📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂

𑀔𑀦𑁆𑀥𑀯𑀕𑁆𑀕𑀝𑀻𑀓𑀸

𑁧. 𑀔𑀦𑁆𑀥𑀲𑀁𑀬𑀼𑀢𑁆𑀢𑀁

𑁧. 𑀦𑀓𑀼𑀮𑀧𑀺𑀢𑀼𑀯𑀕𑁆𑀕𑁄

𑁧. 𑀦𑀓𑀼𑀮𑀧𑀺𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀪𑀕𑁆𑀕𑀸 ¶ ¶ 𑀦𑀸𑀫 𑀚𑀸𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸. 𑀢𑁂𑀲𑀁 𑀦𑀺𑀯𑀸𑀲𑁄 𑀏𑀓𑁄𑀧𑀺 𑀚𑀦𑀧𑀤𑁄 𑀭𑀼𑀴𑁆𑀳𑀻𑀯𑀲𑁂𑀦 ‘‘𑀪𑀕𑁆𑀕𑀸’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀏𑀯𑀁𑀦𑀸𑀫𑀓𑁂 𑀚𑀦𑀧𑀤𑁂’’𑀢𑀺, 𑀏𑀯𑀁 𑀩𑀳𑀼𑀯𑀘𑀦𑀯𑀲𑁂𑀦 𑀮𑀤𑁆𑀥𑀦𑀸𑀫𑁂’’𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂𑀢𑀺 𑀬𑁄 𑀧𑀦 𑀯𑀦𑀲𑀡𑁆𑀟𑁄 𑀧𑀼𑀩𑁆𑀩𑁂 𑀫𑀺𑀕𑀸𑀦𑀁 𑀅𑀪𑀬𑀢𑁆𑀣𑀸𑀬 𑀤𑀺𑀦𑁆𑀦𑁄, 𑀢𑀲𑁆𑀫𑀺𑀁 𑀯𑀦𑀲𑀡𑁆𑀟𑁂. 𑀬𑀲𑁆𑀫𑀸 𑀲𑁄 𑀕𑀳𑀧𑀢𑀺 𑀢𑀲𑁆𑀫𑀺𑀁 𑀦𑀕𑀭𑁂 ‘‘𑀦𑀓𑀼𑀮𑀧𑀺𑀢𑀸’’𑀢𑀺 𑀧𑀼𑀢𑁆𑀢𑀲𑁆𑀲 𑀯𑀲𑁂𑀦 𑀧𑀜𑁆𑀜𑀸𑀬𑀺𑀢𑁆𑀣, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀦𑀓𑀼𑀮𑀧𑀺𑀢𑀸’’𑀢𑀺 𑀦𑀓𑀼𑀮𑀲𑁆𑀲 𑀦𑀸𑀫 𑀤𑀸𑀭𑀓𑀲𑁆𑀲 𑀧𑀺𑀢𑀸𑀢𑀺 𑀅𑀢𑁆𑀣𑁄. 𑀪𑀭𑀺𑀬𑀸𑀧𑀺𑀲𑁆𑀲 ‘‘𑀦𑀓𑀼𑀮𑀫𑀸𑀢𑀸’’𑀢𑀺 𑀧𑀜𑁆𑀜𑀸𑀬𑀺𑀢𑁆𑀣.

𑀚𑀭𑀸𑀚𑀺𑀡𑁆𑀡𑁄𑀢𑀺 ¶ 𑀚𑀭𑀸𑀯𑀲𑁂𑀦 𑀚𑀺𑀡𑁆𑀡𑁄, 𑀦 𑀩𑁆𑀬𑀸𑀥𑀺𑀆𑀤𑀻𑀦𑀁 𑀯𑀲𑁂𑀦 𑀚𑀺𑀡𑁆𑀡𑁄. 𑀯𑀬𑁄𑀯𑀼𑀟𑁆𑀠𑁄𑀢𑀺 𑀚𑀺𑀡𑁆𑀡𑀢𑁆𑀢𑀸 𑀏𑀯 𑀯𑀬𑁄𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑀺𑀬𑀸 𑀯𑀼𑀟𑁆𑀠𑁄, 𑀦 𑀲𑀻𑀮𑀸𑀤𑀺𑀯𑀼𑀟𑁆𑀠𑀺𑀬𑀸. 𑀚𑀸𑀢𑀺𑀬𑀸 𑀫𑀳𑀦𑁆𑀢𑀢𑀸𑀬 𑀘𑀺𑀭𑀭𑀢𑁆𑀢𑀢𑀸𑀬 𑀚𑀸𑀢𑀺𑀫𑀳𑀮𑁆𑀮𑀓𑁄. 𑀢𑀺𑀬𑀤𑁆𑀥𑀕𑀢𑁄𑀢𑀺 𑀧𑀞𑀫𑁄 𑀫𑀚𑁆𑀛𑀺𑀫𑁄 𑀧𑀘𑁆𑀙𑀺𑀫𑁄𑀢𑀺 𑀢𑀬𑁄 𑀅𑀤𑁆𑀥𑁂 𑀕𑀢𑁄. 𑀢𑀢𑁆𑀣 𑀧𑀞𑀫𑀁 𑀤𑀼𑀢𑀺𑀬𑀜𑁆𑀘 𑀅𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀧𑀘𑁆𑀙𑀺𑀫𑀁 𑀉𑀧𑀕𑀢𑀢𑁆𑀢𑀸 𑀯𑀬𑁄𑀅𑀦𑀼𑀧𑁆𑀧𑀢𑁆𑀢𑁄. 𑀆𑀢𑀼𑀭𑀓𑀸𑀬𑁄𑀢𑀺 𑀤𑀼𑀓𑁆𑀔𑀯𑁂𑀤𑀦𑀸𑀧𑀯𑀺𑀲𑀢𑀸𑀬 𑀅𑀦𑀲𑁆𑀲𑀸𑀤𑀓𑀸𑀬𑁄. 𑀕𑁂𑀮𑀜𑁆𑀜𑀁 𑀧𑀦 𑀤𑀼𑀓𑁆𑀔𑀕𑀢𑀺𑀓𑀦𑁆𑀢𑀺 ¶ ‘‘𑀕𑀺𑀮𑀸𑀦𑀓𑀸𑀬𑁄’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀲𑀘𑁆𑀘𑀯𑀺𑀪𑀗𑁆𑀕𑁂 (𑀯𑀺𑀪. 𑁧𑁯𑁦 𑀆𑀤𑀬𑁄) 𑀤𑀼𑀓𑁆𑀔𑀲𑀘𑁆𑀘𑀦𑀺𑀤𑁆𑀤𑁂𑀲𑁂 𑀤𑀼𑀓𑁆𑀔𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀢𑁆𑀢𑀸 𑀩𑁆𑀬𑀸𑀥𑀺 𑀦 𑀦𑀺𑀤𑁆𑀤𑀺𑀝𑁆𑀞𑁄. 𑀦𑀺𑀘𑁆𑀘𑀧𑀕𑁆𑀖𑀭𑀡𑀝𑁆𑀞𑁂𑀦𑀸𑀢𑀺 𑀲𑀩𑁆𑀩𑀤𑀸 𑀅𑀲𑀼𑀘𑀺𑀧𑀕𑁆𑀖𑀭𑀡𑀪𑀸𑀯𑁂𑀦. 𑀲𑁄 𑀧𑀦𑀲𑁆𑀲 𑀆𑀢𑀼𑀭𑀪𑀸𑀯𑁂𑀦𑀸𑀢𑀺 𑀆𑀳 𑁋 ‘‘𑀆𑀢𑀼𑀭𑀁𑀬𑁂𑀯 𑀦𑀸𑀫𑀸’’𑀢𑀺. 𑀯𑀺𑀲𑁂𑀲𑁂𑀦𑀸𑀢𑀺 𑀅𑀥𑀺𑀓𑀪𑀸𑀯𑁂𑀦. 𑀆𑀢𑀼𑀭𑀢𑀻𑀢𑀺 𑀆𑀢𑀼𑀭𑁄. 𑀲𑀗𑁆𑀕𑀸𑀫𑀧𑁆𑀧𑀢𑁆𑀢𑁄 𑀲𑀦𑁆𑀢𑀢𑁆𑀢𑀓𑀸𑀬𑁄. 𑀚𑀭𑀸𑀬 𑀆𑀢𑀼𑀭𑀢𑀸 𑀚𑀭𑀸𑀢𑀼𑀭𑀢𑀸. 𑀓𑀼𑀲𑀮𑀧𑀓𑁆𑀔𑀯𑀟𑁆𑀠𑀦𑁂𑀦 𑀫𑀦𑁄 𑀪𑀸𑀯𑁂𑀦𑁆𑀢𑀻𑀢𑀺 𑀫𑀦𑁄𑀪𑀸𑀯𑀦𑀻𑀬𑀸. 𑀫𑀦𑀲𑀸 𑀯𑀸 𑀪𑀸𑀯𑀦𑀻𑀬𑀸 𑀲𑀫𑁆𑀪𑀸𑀯𑀦𑀻𑀬𑀸𑀢𑀺 𑀫𑀦𑁄𑀪𑀸𑀯𑀦𑀻𑀬𑀸. 𑀅𑀦𑀼𑀲𑀸𑀲𑀢𑀽𑀢𑀺 𑀅𑀦𑀼 𑀅𑀦𑀼 𑀲𑀸𑀲𑀢𑀽𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 𑁋 ‘‘𑀧𑀼𑀦𑀧𑁆𑀧𑀼𑀦𑀁 𑀲𑀸𑀲𑀢𑀽’’𑀢𑀺. 𑀅𑀧𑀭𑀸𑀧𑀭𑀁 𑀧𑀯𑀢𑁆𑀢𑀺𑀢𑀁 𑀳𑀺𑀢𑀯𑀘𑀦𑀁. 𑀅𑀦𑁄𑀢𑀺𑀡𑁆𑀡𑁂 𑀯𑀢𑁆𑀣𑀼𑀲𑁆𑀫𑀺𑀁 𑀬𑁄 𑀏𑀯𑀁 𑀓𑀭𑁄𑀢𑀺, 𑀢𑀲𑁆𑀲 𑀅𑀬𑀁 𑀕𑀼𑀡𑁄 𑀤𑁄𑀲𑁄𑀢𑀺 𑀯𑀘𑀦𑀁. 𑀢𑀦𑁆𑀢𑀺𑀯𑀲𑁂𑀦𑀸𑀢𑀺 𑀢𑀦𑁆𑀢𑀺𑀲𑀦𑁆𑀦𑀺𑀲𑁆𑀲𑀬𑁂𑀦 𑀅𑀬𑀁 𑀅𑀦𑀼𑀲𑀸𑀲𑀦𑀻 𑀦𑀸𑀫. 𑀧𑀯𑁂𑀡𑀻𑀢𑀺 𑀢𑀦𑁆𑀢𑀺𑀬𑀸 𑀏𑀯 𑀯𑁂𑀯𑀘𑀦𑀁.

𑀅𑀡𑁆𑀟𑀁 𑀯𑀺𑀬 𑀪𑀽𑀢𑁄𑀢𑀺 𑀅𑀥𑀺𑀓𑁄𑀧𑀫𑀸 𑀓𑀸𑀬𑀲𑁆𑀲 𑀅𑀡𑁆𑀟𑀓𑁄𑀲𑀢𑁄 𑀅𑀩𑀮𑀤𑀼𑀩𑁆𑀩𑀮𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀅𑀡𑁆𑀟𑀁 𑀳𑀻’’𑀢𑀺𑀆𑀤𑀺. 𑀩𑀸𑀮𑁄𑀬𑁂𑀯 𑀢𑀸𑀤𑀺𑀲𑀢𑁆𑀢𑀪𑀸𑀯𑀲𑀫𑀗𑁆𑀕𑀻 𑀫𑀼𑀳𑀼𑀢𑁆𑀢𑀫𑁆𑀧𑀺 𑀆𑀭𑁄𑀕𑁆𑀬𑀁 𑀧𑀝𑀺𑀚𑀸𑀦𑀦𑁆𑀢𑁄.

𑀯𑀺𑀧𑁆𑀧𑀲𑀦𑁆𑀦𑀸𑀦𑀻𑀢𑀺 𑀧𑀓𑀢𑀺𑀫𑀸𑀓𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀺𑀲𑁂𑀲𑁂𑀦 𑀧𑀲𑀦𑁆𑀦𑀸𑀦𑀺. 𑀢𑁂𑀦𑀸𑀳 𑁋 ‘‘𑀲𑀼𑀉 𑀧𑀲𑀦𑁆𑀦𑀸𑀦𑀻’’𑀢𑀺. 𑀧𑀲𑀦𑁆𑀦𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀭𑀽𑀧𑀲𑀫𑁆𑀧𑀤𑀸𑀳𑀺 𑀢𑀸𑀳𑀺 𑀢𑀲𑁆𑀲 𑀫𑀼𑀔𑀯𑀡𑁆𑀡𑀲𑁆𑀲 𑀧𑀸𑀭𑀺𑀲𑀼𑀤𑁆𑀥𑀻𑀢𑀺 𑀆𑀳 𑁋 ‘‘𑀧𑀭𑀺𑀲𑀼𑀤𑁆𑀥𑁄𑀢𑀺 𑀦𑀺𑀤𑁆𑀤𑁄𑀲𑁄’’𑀢𑀺. 𑀢𑁂𑀦𑁂𑀯𑀸𑀳 ‘‘𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑀸𑀬𑀸’’𑀢𑀺𑀆𑀤𑀺. 𑀏𑀢𑁂𑀦𑁂𑀯𑀲𑁆𑀲𑀺𑀦𑁆𑀤𑁆𑀭𑀺𑀬𑀯𑀺𑀧𑁆𑀧𑀲𑀦𑁆𑀦𑀢𑀸𑀓𑀸𑀭𑀡𑀫𑁆𑀧𑀺 𑀲𑀁𑀯𑀡𑁆𑀡𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀲 𑀫𑀼𑀔𑀯𑀡𑁆𑀡𑁄. 𑀦𑀬𑀕𑁆𑀕𑀸𑀳𑀧𑀜𑁆𑀜𑀸 𑀓𑀺𑀭𑁂𑀲𑀸𑀢𑀺 𑀇𑀤𑀁 𑀅𑀦𑀸𑀯𑀚𑁆𑀚𑀦𑀯𑀲𑁂𑀦𑁂𑀯 𑀯𑀼𑀢𑁆𑀢𑀪𑀸𑀯𑀁 𑀲𑀦𑁆𑀥𑀸𑀬𑀸𑀳.

𑀬𑀁 𑀦𑁂𑀯 𑀧𑀼𑀢𑁆𑀢𑀲𑁆𑀲𑀸𑀢𑀺𑀆𑀤𑀺 ‘‘𑀑𑀯𑀤𑀢𑀼 𑀦𑁄, 𑀪𑀦𑁆𑀢𑁂, 𑀪𑀕𑀯𑀸 𑀬𑀣𑀸 𑀫𑀬𑀁 𑀧𑀭𑀮𑁄𑀓𑁂𑀧𑀺 𑀅𑀜𑁆𑀜𑀫𑀜𑁆𑀜𑀁 𑀲𑀫𑀸𑀕𑀘𑁆𑀙𑁂𑀬𑁆𑀬𑀸𑀫𑀸’’𑀢𑀺 𑀯𑀼𑀢𑁆𑀢𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀫𑁂𑀯. 𑀫𑀥𑀼𑀭𑀥𑀫𑁆𑀫𑀤𑁂𑀲𑀦𑀸𑀬𑁂𑀯 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀧𑀝𑀺𑀮𑀤𑁆𑀥𑀸, 𑀢𑀲𑁆𑀲 𑀅𑀢𑁆𑀢𑀦𑁄 𑀧𑁂𑀫𑀕𑀸𑀭𑀯𑀕𑀳𑀺𑀢𑀢𑁆𑀢𑀸 ‘‘𑀅𑀫𑀢𑀸𑀪𑀺𑀲𑁂𑀓𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀁 𑀧𑀤𑀤𑁆𑀯𑀬𑀁. 𑀆𑀭𑀓𑀢𑁆𑀢𑀸 𑀓𑀺𑀮𑁂𑀲𑁂𑀳𑀺 𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸. 𑀅𑀦𑀬𑁂𑀢𑀺 𑀅𑀯𑀟𑁆𑀠𑀺𑀬𑀁, 𑀅𑀦𑀢𑁆𑀣𑁂𑀢𑀺 𑀅𑀢𑁆𑀣𑁄. 𑀅𑀦𑀬𑁂 𑀯𑀸 𑀅𑀦𑀼𑀧𑀸𑀬𑁂. 𑀦 𑀇𑀭𑀺𑀬𑀦𑀢𑁄 𑀅𑀯𑀢𑁆𑀢𑀦𑀢𑁄. 𑀅𑀬𑁂𑀢𑀺 𑀯𑀟𑁆𑀠𑀺𑀬𑀁 𑀅𑀢𑁆𑀣𑁂 𑀉𑀧𑀸𑀬𑁂 𑀘. 𑀅𑀭𑀡𑀻𑀬𑀢𑁄𑀢𑀺 𑀧𑀬𑀺𑀭𑀼𑀧𑀸𑀲𑀺𑀢𑀩𑁆𑀩𑀢𑁄. 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸 𑀧𑀼𑀭𑀺𑀫𑁂𑀲𑀼 𑀅𑀢𑁆𑀣𑀯𑀺𑀓𑀧𑁆𑀧𑁂𑀲𑀼 ¶ , 𑀧𑀘𑁆𑀙𑀺𑀫𑁂 ¶ 𑀧𑀦 𑀲𑀤𑁆𑀤𑀲𑀢𑁆𑀣𑀯𑀲𑁂𑀦𑀧𑀺. 𑀬𑀤𑀺𑀧𑀺 𑀅𑀭𑀺𑀬𑀲𑀤𑁆𑀤𑁄 ‘‘𑀬𑁂 𑀳𑀺 𑀯𑁄 𑀅𑀭𑀺𑀬𑀸 𑀧𑀭𑀺𑀲𑀼𑀤𑁆𑀥𑀓𑀸𑀬𑀓𑀫𑁆𑀫𑀦𑁆𑀢𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁫) 𑀯𑀺𑀲𑀼𑀤𑁆𑀥𑀸𑀲𑀬𑀧𑀬𑁄𑀕𑁂𑀲𑀼 𑀧𑀼𑀣𑀼𑀚𑁆𑀚𑀦𑁂𑀲𑀼𑀧𑀺 𑀯𑀝𑁆𑀝𑀢𑀺, 𑀇𑀥 𑀧𑀦 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑁂𑀦 𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑀪𑀸𑀯𑁂𑀦 𑀘 𑀅𑀭𑀺𑀬𑀪𑀸𑀯𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀩𑀼𑀤𑁆𑀥𑀸 𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀢𑀣𑀸𑀕𑀢𑀲𑀸𑀯𑀓𑀸 𑀘 𑀲𑀧𑁆𑀧𑀼𑀭𑀺𑀲𑀸𑀢𑀺 𑀇𑀤𑀁 ‘‘𑀅𑀭𑀺𑀬𑀸 𑀲𑀧𑁆𑀧𑀼𑀭𑀺𑀲𑀸’’𑀢𑀺 𑀇𑀥 𑀯𑀼𑀢𑁆𑀢𑀧𑀤𑀸𑀦𑀁 𑀅𑀢𑁆𑀣𑀁 𑀅𑀲𑀗𑁆𑀓𑀭𑀢𑁄 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀅𑀭𑀺𑀬𑀲𑀧𑁆𑀧𑀼𑀭𑀺𑀲𑀪𑀸𑀯𑀸 𑀅𑀪𑀺𑀦𑁆𑀦𑀲𑀪𑀸𑀯𑀸, 𑀢𑀲𑁆𑀫𑀸 ‘‘𑀲𑀩𑁆𑀩𑁂𑀯 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀏𑀢𑁆𑀢𑀸𑀯𑀢𑀸 𑀳𑀺 𑀩𑀼𑀤𑁆𑀥𑀲𑀸𑀯𑀓𑁄 𑀯𑀼𑀢𑁆𑀢𑁄, 𑀢𑀲𑁆𑀲 𑀳𑀺 𑀏𑀓𑀦𑁆𑀢𑁂𑀦 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀇𑀘𑁆𑀙𑀺𑀢𑀩𑁆𑀩𑁄 𑀧𑀭𑀢𑁄 𑀖𑁄𑀲𑀫𑀦𑁆𑀢𑀭𑁂𑀦 𑀧𑀞𑀫𑀫𑀕𑁆𑀕𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀯𑀺𑀲𑁂𑀲𑀢𑁄 𑀘𑀲𑁆𑀲 𑀪𑀕𑀯𑀸𑀯 ‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀫𑀫𑀜𑁆𑀳𑀺, 𑀆𑀦𑀦𑁆𑀤, 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀆𑀕𑀫𑁆𑀫 𑀚𑀸𑀢𑀺𑀥𑀫𑁆𑀫𑀸 𑀲𑀢𑁆𑀢𑀸 𑀚𑀸𑀢𑀺𑀬𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁧.𑁧𑁨𑁯; 𑁫.𑁨). 𑀲𑁄 𑀏𑀯 𑀘 𑀅𑀯𑁂𑀘𑁆𑀘𑀧𑀲𑀸𑀤𑀸𑀥𑀺𑀕𑀫𑁂𑀦 𑀤𑀴𑁆𑀳𑀪𑀢𑁆𑀢𑀺 𑀦𑀸𑀫. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 ‘‘𑀬𑀁 𑀫𑀬𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀢𑀁 𑀫𑀫 𑀲𑀸𑀯𑀓𑀸 𑀚𑀻𑀯𑀺𑀢𑀳𑁂𑀢𑀼𑀧𑀺 𑀦𑀸𑀢𑀺𑀓𑁆𑀓𑀫𑀦𑁆𑀢𑀻’’𑀢𑀺 (𑀉𑀤𑀸. 𑁪𑁫; 𑀘𑀽𑀴𑀯. 𑁩𑁮𑁫). 𑀓𑀢𑀜𑁆𑀜𑀼𑀢𑀸𑀤𑀻𑀳𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀩𑀼𑀤𑁆𑀥𑀸𑀢𑀺 𑀏𑀢𑁆𑀣 𑀓𑀢𑀁 𑀚𑀸𑀦𑀸𑀢𑀻𑀢𑀺 𑀓𑀢𑀜𑁆𑀜𑀽. 𑀓𑀢𑀁 𑀯𑀺𑀤𑀺𑀢𑀁 𑀧𑀸𑀓𑀝𑀁 𑀓𑀭𑁄𑀢𑀻𑀢𑀺 𑀓𑀢𑀯𑁂𑀤𑀻. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀳𑀺 𑀅𑀦𑁂𑀓𑁂𑀲𑀼𑀧𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑁂𑀲𑀼 𑀓𑀢𑀁 𑀉𑀧𑀓𑀸𑀭𑀁 𑀚𑀸𑀦𑀦𑁆𑀢𑀺, 𑀓𑀢𑀜𑁆𑀘 𑀧𑀸𑀓𑀝𑀁 𑀓𑀭𑁄𑀦𑁆𑀢𑀺 𑀲𑀢𑀺𑀚𑀦𑀦𑀆𑀫𑀺𑀲𑀧𑀝𑀺𑀕𑁆𑀕𑀳𑀡𑀸𑀤𑀺𑀦𑀸. 𑀢𑀣𑀸 𑀲𑀁𑀲𑀸𑀭𑀤𑀼𑀓𑁆𑀔𑀤𑀼𑀓𑁆𑀔𑀺𑀢𑀲𑁆𑀲 𑀲𑀓𑁆𑀓𑀘𑁆𑀘𑀁 𑀓𑀭𑁄𑀦𑁆𑀢𑀺 𑀓𑀺𑀘𑁆𑀘𑀁, 𑀬𑀁 𑀅𑀢𑁆𑀢𑀦𑀸 𑀓𑀸𑀢𑀼𑀁 𑀲𑀓𑁆𑀓𑀸. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦 𑀓𑀧𑁆𑀧𑀸𑀦𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀲𑀳𑀲𑁆𑀲𑁂𑀲𑀼𑀧𑀺 𑀓𑀢𑀁 𑀉𑀧𑀓𑀸𑀭𑀁 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑀜𑁆𑀘 𑀚𑀸𑀦𑀦𑁆𑀢𑀺, 𑀧𑀸𑀓𑀝𑀜𑁆𑀘 𑀓𑀭𑁄𑀦𑁆𑀢𑀺. 𑀲𑀻𑀳𑁄 𑀯𑀺𑀬 𑀘 𑀏𑀯𑀁 𑀲𑀩𑁆𑀩𑀢𑁆𑀣 𑀲𑀓𑁆𑀓𑀘𑁆𑀘𑀫𑁂𑀯 𑀥𑀫𑁆𑀫𑀤𑁂𑀲𑀦𑀁 𑀓𑀭𑁄𑀦𑁆𑀢𑁂𑀦 𑀩𑀼𑀤𑁆𑀥𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺. 𑀬𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀅𑀭𑀺𑀬𑀸 𑀤𑀺𑀝𑁆𑀞𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀲𑁆𑀲𑀸 𑀅𑀧𑁆𑀧𑀝𑀺𑀧𑀚𑁆𑀚𑀦𑀁, 𑀢𑀢𑁆𑀣 𑀘 𑀆𑀤𑀭𑀸𑀪𑀸𑀯𑁄 𑀅𑀭𑀺𑀬𑀸𑀦𑀁 𑀅𑀤𑀲𑁆𑀲𑀦𑀲𑀻𑀮𑀢𑀸, 𑀦 𑀘 𑀤𑀲𑁆𑀲𑀦𑁂 𑀲𑀸𑀥𑀼𑀓𑀸𑀭𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀘𑀓𑁆𑀔𑀼𑀦𑀸 𑀅𑀤𑀲𑁆𑀲𑀸𑀯𑀻𑀢𑀺 𑀏𑀢𑁆𑀣 𑀘𑀓𑁆𑀔𑀼 𑀦𑀸𑀫 𑀦 𑀫𑀁𑀲𑀘𑀓𑁆𑀔𑀼 𑀏𑀯, 𑀅𑀣 𑀔𑁄 𑀤𑀺𑀩𑁆𑀩𑀘𑀓𑁆𑀔𑀼𑀧𑀻𑀢𑀺 𑀆𑀳 ‘‘𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀯𑀸’’𑀢𑀺. 𑀅𑀭𑀺𑀬𑀪𑀸𑀯𑁄𑀢𑀺 𑀬𑁂𑀳𑀺 𑀬𑁄𑀕𑀢𑁄 ‘‘𑀅𑀭𑀺𑀬𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑁂 𑀫𑀕𑁆𑀕𑀨𑀮𑀥𑀫𑁆𑀫𑀸 𑀤𑀝𑁆𑀞𑀩𑁆𑀩𑀸.

𑀢𑀢𑁆𑀭𑀸𑀢𑀺 𑀜𑀸𑀡𑀤𑀲𑁆𑀲𑀦𑀲𑁆𑀲𑁂𑀯 𑀤𑀲𑁆𑀲𑀦𑀪𑀸𑀯𑁂. 𑀯𑀢𑁆𑀣𑀽𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀣𑀜𑀸𑀧𑀦𑀓𑀸𑀭𑀡𑀁. 𑀏𑀯𑀁 𑀯𑀼𑀢𑁆𑀢𑁂𑀧𑀻𑀢𑀺 𑀏𑀯𑀁 𑀅𑀜𑁆𑀜𑀸𑀧𑀤𑁂𑀲𑁂𑀦 𑀅𑀢𑁆𑀢𑀼𑀧𑀦𑀸𑀬𑀺𑀓𑀁 𑀓𑀢𑁆𑀯𑀸 ¶ 𑀯𑀼𑀢𑁆𑀢𑁂𑀧𑀺. 𑀥𑀫𑁆𑀫𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁, 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀯𑀸. 𑀅𑀭𑀺𑀬𑀓𑀭𑀥𑀫𑁆𑀫𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀬𑁄, 𑀯𑀺𑀧𑀲𑁆𑀲𑀺𑀬𑀫𑀸𑀦𑀸 𑀯𑀸 𑀅𑀦𑀺𑀘𑁆𑀘𑀸𑀤𑀬𑁄, 𑀘𑀢𑁆𑀢𑀸𑀭𑀺 𑀯𑀸 𑀅𑀭𑀺𑀬𑀲𑀘𑁆𑀘𑀸𑀦𑀺.

𑀅𑀯𑀺𑀦𑀻𑀢𑁄𑀢𑀺 ¶ 𑀦 𑀯𑀺𑀦𑀻𑀢𑁄 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀻𑀦𑀁 𑀯𑀲𑁂𑀦 𑀦 𑀲𑀺𑀓𑁆𑀔𑀺𑀢𑁄. 𑀬𑁂𑀲𑀁 𑀲𑀁𑀯𑀭𑀯𑀺𑀦𑀬𑀸𑀤𑀻𑀦𑀁 𑀅𑀪𑀸𑀯𑁂𑀦 𑀅𑀬𑀁 ‘‘𑀅𑀯𑀺𑀦𑀻𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑁂 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀯𑀺𑀥𑁄 𑀯𑀺𑀦𑀬𑁄 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀻𑀮𑀲𑀁𑀯𑀭𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄 𑀯𑁂𑀤𑀺𑀢𑀩𑁆𑀩𑁄, 𑀲𑁄 𑀘 𑀅𑀢𑁆𑀣𑀢𑁄 𑀓𑀸𑀬𑀺𑀓𑀯𑀸𑀘𑀲𑀺𑀓𑁄 𑀅𑀯𑀻𑀢𑀺𑀓𑁆𑀓𑀫𑁄. 𑀲𑀢𑀺𑀲𑀁𑀯𑀭𑁄𑀢𑀺 𑀇𑀦𑁆𑀤𑁆𑀭𑀺𑀬𑀸𑀭𑀓𑁆𑀔𑀸, 𑀲𑀸 𑀘 𑀢𑀣𑀸𑀧𑀯𑀢𑁆𑀢𑀸 𑀲𑀢𑀺𑀬𑁂𑀯. 𑀜𑀸𑀡𑀲𑀁𑀯𑀭𑁄𑀢𑀺 ‘‘𑀲𑁄𑀢𑀸𑀦𑀁 𑀲𑀁𑀯𑀭𑀁 𑀩𑁆𑀭𑀽𑀫𑀻’’𑀢𑀺 (𑀲𑀼. 𑀦𑀺. 𑁧𑁦𑁪𑁧) 𑀯𑀢𑁆𑀯𑀸 ‘‘𑀧𑀜𑁆𑀜𑀸𑀬𑁂𑀢𑁂 𑀧𑀺𑀥𑀻𑀬𑀭𑁂’’𑀢𑀺 (𑀲𑀼. 𑀦𑀺. 𑁧𑁦𑁪𑁧) 𑀯𑀘𑀦𑀢𑁄 𑀲𑁄𑀢𑀲𑀗𑁆𑀔𑀸𑀢𑀸𑀦𑀁 𑀢𑀡𑁆𑀳𑀸𑀤𑀺𑀝𑁆𑀞𑀺𑀤𑀼𑀘𑁆𑀘𑀭𑀺𑀢𑀅𑀯𑀺𑀚𑁆𑀚𑀸𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀸𑀦𑀁 𑀲𑀁𑀯𑀭𑁄 𑀧𑀺𑀤𑀳𑀦𑀁 𑀲𑀫𑀼𑀘𑁆𑀙𑁂𑀤𑀜𑀸𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀔𑀦𑁆𑀢𑀺𑀲𑀁𑀯𑀭𑁄𑀢𑀺 𑀅𑀥𑀺𑀯𑀸𑀲𑀦𑀸, 𑀲𑀸 𑀘 𑀢𑀣𑀸𑀧𑀯𑀢𑁆𑀢𑀸 𑀔𑀦𑁆𑀥𑀸, 𑀅𑀤𑁄𑀲𑁄 𑀯𑀸, ‘‘𑀧𑀜𑁆𑀜𑀸’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀯𑀻𑀭𑀺𑀬𑀲𑀁𑀯𑀭𑁄 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀦𑀁 𑀯𑀺𑀦𑁄𑀤𑀦𑀯𑀲𑁂𑀦 𑀧𑀯𑀢𑁆𑀢𑀁 𑀯𑀻𑀭𑀺𑀬𑀫𑁂𑀯. 𑀢𑁂𑀦 𑀢𑁂𑀦 𑀅𑀗𑁆𑀕𑁂𑀦 𑀢𑀲𑁆𑀲 𑀢𑀲𑁆𑀲 𑀅𑀗𑁆𑀕𑀲𑁆𑀲 𑀧𑀳𑀸𑀦𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑀁. 𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀧𑀳𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁. 𑀲𑁂𑀲𑀧𑀤𑀢𑁆𑀢𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑀇𑀫𑀺𑀦𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦𑀸𑀢𑀺𑀆𑀤𑀺 𑀲𑀻𑀮𑀲𑀁𑀯𑀭𑀸𑀤𑀻𑀦𑀁 𑀯𑀺𑀯𑀭𑀡𑀁. 𑀢𑀢𑁆𑀣 𑀲𑀫𑀼𑀧𑁂𑀢𑁄𑀢𑀺 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. 𑀢𑁂𑀦 ‘‘𑀉𑀧𑀕𑀢𑁄’’𑀢𑀺𑀆𑀤𑀺𑀦𑀸 𑀯𑀺𑀪𑀗𑁆𑀕𑁂 (𑀯𑀺𑀪. 𑁫𑁧𑁧) 𑀆𑀕𑀢𑀁 𑀲𑀁𑀯𑀭𑀯𑀺𑀪𑀗𑁆𑀕𑀁 𑀤𑀲𑁆𑀲𑁂𑀢𑀺. 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀦𑁆𑀢𑀺 𑀤𑀼𑀲𑁆𑀲𑀻𑀮𑁆𑀬𑀲𑀗𑁆𑀔𑀸𑀢𑀸𑀦𑀁 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀫𑀼𑀝𑁆𑀞𑀲𑀘𑁆𑀘𑀲𑀗𑁆𑀔𑀸𑀢𑀲𑁆𑀲 𑀧𑀫𑀸𑀤𑀲𑁆𑀲, 𑀅𑀪𑀺𑀚𑁆𑀛𑀸𑀤𑀻𑀦𑀁 𑀯𑀸 𑀅𑀓𑁆𑀔𑀦𑁆𑀢𑀺𑀅𑀜𑁆𑀜𑀸𑀡𑀓𑁄𑀲𑀚𑁆𑀚𑀸𑀦𑀜𑁆𑀘. 𑀲𑀁𑀯𑀭𑀡𑀢𑁄𑀢𑀺 𑀧𑀺𑀤𑀳𑀦𑀢𑁄, 𑀯𑀺𑀦𑀬𑀦𑀢𑁄𑀢𑀺 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀸𑀦𑀁 𑀯𑀺𑀭𑀽𑀧𑀧𑀯𑀢𑁆𑀢𑀺𑀬𑀸 𑀯𑀺𑀦𑀬𑀦𑀢𑁄, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀯𑀸 𑀅𑀧𑀦𑀬𑀦𑀢𑁄, 𑀓𑀸𑀬𑀸𑀤𑀻𑀦𑀁 𑀯𑀸 𑀚𑀺𑀫𑁆𑀳𑀧𑀯𑀢𑁆𑀢𑀺𑀁 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀉𑀚𑀼𑀓𑀦𑀬𑀦𑀢𑁄𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀲𑀫𑀯𑀸𑀬𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀸𑀦𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀢𑀣𑀸 𑀢𑀣𑀸 𑀅𑀦𑀼𑀧𑁆𑀧𑀸𑀤𑀦𑀫𑁂𑀯 𑀲𑀁𑀯𑀭𑀡𑀁 𑀯𑀺𑀦𑀬𑀦𑀜𑁆𑀘 𑀯𑁂𑀤𑀺𑀢𑀩𑁆𑀩𑀁.

𑀬𑀁 𑀧𑀳𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀸𑀤𑀻𑀲𑀼 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀲𑀽’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁? 𑀦𑀦𑀼 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀓𑀗𑁆𑀔𑀸𑀯𑀺𑀢𑀭𑀡𑀸𑀦𑀺 𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀦𑀺 𑀲𑀫𑁆𑀫𑀲𑀦𑀸𑀓𑀸𑀭𑁂𑀦 𑀅𑀧𑁆𑀧𑀯𑀢𑁆𑀢𑀦𑀢𑁄? 𑀲𑀘𑁆𑀘𑀫𑁂𑀢𑀁, 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀧𑀦 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀏𑀯𑀁 𑀯𑀼𑀢𑁆𑀢𑀁. 𑀦𑀸𑀫𑀭𑀽𑀧𑀫𑀢𑁆𑀢𑀫𑀺𑀤𑀁, ‘‘𑀦𑀢𑁆𑀣𑀺 𑀏𑀢𑁆𑀣 𑀅𑀢𑁆𑀢𑀸 𑀯𑀸 𑀅𑀢𑁆𑀢𑀦𑀺𑀬𑀁 ¶ 𑀯𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀜𑀸𑀡𑀁 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑀁. 𑀲𑀢𑀺 𑀯𑀺𑀚𑁆𑀚𑀫𑀸𑀦𑁂 𑀔𑀦𑁆𑀥𑀧𑀜𑁆𑀘𑀓𑀲𑀗𑁆𑀔𑀸𑀢𑁂 𑀓𑀸𑀬𑁂, 𑀲𑀬𑀁 𑀯𑀸 𑀲𑀢𑀻 𑀢𑀲𑁆𑀫𑀺𑀁 𑀓𑀸𑀬𑁂 𑀤𑀺𑀝𑁆𑀞𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺, 𑀲𑀸 𑀘 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀅𑀢𑁆𑀢𑀤𑀺𑀝𑁆𑀞𑀺. 𑀢𑀲𑁆𑀲 𑀦𑀸𑀫𑀭𑀽𑀧𑀲𑁆𑀲 𑀓𑀫𑁆𑀫𑀸𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬𑀧𑀭𑀺𑀕𑁆𑀕𑀡𑁆𑀳𑀦𑀜𑀸𑀡𑀁 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄. ‘‘𑀦𑀢𑁆𑀣𑀺 𑀳𑁂𑀢𑀼, 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸 𑀅𑀳𑁂𑀢𑀼𑀤𑀺𑀝𑁆𑀞𑀺. ‘‘𑀇𑀲𑁆𑀲𑀭𑀧𑀼𑀭𑀺𑀲𑀧𑀚𑀸𑀧𑀢𑀺𑀧𑀓𑀢𑀺𑀅𑀡𑀼𑀓𑀸𑀮𑀸𑀤𑀻𑀳𑀺 𑀮𑁄𑀓𑁄 𑀧𑀯𑀢𑁆𑀢𑀢𑀺 𑀦𑀺𑀯𑀢𑁆𑀢𑀢𑀺 𑀘𑀸’’𑀢𑀺 𑀢𑀣𑀸 𑀢𑀣𑀸 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺 𑀯𑀺𑀲𑀫𑀳𑁂𑀢𑀼𑀤𑀺𑀝𑁆𑀞𑀺. 𑀢𑀲𑁆𑀲𑁂𑀯𑀸𑀢𑀺 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀲𑁆𑀲𑁂𑀯. 𑀓𑀗𑁆𑀔𑀸𑀯𑀺𑀢𑀭𑀡𑁂𑀦𑀸𑀢𑀺 𑀬𑀣𑀸 𑀏𑀢𑀭𑀳𑀺 𑀦𑀸𑀫𑀭𑀽𑀧𑀲𑁆𑀲 𑀓𑀫𑁆𑀫𑀸𑀤𑀺𑀧𑀘𑁆𑀘𑀬𑀢𑁄 𑀉𑀧𑁆𑀧𑀢𑁆𑀢𑀺, 𑀏𑀯𑀁 𑀅𑀢𑀻𑀢𑁂 𑀅𑀦𑀸𑀕𑀢𑁂𑀧𑀻𑀢𑀺 𑀢𑀻𑀲𑀼 𑀓𑀸𑀮𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸𑀧𑀦𑀬𑀦𑀜𑀸𑀡𑁂𑀦. 𑀓𑀣𑀁𑀓𑀣𑀻𑀪𑀸𑀯𑀲𑁆𑀲𑀸𑀢𑀺 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀁 ¶ 𑀅𑀢𑀻𑀢𑀫𑀤𑁆𑀥𑀸𑀦’’𑀦𑁆𑀢𑀺𑀆𑀤𑀺𑀦𑀬𑀧𑀯𑀢𑁆𑀢𑀸𑀬 (𑀫. 𑀦𑀺. 𑁧.𑁧𑁮; 𑀲𑀁. 𑀦𑀺. 𑁨.𑁨𑁦) 𑀲𑀁𑀲𑀬𑀧𑁆𑀧𑀯𑀢𑁆𑀢𑀺𑀬𑀸. 𑀓𑀮𑀸𑀧𑀲𑀫𑁆𑀫𑀲𑀦𑁂𑀦𑀸𑀢𑀺 ‘‘𑀬𑀁 𑀓𑀺𑀜𑁆𑀘𑀺 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁩.𑁪𑁮-𑁪𑁯) 𑀔𑀦𑁆𑀥𑀧𑀜𑁆𑀘𑀓𑀁 𑀏𑀓𑀸𑀤𑀲𑀲𑀼 𑀑𑀓𑀸𑀲𑁂𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀫𑁆𑀫𑀲𑀦𑀯𑀲𑁂𑀦 𑀧𑀯𑀢𑁆𑀢𑁂𑀦 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦. 𑀅𑀳𑀁 𑀫𑀫𑀸𑀢𑀺 𑀕𑀸𑀳𑀲𑁆𑀲𑀸𑀢𑀺 ‘‘𑀅𑀢𑁆𑀢𑀸 𑀅𑀢𑁆𑀢𑀦𑀺𑀬’’𑀦𑁆𑀢𑀺 𑀕𑀳𑀡𑀲𑁆𑀲. 𑀫𑀕𑁆𑀕𑀸𑀫𑀕𑁆𑀕𑀯𑀯𑀢𑁆𑀣𑀸𑀦𑁂𑀦𑀸𑀢𑀺 𑀫𑀕𑁆𑀕𑀸𑀫𑀕𑁆𑀕𑀜𑀸𑀡𑀯𑀺𑀲𑀼𑀤𑁆𑀥𑀺𑀬𑀸. 𑀅𑀫𑀕𑁆𑀕𑁂 𑀫𑀕𑁆𑀕𑀲𑀜𑁆𑀜𑀸𑀬𑀸𑀢𑀺 𑀅𑀫𑀕𑁆𑀕𑁂 𑀑𑀪𑀸𑀲𑀸𑀤𑀺𑀓𑁂 ‘‘𑀫𑀕𑁆𑀕𑁄’’𑀢𑀺 𑀉𑀧𑁆𑀧𑀦𑁆𑀦𑀲𑀜𑁆𑀜𑀸𑀬. 𑀬𑀲𑁆𑀫𑀸 𑀲𑀫𑁆𑀫𑀤𑁂𑀯 𑀲𑀗𑁆𑀔𑀸𑀭𑀸𑀦𑀁 𑀉𑀤𑀬𑀁 𑀧𑀲𑁆𑀲𑀦𑁆𑀢𑁄 ‘‘𑀏𑀯𑀫𑁂𑀢𑁂 𑀲𑀗𑁆𑀔𑀸𑀭𑀸 𑀅𑀦𑀼𑀭𑀽𑀧𑀓𑀸𑀭𑀡𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀧𑀦 𑀉𑀘𑁆𑀙𑀺𑀚𑁆𑀚𑀦𑁆𑀢𑀻’’𑀢𑀺 𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀉𑀤𑀬𑀤𑀲𑁆𑀲𑀦𑁂𑀦 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸’’𑀢𑀺. 𑀬𑀲𑁆𑀫𑀸 𑀧𑀦 𑀲𑀗𑁆𑀔𑀸𑀭𑀸𑀦𑀁 𑀯𑀬𑀁 ‘‘𑀬𑀤𑀺𑀧𑀺𑀫𑁂 𑀲𑀗𑁆𑀔𑀸𑀭𑀸 𑀅𑀯𑀺𑀘𑁆𑀙𑀺𑀦𑁆𑀦𑀸 𑀯𑀢𑁆𑀢𑀦𑁆𑀢𑀺, 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀸 𑀧𑀦 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸 𑀦𑀺𑀭𑀼𑀚𑁆𑀛𑀦𑁆𑀢𑁂𑀯𑀸’’𑀢𑀺 𑀧𑀲𑁆𑀲𑀢𑁄 𑀓𑀼𑀢𑁄 𑀲𑀲𑁆𑀲𑀢𑀕𑁆𑀕𑀸𑀳𑁄. 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀯𑀬𑀤𑀲𑁆𑀲𑀦𑁂𑀦 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸’’𑀢𑀺. 𑀪𑀬𑀤𑀲𑁆𑀲𑀦𑁂𑀦𑀸𑀢𑀺 𑀪𑀬𑀢𑀽𑀧𑀝𑁆𑀞𑀸𑀦𑀜𑀸𑀡𑁂𑀦. 𑀲𑀪𑀬𑁂𑀢𑀺 𑀲𑀩𑁆𑀩𑀪𑀬𑀸𑀦𑀁 𑀆𑀓𑀭𑀪𑀸𑀯𑀢𑁄 𑀲𑀓𑀮𑀤𑀼𑀓𑁆𑀔𑀯𑀽𑀧𑀲𑀫𑀲𑀗𑁆𑀔𑀸𑀢𑀲𑁆𑀲 𑀧𑀭𑀫𑀲𑁆𑀲𑀸𑀲𑀲𑁆𑀲 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀘 𑀲𑀪𑀬𑁂 𑀔𑀦𑁆𑀥𑀧𑀜𑁆𑀘𑀓𑁂. 𑀅𑀪𑀬𑀲𑀜𑁆𑀜𑀸𑀬𑀸𑀢𑀺 ‘‘𑀅𑀪𑀬𑀁 𑀔𑁂𑀫’’𑀦𑁆𑀢𑀺 𑀉𑀧𑁆𑀧𑀦𑁆𑀦𑀲𑀜𑁆𑀜𑀸𑀬. 𑀅𑀲𑁆𑀲𑀸𑀤𑀲𑀜𑁆𑀜𑀸 𑀦𑀸𑀫 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀅𑀲𑁆𑀲𑀸𑀤𑀦𑀯𑀲𑁂𑀦 𑀧𑀯𑀢𑁆𑀢𑀲𑀜𑁆𑀜𑀸, 𑀬𑁄 ‘‘𑀆𑀮𑀬𑀸𑀪𑀺𑀦𑀺𑀯𑁂𑀲𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀅𑀪𑀺𑀭𑀢𑀺𑀲𑀜𑁆𑀜𑀸 𑀢𑀢𑁆𑀣𑁂𑀯 𑀅𑀪𑀺𑀭𑀫𑀡𑀯𑀲𑁂𑀦 𑀧𑀯𑀢𑁆𑀢𑀲𑀜𑁆𑀜𑀸, 𑀬𑀸 ‘‘𑀦𑀦𑁆𑀤𑀻’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀅𑀫𑀼𑀘𑁆𑀘𑀺𑀢𑀼𑀓𑀸𑀫𑀢𑀸 𑀆𑀤𑀸𑀦𑀁. 𑀅𑀦𑀼𑀧𑁂𑀓𑁆𑀔𑀸 𑀲𑀗𑁆𑀔𑀸𑀭𑁂𑀳𑀺 𑀅𑀦𑀺𑀩𑁆𑀩𑀺𑀦𑁆𑀤𑀦𑀁, 𑀲𑀸𑀮𑀬𑀢𑀸𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀝𑁆𑀞𑀺𑀢𑀺𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂. 𑀧𑀝𑀺𑀮𑁄𑀫𑀪𑀸𑀯𑁄 𑀲𑀲𑁆𑀲𑀢𑀼𑀘𑁆𑀙𑁂𑀤𑀕𑁆𑀕𑀸𑀳𑁄, 𑀧𑀘𑁆𑀘𑀬𑀸𑀓𑀸𑀭𑀧𑀝𑀺𑀘𑁆𑀙𑀸𑀤𑀓𑀫𑁄𑀳𑁄 𑀯𑀸. 𑀦𑀺𑀩𑁆𑀩𑀸𑀦𑁂 ¶ 𑀘 𑀧𑀝𑀺𑀮𑁄𑀫𑀪𑀸𑀯𑁄 𑀲𑀗𑁆𑀔𑀸𑀭𑁂𑀲𑀼 𑀦𑀢𑀺, 𑀦𑀺𑀩𑁆𑀩𑀸𑀦𑀧𑀝𑀺𑀘𑁆𑀙𑀸𑀤𑀓𑀫𑁄𑀳𑁄 𑀯𑀸. 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄𑀢𑀺 𑀬𑀸𑀤𑀺𑀲𑀲𑁆𑀲 𑀓𑀺𑀮𑁂𑀲𑀲𑁆𑀲 𑀅𑀧𑁆𑀧𑀳𑀻𑀦𑀢𑀸 𑀯𑀺𑀧𑀲𑁆𑀲𑀦𑀸 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀁 𑀦 𑀫𑀼𑀜𑁆𑀘𑀢𑀺, 𑀲𑁄 𑀓𑀺𑀮𑁂𑀲𑁄, 𑀬𑁄 ‘‘𑀲𑀁𑀬𑁄𑀕𑀸𑀪𑀺𑀦𑀺𑀯𑁂𑀲𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀲𑁆𑀲, 𑀅𑀢𑀺𑀓𑁆𑀓𑀫𑀦𑀫𑁂𑀯 𑀯𑀸 𑀧𑀳𑀸𑀦𑀁.

𑀧𑀯𑀢𑁆𑀢𑀺 𑀏𑀯 𑀧𑀯𑀢𑁆𑀢𑀺𑀪𑀸𑀯𑁄, 𑀧𑀭𑀺𑀬𑀼𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀦𑀻𑀯𑀭𑀡𑀸𑀤𑀺𑀥𑀫𑁆𑀫𑀸𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀦𑀻𑀯𑀭𑀡𑀧𑀓𑁆𑀔𑀺𑀬𑀸 𑀓𑀺𑀮𑁂𑀲𑀸 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀤𑀬𑁄 𑀘 𑀕𑀬𑁆𑀳𑀦𑁆𑀢𑀺. 𑀘𑀢𑀼𑀦𑁆𑀦𑀁 𑀅𑀭𑀺𑀬𑀫𑀕𑁆𑀕𑀸𑀦𑀁 𑀪𑀸𑀯𑀺𑀢𑀢𑁆𑀢𑀸 𑀅𑀘𑁆𑀘𑀦𑁆𑀢𑀁 𑀅𑀧𑁆𑀧𑀯𑀢𑁆𑀢𑀺𑀪𑀸𑀯𑁂𑀦 𑀬𑀁 𑀧𑀳𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀓𑁂𑀦 𑀧𑀦 𑀧𑀳𑀸𑀦𑀦𑁆𑀢𑀺? ‘‘𑀅𑀭𑀺𑀬𑀫𑀕𑁆𑀕𑁂𑀳𑁂𑀯𑀸’’𑀢𑀺 𑀯𑀺𑀜𑁆𑀜𑀸𑀬𑀫𑀸𑀦𑁄𑀬𑀫𑀢𑁆𑀣𑁄 𑀢𑁂𑀲𑀁 𑀪𑀸𑀯𑀺𑀢𑀢𑁆𑀢𑀸 𑀅𑀧𑁆𑀧𑀯𑀢𑁆𑀢𑀺𑀯𑀘𑀦𑀢𑁄. ‘‘𑀲𑀫𑀼𑀤𑀬𑀧𑀓𑁆𑀔𑀺𑀓𑀲𑁆𑀲𑀸’’𑀢𑀺 𑀏𑀢𑁆𑀣 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀘𑀢𑀼𑀲𑀘𑁆𑀘𑀸𑀪𑀺𑀲𑀫𑀬𑀸𑀢𑀺 𑀓𑀢𑁆𑀯𑀸 𑀢𑁂𑀳𑀺 𑀧𑀳𑀸𑀢𑀩𑁆𑀩𑁂𑀦 𑀢𑁂𑀦 𑀢𑁂𑀦 𑀲𑀫𑀼𑀤𑀬𑀲𑀗𑁆𑀔𑀸𑀢𑁂𑀦 𑀮𑁄𑀪𑁂𑀦 𑀲𑀳 𑀧𑀳𑀸𑀢𑀩𑁆𑀩𑀢𑁆𑀢𑀸 𑀲𑀫𑀼𑀤𑀬𑀲𑀪𑀸𑀯𑀢𑁆𑀢𑀸 𑀘. 𑀲𑀘𑁆𑀘𑀯𑀺𑀪𑀗𑁆𑀕𑁂 𑀘 𑀲𑀩𑁆𑀩𑀓𑀺𑀮𑁂𑀲𑀸𑀦𑀁 𑀲𑀫𑀼𑀤𑀬𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀫𑀼𑀤𑀬𑀧𑀓𑁆𑀔𑀺𑀓𑀸’’𑀢𑀺 𑀤𑀺𑀝𑁆𑀞𑀺𑀆𑀤𑀬𑁄 𑀯𑀼𑀘𑁆𑀘𑀦𑁆𑀢𑀺. 𑀧𑀝𑀺𑀧𑀲𑁆𑀲𑀤𑁆𑀥𑀢𑁆𑀢𑀁 𑀯𑀽𑀧𑀲𑀦𑁆𑀢𑀢𑀸.

𑀲𑀗𑁆𑀔𑀢𑀦𑀺𑀲𑁆𑀲𑀝𑀢𑀸 𑀲𑀗𑁆𑀔𑀸𑀭𑀲𑀪𑀸𑀯𑀸𑀪𑀸𑀯𑁄. 𑀧𑀳𑀻𑀦𑀲𑀩𑁆𑀩𑀲𑀗𑁆𑀔𑀢𑀦𑁆𑀢𑀺 𑀯𑀺𑀭𑀳𑀺𑀢𑀲𑀩𑁆𑀩𑀲𑀗𑁆𑀔𑀢𑀁, 𑀯𑀺𑀲𑀗𑁆𑀔𑀸𑀭𑀦𑁆𑀢𑀺 𑀅𑀢𑁆𑀣𑁄. 𑀧𑀳𑀸𑀦𑀜𑁆𑀘 𑀢𑀁 𑀯𑀺𑀦𑀬𑁄 𑀘𑀸𑀢𑀺 𑀧𑀳𑀸𑀦𑀯𑀺𑀦𑀬𑁄 𑀧𑀼𑀭𑀺𑀫𑁂𑀦 𑀅𑀢𑁆𑀣𑁂𑀦. 𑀤𑀼𑀢𑀺𑀬𑁂𑀦 𑀧𑀦 𑀧𑀳𑀻𑀬𑀢𑀻𑀢𑀺 𑀧𑀳𑀸𑀦𑀁, 𑀢𑀲𑁆𑀲 𑀯𑀺𑀦𑀬𑁄𑀢𑀺 𑀬𑁄𑀚𑁂𑀢𑀩𑁆𑀩𑁄.

𑀪𑀺𑀦𑁆𑀦𑀲𑀁𑀯𑀭𑀢𑁆𑀢𑀸𑀢𑀺 ¶ 𑀦𑀝𑁆𑀞𑀲𑀁𑀯𑀭𑀢𑁆𑀢𑀸, 𑀲𑀁𑀯𑀭𑀸𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦 𑀅𑀲𑀫𑀸𑀤𑀺𑀦𑁆𑀦𑀲𑀁𑀯𑀭𑁄𑀧𑀺 𑀲𑀗𑁆𑀕𑀳𑀺𑀢𑁄𑀯 𑀳𑁄𑀢𑀺. 𑀲𑀫𑀸𑀤𑀸𑀦𑁂𑀦 𑀳𑀺 𑀲𑀫𑁆𑀧𑀸𑀤𑁂𑀢𑀩𑁆𑀩𑁄 𑀲𑀁𑀯𑀭𑁄, 𑀢𑀤𑀪𑀸𑀯𑁂 𑀦 𑀳𑁄𑀢𑀻𑀢𑀺. 𑀅𑀭𑀺𑀬𑁂𑀢𑀺 𑀅𑀭𑀺𑀬𑁄. 𑀧𑀘𑁆𑀘𑀢𑁆𑀢𑀯𑀘𑀦𑀜𑁆𑀳𑁂𑀢𑀁. 𑀏𑀲𑁂𑀲𑁂𑀢𑀺 𑀏𑀲𑁄 𑀏𑀲𑁄, 𑀅𑀢𑁆𑀣𑀢𑁄 𑀅𑀦𑀜𑁆𑀜𑁄𑀢𑀺 𑀅𑀢𑁆𑀣𑁄. 𑀢𑀚𑁆𑀚𑀸𑀢𑁂𑀢𑀺 𑀅𑀢𑁆𑀣𑀢𑁄 𑀢𑀁𑀲𑀪𑀸𑀯𑁄, 𑀲𑀧𑁆𑀧𑀼𑀭𑀺𑀲𑁄 𑀅𑀭𑀺𑀬𑀲𑀪𑀸𑀯𑁄, 𑀅𑀭𑀺𑀬𑁄 𑀘 𑀲𑀧𑁆𑀧𑀼𑀭𑀺𑀲𑀪𑀸𑀯𑁄𑀢𑀺 𑀅𑀢𑁆𑀣𑁄.

𑀲𑁄 𑀅𑀳𑀦𑁆𑀢𑀺 𑀅𑀢𑁆𑀢𑀦𑀸 𑀧𑀭𑀺𑀓𑀧𑁆𑀧𑀺𑀢𑀁 𑀅𑀢𑁆𑀢𑀸𑀦𑀁 𑀤𑀺𑀝𑁆𑀞𑀺𑀕𑀢𑀺𑀓𑁄 𑀯𑀤𑀢𑀺. ‘‘𑀅𑀳𑀁𑀩𑀼𑀤𑁆𑀥𑀺𑀦𑀺𑀩𑀦𑁆𑀥𑀦𑁄 𑀅𑀢𑁆𑀢𑀸’’𑀢𑀺 𑀳𑀺 𑀅𑀢𑁆𑀢𑀯𑀸𑀤𑀺𑀦𑁄 𑀮𑀤𑁆𑀥𑀺. 𑀅𑀤𑁆𑀯𑀬𑀦𑁆𑀢𑀺 𑀤𑁆𑀯𑀬𑀢𑀸𑀭𑀳𑀺𑀢𑀁. 𑀅𑀪𑀺𑀦𑁆𑀦𑀁 𑀯𑀡𑁆𑀡𑀫𑁂𑀯 ‘‘𑀅𑀘𑁆𑀘𑀻’’𑀢𑀺 𑀕𑀳𑁂𑀢𑁆𑀯𑀸 ‘‘𑀅𑀘𑁆𑀘𑀻𑀢𑀺 𑀯𑀡𑁆𑀡𑁄 𑀏𑀯𑀸’’𑀢𑀺 𑀢𑁂𑀲𑀁 𑀏𑀓𑀢𑁆𑀢𑀁 𑀧𑀲𑁆𑀲𑀦𑁆𑀢𑁄 𑀯𑀺𑀬 𑀬𑀣𑀸𑀧𑀭𑀺𑀓𑀧𑁆𑀧𑀺𑀢𑀁 𑀅𑀢𑁆𑀢𑀸𑀦𑀁 ‘‘𑀭𑀽𑀧’’𑀦𑁆𑀢𑀺, 𑀬𑀣𑀸𑀤𑀺𑀝𑁆𑀞𑀁 𑀯𑀸 𑀭𑀽𑀧𑀁, ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀏𑀓𑀢𑁆𑀢𑀁 𑀧𑀲𑁆𑀲𑀦𑁆𑀢𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀣 𑀘 ‘‘𑀭𑀽𑀧𑀁 𑀅𑀢𑁆𑀢𑀸’’𑀢𑀺 ¶ 𑀇𑀫𑀺𑀲𑁆𑀲𑀸 𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑁂𑀧𑀺 𑀭𑀽𑀧𑁂 𑀅𑀢𑁆𑀢𑀕𑁆𑀕𑀳𑀡𑀁 𑀧𑀯𑀢𑁆𑀢𑀫𑀸𑀦𑀁 𑀅𑀘𑁆𑀘𑀺𑀬𑀁 𑀯𑀡𑁆𑀡𑀕𑁆𑀕𑀳𑀡𑀁 𑀯𑀺𑀬 ‘‘𑀅𑀤𑁆𑀯𑀬𑀤𑀲𑁆𑀲𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀧𑀫𑀸𑀬𑁄 𑀘 𑀅𑀦𑀜𑁆𑀜𑀢𑁆𑀢𑀸𑀤𑀺𑀕𑀳𑀡𑀦𑀺𑀤𑀲𑁆𑀲𑀦𑀯𑀲𑁂𑀦𑁂𑀯 𑀯𑀼𑀢𑁆𑀢𑀸, 𑀦 𑀯𑀡𑁆𑀡𑀸𑀤𑀻𑀦𑀁 𑀯𑀺𑀬 𑀅𑀢𑁆𑀢𑀦𑁄 𑀯𑀺𑀚𑁆𑀚𑀫𑀸𑀦𑀤𑀲𑁆𑀲𑀦𑀢𑁆𑀣𑀁. 𑀦 𑀳𑀺 𑀅𑀢𑁆𑀢𑀦𑀺 𑀲𑀸𑀫𑀺𑀪𑀸𑀯𑁂𑀦 𑀭𑀽𑀧𑀜𑁆𑀘 𑀲𑀓𑀺𑀜𑁆𑀘𑀦𑀪𑀸𑀯𑁂𑀦 𑀲𑀫𑀦𑀼𑀧𑀲𑁆𑀲𑀢𑀺. 𑀅𑀢𑁆𑀢𑀦𑀺 𑀯𑀸 𑀭𑀽𑀧𑀦𑁆𑀢𑀺 𑀅𑀢𑁆𑀢𑀸𑀦𑀁 𑀭𑀽𑀧𑀲𑁆𑀲 𑀲𑀪𑀸𑀯𑀢𑁄 𑀆𑀥𑀸𑀭𑀡𑀪𑀸𑀯𑁂𑀦. 𑀭𑀽𑀧𑀲𑁆𑀫𑀺𑀁 𑀯𑀸 𑀅𑀢𑁆𑀢𑀸𑀦𑀦𑁆𑀢𑀺 𑀭𑀽𑀧𑀲𑁆𑀲 𑀅𑀢𑁆𑀢𑀦𑁄 𑀆𑀥𑀸𑀭𑀡𑀪𑀸𑀯𑁂𑀦 𑀤𑀺𑀝𑁆𑀞𑀺𑀧𑀲𑁆𑀲𑀦𑀸𑀬 𑀧𑀲𑁆𑀲𑀢𑀺. 𑀧𑀭𑀺𑀬𑀼𑀝𑁆𑀞𑀝𑁆𑀞𑀸𑀬𑀻𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀢𑁆𑀢𑀸𑀳𑀺 𑀤𑀺𑀝𑁆𑀞𑀺𑀢𑀡𑁆𑀳𑀸𑀳𑀺 ‘‘𑀭𑀽𑀧𑀁 𑀅𑀢𑁆𑀢𑀸, 𑀭𑀽𑀧𑀯𑀸 𑀅𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀔𑀦𑁆𑀥𑀧𑀜𑁆𑀘𑀓𑀁 𑀫𑀺𑀘𑁆𑀙𑀸 𑀕𑀳𑁂𑀢𑁆𑀯𑀸 𑀢𑀺𑀝𑁆𑀞𑀦𑀢𑁄. 𑀢𑁂𑀦𑀸𑀳 ‘‘𑀧𑀭𑀺𑀬𑀼𑀝𑁆𑀞𑀸𑀦𑀸𑀓𑀸𑀭𑁂𑀦𑀸’’𑀢𑀺𑀆𑀤𑀺. 𑀏𑀲𑁂𑀯 𑀦𑀬𑁄𑀢𑀺 𑀬𑁄 ‘‘𑀇𑀥𑁂𑀓𑀘𑁆𑀘𑁄 𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 𑀭𑀽𑀧𑀓𑁆𑀔𑀦𑁆𑀥𑁂 𑀯𑀼𑀢𑁆𑀢𑁄 𑀲𑀁𑀯𑀡𑁆𑀡𑀦𑀸𑀦𑀬𑁄, 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀲𑀼𑀧𑀺 𑀏𑀲𑁄 𑀏𑀯 𑀦𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀼𑀤𑁆𑀥𑀭𑀽𑀧𑀫𑁂𑀯𑀸𑀢𑀺 𑀅𑀭𑀽𑀧𑁂𑀦 𑀅𑀫𑀺𑀲𑁆𑀲𑀺𑀢𑀁 𑀓𑁂𑀯𑀮𑀁 𑀭𑀽𑀧𑀫𑁂𑀯. 𑀅𑀭𑀽𑀧𑀦𑁆𑀢𑀺 𑀲𑀼𑀤𑁆𑀥𑀅𑀭𑀽𑀧𑀁 𑀭𑀽𑀧𑀲𑁆𑀲 𑀅𑀕𑁆𑀕𑀳𑀺𑀢𑀢𑁆𑀢𑀸. 𑀘𑀢𑀽𑀲𑀼 𑀔𑀦𑁆𑀥𑁂𑀲𑀼 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀯𑀲𑁂𑀦𑀸𑀢𑀺 𑀘𑀢𑀽𑀲𑀼 𑀔𑀦𑁆𑀥𑁂𑀲𑀼 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀕𑀳𑀡𑀯𑀲𑁂𑀦 𑀭𑀽𑀧𑀸𑀭𑀽𑀧𑀫𑀺𑀲𑁆𑀲𑀓𑁄 𑀅𑀢𑁆𑀢𑀸 𑀓𑀣𑀺𑀢𑁄 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀕𑀳𑀡𑁂 𑀯𑁂𑀤𑀦𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀅𑀭𑀽𑀧𑀥𑀫𑁆𑀫𑁂 𑀓𑀲𑀺𑀡𑀭𑀽𑀧𑁂𑀦 𑀲𑀤𑁆𑀥𑀺𑀁 𑀲𑀩𑁆𑀩𑀭𑀽𑀧𑀥𑀫𑁆𑀫𑁂 𑀘 𑀏𑀓𑀚𑁆𑀛𑀁 𑀕𑀳𑀡𑀲𑀺𑀤𑁆𑀥𑀺𑀢𑁄. 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀓𑀣𑀺𑀢𑀸, 𑀢𑁂 𑀢𑁂 𑀏𑀯 𑀥𑀫𑁆𑀫𑁂 ‘‘𑀅𑀢𑁆𑀢𑀸’’𑀢𑀺 𑀕𑀳𑀡𑀢𑁄 𑀢𑁂𑀲𑀜𑁆𑀘 𑀉𑀘𑁆𑀙𑁂𑀤𑀪𑀸𑀯𑀢𑁄. 𑀅𑀯𑀲𑁂𑀲𑁂𑀲𑀼 𑀧𑀦 𑀧𑀦𑁆𑀦𑀭𑀲𑀲𑀼 𑀞𑀸𑀦𑁂𑀲𑀼 𑀭𑀽𑀧𑀁 ‘‘𑀅𑀢𑁆𑀢𑀸’’𑀢𑀺 𑀕𑀳𑁂𑀢𑁆𑀯𑀸𑀧𑀺 𑀤𑀺𑀝𑁆𑀞𑀺𑀕𑀢𑀺𑀓𑁄 𑀢𑀢𑁆𑀣 𑀦𑀺𑀘𑁆𑀘𑀲𑀜𑁆𑀜𑀁 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺 𑀓𑀲𑀺𑀡𑀭𑀽𑀧𑁂𑀦 𑀢𑀁 𑀫𑀺𑀲𑁆𑀲𑁂𑀢𑁆𑀯𑀸 𑀢𑀲𑁆𑀲 𑀘 𑀉𑀧𑁆𑀧𑀸𑀤𑀸𑀤𑀻𑀦𑀁 𑀅𑀤𑀲𑁆𑀲𑀦𑀢𑁄, 𑀢𑀲𑁆𑀫𑀸𑀲𑁆𑀲 𑀢𑀢𑁆𑀣𑀧𑀺 𑀳𑁄𑀢𑀺𑀬𑁂𑀯 𑀲𑀲𑁆𑀲𑀢𑀤𑀺𑀝𑁆𑀞𑀺 𑀏𑀓𑀘𑁆𑀘𑀲𑀲𑁆𑀲𑀢𑀕𑀸𑀳𑀯𑀲𑁂𑀦𑀧𑀺. 𑀫𑀕𑁆𑀕𑀸𑀯𑀭𑀡𑀸 𑀯𑀺𑀧𑀭𑀻𑀢𑀤𑀲𑁆𑀲𑀦𑀢𑁄. 𑀦 𑀲𑀕𑁆𑀕𑀸𑀯𑀭𑀡𑀸 𑀅𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀢𑀸𑀬. 𑀅𑀓𑀺𑀭𑀺𑀬𑀸𑀳𑁂𑀢𑀼𑀓𑀦𑀢𑁆𑀣𑀺𑀓𑀤𑀺𑀝𑁆𑀞𑀺𑀬𑁄 𑀏𑀯 𑀳𑀺 𑀓𑀫𑁆𑀫𑀧𑀣𑀤𑀺𑀝𑁆𑀞𑀺𑀬𑁄.

𑀓𑀸𑀬𑁄𑀢𑀺 𑀭𑀽𑀧𑀓𑀸𑀬𑁄. 𑀲𑁄 𑀆𑀢𑀼𑀭𑁄𑀬𑁂𑀯 𑀅𑀲𑀯𑀲𑀪𑀸𑀯𑀢𑁄. 𑀭𑀸𑀕𑀤𑁄𑀲𑀫𑁄𑀳𑀸𑀦𑀼𑀕𑀢𑀦𑁆𑀢𑀺 𑀅𑀧𑁆𑀧𑀳𑀻𑀦𑀭𑀸𑀕𑀤𑁄𑀲𑀫𑁄𑀳𑀲𑀦𑁆𑀢𑀸𑀦𑁂 ¶ 𑀧𑀯𑀢𑁆𑀢𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂. 𑀤𑀲𑁆𑀲𑀺𑀢𑀁 𑀆𑀢𑀼𑀭𑀪𑀸𑀯𑁂𑀦. 𑀦𑀺𑀓𑁆𑀓𑀺𑀮𑁂𑀲𑀢𑀸𑀬𑀸𑀢𑀺 𑀲𑀬𑀁 𑀧𑀳𑀻𑀦𑀓𑀺𑀮𑁂𑀲𑀲𑀦𑁆𑀢𑀸𑀦𑀕𑀢𑀢𑀸𑀬. 𑀲𑁂𑀔𑀸 𑀦𑁂𑀯 𑀆𑀢𑀼𑀭𑀘𑀺𑀢𑁆𑀢𑀸 𑀧𑀳𑀻𑀦𑀓𑀺𑀮𑁂𑀲𑁂 𑀉𑀧𑀸𑀤𑀸𑀬, 𑀅𑀧𑁆𑀧𑀳𑀻𑀦𑁂 𑀧𑀦 𑀉𑀧𑀸𑀤𑀸𑀬 𑀆𑀢𑀼𑀭𑀘𑀺𑀢𑁆𑀢𑀸. 𑀅𑀦𑀸𑀢𑀼𑀭𑀘𑀺𑀢𑁆𑀢𑀢𑀁𑀬𑁂𑀯 𑀪𑀚𑀦𑁆𑀢𑀺 𑀯𑀝𑁆𑀝𑀸𑀦𑀼𑀲𑀸𑀭𑀺𑀫𑀳𑀸𑀚𑀦𑀲𑁆𑀲 𑀯𑀺𑀬 𑀢𑁂𑀲𑀁 𑀘𑀺𑀢𑁆𑀢𑀲𑁆𑀲 𑀓𑀺𑀮𑁂𑀲𑀯𑀲𑁂𑀦 𑀆𑀢𑀼𑀭𑀢𑁆𑀢𑀸𑀪𑀸𑀯𑀢𑁄.

𑀦𑀓𑀼𑀮𑀧𑀺𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑁂𑀯𑀤𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁨. 𑀤𑁂𑀯𑀸 ¶ 𑀯𑀼𑀘𑁆𑀘𑀦𑁆𑀢𑀺 𑀭𑀸𑀚𑀸𑀦𑁄 ‘‘𑀤𑀺𑀩𑁆𑀩𑀦𑁆𑀢𑀺 𑀓𑀸𑀫𑀕𑀼𑀡𑁂𑀳𑀺 𑀓𑀻𑀴𑀦𑁆𑀢𑀺 𑀮𑀴𑀦𑁆𑀢𑀺, 𑀅𑀢𑁆𑀢𑀦𑁄 𑀯𑀸 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀚𑁄𑀢𑀦𑁆𑀢𑀻’’𑀢𑀺 𑀓𑀢𑁆𑀯𑀸. 𑀢𑁂𑀲𑀁 𑀤𑀳𑁄𑀢𑀺 𑀤𑁂𑀯𑀤𑀳𑁄. 𑀲𑀬𑀁𑀚𑀸𑀢𑁄 𑀯𑀸 𑀲𑁄 𑀳𑁄𑀢𑀺, 𑀢𑀲𑁆𑀫𑀸𑀧𑀺 ‘‘𑀤𑁂𑀯𑀤𑀳𑁄’’𑀢𑀺 𑀯𑀼𑀢𑁆𑀢𑁄. 𑀢𑀲𑁆𑀲 𑀅𑀯𑀺𑀤𑀽𑀭𑁂 𑀦𑀺𑀕𑀫𑁄 ‘‘𑀤𑁂𑀯𑀤𑀳’’𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀢𑁄 𑀬𑀣𑀸 ‘‘𑀯𑀭𑀡𑀸𑀦𑀕𑀭𑀁, 𑀕𑁄𑀥𑀸𑀕𑀸𑀫𑁄’’𑀢𑀺. 𑀧𑀘𑁆𑀙𑀸𑀪𑀽𑀫𑀺𑀬𑀁 𑀅𑀧𑀭𑀤𑀺𑀲𑀸𑀬𑀁 𑀦𑀺𑀯𑀺𑀝𑁆𑀞𑀚𑀦𑀧𑀤𑁄 𑀧𑀘𑁆𑀙𑀸𑀪𑀽𑀫𑀁, 𑀢𑀁 𑀕𑀦𑁆𑀢𑀼𑀓𑀸𑀫𑀸 𑀧𑀘𑁆𑀙𑀸𑀪𑀽𑀫𑀕𑀫𑀺𑀓𑀸. 𑀢𑁂 𑀲𑀪𑀸𑀭𑁂𑀢𑀺 𑀢𑁂 𑀪𑀺𑀓𑁆𑀔𑀽 𑀣𑁂𑀭𑀲𑁆𑀲 𑀯𑀲𑁂𑀦 𑀲𑀪𑀸𑀭𑁂 𑀓𑀸𑀢𑀼𑀓𑀸𑀫𑀢𑀸𑀬. 𑀬𑀤𑀺 𑀣𑁂𑀭𑁄 𑀢𑁂𑀲𑀁 𑀪𑀸𑀭𑁄, 𑀣𑁂𑀭𑀲𑁆𑀲𑀧𑀺 𑀢𑁂 𑀪𑀸𑀭𑀸 𑀏𑀯𑀸𑀢𑀺 ‘‘𑀢𑁂 𑀲𑀪𑀸𑀭𑁂 𑀓𑀸𑀢𑀼𑀓𑀸𑀫𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 𑀣𑁂𑀭𑁄 𑀢𑁂 𑀑𑀯𑀤𑀺𑀢𑀩𑁆𑀩𑁂 𑀅𑀦𑀼𑀲𑀸𑀲𑀺𑀢𑀩𑁆𑀩𑁂 𑀫𑀜𑁆𑀜𑀢𑀻𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀬𑁄 𑀳𑀻’’𑀢𑀺𑀆𑀤𑀺𑀫𑀸𑀳. 𑀅𑀬𑀁 𑀦𑀺𑀩𑁆𑀪𑀸𑀭𑁄 𑀦𑀸𑀫 𑀓𑀜𑁆𑀘𑀺 𑀧𑀼𑀕𑁆𑀕𑀮𑀁 𑀅𑀢𑁆𑀢𑀦𑁄 𑀪𑀸𑀭𑀁 𑀓𑀢𑁆𑀯𑀸 𑀅𑀯𑀢𑁆𑀢𑀦𑀢𑁄.

𑀘𑀢𑀼𑀩𑁆𑀩𑀺𑀥𑁂𑀦𑀸𑀢𑀺 𑀥𑀸𑀢𑀼𑀓𑁄𑀲𑀮𑁆𑀮𑀁 𑀆𑀬𑀢𑀦𑀓𑁄𑀲𑀮𑁆𑀮𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑁄𑀲𑀮𑁆𑀮𑀁 𑀞𑀸𑀦𑀸𑀝𑁆𑀞𑀸𑀦𑀓𑁄𑀲𑀮𑁆𑀮𑀦𑁆𑀢𑀺 𑀏𑀯𑀁 𑀘𑀢𑀼𑀩𑁆𑀩𑀺𑀥𑁂𑀦.

𑀢𑁂 𑀫𑀳𑀮𑁆𑀮𑀓𑀸𑀩𑀸𑀥𑀺𑀓𑀸𑀢𑀺𑀤𑀳𑀭𑀧𑀼𑀕𑁆𑀕𑀮𑁂 𑀕𑀡𑁆𑀳𑀺𑀢𑁆𑀯𑀸𑀯 𑀕𑀘𑁆𑀙𑀢𑀺. 𑀢𑁂 𑀳𑀺 𑀤𑀺𑀯𑀲𑀤𑁆𑀯𑀬𑁂𑀦 𑀯𑀽𑀧𑀲𑀦𑁆𑀢𑀧𑀭𑀺𑀲𑁆𑀲𑀫𑀸 𑀏𑀯. 𑀳𑀢𑁆𑀣𑀺𑀯𑀸𑀦𑀭𑀢𑀺𑀢𑁆𑀢𑀺𑀭𑀧𑀝𑀺𑀩𑀤𑁆𑀥𑀁 𑀯𑀢𑁆𑀣𑀼𑀁 𑀓𑀣𑁂𑀢𑁆𑀯𑀸. ‘‘𑀏𑀴𑀓𑀸𑀴𑀕𑀼𑀫𑁆𑀩𑁂𑀢𑀺 𑀓𑀸𑀴𑀢𑀺𑀡𑀕𑀘𑁆𑀙𑀫𑀡𑁆𑀟𑀧𑁂’’𑀢𑀺𑀧𑀺 𑀯𑀤𑀦𑁆𑀢𑀺.

𑀯𑀺𑀯𑀺𑀥𑀁 𑀦𑀸𑀦𑀸𑀪𑀽𑀢𑀁 𑀭𑀚𑁆𑀚𑀁 𑀯𑀺𑀭𑀚𑁆𑀚𑀁, 𑀯𑀺𑀭𑀚𑁆𑀚𑀫𑁂𑀯 𑀯𑁂𑀭𑀚𑁆𑀚𑀁, 𑀢𑀢𑁆𑀣 𑀕𑀢𑀁, 𑀧𑀭𑀤𑁂𑀲𑀕𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀏𑀓𑀲𑁆𑀲𑀸’’𑀢𑀺𑀆𑀤𑀺. 𑀘𑀺𑀢𑁆𑀢𑀲𑀼𑀤𑀢𑁆𑀢𑀸𑀤𑀬𑁄𑀢𑀺 𑀘𑀺𑀢𑁆𑀢𑀕𑀳𑀧𑀢𑀺𑀅𑀦𑀸𑀣𑀧𑀺𑀡𑁆𑀟𑀺𑀓𑀸𑀤𑀬𑁄. 𑀯𑀻𑀫𑀁𑀲𑀓𑀸𑀢𑀺 𑀥𑀫𑁆𑀫𑀯𑀺𑀘𑀸𑀭𑀓𑀸. 𑀓𑀺𑀦𑁆𑀢𑀺 𑀓𑀻𑀤𑀺𑀲𑀁. 𑀤𑀲𑁆𑀲𑀦𑀦𑁆𑀢𑀺 𑀲𑀺𑀤𑁆𑀥𑀦𑁆𑀢𑀁. 𑀆𑀘𑀺𑀓𑁆𑀔𑀢𑀺 𑀓𑀻𑀤𑀺𑀲𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀥𑀫𑁆𑀫𑀲𑁆𑀲𑀸𑀢𑀺 𑀪𑀕𑀯𑀢𑀸 𑀯𑀼𑀢𑁆𑀢𑀥𑀫𑁆𑀫𑀲𑁆𑀲. 𑀅𑀦𑀼𑀥𑀫𑁆𑀫𑀦𑁆𑀢𑀺 𑀅𑀦𑀼𑀓𑀽𑀮𑀁 𑀅𑀯𑀺𑀭𑀼𑀚𑁆𑀛𑀦𑀥𑀫𑁆𑀫𑀁. 𑀲𑁄 𑀧𑀦 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀤𑁂𑀲𑀦𑀸𑀯𑀺𑀢𑁆𑀣𑀸𑀭𑁄𑀢𑀺 𑀆𑀳 𑁋 ‘‘𑀯𑀼𑀢𑁆𑀢𑀩𑁆𑀬𑀸𑀓𑀭𑀡𑀲𑁆𑀲 𑀅𑀦𑀼𑀩𑁆𑀬𑀸𑀓𑀭𑀡’’𑀦𑁆𑀢𑀺. 𑀥𑀸𑀭𑁂𑀢𑀺 𑀅𑀢𑁆𑀢𑀦𑁄 ¶ 𑀨𑀮𑀦𑁆𑀢𑀺 𑀥𑀫𑁆𑀫𑁄, 𑀓𑀸𑀭𑀡𑀦𑁆𑀢𑀺 𑀆𑀳 𑁋 ‘‘𑀲𑀳𑀥𑀫𑁆𑀫𑀺𑀓𑁄𑀢𑀺 𑀲𑀓𑀸𑀭𑀡𑁄’’𑀢𑀺. 𑀇𑀫𑀺𑀦𑀸𑀧𑀺 𑀧𑀸𑀞𑀦𑁆𑀢𑀭𑁂𑀦 𑀯𑀸𑀤𑁄 𑀏𑀯 𑀤𑀻𑀧𑀺𑀢𑁄, 𑀦 𑀢𑁂𑀦 𑀧𑀓𑀸𑀲𑀺𑀢𑀸 𑀓𑀺𑀭𑀺𑀬𑀸.

𑀢𑀡𑁆𑀳𑀸𑀯𑀲𑁂𑀦𑁂𑀯 𑀙𑀦𑁆𑀦𑀫𑁆𑀧𑀺 𑀧𑀤𑀸𑀦𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀸 𑀭𑀸𑀕𑀸𑀤𑀬𑁄 𑀢𑀡𑁆𑀳𑀸𑀬 𑀏𑀯 𑀅𑀯𑀢𑁆𑀣𑀸𑀯𑀺𑀲𑁂𑀲𑀸𑀢𑀺. 𑀢𑁂𑀦𑀸𑀳 ‘‘𑀢𑀡𑁆𑀳𑀸 𑀳𑀻’’𑀢𑀺𑀆𑀤𑀺. 𑀯𑀺𑀳𑀦𑀦𑁆𑀢𑀺 𑀓𑀸𑀬𑀁 𑀘𑀺𑀢𑁆𑀢𑀜𑁆𑀘𑀸𑀢𑀺 𑀯𑀺𑀖𑀸𑀢𑁄, 𑀤𑀼𑀓𑁆𑀔𑀦𑁆𑀢𑀺 𑀆𑀳 𑁋 ‘‘𑀅𑀯𑀺𑀖𑀸𑀢𑁄𑀢𑀺 ¶ 𑀦𑀺𑀤𑀼𑀓𑁆𑀔𑁄’’𑀢𑀺. 𑀉𑀧𑀸𑀬𑀸𑀲𑁂𑀢𑀺 𑀉𑀧𑀢𑀸𑀧𑁂𑀢𑀻𑀢𑀺 𑀉𑀧𑀸𑀬𑀸𑀲𑁄, 𑀉𑀧𑀢𑀸𑀧𑁄. 𑀢𑀧𑁆𑀧𑀝𑀺𑀧𑀓𑁆𑀔𑁄 𑀧𑀦 𑀅𑀦𑀼𑀧𑀸𑀬𑀸𑀲𑁄 𑀦𑀺𑀭𑀽𑀧𑀢𑀸𑀧𑁄 𑀤𑀝𑁆𑀞𑀩𑁆𑀩𑁄. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀯𑀸𑀭𑁂𑀲𑀼.

𑀤𑁂𑀯𑀤𑀳𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀳𑀸𑀮𑀺𑀤𑁆𑀤𑀺𑀓𑀸𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩. ‘‘𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑁂’’𑀢𑀺 𑀅𑀜𑁆𑀜𑁂𑀲𑀼 𑀲𑀼𑀢𑁆𑀢𑀧𑀤𑁂𑀲𑀼 𑀆𑀕𑀢𑀢𑁆𑀢𑀸 𑀆𑀳 ‘‘𑀅𑀯𑀦𑁆𑀢𑀺𑀤𑀓𑁆𑀔𑀺𑀡𑀸𑀧𑀣𑀲𑀗𑁆𑀔𑀸𑀢𑁂’’𑀢𑀺. 𑀫𑀚𑁆𑀛𑀺𑀫𑀤𑁂𑀲𑀢𑁄 𑀳𑀺 𑀤𑀓𑁆𑀔𑀺𑀡𑀤𑀺𑀲𑀸𑀬 𑀅𑀯𑀦𑁆𑀢𑀺𑀭𑀝𑁆𑀞𑀁. 𑀧𑀯𑀢𑁆𑀢𑀬𑀺𑀢𑁆𑀣 𑀏𑀢𑁆𑀣 𑀮𑀤𑁆𑀥𑀻𑀢𑀺 𑀧𑀯𑀢𑁆𑀢𑀁, 𑀧𑀯𑀢𑁆𑀢𑀺𑀢𑀩𑁆𑀩𑀝𑁆𑀞𑀸𑀦𑀦𑁆𑀢𑀺 𑀆𑀳 ‘‘𑀮𑀤𑁆𑀥𑀺𑀧𑀯𑀢𑁆𑀢𑀝𑁆𑀞𑀸𑀦𑁂’’𑀢𑀺. 𑀭𑀼𑀧𑁆𑀧𑀦𑀲𑀪𑀸𑀯𑁄 𑀥𑀫𑁆𑀫𑁄𑀢𑀺 𑀓𑀢𑁆𑀯𑀸 𑀭𑀽𑀧𑀥𑀸𑀢𑀽𑀢𑀺 𑀭𑀽𑀧𑀓𑁆𑀔𑀦𑁆𑀥𑁄 𑀯𑀼𑀢𑁆𑀢𑁄. 𑀭𑀽𑀧𑀥𑀸𑀢𑀼𑀫𑁆𑀳𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑁂𑀦 𑀭𑀸𑀕𑁂𑀦 𑀲𑀳𑀚𑀸𑀢𑁂𑀦𑀧𑀺 𑀅𑀲𑀳𑀚𑀸𑀢𑁂𑀦𑀧𑀺 𑀉𑀧𑀦𑀺𑀲𑁆𑀲𑀬𑀪𑀽𑀢𑁂𑀦 𑀅𑀧𑁆𑀧𑀳𑀻𑀦𑀪𑀸𑀯𑁂𑀦𑁂𑀯 𑀯𑀺𑀦𑀺𑀩𑀤𑁆𑀥𑀁 𑀧𑀝𑀺𑀩𑀤𑁆𑀥𑀁 𑀓𑀫𑁆𑀫𑀯𑀺𑀜𑁆𑀜𑀸𑀡𑀁. 𑀑𑀓𑀲𑀸𑀭𑀻𑀢𑀺 𑀯𑀼𑀘𑁆𑀘𑀢𑀺 𑁋 ‘‘𑀢𑀲𑁆𑀫𑀺𑀁 𑀭𑀽𑀧𑀥𑀸𑀢𑀼𑀲𑀜𑁆𑀜𑀺𑀢𑁂 𑀑𑀓𑁂 𑀲𑀭𑀢𑀺 𑀧𑀯𑀢𑁆𑀢𑀢𑀻’’𑀢𑀺 𑀓𑀢𑁆𑀯𑀸. 𑀅𑀯𑀢𑀺 𑀏𑀢𑁆𑀣 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀑𑀓𑀁, 𑀧𑀯𑀢𑁆𑀢𑀺𑀝𑁆𑀞𑀸𑀦𑀁. 𑀢𑁂𑀦𑀸𑀳 𑁋 ‘‘𑀕𑁂𑀳𑀲𑀸𑀭𑀻 𑀆𑀮𑀬𑀲𑀸𑀭𑀻’’𑀢𑀺.

