑀲𑀦𑁆𑀦𑀁 𑀧𑀼𑀭𑀺𑀲𑀲𑀢𑀲𑀳𑀲𑁆𑀲𑀸𑀦𑀁 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀪𑀼𑀜𑁆𑀚𑀸𑀫𑀻𑀢𑀺 𑀧𑀭𑀫𑀧𑁆𑀧𑀫𑀸𑀡𑁂𑀦 𑀦𑀸𑀴𑀺𑀓𑁄𑀤𑀦𑀫𑀢𑁆𑀢𑀁 𑀪𑀼𑀜𑁆𑀚𑀸𑀫𑀺, 𑀲𑁂𑀲𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀸𑀦𑀁 𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑀸𑀥𑀺𑀓𑀸𑀦𑀁 𑀅𑀝𑁆𑀞𑀦𑁆𑀦𑀁 𑀧𑀼𑀭𑀺𑀲𑀲𑀢𑀲𑀳𑀲𑁆𑀲𑀸𑀦𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀓𑀣𑀸𑀮𑀺𑀧𑀸𑀓𑁄 𑀳𑀺 𑀤𑀲𑀦𑁆𑀦𑀁 𑀚𑀦𑀸𑀦𑀁 𑀧𑀳𑁄𑀢𑀺.

𑀇𑀢𑀺 𑀇𑀫𑀁 𑀫𑀳𑀸𑀲𑀼𑀤𑀲𑁆𑀲𑀦𑀓𑀸𑀮𑁂 𑀲𑀫𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀢𑀲𑁆𑀲𑀸 𑀅𑀦𑀺𑀘𑁆𑀘𑀢𑀁 𑀤𑀲𑁆𑀲𑁂𑀦𑁆𑀢𑁄 𑀇𑀢𑀺 𑀔𑁄 𑀪𑀺𑀓𑁆𑀔𑀽𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀧𑀭𑀺𑀡𑀢𑀸𑀢𑀺 𑀧𑀓𑀢𑀺𑀚𑀳𑀦𑁂𑀦 𑀦𑀺𑀩𑁆𑀩𑀼𑀢𑀧𑀤𑀻𑀧𑁄 𑀯𑀺𑀬 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀁 𑀕𑀢𑀸. 𑀏𑀯𑀁 𑀅𑀦𑀺𑀘𑁆𑀘𑀸 𑀔𑁄 𑀪𑀺𑀓𑁆𑀔𑀼 𑀲𑀗𑁆𑀔𑀸𑀭𑀸𑀢𑀺 𑀏𑀯𑀁 𑀳𑀼𑀢𑁆𑀯𑀸𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀸. 𑀏𑀢𑁆𑀢𑀸𑀯𑀢𑀸 𑀪𑀕𑀯𑀸 𑀬𑀣𑀸 𑀦𑀸𑀫 𑀧𑀼𑀭𑀺𑀲𑁄 𑀲𑀢𑀳𑀢𑁆𑀣𑀼𑀩𑁆𑀩𑁂𑀥𑁂 𑀘𑀫𑁆𑀧𑀓𑀭𑀼𑀓𑁆𑀔𑁂 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀺𑀢𑁆𑀯𑀸 𑀅𑀪𑀺𑀭𑀼𑀳𑀺𑀢𑁆𑀯𑀸 𑀘𑀫𑁆𑀧𑀓𑀧𑀼𑀧𑁆𑀨𑀁 𑀆𑀤𑀸𑀬 𑀦𑀺𑀲𑁆𑀲𑁂𑀡𑀺𑀁 𑀫𑀼𑀜𑁆𑀘𑀦𑁆𑀢𑁄 𑀑𑀢𑀭𑁂𑀬𑁆𑀬, 𑀏𑀯𑀫𑁂𑀯𑀁 𑀦𑀺𑀲𑁆𑀲𑁂𑀡𑀺𑀁 𑀩𑀦𑁆𑀥𑀦𑁆𑀢𑁄 𑀯𑀺𑀬 𑀅𑀦𑁂𑀓𑀯𑀲𑁆𑀲𑀓𑁄𑀝𑀺𑀲𑀢𑀲𑀳𑀲𑁆𑀲𑀼𑀩𑁆𑀩𑁂𑀥𑀁 𑀫𑀳𑀸𑀲𑀼𑀤𑀲𑁆𑀲𑀦𑀲𑀫𑁆𑀧𑀢𑁆𑀢𑀺𑀁 𑀆𑀭𑀼𑀬𑁆𑀳 𑀲𑀫𑁆𑀧𑀢𑁆𑀢𑀺𑀫𑀢𑁆𑀣𑀓𑁂 𑀞𑀺𑀢𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀆𑀤𑀸𑀬 𑀦𑀺𑀲𑁆𑀲𑁂𑀡𑀺𑀁 𑀫𑀼𑀜𑁆𑀘𑀦𑁆𑀢𑁄 𑀯𑀺𑀬 𑀑𑀢𑀺𑀡𑁆𑀡𑁄. 𑀏𑀯𑀁 𑀅𑀤𑁆𑀥𑀼𑀯𑀸𑀢𑀺 𑀏𑀯𑀁 𑀉𑀤𑀓𑀧𑀼𑀩𑁆𑀩𑀼𑀴𑀸𑀤𑀬𑁄 𑀯𑀺𑀬 𑀥𑀼𑀯𑀪𑀸𑀯𑀭𑀳𑀺𑀢𑀸. 𑀏𑀯𑀁 𑀅𑀦𑀲𑁆𑀲𑀸𑀲𑀺𑀓𑀸𑀢𑀺 𑀏𑀯𑀁 𑀲𑀼𑀧𑀺𑀦𑀓𑁂 𑀧𑀻𑀢𑀧𑀸𑀦𑀻𑀬𑀁 𑀯𑀺𑀬 𑀅𑀦𑀼𑀮𑀺𑀢𑁆𑀢𑀘𑀦𑁆𑀤𑀦𑀁 𑀯𑀺𑀬 𑀘 ¶ 𑀅𑀲𑁆𑀲𑀸𑀲𑀯𑀺𑀭𑀳𑀺𑀢𑀸. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀓𑀣𑀺𑀢𑀁. 𑀧𑀜𑁆𑀘𑀫𑁂 𑀲𑀩𑁆𑀩𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀙𑀝𑁆𑀞𑀁 𑀢𑀣𑀸 𑀩𑀼𑀚𑁆𑀛𑀦𑀓𑀲𑁆𑀲 𑀅𑀚𑁆𑀛𑀸𑀲𑀬𑁂𑀦 𑀯𑀼𑀢𑁆𑀢𑀁. 𑀘𑀢𑀼𑀢𑁆𑀣𑀸𑀤𑀻𑀦𑀺.

𑁭. 𑀕𑀤𑁆𑀤𑀼𑀮𑀩𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁯. 𑀲𑀢𑁆𑀢𑀫𑁂 𑀬𑀁 𑀫𑀳𑀸𑀲𑀫𑀼𑀤𑁆𑀤𑁄𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀧𑀜𑁆𑀘𑀫𑁂 𑀲𑀽𑀭𑀺𑀬𑁂 𑀉𑀝𑁆𑀞𑀺𑀢𑁂 𑀫𑀳𑀸𑀲𑀫𑀼𑀤𑁆𑀤𑁄 𑀉𑀲𑁆𑀲𑀼𑀲𑁆𑀲𑀢𑀺. 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀦𑁆𑀢𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀅𑀧𑁆𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀅𑀯𑀺𑀚𑁆𑀚𑀸𑀬 𑀦𑀺𑀯𑀼𑀢𑀸𑀦𑀁𑀬𑁂𑀯 𑀲𑀢𑀁 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀁 𑀧𑀭𑀺𑀘𑁆𑀙𑁂𑀤𑀁 ¶ 𑀦 𑀯𑀤𑀸𑀫𑀺. 𑀲𑀸 𑀕𑀤𑁆𑀤𑀼𑀮𑀩𑀤𑁆𑀥𑁄𑀢𑀺 𑀕𑀤𑁆𑀤𑀼𑀮𑁂𑀦 𑀩𑀤𑁆𑀥𑀲𑀼𑀦𑀔𑁄. 𑀔𑀻𑀮𑁂𑀢𑀺 ¶ 𑀧𑀣𑀯𑀺𑀬𑀁 𑀆𑀓𑁄𑀝𑀺𑀢𑁂 𑀫𑀳𑀸𑀔𑀻𑀮𑁂. 𑀣𑀫𑁆𑀪𑁂𑀢𑀺 𑀦𑀺𑀔𑀡𑀺𑀢𑁆𑀯𑀸 𑀞𑀧𑀺𑀢𑁂 𑀣𑀫𑁆𑀪𑁂. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀲𑀼𑀦𑀔𑁄 𑀯𑀺𑀬 𑀯𑀝𑁆𑀝𑀦𑀺𑀲𑁆𑀲𑀺𑀢𑁄 𑀩𑀸𑀮𑁄, 𑀕𑀤𑁆𑀤𑀼𑀮𑁄 𑀯𑀺𑀬 𑀤𑀺𑀝𑁆𑀞𑀺, 𑀣𑀫𑁆𑀪𑁄 𑀯𑀺𑀬 𑀲𑀓𑁆𑀓𑀸𑀬𑁄, 𑀕𑀤𑁆𑀤𑀼𑀮𑀭𑀚𑁆𑀚𑀼𑀬𑀸 𑀣𑀫𑁆𑀪𑁂 𑀉𑀧𑀦𑀺𑀩𑀤𑁆𑀥𑀲𑀼𑀦𑀔𑀲𑁆𑀲 𑀣𑀫𑁆𑀪𑀸𑀦𑀼𑀧𑀭𑀺𑀯𑀢𑁆𑀢𑀦𑀁 𑀯𑀺𑀬 𑀤𑀺𑀝𑁆𑀞𑀺𑀢𑀡𑁆𑀳𑀸𑀬 𑀲𑀓𑁆𑀓𑀸𑀬𑁂 𑀩𑀤𑁆𑀥𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑀓𑁆𑀓𑀸𑀬𑀸𑀦𑀼𑀧𑀭𑀺𑀯𑀢𑁆𑀢𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀢𑁆𑀢𑀫𑀁.

𑁮. 𑀤𑀼𑀢𑀺𑀬𑀕𑀤𑁆𑀤𑀼𑀮𑀩𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁦. 𑀅𑀝𑁆𑀞𑀫𑁂 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀤𑀺𑀝𑁆𑀞𑀺𑀕𑀤𑁆𑀤𑀼𑀮𑀦𑀺𑀲𑁆𑀲𑀺𑀢𑀸𑀬 𑀢𑀡𑁆𑀳𑀸𑀭𑀚𑁆𑀚𑀼𑀬𑀸 𑀲𑀓𑁆𑀓𑀸𑀬𑀣𑀫𑁆𑀪𑁂 𑀉𑀧𑀦𑀺𑀩𑀤𑁆𑀥𑁄 𑀯𑀝𑁆𑀝𑀦𑀺𑀲𑁆𑀲𑀺𑀢𑁄 𑀩𑀸𑀮𑀧𑀼𑀣𑀼𑀚𑁆𑀚𑀦𑁄 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀲𑀼 𑀔𑀦𑁆𑀥𑀧𑀜𑁆𑀘𑀓𑀁 𑀦𑀺𑀲𑁆𑀲𑀸𑀬𑁂𑀯 𑀧𑀯𑀢𑁆𑀢𑀢𑀺, 𑀬𑀲𑁆𑀫𑀸 𑀯𑀸 𑀤𑀻𑀖𑀭𑀢𑁆𑀢𑀫𑀺𑀤𑀁 𑀘𑀺𑀢𑁆𑀢𑀁 𑀲𑀁𑀓𑀺𑀮𑀺𑀝𑁆𑀞𑀁 𑀭𑀸𑀕𑁂𑀦 𑀤𑁄𑀲𑁂𑀦 𑀫𑁄𑀳𑁂𑀦, 𑀢𑀲𑁆𑀫𑀸. 𑀘𑀺𑀢𑁆𑀢𑀲𑀁𑀓𑀺𑀮𑁂𑀲𑀸𑀢𑀺 𑀲𑀼𑀦𑁆𑀳𑀸𑀢𑀸𑀧𑀺 𑀳𑀺 𑀲𑀢𑁆𑀢𑀸 𑀘𑀺𑀢𑁆𑀢𑀲𑀁𑀓𑀺𑀮𑁂𑀲𑁂𑀦𑁂𑀯 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺, 𑀫𑀮𑀕𑁆𑀕𑀳𑀺𑀢𑀲𑀭𑀻𑀭𑀸𑀧𑀺 𑀘𑀺𑀢𑁆𑀢𑀲𑁆𑀲 𑀯𑁄𑀤𑀸𑀦𑀢𑁆𑀢𑀸 𑀯𑀺𑀲𑀼𑀚𑁆𑀛𑀦𑁆𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀭𑀽𑀧𑀫𑁆𑀳𑀺 𑀲𑀁𑀓𑀺𑀮𑀺𑀝𑁆𑀞𑀫𑁆𑀳𑀺, 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺 𑀫𑀸𑀡𑀯𑀸;

𑀭𑀽𑀧𑁂 𑀲𑀼𑀤𑁆𑀥𑁂 𑀯𑀺𑀲𑀼𑀚𑁆𑀛𑀦𑁆𑀢𑀺, 𑀅𑀦𑀓𑁆𑀔𑀸𑀢𑀁 𑀫𑀳𑁂𑀲𑀺𑀦𑀸.

‘‘𑀘𑀺𑀢𑁆𑀢𑀫𑁆𑀳𑀺 𑀲𑀁𑀓𑀺𑀮𑀺𑀝𑁆𑀞𑀫𑁆𑀳𑀺, 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺 𑀫𑀸𑀡𑀯𑀸;

𑀘𑀺𑀢𑁆𑀢𑁂 𑀲𑀼𑀤𑁆𑀥𑁂 𑀯𑀺𑀲𑀼𑀚𑁆𑀛𑀦𑁆𑀢𑀺, 𑀇𑀢𑀺 𑀯𑀼𑀢𑁆𑀢𑀁 𑀫𑀳𑁂𑀲𑀺𑀦𑀸’’𑀢𑀺.

𑀘𑀭𑀡𑀁 𑀦𑀸𑀫 𑀘𑀺𑀢𑁆𑀢𑀦𑁆𑀢𑀺 𑀯𑀺𑀘𑀭𑀡𑀘𑀺𑀢𑁆𑀢𑀁. 𑀲𑀗𑁆𑀔𑀸 𑀦𑀸𑀫 𑀩𑁆𑀭𑀸𑀳𑁆𑀫𑀡𑀧𑀸𑀲𑀡𑁆𑀟𑀺𑀓𑀸 𑀳𑁄𑀦𑁆𑀢𑀺, 𑀢𑁂 𑀧𑀝𑀓𑁄𑀝𑁆𑀞𑀓𑀁 ¶ 𑀓𑀢𑁆𑀯𑀸 𑀢𑀢𑁆𑀣 𑀦𑀸𑀦𑀧𑁆𑀧𑀓𑀸𑀭𑀸 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀯𑀲𑁂𑀦 𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀬𑁄 𑀮𑁂𑀔𑀸𑀧𑁂𑀢𑁆𑀯𑀸, ‘‘𑀇𑀫𑀁 𑀓𑀫𑁆𑀫𑀁 𑀓𑀢𑁆𑀯𑀸 𑀇𑀤𑀁 𑀧𑀝𑀺𑀮𑀪𑀢𑀺, 𑀇𑀤𑀁 𑀓𑀢𑁆𑀯𑀸 𑀇𑀤’’𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑀸 𑀢𑀁 𑀘𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀺. 𑀘𑀺𑀢𑁆𑀢𑁂𑀦𑁂𑀯 𑀘𑀺𑀢𑁆𑀢𑀺𑀢𑀦𑁆𑀢𑀺 𑀘𑀺𑀢𑁆𑀢𑀓𑀸𑀭𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 𑀓𑀢𑀢𑁆𑀢𑀸 𑀘𑀺𑀢𑁆𑀢𑁂𑀦 𑀘𑀺𑀦𑁆𑀢𑀺𑀢𑀁 𑀦𑀸𑀫. 𑀘𑀺𑀢𑁆𑀢𑀜𑁆𑀜𑁂𑀯 𑀘𑀺𑀢𑁆𑀢𑀢𑀭𑀦𑁆𑀢𑀺 𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑀸𑀬𑀧𑀭𑀺𑀬𑁂𑀲𑀦𑀘𑀺𑀢𑁆𑀢𑀁 𑀢𑀢𑁄𑀧𑀺 𑀘𑀺𑀢𑁆𑀢𑀢𑀭𑀁. 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀡𑀸 𑀘𑀺𑀢𑁆𑀢𑁂𑀦𑁂𑀯 𑀘𑀺𑀢𑁆𑀢𑀺𑀢𑀸𑀢𑀺 𑀓𑀫𑁆𑀫𑀘𑀺𑀢𑁆𑀢𑁂𑀦𑁂𑀯 𑀘𑀺𑀢𑁆𑀢𑀺𑀢𑀸. 𑀢𑀁 𑀧𑀦 𑀓𑀫𑁆𑀫𑀘𑀺𑀢𑁆𑀢𑀁 𑀇𑀫𑁂 𑀯𑀝𑁆𑀝𑀓𑀢𑀺𑀢𑁆𑀢𑀺𑀭𑀸𑀤𑀬𑁄 ‘‘𑀏𑀯𑀁 𑀘𑀺𑀢𑁆𑀢𑀸 𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀆𑀬𑀽𑀳𑀦𑁆𑀢𑀸 𑀦𑀸𑀫 𑀦𑀢𑁆𑀣𑀺. 𑀓𑀫𑁆𑀫𑀁 𑀧𑀦 𑀬𑁄𑀦𑀺𑀁 𑀉𑀧𑀦𑁂𑀢𑀺, 𑀬𑁄𑀦𑀺𑀫𑀽𑀮𑀓𑁄 𑀢𑁂𑀲𑀁 𑀘𑀺𑀢𑁆𑀢𑀪𑀸𑀯𑁄. 𑀬𑁄𑀦𑀺𑀉𑀧𑀕𑀢𑀸 ¶ 𑀳𑀺 𑀲𑀢𑁆𑀢𑀸 𑀢𑀁𑀢𑀁𑀬𑁄𑀦𑀺𑀓𑁂𑀳𑀺 𑀲𑀤𑀺𑀲𑀘𑀺𑀢𑁆𑀢𑀸𑀯 𑀳𑁄𑀦𑁆𑀢𑀺. 𑀇𑀢𑀺 𑀬𑁄𑀦𑀺𑀲𑀺𑀤𑁆𑀥𑁄 𑀘𑀺𑀢𑁆𑀢𑀪𑀸𑀯𑁄, 𑀓𑀫𑁆𑀫𑀲𑀺𑀤𑁆𑀥𑀸 𑀬𑁄𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀧𑀺𑀘 ¶ 𑀘𑀺𑀢𑁆𑀢𑀁 𑀦𑀸𑀫𑁂𑀢𑀁 𑀲𑀳𑀚𑀸𑀢𑀁 𑀲𑀳𑀚𑀸𑀢𑀥𑀫𑁆𑀫𑀘𑀺𑀢𑁆𑀢𑀢𑀸𑀬 𑀪𑀽𑀫𑀺𑀘𑀺𑀢𑁆𑀢𑀢𑀸𑀬 𑀯𑀢𑁆𑀣𑀼𑀘𑀺𑀢𑁆𑀢𑀢𑀸𑀬 𑀤𑁆𑀯𑀸𑀭𑀘𑀺𑀢𑁆𑀢𑀢𑀸𑀬 𑀆𑀭𑀫𑁆𑀫𑀡𑀘𑀺𑀢𑁆𑀢𑀢𑀸𑀬 𑀓𑀫𑁆𑀫𑀦𑀸𑀦𑀢𑁆𑀢𑀫𑀽𑀮𑀓𑀸𑀦𑀁 𑀮𑀺𑀗𑁆𑀕𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀸𑀦𑀢𑁆𑀢𑀯𑁄𑀳𑀸𑀭𑀦𑀸𑀦𑀢𑁆𑀢𑀸𑀤𑀻𑀦𑀁 𑀅𑀦𑁂𑀓𑀯𑀺𑀥𑀸𑀦𑀁 𑀘𑀺𑀢𑁆𑀢𑀸𑀦𑀁 𑀦𑀺𑀧𑁆𑀨𑀸𑀤𑀦𑀢𑀸𑀬𑀧𑀺 𑀢𑀺𑀭𑀘𑁆𑀙𑀸𑀦𑀕𑀢𑀘𑀺𑀢𑁆𑀢𑀢𑁄 𑀘𑀺𑀢𑁆𑀢𑀢𑀭𑀫𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀭𑀚𑀓𑁄𑀢𑀺 𑀯𑀢𑁆𑀣𑁂𑀲𑀼 𑀭𑀗𑁆𑀕𑁂𑀦 𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑀓𑁄. 𑀲𑁄 𑀧𑀦 𑀅𑀙𑁂𑀓𑁄 𑀅𑀫𑀦𑀸𑀧𑀁 𑀭𑀽𑀧𑀁 𑀓𑀭𑁄𑀢𑀺, 𑀙𑁂𑀓𑁄 𑀫𑀦𑀸𑀧𑀁 𑀤𑀲𑁆𑀲𑀦𑀻𑀬𑀁, 𑀏𑀯𑀫𑁂𑀯 𑀧𑀼𑀣𑀼𑀚𑁆𑀚𑀦𑁄 𑀅𑀓𑀼𑀲𑀮𑀘𑀺𑀢𑁆𑀢𑁂𑀦 𑀯𑀸 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀓𑀼𑀲𑀮𑁂𑀦 𑀯𑀸 𑀘𑀓𑁆𑀔𑀼𑀲𑀫𑁆𑀧𑀤𑀸𑀤𑀺𑀯𑀺𑀭𑀳𑀺𑀢𑀁 𑀯𑀺𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀓𑀼𑀲𑀮𑁂𑀦 𑀘𑀓𑁆𑀔𑀼𑀲𑀫𑁆𑀧𑀤𑀸𑀤𑀺𑀲𑀫𑁆𑀧𑀦𑁆𑀦𑀁 𑀅𑀪𑀺𑀭𑀽𑀧𑀁. 𑀅𑀝𑁆𑀞𑀫𑀁.

𑁯. 𑀯𑀸𑀲𑀺𑀚𑀝𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁧. 𑀦𑀯𑀫𑁂 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑀸𑀦𑀻𑀢𑀺 𑀇𑀫𑀸 𑀓𑀡𑁆𑀳𑀧𑀓𑁆𑀔𑀲𑀼𑀓𑁆𑀓𑀧𑀓𑁆𑀔𑀯𑀲𑁂𑀦 𑀤𑁆𑀯𑁂 𑀉𑀧𑀫𑀸 𑀯𑀼𑀢𑁆𑀢𑀸. 𑀢𑀸𑀲𑀼 𑀓𑀡𑁆𑀳𑀧𑀓𑁆𑀔𑀉𑀧𑀫𑀸 𑀅𑀢𑁆𑀣𑀲𑁆𑀲 𑀅𑀲𑀸𑀥𑀺𑀓𑀸, 𑀇𑀢𑀭𑀸 𑀲𑀸𑀥𑀺𑀓𑀸𑀢𑀺. 𑀲𑀼𑀓𑁆𑀓𑀧𑀓𑁆𑀔𑀉𑀧𑀫𑀸𑀬 𑀏𑀯𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀲𑁂𑀬𑁆𑀬𑀣𑀸𑀢𑀺 𑀑𑀧𑀫𑁆𑀫𑀢𑁆𑀣𑁂 𑀦𑀺𑀧𑀸𑀢𑁄, 𑀅𑀧𑀻𑀢𑀺 𑀲𑀫𑁆𑀪𑀸𑀯𑀦𑀢𑁆𑀣𑁂. 𑀉𑀪𑀬𑁂𑀦𑀸𑀧𑀺 𑀲𑁂𑀬𑁆𑀬𑀣𑀸 𑀦𑀸𑀫, 𑀪𑀺𑀓𑁆𑀔𑀯𑁂𑀢𑀺 𑀤𑀲𑁆𑀲𑁂𑀢𑀺. 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑀸𑀦𑀺 𑀅𑀝𑁆𑀞 𑀯𑀸 𑀤𑀲 𑀯𑀸 𑀤𑀲 𑀯𑀸 𑀤𑁆𑀯𑀸𑀤𑀲 𑀯𑀸𑀢𑀺 𑀏𑀢𑁆𑀣 𑀧𑀦 𑀓𑀺𑀜𑁆𑀘𑀸𑀧𑀺 𑀓𑀼𑀓𑁆𑀓𑀼𑀝𑀺𑀬𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁄 𑀊𑀦𑀸𑀥𑀺𑀓𑀸𑀦𑀺𑀧𑀺 𑀅𑀡𑁆𑀟𑀸𑀦𑀺 𑀳𑁄𑀦𑁆𑀢𑀺, 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀬 𑀧𑀦 𑀏𑀯𑀁 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 𑀮𑁄𑀓𑁂 𑀲𑀺𑀮𑀺𑀝𑁆𑀞𑀯𑀘𑀦𑀁 𑀳𑁄𑀢𑀺. 𑀢𑀸𑀦𑀲𑁆𑀲𑀽𑀢𑀺 𑀢𑀸𑀦𑀺 𑀅𑀲𑁆𑀲𑀼, 𑀢𑀸𑀦𑀺 𑀪𑀯𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀓𑀼𑀓𑁆𑀓𑀼𑀝𑀺𑀬𑀸 𑀲𑀫𑁆𑀫𑀸 𑀅𑀥𑀺𑀲𑀬𑀺𑀢𑀸𑀦𑀻𑀢𑀺 𑀢𑀸𑀬 𑀘 𑀚𑀦𑁂𑀢𑁆𑀢𑀺𑀬𑀸 𑀓𑀼𑀓𑁆𑀓𑀼𑀝𑀺𑀬𑀸 𑀧𑀓𑁆𑀔𑁂 𑀧𑀲𑀸𑀭𑁂𑀢𑁆𑀯𑀸 𑀢𑁂𑀲𑀁 𑀉𑀧𑀭𑀺 𑀲𑀬𑀦𑁆𑀢𑀺𑀬𑀸 𑀲𑀫𑁆𑀫𑀸 ¶ 𑀅𑀥𑀺𑀲𑀬𑀺𑀢𑀸𑀦𑀺. 𑀲𑀫𑁆𑀫𑀸 𑀧𑀭𑀺𑀲𑁂𑀤𑀺𑀢𑀸𑀦𑀻𑀢𑀺 𑀓𑀸𑀮𑁂𑀦 𑀓𑀸𑀮𑀁 𑀉𑀢𑀼𑀁 𑀕𑀡𑁆𑀳𑀸𑀧𑁂𑀦𑁆𑀢𑀺𑀬𑀸 𑀲𑀼𑀝𑁆𑀞𑀼 𑀲𑀫𑀦𑁆𑀢𑀢𑁄 𑀲𑁂𑀤𑀺𑀢𑀸𑀦𑀺 𑀉𑀲𑁆𑀫𑀻𑀓𑀢𑀸𑀦𑀺. 𑀲𑀫𑁆𑀫𑀸 𑀧𑀭𑀺𑀪𑀸𑀯𑀺𑀢𑀸𑀦𑀻𑀢𑀺 𑀓𑀸𑀮𑁂𑀦 𑀓𑀸𑀮𑀁 𑀲𑀼𑀝𑁆𑀞𑀼 𑀲𑀫𑀦𑁆𑀢𑀢𑁄 𑀪𑀸𑀯𑀺𑀢𑀸𑀦𑀺, 𑀓𑀼𑀓𑁆𑀓𑀼𑀝𑀕𑀦𑁆𑀥𑀁 𑀕𑀸𑀳𑀸𑀧𑀺𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀓𑀺𑀜𑁆𑀘𑀸𑀧𑀺 𑀢𑀲𑁆𑀲𑀸 𑀓𑀼𑀓𑁆𑀓𑀼𑀝𑀺𑀬𑀸𑀢𑀺 𑀢𑀲𑁆𑀲𑀸 𑀓𑀼𑀓𑁆𑀓𑀼𑀝𑀺𑀬𑀸 𑀇𑀫𑀺𑀦𑀸 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦 𑀅𑀧𑁆𑀧𑀫𑀸𑀤𑀁 𑀓𑀢𑁆𑀯𑀸 𑀓𑀺𑀜𑁆𑀘𑀸𑀧𑀺 𑀦 𑀏𑀯𑀁 𑀇𑀘𑁆𑀙𑀸 𑀉𑀧𑀚𑁆𑀚𑁂𑀬𑁆𑀬. 𑀅𑀣 ¶ 𑀔𑁄 𑀪𑀩𑁆𑀩𑀸𑀯 𑀢𑁂𑀢𑀺 𑀅𑀣 𑀔𑁄 𑀢𑁂 𑀓𑀼𑀓𑁆𑀓𑀼𑀝𑀧𑁄𑀢𑀓𑀸 𑀯𑀼𑀢𑁆𑀢𑀦𑀬𑁂𑀦 𑀲𑁄𑀢𑁆𑀣𑀺𑀦𑀸 𑀅𑀪𑀺𑀦𑀺𑀩𑁆𑀪𑀺𑀚𑁆𑀚𑀺𑀢𑀼𑀁 𑀪𑀩𑁆𑀩𑀸𑀯. 𑀢𑁂 𑀳𑀺 𑀬𑀲𑁆𑀫𑀸 𑀢𑀸𑀬 𑀓𑀼𑀓𑁆𑀓𑀼𑀝𑀺𑀬𑀸 𑀏𑀯𑀁 𑀢𑀻𑀳𑀸𑀓𑀸𑀭𑁂𑀳𑀺 𑀢𑀸𑀦𑀺 𑀅𑀡𑁆𑀟𑀸𑀦𑀺 𑀧𑀭𑀺𑀧𑀸𑀮𑀺𑀬𑀫𑀸𑀦𑀸𑀦𑀺 𑀦 𑀧𑀽𑀢𑀻𑀦𑀺 ¶ 𑀳𑁄𑀦𑁆𑀢𑀺, 𑀬𑁄 𑀦𑁂𑀲𑀁 𑀅𑀮𑁆𑀮𑀲𑀺𑀦𑁂𑀳𑁄, 𑀲𑁄𑀧𑀺 𑀧𑀭𑀺𑀬𑀸𑀤𑀸𑀦𑀁 𑀕𑀘𑁆𑀙𑀢𑀺, 𑀓𑀧𑀸𑀮𑀁 𑀢𑀦𑀼𑀓𑀁 𑀳𑁄𑀢𑀺, 𑀧𑀸𑀤𑀦𑀔𑀲𑀺𑀔𑀸 𑀘 𑀫𑀼𑀔𑀢𑀼𑀡𑁆𑀟𑀓𑀜𑁆𑀘 𑀔𑀭𑀁 𑀳𑁄𑀢𑀺, 𑀲𑀬𑀫𑁆𑀧𑀺 𑀧𑀭𑀺𑀡𑀸𑀫𑀁 𑀕𑀘𑁆𑀙𑀦𑁆𑀢𑀺, 𑀓𑀧𑀸𑀮𑀲𑁆𑀲 𑀢𑀦𑀼𑀢𑁆𑀢𑀸 𑀩𑀳𑀺 𑀆𑀮𑁄𑀓𑁄 𑀅𑀦𑁆𑀢𑁄 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 ‘‘𑀘𑀺𑀭𑀁 𑀯𑀢 𑀫𑀬𑀁 𑀲𑀗𑁆𑀓𑀼𑀝𑀺𑀢𑀳𑀢𑁆𑀣𑀧𑀸𑀤𑀸 𑀲𑀫𑁆𑀩𑀸𑀥𑁂 𑀲𑀬𑀺𑀫𑁆𑀳𑀸, 𑀅𑀬𑀜𑁆𑀘 𑀩𑀳𑀺 𑀆𑀮𑁄𑀓𑁄 𑀤𑀺𑀲𑁆𑀲𑀢𑀺, 𑀏𑀢𑁆𑀣 𑀤𑀸𑀦𑀺 𑀦𑁄 𑀲𑀼𑀔𑀯𑀺𑀳𑀸𑀭𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀦𑀺𑀓𑁆𑀔𑀫𑀺𑀢𑀼𑀓𑀸𑀫𑀸 𑀳𑀼𑀢𑁆𑀯𑀸 𑀓𑀧𑀸𑀮𑀁 𑀧𑀸𑀤𑁂𑀦 𑀧𑀳𑀭𑀦𑁆𑀢𑀺, 𑀕𑀻𑀯𑀁 𑀧𑀲𑀸𑀭𑁂𑀦𑁆𑀢𑀺, 𑀢𑀢𑁄 𑀢𑀁 𑀓𑀧𑀸𑀮𑀁 𑀤𑁆𑀯𑁂𑀥𑀸 𑀪𑀺𑀚𑁆𑀚𑀢𑀺. 𑀅𑀣 𑀢𑁂 𑀧𑀓𑁆𑀔𑁂 𑀯𑀺𑀥𑀼𑀦𑀦𑁆𑀢𑀸 𑀢𑀁𑀔𑀡𑀸𑀦𑀼𑀭𑀽𑀧𑀁 𑀯𑀺𑀭𑀯𑀦𑁆𑀢𑀸 𑀦𑀺𑀓𑁆𑀔𑀫𑀦𑁆𑀢𑀺𑀬𑁂𑀯, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀘 𑀕𑀸𑀫𑀓𑁆𑀔𑁂𑀢𑁆𑀢𑀁 𑀉𑀧𑀲𑁄𑀪𑀬𑀫𑀸𑀦𑀸 𑀯𑀺𑀘𑀭𑀦𑁆𑀢𑀺.

