📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂

𑀲𑀴𑀸𑀬𑀢𑀦𑀯𑀕𑁆𑀕-𑀅𑀝𑁆𑀞𑀓𑀣𑀸

𑁧. 𑀲𑀴𑀸𑀬𑀢𑀦𑀲𑀁𑀬𑀼𑀢𑁆𑀢𑀁

𑁧. 𑀅𑀦𑀺𑀘𑁆𑀘𑀯𑀕𑁆𑀕𑁄

𑁧. 𑀅𑀚𑁆𑀛𑀢𑁆𑀢𑀸𑀦𑀺𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀲𑀴𑀸𑀬𑀢𑀦𑀯𑀕𑁆𑀕𑀲𑁆𑀲 𑀧𑀞𑀫𑁂 𑀘𑀓𑁆𑀔𑀼𑀦𑁆𑀢𑀺 𑀤𑁆𑀯𑁂 𑀘𑀓𑁆𑀔𑀽𑀦𑀺 𑁋 𑀜𑀸𑀡𑀘𑀓𑁆𑀔𑀼 𑀘𑁂𑀯 𑀫𑀁𑀲𑀘𑀓𑁆𑀔𑀼 𑀘. 𑀢𑀢𑁆𑀣 𑀜𑀸𑀡𑀘𑀓𑁆𑀔𑀼 𑀧𑀜𑁆𑀘𑀯𑀺𑀥𑀁 𑁋 𑀩𑀼𑀤𑁆𑀥𑀘𑀓𑁆𑀔𑀼, 𑀥𑀫𑁆𑀫𑀘𑀓𑁆𑀔𑀼, 𑀲𑀫𑀦𑁆𑀢𑀘𑀓𑁆𑀔𑀼, 𑀤𑀺𑀩𑁆𑀩𑀘𑀓𑁆𑀔𑀼, 𑀧𑀜𑁆𑀜𑀸𑀘𑀓𑁆𑀔𑀽𑀢𑀺. 𑀢𑁂𑀲𑀼 𑀩𑀼𑀤𑁆𑀥𑀘𑀓𑁆𑀔𑀼 𑀦𑀸𑀫 𑀆𑀲𑀬𑀸𑀦𑀼𑀲𑀬𑀜𑀸𑀡𑀜𑁆𑀘𑁂𑀯 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀜𑁆𑀘, 𑀬𑀁 𑁋 ‘‘𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑁄’’𑀢𑀺 (𑀫𑀳𑀸𑀯. 𑁯; 𑀫. 𑀦𑀺. 𑁧.𑁨𑁮𑁩; 𑁨.𑁩𑁩𑁮) 𑀆𑀕𑀢𑀁. 𑀥𑀫𑁆𑀫𑀘𑀓𑁆𑀔𑀼 𑀦𑀸𑀫 𑀳𑁂𑀝𑁆𑀞𑀺𑀫𑀸 𑀢𑀬𑁄 𑀫𑀕𑁆𑀕𑀸 𑀢𑀻𑀡𑀺 𑀘 𑀨𑀮𑀸𑀦𑀺, 𑀬𑀁 𑁋 ‘‘𑀯𑀺𑀭𑀚𑀁 𑀯𑀻𑀢𑀫𑀮𑀁 𑀥𑀫𑁆𑀫𑀘𑀓𑁆𑀔𑀼𑀁 𑀉𑀤𑀧𑀸𑀤𑀻’’𑀢𑀺 (𑀫𑀳𑀸𑀯. 𑁧𑁬; 𑀫. 𑀦𑀺. 𑁨.𑁩𑁯𑁫) 𑀆𑀕𑀢𑀁. 𑀲𑀫𑀦𑁆𑀢𑀘𑀓𑁆𑀔𑀼 𑀦𑀸𑀫 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀬𑀁 𑁋 ‘‘𑀧𑀸𑀲𑀸𑀤𑀫𑀸𑀭𑀼𑀬𑁆𑀳 𑀲𑀫𑀦𑁆𑀢𑀘𑀓𑁆𑀔𑀽’’𑀢𑀺 (𑀫𑀳𑀸𑀯. 𑁮; 𑀫. 𑀦𑀺. 𑁧.𑁨𑁮𑁨; 𑁨.𑁩𑁩𑁮) 𑀆𑀕𑀢𑀁. 𑀤𑀺𑀩𑁆𑀩𑀘𑀓𑁆𑀔𑀼 𑀦𑀸𑀫 𑀆𑀮𑁄𑀓𑀨𑀭𑀡𑁂𑀦 𑀉𑀧𑁆𑀧𑀦𑁆𑀦𑀁 𑀜𑀸𑀡𑀁, 𑀬𑀁 𑁋 ‘‘𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦𑀸’’𑀢𑀺 (𑀧𑀸𑀭𑀸. 𑁧𑁩; 𑀫. 𑀦𑀺. 𑁨.𑁩𑁪𑁧) 𑀆𑀕𑀢𑀁. 𑀧𑀜𑁆𑀜𑀸𑀘𑀓𑁆𑀔𑀼 𑀦𑀸𑀫 𑀘𑀢𑀼𑀲𑀘𑁆𑀘𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁, 𑀬𑀁 𑁋 ‘‘𑀘𑀓𑁆𑀔𑀼𑀁 𑀉𑀤𑀧𑀸𑀤𑀻’’𑀢𑀺 (𑀲. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁫) 𑀆𑀕𑀢𑀁.

𑀫𑀁𑀲𑀘𑀓𑁆𑀔𑀼𑀧𑀺 𑀤𑀼𑀯𑀺𑀥𑀁 𑁋 𑀲𑀲𑀫𑁆𑀪𑀸𑀭𑀘𑀓𑁆𑀔𑀼, 𑀧𑀲𑀸𑀤𑀘𑀓𑁆𑀔𑀽𑀢𑀺. 𑀢𑁂𑀲𑀼 𑀬𑁆𑀯𑀸𑀬𑀁 𑀅𑀓𑁆𑀔𑀺𑀓𑀽𑀧𑀓𑁂 𑀅𑀓𑁆𑀔𑀺𑀧𑀝𑀮𑁂𑀳𑀺 𑀧𑀭𑀺𑀯𑀸𑀭𑀺𑀢𑁄 𑀫𑀁𑀲𑀧𑀺𑀡𑁆𑀟𑁄, 𑀬𑀢𑁆𑀣 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀯𑀡𑁆𑀡𑀕𑀦𑁆𑀥𑀭𑀲𑁄𑀚𑀸 𑀲𑀫𑁆𑀪𑀯𑁄 𑀚𑀻𑀯𑀺𑀢𑀁 𑀪𑀸𑀯𑁄 𑀘𑀓𑁆𑀔𑀼𑀧𑀲𑀸𑀤𑁄 𑀓𑀸𑀬𑀧𑀲𑀸𑀤𑁄𑀢𑀺 𑀲𑀗𑁆𑀔𑁂𑀧𑀢𑁄 𑀢𑁂𑀭𑀲 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀘𑀢𑀲𑁆𑀲𑁄 𑀥𑀸𑀢𑀼𑀬𑁄 𑀯𑀡𑁆𑀡𑀕𑀦𑁆𑀥𑀭𑀲𑁄𑀚𑀸 𑀲𑀫𑁆𑀪𑀯𑁄𑀢𑀺 𑀇𑀫𑁂 𑀦𑀯 𑀘𑀢𑀼𑀲𑀫𑀼𑀝𑁆𑀞𑀸𑀦𑀯𑀲𑁂𑀦 𑀙𑀢𑁆𑀢𑀺𑀁𑀲, 𑀚𑀻𑀯𑀺𑀢𑀁 𑀪𑀸𑀯𑁄 𑀘𑀓𑁆𑀔𑀼𑀧𑀲𑀸𑀤𑁄 𑀓𑀸𑀬𑀧𑀲𑀸𑀤𑁄𑀢𑀺 𑀇𑀫𑁂 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸 𑀢𑀸𑀯 𑀘𑀢𑁆𑀢𑀸𑀭𑁄𑀢𑀺 𑀘𑀢𑁆𑀢𑀸𑀭𑀻𑀲 𑀲𑀫𑁆𑀪𑀸𑀭𑀸 𑀳𑁄𑀦𑁆𑀢𑀺. 𑀇𑀤𑀁 𑀲𑀲𑀫𑁆𑀪𑀸𑀭𑀘𑀓𑁆𑀔𑀼 𑀦𑀸𑀫. 𑀬𑀁 𑀧𑀦𑁂𑀢𑁆𑀣 𑀲𑁂𑀢𑀫𑀡𑁆𑀟𑀮𑀧𑀭𑀺𑀘𑁆𑀙𑀺𑀦𑁆𑀦𑁂𑀦 𑀓𑀡𑁆𑀳𑀫𑀡𑁆𑀟𑀮𑁂𑀦 𑀧𑀭𑀺𑀯𑀸𑀭𑀺𑀢𑁂 𑀤𑀺𑀝𑁆𑀞𑀺𑀫𑀡𑁆𑀟𑀮𑁂 𑀲𑀦𑁆𑀦𑀺𑀯𑀺𑀝𑁆𑀞𑀁 𑀭𑀽𑀧𑀤𑀲𑁆𑀲𑀦𑀲𑀫𑀢𑁆𑀣𑀁 𑀧𑀲𑀸𑀤𑀫𑀢𑁆𑀢𑀁, 𑀇𑀤𑀁 𑀧𑀲𑀸𑀤𑀘𑀓𑁆𑀔𑀼 𑀦𑀸𑀫. 𑀢𑀲𑁆𑀲 𑀢𑀢𑁄 𑀧𑀭𑁂𑀲𑀜𑁆𑀘 𑀲𑁄𑀢𑀸𑀤𑀻𑀦𑀁 𑀯𑀺𑀢𑁆𑀣𑀸𑀭𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀸𑀯.

𑀢𑀢𑁆𑀣 𑀬𑀤𑀺𑀤𑀁 𑀧𑀲𑀸𑀤𑀘𑀓𑁆𑀔𑀼, 𑀢𑀁 𑀕𑀳𑁂𑀢𑁆𑀯𑀸 𑀪𑀕𑀯𑀸 𑁋 𑀘𑀓𑁆𑀔𑀼𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑁋 ‘‘𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀅𑀦𑀺𑀘𑁆𑀘𑀁 𑀉𑀤𑀬𑀩𑁆𑀩𑀬𑀯𑀦𑁆𑀢𑀢𑀸𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀢𑁆𑀣𑀸𑀭𑀓𑀣𑀸 𑀳𑁂𑀝𑁆𑀞𑀸 𑀧𑀓𑀸𑀲𑀺𑀢𑀸𑀬𑁂𑀯. 𑀲𑁄𑀢𑀫𑁆𑀧𑀺 𑀧𑀲𑀸𑀤𑀲𑁄𑀢𑀫𑁂𑀯 𑀅𑀥𑀺𑀧𑁆𑀧𑁂𑀢𑀁, 𑀢𑀣𑀸 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸. 𑀫𑀦𑁄𑀢𑀺 𑀢𑁂𑀪𑀽𑀫𑀓𑀲𑀫𑁆𑀫𑀲𑀦𑀘𑀸𑀭𑀘𑀺𑀢𑁆𑀢𑀁. 𑀇𑀢𑀺 𑀇𑀤𑀁 𑀲𑀼𑀢𑁆𑀢𑀁 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑁂𑀲𑀼 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀓𑀣𑀺𑀢𑁂 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑁂𑀦 𑀯𑀼𑀢𑁆𑀢𑀁.

𑁨-𑁩. 𑀅𑀚𑁆𑀛𑀢𑁆𑀢𑀤𑀼𑀓𑁆𑀔𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨-𑁩. 𑀤𑀼𑀢𑀺𑀬𑀁 𑀤𑁆𑀯𑁂 𑀮𑀓𑁆𑀔𑀡𑀸𑀦𑀺, 𑀢𑀢𑀺𑀬𑀁 𑀏𑀓𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑁆𑀯𑀸 𑀓𑀣𑀺𑀢𑁂 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑁂𑀦 𑀯𑀼𑀢𑁆𑀢𑀁. 𑀲𑁂𑀲𑀸𑀦𑀺 𑀧𑀦 𑀢𑁂𑀳𑀺 𑀲𑀮𑁆𑀮𑀓𑁆𑀔𑀺𑀢𑀸𑀦𑀺 𑀯𑀸 𑀏𑀢𑁆𑀢𑀓𑁂𑀦𑁂𑀯 𑀯𑀸 𑀲𑀮𑁆𑀮𑀓𑁆𑀔𑁂𑀲𑁆𑀲𑀦𑁆𑀢𑀻𑀢𑀺.

𑁪-𑁬. 𑀩𑀸𑀳𑀺𑀭𑀸𑀦𑀺𑀘𑁆𑀘𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪-𑁬. 𑀘𑀢𑀼𑀢𑁆𑀣𑁂 𑀭𑀽𑀧𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀸 𑀘𑀢𑀼𑀲𑀫𑀼𑀝𑁆𑀞𑀸𑀦𑀸, 𑀲𑀤𑁆𑀤𑁄 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑁄, 𑀥𑀫𑁆𑀫𑀸𑀢𑀺 𑀢𑁂𑀪𑀽𑀫𑀓𑀥𑀫𑁆𑀫𑀸𑀭𑀫𑁆𑀫𑀡𑀁. 𑀇𑀤𑀫𑁆𑀧𑀺 𑀩𑀸𑀳𑀺𑀭𑁂𑀲𑀼 𑀙𑀲𑀼 𑀆𑀬𑀢𑀦𑁂𑀲𑀼 𑀢𑀺𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑁆𑀯𑀸 𑀓𑀣𑀺𑀢𑁂 𑀩𑀼𑀚𑁆𑀛𑀦𑀓𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀜𑁆𑀘𑀫𑁂 𑀙𑀝𑁆𑀞𑁂 𑀘 𑀤𑀼𑀢𑀺𑀬𑀢𑀢𑀺𑀬𑁂𑀲𑀼 𑀯𑀼𑀢𑁆𑀢𑀲𑀤𑀺𑀲𑁄𑀯 𑀦𑀬𑁄.

𑁭-𑁧𑁨. 𑀅𑀚𑁆𑀛𑀢𑁆𑀢𑀸𑀦𑀺𑀘𑁆𑀘𑀸𑀢𑀻𑀢𑀸𑀦𑀸𑀕𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭-𑁧𑁨. 𑀲𑀢𑁆𑀢𑀫𑀸𑀤𑀻𑀦𑀺 𑀅𑀢𑀻𑀢𑀸𑀦𑀸𑀕𑀢𑁂𑀲𑀼 𑀘𑀓𑁆𑀔𑀸𑀤𑀻𑀲𑀼 𑀅𑀦𑀺𑀘𑁆𑀘𑀮𑀓𑁆𑀔𑀡𑀸𑀤𑀻𑀦𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀩𑀮𑀯𑀕𑀸𑀳𑁂𑀦 𑀓𑀺𑀮𑀫𑀦𑁆𑀢𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀅𑀦𑀺𑀘𑁆𑀘𑀯𑀕𑁆𑀕𑁄 𑀧𑀞𑀫𑁄.

𑁨. 𑀬𑀫𑀓𑀯𑀕𑁆𑀕𑁄

𑁧-𑁪. 𑀧𑀞𑀫𑀧𑀼𑀩𑁆𑀩𑁂𑀲𑀫𑁆𑀩𑁄𑀥𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁩-𑁧𑁬. 𑀬𑀫𑀓𑀯𑀕𑁆𑀕𑀲𑁆𑀲 𑀧𑀞𑀫𑀤𑀼𑀢𑀺𑀬𑁂𑀲𑀼 𑀅𑀚𑁆𑀛𑀢𑁆𑀢𑀺𑀓𑀸𑀦𑀦𑁆𑀢𑀺 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑀯𑀲𑁂𑀦 𑀅𑀚𑁆𑀛𑀢𑁆𑀢𑀺𑀓𑀸𑀦𑀁. 𑀲𑁄 𑀧𑀦 𑀦𑁂𑀲𑀁 𑀅𑀚𑁆𑀛𑀢𑁆𑀢𑀺𑀓𑀪𑀸𑀯𑁄 𑀙𑀦𑁆𑀤𑀭𑀸𑀕𑀲𑁆𑀲 𑀅𑀥𑀺𑀫𑀢𑁆𑀢𑀩𑀮𑀯𑀢𑀸𑀬 𑀯𑁂𑀤𑀺𑀢𑀩𑁆𑀩𑁄. 𑀫𑀦𑀼𑀲𑁆𑀲𑀸𑀦𑀜𑁆𑀳𑀺 𑀅𑀦𑁆𑀢𑁄𑀖𑀭𑀁 𑀯𑀺𑀬 𑀙 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀦𑀺, 𑀖𑀭𑀽𑀧𑀘𑀸𑀭𑀁 𑀯𑀺𑀬 𑀙 𑀩𑀸𑀳𑀺𑀭𑀸𑀬𑀢𑀦𑀸𑀦𑀺. 𑀬𑀣𑀸 𑀦𑁂𑀲𑀁 𑀧𑀼𑀢𑁆𑀢𑀤𑀸𑀭𑀥𑀦𑀥𑀜𑁆𑀜𑀧𑀼𑀡𑁆𑀡𑁂 𑀅𑀦𑁆𑀢𑁄𑀖𑀭𑁂 𑀙𑀦𑁆𑀤𑀭𑀸𑀕𑁄 𑀅𑀥𑀺𑀫𑀢𑁆𑀢𑀩𑀮𑀯𑀸 𑀳𑁄𑀢𑀺, 𑀢𑀢𑁆𑀣 𑀓𑀲𑁆𑀲𑀘𑀺 𑀧𑀯𑀺𑀲𑀺𑀢𑀼𑀁 𑀦 𑀤𑁂𑀦𑁆𑀢𑀺, 𑀅𑀧𑁆𑀧𑀫𑀢𑁆𑀢𑁂𑀦 𑀪𑀸𑀚𑀦𑀲𑀤𑁆𑀤𑀫𑀢𑁆𑀢𑁂𑀦𑀸𑀧𑀺 ‘‘𑀓𑀺𑀁 𑀏𑀢’’𑀦𑁆𑀢𑀺? 𑀯𑀢𑁆𑀢𑀸𑀭𑁄 𑀪𑀯𑀦𑁆𑀢𑀺. 𑀏𑀯𑀫𑁂𑀯𑀁 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑁂𑀲𑀼 𑀆𑀬𑀢𑀦𑁂𑀲𑀼 𑀅𑀥𑀺𑀫𑀢𑁆𑀢𑀩𑀮𑀯𑀙𑀦𑁆𑀤𑀭𑀸𑀕𑁄𑀢𑀺. 𑀇𑀢𑀺 𑀇𑀫𑀸𑀬 𑀙𑀦𑁆𑀤𑀭𑀸𑀕𑀩𑀮𑀯𑀢𑀸𑀬 𑀢𑀸𑀦𑀺 ‘‘𑀅𑀚𑁆𑀛𑀢𑁆𑀢𑀺𑀓𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺. 𑀖𑀭𑀽𑀧𑀘𑀸𑀭𑁂 𑀧𑀦 𑀦𑁄 𑀢𑀣𑀸 𑀩𑀮𑀯𑀸 𑀳𑁄𑀢𑀺, 𑀢𑀢𑁆𑀣 𑀘𑀭𑀦𑁆𑀢𑁂 𑀫𑀦𑀼𑀲𑁆𑀲𑁂𑀧𑀺 𑀘𑀢𑀼𑀧𑁆𑀧𑀤𑀸𑀦𑀺𑀧𑀺 𑀦 𑀲𑀳𑀲𑀸 𑀦𑀺𑀯𑀸𑀭𑁂𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 𑀦 𑀦𑀺𑀯𑀸𑀭𑁂𑀦𑁆𑀢𑀺, 𑀅𑀦𑀺𑀘𑁆𑀙𑀦𑁆𑀢𑀸 𑀧𑀦 𑀧𑀲𑀼𑀧𑀘𑁆𑀙𑀺𑀫𑀢𑁆𑀢𑀫𑁆𑀧𑀺 𑀕𑀳𑀺𑀢𑀼𑀁 𑀦 𑀤𑁂𑀦𑁆𑀢𑀺. 𑀇𑀢𑀺 𑀦𑁂𑀲𑀁 𑀢𑀢𑁆𑀣 𑀦 𑀅𑀥𑀺𑀫𑀢𑁆𑀢𑀩𑀮𑀯𑀙𑀦𑁆𑀤𑀭𑀸𑀕𑁄 𑀳𑁄𑀢𑀺. 𑀭𑀽𑀧𑀸𑀤𑀻𑀲𑀼𑀧𑀺 𑀢𑀣𑁂𑀯 𑀦 𑀅𑀥𑀺𑀫𑀢𑁆𑀢𑀩𑀮𑀯𑀙𑀦𑁆𑀤𑀭𑀸𑀕𑁄, 𑀢𑀲𑁆𑀫𑀸 𑀢𑀸𑀦𑀺 ‘‘𑀩𑀸𑀳𑀺𑀭𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀸𑀯. 𑀲𑁂𑀲𑀁 𑀤𑁆𑀯𑀻𑀲𑀼𑀧𑀺 𑀲𑀼𑀢𑁆𑀢𑁂𑀲𑀼 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀢𑀣𑀸 𑀢𑀢𑀺𑀬𑀘𑀢𑀼𑀢𑁆𑀣𑁂𑀲𑀼.

𑁫-𑁬. 𑀧𑀞𑀫𑀦𑁄𑀘𑁂𑀅𑀲𑁆𑀲𑀸𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁭-𑁧𑁮. 𑀧𑀜𑁆𑀘𑀫𑁂 𑀦𑀺𑀲𑁆𑀲𑀝𑀸𑀢𑀺 𑀦𑀺𑀓𑁆𑀔𑀦𑁆𑀢𑀸. 𑀯𑀺𑀲𑀜𑁆𑀜𑀼𑀢𑁆𑀢𑀸𑀢𑀺 𑀦𑁄𑀲𑀁𑀬𑀼𑀢𑁆𑀢𑀸. 𑀯𑀺𑀧𑁆𑀧𑀫𑀼𑀢𑁆𑀢𑀸𑀢𑀺 𑀦𑁄 𑀅𑀥𑀺𑀫𑀼𑀢𑁆𑀢𑀸 𑀯𑀺𑀫𑀭𑀺𑀬𑀸𑀤𑀻𑀓𑀢𑁂𑀦 𑀘𑁂𑀢𑀲𑀸𑀢𑀺 𑀦𑀺𑀫𑁆𑀫𑀭𑀺𑀬𑀸𑀤𑀻𑀓𑀢𑁂𑀦 𑀘𑁂𑀢𑀲𑀸. 𑀬𑀜𑁆𑀳𑀺 𑀓𑀺𑀮𑁂𑀲𑀚𑀸𑀢𑀁 𑀯𑀸 𑀯𑀝𑁆𑀝𑀁 𑀯𑀸 𑀅𑀧𑁆𑀧𑀳𑀻𑀦𑀁 𑀳𑁄𑀢𑀺, 𑀢𑁂𑀦 𑀲𑁂𑀔𑀸𑀦𑀁 𑀘𑀺𑀢𑁆𑀢𑀁 𑀲𑀫𑀭𑀺𑀬𑀸𑀤𑀻𑀓𑀢𑀁 𑀦𑀸𑀫. 𑀬𑀁 𑀧𑀳𑀻𑀦𑀁, 𑀢𑁂𑀦 𑀯𑀺𑀫𑀭𑀺𑀬𑀸𑀤𑀻𑀓𑀢𑀁. 𑀇𑀥 𑀧𑀦 𑀲𑀩𑁆𑀩𑀲𑁄 𑀓𑀺𑀮𑁂𑀲𑀸𑀦𑀜𑁆𑀘𑁂𑀯 𑀯𑀝𑁆𑀝𑀲𑁆𑀲 𑀘 𑀧𑀳𑀻𑀦𑀢𑁆𑀢𑀸 𑀯𑀺𑀫𑀭𑀺𑀬𑀸𑀤𑀻𑀓𑀢𑁂𑀦 𑀓𑀺𑀮𑁂𑀲𑀯𑀝𑁆𑀝𑀫𑀭𑀺𑀬𑀸𑀤𑀁 𑀅𑀢𑀺𑀓𑁆𑀓𑀦𑁆𑀢𑁂𑀦 𑀘𑀺𑀢𑁆𑀢𑁂𑀦 𑀯𑀺𑀳𑀭𑀺𑀁𑀲𑀽𑀢𑀺 𑀅𑀢𑁆𑀣𑁄. 𑀙𑀝𑁆𑀞𑁂𑀧𑀺 𑀏𑀲𑁂𑀯 𑀦𑀬𑁄. 𑀙𑀲𑀼𑀧𑀺 𑀧𑀦𑁂𑀢𑁂𑀲𑀼 𑀲𑀼𑀢𑁆𑀢𑁂𑀲𑀼 𑀘𑀢𑀼𑀲𑀘𑁆𑀘𑀫𑁂𑀯 𑀓𑀣𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁭-𑁧𑁦. 𑀧𑀞𑀫𑀸𑀪𑀺𑀦𑀦𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁯-𑁨𑁨. 𑀲𑀢𑁆𑀢𑀫𑀸𑀤𑀻𑀲𑀼 𑀘𑀢𑀽𑀲𑀼 𑀯𑀝𑁆𑀝𑀯𑀺𑀯𑀝𑁆𑀝𑀫𑁂𑀯 𑀓𑀣𑀺𑀢𑀁. 𑀅𑀦𑀼𑀧𑀼𑀩𑁆𑀩𑀓𑀣𑀸 𑀧𑀦 𑀦𑁂𑀲𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀬𑀫𑀓𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀲𑀩𑁆𑀩𑀯𑀕𑁆𑀕𑁄

𑁧. 𑀲𑀩𑁆𑀩𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩. 𑀲𑀩𑁆𑀩𑀯𑀕𑁆𑀕𑀲𑁆𑀲 𑀧𑀞𑀫𑁂 𑀲𑀩𑁆𑀩𑀁 𑀯𑁄, 𑀪𑀺𑀓𑁆𑀔𑀯𑁂𑀢𑀺 𑀲𑀩𑁆𑀩𑀁 𑀦𑀸𑀫 𑀘𑀢𑀼𑀩𑁆𑀩𑀺𑀥𑀁 𑁋 𑀲𑀩𑁆𑀩𑀲𑀩𑁆𑀩𑀁, 𑀆𑀬𑀢𑀦𑀲𑀩𑁆𑀩𑀁, 𑀲𑀓𑁆𑀓𑀸𑀬𑀲𑀩𑁆𑀩𑀁, 𑀧𑀤𑁂𑀲𑀲𑀩𑁆𑀩𑀦𑁆𑀢𑀺. 𑀢𑀢𑁆𑀣 𑁋

‘‘𑀦 𑀢𑀲𑁆𑀲 𑀅𑀤𑁆𑀤𑀺𑀝𑁆𑀞𑀫𑀺𑀥𑀅𑀢𑁆𑀣𑀺 𑀓𑀺𑀜𑁆𑀘𑀺,

𑀅𑀣𑁄 𑀅𑀯𑀺𑀜𑁆𑀜𑀸𑀢𑀫𑀚𑀸𑀦𑀺𑀢𑀩𑁆𑀩𑀁;

𑀲𑀩𑁆𑀩𑀁 𑀅𑀪𑀺𑀜𑁆𑀜𑀸𑀲𑀺 𑀬𑀤𑀢𑁆𑀣𑀺 𑀦𑁂𑀬𑁆𑀬𑀁,

𑀢𑀣𑀸𑀕𑀢𑁄 𑀢𑁂𑀦 𑀲𑀫𑀦𑁆𑀢𑀘𑀓𑁆𑀔𑀽’’𑀢𑀺. (𑀫𑀳𑀸𑀦𑀺. 𑁧𑁫𑁬; 𑀘𑀽𑀴𑀦𑀺. 𑀥𑁄𑀢𑀓𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑁩𑁨; 𑀧𑀝𑀺. 𑀫. 𑁧.𑁧𑁨𑁧) 𑁋

𑀇𑀤𑀁 𑀲𑀩𑁆𑀩𑀲𑀩𑁆𑀩𑀁 𑀦𑀸𑀫. ‘‘𑀲𑀩𑁆𑀩𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣𑀸’’𑀢𑀺 (𑀲𑀁. 𑀦𑀺. 𑁪.𑁨𑁪) 𑀇𑀤𑀁 𑀆𑀬𑀢𑀦𑀲𑀩𑁆𑀩𑀁 𑀦𑀸𑀫. ‘‘𑀲𑀩𑁆𑀩𑀥𑀫𑁆𑀫𑀫𑀽𑀮𑀧𑀭𑀺𑀬𑀸𑀬𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 (𑀫. 𑀦𑀺. 𑁧.𑁧) 𑀇𑀤𑀁 𑀲𑀓𑁆𑀓𑀸𑀬𑀲𑀩𑁆𑀩𑀁 𑀦𑀸𑀫. ‘‘𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀸 𑀧𑀦 𑀧𑀞𑀫𑀲𑀫𑀦𑁆𑀦𑀸𑀳𑀸𑀭𑁄 𑀉𑀧𑁆𑀧𑀚𑁆𑀚𑀢𑀺 𑀘𑀺𑀢𑁆𑀢𑀁 𑀫𑀦𑁄 𑀫𑀸𑀦𑀲𑀁…𑀧𑁂… 𑀢𑀚𑁆𑀚𑀸𑀫𑀦𑁄𑀥𑀸𑀢𑀽’’𑀢𑀺 𑀇𑀤𑀁 𑀧𑀤𑁂𑀲𑀲𑀩𑁆𑀩𑀁 𑀦𑀸𑀫. 𑀇𑀢𑀺 𑀧𑀜𑁆𑀘𑀸𑀭𑀫𑁆𑀫𑀡𑀫𑀢𑁆𑀢𑀁 𑀧𑀤𑁂𑀲𑀲𑀩𑁆𑀩𑀁. 𑀢𑁂𑀪𑀽𑀫𑀓𑀥𑀫𑁆𑀫𑀸 𑀲𑀓𑁆𑀓𑀸𑀬𑀲𑀩𑁆𑀩𑀁. 𑀘𑀢𑀼𑀪𑀽𑀫𑀓𑀥𑀫𑁆𑀫𑀸 𑀆𑀬𑀢𑀦𑀲𑀩𑁆𑀩𑀁. 𑀬𑀁𑀓𑀺𑀜𑁆𑀘𑀺 𑀦𑁂𑀬𑁆𑀬𑀁 𑀲𑀩𑁆𑀩𑀲𑀩𑁆𑀩𑀁. 𑀧𑀤𑁂𑀲𑀲𑀩𑁆𑀩𑀁 𑀲𑀓𑁆𑀓𑀸𑀬𑀲𑀩𑁆𑀩𑀁 𑀦 𑀧𑀸𑀧𑀼𑀡𑀸𑀢𑀺, 𑀲𑀓𑁆𑀓𑀸𑀬𑀲𑀩𑁆𑀩𑀁 𑀆𑀬𑀢𑀦𑀲𑀩𑁆𑀩𑀁 𑀦 𑀧𑀸𑀧𑀼𑀡𑀸𑀢𑀺, 𑀆𑀬𑀢𑀦𑀲𑀩𑁆𑀩𑀁 𑀲𑀩𑁆𑀩𑀲𑀩𑁆𑀩𑀁 𑀦 𑀧𑀸𑀧𑀼𑀡𑀸𑀢𑀺. 𑀓𑀲𑁆𑀫𑀸? 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀅𑀬𑀁 𑀦𑀸𑀫 𑀥𑀫𑁆𑀫𑁄 𑀆𑀭𑀫𑁆𑀫𑀡𑀁 𑀦 𑀳𑁄𑀢𑀻𑀢𑀺 𑀦𑀢𑁆𑀣𑀺𑀢𑀸𑀬. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀆𑀬𑀢𑀦𑀲𑀩𑁆𑀩𑀁 𑀅𑀥𑀺𑀧𑁆𑀧𑁂𑀢𑀁.

𑀧𑀘𑁆𑀘𑀓𑁆𑀔𑀸𑀬𑀸𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸. 𑀯𑀸𑀘𑀸𑀯𑀢𑁆𑀣𑀼𑀓𑀫𑁂𑀯𑀲𑁆𑀲𑀸𑀢𑀺, 𑀯𑀸𑀘𑀸𑀬 𑀯𑀢𑁆𑀢𑀩𑁆𑀩𑀯𑀢𑁆𑀣𑀼𑀫𑀢𑁆𑀢𑀓𑀫𑁂𑀯 𑀪𑀯𑁂𑀬𑁆𑀬. 𑀇𑀫𑀸𑀦𑀺 𑀧𑀦 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀬𑀁 𑀦𑀸𑀫 𑀅𑀜𑁆𑀜𑁄 𑀲𑀪𑀸𑀯𑀥𑀫𑁆𑀫𑁄 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬. 𑀧𑀼𑀝𑁆𑀞𑁄 𑀘 𑀦 𑀲𑀫𑁆𑀧𑀸𑀬𑁂𑀬𑁆𑀬𑀸𑀢𑀺, ‘‘𑀓𑀢𑀫𑀁 𑀅𑀜𑁆𑀜𑀁 𑀲𑀩𑁆𑀩𑀁 𑀦𑀸𑀫𑀸’’𑀢𑀺? 𑀧𑀼𑀘𑁆𑀙𑀺𑀢𑁄, ‘‘𑀇𑀤𑀁 𑀦𑀸𑀫𑀸’’𑀢𑀺 𑀯𑀘𑀦𑁂𑀦 𑀲𑀫𑁆𑀧𑀸𑀤𑁂𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬. 𑀯𑀺𑀖𑀸𑀢𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀤𑀼𑀓𑁆𑀔𑀁 𑀆𑀧𑀚𑁆𑀚𑁂𑀬𑁆𑀬. 𑀬𑀣𑀸 𑀢𑀁, 𑀪𑀺𑀓𑁆𑀔𑀯𑁂, 𑀅𑀯𑀺𑀲𑀬𑀲𑁆𑀫𑀺𑀦𑁆𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀬𑀣𑀸𑀢𑀺 𑀓𑀸𑀭𑀡𑀯𑀘𑀦𑀁, 𑀬𑀲𑁆𑀫𑀸 𑀅𑀯𑀺𑀲𑀬𑁂 𑀧𑀼𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀅𑀯𑀺𑀲𑀬𑀲𑁆𑀫𑀺𑀜𑁆𑀳𑀺 𑀲𑀢𑁆𑀢𑀸𑀦𑀁 𑀯𑀺𑀖𑀸𑀢𑁄𑀯 𑀳𑁄𑀢𑀺, 𑀓𑀽𑀝𑀸𑀕𑀸𑀭𑀫𑀢𑁆𑀢𑀁 𑀲𑀺𑀮𑀁 𑀲𑀻𑀲𑁂𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀫𑁆𑀪𑀻𑀭𑁂 𑀉𑀤𑀓𑁂 𑀢𑀭𑀡𑀁 𑀅𑀯𑀺𑀲𑀬𑁄, 𑀢𑀣𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀦𑀁 𑀆𑀓𑀟𑁆𑀠𑀺𑀢𑁆𑀯𑀸 𑀧𑀸𑀢𑀦𑀁, 𑀢𑀲𑁆𑀫𑀺𑀁 𑀅𑀯𑀺𑀲𑀬𑁂 𑀯𑀸𑀬𑀫𑀦𑁆𑀢𑁄 𑀯𑀺𑀖𑀸𑀢𑀫𑁂𑀯 𑀆𑀧𑀚𑁆𑀚𑀢𑀺, 𑀏𑀯𑀁 𑀇𑀫𑀲𑁆𑀫𑀺𑀫𑁆𑀧𑀺 𑀅𑀯𑀺𑀲𑀬𑁂 𑀯𑀺𑀖𑀸𑀢𑀫𑁂𑀯 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁨. 𑀧𑀳𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪. 𑀤𑀼𑀢𑀺𑀬𑁂 𑀲𑀩𑁆𑀩𑀧𑁆𑀧𑀳𑀸𑀦𑀸𑀬𑀸𑀢𑀺 𑀲𑀩𑁆𑀩𑀲𑁆𑀲 𑀧𑀳𑀸𑀦𑀸𑀬. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀯𑁂𑀤𑀬𑀺𑀢𑀦𑁆𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀁 𑀫𑀽𑀮𑀧𑀘𑁆𑀘𑀬𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀸 𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀯𑁄𑀝𑁆𑀞𑀩𑁆𑀩𑀦𑀚𑀯𑀦𑀯𑁂𑀤𑀦𑀸. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀬 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀲𑁄𑀢𑀤𑁆𑀯𑀸𑀭𑀸𑀤𑀺𑀯𑁂𑀤𑀦𑀸𑀧𑀘𑁆𑀘𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀧𑀦 𑀫𑀦𑁄𑀢𑀺 𑀪𑀯𑀗𑁆𑀕𑀘𑀺𑀢𑁆𑀢𑀁. 𑀥𑀫𑁆𑀫𑀸𑀢𑀺 𑀆𑀭𑀫𑁆𑀫𑀡𑀁. 𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺 𑀲𑀳𑀸𑀯𑀚𑁆𑀚𑀦𑀓𑀚𑀯𑀦𑀁. 𑀫𑀦𑁄𑀲𑀫𑁆𑀨𑀲𑁆𑀲𑁄𑀢𑀺 𑀪𑀯𑀗𑁆𑀕𑀲𑀳𑀚𑀸𑀢𑁄 𑀲𑀫𑁆𑀨𑀲𑁆𑀲𑁄. 𑀯𑁂𑀤𑀬𑀺𑀢𑀦𑁆𑀢𑀺 𑀲𑀳𑀸𑀯𑀚𑁆𑀚𑀦𑀯𑁂𑀤𑀦𑀸𑀬 𑀚𑀯𑀦𑀯𑁂𑀤𑀦𑀸. 𑀪𑀯𑀗𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀬 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀆𑀯𑀚𑁆𑀚𑀦𑀁 𑀪𑀯𑀗𑁆𑀕𑀢𑁄 𑀅𑀫𑁄𑀘𑁂𑀢𑁆𑀯𑀸 𑀫𑀦𑁄𑀢𑀺 𑀲𑀳𑀸𑀯𑀚𑁆𑀚𑀦𑁂𑀦 𑀪𑀯𑀗𑁆𑀕𑀁 𑀤𑀝𑁆𑀞𑀩𑁆𑀩𑀁. 𑀥𑀫𑁆𑀫𑀸𑀢𑀺 𑀆𑀭𑀫𑁆𑀫𑀡𑀁. 𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺 𑀚𑀯𑀦𑀯𑀺𑀜𑁆𑀜𑀸𑀡𑀁. 𑀫𑀦𑁄𑀲𑀫𑁆𑀨𑀲𑁆𑀲𑁄𑀢𑀺 𑀪𑀯𑀗𑁆𑀕𑀲𑀳𑀚𑀸𑀢𑁄 𑀲𑀫𑁆𑀨𑀲𑁆𑀲𑁄. 𑀯𑁂𑀤𑀬𑀺𑀢𑀦𑁆𑀢𑀺 𑀚𑀯𑀦𑀲𑀳𑀚𑀸𑀢𑀸 𑀯𑁂𑀤𑀦𑀸. 𑀲𑀳𑀸𑀯𑀚𑁆𑀚𑀦𑁂𑀦 𑀪𑀯𑀗𑁆𑀕𑀲𑀳𑀚𑀸𑀢𑀸𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀬𑀸 𑀧𑀦𑁂𑀢𑁆𑀣 𑀤𑁂𑀲𑀦𑀸 𑀅𑀦𑀼𑀲𑀺𑀝𑁆𑀞𑀺𑀆𑀡𑀸, 𑀅𑀬𑀁 𑀧𑀡𑁆𑀡𑀢𑁆𑀢𑀺 𑀦𑀸𑀫𑀸𑀢𑀺.

𑁩. 𑀅𑀪𑀺𑀜𑁆𑀜𑀸𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫. 𑀢𑀢𑀺𑀬𑁂 𑀲𑀩𑁆𑀩𑀁 𑀅𑀪𑀺𑀜𑁆𑀜𑀸 𑀧𑀭𑀺𑀜𑁆𑀜𑀸 𑀧𑀳𑀸𑀦𑀸𑀬𑀸𑀢𑀺 𑀲𑀩𑁆𑀩𑀁 𑀅𑀪𑀺𑀚𑀸𑀦𑀺𑀢𑁆𑀯𑀸 𑀧𑀭𑀺𑀚𑀸𑀦𑀺𑀢𑁆𑀯𑀸 𑀧𑀚𑀳𑀦𑀢𑁆𑀣𑀸𑀬. 𑀅𑀪𑀺𑀜𑁆𑀜𑀸 𑀧𑀭𑀺𑀜𑁆𑀜𑀸 𑀧𑀳𑀸𑀢𑀩𑁆𑀩𑀦𑁆𑀢𑀺 𑀅𑀪𑀺𑀚𑀸𑀦𑀺𑀢𑁆𑀯𑀸 𑀧𑀭𑀺𑀚𑀸𑀦𑀺𑀢𑁆𑀯𑀸 𑀧𑀳𑀸𑀢𑀩𑁆𑀩𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁪. 𑀧𑀞𑀫𑀅𑀧𑀭𑀺𑀚𑀸𑀦𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬. 𑀘𑀢𑀼𑀢𑁆𑀣𑁂 𑀅𑀦𑀪𑀺𑀚𑀸𑀦𑀁 𑀅𑀧𑀭𑀺𑀚𑀸𑀦𑀁 𑀅𑀯𑀺𑀭𑀸𑀚𑀬𑀁 𑀅𑀧𑁆𑀧𑀚𑀳𑀦𑁆𑀢𑀺 𑀅𑀦𑀪𑀺𑀚𑀸𑀦𑀦𑁆𑀢𑁄 𑀅𑀧𑀭𑀺𑀚𑀸𑀦𑀦𑁆𑀢𑁄 𑀅𑀯𑀺𑀭𑀸𑀚𑁂𑀦𑁆𑀢𑁄 𑀅𑀧𑁆𑀧𑀚𑀳𑀦𑁆𑀢𑁄. 𑀏𑀢𑁆𑀣 𑀘 𑀅𑀯𑀺𑀭𑀸𑀚𑁂𑀦𑁆𑀢𑁄𑀢𑀺 𑀅𑀯𑀺𑀕𑀘𑁆𑀙𑀸𑀧𑁂𑀦𑁆𑀢𑁄. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀢𑀺𑀲𑁆𑀲𑁄𑀧𑀺 𑀧𑀭𑀺𑀜𑁆𑀜𑀸 𑀓𑀣𑀺𑀢𑀸 𑀳𑁄𑀦𑁆𑀢𑀺. ‘‘𑀅𑀪𑀺𑀚𑀸𑀦’’𑀦𑁆𑀢𑀺 𑀳𑀺 𑀯𑀘𑀦𑁂𑀦 𑀜𑀸𑀢𑀧𑀭𑀺𑀜𑁆𑀜𑀸 𑀓𑀣𑀺𑀢𑀸, ‘‘𑀧𑀭𑀺𑀚𑀸𑀦’’𑀦𑁆𑀢𑀺 𑀯𑀘𑀦𑁂𑀦 𑀢𑀻𑀭𑀡𑀧𑀭𑀺𑀜𑁆𑀜𑀸, ‘‘𑀯𑀺𑀭𑀸𑀚𑀬𑀁 𑀧𑀚𑀳’’𑀦𑁆𑀢𑀺 𑀤𑁆𑀯𑀻𑀳𑀺 𑀧𑀳𑀸𑀦𑀧𑀭𑀺𑀜𑁆𑀜𑀸𑀢𑀺.

𑁫. 𑀤𑀼𑀢𑀺𑀬𑀅𑀧𑀭𑀺𑀚𑀸𑀦𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭. 𑀧𑀜𑁆𑀘𑀫𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑀸 𑀥𑀫𑁆𑀫𑀸𑀢𑀺 𑀳𑁂𑀝𑁆𑀞𑀸 𑀕𑀳𑀺𑀢𑀭𑀽𑀧𑀫𑁂𑀯 𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀳𑁂𑀝𑁆𑀞𑀸 𑀯𑀸 𑀆𑀧𑀸𑀣𑀕𑀢𑀁 𑀕𑀳𑀺𑀢𑀁, 𑀇𑀥 𑀅𑀦𑀸𑀧𑀸𑀣𑀕𑀢𑀁. 𑀇𑀤𑀁 𑀧𑀦𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁 𑁋 𑀳𑁂𑀝𑁆𑀞𑀸 𑀆𑀧𑀸𑀣𑀕𑀢𑀫𑁆𑀧𑀺 𑀅𑀦𑀸𑀧𑀸𑀣𑀕𑀢𑀫𑁆𑀧𑀺 𑀕𑀳𑀺𑀢𑀫𑁂𑀯, 𑀇𑀥 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀢𑀬𑁄 𑀔𑀦𑁆𑀥𑀸. 𑀢𑁂 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀲𑀳 𑀯𑀺𑀜𑁆𑀜𑀸𑀢𑀩𑁆𑀩𑀢𑁆𑀢𑀸 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀸. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁬. 𑀆𑀤𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮. 𑀙𑀝𑁆𑀞𑁂 𑀕𑀬𑀸𑀲𑀻𑀲𑁂𑀢𑀺 𑀕𑀬𑀸𑀕𑀸𑀫𑀲𑁆𑀲 𑀳𑀺 𑀅𑀯𑀺𑀤𑀽𑀭𑁂 𑀕𑀬𑀸𑀢𑀺 𑀏𑀓𑀸 𑀧𑁄𑀓𑁆𑀔𑀭𑀡𑀻𑀧𑀺 𑀅𑀢𑁆𑀣𑀺 𑀦𑀤𑀻𑀧𑀺, 𑀕𑀬𑀸𑀲𑀻𑀲𑀦𑀸𑀫𑀓𑁄 𑀳𑀢𑁆𑀣𑀺𑀓𑀼𑀫𑁆𑀪𑀲𑀤𑀺𑀲𑁄 𑀧𑀺𑀝𑁆𑀞𑀺𑀧𑀸𑀲𑀸𑀡𑁄𑀧𑀺, 𑀬𑀢𑁆𑀣 𑀪𑀺𑀓𑁆𑀔𑀼𑀲𑀳𑀲𑁆𑀲𑀲𑁆𑀲𑀧𑀺 𑀑𑀓𑀸𑀲𑁄 𑀧𑀳𑁄𑀢𑀺, 𑀪𑀕𑀯𑀸 𑀢𑀢𑁆𑀣 𑀯𑀺𑀳𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀕𑀬𑀸𑀲𑀻𑀲𑁂’’𑀢𑀺. 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺 𑀢𑁂𑀲𑀁 𑀲𑀧𑁆𑀧𑀸𑀬𑀥𑀫𑁆𑀫𑀤𑁂𑀲𑀦𑀁 𑀯𑀺𑀘𑀺𑀦𑀺𑀢𑁆𑀯𑀸 𑀢𑀁 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀆𑀫𑀦𑁆𑀢𑁂𑀲𑀺.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀇𑀢𑁄 𑀓𑀺𑀭 𑀤𑁆𑀯𑀸𑀦𑀯𑀼𑀢𑀺𑀓𑀧𑁆𑀧𑁂 𑀫𑀳𑀺𑀦𑁆𑀤𑁄 𑀦𑀸𑀫 𑀭𑀸𑀚𑀸 𑀅𑀳𑁄𑀲𑀺. 𑀢𑀲𑁆𑀲 𑀚𑁂𑀝𑁆𑀞𑀧𑀼𑀢𑁆𑀢𑁄 𑀨𑀼𑀲𑁆𑀲𑁄 𑀦𑀸𑀫. 𑀲𑁄 𑀧𑀽𑀭𑀺𑀢𑀧𑀸𑀭𑀫𑀻 𑀧𑀘𑁆𑀙𑀺𑀫𑀪𑀯𑀺𑀓𑀲𑀢𑁆𑀢𑁄, 𑀧𑀭𑀺𑀧𑀸𑀓𑀕𑀢𑁂 𑀜𑀸𑀡𑁂 𑀩𑁄𑀥𑀺𑀫𑀡𑁆𑀟𑀁 𑀆𑀭𑀼𑀬𑁆𑀳 𑀲𑀩𑁆𑀩𑀜𑁆𑀜𑀼𑀢𑀁 𑀧𑀝𑀺𑀯𑀺𑀚𑁆𑀛𑀺. 𑀭𑀜𑁆𑀜𑁄 𑀓𑀦𑀺𑀝𑁆𑀞𑀧𑀼𑀢𑁆𑀢𑁄 𑀢𑀲𑁆𑀲 𑀅𑀕𑁆𑀕𑀲𑀸𑀯𑀓𑁄 𑀅𑀳𑁄𑀲𑀺, 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀤𑀼𑀢𑀺𑀬𑀲𑀸𑀯𑀓𑁄. 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑁆𑀳𑀁 𑀚𑁂𑀝𑁆𑀞𑀧𑀼𑀢𑁆𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀼𑀤𑁆𑀥𑁄 𑀚𑀸𑀢𑁄, 𑀓𑀦𑀺𑀝𑁆𑀞𑀧𑀼𑀢𑁆𑀢𑁄 𑀅𑀕𑁆𑀕𑀲𑀸𑀯𑀓𑁄, 𑀧𑀼𑀭𑁄𑀳𑀺𑀢𑀧𑀼𑀢𑁆𑀢𑁄 𑀤𑀼𑀢𑀺𑀬𑀲𑀸𑀯𑀓𑁄’’𑀢𑀺. 𑀲𑁄 ‘‘𑀅𑀫𑁆𑀳𑀸𑀓𑀁𑀬𑁂𑀯 𑀩𑀼𑀤𑁆𑀥𑁄, 𑀅𑀫𑁆𑀳𑀸𑀓𑀁 𑀥𑀫𑁆𑀫𑁄, 𑀅𑀫𑁆𑀳𑀸𑀓𑀁 𑀲𑀗𑁆𑀖𑁄’’𑀢𑀺 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀯𑀺𑀳𑀸𑀭𑀤𑁆𑀯𑀸𑀭𑀓𑁄𑀝𑁆𑀞𑀓𑀢𑁄 𑀬𑀸𑀯 𑀅𑀢𑁆𑀢𑀦𑁄 𑀖𑀭𑀤𑁆𑀯𑀸𑀭𑀸 𑀉𑀪𑀢𑁄 𑀯𑁂𑀴𑀼𑀪𑀺𑀢𑁆𑀢𑀺𑀓𑀼𑀝𑀺𑀓𑀸𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀢𑁆𑀣𑀓𑁂 𑀲𑀼𑀯𑀡𑁆𑀡𑀢𑀸𑀭𑀓𑀔𑀘𑀺𑀢𑀲𑀫𑁄𑀲𑀭𑀺𑀢𑀕𑀦𑁆𑀥𑀤𑀸𑀫𑀫𑀸𑀮𑀸𑀤𑀸𑀫𑀯𑀺𑀢𑀸𑀦𑀁 𑀩𑀦𑁆𑀥𑀸𑀧𑁂𑀢𑁆𑀯𑀸 𑀳𑁂𑀝𑁆𑀞𑀸 𑀭𑀚𑀢𑀯𑀡𑁆𑀡𑀁 𑀯𑀸𑀮𑀼𑀓𑀁 𑀲𑀦𑁆𑀣𑀭𑀺𑀢𑁆𑀯𑀸 𑀧𑀼𑀧𑁆𑀨𑀸𑀦𑀺 𑀯𑀺𑀓𑀺𑀭𑀸𑀧𑁂𑀢𑁆𑀯𑀸 𑀢𑁂𑀦 𑀫𑀕𑁆𑀕𑁂𑀦 𑀪𑀕𑀯𑀢𑁄 𑀆𑀕𑀫𑀦𑀁 𑀓𑀸𑀭𑁂𑀲𑀺.

𑀲𑀢𑁆𑀣𑀸 𑀯𑀺𑀳𑀸𑀭𑀲𑁆𑀫𑀺𑀁𑀬𑁂𑀯 𑀞𑀺𑀢𑁄 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀅𑀦𑁆𑀢𑁄𑀲𑀸𑀡𑀺𑀬𑀸𑀯 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀭𑀸𑀚𑀕𑁂𑀳𑀁 𑀆𑀕𑀘𑁆𑀙𑀢𑀺, 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀅𑀦𑁆𑀢𑁄𑀲𑀸𑀡𑀺𑀬𑀸𑀯 𑀕𑀘𑁆𑀙𑀢𑀺. 𑀓𑁄𑀘𑀺 𑀓𑀝𑀘𑁆𑀙𑀼𑀪𑀺𑀓𑁆𑀔𑀸𑀫𑀢𑁆𑀢𑀫𑁆𑀧𑀺 𑀤𑀸𑀢𑀼𑀁 𑀦 𑀮𑀪𑀢𑀺. 𑀢𑀢𑁄 𑀦𑀸𑀕𑀭𑀸 𑀉𑀚𑁆𑀛𑀸𑀬𑀺𑀁𑀲𑀼, ‘‘𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀦𑁆𑀦𑁄, 𑀦 𑀘 𑀫𑀬𑀁 𑀧𑀼𑀜𑁆𑀜𑀸𑀦𑀺 𑀓𑀸𑀢𑀼𑀁 𑀮𑀪𑀸𑀫. 𑀬𑀣𑀸 𑀳𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀲𑀩𑁆𑀩𑁂𑀲𑀁 𑀆𑀮𑁄𑀓𑀁 𑀓𑀭𑁄𑀦𑁆𑀢𑀺, 𑀏𑀯𑀁 𑀩𑀼𑀤𑁆𑀥𑀸 𑀦𑀸𑀫 𑀲𑀩𑁆𑀩𑁂𑀲𑀁 𑀳𑀺𑀢𑀢𑁆𑀣𑀸𑀬 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀅𑀬𑀁 𑀧𑀦 𑀭𑀸𑀚𑀸 𑀲𑀩𑁆𑀩𑁂𑀲𑀁 𑀧𑀼𑀜𑁆𑀜𑀘𑁂𑀢𑀦𑀁 𑀅𑀢𑁆𑀢𑀦𑁄𑀬𑁂𑀯 𑀅𑀦𑁆𑀢𑁄 𑀧𑀯𑁂𑀲𑁂𑀢𑀻’’𑀢𑀺.

𑀢𑀲𑁆𑀲 𑀘 𑀭𑀜𑁆𑀜𑁄 𑀅𑀜𑁆𑀜𑁂 𑀢𑀬𑁄 𑀧𑀼𑀢𑁆𑀢𑀸 𑀅𑀢𑁆𑀣𑀺. 𑀦𑀸𑀕𑀭𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀲𑀫𑁆𑀫𑀦𑁆𑀢𑀬𑀺𑀁𑀲𑀼, ‘‘𑀭𑀸𑀚𑀓𑀼𑀮𑁂𑀳𑀺 𑀲𑀤𑁆𑀥𑀺𑀁 𑀅𑀝𑁆𑀝𑁄 𑀦𑀸𑀫 𑀦𑀢𑁆𑀣𑀺, 𑀏𑀓𑀁 𑀉𑀧𑀸𑀬𑀁 𑀓𑀭𑁄𑀫𑀸’’𑀢𑀺. 𑀢𑁂 𑀧𑀘𑁆𑀘𑀦𑁆𑀢𑁂 𑀘𑁄𑀭𑁂 𑀉𑀝𑁆𑀞𑀸𑀧𑁂𑀢𑁆𑀯𑀸, ‘‘𑀓𑀢𑀺𑀧𑀬𑀸 𑀕𑀸𑀫𑀸 𑀧𑀳𑀝𑀸’’𑀢𑀺 𑀲𑀸𑀲𑀦𑀁 𑀆𑀳𑀭𑀸𑀧𑁂𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑀬𑀺𑀁𑀲𑀼. 𑀭𑀸𑀚𑀸 𑀧𑀼𑀢𑁆𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸‘‘𑀢𑀸𑀢𑀸, 𑀅𑀳𑀁 𑀫𑀳𑀮𑁆𑀮𑀓𑁄, 𑀕𑀘𑁆𑀙𑀣 𑀘𑁄𑀭𑁂 𑀯𑀽𑀧𑀲𑀫𑁂𑀣𑀸’’𑀢𑀺 𑀧𑁂𑀲𑁂𑀲𑀺. 𑀧𑀬𑀼𑀢𑁆𑀢𑀘𑁄𑀭𑀸 𑀇𑀢𑁄 𑀘𑀺𑀢𑁄 𑀘 𑀅𑀯𑀺𑀧𑁆𑀧𑀓𑀺𑀭𑀺𑀢𑁆𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑀫𑁂𑀯 𑀆𑀕𑀘𑁆𑀙𑀺𑀁𑀲𑀼. 𑀢𑁂 𑀅𑀦𑀸𑀯𑀸𑀲𑁂 𑀕𑀸𑀫𑁂 𑀯𑀸𑀲𑁂𑀢𑁆𑀯𑀸 ‘‘𑀯𑀽𑀧𑀲𑀫𑀺𑀢𑀸 𑀘𑁄𑀭𑀸’’𑀢𑀺 𑀆𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀁𑀲𑀼.

𑀭𑀸𑀚𑀸 𑀢𑀼𑀝𑁆𑀞𑁄 ‘‘𑀢𑀸𑀢𑀸, 𑀯𑀭𑀁 𑀯𑁄 𑀤𑁂𑀫𑀻’’𑀢𑀺 𑀆𑀳. 𑀢𑁂 𑀅𑀥𑀺𑀯𑀸𑀲𑁂𑀢𑁆𑀯𑀸 𑀕𑀦𑁆𑀢𑁆𑀯𑀸 𑀦𑀸𑀕𑀭𑁂𑀳𑀺 𑀲𑀤𑁆𑀥𑀺𑀁 𑀫𑀦𑁆𑀢𑀬𑀺𑀁𑀲𑀼, ‘‘𑀭𑀜𑁆𑀜𑀸 𑀅𑀫𑁆𑀳𑀸𑀓𑀁 𑀯𑀭𑁄 𑀤𑀺𑀦𑁆𑀦𑁄. 𑀓𑀺𑀁 𑀕𑀡𑁆𑀳𑀸𑀫𑀸’’𑀢𑀺? 𑀅𑀬𑁆𑀬𑀧𑀼𑀢𑁆𑀢𑀸, 𑀢𑀼𑀫𑁆𑀳𑀸𑀓𑀁 𑀳𑀢𑁆𑀣𑀺𑀅𑀲𑁆𑀲𑀸𑀤𑀬𑁄 𑀦 𑀤𑀼𑀮𑁆𑀮𑀪𑀸, 𑀩𑀼𑀤𑁆𑀥𑀭𑀢𑀦𑀁 𑀧𑀦 𑀤𑀼𑀮𑁆𑀮𑀪𑀁, 𑀦 𑀲𑀩𑁆𑀩𑀓𑀸𑀮𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀼𑀫𑁆𑀳𑀸𑀓𑀁 𑀚𑁂𑀝𑁆𑀞𑀪𑀸𑀢𑀺𑀓𑀲𑁆𑀲 𑀨𑀼𑀲𑁆𑀲𑀩𑀼𑀤𑁆𑀥𑀲𑁆𑀲 𑀧𑀝𑀺𑀚𑀕𑁆𑀕𑀦𑀯𑀭𑀁 𑀕𑀡𑁆𑀳𑀣𑀸𑀢𑀺. 𑀢𑁂 ‘‘𑀏𑀯𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀦𑀸𑀕𑀭𑀸𑀦𑀁 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀓𑀢𑀫𑀲𑁆𑀲𑀼𑀓𑀫𑁆𑀫𑀸 𑀲𑀼𑀦𑁆𑀳𑀸𑀢𑀸 𑀲𑀼𑀯𑀺𑀮𑀺𑀢𑁆𑀢𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀤𑁂𑀯, 𑀦𑁄 𑀯𑀭𑀁 𑀤𑁂𑀣𑀸’’𑀢𑀺 𑀬𑀸𑀘𑀺𑀁𑀲𑀼. 𑀓𑀺𑀁 𑀕𑀡𑁆𑀳𑀺𑀲𑁆𑀲𑀣 𑀢𑀸𑀢𑀸𑀢𑀺? 𑀤𑁂𑀯, 𑀅𑀫𑁆𑀳𑀸𑀓𑀁 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀳𑀺 𑀅𑀢𑁆𑀣𑁄 𑀦𑀢𑁆𑀣𑀺, 𑀚𑁂𑀝𑁆𑀞𑀪𑀸𑀢𑀺𑀓𑀲𑁆𑀲 𑀦𑁄 𑀨𑀼𑀲𑁆𑀲𑀩𑀼𑀤𑁆𑀥𑀲𑁆𑀲 𑀧𑀝𑀺𑀚𑀕𑁆𑀕𑀦𑀯𑀭𑀁 𑀤𑁂𑀣𑀸𑀢𑀺. ‘‘𑀅𑀬𑀁 𑀯𑀭𑁄 𑀦 𑀲𑀓𑁆𑀓𑀸 𑀫𑀬𑀸 𑀚𑀻𑀯𑀫𑀸𑀦𑁂𑀦 𑀤𑀸𑀢𑀼’’𑀦𑁆𑀢𑀺 𑀤𑁆𑀯𑁂 𑀓𑀡𑁆𑀡𑁂 𑀧𑀺𑀤𑀳𑀺. ‘‘𑀤𑁂𑀯, 𑀦 𑀢𑀼𑀫𑁆𑀳𑁂 𑀅𑀫𑁆𑀳𑁂𑀳𑀺 𑀩𑀮𑀓𑁆𑀓𑀸𑀭𑁂𑀦 𑀯𑀭𑀁 𑀤𑀸𑀧𑀺𑀢𑀸, 𑀢𑀼𑀫𑁆𑀳𑁂𑀳𑀺 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀢𑀼𑀝𑁆𑀞𑁂𑀳𑀺 𑀤𑀺𑀦𑁆𑀦𑁄. 𑀓𑀺𑀁, 𑀤𑁂𑀯, 𑀭𑀸𑀚𑀓𑀼𑀮𑀲𑁆𑀲 𑀤𑁆𑀯𑁂 𑀓𑀣𑀸 𑀯𑀝𑁆𑀝𑀦𑁆𑀢𑀻’’𑀢𑀺? 𑀲𑀘𑁆𑀘𑀯𑀸𑀤𑀺𑀢𑀸𑀬 𑀪𑀡𑀺𑀁𑀲𑀼.

𑀭𑀸𑀚𑀸 𑀯𑀺𑀦𑀺𑀯𑀢𑁆𑀢𑀺𑀢𑀼𑀁 𑀅𑀮𑀪𑀦𑁆𑀢𑁄 𑁋 ‘‘𑀢𑀸𑀢𑀸, 𑀲𑀢𑁆𑀢 𑀲𑀁𑀯𑀘𑁆𑀙𑀭𑁂 𑀲𑀢𑁆𑀢 𑀫𑀸𑀲𑁂 𑀲𑀢𑁆𑀢 𑀘 𑀤𑀺𑀯𑀲𑁂 𑀉𑀧𑀝𑁆𑀞𑀳𑀺𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀸𑀫𑀻’’𑀢𑀺 𑀆𑀳. ‘‘𑀲𑀼𑀦𑁆𑀤𑀭𑀁, 𑀤𑁂𑀯, 𑀧𑀸𑀝𑀺𑀪𑁄𑀕𑀁 𑀤𑁂𑀣𑀸’’𑀢𑀺. ‘‘𑀓𑀺𑀲𑁆𑀲 𑀧𑀸𑀝𑀺𑀪𑁄𑀕𑀁 𑀢𑀸𑀢𑀸’’𑀢𑀺? ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀅𑀫𑀭𑀡𑀧𑀸𑀝𑀺𑀪𑁄𑀕𑀁 𑀤𑁂𑀯𑀸’’𑀢𑀺. ‘‘𑀢𑀸𑀢𑀸, 𑀅𑀬𑀼𑀢𑁆𑀢𑀁 𑀧𑀸𑀝𑀺𑀪𑁄𑀕𑀁 𑀤𑀸𑀧𑁂𑀣, 𑀦 𑀲𑀓𑁆𑀓𑀸 𑀏𑀯𑀁 𑀧𑀸𑀝𑀺𑀪𑁄𑀕𑀁 𑀤𑀸𑀢𑀼𑀁, 𑀢𑀺𑀡𑀕𑁆𑀕𑁂 𑀉𑀲𑁆𑀲𑀸𑀯𑀩𑀺𑀦𑁆𑀤𑀼𑀲𑀤𑀺𑀲𑀁 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢’’𑀦𑁆𑀢𑀺. ‘‘𑀦𑁄 𑀘𑁂, 𑀤𑁂𑀯, 𑀧𑀸𑀝𑀺𑀪𑁄𑀕𑀁 𑀤𑁂𑀣, 𑀫𑀬𑀁 𑀅𑀦𑁆𑀢𑀭𑀸 𑀫𑀢𑀸 𑀓𑀺𑀁 𑀓𑀼𑀲𑀮𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺? ‘‘𑀢𑁂𑀦 𑀳𑀺, 𑀢𑀸𑀢𑀸, 𑀙 𑀲𑀁𑀯𑀘𑁆𑀙𑀭𑀸𑀦𑀺 𑀤𑁂𑀣𑀸’’𑀢𑀺. ‘‘𑀦 𑀲𑀓𑁆𑀓𑀸, 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺 𑀧𑀜𑁆𑀘, 𑀘𑀢𑁆𑀢𑀸𑀭𑀺, 𑀢𑀻𑀡𑀺, 𑀤𑁆𑀯𑁂, 𑀏𑀓𑀁 𑀲𑀁𑀯𑀘𑁆𑀙𑀭𑀁 𑀤𑁂𑀣’’. ‘‘𑀲𑀢𑁆𑀢, 𑀙 𑀫𑀸𑀲𑁂 𑀤𑁂𑀣…𑀧𑁂… 𑀫𑀸𑀲𑀟𑁆𑀠𑀫𑀢𑁆𑀢𑀁 𑀤𑁂𑀣𑀸’’𑀢𑀺. ‘‘𑀦 𑀲𑀓𑁆𑀓𑀸, 𑀤𑁂𑀯𑀸’’𑀢𑀺. ‘‘𑀢𑁂𑀦 𑀳𑀺 𑀲𑀢𑁆𑀢𑀤𑀺𑀯𑀲𑀫𑀢𑁆𑀢𑀁 𑀤𑁂𑀣𑀸’’𑀢𑀺. ‘‘𑀲𑀸𑀥𑀼, 𑀤𑁂𑀯𑀸𑀢𑀺 𑀲𑀢𑁆𑀢 𑀤𑀺𑀯𑀲𑁂 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼’’. 𑀭𑀸𑀚𑀸 𑀲𑀢𑁆𑀢 𑀲𑀁𑀯𑀘𑁆𑀙𑀭𑁂 𑀲𑀢𑁆𑀢 𑀫𑀸𑀲𑁂 𑀲𑀢𑁆𑀢 𑀤𑀺𑀯𑀲𑁂 𑀓𑀢𑁆𑀢𑀩𑁆𑀩𑀲𑀓𑁆𑀓𑀸𑀭𑀁 𑀲𑀢𑁆𑀢𑀲𑀼𑀬𑁂𑀯 𑀤𑀺𑀯𑀲𑁂𑀲𑀼 𑀅𑀓𑀸𑀲𑀺.

𑀢𑀢𑁄 𑀧𑀼𑀢𑁆𑀢𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀲𑀢𑁆𑀣𑀸𑀭𑀁 𑀧𑁂𑀲𑁂𑀢𑀼𑀁 𑀅𑀝𑁆𑀞𑀉𑀲𑀪𑀯𑀺𑀢𑁆𑀣𑀢𑀁 𑀫𑀕𑁆𑀕𑀁 𑀅𑀮𑀗𑁆𑀓𑀸𑀭𑀸𑀧𑁂𑀲𑀺, 𑀫𑀚𑁆𑀛𑀝𑁆𑀞𑀸𑀦𑁂 𑀘𑀢𑀼𑀉𑀲𑀪𑀧𑁆𑀧𑀫𑀸𑀡𑀁 𑀧𑀤𑁂𑀲𑀁 𑀳𑀢𑁆𑀣𑀻𑀳𑀺 𑀫𑀤𑁆𑀤𑀸𑀧𑁂𑀢𑁆𑀯𑀸 𑀓𑀲𑀺𑀡𑀫𑀡𑁆𑀟𑀮𑀲𑀤𑀺𑀲𑀁 𑀓𑀢𑁆𑀯𑀸 𑀯𑀸𑀮𑀼𑀓𑀸𑀬 𑀲𑀦𑁆𑀣𑀭𑀸𑀧𑁂𑀢𑁆𑀯𑀸 𑀧𑀼𑀧𑁆𑀨𑀸𑀪𑀺𑀓𑀺𑀡𑁆𑀡𑀫𑀓𑀸𑀲𑀺, 𑀢𑀢𑁆𑀣 𑀢𑀢𑁆𑀣 𑀓𑀤𑀮𑀺𑀬𑁄 𑀘 𑀧𑀼𑀡𑁆𑀡𑀖𑀝𑁂 𑀘 𑀞𑀧𑀸𑀧𑁂𑀢𑁆𑀯𑀸 𑀥𑀚𑀧𑀝𑀸𑀓𑀸 𑀉𑀓𑁆𑀔𑀺𑀧𑀸𑀧𑁂𑀲𑀺. 𑀉𑀲𑀪𑁂 𑀉𑀲𑀪𑁂 𑀧𑁄𑀓𑁆𑀔𑀭𑀡𑀺𑀁 𑀔𑀡𑀸𑀧𑁂𑀲𑀺, 𑀅𑀧𑀭𑀪𑀸𑀕𑁂 𑀤𑁆𑀯𑀻𑀲𑀼 𑀧𑀲𑁆𑀲𑁂𑀲𑀼 𑀕𑀦𑁆𑀥𑀫𑀸𑀮𑀸𑀧𑀼𑀧𑁆𑀨𑀸𑀧𑀡𑁂 𑀧𑀲𑀸𑀭𑀸𑀧𑁂𑀲𑀺. 𑀫𑀚𑁆𑀛𑀝𑁆𑀞𑀸𑀦𑁂 𑀘𑀢𑀼𑀉𑀲𑀪𑀯𑀺𑀢𑁆𑀣𑀸𑀭𑀲𑁆𑀲 𑀅𑀮𑀗𑁆𑀓𑀢𑀫𑀕𑁆𑀕𑀲𑁆𑀲 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀤𑁆𑀯𑁂 𑀤𑁆𑀯𑁂 𑀉𑀲𑀪𑀯𑀺𑀢𑁆𑀣𑀸𑀭𑁂 𑀫𑀕𑁆𑀕𑁂 𑀔𑀸𑀡𑀼𑀓𑀡𑁆𑀝𑀓𑁂 𑀳𑀭𑀸𑀧𑁂𑀢𑁆𑀯𑀸 𑀤𑀡𑁆𑀟𑀤𑀻𑀧𑀺𑀓𑀸𑀬𑁄 𑀓𑀸𑀭𑀸𑀧𑁂𑀲𑀺. 𑀭𑀸𑀚𑀧𑀼𑀢𑁆𑀢𑀸𑀧𑀺 𑀅𑀢𑁆𑀢𑀦𑁄 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑁂 𑀲𑁄𑀴𑀲𑀉𑀲𑀪𑀫𑀕𑁆𑀕𑀁 𑀢𑀣𑁂𑀯 𑀅𑀮𑀗𑁆𑀓𑀸𑀭𑀸𑀧𑁂𑀲𑀼𑀁.