𑀉𑀕𑀘𑁆𑀙𑀢𑀺 𑀯𑀸 𑀏𑀢𑁆𑀣 𑀯𑁂𑀤𑀦𑀸𑀤𑀻𑀳𑀺 𑀲𑀤𑁆𑀥𑀺𑀁 𑀲𑀫𑀯𑁂𑀢𑀻𑀢𑀺 𑀑𑀓𑁄, 𑀘𑀓𑁆𑀔𑀼𑀭𑀽𑀧𑀸𑀤𑀺. 𑀧𑀘𑁆𑀘𑀬𑁄𑀢𑀺 𑀆𑀭𑀫𑁆𑀫𑀡𑀸𑀤𑀺𑀯𑀲𑁂𑀦 𑀧𑀘𑁆𑀘𑀬𑁄. 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀸𑀤𑀺𑀦𑀸 𑀘𑁂𑀯 𑀓𑀫𑁆𑀫𑀽𑀧𑀦𑀺𑀲𑁆𑀲𑀬𑀆𑀭𑀫𑁆𑀫𑀡𑀸𑀤𑀺𑀦𑀸 𑀘. ‘‘𑀯𑀺𑀜𑁆𑀜𑀸𑀡𑀥𑀸𑀢𑀼 𑀔𑁄, 𑀕𑀳𑀧𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑁂 ‘‘𑀓𑀫𑁆𑀫𑀯𑀺𑀜𑁆𑀜𑀸𑀡𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑁂𑀲𑀼 𑀓𑀢𑀭𑀁 𑀦𑀼 𑀔𑁄’’𑀢𑀺 𑀲𑀫𑁆𑀫𑁄𑀳𑁄 𑀪𑀯𑁂𑀬𑁆𑀬. 𑀢𑀲𑁆𑀲 𑀲𑀫𑁆𑀫𑁄𑀳𑀲𑁆𑀲 𑀯𑀺𑀖𑀸𑀢𑀢𑁆𑀣𑀁 𑀅𑀧𑀕𑀫𑀦𑀢𑁆𑀣𑀁. 𑀅𑀲𑀫𑁆𑀪𑀺𑀦𑁆𑀦𑀸𑀯𑀸𑀢𑀺 𑀅𑀲𑀁𑀓𑀺𑀡𑁆𑀡𑀸𑀯 𑀤𑁂𑀲𑀦𑀸 𑀓𑀢𑀸. 𑀆𑀭𑀫𑁆𑀫𑀡𑀯𑀲𑁂𑀦 𑀘𑀢𑀲𑁆𑀲𑁄 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀯𑀼𑀢𑁆𑀢𑀸 𑁋 ‘‘𑀭𑀽𑀧𑀼𑀧𑀬𑀁 𑀯𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀫𑀸𑀦𑀁 𑀢𑀺𑀝𑁆𑀞𑁂𑀬𑁆𑀬, 𑀭𑀽𑀧𑀸𑀭𑀫𑁆𑀫𑀡’’𑀦𑁆𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁩.𑁫𑁩). 𑀢𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄 𑀤𑀲𑁆𑀲𑁂𑀢𑀼𑀫𑁆𑀧𑀺.

𑀤𑀴𑁆𑀳𑀁 𑀅𑀪𑀺𑀦𑀺𑀯𑁂𑀲𑀯𑀲𑁂𑀦 𑀆𑀭𑀫𑁆𑀫𑀡𑀁 𑀉𑀧𑁂𑀦𑁆𑀢𑀻𑀢𑀺 𑀉𑀧𑀬𑀸, 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄. 𑀅𑀥𑀺𑀝𑁆𑀞𑀸𑀦𑀪𑀽𑀢𑀸𑀢𑀺 𑀧𑀢𑀺𑀝𑁆𑀞𑀸𑀦𑀪𑀽𑀢𑀸. 𑀅𑀪𑀺𑀦𑀺𑀯𑁂𑀲𑀪𑀽𑀢𑀸𑀢𑀺 𑀢𑀁 𑀢𑀁 𑀆𑀭𑀫𑁆𑀫𑀡𑀁 𑀅𑀪𑀺𑀦𑀺𑀯𑀺𑀲𑁆𑀲 𑀅𑀚𑁆𑀛𑁄𑀲𑀸𑀬 𑀧𑀯𑀢𑁆𑀢𑀺𑀬𑀸 𑀓𑀸𑀭𑀡𑀪𑀽𑀢𑀸. 𑀅𑀦𑀼𑀲𑀬𑀪𑀽𑀢𑀸𑀢𑀺 𑀭𑀸𑀕𑀸𑀦𑀼𑀲𑀬𑀤𑀺𑀝𑁆𑀞𑀸𑀦𑀼𑀲𑀬𑀪𑀽𑀢𑀸. 𑀉𑀧𑀭𑀺𑀫𑀓𑁄𑀝𑀺𑀬𑀸𑀢𑀺 𑀧𑀳𑀸𑀦𑀲𑁆𑀲 𑀉𑀧𑀭𑀺𑀫𑀓𑁄𑀝𑀺𑀬𑀸 ¶ . 𑀩𑀼𑀤𑁆𑀥𑀸𑀦𑀜𑁆𑀜𑁂𑀯 𑀳𑀺 𑀢𑁂 𑀲𑀯𑀸𑀲𑀦𑀸 𑀧𑀳𑀻𑀦𑀸. 𑀧𑀼𑀩𑁆𑀩𑁂 𑀅𑀕𑁆𑀕𑀳𑀺𑀢𑀁 𑀯𑀺𑀜𑁆𑀜𑀸𑀡𑀁 𑀅𑀕𑁆𑀕𑀳𑀺𑀢𑀫𑁂𑀯𑀸𑀢𑀺 𑀓𑀢𑁆𑀯𑀸 𑀓𑀲𑁆𑀫𑀸 𑀇𑀥 𑀤𑁂𑀲𑀦𑀸 𑀓𑀢𑀸𑀢𑀺 𑀘𑁄𑀤𑁂𑀢𑀺 𑁋 ‘‘𑀇𑀥 ¶ 𑀯𑀺𑀜𑁆𑀜𑀸𑀡𑀁 𑀓𑀲𑁆𑀫𑀸 𑀕𑀳𑀺𑀢’’𑀦𑁆𑀢𑀺. 𑀧𑀼𑀩𑁆𑀩𑁂 ‘‘𑀯𑀺𑀜𑁆𑀜𑀸𑀡𑀥𑀸𑀢𑀼𑀭𑀸𑀕𑀯𑀺𑀦𑀺𑀩𑀦𑁆𑀥𑀜𑁆𑀘 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁂 𑀬𑀣𑀸 𑀬𑀣𑀸 𑀲𑀫𑁆𑀫𑁄𑀳𑁄 𑀲𑀺𑀬𑀸 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀯𑀺𑀪𑀸𑀕𑀲𑁆𑀲 𑀤𑀼𑀓𑁆𑀓𑀭𑀢𑁆𑀢𑀸, 𑀇𑀥 𑀧𑀦 𑀲𑀫𑁆𑀫𑁄𑀳𑀲𑁆𑀲 𑀑𑀓𑀸𑀲𑁄𑀯 𑀦𑀢𑁆𑀣𑀺 𑀅𑀯𑀺𑀲𑁂𑀲𑁂𑀦 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀓𑀺𑀮𑁂𑀲𑀧𑁆𑀧𑀳𑀸𑀦𑀯𑀲𑁂𑀦𑀸𑀢𑀺. 𑀢𑁂𑀦𑀸𑀳 ‘‘𑀓𑀺𑀮𑁂𑀲𑀧𑁆𑀧𑀳𑀸𑀦𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺𑀆𑀤𑀺. 𑀓𑀫𑁆𑀫𑀯𑀺𑀜𑁆𑀜𑀸𑀡𑁂𑀦 𑀑𑀓𑀁 𑀅𑀲𑀭𑀦𑁆𑀢𑁂𑀦𑀸’’𑀢𑀺 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁. 𑀅𑀲𑀭𑀦𑁆𑀢𑁂𑀦𑀸𑀢𑀺 𑀅𑀦𑀼𑀧𑀕𑀘𑁆𑀙𑀦𑁆𑀢𑁂𑀦.

𑀧𑀘𑁆𑀘𑀬𑀝𑁆𑀞𑁂𑀦𑀸𑀢𑀺 𑀆𑀭𑀫𑁆𑀫𑀡𑀸𑀤𑀺𑀧𑀘𑁆𑀘𑀬𑀪𑀸𑀯𑁂𑀦. 𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀢𑁆𑀢𑀺𑀓𑀁. 𑀆𑀭𑀫𑁆𑀫𑀡…𑀧𑁂… 𑀦𑀺𑀓𑁂𑀢𑀦𑁆𑀢𑀺 𑀆𑀭𑀫𑁆𑀫𑀡𑀓𑀭𑀡𑀲𑀗𑁆𑀔𑀸𑀢𑁂𑀦 𑀦𑀺𑀯𑀸𑀲𑀝𑁆𑀞𑀸𑀦𑀪𑀽𑀢𑁂𑀦 𑀭𑀽𑀧𑀫𑁂𑀯 𑀦𑀺𑀓𑁂𑀢𑀦𑁆𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀦𑀺𑀓𑁂𑀢𑀁.

𑀙𑀦𑁆𑀤𑀭𑀸𑀕𑀲𑁆𑀲 𑀩𑀮𑀯𑀤𑀼𑀩𑁆𑀩𑀮𑀢𑀸𑀬𑀸𑀢𑀺 𑀅𑀚𑁆𑀛𑀢𑁆𑀢𑀔𑀦𑁆𑀥𑀧𑀜𑁆𑀘𑀓𑁂 𑀙𑀦𑁆𑀤𑀭𑀸𑀕𑀲𑁆𑀲 𑀩𑀮𑀯𑀪𑀸𑀯𑁂𑀦 𑀢𑀁 ‘‘𑀑𑀓𑁄’’𑀢𑀺, 𑀩𑀳𑀺𑀤𑁆𑀥𑀸 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀢𑀲𑁆𑀲 𑀤𑀼𑀩𑁆𑀩𑀮𑀢𑀸𑀬 𑀢𑀸𑀦𑀺 ‘‘𑀦𑀺𑀓𑁂𑀢’’𑀦𑁆𑀢𑀺 𑀯𑀼𑀢𑁆𑀢𑀸𑀦𑀺. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀲𑀫𑀸𑀦𑁂𑀧𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀑𑀓𑁄𑀢𑀺 𑀯𑀼𑀘𑁆𑀘𑀢𑀺 𑀕𑁂𑀳𑀫𑁂𑀯 𑀭𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄. 𑀦𑀺𑀓𑁂𑀢𑀦𑁆𑀢𑀺 𑀯𑀼𑀘𑁆𑀘𑀢𑀺 𑀉𑀬𑁆𑀬𑀸𑀦𑀸𑀤𑀺 𑀤𑀺𑀯𑀸𑀝𑁆𑀞𑀸𑀦𑀪𑀸𑀯𑀢𑁄. 𑀢𑀢𑁄 𑀤𑀼𑀩𑁆𑀩𑀮𑀢𑀭𑁄 𑀳𑁄𑀢𑀺 𑀙𑀦𑁆𑀤𑀭𑀸𑀕𑁄.

𑀕𑁂𑀳𑀲𑁆𑀲𑀺𑀢𑀲𑀼𑀔𑁂𑀦𑀸𑀢𑀺 𑀕𑁂𑀳𑀦𑀺𑀲𑁆𑀲𑀺𑀢𑁂𑀦 𑀘𑀺𑀢𑁆𑀢𑀲𑁆𑀲 𑀲𑀼𑀔𑁂𑀦 𑀲𑀼𑀔𑀺𑀢𑁄 𑀲𑀼𑀔𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀓𑀺𑀘𑁆𑀘𑀓𑀭𑀡𑀻𑀬𑁂𑀲𑀽𑀢𑀺 𑀔𑀼𑀤𑁆𑀤𑀓𑁂𑀲𑀼 𑀘𑁂𑀯 𑀫𑀳𑀦𑁆𑀢𑁂𑀲𑀼 𑀘 𑀓𑀢𑁆𑀢𑀩𑁆𑀩𑀢𑁆𑀣𑁂𑀲𑀼. 𑀲𑀬𑀦𑁆𑀢𑀺 𑀅𑀢𑁆𑀢𑀦𑀸. 𑀅𑀦𑁆𑀢𑁄𑀢𑀺 𑀘𑀺𑀢𑁆𑀢𑀚𑁆𑀛𑀸𑀲𑀬𑁂.

𑀏𑀯𑀁𑀭𑀽𑀧𑁄𑀢𑀺 𑀈𑀤𑀺𑀲𑀭𑀽𑀧𑁄. 𑀯𑀡𑁆𑀡𑀲𑀤𑁆𑀤𑁄 𑀯𑀺𑀬 𑀭𑀽𑀧𑀲𑀤𑁆𑀤𑁄 𑀭𑀽𑀧𑀸𑀬𑀢𑀦𑀲𑁆𑀲 𑀯𑀺𑀬 𑀲𑀡𑁆𑀞𑀸𑀦𑀲𑁆𑀲𑀧𑀺 𑀯𑀸𑀘𑀓𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀤𑀻𑀖𑀭𑀲𑁆𑀲 𑀓𑀸𑀴𑁄𑀤𑀸𑀢𑀸𑀤𑀻𑀲𑀼 𑀭𑀽𑀧𑁂𑀲𑀽’’𑀢𑀺 𑀯𑀼𑀢𑁆𑀢𑀁. 𑀲𑀼𑀔𑀸𑀤𑀻𑀲𑀽𑀢𑀺 𑀲𑁄𑀫𑀦𑀲𑁆𑀲𑀸𑀤𑀻𑀲𑀼. 𑀢𑀢𑁆𑀣 𑀳𑀺 ‘‘𑀅𑀪𑀺𑀡𑁆𑀳𑀁 𑀲𑁄𑀫𑀦𑀲𑁆𑀲𑀺𑀢𑁄 𑀪𑀯𑁂𑀬𑁆𑀬’’𑀦𑁆𑀢𑀺 𑀧𑀢𑁆𑀣𑀦𑀸 𑀲𑀺𑀬𑀸. 𑀏𑀯𑀁𑀲𑀜𑁆𑀜𑁄 𑀦𑀸𑀫𑀸𑀢𑀺 𑀯𑀺𑀲𑀬𑀯𑀲𑁂𑀦 𑀲𑀜𑁆𑀜𑀸𑀯𑀺𑀲𑁂𑀲𑀧𑀢𑁆𑀣𑀦𑀫𑀸𑀳. 𑀏𑀯𑀁𑀯𑀺𑀜𑁆𑀜𑀸𑀡𑁄𑀢𑀺 𑀧𑀦 𑀇𑀥 𑀯𑀺𑀲𑀬𑀫𑀼𑀔𑁂𑀦 𑀯𑀺𑀜𑁆𑀜𑀸𑀡𑀯𑀺𑀲𑁂𑀲𑀧𑀢𑁆𑀣𑀦𑀁 𑀯𑀤𑀢𑀺 𑁋 ‘‘𑀏𑀯𑀁𑀦𑀺𑀧𑀼𑀡𑀭𑀽𑀧𑀤𑀲𑁆𑀲𑀦𑀲𑀫𑀢𑁆𑀣𑀁, 𑀏𑀯𑀁𑀧𑀜𑁆𑀘𑀧𑀲𑀸𑀤𑀧𑀝𑀺𑀫𑀡𑁆𑀟𑀺𑀢𑀦𑀺𑀲𑁆𑀲𑀬𑀜𑁆𑀘 𑀫𑁂 𑀯𑀺𑀜𑁆𑀜𑀸𑀡𑀁 𑀪𑀯𑁂𑀬𑁆𑀬𑀸’’𑀢𑀺.

𑀯𑀝𑁆𑀝𑀁 𑀧𑀼𑀭𑀢𑁄 𑀅𑀓𑀼𑀭𑀽𑀫𑀸𑀦𑁄𑀢𑀺 𑀮𑁄𑀓𑁂 𑀘𑀺𑀢𑁆𑀢𑀁 𑀅𑀧𑀢𑁆𑀣𑁂𑀦𑁆𑀢𑁄. 𑀅𑀲𑀺𑀮𑀺𑀝𑁆𑀞𑀁 𑀧𑀼𑀩𑁆𑀩𑁂𑀦𑀸𑀧𑀭𑀁 𑀅𑀲𑀫𑁆𑀩𑀤𑁆𑀥𑀁. 𑀯𑀤𑀦𑁆𑀢𑀺 𑀏𑀢𑁂𑀦𑀸𑀢𑀺 𑀯𑀸𑀤𑁄, 𑀤𑁄𑀲𑁄𑀢𑀺 𑀆𑀳 𑁋 ‘‘𑀢𑀼𑀬𑁆𑀳𑀁 𑀤𑁄𑀲𑁄’’𑀢𑀺𑀆𑀤𑀺. 𑀇𑀥𑁂𑀯 𑀇𑀫𑀲𑁆𑀫𑀺𑀁𑀬𑁂𑀯 𑀲𑀫𑀸𑀕𑀫𑁂. 𑀦𑀺𑀩𑁆𑀩𑁂𑀞𑁂𑀳𑀺 𑀤𑁄𑀲𑀢𑁄 𑀅𑀢𑁆𑀢𑀸𑀦𑀁 𑀫𑁄𑀘𑁂𑀳𑀺.

𑀳𑀸𑀮𑀺𑀤𑁆𑀤𑀺𑀓𑀸𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀤𑀼𑀢𑀺𑀬𑀳𑀸𑀮𑀺𑀤𑁆𑀤𑀺𑀓𑀸𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪. 𑀘𑀽𑀴𑀙𑀓𑁆𑀓𑀧𑀜𑁆𑀳𑁂𑀢𑀺 ¶ ¶ 𑀫𑀽𑀮𑀧𑀡𑁆𑀡𑀸𑀲𑁂 𑀘𑀽𑀴𑀢𑀡𑁆𑀳𑀸𑀲𑀗𑁆𑀔𑀬𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁩𑁯𑁦 𑀆𑀤𑀬𑁄). 𑀫𑀳𑀸𑀲𑀓𑁆𑀓𑀧𑀜𑁆𑀳𑁂𑀧𑀻𑀢𑀺 𑀫𑀳𑀸𑀢𑀡𑁆𑀳𑀸𑀲𑀗𑁆𑀔𑀬𑀲𑀼𑀢𑁆𑀢𑁂𑀧𑀺 (𑀫. 𑀦𑀺. 𑁧.𑁩𑁯𑁬 𑀆𑀤𑀬𑁄). 𑀏𑀢𑀦𑁆𑀢𑀺 ‘‘𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺𑀲𑀼𑀢𑁆𑀢𑀧𑀤𑀁. 𑀢𑀡𑁆𑀳𑀸 𑀲𑀫𑁆𑀫𑀤𑁂𑀯 𑀔𑀻𑀬𑀢𑀺 𑀏𑀢𑁆𑀣𑀸𑀢𑀺 𑀢𑀡𑁆𑀳𑀸𑀲𑀗𑁆𑀔𑀬𑁄, 𑀅𑀲𑀗𑁆𑀔𑀢𑀸 𑀥𑀸𑀢𑀽𑀢𑀺 𑀆𑀳 ‘‘𑀢𑀡𑁆𑀳𑀸𑀲𑀗𑁆𑀔𑀬𑁂 𑀦𑀺𑀩𑁆𑀩𑀸𑀦𑁂’’𑀢𑀺. 𑀅𑀦𑁆𑀢𑀁 𑀅𑀢𑀺𑀓𑁆𑀓𑀦𑁆𑀢𑀦𑀺𑀝𑁆𑀞𑀸𑀢𑀺 𑀅𑀦𑁆𑀢𑀭𑀳𑀺𑀢𑀦𑀺𑀝𑁆𑀞𑀸. 𑀢𑁂𑀦𑀸𑀳 ‘‘𑀲𑀢𑀢𑀦𑀺𑀝𑁆𑀞𑀸’’𑀢𑀺. 𑀲𑁂𑀲𑀧𑀤𑁂𑀲𑀽𑀢𑀺 ‘‘𑀅𑀘𑁆𑀘𑀦𑁆𑀢𑀬𑁄𑀕𑀓𑁆𑀔𑁂𑀫𑀺𑀦𑁄’’𑀢𑀺𑀆𑀤𑀻𑀲𑀼.

𑀤𑀼𑀢𑀺𑀬𑀳𑀸𑀮𑀺𑀤𑁆𑀤𑀺𑀓𑀸𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁫. 𑀲𑀫𑀸𑀥𑀻𑀢𑀺 𑀅𑀧𑁆𑀧𑀦𑀸𑀲𑀫𑀸𑀥𑀺, 𑀉𑀧𑀘𑀸𑀭𑀲𑀫𑀸𑀥𑀺 𑀯𑀸. 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀲𑀫𑀸𑀥𑀺𑀧𑀸𑀤𑀓𑀁 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁. ‘‘𑀨𑀸𑀢𑀺𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀧𑀸𑀞𑁄. 𑀧𑀢𑁆𑀣𑁂𑀢𑀻𑀢𑀺 ‘‘𑀅𑀳𑁄 𑀯𑀢 𑀫𑁂 𑀈𑀤𑀺𑀲𑀁 𑀭𑀽𑀧𑀁 𑀪𑀯𑁂𑀬𑁆𑀬𑀸’’𑀢𑀺. 𑀅𑀪𑀺𑀯𑀤𑀢𑀻𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀅𑀪𑀺𑀦𑀺𑀯𑁂𑀲𑀁 𑀯𑀤𑀢𑀺. 𑀢𑁂𑀦𑀸𑀳 ‘‘𑀢𑀸𑀬 𑀅𑀪𑀺𑀦𑀦𑁆𑀤𑀦𑀸𑀬𑀸’’𑀢𑀺𑀆𑀤𑀺. ‘‘𑀅𑀳𑁄 𑀧𑀺𑀬𑀁 𑀇𑀝𑁆𑀞’’𑀦𑁆𑀢𑀺 𑀯𑀘𑀻𑀪𑁂𑀤𑁂 𑀅𑀲𑀢𑀺𑀧𑀺 𑀢𑀣𑀸 𑀮𑁄𑀪𑀼𑀧𑁆𑀧𑀸𑀤𑁂 𑀲𑀢𑀺 𑀅𑀪𑀺𑀯𑀤𑀢𑀺𑀬𑁂𑀯 𑀦𑀸𑀫. 𑀢𑁂𑀦𑀸𑀳 ‘‘𑀯𑀸𑀘𑀁 𑀅𑀪𑀺𑀦𑁆𑀤𑀦𑁆𑀢𑁄’’𑀢𑀺. ‘‘𑀫𑀫 𑀇𑀤’’𑀦𑁆𑀢𑀺 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑁂𑀢𑁆𑀯𑀸 𑀅𑀦𑀜𑁆𑀜𑀕𑁄𑀘𑀭𑀁 𑀯𑀺𑀬 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀕𑀺𑀮𑀺𑀢𑁆𑀯𑀸𑀢𑀺 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀻’’𑀢𑀺. ‘‘𑀅𑀪𑀺𑀦𑀦𑁆𑀤𑀢𑀻’’𑀢𑀺𑀆𑀤𑀬𑁄 𑀧𑀼𑀩𑁆𑀩𑀪𑀸𑀕𑀯𑀲𑁂𑀦 𑀯𑀼𑀢𑁆𑀢𑀸, ‘‘𑀉𑀧𑁆𑀧𑀚𑁆𑀚𑀢𑀺 𑀦𑀦𑁆𑀤𑀻’’𑀢𑀺 𑀤𑁆𑀯𑀸𑀭𑀧𑁆𑀧𑀢𑁆𑀢𑀯𑀲𑁂𑀦. 𑀧𑀞𑀫𑁂𑀳𑀺 𑀧𑀤𑁂𑀳𑀺 𑀅𑀦𑀼𑀲𑀬𑁄, 𑀧𑀘𑁆𑀙𑀺𑀫𑁂𑀦 𑀧𑀭𑀺𑀬𑀼𑀝𑁆𑀞𑀸𑀦𑀦𑁆𑀢𑀺 𑀓𑁂𑀘𑀺 ‘‘𑀕𑀳𑀡𑀝𑁆𑀞𑁂𑀦 𑀉𑀧𑀸𑀤𑀸𑀦’’𑀦𑁆𑀢𑀺 𑀓𑀢𑁆𑀯𑀸. 𑀦𑀸𑀪𑀺𑀦𑀦𑁆𑀤𑀢𑀺 𑀦𑀸𑀪𑀺𑀯𑀤𑀢𑀻𑀢𑀺 𑀏𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀦 ‘‘𑀇𑀝𑁆𑀞𑀁 𑀓𑀦𑁆𑀢’’𑀦𑁆𑀢𑀺 𑀯𑀤𑀢𑀻𑀢𑀺 ‘‘𑀇𑀝𑁆𑀞’’𑀦𑁆𑀢𑀺 𑀦 𑀯𑀤𑀢𑀺, ‘‘𑀓𑀦𑁆𑀢’’𑀦𑁆𑀢𑀺 𑀦 𑀯𑀤𑀢𑀺. 𑀦𑀸𑀪𑀺𑀯𑀤𑀢𑀺𑀬𑁂𑀯 𑀢𑀡𑁆𑀳𑀸𑀬 𑀅𑀦𑀼𑀧𑀸𑀤𑀺𑀬𑀢𑁆𑀢𑀸.

𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀧𑀝𑀺𑀲𑀮𑁆𑀮𑀸𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁬. 𑀜𑀢𑁆𑀯𑀸 ¶ 𑀆𑀳𑀸𑀢𑀺 ‘‘𑀲𑀢𑀺 𑀓𑀸𑀬𑀯𑀺𑀯𑁂𑀓𑁂 𑀘𑀺𑀢𑁆𑀢𑀯𑀺𑀯𑁂𑀓𑁄, 𑀢𑀲𑁆𑀫𑀺𑀁 𑀲𑀢𑀺 𑀉𑀧𑀥𑀺𑀯𑀺𑀯𑁂𑀓𑁄 𑀘 𑀇𑀫𑁂𑀲𑀁 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻’’𑀢𑀺 𑀜𑀢𑁆𑀯𑀸 𑀆𑀳.

𑀧𑀝𑀺𑀲𑀮𑁆𑀮𑀸𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀉𑀧𑀸𑀤𑀸𑀧𑀭𑀺𑀢𑀲𑁆𑀲𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁭. 𑀕𑀳𑀡𑁂𑀦 ¶ 𑀉𑀧𑁆𑀧𑀦𑁆𑀦𑀁 𑀧𑀭𑀺𑀢𑀲𑁆𑀲𑀦𑀦𑁆𑀢𑀺 𑀔𑀦𑁆𑀥𑀧𑀜𑁆𑀘𑀓𑁂 ‘‘𑀅𑀳𑀁 𑀫𑀫𑀸’’𑀢𑀺 𑀕𑀳𑀡𑁂𑀦 𑀉𑀧𑁆𑀧𑀦𑁆𑀦𑀁 𑀢𑀡𑁆𑀳𑀸𑀧𑀭𑀺𑀢𑀲𑁆𑀲𑀦𑀁 𑀤𑀺𑀝𑁆𑀞𑀺𑀧𑀭𑀺𑀢𑀲𑁆𑀲𑀦𑀜𑁆𑀘. 𑀅𑀧𑀭𑀺𑀢𑀲𑁆𑀲𑀦𑀦𑁆𑀢𑀺 𑀧𑀭𑀺𑀢𑀲𑁆𑀲𑀦𑀸𑀪𑀸𑀯𑀁, 𑀧𑀭𑀺𑀢𑀲𑁆𑀲𑀦𑀧𑀝𑀺𑀧𑀓𑁆𑀔𑀁 𑀯𑀸. 𑀅𑀳𑀼 𑀯𑀢 𑀫𑁂𑀢𑀁 𑀩𑀮𑀬𑁄𑀩𑁆𑀩𑀦𑀸𑀤𑀺. 𑀓𑀫𑁆𑀫𑀯𑀺𑀜𑁆𑀜𑀸𑀡𑀦𑁆𑀢𑀺 𑀯𑀺𑀧𑀭𑀺𑀡𑀸𑀫𑀸𑀭𑀫𑁆𑀫𑀡𑀁 𑀢𑀡𑁆𑀳𑀸𑀤𑀺𑀝𑁆𑀞𑀺𑀲𑀳𑀕𑀢𑀁 𑀯𑀺𑀜𑁆𑀜𑀸𑀡𑀁 𑀢𑀤𑀦𑀼𑀯𑀢𑁆𑀢𑀺 𑀘. 𑀅𑀦𑀼𑀧𑀭𑀺𑀯𑀢𑁆𑀢𑀺 𑀦𑀸𑀫 𑀢𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺. 𑀢𑁂𑀦𑀸𑀳 ‘‘𑀯𑀺𑀧𑀭𑀺𑀡𑀸𑀫𑀸𑀭𑀫𑁆𑀫𑀡𑀘𑀺𑀢𑁆𑀢𑀢𑁄’’𑀢𑀺. 𑀅𑀓𑀼𑀲𑀮𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑀸𑀢𑀺 𑀢𑀡𑁆𑀳𑀸𑀬 𑀅𑀜𑁆𑀜𑀸𑀓𑀼𑀲𑀮𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑀸. 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸𑀢𑀺 𑀔𑁂𑀧𑁂𑀢𑁆𑀯𑀸, 𑀢𑀲𑁆𑀲 𑀧𑀯𑀢𑁆𑀢𑀺𑀢𑀼𑀁 𑀑𑀓𑀸𑀲𑀁 𑀅𑀤𑀢𑁆𑀯𑀸. 𑀲𑀉𑀢𑁆𑀢𑀸𑀲𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀲𑀉𑀢𑁆𑀢𑀸𑀲𑁄. 𑀕𑀡𑁆𑀳𑀺𑀢𑁆𑀯𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀕𑁆𑀕𑀸𑀳𑁂𑀳𑀺 𑀕𑀳𑁂𑀢𑁆𑀯𑀸 𑀢𑁂𑀲𑀜𑁆𑀘𑁂𑀯 𑀯𑀲𑁂𑀦 𑀧𑀭𑀺𑀢𑀲𑁆𑀲𑀓𑁄. 𑀭𑀽𑀧𑀪𑁂𑀤𑀸𑀦𑀼𑀧𑀭𑀺𑀯𑀢𑁆𑀢𑀺 𑀘𑀺𑀢𑁆𑀢𑀁 𑀦 𑀳𑁄𑀢𑀺. 𑀯𑀝𑁆𑀝𑀢𑀻𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀯𑀢𑁆𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀉𑀧𑀸𑀤𑀸𑀧𑀭𑀺𑀢𑀲𑁆𑀲𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀤𑀼𑀢𑀺𑀬𑀉𑀧𑀸𑀤𑀸𑀧𑀭𑀺𑀢𑀲𑁆𑀲𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁮. 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀤𑁂𑀲𑀦𑀸 𑀓𑀢𑀸 ‘‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺 𑀤𑁂𑀲𑀦𑀸𑀬 𑀆𑀕𑀢𑀢𑁆𑀢𑀸. 𑀘𑀢𑀽𑀲𑀼 𑀲𑀼𑀢𑁆𑀢𑁂𑀲𑀽𑀢𑀺 𑀧𑀜𑁆𑀘𑀫𑀸𑀤𑀻𑀲𑀼 𑀘𑀢𑀽𑀲𑀼 𑀲𑀼𑀢𑁆𑀢𑁂𑀲𑀼. 𑀘𑀢𑀼𑀢𑁆𑀣𑁂 𑀧𑀦 𑀯𑀺𑀯𑀝𑁆𑀝𑀫𑁂𑀯 𑀓𑀣𑀺𑀢𑀁.

𑀤𑀼𑀢𑀺𑀬𑀉𑀧𑀸𑀤𑀸𑀧𑀭𑀺𑀢𑀲𑁆𑀲𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀓𑀸𑀮𑀢𑁆𑀢𑀬𑀅𑀦𑀺𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸

𑁯. 𑀬𑀤𑀺 ¶ 𑀅𑀢𑀻𑀢𑀸𑀦𑀸𑀕𑀢𑀁 𑀏𑀢𑀭𑀳𑀺 𑀦𑀢𑁆𑀣𑀺𑀪𑀸𑀯𑀢𑁄 𑀅𑀦𑀺𑀘𑁆𑀘𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀧𑀺 𑀢𑀤𑀸 𑀦𑀢𑁆𑀣𑀻𑀢𑀺 𑀓𑁄 𑀧𑀦 𑀯𑀸𑀤𑁄 𑀢𑀲𑁆𑀲 𑀅𑀦𑀺𑀘𑁆𑀘𑀢𑀸𑀬, 𑀧𑀘𑁆𑀘𑀼𑀧𑁆𑀧𑀦𑁆𑀦𑀫𑁆𑀳𑀺 𑀓𑀣𑀸𑀯 𑀓𑀸 𑀉𑀤𑀬𑀩𑁆𑀩𑀬𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀢𑀲𑁆𑀲. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀦𑀺𑀩𑁆𑀩𑀢𑁆𑀢𑀸 𑀬𑁂 𑀘 𑀢𑀺𑀝𑁆𑀞𑀦𑁆𑀢𑀺, 𑀆𑀭𑀕𑁆𑀕𑁂 𑀲𑀸𑀲𑀧𑀽𑀧𑀫𑀸’’𑀢𑀺 (𑀫𑀳𑀸𑀦𑀺. 𑁧𑁦).

𑀓𑀸𑀮𑀢𑁆𑀢𑀬𑀅𑀦𑀺𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦-𑁧𑁧. 𑀓𑀸𑀮𑀢𑁆𑀢𑀬𑀤𑀼𑀓𑁆𑀔𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦-𑁧𑁧. 𑀢𑀣𑀸𑀭𑀽𑀧𑁂𑀦𑁂𑀯𑀸𑀢𑀺 𑀬𑀣𑀸𑀭𑀽𑀧𑁂𑀦𑁂𑀯 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁂𑀦 𑀦𑀯𑀫𑀁 𑀲𑀼𑀢𑁆𑀢𑀁 𑀓𑀣𑀺𑀢𑀁, 𑀢𑀣𑀸𑀭𑀽𑀧𑁂𑀦𑁂𑀯𑀸𑀢𑀺. 𑀢𑁂 𑀓𑀺𑀭 𑀪𑀺𑀓𑁆𑀔𑀽 𑀅𑀢𑀻𑀢𑀸𑀦𑀸𑀕𑀢𑀁 ‘‘𑀤𑀼𑀓𑁆𑀔’’𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸, 𑀢𑀣𑀸 ‘‘𑀅𑀦𑀢𑁆𑀢𑀸’’𑀢𑀺 ¶ 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀺𑀮𑀫𑀺𑀁𑀲𑀼. ‘‘𑀅𑀣 𑀦𑁂𑀲’’𑀦𑁆𑀢𑀺𑀆𑀤𑀺 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀯𑀢𑁆𑀢𑀩𑁆𑀩𑀁.

𑀓𑀸𑀮𑀢𑁆𑀢𑀬𑀤𑀼𑀓𑁆𑀔𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀓𑀼𑀮𑀧𑀺𑀢𑀼𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀦𑀺𑀘𑁆𑀘𑀯𑀕𑁆𑀕𑁄

𑁧-𑁧𑁦. 𑀅𑀦𑀺𑀘𑁆𑀘𑀸𑀤𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨-𑁨𑁧. 𑀧𑀼𑀘𑁆𑀙𑀸𑀯𑀲𑀺𑀓𑀁 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀧𑀼𑀘𑁆𑀙𑀸𑀯𑀲𑁂𑀦 𑀤𑁂𑀲𑀺𑀢𑀢𑁆𑀢𑀸.

𑀅𑀦𑀺𑀘𑁆𑀘𑀸𑀤𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀺𑀘𑁆𑀘𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀪𑀸𑀭𑀯𑀕𑁆𑀕𑁄

𑁧. 𑀪𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨. 𑀉𑀧𑀸𑀤𑀸𑀦𑀸𑀦𑀁 𑀆𑀭𑀫𑁆𑀫𑀡𑀪𑀽𑀢𑀸 𑀔𑀦𑁆𑀥𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀧𑀭𑀺𑀳𑀸𑀭𑀪𑀸𑀭𑀺𑀬𑀝𑁆𑀞𑁂𑀦𑀸𑀢𑀺 𑀧𑀭𑀺𑀳𑀸𑀭𑀲𑁆𑀲 𑀪𑀸𑀭𑀺𑀬𑀪𑀸𑀯𑁂𑀦 𑀕𑀭𑀼𑀢𑀭𑀪𑀸𑀯𑁂𑀦. 𑀯𑀼𑀢𑁆𑀢𑀫𑁂𑀯 𑀅𑀢𑁆𑀣𑀁 ¶ 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀏𑀢𑁂𑀲𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑁆𑀫𑀸 𑀏𑀢𑀸𑀦𑀺 𑀞𑀸𑀦𑀕𑀫𑀦𑀸𑀤𑀻𑀦𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀧𑀗𑁆𑀕𑀼𑀮𑀚𑀘𑁆𑀘𑀦𑁆𑀥𑀸𑀦𑀁 𑀯𑀺𑀬 𑀅𑀜𑁆𑀜𑀫𑀜𑁆𑀜𑀽𑀧𑀲𑁆𑀲𑀬𑀯𑀲𑁂𑀦 𑀇𑀚𑁆𑀛𑀦𑁆𑀢𑀺, 𑀦 𑀧𑀘𑁆𑀘𑁂𑀓𑀁, 𑀢𑀲𑁆𑀫𑀸 ‘‘𑀏𑀢𑁂𑀲’’𑀦𑁆𑀢𑀺 𑀅𑀯𑀺𑀲𑁂𑀲𑀯𑀘𑀦𑀁 𑀓𑀢𑀁. 𑀧𑀼𑀕𑁆𑀕𑀮𑀦𑁆𑀢𑀺 𑀔𑀦𑁆𑀥𑀲𑀦𑁆𑀢𑀸𑀦𑀁 𑀯𑀤𑀢𑀺. 𑀔𑀦𑁆𑀥𑀲𑀦𑁆𑀢𑀸𑀦𑁄 𑀳𑀺 𑀅𑀯𑀺𑀘𑁆𑀙𑁂𑀤𑁂𑀦 𑀧𑀯𑀢𑁆𑀢𑀫𑀸𑀦𑁄 𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀸 𑀔𑀦𑁆𑀥𑀪𑀸𑀭𑀁 𑀯𑀳𑀦𑁆𑀢𑁄 𑀯𑀺𑀬 𑀮𑁄𑀓𑁂 𑀔𑀸𑀬𑀢𑀺 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀲𑀢𑁆𑀢𑀲𑁆𑀲 𑀅𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺. 𑀪𑀸𑀭𑀳𑀸𑀭𑁄𑀢𑀺 𑀚𑀸𑀢𑁄𑀢𑀺 𑀪𑀸𑀭𑀳𑀸𑀭𑁄 𑀦𑀸𑀫 𑀚𑀸𑀢𑁄.

𑀧𑀼𑀦𑀩𑁆𑀪𑀯𑀓𑀭𑀡𑀁 𑀧𑀼𑀦𑀩𑁆𑀪𑀯𑁄, 𑀢𑀁 𑀨𑀮𑀁 𑀅𑀭𑀳𑀢𑀺, 𑀢𑀢𑁆𑀣 𑀦𑀺𑀬𑀼𑀢𑁆𑀢𑀸𑀢𑀺 𑀯𑀸 𑀧𑁄𑀦𑁄𑀪𑀯𑀺𑀓𑀸. 𑀢𑀩𑁆𑀪𑀸𑀯𑀲𑀳𑀕𑀢𑀁 ¶ 𑀬𑀣𑀸 ‘‘𑀲𑀦𑀺𑀤𑀲𑁆𑀲𑀦𑀸 𑀥𑀫𑁆𑀫𑀸’’𑀢𑀺, 𑀦 𑀲𑀁𑀲𑀝𑁆𑀞𑀲𑀳𑀕𑀢𑀁, 𑀦𑀸𑀧𑀺 𑀆𑀭𑀫𑁆𑀫𑀡𑀲𑀳𑀕𑀢𑀁. ‘‘𑀢𑀢𑁆𑀭 𑀢𑀢𑁆𑀭𑀸’’𑀢𑀺 𑀬𑀁 𑀬𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁, 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 𑀯𑀸 𑀧𑀢𑁆𑀯𑀸 𑀢𑀢𑁆𑀭𑀢𑀢𑁆𑀭𑀸𑀪𑀺𑀦𑀦𑁆𑀤𑀺𑀦𑀻. 𑀢𑁂𑀦𑀸𑀳 ‘‘𑀉𑀧𑀧𑀢𑁆𑀢𑀺𑀝𑁆𑀞𑀸𑀦𑁂 𑀯𑀸’’𑀢𑀺𑀆𑀤𑀺. 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀸𑀭𑀫𑁆𑀫𑀡𑁄. 𑀭𑀽𑀧𑀸𑀭𑀽𑀧𑀽𑀧𑀧𑀢𑁆𑀢𑀺𑀪𑀯𑁂 𑀭𑀸𑀕𑁄 𑀭𑀽𑀧𑀸𑀭𑀽𑀧𑀪𑀯𑀭𑀸𑀕𑁄. 𑀛𑀸𑀦𑀦𑀺𑀓𑀦𑁆𑀢𑀺 𑀛𑀸𑀦𑀲𑀗𑁆𑀔𑀸𑀢𑁂 𑀓𑀫𑁆𑀫𑀪𑀯𑁂 𑀭𑀸𑀕𑁄. 𑀲𑀲𑁆𑀲𑀢𑀸𑀤𑀺𑀝𑁆𑀞𑀻𑀢𑀺 𑀪𑀯𑀤𑀺𑀝𑁆𑀞𑀺, 𑀢𑀁𑀲𑀳𑀕𑀢𑁄 𑀭𑀸𑀕𑁄. 𑀅𑀬𑀦𑁆𑀢𑀺 𑀭𑀸𑀕𑁄 𑀪𑀯𑀢𑀡𑁆𑀳𑀸 𑀦𑀸𑀫. 𑀉𑀘𑁆𑀙𑁂𑀤𑀤𑀺𑀝𑁆𑀞𑀺 𑀯𑀺𑀪𑀯𑀤𑀺𑀝𑁆𑀞𑀺 𑀦𑀸𑀫, 𑀢𑀁𑀲𑀳𑀕𑀢𑁄 𑀙𑀦𑁆𑀤𑀭𑀸𑀕𑁄 𑀯𑀺𑀪𑀯𑀢𑀡𑁆𑀳𑀸 𑀦𑀸𑀫. 𑀏𑀲 𑀧𑀼𑀕𑁆𑀕𑀮𑁄 𑀔𑀦𑁆𑀥𑀪𑀸𑀭𑀁 𑀆𑀤𑀺𑀬𑀢𑀺 𑀢𑀡𑁆𑀳𑀸𑀯𑀲𑁂𑀦 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄. ‘‘𑀅𑀲𑁂𑀲𑀫𑁂𑀢𑁆𑀣 𑀢𑀡𑁆𑀳𑀸 𑀯𑀺𑀭𑀚𑁆𑀚𑀢𑀺 𑀧𑀮𑀼𑀚𑁆𑀚𑀢𑀺 𑀦𑀺𑀭𑀼𑀚𑁆𑀛𑀢𑀺 𑀧𑀳𑀻𑀬𑀢𑀻’’𑀢𑀺𑀆𑀤𑀺𑀦𑀸 𑀲𑀩𑁆𑀩𑀧𑀤𑀸𑀦𑀺 𑀦𑀺𑀩𑁆𑀩𑀸𑀦𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀆𑀳 ‘‘𑀲𑀩𑁆𑀩𑀁 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀯𑁂𑀯𑀘𑀦’’𑀦𑁆𑀢𑀺.

𑀪𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀭𑀺𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩. 𑀧𑀭𑀺𑀚𑀸𑀦𑀺𑀢𑀩𑁆𑀩𑁂𑀢𑀺 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀧𑀭𑀺𑀚𑀸𑀦𑀺𑀢𑀩𑁆𑀩𑁂. 𑀢𑀣𑀸 𑀧𑀭𑀺𑀚𑀸𑀦𑀦𑀜𑁆𑀘 𑀢𑀢𑁆𑀣 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁, 𑀢𑁂𑀲𑀁 𑀅𑀢𑀺𑀓𑁆𑀓𑀫𑁄𑀢𑀺 𑀆𑀳 ‘‘𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩𑁂𑀢𑀺 𑀅𑀢𑁆𑀣𑁄’’𑀢𑀺. 𑀅𑀘𑁆𑀘𑀦𑁆𑀢𑀧𑀭𑀺𑀜𑁆𑀜𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀯𑀤𑀢𑀺. 𑀢𑁂𑀦𑀸𑀳 ‘‘𑀲𑀫𑀢𑀺𑀓𑁆𑀓𑀫𑀦𑁆𑀢𑀺 𑀅𑀢𑁆𑀣𑁄’’𑀢𑀺.

𑀧𑀭𑀺𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀪𑀺𑀚𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪. 𑀜𑀸𑀢𑀧𑀭𑀺𑀜𑁆𑀜𑀸 ¶ 𑀓𑀣𑀺𑀢𑀸 ‘‘𑀅𑀪𑀺𑀯𑀺𑀲𑀺𑀝𑁆𑀞𑀸𑀬 𑀧𑀜𑁆𑀜𑀸𑀬 𑀚𑀸𑀦𑀦’’𑀦𑁆𑀢𑀺 𑀓𑀢𑁆𑀯𑀸. 𑀤𑀼𑀢𑀺𑀬𑀧𑀤𑁂𑀦𑀸𑀢𑀺 ‘‘𑀧𑀭𑀺𑀚𑀸𑀦’’𑀦𑁆𑀢𑀺 𑀧𑀤𑁂𑀦. 𑀢𑀢𑀺𑀬𑀘𑀢𑀼𑀢𑁆𑀣𑁂𑀳𑀻𑀢𑀺 ‘‘𑀯𑀺𑀭𑀸𑀚𑀬𑀁 𑀧𑀚𑀳’’𑀦𑁆𑀢𑀺 𑀧𑀤𑁂𑀳𑀺.

𑀅𑀪𑀺𑀚𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪-𑁯. 𑀙𑀦𑁆𑀤𑀭𑀸𑀕𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁫-𑁩𑁦. 𑀥𑀸𑀢𑀼𑀲𑀁𑀬𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺, 𑀓𑁂𑀯𑀮𑀜𑁆𑀳𑀺 𑀏𑀢𑁆𑀣 𑀔𑀦𑁆𑀥𑀯𑀲𑁂𑀦 𑀤𑁂𑀲𑀦𑀸 𑀆𑀕𑀢𑀸, 𑀢𑀢𑁆𑀣 𑀥𑀸𑀢𑀼𑀯𑀲𑁂𑀦𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀓𑀣𑀺𑀢𑀸𑀦𑀺 𑀅𑀲𑁆𑀲𑀸𑀤𑀸𑀤𑀻𑀦𑀯𑀦𑀺𑀲𑁆𑀲𑀭𑀡𑀯𑀲𑁂𑀦 𑀤𑁂𑀲𑀦𑀸𑀬 𑀧𑀯𑀢𑁆𑀢𑀢𑁆𑀢𑀸.

𑀙𑀦𑁆𑀤𑀭𑀸𑀕𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀅𑀖𑀫𑀽𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀅𑀖𑀁 ¶ 𑀯𑀼𑀘𑁆𑀘𑀢𑀺 𑀧𑀸𑀧𑀁, 𑀅𑀖𑀦𑀺𑀫𑀺𑀢𑁆𑀢𑀢𑀸𑀬 𑀅𑀖𑀁 𑀤𑀼𑀓𑁆𑀔𑀁. 𑀇𑀤𑀜𑁆𑀳𑀺 𑀤𑀼𑀓𑁆𑀔𑀁 𑀦𑀸𑀫 𑀯𑀺𑀲𑁂𑀲𑀢𑁄 𑀧𑀸𑀧𑀳𑁂𑀢𑀼𑀓𑀁 𑀓𑀫𑁆𑀫𑀨𑀮𑀲𑀜𑁆𑀜𑀺𑀢𑀁. 𑀢𑀣𑀸 𑀯𑀝𑁆𑀝𑀤𑀼𑀓𑁆𑀔𑀁 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀫𑀽𑀮𑀓𑀢𑁆𑀢𑀸. 𑀅𑀖𑀲𑁆𑀲 𑀦𑀺𑀫𑀺𑀢𑁆𑀢𑀢𑀸𑀬 𑀅𑀖𑀁 𑀤𑀼𑀓𑁆𑀔𑀁. 𑀯𑀝𑁆𑀝𑀸𑀦𑀼𑀲𑀸𑀭𑀻 𑀫𑀳𑀸𑀚𑀦𑁄 𑀳𑀺 𑀤𑀼𑀓𑁆𑀔𑀸𑀪𑀺𑀪𑀽𑀢𑁄 𑀢𑀲𑁆𑀲 𑀧𑀢𑀺𑀓𑀸𑀭𑀁 𑀫𑀜𑁆𑀜𑀫𑀸𑀦𑁄 𑀢𑀁 𑀢𑀁 𑀓𑀭𑁄𑀢𑀻𑀢𑀺.

𑀅𑀖𑀫𑀽𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀧𑀪𑀗𑁆𑀕𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨. 𑀧𑀪𑀺𑀚𑁆𑀚𑀦𑀲𑀪𑀸𑀯𑀦𑁆𑀢𑀺 𑀔𑀡𑁂 𑀔𑀡𑁂 𑀧𑀪𑀗𑁆𑀕𑀼𑀲𑀪𑀸𑀯𑀁.

𑀧𑀪𑀗𑁆𑀕𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀸𑀭𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀦𑀢𑀼𑀫𑁆𑀳𑀸𑀓𑀁𑀯𑀕𑁆𑀕𑁄

𑁧. 𑀦𑀢𑀼𑀫𑁆𑀳𑀸𑀓𑀁𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁩. 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦𑀸𑀢𑀺 ¶ 𑀢𑀧𑁆𑀧𑀝𑀺𑀩𑀤𑁆𑀥𑀲𑁆𑀲 𑀙𑀦𑁆𑀤𑀭𑀸𑀕𑀲𑁆𑀲 𑀧𑀚𑀳𑀦𑁂𑀦. 𑀤𑀩𑁆𑀩𑀸𑀤𑀺 𑀧𑀸𑀓𑀢𑀺𑀓𑀢𑀺𑀡𑀁 𑀧𑀸𑀓𑀝𑀫𑁂𑀯𑀸𑀢𑀺 𑀅𑀧𑀸𑀓𑀝𑀁 𑀤𑀲𑁆𑀲𑁂𑀢𑀼𑀁 𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀺 𑀤𑀲𑁆𑀲𑀺𑀢𑀁, 𑀢𑀺𑀡𑀓𑀝𑁆𑀞𑀸𑀦𑀁 𑀯𑀸 𑀪𑁂𑀤𑀤𑀲𑁆𑀲𑀦𑀢𑁆𑀣𑀁. 𑀧𑀺𑀬𑀸𑀮𑁄 𑀨𑀸𑀭𑀼𑀲𑀓𑀁.

𑀦𑀢𑀼𑀫𑁆𑀳𑀸𑀓𑀁𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀜𑁆𑀜𑀢𑀭𑀪𑀺𑀓𑁆𑀔𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫. 𑀬𑀤𑀺 𑀭𑀽𑀧𑀁 𑀅𑀦𑀼𑀲𑁂𑀢𑀻𑀢𑀺 𑀭𑀽𑀧𑀥𑀫𑁆𑀫𑁂 𑀆𑀭𑀩𑁆𑀪 𑀬𑀤𑀺 𑀭𑀸𑀕𑀸𑀤𑀬𑁄 𑀅𑀦𑀼𑀲𑀬𑀦𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀺. 𑀢𑁂𑀦 𑀲𑀗𑁆𑀔𑀁 𑀕𑀘𑁆𑀙𑀢𑀻𑀢𑀺 𑀢𑁂𑀦 𑀭𑀸𑀕𑀸𑀤𑀺𑀦𑀸 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀲𑀗𑁆𑀔𑀸𑀢𑀩𑁆𑀩𑀢𑀁 ‘‘𑀭𑀢𑁆𑀢𑁄 𑀤𑀼𑀝𑁆𑀞𑁄’’𑀢𑀺𑀆𑀤𑀺𑀦𑀸 𑀯𑁄𑀳𑀭𑀺𑀢𑀩𑁆𑀩𑀢𑀁 𑀉𑀧𑀕𑀘𑁆𑀙𑀢𑀻𑀢𑀺. 𑀢𑁂𑀦𑀸𑀳 ‘‘𑀓𑀸𑀫𑀭𑀸𑀕𑀸𑀤𑀻𑀲𑀽’’𑀢𑀺𑀆𑀤𑀺. 𑀅𑀪𑀽𑀢𑁂𑀦𑀸𑀢𑀺 𑀅𑀚𑀸𑀢𑁂𑀦 ¶ 𑀅𑀦𑀼𑀲𑀬𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑁂𑀦. 𑀅𑀦𑀼𑀲𑀬𑀲𑀻𑀲𑁂𑀦 𑀳𑁂𑀢𑁆𑀣 𑀅𑀪𑀺𑀪𑀯𑀁 𑀯𑀤𑀢𑀺. 𑀬𑀢𑁄 ‘‘𑀭𑀢𑁆𑀢𑁄 𑀤𑀼𑀝𑁆𑀞𑁄 𑀫𑀽𑀴𑁆𑀳𑁄𑀢𑀺 𑀲𑀗𑁆𑀔𑀁 𑀦 𑀕𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀁. 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀳𑀺 𑀫𑀕𑁆𑀕𑀯𑀚𑁆𑀛𑀓𑀺𑀮𑁂𑀲𑀸 𑀅𑀦𑀼𑀲𑀬𑁄.

𑀅𑀜𑁆𑀜𑀢𑀭𑀪𑀺𑀓𑁆𑀔𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀤𑀼𑀢𑀺𑀬𑀅𑀜𑁆𑀜𑀢𑀭𑀪𑀺𑀓𑁆𑀔𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬. 𑀢𑀁 𑀅𑀦𑀼𑀲𑀬𑀺𑀢𑀁 𑀭𑀽𑀧𑀦𑁆𑀢𑀺 𑀢𑀁 𑀭𑀸𑀕𑀸𑀤𑀺𑀦𑀸 𑀅𑀦𑀼𑀲𑀬𑀺𑀢𑀁 𑀭𑀽𑀧𑀁 𑀫𑀭𑀦𑁆𑀢𑁂𑀦 𑀅𑀦𑀼𑀲𑀬𑁂𑀦 𑀅𑀦𑀼𑀫𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦 𑀳𑀻’’𑀢𑀺𑀆𑀤𑀺. 𑀬𑁂𑀦 𑀅𑀦𑀼𑀲𑀬𑁂𑀦 𑀫𑀭𑀦𑁆𑀢𑁂𑀦 𑀢𑀁 𑀅𑀦𑀼𑀫𑀭𑀢𑀺. 𑀢𑁂𑀦 𑀲𑀗𑁆𑀔𑀁 𑀕𑀘𑁆𑀙𑀢𑀻𑀢𑀺 𑀢𑀣𑀸𑀪𑀽𑀢𑀢𑁄 𑀢𑁂𑀦 ‘‘𑀭𑀢𑁆𑀢𑁄’’𑀢𑀺𑀆𑀤𑀺𑀯𑁄𑀳𑀸𑀭𑀁 𑀮𑀪𑀢𑀺. 𑀬𑁂𑀦 𑀅𑀦𑀼𑀲𑀬𑁂𑀦 𑀓𑀸𑀭𑀡𑀪𑀽𑀢𑁂𑀦 𑀅𑀦𑀼𑀫𑀻𑀬𑀢𑀺, 𑀢𑁂𑀦.

𑀤𑀼𑀢𑀺𑀬𑀅𑀜𑁆𑀜𑀢𑀭𑀪𑀺𑀓𑁆𑀔𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁬. 𑀆𑀦𑀦𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁭-𑁩𑁮. 𑀞𑀺𑀢𑀺𑀬𑀸 ¶ 𑀞𑀺𑀢𑀺𑀓𑁆𑀔𑀡𑁂𑀦 𑀲𑀳𑀺𑀢𑀁 𑀞𑀺𑀢𑀁. 𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀉𑀧𑁆𑀧𑀸𑀤𑀓𑁆𑀔𑀡𑀢𑁄 𑀅𑀜𑁆𑀜𑀣𑀸𑀪𑀸𑀯𑁄. 𑀧𑀜𑁆𑀜𑀸𑀬𑀢𑀻𑀢𑀺 𑀉𑀧𑀮𑀩𑁆𑀪𑀢𑀺. 𑀧𑀘𑁆𑀘𑀬𑀯𑀲𑁂𑀦 𑀥𑀭𑀫𑀸𑀦𑀢𑁆𑀢𑀸 𑀏𑀯 𑀚𑀻𑀯𑀫𑀸𑀦𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀚𑀭𑀸 𑀧𑀜𑁆𑀜𑀸𑀬𑀢𑀺 𑀉𑀧𑁆𑀧𑀸𑀤𑀓𑁆𑀔𑀡𑀢𑁄 𑀅𑀜𑁆𑀜𑀣𑀢𑁆𑀢𑀧𑁆𑀧𑀢𑁆𑀢𑀺𑀬𑀸. 𑀯𑀼𑀢𑁆𑀢𑀫𑁂𑀯 𑀅𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀞𑀺𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀚𑀻𑀯𑀺…𑀧𑁂… 𑀦𑀸𑀫𑀁. 𑀢𑀣𑀸 𑀳𑀺 𑀅𑀪𑀺𑀥𑀫𑁆𑀫𑁂 (𑀥. 𑀲. 𑁧𑁯) ‘‘𑀆𑀬𑀼 𑀞𑀺𑀢𑀻’’𑀢𑀺 𑀦𑀺𑀤𑁆𑀤𑀺𑀝𑁆𑀞𑀁. 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀚𑀭𑀸𑀬 𑀦𑀸𑀫𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀳𑁄𑀦𑁆𑀢𑀺 𑀲𑀗𑁆𑀔𑀢𑀲𑀪𑀸𑀯𑀮𑀓𑁆𑀔𑀡𑀢𑁄. 𑀬𑁄 𑀓𑁄𑀘𑀺 𑀭𑀽𑀧𑀥𑀫𑁆𑀫𑁄 𑀯𑀸 𑀅𑀭𑀽𑀧𑀥𑀫𑁆𑀫𑁄 𑀯𑀸 𑀮𑁄𑀓𑀺𑀬𑁄 𑀯𑀸 𑀮𑁄𑀓𑀼𑀢𑁆𑀢𑀭𑁄 𑀯𑀸 𑀲𑀗𑁆𑀔𑀸𑀭𑁄. 𑀲𑀗𑁆𑀔𑀸𑀭𑁄, 𑀦 𑀮𑀓𑁆𑀔𑀡𑀁 𑀉𑀧𑁆𑀧𑀸𑀤𑀸𑀤𑀺𑀲𑀪𑀸𑀯𑀢𑁆𑀢𑀸. 𑀮𑀓𑁆𑀔𑀡𑀁, 𑀦 𑀲𑀗𑁆𑀔𑀸𑀭𑁄 𑀉𑀧𑁆𑀧𑀸𑀤𑀸𑀤𑀺𑀭𑀳𑀺𑀢𑀢𑁆𑀢𑀸. 𑀦 𑀘…𑀧𑁂… 𑀲𑀓𑁆𑀓𑀸 𑀲𑀗𑁆𑀔𑀸𑀭𑀥𑀫𑁆𑀫𑀢𑁆𑀢𑀸 𑀮𑀓𑁆𑀔𑀡𑀲𑁆𑀲. 𑀦𑀸𑀧𑀺 𑀮𑀓𑁆𑀔𑀡𑀁 𑀯𑀺𑀦𑀸 𑀲𑀗𑁆𑀔𑀸𑀭𑁄 𑀧𑀜𑁆𑀜𑀸𑀧𑁂𑀢𑀼𑀁 𑀲𑀓𑁆𑀓𑀸 𑀲𑀗𑁆𑀔𑀸𑀭𑀪𑀸𑀯𑁂𑀦. 𑀢𑁂𑀦𑀸𑀳 ‘‘𑀮𑀓𑁆𑀔𑀡𑁂𑀦𑀸’’𑀢𑀺𑀆𑀤𑀺. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀮𑀓𑁆𑀔𑀡𑀦𑁆𑀢𑀺 𑀓𑀸𑀴𑀭𑀢𑁆𑀢𑀲𑀩𑀮𑀸𑀤𑀺𑀪𑀸𑀯𑀮𑀓𑁆𑀔𑀡𑀁 𑀧𑀸𑀓𑀝𑀁 𑀳𑁄𑀢𑀺 ‘‘𑀅𑀬𑀁 𑀅𑀲𑀼𑀓𑀲𑁆𑀲 𑀕𑀸𑀯𑀻’’𑀢𑀺.

𑀏𑀯𑀁 𑀲𑀗𑁆𑀔𑀸𑀭𑁄𑀧𑀺 𑀧𑀜𑁆𑀜𑀸𑀬𑀢𑀺 𑀲𑀪𑀸𑀯𑀢𑁄 𑀉𑀧𑀥𑀸𑀭𑁂𑀦𑁆𑀢𑀲𑁆𑀲 𑀉𑀧𑁆𑀧𑀸𑀤𑀮𑀓𑁆𑀔𑀡𑀫𑁆𑀧𑀺 𑀉𑀧𑁆𑀧𑀸𑀤𑀸𑀯𑀢𑁆𑀣𑀸𑀢𑀺 𑀓𑀢𑁆𑀯𑀸. 𑀓𑀸𑀮𑀲𑀗𑁆𑀔𑀸𑀢𑁄𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀓𑀸𑀮𑀲𑀗𑁆𑀔𑀸𑀢𑁄. 𑀢𑀲𑁆𑀲 𑀲𑀗𑁆𑀔𑀸𑀭𑀲𑁆𑀲. 𑀔𑀡𑁄𑀧𑀻𑀢𑀺 𑀉𑀧𑁆𑀧𑀸𑀤𑀓𑁆𑀔𑀡𑁄𑀧𑀺 𑀧𑀜𑁆𑀜𑀸𑀬𑀢𑀺. 𑀉𑀧𑁆𑀧𑀸𑀤𑁄𑀧𑀻𑀢𑀺 𑀉𑀧𑁆𑀧𑀸𑀤𑀮𑀓𑁆𑀔𑀡𑁄𑀧𑀺. 𑀚𑀭𑀸𑀮𑀓𑁆𑀔𑀡𑀦𑁆𑀢𑀺 𑀉𑀧𑁆𑀧𑀦𑁆𑀦𑀚𑀻𑀭𑀡𑀮𑀓𑁆𑀔𑀡𑀁, 𑀢𑀁 ‘‘𑀞𑀺𑀢𑀲𑁆𑀲 ¶ 𑀅𑀜𑁆𑀜𑀣𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀪𑀗𑁆𑀕𑀓𑁆𑀔𑀡𑁂 𑀲𑀗𑁆𑀔𑀸𑀭𑁄𑀧𑀺 𑀢𑀁𑀮𑀓𑁆𑀔𑀡𑀫𑁆𑀧𑀺 𑀓𑀸𑀮𑀲𑀗𑁆𑀔𑀸𑀢𑁄 𑀢𑀲𑁆𑀲 𑀔𑀡𑁄𑀧𑀺 𑀧𑀜𑁆𑀜𑀸𑀬𑀢𑀻’’𑀢𑀺 𑀧𑀸𑀞𑁄. 𑀓𑁂𑀘𑀺 𑀧𑀦 ‘‘𑀚𑀭𑀸𑀧𑀻’’𑀢𑀺 𑀧𑀤𑀫𑁆𑀧𑁂𑀢𑁆𑀣 𑀧𑀓𑁆𑀔𑀺𑀧𑀦𑁆𑀢𑀺. 𑀏𑀯𑀜𑁆𑀘 𑀯𑀤𑀦𑁆𑀢𑀺 ‘‘𑀦 𑀳𑀺 𑀢𑀲𑁆𑀫𑀺𑀁 𑀔𑀡𑁂 𑀢𑀭𑀼𑀡𑁄 𑀳𑀼𑀢𑁆𑀯𑀸 𑀲𑀗𑁆𑀔𑀸𑀭𑁄 𑀪𑀺𑀚𑁆𑀚𑀢𑀺, 𑀅𑀣 𑀔𑁄 𑀚𑀺𑀬𑁆𑀬𑀫𑀸𑀦𑁄 𑀫𑀳𑀮𑁆𑀮𑀓𑁄 𑀯𑀺𑀬 𑀚𑀺𑀡𑁆𑀡𑁄 𑀏𑀯 𑀳𑀼𑀢𑁆𑀯𑀸 𑀪𑀺𑀚𑁆𑀚𑀢𑀻’’𑀢𑀺, 𑀪𑀗𑁆𑀕𑁂𑀦𑁂𑀯 𑀧𑀦 𑀚𑀭𑀸 𑀅𑀪𑀺𑀪𑀼𑀬𑁆𑀬𑀢𑀺 𑀔𑀡𑀲𑁆𑀲 𑀅𑀢𑀺𑀇𑀢𑁆𑀢𑀭𑀪𑀸𑀯𑀢𑁄 𑀦 𑀲𑀓𑁆𑀓𑀸 𑀧𑀜𑁆𑀜𑀸𑀧𑁂𑀢𑀼𑀁 𑀞𑀺𑀢𑀺𑀬𑀸𑀢𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄. 𑀢𑀸𑀦𑀻𑀢𑀺 𑀅𑀭𑀽𑀧𑀥𑀫𑁆𑀫𑀸𑀦𑀁 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺. 𑀅𑀢𑁆𑀣𑀺𑀓𑁆𑀔𑀡𑀦𑁆𑀢𑀺 𑀅𑀭𑀽𑀧𑀥𑀫𑁆𑀫𑀯𑀺𑀚𑁆𑀚𑀫𑀸𑀦𑀓𑁆𑀔𑀡𑀁, 𑀉𑀧𑁆𑀧𑀸𑀤𑀓𑁆𑀔𑀡𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀩𑁆𑀩𑀥𑀫𑁆𑀫𑀸𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀞𑀺𑀢𑀺𑀬𑀸 𑀦 𑀪𑀯𑀺𑀢𑀩𑁆𑀩𑀁. 𑀢𑀲𑁆𑀲𑁂𑀯𑀸𑀢𑀺 𑀢𑀲𑁆𑀲𑀸 𑀏𑀯 𑀞𑀺𑀢𑀺𑀬𑀸. 𑀢𑀫𑀢𑁆𑀣𑀦𑁆𑀢𑀺 𑀚𑀭𑀸𑀮𑀓𑁆𑀔𑀡𑀲𑁆𑀲 𑀧𑀜𑁆𑀜𑀸𑀧𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑀁. 𑀅𑀜𑁆𑀜𑁂 𑀧𑀦 ‘‘𑀲𑀦𑁆𑀢𑀢𑀺𑀯𑀲𑁂𑀦 𑀞𑀸𑀦𑀁 𑀞𑀺𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀬𑀺𑀤𑀁 ¶ 𑀅𑀓𑀸𑀭𑀡𑀁 𑀅𑀝𑁆𑀞𑀸𑀦𑀁. 𑀬𑀲𑁆𑀫𑀸 𑀲𑀼𑀢𑁆𑀢𑁂 ‘‘𑀞𑀺𑀢𑀲𑁆𑀲 𑀅𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀻’’𑀢𑀺 𑀉𑀧𑁆𑀧𑀸𑀤𑀯𑀬𑁂𑀳𑀺 𑀦𑀺𑀩𑁆𑀩𑀺𑀲𑁂𑀲𑁂𑀦 𑀞𑀺𑀢𑀺𑀬𑀸 𑀚𑁄𑀢𑀺𑀢𑀢𑁆𑀢𑀸. 𑀬𑀁 𑀧𑀦𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀅𑀧𑀺𑀘 𑀬𑀣𑀸 𑀥𑀫𑁆𑀫𑀲𑁆𑀲 𑀉𑀧𑁆𑀧𑀸𑀤𑀸𑀯𑀢𑁆𑀣𑀸𑀬 𑀪𑀺𑀦𑁆𑀦𑀸 𑀪𑀗𑁆𑀕𑀸𑀯𑀢𑁆𑀣𑀸 𑀇𑀘𑁆𑀙𑀺𑀢𑀸, 𑀅𑀜𑁆𑀜𑀣𑀸 𑀉𑀧𑁆𑀧𑀚𑁆𑀚𑀫𑀸𑀦𑀫𑁂𑀯 𑀪𑀺𑀚𑁆𑀚𑀢𑀻𑀢𑀺 𑀆𑀧𑀚𑁆𑀚𑀢𑀺, 𑀏𑀯𑀁 𑀪𑀗𑁆𑀕𑀸𑀯𑀢𑁆𑀣𑀸𑀬𑀧𑀺 𑀪𑀺𑀦𑁆𑀦𑀸 𑀪𑀗𑁆𑀕𑀸𑀪𑀺𑀫𑀼𑀔𑀸𑀯𑀢𑁆𑀣𑀸 𑀇𑀘𑁆𑀙𑀺𑀢𑀩𑁆𑀩𑀸. 𑀦 𑀳𑀺 𑀅𑀪𑀗𑁆𑀕𑀸𑀪𑀺𑀫𑀼𑀔𑁄 𑀪𑀺𑀚𑁆𑀚𑀢𑀺. 𑀦 𑀘𑁂𑀢𑁆𑀣 𑀲𑀓𑁆𑀓𑀸 𑀉𑀧𑁆𑀧𑀸𑀤𑀸𑀪𑀺𑀫𑀼𑀔𑀸𑀯𑀢𑁆𑀣𑀁 𑀧𑀭𑀺𑀓𑀧𑁆𑀧𑁂𑀢𑀼𑀁 𑀢𑀤𑀸 𑀢𑀲𑁆𑀲 𑀅𑀮𑀤𑁆𑀥𑀢𑁆𑀢𑀮𑀸𑀪𑀢𑁆𑀢𑀸. 𑀅𑀬𑀁 𑀯𑀺𑀲𑁂𑀲𑁄𑀢𑀺 𑀞𑀺𑀢𑀺𑀓𑁆𑀔𑀡𑁄 𑀦𑀸𑀫 𑀭𑀽𑀧𑀥𑀫𑁆𑀫𑀸𑀦𑀁𑀬𑁂𑀯, 𑀦 𑀅𑀭𑀽𑀧𑀥𑀫𑁆𑀫𑀸𑀦𑀦𑁆𑀢𑀺 𑀅𑀬𑀁 𑀈𑀤𑀺𑀲𑁄 𑀯𑀺𑀲𑁂𑀲𑁄. 𑀆𑀘𑀭𑀺𑀬𑀫𑀢𑀺 𑀦𑀸𑀫 𑀢𑀲𑁆𑀲𑁂𑀯 𑀆𑀘𑀭𑀺𑀬𑀲𑁆𑀲 𑀫𑀢𑀺, 𑀲𑀸 𑀲𑀩𑁆𑀩𑀤𑀼𑀩𑁆𑀩𑀮𑀸𑀢𑀺 𑀆𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺.

𑀆𑀦𑀦𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁧𑁦. 𑀅𑀦𑀼𑀥𑀫𑁆𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁯-𑁪𑁨. 𑀅𑀧𑀸𑀬𑀤𑀼𑀓𑁆𑀔𑁂 𑀲𑀓𑀮𑀲𑀁𑀲𑀸𑀭𑀤𑀼𑀓𑁆𑀔𑁂 𑀘 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀥𑀸𑀭𑀡𑀝𑁆𑀞𑁂𑀦 𑀥𑀫𑁆𑀫𑁄, 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀺. 𑀢𑀤𑀦𑀼𑀮𑁄𑀫𑀺𑀓𑀸 𑀘𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀢𑀺 𑀆𑀳 ‘‘𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑀝𑀺𑀧𑀦𑁆𑀦𑀲𑁆𑀲𑀸’’𑀢𑀺𑀆𑀤𑀺. ‘‘𑀦𑀺𑀩𑁆𑀩𑀺𑀤𑀸𑀩𑀳𑀼𑀮𑁄’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀧𑀤𑀼𑀤𑁆𑀥𑀸𑀭𑁄 𑀓𑀢𑁄, 𑀧𑀸𑀴𑀺𑀬𑀁 𑀧𑀦 ‘‘𑀦𑀺𑀩𑁆𑀩𑀺𑀤𑀸𑀩𑀳𑀼𑀮𑀁 𑀯𑀺𑀳𑀭𑁂𑀬𑁆𑀬𑀸’’𑀢𑀺 𑀆𑀕𑀢𑀁. 𑀉𑀓𑁆𑀓𑀡𑁆𑀞𑀦𑀩𑀳𑀼𑀮𑁄𑀢𑀺 𑀲𑀩𑁆𑀩𑀪𑀯𑁂𑀲𑀼 𑀉𑀓𑁆𑀓𑀡𑁆𑀞𑀦𑀩𑀳𑀼𑀮𑁄. 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀻𑀢𑀺 𑀜𑀸𑀢𑀢𑀻𑀭𑀡𑀧𑁆𑀧𑀳𑀸𑀦𑀧𑀭𑀺𑀜𑁆𑀜𑀸𑀳𑀺. 𑀧𑀭𑀺𑀚𑀸𑀦𑀸𑀢𑀻𑀢𑀺 𑀢𑁂𑀪𑀽𑀫𑀓𑀥𑀫𑁆𑀫𑁂 𑀧𑀭𑀺𑀘𑁆𑀙𑀺𑀚𑁆𑀚 𑀚𑀸𑀦𑀸𑀢𑀺, 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑀺. 𑀧𑀭𑀺𑀫𑀼𑀘𑁆𑀘𑀢𑀺 𑀲𑀩𑁆𑀩𑀲𑀁𑀓𑀺𑀮𑁂𑀲𑀢𑁄 ‘‘𑀫𑀕𑁆𑀕𑁄 𑀧𑀯𑀢𑁆𑀢𑀺𑀢𑁄 𑀧𑀭𑀺𑀫𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀢𑀣𑀸𑀢𑀺 𑀇𑀫𑀺𑀦𑀸 𑀇𑀢𑁄 𑀧𑀭𑁂𑀲𑀼 𑀢𑀻𑀲𑀼 𑀫𑀕𑁆𑀕𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂. 𑀅𑀦𑀺𑀬𑀫𑀺𑀢𑀸𑀢𑀺 𑀅𑀕𑁆𑀕𑀳𑀺𑀢𑀸. 𑀢𑁂𑀲𑀼 𑀦𑀺𑀬𑀫𑀺𑀢𑀸 ‘‘𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻’’𑀢𑀺𑀆𑀤𑀺𑀯𑀘𑀦𑀢𑁄. 𑀲𑀸𑀢𑀺 𑀅𑀦𑀼𑀧𑀲𑁆𑀲𑀦𑀸. 𑀢𑀢𑁆𑀣 𑀦𑀺𑀬𑀫𑀺𑀢𑀯𑀲𑁂𑀦𑁂𑀯𑀸𑀢𑀺 𑀇𑀤𑀁 𑀮𑀓𑁆𑀔𑀡𑀯𑀘𑀦𑀁 𑀬𑀣𑀸 ‘‘𑀬𑀤𑀺 𑀫𑁂 𑀩𑁆𑀬𑀸𑀥𑀬𑁄 𑀪𑀯𑁂𑀬𑁆𑀬𑀼𑀁 ¶ , 𑀤𑀸𑀢𑀩𑁆𑀩𑀫𑀺𑀤𑀫𑁄𑀲𑀥’’𑀦𑁆𑀢𑀺. 𑀦 𑀳𑀺 𑀲𑀓𑁆𑀓𑀸 𑀏𑀢𑀺𑀲𑁆𑀲𑀸 𑀏𑀯 𑀅𑀦𑀼𑀧𑀲𑁆𑀲𑀦𑀸𑀬 𑀯𑀲𑁂𑀦 𑀲𑀫𑁆𑀫𑀲𑀦𑀸𑀘𑀸𑀭𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑀼𑀦𑁆𑀢𑀺.

𑀅𑀦𑀼𑀥𑀫𑁆𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀢𑀼𑀫𑁆𑀳𑀸𑀓𑀁𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀅𑀢𑁆𑀢𑀤𑀻𑀧𑀯𑀕𑁆𑀕𑁄

𑁧. 𑀅𑀢𑁆𑀢𑀤𑀻𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁩. 𑀤𑁆𑀯𑀻𑀳𑀺 ¶ 𑀪𑀸𑀕𑁂𑀳𑀺 𑀆𑀧𑁄 𑀏𑀢𑁆𑀣 𑀕𑀢𑀸𑀢𑀺 𑀤𑀻𑀧𑁄, 𑀤𑀻𑀧𑁄 𑀯𑀺𑀬𑀸𑀢𑀺 𑀤𑀻𑀧𑁄 𑀑𑀖𑁂𑀳𑀺 𑀅𑀦𑀚𑁆𑀛𑁄𑀢𑁆𑀣𑀭𑀦𑀻𑀬𑀢𑀸𑀬. 𑀬𑁄 𑀧𑀭𑁄 𑀦 𑀳𑁄𑀢𑀺, 𑀲𑁄 𑀅𑀢𑁆𑀢𑀸, 𑀇𑀥 𑀧𑀦 𑀥𑀫𑁆𑀫𑁄 𑀅𑀥𑀺𑀧𑁆𑀧𑁂𑀢𑁄. 𑀅𑀢𑁆𑀢𑀸 𑀤𑀻𑀧𑁄 𑀏𑀢𑁂𑀲𑀦𑁆𑀢𑀺 𑀅𑀢𑁆𑀢𑀤𑀻𑀧𑀸. 𑀧𑀝𑀺𑀲𑀭𑀡𑀢𑁆𑀣𑁄 𑀤𑀻𑀧𑀝𑁆𑀞𑁄𑀢𑀺 𑀆𑀳 𑁋 ‘‘𑀅𑀢𑁆𑀢𑀲𑀭𑀡𑀸𑀢𑀺 𑀇𑀤𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦’’𑀦𑁆𑀢𑀺. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁄 𑀥𑀫𑁆𑀫𑁄 𑀅𑀢𑁆𑀢𑀸 𑀦𑀸𑀫 𑀏𑀓𑀦𑁆𑀢𑀦𑀸𑀣𑀪𑀸𑀯𑀢𑁄. 𑀧𑀞𑀫𑁂𑀦 𑀧𑀤𑁂𑀦 𑀯𑀼𑀢𑁆𑀢𑁄 𑀏𑀯 𑀅𑀢𑁆𑀣𑁄 𑀤𑀼𑀢𑀺𑀬𑀧𑀤𑁂𑀦 𑀯𑀼𑀘𑁆𑀘𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑁂𑀦𑁂𑀯𑀸𑀳𑀸’’𑀢𑀺𑀆𑀤𑀺. 𑀬𑀯𑀢𑀺 𑀏𑀢𑀲𑁆𑀫𑀸 𑀨𑀮𑀁 𑀧𑀲𑀯𑀢𑀻𑀢𑀺 𑀬𑁄𑀦𑀺, 𑀓𑀸𑀭𑀡𑀁. 𑀓𑀺𑀁 𑀧𑀪𑀼𑀢𑀺 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁 𑀏𑀢𑁂𑀲𑀦𑁆𑀢𑀺 𑀓𑀺𑀁 𑀧𑀪𑀼𑀢𑀺𑀓𑀸. 𑀧𑀳𑀸𑀦𑀤𑀲𑁆𑀲𑀦𑀢𑁆𑀣𑀁 𑀆𑀭𑀤𑁆𑀥𑀁. 𑀢𑁂𑀦𑁂𑀯𑀸𑀳 ‘‘𑀧𑀼𑀩𑁆𑀩𑁂 𑀘𑁂𑀯…𑀧𑁂… 𑀢𑁂 𑀧𑀳𑀻𑀬𑀦𑁆𑀢𑀻’’𑀢𑀺. 𑀦 𑀧𑀭𑀺𑀢𑀲𑁆𑀲𑀢𑀺 𑀢𑀡𑁆𑀳𑀸𑀧𑀭𑀺𑀢𑁆𑀢𑀸𑀲𑀲𑁆𑀲 𑀅𑀪𑀸𑀯𑀢𑁄. 𑀯𑀺𑀧𑀲𑁆𑀲𑀦𑀗𑁆𑀕𑁂𑀦𑀸𑀢𑀺 𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑁂𑀦 𑀓𑀸𑀭𑀡𑁂𑀦.

𑀅𑀢𑁆𑀢𑀤𑀻𑀧𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀝𑀺𑀧𑀤𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁪. 𑀲𑀪𑀸𑀯𑀢𑁄𑀲𑀦𑁆𑀢𑁄 𑀯𑀺𑀚𑁆𑀚𑀫𑀸𑀦𑁄 𑀓𑀸𑀬𑁄 𑀭𑀽𑀧𑀸𑀤𑀺𑀥𑀫𑁆𑀫𑀲𑀫𑀽𑀳𑁄𑀢𑀺 𑀲𑀓𑁆𑀓𑀸𑀬𑁄𑀢𑀺 𑀆𑀳 𑁋 ‘‘𑀲𑀓𑁆𑀓𑀸𑀬𑁄 𑀤𑀼𑀓𑁆𑀔’’𑀦𑁆𑀢𑀺. 𑀤𑀺𑀝𑁆𑀞𑀺 𑀏𑀯 𑀲𑀫𑀦𑀼𑀧𑀲𑁆𑀲𑀦𑀸, 𑀤𑀺𑀝𑁆𑀞𑀺𑀲𑀳𑀺𑀢𑀸 𑀯𑀸 𑀲𑀫𑀦𑀼𑀧𑀲𑁆𑀲𑀦𑀸 𑀤𑀺𑀝𑁆𑀞𑀺𑀲𑀫𑀦𑀼𑀧𑀲𑁆𑀲𑀦𑀸, 𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀬 𑀲𑀤𑁆𑀥𑀺𑀁 𑀇𑀢𑀭𑀫𑀜𑁆𑀜𑀦𑀸. 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀘𑀢𑀼𑀫𑀕𑁆𑀕𑀜𑀸𑀡𑀁 𑀲𑀫𑀦𑀼𑀧𑀲𑁆𑀲𑀦𑀸 ‘‘𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀲𑀫𑁆𑀫𑀤𑁂𑀯 𑀅𑀦𑀼𑀭𑀽𑀧𑀢𑁄 𑀧𑀲𑁆𑀲𑀦𑀸’’𑀢𑀺 𑀓𑀢𑁆𑀯𑀸.

𑀧𑀝𑀺𑀧𑀤𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀦𑀺𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁫. 𑀯𑀺𑀭𑀸𑀕𑁄 ¶ 𑀦𑀸𑀫 𑀫𑀕𑁆𑀕𑁄, 𑀯𑀺𑀫𑀼𑀢𑁆𑀢𑀺𑀨𑀮𑀦𑁆𑀢𑀺 𑀆𑀳 𑁋 ‘‘𑀫𑀕𑁆𑀕𑀓𑁆𑀔𑀡𑁂 𑀯𑀺𑀭𑀚𑁆𑀚𑀢𑀺, 𑀨𑀮𑀓𑁆𑀔𑀡𑁂 𑀯𑀺𑀫𑀼𑀘𑁆𑀘𑀢𑀻’’𑀢𑀺. 𑀅𑀕𑁆𑀕𑀳𑁂𑀢𑁆𑀯𑀸𑀢𑀺 𑀏𑀯𑀁 𑀦𑀺𑀭𑀼𑀚𑁆𑀛𑀫𑀸𑀦𑁂𑀳𑀺 𑀆𑀲𑀯𑁂𑀳𑀺 ‘‘𑀅𑀳𑀁 𑀫𑀫𑀸’’𑀢𑀺 𑀓𑀜𑁆𑀘𑀺 𑀥𑀫𑁆𑀫𑀁 𑀅𑀦𑀸𑀤𑀺𑀬𑀺𑀢𑁆𑀯𑀸. ‘‘𑀘𑀺𑀢𑁆𑀢𑀁 𑀯𑀺𑀭𑀢𑁆𑀢𑀁, 𑀯𑀺𑀫𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ¶ 𑀨𑀮𑀁 𑀕𑀬𑁆𑀳𑀢𑀺, ‘‘𑀔𑀻𑀡𑀸 𑀚𑀸𑀢𑀻’’𑀢𑀺𑀆𑀤𑀺𑀦𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀢𑀺 𑀆𑀳 ‘‘𑀲𑀳 𑀨𑀮𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺. 𑀉𑀧𑀭𑀺 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀸𑀪𑀸𑀯𑁂𑀦 𑀞𑀺𑀢𑀁. 𑀢𑁂𑀦𑀸𑀳 ‘‘𑀯𑀺𑀫𑀼𑀢𑁆𑀢𑀢𑁆𑀢𑀸 𑀞𑀺𑀢’’𑀦𑁆𑀢𑀺. 𑀬𑀁 𑀧𑀢𑁆𑀢𑀩𑁆𑀩𑀁, 𑀢𑀁 𑀅𑀕𑁆𑀕𑀨𑀮𑀲𑁆𑀲 𑀧𑀢𑁆𑀢𑀪𑀸𑀯𑁂𑀦 𑀅𑀥𑀺𑀕𑀢𑀢𑁆𑀢𑀸 𑀲𑀦𑁆𑀢𑀼𑀝𑁆𑀞𑀁 𑀧𑀭𑀺𑀢𑀼𑀝𑁆𑀞𑀁.