𑀏𑀯𑀫𑁂𑀯 𑀔𑁄𑀢𑀺 𑀇𑀤𑀁 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀁. 𑀢𑀁 𑀏𑀯𑀁 𑀅𑀢𑁆𑀣𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁 𑁋 𑀢𑀲𑁆𑀲𑀸 𑀓𑀼𑀓𑁆𑀓𑀼𑀝𑀺𑀬𑀸 𑀅𑀡𑁆𑀟𑁂𑀲𑀼 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑀁 𑀯𑀺𑀬 𑀳𑀺 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀸𑀯𑀸𑀦𑀼𑀬𑁄𑀕𑀁 𑀅𑀦𑀼𑀬𑀼𑀢𑁆𑀢𑀓𑀸𑀮𑁄, 𑀓𑀼𑀓𑁆𑀓𑀼𑀝𑀺𑀬𑀸 𑀢𑀺𑀯𑀺𑀥𑀓𑀺𑀭𑀺𑀬𑀸𑀲𑀫𑁆𑀧𑀸𑀤𑀦𑁂𑀦 𑀅𑀡𑁆𑀟𑀸𑀦𑀁 𑀅𑀧𑀽𑀢𑀺𑀪𑀸𑀯𑁄 𑀯𑀺𑀬 𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀅𑀧𑀭𑀺𑀳𑀸𑀦𑀺, 𑀢𑀲𑁆𑀲𑀸 𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦 𑀅𑀮𑁆𑀮𑀲𑀺𑀦𑁂𑀳𑀧𑀭𑀺𑀬𑀸𑀤𑀸𑀦𑀁 𑀯𑀺𑀬 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀯𑀺𑀥𑀸𑀦𑀼𑀧𑀲𑁆𑀲𑀦𑀸𑀲𑀫𑁆𑀧𑀸𑀤𑀦𑁂𑀦 𑀪𑀯𑀢𑁆𑀢𑀬𑀸𑀦𑀼𑀕𑀢𑀦𑀺𑀓𑀦𑁆𑀢𑀺𑀲𑀺𑀦𑁂𑀳𑀧𑀭𑀺𑀬𑀸𑀤𑀸𑀦𑀁, 𑀅𑀡𑁆𑀟𑀓𑀧𑀸𑀮𑀸𑀦𑀁 𑀢𑀦𑀼𑀪𑀸𑀯𑁄 𑀯𑀺𑀬 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀲𑁆𑀲 𑀢𑀦𑀼𑀪𑀸𑀯𑁄, 𑀓𑀼𑀓𑁆𑀓𑀼𑀝𑀧𑁄𑀢𑀓𑀸𑀦𑀁 𑀧𑀸𑀤𑀦𑀔𑀲𑀺𑀔𑀫𑀼𑀔𑀢𑀼𑀡𑁆𑀟𑀓𑀸𑀦𑀁 𑀣𑀤𑁆𑀥𑀔𑀭𑀪𑀸𑀯𑁄 𑀯𑀺𑀬 𑀪𑀺𑀓𑁆𑀔𑀼𑀦𑁄 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀢𑀺𑀓𑁆𑀔𑀔𑀭𑀯𑀺𑀧𑁆𑀧𑀲𑀦𑁆𑀦 𑀲𑀽𑀭𑀪𑀸𑀯𑁄, 𑀓𑀼𑀓𑁆𑀓𑀼𑀝𑀧𑁄𑀢𑀓𑀸𑀦𑀁 𑀧𑀭𑀺𑀡𑀸𑀫𑀓𑀸𑀮𑁄 𑀯𑀺𑀬 𑀪𑀺𑀓𑁆𑀔𑀼𑀦𑁄 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀧𑀭𑀺𑀡𑀸𑀫𑀓𑀸𑀮𑁄 𑀯𑀟𑁆𑀠𑀺𑀢𑀓𑀸𑀮𑁄 𑀕𑀩𑁆𑀪𑀕𑁆𑀕𑀳𑀡𑀓𑀸𑀮𑁄, 𑀓𑀼𑀓𑁆𑀓𑀼𑀝𑀧𑁄𑀢𑀓𑀸𑀦𑀁 𑀧𑀸𑀤𑀦𑀔𑀲𑀺𑀔𑀸𑀬 𑀯𑀸 𑀫𑀼𑀔𑀢𑀼𑀡𑁆𑀟𑀓𑁂𑀦 𑀯𑀸 𑀅𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀧𑀓𑁆𑀔𑁂 𑀧𑀧𑁆𑀨𑁄𑀝𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀅𑀪𑀺𑀦𑀺𑀩𑁆𑀪𑀺𑀤𑀸𑀓𑀸𑀮𑁄 𑀯𑀺𑀬 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀧𑀲𑁆𑀲𑀦𑀸𑀜𑀸𑀡𑀕𑀩𑁆𑀪𑀁 𑀕𑀡𑁆𑀳𑀸𑀧𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀲𑁆𑀲 𑀢𑀚𑁆𑀚𑀸𑀢𑀺𑀓𑀁 𑀉𑀢𑀼𑀲𑀧𑁆𑀧𑀸𑀬𑀁 𑀯𑀸 𑀪𑁄𑀚𑀦𑀲𑀧𑁆𑀧𑀸𑀬𑀁 𑀯𑀸 𑀧𑀼𑀕𑁆𑀕𑀮𑀲𑀧𑁆𑀧𑀸𑀬𑀁 𑀯𑀸 𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀸𑀬𑀁 𑀯𑀸 𑀮𑀪𑀺𑀢𑁆𑀯𑀸 𑀏𑀓𑀸𑀲𑀦𑁂 𑀦𑀺𑀲𑀺𑀦𑁆𑀦𑀲𑁆𑀲𑁂𑀯 𑀯𑀺𑀧𑀲𑁆𑀲𑀦𑀁 ¶ 𑀯𑀟𑁆𑀠𑁂𑀦𑁆𑀢𑀲𑁆𑀲 𑀅𑀦𑀼𑀧𑀼𑀩𑁆𑀩𑀸𑀥𑀺𑀕𑀢𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀅𑀪𑀺𑀜𑁆𑀜𑀸𑀧𑀓𑁆𑀔𑁂 𑀧𑀧𑁆𑀨𑁄𑀝𑁂𑀢𑁆𑀯𑀸 𑀲𑁄𑀢𑁆𑀣𑀺𑀦𑀸 𑀅𑀭𑀳𑀢𑁆𑀢𑀧𑀢𑁆𑀢𑀓𑀸𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀧𑀦 𑀓𑀼𑀓𑁆𑀓𑀼𑀝𑀧𑁄𑀢𑀓𑀸𑀦𑀁 ¶ 𑀧𑀭𑀺𑀡𑀢𑀪𑀸𑀯𑀁 𑀜𑀢𑁆𑀯𑀸 𑀫𑀸𑀢𑀸𑀧𑀺 𑀅𑀡𑁆𑀟𑀓𑁄𑀲𑀁 𑀪𑀺𑀦𑁆𑀤𑀢𑀺, 𑀏𑀯𑀁 𑀢𑀣𑀸𑀭𑀽𑀧𑀲𑁆𑀲 𑀪𑀺𑀓𑁆𑀔𑀼𑀦𑁄 𑀜𑀸𑀡𑀧𑀭𑀺𑀧𑀸𑀓𑀁 𑀜𑀢𑁆𑀯𑀸 𑀲𑀢𑁆𑀣𑀸𑀧𑀺 𑁋

‘‘𑀉𑀘𑁆𑀙𑀺𑀦𑁆𑀤 ¶ 𑀲𑀺𑀦𑁂𑀳𑀫𑀢𑁆𑀢𑀦𑁄, 𑀓𑀼𑀫𑀼𑀤𑀁 𑀲𑀸𑀭𑀤𑀺𑀓𑀁𑀯 𑀧𑀸𑀡𑀺𑀦𑀸;

𑀲𑀦𑁆𑀢𑀺𑀫𑀕𑁆𑀕𑀫𑁂𑀯 𑀩𑁆𑀭𑀽𑀳𑀬, 𑀦𑀺𑀩𑁆𑀩𑀸𑀦𑀁 𑀲𑀼𑀕𑀢𑁂𑀦 𑀤𑁂𑀲𑀺𑀢’’𑀦𑁆𑀢𑀺. (𑀥. 𑀧. 𑁨𑁮𑁫) 𑁋

𑀆𑀤𑀺𑀦𑀸 𑀦𑀬𑁂𑀦 𑀑𑀪𑀸𑀲𑀁 𑀨𑀭𑀺𑀢𑁆𑀯𑀸 𑀕𑀸𑀣𑀸𑀬 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀳𑀭𑀢𑀺. 𑀲𑁄 𑀕𑀸𑀣𑀸𑀧𑀭𑀺𑀬𑁄𑀲𑀸𑀦𑁂 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀪𑀺𑀦𑁆𑀤𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀬𑀣𑀸 𑀢𑁂 𑀓𑀼𑀓𑁆𑀓𑀼𑀝𑀧𑁄𑀢𑀓𑀸 𑀕𑀸𑀫𑀓𑁆𑀔𑁂𑀢𑁆𑀢𑀁 𑀉𑀧𑀲𑁄𑀪𑀬𑀫𑀸𑀦𑀸 𑀢𑀢𑁆𑀣 𑀯𑀺𑀘𑀭𑀦𑁆𑀢𑀺, 𑀏𑀯𑀁 𑀅𑀬𑀫𑁆𑀧𑀺 𑀫𑀳𑀸𑀔𑀻𑀡𑀸𑀲𑀯𑁄 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀲𑀗𑁆𑀖𑀸𑀭𑀸𑀫𑀁 𑀉𑀧𑀲𑁄𑀪𑀬𑀫𑀸𑀦𑁄 𑀯𑀺𑀘𑀭𑀢𑀺.

𑀧𑀮𑀕𑀡𑁆𑀟𑀲𑁆𑀲𑀸𑀢𑀺 𑀯𑀟𑁆𑀠𑀓𑀺𑀲𑁆𑀲. 𑀲𑁄 𑀳𑀺 𑀑𑀮𑀫𑁆𑀩𑀓𑀲𑀗𑁆𑀔𑀸𑀢𑀁 𑀧𑀮𑀁 𑀥𑀸𑀭𑁂𑀢𑁆𑀯𑀸 𑀤𑀸𑀭𑀽𑀦𑀁 𑀕𑀡𑁆𑀟𑀁 𑀳𑀭𑀢𑀻𑀢𑀺 𑀧𑀮𑀕𑀡𑁆𑀟𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀸𑀲𑀺𑀚𑀝𑁂𑀢𑀺 𑀯𑀸𑀲𑀺𑀤𑀡𑁆𑀟𑀓𑀲𑁆𑀲 𑀕𑀳𑀡𑀝𑁆𑀞𑀸𑀦𑁂. 𑀏𑀢𑁆𑀢𑀓𑀁 𑀯𑀢 𑀫𑁂 𑀅𑀚𑁆𑀚 𑀆𑀲𑀯𑀸𑀦𑀁 𑀔𑀻𑀡𑀦𑁆𑀢𑀺 𑀧𑀩𑁆𑀩𑀚𑀺𑀢𑀲𑁆𑀲 𑀳𑀺 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑁂𑀧𑁂𑀦 𑀉𑀤𑁆𑀤𑁂𑀲𑁂𑀦 𑀧𑀭𑀺𑀧𑀼𑀘𑁆𑀙𑀸𑀬 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀬𑀸 𑀘 𑀦𑀺𑀘𑁆𑀘𑀓𑀸𑀮𑀁 𑀆𑀲𑀯𑀸 𑀔𑀻𑀬𑀦𑁆𑀢𑀺. 𑀏𑀯𑀁 𑀔𑀻𑀬𑀫𑀸𑀦𑀸𑀦𑀁 𑀧𑀦 𑀢𑁂𑀲𑀁 ‘‘𑀏𑀢𑁆𑀢𑀓𑀁 𑀅𑀚𑁆𑀚 𑀔𑀻𑀡𑀁, 𑀏𑀢𑁆𑀢𑀓𑀁 𑀳𑀺𑀬𑁆𑀬𑁄’’𑀢𑀺 𑀏𑀯𑀫𑀲𑁆𑀲 𑀜𑀸𑀡𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀸𑀬 𑀉𑀧𑀫𑀸𑀬 𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀲𑀁𑀲𑁄 𑀤𑀻𑀧𑀺𑀢𑁄. 𑀳𑁂𑀫𑀦𑁆𑀢𑀺𑀓𑁂𑀦𑀸𑀢𑀺 𑀳𑁂𑀫𑀦𑁆𑀢𑀲𑀫𑀬𑁂𑀦. 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻𑀢𑀺 𑀣𑀺𑀭𑀪𑀸𑀯𑁂𑀦 𑀧𑀭𑀺𑀳𑀸𑀬𑀦𑁆𑀢𑀺.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀫𑀳𑀸𑀲𑀫𑀼𑀤𑁆𑀤𑁄 𑀯𑀺𑀬 𑀲𑀸𑀲𑀦𑀁 𑀤𑀝𑁆𑀞𑀩𑁆𑀩𑀁, 𑀦𑀸𑀯𑀸 𑀯𑀺𑀬 𑀬𑁄𑀕𑀸𑀯𑀘𑀭𑁄, 𑀦𑀸𑀯𑀸𑀬 𑀫𑀳𑀸𑀲𑀫𑀼𑀤𑁆𑀤𑁂 𑀧𑀭𑀺𑀬𑀸𑀤𑀸𑀦𑀁 𑀯𑀺𑀬 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀊𑀦𑀧𑀜𑁆𑀘𑀯𑀲𑁆𑀲𑀓𑀸𑀮𑁂 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀲𑀦𑁆𑀢𑀺𑀓𑁂 𑀯𑀺𑀘𑀭𑀡𑀁, 𑀦𑀸𑀯𑀸𑀬 𑀫𑀳𑀸𑀲𑀫𑀼𑀤𑁆𑀤𑁄𑀤𑀓𑁂𑀦 𑀔𑀚𑁆𑀚𑀫𑀸𑀦𑀸𑀦𑀁 𑀩𑀦𑁆𑀥𑀦𑀸𑀦𑀁 𑀢𑀦𑀼𑀪𑀸𑀯𑁄 𑀯𑀺𑀬 𑀪𑀺𑀓𑁆𑀔𑀼𑀦𑁄 𑀧𑀩𑁆𑀩𑀚𑁆𑀚𑀸𑀲𑀗𑁆𑀔𑁂𑀧𑁂𑀦 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀳𑀺 𑀘𑁂𑀯 𑀲𑀁𑀬𑁄𑀚𑀦𑀸𑀦𑀁 𑀢𑀦𑀼𑀪𑀸𑀯𑁄, 𑀦𑀸𑀯𑀸𑀬 𑀣𑀮𑁂 𑀉𑀓𑁆𑀔𑀺𑀢𑁆𑀢𑀓𑀸𑀮𑁄 ¶ 𑀯𑀺𑀬 𑀪𑀺𑀓𑁆𑀔𑀼𑀦𑁄 𑀦𑀺𑀲𑁆𑀲𑀬𑀫𑀼𑀘𑁆𑀘𑀓𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀅𑀭𑀜𑁆𑀜𑁂 𑀯𑀲𑀦𑀓𑀸𑀮𑁄, 𑀤𑀺𑀯𑀸 𑀯𑀸𑀢𑀸𑀢𑀧𑁂𑀦 𑀲𑀁𑀲𑀼𑀲𑁆𑀲𑀦𑀁 𑀯𑀺𑀬 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀢𑀡𑁆𑀳𑀸𑀲𑁆𑀦𑁂𑀳𑀲𑀁𑀲𑀼𑀲𑁆𑀲𑀦𑀁, 𑀭𑀢𑁆𑀢𑀺𑀁 𑀳𑀺𑀫𑁄𑀤𑀓𑁂𑀦 𑀢𑁂𑀫𑀦𑀁 𑀯𑀺𑀬 𑀓𑀫𑁆𑀫𑀝𑁆𑀞𑀸𑀦𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑁂𑀦 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀦 𑀘𑀺𑀢𑁆𑀢𑀢𑁂𑀫𑀦𑀁, 𑀭𑀢𑁆𑀢𑀺𑀦𑁆𑀤𑀺𑀯𑀁 𑀯𑀸𑀢𑀸𑀢𑀧𑁂𑀦 𑀘𑁂𑀯 𑀳𑀺𑀫𑁄𑀤𑀓𑁂𑀦 𑀘 𑀧𑀭𑀺𑀲𑀼𑀓𑁆𑀔𑀧𑀭𑀺𑀢𑀺𑀦𑁆𑀢𑀸𑀦𑀁 𑀩𑀦𑁆𑀥𑀦𑀸𑀦𑀁 𑀤𑀼𑀩𑁆𑀩𑀮𑀪𑀸𑀯𑁄 𑀯𑀺𑀬 𑀏𑀓𑀤𑀺𑀯𑀲𑀁 𑀉𑀢𑀼𑀲𑀧𑁆𑀧𑀸𑀬𑀸𑀤𑀻𑀦𑀺 𑀮𑀤𑁆𑀥𑀸 𑀯𑀺𑀧𑀲𑁆𑀲𑀦𑀸𑀜𑀸𑀡𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀳𑀺 𑀲𑀁𑀬𑁄𑀚𑀦𑀸𑀦𑀁 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀤𑀼𑀩𑁆𑀩𑀮𑀪𑀸𑀯𑁄, 𑀧𑀸𑀯𑀼𑀲𑁆𑀲𑀓𑀫𑁂𑀖𑁄 𑀯𑀺𑀬 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 ¶ , 𑀫𑁂𑀖𑀯𑀼𑀝𑁆𑀞𑀺𑀉𑀤𑀓𑁂𑀦 𑀦𑀸𑀯𑀸𑀬 𑀩𑀦𑁆𑀥𑁂 𑀧𑀽𑀢𑀺𑀪𑀸𑀯𑁄 𑀯𑀺𑀬 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀲𑁆𑀲 ¶ 𑀭𑀽𑀧𑀲𑀢𑁆𑀢𑀓𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑀲𑁆𑀲 𑀑𑀓𑁆𑀔𑀸𑀬𑀫𑀸𑀦𑁂 𑀧𑀓𑁆𑀔𑀸𑀬𑀫𑀸𑀦𑁂 𑀓𑀫𑁆𑀫𑀝𑁆𑀞𑀸𑀦𑁂 𑀏𑀓𑀤𑀺𑀯𑀲𑀁 𑀉𑀢𑀼𑀲𑀧𑁆𑀧𑀸𑀬𑀸𑀤𑀻𑀦𑀺 𑀮𑀤𑁆𑀥𑀸 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀺𑀦𑁆𑀦𑀲𑁆𑀲 𑀅𑀭𑀳𑀢𑁆𑀢𑀨𑀮𑀸𑀥𑀺𑀕𑀫𑁄, 𑀧𑀽𑀢𑀺𑀩𑀦𑁆𑀥𑀦𑀸𑀯𑀸𑀬 𑀓𑀜𑁆𑀘𑀺 𑀓𑀸𑀮𑀁 𑀞𑀸𑀦𑀁 𑀯𑀺𑀬 𑀔𑀻𑀡𑀲𑀁𑀬𑁄𑀚𑀦𑀲𑁆𑀲 𑀅𑀭𑀳𑀢𑁄 𑀫𑀳𑀸𑀚𑀦𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀬𑀸𑀯𑀢𑀸𑀬𑀼𑀓𑀁 𑀞𑀸𑀦𑀁, 𑀧𑀽𑀢𑀺𑀩𑀦𑁆𑀥𑀦𑀸𑀯𑀸𑀬 𑀅𑀦𑀼𑀧𑀼𑀩𑁆𑀩𑁂𑀦 𑀪𑀺𑀚𑁆𑀚𑀺𑀢𑁆𑀯𑀸 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀽𑀧𑀕𑀫𑁄 𑀯𑀺𑀬 𑀔𑀻𑀡𑀸𑀲𑀯𑀲𑁆𑀲 𑀉𑀧𑀸𑀤𑀺𑀡𑁆𑀡𑀓𑁆𑀔𑀦𑁆𑀥𑀪𑁂𑀤𑁂𑀦 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑀲𑁆𑀲 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀽𑀧𑀕𑀫𑁄𑀢𑀺 𑀇𑀫𑀸𑀬 𑀉𑀧𑀫𑀸𑀬 𑀲𑀁𑀬𑁄𑀚𑀦𑀸𑀦𑀁 𑀤𑀼𑀩𑁆𑀩𑀮𑀢𑀸 𑀤𑀻𑀧𑀺𑀢𑀸. 𑀦𑀯𑀫𑀁.

𑁧𑁦. 𑀅𑀦𑀺𑀘𑁆𑀘𑀲𑀜𑁆𑀜𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁨. 𑀤𑀲𑀫𑁂 𑀅𑀦𑀺𑀘𑁆𑀘𑀲𑀜𑁆𑀜𑀸𑀢𑀺 𑀅𑀦𑀺𑀘𑁆𑀘𑀁 𑀅𑀦𑀺𑀘𑁆𑀘𑀦𑁆𑀢𑀺 𑀪𑀸𑀯𑁂𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀲𑀜𑁆𑀜𑀸. 𑀧𑀭𑀺𑀬𑀸𑀤𑀺𑀬𑀢𑀻𑀢𑀺 𑀔𑁂𑀧𑀬𑀢𑀺. 𑀲𑀩𑁆𑀩𑀁 𑀅𑀲𑁆𑀫𑀺𑀫𑀸𑀦𑀦𑁆𑀢𑀺 𑀦𑀯𑀯𑀺𑀥𑀁 𑀅𑀲𑁆𑀫𑀺𑀫𑀸𑀦𑀁. 𑀫𑀽𑀮𑀲𑀦𑁆𑀢𑀸𑀦𑀓𑀸𑀦𑀻𑀢𑀺 𑀲𑀦𑁆𑀢𑀸𑀦𑁂𑀢𑁆𑀯𑀸 𑀞𑀺𑀢𑀫𑀽𑀮𑀸𑀦𑀺. 𑀫𑀳𑀸𑀦𑀗𑁆𑀕𑀮𑀁 𑀯𑀺𑀬 𑀳𑀺 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀸𑀦𑀺 𑀫𑀽𑀮𑀲𑀦𑁆𑀢𑀸𑀦𑀓𑀸𑀦𑀺 𑀯𑀺𑀬 𑀓𑀺𑀮𑁂𑀲𑀸, 𑀬𑀣𑀸 𑀓𑀲𑁆𑀲𑀓𑁄 𑀓𑀲𑀦𑁆𑀢𑁄 𑀦𑀗𑁆𑀕𑀮𑁂𑀦 𑀢𑀸𑀦𑀺 𑀧𑀤𑀸𑀮𑁂𑀢𑀺, 𑀏𑀯𑀁 𑀬𑁄𑀕𑀻 𑀅𑀦𑀺𑀘𑁆𑀘𑀲𑀜𑁆𑀜𑀁 𑀪𑀸𑀯𑁂𑀦𑁆𑀢𑁄 𑀅𑀦𑀺𑀘𑁆𑀘𑀲𑀜𑁆𑀜𑀸𑀜𑀸𑀡𑁂𑀦 𑀓𑀺𑀮𑁂𑀲𑁂 𑀧𑀤𑀸𑀮𑁂𑀢𑀻𑀢𑀺 𑀇𑀤𑀫𑁂𑀢𑁆𑀣 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁.

𑀑𑀥𑀼𑀦𑀸𑀢𑀻𑀢𑀺 𑀳𑁂𑀝𑁆𑀞𑀸 𑀥𑀼𑀦𑀸𑀢𑀺. 𑀦𑀺𑀤𑁆𑀥𑀼𑀦𑀸𑀢𑀻𑀢𑀺 𑀧𑀧𑁆𑀨𑁄𑀝𑁂𑀢𑀺. 𑀦𑀺𑀘𑁆𑀙𑁄𑀝𑁂𑀢𑀻𑀢𑀺 ¶ 𑀧𑀧𑁆𑀨𑁄𑀝𑁂𑀢𑁆𑀯𑀸 𑀙𑀟𑁆𑀟𑁂𑀢𑀺. 𑀇𑀥𑀸𑀧𑀺 𑀧𑀩𑁆𑀩𑀚𑀸𑀦𑀺 𑀯𑀺𑀬 𑀓𑀺𑀮𑁂𑀲𑀸, 𑀮𑀸𑀬𑀦𑀁 𑀦𑀺𑀘𑁆𑀙𑁄𑀝𑀦𑀁 𑀯𑀺𑀬 𑀅𑀦𑀺𑀘𑁆𑀘𑀲𑀜𑁆𑀜𑀸𑀜𑀸𑀡𑀦𑁆𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀉𑀧𑀫𑀸 𑀲𑀁𑀲𑀦𑁆𑀤𑁂𑀢𑀩𑁆𑀩𑀸.