𑀭𑀸𑀚𑀸 𑀅𑀢𑁆𑀢𑀦𑁄 𑀆𑀡𑀸𑀧𑀯𑀢𑁆𑀢𑀺𑀝𑁆𑀞𑀸𑀦𑀲𑁆𑀲 𑀓𑁂𑀤𑀸𑀭𑀲𑀻𑀫𑀁 𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀧𑀭𑀺𑀤𑁂𑀯𑀫𑀸𑀦𑁄, ‘‘𑀢𑀸𑀢𑀸, 𑀫𑀬𑁆𑀳𑀁 𑀤𑀓𑁆𑀔𑀺𑀡𑀓𑁆𑀔𑀺𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀕𑀡𑁆𑀳𑀦𑁆𑀢𑀸 𑀯𑀺𑀬 𑀕𑀘𑁆𑀙𑀣, 𑀏𑀯𑀁 𑀕𑀡𑁆𑀳𑀺𑀢𑁆𑀯𑀸 𑀕𑀢𑀸 𑀧𑀦 𑀩𑀼𑀤𑁆𑀥𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀁 𑀓𑀭𑁂𑀬𑁆𑀬𑀸𑀣. 𑀫𑀸 𑀲𑀼𑀭𑀸𑀲𑁄𑀡𑁆𑀟𑀸 𑀯𑀺𑀬 𑀧𑀫𑀢𑁆𑀢𑀸 𑀯𑀺𑀘𑀭𑀺𑀢𑁆𑀣𑀸’’𑀢𑀺 𑀆𑀳. 𑀢𑁂 ‘‘𑀚𑀸𑀦𑀺𑀲𑁆𑀲𑀸𑀫 𑀫𑀬𑀁, 𑀤𑁂𑀯𑀸’’𑀢𑀺 𑀲𑀢𑁆𑀣𑀸𑀭𑀁 𑀕𑀳𑁂𑀢𑁆𑀯𑀸 𑀕𑀢𑀸, 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀲𑀢𑁆𑀣𑀼 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀢𑀢𑁆𑀣 𑀲𑀢𑁆𑀣𑀸𑀭𑀁 𑀧𑀝𑀺𑀚𑀕𑁆𑀕𑀦𑁆𑀢𑀸 𑀓𑀸𑀮𑁂𑀦 𑀣𑁂𑀭𑀸𑀲𑀦𑁂, 𑀓𑀸𑀮𑁂𑀦 𑀫𑀚𑁆𑀛𑀺𑀫𑀸𑀲𑀦𑁂, 𑀓𑀸𑀮𑁂𑀦 𑀲𑀗𑁆𑀖𑀦𑀯𑀓𑀸𑀲𑀦𑁂 𑀢𑀺𑀝𑁆𑀞𑀦𑁆𑀢𑀺. 𑀤𑀸𑀦𑀁 𑀉𑀧𑀧𑀭𑀺𑀓𑁆𑀔𑀫𑀸𑀦𑀸𑀦𑀁 𑀢𑀺𑀡𑁆𑀡𑀫𑁆𑀧𑀺 𑀚𑀦𑀸𑀦𑀁 𑀏𑀓𑀲𑀤𑀺𑀲𑀫𑁂𑀯 𑀅𑀳𑁄𑀲𑀺. 𑀢𑁂 𑀉𑀧𑀓𑀝𑁆𑀞𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀓𑀣𑀁 𑀦𑀼 𑀔𑁄 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀁 𑀕𑀡𑁆𑀳𑁂𑀬𑁆𑀬𑀸𑀫𑀸’’𑀢𑀺? 𑀅𑀣 𑀦𑁂𑀲𑀁 𑀏𑀢𑀤𑀳𑁄𑀲𑀺 𑁋 ‘‘𑀩𑀼𑀤𑁆𑀥𑀸 𑀦𑀸𑀫 𑀥𑀫𑁆𑀫𑀕𑀭𑀼𑀦𑁄, 𑀦 𑀆𑀫𑀺𑀲𑀕𑀭𑀼𑀦𑁄, 𑀲𑀻𑀮𑁂 𑀧𑀢𑀺𑀝𑁆𑀞𑀫𑀸𑀦𑀸 𑀫𑀬𑀁 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀁 𑀕𑀳𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀸’’𑀢𑀺 𑀤𑀸𑀦𑀲𑀁𑀯𑀺𑀥𑀸𑀬𑀓𑁂 𑀫𑀦𑀼𑀲𑁆𑀲𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀢𑀸𑀢𑀸, 𑀇𑀫𑀺𑀦𑀸𑀯 𑀦𑀻𑀳𑀸𑀭𑁂𑀦 𑀬𑀸𑀕𑀼𑀪𑀢𑁆𑀢𑀔𑀸𑀤𑀦𑀻𑀬𑀸𑀤𑀻𑀦𑀺 𑀲𑀫𑁆𑀧𑀸𑀤𑁂𑀦𑁆𑀢𑀸 𑀤𑀸𑀦𑀁 𑀧𑀯𑀢𑁆𑀢𑁂𑀣𑀸’’𑀢𑀺 𑀯𑀢𑁆𑀯𑀸 𑀤𑀸𑀦𑀲𑀁𑀯𑀺𑀤𑀳𑀦𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀁𑀲𑀼.

𑀅𑀣 𑀦𑁂𑀲𑀁 𑀚𑁂𑀝𑁆𑀞𑀪𑀸𑀢𑀸 𑀧𑀜𑁆𑀘𑀲𑀢𑁂 𑀧𑀼𑀭𑀺𑀲𑁂 𑀆𑀤𑀸𑀬 𑀤𑀲𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀬 𑀤𑁆𑀯𑁂 𑀓𑀸𑀲𑀸𑀬𑀸𑀦𑀺 𑀅𑀘𑁆𑀙𑀸𑀤𑁂𑀢𑁆𑀯𑀸 𑀓𑀧𑁆𑀧𑀺𑀬𑀁 𑀉𑀤𑀓𑀁 𑀧𑀭𑀺𑀪𑀼𑀜𑁆𑀚𑀫𑀸𑀦𑁄 𑀯𑀸𑀲𑀁 𑀓𑀧𑁆𑀧𑁂𑀲𑀺. 𑀫𑀚𑁆𑀛𑀺𑀫𑁄 𑀢𑀻𑀳𑀺, 𑀓𑀦𑀺𑀝𑁆𑀞𑁄 𑀤𑁆𑀯𑀻𑀳𑀺 𑀧𑀼𑀭𑀺𑀲𑀲𑀢𑁂𑀳𑀺 𑀲𑀤𑁆𑀥𑀺𑀁 𑀢𑀣𑁂𑀯 𑀧𑀝𑀺𑀧𑀚𑁆𑀚𑀺. 𑀢𑁂 𑀬𑀸𑀯𑀚𑀻𑀯𑀁 𑀲𑀢𑁆𑀣𑀸𑀭𑀁 𑀉𑀧𑀝𑁆𑀞𑀳𑀺𑀁𑀲𑀼. 𑀲𑀢𑁆𑀣𑀸 𑀢𑁂𑀲𑀁𑀬𑁂𑀯 𑀲𑀦𑁆𑀢𑀺𑀓𑁂 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀢𑁂𑀧𑀺 𑀓𑀸𑀮𑀁 𑀓𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀤𑁆𑀯𑀸𑀦𑀯𑀼𑀢𑀺𑀓𑀧𑁆𑀧𑁂 𑀫𑀦𑀼𑀲𑁆𑀲𑀮𑁄𑀓𑀢𑁄 𑀤𑁂𑀯𑀮𑁄𑀓𑀁, 𑀤𑁂𑀯𑀮𑁄𑀓𑀢𑁄 𑀘 𑀫𑀦𑀼𑀲𑁆𑀲𑀮𑁄𑀓𑀁 𑀲𑀁𑀲𑀭𑀦𑁆𑀢𑀸 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼𑀓𑀸𑀮𑁂 𑀤𑁂𑀯𑀮𑁄𑀓𑀸 𑀘𑀯𑀺𑀢𑁆𑀯𑀸 𑀫𑀦𑀼𑀲𑁆𑀲𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀢𑁂𑀲𑀁 𑀤𑀸𑀦𑀕𑁆𑀕𑁂 𑀩𑁆𑀬𑀸𑀯𑀝𑁄 𑀫𑀳𑀸𑀅𑀫𑀘𑁆𑀘𑁄 𑀅𑀗𑁆𑀕𑀫𑀕𑀥𑀸𑀦𑀁 𑀭𑀸𑀚𑀸 𑀩𑀺𑀫𑁆𑀩𑀺𑀲𑀸𑀭𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺. 𑀢𑁂 𑀢𑀲𑁆𑀲𑁂𑀯 𑀭𑀜𑁆𑀜𑁄 𑀭𑀝𑁆𑀞𑁂 𑀩𑁆𑀭𑀸𑀳𑁆𑀫𑀡𑀫𑀳𑀸𑀲𑀸𑀮𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺𑀁𑀲𑀼. 𑀚𑁂𑀝𑁆𑀞𑀪𑀸𑀢𑀸 𑀚𑁂𑀝𑁆𑀞𑁄𑀯 𑀚𑀸𑀢𑁄, 𑀫𑀚𑁆𑀛𑀺𑀫𑀓𑀦𑀺𑀝𑁆𑀞𑀸 𑀫𑀚𑁆𑀛𑀺𑀫𑀓𑀦𑀺𑀝𑁆𑀞𑀸𑀬𑁂𑀯. 𑀬𑁂𑀧𑀺 𑀢𑁂𑀲𑀁 𑀧𑀭𑀺𑀯𑀸𑀭𑀫𑀦𑀼𑀲𑁆𑀲𑀸, 𑀢𑁂 𑀧𑀭𑀺𑀯𑀸𑀭𑀫𑀦𑀼𑀲𑁆𑀲𑀸𑀯 𑀚𑀸𑀢𑀸. 𑀢𑁂 𑀯𑀼𑀤𑁆𑀥𑀺𑀫𑀦𑁆𑀯𑀸𑀬 𑀢𑀬𑁄𑀧𑀺 𑀚𑀦𑀸 𑀢𑀁 𑀧𑀼𑀭𑀺𑀲𑀲𑀳𑀲𑁆𑀲𑀁 𑀆𑀤𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀸𑀧𑀲𑀸 𑀳𑀼𑀢𑁆𑀯𑀸 𑀉𑀭𑀼𑀯𑁂𑀮𑀸𑀬𑀁 𑀦𑀤𑀻𑀢𑀻𑀭𑁂𑀬𑁂𑀯 𑀯𑀲𑀺𑀁𑀲𑀼. 𑀅𑀗𑁆𑀕𑀫𑀕𑀥𑀯𑀸𑀲𑀺𑀦𑁄 𑀫𑀸𑀲𑁂 𑀫𑀸𑀲𑁂 𑀢𑁂𑀲𑀁 𑀫𑀳𑀸𑀲𑀓𑁆𑀓𑀸𑀭𑀁 𑀅𑀪𑀺𑀳𑀭𑀦𑁆𑀢𑀺.

𑀅𑀣 𑀅𑀫𑁆𑀳𑀸𑀓𑀁 𑀩𑁄𑀥𑀺𑀲𑀢𑁆𑀢𑁄 𑀓𑀢𑀸𑀪𑀺𑀦𑀺𑀓𑁆𑀔𑀫𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀬𑀲𑀸𑀤𑀬𑁄 𑀓𑀼𑀮𑀧𑀼𑀢𑁆𑀢𑁂 𑀯𑀺𑀦𑁂𑀢𑁆𑀯𑀸 𑀲𑀝𑁆𑀞𑀺 𑀅𑀭𑀳𑀦𑁆𑀢𑁂 𑀥𑀫𑁆𑀫𑀤𑁂𑀲𑀦𑀢𑁆𑀣𑀸𑀬 𑀤𑀺𑀲𑀸𑀲𑀼 𑀉𑀬𑁆𑀬𑁄𑀚𑁂𑀢𑁆𑀯𑀸 𑀲𑀬𑀁 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑁋 ‘‘𑀢𑁂 𑀢𑀬𑁄 𑀚𑀝𑀺𑀮𑀪𑀸𑀢𑀺𑀓𑁂 𑀤𑀫𑁂𑀲𑁆𑀲𑀸𑀫𑀻’’𑀢𑀺 𑀉𑀭𑀼𑀯𑁂𑀮𑀁 𑀕𑀦𑁆𑀢𑁆𑀯𑀸 𑀅𑀦𑁂𑀓𑁂𑀳𑀺 𑀧𑀸𑀝𑀺𑀳𑀸𑀭𑀺𑀬𑀲𑀢𑁂𑀳𑀺 𑀢𑁂𑀲𑀁 𑀤𑀺𑀝𑁆𑀞𑀺𑀁 𑀪𑀺𑀦𑁆𑀤𑀺𑀢𑁆𑀯𑀸 𑀢𑁂 𑀧𑀩𑁆𑀩𑀸𑀚𑁂𑀲𑀺. 𑀲𑁄 𑀢𑀁 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑀁 𑀲𑀫𑀡𑀲𑀳𑀲𑁆𑀲𑀁 𑀆𑀤𑀸𑀬 𑀕𑀬𑀸𑀲𑀻𑀲𑀁 𑀕𑀦𑁆𑀢𑁆𑀯𑀸 𑀢𑁂𑀳𑀺 𑀧𑀭𑀺𑀯𑀸𑀭𑀺𑀢𑁄 𑀦𑀺𑀲𑀻𑀤𑀺𑀢𑁆𑀯𑀸, 𑁋 ‘‘𑀓𑀢𑀭𑀸 𑀦𑀼 𑀔𑁄 𑀏𑀢𑁂𑀲𑀁 𑀥𑀫𑁆𑀫𑀓𑀣𑀸 𑀲𑀧𑁆𑀧𑀸𑀬𑀸’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄, ‘‘𑀇𑀫𑁂 𑀲𑀸𑀬𑀁𑀧𑀸𑀢𑀁 𑀅𑀕𑁆𑀕𑀺𑀁 𑀧𑀭𑀺𑀘𑀭𑀦𑁆𑀢𑀺. 𑀇𑀫𑁂𑀲𑀁 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀆𑀤𑀺𑀢𑁆𑀢𑀸𑀦𑀺 𑀲𑀫𑁆𑀧𑀚𑁆𑀚𑀮𑀺𑀢𑀸𑀦𑀺 𑀯𑀺𑀬 𑀓𑀢𑁆𑀯𑀸 𑀤𑁂𑀲𑁂𑀲𑁆𑀲𑀸𑀫𑀺, 𑀏𑀯𑀁 𑀇𑀫𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀫𑀓𑀸𑀲𑀺. 𑀅𑀣 𑀦𑁂𑀲𑀁 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀇𑀫𑀁 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀁 𑀅𑀪𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺 𑀢𑁂𑀲𑀁 𑀲𑀧𑁆𑀧𑀸𑀬𑀥𑀫𑁆𑀫𑀤𑁂𑀲𑀦𑀁 𑀯𑀺𑀘𑀺𑀦𑀺𑀢𑁆𑀯𑀸 𑀢𑀁 𑀤𑁂𑀲𑁂𑀲𑁆𑀲𑀸𑀫𑀻𑀢𑀺 𑀆𑀫𑀦𑁆𑀢𑁂𑀲𑀻’’𑀢𑀺. 𑀢𑀢𑁆𑀣 𑀆𑀤𑀺𑀢𑁆𑀢𑀦𑁆𑀢𑀺 𑀧𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀤𑀼𑀓𑁆𑀔𑀮𑀓𑁆𑀔𑀡𑀁 𑀓𑀣𑀺𑀢𑀁.

𑁭. 𑀅𑀤𑁆𑀥𑀪𑀽𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯. 𑀲𑀢𑁆𑀢𑀫𑁂 𑀅𑀤𑁆𑀥𑀪𑀽𑀢𑀦𑁆𑀢𑀺 𑀅𑀥𑀺𑀪𑀽𑀢𑀁 𑀅𑀚𑁆𑀛𑁄𑀢𑁆𑀣𑀝𑀁, 𑀉𑀧𑀤𑁆𑀤𑀼𑀢𑀦𑁆𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑁂 𑀤𑀼𑀓𑁆𑀔𑀮𑀓𑁆𑀔𑀡𑀫𑁂𑀯 𑀓𑀣𑀺𑀢𑀁.

𑁮. 𑀲𑀫𑀼𑀕𑁆𑀖𑀸𑀢𑀲𑀸𑀭𑀼𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦. 𑀅𑀝𑁆𑀞𑀫𑁂 𑀲𑀩𑁆𑀩𑀫𑀜𑁆𑀜𑀺𑀢𑀲𑀫𑀼𑀕𑁆𑀖𑀸𑀢𑀲𑀸𑀭𑀼𑀧𑁆𑀧𑀦𑁆𑀢𑀺 𑀲𑀩𑁆𑀩𑁂𑀲𑀁 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀫𑀜𑁆𑀜𑀺𑀢𑀸𑀦𑀁 𑀲𑀫𑀼𑀕𑁆𑀖𑀸𑀢𑀸𑀬 𑀅𑀦𑀼𑀘𑁆𑀙𑀯𑀺𑀓𑀁. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂. 𑀘𑀓𑁆𑀔𑀼𑀁 𑀦 𑀫𑀜𑁆𑀜𑀢𑀻𑀢𑀺 𑀘𑀓𑁆𑀔𑀼𑀁 𑀅𑀳𑀦𑁆𑀢𑀺 𑀯𑀸 𑀫𑀫𑀦𑁆𑀢𑀺 𑀯𑀸 𑀧𑀭𑁄𑀢𑀺 𑀯𑀸 𑀧𑀭𑀲𑁆𑀲𑀸𑀢𑀺 𑀯𑀸 𑀦 𑀫𑀜𑁆𑀜𑀢𑀺. 𑀘𑀓𑁆𑀔𑀼𑀲𑁆𑀫𑀺𑀁 𑀦 𑀫𑀜𑁆𑀜𑀢𑀻𑀢𑀺 𑀅𑀳𑀁 𑀘𑀓𑁆𑀔𑀼𑀲𑁆𑀫𑀺𑀁, 𑀫𑀫 𑀓𑀺𑀜𑁆𑀘𑀦𑀧𑀮𑀺𑀩𑁄𑀥𑁄 𑀘𑀓𑁆𑀔𑀼𑀲𑁆𑀫𑀺𑀁 𑀧𑀭𑁄 𑀘𑀓𑁆𑀔𑀼𑀲𑁆𑀫𑀺𑀁, 𑀧𑀭𑀲𑁆𑀲 𑀓𑀺𑀜𑁆𑀘𑀦𑀧𑀮𑀺𑀩𑁄𑀥𑁄 𑀘𑀓𑁆𑀔𑀼𑀲𑁆𑀫𑀺𑀦𑁆𑀢𑀺 𑀦 𑀫𑀜𑁆𑀜𑀢𑀺. 𑀘𑀓𑁆𑀔𑀼𑀢𑁄 𑀦 𑀫𑀜𑁆𑀜𑀢𑀻𑀢𑀺 𑀅𑀳𑀁 𑀘𑀓𑁆𑀔𑀼𑀢𑁄 𑀦𑀺𑀕𑁆𑀕𑀢𑁄, 𑀫𑀫 𑀓𑀺𑀜𑁆𑀘𑀦𑀧𑀮𑀺𑀩𑁄𑀥𑁄 𑀘𑀓𑁆𑀔𑀼𑀢𑁄 𑀦𑀺𑀕𑁆𑀕𑀢𑁄, 𑀧𑀭𑁄 𑀘𑀓𑁆𑀔𑀼𑀢𑁄 𑀦𑀺𑀕𑁆𑀕𑀢𑁄, 𑀧𑀭𑀲𑁆𑀲 𑀓𑀺𑀜𑁆𑀘𑀦𑀧𑀮𑀺𑀩𑁄𑀥𑁄 𑀘𑀓𑁆𑀔𑀼𑀢𑁄 𑀦𑀺𑀕𑁆𑀕𑀢𑁄𑀢𑀺 𑀏𑀯𑀫𑁆𑀧𑀺 𑀦 𑀫𑀜𑁆𑀜𑀢𑀺, 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀫𑀜𑁆𑀜𑀦𑀸𑀦𑀁 𑀏𑀓𑀫𑁆𑀧𑀺 𑀦 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀘𑀓𑁆𑀔𑀼𑀁 𑀫𑁂𑀢𑀺 𑀦 𑀫𑀜𑁆𑀜𑀢𑀻𑀢𑀺 𑀫𑀫 𑀘𑀓𑁆𑀔𑀽𑀢𑀺 𑀦 𑀫𑀜𑁆𑀜𑀢𑀺, 𑀫𑀫𑀢𑁆𑀢𑀪𑀽𑀢𑀁 𑀢𑀡𑁆𑀳𑀸𑀫𑀜𑁆𑀜𑀦𑀁 𑀦 𑀉𑀧𑁆𑀧𑀸𑀤𑁂𑀢𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀘𑀢𑀼𑀘𑀢𑁆𑀢𑀸𑀮𑀻𑀲𑀸𑀬 𑀞𑀸𑀦𑁂𑀲𑀼 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸.

𑁯. 𑀧𑀞𑀫𑀲𑀫𑀼𑀕𑁆𑀖𑀸𑀢𑀲𑀧𑁆𑀧𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀦𑀯𑀫𑁂 𑀲𑀫𑀼𑀕𑁆𑀖𑀸𑀢𑀲𑀧𑁆𑀧𑀸𑀬𑀸𑀢𑀺 𑀲𑀫𑀼𑀕𑁆𑀖𑀸𑀢𑀲𑁆𑀲 𑀉𑀧𑀓𑀸𑀭𑀪𑀽𑀢𑀸. 𑀢𑀢𑁄 𑀢𑀁 𑀳𑁄𑀢𑀺 𑀅𑀜𑁆𑀜𑀣𑀸𑀢𑀺 𑀢𑀢𑁄 𑀢𑀁 𑀅𑀜𑁆𑀜𑁂𑀦𑀸𑀓𑀸𑀭𑁂𑀦 𑀳𑁄𑀢𑀺. 𑀅𑀜𑁆𑀜𑀣𑀸𑀪𑀸𑀯𑀻 𑀪𑀯𑀲𑀢𑁆𑀢𑁄 𑀮𑁄𑀓𑁄 𑀪𑀯𑀫𑁂𑀯𑀸𑀪𑀺𑀦𑀦𑁆𑀤𑀢𑀻𑀢𑀺 𑀅𑀜𑁆𑀜𑀣𑀸𑀪𑀸𑀯𑀁 𑀯𑀺𑀧𑀭𑀺𑀡𑀸𑀫𑀁 𑀉𑀧𑀕𑀫𑀦𑁂𑀦 𑀅𑀜𑁆𑀜𑀣𑀸𑀪𑀸𑀯𑀻 𑀳𑀼𑀢𑁆𑀯𑀸𑀧𑀺 𑀪𑀯𑁂𑀲𑀼 𑀲𑀢𑁆𑀢𑁄 𑀮𑀕𑁆𑀕𑁄 𑀮𑀕𑀺𑀢𑁄 𑀧𑀮𑀺𑀩𑀼𑀤𑁆𑀥𑁄 𑀅𑀬𑀁 𑀮𑁄𑀓𑁄 𑀪𑀯𑀁𑀬𑁂𑀯 𑀅𑀪𑀺𑀦𑀦𑁆𑀤𑀢𑀺. 𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀬𑀢𑁆𑀢𑀓𑀁 𑀇𑀤𑀁 𑀔𑀦𑁆𑀥𑀸 𑀘 𑀥𑀸𑀢𑀼𑀬𑁄 𑀘 𑀆𑀬𑀢𑀦𑀸𑀦𑀺 𑀘𑀸𑀢𑀺 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀁. 𑀢𑀫𑁆𑀧𑀺 𑀦 𑀫𑀜𑁆𑀜𑀢𑀻𑀢𑀺 𑀲𑀩𑁆𑀩𑀫𑁆𑀧𑀺 𑀦 𑀫𑀜𑁆𑀜𑀢𑀻𑀢𑀺 𑀳𑁂𑀝𑁆𑀞𑀸 𑀕𑀳𑀺𑀢𑀫𑁂𑀯 𑀲𑀁𑀓𑀟𑁆𑀠𑀺𑀢𑁆𑀯𑀸 𑀧𑀼𑀦 𑀤𑀲𑁆𑀲𑁂𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀸𑀬 𑀞𑀸𑀦𑁂𑀲𑀼 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸.

𑁧𑁦. 𑀤𑀼𑀢𑀺𑀬𑀲𑀫𑀼𑀕𑁆𑀖𑀸𑀢𑀲𑀧𑁆𑀧𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨. 𑀤𑀲𑀫𑁂 𑀏𑀢𑀁 𑀫𑀫𑀸𑀢𑀺𑀆𑀤𑀻𑀳𑀺 𑀢𑀻𑀳𑀺 𑀢𑀻𑀳𑀺 𑀧𑀤𑁂𑀳𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀕𑀸𑀳𑁂 𑀤𑀲𑁆𑀲𑁂𑀢𑁆𑀯𑀸 𑀢𑀺𑀧𑀭𑀺𑀯𑀝𑁆𑀝𑀦𑀬𑁂𑀦 𑀤𑁂𑀲𑀦𑀸 𑀓𑀢𑀸. 𑀧𑀝𑀺𑀧𑀸𑀝𑀺𑀬𑀸 𑀧𑀦 𑀢𑀻𑀲𑀼𑀧𑀺 𑀇𑀫𑁂𑀲𑀼 𑀲𑀼𑀢𑁆𑀢𑁂𑀲𑀼 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀓𑀣𑀺𑀢𑀸𑀢𑀺.

𑀲𑀩𑁆𑀩𑀯𑀕𑁆𑀕𑁄 𑀢𑀢𑀺𑀬𑁄.

𑁪. 𑀚𑀸𑀢𑀺𑀥𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸

𑁩𑁩-𑁪𑁨. 𑀚𑀸𑀢𑀺𑀥𑀫𑁆𑀫𑀯𑀕𑁆𑀕𑁂 𑀚𑀸𑀢𑀺𑀥𑀫𑁆𑀫𑀦𑁆𑀢𑀺 𑀚𑀸𑀬𑀦𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑀦𑀲𑀪𑀸𑀯𑀁. 𑀚𑀭𑀸𑀥𑀫𑁆𑀫𑀦𑁆𑀢𑀺 𑀚𑀻𑀭𑀡𑀲𑀪𑀸𑀯𑀁. 𑀩𑁆𑀬𑀸𑀥𑀺𑀥𑀫𑁆𑀫𑀦𑁆𑀢𑀺 𑀩𑁆𑀬𑀸𑀥𑀺𑀦𑁄 𑀉𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑀪𑀸𑀯𑁂𑀦 𑀩𑁆𑀬𑀸𑀥𑀺𑀲𑀪𑀸𑀯𑀁. 𑀫𑀭𑀡𑀥𑀫𑁆𑀫𑀦𑁆𑀢𑀺 𑀫𑀭𑀡𑀲𑀪𑀸𑀯𑀁. 𑀲𑁄𑀓𑀥𑀫𑁆𑀫𑀦𑁆𑀢𑀺 𑀲𑁄𑀓𑀲𑁆𑀲 𑀉𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑀪𑀸𑀯𑁂𑀦 𑀲𑁄𑀓𑀲𑀪𑀸𑀯𑀁. 𑀲𑀁𑀓𑀺𑀮𑁂𑀲𑀺𑀓𑀥𑀫𑁆𑀫𑀦𑁆𑀢𑀺 𑀲𑀁𑀓𑀺𑀮𑁂𑀲𑀺𑀓𑀲𑀪𑀸𑀯𑀁. 𑀔𑀬𑀥𑀫𑁆𑀫𑀦𑁆𑀢𑀺 𑀔𑀬𑀕𑀫𑀦𑀲𑀪𑀸𑀯𑀁. 𑀯𑀬𑀥𑀫𑁆𑀫𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺.

𑀚𑀸𑀢𑀺𑀥𑀫𑁆𑀫𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑁫. 𑀲𑀩𑁆𑀩𑀅𑀦𑀺𑀘𑁆𑀘𑀯𑀕𑁆𑀕𑀯𑀡𑁆𑀡𑀦𑀸

𑁪𑁩-𑁫𑁨. 𑀅𑀦𑀺𑀘𑁆𑀘𑀯𑀕𑁆𑀕𑁂 𑀅𑀪𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀧𑀤𑁂 𑀜𑀸𑀢𑀧𑀭𑀺𑀜𑁆𑀜𑀸 𑀆𑀕𑀢𑀸, 𑀇𑀢𑀭𑀸 𑀧𑀦 𑀤𑁆𑀯𑁂 𑀕𑀳𑀺𑀢𑀸𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀭𑀺𑀜𑁆𑀜𑁂𑀬𑁆𑀬𑀧𑀳𑀸𑀢𑀩𑁆𑀩𑀧𑀤𑁂𑀲𑀼𑀧𑀺 𑀢𑀻𑀭𑀡𑀧𑀳𑀸𑀦𑀧𑀭𑀺𑀜𑁆𑀜𑀸𑀯 𑀆𑀕𑀢𑀸, 𑀇𑀢𑀭𑀸𑀧𑀺 𑀧𑀦 𑀤𑁆𑀯𑁂 𑀕𑀳𑀺𑀢𑀸𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀘𑁆𑀙𑀺𑀓𑀸𑀢𑀩𑁆𑀩𑀦𑁆𑀢𑀺 𑀧𑀘𑁆𑀘𑀓𑁆𑀔𑀁 𑀓𑀸𑀢𑀩𑁆𑀩𑀁. 𑀅𑀪𑀺𑀜𑁆𑀜𑀸𑀧𑀭𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀇𑀥𑀸𑀧𑀺 𑀧𑀳𑀸𑀦𑀧𑀭𑀺𑀜𑁆𑀜𑀸 𑀅𑀯𑀼𑀢𑁆𑀢𑀸𑀧𑀺 𑀕𑀳𑀺𑀢𑀸𑀬𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀉𑀧𑀤𑁆𑀤𑀼𑀢𑀦𑁆𑀢𑀺 𑀅𑀦𑁂𑀓𑀕𑁆𑀕𑀝𑁆𑀞𑁂𑀦. 𑀉𑀧𑀲𑁆𑀲𑀝𑁆𑀞𑀦𑁆𑀢𑀺 𑀉𑀧𑀳𑀢𑀝𑁆𑀞𑁂𑀦. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀲𑀩𑁆𑀩𑀅𑀦𑀺𑀘𑁆𑀘𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀧𑀞𑀫𑁄 𑀧𑀡𑁆𑀡𑀸𑀲𑀓𑁄.

𑁬. 𑀅𑀯𑀺𑀚𑁆𑀚𑀸𑀯𑀕𑁆𑀕𑀯𑀡𑁆𑀡𑀦𑀸

𑁫𑁩-𑁬𑁨. 𑀅𑀯𑀺𑀚𑁆𑀚𑀸𑀯𑀕𑁆𑀕𑁂 𑀅𑀯𑀺𑀚𑁆𑀚𑀸𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀅𑀜𑁆𑀜𑀸𑀡𑀁. 𑀯𑀺𑀚𑁆𑀚𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀯𑀺𑀚𑁆𑀚𑀸. 𑀅𑀦𑀺𑀘𑁆𑀘𑀢𑁄 𑀚𑀸𑀦𑀢𑁄 𑀧𑀲𑁆𑀲𑀢𑁄𑀢𑀺 𑀤𑀼𑀓𑁆𑀔𑀸𑀦𑀢𑁆𑀢𑀯𑀲𑁂𑀦𑀸𑀧𑀺 𑀚𑀸𑀦𑀢𑁄 𑀧𑀲𑁆𑀲𑀢𑁄 𑀧𑀳𑀻𑀬𑀢𑀺𑀬𑁂𑀯, 𑀇𑀤𑀁 𑀧𑀦 𑀅𑀦𑀺𑀘𑁆𑀘𑀯𑀲𑁂𑀦 𑀓𑀣𑀺𑀢𑁂 𑀩𑀼𑀚𑁆𑀛𑀦𑀓𑀧𑀼𑀕𑁆𑀕𑀮𑀲𑁆𑀲 𑀅𑀚𑁆𑀛𑀸𑀲𑀬𑁂𑀦 𑀯𑀼𑀢𑁆𑀢𑀁. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀧𑀺 𑀘𑁂𑀢𑁆𑀣 𑀲𑀁𑀬𑁄𑀚𑀦𑀸𑀢𑀺 𑀤𑀲 𑀲𑀁𑀬𑁄𑀚𑀦𑀸𑀦𑀺. 𑀆𑀲𑀯𑀸𑀢𑀺 𑀘𑀢𑁆𑀢𑀸𑀭𑁄 𑀆𑀲𑀯𑀸. 𑀅𑀦𑀼𑀲𑀬𑀸𑀢𑀺 𑀲𑀢𑁆𑀢 𑀅𑀦𑀼𑀲𑀬𑀸. 𑀲𑀩𑁆𑀩𑀼𑀧𑀸𑀤𑀸𑀦𑀧𑀭𑀺𑀜𑁆𑀜𑀸𑀬𑀸𑀢𑀺 𑀲𑀩𑁆𑀩𑁂𑀲𑀁 𑀘𑀢𑀼𑀦𑁆𑀦𑀫𑁆𑀧𑀺 𑀉𑀧𑀸𑀤𑀸𑀦𑀸𑀦𑀁 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀦𑀢𑁆𑀣𑀸𑀬. 𑀧𑀭𑀺𑀬𑀸𑀤𑀸𑀦𑀸𑀬𑀸𑀢𑀺 𑀔𑁂𑀧𑀦𑀢𑁆𑀣𑀸𑀬. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀯𑀺𑀚𑁆𑀚𑀸𑀯𑀕𑁆𑀕𑁄 𑀙𑀝𑁆𑀞𑁄.

𑁭. 𑀫𑀺𑀕𑀚𑀸𑀮𑀯𑀕𑁆𑀕𑁄

𑁧. 𑀧𑀞𑀫𑀫𑀺𑀕𑀚𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁩. 𑀫𑀺𑀕𑀚𑀸𑀮𑀯𑀕𑁆𑀕𑀲𑁆𑀲 𑀧𑀞𑀫𑁂 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀧𑀲𑁆𑀲𑀺𑀢𑀩𑁆𑀩𑀸. 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀝𑁆𑀞𑀸𑀢𑀺 𑀧𑀭𑀺𑀬𑀺𑀝𑁆𑀞𑀸 𑀯𑀸 𑀳𑁄𑀦𑁆𑀢𑀼 𑀫𑀸 𑀯𑀸, 𑀇𑀝𑁆𑀞𑀸𑀭𑀫𑁆𑀫𑀡𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀓𑀦𑁆𑀢𑀸𑀢𑀺 𑀓𑀫𑀦𑀻𑀬𑀸. 𑀫𑀦𑀸𑀧𑀸𑀢𑀺 𑀫𑀦𑀯𑀟𑁆𑀠𑀦𑀓𑀸. 𑀧𑀺𑀬𑀭𑀽𑀧𑀸𑀢𑀺 𑀧𑀺𑀬𑀚𑀸𑀢𑀺𑀓𑀸. 𑀓𑀸𑀫𑀽𑀧𑀲𑀁𑀳𑀺𑀢𑀸𑀢𑀺 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀓𑀸𑀫𑁂𑀦 𑀉𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸𑀢𑀺 𑀭𑀜𑁆𑀚𑀦𑀻𑀬𑀸, 𑀭𑀸𑀕𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀦𑀦𑁆𑀤𑀻𑀢𑀺 𑀢𑀡𑁆𑀳𑀸𑀦𑀦𑁆𑀤𑀻. 𑀲𑀁𑀬𑁄𑀕𑁄𑀢𑀺 𑀲𑀁𑀬𑁄𑀚𑀦𑀁. 𑀦𑀦𑁆𑀤𑀺𑀲𑀁𑀬𑁄𑀚𑀦𑀲𑀁𑀬𑀼𑀢𑁆𑀢𑁄𑀢𑀺 𑀦𑀦𑁆𑀤𑀻𑀩𑀦𑁆𑀥𑀦𑁂𑀦 𑀩𑀤𑁆𑀥𑁄. 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀻𑀢𑀺 𑀅𑀭𑀜𑁆𑀜𑀸𑀦𑀺 𑀘 𑀯𑀦𑀧𑀢𑁆𑀣𑀸𑀦𑀺 𑀘. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀪𑀺𑀥𑀫𑁆𑀫𑁂 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 ‘‘𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺 𑀇𑀦𑁆𑀤𑀔𑀻𑀮𑀸 𑀲𑀩𑁆𑀩𑀫𑁂𑀢𑀁 𑀅𑀭𑀜𑁆𑀜’’𑀦𑁆𑀢𑀺 (𑀯𑀺𑀪. 𑁫𑁨𑁯) 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀬𑀁 𑀢𑀁 ‘‘𑀧𑀜𑁆𑀘𑀥𑀦𑀼𑀲𑀢𑀺𑀓𑀁 𑀧𑀘𑁆𑀙𑀺𑀫’’𑀦𑁆𑀢𑀺 (𑀧𑀸𑀭𑀸. 𑁬𑁫𑁪) 𑀅𑀭𑀜𑁆𑀜𑀓𑀗𑁆𑀕𑀦𑀺𑀧𑁆𑀨𑀸𑀤𑀓𑀁 𑀲𑁂𑀦𑀸𑀲𑀦𑀁 𑀯𑀼𑀢𑁆𑀢𑀁, 𑀢𑀤𑁂𑀯 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀦𑀧𑀢𑁆𑀣𑀦𑁆𑀢𑀺 𑀕𑀸𑀫𑀦𑁆𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀦𑀼𑀲𑁆𑀲𑀸𑀦𑀁 𑀅𑀦𑀼𑀧𑀘𑀸𑀭𑀝𑁆𑀞𑀸𑀦𑀁, 𑀬𑀢𑁆𑀣 𑀦 𑀓𑀲𑀻𑀬𑀢𑀺 𑀦 𑀯𑀧𑀻𑀬𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀯𑀦𑀧𑀢𑁆𑀣𑀦𑁆𑀢𑀺 𑀤𑀽𑀭𑀸𑀦𑀫𑁂𑀢𑀁 𑀲𑁂𑀦𑀸𑀲𑀦𑀸𑀦𑀁 𑀅𑀥𑀺𑀯𑀘𑀦𑀁. 𑀯𑀦𑀧𑀢𑁆𑀣𑀦𑁆𑀢𑀺 𑀯𑀦𑀲𑀡𑁆𑀟𑀸𑀦𑀫𑁂𑀢𑀁, 𑀯𑀦𑀧𑀢𑁆𑀣𑀦𑁆𑀢𑀺 𑀪𑀺𑀁𑀲𑀦𑀓𑀸𑀦𑀫𑁂𑀢𑀁, 𑀯𑀦𑀧𑀢𑁆𑀣𑀦𑁆𑀢𑀺 𑀲𑀮𑁄𑀫𑀳𑀁𑀲𑀸𑀦𑀫𑁂𑀢𑀁, 𑀯𑀦𑀧𑀢𑁆𑀣𑀦𑁆𑀢𑀺 𑀧𑀭𑀺𑀬𑀦𑁆𑀢𑀸𑀦𑀫𑁂𑀢𑀁, 𑀯𑀦𑀧𑀢𑁆𑀣𑀦𑁆𑀢𑀺 𑀅𑀫𑀦𑀼𑀲𑁆𑀲𑀽𑀧𑀘𑀸𑀭𑀸𑀦𑀁 𑀲𑁂𑀦𑀸𑀲𑀦𑀸𑀦𑀫𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀯𑀺𑀪. 𑁫𑁩𑁧).

𑀏𑀢𑁆𑀣 𑀘 𑀧𑀭𑀺𑀬𑀦𑁆𑀢𑀸𑀦𑀦𑁆𑀢𑀺 𑀇𑀫𑀁 𑀏𑀓𑀁 𑀧𑀭𑀺𑀬𑀸𑀬𑀁 𑀞𑀧𑁂𑀢𑁆𑀯𑀸 𑀲𑁂𑀲𑀧𑀭𑀺𑀬𑀸𑀬𑁂𑀳𑀺 𑀯𑀦𑀧𑀢𑁆𑀣𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀧𑀦𑁆𑀢𑀸𑀦𑀻𑀢𑀺 𑀧𑀭𑀺𑀬𑀦𑁆𑀢𑀸𑀦𑀺 𑀅𑀢𑀺𑀤𑀽𑀭𑀸𑀦𑀺. 𑀅𑀧𑁆𑀧𑀲𑀤𑁆𑀤𑀸𑀦𑀻𑀢𑀺 𑀉𑀤𑀼𑀓𑁆𑀔𑀮𑀫𑀼𑀲𑀮𑀤𑀸𑀭𑀓𑀲𑀤𑁆𑀤𑀸𑀤𑀻𑀦𑀁 𑀅𑀪𑀸𑀯𑁂𑀦 𑀅𑀧𑁆𑀧𑀲𑀤𑁆𑀤𑀸𑀦𑀺. 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀻𑀢𑀺 𑀢𑁂𑀲𑀁 𑀢𑁂𑀲𑀁 𑀦𑀺𑀦𑁆𑀦𑀸𑀤𑀫𑀳𑀸𑀦𑀺𑀕𑁆𑀖𑁄𑀲𑀲𑁆𑀲 𑀅𑀪𑀸𑀯𑁂𑀦 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀺. 𑀯𑀺𑀚𑀦𑀯𑀸𑀢𑀸𑀦𑀻𑀢𑀺 𑀲𑀜𑁆𑀘𑀭𑀡𑀚𑀦𑀲𑁆𑀲 𑀲𑀭𑀻𑀭𑀯𑀸𑀢𑀯𑀺𑀭𑀳𑀺𑀢𑀸𑀦𑀺. 𑀫𑀦𑀼𑀲𑁆𑀲𑀭𑀸𑀳𑀲𑁆𑀲𑁂𑀬𑁆𑀬𑀓𑀸𑀦𑀻𑀢𑀺 𑀫𑀦𑀼𑀲𑁆𑀲𑀸𑀦𑀁 𑀭𑀳𑁄𑀓𑀫𑁆𑀫𑀲𑁆𑀲 𑀅𑀦𑀼𑀘𑁆𑀙𑀯𑀺𑀓𑀸𑀦𑀺. 𑀧𑀝𑀺𑀲𑀮𑁆𑀮𑀸𑀦𑀲𑀸𑀭𑀼𑀧𑁆𑀧𑀸𑀦𑀻𑀢𑀺 𑀦𑀺𑀮𑀻𑀬𑀦𑀲𑀸𑀭𑀼𑀧𑁆𑀧𑀸𑀦𑀺.

𑁨. 𑀤𑀼𑀢𑀺𑀬𑀫𑀺𑀕𑀚𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁪. 𑀤𑀼𑀢𑀺𑀬𑁂 𑀦𑀦𑁆𑀤𑀺𑀦𑀺𑀭𑁄𑀥𑀸 𑀤𑀼𑀓𑁆𑀔𑀦𑀺𑀭𑁄𑀥𑁄𑀢𑀺 𑀢𑀡𑁆𑀳𑀸𑀦𑀦𑁆𑀤𑀺𑀬𑀸 𑀦𑀺𑀭𑁄𑀥𑁂𑀦 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀦𑀺𑀭𑁄𑀥𑁄.

𑁩-𑁫. 𑀧𑀞𑀫𑀲𑀫𑀺𑀤𑁆𑀥𑀺𑀫𑀸𑀭𑀧𑀜𑁆𑀳𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁬𑁫-𑁬𑁭. 𑀢𑀢𑀺𑀬𑁂 𑀲𑀫𑀺𑀤𑁆𑀥𑀻𑀢𑀺 𑀅𑀢𑁆𑀢𑀪𑀸𑀯𑀲𑁆𑀲 𑀲𑀫𑀺𑀤𑁆𑀥𑀢𑀸𑀬 𑀏𑀯𑀁 𑀮𑀤𑁆𑀥𑀦𑀸𑀫𑁄. 𑀢𑀲𑁆𑀲 𑀓𑀺𑀭 𑀣𑁂𑀭𑀲𑁆𑀲 𑀅𑀢𑁆𑀢𑀪𑀸𑀯𑁄 𑀅𑀪𑀺𑀭𑀽𑀧𑁄 𑀅𑀳𑁄𑀲𑀺 𑀧𑀸𑀲𑀸𑀤𑀺𑀓𑁄, 𑀉𑀓𑁆𑀔𑀺𑀢𑁆𑀢𑀫𑀸𑀮𑀸𑀧𑀼𑀝𑁄 𑀯𑀺𑀬 𑀅𑀮𑀗𑁆𑀓𑀢𑀫𑀸𑀮𑀸𑀕𑀩𑁆𑀪𑁄 𑀯𑀺𑀬 𑀘 𑀲𑀩𑁆𑀩𑀸𑀓𑀸𑀭𑀧𑀸𑀭𑀺𑀧𑀽𑀭𑀺𑀬𑀸 𑀲𑀫𑀺𑀤𑁆𑀥𑁄. 𑀢𑀲𑁆𑀫𑀸 𑀲𑀫𑀺𑀤𑁆𑀥𑀺𑀢𑁆𑀯𑁂𑀯 𑀲𑀗𑁆𑀔𑀁 𑀕𑀢𑁄. 𑀫𑀸𑀭𑁄𑀢𑀺 𑀫𑀭𑀡𑀁 𑀧𑀼𑀘𑁆𑀙𑀢𑀺. 𑀫𑀸𑀭𑀧𑀜𑁆𑀜𑀢𑁆𑀢𑀻𑀢𑀺 𑀫𑀸𑀭𑁄𑀢𑀺 𑀧𑀜𑁆𑀜𑀢𑁆𑀢𑀺 𑀦𑀸𑀫𑀁 𑀦𑀸𑀫𑀥𑁂𑀬𑁆𑀬𑀁. 𑀅𑀢𑁆𑀣𑀺 𑀢𑀢𑁆𑀣 𑀫𑀸𑀭𑁄 𑀯𑀸 𑀫𑀸𑀭𑀧𑀜𑁆𑀜𑀢𑁆𑀢𑀺 𑀯𑀸𑀢𑀺 𑀢𑀢𑁆𑀣 𑀫𑀭𑀡𑀁 𑀯𑀸 𑀫𑀭𑀡𑀦𑁆𑀢𑀺 𑀇𑀤𑀁 𑀦𑀸𑀫𑀁 𑀯𑀸 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀘𑀢𑀼𑀢𑁆𑀣𑀁 𑀉𑀢𑁆𑀢𑀸𑀦𑀫𑁂𑀯, 𑀢𑀣𑀸 𑀧𑀜𑁆𑀘𑀫𑀁.

𑁬. 𑀲𑀫𑀺𑀤𑁆𑀥𑀺𑀮𑁄𑀓𑀧𑀜𑁆𑀳𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁮. 𑀙𑀝𑁆𑀞𑁂 𑀮𑁄𑀓𑁄𑀢𑀺 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄. 𑀇𑀢𑀺 𑀫𑀺𑀕𑀚𑀸𑀮𑀢𑁆𑀣𑁂𑀭𑀲𑁆𑀲 𑀆𑀬𑀸𑀘𑀦𑀲𑀼𑀢𑁆𑀢𑀢𑁄 𑀧𑀝𑁆𑀞𑀸𑀬 𑀧𑀜𑁆𑀘𑀲𑀼𑀧𑀺 𑀲𑀼𑀢𑁆𑀢𑁂𑀲𑀼 𑀯𑀝𑁆𑀝𑀯𑀺𑀯𑀝𑁆𑀝𑀫𑁂𑀯 𑀓𑀣𑀺𑀢𑀁.

𑁭. 𑀉𑀧𑀲𑁂𑀦𑀆𑀲𑀻𑀯𑀺𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁯. 𑀲𑀢𑁆𑀢𑀫𑁂 𑀲𑀻𑀢𑀯𑀦𑁂𑀢𑀺 𑀏𑀯𑀁𑀦𑀸𑀫𑀓𑁂 𑀲𑀼𑀲𑀸𑀦𑀯𑀦𑁂. 𑀲𑀧𑁆𑀧𑀲𑁄𑀡𑁆𑀟𑀺𑀓𑀧𑀩𑁆𑀪𑀸𑀭𑁂𑀢𑀺 𑀲𑀧𑁆𑀧𑀨𑀡𑀲𑀤𑀺𑀲𑀢𑀸𑀬 𑀏𑀯𑀁𑀮𑀤𑁆𑀥𑀦𑀸𑀫𑁂 𑀧𑀩𑁆𑀪𑀸𑀭𑁂. 𑀉𑀧𑀲𑁂𑀦𑀲𑁆𑀲𑀸𑀢𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀓𑀦𑀺𑀝𑁆𑀞𑀪𑀸𑀢𑀺𑀓𑀉𑀧𑀲𑁂𑀦𑀢𑁆𑀣𑁂𑀭𑀲𑁆𑀲. 𑀆𑀲𑀻𑀯𑀺𑀲𑁄 𑀧𑀢𑀺𑀢𑁄 𑀳𑁄𑀢𑀻𑀢𑀺 𑀣𑁂𑀭𑁄 𑀓𑀺𑀭 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀫𑀳𑀸𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀮𑁂𑀡𑀘𑁆𑀙𑀸𑀬𑀸𑀬 𑀫𑀦𑁆𑀤𑀫𑀦𑁆𑀤𑁂𑀦 𑀯𑀸𑀢𑀧𑀸𑀦𑀯𑀸𑀢𑁂𑀦 𑀩𑀻𑀚𑀺𑀬𑀫𑀸𑀦𑁄 𑀦𑀺𑀲𑀻𑀤𑀺𑀢𑁆𑀯𑀸 𑀤𑀼𑀧𑀝𑁆𑀝𑀦𑀺𑀯𑀸𑀲𑀦𑁂 𑀲𑀽𑀘𑀺𑀓𑀫𑁆𑀫𑀁 𑀓𑀭𑁄𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀮𑁂𑀡𑀘𑁆𑀙𑀤𑀦𑁂 𑀤𑁆𑀯𑁂 𑀆𑀲𑀻𑀯𑀺𑀲𑀧𑁄𑀢𑀓𑀸 𑀓𑀻𑀴𑀦𑁆𑀢𑀺. 𑀢𑁂𑀲𑀼 𑀏𑀓𑁄 𑀧𑀢𑀺𑀢𑁆𑀯𑀸 𑀣𑁂𑀭𑀲𑁆𑀲 𑀅𑀁𑀲𑀓𑀽𑀝𑁂 𑀅𑀯𑀢𑁆𑀣𑀸𑀲𑀺. 𑀲𑁄 𑀘 𑀨𑀼𑀝𑁆𑀞𑀯𑀺𑀲𑁄 𑀳𑁄𑀢𑀺. 𑀢𑀲𑁆𑀫𑀸 𑀧𑀢𑀺𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀣𑁂𑀭𑀲𑁆𑀲 𑀓𑀸𑀬𑁂 𑀤𑀻𑀧𑀲𑀺𑀔𑀸 𑀯𑀺𑀬 𑀯𑀝𑁆𑀝𑀺𑀁 𑀧𑀭𑀺𑀬𑀸𑀤𑀺𑀬𑀫𑀸𑀦𑀫𑁂𑀯𑀲𑁆𑀲 𑀯𑀺𑀲𑀁 𑀑𑀢𑀺𑀡𑁆𑀡𑀁. 𑀣𑁂𑀭𑁄 𑀯𑀺𑀲𑀲𑁆𑀲 𑀢𑀣𑀸𑀕𑀫𑀦𑀁 𑀤𑀺𑀲𑁆𑀯𑀸 𑀓𑀺𑀜𑁆𑀘𑀸𑀧𑀺 𑀢𑀁 𑀧𑀢𑀺𑀢𑀫𑀢𑁆𑀢𑀫𑁂𑀯 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦 𑀕𑀢𑀁, 𑀅𑀢𑁆𑀢𑀦𑁄 𑀧𑀦 𑀇𑀤𑁆𑀥𑀺𑀩𑀮𑁂𑀦 ‘‘𑀅𑀬𑀁 𑀅𑀢𑁆𑀢𑀪𑀸𑀯𑁄 𑀮𑁂𑀡𑁂 𑀫𑀸 𑀯𑀺𑀦𑀲𑁆𑀲𑀢𑀽’’𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺. 𑀧𑀼𑀭𑀸𑀬𑀁 𑀓𑀸𑀬𑁄 𑀇𑀥𑁂𑀯 𑀯𑀺𑀓𑀺𑀭𑀢𑀻𑀢𑀺 𑀬𑀸𑀯 𑀦 𑀯𑀺𑀓𑀺𑀭𑀢𑀺, 𑀢𑀸𑀯 𑀦𑀁 𑀩𑀳𑀺𑀤𑁆𑀥𑀸 𑀦𑀻𑀳𑀭𑀣𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀅𑀜𑁆𑀜𑀣𑀸𑀪𑀸𑀯𑀁. 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀸 𑀯𑀺𑀧𑀭𑀺𑀡𑀸𑀫𑀦𑁆𑀢𑀺 𑀘𑀓𑁆𑀔𑀼𑀲𑁄𑀢𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀧𑀓𑀢𑀺𑀯𑀺𑀚𑀳𑀦𑀪𑀸𑀯𑀁. 𑀢𑀢𑁆𑀣𑁂𑀯 𑀯𑀺𑀓𑀺𑀭𑀻𑀢𑀺 𑀩𑀳𑀺 𑀦𑀻𑀳𑀭𑀺𑀢𑁆𑀯𑀸 𑀞𑀧𑀺𑀢𑀝𑁆𑀞𑀸𑀦𑁂 𑀫𑀜𑁆𑀘𑀓𑀲𑁆𑀫𑀺𑀁𑀬𑁂𑀯 𑀯𑀺𑀓𑀺𑀭𑀺.

𑁮. 𑀉𑀧𑀯𑀸𑀡𑀲𑀦𑁆𑀤𑀺𑀝𑁆𑀞𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁦. 𑀅𑀝𑁆𑀞𑀫𑁂 𑀭𑀽𑀧𑀧𑁆𑀧𑀝𑀺𑀲𑀁𑀯𑁂𑀤𑀻𑀢𑀺 𑀦𑀻𑀮𑀧𑀻𑀢𑀸𑀤𑀺𑀪𑁂𑀤𑀁 𑀆𑀭𑀫𑁆𑀫𑀡𑀁 𑀯𑀯𑀢𑁆𑀣𑀸𑀧𑁂𑀦𑁆𑀢𑁄 𑀭𑀽𑀧𑀁 𑀧𑀝𑀺𑀲𑀁𑀯𑀺𑀤𑀺𑀢𑀁 𑀓𑀭𑁄𑀢𑀺, 𑀢𑀲𑁆𑀫𑀸 𑀭𑀽𑀧𑀧𑁆𑀧𑀝𑀺𑀲𑀁𑀯𑁂𑀤𑀻 𑀦𑀸𑀫 𑀳𑁄𑀢𑀺. 𑀭𑀽𑀧𑀭𑀸𑀕𑀧𑁆𑀧𑀝𑀺𑀲𑀁𑀯𑁂𑀤𑀻𑀢𑀺 𑀓𑀺𑀮𑁂𑀲𑀲𑁆𑀲 𑀅𑀢𑁆𑀣𑀺𑀪𑀸𑀯𑁂𑀦𑁂𑀯 𑀧𑀦 𑀭𑀽𑀧𑀭𑀸𑀕𑀁 𑀧𑀝𑀺𑀲𑀁𑀯𑀺𑀤𑀺𑀢𑀁 𑀓𑀭𑁄𑀢𑀺 𑀦𑀸𑀫, 𑀢𑀲𑁆𑀫𑀸 𑀭𑀽𑀧𑀭𑀸𑀕𑀧𑁆𑀧𑀝𑀺𑀲𑀁𑀯𑁂𑀤𑀻𑀢𑀺 𑀯𑀼𑀘𑁆𑀘𑀢𑀺. 𑀲𑀦𑁆𑀤𑀺𑀝𑁆𑀞𑀺𑀓𑁄𑀢𑀺𑀆𑀤𑀻𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀦𑁄 𑀘 𑀭𑀽𑀧𑀭𑀸𑀕𑀧𑁆𑀧𑀝𑀺𑀲𑀁𑀯𑁂𑀤𑀻𑀢𑀺 𑀓𑀺𑀮𑁂𑀲𑀲𑁆𑀲 𑀦𑀢𑁆𑀣𑀺𑀪𑀸𑀯𑁂𑀦𑁂𑀯 𑀦 𑀭𑀽𑀧𑀭𑀸𑀕𑀁 𑀧𑀝𑀺𑀲𑀁𑀯𑀺𑀤𑀺𑀢𑀁 𑀓𑀭𑁄𑀢𑀺 𑀦𑀸𑀫, 𑀢𑀲𑁆𑀫𑀸 ‘‘𑀦𑁄 𑀘 𑀭𑀽𑀧𑀭𑀸𑀕𑀧𑁆𑀧𑀝𑀺𑀲𑀁𑀯𑁂𑀤𑀻’’𑀢𑀺 𑀯𑀼𑀘𑁆𑀘𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑁂𑀔𑀸𑀲𑁂𑀔𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀸 𑀓𑀣𑀺𑀢𑀸.

𑁯. 𑀧𑀞𑀫𑀙𑀨𑀲𑁆𑀲𑀸𑀬𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁧. 𑀦𑀯𑀫𑁂 𑀨𑀲𑁆𑀲𑀸𑀬𑀢𑀦𑀸𑀦𑀦𑁆𑀢𑀺 𑀨𑀲𑁆𑀲𑀸𑀓𑀭𑀸𑀦𑀁. 𑀅𑀯𑀼𑀲𑀺𑀢𑀦𑁆𑀢𑀺 𑀅𑀯𑀼𑀝𑁆𑀞𑀁. 𑀆𑀭𑀓𑀸𑀢𑀺 𑀤𑀽𑀭𑁂. 𑀏𑀢𑁆𑀣𑀸𑀳𑀁, 𑀪𑀦𑁆𑀢𑁂, 𑀅𑀦𑀲𑁆𑀲𑀲𑀦𑁆𑀢𑀺, 𑀪𑀦𑁆𑀢𑁂, 𑀅𑀳𑀁 𑀏𑀢𑁆𑀣 𑀅𑀦𑀲𑁆𑀲𑀲𑀺𑀁, 𑀦𑀝𑁆𑀞𑁄 𑀦𑀸𑀫 𑀅𑀳𑀦𑁆𑀢𑀺 𑀯𑀤𑀢𑀺. 𑀪𑀕𑀯𑀸 𑁋 ‘‘𑀅𑀬𑀁 𑀪𑀺𑀓𑁆𑀔𑀼 ‘𑀅𑀳𑀁 𑀦𑀸𑀫 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀦𑀝𑁆𑀞𑁄’𑀢𑀺 𑀯𑀤𑀢𑀺, 𑀓𑀺𑀦𑁆𑀦𑀼 𑀔𑁆𑀯𑀲𑁆𑀲 𑀅𑀜𑁆𑀜𑁂𑀲𑀼 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦-𑀓𑀲𑀺𑀡𑀓𑀫𑁆𑀫𑀝𑁆𑀞𑀸𑀦𑀸𑀤𑀻𑀲𑀼 𑀅𑀪𑀺𑀬𑁄𑀕𑁄 𑀅𑀢𑁆𑀣𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀢𑀫𑁆𑀧𑀺 𑀅𑀧𑀲𑁆𑀲𑀦𑁆𑀢𑁄 𑁋 ‘‘𑀓𑀢𑀭𑀁 𑀦𑀼 𑀔𑁄 𑀓𑀫𑁆𑀫𑀝𑁆𑀞𑀸𑀦𑀁 𑀇𑀫𑀲𑁆𑀲 𑀲𑀧𑁆𑀧𑀸𑀬𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀢𑁄 ‘‘𑀆𑀬𑀢𑀦𑀓𑀫𑁆𑀫𑀝𑁆𑀞𑀸𑀦𑀫𑁂𑀯 𑀲𑀧𑁆𑀧𑀸𑀬’’𑀦𑁆𑀢𑀺 𑀤𑀺𑀲𑁆𑀯𑀸 𑀢𑀁 𑀓𑀣𑁂𑀦𑁆𑀢𑁄 𑀢𑀁 𑀓𑀺𑀁 𑀫𑀜𑁆𑀜𑀲𑀺 𑀪𑀺𑀓𑁆𑀔𑀽𑀢𑀺𑀆𑀤𑀺𑀫𑀸𑀳. 𑀲𑀸𑀥𑀽𑀢𑀺 𑀢𑀲𑁆𑀲 𑀩𑁆𑀬𑀸𑀓𑀭𑀡𑁂 𑀲𑀫𑁆𑀧𑀳𑀁𑀲𑀦𑀁. 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸𑀢𑀺 𑀅𑀬𑀫𑁂𑀯 𑀯𑀝𑁆𑀝𑀤𑀼𑀓𑁆𑀔𑀲𑁆𑀲𑀦𑁆𑀢𑁄 𑀧𑀭𑀺𑀘𑁆𑀙𑁂𑀤𑁄, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀢𑁆𑀣𑁄.

𑁧𑁦. 𑀤𑀼𑀢𑀺𑀬𑀙𑀨𑀲𑁆𑀲𑀸𑀬𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁨. 𑀤𑀲𑀫𑁂 𑀅𑀦𑀲𑁆𑀲𑀲𑀦𑁆𑀢𑀺 𑀦𑀲𑁆𑀲𑀲𑀺𑀁, 𑀦𑀝𑁆𑀞𑁄 𑀦𑀸𑀫𑀫𑁆𑀳𑀺 𑀇𑀘𑁆𑀘𑁂𑀯 𑀅𑀢𑁆𑀣𑁄. 𑀆𑀬𑀢𑀺𑀁 𑀅𑀧𑀼𑀦𑀩𑁆𑀪𑀯𑀸𑀬𑀸𑀢𑀺 𑀏𑀢𑁆𑀣 𑀆𑀬𑀢𑀺𑀁 𑀅𑀧𑀼𑀦𑀩𑁆𑀪𑀯𑁄 𑀦𑀸𑀫 𑀦𑀺𑀩𑁆𑀩𑀸𑀦𑀁, 𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀧𑀳𑀻𑀦𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄.

𑁧𑁧. 𑀢𑀢𑀺𑀬𑀙𑀨𑀲𑁆𑀲𑀸𑀬𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁩. 𑀏𑀓𑀸𑀤𑀲𑀫𑁂 𑀅𑀦𑀲𑁆𑀲𑀲𑀦𑁆𑀢𑀺 𑀦𑀝𑁆𑀞𑁄, 𑀧𑀦𑀲𑁆𑀲𑀲𑀦𑁆𑀢𑀺 𑀅𑀢𑀺𑀦𑀝𑁆𑀞𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑀫𑀺𑀕𑀚𑀸𑀮𑀯𑀕𑁆𑀕𑁄 𑀲𑀢𑁆𑀢𑀫𑁄.

𑁮. 𑀕𑀺𑀮𑀸𑀦𑀯𑀕𑁆𑀕𑁄

𑁧-𑁫. 𑀧𑀞𑀫𑀕𑀺𑀮𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁪-𑁭𑁮. 𑀕𑀺𑀮𑀸𑀦𑀯𑀕𑁆𑀕𑀲𑁆𑀲 𑀧𑀞𑀫𑁂 𑀅𑀫𑀼𑀓𑀲𑁆𑀫𑀺𑀦𑁆𑀢𑀺 𑀅𑀲𑀼𑀓𑀲𑁆𑀫𑀺𑀁. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀅𑀧𑁆𑀧𑀜𑁆𑀜𑀸𑀢𑁄𑀢𑀺 𑀅𑀜𑁆𑀜𑀸𑀢𑁄 𑀅𑀧𑀸𑀓𑀝𑁄. 𑀦𑀯𑁄𑀧𑀺 𑀳𑀺 𑀓𑁄𑀘𑀺 𑀧𑀜𑁆𑀜𑀸𑀢𑁄 𑀳𑁄𑀢𑀺 𑀭𑀸𑀳𑀼𑀮𑀢𑁆𑀣𑁂𑀭𑁄 𑀯𑀺𑀬 𑀲𑀼𑀫𑀦𑀲𑀸𑀫𑀡𑁂𑀭𑁄 𑀯𑀺𑀬 𑀘, 𑀅𑀬𑀁 𑀧𑀦 𑀦𑀯𑁄 𑀘𑁂𑀯 𑀅𑀧𑀜𑁆𑀜𑀸𑀢𑁄 𑀘. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺. 𑀢𑀣𑀸 𑀇𑀢𑁄 𑀧𑀭𑁂𑀲𑀼 𑀘𑀢𑀽𑀲𑀼.

𑁬. 𑀧𑀞𑀫𑀅𑀯𑀺𑀚𑁆𑀚𑀸𑀧𑀳𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁯. 𑀙𑀝𑁆𑀞𑁂 𑀅𑀦𑀺𑀘𑁆𑀘𑀢𑁄 𑀚𑀸𑀦𑀢𑁄𑀢𑀺 𑀤𑀼𑀓𑁆𑀔𑀸𑀦𑀢𑁆𑀢𑀯𑀲𑁂𑀦 𑀚𑀸𑀦𑀢𑁄𑀧𑀺 𑀧𑀳𑀻𑀬𑀢𑀺𑀬𑁂𑀯, 𑀇𑀤𑀁 𑀧𑀦 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑁆𑀯𑀸 𑀯𑀼𑀢𑁆𑀢𑁂 𑀩𑀼𑀚𑁆𑀛𑀦𑀓𑀲𑁆𑀲 𑀅𑀚𑁆𑀛𑀸𑀲𑀬𑁂𑀦 𑀯𑀼𑀢𑁆𑀢𑀁.

𑁭. 𑀤𑀼𑀢𑀺𑀬𑀅𑀯𑀺𑀚𑁆𑀚𑀸𑀧𑀳𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁦. 𑀲𑀢𑁆𑀢𑀫𑁂 𑀲𑀩𑁆𑀩𑁂 𑀥𑀫𑁆𑀫𑀸𑀢𑀺 𑀲𑀩𑁆𑀩𑁂 𑀢𑁂𑀪𑀽𑀫𑀓𑀥𑀫𑁆𑀫𑀸. 𑀦𑀸𑀮𑀁 𑀅𑀪𑀺𑀦𑀺𑀯𑁂𑀲𑀸𑀬𑀸𑀢𑀺 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑀕𑁆𑀕𑀸𑀳𑁂𑀦 𑀕𑀡𑁆𑀳𑀺𑀢𑀼𑀁 𑀦 𑀬𑀼𑀢𑁆𑀢𑀸. 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀻𑀢𑀺 𑀲𑀩𑁆𑀩𑀸𑀦𑀺 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀸𑀦𑀺. 𑀅𑀜𑁆𑀜𑀢𑁄 𑀧𑀲𑁆𑀲𑀢𑀻𑀢𑀺 𑀬𑀣𑀸 𑀅𑀧𑀭𑀺𑀜𑁆𑀜𑀸𑀢𑀸𑀪𑀺𑀦𑀺𑀯𑁂𑀲𑁄 𑀚𑀦𑁄 𑀧𑀲𑁆𑀲𑀢𑀺, 𑀢𑀢𑁄 𑀅𑀜𑁆𑀜𑀢𑁄 𑀧𑀲𑁆𑀲𑀢𑀺. 𑀅𑀧𑀭𑀺𑀜𑁆𑀜𑀸𑀢𑀸𑀪𑀺𑀦𑀺𑀯𑁂𑀲𑁄 𑀳𑀺 𑀚𑀦𑁄 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺𑀧𑀺 𑀅𑀢𑁆𑀢𑀢𑁄 𑀧𑀲𑁆𑀲𑀢𑀺. 𑀧𑀭𑀺𑀜𑁆𑀜𑀸𑀢𑀸𑀪𑀺𑀦𑀺𑀯𑁂𑀲𑁄 𑀧𑀦 𑀅𑀦𑀢𑁆𑀢𑀢𑁄 𑀧𑀲𑁆𑀲𑀢𑀺, 𑀦𑁄 𑀅𑀢𑁆𑀢𑀢𑁄𑀢𑀺 𑀏𑀯𑀁 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀦𑀢𑁆𑀢𑀮𑀓𑁆𑀔𑀡𑀫𑁂𑀯 𑀓𑀣𑀺𑀢𑀁.

𑁮. 𑀲𑀫𑁆𑀩𑀳𑀼𑀮𑀪𑀺𑀓𑁆𑀔𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁧. 𑀅𑀝𑁆𑀞𑀫𑁂 𑀇𑀥 𑀦𑁄𑀢𑀺 𑀏𑀢𑁆𑀣 𑀦𑁄-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀫𑁂𑀯. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀓𑁂𑀯𑀮𑀁 𑀇𑀥 𑀤𑀼𑀓𑁆𑀔𑀮𑀓𑁆𑀔𑀡𑀁 𑀓𑀣𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁯. 𑀮𑁄𑀓𑀧𑀜𑁆𑀳𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁨. 𑀦𑀯𑀫𑁂 𑀮𑀼𑀚𑁆𑀚𑀢𑀻𑀢𑀺 𑀧𑀮𑀼𑀚𑁆𑀚𑀢𑀺 𑀪𑀺𑀚𑁆𑀚𑀢𑀺. 𑀇𑀥 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀓𑀣𑀺𑀢𑀁.