𑀅𑀦𑀺𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀤𑀼𑀢𑀺𑀬𑀅𑀦𑀺𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁬. 𑀧𑀼𑀩𑁆𑀩𑀦𑁆𑀢𑀁 𑀅𑀢𑀻𑀢𑀔𑀦𑁆𑀥𑀓𑁄𑀝𑁆𑀞𑀸𑀲𑀁. 𑀅𑀦𑀼𑀕𑀢𑀸𑀢𑀺 𑀲𑀲𑁆𑀲𑀢𑀸𑀤𑀻𑀦𑀺 𑀓𑀧𑁆𑀧𑁂𑀢𑁆𑀯𑀸 𑀕𑀳𑀡𑀯𑀲𑁂𑀦 𑀅𑀦𑀼𑀕𑀢𑀸. 𑀅𑀝𑁆𑀞𑀸𑀭𑀲 𑀤𑀺𑀝𑁆𑀞𑀺𑀬𑁄𑀢𑀺 𑀘𑀢𑀲𑁆𑀲𑁄 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑁄, 𑀘𑀢𑀲𑁆𑀲𑁄 𑀏𑀓𑀘𑁆𑀘𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑁄, 𑀘𑀢𑀲𑁆𑀲𑁄 𑀅𑀦𑁆𑀢𑀸𑀦𑀦𑁆𑀢𑀺𑀓𑀤𑀺𑀝𑁆𑀞𑀺𑀬𑁄, 𑀘𑀢𑀲𑁆𑀲𑁄 𑀅𑀫𑀭𑀸𑀯𑀺𑀓𑁆𑀔𑁂𑀧𑀤𑀺𑀝𑁆𑀞𑀺𑀬𑁄, 𑀤𑁆𑀯𑁂 𑀅𑀥𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀤𑀺𑀝𑁆𑀞𑀺𑀬𑁄𑀢𑀺 𑀏𑀯𑀁 𑀅𑀝𑁆𑀞𑀸𑀭𑀲 𑀤𑀺𑀝𑁆𑀞𑀺𑀬𑁄 𑀦 𑀳𑁄𑀦𑁆𑀢𑀺 𑀧𑀘𑁆𑀘𑀬𑀖𑀸𑀢𑁂𑀦. 𑀅𑀧𑀭𑀦𑁆𑀢𑀦𑁆𑀢𑀺 𑀅𑀦𑀸𑀕𑀢𑀁 𑀔𑀦𑁆𑀥𑀓𑁄𑀝𑁆𑀞𑀸𑀲𑀁 𑀲𑀲𑁆𑀲𑀢𑀸𑀤𑀺𑀪𑀸𑀯𑀁 𑀓𑀧𑁆𑀧𑁂𑀢𑁆𑀯𑀸 𑀕𑀳𑀡𑀯𑀲𑁂𑀦 𑀅𑀦𑀼𑀕𑀢𑀸. 𑀲𑁄𑀴𑀲 𑀲𑀜𑁆𑀜𑀻𑀯𑀸𑀤𑀸, 𑀅𑀝𑁆𑀞 𑀅𑀲𑀜𑁆𑀜𑀻𑀯𑀸𑀤𑀸, 𑀅𑀝𑁆𑀞 𑀦𑁂𑀯𑀲𑀜𑁆𑀜𑀻𑀦𑀸𑀲𑀜𑁆𑀜𑀻𑀯𑀸𑀤𑀸, 𑀲𑀢𑁆𑀢 𑀉𑀘𑁆𑀙𑁂𑀤𑀯𑀸𑀤𑀸, 𑀧𑀜𑁆𑀘 𑀧𑀭𑀫𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑀸𑀢𑀺 𑀏𑀯𑀁 𑀘𑀢𑀼𑀘𑀢𑁆𑀢𑀸𑀮𑀻𑀲 𑀤𑀺𑀝𑁆𑀞𑀺𑀬𑁄 𑀦 𑀳𑁄𑀦𑁆𑀢𑀺 𑀧𑀘𑁆𑀘𑀬𑀖𑀸𑀢𑁂𑀦. 𑀲𑀲𑁆𑀲𑀢𑀤𑀺𑀝𑁆𑀞𑀺𑀣𑀸𑀫𑀲𑁄 𑀘𑁂𑀯 𑀲𑀻𑀮𑀩𑁆𑀩𑀢𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑁄 𑀘 𑀦 𑀳𑁄𑀢𑀺 𑀧𑀘𑁆𑀘𑀬𑀖𑀸𑀢𑁂𑀦. 𑀢𑁂𑀦𑀸𑀳 ‘‘𑀏𑀢𑁆𑀢𑀸𑀯𑀢𑀸 𑀧𑀞𑀫𑀫𑀕𑁆𑀕𑁄 𑀤𑀲𑁆𑀲𑀺𑀢𑁄’’𑀢𑀺 𑀅𑀦𑀯𑀲𑁂𑀲𑀤𑀺𑀝𑁆𑀞𑀺𑀧𑀳𑀸𑀦𑀓𑀺𑀢𑁆𑀢𑀦𑀢𑁄. 𑀧𑀳𑀻𑀦𑀸 𑀯𑀺𑀓𑁆𑀔𑀫𑁆𑀪𑀺𑀢𑀸. 𑀇𑀤𑀁 𑀧𑀦𑀸𑀢𑀺 ‘‘𑀭𑀽𑀧𑀲𑁆𑀫𑀺’’𑀦𑁆𑀢𑀺𑀆𑀤𑀺.

𑀤𑀼𑀢𑀺𑀬𑀅𑀦𑀺𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀫𑀦𑀼𑀧𑀲𑁆𑀲𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭. 𑀧𑀭𑀺𑀧𑀼𑀡𑁆𑀡𑀕𑀸𑀳𑀯𑀲𑁂𑀦𑀸𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀲𑁂𑀲𑁂𑀢𑁆𑀯𑀸 𑀏𑀓𑀚𑁆𑀛𑀁 ‘‘𑀅𑀢𑁆𑀢𑀸’’𑀢𑀺 𑀕𑀳𑀡𑀯𑀲𑁂𑀦. 𑀏𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀅𑀜𑁆𑀜𑀢𑀭𑀁 ‘‘𑀅𑀢𑁆𑀢𑀸’’𑀢𑀺 𑀲𑀫𑀦𑀼𑀧𑀲𑁆𑀲𑀦𑁆𑀢𑀺. 𑀇𑀢𑀻𑀢𑀺 𑀏𑀯𑀁. 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀬𑀁 𑀅𑀢𑁆𑀢𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀸 𑀲𑀫𑀦𑀼𑀧𑀲𑁆𑀲𑀦𑀸 𑀅𑀢𑁆𑀣𑀺 𑀧𑀝𑀺𑀧𑀓𑁆𑀔𑁂𑀦 𑀅𑀯𑀺𑀳𑀢𑀢𑁆𑀢𑀸 𑀲𑀁𑀯𑀺𑀚𑁆𑀚𑀢𑀺. 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀦𑁆𑀢𑀺 𑀘𑀓𑁆𑀔𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁.

𑀆𑀭𑀫𑁆𑀫𑀡𑀦𑁆𑀢𑀺 ¶ 𑀓𑀫𑁆𑀫𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁. 𑀫𑀸𑀦𑀯𑀲𑁂𑀦 𑀘 𑀤𑀺𑀝𑁆𑀞𑀺𑀯𑀲𑁂𑀦 𑀘 ‘‘𑀅𑀲𑁆𑀫𑀻’’𑀢𑀺 𑀕𑀸𑀳𑁂 𑀲𑀺𑀚𑁆𑀛𑀦𑁆𑀢𑁂 𑀢𑀁𑀲𑀳𑀕𑀢𑀸 𑀢𑀡𑁆𑀳𑀸𑀧𑀺 𑀢𑀕𑁆𑀕𑀳𑀺𑀢𑀸𑀯 𑀳𑁄𑀢𑀻𑀢𑀺 ¶ 𑀯𑀼𑀢𑁆𑀢𑀁 ‘‘𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦 𑀅𑀲𑁆𑀫𑀻𑀢𑀺 𑀏𑀯𑀫𑁆𑀧𑀺𑀲𑁆𑀲 𑀳𑁄𑀢𑀻’’𑀢𑀺. 𑀕𑀳𑁂𑀢𑁆𑀯𑀸𑀢𑀺 𑀅𑀳𑀁𑀓𑀸𑀭𑀯𑀢𑁆𑀣𑀼𑀯𑀲𑁂𑀦 𑀕𑀳𑁂𑀢𑁆𑀯𑀸. 𑀅𑀬𑀁 𑀅𑀳𑀫𑀲𑁆𑀫𑀻𑀢𑀺 𑀅𑀬𑀁 𑀘𑀓𑁆𑀔𑀸𑀤𑀺𑀓𑁄, 𑀲𑀼𑀔𑀸𑀤𑀺𑀓𑁄 𑀯𑀸 𑀅𑀳𑀫𑀲𑁆𑀫𑀺. ‘‘𑀭𑀽𑀧𑀻 𑀅𑀢𑁆𑀢𑀸 𑀅𑀭𑁄𑀕𑁄 𑀧𑀭𑀁 𑀫𑀭𑀡𑀸’’𑀢𑀺 𑀏𑀯𑀫𑀸𑀤𑀺𑀕𑀳𑀡𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀯𑀼𑀢𑁆𑀢𑀁 ‘‘𑀭𑀽𑀧𑀻 𑀪𑀯𑀺𑀲𑁆𑀲𑀦𑁆𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀲𑀲𑁆𑀲𑀢𑀫𑁂𑀯 𑀪𑀚𑀦𑁆𑀢𑀻’’𑀢𑀺. 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀢𑁄 𑀧𑀼𑀩𑁆𑀩𑁂 𑀬𑀣𑁂𑀯𑀸𑀓𑀸𑀭𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀅𑀣 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀢𑁄 𑀧𑀭𑀁 𑀢𑁂𑀦𑁂𑀯𑀸𑀓𑀸𑀭𑁂𑀦 𑀞𑀺𑀢𑁂𑀲𑀼 𑀘𑀓𑁆𑀔𑀸𑀤𑀻𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀯𑀺𑀚𑁆𑀚𑀸 𑀧𑀳𑀻𑀬𑀢𑀺 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑀏𑀢𑁆𑀯𑀸 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑀦𑁂𑀦, 𑀅𑀣 𑀫𑀕𑁆𑀕𑀧𑀭𑀫𑁆𑀧𑀭𑀸𑀬 𑀅𑀭𑀳𑀢𑁆𑀢𑀫𑀕𑁆𑀕𑀯𑀺𑀚𑁆𑀚𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀬𑁄 𑀓𑀫𑁆𑀫𑀲𑀫𑁆𑀪𑀸𑀭𑀪𑀸𑀯𑀢𑁄. 𑀓𑀫𑁆𑀫𑀲𑁆𑀲…𑀧𑁂… 𑀏𑀓𑁄 𑀲𑀦𑁆𑀥𑀻𑀢𑀺 𑀳𑁂𑀢𑀼𑀨𑀮𑀲𑀦𑁆𑀥𑀺. 𑀧𑀼𑀦 𑀏𑀓𑁄 𑀲𑀦𑁆𑀥𑀻𑀢𑀺 𑀨𑀮𑀳𑁂𑀢𑀼𑀲𑀦𑁆𑀥𑀺𑀫𑀸𑀳. 𑀢𑀬𑁄 𑀧𑀧𑀜𑁆𑀘𑀸 𑀅𑀢𑀻𑀢𑁄 𑀅𑀤𑁆𑀥𑀸 𑀅𑀢𑀻𑀢𑀪𑀯𑀅𑀤𑁆𑀥𑀸𑀦𑀁 𑀢𑁂𑀲𑀁 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀅𑀦𑀸𑀕𑀢𑀲𑁆𑀲 𑀧𑀘𑁆𑀘𑀬𑁄 𑀤𑀲𑁆𑀲𑀺𑀢𑁄 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲 𑀯𑀲𑁂𑀦. 𑀲𑀼𑀢𑀯𑀢𑁄 𑀧𑀦 𑀅𑀭𑀺𑀬𑀲𑀸𑀯𑀓𑀲𑁆𑀲 𑀯𑀲𑁂𑀦 𑀯𑀝𑁆𑀝𑀲𑁆𑀲 𑀯𑀽𑀧𑀲𑀫𑁄 𑀤𑀲𑁆𑀲𑀺𑀢𑁄𑀢𑀺.

𑀲𑀫𑀦𑀼𑀧𑀲𑁆𑀲𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀔𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮. 𑀢𑀣𑁂𑀯𑀸𑀢𑀺 𑀆𑀭𑀫𑁆𑀫𑀡𑀪𑀸𑀯𑁂𑀦𑁂𑀯. 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀉𑀧𑀸𑀤𑀸𑀦𑁂𑀳𑀺 𑀉𑀧𑀸𑀤𑀸𑀢𑀩𑁆𑀩𑀦𑁆𑀢𑀺 𑀉𑀧𑀸𑀤𑀸𑀦𑀺𑀬𑀁. 𑀇𑀥𑀸𑀧𑀻𑀢𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼𑀧𑀺. 𑀯𑀺𑀪𑀸𑀕𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑁄𑀧𑀺 𑀲𑀺𑀬𑀸, 𑀅𑀪𑀺𑀥𑀫𑁆𑀫𑁂 𑀘 𑀭𑀸𑀲𑀝𑁆𑀞𑁄 𑀏𑀯 𑀆𑀕𑀢𑁄, ‘‘𑀢𑀤𑁂𑀓𑀚𑁆𑀛𑀁 𑀅𑀪𑀺𑀲𑀁𑀬𑀼𑀳𑀺𑀢𑁆𑀯𑀸’’𑀢𑀺 𑀯𑀘𑀦𑀢𑁄 ‘‘𑀭𑀸𑀲𑀝𑁆𑀞𑁂𑀦’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁.

𑀔𑀦𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁮. 𑀲𑁄𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁯-𑁫𑁦. 𑀯𑀺𑀲𑀺𑀝𑁆𑀞𑁄𑀢𑀺 𑀧𑀥𑀸𑀦𑁄. 𑀉𑀢𑁆𑀢𑀫𑁄𑀢𑀺 𑀉𑀓𑁆𑀓𑀝𑁆𑀞𑁄. 𑀅𑀜𑁆𑀜𑀁 𑀓𑀺𑀁 𑀪𑀯𑁂𑀬𑁆𑀬𑀸𑀢𑀺 𑀅𑀜𑁆𑀜𑀁 𑀓𑀺𑀁 𑀓𑀸𑀭𑀡𑀁 𑀪𑀯𑁂𑀬𑁆𑀬 𑀢𑀣𑀸 𑀲𑀫𑀦𑀼𑀧𑀲𑁆𑀲𑀦𑀸𑀬 𑀅𑀜𑁆𑀜𑁂𑀲𑀁 𑀅𑀯𑀺𑀚𑁆𑀚𑀫𑀸𑀦𑀢𑀸𑀬 𑀯𑀘𑀦𑀧𑀭𑀺𑀝𑁆𑀞𑀺𑀢𑀺𑀧𑀪𑀺𑀦𑁆𑀦𑀢𑁄. 𑀯𑀚𑀺𑀭𑀪𑁂𑀤𑀤𑁂𑀲𑀦𑀁 𑀦𑀸𑀫 𑀅𑀢𑁆𑀣𑀢𑁄 𑀢𑁂𑀧𑀭𑀺𑀯𑀝𑁆𑀝𑀤𑁂𑀲𑀦𑀸.

𑀲𑁄𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯-𑁧𑁦. 𑀦𑀦𑁆𑀤𑀺𑀓𑁆𑀔𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫𑁧-𑁫𑁨. 𑀦𑀯𑀫𑀤𑀲𑀫𑁂𑀲𑀽𑀢𑀺 ¶ ¶ 𑀲𑀼𑀢𑁆𑀢𑀤𑁆𑀯𑀬𑀁 𑀲𑀳𑁂𑀯 𑀉𑀤𑁆𑀥𑀝𑀁, 𑀤𑁆𑀯𑀻𑀲𑀼𑀧𑀺 𑀅𑀢𑁆𑀣𑀯𑀡𑁆𑀡𑀦𑀸𑀬 𑀲𑀭𑀺𑀓𑁆𑀔𑀪𑀸𑀯𑀢𑁄. 𑀦𑀦𑁆𑀤𑀦𑀝𑁆𑀞𑁂𑀦 𑀦𑀦𑁆𑀤𑀻, 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀕𑁄. 𑀲𑀢𑀺𑀧𑀺 𑀲𑀤𑁆𑀤𑀢𑁆𑀣𑀢𑁄 𑀪𑁂𑀤𑁂 ‘‘𑀇𑀫𑁂𑀲𑀁 𑀅𑀢𑁆𑀣𑀢𑁄 𑀦𑀺𑀦𑁆𑀦𑀸𑀦𑀸𑀓𑀭𑀡𑀢𑀸𑀬𑀸’’𑀢𑀺 𑀯𑀢𑁆𑀯𑀸𑀧𑀺 𑀧𑀳𑀸𑀬𑀓𑀥𑀫𑁆𑀫𑀪𑁂𑀤𑁂𑀦 𑀧𑀦 𑀮𑀩𑁆𑀪𑀢𑁂𑀯 𑀪𑁂𑀤𑀫𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀭𑀚𑁆𑀚𑀦𑁆𑀢𑁄 𑀭𑀸𑀕𑀁 𑀧𑀚𑀳𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀢𑁆𑀢𑀸𑀯𑀢𑀸𑀢𑀺 ‘‘𑀦𑀦𑁆𑀤𑀺𑀓𑁆𑀔𑀬𑀸 𑀭𑀸𑀕𑀓𑁆𑀔𑀬𑁄’’𑀢𑀺 𑀏𑀢𑁆𑀢𑀸𑀯𑀢𑀸. 𑀯𑀺𑀧𑀲𑁆𑀲𑀦𑀁 𑀦𑀺𑀝𑁆𑀞𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀓𑀺𑀘𑁆𑀘𑀲𑁆𑀲 𑀧𑀭𑀺𑀬𑁄𑀲𑀸𑀦𑁂𑀦. 𑀭𑀸𑀕𑀓𑁆𑀔𑀬𑀸𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀧𑀭𑀺𑀬𑁄𑀲𑀸𑀦𑀸𑀬 𑀯𑀺𑀧𑀲𑁆𑀲𑀦𑀸𑀬 𑀭𑀸𑀕𑀲𑁆𑀲 𑀔𑁂𑀧𑀺𑀢𑀢𑁆𑀢𑀸. 𑀅𑀦𑀦𑁆𑀢𑀭𑀁 𑀉𑀧𑁆𑀧𑀦𑁆𑀦𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀦𑀦𑁆𑀤𑀺𑀓𑁆𑀔𑀬𑁄𑀢𑀺. 𑀢𑁂𑀦𑀸𑀳 ‘‘𑀇𑀥 𑀫𑀕𑁆𑀕𑀁 𑀤𑀲𑁆𑀲𑁂𑀢𑁆𑀯𑀸’’𑀢𑀺. 𑀅𑀦𑀦𑁆𑀢𑀭𑀁 𑀧𑀦 𑀉𑀧𑁆𑀧𑀦𑁆𑀦𑁂𑀦 𑀅𑀭𑀺𑀬𑀨𑀮𑁂𑀦 𑀧𑀝𑀺𑀧𑀲𑁆𑀲𑀤𑁆𑀥𑀺𑀯𑀲𑁂𑀦 𑀦𑀦𑁆𑀤𑀺𑀭𑀸𑀕𑀓𑁆𑀔𑀬𑀸 𑀲𑀩𑁆𑀩𑀁 𑀲𑀁𑀓𑀺𑀮𑁂𑀲𑀢𑁄 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀻𑀢𑀺. 𑀢𑁂𑀦𑀸𑀳 ‘‘𑀨𑀮𑀁 𑀤𑀲𑁆𑀲𑀺𑀢’’𑀦𑁆𑀢𑀺.

𑀦𑀦𑁆𑀤𑀺𑀓𑁆𑀔𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀢𑁆𑀢𑀤𑀻𑀧𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀽𑀮𑀧𑀡𑁆𑀡𑀸𑀲𑀓𑁄 𑀲𑀫𑀢𑁆𑀢𑁄.

𑁬. 𑀉𑀧𑀬𑀯𑀕𑁆𑀕𑁄

𑁧. 𑀉𑀧𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁩. 𑀉𑀧𑁂𑀢𑀻𑀢𑀺 𑀉𑀧𑀬𑁄. 𑀓𑀣𑀫𑀼𑀧𑁂𑀢𑀺? 𑀢𑀡𑁆𑀳𑀸𑀫𑀸𑀦𑀸𑀤𑀺𑀯𑀲𑁂𑀦𑀸𑀢𑀺 𑀆𑀳 ‘‘𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀯𑀲𑁂𑀦𑀸’’𑀢𑀺. 𑀓𑀣𑀫𑀺𑀤𑀁 𑀮𑀩𑁆𑀪𑀢𑀻𑀢𑀺? ‘‘𑀅𑀯𑀺𑀫𑀼𑀢𑁆𑀢𑁄’’𑀢𑀺 𑀯𑀘𑀦𑀢𑁄. 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀳𑀺 𑀩𑀤𑁆𑀥𑁄, 𑀓𑀺𑀁 𑀉𑀧𑁂𑀢𑀻𑀢𑀺 𑀆𑀳 ‘‘𑀧𑀜𑁆𑀘𑀓𑁆𑀔𑀦𑁆𑀥𑁂’’𑀢𑀺 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀢𑀣𑀸 𑀉𑀧𑁂𑀢𑀲𑁆𑀲 𑀅𑀪𑀸𑀯𑀢𑁄. 𑀓𑁄 𑀧𑀦𑀼𑀧𑁂𑀢𑀻𑀢𑀺? 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄. 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀲𑁂𑀦 𑀉𑀧𑀕𑀫𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀅𑀓𑀼𑀲𑀮𑀓𑀫𑁆𑀫𑀯𑀺𑀜𑁆𑀜𑀸𑀡𑀫𑁂𑀯𑀸𑀢𑀺 𑀯𑀤𑀦𑁆𑀢𑀺. 𑀚𑀯𑀸𑀧𑁂𑀢𑁆𑀯𑀸𑀢𑀺 𑀕𑀳𑀺𑀢𑀚𑀯𑀁 𑀓𑀢𑁆𑀯𑀸. 𑀬𑀣𑀸 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀺𑀢𑀼𑀁 𑀲𑀫𑀢𑁆𑀣𑀁, 𑀏𑀯𑀁 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀧𑀝𑀺𑀲𑀦𑁆𑀥𑀻’’𑀢𑀺𑀆𑀤𑀺. 𑀅𑀕𑁆𑀕𑀳𑀡𑁂 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯 ‘‘𑀑𑀓𑀁 𑀧𑀳𑀸𑀬 𑀅𑀦𑀺𑀓𑁂𑀢𑀲𑀸𑀭𑀻’’𑀢𑀺 𑀕𑀸𑀣𑀸𑀬 𑀯𑀺𑀲𑁆𑀲𑀚𑁆𑀚𑀦𑁂. 𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀤𑀺𑀯𑀲𑁂𑀦 𑀧𑀝𑀺𑀲𑀦𑁆𑀥𑀺𑀬𑀸 𑀧𑀘𑁆𑀘𑀬𑀪𑀽𑀢𑀁 ¶ 𑀆𑀭𑀫𑁆𑀫𑀡𑀁 𑀧𑀝𑀺𑀲𑀦𑁆𑀥𑀺𑀚𑀦𑀓𑀲𑁆𑀲 𑀓𑀫𑁆𑀫𑀲𑁆𑀲 𑀯𑀲𑁂𑀦 𑀯𑁄𑀘𑁆𑀙𑀺𑀚𑁆𑀚𑀢𑀺. 𑀧𑀢𑀺𑀝𑁆𑀞𑀸 𑀦 𑀳𑁄𑀢𑀺 𑀲𑀭𑀸𑀕𑀓𑀸𑀮𑁂 𑀯𑀺𑀬 𑀅𑀦𑀼𑀧𑀝𑁆𑀞𑀸𑀦𑀢𑁄 ¶ . 𑀅𑀧𑁆𑀧𑀢𑀺𑀝𑁆𑀞𑀺𑀢𑀁 𑀯𑀺𑀜𑁆𑀜𑀸𑀡𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦. 𑀅𑀦𑀪𑀺𑀲𑀗𑁆𑀔𑀭𑀺𑀢𑁆𑀯𑀸𑀢𑀺 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀧𑀘𑁆𑀘𑀬𑀖𑀸𑀢𑁂𑀦.

𑀉𑀧𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀩𑀻𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁪. 𑀩𑀻𑀚𑀚𑀸𑀢𑀸𑀦𑀻𑀢𑀺 𑀚𑀸𑀢-𑀲𑀤𑁆𑀤𑁄 𑀧𑀤𑀧𑀽𑀭𑀡𑀫𑀢𑁆𑀢𑀦𑁆𑀢𑀺 𑀆𑀳 ‘‘𑀩𑀻𑀚𑀸𑀦𑀻’’𑀢𑀺. 𑀯𑀘𑀦𑁆𑀢𑀺 𑀲𑁂𑀢𑀯𑀘𑀁. 𑀅𑀚𑁆𑀚𑀼𑀓𑀦𑁆𑀢𑀺 𑀢𑀘𑁆𑀙𑀓𑀁. 𑀨𑀡𑀺𑀚𑁆𑀚𑀓𑀁 𑀢𑀼𑀮𑀲𑀺. 𑀅𑀪𑀺𑀦𑁆𑀦𑀸𑀦𑀻𑀢𑀺 𑀏𑀓𑀤𑁂𑀲𑁂𑀦𑀧𑀺 𑀅𑀔𑀡𑁆𑀟𑀺𑀢𑀸𑀦𑀺. 𑀩𑀻𑀚𑀢𑁆𑀣𑀸𑀬𑀸𑀢𑀺 𑀩𑀻𑀚𑀓𑀺𑀘𑁆𑀘𑀸𑀬. 𑀦 𑀉𑀧𑀓𑀧𑁆𑀧𑀢𑀻𑀢𑀺 𑀧𑀘𑁆𑀘𑀬𑁄 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀦 𑀧𑀸𑀧𑀺𑀢𑀸𑀦𑀻𑀢𑀺 𑀧𑀽𑀢𑀺𑀢𑀁 𑀦 𑀉𑀧𑀕𑀢𑀸𑀦𑀺. 𑀢𑀡𑁆𑀟𑀼𑀮𑀲𑀸𑀭𑀲𑁆𑀲 𑀆𑀤𑀸𑀦𑀢𑁄 𑀲𑀸𑀭𑀸𑀤𑀸𑀦𑀺. 𑀆𑀭𑀫𑁆𑀫𑀡𑀕𑁆𑀕𑀳𑀡𑀯𑀲𑁂𑀦 𑀯𑀺𑀜𑁆𑀜𑀸𑀡𑀁 𑀢𑀺𑀝𑁆𑀞𑀢𑀺 𑀏𑀢𑁆𑀣𑀸𑀢𑀺 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄. 𑀆𑀭𑀫𑁆𑀫𑀡𑀯𑀲𑁂𑀦𑀸𑀢𑀺 𑀆𑀭𑀫𑁆𑀫𑀡𑀪𑀸𑀯𑀯𑀲𑁂𑀦. 𑀲𑀺𑀦𑁂𑀳𑀦𑀝𑁆𑀞𑁂𑀦𑀸𑀢𑀺 𑀢𑀡𑁆𑀳𑀸𑀬𑀦𑀯𑀲𑁂𑀦 𑀲𑀺𑀦𑀺𑀤𑁆𑀥𑀢𑀸𑀧𑀸𑀤𑀦𑁂𑀦, 𑀬𑀢𑁄 ‘‘𑀦𑀦𑁆𑀤𑀽𑀧𑀲𑁂𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀯𑀺𑀭𑁄𑀧𑀺𑀢𑀁 𑀢𑀁 𑀓𑀫𑁆𑀫𑀯𑀺𑀜𑁆𑀜𑀸𑀡𑀁 𑀧𑀝𑀺𑀲𑀦𑁆𑀥𑀺𑀅𑀗𑁆𑀓𑀼𑀭𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀁 𑀳𑁄𑀢𑀺. 𑀲𑀧𑁆𑀧𑀘𑁆𑀘𑀬𑀦𑁆𑀢𑀺 𑀅𑀯𑀺𑀚𑁆𑀚𑀸𑀅𑀬𑁄𑀦𑀺𑀲𑁄𑀦𑀫𑀦𑀲𑀺𑀓𑀸𑀭𑀸𑀤𑀺𑀧𑀘𑁆𑀘𑀬𑁂𑀳𑀺 𑀲𑀧𑁆𑀧𑀘𑁆𑀘𑀬𑀁. 𑀯𑀺𑀭𑀼𑀳𑀢𑀺 𑀯𑀺𑀧𑀸𑀓𑀲𑀦𑁆𑀢𑀸𑀦𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑁄 𑀳𑀼𑀢𑁆𑀯𑀸.

𑀩𑀻𑀚𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀉𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁫. 𑀉𑀤𑀸𑀦𑀁 𑀉𑀤𑀸𑀳𑀭𑀻𑀢𑀺 𑀅𑀢𑁆𑀢𑀫𑀦𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀏𑀲 𑀯𑀼𑀢𑁆𑀢𑀧𑁆𑀧𑀓𑀸𑀭𑁄 𑀉𑀤𑀸𑀳𑀸𑀭𑁄. 𑀪𑀼𑀲𑁄 𑀦𑀺𑀲𑁆𑀲𑀬𑁄 𑀉𑀧𑀦𑀺𑀲𑁆𑀲𑀬𑁄, 𑀤𑀸𑀦𑀫𑁂𑀯 𑀉𑀧𑀦𑀺𑀲𑁆𑀲𑀬𑁄 𑀤𑀸𑀦𑀽𑀧𑀦𑀺𑀲𑁆𑀲𑀬𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀢𑀢𑁆𑀣 𑀤𑀸𑀦𑀽𑀧𑀦𑀺𑀲𑁆𑀲𑀬𑁄 𑀅𑀦𑁆𑀦𑀸𑀤𑀺𑀯𑀢𑁆𑀣𑀽𑀲𑀼 𑀩𑀮𑀯𑀸𑀢𑀺 𑀩𑀮𑀯𑀪𑀸𑀯𑁂𑀦 𑀳𑁄𑀢𑀺, 𑀢𑀲𑁆𑀫𑀸 𑀉𑀧𑀦𑀺𑀲𑁆𑀲𑀬𑀩𑀳𑀼𑀮𑁄 𑀓𑀸𑀫𑀭𑀸𑀕𑀧𑁆𑀧𑀳𑀸𑀦𑁂𑀦𑁂𑀯 𑀓𑀢𑀧𑀭𑀺𑀘𑀬𑀢𑁆𑀢𑀸 𑀯𑀺𑀧𑀲𑁆𑀲𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑁄 𑀦 𑀘𑀺𑀭𑀲𑁆𑀲𑁂𑀯 𑀅𑀦𑀸𑀕𑀸𑀫𑀺𑀨𑀮𑀁 𑀧𑀸𑀧𑀼𑀡𑀸𑀢𑀺, 𑀢𑀣𑀸 𑀲𑀼𑀯𑀺𑀲𑀼𑀤𑁆𑀥𑀲𑀻𑀮𑀽𑀧𑀦𑀺𑀲𑁆𑀲𑀬𑁄 𑀓𑀸𑀫𑀤𑁄𑀲𑀚𑀺𑀕𑀼𑀘𑁆𑀙𑀦𑁂𑀦. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀇𑀫𑁂 𑀤𑁆𑀯𑁂 𑀉𑀧𑀦𑀺𑀲𑁆𑀲𑀬𑀸 𑀤𑀼𑀩𑁆𑀩𑀮𑀸𑀢𑀺 𑀯𑀼𑀢𑁆𑀢𑀸 ¶ ? 𑀯𑀺𑀚𑁆𑀚𑀽𑀧𑀫𑀜𑁆𑀜𑀸𑀡𑀲𑁆𑀲𑁂𑀯 𑀧𑀘𑁆𑀘𑀬𑀪𑀸𑀯𑀢𑁄. 𑀲𑁄𑀧𑀺 𑀪𑀸𑀯𑀦𑀽𑀧𑀦𑀺𑀲𑁆𑀲𑀬𑀲𑀳𑀸𑀬𑀮𑀸𑀪𑁂𑀦𑁂𑀯, 𑀦 𑀓𑁂𑀯𑀮𑀁. 𑀪𑀸𑀯𑀦𑀸 𑀧𑀦 𑀧𑀝𑀺𑀯𑁂𑀥𑀲𑁆𑀲 𑀯𑀺𑀲𑁂𑀲𑀳𑁂𑀢𑀼𑀪𑀸𑀯𑀢𑁄 𑀩𑀮𑀯𑀸 𑀉𑀧𑀦𑀺𑀲𑁆𑀲𑀬𑁄. 𑀢𑀣𑀸 𑀳𑀺 𑀲𑀸 𑀯𑀚𑀺𑀭𑀽𑀧𑀫𑀜𑀸𑀡𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄. 𑀢𑁂𑀦𑀸𑀳 ‘‘𑀪𑀸𑀯𑀦𑀽𑀧𑀦𑀺𑀲𑁆𑀲𑀬𑁄 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑀻’’𑀢𑀺.

𑀲𑁄𑀢𑀺 𑀫𑀺𑀮𑀓𑀢𑁆𑀣𑁂𑀭𑁄. 𑀯𑀺𑀳𑀸𑀭𑀦𑁆𑀢𑀺 𑀯𑀲𑀦𑀝𑁆𑀞𑀸𑀦𑀁. 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀳𑀺 𑀧𑀡𑁆𑀡𑀲𑀸𑀮𑀸𑀬 𑀣𑁂𑀭𑁄 𑀯𑀺𑀳𑀭𑀢𑀺. 𑀉𑀧𑀝𑁆𑀞𑀸𑀢𑀺 𑀏𑀓𑀮𑀓𑁆𑀔𑀡𑁂𑀦. 𑀓𑀽𑀝𑀕𑁄𑀡𑁄 𑀯𑀺𑀬 𑀕𑀫𑀦𑀯𑀻𑀣𑀺𑀁. 𑀢𑀢𑁆𑀣𑀸𑀢𑀺 𑀅𑀮𑁆𑀮𑀓𑀝𑁆𑀞𑀭𑀸𑀲𑀺𑀫𑁆𑀳𑀺. 𑀉𑀤𑀓𑀫𑀡𑀺𑀓𑀸𑀦𑀦𑁆𑀢𑀺 𑀉𑀤𑀓𑀣𑁂𑀯𑀸𑀦𑀁.

𑀅𑀢𑁆𑀢𑀦𑀺𑀬𑁂𑀯 ¶ 𑀉𑀧𑀦𑁂𑀲𑀺 𑀉𑀤𑀸𑀦𑀓𑀣𑀸𑀬 𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀭𑀺𑀧𑀼𑀡𑁆𑀡𑀸𑀦𑀁 𑀅𑀢𑁆𑀢𑀦𑀺 𑀲𑀁𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀢𑁂𑀦𑀸𑀳 ‘‘𑀉𑀝𑁆𑀞𑀸𑀦𑀯𑀢𑀸’’𑀢𑀺𑀆𑀤𑀺. 𑀅𑀬𑀜𑁆𑀳𑀺 𑀫𑀺𑀮𑀓𑀢𑁆𑀣𑁂𑀭𑁄 𑀲𑀺𑀓𑁆𑀔𑀸𑀬 𑀕𑀸𑀭𑀯𑁄 𑀲𑀧𑁆𑀧𑀢𑀺𑀲𑁆𑀲𑁄 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀧𑀽𑀭𑁂𑀦𑁆𑀢𑁄 𑀯𑀺𑀲𑀼𑀤𑁆𑀥𑀲𑀻𑀮𑁄 𑀳𑀼𑀢𑁆𑀯𑀸 𑀞𑀺𑀢𑁄, 𑀢𑀲𑁆𑀫𑀸 ‘‘𑀤𑀼𑀩𑁆𑀩𑀮𑀽𑀧𑀦𑀺𑀲𑁆𑀲𑀬𑁂’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑀪𑀕𑀯𑀸 𑀉𑀤𑀸𑀦𑁂𑀦𑁆𑀢𑁄 ‘‘𑀦𑁄 𑀘𑀲𑁆𑀲𑀁…𑀧𑁂… 𑀲𑀜𑁆𑀜𑁄𑀚𑀦𑀸𑀦𑀻’’𑀢𑀺.

𑀲𑀘𑁂 𑀅𑀳𑀁 𑀦 𑀪𑀯𑁂𑀬𑁆𑀬𑀦𑁆𑀢𑀺 𑀬𑀤𑀺 𑀅𑀳𑀁 𑀦𑀸𑀫 𑀓𑁄𑀘𑀺 𑀦 𑀪𑀯𑁂𑀬𑁆𑀬𑀁 𑀢𑀸𑀤𑀺𑀲𑀲𑁆𑀲 𑀅𑀳𑀁𑀲𑀤𑁆𑀤𑀯𑀘𑀦𑀻𑀬𑀲𑁆𑀲 𑀓𑀲𑁆𑀲𑀘𑀺 𑀅𑀢𑁆𑀣𑀲𑁆𑀲 𑀅𑀪𑀸𑀯𑀢𑁄. 𑀢𑀢𑁄 𑀏𑀯 𑀫𑀫 𑀧𑀭𑀺𑀓𑁆𑀔𑀸𑀭𑁄𑀧𑀺 𑀦 𑀪𑀯𑁂𑀬𑁆𑀬𑀢𑀲𑁆𑀲 𑀘 𑀧𑀪𑀗𑁆𑀕𑀼𑀪𑀸𑀯𑁂𑀦 𑀅𑀦𑀯𑀝𑁆𑀞𑀺𑀢𑀪𑀸𑀯𑀢𑁄. 𑀏𑀯𑀁 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀪𑀸𑀯𑁂𑀦 𑀧𑀤𑀤𑁆𑀯𑀬𑀲𑁆𑀲 𑀅𑀢𑁆𑀣𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀓𑀫𑁆𑀫𑀨𑀮𑀯𑀲𑁂𑀦 𑀯𑀢𑁆𑀢𑀼𑀁 ‘‘𑀲𑀘𑁂 𑀯𑀸 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀲𑀼𑀜𑁆𑀜𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀯𑀲𑁂𑀦 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀤𑀸𑀦𑀺 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀅𑀥𑀺𑀫𑀼𑀘𑁆𑀘𑀦𑁆𑀢𑁄𑀢𑀺 𑀏𑀤𑀺𑀲𑀁 𑀅𑀥𑀺𑀫𑀼𑀢𑁆𑀢𑀺𑀁 𑀧𑀯𑀢𑁆𑀢𑁂𑀦𑁆𑀢𑁄. 𑀯𑀺𑀪𑀯𑀺𑀲𑁆𑀲𑀢𑀻𑀢𑀺 𑀯𑀺𑀦𑀲𑁆𑀲𑀺𑀲𑁆𑀲𑀢𑀺. 𑀯𑀺𑀪𑀯𑁄 𑀳𑀺 𑀯𑀺𑀦𑀸𑀲𑁄. 𑀢𑁂𑀦𑀸𑀳 ‘‘𑀪𑀺𑀚𑁆𑀚𑀺𑀲𑁆𑀲𑀢𑀻’’𑀢𑀺. 𑀯𑀺𑀪𑀯𑀤𑀲𑁆𑀲𑀦𑀁 𑀯𑀺𑀪𑀯𑁄𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀯𑀺𑀪𑀯𑀤𑀲𑁆𑀲𑀦𑁂𑀦𑀸’’𑀢𑀺. 𑀯𑀺𑀪𑀯𑀤𑀲𑁆𑀲𑀦𑀁 𑀦𑀸𑀫 𑀅𑀘𑁆𑀘𑀦𑁆𑀢𑀸𑀬 𑀯𑀺𑀦𑀸𑀲𑀲𑁆𑀲 𑀤𑀲𑁆𑀲𑀦𑀁. 𑀢𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀁. 𑀲𑀸𑀫𑀜𑁆𑀜𑀚𑁄𑀢𑀦𑀸 𑀳𑁂𑀲𑀸 𑀯𑀺𑀲𑁂𑀲𑀦𑀺𑀝𑁆𑀞𑀸 𑀳𑁄𑀢𑀻𑀢𑀺 𑀢𑀢𑀺𑀬𑀫𑀕𑁆𑀕𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀉𑀧𑀭𑀺 𑀫𑀕𑁆𑀕𑀨𑀮𑀦𑁆𑀢𑀺 𑀅𑀕𑁆𑀕𑀫𑀕𑁆𑀕𑀨𑀮𑀁. 𑀦𑀢𑁆𑀣𑀺 𑀏𑀢𑀺𑀲𑁆𑀲𑀸 𑀚𑀸𑀢𑀺𑀬𑀸 𑀅𑀦𑁆𑀢𑀭𑀦𑁆𑀢𑀺 𑀅𑀦𑀦𑁆𑀢𑀭𑀸, 𑀅𑀦𑀦𑁆𑀢𑀭𑀸 𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑀲𑁆𑀲. 𑀕𑁄𑀢𑁆𑀭𑀪𑀽 𑀧𑀦 𑀅𑀦𑀼𑀮𑁄𑀫𑀯𑀻𑀣𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀯𑀺𑀧𑀲𑁆𑀲𑀦𑀸𑀕𑀢𑀺𑀓𑀁 𑀯𑀸 𑀲𑀺𑀬𑀸, 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁆𑀢𑀸 𑀫𑀕𑁆𑀕𑀕𑀢𑀺𑀓𑀁 𑀯𑀸𑀢𑀺 𑀦 𑀢𑁂𑀦 𑀫𑀕𑁆𑀕𑁄 𑀅𑀦𑁆𑀢𑀭𑀺𑀓𑁄 𑀦𑀸𑀫 𑀳𑁄𑀢𑀺. 𑀢𑁂𑀦𑀸𑀳 ‘‘𑀯𑀺𑀧𑀲𑁆𑀲𑀦𑀸 𑀫𑀕𑁆𑀕𑀲𑁆𑀲 𑀆𑀲𑀦𑁆𑀦𑀸𑀦𑀦𑁆𑀢𑀭𑀁 𑀦𑀸𑀫𑀸’’𑀢𑀺 ¶ . 𑀨𑀮𑀁 𑀧𑀦 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁆𑀢𑀸 𑀓𑀺𑀮𑁂𑀲𑀸𑀦𑀁 𑀧𑀚𑀳𑀦𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀮𑁄𑀓𑀼𑀢𑁆𑀢𑀭𑀪𑀸𑀯𑀢𑁄 𑀘 𑀓𑀫𑁆𑀫𑀫𑀕𑁆𑀕𑀕𑀢𑀺𑀓𑀫𑁂𑀯, 𑀓𑀼𑀲𑀮𑀯𑀺𑀧𑀸𑀓𑀪𑀸𑀯𑁂𑀦 𑀧𑀦 𑀦𑁂𑀲𑀁 𑀅𑀢𑁆𑀣𑁄 𑀧𑀪𑁂𑀤𑁄𑀢𑀺 𑀯𑀺𑀧𑀲𑁆𑀲𑀦𑀸𑀬 𑀨𑀮𑀲𑁆𑀲 𑀲𑀺𑀬𑀸 𑀅𑀦𑀦𑁆𑀢𑀭𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀨𑀮𑀲𑁆𑀲 𑀤𑀽𑀭𑀸𑀦𑀦𑁆𑀢𑀭𑀁 𑀦𑀸𑀫𑀸’’𑀢𑀺. ‘‘𑀆𑀲𑀯𑀸𑀦𑀁 𑀔𑀬𑁄’’𑀢𑀺 𑀧𑀦 𑀅𑀕𑁆𑀕𑀫𑀕𑁆𑀕𑁂 𑀯𑀼𑀘𑁆𑀘𑀫𑀸𑀦𑁂 𑀯𑀺𑀧𑀲𑁆𑀲𑀦𑀸𑀦𑀁 𑀆𑀲𑀦𑁆𑀦𑀢𑀸𑀬 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀅𑀢𑀲𑀺𑀢𑀸𑀬𑁂𑀢𑀺 𑀦 𑀢𑀲𑀺𑀢𑀩𑁆𑀩𑁂 𑀢𑀸𑀲𑀁 𑀅𑀦𑀸𑀧𑀚𑁆𑀚𑀺𑀢𑀩𑁆𑀩𑁂. 𑀢𑀸𑀲𑁄𑀢𑀺 𑀢𑀸𑀲𑀳𑁂𑀢𑀼 ‘‘𑀢𑀲𑀢𑀺 𑀏𑀢𑀲𑁆𑀫𑀸’’𑀢𑀺 𑀓𑀢𑁆𑀯𑀸. 𑀲𑁄𑀢𑀺 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄. 𑀢𑀺𑀮𑀓𑁆𑀔𑀡𑀸𑀳𑀢𑀦𑁆𑀢𑀺 𑀅𑀦𑀺𑀘𑁆𑀘𑀢𑀸𑀤𑀺𑀮𑀓𑁆𑀔𑀡𑀢𑁆𑀢𑀬𑀮𑀓𑁆𑀔𑀺𑀢𑀁. 𑀫𑀦𑀫𑁆𑀳𑀺 𑀦𑀝𑁆𑀞𑁄𑀢𑀺 𑀈𑀲𑀓𑀁 𑀦𑀝𑁆𑀞𑁄𑀫𑁆𑀳𑀺, 𑀢𑀢𑁄 𑀧𑀭𑀫𑁆𑀧𑀺 𑀢𑀢𑁆𑀣𑁂𑀯 𑀞𑀢𑁆𑀯𑀸 𑀓𑀺𑀜𑁆𑀘𑀺 𑀅𑀧𑀽𑀭𑀺𑀢𑀢𑁆𑀢𑀸 𑀏𑀯 𑀫𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀦 𑀢𑀸𑀲𑁄 𑀦𑀸𑀫 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀅𑀢𑀸𑀲𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁄 𑀳𑀺 𑀪𑀬𑀢𑀼𑀧𑀝𑁆𑀞𑀸𑀦𑀜𑀸𑀡𑁂𑀦 ‘‘𑀲𑀪𑀬𑀸 𑀲𑀗𑁆𑀔𑀸𑀭𑀸’’𑀢𑀺 𑀯𑀺𑀧𑀲𑁆𑀲𑀦𑁆𑀢𑁄 𑀦 𑀉𑀢𑁆𑀢𑀲𑀢𑀺.

𑀉𑀤𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀉𑀧𑀸𑀤𑀸𑀦𑀧𑀭𑀺𑀧𑀯𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁬. 𑀘𑀢𑀼𑀦𑁆𑀦𑀁 ¶ 𑀧𑀭𑀺𑀯𑀝𑁆𑀝𑀦𑀯𑀲𑁂𑀦𑀸𑀢𑀺 𑀧𑀘𑁆𑀘𑁂𑀓𑀓𑁆𑀔𑀦𑁆𑀥𑁂𑀲𑀼 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀧𑀭𑀺𑀯𑀝𑁆𑀝𑀦𑀯𑀲𑁂𑀦. 𑀭𑀽𑀧𑀁 𑀅𑀩𑁆𑀪𑀜𑁆𑀜𑀸𑀲𑀺𑀦𑁆𑀢𑀺 𑀲𑀓𑀮𑀪𑀽𑀢𑀼𑀧𑀸𑀤𑀸𑀭𑀽𑀧𑀁 𑀓𑀼𑀘𑁆𑀙𑀺𑀢𑀪𑀸𑀯𑀢𑁄 𑀢𑀢𑁆𑀣 𑀘 𑀢𑀼𑀘𑁆𑀙𑀯𑀺𑀧𑀮𑁆𑀮𑀸𑀲𑀢𑀸𑀬 ‘‘𑀤𑀼𑀓𑁆𑀔𑀲𑀘𑁆𑀘’’𑀦𑁆𑀢𑀺 𑀅𑀪𑀺𑀯𑀺𑀲𑀺𑀝𑁆𑀞𑁂𑀦 𑀜𑀸𑀡𑁂𑀦 𑀅𑀜𑁆𑀜𑀸𑀲𑀺𑀁 𑀧𑀝𑀺𑀯𑀺𑀚𑁆𑀛𑀺𑀁. 𑀆𑀳𑀸𑀭𑀯𑀲𑁂𑀦 𑀭𑀽𑀧𑀓𑀸𑀬𑀲𑁆𑀲 𑀳𑀸𑀦𑀺𑀯𑀼𑀤𑁆𑀥𑀸𑀤𑀻𑀦𑀁 𑀧𑀸𑀓𑀝𑀪𑀸𑀯𑀢𑁄 𑀯𑀺𑀲𑁂𑀲𑀧𑀘𑁆𑀘𑀬𑀢𑁄 𑀘 𑀢𑀲𑁆𑀲 ‘‘𑀆𑀳𑀸𑀭𑀲𑀫𑀼𑀤𑀬𑀸’’𑀢𑀺 𑀯𑀼𑀢𑁆𑀢𑀁. 𑀤𑀼𑀓𑁆𑀔𑀲𑀫𑀼𑀤𑀬𑀓𑀣𑀸 𑀦𑀸𑀫 𑀯𑀝𑁆𑀝𑀓𑀣𑀸𑀢𑀺 ‘‘𑀲𑀘𑁆𑀙𑀦𑁆𑀤𑀭𑀸𑀕𑁄’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀙𑀦𑁆𑀤𑀭𑀸𑀕𑀕𑁆𑀕𑀳𑀡𑁂𑀦 𑀘 𑀉𑀧𑀸𑀤𑀸𑀦𑀓𑀫𑁆𑀫𑀸𑀯𑀺𑀚𑁆𑀚𑀸𑀧𑀺 𑀕𑀳𑀺𑀢𑀸 𑀏𑀯. 𑀧𑀝𑀺𑀧𑀦𑁆𑀦𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀢𑁆𑀢𑀫𑀸𑀦𑀓𑀸𑀮𑀧𑁆𑀧𑀬𑁄𑀕𑁄 𑀳𑁂𑀲 𑀬𑀣𑀸 ‘‘𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺. 𑀧𑀢𑀺𑀝𑁆𑀞𑀳𑀦𑁆𑀢𑀻𑀢𑀺 𑀧𑀢𑀺𑀝𑁆𑀞𑀁 𑀮𑀪𑀦𑁆𑀢𑀺. 𑀓𑁂𑀯𑀮𑀺𑀦𑁄𑀢𑀺 𑀇𑀥 𑀯𑀺𑀫𑀼𑀢𑁆𑀢𑀺𑀕𑀼𑀡𑁂𑀦 𑀧𑀸𑀭𑀺𑀧𑀽𑀭𑀻𑀢𑀺 𑀆𑀳 ‘‘𑀲𑀓𑀮𑀺𑀦𑁄 𑀓𑀢𑀲𑀩𑁆𑀩𑀓𑀺𑀘𑁆𑀘𑀸’’𑀢𑀺. 𑀬𑁂𑀦 𑀢𑁂𑀢𑀺 𑀬𑁂𑀦 𑀅𑀯𑀲𑀺𑀝𑁆𑀞𑁂𑀦 𑀢𑁂 𑀅𑀲𑁂𑀓𑁆𑀔𑁂 𑀧𑀜𑁆𑀜𑀸𑀧𑁂𑀦𑁆𑀢𑀸 𑀧𑀜𑁆𑀜𑀸𑀧𑁂𑀬𑁆𑀬𑀼𑀁, 𑀢𑀁 𑀦𑁂𑀲𑀁 𑀯𑀝𑁆𑀝𑀁 𑀲𑁂𑀓𑁆𑀔𑀸𑀦𑀁 𑀯𑀺𑀬 𑀦𑀢𑁆𑀣𑀺 𑀧𑀜𑁆𑀜𑀸𑀧𑀦𑀸𑀬. 𑀯𑀝𑁆𑀝𑀦𑁆𑀢𑀺 𑀓𑀸𑀭𑀡𑀁 𑀯𑀝𑁆𑀝𑀦𑀝𑁆𑀞𑁂𑀦 𑀨𑀮𑀲𑁆𑀲 𑀧𑀯𑀢𑁆𑀢𑀦𑀝𑁆𑀞𑁂𑀦. 𑀅𑀲𑁂𑀓𑁆𑀔𑀪𑀽𑀫𑀺𑀯𑀸𑀭𑁄𑀢𑀺 𑀅𑀲𑁂𑀓𑁆𑀔𑀪𑀽𑀫𑀺𑀧𑁆𑀧𑀯𑀢𑁆𑀢𑀺.

𑀉𑀧𑀸𑀤𑀸𑀦𑀧𑀭𑀺𑀧𑀯𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀢𑁆𑀢𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁭. 𑀲𑀢𑁆𑀢𑀲𑀼 ¶ 𑀑𑀓𑀸𑀲𑁂𑀲𑀽𑀢𑀺 𑀭𑀽𑀧𑀧𑀚𑀸𑀦𑀦𑀸𑀤𑀻𑀲𑀼 𑀲𑀢𑁆𑀢𑀲𑀼 𑀑𑀓𑀸𑀲𑁂𑀲𑀼. 𑀯𑀼𑀲𑀺𑀢𑀯𑀸𑀲𑁄𑀢𑀺 𑀯𑀼𑀲𑀺𑀢𑀅𑀭𑀺𑀬𑀯𑀸𑀲𑁄. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀉𑀤𑁆𑀤𑁂𑀲𑁂. 𑀲𑁂𑀲𑀁 𑀦𑀸𑀫 𑀇𑀥 𑀯𑀼𑀢𑁆𑀢𑀸𑀯𑀲𑁂𑀲𑀁. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀉𑀲𑁆𑀲𑀤𑀦𑀦𑁆𑀤𑀺𑀬𑀦𑁆𑀢𑀺 𑀉𑀲𑁆𑀲𑀦𑁆𑀦𑀕𑀼𑀡𑀯𑀢𑁄 𑀢𑁄𑀲𑀦𑀁 𑀲𑀫𑁆𑀫𑁄𑀤𑀸𑀧𑀦𑀁. 𑀕𑀼𑀡𑀓𑀺𑀢𑁆𑀢𑀦𑁂𑀦 𑀧𑀮𑁄𑀪𑀦𑀻𑀬𑀁 𑀲𑁂𑀓𑁆𑀔𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀲𑀸𑀤𑀼𑀧𑁆𑀧𑀸𑀤𑀦𑁂𑀦. 𑀇𑀤𑀸𑀦𑀺 𑀯𑀼𑀢𑁆𑀢𑀫𑁂𑀯 𑀅𑀢𑁆𑀣𑀁 𑀧𑀸𑀓𑀝𑀁 𑀓𑀸𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀏𑀢𑁆𑀢𑀸𑀯𑀢𑀸𑀢𑀺 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀯𑀲𑁂𑀦 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀓𑁄𑀲𑀮𑁆𑀮𑀤𑀻𑀧𑀦𑁂𑀦 𑀏𑀢𑁆𑀢𑀓𑁂𑀦 𑀤𑁂𑀲𑀦𑀸𑀓𑁆𑀓𑀫𑁂𑀦. 𑀢𑀦𑁆𑀢𑀺 𑀆𑀭𑀫𑁆𑀫𑀡𑀁. 𑀥𑀸𑀢𑀼𑀆𑀤𑀺𑀫𑀢𑁆𑀢𑀫𑁂𑀯𑀸𑀢𑀺 𑀥𑀸𑀢𑀸𑀬𑀢𑀦𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀫𑀢𑁆𑀢𑀫𑁂𑀯. 𑀇𑀫𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀇𑀫𑁂𑀲𑀼 𑀚𑀸𑀢𑀸𑀤𑀻𑀲𑀼. 𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 𑀲𑀫𑁆𑀫𑀲𑀦𑀓𑀫𑁆𑀫𑀁 𑀦𑀺𑀝𑁆𑀞𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀫𑁂𑀢𑁆𑀣 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀯𑀲𑁂𑀦 𑀲𑀢𑁆𑀢𑀝𑁆𑀞𑀸𑀦𑀓𑁄𑀲𑀮𑁆𑀮𑀧𑀯𑀢𑁆𑀢𑀺𑀬𑀸 𑀧𑀪𑁂𑀤𑁂𑀦 𑀯𑀺𑀪𑀚𑀺𑀢𑁆𑀯𑀸 ‘‘𑀢𑀺𑀯𑀺𑀥𑀽𑀧𑀧𑀭𑀺𑀓𑁆𑀔𑀻’’𑀢𑀺 𑀤𑀲𑁆𑀲𑁂𑀢𑀺 𑀥𑀫𑁆𑀫𑀭𑀸𑀚𑀸.

𑀲𑀢𑁆𑀢𑀝𑁆𑀞𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁮. 𑀅𑀥𑀺𑀓𑀁 ¶ 𑀲𑀯𑀺𑀲𑁂𑀲𑀁 𑀧𑀬𑀲𑀢𑀺 𑀧𑀬𑀼𑀜𑁆𑀚𑀢𑀺 𑀏𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀬𑀸𑀲𑁄, 𑀯𑀺𑀲𑀺𑀝𑁆𑀞𑀧𑀬𑁄𑀕𑁄. 𑀢𑁂𑀦𑀸𑀳 ‘‘𑀅𑀥𑀺𑀓𑀧𑀬𑁄𑀕𑁄’’𑀢𑀺. 𑀇𑀫𑀜𑁆𑀳𑀺 𑀫𑀕𑁆𑀕𑀦𑁆𑀢𑀺 𑀅𑀝𑁆𑀞𑀗𑁆𑀕𑀺𑀓𑀁 𑀅𑀭𑀺𑀬𑀫𑀕𑁆𑀕𑀫𑀸𑀳. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂. 𑀅𑀯𑀢𑁆𑀢𑀫𑀸𑀦𑀝𑁆𑀞𑁂𑀦𑀸𑀢𑀺 𑀩𑀼𑀤𑁆𑀥𑀼𑀧𑁆𑀧𑀸𑀤𑀢𑁄 𑀧𑀼𑀩𑁆𑀩𑁂 𑀦 𑀯𑀢𑁆𑀢𑀫𑀸𑀦𑀪𑀸𑀯𑁂𑀦. 𑀫𑀕𑁆𑀕𑀁 𑀚𑀸𑀦𑀸𑀢𑀻𑀢𑀺 𑀲𑀫𑀼𑀤𑀸𑀕𑀫𑀢𑁄 𑀧𑀝𑁆𑀞𑀸𑀬 𑀲𑀧𑀼𑀩𑁆𑀩𑀪𑀸𑀕𑀁 𑀲𑀲𑀫𑁆𑀪𑀸𑀭𑀯𑀺𑀲𑀬𑀁 𑀲𑀨𑀮𑀁 𑀲𑀉𑀤𑁆𑀭𑀬𑀁 𑀅𑀭𑀺𑀬𑀁 𑀫𑀕𑁆𑀕𑀁 𑀚𑀸𑀦𑀸𑀢𑀺 𑀅𑀯𑀩𑀼𑀚𑁆𑀛𑀢𑀻𑀢𑀺 𑀫𑀕𑁆𑀕𑀜𑁆𑀜𑀽. 𑀯𑀺𑀤𑀺𑀢𑀦𑁆𑀢𑀺 𑀅𑀜𑁆𑀜𑁂𑀲𑀫𑁆𑀧𑀺 𑀜𑀸𑀢𑀁 𑀧𑀝𑀺𑀮𑀤𑁆𑀥𑀁 𑀳𑀢𑁆𑀣𑀢𑀮𑁂 𑀆𑀫𑀮𑀓𑀁 𑀯𑀺𑀬 𑀧𑀸𑀓𑀝𑀁 𑀅𑀓𑀸𑀲𑀺, 𑀢𑀣𑀸 𑀓𑀢𑁆𑀯𑀸 𑀤𑁂𑀲𑁂𑀲𑀺. 𑀅𑀫𑀕𑁆𑀕𑁂 𑀧𑀭𑀺𑀯𑀚𑁆𑀚𑀦𑁂𑀦 𑀫𑀕𑁆𑀕𑁂 𑀧𑀝𑀺𑀧𑀢𑁆𑀢𑀻𑀢𑀺 𑀢𑀲𑁆𑀲 𑀫𑀕𑁆𑀕𑀓𑀼𑀲𑀮𑀢𑀸 𑀯𑀺𑀬 𑀅𑀫𑀕𑁆𑀕𑀓𑀼𑀲𑀮𑀢𑀸𑀧𑀺 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀫𑀕𑁆𑀕𑁂 𑀘 𑀅𑀫𑀕𑁆𑀕𑁂 𑀘 𑀓𑁄𑀯𑀺𑀤𑁄’’𑀢𑀺. 𑀅𑀳𑀁 𑀧𑀞𑀫𑀁 𑀕𑀢𑁄𑀢𑀺 𑀅𑀳𑀁 𑀧𑀞𑀫𑀫𑀕𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑁄.

𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀦𑀢𑁆𑀢𑀮𑀓𑁆𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁯. 𑀧𑀼𑀭𑀸𑀡𑀼𑀧𑀝𑁆𑀞𑀸𑀓𑁂𑀢𑀺 ¶ 𑀧𑀼𑀩𑁆𑀩𑁂 𑀧𑀥𑀸𑀦𑀧𑀤𑀳𑀦𑀓𑀸𑀮𑁂 𑀉𑀧𑀝𑁆𑀞𑀸𑀓𑀪𑀽𑀢𑁂. ‘‘𑀅𑀯𑀲𑀯𑀢𑁆𑀢𑀦𑀝𑁆𑀞𑁂𑀦 𑀅𑀲𑁆𑀲𑀸𑀫𑀺𑀓𑀝𑁆𑀞𑁂𑀦 𑀲𑀼𑀜𑁆𑀜𑀢𑀝𑁆𑀞𑁂𑀦 𑀅𑀢𑁆𑀢𑀧𑀝𑀺𑀓𑁆𑀔𑁂𑀧𑀝𑁆𑀞𑁂𑀦𑀸’’𑀢𑀺 𑀏𑀯𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑁂𑀳𑀺. 𑀏𑀢𑁆𑀢𑀓𑁂𑀦 𑀞𑀸𑀦𑁂𑀦𑀸𑀢𑀺 ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀢𑁆𑀢𑀸’’𑀢𑀺 𑀆𑀭𑀪𑀺𑀢𑁆𑀯𑀸 𑀬𑀸𑀯 ‘‘𑀏𑀯𑀁 𑀫𑁂 𑀯𑀺𑀜𑁆𑀜𑀸𑀡𑀁 𑀫𑀸 𑀅𑀳𑁄𑀲𑀻’’𑀢𑀺 𑀏𑀢𑁆𑀢𑀓𑁂𑀦 𑀲𑀼𑀢𑁆𑀢𑀧𑀤𑁂𑀲𑁂𑀦. 𑀅𑀓𑀣𑀺𑀢𑀲𑁆𑀲𑁂𑀯 𑀓𑀣𑀦𑀁 𑀉𑀢𑁆𑀢𑀭𑀁, 𑀦 𑀓𑀣𑀺𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 ‘‘𑀢𑀸𑀦𑀺 𑀤𑀲𑁆𑀲𑁂𑀢𑁆𑀯𑀸’’𑀢𑀺. 𑀲𑀫𑁄𑀥𑀸𑀦𑁂𑀢𑁆𑀯𑀸𑀢𑀺 𑀲𑀫𑁆𑀧𑀺𑀡𑁆𑀟𑀺𑀢𑁆𑀯𑀸. 𑀯𑀺𑀢𑁆𑀣𑀸𑀭𑀓𑀣𑀸𑀢𑀺 𑀯𑀺𑀢𑁆𑀣𑀸𑀭𑀢𑁄 𑀅𑀝𑁆𑀞𑀓𑀣𑀸. 𑀅𑀦𑀢𑁆𑀢𑀮𑀓𑁆𑀔𑀡𑀫𑁂𑀯𑀸𑀢𑀺 𑀢𑀩𑁆𑀩𑀳𑀼𑀮𑀢𑀸𑀬 𑀢𑀧𑁆𑀧𑀥𑀸𑀦𑀢𑀸𑀬 𑀘 𑀯𑀼𑀢𑁆𑀢𑀁. 𑀅𑀦𑀺𑀘𑁆𑀘𑀢𑀸𑀤𑀻𑀦𑀫𑁆𑀧𑀺 𑀳𑀺 𑀢𑀢𑁆𑀣 𑀢𑀁𑀤𑀻𑀧𑀦𑀢𑁆𑀣𑀫𑁂𑀯 𑀯𑀼𑀢𑁆𑀢𑀢𑁆𑀢𑀸 𑀢𑀤𑁂𑀯 𑀚𑁂𑀝𑁆𑀞𑀁 𑀧𑀥𑀸𑀦𑀁 𑀢𑀣𑀸 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀢𑁄.

𑀅𑀦𑀢𑁆𑀢𑀮𑀓𑁆𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀫𑀳𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁦. 𑀏𑀓𑀦𑁆𑀢𑀤𑀼𑀓𑁆𑀔𑀦𑁆𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀯𑀼𑀢𑁆𑀢𑀦𑀬𑀸𑀦𑁂𑀯, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀬𑀣𑀸 𑀲𑀭𑀸𑀕𑁄 𑀳𑁂𑀢𑀼 𑀧𑀘𑁆𑀘𑀬𑁄 𑀲𑀁𑀓𑀺𑀮𑁂𑀲𑀸𑀬, 𑀏𑀯𑀁 𑀲𑀯𑀺𑀧𑀲𑁆𑀲𑀦𑁄 𑀫𑀕𑁆𑀕𑁄 𑀳𑁂𑀢𑀼 𑀧𑀘𑁆𑀘𑀬𑁄 𑀘 𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀫𑀳𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀆𑀤𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁧. 𑀏𑀓𑀸𑀤𑀲𑀳𑀻𑀢𑀺 ¶ 𑀭𑀸𑀕𑀸𑀤𑀻𑀳𑀺 𑀉𑀧𑀸𑀬𑀸𑀲𑀧𑀭𑀺𑀬𑁄𑀲𑀸𑀦𑁂𑀳𑀺 𑀏𑀓𑀸𑀤𑀲𑀳𑀺 𑀲𑀦𑁆𑀢𑀸𑀧𑀦𑀝𑁆𑀞𑁂𑀦 𑀅𑀕𑁆𑀕𑀻𑀳𑀺. 𑀤𑁆𑀯𑀻𑀲𑀽𑀢𑀺 𑀅𑀝𑁆𑀞𑀫𑀦𑀯𑀫𑁂𑀲𑀼. 𑀤𑀼𑀓𑁆𑀔𑀮𑀓𑁆𑀔𑀡𑀫𑁂𑀯𑀸𑀢𑀺 𑀢𑀩𑁆𑀩𑀳𑀼𑀮𑀢𑀸𑀬 𑀢𑀧𑁆𑀧𑀥𑀸𑀦𑀢𑀸𑀬 𑀘 𑀯𑀼𑀢𑁆𑀢𑀁.

𑀆𑀤𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀦𑀺𑀭𑀼𑀢𑁆𑀢𑀺𑀧𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁨. 𑀦𑀺𑀭𑀼𑀢𑁆𑀢𑀺𑀬𑁄𑀯 𑀦𑀺𑀭𑀼𑀢𑁆𑀢𑀺𑀧𑀣𑀸𑀢𑀺 𑀧𑀣-𑀲𑀤𑁆𑀤𑁂𑀦 𑀧𑀤𑀯𑀟𑁆𑀠𑀦𑀫𑀸𑀳 𑀬𑀣𑀸 ‘‘𑀩𑀻𑀚𑀸𑀦𑀺𑀬𑁂𑀯 𑀩𑀻𑀚𑀚𑀸𑀢𑀸𑀦𑀻’’𑀢𑀺. 𑀦𑀺𑀭𑀼𑀢𑁆𑀢𑀺𑀯𑀲𑁂𑀦𑀸𑀢𑀺 𑀦𑀺𑀩𑁆𑀩𑀘𑀦𑀯𑀲𑁂𑀦. 𑀧𑀣𑀸 𑀘 𑀅𑀢𑁆𑀣𑀸𑀦𑀼𑀭𑀽𑀧𑀪𑀸𑀯𑀢𑁄 ¶ . 𑀢𑀻𑀡𑀺𑀧𑀻𑀢𑀺 𑀦𑀺𑀭𑀼𑀢𑁆𑀢𑀺𑀅𑀥𑀺𑀯𑀘𑀦𑀧𑀜𑁆𑀜𑀢𑁆𑀢𑀺𑀧𑀣𑀧𑀤𑀸𑀦𑀺. 𑀢𑀣𑀸 𑀳𑀺 ‘‘𑀨𑀼𑀲𑀢𑀻𑀢𑀺 𑀨𑀲𑁆𑀲𑁄’’𑀢𑀺𑀆𑀤𑀺𑀦𑀸 𑀦𑀻𑀳𑀭𑀺𑀢𑁆𑀯𑀸 𑀯𑀘𑀦𑀁 𑀦𑀺𑀭𑀼𑀢𑁆𑀢𑀺, ‘‘𑀲𑀺𑀭𑀻𑀯𑀟𑁆𑀠𑀓𑁄 𑀥𑀦𑀯𑀟𑁆𑀠𑀓𑁄’’𑀢𑀺𑀆𑀤𑀺𑀦𑀸 𑀯𑀘𑀦𑀫𑀢𑁆𑀢𑀫𑁂𑀯 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀧𑀯𑀢𑁆𑀢𑀁 𑀅𑀥𑀺𑀯𑀘𑀦𑀁, ‘‘𑀢𑀓𑁆𑀓𑁄 𑀯𑀺𑀢𑀓𑁆𑀓𑁄’’𑀢𑀺𑀆𑀤𑀺𑀦𑀸 𑀢𑀁𑀢𑀁𑀧𑀓𑀸𑀭𑁂𑀦 𑀜𑀸𑀧𑀦𑀢𑁄 𑀧𑀜𑁆𑀜𑀢𑁆𑀢𑀺. 𑀅𑀣 𑀯𑀸 𑀢𑀁𑀢𑀁𑀅𑀢𑁆𑀣𑀧𑁆𑀧𑀓𑀸𑀲𑀦𑁂𑀦 𑀦𑀺𑀘𑁆𑀙𑀺𑀢𑀁, 𑀦𑀺𑀬𑀢𑀁 𑀯𑀸 𑀯𑀘𑀦𑀁 𑀦𑀺𑀭𑀼𑀢𑁆𑀢𑀺. 𑀅𑀥𑀺-𑀲𑀤𑁆𑀤𑁄 𑀉𑀧𑀭𑀺𑀪𑀸𑀕𑁂, 𑀉𑀧𑀭𑀺 𑀯𑀘𑀦𑀁 𑀅𑀥𑀺𑀯𑀘𑀦𑀁. 𑀓𑀲𑁆𑀲 𑀉𑀧𑀭𑀺? 𑀧𑀓𑀸𑀲𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲𑀸𑀢𑀺 𑀧𑀸𑀓𑀝𑁄𑀬𑀫𑀢𑁆𑀣𑁄. 𑀅𑀥𑀻𑀦𑀁 𑀯𑀘𑀦𑀁 𑀅𑀥𑀺𑀯𑀘𑀦𑀁. 𑀓𑁂𑀦 𑀅𑀥𑀻𑀦𑀁? 𑀅𑀢𑁆𑀣𑁂𑀦. 𑀅𑀢𑁆𑀣𑀲𑁆𑀲 𑀧𑀜𑁆𑀜𑀸𑀧𑀦𑀢𑁆𑀣𑁂𑀦 𑀧𑀜𑁆𑀜𑀢𑁆𑀢𑀻𑀢𑀺 𑀏𑀯𑀁 𑀦𑀺𑀭𑀼𑀢𑁆𑀢𑀺𑀆𑀤𑀺𑀧𑀤𑀸𑀦𑀁 𑀲𑀩𑁆𑀩𑀯𑀘𑀦𑁂𑀲𑀼 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀜𑁆𑀜𑀣𑀸 ‘‘𑀨𑀼𑀲𑀢𑀻𑀢𑀺 𑀨𑀲𑁆𑀲𑁄’’𑀢𑀺𑀆𑀤𑀺𑀧𑁆𑀧𑀓𑀸𑀭𑁂𑀦 𑀦𑀺𑀤𑁆𑀥𑀸𑀭𑀡𑀯𑀘𑀦𑀸𑀦𑀁𑀬𑁂𑀯 𑀦𑀺𑀭𑀼𑀢𑁆𑀢𑀺𑀢𑀸, 𑀲𑀺𑀭𑀺𑀯𑀟𑁆𑀠𑀓𑀥𑀦𑀯𑀟𑁆𑀠𑀓𑀧𑀓𑀸𑀭𑀸𑀦𑀫𑁂𑀯 𑀅𑀪𑀺𑀮𑀸𑀧𑀦𑀁 𑀅𑀥𑀺𑀯𑀘𑀦𑀢𑀸. ‘‘𑀢𑀓𑁆𑀓𑁄 𑀯𑀺𑀢𑀓𑁆𑀓𑁄’’𑀢𑀺 𑀏𑀯𑀁𑀧𑀓𑀸𑀭𑀸𑀦𑀫𑁂𑀯 𑀏𑀓𑀫𑁂𑀯 𑀅𑀢𑁆𑀣𑀁 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀜𑀸𑀧𑁂𑀦𑁆𑀢𑀸𑀦𑀁 𑀯𑀘𑀦𑀸𑀦𑀁 𑀧𑀜𑁆𑀜𑀢𑁆𑀢𑀺𑀢𑀸 𑀘 𑀆𑀧𑀚𑁆𑀚𑁂𑀬𑁆𑀬. 𑀅𑀲𑀁𑀓𑀺𑀡𑁆𑀡𑀸𑀢𑀺 𑀦 𑀲𑀁𑀓𑀺𑀡𑁆𑀡𑀸. 𑀢𑁂𑀦𑀸𑀳 ‘‘𑀅𑀯𑀺𑀚𑀳𑀺𑀢𑀸…𑀧𑁂… 𑀅𑀙𑀟𑁆𑀟𑀺𑀢𑀸’’𑀢𑀺. 𑀦 𑀲𑀁𑀓𑀻𑀬𑀦𑁆𑀢𑀻𑀢𑀺 𑀦 𑀲𑀁𑀓𑀺𑀭𑀻𑀬𑀦𑁆𑀢𑀺, 𑀦 𑀲𑀁𑀓𑀻𑀬𑀺𑀲𑁆𑀲𑀦𑁆𑀢𑀺 𑀦 𑀲𑀁𑀓𑀺𑀭𑀻𑀬𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀝𑀺𑀓𑀼𑀝𑁆𑀞𑀸𑀢𑀺 𑀦 𑀧𑀝𑀺𑀓𑁆𑀔𑀺𑀢𑁆𑀢𑀸. 𑀬𑀲𑁆𑀫𑀸 𑀪𑀗𑁆𑀕𑀁 𑀅𑀢𑀺𑀓𑁆𑀓𑀦𑁆𑀢𑀁 𑀉𑀧𑁆𑀧𑀸𑀤𑀸𑀤𑀺 𑀅𑀢𑀺𑀓𑁆𑀓𑀦𑁆𑀢𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀪𑀗𑁆𑀕𑀫𑁂𑀯𑀸’’𑀢𑀺. 𑀬𑀲𑁆𑀫𑀸 𑀤𑁂𑀲𑀦𑁆𑀢𑀭𑀁 𑀲𑀗𑁆𑀓𑀦𑁆𑀢𑁄𑀧𑀺 𑀅𑀢𑀺𑀓𑁆𑀓𑀦𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀢𑀤𑀸𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀤𑁂𑀲𑀦𑁆𑀢𑀭𑀁 𑀅𑀲𑀗𑁆𑀓𑀫𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀬𑀢𑁆𑀣 𑀬𑀢𑁆𑀣 𑀳𑀺 𑀲𑀗𑁆𑀔𑀸𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀪𑀺𑀚𑁆𑀚𑀦𑁆𑀢𑀺 𑀦𑀺𑀭𑀼𑀚𑁆𑀛𑀦𑁆𑀢𑀺 𑀯𑀺𑀧𑀭𑀺𑀡𑀫𑀦𑁆𑀢𑀺 𑀯𑀺𑀦𑀸𑀲𑀁 𑀆𑀧𑀚𑁆𑀚𑀦𑁆𑀢𑀺. 𑀢𑁂𑀦𑀸𑀳 ‘‘𑀯𑀺𑀧𑀭𑀺𑀡𑀢𑀦𑁆𑀢𑀺…𑀧𑁂… 𑀦𑀝𑁆𑀞’’𑀦𑁆𑀢𑀺. 𑀅𑀧𑀸𑀓𑀝𑀻𑀪𑀽𑀢𑀁 𑀅𑀚𑀸𑀢𑀢𑁆𑀢𑀸 𑀏𑀯.

𑀯𑀲𑀪𑀡𑀕𑁄𑀢𑁆𑀢𑀢𑀸𑀬 𑀯𑀲𑁆𑀲𑀪𑀜𑁆𑀜𑀸. 𑀫𑀽𑀮𑀤𑀺𑀝𑁆𑀞𑀺𑀕𑀢𑀺𑀓𑀸𑀢𑀺 𑀫𑀽𑀮𑀪𑀽𑀢𑀸 𑀤𑀺𑀝𑁆𑀞𑀺𑀕𑀢𑀺𑀓𑀸, 𑀇𑀫𑀲𑁆𑀫𑀺𑀁 𑀓𑀧𑁆𑀧𑁂 𑀲𑀩𑁆𑀩𑀧𑀞𑀫𑀁 𑀢𑀸𑀤𑀺𑀲𑀤𑀺𑀝𑁆𑀞𑀺𑀲𑀫𑀼𑀧𑁆𑀧𑀸𑀤𑀓𑀸. 𑀧𑀼𑀦𑀧𑁆𑀧𑀼𑀦𑀁 𑀆𑀯𑀚𑁆𑀚𑁂𑀦𑁆𑀢𑀲𑁆𑀲𑀸𑀢𑀺 𑀅𑀳𑁂𑀢𑀼𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀕𑀦𑁆𑀣𑀁 𑀉𑀕𑁆𑀕𑀳𑁂𑀢𑁆𑀯𑀸 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀢𑀤𑀢𑁆𑀣𑀁 𑀯𑀻𑀫𑀁𑀲𑀦𑁆𑀢𑀲𑁆𑀲 ‘‘𑀦𑀢𑁆𑀣𑀺 𑀳𑁂𑀢𑀼, 𑀦𑀢𑁆𑀣𑀺 𑀧𑀘𑁆𑀘𑀬𑁄 𑀲𑀢𑁆𑀢𑀸𑀦𑀁 𑀲𑀁𑀓𑀺𑀮𑁂𑀲𑀸𑀬𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀸𑀬 ¶ 𑀮𑀤𑁆𑀥𑀺𑀬𑀸 𑀆𑀭𑀫𑁆𑀫𑀡𑁂 𑀫𑀺𑀘𑁆𑀙𑀸𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀺, ‘‘𑀦𑀢𑁆𑀣𑀺 𑀳𑁂𑀢𑀽’’𑀢𑀺𑀆𑀤𑀺𑀯𑀲𑁂𑀦 𑀅𑀦𑀼𑀲𑁆𑀲𑀯𑀽𑀧𑀮𑀤𑁆𑀥𑁂 𑀅𑀢𑁆𑀣𑁂 𑀢𑀤𑀸𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑀦𑁂𑀳𑀺 𑀲𑀯𑀺𑀕𑁆𑀕𑀳𑁂 𑀯𑀺𑀬 𑀲𑀭𑀽𑀧𑀢𑁄 𑀘𑀺𑀢𑁆𑀢𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀘𑀺𑀭𑀓𑀸𑀮𑀧𑀭𑀺𑀘𑀬𑁂𑀦 ‘‘𑀏𑀯𑀫𑁂𑀢’’𑀦𑁆𑀢𑀺 𑀦𑀺𑀚𑁆𑀛𑀸𑀦𑀓𑁆𑀔𑀫𑀪𑀸𑀯𑀽𑀧𑀕𑀫𑀦𑁂𑀦 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀢𑀣𑀸𑀕𑀳𑀺𑀢𑁂 𑀧𑀼𑀦𑀧𑁆𑀧𑀼𑀦𑀁 𑀢𑀣𑁂𑀯 𑀆𑀲𑁂𑀯𑀦𑁆𑀢𑀲𑁆𑀲 𑀩𑀳𑀼𑀮𑀻𑀓𑀭𑁄𑀦𑁆𑀢𑀲𑁆𑀲 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑁂𑀦 𑀲𑀫𑀸𑀤𑀺𑀬𑀫𑀸𑀦𑀸 𑀫𑀺𑀘𑁆𑀙𑀸𑀯𑀸𑀬𑀸𑀫𑀽𑀧𑀢𑁆𑀣𑀫𑁆𑀪𑀺𑀢𑀸 𑀅𑀢𑀁𑀲𑀪𑀸𑀯𑀁 ‘‘𑀢𑀁𑀲𑀪𑀸𑀯’’𑀦𑁆𑀢𑀺 ¶ 𑀕𑀡𑁆𑀳𑀦𑁆𑀢𑀻 𑀫𑀺𑀘𑁆𑀙𑀸𑀲𑀢𑀻𑀢𑀺 𑀮𑀤𑁆𑀥𑀦𑀸𑀫𑀸 𑀢𑀁𑀮𑀤𑁆𑀥𑀺𑀲𑀳𑀕𑀢𑀸 𑀢𑀡𑁆𑀳𑀸 𑀲𑀦𑁆𑀢𑀺𑀝𑁆𑀞𑀢𑀺. 𑀬𑀣𑀸𑀲𑀓𑀁 𑀯𑀺𑀢𑀓𑁆𑀓𑀸𑀤𑀺𑀧𑀘𑁆𑀘𑀬𑀮𑀸𑀪𑁂𑀦 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀅𑀥𑀺𑀝𑁆𑀞𑀺𑀢𑀢𑀸𑀬 𑀅𑀦𑁂𑀓𑀕𑁆𑀕𑀢𑀁 𑀧𑀳𑀸𑀬 𑀘𑀺𑀢𑁆𑀢𑀁 𑀏𑀓𑀕𑁆𑀕𑀢𑀁 𑀅𑀧𑁆𑀧𑀺𑀢𑀁 𑀯𑀺𑀬 𑀳𑁄𑀢𑀺 𑀫𑀺𑀘𑁆𑀙𑀸𑀲𑀫𑀸𑀥𑀺𑀦𑀸. 𑀲𑁄𑀧𑀺 𑀳𑀺 𑀧𑀘𑁆𑀘𑀬𑀯𑀺𑀲𑁂𑀲𑁂𑀳𑀺 𑀮𑀤𑁆𑀥𑀪𑀸𑀯𑀦𑀸𑀩𑀮𑁄 𑀈𑀤𑀺𑀲𑁂 𑀞𑀸𑀦𑁂 𑀲𑀫𑀸𑀥𑀸𑀦𑀧𑀢𑀺𑀭𑀽𑀧𑀓𑀺𑀘𑁆𑀘𑀓𑀭𑁄 𑀳𑁄𑀢𑀺𑀬𑁂𑀯 𑀯𑀸𑀮𑀯𑀺𑀚𑁆𑀛𑀦𑀸𑀤𑀻𑀲𑀼 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀢𑁂𑀦𑀸𑀓𑀸𑀭𑁂𑀦 𑀧𑀼𑀩𑁆𑀩𑀪𑀸𑀕𑀺𑀬𑁂𑀲𑀼 𑀚𑀯𑀦𑀯𑀸𑀭𑁂𑀲𑀼 𑀧𑀯𑀢𑁆𑀢𑁂𑀲𑀼 𑀲𑀩𑁆𑀩𑀧𑀘𑁆𑀙𑀺𑀫𑁂 𑀚𑀯𑀦𑀯𑀸𑀭𑁂 𑀲𑀢𑁆𑀢 𑀚𑀯𑀦𑀸𑀦𑀺 𑀚𑀯𑀦𑁆𑀢𑀺. 𑀢𑀢𑁆𑀣 𑀧𑀞𑀫𑁂 𑀲𑀢𑁂𑀓𑀺𑀘𑁆𑀙𑁄 𑀳𑁄𑀢𑀺, 𑀢𑀣𑀸 𑀤𑀼𑀢𑀺𑀬𑀸𑀤𑀻𑀲𑀼. 𑀲𑀢𑁆𑀢𑀫𑁂 𑀧𑀦 𑀚𑀯𑀦𑁂 𑀲𑀫𑁆𑀧𑀢𑁆𑀢𑁂 𑀅𑀢𑁂𑀓𑀺𑀘𑁆𑀙𑁄 𑀳𑁄𑀢𑀺. 𑀢𑁂𑀦𑀸𑀳 ‘‘𑀅𑀲𑁆𑀲𑀸𑀤𑁂𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺. 𑀇𑀫𑁂𑀲𑀼𑀧𑀻𑀢𑀺 𑀤𑁆𑀯𑀻𑀲𑀼𑀧𑀺 𑀞𑀸𑀦𑁂𑀲𑀼.

𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀯𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. 𑀢𑁂𑀦 ‘‘𑀬𑀤𑁂𑀢𑀁 𑀅𑀦𑀸𑀕𑀢𑀁 𑀦𑀸𑀫, 𑀦𑀬𑀺𑀤𑀁 𑀅𑀦𑀸𑀕𑀢’’𑀦𑁆𑀢𑀺𑀆𑀤𑀺𑀓𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀧𑀻𑀢𑀺 𑀢𑁂 𑀯𑀲𑁆𑀲𑀪𑀜𑁆𑀜𑀸𑀧𑀺 𑀦 𑀫𑀜𑁆𑀜𑀺𑀁𑀲𑀼 𑀮𑁄𑀓𑀲𑀫𑀜𑁆𑀜𑀸𑀬 𑀅𑀦𑀢𑀺𑀓𑁆𑀓𑀫𑀦𑀻𑀬𑀢𑁄. 𑀢𑁂𑀦𑀸𑀳 ‘‘𑀅𑀢𑀻𑀢𑀁 𑀧𑀦𑀸’’𑀢𑀺𑀆𑀤𑀺. 𑀔𑀦𑁆𑀥𑀸𑀦𑀁 𑀉𑀧𑀭𑀺 𑀦𑀺𑀭𑀼𑀴𑁆𑀳𑀸 𑀧𑀡𑁆𑀡𑀢𑁆𑀢𑀺.

𑀦𑀺𑀭𑀼𑀢𑁆𑀢𑀺𑀧𑀣𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀭𑀳𑀦𑁆𑀢𑀯𑀕𑁆𑀕𑁄

𑁧. 𑀉𑀧𑀸𑀤𑀺𑀬𑀫𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁩. 𑀕𑀡𑁆𑀳𑀫𑀸𑀦𑁄𑀢𑀺 ‘‘𑀏𑀢𑀁 𑀫𑀫𑀸’’𑀢𑀺𑀆𑀤𑀺𑀦𑀸 𑀕𑀡𑁆𑀳𑀫𑀸𑀦𑁄. 𑀧𑀸𑀲𑁂𑀦𑀸𑀢𑀺 𑀭𑀸𑀕𑀧𑀸𑀲𑁂𑀦. 𑀢𑀜𑁆𑀳𑀺 𑀫𑀸𑀭𑁄 𑀫𑀸𑀭𑀧𑀸𑀲𑁄𑀢𑀺 𑀫𑀜𑁆𑀜𑀢𑀺. 𑀢𑁂𑀦𑀸𑀳 ‘‘𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀧𑀸𑀲𑁄, 𑀬𑁆𑀯𑀸𑀬𑀁 𑀘𑀭𑀢𑀺 𑀫𑀸𑀦𑀲𑁄’’𑀢𑀺 (𑀲𑀁. 𑀦𑀺. 𑁧.𑁧𑁫𑁧; 𑀫𑀳𑀸𑀯. 𑁩𑁩). 𑀫𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺 𑀅𑀦𑀼𑀧𑀸𑀤𑀺𑀬𑀢𑁄 𑀲𑀩𑁆𑀩𑀲𑁄 𑀔𑀦𑁆𑀥𑀲𑁆𑀲 𑀅𑀪𑀸𑀯𑀢𑁄.

𑀉𑀧𑀸𑀤𑀺𑀬𑀫𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨-𑁬. 𑀫𑀜𑁆𑀜𑀫𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁬𑁪-𑁬𑁮. ‘‘𑀏𑀢𑀁 ¶ ¶ 𑀫𑀫𑀸’’𑀢𑀺𑀆𑀤𑀺𑀦𑀸. 𑀫𑀜𑁆𑀜𑀦𑀸 𑀅𑀪𑀺𑀦𑀦𑁆𑀤𑀦𑀸 𑀘. 𑀢𑀡𑁆𑀳𑀸𑀙𑀦𑁆𑀤𑁄𑀢𑀺 𑀢𑀡𑁆𑀳𑀸 𑀏𑀯 𑀙𑀦𑁆𑀤𑁄. 𑀲𑀸 𑀳𑀺 𑀢𑀡𑁆𑀳𑀸𑀬𑀦𑀝𑁆𑀞𑁂𑀦 𑀢𑀡𑁆𑀳𑀸, 𑀙𑀦𑁆𑀤𑀺𑀓𑀢𑀝𑁆𑀞𑁂𑀦 𑀙𑀦𑁆𑀤𑁄. 𑀘𑀢𑀼𑀢𑁆𑀣𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀫𑀼𑀔𑁂𑀦 𑀯𑀼𑀢𑁆𑀢𑀁, 𑀧𑀜𑁆𑀘𑀫𑀁 𑀤𑀼𑀓𑁆𑀔𑀮𑀓𑁆𑀔𑀡𑀫𑀼𑀔𑁂𑀦, 𑀙𑀝𑁆𑀞𑀁 𑀅𑀦𑀢𑁆𑀢𑀮𑀓𑁆𑀔𑀡𑀫𑀼𑀔𑁂𑀦. 𑀲𑁂𑀲𑀁 𑀢𑀻𑀲𑀼𑀧𑀺 𑀲𑀤𑀺𑀲𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀏𑀲𑁂𑀯 𑀦𑀬𑁄’’𑀢𑀺.