𑀯𑀡𑁆𑀝𑀘𑁆𑀙𑀺𑀦𑁆𑀦𑀸𑀬𑀸𑀢𑀺 𑀢𑀺𑀡𑁆𑀳𑁂𑀦 𑀔𑀼𑀭𑀧𑁆𑀧𑁂𑀦 𑀯𑀡𑁆𑀝𑀘𑁆𑀙𑀺𑀦𑁆𑀦𑀸𑀬. 𑀢𑀤𑀦𑁆𑀯𑀬𑀸𑀦𑀺 𑀪𑀯𑀦𑁆𑀢𑀻𑀢𑀺 𑀢𑀁 𑀅𑀫𑁆𑀩𑀧𑀺𑀡𑁆𑀟𑀺𑀁 𑀅𑀦𑀼𑀕𑀘𑁆𑀙𑀦𑁆𑀢𑀺, 𑀢𑀲𑁆𑀲𑀸 𑀧𑀢𑀫𑀸𑀦𑀸𑀬 𑀅𑀫𑁆𑀩𑀸𑀦𑀺 𑀪𑀽𑀫𑀺𑀬𑀁 𑀧𑀢𑀦𑁆𑀢𑀺. 𑀇𑀥𑀸𑀧𑀺 𑀅𑀫𑁆𑀩𑀧𑀺𑀡𑁆𑀟𑀺 𑀯𑀺𑀬 𑀓𑀺𑀮𑁂𑀲𑀸, 𑀢𑀺𑀡𑁆𑀳𑀔𑀼𑀭𑀧𑁆𑀧𑁄 𑀯𑀺𑀬 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀬𑀣𑀸 𑀔𑀼𑀭𑀧𑁆𑀧𑁂𑀦 𑀙𑀺𑀦𑁆𑀦𑀸𑀬 𑀅𑀫𑁆𑀩𑀧𑀺𑀡𑁆𑀟𑀺𑀬𑀸 𑀲𑀩𑁆𑀩𑀸𑀦𑀺 𑀅𑀫𑁆𑀩𑀸𑀦𑀺 𑀪𑀽𑀫𑀺𑀬𑀁 𑀧𑀢𑀦𑁆𑀢𑀺, 𑀏𑀯𑀁 𑀅𑀦𑀺𑀘𑁆𑀘𑀲𑀜𑁆𑀜𑀸𑀜𑀸𑀡𑁂𑀦 𑀓𑀺𑀮𑁂𑀲𑀸𑀦𑀁 𑀫𑀽𑀮𑀪𑀽𑀢𑀸𑀬 𑀅𑀯𑀺𑀚𑁆𑀚𑀸𑀬 𑀙𑀺𑀦𑁆𑀦𑀸𑀬 𑀲𑀩𑁆𑀩𑀓𑀺𑀮𑁂𑀲𑀸 𑀲𑀫𑀼𑀕𑁆𑀖𑀸𑀢𑀁 𑀕𑀘𑁆𑀙𑀦𑁆𑀢𑀻𑀢𑀺, 𑀇𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁.

𑀓𑀽𑀝𑀗𑁆𑀕𑀫𑀸𑀢𑀺 𑀓𑀽𑀝𑀁 𑀕𑀘𑁆𑀙𑀦𑁆𑀢𑀺. 𑀓𑀽𑀝𑀦𑀺𑀦𑁆𑀦𑀸𑀢𑀺 𑀓𑀽𑀝𑀁 𑀧𑀯𑀺𑀲𑀦𑀪𑀸𑀯𑁂𑀦 𑀓𑀽𑀝𑁂 𑀦𑀺𑀦𑁆𑀦𑀸. 𑀓𑀽𑀝𑀲𑀫𑁄𑀲𑀭𑀡𑀸𑀢𑀺 𑀓𑀽𑀝𑁂 𑀲𑀫𑁄𑀲𑀭𑀺𑀢𑁆𑀯𑀸 𑀞𑀺𑀢𑀸. 𑀇𑀥𑀸𑀧𑀺 𑀓𑀽𑀝𑀁 𑀯𑀺𑀬 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀕𑁄𑀧𑀸𑀦𑀲𑀺𑀬𑁄 𑀯𑀺𑀬 ¶ 𑀘𑀢𑀼𑀪𑀽𑀫𑀓𑀓𑀼𑀲𑀮𑀥𑀫𑁆𑀫𑀸, 𑀬𑀣𑀸 𑀲𑀩𑁆𑀩𑀕𑁄𑀧𑀸𑀦𑀲𑀻𑀦𑀁 ¶ 𑀓𑀽𑀝𑀁 𑀅𑀕𑁆𑀕𑀁, 𑀏𑀯𑀁 𑀓𑀼𑀲𑀮𑀥𑀫𑁆𑀫𑀸𑀦𑀁 𑀅𑀦𑀺𑀘𑁆𑀘𑀲𑀜𑁆𑀜𑀸 𑀅𑀕𑁆𑀕𑀸. 𑀦𑀦𑀼 𑀘 𑀅𑀦𑀺𑀘𑁆𑀘𑀲𑀜𑁆𑀜𑀸 𑀮𑁄𑀓𑀺𑀬𑀸, 𑀲𑀸 𑀮𑁄𑀓𑀺𑀬𑀓𑀼𑀲𑀮𑀸𑀦𑀁 𑀢𑀸𑀯 𑀅𑀕𑁆𑀕𑀁 𑀳𑁄𑀢𑀼, 𑀮𑁄𑀓𑀼𑀢𑁆𑀢𑀭𑀸𑀦𑀁 𑀓𑀣𑀁 𑀅𑀕𑁆𑀕𑀦𑁆𑀢𑀺? 𑀢𑁂𑀲𑀫𑁆𑀧𑀺 𑀧𑀝𑀺𑀮𑀸𑀪𑀓𑀭𑀡𑀢𑁆𑀣𑁂𑀦 𑀅𑀕𑁆𑀕𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀲𑀩𑁆𑀩𑀸𑀲𑀼 𑀉𑀧𑀫𑀸𑀲𑀼 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀼𑀭𑀺𑀫𑀸𑀳𑀺 𑀧𑀦𑁂𑀢𑁆𑀣 𑀢𑀻𑀳𑀺 𑀅𑀦𑀺𑀘𑁆𑀘𑀲𑀜𑁆𑀜𑀸𑀬 𑀓𑀺𑀘𑁆𑀘𑀁, 𑀧𑀘𑁆𑀙𑀺𑀫𑀸𑀳𑀺 𑀩𑀮𑀦𑁆𑀢𑀺. 𑀤𑀲𑀫𑀁.

𑀧𑀼𑀧𑁆𑀨𑀯𑀕𑁆𑀕𑁄 𑀤𑀲𑀫𑁄.

𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑀓𑁄 𑀲𑀫𑀢𑁆𑀢𑁄.

𑁧𑁧. 𑀅𑀦𑁆𑀢𑀯𑀕𑁆𑀕𑁄

𑁧. 𑀅𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩. 𑀅𑀦𑁆𑀢𑀯𑀕𑁆𑀕𑀲𑁆𑀲 𑀧𑀞𑀫𑁂 𑀅𑀦𑁆𑀢𑀸𑀢𑀺 𑀓𑁄𑀝𑁆𑀞𑀸𑀲𑀸. 𑀇𑀤𑀁 𑀲𑀼𑀢𑁆𑀢𑀁 𑀘𑀢𑀼𑀲𑀘𑁆𑀘𑀯𑀲𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑁂 𑀬𑁄𑀚𑁂𑀢𑁆𑀯𑀸 𑀅𑀦𑁆𑀢𑁄𑀢𑀺 𑀯𑀘𑀦𑁂𑀦 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀞𑀫𑀁.

𑁨-𑁩. 𑀤𑀼𑀓𑁆𑀔𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁪-𑁧𑁦𑁫. 𑀤𑀼𑀢𑀺𑀬𑀫𑁆𑀧𑀺 𑀧𑀜𑁆𑀘𑀓𑁆𑀔𑀦𑁆𑀥𑁂 𑀘𑀢𑀼𑀲𑀘𑁆𑀘𑀯𑀲𑁂𑀦 𑀬𑁄𑀚𑁂𑀢𑁆𑀯𑀸 𑀤𑀼𑀓𑁆𑀔𑀦𑁆𑀢𑀺 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑁂𑀦 𑀓𑀣𑀺𑀢𑀁. 𑀢𑀢𑀺𑀬𑀫𑁆𑀧𑀺 ¶ 𑀢𑀣𑁂𑀯 𑀲𑀓𑁆𑀓𑀸𑀬𑁄𑀢𑀺 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑁂𑀦 𑀓𑀣𑀺𑀢𑀁. 𑀤𑀼𑀢𑀺𑀬𑀢𑀢𑀺𑀬𑀸𑀦𑀺.

𑁪. 𑀧𑀭𑀺𑀜𑁆𑀜𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁬. 𑀘𑀢𑀼𑀢𑁆𑀣𑁂 𑀧𑀭𑀺𑀜𑁆𑀜𑁂𑀬𑁆𑀬𑁂𑀢𑀺 𑀧𑀭𑀺𑀚𑀸𑀦𑀺𑀢𑀩𑁆𑀩𑁂 𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩𑁂. 𑀧𑀭𑀺𑀜𑁆𑀜𑀦𑁆𑀢𑀺 𑀲𑀫𑀢𑀺𑀓𑁆𑀓𑀫𑀁. 𑀧𑀭𑀺𑀜𑁆𑀜𑀸𑀢𑀸𑀯𑀺𑀦𑁆𑀢𑀺 𑀢𑀸𑀬 𑀧𑀭𑀺𑀜𑁆𑀜𑀸𑀬 𑀧𑀭𑀺𑀚𑀸𑀦𑀺𑀢𑁆𑀯𑀸 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀁. 𑀭𑀸𑀕𑀓𑁆𑀔𑀬𑁄𑀢𑀺𑀆𑀤𑀻𑀳𑀺 𑀦𑀺𑀩𑁆𑀩𑀸𑀦𑀁 𑀤𑀲𑁆𑀲𑀺𑀢𑀁. 𑀘𑀢𑀼𑀢𑁆𑀣𑀁.

𑁫-𑁧𑁦. 𑀲𑀫𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁭-𑁧𑁧𑁨. 𑀧𑀜𑁆𑀘𑀫𑀸𑀤𑀻𑀲𑀼 ¶ 𑀘𑀢𑀽𑀲𑀼 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀓𑀣𑀺𑀢𑀸𑀦𑀺. 𑀦𑀯𑀫𑀤𑀲𑀫𑁂𑀲𑀼 𑀓𑀺𑀮𑁂𑀲𑀧𑁆𑀧𑀳𑀸𑀦𑀦𑁆𑀢𑀺. 𑀧𑀜𑁆𑀘𑀫𑀸𑀤𑀻𑀦𑀺.

𑀅𑀦𑁆𑀢𑀯𑀕𑁆𑀕𑁄 𑀏𑀓𑀸𑀤𑀲𑀫𑁄.

𑁧𑁨. 𑀥𑀫𑁆𑀫𑀓𑀣𑀺𑀓𑀯𑀕𑁆𑀕𑁄

𑁧-𑁨. 𑀅𑀯𑀺𑀚𑁆𑀚𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁩-𑁧𑁧𑁪. 𑀥𑀫𑁆𑀫𑀓𑀣𑀺𑀓𑀯𑀕𑁆𑀕𑀲𑁆𑀲 𑀧𑀞𑀫𑁂 ¶ 𑀏𑀢𑁆𑀢𑀸𑀯𑀢𑀸 𑀘 𑀅𑀯𑀺𑀚𑁆𑀚𑀸𑀕𑀢𑁄 𑀳𑁄𑀢𑀻𑀢𑀺 𑀬𑀸𑀯𑀢𑀸 𑀇𑀫𑀸𑀬 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀅𑀜𑁆𑀜𑀸𑀡𑀪𑀽𑀢𑀸𑀬 𑀅𑀯𑀺𑀚𑁆𑀚𑀸𑀬 𑀲𑀫𑀦𑁆𑀦𑀸𑀕𑀢𑁄, 𑀏𑀢𑁆𑀢𑀸𑀯𑀢𑀸 𑀅𑀯𑀺𑀚𑁆𑀚𑀸𑀕𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀞𑀫𑀤𑀼𑀢𑀺𑀬𑀸𑀦𑀺.

𑁩. 𑀥𑀫𑁆𑀫𑀓𑀣𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁫. 𑀢𑀢𑀺𑀬𑁂 𑀧𑀞𑀫𑁂𑀦 𑀥𑀫𑁆𑀫𑀓𑀣𑀺𑀓𑁄, 𑀤𑀼𑀢𑀺𑀬𑁂𑀦 𑀲𑁂𑀔𑀪𑀽𑀫𑀺, 𑀢𑀢𑀺𑀬𑁂𑀦 𑀅𑀲𑁂𑀔𑀪𑀽𑀫𑀻𑀢𑀺 𑀏𑀯𑀁 𑀥𑀫𑁆𑀫𑀓𑀣𑀺𑀓𑀁 𑀧𑀼𑀘𑁆𑀙𑀺𑀢𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀤𑁆𑀯𑁂 𑀪𑀽𑀫𑀺𑀬𑁄 𑀓𑀣𑀺𑀢𑀸. 𑀢𑀢𑀺𑀬𑀁.

𑁪. 𑀤𑀼𑀢𑀺𑀬𑀥𑀫𑁆𑀫𑀓𑀣𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁬. 𑀘𑀢𑀼𑀢𑁆𑀣𑁂 𑀢𑀺𑀲𑁆𑀲𑀦𑁆𑀦𑀫𑁆𑀧𑀺 𑀧𑀼𑀘𑁆𑀙𑀸𑀦𑀁 𑀢𑀻𑀡𑀺 𑀯𑀺𑀲𑁆𑀲𑀚𑁆𑀚𑀦𑀸𑀦𑀺 𑀓𑀣𑀺𑀢𑀸𑀦𑀺. 𑀘𑀢𑀼𑀢𑁆𑀣𑀁.

𑁫-𑁯. 𑀩𑀦𑁆𑀥𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁭-𑁧𑁨𑁧. 𑀧𑀜𑁆𑀘𑀫𑁂 𑀅𑀢𑀻𑀭𑀤𑀲𑁆𑀲𑀻𑀢𑀺 𑀢𑀻𑀭𑀁 𑀯𑀼𑀘𑁆𑀘𑀢𑀺 𑀯𑀝𑁆𑀝𑀁, 𑀢𑀁 𑀦 𑀧𑀲𑁆𑀲𑀢𑀺. 𑀅𑀧𑀸𑀭𑀤𑀲𑁆𑀲𑀻𑀢𑀺 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁, 𑀢𑀁 𑀦 𑀧𑀲𑁆𑀲𑀢𑀺. 𑀩𑀤𑁆𑀥𑁄𑀢𑀺 𑀓𑀺𑀮𑁂𑀲𑀩𑀦𑁆𑀥𑀦𑁂𑀦 𑀩𑀤𑁆𑀥𑁄 𑀳𑀼𑀢𑁆𑀯𑀸 𑀚𑀻𑀬𑀢𑀺 𑀘 𑀫𑀻𑀬𑀢𑀺 ¶ 𑀘 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀁 𑀕𑀘𑁆𑀙𑀢𑀻𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀤𑀼𑀓𑁆𑀔𑀁 𑀓𑀣𑀺𑀢𑀦𑁆𑀢𑀺. 𑀙𑀝𑁆𑀞𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯. 𑀧𑀜𑁆𑀘𑀫𑀸𑀤𑀻𑀦𑀺.

𑁧𑁦. 𑀲𑀻𑀮𑀯𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁨. 𑀤𑀲𑀫𑁂 ¶ 𑀅𑀦𑀺𑀘𑁆𑀘𑀢𑁄𑀢𑀺𑀆𑀤𑀻𑀲𑀼 𑀳𑀼𑀢𑁆𑀯𑀸 𑀅𑀪𑀸𑀯𑀸𑀓𑀸𑀭𑁂𑀦 𑀅𑀦𑀺𑀘𑁆𑀘𑀢𑁄, 𑀧𑀝𑀺𑀧𑀻𑀴𑀦𑀸𑀓𑀸𑀭𑁂𑀦 𑀤𑀼𑀓𑁆𑀔𑀢𑁄, 𑀆𑀩𑀸𑀥𑀝𑁆𑀞𑁂𑀦 𑀭𑁄𑀕𑀢𑁄, 𑀅𑀦𑁆𑀢𑁄𑀤𑁄𑀲𑀝𑁆𑀞𑁂𑀦 𑀕𑀡𑁆𑀟𑀢𑁄, 𑀢𑁂𑀲𑀁 𑀢𑁂𑀲𑀁 𑀕𑀡𑁆𑀟𑀸𑀦𑀁 𑀧𑀘𑁆𑀘𑀬𑀪𑀸𑀯𑁂𑀦 𑀯𑀸 𑀔𑀡𑀦𑀝𑁆𑀞𑁂𑀦 𑀯𑀸 𑀲𑀮𑁆𑀮𑀢𑁄 𑀤𑀼𑀓𑁆𑀔𑀝𑁆𑀞𑁂𑀦 𑀅𑀖𑀢𑁄, 𑀯𑀺𑀲𑀪𑀸𑀕𑀫𑀳𑀸𑀪𑀽𑀢𑀲𑀫𑀼𑀝𑁆𑀞𑀸𑀦𑀆𑀩𑀸𑀥𑀧𑀘𑁆𑀘𑀬𑀝𑁆𑀞𑁂𑀦 𑀆𑀩𑀸𑀥𑀢𑁄, 𑀅𑀲𑀓𑀝𑁆𑀞𑁂𑀦 𑀧𑀭𑀢𑁄, 𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀧𑀮𑁄𑀓𑀢𑁄 ¶ , 𑀲𑀢𑁆𑀢𑀲𑀼𑀜𑁆𑀜𑀢𑀝𑁆𑀞𑁂𑀦 𑀲𑀼𑀜𑁆𑀜𑀢𑁄, 𑀅𑀢𑁆𑀢𑀸𑀪𑀸𑀯𑁂𑀦 𑀅𑀦𑀢𑁆𑀢𑀢𑁄. 𑀏𑀯𑀫𑁂𑀢𑁆𑀣 ‘‘𑀅𑀦𑀺𑀘𑁆𑀘𑀢𑁄 𑀧𑀮𑁄𑀓𑀢𑁄’’𑀢𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀅𑀦𑀺𑀘𑁆𑀘𑀫𑀦𑀲𑀺𑀓𑀸𑀭𑁄, ‘‘𑀲𑀼𑀜𑁆𑀜𑀢𑁄 𑀅𑀦𑀢𑁆𑀢𑀢𑁄’’𑀢𑀺 𑀤𑁆𑀯𑀻𑀳𑀺 𑀅𑀦𑀢𑁆𑀢𑀫𑀦𑀲𑀺𑀓𑀸𑀭𑁄, 𑀲𑁂𑀲𑁂𑀳𑀺 𑀤𑀼𑀓𑁆𑀔𑀫𑀦𑀲𑀺𑀓𑀸𑀭𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀤𑀲𑀫𑀁.

𑁧𑁧. 𑀲𑀼𑀢𑀯𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁩. 𑀢𑀣𑀸 𑀏𑀓𑀸𑀤𑀲𑀫𑁂. 𑀤𑀲𑀫𑀲𑁆𑀫𑀺𑀜𑁆𑀳𑀺 ‘‘𑀲𑀻𑀮𑀯𑀢𑀸’’𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀯𑀼𑀢𑁆𑀢𑀁, 𑀇𑀥 𑀲𑀼𑀢𑀯𑀢𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀲𑀼𑀢𑀁 𑀇𑀤𑀫𑁂𑀯 𑀦𑀸𑀦𑀸𑀓𑀭𑀡𑀁. 𑀏𑀓𑀸𑀤𑀲𑀫𑀁.

𑁧𑁨-𑁧𑁩. 𑀓𑀧𑁆𑀧𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁨𑁪-𑁧𑁨𑁫. 𑀤𑁆𑀯𑀸𑀤𑀲𑀫𑀢𑁂𑀭𑀲𑀫𑀸𑀦𑀺 𑀭𑀸𑀳𑀼𑀮𑁄𑀯𑀸𑀤𑀲𑀤𑀺𑀲𑀸𑀦𑁂𑀯𑀸𑀢𑀺. 𑀤𑁆𑀯𑀸𑀤𑀲𑀫𑀢𑁂𑀭𑀲𑀫𑀸𑀦𑀺.

𑀥𑀫𑁆𑀫𑀓𑀣𑀺𑀓𑀯𑀕𑁆𑀕𑁄 𑀤𑁆𑀯𑀸𑀤𑀲𑀫𑁄.

𑁧𑁩. 𑀅𑀯𑀺𑀚𑁆𑀚𑀸𑀯𑀕𑁆𑀕𑁄

𑁧-𑁧𑁦. 𑀲𑀫𑀼𑀤𑀬𑀥𑀫𑁆𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁨𑁬-𑁧𑁩𑁫. 𑀅𑀯𑀺𑀚𑁆𑀚𑀸𑀯𑀕𑁆𑀕𑁄 ¶ 𑀉𑀢𑁆𑀢𑀸𑀦𑀢𑁆𑀣𑁄𑀯. 𑀇𑀫𑀲𑁆𑀫𑀺𑀜𑁆𑀳𑀺 𑀯𑀕𑁆𑀕𑁂 𑀲𑀩𑁆𑀩𑀲𑀼𑀢𑁆𑀢𑁂𑀲𑀼 𑀘𑀢𑀼𑀲𑀘𑁆𑀘𑀫𑁂𑀯 𑀓𑀣𑀺𑀢𑀁.

𑀅𑀯𑀺𑀚𑁆𑀚𑀸𑀯𑀕𑁆𑀕𑁄 𑀢𑁂𑀭𑀲𑀫𑁄.

𑁧𑁪. 𑀓𑀼𑀓𑁆𑀓𑀼𑀴𑀯𑀕𑁆𑀕𑁄

𑁧-𑁧𑁩. 𑀓𑀼𑀓𑁆𑀓𑀼𑀴𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁩𑁬-𑁧𑁪𑁯. 𑀓𑀼𑀓𑁆𑀓𑀼𑀴𑀯𑀕𑁆𑀕𑀲𑁆𑀲 𑀧𑀞𑀫𑁂 𑀓𑀼𑀓𑁆𑀓𑀼𑀴𑀦𑁆𑀢𑀺 𑀲𑀦𑁆𑀢𑀢𑁆𑀢𑀁 𑀆𑀤𑀺𑀢𑁆𑀢𑀁 𑀙𑀸𑀭𑀺𑀓𑀭𑀸𑀲𑀺𑀁 𑀯𑀺𑀬 𑀫𑀳𑀸𑀧𑀭𑀺𑀴𑀸𑀳𑀁. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀤𑀼𑀓𑁆𑀔𑀮𑀓𑁆𑀔𑀡𑀁 𑀓𑀣𑀺𑀢𑀁, 𑀲𑁂𑀲𑁂𑀲𑀼 𑀅𑀦𑀺𑀘𑁆𑀘𑀮𑀓𑁆𑀔𑀡𑀸𑀤𑀻𑀦𑀺. 𑀲𑀩𑁆𑀩𑀸𑀦𑀺 𑀘𑁂𑀢𑀸𑀦𑀺 𑀧𑀸𑀝𑀺𑀬𑁂𑀓𑁆𑀓𑀁 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁂𑀦 𑀓𑀣𑀺𑀢𑀸𑀦𑀻𑀢𑀺.

𑀓𑀼𑀓𑁆𑀓𑀼𑀴𑀯𑀕𑁆𑀕𑁄 𑀘𑀼𑀤𑁆𑀤𑀲𑀫𑁄.

𑁧𑁫. 𑀤𑀺𑀝𑁆𑀞𑀺𑀯𑀕𑁆𑀕𑁄

𑁧-𑁯. 𑀅𑀚𑁆𑀛𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁫𑁦-𑁧𑁫𑁮. 𑀤𑀺𑀝𑁆𑀞𑀺𑀯𑀕𑁆𑀕𑀲𑁆𑀲 ¶ ¶ 𑀧𑀞𑀫𑁂 𑀓𑀺𑀁 𑀉𑀧𑀸𑀤𑀸𑀬𑀸𑀢𑀺 𑀓𑀺𑀁 𑀧𑀝𑀺𑀘𑁆𑀘. 𑀤𑀼𑀢𑀺𑀬𑁂 𑀓𑀺𑀁 𑀅𑀪𑀺𑀦𑀺𑀯𑀺𑀲𑁆𑀲𑀸𑀢𑀺 ¶ 𑀓𑀺𑀁 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸, 𑀧𑀘𑁆𑀘𑀬𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀢𑀢𑀺𑀬𑀸𑀤𑀻𑀲𑀼 𑀤𑀺𑀝𑁆𑀞𑀻𑀢𑀺𑀆𑀤𑀻𑀦𑀺 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁂𑀦 𑀯𑀼𑀢𑁆𑀢𑀸𑀦𑀺. 𑀧𑀞𑀫𑀸𑀤𑀻𑀦𑀺.

𑁧𑁦. 𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁯. 𑀤𑀲𑀫𑁂 𑀉𑀧𑀲𑀗𑁆𑀓𑀫𑀻𑀢𑀺 𑀅𑀜𑁆𑀜𑁂 𑀪𑀺𑀓𑁆𑀔𑀽 𑀧𑀜𑁆𑀘𑀓𑁆𑀔𑀦𑁆𑀥𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀸𑀧𑁂𑀢𑁆𑀯𑀸 𑀬𑀼𑀜𑁆𑀚𑀺𑀢𑁆𑀯𑀸 𑀖𑀝𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀅𑀜𑁆𑀜𑀁 𑀩𑁆𑀬𑀸𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀅𑀳𑀫𑁆𑀧𑀺 𑀧𑀜𑁆𑀘𑀓𑁆𑀔𑀦𑁆𑀥𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀸𑀧𑁂𑀢𑁆𑀯𑀸 𑀬𑀼𑀜𑁆𑀚𑀦𑁆𑀢𑁄 𑀖𑀝𑁂𑀦𑁆𑀢𑁄, 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀅𑀜𑁆𑀜𑀁 𑀩𑁆𑀬𑀸𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺. 𑀲𑀢𑁆𑀣𑀸 𑀧𑀦 𑀅𑀢𑁆𑀢𑀦𑁄 𑀥𑀭𑀫𑀸𑀦𑀓𑀸𑀮𑁂 𑀣𑁂𑀭𑀲𑁆𑀲 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀯𑀚𑁆𑀛𑀸𑀦𑀁 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀁 𑀅𑀧𑀲𑁆𑀲𑀦𑁆𑀢𑁄𑀧𑀺 ‘‘𑀇𑀫𑀲𑁆𑀲 𑀘𑀺𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀓𑀣𑁂𑀲𑀺. 𑀢𑀲𑁆𑀲𑀸𑀧𑀺 𑀏𑀓𑀁 𑀤𑁆𑀯𑁂 𑀯𑀸𑀭𑁂 𑀫𑀦𑀲𑀺 𑀓𑀢𑁆𑀯𑀸𑀯 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀯𑁂𑀮𑀸 𑀚𑀸𑀢𑀸𑀢𑀺 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺. 𑀇𑀢𑀺𑀲𑁆𑀲 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑀫𑀸𑀦𑁄 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀥𑀫𑁆𑀫𑁄𑀯 𑀲𑁄 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑁄 𑀚𑀸𑀢𑁄𑀢𑀺. 𑀤𑀲𑀫𑀁.

𑀤𑀺𑀝𑁆𑀞𑀺𑀯𑀕𑁆𑀕𑁄 𑀧𑀦𑁆𑀦𑀭𑀲𑀫𑁄.

𑀉𑀧𑀭𑀺𑀧𑀡𑁆𑀡𑀸𑀲𑀓𑁄 𑀲𑀫𑀢𑁆𑀢𑁄.

𑀔𑀦𑁆𑀥𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀭𑀸𑀥𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧. 𑀫𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁦. 𑀭𑀸𑀥𑀲𑀁𑀬𑀼𑀢𑁆𑀢𑀲𑁆𑀲 ¶ ¶ 𑀧𑀞𑀫𑁂 𑀫𑀸𑀭𑁄 𑀯𑀸 𑀅𑀲𑁆𑀲𑀸𑀢𑀺 𑀫𑀭𑀡𑀁 𑀯𑀸 𑀪𑀯𑁂𑀬𑁆𑀬. 𑀫𑀸𑀭𑁂𑀢𑀸 𑀯𑀸𑀢𑀺 𑀫𑀸𑀭𑁂𑀢𑀩𑁆𑀩𑁄 𑀯𑀸. 𑀬𑁄 𑀯𑀸 𑀧𑀦 𑀫𑀻𑀬𑀢𑀻𑀢𑀺 𑀬𑁄 𑀯𑀸 𑀧𑀦 𑀫𑀭𑀢𑀺. 𑀦𑀺𑀩𑁆𑀩𑀺𑀤𑀢𑁆𑀣𑀦𑁆𑀢𑀺 𑀦𑀺𑀩𑁆𑀩𑀺𑀤𑀸𑀜𑀸𑀡𑀢𑁆𑀣𑀁. 𑀦𑀺𑀩𑁆𑀩𑀸𑀦𑀢𑁆𑀣𑀸𑀢𑀺 𑀨𑀮𑀯𑀺𑀫𑀼𑀢𑁆𑀢𑀺 𑀦𑀸𑀫𑁂𑀲𑀸 𑀅𑀦𑀼𑀧𑀸𑀤𑀸𑀦𑀺𑀩𑁆𑀩𑀸𑀦𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀅𑀘𑁆𑀘𑀬𑀸𑀲𑀻𑀢𑀺 ¶ 𑀅𑀢𑀺𑀓𑁆𑀓𑀦𑁆𑀢𑁄𑀲𑀺. 𑀦𑀺𑀩𑁆𑀩𑀸𑀦𑁄𑀕𑀥𑀦𑁆𑀢𑀺 𑀦𑀺𑀩𑁆𑀩𑀸𑀦𑁂 𑀧𑀢𑀺𑀝𑁆𑀞𑀺𑀢𑀁. 𑀇𑀤𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑀸𑀫 𑀦𑀺𑀩𑁆𑀩𑀸𑀦𑀩𑁆𑀪𑀦𑁆𑀢𑀭𑁂 𑀯𑀼𑀲𑁆𑀲𑀢𑀺, 𑀦 𑀦𑀺𑀩𑁆𑀩𑀸𑀦𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀅𑀲𑁆𑀲 𑀧𑀭𑀺𑀬𑁄𑀲𑀸𑀦𑀁, 𑀦𑀺𑀧𑁆𑀨𑀢𑁆𑀢𑀺 𑀦𑀺𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀧𑀞𑀫𑀁.