𑁧𑁦. 𑀨𑀕𑁆𑀕𑀼𑀦𑀧𑀜𑁆𑀳𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁩. 𑀤𑀲𑀫𑁂 𑀙𑀺𑀦𑁆𑀦𑀧𑀧𑀜𑁆𑀘𑁂𑀢𑀺 𑀢𑀡𑁆𑀳𑀸𑀧𑀧𑀜𑁆𑀘𑀲𑁆𑀲 𑀙𑀺𑀦𑁆𑀦𑀢𑁆𑀢𑀸 𑀙𑀺𑀦𑁆𑀦𑀧𑀧𑀜𑁆𑀘𑁂. 𑀙𑀺𑀦𑁆𑀦𑀯𑀝𑀼𑀫𑁂𑀢𑀺 𑀢𑀡𑁆𑀳𑀸𑀯𑀝𑀼𑀫𑀲𑁆𑀲𑁂𑀯 𑀙𑀺𑀦𑁆𑀦𑀢𑁆𑀢𑀸 𑀙𑀺𑀦𑁆𑀦𑀯𑀝𑀼𑀫𑁂. 𑀓𑀺𑀁 𑀧𑀼𑀘𑁆𑀙𑀸𑀫𑀻𑀢𑀺 𑀧𑀼𑀘𑁆𑀙𑀢𑀺? 𑀅𑀢𑀺𑀓𑁆𑀓𑀦𑁆𑀢𑀩𑀼𑀤𑁆𑀥𑁂𑀳𑀺 𑀧𑀭𑀺𑀳𑀭𑀺𑀢𑀸𑀦𑀺 𑀘𑀓𑁆𑀔𑀼𑀲𑁄𑀢𑀸𑀤𑀻𑀦𑀺 𑀧𑀼𑀘𑁆𑀙𑀸𑀫𑀻𑀢𑀺 𑀧𑀼𑀘𑁆𑀙𑀢𑀺. 𑀅𑀣 𑀯𑀸 𑀲𑀘𑁂 𑀫𑀕𑁆𑀕𑁂 𑀪𑀸𑀯𑀺𑀢𑁂𑀧𑀺 𑀅𑀦𑀸𑀕𑀢𑁂 𑀘𑀓𑁆𑀔𑀼𑀲𑁄𑀢𑀸𑀤𑀺𑀯𑀝𑁆𑀝𑀁 𑀯𑀟𑁆𑀠𑁂𑀬𑁆𑀬, 𑀢𑀁 𑀧𑀼𑀘𑁆𑀙𑀸𑀫𑀻𑀢𑀺 𑀧𑀼𑀘𑁆𑀙𑀢𑀻𑀢𑀺.

𑀕𑀺𑀮𑀸𑀦𑀯𑀕𑁆𑀕𑁄 𑀅𑀝𑁆𑀞𑀫𑁄.

𑁯. 𑀙𑀦𑁆𑀦𑀯𑀕𑁆𑀕𑁄

𑁧. 𑀧𑀮𑁄𑀓𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁪. 𑀙𑀦𑁆𑀦𑀯𑀕𑁆𑀕𑀲𑁆𑀲 𑀧𑀞𑀫𑁂 𑀧𑀮𑁄𑀓𑀥𑀫𑁆𑀫𑀦𑁆𑀢𑀺 𑀪𑀺𑀚𑁆𑀚𑀦𑀓𑀲𑀪𑀸𑀯𑀁. 𑀏𑀯𑀫𑁂𑀢𑁆𑀣 𑀅𑀦𑀺𑀘𑁆𑀘𑀮𑀓𑁆𑀔𑀡𑀫𑁂𑀯 𑀓𑀣𑀺𑀢𑀁.

𑁨. 𑀲𑀼𑀜𑁆𑀜𑀢𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁫. 𑀤𑀼𑀢𑀺𑀬𑁂 𑀅𑀢𑁆𑀢𑀦𑀺𑀬𑁂𑀦𑀸𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦 𑀧𑀭𑀺𑀓𑁆𑀔𑀸𑀭𑁂𑀦. 𑀏𑀯𑀫𑁂𑀢𑁆𑀣 𑀅𑀦𑀢𑁆𑀢𑀮𑀓𑁆𑀔𑀡𑀫𑁂𑀯 𑀓𑀣𑀺𑀢𑀁.

𑁩. 𑀲𑀁𑀔𑀺𑀢𑁆𑀢𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁬. 𑀢𑀢𑀺𑀬𑀁 𑀔𑀦𑁆𑀥𑀺𑀬𑀯𑀕𑁆𑀕𑁂 𑀆𑀦𑀦𑁆𑀤𑁄𑀯𑀸𑀤𑁂 (𑀲𑀁. 𑀦𑀺. 𑁩.𑁮𑁩) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑁪. 𑀙𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁭. 𑀘𑀢𑀼𑀢𑁆𑀣𑁂 𑀙𑀦𑁆𑀦𑁄𑀢𑀺 𑀏𑀯𑀁𑀦𑀸𑀫𑀓𑁄 𑀣𑁂𑀭𑁄, 𑀦 𑀅𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀦𑁆𑀢𑀣𑁂𑀭𑁄. 𑀧𑀝𑀺𑀲𑀮𑁆𑀮𑀸𑀦𑀸𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀢𑁄. 𑀕𑀺𑀮𑀸𑀦𑀧𑀼𑀘𑁆𑀙𑀓𑀸𑀢𑀺 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸. 𑀕𑀺𑀮𑀸𑀦𑀼𑀧𑀝𑁆𑀞𑀸𑀦𑀁 𑀦𑀸𑀫 𑀩𑀼𑀤𑁆𑀥𑀧𑀲𑀢𑁆𑀣𑀁 𑀩𑀼𑀤𑁆𑀥𑀯𑀡𑁆𑀡𑀺𑀢𑀁, 𑀢𑀲𑁆𑀫𑀸 𑀏𑀯𑀫𑀸𑀳. 𑀲𑀻𑀲𑀯𑁂𑀞𑀁 𑀤𑀤𑁂𑀬𑁆𑀬𑀸𑀢𑀺 𑀲𑀻𑀲𑁂 𑀯𑁂𑀞𑀦𑀁 𑀲𑀻𑀲𑀯𑁂𑀞𑀁, 𑀢𑀜𑁆𑀘 𑀤𑀤𑁂𑀬𑁆𑀬. 𑀲𑀢𑁆𑀣𑀦𑁆𑀢𑀺 𑀚𑀻𑀯𑀺𑀢𑀳𑀸𑀭𑀓𑀲𑀢𑁆𑀣𑀁. 𑀦𑀸𑀯𑀓𑀗𑁆𑀔𑀸𑀫𑀻𑀢𑀺 𑀦 𑀇𑀘𑁆𑀙𑀸𑀫𑀺. 𑀧𑀭𑀺𑀘𑀺𑀡𑁆𑀡𑁄𑀢𑀺 𑀧𑀭𑀺𑀘𑀭𑀺𑀢𑁄. 𑀫𑀦𑀸𑀧𑁂𑀦𑀸𑀢𑀺 𑀫𑀦𑀯𑀟𑁆𑀠𑀦𑀓𑁂𑀦 𑀓𑀸𑀬𑀓𑀫𑁆𑀫𑀸𑀤𑀺𑀦𑀸. 𑀏𑀢𑁆𑀣 𑀘 𑀲𑀢𑁆𑀢 𑀲𑁂𑀔𑀸 𑀧𑀭𑀺𑀘𑀭𑀦𑁆𑀢𑀺 𑀦𑀸𑀫, 𑀅𑀭𑀳𑀸 𑀧𑀭𑀺𑀘𑀸𑀭𑀻 𑀦𑀸𑀫, 𑀪𑀕𑀯𑀸 𑀧𑀭𑀺𑀘𑀺𑀡𑁆𑀡𑁄 𑀦𑀸𑀫.

𑀏𑀢𑀜𑁆𑀳𑀺, 𑀆𑀯𑀼𑀲𑁄, 𑀲𑀸𑀯𑀓𑀲𑁆𑀲 𑀧𑀢𑀺𑀭𑀽𑀧𑀦𑁆𑀢𑀺, 𑀆𑀯𑀼𑀲𑁄, 𑀲𑀸𑀯𑀓𑀲𑁆𑀲 𑀦𑀸𑀫 𑀏𑀢𑀁 𑀅𑀦𑀼𑀘𑁆𑀙𑀯𑀺𑀓𑀁. 𑀅𑀦𑀼𑀧𑀯𑀚𑁆𑀚𑀦𑁆𑀢𑀺 𑀅𑀧𑁆𑀧𑀯𑀢𑁆𑀢𑀺𑀓𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀁. 𑀧𑀼𑀘𑁆𑀙𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀲𑀼𑀢𑁆𑀯𑀸 𑀯𑁂𑀤𑀺𑀲𑁆𑀲𑀸𑀫𑀸𑀢𑀺 𑀅𑀬𑀁 𑀲𑀸𑀯𑀓𑀧𑀯𑀸𑀭𑀡𑀸 𑀦𑀸𑀫. 𑀏𑀢𑀁 𑀫𑀫𑀸𑀢𑀺𑀆𑀤𑀻𑀦𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀕𑁆𑀕𑀸𑀳𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀦𑀺𑀭𑁄𑀥𑀁 𑀤𑀺𑀲𑁆𑀯𑀸𑀢𑀺 𑀔𑀬𑀯𑀬𑀁 𑀜𑀢𑁆𑀯𑀸. 𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸𑀢𑀺 𑀲𑀫𑀦𑀼𑀧𑀲𑁆𑀲𑀸𑀫𑀻𑀢𑀺 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀲𑀫𑀦𑀼𑀧𑀲𑁆𑀲𑀸𑀫𑀺. 𑀏𑀢𑁆𑀢𑀓𑁂𑀲𑀼 𑀞𑀸𑀦𑁂𑀲𑀼 𑀙𑀦𑁆𑀦𑀢𑁆𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦 𑀧𑀼𑀘𑁆𑀙𑀺𑀢𑀁 𑀧𑀜𑁆𑀳𑀁 𑀅𑀭𑀳𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀣𑁂𑀲𑀺. 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀧𑀦 𑀢𑀲𑁆𑀲 𑀧𑀼𑀣𑀼𑀚𑁆𑀚𑀦𑀪𑀸𑀯𑀁 𑀜𑀢𑁆𑀯𑀸𑀧𑀺 𑀢𑀁 ‘‘𑀧𑀼𑀣𑀼𑀚𑁆𑀚𑀦𑁄’’𑀢𑀺 𑀯𑀸 ‘‘𑀔𑀻𑀡𑀸𑀲𑀯𑁄’’𑀢𑀺 𑀯𑀸 𑀅𑀯𑀢𑁆𑀯𑀸 𑀢𑀼𑀡𑁆𑀳𑀻𑀬𑁂𑀯 𑀅𑀳𑁄𑀲𑀺. 𑀘𑀼𑀦𑁆𑀤𑀢𑁆𑀣𑁂𑀭𑁄 𑀧𑀦𑀲𑁆𑀲 𑀧𑀼𑀣𑀼𑀚𑁆𑀚𑀦𑀪𑀸𑀯𑀁 𑀲𑀜𑁆𑀜𑀸𑀧𑁂𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀑𑀯𑀸𑀤𑀁 𑀅𑀤𑀸𑀲𑀺.

𑀢𑀢𑁆𑀣 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀫𑀸𑀭𑀡𑀦𑁆𑀢𑀺𑀓𑀁 𑀯𑁂𑀤𑀦𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀢𑁆𑀣𑀁 𑀆𑀳𑀭𑀸𑀫𑀻𑀢𑀺 𑀯𑀤𑀢𑀺, 𑀢𑀲𑁆𑀫𑀸 𑀧𑀼𑀣𑀼𑀚𑁆𑀚𑀦𑁄 𑀆𑀬𑀲𑁆𑀫𑀸, 𑀢𑁂𑀦 𑀇𑀤𑀫𑁆𑀧𑀺 𑀫𑀦𑀲𑀺𑀓𑀭𑁄𑀳𑀻𑀢𑀺 𑀤𑀻𑀧𑁂𑀢𑀺. 𑀬𑀲𑁆𑀫𑀸 𑀯𑀸 𑀙𑀦𑁆𑀦𑀁 𑀆𑀬𑀢𑀦𑀸𑀦𑀁 𑀦𑀺𑀭𑁄𑀥𑀁 𑀤𑀺𑀲𑁆𑀯𑀸 𑀘𑀓𑁆𑀔𑀸𑀤𑀻𑀦𑀺 𑀢𑀺𑀡𑁆𑀡𑀁 𑀕𑀸𑀳𑀸𑀦𑀁 𑀯𑀲𑁂𑀦 𑀦 𑀲𑀫𑀦𑀼𑀧𑀲𑁆𑀲𑀸𑀫𑀻𑀢𑀺 𑀯𑀤𑀲𑀺. 𑀢𑀲𑁆𑀫𑀸 𑀇𑀤𑀫𑁆𑀧𑀺 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀲𑀦𑀁 𑀆𑀬𑀲𑁆𑀫𑀢𑀸 𑀫𑀦𑀲𑀺𑀓𑀸𑀢𑀩𑁆𑀩𑀦𑁆𑀢𑀺𑀧𑀺 𑀧𑀼𑀣𑀼𑀚𑁆𑀚𑀦𑀪𑀸𑀯𑀫𑁂𑀯 𑀤𑀻𑀧𑁂𑀦𑁆𑀢𑁄 𑀯𑀤𑀢𑀺. 𑀦𑀺𑀘𑁆𑀘𑀓𑀧𑁆𑀧𑀦𑁆𑀢𑀺 𑀦𑀺𑀘𑁆𑀘𑀓𑀸𑀮𑀁. 𑀦𑀺𑀲𑁆𑀲𑀺𑀢𑀲𑁆𑀲𑀸𑀢𑀺 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀻𑀳𑀺 𑀦𑀺𑀲𑁆𑀲𑀺𑀢𑀲𑁆𑀲. 𑀘𑀮𑀺𑀢𑀦𑁆𑀢𑀺 𑀯𑀺𑀧𑁆𑀨𑀦𑁆𑀤𑀺𑀢𑀁 𑀳𑁄𑀢𑀺. 𑀬𑀣𑀬𑀺𑀤𑀁 𑀆𑀬𑀲𑁆𑀫𑀢𑁄 𑀉𑀧𑁆𑀧𑀦𑁆𑀦𑀁 𑀯𑁂𑀤𑀦𑀁 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 ‘‘𑀅𑀳𑀁 𑀯𑁂𑀤𑀬𑀸𑀫𑀺, 𑀫𑀫 𑀯𑁂𑀤𑀦𑀸’’𑀢𑀺 𑀅𑀧𑁆𑀧𑀳𑀻𑀦𑀕𑁆𑀕𑀸𑀳𑀲𑁆𑀲 𑀇𑀤𑀸𑀦𑀺 𑀯𑀺𑀧𑁆𑀨𑀦𑁆𑀤𑀺𑀢𑀁 𑀳𑁄𑀢𑀺, 𑀇𑀫𑀺𑀦𑀸𑀧𑀺 𑀦𑀁 ‘‘𑀧𑀼𑀣𑀼𑀚𑁆𑀚𑀦𑁄𑀯 𑀢𑁆𑀯’’𑀦𑁆𑀢𑀺 𑀯𑀤𑀢𑀺.

𑀧𑀲𑁆𑀲𑀤𑁆𑀥𑀻𑀢𑀺 𑀓𑀸𑀬𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀺, 𑀓𑀺𑀮𑁂𑀲𑀧𑀲𑁆𑀲𑀤𑁆𑀥𑀺 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀦𑀢𑀺𑀬𑀸𑀢𑀺 𑀢𑀡𑁆𑀳𑀸𑀦𑀢𑀺𑀬𑀸. 𑀅𑀲𑀢𑀻𑀢𑀺 𑀪𑀯𑀢𑁆𑀣𑀸𑀬 𑀆𑀮𑀬𑀦𑀺𑀓𑀦𑁆𑀢𑀺𑀧𑀭𑀺𑀬𑀼𑀝𑁆𑀞𑀸𑀦𑁂 𑀅𑀲𑀢𑀺. 𑀆𑀕𑀢𑀺𑀕𑀢𑀺 𑀦 𑀳𑁄𑀢𑀻𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀆𑀕𑀢𑀺 𑀦𑀸𑀫, 𑀘𑀼𑀢𑀺𑀯𑀲𑁂𑀦 𑀕𑀫𑀦𑀁 𑀦𑀸𑀫 𑀦 𑀳𑁄𑀢𑀺. 𑀘𑀼𑀢𑀽𑀧𑀧𑀸𑀢𑁄𑀢𑀺 𑀘𑀯𑀦𑀯𑀲𑁂𑀦 𑀘𑀼𑀢𑀺, 𑀉𑀧𑀧𑀚𑁆𑀚𑀦𑀯𑀲𑁂𑀦 𑀉𑀧𑀧𑀸𑀢𑁄. 𑀦𑁂𑀯𑀺𑀥 𑀦 𑀳𑀼𑀭𑀁 𑀦 𑀉𑀪𑀬𑀫𑀦𑁆𑀢𑀭𑁂𑀦𑀸𑀢𑀺 𑀦 𑀇𑀥𑀮𑁄𑀓𑁂 𑀦 𑀧𑀭𑀮𑁄𑀓𑁂 𑀦 𑀉𑀪𑀬𑀢𑁆𑀣 𑀳𑁄𑀢𑀺. 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀓𑀺𑀮𑁂𑀲𑀤𑀼𑀓𑁆𑀔𑀲𑁆𑀲 𑀅𑀬𑀫𑁂𑀯 𑀅𑀦𑁆𑀢𑁄 𑀅𑀬𑀁 𑀧𑀭𑀺𑀘𑁆𑀙𑁂𑀤𑁄 𑀧𑀭𑀺𑀯𑀝𑀼𑀫𑀪𑀸𑀯𑁄 𑀳𑁄𑀢𑀺. 𑀅𑀬𑀫𑁂𑀯 𑀳𑀺 𑀏𑀢𑁆𑀣 𑀅𑀢𑁆𑀣𑁄. 𑀬𑁂 𑀧𑀦 ‘‘𑀉𑀪𑀬𑀫𑀦𑁆𑀢𑀭𑁂𑀦𑀸’’𑀢𑀺 𑀯𑀘𑀦𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑀭𑀸𑀪𑀯𑀁 𑀇𑀘𑁆𑀙𑀦𑁆𑀢𑀺, 𑀢𑁂𑀲𑀁 𑀯𑀘𑀦𑀁 𑀦𑀺𑀭𑀢𑁆𑀣𑀓𑀁. 𑀅𑀦𑁆𑀢𑀭𑀸𑀪𑀯𑀲𑁆𑀲 𑀳𑀺 𑀪𑀸𑀯𑁄 𑀅𑀪𑀺𑀥𑀫𑁆𑀫𑁂 𑀧𑀝𑀺𑀓𑁆𑀔𑀺𑀢𑁆𑀢𑁄𑀬𑁂𑀯. ‘‘𑀅𑀦𑁆𑀢𑀭𑁂𑀦𑀸’’𑀢𑀺 𑀯𑀘𑀦𑀁 𑀧𑀦 𑀯𑀺𑀓𑀧𑁆𑀧𑀦𑁆𑀢𑀭𑀤𑀻𑀧𑀦𑀁. 𑀢𑀲𑁆𑀫𑀸 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑁋 𑀦𑁂𑀯 𑀇𑀥 𑀦 𑀳𑀼𑀭𑀁, 𑀅𑀧𑀭𑁄 𑀯𑀺𑀓𑀧𑁆𑀧𑁄 𑀦 𑀉𑀪𑀬𑀦𑁆𑀢𑀺.

𑀲𑀢𑁆𑀣𑀁 𑀆𑀳𑀭𑁂𑀲𑀻𑀢𑀺 𑀚𑀻𑀯𑀺𑀢𑀳𑀸𑀭𑀓𑀲𑀢𑁆𑀣𑀁 𑀆𑀳𑀭𑀺, 𑀆𑀳𑀭𑀺𑀢𑁆𑀯𑀸 𑀓𑀡𑁆𑀞𑀦𑀸𑀴𑀁 𑀙𑀺𑀦𑁆𑀤𑀺. 𑀅𑀣𑀲𑁆𑀲 𑀢𑀲𑁆𑀫𑀺𑀁 𑀔𑀡𑁂 𑀫𑀭𑀡𑀪𑀬𑀁 𑀑𑀓𑁆𑀓𑀫𑀺, 𑀕𑀢𑀺𑀦𑀺𑀫𑀺𑀢𑁆𑀢𑀁 𑀉𑀧𑀝𑁆𑀞𑀸𑀲𑀺. 𑀲𑁄 𑀅𑀢𑁆𑀢𑀦𑁄 𑀧𑀼𑀣𑀼𑀚𑁆𑀚𑀦𑀪𑀸𑀯𑀁 𑀜𑀢𑁆𑀯𑀸, 𑀲𑀁𑀯𑀺𑀕𑁆𑀕𑀘𑀺𑀢𑁆𑀢𑁄 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸, 𑀲𑀗𑁆𑀔𑀸𑀭𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸, 𑀲𑀫𑀲𑀻𑀲𑀻 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀲𑀫𑁆𑀫𑀼𑀔𑀸𑀬𑁂𑀯 𑀅𑀦𑀼𑀧𑀯𑀚𑁆𑀚𑀢𑀸 𑀩𑁆𑀬𑀸𑀓𑀢𑀸𑀢𑀺 𑀓𑀺𑀜𑁆𑀘𑀸𑀧𑀺 𑀇𑀤𑀁 𑀣𑁂𑀭𑀲𑁆𑀲 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀩𑁆𑀬𑀸𑀓𑀭𑀡𑀁 𑀳𑁄𑀢𑀺; 𑀏𑀢𑁂𑀦 𑀧𑀦 𑀩𑁆𑀬𑀸𑀓𑀭𑀡𑁂𑀦 𑀅𑀦𑀦𑁆𑀢𑀭𑀸𑀬𑀫𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀳𑁄𑀲𑀺. 𑀢𑀲𑁆𑀫𑀸 𑀪𑀕𑀯𑀸 𑀢𑀤𑁂𑀯 𑀩𑁆𑀬𑀸𑀓𑀭𑀡𑀁 𑀕𑀳𑁂𑀢𑁆𑀯𑀸 𑀓𑀣𑁂𑀲𑀺.

𑀉𑀧𑀯𑀚𑁆𑀚𑀓𑀼𑀮𑀸𑀦𑀻𑀢𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀓𑀼𑀮𑀸𑀦𑀺. 𑀇𑀫𑀺𑀦𑀸 𑀣𑁂𑀭𑁄, ‘‘𑀪𑀦𑁆𑀢𑁂, 𑀏𑀯𑀁 𑀉𑀧𑀝𑁆𑀞𑀸𑀓𑁂𑀲𑀼 𑀘 𑀉𑀧𑀝𑁆𑀞𑀸𑀬𑀺𑀓𑀸𑀲𑀼 𑀘 𑀯𑀺𑀚𑁆𑀚𑀫𑀸𑀦𑀸𑀲𑀼 𑀲𑁄 𑀪𑀺𑀓𑁆𑀔𑀼 𑀢𑀼𑀫𑁆𑀳𑀸𑀓𑀁 𑀲𑀸𑀲𑀦𑁂 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀻’’𑀢𑀺 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀢𑁆𑀢𑀺𑀬𑀁 𑀓𑀼𑀮𑀲𑀁𑀲𑀕𑁆𑀕𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄 𑀧𑀼𑀘𑁆𑀙𑀢𑀺. 𑀅𑀣𑀲𑁆𑀲 𑀪𑀕𑀯𑀸 𑀓𑀼𑀮𑁂𑀲𑀼 𑀲𑀁𑀲𑀕𑁆𑀕𑀸𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 𑀳𑁄𑀦𑁆𑀢𑀺 𑀳𑁂𑀢𑁂 𑀲𑀸𑀭𑀺𑀧𑀼𑀢𑁆𑀢𑀸𑀢𑀺𑀆𑀤𑀺𑀫𑀸𑀳. 𑀇𑀫𑀲𑁆𑀫𑀺𑀁 𑀓𑀺𑀭 𑀞𑀸𑀦𑁂 𑀣𑁂𑀭𑀲𑁆𑀲 𑀓𑀼𑀮𑁂𑀲𑀼 𑀅𑀲𑀁𑀲𑀝𑁆𑀞𑀪𑀸𑀯𑁄 𑀧𑀸𑀓𑀝𑁄 𑀅𑀳𑁄𑀲𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑁫-𑁬. 𑀧𑀼𑀡𑁆𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁮𑁮-𑁮𑁯. 𑀧𑀜𑁆𑀘𑀫𑁂 𑀢𑀜𑁆𑀘𑁂𑀢𑀺 𑀢𑀁 𑀘𑀓𑁆𑀔𑀼𑀜𑁆𑀘𑁂𑀯 𑀭𑀽𑀧𑀜𑁆𑀘. 𑀦𑀦𑁆𑀤𑀺𑀲𑀫𑀼𑀤𑀬𑀸 𑀤𑀼𑀓𑁆𑀔𑀲𑀫𑀼𑀤𑀬𑁄𑀢𑀺 𑀢𑀡𑁆𑀳𑀸𑀬 𑀲𑀫𑁄𑀥𑀸𑀦𑁂𑀦 𑀧𑀜𑁆𑀘𑀓𑁆𑀔𑀦𑁆𑀥𑀤𑀼𑀓𑁆𑀔𑀲𑁆𑀲 𑀲𑀫𑁄𑀥𑀸𑀦𑀁 𑀳𑁄𑀢𑀺. 𑀇𑀢𑀺 𑀙𑀲𑀼 𑀤𑁆𑀯𑀸𑀭𑁂𑀲𑀼 ‘‘𑀦𑀦𑁆𑀤𑀺𑀲𑀫𑀼𑀤𑀬𑀸 𑀤𑀼𑀓𑁆𑀔𑀲𑀫𑀼𑀤𑀬𑁄’’𑀢𑀺 𑀇𑀫𑀺𑀦𑀸 𑀤𑁆𑀯𑀺𑀦𑁆𑀦𑀁 𑀲𑀘𑁆𑀘𑀸𑀦𑀁 𑀯𑀲𑁂𑀦 𑀯𑀝𑁆𑀝𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀤𑀼𑀢𑀺𑀬𑀦𑀬𑁂 𑀦𑀺𑀭𑁄𑀥𑁄 𑀫𑀕𑁆𑀕𑁄𑀢𑀺 𑀤𑁆𑀯𑀺𑀦𑁆𑀦𑀁 𑀲𑀘𑁆𑀘𑀸𑀦𑀁 𑀯𑀲𑁂𑀦 𑀯𑀺𑀯𑀝𑁆𑀝𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀲𑀺. 𑀇𑀫𑀺𑀦𑀸 𑀢𑁆𑀯𑀁 𑀧𑀼𑀡𑁆𑀡𑀸𑀢𑀺 𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀺. 𑀏𑀯𑀁 𑀢𑀸𑀯 𑀯𑀝𑁆𑀝𑀯𑀺𑀯𑀝𑁆𑀝𑀯𑀲𑁂𑀦 𑀤𑁂𑀲𑀦𑀁 𑀅𑀭𑀳𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀇𑀤𑀸𑀦𑀺 𑀧𑀼𑀡𑁆𑀡𑀢𑁆𑀣𑁂𑀭𑀁 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀲𑀻𑀳𑀦𑀸𑀤𑀁 𑀦𑀤𑀸𑀧𑁂𑀢𑀼𑀁 𑀇𑀫𑀺𑀦𑀸 𑀢𑁆𑀯𑀦𑁆𑀢𑀺𑀆𑀤𑀺𑀫𑀸𑀳.

𑀘𑀡𑁆𑀟𑀸𑀢𑀺 𑀤𑀼𑀝𑁆𑀞𑀸 𑀓𑀺𑀩𑁆𑀩𑀺𑀲𑀸. 𑀨𑀭𑀼𑀲𑀸𑀢𑀺 𑀓𑀓𑁆𑀔𑀴𑀸 𑀅𑀓𑁆𑀓𑁄𑀲𑀺𑀲𑁆𑀲𑀦𑁆𑀢𑀻𑀢𑀺 𑀤𑀲𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑁆𑀓𑁄𑀲𑀺𑀲𑁆𑀲𑀦𑁆𑀢𑀺. 𑀧𑀭𑀺𑀪𑀸𑀲𑀺𑀲𑁆𑀲𑀦𑁆𑀢𑀻𑀢𑀺 ‘‘𑀓𑀺𑀁 𑀲𑀫𑀡𑁄 𑀦𑀸𑀫 𑀢𑁆𑀯𑀁, 𑀇𑀤𑀜𑁆𑀘𑀺𑀤𑀜𑁆𑀘 𑀢𑁂 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀢𑀚𑁆𑀚𑁂𑀲𑁆𑀲𑀦𑁆𑀢𑀺. 𑀏𑀯𑀫𑁂𑀢𑁆𑀣𑀸𑀢𑀺 𑀏𑀯𑀁 𑀫𑀬𑁆𑀳𑀁 𑀏𑀢𑁆𑀣 𑀪𑀯𑀺𑀲𑁆𑀲𑀢𑀺. 𑀤𑀡𑁆𑀟𑁂𑀦𑀸𑀢𑀺 𑀘𑀢𑀼𑀳𑀢𑁆𑀣𑀤𑀡𑁆𑀟𑁂𑀦 𑀯𑀸 𑀔𑀤𑀺𑀭𑀤𑀡𑁆𑀟𑁂𑀦 𑀯𑀸 𑀖𑀝𑀺𑀓𑀫𑀼𑀕𑁆𑀕𑀭𑁂𑀦 𑀯𑀸. 𑀲𑀢𑁆𑀣𑁂𑀦𑀸𑀢𑀺 𑀏𑀓𑀢𑁄𑀥𑀸𑀭𑀸𑀤𑀺𑀦𑀸 𑀲𑀢𑁆𑀣𑁂𑀦. 𑀲𑀢𑁆𑀣𑀳𑀸𑀭𑀓𑀁 𑀧𑀭𑀺𑀬𑁂𑀲𑀦𑁆𑀢𑀻𑀢𑀺 𑀚𑀻𑀯𑀺𑀢𑀳𑀸𑀭𑀓𑀲𑀢𑁆𑀣𑀁 𑀧𑀭𑀺𑀬𑁂𑀲𑀦𑁆𑀢𑀺. 𑀇𑀤𑀁 𑀣𑁂𑀭𑁄 𑀢𑀢𑀺𑀬𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀲𑁆𑀫𑀺𑀁 𑀅𑀲𑀼𑀪𑀓𑀣𑀁 𑀲𑀼𑀢𑁆𑀯𑀸 𑀅𑀢𑁆𑀢𑀪𑀸𑀯𑁂𑀦 𑀚𑀺𑀕𑀼𑀘𑁆𑀙𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀢𑁆𑀣𑀳𑀸𑀭𑀓𑀧𑀭𑀺𑀬𑁂𑀲𑀦𑀁 𑀲𑀦𑁆𑀥𑀸𑀬𑀸𑀳. 𑀤𑀫𑀽𑀧𑀲𑀫𑁂𑀦𑀸𑀢𑀺 𑀏𑀢𑁆𑀣 𑀤𑀫𑁄𑀢𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀻𑀦𑀁 𑀏𑀢𑀁 𑀦𑀸𑀫𑀁.

‘‘𑀲𑀘𑁆𑀘𑁂𑀦 𑀤𑀦𑁆𑀢𑁄 𑀤𑀫𑀲𑀸 𑀉𑀧𑁂𑀢𑁄,

𑀯𑁂𑀤𑀦𑁆𑀢𑀕𑀽 𑀯𑀼𑀲𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑁄’’𑀢𑀺. (𑀲𑀁. 𑀦𑀺. 𑁧.𑁧𑁯𑁫; 𑀲𑀼. 𑀦𑀺. 𑁪𑁬𑁭) 𑁋

𑀏𑀢𑁆𑀣 𑀳𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀤𑀫𑁄𑀢𑀺 𑀯𑀼𑀢𑁆𑀢𑁄. ‘‘𑀬𑀤𑀺 𑀲𑀘𑁆𑀘𑀸 𑀤𑀫𑀸 𑀘𑀸𑀕𑀸, 𑀔𑀦𑁆𑀢𑁆𑀬𑀸 𑀪𑀺𑀬𑁆𑀬𑁄𑀥 𑀯𑀺𑀚𑁆𑀚𑀢𑀻’’𑀢𑀺 (𑀲𑀼. 𑀦𑀺. 𑁧𑁯𑁧; 𑀲𑀁. 𑀦𑀺. 𑁧.𑁨𑁪𑁬) 𑀏𑀢𑁆𑀣 𑀧𑀜𑁆𑀜𑀸 𑀤𑀫𑁄𑀢𑀺 𑀯𑀼𑀢𑁆𑀢𑀸. ‘‘𑀤𑀸𑀦𑁂𑀦 𑀤𑀫𑁂𑀦 𑀲𑀁𑀬𑀫𑁂𑀦 𑀲𑀘𑁆𑀘𑀯𑀚𑁆𑀚𑁂𑀦𑀸’’𑀢𑀺 (𑀤𑀻. 𑀦𑀺. 𑁧.𑁧𑁬𑁫; 𑀫. 𑀦𑀺. 𑁨.𑁨𑁨𑁬) 𑀏𑀢𑁆𑀣 𑀉𑀧𑁄𑀲𑀣𑀓𑀫𑁆𑀫𑀁 𑀤𑀫𑁄𑀢𑀺 𑀯𑀼𑀢𑁆𑀢𑀁. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀔𑀦𑁆𑀢𑀺 𑀤𑀫𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀉𑀧𑀲𑀫𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁.

𑀅𑀣 𑀔𑁄 𑀆𑀬𑀲𑁆𑀫𑀸 𑀧𑀼𑀡𑁆𑀡𑁄𑀢𑀺 𑀓𑁄 𑀧𑀦𑁂𑀲 𑀧𑀼𑀡𑁆𑀡𑁄, 𑀓𑀲𑁆𑀫𑀸 𑀘 𑀧𑀦𑁂𑀢𑁆𑀣 𑀕𑀦𑁆𑀢𑀼𑀓𑀸𑀫𑁄 𑀅𑀳𑁄𑀲𑀻𑀢𑀺? 𑀲𑀼𑀦𑀸𑀧𑀭𑀦𑁆𑀢𑀯𑀸𑀲𑀺𑀓𑁄 𑀏𑀯 𑀏𑀲, 𑀲𑀸𑀯𑀢𑁆𑀣𑀺𑀬𑀁 𑀧𑀦 𑀅𑀲𑀧𑁆𑀧𑀸𑀬𑀯𑀺𑀳𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑀢𑁆𑀣 𑀕𑀦𑁆𑀢𑀼𑀓𑀸𑀫𑁄 𑀅𑀳𑁄𑀲𑀺.

𑀢𑀢𑁆𑀭𑀸𑀬𑀁 𑀅𑀦𑀼𑀧𑁆𑀧𑀼𑀩𑁆𑀩𑀺𑀓𑀣𑀸 𑁋 𑀲𑀼𑀦𑀸𑀧𑀭𑀦𑁆𑀢𑀭𑀝𑁆𑀞𑁂 𑀓𑀺𑀭 𑀏𑀓𑀲𑁆𑀫𑀺𑀁 𑀯𑀸𑀡𑀺𑀚𑀕𑀸𑀫𑁂 𑀏𑀢𑁂 𑀤𑁆𑀯𑁂 𑀪𑀸𑀢𑀭𑁄. 𑀢𑁂𑀲𑀼 𑀓𑀤𑀸𑀘𑀺 𑀚𑁂𑀝𑁆𑀞𑁄 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀕𑀳𑁂𑀢𑁆𑀯𑀸 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸 𑀪𑀡𑁆𑀟𑀁 𑀆𑀳𑀭𑀢𑀺, 𑀓𑀤𑀸𑀘𑀺 𑀓𑀦𑀺𑀝𑁆𑀞𑁄. 𑀇𑀫𑀲𑁆𑀫𑀺𑀁 𑀧𑀦 𑀲𑀫𑀬𑁂 𑀓𑀦𑀺𑀝𑁆𑀞𑀁 𑀖𑀭𑁂 𑀞𑀧𑁂𑀢𑁆𑀯𑀸, 𑀚𑁂𑀝𑁆𑀞𑀪𑀸𑀢𑀺𑀓𑁄 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀕𑀳𑁂𑀢𑁆𑀯𑀸, 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸, 𑀚𑁂𑀢𑀯𑀦𑀲𑁆𑀲 𑀦𑀸𑀢𑀺𑀤𑀽𑀭𑁂 𑀲𑀓𑀝𑀲𑀢𑁆𑀣𑀁 𑀦𑀺𑀯𑁂𑀲𑁂𑀢𑁆𑀯𑀸 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀧𑀭𑀺𑀚𑀦𑀧𑀭𑀺𑀯𑀼𑀢𑁄 𑀨𑀸𑀲𑀼𑀓𑀝𑁆𑀞𑀸𑀦𑁂 𑀦𑀺𑀲𑀻𑀤𑀺.

𑀢𑁂𑀦 𑀘 𑀲𑀫𑀬𑁂𑀦 𑀲𑀸𑀯𑀢𑁆𑀣𑀺𑀯𑀸𑀲𑀺𑀦𑁄 𑀪𑀼𑀢𑁆𑀢𑀧𑀸𑀢𑀭𑀸𑀲𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀲𑀼𑀤𑁆𑀥𑀼𑀢𑁆𑀢𑀭𑀸𑀲𑀗𑁆𑀕𑀸 𑀕𑀦𑁆𑀥𑀧𑀼𑀧𑁆𑀨𑀸𑀤𑀺𑀳𑀢𑁆𑀣𑀸 𑀬𑁂𑀦 𑀩𑀼𑀤𑁆𑀥𑁄, 𑀬𑁂𑀦 𑀥𑀫𑁆𑀫𑁄, 𑀬𑁂𑀦 𑀲𑀗𑁆𑀖𑁄, 𑀢𑀦𑁆𑀦𑀺𑀦𑁆𑀦𑀸 𑀢𑀧𑁆𑀧𑁄𑀡𑀸 𑀢𑀧𑁆𑀧𑀩𑁆𑀪𑀸𑀭𑀸 𑀳𑀼𑀢𑁆𑀯𑀸, 𑀤𑀓𑁆𑀔𑀺𑀡𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀚𑁂𑀢𑀯𑀦𑀁 𑀕𑀘𑁆𑀙𑀦𑁆𑀢𑀺. 𑀲𑁄 𑀢𑁂 𑀤𑀺𑀲𑁆𑀯𑀸 ‘‘𑀓𑀳𑀁 𑀇𑀫𑁂 𑀕𑀘𑁆𑀙𑀦𑁆𑀢𑀻’’𑀢𑀺 𑀏𑀓𑀁 𑀫𑀦𑀼𑀲𑁆𑀲𑀁 𑀧𑀼𑀘𑁆𑀙𑀺. 𑀓𑀺𑀁 𑀢𑁆𑀯𑀁, 𑀅𑀬𑁆𑀬𑁄, 𑀦 𑀚𑀸𑀦𑀸𑀲𑀺? 𑀮𑁄𑀓𑁂 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀭𑀢𑀦𑀸𑀦𑀺 𑀦𑀸𑀫 𑀉𑀧𑁆𑀧𑀦𑁆𑀦𑀸𑀦𑀺, 𑀇𑀘𑁆𑀘𑁂𑀲𑁄 𑀫𑀳𑀸𑀚𑀦𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀥𑀫𑁆𑀫𑀓𑀣𑀁 𑀲𑁄𑀢𑀼𑀁 𑀕𑀘𑁆𑀙𑀢𑀻𑀢𑀺. 𑀢𑀲𑁆𑀲 ‘‘𑀩𑀼𑀤𑁆𑀥𑁄’’𑀢𑀺 𑀯𑀘𑀦𑀁 𑀙𑀯𑀺𑀘𑀫𑁆𑀫𑀸𑀤𑀻𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀺𑀫𑀺𑀜𑁆𑀚𑀁 𑀆𑀳𑀘𑁆𑀘 𑀅𑀝𑁆𑀞𑀸𑀲𑀺. 𑀲𑁄 𑀅𑀢𑁆𑀢𑀦𑁄 𑀧𑀭𑀺𑀚𑀦𑀧𑀭𑀺𑀯𑀼𑀢𑁄 𑀢𑀸𑀬 𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸, 𑀲𑀢𑁆𑀣𑀼 𑀫𑀥𑀼𑀭𑀲𑁆𑀲𑀭𑁂𑀦 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀞𑀺𑀢𑁄, 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀧𑀩𑁆𑀩𑀚𑁆𑀚𑀸𑀬 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀅𑀣 𑀢𑀣𑀸𑀕𑀢𑁂𑀦 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀧𑀭𑀺𑀲𑀸𑀬 𑀉𑀬𑁆𑀬𑁄𑀚𑀺𑀢𑀸𑀬 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀯𑀦𑁆𑀤𑀺𑀢𑁆𑀯𑀸, 𑀲𑁆𑀯𑀸𑀢𑀦𑀸𑀬 𑀦𑀺𑀫𑀦𑁆𑀢𑁂𑀢𑁆𑀯𑀸, 𑀤𑀼𑀢𑀺𑀬𑀤𑀺𑀯𑀲𑁂 𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸, 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸, 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸, 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬 𑀪𑀡𑁆𑀟𑀸𑀕𑀸𑀭𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀏𑀢𑁆𑀢𑀓𑀁 𑀥𑀦𑀁 𑀯𑀺𑀲𑁆𑀲𑀚𑁆𑀚𑀺𑀢𑀁, 𑀏𑀢𑁆𑀢𑀓𑀁 𑀥𑀦𑀁 𑀦 𑀯𑀺𑀲𑁆𑀲𑀚𑁆𑀚𑀺𑀢’’𑀦𑁆𑀢𑀺 𑀲𑀩𑁆𑀩𑀁 𑀆𑀘𑀺𑀓𑁆𑀔𑀺𑀢𑁆𑀯𑀸, ‘‘𑀇𑀫𑀁 𑀲𑀸𑀧𑀢𑁂𑀬𑁆𑀬𑀁 𑀫𑀬𑁆𑀳𑀁 𑀓𑀦𑀺𑀝𑁆𑀞𑀲𑁆𑀲 𑀤𑁂𑀳𑀻’’𑀢𑀺 𑀲𑀩𑁆𑀩𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸, 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸, 𑀓𑀫𑁆𑀫𑀝𑁆𑀞𑀸𑀦𑀧𑀭𑀸𑀬𑀡𑁄 𑀅𑀳𑁄𑀲𑀺.

𑀅𑀣𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀉𑀧𑀝𑁆𑀞𑀸𑀢𑀺. 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀚𑀦𑀧𑀤𑁄 𑀫𑀬𑁆𑀳𑀁 𑀅𑀲𑀧𑁆𑀧𑀸𑀬𑁄, 𑀬𑀁𑀦𑀽𑀦𑀸𑀳𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀲𑀓𑀭𑀝𑁆𑀞𑀫𑁂𑀯 𑀕𑀘𑁆𑀙𑁂𑀬𑁆𑀬’’𑀦𑁆𑀢𑀺. 𑀅𑀣 𑀧𑀼𑀩𑁆𑀩𑀡𑁆𑀳𑀲𑀫𑀬𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸, 𑀲𑀸𑀬𑀦𑁆𑀳𑁂 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸, 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀸𑀧𑁂𑀢𑁆𑀯𑀸, 𑀲𑀢𑁆𑀢 𑀲𑀻𑀳𑀦𑀸𑀤𑁂 𑀦𑀤𑀺𑀢𑁆𑀯𑀸, 𑀧𑀓𑁆𑀓𑀸𑀫𑀺. 𑀢𑁂𑀦 𑀯𑀼𑀢𑁆𑀢𑀁, ‘‘𑀅𑀣 𑀔𑁄 𑀆𑀬𑀲𑁆𑀫𑀸 𑀧𑀼𑀡𑁆𑀡𑁄…𑀧𑁂… 𑀯𑀺𑀳𑀭𑀢𑀻’’𑀢𑀺.

𑀓𑀢𑁆𑀣 𑀧𑀦𑀸𑀬𑀁 𑀯𑀺𑀳𑀸𑀲𑀻𑀢𑀺? 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀺𑀳𑀸𑀲𑀺. 𑀲𑀼𑀦𑀸𑀧𑀭𑀦𑁆𑀢𑀭𑀝𑁆𑀞𑀁 𑀢𑀸𑀯 𑀧𑀯𑀺𑀲𑀺𑀢𑁆𑀯𑀸 𑀘 𑀅𑀩𑁆𑀩𑀼𑀳𑀢𑁆𑀣𑀧𑀩𑁆𑀩𑀢𑀁 𑀦𑀸𑀫 𑀧𑀢𑁆𑀯𑀸 𑀯𑀸𑀡𑀺𑀚𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀣 𑀦𑀁 𑀓𑀦𑀺𑀝𑁆𑀞𑀪𑀸𑀢𑀸 𑀲𑀜𑁆𑀚𑀸𑀦𑀺𑀢𑁆𑀯𑀸 𑀪𑀺𑀓𑁆𑀔𑀁 𑀤𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀜𑁆𑀜𑀢𑁆𑀣 𑀅𑀕𑀦𑁆𑀢𑁆𑀯𑀸 𑀇𑀥𑁂𑀯 𑀯𑀲𑀣𑀸’’𑀢𑀺 𑀧𑀝𑀺𑀜𑁆𑀜𑀁 𑀓𑀸𑀭𑁂𑀢𑁆𑀯𑀸 𑀢𑀢𑁆𑀣𑁂𑀯 𑀯𑀲𑀸𑀧𑁂𑀲𑀺.

𑀢𑀢𑁄 𑀲𑀫𑀼𑀤𑁆𑀤𑀕𑀺𑀭𑀺𑀯𑀺𑀳𑀸𑀭𑀁 𑀦𑀸𑀫 𑀅𑀕𑀫𑀸𑀲𑀺. 𑀢𑀢𑁆𑀣 𑀅𑀬𑀓𑀦𑁆𑀢𑀧𑀸𑀲𑀸𑀡𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑀘𑀗𑁆𑀓𑀫𑁄 𑀅𑀢𑁆𑀣𑀺, 𑀓𑁄𑀘𑀺 𑀢𑀁 𑀘𑀗𑁆𑀓𑀫𑀺𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀢𑀢𑁆𑀣 𑀲𑀫𑀼𑀤𑁆𑀤𑀯𑀻𑀘𑀺𑀬𑁄 𑀆𑀕𑀦𑁆𑀢𑁆𑀯𑀸 𑀅𑀬𑀓𑀦𑁆𑀢𑀧𑀸𑀲𑀸𑀡𑁂𑀲𑀼 𑀧𑀳𑀭𑀺𑀢𑁆𑀯𑀸 𑀫𑀳𑀸𑀲𑀤𑁆𑀤𑀁 𑀓𑀭𑁄𑀦𑁆𑀢𑀺. 𑀣𑁂𑀭𑁄 ‘‘𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑀸𑀦𑀁 𑀨𑀸𑀲𑀼𑀯𑀺𑀳𑀸𑀭𑁄 𑀳𑁄𑀢𑀽’’𑀢𑀺 𑀲𑀫𑀼𑀤𑁆𑀤𑀁 𑀦𑀺𑀲𑁆𑀲𑀤𑁆𑀤𑀁 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀲𑀺.

𑀢𑀢𑁄 𑀫𑀸𑀢𑀼𑀮𑀕𑀺𑀭𑀺𑀁 𑀦𑀸𑀫 𑀅𑀕𑀫𑀸𑀲𑀺. 𑀢𑀢𑁆𑀣𑀧𑀺 𑀲𑀓𑀼𑀡𑀲𑀗𑁆𑀖𑁄 𑀉𑀲𑁆𑀲𑀦𑁆𑀦𑁄 𑀭𑀢𑁆𑀢𑀺𑀜𑁆𑀘 𑀤𑀺𑀯𑀸 𑀘 𑀲𑀤𑁆𑀤𑁄 𑀏𑀓𑀸𑀩𑀤𑁆𑀥𑁄𑀯 𑀅𑀳𑁄𑀲𑀺. 𑀣𑁂𑀭𑁄 ‘‘𑀇𑀤𑀁 𑀞𑀸𑀦𑀁 𑀦 𑀨𑀸𑀲𑀼𑀓’’𑀦𑁆𑀢𑀺 𑀢𑀢𑁄 𑀫𑀓𑀼𑀮𑀓𑀸𑀭𑀸𑀫𑀯𑀺𑀳𑀸𑀭𑀁 𑀦𑀸𑀫 𑀕𑀢𑁄. 𑀲𑁄 𑀯𑀸𑀡𑀺𑀚𑀕𑀸𑀫𑀲𑁆𑀲 𑀦𑀸𑀢𑀺𑀤𑀽𑀭𑁄 𑀦𑀘𑁆𑀘𑀸𑀲𑀦𑁆𑀦𑁄 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑁄 𑀯𑀺𑀯𑀺𑀢𑁆𑀢𑁄 𑀅𑀧𑁆𑀧𑀲𑀤𑁆𑀤𑁄. 𑀣𑁂𑀭𑁄 ‘‘𑀇𑀫𑀁 𑀞𑀸𑀦𑀁 𑀨𑀸𑀲𑀼𑀓’’𑀦𑁆𑀢𑀺 𑀢𑀢𑁆𑀣 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀘𑀗𑁆𑀓𑀫𑀦𑀸𑀤𑀻𑀦𑀺 𑀓𑀸𑀭𑁂𑀢𑁆𑀯𑀸 𑀯𑀲𑁆𑀲𑀁 𑀉𑀧𑀕𑀘𑁆𑀙𑀺. 𑀏𑀯𑀁 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀺𑀳𑀸𑀲𑀺.

𑀅𑀣𑁂𑀓𑀤𑀺𑀯𑀲𑀁 𑀢𑀲𑁆𑀫𑀺𑀁𑀬𑁂𑀯 𑀅𑀦𑁆𑀢𑁄𑀯𑀲𑁆𑀲𑁂 𑀧𑀜𑁆𑀘 𑀯𑀸𑀡𑀺𑀚𑀲𑀢𑀸𑀦𑀺 ‘‘𑀧𑀭𑀲𑀫𑀼𑀤𑁆𑀤𑀁 𑀕𑀘𑁆𑀙𑀸𑀫𑀸’’𑀢𑀺 𑀦𑀸𑀯𑀸𑀬 𑀪𑀡𑁆𑀟𑀁 𑀧𑀓𑁆𑀔𑀺𑀧𑀺𑀁𑀲𑀼. 𑀦𑀸𑀯𑀸𑀭𑁄𑀳𑀦𑀤𑀺𑀯𑀲𑁂 𑀣𑁂𑀭𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀸 𑀣𑁂𑀭𑀁 𑀪𑁄𑀚𑁂𑀢𑁆𑀯𑀸, 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀲𑀺𑀓𑁆𑀔𑀸𑀧𑀤𑀸𑀦𑀺 𑀕𑀳𑁂𑀢𑁆𑀯𑀸, 𑀯𑀦𑁆𑀤𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀲𑀫𑀼𑀤𑁆𑀤𑁄 𑀦𑀸𑀫 𑀅𑀲𑀤𑁆𑀥𑁂𑀬𑁆𑀬𑁄 𑀅𑀦𑁂𑀓𑀦𑁆𑀢𑀭𑀸𑀬𑁄, 𑀅𑀫𑁆𑀳𑁂 𑀆𑀯𑀚𑁆𑀚𑁂𑀬𑁆𑀬𑀸𑀣𑀸’’𑀢𑀺 𑀯𑀢𑁆𑀯𑀸 𑀦𑀸𑀯𑀁 𑀆𑀭𑀼𑀳𑀺. 𑀦𑀸𑀯𑀸 𑀉𑀢𑁆𑀢𑀫𑀚𑀯𑁂𑀦 𑀕𑀘𑁆𑀙𑀫𑀸𑀦𑀸 𑀅𑀜𑁆𑀜𑀢𑀭𑀁 𑀤𑀻𑀧𑀓𑀁 𑀧𑀸𑀧𑀼𑀡𑀺. 𑀫𑀦𑀼𑀲𑁆𑀲𑀸 ‘‘𑀧𑀸𑀢𑀭𑀸𑀲𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀤𑀻𑀧𑀓𑁂 𑀉𑀢𑁆𑀢𑀺𑀡𑁆𑀡𑀸. 𑀢𑀲𑁆𑀫𑀺𑀁 𑀧𑀦 𑀤𑀻𑀧𑀓𑁂 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀦𑀢𑁆𑀣𑀺, 𑀘𑀦𑁆𑀤𑀦𑀯𑀦𑀫𑁂𑀯 𑀅𑀳𑁄𑀲𑀺.

𑀅𑀣𑁂𑀓𑁄 𑀯𑀸𑀲𑀺𑀬𑀸 𑀭𑀼𑀓𑁆𑀔𑀁 𑀆𑀓𑁄𑀝𑁂𑀢𑁆𑀯𑀸 𑀮𑁄𑀳𑀺𑀢𑀘𑀦𑁆𑀤𑀦𑀪𑀸𑀯𑀁 𑀜𑀢𑁆𑀯𑀸 𑀆𑀳 𑁋 ‘‘𑀪𑁄, 𑀫𑀬𑀁 𑀮𑀸𑀪𑀢𑁆𑀣𑀸𑀬 𑀧𑀭𑀲𑀫𑀼𑀤𑁆𑀤𑀁 𑀕𑀘𑁆𑀙𑀸𑀫, 𑀇𑀢𑁄 𑀘 𑀉𑀢𑁆𑀢𑀭𑀺 𑀮𑀸𑀪𑁄 𑀦𑀸𑀫 𑀦𑀢𑁆𑀣𑀺, 𑀘𑀢𑀼𑀭𑀗𑁆𑀕𑀼𑀮𑀫𑀢𑁆𑀢𑀸 𑀖𑀝𑀺𑀓𑀸 𑀲𑀢𑀲𑀳𑀲𑁆𑀲𑀁 𑀅𑀕𑁆𑀖𑀢𑀺. 𑀳𑀸𑀭𑁂𑀢𑀩𑁆𑀩𑀬𑀼𑀢𑁆𑀢𑀓𑀁 𑀪𑀡𑁆𑀟𑀁 𑀳𑀸𑀭𑁂𑀢𑁆𑀯𑀸 𑀘𑀦𑁆𑀤𑀦𑀲𑁆𑀲 𑀧𑀽𑀭𑁂𑀲𑁆𑀲𑀸𑀫𑀸’’𑀢𑀺 𑀢𑁂 𑀢𑀣𑀸 𑀓𑀭𑀺𑀁𑀲𑀼. 𑀘𑀦𑁆𑀤𑀦𑀯𑀦𑁂 𑀅𑀥𑀺𑀯𑀢𑁆𑀣𑀸 𑀅𑀫𑀦𑀼𑀲𑁆𑀲𑀸 𑀓𑀼𑀚𑁆𑀛𑀺𑀢𑁆𑀯𑀸, ‘‘𑀇𑀫𑁂𑀳𑀺 𑀅𑀫𑁆𑀳𑀸𑀓𑀁 𑀘𑀦𑁆𑀤𑀦𑀯𑀦𑀁 𑀦𑀸𑀲𑀺𑀢𑀁 𑀖𑀸𑀢𑁂𑀲𑁆𑀲𑀸𑀫 𑀦𑁂’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀇𑀥𑁂𑀯 𑀖𑀸𑀢𑀺𑀢𑁂𑀲𑀼 𑀲𑀩𑁆𑀩𑀁 𑀏𑀓𑀓𑀼𑀡𑀧𑀁 𑀪𑀯𑀺𑀲𑁆𑀲𑀢𑀺, 𑀲𑀫𑀼𑀤𑁆𑀤𑀫𑀚𑁆𑀛𑁂 𑀦𑁂𑀲𑀁 𑀦𑀸𑀯𑀁 𑀑𑀲𑀻𑀤𑁂𑀲𑁆𑀲𑀸𑀫𑀸’’𑀢𑀺 𑀆𑀳𑀁𑀲𑀼. 𑀅𑀣 𑀦𑁂𑀲𑀁 𑀦𑀸𑀯𑀁 𑀆𑀭𑀼𑀬𑁆𑀳 𑀫𑀼𑀳𑀼𑀢𑁆𑀢𑀁 𑀕𑀢𑀓𑀸𑀮𑁂𑀬𑁂𑀯 𑀉𑀧𑁆𑀧𑀸𑀢𑀺𑀓𑀁 𑀉𑀝𑁆𑀞𑀧𑁂𑀢𑁆𑀯𑀸 𑀲𑀬𑀫𑁆𑀧𑀺 𑀢𑁂 𑀅𑀫𑀦𑀼𑀲𑁆𑀲𑀸 𑀪𑀬𑀸𑀦𑀓𑀸𑀦𑀺 𑀭𑀽𑀧𑀸𑀦𑀺 𑀤𑀲𑁆𑀲𑀬𑀺𑀁𑀲𑀼. 𑀪𑀻𑀢𑀸 𑀫𑀦𑀼𑀲𑁆𑀲𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀤𑁂𑀯𑀢𑀸𑀦𑀁 𑀦𑀫𑀲𑁆𑀲𑀦𑁆𑀢𑀺. 𑀣𑁂𑀭𑀲𑁆𑀲 𑀓𑀦𑀺𑀝𑁆𑀞𑁄 𑀘𑀽𑀴𑀧𑀼𑀡𑁆𑀡𑀓𑀼𑀝𑀼𑀫𑁆𑀩𑀺𑀓𑁄 ‘‘𑀫𑀬𑁆𑀳𑀁 𑀪𑀸𑀢𑀸 𑀅𑀯𑀲𑁆𑀲𑀬𑁄 𑀳𑁄𑀢𑀽’’𑀢𑀺 𑀣𑁂𑀭𑀲𑁆𑀲 𑀦𑀫𑀲𑁆𑀲𑀫𑀸𑀦𑁄 𑀅𑀝𑁆𑀞𑀸𑀲𑀺.

𑀣𑁂𑀭𑁄𑀧𑀺 𑀓𑀺𑀭 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀆𑀯𑀚𑁆𑀚𑁂𑀢𑁆𑀯𑀸, 𑀢𑁂𑀲𑀁 𑀩𑁆𑀬𑀲𑀦𑀼𑀧𑁆𑀧𑀢𑁆𑀢𑀺𑀁 𑀜𑀢𑁆𑀯𑀸, 𑀯𑁂𑀳𑀸𑀲𑀁 𑀉𑀧𑁆𑀧𑀢𑀺𑀢𑁆𑀯𑀸, 𑀅𑀪𑀺𑀫𑀼𑀔𑁄 𑀅𑀝𑁆𑀞𑀸𑀲𑀺. 𑀅𑀫𑀦𑀼𑀲𑁆𑀲𑀸 𑀣𑁂𑀭𑀁 𑀤𑀺𑀲𑁆𑀯𑀸𑀯 ‘‘𑀅𑀬𑁆𑀬𑁄 𑀧𑀼𑀡𑁆𑀡𑀢𑁆𑀣𑁂𑀭𑁄 𑀏𑀢𑀻’’𑀢𑀺 𑀅𑀧𑀓𑁆𑀓𑀫𑀺𑀁𑀲𑀼, 𑀉𑀧𑁆𑀧𑀸𑀢𑀺𑀓𑀁 𑀲𑀦𑁆𑀦𑀺𑀲𑀻𑀤𑀺. 𑀣𑁂𑀭𑁄 ‘‘𑀫𑀸 𑀪𑀸𑀬𑀣𑀸’’𑀢𑀺 𑀢𑁂 𑀅𑀲𑁆𑀲𑀸𑀲𑁂𑀢𑁆𑀯𑀸 ‘‘𑀓𑀳𑀁 𑀕𑀦𑁆𑀢𑀼𑀓𑀸𑀫𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀲𑀓𑀝𑁆𑀞𑀸𑀦𑀫𑁂𑀯 𑀕𑀘𑁆𑀙𑀸𑀫𑀸𑀢𑀺. 𑀣𑁂𑀭𑁄 𑀦𑀸𑀯𑀗𑁆𑀕𑀡𑁂 𑀅𑀓𑁆𑀓𑀫𑀺𑀢𑁆𑀯𑀸 ‘‘𑀏𑀢𑁂𑀲𑀁 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀘𑁆𑀙𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀯𑀸𑀡𑀺𑀚𑀸 𑀲𑀓𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸, 𑀢𑀁 𑀧𑀯𑀢𑁆𑀢𑀺𑀁 𑀧𑀼𑀢𑁆𑀢𑀤𑀸𑀭𑀲𑁆𑀲 𑀆𑀭𑁄𑀘𑁂𑀢𑁆𑀯𑀸, ‘‘𑀏𑀣 𑀣𑁂𑀭𑀁 𑀲𑀭𑀡𑀁 𑀕𑀘𑁆𑀙𑀸𑀫𑀸’’𑀢𑀺 𑀧𑀜𑁆𑀘𑀲𑀢𑀸𑀧𑀺 𑀅𑀢𑁆𑀢𑀦𑁄 𑀧𑀜𑁆𑀘𑀳𑀺 𑀫𑀸𑀢𑀼𑀕𑀸𑀫𑀲𑀢𑁂𑀳𑀺 𑀲𑀤𑁆𑀥𑀺𑀁 𑀢𑀻𑀲𑀼 𑀲𑀭𑀡𑁂𑀲𑀼 𑀧𑀢𑀺𑀝𑁆𑀞𑀸𑀬 𑀉𑀧𑀸𑀲𑀓𑀢𑁆𑀢𑀁 𑀧𑀝𑀺𑀯𑁂𑀤𑁂𑀲𑀼𑀁. 𑀢𑀢𑁄 𑀦𑀸𑀯𑀸𑀬 𑀪𑀡𑁆𑀟𑀁 𑀑𑀢𑀸𑀭𑁂𑀢𑁆𑀯𑀸 𑀣𑁂𑀭𑀲𑁆𑀲 𑀏𑀓𑀁 𑀓𑁄𑀝𑁆𑀞𑀸𑀲𑀁 𑀓𑀢𑁆𑀯𑀸, ‘‘𑀅𑀬𑀁, 𑀪𑀦𑁆𑀢𑁂, 𑀢𑀼𑀫𑁆𑀳𑀸𑀓𑀁 𑀓𑁄𑀝𑁆𑀞𑀸𑀲𑁄’’𑀢𑀺 𑀆𑀳𑀁𑀲𑀼. 𑀣𑁂𑀭𑁄 𑀫𑀬𑁆𑀳𑀁 𑀯𑀺𑀲𑀼𑀁 𑀓𑁄𑀝𑁆𑀞𑀸𑀲𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀲𑀢𑁆𑀣𑀸 𑀧𑀦 𑀢𑀼𑀫𑁆𑀳𑁂𑀳𑀺 𑀤𑀺𑀝𑁆𑀞𑀧𑀼𑀩𑁆𑀩𑁄𑀢𑀺. 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀪𑀦𑁆𑀢𑁂𑀢𑀺. 𑀢𑁂𑀦 𑀳𑀺 𑀇𑀫𑀺𑀦𑀸 𑀲𑀢𑁆𑀣𑀼 𑀫𑀡𑁆𑀟𑀮𑀫𑀸𑀴𑀁 𑀓𑀭𑁄𑀣. 𑀏𑀯𑀁 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀲𑁆𑀲𑀣𑀸𑀢𑀺. 𑀢𑁂 𑀲𑀸𑀥𑀼, 𑀪𑀦𑁆𑀢𑁂𑀢𑀺. 𑀢𑁂𑀦 𑀘 𑀓𑁄𑀝𑁆𑀞𑀸𑀲𑁂𑀦 𑀅𑀢𑁆𑀢𑀦𑁄 𑀘 𑀓𑁄𑀝𑁆𑀞𑀸𑀲𑁂𑀳𑀺 𑀫𑀡𑁆𑀟𑀮𑀫𑀸𑀴𑀁 𑀓𑀸𑀢𑀼𑀁 𑀆𑀭𑀪𑀺𑀁𑀲𑀼.

𑀲𑀢𑁆𑀣𑀸𑀧𑀺 𑀓𑀺𑀭 𑀢𑀁 𑀆𑀭𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀧𑀭𑀺𑀪𑁄𑀕𑀁 𑀅𑀓𑀸𑀲𑀺. 𑀆𑀭𑀓𑁆𑀔𑀫𑀦𑀼𑀲𑁆𑀲𑀸 𑀭𑀢𑁆𑀢𑀺𑀁 𑀑𑀪𑀸𑀲𑀁 𑀤𑀺𑀲𑁆𑀯𑀸, ‘‘𑀫𑀳𑁂𑀲𑀓𑁆𑀔𑀸 𑀤𑁂𑀯𑀢𑀸 𑀅𑀢𑁆𑀣𑀻’’𑀢𑀺 𑀲𑀜𑁆𑀜𑀁 𑀓𑀭𑀺𑀁𑀲𑀼. 𑀉𑀧𑀸𑀲𑀓𑀸 𑀫𑀡𑁆𑀟𑀮𑀫𑀸𑀴𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀲𑁂𑀦𑀸𑀲𑀦𑀸𑀦𑀺 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀤𑀸𑀦𑀲𑀫𑁆𑀪𑀸𑀭𑀁 𑀲𑀚𑁆𑀚𑁂𑀢𑁆𑀯𑀸, ‘‘𑀓𑀢𑀁, 𑀪𑀦𑁆𑀢𑁂, 𑀅𑀫𑁆𑀳𑁂𑀳𑀺 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁, 𑀲𑀢𑁆𑀣𑀸𑀭𑀁 𑀧𑀓𑁆𑀓𑁄𑀲𑀣𑀸’’𑀢𑀺 𑀣𑁂𑀭𑀲𑁆𑀲 𑀆𑀭𑁄𑀘𑁂𑀲𑀼𑀁. 𑀣𑁂𑀭𑁄 𑀲𑀸𑀬𑀦𑁆𑀳𑀲𑀫𑀬𑁂 𑀇𑀤𑁆𑀥𑀺𑀬𑀸 𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸, ‘‘𑀪𑀦𑁆𑀢𑁂, 𑀯𑀸𑀡𑀺𑀚𑀕𑀸𑀫𑀯𑀸𑀲𑀺𑀦𑁄 𑀢𑀼𑀫𑁆𑀳𑁂 𑀤𑀝𑁆𑀞𑀼𑀓𑀸𑀫𑀸, 𑀢𑁂𑀲𑀁 𑀅𑀦𑀼𑀓𑀫𑁆𑀧𑀁 𑀓𑀭𑁄𑀣𑀸’’𑀢𑀺 𑀪𑀕𑀯𑀦𑁆𑀢𑀁 𑀬𑀸𑀘𑀺. 𑀪𑀕𑀯𑀸 𑀅𑀥𑀺𑀯𑀸𑀲𑁂𑀲𑀺. 𑀣𑁂𑀭𑁄 𑀲𑀓𑀝𑁆𑀞𑀸𑀦𑀫𑁂𑀯 𑀧𑀘𑁆𑀘𑀸𑀕𑀢𑁄.

𑀪𑀕𑀯𑀸𑀧𑀺 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺, ‘‘𑀆𑀦𑀦𑁆𑀤, 𑀲𑁆𑀯𑁂 𑀲𑀼𑀦𑀸𑀧𑀭𑀦𑁆𑀢𑁂 𑀯𑀸𑀡𑀺𑀚𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀲𑁆𑀲𑀸𑀫, 𑀢𑁆𑀯𑀁 𑀏𑀓𑀽𑀦𑀧𑀜𑁆𑀘𑀲𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀮𑀸𑀓𑀁 𑀤𑁂𑀳𑀻’’𑀢𑀺. 𑀣𑁂𑀭𑁄 ‘‘𑀲𑀸𑀥𑀼, 𑀪𑀦𑁆𑀢𑁂’’𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀢𑀫𑀢𑁆𑀣𑀁 𑀆𑀭𑁄𑀘𑁂𑀢𑁆𑀯𑀸, ‘‘𑀆𑀓𑀸𑀲𑀘𑀸𑀭𑀻 𑀪𑀺𑀓𑁆𑀔𑀽 𑀲𑀮𑀸𑀓𑀁 𑀕𑀡𑁆𑀳𑀦𑁆𑀢𑀽’’𑀢𑀺 𑀆𑀳. 𑀢𑀁𑀤𑀺𑀯𑀲𑀁 𑀓𑀼𑀡𑁆𑀟𑀥𑀸𑀦𑀢𑁆𑀣𑁂𑀭𑁄 𑀧𑀞𑀫𑀁 𑀲𑀮𑀸𑀓𑀁 𑀅𑀕𑁆𑀕𑀳𑁂𑀲𑀺. 𑀯𑀸𑀡𑀺𑀚𑀕𑀸𑀫𑀯𑀸𑀲𑀺𑀦𑁄𑀧𑀺 ‘‘𑀲𑁆𑀯𑁂 𑀓𑀺𑀭 𑀲𑀢𑁆𑀣𑀸 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀕𑀸𑀫𑀫𑀚𑁆𑀛𑁂 𑀫𑀡𑁆𑀟𑀧𑀁 𑀓𑀢𑁆𑀯𑀸 𑀤𑀸𑀦𑀕𑁆𑀕𑀁 𑀲𑀚𑁆𑀚𑀬𑀺𑀁𑀲𑀼. 𑀪𑀕𑀯𑀸 𑀧𑀸𑀢𑁄𑀯 𑀲𑀭𑀻𑀭𑀧𑀝𑀺𑀚𑀕𑁆𑀕𑀦𑀁 𑀓𑀢𑁆𑀯𑀸, 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸, 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸, 𑀦𑀺𑀲𑀻𑀤𑀺. 𑀲𑀓𑁆𑀓𑀲𑁆𑀲 𑀧𑀡𑁆𑀟𑀼𑀓𑀫𑁆𑀩𑀮𑀲𑀺𑀮𑀸𑀲𑀦𑀁 𑀉𑀡𑁆𑀳𑀁 𑀅𑀳𑁄𑀲𑀺. 𑀲𑁄 ‘‘𑀓𑀺𑀁 𑀇𑀤’’𑀦𑁆𑀢𑀺 𑀆𑀯𑀚𑁆𑀚𑁂𑀢𑁆𑀯𑀸 𑀲𑀢𑁆𑀣𑀼 𑀲𑀼𑀦𑀸𑀧𑀭𑀦𑁆𑀢𑀕𑀫𑀦𑀁 𑀤𑀺𑀲𑁆𑀯𑀸, 𑀯𑀺𑀲𑁆𑀲𑀓𑀫𑁆𑀫𑀁 𑀆𑀫𑀦𑁆𑀢𑁂𑀲𑀺, ‘‘𑀢𑀸𑀢, 𑀅𑀚𑁆𑀚 𑀪𑀕𑀯𑀸 𑀢𑀺𑀁𑀲𑀫𑀢𑁆𑀢𑀸𑀦𑀺 𑀬𑁄𑀚𑀦𑀲𑀢𑀸𑀦𑀺 𑀧𑀺𑀡𑁆𑀟𑀘𑀸𑀭𑀁 𑀕𑀫𑀺𑀲𑁆𑀲𑀢𑀺. 𑀧𑀜𑁆𑀘 𑀓𑀽𑀝𑀸𑀕𑀸𑀭𑀲𑀢𑀸𑀦𑀺 𑀫𑀸𑀧𑁂𑀢𑁆𑀯𑀸 𑀚𑁂𑀢𑀯𑀦𑀤𑁆𑀯𑀸𑀭𑀓𑁄𑀝𑁆𑀞𑀓𑀫𑀢𑁆𑀣𑀓𑁂 𑀕𑀫𑀦𑀲𑀚𑁆𑀚𑀸𑀦𑀺 𑀓𑀢𑁆𑀯𑀸 𑀞𑀧𑁂𑀳𑀻’’𑀢𑀺. 𑀲𑁄 𑀢𑀣𑀸 𑀅𑀓𑀸𑀲𑀺. 𑀪𑀕𑀯𑀢𑁄 𑀓𑀽𑀝𑀸𑀕𑀸𑀭𑀁 𑀘𑀢𑀼𑀫𑀼𑀔𑀁 𑀅𑀳𑁄𑀲𑀺, 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀤𑁆𑀯𑀺𑀫𑀼𑀔𑀸𑀦𑀺, 𑀲𑁂𑀲𑀸𑀦𑀺 𑀏𑀓𑀫𑀼𑀔𑀸𑀦𑀺, 𑀲𑀢𑁆𑀣𑀸 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀞𑀧𑀺𑀢𑀓𑀽𑀝𑀸𑀕𑀸𑀭𑁂𑀲𑀼 𑀥𑀼𑀭𑀓𑀽𑀝𑀸𑀕𑀸𑀭𑀁 𑀧𑀸𑀯𑀺𑀲𑀺. 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂 𑀆𑀤𑀺𑀁 𑀓𑀢𑁆𑀯𑀸 𑀏𑀓𑀽𑀦𑀧𑀜𑁆𑀘𑀪𑀺𑀓𑁆𑀔𑀼𑀲𑀢𑀸𑀦𑀺𑀧𑀺 𑀓𑀽𑀝𑀸𑀕𑀸𑀭𑀕𑀢𑀸𑀦𑀺 𑀅𑀳𑁂𑀲𑀼𑀁. 𑀏𑀓𑀁 𑀢𑀼𑀘𑁆𑀙𑀁 𑀓𑀽𑀝𑀸𑀕𑀸𑀭𑀁 𑀅𑀳𑁄𑀲𑀺, 𑀧𑀜𑁆𑀘𑀧𑀺 𑀓𑀽𑀝𑀸𑀕𑀸𑀭𑀲𑀢𑀸𑀦𑀺 𑀆𑀓𑀸𑀲𑁂 𑀉𑀧𑁆𑀧𑀢𑁆𑀢𑀺𑀁𑀲𑀼.