𑀫𑀜𑁆𑀜𑀫𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀦𑀢𑁆𑀢𑀦𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁯. 𑀅𑀦𑀢𑁆𑀢𑀦𑀺𑀬𑀦𑁆𑀢𑀺 𑀦 𑀅𑀢𑁆𑀢𑀦𑀺𑀬𑀁. 𑀢𑁂𑀦𑀸𑀳 ‘‘𑀦 𑀅𑀢𑁆𑀢𑀦𑁄 𑀲𑀦𑁆𑀢𑀓’’𑀦𑁆𑀢𑀺.

𑀅𑀦𑀢𑁆𑀢𑀦𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮-𑁧𑁦. 𑀭𑀚𑀦𑀻𑀬𑀲𑀡𑁆𑀞𑀺𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁦-𑁭𑁨. 𑀭𑀚𑀦𑀻𑀬𑁂𑀦𑀸𑀢𑀺 𑀭𑀚𑀦𑀻𑀬𑁂𑀦 𑀭𑀸𑀕𑀼𑀧𑁆𑀧𑀸𑀤𑀓𑁂𑀦. 𑀢𑁂𑀦𑀸𑀳 ‘‘𑀭𑀸𑀕𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦𑀸’’𑀢𑀺. 𑀭𑀸𑀳𑀼𑀮𑀲𑀁𑀬𑀼𑀢𑁆𑀢𑁂 𑀭𑀸𑀳𑀼𑀮𑀢𑁆𑀣𑁂𑀭𑀲𑁆𑀲 𑀧𑀼𑀘𑁆𑀙𑀸𑀯𑀲𑁂𑀦 𑀆𑀕𑀢𑀸. 𑀇𑀥 𑀭𑀸𑀥𑀢𑁆𑀣𑁂𑀭𑀲𑁆𑀲 𑀲𑀼𑀭𑀸𑀥𑀢𑁆𑀣𑁂𑀭𑀲𑁆𑀲 𑀘 𑀧𑀼𑀘𑁆𑀙𑀸𑀯𑀲𑁂𑀦, 𑀧𑀸𑀴𑀺 𑀧𑀦 𑀲𑀩𑁆𑀩𑀢𑁆𑀣 𑀲𑀤𑀺𑀲𑀸. 𑀢𑁂𑀦𑀸𑀳 ‘‘𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀻’’𑀢𑀺.

𑀭𑀚𑀦𑀻𑀬𑀲𑀡𑁆𑀞𑀺𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀭𑀳𑀦𑁆𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀔𑀚𑁆𑀚𑀦𑀻𑀬𑀯𑀕𑁆𑀕𑁄

𑁧-𑁩. 𑀅𑀲𑁆𑀲𑀸𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁩-𑁭𑁫. 𑀘𑀢𑀼𑀲𑀘𑁆𑀘𑀫𑁂𑀯 𑀓𑀣𑀺𑀢𑀁 𑀅𑀲𑁆𑀲𑀸𑀤𑀸𑀤𑀻𑀦𑀜𑁆𑀘𑁂𑀯 𑀲𑀫𑀼𑀤𑀬𑀸𑀤𑀻𑀦𑀜𑁆𑀘 𑀯𑀲𑁂𑀦 𑀤𑁂𑀲𑀦𑀸𑀬 𑀧𑀯𑀢𑁆𑀢𑀢𑁆𑀢𑀸. 𑀬𑀲𑁆𑀫𑀸 𑀅𑀲𑁆𑀲𑀸𑀤𑁄 𑀲𑀫𑀼𑀤𑀬𑀲𑀘𑁆𑀘𑀁, 𑀆𑀤𑀻𑀦𑀯𑁄 𑀤𑀼𑀓𑁆𑀔𑀲𑀘𑁆𑀘𑀁, 𑀦𑀺𑀲𑁆𑀲𑀭𑀡𑀁 𑀫𑀕𑁆𑀕𑀲𑀘𑁆𑀘𑀁 𑀦𑀺𑀭𑁄𑀥𑀲𑀘𑁆𑀘𑀜𑁆𑀘𑀸𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄; 𑀤𑀼𑀢𑀺𑀬𑁂 𑀲𑀫𑀼𑀤𑀬𑀲𑁆𑀲𑀸𑀤𑁄 ¶ 𑀲𑀫𑀼𑀤𑀬𑀲𑀘𑁆𑀘𑀁, 𑀆𑀤𑀻𑀦𑀯𑁄 𑀤𑀼𑀓𑁆𑀔𑀲𑀘𑁆𑀘𑀁, 𑀅𑀢𑁆𑀣𑀗𑁆𑀕𑀫𑁄 ¶ 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀲𑁆𑀲𑀭𑀡𑀁 𑀫𑀕𑁆𑀕𑀲𑀘𑁆𑀘𑀦𑁆𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄; 𑀢𑀢𑀺𑀬𑀁 𑀅𑀭𑀺𑀬𑀲𑀸𑀯𑀓𑀲𑁆𑀲𑁂𑀯 𑀯𑀲𑁂𑀦 𑀯𑀼𑀢𑁆𑀢𑀁.

𑀅𑀲𑁆𑀲𑀸𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀭𑀳𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁬. 𑀬𑀢𑁆𑀢𑀓𑀸 𑀲𑀢𑁆𑀢𑀸𑀯𑀸𑀲𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀢𑁆𑀢𑀦𑀺𑀓𑀸𑀬𑁂 𑀆𑀯𑀲𑀦𑀝𑁆𑀞𑁂𑀦 𑀲𑀢𑁆𑀢𑀸 𑀏𑀯 𑀲𑀢𑁆𑀢𑀸𑀯𑀸𑀲𑀸. 𑀢𑁂𑀦 𑀬𑀢𑁆𑀢𑀓𑀸 𑀲𑀢𑁆𑀢𑀸𑀯𑀸𑀲𑀸, 𑀢𑁂𑀳𑀺 𑀲𑀩𑁆𑀩𑁂𑀳𑀺𑀧𑀺 𑀏𑀢𑁂 𑀅𑀕𑁆𑀕𑀸 𑀏𑀢𑁂 𑀲𑁂𑀝𑁆𑀞𑀸, 𑀬𑁂 𑀇𑀫𑁂 𑀅𑀭𑀳𑀦𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀧𑀼𑀭𑀺𑀫𑀲𑁆𑀫𑀺𑀁 𑀲𑀢𑁆𑀢𑀝𑁆𑀞𑀸𑀦𑀓𑁄𑀲𑀮𑁆𑀮𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦.

𑀢𑀤𑀢𑁆𑀣𑀧𑀭𑀺𑀤𑀻𑀧𑀦𑀸𑀳𑀻𑀢𑀺 ‘‘𑀧𑀜𑁆𑀘𑀓𑁆𑀔𑀦𑁆𑀥𑁂 𑀧𑀭𑀺𑀜𑁆𑀜𑀸𑀬. 𑀢𑀡𑁆𑀳𑀸 𑀢𑁂𑀲𑀁 𑀦 𑀯𑀺𑀚𑁆𑀚𑀢𑀺. 𑀅𑀲𑁆𑀫𑀺𑀫𑀸𑀦𑁄 𑀲𑀫𑀼𑀘𑁆𑀙𑀺𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀢𑀲𑁆𑀲 𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀤𑀻𑀧𑀦𑀸𑀳𑀺 𑀘𑁂𑀯 ‘‘𑀅𑀦𑁂𑀚𑀁 𑀢𑁂 𑀅𑀦𑀼𑀧𑁆𑀧𑀢𑁆𑀢𑀸, 𑀘𑀺𑀢𑁆𑀢𑀁 𑀢𑁂𑀲𑀁 𑀅𑀦𑀸𑀯𑀺𑀮’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀲𑁂𑀲𑀢𑁆𑀣𑀧𑀭𑀺𑀤𑀻𑀧𑀦𑀸𑀳𑀺 𑀘. 𑀛𑀸𑀦𑀫𑀕𑁆𑀕𑀨𑀮𑀧𑀭𑀺𑀬𑀸𑀧𑀦𑁆𑀦𑀁 𑀅𑀢𑀺𑀲𑀬𑀺𑀢𑀲𑀼𑀔𑀁 𑀏𑀢𑁂𑀲𑀫𑀢𑁆𑀣𑀻𑀢𑀺 𑀲𑀼𑀔𑀺𑀦𑁄𑀢𑀺 𑀆𑀳 ‘‘𑀛𑀸𑀦…𑀧𑁂… 𑀲𑀼𑀔𑀺𑀢𑀸’’𑀢𑀺. 𑀢𑀡𑁆𑀳𑀸 𑀢𑁂𑀲𑀁 𑀦 𑀯𑀺𑀚𑁆𑀚𑀢𑀻𑀢𑀺 𑀏𑀢𑁆𑀣 𑀢𑁂𑀲𑀁 𑀅𑀧𑀸𑀬𑀤𑀼𑀓𑁆𑀔𑀚𑀦𑀺𑀓𑀸 𑀢𑀡𑁆𑀳𑀸 𑀦 𑀯𑀺𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀁. 𑀯𑀝𑁆𑀝𑀫𑀽𑀮𑀺𑀓𑀸𑀬 𑀢𑀡𑁆𑀳𑀸𑀬 𑀅𑀪𑀸𑀯𑀸 ‘‘𑀦𑀦𑁆𑀤𑀻 𑀢𑁂𑀲𑀁 𑀦 𑀯𑀺𑀚𑁆𑀚𑀢𑀻’’𑀢𑀺 𑀏𑀢𑁆𑀣 𑀯𑀼𑀘𑁆𑀘𑀢𑀻𑀢𑀺. 𑀇𑀫𑀲𑁆𑀲𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀤𑀼𑀓𑁆𑀔𑀲𑁆𑀲𑀸𑀪𑀸𑀯𑁂𑀦𑀧𑀻𑀢𑀺 𑀤𑀼𑀓𑁆𑀔𑀸𑀪𑀸𑀯𑁄 𑀯𑀺𑀬 𑀯𑀝𑁆𑀝𑀫𑀽𑀮𑀺𑀓𑀢𑀡𑁆𑀳𑀸𑀪𑀸𑀯𑁄 𑀲𑀫𑁆𑀧𑀺𑀡𑁆𑀟𑀻𑀬𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦 𑀳𑀺 𑀢𑁂 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀬𑀸 𑀅𑀘𑁆𑀘𑀦𑁆𑀢𑀲𑀼𑀔𑀺𑀢𑀸 𑀏𑀯𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺. ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀺𑀬𑀸 𑀦𑀯𑀯𑀺𑀥𑁄. 𑀜𑀸𑀡𑁂𑀦𑀸𑀢𑀺 𑀅𑀕𑁆𑀕𑀫𑀕𑁆𑀕𑀜𑁆𑀜𑀸𑀡𑁂𑀦.

𑀅𑀭𑀳𑀢𑁆𑀢𑀁 𑀅𑀦𑀼𑀧𑁆𑀧𑀢𑁆𑀢𑀸. 𑀅𑀮𑀺𑀢𑁆𑀢𑀸𑀢𑀺 𑀅𑀫𑀓𑁆𑀔𑀺𑀢𑀸. 𑀩𑁆𑀭𑀳𑁆𑀫𑀪𑀽𑀢𑀸𑀢𑀺 𑀩𑁆𑀭𑀳𑁆𑀫𑀪𑀸𑀯𑀁 𑀧𑀢𑁆𑀢𑀸, 𑀩𑁆𑀭𑀳𑁆𑀫𑀢𑁄 𑀯𑀸 𑀅𑀭𑀺𑀬𑀫𑀕𑁆𑀕𑀜𑀸𑀡𑀢𑁄 𑀪𑀽𑀢𑀸 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀸. 𑀲𑀢𑁆𑀢 𑀲𑀤𑁆𑀥𑀫𑁆𑀫𑀸 𑀕𑁄𑀘𑀭𑁄 𑀧𑀯𑀢𑁆𑀢𑀺𑀝𑁆𑀞𑀸𑀦𑀁 𑀏𑀢𑁂𑀲𑀦𑁆𑀢𑀺 𑀲𑀢𑁆𑀢𑀲𑀤𑁆𑀥𑀫𑁆𑀫𑀕𑁄𑀘𑀭𑀸.

𑀦𑀺𑀭𑀸𑀲𑀗𑁆𑀓𑀘𑀸𑀭𑁄 𑀦𑀸𑀫 𑀕𑀳𑀺𑀢𑁄 𑀓𑀼𑀢𑁄𑀘𑀺𑀧𑀺 𑀢𑁂𑀲𑀁 𑀆𑀲𑀗𑁆𑀓𑀸𑀬 𑀅𑀪𑀸𑀯𑀢𑁄. 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀳𑀺 𑀤𑀲𑀳𑀺 𑀅𑀗𑁆𑀕𑁂𑀳𑀺 𑀲𑀫𑁆𑀫𑀸𑀯𑀺𑀫𑀼𑀢𑁆𑀢𑀺-𑀲𑀫𑁆𑀫𑀸𑀜𑀸𑀡𑀧𑀭𑀺𑀬𑁄𑀲𑀸𑀦𑁂𑀳𑀺. ‘‘𑀆𑀕𑀼𑀁 𑀦 𑀓𑀭𑁄𑀢𑀻’’𑀢𑀺𑀆𑀤𑀻𑀳𑀺 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺. 𑀢𑀡𑁆𑀳𑀸 𑀢𑁂𑀲𑀁 𑀦 𑀯𑀺𑀚𑁆𑀚𑀢𑀻𑀢𑀺 𑀇𑀤𑀫𑁆𑀧𑀺 𑀢𑀡𑁆𑀳𑀸𑀧𑀳𑀸𑀦𑀲𑁆𑀲 𑀩𑀳𑀽𑀧𑀓𑀸𑀭𑀢𑀸𑀤𑀲𑁆𑀲𑀦𑀁. 𑀢𑁂𑀦𑀸𑀳 ‘‘𑀤𑀸𑀲𑀓𑀸𑀭𑀺𑀓𑀸 𑀢𑀡𑁆𑀳𑀸𑀧𑀺 𑀢𑁂𑀲𑀁 𑀦𑀢𑁆𑀣𑀻’’𑀢𑀺.

𑀦 ¶ 𑀯𑀺𑀓𑀫𑁆𑀧𑀦𑁆𑀢𑀺 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸.

𑀉𑀤𑁆𑀥𑀁 ¶ 𑀢𑀺𑀭𑀺𑀬𑀁 𑀅𑀧𑀸𑀘𑀻𑀦𑀦𑁆𑀢𑀺 𑀏𑀢𑁆𑀣 ‘‘𑀉𑀤𑁆𑀥𑀁 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺𑀦𑀸 𑀭𑀽𑀧𑀫𑀼𑀔𑁂𑀦 𑀅𑀢𑁆𑀢𑀪𑀸𑀯𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑁄 𑀧𑀞𑀫𑀦𑀬𑁄. 𑀓𑀸𑀮𑀢𑁆𑀢𑀬𑀯𑀲𑁂𑀦 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑁄 𑀤𑀼𑀢𑀺𑀬𑀦𑀬𑁄. 𑀞𑀸𑀦𑀯𑀲𑁂𑀦 𑀲𑀓𑀮𑀮𑁄𑀓𑀥𑀸𑀢𑀼𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑁄 𑀢𑀢𑀺𑀬𑀦𑀬𑁄. 𑀩𑀼𑀤𑁆𑀥𑀸𑀢𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀩𑀼𑀤𑁆𑀥𑀯𑀦𑁆𑀢𑁄.

𑀲𑀻𑀳𑀦𑀸𑀤𑀲𑀫𑁄𑀥𑀸𑀦𑀦𑁆𑀢𑀺 𑀲𑀻𑀳𑀦𑀸𑀤𑀸𑀦𑀁 𑀲𑀁𑀓𑀮𑀦𑀁. 𑀮𑁄𑀓𑁂 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀢𑀭𑀲𑁆𑀲𑀸𑀪𑀸𑀯𑀸 𑀅𑀦𑀼𑀢𑁆𑀢𑀭𑀸. 𑀉𑀢𑁆𑀢𑀭𑁄 𑀢𑀸𑀯 𑀢𑀺𑀝𑁆𑀞𑀢𑀼 𑀧𑀼𑀭𑀺𑀲𑁄, 𑀲𑀤𑀺𑀲𑁄𑀧𑀺 𑀢𑀸𑀯 𑀦𑀢𑁆𑀣𑀻𑀢𑀺 𑀅𑀲𑀤𑀺𑀲𑀸. 𑀲𑀓𑀮𑀫𑁆𑀧𑀺 𑀪𑀯𑀁 𑀉𑀢𑁆𑀢𑀭𑀺𑀢𑁆𑀯𑀸 𑀪𑀯𑀧𑀺𑀝𑁆𑀞𑁂 𑀞𑀢𑁆𑀯𑀸 𑀯𑀺𑀫𑀼𑀢𑁆𑀢𑀺𑀲𑀼𑀔𑁂𑀦 𑀲𑀼𑀔𑀺𑀢𑀢𑁆𑀢𑀸𑀤𑀺𑀯𑀲𑁂𑀦 𑀏𑀓𑀯𑀻𑀲𑀢𑀺𑀬𑀸𑀓𑀸𑀭𑁂𑀳𑀺 𑀲𑀻𑀳𑀦𑀸𑀤𑀁 𑀦𑀤𑀦𑁆𑀢𑀺.

𑀅𑀭𑀳𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀤𑀼𑀢𑀺𑀬𑀅𑀭𑀳𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁭. 𑀲𑀼𑀤𑁆𑀥𑀺𑀓𑀫𑁂𑀯𑀸𑀢𑀺 𑀲𑀼𑀤𑁆𑀥𑀲𑀁𑀔𑀺𑀢𑁆𑀢𑀩𑀦𑁆𑀥𑀫𑁂𑀯 𑀓𑀢𑁆𑀯𑀸.

𑀤𑀼𑀢𑀺𑀬𑀅𑀭𑀳𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀻𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁮. 𑀲𑀻𑀳𑁄𑀢𑀺 𑀧𑀭𑀺𑀲𑁆𑀲𑀬𑀲𑀳𑀦𑀢𑁄 𑀧𑀝𑀺𑀧𑀓𑁆𑀔𑀳𑀦𑀦𑀢𑁄 𑀘 ‘‘𑀲𑀻𑀳𑁄’𑀢𑀺 𑀮𑀤𑁆𑀥𑀦𑀸𑀫𑁄 𑀫𑀺𑀕𑀸𑀥𑀺𑀧𑀢𑀺. 𑀘𑀢𑁆𑀢𑀸𑀭𑁄𑀢𑀺 𑀘 𑀲𑀫𑀸𑀦𑁂𑀧𑀺 𑀲𑀻𑀳𑀚𑀸𑀢𑀺𑀓𑀪𑀸𑀯𑁂 𑀯𑀡𑁆𑀡𑀯𑀺𑀲𑁂𑀲𑀸𑀤𑀺𑀲𑀺𑀤𑁆𑀥𑁂𑀦 𑀯𑀺𑀲𑁂𑀲𑁂𑀦 𑀘𑀢𑁆𑀢𑀸𑀭𑁄 𑀲𑀻𑀳𑀸. 𑀢𑁂 𑀇𑀤𑀸𑀦𑀺 𑀦𑀸𑀫𑀢𑁄 𑀯𑀡𑁆𑀡𑀢𑁄 𑀆𑀳𑀸𑀭𑀢𑁄 𑀤𑀲𑁆𑀲𑁂𑀢𑁆𑀯𑀸 𑀇𑀥𑀸𑀥𑀺𑀧𑁆𑀧𑁂𑀢𑀲𑀻𑀳𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀯𑀺𑀪𑀸𑀯𑁂𑀢𑀼𑀁 ‘‘𑀢𑀺𑀡𑀲𑀻𑀳𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀺𑀡𑀪𑀓𑁆𑀔𑁄 𑀲𑀻𑀳𑁄 𑀢𑀺𑀡𑀲𑀻𑀳𑁄 𑀧𑀼𑀭𑀺𑀫𑀧𑀤𑁂 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀬𑀣𑀸 ‘‘𑀲𑀸𑀓𑀧𑀢𑁆𑀣𑀺𑀯𑁄’’𑀢𑀺. 𑀓𑀸𑀴𑀯𑀡𑁆𑀡𑀢𑀸𑀬 𑀓𑀸𑀴𑀲𑀻𑀳𑁄. 𑀢𑀣𑀸 𑀧𑀡𑁆𑀟𑀼𑀲𑀻𑀳𑁄. 𑀢𑁂𑀦𑀸𑀳 ‘‘𑀓𑀸𑀴𑀲𑀻𑀳𑁄 𑀓𑀸𑀴𑀕𑀸𑀯𑀺𑀲𑀤𑀺𑀲𑁄, 𑀧𑀡𑁆𑀟𑀼𑀲𑀻𑀳𑁄 𑀧𑀡𑁆𑀟𑀼𑀧𑀮𑀸𑀲𑀯𑀡𑁆𑀡𑀕𑀸𑀯𑀺𑀲𑀤𑀺𑀲𑁄’’𑀢𑀺. 𑀭𑀢𑁆𑀢𑀓𑀫𑁆𑀩𑀮𑀲𑁆𑀲 𑀯𑀺𑀬 𑀓𑁂𑀲𑀭𑁄 𑀓𑁂𑀲𑀭𑀓𑀮𑀸𑀧𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀓𑁂𑀲𑀭𑀻. 𑀮𑀸𑀔𑀸𑀭𑀲𑀧𑀭𑀺𑀓𑀫𑁆𑀫𑀓𑀢𑁂𑀳𑀺 𑀯𑀺𑀬 𑀧𑀸𑀤𑀧𑀭𑀺𑀬𑀦𑁆𑀢𑁂𑀳𑀻𑀢𑀺 𑀬𑁄𑀚𑀦𑀸.

𑀓𑀫𑁆𑀫𑀸𑀦𑀼𑀪𑀸𑀯𑀲𑀺𑀤𑁆𑀥𑀆𑀥𑀺𑀧𑀘𑁆𑀘𑀫𑀳𑁂𑀲𑀓𑁆𑀔𑀢𑀸𑀳𑀺 ¶ 𑀲𑀩𑁆𑀩𑀫𑀺𑀕𑀕𑀡𑀲𑁆𑀲 𑀭𑀸𑀚𑀸 𑀲𑀼𑀯𑀡𑁆𑀡𑀕𑀼𑀳𑀢𑁄 𑀯𑀸𑀢𑀺𑀆𑀤𑀺 ‘‘𑀲𑀻𑀳𑀲𑁆𑀲 𑀯𑀺𑀳𑀸𑀭𑁄 𑀓𑀺𑀭𑀺𑀬𑀸 𑀏𑀯𑀁 𑀳𑁄𑀢𑀻’’𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀲𑀫𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀲𑀩𑁆𑀩𑀪𑀸𑀕𑁂𑀳𑀺 𑀲𑀫𑀫𑁂𑀯 𑀪𑀽𑀫𑀺𑀬𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸. 𑀆𑀓𑀟𑁆𑀠𑀺𑀢𑁆𑀯𑀸𑀢𑀺 𑀧𑀼𑀭𑀢𑁄 𑀆𑀓𑀟𑁆𑀠𑀺𑀢𑁆𑀯𑀸 ¶ . 𑀅𑀪𑀺𑀳𑀭𑀺𑀢𑁆𑀯𑀸𑀢𑀺 𑀅𑀪𑀺𑀫𑀼𑀔𑀁 𑀳𑀭𑀺𑀢𑁆𑀯𑀸. 𑀲𑀗𑁆𑀖𑀸𑀢𑀦𑁆𑀢𑀺 𑀯𑀺𑀦𑀸𑀲𑀁. 𑀯𑀻𑀲𑀢𑀺𑀬𑀝𑁆𑀞𑀺𑀓𑀁 𑀞𑀸𑀦𑀁 𑀉𑀲𑀪𑀁.

𑀲𑀫𑀲𑀻𑀳𑁄𑀢𑀺 𑀲𑀫𑀚𑀸𑀢𑀺𑀓𑁄 𑀲𑀫𑀪𑀸𑀕𑁄 𑀘 𑀲𑀻𑀳𑁄. 𑀲𑀫𑀸𑀦𑁄𑀲𑁆𑀫𑀻𑀢𑀺 𑀤𑁂𑀲𑀦𑀸𑀫𑀢𑁆𑀢𑀁, 𑀲𑀫𑀧𑁆𑀧𑀪𑀸𑀯𑀢𑀸𑀬𑀧𑀺 𑀦 𑀪𑀸𑀬𑀢𑀺. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀩𑀮𑀯𑀢𑀸𑀬𑀸𑀢𑀺 ‘‘𑀓𑁂 𑀅𑀜𑁆𑀜𑁂 𑀅𑀫𑁆𑀳𑁂𑀳𑀺 𑀉𑀢𑁆𑀢𑀭𑀺𑀢𑀭𑀸, 𑀅𑀣 𑀔𑁄 𑀫𑀬𑀫𑁂𑀯 𑀫𑀳𑀸𑀩𑀮𑀸’’𑀢𑀺 𑀏𑀯𑀁 𑀩𑀮𑀸𑀢𑀺𑀫𑀸𑀦𑀦𑀺𑀫𑀺𑀢𑁆𑀢𑀸𑀬 𑀅𑀳𑀗𑁆𑀓𑀸𑀭𑀳𑁂𑀢𑀼𑀪𑀽𑀢𑀸𑀬 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀩𑀮𑀪𑀸𑀯𑁂𑀦. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀧𑀳𑀻𑀦𑀢𑁆𑀢𑀸𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀧𑀳𑀻𑀦𑀢𑁆𑀢𑀸 𑀦𑀺𑀭𑀳𑀗𑁆𑀓𑀸𑀭𑀢𑁆𑀢𑀸 𑀅𑀢𑁆𑀢𑀲𑀺𑀦𑁂𑀳𑀲𑁆𑀲 𑀲𑀼𑀝𑁆𑀞𑀼 𑀲𑀫𑀼𑀕𑁆𑀖𑀸𑀝𑀺𑀢𑀢𑁆𑀢𑀸 𑀦 𑀪𑀸𑀬𑀢𑀺.

𑀢𑀣𑀸 𑀢𑀣𑀸𑀢𑀺 𑀲𑀻𑀳𑀲𑀤𑀺𑀲𑀢𑀸𑀤𑀺𑀦𑀸 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀅𑀢𑁆𑀢𑀸𑀦𑀁 𑀓𑀣𑁂𑀲𑀻𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀲𑀻𑀳𑁄𑀢𑀺 𑀔𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀓𑀢𑀸𑀪𑀺𑀦𑀻𑀳𑀸𑀭𑀲𑁆𑀲 𑀮𑁄𑀓𑀦𑀸𑀣𑀲𑁆𑀲 𑀩𑁄𑀥𑀺𑀬𑀸 𑀦𑀺𑀬𑀢𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀏𑀓𑀦𑁆𑀢𑀪𑀸𑀯𑀻𑀩𑀼𑀤𑁆𑀥𑀪𑀸𑀯𑁄𑀢𑀺 𑀓𑀢𑁆𑀯𑀸 ‘‘𑀢𑀻𑀲𑀼 𑀧𑀸𑀲𑀸𑀤𑁂𑀲𑀼 𑀦𑀺𑀯𑀸𑀲𑀓𑀸𑀮𑁄, 𑀫𑀕𑀥𑀭𑀜𑁆𑀜𑁄 𑀧𑀝𑀺𑀜𑁆𑀜𑀸𑀤𑀸𑀦𑀓𑀸𑀮𑁄, 𑀧𑀸𑀬𑀸𑀲𑀲𑁆𑀲 𑀧𑀭𑀺𑀪𑀼𑀢𑁆𑀢𑀓𑀸𑀮𑁄’’𑀢𑀺𑀆𑀤𑀺𑀦𑀸 𑀅𑀪𑀺𑀲𑀫𑁆𑀩𑁄𑀥𑀺𑀢𑁄 𑀧𑀼𑀭𑀺𑀫𑀸𑀯𑀢𑁆𑀣𑀸𑀧𑀺 𑀲𑀻𑀳𑀲𑀤𑀺𑀲𑀁 𑀓𑀢𑁆𑀯𑀸 𑀤𑀲𑁆𑀲𑀺𑀢𑀸. 𑀪𑀸𑀯𑀺𑀦𑀺, 𑀪𑀽𑀢𑁄𑀧𑀘𑀸𑀭𑁄𑀧𑀺 𑀳𑀺 𑀮𑁄𑀓𑀯𑁄𑀳𑀸𑀭𑁄. 𑀯𑀺𑀚𑁆𑀚𑀸𑀪𑀸𑀯𑀲𑀸𑀫𑀜𑁆𑀜𑀢𑁄 𑀪𑀽𑀢𑀯𑀺𑀚𑁆𑀚𑀸 𑀇𑀢𑀭𑀯𑀺𑀚𑁆𑀚𑀸𑀧𑀺 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀫𑁆𑀫𑀲𑀦𑀢𑁄 𑀢𑀁 𑀧𑀼𑀭𑁂𑀢𑀭𑀁 𑀲𑀺𑀤𑁆𑀥𑀁 𑀯𑀺𑀧𑀸𑀓𑀁 𑀯𑀺𑀬 𑀓𑀢𑁆𑀯𑀸 𑀆𑀳 ‘‘𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀯𑀺𑀲𑁄𑀥𑁂𑀢𑁆𑀯𑀸’’𑀢𑀺. 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀯𑀢𑁆𑀢𑀜𑀸𑀡𑀯𑀲𑁂𑀦 ‘‘𑀬𑀫𑀓𑀜𑀸𑀡𑀫𑀦𑁆𑀣𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀯𑀺𑀳𑀭𑀦𑁆𑀢𑀲𑁆𑀲𑀸𑀢𑀺 𑀅𑀚𑀧𑀸𑀮𑀦𑀺𑀕𑁆𑀭𑁄𑀥𑀫𑀽𑀮𑁂 𑀯𑀺𑀳𑀭𑀦𑁆𑀢𑀲𑁆𑀲. 𑀏𑀓𑀸𑀤𑀲𑀫𑁂 𑀤𑀺𑀯𑀲𑁂𑀢𑀺 𑀲𑀢𑁆𑀢𑀲𑀢𑁆𑀢𑀸𑀳𑀢𑁄 𑀧𑀭𑀁 𑀏𑀓𑀸𑀤𑀲𑀫𑁂 𑀤𑀺𑀯𑀲𑁂. 𑀅𑀘𑀮𑀧𑀮𑁆𑀮𑀗𑁆𑀓𑁂𑀢𑀺 𑀇𑀲𑀺𑀧𑀢𑀦𑁂 𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀢𑁆𑀣𑀁 𑀦𑀺𑀲𑀺𑀦𑁆𑀦𑀧𑀮𑁆𑀮𑀗𑁆𑀓𑁂. 𑀢𑀫𑁆𑀧𑀺 𑀳𑀺 𑀓𑁂𑀦𑀘𑀺 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀥𑀫𑁆𑀫𑀘𑀓𑁆𑀓𑀧𑀯𑀢𑁆𑀢𑀦𑀢𑁆𑀣𑀁 ¶ 𑀦𑀺𑀲𑀚𑁆𑀚𑀸𑀢𑀺 𑀓𑀢𑁆𑀯𑀸 𑀯𑀚𑀺𑀭𑀸𑀲𑀦𑀁 𑀯𑀺𑀬 𑀅𑀘𑀮𑀧𑀮𑁆𑀮𑀗𑁆𑀓𑀁 𑀯𑀼𑀘𑁆𑀘𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀧𑀦 𑀧𑀤𑁂𑀢𑀺 ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀸’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂 𑀇𑀫𑀲𑁆𑀫𑀺𑀁 𑀲𑀤𑁆𑀥𑀫𑁆𑀫𑀓𑁄𑀝𑁆𑀞𑀸𑀲𑁂. 𑀥𑀫𑁆𑀫𑀖𑁄𑀲𑁄…𑀧𑁂… 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀧𑀝𑀺𑀘𑁆𑀙𑀸𑀤𑁂𑀲𑀺 ‘‘𑀲𑀩𑁆𑀩𑀢𑁆𑀣 𑀞𑀺𑀢𑀸 𑀲𑀼𑀡𑀦𑁆𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀦𑁂𑀦. 𑀲𑁄𑀴𑀲𑀳𑀸𑀓𑀸𑀭𑁂𑀳𑀻𑀢𑀺 ‘‘𑀤𑀼𑀓𑁆𑀔𑀧𑀭𑀺𑀜𑁆𑀜𑀸, 𑀲𑀫𑀼𑀤𑀬𑀧𑁆𑀧𑀳𑀸𑀦𑀁, 𑀦𑀺𑀭𑁄𑀥𑀲𑀘𑁆𑀙𑀺𑀓𑀺𑀭𑀺𑀬𑀸, 𑀫𑀕𑁆𑀕𑀪𑀸𑀯𑀦𑀸’’𑀢𑀺 𑀏𑀯𑀁 𑀏𑀓𑁂𑀓𑀲𑁆𑀫𑀺𑀁 𑀫𑀕𑁆𑀕𑁂 𑀘𑀢𑁆𑀢𑀸𑀭𑀺 𑀘𑀢𑁆𑀢𑀸𑀭𑀺 𑀓𑀢𑁆𑀯𑀸 𑀲𑁄𑀴𑀲𑀳𑀺 𑀆𑀓𑀸𑀭𑁂𑀳𑀺.

𑀯𑀼𑀢𑁆𑀢𑁄𑀬𑁂𑀯, 𑀦 𑀇𑀥 𑀯𑀢𑁆𑀢𑀩𑁆𑀩𑁄, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀫𑀸 𑀘 𑀅𑀧𑀭𑁂𑀳𑀺𑀧𑀺 𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀢𑀣𑀸𑀕𑀢𑁄𑀢𑀺 𑀆𑀭𑀪𑀺𑀢𑁆𑀯𑀸 𑀉𑀤𑀸𑀦𑀝𑁆𑀞𑀓𑀣𑀸𑀤𑀻𑀲𑀼𑀧𑀺 (𑀉𑀤𑀸. 𑀅𑀝𑁆𑀞. 𑁧𑁮; 𑀇𑀢𑀺𑀯𑀼. 𑁩𑁮) 𑀢𑀣𑀸𑀕𑀢𑀧𑀤𑀲𑁆𑀲 𑀅𑀢𑁆𑀣𑁄 𑀯𑀼𑀢𑁆𑀢𑁄 𑀏𑀯, 𑀢𑀲𑁆𑀫𑀸 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 ¶ . 𑀬𑀤𑀺𑀧𑀺 𑀪𑀕𑀯𑀸 𑀦 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀫𑀢𑁆𑀢𑁄𑀯 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀚𑀸𑀢𑁄, 𑀢𑀣𑀸𑀧𑀺 𑀢𑀸𑀬 𑀦𑀺𑀲𑀚𑁆𑀚𑀸𑀬 𑀦𑀺𑀲𑀺𑀦𑁆𑀦𑁄𑀯 𑀧𑀦𑀼𑀚𑁆𑀚 𑀲𑀩𑁆𑀩𑀧𑀭𑀺𑀲𑁆𑀲𑀬𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀚𑀸𑀢𑁄. 𑀢𑀣𑀸 𑀳𑀺 𑀢𑀁 ‘‘𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 ‘‘𑀬𑀸𑀯 𑀩𑁄𑀥𑀺𑀧𑀮𑁆𑀮𑀗𑁆𑀓𑀸 𑀯𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀅𑀧𑀭𑀺𑀢𑀼𑀲𑁆𑀲𑀦𑁆𑀢𑁄 ‘‘𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀸 𑀯𑀸’’𑀢𑀺 𑀆𑀳.

𑀇𑀢𑀺 𑀭𑀽𑀧𑀦𑁆𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀦𑀺𑀤𑀲𑁆𑀲𑀦𑀢𑁆𑀣𑁄. 𑀢𑁂𑀦 𑀭𑀽𑀧𑀁 𑀲𑀭𑀽𑀧𑀢𑁄 𑀧𑀭𑀺𑀫𑀸𑀡𑀢𑁄 𑀧𑀭𑀺𑀘𑁆𑀙𑁂𑀤𑀢𑁄 𑀤𑀲𑁆𑀲𑀺𑀢𑀦𑁆𑀢𑀺 𑀆𑀳 ‘‘𑀇𑀤𑀁 𑀭𑀼𑀧’’𑀦𑁆𑀢𑀺𑀆𑀤𑀺. ‘‘𑀇𑀤𑀁 𑀭𑀽𑀧’’𑀦𑁆𑀢𑀺 𑀳𑀺 𑀇𑀫𑀺𑀦𑀸 𑀪𑀽𑀢𑀼𑀧𑀸𑀤𑀸𑀬𑀪𑁂𑀤𑀭𑀽𑀧𑀁 𑀲𑀭𑀽𑀧𑀢𑁄 𑀤𑀲𑁆𑀲𑀺𑀢𑀁. 𑀏𑀢𑁆𑀢𑀓𑀁 𑀭𑀽𑀧𑀦𑁆𑀢𑀺 𑀇𑀫𑀺𑀦𑀸 𑀢𑀁 𑀧𑀭𑀺𑀫𑀸𑀡𑀢𑁄 𑀤𑀲𑁆𑀲𑀺𑀢𑀁. 𑀢𑀲𑁆𑀲 𑀘 𑀧𑀭𑀺𑀫𑀸𑀡𑀲𑁆𑀲 𑀏𑀓𑀦𑁆𑀢𑀪𑀸𑀯𑀤𑀲𑁆𑀲𑀦𑁂𑀦 ‘‘𑀦 𑀇𑀢𑁄 𑀪𑀺𑀬𑁆𑀬𑁄 𑀭𑀽𑀧𑀁 𑀅𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀲𑀪𑀸𑀯𑀢𑁄𑀢𑀺 𑀲𑀮𑀓𑁆𑀔𑀡𑀢𑁄. 𑀲𑀭𑀲𑀢𑁄𑀢𑀺 𑀲𑀓𑀺𑀘𑁆𑀘𑀢𑁄. 𑀧𑀭𑀺𑀬𑀦𑁆𑀢𑀢𑁄𑀢𑀺 𑀧𑀭𑀺𑀫𑀸𑀡𑀧𑀭𑀺𑀬𑀦𑁆𑀢𑀢𑁄. 𑀧𑀭𑀺𑀘𑁆𑀙𑁂𑀤𑀢𑁄𑀢𑀺 𑀬𑀢𑁆𑀢𑀓𑁂 𑀞𑀸𑀦𑁂 𑀢𑀲𑁆𑀲 𑀧𑀯𑀢𑁆𑀢𑀺, 𑀢𑀲𑁆𑀲 𑀧𑀭𑀺𑀘𑁆𑀙𑁂𑀤𑀦𑀢𑁄. 𑀧𑀭𑀺𑀘𑁆𑀙𑀺𑀦𑁆𑀤𑀦𑀢𑁄𑀢𑀺 𑀧𑀭𑀺𑀬𑁄𑀲𑀸𑀦𑀧𑁆𑀧𑀢𑁆𑀢𑀺𑀢𑁄. 𑀢𑀁 𑀲𑀩𑁆𑀩𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺 𑀬𑀣𑀸𑀯𑀼𑀢𑁆𑀢𑁂𑀦 𑀯𑀺𑀪𑀸𑀕𑁂𑀦. 𑀅𑀬𑀁 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄 𑀦𑀸𑀫𑀸𑀢𑀺 𑀅𑀬𑀁 𑀆𑀳𑀸𑀭𑀸𑀤𑀺 𑀭𑀽𑀧𑀲𑁆𑀲 𑀲𑀫𑀼𑀤𑀬𑁄 𑀦𑀸𑀫. 𑀢𑁂𑀦𑀸𑀳 ‘‘𑀏𑀢𑁆𑀢𑀸𑀯𑀢𑀸’’𑀢𑀺𑀆𑀤𑀺. 𑀅𑀢𑁆𑀣𑀗𑁆𑀕𑀫𑁄𑀢𑀺 𑀦𑀺𑀭𑁄𑀥𑁄. ‘‘𑀆𑀳𑀸𑀭𑀲𑀫𑀼𑀤𑀬𑀸 𑀆𑀳𑀸𑀭𑀦𑀺𑀭𑁄𑀥𑀸’’𑀢𑀺 𑀘 𑀅𑀲𑀸𑀥𑀸𑀭𑀡𑀫𑁂𑀯 𑀕𑀳𑁂𑀢𑁆𑀯𑀸 𑀲𑁂𑀲𑁂 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀕𑀡𑁆𑀳𑀸𑀢𑀺.

𑀧𑀡𑁆𑀡𑀸𑀲𑀮𑀓𑁆𑀔𑀡𑀧𑀝𑀺𑀫𑀡𑁆𑀟𑀺𑀢𑀦𑁆𑀢𑀺 ¶ 𑀧𑀡𑁆𑀡𑀸𑀲𑀉𑀤𑀬𑀩𑁆𑀩𑀬𑀮𑀓𑁆𑀔𑀡𑀯𑀺𑀪𑀽𑀲𑀺𑀢𑀁 𑀲𑀫𑀼𑀤𑀬𑀢𑁆𑀣𑀗𑁆𑀕𑀫𑀕𑀳𑀡𑀢𑁄. 𑀔𑀻𑀡𑀸𑀲𑀯𑀢𑁆𑀢𑀸𑀢𑀺 𑀅𑀦𑀯𑀲𑁂𑀲𑀁 𑀲𑀸𑀯𑀲𑁂𑀲𑀜𑁆𑀘 𑀆𑀲𑀯𑀸𑀦𑀁 𑀧𑀭𑀺𑀓𑁆𑀔𑀻𑀡𑀢𑁆𑀢𑀸. 𑀅𑀦𑀸𑀕𑀸𑀫𑀻𑀦𑀫𑁆𑀧𑀺 𑀳𑀺 𑀪𑀬𑀁 𑀘𑀺𑀢𑁆𑀢𑀼𑀢𑁆𑀭𑀸𑀲𑁄 𑀘 𑀦 𑀳𑁄𑀢𑀻𑀢𑀺. 𑀜𑀸𑀡𑀲𑀁𑀯𑁂𑀕𑁄 𑀪𑀬𑀢𑀽𑀧𑀝𑁆𑀞𑀸𑀦𑀜𑀸𑀡𑀁. 𑀇𑀢𑀭𑁂𑀲𑀁 𑀧𑀦 𑀤𑁂𑀯𑀸𑀦𑀦𑁆𑀢𑀺 𑀅𑀔𑀻𑀡𑀸𑀲𑀯𑁂 𑀤𑁂𑀯𑁂 𑀲𑀦𑁆𑀥𑀸𑀬 𑀯𑀤𑀢𑀺. 𑀪𑁄𑀢𑀺 𑀥𑀫𑁆𑀫𑀸𑀮𑀧𑀦𑀫𑀢𑁆𑀢𑀦𑁆𑀢𑀺 𑀯𑀸𑀘𑀲𑀺𑀓𑀁 𑀢𑀣𑀸𑀮𑀧𑀦𑀫𑀢𑁆𑀢𑀁.

𑀘𑀓𑁆𑀓𑀦𑁆𑀢𑀺 𑀲𑀢𑁆𑀣𑀼 𑀆𑀡𑀸𑀘𑀓𑁆𑀓𑀁, 𑀢𑀁 𑀧𑀦 𑀥𑀫𑁆𑀫𑀢𑁄 𑀆𑀕𑀢𑀦𑁆𑀢𑀺 𑀥𑀫𑁆𑀫𑀘𑀓𑁆𑀓𑀁. 𑀢𑀢𑁆𑀣 𑀅𑀭𑀺𑀬𑀲𑀸𑀯𑀓𑀸𑀦𑀁 𑀧𑀝𑀺𑀯𑁂𑀥𑀥𑀫𑁆𑀫𑀢𑁄 𑀆𑀕𑀢𑀦𑁆𑀢𑀺 𑀥𑀫𑁆𑀫𑀘𑀓𑁆𑀓𑀁. 𑀇𑀢𑀭𑁂𑀲𑀁 𑀤𑁂𑀲𑀦𑀸𑀥𑀫𑁆𑀫𑀢𑁄 𑀆𑀕𑀢𑀦𑁆𑀢𑀺 𑀥𑀫𑁆𑀫𑀘𑀓𑁆𑀓𑀁. 𑀤𑀼𑀯𑀺𑀥𑁂𑀧𑀺 𑀜𑀸𑀡𑀁 𑀧𑀥𑀸𑀦𑀦𑁆𑀢𑀺 𑀜𑀸𑀡𑀲𑀻𑀲𑁂𑀦 𑀯𑀼𑀢𑁆𑀢𑀁 ‘‘𑀧𑀝𑀺𑀯𑁂𑀥𑀜𑀸𑀡𑀫𑁆𑀧𑀺 𑀤𑁂𑀲𑀦𑀸𑀜𑀸𑀡𑀫𑁆𑀧𑀻’’𑀢𑀺. 𑀇𑀤𑀸𑀦𑀺 𑀢𑀁 𑀜𑀸𑀡𑀤𑁆𑀯𑀬𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀧𑀝𑀺𑀯𑁂𑀥𑀜𑀸𑀡𑀁 𑀦𑀸𑀫𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀘𑀲𑁆𑀲 𑀜𑀸𑀡𑀲𑁆𑀲 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀪𑀕𑀯𑀸 𑀢𑀸𑀦𑀺 𑀲𑀝𑁆𑀞𑀺 𑀦𑀬𑀲𑀳𑀲𑁆𑀲𑀸𑀦𑀺 𑀯𑁂𑀦𑁂𑀬𑁆𑀬𑀸𑀦𑀁 𑀤𑀲𑁆𑀲𑁂𑀢𑀼𑀁 𑀲𑀫𑀢𑁆𑀣𑁄 𑀅𑀳𑁄𑀲𑀺, 𑀢𑀲𑁆𑀫𑀸 𑀢𑀸𑀦𑀺 𑀲𑀝𑁆𑀞𑀺 𑀦𑀬𑀲𑀳𑀲𑁆𑀲𑀸𑀦𑀺 𑀢𑁂𑀦 𑀜𑀸𑀡𑁂𑀦 𑀲𑀤𑁆𑀥𑀺𑀁𑀬𑁂𑀯 𑀲𑀺𑀤𑁆𑀥𑀸𑀦𑀻𑀢𑀺 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀝𑁆𑀞𑀺𑀬𑀸 𑀘 𑀦𑀬𑀲𑀳𑀲𑁆𑀲𑁂𑀳𑀺 𑀧𑀝𑀺𑀯𑀺𑀚𑁆𑀛𑀻’’𑀢𑀺 𑀆𑀳. 𑀢𑀺𑀧𑀭𑀺𑀯𑀝𑁆𑀝𑀦𑁆𑀢𑀺 𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀘, 𑀧𑀭𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀘, 𑀧𑀭𑀺𑀜𑁆𑀜𑀸𑀢𑀦𑁆𑀢𑀺 𑀘 𑀏𑀯𑀁 𑀢𑀺𑀧𑀭𑀺𑀯𑀝𑁆𑀝𑀁, 𑀢𑀁𑀬𑁂𑀯 𑀤𑁆𑀯𑀸𑀤𑀲𑀸𑀓𑀸𑀭𑀁. 𑀢𑀦𑁆𑀢𑀺 𑀤𑁂𑀲𑀦𑀸𑀜𑀸𑀡𑀁 𑀧𑀯𑀢𑁆𑀢𑁂𑀢𑀺 𑀏𑀲 𑀪𑀕𑀯𑀸. 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀧𑀢𑀺𑀦𑀺𑀥𑀺𑀪𑀽𑀢𑀧𑀼𑀕𑁆𑀕𑀮𑀭𑀳𑀺𑀢𑁄. 𑀏𑀓𑀲𑀤𑀺𑀲𑀲𑁆𑀲𑀸𑀢𑀺 𑀦𑀺𑀩𑁆𑀩𑀺𑀓𑀸𑀭𑀲𑁆𑀲.

𑀲𑀻𑀳𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀔𑀚𑁆𑀚𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁯. 𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑀸𑀢𑀺 ¶ 𑀏𑀢𑀭𑀳𑀺 𑀭𑀽𑀧𑀯𑁂𑀤𑀦𑀸𑀤𑀬𑁄 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 ‘‘𑀧𑀼𑀩𑁆𑀩𑁂𑀧𑀸𑀳𑀁 𑀏𑀯𑀁𑀯𑁂𑀤𑀦𑁄 𑀅𑀳𑁄𑀲𑀺’’𑀦𑁆𑀢𑀺 𑀅𑀢𑀻𑀢𑀸𑀦𑀁 𑀭𑀽𑀧𑀯𑁂𑀤𑀦𑀸𑀤𑀻𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀳𑀺 𑀯𑀺𑀲𑁂𑀲𑀸𑀪𑀸𑀯𑀤𑀲𑁆𑀲𑀦𑀸 𑀯𑀺𑀧𑀲𑁆𑀲𑀦𑀸, 𑀢𑀲𑁆𑀲𑀸 𑀯𑀺𑀧𑀲𑁆𑀲𑀦𑀸𑀬 𑀯𑀲𑁂𑀦. 𑀬𑁆𑀯𑀸𑀬𑀁 ‘‘𑀦 𑀇𑀤𑀁 𑀅𑀪𑀺𑀜𑁆𑀜𑀸𑀯𑀲𑁂𑀦𑀸’’𑀢𑀺 𑀧𑀝𑀺𑀓𑁆𑀔𑁂𑀧𑁄 𑀓𑀢𑁄, 𑀢𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀪𑀺𑀜𑁆𑀜𑀸𑀯𑀲𑁂𑀦 𑀳𑀻’’𑀢𑀺𑀆𑀤𑀺𑀫𑀸𑀳. 𑀔𑀦𑁆𑀥𑀧𑀝𑀺𑀩𑀤𑁆𑀥𑀸 𑀦𑀸𑀫 𑀕𑁄𑀢𑁆𑀢𑀯𑀡𑁆𑀡𑀳𑀸𑀭𑀸𑀤𑀬𑁄. 𑀏𑀯𑀁 𑀅𑀦𑀼𑀲𑁆𑀲𑀭𑀦𑁆𑀢𑁄𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀦𑀼𑀲𑁆𑀲𑀭𑀦𑁆𑀢𑁄. 𑀲𑀪𑀸𑀯𑀥𑀫𑁆𑀫𑀸𑀦𑀁 𑀏𑀯 𑀅𑀦𑀼𑀲𑁆𑀲𑀭𑀡𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 ‘‘𑀲𑀼𑀜𑁆𑀜𑀢𑀸𑀧𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.

𑀬𑀲𑁆𑀫𑀸 ¶ 𑀢𑁂 𑀏𑀯 𑀭𑀽𑀧𑀸𑀤𑀬𑁄 𑀦𑁂𑀯 𑀅𑀢𑁆𑀢𑀸, 𑀦 𑀅𑀢𑁆𑀢𑀦𑀺𑀬𑀸 𑀅𑀲𑀸𑀭𑀸 𑀅𑀦𑀺𑀲𑁆𑀲𑀭𑀸, 𑀢𑀲𑁆𑀫𑀸 𑀢𑀢𑁄 𑀲𑀼𑀜𑁆𑀜𑀸, 𑀢𑁂𑀲𑀁 𑀪𑀸𑀯𑁄 𑀲𑀼𑀜𑁆𑀜𑀢𑀸, 𑀢𑀲𑁆𑀲𑀸 𑀮𑀓𑁆𑀔𑀡𑀁 𑀭𑀼𑀧𑁆𑀧𑀦𑀸𑀤𑀺𑀓𑀁 𑀤𑀲𑁆𑀲𑁂𑀢𑀼𑀁.

𑀓𑀺𑀜𑁆𑀘𑀸𑀢𑀺 𑀳𑁂𑀢𑀼𑀅𑀢𑁆𑀣𑀚𑁄𑀢𑀓𑁂 𑀓𑀸𑀭𑀡𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀓𑀺𑀜𑁆𑀘𑀸𑀢𑀺 𑀓𑀸𑀭𑀡𑀧𑀼𑀘𑁆𑀙𑀸, 𑀓𑁂𑀦 𑀓𑀸𑀭𑀡𑁂𑀦 𑀭𑀽𑀧𑀁 𑀯𑀤𑁂𑀣𑀸’’𑀢𑀺. 𑀏𑀢𑀦𑁆𑀢𑀺 𑀏𑀢𑀁 𑀪𑀽𑀢𑀼𑀧𑀸𑀤𑀸𑀬𑀪𑁂𑀤𑀁 𑀥𑀫𑁆𑀫𑀚𑀸𑀢𑀁. 𑀓𑁂𑀦 𑀓𑀸𑀭𑀡𑁂𑀦 𑀭𑀽𑀧𑀁 𑀦𑀸𑀫𑀸𑀢𑀺 𑀓𑀺𑀁 𑀓𑀸𑀭𑀡𑀁 𑀦𑀺𑀲𑁆𑀲𑀸𑀬 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀭𑀡𑀼𑀤𑁆𑀤𑁂𑀲𑁄𑀢𑀺 𑀓𑀸𑀭𑀡𑀲𑁆𑀲 𑀉𑀤𑁆𑀤𑀺𑀲𑀦𑀁. 𑀭𑀼𑀧𑁆𑀧𑀢𑀻𑀢𑀺 𑀏𑀢𑁆𑀣 𑀭𑀽𑀧𑀁 𑀦𑀸𑀫 𑀲𑀻𑀢𑀸𑀤𑀺𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀦𑁆𑀦𑀺𑀧𑀸𑀢𑁂𑀦 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺. 𑀢𑁂𑀦𑀸𑀳 ‘‘𑀲𑀻𑀢𑁂𑀦𑀧𑀻’’𑀢𑀺𑀆𑀤𑀺. 𑀧𑀩𑁆𑀩𑀢𑀧𑀸𑀤𑁂𑀢𑀺 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀧𑀸𑀤𑁂, 𑀲𑁄 𑀧𑀦 𑀢𑀢𑁆𑀣 𑀅𑀘𑁆𑀘𑀼𑀕𑁆𑀕𑀢𑁄 𑀧𑀸𑀓𑀸𑀭𑁄 𑀯𑀺𑀬 𑀞𑀺𑀢𑁄. 𑀢𑀣𑀸 𑀳𑀺 𑀢𑀢𑁆𑀣 𑀲𑀢𑁆𑀢𑀸 𑀑𑀮𑀫𑁆𑀩𑀦𑁆𑀢𑀸 𑀢𑀺𑀝𑁆𑀞𑀦𑁆𑀢𑀺. 𑀳𑀢𑁆𑀣𑀧𑀸𑀲𑀸𑀕𑀢𑀸𑀢𑀺 𑀳𑀢𑁆𑀣𑀧𑀸𑀲𑀁 𑀆𑀕𑀢𑀸 𑀉𑀧𑀸𑀕𑀢𑀸. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀳𑀢𑁆𑀣𑀧𑀸𑀲𑀸𑀕𑀢𑁂 𑀲𑀢𑁆𑀢𑁂. 𑀙𑀺𑀚𑁆𑀚𑀺𑀢𑁆𑀯𑀸𑀢𑀺 𑀫𑀼𑀘𑁆𑀙𑀸𑀧𑀢𑁆𑀢𑀺𑀬𑀸 𑀫𑀼𑀘𑁆𑀘𑀺𑀢𑁆𑀯𑀸, 𑀅𑀗𑁆𑀕𑀧𑀘𑁆𑀘𑀗𑁆𑀕𑀉𑀘𑁆𑀙𑁂𑀤𑀯𑀲𑁂𑀦 𑀯𑀸 𑀧𑀭𑀺𑀘𑁆𑀙𑀺𑀚𑁆𑀚𑀺𑀢𑁆𑀯𑀸. 𑀅𑀘𑁆𑀘𑀦𑁆𑀢𑀔𑀸𑀭𑁂 𑀉𑀤𑀓𑁂𑀢𑀺 𑀆𑀢𑀧𑀲𑀦𑁆𑀢𑀸𑀧𑀸𑀪𑀸𑀯𑁂𑀦 𑀅𑀢𑀺𑀲𑀻𑀢𑀪𑀸𑀯𑀫𑁂𑀯 𑀲𑀦𑁆𑀥𑀸𑀬 𑀅𑀘𑁆𑀘𑀦𑁆𑀢𑀔𑀸𑀭𑀢𑀸 𑀯𑀼𑀢𑁆𑀢𑀸 𑀲𑀺𑀬𑀸. 𑀦 𑀳𑀺 𑀢𑀁 𑀓𑀧𑁆𑀧𑀲𑀡𑁆𑀞𑀸𑀦𑀉𑀤𑀓𑀁 𑀲𑀫𑁆𑀧𑀢𑁆𑀢𑀺𑀓𑀭𑀫𑀳𑀸𑀫𑁂𑀖𑀯𑀼𑀝𑁆𑀞𑀁 𑀧𑀣𑀯𑀻𑀲𑀦𑁆𑀥𑀸𑀭𑀓𑀁 𑀓𑀧𑁆𑀧𑀯𑀺𑀦𑀸𑀲𑀉𑀤𑀓𑀁 𑀯𑀺𑀬 𑀔𑀸𑀭𑀁 𑀪𑀯𑀺𑀢𑀼𑀁 𑀅𑀭𑀳𑀢𑀺, 𑀢𑀣𑀸 𑀲𑀢𑀺 𑀧𑀣𑀯𑀻𑀧𑀺 𑀯𑀺𑀮𑀻𑀬𑁂𑀬𑁆𑀬𑀸𑀢𑀺. 𑀫𑀳𑀺𑀁𑀲𑀓𑀭𑀝𑁆𑀞𑀁 𑀦𑀸𑀫 𑀳𑀺𑀫𑀯𑀦𑁆𑀢𑀧𑀤𑁂𑀲𑁂 𑀏𑀓𑀁 𑀭𑀝𑁆𑀞𑀁.

𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑁂𑀢𑀺 𑀲𑀉𑀲𑁆𑀲𑀤𑀁 𑀅𑀯𑀻𑀘𑀺𑀦𑀺𑀭𑀬𑀁 𑀯𑀼𑀢𑁆𑀢𑀁. 𑀕𑀗𑁆𑀕𑀸𑀧𑀺𑀝𑁆𑀞𑁂𑀢𑀺 𑀕𑀗𑁆𑀕𑀸𑀢𑀻𑀭𑁂.

𑀲𑀭𑀦𑁆𑀢𑀸 𑀕𑀘𑁆𑀙𑀦𑁆𑀢𑀻𑀢𑀺 𑀲𑀭𑀻𑀲𑀧𑀧𑀤𑀲𑁆𑀲 𑀅𑀢𑁆𑀣𑀁 𑀯𑀤𑀢𑀺. 𑀏𑀢𑀦𑁆𑀢𑀺 𑀭𑀼𑀧𑁆𑀧𑀦𑀁. 𑀬𑀣𑀸 𑀓𑀞𑀺𑀦𑀢𑀸 𑀧𑀣𑀯𑀺𑀬𑀸 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀁, 𑀏𑀯𑀁 𑀭𑀼𑀧𑁆𑀧𑀦𑀁 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀁, 𑀲𑀪𑀸𑀯𑀪𑀽𑀢𑀮𑀓𑁆𑀔𑀡𑀦𑁆𑀢𑀺 𑀅𑀢𑁆𑀣𑁄.

𑀧𑀼𑀭𑀺𑀫𑀲𑀤𑀺𑀲𑀦𑁆𑀢𑀺 ¶ 𑀧𑀼𑀭𑀺𑀫𑁂 𑀭𑀽𑀧𑀓𑁆𑀔𑀦𑁆𑀥𑁂 𑀯𑀼𑀢𑁆𑀢𑁂𑀦 𑀲𑀤𑀺𑀲𑀁. 𑀢𑀁 ‘‘𑀓𑀺𑀦𑁆𑀢𑀺 𑀓𑀸𑀭𑀡𑀧𑀼𑀘𑁆𑀙𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑀼𑀔𑀁 𑀇𑀝𑁆𑀞𑀸𑀭𑀫𑁆𑀫𑀡𑀁. 𑀲𑀼𑀔𑀸𑀤𑀻𑀦𑀁 𑀯𑁂𑀤𑀦𑀸𑀦𑀁. 𑀧𑀘𑁆𑀘𑀬𑀢𑁄𑀢𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑀢𑁄. 𑀅𑀬𑀫𑀢𑁆𑀣𑁄𑀢𑀺 ‘‘𑀲𑀼𑀔𑀸𑀭𑀫𑁆𑀫𑀡𑀁 𑀲𑀼𑀔𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀅𑀬𑀫𑀢𑁆𑀣𑁄. 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀳𑁂𑀲 𑀦𑀺𑀤𑁆𑀤𑁂𑀲𑁄. 𑀯𑁂𑀤𑀬𑀢𑀻𑀢𑀺 𑀅𑀦𑀼𑀪𑀯𑀢𑀺. 𑀯𑁂𑀤𑀬𑀺𑀢𑀮𑀓𑁆𑀔𑀡𑀸𑀢𑀺 𑀅𑀦𑀼𑀪𑀯𑀦𑀮𑀓𑁆𑀔𑀡𑀸.

𑀦𑀻𑀮𑀧𑀼𑀧𑁆𑀨𑁂𑀢𑀺 𑀦𑀻𑀮𑀯𑀡𑁆𑀡𑀧𑀼𑀧𑁆𑀨𑁂. 𑀯𑀢𑁆𑀣𑁂 𑀯𑀸𑀢𑀺 𑀦𑀻𑀮𑀯𑀢𑁆𑀣𑁂. 𑀯𑀸-𑀲𑀤𑁆𑀤𑁂𑀦 𑀯𑀡𑁆𑀡𑀥𑀸𑀢𑀼𑀆𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀧𑁆𑀧𑀦𑀁 𑀯𑀸 𑀛𑀸𑀦𑀁 𑀯𑀸𑀧𑁂𑀦𑁆𑀢𑁄. 𑀉𑀧𑁆𑀧𑀚𑁆𑀚𑀦𑀲𑀜𑁆𑀜𑀸𑀧𑀻𑀢𑀺 𑀬𑀁 ¶ 𑀓𑀺𑀜𑁆𑀘𑀺 𑀦𑀻𑀮𑀁 𑀭𑀽𑀧𑀸𑀬𑀢𑀦𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀦𑀲𑀜𑁆𑀜𑀸𑀧𑀺, 𑀬𑀸 𑀧𑀓𑀺𑀡𑁆𑀡𑀓𑀲𑀜𑁆𑀜𑀸𑀢𑀺 𑀯𑀼𑀘𑁆𑀘𑀢𑀺.

𑀭𑀽𑀧𑀢𑁆𑀢𑀸𑀬𑀸𑀢𑀺 𑀭𑀽𑀧𑀪𑀸𑀯𑀸𑀬. 𑀬𑀸𑀕𑀼𑀫𑁂𑀯𑀸𑀢𑀺 𑀬𑀸𑀕𑀼𑀪𑀸𑀯𑀺𑀦𑀫𑁂𑀯 𑀯𑀢𑁆𑀣𑀼𑀁. 𑀬𑀸𑀕𑀼𑀢𑁆𑀢𑀸𑀬 𑀬𑀸𑀕𑀼𑀪𑀸𑀯𑀸𑀬. 𑀧𑀘𑀢𑀺 𑀦𑀸𑀫 𑀧𑀼𑀕𑁆𑀕𑀮𑁄. 𑀏𑀯𑀦𑁆𑀢𑀺 𑀬𑀣𑀸 𑀬𑀸𑀕𑀼𑀆𑀤𑀺𑀯𑀢𑁆𑀣𑀼𑀁 𑀧𑀼𑀭𑀺𑀲𑁄 𑀬𑀸𑀕𑀼𑀆𑀤𑀺𑀅𑀢𑁆𑀣𑀸𑀬 𑀧𑀘𑀢𑀺 𑀦𑀺𑀧𑁆𑀨𑀸𑀤𑁂𑀢𑀺, 𑀅𑀬𑀁 𑀏𑀯𑀁 𑀭𑀼𑀧𑁆𑀧𑀦𑀸𑀤𑀺𑀲𑀪𑀸𑀯𑁂 𑀥𑀫𑁆𑀫𑀲𑀫𑀽𑀳𑁂 𑀬𑀣𑀸𑀲𑀓𑀁 𑀧𑀘𑁆𑀘𑀬𑁂𑀳𑀺 𑀅𑀪𑀺𑀲𑀗𑁆𑀔𑀭𑀺𑀬𑀫𑀸𑀦𑁂 𑀘𑁂𑀢𑀦𑀸𑀧𑀥𑀸𑀦𑁄 𑀥𑀫𑁆𑀫𑀲𑀫𑀽𑀳𑁄 𑀧𑀯𑀢𑁆𑀢𑀦𑀢𑁆𑀣𑀁 𑀯𑀺𑀲𑁂𑀲𑀧𑀘𑁆𑀘𑀬𑁄 𑀳𑀼𑀢𑁆𑀯𑀸 𑀢𑁂 𑀅𑀪𑀺𑀲𑀗𑁆𑀔𑀭𑁄𑀢𑀺 𑀦𑀺𑀭𑁄𑀧𑁂𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀢𑁂𑀦𑀸𑀳 ‘‘𑀧𑀘𑁆𑀘𑀬𑁂𑀳𑀻’’𑀢𑀺𑀆𑀤𑀺. 𑀭𑀽𑀧𑀫𑁂𑀯𑀸𑀢𑀺 𑀭𑀽𑀧𑀲𑀪𑀸𑀯𑀫𑁂𑀯, 𑀦 𑀅𑀜𑁆𑀜𑀁 𑀲𑀪𑀸𑀯𑀁. 𑀅𑀪𑀺𑀲𑀗𑁆𑀔𑀭𑁄𑀢𑀻𑀢𑀺 𑀇𑀢𑀭𑁂𑀳𑀺 𑀧𑀘𑁆𑀘𑀬𑀥𑀫𑁆𑀫𑁂𑀳𑀺 𑀅𑀥𑀺𑀓𑀁 𑀲𑀼𑀝𑁆𑀞𑀼 𑀧𑀘𑁆𑀘𑀬𑀢𑀁 𑀓𑀭𑁄𑀢𑀺. ‘‘𑀉𑀧𑀕𑀘𑁆𑀙𑀢𑀺 𑀬𑀸𑀧𑁂𑀢𑀺 𑀆𑀬𑀽𑀳𑀢𑀻’’𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. 𑀅𑀪𑀺𑀲𑀗𑁆𑀔𑀭𑀡𑀫𑁂𑀯 𑀳𑀺 𑀆𑀬𑀽𑀳𑀦𑀸𑀤𑀻𑀦𑀺. 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀭𑀼𑀧𑁆𑀧𑀦𑀸𑀤𑀺𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀘𑁂𑀢𑀬𑀺𑀢𑀮𑀓𑁆𑀔𑀡𑀲𑁆𑀲 𑀲𑀗𑁆𑀔𑀸𑀭𑀲𑁆𑀲𑀸𑀢𑀺 𑀇𑀤𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀦𑀁 𑀘𑁂𑀢𑀦𑀸𑀧𑀥𑀸𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀪𑀕𑀯𑀸 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀁 𑀯𑀺𑀪𑀚𑀦𑁆𑀢𑁂𑀦 𑀘𑁂𑀢𑀦𑀸𑀯 𑀯𑀺𑀪𑀢𑁆𑀢𑀸.

𑀯𑀸𑀢𑀺𑀗𑁆𑀕𑀡𑀁 𑀩𑁆𑀭𑀳𑀢𑀺𑀨𑀮𑀁. 𑀘𑀢𑀼𑀭𑀲𑁆𑀲𑀯𑀮𑁆𑀮𑀻𑀢𑀺 𑀢𑀺𑀯𑀼𑀢𑀸𑀮𑀢𑀸. 𑀅𑀔𑀸𑀭𑀺𑀓𑀦𑁆𑀢𑀺 𑀔𑀸𑀭𑀭𑀲𑀭𑀳𑀺𑀢𑀁, 𑀢𑀁 𑀧𑀦 𑀧𑀡𑁆𑀡𑀨𑀮𑀸𑀤𑀺. 𑀬𑀢𑁆𑀣 𑀮𑁄𑀡𑀭𑀲𑁄 𑀅𑀥𑀺𑀓𑁄, 𑀢𑀁 𑀮𑁄𑀡𑀺𑀓𑀦𑁆𑀢𑀺 𑀆𑀳 ‘‘𑀮𑁄𑀡𑀬𑀸𑀕𑀽’’𑀢𑀺𑀆𑀤𑀺. 𑀅𑀫𑁆𑀩𑀺𑀮𑀸𑀤𑀺𑀪𑁂𑀤𑀁 𑀭𑀲𑀁.

𑀆𑀓𑀸𑀭𑀲𑀡𑁆𑀞𑀸𑀦𑀕𑀳𑀡𑀯𑀲𑁂𑀦𑀸𑀢𑀺 𑀦𑀻𑀮𑀧𑀻𑀢𑀸𑀤𑀺𑀆𑀓𑀸𑀭𑀕𑀳𑀡𑀯𑀲𑁂𑀦 𑀘𑁂𑀯 𑀯𑀝𑁆𑀝𑀘𑀢𑀼𑀭𑀲𑁆𑀲𑀸𑀤𑀺𑀲𑀡𑁆𑀞𑀸𑀦𑀕𑀳𑀡𑀯𑀲𑁂𑀦 𑀘. 𑀯𑀺𑀦𑀸𑀧𑀺 𑀆𑀓𑀸𑀭𑀲𑀡𑁆𑀞𑀸𑀦𑀸𑀢𑀺 𑀆𑀓𑀸𑀭𑀲𑀡𑁆𑀞𑀸𑀦𑁂𑀳𑀺 𑀯𑀺𑀦𑀸, 𑀢𑁂 𑀞𑀧𑁂𑀢𑁆𑀯𑀸𑀧𑀺. 𑀧𑀘𑁆𑀘𑀢𑁆𑀢𑀪𑁂𑀤𑀕𑀳𑀡𑀯𑀲𑁂𑀦𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀧𑀪𑁂𑀤𑀕𑀳𑀡𑀯𑀲𑁂𑀦. 𑀅𑀲𑀫𑁆𑀫𑁄𑀳𑀢𑁄𑀢𑀺 𑀬𑀸𑀣𑀸𑀯𑀢𑁄. 𑀯𑀺𑀲𑁂𑀲𑁄 𑀯𑀺𑀲𑁂𑀲𑀢𑁆𑀣𑀤𑀻𑀧𑀦𑀢𑁄, 𑀅𑀯𑀺𑀲𑁂𑀲𑁄 𑀅𑀬𑀁 𑀥𑀫𑁆𑀫𑁄 𑀅𑀯𑀺𑀲𑁂𑀲𑀤𑀻𑀧𑀦𑀢𑁄. 𑀢𑁂𑀦𑀸𑀳 ‘‘𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺. 𑀚𑀸𑀦𑀦𑀜𑁆𑀳𑀺 𑀅𑀯𑀺𑀲𑀺𑀝𑁆𑀞𑀁, 𑀢𑀁 𑀲𑀫𑀸𑀲𑀧𑀤𑀢𑁄 𑀉𑀧𑀲𑀕𑁆𑀕𑀸 𑀯𑀺𑀲𑁂𑀲𑁂𑀦𑁆𑀢𑀺. 𑀢𑀣𑀸 𑀳𑀺 𑀲𑀜𑁆𑀚𑀸𑀦𑀦𑀧𑀤𑀁 𑀧𑀘𑁆𑀘𑀪𑀺𑀜𑁆𑀜𑀸𑀡𑀦𑀺𑀫𑀺𑀢𑁆𑀢𑀁 𑀆𑀓𑀸𑀭𑀕𑀳𑀡𑀫𑀢𑁆𑀢𑀁 𑀩𑁄𑀥𑁂𑀢𑀺, 𑀯𑀺𑀚𑀸𑀦𑀦𑀧𑀤𑀁 𑀢𑀢𑁄 𑀯𑀺𑀲𑀺𑀝𑁆𑀞𑀯𑀺𑀲𑀬𑀕𑀳𑀡𑀁 ¶ . 𑀧𑀚𑀸𑀦𑀦𑀧𑀤𑀁 𑀧𑀦 𑀢𑀢𑁄𑀧𑀺 𑀯𑀺𑀲𑀺𑀝𑁆𑀞𑀢𑀭𑀁 𑀧𑀓𑀸𑀭𑀢𑁄 𑀅𑀯𑀩𑁄𑀥𑀁 𑀩𑁄𑀥𑁂𑀢𑀺. 𑀢𑁂𑀦𑀸𑀳 ‘‘𑀢𑀲𑁆𑀲𑀸𑀧𑀻’’𑀢𑀺𑀆𑀤𑀺. 𑀆𑀭𑀫𑁆𑀫𑀡𑀲𑀜𑁆𑀚𑀸𑀦𑀦𑀫𑀢𑁆𑀢𑀫𑁂𑀯𑀸𑀢𑀺 𑀦𑀻𑀮𑀸𑀤𑀺𑀪𑁂𑀤𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 ¶ 𑀲𑀮𑁆𑀮𑀓𑁆𑀔𑀡𑀫𑀢𑁆𑀢𑀫𑁂𑀯. 𑀅𑀯𑀥𑀸𑀭𑀡𑁂𑀦 𑀮𑀓𑁆𑀔𑀡𑀧𑀝𑀺𑀯𑁂𑀥𑀢𑁆𑀢𑀁 𑀦𑀺𑀯𑀢𑁆𑀢𑁂𑀢𑀺. 𑀢𑁂𑀦𑀸𑀳 ‘‘𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺. 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑁂𑀳𑀺 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀬 𑀧𑀕𑀼𑀡𑀪𑀸𑀯𑁂 𑀲𑀢𑀺 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀘𑀺𑀢𑁆𑀢𑁂𑀦𑀧𑀺 𑀯𑀺𑀧𑀲𑁆𑀲𑀦𑀸 𑀳𑁄𑀢𑀺𑀬𑁂𑀯𑀸𑀢𑀺 𑀆𑀳 ‘‘𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀮𑀓𑁆𑀔𑀡𑀧𑀝𑀺𑀯𑁂𑀥𑀜𑁆𑀘 𑀧𑀸𑀧𑁂𑀢𑀻’’𑀢𑀺. 𑀧𑀝𑀺𑀯𑁂𑀥𑀦𑁆𑀢𑀺 𑀘 𑀉𑀧𑀮𑀤𑁆𑀥𑀺𑀫𑁂𑀯 𑀯𑀤𑀢𑀺, 𑀦 𑀧𑀝𑀺𑀯𑀺𑀚𑁆𑀛𑀦𑀁. 𑀢𑁂𑀦𑀸𑀳 ‘‘𑀉𑀲𑁆𑀲𑀓𑁆𑀓𑀺𑀢𑁆𑀯𑀸 𑀧𑀦𑀸’’𑀢𑀺𑀆𑀤𑀺. 𑀉𑀲𑁆𑀲𑀓𑁆𑀓𑀺𑀢𑁆𑀯𑀸𑀢𑀺 𑀉𑀲𑁆𑀲𑀓𑁆𑀓𑀸𑀧𑁂𑀢𑁆𑀯𑀸 𑀫𑀕𑁆𑀕𑀧𑀸𑀢𑀼𑀪𑀸𑀯𑀫𑁆𑀧𑀺 𑀧𑀸𑀧𑁂𑀢𑀺 𑀅𑀲𑀫𑁆𑀫𑁄𑀳𑀲𑀪𑀸𑀯𑀢𑁆𑀢𑀸. 𑀬𑀣𑀸 𑀮𑀓𑁆𑀔𑀡𑀧𑀝𑀺𑀯𑁂𑀥𑀓𑀸𑀮𑁂 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑀯𑀲𑁂𑀦 𑀲𑀜𑁆𑀜𑀸𑀡𑀅𑀦𑀼𑀭𑀽𑀧𑀯𑀲𑁂𑀦𑁂𑀯 𑀧𑀯𑀢𑁆𑀢𑀁, 𑀏𑀯𑀁 𑀯𑀺𑀜𑁆𑀜𑀸𑀡𑀯𑀺𑀚𑀸𑀦𑀦𑀯𑀲𑁂𑀦 𑀯𑀸𑀬𑀁 𑀅𑀦𑀼𑀭𑀽𑀧𑀯𑀲𑁂𑀦𑁂𑀯 𑀧𑀯𑀢𑁆𑀢𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀇𑀤𑀸𑀦𑀺 𑀢𑀫𑀢𑁆𑀣𑀁 𑀳𑁂𑀭𑀜𑁆𑀜𑀺𑀓𑀸𑀤𑀺𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀳𑀺𑀭𑀜𑁆𑀜𑀁 𑀯𑀼𑀘𑁆𑀘𑀢𑀺 𑀓𑀳𑀸𑀧𑀡𑀁, 𑀳𑀺𑀭𑀜𑁆𑀜𑀚𑀸𑀦𑀦𑁂 𑀦𑀺𑀬𑀼𑀢𑁆𑀢𑁄 𑀳𑁂𑀭𑀜𑁆𑀜𑀺𑀓𑁄. 𑀮𑁄𑀓𑀯𑁄𑀳𑀸𑀭𑁂 𑀅𑀚𑀸𑀢𑀸 𑀅𑀲𑀜𑁆𑀚𑀸𑀢𑀸 𑀩𑀼𑀤𑁆𑀥𑀺 𑀏𑀢𑀲𑁆𑀲𑀸𑀢𑀺 𑀅𑀚𑀸𑀢𑀩𑀼𑀤𑁆𑀥𑀺, 𑀩𑀸𑀮𑀤𑀸𑀭𑀓𑁄. 𑀯𑁄𑀳𑀸𑀭𑀓𑀼𑀲𑀮𑁄 𑀕𑀸𑀫𑀯𑀸𑀲𑀻 𑀧𑀼𑀭𑀺𑀲𑁄 𑀕𑀸𑀫𑀺𑀓𑀧𑀼𑀭𑀺𑀲𑁄. 𑀉𑀧𑀪𑁄𑀕𑀧𑀭𑀺𑀪𑁄𑀕𑀸𑀭𑀳𑀢𑁆𑀢𑀸 𑀉𑀧𑀪𑁄𑀕𑀧𑀭𑀺𑀪𑁄𑀕𑀁. 𑀢𑀫𑁆𑀩𑀓𑀁𑀲𑀫𑀬𑀢𑁆𑀢𑀸 𑀓𑀽𑀝𑁄. 𑀫𑀳𑀸𑀲𑀸𑀭𑀢𑁆𑀢𑀸 𑀙𑁂𑀓𑁄. 𑀅𑀟𑁆𑀠𑀲𑀸𑀭𑀢𑁆𑀢𑀸 𑀓𑀭𑀝𑁄. 𑀦𑀺𑀳𑀻𑀦𑀲𑀸𑀭𑀢𑁆𑀢𑀸 𑀲𑀡𑁆𑀳𑁄. 𑀏𑀢𑁆𑀣 𑀘 𑀬𑀣𑀸 𑀳𑁂𑀭𑀜𑁆𑀜𑀺𑀓𑁄 𑀓𑀳𑀸𑀧𑀡𑀁 𑀘𑀺𑀢𑁆𑀢𑀸𑀤𑀺𑀪𑀸𑀯𑀢𑁄 𑀉𑀤𑁆𑀥𑀁 𑀓𑀽𑀝𑀸𑀤𑀺𑀪𑀸𑀯𑀁 𑀭𑀽𑀧𑀤𑀲𑁆𑀲𑀦𑀸𑀤𑀺𑀯𑀲𑁂𑀦 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑁄𑀧𑀺 𑀚𑀸𑀦𑀦𑁆𑀢𑁄 𑀅𑀦𑁂𑀓𑀸𑀓𑀸𑀭𑀢𑁄 𑀚𑀸𑀦𑀸𑀢𑀺, 𑀏𑀯𑀁 𑀧𑀜𑁆𑀜𑀸 𑀆𑀭𑀫𑁆𑀫𑀡𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀚𑀸𑀦𑀸𑀢𑀺 𑀧𑀝𑀺𑀯𑀺𑀚𑁆𑀛𑀢𑀺, 𑀢𑀸𑀬 𑀲𑀤𑁆𑀥𑀺𑀁 𑀧𑀯𑀢𑁆𑀢𑀫𑀸𑀦𑀯𑀺𑀜𑁆𑀜𑀸𑀡𑀫𑁆𑀧𑀺 𑀬𑀣𑀸𑀯𑀺𑀲𑀬𑀁 𑀆𑀭𑀫𑁆𑀫𑀡𑀁 𑀚𑀸𑀦𑀸𑀢𑀺.

𑀏𑀯𑀁 𑀲𑁆𑀯𑀸𑀬𑀁 𑀦𑁂𑀲𑀁 𑀚𑀸𑀦𑀦𑁂 𑀯𑀺𑀲𑁂𑀲𑁄 𑀅𑀜𑁆𑀜𑁂𑀲𑀁 𑀅𑀯𑀺𑀲𑀬𑁄, 𑀩𑀼𑀤𑁆𑀥𑀸𑀦𑀁 𑀏𑀯 𑀯𑀺𑀲𑀬𑁄𑀢𑀺 𑀇𑀤𑀁 𑀯𑀺𑀲𑁂𑀲𑀁 𑀫𑀺𑀮𑀺𑀦𑁆𑀤𑀧𑀜𑁆𑀳𑁂𑀦 𑀯𑀺𑀪𑀸𑀯𑁂𑀢𑀼𑀁 ‘‘𑀢𑁂𑀦𑀸𑀳𑀸’’𑀢𑀺𑀆𑀤𑀺𑀫𑀸𑀳, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀢𑁆𑀢𑀲𑀼𑀜𑁆𑀜𑀸𑀦𑀁 𑀲𑀪𑀸𑀯𑀥𑀫𑁆𑀫𑀸𑀦𑀁 𑀥𑀫𑁆𑀫𑀫𑀢𑁆𑀢𑀢𑀸𑀬 𑀓𑀣𑀺𑀢𑀢𑁆𑀢𑀸 ‘‘𑀅𑀦𑀢𑁆𑀢𑀮𑀓𑁆𑀔𑀡𑀁 𑀓𑀣𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀳𑁂𑀝𑁆𑀞𑀺𑀫𑀫𑀕𑁆𑀕𑀸 𑀘 𑀬𑀤𑀺 𑀅𑀥𑀺𑀕𑀢𑀸, 𑀅𑀭𑀳𑀢𑁆𑀢𑀲𑁆𑀲 𑀅𑀦𑀥𑀺𑀕𑀢𑀢𑁆𑀢𑀸 ‘‘𑀏𑀓𑀤𑁂𑀲𑀫𑀢𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀼𑀁 𑀇𑀤𑀁 𑀧𑀩𑁆𑀩𑀫𑀸𑀭𑀤𑁆𑀥𑀁, 𑀇𑀢𑀭𑀸𑀦𑀺 𑀤𑁆𑀯𑁂 𑀮𑀓𑁆𑀔𑀡𑀸𑀦𑀺 𑀢𑀲𑁆𑀲 𑀧𑀭𑀺𑀳𑀸𑀭𑀪𑀸𑀯𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑀲𑁆𑀫𑀸 ¶ 𑀧𑀦𑁂𑀢𑁆𑀣 ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀤𑁂𑀲𑀦𑀸𑀬 𑀢𑀻𑀲𑀼 𑀮𑀓𑁆𑀔𑀡𑁂𑀲𑀼 𑀇𑀤𑀫𑁂𑀯 𑀧𑀥𑀸𑀦𑀪𑀸𑀯𑁂𑀦 𑀤𑀲𑁆𑀲𑀺𑀢𑀁, 𑀇𑀤𑀁 𑀅𑀧𑁆𑀧𑀥𑀸𑀦𑀪𑀸𑀯𑁂𑀦𑀸𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀢𑀲𑁆𑀫𑀸 ‘‘𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀁. 𑀅𑀧𑀘𑀺𑀦𑀸𑀢𑀻𑀢𑀺 𑀅𑀧𑀘𑀬𑀕𑀸𑀫𑀺𑀥𑀫𑁆𑀫𑁂 𑀦𑀺𑀯𑀢𑁆𑀢𑁂𑀢𑀺 𑀏𑀓𑀁𑀲𑀢𑁄 𑀅𑀧𑀘𑀬𑀕𑀸𑀫𑀺𑀧𑀝𑀺𑀧𑀤𑀸𑀬 ¶ 𑀧𑀭𑀺𑀧𑀽𑀭𑀡𑀢𑁄. 𑀢𑁂𑀦𑀸𑀳 ‘‘𑀦𑁄 𑀆𑀘𑀺𑀦𑀸𑀢𑀻’’𑀢𑀺𑀆𑀤𑀺. 𑀯𑀝𑁆𑀝𑀁 𑀯𑀺𑀦𑀸𑀲𑁂𑀢𑀻𑀢𑀺 𑀯𑀺𑀥𑀫𑀢𑀺 𑀅𑀤𑀲𑁆𑀲𑀦𑀁 𑀕𑀫𑁂𑀢𑀺. 𑀦𑁂𑀯 𑀘𑀺𑀦𑀸𑀢𑀻𑀢𑀺 𑀦 𑀯𑀟𑁆𑀠𑁂𑀢𑀺. 𑀢𑀤𑁂𑀯𑀸𑀢𑀺 𑀢𑀁 𑀯𑀝𑁆𑀝𑀁 𑀏𑀯. 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀙𑀟𑁆𑀟𑁂𑀢𑀺. 𑀯𑀺𑀓𑀺𑀭𑀢𑀻𑀢𑀺 𑀯𑀺𑀤𑁆𑀥𑀁𑀲𑁂𑀢𑀺. 𑀯𑀺𑀥𑀽𑀧𑁂𑀢𑀻𑀢𑀺 𑀯𑀝𑁆𑀝𑀢𑁆𑀢𑀬𑀲𑀗𑁆𑀔𑀸𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀯𑀺𑀕𑀢𑀥𑀽𑀫𑀁 𑀯𑀺𑀕𑀢𑀲𑀦𑁆𑀢𑀸𑀧𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄𑀢𑀺 𑀆𑀳 ‘‘𑀦𑀺𑀩𑁆𑀩𑀸𑀧𑁂𑀢𑀻’’𑀢𑀺.

𑀏𑀯𑀁 𑀧𑀲𑁆𑀲𑀦𑁆𑀢𑀺𑀆𑀤𑀺 𑀅𑀦𑀸𑀕𑀸𑀫𑀺𑀨𑀮𑁂 𑀞𑀺𑀢𑀲𑁆𑀲 𑀅𑀭𑀺𑀬𑀲𑀸𑀯𑀓𑀲𑁆𑀲 𑀅𑀕𑁆𑀕𑀫𑀕𑁆𑀕𑀨𑀮𑀸𑀥𑀺𑀕𑀫𑀸𑀬 𑀤𑁂𑀲𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀯𑀝𑁆𑀝𑀁 𑀯𑀺𑀦𑀸𑀲𑁂𑀢𑁆𑀯𑀸 𑀞𑀺𑀢𑀁 𑀫𑀳𑀸𑀔𑀻𑀡𑀸𑀲𑀯𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺. 𑀔𑀻𑀡𑀸𑀲𑀯𑀲𑁆𑀲 𑀅𑀦𑀸𑀕𑀢𑀪𑀸𑀯𑀤𑀲𑁆𑀲𑀦𑀁𑀬𑁂𑀯, 𑀲𑀩𑁆𑀩𑀸 𑀘𑀸𑀬𑀁 𑀳𑁂𑀝𑁆𑀞𑀺𑀫𑀸 𑀤𑁂𑀲𑀦𑀸 𑀲𑀼𑀤𑁆𑀥𑀯𑀺𑀧𑀲𑁆𑀲𑀦𑀸𑀓𑀣𑀸, 𑀲𑀳𑀧𑀞𑀫𑀫𑀕𑁆𑀕𑀸 𑀯𑀸 𑀲𑀳𑀯𑀺𑀚𑁆𑀚𑀽𑀧𑀫𑀥𑀫𑁆𑀫𑀸 𑀯𑀸 𑀯𑀺𑀧𑀲𑁆𑀲𑀦𑀸𑀓𑀣𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑁆𑀢𑀓𑁂𑀦 𑀞𑀸𑀦𑁂𑀦𑀸’’𑀢𑀺𑀆𑀤𑀺𑀫𑀸𑀳.