𑁨-𑁧𑁦. 𑀲𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁬𑁧-𑁧𑁬𑁯. 𑀤𑀼𑀢𑀺𑀬𑁂 𑀲𑀢𑁆𑀢𑁄 𑀲𑀢𑁆𑀢𑁄𑀢𑀺 𑀮𑀕𑁆𑀕𑀧𑀼𑀘𑁆𑀙𑀸. 𑀢𑀢𑁆𑀭 𑀲𑀢𑁆𑀢𑁄 𑀢𑀢𑁆𑀭 𑀯𑀺𑀲𑀢𑁆𑀢𑁄𑀢𑀺 𑀢𑀢𑁆𑀭 𑀮𑀕𑁆𑀕𑁄 𑀢𑀢𑁆𑀭 𑀯𑀺𑀮𑀕𑁆𑀕𑁄. 𑀧𑀁𑀲𑁆𑀯𑀸𑀕𑀸𑀭𑀓𑁂𑀳𑀻𑀢𑀺 𑀧𑀁𑀲𑀼𑀖𑀭𑀓𑁂𑀳𑀺. 𑀓𑁂𑀴𑀸𑀬𑀦𑁆𑀢𑀻𑀢𑀺 𑀓𑀻𑀴𑀦𑁆𑀢𑀺. 𑀥𑀦𑀸𑀬𑀦𑁆𑀢𑀻𑀢𑀺 𑀥𑀦𑀁 𑀯𑀺𑀬 𑀫𑀜𑁆𑀜𑀦𑁆𑀢𑀺. 𑀫𑀫𑀸𑀬𑀦𑁆𑀢𑀻𑀢𑀺 ‘‘𑀫𑀫 𑀇𑀤𑀁, 𑀫𑀫 𑀇𑀤’’𑀦𑁆𑀢𑀺 𑀫𑀫𑀢𑁆𑀢𑀁 𑀓𑀭𑁄𑀦𑁆𑀢𑀺, 𑀅𑀜𑁆𑀜𑀲𑁆𑀲 𑀨𑀼𑀲𑀺𑀢𑀼𑀫𑁆𑀧𑀺 𑀦 𑀤𑁂𑀦𑁆𑀢𑀺. 𑀯𑀺𑀓𑀻𑀴𑀦𑀺𑀬𑀁 𑀓𑀭𑁄𑀦𑁆𑀢𑀻𑀢𑀺 ‘‘𑀦𑀺𑀝𑁆𑀞𑀺𑀢𑀸 𑀓𑀻𑀴𑀸’’𑀢𑀺 𑀢𑁂 𑀪𑀺𑀦𑁆𑀤𑀫𑀸𑀦𑀸 𑀓𑀻𑀴𑀸𑀯𑀺𑀕𑀫𑀁 𑀓𑀭𑁄𑀦𑁆𑀢𑀺. 𑀢𑀢𑀺𑀬𑁂 𑀪𑀯𑀦𑁂𑀢𑁆𑀢𑀻𑀢𑀺 𑀪𑀯𑀭𑀚𑁆𑀚𑀼. 𑀘𑀢𑀼𑀢𑁆𑀣𑀁 𑀉𑀢𑁆𑀢𑀸𑀦𑀫𑁂𑀯. 𑀧𑀜𑁆𑀘𑀫𑀸𑀤𑀻𑀲𑀼 𑀘𑀢𑀽𑀲𑀼 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀓𑀣𑀺𑀢𑀸𑀦𑀺, 𑀤𑁆𑀯𑀻𑀲𑀼 𑀓𑀺𑀮𑁂𑀲𑀧𑁆𑀧𑀳𑀸𑀦𑀦𑁆𑀢𑀺. 𑀤𑀼𑀢𑀺𑀬𑀸𑀤𑀻𑀦𑀺.

𑀧𑀞𑀫𑁄 𑀯𑀕𑁆𑀕𑁄.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧-𑁧𑁨. 𑀫𑀸𑀭𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁭𑁦-𑁧𑁮𑁧. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 ¶ 𑀧𑀞𑀫𑁂 𑀫𑀸𑀭𑁄, 𑀫𑀸𑀭𑁄𑀢𑀺 𑀫𑀭𑀡𑀁 𑀧𑀼𑀘𑁆𑀙𑀢𑀺. 𑀬𑀲𑁆𑀫𑀸 𑀧𑀦 𑀭𑀽𑀧𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀁 𑀫𑀭𑀡𑀁 𑀦𑀸𑀫 𑀦𑀢𑁆𑀣𑀺, 𑀢𑁂𑀦𑀲𑁆𑀲 𑀪𑀕𑀯𑀸 𑀭𑀽𑀧𑀁 𑀔𑁄, 𑀭𑀸𑀥, 𑀫𑀸𑀭𑁄𑀢𑀺𑀆𑀤𑀺𑀫𑀸𑀳 ¶ . 𑀤𑀼𑀢𑀺𑀬𑁂 𑀫𑀸𑀭𑀥𑀫𑁆𑀫𑁄𑀢𑀺 𑀫𑀭𑀡𑀥𑀫𑁆𑀫𑁄. 𑀏𑀢𑁂𑀦𑀼𑀧𑀸𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀤𑀼𑀢𑀺𑀬𑁄 𑀯𑀕𑁆𑀕𑁄.

𑁩-𑁪. 𑀆𑀬𑀸𑀘𑀦𑀯𑀕𑁆𑀕𑀸𑀤𑀺

𑁧-𑁧𑁧. 𑀫𑀸𑀭𑀸𑀤𑀺𑀲𑀼𑀢𑁆𑀢𑀏𑀓𑀸𑀤𑀲𑀓𑀯𑀡𑁆𑀡𑀦𑀸

𑁧𑁮𑁨-𑁨𑁦𑁫. 𑀢𑀢𑁄 ¶ 𑀧𑀭𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀅𑀬𑀜𑁆𑀳𑀺 𑀭𑀸𑀥𑀢𑁆𑀣𑁂𑀭𑁄 𑀧𑀝𑀺𑀪𑀸𑀦𑀺𑀬𑀢𑁆𑀣𑁂𑀭𑁄 𑀦𑀸𑀫. 𑀢𑀣𑀸𑀕𑀢𑀲𑁆𑀲 𑀇𑀫𑀁 𑀣𑁂𑀭𑀁 𑀤𑀺𑀲𑁆𑀯𑀸 𑀲𑀼𑀔𑀼𑀫𑀁 𑀓𑀸𑀭𑀡𑀁 𑀉𑀧𑀝𑁆𑀞𑀸𑀢𑀺. 𑀢𑁂𑀦𑀲𑁆𑀲 𑀪𑀕𑀯𑀸 𑀦𑀸𑀦𑀸𑀦𑀬𑁂𑀳𑀺 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀏𑀯𑀁 𑀇𑀫𑀲𑁆𑀫𑀺𑀁 𑀭𑀸𑀥𑀲𑀁𑀬𑀼𑀢𑁆𑀢𑁂 𑀆𑀤𑀺𑀢𑁄 𑀤𑁆𑀯𑁂 𑀯𑀕𑁆𑀕𑀸 𑀧𑀼𑀘𑁆𑀙𑀸𑀯𑀲𑁂𑀦 𑀤𑁂𑀲𑀺𑀢𑀸, 𑀢𑀢𑀺𑀬𑁄 𑀆𑀬𑀸𑀘𑀦𑁂𑀦, 𑀘𑀢𑀼𑀢𑁆𑀣𑁄 𑀉𑀧𑀦𑀺𑀲𑀺𑀦𑁆𑀦𑀓𑀓𑀣𑀸𑀯𑀲𑁂𑀦. 𑀲𑀓𑀮𑀫𑁆𑀧𑀺 𑀧𑀦𑁂𑀢𑀁 𑀭𑀸𑀥𑀲𑀁𑀬𑀼𑀢𑁆𑀢𑀁 𑀣𑁂𑀭𑀲𑁆𑀲 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀥𑀫𑁆𑀫𑀯𑀲𑁂𑀦𑁂𑀯 𑀕𑀳𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀭𑀸𑀥𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀤𑀺𑀝𑁆𑀞𑀺𑀲𑀁𑀬𑀼𑀢𑁆𑀢𑀁

𑁧. 𑀲𑁄𑀢𑀸𑀧𑀢𑁆𑀢𑀺𑀯𑀕𑁆𑀕𑁄

𑁧. 𑀯𑀸𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁬. 𑀤𑀺𑀝𑁆𑀞𑀺𑀲𑀁𑀬𑀼𑀢𑁆𑀢𑁂 ¶ ¶ 𑀦 𑀯𑀸𑀢𑀸 𑀯𑀸𑀬𑀦𑁆𑀢𑀻𑀢𑀺𑀆𑀤𑀻𑀲𑀼 𑀏𑀯𑀁 𑀓𑀺𑀭 𑀢𑁂𑀲𑀁 𑀤𑀺𑀝𑁆𑀞𑀺 𑁋 ‘‘𑀬𑁂𑀧𑀺 𑀏𑀢𑁂 𑀭𑀼𑀓𑁆𑀔𑀲𑀸𑀔𑀸𑀤𑀻𑀦𑀺 𑀪𑀜𑁆𑀚𑀦𑁆𑀢𑀸 𑀯𑀸𑀢𑀸 𑀯𑀸𑀬𑀦𑁆𑀢𑀺, 𑀦 𑀏𑀢𑁂 𑀯𑀸𑀢𑀸, 𑀯𑀸𑀢𑀮𑁂𑀲𑁄 𑀦𑀸𑀫𑁂𑀲𑁄, 𑀯𑀸𑀢𑁄 𑀧𑀦 𑀏𑀲𑀺𑀓𑀢𑁆𑀣𑀫𑁆𑀪𑁄 𑀯𑀺𑀬 𑀧𑀩𑁆𑀩𑀢𑀓𑀽𑀝𑀁 𑀯𑀺𑀬 𑀘 𑀞𑀺𑀢𑁄. 𑀢𑀣𑀸 𑀬𑀸𑀧𑀺 𑀏𑀢𑀸 𑀢𑀺𑀡𑀓𑀝𑁆𑀞𑀸𑀤𑀻𑀦𑀺 𑀯𑀳𑀦𑁆𑀢𑀺𑀬𑁄 𑀦𑀤𑀺𑀬𑁄 𑀲𑀦𑁆𑀤𑀦𑁆𑀢𑀺, 𑀦 𑀏𑀢𑁆𑀣 𑀉𑀤𑀓𑀁 𑀲𑀦𑁆𑀤𑀓𑀺, 𑀉𑀤𑀓𑀮𑁂𑀲𑁄 𑀦𑀸𑀫𑁂𑀲, 𑀉𑀤𑀓𑀁 𑀧𑀦 𑀏𑀲𑀺𑀓𑀢𑁆𑀣𑀫𑁆𑀪𑁄 𑀯𑀺𑀬 𑀧𑀩𑁆𑀩𑀢𑀓𑀽𑀝𑀁 𑀯𑀺𑀬 𑀘 𑀞𑀺𑀢𑀁. 𑀬𑀸𑀧𑀺𑀫𑀸 𑀕𑀩𑁆𑀪𑀺𑀦𑀺𑀬𑁄 𑀯𑀺𑀚𑀸𑀬𑀦𑁆𑀢𑀻𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺, 𑀓𑀺𑀜𑁆𑀘𑀸𑀧𑀺 𑀢𑀸 𑀫𑀺𑀮𑀸𑀢𑀼𑀤𑀭𑀸 𑀳𑁄𑀦𑁆𑀢𑀺, 𑀕𑀩𑁆𑀪𑁄 𑀧𑀦 𑀦 𑀦𑀺𑀓𑁆𑀔𑀫𑀢𑀺, 𑀕𑀩𑁆𑀪𑀮𑁂𑀲𑁄 𑀦𑀸𑀫𑁂𑀲𑁄, 𑀕𑀩𑁆𑀪𑁄 𑀧𑀦 𑀏𑀲𑀺𑀓𑀢𑁆𑀣𑀫𑁆𑀪𑁄 𑀯𑀺𑀬 𑀧𑀩𑁆𑀩𑀢𑀓𑀽𑀝𑀁 𑀯𑀺𑀬 𑀘 𑀞𑀺𑀢𑁄. 𑀬𑁂𑀧𑀺 𑀏𑀢𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀉𑀤𑁂𑀦𑁆𑀢𑀺 𑀯𑀸 𑀅𑀧𑁂𑀦𑁆𑀢𑀺 𑀯𑀸, 𑀦𑁂𑀯 𑀢𑁂 𑀉𑀤𑁂𑀦𑁆𑀢𑀺 𑀦 𑀅𑀧𑁂𑀦𑁆𑀢𑀺, 𑀘𑀦𑁆𑀤𑀺𑀫𑀲𑀽𑀭𑀺𑀬𑀮𑁂𑀲𑁄 𑀦𑀸𑀫𑁂𑀲, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀧𑀦 𑀏𑀲𑀺𑀓𑀢𑁆𑀣𑀫𑁆𑀪𑁄 𑀯𑀺𑀬 𑀧𑀩𑁆𑀩𑀢𑀓𑀽𑀝𑀁 𑀯𑀺𑀬 𑀘 𑀞𑀺𑀢𑀸’’𑀢𑀺.

𑁨-𑁪. 𑀏𑀢𑀁𑀫𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁦𑁭-𑁨𑁦𑁯. 𑀤𑀺𑀝𑁆𑀞𑀦𑁆𑀢𑀺𑀆𑀤𑀻𑀲𑀼 𑀤𑀺𑀝𑁆𑀞𑀁 𑀭𑀽𑀧𑀸𑀬𑀢𑀦𑀁. 𑀲𑀼𑀢𑀁 𑀲𑀤𑁆𑀤𑀸𑀬𑀢𑀦𑀁. 𑀫𑀼𑀢𑀁 𑀕𑀦𑁆𑀥𑀸𑀬𑀢𑀦𑀁 𑀭𑀲𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁. 𑀢𑀜𑁆𑀳𑀺 𑀧𑀢𑁆𑀯𑀸 𑀕𑀳𑁂𑀢𑀩𑁆𑀩𑀢𑁄 𑀫𑀼𑀢𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀅𑀯𑀲𑁂𑀲𑀸𑀦𑀺 𑀲𑀢𑁆𑀢𑀸𑀬𑀢𑀦𑀸𑀦𑀺 𑀯𑀺𑀜𑁆𑀜𑀸𑀢𑀁 𑀦𑀸𑀫. 𑀧𑀢𑁆𑀢𑀦𑁆𑀢𑀺 𑀧𑀭𑀺𑀬𑁂𑀲𑀺𑀢𑁆𑀯𑀸 𑀯𑀸 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀯𑀸 𑀧𑀢𑁆𑀢𑀁. 𑀧𑀭𑀺𑀬𑁂𑀲𑀺𑀢𑀦𑁆𑀢𑀺 𑀧𑀢𑁆𑀢𑀁 𑀯𑀸 𑀅𑀧𑀢𑁆𑀢𑀁 ¶ 𑀯𑀸 𑀧𑀭𑀺𑀬𑁂𑀲𑀺𑀢𑀁. 𑀅𑀦𑀼𑀯𑀺𑀘𑀭𑀺𑀢𑀁 𑀫𑀦𑀲𑀸𑀢𑀺 𑀘𑀺𑀢𑁆𑀢𑁂𑀦 𑀅𑀦𑀼𑀲𑀜𑁆𑀘𑀭𑀺𑀢𑀁. 𑀮𑁄𑀓𑀲𑁆𑀫𑀺𑀜𑁆𑀳𑀺 𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀫𑁆𑀧𑀺 𑀅𑀢𑁆𑀣𑀺, 𑀧𑀭𑀺𑀬𑁂𑀲𑀺𑀢𑁆𑀯𑀸 𑀦𑁄𑀧𑀢𑁆𑀢𑀫𑁆𑀧𑀺, 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀫𑁆𑀧𑀺, 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀦𑁄𑀧𑀢𑁆𑀢𑀫𑁆𑀧𑀺. 𑀢𑀢𑁆𑀣 𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀁 𑀧𑀢𑁆𑀢𑀁 𑀦𑀸𑀫, 𑀧𑀭𑀺𑀬𑁂𑀲𑀺𑀢𑁆𑀯𑀸 𑀦𑁄𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢𑀁 𑀦𑀸𑀫 ¶ . 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀜𑁆𑀘 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀦𑁄𑀧𑀢𑁆𑀢𑀜𑁆𑀘 𑀫𑀦𑀲𑀸𑀦𑀼𑀯𑀺𑀘𑀭𑀺𑀢𑀁 𑀦𑀸𑀫. 𑀅𑀣 𑀯𑀸 𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀫𑁆𑀧𑀺 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀫𑁆𑀧𑀺 𑀧𑀢𑁆𑀢𑀝𑁆𑀞𑁂𑀦 𑀧𑀢𑁆𑀢𑀁 𑀦𑀸𑀫, 𑀧𑀭𑀺𑀬𑁂𑀲𑀺𑀢𑁆𑀯𑀸 𑀦𑁄𑀧𑀢𑁆𑀢𑀫𑁂𑀯 𑀧𑀭𑀺𑀬𑁂𑀲𑀺𑀢𑀁 𑀦𑀸𑀫, 𑀅𑀧𑀭𑀺𑀬𑁂𑀲𑀺𑀢𑁆𑀯𑀸 𑀦𑁄𑀧𑀢𑁆𑀢𑀁 𑀫𑀦𑀲𑀸𑀦𑀼𑀯𑀺𑀘𑀭𑀺𑀢𑀁 𑀦𑀸𑀫. 𑀲𑀩𑁆𑀩𑀁 𑀯𑀸 𑀏𑀢𑀁 𑀫𑀦𑀲𑀸 𑀅𑀦𑀼𑀯𑀺𑀘𑀭𑀺𑀢𑀫𑁂𑀯.

𑁫. 𑀦𑀢𑁆𑀣𑀺𑀤𑀺𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁦. 𑀦𑀢𑁆𑀣𑀺 ¶ 𑀤𑀺𑀦𑁆𑀦𑀦𑁆𑀢𑀺𑀆𑀤𑀻𑀲𑀼 𑀦𑀢𑁆𑀣𑀺 𑀤𑀺𑀦𑁆𑀦𑀦𑁆𑀢𑀺 𑀤𑀺𑀦𑁆𑀦𑀲𑁆𑀲 𑀨𑀮𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺. 𑀬𑀺𑀝𑁆𑀞𑀁 𑀯𑀼𑀘𑁆𑀘𑀢𑀺 𑀫𑀳𑀸𑀬𑀸𑀕𑁄. 𑀳𑀼𑀢𑀦𑁆𑀢𑀺 𑀧𑀳𑁂𑀡𑀓𑀲𑀓𑁆𑀓𑀸𑀭𑁄 𑀅𑀥𑀺𑀧𑁆𑀧𑁂𑀢𑁄. 𑀢𑀫𑁆𑀧𑀺 𑀉𑀪𑀬𑀁 𑀨𑀮𑀸𑀪𑀸𑀯𑀫𑁂𑀯 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀦𑁆𑀢𑀺. 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀦𑁆𑀢𑀺 𑀲𑀼𑀓𑀢𑀤𑀼𑀓𑁆𑀓𑀢𑀸𑀦𑀁, 𑀓𑀼𑀲𑀮𑀸𑀓𑀼𑀲𑀮𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀨𑀮𑀁 𑀯𑀺𑀧𑀸𑀓𑁄𑀢𑀺 𑀬𑀁 𑀨𑀮𑀦𑁆𑀢𑀺 𑀯𑀸 𑀯𑀺𑀧𑀸𑀓𑁄𑀢𑀺 𑀯𑀸 𑀯𑀼𑀘𑁆𑀘𑀢𑀺, 𑀢𑀁 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀺. 𑀦𑀢𑁆𑀣𑀺 𑀅𑀬𑀁 𑀮𑁄𑀓𑁄𑀢𑀺 𑀧𑀭𑀮𑁄𑀓𑁂 𑀞𑀺𑀢𑀲𑁆𑀲 𑀅𑀬𑀁 𑀮𑁄𑀓𑁄 𑀦𑀢𑁆𑀣𑀺. 𑀦𑀢𑁆𑀣𑀺 𑀧𑀭𑁄 𑀮𑁄𑀓𑁄𑀢𑀺 𑀇𑀥 𑀮𑁄𑀓𑁂 𑀞𑀺𑀢𑀲𑁆𑀲𑀧𑀺 𑀧𑀭𑁄 𑀮𑁄𑀓𑁄 𑀦𑀢𑁆𑀣𑀺, 𑀲𑀩𑁆𑀩𑁂 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑀺. 𑀦𑀢𑁆𑀣𑀺 𑀫𑀸𑀢𑀸 𑀦𑀢𑁆𑀣𑀺 𑀧𑀺𑀢𑀸𑀢𑀺 𑀢𑁂𑀲𑀼 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀻𑀦𑀁 𑀨𑀮𑀸𑀪𑀸𑀯𑀯𑀲𑁂𑀦 𑀯𑀤𑀦𑁆𑀢𑀺. 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸𑀢𑀺 𑀘𑀯𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀓𑀲𑀢𑁆𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀺. 𑀦𑀢𑁆𑀣𑀺 𑀮𑁄𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺 𑀮𑁄𑀓𑁂 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀯𑀤𑀦𑁆𑀢𑀺.

𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄𑀢𑀺 𑀘𑀢𑀼𑀫𑀳𑀸𑀪𑀽𑀢𑀫𑀬𑁄. 𑀧𑀣𑀯𑀻 𑀧𑀣𑀯𑀻𑀓𑀸𑀬𑀦𑁆𑀢𑀺 𑀅𑀚𑁆𑀛𑀢𑁆𑀢𑀺𑀓𑀸 𑀧𑀣𑀯𑀻𑀥𑀸𑀢𑀼 𑀩𑀸𑀳𑀺𑀭𑀁 𑀧𑀣𑀯𑀻𑀥𑀸𑀢𑀼𑀁. 𑀅𑀦𑀼𑀧𑁂𑀢𑀻𑀢𑀺 𑀅𑀦𑀼𑀬𑀸𑀢𑀺. 𑀅𑀦𑀼𑀧𑀕𑀘𑁆𑀙𑀢𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀅𑀦𑀼𑀕𑀘𑁆𑀙𑀢𑀻𑀢𑀺𑀧𑀺 𑀅𑀢𑁆𑀣𑁄. 𑀉𑀪𑀬𑁂𑀦𑀸𑀧𑀺 𑀉𑀧𑁂𑀢𑀺 𑀉𑀧𑀕𑀘𑁆𑀙𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑀺. 𑀆𑀧𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺 𑀫𑀦𑀘𑁆𑀙𑀝𑁆𑀞𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺. 𑀲𑀗𑁆𑀓𑀫𑀦𑁆𑀢𑀻𑀢𑀺 ¶ 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀦𑁆𑀢𑀺. 𑀆𑀲𑀦𑁆𑀤𑀺𑀧𑀜𑁆𑀘𑀫𑀸𑀢𑀺 𑀦𑀺𑀧𑀦𑁆𑀦𑀫𑀜𑁆𑀘𑁂𑀦 𑀧𑀜𑁆𑀘𑀫𑀸, 𑀫𑀜𑁆𑀘𑁄 𑀘𑁂𑀯, 𑀘𑀢𑁆𑀢𑀸𑀭𑁄 𑀫𑀜𑁆𑀘𑀧𑀸𑀤𑁂 𑀕𑀳𑁂𑀢𑁆𑀯𑀸 𑀞𑀺𑀢𑀸 𑀘𑀢𑁆𑀢𑀸𑀭𑁄 𑀧𑀼𑀭𑀺𑀲𑀸 𑀘𑀸𑀢𑀺 𑀅𑀢𑁆𑀣𑁄. 𑀬𑀸𑀯 𑀆𑀴𑀸𑀳𑀦𑀸𑀢𑀺 𑀬𑀸𑀯 𑀲𑀼𑀲𑀸𑀦𑀸. 𑀧𑀤𑀸𑀦𑀻𑀢𑀺 ‘‘𑀅𑀬𑀁 𑀏𑀯𑀁 𑀲𑀻𑀮𑀯𑀸 𑀅𑀳𑁄𑀲𑀺, 𑀏𑀯𑀁 𑀤𑀼𑀲𑁆𑀲𑀻𑀮𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀸𑀦𑀺 𑀕𑀼𑀡𑀸𑀕𑀼𑀡𑀧𑀤𑀸𑀦𑀺. 𑀲𑀭𑀻𑀭𑀫𑁂𑀯 𑀯𑀸 𑀏𑀢𑁆𑀣 𑀧𑀤𑀸𑀦𑀻𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀓𑀸𑀧𑁄𑀢𑀓𑀸𑀦𑀻𑀢𑀺 𑀓𑀧𑁄𑀢𑀓𑀯𑀡𑁆𑀡𑀸𑀦𑀺, 𑀧𑀸𑀭𑀸𑀯𑀢𑀧𑀓𑁆𑀔𑀯𑀡𑁆𑀡𑀸𑀦𑀻𑀢𑀺 𑀅𑀢𑁆𑀣𑁄. 𑀪𑀲𑁆𑀲𑀦𑁆𑀢𑀸𑀢𑀺 𑀪𑀲𑁆𑀫𑀦𑁆𑀢𑀸. 𑀅𑀬𑀫𑁂𑀯 𑀯𑀸 𑀧𑀸𑀴𑀺. 𑀆𑀳𑀼𑀢𑀺𑀬𑁄𑀢𑀺 𑀬𑀁 𑀧𑀳𑁂𑀡𑀓𑀲𑀓𑁆𑀓𑀸𑀭𑀸𑀤𑀺𑀪𑁂𑀤𑀁 𑀤𑀺𑀦𑁆𑀦𑀤𑀸𑀦𑀁, 𑀲𑀩𑁆𑀩𑀁 𑀢𑀁 𑀙𑀸𑀭𑀺𑀓𑀸𑀯𑀲𑀸𑀦𑀫𑁂𑀯 𑀳𑁄𑀢𑀺, 𑀦 𑀢𑀢𑁄 𑀧𑀭𑀁 𑀨𑀮𑀤𑀸𑀬𑀓𑀁 𑀳𑀼𑀢𑁆𑀯𑀸 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀤𑀢𑁆𑀢𑀼𑀧𑀜𑁆𑀜𑀢𑁆𑀢𑀦𑁆𑀢𑀺 ¶ 𑀤𑀢𑁆𑀢𑀽𑀳𑀺 𑀩𑀸𑀮𑀫𑀦𑀼𑀲𑁆𑀲𑁂𑀳𑀺 𑀧𑀜𑁆𑀜𑀢𑁆𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀩𑀸𑀮𑁂𑀳𑀺 𑀅𑀩𑀼𑀤𑁆𑀥𑀻𑀳𑀺 𑀧𑀜𑁆𑀜𑀢𑁆𑀢𑀫𑀺𑀤𑀁 𑀤𑀸𑀦𑀁, 𑀦 𑀧𑀡𑁆𑀟𑀺𑀢𑁂𑀳𑀺. 𑀩𑀸𑀮𑀸 𑀤𑁂𑀦𑁆𑀢𑀺, 𑀧𑀡𑁆𑀟𑀺𑀢𑀸 𑀕𑀡𑁆𑀳𑀦𑁆𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑀺.