𑀲𑀢𑁆𑀣𑀸 𑀲𑀘𑁆𑀘𑀩𑀦𑁆𑀥𑀧𑀩𑁆𑀩𑀢𑀁 𑀦𑀸𑀫 𑀧𑀢𑁆𑀯𑀸 𑀓𑀽𑀝𑀸𑀕𑀸𑀭𑀁 𑀆𑀓𑀸𑀲𑁂 𑀞𑀧𑁂𑀲𑀺. 𑀢𑀲𑁆𑀫𑀺𑀁 𑀧𑀩𑁆𑀩𑀢𑁂 𑀲𑀘𑁆𑀘𑀩𑀦𑁆𑀥𑁄 𑀦𑀸𑀫 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀢𑀸𑀧𑀲𑁄 𑀫𑀳𑀸𑀚𑀦𑀁 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀉𑀕𑁆𑀕𑀡𑁆𑀳𑀸𑀧𑁂𑀦𑁆𑀢𑁄 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀯𑀲𑀢𑀺, 𑀅𑀩𑁆𑀪𑀦𑁆𑀢𑀭𑁂 𑀘𑀲𑁆𑀲 𑀅𑀦𑁆𑀢𑁄𑀘𑀸𑀝𑀺𑀬𑀁 𑀧𑀤𑀻𑀧𑁄 𑀯𑀺𑀬 𑀅𑀭𑀳𑀢𑁆𑀢𑀨𑀮𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀚𑀮𑀢𑀺. 𑀢𑀁 𑀤𑀺𑀲𑁆𑀯𑀸 ‘‘𑀥𑀫𑁆𑀫𑀫𑀲𑁆𑀲 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀸𑀧𑀲𑁄 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀫𑀕𑁆𑀕𑁂𑀦𑁂𑀯𑀲𑁆𑀲 𑀅𑀪𑀺𑀜𑁆𑀜𑀸 𑀆𑀕𑀢𑀸. 𑀲𑁄 𑀏𑀳𑀺𑀪𑀺𑀓𑁆𑀔𑀼 𑀳𑀼𑀢𑁆𑀯𑀸 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀥𑀭𑁄 𑀢𑀼𑀘𑁆𑀙𑀓𑀽𑀝𑀸𑀕𑀸𑀭𑀁 𑀧𑀸𑀯𑀺𑀲𑀺.

𑀪𑀕𑀯𑀸 𑀓𑀽𑀝𑀸𑀕𑀸𑀭𑀕𑀢𑁂𑀳𑀺 𑀧𑀜𑁆𑀘𑀳𑀺 𑀪𑀺𑀓𑁆𑀔𑀼𑀲𑀢𑁂𑀳𑀺 𑀲𑀤𑁆𑀥𑀺𑀁 𑀯𑀸𑀡𑀺𑀚𑀕𑀸𑀫𑀁 𑀕𑀦𑁆𑀢𑁆𑀯𑀸, 𑀓𑀽𑀝𑀸𑀕𑀸𑀭𑀸𑀦𑀺 𑀅𑀤𑀺𑀲𑁆𑀲𑀫𑀸𑀦𑀓𑀸𑀦𑀺 𑀓𑀢𑁆𑀯𑀸, 𑀯𑀸𑀡𑀺𑀚𑀕𑀸𑀫𑀁 𑀧𑀸𑀯𑀺𑀲𑀺. 𑀯𑀸𑀡𑀺𑀚𑀸 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀲𑀗𑁆𑀖𑀲𑁆𑀲 𑀫𑀳𑀸𑀤𑀸𑀦𑀁 𑀤𑀢𑁆𑀯𑀸 𑀲𑀢𑁆𑀣𑀸𑀭𑀁 𑀫𑀓𑀼𑀮𑀓𑀸𑀭𑀸𑀫𑀁 𑀦𑀬𑀺𑀁𑀲𑀼. 𑀲𑀢𑁆𑀣𑀸 𑀫𑀡𑁆𑀟𑀮𑀫𑀸𑀴𑀁 𑀧𑀸𑀯𑀺𑀲𑀺. 𑀫𑀳𑀸𑀚𑀦𑁄 𑀬𑀸𑀯 𑀲𑀢𑁆𑀣𑀸 𑀪𑀢𑁆𑀢𑀤𑀭𑀣𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀺, 𑀢𑀸𑀯 𑀧𑀸𑀢𑀭𑀸𑀲𑀁 𑀓𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀲𑀫𑀸𑀤𑀸𑀬 𑀩𑀳𑀼𑀁 𑀕𑀦𑁆𑀥𑀜𑁆𑀘 𑀧𑀼𑀧𑁆𑀨𑀜𑁆𑀘 𑀆𑀤𑀸𑀬 𑀥𑀫𑁆𑀫𑀲𑁆𑀲𑀯𑀦𑀢𑁆𑀣𑀸𑀬 𑀆𑀭𑀸𑀫𑀁 𑀧𑀘𑁆𑀘𑀸𑀕𑀫𑀸𑀲𑀺. 𑀲𑀢𑁆𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀫𑀳𑀸𑀚𑀦𑀲𑁆𑀲 𑀩𑀦𑁆𑀥𑀦𑀫𑁄𑀓𑁆𑀔𑁄 𑀚𑀸𑀢𑁄, 𑀫𑀳𑀦𑁆𑀢𑀁 𑀩𑀼𑀤𑁆𑀥𑀓𑁄𑀮𑀸𑀳𑀮𑀁 𑀅𑀳𑁄𑀲𑀺.

𑀲𑀢𑁆𑀣𑀸 𑀫𑀳𑀸𑀚𑀦𑀲𑁆𑀲 𑀲𑀗𑁆𑀕𑀳𑀢𑁆𑀣𑀸𑀬 𑀲𑀢𑁆𑀢𑀸𑀳𑀁 𑀢𑀢𑁆𑀣𑁂𑀯 𑀯𑀲𑀺, 𑀅𑀭𑀼𑀡𑀁 𑀧𑀦 𑀫𑀳𑀸𑀕𑀦𑁆𑀥𑀓𑀼𑀝𑀺𑀬𑀁𑀬𑁂𑀯 𑀉𑀝𑁆𑀞𑀧𑁂𑀲𑀺. 𑀲𑀢𑁆𑀢𑀸𑀳𑀫𑁆𑀧𑀺 𑀥𑀫𑁆𑀫𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀘𑀢𑀼𑀭𑀸𑀲𑀻𑀢𑀺𑀬𑀸 𑀧𑀸𑀡𑀲𑀳𑀲𑁆𑀲𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄 𑀅𑀳𑁄𑀲𑀺. 𑀢𑀢𑁆𑀣 𑀲𑀢𑁆𑀢𑀸𑀳𑀁 𑀯𑀲𑀺𑀢𑁆𑀯𑀸, 𑀯𑀸𑀡𑀺𑀚𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸, ‘‘𑀢𑁆𑀯𑀁 𑀇𑀥𑁂𑀯 𑀯𑀲𑀸𑀳𑀻’’𑀢𑀺 𑀧𑀼𑀡𑁆𑀡𑀢𑁆𑀣𑁂𑀭𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀦𑁆𑀢𑀭𑁂 𑀦𑀫𑁆𑀫𑀤𑀸𑀦𑀤𑀻 𑀦𑀸𑀫 𑀅𑀢𑁆𑀣𑀺, 𑀢𑀲𑁆𑀲𑀸 𑀢𑀻𑀭𑀁 𑀅𑀕𑀫𑀸𑀲𑀺. 𑀦𑀫𑁆𑀫𑀤𑀸 𑀦𑀸𑀕𑀭𑀸𑀚𑀸 𑀲𑀢𑁆𑀣𑀼 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀢𑁆𑀯𑀸, 𑀦𑀸𑀕𑀪𑀯𑀦𑀁 𑀧𑀯𑁂𑀲𑁂𑀢𑁆𑀯𑀸, 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀲𑀓𑁆𑀓𑀸𑀭𑀁 𑀅𑀓𑀸𑀲𑀺. 𑀲𑀢𑁆𑀣𑀸 𑀢𑀲𑁆𑀲 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀦𑀸𑀕𑀪𑀯𑀦𑀸 𑀦𑀺𑀓𑁆𑀔𑀫𑀺. 𑀲𑁄 ‘‘𑀫𑀬𑁆𑀳𑀁, 𑀪𑀦𑁆𑀢𑁂, 𑀧𑀭𑀺𑀘𑀭𑀺𑀢𑀩𑁆𑀩𑀁 𑀤𑁂𑀣𑀸’’𑀢𑀺 𑀬𑀸𑀘𑀺. 𑀪𑀕𑀯𑀸 𑀦𑀫𑁆𑀫𑀤𑀸𑀦𑀤𑀻𑀢𑀻𑀭𑁂 𑀧𑀤𑀘𑁂𑀢𑀺𑀬𑀁 𑀤𑀲𑁆𑀲𑁂𑀲𑀺. 𑀢𑀁 𑀯𑀻𑀘𑀻𑀲𑀼 𑀆𑀕𑀢𑀸𑀲𑀼 𑀧𑀺𑀥𑀻𑀬𑀢𑀺, 𑀕𑀢𑀸𑀲𑀼 𑀯𑀺𑀯𑀭𑀻𑀬𑀢𑀺. 𑀫𑀳𑀸𑀲𑀓𑁆𑀓𑀸𑀭𑀧𑀢𑁆𑀢𑀁 𑀅𑀳𑁄𑀲𑀺. 𑀲𑀢𑁆𑀣𑀸 𑀢𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀘𑁆𑀘𑀩𑀦𑁆𑀥𑀧𑀩𑁆𑀩𑀢𑀁 𑀕𑀦𑁆𑀢𑁆𑀯𑀸 𑀲𑀘𑁆𑀘𑀩𑀦𑁆𑀥𑀁 𑀆𑀳 𑁋 ‘‘𑀢𑀬𑀸 𑀫𑀳𑀸𑀚𑀦𑁄 𑀅𑀧𑀸𑀬𑀫𑀕𑁆𑀕𑁂 𑀑𑀢𑀸𑀭𑀺𑀢𑁄. 𑀢𑁆𑀯𑀁 𑀇𑀥𑁂𑀯 𑀯𑀲𑀺𑀢𑁆𑀯𑀸, 𑀏𑀢𑁂𑀲𑀁 𑀮𑀤𑁆𑀥𑀺𑀁 𑀯𑀺𑀲𑁆𑀲𑀚𑁆𑀚𑀸𑀧𑁂𑀢𑁆𑀯𑀸, 𑀦𑀺𑀩𑁆𑀩𑀸𑀦𑀫𑀕𑁆𑀕𑁂 𑀧𑀢𑀺𑀝𑁆𑀞𑀸𑀧𑁂𑀳𑀻’’𑀢𑀺. 𑀲𑁄𑀧𑀺 𑀧𑀭𑀺𑀘𑀭𑀺𑀢𑀩𑁆𑀩𑀁 𑀬𑀸𑀘𑀺. 𑀲𑀢𑁆𑀣𑀸 𑀖𑀦𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀅𑀮𑁆𑀮𑀫𑀢𑁆𑀢𑀺𑀓𑀧𑀺𑀡𑁆𑀟𑀫𑁆𑀳𑀺 𑀮𑀜𑁆𑀙𑀦𑀁 𑀯𑀺𑀬 𑀧𑀤𑀘𑁂𑀢𑀺𑀬𑀁 𑀤𑀲𑁆𑀲𑁂𑀲𑀺. 𑀢𑀢𑁄 𑀚𑁂𑀢𑀯𑀦𑀫𑁂𑀯 𑀕𑀢𑁄. 𑀏𑀢𑀫𑀢𑁆𑀣𑀁 𑀲𑀦𑁆𑀥𑀸𑀬 𑀢𑁂𑀦𑁂𑀯 𑀅𑀦𑁆𑀢𑀭𑀯𑀲𑁆𑀲𑁂𑀦𑀸𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺. 𑀫𑀳𑀸𑀚𑀦𑁄 𑀣𑁂𑀭𑀲𑁆𑀲 𑀲𑀢𑁆𑀢 𑀤𑀺𑀯𑀲𑀸𑀦𑀺 𑀲𑀭𑀻𑀭𑀧𑀽𑀚𑀁 𑀓𑀢𑁆𑀯𑀸, 𑀩𑀳𑀽𑀦𑀺 𑀕𑀦𑁆𑀥𑀓𑀝𑁆𑀞𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸, 𑀲𑀭𑀻𑀭𑀁 𑀛𑀸𑀧𑁂𑀢𑁆𑀯𑀸 𑀥𑀸𑀢𑀼𑀬𑁄 𑀆𑀤𑀸𑀬 𑀘𑁂𑀢𑀺𑀬𑀁 𑀅𑀓𑀸𑀲𑀺. 𑀲𑀫𑁆𑀩𑀳𑀼𑀮𑀸 𑀪𑀺𑀓𑁆𑀔𑀽𑀢𑀺 𑀣𑁂𑀭𑀲𑁆𑀲 𑀆𑀴𑀸𑀳𑀦𑀝𑁆𑀞𑀸𑀦𑁂 𑀞𑀺𑀢𑀪𑀺𑀓𑁆𑀔𑀽. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀙𑀝𑁆𑀞𑀁 𑀉𑀢𑁆𑀢𑀸𑀦𑀫𑁂𑀯.

𑁭-𑁮. 𑀧𑀞𑀫𑀏𑀚𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁦-𑁯𑁧. 𑀲𑀢𑁆𑀢𑀫𑁂 𑀏𑀚𑀸𑀢𑀺 𑀢𑀡𑁆𑀳𑀸. 𑀲𑀸 𑀳𑀺 𑀘𑀮𑀦𑀝𑁆𑀞𑁂𑀦 𑀏𑀚𑀸𑀢𑀺 𑀯𑀼𑀘𑁆𑀘𑀢𑀺. 𑀲𑀸𑀯 𑀆𑀩𑀸𑀥𑀦𑀝𑁆𑀞𑁂𑀦 𑀭𑁄𑀕𑁄, 𑀅𑀦𑁆𑀢𑁄 𑀤𑀼𑀲𑁆𑀲𑀦𑀝𑁆𑀞𑁂𑀦 𑀕𑀡𑁆𑀟𑁄, 𑀦𑀺𑀓𑀦𑁆𑀢𑀦𑀝𑁆𑀞𑁂𑀦 𑀲𑀮𑁆𑀮𑀁. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀚𑀸 𑀭𑁄𑀕𑁄 𑀘𑁂𑀯 𑀕𑀡𑁆𑀟𑁄 𑀘 𑀲𑀮𑁆𑀮𑀜𑁆𑀘, 𑀢𑀲𑁆𑀫𑀸. 𑀘𑀓𑁆𑀔𑀼𑀁 𑀦 𑀫𑀜𑁆𑀜𑁂𑀬𑁆𑀬𑀸𑀢𑀺𑀆𑀤𑀺 𑀯𑀼𑀢𑁆𑀢𑀦𑀬𑀫𑁂𑀯, 𑀇𑀥𑀸𑀧𑀺 𑀲𑀩𑁆𑀩𑀁 𑀳𑁂𑀝𑁆𑀞𑀸 𑀕𑀳𑀺𑀢𑀫𑁂𑀯 𑀲𑀁𑀓𑀟𑁆𑀠𑀺𑀢𑁆𑀯𑀸 𑀤𑀲𑁆𑀲𑀺𑀢𑀁. 𑀅𑀝𑁆𑀞𑀫𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁯-𑁧𑁦. 𑀧𑀞𑀫𑀤𑁆𑀯𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁨-𑁯𑁩. 𑀦𑀯𑀫𑁂 𑀤𑁆𑀯𑀬𑀦𑁆𑀢𑀺 𑀤𑁆𑀯𑁂 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂. 𑀤𑀲𑀫𑁂 𑀇𑀢𑁆𑀣𑁂𑀢𑀁 𑀤𑁆𑀯𑀬𑀦𑁆𑀢𑀺 𑀏𑀯𑀫𑁂𑀢𑀁 𑀤𑁆𑀯𑀬𑀁. 𑀘𑀮𑀜𑁆𑀘𑁂𑀯 𑀩𑁆𑀬𑀣𑀜𑁆𑀘𑀸𑀢𑀺 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀅𑀲𑀡𑁆𑀞𑀳𑀦𑀢𑁄 𑀘𑀮𑀢𑀺 𑀘𑁂𑀯 𑀩𑁆𑀬𑀣𑀢𑀺 𑀘. 𑀬𑁄𑀧𑀺 𑀳𑁂𑀢𑀼 𑀬𑁄𑀧𑀺 𑀧𑀘𑁆𑀘𑀬𑁄𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀸𑀭𑀫𑁆𑀫𑀡𑀁 𑀳𑁂𑀢𑀼 𑀘𑁂𑀯 𑀧𑀘𑁆𑀘𑀬𑁄 𑀘. 𑀓𑀼𑀢𑁄 𑀦𑀺𑀘𑁆𑀘𑀁 𑀪𑀯𑀺𑀲𑁆𑀲𑀢𑀻𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀦𑀺𑀘𑁆𑀘𑀁 𑀪𑀯𑀺𑀲𑁆𑀲𑀢𑀺. 𑀬𑀣𑀸 𑀧𑀦 𑀤𑀸𑀲𑀲𑁆𑀲 𑀤𑀸𑀲𑀺𑀬𑀸 𑀓𑀼𑀘𑁆𑀙𑀺𑀲𑁆𑀫𑀺𑀁 𑀚𑀸𑀢𑁄 𑀧𑀼𑀢𑁆𑀢𑁄 𑀧𑀭𑁄𑀯 𑀤𑀸𑀲𑁄 𑀳𑁄𑀢𑀺, 𑀏𑀯𑀁 𑀅𑀦𑀺𑀘𑁆𑀘𑀫𑁂𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀗𑁆𑀕𑀢𑀻𑀢𑀺 𑀲𑀳𑀕𑀢𑀺. 𑀲𑀦𑁆𑀦𑀺𑀧𑀸𑀢𑁄𑀢𑀺 𑀏𑀓𑀢𑁄 𑀲𑀦𑁆𑀦𑀺𑀧𑀢𑀦𑀁. 𑀲𑀫𑀯𑀸𑀬𑁄𑀢𑀺 𑀏𑀓𑀢𑁄 𑀲𑀫𑀸𑀕𑀫𑁄. 𑀅𑀬𑀁 𑀯𑀼𑀘𑁆𑀘𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄𑀢𑀺 𑀇𑀫𑀺𑀦𑀸 𑀲𑀗𑁆𑀕𑀢𑀺𑀲𑀦𑁆𑀦𑀺𑀧𑀸𑀢𑀲𑀫𑀯𑀸𑀬𑀲𑀗𑁆𑀔𑀸𑀢𑁂𑀦 𑀧𑀘𑁆𑀘𑀬𑁂𑀦 𑀉𑀧𑁆𑀧𑀦𑁆𑀦𑀢𑁆𑀢𑀸 𑀧𑀘𑁆𑀘𑀬𑀦𑀸𑀫𑁂𑀦𑁂𑀯 𑀲𑀗𑁆𑀕𑀢𑀺 𑀲𑀦𑁆𑀦𑀺𑀧𑀸𑀢𑁄 𑀲𑀫𑀯𑀸𑀬𑁄𑀢𑀺 𑀅𑀬𑀁 𑀯𑀼𑀘𑁆𑀘𑀢𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑁄.

𑀲𑁄𑀧𑀺 𑀳𑁂𑀢𑀽𑀢𑀺 𑀨𑀲𑁆𑀲𑀲𑁆𑀲 𑀯𑀢𑁆𑀣𑀼 𑀆𑀭𑀫𑁆𑀫𑀡𑀁 𑀲𑀳𑀚𑀸𑀢𑀸 𑀢𑀬𑁄 𑀔𑀦𑁆𑀥𑀸𑀢𑀺 𑀅𑀬𑀁 𑀳𑁂𑀢𑀼. 𑀨𑀼𑀝𑁆𑀞𑁄𑀢𑀺 𑀉𑀧𑀬𑁄𑀕𑀢𑁆𑀣𑁂 𑀧𑀘𑁆𑀘𑀢𑁆𑀢𑀁, 𑀨𑀲𑁆𑀲𑁂𑀦 𑀨𑀼𑀝𑁆𑀞𑀫𑁂𑀯 𑀕𑁄𑀘𑀭𑀁 𑀯𑁂𑀤𑀦𑀸 𑀯𑁂𑀤𑁂𑀢𑀺, 𑀘𑁂𑀢𑀦𑀸 𑀘𑁂𑀢𑁂𑀢𑀺, 𑀲𑀜𑁆𑀜𑀸 𑀲𑀜𑁆𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀨𑀼𑀝𑁆𑀞𑁄𑀢𑀺 𑀯𑀸 𑀨𑀲𑁆𑀲𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄, 𑀨𑀲𑁆𑀲𑁂𑀦 𑀨𑀼𑀝𑁆𑀞𑀸𑀭𑀫𑁆𑀫𑀡𑀫𑁂𑀯 𑀯𑁂𑀤𑀦𑀸𑀤𑀻𑀳𑀺 𑀯𑁂𑀤𑁂𑀢𑀺 𑀘𑁂𑀢𑁂𑀢𑀺 𑀲𑀜𑁆𑀚𑀸𑀦𑀸𑀢𑀻𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀫𑀢𑀺𑀁𑀲𑀓𑁆𑀔𑀦𑁆𑀥𑀸 𑀓𑀣𑀺𑀢𑀸 𑀳𑁄𑀦𑁆𑀢𑀺. 𑀓𑀣𑀁? 𑀘𑀓𑁆𑀔𑀼𑀤𑁆𑀯𑀸𑀭𑁂 𑀢𑀸𑀯 𑀯𑀢𑁆𑀣𑀼 𑀘𑁂𑀯 𑀆𑀭𑀫𑁆𑀫𑀡𑀜𑁆𑀘 𑀭𑀽𑀧𑀓𑁆𑀔𑀦𑁆𑀥𑁄, 𑀨𑀼𑀝𑁆𑀞𑁄 𑀯𑁂𑀤𑁂𑀢𑀻𑀢𑀺 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀘𑁂𑀢𑁂𑀢𑀻𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀲𑀜𑁆𑀚𑀸𑀦𑀸𑀢𑀻𑀢𑀺 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀯𑀺𑀚𑀸𑀦𑀸𑀢𑀻𑀢𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺. 𑀲𑁂𑀲𑀤𑁆𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀫𑀦𑁄𑀤𑁆𑀯𑀸𑀭𑁂𑀧𑀺 𑀳𑀺 𑀯𑀢𑁆𑀣𑀼𑀭𑀽𑀧𑀁 𑀏𑀓𑀦𑁆𑀢𑀢𑁄 𑀭𑀽𑀧𑀓𑁆𑀔𑀦𑁆𑀥𑁄, 𑀭𑀽𑀧𑁂 𑀧𑀦 𑀆𑀭𑀫𑁆𑀫𑀡𑁂 𑀲𑀢𑀺 𑀆𑀭𑀫𑁆𑀫𑀡𑀫𑁆𑀧𑀺 𑀭𑀽𑀧𑀓𑁆𑀔𑀦𑁆𑀥𑁄𑀢𑀺 𑀙 𑀧𑀜𑁆𑀘𑀓𑀸𑀢𑀺𑀁𑀲 𑀳𑁄𑀦𑁆𑀢𑀺. 𑀲𑀗𑁆𑀔𑁂𑀧𑁂𑀦 𑀧𑀦𑁂𑀢𑁂 𑀙𑀲𑀼𑀧𑀺 𑀤𑁆𑀯𑀸𑀭𑁂𑀲𑀼 𑀧𑀜𑁆𑀘𑁂𑀯 𑀔𑀦𑁆𑀥𑀸𑀢𑀺 𑀲𑀧𑀘𑁆𑀘𑀬𑁂 𑀧𑀜𑁆𑀘𑀓𑁆𑀔𑀦𑁆𑀥𑁂 𑀅𑀦𑀺𑀘𑁆𑀘𑀸𑀢𑀺 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑁂 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑁂𑀦 𑀇𑀤𑀁 𑀲𑀼𑀢𑁆𑀢𑀁 𑀤𑁂𑀲𑀺𑀢𑀦𑁆𑀢𑀺.

𑀙𑀦𑁆𑀦𑀯𑀕𑁆𑀕𑁄 𑀦𑀯𑀫𑁄.

𑁧𑁦. 𑀲𑀴𑀯𑀕𑁆𑀕𑁄

𑁧. 𑀅𑀤𑀦𑁆𑀢𑀅𑀕𑀼𑀢𑁆𑀢𑀯𑀡𑁆𑀡𑀦𑀸

𑁯𑁪. 𑀲𑀴𑀯𑀕𑁆𑀕𑀲𑁆𑀲 𑀧𑀞𑀫𑁂 𑀅𑀤𑀦𑁆𑀢𑀸𑀢𑀺 𑀅𑀤𑀫𑀺𑀢𑀸. 𑀅𑀕𑀼𑀢𑁆𑀢𑀸𑀢𑀺 𑀅𑀕𑁄𑀧𑀺𑀢𑀸. 𑀅𑀭𑀓𑁆𑀔𑀺𑀢𑀸𑀢𑀺 𑀦 𑀭𑀓𑁆𑀔𑀺𑀢𑀸. 𑀅𑀲𑀁𑀯𑀼𑀢𑀸𑀢𑀺 𑀅𑀧𑀺𑀳𑀺𑀢𑀸. 𑀤𑀼𑀓𑁆𑀔𑀸𑀥𑀺𑀯𑀸𑀳𑀸 𑀳𑁄𑀦𑁆𑀢𑀻𑀢𑀺 𑀦𑁂𑀭𑀬𑀺𑀓𑀸𑀤𑀺𑀪𑁂𑀤𑀁 𑀅𑀥𑀺𑀓𑀤𑀼𑀓𑁆𑀔𑀁 𑀆𑀯𑀳𑀦𑀓𑀸 𑀳𑁄𑀦𑁆𑀢𑀺. 𑀲𑀼𑀔𑀸𑀥𑀺𑀯𑀸𑀳𑀸 𑀳𑁄𑀦𑁆𑀢𑀻𑀢𑀺 𑀛𑀸𑀦𑀫𑀕𑁆𑀕𑀨𑀮𑀧𑀪𑁂𑀤𑀁 𑀅𑀥𑀺𑀓𑀲𑀼𑀔𑀁 𑀆𑀯𑀳𑀦𑀓𑀸 𑀳𑁄𑀦𑁆𑀢𑀺. 𑀅𑀥𑀺𑀯𑀳𑀸𑀢𑀺𑀧𑀺 𑀧𑀸𑀞𑁄, 𑀏𑀲𑁂𑀯𑀢𑁆𑀣𑁄.

𑀲𑀴𑁂𑀯𑀸𑀢𑀺 𑀙 𑀏𑀯. 𑀅𑀲𑀁𑀯𑀼𑀢𑁄 𑀬𑀢𑁆𑀣 𑀤𑀼𑀓𑁆𑀔𑀁 𑀦𑀺𑀕𑀘𑁆𑀙𑀢𑀻𑀢𑀺 𑀬𑁂𑀲𑀼 𑀆𑀬𑀢𑀦𑁂𑀲𑀼 𑀲𑀁𑀯𑀭𑀯𑀺𑀭𑀳𑀺𑀢𑁄 𑀤𑀼𑀓𑁆𑀔𑀁 𑀧𑀸𑀧𑀼𑀡𑀸𑀢𑀺. 𑀢𑁂𑀲𑀜𑁆𑀘 𑀬𑁂 𑀲𑀁𑀯𑀭𑀡𑀁 𑀅𑀯𑁂𑀤𑀺𑀲𑀼𑀦𑁆𑀢𑀺 𑀬𑁂 𑀢𑁂𑀲𑀁 𑀆𑀬𑀢𑀦𑀸𑀦𑀁 𑀲𑀁𑀯𑀭𑀁 𑀯𑀺𑀦𑁆𑀤𑀺𑀁𑀲𑀼 𑀧𑀝𑀺𑀮𑀪𑀺𑀁𑀲𑀼. 𑀯𑀺𑀳𑀭𑀦𑁆𑀢𑀸𑀦𑀯𑀲𑁆𑀲𑀼𑀢𑀸𑀢𑀺 𑀯𑀺𑀳𑀭𑀦𑁆𑀢𑀺 𑀅𑀦𑀯𑀲𑁆𑀲𑀼𑀢𑀸 𑀅𑀢𑀺𑀦𑁆𑀢𑀸.

𑀅𑀲𑀸𑀤𑀺𑀢𑀜𑁆𑀘 𑀲𑀸𑀤𑀼𑀦𑁆𑀢𑀺 𑀅𑀲𑁆𑀲𑀸𑀤𑀯𑀦𑁆𑀢𑀜𑁆𑀘 𑀫𑀥𑀼𑀭𑀜𑁆𑀘. 𑀨𑀲𑁆𑀲𑀤𑁆𑀯𑀬𑀁 𑀲𑀼𑀔𑀤𑀼𑀓𑁆𑀔𑁂 𑀉𑀧𑁂𑀓𑁆𑀔𑁂𑀢𑀺 𑀲𑀼𑀔𑀨𑀲𑁆𑀲𑀜𑁆𑀘 𑀤𑀼𑀓𑁆𑀔𑀨𑀲𑁆𑀲𑀜𑁆𑀘𑀸𑀢𑀺 𑀇𑀤𑀁 𑀨𑀲𑁆𑀲𑀤𑁆𑀯𑀬𑀁 𑀉𑀧𑁂𑀓𑁆𑀔𑁂, 𑀉𑀧𑁂𑀓𑁆𑀔𑀸𑀫𑁂𑀯𑁂𑀢𑁆𑀣 𑀉𑀧𑁆𑀧𑀸𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀨𑀲𑁆𑀲𑀤𑁆𑀯𑀬𑀁 𑀲𑀼𑀔𑀤𑀼𑀓𑁆𑀔𑀁 𑀉𑀧𑁂𑀓𑁆𑀔𑁄𑀢𑀺 𑀯𑀸 𑀧𑀸𑀞𑁄, 𑀨𑀲𑁆𑀲𑀳𑁂𑀢𑀼𑀓𑀁 𑀲𑀼𑀔𑀤𑀼𑀓𑁆𑀔𑀁 𑀉𑀧𑁂𑀓𑁆𑀔𑁄, 𑀲𑀼𑀔𑁂 𑀅𑀦𑀼𑀭𑁄𑀥𑀁 𑀤𑀼𑀓𑁆𑀔𑁂 𑀘 𑀯𑀺𑀭𑁄𑀥𑀁 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁄 𑀉𑀧𑁂𑀓𑁆𑀔𑀓𑁄 𑀪𑀯𑁂𑀬𑁆𑀬𑀸𑀢𑀺𑀧𑀺 𑀅𑀢𑁆𑀣𑁄. 𑀅𑀦𑀸𑀦𑀼𑀭𑀼𑀤𑁆𑀥𑁄 𑀅𑀯𑀺𑀭𑀼𑀤𑁆𑀥𑁄 𑀓𑁂𑀦𑀘𑀻𑀢𑀺 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀦𑁂𑀯 𑀅𑀦𑀼𑀭𑀼𑀤𑁆𑀥𑁄 𑀦 𑀯𑀺𑀭𑀼𑀤𑁆𑀥𑁄 𑀪𑀯𑁂𑀬𑁆𑀬.

𑀧𑀧𑀜𑁆𑀘𑀲𑀜𑁆𑀜𑀸𑀢𑀺 𑀓𑀺𑀮𑁂𑀲𑀲𑀜𑁆𑀜𑀸𑀬 𑀧𑀧𑀜𑁆𑀘𑀲𑀜𑁆𑀜𑀸 𑀦𑀸𑀫 𑀳𑀼𑀢𑁆𑀯𑀸. 𑀇𑀢𑀭𑀻𑀢𑀭𑀸 𑀦𑀭𑀸𑀢𑀺 𑀮𑀸𑀫𑀓𑀲𑀢𑁆𑀢𑀸 𑀧𑀧𑀜𑁆𑀘𑀬𑀦𑁆𑀢𑀸 𑀉𑀧𑀬𑀦𑁆𑀢𑀻𑀢𑀺 𑀧𑀧𑀜𑁆𑀘𑀬𑀫𑀸𑀦𑀸 𑀯𑀝𑁆𑀝𑀁 𑀉𑀧𑀕𑀘𑁆𑀙𑀦𑁆𑀢𑀺. 𑀲𑀜𑁆𑀜𑀺𑀦𑁄𑀢𑀺 𑀲𑀲𑀜𑁆𑀜𑀸 𑀲𑀢𑁆𑀢𑀸. 𑀫𑀦𑁄𑀫𑀬𑀁 𑀕𑁂𑀳𑀲𑀺𑀢𑀜𑁆𑀘 𑀲𑀩𑁆𑀩𑀦𑁆𑀢𑀺 𑀲𑀩𑁆𑀩𑀫𑁂𑀯 𑀧𑀜𑁆𑀘𑀓𑀸𑀫𑀕𑀼𑀡𑀕𑁂𑀳𑀦𑀺𑀲𑁆𑀲𑀺𑀢𑀁 𑀫𑀦𑁄𑀫𑀬𑀁 𑀯𑀺𑀢𑀓𑁆𑀓𑀁. 𑀧𑀦𑀼𑀚𑁆𑀚𑀸𑀢𑀺 𑀧𑀦𑀼𑀤𑀺𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸. 𑀦𑁂𑀓𑁆𑀔𑀫𑁆𑀫𑀲𑀺𑀢𑀁 𑀇𑀭𑀻𑀬𑀢𑀻𑀢𑀺 𑀤𑀩𑁆𑀩𑀚𑀸𑀢𑀺𑀓𑁄 𑀪𑀺𑀓𑁆𑀔𑀼 𑀦𑁂𑀓𑁆𑀔𑀫𑁆𑀫𑀲𑀺𑀢𑀁 𑀇𑀭𑀺𑀬𑁂𑀦 𑀇𑀭𑀻𑀬𑀢𑀺.

𑀙𑀲𑁆𑀲𑀼 𑀬𑀤𑀸 𑀲𑀼𑀪𑀸𑀯𑀺𑀢𑁄𑀢𑀺 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀬𑀤𑀸 𑀲𑀼𑀝𑁆𑀞𑀼 𑀪𑀸𑀯𑀺𑀢𑁄. 𑀨𑀼𑀝𑁆𑀞𑀲𑁆𑀲 𑀘𑀺𑀢𑁆𑀢𑀁 𑀦 𑀯𑀺𑀓𑀫𑁆𑀧𑀢𑁂 𑀓𑁆𑀯𑀘𑀻𑀢𑀺 𑀲𑀼𑀔𑀨𑀲𑁆𑀲𑁂𑀦 𑀯𑀸 𑀤𑀼𑀓𑁆𑀔𑀨𑀲𑁆𑀲𑁂𑀦 𑀯𑀸 𑀨𑀼𑀝𑁆𑀞𑀲𑁆𑀲 𑀓𑀺𑀲𑁆𑀫𑀺𑀜𑁆𑀘𑀺 𑀘𑀺𑀢𑁆𑀢𑀁 𑀦 𑀓𑀫𑁆𑀧𑀢𑀺 𑀦 𑀯𑁂𑀥𑀢𑀺. 𑀪𑀯𑀢𑁆𑀣 𑀚𑀸𑀢𑀺𑀫𑀭𑀡𑀲𑁆𑀲 𑀧𑀸𑀭𑀕𑀸𑀢𑀺 𑀚𑀸𑀢𑀺𑀫𑀭𑀡𑀸𑀦𑀁 𑀧𑀸𑀭𑀁 𑀦𑀺𑀩𑁆𑀩𑀸𑀦𑀁 𑀕𑀫𑀓𑀸 𑀳𑁄𑀣.

𑁨. 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁫. 𑀤𑀼𑀢𑀺𑀬𑁂 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑁄𑀢𑀺 𑀫𑀸𑀮𑀼𑀓𑁆𑀬𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀼𑀢𑁆𑀢𑁄. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀢𑀯 𑀑𑀯𑀸𑀤𑀸𑀬𑀸𑀘𑀦𑁂. 𑀇𑀫𑀺𑀦𑀸 𑀣𑁂𑀭𑀁 𑀅𑀧𑀲𑀸𑀤𑁂𑀢𑀺𑀧𑀺 𑀉𑀲𑁆𑀲𑀸𑀤𑁂𑀢𑀺𑀧𑀺. 𑀓𑀣𑀁? 𑀅𑀬𑀁 𑀓𑀺𑀭 𑀤𑀳𑀭𑀓𑀸𑀮𑁂 𑀭𑀽𑀧𑀸𑀤𑀻𑀲𑀼 𑀧𑀫𑀚𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀫𑀳𑀮𑁆𑀮𑀓𑀓𑀸𑀮𑁂 𑀅𑀭𑀜𑁆𑀜𑀯𑀸𑀲𑀁 𑀧𑀢𑁆𑀣𑁂𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀬𑀸𑀘𑀢𑀺. 𑀅𑀣 𑀪𑀕𑀯𑀸 ‘‘𑀏𑀢𑁆𑀣 𑀤𑀳𑀭𑁂 𑀓𑀺𑀁 𑀯𑀓𑁆𑀔𑀸𑀫? 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑁄 𑀯𑀺𑀬 𑀢𑀼𑀫𑁆𑀳𑁂𑀧𑀺 𑀢𑀭𑀼𑀡𑀓𑀸𑀮𑁂 𑀧𑀫𑀚𑁆𑀚𑀺𑀢𑁆𑀯𑀸 𑀫𑀳𑀮𑁆𑀮𑀓𑀓𑀸𑀮𑁂 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀭𑁂𑀬𑁆𑀬𑀸𑀣𑀸’’𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀪𑀡𑀦𑁆𑀢𑁄 𑀣𑁂𑀭𑀁 𑀅𑀧𑀲𑀸𑀤𑁂𑀢𑀺 𑀦𑀸𑀫.

𑀬𑀲𑁆𑀫𑀸 𑀧𑀦 𑀣𑁂𑀭𑁄 𑀫𑀳𑀮𑁆𑀮𑀓𑀓𑀸𑀮𑁂𑀧𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀓𑀸𑀫𑁄, 𑀢𑀲𑁆𑀫𑀸 𑀪𑀕𑀯𑀸 ‘‘𑀏𑀢𑁆𑀣 𑀤𑀳𑀭𑁂 𑀓𑀺𑀁 𑀯𑀓𑁆𑀔𑀸𑀫? 𑀅𑀬𑀁 𑀅𑀫𑁆𑀳𑀸𑀓𑀁 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑁄 𑀫𑀳𑀮𑁆𑀮𑀓𑀓𑀸𑀮𑁂𑀧𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀓𑀢𑁆𑀢𑀼𑀓𑀸𑀫𑁄 𑀓𑀫𑁆𑀫𑀝𑁆𑀞𑀸𑀦𑀁 𑀬𑀸𑀘𑀢𑀺, 𑀢𑀼𑀫𑁆𑀳𑁂 𑀦𑀸𑀫 𑀢𑀭𑀼𑀡𑀓𑀸𑀮𑁂𑀧𑀺 𑀯𑀻𑀭𑀺𑀬𑀁 𑀦 𑀓𑀭𑁄𑀣𑀸’’𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀪𑀡𑀦𑁆𑀢𑁄 𑀣𑁂𑀭𑀁 𑀉𑀲𑁆𑀲𑀸𑀤𑁂𑀢𑀺 𑀦𑀸𑀫.

𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑁄 𑀦𑀸𑀫. 𑀓𑀺𑀜𑁆𑀘𑀸𑀧𑀸𑀳𑀦𑁆𑀢𑀺 𑀓𑀺𑀜𑁆𑀘𑀸𑀧𑀺 ‘‘𑀅𑀳𑀁 𑀫𑀳𑀮𑁆𑀮𑀓𑁄’’𑀢𑀺 𑀜𑀸𑀢𑀁. 𑀬𑀤𑀺 𑀅𑀳𑀁 𑀫𑀳𑀮𑁆𑀮𑀓𑁄, 𑀫𑀳𑀮𑁆𑀮𑀓𑁄 𑀲𑀫𑀸𑀦𑁄𑀧𑀺 𑀲𑀓𑁆𑀔𑀺𑀲𑁆𑀲𑀸𑀫𑀺 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁, 𑀤𑁂𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀫𑀳𑀮𑁆𑀮𑀓𑀪𑀸𑀯𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀑𑀯𑀸𑀤𑀜𑁆𑀘 𑀧𑀲𑀁𑀲𑀦𑁆𑀢𑁄 𑀏𑀯𑀫𑀸𑀳.

𑀅𑀤𑀺𑀝𑁆𑀞𑀸 𑀅𑀤𑀺𑀝𑁆𑀞𑀧𑀼𑀩𑁆𑀩𑀸𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀅𑀤𑀺𑀝𑁆𑀞𑀸 𑀅𑀢𑀻𑀢𑁂𑀧𑀺 𑀅𑀤𑀺𑀝𑁆𑀞𑀧𑀼𑀩𑁆𑀩𑀸. 𑀦 𑀘 𑀧𑀲𑁆𑀲𑀲𑀻𑀢𑀺 𑀏𑀢𑀭𑀳𑀺𑀧𑀺 𑀦 𑀧𑀲𑁆𑀲𑀲𑀺. 𑀦 𑀘 𑀢𑁂 𑀳𑁄𑀢𑀺 𑀧𑀲𑁆𑀲𑁂𑀬𑁆𑀬𑀦𑁆𑀢𑀺 𑀏𑀯𑀁 𑀲𑀫𑀦𑁆𑀦𑀸𑀳𑀸𑀭𑁄𑀧𑀺 𑀢𑁂 𑀬𑀢𑁆𑀣 𑀦𑀢𑁆𑀣𑀺, 𑀅𑀧𑀺 𑀦𑀼 𑀢𑁂 𑀢𑀢𑁆𑀣 𑀙𑀦𑁆𑀤𑀸𑀤𑀬𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀧𑀼𑀘𑁆𑀙𑀢𑀺.

𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀦𑁆𑀢𑀺 𑀭𑀽𑀧𑀸𑀬𑀢𑀦𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀜𑁆𑀳𑀺 𑀭𑀽𑀧𑁂 𑀭𑀽𑀧𑀫𑀢𑁆𑀢𑀫𑁂𑀯 𑀧𑀲𑁆𑀲𑀢𑀺, 𑀦 𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑀁, 𑀇𑀢𑀺 𑀲𑁂𑀲𑀯𑀺𑀜𑁆𑀜𑀸𑀡𑁂𑀳𑀺𑀧𑀺 𑀫𑁂 𑀏𑀢𑁆𑀣 𑀤𑀺𑀝𑁆𑀞𑀫𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀤𑀺𑀝𑁆𑀞𑁂 𑀤𑀺𑀝𑁆𑀞𑀁 𑀦𑀸𑀫 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀭𑀽𑀧𑁂 𑀭𑀽𑀧𑀯𑀺𑀚𑀸𑀦𑀦𑀦𑁆𑀢𑀺 𑀅𑀢𑁆𑀣𑁄. 𑀫𑀢𑁆𑀢𑀸𑀢𑀺 𑀧𑀫𑀸𑀡𑀁, 𑀤𑀺𑀝𑁆𑀞𑀁 𑀫𑀢𑁆𑀢𑀸 𑀅𑀲𑁆𑀲𑀸𑀢𑀺 𑀤𑀺𑀝𑁆𑀞𑀫𑀢𑁆𑀢𑀁, 𑀘𑀺𑀢𑁆𑀢𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀫𑀢𑁆𑀢𑀫𑁂𑀯 𑀫𑁂 𑀘𑀺𑀢𑁆𑀢𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀆𑀧𑀸𑀣𑀕𑀢𑀭𑀽𑀧𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦 𑀭𑀚𑁆𑀚𑀢𑀺 𑀦 𑀤𑀼𑀲𑁆𑀲𑀢𑀺 𑀦 𑀫𑀼𑀬𑁆𑀳𑀢𑀺, 𑀏𑀯𑀁 𑀭𑀸𑀕𑀸𑀤𑀺𑀯𑀺𑀭𑀳𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀫𑀢𑁆𑀢𑀫𑁂𑀯 𑀚𑀯𑀦𑀁 𑀪𑀯𑀺𑀲𑁆𑀲𑀢𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀧𑀫𑀸𑀡𑁂𑀦𑁂𑀯 𑀚𑀯𑀦𑀁 𑀞𑀧𑁂𑀲𑁆𑀲𑀸𑀫𑀻𑀢𑀺. 𑀅𑀣 𑀯𑀸 𑀤𑀺𑀝𑁆𑀞𑀁 𑀦𑀸𑀫 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀤𑀺𑀝𑁆𑀞𑀭𑀽𑀧𑀁, 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀦𑀸𑀫 𑀢𑀢𑁆𑀣𑁂𑀯 𑀉𑀧𑁆𑀧𑀦𑁆𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑀲𑀦𑁆𑀢𑀻𑀭𑀡𑀯𑁄𑀝𑁆𑀞𑀩𑁆𑀩𑀦𑀲𑀗𑁆𑀔𑀸𑀢𑀁 𑀘𑀺𑀢𑁆𑀢𑀢𑁆𑀢𑀬𑀁. 𑀬𑀣𑀸 𑀢𑀁 𑀦 𑀭𑀚𑁆𑀚𑀢𑀺, 𑀦 𑀤𑀼𑀲𑁆𑀲𑀢𑀺, 𑀦 𑀫𑀼𑀬𑁆𑀳𑀢𑀺, 𑀏𑀯𑀁 𑀆𑀧𑀸𑀣𑀕𑀢𑁂 𑀭𑀽𑀧𑁂 𑀢𑁂𑀦𑁂𑀯 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀺𑀧𑁆𑀧𑀫𑀸𑀡𑁂𑀦 𑀚𑀯𑀦𑀁 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀺, 𑀦𑀸𑀳𑀁 𑀢𑀁 𑀧𑀫𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀺𑀢𑀼𑀁 𑀤𑀲𑁆𑀲𑀸𑀫𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀏𑀲𑁂𑀯 𑀦𑀬𑁄 𑀲𑀼𑀢𑀫𑀼𑀢𑁂𑀲𑀼.

𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀫𑀢𑁆𑀢𑀦𑁆𑀢𑀺 𑀏𑀢𑁆𑀣 𑀧𑀦 𑀯𑀺𑀜𑁆𑀜𑀸𑀢𑀁 𑀦𑀸𑀫 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑁂𑀦 𑀯𑀺𑀜𑁆𑀜𑀸𑀢𑀸𑀭𑀫𑁆𑀫𑀡𑀁, 𑀢𑀲𑁆𑀫𑀺𑀁 𑀯𑀺𑀜𑁆𑀜𑀸𑀢𑁂 𑀯𑀺𑀜𑁆𑀜𑀸𑀢𑀫𑀢𑁆𑀢𑀦𑁆𑀢𑀺 𑀆𑀯𑀚𑁆𑀚𑀦𑀧𑀫𑀸𑀡𑀁. 𑀬𑀣𑀸 𑀆𑀯𑀚𑁆𑀚𑀦𑁂𑀦 𑀦 𑀭𑀚𑁆𑀚𑀢𑀺 𑀦 𑀤𑀼𑀲𑁆𑀲𑀢𑀺 𑀦 𑀫𑀼𑀬𑁆𑀳𑀢𑀺, 𑀏𑀯𑀁 𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀤𑀢𑁆𑀯𑀸 𑀆𑀯𑀚𑁆𑀚𑀦𑀧𑀫𑀸𑀡𑁂𑀦𑁂𑀯 𑀘𑀺𑀢𑁆𑀢𑀁 𑀞𑀧𑁂𑀲𑁆𑀲𑀸𑀫𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄.

𑀬𑀢𑁄𑀢𑀺 𑀬𑀤𑀸. 𑀢𑀢𑁄𑀢𑀺 𑀢𑀤𑀸. 𑀦 𑀢𑁂𑀦𑀸𑀢𑀺 𑀢𑁂𑀦 𑀭𑀸𑀕𑁂𑀦 𑀯𑀸 𑀭𑀢𑁆𑀢𑁄, 𑀤𑁄𑀲𑁂𑀦 𑀯𑀸 𑀤𑀼𑀝𑁆𑀞𑁄, 𑀫𑁄𑀳𑁂𑀦 𑀯𑀸 𑀫𑀽𑀴𑁆𑀳𑁄 𑀦 𑀪𑀯𑀺𑀲𑁆𑀲𑀢𑀺. 𑀢𑀢𑁄 𑀢𑁆𑀯𑀁 𑀫𑀸𑀮𑀼𑀓𑁆𑀬𑀧𑀼𑀢𑁆𑀢 𑀦 𑀢𑀢𑁆𑀣𑀸𑀢𑀺 𑀬𑀤𑀸 𑀢𑁆𑀯𑀁 𑀢𑁂𑀦 𑀭𑀸𑀕𑁂𑀦 𑀯𑀸 𑀤𑁄𑀲𑀫𑁄𑀳𑁂𑀳𑀺 𑀯𑀸 𑀭𑀢𑁆𑀢𑁄 𑀯𑀸 𑀤𑀼𑀝𑁆𑀞𑁄 𑀯𑀸 𑀫𑀽𑀴𑁆𑀳𑁄 𑀯𑀸 𑀦 𑀪𑀯𑀺𑀲𑁆𑀲𑀲𑀺, 𑀢𑀤𑀸 𑀢𑁆𑀯𑀁 𑀦 𑀢𑀢𑁆𑀣 𑀢𑀲𑁆𑀫𑀺𑀁 𑀤𑀺𑀝𑁆𑀞𑁂 𑀯𑀸 𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑁂 𑀯𑀸 𑀧𑀝𑀺𑀩𑀤𑁆𑀥𑁄 𑀅𑀮𑁆𑀮𑀻𑀦𑁄 𑀧𑀢𑀺𑀝𑁆𑀞𑀺𑀢𑁄 𑀦𑀸𑀫 𑀪𑀯𑀺𑀲𑁆𑀲𑀲𑀺. 𑀦𑁂𑀯𑀺𑀥𑀸𑀢𑀺𑀆𑀤𑀺 𑀯𑀼𑀢𑁆𑀢𑀢𑁆𑀣𑀫𑁂𑀯.

𑀲𑀢𑀺 𑀫𑀼𑀝𑁆𑀞𑀸𑀢𑀺 𑀲𑀢𑀺 𑀦𑀝𑁆𑀞𑀸. 𑀢𑀜𑁆𑀘 𑀅𑀚𑁆𑀛𑁄𑀲𑀸𑀢𑀺 𑀢𑀁 𑀆𑀭𑀫𑁆𑀫𑀡𑀁 𑀕𑀺𑀮𑀺𑀢𑁆𑀯𑀸. 𑀅𑀪𑀺𑀚𑁆𑀛𑀸 𑀘 𑀯𑀺𑀳𑁂𑀲𑀸 𑀘𑀸𑀢𑀺 𑀅𑀪𑀺𑀚𑁆𑀛𑀸𑀬 𑀘 𑀯𑀺𑀳𑀺𑀁𑀲𑀸𑀬 𑀘. 𑀅𑀣 𑀯𑀸 ‘‘𑀢𑀲𑁆𑀲 𑀯𑀟𑁆𑀠𑀦𑁆𑀢𑀻’’𑀢𑀺 𑀧𑀤𑁂𑀦𑀸𑀧𑀺 𑀲𑀤𑁆𑀥𑀺𑀁 𑀬𑁄𑀚𑁂𑀢𑀩𑁆𑀩𑀁, 𑀅𑀪𑀺𑀚𑁆𑀛𑀸 𑀘 𑀯𑀺𑀳𑁂𑀲𑀸 𑀘𑀸𑀢𑀺 𑀇𑀫𑁂𑀧𑀺 𑀤𑁆𑀯𑁂 𑀥𑀫𑁆𑀫𑀸 𑀢𑀲𑁆𑀲 𑀯𑀟𑁆𑀠𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀘𑀺𑀢𑁆𑀢𑀫𑀲𑁆𑀲𑀽𑀧𑀳𑀜𑁆𑀜𑀢𑀻𑀢𑀺 𑀅𑀪𑀺𑀚𑁆𑀛𑀸𑀯𑀺𑀳𑁂𑀲𑀸𑀳𑀺 𑀅𑀲𑁆𑀲 𑀘𑀺𑀢𑁆𑀢𑀁 𑀉𑀧𑀳𑀜𑁆𑀜𑀢𑀺. 𑀆𑀘𑀺𑀦𑀢𑁄𑀢𑀺 𑀆𑀘𑀺𑀦𑀦𑁆𑀢𑀲𑁆𑀲. 𑀆𑀭𑀸 𑀦𑀺𑀩𑁆𑀩𑀸𑀦 𑀯𑀼𑀘𑁆𑀘𑀢𑀻𑀢𑀺 𑀏𑀯𑀭𑀽𑀧𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀤𑀽𑀭𑁂 𑀧𑀯𑀼𑀘𑁆𑀘𑀢𑀺. 𑀖𑀢𑁆𑀯𑀸𑀢𑀺 𑀖𑀸𑀬𑀺𑀢𑁆𑀯𑀸. 𑀪𑁄𑀢𑁆𑀯𑀸𑀢𑀺 𑀪𑀼𑀢𑁆𑀯𑀸 𑀲𑀸𑀬𑀺𑀢𑁆𑀯𑀸 𑀮𑁂𑀳𑀺𑀢𑁆𑀯𑀸. 𑀨𑀼𑀲𑁆𑀲𑀸𑀢𑀺 𑀨𑀼𑀲𑀺𑀢𑁆𑀯𑀸. 𑀧𑀝𑀺𑀲𑁆𑀲𑀢𑁄𑀢𑀺 𑀧𑀝𑀺𑀲𑁆𑀲𑀢𑀺𑀲𑀗𑁆𑀔𑀸𑀢𑀸𑀬 𑀲𑀢𑀺𑀬𑀸 𑀬𑀼𑀢𑁆𑀢𑁄. 𑀲𑁂𑀯𑀢𑁄 𑀘𑀸𑀧𑀺 𑀯𑁂𑀤𑀦𑀦𑁆𑀢𑀺 𑀘𑀢𑀼𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀁 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀯𑁂𑀤𑀦𑀁 𑀲𑁂𑀯𑀦𑁆𑀢𑀲𑁆𑀲. 𑀔𑀻𑀬𑀢𑀻𑀢𑀺 𑀔𑀬𑀁 𑀕𑀘𑁆𑀙𑀢𑀺. 𑀓𑀺𑀁 𑀢𑀁? 𑀤𑀼𑀓𑁆𑀔𑀫𑁆𑀧𑀺 𑀓𑀺𑀮𑁂𑀲𑀚𑀸𑀢𑀫𑁆𑀧𑀺. 𑀅𑀜𑁆𑀜𑀢𑀭𑁄𑀢𑀺 𑀅𑀲𑀻𑀢𑀺𑀬𑀸 𑀫𑀳𑀸𑀲𑀸𑀯𑀓𑀸𑀦𑀁 𑀅𑀩𑁆𑀪𑀦𑁆𑀢𑀭𑁄 𑀏𑀓𑁄. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀕𑀸𑀣𑀸𑀳𑀺𑀧𑀺 𑀯𑀝𑁆𑀝𑀯𑀺𑀯𑀝𑁆𑀝𑀫𑁂𑀯 𑀓𑀣𑀺𑀢𑀁.

𑁩. 𑀧𑀭𑀺𑀳𑀸𑀦𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁬. 𑀢𑀢𑀺𑀬𑁂 𑀧𑀭𑀺𑀳𑀸𑀦𑀥𑀫𑁆𑀫𑀦𑁆𑀢𑀺 𑀧𑀭𑀺𑀳𑀸𑀦𑀲𑀪𑀸𑀯𑀁. 𑀅𑀪𑀺𑀪𑀸𑀬𑀢𑀦𑀸𑀦𑀻𑀢𑀺 𑀅𑀪𑀺𑀪𑀯𑀺𑀢𑀸𑀦𑀺 𑀆𑀬𑀢𑀦𑀸𑀦𑀺. 𑀲𑀭𑀲𑀗𑁆𑀓𑀧𑁆𑀧𑀸𑀢𑀺 𑀏𑀢𑁆𑀣 𑀲𑀭𑀦𑁆𑀢𑀻𑀢𑀺 𑀲𑀭𑀸, 𑀥𑀸𑀯𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀭𑀸 𑀘 𑀢𑁂 𑀲𑀗𑁆𑀓𑀧𑁆𑀧𑀸 𑀘 𑀲𑀭𑀲𑀗𑁆𑀓𑀧𑁆𑀧𑀸. 𑀲𑀁𑀬𑁄𑀚𑀦𑀺𑀬𑀸𑀢𑀺 𑀩𑀦𑁆𑀥𑀦𑀺𑀬𑀸 𑀩𑀦𑁆𑀥𑀦𑀲𑁆𑀲 𑀧𑀘𑁆𑀘𑀬𑀪𑀽𑀢𑀸. 𑀢𑀜𑁆𑀘𑁂 𑀪𑀺𑀓𑁆𑀔𑀽𑀢𑀺 𑀢𑀁 𑀏𑀯𑀁 𑀉𑀧𑁆𑀧𑀦𑁆𑀦𑀁 𑀓𑀺𑀮𑁂𑀲𑀚𑀸𑀢𑀁, 𑀢𑀁 𑀯𑀸 𑀆𑀭𑀫𑁆𑀫𑀡𑀁. 𑀅𑀥𑀺𑀯𑀸𑀲𑁂𑀢𑀻𑀢𑀺 𑀘𑀺𑀢𑁆𑀢𑁂 𑀆𑀭𑁄𑀧𑁂𑀢𑁆𑀯𑀸 𑀯𑀸𑀲𑁂𑀢𑀺. 𑀦𑀧𑁆𑀧𑀚𑀳𑀢𑀻𑀢𑀺 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀦 𑀧𑀚𑀳𑀢𑀺. 𑀏𑀯𑀁 𑀲𑀩𑁆𑀩𑀧𑀤𑁂𑀳𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀪𑀺𑀪𑀸𑀬𑀢𑀦𑀜𑁆𑀳𑁂𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺 𑀏𑀢𑀁 𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀅𑀪𑀺𑀪𑀯𑀺𑀢𑀁 𑀆𑀬𑀢𑀦𑀦𑁆𑀢𑀺 𑀓𑀣𑀺𑀢𑀁. 𑀇𑀥 𑀥𑀫𑁆𑀫𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀪𑀚𑀦𑁆𑀢𑁂𑀦 𑀧𑀼𑀕𑁆𑀕𑀮𑁂𑀦 𑀥𑀫𑁆𑀫𑁄 𑀤𑀲𑁆𑀲𑀺𑀢𑁄.

𑁪. 𑀧𑀫𑀸𑀤𑀯𑀺𑀳𑀸𑀭𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁭. 𑀘𑀢𑀼𑀢𑁆𑀣𑁂 𑀅𑀲𑀁𑀯𑀼𑀢𑀲𑁆𑀲𑀸𑀢𑀺 𑀅𑀧𑀺𑀳𑀺𑀢𑀲𑁆𑀲 𑀦 𑀧𑀺𑀤𑀳𑀺𑀢𑁆𑀯𑀸 𑀲𑀜𑁆𑀙𑀸𑀤𑀺𑀢𑁆𑀯𑀸 𑀞𑀧𑀺𑀢𑀲𑁆𑀲. 𑀩𑁆𑀬𑀸𑀲𑀺𑀜𑁆𑀘𑀢𑀻𑀢𑀺 𑀯𑀺𑀆𑀲𑀺𑀜𑁆𑀘𑀢𑀺, 𑀓𑀺𑀮𑁂𑀲𑀢𑀺𑀦𑁆𑀢𑀁 𑀳𑀼𑀢𑁆𑀯𑀸 𑀯𑀢𑁆𑀢𑀢𑀺. 𑀧𑀸𑀫𑁄𑀚𑁆𑀚𑀦𑁆𑀢𑀺 𑀤𑀼𑀩𑁆𑀩𑀮𑀧𑀻𑀢𑀺. 𑀧𑀻𑀢𑀻𑀢𑀺 𑀩𑀮𑀯𑀧𑀻𑀢𑀺. 𑀧𑀲𑁆𑀲𑀤𑁆𑀥𑀻𑀢𑀺 𑀤𑀭𑀣𑀧𑀲𑁆𑀲𑀤𑁆𑀥𑀺. 𑀥𑀫𑁆𑀫𑀸 𑀦 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀼𑀕𑁆𑀕𑀮𑀁 𑀧𑀼𑀘𑁆𑀙𑀺𑀢𑁆𑀯𑀸 𑀯𑀺𑀪𑀚𑀦𑁆𑀢𑁂𑀦 𑀥𑀫𑁆𑀫𑁂𑀦 𑀧𑀼𑀕𑁆𑀕𑀮𑁄 𑀤𑀲𑁆𑀲𑀺𑀢𑁄.

𑁫. 𑀲𑀁𑀯𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁮. 𑀧𑀜𑁆𑀘𑀫𑁂 𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀲𑀁𑀯𑀭𑁄𑀢𑀺 𑀇𑀤𑀁 𑀫𑀕𑁆𑀕𑀓𑀼𑀲𑀮𑀲𑁆𑀲 𑀯𑀸𑀫𑀁 𑀫𑀼𑀜𑁆𑀘𑀺𑀢𑁆𑀯𑀸 𑀤𑀓𑁆𑀔𑀺𑀡𑀁 𑀕𑀡𑁆𑀳𑁂𑀬𑁆𑀬𑀸𑀲𑀻𑀢𑀺 𑀧𑀞𑀫𑀁 𑀧𑀳𑀸𑀢𑀩𑁆𑀩𑀫𑀕𑁆𑀕𑀓𑁆𑀔𑀸𑀦𑀁 𑀯𑀺𑀬 𑀉𑀤𑁆𑀤𑁂𑀲𑀓𑁆𑀓𑀫𑁂𑀦 𑀅𑀯𑀢𑁆𑀯𑀸 𑀤𑁂𑀲𑀦𑀸𑀓𑀼𑀲𑀮𑀢𑀸𑀬 𑀧𑀞𑀫𑀁 𑀧𑀳𑀸𑀢𑀩𑁆𑀩𑀥𑀫𑁆𑀫𑀓𑁆𑀔𑀸𑀦𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀥 𑀥𑀫𑁆𑀫𑀁 𑀧𑀼𑀘𑁆𑀙𑀺𑀢𑁆𑀯𑀸 𑀥𑀫𑁆𑀫𑁄𑀯 𑀯𑀺𑀪𑀢𑁆𑀢𑁄.

𑁬. 𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁯. 𑀙𑀝𑁆𑀞𑁂 𑀲𑀫𑀸𑀥𑀺𑀦𑁆𑀢𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀁. 𑀇𑀤𑀜𑁆𑀳𑀺 𑀲𑀼𑀢𑁆𑀢𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀧𑀭𑀺𑀳𑀸𑀬𑀫𑀸𑀦𑁂 𑀤𑀺𑀲𑁆𑀯𑀸, ‘‘𑀇𑀫𑁂𑀲𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀁 𑀮𑀪𑀦𑁆𑀢𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀁 𑀨𑀸𑀢𑀺𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀓𑀣𑀺𑀢𑀁.

𑁭. 𑀧𑀝𑀺𑀲𑀮𑁆𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁦. 𑀲𑀢𑁆𑀢𑀫𑁂 𑀧𑀝𑀺𑀲𑀮𑁆𑀮𑀸𑀦𑀦𑁆𑀢𑀺 𑀓𑀸𑀬𑀯𑀺𑀯𑁂𑀓𑀁. 𑀇𑀤𑀜𑁆𑀳𑀺 𑀲𑀼𑀢𑁆𑀢𑀁 𑀓𑀸𑀬𑀯𑀺𑀯𑁂𑀓𑁂𑀦 𑀧𑀭𑀺𑀳𑀸𑀬𑀫𑀸𑀦𑁂 𑀤𑀺𑀲𑁆𑀯𑀸, ‘‘𑀇𑀫𑁂𑀲𑀁 𑀓𑀸𑀬𑀯𑀺𑀯𑁂𑀓𑀁 𑀮𑀪𑀦𑁆𑀢𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀁 𑀨𑀸𑀢𑀺𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀓𑀣𑀺𑀢𑀁.

𑁮-𑁯. 𑀧𑀞𑀫𑀦𑀢𑀼𑀫𑁆𑀳𑀸𑀓𑀁𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁧-𑁧𑁦𑁨. 𑀅𑀝𑁆𑀞𑀫𑀁 𑀉𑀧𑀫𑀸𑀬 𑀧𑀭𑀺𑀯𑀸𑀭𑁂𑀢𑁆𑀯𑀸 𑀓𑀣𑀺𑀢𑁂 𑀩𑀼𑀚𑁆𑀛𑀦𑀓𑀸𑀦𑀁, 𑀦𑀯𑀫𑀁 𑀲𑀼𑀤𑁆𑀥𑀺𑀓𑀯𑀲𑁂𑀦𑁂𑀯 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀢𑁆𑀣𑁄 𑀧𑀦 𑀉𑀪𑀬𑀢𑁆𑀣𑀸𑀧𑀺 𑀔𑀦𑁆𑀥𑀺𑀬𑀯𑀕𑁆𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁧𑁦. 𑀉𑀤𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩. 𑀤𑀲𑀫𑁂 𑀉𑀤𑀓𑁄 𑀲𑀼𑀤𑀦𑁆𑀢𑀺 𑀏𑀢𑁆𑀣 𑀲𑀼𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀉𑀤𑀓𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀇𑀤𑀁 𑀚𑀸𑀢𑀼 𑀯𑁂𑀤𑀕𑀽𑀢𑀺 𑀏𑀢𑁆𑀣 𑀇𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀅𑀣 𑀯𑀸 𑀇𑀤𑀁 𑀫𑀫 𑀯𑀘𑀦𑀁 𑀲𑀼𑀡𑀸𑀣𑀸𑀢𑀺 𑀤𑀻𑀧𑁂𑀦𑁆𑀢𑁄 𑀏𑀯𑀫𑀸𑀳. 𑀚𑀸𑀢𑀼 𑀯𑁂𑀤𑀕𑀽𑀢𑀺 𑀅𑀳𑀁 𑀏𑀓𑀁𑀲𑁂𑀦𑁂𑀯 𑀯𑁂𑀤𑀕𑀽, 𑀯𑁂𑀤𑀲𑀗𑁆𑀔𑀸𑀢𑁂𑀦 𑀜𑀸𑀡𑁂𑀦 𑀦𑁂𑀬𑁆𑀬𑁂𑀲𑀼 𑀕𑀢𑁄, 𑀯𑁂𑀤𑀁 𑀯𑀸 𑀕𑀢𑁄 𑀅𑀥𑀺𑀕𑀢𑁄, 𑀧𑀡𑁆𑀟𑀺𑀢𑁄𑀳𑀫𑀲𑁆𑀫𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑀚𑀻𑀢𑀺 𑀏𑀓𑀁𑀲𑁂𑀦 𑀲𑀩𑁆𑀩𑀯𑀝𑁆𑀝𑀁 𑀚𑀺𑀦𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑁄𑀲𑁆𑀫𑀻𑀢𑀺 𑀯𑀤𑀢𑀺. 𑀅𑀧𑀮𑀺𑀔𑀢𑀁 𑀕𑀡𑁆𑀟𑀫𑀽𑀮𑀦𑁆𑀢𑀺 𑀅𑀧𑀮𑀺𑀔𑀢𑀁 𑀤𑀼𑀓𑁆𑀔𑀫𑀽𑀮𑀁. 𑀧𑀮𑀺𑀔𑀡𑀺𑀦𑁆𑀢𑀺 𑀧𑀮𑀺𑀔𑀢𑀁 𑀫𑀬𑀸, 𑀔𑀦𑀺𑀢𑁆𑀯𑀸 𑀞𑀺𑀢𑁄𑀲𑁆𑀫𑀻𑀢𑀺 𑀤𑀻𑀧𑁂𑀢𑀺.

𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑀲𑁆𑀲𑀸𑀢𑀺 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀦𑀺𑀩𑁆𑀩𑀢𑁆𑀢𑁂𑀦 𑀫𑀸𑀢𑀸𑀧𑁂𑀢𑁆𑀢𑀺𑀓𑁂𑀦 𑀲𑀼𑀓𑁆𑀓𑀲𑁄𑀡𑀺𑀢𑁂𑀦 𑀲𑀫𑁆𑀪𑀽𑀢𑀲𑁆𑀲. 𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑀲𑁆𑀲𑀸𑀢𑀺 𑀑𑀤𑀦𑁂𑀦 𑀘𑁂𑀯 𑀓𑀼𑀫𑁆𑀫𑀸𑀲𑁂𑀦 𑀘 𑀉𑀧𑀘𑀺𑀢𑀲𑁆𑀲 𑀯𑀟𑁆𑀠𑀺𑀢𑀲𑁆𑀲. 𑀅𑀦𑀺𑀘𑁆𑀘𑀼𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑀲𑁆𑀲𑀸𑀢𑀺 𑀏𑀢𑁆𑀣 𑀅𑀬𑀁 𑀓𑀸𑀬𑁄 𑀳𑀼𑀢𑁆𑀯𑀸 𑀅𑀪𑀸𑀯𑀝𑁆𑀞𑁂𑀦 𑀅𑀦𑀺𑀘𑁆𑀘𑀥𑀫𑁆𑀫𑁄, 𑀤𑀼𑀕𑁆𑀕𑀦𑁆𑀥𑀯𑀺𑀖𑀸𑀢𑀢𑁆𑀣𑀸𑀬 𑀢𑀦𑀼𑀯𑀺𑀮𑁂𑀧𑀦𑁂𑀦 𑀉𑀘𑁆𑀙𑀸𑀤𑀦𑀥𑀫𑁆𑀫𑁄, 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀩𑀸𑀥𑀯𑀺𑀦𑁄𑀤𑀦𑀢𑁆𑀣𑀸𑀬 𑀔𑀼𑀤𑁆𑀤𑀓𑀲𑀫𑁆𑀩𑀸𑀳𑀦𑁂𑀦 𑀧𑀭𑀺𑀫𑀤𑁆𑀤𑀦𑀥𑀫𑁆𑀫𑁄, 𑀤𑀳𑀭𑀓𑀸𑀮𑁂 𑀯𑀸 𑀊𑀭𑀽𑀲𑀼 𑀲𑀬𑀸𑀧𑁂𑀢𑁆𑀯𑀸 𑀕𑀩𑁆𑀪𑀯𑀸𑀲𑁂𑀦 𑀤𑀼𑀲𑁆𑀲𑀡𑁆𑀞𑀺𑀢𑀸𑀦𑀁 𑀢𑁂𑀲𑀁 𑀢𑁂𑀲𑀁 𑀅𑀗𑁆𑀕𑀸𑀦𑀁 𑀲𑀡𑁆𑀞𑀸𑀦𑀲𑀫𑁆𑀧𑀸𑀤𑀦𑀢𑁆𑀣𑀁 𑀅𑀜𑁆𑀙𑀦𑀧𑀻𑀴𑀦𑀸𑀤𑀻𑀦𑀁 𑀯𑀲𑁂𑀦 𑀧𑀭𑀺𑀫𑀤𑁆𑀤𑀦𑀥𑀫𑁆𑀫𑁄, 𑀏𑀯𑀁 𑀧𑀭𑀺𑀳𑀭𑀺𑀢𑁄𑀧𑀺 𑀘 𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑁄 𑀪𑀺𑀚𑁆𑀚𑀢𑀺 𑀘𑁂𑀯 𑀯𑀺𑀓𑀺𑀭𑀢𑀺 𑀘, 𑀏𑀯𑀁 𑀲𑀪𑀸𑀯𑁄𑀢𑀺 𑀅𑀢𑁆𑀣𑁄.

𑀢𑀢𑁆𑀣 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑀧𑀭𑀺𑀫𑀤𑁆𑀤𑀦𑀧𑀤𑁂𑀳𑀺 𑀯𑀟𑁆𑀠𑀺 𑀓𑀣𑀺𑀢𑀸, 𑀅𑀦𑀺𑀘𑁆𑀘𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀧𑀤𑁂𑀳𑀺 𑀧𑀭𑀺𑀳𑀸𑀦𑀺. 𑀧𑀼𑀭𑀺𑀫𑁂𑀳𑀺 𑀯𑀸 𑀢𑀻𑀳𑀺 𑀲𑀫𑀼𑀤𑀬𑁄, 𑀧𑀘𑁆𑀙𑀺𑀫𑁂𑀳𑀺 𑀅𑀢𑁆𑀣𑀗𑁆𑀕𑀫𑁄𑀢𑀺. 𑀏𑀯𑀁 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀲 𑀓𑀸𑀬𑀲𑁆𑀲 𑀯𑀟𑁆𑀠𑀺𑀧𑀭𑀺𑀳𑀸𑀦𑀺𑀦𑀺𑀩𑁆𑀩𑀢𑁆𑀢𑀺𑀪𑁂𑀤𑀸 𑀤𑀲𑁆𑀲𑀺𑀢𑀸. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀴𑀯𑀕𑁆𑀕𑁄 𑀤𑀲𑀫𑁄.

𑀤𑀼𑀢𑀺𑀬𑁄 𑀧𑀡𑁆𑀡𑀸𑀲𑀓𑁄.

𑁧𑁧. 𑀬𑁄𑀕𑀓𑁆𑀔𑁂𑀫𑀺𑀯𑀕𑁆𑀕𑁄

𑁧. 𑀬𑁄𑀕𑀓𑁆𑀔𑁂𑀫𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁪. 𑀬𑁄𑀕𑀓𑁆𑀔𑁂𑀫𑀺𑀯𑀕𑁆𑀕𑀲𑁆𑀲 𑀧𑀞𑀫𑁂 𑀬𑁄𑀕𑀓𑁆𑀔𑁂𑀫𑀺𑀧𑀭𑀺𑀬𑀸𑀬𑀦𑁆𑀢𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀔𑁂𑀫𑀺𑀦𑁄 𑀓𑀸𑀭𑀡𑀪𑀽𑀢𑀁. 𑀥𑀫𑁆𑀫𑀧𑀭𑀺𑀬𑀸𑀬𑀦𑁆𑀢𑀺 𑀥𑀫𑁆𑀫𑀓𑀸𑀭𑀡𑀁. 𑀅𑀓𑁆𑀔𑀸𑀲𑀺 𑀬𑁄𑀕𑀦𑁆𑀢𑀺 𑀬𑀼𑀢𑁆𑀢𑀺𑀁 𑀓𑀣𑁂𑀲𑀺. 𑀢𑀲𑁆𑀫𑀸𑀢𑀺 𑀓𑀲𑁆𑀫𑀸? 𑀓𑀺𑀁 𑀅𑀓𑁆𑀔𑀸𑀢𑀢𑁆𑀢𑀸, 𑀉𑀤𑀸𑀳𑀼 𑀧𑀳𑀻𑀦𑀢𑁆𑀢𑀸𑀢𑀺? 𑀧𑀳𑀻𑀦𑀢𑁆𑀢𑀸. 𑀦 𑀳𑀺 𑀅𑀓𑁆𑀔𑀸𑀦𑁂𑀦 𑀬𑁄𑀕𑀓𑁆𑀔𑁂𑀫𑀺 𑀦𑀸𑀫 𑀳𑁄𑀢𑀺.

𑁨-𑁧𑁦. 𑀉𑀧𑀸𑀤𑀸𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁫-𑁧𑁧𑁩. 𑀤𑀼𑀢𑀺𑀬𑁂 𑀯𑁂𑀤𑀦𑀸𑀲𑀼𑀔𑀤𑀼𑀓𑁆𑀔𑀁 𑀓𑀣𑀺𑀢𑀁, 𑀢𑀁 𑀧𑀦 𑀯𑀺𑀧𑀸𑀓𑀲𑀼𑀔𑀤𑀼𑀓𑁆𑀔𑀁 𑀯𑀝𑁆𑀝𑀢𑀺. 𑀢𑀢𑀺𑀬𑁂 𑀤𑀼𑀓𑁆𑀔𑀲𑁆𑀲𑀸𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲. 𑀘𑀢𑀼𑀢𑁆𑀣𑁂 𑀮𑁄𑀓𑀲𑁆𑀲𑀸𑀢𑀺 𑀲𑀗𑁆𑀔𑀸𑀭𑀮𑁄𑀓𑀲𑁆𑀲. 𑀧𑀜𑁆𑀘𑀫𑀸𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀔𑀦𑁆𑀥𑀺𑀬𑀯𑀕𑁆𑀕𑁂 𑀯𑀼𑀢𑁆𑀢𑀦𑀬𑀫𑁂𑀯.

𑀬𑁄𑀕𑀓𑁆𑀔𑁂𑀫𑀺𑀯𑀕𑁆𑀕𑁄 𑀏𑀓𑀸𑀤𑀲𑀫𑁄.

𑁧𑁨. 𑀮𑁄𑀓𑀓𑀸𑀫𑀕𑀼𑀡𑀯𑀕𑁆𑀕𑁄

𑁧-𑁨. 𑀧𑀞𑀫𑀫𑀸𑀭𑀧𑀸𑀲𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁪-𑁧𑁧𑁫. 𑀮𑁄𑀓𑀓𑀸𑀫𑀕𑀼𑀡𑀯𑀕𑁆𑀕𑀲𑁆𑀲 𑀧𑀞𑀫𑁂 𑀆𑀯𑀸𑀲𑀕𑀢𑁄𑀢𑀺 𑀯𑀲𑀦𑀝𑁆𑀞𑀸𑀦𑀁 𑀕𑀢𑁄. 𑀫𑀸𑀭𑀲𑁆𑀲 𑀯𑀲𑀁 𑀕𑀢𑁄𑀢𑀺 𑀢𑀺𑀯𑀺𑀥𑀲𑁆𑀲𑀸𑀧𑀺 𑀫𑀸𑀭𑀲𑁆𑀲 𑀯𑀲𑀁 𑀕𑀢𑁄. 𑀧𑀝𑀺𑀫𑀼𑀓𑁆𑀓’𑀲𑁆𑀲 𑀫𑀸𑀭𑀧𑀸𑀲𑁄𑀢𑀺 𑀅𑀲𑁆𑀲 𑀕𑀻𑀯𑀸𑀬 𑀫𑀸𑀭𑀧𑀸𑀲𑁄 𑀧𑀝𑀺𑀫𑀼𑀓𑁆𑀓𑁄 𑀧𑀯𑁂𑀲𑀺𑀢𑁄. 𑀤𑀼𑀢𑀺𑀬𑀁 𑀉𑀢𑁆𑀢𑀸𑀦𑀫𑁂𑀯.

𑁩. 𑀮𑁄𑀓𑀦𑁆𑀢𑀕𑀫𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁬. 𑀢𑀢𑀺𑀬𑁂 𑀮𑁄𑀓𑀲𑁆𑀲𑀸𑀢𑀺 𑀘𑀓𑁆𑀓𑀯𑀸𑀴𑀮𑁄𑀓𑀲𑁆𑀲. 𑀮𑁄𑀓𑀲𑁆𑀲 𑀅𑀦𑁆𑀢𑀦𑁆𑀢𑀺 𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀅𑀦𑁆𑀢𑀁. 𑀯𑀺𑀳𑀸𑀭𑀁 𑀧𑀸𑀯𑀺𑀲𑀻𑀢𑀺 ‘‘𑀫𑀬𑀺 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁂 𑀇𑀫𑁂 𑀪𑀺𑀓𑁆𑀔𑀽, 𑀇𑀫𑀁 𑀉𑀤𑁆𑀤𑁂𑀲𑀁 𑀆𑀦𑀦𑁆𑀤𑀁 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀺, 𑀲𑁄 𑀘 𑀢𑁂𑀲𑀁 𑀫𑀫 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸 𑀓𑀣𑁂𑀲𑁆𑀲𑀢𑀺. 𑀢𑀢𑁄 𑀦𑀁 𑀣𑁄𑀫𑁂𑀲𑁆𑀲𑀸𑀫𑀺, 𑀫𑀫 𑀣𑁄𑀫𑀦𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀆𑀦𑀦𑁆𑀤𑀁 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀁, 𑀯𑀘𑀦𑀜𑁆𑀘𑀲𑁆𑀲 𑀲𑁄𑀢𑀩𑁆𑀩𑀁 𑀲𑀤𑁆𑀥𑀸𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺, 𑀢𑀁 𑀦𑁂𑀲𑀁 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑀁 𑀅𑀯𑀺𑀪𑀚𑀺𑀢𑁆𑀯𑀸𑀯 𑀦𑀺𑀲𑀺𑀦𑁆𑀦𑀸𑀲𑀦𑁂 𑀅𑀦𑁆𑀢𑀭𑀳𑀺𑀢𑁄 𑀕𑀦𑁆𑀥𑀓𑀼𑀝𑀺𑀬𑀁 𑀧𑀸𑀢𑀼𑀭𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀻’’𑀢𑀺.

𑀲𑀢𑁆𑀣𑀼 𑀘𑁂𑀯 𑀲𑀁𑀯𑀡𑁆𑀡𑀺𑀢𑁄𑀢𑀺 𑀲𑀢𑁆𑀣𑀸𑀭𑀸 𑀘 𑀧𑀲𑀢𑁆𑀣𑁄. 𑀯𑀺𑀜𑁆𑀜𑀽𑀦𑀦𑁆𑀢𑀺 𑀇𑀤𑀫𑁆𑀧𑀺 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀧𑀡𑁆𑀟𑀺𑀢𑁂𑀳𑀺 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 𑀘 𑀲𑀫𑁆𑀪𑀸𑀯𑀺𑀢𑁄𑀢𑀺 𑀅𑀢𑁆𑀣𑁄. 𑀧𑀳𑁄𑀢𑀻𑀢𑀺 𑀲𑀓𑁆𑀓𑁄𑀢𑀺. 𑀅𑀢𑀺𑀓𑁆𑀓𑀫𑁆𑀫𑁂𑀯 𑀫𑀽𑀮𑀁 𑀅𑀢𑀺𑀓𑁆𑀓𑀫𑁆𑀫𑁂𑀯 𑀔𑀦𑁆𑀥𑀦𑁆𑀢𑀺 𑀲𑀸𑀭𑁄 𑀦𑀸𑀫 𑀫𑀽𑀮𑁂 𑀯𑀸 𑀔𑀦𑁆𑀥𑁂 𑀯𑀸 𑀪𑀯𑁂𑀬𑁆𑀬, 𑀢𑀫𑁆𑀧𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀁𑀲𑀫𑁆𑀧𑀤𑀫𑀺𑀤𑀦𑁆𑀢𑀺 𑀏𑀯𑀁𑀲𑀫𑁆𑀧𑀢𑁆𑀢𑀺𑀓𑀁, 𑀈𑀤𑀺𑀲𑀦𑁆𑀢𑀺 𑀅𑀢𑁆𑀣𑁄. 𑀅𑀢𑀺𑀲𑀺𑀢𑁆𑀯𑀸𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸. 𑀚𑀸𑀦𑀁 𑀚𑀸𑀦𑀸𑀢𑀻𑀢𑀺 𑀚𑀸𑀦𑀺𑀢𑀩𑁆𑀩𑀫𑁂𑀯 𑀚𑀸𑀦𑀸𑀢𑀺. 𑀧𑀲𑁆𑀲𑀁 𑀧𑀲𑁆𑀲𑀢𑀻𑀢𑀺 𑀧𑀲𑁆𑀲𑀺𑀢𑀩𑁆𑀩𑀫𑁂𑀯 𑀧𑀲𑁆𑀲𑀢𑀺. 𑀬𑀣𑀸 𑀯𑀸 𑀏𑀓𑀘𑁆𑀘𑁄 𑀯𑀺𑀧𑀭𑀻𑀢𑀁 𑀕𑀡𑁆𑀳𑀦𑁆𑀢𑁄 𑀚𑀸𑀦𑀦𑁆𑀢𑁄𑀧𑀺 𑀦 𑀚𑀸𑀦𑀸𑀢𑀺, 𑀧𑀲𑁆𑀲𑀦𑁆𑀢𑁄𑀧𑀺 𑀦 𑀧𑀲𑁆𑀲𑀢𑀺, 𑀦 𑀏𑀯𑀁 𑀪𑀕𑀯𑀸. 𑀪𑀕𑀯𑀸 𑀧𑀦 𑀚𑀸𑀦𑀦𑁆𑀢𑁄 𑀚𑀸𑀦𑀸𑀢𑀺, 𑀧𑀲𑁆𑀲𑀦𑁆𑀢𑁄 𑀧𑀲𑁆𑀲𑀢𑀺𑀬𑁂𑀯. 𑀲𑁆𑀯𑀸𑀬𑀁 𑀤𑀲𑁆𑀲𑀦𑀧𑀭𑀺𑀡𑀸𑀬𑀓𑀝𑁆𑀞𑁂𑀦 𑀘𑀓𑁆𑀔𑀼𑀪𑀽𑀢𑁄. 𑀯𑀺𑀤𑀺𑀢𑀓𑀭𑀡𑀝𑁆𑀞𑁂𑀦 𑀜𑀸𑀡𑀪𑀽𑀢𑁄. 𑀅𑀯𑀺𑀧𑀭𑀻𑀢𑀲𑀪𑀸𑀯𑀝𑁆𑀞𑁂𑀦 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀧𑀯𑀢𑁆𑀢𑀦𑀢𑁄 𑀯𑀸 𑀳𑀤𑀬𑁂𑀦 𑀘𑀺𑀦𑁆𑀢𑁂𑀢𑁆𑀯𑀸 𑀯𑀸𑀘𑀸𑀬 𑀦𑀺𑀘𑁆𑀙𑀸𑀭𑀺𑀢𑀥𑀫𑁆𑀫𑀫𑀬𑁄𑀢𑀺 𑀥𑀫𑁆𑀫𑀪𑀽𑀢𑁄. 𑀲𑁂𑀝𑁆𑀞𑀝𑁆𑀞𑁂𑀦 𑀩𑁆𑀭𑀳𑁆𑀫𑀪𑀽𑀢𑁄. 𑀅𑀣 𑀯𑀸 𑀘𑀓𑁆𑀔𑀼 𑀯𑀺𑀬 𑀪𑀽𑀢𑁄𑀢𑀺 𑀘𑀓𑁆𑀔𑀼𑀪𑀽𑀢𑁄. 𑀏𑀯𑀫𑁂𑀢𑁂𑀲𑀼 𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁆𑀯𑀸𑀬𑀁 𑀥𑀫𑁆𑀫𑀲𑁆𑀲 𑀯𑀢𑁆𑀢𑀦𑀢𑁄 𑀯𑀢𑁆𑀢𑀸. 𑀧𑀯𑀢𑁆𑀢𑀦𑀢𑁄 𑀧𑀯𑀢𑁆𑀢𑀸. 𑀅𑀢𑁆𑀣𑀁 𑀦𑀻𑀳𑀭𑀺𑀢𑁆𑀯𑀸 𑀦𑀻𑀳𑀭𑀺𑀢𑁆𑀯𑀸 𑀤𑀲𑁆𑀲𑀦𑀲𑀫𑀢𑁆𑀣𑀢𑀸𑀬 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸. 𑀅𑀫𑀢𑀸𑀥𑀺𑀕𑀫𑀸𑀬 𑀧𑀝𑀺𑀧𑀢𑁆𑀢𑀺𑀁 𑀤𑁂𑀲𑁂𑀢𑀻𑀢𑀺 𑀅𑀫𑀢𑀲𑁆𑀲 𑀤𑀸𑀢𑀸.

𑀅𑀕𑀭𑀼𑀁 𑀓𑀭𑀺𑀢𑁆𑀯𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀸𑀧𑁂𑀦𑁆𑀢𑁄𑀧𑀺 𑀳𑀺 𑀕𑀭𑀼𑀁 𑀓𑀭𑁄𑀢𑀺 𑀦𑀸𑀫. 𑀅𑀢𑁆𑀢𑀦𑁄 𑀲𑁂𑀓𑁆𑀔𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑁂 𑀞𑀢𑁆𑀯𑀸 𑀲𑀺𑀦𑁂𑀭𑀼𑀧𑀸𑀤𑀢𑁄 𑀯𑀸𑀮𑀺𑀓𑀁 𑀉𑀤𑁆𑀥𑀭𑀫𑀸𑀦𑁄 𑀯𑀺𑀬 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀁 𑀓𑀢𑁆𑀯𑀸 𑀓𑀣𑁂𑀦𑁆𑀢𑁄𑀧𑀺 𑀕𑀭𑀼𑀁 𑀓𑀭𑁄𑀢𑀺𑀬𑁂𑀯 𑀦𑀸𑀫. 𑀏𑀯𑀁 𑀅𑀓𑀢𑁆𑀯𑀸 𑀅𑀫𑁆𑀳𑁂 𑀧𑀼𑀦𑀧𑁆𑀧𑀼𑀦𑀁 𑀅𑀬𑀸𑀘𑀸𑀧𑁂𑀢𑁆𑀯𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁆𑀧𑀺 𑀦𑁄 𑀓𑀢𑁆𑀯𑀸 𑀓𑀣𑁂𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀬𑀁 𑀔𑁄 𑀯𑁄𑀢𑀺 𑀬𑀁 𑀔𑁄 𑀢𑀼𑀫𑁆𑀳𑀸𑀓𑀁. 𑀘𑀓𑁆𑀔𑀼𑀦𑀸 𑀔𑁄, 𑀆𑀯𑀼𑀲𑁄, 𑀮𑁄𑀓𑀲𑁆𑀫𑀺𑀁 𑀮𑁄𑀓𑀲𑀜𑁆𑀜𑀻 𑀳𑁄𑀢𑀺 𑀮𑁄𑀓𑀫𑀸𑀦𑀻𑀢𑀺 𑀘𑀓𑁆𑀔𑀼𑀜𑁆𑀳𑀺 𑀮𑁄𑀓𑁂 𑀅𑀧𑁆𑀧𑀳𑀻𑀦𑀤𑀺𑀝𑁆𑀞𑀺 𑀧𑀼𑀣𑀼𑀚𑁆𑀚𑀦𑁄 𑀲𑀢𑁆𑀢𑀮𑁄𑀓𑀯𑀲𑁂𑀦 𑀮𑁄𑀓𑁄𑀢𑀺 𑀲𑀜𑁆𑀚𑀸𑀦𑀸𑀢𑀺 𑀘𑁂𑀯 𑀫𑀜𑁆𑀜𑀢𑀺 𑀘, 𑀢𑀣𑀸 𑀘𑀓𑁆𑀓𑀯𑀸𑀴𑀮𑁄𑀓𑀯𑀲𑁂𑀦. 𑀦 𑀳𑀺 𑀅𑀜𑁆𑀜𑀢𑁆𑀭 𑀘𑀓𑁆𑀔𑀸𑀤𑀻𑀳𑀺 𑀤𑁆𑀯𑀸𑀤𑀲𑀸𑀬𑀢𑀦𑁂𑀳𑀺 𑀢𑀲𑁆𑀲 𑀲𑀸 𑀲𑀜𑁆𑀜𑀸 𑀯𑀸 𑀫𑀸𑀦𑁄 𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁, ‘‘𑀘𑀓𑁆𑀔𑀼𑀦𑀸 𑀔𑁄, 𑀆𑀯𑀼𑀲𑁄, 𑀮𑁄𑀓𑀲𑁆𑀫𑀺𑀁 𑀮𑁄𑀓𑀲𑀜𑁆𑀜𑀻 𑀳𑁄𑀢𑀺 𑀮𑁄𑀓𑀫𑀸𑀦𑀻’’𑀢𑀺. 𑀇𑀫𑀲𑁆𑀲 𑀘 𑀮𑁄𑀓𑀲𑁆𑀲 𑀕𑀫𑀦𑁂𑀦 𑀅𑀦𑁆𑀢𑁄 𑀦𑀸𑀫 𑀜𑀸𑀢𑀼𑀁 𑀯𑀸 𑀤𑀝𑁆𑀞𑀼𑀁 𑀯𑀸 𑀧𑀢𑁆𑀢𑀼𑀁 𑀯𑀸 𑀦 𑀲𑀓𑁆𑀓𑀸. 𑀮𑀼𑀚𑁆𑀚𑀦𑀝𑁆𑀞𑁂𑀦 𑀧𑀦 𑀢𑀲𑁆𑀲𑁂𑀯 𑀘𑀓𑁆𑀔𑀸𑀤𑀺𑀪𑁂𑀤𑀲𑁆𑀲 𑀮𑁄𑀓𑀲𑁆𑀲 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀅𑀦𑁆𑀢𑀁 𑀅𑀧𑁆𑀧𑀢𑁆𑀯𑀸 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀇𑀤𑀸𑀦𑀺 ‘‘𑀲𑀸𑀯𑀓𑁂𑀦 𑀧𑀜𑁆𑀳𑁄 𑀓𑀣𑀺𑀢𑁄𑀢𑀺 𑀫𑀸 𑀦𑀺𑀓𑁆𑀓𑀗𑁆𑀔𑀸 𑀅𑀳𑀼𑀯𑀢𑁆𑀣, 𑀅𑀬𑀁 𑀪𑀕𑀯𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀢𑀼𑀮𑀁 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁄. 𑀇𑀘𑁆𑀙𑀫𑀸𑀦𑀸 𑀢𑀫𑁂𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀺𑀓𑁆𑀓𑀗𑁆𑀔𑀸 𑀳𑁄𑀣𑀸’’𑀢𑀺 𑀉𑀬𑁆𑀬𑁄𑀚𑁂𑀦𑁆𑀢𑁄 𑀆𑀓𑀗𑁆𑀔𑀫𑀸𑀦𑀸 𑀧𑀦𑀸𑀢𑀺𑀆𑀤𑀺𑀫𑀸𑀳.

𑀇𑀫𑁂𑀳𑀺 𑀆𑀓𑀸𑀭𑁂𑀳𑀻𑀢𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀘𑀓𑁆𑀓𑀯𑀸𑀴𑀮𑁄𑀓𑀲𑁆𑀲 𑀅𑀦𑁆𑀢𑀸𑀪𑀸𑀯𑀓𑀸𑀭𑀡𑁂𑀳𑀺 𑀘𑁂𑀯 𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀅𑀦𑁆𑀢𑀸𑀧𑀢𑁆𑀢𑀺𑀓𑀸𑀭𑀡𑁂𑀳𑀺 𑀘. 𑀇𑀫𑁂𑀳𑀺 𑀧𑀤𑁂𑀳𑀻𑀢𑀺 𑀇𑀫𑁂𑀳𑀺 𑀅𑀓𑁆𑀔𑀭𑀲𑀫𑁆𑀧𑀺𑀡𑁆𑀟𑀦𑁂𑀳𑀺. 𑀩𑁆𑀬𑀜𑁆𑀚𑀦𑁂𑀳𑀻𑀢𑀺 𑀧𑀸𑀝𑀺𑀬𑁂𑀓𑁆𑀓𑀅𑀓𑁆𑀔𑀭𑁂𑀳𑀺.

𑀧𑀡𑁆𑀟𑀺𑀢𑁄𑀢𑀺 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀧𑀡𑁆𑀟𑀺𑀢𑁄 𑀥𑀸𑀢𑀼𑀓𑀼𑀲𑀮𑁄 𑀆𑀬𑀢𑀦𑀓𑀼𑀲𑀮𑁄 𑀧𑀘𑁆𑀘𑀬𑀸𑀓𑀸𑀭𑀓𑀼𑀲𑀮𑁄 𑀓𑀸𑀭𑀡𑀸𑀓𑀸𑀭𑀡𑀓𑀼𑀲𑀮𑁄𑀢𑀺. 𑀫𑀳𑀸𑀧𑀜𑁆𑀜𑁄𑀢𑀺 𑀫𑀳𑀦𑁆𑀢𑁂 𑀅𑀢𑁆𑀣𑁂 𑀫𑀳𑀦𑁆𑀢𑁂 𑀥𑀫𑁆𑀫𑁂 𑀫𑀳𑀦𑁆𑀢𑀸 𑀦𑀺𑀭𑀼𑀢𑁆𑀢𑀺𑀬𑁄 𑀫𑀳𑀦𑁆𑀢𑀸𑀦𑀺 𑀧𑀝𑀺𑀪𑀸𑀦𑀸𑀦𑀺 𑀧𑀝𑀺𑀕𑁆𑀕𑀡𑁆𑀳𑀦𑀲𑀫𑀢𑁆𑀣𑀢𑀸𑀬 𑀫𑀳𑀸𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀬𑀣𑀸 𑀢𑀁 𑀆𑀦𑀦𑁆𑀤𑁂𑀦𑀸𑀢𑀺 𑀬𑀣𑀸 𑀆𑀦𑀦𑁆𑀤𑁂𑀦 𑀩𑁆𑀬𑀸𑀓𑀢𑀁, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀣𑀸 𑀆𑀦𑀦𑁆𑀤𑁂𑀦 𑀢𑀁 𑀩𑁆𑀬𑀸𑀓𑀢𑀁, 𑀅𑀳𑀫𑁆𑀧𑀺 𑀢𑀁 𑀏𑀯𑀫𑁂𑀯 𑀩𑁆𑀬𑀸𑀓𑀭𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄.

𑁪. 𑀓𑀸𑀫𑀕𑀼𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁭. 𑀘𑀢𑀼𑀢𑁆𑀣𑁂 𑀬𑁂 𑀫𑁂𑀢𑀺 𑀬𑁂 𑀫𑀫. 𑀘𑁂𑀢𑀲𑁄 𑀲𑀫𑁆𑀨𑀼𑀝𑁆𑀞𑀧𑀼𑀩𑁆𑀩𑀸𑀢𑀺 𑀘𑀺𑀢𑁆𑀢𑁂𑀦 𑀅𑀦𑀼𑀪𑀽𑀢𑀧𑀼𑀩𑁆𑀩𑀸. 𑀢𑀢𑁆𑀭 𑀫𑁂 𑀘𑀺𑀢𑁆𑀢𑀁 𑀩𑀳𑀼𑀮𑀁 𑀕𑀘𑁆𑀙𑀫𑀸𑀦𑀁 𑀕𑀘𑁆𑀙𑁂𑀬𑁆𑀬𑀸𑀢𑀺 𑀢𑁂𑀲𑀼 𑀧𑀸𑀲𑀸𑀤𑀢𑁆𑀢𑀬𑀢𑀺𑀯𑀺𑀥𑀦𑀸𑀝𑀓𑀸𑀤𑀺𑀪𑁂𑀤𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀅𑀦𑀼𑀪𑀽𑀢𑀧𑀼𑀩𑁆𑀩𑁂𑀲𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀩𑀳𑀽𑀲𑀼 𑀯𑀸𑀭𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀤𑀻𑀧𑁂𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀯𑀸𑀢𑀺 𑀇𑀥 𑀧𑀥𑀸𑀦𑀘𑀭𑀺𑀬𑀓𑀸𑀮𑁂 𑀙𑀩𑁆𑀩𑀲𑁆𑀲𑀸𑀦𑀺 𑀲𑀼𑀧𑀼𑀧𑁆𑀨𑀺𑀢𑀯𑀦𑀲𑀡𑁆𑀟𑀚𑀸𑀢𑀸𑀦𑀁 𑀤𑀺𑀚𑀕𑀡𑀸𑀤𑀻𑀦𑀁 𑀯𑀲𑁂𑀦 𑀤𑀺𑀝𑁆𑀞𑀲𑀼𑀢𑀸𑀤𑀺𑀪𑁂𑀤𑀁 𑀫𑀦𑁄𑀭𑀫𑀸𑀭𑀫𑁆𑀫𑀡𑀁 𑀓𑀸𑀫𑀕𑀼𑀡𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀭𑀽𑀧𑁂𑀲𑀼 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀯𑀸 𑀩𑀳𑀼𑀮𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀤𑀲𑁆𑀲𑁂𑀢𑀺. 𑀅𑀧𑁆𑀧𑀁 𑀯𑀸 𑀅𑀦𑀸𑀕𑀢𑁂𑀲𑀽𑀢𑀺 𑀅𑀦𑀸𑀕𑀢𑁂 ‘‘𑀫𑁂𑀢𑁆𑀢𑁂𑀬𑁆𑀬𑁄 𑀦𑀸𑀫 𑀩𑀼𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀲𑀗𑁆𑀔𑁄 𑀦𑀸𑀫 𑀭𑀸𑀚𑀸, 𑀓𑁂𑀢𑀼𑀫𑀢𑀻 𑀦𑀸𑀫 𑀭𑀸𑀚𑀥𑀸𑀦𑀻’’𑀢𑀺𑀆𑀤𑀺𑀯𑀲𑁂𑀦 (𑀤𑀻. 𑀦𑀺. 𑁩.𑁧𑁦𑁬) 𑀧𑀭𑀺𑀢𑁆𑀢𑀓𑀫𑁂𑀯 𑀅𑀦𑀸𑀕𑀢𑁂𑀲𑀼 𑀓𑀸𑀫𑀕𑀼𑀡𑁂𑀲𑀼 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀭 𑀫𑁂 𑀅𑀢𑁆𑀢𑀭𑀽𑀧𑁂𑀦𑀸𑀢𑀺 𑀢𑀢𑁆𑀭 𑀫𑀬𑀸 𑀅𑀢𑁆𑀢𑀦𑁄 𑀳𑀺𑀢𑀓𑀸𑀫𑀚𑀸𑀢𑀺𑀓𑁂𑀦. 𑀅𑀧𑁆𑀧𑀫𑀸𑀤𑁄𑀢𑀺 𑀲𑀸𑀢𑀘𑁆𑀘𑀓𑀺𑀭𑀺𑀬𑀸 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀘𑀺𑀢𑁆𑀢𑀲𑁆𑀲 𑀅𑀯𑁄𑀲𑁆𑀲𑀕𑁆𑀕𑁄. 𑀲𑀢𑀻𑀢𑀺 𑀆𑀭𑀫𑁆𑀫𑀡𑀧𑀭𑀺𑀕𑁆𑀕𑀳𑀺𑀢𑀲𑀢𑀺. 𑀆𑀭𑀓𑁆𑀔𑁄𑀢𑀺 𑀅𑀬𑀁 𑀅𑀧𑁆𑀧𑀫𑀸𑀤𑁄 𑀘 𑀲𑀢𑀺 𑀘 𑀘𑁂𑀢𑀲𑁄 𑀆𑀭𑀓𑁆𑀔𑁄 𑀓𑀭𑀡𑀻𑀬𑁄, 𑀏𑀯𑀁 𑀫𑁂 𑀅𑀳𑁄𑀲𑀻𑀢𑀺 𑀤𑀲𑁆𑀲𑁂𑀢𑀺, 𑀆𑀭𑀓𑁆𑀔𑀢𑁆𑀣𑀸𑀬 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀓𑀸𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀲𑁂 𑀆𑀬𑀢𑀦𑁂 𑀯𑁂𑀤𑀺𑀢𑀩𑁆𑀩𑁂𑀢𑀺 𑀬𑀲𑁆𑀫𑀸 𑀘𑁂𑀢𑀲𑁄 𑀆𑀭𑀓𑁆𑀔𑀢𑁆𑀣𑀸𑀬 𑀅𑀧𑁆𑀧𑀫𑀸𑀤𑁄 𑀘 𑀲𑀢𑀺 𑀘 𑀓𑀸𑀢𑀩𑁆𑀩𑀸, 𑀬𑀲𑁆𑀫𑀸 𑀢𑀲𑁆𑀫𑀺𑀁 𑀆𑀬𑀢𑀦𑁂 𑀯𑀺𑀤𑀺𑀢𑁂 𑀅𑀧𑁆𑀧𑀫𑀸𑀤𑁂𑀦 𑀯𑀸 𑀲𑀢𑀺𑀬𑀸 𑀯𑀸 𑀓𑀸𑀢𑀩𑁆𑀩𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑁂 𑀆𑀬𑀢𑀦𑁂 𑀯𑁂𑀤𑀺𑀢𑀩𑁆𑀩𑁂, 𑀢𑀁 𑀓𑀸𑀭𑀡𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀲𑀴𑀸𑀬𑀢𑀦𑀦𑀺𑀭𑁄𑀥𑀦𑁆𑀢𑀺 𑀲𑀴𑀸𑀬𑀢𑀦𑀦𑀺𑀭𑁄𑀥𑁄 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁, 𑀢𑀁 𑀲𑀦𑁆𑀥𑀸𑀬 𑀪𑀸𑀲𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀸𑀦𑀲𑁆𑀫𑀺𑀜𑁆𑀳𑀺 𑀘𑀓𑁆𑀔𑀼𑀆𑀤𑀻𑀦𑀺 𑀘𑁂𑀯 𑀦𑀺𑀭𑀼𑀚𑁆𑀛𑀦𑁆𑀢𑀺 𑀭𑀽𑀧𑀲𑀜𑁆𑀜𑀸𑀤𑀬𑁄 𑀘 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁫-𑁬. 𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁮-𑁧𑁧𑁯. 𑀧𑀜𑁆𑀘𑀫𑁂 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂. 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀻𑀢𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺. 𑀢𑀦𑁆𑀦𑀺𑀲𑁆𑀲𑀺𑀢𑀁 𑀯𑀺𑀜𑁆𑀜𑀸𑀡𑀁 𑀳𑁄𑀢𑀻𑀢𑀺 𑀢𑀡𑁆𑀳𑀸𑀦𑀺𑀲𑁆𑀲𑀺𑀢𑀁 𑀓𑀫𑁆𑀫𑀯𑀺𑀜𑁆𑀜𑀸𑀡𑀁 𑀳𑁄𑀢𑀺. 𑀢𑀤𑀼𑀧𑀸𑀤𑀸𑀦𑀦𑁆𑀢𑀺 𑀢𑀁𑀕𑀳𑀡𑀁, 𑀢𑀡𑁆𑀳𑀸𑀕𑀳𑀡𑁂𑀦 𑀲𑀳𑀕𑀢𑀁 𑀯𑀺𑀜𑁆𑀜𑀸𑀡𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀙𑀝𑁆𑀞𑀁 𑀉𑀢𑁆𑀢𑀸𑀦𑀫𑁂𑀯.

𑁭. 𑀲𑀸𑀭𑀺𑀧𑀼𑀢𑁆𑀢𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁦. 𑀲𑀢𑁆𑀢𑀫𑁂 𑀲𑀦𑁆𑀢𑀸𑀦𑁂𑀲𑁆𑀲𑀢𑀻𑀢𑀺 𑀖𑀝𑁂𑀲𑁆𑀲𑀢𑀺, 𑀬𑁄𑀕𑀯𑀺𑀘𑁆𑀙𑁂𑀤𑀫𑀲𑁆𑀲 𑀧𑀸𑀧𑀼𑀡𑀺𑀢𑀼𑀁 𑀦 𑀤𑀲𑁆𑀲𑀢𑀺.

𑁮. 𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁧. 𑀅𑀝𑁆𑀞𑀫𑁂 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀺𑀬𑀸𑀢𑀺 𑀯𑀺𑀫𑀼𑀢𑁆𑀢𑀺𑀁 𑀧𑀭𑀺𑀧𑀸𑀘𑁂𑀦𑁆𑀢𑀻𑀢𑀺 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀺𑀬𑀸. 𑀥𑀫𑁆𑀫𑀸𑀢𑀺 𑀧𑀦𑁆𑀦𑀭𑀲 𑀥𑀫𑁆𑀫𑀸, 𑀢𑁂 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀯𑀺𑀲𑀼𑀤𑁆𑀥𑀺𑀓𑀭𑀡𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀲𑁆𑀲𑀤𑁆𑀥𑁂 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀲𑀤𑁆𑀥𑁂 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄, 𑀧𑀲𑀸𑀤𑀦𑀻𑀬𑁂 𑀲𑀼𑀢𑁆𑀢𑀦𑁆𑀢𑁂 𑀧𑀘𑁆𑀘𑀯𑁂𑀓𑁆𑀔𑀢𑁄, 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺. 𑀓𑀼𑀲𑀻𑀢𑁂 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀆𑀭𑀤𑁆𑀥𑀯𑀻𑀭𑀺𑀬𑁂 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄, 𑀲𑀫𑁆𑀫𑀧𑁆𑀧𑀥𑀸𑀦𑁂 𑀧𑀘𑁆𑀘𑀯𑁂𑀓𑁆𑀔𑀢𑁄, 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺. 𑀫𑀼𑀝𑁆𑀞𑀲𑁆𑀲𑀢𑀻 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀉𑀧𑀝𑁆𑀞𑀺𑀢𑀲𑁆𑀲𑀢𑀻 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄, 𑀲𑀢𑀺𑀧𑀝𑁆𑀞𑀸𑀦𑁂 𑀧𑀘𑁆𑀘𑀯𑁂𑀓𑁆𑀔𑀢𑁄, 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀲𑀢𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺. 𑀅𑀲𑀫𑀸𑀳𑀺𑀢𑁂 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀲𑀫𑀸𑀳𑀺𑀢𑁂 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄, 𑀛𑀸𑀦𑀯𑀺𑀫𑁄𑀓𑁆𑀔𑁂 𑀧𑀘𑁆𑀘𑀯𑁂𑀓𑁆𑀔𑀢𑁄, 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺. 𑀤𑀼𑀧𑁆𑀧𑀜𑁆𑀜𑁂 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀧𑀜𑁆𑀜𑀯𑀦𑁆𑀢𑁂 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄, 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀁 𑀧𑀘𑁆𑀘𑀯𑁂𑀓𑁆𑀔𑀢𑁄, 𑀇𑀫𑁂𑀳𑀺 𑀢𑀻𑀳𑀸𑀓𑀸𑀭𑁂𑀳𑀺 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺. 𑀇𑀢𑀺 𑀇𑀫𑁂 𑀧𑀜𑁆𑀘 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄, 𑀧𑀜𑁆𑀘 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄 𑀪𑀚𑀢𑁄 𑀧𑀬𑀺𑀭𑀼𑀧𑀸𑀲𑀢𑁄, 𑀧𑀜𑁆𑀘 𑀲𑀼𑀢𑁆𑀢𑀦𑁆𑀢𑁂 𑀧𑀘𑁆𑀘𑀯𑁂𑀓𑁆𑀔𑀢𑁄, 𑀇𑀫𑁂𑀳𑀺 𑀧𑀦𑁆𑀦𑀭𑀲𑀳𑀺 𑀆𑀓𑀸𑀭𑁂𑀳𑀺 𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀲𑀼𑀚𑁆𑀛𑀦𑁆𑀢𑀻’’𑀢𑀺 (𑀧𑀝𑀺. 𑀫. 𑁧.𑁧𑁮𑁪).

𑀅𑀧𑀭𑁂𑀧𑀺 𑀧𑀦𑁆𑀦𑀭𑀲 𑀥𑀫𑁆𑀫𑀸 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀺𑀬𑀸 𑁋 𑀲𑀤𑁆𑀥𑀸𑀧𑀜𑁆𑀘𑀫𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑀲𑀜𑁆𑀜𑀸, 𑀤𑀼𑀓𑁆𑀔𑁂 𑀅𑀦𑀢𑁆𑀢𑀲𑀜𑁆𑀜𑀸, 𑀧𑀳𑀸𑀦𑀲𑀜𑁆𑀜𑀸, 𑀯𑀺𑀭𑀸𑀕𑀲𑀜𑁆𑀜𑀸𑀢𑀺 𑀇𑀫𑀸 𑀧𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀸 𑀲𑀜𑁆𑀜𑀸, 𑀫𑁂𑀖𑀺𑀬𑀢𑁆𑀣𑁂𑀭𑀲𑁆𑀲 𑀓𑀣𑀺𑀢𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀸𑀢𑀺 (𑀉𑀤𑀸. 𑁩𑁧). 𑀓𑀸𑀬 𑀧𑀦 𑀯𑁂𑀮𑀸𑀬 𑀪𑀕𑀯𑀢𑁄 𑀏𑀢𑀤𑀳𑁄𑀲𑀻𑀢𑀺? 𑀧𑀘𑁆𑀘𑀽𑀲𑀲𑀫𑀬𑁂 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑀲𑁆𑀲.

𑀅𑀦𑁂𑀓𑀸𑀦𑀺 𑀤𑁂𑀯𑀢𑀸𑀲𑀳𑀲𑁆𑀲𑀸𑀦𑀻𑀢𑀺 𑀆𑀬𑀲𑁆𑀫𑀢𑀸 𑀭𑀸𑀳𑀼𑀮𑁂𑀦 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀧𑀸𑀮𑀺𑀢𑀦𑀸𑀕𑀭𑀸𑀚𑀓𑀸𑀮𑁂 𑀧𑀢𑁆𑀣𑀦𑀁 𑀧𑀝𑁆𑀞𑀧𑁂𑀦𑁆𑀢𑁂𑀦 𑀲𑀤𑁆𑀥𑀺𑀁 𑀧𑀢𑁆𑀣𑀦𑀁 𑀧𑀝𑁆𑀞𑀧𑀺𑀢𑀤𑁂𑀯𑀢𑀸𑀲𑀼 𑀧𑀦 𑀓𑀸𑀘𑀺 𑀪𑀽𑀫𑀝𑁆𑀞𑀓𑀸 𑀤𑁂𑀯𑀢𑀸, 𑀓𑀸𑀘𑀺 𑀅𑀦𑁆𑀢𑀮𑀺𑀓𑁆𑀔𑀝𑁆𑀞𑀓𑀸, 𑀓𑀸𑀘𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸, 𑀓𑀸𑀘𑀺 𑀤𑁂𑀯𑀮𑁄𑀓𑁂, 𑀓𑀸𑀘𑀺 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸. 𑀇𑀫𑀲𑁆𑀫𑀺𑀁 𑀧𑀦 𑀤𑀺𑀯𑀲𑁂 𑀲𑀩𑁆𑀩𑀸𑀧𑀺 𑀢𑀸 𑀏𑀓𑀝𑁆𑀞𑀸𑀦𑁂 𑀅𑀦𑁆𑀥𑀯𑀦𑀲𑁆𑀫𑀺𑀁𑀬𑁂𑀯 𑀲𑀦𑁆𑀦𑀺𑀧𑀢𑀺𑀢𑀸, 𑀢𑀸 𑀲𑀦𑁆𑀥𑀸𑀬𑀸𑀳 𑁋 ‘‘𑀅𑀦𑁂𑀓𑀸𑀦𑀺 𑀤𑁂𑀯𑀢𑀸𑀲𑀳𑀲𑁆𑀲𑀸𑀦𑀻’’𑀢𑀺. 𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀘𑀢𑁆𑀢𑀸𑀭𑁄 𑀘 𑀫𑀕𑁆𑀕𑀸 𑀘𑀢𑁆𑀢𑀸𑀭𑀺 𑀘 𑀨𑀮𑀸𑀦𑀺 𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀢𑀢𑁆𑀣 𑀳𑀺 𑀓𑀸𑀘𑀺 𑀤𑁂𑀯𑀢𑀸 𑀲𑁄𑀢𑀸𑀧𑀦𑁆𑀦𑀸 𑀅𑀳𑁂𑀲𑀼𑀁, 𑀓𑀸𑀘𑀺 𑀲𑀓𑀤𑀸𑀕𑀸𑀫𑀻, 𑀅𑀦𑀸𑀕𑀸𑀫𑀻, 𑀔𑀻𑀡𑀸𑀲𑀯𑀸. 𑀢𑀸𑀲𑀜𑁆𑀘 𑀧𑀦 𑀤𑁂𑀯𑀢𑀸𑀦𑀁 𑀏𑀢𑁆𑀢𑀓𑀸𑀢𑀺 𑀕𑀡𑀦𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑁯-𑁧𑁦. 𑀲𑀁𑀬𑁄𑀚𑀦𑀺𑀬𑀥𑀫𑁆𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁨𑁨-𑁧𑁨𑁩. 𑀦𑀯𑀫𑀤𑀲𑀫𑀸𑀦𑀺 𑀇𑀝𑁆𑀞𑀸𑀭𑀫𑁆𑀫𑀡𑀯𑀲𑁂𑀦 𑀓𑀣𑀺𑀬𑀫𑀸𑀦𑁂 𑀩𑀼𑀚𑁆𑀛𑀦𑀓𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀸𑀦𑀻𑀢𑀺.

𑀮𑁄𑀓𑀓𑀸𑀫𑀕𑀼𑀡𑀯𑀕𑁆𑀕𑁄 𑀤𑁆𑀯𑀸𑀤𑀲𑀫𑁄.

𑁧𑁩. 𑀕𑀳𑀧𑀢𑀺𑀯𑀕𑁆𑀕𑁄

𑁧-𑁩. 𑀯𑁂𑀲𑀸𑀮𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁨𑁪-𑁧𑁨𑁬. 𑀕𑀳𑀧𑀢𑀺𑀯𑀕𑁆𑀕𑀲𑁆𑀲 𑀧𑀞𑀫𑁂 𑀉𑀕𑁆𑀕𑁄𑀢𑀺 𑀧𑀡𑀻𑀢𑀤𑀸𑀬𑀓𑀸𑀦𑀁 𑀅𑀕𑁆𑀕𑀉𑀕𑁆𑀕𑁄, 𑀲𑁄 𑀪𑀕𑀯𑀢𑀸 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀓𑀸𑀦𑀁 𑀧𑀡𑀻𑀢𑀤𑀸𑀬𑀓𑀸𑀦𑀁 𑀬𑀤𑀺𑀤𑀁 𑀉𑀕𑁆𑀕𑁄 𑀕𑀳𑀧𑀢𑀻’’𑀢𑀺 𑀏𑀯𑀁 𑀏𑀢𑀤𑀕𑁆𑀕𑁂 𑀞𑀧𑀺𑀢𑁄. 𑀲𑁂𑀲𑀫𑁂𑀢𑁂𑀲𑀼 𑀘𑁂𑀯 𑀤𑁆𑀯𑀻𑀲𑀼, 𑀢𑀢𑀺𑀬𑁂 𑀘 𑀯𑀼𑀢𑁆𑀢𑀢𑁆𑀣𑀫𑁂𑀯.

𑁪-𑁫. 𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁨𑁭-𑁧𑁨𑁮. 𑀘𑀢𑀼𑀢𑁆𑀣𑁂 𑀧𑀺𑀡𑁆𑀟𑀁 𑀉𑀮𑀫𑀸𑀦𑁄 𑀧𑀭𑀺𑀬𑁂𑀲𑀫𑀸𑀦𑁄 𑀧𑀩𑁆𑀩𑀚𑀺𑀢𑁄𑀢𑀺 𑀧𑀺𑀡𑁆𑀟𑁄𑀮𑁄. 𑀲𑁄 𑀓𑀺𑀭 𑀧𑀭𑀺𑀚𑀺𑀡𑁆𑀡𑀪𑁄𑀕𑁄 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺. 𑀅𑀣 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀮𑀸𑀪𑀲𑀓𑁆𑀓𑀸𑀭𑀁 𑀤𑀺𑀲𑁆𑀯𑀸 𑀧𑀺𑀡𑁆𑀟𑀢𑁆𑀣𑀸𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄. 𑀲𑁄 𑀫𑀳𑀦𑁆𑀢𑀁 𑀓𑀧𑀮𑁆𑀮𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀘𑀭𑀢𑀺, 𑀢𑁂𑀦 𑀓𑀧𑀮𑁆𑀮𑀧𑀽𑀭𑀁 𑀬𑀸𑀕𑀼𑀁 𑀧𑀺𑀯𑀢𑀺, 𑀓𑀧𑀮𑁆𑀮𑀧𑀽𑀭𑁂 𑀧𑀽𑀯𑁂 𑀔𑀸𑀤𑀢𑀺, 𑀓𑀧𑀮𑁆𑀮𑀧𑀽𑀭𑀁 𑀪𑀢𑁆𑀢𑀁 𑀪𑀼𑀜𑁆𑀚𑀢𑀺. 𑀅𑀣𑀲𑁆𑀲 𑀫𑀳𑀕𑁆𑀖𑀲𑀪𑀸𑀯𑀁 𑀲𑀢𑁆𑀣𑀼 𑀆𑀭𑁄𑀘𑀬𑀺𑀁𑀲𑀼. 𑀲𑀢𑁆𑀣𑀸 𑀢𑀲𑁆𑀲 𑀧𑀢𑁆𑀢𑀢𑁆𑀣𑀯𑀺𑀓𑀁 𑀦𑀸𑀦𑀼𑀚𑀸𑀦𑀺. 𑀳𑁂𑀝𑁆𑀞𑀸𑀫𑀜𑁆𑀘𑁂 𑀧𑀢𑁆𑀢𑀁 𑀦𑀺𑀓𑁆𑀓𑀼𑀚𑁆𑀚𑀺𑀢𑁆𑀯𑀸 𑀞𑀧𑁂𑀢𑀺. 𑀲𑁄 𑀞𑀧𑁂𑀦𑁆𑀢𑁄𑀧𑀺 𑀖𑀁𑀲𑀦𑁆𑀢𑁄𑀯 𑀧𑀡𑀸𑀫𑁂𑀢𑁆𑀯𑀸 𑀞𑀧𑁂𑀢𑀺, 𑀕𑀡𑁆𑀳𑀦𑁆𑀢𑁄𑀧𑀺 𑀖𑀁𑀲𑀦𑁆𑀢𑁄𑀯 𑀆𑀓𑀟𑁆𑀠𑀺𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀢𑀁 𑀕𑀘𑁆𑀙𑀦𑁆𑀢𑁂 𑀓𑀸𑀮𑁂 𑀥𑀁𑀲𑀦𑁂𑀦 𑀧𑀭𑀺𑀓𑁆𑀔𑀻𑀡𑀁 𑀦𑀸𑀴𑀺𑀓𑁄𑀤𑀦𑀫𑀢𑁆𑀢𑀫𑁂𑀯 𑀕𑀡𑁆𑀳𑀦𑀓𑀁 𑀚𑀸𑀢𑀁. 𑀢𑀢𑁄 𑀲𑀢𑁆𑀣𑀼 𑀆𑀭𑁄𑀘𑁂𑀲𑀼𑀁, 𑀅𑀣𑀲𑁆𑀲 𑀲𑀢𑁆𑀣𑀸 𑀧𑀢𑁆𑀢𑀢𑁆𑀣𑀯𑀺𑀓𑀁 𑀅𑀦𑀼𑀚𑀸𑀦𑀺. 𑀣𑁂𑀭𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀁 𑀪𑀸𑀯𑁂𑀢𑁆𑀯𑀸 𑀅𑀕𑁆𑀕𑀨𑀮𑁂 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺. 𑀇𑀢𑀺 𑀲𑁄 𑀧𑀺𑀡𑁆𑀟𑀢𑁆𑀣𑀸𑀬 𑀧𑀩𑁆𑀩𑀚𑀺𑀢𑀢𑁆𑀢𑀸 𑀧𑀺𑀡𑁆𑀟𑁄𑀮𑁄, 𑀕𑁄𑀢𑁆𑀢𑁂𑀦 𑀧𑀦 𑀪𑀸𑀭𑀤𑁆𑀯𑀸𑀚𑁄𑀢𑀺 𑀉𑀪𑀬𑀁 𑀏𑀓𑀢𑁄 𑀓𑀢𑁆𑀯𑀸 𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑁄𑀢𑀺 𑀯𑀼𑀘𑁆𑀘𑀢𑀺.

𑀉𑀧𑀲𑀗𑁆𑀓𑀫𑀻𑀢𑀺 𑀉𑀕𑁆𑀕𑀢𑀼𑀕𑁆𑀕𑀢𑁂𑀳𑀺 𑀫𑀳𑀸𑀅𑀫𑀘𑁆𑀘𑁂𑀳𑀺 𑀧𑀭𑀺𑀯𑀼𑀢𑁄 𑀉𑀧𑀲𑀗𑁆𑀓𑀫𑀺. 𑀣𑁂𑀭𑁄 𑀓𑀺𑀭 𑀏𑀓𑀤𑀺𑀯𑀲𑀁 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑁄 𑀦𑀺𑀤𑀸𑀖𑀲𑀫𑀬𑁂 𑀲𑀻𑀢𑀞𑀸𑀦𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺𑀲𑁆𑀲𑀸𑀫𑀻𑀢𑀺 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀕𑀗𑁆𑀕𑀸𑀢𑀻𑀭𑁂 𑀉𑀤𑁂𑀦𑀲𑁆𑀲 𑀭𑀜𑁆𑀜𑁄 𑀉𑀤𑀧𑀸𑀦𑀁 𑀦𑀸𑀫 𑀉𑀬𑁆𑀬𑀸𑀦𑀁 𑀅𑀢𑁆𑀣𑀺, 𑀢𑀢𑁆𑀣 𑀧𑀯𑀺𑀲𑀺𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺 𑀲𑀻𑀢𑁂𑀦 𑀉𑀤𑀓𑀯𑀸𑀢𑁂𑀦 𑀩𑀻𑀚𑀺𑀬𑀫𑀸𑀦𑁄.

𑀉𑀤𑁂𑀦𑁄𑀧𑀺 𑀔𑁄 𑀦𑀸𑀫 𑀭𑀸𑀚𑀸 𑀲𑀢𑁆𑀢𑀸𑀳𑀁 𑀫𑀳𑀸𑀧𑀸𑀦𑀁 𑀧𑀺𑀯𑀺𑀢𑁆𑀯𑀸 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀉𑀬𑁆𑀬𑀸𑀦𑀁 𑀧𑀝𑀺𑀚𑀕𑁆𑀕𑀸𑀧𑁂𑀢𑁆𑀯𑀸 𑀫𑀳𑀸𑀚𑀦𑀧𑀭𑀺𑀯𑀸𑀭𑁄 𑀉𑀬𑁆𑀬𑀸𑀦𑀁 𑀕𑀦𑁆𑀢𑁆𑀯𑀸 𑀫𑀗𑁆𑀕𑀮𑀲𑀺𑀮𑀸𑀧𑀝𑁆𑀝𑁂 𑀅𑀢𑁆𑀣𑀢𑀸𑀬 𑀲𑁂𑀬𑁆𑀬𑀸𑀬 𑀦𑀺𑀧𑀚𑁆𑀚𑀺. 𑀢𑀲𑁆𑀲 𑀏𑀓𑀸 𑀧𑀭𑀺𑀘𑀸𑀭𑀺𑀓𑀸 𑀧𑀸𑀤𑁂 𑀲𑀫𑁆𑀩𑀸𑀳𑀫𑀸𑀦𑀸 𑀦𑀺𑀲𑀺𑀦𑁆𑀦𑀸. 𑀭𑀸𑀚𑀸 𑀓𑀫𑁂𑀦 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺. 𑀢𑀲𑁆𑀫𑀺𑀁 𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑁂 𑀦𑀸𑀝𑀓𑀺𑀢𑁆𑀣𑀺𑀬𑁄 ‘‘𑀬𑀲𑁆𑀲𑀢𑁆𑀣𑀸𑀬 𑀫𑀬𑀁 𑀕𑀻𑀢𑀸𑀤𑀻𑀦𑀺 𑀧𑀬𑁄𑀚𑁂𑀬𑁆𑀬𑀸𑀫, 𑀲𑁄 𑀦𑀺𑀤𑁆𑀤𑀁 𑀉𑀧𑀕𑀢𑁄, 𑀦 𑀘 𑀦𑀺𑀤𑁆𑀤𑀸𑀓𑀸𑀮𑁂 𑀫𑀳𑀸𑀲𑀤𑁆𑀤𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀢𑀽𑀭𑀺𑀬𑀸𑀦𑀺 𑀞𑀧𑁂𑀢𑁆𑀯𑀸 𑀉𑀬𑁆𑀬𑀸𑀦𑀁 𑀧𑀓𑁆𑀓𑀦𑁆𑀢𑀸. 𑀢𑀸 𑀢𑀢𑁆𑀣 𑀢𑀢𑁆𑀣 𑀨𑀮𑀸𑀨𑀮𑀸𑀦𑀺 𑀔𑀸𑀤𑀫𑀸𑀦𑀸 𑀧𑀼𑀧𑁆𑀨𑀸𑀦𑀺 𑀧𑀺𑀴𑀦𑁆𑀥𑀫𑀸𑀦𑀸 𑀯𑀺𑀘𑀭𑀦𑁆𑀢𑀺𑀬𑁄 𑀣𑁂𑀭𑀁 𑀤𑀺𑀲𑁆𑀯𑀸 ‘‘𑀫𑀸 𑀲𑀤𑁆𑀤𑀁 𑀓𑀭𑀺𑀢𑁆𑀣𑀸’’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀦𑀺𑀯𑀸𑀭𑀬𑀫𑀸𑀦𑀸 𑀯𑀦𑁆𑀤𑀺𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀣𑁂𑀭𑁄 ‘‘𑀇𑀲𑁆𑀲𑀸 𑀧𑀳𑀸𑀢𑀩𑁆𑀩𑀸, 𑀫𑀘𑁆𑀙𑁂𑀭𑀁 𑀯𑀺𑀦𑁄𑀤𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀸𑀲𑀁 𑀅𑀦𑀼𑀭𑀽𑀧𑀁 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺.

𑀲𑀸𑀧𑀺 𑀔𑁄 𑀭𑀜𑁆𑀜𑁄 𑀧𑀸𑀤𑁂 𑀲𑀫𑁆𑀩𑀸𑀳𑀫𑀸𑀦𑀸 𑀦𑀺𑀲𑀺𑀦𑁆𑀦𑀸 𑀇𑀢𑁆𑀣𑀻 𑀧𑀸𑀤𑁂 𑀘𑀸𑀮𑁂𑀢𑁆𑀯𑀸 𑀭𑀸𑀚𑀸𑀦𑀁 𑀧𑀩𑁄𑀥𑁂𑀲𑀺. 𑀲𑁄 ‘‘𑀓𑀳𑀁 𑀢𑀸 𑀕𑀢𑀸’’𑀢𑀺 𑀧𑀼𑀘𑁆𑀙𑀺. 𑀓𑀺𑀁 𑀢𑀸𑀲𑀁 𑀢𑀼𑀫𑁆𑀳𑁂𑀳𑀺? 𑀢𑀸 𑀏𑀓𑀁 𑀲𑀫𑀡𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀢𑀺. 𑀭𑀸𑀚𑀸 𑀓𑀼𑀤𑁆𑀥𑁄 𑀉𑀤𑁆𑀥𑀦𑁂 𑀧𑀓𑁆𑀔𑀺𑀢𑁆𑀢𑀮𑁄𑀡𑀁 𑀯𑀺𑀬 𑀢𑀝𑀢𑀝𑀸𑀬𑀫𑀸𑀦𑁄 𑀉𑀝𑁆𑀞𑀳𑀺𑀢𑁆𑀯𑀸 ‘‘𑀢𑀫𑁆𑀩𑀓𑀺𑀧𑀺𑀮𑁆𑀮𑀺𑀓𑀸𑀳𑀺 𑀦𑀁 𑀔𑀸𑀤𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀕𑀘𑁆𑀙𑀦𑁆𑀢𑁄 𑀏𑀓𑀲𑁆𑀫𑀺𑀁 𑀅𑀲𑁄𑀓𑀭𑀼𑀓𑁆𑀔𑁂 𑀢𑀫𑁆𑀩𑀓𑀺𑀧𑀺𑀮𑁆𑀮𑀺𑀓𑀸𑀦𑀁 𑀧𑀼𑀝𑀁 𑀤𑀺𑀲𑁆𑀯𑀸 𑀳𑀢𑁆𑀣𑁂𑀦𑀸𑀓𑀟𑁆𑀠𑀺𑀢𑁆𑀯𑀸 𑀲𑀸𑀔𑀁 𑀕𑀡𑁆𑀳𑀺𑀢𑀼𑀁 𑀦𑀸𑀲𑀓𑁆𑀔𑀺. 𑀓𑀺𑀧𑀺𑀮𑁆𑀮𑀺𑀓𑀧𑀼𑀝𑁄 𑀙𑀺𑀚𑁆𑀚𑀺𑀢𑁆𑀯𑀸 𑀭𑀜𑁆𑀜𑁄 𑀲𑀻𑀲𑁂 𑀧𑀢𑀺, 𑀲𑀓𑀮𑀲𑀭𑀻𑀭𑀁 𑀲𑀸𑀮𑀺𑀣𑀼𑀲𑁂𑀳𑀺 𑀧𑀭𑀺𑀓𑀺𑀡𑁆𑀡𑀁 𑀯𑀺𑀬 𑀤𑀡𑁆𑀟𑀤𑀻𑀧𑀺𑀓𑀸𑀳𑀺 𑀟𑀬𑁆𑀳𑀫𑀸𑀦𑀁 𑀯𑀺𑀬 𑀘 𑀅𑀳𑁄𑀲𑀺. 𑀣𑁂𑀭𑁄 𑀭𑀜𑁆𑀜𑁄 𑀧𑀤𑀼𑀝𑁆𑀞𑀪𑀸𑀯𑀁 𑀜𑀢𑁆𑀯𑀸 𑀇𑀤𑁆𑀥𑀺𑀬𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺. 𑀢𑀸𑀧𑀺 𑀇𑀢𑁆𑀣𑀺𑀬𑁄 𑀉𑀝𑁆𑀞𑀸𑀬 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀲𑀭𑀻𑀭𑀁 𑀧𑀼𑀜𑁆𑀙𑀦𑁆𑀢𑀺𑀬𑁄 𑀯𑀺𑀬 𑀪𑀽𑀫𑀺𑀬𑀁 𑀧𑀢𑀺𑀢𑀧𑀢𑀺𑀢𑀸 𑀓𑀺𑀧𑀺𑀮𑁆𑀮𑀺𑀓𑀸𑀬𑁄 𑀕𑀳𑁂𑀢𑁆𑀯𑀸 𑀲𑀭𑀻𑀭𑁂 𑀔𑀺𑀧𑀫𑀸𑀦𑀸 𑀲𑀩𑁆𑀩𑀸 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀚𑁆𑀛𑀺𑀁𑀲𑀼 𑁋 ‘‘𑀓𑀺𑀁 𑀦𑀸𑀫𑁂𑀢𑀁, 𑀅𑀜𑁆𑀜𑁂 𑀭𑀸𑀚𑀸𑀦𑁄 𑀧𑀩𑁆𑀩𑀚𑀺𑀢𑁂 𑀤𑀺𑀲𑁆𑀯𑀸 𑀯𑀦𑁆𑀤𑀦𑁆𑀢𑀺, 𑀧𑀜𑁆𑀳𑀁 𑀧𑀼𑀘𑁆𑀙𑀦𑁆𑀢𑀺, 𑀅𑀬𑀁 𑀧𑀦 𑀭𑀸𑀚𑀸 𑀓𑀺𑀧𑀺𑀮𑁆𑀮𑀺𑀓𑀧𑀼𑀝𑀁 𑀲𑀻𑀲𑁂 𑀪𑀺𑀦𑁆𑀤𑀺𑀢𑀼𑀓𑀸𑀫𑁄 𑀚𑀸𑀢𑁄’’𑀢𑀺.

𑀭𑀸𑀚𑀸 𑀅𑀢𑁆𑀢𑀦𑁄 𑀅𑀧𑀭𑀸𑀥𑀁 𑀤𑀺𑀲𑁆𑀯𑀸 𑀉𑀬𑁆𑀬𑀸𑀦𑀧𑀸𑀮𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀏𑀲 𑀧𑀩𑁆𑀩𑀚𑀺𑀢𑁄? 𑀅𑀜𑁆𑀜𑁂𑀲𑀼𑀧𑀺 𑀤𑀺𑀯𑀲𑁂𑀲𑀼 𑀇𑀥 𑀆𑀕𑀘𑁆𑀙𑀢𑀻’’𑀢𑀺? 𑀆𑀫, 𑀤𑁂𑀯𑀸𑀢𑀺. 𑀇𑀥 𑀢𑁆𑀯𑀁 𑀆𑀕𑀢𑀤𑀺𑀯𑀲𑁂 𑀫𑀬𑁆𑀳𑀁 𑀆𑀭𑁄𑀘𑁂𑀬𑁆𑀬𑀸𑀲𑀻𑀢𑀺. 𑀣𑁂𑀭𑁄𑀧𑀺 𑀓𑀢𑀺𑀧𑀸𑀳𑁂𑀦𑁂𑀯 𑀧𑀼𑀦 𑀆𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺. 𑀉𑀬𑁆𑀬𑀸𑀦𑀧𑀸𑀮𑁄 𑀤𑀺𑀲𑁆𑀯𑀸 𑁋 ‘‘𑀫𑀳𑀦𑁆𑀢𑁄 𑀫𑁂 𑀅𑀬𑀁 𑀧𑀡𑁆𑀡𑀸𑀓𑀸𑀭𑁄’’𑀢𑀺 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀉𑀝𑁆𑀞𑀳𑀺𑀢𑁆𑀯𑀸 𑀲𑀗𑁆𑀔𑀧𑀡𑀯𑀸𑀤𑀺𑀲𑀤𑁆𑀤𑀁 𑀦𑀺𑀯𑀸𑀭𑁂𑀢𑁆𑀯𑀸 𑀉𑀕𑁆𑀕𑀢𑀼𑀕𑁆𑀕𑀢𑁂𑀳𑀺 𑀅𑀫𑀘𑁆𑀘𑁂𑀳𑀺 𑀲𑀤𑁆𑀥𑀺𑀁 𑀉𑀬𑁆𑀬𑀸𑀦𑀁 𑀅𑀕𑀫𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀧𑀲𑀗𑁆𑀓𑀫𑀻’’𑀢𑀺.

𑀅𑀦𑀺𑀓𑀻𑀴𑀺𑀢𑀸𑀯𑀺𑀦𑁄 𑀓𑀸𑀫𑁂𑀲𑀽𑀢𑀺 𑀬𑀸 𑀓𑀸𑀫𑁂𑀲𑀼 𑀓𑀸𑀫𑀓𑀻𑀴𑀸, 𑀢𑀁 𑀅𑀓𑀻𑀴𑀺𑀢𑀧𑀼𑀩𑁆𑀩𑀸, 𑀅𑀧𑀭𑀺𑀪𑀼𑀢𑁆𑀢𑀓𑀸𑀫𑀸𑀢𑀺 𑀅𑀢𑁆𑀣𑁄. 𑀅𑀤𑁆𑀥𑀸𑀦𑀜𑁆𑀘 𑀆𑀧𑀸𑀤𑁂𑀦𑁆𑀢𑀻𑀢𑀺 𑀧𑀯𑁂𑀡𑀺𑀁 𑀧𑀝𑀺𑀧𑀸𑀤𑁂𑀦𑁆𑀢𑀺, 𑀤𑀻𑀖𑀭𑀢𑁆𑀢𑀁 𑀅𑀦𑀼𑀩𑀦𑁆𑀥𑀸𑀧𑁂𑀦𑁆𑀢𑀺. 𑀫𑀸𑀢𑀼𑀫𑀢𑁆𑀢𑀻𑀲𑀽𑀢𑀺 𑀫𑀸𑀢𑀼𑀧𑀫𑀸𑀡𑀸𑀲𑀼. 𑀮𑁄𑀓𑀲𑁆𑀫𑀺𑀜𑁆𑀳𑀺 𑀫𑀸𑀢𑀸 𑀪𑀕𑀺𑀦𑀻 𑀥𑀻𑀢𑀸𑀢𑀺 𑀇𑀤𑀁 𑀢𑀺𑀯𑀺𑀥𑀁 𑀕𑀭𑀼𑀓𑀸𑀭𑀫𑁆𑀫𑀡𑀁 𑀦𑀸𑀫, 𑀇𑀢𑀺 𑀕𑀭𑀼𑀓𑀸𑀭𑀫𑁆𑀫𑀡𑁂 𑀉𑀧𑀦𑀺𑀩𑀦𑁆𑀥𑀁 𑀘𑀺𑀢𑁆𑀢𑀁 𑀯𑀺𑀫𑁄𑀘𑁂𑀢𑀼𑀁 𑀦 𑀮𑀪𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀅𑀣𑀲𑁆𑀲 𑀢𑁂𑀦 𑀧𑀜𑁆𑀳𑁂𑀦 𑀘𑀺𑀢𑁆𑀢𑀁 𑀅𑀦𑁄𑀢𑀭𑀦𑁆𑀢𑀁 𑀤𑀺𑀲𑁆𑀯𑀸 𑀪𑀕𑀯𑀢𑀸 𑀧𑀝𑀺𑀓𑀽𑀮𑀫𑀦𑀲𑀺𑀓𑀸𑀭𑀯𑀲𑁂𑀦 𑀘𑀺𑀢𑁆𑀢𑀽𑀧𑀦𑀺𑀩𑀦𑁆𑀥𑀦𑀢𑁆𑀣𑀁 𑀯𑀼𑀢𑁆𑀢𑀁 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑀺.