𑀦𑀫𑀲𑁆𑀲𑀦𑁆𑀢𑀺𑀬𑁂𑀯 𑀫𑀳𑀢𑀸 𑀕𑀸𑀭𑀯𑀩𑀳𑀼𑀫𑀸𑀦𑁂𑀦. 𑀢𑁂𑀦𑀸𑀳 ‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜𑀸’’𑀢𑀺𑀆𑀤𑀺. 𑀢𑀢𑁆𑀣 𑀦𑀺𑀤𑀲𑁆𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀬𑀲𑁆𑀫𑀦𑁆𑀢𑀁 𑀦𑀻𑀢𑀢𑁆𑀣𑁂𑀭𑀁 𑀯𑀺𑀬𑀸’’𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀣𑁂𑀭𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀔𑀼𑀭𑀕𑁆𑀕𑁂𑀬𑁂𑀯𑀸𑀢𑀺 𑀓𑁂𑀲𑁄𑀭𑁄𑀧𑀦𑀢𑁆𑀣𑀁 𑀔𑀼𑀭𑀥𑀸𑀭𑀸𑀬 𑀅𑀕𑁆𑀕𑁂 𑀲𑀻𑀲𑁂 𑀞𑀧𑀺𑀢𑁂 𑀢𑀘𑀧𑀜𑁆𑀘𑀓𑀓𑀫𑁆𑀫𑀝𑁆𑀞𑀸𑀦𑀫𑀼𑀔𑁂𑀦 𑀪𑀸𑀯𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸. 𑀩𑁆𑀭𑀳𑁆𑀫𑀯𑀺𑀫𑀸𑀦𑀸𑀢𑀺 𑀩𑁆𑀭𑀳𑁆𑀫𑀸𑀦𑀁 𑀦𑀺𑀯𑀸𑀲𑀪𑀽𑀢𑀸 𑀯𑀺𑀫𑀸𑀦𑀸.

𑀔𑀚𑁆𑀚𑀦𑀻𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀧𑀺𑀡𑁆𑀟𑁄𑀮𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁦. 𑀅𑀧𑀓𑀭𑀻𑀬𑀢𑀺 𑀏𑀢𑁂𑀦𑀸𑀢𑀺 𑀅𑀧𑀓𑀭𑀡𑀁, 𑀧𑀤𑀁. 𑀅𑀧𑀓𑀭𑀡𑀁 𑀧𑀓𑀭𑀡𑀁 𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓𑀁. 𑀢𑁂𑀦𑀸𑀳 ‘‘𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀓𑀸𑀭𑀡𑁂’’𑀢𑀺. 𑀦𑀻𑀳𑀭𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀲𑀫𑀻𑀧𑀘𑀸𑀭𑀪𑀸𑀯𑀢𑁄 𑀅𑀧𑀦𑁂𑀢𑁆𑀯𑀸. 𑀢𑀣𑀸𑀓𑀭𑀡𑀜𑁆𑀘 𑀏𑀯𑀫𑁂𑀢𑁂 ¶ 𑀏𑀢𑁆𑀢𑀓𑀫𑁆𑀧𑀺 𑀅𑀧𑁆𑀧𑀝𑀺𑀭𑀽𑀧𑀁 𑀅𑀓𑀢𑁆𑀯𑀸 𑀆𑀬𑀢𑀺𑀁 𑀲𑀫𑁆𑀫𑀸 𑀧𑀝𑀺𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺. 𑀮𑀤𑁆𑀥𑀩𑀮𑀸𑀢𑀺 𑀮𑀤𑁆𑀥𑀜𑀸𑀡𑀩𑀮𑀸.

𑀏𑀓𑀤𑁆𑀯𑀻𑀳𑀺𑀓𑀸𑀬𑀸𑀢𑀺 𑀏𑀓𑁂𑀓𑀲𑁆𑀲 𑀘𑁂𑀯 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀜𑁆𑀘 𑀈𑀳𑀺𑀓𑀸 𑀕𑀢𑀺 𑀉𑀧𑀲𑀗𑁆𑀓𑀫𑀦𑀸 𑀏𑀓𑀤𑁆𑀯𑀻𑀳𑀺𑀓𑀸. 𑀢𑁂𑀦𑀸𑀳 ‘‘𑀏𑀓𑁂𑀓𑁄 𑀘𑁂𑀯 𑀤𑁆𑀯𑁂 𑀤𑁆𑀯𑁂 𑀘 𑀳𑀼𑀢𑁆𑀯𑀸’’𑀢𑀺. 𑀧𑀼𑀣𑀼𑀚𑁆𑀚𑀦𑀸𑀦𑀁 𑀲𑀫𑀼𑀤𑀺𑀢𑀸𑀦𑀁 𑀦𑀸𑀫 𑀓𑀺𑀭𑀺𑀬𑀸 𑀢𑀸𑀤𑀺𑀲𑀻𑀧𑀺 𑀲𑀺𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀓𑁂𑀴𑀺𑀫𑁆𑀧𑀺 𑀓𑀭𑁂𑀬𑁆𑀬𑀼’’𑀦𑁆𑀢𑀺. 𑀧𑀭𑀺𑀓𑀧𑁆𑀧𑀦𑀯𑀲𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀉𑀤𑁆𑀤𑀺𑀲𑁆𑀲 𑀧𑁂𑀲𑀮𑀸 𑀪𑀺𑀓𑁆𑀔𑀽𑀧𑀺 𑀏𑀯𑀁 𑀓𑀭𑁄𑀦𑁆𑀢𑀻𑀢𑀺.

𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑀸𑀤𑀻𑀦𑀁 𑀅𑀦𑁆𑀢𑀭𑁂 𑀲𑀻𑀤𑀦𑁆𑀢𑀭𑀁 𑀲𑀫𑀼𑀤𑁆𑀤𑀁 𑀦𑀸𑀫. 𑀢𑀢𑁆𑀣 𑀓𑀺𑀭 𑀯𑀸𑀢𑁄 𑀦 𑀯𑀸𑀬𑀢𑀺, 𑀧𑀢𑀺𑀢𑀁 𑀬𑀁 ¶ 𑀓𑀺𑀜𑁆𑀘𑀺𑀧𑀺 𑀲𑀻𑀤𑀦𑁆𑀢𑀭𑀦𑀤𑀺𑀬𑀁 𑀯𑀺𑀮𑀻𑀬𑀦𑁆𑀢𑀸 𑀲𑀻𑀤𑀦𑁆𑀢𑁂𑀯, 𑀢𑀲𑁆𑀫𑀸 𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸 𑀬𑀼𑀕𑀦𑁆𑀥𑀭𑀸𑀤𑀬𑁄𑀧𑀺 𑀲𑀻𑀤𑀧𑀩𑁆𑀩𑀢𑀸 𑀦𑀸𑀫. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀲𑀻𑀤𑀦𑁆𑀢𑀭𑁂 𑀲𑀦𑁆𑀦𑀺𑀲𑀺𑀦𑁆𑀦𑀁 𑀫𑀳𑀸𑀲𑀫𑀼𑀤𑁆𑀤𑀁 𑀯𑀺𑀬𑀸’’𑀢𑀺. 𑀆𑀳𑀸𑀭𑀳𑁂𑀢𑀽𑀢𑀺 𑀆𑀫𑀺𑀲𑀳𑁂𑀢𑀼 𑀲𑀧𑁆𑀧𑀺𑀢𑁂𑀮𑀸𑀤𑀺𑀦𑀺𑀫𑀺𑀢𑁆𑀢𑀁, 𑀢𑁂𑀲𑀁 𑀧𑀡𑀸𑀫𑀦𑀸.

𑀧𑀘𑁆𑀙𑀺𑀫𑀦𑁆𑀢𑀺 𑀦𑀺𑀳𑀻𑀦𑀁. 𑀢𑁂𑀦𑀸𑀳 ‘‘𑀮𑀸𑀫𑀓’’𑀦𑁆𑀢𑀺, 𑀮𑀸𑀫𑀓𑀦𑁆𑀢𑁄 𑀇𑀥𑀸𑀥𑀺𑀧𑁆𑀧𑁂𑀢𑁄 𑁋

‘‘𑀫𑀺𑀕𑀸𑀦𑀁 𑀓𑁄𑀝𑁆𑀞𑀼𑀓𑁄 𑀅𑀦𑁆𑀢𑁄, 𑀧𑀓𑁆𑀔𑀻𑀦𑀁 𑀧𑀦 𑀯𑀸𑀬𑀲𑁄;

𑀏𑀭𑀡𑁆𑀟𑁄 𑀅𑀦𑁆𑀢𑁄 𑀭𑀼𑀓𑁆𑀔𑀸𑀦𑀁, 𑀢𑀬𑁄 𑀅𑀦𑁆𑀢𑀸 𑀲𑀫𑀸𑀕𑀢𑀸’’𑀢𑀺. 𑁋

𑀆𑀤𑀻𑀲𑀼 (𑀚𑀸. 𑁧.𑁩.𑁧𑁩𑁫) 𑀯𑀺𑀬. 𑀉𑀮𑀢𑀻𑀢𑀺 𑀅𑀪𑀺𑀘𑀭𑀢𑀺. 𑀅𑀪𑀺𑀲𑀧𑀦𑁆𑀢𑀺 𑀏𑀢𑁂𑀦𑀸𑀢𑀺 𑀅𑀪𑀺𑀲𑀸𑀧𑁄. 𑀅𑀪𑀺𑀲𑀸𑀧𑀯𑀢𑁆𑀣𑀼 𑀧𑀺𑀡𑁆𑀟𑁄𑀮𑁆𑀬𑀁. 𑀅𑀢𑁆𑀣𑁄 𑀨𑀮𑀁 𑀯𑀲𑁄 𑀏𑀢𑀲𑁆𑀲𑀸𑀢𑀺 𑀅𑀢𑁆𑀣𑀯𑀲𑀁, 𑀓𑀸𑀭𑀡𑀁, 𑀢𑀫𑁆𑀧𑀺 𑀢𑁂𑀲𑀼 𑀅𑀢𑁆𑀣𑀺, 𑀢𑀢𑁆𑀣 𑀦𑀺𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑀯𑀲𑀺𑀓𑀸.

𑀅𑀦𑁆𑀢𑁄 𑀳𑀤𑀬𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀅𑀦𑀼𑀧𑀯𑀺𑀝𑁆𑀞𑀸 𑀲𑁄𑀓𑀯𑀢𑁆𑀣𑀽𑀳𑀺.

𑀅𑀪𑀺𑀚𑁆𑀛𑀸𑀬𑀺𑀢𑀸𑀢𑀺 𑀅𑀪𑀺𑀚𑁆𑀛𑀸𑀬𑀦𑀲𑀻𑀮𑁄. 𑀅𑀪𑀺𑀡𑁆𑀳𑀧𑁆𑀧𑀯𑀢𑁆𑀢𑀺𑀬𑀸 𑀘𑁂𑀯 𑀩𑀳𑀼𑀮𑀪𑀸𑀯𑁂𑀦 𑀘 𑀩𑀳𑀼𑀮𑀭𑀸𑀕𑁄. 𑀧𑀽𑀢𑀺𑀪𑀸𑀯𑁂𑀦𑀸𑀢𑀺 𑀓𑀼𑀣𑀺𑀢𑀪𑀸𑀯𑁂𑀦. 𑀩𑁆𑀬𑀸𑀧𑀸𑀤𑁄 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑁄 𑀘𑀺𑀢𑁆𑀢𑀁 𑀅𑀧𑀕𑀦𑁆𑀥𑀁 𑀓𑀭𑁄𑀢𑀺, 𑀦 𑀲𑀼𑀘𑀺𑀫𑀦𑀼𑀜𑁆𑀜𑀪𑀸𑀯𑀁. 𑀪𑀢𑁆𑀢𑀦𑀺𑀓𑁆𑀔𑀺𑀢𑁆𑀢𑀓𑀸𑀓𑁄 𑀯𑀺𑀬𑀸𑀢𑀺 𑀇𑀤𑀁 𑀪𑀢𑁆𑀢𑀝𑁆𑀞𑀸𑀦𑀲𑁆𑀲 𑀅𑀲𑀭𑀡𑁂𑀦 𑀓𑀸𑀓𑀲𑁆𑀲 𑀦𑀝𑁆𑀞𑀲𑀢𑀺𑀢𑀸 𑀧𑀜𑁆𑀜𑀸𑀬𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀦 𑀪𑀢𑁆𑀢𑀦𑀺𑀓𑁆𑀔𑀺𑀢𑁆𑀢𑀢𑀸𑀬. 𑀅𑀲𑀡𑁆𑀞𑀺𑀢𑁄𑀢𑀺 𑀅𑀲𑀡𑁆𑀞𑀺𑀢𑀘𑀺𑀢𑁆𑀢𑁄. 𑀓𑀝𑁆𑀞𑀢𑁆𑀣𑀦𑁆𑀢𑀺 𑀓𑀝𑁆𑀞𑁂𑀦 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀁.

𑀧𑀸𑀧𑀯𑀺𑀢𑀓𑁆𑀓𑁂𑀳𑀺 𑀓𑀢𑁄, 𑀢𑀲𑁆𑀫𑀸 𑀢𑁂 𑀅𑀦𑀯𑀲𑁂𑀲𑀢𑁄 𑀧𑀳𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀤𑁆𑀯𑀺𑀦𑁆𑀦𑀁 𑀯𑀼𑀢𑁆𑀢𑀢𑁆𑀢𑀸 𑀏𑀓𑁄 𑀧𑀼𑀩𑁆𑀩𑀪𑀸𑀕𑁄, 𑀇𑀢𑀭𑁄 𑀫𑀺𑀲𑁆𑀲𑀓𑁄𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 ¶ 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀢𑀁 𑀪𑀸𑀯𑁂𑀦𑁆𑀢𑀲𑁆𑀲 𑀦𑀺𑀭𑀼𑀚𑁆𑀛𑀦𑁆𑀢𑀺 𑀏𑀯𑀸𑀢𑀺 𑀏𑀓𑁂𑀓𑀫𑀺𑀲𑁆𑀲𑀓𑀢𑀸𑀯𑀲𑁂𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀧𑁄𑀭𑀸𑀡𑀸. 𑀉𑀧𑀭𑀺 𑀢𑀺𑀧𑀭𑀺𑀯𑀝𑁆𑀝𑀤𑁂𑀲𑀦𑀸𑀬 𑀅𑀦𑀺𑀫𑀺𑀢𑁆𑀢𑀲𑀫𑀸𑀥𑀺𑀬𑁂𑀯 𑀤𑀻𑀧𑀺𑀢𑁄. 𑀢𑁂𑀦𑀸𑀳 ‘‘𑀬𑀸𑀯𑀜𑁆𑀘𑀺𑀤’’𑀦𑁆𑀢𑀺. 𑀦𑀺𑀤𑁆𑀤𑁄𑀲𑁄𑀢𑀺 𑀯𑀻𑀢𑀭𑀸𑀕𑀸𑀤𑀺𑀦𑀸 𑀦𑀺𑀤𑁆𑀤𑁄𑀲𑁄.

𑀧𑀺𑀡𑁆𑀟𑁄𑀮𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀸𑀮𑀺𑀮𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁧. 𑀧𑀭𑀺𑀬𑀸𑀤𑀺𑀡𑁆𑀡𑀭𑀽𑀧𑀘𑀺𑀢𑁆𑀢𑀸𑀢𑀺 ¶ 𑀭𑀸𑀕𑀸𑀤𑀻𑀳𑀺 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀔𑁂𑀧𑁂𑀢𑁆𑀯𑀸 𑀕𑀳𑀺𑀢𑀘𑀺𑀢𑁆𑀢𑀸.

𑀪𑀕𑀯𑀢𑁄 𑀘𑀸𑀭𑁄 𑀯𑀺𑀤𑀺𑀢𑁄 𑀧𑀭𑀺𑀘𑀬𑀯𑀲𑁂𑀦. 𑀲𑀢𑁆𑀣𑀸 𑀧𑀭𑀺𑀪𑁄𑀕𑀁 𑀓𑀭𑁄𑀢𑀺 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 ‘‘𑀏𑀯𑀁 𑀳𑀺𑀲𑁆𑀲 𑀤𑀼𑀕𑁆𑀕𑀢𑀺𑀫𑁄𑀓𑁆𑀔𑁄 𑀪𑀯𑀺𑀲𑁆𑀲𑀢𑀻’’𑀢𑀺. 𑀅𑀜𑁆𑀜𑀢𑁆𑀭𑀸𑀢𑀺 𑀯𑀺𑀦𑀸.

𑀦𑀸𑀕𑁂𑀦𑀸𑀢𑀺 𑀩𑀼𑀤𑁆𑀥𑀦𑀸𑀕𑁂𑀦 𑀅𑀗𑁆𑀓𑀼𑀲𑀭𑀳𑀺𑀢𑁂𑀦. 𑀢𑀢𑁄 𑀏𑀯 𑀉𑀚𑀼𑀪𑀽𑀢𑁂𑀦 𑀘𑀺𑀢𑁆𑀢𑁂𑀦. 𑀈𑀲𑀸𑀤𑀦𑁆𑀢𑀲𑁆𑀲 𑀦𑀗𑁆𑀕𑀮𑀲𑀤𑀺𑀲𑀤𑀦𑁆𑀢𑀲𑁆𑀲 𑀳𑀢𑁆𑀣𑀺𑀦𑁄 𑀏𑀯𑀁 𑀘𑀺𑀢𑁆𑀢𑀁 𑀲𑀫𑁂𑀢𑀺. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀬𑀤𑁂𑀓𑁄 𑀭𑀫𑀢𑀻 𑀯𑀦𑁂’’𑀢𑀺. 𑀏𑀢𑁂𑀦 𑀓𑀸𑀬𑀯𑀺𑀯𑁂𑀓𑁂𑀦 𑀭𑀢𑀺𑀲𑀸𑀫𑀜𑁆𑀜𑀁 𑀯𑀤𑀢𑀺.

𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬𑀸𑀢𑀺 𑀧𑀓𑀢𑀺𑀬𑀸 𑀲𑀬𑀫𑁂𑀯.

𑀆𑀲𑀯𑀸𑀦𑀁 𑀔𑀬𑁄𑀢𑀺 𑀇𑀥 𑀅𑀭𑀳𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀁 𑀧𑀦 𑀅𑀕𑁆𑀕𑀫𑀕𑁆𑀕𑀸𑀦𑀦𑁆𑀢𑀭𑀫𑁂𑀯𑀸𑀢𑀺 𑀆𑀳 ‘‘𑀫𑀕𑁆𑀕𑀸𑀦𑀦𑁆𑀢𑀭𑀁 𑀅𑀭𑀳𑀢𑁆𑀢𑀨𑀮’’𑀦𑁆𑀢𑀺. 𑀯𑀺𑀘𑀬𑁄 𑀤𑁂𑀲𑀦𑀸𑀧𑀜𑁆𑀜𑀸 𑀅𑀥𑀺𑀧𑁆𑀧𑁂𑀢𑀸, 𑀲𑀸 𑀘 𑀅𑀦𑁂𑀓𑀥𑀸 𑀧𑀯𑀢𑁆𑀢𑀸 𑀏𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀯𑀺𑀘𑀬𑀲𑁄’’𑀢𑀺, 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀫𑀸𑀦𑀸𑀧𑀺 𑀯𑀺𑀘𑀬𑁄 𑀏𑀯𑀸𑀢𑀺 𑀓𑀢𑁆𑀯𑀸 ‘‘𑀯𑀺𑀘𑀬𑁂𑀦𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀲𑀸𑀲𑀦𑀥𑀫𑁆𑀫𑁄𑀢𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀺𑀧𑀭𑀺𑀤𑀻𑀧𑀦𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄. 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺𑀦𑀸, 𑀏𑀯𑀁 𑀓𑁄𑀝𑁆𑀞𑀸𑀲𑀢𑁄 𑀧𑀭𑀺𑀘𑁆𑀙𑀺𑀚𑁆𑀚 𑀤𑁂𑀲𑀺𑀢𑁂 𑀫𑀬𑀸 𑀥𑀫𑁆𑀫𑁂 𑀓𑀢𑀫𑀲𑁆𑀲 𑀚𑀸𑀦𑀦𑀲𑁆𑀲 𑀅𑀦𑁆𑀢𑀭𑀸 𑀆𑀲𑀯𑀸𑀦𑀁 𑀔𑀬𑁄 𑀳𑁄𑀢𑀻𑀢𑀺 𑀏𑀓𑀘𑁆𑀘𑀲𑁆𑀲 𑀓𑀗𑁆𑀔𑀸 𑀳𑁄𑀢𑀺𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀺𑀝𑁆𑀞𑀺 𑀏𑀯 𑀲𑀫𑀦𑀼𑀧𑀲𑁆𑀲𑀦𑀸 𑀤𑀺𑀝𑁆𑀞𑀺𑀲𑀫𑀦𑀼𑀧𑀲𑁆𑀲𑀦𑀸. 𑀤𑀺𑀝𑁆𑀞𑀺𑀲𑀗𑁆𑀔𑀸𑀭𑁄𑀢𑀺 𑀤𑀺𑀝𑁆𑀞𑀺𑀧𑀘𑁆𑀘𑀬𑁄 𑀲𑀗𑁆𑀔𑀸𑀭𑁄. 𑀢𑀢𑁄 𑀏𑀯 𑀢𑀡𑁆𑀳𑀸𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑀢𑁄𑀚𑁄 𑀲𑁄 𑀲𑀗𑁆𑀔𑀸𑀭𑁄’’𑀢𑀺. 𑀢𑀢𑁄 𑀢𑀡𑁆𑀳𑀸𑀢𑁄 𑀲𑁄 𑀲𑀗𑁆𑀔𑀸𑀭𑁄 𑀚𑀸𑀢𑁄𑀢𑀺 𑀘𑀢𑀽𑀲𑀼 𑀏𑀲 𑀤𑀺𑀝𑁆𑀞𑀺𑀲𑀗𑁆𑀔𑀸𑀭𑁄 𑀤𑀺𑀝𑁆𑀞𑀽𑀧𑀦𑀺𑀲𑁆𑀲𑀬𑁄 𑀲𑀗𑁆𑀔𑀸𑀭𑁄 𑀚𑀸𑀬𑀢𑀺. 𑀅𑀯𑀺𑀚𑁆𑀚𑀸𑀲𑀫𑁆𑀨𑀲𑁆𑀲𑁄𑀢𑀺 ¶ 𑀅𑀯𑀺𑀚𑁆𑀚𑀸𑀲𑀫𑁆𑀧𑀬𑀼𑀢𑁆𑀢𑀲𑀫𑁆𑀨𑀲𑁆𑀲𑁄. 𑀏𑀯𑀫𑁂𑀢𑁆𑀣 𑀪𑀕𑀯𑀸 𑀲𑀴𑀸𑀬𑀢𑀦𑀦𑀸𑀫𑀭𑀽𑀧𑀯𑀺𑀜𑁆𑀜𑀸𑀡𑀸𑀦𑀺 𑀲𑀗𑁆𑀔𑀸𑀭𑀧𑀓𑁆𑀔𑀺𑀓𑀸𑀦𑁂𑀯 𑀓𑀢𑁆𑀯𑀸 𑀤𑀲𑁆𑀲𑁂𑀢𑀺.

𑀏𑀢𑁆𑀢𑀓𑁂 𑀞𑀸𑀦𑁂𑀢𑀺 ‘‘𑀇𑀥 𑀪𑀺𑀓𑁆𑀔𑀯𑁂 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄’’𑀢𑀺𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 ‘‘𑀦 𑀫𑁂 𑀪𑀯𑀺𑀲𑁆𑀲𑀢𑀻’’𑀢𑀺 𑀏𑀢𑁆𑀢𑀓𑁂 𑀞𑀸𑀦𑁂. 𑀕𑀳𑀺𑀢𑀕𑀳𑀺𑀢𑀤𑀺𑀝𑁆𑀞𑀺𑀦𑁆𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 ‘‘𑀲𑁄 𑀅𑀢𑁆𑀢𑀸, 𑀲𑁄 𑀮𑁄𑀓𑁄’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀁 𑀲𑀲𑁆𑀲𑀢𑀤𑀺𑀝𑁆𑀞𑀺𑀁, 𑀦𑁄 𑀘𑀲𑁆𑀲𑀁, 𑀦𑁄 𑀘 𑀫𑁂 𑀲𑀺𑀬𑀸’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀁 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀦𑁆𑀢𑀺 𑀢𑀣𑀸 𑀢𑀣𑀸 𑀕𑀳𑀺𑀢𑀤𑀺𑀝𑁆𑀞𑀺𑀁. ‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑁄𑀧𑀺 𑀲𑀗𑁆𑀔𑀸𑀭𑁄 𑀅𑀦𑀺𑀘𑁆𑀘𑁄’’𑀢𑀺𑀆𑀤𑀺𑀤𑁂𑀲𑀦𑀸𑀬 𑀯𑀺𑀲𑁆𑀲𑀚𑁆𑀚𑀸𑀧𑁂𑀦𑁆𑀢𑁄 𑀆𑀕𑀢𑁄. 𑀢𑀢𑁆𑀣 𑀢𑀢𑁆𑀣𑁂𑀯𑀸𑀲𑁆𑀲 𑀉𑀧𑁆𑀧𑀦𑁆𑀦𑀤𑀺𑀝𑁆𑀞𑀺𑀯𑀺𑀯𑁂𑀘𑀦𑀢𑁄 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁂𑀦 ¶ 𑀧𑀯𑀢𑁆𑀢𑀺𑀢𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀢𑁂𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀼 𑀅𑀭𑀳𑀢𑁆𑀢𑀧𑀸𑀧𑀦𑁂𑀦 𑀤𑁂𑀲𑀦𑀸𑀯𑀺𑀮𑀸𑀲𑁄. 𑀢𑀢𑁄𑀚𑁄 𑀲𑁄 𑀲𑀗𑁆𑀔𑀸𑀭𑁄𑀢𑀺 𑀢𑀢𑁄 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀘𑁆𑀘𑀬𑀪𑀽𑀢𑀢𑀡𑁆𑀳𑀸𑀢𑁄 𑀚𑀸𑀢𑁄 𑀯𑀺𑀘𑀺𑀓𑀺𑀘𑁆𑀙𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀲𑀗𑁆𑀔𑀸𑀭𑁄. 𑀬𑀤𑀺 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀢𑀢𑁄 𑀢𑀡𑁆𑀳𑀸𑀢𑁄 𑀚𑀸𑀢𑁄𑀢𑀺 𑀢𑀢𑁄𑀚𑁄 𑀲𑀗𑁆𑀔𑀸𑀭𑁄𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀇𑀤𑀫𑀬𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀡𑁆𑀳𑀸𑀲𑀫𑁆𑀧𑀬𑀼𑀢𑁆𑀢…𑀧𑁂… 𑀚𑀸𑀬𑀢𑀻’’𑀢𑀺 𑀘𑁄𑀤𑁂𑀢𑀺. 𑀇𑀢𑀭𑁄 𑀉𑀧𑀦𑀺𑀲𑁆𑀲𑀬𑀓𑁄𑀝𑀺 𑀇𑀥𑀸𑀥𑀺𑀧𑁆𑀧𑁂𑀢𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑁆𑀧𑀳𑀻𑀦𑀢𑁆𑀢𑀸’’𑀢𑀺 𑀯𑀢𑁆𑀯𑀸 ‘‘𑀬𑀲𑁆𑀲 𑀳𑀻’’𑀢𑀺𑀆𑀤𑀺𑀦𑀸 𑀢𑀫𑀢𑁆𑀣𑀁 𑀯𑀺𑀯𑀭𑀢𑀺. 𑀦 𑀳𑀺 𑀢𑀡𑁆𑀳𑀸𑀬 𑀯𑀺𑀘𑀺𑀓𑀺𑀘𑁆𑀙𑀸 𑀲𑀫𑁆𑀪𑀯𑀢𑀺. 𑀬𑀤𑀺 𑀅𑀲𑀢𑀺 𑀲𑀳𑀚𑀸𑀢𑀓𑁄𑀝𑀺𑀬𑀸 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀢𑀡𑁆𑀳𑀸𑀧𑀘𑁆𑀘𑀬𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀲𑀫𑁆𑀪𑀯𑁄 𑀏𑀯. 𑀤𑀺𑀝𑁆𑀞𑀺𑀬𑀸𑀧𑀻𑀢𑀺 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀬𑀸𑀧𑀺. 𑀢𑁂𑀦𑀸𑀳 ‘‘𑀘𑀢𑀽𑀲𑀼 𑀳𑀻’’𑀢𑀺𑀆𑀤𑀺. 𑀯𑀻𑀲𑀢𑀺 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑁄 𑀲𑀲𑁆𑀲𑀢𑀤𑀺𑀝𑁆𑀞𑀺𑀁 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀁 𑀯𑀺𑀘𑀺𑀓𑀺𑀘𑁆𑀙𑀜𑁆𑀘 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑁆𑀘𑁂𑀓𑀁 𑀅𑀦𑀺𑀘𑁆𑀘𑀢𑀸𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀁 𑀤𑀲𑁆𑀲𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑁆𑀯𑀸 𑀤𑁂𑀲𑀦𑀸 𑀦𑀺𑀝𑁆𑀞𑀸𑀧𑀺𑀢𑀸𑀢𑀺 𑀆𑀳 ‘‘𑀢𑁂𑀯𑀻𑀲𑀢𑀺𑀬𑀸 𑀞𑀸𑀦𑁂𑀲𑀽’’𑀢𑀺𑀆𑀤𑀺.

𑀧𑀸𑀮𑀺𑀮𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀼𑀡𑁆𑀡𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁨. 𑀤𑀺𑀲𑁆𑀲𑀢𑀺 𑀅𑀧𑀤𑀺𑀲𑁆𑀲𑀢𑀻𑀢𑀺 𑀤𑁂𑀲𑁄, 𑀓𑀸𑀭𑀡𑀁, 𑀢𑀜𑁆𑀘 𑀔𑁄 𑀜𑀸𑀧𑀓𑀁 𑀤𑀝𑁆𑀞𑀩𑁆𑀩𑀁. 𑀬𑀜𑁆𑀳𑀺 𑀲𑁄 𑀚𑀸𑀦𑀺𑀢𑀼𑀓𑀸𑀫𑁄 𑀭𑀼𑀧𑁆𑀧𑀦𑀸𑀤𑀺𑀲𑀪𑀸𑀯𑀁, 𑀧𑀞𑀫𑀁 𑀧𑀦 𑀲𑀭𑀽𑀧𑀁 ¶ 𑀧𑀼𑀘𑁆𑀙𑀺𑀢𑁆𑀯𑀸 𑀧𑀼𑀦 𑀢𑀲𑁆𑀲 𑀯𑀺𑀲𑁂𑀲𑁄 𑀧𑀼𑀘𑁆𑀙𑀺𑀢𑀩𑁆𑀩𑁄𑀢𑀺 𑀧𑀞𑀫𑀁 ‘‘𑀇𑀫𑁂 𑀦𑀼 𑀔𑁄’’𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀁 𑀓𑀭𑁄𑀢𑀺, 𑀇𑀥𑀸𑀧𑀺 𑀘 𑀲𑁄 𑀯𑀺𑀲𑁂𑀲𑁄 𑀏𑀯 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀧𑀼𑀘𑁆𑀙𑀢𑀺 𑀢𑁂𑀲𑀁 𑀳𑁂𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑀡𑁆𑀳𑀸𑀙𑀦𑁆𑀤𑀫𑀽𑀮𑀓𑀸 𑀧𑀪𑀯𑀢𑁆𑀢𑀸. 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀢𑀺 𑀏𑀢𑁆𑀣 𑀯𑀺𑀲𑁂𑀲𑀢𑁄 𑀢𑀡𑁆𑀳𑀼𑀧𑀸𑀤𑀸𑀦𑀲𑁆𑀲 𑀕𑀳𑀡𑀁 𑀇𑀢𑀭𑀲𑁆𑀲 𑀢𑀕𑁆𑀕𑀳𑀡𑁂𑀦𑁂𑀯 𑀕𑀳𑀺𑀢𑀁 𑀢𑀤𑀯𑀺𑀦𑀸𑀪𑀸𑀯𑀢𑁄𑀢𑀺 𑀙𑀦𑁆𑀤𑀭𑀸𑀕𑁄 𑀏𑀯 𑀉𑀤𑁆𑀥𑀝𑁄. 𑀇𑀤𑀦𑁆𑀢𑀺 𑀢𑀧𑁆𑀧𑀜𑁆𑀳𑀧𑀝𑀺𑀓𑁆𑀔𑀺𑀧𑀦𑀁. 𑀬𑀤𑀺𑀧𑀺 𑀔𑀦𑁆𑀥𑀸 𑀉𑀧𑀸𑀤𑀸𑀦𑁂𑀳𑀺 𑀅𑀲𑀳𑀚𑀸𑀢𑀸𑀧𑀺 𑀳𑁄𑀦𑁆𑀢𑀺 𑀉𑀧𑀸𑀤𑀸𑀦𑀲𑁆𑀲 𑀅𑀦𑀸𑀭𑀫𑁆𑀫𑀡𑀪𑀽𑀢𑀸𑀧𑀺, 𑀉𑀧𑀸𑀤𑀸𑀦𑀁 𑀧𑀦 𑀢𑁂𑀳𑀺 𑀲𑀳𑀚𑀸𑀢𑀫𑁂𑀯, 𑀢𑀤𑀸𑀭𑀫𑁆𑀫𑀡𑀜𑁆𑀘 𑀳𑁄𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀦 𑀳𑀺 𑀅𑀲𑀳𑀚𑀸𑀢𑀁 𑀅𑀦𑀸𑀭𑀫𑁆𑀫𑀡𑀜𑁆𑀘 𑀉𑀧𑀸𑀤𑀸𑀦𑀁 𑀅𑀢𑁆𑀣𑀻𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑀡𑁆𑀳𑀸𑀲𑀫𑁆𑀧𑀬𑀼𑀢𑁆𑀢𑀲𑁆𑀫𑀺’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀆𑀭𑀫𑁆𑀫𑀡𑀢𑁄𑀢𑀺 𑀆𑀭𑀫𑁆𑀫𑀡𑀓𑀭𑀡𑀢𑁄. ‘‘𑀏𑀯𑀁𑀭𑀽𑀧𑁄 𑀲𑀺𑀬’’𑀦𑁆𑀢𑀺 𑀏𑀯𑀁𑀧𑀯𑀢𑁆𑀢𑀲𑁆𑀲 𑀙𑀦𑁆𑀤𑀭𑀸𑀕𑀲𑁆𑀲 ‘‘𑀏𑀯𑀁𑀯𑁂𑀤𑀦𑁄 𑀲𑀺𑀬’’𑀦𑁆𑀢𑀺 𑀏𑀯𑀁𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀢𑀢𑁆𑀣 𑀢𑀢𑁆𑀣𑁂𑀯 𑀦𑀢𑀲𑀗𑁆𑀔𑀸𑀭𑀸 𑀪𑀺𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀭𑀽𑀧𑀯𑁂𑀤𑀦𑀸𑀭𑀫𑁆𑀫𑀡𑀸𑀦𑀁 𑀙𑀦𑁆𑀤𑀭𑀸𑀕𑀸𑀤𑀻𑀦𑀁 𑀅𑀪𑀸𑀯𑀢𑁄 𑀅𑀢𑁆𑀣𑁂𑀯 𑀙𑀦𑁆𑀤𑀭𑀸𑀕𑀯𑁂𑀫𑀢𑁆𑀢𑀢𑀸. 𑀙𑀦𑁆𑀤𑀭𑀸𑀕𑀲𑁆𑀲 𑀧𑀳𑀸𑀦𑀸𑀤𑀺𑀯𑀲𑁂𑀦 𑀙𑀦𑁆𑀤𑀭𑀸𑀕𑀧𑀝𑀺𑀲𑀁𑀬𑀼𑀢𑁆𑀢𑀲𑁆𑀲 𑀅𑀧𑀼𑀘𑁆𑀙𑀺𑀢𑀢𑁆𑀢𑀸, ‘‘𑀅𑀦𑀼𑀲𑀦𑁆𑀥𑀺 𑀦 𑀖𑀝𑀺𑀬𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀦 𑀖𑀝𑀺𑀬𑀢𑀻𑀢𑀺 𑀅𑀜𑁆𑀜𑀲𑁆𑀲𑁂𑀯 𑀧𑀼𑀘𑁆𑀙𑀺𑀢𑀢𑁆𑀢𑀸, 𑀢𑀣𑀸𑀧𑀺 𑀲𑀸𑀦𑀼𑀲𑀦𑁆𑀥𑀺𑀓𑀸𑀯 𑀧𑀼𑀘𑁆𑀙𑀸 ¶ , 𑀢𑀢𑁄 𑀏𑀯 𑀲𑀸𑀦𑀼𑀲𑀦𑁆𑀥𑀺𑀓𑀁 𑀯𑀺𑀲𑁆𑀲𑀚𑁆𑀚𑀦𑀁. 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀢𑁂𑀲𑀁 𑀢𑁂𑀲’’𑀦𑁆𑀢𑀺𑀆𑀤𑀺𑀦𑀸. 𑀢𑁂𑀦 𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺𑀯𑀲𑁂𑀦 𑀲𑀸𑀦𑀼𑀲𑀦𑁆𑀥𑀺𑀓𑀸𑀦𑁂𑀯 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀦𑀻𑀢𑀺 𑀤𑀲𑁆𑀲𑁂𑀢𑀺.

𑀧𑀼𑀡𑁆𑀡𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀔𑀚𑁆𑀚𑀦𑀻𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀣𑁂𑀭𑀯𑀕𑁆𑀕𑁄

𑁧. 𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁩. 𑀧𑀝𑀺𑀘𑁆𑀘𑀸𑀢𑀺 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸. ‘‘𑀏𑀲𑁄𑀳𑀫𑀲𑁆𑀫𑀻’’𑀢𑀺 𑀤𑀺𑀝𑁆𑀞𑀺𑀕𑁆𑀕𑀸𑀳𑁄, ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺 𑀫𑀸𑀦𑀕𑁆𑀕𑀸𑀳𑁄 𑀘 𑀢𑀡𑁆𑀳𑀸𑀯𑀲𑁂𑀦𑁂𑀯 𑀳𑁄𑀦𑁆𑀢𑀻𑀢𑀺 𑀢𑀡𑁆𑀳𑀸𑀧𑀺 𑀢𑀣𑀸𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀽𑀢𑀸 𑀢𑀣𑀸𑀧𑀯𑀢𑁆𑀢𑀺 𑀏𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀲𑁆𑀫𑀻𑀢𑀺 𑀏𑀯𑀁 𑀧𑀯𑀢𑁆𑀢𑀁 ¶ 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀧𑀧𑀜𑁆𑀘𑀢𑁆𑀢𑀬𑀁 𑀳𑁄𑀢𑀻’’𑀢𑀺. 𑀤𑀳𑀭𑀲𑀤𑁆𑀤𑁄 𑀩𑀸𑀮𑀤𑀸𑀭𑀓𑁂𑀧𑀺 𑀧𑀯𑀢𑁆𑀢𑀢𑀻𑀢𑀺 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀬𑀼𑀯𑀸’’𑀢𑀺 𑀯𑀼𑀢𑁆𑀢𑀁. 𑀬𑀼𑀯𑀸𑀧𑀺 𑀏𑀓𑁄 𑀅𑀫𑀡𑁆𑀟𑀦𑀲𑀻𑀮𑁄𑀢𑀺 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀫𑀡𑁆𑀟𑀦𑀓𑀚𑀸𑀢𑀺𑀓𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀫𑀼𑀔𑀦𑀺𑀫𑀺𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀲𑁆𑀲 𑀲𑀩𑁆𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑀦𑁆𑀢𑀺 𑀆𑀤𑀸𑀲𑀫𑀡𑁆𑀟𑀮𑀁 𑀑𑀮𑁄𑀓𑀬𑀢𑁄. 𑀧𑀭𑀫𑁆𑀫𑀼𑀔𑀁 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑁂𑀬𑁆𑀬𑀸𑀢𑀺 𑀬𑀤𑀺 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀪𑀺𑀫𑀼𑀔𑀁 𑀳𑀼𑀢𑁆𑀯𑀸 𑀞𑀺𑀢𑀁, 𑀫𑀼𑀔𑀦𑀺𑀫𑀺𑀢𑁆𑀢𑀫𑁆𑀧𑀺 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀪𑀺𑀫𑀼𑀔𑀫𑁂𑀯 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀬𑀤𑀺𑀧𑀺 𑀧𑀭𑀲𑁆𑀲 𑀲𑀤𑀺𑀲𑀲𑁆𑀲 𑀫𑀼𑀔𑀁 𑀪𑀯𑁂𑀬𑁆𑀬, 𑀢𑀣𑀸𑀧𑀺 𑀓𑀸𑀘𑀺 𑀅𑀲𑀤𑀺𑀲𑀢𑀸 𑀪𑀯𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀯𑀡𑁆𑀡𑀸𑀤𑀻𑀳𑀺 𑀅𑀲𑀤𑀺𑀲𑀁 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑁂𑀬𑁆𑀬𑀸’’𑀢𑀺. 𑀦𑀺𑀪𑀸𑀲𑀭𑀽𑀧𑀦𑁆𑀢𑀺 𑀧𑀝𑀺𑀪𑀸𑀲𑀭𑀽𑀧𑀁. 𑀦𑀺𑀪𑀸𑀲𑀭𑀽𑀧𑀁 𑀢𑀸𑀯 𑀓𑀁𑀲𑀸𑀤𑀺𑀫𑀬𑁂 𑀧𑀪𑀲𑁆𑀲𑀭𑁂 𑀫𑀡𑁆𑀟𑀮𑁂 𑀧𑀜𑁆𑀜𑀸𑀬𑀢𑀼, 𑀉𑀤𑀓𑁂 𑀧𑀦 𑀓𑀣𑀦𑁆𑀢𑀺 ‘‘𑀓𑁂𑀦 𑀓𑀸𑀭𑀡𑁂𑀦𑀸’’𑀢𑀺 𑀧𑀼𑀘𑁆𑀙𑀢𑀺. 𑀇𑀢𑀭𑁄 ‘‘𑀫𑀳𑀸𑀪𑀽𑀢𑀸𑀦𑀁 𑀯𑀺𑀲𑀼𑀤𑁆𑀥𑀢𑀸𑀬𑀸’’𑀢𑀺 𑀯𑀤𑀦𑁆𑀢𑁄 𑀢𑀢𑁆𑀣𑀸𑀧𑀺 𑀬𑀣𑀸𑀮𑀤𑁆𑀥𑀧𑀪𑀲𑁆𑀲𑀭𑀪𑀸𑀯𑁂𑀦𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀢𑁆𑀣 𑀘 𑀫𑀡𑁆𑀟𑀦𑀚𑀸𑀢𑀺𑀓𑁄 𑀧𑀼𑀭𑀺𑀲𑁄 𑀯𑀺𑀬 𑀧𑀼𑀣𑀼𑀚𑁆𑀚𑀦𑁄, 𑀆𑀤𑀸𑀲𑀢𑀮𑀸𑀤𑀬𑁄 𑀯𑀺𑀬 𑀧𑀜𑁆𑀘𑀓𑁆𑀔𑀦𑁆𑀥𑀸, 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀺𑀬 ‘‘𑀅𑀲𑁆𑀫𑀻’’𑀢𑀺 𑀕𑀳𑀡𑀁, 𑀫𑀼𑀔𑀦𑀺𑀫𑀺𑀢𑁆𑀢𑀁 𑀉𑀧𑀸𑀤𑀸𑀬 𑀤𑀺𑀲𑁆𑀲𑀫𑀸𑀦𑀭𑀽𑀧𑀸𑀤𑀺 𑀯𑀺𑀬 ‘‘𑀅𑀲𑁆𑀫𑀻’’𑀢𑀺 𑀲𑀢𑀺 ‘‘𑀅𑀳𑀫𑀲𑁆𑀫𑀻’’𑀢𑀺 ‘‘𑀧𑀭𑁄𑀲𑁆𑀫𑀻’’𑀢𑀺𑀆𑀤𑀬𑁄 𑀕𑀸𑀳𑀯𑀺𑀲𑁂𑀲𑀸. 𑀅𑀪𑀺𑀲𑀫𑁂𑀢𑁄𑀢𑀺 𑀅𑀪𑀺𑀲𑀫𑀺𑀢𑁄, 𑀅𑀬𑀫𑁂𑀯 𑀯𑀸 𑀧𑀸𑀞𑁄.

𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀢𑀺𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁪. 𑀫𑀥𑀼𑀭𑀓𑀁 ¶ 𑀯𑀼𑀘𑁆𑀘𑀢𑀺 𑀓𑀸𑀬𑁂 𑀯𑀺𑀪𑀸𑀭𑀦𑁆𑀢𑀺 𑀆𑀳 𑁋 ‘‘𑀫𑀥𑀼𑀭𑀓𑀚𑀸𑀢𑁄 𑀯𑀺𑀬𑀸𑀢𑀺 𑀲𑀜𑁆𑀚𑀸𑀢𑀕𑀭𑀼𑀪𑀸𑀯𑁄 𑀯𑀺𑀬𑀸’’𑀢𑀺. 𑀕𑀭𑀼𑀪𑀸𑀯𑁂 𑀲𑀢𑀺 𑀮𑀳𑀼𑀢𑀸 𑀅𑀦𑁄𑀓𑀸𑀲𑀸𑀯, 𑀢𑀣𑀸 𑀫𑀼𑀤𑀼𑀢𑀸 𑀓𑀫𑁆𑀫𑀜𑁆𑀜𑀢𑀸 𑀘𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀓𑀫𑁆𑀫𑀜𑁆𑀜𑁄’’𑀢𑀺. ‘‘𑀓𑀸𑀬𑁂’’𑀢𑀺 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀁. 𑀦 𑀧𑀓𑁆𑀔𑀸𑀬𑀦𑁆𑀢𑀻𑀢𑀺 𑀧𑀓𑀸𑀲𑀸 𑀳𑀼𑀢𑁆𑀯𑀸 𑀦 𑀔𑀸𑀬𑀦𑁆𑀢𑀺. 𑀢𑁂𑀦𑀸𑀳 ‘‘𑀦 𑀧𑀸𑀓𑀝𑀸 𑀳𑁄𑀦𑁆𑀢𑀻’’𑀢𑀺. 𑀉𑀧𑀝𑁆𑀞𑀳𑀦𑁆𑀢𑀻𑀢𑀺 𑀉𑀧𑀢𑀺𑀝𑁆𑀞𑀦𑁆𑀢𑀺. 𑀦 𑀤𑀺𑀲𑁆𑀲𑀢𑀻𑀢𑀺 𑀕𑀳𑀡𑀁 𑀦 𑀕𑀘𑁆𑀙𑀢𑀺. 𑀫𑀳𑀸𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀅𑀝𑁆𑀞𑀯𑀢𑁆𑀣𑀼𑀓𑀸 𑀲𑁄𑀴𑀲𑀯𑀢𑁆𑀣𑀼𑀓𑀸 𑀘 𑀯𑀺𑀫𑀢𑀺. 𑀦 𑀳𑀺 𑀉𑀧𑁆𑀧𑀚𑁆𑀚𑀢𑀺 𑀧𑀭𑀺𑀧𑀓𑁆𑀓𑀓𑀼𑀲𑀮𑀫𑀽𑀮𑀢𑁆𑀢𑀸.

𑀓𑀸𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑀬𑁂𑀦 𑀅𑀥𑀺𑀧𑁆𑀧𑀸𑀬𑁂𑀦 𑀪𑀕𑀯𑀢𑀸 𑀦𑀺𑀦𑁆𑀦𑀁 𑀧𑀮𑁆𑀮𑀮𑀁 𑀓𑀸𑀫𑀸𑀦𑀁 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀆𑀪𑀢𑀁, 𑀢𑀁 𑀅𑀥𑀺𑀧𑁆𑀧𑀸𑀬𑀁 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀺𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀬𑀫𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁫. 𑀤𑀺𑀝𑁆𑀞𑀺 ¶ 𑀏𑀯 𑀤𑀺𑀝𑁆𑀞𑀺𑀕𑀢𑀁 ‘‘𑀕𑀽𑀣𑀕𑀢𑀁 𑀫𑀼𑀢𑁆𑀢𑀕𑀢’’𑀦𑁆𑀢𑀺 (𑀫. 𑀦𑀺. 𑁨.𑁧𑁧𑁯; 𑀅. 𑀦𑀺. 𑁯.𑁧𑁧) 𑀬𑀣𑀸. 𑀤𑀺𑀝𑁆𑀞𑀺𑀕𑀢𑀁 𑀦𑀸𑀫 𑀚𑀸𑀢𑀁 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀲𑀢𑁆𑀢𑀲𑁆𑀲 𑀕𑀳𑀺𑀢𑀢𑁆𑀢𑀸.

𑀓𑀼𑀧𑀺𑀢𑁂𑀢𑀺 𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀭𑁄𑀕𑁂𑀦 𑀓𑀼𑀧𑀺𑀢𑁂. 𑀧𑀕𑁆𑀕𑀬𑁆𑀳𑀸𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀯𑀺𑀬 𑀣𑁂𑀭𑀲𑁆𑀲 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀲𑀫𑁆𑀫𑀼𑀔𑀸 𑀅𑀢𑁆𑀢𑀦𑁄 𑀮𑀤𑁆𑀥𑀺𑀁 𑀧𑀕𑁆𑀕𑀬𑁆𑀳 ‘‘𑀏𑀯𑀁 𑀔𑁆𑀯𑀸𑀳’’𑀦𑁆𑀢𑀺 𑀏𑀯𑀁 𑀦𑀺𑀘𑁆𑀙𑀬𑁂𑀦 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄.

𑀅𑀦𑀼𑀬𑁄𑀕𑀯𑀢𑁆𑀢𑀁 𑀦𑀸𑀫 𑀬𑁂𑀦 𑀬𑀼𑀢𑁆𑀢𑁄, 𑀢𑀲𑁆𑀲 𑀅𑀢𑁆𑀢𑀦𑁄 𑀕𑀸𑀳𑀁 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸𑀯 𑀬𑀸𑀣𑀸𑀯𑀢𑁄 𑀧𑀯𑁂𑀤𑀦𑀁. 𑀣𑁂𑀭𑀲𑁆𑀲 𑀅𑀦𑀼𑀬𑁄𑀕𑁂 𑀪𑀼𑀫𑁆𑀫𑀦𑁆𑀢𑀺 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀆𑀯𑀼𑀲𑁄 𑀬𑀫𑀓𑀸’’𑀢𑀺𑀆𑀤𑀺𑀦𑀸 𑀣𑁂𑀭𑁂𑀦 𑀓𑀣𑀺𑀢𑀧𑀼𑀘𑁆𑀙𑀸𑀬 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁄. 𑀲𑀘𑁂 𑀢𑀁 𑀆𑀯𑀼𑀲𑁄𑀢𑀺 𑀇𑀤𑀦𑁆𑀢𑀺 ‘‘𑀲𑀘𑁂 𑀢𑀁, 𑀆𑀯𑀼𑀲𑁄’’𑀢𑀺 𑀏𑀯𑀫𑀸𑀤𑀺𑀓𑀁 𑀇𑀤𑀁 𑀯𑀘𑀦𑀁. 𑀏𑀢𑀦𑁆𑀢𑀺 𑀬𑀫𑀓𑀢𑁆𑀣𑁂𑀭𑀁. 𑀅𑀜𑁆𑀜𑀦𑁆𑀢𑀺 𑀅𑀭𑀳𑀢𑁆𑀢𑀁. 𑀯𑀢𑁆𑀢𑀩𑁆𑀩𑀸𑀓𑀸𑀭𑁂𑀦 𑀯𑀤𑀦𑁆𑀢𑁄 𑀅𑀢𑁆𑀣𑀢𑁄 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀭𑁄𑀦𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺.

𑀏𑀢𑀲𑁆𑀲 𑀧𑀞𑀫𑀫𑀕𑁆𑀕𑀲𑁆𑀲𑀸𑀢𑀺 𑀏𑀢𑀲𑁆𑀲 𑀇𑀤𑀸𑀦𑀺𑀬𑁂𑀯 𑀢𑀺𑀧𑀭𑀺𑀯𑀝𑁆𑀝𑀤𑁂𑀲𑀦𑀸𑀯𑀲𑀸𑀦𑁂 𑀢𑀬𑀸 𑀅𑀥𑀺𑀕𑀢𑀲𑁆𑀲 𑀧𑀞𑀫𑀫𑀕𑁆𑀕𑀲𑁆𑀲 ¶ . 𑀘𑀢𑀽𑀳𑀺 𑀬𑁄𑀕𑁂𑀳𑀻𑀢𑀺 𑀅𑀢𑁆𑀢𑀢𑁄 𑀧𑀺𑀬𑀢𑁄 𑀉𑀤𑀸𑀲𑀺𑀦𑀢𑁄 𑀯𑁂𑀭𑀺𑀢𑁄𑀢𑀺 𑀘𑀢𑀽𑀳𑀺𑀧𑀺 𑀉𑀧𑁆𑀧𑀚𑁆𑀚𑀦𑀅𑀦𑀢𑁆𑀣𑀬𑁄𑀕𑁂𑀳𑀺.

𑀉𑀧𑁂𑀢𑀻𑀢𑀺 𑀢𑀡𑁆𑀳𑀼𑀧𑀬𑀤𑀺𑀝𑁆𑀞𑀼𑀧𑀬𑁂𑀳𑀺 𑀉𑀧𑀸𑀤𑀺𑀬𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀯𑀢𑁆𑀣𑀼𑀁 𑀧𑀧𑁆𑀧𑁄𑀢𑀺. 𑀉𑀧𑀸𑀤𑀺𑀬𑀢𑀻𑀢𑀺 𑀤𑀴𑁆𑀳𑀕𑁆𑀕𑀸𑀳𑀁 𑀕𑀡𑁆𑀳𑀸𑀢𑀺. 𑀅𑀥𑀺𑀢𑀺𑀝𑁆𑀞𑀢𑀻𑀢𑀺 𑀅𑀪𑀺𑀦𑀺𑀯𑀺𑀲𑁆𑀲 𑀢𑀺𑀝𑁆𑀞𑀢𑀺. 𑀓𑀺𑀦𑁆𑀢𑀺? ‘‘𑀅𑀢𑁆𑀢𑀸 𑀫𑁂’’𑀢𑀺. 𑀧𑀘𑁆𑀘𑀢𑁆𑀣𑀺𑀓𑀸 𑀫𑁂 𑀏𑀢𑁂𑀢𑀺 𑀏𑀢𑁂 𑀭𑀽𑀧𑀯𑁂𑀤𑀦𑀸𑀤𑀬𑁄 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀫𑀬𑁆𑀳𑀁 𑀧𑀘𑁆𑀘𑀢𑁆𑀣𑀺𑀓𑀸 𑀅𑀦𑀢𑁆𑀣𑀸𑀯𑀳𑀢𑁆𑀢𑀸𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀜𑀢𑁆𑀯𑀸. 𑀯𑀺𑀧𑀲𑁆𑀲𑀦𑀸𑀬 𑀬𑁄𑀚𑁂𑀢𑁆𑀯𑀸𑀢𑀺 𑀯𑀺𑀧𑀲𑁆𑀲𑀦𑀸𑀬 𑀔𑀦𑁆𑀥𑁂 𑀬𑁄𑀚𑁂𑀢𑁆𑀯𑀸.

𑀬𑀫𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀦𑀼𑀭𑀸𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁬. 𑀢𑀲𑁆𑀲𑁂𑀯 𑀯𑀺𑀳𑀸𑀭𑀲𑁆𑀲𑀸𑀢𑀺 𑀫𑀳𑀸𑀯𑀦𑁂 𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀪𑀕𑀯𑀸 𑀯𑀺𑀳𑀭𑀢𑀺, 𑀢𑀲𑁆𑀲𑁂𑀯 𑀯𑀺𑀳𑀸𑀭𑀲𑁆𑀲. 𑀇𑀫𑁂𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸. 𑀬𑀲𑁆𑀫𑀸 𑀅𑀬𑀁 𑀣𑁂𑀭𑁄 ¶ 𑀞𑀧𑀦𑀻𑀬𑀁 𑀧𑀜𑁆𑀳𑀁 𑀞𑀧𑀦𑀻𑀬𑀪𑀸𑀯𑁂𑀦 𑀦 𑀞𑀧𑁂𑀲𑀺, 𑀢𑀲𑁆𑀫𑀸. 𑀅𑀜𑁆𑀜𑀢𑀺𑀢𑁆𑀣𑀺𑀬𑀸…𑀧𑁂… 𑀏𑀢𑀤𑀯𑁄𑀘𑀼𑀁. 𑀢𑁂𑀦𑀸𑀳 ‘‘𑀏𑀓𑀤𑁂𑀲𑁂𑀦 𑀲𑀸𑀲𑀦𑀲𑀫𑀬𑀁 𑀚𑀸𑀦𑀦𑁆𑀢𑀸’’𑀢𑀺.

𑀕𑀳𑀺𑀢𑀫𑁂𑀯 𑀳𑁄𑀢𑀺 𑀢𑀢𑁄 𑀧𑀕𑁂𑀯 𑀲𑀺𑀤𑁆𑀥𑀢𑁆𑀢𑀸. 𑀢𑁂𑀦𑀸𑀳 ‘‘𑀢𑀲𑁆𑀲 𑀫𑀽𑀮𑀢𑁆𑀢𑀸’’𑀢𑀺. 𑀏𑀯𑀦𑁆𑀢𑀺 ‘‘𑀤𑀼𑀓𑁆𑀔𑀜𑁆𑀘𑁂𑀯 𑀧𑀜𑁆𑀜𑀧𑁂𑀫𑀺, 𑀤𑀼𑀓𑁆𑀔𑀲𑁆𑀲 𑀘 𑀦𑀺𑀭𑁄𑀥’’𑀦𑁆𑀢𑀺 𑀏𑀯𑀁. 𑀯𑀝𑁆𑀝𑀯𑀺𑀯𑀝𑁆𑀝𑀫𑁂𑀯𑀸𑀢𑀺 𑀧𑀜𑁆𑀘𑀦𑁆𑀦𑀁 𑀧𑀦 𑀔𑀦𑁆𑀥𑀸𑀦𑀁 𑀲𑀫𑀦𑀼𑀧𑀲𑁆𑀲𑀦𑀸𑀬 𑀯𑀲𑁂𑀦 𑀯𑀝𑁆𑀝𑀁, ‘‘𑀏𑀯𑀁 𑀧𑀲𑁆𑀲’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀯𑀝𑁆𑀝𑀁 𑀓𑀣𑀺𑀢𑀫𑁂𑀯.

𑀅𑀦𑀼𑀭𑀸𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀯𑀓𑁆𑀓𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁭. 𑀦𑀕𑀭𑀫𑀚𑁆𑀛𑁂 𑀫𑀳𑀸𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑀻𑀢𑀺 𑀦𑀕𑀭𑀫𑀚𑁆𑀛𑁂𑀦 𑀆𑀕𑀘𑁆𑀙𑀦𑁆𑀢𑁄 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑁄 𑀫𑀳𑀦𑁆𑀢𑁄 𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑀢𑀺. 𑀲𑀫𑀦𑁆𑀢𑀢𑁄 𑀅𑀥𑁄𑀲𑀻𑀢𑀺 𑀲𑀩𑁆𑀩𑀪𑀸𑀕𑁂𑀦 𑀧𑀭𑀺𑀧𑁆𑀨𑀦𑁆𑀤𑀺. 𑀇𑀭𑀺𑀬𑀸𑀧𑀣𑀁 𑀬𑀸𑀧𑁂𑀢𑀼𑀦𑁆𑀢𑀺 𑀲𑀬𑀦𑀦𑀺𑀲𑀚𑁆𑀚𑀸𑀤𑀺𑀪𑁂𑀤𑀁 𑀇𑀭𑀺𑀬𑀸𑀧𑀣𑀁 𑀧𑀯𑀢𑁆𑀢𑁂𑀢𑀼𑀁. 𑀦𑀺𑀯𑀢𑁆𑀢𑀦𑁆𑀢𑀻𑀢𑀺 𑀑𑀲𑀓𑁆𑀓𑀦𑁆𑀢𑀺, 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀥𑀺𑀕𑀘𑁆𑀙𑀦𑁆𑀢𑀻𑀢𑀺 𑀯𑀟𑁆𑀠𑀦𑁆𑀢𑀺. 𑀲𑀢𑁆𑀣𑀼 𑀕𑀼𑀡𑀲𑀭𑀻𑀭𑀁 𑀦𑀸𑀫 𑀦𑀯𑀯𑀺𑀥𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀥𑀺𑀕𑀫𑀫𑀽𑀮𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀦𑀯𑀯𑀺𑀥𑁄 𑀳𑀺…𑀧𑁂… 𑀓𑀸𑀬𑁄 𑀦𑀸𑀫𑀸’’𑀢𑀺, 𑀬𑀣𑀸 𑀲𑀢𑁆𑀢𑀸𑀦𑀁 𑀓𑀸𑀬𑁄 𑀧𑀝𑀺𑀲𑀦𑁆𑀥𑀺𑀫𑀽𑀮𑀓𑁄.

𑀓𑀸𑀴𑀲𑀺𑀮𑀸𑀬𑀁 𑀓𑀢𑀯𑀺𑀳𑀸𑀭𑁄 𑀓𑀸𑀴𑀲𑀺𑀮𑀸𑀯𑀺𑀳𑀸𑀭𑁄. 𑀫𑀕𑁆𑀕𑀯𑀺𑀫𑁄𑀓𑁆𑀔𑀢𑁆𑀣𑀸𑀬𑀸𑀢𑀺 𑀅𑀕𑁆𑀕𑀫𑀕𑁆𑀕𑀯𑀺𑀫𑁄𑀓𑁆𑀔𑀸𑀥𑀺𑀕𑀫𑀸𑀬. 𑀤𑁂𑀯𑀢𑀸𑀢𑀺 𑀲𑀼𑀤𑁆𑀥𑀸𑀯𑀸𑀲𑀤𑁂𑀯𑀢𑀸. 𑀅𑀮𑀸𑀫𑀓𑀁 𑀦𑀸𑀫 𑀧𑀼𑀣𑀼𑀚𑁆𑀚𑀦𑀓𑀸𑀮𑀓𑀺𑀭𑀺𑀬𑀸𑀬 𑀅𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀣𑁂𑀭𑁄 𑀓𑀺𑀭𑀸’’𑀢𑀺𑀆𑀤𑀺 ¶ . 𑀏𑀓𑀁 𑀤𑁆𑀯𑁂 𑀜𑀸𑀡𑀸𑀦𑀻𑀢𑀺 𑀏𑀓𑀁 𑀤𑁆𑀯𑁂 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀺 𑀲𑀪𑀸𑀯𑀢𑁄 𑀅𑀯𑀲𑁆𑀲𑀁 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀬𑀁 𑀥𑀫𑁆𑀫𑀢𑀸. 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀸𑀦𑀺 𑀢𑀁𑀢𑀁𑀫𑀕𑁆𑀕𑀯𑀼𑀝𑁆𑀞𑀸𑀦𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 𑀏𑀯. 𑀏𑀓𑀁 𑀤𑁆𑀯𑁂𑀢𑀺 𑀯𑀘𑀦𑀁 𑀉𑀧𑁆𑀧𑀦𑁆𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁.

𑀥𑀽𑀫𑀸𑀬𑀦𑀪𑀸𑀯𑁄 𑀥𑀽𑀫𑀸𑀓𑀸𑀭𑀢𑀸, 𑀢𑀣𑀸 𑀢𑀺𑀫𑀺𑀭𑀸𑀬𑀦𑀪𑀸𑀯𑁄.

𑀯𑀓𑁆𑀓𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀲𑁆𑀲𑀚𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁮. 𑀧𑀲𑁆𑀲𑀫𑁆𑀪𑀺𑀢𑁆𑀯𑀸𑀢𑀺 ¶ 𑀦𑀺𑀭𑁄𑀥𑁂𑀢𑁆𑀯𑀸. 𑀦𑁄 𑀘 𑀲𑁆𑀯𑀸𑀳𑀦𑁆𑀢𑀺 𑀦𑁄 𑀘 𑀲𑀼 𑀅𑀳𑀁. 𑀧𑀭𑀺𑀳𑀸𑀬𑀺 𑀓𑀼𑀧𑁆𑀧𑀥𑀫𑁆𑀫𑀢𑁆𑀢𑀸. 𑀏𑀢𑀦𑁆𑀢𑀺 𑀲𑀫𑀸𑀥𑀺𑀫𑀢𑁆𑀢𑀲𑀸𑀭𑀁, 𑀲𑀻𑀮𑀫𑀢𑁆𑀢𑁂 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀓𑀣𑀁 𑀳𑁄𑀢𑀻𑀢𑀺 𑀓𑀣𑀁 𑀅𑀪𑀺𑀦𑀦𑁆𑀤𑀦𑀸 𑀳𑁄𑀢𑀺. 𑀤𑀼𑀓𑁆𑀔𑀁 𑀧𑀢𑁆𑀯𑀸𑀢𑀺 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀳𑁂𑀢𑀼 𑀲𑀼𑀔𑀁 𑀧𑀢𑁆𑀣𑁂𑀢𑀺 ‘‘𑀏𑀯𑀁 𑀫𑁂 𑀤𑀼𑀓𑁆𑀔𑀧𑀭𑀺𑀴𑀸𑀳𑁄 𑀦 𑀪𑀯𑀺𑀲𑁆𑀲𑀢𑀻’’𑀢𑀺. 𑀬𑀤𑀕𑁆𑀕𑁂𑀦𑀸𑀢𑀺 𑀬𑁂𑀦 𑀪𑀸𑀕𑁂𑀦. ‘‘𑀤𑀼𑀓𑁆𑀔𑀁 𑀧𑀢𑁆𑀣𑁂𑀢𑀺𑀬𑁂𑀯𑀸’’𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀲𑀼𑀔𑀯𑀺𑀧𑀭𑀺𑀡𑀸𑀫𑁂𑀦 𑀳𑀻’’𑀢𑀺𑀆𑀤𑀺. 𑀲𑀼𑀔𑀯𑀺𑀧𑀭𑀺𑀯𑀢𑁆𑀢𑁂 𑀲𑀼𑀔𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀁, 𑀢𑀲𑁆𑀫𑀸 𑀲𑀼𑀔𑀁 𑀅𑀪𑀺𑀦𑀦𑁆𑀤𑀦𑁆𑀢𑁄 𑀅𑀢𑁆𑀣𑀢𑁄 𑀤𑀼𑀓𑁆𑀔𑀁 𑀅𑀪𑀺𑀦𑀦𑁆𑀤𑀢𑀺 𑀦𑀸𑀫.

𑀅𑀲𑁆𑀲𑀚𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀔𑁂𑀫𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁯. 𑀅𑀢𑁆𑀢𑀦𑀺𑀬𑀦𑁆𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑀧𑀭𑀺𑀓𑀧𑁆𑀧𑀺𑀢𑀲𑁆𑀲 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁. 𑀢𑁂𑀦𑀸𑀳 ‘‘𑀅𑀢𑁆𑀢𑀦𑁄 𑀧𑀭𑀺𑀓𑁆𑀔𑀸𑀭𑀚𑀸𑀢’’𑀦𑁆𑀢𑀺. 𑀢𑀡𑁆𑀳𑀸𑀫𑀸𑀦𑁄 𑀅𑀥𑀺𑀕𑀢𑁄 𑀅𑀭𑀳𑀢𑁆𑀢𑀲𑁆𑀲 𑀅𑀦𑀥𑀺𑀕𑀢𑀢𑁆𑀢𑀸, 𑀦𑁄 𑀤𑀺𑀝𑁆𑀞𑀺𑀫𑀸𑀦𑁄 𑀅𑀥𑀺𑀕𑀢𑁄, 𑀢𑀣𑀸 𑀓𑀸𑀫𑀭𑀸𑀕𑀩𑁆𑀬𑀸𑀧𑀸𑀤𑀸𑀧𑀺. 𑀅𑀦𑀸𑀕𑀸𑀫𑀻 𑀓𑀺𑀭 𑀔𑁂𑀫𑀓𑀢𑁆𑀣𑁂𑀭𑁄, ‘‘𑀲𑀓𑀤𑀸𑀕𑀸𑀫𑀻’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀲𑀦𑁆𑀥𑀸𑀯𑀦𑀺𑀓𑀸𑀬𑀸𑀢𑀺 𑀲𑀜𑁆𑀘𑀭𑀡𑁂𑀦. 𑀢𑁂𑀦𑀸𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀕𑀫𑀦𑀸𑀕𑀫𑀦𑁂𑀦𑀸’’𑀢𑀺. 𑀘𑀢𑀼𑀓𑁆𑀔𑀢𑁆𑀢𑀼𑀁 𑀕𑀫𑀦𑀸𑀕𑀫𑀦𑁂𑀦𑀸𑀢𑀺 𑀘𑀢𑀼𑀓𑁆𑀔𑀢𑁆𑀢𑀼𑀁 𑀕𑀫𑀦𑁂𑀦 𑀘 𑀆𑀕𑀫𑀦𑁂𑀦 𑀘. 𑀢𑁂𑀦𑀸𑀳 𑁋 ‘‘𑀢𑀁 𑀤𑀺𑀯𑀲𑀁 𑀤𑁆𑀯𑀺𑀬𑁄𑀚𑀦𑀁 𑀅𑀤𑁆𑀥𑀸𑀦𑀁 𑀆𑀳𑀺𑀡𑁆𑀟𑀻’’𑀢𑀺. 𑀜𑀢𑁆𑀯𑀸𑀢𑀺 𑀅𑀚𑁆𑀛𑀸𑀲𑀬𑀁 𑀜𑀢𑁆𑀯𑀸. 𑀣𑁂𑀭𑁄𑀢𑀺 𑀔𑁂𑀫𑀓𑀢𑁆𑀣𑁂𑀭𑁄.

𑀭𑀽𑀧𑀫𑁂𑀯 𑀅𑀲𑁆𑀫𑀻𑀢𑀺 𑀯𑀤𑀢𑀻𑀢𑀺 𑀭𑀽𑀧𑀓𑁆𑀔𑀦𑁆𑀥𑀫𑁂𑀯 ‘‘𑀅𑀲𑁆𑀫𑀻’’𑀢𑀺 𑀕𑀸𑀳𑀲𑁆𑀲 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀯𑀤𑀢𑀺. 𑀅𑀥𑀺𑀕𑀢𑁄 𑀢𑀡𑁆𑀳𑀸𑀫𑀸𑀦𑁄.

𑀅𑀡𑀼𑀲𑀳𑀕𑀢𑁄𑀢𑀺 ¶ 𑀅𑀡𑀼𑀪𑀸𑀯𑀁 𑀕𑀢𑁄. 𑀢𑁂𑀦𑀸𑀳 ‘‘𑀲𑀼𑀔𑀼𑀫𑁄’’𑀢𑀺. 𑀢𑀬𑁄 𑀔𑀸𑀭𑀸 𑀯𑀺𑀬 𑀢𑀺𑀲𑁆𑀲𑁄 𑀅𑀦𑀼𑀧𑀲𑁆𑀲𑀦𑀸 𑀘𑀺𑀢𑁆𑀢𑀲𑀁𑀓𑀺𑀮𑁂𑀲𑀲𑁆𑀲 𑀯𑀺𑀲𑁄𑀥𑀦𑀢𑁄. 𑀲𑀻𑀮𑀕𑀦𑁆𑀥𑀸𑀤𑀻𑀳𑀺 𑀕𑀼𑀡𑀕𑀦𑁆𑀥𑁂𑀳𑀺.

𑀓𑀣𑁂𑀢𑀼𑀦𑁆𑀢𑀺 𑀉𑀤𑁆𑀤𑁂𑀲𑀯𑀲𑁂𑀦 𑀓𑀣𑁂𑀢𑀼𑀁. 𑀧𑀓𑀸𑀲𑁂𑀢𑀼𑀦𑁆𑀢𑀺 𑀦𑀺𑀤𑁆𑀤𑁂𑀲𑀯𑀲𑁂𑀦 𑀢𑀫𑀢𑁆𑀣𑀁 𑀧𑀓𑀸𑀲𑁂𑀢𑀼𑀁. 𑀚𑀸𑀦𑀸𑀧𑁂𑀢𑀼𑀦𑁆𑀢𑀺 𑀓𑀸𑀭𑀡𑀯𑀲𑁂𑀦 𑀚𑀸𑀦𑀸𑀧𑁂𑀢𑀼𑀁. 𑀧𑀢𑀺𑀝𑁆𑀞𑀸𑀧𑁂𑀢𑀼𑀦𑁆𑀢𑀺 𑀓𑀣𑀸𑀧𑁂𑀢𑀼𑀁. 𑀯𑀺𑀯𑀝𑀁 𑀓𑀸𑀢𑀼𑀦𑁆𑀢𑀺 𑀉𑀤𑀸𑀳𑀭𑀡𑀁 𑀯𑀡𑁆𑀡𑁂𑀢𑁆𑀯𑀸 𑀧𑀸𑀓𑀝𑀁 𑀓𑀸𑀢𑀼𑀁 ¶ . 𑀲𑀼𑀯𑀺𑀪𑀢𑁆𑀢𑀁 𑀓𑀸𑀢𑀼𑀦𑁆𑀢𑀺 𑀅𑀦𑁆𑀯𑀬𑀢𑁄 𑀩𑁆𑀬𑀢𑀺𑀭𑁂𑀓𑀢𑁄 𑀲𑀼𑀝𑁆𑀞𑀼, 𑀯𑀺𑀪𑀢𑁆𑀢𑀁 𑀓𑀸𑀢𑀼𑀁. 𑀉𑀢𑁆𑀢𑀸𑀦𑀓𑀁 𑀓𑀸𑀢𑀼𑀦𑁆𑀢𑀺 𑀉𑀧𑀦𑀬𑀦𑀺𑀕𑀫𑁂𑀳𑀺 𑀢𑀫𑀢𑁆𑀣𑀁 𑀯𑀺𑀪𑀽𑀢𑀁 𑀓𑀸𑀢𑀼𑀁. 𑀅𑀜𑁆𑀜𑁂𑀦 𑀦𑀻𑀳𑀸𑀭𑁂𑀦𑀸𑀢𑀺 𑀯𑀺𑀧𑀲𑁆𑀲𑀦𑀸𑀯𑀺𑀫𑀼𑀢𑁆𑀢𑁂𑀦 𑀘𑀺𑀢𑁆𑀢𑀸𑀪𑀺𑀦𑀻𑀳𑀸𑀭𑁂𑀦.

𑀔𑁂𑀫𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀙𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁦. 𑀫𑀓𑁆𑀔𑀻𑀢𑀺 𑀕𑀼𑀡𑀫𑀓𑁆𑀔𑀦𑀮𑀓𑁆𑀔𑀡𑁂𑀦 𑀫𑀓𑁆𑀔𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀧𑀴𑀸𑀲𑀻𑀢𑀺 𑀬𑀼𑀕𑀕𑁆𑀕𑀸𑀳𑀮𑀓𑁆𑀔𑀡𑁂𑀦 𑀧𑀴𑀸𑀲𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀏𑀢𑀁 𑀅𑀯𑁄𑀘𑀸𑀢𑀺 ‘‘𑀑𑀯𑀤𑀦𑁆𑀢𑀼 𑀫𑀁…𑀧𑁂… 𑀧𑀲𑁆𑀲𑁂𑀬𑁆𑀬’’𑀦𑁆𑀢𑀺 𑀏𑀢𑀁 𑀅𑀯𑁄𑀘.

𑀣𑁂𑀭𑀦𑁆𑀢𑀺 𑀙𑀦𑁆𑀦𑀢𑁆𑀣𑁂𑀭𑀁. 𑀅𑀢𑁆𑀢𑀦𑁄 𑀤𑀼𑀕𑁆𑀕𑀳𑀡𑁂𑀦 𑀓𑀜𑁆𑀘𑀺 𑀉𑀧𑀸𑀭𑀫𑁆𑀪𑀫𑁆𑀧𑀺 𑀓𑀭𑁂𑀬𑁆𑀬. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀯𑀁 𑀓𑀺𑀭 𑀦𑁂𑀲𑀁 𑀅𑀳𑁄𑀲𑀻’’𑀢𑀺𑀆𑀤𑀺. 𑀦𑀺𑀤𑁆𑀤𑁄𑀲𑀫𑁂𑀯𑀲𑁆𑀲 𑀓𑀢𑁆𑀯𑀸𑀢𑀺 𑀆𑀤𑀺𑀢𑁄 𑀅𑀦𑀼𑀭𑀽𑀧𑀢𑁆𑀢𑀫𑁂𑀯 𑀓𑀢𑁆𑀯𑀸 𑀲𑀤𑁆𑀥𑀫𑁆𑀫𑀁 𑀓𑀣𑁂𑀲𑁆𑀲𑀸𑀫𑀸𑀢𑀺.

𑀧𑀭𑀺𑀢𑀲𑁆𑀲𑀦𑀸 𑀉𑀧𑀸𑀤𑀸𑀦𑀦𑁆𑀢𑀺 𑀪𑀬𑀧𑀭𑀺𑀢𑀲𑁆𑀲𑀦𑀸 𑀤𑀺𑀝𑁆𑀞𑀼𑀧𑀸𑀤𑀸𑀦𑀁. 𑀅𑀦𑀢𑁆𑀢𑀦𑀺 𑀲𑀢𑀺 𑀅𑀦𑀢𑁆𑀢𑀓𑀢𑀸𑀦𑀺 𑀓𑀫𑁆𑀫𑀸𑀦𑀺 𑀓𑀫𑀢𑁆𑀢𑀸𑀦𑀁 𑀨𑀼𑀲𑀺𑀲𑁆𑀲𑀦𑁆𑀢𑀻𑀢𑀺 𑀪𑀬𑀧𑀭𑀺𑀢𑀲𑁆𑀲𑀦𑀸 𑀘𑁂𑀯 𑀤𑀺𑀝𑁆𑀞𑀼𑀧𑀸𑀤𑀸𑀦𑀜𑁆𑀘 𑀉𑀧𑁆𑀧𑀚𑁆𑀚𑀢𑀺. 𑀧𑀝𑀺𑀦𑀺𑀯𑀢𑁆𑀢𑀢𑀻𑀢𑀺 𑀬𑀣𑀸𑀭𑀤𑁆𑀥𑀯𑀺𑀧𑀲𑁆𑀲𑀦𑀸𑀢𑁄 𑀧𑀝𑀺𑀦𑀺𑀯𑀢𑁆𑀢𑀢𑀺, 𑀦𑀸𑀲𑀓𑁆𑀔𑀻𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀧𑀦𑁂𑀢𑀲𑁆𑀲 𑀯𑀺𑀧𑀲𑁆𑀲𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀏𑀯𑀁 𑀅𑀳𑁄𑀲𑀻𑀢𑀺 𑀢𑀢𑁆𑀣 𑀓𑀸𑀭𑀡𑀁 𑀯𑀤𑀢𑀺 ‘‘𑀅𑀬𑀁 𑀓𑀺𑀭𑀸’’𑀢𑀺𑀆𑀤𑀺𑀦𑀸. 𑀏𑀯𑀦𑁆𑀢𑀺 ‘‘𑀓𑁄 𑀦𑀼 𑀔𑁄 𑀫𑁂 𑀅𑀢𑁆𑀢𑀸’’𑀢𑀺 𑀏𑀯𑀁 𑀦 𑀳𑁄𑀢𑀺. 𑀢𑀸𑀯𑀢𑀺𑀓𑀸 𑀯𑀺𑀲𑁆𑀲𑀢𑁆𑀣𑀻𑀢𑀺 ‘‘𑀫𑀬𑁆𑀳𑀁 𑀥𑀫𑁆𑀫𑀁 𑀤𑁂𑀲𑁂𑀢𑀽’’𑀢𑀺 𑀯𑀼𑀢𑁆𑀢𑀯𑀺𑀲𑁆𑀲𑀸𑀲𑁄 𑀅𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀓𑀘𑁆𑀘𑀸𑀦𑀲𑀢𑁆𑀣𑀁 𑀅𑀤𑁆𑀤𑀲𑀸𑀢𑀺 𑀬𑁄𑀚𑀦𑀸. ‘‘𑀤𑁆𑀯𑀬𑀦𑀺𑀲𑁆𑀲𑀺𑀢𑁄, 𑀓𑀘𑁆𑀘𑀸𑀦, 𑀮𑁄𑀓𑁄’’𑀢𑀺𑀆𑀤𑀺 𑀤𑀺𑀝𑁆𑀞𑀺𑀯𑀺𑀦𑀺𑀯𑁂𑀞𑀦𑀸. ‘‘𑀏𑀢𑁂 𑀢𑁂, 𑀓𑀘𑁆𑀘𑀸𑀦, 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫𑀸’’𑀢𑀺𑀆𑀤𑀺 𑀩𑀼𑀤𑁆𑀥𑀩𑀮𑀤𑀻𑀧𑀦𑀸.

𑀙𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯-𑁧𑁦. 𑀭𑀸𑀳𑀼𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁧-𑁯𑁨. 𑀏𑀢𑀸𑀦𑀺 ¶ 𑀲𑀼𑀢𑁆𑀢𑀸𑀦𑀺. 𑀇𑀥𑀸𑀕𑀢𑀸𑀦𑀻𑀢𑀺 𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀆𑀦𑀻𑀢𑀸𑀦𑀺 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀻𑀢𑀺.

𑀭𑀸𑀳𑀼𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀣𑁂𑀭𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀼𑀧𑁆𑀨𑀯𑀕𑁆𑀕𑁄

𑁧. 𑀦𑀤𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁩. 𑀧𑀩𑁆𑀩𑀢𑁂𑀬𑁆𑀬𑀸𑀢𑀺 ¶ 𑀧𑀩𑁆𑀩𑀢𑀢𑁄 𑀆𑀕𑀢𑀸. 𑀢𑀢𑁄 𑀏𑀯 𑀑𑀳𑀸𑀭𑀺𑀦𑀻. 𑀢𑁂𑀦𑀲𑁆𑀲𑀸 𑀘𑀡𑁆𑀟𑀲𑁄𑀢𑀢𑀁 𑀤𑀲𑁆𑀲𑁂𑀢𑀺. 𑀤𑀽𑀭𑀁 𑀕𑀘𑁆𑀙𑀢𑀻𑀢𑀺 𑀤𑀽𑀭𑀗𑁆𑀕𑀫𑀸. 𑀢𑁂𑀦𑀲𑁆𑀲𑀸 𑀫𑀳𑁄𑀖𑀢𑀁 𑀤𑀲𑁆𑀲𑁂𑀢𑀺.

𑀲𑁄𑀢𑁂𑀢𑀺 𑀯𑀝𑁆𑀝𑀲𑁄𑀢𑁂. 𑀘𑀢𑀽𑀳𑀺 𑀕𑀸𑀳𑁂𑀳𑀻𑀢𑀺 ‘‘𑀭𑀽𑀧𑀁 𑀅𑀢𑁆𑀢𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁂𑀳𑀺 𑀘𑀢𑀽𑀳𑀺 𑀕𑀸𑀳𑁂𑀳𑀺. 𑀧𑀮𑀼𑀚𑁆𑀚𑀦𑀢𑁆𑀢𑀸𑀢𑀺 𑀙𑀺𑀦𑁆𑀦𑀢𑁆𑀢𑀸. 𑀲𑁄𑀓𑀸𑀤𑀺𑀩𑁆𑀬𑀲𑀦𑀧𑁆𑀧𑀢𑁆𑀢𑀻𑀢𑀺 𑀲𑁄𑀓𑀸𑀤𑀺𑀅𑀦𑀢𑁆𑀣𑀼𑀧𑁆𑀧𑀢𑁆𑀢𑀺.

𑀦𑀤𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀼𑀧𑁆𑀨𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁪. 𑀯𑀺𑀯𑀤𑀢𑀻𑀢𑀺 𑀯𑀺𑀯𑀸𑀤𑀁 𑀓𑀭𑁄𑀢𑀺. 𑀯𑀤𑀦𑁆𑀢𑁄𑀢𑀺 𑀅𑀬𑀣𑀸𑀲𑀪𑀸𑀯𑁂𑀦 𑀯𑀤𑀦𑁆𑀢𑁄. 𑀯𑀺𑀯𑀤𑀢𑀺 𑀥𑀫𑁆𑀫𑀢𑀸𑀬 𑀯𑀺𑀭𑀼𑀤𑁆𑀥𑀁 𑀓𑀢𑁆𑀯𑀸 𑀯𑀤𑀢𑀺. 𑀮𑁄𑀓𑀥𑀫𑁆𑀫𑁄𑀢𑀺 𑀮𑀼𑀚𑁆𑀚𑀦𑀲𑀪𑀸𑀯𑀥𑀫𑁆𑀫𑁄. 𑀓𑁄 𑀧𑀦 𑀲𑁄𑀢𑀺 𑀆𑀳 ‘‘𑀔𑀦𑁆𑀥𑀧𑀜𑁆𑀘𑀓’’𑀦𑁆𑀢𑀺. 𑀢𑁂𑀦𑀸𑀳 ‘‘𑀢𑀁 𑀳𑀻’’𑀢𑀺𑀆𑀤𑀺. 𑀓𑀣𑀁 𑀓𑀭𑁄𑀫𑀻𑀢𑀺 𑀓𑁂𑀦 𑀧𑀓𑀸𑀭𑁂𑀦𑀸𑀳𑀁 𑀩𑀸𑀮𑀁 𑀅𑀚𑀸𑀦𑀦𑁆𑀢𑀁 𑀓𑀭𑁄𑀫𑀺. 𑀢𑁂𑀦𑀸𑀳 ‘‘𑀫𑀬𑁆𑀳𑀁 𑀳𑀻’’𑀢𑀺𑀆𑀤𑀺. 𑀢𑀣𑀸 𑀘𑀸𑀳 ‘‘𑀅𑀓𑁆𑀔𑀸𑀢𑁄 𑀯𑁄 𑀫𑀬𑀸 𑀫𑀕𑁆𑀕𑁄’’𑀢𑀺𑀆𑀤𑀺 (𑀥. 𑀧. 𑁨𑁭𑁫). ‘‘𑀢𑀬𑁄 𑀮𑁄𑀓𑀸 𑀓𑀣𑀺𑀢𑀸’’𑀢𑀺 𑀯𑀢𑁆𑀯𑀸 𑀢𑀁 𑀯𑀺𑀯𑀭𑀺𑀢𑀼𑀁 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳.

𑀧𑀼𑀧𑁆𑀨𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀨𑁂𑀡𑀧𑀺𑀡𑁆𑀟𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁫. 𑀓𑁂𑀦𑀘𑀺 ¶ 𑀓𑀸𑀭𑀡𑁂𑀦 𑀬𑀼𑀚𑁆𑀛𑀺𑀢𑁆𑀯𑀸 𑀕𑀳𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀬𑀼𑀚𑁆𑀛𑀸 𑀦𑀸𑀫. 𑀦𑀺𑀯𑀢𑁆𑀢𑀦𑀝𑁆𑀞𑀸𑀦𑁂𑀢𑀺 𑀉𑀤𑀓𑀧𑁆𑀧𑀯𑀸𑀳𑀲𑁆𑀲 𑀦𑀺𑀯𑀢𑁆𑀢𑀺𑀢𑀝𑁆𑀞𑀸𑀦𑁂.