𑁬. 𑀓𑀭𑁄𑀢𑁄𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁧. 𑀓𑀭𑁄𑀢𑁄𑀢𑀺 ¶ 𑀲𑀳𑀢𑁆𑀣𑀸 𑀓𑀭𑁄𑀦𑁆𑀢𑀲𑁆𑀲. 𑀓𑀸𑀭𑀬𑀢𑁄𑀢𑀺 𑀆𑀡𑀢𑁆𑀢𑀺𑀬𑀸 𑀓𑀸𑀭𑁂𑀦𑁆𑀢𑀲𑁆𑀲. 𑀙𑀺𑀦𑁆𑀤𑀢𑁄𑀢𑀺 𑀧𑀭𑁂𑀲𑀁 𑀳𑀢𑁆𑀣𑀸𑀤𑀻𑀦𑀺 𑀙𑀺𑀦𑁆𑀤𑀦𑁆𑀢𑀲𑁆𑀲. 𑀙𑁂𑀤𑀸𑀧𑀬𑀢𑁄𑀢𑀺 𑀧𑀭𑁂𑀳𑀺 𑀙𑁂𑀤𑀸𑀧𑁂𑀦𑁆𑀢𑀲𑁆𑀲. 𑀧𑀘𑀢𑁄𑀢𑀺 𑀤𑀡𑁆𑀟𑁂𑀦 𑀧𑀻𑀴𑁂𑀦𑁆𑀢𑀲𑁆𑀲. 𑀧𑀘𑀸𑀧𑀬𑀢𑁄𑀢𑀺 𑀧𑀭𑁂𑀳𑀺 𑀤𑀡𑁆𑀟𑀸𑀤𑀺𑀦𑀸 𑀧𑀻𑀴𑀸𑀧𑁂𑀦𑁆𑀢𑀲𑁆𑀲. 𑀲𑁄𑀘𑀢𑁄 𑀲𑁄𑀘𑀸𑀧𑀬𑀢𑁄𑀢𑀺 𑀧𑀭𑀲𑁆𑀲 𑀪𑀡𑁆𑀟𑀳𑀭𑀡𑀸𑀤𑀻𑀳𑀺 𑀲𑁄𑀓𑀁 𑀲𑀬𑀁 𑀓𑀭𑁄𑀦𑁆𑀢𑀲𑁆𑀲𑀸𑀧𑀺 𑀧𑀭𑁂𑀳𑀺 𑀓𑀸𑀭𑁂𑀦𑁆𑀢𑀲𑁆𑀲𑀸𑀧𑀺. 𑀓𑀺𑀮𑀫𑀢𑁄 𑀓𑀺𑀮𑀫𑀸𑀧𑀬𑀢𑁄𑀢𑀺 𑀆𑀳𑀸𑀭𑀼𑀧𑀘𑁆𑀙𑁂𑀤𑀩𑀦𑁆𑀥𑀦𑀸𑀕𑀸𑀭𑀧𑀯𑁂𑀲𑀦𑀸𑀤𑀻𑀳𑀺 𑀲𑀬𑀁 𑀓𑀺𑀮𑀫𑁂𑀦𑁆𑀢𑀲𑁆𑀲𑀧𑀺 𑀧𑀭𑁂𑀳𑀺 𑀓𑀺𑀮𑀫𑀸𑀧𑁂𑀦𑁆𑀢𑀲𑁆𑀲𑀧𑀺. 𑀨𑀦𑁆𑀤𑀢𑁄 𑀨𑀦𑁆𑀤𑀸𑀧𑀬𑀢𑁄𑀢𑀺 𑀧𑀭𑀁 𑀨𑀦𑁆𑀤𑀦𑁆𑀢𑀁 𑀨𑀦𑁆𑀤𑀦𑀓𑀸𑀮𑁂 𑀲𑀬𑀫𑁆𑀧𑀺 𑀨𑀦𑁆𑀤𑀢𑁄 𑀧𑀭𑁂𑀫𑁆𑀧𑀺 𑀨𑀦𑁆𑀤𑀸𑀧𑀬𑀢𑁄. 𑀧𑀸𑀡𑀫𑀢𑀺𑀧𑀸𑀢𑀬𑀢𑁄𑀢𑀺 ¶ 𑀧𑀸𑀡𑀁 𑀳𑀦𑀦𑁆𑀢𑀲𑁆𑀲𑀧𑀺 𑀳𑀦𑀸𑀧𑁂𑀦𑁆𑀢𑀲𑁆𑀲𑀧𑀺. 𑀏𑀯𑀁 𑀲𑀩𑁆𑀩𑀢𑁆𑀣 𑀓𑀭𑀡𑀓𑀸𑀭𑀸𑀧𑀦𑀯𑀲𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀦𑁆𑀥𑀺𑀦𑁆𑀢𑀺 𑀖𑀭𑀲𑀦𑁆𑀥𑀺𑀁. 𑀦𑀺𑀮𑁆𑀮𑁄𑀧𑀦𑁆𑀢𑀺 𑀫𑀳𑀸𑀯𑀺𑀮𑁄𑀧𑀁. 𑀏𑀓𑀸𑀕𑀸𑀭𑀺𑀓𑀦𑁆𑀢𑀺 𑀏𑀓𑀫𑁂𑀯 𑀖𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀯𑀺𑀮𑀼𑀫𑁆𑀧𑀦𑀁. 𑀧𑀭𑀺𑀧𑀦𑁆𑀣𑁂 𑀢𑀺𑀝𑁆𑀞𑀢𑁄𑀢𑀺 𑀆𑀕𑀢𑀸𑀕𑀢𑀸𑀦𑀁 𑀅𑀘𑁆𑀙𑀺𑀦𑁆𑀤𑀦𑀢𑁆𑀣𑀁 𑀫𑀕𑁆𑀕𑁂 𑀢𑀺𑀝𑁆𑀞𑀢𑁄. 𑀓𑀭𑁄𑀢𑁄 𑀦 𑀓𑀭𑀻𑀬𑀢𑀺 𑀧𑀸𑀧𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀧𑀸𑀧𑀁 𑀓𑀭𑁄𑀫𑀻𑀢𑀺 𑀲𑀜𑁆𑀜𑀸𑀬 𑀓𑀭𑁄𑀢𑁄𑀧𑀺 𑀧𑀸𑀧𑀁 𑀦 𑀓𑀭𑀻𑀬𑀢𑀺, 𑀦𑀢𑁆𑀣𑀺 𑀧𑀸𑀧𑀁. 𑀲𑀢𑁆𑀢𑀸 𑀧𑀦 𑀓𑀭𑁄𑀫𑀸𑀢𑀺 𑀏𑀯𑀁𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀻𑀢𑀺 𑀤𑀻𑀧𑁂𑀦𑁆𑀢𑀺. 𑀔𑀼𑀭𑀧𑀭𑀺𑀬𑀦𑁆𑀢𑁂𑀦𑀸𑀢𑀺 𑀔𑀼𑀭𑀦𑁂𑀫𑀺𑀦𑀸, 𑀔𑀼𑀭𑀥𑀸𑀭𑀲𑀤𑀺𑀲𑀧𑀭𑀺𑀬𑀦𑁆𑀢𑁂𑀦 𑀯𑀸. 𑀏𑀓𑀫𑀁𑀲𑀔𑀮𑀦𑁆𑀢𑀺 𑀏𑀓𑀫𑀁𑀲𑀭𑀸𑀲𑀺𑀁. 𑀧𑀼𑀜𑁆𑀚𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀢𑀢𑁄𑀦𑀺𑀤𑀸𑀦𑀦𑁆𑀢𑀺 𑀏𑀓𑀫𑀁𑀲𑀔𑀮𑀓𑀭𑀡𑀦𑀺𑀤𑀸𑀦𑀁.

𑀤𑀓𑁆𑀔𑀺𑀡𑀦𑁆𑀢𑀺 𑀤𑀓𑁆𑀔𑀺𑀡𑀢𑀻𑀭𑁂 𑀫𑀦𑀼𑀲𑁆𑀲𑀸 𑀓𑀓𑁆𑀔𑀴𑀸 𑀤𑀸𑀭𑀼𑀡𑀸, 𑀢𑁂 𑀲𑀦𑁆𑀥𑀸𑀬 𑀳𑀦𑀦𑁆𑀢𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀢𑁆𑀢𑀭𑀦𑁆𑀢𑀺 𑀉𑀢𑁆𑀢𑀭𑀢𑀻𑀭𑁂 𑀲𑀤𑁆𑀥𑀸 𑀳𑁄𑀦𑁆𑀢𑀺 𑀧𑀲𑀦𑁆𑀦𑀸 𑀩𑀼𑀤𑁆𑀥𑀫𑀸𑀫𑀓𑀸 𑀥𑀫𑁆𑀫𑀫𑀸𑀫𑀓𑀸 𑀲𑀗𑁆𑀖𑀫𑀸𑀫𑀓𑀸, 𑀢𑁂 𑀲𑀦𑁆𑀥𑀸𑀬 𑀤𑀤𑀦𑁆𑀢𑁄𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀚𑀦𑁆𑀢𑁄𑀢𑀺 𑀫𑀳𑀸𑀬𑀸𑀕𑀁 𑀓𑀭𑁄𑀦𑁆𑀢𑁄. 𑀤𑀫𑁂𑀦𑀸𑀢𑀺 𑀇𑀦𑁆𑀤𑁆𑀭𑀺𑀬𑀤𑀫𑁂𑀦 𑀉𑀧𑁄𑀲𑀣𑀓𑀫𑁆𑀫𑁂𑀦. 𑀲𑀁𑀬𑀫𑁂𑀦𑀸𑀢𑀺 𑀲𑀻𑀮𑀲𑀁𑀬𑀫𑁂𑀦. 𑀲𑀘𑁆𑀘𑀯𑀚𑁆𑀚𑁂𑀦𑀸𑀢𑀺 𑀲𑀘𑁆𑀘𑀯𑀘𑀦𑁂𑀦. 𑀆𑀕𑀫𑁄𑀢𑀺 𑀆𑀕𑀫𑀦𑀁, 𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀣𑀸𑀧𑀺 𑀧𑀸𑀧𑀧𑀼𑀜𑁆𑀜𑀸𑀦𑀁 𑀓𑀺𑀭𑀺𑀬𑀫𑁂𑀯 𑀧𑀝𑀺𑀓𑁆𑀔𑀺𑀧𑀦𑁆𑀢𑀺.

𑁭. 𑀳𑁂𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁨. 𑀦𑀢𑁆𑀣𑀺 ¶ ¶ 𑀳𑁂𑀢𑀼 𑀦𑀢𑁆𑀣𑀺 𑀧𑀘𑁆𑀘𑀬𑁄𑀢𑀺 𑀏𑀢𑁆𑀣 𑀧𑀘𑁆𑀘𑀬𑁄𑀢𑀺 𑀳𑁂𑀢𑀼𑀯𑁂𑀯𑀘𑀦𑀫𑁂𑀯. 𑀉𑀪𑀬𑁂𑀦𑀸𑀧𑀺 𑀯𑀺𑀚𑁆𑀚𑀫𑀸𑀦𑀫𑁂𑀯 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀲𑀁𑀓𑀺𑀮𑁂𑀲𑀧𑀘𑁆𑀘𑀬𑀁, 𑀓𑀸𑀬𑀲𑀼𑀘𑀭𑀺𑀢𑀸𑀤𑀻𑀦𑀜𑁆𑀘 𑀯𑀺𑀲𑀼𑀤𑁆𑀥𑀺𑀧𑀘𑁆𑀘𑀬𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀺. 𑀦𑀢𑁆𑀣𑀺 𑀩𑀮𑀦𑁆𑀢𑀺 𑀬𑀫𑁆𑀳𑀺 𑀅𑀢𑁆𑀢𑀦𑁄 𑀩𑀮𑁂 𑀧𑀢𑀺𑀝𑁆𑀞𑀺𑀢𑀸 𑀇𑀫𑁂 𑀲𑀢𑁆𑀢𑀸 𑀤𑁂𑀯𑀢𑁆𑀢𑀫𑁆𑀧𑀺 𑀫𑀸𑀭𑀢𑁆𑀢𑀫𑁆𑀧𑀺 𑀩𑁆𑀭𑀳𑁆𑀫𑀢𑁆𑀢𑀫𑁆𑀧𑀺 𑀲𑀸𑀯𑀓𑀩𑁄𑀥𑀺𑀫𑁆𑀧𑀺 𑀧𑀘𑁆𑀘𑁂𑀓𑀩𑁄𑀥𑀺𑀫𑁆𑀧𑀺 𑀲𑀩𑁆𑀩𑀜𑁆𑀜𑀼𑀢𑀫𑁆𑀧𑀺 𑀧𑀸𑀧𑀼𑀡𑀦𑁆𑀢𑀺, 𑀢𑀁 𑀩𑀮𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀺. 𑀦𑀢𑁆𑀣𑀺 𑀯𑀻𑀭𑀺𑀬𑀦𑁆𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑁂𑀯. ‘‘𑀇𑀤𑀁 𑀦𑁄 𑀯𑀻𑀭𑀺𑀬𑁂𑀦, 𑀇𑀤𑀁 𑀧𑀼𑀭𑀺𑀲𑀣𑀸𑀫𑁂𑀦, 𑀇𑀤𑀁 𑀧𑀼𑀭𑀺𑀲𑀧𑀭𑀓𑁆𑀓𑀫𑁂𑀦 ¶ 𑀧𑀢𑁆𑀢’’𑀦𑁆𑀢𑀺, 𑀏𑀯𑀁 𑀧𑀯𑀢𑁆𑀢𑀯𑀘𑀦𑀧𑀝𑀺𑀓𑁆𑀔𑁂𑀧𑀓𑀭𑀡𑀯𑀲𑁂𑀦 𑀧𑀦𑁂𑀢𑀸𑀦𑀺 𑀯𑀺𑀲𑀼𑀁 𑀆𑀤𑀺𑀬𑀦𑁆𑀢𑀺.

𑀲𑀩𑁆𑀩𑁂 𑀲𑀢𑁆𑀢𑀸𑀢𑀺 𑀑𑀝𑁆𑀞𑀕𑁄𑀡𑀕𑀤𑁆𑀭𑀪𑀸𑀤𑀬𑁄 𑀅𑀦𑀯𑀲𑁂𑀲𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀺. 𑀲𑀩𑁆𑀩𑁂 𑀧𑀸𑀡𑀸𑀢𑀺 𑀏𑀓𑀺𑀦𑁆𑀤𑁆𑀭𑀺𑀬𑁄 𑀧𑀸𑀡𑁄, 𑀤𑁆𑀯𑀺𑀦𑁆𑀤𑁆𑀭𑀺𑀬𑁄 𑀧𑀸𑀡𑁄𑀢𑀺𑀆𑀤𑀺𑀯𑀲𑁂𑀦 𑀯𑀤𑀦𑁆𑀢𑀺. 𑀲𑀩𑁆𑀩𑁂 𑀪𑀽𑀢𑀸𑀢𑀺 𑀅𑀡𑁆𑀟𑀓𑁄𑀲𑀯𑀢𑁆𑀣𑀺𑀓𑁄𑀲𑁂𑀲𑀼 𑀪𑀽𑀢𑁂 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺. 𑀲𑀩𑁆𑀩𑁂 𑀚𑀻𑀯𑀸𑀢𑀺 𑀲𑀸𑀮𑀺𑀬𑀯𑀕𑁄𑀥𑀼𑀫𑀸𑀤𑀬𑁄 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺. 𑀢𑁂𑀲𑀼 𑀳𑀺 𑀢𑁂 𑀯𑀺𑀭𑀼𑀳𑀦𑀪𑀸𑀯𑁂𑀦 𑀚𑀻𑀯𑀲𑀜𑁆𑀜𑀺𑀦𑁄. 𑀅𑀯𑀲𑀸 𑀅𑀩𑀮𑀸 𑀅𑀯𑀻𑀭𑀺𑀬𑀸𑀢𑀺 𑀢𑁂𑀲𑀁 𑀅𑀢𑁆𑀢𑀦𑁄 𑀯𑀲𑁄 𑀯𑀸 𑀩𑀮𑀁 𑀯𑀸 𑀯𑀻𑀭𑀺𑀬𑀁 𑀯𑀸 𑀦𑀢𑁆𑀣𑀺. 𑀦𑀺𑀬𑀢𑀺𑀲𑀗𑁆𑀕𑀢𑀺𑀪𑀸𑀯𑀧𑀭𑀺𑀡𑀢𑀸𑀢𑀺 𑀏𑀢𑁆𑀣 𑀦𑀺𑀬𑀢𑀻𑀢𑀺 𑀦𑀺𑀬𑀢𑀢𑀸. 𑀲𑀗𑁆𑀕𑀢𑀻𑀢𑀺 𑀙𑀦𑁆𑀦𑀁 𑀅𑀪𑀺𑀚𑀸𑀢𑀻𑀦𑀁 𑀢𑀢𑁆𑀣 𑀢𑀢𑁆𑀣 𑀕𑀫𑀦𑀁. 𑀪𑀸𑀯𑁄𑀢𑀺 𑀲𑀪𑀸𑀯𑁄𑀬𑁂𑀯. 𑀏𑀯𑀁 𑀦𑀺𑀬𑀢𑀺𑀬𑀸 𑀘 𑀲𑀗𑁆𑀕𑀢𑀺𑀬𑀸 𑀘 𑀪𑀸𑀯𑁂𑀦 𑀘 𑀧𑀭𑀺𑀡𑀢𑀸 𑀦𑀸𑀦𑀧𑁆𑀧𑀓𑀸𑀭𑀢𑀁 𑀧𑀢𑁆𑀢𑀸. 𑀬𑁂𑀦 𑀳𑀺 𑀬𑀣𑀸 𑀪𑀯𑀺𑀢𑀩𑁆𑀩𑀁, 𑀲𑁄 𑀢𑀣𑁂𑀯 𑀪𑀯𑀢𑀺. 𑀬𑁂𑀦 𑀦 𑀪𑀯𑀺𑀢𑀩𑁆𑀩𑀁, 𑀲𑁄 𑀦 𑀪𑀯𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑀺. 𑀙𑀲𑁆𑀯𑁂𑀯𑀸𑀪𑀺𑀚𑀸𑀢𑀻𑀲𑀽𑀢𑀺 𑀙𑀲𑀼 𑀏𑀯 𑀅𑀪𑀺𑀚𑀸𑀢𑀻𑀲𑀼 𑀞𑀢𑁆𑀯𑀸 𑀲𑀼𑀔𑀜𑁆𑀘 𑀤𑀼𑀓𑁆𑀔𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀺, 𑀅𑀜𑁆𑀜𑀸 𑀲𑀼𑀔𑀤𑀼𑀓𑁆𑀔𑀪𑀽𑀫𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑀺.

𑁮-𑁧𑁦. 𑀫𑀳𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁧𑁩-𑁨𑁧𑁫. 𑀅𑀓𑀝𑀸𑀢𑀺 𑀅𑀓𑀢𑀸. 𑀅𑀓𑀝𑀯𑀺𑀥𑀸𑀢𑀺 𑀅𑀓𑀢𑀯𑀺𑀥𑀸𑀦𑀸, ‘‘𑀏𑀯𑀁 𑀓𑀭𑁄𑀳𑀻’’𑀢𑀺 𑀓𑁂𑀦𑀘𑀺 𑀓𑀸𑀭𑀺𑀢𑀸𑀧𑀺 𑀦 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀺𑀫𑁆𑀫𑀺𑀢𑀸𑀢𑀺 𑀇𑀤𑁆𑀥𑀺𑀬𑀸𑀧𑀺 𑀦 𑀦𑀺𑀫𑁆𑀫𑀺𑀢𑀸. 𑀅𑀦𑀺𑀫𑁆𑀫𑀸𑀢𑀸𑀢𑀺 𑀅𑀦𑀺𑀫𑁆𑀫𑀸𑀧𑀺𑀢𑀸. ‘‘𑀅𑀦𑀺𑀫𑁆𑀫𑀺𑀢𑀩𑁆𑀩𑀸’’𑀢𑀺𑀧𑀺 𑀧𑀸𑀞𑁄, 𑀦 𑀦𑀺𑀫𑁆𑀫𑀺𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀯𑀜𑁆𑀛𑀸𑀢𑀺 𑀯𑀜𑁆𑀛𑀧𑀲𑀼𑀯𑀜𑁆𑀛𑀢𑀸𑀮𑀸𑀤𑀬𑁄 𑀯𑀺𑀬 𑀅𑀨𑀮𑀸 𑀓𑀲𑁆𑀲𑀘𑀺 𑀅𑀚𑀦𑀓𑀸. 𑀧𑀩𑁆𑀩𑀢𑀓𑀽𑀝𑀁 𑀯𑀺𑀬 𑀞𑀺𑀢𑀸𑀢𑀺 𑀓𑀽𑀝𑀝𑁆𑀞𑀸. 𑀏𑀲𑀺𑀓𑀝𑁆𑀞𑀸𑀬𑀺𑀦𑁄 𑀯𑀺𑀬 𑀳𑀼𑀢𑁆𑀯𑀸 𑀞𑀺𑀢𑀸𑀢𑀺 𑀏𑀲𑀺𑀓𑀝𑁆𑀞𑀸𑀬𑀺𑀝𑁆𑀞𑀺𑀢𑀸, 𑀬𑀣𑀸 𑀲𑀼𑀦𑀺𑀔𑀸𑀢𑁄 𑀏𑀲𑀺𑀓𑀢𑁆𑀣𑀫𑁆𑀪𑁄 𑀦𑀺𑀘𑁆𑀘𑀮𑁄 𑀢𑀺𑀝𑁆𑀞𑀢𑀺, 𑀏𑀯𑀁 𑀞𑀺𑀢𑀸𑀢𑀺 𑀅𑀢𑁆𑀣𑁄. 𑀦 ¶ 𑀇𑀜𑁆𑀚𑀦𑁆𑀢𑀻𑀢𑀺 𑀏𑀲𑀺𑀓𑀢𑁆𑀣𑀫𑁆𑀪𑁄 𑀯𑀺𑀬 𑀞𑀺𑀢𑀢𑁆𑀢𑀸 ¶ 𑀦 𑀘𑀮𑀦𑁆𑀢𑀺. 𑀦 𑀯𑀺𑀧𑀭𑀺𑀡𑀫𑀦𑁆𑀢𑀻𑀢𑀺 ¶ 𑀧𑀓𑀢𑀺𑀁 𑀦 𑀯𑀺𑀚𑀳𑀦𑁆𑀢𑀺. 𑀦 𑀅𑀜𑁆𑀜𑀫𑀜𑁆𑀜𑀁 𑀩𑁆𑀬𑀸𑀩𑀸𑀥𑁂𑀦𑁆𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀁 𑀦 𑀉𑀧𑀳𑀦𑀦𑁆𑀢𑀺. 𑀦𑀸𑀮𑀦𑁆𑀢𑀺 𑀦 𑀲𑀫𑀢𑁆𑀣𑀸. 𑀧𑀣𑀯𑀻𑀓𑀸𑀬𑁄𑀢𑀺𑀆𑀤𑀻𑀲𑀼 𑀧𑀣𑀯𑀻𑀬𑁂𑀯 𑀧𑀣𑀯𑀻𑀓𑀸𑀬𑁄, 𑀧𑀣𑀯𑀻𑀲𑀫𑀽𑀳𑁄 𑀯𑀸. 𑀲𑀢𑁆𑀢𑀦𑁆𑀦𑀁𑀢𑁆𑀯𑁂𑀯 𑀓𑀸𑀬𑀸𑀦𑀦𑁆𑀢𑀺 𑀬𑀣𑀸 𑀫𑀼𑀕𑁆𑀕𑀭𑀸𑀲𑀺𑀆𑀤𑀻𑀲𑀼 𑀧𑀳𑀝𑀁 𑀲𑀢𑁆𑀣𑀁 𑀫𑀼𑀕𑁆𑀕𑀭𑀸𑀲𑀺𑀆𑀤𑀻𑀦𑀁 𑀅𑀦𑁆𑀢𑀭𑁂𑀦𑁂𑀯 𑀧𑀯𑀺𑀲𑀢𑀺, 𑀏𑀯𑀁 𑀲𑀢𑁆𑀢𑀦𑁆𑀦𑀁 𑀓𑀸𑀬𑀸𑀦𑀁 𑀅𑀦𑁆𑀢𑀭𑁂𑀦 𑀙𑀺𑀤𑁆𑀤𑁂𑀦 𑀯𑀺𑀯𑀭𑁂𑀦 𑀲𑀢𑁆𑀣𑀁 𑀧𑀯𑀺𑀲𑀢𑀺. 𑀢𑀢𑁆𑀣 ‘‘𑀅𑀳𑀁 𑀇𑀫𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀫𑀻’’𑀢𑀺 𑀓𑁂𑀯𑀮𑀁 𑀲𑀜𑁆𑀜𑀸𑀫𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑀺.

𑀬𑁄𑀦𑀺𑀧𑀫𑀼𑀔𑀲𑀢𑀲𑀳𑀲𑁆𑀲𑀸𑀦𑀻𑀢𑀺 𑀧𑀫𑀼𑀔𑀬𑁄𑀦𑀻𑀦𑀁 𑀉𑀢𑁆𑀢𑀫𑀬𑁄𑀦𑀻𑀦𑀁 𑀘𑀼𑀤𑁆𑀤𑀲𑀲𑀢𑀲𑀳𑀲𑁆𑀲𑀸𑀦𑀺 𑀅𑀜𑁆𑀜𑀸𑀦𑀺 𑀘 𑀲𑀝𑁆𑀞𑀺𑀲𑀢𑀸𑀦𑀺 𑀅𑀜𑁆𑀜𑀸𑀦𑀺 𑀘 𑀙𑀲𑀢𑀸𑀦𑀺 𑀧𑀜𑁆𑀘 𑀘 𑀓𑀫𑁆𑀫𑀼𑀦𑁄 𑀲𑀢𑀸𑀦𑀻𑀢𑀺 𑀧𑀜𑁆𑀘𑀓𑀫𑁆𑀫𑀲𑀢𑀸𑀦𑀺 𑀘𑀸𑀢𑀺 𑀓𑁂𑀯𑀮𑀁 𑀢𑀓𑁆𑀓𑀫𑀢𑁆𑀢𑀓𑁂𑀦 𑀦𑀺𑀭𑀢𑁆𑀣𑀓𑀤𑀺𑀝𑁆𑀞𑀺𑀁 𑀤𑀻𑀧𑁂𑀦𑁆𑀢𑀺. 𑀧𑀜𑁆𑀘 𑀘 𑀓𑀫𑁆𑀫𑀸𑀦𑀺 𑀢𑀻𑀡𑀺 𑀘 𑀓𑀫𑁆𑀫𑀸𑀦𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑁂𑀘𑀺 𑀧𑀦𑀸𑀳𑀼 ‘‘𑀧𑀜𑁆𑀘 𑀓𑀫𑁆𑀫𑀸𑀦𑀻𑀢𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀕𑀡𑁆𑀳𑀦𑁆𑀢𑀺, 𑀢𑀻𑀡𑀻𑀢𑀺 𑀓𑀸𑀬𑀓𑀫𑁆𑀫𑀸𑀤𑀺𑀯𑀲𑁂𑀦𑀸’’𑀢𑀺. 𑀓𑀫𑁆𑀫𑁂 𑀘 𑀅𑀟𑁆𑀠𑀓𑀫𑁆𑀫𑁂 𑀘𑀸𑀢𑀺 𑀏𑀢𑁆𑀣 𑀧𑀦𑀲𑁆𑀲 𑀓𑀸𑀬𑀓𑀫𑁆𑀫𑀯𑀘𑀻𑀓𑀫𑁆𑀫𑀸𑀦𑀺 𑀓𑀫𑁆𑀫𑀦𑁆𑀢𑀺 𑀮𑀤𑁆𑀥𑀺, 𑀫𑀦𑁄𑀓𑀫𑁆𑀫𑀁 𑀉𑀧𑀟𑁆𑀠𑀓𑀫𑁆𑀫𑀦𑁆𑀢𑀺. 𑀤𑁆𑀯𑀝𑁆𑀞𑀺𑀧𑀝𑀺𑀧𑀤𑀸𑀢𑀺 𑀤𑁆𑀯𑀸𑀲𑀝𑁆𑀞𑀺𑀧𑀝𑀺𑀧𑀤𑀸𑀢𑀺 𑀯𑀤𑀦𑁆𑀢𑀺. 𑀤𑁆𑀯𑀝𑁆𑀞𑀦𑁆𑀢𑀭𑀓𑀧𑁆𑀧𑀸𑀢𑀺 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂 𑀘𑀢𑀼𑀲𑀝𑁆𑀞𑀺 𑀅𑀦𑁆𑀢𑀭𑀓𑀧𑁆𑀧𑀸 𑀦𑀸𑀫 𑀳𑁄𑀦𑁆𑀢𑀺, 𑀅𑀬𑀁 𑀧𑀦 𑀅𑀜𑁆𑀜𑁂 𑀤𑁆𑀯𑁂 𑀅𑀚𑀸𑀦𑀦𑁆𑀢𑁄 𑀏𑀯𑀫𑀸𑀳.