𑀅𑀪𑀸𑀯𑀺𑀢𑀓𑀸𑀬𑀸𑀢𑀺 𑀅𑀪𑀸𑀯𑀺𑀢𑀧𑀜𑁆𑀘𑀤𑁆𑀯𑀸𑀭𑀺𑀓𑀓𑀸𑀬𑀸. 𑀢𑁂𑀲𑀁 𑀢𑀁 𑀤𑀼𑀓𑁆𑀓𑀭𑀁 𑀳𑁄𑀢𑀻𑀢𑀺 𑀢𑁂𑀲𑀁 𑀢𑀁 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁 𑀪𑀸𑀯𑁂𑀢𑀼𑀁 𑀤𑀼𑀓𑁆𑀓𑀭𑀁 𑀳𑁄𑀢𑀺. 𑀇𑀢𑀺𑀲𑁆𑀲 𑀇𑀫𑀺𑀦𑀸𑀧𑀺 𑀘𑀺𑀢𑁆𑀢𑀁 𑀅𑀦𑁄𑀢𑀭𑀦𑁆𑀢𑀁 𑀤𑀺𑀲𑁆𑀯𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀁 𑀓𑀣𑁂𑀲𑀺. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑁆𑀫𑀺𑀜𑁆𑀳𑀺 𑀉𑀧𑀦𑀺𑀩𑀦𑁆𑀥𑀘𑀺𑀢𑁆𑀢𑀁 𑀯𑀺𑀳𑁂𑀞𑁂𑀢𑀼𑀁 𑀦 𑀮𑀪𑀢𑀺. 𑀭𑀸𑀚𑀸 𑀢𑀁 𑀲𑀼𑀢𑁆𑀯𑀸 𑀢𑀢𑁆𑀣 𑀑𑀢𑀺𑀡𑁆𑀡𑀘𑀺𑀢𑁆𑀢𑁄 𑀅𑀘𑁆𑀙𑀭𑀺𑀬𑀁, 𑀪𑁄 𑀪𑀸𑀭𑀤𑁆𑀯𑀸𑀚𑀸𑀢𑀺𑀆𑀤𑀺𑀫𑀸𑀳.

𑀅𑀭𑀓𑁆𑀔𑀺𑀢𑁂𑀦𑁂𑀯 𑀓𑀸𑀬𑁂𑀦𑀸𑀢𑀺𑀆𑀤𑀻𑀲𑀼 𑀳𑀢𑁆𑀣𑀧𑀸𑀤𑁂 𑀓𑀻𑀴𑀸𑀧𑁂𑀦𑁆𑀢𑁄 𑀕𑀻𑀯𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑀓𑀸𑀬𑀁 𑀦 𑀭𑀓𑁆𑀔𑀢𑀺 𑀦𑀸𑀫, 𑀦𑀸𑀦𑀧𑁆𑀧𑀓𑀸𑀭𑀁 𑀤𑀼𑀝𑁆𑀞𑀼𑀮𑁆𑀮𑀁 𑀓𑀣𑁂𑀦𑁆𑀢𑁄 𑀯𑀘𑀦𑀁 𑀦 𑀭𑀓𑁆𑀔𑀢𑀺 𑀦𑀸𑀫, 𑀓𑀸𑀫𑀯𑀺𑀢𑀓𑁆𑀓𑀸𑀤𑀬𑁄 𑀯𑀺𑀢𑀓𑁆𑀓𑁂𑀦𑁆𑀢𑁄 𑀘𑀺𑀢𑁆𑀢𑀁 𑀦 𑀭𑀓𑁆𑀔𑀢𑀺 𑀦𑀸𑀫. 𑀭𑀓𑁆𑀔𑀺𑀢𑁂𑀦𑁂𑀯 𑀓𑀸𑀬𑁂𑀦𑀸𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀢𑀺𑀯𑀺𑀬 𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀮𑁄𑀪𑀥𑀫𑁆𑀫𑀸 𑀧𑀭𑀺𑀲𑀳𑀦𑁆𑀢𑀻𑀢𑀺 𑀫𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀮𑁄𑀪𑁄 𑀅𑀥𑀺𑀪𑀯𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸𑀢𑀺 𑀓𑀸𑀬𑀕𑀢𑀸𑀬 𑀲𑀢𑀺𑀬𑀸 𑀲𑀼𑀧𑀝𑁆𑀞𑀺𑀢𑀸𑀬. 𑀦 𑀫𑀁 𑀢𑀣𑀸 𑀢𑀲𑁆𑀫𑀺𑀁 𑀲𑀫𑀬𑁂𑀢𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀫𑀁 𑀬𑀣𑀸 𑀧𑀼𑀩𑁆𑀩𑁂, 𑀦 𑀢𑀣𑀸 𑀮𑁄𑀪𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀺𑀲𑀳𑀦𑁆𑀢𑀻𑀢𑀺 𑀧𑀤𑀲𑁆𑀲 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺𑀧𑀺 𑀅𑀢𑁆𑀣𑁄𑀬𑁂𑀯. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀢𑀬𑁄 𑀓𑀸𑀬𑀸 𑀓𑀣𑀺𑀢𑀸. 𑀓𑀣𑀁? ‘‘𑀇𑀫𑀫𑁂𑀯 𑀓𑀸𑀬’’𑀦𑁆𑀢𑀺 𑀏𑀢𑁆𑀣 𑀳𑀺 𑀓𑀭𑀚𑀓𑀸𑀬𑁄 𑀓𑀣𑀺𑀢𑁄, ‘‘𑀪𑀸𑀯𑀺𑀢𑀓𑀸𑀬𑁄’’𑀢𑀺 𑀏𑀢𑁆𑀣 𑀧𑀜𑁆𑀘𑀤𑁆𑀯𑀸𑀭𑀺𑀓𑀓𑀸𑀬𑁄, ‘‘𑀭𑀓𑁆𑀔𑀺𑀢𑁂𑀦𑁂𑀯 𑀓𑀸𑀬𑁂𑀦𑀸’’𑀢𑀺 𑀏𑀢𑁆𑀣 𑀘𑁄𑀧𑀦𑀓𑀸𑀬𑁄, 𑀓𑀸𑀬𑀯𑀺𑀜𑁆𑀜𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀘𑀫𑀁 𑀉𑀢𑁆𑀢𑀸𑀦𑀫𑁂𑀯.

𑁬. 𑀖𑁄𑀲𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁯. 𑀙𑀝𑁆𑀞𑁂 𑀭𑀽𑀧𑀸 𑀘 𑀫𑀦𑀸𑀧𑀸𑀢𑀺 𑀭𑀽𑀧𑀸 𑀘 𑀫𑀦𑀸𑀧𑀸 𑀲𑀁𑀯𑀺𑀚𑁆𑀚𑀦𑁆𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀜𑁆𑀘𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀜𑁆𑀘 𑀲𑀁𑀯𑀺𑀚𑁆𑀚𑀢𑀺. 𑀲𑀼𑀔𑀯𑁂𑀤𑀦𑀺𑀬𑀁 𑀨𑀲𑁆𑀲𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀚𑀯𑀦𑀓𑀸𑀮𑁂 𑀲𑀼𑀔𑀯𑁂𑀤𑀦𑀸𑀬 𑀧𑀘𑁆𑀘𑀬𑀪𑀽𑀢𑀁 𑀨𑀲𑁆𑀲𑀁. 𑀲𑀼𑀔𑀸 𑀯𑁂𑀤𑀦𑀸𑀢𑀺 𑀏𑀓𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀚𑀯𑀦𑀯𑀲𑁂𑀦 𑀲𑀼𑀔𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀢𑁂𑀯𑀻𑀲𑀢𑀺 𑀥𑀸𑀢𑀼𑀬𑁄 𑀓𑀣𑀺𑀢𑀸. 𑀓𑀣𑀁? 𑀏𑀢𑁆𑀣 𑀳𑀺 𑀘𑀓𑁆𑀔𑀼𑀧𑀲𑀸𑀤𑁄 𑀘𑀓𑁆𑀔𑀼𑀥𑀸𑀢𑀼, 𑀢𑀲𑁆𑀲 𑀆𑀭𑀫𑁆𑀫𑀡𑀁 𑀭𑀽𑀧𑀥𑀸𑀢𑀼, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀥𑀸𑀢𑀼, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀲𑀳𑀚𑀸𑀢𑀸 𑀢𑀬𑁄 𑀔𑀦𑁆𑀥𑀸 𑀥𑀫𑁆𑀫𑀥𑀸𑀢𑀼, 𑀏𑀯𑀁 𑀧𑀜𑁆𑀘𑀲𑀼 𑀤𑁆𑀯𑀸𑀭𑁂𑀲𑀼 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀯𑀲𑁂𑀦 𑀯𑀻𑀲𑀢𑀺. 𑀫𑀦𑁄𑀤𑁆𑀯𑀸𑀭𑁂 ‘‘𑀫𑀦𑁄𑀥𑀸𑀢𑀽’’𑀢𑀺 𑀆𑀯𑀚𑁆𑀚𑀦𑀘𑀺𑀢𑁆𑀢𑀁 𑀕𑀳𑀺𑀢𑀁, 𑀆𑀭𑀫𑁆𑀫𑀡𑀜𑁆𑀘𑁂𑀯 𑀳𑀤𑀬𑀯𑀢𑁆𑀣𑀼 𑀘 𑀥𑀫𑁆𑀫𑀥𑀸𑀢𑀼, 𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀢𑀺 𑀏𑀯𑀁 𑀢𑁂𑀯𑀻𑀲𑀢𑀺 𑀳𑁄𑀦𑁆𑀢𑀺. 𑀏𑀯𑀁 𑀢𑁂𑀯𑀻𑀲𑀢𑀺𑀬𑀸 𑀥𑀸𑀢𑀽𑀦𑀁 𑀯𑀲𑁂𑀦 𑀥𑀸𑀢𑀼𑀦𑀸𑀦𑀢𑁆𑀢𑀁 𑀯𑀼𑀢𑁆𑀢𑀁 𑀪𑀕𑀯𑀢𑀸𑀢𑀺 𑀤𑀲𑁆𑀲𑁂𑀢𑀺.

𑁭-𑁮. 𑀳𑀸𑀮𑀺𑀤𑁆𑀤𑀺𑀓𑀸𑀦𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁩𑁦-𑁧𑁩𑁧. 𑀲𑀢𑁆𑀢𑀫𑁂 𑀫𑀦𑀸𑀧𑀁 𑀇𑀢𑁆𑀣𑁂𑀢𑀦𑁆𑀢𑀺 𑀧𑀚𑀸𑀦𑀸𑀢𑀻𑀢𑀺 𑀬𑀁 𑀅𑀦𑁂𑀦 𑀫𑀦𑀸𑀧𑀁 𑀭𑀽𑀧𑀁 𑀤𑀺𑀝𑁆𑀞𑀁, 𑀢𑀁 𑀇𑀢𑁆𑀣𑁂𑀢𑀦𑁆𑀢𑀺 𑀏𑀯𑀫𑁂𑀢𑀁 𑀫𑀦𑀸𑀧𑀫𑁂𑀯 𑀢𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀲𑀼𑀔𑀯𑁂𑀤𑀦𑀺𑀬𑀜𑁆𑀘 𑀨𑀲𑁆𑀲𑀁 𑀧𑀝𑀺𑀘𑁆𑀘𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀜𑁆𑀘𑁂𑀯, 𑀬𑁄 𑀘 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀯𑀸 𑀅𑀦𑀦𑁆𑀢𑀭𑀓𑁄𑀝𑀺𑀬𑀸 𑀯𑀸 𑀲𑀫𑀦𑀦𑁆𑀢𑀭𑀓𑁄𑀝𑀺𑀬𑀸 𑀯𑀸 𑀲𑀫𑁆𑀧𑀬𑀼𑀢𑁆𑀢𑀓𑁄𑀝𑀺𑀬𑀸 𑀯𑀸 𑀲𑀼𑀔𑀯𑁂𑀤𑀦𑀸𑀬 𑀧𑀘𑁆𑀘𑀬𑁄 𑀨𑀲𑁆𑀲𑁄, 𑀢𑀁 𑀲𑀼𑀔𑀯𑁂𑀤𑀦𑀺𑀬𑀁 𑀨𑀲𑁆𑀲𑀜𑁆𑀘 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀯𑁂𑀤𑀦𑀸𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀇𑀢𑀺 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀲𑀼𑀢𑁆𑀢𑁂𑀲𑀼 𑀓𑀺𑀭𑀺𑀬𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀆𑀯𑀚𑁆𑀚𑀦𑀓𑀺𑀘𑁆𑀘𑀸, 𑀫𑀦𑁄𑀥𑀸𑀢𑀼𑀬𑁂𑀯 𑀯𑀸 𑀲𑀫𑀸𑀦𑀸 𑀫𑀦𑁄𑀥𑀸𑀢𑀼𑀦𑀸𑀫𑁂𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀝𑁆𑀞𑀫𑀁 𑀉𑀢𑁆𑀢𑀸𑀦𑀫𑁂𑀯.

𑁯. 𑀮𑁄𑀳𑀺𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁨. 𑀦𑀯𑀫𑁂 𑀫𑀓𑁆𑀓𑀭𑀓𑀢𑁂𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂 𑀅𑀭𑀜𑁆𑀜𑀓𑀼𑀝𑀺𑀓𑀸𑀬𑀦𑁆𑀢𑀺 𑀅𑀭𑀜𑁆𑀜𑁂 𑀓𑀢𑀸𑀬 𑀧𑀸𑀝𑀺𑀬𑁂𑀓𑁆𑀓𑀸𑀬 𑀓𑀼𑀝𑀺𑀬𑀁, 𑀦 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑀓𑀼𑀝𑀺𑀬𑀁. 𑀫𑀸𑀡𑀯𑀓𑀸𑀢𑀺 𑀬𑁂𑀧𑀺 𑀢𑀢𑁆𑀣 𑀫𑀳𑀮𑁆𑀮𑀓𑀸, 𑀢𑁂 𑀫𑀳𑀮𑁆𑀮𑀓𑀓𑀸𑀮𑁂𑀧𑀺 𑀅𑀦𑁆𑀢𑁂𑀯𑀸𑀲𑀺𑀓𑀢𑀸𑀬 𑀫𑀸𑀡𑀯𑀓𑀸𑀢𑁆𑀯𑁂𑀯 𑀯𑀼𑀢𑁆𑀢𑀸. 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀽𑀢𑀺 𑀧𑀸𑀢𑁄 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑀸𑀬𑀁 ‘‘𑀆𑀘𑀭𑀺𑀬𑀲𑁆𑀲 𑀓𑀝𑁆𑀞𑀸𑀦𑀺 𑀆𑀳𑀭𑀺𑀲𑁆𑀲𑀸𑀫𑀸’’𑀢𑀺 𑀅𑀭𑀜𑁆𑀜𑀁 𑀧𑀯𑀺𑀲𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑀸 𑀬𑁂𑀦 𑀲𑀸 𑀓𑀼𑀝𑀺𑀓𑀸, 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼. 𑀧𑀭𑀺𑀢𑁄 𑀧𑀭𑀺𑀢𑁄 𑀓𑀼𑀝𑀺𑀓𑀸𑀬𑀸𑀢𑀺 𑀢𑀲𑁆𑀲𑀸 𑀓𑀼𑀝𑀺𑀓𑀸𑀬 𑀲𑀫𑀦𑁆𑀢𑀢𑁄 𑀲𑀫𑀦𑁆𑀢𑀢𑁄. 𑀲𑁂𑀮𑁂𑀬𑁆𑀬𑀓𑀸𑀦𑀻𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀺𑀝𑁆𑀞𑀺𑀁 𑀕𑀳𑁂𑀢𑁆𑀯𑀸 𑀮𑀗𑁆𑀖𑀺𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘𑀗𑁆𑀓𑀫𑀦𑀓𑀻𑀴𑀦𑀸𑀦𑀺.

𑀫𑀼𑀡𑁆𑀟𑀓𑀸𑀢𑀺𑀆𑀤𑀻𑀲𑀼 𑀫𑀼𑀡𑁆𑀟𑁂 𑀫𑀼𑀡𑁆𑀟𑀸𑀢𑀺, 𑀲𑀫𑀡𑁂 𑀘 𑀲𑀫𑀡𑀸𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑁂𑀬𑁆𑀬, 𑀇𑀫𑁂 𑀧𑀦 𑀳𑀻𑀴𑁂𑀦𑁆𑀢𑀸 ‘‘𑀫𑀼𑀡𑁆𑀟𑀓𑀸 𑀲𑀫𑀡𑀓𑀸’’𑀢𑀺 𑀆𑀳𑀁𑀲𑀼. 𑀇𑀩𑁆𑀪𑀸𑀢𑀺 𑀕𑀳𑀧𑀢𑀺𑀓𑀸. 𑀓𑀡𑁆𑀳𑀸𑀢𑀺 𑀓𑀡𑁆𑀳𑀸, 𑀓𑀸𑀴𑀓𑀸𑀢𑀺 𑀅𑀢𑁆𑀣𑁄. 𑀩𑀦𑁆𑀥𑀼𑀧𑀸𑀤𑀸𑀧𑀘𑁆𑀘𑀸𑀢𑀺 𑀏𑀢𑁆𑀣 𑀩𑀦𑁆𑀥𑀽𑀢𑀺 𑀩𑁆𑀭𑀳𑁆𑀫𑀸 𑀅𑀥𑀺𑀧𑁆𑀧𑁂𑀢𑁄. 𑀢𑀜𑁆𑀳𑀺 𑀩𑁆𑀭𑀸𑀳𑁆𑀫𑀡𑀸 𑀧𑀺𑀢𑀸𑀫𑀳𑁄𑀢𑀺 𑀯𑁄𑀳𑀭𑀦𑁆𑀢𑀺. 𑀧𑀸𑀤𑀸𑀦𑀁 𑀅𑀧𑀘𑁆𑀘𑀸 𑀧𑀸𑀤𑀸𑀧𑀘𑁆𑀘𑀸, 𑀩𑁆𑀭𑀳𑁆𑀫𑀼𑀦𑁄 𑀧𑀺𑀝𑁆𑀞𑀺𑀧𑀸𑀤𑀢𑁄 𑀚𑀸𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀲𑀁 𑀓𑀺𑀭 𑀅𑀬𑀁 𑀮𑀤𑁆𑀥𑀺 ‘‘𑀩𑁆𑀭𑀸𑀳𑁆𑀫𑀡𑀸 𑀩𑁆𑀭𑀳𑁆𑀫𑀼𑀦𑁄 𑀫𑀼𑀔𑀢𑁄 𑀦𑀺𑀓𑁆𑀔𑀦𑁆𑀢𑀸, 𑀔𑀢𑁆𑀢𑀺𑀬𑀸 𑀉𑀭𑀢𑁄, 𑀯𑁂𑀲𑁆𑀲𑀸 𑀦𑀸𑀪𑀺𑀢𑁄, 𑀲𑀼𑀤𑁆𑀤𑀸 𑀚𑀸𑀡𑀼𑀢𑁄, 𑀲𑀫𑀡𑀸 𑀧𑀺𑀝𑁆𑀞𑀺𑀧𑀸𑀤𑀢𑁄’’𑀢𑀺. 𑀪𑀭𑀢𑀓𑀸𑀦𑀦𑁆𑀢𑀺 𑀓𑀼𑀝𑀺𑀫𑁆𑀩𑀺𑀓𑀸𑀦𑀁. 𑀓𑀼𑀝𑀺𑀫𑁆𑀩𑀺𑀓𑀸 𑀳𑀺 𑀬𑀲𑁆𑀫𑀸 𑀭𑀝𑁆𑀞𑀁 𑀪𑀭𑀦𑁆𑀢𑀺, 𑀢𑀲𑁆𑀫𑀸 𑀪𑀭𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀇𑀫𑁂 𑀧𑀦 𑀧𑀭𑀺𑀪𑀯𑀁 𑀓𑀢𑁆𑀯𑀸 𑀯𑀤𑀫𑀸𑀦𑀸 ‘‘𑀪𑀭𑀢𑀓𑀸𑀦’’𑀦𑁆𑀢𑀺 𑀆𑀳𑀁𑀲𑀼.

𑀯𑀺𑀳𑀸𑀭𑀸 𑀦𑀺𑀓𑁆𑀔𑀫𑀺𑀢𑁆𑀯𑀸𑀢𑀺 ‘‘𑀭𑀢𑁆𑀢𑀺𑀝𑁆𑀞𑀓𑀸𑀧𑀭𑀺𑀘𑁆𑀙𑀦𑁆𑀦𑁂 𑀭𑀚𑀢𑀧𑀝𑁆𑀝𑀲𑀦𑁆𑀦𑀺𑀪𑀲𑀫𑀯𑀺𑀧𑁆𑀧𑀓𑀺𑀡𑁆𑀡𑀯𑀸𑀮𑀺𑀓𑁂 𑀭𑀫𑀡𑀻𑀬𑁂 𑀧𑀭𑀺𑀯𑁂𑀡𑁂 𑀓𑀝𑁆𑀞𑀓𑀮𑀸𑀧𑁂 𑀩𑀦𑁆𑀥𑀺𑀢𑁆𑀯𑀸 𑀔𑀺𑀧𑀫𑀸𑀦𑀸 𑀯𑀸𑀮𑀺𑀓𑀁 𑀆𑀮𑀼𑀴𑁂𑀢𑁆𑀯𑀸, 𑀳𑀢𑁆𑀣𑁂𑀦 𑀳𑀢𑁆𑀣𑀁 𑀆𑀤𑀸𑀬 𑀧𑀡𑁆𑀡𑀓𑀼𑀝𑀺𑀁 𑀧𑀭𑀺𑀬𑀸𑀬𑀦𑁆𑀢𑀸 ‘𑀇𑀫𑁂 𑀇𑀫𑁂𑀲𑀁 𑀪𑀭𑀢𑀓𑀸𑀦𑀁 𑀲𑀓𑁆𑀓𑀢𑀸, 𑀇𑀫𑁂 𑀇𑀫𑁂𑀲𑀁 𑀪𑀭𑀢𑀓𑀸𑀦𑀁 𑀲𑀓𑁆𑀓𑀢𑀸’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀯𑀺𑀭𑀯𑀦𑁆𑀢𑀸 𑀅𑀢𑀺𑀯𑀺𑀬 𑀇𑀫𑁂 𑀫𑀸𑀡𑀯𑀓𑀸 𑀓𑀻𑀴𑀁 𑀓𑀭𑁄𑀦𑁆𑀢𑀺, 𑀯𑀺𑀳𑀸𑀭𑁂 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀺𑀪𑀸𑀯𑀫𑁆𑀧𑀺 𑀦 𑀚𑀸𑀦𑀦𑁆𑀢𑀺, 𑀤𑀲𑁆𑀲𑁂𑀲𑁆𑀲𑀸𑀫𑀺 𑀦𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀺𑀪𑀸𑀯’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀡𑁆𑀡𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑀺.

𑀲𑀻𑀮𑀼𑀢𑁆𑀢𑀫𑀸 𑀧𑀼𑀩𑁆𑀩𑀢𑀭𑀸 𑀅𑀳𑁂𑀲𑀼𑀦𑁆𑀢𑀺 𑀕𑀼𑀡𑀯𑀦𑁆𑀢𑀸𑀦𑀁 𑀕𑀼𑀡𑁂 𑀓𑀣𑀺𑀢𑁂 𑀦𑀺𑀕𑁆𑀕𑀼𑀡𑀸𑀦𑀁 𑀕𑀼𑀡𑀸𑀪𑀸𑀯𑁄 𑀧𑀸𑀓𑀝𑁄𑀯 𑀪𑀯𑀺𑀲𑁆𑀲𑀢𑀻𑀢𑀺 𑀧𑁄𑀭𑀸𑀡𑀓𑀩𑁆𑀭𑀸𑀳𑁆𑀫𑀡𑀸𑀦𑀁 𑀕𑀼𑀡𑁂 𑀓𑀣𑁂𑀦𑁆𑀢𑁄 𑀏𑀯𑀫𑀸𑀳. 𑀢𑀢𑁆𑀣 𑀲𑀻𑀮𑀼𑀢𑁆𑀢𑀫𑀸𑀢𑀺 𑀲𑀻𑀮𑀚𑁂𑀝𑁆𑀞𑀓𑀸. 𑀲𑀻𑀮𑀜𑁆𑀳𑀺 𑀢𑁂𑀲𑀁 𑀉𑀢𑁆𑀢𑀫𑀁, 𑀦 𑀚𑀸𑀢𑀺𑀕𑁄𑀢𑁆𑀢𑀁. 𑀬𑁂 𑀧𑀼𑀭𑀸𑀡𑀁 𑀲𑀭𑀦𑁆𑀢𑀻𑀢𑀺 𑀬𑁂 𑀧𑁄𑀭𑀸𑀡𑀓𑀁 𑀩𑁆𑀭𑀸𑀳𑁆𑀫𑀡𑀥𑀫𑁆𑀫𑀁 𑀲𑀭𑀦𑁆𑀢𑀺. 𑀅𑀪𑀺𑀪𑀼𑀬𑁆𑀬 𑀓𑁄𑀥𑀦𑁆𑀢𑀺 𑀓𑁄𑀥𑀁 𑀅𑀪𑀺𑀪𑀯𑀺𑀢𑁆𑀯𑀸 𑀢𑁂𑀲𑀁 𑀤𑁆𑀯𑀸𑀭𑀸𑀦𑀺 𑀲𑀼𑀕𑀼𑀢𑁆𑀢𑀸𑀦𑀺 𑀲𑀼𑀭𑀓𑁆𑀔𑀺𑀢𑀸𑀦𑀺 𑀅𑀳𑁂𑀲𑀼𑀁. 𑀥𑀫𑁆𑀫𑁂 𑀘 𑀛𑀸𑀦𑁂 𑀘 𑀭𑀢𑀸𑀢𑀺 𑀤𑀲𑀯𑀺𑀥𑁂 𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑁂 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀛𑀸𑀦𑁂𑀲𑀼 𑀘 𑀭𑀢𑀸.

𑀏𑀯𑀁 𑀧𑁄𑀭𑀸𑀡𑀸𑀦𑀁 𑀕𑀼𑀡𑀁 𑀓𑀣𑁂𑀢𑁆𑀯𑀸 𑀅𑀣𑁂𑀢𑀭𑀳𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀸𑀦𑀁 𑀦𑀺𑀫𑁆𑀫𑀤𑁆𑀤𑁂𑀦𑁆𑀢𑁄 𑀇𑀫𑁂 𑀘 𑀯𑁄𑀓𑁆𑀓𑀫𑁆𑀫 𑀚𑀧𑀸𑀫𑀲𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑁄𑀓𑁆𑀓𑀫𑁆𑀫𑀸𑀢𑀺 𑀏𑀢𑁂𑀳𑀺 𑀕𑀼𑀡𑁂𑀳𑀺 𑀅𑀧𑀓𑁆𑀓𑀫𑀺𑀢𑁆𑀯𑀸. 𑀚𑀧𑀸𑀫𑀲𑁂𑀢𑀺 𑀫𑀬𑀁 𑀚𑀧𑀸𑀫 𑀲𑀚𑁆𑀛𑀸𑀬𑀸𑀫𑀸𑀢𑀺 𑀏𑀢𑁆𑀢𑀓𑁂𑀦𑁂𑀯 𑀩𑁆𑀭𑀸𑀳𑁆𑀫𑀡𑀫𑁆𑀳𑀸𑀢𑀺 𑀫𑀜𑁆𑀜𑀫𑀸𑀦𑀸 𑀩𑁆𑀭𑀸𑀳𑁆𑀫𑀡𑀸 𑀫𑀬𑀦𑁆𑀢𑀺 𑀇𑀫𑀺𑀦𑀸 𑀕𑁄𑀢𑁆𑀢𑁂𑀦 𑀫𑀢𑁆𑀢𑀸 𑀳𑀼𑀢𑁆𑀯𑀸 𑀯𑀺𑀲𑀫𑀁 𑀘𑀭𑀦𑁆𑀢𑀺, 𑀯𑀺𑀲𑀫𑀸𑀦𑀺 𑀓𑀸𑀬𑀓𑀫𑁆𑀫𑀸𑀤𑀻𑀦𑀺 𑀓𑀭𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀣𑀼𑀅𑀢𑁆𑀢𑀤𑀡𑁆𑀟𑀸𑀢𑀺 𑀧𑀼𑀣𑀼 𑀅𑀢𑁆𑀢𑀸 𑀤𑀡𑁆𑀟𑀸 𑀏𑀢𑁂𑀳𑀻𑀢𑀺 𑀧𑀼𑀣𑀼𑀅𑀢𑁆𑀢𑀤𑀡𑁆𑀟𑀸, 𑀕𑀳𑀺𑀢𑀦𑀸𑀦𑀸𑀯𑀺𑀥𑀤𑀡𑁆𑀟𑀸𑀢𑀺 𑀅𑀢𑁆𑀣𑁄. 𑀲𑀢𑀡𑁆𑀳𑀸𑀢𑀡𑁆𑀳𑁂𑀲𑀽𑀢𑀺 𑀲𑀢𑀡𑁆𑀳𑀦𑀺𑀢𑁆𑀢𑀡𑁆𑀳𑁂𑀲𑀼. 𑀅𑀕𑀼𑀢𑁆𑀢𑀤𑁆𑀯𑀸𑀭𑀲𑁆𑀲 𑀪𑀯𑀦𑁆𑀢𑀺 𑀫𑁄𑀖𑀸𑀢𑀺 𑀅𑀲𑀁𑀯𑀼𑀢𑀤𑁆𑀯𑀸𑀭𑀲𑁆𑀲 𑀲𑀩𑁆𑀩𑁂𑀧𑀺 𑀯𑀢𑀲𑀫𑀸𑀤𑀸𑀦𑀸 𑀫𑁄𑀖𑀸 𑀪𑀯𑀦𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀬𑀣𑀸 𑀓𑀺𑀦𑁆𑀢𑀺? 𑀲𑀼𑀧𑀺𑀦𑁂𑀯 𑀮𑀤𑁆𑀥𑀁 𑀧𑀼𑀭𑀺𑀲𑀲𑁆𑀲 𑀯𑀺𑀢𑁆𑀢𑀦𑁆𑀢𑀺 𑀬𑀣𑀸 𑀲𑀼𑀧𑀺𑀦𑁂 𑀧𑀼𑀭𑀺𑀲𑀲𑁆𑀲 𑀮𑀤𑁆𑀥𑀁 𑀫𑀡𑀺𑀫𑀼𑀢𑁆𑀢𑀸𑀤𑀺𑀦𑀸𑀦𑀸𑀯𑀺𑀥𑀁 𑀯𑀺𑀢𑁆𑀢𑀁 𑀫𑁄𑀖𑀁 𑀳𑁄𑀢𑀺, 𑀧𑀩𑀼𑀚𑁆𑀛𑀺𑀢𑁆𑀯𑀸 𑀓𑀺𑀜𑁆𑀘𑀺 𑀦 𑀧𑀲𑁆𑀲𑀢𑀺, 𑀏𑀯𑀁 𑀫𑁄𑀖𑀸 𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀅𑀦𑀸𑀲𑀓𑀸𑀢𑀺 𑀏𑀓𑀸𑀳𑀤𑁆𑀯𑀻𑀳𑀸𑀤𑀺𑀯𑀲𑁂𑀦 𑀅𑀦𑀸𑀳𑀸𑀭𑀓𑀸. 𑀣𑀡𑁆𑀟𑀺𑀮𑀲𑀸𑀬𑀺𑀓𑀸 𑀘𑀸𑀢𑀺 𑀳𑀭𑀺𑀢𑀓𑀼𑀲𑀲𑀦𑁆𑀣𑀢𑁂 𑀪𑀽𑀫𑀺𑀪𑀸𑀕𑁂 𑀲𑀬𑀦𑀁, 𑀧𑀸𑀢𑁄 𑀲𑀺𑀦𑀸𑀦𑀜𑁆𑀘 𑀢𑀬𑁄 𑀘 𑀯𑁂𑀤𑀸𑀢𑀺 𑀧𑀸𑀢𑁄𑀯 𑀉𑀤𑀓𑀁 𑀧𑀯𑀺𑀲𑀺𑀢𑁆𑀯𑀸 𑀦𑁆𑀳𑀸𑀦𑀜𑁆𑀘𑁂𑀯 𑀢𑀬𑁄 𑀘 𑀯𑁂𑀤𑀸. 𑀔𑀭𑀸𑀚𑀺𑀦𑀁 𑀚𑀝𑀸 𑀧𑀗𑁆𑀓𑁄𑀢𑀺 𑀔𑀭𑀲𑀫𑁆𑀨𑀲𑁆𑀲𑀁 𑀅𑀚𑀺𑀦𑀘𑀫𑁆𑀫𑀜𑁆𑀘𑁂𑀯 𑀚𑀝𑀸𑀓𑀮𑀸𑀧𑁄 𑀘 𑀧𑀗𑁆𑀓𑁄 𑀘, 𑀧𑀗𑁆𑀓𑁄 𑀦𑀸𑀫 𑀤𑀦𑁆𑀢𑀫𑀮𑀁. 𑀫𑀦𑁆𑀢𑀸 𑀲𑀻𑀮𑀩𑁆𑀩𑀢𑀁 𑀢𑀧𑁄𑀢𑀺 𑀫𑀦𑁆𑀢𑀸 𑀘 𑀅𑀚𑀲𑀻𑀮𑀕𑁄𑀲𑀻𑀮𑀲𑀗𑁆𑀔𑀸𑀢𑀁 𑀲𑀻𑀮𑀁 𑀅𑀚𑀯𑀢𑀕𑁄𑀯𑀢𑀲𑀗𑁆𑀔𑀸𑀢𑀁 𑀯𑀢𑀜𑁆𑀘. 𑀅𑀬𑀁 𑀇𑀤𑀸𑀦𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀢𑀧𑁄𑀢𑀺 𑀯𑀤𑀢𑀺. 𑀓𑀼𑀳𑀦𑀸 𑀯𑀗𑁆𑀓𑀤𑀡𑁆𑀟𑀸 𑀘𑀸𑀢𑀺 𑀧𑀝𑀺𑀘𑁆𑀙𑀦𑁆𑀦𑀓𑀽𑀧𑁄 𑀯𑀺𑀬 𑀧𑀝𑀺𑀘𑁆𑀙𑀦𑁆𑀦𑀤𑁄𑀲𑀁 𑀓𑁄𑀳𑀜𑁆𑀜𑀜𑁆𑀘𑁂𑀯 𑀯𑀗𑁆𑀓𑀤𑀡𑁆𑀟𑁄, 𑀘 𑀉𑀤𑀼𑀫𑁆𑀩𑀭𑀧𑀮𑀸𑀲𑀩𑁂𑀴𑀼𑀯𑀭𑀼𑀓𑁆𑀔𑀸𑀦𑀁 𑀅𑀜𑁆𑀜𑀢𑀭𑀢𑁄 𑀕𑀳𑀺𑀢𑀁 𑀯𑀗𑁆𑀓𑀤𑀡𑁆𑀟𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀉𑀤𑀓𑀸𑀘𑀫𑀦𑀸𑀦𑀺 𑀘𑀸𑀢𑀺 𑀉𑀤𑀓𑁂𑀦 𑀫𑀼𑀔𑀧𑀭𑀺𑀫𑀚𑁆𑀚𑀦𑀸𑀦𑀺. 𑀯𑀡𑁆𑀡𑀸 𑀏𑀢𑁂 𑀩𑁆𑀭𑀸𑀳𑁆𑀫𑀡𑀸𑀦𑀦𑁆𑀢𑀺 𑀏𑀢𑁂 𑀩𑁆𑀭𑀸𑀳𑁆𑀫𑀡𑀸𑀦𑀁 𑀧𑀭𑀺𑀓𑁆𑀔𑀸𑀭𑀪𑀡𑁆𑀟𑀓𑀯𑀡𑁆𑀡𑀸𑀢𑀺 𑀤𑀲𑁆𑀲𑁂𑀢𑀺. 𑀓𑀢 𑀓𑀺𑀜𑁆𑀘𑀺𑀓𑁆𑀔𑀪𑀸𑀯𑀦𑀸𑀢𑀺 𑀓𑀢𑀸 𑀓𑀺𑀜𑁆𑀘𑀺𑀓𑁆𑀔𑀪𑀸𑀯𑀦𑀸. 𑀅𑀬𑀫𑁂𑀯 𑀯𑀸 𑀧𑀸𑀞𑁄, 𑀆𑀫𑀺𑀲𑀓𑀺𑀜𑁆𑀘𑀺𑀓𑁆𑀔𑀲𑁆𑀲 𑀯𑀟𑁆𑀠𑀦𑀢𑁆𑀣𑀸𑀬 𑀓𑀢𑀦𑁆𑀢𑀺 𑀅𑀢𑁆𑀣𑁄.

𑀏𑀯𑀁 𑀏𑀢𑀭𑀳𑀺 𑀩𑁆𑀭𑀸𑀳𑁆𑀫𑀡𑀸𑀦𑀁 𑀫𑀸𑀦𑀁 𑀦𑀺𑀫𑁆𑀫𑀤𑁆𑀤𑀺𑀢𑁆𑀯𑀸 𑀧𑀼𑀦 𑀧𑁄𑀭𑀸𑀡𑀓𑀩𑁆𑀭𑀸𑀳𑁆𑀫𑀡𑀸𑀦𑀁 𑀯𑀡𑁆𑀡𑀁 𑀓𑀣𑁂𑀦𑁆𑀢𑁄 𑀘𑀺𑀢𑁆𑀢𑀜𑁆𑀘 𑀲𑀼𑀲𑀫𑀸𑀳𑀺𑀢𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀲𑀫𑀸𑀳𑀺𑀢𑀦𑁆𑀢𑀺 𑀢𑁂𑀲𑀁 𑀩𑁆𑀭𑀸𑀳𑁆𑀫𑀡𑀸𑀦𑀁 𑀘𑀺𑀢𑁆𑀢𑀁 𑀉𑀧𑀘𑀸𑀭𑀧𑁆𑀧𑀦𑀸𑀲𑀫𑀸𑀥𑀻𑀳𑀺 𑀲𑀼𑀲𑀫𑀸𑀳𑀺𑀢𑀁 𑀅𑀳𑁄𑀲𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀔𑀺𑀮𑀦𑁆𑀢𑀺 𑀫𑀼𑀤𑀼 𑀅𑀣𑀤𑁆𑀥𑀁. 𑀲𑁄 𑀫𑀕𑁆𑀕𑁄 𑀩𑁆𑀭𑀳𑁆𑀫𑀧𑀢𑁆𑀢𑀺𑀬𑀸𑀢𑀺 𑀲𑁄 𑀲𑁂𑀝𑁆𑀞𑀧𑀢𑁆𑀢𑀺𑀬𑀸 𑀫𑀕𑁆𑀕𑁄, 𑀢𑀼𑀫𑁆𑀳𑁂 𑀧𑀦 𑀓𑀺𑀁 𑀩𑁆𑀭𑀸𑀳𑁆𑀫𑀡𑀸 𑀦𑀸𑀫𑀸𑀢𑀺 𑀤𑀻𑀧𑁂𑀦𑁆𑀢𑁄 𑀏𑀯𑀫𑀸𑀳.

𑀆𑀕𑀫𑀁𑀲𑀼 𑀦𑀼 𑀔𑁆𑀯𑀺𑀥𑀸𑀢𑀺 𑀆𑀕𑀫𑀁𑀲𑀼 𑀦𑀼 𑀔𑁄 𑀇𑀥. 𑀅𑀥𑀺𑀫𑀼𑀘𑁆𑀘𑀢𑀻𑀢𑀺 𑀓𑀺𑀮𑁂𑀲𑀯𑀲𑁂𑀦 𑀅𑀥𑀺𑀫𑀼𑀢𑁆𑀢𑁄 𑀕𑀺𑀤𑁆𑀥𑁄 𑀳𑁄𑀢𑀺. 𑀩𑁆𑀬𑀸𑀧𑀚𑁆𑀚𑀢𑀻𑀢𑀺 𑀩𑁆𑀬𑀸𑀧𑀸𑀤𑀯𑀲𑁂𑀦 𑀧𑀽𑀢𑀺𑀘𑀺𑀢𑁆𑀢𑀁 𑀳𑁄𑀢𑀺. 𑀧𑀭𑀺𑀢𑁆𑀢𑀘𑁂𑀢𑀲𑁄𑀢𑀺 𑀅𑀦𑀼𑀧𑀝𑁆𑀞𑀺𑀢𑀲𑀢𑀺𑀢𑀸𑀬 𑀲𑀁𑀓𑀺𑀮𑁂𑀲𑀘𑀺𑀢𑁆𑀢𑁂𑀦 𑀧𑀭𑀺𑀢𑁆𑀢𑀘𑀺𑀢𑁆𑀢𑁄. 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀨𑀮𑀲𑀫𑀸𑀥𑀺𑀁. 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀦𑁆𑀢𑀺 𑀨𑀮𑀧𑀜𑁆𑀜𑀁. 𑀅𑀧𑁆𑀧𑀫𑀸𑀡𑀘𑁂𑀢𑀲𑁄𑀢𑀺 𑀉𑀧𑀝𑁆𑀞𑀺𑀢𑀲𑀢𑀺𑀢𑀸𑀬 𑀦𑀺𑀓𑁆𑀓𑀺𑀮𑁂𑀲𑀘𑀺𑀢𑁆𑀢𑁂𑀦 𑀅𑀧𑁆𑀧𑀫𑀸𑀡𑀘𑀺𑀢𑁆𑀢𑁄.

𑁧𑁦. 𑀯𑁂𑀭𑀳𑀘𑁆𑀘𑀸𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁩. 𑀤𑀲𑀫𑁂 𑀓𑀸𑀫𑀡𑁆𑀟𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀬𑀕𑁆𑀖𑁂𑀢𑀺 𑀘𑁄𑀤𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀕𑀳𑀧𑀢𑀺𑀯𑀕𑁆𑀕𑁄 𑀢𑁂𑀭𑀲𑀫𑁄.

𑁧𑁪. 𑀤𑁂𑀯𑀤𑀳𑀯𑀕𑁆𑀕𑁄

𑁧. 𑀤𑁂𑀯𑀤𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁪. 𑀤𑁂𑀯𑀤𑀳𑀯𑀕𑁆𑀕𑀲𑁆𑀲 𑀧𑀞𑀫𑁂 𑀤𑁂𑀯𑀤𑀳𑀦𑁆𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑁂𑀦 𑀮𑀤𑁆𑀥𑀦𑀸𑀫𑁄 𑀦𑀺𑀕𑀫𑁄. 𑀫𑀦𑁄𑀭𑀫𑀸𑀢𑀺 𑀫𑀦𑀁 𑀭𑀫𑀬𑀦𑁆𑀢𑀸, 𑀫𑀦𑀸𑀧𑀸𑀢𑀺 𑀅𑀢𑁆𑀣𑁄. 𑀅𑀫𑀦𑁄𑀭𑀫𑀸𑀢𑀺 𑀅𑀫𑀦𑀸𑀧𑀸.

𑁨. 𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁫. 𑀤𑀼𑀢𑀺𑀬𑁂 𑀙𑀨𑀲𑁆𑀲𑀸𑀬𑀢𑀦𑀺𑀓𑀸 𑀦𑀸𑀫𑀸𑀢𑀺 𑀯𑀺𑀲𑀼𑀁 𑀙𑀨𑀲𑁆𑀲𑀸𑀬𑀢𑀦𑀺𑀓𑀸 𑀦𑀸𑀫 𑀦𑀺𑀭𑀬𑀸 𑀦𑀢𑁆𑀣𑀺. 𑀲𑀩𑁆𑀩𑁂𑀲𑀼𑀧𑀺 𑀳𑀺 𑀏𑀓𑀢𑀺𑀁𑀲𑀫𑀳𑀸𑀦𑀺𑀭𑀬𑁂𑀲𑀼 𑀙𑀤𑁆𑀯𑀸𑀭𑀨𑀲𑁆𑀲𑀸𑀬𑀢𑀦𑀧𑀜𑁆𑀜𑀢𑁆𑀢𑀺 𑀳𑁄𑀢𑀺𑀬𑁂𑀯. 𑀇𑀤𑀁 𑀧𑀦 𑀅𑀯𑀻𑀘𑀺𑀫𑀳𑀸𑀦𑀺𑀭𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀕𑁆𑀕𑀸𑀢𑀺 𑀇𑀥𑀸𑀧𑀺 𑀢𑀸𑀯𑀢𑀺𑀁𑀲𑀧𑀼𑀭𑀫𑁂𑀯 𑀅𑀥𑀺𑀧𑁆𑀧𑁂𑀢𑀁. 𑀓𑀸𑀫𑀸𑀯𑀘𑀭𑀤𑁂𑀯𑀮𑁄𑀓𑁂 𑀧𑀦 𑀏𑀓𑀲𑁆𑀫𑀺𑀫𑁆𑀧𑀺 𑀙𑀨𑀲𑁆𑀲𑀸𑀬𑀢𑀦𑀧𑀜𑁆𑀜𑀢𑁆𑀢𑀺𑀬𑀸 𑀅𑀪𑀸𑀯𑁄 𑀦𑀸𑀫 𑀦𑀢𑁆𑀣𑀺. 𑀇𑀫𑀺𑀦𑀸 𑀓𑀺𑀁 𑀤𑀻𑀧𑁂𑀢𑀺? 𑀦𑀺𑀭𑀬𑁂 𑀏𑀓𑀦𑁆𑀢𑀤𑀼𑀓𑁆𑀔𑀲𑀫𑀧𑁆𑀧𑀺𑀢𑀪𑀸𑀯𑁂𑀦, 𑀤𑁂𑀯𑀮𑁄𑀓𑁂 𑀘 𑀏𑀓𑀦𑁆𑀢𑀲𑀼𑀔𑀲𑀫𑀧𑁆𑀧𑀺𑀢𑀢𑁆𑀢𑀸 𑀏𑀓𑀦𑁆𑀢𑀔𑀺𑀟𑁆𑀟𑀸𑀭𑀢𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀧𑀫𑀸𑀤𑁂𑀦 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀯𑀲𑀺𑀢𑀼𑀁 𑀦 𑀲𑀓𑁆𑀓𑀸. 𑀫𑀦𑀼𑀲𑁆𑀲𑀮𑁄𑀓𑁄 𑀧𑀦 𑀯𑁄𑀓𑀺𑀡𑁆𑀡𑀲𑀼𑀔𑀤𑀼𑀓𑁆𑀔𑁄, 𑀇𑀥𑁂𑀯 𑀅𑀧𑀸𑀬𑁄𑀧𑀺 𑀲𑀕𑁆𑀕𑁄𑀧𑀺 𑀧𑀜𑁆𑀜𑀸𑀬𑀢𑀺. 𑀅𑀬𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀓𑀫𑁆𑀫𑀪𑀽𑀫𑀺 𑀦𑀸𑀫, 𑀲𑀸 𑀢𑀼𑀫𑁆𑀳𑁂𑀳𑀺 𑀮𑀤𑁆𑀥𑀸. 𑀢𑀲𑁆𑀫𑀸 𑀬𑁂 𑀯𑁄 𑀇𑀫𑁂 𑀫𑀸𑀦𑀼𑀲𑁆𑀲𑀓𑀸 𑀔𑀦𑁆𑀥𑀸 𑀮𑀤𑁆𑀥𑀸, 𑀢𑁂 𑀯𑁄 𑀮𑀸𑀪𑀸. 𑀬𑀜𑁆𑀘 𑀯𑁄 𑀇𑀤𑀁 𑀫𑀦𑀼𑀲𑁆𑀲𑀢𑁆𑀢𑀁 𑀮𑀤𑁆𑀥𑀁, 𑀧𑀝𑀺𑀮𑀤𑁆𑀥𑁄 𑀯𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀲𑁆𑀲 𑀔𑀡𑁄 𑀲𑀫𑀬𑁄𑀢𑀺. 𑀯𑀼𑀢𑁆𑀢𑀫𑁆𑀧𑀺 𑀳𑁂𑀢𑀁 𑀧𑁄𑀭𑀸𑀡𑁂𑀳𑀺 𑁋

‘‘𑀅𑀬𑀁 𑀓𑀫𑁆𑀫𑀪𑀽𑀫𑀺 𑀇𑀥 𑀫𑀕𑁆𑀕𑀪𑀸𑀯𑀦𑀸,

𑀞𑀸𑀦𑀸𑀦𑀺 𑀲𑀁𑀯𑁂𑀚𑀦𑀺𑀬𑀸 𑀩𑀳𑀽 𑀇𑀥;

𑀲𑀁𑀯𑁂𑀕𑀲𑀁𑀯𑁂𑀚𑀦𑀺𑀬𑁂𑀲𑀼 𑀯𑀢𑁆𑀣𑀼𑀲𑀼,

𑀲𑀁𑀯𑁂𑀕𑀚𑀸𑀢𑁄𑀯 𑀧𑀬𑀼𑀜𑁆𑀘 𑀬𑁄𑀦𑀺𑀲𑁄’’𑀢𑀺.

𑁩. 𑀧𑀞𑀫𑀭𑀽𑀧𑀸𑀭𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁬. 𑀢𑀢𑀺𑀬𑁂 𑀭𑀽𑀧𑀲𑀫𑁆𑀫𑀼𑀤𑀺𑀢𑀸𑀢𑀺 𑀭𑀽𑀧𑁂 𑀲𑀫𑁆𑀫𑀼𑀤𑀺𑀢𑀸 𑀧𑀫𑁄𑀤𑀺𑀢𑀸. 𑀤𑀼𑀓𑁆𑀔𑀸𑀢𑀺 𑀤𑀼𑀓𑁆𑀔𑀺𑀢𑀸. 𑀲𑀼𑀔𑁄𑀢𑀺 𑀦𑀺𑀩𑁆𑀩𑀸𑀦𑀲𑀼𑀔𑁂𑀦 𑀲𑀼𑀔𑀺𑀢𑁄. 𑀓𑁂𑀯𑀮𑀸𑀢𑀺 𑀲𑀓𑀮𑀸. 𑀬𑀸𑀯𑀢𑀢𑁆𑀣𑀻𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑀢𑁆𑀢𑀓𑀸 𑀅𑀢𑁆𑀣𑀻𑀢𑀺 𑀯𑀼𑀘𑁆𑀘𑀢𑀺. 𑀏𑀢𑁂 𑀯𑁄𑀢𑀺 𑀏𑀢𑁆𑀣 𑀯𑁄-𑀓𑀸𑀭𑁄 𑀦𑀺𑀧𑀸𑀢𑀫𑀢𑁆𑀢𑀁. 𑀧𑀘𑁆𑀘𑀦𑀻𑀓𑀫𑀺𑀤𑀁 𑀳𑁄𑀢𑀺, 𑀲𑀩𑁆𑀩𑀮𑁄𑀓𑁂𑀦 𑀧𑀲𑁆𑀲𑀢𑀦𑁆𑀢𑀺 𑀬𑀁 𑀇𑀤𑀁 𑀧𑀲𑁆𑀲𑀦𑁆𑀢𑀸𑀦𑀁 𑀧𑀡𑁆𑀟𑀺𑀢𑀸𑀦𑀁 𑀤𑀲𑁆𑀲𑀦𑀁, 𑀢𑀁 𑀲𑀩𑁆𑀩𑀮𑁄𑀓𑁂𑀦 𑀧𑀘𑁆𑀘𑀦𑀻𑀓𑀁 𑀳𑁄𑀢𑀺 𑀯𑀺𑀭𑀼𑀤𑁆𑀥𑀁. 𑀮𑁄𑀓𑁄 𑀳𑀺 𑀧𑀜𑁆𑀘𑀓𑁆𑀔𑀦𑁆𑀥𑁂 𑀦𑀺𑀘𑁆𑀘𑀸 𑀲𑀼𑀔𑀸 𑀅𑀢𑁆𑀢𑀸 𑀲𑀼𑀪𑀸𑀢𑀺 𑀫𑀜𑁆𑀜𑀢𑀺, 𑀧𑀡𑁆𑀟𑀺𑀢𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀅𑀦𑀢𑁆𑀢𑀸 𑀅𑀲𑀼𑀪𑀸𑀢𑀺. 𑀲𑀼𑀔𑀢𑁄 𑀆𑀳𑀽𑀢𑀺 𑀲𑀼𑀔𑀦𑁆𑀢𑀺 𑀓𑀣𑁂𑀦𑁆𑀢𑀺. 𑀲𑀼𑀔𑀢𑁄 𑀯𑀺𑀤𑀽𑀢𑀺 𑀲𑀼𑀔𑀦𑁆𑀢𑀺 𑀚𑀸𑀦𑀦𑁆𑀢𑀺. 𑀲𑀩𑁆𑀩𑀫𑁂𑀢𑀁 𑀦𑀺𑀩𑁆𑀩𑀸𑀦𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀲𑀫𑁆𑀫𑀽𑀴𑁆𑀳𑁂𑀢𑁆𑀣𑀸𑀢𑀺 𑀏𑀢𑁆𑀣 𑀦𑀺𑀩𑁆𑀩𑀸𑀦𑁂 𑀲𑀫𑁆𑀫𑀽𑀴𑁆𑀳𑀸. 𑀅𑀯𑀺𑀤𑁆𑀤𑀲𑀽𑀢𑀺 𑀩𑀸𑀮𑀸. 𑀲𑀩𑁆𑀩𑁂𑀧𑀺 𑀳𑀺 𑀙𑀦𑁆𑀦𑀯𑀼𑀢𑀺𑀧𑀸𑀲𑀡𑁆𑀟𑀺𑀦𑁄 ‘‘𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀸’’𑀢𑀺 𑀲𑀜𑁆𑀜𑀺𑀦𑁄 𑀳𑁄𑀦𑁆𑀢𑀺, 𑀢𑁂 𑀧𑀦 ‘‘𑀦𑀺𑀩𑁆𑀩𑀸𑀦𑀁 𑀦𑀸𑀫 𑀇𑀤’’𑀦𑁆𑀢𑀺𑀧𑀺 𑀦 𑀚𑀸𑀦𑀦𑁆𑀢𑀺. 𑀦𑀺𑀯𑀼𑀢𑀸𑀦𑀦𑁆𑀢𑀺 𑀓𑀺𑀮𑁂𑀲𑀦𑀻𑀯𑀭𑀡𑁂𑀦 𑀦𑀺𑀯𑀼𑀢𑀸𑀦𑀁 𑀧𑀭𑀺𑀬𑁄𑀦𑀤𑁆𑀥𑀸𑀦𑀁. 𑀅𑀦𑁆𑀥𑀓𑀸𑀭𑁄 𑀅𑀧𑀲𑁆𑀲𑀢𑀦𑁆𑀢𑀺 𑀅𑀧𑀲𑁆𑀲𑀦𑁆𑀢𑀸𑀦𑀁 𑀅𑀦𑁆𑀥𑀓𑀸𑀭𑁄 𑀳𑁄𑀢𑀺. 𑀓𑀺𑀁 𑀢𑀁 𑀏𑀯𑀁 𑀳𑁄𑀢𑀺? 𑀦𑀺𑀩𑁆𑀩𑀸𑀦𑀁 𑀯𑀸 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀁 𑀯𑀸 𑀅𑀧𑀲𑁆𑀲𑀦𑁆𑀢𑀸𑀦𑀜𑁆𑀳𑀺 𑀩𑀸𑀮𑀸𑀦𑀁 𑀦𑀺𑀩𑁆𑀩𑀸𑀦𑀫𑁆𑀧𑀺 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀫𑁆𑀧𑀺 𑀓𑀸𑀴𑀫𑁂𑀖𑀅𑀯𑀘𑁆𑀙𑀸𑀤𑀺𑀢𑀁 𑀯𑀺𑀬 𑀘𑀦𑁆𑀤𑀫𑀡𑁆𑀟𑀮𑀁 𑀓𑀝𑀸𑀳𑁂𑀦 𑀧𑀝𑀺𑀓𑀼𑀚𑁆𑀚𑀺𑀢𑀧𑀢𑁆𑀢𑁄 𑀯𑀺𑀬 𑀘 𑀦𑀺𑀘𑁆𑀘𑀓𑀸𑀮𑀁 𑀢𑀫𑁄 𑀘𑁂𑀯 𑀅𑀦𑁆𑀥𑀓𑀸𑀭𑁄 𑀘 𑀲𑀫𑁆𑀧𑀚𑁆𑀚𑀢𑀺.

𑀲𑀢𑀜𑁆𑀘 𑀯𑀺𑀯𑀝𑀁 𑀳𑁄𑀢𑀺, 𑀆𑀮𑁄𑀓𑁄 𑀧𑀲𑁆𑀲𑀢𑀸𑀫𑀺𑀯𑀸𑀢𑀺 𑀲𑀢𑀜𑁆𑀘 𑀲𑀧𑁆𑀧𑀼𑀭𑀺𑀲𑀸𑀦𑀁 𑀧𑀜𑁆𑀜𑀸𑀤𑀲𑁆𑀲𑀦𑁂𑀦 𑀧𑀲𑁆𑀲𑀦𑁆𑀢𑀸𑀦𑀁 𑀦𑀺𑀩𑁆𑀩𑀸𑀦𑀁 𑀆𑀮𑁄𑀓𑁄 𑀯𑀺𑀬 𑀯𑀺𑀯𑀝𑀁 𑀳𑁄𑀢𑀺. 𑀲𑀦𑁆𑀢𑀺𑀓𑁂 𑀦 𑀯𑀺𑀚𑀸𑀦𑀦𑁆𑀢𑀺, 𑀫𑀕𑀸 𑀥𑀫𑁆𑀫𑀲𑁆𑀲 𑀅𑀓𑁄𑀯𑀺𑀤𑀸𑀢𑀺 𑀬𑀁 𑀅𑀢𑁆𑀢𑀦𑁄 𑀲𑀭𑀻𑀭𑁂 𑀓𑁂𑀲𑁂 𑀯𑀸 𑀮𑁄𑀫𑀸𑀤𑀻𑀲𑀼 𑀯𑀸 𑀅𑀜𑁆𑀜𑀢𑀭𑀓𑁄𑀝𑁆𑀞𑀸𑀲𑀁 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑀦𑁆𑀢𑀭𑀫𑁂𑀯 𑀅𑀥𑀺𑀕𑀦𑁆𑀢𑀩𑁆𑀩𑀢𑁄 𑀅𑀢𑁆𑀢𑀦𑁄 𑀯𑀸 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑀫𑀕𑁆𑀕𑀢𑁄 𑀲𑀦𑁆𑀢𑀺𑀓𑁂 𑀦𑀺𑀩𑁆𑀩𑀸𑀦𑀁. 𑀢𑀁 𑀏𑀯𑀁 𑀲𑀦𑁆𑀢𑀺𑀓𑁂 𑀲𑀫𑀸𑀦𑀫𑁆𑀧𑀺 𑀫𑀕𑁆𑀕𑀪𑀽𑀢𑀸 𑀚𑀦𑀸 𑀫𑀕𑁆𑀕𑀸𑀫𑀕𑁆𑀕𑀥𑀫𑁆𑀫𑀲𑁆𑀲 𑀘𑀢𑀼𑀲𑀘𑁆𑀘𑀥𑀫𑁆𑀫𑀲𑁆𑀲 𑀯𑀸 𑀅𑀓𑁄𑀯𑀺𑀤𑀸 𑀦 𑀚𑀸𑀦𑀦𑁆𑀢𑀺.

𑀫𑀸𑀭𑀥𑁂𑀬𑁆𑀬𑀸𑀦𑀼𑀧𑀦𑁆𑀦𑁂𑀳𑀻𑀢𑀺 𑀢𑁂𑀪𑀽𑀫𑀓𑀯𑀝𑁆𑀝𑀁 𑀫𑀸𑀭𑀲𑁆𑀲 𑀦𑀺𑀯𑀸𑀲𑀝𑁆𑀞𑀸𑀦𑀁 𑀅𑀦𑀼𑀧𑀦𑁆𑀦𑁂𑀳𑀺. 𑀓𑁄 𑀦𑀼 𑀅𑀜𑁆𑀜𑀢𑁆𑀭 𑀅𑀭𑀺𑀬𑁂𑀪𑀻𑀢𑀺 𑀞𑀧𑁂𑀢𑁆𑀯𑀸 𑀅𑀭𑀺𑀬𑁂 𑀓𑁄 𑀦𑀼 𑀅𑀜𑁆𑀜𑁄 𑀦𑀺𑀩𑁆𑀩𑀸𑀦𑀧𑀤𑀁 𑀚𑀸𑀦𑀺𑀢𑀼𑀁 𑀅𑀭𑀳𑀢𑀺. 𑀲𑀫𑁆𑀫𑀤𑀜𑁆𑀜𑀸𑀬 𑀧𑀭𑀺𑀦𑀺𑀩𑁆𑀩𑀦𑁆𑀢𑀻𑀢𑀺 𑀅𑀭𑀳𑀢𑁆𑀢𑀧𑀜𑁆𑀜𑀸𑀬 𑀲𑀫𑁆𑀫𑀸 𑀚𑀸𑀦𑀺𑀢𑁆𑀯𑀸 𑀅𑀦𑀦𑁆𑀢𑀭𑀫𑁂𑀯 𑀅𑀦𑀸𑀲𑀯𑀸 𑀳𑀼𑀢𑁆𑀯𑀸 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀦𑁆𑀢𑀺. 𑀅𑀣 𑀯𑀸 𑀲𑀫𑁆𑀫𑀤𑀜𑁆𑀜𑀸𑀬 𑀅𑀦𑀸𑀲𑀯𑀸 𑀳𑀼𑀢𑁆𑀯𑀸 𑀅𑀦𑁆𑀢𑁂 𑀔𑀦𑁆𑀥𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺.

𑁪-𑁧𑁨. 𑀤𑀼𑀢𑀺𑀬𑀭𑀽𑀧𑀸𑀭𑀸𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁩𑁭-𑁧𑁪𑁫. 𑀘𑀢𑀼𑀢𑁆𑀣𑀁 𑀲𑀼𑀤𑁆𑀥𑀺𑀓𑀁 𑀓𑀢𑁆𑀯𑀸 𑀤𑁂𑀲𑀺𑀬𑀫𑀸𑀦𑁂 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑁂𑀦 𑀯𑀼𑀢𑁆𑀢𑀁. 𑀧𑀜𑁆𑀘𑀫𑀸𑀤𑀻𑀦𑀺 𑀢𑀣𑀸 𑀢𑀣𑀸 𑀩𑀼𑀚𑁆𑀛𑀦𑁆𑀢𑀸𑀦𑀁 𑀅𑀚𑁆𑀛𑀸𑀲𑀬𑁂𑀦 𑀯𑀼𑀢𑁆𑀢𑀸𑀦𑀺. 𑀅𑀢𑁆𑀣𑁄 𑀧𑀦 𑀢𑁂𑀲𑀁 𑀧𑀸𑀓𑀝𑁄𑀬𑁂𑀯𑀸𑀢𑀺.

𑀤𑁂𑀯𑀤𑀳𑀯𑀕𑁆𑀕𑁄 𑀘𑀼𑀤𑁆𑀤𑀲𑀫𑁄.

𑁧𑁫. 𑀦𑀯𑀧𑀼𑀭𑀸𑀡𑀯𑀕𑁆𑀕𑁄

𑁧. 𑀓𑀫𑁆𑀫𑀦𑀺𑀭𑁄𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁬. 𑀦𑀯𑀧𑀼𑀭𑀸𑀡𑀯𑀕𑁆𑀕𑀲𑁆𑀲 𑀧𑀞𑀫𑁂 𑀦𑀯𑀧𑀼𑀭𑀸𑀡𑀸𑀦𑀻𑀢𑀺 𑀦𑀯𑀸𑀦𑀺 𑀘 𑀧𑀼𑀭𑀸𑀡𑀸𑀦𑀺 𑀘. 𑀘𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀧𑀼𑀭𑀸𑀡𑀓𑀫𑁆𑀫𑀦𑁆𑀢𑀺 𑀦 𑀘𑀓𑁆𑀔𑀼 𑀧𑀼𑀭𑀸𑀡𑀁, 𑀓𑀫𑁆𑀫𑀫𑁂𑀯 𑀧𑀼𑀭𑀸𑀡𑀁, 𑀓𑀫𑁆𑀫𑀢𑁄 𑀧𑀦 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀧𑀘𑁆𑀘𑀬𑀦𑀸𑀫𑁂𑀦 𑀏𑀯𑀁 𑀯𑀼𑀢𑁆𑀢𑀁. 𑀅𑀪𑀺𑀲𑀗𑁆𑀔𑀢𑀦𑁆𑀢𑀺 𑀧𑀘𑁆𑀘𑀬𑁂𑀳𑀺 𑀅𑀪𑀺𑀲𑀫𑀸𑀕𑀦𑁆𑀢𑁆𑀯𑀸 𑀓𑀢𑀁. 𑀅𑀪𑀺𑀲𑀜𑁆𑀘𑁂𑀢𑀬𑀺𑀢𑀦𑁆𑀢𑀺 𑀘𑁂𑀢𑀦𑀸𑀬 𑀧𑀓𑀧𑁆𑀧𑀺𑀢𑀁. 𑀯𑁂𑀤𑀦𑀺𑀬𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀯𑁂𑀤𑀦𑀸𑀬 𑀯𑀢𑁆𑀣𑀽𑀢𑀺 𑀧𑀲𑁆𑀲𑀺𑀢𑀩𑁆𑀩𑀁. 𑀦𑀺𑀭𑁄𑀥𑀸 𑀯𑀺𑀫𑀼𑀢𑁆𑀢𑀺𑀁 𑀨𑀼𑀲𑀢𑀻𑀢𑀺 𑀇𑀫𑀲𑁆𑀲 𑀢𑀺𑀯𑀺𑀥𑀲𑁆𑀲 𑀓𑀫𑁆𑀫𑀲𑁆𑀲 𑀦𑀺𑀭𑁄𑀥𑁂𑀦 𑀯𑀺𑀫𑀼𑀢𑁆𑀢𑀺𑀁 𑀨𑀼𑀲𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀢𑀲𑁆𑀲𑀸 𑀯𑀺𑀫𑀼𑀢𑁆𑀢𑀺𑀬𑀸 𑀆𑀭𑀫𑁆𑀫𑀡𑀪𑀽𑀢𑁄 𑀦𑀺𑀭𑁄𑀥𑁄 𑀓𑀫𑁆𑀫𑀦𑀺𑀭𑁄𑀥𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸.

𑁨-𑁫. 𑀅𑀦𑀺𑀘𑁆𑀘𑀦𑀺𑀩𑁆𑀩𑀸𑀦𑀲𑀧𑁆𑀧𑀸𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁪𑁭-𑁧𑁫𑁦. 𑀤𑀼𑀢𑀺𑀬𑁂 𑀦𑀺𑀩𑁆𑀩𑀸𑀦𑀲𑀧𑁆𑀧𑀸𑀬𑀦𑁆𑀢𑀺 𑀦𑀺𑀩𑁆𑀩𑀸𑀦𑀲𑁆𑀲 𑀲𑀧𑁆𑀧𑀸𑀬𑀁 𑀉𑀧𑀓𑀸𑀭𑀧𑀝𑀺𑀧𑀤𑀁. 𑀢𑀢𑀺𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀧𑀝𑀺𑀧𑀸𑀝𑀺𑀬𑀸 𑀧𑀦 𑀘𑀢𑀽𑀲𑀼𑀧𑀺 𑀏𑀢𑁂𑀲𑀼 𑀲𑀼𑀢𑁆𑀢𑁂𑀲𑀼 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀓𑀣𑀺𑀢𑀸.

𑁬-𑁭. 𑀅𑀦𑁆𑀢𑁂𑀯𑀸𑀲𑀺𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁫𑁧-𑁧𑁫𑁨. 𑀙𑀝𑁆𑀞𑁂 𑀅𑀦𑀦𑁆𑀢𑁂𑀯𑀸𑀲𑀺𑀓𑀦𑁆𑀢𑀺 𑀅𑀦𑁆𑀢𑁄 𑀯𑀲𑀦𑀓𑀓𑀺𑀮𑁂𑀲𑀯𑀺𑀭𑀳𑀺𑀢𑀁. 𑀅𑀦𑀸𑀘𑀭𑀺𑀬𑀓𑀦𑁆𑀢𑀺 𑀆𑀘𑀭𑀡𑀓𑀓𑀺𑀮𑁂𑀲𑀯𑀺𑀭𑀳𑀺𑀢𑀁. 𑀅𑀦𑁆𑀢𑀲𑁆𑀲 𑀯𑀲𑀦𑁆𑀢𑀻𑀢𑀺 𑀅𑀦𑁆𑀢𑁄 𑀅𑀲𑁆𑀲 𑀯𑀲𑀦𑁆𑀢𑀺. 𑀢𑁂 𑀦𑀁 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀢𑁂 𑀏𑀢𑀁 𑀅𑀥𑀺𑀪𑀯𑀦𑁆𑀢𑀺 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺 𑀲𑀺𑀓𑁆𑀔𑀸𑀧𑁂𑀦𑁆𑀢𑀺 𑀯𑀸. ‘‘𑀏𑀯𑀁 𑀯𑁂𑀚𑁆𑀚𑀓𑀫𑁆𑀫𑀁 𑀓𑀭𑁄𑀳𑀺, 𑀏𑀯𑀁 𑀤𑀽𑀢𑀓𑀫𑁆𑀫’’𑀦𑁆𑀢𑀺 𑀇𑀢𑀺 𑀲𑀺𑀓𑁆𑀔𑀸𑀧𑀦𑀲𑀗𑁆𑀔𑀸𑀢𑁂𑀦 𑀲𑀫𑀼𑀤𑀸𑀘𑀭𑀡𑀢𑁆𑀣𑁂𑀦𑀲𑁆𑀲 𑀢𑁂 𑀆𑀘𑀭𑀺𑀬𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑁂𑀳𑀺 𑀆𑀘𑀭𑀺𑀬𑁂𑀳𑀺 𑀲𑀸𑀘𑀭𑀺𑀬𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀲𑀢𑁆𑀢𑀫𑀁 𑀳𑁂𑀝𑁆𑀞𑀸 𑀓𑀣𑀺𑀢𑀦𑀬𑀫𑁂𑀯.