𑀅𑀦𑀼𑀲𑁄𑀢𑀸𑀕𑀫𑀦𑁂𑀢𑀺 𑀅𑀦𑀼𑀲𑁄𑀢𑀁 𑀆𑀕𑀫𑀦𑀳𑁂𑀢𑀼, ‘‘𑀅𑀦𑀼𑀲𑁄𑀢𑀸𑀕𑀫𑀦𑁂𑀦𑀸’’𑀢𑀺 𑀯𑀸 𑀧𑀸𑀞𑁄. 𑀅𑀦𑀼𑀧𑀼𑀩𑁆𑀩𑁂𑀦 𑀧𑀯𑀟𑁆𑀠𑀺𑀢𑁆𑀯𑀸𑀢𑀺 𑀢𑀢𑁆𑀣 𑀢𑀢𑁆𑀣 𑀉𑀝𑁆𑀞𑀺𑀢𑀸𑀦𑀁 𑀔𑀼𑀤𑁆𑀤𑀓𑀫𑀳𑀦𑁆𑀢𑀸𑀦𑀁 ¶ 𑀨𑁂𑀡𑀧𑀺𑀡𑁆𑀟𑀸𑀦𑀁 𑀲𑀁𑀲𑀕𑁆𑀕𑁂𑀦 𑀧𑀓𑀸𑀭𑀢𑁄 𑀯𑀼𑀤𑁆𑀥𑀺𑀁 𑀧𑀢𑁆𑀯𑀸. 𑀆𑀯𑀳𑁂𑀬𑁆𑀬𑀸𑀢𑀺 𑀆𑀦𑁂𑀢𑁆𑀯𑀸 𑀯𑀳𑁂𑀬𑁆𑀬. 𑀓𑀸𑀭𑀡𑁂𑀦 𑀉𑀧𑀧𑀭𑀺𑀓𑁆𑀔𑁂𑀬𑁆𑀬𑀸𑀢𑀺 𑀜𑀸𑀡𑁂𑀦 𑀯𑀻𑀫𑀁𑀲𑁂𑀬𑁆𑀬. ‘‘𑀲𑀸𑀭𑁄 𑀦𑀸𑀫 𑀓𑀺𑀁 𑀪𑀯𑁂𑀬𑁆𑀬𑀸’’𑀢𑀺 𑀯𑀢𑁆𑀯𑀸 𑀲𑀩𑁆𑀩𑀲𑁄 𑀢𑀤𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀮𑀻𑀬𑀺𑀢𑁆𑀯𑀸 𑀯𑀺𑀤𑁆𑀥𑀁𑀲𑁂𑀬𑁆𑀬𑁂𑀯𑀸’’𑀢𑀺 𑀆𑀳. 𑀢𑁂𑀦 𑀭𑀽𑀧𑀫𑁆𑀧𑀺 𑀦𑀺𑀲𑁆𑀲𑀸𑀭𑀢𑀸𑀬 𑀪𑀺𑀚𑁆𑀚𑀢𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀬𑀣𑀸 𑀳𑀺 𑀅𑀦𑀺𑀘𑁆𑀘𑀢𑀸𑀬 𑀅𑀲𑀸𑀭𑀢𑀸𑀲𑀺𑀤𑁆𑀥𑀺, 𑀏𑀯𑀁 𑀅𑀲𑀸𑀭𑀢𑀸𑀬𑀧𑀺 𑀅𑀦𑀺𑀘𑁆𑀘𑀢𑀸𑀲𑀺𑀤𑁆𑀥𑀻𑀢𑀺 𑀅𑀦𑀺𑀘𑁆𑀘𑀢𑀸𑀬 𑀏𑀯 𑀦𑀺𑀘𑁆𑀘𑀲𑀸𑀭𑀁 𑀣𑀺𑀭𑀪𑀸𑀯𑀲𑀸𑀭𑀁 𑀥𑀼𑀯𑀲𑀸𑀭𑀁 𑀲𑀸𑀫𑀻𑀦𑀺𑀯𑀸𑀲𑀻𑀓𑀸𑀭𑀓𑀪𑀽𑀢𑀲𑁆𑀲 𑀅𑀢𑁆𑀢𑀦𑁄 𑀯𑀲𑁂 𑀧𑀯𑀢𑁆𑀢𑀦𑀫𑁆𑀧𑁂𑀢𑁆𑀣 𑀦𑀢𑁆𑀣𑀻𑀢𑀺 𑀆𑀳 ‘‘𑀭𑀽𑀧𑀫𑁆𑀧𑀺…𑀧𑁂… 𑀦𑀺𑀲𑁆𑀲𑀸𑀭𑀫𑁂𑀯𑀸’’𑀢𑀺. 𑀲𑁄𑀢𑀺 𑀨𑁂𑀡𑀧𑀺𑀡𑁆𑀟𑁄. 𑀕𑀳𑀺𑀢𑁄𑀧𑀺 𑀉𑀧𑀸𑀬𑁂𑀦 𑀢𑀫𑀢𑁆𑀣𑀁 𑀦 𑀲𑀸𑀥𑁂𑀢𑀺 𑀅𑀦𑀭𑀳𑀢𑁆𑀢𑀸. 𑀅𑀦𑁂𑀓𑀲𑀦𑁆𑀥𑀺𑀖𑀝𑀺𑀢𑁄 𑀢𑀣𑀸 𑀢𑀣𑀸 𑀖𑀝𑀺𑀢𑁄 𑀳𑀼𑀢𑁆𑀯𑀸.

𑀩𑁆𑀬𑀸𑀫𑀫𑀢𑁆𑀢𑀫𑁆𑀧𑀺 𑀏𑀢𑀭𑀳𑀺 𑀫𑀦𑀼𑀲𑁆𑀲𑀸𑀦𑀁 𑀯𑀲𑁂𑀦. 𑀅𑀯𑀲𑁆𑀲𑀫𑁂𑀯 𑀪𑀺𑀚𑁆𑀚𑀢𑀺 𑀢𑀭𑀗𑁆𑀕𑀩𑁆𑀪𑀸𑀳𑀢𑀁 𑀳𑀼𑀢𑁆𑀯𑀸.

𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀉𑀤𑀓𑀩𑀺𑀦𑁆𑀤𑀼𑀫𑁆𑀳𑀺 𑀧𑀢𑀺𑀢𑁂. 𑀉𑀤𑀓𑀢𑀮𑀦𑁆𑀢𑀺 𑀉𑀤𑀓𑀧𑀺𑀝𑁆𑀞𑀺𑀁. 𑀅𑀜𑁆𑀜𑀢𑁄 𑀧𑀢𑀦𑁆𑀢𑀁 𑀉𑀤𑀓𑀩𑀺𑀦𑁆𑀤𑀼𑀁. 𑀉𑀤𑀓𑀚𑀮𑁆𑀮𑀦𑁆𑀢𑀺 𑀲𑀦𑁆𑀢𑀸𑀦𑀓𑀁 𑀳𑀼𑀢𑁆𑀯𑀸 𑀞𑀺𑀢𑀁 𑀉𑀤𑀓𑀫𑀮𑀁. 𑀢𑀜𑁆𑀳𑀺 𑀲𑀁𑀓𑀟𑁆𑀠𑀺𑀢𑁆𑀯𑀸 𑀢𑀢𑁄 𑀉𑀤𑀓𑀁 𑀧𑀼𑀝𑀁 𑀓𑀭𑁄𑀢𑀺, 𑀢𑀲𑁆𑀫𑀺𑀁 𑀧𑀼𑀝𑁂 𑀧𑀼𑀩𑁆𑀩𑀼𑀴𑀲𑀫𑀜𑁆𑀜𑀸. 𑀯𑀢𑁆𑀣𑀼𑀦𑁆𑀢𑀺 𑀘𑀓𑁆𑀔𑀸𑀤𑀺𑀯𑀢𑁆𑀣𑀼𑀁. 𑀆𑀭𑀫𑁆𑀫𑀡𑀦𑁆𑀢𑀺 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁. 𑀓𑀺𑀮𑁂𑀲𑀚𑀮𑁆𑀮𑀦𑁆𑀢𑀺 𑀧𑀼𑀭𑀺𑀫𑀲𑀺𑀤𑁆𑀥𑀁, 𑀧𑀝𑀺𑀮𑀩𑁆𑀪𑀫𑀸𑀦𑀁 𑀯𑀸 𑀓𑀺𑀮𑁂𑀲𑀫𑀮𑀁. 𑀨𑀲𑁆𑀲𑀲𑀗𑁆𑀖𑀝𑁆𑀝𑀦𑀦𑁆𑀢𑀺 𑀨𑀲𑁆𑀲𑀲𑀫𑁄𑀥𑀸𑀦𑀁. 𑀧𑀼𑀩𑁆𑀩𑀼𑀴𑀲𑀤𑀺𑀲𑀸 𑀫𑀼𑀳𑀼𑀢𑁆𑀢𑀭𑀫𑀡𑀻𑀬𑀢𑀸𑀬. 𑀬𑀲𑁆𑀫𑀸 𑀖𑀫𑁆𑀫𑀓𑀸𑀮𑁂 𑀲𑀽𑀭𑀺𑀬𑀸𑀢𑀧𑀲𑀦𑁆𑀢𑀸𑀧𑀸𑀪𑀺𑀦𑀺𑀩𑁆𑀩𑀢𑁆𑀢𑀭𑀲𑁆𑀫𑀺𑀚𑀸𑀮𑀦𑀺𑀧𑀸𑀢𑁂 𑀢𑀸𑀤𑀺𑀲𑁂 𑀪𑀽𑀫𑀺𑀧𑀤𑁂𑀲𑁂 𑀇𑀢𑁄 𑀘𑀺𑀢𑁄 𑀲𑀫𑀼𑀕𑁆𑀕𑀢𑀯𑀸𑀢𑀯𑁂𑀕𑀲𑀫𑀼𑀤𑁆𑀥𑀝𑀯𑀺𑀭𑀼𑀴𑁆𑀳𑀲𑀗𑁆𑀔𑀸𑀢𑁂𑀲𑀼 𑀧𑀭𑀺𑀩𑁆𑀪𑀫𑀦𑁆𑀢𑁂𑀲𑀼 𑀅𑀡𑀼𑀧𑀭𑀫𑀸𑀡𑀼𑀢𑀚𑁆𑀚𑀸𑀭𑀺𑀧𑁆𑀧𑀓𑀸𑀭𑁂𑀲𑀼 𑀪𑀽𑀢𑀲𑀗𑁆𑀖𑀸𑀢𑁂𑀲𑀼 𑀫𑀭𑀻𑀘𑀺𑀲𑀫𑀜𑁆𑀜𑀸, 𑀢𑀲𑁆𑀫𑀸 𑀲𑀩𑁆𑀩𑀲𑁄 𑀲𑀸𑀭𑀯𑀺𑀭𑀳𑀺𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀜𑁆𑀜𑀸𑀧𑀺 𑀅𑀲𑀸𑀭𑀓𑀝𑁆𑀞𑁂𑀦 𑀫𑀭𑀻𑀘𑀺𑀲𑀤𑀺𑀲𑀸’’𑀢𑀺. 𑀬𑀲𑁆𑀫𑀸 𑀘 𑀧𑀲𑁆𑀲𑀦𑁆𑀢𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀉𑀤𑀓𑀸𑀓𑀸𑀭𑁂𑀦 𑀔𑀸𑀬𑀢𑀺, 𑀢𑀲𑁆𑀫𑀸 ‘‘𑀕𑀳𑁂𑀢𑁆𑀯𑀸 𑀧𑀺𑀯𑀺𑀢𑀼𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦𑀻𑀮𑀸𑀤𑀺𑀅𑀦𑀼𑀪𑀯𑀦𑀢𑁆𑀣𑀸𑀬𑀸𑀢𑀺 𑀦𑀻𑀮𑀸𑀤𑀺𑀆𑀭𑀫𑁆𑀫𑀡𑀲𑁆𑀲 𑀅𑀦𑀼𑀪𑀯𑀦𑀢𑁆𑀣𑀸𑀬. 𑀨𑀦𑁆𑀤𑀢𑀻𑀢𑀺 𑀨𑀦𑁆𑀤𑀦𑀸𑀓𑀸𑀭𑀧𑁆𑀧𑀢𑁆𑀢𑀸 𑀯𑀺𑀬 𑀳𑁄𑀢𑀺 𑀅𑀧𑁆𑀧𑀳𑀻𑀦𑀢𑀡𑁆𑀳𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀯𑀺𑀧𑁆𑀧𑀮𑀫𑁆𑀪𑁂𑀢𑀺 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀁 𑀧𑀼𑀕𑁆𑀕𑀮𑀁. 𑀢𑁂𑀦𑀸𑀳 ‘‘𑀇𑀤𑀁 𑀦𑀻𑀮𑀓’’𑀦𑁆𑀢𑀺𑀆𑀤𑀺. 𑀲𑀜𑁆𑀜𑀸𑀯𑀺𑀧𑀮𑁆𑀮𑀸𑀲𑀢𑁄 𑀳𑀺 𑀘𑀺𑀢𑁆𑀢𑀯𑀺𑀧𑀮𑁆𑀮𑀸𑀲𑁄, 𑀢𑀢𑁄 𑀤𑀺𑀝𑁆𑀞𑀺𑀯𑀺𑀧𑀮𑁆𑀮𑀸𑀲𑁄𑀢𑀺. 𑀯𑀺𑀧𑁆𑀧𑀮𑀫𑁆𑀪𑀦𑁂𑀦𑀸𑀢𑀺 𑀯𑀺𑀧𑁆𑀧𑀓𑀸𑀭𑀯𑀲𑁂𑀦𑁂𑀯 𑀆𑀭𑀫𑁆𑀫𑀡𑀲𑁆𑀲 𑀮𑀫𑁆𑀪𑀦𑁂𑀦. 𑀯𑀺𑀧𑁆𑀧𑀓𑀸𑀭𑀯𑀲𑁂𑀦 𑀳𑀺 ¶ 𑀏𑀢𑀁 𑀮𑀫𑁆𑀪𑀦𑀁, 𑀬𑀤𑀺𑀤𑀁 𑀅𑀦𑀼𑀤𑀓𑀫𑁂𑀯 𑀉𑀤𑀓𑀁 𑀓𑀢𑁆𑀯𑀸 𑀤𑀲𑁆𑀲𑀦𑀁 𑀅𑀦𑀕𑀭𑀫𑁂𑀯 𑀦𑀕𑀭𑀁 𑀓𑀢𑁆𑀯𑀸 𑀕𑀦𑁆𑀥𑀩𑁆𑀩𑀦𑀸𑀝𑀓𑀸𑀤𑀺𑀤𑀲𑁆𑀲𑀦𑀁.

𑀓𑀼𑀓𑁆𑀓𑀼𑀓𑀁 ¶ 𑀯𑀼𑀘𑁆𑀘𑀢𑀺 𑀓𑀤𑀮𑀺𑀓𑁆𑀔𑀦𑁆𑀥𑀲𑁆𑀲 𑀲𑀩𑁆𑀩𑀧𑀢𑁆𑀢𑀯𑀝𑁆𑀝𑀻𑀦𑀁 𑀅𑀩𑁆𑀪𑀦𑁆𑀢𑀭𑁂 𑀤𑀡𑁆𑀟𑀓𑀦𑁆𑀢𑀺 𑀆𑀳 ‘‘𑀅𑀓𑀼𑀓𑁆𑀓𑀼𑀓𑀚𑀸𑀢𑀦𑁆𑀢𑀺 𑀅𑀦𑁆𑀢𑁄 𑀅𑀲𑀜𑁆𑀚𑀸𑀢𑀖𑀦𑀤𑀡𑁆𑀟𑀓’’𑀦𑁆𑀢𑀺. 𑀦 𑀢𑀣𑀸 𑀳𑁄𑀢𑀻𑀢𑀺 𑀬𑀤𑀢𑁆𑀣𑀸𑀬 𑀉𑀧𑀦𑀻𑀢𑀁, 𑀢𑀤𑀢𑁆𑀣𑀸𑀬 𑀦 𑀳𑁄𑀢𑀺. 𑀦𑀸𑀦𑀸𑀮𑀓𑁆𑀔𑀡𑁄𑀢𑀺 𑀦𑀸𑀦𑀸𑀲𑀪𑀸𑀯𑁄. 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀯𑀸𑀢𑀺 𑀏𑀓𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑁆𑀯𑁂𑀯 𑀯𑀼𑀘𑁆𑀘𑀢𑀺.

𑀅𑀲𑁆𑀲𑀸𑀢𑀺 𑀧𑀼𑀭𑀺𑀲𑀲𑁆𑀲. 𑀅𑀧𑀕𑀢𑀧𑀝𑀮𑀧𑀺𑀴𑀓𑀦𑁆𑀢𑀺 𑀅𑀧𑀕𑀢𑀧𑀝𑀮𑀤𑁄𑀲𑀜𑁆𑀘𑁂𑀯 𑀅𑀧𑀕𑀢𑀧𑀺𑀴𑀓𑀤𑁄𑀲𑀜𑁆𑀘. 𑀅𑀲𑀸𑀭𑀪𑀸𑀯𑀤𑀲𑁆𑀲𑀦𑀲𑀫𑀢𑁆𑀣𑀦𑁆𑀢𑀺 𑀅𑀲𑀸𑀭𑀲𑁆𑀲 𑀅𑀲𑀸𑀭𑀪𑀸𑀯𑀤𑀲𑁆𑀲𑀦𑀲𑀫𑀢𑁆𑀣𑀁. 𑀇𑀢𑁆𑀢𑀭𑀸𑀢𑀺 𑀧𑀭𑀺𑀢𑁆𑀢𑀓𑀸𑀮𑀸, 𑀦 𑀘𑀺𑀭𑀝𑁆𑀞𑀺𑀢𑀺𑀓𑀸. 𑀢𑁂𑀦𑀸𑀳 ‘‘𑀮𑀳𑀼𑀧𑀘𑁆𑀘𑀼𑀧𑀝𑁆𑀞𑀸𑀦𑀸’’𑀢𑀺. 𑀅𑀜𑁆𑀜𑀤𑁂𑀯 𑀘 𑀆𑀕𑀫𑀦𑀓𑀸𑀮𑁂 𑀘𑀺𑀢𑁆𑀢𑀦𑁆𑀢𑀺 𑀇𑀤𑀜𑁆𑀘 𑀑𑀴𑀸𑀭𑀺𑀓𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀏𑀓𑀘𑁆𑀙𑀭𑀓𑁆𑀔𑀡𑁂 𑀅𑀦𑁂𑀓𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀗𑁆𑀔𑀸𑀦𑀺 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀫𑀸𑀬𑀸𑀬 𑀤𑀲𑁆𑀲𑀺𑀢𑀁 𑀭𑀽𑀧𑀁 𑀫𑀸𑀬𑀸𑀢𑀺 𑀯𑀼𑀢𑁆𑀢𑀁. 𑀬𑀁𑀓𑀺𑀜𑁆𑀘𑀺𑀤𑁂𑀯 𑀓𑀧𑀸𑀮𑀺𑀝𑁆𑀞𑀓𑀧𑀸𑀲𑀸𑀡𑀯𑀸𑀮𑀺𑀓𑀸𑀤𑀺𑀁. 𑀯𑀜𑁆𑀘𑁂𑀢𑀻𑀢𑀺 𑀅𑀲𑀼𑀯𑀡𑁆𑀡𑀫𑁂𑀯 𑀲𑀼𑀯𑀡𑁆𑀡𑀦𑁆𑀢𑀺, 𑀅𑀫𑀼𑀢𑁆𑀢𑀫𑁂𑀯 𑀫𑀼𑀢𑁆𑀢𑀸𑀢𑀺𑀆𑀤𑀺𑀦𑀸 𑀯𑀜𑁆𑀘𑁂𑀢𑀺. 𑀦𑀦𑀼 𑀘 𑀲𑀜𑁆𑀜𑀸𑀧𑀺 𑀫𑀭𑀻𑀘𑀺 𑀯𑀺𑀬 𑀯𑀺𑀧𑁆𑀧𑀮𑀫𑁆𑀪𑁂𑀢𑀺 𑀯𑀜𑁆𑀘𑁂𑀢𑀺, 𑀇𑀤𑀫𑁆𑀧𑀺 𑀯𑀺𑀜𑁆𑀜𑀸𑀡𑀁 𑀫𑀸𑀬𑀸 𑀯𑀺𑀬 𑀯𑀜𑁆𑀘𑁂𑀢𑀻𑀢𑀺 𑀓𑁄 𑀇𑀫𑁂𑀲𑀁 𑀯𑀺𑀲𑁂𑀲𑁄𑀢𑀺? 𑀯𑀘𑀦𑀢𑁆𑀣𑁄 𑀦𑁂𑀲𑀁 𑀲𑀸𑀥𑀸𑀭𑀡𑁄. 𑀢𑀣𑀸𑀧𑀺 𑀲𑀜𑁆𑀜𑀸 𑀅𑀦𑀼𑀤𑀓𑀁𑀬𑁂𑀯 𑀉𑀤𑀓𑀁 𑀓𑀢𑁆𑀯𑀸 𑀕𑀸𑀳𑀸𑀧𑁂𑀦𑁆𑀢𑀻, 𑀅𑀧𑀼𑀭𑀺𑀲𑀜𑁆𑀜𑁂𑀯 𑀧𑀼𑀭𑀺𑀲𑀁 𑀓𑀢𑁆𑀯𑀸 𑀕𑀸𑀳𑀸𑀧𑁂𑀦𑁆𑀢𑀻 𑀯𑀺𑀧𑁆𑀧𑀮𑀫𑁆𑀪𑀦𑀯𑀲𑁂𑀦 𑀅𑀧𑁆𑀧𑀯𑀺𑀲𑀬𑀸, 𑀯𑀺𑀜𑁆𑀜𑀸𑀡𑀁 𑀧𑀦 𑀬𑀁 𑀓𑀺𑀜𑁆𑀘𑀺 𑀅𑀢𑀁𑀲𑀪𑀸𑀯𑀁 𑀢𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑀻 𑀫𑀸𑀬𑀸 𑀯𑀺𑀬 𑀫𑀳𑀸𑀯𑀺𑀲𑀬𑀸. 𑀢𑁂𑀦𑀸𑀳 ‘‘𑀬𑀁𑀓𑀺𑀜𑁆𑀘𑀺𑀤𑁂𑀯𑀸’’𑀢𑀺𑀆𑀤𑀺. 𑀏𑀯𑀫𑁆𑀧𑀻𑀢𑀺 𑀅𑀢𑀺𑀯𑀺𑀬 𑀮𑀳𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑁂𑀦𑀧𑀺 𑀫𑀸𑀬𑀸𑀲𑀤𑀺𑀲𑀦𑁆𑀢𑀺.

𑀤𑁂𑀲𑀺𑀢𑀸𑀢𑀺 𑀏𑀯𑀁 𑀤𑁂𑀲𑀺𑀢𑀸 𑀨𑁂𑀡𑀧𑀺𑀡𑁆𑀟𑀸𑀤𑀺𑀉𑀧𑀫𑀸𑀳𑀺.

𑀪𑀽𑀭𑀺 𑀯𑀼𑀘𑁆𑀘𑀢𑀺 𑀧𑀣𑀯𑀻, 𑀲𑀡𑁆𑀳𑀝𑁆𑀞𑁂𑀦 𑀯𑀺𑀧𑀼𑀮𑀝𑁆𑀞𑁂𑀦 𑀘 𑀪𑀽𑀭𑀺𑀲𑀤𑀺𑀲𑀧𑀜𑁆𑀜𑀢𑀸𑀬 𑀪𑀽𑀭𑀺𑀧𑀜𑁆𑀜𑁄. 𑀢𑁂𑀦𑀸𑀳 ‘‘𑀲𑀡𑁆𑀳𑀧𑀜𑁆𑀜𑁂𑀦 𑀘𑁂𑀯𑀸’’𑀢𑀺𑀆𑀤𑀺. 𑀓𑀺𑀫𑀺𑀕𑀡𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀦𑁂𑀓𑀕𑀺𑀚𑁆𑀛𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀯𑁂𑀡𑀻𑀢𑀺 𑀥𑀫𑁆𑀫𑀧𑀩𑀦𑁆𑀥𑁄. 𑀩𑀸𑀮𑀮𑀸𑀧𑀺𑀦𑀻 ‘‘𑀅𑀳𑀁 𑀫𑀫𑀸’’𑀢𑀺𑀆𑀤𑀺𑀦𑀸. 𑀲𑁂𑀲𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸𑀯 𑀪𑀺𑀚𑁆𑀚𑀢𑀺 𑀏𑀓𑀼𑀧𑁆𑀧𑀸𑀤𑁂𑀓𑀦𑀺𑀭𑁄𑀥𑀢𑁆𑀢𑀸, 𑀯𑀢𑁆𑀣𑀼𑀭𑀽𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑁆𑀢𑀸 ‘‘𑀅𑀬’’𑀦𑁆𑀢𑀺 𑀦 𑀯𑀺𑀲𑀼𑀁 𑀕𑀳𑀺𑀢𑀁. 𑀯𑀥𑀪𑀸𑀯𑀢𑁄𑀢𑀺 𑀯𑀥𑀲𑁆𑀲 𑀫𑀭𑀡𑀲𑁆𑀲 𑀅𑀢𑁆𑀣𑀺𑀪𑀸𑀯𑀢𑁄. 𑀲𑀭𑀡𑀦𑁆𑀢𑀺 𑀧𑀝𑀺𑀲𑀭𑀡𑀁.

𑀨𑁂𑀡𑀧𑀺𑀡𑁆𑀟𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪-𑁬. 𑀕𑁄𑀫𑀬𑀧𑀺𑀡𑁆𑀟𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁬-𑁯𑁮. 𑀲𑀲𑁆𑀲𑀢𑀁 ¶ ¶ 𑀲𑀩𑁆𑀩𑀓𑀸𑀮𑀁 𑀬𑀸𑀯 𑀓𑀧𑁆𑀧𑀯𑀼𑀝𑁆𑀞𑀸𑀦𑀸 𑀳𑁄𑀦𑁆𑀢𑀻𑀢𑀺 𑀲𑀲𑁆𑀲𑀢𑀺𑀬𑁄, 𑀲𑀺𑀦𑁂𑀭𑀼𑀆𑀤𑀬𑁄. 𑀢𑀸𑀳𑀺 𑀲𑀫𑀁 𑀲𑀫𑀓𑀸𑀮𑀁. 𑀅𑀦𑁂𑀦𑀸𑀢𑀺 𑀪𑀕𑀯𑀢𑀸. 𑀦𑀬𑀺𑀤𑀦𑁆𑀢𑀺 𑀏𑀢𑁆𑀣 𑀬-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀇𑀤𑀦𑁆𑀢𑀺 𑀦𑀺𑀧𑀸𑀢𑀧𑀤𑀁. 𑀢𑀁 𑀧𑀦 𑀬𑁂𑀦 𑀬𑁂𑀦 𑀲𑀫𑁆𑀩𑀦𑁆𑀥𑀻𑀬𑀢𑀺, 𑀢𑀁 𑀢𑀺𑀮𑀺𑀗𑁆𑀕𑁄𑀯 𑀳𑁄𑀢𑀻𑀢𑀺 ‘‘𑀅𑀬𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑁄’’𑀢𑀺 𑀯𑀼𑀢𑁆𑀢𑀁. ‘‘𑀦 𑀧𑀜𑁆𑀜𑀸𑀬𑁂𑀬𑁆𑀬𑀸’’𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀫𑀕𑁆𑀕𑁄 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀯𑀝𑁆𑀝𑁂𑀦𑁆𑀢𑁄𑀢𑀺 𑀯𑀺𑀦𑀺𑀯𑀝𑁆𑀝𑁂𑀦𑁆𑀢𑁄 𑀅𑀧𑁆𑀧𑀯𑀢𑁆𑀢𑀺𑀁 𑀓𑀭𑁄𑀦𑁆𑀢𑁄.

𑀭𑀸𑀚𑀥𑀸𑀦𑀻𑀢𑀺 𑀭𑀜𑁆𑀜𑁄 𑀦𑀺𑀯𑀸𑀲𑀦𑀕𑀭𑀁. 𑀲𑀼𑀢𑁆𑀢𑀫𑀬𑀦𑁆𑀢𑀺 𑀘𑀺𑀢𑁆𑀢𑀯𑀡𑁆𑀡𑀯𑀝𑁆𑀝𑀺𑀓𑀸𑀫𑀬𑀁.

𑀕𑁄𑀫𑀬𑀧𑀺𑀡𑁆𑀟𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀕𑀤𑁆𑀤𑀼𑀮𑀩𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁯. 𑀬𑀁 𑀫𑀳𑀸𑀲𑀫𑀼𑀤𑁆𑀤𑁄𑀢𑀺 𑀏𑀢𑁆𑀣 𑀬𑀦𑁆𑀢𑀺 𑀲𑀫𑀬𑀲𑁆𑀲 𑀧𑀘𑁆𑀘𑀸𑀫𑀲𑀦𑀁. 𑀪𑀼𑀫𑁆𑀫𑀢𑁆𑀣𑁂 𑀘𑁂𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 ‘‘𑀬𑀲𑁆𑀫𑀺𑀁 𑀲𑀫𑀬𑁂’’𑀢𑀺. 𑀲𑁄 𑀘 𑀲𑀫𑀬𑁄 𑀅𑀬𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀜𑁆𑀘𑀫𑁂 𑀲𑀽𑀭𑀺𑀬𑁂 𑀉𑀝𑁆𑀞𑀺𑀢𑁂’’𑀢𑀺 𑀆𑀳. 𑀧𑀭𑀺𑀘𑁆𑀙𑁂𑀤𑀁 𑀦 𑀯𑀤𑀸𑀫𑀺 𑀧𑀭𑀺𑀘𑁆𑀙𑁂𑀤𑀓𑀸𑀭𑀺𑀓𑀸𑀬 𑀅𑀕𑁆𑀕𑀫𑀕𑁆𑀕𑀯𑀺𑀚𑁆𑀚𑀸𑀬 𑀅𑀦𑀥𑀺𑀕𑀢𑀢𑁆𑀢𑀸. 𑀲𑀼𑀦𑀔𑁄 𑀯𑀺𑀬 𑀯𑀝𑁆𑀝𑀦𑀺𑀲𑁆𑀲𑀺𑀢𑁄 𑀩𑀸𑀮𑁄 𑀅𑀲𑀯𑀲𑀪𑀸𑀯𑀢𑁄. 𑀕𑀤𑁆𑀤𑀼𑀮𑁄 𑀯𑀺𑀬 𑀤𑀺𑀝𑁆𑀞𑀺𑀩𑀦𑁆𑀥𑁄. 𑀲𑀓𑁆𑀓𑀸𑀬𑁄 𑀢𑀲𑁆𑀲 𑀅𑀲𑀯𑀲𑀪𑀸𑀯𑀢𑁄. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀲𑀓𑁆𑀓𑀸𑀬𑀸𑀦𑀼𑀧𑀭𑀺𑀯𑀢𑁆𑀢𑀦𑀦𑁆𑀢𑀺 ‘‘𑀲𑀦𑁆𑀢𑀸𑀦𑁂 𑀲𑀢𑁆𑀢𑀯𑁄𑀳𑀸𑀭𑁄’’𑀢𑀺 𑀢𑀁 𑀢𑀢𑁄 𑀅𑀜𑁆𑀜𑀁 𑀓𑀢𑁆𑀯𑀸 𑀪𑁂𑀤𑁂𑀦 𑀦𑀺𑀤𑁆𑀤𑁂𑀲𑁄.

𑀕𑀤𑁆𑀤𑀼𑀮𑀩𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀤𑀼𑀢𑀺𑀬𑀕𑀤𑁆𑀤𑀼𑀮𑀩𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁦. 𑀤𑀺𑀝𑁆𑀞𑀺𑀕𑀤𑁆𑀤𑀼𑀮𑀦𑀺𑀲𑁆𑀲𑀺𑀢𑀸𑀬𑀸𑀢𑀺 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀯𑀲𑁂𑀦 𑀤𑀺𑀝𑁆𑀞𑀺𑀕𑀤𑁆𑀤𑀼𑀮𑀦𑀺𑀲𑁆𑀲𑀺𑀢𑀸𑀬 𑀦𑀺𑀲𑁆𑀲𑀸𑀬𑁂𑀯 𑀧𑀯𑀢𑁆𑀢𑀢𑀺 𑀢𑀢𑁄 𑀅𑀢𑁆𑀢𑀸𑀦𑀁 𑀯𑀺𑀯𑁂𑀘𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀘𑀺𑀢𑁆𑀢𑀲𑀁𑀓𑀺𑀮𑁂𑀲𑁂𑀦𑁂𑀯𑀸𑀢𑀺 𑀤𑀲𑀯𑀺𑀥𑀓𑀺𑀮𑁂𑀲𑀯𑀢𑁆𑀣𑀼𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀲𑀁𑀓𑀺𑀮𑀺𑀝𑁆𑀞𑀪𑀸𑀯𑁂𑀦. 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀦𑁂𑀦 𑀘𑀺𑀢𑁆𑀢𑀲𑁆𑀲 𑀯𑁄𑀤𑀸𑀦𑀢𑁆𑀢𑀸 𑀯𑁄𑀤𑀸𑀬𑀦𑁆𑀢𑀺 𑀯𑀺𑀲𑀼𑀚𑁆𑀛𑀦𑁆𑀢𑀺.

𑀯𑀺𑀘𑀭𑀡𑀘𑀺𑀢𑁆𑀢𑀦𑁆𑀢𑀺 ¶ 𑀕𑀳𑁂𑀢𑁆𑀯𑀸 𑀯𑀺𑀘𑀭𑀡𑀯𑀲𑁂𑀦 𑀯𑀺𑀘𑀭𑀡𑀘𑀺𑀢𑁆𑀢𑀁. 𑀲𑀗𑁆𑀔𑀸𑀦𑀸𑀫𑀸𑀢𑀺 𑀏𑀯𑀁𑀦𑀸𑀫𑀓𑀸. 𑀩𑁆𑀭𑀸𑀳𑁆𑀫𑀡𑀧𑀸𑀲𑀡𑁆𑀟𑀺𑀓𑀸𑀢𑀺 𑀚𑀸𑀢𑀺𑀬𑀸 𑀩𑁆𑀭𑀸𑀳𑁆𑀫𑀡𑀸, 𑀙𑀦𑁆𑀦𑀯𑀼𑀢𑀺𑀬𑀸 𑀧𑀸𑀲𑀡𑁆𑀟𑁂𑀲𑀼 𑀢𑀁 𑀲𑀗𑁆𑀔𑀸𑀲𑀜𑁆𑀜𑀺𑀢𑀁 𑀧𑀸𑀲𑀡𑁆𑀟𑀁 𑀧𑀕𑁆𑀕𑀬𑁆𑀳 𑀯𑀺𑀘𑀭𑀡𑀓𑀸. 𑀧𑀝𑀓𑁄𑀝𑁆𑀞𑀓𑀦𑁆𑀢𑀺 𑀤𑀼𑀲𑁆𑀲𑀸𑀧𑀡𑀓𑀁. 𑀤𑀲𑁆𑀲𑁂𑀦𑁆𑀢𑀸𑀢𑀺 𑀬𑀣𑀸𑀕𑀢𑀺𑀓𑀫𑁆𑀫𑀯𑀺𑀧𑀸𑀓𑀘𑀺𑀢𑁆𑀢𑀢𑀁 𑀤𑀲𑁆𑀲𑁂𑀦𑁆𑀢𑀸 ¶ . 𑀢𑀁 𑀘𑀺𑀢𑁆𑀢𑀦𑁆𑀢𑀺 𑀢𑀁 𑀧𑀝𑀓𑁄𑀝𑁆𑀞𑀓𑀘𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑀺. 𑀘𑀺𑀦𑁆𑀢𑁂𑀢𑁆𑀯𑀸 𑀓𑀢𑀢𑁆𑀢𑀸𑀢𑀺 ‘‘𑀇𑀫𑀲𑁆𑀲 𑀭𑀽𑀧𑀲𑁆𑀲 𑀏𑀯𑀁 𑀳𑀢𑁆𑀣𑀧𑀸𑀤𑀸, 𑀏𑀯𑀁 𑀫𑀼𑀔𑀁 𑀮𑀺𑀔𑀺𑀢𑀩𑁆𑀩𑀁, 𑀏𑀯𑀁 𑀆𑀓𑀸𑀭𑀯𑀢𑁆𑀣𑀕𑁆𑀕𑀳𑀡𑀸𑀦𑀺, 𑀏𑀯𑀁 𑀓𑀺𑀭𑀺𑀬𑀸𑀯𑀺𑀲𑁂𑀲𑀸, 𑀏𑀯𑀁 𑀓𑀺𑀭𑀺𑀬𑀸𑀯𑀺𑀪𑀸𑀕𑀁, 𑀲𑀢𑁆𑀢𑀯𑀺𑀲𑁂𑀲𑀸𑀦𑀁 𑀯𑀺𑀪𑀸𑀕𑀁 𑀓𑀸𑀢𑀩𑁆𑀩’’𑀦𑁆𑀢𑀺 𑀢𑀲𑁆𑀲 𑀉𑀩𑁆𑀩𑀢𑁆𑀢𑀦𑀔𑀺𑀧𑀦𑀧𑀯𑀢𑁆𑀢𑀦𑀸𑀤𑀺𑀧𑀬𑁄𑀚𑀦𑀜𑁆𑀘𑀸𑀢𑀺 𑀲𑀩𑁆𑀩𑀫𑁂𑀢𑀁 𑀢𑀣𑀸 𑀘𑀺𑀦𑁆𑀢𑁂𑀢𑁆𑀯𑀸 𑀓𑀢𑀢𑁆𑀢𑀸 𑀘𑀺𑀢𑁆𑀢𑁂𑀦 𑀫𑀦𑀲𑀸 𑀘𑀺𑀦𑁆𑀢𑀺𑀢𑀁 𑀦𑀸𑀫. 𑀉𑀧𑀸𑀬𑀧𑀭𑀺𑀬𑁂𑀲𑀦𑀘𑀺𑀢𑁆𑀢𑀦𑁆𑀢𑀺 ‘‘𑀳𑀢𑁆𑀣𑀧𑀸𑀤𑀸 𑀏𑀯𑀁 𑀮𑀺𑀔𑀺𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀉𑀧𑀸𑀬𑀲𑁆𑀲 𑀘𑁂𑀯 𑀧𑀼𑀩𑁆𑀩𑁂 𑀧𑀯𑀢𑁆𑀢𑀲𑁆𑀲 𑀪𑀽𑀫𑀺𑀧𑀭𑀺𑀓𑀫𑁆𑀫𑀯𑀡𑁆𑀡𑀥𑀸𑀢𑀼𑀲𑀫𑁆𑀫𑀸𑀬𑁄𑀚𑀦𑀼𑀧𑀸𑀬𑀲𑁆𑀲 𑀘 𑀯𑀲𑁂𑀦 𑀧𑀯𑀢𑁆𑀢𑀁 𑀘𑀺𑀢𑁆𑀢𑀁. 𑀢𑀢𑁄𑀧𑀺 𑀘𑀺𑀢𑁆𑀢𑀢𑀭𑀦𑁆𑀢𑀺 𑀢𑀢𑁄 𑀘𑀺𑀢𑁆𑀢𑀓𑀫𑁆𑀫𑀢𑁄𑀧𑀺 𑀘𑀺𑀢𑁆𑀢𑀢𑀭𑀁 𑀘𑀺𑀢𑁆𑀢𑀓𑀸𑀭𑁂𑀦 𑀘𑀺𑀦𑁆𑀢𑀺𑀢𑀧𑁆𑀧𑀓𑀸𑀭𑀸𑀦𑀁 𑀲𑀩𑁆𑀩𑁂𑀲𑀁𑀬𑁂𑀯 𑀘𑀺𑀢𑁆𑀢𑀓𑀫𑁆𑀫𑁂 𑀅𑀦𑀺𑀧𑁆𑀨𑀚𑁆𑀚𑀦𑀢𑁄. 𑀓𑀫𑁆𑀫𑀘𑀺𑀢𑁆𑀢𑁂𑀦𑀸𑀢𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑁂𑀦. 𑀓𑀫𑁆𑀫𑀘𑀺𑀢𑁆𑀢𑁂𑀦𑀸𑀢𑀺 𑀯𑀸 𑀓𑀫𑁆𑀫𑀲𑁆𑀲 𑀘𑀺𑀢𑁆𑀢𑀪𑀸𑀯𑁂𑀦. 𑀲𑁄 𑀓𑀫𑁆𑀫𑀲𑁆𑀲 𑀯𑀺𑀘𑀺𑀢𑁆𑀢𑀪𑀸𑀯𑁄 𑀢𑀡𑁆𑀳𑀸𑀯𑀲𑁂𑀦 𑀚𑀸𑀬𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁆𑀯𑀸𑀬𑀫𑀢𑁆𑀣𑁄 𑀅𑀝𑁆𑀞𑀲𑀸𑀮𑀺𑀦𑀻𑀝𑀻𑀓𑀸𑀬𑀁 𑀯𑀺𑀪𑀸𑀯𑀺𑀢𑁄. 𑀏𑀯𑀁 𑀘𑀺𑀢𑁆𑀢𑀸𑀢𑀺 𑀏𑀯𑀁 𑀘𑀺𑀢𑁆𑀢𑀭𑀽𑀧𑀯𑀺𑀲𑁂𑀲𑀸. 𑀬𑁄𑀦𑀺𑀁 𑀉𑀧𑀦𑁂𑀢𑀻𑀢𑀺 𑀢𑀁 𑀢𑀁 𑀅𑀡𑁆𑀟𑀚𑀸𑀤𑀺𑀪𑁂𑀤𑀁 𑀬𑁄𑀦𑀺𑀯𑀺𑀲𑁂𑀲𑀁 𑀧𑀸𑀧𑁂𑀢𑀺 𑀯𑀡𑁆𑀡𑀯𑀺𑀲𑁂𑀲𑁄 𑀯𑀺𑀬 𑀨𑀮𑀺𑀓𑀫𑀡𑀺𑀓𑀁. 𑀦 𑀳𑀺 𑀯𑀺𑀲𑁂𑀲𑀸 𑀳𑀺𑀢𑀯𑀺𑀘𑀺𑀢𑁆𑀢𑀲𑀸𑀫𑀢𑁆𑀣𑀺𑀬𑀓𑀫𑁆𑀫𑀁 𑀬𑁄𑀦𑀺𑀁 𑀉𑀧𑀦𑁂𑀢𑀺, 𑀢𑀲𑁆𑀲 𑀢𑀲𑁆𑀲 𑀯𑀺𑀧𑀸𑀓𑀼𑀧𑁆𑀧𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀺. 𑀬𑁄𑀦𑀺𑀫𑀽𑀮𑀓𑁄 𑀢𑁂𑀲𑀁 𑀘𑀺𑀢𑁆𑀢𑀪𑀸𑀯𑁄𑀢𑀺 𑀬𑀁 𑀬𑀁 𑀬𑁄𑀦𑀺𑀁 𑀓𑀫𑁆𑀫𑀁 𑀲𑀢𑁆𑀢𑁂 𑀉𑀧𑀦𑁂𑀢𑀺, 𑀢𑀁𑀢𑀁𑀬𑁄𑀦𑀺𑀫𑀽𑀮𑀓𑁄 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀪𑀸𑀯𑁄. 𑀢𑁂𑀦𑀸𑀳 ‘‘𑀬𑁄𑀦𑀺𑀉𑀧𑀕𑀢𑀸’’𑀢𑀺𑀆𑀤𑀺. 𑀲𑀤𑀺𑀲𑀘𑀺𑀢𑁆𑀢𑀸𑀯 𑀲𑀤𑀺𑀲𑀘𑀺𑀢𑁆𑀢𑀪𑀸𑀯𑀸 𑀏𑀯. 𑀇𑀢𑀻𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀦𑀺𑀕𑀫𑀦𑀁.

𑀢𑀺𑀭𑀘𑁆𑀙𑀸𑀦𑀕𑀢𑀘𑀺𑀢𑁆𑀢𑀪𑀸𑀯𑀢𑁄 𑀘𑀺𑀢𑁆𑀢𑀲𑁆𑀲𑁂𑀯 𑀲𑀯𑀺𑀲𑁂𑀲𑀁 𑀘𑀺𑀢𑁆𑀢𑀪𑀸𑀯𑀓𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘𑀺𑀢𑁆𑀢𑀁 𑀦𑀸𑀫𑁂𑀢𑀁 𑀘𑀺𑀢𑁆𑀢𑀢𑀭𑀫𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀳𑀚𑀸𑀢𑀥𑀫𑁆𑀫𑀘𑀺𑀢𑁆𑀢𑀢𑀸𑀬𑀸𑀢𑀺 𑀭𑀸𑀕𑀸𑀤𑀺𑀲𑀤𑁆𑀥𑀸𑀤𑀺𑀥𑀫𑁆𑀫𑀯𑀺𑀘𑀺𑀢𑁆𑀢𑀪𑀸𑀯𑁂𑀦. 𑀪𑀽𑀫𑀺𑀘𑀺𑀢𑁆𑀢𑀢𑀸𑀬𑀸𑀢𑀺 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀢𑀸𑀬. 𑀓𑀫𑁆𑀫𑀦𑀸𑀦𑀢𑁆𑀢𑀁 𑀫𑀽𑀮𑀁 𑀓𑀸𑀭𑀡𑀁 𑀏𑀢𑁂𑀲𑀦𑁆𑀢𑀺 𑀓𑀫𑁆𑀫𑀦𑀸𑀦𑀢𑁆𑀢𑀫𑀽𑀮𑀓𑀸, 𑀢𑁂𑀲𑀁. 𑀮𑀺𑀗𑁆𑀕𑀦𑀸𑀦𑀢𑁆𑀢𑀁 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺𑀦𑀸𑀦𑀢𑁆𑀢𑀯𑀲𑁂𑀦 𑀘𑁂𑀯 𑀢𑀁𑀢𑀁𑀲𑀡𑁆𑀞𑀸𑀦𑀦𑀸𑀦𑀢𑁆𑀢𑀯𑀲𑁂𑀦 𑀘 𑀯𑁂𑀤𑀺𑀢𑀩𑁆𑀩𑀁. 𑀲𑀜𑁆𑀜𑀸𑀦𑀸𑀦𑀢𑁆𑀢𑀁 𑀇𑀢𑁆𑀣𑀺𑀧𑀼𑀭𑀺𑀲𑀤𑁂𑀯𑀫𑀦𑀼𑀲𑁆𑀲𑀸𑀤𑀺𑀲𑀜𑁆𑀜𑀸𑀦𑀸𑀦𑀢𑁆𑀢𑀯𑀲𑁂𑀦 ¶ . 𑀯𑁄𑀳𑀸𑀭𑀦𑀸𑀦𑀢𑁆𑀢𑀁 𑀢𑀺𑀲𑁆𑀲𑁄𑀢𑀺𑀆𑀤𑀺𑀯𑁄𑀳𑀸𑀭𑀦𑀸𑀦𑀢𑁆𑀢𑀯𑀲𑁂𑀦. 𑀘𑀺𑀢𑁆𑀢𑀸𑀦𑀁 𑀯𑀺𑀘𑀺𑀢𑁆𑀢𑀸𑀦𑀁. 𑀢𑀁𑀢𑀁𑀯𑁄𑀳𑀸𑀭𑀦𑀸𑀦𑀢𑁆𑀢𑀫𑁆𑀧𑀺 𑀘𑀺𑀢𑁆𑀢𑁂𑀦𑁂𑀯 𑀧𑀜𑁆𑀜𑀧𑀻𑀬𑀢𑀺. 𑀭𑀗𑁆𑀕𑀚𑀸𑀢𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑀸𑀤𑀺𑀦𑀸 𑀯𑀢𑁆𑀣𑀁 𑀭𑀜𑁆𑀚𑀬𑀢𑀻𑀢𑀺 𑀭𑀚𑀓𑁄, 𑀯𑀡𑁆𑀡𑀓𑀸𑀭𑁄. 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀢𑁆𑀢𑀪𑀸𑀯𑀲𑀜𑁆𑀜𑀺𑀢𑀭𑀽𑀧𑀲𑀫𑀼𑀝𑁆𑀞𑀸𑀧𑀦𑀢𑀸 𑀦𑀺𑀬𑀢𑀸 𑀏𑀓𑀦𑁆𑀢𑀺𑀓𑀸𑀢𑀺 𑀧𑀼𑀣𑀼𑀚𑁆𑀚𑀦𑀕𑁆𑀕𑀳𑀡𑀁. ‘‘𑀅𑀪𑀺𑀭𑀽𑀧𑀁 𑀭𑀽𑀧𑀁 𑀲𑀫𑀼𑀝𑁆𑀞𑀸𑀧𑁂𑀢𑀻’’𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄.

𑀤𑀼𑀢𑀺𑀬𑀕𑀤𑁆𑀤𑀼𑀮𑀩𑀤𑁆𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀯𑀸𑀲𑀺𑀚𑀝𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁧. 𑀅𑀢𑁆𑀣𑀲𑁆𑀲𑀸𑀢𑀺 𑀳𑀺𑀢𑀲𑁆𑀲. 𑀅𑀲𑀸𑀥𑀺𑀓𑀸 ‘‘𑀪𑀸𑀯𑀦𑀸𑀦𑀼𑀬𑁄𑀕𑀁 𑀅𑀦𑀦𑀼𑀬𑀼𑀢𑁆𑀢𑀲𑁆𑀲𑀸’’𑀢𑀺 𑀅𑀦𑀦𑀼𑀬𑀼𑀢𑁆𑀢𑀲𑁆𑀲 ¶ 𑀯𑀼𑀢𑁆𑀢𑀢𑁆𑀢𑀸. 𑀇𑀢𑀭𑀸𑀢𑀺 𑀲𑀼𑀓𑁆𑀓𑀧𑀓𑁆𑀔𑀉𑀧𑀫𑀸. 𑀲𑀸𑀥𑀺𑀓𑀸 𑀪𑀸𑀯𑀦𑀸𑀬𑁄𑀕𑀲𑁆𑀲 𑀅𑀦𑀼𑀬𑀼𑀢𑁆𑀢𑀢𑁆𑀢𑀸. 𑀢𑀜𑁆𑀳𑀺 𑀢𑀲𑁆𑀲 𑀲𑀸𑀥𑀺𑀓𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀫𑁆𑀪𑀸𑀯𑀦𑀢𑁆𑀣𑁂𑀢𑀺 𑀧𑀭𑀫𑀢𑁆𑀣𑀲𑀫𑁆𑀪𑀸𑀯𑀦𑁂. 𑀏𑀯𑀜𑁆𑀳𑀺 𑀓𑀡𑁆𑀳𑀧𑀓𑁆𑀔𑁂𑀧𑀺 𑀅𑀧𑀺𑀲𑀤𑁆𑀤𑀕𑁆𑀕𑀳𑀡𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺. 𑀲𑀫𑁆𑀪𑀸𑀯𑀦𑀢𑁆𑀣𑁂𑀢𑀺 𑀯𑀸 𑀧𑀭𑀺𑀓𑀧𑁆𑀧𑀦𑀢𑁆𑀣𑁂𑀢𑀺 𑀅𑀢𑁆𑀣𑁄. 𑀲𑀗𑁆𑀔𑀸𑀢𑀩𑁆𑀩𑁂 𑀅𑀢𑁆𑀣𑁂 𑀅𑀦𑀺𑀬𑀫𑀢𑁄 𑀯𑀼𑀘𑁆𑀘𑀫𑀸𑀦𑁂 𑀲𑀗𑁆𑀔𑀸𑀢𑁄 𑀅𑀦𑀺𑀬𑀫𑀢𑁆𑀣𑁄 𑀯𑀸𑀲𑀤𑁆𑀤𑁄 𑀯𑀢𑁆𑀢𑀩𑁆𑀩𑁄𑀢𑀺 ‘‘𑀅𑀝𑁆𑀞 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀊𑀦𑀸𑀥𑀺𑀓𑀸𑀦𑀻𑀢𑀺 𑀊𑀦𑀸𑀦𑀺𑀧𑀺 𑀅𑀥𑀺𑀓𑀸𑀦𑀺𑀧𑀺 𑀓𑀺𑀜𑁆𑀘𑀸𑀧𑀺 𑀳𑁄𑀦𑁆𑀢𑀺, 𑀏𑀓𑀁𑀲𑁄 𑀧𑀦 𑀕𑀳𑁂𑀢𑀩𑁆𑀩𑁄𑀢𑀺 ‘‘𑀅𑀝𑁆𑀞 𑀯𑀸 𑀤𑀲 𑀯𑀸 𑀤𑁆𑀯𑀸𑀤𑀲 𑀯𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀯𑀘𑀦𑀁 𑀲𑀦𑁆𑀥𑀸𑀬 ‘‘𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀸𑀤𑀦𑀔𑀲𑀺𑀔𑀸𑀳𑀺 𑀅𑀓𑁄𑀧𑀦𑀯𑀲𑁂𑀦 𑀲𑀫𑁆𑀫𑀸 𑀅𑀥𑀺𑀲𑀬𑀺𑀢𑀸𑀦𑀺. 𑀉𑀢𑀼𑀦𑁆𑀢𑀺 𑀉𑀡𑁆𑀳𑀉𑀢𑀼𑀁 𑀓𑀸𑀬𑀼𑀲𑁆𑀫𑀸𑀯𑀲𑁂𑀦. 𑀢𑁂𑀦𑀸𑀳 ‘‘𑀉𑀲𑁆𑀫𑀻𑀓𑀢𑀸𑀦𑀻’’𑀢𑀺. 𑀪𑀸𑀯𑀺𑀢𑀸𑀦𑀻𑀢𑀺 𑀓𑀼𑀓𑁆𑀓𑀼𑀝𑀯𑀸𑀲𑀦𑀸𑀬 𑀯𑀸𑀲𑀺𑀢𑀸𑀦𑀺. 𑀲𑀫𑁆𑀫𑀸𑀅𑀥𑀺𑀲𑀬𑀦𑀸𑀤𑀺𑀢𑀺𑀯𑀺𑀥𑀓𑀺𑀭𑀺𑀬𑀸𑀓𑀭𑀡𑁂𑀦 𑀇𑀫𑀁 𑀅𑀧𑁆𑀧𑀫𑀸𑀤𑀁 𑀓𑀢𑁆𑀯𑀸. 𑀲𑁄𑀢𑁆𑀣𑀺𑀦𑀸 𑀅𑀪𑀺𑀦𑀺𑀩𑁆𑀪𑀺𑀚𑁆𑀚𑀺𑀢𑀼𑀦𑁆𑀢𑀺 𑀅𑀦𑀦𑁆𑀢𑀭𑀸𑀬𑁂𑀦 𑀢𑀢𑁄 𑀦𑀺𑀓𑁆𑀔𑀫𑀺𑀢𑀼𑀁. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀢𑁂 𑀳𑀻’’𑀢𑀺𑀆𑀤𑀺𑀫𑀸𑀳. 𑀲𑀬𑀫𑁆𑀧𑀻𑀢𑀺 𑀅𑀡𑁆𑀟𑀸𑀦𑀺. 𑀧𑀭𑀺𑀡𑀸𑀫𑀦𑁆𑀢𑀺 𑀧𑀭𑀺𑀧𑀓𑁆𑀓𑀁 𑀩𑀳𑀺𑀦𑀺𑀓𑁆𑀔𑀫𑀦𑀬𑁄𑀕𑁆𑀕𑀢𑀁.

𑀢𑀦𑁆𑀢𑀺 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀁. 𑀏𑀯𑀦𑁆𑀢𑀺 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑁂𑀦. 𑀅𑀢𑁆𑀣𑁂𑀦𑀸𑀢𑀺 𑀉𑀧𑀫𑁂𑀬𑁆𑀬𑀢𑁆𑀣𑁂𑀦. 𑀲𑀁𑀲𑀦𑁆𑀤𑀺𑀢𑁆𑀯𑀸 𑀲𑀫𑁆𑀫𑀸 𑀬𑁄𑀚𑁂𑀢𑁆𑀯𑀸. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀯𑀲𑁂𑀦 𑀜𑀸𑀡𑀲𑁆𑀲 𑀢𑀺𑀓𑁆𑀔𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀜𑀸𑀡𑀲𑁆𑀲 𑀳𑀺 𑀲𑀪𑀸𑀯𑀢𑁄 𑀲𑀢𑀺𑀦𑁂𑀧𑀓𑁆𑀓𑀢𑁄 𑀘 𑀢𑀺𑀓𑁆𑀔𑀪𑀸𑀯𑁄, 𑀲𑀫𑀸𑀥𑀺𑀯𑀲𑁂𑀦 𑀲𑀽𑀭𑀪𑀸𑀯𑁄, 𑀲𑀤𑁆𑀥𑀸𑀯𑀲𑁂𑀦 𑀯𑀺𑀧𑁆𑀧𑀲𑀦𑁆𑀦𑀪𑀸𑀯𑁄 ¶ , 𑀯𑀻𑀭𑀺𑀬𑀯𑀲𑁂𑀦 𑀧𑀭𑀺𑀡𑀸𑀫𑀪𑀸𑀯𑁄. 𑀧𑀭𑀺𑀡𑀸𑀫𑀓𑀸𑀮𑁄𑀢𑀺 𑀩𑀮𑀯𑀯𑀺𑀧𑀲𑁆𑀲𑀦𑀸𑀓𑀸𑀮𑁄. 𑀯𑀟𑁆𑀠𑀺𑀢𑀓𑀸𑀮𑁄𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀓𑀸𑀮𑁄. 𑀅𑀦𑀼𑀮𑁄𑀫𑀝𑁆𑀞𑀸𑀦𑀲𑁆𑀲 𑀳𑀺 𑀯𑀺𑀧𑀲𑁆𑀲𑀦𑀸 𑀕𑀳𑀺𑀢𑀕𑀩𑁆𑀪𑀸 𑀦𑀸𑀫 𑀢𑀤𑀸 𑀫𑀕𑁆𑀕𑀕𑀩𑁆𑀪𑀲𑁆𑀲 𑀕𑀳𑀺𑀢𑀢𑁆𑀢𑀸. 𑀢𑀚𑁆𑀚𑀸𑀢𑀺𑀓𑀦𑁆𑀢𑀺 𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀦𑀼𑀬𑁄𑀕𑀲𑁆𑀲 𑀅𑀦𑀼𑀭𑀽𑀧𑀁. 𑀲𑀢𑁆𑀣𑀸𑀧𑀺 𑀕𑀸𑀣𑀸𑀬 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀳𑀭𑀢𑀺 𑀪𑀺𑀦𑁆𑀤𑀸𑀧𑁂𑀢𑀺.

𑀑𑀮𑀫𑁆𑀩𑀓𑀲𑀗𑁆𑀔𑀸𑀢𑀦𑁆𑀢𑀺 𑀑𑀮𑀫𑁆𑀩𑀓𑀲𑀼𑀢𑁆𑀢𑀲𑀗𑁆𑀔𑀸𑀢𑀁. 𑀧𑀮𑀦𑁆𑀢𑀺 𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀦𑀸𑀫𑀁. 𑀥𑀸𑀭𑁂𑀢𑁆𑀯𑀸𑀢𑀺 𑀤𑀸𑀭𑀽𑀦𑀁 𑀳𑁂𑀬𑁆𑀬𑀸𑀤𑀺𑀚𑀸𑀦𑀦𑀢𑁆𑀣𑀁 𑀉𑀧𑀦𑁂𑀢𑁆𑀯𑀸. 𑀤𑀸𑀭𑀽𑀦𑀁 𑀕𑀡𑁆𑀟𑀁 𑀳𑀭𑀢𑀻𑀢𑀺 𑀧𑀮𑀕𑀡𑁆𑀟𑁄𑀢𑀺 𑀏𑀢𑁂𑀦 𑀧𑀮𑁂𑀦 𑀕𑀡𑁆𑀟𑀳𑀸𑀭𑁄 ‘‘𑀧𑀮𑀕𑀡𑁆𑀟𑁄’’𑀢𑀺 𑀧𑀘𑁆𑀙𑀺𑀫𑀧𑀤𑁂 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀕𑀳𑀡𑀝𑁆𑀞𑀸𑀦𑁂𑀢𑀺 𑀳𑀢𑁆𑀣𑁂𑀦 𑀕𑀳𑁂𑀢𑀩𑁆𑀩𑀝𑁆𑀞𑀸𑀦𑁂. 𑀲𑀫𑁆𑀫𑀤𑁂𑀯 𑀔𑁂𑀧𑀻𑀬𑀦𑁆𑀢𑀺 𑀏𑀢𑁂𑀦 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀻𑀢𑀺 𑀲𑀗𑁆𑀔𑁂𑀧𑁄, 𑀢𑁂𑀦. 𑀯𑀺𑀧𑀲𑁆𑀲𑀦𑀁 𑀅𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑁂𑀯 𑀤𑀺𑀯𑀲𑁂 𑀤𑀺𑀯𑀲𑁂 𑀆𑀲𑀯𑀸𑀦𑀁 𑀧𑀭𑀺𑀓𑁆𑀔𑀬𑁄 𑀇𑀥 ‘‘𑀯𑀺𑀧𑀲𑁆𑀲𑀦𑀸𑀬𑀸𑀦𑀺𑀲𑀁𑀲𑁄’’𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀳𑁂𑀫𑀦𑁆𑀢𑀺𑀓𑁂𑀦 𑀓𑀭𑀡𑀪𑀽𑀢𑁂𑀦. 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀏𑀢𑀁 𑀓𑀭𑀡𑀯𑀘𑀦𑀁, 𑀳𑁂𑀫𑀦𑁆𑀢𑀺𑀓𑁂𑀢𑀺 𑀅𑀢𑁆𑀣𑁄. 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀻𑀢𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀨𑀮𑀸𑀦𑀺 𑀳𑁄𑀦𑁆𑀢𑀺. 𑀢𑁂𑀦𑀸𑀳 ‘‘𑀧𑀽𑀢𑀺𑀓𑀸𑀦𑀺 𑀪𑀯𑀦𑁆𑀢𑀻’’𑀢𑀺.

𑀫𑀳𑀸𑀲𑀫𑀼𑀤𑁆𑀤𑁄 𑀯𑀺𑀬 𑀲𑀸𑀲𑀦𑀁 𑀲𑀪𑀸𑀯𑀕𑀫𑁆𑀪𑀻𑀭𑀪𑀸𑀯𑀢𑁄. 𑀦𑀸𑀯𑀸 𑀯𑀺𑀬 𑀬𑁄𑀕𑀸𑀯𑀘𑀭𑁄 𑀫𑀳𑁄𑀖𑀼𑀢𑁆𑀢𑀭𑀡𑀢𑁄. 𑀧𑀭𑀺𑀬𑀸𑀤𑀸𑀦𑀁 𑀯𑀺𑀬𑀸𑀢𑀺 𑀧𑀭𑀺𑀢𑁄 𑀅𑀧𑀭𑀺𑀧𑀽𑀭𑀡𑀁 𑀯𑀺𑀬. 𑀔𑀚𑁆𑀚𑀫𑀸𑀦𑀸𑀦𑀦𑁆𑀢𑀺 𑀲𑀗𑁆𑀔𑀸𑀤𑀦𑁆𑀢𑁂𑀦 𑀯𑀺𑀬 𑀉𑀤𑀓𑁂𑀦 𑀔𑁂𑀧𑀺𑀬𑀫𑀸𑀦𑀸𑀦𑀁 ¶ 𑀩𑀦𑁆𑀥𑀦𑀸𑀦𑀁. 𑀢𑀦𑀼𑀪𑀸𑀯𑁄𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑀼𑀧𑁆𑀧𑀢𑁆𑀢𑀺𑀬𑀸 𑀅𑀲𑀫𑀢𑁆𑀣𑀢𑀸𑀬 𑀤𑀼𑀩𑁆𑀩𑀮𑀪𑀸𑀯𑁄. 𑀯𑀺𑀧𑀲𑁆𑀲𑀦𑀸𑀜𑀸𑀡𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀳𑀻𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑀫𑀼𑀝𑁆𑀞𑀺𑀢𑁂𑀳𑀺 𑀧𑀻𑀢𑀺𑀧𑀸𑀫𑁄𑀚𑁆𑀚𑁂𑀳𑀺. 𑀑𑀓𑁆𑀔𑀸𑀬𑀫𑀸𑀦𑁂 𑀧𑀓𑁆𑀔𑀸𑀬𑀫𑀸𑀦𑁂𑀢𑀺 𑀯𑀺𑀯𑀺𑀥𑀧𑀝𑀺𑀧𑀢𑁆𑀢𑀺𑀬𑀸 𑀉𑀓𑁆𑀔𑀸𑀬𑀫𑀸𑀦𑁂 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸𑀬 𑀧𑀓𑁆𑀔𑀸𑀬𑀫𑀸𑀦𑁂. 𑀤𑀼𑀩𑁆𑀩𑀮𑀢𑀸 𑀤𑀻𑀧𑀺𑀢𑀸 ‘‘𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀲𑀁𑀬𑁄𑀚𑀦𑀸𑀦𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺, 𑀧𑀽𑀢𑀺𑀓𑀸𑀦𑀺 𑀪𑀯𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸.

𑀯𑀸𑀲𑀺𑀚𑀝𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀅𑀦𑀺𑀘𑁆𑀘𑀲𑀜𑁆𑀜𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁨. 𑀪𑀸𑀯𑁂𑀦𑁆𑀢𑀲𑁆𑀲𑀸𑀢𑀺 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀲𑀜𑁆𑀜𑀸. 𑀢𑁂𑀦𑀸𑀳 𑁋 ‘‘𑀲𑀩𑁆𑀩𑀁 𑀓𑀸𑀫𑀭𑀸𑀕𑀁 𑀧𑀭𑀺𑀬𑀸𑀤𑀺𑀬𑀢𑀻’’𑀢𑀺𑀆𑀤𑀺. 𑀲𑀦𑁆𑀢𑀸𑀦𑁂𑀢𑁆𑀯𑀸𑀢𑀺 𑀓𑀲𑀦𑀝𑁆𑀞𑀸𑀦𑀁 ¶ 𑀲𑀩𑁆𑀩𑀲𑁄 𑀯𑀺𑀢𑀦𑁂𑀢𑁆𑀯𑀸 𑀧𑀢𑁆𑀣𑀭𑀺𑀢𑁆𑀯𑀸. 𑀓𑀺𑀮𑁂𑀲𑀸𑀢𑀺 𑀉𑀧𑀓𑁆𑀓𑀺𑀮𑁂𑀲𑀧𑁆𑀧𑀪𑁂𑀤𑀸 𑀓𑀺𑀮𑁂𑀲𑀸. 𑀅𑀦𑀺𑀘𑁆𑀘𑀲𑀜𑁆𑀜𑀸𑀜𑀸𑀡𑁂𑀦𑀸𑀢𑀺 𑀅𑀦𑀺𑀘𑁆𑀘𑀲𑀜𑁆𑀜𑀸𑀲𑀳𑀕𑀢𑁂𑀦 𑀜𑀸𑀡𑁂𑀦.

𑀮𑀸𑀬𑀦𑀦𑁆𑀢𑀺 𑀮𑀸𑀬𑀦𑀁 𑀯𑀺𑀬 𑀦𑀬𑀦𑀁 𑀯𑀺𑀬 𑀦𑀺𑀘𑁆𑀙𑁄𑀝𑀦𑀁 𑀯𑀺𑀬 𑀘 𑀅𑀦𑀺𑀘𑁆𑀘𑀲𑀜𑁆𑀜𑀸𑀜𑀸𑀡𑀁. 𑀇𑀫𑀺𑀦𑀸 𑀅𑀢𑁆𑀣𑁂𑀦𑀸𑀢𑀺 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑁂𑀦 𑀧𑀸𑀴𑀺𑀬𑀸 𑀅𑀢𑁆𑀣𑁂𑀦, 𑀉𑀧𑀫𑀸 𑀲𑀁𑀲𑀦𑁆𑀤𑁂𑀢𑀩𑁆𑀩𑀸𑀢𑀺 𑀏𑀢𑁆𑀣 𑀧𑀩𑁆𑀩𑀚𑀮𑀸𑀬𑀓𑁄 𑀯𑀺𑀬 𑀬𑁄𑀕𑀸𑀯𑀘𑀭𑁄. 𑀮𑀸𑀬𑀦𑀸𑀤𑀺𑀦𑀸 𑀢𑀲𑁆𑀲 𑀢𑀢𑁆𑀣 𑀓𑀢𑀓𑀺𑀘𑁆𑀘𑀢𑀸𑀬 𑀧𑀭𑀺𑀢𑀼𑀝𑁆𑀞𑀺 𑀯𑀺𑀬 𑀇𑀫𑀲𑁆𑀲 𑀓𑀺𑀮𑁂𑀲𑁂 𑀲𑀩𑁆𑀩𑀲𑁄 𑀙𑀺𑀦𑁆𑀤𑀺𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦 𑀓𑀸𑀮𑀲𑁆𑀲 𑀯𑀻𑀢𑀺𑀦𑀸𑀫𑀦𑀸.

𑀓𑀽𑀝𑀁 𑀕𑀘𑁆𑀙𑀦𑁆𑀢𑀻𑀢𑀺 𑀧𑀸𑀭𑀺𑀫𑀦𑁆𑀢𑁂𑀦 𑀓𑀽𑀝𑀁 𑀕𑀘𑁆𑀙𑀦𑁆𑀢𑀺. 𑀓𑀽𑀝𑀁 𑀧𑀯𑀺𑀲𑀦𑀪𑀸𑀯𑁂𑀦𑀸𑀢𑀺 𑀓𑀽𑀝𑀘𑁆𑀙𑀺𑀤𑁆𑀤𑀁 𑀅𑀕𑁆𑀕𑁂𑀦 𑀧𑀯𑀺𑀲𑀦𑀯𑀲𑁂𑀦. 𑀲𑀫𑁄𑀲𑀭𑀺𑀢𑁆𑀯𑀸𑀢𑀺 𑀙𑀺𑀤𑁆𑀤𑁂 𑀅𑀦𑀼𑀧𑀯𑀺𑀲𑀦𑀯𑀲𑁂𑀦 𑀘 𑀆𑀳𑀘𑁆𑀘 𑀅𑀯𑀝𑁆𑀞𑀸𑀦𑁂𑀦 𑀘 𑀲𑀫𑁄𑀲𑀭𑀺𑀢𑁆𑀯𑀸 𑀞𑀺𑀢𑀸. 𑀓𑀽𑀝𑀁 𑀯𑀺𑀬 𑀅𑀦𑀺𑀘𑁆𑀘𑀲𑀜𑁆𑀜𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀅𑀯𑀝𑁆𑀞𑀸𑀦𑀲𑁆𑀲 𑀫𑀽𑀮𑀪𑀸𑀯𑀢𑁄. 𑀕𑁄𑀧𑀸𑀦𑀲𑀺𑀬𑁄 𑀯𑀺𑀬 𑀘𑀢𑀼𑀪𑀽𑀫𑀓𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑀺𑀘𑁆𑀘𑀲𑀜𑁆𑀜𑀸𑀫𑀽𑀮𑀓𑀢𑁆𑀢𑀸. 𑀓𑀽𑀝𑀁 𑀅𑀕𑁆𑀕𑀁 𑀲𑀩𑁆𑀩𑀕𑁄𑀧𑀸𑀦𑀲𑀻𑀦𑀁 𑀢𑀣𑀸𑀅𑀥𑀺𑀝𑁆𑀞𑀸𑀦𑀲𑁆𑀲 𑀧𑀥𑀸𑀦𑀓𑀸𑀭𑀡𑀢𑁆𑀢𑀸. 𑀅𑀦𑀺𑀘𑁆𑀘𑀲𑀜𑁆𑀜𑀸 𑀅𑀕𑁆𑀕𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑀺𑀘𑁆𑀘𑀲𑀜𑁆𑀜𑀸 𑀮𑁄𑀓𑀺𑀬𑀸𑀢𑀺 𑀇𑀤𑀁 𑀅𑀦𑀺𑀘𑁆𑀘𑀲𑀜𑁆𑀜𑀸𑀦𑀼𑀧𑀲𑁆𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀫𑀼𑀔𑁂𑀦 𑀅𑀥𑀺𑀕𑀢𑀅𑀭𑀺𑀬𑀫𑀕𑁆𑀕𑁂 𑀉𑀧𑁆𑀧𑀦𑁆𑀦𑀲𑀜𑁆𑀜𑀸 𑀅𑀦𑀺𑀘𑁆𑀘𑀲𑀜𑁆𑀜𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀻𑀢𑀺 ‘‘𑀅𑀦𑀺𑀘𑁆𑀘𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀲𑀩𑁆𑀩𑀁 𑀓𑀸𑀫𑀭𑀸𑀕𑀁 𑀧𑀭𑀺𑀬𑀸𑀤𑀺𑀬𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀥𑀫𑁆𑀫𑀲𑀗𑁆𑀕𑀳𑁂 (𑀥. 𑀲. 𑁩𑁫𑁭, 𑁩𑁬𑁦) ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀮𑁄𑀓𑀼𑀢𑁆𑀢𑀭𑀁 𑀲𑀜𑁆𑀜𑀁 𑀪𑀸𑀯𑁂𑀢𑀻’’𑀢𑀺𑀆𑀤𑀺𑀦𑀸 𑀲𑀜𑁆𑀜𑀸𑀧𑀺 𑀉𑀤𑁆𑀥𑀝𑀸. 𑀲𑀩𑁆𑀩𑀸𑀲𑀼 𑀉𑀧𑀫𑀸𑀲𑀽𑀢𑀺 𑀫𑀽𑀮𑀲𑀦𑁆𑀢𑀸𑀦𑀉𑀧𑀫𑀸𑀤𑀻𑀲𑀼 𑀧𑀜𑁆𑀘𑀲𑀼 𑀉𑀧𑀫𑀸𑀲𑀼. 𑀧𑀼𑀭𑀺𑀫𑀸𑀳𑀻𑀢𑀺 𑀓𑀲𑁆𑀲𑀓𑀧𑀩𑁆𑀩𑀚𑀮𑀸𑀬𑀦𑀅𑀫𑁆𑀩𑀧𑀺𑀡𑁆𑀟𑀺𑀉𑀧𑀫𑀸𑀳𑀺 𑀅𑀦𑀺𑀘𑁆𑀘𑀲𑀜𑁆𑀜𑀸𑀬 𑀓𑀺𑀘𑁆𑀘𑀁 𑀯𑀼𑀢𑁆𑀢𑀁 𑀫𑀽𑀮𑀲𑀦𑁆𑀢𑀸𑀦𑀓𑀧𑀤𑀸𑀮𑀦𑀧𑀩𑁆𑀩𑀚𑀮𑀸𑀬𑀦𑀯𑀡𑁆𑀝𑀘𑁆𑀙𑁂𑀤𑀦𑀧𑀤𑁂𑀲𑁂𑀦 ¶ 𑀅𑀦𑀺𑀘𑁆𑀘𑀲𑀜𑁆𑀜𑀸𑀬 𑀧𑀝𑀺𑀧𑀓𑁆𑀔𑀧𑀘𑁆𑀙𑁂𑀤𑀦𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸. 𑀧𑀘𑁆𑀙𑀺𑀫𑀸𑀳𑀺 𑀩𑀮𑀁 𑀤𑀲𑁆𑀲𑀺𑀢𑀁 𑀧𑀝𑀺𑀧𑀓𑁆𑀔𑀸𑀢𑀺𑀪𑀸𑀯𑀲𑁆𑀲 𑀚𑁄𑀢𑀺𑀢𑀢𑁆𑀢𑀸.

𑀅𑀦𑀺𑀘𑁆𑀘𑀲𑀜𑁆𑀜𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀧𑁆𑀨𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀚𑁆𑀛𑀺𑀫𑀧𑀡𑁆𑀡𑀸𑀲𑀓𑁄 𑀲𑀫𑀢𑁆𑀢𑁄.

𑁧𑁧. 𑀅𑀦𑁆𑀢𑀯𑀕𑁆𑀕𑁄

𑁧. 𑀅𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩. 𑀅𑀜𑁆𑀜𑀫𑀜𑁆𑀜𑀁 ¶ 𑀅𑀲𑀁𑀲𑀝𑁆𑀞𑀪𑀸𑀯𑁂𑀦 𑀏𑀢𑀺 𑀕𑀘𑁆𑀙𑀢𑀻𑀢𑀺 𑀅𑀦𑁆𑀢𑁄, 𑀪𑀸𑀕𑁄𑀢𑀺 𑀆𑀳 ‘‘𑀅𑀦𑁆𑀢𑀸𑀢𑀺 𑀓𑁄𑀝𑁆𑀞𑀸𑀲𑀸’’𑀢𑀺. ‘‘𑀲𑀓𑁆𑀓𑀸𑀬𑀦𑀺𑀭𑁄𑀥𑀦𑁆𑀢𑁄’’𑀢𑀺 𑀦𑀺𑀭𑁄𑀥𑀧𑀘𑁆𑀘𑀬𑀲𑁆𑀲 𑀕𑀳𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀘𑀢𑀼𑀲𑀘𑁆𑀘𑀯𑀲𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑁂 𑀬𑁄𑀚𑁂𑀢𑁆𑀯𑀸’’𑀢𑀺. 𑀅𑀦𑁆𑀢𑁄𑀢𑀺…𑀧𑁂… 𑀅𑀚𑁆𑀛𑀸𑀲𑀬𑀯𑀲𑁂𑀦 𑀯𑀼𑀢𑁆𑀢𑀁 𑀬𑀣𑀸𑀦𑀼𑀮𑁄𑀫𑀤𑁂𑀲𑀦𑀢𑁆𑀢𑀸 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬.

𑀅𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨-𑁩. 𑀤𑀼𑀓𑁆𑀔𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁪-𑁧𑁦𑁫. 𑀤𑀼𑀢𑀺𑀬𑀫𑁆𑀧𑀻𑀢𑀺 𑀅𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑁂𑀦 𑀦 𑀓𑁂𑀯𑀮𑀁 𑀧𑀞𑀫𑀲𑀼𑀢𑁆𑀢𑀫𑁂𑀯, 𑀅𑀣 𑀔𑁄 𑀤𑀼𑀢𑀺𑀬𑀫𑁆𑀧𑀻𑀢𑀺.

𑀢𑀢𑀺𑀬𑀫𑁆𑀧𑀺 𑀢𑀣𑁂𑀯𑀸𑀢𑀺 𑀇𑀫𑀺𑀦𑀸 ‘‘𑀧𑀜𑁆𑀘𑀓𑁆𑀔𑀦𑁆𑀥𑁂 𑀘𑀢𑀼𑀲𑀘𑁆𑀘𑀯𑀲𑁂𑀦 𑀬𑁄𑀚𑁂𑀢𑁆𑀯𑀸’’𑀢𑀺 𑀇𑀤𑀁 𑀉𑀧𑀲𑀁𑀳𑀭𑀢𑀺.

𑀤𑀼𑀓𑁆𑀔𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀭𑀺𑀜𑁆𑀜𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁬. 𑀧𑀭𑀺𑀜𑁆𑀜𑁂𑀬𑁆𑀬𑁂𑀢𑀺 𑀏𑀢𑁆𑀣 𑀢𑀺𑀲𑁆𑀲𑁄 𑀧𑀭𑀺𑀜𑁆𑀜𑀸 𑀜𑀸𑀢𑀧𑀭𑀺𑀜𑁆𑀜𑀸, 𑀢𑀻𑀭𑀡𑀧𑀭𑀺𑀜𑁆𑀜𑀸, 𑀧𑀳𑀸𑀦𑀧𑀭𑀺𑀜𑁆𑀜𑀸𑀢𑀺. 𑀢𑀸𑀲𑀼 𑀜𑀸𑀢𑀧𑀭𑀺𑀜𑁆𑀜𑀸 𑀬𑀸𑀯𑀤𑁂𑀯 𑀢𑀻𑀭𑀡𑀧𑀭𑀺𑀜𑁆𑀜𑀢𑁆𑀣𑀸. 𑀢𑀻𑀭𑀡𑀧𑀭𑀺𑀜𑁆𑀜𑀸 𑀘 𑀬𑀸𑀯𑀤𑁂𑀯 𑀧𑀳𑀸𑀦𑀧𑀭𑀺𑀜𑁆𑀜𑀢𑁆𑀣𑀸𑀢𑀺 ¶ . 𑀢𑀢𑁆𑀣 𑀉𑀓𑁆𑀓𑀝𑁆𑀞𑀸𑀬 𑀧𑀭𑀺𑀜𑁆𑀜𑀸𑀬 𑀓𑀺𑀘𑁆𑀘𑀤𑀲𑁆𑀲𑀦𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀭𑀺𑀜𑁆𑀜𑁂𑀬𑁆𑀬𑁂𑀢𑀺 𑀧𑀭𑀺𑀚𑀸𑀦𑀺𑀢𑀩𑁆𑀩𑁂 𑀲𑀫𑀢𑀺𑀓𑁆𑀓𑀫𑀺𑀢𑀩𑁆𑀩𑁂’’𑀢𑀺, 𑀧𑀳𑀸𑀢𑀩𑁆𑀩𑁂𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀓𑀢𑀫𑀸 𑀘, 𑀪𑀺𑀓𑁆𑀔𑀯𑁂, 𑀧𑀭𑀺𑀜𑁆𑀜𑀸? 𑀭𑀸𑀕𑀓𑁆𑀔𑀬𑁄, 𑀤𑁄𑀲𑀓𑁆𑀔𑀬𑁄, 𑀫𑁄𑀳𑀓𑁆𑀔𑀬𑁄’’𑀢𑀺, 𑀢𑀲𑁆𑀫𑀸 𑀲𑀫𑀢𑀺𑀓𑁆𑀓𑀫𑀦𑁆𑀢𑀺, 𑀲𑀫𑀢𑀺𑀓𑁆𑀓𑀦𑁆𑀢𑀁 𑀧𑀳𑀸𑀦𑀲𑁆𑀲 𑀉𑀧𑀸𑀬𑀁. 𑀲𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑀦𑁆𑀢𑀺 𑀧𑀚𑀳𑀺𑀢𑁆𑀯𑀸 𑀞𑀺𑀢𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀧𑀭𑀺𑀜𑁆𑀜𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁧𑁦. 𑀲𑀫𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁭-𑁧𑁧𑁨. 𑀘𑀢𑁆𑀢𑀸𑀭𑀺 ¶ 𑀲𑀘𑁆𑀘𑀸𑀦𑀺 𑀓𑀣𑀺𑀢𑀸𑀦𑀺 𑀅𑀲𑁆𑀲𑀸𑀤𑀸𑀤𑀻𑀦𑀁 𑀲𑀫𑀼𑀤𑀬𑀸𑀤𑀻𑀦𑀜𑁆𑀘 𑀤𑁂𑀲𑀺𑀢𑀢𑁆𑀢𑀸.

𑀓𑀺𑀮𑁂𑀲𑀧𑁆𑀧𑀳𑀸𑀦𑀁 𑀓𑀣𑀺𑀢𑀁 𑀭𑀸𑀕𑀧𑁆𑀧𑀳𑀸𑀦𑀲𑁆𑀲 𑀚𑁄𑀢𑀺𑀢𑀢𑁆𑀢𑀸.

𑀲𑀫𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑁆𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀥𑀫𑁆𑀫𑀓𑀣𑀺𑀓𑀯𑀕𑁆𑀕𑁄

𑁧-𑁨. 𑀅𑀯𑀺𑀚𑁆𑀚𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁩-𑁧𑁧𑁪. 𑀬𑀸𑀯𑀢𑀸𑀢𑀺 𑀬𑀲𑁆𑀫𑀸. 𑀇𑀫𑀸𑀬…𑀧𑁂… 𑀲𑀫𑀦𑁆𑀦𑀸𑀕𑀢𑁄𑀢𑀺 ‘‘𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀬𑀣𑀸𑀪𑀽𑀢𑀁 𑀦𑀧𑁆𑀧𑀚𑀸𑀦𑀸𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸𑀬 𑀘𑀢𑀽𑀲𑀼 𑀅𑀭𑀺𑀬𑀲𑀘𑁆𑀘𑁂𑀲𑀼 𑀅𑀜𑁆𑀜𑀸𑀡𑀲𑀪𑀸𑀯𑀸𑀬 𑀅𑀯𑀺𑀚𑁆𑀚𑀸𑀬 𑀲𑀫𑁆𑀫𑁄𑀳𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀏𑀢𑁆𑀢𑀸𑀯𑀢𑀸𑀢𑀺 𑀏𑀢𑁆𑀢𑀓𑁂𑀦 𑀓𑀸𑀭𑀡𑁂𑀦 𑀅𑀯𑀺𑀚𑁆𑀚𑀸𑀕𑀢𑁄 𑀲𑀫𑀗𑁆𑀕𑀻𑀪𑀽𑀢𑁂𑀦 𑀉𑀧𑀕𑀢𑁄, 𑀅𑀯𑀺𑀚𑁆𑀚𑀸𑀬 𑀯𑀸 𑀉𑀧𑁂𑀢𑁄 𑀦𑀸𑀫 𑀳𑁄𑀢𑀺.

𑀤𑀼𑀢𑀺𑀬𑁂𑀧𑀻𑀢𑀺 𑀯𑀺𑀚𑁆𑀚𑀸𑀲𑀼𑀢𑁆𑀢𑁂. ‘‘𑀯𑀺𑀚𑁆𑀚𑀸𑀯𑀲𑁂𑀦 𑀤𑁂𑀲𑀦𑀸’’𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄𑀢𑀺 𑀆𑀳 ‘‘𑀏𑀲𑁂𑀯 𑀦𑀬𑁄’’𑀢𑀺.

𑀅𑀯𑀺𑀚𑁆𑀚𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀥𑀫𑁆𑀫𑀓𑀣𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁫. 𑀧𑀞𑀫𑁂𑀦 ¶ 𑀥𑀫𑁆𑀫𑀓𑀣𑀺𑀓𑁄 𑀓𑀣𑀺𑀢𑁄 ‘‘𑀥𑀫𑁆𑀫𑀁 𑀤𑁂𑀲𑁂𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀤𑀼𑀢𑀺𑀬𑁂𑀦 𑀲𑁂𑀔𑀪𑀽𑀫𑀺 𑀓𑀣𑀺𑀢𑀸 ‘‘𑀧𑀝𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀢𑀢𑀺𑀬𑁂𑀦 𑀅𑀲𑁂𑀔𑀪𑀽𑀫𑀺 𑀓𑀣𑀺𑀢𑀸 ‘‘𑀅𑀦𑀼𑀧𑀸𑀤𑀸𑀯𑀺𑀫𑀼𑀢𑁆𑀢𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀥𑀫𑁆𑀫𑀓𑀣𑀺𑀓𑀁 𑀧𑀼𑀘𑁆𑀙𑀺𑀢𑁂𑀦 𑀪𑀕𑀯𑀢𑀸. 𑀯𑀺𑀲𑁂𑀲𑁂𑀢𑁆𑀯𑀸𑀢𑀺 𑀥𑀫𑁆𑀫𑀓𑀣𑀺𑀓𑀪𑀸𑀯𑀢𑁄 𑀯𑀺𑀲𑁂𑀲𑁂𑀢𑁆𑀯𑀸 𑀉𑀓𑁆𑀓𑀁𑀲𑁂𑀢𑁆𑀯𑀸. 𑀤𑁆𑀯𑁂 𑀪𑀽𑀫𑀺𑀬𑁄𑀢𑀺 𑀲𑁂𑀓𑁆𑀔𑀸𑀲𑁂𑀓𑁆𑀔𑀪𑀽𑀫𑀺𑀬𑁄.