𑀙𑀴𑀸𑀪𑀺𑀚𑀸𑀢𑀺𑀬𑁄𑀢𑀺 𑀓𑀡𑁆𑀳𑀸𑀪𑀺𑀚𑀸𑀢𑀺 𑀦𑀻𑀮𑀸𑀪𑀺𑀚𑀸𑀢𑀺 𑀮𑁄𑀳𑀺𑀢𑀸𑀪𑀺𑀚𑀸𑀢𑀺 𑀳𑀮𑀺𑀤𑁆𑀤𑀸𑀪𑀺𑀚𑀸𑀢𑀺 𑀲𑀼𑀓𑁆𑀓𑀸𑀪𑀺𑀚𑀸𑀢𑀺 𑀧𑀭𑀫𑀲𑀼𑀓𑁆𑀓𑀸𑀪𑀺𑀚𑀸𑀢𑀻𑀢𑀺 𑀇𑀫𑀸 𑀙 𑀅𑀪𑀺𑀚𑀸𑀢𑀺𑀬𑁄 𑀯𑀤𑀦𑁆𑀢𑀺. 𑀢𑀢𑁆𑀣 𑀑𑀭𑀩𑁆𑀪𑀺𑀓𑀸 𑀲𑀽𑀓𑀭𑀺𑀓𑀸 𑀲𑀸𑀓𑀼𑀡𑀺𑀓𑀸 𑀫𑀸𑀕𑀯𑀺𑀓𑀸 𑀮𑀼𑀤𑁆𑀤𑀸 𑀫𑀘𑁆𑀙𑀖𑀸𑀢𑀓𑀸 𑀘𑁄𑀭𑀸 𑀘𑁄𑀭𑀖𑀸𑀢𑀓𑀸 𑀩𑀦𑁆𑀥𑀦𑀸𑀕𑀸𑀭𑀺𑀓𑀸, 𑀬𑁂 𑀯𑀸 𑀧𑀦𑀜𑁆𑀜𑁂𑀧𑀺 𑀓𑁂𑀘𑀺 𑀓𑀼𑀭𑀽𑀭𑀓𑀫𑁆𑀫𑀦𑁆𑀢𑀸, 𑀅𑀬𑀁 𑀓𑀡𑁆𑀳𑀸𑀪𑀺𑀚𑀸𑀢𑀻𑀢𑀺 𑀯𑀤𑀦𑁆𑀢𑀺. 𑀪𑀺𑀓𑁆𑀔𑀽 𑀦𑀻𑀮𑀸𑀪𑀺𑀚𑀸𑀢𑀻𑀢𑀺 𑀯𑀤𑀦𑁆𑀢𑀺. 𑀢𑁂 𑀓𑀺𑀭 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀓𑀡𑁆𑀝𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀔𑀸𑀤𑀦𑁆𑀢𑀺, ‘‘𑀪𑀺𑀓𑁆𑀔𑀽 ¶ 𑀘 𑀓𑀡𑁆𑀝𑀓𑀯𑀼𑀢𑁆𑀢𑀺𑀓𑀸’’𑀢𑀺 (𑀅. 𑀦𑀺. 𑁬.𑁫𑁭) 𑀅𑀬𑀁 𑀳𑀺𑀲𑁆𑀲 𑀧𑀸𑀴𑀺 𑀏𑀯. 𑀅𑀣 𑀯𑀸 𑀓𑀡𑁆𑀝𑀓𑀯𑀼𑀢𑁆𑀢𑀺𑀓𑀸 𑀏𑀯 𑀦𑀸𑀫 𑀏𑀓𑁂 𑀧𑀩𑁆𑀩𑀚𑀺𑀢𑀸𑀢𑀺 𑀯𑀤𑀦𑁆𑀢𑀺. 𑀮𑁄𑀳𑀺𑀢𑀸𑀪𑀺𑀚𑀸𑀢𑀺 𑀦𑀸𑀫 𑀦𑀺𑀕𑀡𑁆𑀞𑀸 𑀏𑀓𑀲𑀸𑀝𑀓𑀸𑀢𑀺 𑀯𑀤𑀦𑁆𑀢𑀺. 𑀇𑀫𑁂 𑀓𑀺𑀭 𑀧𑀼𑀭𑀺𑀫𑁂𑀳𑀺 𑀤𑁆𑀯𑀻𑀳𑀺 𑀧𑀡𑁆𑀟𑀭𑀢𑀭𑀸. 𑀕𑀺𑀳𑀻 𑀑𑀤𑀸𑀢𑀯𑀲𑀦𑀸 𑀅𑀘𑁂𑀮𑀓𑀲𑀸𑀯𑀓𑀸 𑀳𑀮𑀺𑀤𑁆𑀤𑀸𑀪𑀺𑀚𑀸𑀢𑀻𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀅𑀢𑁆𑀢𑀦𑁄 𑀧𑀘𑁆𑀘𑀬𑀤𑀸𑀬𑀓𑁂 𑀦𑀺𑀕𑀡𑁆𑀞𑁂𑀳𑀺𑀧𑀺 𑀚𑁂𑀝𑁆𑀞𑀓𑀢𑀭𑁂 𑀓𑀭𑁄𑀦𑁆𑀢𑀺. 𑀆𑀚𑀻𑀯𑀓𑀸 𑀆𑀚𑀻𑀯𑀺𑀦𑀺𑀬𑁄 𑀅𑀬𑀁 𑀲𑀼𑀓𑁆𑀓𑀸𑀪𑀺𑀚𑀸𑀢𑀻𑀢𑀺 𑀯𑀤𑀦𑁆𑀢𑀺. 𑀢𑁂 𑀓𑀺𑀭 𑀧𑀼𑀭𑀺𑀫𑁂𑀳𑀺 𑀘𑀢𑀽𑀳𑀺 𑀧𑀡𑁆𑀟𑀭𑀢𑀭𑀸 ¶ . 𑀦𑀦𑁆𑀤𑁄 𑀯𑀘𑁆𑀙𑁄, 𑀓𑀺𑀲𑁄 𑀲𑀁𑀓𑀺𑀘𑁆𑀘𑁄, 𑀫𑀓𑁆𑀔𑀮𑀺 𑀕𑁄𑀲𑀸𑀮𑁄 𑀧𑀭𑀫𑀲𑀼𑀓𑁆𑀓𑀸𑀪𑀺𑀚𑀸𑀢𑀻𑀢𑀺 𑀯𑀤𑀦𑁆𑀢𑀺. 𑀢𑁂 𑀓𑀺𑀭 𑀲𑀩𑁆𑀩𑁂𑀳𑀺 𑀧𑀡𑁆𑀟𑀭𑀢𑀭𑀸.

𑀅𑀝𑁆𑀞 ¶ 𑀧𑀼𑀭𑀺𑀲𑀪𑀽𑀫𑀺𑀬𑁄𑀢𑀺 𑀫𑀦𑁆𑀤𑀪𑀽𑀫𑀺 𑀔𑀺𑀟𑁆𑀟𑀸𑀪𑀽𑀫𑀺 𑀯𑀻𑀫𑀁𑀲𑀓𑀪𑀽𑀫𑀺 𑀉𑀚𑀼𑀕𑀢𑀪𑀽𑀫𑀺 𑀲𑁂𑀔𑀪𑀽𑀫𑀺 𑀲𑀫𑀡𑀪𑀽𑀫𑀺 𑀚𑀸𑀦𑀦𑀪𑀽𑀫𑀺 𑀧𑀦𑁆𑀦𑀪𑀽𑀫𑀻𑀢𑀺 𑀇𑀫𑀸 𑀅𑀝𑁆𑀞 𑀧𑀼𑀭𑀺𑀲𑀪𑀽𑀫𑀺𑀬𑁄𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀚𑀸𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢 𑀤𑀺𑀯𑀲𑁂 𑀲𑀫𑁆𑀩𑀸𑀥𑀝𑁆𑀞𑀸𑀦𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀲𑀢𑁆𑀢𑀸 𑀫𑀦𑁆𑀤𑀸 𑀳𑁄𑀦𑁆𑀢𑀺 𑀫𑁄𑀫𑀽𑀳𑀸, 𑀅𑀬𑀁 𑀫𑀦𑁆𑀤𑀪𑀽𑀫𑀻𑀢𑀺 𑀯𑀤𑀦𑁆𑀢𑀺. 𑀬𑁂 𑀧𑀦 𑀤𑀼𑀕𑁆𑀕𑀢𑀺𑀢𑁄 𑀆𑀕𑀢𑀸 𑀳𑁄𑀦𑁆𑀢𑀺, 𑀢𑁂 𑀅𑀪𑀺𑀡𑁆𑀳𑀁 𑀭𑁄𑀤𑀦𑁆𑀢𑀺 𑀘𑁂𑀯 𑀯𑀺𑀭𑀯𑀦𑁆𑀢𑀺 𑀘, 𑀲𑀼𑀕𑀢𑀺𑀢𑁄 𑀆𑀕𑀢𑀸 𑀢𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀳𑀲𑀦𑁆𑀢𑀺, 𑀅𑀬𑀁 𑀔𑀺𑀟𑁆𑀟𑀸𑀪𑀽𑀫𑀺 𑀦𑀸𑀫. 𑀫𑀸𑀢𑀸𑀧𑀺𑀢𑀽𑀦𑀁 𑀳𑀢𑁆𑀣𑀁 𑀯𑀸 𑀧𑀸𑀤𑀁 𑀯𑀸 𑀫𑀜𑁆𑀘𑀁 𑀯𑀸 𑀧𑀻𑀞𑀁 𑀯𑀸 𑀕𑀳𑁂𑀢𑁆𑀯𑀸 𑀪𑀽𑀫𑀺𑀬𑀁 𑀧𑀤𑀦𑀺𑀓𑁆𑀔𑀺𑀧𑀦𑀁 𑀯𑀻𑀫𑀁𑀲𑀓𑀪𑀽𑀫𑀺 𑀦𑀸𑀫. 𑀧𑀤𑀲𑀸 𑀕𑀦𑁆𑀢𑀼𑀁 𑀲𑀫𑀢𑁆𑀣𑀓𑀸𑀮𑁄 𑀉𑀚𑀼𑀕𑀢𑀪𑀽𑀫𑀺 𑀦𑀸𑀫. 𑀲𑀺𑀧𑁆𑀧𑀸𑀦𑀺 𑀲𑀺𑀓𑁆𑀔𑀦𑀓𑀸𑀮𑁄 𑀲𑁂𑀔𑀪𑀽𑀫𑀺 𑀦𑀸𑀫. 𑀖𑀭𑀸 𑀦𑀺𑀓𑁆𑀔𑀫𑁆𑀫 𑀧𑀩𑁆𑀩𑀚𑀦𑀓𑀸𑀮𑁄 𑀲𑀫𑀡𑀪𑀽𑀫𑀺 𑀦𑀸𑀫. 𑀆𑀘𑀭𑀺𑀬𑀁 𑀲𑁂𑀯𑀺𑀢𑁆𑀯𑀸 𑀚𑀸𑀦𑀦𑀓𑀸𑀮𑁄 𑀚𑀸𑀦𑀦𑀪𑀽𑀫𑀺 𑀦𑀸𑀫. ‘‘𑀪𑀺𑀓𑁆𑀔𑀼 𑀘 𑀧𑀦𑁆𑀦𑀓𑁄 𑀚𑀺𑀦𑁄 𑀦 𑀓𑀺𑀜𑁆𑀘𑀺 𑀆𑀳𑀸’’𑀢𑀺 𑀏𑀯𑀁 𑀅𑀮𑀸𑀪𑀺𑀁 𑀲𑀫𑀡𑀁 𑀧𑀦𑁆𑀦𑀪𑀽𑀫𑀻𑀢𑀺 𑀯𑀤𑀦𑁆𑀢𑀺.

𑀏𑀓𑀽𑀦𑀧𑀜𑁆𑀜𑀸𑀲 ¶ 𑀆𑀚𑀻𑀯𑀓𑀲𑀢𑁂𑀢𑀺 𑀏𑀓𑀽𑀦𑀧𑀜𑁆𑀜𑀸𑀲 𑀆𑀚𑀻𑀯𑀯𑀼𑀢𑁆𑀢𑀺𑀲𑀢𑀸𑀦𑀺. 𑀧𑀭𑀺𑀩𑁆𑀩𑀸𑀚𑀓𑀲𑀢𑁂𑀢𑀺 𑀧𑀭𑀺𑀩𑁆𑀩𑀸𑀚𑀓𑀧𑀩𑁆𑀩𑀚𑁆𑀚𑀸𑀲𑀢𑀸𑀦𑀺. 𑀦𑀸𑀕𑀯𑀸𑀲𑀲𑀢𑁂𑀢𑀺 𑀦𑀸𑀕𑀫𑀡𑁆𑀟𑀮𑀲𑀢𑀸𑀦𑀺. 𑀯𑀻𑀲𑁂 𑀇𑀦𑁆𑀤𑁆𑀭𑀺𑀬𑀲𑀢𑁂𑀢𑀺 𑀯𑀻𑀲 𑀇𑀦𑁆𑀤𑁆𑀭𑀺𑀬𑀲𑀢𑀸𑀦𑀺. 𑀢𑀺𑀁𑀲𑁂 𑀦𑀺𑀭𑀬𑀲𑀢𑁂𑀢𑀺 𑀢𑀺𑀁𑀲 𑀦𑀺𑀭𑀬𑀲𑀢𑀸𑀦𑀺. 𑀭𑀚𑁄𑀥𑀸𑀢𑀼𑀬𑁄𑀢𑀺 𑀭𑀚𑀑𑀓𑀺𑀭𑀡𑀝𑁆𑀞𑀸𑀦𑀸𑀦𑀺. 𑀳𑀢𑁆𑀣𑀧𑀺𑀝𑁆𑀞𑀺𑀧𑀸𑀤𑀧𑀺𑀝𑁆𑀞𑀸𑀤𑀻𑀦𑀺 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀢𑁆𑀢 𑀲𑀜𑁆𑀜𑀻𑀕𑀩𑁆𑀪𑀸𑀢𑀺 𑀑𑀝𑁆𑀞𑀕𑁄𑀡𑀕𑀤𑁆𑀭𑀪𑀅𑀚𑀧𑀲𑀼𑀫𑀺𑀕𑀫𑀳𑀺𑀁𑀲𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀢𑁆𑀢 𑀅𑀲𑀜𑁆𑀜𑀻𑀕𑀩𑁆𑀪𑀸𑀢𑀺 𑀲𑀸𑀮𑀺𑀬𑀯𑀕𑁄𑀥𑀼𑀫𑀫𑀼𑀕𑁆𑀕𑀓𑀗𑁆𑀕𑀼𑀯𑀭𑀓𑀓𑀼𑀤𑁆𑀭𑀽𑀲𑀓𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀦𑀺𑀕𑀡𑁆𑀞𑀺𑀕𑀩𑁆𑀪𑀸𑀢𑀺 𑀕𑀡𑁆𑀞𑀺𑀫𑁆𑀳𑀺 𑀚𑀸𑀢𑀕𑀩𑁆𑀪𑀸, 𑀉𑀘𑁆𑀙𑀼𑀯𑁂𑀴𑀼𑀦𑀴𑀸𑀤𑀬𑁄 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑀢𑁆𑀢 𑀤𑁂𑀯𑀸𑀢𑀺 𑀩𑀳𑀽 𑀤𑁂𑀯𑀸, 𑀲𑁄 𑀧𑀦 𑀲𑀢𑁆𑀢𑀸𑀢𑀺 𑀯𑀤𑀢𑀺. 𑀫𑀦𑀼𑀲𑁆𑀲𑀸𑀧𑀺 𑀅𑀦𑀦𑁆𑀢𑀸, 𑀲𑁄 𑀲𑀢𑁆𑀢𑀸𑀢𑀺 𑀯𑀤𑀢𑀺. 𑀲𑀢𑁆𑀢 𑀧𑁂𑀲𑀸𑀘𑀸𑀢𑀺 𑀧𑀺𑀲𑀸𑀘𑀸 𑀫𑀳𑀦𑁆𑀢𑀫𑀳𑀦𑁆𑀢𑀸, 𑀲𑀢𑁆𑀢𑀸𑀢𑀺 𑀯𑀤𑀢𑀺. 𑀲𑀭𑀸𑀢𑀺 𑀫𑀳𑀸𑀲𑀭𑀸. 𑀓𑀡𑁆𑀡𑀫𑀼𑀡𑁆𑀟-𑀭𑀣𑀓𑀸𑀭-𑀅𑀦𑁄𑀢𑀢𑁆𑀢-𑀲𑀻𑀳𑀧𑁆𑀧𑀧𑀸𑀢-𑀙𑀤𑁆𑀤𑀦𑁆𑀢-𑀫𑀼𑀘𑀮𑀺𑀦𑁆𑀤-𑀓𑀼𑀡𑀸𑀮𑀤𑀳𑁂 𑀕𑀳𑁂𑀢𑁆𑀯𑀸 𑀯𑀤𑀢𑀺.

𑀧𑀯𑀼𑀝𑀸𑀢𑀺 𑀕𑀡𑁆𑀞𑀺𑀓𑀸. 𑀧𑀧𑀸𑀢𑀸𑀢𑀺 𑀫𑀳𑀸𑀧𑀧𑀸𑀢𑀸. 𑀧𑀧𑀸𑀢𑀲𑀢𑀸𑀦𑀻𑀢𑀺 𑀔𑀼𑀤𑁆𑀤𑀓𑀧𑀧𑀸𑀢𑀲𑀢𑀸𑀦𑀺. 𑀲𑀼𑀧𑀺𑀦𑀸𑀢𑀺 𑀫𑀳𑀸𑀲𑀼𑀧𑀺𑀦𑀸. 𑀲𑀼𑀧𑀺𑀦𑀲𑀢𑀸𑀦𑀻𑀢𑀺 𑀔𑀼𑀤𑁆𑀤𑀓𑀲𑀼𑀧𑀺𑀦𑀲𑀢𑀸𑀦𑀺. 𑀫𑀳𑀸𑀓𑀧𑁆𑀧𑀺𑀦𑁄𑀢𑀺 𑀫𑀳𑀸𑀓𑀧𑁆𑀧𑀸𑀦𑀁. 𑀏𑀢𑁆𑀣 𑀏𑀓𑀫𑁆𑀳𑀸 𑀫𑀳𑀸𑀲𑀭𑀸 𑀯𑀲𑁆𑀲𑀲𑀢𑁂 ¶ 𑀯𑀲𑁆𑀲𑀲𑀢𑁂 𑀓𑀼𑀲𑀕𑁆𑀕𑁂𑀦 𑀏𑀓𑀁 𑀉𑀤𑀓𑀩𑀺𑀦𑁆𑀤𑀼𑀁 𑀦𑀻𑀳𑀭𑀺𑀢𑁆𑀯𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀢𑀫𑁆𑀳𑀺 𑀲𑀭𑁂 𑀦𑀺𑀭𑀼𑀤𑀓𑁂 𑀓𑀢𑁂 𑀏𑀓𑁄 𑀫𑀳𑀸𑀓𑀧𑁆𑀧𑁄𑀢𑀺 𑀯𑀤𑀢𑀺. 𑀏𑀯𑀭𑀽𑀧𑀸𑀦𑀁 𑀫𑀳𑀸𑀓𑀧𑁆𑀧𑀸𑀦𑀁 𑀘𑀢𑀼𑀭𑀸𑀲𑀻𑀢𑀺𑀲𑀢𑀲𑀳𑀲𑁆𑀲𑀸𑀦𑀺 𑀔𑁂𑀧𑁂𑀢𑁆𑀯𑀸 𑀩𑀸𑀮𑁂 𑀘 𑀧𑀡𑁆𑀟𑀺𑀢𑁂 𑀘 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀦𑁆𑀢𑀻𑀢𑀺 𑀅𑀬𑀫𑀲𑁆𑀲 𑀮𑀤𑁆𑀥𑀺. 𑀧𑀡𑁆𑀟𑀺𑀢𑁄𑀧𑀺 𑀓𑀺𑀭 𑀅𑀦𑁆𑀢𑀭𑀸𑀯𑀺𑀲𑀼𑀚𑁆𑀛𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀩𑀸𑀮𑁄𑀧𑀺 𑀢𑀢𑁄 𑀉𑀤𑁆𑀥𑀁 𑀦 𑀕𑀘𑁆𑀙𑀢𑀺.

𑀲𑀻𑀮𑁂𑀦 ¶ ¶ 𑀯𑀸𑀢𑀺 𑀅𑀘𑁂𑀮𑀓𑀲𑀻𑀮𑁂𑀦 𑀯𑀸 𑀅𑀜𑁆𑀜𑁂𑀦 𑀯𑀸 𑀬𑁂𑀦 𑀓𑁂𑀦𑀘𑀺. 𑀯𑀢𑁂𑀦𑀸𑀢𑀺 𑀢𑀸𑀤𑀺𑀲𑁂𑀦𑁂𑀯 𑀯𑀢𑁂𑀦. 𑀢𑀧𑁂𑀦𑀸𑀢𑀺 𑀢𑀧𑁄𑀓𑀫𑁆𑀫𑁂𑀦. 𑀅𑀧𑀭𑀺𑀧𑀓𑁆𑀓𑀁 𑀧𑀭𑀺𑀧𑀸𑀘𑁂𑀢𑀺 𑀦𑀸𑀫 𑀬𑁄 ‘‘𑀅𑀳𑀁 𑀧𑀡𑁆𑀟𑀺𑀢𑁄’’𑀢𑀺 𑀅𑀦𑁆𑀢𑀭𑀸 𑀯𑀺𑀲𑀼𑀚𑁆𑀛𑀢𑀺. 𑀧𑀭𑀺𑀧𑀓𑁆𑀓𑀁 𑀨𑀼𑀲𑁆𑀲 𑀨𑀼𑀲𑁆𑀲 𑀩𑁆𑀬𑀦𑁆𑀢𑀻𑀓𑀭𑁄𑀢𑀺 𑀦𑀸𑀫 𑀬𑁄 ‘‘𑀅𑀳𑀁 𑀩𑀸𑀮𑁄’’𑀢𑀺 𑀯𑀼𑀢𑁆𑀢𑀧𑀭𑀺𑀫𑀸𑀡𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀬𑀸𑀢𑀺. 𑀳𑁂𑀯𑀁 𑀦𑀢𑁆𑀣𑀻𑀢𑀺 𑀏𑀯𑀁 𑀦𑀢𑁆𑀣𑀺. 𑀢𑀜𑁆𑀳𑀺 𑀉𑀪𑀬𑀫𑁆𑀧𑀺 𑀦 𑀲𑀓𑁆𑀓𑀸 𑀓𑀸𑀢𑀼𑀦𑁆𑀢𑀺 𑀤𑀻𑀧𑁂𑀢𑀺. 𑀤𑁄𑀡𑀫𑀺𑀢𑁂𑀢𑀺 𑀤𑁄𑀡𑁂𑀦 𑀫𑀺𑀢𑀁 𑀯𑀺𑀬. 𑀲𑀼𑀔𑀤𑀼𑀓𑁆𑀔𑁂𑀢𑀺 𑀲𑀼𑀔𑀤𑀼𑀓𑁆𑀔𑀁. 𑀧𑀭𑀺𑀬𑀦𑁆𑀢𑀓𑀢𑁂𑀢𑀺 𑀯𑀼𑀢𑁆𑀢𑀧𑀭𑀺𑀫𑀸𑀡𑁂𑀦 𑀓𑀸𑀮𑁂𑀦 𑀓𑀢𑀧𑀭𑀺𑀬𑀦𑁆𑀢𑁄. 𑀦𑀢𑁆𑀣𑀺 𑀳𑀸𑀬𑀦𑀯𑀟𑁆𑀠𑀦𑁂𑀢𑀺 𑀦𑀢𑁆𑀣𑀺 𑀳𑀸𑀬𑀦𑀯𑀟𑁆𑀠𑀦𑀸𑀦𑀺, 𑀦 𑀲𑀁𑀲𑀸𑀭𑁄 𑀧𑀡𑁆𑀟𑀺𑀢𑀲𑁆𑀲 𑀳𑀸𑀬𑀢𑀺, 𑀦 𑀩𑀸𑀮𑀲𑁆𑀲 𑀯𑀟𑁆𑀠𑀢𑀻𑀢𑀺 𑀅𑀢𑁆𑀣𑁄. 𑀉𑀓𑁆𑀓𑀁𑀲𑀸𑀯𑀓𑀁𑀲𑁂𑀢𑀺 𑀉𑀓𑁆𑀓𑀁𑀲𑀸𑀯𑀓𑀁𑀲𑀸. 𑀳𑀸𑀬𑀦𑀯𑀟𑁆𑀠𑀦𑀸𑀦𑀫𑁂𑀯𑁂𑀢𑀁 𑀯𑁂𑀯𑀘𑀦𑀁. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀉𑀧𑀫𑀸𑀬 𑀲𑀸𑀥𑁂𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀢𑁆𑀢𑀕𑀼𑀴𑁂𑀢𑀺 𑀯𑁂𑀞𑁂𑀢𑁆𑀯𑀸 𑀓𑀢𑀲𑀼𑀢𑁆𑀢𑀕𑀼𑀴𑁂. 𑀦𑀺𑀩𑁆𑀩𑁂𑀞𑀺𑀬𑀫𑀸𑀦𑀫𑁂𑀯 𑀧𑀮𑁂𑀢𑀻𑀢𑀺 𑀧𑀩𑁆𑀩𑀢𑁂 𑀯𑀸 𑀭𑀼𑀓𑁆𑀔𑀕𑁆𑀕𑁂 𑀯𑀸 𑀞𑀢𑁆𑀯𑀸 𑀔𑀺𑀢𑁆𑀢𑀁 𑀲𑀼𑀢𑁆𑀢𑀧𑁆𑀧𑀫𑀸𑀡𑁂𑀦 𑀦𑀺𑀩𑁆𑀩𑁂𑀞𑀺𑀬𑀫𑀸𑀦𑀫𑁂𑀯 𑀕𑀘𑁆𑀙𑀢𑀺, 𑀲𑀼𑀢𑁆𑀢𑁂 𑀔𑀻𑀡𑁂 𑀢𑀢𑁆𑀣𑁂𑀯 𑀢𑀺𑀝𑁆𑀞𑀢𑀺, 𑀦 𑀕𑀘𑁆𑀙𑀢𑀺 𑀏𑀯𑀫𑁂𑀯 𑀩𑀸𑀮𑀸 𑀘 𑀧𑀡𑁆𑀟𑀺𑀢𑀸 𑀘 𑀓𑀸𑀮𑀯𑀲𑁂𑀦 𑀦𑀺𑀩𑁆𑀩𑁂𑀞𑀺𑀬𑀫𑀸𑀦𑀸 𑀲𑀼𑀔𑀤𑀼𑀓𑁆𑀔𑀁 𑀧𑀮𑁂𑀦𑁆𑀢𑀺, 𑀬𑀣𑀸𑀯𑀼𑀢𑁆𑀢𑁂𑀦 𑀓𑀸𑀮𑁂𑀦 𑀅𑀢𑀺𑀓𑁆𑀓𑀫𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁧𑁧-𑁧𑁮. 𑀅𑀦𑁆𑀢𑀯𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁧𑁬-𑁨𑁨𑁩. 𑀅𑀦𑁆𑀢𑀯𑀸 𑀮𑁄𑀓𑁄𑀢𑀺 𑀏𑀓𑀢𑁄 𑀯𑀟𑁆𑀠𑀺𑀢𑀦𑀺𑀫𑀺𑀢𑁆𑀢𑀁 𑀮𑁄𑀓𑁄𑀢𑀺 𑀕𑀸𑀳𑁂𑀦 𑀯𑀸 𑀢𑀓𑁆𑀓𑁂𑀦 𑀯𑀸 𑀉𑀧𑁆𑀧𑀦𑁆𑀦𑀤𑀺𑀝𑁆𑀞𑀺. 𑀅𑀦𑀦𑁆𑀢𑀯𑀸𑀢𑀺 𑀲𑀩𑁆𑀩𑀢𑁄 𑀯𑀟𑁆𑀠𑀺𑀢𑀁 𑀅𑀧𑁆𑀧𑀫𑀸𑀡𑀦𑀺𑀫𑀺𑀢𑁆𑀢𑀁 𑀮𑁄𑀓𑁄𑀢𑀺 𑀕𑀸𑀳𑁂𑀦 𑀯𑀸 𑀢𑀓𑁆𑀓𑁂𑀦 𑀯𑀸 𑀉𑀧𑁆𑀧𑀦𑁆𑀦𑀤𑀺𑀝𑁆𑀞𑀺. 𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭𑀦𑁆𑀢𑀺 𑀚𑀻𑀯𑀜𑁆𑀘 𑀲𑀭𑀻𑀭𑀜𑁆𑀘 𑀏𑀓𑀫𑁂𑀯𑀸𑀢𑀺 𑀉𑀧𑁆𑀧𑀦𑁆𑀦𑀤𑀺𑀝𑁆𑀞𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀇𑀫𑀸𑀦𑀺 𑀢𑀸𑀯 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀯𑀲𑁂𑀦 𑀅𑀝𑁆𑀞𑀸𑀭𑀲 𑀯𑁂𑀬𑁆𑀬𑀸𑀓𑀭𑀡𑀸𑀦𑀺 𑀏𑀓𑀁 𑀕𑀫𑀦𑀁.

𑁨. 𑀤𑀼𑀢𑀺𑀬𑀕𑀫𑀦𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸

𑁨𑁨𑁪-𑁩𑁦𑁧. 𑀤𑀼𑀢𑀺𑀬𑀁 ¶ 𑀕𑀫𑀦𑀁 𑀤𑀼𑀓𑁆𑀔𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀢𑁆𑀭𑀸𑀧𑀺 𑀅𑀝𑁆𑀞𑀸𑀭𑀲𑁂𑀯 𑀯𑁂𑀬𑁆𑀬𑀸𑀓𑀭𑀡𑀸𑀦𑀺, 𑀢𑀢𑁄 𑀧𑀭𑀸𑀦𑀺 ‘‘𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀻’’𑀢𑀺𑀆𑀤𑀻𑀦𑀺 𑀅𑀝𑁆𑀞 𑀯𑁂𑀬𑁆𑀬𑀸𑀓𑀭𑀡𑀸𑀦𑀺, 𑀢𑁂𑀳𑀺 𑀲𑀤𑁆𑀥𑀺𑀁 𑀢𑀁 𑀤𑀼𑀢𑀺𑀬𑀧𑁂𑀬𑁆𑀬𑀸𑀮𑁄𑀢𑀺 𑀯𑀼𑀢𑁆𑀢𑁄.