𑁮. 𑀅𑀢𑁆𑀣𑀺𑀦𑀼𑀔𑁄𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁩. 𑀅𑀝𑁆𑀞𑀫𑁂 𑀬𑀁 𑀧𑀭𑀺𑀬𑀸𑀬𑀁 𑀆𑀕𑀫𑁆𑀫𑀸𑀢𑀺 𑀬𑀁 𑀓𑀸𑀭𑀡𑀁 𑀆𑀕𑀫𑁆𑀫. 𑀅𑀜𑁆𑀜𑀢𑁆𑀭𑁂𑀯 𑀲𑀤𑁆𑀥𑀸𑀬𑀸𑀢𑀺 𑀯𑀺𑀦𑀸 𑀲𑀤𑁆𑀥𑀸𑀬 𑀲𑀤𑁆𑀥𑀁 𑀅𑀧𑀦𑁂𑀢𑁆𑀯𑀸. 𑀏𑀢𑁆𑀣 𑀘 𑀲𑀤𑁆𑀥𑀸𑀢𑀺 𑀦 𑀧𑀘𑁆𑀘𑀓𑁆𑀔𑀸 𑀲𑀤𑁆𑀥𑀸. 𑀬𑁄 𑀧𑀦 𑀧𑀭𑀲𑁆𑀲 𑀏𑀯𑀁 𑀓𑀺𑀭 𑀏𑀯𑀁 𑀓𑀺𑀭𑀸𑀢𑀺 𑀓𑀣𑁂𑀦𑁆𑀢𑀲𑁆𑀲 𑀲𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑁄 𑀲𑀤𑁆𑀤𑀳𑀦𑀸𑀓𑀸𑀭𑁄, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀭𑀼𑀘𑀺𑀆𑀤𑀻𑀲𑀼𑀧𑀺 𑀭𑀼𑀘𑀸𑀧𑁂𑀢𑁆𑀯𑀸 𑀔𑀫𑀸𑀧𑁂𑀢𑁆𑀯𑀸 𑀅𑀢𑁆𑀣𑁂𑀢𑀦𑁆𑀢𑀺 𑀕𑀳𑀡𑀸𑀓𑀸𑀭𑁄 𑀭𑀼𑀘𑀺 𑀦𑀸𑀫, 𑀏𑀯𑀁 𑀓𑀺𑀭 𑀪𑀯𑀺𑀲𑁆𑀲𑀢𑀻𑀢𑀺 𑀅𑀦𑀼𑀲𑁆𑀲𑀯𑀦𑀁 𑀅𑀦𑀼𑀲𑁆𑀲𑀯𑁄, 𑀦𑀺𑀲𑀻𑀤𑀺𑀢𑁆𑀯𑀸 𑀏𑀓𑀁 𑀓𑀸𑀭𑀡𑀁 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀓𑀸𑀭𑀡𑀁 𑀉𑀧𑀝𑁆𑀞𑀸𑀢𑀺, 𑀏𑀯𑀁 𑀉𑀧𑀝𑁆𑀞𑀺𑀢𑀲𑁆𑀲 𑀅𑀢𑁆𑀣𑁂𑀢𑀦𑁆𑀢𑀺 𑀕𑀳𑀡𑀁 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁄 𑀦𑀸𑀫, 𑀓𑀸𑀭𑀡𑀯𑀺𑀢𑀓𑁆𑀓𑁄𑀢𑀺 𑀅𑀢𑁆𑀣𑁄. 𑀓𑀸𑀭𑀡𑀁 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀧𑀸𑀧𑀺𑀓𑀸 𑀮𑀤𑁆𑀥𑀺 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀅𑀢𑁆𑀣𑁂𑀲𑀸𑀢𑀺 𑀕𑀳𑀡𑀸𑀓𑀸𑀭𑁄 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺 𑀦𑀸𑀫. 𑀅𑀜𑁆𑀜𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀞𑀸𑀦𑀸𑀦𑀺 𑀫𑀼𑀜𑁆𑀘𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀭𑁂𑀬𑁆𑀬. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑁂𑀔𑀸𑀲𑁂𑀔𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀸 𑀓𑀣𑀺𑀢𑀸.

𑁯-𑁧𑁦. 𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀦𑁆𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁫𑁪-𑁧𑁫𑁫. 𑀦𑀯𑀫𑁂 𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀦𑁆𑀦𑁄𑀢𑀺 𑀧𑀭𑀺𑀧𑀼𑀡𑁆𑀡𑀺𑀦𑁆𑀤𑁆𑀭𑀺𑀬𑁄. 𑀢𑀢𑁆𑀣 𑀬𑁂𑀦 𑀙 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀁, 𑀲𑁄 𑀢𑁂𑀳𑀺 𑀦𑀺𑀩𑁆𑀩𑀺𑀲𑁂𑀯𑀦𑁂𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸, 𑀘𑀓𑁆𑀔𑀸𑀤𑀻𑀦𑀺 𑀯𑀸 𑀙 𑀇𑀦𑁆𑀤𑁆𑀭𑀺𑀬𑀸𑀦𑀺 𑀲𑀫𑁆𑀫𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑁂𑀳𑀺 𑀲𑀤𑁆𑀥𑀸𑀤𑀻𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀭𑀺𑀧𑀼𑀡𑁆𑀡𑀺𑀦𑁆𑀤𑁆𑀭𑀺𑀬𑁄 𑀦𑀸𑀫 𑀳𑁄𑀢𑀺, 𑀢𑀁 𑀲𑀦𑁆𑀥𑀸𑀬 𑀪𑀕𑀯𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀘𑁂𑀢𑀺𑀆𑀤𑀺𑀦𑀸 𑀦𑀬𑁂𑀦 𑀤𑁂𑀲𑀦𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀏𑀢𑁆𑀢𑀸𑀯𑀢𑀸 𑀔𑁄 𑀪𑀺𑀓𑁆𑀔𑀼 𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀦𑁆𑀦𑁄 𑀳𑁄𑀢𑀻𑀢𑀺 𑀆𑀳. 𑀤𑀲𑀫𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀦𑀯𑀧𑀼𑀭𑀸𑀡𑀯𑀕𑁆𑀕𑁄 𑀧𑀜𑁆𑀘𑀤𑀲𑀫𑁄.

𑀢𑀢𑀺𑀬𑁄 𑀧𑀡𑁆𑀡𑀸𑀲𑀓𑁄.

𑁧𑁬. 𑀦𑀦𑁆𑀤𑀺𑀓𑁆𑀔𑀬𑀯𑀕𑁆𑀕𑁄

𑁧-𑁪. 𑀅𑀚𑁆𑀛𑀢𑁆𑀢𑀦𑀦𑁆𑀤𑀺𑀓𑁆𑀔𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁫𑁬-𑁧𑁫𑁯. 𑀦𑀦𑁆𑀤𑀺𑀓𑁆𑀔𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀦𑀦𑁆𑀤𑀺𑀓𑁆𑀔𑀬𑀸 𑀭𑀸𑀕𑀓𑁆𑀔𑀬𑁄, 𑀭𑀸𑀕𑀓𑁆𑀔𑀬𑀸 𑀦𑀦𑁆𑀤𑀺𑀓𑁆𑀔𑀬𑁄𑀢𑀺 𑀦𑀦𑁆𑀤𑀺𑀬𑀸 𑀘 𑀭𑀸𑀕𑀲𑁆𑀲 𑀘 𑀅𑀢𑁆𑀣𑀢𑁄 𑀏𑀓𑀢𑁆𑀢𑀸 𑀯𑀼𑀢𑁆𑀢𑀁. 𑀲𑀼𑀯𑀺𑀫𑀼𑀢𑁆𑀢𑀦𑁆𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀯𑀲𑁂𑀦 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑀁. 𑀲𑁂𑀲𑀫𑁂𑀢𑁆𑀣 𑀤𑀼𑀢𑀺𑀬𑀸𑀤𑀻𑀲𑀼 𑀘 𑀉𑀢𑁆𑀢𑀸𑀦𑀫𑁂𑀯.

𑁫-𑁬. 𑀚𑀻𑀯𑀓𑀫𑁆𑀩𑀯𑀦𑀲𑀫𑀸𑀥𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁬𑁦-𑁧𑁬𑁧. 𑀧𑀜𑁆𑀘𑀫𑀁 𑀲𑀫𑀸𑀥𑀺𑀯𑀺𑀓𑀮𑀸𑀦𑀁, 𑀙𑀝𑁆𑀞𑀁 𑀧𑀝𑀺𑀲𑀮𑁆𑀮𑀸𑀦𑀯𑀺𑀓𑀮𑀸𑀦𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀜𑁆𑀘 𑀓𑀸𑀬𑀯𑀺𑀯𑁂𑀓𑀜𑁆𑀘 𑀮𑀪𑀦𑁆𑀢𑀸𑀦𑀁 𑀏𑀢𑁂𑀲𑀁 𑀓𑀫𑁆𑀫𑀝𑁆𑀞𑀸𑀦𑀁 𑀨𑀸𑀢𑀺𑀁 𑀕𑀫𑀺𑀲𑁆𑀲𑀢𑀻𑀢𑀺 𑀜𑀢𑁆𑀯𑀸 𑀓𑀣𑀺𑀢𑀁. 𑀢𑀢𑁆𑀣 𑀑𑀓𑁆𑀔𑀸𑀬𑀢𑀻𑀢𑀺 (𑀧𑀘𑁆𑀘𑀓𑁆𑀔𑀸𑀬𑀢𑀺) 𑀧𑀜𑁆𑀜𑀸𑀬𑀢𑀺 𑀧𑀸𑀓𑀝𑀁 𑀳𑁄𑀢𑀺. 𑀇𑀢𑀺 𑀤𑁆𑀯𑀻𑀲𑀼𑀧𑀺 𑀏𑀢𑁂𑀲𑀼 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀓𑀣𑀺𑀢𑀸.

𑁭-𑁯. 𑀓𑁄𑀝𑁆𑀞𑀺𑀓𑀅𑀦𑀺𑀘𑁆𑀘𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁬𑁨-𑁧𑁬𑁪. 𑀲𑀢𑁆𑀢𑀫𑀸𑀤𑀻𑀲𑀼 𑀢𑀻𑀲𑀼 𑀣𑁂𑀭𑀲𑁆𑀲 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀺𑀬𑀸 𑀥𑀫𑁆𑀫𑀸𑀯 𑀓𑀣𑀺𑀢𑀸.

𑁧𑁦-𑁧𑁨. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀳𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁬𑁫-𑁧𑁬𑁭. 𑀤𑀲𑀫𑀸𑀤𑀻𑀦𑀺 𑀢𑀻𑀡𑀺 𑀧𑀸𑀝𑀺𑀬𑁂𑀓𑁆𑀓𑁂𑀦 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀢𑁂𑀲𑀁 𑀅𑀢𑁆𑀣𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀦𑀦𑁆𑀤𑀺𑀓𑁆𑀔𑀬𑀯𑀕𑁆𑀕𑁄 𑀲𑁄𑀮𑀲𑀫𑁄.

𑁧𑁭. 𑀲𑀝𑁆𑀞𑀺𑀧𑁂𑀬𑁆𑀬𑀸𑀮𑀯𑀕𑁆𑀕𑁄

𑁧-𑁬𑁦. 𑀅𑀚𑁆𑀛𑀢𑁆𑀢𑀅𑀦𑀺𑀘𑁆𑀘𑀙𑀦𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁬𑁮-𑁨𑁨𑁭. 𑀢𑀤𑀦𑀦𑁆𑀢𑀭𑁄 𑀲𑀝𑁆𑀞𑀺𑀧𑁂𑀬𑁆𑀬𑀸𑀮𑁄 𑀦𑀸𑀫 𑀳𑁄𑀢𑀺, 𑀲𑁄 𑀉𑀢𑁆𑀢𑀸𑀦𑀢𑁆𑀣𑁄𑀯. 𑀬𑀸𑀦𑀺 𑀧𑀦𑁂𑀢𑁆𑀣 𑀲𑀝𑁆𑀞𑀺 𑀲𑀼𑀢𑁆𑀢𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀢𑀸𑀦𑀺 ‘‘𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄’’𑀢𑀺 𑀏𑀯𑀁 𑀢𑀲𑁆𑀲 𑀢𑀲𑁆𑀲𑁂𑀯 𑀧𑀤𑀲𑁆𑀲 𑀯𑀲𑁂𑀦 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀇𑀢𑀺 𑀲𑀩𑁆𑀩𑀸𑀦𑀺 𑀢𑀸𑀦𑀺 𑀧𑀸𑀝𑀺𑀬𑁂𑀓𑁆𑀓𑁂𑀦 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦 𑀓𑀣𑀺𑀢𑀸𑀦𑀺. 𑀏𑀓𑁂𑀓𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂 𑀘𑁂𑀢𑁆𑀣 𑀲𑀝𑁆𑀞𑀺 𑀲𑀝𑁆𑀞𑀺 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸𑀢𑀺.

𑀲𑀝𑁆𑀞𑀺𑀧𑁂𑀬𑁆𑀬𑀸𑀮𑀯𑀕𑁆𑀕𑁄.

𑁧𑁮. 𑀲𑀫𑀼𑀤𑁆𑀤𑀯𑀕𑁆𑀕𑁄

𑁧. 𑀧𑀞𑀫𑀲𑀫𑀼𑀤𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁮. 𑀲𑀫𑀼𑀤𑁆𑀤𑀯𑀕𑁆𑀕𑀲𑁆𑀲 𑀧𑀞𑀫𑁂 𑀘𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑀲𑁆𑀲 𑀲𑀫𑀼𑀤𑁆𑀤𑁄𑀢𑀺 𑀬𑀤𑀺 𑀤𑀼𑀧𑁆𑀧𑀽𑀭𑀡𑀝𑁆𑀞𑁂𑀦 𑀬𑀤𑀺 𑀯𑀸 𑀲𑀫𑀼𑀤𑁆𑀤𑀦𑀝𑁆𑀞𑁂𑀦 𑀲𑀫𑀼𑀤𑁆𑀤𑁄, 𑀘𑀓𑁆𑀔𑀼𑀫𑁂𑀯 𑀲𑀫𑀼𑀤𑁆𑀤𑁄. 𑀢𑀲𑁆𑀲 𑀳𑀺 𑀧𑀣𑀯𑀺𑀢𑁄 𑀬𑀸𑀯 𑀅𑀓𑀦𑀺𑀝𑁆𑀞𑀩𑁆𑀭𑀳𑁆𑀫𑀮𑁄𑀓𑀸 𑀦𑀻𑀮𑀸𑀤𑀺𑀆𑀭𑀫𑁆𑀫𑀡𑀁 𑀲𑀫𑁄𑀲𑀭𑀦𑁆𑀢𑀁 𑀧𑀭𑀺𑀧𑀼𑀡𑁆𑀡𑀪𑀸𑀯𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀤𑀼𑀧𑁆𑀧𑀽𑀭𑀡𑀝𑁆𑀞𑁂𑀦𑀧𑀺 𑀲𑀫𑀼𑀤𑁆𑀤𑁄. 𑀘𑀓𑁆𑀔𑀼 𑀘 𑀢𑁂𑀲𑀼 𑀢𑁂𑀲𑀼 𑀦𑀻𑀮𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀲𑀫𑀼𑀤𑁆𑀤𑀢𑀺, 𑀅𑀲𑀁𑀯𑀼𑀢𑀁 𑀳𑀼𑀢𑁆𑀯𑀸 𑀑𑀲𑀭𑀫𑀸𑀦𑀁 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀪𑀸𑀯𑁂𑀦 𑀲𑀤𑁄𑀲𑀕𑀫𑀦𑁂𑀦 𑀕𑀘𑁆𑀙𑀢𑀻𑀢𑀺 𑀲𑀫𑀼𑀤𑁆𑀤𑀦𑀝𑁆𑀞𑁂𑀦𑀧𑀺 𑀲𑀫𑀼𑀤𑁆𑀤𑁄. 𑀢𑀲𑁆𑀲 𑀭𑀽𑀧𑀫𑀬𑁄 𑀯𑁂𑀕𑁄𑀢𑀺 𑀲𑀫𑀼𑀤𑁆𑀤𑀲𑁆𑀲 𑀅𑀧𑁆𑀧𑀫𑀸𑀡𑁄 𑀊𑀫𑀺𑀫𑀬𑁄 𑀯𑁂𑀕𑁄 𑀯𑀺𑀬 𑀢𑀲𑁆𑀲𑀸𑀧𑀺 𑀘𑀓𑁆𑀔𑀼𑀲𑀫𑀼𑀤𑁆𑀤𑀲𑁆𑀲 𑀲𑀫𑁄𑀲𑀭𑀦𑁆𑀢𑀲𑁆𑀲 𑀦𑀻𑀮𑀸𑀤𑀺𑀪𑁂𑀤𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀯𑀲𑁂𑀦 𑀅𑀧𑁆𑀧𑀫𑁂𑀬𑁆𑀬𑁄 𑀭𑀽𑀧𑀫𑀬𑁄 𑀯𑁂𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀬𑁄 𑀢𑀁 𑀭𑀽𑀧𑀫𑀬𑀁 𑀯𑁂𑀕𑀁 𑀲𑀳𑀢𑀻𑀢𑀺 𑀬𑁄 𑀢𑀁 𑀘𑀓𑁆𑀔𑀼𑀲𑀫𑀼𑀤𑁆𑀤𑁂 𑀲𑀫𑁄𑀲𑀝𑀁 𑀭𑀽𑀧𑀫𑀬𑀁 𑀯𑁂𑀕𑀁, 𑀫𑀦𑀸𑀧𑁂 𑀭𑀽𑀧𑁂 𑀭𑀸𑀕𑀁, 𑀅𑀫𑀦𑀸𑀧𑁂 𑀤𑁄𑀲𑀁, 𑀅𑀲𑀫𑀧𑁂𑀓𑁆𑀔𑀺𑀢𑁂 𑀫𑁄𑀳𑀦𑁆𑀢𑀺 𑀏𑀯𑀁 𑀭𑀸𑀕𑀸𑀤𑀺𑀓𑀺𑀮𑁂𑀲𑁂 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑁄 𑀉𑀧𑁂𑀓𑁆𑀔𑀓𑀪𑀸𑀯𑁂𑀦 𑀲𑀳𑀢𑀺.

𑀲𑀊𑀫𑀺𑀦𑁆𑀢𑀺𑀆𑀤𑀻𑀲𑀼 𑀓𑀺𑀮𑁂𑀲𑀊𑀫𑀻𑀳𑀺 𑀲𑀊𑀫𑀺𑀁. 𑀓𑀺𑀮𑁂𑀲𑀸𑀯𑀝𑁆𑀝𑁂𑀳𑀺 𑀲𑀸𑀯𑀝𑁆𑀝𑀁. 𑀓𑀺𑀮𑁂𑀲𑀕𑀸𑀳𑁂𑀳𑀺 𑀲𑀕𑀸𑀳𑀁. 𑀓𑀺𑀮𑁂𑀲𑀭𑀓𑁆𑀔𑀲𑁂𑀳𑀺 𑀲𑀭𑀓𑁆𑀔𑀲𑀁. 𑀓𑁄𑀥𑀽𑀧𑀸𑀬𑀸𑀲𑀲𑁆𑀲 𑀘 𑀯𑀲𑁂𑀦 𑀲𑀊𑀫𑀺𑀁. 𑀯𑀼𑀢𑀜𑁆𑀳𑁂𑀢𑀁 ‘‘𑀊𑀫𑀺𑀪𑀬𑀦𑁆𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀓𑁄𑀥𑀽𑀧𑀸𑀬𑀸𑀲𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀇𑀢𑀺𑀯𑀼. 𑁧𑁦𑁯; 𑀫. 𑀦𑀺. 𑁨.𑁧𑁬𑁨; 𑀅. 𑀦𑀺. 𑁪.𑁧𑁨𑁨). 𑀓𑀸𑀫𑀕𑀼𑀡𑀯𑀲𑁂𑀦 𑀲𑀸𑀯𑀝𑁆𑀝𑀁. 𑀯𑀼𑀢𑀜𑁆𑀳𑁂𑀢𑀁 ‘‘𑀆𑀯𑀝𑁆𑀝𑀕𑁆𑀕𑀸𑀳𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑁂𑀢𑀁 𑀓𑀸𑀫𑀕𑀼𑀡𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀲𑀁. 𑀦𑀺. 𑁪.𑁨𑁪𑁧). 𑀫𑀸𑀢𑀼𑀕𑀸𑀫𑀯𑀲𑁂𑀦 𑀲𑀕𑀸𑀳𑀁 𑀲𑀭𑀓𑁆𑀔𑀲𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀕𑀸𑀳𑀭𑀓𑁆𑀔𑀲𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀫𑀸𑀢𑀼𑀕𑀸𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 (𑀇𑀢𑀺𑀯𑀼. 𑁧𑁦𑁯). 𑀲𑁂𑀲𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀪𑀬𑀁 𑀤𑀼𑀢𑁆𑀢𑀭𑀁 𑀅𑀘𑁆𑀘𑀢𑀭𑀻𑀢𑀺 𑀊𑀫𑀺𑀪𑀬𑁂𑀦 𑀲𑀪𑀬𑀁 𑀤𑀼𑀭𑀢𑀺𑀓𑁆𑀓𑀫𑀁 𑀅𑀢𑀺𑀓𑁆𑀓𑀫𑀺. 𑀮𑁄𑀓𑀦𑁆𑀢𑀕𑀽𑀢𑀺 𑀲𑀗𑁆𑀔𑀸𑀭𑀮𑁄𑀓𑀲𑁆𑀲 𑀅𑀦𑁆𑀢𑀁 𑀕𑀢𑁄. 𑀧𑀸𑀭𑀕𑀢𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀦𑀺𑀩𑁆𑀩𑀸𑀦𑀁 𑀕𑀢𑁄𑀢𑀺 𑀓𑀣𑀻𑀬𑀢𑀺.

𑁨-𑁩. 𑀤𑀼𑀢𑀺𑀬𑀲𑀫𑀼𑀤𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁨𑁯-𑁨𑁩𑁦. 𑀤𑀼𑀢𑀺𑀬𑁂 𑀲𑀫𑀼𑀤𑁆𑀤𑁄𑀢𑀺 𑀲𑀫𑀼𑀤𑁆𑀤𑀦𑀝𑁆𑀞𑁂𑀦 𑀲𑀫𑀼𑀤𑁆𑀤𑁄, 𑀓𑀺𑀮𑁂𑀤𑀦𑀝𑁆𑀞𑁂𑀦 𑀢𑁂𑀫𑀦𑀝𑁆𑀞𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑁂𑀪𑀼𑀬𑁆𑀬𑁂𑀦𑀸𑀢𑀺 𑀞𑀧𑁂𑀢𑁆𑀯𑀸 𑀅𑀭𑀺𑀬𑀲𑀸𑀯𑀓𑁂. 𑀲𑀫𑀼𑀦𑁆𑀦𑀸𑀢𑀺 𑀓𑀺𑀮𑀺𑀦𑁆𑀦𑀸 𑀢𑀺𑀦𑁆𑀢𑀸 𑀦𑀺𑀫𑀼𑀕𑁆𑀕𑀸. 𑀢𑀦𑁆𑀢𑀸𑀓𑀼𑀮𑀓𑀚𑀸𑀢𑀸𑀢𑀺𑀆𑀤𑀺 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀫𑀘𑁆𑀘𑀼𑀚𑀳𑁄𑀢𑀺 𑀢𑀬𑁄 𑀫𑀘𑁆𑀘𑀽 𑀚𑀳𑀺𑀢𑁆𑀯𑀸 𑀞𑀺𑀢𑁄. 𑀦𑀺𑀭𑀼𑀧𑀥𑀻𑀢𑀺 𑀢𑀻𑀳𑀺 𑀉𑀧𑀥𑀻𑀳𑀺 𑀅𑀦𑀼𑀧𑀥𑀺. 𑀅𑀧𑀼𑀦𑀩𑁆𑀪𑀯𑀸𑀬𑀸𑀢𑀺 𑀦𑀺𑀩𑁆𑀩𑀸𑀦𑀢𑁆𑀣𑀸𑀬. 𑀅𑀫𑁄𑀳𑀬𑀻 𑀫𑀘𑁆𑀘𑀼𑀭𑀸𑀚𑀦𑁆𑀢𑀺 𑀬𑀣𑀸 𑀢𑀲𑁆𑀲 𑀕𑀢𑀺𑀁 𑀦 𑀚𑀸𑀦𑀸𑀢𑀺, 𑀏𑀯𑀁 𑀫𑀘𑁆𑀘𑀼𑀭𑀸𑀚𑀸𑀦𑀁 𑀫𑁄𑀳𑁂𑀢𑁆𑀯𑀸 𑀕𑀢𑁄. 𑀢𑀢𑀺𑀬𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁪-𑁬. 𑀔𑀻𑀭𑀭𑀼𑀓𑁆𑀔𑁄𑀧𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁩𑁧-𑁨𑁩𑁩. 𑀘𑀢𑀼𑀢𑁆𑀣𑁂 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀅𑀢𑁆𑀣𑀺, 𑀢𑁂𑀦𑁂𑀯𑀸𑀳 𑀲𑁄 𑀅𑀧𑁆𑀧𑀳𑀻𑀦𑁄𑀢𑀺. 𑀧𑀭𑀺𑀢𑁆𑀢𑀸𑀢𑀺, 𑀧𑀩𑁆𑀩𑀢𑀫𑀢𑁆𑀢𑀫𑁆𑀧𑀺 𑀭𑀽𑀧𑀁 𑀅𑀦𑀺𑀝𑁆𑀞𑀁 𑀅𑀭𑀚𑀦𑀻𑀬𑀁 𑀧𑀭𑀺𑀢𑁆𑀢𑀁 𑀦𑀸𑀫 𑀳𑁄𑀢𑀺, 𑀏𑀯𑀭𑀽𑀧𑀸𑀧𑀺𑀲𑁆𑀲 𑀭𑀽𑀧𑀸 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑁄 𑀧𑀦 𑀯𑀸𑀤𑁄 𑀅𑀥𑀺𑀫𑀢𑁆𑀢𑀸𑀦𑀦𑁆𑀢𑀺 𑀇𑀝𑁆𑀞𑀸𑀭𑀫𑁆𑀫𑀡𑀁 𑀧𑀦𑀲𑁆𑀲 𑀭𑀚𑀦𑀻𑀬𑀁 𑀯𑀢𑁆𑀣𑀼 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀢𑀻𑀢𑀺 𑀏𑀢𑁆𑀣 𑀓𑀸 𑀓𑀣𑀸? 𑀏𑀢𑁆𑀣 𑀘 𑀦𑀔𑀧𑀺𑀝𑁆𑀞𑀺𑀧𑀫𑀸𑀡𑀫𑁆𑀧𑀺 𑀫𑀡𑀺𑀫𑀼𑀢𑁆𑀢𑀸𑀤𑀺 𑀭𑀚𑀦𑀻𑀬𑀁 𑀯𑀢𑁆𑀣𑀼 𑀅𑀥𑀺𑀫𑀢𑁆𑀢𑀸𑀭𑀫𑁆𑀫𑀡𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑀳𑀭𑁄𑀢𑀺𑀆𑀤𑀻𑀦𑀺 𑀢𑀻𑀡𑀺𑀧𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑁂𑀯. 𑀆𑀪𑀺𑀦𑁆𑀤𑁂𑀬𑁆𑀬𑀸𑀢𑀺 𑀧𑀳𑀭𑁂𑀬𑁆𑀬 𑀧𑀤𑀸𑀮𑁂𑀬𑁆𑀬 𑀯𑀸. 𑀧𑀜𑁆𑀘𑀫𑁂 𑀢𑀤𑀼𑀪𑀬𑀦𑁆𑀢𑀺 𑀢𑀁 𑀉𑀪𑀬𑀁. 𑀙𑀝𑁆𑀞𑀁 𑀉𑀢𑁆𑀢𑀸𑀦𑀫𑁂𑀯.

𑁭. 𑀉𑀤𑀸𑀬𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁪. 𑀲𑀢𑁆𑀢𑀫𑁂 𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀸𑀢𑀺 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺. 𑀇𑀢𑀺𑀧𑀸𑀬𑀦𑁆𑀢𑀺 𑀇𑀢𑀺𑀧𑀺 𑀅𑀬𑀁. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀦𑀺𑀘𑁆𑀘𑁂𑀦 𑀅𑀦𑀢𑁆𑀢𑀮𑀓𑁆𑀔𑀡𑀁 𑀓𑀣𑀺𑀢𑀁.

𑁮. 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁫. 𑀅𑀝𑁆𑀞𑀫𑁂 𑀅𑀦𑀼𑀩𑁆𑀬𑀜𑁆𑀚𑀦𑀲𑁄 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄𑀢𑀺 ‘‘𑀳𑀢𑁆𑀣𑀸 𑀲𑁄𑀪𑀦𑀸 𑀧𑀸𑀤𑀸 𑀲𑁄𑀪𑀦𑀸’’𑀢𑀺 𑀏𑀯𑀁 𑀅𑀦𑀼𑀩𑁆𑀬𑀜𑁆𑀚𑀦𑀯𑀲𑁂𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄. 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄𑀢𑀺 𑀳𑀺 𑀲𑀁𑀲𑀦𑁆𑀤𑁂𑀢𑁆𑀯𑀸 𑀕𑀳𑀡𑀁, 𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑁄𑀢𑀺 𑀯𑀺𑀪𑀢𑁆𑀢𑀺𑀕𑀳𑀡𑀁. 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄 𑀓𑀼𑀫𑁆𑀪𑀻𑀮𑀲𑀤𑀺𑀲𑁄 𑀲𑀩𑁆𑀩𑀫𑁂𑀯 𑀕𑀡𑁆𑀳𑀸𑀢𑀺, 𑀅𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑁄 𑀭𑀢𑁆𑀢𑀧𑀸𑀲𑀤𑀺𑀲𑁄 𑀯𑀺𑀪𑀚𑀺𑀢𑁆𑀯𑀸 𑀳𑀢𑁆𑀣𑀧𑀸𑀤𑀸𑀤𑀻𑀲𑀼 𑀢𑀁 𑀢𑀁 𑀓𑁄𑀝𑁆𑀞𑀸𑀲𑀁. 𑀇𑀫𑁂 𑀧𑀦 𑀤𑁆𑀯𑁂 𑀕𑀸𑀳𑀸 𑀏𑀓𑀚𑀯𑀦𑀯𑀸𑀭𑁂𑀧𑀺 𑀮𑀩𑁆𑀪𑀦𑁆𑀢𑀺, 𑀦𑀸𑀦𑀸𑀚𑀯𑀦𑀯𑀸𑀭𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺.

𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑀕𑀣𑀺𑀢𑀦𑁆𑀢𑀺 𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑁂𑀦 𑀕𑀦𑁆𑀣𑀺𑀢𑀁 𑀩𑀤𑁆𑀥𑀁. 𑀯𑀺𑀜𑁆𑀜𑀸𑀡𑀦𑁆𑀢𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑀁. 𑀢𑀲𑁆𑀫𑀺𑀁 𑀘𑁂 𑀲𑀫𑀬𑁂 𑀓𑀸𑀮𑀁 𑀓𑀭𑁂𑀬𑁆𑀬𑀸𑀢𑀺 𑀦 𑀓𑁄𑀘𑀺 𑀲𑀁𑀓𑀺𑀮𑀺𑀝𑁆𑀞𑁂𑀦 𑀘𑀺𑀢𑁆𑀢𑁂𑀦 𑀓𑀸𑀮𑀁 𑀓𑀭𑁄𑀦𑁆𑀢𑁄 𑀦𑀸𑀫 𑀅𑀢𑁆𑀣𑀺. 𑀲𑀩𑁆𑀩𑀲𑀢𑁆𑀢𑀸𑀦𑀜𑁆𑀳𑀺 𑀪𑀯𑀗𑁆𑀕𑁂𑀦𑁂𑀯 𑀓𑀸𑀮𑀓𑀺𑀭𑀺𑀬𑀸 𑀳𑁄𑀢𑀺. 𑀓𑀺𑀮𑁂𑀲𑀪𑀬𑀁 𑀧𑀦 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀲𑀫𑀬𑀯𑀲𑁂𑀦 𑀯𑀸 𑀏𑀯𑀁 𑀯𑀼𑀢𑁆𑀢𑀁. 𑀘𑀓𑁆𑀔𑀼𑀤𑁆𑀯𑀸𑀭𑀲𑁆𑀫𑀺𑀜𑁆𑀳𑀺 𑀆𑀧𑀸𑀣𑀕𑀢𑁂 𑀆𑀭𑀫𑁆𑀫𑀡𑁂 𑀭𑀢𑁆𑀢𑀘𑀺𑀢𑁆𑀢𑀁 𑀯𑀸 𑀤𑀼𑀝𑁆𑀞𑀘𑀺𑀢𑁆𑀢𑀁 𑀯𑀸 𑀫𑀽𑀴𑁆𑀳𑀘𑀺𑀢𑁆𑀢𑀁 𑀯𑀸 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀢𑀺, 𑀪𑀯𑀗𑁆𑀕𑁂 𑀞𑀢𑁆𑀯𑀸 𑀓𑀸𑀮𑀓𑀺𑀭𑀺𑀬𑀁 𑀓𑀭𑁄𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀸𑀮𑀁 𑀓𑀭𑁄𑀦𑁆𑀢𑀲𑁆𑀲 𑀤𑁆𑀯𑁂𑀯 𑀕𑀢𑀺𑀬𑁄 𑀧𑀸𑀝𑀺𑀓𑀗𑁆𑀔𑀸, 𑀇𑀫𑀲𑁆𑀲 𑀲𑀫𑀬𑀲𑁆𑀲 𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁.

𑀇𑀫𑀁 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀆𑀤𑀻𑀦𑀯𑀦𑁆𑀢𑀺 𑀇𑀫𑀁 𑀅𑀦𑁂𑀓𑀸𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀦𑀺𑀭𑀬𑁂 𑀅𑀦𑀼𑀪𑀯𑀺𑀢𑀩𑁆𑀩𑀁 𑀤𑀼𑀓𑁆𑀔𑀁 𑀲𑀫𑁆𑀧𑀲𑁆𑀲𑀫𑀸𑀦𑁄 𑀏𑀯𑀁 𑀯𑀤𑀸𑀫𑀺 𑀢𑀢𑁆𑀢𑀸𑀬 𑀅𑀬𑁄𑀲𑀮𑀸𑀓𑀸𑀬 𑀅𑀓𑁆𑀔𑀻𑀦𑀺 𑀅𑀜𑁆𑀚𑀸𑀧𑁂𑀢𑀼𑀓𑀸𑀫𑁄𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑁄𑀲𑀗𑁆𑀓𑀼𑀦𑀸𑀢𑀺 𑀅𑀬𑀲𑀽𑀮𑁂𑀦. 𑀲𑀫𑁆𑀧𑀮𑀺𑀫𑀝𑁆𑀞𑀦𑁆𑀢𑀺 𑀤𑁆𑀯𑁂𑀧𑀺 𑀓𑀡𑁆𑀡𑀘𑁆𑀙𑀺𑀤𑁆𑀤𑀸𑀦𑀺 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀣𑀯𑀺𑀬𑀁 𑀆𑀓𑁄𑀝𑀦𑀯𑀲𑁂𑀦 𑀲𑀫𑁆𑀧𑀮𑀺𑀫𑀝𑁆𑀞𑀁.

𑀢𑀢𑀺𑀬𑀯𑀸𑀭𑁂 𑀲𑀫𑁆𑀧𑀮𑀺𑀫𑀝𑁆𑀞𑀦𑁆𑀢𑀺 𑀦𑀔𑀘𑁆𑀙𑁂𑀤𑀦𑀁 𑀧𑀯𑁂𑀲𑁂𑀢𑁆𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀲𑀳𑀥𑀼𑀦𑀝𑁆𑀞𑁂𑀦 𑀙𑀺𑀦𑁆𑀤𑀺𑀢𑁆𑀯𑀸 𑀧𑀸𑀢𑀦𑀯𑀲𑁂𑀦 𑀲𑀫𑁆𑀧𑀮𑀺𑀫𑀝𑁆𑀞𑀁. 𑀘𑀢𑀼𑀢𑁆𑀣𑀯𑀸𑀭𑁂 𑀲𑀫𑁆𑀧𑀮𑀺𑀫𑀝𑁆𑀞𑀦𑁆𑀢𑀺 𑀩𑀦𑁆𑀥𑀦𑀫𑀽𑀮𑀁 𑀙𑁂𑀢𑁆𑀯𑀸 𑀧𑀸𑀢𑀦𑀯𑀲𑁂𑀦 𑀲𑀫𑁆𑀧𑀮𑀺𑀫𑀝𑁆𑀞𑀁. 𑀧𑀜𑁆𑀘𑀫𑀯𑀸𑀭𑁂 𑀲𑀫𑁆𑀧𑀮𑀺𑀫𑀝𑁆𑀞𑀦𑁆𑀢𑀺 𑀢𑀺𑀔𑀺𑀡𑀸𑀬 𑀲𑀢𑁆𑀢𑀺𑀬𑀸 𑀓𑀸𑀬𑀧𑀲𑀸𑀤𑀁 𑀉𑀧𑁆𑀧𑀸𑀝𑁂𑀢𑁆𑀯𑀸 𑀧𑀢𑀦𑀯𑀲𑁂𑀦 𑀲𑀫𑁆𑀧𑀮𑀺𑀫𑀝𑁆𑀞𑀁. 𑀲𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀫𑀳𑀢𑀻 𑀤𑀡𑁆𑀟𑀓𑀯𑀸𑀲𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁄𑀢𑁆𑀢𑀦𑁆𑀢𑀺 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑁄𑀓𑁆𑀓𑀫𑀦𑀁. 𑀬𑀣𑀸𑀭𑀽𑀧𑀸𑀦𑀁 𑀯𑀺𑀢𑀓𑁆𑀓𑀸𑀦𑀁 𑀯𑀲𑀁 𑀕𑀢𑁄 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬𑀸𑀢𑀺 𑀇𑀫𑀺𑀦𑀸 𑀯𑀺𑀢𑀓𑁆𑀓𑀸𑀦𑀁 𑀬𑀸𑀯 𑀲𑀗𑁆𑀖𑀪𑁂𑀤𑀸 𑀧𑀸𑀧𑀓𑀫𑁆𑀫𑀸𑀯𑀳𑀦𑀢𑀸 𑀤𑀲𑁆𑀲𑀺𑀢𑀸. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑁯-𑁧𑁦. 𑀧𑀞𑀫𑀳𑀢𑁆𑀣𑀧𑀸𑀤𑁄𑀧𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁩𑁬-𑁨𑁩𑁭. 𑀦𑀯𑀫𑁂 𑀳𑀢𑁆𑀣𑁂𑀲𑀼, 𑀪𑀺𑀓𑁆𑀔𑀯𑁂, 𑀲𑀢𑀻𑀢𑀺 𑀳𑀢𑁆𑀣𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼. 𑀤𑀲𑀫𑁂 𑀦 𑀳𑁄𑀢𑀻𑀢𑀺 𑀯𑀼𑀘𑁆𑀘𑀫𑀸𑀦𑁂 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀤𑁆𑀯𑀻𑀲𑀼𑀧𑀺 𑀘𑁂𑀢𑁂𑀲𑀼 𑀯𑀺𑀧𑀸𑀓𑀲𑀼𑀔𑀤𑀼𑀓𑁆𑀔𑀫𑁂𑀯 𑀤𑀲𑁆𑀲𑁂𑀢𑁆𑀯𑀸 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀦𑁆𑀢𑀺.

𑀲𑀫𑀼𑀤𑁆𑀤𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.

𑁧𑁯. 𑀆𑀲𑀻𑀯𑀺𑀲𑀯𑀕𑁆𑀕𑁄

𑁧. 𑀆𑀲𑀻𑀯𑀺𑀲𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁮. 𑀆𑀲𑀻𑀯𑀺𑀲𑀯𑀕𑁆𑀕𑀲𑁆𑀲 𑀧𑀞𑀫𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺 𑀏𑀓𑀘𑀸𑀭𑀺𑀓𑀤𑁆𑀯𑀺𑀘𑀸𑀭𑀺𑀓𑀢𑀺𑀘𑀸𑀭𑀺𑀓𑀘𑀢𑀼𑀘𑀸𑀭𑀺𑀓𑀧𑀜𑁆𑀘𑀘𑀸𑀭𑀺𑀓𑁂 𑀲𑀪𑀸𑀕𑀯𑀼𑀢𑁆𑀢𑀺𑀦𑁄 𑀓𑀸𑀭𑀓𑁂 𑀬𑀼𑀢𑁆𑀢𑀧𑀬𑀼𑀢𑁆𑀢𑁂 𑀲𑀩𑁆𑀩𑁂𑀧𑀺 𑀤𑀼𑀓𑁆𑀔𑀮𑀓𑁆𑀔𑀡𑀓𑀫𑁆𑀫𑀝𑁆𑀞𑀸𑀦𑀺𑀓𑁂 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑁂 𑀬𑁄𑀕𑀸𑀯𑀘𑀭𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺. 𑀇𑀤𑀜𑁆𑀳𑀺 𑀲𑀼𑀢𑁆𑀢𑀁 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁂𑀦 𑀯𑀼𑀢𑁆𑀢𑀁. 𑀧𑀼𑀕𑁆𑀕𑀮𑁂𑀲𑀼𑀧𑀺 𑀯𑀺𑀧𑀜𑁆𑀘𑀺𑀢𑀜𑁆𑀜𑀽𑀦𑀁 𑀤𑀺𑀲𑀸𑀯𑀸𑀲𑀺𑀓𑀸𑀦𑀁 𑀤𑀼𑀓𑁆𑀔𑀮𑀓𑁆𑀔𑀡𑀓𑀫𑁆𑀫𑀝𑁆𑀞𑀸𑀦𑀺𑀓𑀸𑀦𑀁 𑀉𑀧𑀝𑁆𑀞𑀸𑀦𑀯𑁂𑀮𑀸𑀬 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀉𑀕𑁆𑀖𑀝𑀺𑀢𑀜𑁆𑀜𑀽𑀆𑀤𑀻𑀦𑀁 𑀘𑀢𑀼𑀦𑁆𑀦𑀫𑁆𑀧𑀺 𑀧𑀼𑀕𑁆𑀕𑀮𑀸𑀦𑀁 𑀧𑀘𑁆𑀘𑀬𑀪𑀽𑀢𑀫𑁂𑀯𑁂𑀢𑀁. 𑀉𑀕𑁆𑀖𑀝𑀺𑀢𑀜𑁆𑀜𑀽 𑀧𑀼𑀕𑁆𑀕𑀮𑁄 𑀳𑀺 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀫𑀸𑀢𑀺𑀓𑀸𑀦𑀺𑀓𑁆𑀔𑁂𑀧𑁂𑀦𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀫𑀸𑀢𑀺𑀓𑀸𑀬 𑀯𑀺𑀢𑁆𑀣𑀸𑀭𑀪𑀸𑀚𑀦𑁂𑀦, 𑀦𑁂𑀬𑁆𑀬𑀧𑀼𑀕𑁆𑀕𑀮𑁄 𑀇𑀫𑀫𑁂𑀯 𑀲𑀼𑀢𑁆𑀢𑀁 𑀲𑀚𑁆𑀛𑀸𑀬𑀦𑁆𑀢𑁄 𑀧𑀭𑀺𑀧𑀼𑀘𑁆𑀙𑀦𑁆𑀢𑁄 𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑁄 𑀪𑀚𑀦𑁆𑀢𑁄 𑀧𑀬𑀺𑀭𑀼𑀧𑀸𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀺. 𑀧𑀤𑀧𑀭𑀫𑀲𑁆𑀲𑁂𑀢𑀁 𑀲𑀼𑀢𑁆𑀢𑀁 𑀅𑀦𑀸𑀕𑀢𑁂 𑀯𑀸𑀲𑀦𑀸 𑀪𑀯𑀺𑀲𑁆𑀲𑀢𑀻𑀢𑀺 𑀏𑀯𑀁 𑀲𑀩𑁆𑀩𑁂𑀲𑀫𑁆𑀧𑀺 𑀉𑀧𑀓𑀸𑀭𑀪𑀸𑀯𑀁 𑀜𑀢𑁆𑀯𑀸 𑀪𑀕𑀯𑀸 𑀲𑀺𑀦𑁂𑀭𑀼𑀁 𑀉𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀆𑀓𑀸𑀲𑀁 𑀯𑀺𑀢𑁆𑀣𑀸𑀭𑁂𑀦𑁆𑀢𑁄 𑀯𑀺𑀬 𑀘𑀓𑁆𑀓𑀯𑀸𑀴𑀧𑀩𑁆𑀩𑀢𑀁 𑀓𑀫𑁆𑀧𑁂𑀦𑁆𑀢𑁄 𑀯𑀺𑀬 𑀘 𑀫𑀳𑀦𑁆𑀢𑁂𑀦 𑀉𑀲𑁆𑀲𑀸𑀳𑁂𑀦 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂𑀢𑀺 𑀇𑀫𑀁 𑀆𑀲𑀻𑀯𑀺𑀲𑁄𑀧𑀫𑀲𑀼𑀢𑁆𑀢𑀁 𑀆𑀭𑀪𑀺.

𑀢𑀢𑁆𑀣 𑀘𑀢𑁆𑀢𑀸𑀭𑁄 𑀆𑀲𑀻𑀯𑀺𑀲𑀸𑀢𑀺 𑀓𑀝𑁆𑀞𑀫𑀼𑀔𑁄, 𑀧𑀽𑀢𑀺𑀫𑀼𑀔𑁄, 𑀅𑀕𑁆𑀕𑀺𑀫𑀼𑀔𑁄, 𑀲𑀢𑁆𑀣𑀫𑀼𑀔𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄. 𑀢𑁂𑀲𑀼 𑀓𑀝𑁆𑀞𑀫𑀼𑀔𑁂𑀦 𑀤𑀝𑁆𑀞𑀲𑁆𑀲 𑀲𑀓𑀮𑀲𑀭𑀻𑀭𑀁 𑀲𑀼𑀓𑁆𑀔𑀓𑀝𑁆𑀞𑀁 𑀯𑀺𑀬 𑀣𑀤𑁆𑀥𑀁 𑀳𑁄𑀢𑀺, 𑀲𑀦𑁆𑀥𑀺𑀧𑀩𑁆𑀩𑁂𑀲𑀼 𑀅𑀥𑀺𑀫𑀢𑁆𑀢𑀁 𑀅𑀬𑀲𑀽𑀮𑀲𑀫𑀧𑁆𑀧𑀺𑀢𑀁 𑀯𑀺𑀬 𑀢𑀺𑀝𑁆𑀞𑀢𑀺. 𑀧𑀽𑀢𑀺𑀫𑀼𑀔𑁂𑀦 𑀤𑀝𑁆𑀞𑀲𑁆𑀲 𑀧𑀓𑁆𑀓𑀧𑀽𑀢𑀺𑀧𑀦𑀲𑀁 𑀯𑀺𑀬 𑀯𑀺𑀧𑀼𑀩𑁆𑀩𑀓𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀕𑁆𑀖𑀭𑀢𑀺, 𑀘𑀗𑁆𑀕𑀯𑀸𑀭𑁂 𑀧𑀓𑁆𑀔𑀺𑀢𑁆𑀢𑀉𑀤𑀓𑀁 𑀯𑀺𑀬 𑀳𑁄𑀢𑀺. 𑀅𑀕𑁆𑀕𑀺𑀫𑀼𑀔𑁂𑀦 𑀤𑀝𑁆𑀞𑀲𑁆𑀲 𑀲𑀓𑀮𑀲𑀭𑀻𑀭𑀁 𑀛𑀸𑀬𑀺𑀢𑁆𑀯𑀸 𑀪𑀲𑁆𑀫𑀫𑀼𑀝𑁆𑀞𑀺 𑀯𑀺𑀬 𑀣𑀼𑀲𑀫𑀼𑀝𑁆𑀞𑀺 𑀯𑀺𑀬 𑀘 𑀯𑀺𑀧𑁆𑀧𑀓𑀺𑀭𑀻𑀬𑀢𑀺. 𑀲𑀢𑁆𑀢𑀫𑀼𑀔𑁂𑀦 𑀤𑀝𑁆𑀞𑀲𑁆𑀲 𑀲𑀓𑀮𑀲𑀭𑀻𑀭𑀁 𑀪𑀺𑀚𑁆𑀚𑀢𑀺, 𑀅𑀲𑀦𑀺𑀧𑀸𑀢𑀝𑁆𑀞𑀸𑀦𑀁 𑀯𑀺𑀬 𑀫𑀳𑀸𑀦𑀺𑀔𑀸𑀤𑀦𑁂𑀦 𑀔𑀢𑀲𑀦𑁆𑀥𑀺𑀫𑀼𑀔𑀁 𑀯𑀺𑀬 𑀘 𑀳𑁄𑀢𑀺. 𑀏𑀯𑀁 𑀯𑀺𑀲𑀯𑀲𑁂𑀦 𑀯𑀺𑀪𑀢𑁆𑀢𑀸 𑀘𑀢𑁆𑀢𑀸𑀭𑁄 𑀆𑀲𑀻𑀯𑀺𑀲𑀸.

𑀯𑀺𑀲𑀯𑁂𑀕𑀯𑀺𑀓𑀸𑀭𑁂𑀦 𑀧𑀦𑁂𑀢𑁂 𑀲𑁄𑀴𑀲 𑀳𑁄𑀦𑁆𑀢𑀺. 𑀓𑀝𑁆𑀞𑀫𑀼𑀔𑁄 𑀳𑀺 𑀤𑀝𑁆𑀞𑀯𑀺𑀲𑁄, 𑀤𑀺𑀝𑁆𑀞𑀯𑀺𑀲𑁄, 𑀨𑀼𑀝𑁆𑀞𑀯𑀺𑀲𑁄, 𑀯𑀸𑀢𑀯𑀺𑀲𑁄𑀢𑀺 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺. 𑀢𑁂𑀦 𑀳𑀺 𑀤𑀝𑁆𑀞𑀫𑁆𑀧𑀺 𑀤𑀺𑀝𑁆𑀞𑀫𑁆𑀧𑀺 𑀨𑀼𑀝𑁆𑀞𑀫𑁆𑀧𑀺 𑀢𑀲𑁆𑀲 𑀯𑀸𑀢𑁂𑀦 𑀧𑀳𑀝𑀫𑁆𑀧𑀺 𑀲𑀭𑀻𑀭𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀣𑀤𑁆𑀥𑀁 𑀳𑁄𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺. 𑀏𑀯𑀁 𑀯𑀺𑀲𑀯𑁂𑀕𑀯𑀺𑀓𑀸𑀭𑀯𑀲𑁂𑀦 𑀲𑁄𑀴𑀲 𑀳𑁄𑀦𑁆𑀢𑀺.

𑀧𑀼𑀦 𑀧𑀼𑀕𑁆𑀕𑀮𑀧𑀡𑁆𑀡𑀢𑁆𑀢𑀺𑀯𑀲𑁂𑀦 𑀘𑀢𑀼𑀲𑀝𑁆𑀞𑀺 𑀳𑁄𑀦𑁆𑀢𑀺. 𑀓𑀣𑀁? 𑀓𑀝𑁆𑀞𑀫𑀼𑀔𑁂𑀲𑀼 𑀢𑀸𑀯 𑀤𑀝𑁆𑀞𑀯𑀺𑀲𑁄 𑀘 𑀆𑀕𑀢𑀯𑀺𑀲𑁄 𑀦𑁄 𑀖𑁄𑀭𑀯𑀺𑀲𑁄, 𑀖𑁄𑀭𑀯𑀺𑀲𑁄 𑀦𑁄 𑀆𑀕𑀢𑀯𑀺𑀲𑁄, 𑀆𑀕𑀢𑀯𑀺𑀲𑁄 𑀘𑁂𑀯 𑀖𑁄𑀭𑀯𑀺𑀲𑁄 𑀘, 𑀦𑁂𑀯𑀸𑀕𑀢𑀯𑀺𑀲𑁄 𑀦 𑀖𑁄𑀭𑀯𑀺𑀲𑁄𑀢𑀺 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀬𑀲𑁆𑀲 𑀯𑀺𑀲𑀁 𑀲𑀫𑁆𑀧𑀚𑁆𑀚𑀮𑀺𑀢𑀢𑀺𑀡𑀼𑀓𑁆𑀓𑀸𑀬 𑀅𑀕𑁆𑀕𑀺 𑀯𑀺𑀬 𑀲𑀻𑀖𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀅𑀓𑁆𑀔𑀻𑀦𑀺 𑀕𑀳𑁂𑀢𑁆𑀯𑀸 𑀔𑀦𑁆𑀥𑀁 𑀕𑀳𑁂𑀢𑁆𑀯𑀸 𑀲𑀻𑀲𑀁 𑀕𑀳𑁂𑀢𑁆𑀯𑀸 𑀞𑀺𑀢𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺 𑀫𑀡𑀺𑀲𑀧𑁆𑀧𑀸𑀤𑀻𑀦𑀁 𑀯𑀺𑀲𑀁 𑀯𑀺𑀬, 𑀫𑀦𑁆𑀢𑀁 𑀧𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀓𑀡𑁆𑀡𑀯𑀸𑀢𑀁 𑀤𑀢𑁆𑀯𑀸 𑀤𑀡𑁆𑀟𑀓𑁂𑀦 𑀧𑀳𑀝𑀫𑀢𑁆𑀢𑁂 𑀑𑀢𑀭𑀺𑀢𑁆𑀯𑀸 𑀤𑀝𑁆𑀞𑀝𑁆𑀞𑀸𑀦𑁂𑀬𑁂𑀯 𑀢𑀺𑀝𑁆𑀞𑀢𑀺, 𑀅𑀬𑀁 𑀆𑀕𑀢𑀯𑀺𑀲𑁄 𑀦𑁄 𑀖𑁄𑀭𑀯𑀺𑀲𑁄 𑀦𑀸𑀫. 𑀬𑀲𑁆𑀲 𑀧𑀦 𑀯𑀺𑀲𑀁 𑀲𑀡𑀺𑀓𑀁 𑀅𑀪𑀺𑀭𑀼𑀳𑀢𑀺, 𑀆𑀭𑀼𑀴𑁆𑀳𑀸𑀭𑀼𑀴𑁆𑀳𑀝𑁆𑀞𑀸𑀦𑁂 𑀧𑀦 𑀅𑀬𑀁 𑀲𑀻𑀢𑀉𑀤𑀓𑀁 𑀯𑀺𑀬 𑀳𑁄𑀢𑀺 𑀉𑀤𑀓𑀲𑀧𑁆𑀧𑀸𑀤𑀻𑀦𑀁 𑀯𑀺𑀲𑀁 𑀯𑀺𑀬, 𑀤𑁆𑀯𑀸𑀤𑀲𑀯𑀲𑁆𑀲𑀘𑁆𑀘𑀬𑁂𑀦𑀸𑀧𑀺 𑀓𑀡𑁆𑀡𑀧𑀺𑀝𑁆𑀞𑀺𑀔𑀦𑁆𑀥𑀧𑀺𑀝𑁆𑀞𑀺𑀓𑀸𑀤𑀻𑀲𑀼 𑀕𑀡𑁆𑀟𑀧𑀺𑀴𑀓𑀸𑀤𑀺𑀯𑀲𑁂𑀦 𑀧𑀜𑁆𑀜𑀸𑀬𑀢𑀺, 𑀫𑀦𑁆𑀢𑀧𑀭𑀺𑀯𑀢𑁆𑀢𑀦𑀸𑀤𑀻𑀲𑀼 𑀘 𑀓𑀬𑀺𑀭𑀫𑀸𑀦𑀸𑀲𑀼 𑀲𑀻𑀖𑀁 𑀦 𑀑𑀢𑀭𑀢𑀺, 𑀅𑀬𑀁 𑀖𑁄𑀭𑀯𑀺𑀲𑁄 𑀦𑁄 𑀆𑀕𑀢𑀯𑀺𑀲𑁄 𑀦𑀸𑀫. 𑀬𑀲𑁆𑀲 𑀧𑀦 𑀯𑀺𑀲𑀁 𑀲𑀻𑀖𑀁 𑀅𑀪𑀺𑀭𑀼𑀳𑀢𑀺, 𑀦 𑀲𑀻𑀖𑀁 𑀑𑀢𑀭𑀢𑀺 𑀅𑀦𑁂𑀴𑀓𑀲𑀧𑁆𑀧𑀸𑀤𑀻𑀦𑀁 𑀯𑀺𑀲𑀁 𑀯𑀺𑀬, 𑀅𑀬𑀁 𑀆𑀕𑀢𑀯𑀺𑀲𑁄 𑀘𑁂𑀯 𑀖𑁄𑀭𑀯𑀺𑀲𑁄 𑀘. 𑀬𑀲𑁆𑀲 𑀧𑀦 𑀯𑀺𑀲𑀁 𑀫𑀦𑁆𑀤𑀁 𑀳𑁄𑀢𑀺, 𑀑𑀢𑀸𑀭𑀺𑀬𑀫𑀸𑀦𑀫𑁆𑀧𑀺 𑀲𑀼𑀔𑁂𑀦𑁂𑀯 𑀑𑀢𑀭𑀢𑀺 𑀦𑀻𑀮𑀲𑀧𑁆𑀧𑀥𑀫𑁆𑀫𑀦𑀺𑀲𑀧𑁆𑀧𑀸𑀤𑀻𑀦𑀁 𑀯𑀺𑀲𑀁 𑀯𑀺𑀬, 𑀅𑀬𑀁 𑀦𑁂𑀯𑀸𑀕𑀢𑀯𑀺𑀲𑁄 𑀦 𑀖𑁄𑀭𑀯𑀺𑀲𑁄 𑀦𑀸𑀫. 𑀇𑀫𑀺𑀦𑀸 𑀉𑀧𑀸𑀬𑁂𑀦 𑀓𑀝𑁆𑀞𑀫𑀼𑀔𑁂 𑀤𑀝𑁆𑀞𑀯𑀺𑀲𑀸𑀤𑀬𑁄 𑀧𑀽𑀢𑀺𑀫𑀼𑀔𑀸𑀤𑀻𑀲𑀼 𑀘 𑀤𑀝𑁆𑀞𑀯𑀺𑀲𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸𑀢𑀺. 𑀏𑀯𑀁 𑀧𑀼𑀕𑁆𑀕𑀮𑀧𑀡𑁆𑀡𑀢𑁆𑀢𑀺𑀯𑀲𑁂𑀦 𑀘𑀢𑀼𑀲𑀝𑁆𑀞𑀺.

𑀢𑁂𑀲𑀼 ‘‘𑀅𑀡𑁆𑀟𑀚𑀸 𑀦𑀸𑀕𑀸’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁩.𑁩𑁪𑁨-𑁩𑁪𑁪) 𑀬𑁄𑀦𑀺𑀯𑀲𑁂𑀦 𑀏𑀓𑁂𑀓𑀁 𑀘𑀢𑀼𑀥𑀸 𑀯𑀺𑀪𑀚𑀺𑀢𑁆𑀯𑀸 𑀙𑀧𑀡𑁆𑀡𑀸𑀲𑀸𑀥𑀺𑀓𑀸𑀦𑀺 𑀤𑁆𑀯𑁂 𑀲𑀢𑀸𑀦𑀺 𑀳𑁄𑀦𑁆𑀢𑀺. 𑀢𑁂 𑀚𑀮𑀚𑀸𑀣𑀮𑀚𑀸𑀢𑀺 𑀤𑁆𑀯𑀺𑀕𑀼𑀡𑀺𑀢𑀸 𑀤𑁆𑀯𑀸𑀤𑀲𑀸𑀥𑀺𑀓𑀸𑀦𑀺 𑀧𑀜𑁆𑀘𑀲𑀢𑀸𑀦𑀺 𑀳𑁄𑀦𑁆𑀢𑀺, 𑀢𑁂 𑀓𑀸𑀫𑀭𑀽𑀧𑀅𑀓𑀸𑀫𑀭𑀽𑀧𑀸𑀦𑀁 𑀯𑀲𑁂𑀦 𑀤𑁆𑀯𑀺𑀕𑀼𑀡𑀺𑀢𑀸 𑀘𑀢𑀼𑀯𑀻𑀲𑀸𑀥𑀺𑀓𑀲𑀳𑀲𑁆𑀲𑀲𑀗𑁆𑀔𑀸 𑀳𑁄𑀦𑁆𑀢𑀺. 𑀧𑀼𑀦 𑀕𑀢𑀫𑀕𑁆𑀕𑀲𑁆𑀲 𑀧𑀝𑀺𑀮𑁄𑀫𑀢𑁄 𑀲𑀁𑀔𑀺𑀧𑁆𑀧𑀫𑀸𑀦𑀸 𑀓𑀝𑁆𑀞𑀫𑀼𑀔𑀸𑀤𑀺𑀯𑀲𑁂𑀦 𑀘𑀢𑁆𑀢𑀸𑀭𑁄𑀯 𑀳𑁄𑀦𑁆𑀢𑀻𑀢𑀺. 𑀢𑁂 𑀲𑀦𑁆𑀥𑀸𑀬 𑀪𑀕𑀯𑀸 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑁄 𑀆𑀲𑀻𑀯𑀺𑀲𑀸’’𑀢𑀺 𑀆𑀳. 𑀓𑀼𑀮𑀯𑀲𑁂𑀦 𑀳𑀺 𑀏𑀢𑁂 𑀕𑀳𑀺𑀢𑀸.

𑀢𑀢𑁆𑀣 𑀆𑀲𑀻𑀯𑀺𑀲𑀸𑀢𑀺 𑀆𑀲𑀺𑀢𑁆𑀢𑀯𑀺𑀲𑀸𑀢𑀺𑀧𑀺 𑀆𑀲𑀻𑀯𑀺𑀲𑀸, 𑀅𑀲𑀺𑀢𑀯𑀺𑀲𑀸𑀢𑀺𑀧𑀺 𑀆𑀲𑀻𑀯𑀺𑀲𑀸, 𑀅𑀲𑀺𑀲𑀤𑀺𑀲𑀯𑀺𑀲𑀸𑀢𑀺𑀧𑀺 𑀆𑀲𑀻𑀯𑀺𑀲𑀸. 𑀆𑀲𑀺𑀢𑁆𑀢𑀯𑀺𑀲𑀸𑀢𑀺 𑀲𑀓𑀮𑀓𑀸𑀬𑁂 𑀆𑀲𑀺𑀜𑁆𑀘𑀺𑀢𑁆𑀯𑀸 𑀯𑀺𑀬 𑀞𑀧𑀺𑀢𑀯𑀺𑀲𑀸, 𑀧𑀭𑀲𑁆𑀲 𑀘 𑀅𑀢𑁆𑀢𑀦𑁄 𑀲𑀭𑀻𑀭𑁂 𑀘 𑀆𑀲𑀺𑀜𑁆𑀘𑀦𑀯𑀺𑀲𑀸𑀢𑀺 𑀅𑀢𑁆𑀣𑁄. 𑀅𑀲𑀺𑀢𑀯𑀺𑀲𑀸𑀢𑀺 𑀬𑀁 𑀬𑀁 𑀏𑀢𑁂𑀳𑀺 𑀅𑀲𑀺𑀢𑀁 𑀳𑁄𑀢𑀺 𑀧𑀭𑀺𑀪𑀼𑀢𑁆𑀢𑀁, 𑀢𑀁 𑀢𑀁 𑀯𑀺𑀲𑀫𑁂𑀯 𑀲𑀫𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀅𑀲𑀺𑀢𑀁 𑀯𑀺𑀲𑀁 𑀳𑁄𑀢𑀺 𑀏𑀢𑁂𑀲𑀦𑁆𑀢𑀺 𑀆𑀲𑀻𑀯𑀺𑀲𑀸. 𑀅𑀲𑀺𑀲𑀤𑀺𑀲𑀯𑀺𑀲𑀸𑀢𑀺 𑀅𑀲𑀺𑀯𑀺𑀬 𑀢𑀺𑀔𑀺𑀡𑀁 𑀧𑀭𑀫𑀫𑁆𑀫𑀘𑁆𑀙𑁂𑀤𑀦𑀲𑀫𑀢𑁆𑀣𑀁 𑀯𑀺𑀲𑀁 𑀏𑀢𑁂𑀲𑀦𑁆𑀢𑀺 𑀆𑀲𑀻𑀯𑀺𑀲𑀸𑀢𑀺 𑀏𑀯𑀫𑁂𑀢𑁆𑀣 𑀯𑀘𑀦𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀉𑀕𑁆𑀕𑀢𑁂𑀚𑀸𑀢𑀺 𑀉𑀕𑁆𑀕𑀢𑀢𑁂𑀚𑀸 𑀩𑀮𑀯𑀢𑁂𑀚𑀸. 𑀖𑁄𑀭𑀯𑀺𑀲𑀸𑀢𑀺 𑀤𑀼𑀦𑁆𑀦𑀺𑀫𑁆𑀫𑀤𑁆𑀤𑀦𑀯𑀺𑀲𑀸.

𑀏𑀯𑀁 𑀯𑀤𑁂𑀬𑁆𑀬𑀼𑀦𑁆𑀢𑀺 𑀧𑀝𑀺𑀚𑀕𑁆𑀕𑀸𑀧𑀦𑀢𑁆𑀣𑀁 𑀏𑀯𑀁 𑀯𑀤𑁂𑀬𑁆𑀬𑀼𑀁. 𑀭𑀸𑀚𑀸𑀦𑁄 𑀳𑀺 𑀆𑀲𑀻𑀯𑀺𑀲𑁂 𑀕𑀸𑀳𑀸𑀧𑁂𑀢𑁆𑀯𑀸 𑁋 ‘‘𑀢𑀣𑀸𑀭𑀽𑀧𑁂 𑀘𑁄𑀭𑁂 𑀯𑀸 𑀏𑀢𑁂𑀳𑀺 𑀟𑀁𑀲𑀸𑀧𑁂𑀢𑁆𑀯𑀸 𑀫𑀸𑀭𑁂𑀲𑁆𑀲𑀸𑀫, 𑀦𑀕𑀭𑀽𑀧𑀭𑁄𑀥𑀓𑀸𑀮𑁂 𑀧𑀭𑀲𑁂𑀦𑀸𑀬 𑀯𑀸 𑀢𑀁 𑀔𑀺𑀧𑀺𑀲𑁆𑀲𑀸𑀫, 𑀧𑀭𑀩𑀮𑀁 𑀦𑀺𑀫𑁆𑀫𑀤𑁆𑀤𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀭𑀲𑀬𑀦𑀁 𑀆𑀭𑀼𑀬𑁆𑀳 𑀏𑀢𑁂𑀳𑀺 𑀅𑀢𑁆𑀢𑀸𑀦𑀁 𑀟𑀁𑀲𑀸𑀧𑁂𑀢𑁆𑀯𑀸 𑀲𑀢𑁆𑀢𑀽𑀦𑀁 𑀯𑀲𑀁 𑀅𑀦𑀸𑀕𑀘𑁆𑀙𑀦𑁆𑀢𑀸 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀫𑀭𑀺𑀲𑁆𑀲𑀸𑀫𑀸’’𑀢𑀺 𑀆𑀲𑀻𑀯𑀺𑀲𑁂 𑀚𑀕𑁆𑀕𑀸𑀧𑁂𑀦𑁆𑀢𑀺. 𑀢𑁂 𑀬𑀁 𑀘𑁄𑀭𑀁 𑀲𑀳𑀲𑀸𑀯 𑀫𑀸𑀭𑁂𑀢𑀼𑀁 𑀦 𑀇𑀘𑁆𑀙𑀦𑁆𑀢𑀺, ‘‘𑀏𑀯𑀫𑁂𑀢𑁂 𑀤𑀻𑀖𑀭𑀢𑁆𑀢𑀁 𑀤𑀼𑀓𑁆𑀔𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸 𑀫𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀇𑀘𑁆𑀙𑀦𑁆𑀢𑀸 𑀢𑀁 𑀧𑀼𑀭𑀺𑀲𑀁 𑀏𑀯𑀁 𑀯𑀤𑀦𑁆𑀢𑀺 𑀇𑀫𑁂 𑀢𑁂 𑀅𑀫𑁆𑀪𑁄 𑀧𑀼𑀭𑀺𑀲 𑀘𑀢𑁆𑀢𑀸𑀭𑁄 𑀆𑀲𑀻𑀯𑀺𑀲𑀸𑀢𑀺.