𑀥𑀫𑁆𑀫𑀓𑀣𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀤𑀼𑀢𑀺𑀬𑀥𑀫𑁆𑀫𑀓𑀣𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁬. 𑀢𑀻𑀡𑀺 ¶ 𑀯𑀺𑀲𑁆𑀲𑀚𑁆𑀚𑀦𑀸𑀦𑀻𑀢𑀺 𑀬𑀣𑀸𑀧𑀼𑀘𑁆𑀙𑀁 𑀢𑀻𑀡𑀺 𑀯𑀺𑀲𑁆𑀲𑀚𑁆𑀚𑀦𑀸𑀦𑀺.

𑀤𑀼𑀢𑀺𑀬𑀥𑀫𑁆𑀫𑀓𑀣𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁯. 𑀩𑀦𑁆𑀥𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁭-𑁧𑁨𑁧. 𑀢𑀻𑀭𑀁 𑀯𑀼𑀘𑁆𑀘𑀢𑀺 𑀯𑀝𑁆𑀝𑀁 𑀑𑀭𑀺𑀫𑀢𑀻𑀭𑀦𑁆𑀢𑀺 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀅𑀣𑀸𑀬𑀁 𑀇𑀢𑀭𑀸 𑀧𑀚𑀸, 𑀢𑀻𑀭𑀫𑁂𑀯𑀸𑀦𑀼𑀥𑀸𑀯𑀢𑀻’’𑀢𑀺 (𑀥. 𑀧. 𑁮𑁫). 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁 𑀲𑀁𑀲𑀸𑀭𑀲𑁆𑀲 𑀧𑀸𑀭𑀺𑀫𑀦𑁆𑀢𑀺 𑀓𑀢𑁆𑀯𑀸. 𑀩𑀤𑁆𑀥𑁄𑀢𑀺 𑀅𑀦𑀼𑀲𑀬𑀧𑁆𑀧𑀳𑀸𑀦𑀲𑁆𑀲 𑀅𑀓𑀢𑀢𑁆𑀢𑀸 𑀓𑀺𑀮𑁂𑀲𑀩𑀦𑁆𑀥𑀦𑁂𑀦 𑀩𑀤𑁆𑀥𑁄, 𑀲𑀼𑀓𑁆𑀓𑀧𑀓𑁆𑀔𑁂𑀧𑀺 𑀤𑀺𑀝𑁆𑀞𑀺𑀲𑀫𑀦𑀼𑀧𑀲𑁆𑀲𑀦𑀸𑀬 𑀭𑀽𑀧𑀸𑀤𑀺𑀩𑀦𑁆𑀥𑀦𑀲𑁆𑀲 𑀧𑀝𑀺𑀓𑁆𑀔𑁂𑀧𑀫𑀢𑁆𑀢𑀫𑁂𑀯 𑀯𑀼𑀢𑁆𑀢𑀁, 𑀦 𑀯𑀺𑀫𑁄𑀓𑁆𑀔𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀤𑀼𑀓𑁆𑀔𑀁 𑀓𑀣𑀺𑀢𑀦𑁆𑀢𑀺 ‘‘𑀢𑀻𑀭𑀤𑀲𑁆𑀲𑀻 𑀧𑀸𑀭𑀤𑀲𑁆𑀲𑀻, 𑀧𑀭𑀺𑀫𑀼𑀢𑁆𑀢𑁄 𑀲𑁄 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀻’’𑀢𑀺 𑀆𑀕𑀢𑀢𑁆𑀢𑀸 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀓𑀦𑁆𑀢𑀺 𑀯𑀢𑁆𑀢𑀼𑀁 𑀲𑀓𑁆𑀓𑀸.

𑀙𑀝𑁆𑀞𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸.

𑀩𑀦𑁆𑀥𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀻𑀮𑀯𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁨. 𑀆𑀩𑀸𑀥𑀝𑁆𑀞𑁂𑀦𑀸𑀢𑀺 𑀆𑀤𑀺𑀢𑁄 𑀉𑀧𑁆𑀧𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀩𑀸𑀥𑀦𑀝𑁆𑀞𑁂𑀦 𑀭𑀼𑀚𑀦𑀝𑁆𑀞𑁂𑀦. 𑀅𑀦𑁆𑀢𑁄𑀤𑁄𑀲𑀝𑁆𑀞𑁂𑀦𑀸𑀢𑀺 𑀅𑀩𑁆𑀪𑀦𑁆𑀢𑀭𑁂 𑀏𑀯 𑀤𑀼𑀲𑁆𑀲𑀦𑀝𑁆𑀞𑁂𑀦 𑀓𑀼𑀧𑁆𑀧𑀦𑀝𑁆𑀞𑁂𑀦. 𑀔𑀡𑀦𑀝𑁆𑀞𑁂𑀦𑀸𑀢𑀺 𑀲𑀲𑀦𑀝𑁆𑀞𑁂𑀦. 𑀤𑀼𑀓𑁆𑀔𑀝𑁆𑀞𑁂𑀦𑀸𑀢𑀺 𑀤𑀼𑀓𑁆𑀔𑀫𑀢𑁆𑀢𑀸 ¶ 𑀤𑀼𑀓𑁆𑀔𑀪𑀸𑀯𑁂𑀦. 𑀤𑀼𑀓𑁆𑀔𑀜𑁆𑀳𑀺 𑀮𑁄𑀓𑁂 ‘‘𑀅𑀖’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀅𑀢𑀺𑀯𑀺𑀬 𑀳𑀦𑀦𑀢𑁄. 𑀯𑀺𑀲𑀪𑀸𑀕𑀁 …𑀧𑁂… 𑀧𑀘𑁆𑀘𑀬𑀝𑁆𑀞𑁂𑀦𑀸𑀢𑀺 𑀬𑀣𑀸𑀧𑀯𑀢𑁆𑀢𑀫𑀸𑀦𑀸𑀦𑀁 𑀥𑀸𑀢𑀸𑀤𑀻𑀦𑀁 𑀯𑀺𑀲𑀪𑀸𑀕𑀪𑀽𑀢𑀫𑀳𑀸𑀪𑀽𑀢𑀲𑀫𑀼𑀝𑁆𑀞𑀸𑀦𑀲𑁆𑀲 𑀆𑀩𑀸𑀥𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦. 𑀅𑀲𑀓𑀝𑁆𑀞𑁂𑀦𑀸𑀢𑀺 𑀅𑀦𑀢𑁆𑀢𑀦𑀺𑀬𑀢𑁄. 𑀧𑀮𑀼𑀚𑁆𑀚𑀦𑀝𑁆𑀞𑁂𑀦𑀸𑀢𑀺 𑀧𑀓𑀸𑀭𑀢𑁄 𑀪𑀺𑀚𑁆𑀚𑀦𑀝𑁆𑀞𑁂𑀦. 𑀲𑀢𑁆𑀢𑀲𑀼𑀜𑁆𑀜𑀢𑀝𑁆𑀞𑁂𑀦𑀸𑀢𑀺 𑀲𑀢𑁆𑀢𑀲𑀗𑁆𑀔𑀸𑀢𑀅𑀢𑁆𑀢𑀲𑀼𑀜𑁆𑀜𑀢𑀝𑁆𑀞𑁂𑀦. 𑀅𑀢𑁆𑀢𑀸𑀪𑀸𑀯𑁂𑀦𑀸𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑀧𑀭𑀺𑀓𑀧𑁆𑀧𑀺𑀢𑀲𑁆𑀲 𑀅𑀢𑁆𑀢𑀦𑁄 𑀅𑀪𑀸𑀯𑁂𑀦. 𑀲𑀼𑀜𑁆𑀜𑀢𑁄 𑀅𑀦𑀢𑁆𑀢𑀢𑁄𑀢𑀺 𑀏𑀢𑁆𑀣 ‘‘𑀧𑀭𑀢𑁄’’𑀢𑀺 𑀧𑀤𑀲𑁆𑀲 𑀲𑀗𑁆𑀕𑀳𑁄 𑀓𑀸𑀢𑀩𑁆𑀩𑁄, 𑀢𑀲𑁆𑀫𑀸 ‘‘𑀤𑁆𑀯𑀻𑀳𑀺 𑀅𑀦𑀢𑁆𑀢𑀫𑀦𑀲𑀺𑀓𑀸𑀭𑁄’’𑀢𑀺 𑀯𑀢𑁆𑀢𑀩𑁆𑀩𑀁.

𑀲𑀻𑀮𑀯𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀲𑀼𑀢𑀯𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁩. 𑀢𑀣𑀸 ¶ 𑀏𑀓𑀸𑀤𑀲𑀫𑁂𑀢𑀺 𑀏𑀢𑁆𑀣 𑀢𑀣𑀸-𑀲𑀤𑁆𑀤𑁂𑀦 ‘‘𑀉𑀢𑁆𑀢𑀸𑀦𑀫𑁂𑀯𑀸’’𑀢𑀺 𑀇𑀤𑀁 𑀆𑀓𑀟𑁆𑀠𑀢𑀺. 𑀇𑀥𑀸𑀢𑀺 𑀏𑀓𑀸𑀤𑀲𑀫𑁂. 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀉𑀕𑁆𑀕𑀳𑀥𑀸𑀭𑀡𑀧𑀭𑀺𑀘𑀬𑀫𑀦𑀲𑀺𑀓𑀸𑀭𑀯𑀲𑁂𑀦 𑀧𑀯𑀢𑁆𑀢𑀜𑀸𑀡𑀁 𑀓𑀫𑁆𑀫𑀝𑁆𑀞𑀸𑀦𑀲𑀼𑀢𑀯𑀲𑁂𑀦 𑀦𑀺𑀧𑁆𑀨𑀚𑁆𑀚𑀦𑀢𑁄 ‘‘𑀲𑀼𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀲𑀼𑀢𑀯𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨-𑁧𑁩. 𑀓𑀧𑁆𑀧𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁨𑁪-𑁧𑁨𑁫. 𑀭𑀸𑀳𑀼𑀮𑁄𑀯𑀸𑀤𑀲𑀤𑀺𑀲𑀸𑀦𑀻𑀢𑀺 𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁧𑁧𑁩 𑀆𑀤𑀬𑁄) 𑀆𑀕𑀢𑀲𑀼𑀢𑁆𑀢𑀲𑀤𑀺𑀲𑀸𑀦𑀺.

𑀓𑀧𑁆𑀧𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀥𑀫𑁆𑀫𑀓𑀣𑀺𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀅𑀯𑀺𑀚𑁆𑀚𑀸𑀯𑀕𑁆𑀕𑁄

𑁧-𑁧𑁦. 𑀲𑀫𑀼𑀤𑀬𑀥𑀫𑁆𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁨𑁬-𑁧𑁩𑁫. 𑀇𑀫𑀲𑁆𑀫𑀺𑀦𑁆𑀢𑀺 ¶ 𑀅𑀯𑀺𑀚𑁆𑀚𑀸𑀯𑀕𑁆𑀕𑁂. 𑀘𑀢𑀼𑀲𑀘𑁆𑀘𑀫𑁂𑀯 𑀓𑀣𑀺𑀢𑀁, 𑀢𑀲𑁆𑀫𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀫𑀼𑀤𑀬𑀥𑀫𑁆𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀯𑀺𑀚𑁆𑀚𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀓𑀼𑀓𑁆𑀓𑀼𑀴𑀯𑀕𑁆𑀕𑁄

𑁧-𑁧𑁪. 𑀓𑀼𑀓𑁆𑀓𑀼𑀴𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁩𑁬-𑁧𑁪𑁯. 𑀅𑀦𑁆𑀢𑁄 𑀅𑀕𑁆𑀕𑀺 𑀫𑀳𑀦𑁆𑀢𑁄 𑀙𑀸𑀭𑀺𑀓𑀭𑀸𑀲𑀺, 𑀢𑀢𑁆𑀣 𑀉𑀓𑁆𑀓𑀼𑀴𑀯𑀺𑀓𑀼𑀮𑀢𑁄 𑀅𑀓𑁆𑀓𑀫𑀦𑁆𑀢𑀁 𑀬𑀸𑀯 𑀓𑁂𑀲𑀕𑁆𑀕𑀁 𑀅𑀦𑀼𑀤𑀳𑀢𑀸𑀬 𑀓𑀼𑀘𑁆𑀙𑀺𑀢𑀁 𑀓𑀼𑀴𑀦𑁆𑀢𑀺 𑀓𑀼𑀓𑁆𑀓𑀼𑀴𑀁 ¶ , 𑀭𑀽𑀧𑀯𑁂𑀤𑀦𑀸𑀤𑀺 𑀧𑀦 𑀢𑀢𑁄𑀧𑀺 𑀓𑀜𑁆𑀘𑀺 𑀓𑀸𑀮𑀁 𑀅𑀦𑀼𑀤𑀳𑀦𑀢𑁄 𑀫𑀳𑀸𑀧𑀭𑀺𑀴𑀸𑀳𑀦𑀝𑁆𑀞𑁂𑀦 𑀘 𑀓𑀼𑀓𑁆𑀓𑀼𑀴𑀁 𑀯𑀺𑀬𑀸𑀢𑀺 𑀓𑀼𑀓𑁆𑀓𑀼𑀴𑀁. 𑀅𑀦𑀺𑀘𑁆𑀘𑀮𑀓𑁆𑀔𑀡𑀸𑀤𑀻𑀦𑀻𑀢𑀺 𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀦𑀢𑁆𑀢𑀮𑀓𑁆𑀔𑀡𑀸𑀦𑀺.

𑀓𑀼𑀓𑁆𑀓𑀼𑀴𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀼𑀓𑁆𑀓𑀼𑀴𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫. 𑀤𑀺𑀝𑁆𑀞𑀺𑀯𑀕𑁆𑀕𑁄

𑁧-𑁯. 𑀅𑀚𑁆𑀛𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁫𑁦-𑁧𑁫𑁮. 𑀧𑀘𑁆𑀘𑀬𑀁 𑀓𑀢𑁆𑀯𑀸𑀢𑀺 𑀅𑀪𑀺𑀦𑀺𑀯𑁂𑀲𑀧𑀘𑁆𑀘𑀬𑀁 𑀓𑀢𑁆𑀯𑀸. 𑀆𑀤𑀺𑀲𑀤𑁆𑀤𑁂𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺 𑀲𑀜𑁆𑀜𑁄𑀚𑀦𑀸𑀪𑀺𑀦𑀺𑀯𑁂𑀲-𑀯𑀺𑀦𑀺𑀩𑀦𑁆𑀥𑀅𑀚𑁆𑀛𑁄𑀲𑀸𑀦𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀅𑀪𑀺𑀦𑀺𑀯𑁂𑀲𑀸 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀬𑁄. 𑀯𑀺𑀦𑀺𑀩𑀦𑁆𑀥𑀸 ‘‘𑀓𑀸𑀬𑁂 𑀅𑀯𑀻𑀢𑀭𑀸𑀕𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁩𑁨𑁦; 𑀫. 𑀦𑀺. 𑁧.𑁧𑁮𑁬) 𑀆𑀕𑀢𑀘𑁂𑀢𑀲𑁄𑀯𑀺𑀦𑀺𑀩𑀦𑁆𑀥𑀸 ¶ . 𑀅𑀚𑁆𑀛𑁄𑀲𑀸𑀦𑀸𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀚𑁆𑀛𑁄𑀲𑀸𑀦𑀸𑀦𑀺. 𑀲𑁂𑀲𑀸𑀦𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑁂𑀯.

𑀅𑀚𑁆𑀛𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦.𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁯. 𑀥𑀭𑀫𑀸𑀦𑀓𑀸𑀮𑁂𑀢𑀺 𑀚𑀻𑀯𑀫𑀸𑀦𑀓𑀸𑀮𑁂. 𑀧𑀳𑀸𑀦𑀁 𑀅𑀧𑀲𑁆𑀲𑀦𑁆𑀢𑁄𑀢𑀺 𑀣𑁂𑀭𑀲𑁆𑀲 𑀓𑀺𑀭 𑀪𑀕𑀯𑀢𑀺 𑀧𑁂𑀫𑀁 𑀅𑀥𑀺𑀫𑀢𑁆𑀢𑀁. 𑀘𑀺𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻𑀢𑀺 𑀘𑀺𑀢𑁆𑀢𑀁 𑀆𑀭𑀸𑀥𑁂𑀲𑁆𑀲𑀸𑀫𑀺. 𑀕𑀦𑁆𑀢𑀩𑁆𑀩𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀧𑀮𑀺𑀩𑁄𑀥𑁄. 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑀫𑀸𑀦𑁄𑀢𑀺 𑀘𑀺𑀢𑁆𑀢𑀲𑁆𑀲 𑀯𑀺𑀩𑁄𑀥𑀦𑁄. 𑀯𑀺𑀫𑀼𑀢𑁆𑀢𑀺…𑀧𑁂… 𑀚𑀸𑀢𑁄 𑀆𑀬𑀢𑀺𑀁 𑀧𑀝𑀺𑀯𑁂𑀥𑀧𑀘𑁆𑀘𑀬𑀢𑁆𑀢𑀸, 𑀦 𑀧𑀦 𑀢𑀤𑀸 𑀯𑀺𑀲𑁂𑀲𑀸𑀯𑀳𑀪𑀸𑀯𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑁄.

𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀺𑀝𑁆𑀞𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀭𑀺𑀧𑀡𑁆𑀡𑀸𑀲𑀓𑁄 𑀲𑀫𑀢𑁆𑀢𑁄.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀔𑀦𑁆𑀥𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁨. 𑀭𑀸𑀥𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧. 𑀫𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁦. 𑀫𑀸𑀭𑀲𑀤𑁆𑀤𑁄𑀬𑀁 ¶ ¶ 𑀪𑀸𑀯𑀲𑀸𑀥𑀦𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀸𑀭𑁄 𑀯𑀸 𑀅𑀲𑁆𑀲𑀸𑀢𑀺 𑀫𑀭𑀡𑀁 𑀯𑀸 𑀪𑀯𑁂𑀬𑁆𑀬𑀸’’𑀢𑀺 𑀆𑀳. 𑀫𑀸𑀭𑁂𑀢𑀸𑀢𑀺 𑀫𑀭𑀺𑀢𑀩𑁆𑀩𑁄 𑀫𑀸𑀭𑀁 𑀫𑀭𑀡𑀁 𑀏𑀢𑀩𑁆𑀩𑁄𑀢𑀺 𑀆𑀳 ‘‘𑀫𑀸𑀭𑁂𑀢𑀩𑁆𑀩𑁄’’𑀢𑀺. 𑀅𑀦𑀼𑀧𑀸𑀤𑀸𑀦𑀺𑀩𑁆𑀩𑀸𑀦𑀢𑁆𑀣𑀸𑀢𑀺 𑀨𑀮𑀯𑀺𑀫𑀼𑀢𑁆𑀢𑀺𑀲𑀗𑁆𑀔𑀸𑀢𑀸 𑀅𑀭𑀳𑀢𑁄 𑀅𑀭𑀳𑀦𑁆𑀢𑀢𑀸 𑀦𑀸𑀫 𑀬𑀸𑀯𑀤𑁂𑀯 𑀅𑀦𑀼𑀧𑀸𑀤𑀸𑀦𑀺𑀩𑁆𑀩𑀸𑀦𑀢𑁆𑀣𑀸. 𑀦𑀺𑀩𑁆𑀩𑀸𑀦𑀩𑁆𑀪𑀦𑁆𑀢𑀭𑁂𑀢𑀺 𑀅𑀦𑀼𑀧𑀸𑀤𑀸𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀢𑀢𑁄 𑀑𑀭𑀫𑁂𑀯 𑀇𑀤𑀁 𑀫𑀕𑁆𑀕𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺, 𑀦 𑀢𑀢𑁄 𑀧𑀭𑀁. 𑀅𑀲𑁆𑀲𑀸𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲.

𑀫𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨-𑁧𑁦. 𑀲𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁬𑁧-𑁧𑁬𑁯. 𑀮𑀕𑁆𑀕𑀧𑀼𑀘𑁆𑀙𑀸𑀢𑀺 𑀮𑀕𑁆𑀕𑀦𑀲𑁆𑀲 𑀩𑀚𑁆𑀛𑀦𑀲𑁆𑀲 𑀧𑀼𑀘𑁆𑀙𑀸. 𑀬𑀤𑀺 𑀭𑀽𑀧𑀸𑀤𑀻𑀲𑀼 𑀲𑀢𑁆𑀢𑀢𑁆𑀢𑀸 𑀲𑀢𑁆𑀢𑁄, 𑀔𑀻𑀡𑀸𑀲𑀯𑀸 𑀓𑀣𑀁 𑀲𑀢𑁆𑀢𑀸𑀢𑀺? 𑀲𑀢𑁆𑀢𑀪𑀽𑀢𑀧𑀼𑀩𑁆𑀩𑀸𑀢𑀺 𑀓𑀢𑁆𑀯𑀸. 𑀓𑀻𑀴𑀸𑀯𑀺𑀕𑀫𑀦𑁆𑀢𑀺 𑀓𑀻𑀴𑀸𑀬 𑀅𑀧𑀦𑀬𑀦𑀁 𑀑𑀭𑀫𑀡𑀁. 𑀬𑀦𑁆𑀢𑀭𑀚𑁆𑀚𑀼 𑀯𑀺𑀬 𑀪𑀯𑀧𑀩𑀦𑁆𑀥𑀲𑁆𑀲 𑀦𑀬𑀦𑀢𑁄 𑀪𑀯𑀭𑀚𑁆𑀚𑀽𑀢𑀺 𑀢𑀡𑁆𑀳𑀸 𑀯𑀼𑀢𑁆𑀢𑀸.

𑀲𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧-𑁧𑁨. 𑀫𑀸𑀭𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁭𑁦-𑁧𑁮𑁧. 𑀭𑀽𑀧𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀁 ¶ 𑀫𑀭𑀡𑀁 𑀦𑀸𑀫 𑀦𑀢𑁆𑀣𑀺 𑀭𑀽𑀧𑀸𑀤𑀻𑀦𑀁𑀬𑁂𑀯 𑀯𑀺𑀪𑀯𑁂 𑀫𑀭𑀡𑀲𑀫𑀜𑁆𑀜𑀸𑀢𑀺. 𑀫𑀭𑀡𑀥𑀫𑁆𑀫𑁄 𑀯𑀺𑀦𑀸𑀲𑀪𑀸𑀯𑁄.

𑀫𑀸𑀭𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁪. 𑀆𑀬𑀸𑀘𑀦𑀯𑀕𑁆𑀕𑀸𑀤𑀺

𑁧-𑁧𑁧. 𑀫𑀸𑀭𑀸𑀤𑀺𑀲𑀼𑀢𑁆𑀢𑀏𑀓𑀸𑀤𑀲𑀓𑀯𑀡𑁆𑀡𑀦𑀸

𑁧𑁮𑁨-𑁨𑁦𑁫. 𑀲𑀼𑀔𑀼𑀫𑀁 ¶ 𑀓𑀸𑀭𑀡𑀁 𑀉𑀧𑀝𑁆𑀞𑀸𑀢𑀺, 𑀢𑁂𑀦𑁂𑀲 𑀣𑁂𑀭𑁄 𑀧𑀝𑀺𑀪𑀸𑀦𑁂𑀬𑁆𑀬𑀓𑀸𑀦𑀁 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄. 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀥𑀫𑁆𑀫𑀯𑀲𑁂𑀦𑁂𑀯, 𑀦 𑀧𑀝𑀺𑀯𑁂𑀥𑀸𑀯𑀳𑀪𑀸𑀯𑁂𑀦.

𑀫𑀸𑀭𑀸𑀤𑀺𑀲𑀼𑀢𑁆𑀢𑀏𑀓𑀸𑀤𑀲𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀬𑀸𑀘𑀦𑀯𑀕𑁆𑀕𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀭𑀸𑀥𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁩. 𑀤𑀺𑀝𑁆𑀞𑀺𑀲𑀁𑀬𑀼𑀢𑁆𑀢𑀁

𑁧. 𑀲𑁄𑀢𑀸𑀧𑀢𑁆𑀢𑀺𑀯𑀕𑁆𑀕𑁄

𑁧. 𑀯𑀸𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁬. 𑀦 ¶ ¶ 𑀏𑀢𑁂 𑀯𑀸𑀢𑀸𑀢𑀺 𑀬𑁂 𑀇𑀫𑁂 𑀭𑀼𑀓𑁆𑀔𑀲𑀸𑀔𑀸𑀤𑀺𑀪𑀜𑁆𑀚𑀦𑀓𑀭𑀸, 𑀏𑀢𑁂 𑀲𑀢𑁆𑀢𑀓𑀸𑀬𑀢𑁆𑀢𑀸 𑀯𑀸𑀢𑀸 𑀦𑀸𑀫 𑀦 𑀳𑁄𑀦𑁆𑀢𑀺. 𑀢𑁂 𑀳𑀺 𑀦𑀺𑀘𑁆𑀘𑀸 𑀥𑀼𑀯𑀸 𑀲𑀲𑁆𑀲𑀢𑀸. 𑀢𑁂𑀦𑀸𑀳 ‘‘𑀯𑀸𑀢𑁄 𑀧𑀦𑀸’’𑀢𑀺𑀆𑀤𑀺. 𑀢𑁂𑀦 𑀲𑀢𑁆𑀢𑀲𑀼 𑀓𑀸𑀬𑁂𑀲𑀼 𑀘𑀢𑀼𑀢𑁆𑀣𑀁 𑀓𑀸𑀬𑀫𑀸𑀳. 𑀭𑀼𑀓𑁆𑀔𑀲𑀸𑀔𑀸𑀤𑀺𑀪𑀜𑁆𑀚𑀦𑀓𑁄 𑀏𑀲𑁄 𑀯𑀸𑀢𑀮𑁂𑀲𑁄 𑀦𑀸𑀫, 𑀯𑀸𑀢𑀲𑀤𑀺𑀲𑁄𑀢𑀺 𑀅𑀢𑁆𑀣𑁄. 𑀏𑀲𑀺𑀓𑀢𑁆𑀣𑀫𑁆𑀪𑁄 𑀯𑀺𑀬𑀸𑀢𑀺 𑀇𑀫𑀺𑀦𑀸 𑀦𑀺𑀘𑁆𑀘𑀮𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀺, 𑀧𑀩𑁆𑀩𑀢𑀓𑀽𑀝𑀁 𑀯𑀺𑀬𑀸𑀢𑀺 𑀇𑀫𑀺𑀦𑀸 𑀧𑀦 𑀲𑀲𑁆𑀲𑀢𑀺𑀲𑀫𑀁𑀯𑀸𑀧𑀺. 𑀅𑀬𑀜𑁆𑀳𑀺 𑀯𑀸𑀬𑀼 𑀓𑀸𑀬𑀲𑁆𑀲 𑀦𑀺𑀘𑁆𑀘𑀢𑀁 𑀅𑀪𑀺𑀦𑀺𑀯𑀺𑀲𑁆𑀲 𑀞𑀺𑀢𑁄 ‘‘𑀫𑀸 𑀘 𑀅𑀦𑀺𑀘𑁆𑀘𑀢𑀸 𑀧𑀭𑁄 𑀳𑁄𑀢𑀽’’𑀢𑀺 𑀦 𑀯𑀸𑀢𑀸 𑀯𑀸𑀬𑀦𑁆𑀢𑀻𑀢𑀺 𑀩𑀸𑀥𑀢𑀺. 𑀏𑀲 𑀦𑀬𑁄 𑀦𑀤𑀺𑀬𑁄 𑀲𑀦𑁆𑀤𑀦𑁆𑀢𑀻𑀢𑀺𑀆𑀤𑀻𑀲𑀼. 𑀉𑀤𑀓𑀁 𑀧𑀦𑀸𑀢𑀺 𑀤𑀼𑀢𑀺𑀬𑀁 𑀓𑀸𑀬𑀁 𑀲𑀦𑁆𑀥𑀸𑀬𑀸𑀳. 𑀕𑀩𑁆𑀪𑁄 𑀧𑀦 𑀦 𑀦𑀺𑀓𑁆𑀔𑀫𑀢𑀺 𑀓𑀽𑀝𑀝𑁆𑀞𑀸𑀤𑀺𑀪𑀸𑀯𑁂𑀦𑁂𑀯 𑀢𑀲𑁆𑀲 𑀮𑀩𑁆𑀪𑀦𑀢𑁄. 𑀦𑁂𑀯 𑀢𑁂 𑀉𑀤𑁂𑀦𑁆𑀢𑀺 𑀬𑀣𑀸 𑀯𑀸𑀢𑀸, 𑀏𑀯𑀁 𑀢𑀺𑀝𑁆𑀞𑀦𑀢𑁄 𑀮𑁄𑀓𑀲𑁆𑀲 𑀧𑀦 𑀢𑀣𑀸 𑀫𑀢𑀺𑀫𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀯𑀸𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨-𑁪. 𑀏𑀢𑀁𑀫𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁦𑁭-𑁨𑁦𑁯. 𑀤𑀺𑀝𑁆𑀞𑀁 𑀭𑀽𑀧𑀸𑀬𑀢𑀦𑀁 𑀘𑀓𑁆𑀔𑀼𑀦𑀸 𑀤𑀝𑁆𑀞𑀩𑁆𑀩𑀢𑁄. 𑀲𑀼𑀢𑀁 𑀲𑀤𑁆𑀤𑀸𑀬𑀢𑀦𑀁 𑀲𑁄𑀢𑁂𑀦 𑀲𑁄𑀢𑀩𑁆𑀩𑀢𑁄. 𑀫𑀼𑀢𑀁 𑀕𑀦𑁆𑀥𑀸𑀬𑀢𑀦𑀸𑀤𑀺 𑀢𑀺𑀯𑀺𑀥𑀁 𑀲𑀫𑁆𑀧𑀢𑁆𑀢𑀕𑀸𑀳𑀻𑀳𑀺 𑀖𑀸𑀦𑀸𑀤𑀻𑀳𑀺 𑀧𑀢𑁆𑀯𑀸 𑀕𑀳𑁂𑀢𑀩𑁆𑀩𑀢𑁄. 𑀅𑀯𑀲𑁂𑀲𑀸𑀦𑀺 𑀘𑀓𑁆𑀔𑀸𑀤𑀻𑀦𑀺 𑀲𑀢𑁆𑀢𑀸𑀬𑀢𑀦𑀸𑀦𑀺 𑀯𑀺𑀜𑁆𑀜𑀸𑀢𑀁 𑀦𑀸𑀫 𑀓𑁂𑀯𑀮𑀁 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀯𑀺𑀚𑀸𑀦𑀺𑀢𑀩𑁆𑀩𑀢𑁄. 𑀧𑀢𑁆𑀢𑀦𑁆𑀢𑀺 𑀅𑀦𑀼𑀧𑁆𑀧𑀢𑁆𑀢𑀁, 𑀬𑀁 𑀓𑀺𑀜𑁆𑀘𑀺 𑀧𑀸𑀧𑀼𑀡𑀺𑀢𑀩𑁆𑀩𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀕𑀯𑁂𑀲𑀺𑀢𑁆𑀯𑀸 𑀲𑀫𑁆𑀧𑀢𑁆𑀢𑀦𑁆𑀢𑀺 𑀅𑀦𑀼𑀧𑁆𑀧𑀢𑁆𑀢𑀁. 𑀧𑀭𑀺𑀬𑁂𑀲𑀺𑀢𑀦𑁆𑀢𑀺 𑀧𑀭𑀺𑀬𑀺𑀝𑁆𑀞𑀁. 𑀘𑀺𑀢𑁆𑀢𑁂𑀦 𑀅𑀦𑀼𑀲𑀜𑁆𑀘𑀭𑀺𑀢𑀦𑁆𑀢𑀺 𑀫𑀦𑀲𑀸 𑀘𑀺𑀦𑁆𑀢𑀺𑀢𑀁. ‘‘𑀧𑀢𑁆𑀢𑀁 𑀧𑀭𑀺𑀬𑁂𑀲𑀺𑀢’’𑀦𑁆𑀢𑀺 𑀏𑀢𑀲𑁆𑀫𑀺𑀁 𑀧𑀤𑀤𑁆𑀯𑀬𑁂 𑀘𑀢𑀼𑀓𑁆𑀓𑀁 𑀲𑀫𑁆𑀪𑀯𑀢𑀻𑀢𑀺 𑀢𑀁 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲 𑀯𑀲𑁂𑀦 𑀧𑀢𑁆𑀢𑀧𑀭𑀺𑀬𑁂𑀲𑀺𑀢𑀧𑀤𑀸𑀦𑀺, 𑀢𑀢𑁄 𑀫𑀦𑀲𑀸 𑀅𑀦𑀼𑀯𑀺𑀘𑀭𑀺𑀢𑀜𑁆𑀘 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ¶ ‘‘𑀮𑁄𑀓𑀲𑁆𑀫𑀺𑀁 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀁 𑀦𑀸𑀫 𑀧𑀭𑀺𑀬𑁂𑀲𑀦𑀸𑀬 ¶ 𑀧𑀭𑀺𑀕𑁆𑀕𑀸𑀳𑀪𑀸𑀯𑀢𑁄. 𑀧𑀭𑀺𑀬𑁂𑀲𑀺𑀢𑀁 𑀦𑀸𑀫 𑀓𑁂𑀯𑀮𑀁 𑀧𑀭𑀺𑀬𑁂𑀲𑀺𑀢𑀫𑁂𑀯𑀸𑀢𑀺 𑀓𑀢𑁆𑀯𑀸 𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑀢𑁆𑀢𑀲𑁆𑀲 𑀫𑀦𑀼𑀲𑁆𑀲𑀸𑀦𑀼𑀯𑀺𑀘𑀭𑀺𑀢𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀧𑀞𑀫𑀯𑀺𑀓𑀧𑁆𑀧𑁂 𑀲𑀗𑁆𑀓𑀭𑁄 𑀅𑀢𑁆𑀣𑀻𑀢𑀺 𑀅𑀲𑀗𑁆𑀓𑀭𑀢𑁄 𑀘 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀦𑁆𑀢𑀺 𑀯𑀺𑀜𑁆𑀜𑀸𑀢𑀸𑀤𑀺. 𑀢𑀜𑁆𑀳𑀺 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀕𑀳𑀺𑀢𑀢𑁆𑀢𑀸 𑀫𑀦𑀲𑀸 𑀅𑀦𑀼𑀯𑀺𑀘𑀭𑀺𑀢𑀁 𑀦𑀸𑀫 𑀦 𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢𑀁.

𑀏𑀢𑀁𑀫𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀦𑀢𑁆𑀣𑀺𑀤𑀺𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁦. 𑀤𑀺𑀦𑁆𑀦𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀲𑀻𑀲𑁂𑀦 𑀤𑀸𑀦𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀤𑀺𑀦𑁆𑀦𑀲𑁆𑀲 𑀨𑀮𑀸𑀪𑀸𑀯𑀁 𑀲𑀦𑁆𑀥𑀸𑀬𑀸’’𑀢𑀺, 𑀤𑀺𑀦𑁆𑀦𑀁 𑀧𑀦 𑀅𑀦𑁆𑀦𑀸𑀤𑀺𑀯𑀢𑁆𑀣𑀼𑀁 𑀓𑀣𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑀺. 𑀏𑀲 𑀦𑀬𑁄 ‘‘𑀬𑀺𑀝𑁆𑀞𑀁 𑀳𑀼𑀢’’𑀦𑁆𑀢𑀺 𑀏𑀢𑁆𑀣𑀸𑀧𑀺. 𑀫𑀳𑀸𑀬𑀸𑀕𑁄𑀢𑀺 𑀲𑀩𑁆𑀩𑀲𑀸𑀥𑀸𑀭𑀡𑀁 𑀫𑀳𑀸𑀤𑀸𑀦𑀁. 𑀧𑀳𑁂𑀡𑀓𑀲𑀓𑁆𑀓𑀸𑀭𑁄𑀢𑀺 𑀧𑀸𑀳𑀼𑀦𑀓𑀸𑀦𑀁 𑀓𑀸𑀢𑀩𑁆𑀩𑀲𑀓𑁆𑀓𑀸𑀭𑁄. 𑀨𑀮𑀦𑁆𑀢𑀺 𑀆𑀦𑀺𑀲𑀁𑀲𑀨𑀮𑀁 𑀦𑀺𑀲𑁆𑀲𑀦𑁆𑀤𑀨𑀮𑀜𑁆𑀘. 𑀯𑀺𑀧𑀸𑀓𑁄𑀢𑀺 𑀲𑀤𑀺𑀲𑀨𑀮𑀁. 𑀧𑀭𑀮𑁄𑀓𑁂 𑀞𑀺𑀢𑀲𑁆𑀲 𑀅𑀬𑀁 𑀮𑁄𑀓𑁄 𑀦𑀢𑁆𑀣𑀻𑀢𑀺 𑀧𑀭𑀮𑁄𑀓𑁂 𑀞𑀺𑀢𑀲𑁆𑀲 𑀓𑀫𑁆𑀫𑀼𑀦𑀸 𑀮𑀤𑁆𑀥𑀩𑁆𑀩𑁄 𑀅𑀬𑀁 𑀮𑁄𑀓𑁄 𑀦 𑀳𑁄𑀢𑀺. 𑀇𑀥𑀮𑁄𑀓𑁂 𑀞𑀺𑀢𑀲𑁆𑀲𑀧𑀺 𑀧𑀭𑀮𑁄𑀓𑁄 𑀦𑀢𑁆𑀣𑀻𑀢𑀺 𑀇𑀥𑀮𑁄𑀓𑁂 𑀞𑀺𑀢𑀲𑁆𑀲 𑀓𑀫𑁆𑀫𑀼𑀦𑀸 𑀮𑀤𑁆𑀥𑀩𑁆𑀩𑁄 𑀧𑀭𑀮𑁄𑀓𑁄 𑀦 𑀳𑁄𑀢𑀺. 𑀢𑀢𑁆𑀣 𑀓𑀸𑀭𑀡𑀫𑀸𑀳 𑁋 ‘‘𑀲𑀩𑁆𑀩𑁂 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑁆𑀢𑀻’’𑀢𑀺. 𑀇𑀫𑁂 𑀲𑀢𑁆𑀢𑀸 𑀬𑀢𑁆𑀣 𑀬𑀢𑁆𑀣 𑀪𑀯𑁂 𑀬𑁄𑀦𑀺𑀆𑀤𑀻𑀲𑀼 𑀘 𑀞𑀺𑀢𑀸, 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑁆𑀢𑀺 𑀦𑀺𑀭𑀼𑀤𑀬𑀯𑀺𑀦𑀸𑀲𑀯𑀲𑁂𑀦 𑀦𑀲𑁆𑀲𑀦𑁆𑀢𑀺. 𑀨𑀮𑀸𑀪𑀸𑀯𑀯𑀲𑁂𑀦𑀸𑀢𑀺 𑀫𑀸𑀢𑀸𑀧𑀺𑀢𑀽𑀲𑀼 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀻𑀦𑀁 𑀨𑀮𑀲𑁆𑀲 𑀅𑀪𑀸𑀯𑀯𑀲𑁂𑀦 ‘‘𑀦𑀢𑁆𑀣𑀺 𑀫𑀸𑀢𑀸, 𑀦𑀢𑁆𑀣𑀺 𑀧𑀺𑀢𑀸’’𑀢𑀺 𑀯𑀤𑀦𑁆𑀢𑀺, 𑀦 𑀫𑀸𑀢𑀸𑀧𑀺𑀢𑀽𑀦𑀁, 𑀦𑀸𑀧𑀺 𑀢𑁂𑀲𑀼 𑀇𑀤𑀸𑀦𑀺 𑀓𑀭𑀺𑀬𑀫𑀸𑀦𑀲𑀓𑁆𑀓𑀸𑀭𑀸𑀲𑀓𑁆𑀓𑀸𑀭𑀸𑀦𑀁 𑀅𑀪𑀸𑀯𑀯𑀲𑁂𑀦 𑀢𑁂𑀲𑀁 𑀮𑁄𑀓𑀧𑀘𑁆𑀘𑀓𑁆𑀔𑀢𑁆𑀢𑀸. 𑀧𑀼𑀩𑁆𑀩𑀼𑀴𑀓𑀲𑁆𑀲 𑀯𑀺𑀬 𑀇𑀫𑁂𑀲𑀁 𑀲𑀢𑁆𑀢𑀸𑀦𑀁 𑀉𑀧𑁆𑀧𑀸𑀤𑁄 𑀦𑀸𑀫 𑀓𑁂𑀯𑀮𑁄, 𑀦 𑀪𑀯𑀢𑁄 𑀘𑀯𑀺𑀢𑁆𑀯𑀸 𑀆𑀕𑀫𑀦𑀧𑀼𑀩𑁆𑀩𑀓𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀘𑀯𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀦𑀓𑀲𑀢𑁆𑀢𑀸 𑀦𑀸𑀫 𑀦𑀢𑁆𑀣𑀻’’𑀢𑀺. 𑀲𑀫𑀡𑁂𑀦 𑀦𑀸𑀫 𑀬𑀸𑀣𑀸𑀯𑀢𑁄 𑀚𑀸𑀦𑀦𑁆𑀢𑁂𑀦 𑀓𑀲𑁆𑀲𑀘𑀺 𑀅𑀓𑀣𑁂𑀢𑁆𑀯𑀸 𑀲𑀜𑁆𑀜𑀢𑁂𑀦 𑀪𑀯𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀆𑀳𑁄𑀧𑀼𑀭𑀺𑀲𑀺𑀓𑀸 𑀦𑀸𑀫 𑀲𑀺𑀬𑀸. 𑀓𑀺𑀜𑁆𑀳𑀺 𑀧𑀭𑁄 𑀧𑀭𑀲𑁆𑀲 𑀓𑀭𑀺𑀲𑁆𑀲𑀢𑀺, 𑀢𑀣𑀸 𑀘 𑀅𑀢𑁆𑀢𑀦𑁄 𑀲𑀫𑁆𑀧𑀸𑀤𑀦𑀲𑁆𑀲 𑀓𑀲𑁆𑀲𑀘𑀺 𑀅𑀯𑀲𑁆𑀲𑀬𑁄 𑀏𑀯 𑀦 𑀲𑀺𑀬𑀸 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀘𑁆𑀙𑀺𑀚𑁆𑀚𑀦𑀢𑁄𑀢𑀺 𑀆𑀳 ‘‘𑀬𑁂 𑀇𑀫𑀜𑁆𑀘…𑀧𑁂… 𑀧𑀯𑁂𑀤𑁂𑀦𑁆𑀢𑀻’’𑀢𑀺.

𑀘𑀢𑀽𑀲𑀼 ¶ 𑀫𑀳𑀸𑀪𑀽𑀢𑁂𑀲𑀼 𑀦𑀺𑀬𑀼𑀢𑁆𑀢𑁄𑀢𑀺 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁄. 𑀬𑀣𑀸 𑀧𑀦 𑀫𑀢𑁆𑀢𑀺𑀓𑀸𑀬 𑀦𑀺𑀩𑁆𑀩𑀢𑁆𑀢𑀁 𑀪𑀸𑀚𑀦𑀁 𑀫𑀢𑁆𑀢𑀺𑀓𑀸𑀫𑀬𑀁, 𑀏𑀯𑀫𑀬𑀁 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀺 𑀦𑀺𑀩𑁆𑀩𑀢𑁆𑀢𑁄𑀢𑀺 𑀆𑀳 ‘‘𑀘𑀢𑀼𑀫𑀳𑀸𑀪𑀽𑀢𑀫𑀬𑁄’’𑀢𑀺. 𑀅𑀚𑁆𑀛𑀢𑁆𑀢𑀺𑀓𑀸 𑀧𑀣𑀯𑀻𑀥𑀸𑀢𑀽𑀢𑀺 𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑀸 𑀧𑀣𑀯𑀻𑀥𑀸𑀢𑀼. 𑀩𑀸𑀳𑀺𑀭𑀁 𑀧𑀣𑀯𑀻𑀥𑀸𑀢𑀼𑀦𑁆𑀢𑀺 𑀩𑀳𑀺𑀤𑁆𑀥𑀸 𑀫𑀳𑀸𑀧𑀣𑀯𑀺𑀁. 𑀅𑀦𑀼𑀬𑀸𑀢𑀻𑀢𑀺 𑀢𑀲𑁆𑀲 𑀅𑀦𑀼𑀭𑀽𑀧𑀪𑀸𑀯𑁂𑀦 𑀬𑀸𑀢𑀺 𑀉𑀧𑁂𑀢𑀺. 𑀉𑀧𑀕𑀘𑁆𑀙𑀢𑀻𑀢𑀺 𑀧𑀼𑀩𑁆𑀩𑁂 𑀩𑀸𑀳𑀺𑀭𑀧𑀣𑀯𑀻𑀓𑀸𑀬𑀢𑁄 𑀢𑀤𑁂𑀓𑀤𑁂𑀲𑀪𑀽𑀢𑀸 𑀧𑀣𑀯𑀻 𑀆𑀕𑀦𑁆𑀢𑁆𑀯𑀸 𑀅𑀚𑁆𑀛𑀢𑁆𑀢𑀺𑀓𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀲𑀢𑁆𑀢𑀪𑀸𑀯𑁂𑀦 𑀲𑀡𑁆𑀞𑀺𑀢𑀸 𑀇𑀤𑀸𑀦𑀺 𑀖𑀝𑀸𑀤𑀺𑀧𑀣𑀯𑀻 ¶ 𑀯𑀺𑀬 𑀢𑀫𑁂𑀯 𑀩𑀸𑀳𑀺𑀭𑀧𑀣𑀯𑀻𑀓𑀸𑀬𑀁 𑀉𑀧𑁂𑀢𑀺 𑀉𑀧𑀕𑀘𑁆𑀙𑀢𑀺, 𑀲𑀩𑁆𑀩𑀲𑁄 𑀢𑁂𑀦 𑀦𑀺𑀩𑁆𑀩𑀺𑀲𑁂𑀲𑀢𑀁 𑀏𑀓𑀻𑀪𑀸𑀯𑀫𑁂𑀯 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀆𑀧𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀏𑀢𑁆𑀣 𑀧𑀚𑁆𑀚𑀼𑀦𑁆𑀦𑁂𑀦 𑀫𑀳𑀸𑀲𑀫𑀼𑀤𑁆𑀤𑀢𑁄 𑀕𑀳𑀺𑀢𑀆𑀧𑁄 𑀯𑀺𑀬 𑀯𑀲𑁆𑀲𑁄𑀤𑀓𑀪𑀸𑀯𑁂𑀦 𑀧𑀼𑀦𑀧𑀺 𑀫𑀳𑀸𑀲𑀫𑀼𑀤𑁆𑀤𑀁, 𑀲𑀽𑀭𑀺𑀬𑀭𑀁𑀲𑀺𑀢𑁄 𑀕𑀳𑀺𑀢𑀇𑀦𑁆𑀤𑀕𑁆𑀕𑀺𑀲𑀗𑁆𑀔𑀸𑀢𑀢𑁂𑀚𑁄 𑀯𑀺𑀬 𑀧𑀼𑀦𑀧𑀺 𑀲𑀽𑀭𑀺𑀬𑀭𑀁𑀲𑀺𑀁, 𑀫𑀳𑀸𑀯𑀸𑀬𑀼𑀔𑀦𑁆𑀥𑀢𑁄 𑀦𑀺𑀕𑁆𑀕𑀢𑀫𑀳𑀸𑀯𑀸𑀬𑁄 𑀯𑀺𑀬 𑀢𑀫𑁂𑀯 𑀯𑀸𑀬𑀼𑀔𑀦𑁆𑀥𑀁 𑀉𑀧𑁂𑀢𑀺 𑀉𑀧𑀕𑀘𑁆𑀙𑀢𑀻𑀢𑀺 𑀤𑀺𑀝𑁆𑀞𑀺𑀕𑀢𑀺𑀓𑁄 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀯𑀸𑀤𑀁 𑀪𑀺𑀦𑁆𑀤𑀢𑀺. 𑀉𑀫𑁆𑀫𑀢𑁆𑀢𑀓𑀧𑀘𑁆𑀙𑀺𑀲𑀤𑀺𑀲𑀜𑁆𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑀤𑀲𑁆𑀲𑀦𑀁. 𑀫𑀦𑀘𑁆𑀙𑀝𑁆𑀞𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀦𑁆𑀢𑀺 𑀢𑁂𑀲𑀁 𑀯𑀺𑀲𑀬𑀪𑀸𑀯𑀸 𑀯𑀺𑀲𑀬𑀸𑀧𑀻𑀢𑀺 𑀯𑀤𑀢𑀺. 𑀯𑀺𑀲𑀬𑀺𑀕𑁆𑀕𑀳𑀡𑁂𑀦 𑀳𑀺 𑀯𑀺𑀲𑀬𑀸 𑀕𑀳𑀺𑀢𑀸 𑀏𑀯 𑀳𑁄𑀦𑁆𑀢𑀻𑀢𑀺. 𑀕𑀼𑀡𑀸𑀕𑀼𑀡𑀧𑀤𑀸𑀦𑀻𑀢𑀺 𑀕𑀼𑀡𑀤𑁄𑀲𑀓𑁄𑀝𑁆𑀞𑀸𑀲𑀸. 𑀲𑀭𑀻𑀭𑀫𑁂𑀯 𑀧𑀤𑀸𑀦𑀻𑀢𑀺 𑀅𑀥𑀺𑀧𑁆𑀧𑁂𑀢𑀁 𑀲𑀭𑀻𑀭𑁂𑀦 𑀢𑀁𑀢𑀁𑀓𑀺𑀭𑀺𑀬𑀸𑀬 𑀧𑀚𑁆𑀚𑀺𑀢𑀩𑁆𑀩𑀢𑁄. 𑀤𑀩𑁆𑀩𑀦𑁆𑀢𑀺 𑀫𑀼𑀬𑁆𑀳𑀦𑁆𑀢𑀻𑀢𑀺 𑀤𑀢𑁆𑀢𑀽, 𑀫𑀽𑀴𑁆𑀳𑀧𑀼𑀕𑁆𑀕𑀮𑀸. 𑀢𑁂𑀳𑀺 𑀤𑀢𑁆𑀢𑀽𑀳𑀺 𑀩𑀸𑀮𑀫𑀦𑀼𑀲𑁆𑀲𑁂𑀳𑀺 𑀧𑀜𑁆𑀜𑀢𑁆𑀢𑀁.

𑀦𑀢𑁆𑀣𑀺𑀤𑀺𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀓𑀭𑁄𑀢𑁄𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁧. 𑀲𑀳𑀢𑁆𑀣𑀸 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀲𑀳𑀢𑁆𑀣𑁂𑀦 𑀓𑀭𑁄𑀦𑁆𑀢𑀲𑁆𑀲. 𑀦𑀺𑀲𑁆𑀲𑀕𑁆𑀕𑀺𑀬𑀣𑀸𑀯𑀭𑀸𑀤𑀬𑁄𑀧𑀺 𑀇𑀥 𑀲𑀳𑀢𑁆𑀣𑀓𑀭𑀡𑁂𑀦𑁂𑀯 𑀲𑀗𑁆𑀕𑀳𑀺𑀢𑀸. 𑀳𑀢𑁆𑀣𑀸𑀤𑀻𑀦𑀻𑀢𑀺 𑀳𑀢𑁆𑀣𑀧𑀸𑀤𑀓𑀡𑁆𑀡𑀦𑀸𑀲𑀸𑀤𑀻𑀦𑀺. 𑀧𑀘𑀦𑀁 𑀤𑀳𑀦𑀁 𑀯𑀺𑀩𑀸𑀥𑀦𑀦𑁆𑀢𑀺 𑀆𑀳 ‘‘𑀤𑀡𑁆𑀟𑁂𑀦 𑀧𑀻𑀴𑁂𑀦𑁆𑀢𑀲𑁆𑀲𑀸’’𑀢𑀺. 𑀧𑀧𑀜𑁆𑀘𑀲𑀽𑀤𑀦𑀺𑀬𑀁 ‘‘𑀢𑀚𑁆𑀚𑁂𑀦𑁆𑀢𑀲𑁆𑀲 𑀘𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀇𑀥 𑀧𑀦 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀁 𑀯𑀺𑀬 𑀢𑀚𑁆𑀚𑀦𑀁 𑀧𑀭𑀺𑀪𑀸𑀲𑀦𑀁 𑀤𑀡𑁆𑀟𑁂𑀦𑁂𑀯 𑀲𑀗𑁆𑀕𑀳𑁂𑀢𑁆𑀯𑀸 ‘‘𑀤𑀡𑁆𑀟𑁂𑀦 𑀧𑀻𑀴𑁂𑀦𑁆𑀢𑀲𑁆𑀲’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀲𑁄𑀓𑀁 𑀲𑀬𑀁 𑀓𑀭𑁄𑀦𑁆𑀢𑀲𑁆𑀲𑀸𑀢𑀺 𑀧𑀭𑀲𑁆𑀲 𑀲𑁄𑀓𑀓𑀸𑀭𑀡𑀁 𑀲𑀬𑀁 𑀓𑀭𑁄𑀦𑁆𑀢𑀲𑁆𑀲, 𑀲𑁄𑀓𑀁 𑀯𑀸 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲. 𑀧𑀭𑁂𑀳𑀺 𑀅𑀢𑁆𑀢𑀦𑁄 𑀯𑀘𑀦𑀓𑀭𑁂𑀳𑀺. 𑀲𑀬𑀫𑁆𑀧𑀺 𑀨𑀦𑁆𑀤𑀢𑁄𑀢𑀺 𑀧𑀭𑀲𑁆𑀲 𑀯𑀺𑀩𑀸𑀥𑀦𑀧𑁆𑀧𑀬𑁄𑀕𑁂𑀦 ¶ 𑀲𑀬𑀫𑁆𑀧𑀺 𑀨𑀦𑁆𑀤𑀢𑁄. 𑀅𑀢𑀺𑀧𑀸𑀢𑀬𑀢𑁄𑀢𑀺 𑀧𑀤𑀁 𑀲𑀼𑀤𑁆𑀥𑀓𑀢𑁆𑀢𑀼𑀅𑀢𑁆𑀣𑁂 𑀳𑁂𑀢𑀼𑀓𑀢𑁆𑀢𑀼𑀅𑀢𑁆𑀣𑁂 𑀘 𑀯𑀢𑁆𑀢𑀢𑀻𑀢𑀺 𑀆𑀳 𑁋 ‘‘𑀳𑀦𑀦𑁆𑀢𑀲𑁆𑀲𑀧𑀺 𑀳𑀦𑀸𑀧𑁂𑀦𑁆𑀢𑀲𑁆𑀲𑀧𑀻’’𑀢𑀺. 𑀓𑀸𑀭𑀡𑀯𑀲𑁂𑀦𑀸𑀢𑀺 𑀓𑀸𑀭𑀸𑀧𑀦𑀯𑀲𑁂𑀦.

𑀖𑀭𑀲𑁆𑀲 𑀪𑀺𑀢𑁆𑀢𑀺 𑀅𑀦𑁆𑀢𑁄 𑀘 𑀩𑀳𑀺 𑀘 𑀲𑀦𑁆𑀥𑀺𑀢𑀸 𑀳𑀼𑀢𑁆𑀯𑀸 𑀞𑀺𑀢𑀸𑀯 𑀖𑀭𑀲𑀦𑁆𑀥𑀺. 𑀓𑀺𑀜𑁆𑀘𑀺𑀧𑀺 𑀅𑀲𑁂𑀲𑁂𑀢𑁆𑀯𑀸 𑀦𑀺𑀭𑀯𑀲𑁂𑀲𑁄 𑀮𑁄𑀧𑁄 𑀦𑀺𑀮𑁆𑀮𑁄𑀧𑁄. 𑀏𑀓𑀸𑀕𑀸𑀭𑁂 𑀦𑀺𑀬𑀼𑀢𑁆𑀢𑁄 𑀯𑀺𑀮𑁄𑀧𑁄 𑀏𑀓𑀸𑀕𑀸𑀭𑀺𑀓𑁄. 𑀧𑀭𑀺𑀢𑁄 𑀲𑀩𑁆𑀩𑀲𑁄 𑀧𑀦𑁆𑀣𑁂 𑀳𑀦𑀦𑀁 𑀧𑀭𑀺𑀧𑀦𑁆𑀣𑁄. 𑀧𑀸𑀧𑀁 𑀦 𑀓𑀭𑀻𑀬𑀢𑀺 𑀧𑀼𑀩𑁆𑀩𑁂 𑀅𑀲𑀢𑁄 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸, 𑀢𑀲𑁆𑀫𑀸 𑀦𑀢𑁆𑀣𑀺 𑀧𑀸𑀧𑀁. 𑀬𑀤𑀺 𑀏𑀯𑀁 𑀓𑀣𑀁 𑀲𑀢𑁆𑀢𑀸 𑀧𑀸𑀧𑁂 𑀧𑀯𑀢𑁆𑀢𑀦𑁆𑀢𑀻𑀢𑀺 𑀆𑀳 ‘‘𑀲𑀢𑁆𑀢𑀸 𑀧𑀦 𑀓𑀭𑁄𑀫𑀸𑀢𑀺 𑀏𑀯𑀁𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀻’’𑀢𑀺 𑀏𑀯𑀁 𑀓𑀺𑀭𑀲𑁆𑀲 𑀳𑁄𑀢𑀺 𑀇𑀫𑁂𑀲𑀜𑁆𑀳𑀺 𑀲𑀢𑁆𑀢𑀸𑀦𑀁 𑀳𑀺𑀁𑀲𑀸𑀤𑀺𑀓𑀺𑀭𑀺𑀬𑀸 𑀦 𑀅𑀢𑁆𑀢𑀸𑀦𑀁 𑀨𑀼𑀲𑀢𑀺 𑀢𑀲𑁆𑀲 𑀦𑀺𑀘𑁆𑀘𑀢𑀸𑀬 𑀦𑀺𑀩𑁆𑀩𑀺𑀓𑀸𑀭𑀢𑁆𑀢𑀸, 𑀲𑀭𑀻𑀭𑀁 𑀧𑀦 𑀅𑀘𑁂𑀢𑀦𑀁 𑀓𑀝𑁆𑀞𑀓𑀮𑀺𑀗𑁆𑀕𑀭𑀽𑀧𑀫𑀁, 𑀢𑀲𑁆𑀫𑀺𑀁 𑀯𑀺𑀓𑁄𑀧𑀺𑀢𑁂𑀧𑀺 𑀦 𑀓𑀺𑀜𑁆𑀘𑀺 𑀧𑀸𑀧𑀦𑁆𑀢𑀺. 𑀔𑀼𑀭𑀦𑁂𑀫𑀺𑀦𑀸𑀢𑀺 𑀦𑀺𑀲𑀺𑀢𑀔𑀼𑀭𑀫𑀬𑀦𑁂𑀫𑀺𑀦𑀸, 𑀔𑀼𑀭𑀲𑀤𑀺𑀲𑀦𑁂𑀫𑀺𑀦𑀸𑀢𑀺 𑀅𑀢𑁆𑀣𑁄.

𑀕𑀗𑁆𑀕𑀸𑀬 ¶ 𑀤𑀓𑁆𑀔𑀺𑀡𑀸 𑀤𑀺𑀲𑀸 𑀅𑀧𑁆𑀧𑀢𑀺𑀭𑀽𑀧𑀤𑁂𑀲𑁄, 𑀉𑀢𑁆𑀢𑀭𑀤𑀺𑀲𑀸 𑀧𑀢𑀺𑀭𑀽𑀧𑀤𑁂𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀤𑀓𑁆𑀔𑀺𑀡𑀜𑁆𑀘𑁂𑀧𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀤𑀓𑁆𑀔𑀺𑀡𑀢𑀻𑀭𑁂 𑀫𑀦𑀼𑀲𑁆𑀲𑀸 𑀓𑀓𑁆𑀔𑀴𑀸’’𑀢𑀺𑀆𑀤𑀺. 𑀫𑀳𑀸𑀬𑀸𑀕𑀦𑁆𑀢𑀺 𑀫𑀳𑀸𑀯𑀺𑀚𑀺𑀢𑀬𑀜𑁆𑀜𑀲𑀤𑀺𑀲𑀁 𑀫𑀳𑀸𑀬𑀸𑀕𑀁. 𑀉𑀧𑁄𑀲𑀣𑀓𑀫𑁆𑀫𑁂𑀦𑀸𑀢𑀺 𑀉𑀧𑁄𑀲𑀣𑀓𑀫𑁆𑀫𑁂𑀦 𑀘. 𑀘-𑀲𑀤𑁆𑀤𑁄 𑀳𑁂𑀢𑁆𑀣 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄. 𑀤𑀫𑀲𑀤𑁆𑀤𑁄 𑀳𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑁆𑀲 𑀉𑀧𑁄𑀲𑀣𑀲𑀻𑀮𑀲𑁆𑀲 𑀘 𑀯𑀸𑀘𑀓𑁄 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀓𑁂𑀘𑀺 𑀧𑀦 ‘‘𑀉𑀧𑁄𑀲𑀣𑀓𑀫𑁆𑀫𑁂𑀦𑀸’’𑀢𑀺 𑀇𑀤𑀁 𑀇𑀦𑁆𑀤𑁆𑀭𑀺𑀬𑀤𑀫𑀦𑀲𑁆𑀲 𑀯𑀺𑀲𑁂𑀲𑀦𑀁, 𑀢𑀲𑁆𑀫𑀸 ‘‘𑀉𑀧𑁄𑀲𑀣𑀓𑀫𑁆𑀫𑀪𑀽𑀢𑁂𑀦 𑀇𑀦𑁆𑀤𑁆𑀭𑀺𑀬𑀤𑀫𑁂𑀦𑀸’’𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀲𑀻𑀮𑀲𑀁𑀬𑀫𑁂𑀦𑀸𑀢𑀺 𑀲𑀻𑀮𑀲𑀁𑀯𑀭𑁂𑀦. 𑀲𑀘𑁆𑀘𑀯𑀘𑀦𑁂𑀦𑀸𑀢𑀺 𑀲𑀘𑁆𑀘𑀯𑀸𑀘𑀸𑀬. 𑀢𑀲𑁆𑀲𑀸 𑀯𑀺𑀲𑀼𑀁 𑀯𑀘𑀦𑀁 𑀮𑁄𑀓𑁂 𑀕𑀭𑀼𑀢𑀭𑀧𑀼𑀜𑁆𑀜𑀲𑀫𑁆𑀫𑀢𑀪𑀸𑀯𑀢𑁄. 𑀬𑀣𑀸 𑀳𑀺 𑀧𑀸𑀧𑀥𑀫𑁆𑀫𑁂𑀲𑀼 𑀫𑀼𑀲𑀸𑀯𑀸𑀤𑁄 𑀕𑀭𑀼, 𑀏𑀯𑀁 𑀧𑀼𑀜𑁆𑀜𑀥𑀫𑁆𑀫𑁂𑀲𑀼 𑀲𑀘𑁆𑀘𑀯𑀸𑀘𑀸. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀏𑀓𑀁 𑀥𑀫𑁆𑀫𑀁 𑀅𑀢𑀻𑀢𑀲𑁆𑀲𑀸’’𑀢𑀺𑀆𑀤𑀺 (𑀇𑀢𑀺𑀯𑀼. 𑁨𑁫). 𑀧𑀯𑀢𑁆𑀢𑀻𑀢𑀺 𑀬𑁄 𑀓𑀭𑁄𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀲𑀦𑁆𑀢𑀸𑀦𑁂 𑀨𑀮𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀸𑀯𑁂𑀦 𑀧𑀯𑀢𑁆𑀢𑀺. 𑀲𑀩𑁆𑀩𑀣𑀸𑀢𑀺 ‘‘𑀓𑀭𑁄𑀢𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀦 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀓𑀺𑀭𑀺𑀬𑀫𑁂𑀯 𑀧𑀝𑀺𑀓𑁆𑀔𑀺𑀧𑀦𑁆𑀢𑀺.

𑀓𑀭𑁄𑀢𑁄𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀳𑁂𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁨. 𑀉𑀪𑀬𑁂𑀦𑀸𑀢𑀺 ¶ 𑀳𑁂𑀢𑀼𑀧𑀘𑁆𑀘𑀬𑀧𑀝𑀺𑀲𑁂𑀥𑀯𑀘𑀦𑁂𑀦. 𑀲𑀁𑀓𑀺𑀮𑁂𑀲𑀧𑀘𑁆𑀘𑀬𑀦𑁆𑀢𑀺 𑀲𑀁𑀓𑀺𑀮𑀺𑀲𑀦𑀲𑁆𑀲 𑀫𑀮𑀻𑀦𑀪𑀸𑀯𑀲𑁆𑀲 𑀓𑀸𑀭𑀡𑀁. 𑀯𑀺𑀲𑀼𑀤𑁆𑀥𑀺𑀧𑀘𑁆𑀘𑀬𑀦𑁆𑀢𑀺 𑀲𑀁𑀓𑀺𑀮𑁂𑀲𑀢𑁄 𑀯𑀺𑀲𑀼𑀤𑁆𑀥𑀺𑀬𑀸 𑀯𑁄𑀤𑀸𑀦𑀲𑁆𑀲 𑀓𑀸𑀭𑀡𑀁. 𑀦𑀢𑁆𑀣𑀺 𑀩𑀮𑀦𑁆𑀢𑀺 𑀲𑀢𑁆𑀢𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀆𑀯𑀳𑀁 𑀩𑀮𑀁 𑀦𑀸𑀫 𑀓𑀺𑀜𑁆𑀘𑀺 𑀦𑀢𑁆𑀣𑀺. 𑀢𑁂𑀦𑀸𑀳 ‘‘𑀬𑀫𑁆𑀳𑀻’’𑀢𑀺𑀆𑀤𑀺. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁, 𑀲𑀁𑀓𑀺𑀮𑁂𑀲𑀺𑀓𑀫𑁆𑀧𑀺 𑀘𑀸𑀬𑀁 𑀧𑀝𑀺𑀓𑁆𑀔𑀺𑀧𑀢𑁂𑀯. 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀻𑀢𑀺 𑀢𑀲𑁆𑀲𑀸 𑀢𑀲𑁆𑀲𑀸 𑀓𑀺𑀭𑀺𑀬𑀸𑀬 𑀉𑀲𑁆𑀲𑀦𑁆𑀦𑀝𑁆𑀞𑁂𑀦 𑀩𑀮𑀁, 𑀲𑀽𑀭𑀯𑀻𑀭𑀪𑀸𑀯𑀸𑀯𑀳𑀝𑁆𑀞𑁂𑀦 𑀯𑀻𑀭𑀺𑀬𑀁, 𑀢𑀫𑁂𑀯 𑀤𑀴𑁆𑀳𑀕𑁆𑀕𑀸𑀳𑀪𑀸𑀯𑀢𑁄 𑀧𑁄𑀭𑀺𑀲𑀁 𑀥𑀼𑀭𑀁 𑀯𑀳𑀦𑁆𑀢𑁂𑀦 𑀧𑀯𑀢𑁆𑀢𑁂𑀢𑀩𑁆𑀩𑀢𑁄 𑀧𑀼𑀭𑀺𑀲𑀣𑀸𑀫𑁄, 𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀦𑀧𑁆𑀧𑀯𑀢𑁆𑀢𑀺𑀬𑀸 𑀧𑀼𑀭𑀺𑀲𑀧𑀭𑀓𑁆𑀓𑀫𑁄𑀢𑀺 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀢𑁆𑀯𑀬𑁄𑀕𑀢𑁄, 𑀭𑀽𑀧𑀸𑀤𑀻𑀲𑀼 𑀯𑀸 𑀲𑀢𑁆𑀢𑀢𑀸𑀬 𑀲𑀢𑁆𑀢𑀸, 𑀧𑀸𑀡𑀦𑀢𑁄 𑀅𑀲𑁆𑀲𑀸𑀲𑀦𑀧𑀲𑁆𑀲𑀸𑀲𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀧𑀸𑀡𑀸, 𑀢𑁂 𑀧𑀦 𑀲𑁄 𑀏𑀓𑀺𑀦𑁆𑀤𑁆𑀭𑀺𑀬𑀸𑀤𑀺𑀯𑀲𑁂𑀦 𑀯𑀺𑀪𑀚𑀺𑀢𑁆𑀯𑀸 𑀯𑀤𑀢𑀻𑀢𑀺 𑀆𑀳 ‘‘𑀏𑀓𑀺𑀦𑁆𑀤𑁆𑀭𑀺𑀬𑁄’’𑀢𑀺𑀆𑀤𑀺. 𑀅𑀡𑁆𑀟𑀓𑁄𑀲𑀸𑀤𑀻𑀲𑀼 𑀪𑀯𑀦𑀢𑁄 𑀪𑀽𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀳 ‘‘𑀅𑀡𑁆𑀟…𑀧𑁂… 𑀯𑀤𑀦𑁆𑀢𑀻’’𑀢𑀺. 𑀚𑀻𑀯𑀦𑀢𑁄 𑀧𑀸𑀡𑀁 𑀥𑀸𑀭𑁂𑀦𑁆𑀢𑀸 𑀯𑀺𑀬 𑀯𑀟𑁆𑀠𑀦𑀢𑁄 𑀚𑀻𑀯𑀸𑀢𑀺 𑀲𑀸𑀮𑀺𑀬𑀯𑀸𑀤𑀺𑀓𑁂 𑀯𑀤𑀦𑁆𑀢𑀺. 𑀦𑀢𑁆𑀣𑀺 𑀏𑀢𑁂𑀲𑀁 𑀲𑀁𑀓𑀺𑀮𑁂𑀲𑀯𑀺𑀲𑀼𑀤𑁆𑀥𑀻𑀲𑀼 𑀯𑀲𑁄𑀢𑀺 𑀅𑀯𑀲𑀸. 𑀦𑀢𑁆𑀣𑀺 𑀢𑁂𑀲𑀁 𑀩𑀮𑀁 𑀯𑀻𑀭𑀺𑀬𑀦𑁆𑀢𑀺 𑀅𑀩𑀮𑀸 𑀅𑀯𑀻𑀭𑀺𑀬𑀸. 𑀦𑀺𑀬𑀢𑀢𑀸𑀢𑀺 𑀅𑀘𑁆𑀙𑁂𑀚𑁆𑀚𑀲𑀼𑀢𑁆𑀢𑀸𑀯𑀼𑀢𑀸𑀪𑁂𑀚𑁆𑀚𑀫𑀡𑀺𑀦𑁄 𑀯𑀺𑀬 𑀦𑀺𑀬𑀢𑀧𑁆𑀧𑀯𑀢𑁆𑀢𑀺𑀢𑀸𑀬 𑀕𑀢𑀺𑀚𑀸𑀢𑀺𑀩𑀦𑁆𑀥𑀸𑀧𑀯𑀕𑁆𑀕𑀯𑀲𑁂𑀦 𑀦𑀺𑀬𑀫𑁄. 𑀢𑀢𑁆𑀣 𑀢𑀢𑁆𑀣 𑀕𑀫𑀦𑀦𑁆𑀢𑀺 𑀙𑀦𑁆𑀦𑀁 𑀅𑀪𑀺𑀚𑀸𑀢𑀻𑀦𑀁 𑀯𑀲𑁂𑀦 𑀢𑀸𑀲𑀼 𑀢𑀸𑀲𑀼 𑀕𑀢𑀻𑀲𑀼 𑀉𑀧𑀕𑀫𑀦𑀁. 𑀲𑀫𑀯𑀸𑀬𑁂𑀦 𑀲𑀫𑀸𑀕𑀫𑁄 𑀲𑀗𑁆𑀕𑀢𑀺. 𑀲𑀪𑀸𑀯𑁄𑀬𑁂𑀯𑀸𑀢𑀺 𑀬𑀣𑀸 𑀓𑀡𑁆𑀝𑀓𑀲𑁆𑀲 𑀢𑀺𑀓𑁆𑀔𑀢𑀸, 𑀓𑀧𑀺𑀢𑁆𑀣𑀨𑀮𑀸𑀦𑀁 𑀧𑀭𑀺𑀫𑀡𑁆𑀟𑀮𑀢𑀸 ¶ , 𑀫𑀺𑀕𑀧𑀓𑁆𑀔𑀻𑀦𑀁 𑀯𑀺𑀘𑀺𑀢𑁆𑀢𑀸𑀓𑀸𑀭𑀢𑀸, 𑀏𑀯𑀁 𑀲𑀩𑁆𑀩𑀲𑁆𑀲𑀧𑀺 𑀮𑁄𑀓𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀳𑀺 𑀯𑀺𑀦𑀸 𑀢𑀣𑀸 𑀢𑀣𑀸 𑀧𑀭𑀺𑀡𑀸𑀫𑁄, 𑀅𑀬𑀁 𑀲𑀪𑀸𑀯𑁄 𑀏𑀯 𑀅𑀓𑀺𑀢𑁆𑀢𑀺𑀫𑁄 𑀏𑀯. 𑀢𑁂𑀦𑀸𑀳 ‘‘𑀬𑁂𑀦 𑀳𑀻’’𑀢𑀺𑀆𑀤𑀺. 𑀙𑀴𑀪𑀺𑀚𑀸𑀢𑀺𑀬𑁄 𑀧𑀭𑀢𑁄 𑀯𑀺𑀢𑁆𑀣𑀸𑀭𑀻𑀬𑀦𑁆𑀢𑀺. 𑀲𑀼𑀔𑀜𑁆𑀘 𑀤𑀼𑀓𑁆𑀔𑀜𑁆𑀘 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀻𑀢𑀺 𑀯𑀤𑀦𑁆𑀢𑀸 𑀅𑀤𑀼𑀓𑁆𑀔𑀫𑀲𑀼𑀔𑀪𑀽𑀪𑀺𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀦 𑀚𑀸𑀦𑀦𑁆𑀢𑀻𑀢𑀺 𑀉𑀮𑁆𑀮𑀺𑀗𑁆𑀕𑁂𑀦𑁆𑀢𑁄 ‘‘𑀅𑀜𑁆𑀜𑀸 𑀲𑀼𑀔𑀤𑀼𑀓𑁆𑀔𑀪𑀽𑀫𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑀻’’𑀢𑀺 𑀆𑀳.

𑀳𑁂𑀢𑀼𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮-𑁧𑁦. 𑀫𑀳𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁧𑁩-𑁨𑁧𑁫. 𑀅𑀓𑀢𑀸𑀢𑀺 ¶ 𑀲𑀫𑁂𑀦 𑀯𑀸 𑀯𑀺𑀲𑀫𑁂𑀦 𑀯𑀸 𑀓𑁂𑀦𑀘𑀺 𑀳𑁂𑀢𑀼𑀦𑀸 𑀦 𑀓𑀢𑀸 𑀏𑀯. 𑀓𑁂𑀦𑀘𑀺 𑀓𑀢𑀁 𑀓𑀭𑀡𑀁 𑀯𑀺𑀥𑀸𑀦𑀁 𑀦𑀢𑁆𑀣𑀺 𑀏𑀢𑁂𑀲𑀦𑁆𑀢𑀺 𑀅𑀓𑀢𑀯𑀺𑀥𑀸𑀦𑀸. 𑀧𑀤𑀤𑁆𑀯𑀬𑁂𑀦𑀧𑀺 𑀮𑁄𑀓𑁂 𑀓𑁂𑀦𑀘𑀺 𑀳𑁂𑀢𑀼𑀧𑀘𑁆𑀘𑀬𑁂𑀦 𑀦𑁂𑀲𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀢𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀇𑀤𑁆𑀥𑀺𑀬𑀸𑀧𑀺 𑀦 𑀦𑀺𑀫𑁆𑀫𑀺𑀢𑀸𑀢𑀺 𑀓𑀲𑁆𑀲𑀘𑀺 𑀇𑀤𑁆𑀥𑀺𑀫𑀢𑁄 𑀤𑁂𑀯𑀲𑁆𑀲 𑀩𑁆𑀭𑀳𑁆𑀫𑀼𑀦𑁄 𑀯𑀸 𑀇𑀤𑁆𑀥𑀺𑀬𑀸𑀧𑀺 𑀦 𑀦𑀺𑀫𑁆𑀫𑀺𑀢𑀸. 𑀅𑀦𑀺𑀫𑁆𑀫𑀺𑀢𑀸𑀢𑀺 𑀯𑀸 𑀓𑀲𑁆𑀲𑀘𑀺 𑀅𑀦𑀺𑀫𑁆𑀫𑀸𑀧𑀓𑀸. 𑀅𑀚𑀦𑀓𑀸𑀢𑀺 𑀏𑀢𑁂𑀦 𑀧𑀣𑀯𑀻𑀓𑀸𑀬𑀸𑀤𑀻𑀦𑀁 𑀭𑀽𑀧𑀸𑀤𑀺𑀚𑀦𑀓𑀪𑀸𑀯𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀭𑀽𑀧𑀲𑀤𑁆𑀤𑀸𑀤𑀬𑁄 𑀳𑀺 𑀧𑀣𑀯𑀻𑀓𑀸𑀬𑀸𑀤𑀻𑀳𑀺 𑀅𑀧𑁆𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀓𑀸𑀢𑀺 𑀢𑀲𑁆𑀲 𑀮𑀤𑁆𑀥𑀺. 𑀬𑀣𑀸 𑀧𑀩𑁆𑀩𑀢𑀓𑀽𑀝𑀁 𑀓𑁂𑀦𑀘𑀺 𑀅𑀦𑀺𑀩𑁆𑀩𑀢𑁆𑀢𑀺𑀢𑀁 𑀓𑀲𑁆𑀲𑀘𑀺 𑀘 𑀅𑀦𑀺𑀩𑁆𑀩𑀢𑁆𑀢𑀓𑀁, 𑀏𑀯𑀫𑁂𑀢𑁂𑀧𑀻𑀢𑀺 𑀆𑀳 ‘‘𑀓𑀽𑀝𑀝𑁆𑀞𑀸’’𑀢𑀺. 𑀬𑀫𑀺𑀤𑀁 ‘‘𑀩𑀻𑀚𑀸𑀤𑀺𑀢𑁄 𑀅𑀗𑁆𑀓𑀼𑀭𑀸𑀤𑀺 𑀚𑀸𑀬𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀜𑁆𑀘 𑀯𑀺𑀚𑁆𑀚𑀫𑀸𑀦𑀫𑁂𑀯 𑀢𑀢𑁄 𑀦𑀺𑀓𑁆𑀔𑀫𑀢𑀺, 𑀦𑀸𑀯𑀺𑀚𑁆𑀚𑀫𑀸𑀦𑀁, 𑀅𑀜𑁆𑀜𑀣𑀸 𑀬𑀢𑁄 𑀓𑀼𑀢𑁄𑀘𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀉𑀧𑁆𑀧𑀢𑁆𑀢𑀺 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀞𑀺𑀢𑀸𑀢𑀺 𑀦𑀺𑀩𑁆𑀩𑀺𑀓𑀸𑀭𑀪𑀸𑀯𑁂𑀦 𑀞𑀺𑀢𑀸. 𑀦 𑀘𑀮𑀦𑁆𑀢𑀻𑀢𑀺 𑀦 𑀯𑀺𑀓𑀸𑀭𑀁 𑀆𑀧𑀚𑁆𑀚𑀦𑁆𑀢𑀺. 𑀯𑀺𑀓𑀸𑀭𑀸𑀪𑀸𑀯𑁂𑀦 𑀳𑀺 𑀢𑁂𑀲𑀁 𑀲𑀢𑁆𑀢𑀦𑁆𑀦𑀁 𑀓𑀸𑀬𑀸𑀦𑀁 𑀏𑀲𑀺𑀓𑀝𑁆𑀞𑀸𑀬𑀺𑀝𑁆𑀞𑀺𑀢𑀢𑀸. 𑀅𑀦𑀺𑀜𑁆𑀚𑀦𑀜𑁆𑀘 𑀅𑀢𑁆𑀢𑀦𑁄 𑀧𑀓𑀢𑀺𑀬𑀸 𑀅𑀯𑀝𑁆𑀞𑀸𑀦𑀫𑁂𑀯. 𑀢𑁂𑀦𑀸𑀳 ‘‘𑀦 𑀯𑀺𑀧𑀭𑀺𑀡𑀫𑀦𑁆𑀢𑀻’’𑀢𑀺. 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑁆𑀢𑀸 𑀏𑀯 𑀘 𑀦𑁂 𑀅𑀜𑁆𑀜𑀫𑀜𑁆𑀜𑀁 𑀦 𑀩𑁆𑀬𑀸𑀩𑀸𑀥𑁂𑀦𑁆𑀢𑀺. 𑀲𑀢𑀺 𑀳𑀺 𑀯𑀺𑀓𑀸𑀭𑀁 𑀆𑀧𑀸𑀤𑁂𑀢𑀩𑁆𑀩𑀢𑀸𑀬 𑀩𑁆𑀬𑀸𑀩𑀸𑀥𑀓𑀢𑀸𑀧𑀺 𑀲𑀺𑀬𑀸, 𑀢𑀣𑀸 𑀅𑀦𑀼𑀕𑁆𑀕𑀳𑁂𑀢𑀩𑁆𑀩𑀢𑀸𑀬 𑀅𑀦𑀼𑀕𑁆𑀕𑀸𑀳𑀓𑀢𑀸𑀢𑀺 𑀢𑀤𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀧𑀸𑀴𑀺𑀬𑀁 ‘‘𑀦𑀸𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀣𑀯𑀻 𑀏𑀯 𑀓𑀸𑀬𑁂𑀓𑀤𑁂𑀲𑀢𑁆𑀢𑀸 𑀧𑀣𑀯𑀺𑀓𑀸𑀬𑁄. 𑀚𑀻𑀯𑀲𑀢𑁆𑀢𑀫𑀸𑀦𑀁 𑀓𑀸𑀬𑀸𑀦𑀁 𑀦𑀺𑀘𑁆𑀘𑀢𑀸𑀬 𑀦𑀺𑀩𑁆𑀩𑀺𑀓𑀸𑀭𑀸𑀪𑀸𑀯𑀢𑁄 𑀦 𑀳𑀦𑁆𑀢𑀩𑁆𑀩𑀢𑀸, 𑀦 𑀖𑀸𑀝𑁂𑀢𑀩𑁆𑀩𑀢𑀸 𑀘𑀸𑀢𑀺 𑀦𑁂𑀯 𑀓𑁄𑀘𑀺 𑀳𑀦𑁆𑀢𑀸 𑀖𑀸𑀢𑁂𑀢𑀸 𑀯𑀸. 𑀢𑁂𑀦𑀸𑀳 ‘‘𑀲𑀢𑁆𑀢𑀦𑁆𑀦𑀦𑁆𑀢𑁆𑀯𑁂𑀯𑀸’’𑀢𑀺𑀆𑀤𑀺. 𑀬𑀤𑀺 𑀓𑁄𑀘𑀺 𑀳𑀦𑁆𑀢𑀸 𑀦𑀢𑁆𑀣𑀺, 𑀓𑀣𑀁 𑀲𑀢𑁆𑀣𑀧𑁆𑀧𑀳𑀸𑀭𑁄𑀢𑀺 𑀆𑀳 ‘‘𑀬𑀣𑀸 𑀫𑀼𑀕𑁆𑀕𑀭𑀸𑀲𑀺𑀆𑀤𑀻𑀲𑀽’’𑀢𑀺𑀆𑀤𑀺. 𑀓𑁂𑀯𑀮𑀁 𑀲𑀜𑁆𑀜𑀸𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀦 𑀖𑀸𑀢𑀦𑀸𑀤𑀺, 𑀧𑀭𑀫𑀢𑁆𑀣𑀢𑁄 𑀲𑀢𑁆𑀢𑀦𑁆𑀦𑀦𑁆𑀢𑁆𑀯𑁂𑀯 𑀓𑀸𑀬𑀸𑀦𑀁 𑀅𑀯𑀺𑀓𑁄𑀧𑀦𑀻𑀬𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀫𑀼𑀔𑀬𑁄𑀦𑀻𑀦𑀦𑁆𑀢𑀺 𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀸𑀤𑀻𑀲𑀼 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸𑀤𑀺𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀯𑀲𑁂𑀦 𑀧𑀥𑀸𑀦𑀬𑁄𑀦𑀻𑀦𑀁. 𑀲𑀝𑁆𑀞𑀺𑀲𑀢𑀸𑀦𑀺 𑀙𑀲𑀳𑀲𑁆𑀲𑀸𑀦𑀺. ‘‘𑀧𑀜𑁆𑀘 𑀘 𑀓𑀫𑁆𑀫𑀼𑀦𑁄 𑀲𑀢𑀸𑀦𑀻’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀤𑀲𑁆𑀲𑀦𑀁 ‘‘𑀧𑀜𑁆𑀘 𑀓𑀫𑁆𑀫𑀲𑀢𑀸𑀦𑀺 𑀘𑀸’’𑀢𑀺 ¶ . 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 ‘‘𑀓𑁂𑀯𑀮𑀁 𑀢𑀓𑁆𑀓𑀫𑀢𑁆𑀢𑁂𑀦 𑀦𑀺𑀭𑀢𑁆𑀣𑀓𑀤𑀺𑀝𑁆𑀞𑀺𑀁 𑀤𑀻𑀧𑁂𑀢𑀻’’𑀢𑀺 𑀇𑀫𑀫𑁂𑀯 𑀅𑀢𑁆𑀣𑀁 𑀅𑀢𑀺𑀤𑀺𑀲𑀢𑀺. 𑀏𑀢𑁆𑀣 𑀘 𑀢𑀓𑁆𑀓𑀫𑀢𑁆𑀢𑀓𑁂𑀦𑀸𑀢𑀺 𑀇𑀫𑀺𑀦𑀸 𑀬𑀲𑁆𑀫𑀸 𑀢𑀓𑁆𑀓𑀺𑀓𑀸 𑀦𑀺𑀭𑀗𑁆𑀓𑀼𑀲𑀢𑀸𑀬 𑀧𑀭𑀺𑀓𑀧𑁆𑀧𑀦𑀲𑁆𑀲 𑀬𑀁 𑀓𑀺𑀜𑁆𑀘𑀺 𑀅𑀢𑁆𑀢𑀦𑁄 𑀧𑀭𑀺𑀓𑀧𑁆𑀧𑀺𑀢𑀁 𑀲𑀸𑀭𑀢𑁄 ¶ 𑀫𑀜𑁆𑀜𑀫𑀸𑀦𑀸 𑀢𑀣𑁂𑀯 𑀅𑀪𑀺𑀦𑀺𑀯𑀺𑀲𑁆𑀲 𑀢𑀓𑁆𑀓𑀤𑀺𑀝𑁆𑀞𑀺𑀕𑀸𑀳𑀁 𑀕𑀡𑁆𑀳𑀦𑁆𑀢𑀺, 𑀢𑀲𑁆𑀫𑀸 𑀦 𑀢𑁂𑀲𑀁 𑀤𑀺𑀝𑁆𑀞𑀺𑀯𑀢𑁆𑀣𑀽𑀲𑀼 𑀯𑀺𑀜𑁆𑀜𑀽𑀳𑀺 𑀯𑀺𑀘𑀸𑀭𑀡𑀸 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀓𑁂𑀘𑀻𑀢𑀺 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄. 𑀢𑁂 𑀳𑀺 ‘‘𑀧𑀜𑁆𑀘 𑀓𑀫𑁆𑀫𑀸𑀦𑀻𑀢𑀺 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸, 𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 ‘𑀧𑀜𑁆𑀘 𑀓𑀫𑁆𑀫𑀸𑀦𑀻𑀢𑀺 𑀧𑀜𑁆𑀜𑀸𑀧𑁂𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀓𑀫𑁆𑀫𑀦𑁆𑀢𑀺 𑀮𑀤𑁆𑀥𑀻𑀢𑀺 𑀑𑀴𑀸𑀭𑀺𑀓𑀪𑀸𑀯𑀢𑁄 𑀧𑀭𑀺𑀧𑀼𑀡𑁆𑀡𑀓𑀫𑁆𑀫𑀦𑁆𑀢𑀺 𑀮𑀤𑁆𑀥𑀺. 𑀫𑀦𑁄𑀓𑀫𑁆𑀫𑀁 𑀅𑀦𑁄𑀴𑀸𑀭𑀺𑀓𑀢𑁆𑀢𑀸 𑀉𑀧𑀟𑁆𑀠𑀓𑀫𑁆𑀫𑀦𑁆𑀢𑀺 𑀮𑀤𑁆𑀥𑀻𑀢𑀺 𑀬𑁄𑀚𑀦𑀸. ‘‘𑀤𑁆𑀯𑀸𑀲𑀝𑁆𑀞𑀺𑀧𑀝𑀺𑀧𑀤𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑀸 ‘‘𑀤𑁆𑀯𑀝𑁆𑀞𑀺𑀧𑀝𑀺𑀧𑀤𑀸’’𑀢𑀺 𑀯𑀤𑀦𑁆𑀢𑀺. 𑀏𑀓𑀲𑁆𑀫𑀺𑀁 𑀓𑀧𑁆𑀧𑁂𑀢𑀺 𑀏𑀓𑀲𑁆𑀫𑀺𑀁 𑀫𑀳𑀸𑀓𑀧𑁆𑀧𑁂. 𑀢𑀢𑁆𑀣𑀸𑀧𑀺 𑀘 𑀯𑀺𑀯𑀝𑁆𑀝𑀝𑁆𑀞𑀸𑀬𑀺𑀲𑀜𑁆𑀜𑀺𑀢𑁂 𑀏𑀓𑀲𑁆𑀫𑀺𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑁂.