𑀢𑀢𑁆𑀣 ¶ 𑀭𑀽𑀧𑀻𑀢𑀺 𑀆𑀭𑀫𑁆𑀫𑀡𑀫𑁂𑀯 ‘‘𑀅𑀢𑁆𑀢𑀸’’𑀢𑀺 𑀕𑀳𑀺𑀢𑀤𑀺𑀝𑁆𑀞𑀺. 𑀅𑀭𑀽𑀧𑀻𑀢𑀺 𑀛𑀸𑀦𑀁 ‘‘𑀅𑀢𑁆𑀢𑀸’’𑀢𑀺 𑀕𑀳𑀺𑀢𑀤𑀺𑀝𑁆𑀞𑀺 ¶ . 𑀭𑀽𑀧𑀻 𑀘 𑀅𑀭𑀽𑀧𑀻 𑀘𑀸𑀢𑀺 𑀆𑀭𑀫𑁆𑀫𑀡𑀜𑁆𑀘 𑀛𑀸𑀦𑀜𑁆𑀘 ‘‘𑀅𑀢𑁆𑀢𑀸’’𑀢𑀺 𑀕𑀳𑀺𑀢𑀤𑀺𑀝𑁆𑀞𑀺. 𑀦𑁂𑀯 𑀭𑀽𑀧𑀻 𑀦𑀸𑀭𑀽𑀧𑀻𑀢𑀺 𑀢𑀓𑁆𑀓𑀫𑀢𑁆𑀢𑁂𑀦 𑀕𑀳𑀺𑀢𑀤𑀺𑀝𑁆𑀞𑀺. 𑀏𑀓𑀦𑁆𑀢𑀲𑀼𑀔𑀻𑀢𑀺 𑀮𑀸𑀪𑀻𑀢𑀓𑁆𑀓𑀻𑀚𑀸𑀢𑀺𑀲𑁆𑀲𑀭𑀸𑀦𑀁 𑀉𑀧𑁆𑀧𑀦𑁆𑀦𑀤𑀺𑀝𑁆𑀞𑀺. 𑀛𑀸𑀦𑀮𑀸𑀪𑀺𑀦𑁄𑀧𑀺 𑀳𑀺 𑀅𑀢𑀻𑀢𑁂 𑀏𑀓𑀦𑁆𑀢𑀲𑀼𑀔𑀁 𑀅𑀢𑁆𑀢𑀪𑀸𑀯𑀁 𑀫𑀦𑀲𑀺𑀓𑀭𑁄𑀢𑁄 𑀏𑀯𑀁 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀺. 𑀢𑀓𑁆𑀓𑀺𑀦𑁄𑀧𑀺 ‘‘𑀬𑀣𑀸 𑀏𑀢𑀭𑀳𑀺 𑀅𑀳𑀁 𑀏𑀓𑀦𑁆𑀢𑀲𑀼𑀔𑀻, 𑀏𑀯𑀁 𑀲𑀫𑁆𑀧𑀭𑀸𑀬𑁂𑀧𑀺 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀚𑀸𑀢𑀺𑀲𑁆𑀲𑀭𑀲𑁆𑀲𑀧𑀺 𑀲𑀢𑁆𑀢𑀝𑁆𑀞𑀪𑀯𑁂 𑀲𑀼𑀔𑀺𑀢𑀪𑀸𑀯𑀁 𑀧𑀲𑁆𑀲𑀦𑁆𑀢𑀲𑁆𑀲 𑀏𑀯𑀁 𑀉𑀧𑁆𑀧𑀚𑁆𑀚𑀢𑀺, 𑀏𑀓𑀦𑁆𑀢𑀤𑀼𑀓𑁆𑀔𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑀺𑀬𑀧𑁂𑀬𑁆𑀬𑀸𑀮𑁄 𑀅𑀦𑀺𑀘𑁆𑀘𑀤𑀼𑀓𑁆𑀔𑀯𑀲𑁂𑀦 𑀢𑁂𑀳𑀺𑀬𑁂𑀯 𑀙𑀩𑁆𑀩𑀻𑀲𑀢𑀺𑀬𑀸 𑀲𑀼𑀢𑁆𑀢𑁂𑀳𑀺 𑀯𑀼𑀢𑁆𑀢𑁄, 𑀘𑀢𑀼𑀢𑁆𑀣𑀧𑁂𑀬𑁆𑀬𑀸𑀮𑁄 𑀢𑀺𑀧𑀭𑀺𑀯𑀝𑁆𑀝𑀯𑀲𑁂𑀦𑀸𑀢𑀺.

𑀤𑀺𑀝𑁆𑀞𑀺𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀑𑀓𑁆𑀓𑀦𑁆𑀢𑀲𑀁𑀬𑀼𑀢𑁆𑀢𑀁

𑁧-𑁧𑁦. 𑀘𑀓𑁆𑀔𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁦𑁨-𑁩𑁧𑁧. 𑀑𑀓𑁆𑀓𑀦𑁆𑀢𑀲𑀁𑀬𑀼𑀢𑁆𑀢𑁂 ¶ 𑀅𑀥𑀺𑀫𑀼𑀘𑁆𑀘𑀢𑀻𑀢𑀺 𑀲𑀤𑁆𑀥𑀸𑀥𑀺𑀫𑁄𑀓𑁆𑀔𑀁 𑀧𑀝𑀺𑀮𑀪𑀢𑀺. 𑀑𑀓𑁆𑀓𑀦𑁆𑀢𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀦𑁆𑀢𑀺 𑀧𑀯𑀺𑀝𑁆𑀞𑁄 𑀅𑀭𑀺𑀬𑀫𑀕𑁆𑀕𑀁. 𑀅𑀪𑀩𑁆𑀩𑁄 𑀘 𑀢𑀸𑀯 𑀓𑀸𑀮𑀁 𑀓𑀸𑀢𑀼𑀦𑁆𑀢𑀺 𑀇𑀫𑀺𑀦𑀸 𑀉𑀧𑁆𑀧𑀦𑁆𑀦𑁂 𑀫𑀕𑁆𑀕𑁂 𑀨𑀮𑀲𑁆𑀲 𑀅𑀦𑀦𑁆𑀢𑀭𑀸𑀬𑀢𑀁 𑀤𑀻𑀧𑁂𑀢𑀺. 𑀉𑀧𑁆𑀧𑀦𑁆𑀦𑀲𑁆𑀫𑀺𑀜𑁆𑀳𑀺 𑀫𑀕𑁆𑀕𑁂 𑀨𑀮𑀲𑁆𑀲 𑀅𑀦𑁆𑀢𑀭𑀸𑀬𑀓𑀭𑀡𑀁 𑀦𑀸𑀫 𑀦𑀢𑁆𑀣𑀺. 𑀢𑁂𑀦𑁂𑀯𑀸𑀳 𑁋 ‘‘𑀅𑀬𑀜𑁆𑀘 𑀧𑀼𑀕𑁆𑀕𑀮𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄 𑀅𑀲𑁆𑀲, 𑀓𑀧𑁆𑀧𑀲𑁆𑀲 𑀘 𑀉𑀟𑁆𑀟𑀬𑁆𑀳𑀦𑀯𑁂𑀮𑀸 𑀅𑀲𑁆𑀲, 𑀦𑁂𑀯 𑀢𑀸𑀯 𑀓𑀧𑁆𑀧𑁄 𑀉𑀟𑁆𑀟𑀬𑁆𑀳𑁂𑀬𑁆𑀬, 𑀬𑀸𑀯𑀸𑀬𑀁 𑀧𑀼𑀕𑁆𑀕𑀮𑁄 𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀞𑀺𑀢𑀓𑀧𑁆𑀧𑀻’’𑀢𑀺 (𑀧𑀼. 𑀧. 𑁧𑁭). 𑀫𑀢𑁆𑀢𑀲𑁄 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀻𑀢𑀺 𑀧𑀫𑀸𑀡𑀢𑁄 𑀑𑀮𑁄𑀓𑀦𑀁 𑀔𑀫𑀦𑁆𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀑𑀓𑁆𑀓𑀦𑁆𑀢𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀉𑀧𑁆𑀧𑀸𑀤𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸

𑁩𑁧𑁨-𑁩𑁨𑁧. 𑀉𑀧𑁆𑀧𑀸𑀤𑀲𑀁𑀬𑀼𑀢𑁆𑀢𑁂 ¶ ¶ ¶ 𑀲𑀩𑁆𑀩𑀁 𑀧𑀸𑀓𑀝𑀫𑁂𑀯.

𑀉𑀧𑁆𑀧𑀸𑀤𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀓𑀺𑀮𑁂𑀲𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸

𑁩𑁨𑁨-𑁩𑁩𑁧. 𑀓𑀺𑀮𑁂𑀲𑀲𑀁𑀬𑀼𑀢𑁆𑀢𑁂 ¶ 𑀘𑀺𑀢𑁆𑀢𑀲𑁆𑀲𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑁄𑀢𑀺 𑀓𑀢𑀭𑀘𑀺𑀢𑁆𑀢𑀲𑁆𑀲? 𑀘𑀢𑀼𑀪𑀽𑀫𑀓𑀘𑀺𑀢𑁆𑀢𑀲𑁆𑀲. 𑀢𑁂𑀪𑀽𑀫𑀓𑀘𑀺𑀢𑁆𑀢𑀲𑁆𑀲 𑀢𑀸𑀯 𑀳𑁄𑀢𑀼, 𑀮𑁄𑀓𑀼𑀢𑁆𑀢𑀭𑀲𑁆𑀲 𑀓𑀣𑀁 𑀉𑀧𑀓𑁆𑀓𑀺𑀮𑁂𑀲𑁄 𑀳𑁄𑀢𑀻𑀢𑀺? 𑀉𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑀢𑁄. 𑀲𑁄 𑀳𑀺 𑀢𑀲𑁆𑀲 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑁆𑀧𑀤𑀸𑀦𑁂𑀦 𑀉𑀧𑀓𑁆𑀓𑀺𑀮𑁂𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀦𑁂𑀓𑁆𑀔𑀫𑁆𑀫𑀦𑀺𑀦𑁆𑀦𑀦𑁆𑀢𑀺 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀦𑁆𑀦𑀁. 𑀘𑀺𑀢𑁆𑀢𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁. 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀭𑀡𑀻𑀬𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦 𑀅𑀪𑀺𑀚𑀸𑀦𑀺𑀢𑁆𑀯𑀸 𑀲𑀘𑁆𑀙𑀺𑀓𑀸𑀢𑀩𑁆𑀩𑁂𑀲𑀼 𑀙𑀴𑀪𑀺𑀜𑁆𑀜𑀸𑀥𑀫𑁆𑀫𑁂𑀲𑀼, 𑀏𑀓𑀁 𑀥𑀫𑁆𑀫𑀁 𑀯𑀸 𑀕𑀡𑁆𑀳𑀦𑁆𑀢𑁂𑀦 𑀦𑁂𑀓𑁆𑀔𑀫𑁆𑀫𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀓𑀺𑀮𑁂𑀲𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀸𑀭𑀺𑀧𑀼𑀢𑁆𑀢𑀲𑀁𑀬𑀼𑀢𑁆𑀢𑀁

𑁧-𑁯. 𑀯𑀺𑀯𑁂𑀓𑀚𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁩𑁨-𑁩𑁪𑁦. 𑀲𑀸𑀭𑀺𑀧𑀼𑀢𑁆𑀢𑀲𑀁𑀬𑀼𑀢𑁆𑀢𑀲𑁆𑀲 ¶ 𑀧𑀞𑀫𑁂 𑀦 𑀏𑀯𑀁 𑀳𑁄𑀢𑀻𑀢𑀺 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀸𑀦𑀁 𑀧𑀳𑀻𑀦𑀢𑁆𑀢𑀸 𑀏𑀯𑀁 𑀦 𑀳𑁄𑀢𑀺. 𑀤𑀼𑀢𑀺𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀞𑀫𑀸𑀤𑀻𑀦𑀺.

𑁧𑁦. 𑀲𑀼𑀘𑀺𑀫𑀼𑀔𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁧. 𑀤𑀲𑀫𑁂 𑀲𑀼𑀘𑀺𑀫𑀼𑀔𑀻𑀢𑀺 𑀏𑀯𑀁𑀦𑀸𑀫𑀺𑀓𑀸. 𑀉𑀧𑀲𑀗𑁆𑀓𑀫𑀻𑀢𑀺 𑀣𑁂𑀭𑀁 𑀅𑀪𑀺𑀭𑀽𑀧𑀁 𑀤𑀲𑁆𑀲𑀦𑀻𑀬𑀁 𑀲𑀼𑀯𑀡𑁆𑀡𑀯𑀡𑁆𑀡𑀁 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀁 𑀤𑀺𑀲𑁆𑀯𑀸 ‘‘𑀇𑀫𑀺𑀦𑀸 𑀲𑀤𑁆𑀥𑀺𑀁 𑀧𑀭𑀺𑀳𑀸𑀲𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀉𑀧𑀲𑀗𑁆𑀓𑀫𑀺. 𑀅𑀣 𑀣𑁂𑀭𑁂𑀦 𑀢𑀲𑁆𑀫𑀺𑀁 𑀯𑀘𑀦𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 ‘‘𑀇𑀤𑀸𑀦𑀺𑀲𑁆𑀲 ¶ 𑀯𑀸𑀤𑀁 𑀆𑀭𑁄𑀧𑁂𑀲𑁆𑀲𑀸𑀫𑀻’’𑀢𑀺 𑀫𑀜𑁆𑀜𑀫𑀸𑀦𑀸 𑀢𑁂𑀦 𑀳𑀺, 𑀲𑀫𑀡, 𑀉𑀩𑁆𑀪𑀫𑀼𑀔𑁄 𑀪𑀼𑀜𑁆𑀚𑀲𑀻𑀢𑀺 𑀆𑀳. 𑀤𑀺𑀲𑀸𑀫𑀼𑀔𑁄𑀢𑀺 ¶ 𑀘𑀢𑀼𑀤𑁆𑀤𑀺𑀲𑀸𑀫𑀼𑀔𑁄, 𑀘𑀢𑀲𑁆𑀲𑁄 𑀤𑀺𑀲𑀸 𑀑𑀮𑁄𑀓𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀯𑀺𑀤𑀺𑀲𑀸𑀫𑀼𑀔𑁄𑀢𑀺 𑀘𑀢𑀲𑁆𑀲𑁄 𑀯𑀺𑀤𑀺𑀲𑀸 𑀑𑀮𑁄𑀓𑁂𑀦𑁆𑀢𑁄.

𑀯𑀢𑁆𑀣𑀼𑀯𑀺𑀚𑁆𑀚𑀸𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬𑀸𑀢𑀺 𑀯𑀢𑁆𑀣𑀼𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀸𑀬 𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀬. 𑀯𑀢𑁆𑀣𑀼𑀯𑀺𑀚𑁆𑀚𑀸 𑀦𑀸𑀫 𑀮𑀸𑀩𑀼𑀯𑀢𑁆𑀣𑀼-𑀓𑀼𑀫𑁆𑀪𑀡𑁆𑀟𑀯𑀢𑁆𑀣𑀼-𑀫𑀽𑀮𑀓𑀯𑀢𑁆𑀣𑀼-𑀆𑀤𑀻𑀦𑀁 𑀯𑀢𑁆𑀣𑀽𑀦𑀁 𑀨𑀮𑀲𑀫𑁆𑀧𑀢𑁆𑀢𑀺𑀓𑀸𑀭𑀡𑀓𑀸𑀮𑀚𑀸𑀦𑀦𑀼𑀧𑀸𑀬𑁄. 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀻𑀢𑀺 𑀢𑁂𑀦𑁂𑀯 𑀯𑀢𑁆𑀣𑀼𑀯𑀺𑀚𑁆𑀚𑀸𑀢𑀺𑀭𑀘𑁆𑀙𑀸𑀦𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑁂𑀦 𑀫𑀺𑀘𑁆𑀙𑀸𑀚𑀻𑀯𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀺, 𑀢𑁂𑀲𑀁 𑀯𑀢𑁆𑀣𑀽𑀦𑀁 𑀲𑀫𑁆𑀧𑀸𑀤𑀦𑁂𑀦 𑀧𑀲𑀦𑁆𑀦𑁂𑀳𑀺 𑀫𑀦𑀼𑀲𑁆𑀲𑁂𑀳𑀺 𑀤𑀺𑀦𑁆𑀦𑁂 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀸 𑀚𑀻𑀯𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀥𑁄𑀫𑀼𑀔𑀸𑀢𑀺 𑀯𑀢𑁆𑀣𑀼𑀁 𑀑𑀮𑁄𑀓𑁂𑀢𑁆𑀯𑀸 𑀪𑀼𑀜𑁆𑀚𑀫𑀸𑀦𑀯𑀲𑁂𑀦 𑀅𑀥𑁄𑀫𑀼𑀔𑀸 𑀪𑀼𑀜𑁆𑀚𑀦𑁆𑀢𑀺 𑀦𑀸𑀫. 𑀏𑀯𑀁 𑀲𑀩𑁆𑀩𑀢𑁆𑀣 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀅𑀧𑀺 𑀘𑁂𑀢𑁆𑀣 𑀦𑀓𑁆𑀔𑀢𑁆𑀢𑀯𑀺𑀚𑁆𑀚𑀸𑀢𑀺 ‘‘𑀅𑀚𑁆𑀚 𑀇𑀫𑀁 𑀦𑀓𑁆𑀔𑀢𑁆𑀢𑀁 𑀇𑀫𑀺𑀦𑀸 𑀦𑀓𑁆𑀔𑀢𑁆𑀢𑁂𑀦 𑀕𑀦𑁆𑀢𑀩𑁆𑀩𑀁, 𑀇𑀫𑀺𑀦𑀸 𑀇𑀤𑀜𑁆𑀘𑀺𑀤𑀜𑁆𑀘 𑀓𑀸𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀚𑀸𑀦𑀦𑀯𑀺𑀚𑁆𑀚𑀸. 𑀤𑀽𑀢𑁂𑀬𑁆𑀬𑀦𑁆𑀢𑀺 𑀤𑀽𑀢𑀓𑀫𑁆𑀫𑀁, 𑀢𑁂𑀲𑀁 𑀢𑁂𑀲𑀁 𑀲𑀸𑀲𑀦𑀁 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀕𑀫𑀦𑀁. 𑀧𑀳𑀺𑀡𑀕𑀫𑀦𑀦𑁆𑀢𑀺 𑀏𑀓𑀕𑀸𑀫𑀲𑁆𑀫𑀺𑀁𑀬𑁂𑀯 𑀏𑀓𑀓𑀼𑀮𑀲𑁆𑀲 𑀲𑀸𑀲𑀦𑁂𑀦 𑀅𑀜𑁆𑀜𑀓𑀼𑀮𑀁 ¶ 𑀉𑀧𑀲𑀗𑁆𑀓𑀫𑀦𑀁. 𑀅𑀗𑁆𑀕𑀯𑀺𑀚𑁆𑀚𑀸𑀢𑀺 𑀇𑀢𑁆𑀣𑀺𑀮𑀓𑁆𑀔𑀡𑀧𑀼𑀭𑀺𑀲𑀮𑀓𑁆𑀔𑀡𑀯𑀲𑁂𑀦 𑀅𑀗𑁆𑀕𑀲𑀫𑁆𑀧𑀢𑁆𑀢𑀺𑀁 𑀜𑀢𑁆𑀯𑀸 ‘‘𑀢𑀸𑀬 𑀅𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀇𑀤𑀁 𑀦𑀸𑀫 𑀮𑀩𑁆𑀪𑀢𑀻’’𑀢𑀺 𑀏𑀯𑀁 𑀚𑀸𑀦𑀦𑀯𑀺𑀚𑁆𑀚𑀸. 𑀯𑀺𑀤𑀺𑀲𑀸𑀫𑀼𑀔𑀸𑀢𑀺 𑀅𑀗𑁆𑀕𑀯𑀺𑀚𑁆𑀚𑀸 𑀳𑀺 𑀢𑀁 𑀢𑀁 𑀲𑀭𑀻𑀭𑀓𑁄𑀝𑁆𑀞𑀸𑀲𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸 𑀯𑀺𑀤𑀺𑀲𑀸𑀬 𑀧𑀯𑀢𑁆𑀢𑀸 𑀦𑀸𑀫, 𑀢𑀲𑁆𑀫𑀸 𑀢𑀸𑀬 𑀯𑀺𑀚𑁆𑀚𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀸 𑀯𑀺𑀤𑀺𑀲𑀸𑀫𑀼𑀔𑀸 𑀪𑀼𑀜𑁆𑀚𑀦𑁆𑀢𑀺 𑀦𑀸𑀫. 𑀏𑀯𑀫𑀸𑀭𑁄𑀘𑁂𑀲𑀻𑀢𑀺 ‘‘𑀥𑀫𑁆𑀫𑀺𑀓𑀁 𑀲𑀫𑀡𑀸’’𑀢𑀺𑀆𑀤𑀻𑀦𑀺 𑀯𑀤𑀫𑀸𑀦𑀸 𑀲𑀸𑀲𑀦𑀲𑁆𑀲 𑀦𑀺𑀬𑁆𑀬𑀸𑀦𑀺𑀓𑀁 𑀕𑀼𑀡𑀁 𑀓𑀣𑁂𑀲𑀺. 𑀢𑀜𑁆𑀘 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀓𑀣𑀁 𑀲𑀼𑀢𑁆𑀯𑀸 𑀧𑀜𑁆𑀘𑀫𑀢𑁆𑀢𑀸𑀦𑀺 𑀓𑀼𑀮𑀲𑀢𑀸𑀦𑀺 𑀲𑀸𑀲𑀦𑁂 𑀑𑀢𑀭𑀺𑀁𑀲𑀽𑀢𑀺.

𑀲𑀸𑀭𑀺𑀧𑀼𑀢𑁆𑀢𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀦𑀸𑀕𑀲𑀁𑀬𑀼𑀢𑁆𑀢𑀁

𑁧. 𑀲𑀼𑀤𑁆𑀥𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁨. 𑀦𑀸𑀕𑀲𑀁𑀬𑀼𑀢𑁆𑀢𑁂 ¶ 𑀅𑀡𑁆𑀟𑀚𑀸𑀢𑀺 𑀅𑀡𑁆𑀟𑁂 𑀚𑀸𑀢𑀸. 𑀚𑀮𑀸𑀩𑀼𑀚𑀸𑀢𑀺 𑀯𑀢𑁆𑀣𑀺𑀓𑁄𑀲𑁂 𑀚𑀸𑀢𑀸. 𑀲𑀁𑀲𑁂𑀤𑀚𑀸𑀢𑀺 𑀲𑀁𑀲𑁂𑀤𑁂 𑀚𑀸𑀢𑀸. 𑀑𑀧𑀧𑀸𑀢𑀺𑀓𑀸𑀢𑀺 𑀉𑀧𑀧𑀢𑀺𑀢𑁆𑀯𑀸 ¶ 𑀯𑀺𑀬 𑀚𑀸𑀢𑀸. 𑀇𑀤𑀜𑁆𑀘 𑀧𑀦 𑀲𑀼𑀢𑁆𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 ¶ 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀽𑀦𑀜𑁆𑀳𑀺 ‘‘𑀓𑀢𑀺 𑀦𑀼 𑀔𑁄 𑀦𑀸𑀕𑀬𑁄𑀦𑀺𑀬𑁄’’𑀢𑀺 𑀓𑀣𑀸 𑀉𑀤𑀧𑀸𑀤𑀺. 𑀅𑀣 𑀪𑀕𑀯𑀸 𑀧𑀼𑀕𑁆𑀕𑀮𑀸𑀦𑀁 𑀦𑀸𑀕𑀬𑁄𑀦𑀻𑀳𑀺 𑀉𑀤𑁆𑀥𑀭𑀡𑀢𑁆𑀣𑀁 𑀦𑀸𑀕𑀬𑁄𑀦𑀺𑀬𑁄 𑀆𑀯𑀺𑀓𑀭𑁄𑀦𑁆𑀢𑁄 𑀇𑀫𑀁 𑀲𑀼𑀢𑁆𑀢𑀫𑀸𑀳.

𑁨-𑁫𑁦. 𑀧𑀡𑀻𑀢𑀢𑀭𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁪𑁩-𑁩𑁯𑁧. 𑀤𑀼𑀢𑀺𑀬𑀸𑀤𑀻𑀲𑀼 𑀯𑁄𑀲𑁆𑀲𑀝𑁆𑀞𑀓𑀸𑀬𑀸𑀢𑀺 𑀅𑀳𑀺𑀢𑀼𑀡𑁆𑀟𑀺𑀓𑀧𑀭𑀺𑀩𑀼𑀤𑁆𑀥𑀁 𑀅𑀕𑀡𑁂𑀢𑁆𑀯𑀸 𑀯𑀺𑀲𑁆𑀲𑀝𑁆𑀞𑀓𑀸𑀬𑀸. 𑀤𑁆𑀯𑀬𑀓𑀸𑀭𑀺𑀦𑁄𑀢𑀺 𑀤𑀼𑀯𑀺𑀥𑀓𑀸𑀭𑀺𑀦𑁄, 𑀓𑀼𑀲𑀮𑀸𑀓𑀼𑀲𑀮𑀓𑀸𑀭𑀺𑀦𑁄𑀢𑀺 𑀅𑀢𑁆𑀣𑁄. 𑀲𑀘𑀚𑁆𑀚 𑀫𑀬𑀦𑁆𑀢𑀺 𑀲𑀘𑁂 𑀅𑀚𑁆𑀚 𑀫𑀬𑀁. 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀻𑀢𑀺 𑀲𑀳𑀪𑀸𑀯𑀁 𑀆𑀧𑀚𑁆𑀚𑀢𑀺. 𑀢𑀢𑁆𑀭𑀲𑁆𑀲 𑀅𑀓𑀼𑀲𑀮𑀁 𑀉𑀧𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀓𑀼𑀲𑀮𑀁 𑀉𑀧𑀧𑀦𑁆𑀦𑀸𑀦𑀁 𑀲𑀫𑁆𑀧𑀢𑁆𑀢𑀺𑀬𑀸. 𑀅𑀦𑁆𑀦𑀦𑁆𑀢𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀁. 𑀧𑀸𑀦𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀧𑀸𑀦𑀓𑀁. 𑀯𑀢𑁆𑀣𑀦𑁆𑀢𑀺 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀁. 𑀬𑀸𑀦𑀦𑁆𑀢𑀺 𑀙𑀢𑁆𑀢𑀼𑀧𑀸𑀳𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀁𑀓𑀺𑀜𑁆𑀘𑀺 𑀕𑀫𑀦𑀧𑀘𑁆𑀘𑀬𑀁. 𑀫𑀸𑀮𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀲𑀼𑀫𑀦𑀫𑀸𑀮𑀸𑀤𑀺𑀧𑀼𑀧𑁆𑀨𑀁. 𑀕𑀦𑁆𑀥𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀘𑀦𑁆𑀤𑀦𑀸𑀤𑀺𑀕𑀦𑁆𑀥𑀁. 𑀯𑀺𑀮𑁂𑀧𑀦𑀦𑁆𑀢𑀺 𑀬𑀁𑀓𑀺𑀜𑁆𑀘𑀺 𑀙𑀯𑀺𑀭𑀸𑀕𑀓𑀭𑀡𑀁. 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀦𑁆𑀢𑀺 𑀫𑀜𑁆𑀘𑀧𑀻𑀞𑀸𑀤𑀺𑀲𑁂𑀬𑁆𑀬𑀁 𑀏𑀓𑀪𑀽𑀫𑀺𑀓𑀸𑀤𑀺𑀆𑀯𑀲𑀣𑀁 𑀯𑀝𑁆𑀝𑀺𑀢𑁂𑀮𑀸𑀤𑀺𑀧𑀤𑀻𑀧𑀽𑀧𑀓𑀭𑀡𑀜𑁆𑀘 𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀲𑀜𑁆𑀳𑀺 𑀤𑀻𑀖𑀸𑀬𑀼𑀓𑀢𑀸𑀬 𑀘 𑀯𑀡𑁆𑀡𑀯𑀦𑁆𑀢𑀢𑀸𑀬 𑀘 𑀲𑀼𑀔𑀩𑀳𑀼𑀮𑀢𑀸𑀬 𑀘 𑀧𑀢𑁆𑀣𑀦𑀁 𑀓𑀢𑁆𑀯𑀸 𑀇𑀫𑀁 𑀤𑀲𑀯𑀺𑀥𑀁 𑀤𑀸𑀦𑀯𑀢𑁆𑀣𑀼𑀁 𑀤𑀢𑁆𑀯𑀸 𑀢𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀢𑀼𑀁 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑁆𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀦𑀸𑀕𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀲𑀼𑀧𑀡𑁆𑀡𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸

𑁩𑁯𑁨-𑁪𑁩𑁭. 𑀲𑀼𑀧𑀡𑁆𑀡𑀲𑀁𑀬𑀼𑀢𑁆𑀢𑁂 ¶ 𑀧𑀢𑁆𑀢𑀸𑀦𑀁 𑀯𑀡𑁆𑀡𑀯𑀦𑁆𑀢𑀢𑀸𑀬 𑀕𑀭𑀼𑀴𑀸 𑀲𑀼𑀧𑀡𑁆𑀡𑀸𑀢𑀺 𑀯𑀼𑀢𑁆𑀢𑀸. 𑀇𑀥𑀸𑀧𑀺 𑀧𑀞𑀫𑀲𑀼𑀢𑁆𑀢𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. 𑀳𑀭𑀦𑁆𑀢𑀻𑀢𑀺 𑀉𑀤𑁆𑀥𑀭𑀦𑁆𑀢𑀺. 𑀉𑀤𑁆𑀥𑀭𑀫𑀸𑀦𑀸 𑀘 𑀧𑀦 𑀢𑁂 𑀅𑀢𑁆𑀢𑀦𑀸 𑀳𑀻𑀦𑁂 𑀯𑀸 𑀲𑀫𑁂 𑀯𑀸 𑀉𑀤𑁆𑀥𑀭𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀦 ¶ 𑀅𑀢𑁆𑀢𑀦𑀸 𑀧𑀡𑀻𑀢𑀢𑀭𑁂. 𑀲𑀢𑁆𑀢𑀯𑀺𑀥𑀸 𑀳𑀺 𑀅𑀦𑀼𑀤𑁆𑀥𑀭𑀡𑀻𑀬𑀦𑀸𑀕𑀸 𑀦𑀸𑀫 𑀧𑀡𑀻𑀢𑀢𑀭𑀸 𑀓𑀫𑁆𑀩𑀮𑀲𑁆𑀲𑀢𑀭𑀸 𑀥𑀢𑀭𑀝𑁆𑀞𑀸 𑀲𑀢𑁆𑀢𑀲𑀻𑀤𑀦𑁆𑀢𑀭𑀯𑀸𑀲𑀺𑀦𑁄 𑀧𑀣𑀯𑀺𑀝𑁆𑀞𑀓𑀸 𑀧𑀩𑁆𑀩𑀢𑀝𑁆𑀞𑀓𑀸 𑀯𑀺𑀫𑀸𑀦𑀝𑁆𑀞𑀓𑀸𑀢𑀺. 𑀢𑀢𑁆𑀭 𑀅𑀡𑁆𑀟𑀚𑀸𑀤𑀻𑀦𑀁 𑀚𑀮𑀸𑀩𑀼𑀚𑀸𑀤𑀬𑁄 𑀧𑀡𑀻𑀢𑀢𑀭𑀸 ¶ , 𑀢𑁂 𑀢𑁂𑀳𑀺 𑀅𑀦𑀼𑀤𑁆𑀥𑀭𑀡𑀻𑀬𑀸. 𑀓𑀫𑁆𑀩𑀮𑀲𑁆𑀲𑀢𑀭𑀸 𑀧𑀦 𑀦𑀸𑀕𑀲𑁂𑀦𑀸𑀧𑀢𑀺𑀦𑁄, 𑀢𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀤𑀺𑀲𑁆𑀯𑀸 𑀬𑁄 𑀓𑁄𑀘𑀺 𑀲𑀼𑀧𑀡𑁆𑀡𑁄 𑀉𑀤𑁆𑀥𑀭𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀥𑀢𑀭𑀝𑁆𑀞𑀸 𑀧𑀦 𑀦𑀸𑀕𑀭𑀸𑀚𑀸𑀦𑁄, 𑀢𑁂𑀧𑀺 𑀓𑁄𑀘𑀺 𑀉𑀤𑁆𑀥𑀭𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀬𑁂 𑀧𑀦 𑀲𑀢𑁆𑀢𑀲𑀻𑀤𑀦𑁆𑀢𑀭𑁂 𑀫𑀳𑀸𑀲𑀫𑀼𑀤𑁆𑀤𑁂 𑀯𑀲𑀦𑁆𑀢𑀺, 𑀢𑁂 𑀬𑀲𑁆𑀫𑀸 𑀓𑀢𑁆𑀣𑀘𑀺 𑀯𑀺𑀓𑀫𑁆𑀧𑀦𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀓𑁄𑀘𑀺 𑀉𑀤𑁆𑀥𑀭𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀧𑀣𑀯𑀺𑀝𑁆𑀞𑀓𑀸𑀤𑀻𑀦𑀁 𑀦𑀺𑀮𑀻𑀬𑀦𑁄𑀓𑀸𑀲𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑁂𑀧𑀺 𑀉𑀤𑁆𑀥𑀭𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀬𑁂 𑀧𑀦 𑀫𑀳𑀸𑀲𑀫𑀼𑀤𑁆𑀤𑁂 𑀊𑀫𑀺𑀧𑀺𑀝𑁆𑀞𑁂 𑀯𑀲𑀦𑁆𑀢𑀺, 𑀢𑁂 𑀬𑁄 𑀓𑁄𑀘𑀺 𑀲𑀫𑁄 𑀯𑀸 𑀧𑀡𑀻𑀢𑀢𑀭𑁄 𑀯𑀸 𑀲𑀼𑀧𑀡𑁆𑀡𑁄 𑀉𑀤𑁆𑀥𑀭𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀲𑁂𑀲𑀁 𑀦𑀸𑀕𑀲𑀁𑀬𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀲𑀼𑀧𑀡𑁆𑀡𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀕𑀦𑁆𑀥𑀩𑁆𑀩𑀓𑀸𑀬𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸

𑁪𑁩𑁮-𑁫𑁪𑁯. 𑀕𑀦𑁆𑀥𑀩𑁆𑀩𑀓𑀸𑀬𑀲𑀁𑀬𑀼𑀢𑁆𑀢𑁂 ¶ 𑀫𑀽𑀮𑀕𑀦𑁆𑀥𑁂 𑀅𑀥𑀺𑀯𑀢𑁆𑀣𑀸𑀢𑀺 𑀬𑀲𑁆𑀲 𑀭𑀼𑀓𑁆𑀔𑀲𑁆𑀲 𑀫𑀽𑀮𑁂 𑀕𑀦𑁆𑀥𑁄 𑀅𑀢𑁆𑀣𑀺, 𑀢𑀁 𑀦𑀺𑀲𑁆𑀲𑀸𑀬 𑀦𑀺𑀩𑁆𑀩𑀢𑁆𑀢𑀸. 𑀲𑁄 𑀳𑀺 𑀲𑀓𑀮𑁄𑀧𑀺 𑀭𑀼𑀓𑁆𑀔𑁄 𑀢𑁂𑀲𑀁 𑀉𑀧𑀓𑀧𑁆𑀧𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀕𑀦𑁆𑀥𑀕𑀦𑁆𑀥𑁂𑀢𑀺 𑀫𑀽𑀮𑀸𑀤𑀺𑀕𑀦𑁆𑀥𑀸𑀦𑀁 𑀕𑀦𑁆𑀥𑁂. 𑀬𑀲𑁆𑀲 𑀳𑀺 𑀭𑀼𑀓𑁆𑀔𑀲𑁆𑀲 𑀲𑀩𑁆𑀩𑁂𑀲𑀫𑁆𑀧𑀺 𑀫𑀽𑀮𑀸𑀤𑀻𑀦𑀁 𑀕𑀦𑁆𑀥𑁄 𑀅𑀢𑁆𑀣𑀺, 𑀲𑁄 𑀇𑀥 𑀕𑀦𑁆𑀥𑁄 𑀦𑀸𑀫. 𑀢𑀲𑁆𑀲 𑀕𑀦𑁆𑀥𑀲𑁆𑀲 𑀕𑀦𑁆𑀥𑁂, 𑀢𑀲𑁆𑀫𑀺𑀁 𑀅𑀥𑀺𑀯𑀢𑁆𑀣𑀸. 𑀇𑀥 𑀫𑀽𑀮𑀸𑀤𑀻𑀦𑀺 𑀲𑀩𑁆𑀩𑀸𑀦𑀺 𑀢𑁂𑀲𑀁𑀬𑁂𑀯 𑀉𑀧𑀓𑀧𑁆𑀧𑀦𑁆𑀢𑀺. 𑀲𑁄 𑀤𑀸𑀢𑀸 𑀳𑁄𑀢𑀺 𑀫𑀽𑀮𑀕𑀦𑁆𑀥𑀸𑀦𑀦𑁆𑀢𑀺 𑀲𑁄 𑀓𑀸𑀴𑀸𑀦𑀼𑀲𑀸𑀭𑀺𑀓𑀸𑀤𑀻𑀦𑀁 𑀫𑀽𑀮𑀕𑀦𑁆𑀥𑀸𑀦𑀁 𑀤𑀸𑀢𑀸 𑀳𑁄𑀢𑀺. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀲𑀭𑀺𑀓𑁆𑀔𑀤𑀸𑀦𑀫𑁆𑀧𑀺 𑀤𑀢𑁆𑀯𑀸 𑀧𑀢𑁆𑀣𑀦𑀁 𑀞𑀧𑁂𑀦𑁆𑀢𑀺, 𑀅𑀲𑀭𑀺𑀓𑁆𑀔𑀤𑀸𑀦𑀫𑁆𑀧𑀺. 𑀢𑀁 𑀤𑀲𑁆𑀲𑁂𑀢𑀼𑀁 𑀲𑁄 𑀅𑀦𑁆𑀦𑀁 𑀤𑁂𑀢𑀻𑀢𑀺𑀆𑀤𑀺 𑀤𑀲𑀯𑀺𑀥𑀁 𑀤𑀸𑀦𑀯𑀢𑁆𑀣𑀼 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀕𑀦𑁆𑀥𑀩𑁆𑀩𑀓𑀸𑀬𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀯𑀮𑀸𑀳𑀓𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸

𑁫𑁫𑁦-𑁬𑁦𑁬. 𑀯𑀮𑀸𑀳𑀓𑀲𑀁𑀬𑀼𑀢𑁆𑀢𑁂 ¶ ¶ 𑀯𑀮𑀸𑀳𑀓𑀓𑀸𑀬𑀺𑀓𑀸𑀢𑀺 𑀯𑀮𑀸𑀳𑀓𑀦𑀸𑀫𑀓𑁂 𑀤𑁂𑀯𑀓𑀸𑀬𑁂 𑀉𑀧𑁆𑀧𑀦𑁆𑀦𑀸 𑀆𑀓𑀸𑀲𑀘𑀸𑀭𑀺𑀓𑀤𑁂𑀯𑀸. 𑀲𑀻𑀢𑀯𑀮𑀸𑀳𑀓𑀸𑀢𑀺 𑀲𑀻𑀢𑀓𑀭𑀡𑀯𑀮𑀸𑀳𑀓𑀸. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀘𑁂𑀢𑁄𑀧𑀡𑀺𑀥𑀺𑀫𑀦𑁆𑀯𑀸𑀬𑀸𑀢𑀺 𑀘𑀺𑀢𑁆𑀢𑀝𑁆𑀞𑀧𑀦𑀁 𑀆𑀕𑀫𑁆𑀫. 𑀲𑀻𑀢𑀁 𑀳𑁄𑀢𑀻𑀢𑀺 𑀬𑀁 𑀯𑀲𑁆𑀲𑀸𑀦𑁂 𑀯𑀸 𑀳𑁂𑀫𑀦𑁆𑀢𑁂 ¶ 𑀯𑀸 𑀲𑀻𑀢𑀁 𑀳𑁄𑀢𑀺, 𑀢𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀫𑁂𑀯. 𑀬𑀁 𑀧𑀦 𑀲𑀻𑀢𑁂𑀧𑀺 𑀅𑀢𑀺𑀲𑀻𑀢𑀁, 𑀕𑀺𑀫𑁆𑀳𑁂 𑀘 𑀉𑀧𑁆𑀧𑀦𑁆𑀦𑀁 𑀲𑀻𑀢𑀁, 𑀢𑀁 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀁 𑀲𑀻𑀢𑀁 𑀦𑀸𑀫. 𑀉𑀡𑁆𑀳𑀁 𑀳𑁄𑀢𑀻𑀢𑀺 𑀬𑀁 𑀕𑀺𑀫𑁆𑀳𑀸𑀦𑁂 𑀉𑀡𑁆𑀳𑀁, 𑀢𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀁 𑀧𑀸𑀓𑀢𑀺𑀓𑀫𑁂𑀯. 𑀬𑀁 𑀧𑀦 𑀉𑀡𑁆𑀳𑁂𑀧𑀺 𑀅𑀢𑀺𑀉𑀡𑁆𑀳𑀁, 𑀲𑀻𑀢𑀓𑀸𑀮𑁂 𑀘 𑀉𑀧𑁆𑀧𑀦𑁆𑀦𑀁 𑀉𑀡𑁆𑀳𑀁, 𑀢𑀁 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀁 𑀉𑀡𑁆𑀳𑀁 𑀦𑀸𑀫. 𑀅𑀩𑁆𑀪𑀁 𑀳𑁄𑀢𑀻𑀢𑀺 𑀅𑀩𑁆𑀪𑀫𑀡𑁆𑀟𑀧𑁄 𑀳𑁄𑀢𑀺. 𑀇𑀥𑀸𑀧𑀺 𑀬𑀁 𑀯𑀲𑁆𑀲𑀸𑀦𑁂 𑀘 𑀲𑀺𑀲𑀺𑀭𑁂 𑀘 𑀅𑀩𑁆𑀪𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀁 𑀧𑀸𑀓𑀢𑀺𑀓𑀫𑁂𑀯. 𑀬𑀁 𑀧𑀦 𑀅𑀩𑁆𑀪𑁂𑀬𑁂𑀯 𑀅𑀢𑀺𑀅𑀩𑁆𑀪𑀁, 𑀲𑀢𑁆𑀢𑀲𑀢𑁆𑀢𑀸𑀳𑀫𑁆𑀧𑀺 𑀘𑀦𑁆𑀤𑀲𑀽𑀭𑀺𑀬𑁂 𑀙𑀸𑀤𑁂𑀢𑁆𑀯𑀸 𑀏𑀓𑀦𑁆𑀥𑀓𑀸𑀭𑀁 𑀓𑀭𑁄𑀢𑀺, 𑀬𑀜𑁆𑀘 𑀘𑀺𑀢𑁆𑀢𑀯𑁂𑀲𑀸𑀔𑀫𑀸𑀲𑁂𑀲𑀼 𑀅𑀩𑁆𑀪𑀁, 𑀢𑀁 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀉𑀧𑁆𑀧𑀦𑁆𑀦𑀁 𑀅𑀩𑁆𑀪𑀁 𑀦𑀸𑀫. 𑀯𑀸𑀢𑁄 𑀳𑁄𑀢𑀻𑀢𑀺 𑀬𑁄 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀉𑀢𑀼𑀫𑁆𑀳𑀺 𑀉𑀢𑁆𑀢𑀭𑀤𑀓𑁆𑀔𑀺𑀡𑀸𑀤𑀺𑀧𑀓𑀢𑀺𑀯𑀸𑀢𑁄 𑀳𑁄𑀢𑀺, 𑀅𑀬𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑁄𑀯. 𑀬𑁄𑀧𑀺 𑀧𑀦 𑀭𑀼𑀓𑁆𑀔𑀓𑁆𑀔𑀦𑁆𑀥𑀸𑀤𑀺𑀧𑀤𑀸𑀮𑀦𑁄 𑀅𑀢𑀺𑀯𑀸𑀢𑁄 𑀦𑀸𑀫 𑀅𑀢𑁆𑀣𑀺, 𑀅𑀬𑀜𑁆𑀘𑁂𑀯, 𑀬𑁄 𑀘 𑀅𑀜𑁆𑀜𑁄𑀧𑀺 𑀅𑀓𑀸𑀮𑀯𑀸𑀢𑁄, 𑀅𑀬𑀁 𑀤𑁂𑀯𑀢𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑁄 𑀦𑀸𑀫. 𑀤𑁂𑀯𑁄 𑀯𑀲𑁆𑀲𑀢𑀻𑀢𑀺 𑀬𑀁 𑀯𑀲𑁆𑀲𑀺𑀓𑁂 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀯𑀲𑁆𑀲𑀁, 𑀢𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀫𑁂𑀯. 𑀬𑀁 𑀧𑀦 𑀯𑀲𑁆𑀲𑁂𑀬𑁂𑀯 𑀅𑀢𑀺𑀯𑀲𑁆𑀲𑀁, 𑀬𑀜𑁆𑀘 𑀘𑀺𑀢𑁆𑀢𑀯𑁂𑀲𑀸𑀔𑀫𑀸𑀲𑁂𑀲𑀼 𑀯𑀲𑁆𑀲𑀁, 𑀢𑀁 𑀤𑁂𑀯𑀢𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑀁 𑀦𑀸𑀫.

𑀢𑀢𑁆𑀭𑀺𑀤𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀯𑀲𑁆𑀲𑀯𑀮𑀸𑀳𑀓𑀤𑁂𑀯𑀧𑀼𑀢𑁆𑀢𑁄 𑀢𑀮𑀓𑀽𑀝𑀓𑀯𑀸𑀲𑀺 𑀔𑀻𑀡𑀸𑀲𑀯𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀣𑁂𑀭𑁄 ‘‘𑀓𑁄𑀲𑀺 𑀢𑁆𑀯’’𑀦𑁆𑀢𑀺 𑀧𑀼𑀘𑁆𑀙𑀺. ‘‘𑀅𑀳𑀁, 𑀪𑀦𑁆𑀢𑁂, 𑀯𑀲𑁆𑀲𑀯𑀮𑀸𑀳𑀓𑀤𑁂𑀯𑀧𑀼𑀢𑁆𑀢𑁄’’𑀢𑀺. ‘‘𑀢𑀼𑀫𑁆𑀳𑀸𑀓𑀁 𑀓𑀺𑀭 𑀘𑀺𑀢𑁆𑀢𑁂𑀦 𑀤𑁂𑀯𑁄 𑀯𑀲𑁆𑀲𑀢𑀻’’𑀢𑀺? ‘‘𑀆𑀫, 𑀪𑀦𑁆𑀢𑁂’’𑀢𑀺. ‘‘𑀧𑀲𑁆𑀲𑀺𑀢𑀼𑀓𑀸𑀫𑀸 𑀫𑀬’’𑀦𑁆𑀢𑀺 ¶ . ‘‘𑀢𑁂𑀫𑀺𑀲𑁆𑀲𑀣, 𑀪𑀦𑁆𑀢𑁂’’𑀢𑀺. ‘‘𑀫𑁂𑀖𑀲𑀻𑀲𑀁 𑀯𑀸 𑀕𑀚𑁆𑀚𑀺𑀢𑀁 𑀯𑀸 𑀦 𑀧𑀜𑁆𑀜𑀸𑀬𑀢𑀺, 𑀓𑀣𑀁 𑀢𑁂𑀫𑀺𑀲𑁆𑀲𑀸𑀫𑀸’’𑀢𑀺? ‘‘𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁𑀘𑀺𑀢𑁆𑀢𑁂𑀦 𑀤𑁂𑀯𑁄 𑀯𑀲𑁆𑀲𑀢𑀺, 𑀢𑀼𑀫𑁆𑀳𑁂 𑀧𑀡𑁆𑀡𑀲𑀸𑀮𑀁 𑀧𑀯𑀺𑀲𑀣𑀸’’𑀢𑀺 ¶ . ‘‘𑀲𑀸𑀥𑀼 𑀤𑁂𑀯𑀧𑀼𑀢𑁆𑀢𑀸’’𑀢𑀺 𑀲𑁄 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀧𑀡𑁆𑀡𑀲𑀸𑀮𑀁 𑀧𑀸𑀯𑀺𑀲𑀺. 𑀤𑁂𑀯𑀧𑀼𑀢𑁆𑀢𑁄 𑀢𑀲𑁆𑀫𑀺𑀁 𑀧𑀯𑀺𑀲𑀦𑁆𑀢𑁂𑀬𑁂𑀯 𑀏𑀓𑀁 𑀕𑀻𑀢𑀁 𑀕𑀸𑀬𑀺𑀢𑁆𑀯𑀸 𑀳𑀢𑁆𑀣𑀁 𑀉𑀓𑁆𑀔𑀺𑀧𑀺. 𑀲𑀫𑀦𑁆𑀢𑀸 𑀢𑀺𑀬𑁄𑀚𑀦𑀝𑁆𑀞𑀸𑀦𑀁 𑀏𑀓𑀫𑁂𑀖𑀁 𑀅𑀳𑁄𑀲𑀺. 𑀣𑁂𑀭𑁄 𑀅𑀤𑁆𑀥𑀢𑀺𑀦𑁆𑀢𑁄 𑀧𑀡𑁆𑀡𑀲𑀸𑀮𑀁 𑀧𑀯𑀺𑀝𑁆𑀞𑁄𑀢𑀺. 𑀅𑀧𑀺𑀘 𑀤𑁂𑀯𑁄 𑀦𑀸𑀫𑁂𑀲 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀯𑀲𑁆𑀲𑀢𑀺 𑀦𑀸𑀕𑀸𑀦𑀼𑀪𑀸𑀯𑁂𑀦 𑀲𑀼𑀧𑀡𑁆𑀡𑀸𑀦𑀼𑀪𑀸𑀯𑁂𑀦 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀲𑀘𑁆𑀘𑀓𑀺𑀭𑀺𑀬𑀸𑀬 𑀉𑀢𑀼𑀲𑀫𑀼𑀝𑁆𑀞𑀸𑀦𑁂𑀦 𑀫𑀸𑀭𑀸𑀯𑀝𑁆𑀝𑀦𑁂𑀦 𑀇𑀤𑁆𑀥𑀺𑀩𑀮𑁂𑀦 𑀯𑀺𑀦𑀸𑀲𑀫𑁂𑀖𑁂𑀦𑀸𑀢𑀺.

𑀯𑀮𑀸𑀳𑀓𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀯𑀘𑁆𑀙𑀕𑁄𑀢𑁆𑀢𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸

𑁬𑁦𑁭-𑁬𑁬𑁧. 𑀯𑀘𑁆𑀙𑀕𑁄𑀢𑁆𑀢𑀲𑀁𑀬𑀼𑀢𑁆𑀢𑁂 ¶ ¶ 𑀅𑀜𑁆𑀜𑀸𑀡𑀸𑀢𑀺 𑀅𑀜𑁆𑀜𑀸𑀡𑁂𑀦. 𑀏𑀯𑀁 𑀲𑀩𑁆𑀩𑀧𑀤𑁂𑀲𑀼 𑀓𑀭𑀡𑀯𑀲𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑀸𑀦𑀺 𑀘𑁂𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑁂𑀯𑀸𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀲𑀁𑀬𑀼𑀢𑁆𑀢𑁂 𑀏𑀓𑀸𑀤𑀲 𑀲𑀼𑀢𑁆𑀢𑀸𑀦𑀺 𑀧𑀜𑁆𑀘𑀧𑀜𑁆𑀜𑀸𑀲 𑀯𑁂𑀬𑁆𑀬𑀸𑀓𑀭𑀡𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀯𑀘𑁆𑀙𑀕𑁄𑀢𑁆𑀢𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀛𑀸𑀦𑀲𑀁𑀬𑀼𑀢𑁆𑀢𑀁

𑁧. 𑀲𑀫𑀸𑀥𑀺𑀫𑀽𑀮𑀓𑀲𑀫𑀸𑀧𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁬𑁨. 𑀛𑀸𑀦𑀲𑀁𑀬𑀼𑀢𑁆𑀢𑀲𑁆𑀲 ¶ 𑀧𑀞𑀫𑁂 𑀲𑀫𑀸𑀥𑀺𑀓𑀼𑀲𑀮𑁄𑀢𑀺 𑀧𑀞𑀫𑀁 𑀛𑀸𑀦𑀁 𑀧𑀜𑁆𑀘𑀗𑁆𑀕𑀺𑀓𑀁 𑀤𑀼𑀢𑀺𑀬𑀁 𑀢𑀺𑀯𑀗𑁆𑀕𑀺𑀓𑀦𑁆𑀢𑀺 𑀏𑀯𑀁 𑀅𑀗𑁆𑀕𑀯𑀯𑀢𑁆𑀣𑀸𑀦𑀓𑀼𑀲𑀮𑁄. 𑀦 𑀲𑀫𑀸𑀥𑀺𑀲𑁆𑀫𑀺𑀁 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁄𑀢𑀺 𑀘𑀺𑀢𑁆𑀢𑀁 𑀳𑀸𑀲𑁂𑀢𑁆𑀯𑀸 𑀓𑀮𑁆𑀮𑀁 𑀓𑀢𑁆𑀯𑀸 𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀤𑀸𑀦𑀺𑀧𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁨-𑁫𑁫. 𑀲𑀫𑀸𑀥𑀺𑀫𑀽𑀮𑀓𑀞𑀺𑀢𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁬𑁬𑁩-𑁭𑁧𑁬. 𑀤𑀼𑀢𑀺𑀬𑀸𑀤𑀻𑀲𑀼 𑀦 𑀲𑀫𑀸𑀥𑀺𑀲𑁆𑀫𑀺𑀁 𑀞𑀺𑀢𑀺𑀓𑀼𑀲𑀮𑁄𑀢𑀺 𑀛𑀸𑀦𑀁 𑀞𑀧𑁂𑀢𑀼𑀁 𑀅𑀓𑀼𑀲𑀮𑁄, 𑀲𑀢𑁆𑀢𑀝𑁆𑀞𑀅𑀘𑁆𑀙𑀭𑀸𑀫𑀢𑁆𑀢𑀁 𑀛𑀸𑀦𑀁 𑀞𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀦 𑀲𑀫𑀸𑀥𑀺𑀲𑁆𑀫𑀺𑀁 𑀯𑀼𑀝𑁆𑀞𑀸𑀦𑀓𑀼𑀲𑀮𑁄𑀢𑀺 𑀛𑀸𑀦𑀢𑁄 𑀯𑀼𑀝𑁆𑀞𑀸𑀢𑀼𑀁 ¶ 𑀅𑀓𑀼𑀲𑀮𑁄, 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦 𑀯𑀼𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀦 𑀲𑀫𑀸𑀥𑀺𑀲𑁆𑀫𑀺𑀁 𑀓𑀮𑁆𑀮𑀺𑀢𑀓𑀼𑀲𑀮𑁄𑀢𑀺 𑀘𑀺𑀢𑁆𑀢𑀁 𑀳𑀸𑀲𑁂𑀢𑁆𑀯𑀸 𑀓𑀮𑁆𑀮𑀁 𑀓𑀸𑀢𑀼𑀁 𑀅𑀓𑀼𑀲𑀮𑁄. 𑀦 𑀲𑀫𑀸𑀥𑀺𑀲𑁆𑀫𑀺𑀁 𑀆𑀭𑀫𑁆𑀫𑀡𑀓𑀼𑀲𑀮𑁄𑀢𑀺 𑀓𑀲𑀺𑀡𑀸𑀭𑀫𑁆𑀫𑀡𑁂𑀲𑀼 𑀅𑀓𑀼𑀲𑀮𑁄. 𑀦 𑀲𑀫𑀸𑀥𑀺𑀲𑁆𑀫𑀺𑀁 𑀕𑁄𑀘𑀭𑀓𑀼𑀲𑀮𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑀕𑁄𑀘𑀭𑁂 𑀘𑁂𑀯 𑀪𑀺𑀓𑁆𑀔𑀸𑀘𑀸𑀭𑀕𑁄𑀘𑀭𑁂 𑀘 𑀅𑀓𑀼𑀲𑀮𑁄. 𑀦 𑀲𑀫𑀸𑀥𑀺𑀲𑁆𑀫𑀺𑀁 𑀅𑀪𑀺𑀦𑀻𑀳𑀸𑀭𑀓𑀼𑀲𑀮𑁄𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀅𑀪𑀺𑀦𑀻𑀳𑀭𑀺𑀢𑀼𑀁 𑀅𑀓𑀼𑀲𑀮𑁄. 𑀦 𑀲𑀫𑀸𑀥𑀺𑀲𑁆𑀫𑀺𑀁 𑀲𑀓𑁆𑀓𑀘𑁆𑀘𑀓𑀸𑀭𑀻𑀢𑀺 𑀛𑀸𑀦𑀁 𑀅𑀧𑁆𑀧𑁂𑀢𑀼𑀁 𑀲𑀓𑁆𑀓𑀘𑁆𑀘𑀓𑀸𑀭𑀻 𑀦 𑀳𑁄𑀢𑀺. 𑀦 𑀲𑀫𑀸𑀥𑀺𑀲𑁆𑀫𑀺𑀁 𑀲𑀸𑀢𑀘𑁆𑀘𑀓𑀸𑀭𑀻𑀢𑀺 𑀛𑀸𑀦𑀧𑁆𑀧𑀦𑀸𑀬 𑀲𑀢𑀢𑀓𑀸𑀭𑀻 𑀦 𑀳𑁄𑀢𑀺, 𑀓𑀤𑀸𑀘𑀺𑀤𑁂𑀯 𑀓𑀭𑁄𑀢𑀺. 𑀦 𑀲𑀫𑀸𑀥𑀺𑀲𑁆𑀫𑀺𑀁 𑀲𑀧𑁆𑀧𑀸𑀬𑀓𑀸𑀭𑀻𑀢𑀺 𑀲𑀫𑀸𑀥𑀺𑀲𑁆𑀲 𑀲𑀧𑁆𑀧𑀸𑀬𑁂 𑀉𑀧𑀓𑀸𑀭𑀓𑀥𑀫𑁆𑀫𑁂 𑀧𑀽𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀢𑁄 𑀧𑀭𑀁 𑀲𑀫𑀸𑀧𑀢𑁆𑀢𑀺𑀆𑀤𑀻𑀳𑀺 ¶ 𑀧𑀤𑁂𑀳𑀺 ¶ 𑀬𑁄𑀚𑁂𑀢𑁆𑀯𑀸 𑀘𑀢𑀼𑀓𑁆𑀓𑀸 𑀯𑀼𑀢𑁆𑀢𑀸. 𑀢𑁂𑀲𑀁 𑀅𑀢𑁆𑀣𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀲𑀓𑀮𑀁 𑀧𑀦𑁂𑀢𑁆𑀣 𑀛𑀸𑀦𑀲𑀁𑀬𑀼𑀢𑁆𑀢𑀁 𑀮𑁄𑀓𑀺𑀬𑀚𑁆𑀛𑀸𑀦𑀯𑀲𑁂𑀦𑁂𑀯 𑀓𑀣𑀺𑀢𑀦𑁆𑀢𑀺.

𑀛𑀸𑀦𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀔𑀦𑁆𑀥𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬 𑀤𑀼𑀢𑀺𑀬𑁄 𑀪𑀸𑀕𑁄.