𑀉𑀭𑀩𑁆𑀪𑁂 𑀳𑀦𑀦𑁆𑀢𑀻𑀢𑀺 𑀑𑀭𑀩𑁆𑀪𑀺𑀓𑀸. 𑀏𑀯𑀁 𑀲𑀽𑀓𑀭𑀺𑀓𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸. 𑀮𑀼𑀤𑁆𑀤𑀸𑀢𑀺 𑀅𑀜𑁆𑀜𑁂𑀧𑀺 𑀬𑁂 𑀓𑁂𑀘𑀺 𑀫𑀸𑀕𑀯𑀺𑀓𑀦𑁂𑀲𑀸𑀤𑀸𑀤𑀬𑁄, 𑀢𑁂 𑀧𑀸𑀧𑀓𑀫𑁆𑀫𑀧𑀲𑀼𑀢𑀢𑀸𑀬 𑀓𑀡𑁆𑀳𑀸𑀪𑀺𑀚𑀸𑀢𑀻𑀢𑀺 𑀯𑀤𑀦𑁆𑀢𑀺. 𑀪𑀺𑀓𑁆𑀔𑀽𑀢𑀺 𑀩𑀼𑀤𑁆𑀥𑀲𑀸𑀲𑀦𑁂 𑀪𑀺𑀓𑁆𑀔𑀽. 𑀢𑁂 𑀓𑀺𑀭 ‘‘𑀲𑀘𑁆𑀙𑀦𑁆𑀤𑀭𑀸𑀕𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀘𑀢𑀽𑀲𑀼 𑀧𑀘𑁆𑀘𑀬𑁂𑀲𑀼 𑀓𑀡𑁆𑀝𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀔𑀸𑀤𑀦𑁆𑀢𑀻𑀢𑀺 𑀯𑀤𑀦𑁆𑀢𑀺. 𑀓𑀲𑁆𑀫𑀸𑀢𑀺 𑀘𑁂? 𑀬𑀲𑁆𑀫𑀸 𑀢𑁂 𑀧𑀡𑀻𑀢𑀧𑀡𑀻𑀢𑁂 𑀧𑀘𑁆𑀘𑀬𑁂 𑀧𑀝𑀺𑀲𑁂𑀯𑀦𑁆𑀢𑀻𑀢𑀺 𑀢𑀲𑁆𑀲 𑀫𑀺𑀘𑁆𑀙𑀸𑀕𑀸𑀳𑁄. 𑀜𑀸𑀬𑀮𑀤𑁆𑀥𑁂𑀧𑀺 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀫𑀸𑀦𑀸 𑀆𑀚𑀻𑀯𑀓𑀲𑀫𑀬𑀲𑁆𑀲 𑀯𑀺𑀮𑁄𑀫𑀕𑀸𑀳𑀺𑀢𑀸𑀬 𑀧𑀘𑁆𑀘𑀬𑁂𑀲𑀼 𑀓𑀡𑁆𑀝𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀔𑀸𑀤𑀦𑁆𑀢𑀺 𑀦𑀸𑀫𑀸𑀢𑀺 𑀯𑀤𑀦𑁆𑀢𑀻𑀢𑀺 𑀅𑀧𑀭𑁂. 𑀏𑀓𑁂 𑀧𑀩𑁆𑀩𑀚𑀺𑀢𑀸, 𑀬𑁂 𑀯𑀺𑀲𑁂𑀲𑀢𑁄 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸. 𑀢𑀣𑀸 𑀳𑀺 𑀢𑁂 𑀓𑀡𑁆𑀝𑀓𑁂 𑀯𑀢𑁆𑀢𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀓𑀡𑁆𑀝𑀓𑀯𑀼𑀢𑁆𑀢𑀺𑀓𑀸𑀢𑀺 𑀯𑀼𑀢𑁆𑀢𑀸. 𑀞𑀢𑁆𑀯𑀸 𑀪𑀼𑀜𑁆𑀚𑀦𑀦𑀳𑀸𑀦𑀧𑀝𑀺𑀓𑁆𑀔𑁂𑀧𑀸𑀤𑀺𑀯𑀢𑀲𑀫𑀸𑀬𑁄𑀕𑁂𑀦 𑀧𑀡𑁆𑀟𑀭𑀢𑀭𑀸. 𑀅𑀘𑁂𑀮𑀓𑀲𑀸𑀯𑀓𑀸𑀢𑀺 𑀆𑀚𑀻𑀯𑀓𑀲𑀸𑀯𑀓𑁂 𑀯𑀤𑀢𑀺. 𑀢𑁂 𑀓𑀺𑀭 𑀆𑀚𑀻𑀯𑀓𑀲𑀫𑀬𑁂 𑀆𑀚𑀻𑀯𑀓𑀮𑀤𑁆𑀥𑀺𑀬𑀸 𑀤𑀴𑁆𑀳𑀕𑀸𑀳𑀺𑀢𑀸𑀬 𑀦𑀺𑀕𑀡𑁆𑀞𑁂𑀳𑀺𑀧𑀺 𑀧𑀡𑁆𑀟𑀭𑀢𑀭𑀸. 𑀦𑀦𑁆𑀤𑀸𑀤𑀬𑁄 𑀓𑀺𑀭 𑀢𑀣𑀸𑀭𑀽𑀧𑀁 𑀆𑀚𑀻𑀯𑀓𑀧𑀝𑀺𑀧𑀢𑁆𑀢𑀺𑀁 𑀉𑀓𑁆𑀓𑀁𑀲𑀁 𑀧𑀸𑀧𑁂𑀢𑁆𑀯𑀸 𑀞𑀺𑀢𑀸, 𑀢𑀲𑁆𑀫𑀸 𑀦𑀺𑀕𑀡𑁆𑀞𑁂𑀳𑀺 𑀆𑀚𑀻𑀯𑀓𑀲𑀸𑀯𑀓𑁂𑀳𑀺 𑀘 𑀧𑀡𑁆𑀟𑀭𑀢𑀭𑀸 𑀯𑀼𑀢𑁆𑀢𑀸. 𑀧𑀭𑀫𑀲𑀼𑀓𑁆𑀓𑀸𑀪𑀺𑀚𑀸𑀢𑀻𑀢𑀺 𑀅𑀬𑀁 𑀢𑁂𑀲𑀁 𑀮𑀤𑁆𑀥𑀺.

𑀧𑀼𑀭𑀺𑀲𑀪𑀽𑀫𑀺𑀬𑁄𑀢𑀺 𑀧𑀥𑀸𑀦𑀧𑀼𑀕𑁆𑀕𑀮𑁂𑀦 𑀦𑀺𑀤𑁆𑀤𑁂𑀲𑁄. 𑀇𑀢𑁆𑀣𑀻𑀦𑀫𑁆𑀧𑁂𑀢𑀸 𑀪𑀽𑀫𑀺𑀬𑁄 𑀇𑀘𑁆𑀙𑀦𑁆𑀢𑁂𑀯. 𑀪𑀺𑀓𑁆𑀔𑀼 𑀘 𑀧𑀦𑁆𑀦𑀓𑁄𑀢𑀺𑀆𑀤𑀺 𑀢𑁂𑀲𑀁 𑀧𑀸𑀴𑀺 𑀏𑀯. 𑀢𑀢𑁆𑀣 𑀧𑀦𑁆𑀦𑀓𑁄𑀢𑀺 𑀪𑀺𑀓𑁆𑀔𑀸𑀬 𑀯𑀺𑀘𑀭𑀡𑀓𑁄, 𑀢𑁂𑀲𑀁 𑀯𑀸 𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑀺𑀧𑀦𑁆𑀦𑀓𑁄. 𑀚𑀺𑀦𑁄𑀢𑀺 𑀚𑀺𑀡𑁆𑀡𑁄 𑀚𑀭𑀸𑀯𑀲𑁂𑀦 𑀳𑀻𑀦𑀥𑀸𑀢𑀼𑀓𑁄, 𑀅𑀢𑁆𑀢𑀦𑁄 𑀯𑀸 𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑀺𑀧𑀓𑁆𑀔𑁂 𑀚𑀺𑀦𑀺𑀢𑁆𑀯𑀸 𑀞𑀺𑀢𑁄. 𑀲𑁄 𑀓𑀺𑀭 𑀢𑀣𑀸𑀪𑀽𑀢𑁄 𑀥𑀫𑁆𑀫𑀫𑁆𑀧𑀺 𑀓𑀲𑁆𑀲𑀘𑀺 𑀦 𑀓𑀣𑁂𑀢𑀺. 𑀢𑁂𑀦𑀸𑀳 ‘‘𑀦 𑀓𑀺𑀜𑁆𑀘𑀺 𑀆𑀳𑀸’’𑀢𑀺. 𑀦𑀺𑀝𑁆𑀞𑀼𑀳𑀦𑀸𑀤𑀺𑀯𑀺𑀧𑁆𑀧𑀓𑀸𑀭𑁂 𑀓𑁂𑀦𑀘𑀺 𑀓𑀢𑁂𑀧𑀺 𑀔𑀫𑀦𑀯𑀲𑁂𑀦 ¶ 𑀦 𑀓𑀺𑀜𑁆𑀘𑀺 𑀯𑀤𑀢𑀻𑀢𑀺 𑀯𑀤𑀦𑁆𑀢𑀺. 𑀅𑀮𑀸𑀪𑀺𑀦𑁆𑀢𑀺 ‘‘𑀲𑁄 𑀦 𑀓𑀼𑀫𑁆𑀪𑀺𑀫𑀼𑀔𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁩𑁯𑁪) 𑀦𑀬𑁂𑀦 𑀯𑀼𑀢𑁆𑀢𑀅𑀮𑀸𑀪𑀳𑁂𑀢𑀼𑀲𑀫𑀸𑀬𑁄𑀕𑁂𑀦 𑀅𑀮𑀸𑀪𑀺𑀁. 𑀢𑀢𑁄 𑀏𑀯 𑀚𑀺𑀖𑀘𑁆𑀙𑀸𑀤𑀼𑀩𑁆𑀩𑀮𑁆𑀬𑀧𑀭𑁂𑀢𑀢𑀸𑀬 𑀲𑀬𑀦𑀧𑀭𑀸𑀬𑀡𑀁 𑀲𑀫𑀡𑀁 𑀧𑀦𑁆𑀦𑀪𑀽𑀫𑀻𑀢𑀺 𑀯𑀤𑀦𑁆𑀢𑀺.

𑀆𑀚𑀻𑀯𑀯𑀼𑀢𑁆𑀢𑀺𑀲𑀢𑀸𑀦𑀻𑀢𑀺 ¶ 𑀲𑀢𑁆𑀢𑀸𑀦𑀁 𑀆𑀚𑀻𑀯𑀪𑀽𑀢𑀸𑀦𑀺 𑀚𑀻𑀯𑀺𑀓𑀸𑀯𑀼𑀢𑁆𑀢𑀺𑀲𑀢𑀸𑀦𑀺. 𑀧𑀲𑀼𑀕𑁆𑀕𑀳𑀡𑁂𑀦 𑀏𑀴𑀓𑀚𑀸𑀢𑀺 𑀕𑀳𑀺𑀢𑀸, 𑀫𑀺𑀕𑀕𑁆𑀕𑀳𑀡𑁂𑀦 𑀭𑀼𑀭𑀼𑀕𑀯𑀬𑀸𑀤𑀺𑀲𑀩𑁆𑀩𑀫𑀺𑀕𑀚𑀸𑀢𑀺. 𑀩𑀳𑀽 𑀤𑁂𑀯𑀸𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀺𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀤𑀺𑀯𑀲𑁂𑀦 𑀢𑁂𑀲𑀁 𑀅𑀦𑁆𑀢𑀭𑀪𑁂𑀤𑀯𑀲𑁂𑀦 𑀩𑀳𑀽 𑀤𑁂𑀯𑀸. 𑀢𑀢𑁆𑀣 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀏𑀓𑀘𑁆𑀘𑁂 𑀅𑀦𑁆𑀢𑀭𑀪𑁂𑀤𑀸 𑀫𑀳𑀸𑀲𑀫𑀬𑀲𑀼𑀢𑁆𑀢𑀯𑀲𑁂𑀦 (𑀤𑀻. 𑀦𑀺. 𑁨.𑁩𑁩𑁧 𑀆𑀤𑀬𑁄) 𑀤𑀻𑀧𑁂𑀢𑀩𑁆𑀩𑀸. 𑀫𑀦𑀼𑀲𑁆𑀲𑀸𑀧𑀺 𑀅𑀦𑀦𑁆𑀢𑀸𑀢𑀺 𑀤𑀻𑀧𑀤𑁂𑀲𑀓𑀼𑀮𑀯𑀁𑀲𑀸𑀚𑀻𑀯𑀸𑀤𑀺𑀯𑀺𑀪𑀸𑀕𑁂𑀦 𑀫𑀦𑀼𑀲𑁆𑀲𑀸𑀧𑀺 𑀅𑀦𑀦𑁆𑀢𑀪𑁂𑀤𑀸. 𑀧𑀺𑀲𑀸𑀘𑀸 𑀏𑀯 𑀧𑁂𑀲𑀸𑀘𑀸, 𑀢𑁂 𑀫𑀳𑀦𑁆𑀢𑀫𑀳𑀦𑁆𑀢𑀸 𑀅𑀚𑀕𑀭𑀧𑁂𑀢𑀸𑀤𑀬𑁄. 𑀙𑀤𑁆𑀤𑀦𑁆𑀢𑀤𑀳𑀫𑀦𑁆𑀤𑀸𑀓𑀺𑀦𑀺𑀬𑁄 𑀓𑀼𑀴𑀻𑀭𑀫𑀼𑀘𑀮𑀺𑀦𑁆𑀤𑀦𑀸𑀫𑁂𑀦 𑀯𑀤𑀦𑁆𑀢𑀺.

𑀧𑀯𑀼𑀝𑀸𑀢𑀺 𑀲𑀩𑁆𑀩𑀕𑀡𑁆𑀞𑀺𑀓𑀸. 𑀧𑀡𑁆𑀟𑀺𑀢𑁄𑀧𑀺…𑀧𑁂… 𑀉𑀤𑁆𑀥𑀁 𑀦 𑀕𑀘𑁆𑀙𑀢𑀺. 𑀓𑀲𑁆𑀫𑀸? 𑀲𑀢𑁆𑀢𑀸𑀦𑀁 𑀲𑀁𑀲𑀭𑀡𑀓𑀸𑀮𑀲𑁆𑀲 𑀦𑀺𑀬𑀢𑀪𑀸𑀯𑀢𑁄.

𑀅𑀧𑀭𑀺𑀧𑀓𑁆𑀓𑀁 𑀲𑀁𑀲𑀭𑀡𑀦𑀺𑀫𑀺𑀢𑁆𑀢𑀁 𑀲𑀻𑀮𑀸𑀤𑀺𑀦𑀸 𑀧𑀭𑀺𑀧𑀸𑀘𑁂𑀢𑀺 𑀦𑀸𑀫 𑀲𑀻𑀖𑀁𑀬𑁂𑀯 𑀯𑀺𑀲𑀼𑀤𑁆𑀥𑀺𑀧𑁆𑀧𑀢𑁆𑀢𑀺𑀬𑀸. 𑀧𑀭𑀺𑀧𑀓𑁆𑀓𑀁 𑀓𑀫𑁆𑀫𑀁 𑀨𑀼𑀲𑁆𑀲 𑀨𑀼𑀲𑁆𑀲 𑀧𑀢𑁆𑀯𑀸 𑀧𑀢𑁆𑀯𑀸 𑀓𑀸𑀮𑁂 𑀧𑀭𑀺𑀧𑀓𑁆𑀓𑀪𑀸𑀯𑀸𑀧𑀸𑀤𑀦𑁂𑀦 𑀩𑁆𑀬𑀦𑁆𑀢𑀻 𑀓𑀭𑁄𑀢𑀺 𑀦𑀸𑀫. 𑀲𑀼𑀢𑁆𑀢𑀕𑀼𑀴𑁂𑀢𑀺 𑀲𑀼𑀢𑁆𑀢𑀯𑀝𑁆𑀝𑀺𑀬𑀁. 𑀦𑀺𑀩𑁆𑀩𑁂𑀞𑀺𑀬𑀫𑀸𑀦𑀫𑁂𑀯 𑀧𑀮𑁂𑀢𑀻𑀢𑀺 𑀉𑀧𑀫𑀸𑀬 𑀲𑀢𑁆𑀢𑀸𑀦𑀁 𑀲𑀁𑀲𑀸𑀭𑁄 𑀅𑀦𑀼𑀓𑁆𑀓𑀫𑁂𑀦 𑀔𑀻𑀬𑀢𑁂𑀯, 𑀦 𑀢𑀲𑁆𑀲 𑀯𑀟𑁆𑀠𑀻𑀢𑀺 𑀤𑀲𑁆𑀲𑁂𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀭𑀽𑀧𑀢𑁆𑀢𑀸. 𑀦𑀺𑀩𑁆𑀩𑁂𑀞𑀺𑀬𑀫𑀸𑀦𑀫𑁂𑀯 𑀲𑀼𑀢𑁆𑀢𑀕𑀼𑀴𑀁 𑀕𑀘𑁆𑀙𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀢𑀜𑁆𑀘 𑀔𑁄 𑀲𑀼𑀢𑁆𑀢𑀧𑀫𑀸𑀡𑁂𑀦, 𑀲𑀼𑀢𑁆𑀢𑁂 𑀧𑀦 𑀅𑀲𑀢𑀺 𑀓𑀼𑀢𑁄 𑀕𑀘𑁆𑀙𑀢𑀺 𑀲𑀼𑀢𑁆𑀢𑀕𑀼𑀴𑀁. 𑀢𑁂𑀦𑀸𑀳 𑁋 ‘‘𑀲𑀼𑀢𑁆𑀢𑁂 𑀔𑀻𑀡𑁂 𑀦 𑀕𑀘𑁆𑀙𑀢𑀻’’𑀢𑀺. 𑀢𑀢𑁆𑀣𑁂𑀯 𑀢𑀺𑀝𑁆𑀞𑀢𑀺 𑀲𑀼𑀢𑁆𑀢𑀧𑀭𑀺𑀬𑀦𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀸𑀮𑀯𑀲𑁂𑀦𑀸𑀢𑀺 𑀅𑀢𑁆𑀢𑀦𑀺 𑀯𑁂𑀞𑁂𑀢𑁆𑀯𑀸 𑀞𑀺𑀢𑀁 𑀲𑀼𑀔𑀤𑀼𑀓𑁆𑀔𑀁 𑀬𑀣𑀸𑀯𑀼𑀢𑁆𑀢𑀲𑁆𑀲 𑀓𑀸𑀮𑀲𑁆𑀲 𑀯𑀲𑁂𑀦 𑀦𑀺𑀩𑁆𑀩𑁂𑀞𑀺𑀬𑀫𑀸𑀦𑁄 𑀩𑀸𑀮𑁄 𑀘 𑀧𑀡𑁆𑀟𑀺𑀢𑁄 𑀘 𑀧𑀮𑁂𑀢𑀺 𑀕𑀘𑁆𑀙𑀢𑀺, 𑀦𑀸𑀢𑀺𑀓𑁆𑀓𑀫𑀢𑀺 𑀲𑀁𑀲𑀸𑀭𑀁.

𑀫𑀳𑀸𑀤𑀺𑀝𑁆𑀞𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧-𑁧𑁮. 𑀅𑀦𑁆𑀢𑀯𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁧𑁬-𑁨𑁨𑁩. 𑀏𑀓𑀢𑁄 ¶ 𑀯𑀟𑁆𑀠𑀺𑀢𑀦𑀺𑀫𑀺𑀢𑁆𑀢𑀦𑁆𑀢𑀺 𑀏𑀓𑀧𑀲𑁆𑀲𑁂𑀦 𑀯𑀟𑁆𑀠𑀺𑀢𑀁 𑀓𑀲𑀺𑀡𑀦𑀺𑀫𑀺𑀢𑁆𑀢𑀁. 𑀕𑀸𑀳𑁂𑀦𑀸𑀢𑀺 𑀮𑀸𑀪𑀻 𑀛𑀸𑀦𑀘𑀓𑁆𑀔𑀼𑀦𑀸 𑀧𑀲𑁆𑀲𑀺𑀢𑁆𑀯𑀸 𑀕𑀳𑀡𑁂𑀦. 𑀢𑀓𑁆𑀓𑁂𑀦𑀸𑀢𑀺 𑀦 𑀮𑀸𑀪𑀻 𑀢𑀓𑁆𑀓𑀫𑀢𑁆𑀢𑁂𑀦. 𑀉𑀧𑁆𑀧𑀦𑁆𑀦𑀤𑀺𑀝𑁆𑀞𑀻𑀢𑀺 ‘‘𑀮𑁄𑀓𑁄’’𑀢𑀺 𑀉𑀧𑁆𑀧𑀦𑁆𑀦𑀤𑀺𑀝𑁆𑀞𑀺. 𑀲𑀩𑁆𑀩𑀢𑁄 𑀯𑀟𑁆𑀠𑀺𑀢𑀦𑁆𑀢𑀺 𑀲𑀫𑀦𑁆𑀢𑀢𑁄 𑀅𑀧𑁆𑀧𑀫𑀸𑀡𑀓𑀲𑀺𑀡𑀦𑀺𑀫𑀺𑀢𑁆𑀢𑀁. 𑀏𑀓𑀫𑁂𑀯𑀸𑀢𑀺 ‘‘𑀏𑀓𑀫𑁂𑀯 𑀯𑀢𑁆𑀣𑀽’’𑀢𑀺 𑀉𑀧𑁆𑀧𑀦𑁆𑀦𑀤𑀺𑀝𑁆𑀞𑀺. 𑀅𑀝𑁆𑀞𑀸𑀭𑀲 𑀯𑁂𑀬𑁆𑀬𑀸𑀓𑀭𑀡𑀸𑀦𑀻𑀢𑀺 𑀯𑁂𑀬𑁆𑀬𑀸𑀓𑀭𑀡𑀮𑀓𑁆𑀔𑀡𑀧𑁆𑀧𑀢𑁆𑀢𑀸𑀦𑀺 𑀅𑀝𑁆𑀞𑀸𑀭𑀲 𑀲𑀼𑀢𑁆𑀢𑀸𑀦𑀺. 𑀏𑀓𑀁 𑀕𑀫𑀦𑀦𑁆𑀢𑀺 𑀏𑀓𑀁 𑀯𑁂𑀬𑁆𑀬𑀸𑀓𑀭𑀡𑀕𑀫𑀦𑀁.

𑀅𑀦𑁆𑀢𑀯𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀕𑀫𑀦𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸

𑁨𑁨𑁪-𑁩𑁦𑁧. 𑀤𑀼𑀓𑁆𑀔𑀯𑀲𑁂𑀦 ¶ 𑀯𑀼𑀢𑁆𑀢𑀦𑁆𑀢𑀺 ‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑁂 𑀲𑀢𑀺 𑀤𑀼𑀓𑁆𑀔𑀁 𑀉𑀧𑀸𑀤𑀸𑀬𑀸’’𑀢𑀺𑀆𑀤𑀺𑀤𑀼𑀓𑁆𑀔𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀸𑀤𑀺𑀲𑀫𑁂𑀯 𑀤𑀼𑀢𑀺𑀬𑀁 𑀯𑁂𑀬𑁆𑀬𑀸𑀓𑀭𑀡𑀕𑀫𑀦𑀁. 𑀢𑁂𑀦𑀸𑀳 ‘‘𑀢𑀢𑁆𑀭𑀸𑀧𑀺 𑀅𑀝𑁆𑀞𑀸𑀭𑀲𑁂𑀯 𑀯𑁂𑀬𑁆𑀬𑀸𑀓𑀭𑀡𑀸𑀦𑀻’’𑀢𑀺. 𑀢𑁂𑀳𑀻𑀢𑀺 ‘‘𑀭𑀽𑀧𑀻 𑀅𑀢𑁆𑀢𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀬𑀧𑀯𑀢𑁆𑀢𑁂𑀳𑀺 𑀯𑁂𑀬𑁆𑀬𑀸𑀓𑀭𑀡𑁂𑀳𑀺 𑀲𑀤𑁆𑀥𑀺𑀁. 𑀢𑀦𑁆𑀢𑀺 𑀤𑀼𑀢𑀺𑀬𑀁 𑀕𑀫𑀦𑀁.

𑀆𑀭𑀫𑁆𑀫𑀡𑀫𑁂𑀯𑀸𑀢𑀺 𑀓𑀲𑀺𑀡𑀲𑀗𑁆𑀔𑀸𑀢𑀁 𑀆𑀭𑀫𑁆𑀫𑀡𑀫𑁂𑀯. 𑀢𑀓𑁆𑀓𑀺𑀲𑀤𑁆𑀤𑁂𑀦 𑀲𑀼𑀤𑁆𑀥𑀢𑀓𑁆𑀓𑀺𑀓𑀸𑀦𑀁 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁.

𑀅𑀦𑀺𑀘𑁆𑀘𑀤𑀼𑀓𑁆𑀔𑀯𑀲𑁂𑀦𑀸𑀢𑀺 ‘‘𑀬𑀤𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔𑀁, 𑀢𑀲𑁆𑀫𑀺𑀁 𑀲𑀢𑀺 𑀢𑀤𑀼𑀧𑀸𑀤𑀸𑀬 𑀏𑀯𑀁 𑀤𑀺𑀝𑁆𑀞𑀺 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀅𑀦𑀺𑀘𑁆𑀘𑀤𑀼𑀓𑁆𑀔𑀯𑀲𑁂𑀦𑀸𑀢𑀺. 𑀢𑁂𑀳𑀺𑀬𑁂𑀯𑀸𑀢𑀺 𑀤𑀼𑀢𑀺𑀬𑁂 𑀧𑁂𑀬𑁆𑀬𑀸𑀮𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀳𑀺𑀬𑁂𑀯. 𑀢𑀺𑀧𑀭𑀺𑀯𑀝𑁆𑀝𑀯𑀲𑁂𑀦𑀸𑀢𑀺 𑀢𑁂𑀳𑀺𑀬𑁂𑀯 𑀙𑀩𑁆𑀩𑀻𑀲𑀢𑀺𑀬𑀸 𑀲𑀼𑀢𑁆𑀢𑁂𑀳𑀺 𑀘𑀢𑀼𑀢𑁆𑀣𑀧𑁂𑀬𑁆𑀬𑀸𑀮𑁂 𑀢𑀺𑀧𑀭𑀺𑀯𑀝𑁆𑀝𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀬𑁄𑀚𑀦𑀸.

𑀤𑀼𑀢𑀺𑀬𑀕𑀫𑀦𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀤𑀺𑀝𑁆𑀞𑀺𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑁪. 𑀑𑀓𑁆𑀓𑀦𑁆𑀢𑀲𑀁𑀬𑀼𑀢𑁆𑀢𑀁

𑁧-𑁧𑁦. 𑀘𑀓𑁆𑀔𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁦𑁨-𑁩𑁧𑁧. 𑀲𑀤𑁆𑀥𑀸𑀥𑀺𑀫𑁄𑀓𑁆𑀔𑀦𑁆𑀢𑀺 ¶ ¶ 𑀲𑀤𑁆𑀤𑀳𑀦𑀯𑀲𑁂𑀦 𑀧𑀯𑀢𑁆𑀢𑀁 𑀅𑀥𑀺𑀫𑁄𑀓𑁆𑀔𑀁, 𑀦 𑀲𑀦𑁆𑀦𑀺𑀝𑁆𑀞𑀸𑀦𑀫𑀢𑁆𑀢𑀯𑀲𑁂𑀦 𑀧𑀯𑀢𑁆𑀢𑀁 𑀅𑀥𑀺𑀫𑁄𑀓𑁆𑀔𑀁. 𑀤𑀲𑁆𑀲𑀦𑀫𑁆𑀧𑀺 𑀲𑀫𑁆𑀫𑀢𑁆𑀢𑀁, 𑀢𑀁𑀲𑀺𑀚𑁆𑀛𑀸𑀦𑀯𑀲𑁂𑀦 𑀧𑀯𑀢𑁆𑀢𑀦𑀺𑀬𑀸𑀫𑁄 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄, 𑀅𑀭𑀺𑀬𑀫𑀕𑁆𑀕𑁄. 𑀅𑀦𑀦𑁆𑀢𑀭𑀸𑀬𑀢𑀁 𑀤𑀻𑀧𑁂𑀢𑀺 𑀓𑀧𑁆𑀧𑀯𑀺𑀦𑀸𑀲𑀧𑀝𑀺𑀪𑀸𑀕𑁂𑀦 𑀧𑀯𑀢𑁆𑀢𑀢𑁆𑀢𑀸. 𑀢𑀣𑀸 𑀘𑀸𑀳 ‘‘𑀢𑁂𑀦𑁂𑀯𑀸𑀳𑀸’’𑀢𑀺𑀆𑀤𑀺. 𑀓𑀧𑁆𑀧𑀲𑀻𑀲𑁂𑀦 𑀪𑀸𑀚𑀦𑀮𑁄𑀓𑀁 𑀯𑀤𑀢𑀺. 𑀲𑁄 𑀳𑀺 𑀉𑀟𑁆𑀟𑀬𑁆𑀳𑀢𑀺, 𑀦 𑀓𑀧𑁆𑀧𑁄, 𑀉𑀟𑁆𑀟𑀬𑁆𑀳𑀦𑀯𑁂𑀮𑀸𑀢𑀺 𑀛𑀸𑀬𑀦𑀯𑁂𑀮𑀸. 𑀞𑀺𑀢𑁄 𑀓𑀧𑁆𑀧𑁄 𑀞𑀺𑀢𑀓𑀧𑁆𑀧𑁄, 𑀲𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀞𑀺𑀢𑀓𑀧𑁆𑀧𑀻, 𑀓𑀧𑁆𑀧𑀁 𑀞𑀧𑁂𑀢𑀼𑀁 𑀲𑀫𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀑𑀮𑁄𑀓𑀦𑀦𑁆𑀢𑀺 𑀲𑀘𑁆𑀘𑀸𑀪𑀺𑀲𑀫𑀬𑀲𑀗𑁆𑀔𑀸𑀢𑀁 𑀤𑀲𑁆𑀲𑀦𑀁. 𑀔𑀫𑀦𑁆𑀢𑀺 𑀲𑀳𑀦𑁆𑀢𑀺, 𑀜𑀸𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀘𑀓𑁆𑀔𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀑𑀓𑁆𑀓𑀦𑁆𑀢𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀉𑀧𑁆𑀧𑀸𑀤𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸

𑁩𑁧𑁨-𑁩𑁨𑁧. 𑀲𑀩𑁆𑀩𑀁 ¶ 𑀧𑀸𑀓𑀝𑀫𑁂𑀯 𑀅𑀧𑀼𑀩𑁆𑀩𑀲𑁆𑀲 𑀅𑀪𑀸𑀯𑀢𑁄.

𑀉𑀧𑁆𑀧𑀸𑀤𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀓𑀺𑀮𑁂𑀲𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸

𑁩𑁨𑁨-𑁩𑁩𑁧. 𑀏𑀲𑁄𑀢𑀺 ¶ 𑀘𑀓𑁆𑀔𑀼𑀲𑁆𑀫𑀺𑀁 𑀙𑀦𑁆𑀤𑀭𑀸𑀕𑁄. 𑀉𑀧𑁂𑀘𑁆𑀘 𑀓𑀺𑀮𑁂𑀲𑁂𑀢𑀻𑀢𑀺 𑀉𑀧𑀓𑁆𑀓𑀺𑀮𑁂𑀲𑁄. 𑀘𑀺𑀢𑁆𑀢𑀲𑁆𑀲𑀸𑀢𑀺 𑀲𑀸𑀫𑀜𑁆𑀜𑀯𑀘𑀦𑀁 𑀅𑀦𑀺𑀘𑁆𑀙𑀦𑁆𑀢𑁄 𑀘𑁄𑀤𑀓𑁄 ‘‘𑀓𑀢𑀭𑀘𑀺𑀢𑁆𑀢𑀲𑁆𑀲𑀸’’𑀢𑀺 𑀆𑀳. 𑀇𑀢𑀭𑁄 𑀓𑀸𑀫𑀁 𑀉𑀧𑀢𑀸𑀧𑀦𑀫𑀮𑀻𑀦𑀪𑀸𑀯𑀓𑀭𑀡𑀯𑀲𑁂𑀦 𑀉𑀧𑀓𑁆𑀓𑀺𑀮𑁂𑀲𑁄 𑀮𑁄𑀓𑀼𑀢𑁆𑀢𑀭𑀲𑁆𑀲 𑀦𑀢𑁆𑀣𑀺, 𑀯𑀺𑀩𑀸𑀥𑀦𑀝𑁆𑀞𑁄 𑀧𑀦 𑀅𑀢𑁆𑀣𑁂𑀯 𑀉𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀘𑀢𑀼𑀪𑀽𑀫𑀓𑀘𑀺𑀢𑁆𑀢𑀲𑁆𑀲𑀸’’𑀢𑀺. 𑀘𑁄𑀤𑀓𑁄 ‘‘𑀢𑁂𑀪𑀽𑀫𑀓𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀢𑀺, 𑀇𑀢𑀭𑁄 ‘‘𑀉𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑀢𑁄’’𑀢𑀺𑀆𑀤𑀺𑀦𑀸. 𑀅𑀭𑀺𑀬𑀨𑀮𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑀳𑀸𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 ¶ 𑀲𑀩𑁆𑀩𑀲𑀁𑀓𑀺𑀮𑁂𑀲𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀦𑁂𑀓𑁆𑀔𑀫𑁆𑀫𑀁, 𑀫𑀕𑁆𑀕𑀦𑀺𑀩𑁆𑀩𑀸𑀦𑀸𑀦𑀁 𑀧𑀦 𑀦𑁂𑀓𑁆𑀔𑀫𑁆𑀫𑀪𑀸𑀯𑁄 𑀉𑀓𑁆𑀓𑀁𑀲𑀢𑁄 𑀕𑀳𑀺𑀢𑁄 𑀏𑀯𑀸𑀢𑀺 𑀆𑀳 ‘‘𑀦𑁂𑀓𑁆𑀔𑀫𑁆𑀫𑀦𑀺𑀦𑁆𑀦𑀦𑁆𑀢𑀺 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀦𑁆𑀦’’𑀦𑁆𑀢𑀺. 𑀅𑀪𑀺𑀚𑀸𑀦𑀺𑀢𑁆𑀯𑀸𑀢𑀺 𑀅𑀪𑀺𑀫𑀼𑀔𑀪𑀸𑀯𑁂𑀦 𑀚𑀸𑀦𑀺𑀢𑁆𑀯𑀸. 𑀲𑀘𑁆𑀙𑀺𑀓𑀸𑀢𑀩𑁆𑀩𑁂𑀲𑀽𑀢𑀺 𑀧𑀘𑁆𑀘𑀓𑁆𑀔𑀓𑀸𑀢𑀩𑁆𑀩𑁂𑀲𑀼. 𑀙𑀴𑀪𑀺𑀜𑁆𑀜𑀸𑀥𑀫𑁆𑀫𑁂𑀲𑀽𑀢𑀺 𑀅𑀭𑀺𑀬𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼.

𑀓𑀺𑀮𑁂𑀲𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀸𑀭𑀺𑀧𑀼𑀢𑁆𑀢𑀲𑀁𑀬𑀼𑀢𑁆𑀢𑀁

𑁧-𑁯. 𑀯𑀺𑀯𑁂𑀓𑀚𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁩𑁨-𑁩𑁪𑁦. 𑀦 ¶ 𑀏𑀯𑀁 𑀳𑁄𑀢𑀻𑀢𑀺 𑀏𑀢𑁆𑀣 ‘‘𑀅𑀳𑀁 𑀲𑀫𑀸𑀧𑀚𑁆𑀚𑀸𑀫𑀻’’𑀢𑀺 𑀯𑀸, ‘‘𑀅𑀳𑀁 𑀲𑀫𑀸𑀧𑀦𑁆𑀦𑁄’’𑀢𑀺 𑀯𑀸 𑀫𑀸 𑀳𑁄𑀢𑀼 𑀢𑀤𑀸 𑀢𑀸𑀤𑀺𑀲𑀸𑀪𑁄𑀕𑀸𑀪𑀸𑀯𑀢𑁄. ‘‘𑀅𑀳𑀁 𑀯𑀼𑀝𑁆𑀞𑀺𑀢𑁄’’𑀢𑀺 𑀧𑀦 𑀓𑀲𑁆𑀫𑀸 𑀦 𑀳𑁄𑀢𑀻𑀢𑀺? 𑀲𑀩𑁆𑀩𑀣𑀸𑀧𑀺 𑀦 𑀳𑁄𑀢𑁆𑀯𑁂𑀯 𑀅𑀳𑀗𑁆𑀓𑀸𑀭𑀲𑁆𑀲 𑀲𑀩𑁆𑀩𑀲𑁄 𑀧𑀳𑀻𑀦𑀢𑁆𑀢𑀸.

𑀯𑀺𑀯𑁂𑀓𑀚𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀽𑀘𑀺𑀫𑀼𑀔𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁧. 𑀢𑀲𑁆𑀫𑀺𑀁 𑀯𑀘𑀦𑁂 𑀧𑀝𑀺𑀓𑁆𑀔𑀺𑀢𑁆𑀢𑁂𑀢𑀺 𑁋 ‘‘𑀅𑀥𑁄𑀫𑀼𑀔𑁄 𑀪𑀼𑀜𑁆𑀚𑀲𑀻’’𑀢𑀺 𑀧𑀭𑀺𑀩𑁆𑀩𑀸𑀚𑀺𑀓𑀸𑀬 𑀯𑀼𑀢𑁆𑀢𑀯𑀘𑀦𑁂 𑁋 ‘‘𑀦 𑀔𑁆𑀯𑀸𑀳𑀁 𑀪𑀕𑀺𑀦𑀻’’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑁂. 𑀯𑀸𑀤𑀦𑁆𑀢𑀺 𑀤𑁄𑀲𑀁. 𑀉𑀩𑁆𑀪𑀫𑀼𑀔𑁄𑀢𑀺 𑀉𑀧𑀭𑀺𑀫𑀼𑀔𑁄. 𑀧𑀼𑀭𑀢𑁆𑀣𑀺𑀫𑀸𑀤𑀺𑀓𑀸 𑀘𑀢𑀲𑁆𑀲𑁄 𑀤𑀺𑀲𑀸. 𑀤𑀓𑁆𑀔𑀺𑀡𑀧𑀼𑀭𑀢𑁆𑀣𑀺𑀫𑀸𑀤𑀺𑀓𑀸 𑀘𑀢𑀲𑁆𑀲𑁄 𑀯𑀺𑀤𑀺𑀲𑀸.

𑀆𑀭𑀸𑀫𑀆𑀭𑀸𑀫𑀯𑀢𑁆𑀣𑀼𑀆𑀤𑀻𑀲𑀼 𑀪𑀽𑀫𑀺𑀧𑀭𑀺𑀓𑀫𑁆𑀫𑀩𑀻𑀚𑀸𑀪𑀺𑀲𑀗𑁆𑀔𑀭𑀡𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑀸 𑀯𑀺𑀚𑁆𑀚𑀸 𑀯𑀢𑁆𑀣𑀼𑀯𑀺𑀚𑁆𑀚𑀸, 𑀢𑀲𑁆𑀲𑀸 𑀧𑀦 𑀫𑀺𑀘𑁆𑀙𑀸𑀚𑀻𑀯𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀲’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀲𑀁 𑀢𑁂𑀲𑀁 𑀅𑀢𑁆𑀢𑀦𑁄 𑀧𑀘𑁆𑀘𑀬𑀤𑀸𑀬𑀓𑀸𑀦𑀁. 𑀢𑀢𑁆𑀣 𑀢𑀢𑁆𑀣 𑀕𑀫𑀦𑀦𑁆𑀢𑀺 𑀢𑁂𑀲𑀁 𑀲𑀸𑀲𑀦𑀳𑀭𑀡𑀯𑀲𑁂𑀦 𑀢𑀁 𑀢𑀁 𑀕𑀸𑀫𑀦𑁆𑀢𑀭𑀤𑁂𑀲𑀦𑁆𑀢𑀭𑀁. 𑀏𑀯𑀫𑀸𑀭𑁄𑀘𑁂𑀲𑀻𑀢𑀺 𑀅𑀢𑁆𑀢𑀼𑀓𑁆𑀓𑀁𑀲𑀦𑀧𑀭𑀯𑀫𑁆𑀪𑀦𑀭𑀳𑀺𑀢𑀁 𑀓𑀡𑁆𑀡𑀲𑀼𑀔𑀁 𑀧𑁂𑀫𑀦𑀻𑀬𑀁 𑀳𑀤𑀬𑀗𑁆𑀕𑀫𑀁 𑀣𑁂𑀭𑀲𑁆𑀲 𑀥𑀫𑁆𑀫𑀓𑀣𑀁 ¶ 𑀲𑀼𑀢𑁆𑀯𑀸 𑀧𑀲𑀦𑁆𑀦𑀫𑀸𑀦𑀲𑀸 𑀏𑀯𑀁 ‘‘𑀥𑀫𑁆𑀫𑀺𑀓𑀁 𑀲𑀫𑀡𑀸 𑀲𑀓𑁆𑀬𑀧𑀼𑀢𑁆𑀢𑀺𑀬𑀸’’𑀢𑀺𑀆𑀤𑀺𑀦𑀸 𑀲𑀸𑀲𑀦𑀲𑁆𑀲 𑀕𑀼𑀡𑀲𑀁𑀓𑀺𑀢𑁆𑀢𑀦𑀯𑀸𑀘𑀁 𑀓𑀼𑀮𑀸𑀦𑀁 𑀆𑀭𑁄𑀘𑁂𑀲𑀺.

𑀲𑀽𑀘𑀺𑀫𑀼𑀔𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀺𑀧𑀼𑀢𑁆𑀢𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀦𑀸𑀕𑀲𑀁𑀬𑀼𑀢𑁆𑀢𑀁

𑁧. 𑀲𑀼𑀤𑁆𑀥𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁨. 𑀅𑀡𑁆𑀟𑀚𑀸𑀢𑀺 ¶ 𑀅𑀡𑁆𑀟𑁂 𑀚𑀸𑀢𑀸. 𑀯𑀢𑁆𑀣𑀺𑀓𑁄𑀲𑁂𑀢𑀺 𑀯𑀢𑁆𑀣𑀺𑀓𑁄𑀲𑀲𑀜𑁆𑀜𑀺𑀢𑁂 𑀚𑀭𑀸𑀬𑀼𑀧𑀼𑀝𑁂 𑀚𑀸𑀢𑀸. 𑀲𑀁𑀲𑁂𑀤𑁂𑀢𑀺 𑀲𑀁𑀲𑀺𑀦𑁆𑀦𑁂 𑀓𑀺𑀮𑀺𑀦𑁆𑀦𑀝𑁆𑀞𑀸𑀦𑁂 𑀉𑀧𑁆𑀧𑀦𑁆𑀦𑀸. 𑀉𑀧𑀧𑀢𑀺𑀢𑁆𑀯𑀸 𑀯𑀺𑀬𑀸𑀢𑀺 𑀓𑀼𑀢𑁄𑀘𑀺𑀧𑀺 𑀅𑀯𑀧𑀢𑀺𑀢𑁆𑀯𑀸 𑀯𑀺𑀬 𑀦𑀺𑀩𑁆𑀩𑀢𑁆𑀢𑀸. 𑀧𑀼𑀕𑁆𑀕𑀮𑀸𑀦𑀦𑁆𑀢𑀺 𑀢𑀣𑀸 𑀯𑀺𑀦𑁂𑀢𑀩𑁆𑀩𑀧𑀼𑀕𑁆𑀕𑀮𑀸𑀦𑀁.

𑀲𑀼𑀤𑁆𑀥𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨-𑁫𑁦. 𑀧𑀡𑀻𑀢𑀢𑀭𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁪𑁩-𑁩𑁯𑁧. 𑀯𑀺𑀲𑁆𑀲𑀝𑁆𑀞𑀓𑀸𑀬𑀸𑀢𑀺 ‘‘𑀬𑁂 𑀘𑀫𑁆𑀫𑁂𑀦 𑀯𑀸 𑀭𑀼𑀥𑀺𑀭𑁂𑀦 𑀯𑀸 𑀅𑀝𑁆𑀞𑀺𑀦𑀸 𑀯𑀸 𑀅𑀢𑁆𑀣𑀺𑀓𑀸, 𑀢𑁂 𑀲𑀩𑁆𑀩𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀢𑀢𑁆𑀣 𑀦𑀺𑀭𑀧𑁂𑀓𑁆𑀔𑀘𑀺𑀢𑁆𑀢𑀢𑀸𑀬 𑀅𑀥𑀺𑀝𑁆𑀞𑀺𑀢𑀲𑀻𑀮𑀢𑀸𑀬 𑀧𑀭𑀺𑀘𑁆𑀘𑀢𑁆𑀢𑀲𑀭𑀻𑀭𑀸. 𑀤𑀼𑀯𑀺𑀥𑀓𑀸𑀭𑀺𑀦𑁄𑀢𑀺 ‘‘𑀓𑀸𑀮𑁂𑀦 𑀓𑀼𑀲𑀮𑀁, 𑀓𑀸𑀮𑁂𑀦 𑀅𑀓𑀼𑀲𑀮’’𑀦𑁆𑀢𑀺 𑀏𑀯𑀁 𑀓𑀼𑀲𑀮𑀸𑀓𑀼𑀲𑀮𑀓𑀸𑀭𑀺𑀦𑁄. 𑀲𑀳 𑀩𑁆𑀬𑀬𑀢𑀺 𑀧𑀯𑀢𑁆𑀢𑀢𑀻𑀢𑀺 𑀲𑀳𑀩𑁆𑀬𑁄, 𑀲𑀳𑀘𑀸𑀭𑁄. 𑀢𑀲𑁆𑀲 𑀪𑀸𑀯𑁄 𑀲𑀳𑀩𑁆𑀬𑀢𑀸, 𑀢𑀁 𑀲𑀳𑀩𑁆𑀬𑀢𑀁. 𑀅𑀤𑀦𑀻𑀬𑀢𑁄 𑀅𑀦𑁆𑀦𑀁. 𑀔𑀸𑀤𑀦𑀻𑀬𑀢𑁄 𑀔𑀚𑁆𑀚𑀁. 𑀧𑀸𑀢𑀩𑁆𑀩𑀢𑁄 𑀧𑀸𑀦𑀁. 𑀦𑀺𑀯𑀲𑀦𑀻𑀬𑀢𑁄 𑀯𑀢𑁆𑀣𑀁. 𑀦𑀺𑀯𑀲𑀺𑀢𑀩𑁆𑀩𑀁 𑀦𑀺𑀯𑀸𑀲𑀦𑀁. 𑀧𑀭𑀺𑀯𑀭𑀺𑀢𑀩𑁆𑀩𑀁 𑀧𑀸𑀯𑀼𑀭𑀡𑀁. 𑀬𑀸𑀦𑁆𑀢𑀺 𑀢𑁂𑀦𑀸𑀢𑀺 𑀬𑀸𑀦𑀁, 𑀉𑀧𑀸𑀳𑀦𑀸𑀤𑀺𑀬𑀸𑀦𑀸𑀦𑀺. 𑀆𑀤𑀺𑀲𑀤𑁆𑀤𑁂𑀦 𑀯𑀬𑁆𑀳𑀲𑀺𑀯𑀺𑀓𑀸𑀤𑀻𑀦𑀁 𑀲𑀗𑁆𑀕𑀳𑁄. 𑀙𑀢𑁆𑀢𑀫𑁆𑀧𑀺 𑀧𑀭𑀺𑀲𑁆𑀲𑀬𑀸𑀢𑀧𑀤𑀼𑀓𑁆𑀔𑀧𑀭𑀺𑀭𑀓𑁆𑀔𑀡𑁂𑀦 𑀫𑀕𑁆𑀕𑀕𑀫𑀦𑀲𑀸𑀥𑀦𑀦𑁆𑀢𑀺 𑀓𑀢𑁆𑀯𑀸 ‘‘𑀙𑀢𑁆𑀢𑀼𑀧𑀸𑀳𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀁 𑀓𑀺𑀜𑁆𑀘𑀺 𑀕𑀫𑀦𑀧𑀘𑁆𑀘𑀬’’𑀦𑁆𑀢𑀺. 𑀧𑀢𑁆𑀣𑀦𑀁 𑀓𑀢𑁆𑀯𑀸…𑀧𑁂… 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀘𑀫𑁆𑀧𑁂𑀬𑁆𑀬𑀦𑀸𑀕𑀭𑀸𑀚𑀸 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀡𑀻𑀢𑀢𑀭𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀸𑀕𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀲𑀼𑀧𑀡𑁆𑀡𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸

𑁩𑁯𑁨-𑁪𑁩𑁭. 𑀧𑀢𑁆𑀢𑀸𑀦𑀦𑁆𑀢𑀺 ¶ ¶ 𑀉𑀪𑁄𑀲𑀼 𑀧𑀓𑁆𑀔𑁂𑀲𑀼 𑀧𑀢𑁆𑀢𑀸𑀦𑀁. 𑀯𑀡𑁆𑀡𑀯𑀦𑁆𑀢𑀢𑀸𑀬𑀸𑀢𑀺 𑀅𑀢𑀺𑀲𑀬𑁂𑀦 𑀯𑀺𑀘𑀺𑀢𑁆𑀢𑀯𑀡𑁆𑀡𑀢𑀸𑀬. 𑀅𑀢𑀺𑀲𑀬𑀢𑁆𑀣𑁄 𑀳𑀺 𑀅𑀬𑀁 𑀯𑀦𑁆𑀢-𑀲𑀤𑁆𑀤𑁄. 𑀧𑀼𑀭𑀺𑀫𑀦𑀬𑁂𑀦𑀸𑀢𑀺 𑀦𑀸𑀕𑀲𑀁𑀬𑀼𑀢𑁆𑀢𑁂 𑀧𑀞𑀫𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦. 𑀉𑀤𑁆𑀥𑀭𑀦𑁆𑀢𑀻𑀢𑀺 𑀲𑀫𑀼𑀤𑁆𑀤𑀢𑁄 𑀉𑀤𑁆𑀥𑀭𑀦𑁆𑀢𑀺, 𑀧𑀣𑀯𑀦𑁆𑀢𑀭𑀧𑀩𑁆𑀩𑀢𑀦𑁆𑀢𑀭𑀢𑁄 𑀧𑀦 𑀢𑁂𑀲𑀁 𑀉𑀤𑁆𑀥𑀭𑀡𑀁 𑀤𑀼𑀓𑁆𑀓𑀭𑀫𑁂𑀯. 𑀧𑀡𑀻𑀢𑀢𑀭𑁂𑀢𑀺 𑀩𑀮𑁂𑀦 𑀧𑀡𑀻𑀢𑀢𑀭𑁂, 𑀩𑀮𑀯𑀦𑁆𑀢𑁂𑀢𑀺 𑀅𑀢𑁆𑀣𑁄. 𑀅𑀦𑀼𑀤𑁆𑀥𑀭𑀡𑀻𑀬𑀦𑀸𑀕𑀸𑀢𑀺 𑀆𑀦𑀼𑀪𑀸𑀯𑀫𑀳𑀦𑁆𑀢𑀢𑀸𑀬 𑀘 𑀯𑀲𑀦𑀝𑁆𑀞𑀸𑀦𑀯𑀺𑀤𑀼𑀕𑁆𑀕𑀢𑀸𑀬 𑀘 𑀉𑀤𑁆𑀥𑀭𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸 𑀦𑀸𑀕𑀸. 𑀢𑁂 ‘‘𑀲𑀢𑁆𑀢𑀯𑀺𑀥𑀸’’𑀢𑀺 𑀯𑀢𑁆𑀯𑀸 𑀲𑀭𑀽𑀧𑀢𑁄 𑀯𑀲𑀦𑀝𑁆𑀞𑀸𑀦𑀢𑁄 𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀫𑁆𑀩𑀮𑀲𑁆𑀲𑀢𑀭𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀫𑁆𑀩𑀮𑀲𑁆𑀲𑀢𑀭𑀸 𑀥𑀢𑀭𑀝𑁆𑀞𑀸𑀢𑀺 𑀇𑀫𑁂 𑀚𑀸𑀢𑀺𑀯𑀲𑁂𑀦 𑀯𑀼𑀢𑁆𑀢𑀸. 𑀲𑀢𑁆𑀢𑀲𑀻𑀤𑀦𑁆𑀢𑀭𑀯𑀸𑀲𑀺𑀦𑁄𑀢𑀺 𑀲𑀢𑁆𑀢𑀯𑀺𑀥𑀲𑀻𑀤𑀲𑀫𑀼𑀤𑁆𑀤𑀯𑀸𑀲𑀺𑀦𑁄. 𑀧𑀣𑀯𑀺𑀝𑁆𑀞𑀓𑀸𑀢𑀺 𑀧𑀣𑀯𑀦𑁆𑀢𑀭𑀯𑀸𑀲𑀺𑀦𑁄, 𑀢𑀣𑀸 𑀧𑀩𑁆𑀩𑀢𑀝𑁆𑀞𑀓𑀸. 𑀢𑁂 𑀘 𑀯𑀺𑀫𑀸𑀦𑀯𑀸𑀲𑀺𑀦𑁄. 𑀢𑁂 𑀦𑀸𑀕𑁂 𑀓𑁄𑀘𑀺 𑀲𑀼𑀧𑀡𑁆𑀡𑁄 𑀉𑀤𑁆𑀥𑀭𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑁂𑀲𑀦𑁆𑀢𑀺 ‘‘𑀓𑀸𑀬𑁂𑀦 𑀤𑁆𑀯𑀬𑀓𑀸𑀭𑀺𑀦𑁄’’𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀦𑀸𑀕𑀲𑀁𑀬𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑀫𑁂𑀯, 𑀢𑀢𑁆𑀣 𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀲𑀼𑀧𑀡𑁆𑀡𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀕𑀦𑁆𑀥𑀩𑁆𑀩𑀓𑀸𑀬𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸

𑁪𑁩𑁮-𑁫𑁪𑁯. 𑀫𑀽𑀮𑀕𑀦𑁆𑀥𑀸𑀤𑀺𑀪𑁂𑀤𑀁 ¶ 𑀕𑀦𑁆𑀥𑀁 𑀅𑀯𑀦𑁆𑀢𑀺 𑀅𑀧𑀬𑀼𑀜𑁆𑀚𑀦𑁆𑀢𑀻𑀢𑀺 𑀕𑀦𑁆𑀥𑀩𑁆𑀩𑀸, 𑀢𑁂𑀲𑀁 𑀓𑀸𑀬𑁄 𑀲𑀫𑀽𑀳𑁄 𑀕𑀦𑁆𑀥𑀩𑁆𑀩𑀓𑀸𑀬𑁄, 𑀕𑀦𑁆𑀥𑀩𑁆𑀩𑀤𑁂𑀯𑀦𑀺𑀓𑀸𑀬𑁄. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑁂𑀲𑀼 𑀏𑀓𑀺𑀬𑀸𑀯 𑀢𑁂 𑀤𑀝𑁆𑀞𑀩𑁆𑀩𑀸, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀢𑀢𑁆𑀣 𑀯𑀸 𑀦𑀺𑀬𑀼𑀢𑁆𑀢𑀸𑀢𑀺 𑀕𑀦𑁆𑀥𑀩𑁆𑀩𑀓𑀸𑀬𑀺𑀓𑀸. 𑀢𑁂𑀲𑀁 𑀢𑁂𑀲𑀁 𑀭𑀼𑀓𑁆𑀔𑀕𑀘𑁆𑀙𑀮𑀢𑀸𑀦𑀁 𑀫𑀽𑀮𑀁 𑀧𑀝𑀺𑀘𑁆𑀘 𑀧𑀯𑀢𑁆𑀢𑁄 𑀕𑀦𑁆𑀥𑁄 𑀫𑀽𑀮𑀕𑀦𑁆𑀥𑁄, 𑀢𑀲𑁆𑀫𑀺𑀁 𑀫𑀽𑀮𑀕𑀦𑁆𑀥𑁂. 𑀅𑀥𑀺𑀯𑀢𑁆𑀣𑀸𑀢𑀺 𑀫𑀽𑀮𑀕𑀦𑁆𑀥𑀁 𑀅𑀥𑀺𑀝𑁆𑀞𑀸𑀬, 𑀅𑀪𑀺𑀪𑀼𑀬𑁆𑀬 𑀯𑀸 𑀯𑀲𑀦𑁆𑀢𑀸. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀢𑀁 𑀦𑀺𑀲𑁆𑀲𑀸𑀬𑀸𑀢𑀺 𑀢𑀁 𑀫𑀽𑀮𑀕𑀦𑁆𑀥𑀁 𑀭𑀼𑀓𑁆𑀔𑀁 𑀧𑀘𑁆𑀘𑀬𑀁 𑀓𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀸. 𑀦 𑀓𑁂𑀯𑀮𑀁 𑀢𑀢𑁆𑀣 𑀕𑀦𑁆𑀥𑁄 𑀏𑀯, 𑀫𑀽𑀮𑀫𑁂𑀯 𑀯𑀸 𑀢𑁂𑀲𑀁 𑀧𑀘𑁆𑀘𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁄 𑀳𑀻’’𑀢𑀺𑀆𑀤𑀺𑀫𑀸𑀳. 𑀉𑀧𑀓𑀧𑁆𑀧𑀢𑀻𑀢𑀺 𑀦𑀺𑀯𑀸𑀲𑀝𑁆𑀞𑀸𑀦𑀪𑀸𑀯𑁂𑀦 𑀯𑀺𑀦𑀺𑀬𑀼𑀜𑁆𑀚𑀢𑀺. 𑀕𑀦𑁆𑀥𑀕𑀦𑁆𑀥𑁂𑀢𑀺 𑀕𑀦𑁆𑀥𑀸𑀦𑀁 𑀕𑀦𑁆𑀥𑀲𑀫𑀼𑀤𑀸𑀬𑁂. 𑀫𑀽𑀮𑀸𑀤𑀺𑀕𑀦𑁆𑀥𑀸𑀦𑀁 𑀕𑀦𑁆𑀥𑁂𑀢𑀺 𑀫𑀽𑀮𑀸𑀤𑀺𑀕𑀢𑀅𑀯𑀬𑀯𑀕𑀦𑁆𑀥𑀸𑀦𑀁 𑀕𑀦𑁆𑀥𑁂, 𑀢𑀺𑀫𑀽𑀮𑀸𑀤𑀺𑀕𑀢𑀲𑀫𑀼𑀤𑀸𑀬𑀪𑀽𑀢𑁂𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑁂 𑀳𑀺 ‘‘𑀫𑀽𑀮𑀕𑀦𑁆𑀥𑁂’’𑀢𑀺𑀆𑀤𑀺𑀦𑀸 𑀭𑀼𑀓𑁆𑀔𑀸𑀦𑀁 𑀅𑀯𑀬𑀯𑀕𑀦𑁆𑀥𑁄 ¶ 𑀕𑀳𑀺𑀢𑁄, 𑀇𑀥 𑀧𑀦 𑀲𑀩𑁆𑀩𑀲𑁄 𑀕𑀳𑀺𑀢𑀢𑁆𑀢𑀸 𑀲𑀫𑀼𑀤𑀸𑀬𑀕𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀦𑀸𑀳 ‘‘𑀬𑀲𑁆𑀲 𑀳𑀺 𑀭𑀼𑀓𑁆𑀔𑀲𑁆𑀲𑀸’’𑀢𑀺𑀆𑀤𑀺. 𑀲𑁄𑀢𑀺 𑀲𑁄 𑀲𑀩𑁆𑀩𑁄 𑀫𑀽𑀮𑀸𑀤𑀺𑀕𑀢𑁄 𑀕𑀦𑁆𑀥𑁄 𑀕𑀦𑁆𑀥𑀲𑀫𑀼𑀤𑀸𑀬𑁄 𑀇𑀥 𑀕𑀦𑁆𑀥𑀕𑀦𑁆𑀥𑁄 𑀦𑀸𑀫. 𑀢𑀲𑁆𑀲 𑀕𑀦𑁆𑀥𑀲𑁆𑀲 𑀕𑀦𑁆𑀥𑁂𑀢𑀺 𑀢𑀲𑁆𑀲 𑀲𑀫𑀼𑀤𑀸𑀬𑀕𑀦𑁆𑀥𑀲𑁆𑀲 𑀢𑀣𑀸𑀪𑀽𑀢𑁂 𑀕𑀦𑁆𑀥𑁂. 𑀲𑀭𑀺𑀓𑁆𑀔𑀁 𑀲𑀤𑀺𑀲𑀁 𑀧𑀝𑀺𑀤𑀸𑀦𑀁 𑀏𑀢𑀺𑀲𑁆𑀲𑀸𑀢𑀺 𑀲𑀭𑀺𑀓𑁆𑀔𑀤𑀸𑀦𑀁, 𑀧𑀢𑁆𑀣𑀦𑀸. 𑀬𑀣𑀸𑀥𑀺𑀧𑁆𑀧𑁂𑀢𑀨𑀮𑀸𑀦𑀺 𑀲𑀭𑀺𑀓𑁆𑀔𑀤𑀸𑀦𑀢𑁆𑀢𑀸𑀯 𑀅𑀥𑀺𑀧𑁆𑀧𑁂𑀢𑀨𑀮𑀁 𑀤𑁂𑀦𑁆𑀢𑀼, 𑀅𑀲𑀭𑀺𑀓𑁆𑀔𑀤𑀸𑀦𑀁 𑀓𑀣𑀦𑁆𑀢𑀺? 𑀢𑀫𑁆𑀧𑀺 𑀤𑁂𑀢𑀺𑀬𑁂𑀯 𑀧𑀼𑀜𑁆𑀜𑀲𑁆𑀲 𑀲𑀩𑁆𑀩𑀓𑀸𑀫𑀤𑀤𑀢𑁆𑀢𑀸𑀢𑀺 𑀆𑀳 ‘‘𑀅𑀲𑀭𑀺𑀓𑁆𑀔𑀤𑀸𑀦𑀫𑁆𑀧𑀻’’𑀢𑀺𑀆𑀤𑀺.

𑀕𑀦𑁆𑀥𑀩𑁆𑀩𑀓𑀸𑀬𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀯𑀮𑀸𑀳𑀓𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸

𑁫𑁫𑁦-𑁬𑁦𑁬. 𑀮𑁄𑀓𑀁 ¶ 𑀯𑀸𑀮𑁂𑀦𑁆𑀢𑀸 𑀲𑀁𑀯𑀭𑀦𑁆𑀢𑀸 𑀙𑀸𑀤𑁂𑀦𑁆𑀢𑀸 𑀅𑀳𑀦𑁆𑀢𑀺 𑀧𑀭𑀺𑀬𑁂𑀲𑀦𑁆𑀢𑀻𑀢𑀺 𑀯𑀮𑀸𑀳𑀸, 𑀤𑁂𑀯𑀧𑀼𑀢𑁆𑀢𑀸. 𑀢𑁂𑀲𑀁 𑀲𑀫𑀽𑀳𑁄 𑀯𑀮𑀸𑀳𑀓𑀤𑁂𑀯𑀓𑀸𑀬𑁄𑀢𑀺 𑀆𑀳 ‘‘𑀯𑀮𑀸𑀳𑀓𑀓𑀸𑀬𑀺𑀓𑀸’’𑀢𑀺𑀆𑀤𑀺. 𑀲𑀻𑀢𑀓𑀭𑀡𑀯𑀮𑀸𑀳𑀓𑀸𑀢𑀺 𑀲𑀻𑀢𑀳𑀭𑀡𑀯𑀮𑀸𑀳𑀓𑀸. 𑀲𑁂𑀲𑀧𑀤𑁂𑀲𑀽𑀢𑀺 𑀉𑀡𑁆𑀳𑀯𑀮𑀸𑀳𑀓𑀸𑀤𑀺𑀧𑀤𑁂𑀲𑀼. 𑀏𑀲𑁂𑀯 𑀦𑀬𑁄𑀢𑀺 ‘‘𑀉𑀡𑁆𑀳𑀓𑀭𑀡𑀯𑀮𑀸𑀳𑀓𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀺𑀢𑁆𑀢𑀝𑁆𑀞𑀧𑀦𑀦𑁆𑀢𑀺 ‘‘𑀲𑀻𑀢𑀁 𑀳𑁄𑀢𑀽’’𑀢𑀺 𑀏𑀯𑀁 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀦𑀁. 𑀯𑀲𑁆𑀲𑀸𑀦𑁂𑀢𑀺 𑀯𑀲𑁆𑀲𑀓𑀸𑀮𑁂. 𑀉𑀢𑀼𑀲𑀫𑀼𑀝𑁆𑀞𑀸𑀦𑀫𑁂𑀯𑀸𑀢𑀺 𑀧𑀸𑀓𑀢𑀺𑀓𑀲𑀻𑀢𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀉𑀡𑁆𑀳𑁂𑀧𑀻𑀢𑀺 𑀉𑀡𑁆𑀳𑀓𑀸𑀮𑁂. 𑀅𑀩𑁆𑀪𑀫𑀡𑁆𑀟𑀧𑁄𑀢𑀺 𑀫𑀡𑁆𑀟𑀧𑀲𑀤𑀺𑀲𑀅𑀩𑁆𑀪𑀧𑀝𑀮𑀯𑀺𑀢𑀸𑀦𑀫𑀸𑀳. 𑀅𑀩𑁆𑀪𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀢𑀳𑀁 𑀢𑀳𑀁 𑀧𑀝𑀮𑀁 𑀉𑀝𑁆𑀞𑀳𑀢𑀺. 𑀅𑀩𑁆𑀪𑁂𑀬𑁂𑀯𑀸𑀢𑀺 𑀅𑀩𑁆𑀪𑀓𑀸𑀮𑁂 𑀏𑀯, 𑀯𑀲𑁆𑀲𑀸𑀦𑁂𑀢𑀺 𑀅𑀢𑁆𑀣𑁄. 𑀅𑀢𑀺𑀅𑀩𑁆𑀪𑀦𑁆𑀢𑀺 𑀲𑀢𑀧𑀝𑀮𑀲𑀳𑀲𑁆𑀲𑀧𑀝𑀮𑀁 𑀳𑀼𑀢𑁆𑀯𑀸 𑀅𑀩𑁆𑀪𑀼𑀝𑁆𑀞𑀸𑀦𑀁. 𑀘𑀺𑀢𑁆𑀢𑀯𑁂𑀲𑀸𑀔𑀫𑀸𑀲𑁂𑀲𑀽𑀢𑀺 𑀯𑀲𑀦𑁆𑀢𑀓𑀸𑀮𑀁 𑀲𑀦𑁆𑀥𑀸𑀬𑀸𑀳. 𑀢𑀤𑀸 𑀳𑀺 𑀯𑀺𑀤𑁆𑀥𑁄 𑀯𑀺𑀕𑀢𑀯𑀮𑀸𑀳𑀓𑁄 𑀤𑁂𑀯𑁄 𑀪𑀯𑀺𑀢𑀼𑀁 𑀬𑀼𑀢𑁆𑀢𑁄. 𑀉𑀢𑁆𑀢𑀭𑀤𑀓𑁆𑀔𑀺𑀡𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀘𑁆𑀙𑀺𑀫𑀯𑀸𑀢𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀓𑀢𑀺𑀯𑀸𑀢𑁄𑀢𑀺 𑀧𑀓𑀢𑀺𑀬𑀸 𑀲𑀪𑀸𑀯𑁂𑀦 𑀯𑀸𑀬𑀦𑀓𑀯𑀸𑀢𑁄. 𑀢𑀁 𑀉𑀢𑀼𑀲𑀫𑀼𑀝𑁆𑀞𑀸𑀦𑀫𑁂𑀯𑀸𑀢𑀺 𑀆𑀳𑀸𑀭𑀽𑀧𑀚𑀻𑀯𑀻𑀦𑀁 𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀓𑀫𑁆𑀫𑀽𑀧𑀦𑀺𑀲𑁆𑀲𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑀫𑁂𑀯. 𑀏𑀲 𑀦𑀬𑁄 𑀉𑀢𑀼𑀲𑀫𑀼𑀝𑁆𑀞𑀸𑀦𑀲𑀻𑀢𑀼𑀡𑁆𑀳𑀯𑀸𑀢𑁂𑀲𑀼𑀧𑀺. 𑀢𑀫𑁆𑀧𑀺 𑀳𑀺 𑀆𑀳𑀸𑀭𑀽𑀧𑀚𑀻𑀯𑀻𑀦𑀁 𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀓𑀫𑁆𑀫𑀽𑀧𑀦𑀺𑀲𑁆𑀲𑀬𑀫𑁂𑀯𑀸𑀢𑀺.

𑀕𑀻𑀢𑀦𑁆𑀢𑀺 𑀫𑁂𑀖𑀕𑀻𑀢𑀁. 𑀲𑀘𑁆𑀘𑀓𑀺𑀭𑀺𑀬𑀸𑀬𑀸𑀢𑀺 𑀢𑀸𑀤𑀺𑀲𑀸𑀦𑀁 𑀧𑀼𑀭𑀺𑀲𑀯𑀺𑀲𑁂𑀲𑀸𑀦𑀁 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑁂𑀦. 𑀇𑀤𑁆𑀥𑀺𑀩𑀮𑁂𑀦𑀸𑀢𑀺 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀇𑀤𑁆𑀥𑀺𑀆𑀦𑀼𑀪𑀸𑀯𑁂𑀦. 𑀯𑀺𑀦𑀸𑀲𑀫𑁂𑀖𑁂𑀦𑀸𑀢𑀺 ¶ 𑀓𑀧𑁆𑀧𑀯𑀺𑀦𑀸𑀲𑀓𑀫𑁂𑀖𑁂𑀦. 𑀅𑀜𑁆𑀜𑁂𑀦𑀧𑀺 𑀓𑀡𑁆𑀳𑀧𑀸𑀧𑀺𑀓𑀲𑀢𑁆𑀢𑀸𑀦𑀁 𑀧𑀸𑀧𑀓𑀫𑁆𑀫𑀧𑀘𑁆𑀘𑀬𑀸 𑀉𑀧𑁆𑀧𑀦𑁆𑀦𑀯𑀺𑀦𑀸𑀲𑀫𑁂𑀖𑁂𑀦 𑀯𑀼𑀝𑁆𑀞𑁂𑀦 𑀲𑁄 𑀲𑁄 𑀤𑁂𑀲𑁄 𑀯𑀺𑀦𑀲𑁆𑀲𑀢𑁂𑀯.

𑀯𑀮𑀸𑀳𑀓𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀯𑀘𑁆𑀙𑀕𑁄𑀢𑁆𑀢𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸

𑁬𑁦𑁭-𑁬𑁬𑁧. 𑀅𑀜𑁆𑀜𑀸𑀡𑀸𑀢𑀺 ¶ 𑀅𑀜𑁆𑀜𑀸𑀡𑀳𑁂𑀢𑀼, 𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀲𑀫𑁆𑀫𑁄𑀳𑀳𑁂𑀢𑀽𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀇𑀫𑀫𑁂𑀯 𑀅𑀢𑁆𑀣𑀁 𑀳𑁂𑀢𑀼𑀅𑀢𑁆𑀣𑁂𑀦 𑀓𑀭𑀡𑀯𑀘𑀦𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀜𑁆𑀜𑀸𑀡𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑀸𑀦𑀻𑀢𑀺 ‘‘𑀅𑀜𑁆𑀜𑀸𑀡𑀸 𑀅𑀤𑀲𑁆𑀲𑀦𑀸 𑀅𑀦𑀪𑀺𑀲𑀫𑀬𑀸’’𑀢𑀺𑀆𑀤𑀻𑀦𑀺 𑀧𑀤𑀸𑀦𑀺 𑀏𑀓𑀸𑀤𑀲𑀲𑀼 𑀲𑀼𑀢𑁆𑀢𑁂𑀲𑀼 𑀆𑀕𑀢𑀸𑀦𑀺, 𑀧𑀜𑁆𑀘𑀧𑀜𑁆𑀜𑀸𑀲 𑀯𑁂𑀬𑁆𑀬𑀸𑀓𑀭𑀡𑀸𑀦𑀺 𑀯𑀼𑀢𑁆𑀢𑀸𑀦𑀺 𑀲𑀼𑀢𑁆𑀢𑁂𑀲𑀼 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀯𑀲𑁂𑀦 𑀯𑁂𑀬𑁆𑀬𑀸𑀓𑀭𑀡𑀲𑁆𑀲 𑀆𑀕𑀢𑀢𑁆𑀢𑀸.

𑀯𑀘𑁆𑀙𑀕𑁄𑀢𑁆𑀢𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀛𑀸𑀦𑀲𑀁𑀬𑀼𑀢𑁆𑀢𑀁

𑁧. 𑀲𑀫𑀸𑀥𑀺𑀫𑀽𑀮𑀓𑀲𑀫𑀸𑀧𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁬𑁨. 𑀲𑀫𑀸𑀥𑀺𑀓𑀼𑀲𑀮𑁄𑀢𑀺 ¶ 𑀲𑀫𑀸𑀥𑀺𑀲𑁆𑀫𑀺𑀁 𑀓𑀼𑀲𑀮𑁄. 𑀢𑀬𑀺𑀤𑀁 𑀲𑀫𑀸𑀥𑀺𑀓𑁄𑀲𑀮𑁆𑀮𑀢𑁆𑀢𑀁 𑀲𑀳 𑀛𑀸𑀦𑀗𑁆𑀕𑀬𑁄𑀕𑁂𑀦 𑀘𑀢𑀼𑀩𑁆𑀩𑀺𑀥𑁄 𑀛𑀸𑀦𑀲𑀫𑀸𑀥𑀺, 𑀢𑀲𑁆𑀫𑀸 𑀢𑀁 𑀢𑀁 𑀯𑀺𑀪𑀸𑀕𑀁 𑀚𑀸𑀦𑀦𑁆𑀢𑀲𑁆𑀲 𑀲𑀺𑀤𑁆𑀥𑀁 𑀳𑁄𑀢𑀻𑀢𑀺 𑀆𑀳 𑁋 ‘‘𑀧𑀞𑀫𑀁 𑀛𑀸𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀯𑀲𑁂𑀦 𑀧𑀞𑀫𑀁 𑀧𑀜𑁆𑀘𑀗𑁆𑀕𑀺𑀓𑀁, 𑀧𑀻𑀢𑀺𑀲𑀼𑀔𑁂𑀓𑀕𑁆𑀕𑀢𑀸𑀯𑀲𑁂𑀦 𑀤𑀼𑀢𑀺𑀬𑀁 𑀢𑀺𑀯𑀗𑁆𑀕𑀺𑀓𑀁, 𑀲𑀼𑀔𑁂𑀓𑀕𑁆𑀕𑀢𑀸𑀯𑀲𑁂𑀦 𑀢𑀢𑀺𑀬𑀁 𑀤𑀼𑀯𑀗𑁆𑀕𑀺𑀓𑀁, 𑀉𑀧𑁂𑀓𑁆𑀔𑁂𑀓𑀕𑁆𑀕𑀢𑀸𑀯𑀲𑁂𑀦 𑀘𑀢𑀼𑀢𑁆𑀣𑀁 𑀤𑀼𑀯𑀗𑁆𑀕𑀺𑀓𑀫𑁂𑀯𑀸𑀢𑀺 𑀏𑀯𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀛𑀸𑀦𑁂 𑀢𑀁𑀢𑀁𑀅𑀗𑁆𑀕𑀸𑀦𑀁 𑀯𑀯𑀢𑁆𑀣𑀸𑀦𑁂 𑀓𑀼𑀲𑀮𑁄. 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑁄𑀢𑀺 𑀲𑀫𑀸𑀧𑀚𑁆𑀚𑀦𑁂 𑀓𑀼𑀲𑀮𑁄. 𑀳𑀸𑀲𑁂𑀢𑁆𑀯𑀸𑀢𑀺 𑀢𑁄𑀲𑁂𑀢𑁆𑀯𑀸. 𑀓𑀮𑁆𑀮𑀁 𑀓𑀢𑁆𑀯𑀸𑀢𑀺 𑀲𑀫𑀸𑀥𑀸𑀦𑀲𑁆𑀲 𑀧𑀝𑀺𑀧𑀓𑁆𑀔𑀥𑀫𑁆𑀫𑀸𑀦𑀁 𑀤𑀽𑀭𑀻𑀓𑀭𑀡𑁂𑀦 𑀲𑀳𑀓𑀸𑀭𑀻𑀓𑀸𑀭𑀡𑀜𑁆𑀘 𑀲𑀫𑀸𑀥𑀸𑀦𑁂𑀦 𑀲𑀫𑀸𑀧𑀚𑁆𑀚𑀦𑁂 𑀘𑀺𑀢𑁆𑀢𑀁 𑀲𑀫𑀢𑁆𑀣𑀁 𑀓𑀢𑁆𑀯𑀸. 𑀲𑁂𑀲𑀧𑀤𑀸𑀦𑀻𑀢𑀺 𑀲𑁂𑀲𑀸 𑀢𑀬𑁄 𑀓𑁄𑀝𑁆𑀞𑀸𑀲𑀸. 𑀢𑀢𑀺𑀬𑀸𑀤𑀻𑀲𑀼 𑀦𑀬𑁂𑀲𑀼 𑀅𑀓𑀼𑀲𑀮𑁄𑀧𑀺 𑀛𑀸𑀦𑀢𑁆𑀣𑀸𑀬 𑀧𑀝𑀺𑀧𑀦𑁆𑀦𑀢𑁆𑀢𑀸 ‘‘𑀛𑀸𑀬𑀻𑀢𑁂𑀯𑀸’’𑀢𑀺 𑀯𑀼𑀢𑁆𑀢𑁄.

𑀲𑀫𑀸𑀥𑀺𑀫𑀽𑀮𑀓𑀲𑀫𑀸𑀧𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨-𑁫𑁫. 𑀲𑀫𑀸𑀥𑀺𑀫𑀽𑀮𑀓𑀞𑀺𑀢𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁬𑁬𑁩-𑁭𑁧𑁬. 𑀤𑀼𑀢𑀺𑀬𑀸𑀤𑀺𑀲𑀼𑀢𑁆𑀢𑁂𑀲𑀼 ¶ 𑀞𑀺𑀢𑀺𑀓𑀼𑀲𑀮𑁄𑀢𑀺 𑀏𑀢𑁆𑀣 𑀅𑀦𑁆𑀢𑁄𑀕𑀥𑀳𑁂𑀢𑀼𑀅𑀢𑁆𑀣𑁄 𑀞𑀺𑀢𑀺-𑀲𑀤𑁆𑀤𑁄, 𑀢𑀲𑁆𑀫𑀺𑀜𑁆𑀘 𑀧𑀦 𑀓𑀼𑀲𑀮𑁄𑀢𑀺 𑀅𑀢𑁆𑀣𑁄𑀢𑀺 𑀆𑀳 𑁋 ‘‘𑀛𑀸𑀦𑀁 𑀞𑀧𑁂𑀢𑀼𑀁 𑀅𑀓𑀼𑀲𑀮𑁄’’𑀢𑀺. 𑀲𑀢𑁆𑀢𑀝𑁆𑀞𑀅𑀘𑁆𑀙𑀭𑀸𑀫𑀢𑁆𑀢𑀦𑁆𑀢𑀺 𑀲𑀢𑁆𑀢𑀝𑁆𑀞𑀅𑀘𑁆𑀙𑀭𑀸𑀫𑀢𑁆𑀢𑀁 𑀔𑀡𑀁 𑀛𑀸𑀦𑀁 𑀞𑀧𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀅𑀥𑀺𑀝𑁆𑀞𑀸𑀦𑀯𑀲𑀻𑀪𑀸𑀯𑀲𑁆𑀲 𑀅𑀦𑀺𑀧𑁆𑀨𑀸𑀤𑀺𑀢𑀢𑁆𑀢𑀸. 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦 𑀓𑀸𑀮𑁂𑀦 𑀯𑀼𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀯𑀼𑀝𑁆𑀞𑀸𑀦𑀯𑀲𑀻𑀪𑀸𑀯𑀲𑁆𑀲 𑀅𑀦𑀺𑀧𑁆𑀨𑀸𑀤𑀺𑀢𑀢𑁆𑀢𑀸. 𑀓𑀮𑁆𑀮𑀁 𑀚𑀸𑀢𑀁 𑀅𑀲𑁆𑀲𑀸𑀢𑀺 𑀓𑀮𑁆𑀮𑀺𑀢𑀁, 𑀢𑀲𑁆𑀫𑀺𑀁 𑀓𑀮𑁆𑀮𑀺𑀢𑁂 𑀓𑀮𑁆𑀮𑀺𑀢𑀪𑀸𑀯𑁂𑀦 𑀓𑀲𑀺𑀡𑀸𑀭𑀫𑁆𑀫𑀡𑁂𑀲𑀼 ‘‘𑀇𑀤𑀁 𑀦𑀸𑀫 𑀅𑀲𑀼𑀓𑀲𑁆𑀲𑀸’’𑀢𑀺 𑀯𑀺𑀲𑀬𑀯𑀲𑁂𑀦 𑀲𑀫𑀸𑀧𑀚𑁆𑀚𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀦 𑀲𑀫𑀸𑀥𑀺𑀲𑁆𑀫𑀺𑀁 𑀆𑀭𑀫𑁆𑀫𑀡𑀓𑀼𑀲𑀮𑁄. 𑀦 𑀲𑀫𑀸𑀥𑀺𑀲𑁆𑀫𑀺𑀁 𑀕𑁄𑀘𑀭𑀓𑀼𑀲𑀮𑁄𑀢𑀺 𑀲𑀫𑀸𑀥𑀺𑀲𑁆𑀫𑀺𑀁 𑀦𑀺𑀧𑁆𑀨𑀸𑀤𑀺𑀢𑀩𑁆𑀩𑁂 𑀢𑀲𑁆𑀲 𑀕𑁄𑀘𑀭𑁂 𑀓𑀫𑁆𑀫𑀝𑁆𑀞𑀸𑀦𑀲𑀜𑁆𑀜𑀺𑀢𑁂 𑀧𑀯𑀢𑁆𑀢𑀺𑀝𑁆𑀞𑀸𑀦𑁂 𑀪𑀺𑀓𑁆𑀔𑀸𑀘𑀸𑀭𑀕𑁄𑀘𑀭𑁂 𑀘 𑀲𑀢𑀺𑀲𑀫𑁆𑀧𑀚𑀜𑁆𑀜𑀯𑀺𑀭𑀳𑀺𑀢𑁄 𑀅𑀓𑀼𑀲𑀮𑁄. 𑀓𑁂𑀘𑀺 𑀧𑀦 ‘‘𑀓𑀫𑁆𑀫𑀝𑁆𑀞𑀸𑀦𑀕𑁄𑀘𑀭𑁄 𑀧𑀞𑀫𑀚𑁆𑀛𑀸𑀦𑀸𑀤𑀺𑀓𑀁, ‘𑀏𑀯𑀁 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀁, 𑀏𑀯𑀁 𑀩𑀳𑀼𑀮𑀻𑀓𑀸𑀢𑀩𑁆𑀩’𑀦𑁆𑀢𑀺 𑀅𑀚𑀸𑀦𑀦𑁆𑀢𑁄 𑀢𑀢𑁆𑀣 𑀅𑀓𑀼𑀲𑀮𑁄 𑀦𑀸𑀫𑀸’’𑀢𑀺 𑀯𑀤𑀦𑁆𑀢𑀺. 𑀓𑀫𑁆𑀫𑀝𑁆𑀞𑀸𑀦𑀁 𑀅𑀪𑀺𑀦𑀻𑀳𑀭𑀺𑀢𑀼𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀲𑁂𑀲𑀪𑀸𑀕𑀺𑀬𑀢𑀸𑀬 ¶ 𑀅𑀪𑀺𑀦𑀻𑀳𑀭𑀺𑀢𑀼𑀁 𑀅𑀓𑀼𑀲𑀮𑁄. 𑀲𑀓𑁆𑀓𑀘𑁆𑀘𑀓𑀸𑀭𑀻𑀢𑀺 𑀘𑀺𑀢𑁆𑀢𑀻𑀓𑀸𑀭𑀻. 𑀲𑀸𑀢𑀘𑁆𑀘𑀓𑀸𑀭𑀻𑀢𑀺 𑀦𑀺𑀬𑀢𑀓𑀸𑀭𑀻. 𑀲𑀫𑀸𑀥𑀺𑀲𑁆𑀲 𑀉𑀧𑀓𑀸𑀭𑀓𑀥𑀫𑁆𑀫𑀸𑀢𑀺 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑀸. 𑀲𑀫𑀸𑀧𑀢𑁆𑀢𑀺𑀆𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀓𑁆𑀓𑀘𑁆𑀘𑀓𑀸𑀭𑀺𑀧𑀤𑀸𑀤𑀻𑀦𑀁𑀬𑁂𑀯 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄 𑀘𑀢𑀼𑀓𑁆𑀓𑀸𑀦𑀁 𑀯𑀼𑀢𑁆𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀬𑁄𑀚𑁂𑀢𑁆𑀯𑀸 𑀘𑀢𑀼𑀓𑁆𑀓𑀸 𑀯𑀼𑀢𑁆𑀢𑀸’’𑀢𑀺. 𑀮𑁄𑀓𑀺𑀬𑀚𑁆𑀛𑀸𑀦𑀯𑀲𑁂𑀦𑁂𑀯 𑀓𑀣𑀺𑀢𑀁 ‘‘𑀲𑀫𑀸𑀥𑀺𑀓𑀼𑀲𑀮𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑁂𑀲𑀦𑀸𑀬 𑀧𑀯𑀢𑁆𑀢𑀢𑁆𑀢𑀸. 𑀦 𑀳𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂𑀲𑀼 𑀅𑀓𑁄𑀲𑀮𑁆𑀮𑀁 𑀦𑀸𑀫 𑀮𑀩𑁆𑀪𑀢𑀺. 𑀬𑀤𑀺 𑀅𑀓𑁄𑀲𑀮𑁆𑀮𑀁, 𑀦 𑀓𑀼𑀲𑀮𑀲𑀤𑁆𑀤𑁂𑀦 𑀯𑀺𑀲𑁂𑀲𑀺𑀢𑀩𑁆𑀩𑀢𑀸 𑀲𑀺𑀬𑀸𑀢𑀺.

𑀲𑀫𑀸𑀥𑀺𑀫𑀽𑀮𑀓𑀞𑀺𑀢𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀛𑀸𑀦𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸

𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬 𑀔𑀦𑁆𑀥𑀯𑀕𑁆𑀕𑀯𑀡𑁆𑀡𑀦𑀸.