𑀢𑀢𑁆𑀣 𑀓𑀸𑀮𑁂𑀦 𑀓𑀸𑀮𑀦𑁆𑀢𑀺 𑀓𑀸𑀮𑁂 𑀓𑀸𑀮𑁂. 𑀲𑀁𑀯𑁂𑀲𑁂𑀢𑀩𑁆𑀩𑀸𑀢𑀺 𑀦𑀺𑀧𑀚𑁆𑀚𑀸𑀧𑁂𑀢𑀩𑁆𑀩𑀸. 𑀅𑀜𑁆𑀜𑀢𑀭𑁄 𑀯𑀸 𑀅𑀜𑁆𑀜𑀢𑀭𑁄 𑀯𑀸𑀢𑀺 𑀓𑀝𑁆𑀞𑀫𑀼𑀔𑀸𑀤𑀻𑀲𑀼 𑀬𑁄 𑀓𑁄𑀘𑀺. 𑀬𑀁 𑀢𑁂 𑀅𑀫𑁆𑀪𑁄 𑀧𑀼𑀭𑀺𑀲 𑀓𑀭𑀡𑀻𑀬𑀁, 𑀢𑀁 𑀓𑀭𑁄𑀳𑀻𑀢𑀺 𑀇𑀤𑀁 𑀅𑀢𑁆𑀣𑀘𑀭𑀓𑀲𑁆𑀲 𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀲 𑀓𑀺𑀭 𑀧𑀼𑀭𑀺𑀲𑀲𑁆𑀲 𑀏𑀯𑀁 𑀆𑀲𑀻𑀯𑀺𑀲𑁂 𑀧𑀝𑀺𑀧𑀸𑀤𑁂𑀢𑁆𑀯𑀸 ‘𑀅𑀬𑀁 𑀯𑁄 𑀉𑀧𑀝𑁆𑀞𑀸𑀓𑁄’𑀢𑀺 𑀘𑀢𑀽𑀲𑀼 𑀧𑁂𑀴𑀸𑀲𑀼 𑀞𑀧𑀺𑀢𑀸𑀦𑀁 𑀆𑀲𑀻𑀯𑀺𑀲𑀸𑀦𑀁 𑀆𑀭𑁄𑀘𑁂𑀦𑁆𑀢𑀺. 𑀅𑀣𑁂𑀓𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀆𑀕𑀫𑁆𑀫 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀤𑀓𑁆𑀔𑀺𑀡𑀧𑀸𑀤𑀸𑀦𑀼𑀲𑀸𑀭𑁂𑀦 𑀅𑀪𑀺𑀭𑀼𑀳𑀺𑀢𑁆𑀯𑀸 𑀤𑀓𑁆𑀔𑀺𑀡𑀳𑀢𑁆𑀣𑀁 𑀫𑀡𑀺𑀩𑀦𑁆𑀥𑀢𑁄 𑀧𑀝𑁆𑀞𑀸𑀬 𑀯𑁂𑀞𑁂𑀢𑁆𑀯𑀸 𑀤𑀓𑁆𑀔𑀺𑀡𑀓𑀡𑁆𑀡𑀲𑁄𑀢𑀫𑀽𑀮𑁂 𑀨𑀡𑀁 𑀓𑀢𑁆𑀯𑀸 𑀲𑀼𑀲𑀽𑀢𑀺 𑀓𑀭𑁄𑀦𑁆𑀢𑁄 𑀦𑀺𑀧𑀚𑁆𑀚𑀺. 𑀅𑀧𑀭𑁄 𑀯𑀸𑀫𑀧𑀸𑀤𑀸𑀦𑀼𑀲𑀸𑀭𑁂𑀦 𑀅𑀪𑀺𑀭𑀼𑀳𑀺𑀢𑁆𑀯𑀸 𑀢𑀣𑁂𑀯 𑀯𑀸𑀫𑀳𑀢𑁆𑀣𑀁 𑀯𑁂𑀞𑁂𑀢𑁆𑀯𑀸 𑀯𑀸𑀫𑀓𑀡𑁆𑀡𑀲𑁄𑀢𑀫𑀽𑀮𑁂 𑀨𑀡𑀁 𑀓𑀢𑁆𑀯𑀸 𑀲𑀼𑀲𑀽𑀢𑀺 𑀓𑀭𑁄𑀦𑁆𑀢𑁄 𑀦𑀺𑀧𑀚𑁆𑀚𑀺, 𑀢𑀢𑀺𑀬𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀅𑀪𑀺𑀫𑀼𑀔𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀓𑀼𑀘𑁆𑀙𑀺𑀁 𑀯𑁂𑀞𑁂𑀢𑁆𑀯𑀸 𑀕𑀮𑀯𑀸𑀝𑀓𑀫𑀽𑀮𑁂 𑀨𑀡𑀁 𑀓𑀢𑁆𑀯𑀸 𑀲𑀼𑀲𑀽𑀢𑀺 𑀓𑀭𑁄𑀦𑁆𑀢𑁄 𑀦𑀺𑀧𑀚𑁆𑀚𑀺, 𑀘𑀢𑀼𑀢𑁆𑀣𑁄 𑀧𑀺𑀝𑁆𑀞𑀺𑀪𑀸𑀕𑁂𑀦 𑀅𑀪𑀺𑀭𑀼𑀳𑀺𑀢𑁆𑀯𑀸 𑀕𑀻𑀯𑀁 𑀯𑁂𑀞𑁂𑀢𑁆𑀯𑀸 𑀉𑀧𑀭𑀺𑀫𑀼𑀤𑁆𑀥𑀦𑀺 𑀨𑀡𑀁 𑀞𑀧𑁂𑀢𑁆𑀯𑀸 𑀲𑀼𑀲𑀽𑀢𑀺 𑀓𑀭𑁄𑀦𑁆𑀢𑁄 𑀦𑀺𑀧𑀚𑁆𑀚𑀺.

𑀏𑀯𑀁 𑀘𑀢𑀽𑀲𑀼 𑀆𑀲𑀻𑀯𑀺𑀲𑁂𑀲𑀼 𑀲𑀭𑀻𑀭𑀝𑁆𑀞𑀓𑁂𑀲𑀼𑀬𑁂𑀯 𑀚𑀸𑀢𑁂𑀲𑀼 𑀏𑀓𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀢𑁆𑀣𑀘𑀭𑀓𑀧𑀼𑀭𑀺𑀲𑁄 𑀢𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀢𑁂, 𑀪𑁄 𑀧𑀼𑀭𑀺𑀲, 𑀮𑀤𑁆𑀥’’𑀦𑁆𑀢𑀺, 𑀧𑀼𑀘𑁆𑀙𑀺. 𑀢𑀢𑁄 𑀢𑁂𑀦 ‘‘𑀇𑀫𑁂 𑀫𑁂, 𑀪𑁄, 𑀳𑀢𑁆𑀣𑁂𑀲𑀼 𑀳𑀢𑁆𑀣𑀓𑀝𑀓𑀁 𑀯𑀺𑀬 𑀩𑀸𑀳𑀸𑀲𑀼 𑀓𑁂𑀬𑀽𑀭𑀁 𑀯𑀺𑀬 𑀓𑀼𑀘𑁆𑀙𑀺𑀫𑁆𑀳𑀺 𑀓𑀼𑀘𑁆𑀙𑀺𑀯𑁂𑀞𑀦𑀲𑀸𑀝𑀓𑁄 𑀯𑀺𑀬 𑀓𑀡𑁆𑀡𑁂𑀲𑀼 𑀓𑀡𑁆𑀡𑀘𑀽𑀴𑀺𑀓𑀸 𑀯𑀺𑀬 𑀕𑀮𑁂 𑀫𑀼𑀢𑁆𑀢𑀸𑀯𑀮𑀺𑀬𑁄 𑀯𑀺𑀬 𑀲𑀻𑀲𑁂 𑀲𑀻𑀲𑀧𑀲𑀸𑀥𑀦𑀁 𑀯𑀺𑀬 𑀓𑁂𑀘𑀺 𑀅𑀮𑀗𑁆𑀓𑀸𑀭𑀯𑀺𑀲𑁂𑀲𑀸 𑀭𑀜𑁆𑀜𑀸 𑀤𑀺𑀦𑁆𑀦𑀸’’𑀢𑀺 𑀯𑀼𑀢𑁆𑀢𑁂 𑀲𑁄 𑀆𑀳 𑁋 ‘‘𑀪𑁄 𑀅𑀦𑁆𑀥𑀩𑀸𑀮, 𑀫𑀸 𑀏𑀯𑀁 𑀫𑀜𑁆𑀜𑀺𑀢𑁆𑀣 ‘𑀭𑀜𑁆𑀜𑀸 𑀫𑁂 𑀢𑀼𑀝𑁆𑀞𑁂𑀦𑁂𑀢𑀁 𑀧𑀲𑀸𑀥𑀦𑀁 𑀤𑀺𑀦𑁆𑀦’𑀦𑁆𑀢𑀺. 𑀢𑁆𑀯𑀁 𑀭𑀜𑁆𑀜𑁄 𑀆𑀕𑀼𑀘𑀸𑀭𑀻 𑀘𑁄𑀭𑁄, 𑀇𑀫𑁂 𑀘 𑀘𑀢𑁆𑀢𑀸𑀭𑁄 𑀆𑀲𑀻𑀯𑀺𑀲𑀸 𑀤𑀼𑀭𑀼𑀧𑀝𑁆𑀞𑀸𑀳𑀸 𑀤𑀼𑀧𑁆𑀧𑀝𑀺𑀚𑀕𑁆𑀕𑀺𑀬𑀸, 𑀏𑀓𑀲𑁆𑀫𑀺𑀁 𑀉𑀝𑁆𑀞𑀸𑀢𑀼𑀓𑀸𑀫𑁂 𑀏𑀓𑁄 𑀦𑁆𑀳𑀸𑀬𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀏𑀓𑀲𑁆𑀫𑀺𑀁 𑀦𑁆𑀳𑀸𑀬𑀺𑀢𑀼𑀓𑀸𑀫𑁂 𑀏𑀓𑁄 𑀪𑀼𑀜𑁆𑀚𑀺𑀢𑀼𑀓𑀸𑀫𑁄, 𑀏𑀓𑀲𑁆𑀫𑀺𑀁 𑀪𑀼𑀜𑁆𑀚𑀺𑀢𑀼𑀓𑀸𑀫𑁂 𑀏𑀓𑁄 𑀦𑀺𑀧𑀚𑁆𑀚𑀺𑀢𑀼𑀓𑀸𑀫𑁄. 𑀢𑁂𑀲𑀼 𑀬𑀲𑁆𑀲𑁂𑀯 𑀇𑀘𑁆𑀙𑀸 𑀦 𑀧𑀽𑀭𑀢𑀺, 𑀲𑁄 𑀢𑀢𑁆𑀣𑁂𑀯 𑀟𑀁𑀲𑀺𑀢𑁆𑀯𑀸 𑀫𑀸𑀭𑁂𑀢𑀻’’𑀢𑀺. 𑀅𑀢𑁆𑀣𑀺 𑀧𑀦, 𑀪𑁄, 𑀏𑀯𑀁 𑀲𑀦𑁆𑀢𑁂 𑀓𑁄𑀘𑀺 𑀲𑁄𑀢𑁆𑀣𑀺𑀫𑀕𑁆𑀕𑁄𑀢𑀺? 𑀆𑀫, 𑀭𑀸𑀚𑀧𑀼𑀭𑀺𑀲𑀸𑀦𑀁 𑀯𑀺𑀓𑁆𑀔𑀺𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀧𑀮𑀸𑀬𑀦𑀁 𑀲𑁄𑀢𑁆𑀣𑀺𑀪𑀸𑀯𑁄𑀢𑀺 𑀯𑀢𑁆𑀯𑀸 ‘‘𑀬𑀁 𑀢𑁂 𑀓𑀭𑀡𑀻𑀬𑀁, 𑀢𑀁 𑀓𑀭𑁄𑀳𑀻’’𑀢𑀺 𑀯𑀤𑁂𑀬𑁆𑀬.

𑀢𑀁 𑀲𑀼𑀢𑁆𑀯𑀸 𑀇𑀢𑀭𑁄 𑀘𑀢𑀼𑀦𑁆𑀦𑀁 𑀆𑀲𑀻𑀯𑀺𑀲𑀸𑀦𑀁 𑀧𑀫𑀸𑀤𑀓𑁆𑀔𑀡𑀁 𑀭𑀸𑀚𑀧𑀼𑀭𑀺𑀲𑁂𑀳𑀺 𑀘 𑀧𑀯𑀺𑀯𑀺𑀢𑁆𑀢𑀁 𑀤𑀺𑀲𑁆𑀯𑀸, 𑀯𑀸𑀫𑀳𑀢𑁆𑀣𑁂𑀦 𑀤𑀓𑁆𑀔𑀺𑀡𑀳𑀢𑁆𑀣𑀁 𑀯𑁂𑀞𑁂𑀢𑁆𑀯𑀸, 𑀤𑀓𑁆𑀔𑀺𑀡𑀓𑀡𑁆𑀡𑀘𑀽𑀴𑀺𑀓𑀸𑀬 𑀨𑀡𑀁 𑀞𑀧𑁂𑀢𑁆𑀯𑀸, 𑀲𑀬𑀺𑀢𑀸𑀲𑀻𑀯𑀺𑀲𑀲𑁆𑀲 𑀲𑀭𑀻𑀭𑀁 𑀧𑀭𑀺𑀫𑀚𑁆𑀚𑀦𑁆𑀢𑁄 𑀯𑀺𑀬 𑀲𑀡𑀺𑀓𑀁 𑀢𑀁 𑀅𑀧𑀦𑁂𑀢𑁆𑀯𑀸, 𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀲𑁂𑀲𑁂𑀧𑀺 𑀅𑀧𑀦𑁂𑀢𑁆𑀯𑀸 𑀢𑁂𑀲𑀁 𑀪𑀻𑀢𑁄 𑀧𑀮𑀸𑀬𑁂𑀬𑁆𑀬. 𑀅𑀣 𑀦𑀁 𑀢𑁂 𑀆𑀲𑀻𑀯𑀺𑀲𑀸 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀭𑀜𑁆𑀜𑀸 𑀉𑀧𑀝𑁆𑀞𑀸𑀓𑁄 𑀤𑀺𑀦𑁆𑀦𑁄’’𑀢𑀺 𑀅𑀦𑀼𑀩𑀦𑁆𑀥𑀫𑀸𑀦𑀸 𑀆𑀕𑀘𑁆𑀙𑁂𑀬𑁆𑀬𑀼𑀁. 𑀇𑀤𑀁 𑀲𑀦𑁆𑀥𑀸𑀬 𑀅𑀣 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀪𑀻𑀢𑁄 𑀘𑀢𑀼𑀦𑁆𑀦𑀁 𑀆𑀲𑀻𑀯𑀺𑀲𑀸𑀦𑀁…𑀧𑁂… 𑀧𑀮𑀸𑀬𑁂𑀣𑀸𑀢𑀺 𑀯𑀼𑀢𑁆𑀢𑀁.

𑀢𑀲𑁆𑀫𑀺𑀁 𑀧𑀦 𑀧𑀼𑀭𑀺𑀲𑁂 𑀏𑀯𑀁 𑀆𑀕𑀢𑀫𑀕𑁆𑀕𑀁 𑀑𑀮𑁄𑀓𑁂𑀢𑁆𑀯𑀸 𑀑𑀮𑁄𑀓𑁂𑀢𑁆𑀯𑀸 𑀧𑀮𑀸𑀬𑀦𑁆𑀢𑁂 𑀭𑀸𑀚𑀸 ‘‘𑀧𑀮𑀸𑀢𑁄 𑀲𑁄 𑀧𑀼𑀭𑀺𑀲𑁄’’𑀢𑀺 𑀲𑀼𑀢𑁆𑀯𑀸 ‘‘𑀓𑁄 𑀦𑀼 𑀔𑁄 𑀢𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀖𑀸𑀢𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺 𑀯𑀺𑀘𑀺𑀦𑀦𑁆𑀢𑁄 𑀢𑀲𑁆𑀲𑁂𑀯 𑀧𑀘𑁆𑀘𑀢𑁆𑀣𑀺𑀓𑁂 𑀧𑀜𑁆𑀘 𑀚𑀦𑁂 𑀮𑀪𑀺𑀢𑁆𑀯𑀸 ‘‘𑀕𑀘𑁆𑀙𑀣 𑀦𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀖𑀸𑀢𑁂𑀣𑀸’’𑀢𑀺 𑀧𑁂𑀲𑁂𑀬𑁆𑀬. 𑀅𑀣𑀲𑁆𑀲 𑀅𑀢𑁆𑀣𑀘𑀭𑀸 𑀧𑀼𑀭𑀺𑀲𑀸 𑀢𑀁 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀆𑀭𑁄𑀘𑁂𑀬𑁆𑀬𑀼𑀁. 𑀲𑁄 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀪𑀻𑀢𑁄 𑀧𑀮𑀸𑀬𑁂𑀣. 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀢𑀫𑁂𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀙𑀝𑁆𑀞𑁄 𑀅𑀦𑁆𑀢𑀭𑀘𑀭𑁄 𑀯𑀥𑀓𑁄𑀢𑀺 ‘‘𑀧𑀞𑀫𑀁 𑀆𑀲𑀻𑀯𑀺𑀲𑁂𑀳𑀺 𑀅𑀦𑀼𑀩𑀤𑁆𑀥𑁄 𑀇𑀢𑁄 𑀘𑀺𑀢𑁄 𑀘 𑀢𑁂 𑀯𑀜𑁆𑀘𑁂𑀦𑁆𑀢𑁄 𑀧𑀮𑀸𑀬𑀺, 𑀇𑀤𑀸𑀦𑀺 𑀧𑀜𑁆𑀘𑀳𑀺 𑀧𑀘𑁆𑀘𑀢𑁆𑀣𑀺𑀓𑁂𑀳𑀺 𑀅𑀦𑀼𑀩𑀤𑁆𑀥𑁄 𑀲𑀼𑀝𑁆𑀞𑀼𑀢𑀭𑀁 𑀧𑀮𑀸𑀬𑀢𑀺, 𑀦 𑀲𑀓𑁆𑀓𑀸 𑀲𑁄 𑀏𑀯𑀁 𑀕𑀳𑁂𑀢𑀼𑀁, 𑀉𑀧𑀮𑀸𑀴𑀦𑀸𑀬 𑀧𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀤𑀳𑀭𑀓𑀸𑀮𑀢𑁄 𑀧𑀝𑁆𑀞𑀸𑀬 𑀏𑀓𑀢𑁄 𑀔𑀸𑀤𑀺𑀢𑁆𑀯𑀸 𑀘 𑀧𑀺𑀯𑀺𑀢𑁆𑀯𑀸 𑀘 𑀲𑀦𑁆𑀣𑀯𑀁 𑀅𑀦𑁆𑀢𑀭𑀘𑀭𑀁 𑀯𑀥𑀓𑀫𑀲𑁆𑀲 𑀧𑁂𑀲𑁂𑀣𑀸’’𑀢𑀺 𑀅𑀫𑀘𑁆𑀘𑁂𑀳𑀺 𑀯𑀼𑀢𑁆𑀢𑁂𑀦 𑀭𑀜𑁆𑀜𑀸 𑀧𑀭𑀺𑀬𑁂𑀲𑀺𑀢𑁆𑀯𑀸 𑀧𑁂𑀲𑀺𑀢𑁄 𑀅𑀦𑁆𑀢𑀭𑀘𑀭𑁄 𑀯𑀥𑀓𑁄.

𑀲𑁄 𑀧𑀲𑁆𑀲𑁂𑀬𑁆𑀬 𑀲𑀼𑀜𑁆𑀜𑀁 𑀕𑀸𑀫𑀦𑁆𑀢𑀺 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀧𑀤𑀁 𑀖𑀸𑀬𑀺𑀢𑁆𑀯𑀸 𑀖𑀸𑀬𑀺𑀢𑁆𑀯𑀸 𑀯𑁂𑀕𑁂𑀦𑀸𑀕𑀘𑁆𑀙𑀦𑁆𑀢𑁂 𑀘𑀢𑁆𑀢𑀸𑀭𑁄 𑀆𑀲𑀻𑀯𑀺𑀲𑁂 𑀧𑀜𑁆𑀘 𑀯𑀥𑀓𑁂 𑀧𑀘𑁆𑀘𑀢𑁆𑀣𑀺𑀓𑁂 𑀙𑀝𑁆𑀞𑀜𑁆𑀘 𑀅𑀦𑁆𑀢𑀭𑀘𑀭𑀁 𑀯𑀥𑀓𑀁 ‘‘𑀦𑀺𑀯𑀢𑁆𑀢 𑀪𑁄, 𑀫𑀸 𑀧𑀮𑀸𑀬𑀺, 𑀧𑀼𑀢𑁆𑀢𑀤𑀸𑀭𑁂𑀦 𑀲𑀤𑁆𑀥𑀺𑀁 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀲𑀼𑀔𑀁 𑀯𑀲𑀺𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸, 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀮𑀸𑀬𑀦𑁆𑀢𑁄 𑀧𑀘𑁆𑀘𑀦𑁆𑀢𑀭𑀝𑁆𑀞𑁂 𑀅𑀪𑀺𑀫𑀼𑀔𑀕𑀢𑀁 𑀏𑀓𑀁 𑀙𑀓𑀼𑀝𑀺𑀓𑀁 𑀲𑀼𑀜𑁆𑀜𑀁 𑀕𑀸𑀫𑀁 𑀧𑀲𑁆𑀲𑁂𑀬𑁆𑀬. 𑀭𑀺𑀢𑁆𑀢𑀓𑀜𑁆𑀜𑁂𑀯 𑀧𑀯𑀺𑀲𑁂𑀬𑁆𑀬𑀸𑀢𑀺 𑀥𑀦𑀥𑀜𑁆𑀜𑀫𑀜𑁆𑀘𑀧𑀻𑀞𑀸𑀤𑀻𑀳𑀺 𑀯𑀺𑀭𑀳𑀺𑀢𑀢𑁆𑀢𑀸 𑀭𑀺𑀢𑁆𑀢𑀓𑀜𑁆𑀜𑁂𑀯 𑀧𑀯𑀺𑀲𑁂𑀬𑁆𑀬. 𑀢𑀼𑀘𑁆𑀙𑀓𑀁 𑀲𑀼𑀜𑁆𑀜𑀓𑀦𑁆𑀢𑀺 𑀏𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀭𑀺𑀫𑀲𑁂𑀬𑁆𑀬𑀸𑀢𑀺 ‘‘𑀲𑀘𑁂 𑀧𑀸𑀦𑀻𑀬𑀁 𑀪𑀯𑀺𑀲𑁆𑀲𑀢𑀺, 𑀧𑀺𑀯𑀺𑀲𑁆𑀲𑀸𑀫𑀺, 𑀲𑀘𑁂 𑀪𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀪𑀼𑀜𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀪𑀸𑀚𑀦𑀁 𑀯𑀺𑀯𑀭𑀺𑀢𑁆𑀯𑀸 𑀳𑀢𑁆𑀣𑀁 𑀅𑀦𑁆𑀢𑁄 𑀧𑀯𑁂𑀲𑁂𑀢𑁆𑀯𑀸 𑀧𑀭𑀺𑀫𑀲𑁂𑀬𑁆𑀬.

𑀢𑀫𑁂𑀦𑀁 𑀏𑀯𑀁 𑀯𑀤𑁂𑀬𑁆𑀬𑀼𑀦𑁆𑀢𑀺 𑀙𑀦𑁆𑀦𑀁 𑀖𑀭𑀸𑀦𑀁 𑀏𑀓𑀖𑀭𑁂𑀧𑀺 𑀓𑀺𑀜𑁆𑀘𑀺 𑀅𑀮𑀪𑀺𑀢𑁆𑀯𑀸 𑀕𑀸𑀫𑀫𑀚𑁆𑀛𑁂 𑀏𑀓𑁄 𑀲𑀦𑁆𑀤𑀘𑁆𑀙𑀸𑀬𑁄 𑀭𑀼𑀓𑁆𑀔𑁄 𑀅𑀢𑁆𑀣𑀺, 𑀢𑀢𑁆𑀣 𑀯𑀗𑁆𑀓𑀨𑀮𑀓𑀁 𑀅𑀢𑁆𑀣𑀢𑀁 𑀤𑀺𑀲𑁆𑀯𑀸, ‘‘𑀇𑀥 𑀢𑀸𑀯 𑀦𑀺𑀲𑀻𑀤𑀺𑀲𑁆𑀲𑀸𑀫𑀻’’𑀢𑀺 𑀕𑀦𑁆𑀢𑁆𑀯𑀸, 𑀢𑀢𑁆𑀣 𑀦𑀺𑀲𑀺𑀦𑁆𑀦𑀁 𑀫𑀦𑁆𑀤𑀫𑀦𑁆𑀤𑁂𑀦 𑀯𑀸𑀢𑁂𑀦 𑀩𑀻𑀚𑀺𑀬𑀫𑀸𑀦𑀁 𑀢𑀢𑁆𑀢𑀓𑀫𑀢𑁆𑀢𑀫𑁆𑀧𑀺 𑀲𑀼𑀔𑀁 𑀲𑀦𑁆𑀢𑀢𑁄 𑀅𑀲𑁆𑀲𑀸𑀤𑀬𑀫𑀸𑀦𑀁, 𑀢𑀫𑁂𑀦𑀁 𑀧𑀼𑀭𑀺𑀲𑀁 𑀓𑁂𑀘𑀺𑀤𑁂𑀯 𑀅𑀢𑁆𑀣𑀘𑀭𑀓𑀸 𑀩𑀳𑀺 𑀧𑀯𑀢𑁆𑀢𑀺𑀁 𑀜𑀢𑁆𑀯𑀸 𑀆𑀕𑀢𑀸 𑀏𑀯𑀁 𑀯𑀤𑁂𑀬𑁆𑀬𑀼𑀁. 𑀇𑀤𑀸𑀦𑀺 𑀅𑀫𑁆𑀪𑁄 𑀧𑀼𑀭𑀺𑀲𑀸𑀢𑀺 𑀅𑀫𑁆𑀪𑁄, 𑀧𑀼𑀭𑀺𑀲, 𑀇𑀤𑀸𑀦𑀺. 𑀘𑁄𑀭𑀸 𑀕𑀸𑀫𑀖𑀸𑀢𑀓𑀸𑀢𑀺 ‘‘𑀬𑀤𑁂𑀯𑁂𑀢𑁆𑀣 𑀮𑀪𑀺𑀲𑁆𑀲𑀸𑀫, 𑀢𑀁 𑀕𑀡𑁆𑀳𑀺𑀲𑁆𑀲𑀸𑀫 𑀯𑀸 𑀖𑀸𑀢𑁂𑀲𑁆𑀲𑀸𑀫 𑀯𑀸’’𑀢𑀺 𑀆𑀕𑀢𑀸 𑀙 𑀕𑀸𑀫𑀖𑀸𑀢𑀓𑀘𑁄𑀭𑀸.

𑀉𑀤𑀓𑀡𑁆𑀡𑀯𑀦𑁆𑀢𑀺 𑀕𑀫𑁆𑀪𑀻𑀭𑀁 𑀧𑀼𑀣𑀼𑀮𑀁 𑀉𑀤𑀓𑀁. 𑀕𑀫𑁆𑀪𑀻𑀭𑀫𑁆𑀧𑀺 𑀳𑀺 𑀅𑀧𑀼𑀣𑀼𑀮𑀁, 𑀧𑀼𑀣𑀼𑀮𑀁 𑀯𑀸 𑀅𑀕𑀫𑁆𑀪𑀻𑀭𑀁, 𑀦 𑀅𑀡𑁆𑀡𑀯𑁄𑀢𑀺 𑀯𑀼𑀘𑁆𑀘𑀢𑀺, 𑀬𑀫𑁆𑀧𑀦 𑀕𑀫𑁆𑀪𑀻𑀭𑀜𑁆𑀘 𑀧𑀼𑀣𑀼𑀮𑀜𑁆𑀘, 𑀢𑀲𑁆𑀲𑁂𑀯𑁂𑀢𑀁 𑀦𑀸𑀫𑀁. 𑀲𑀸𑀲𑀗𑁆𑀓𑀁 𑀲𑀧𑁆𑀧𑀝𑀺𑀪𑀬𑀦𑁆𑀢𑀺 𑀘𑀢𑀼𑀦𑁆𑀦𑀁 𑀆𑀲𑀻𑀯𑀺𑀲𑀸𑀦𑀁 𑀧𑀜𑁆𑀘𑀦𑁆𑀦𑀁 𑀯𑀥𑀓𑀸𑀦𑀁 𑀙𑀝𑁆𑀞𑀲𑁆𑀲 𑀅𑀦𑁆𑀢𑀭𑀘𑀭𑀲𑁆𑀲 𑀙𑀦𑁆𑀦𑀜𑁆𑀘 𑀕𑀸𑀫𑀖𑀸𑀢𑀓𑀘𑁄𑀭𑀸𑀦𑀁 𑀯𑀲𑁂𑀦 𑀲𑀸𑀲𑀗𑁆𑀓𑀁 𑀲𑀧𑁆𑀧𑀝𑀺𑀪𑀬𑀁. 𑀔𑁂𑀫𑀁 𑀅𑀧𑁆𑀧𑀝𑀺𑀪𑀬𑀦𑁆𑀢𑀺 𑀢𑁂𑀲𑀁𑀬𑁂𑀯 𑀆𑀲𑀻𑀯𑀺𑀲𑀸𑀤𑀻𑀦𑀁 𑀅𑀪𑀸𑀯𑁂𑀦 𑀔𑁂𑀫𑀜𑁆𑀘 𑀦𑀺𑀩𑁆𑀪𑀬𑀜𑁆𑀘 𑀯𑀺𑀘𑀺𑀢𑁆𑀭𑀉𑀬𑁆𑀬𑀸𑀦𑀯𑀭𑀁 𑀩𑀳𑁆𑀯𑀦𑁆𑀦𑀧𑀸𑀦𑀁 𑀤𑁂𑀯𑀦𑀕𑀭𑀲𑀤𑀺𑀲𑀁. 𑀦 𑀘𑀲𑁆𑀲 𑀦𑀸𑀯𑀸 𑀲𑀦𑁆𑀢𑀸𑀭𑀡𑀻𑀢𑀺 ‘‘𑀇𑀫𑀸𑀬 𑀦𑀸𑀯𑀸𑀬 𑀑𑀭𑀺𑀫𑀢𑀻𑀭𑀢𑁄 𑀧𑀭𑀢𑀻𑀭𑀁 𑀕𑀫𑀺𑀲𑁆𑀲𑀦𑁆𑀢𑀻’’𑀢𑀺 𑀏𑀯𑀁 𑀞𑀧𑀺𑀢𑀸 𑀘 𑀲𑀦𑁆𑀢𑀸𑀭𑀡𑀻 𑀦𑀸𑀯𑀸 𑀦 𑀪𑀯𑁂𑀬𑁆𑀬. 𑀉𑀢𑁆𑀢𑀭𑀲𑁂𑀢𑀼 𑀯𑀸𑀢𑀺 𑀭𑀼𑀓𑁆𑀔𑀲𑁂𑀢𑀼-𑀚𑀗𑁆𑀖𑀲𑁂𑀢𑀼-𑀲𑀓𑀝𑀲𑁂𑀢𑀽𑀦𑀁 𑀅𑀜𑁆𑀜𑀢𑀭𑁄 𑀉𑀢𑁆𑀢𑀭𑀲𑁂𑀢𑀼 𑀯𑀸 𑀦 𑀪𑀯𑁂𑀬𑁆𑀬. 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄𑀢𑀺 𑀦 𑀔𑁄 𑀏𑀲 𑀩𑁆𑀭𑀸𑀳𑁆𑀫𑀡𑁄. 𑀓𑀲𑁆𑀫𑀸 𑀦𑀁 𑀩𑁆𑀭𑀸𑀳𑁆𑀫𑀡𑁄𑀢𑀺 𑀆𑀳? 𑀏𑀢𑁆𑀢𑀓𑀸𑀦𑀁 𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀩𑀸𑀳𑀺𑀢𑀢𑁆𑀢𑀸, 𑀤𑁂𑀲𑀦𑀁 𑀯𑀸 𑀯𑀺𑀦𑀺𑀯𑀢𑁆𑀢𑁂𑀦𑁆𑀢𑁄 𑀏𑀓𑀁 𑀔𑀻𑀡𑀸𑀲𑀯𑀩𑁆𑀭𑀸𑀳𑁆𑀫𑀡𑀁 𑀤𑀲𑁆𑀲𑁂𑀢𑀼𑀫𑁆𑀧𑀺 𑀏𑀯𑀫𑀸𑀳.

𑀢𑀲𑁆𑀫𑀺𑀁 𑀧𑀦 𑀏𑀯𑀁 𑀉𑀢𑁆𑀢𑀺𑀡𑁆𑀡𑁂 𑀘𑀢𑁆𑀢𑀸𑀭𑁄 𑀆𑀲𑀻𑀯𑀺𑀲𑀸 ‘‘𑀦 𑀮𑀤𑁆𑀥𑁄 𑀯𑀢𑀸𑀲𑀺 𑀅𑀫𑁆𑀳𑁂𑀳𑀺, 𑀅𑀚𑁆𑀚 𑀢𑁂 𑀫𑀼𑀭𑀼𑀫𑀼𑀭𑀸𑀬 𑀚𑀻𑀯𑀺𑀢𑀁 𑀔𑀸𑀤𑀺𑀢𑁆𑀯𑀸 𑀙𑀟𑁆𑀟𑁂𑀬𑁆𑀬𑀸𑀫’’. 𑀧𑀜𑁆𑀘 𑀧𑀘𑁆𑀘𑀢𑁆𑀣𑀺𑀓𑀸 ‘‘𑀦 𑀮𑀤𑁆𑀥𑁄 𑀯𑀢𑀸𑀲𑀺 𑀅𑀫𑁆𑀳𑁂𑀳𑀺, 𑀅𑀚𑁆𑀚 𑀢𑁂 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀗𑁆𑀕𑀫𑀗𑁆𑀕𑀸𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀕𑀢𑀸 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀮𑀪𑁂𑀬𑁆𑀬𑀸𑀫’’. 𑀙𑀝𑁆𑀞𑁄 𑀅𑀦𑁆𑀢𑀭𑀘𑀭𑁄 ‘‘𑀦 𑀮𑀤𑁆𑀥𑁄 𑀯𑀢𑀸𑀲𑀺 𑀫𑀬𑀸, 𑀅𑀚𑁆𑀚 𑀢𑁂 𑀨𑀮𑀺𑀓𑀯𑀡𑁆𑀡𑁂𑀦 𑀅𑀲𑀺𑀦𑀸 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸, 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑀁 𑀮𑀪𑀺𑀢𑁆𑀯𑀸 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑁂𑀬𑁆𑀬𑀁’’. 𑀙 𑀘𑁄𑀭𑀸 ‘‘𑀦 𑀮𑀤𑁆𑀥𑁄 𑀯𑀢𑀸𑀲𑀺 𑀅𑀫𑁆𑀳𑁂𑀳𑀺, 𑀅𑀚𑁆𑀚 𑀢𑁂 𑀯𑀺𑀯𑀺𑀥𑀸𑀦𑀺 𑀓𑀫𑁆𑀫𑀓𑀸𑀭𑀡𑀸𑀦𑀺 𑀓𑀸𑀭𑁂𑀢𑁆𑀯𑀸 𑀩𑀳𑀼𑀥𑀦𑀁 𑀆𑀳𑀭𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀉𑀤𑀓𑀡𑁆𑀡𑀯𑀁 𑀑𑀢𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸 𑀭𑀜𑁆𑀜𑁄 𑀆𑀡𑀸𑀬 𑀓𑁄𑀧𑀺𑀢𑀢𑁆𑀢𑀸 𑀧𑀭𑀢𑁄 𑀕𑀦𑁆𑀢𑀼𑀫𑁆𑀧𑀺 𑀅𑀯𑀺𑀲𑀳𑀦𑁆𑀢𑀸 𑀢𑀢𑁆𑀣𑁂𑀯 𑀲𑀼𑀲𑁆𑀲𑀺𑀢𑁆𑀯𑀸 𑀫𑀭𑁂𑀬𑁆𑀬𑀼𑀁.

𑀉𑀧𑀫𑀸 𑀔𑁄 𑀫𑁆𑀬𑀸𑀬𑀦𑁆𑀢𑀺 𑀏𑀢𑁆𑀣 𑀏𑀯𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀭𑀸𑀚𑀸 𑀯𑀺𑀬 𑀳𑀺 𑀓𑀫𑁆𑀫𑀁 𑀤𑀝𑁆𑀞𑀩𑁆𑀩𑀁, 𑀭𑀸𑀚𑀸𑀧𑀭𑀸𑀥𑀺𑀓𑀧𑀼𑀭𑀺𑀲𑁄 𑀯𑀺𑀬 𑀯𑀝𑁆𑀝𑀦𑀺𑀲𑁆𑀲𑀺𑀢𑁄 𑀧𑀼𑀣𑀼𑀚𑁆𑀚𑀦𑁄. 𑀘𑀢𑁆𑀢𑀸𑀭𑁄 𑀆𑀲𑀻𑀯𑀺𑀲𑀸 𑀯𑀺𑀬 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺, 𑀭𑀜𑁆𑀜𑁄 𑀢𑀲𑁆𑀲 𑀘𑀢𑁆𑀢𑀸𑀭𑁄 𑀆𑀲𑀻𑀯𑀺𑀲𑁂 𑀧𑀝𑀺𑀘𑁆𑀙𑀸𑀧𑀺𑀢𑀓𑀸𑀮𑁄 𑀯𑀺𑀬 𑀓𑀫𑁆𑀫𑀼𑀦𑀸 𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂𑀬𑁂𑀯 𑀘𑀢𑀼𑀦𑁆𑀦𑀁 𑀫𑀳𑀸𑀪𑀽𑀢𑀸𑀦𑀁 𑀤𑀺𑀦𑁆𑀦𑀓𑀸𑀮𑁄. ‘‘𑀇𑀫𑁂𑀲𑀁 𑀆𑀲𑀻𑀯𑀺𑀲𑀸𑀦𑀁 𑀧𑀫𑀸𑀤𑀓𑁆𑀔𑀡𑁂 𑀭𑀸𑀚𑀧𑀼𑀭𑀺𑀲𑀸𑀦𑀜𑁆𑀘 𑀯𑀺𑀯𑀺𑀢𑁆𑀢𑀓𑁆𑀔𑀡𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑀁 𑀢𑁂 𑀅𑀫𑁆𑀪𑁄, 𑀧𑀼𑀭𑀺𑀲, 𑀓𑀭𑀡𑀻𑀬𑀁, 𑀢𑀁 𑀓𑀭𑁄𑀳𑀻’’𑀢𑀺 𑀯𑀘𑀦𑁂𑀦 ‘‘𑀧𑀮𑀸𑀬𑀲𑁆𑀲𑀽’’𑀢𑀺 𑀯𑀼𑀢𑁆𑀢𑀓𑀸𑀮𑁄 𑀯𑀺𑀬 𑀲𑀢𑁆𑀣𑀸𑀭𑀸 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑀳𑀸𑀪𑀽𑀢𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑁆𑀯𑀸 ‘‘𑀇𑀫𑁂𑀲𑀼 𑀘𑀢𑀽𑀲𑀼 𑀫𑀳𑀸𑀪𑀽𑀢𑁂𑀲𑀼 𑀦𑀺𑀩𑁆𑀩𑀺𑀦𑁆𑀤 𑀯𑀺𑀭𑀚𑁆𑀚, 𑀏𑀯𑀁 𑀯𑀝𑁆𑀝𑀢𑁄 𑀧𑀭𑀺𑀫𑀼𑀘𑁆𑀘𑀺𑀲𑁆𑀲𑀲𑀻’’𑀢𑀺 𑀓𑀣𑀺𑀢𑀓𑀸𑀮𑁄, 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀢𑁆𑀣𑀘𑀭𑀓𑀯𑀘𑀦𑀁 𑀲𑀼𑀢𑁆𑀯𑀸 𑀘𑀢𑀼𑀦𑁆𑀦𑀁 𑀆𑀲𑀻𑀯𑀺𑀲𑀸𑀦𑀁 𑀧𑀫𑀸𑀤𑀓𑁆𑀔𑀡𑁂 𑀭𑀸𑀚𑀧𑀼𑀭𑀺𑀲𑀸𑀦𑀜𑁆𑀘 𑀯𑀺𑀯𑀺𑀢𑁆𑀢𑀓𑁆𑀔𑀡𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀮𑀸𑀬𑀦𑀁 𑀯𑀺𑀬 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀮𑀪𑀺𑀢𑁆𑀯𑀸 𑀫𑀳𑀸𑀪𑀽𑀢𑀸𑀲𑀻𑀯𑀺𑀲𑁂𑀳𑀺 𑀧𑀭𑀺𑀫𑀼𑀘𑁆𑀘𑀦𑀢𑁆𑀣𑀸𑀬 𑀜𑀸𑀡𑀧𑀮𑀸𑀬𑀦𑁂𑀦 𑀧𑀮𑀸𑀬𑀦𑀁.

𑀇𑀤𑀸𑀦𑀺 𑀘𑀢𑀼𑀦𑁆𑀦𑁂𑀢𑀁 𑀫𑀳𑀸𑀪𑀽𑀢𑀸𑀦𑀁 𑀅𑀥𑀺𑀯𑀘𑀦𑀁 𑀧𑀣𑀯𑀻𑀥𑀸𑀢𑀼𑀬𑀸 𑀆𑀧𑁄𑀥𑀸𑀢𑀼𑀬𑀸𑀢𑀺𑀆𑀤𑀻𑀲𑀼 𑀘𑀢𑀼𑀫𑀳𑀸𑀪𑀽𑀢𑀓𑀣𑀸 𑀘 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀓𑀣𑀸 𑀘 𑀆𑀬𑀢𑀦𑀓𑀣𑀸 𑀘 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣 𑀘 𑀓𑀝𑁆𑀞𑀫𑀼𑀔𑀆𑀲𑀻𑀯𑀺𑀲𑁄 𑀯𑀺𑀬 𑀧𑀣𑀯𑀻𑀥𑀸𑀢𑀼 𑀤𑀝𑁆𑀞𑀩𑁆𑀩𑀸, 𑀧𑀽𑀢𑀺𑀫𑀼𑀔𑀅𑀕𑁆𑀕𑀺𑀫𑀼𑀔𑀲𑀢𑁆𑀣𑀫𑀼𑀔𑀸 𑀯𑀺𑀬 𑀲𑁂𑀲𑀥𑀸𑀢𑀼𑀬𑁄. 𑀬𑀣𑁂𑀯 𑀳𑀺 𑀓𑀝𑁆𑀞𑀫𑀼𑀔𑁂𑀦 𑀤𑀝𑁆𑀞𑀲𑁆𑀲 𑀲𑀓𑀮𑀓𑀸𑀬𑁄 𑀣𑀤𑁆𑀥𑁄 𑀳𑁄𑀢𑀺, 𑀏𑀯𑀁 𑀧𑀣𑀯𑀻𑀥𑀸𑀢𑀼𑀧𑀓𑁄𑀧𑁂𑀦𑀸𑀧𑀺. 𑀬𑀣𑀸 𑀘 𑀧𑀽𑀢𑀺𑀫𑀼𑀔𑀸𑀤𑀻𑀳𑀺 𑀤𑀝𑁆𑀞𑀲𑁆𑀲 𑀧𑀕𑁆𑀖𑀭𑀢𑀺 𑀘𑁂𑀯 𑀛𑀸𑀬𑀢𑀺 𑀘 𑀙𑀺𑀚𑁆𑀚𑀢𑀺 𑀘, 𑀏𑀯𑀁 𑀆𑀧𑁄𑀥𑀸𑀢𑀼𑀢𑁂𑀚𑁄𑀥𑀸𑀢𑀼𑀯𑀸𑀬𑁄𑀥𑀸𑀢𑀼𑀧𑀓𑁄𑀧𑁂𑀦𑀸𑀧𑀻𑀢𑀺. 𑀢𑁂𑀦𑀸𑀳𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑁋

‘‘𑀧𑀢𑁆𑀣𑀤𑁆𑀥𑁄 𑀪𑀯𑀢𑀻 𑀓𑀸𑀬𑁄, 𑀤𑀝𑁆𑀞𑁄 𑀓𑀝𑁆𑀞𑀫𑀼𑀔𑁂𑀦 𑀯𑀸;

𑀧𑀣𑀯𑀻𑀥𑀸𑀢𑀼𑀧𑀓𑁄𑀧𑁂𑀦, 𑀳𑁄𑀢𑀺 𑀓𑀝𑁆𑀞𑀫𑀼𑀔𑁂𑀯 𑀲𑁄.

‘‘𑀧𑀽𑀢𑀺𑀓𑁄 𑀪𑀯𑀢𑀻 𑀓𑀸𑀬𑁄, 𑀤𑀝𑁆𑀞𑁄 𑀧𑀽𑀢𑀺𑀫𑀼𑀔𑁂𑀦 𑀯𑀸;

𑀆𑀧𑁄𑀥𑀸𑀢𑀼𑀧𑀓𑁄𑀧𑁂𑀦, 𑀳𑁄𑀢𑀺 𑀧𑀽𑀢𑀺𑀫𑀼𑀔𑁂𑀯 𑀲𑁄.

‘‘𑀲𑀦𑁆𑀢𑀢𑁆𑀢𑁄 𑀪𑀯𑀢𑀻 𑀓𑀸𑀬𑁄, 𑀤𑀝𑁆𑀞𑁄 𑀅𑀕𑁆𑀕𑀺𑀫𑀼𑀔𑁂𑀦 𑀯𑀸;

𑀢𑁂𑀚𑁄𑀥𑀸𑀢𑀼𑀧𑀓𑁄𑀧𑁂𑀦, 𑀳𑁄𑀢𑀺 𑀅𑀕𑁆𑀕𑀺𑀫𑀼𑀔𑁂𑀯 𑀲𑁄.

‘‘𑀲𑀜𑁆𑀙𑀺𑀦𑁆𑀦𑁄 𑀪𑀯𑀢𑀻 𑀓𑀸𑀬𑁄, 𑀤𑀝𑁆𑀞𑁄 𑀲𑀢𑁆𑀣𑀫𑀼𑀔𑁂𑀦 𑀯𑀸;

𑀯𑀸𑀬𑁄𑀥𑀸𑀢𑀼𑀧𑀓𑁄𑀧𑁂𑀦, 𑀳𑁄𑀢𑀺 𑀲𑀢𑁆𑀣𑀫𑀼𑀔𑁂𑀯 𑀲𑁄’’𑀢𑀺. 𑁋

𑀏𑀯𑀁 𑀢𑀸𑀯𑁂𑀢𑁆𑀣 𑀯𑀺𑀲𑁂𑀲𑀢𑁄 𑀲𑀤𑀺𑀲𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀯𑀺𑀲𑁂𑀲𑀢𑁄 𑀧𑀦 𑀆𑀲𑀬𑀢𑁄 𑀯𑀺𑀲𑀯𑁂𑀕𑀯𑀺𑀓𑀸𑀭𑀢𑁄 𑀅𑀦𑀢𑁆𑀣𑀕𑁆𑀕𑀳𑀡𑀢𑁄 𑀤𑀼𑀭𑀼𑀧𑀝𑁆𑀞𑀸𑀦𑀢𑁄 𑀤𑀼𑀭𑀸𑀲𑀤𑀢𑁄 𑀅𑀓𑀢𑀜𑁆𑀜𑀼𑀢𑀢𑁄 𑀅𑀯𑀺𑀲𑁂𑀲𑀓𑀸𑀭𑀺𑀢𑁄 𑀅𑀦𑀦𑁆𑀢𑀤𑁄𑀲𑀽𑀧𑀤𑁆𑀤𑀯𑀢𑁄𑀢𑀺 𑀇𑀫𑁂𑀳𑀺 𑀓𑀸𑀭𑀡𑁂𑀳𑀺 𑀏𑀢𑁂𑀲𑀁 𑀆𑀲𑀻𑀯𑀺𑀲𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀆𑀲𑀬𑀢𑁄𑀢𑀺 𑀆𑀲𑀻𑀯𑀺𑀲𑀸𑀦𑀜𑁆𑀳𑀺 𑀯𑀫𑁆𑀫𑀺𑀓𑁄 𑀆𑀲𑀬𑁄, 𑀢𑀢𑁆𑀣𑁂𑀯 𑀢𑁂 𑀯𑀲𑀦𑁆𑀢𑀺. 𑀫𑀳𑀸𑀪𑀽𑀢𑀸𑀦𑀫𑁆𑀧𑀺 𑀓𑀸𑀬𑀯𑀫𑁆𑀫𑀺𑀓𑁄 𑀆𑀲𑀬𑁄. 𑀆𑀲𑀻𑀯𑀺𑀲𑀸𑀦𑀜𑁆𑀘 𑀭𑀼𑀓𑁆𑀔𑀲𑀼𑀲𑀺𑀭𑀢𑀺𑀡𑀧𑀡𑁆𑀡𑀕𑀳𑀦𑀲𑀗𑁆𑀓𑀸𑀭𑀝𑁆𑀞𑀸𑀦𑀸𑀦𑀺𑀧𑀺 𑀆𑀲𑀬𑁄. 𑀏𑀢𑁂𑀲𑀼𑀧𑀺 𑀳𑀺 𑀢𑁂 𑀯𑀲𑀦𑁆𑀢𑀺. 𑀫𑀳𑀸𑀪𑀽𑀢𑀸𑀦𑀫𑁆𑀧𑀺 𑀓𑀸𑀬𑀲𑀼𑀲𑀺𑀭𑀁 𑀓𑀸𑀬𑀕𑀳𑀦𑀁 𑀓𑀸𑀬𑀲𑀗𑁆𑀓𑀸𑀭𑀝𑁆𑀞𑀸𑀦𑀁 𑀆𑀲𑀬𑁄𑀢𑀺. 𑀏𑀯𑀁 𑀢𑀸𑀯 𑀆𑀲𑀬𑀢𑁄 𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀯𑀺𑀲𑀯𑁂𑀕𑀯𑀺𑀓𑀸𑀭𑀢𑁄𑀢𑀺 𑀆𑀲𑀻𑀯𑀺𑀲𑀸 𑀳𑀺 𑀓𑀼𑀮𑀯𑀲𑁂𑀦 𑀓𑀝𑁆𑀞𑀫𑀼𑀔𑀸𑀤𑀺𑀪𑁂𑀤𑀢𑁄 𑀘𑀢𑁆𑀢𑀸𑀭𑁄. 𑀢𑀢𑁆𑀣 𑀏𑀓𑁂𑀓𑁄 𑀯𑀺𑀲𑀯𑀺𑀓𑀸𑀭𑀢𑁄 𑀯𑀺𑀪𑀚𑁆𑀚𑀫𑀸𑀦𑁄 𑀤𑀝𑁆𑀞𑀯𑀺𑀲𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑁄 𑀳𑁄𑀢𑀺. 𑀫𑀳𑀸𑀪𑀽𑀢𑀸𑀦𑀺𑀧𑀺 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀯𑀲𑁂𑀦 𑀧𑀣𑀯𑀻𑀆𑀤𑀺𑀪𑁂𑀤𑀢𑁄 𑀘𑀢𑁆𑀢𑀸𑀭𑀺. 𑀏𑀢𑁆𑀣 𑀏𑀓𑁂𑀓𑀁 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺. 𑀏𑀯𑀁 𑀯𑀺𑀲𑀯𑁂𑀕𑀯𑀺𑀓𑀸𑀭𑀢𑁄 𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀦𑀢𑁆𑀣𑀕𑁆𑀕𑀳𑀡𑀢𑁄𑀢𑀺 𑀆𑀲𑀻𑀯𑀺𑀲𑁂 𑀕𑀡𑁆𑀳𑀦𑁆𑀢𑀸 𑀧𑀜𑁆𑀘 𑀅𑀦𑀢𑁆𑀣𑁂 𑀕𑀡𑁆𑀳𑀦𑁆𑀢𑀺 𑁋 𑀤𑀼𑀕𑁆𑀕𑀦𑁆𑀥𑀁 𑀕𑀡𑁆𑀳𑀦𑁆𑀢𑀺, 𑀅𑀲𑀼𑀘𑀺𑀁 𑀕𑀡𑁆𑀳𑀦𑁆𑀢𑀺, 𑀩𑁆𑀬𑀸𑀥𑀺𑀁 𑀕𑀡𑁆𑀳𑀦𑁆𑀢𑀺, 𑀯𑀺𑀲𑀁 𑀕𑀡𑁆𑀳𑀦𑁆𑀢𑀺, 𑀫𑀭𑀡𑀁 𑀕𑀡𑁆𑀳𑀦𑁆𑀢𑀺. 𑀫𑀳𑀸𑀪𑀽𑀢𑀸𑀦𑀺𑀧𑀺 𑀕𑀡𑁆𑀳𑀦𑁆𑀢𑀸 𑀧𑀜𑁆𑀘 𑀅𑀦𑀢𑁆𑀣𑁂 𑀕𑀡𑁆𑀳𑀦𑁆𑀢𑀺 𑁋 𑀤𑀼𑀕𑁆𑀕𑀦𑁆𑀥𑀁 𑀕𑀡𑁆𑀳𑀦𑁆𑀢𑀺, 𑀅𑀲𑀼𑀘𑀺𑀁 𑀕𑀡𑁆𑀳𑀦𑁆𑀢𑀺, 𑀩𑁆𑀬𑀸𑀥𑀺𑀁 𑀕𑀡𑁆𑀳𑀦𑁆𑀢𑀺, 𑀚𑀭𑀁 𑀕𑀡𑁆𑀳𑀦𑁆𑀢𑀺, 𑀫𑀭𑀡𑀁 𑀕𑀡𑁆𑀳𑀦𑁆𑀢𑀺. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀬𑁂𑀓𑁂𑀘𑀺 𑀲𑀧𑁆𑀧𑀁 𑀕𑀡𑁆𑀳𑀦𑁆𑀢𑀺, 𑀫𑀻𑀴𑁆𑀳𑀮𑀺𑀢𑁆𑀢𑀁 𑀫𑀳𑀸𑀯𑀺𑀲𑀁;

𑀧𑀜𑁆𑀘 𑀕𑀡𑁆𑀳𑀦𑁆𑀢𑀼𑀦𑀢𑁆𑀣𑀸𑀦𑀺, 𑀮𑁄𑀓𑁂 𑀲𑀧𑁆𑀧𑀸𑀪𑀺𑀦𑀦𑁆𑀤𑀺𑀦𑁄.

‘‘𑀤𑀼𑀕𑁆𑀕𑀦𑁆𑀥𑀁 𑀅𑀲𑀼𑀘𑀺𑀁 𑀩𑁆𑀬𑀸𑀥𑀺𑀁, 𑀯𑀺𑀲𑀁 𑀫𑀭𑀡𑀧𑀜𑁆𑀘𑀫𑀁;

𑀅𑀦𑀢𑁆𑀣𑀸 𑀳𑁄𑀦𑁆𑀢𑀺 𑀧𑀜𑁆𑀘𑁂𑀢𑁂, 𑀫𑀻𑀴𑁆𑀳𑀮𑀺𑀢𑁆𑀢𑁂 𑀪𑀼𑀚𑀗𑁆𑀕𑀫𑁂.

‘‘𑀏𑀯𑀫𑁂𑀯𑀁 𑀅𑀓𑀼𑀲𑀮𑀸, 𑀅𑀦𑁆𑀥𑀩𑀸𑀮𑀧𑀼𑀣𑀼𑀚𑁆𑀚𑀦𑀸;

𑀧𑀜𑁆𑀘 𑀕𑀡𑁆𑀳𑀦𑁆𑀢𑀼𑀦𑀢𑁆𑀣𑀸𑀦𑀺, 𑀪𑀯𑁂 𑀚𑀸𑀢𑀸𑀪𑀺𑀦𑀦𑁆𑀤𑀺𑀦𑁄.

‘‘𑀤𑀼𑀕𑁆𑀕𑀦𑁆𑀥𑀁 𑀅𑀲𑀼𑀘𑀺𑀁 𑀩𑁆𑀬𑀸𑀥𑀺𑀁, 𑀚𑀭𑀁 𑀫𑀭𑀡𑀧𑀜𑁆𑀘𑀫𑀁;

𑀅𑀦𑀢𑁆𑀣𑀸 𑀳𑁄𑀦𑁆𑀢𑀺 𑀧𑀜𑁆𑀘𑁂𑀢𑁂, 𑀫𑀻𑀴𑁆𑀳𑀮𑀺𑀢𑁆𑀢𑁂𑀯 𑀧𑀦𑁆𑀦𑀕𑁂’’𑀢𑀺. 𑁋

𑀏𑀯𑀁 𑀅𑀦𑀢𑁆𑀣𑀕𑁆𑀕𑀳𑀡𑀢𑁄 𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀤𑀼𑀭𑀼𑀧𑀝𑁆𑀞𑀸𑀦𑀢𑁄𑀢𑀺 𑀢𑁂 𑀆𑀲𑀻𑀯𑀺𑀲𑀸 𑀤𑀼𑀭𑀼𑀧𑀝𑁆𑀞𑀸𑀦𑀸, 𑀏𑀓𑀲𑁆𑀫𑀺𑀁 𑀉𑀝𑁆𑀞𑀸𑀢𑀼𑀓𑀸𑀫𑁂 𑀏𑀓𑁄 𑀦𑁆𑀳𑀸𑀬𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀦𑁆𑀳𑀸𑀬𑀺𑀢𑀼𑀓𑀸𑀫𑁂 𑀅𑀧𑀭𑁄 𑀪𑀼𑀜𑁆𑀚𑀺𑀢𑀼𑀓𑀸𑀫𑁄, 𑀢𑀲𑁆𑀫𑀺𑀁 𑀪𑀼𑀜𑁆𑀚𑀺𑀢𑀼𑀓𑀸𑀫𑁂 𑀅𑀜𑁆𑀜𑁄 𑀦𑀺𑀧𑀚𑁆𑀚𑀺𑀢𑀼𑀓𑀸𑀫𑁄 𑀳𑁄𑀢𑀺. 𑀢𑁂𑀲𑀼 𑀬𑀲𑁆𑀲 𑀬𑀲𑁆𑀲𑁂𑀯 𑀅𑀚𑁆𑀛𑀸𑀲𑀬𑁄 𑀦 𑀧𑀽𑀭𑀢𑀺, 𑀲𑁄 𑀢𑀢𑁆𑀣𑁂𑀯 𑀟𑀁𑀲𑀺𑀢𑁆𑀯𑀸 𑀫𑀸𑀭𑁂𑀢𑀺. 𑀇𑀫𑁂𑀳𑀺 𑀧𑀦 𑀆𑀲𑀻𑀯𑀺𑀲𑁂𑀳𑀺 𑀪𑀽𑀢𑀸𑀦𑁂𑀯 𑀤𑀼𑀭𑀼𑀧𑀝𑁆𑀞𑀸𑀦𑀢𑀭𑀸𑀦𑀺. 𑀧𑀣𑀯𑀻𑀥𑀸𑀢𑀼𑀬𑀸 𑀳𑀺 𑀪𑁂𑀲𑀚𑁆𑀚𑁂 𑀓𑀬𑀺𑀭𑀫𑀸𑀦𑁂 𑀆𑀧𑁄𑀥𑀸𑀢𑀼 𑀓𑀼𑀧𑁆𑀧𑀢𑀺, 𑀢𑀲𑁆𑀲𑁂𑀯 𑀪𑁂𑀲𑀚𑁆𑀚𑀁 𑀓𑀭𑁄𑀦𑁆𑀢𑀲𑁆𑀲 𑀢𑁂𑀚𑁄𑀥𑀸𑀢𑀽𑀢𑀺 𑀏𑀯𑀁 𑀏𑀓𑀺𑀲𑁆𑀲𑀸 𑀪𑁂𑀲𑀚𑁆𑀚𑁂 𑀓𑀬𑀺𑀭𑀫𑀸𑀦𑁂 𑀅𑀧𑀭𑀸 𑀓𑀼𑀧𑁆𑀧𑀦𑁆𑀢𑀻𑀢𑀺. 𑀏𑀯𑀁 𑀤𑀼𑀭𑀼𑀧𑀝𑁆𑀞𑀸𑀦𑀢𑁄 𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀤𑀼𑀭𑀸𑀲𑀤𑀢𑁄𑀢𑀺 𑀤𑀼𑀭𑀸𑀲𑀤𑀸 𑀳𑀺 𑀆𑀲𑀻𑀯𑀺𑀲𑀸, 𑀕𑁂𑀳𑀲𑁆𑀲 𑀧𑀼𑀭𑀺𑀫𑀪𑀸𑀕𑁂 𑀆𑀲𑀻𑀯𑀺𑀲𑀁 𑀤𑀺𑀲𑁆𑀯𑀸 𑀧𑀘𑁆𑀙𑀺𑀫𑀪𑀸𑀕𑁂𑀦 𑀧𑀮𑀸𑀬𑀦𑁆𑀢𑀺, 𑀧𑀘𑁆𑀙𑀺𑀫𑀪𑀸𑀕𑁂 𑀤𑀺𑀲𑁆𑀯𑀸 𑀧𑀼𑀭𑀺𑀫𑀪𑀸𑀕𑁂𑀦, 𑀕𑁂𑀳𑀫𑀚𑁆𑀛𑁂 𑀤𑀺𑀲𑁆𑀯𑀸 𑀕𑀩𑁆𑀪𑀁 𑀧𑀯𑀺𑀲𑀦𑁆𑀢𑀺, 𑀕𑀩𑁆𑀪𑁂 𑀤𑀺𑀲𑁆𑀯𑀸 𑀫𑀜𑁆𑀘𑀧𑀻𑀞𑀁 𑀅𑀪𑀺𑀭𑀼𑀳𑀦𑁆𑀢𑀺. 𑀫𑀳𑀸𑀪𑀽𑀢𑀸𑀦𑀺 𑀢𑀢𑁄𑀧𑀺 𑀤𑀼𑀭𑀸𑀲𑀤𑀢𑀭𑀸𑀦𑀺. 𑀢𑀣𑀸𑀭𑀽𑀧𑁂𑀦 𑀳𑀺 𑀓𑀼𑀝𑁆𑀞𑀭𑁄𑀕𑁂𑀦 𑀨𑀼𑀝𑁆𑀞𑀲𑁆𑀲 𑀓𑀡𑁆𑀡𑀦𑀸𑀲𑀸𑀤𑀻𑀦𑀺 𑀙𑀺𑀦𑁆𑀤𑀺𑀢𑁆𑀯𑀸 𑀧𑀢𑀦𑁆𑀢𑀺, 𑀲𑀭𑀻𑀭𑀁 𑀲𑀫𑁆𑀨𑀼𑀝𑀢𑀺 𑀦𑀻𑀮𑀫𑀓𑁆𑀔𑀺𑀓𑀸 𑀧𑀭𑀺𑀯𑀸𑀭𑁂𑀦𑁆𑀢𑀺, 𑀲𑀭𑀻𑀭𑀕𑀦𑁆𑀥𑁄 𑀤𑀽𑀭𑀢𑁄𑀯 𑀉𑀩𑁆𑀩𑀸𑀳𑀢𑀺. 𑀢𑀁 𑀧𑀼𑀭𑀺𑀲𑀁 𑀅𑀓𑁆𑀓𑁄𑀲𑀫𑀸𑀦𑀫𑁆𑀧𑀺 𑀧𑀭𑀺𑀤𑁂𑀯𑀫𑀸𑀦𑀫𑁆𑀧𑀺 𑀦𑁂𑀯 𑀭𑁄𑀲𑀯𑀲𑁂𑀦, 𑀦 𑀓𑀸𑀭𑀼𑀜𑁆𑀜𑁂𑀦, 𑀉𑀧𑀲𑀗𑁆𑀓𑀫𑀺𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀦𑀸𑀲𑀺𑀓𑀁 𑀧𑀺𑀤𑀳𑀺𑀢𑁆𑀯𑀸 𑀔𑁂𑀴𑀁 𑀧𑀸𑀢𑁂𑀦𑁆𑀢𑀸 𑀤𑀽𑀭𑀢𑁄𑀯 𑀦𑀁 𑀯𑀺𑀯𑀚𑁆𑀚𑁂𑀦𑁆𑀢𑀺. 𑀏𑀯𑀁 𑀅𑀜𑁆𑀜𑁂𑀲𑀫𑁆𑀧𑀺 𑀪𑀕𑀦𑁆𑀤𑀭𑀓𑀼𑀘𑁆𑀙𑀺𑀭𑁄𑀕𑀯𑀸𑀢𑀭𑁄𑀕𑀸𑀤𑀻𑀦𑀁 𑀩𑀻𑀪𑀘𑁆𑀙𑀚𑁂𑀕𑀼𑀘𑁆𑀙𑀪𑀸𑀯𑀓𑀭𑀸𑀦𑀜𑁆𑀘 𑀭𑁄𑀕𑀸𑀦𑀁 𑀯𑀲𑁂𑀦 𑀅𑀬𑀫𑁂𑀯𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄𑀢𑀺. 𑀏𑀯𑀁 𑀤𑀼𑀭𑀸𑀲𑀤𑀢𑁄 𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀓𑀢𑀜𑁆𑀜𑀼𑀢𑀢𑁄𑀢𑀺 𑀆𑀲𑀻𑀯𑀺𑀲𑀸 𑀳𑀺 𑀅𑀓𑀢𑀜𑁆𑀜𑀼𑀦𑁄 𑀳𑁄𑀦𑁆𑀢𑀺, 𑀦𑁆𑀳𑀸𑀧𑀺𑀬𑀫𑀸𑀦𑀸𑀧𑀺 𑀪𑁄𑀚𑀺𑀬𑀫𑀸𑀦𑀸𑀧𑀺 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀺𑀬𑀫𑀸𑀦𑀸𑀧𑀺 𑀧𑁂𑀴𑀸𑀬𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀳𑀭𑀺𑀬𑀫𑀸𑀦𑀸𑀧𑀺 𑀑𑀢𑀸𑀭𑀫𑁂𑀯 𑀕𑀯𑁂𑀲𑀦𑁆𑀢𑀺. 𑀬𑀢𑁆𑀣 𑀑𑀢𑀸𑀭𑀁 𑀮𑀪𑀦𑁆𑀢𑀺, 𑀢𑀢𑁆𑀣𑁂𑀯 𑀦𑀁 𑀟𑀁𑀲𑀺𑀢𑁆𑀯𑀸 𑀫𑀸𑀭𑁂𑀦𑁆𑀢𑀺. 𑀆𑀲𑀻𑀯𑀺𑀲𑁂𑀳𑀺𑀧𑀺 𑀫𑀳𑀸𑀪𑀽𑀢𑀸𑀦𑁂𑀯 𑀅𑀓𑀢𑀜𑁆𑀜𑀼𑀢𑀭𑀸𑀦𑀺. 𑀏𑀢𑁂𑀲𑀜𑁆𑀳𑀺 𑀓𑀢𑀁 𑀦𑀸𑀫 𑀦𑀢𑁆𑀣𑀺, 𑀲𑀻𑀢𑁂𑀦 𑀯𑀸 𑀉𑀡𑁆𑀳𑁂𑀦 𑀯𑀸 𑀦𑀺𑀫𑁆𑀫𑀮𑁂𑀦 𑀚𑀮𑁂𑀦 𑀦𑁆𑀳𑀸𑀧𑀺𑀬𑀫𑀸𑀦𑀸𑀦𑀺𑀧𑀺 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀲𑀓𑁆𑀓𑀭𑀺𑀬𑀫𑀸𑀦𑀸𑀦𑀺𑀧𑀺 𑀫𑀼𑀤𑀼𑀯𑀢𑁆𑀣𑀫𑀼𑀤𑀼𑀲𑀬𑀦𑀫𑀼𑀤𑀼𑀬𑀸𑀦𑀸𑀤𑀻𑀳𑀺 𑀧𑀭𑀺𑀳𑀭𑀺𑀬𑀫𑀸𑀦𑀸𑀦𑀺𑀧𑀺, 𑀯𑀭𑀪𑁄𑀚𑀦𑀁 𑀪𑁄𑀚𑀺𑀬𑀫𑀸𑀦𑀸𑀦𑀺𑀧𑀺, 𑀯𑀭𑀧𑀸𑀦𑀁 𑀧𑀸𑀬𑀸𑀧𑀺𑀬𑀫𑀸𑀦𑀸𑀦𑀺𑀧𑀺 𑀑𑀢𑀸𑀭𑀫𑁂𑀯 𑀕𑀯𑁂𑀲𑀦𑁆𑀢𑀺. 𑀬𑀢𑁆𑀣 𑀑𑀢𑀸𑀭𑀁 𑀮𑀪𑀦𑁆𑀢𑀺, 𑀢𑀢𑁆𑀣𑁂𑀯 𑀓𑀼𑀧𑁆𑀧𑀺𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑁂𑀦𑁆𑀢𑀻𑀢𑀺. 𑀏𑀯𑀁 𑀅𑀓𑀢𑀜𑁆𑀜𑀼𑀢𑀢𑁄 𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀯𑀺𑀲𑁂𑀲𑀓𑀸𑀭𑀺𑀢𑁄𑀢𑀺 𑀆𑀲𑀻𑀯𑀺𑀲𑀸 𑀳𑀺 ‘‘𑀅𑀬𑀁 𑀔𑀢𑁆𑀢𑀺𑀬𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀯𑁂𑀲𑁆𑀲𑁄 𑀯𑀸 𑀲𑀼𑀤𑁆𑀤𑁄 𑀯𑀸 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸’’𑀢𑀺 𑀯𑀺𑀲𑁂𑀲𑀁 𑀦 𑀓𑀭𑁄𑀦𑁆𑀢𑀺, 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀫𑁂𑀯 𑀟𑀁𑀲𑀺𑀢𑁆𑀯𑀸 𑀫𑀸𑀭𑁂𑀦𑁆𑀢𑀺. 𑀫𑀳𑀸𑀪𑀽𑀢𑀸𑀦𑀺𑀧𑀺 ‘‘𑀅𑀬𑀁 𑀔𑀢𑁆𑀢𑀺𑀬𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀯𑁂𑀲𑁆𑀲𑁄 𑀯𑀸 𑀲𑀼𑀤𑁆𑀤𑁄 𑀯𑀸 𑀕𑀳𑀝𑁆𑀞𑁄 𑀯𑀸 𑀧𑀩𑁆𑀩𑀚𑀺𑀢𑁄 𑀯𑀸 𑀤𑁂𑀯𑁄 𑀯𑀸 𑀫𑀦𑀼𑀲𑁆𑀲𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀦𑀺𑀕𑁆𑀕𑀼𑀡𑁄 𑀯𑀸 𑀲𑀕𑀼𑀡𑁄 𑀯𑀸’’𑀢𑀺 𑀯𑀺𑀲𑁂𑀲𑀁 𑀦 𑀓𑀭𑁄𑀦𑁆𑀢𑀺. 𑀬𑀤𑀺 𑀳𑀺 𑀦𑁂𑀲𑀁 ‘‘𑀅𑀬𑀁 𑀕𑀼𑀡𑀯𑀸’’𑀢𑀺 𑀮𑀚𑁆𑀚𑀸 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑁂 𑀢𑀣𑀸𑀕𑀢𑁂 𑀮𑀚𑁆𑀚𑀁 𑀉𑀧𑁆𑀧𑀸𑀤𑁂𑀬𑁆𑀬𑀼𑀁. 𑀅𑀣𑀸𑀧𑀺 𑀦𑁂𑀲𑀁 ‘‘𑀅𑀬𑀁 𑀫𑀳𑀸𑀧𑀜𑁆𑀜𑁄 𑀅𑀬𑀁 𑀫𑀳𑀺𑀤𑁆𑀥𑀺𑀓𑁄 𑀅𑀬𑀁 𑀥𑀼𑀢𑀯𑀸𑀤𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀮𑀚𑁆𑀚𑀸 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀸𑀤𑀻𑀲𑀼 𑀮𑀚𑁆𑀚𑀁 𑀉𑀧𑁆𑀧𑀸𑀤𑁂𑀬𑁆𑀬𑀼𑀁. 𑀅𑀣𑀸𑀧𑀺 𑀦𑁂𑀲𑀁 ‘‘𑀅𑀬𑀁 𑀦𑀺𑀕𑁆𑀕𑀼𑀡𑁄 𑀤𑀸𑀭𑀼𑀡𑁄 𑀣𑀤𑁆𑀥𑁄’’𑀢𑀺 𑀪𑀬𑀁 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀲𑀤𑁂𑀯𑀓𑁂 𑀮𑁄𑀓𑁂 𑀦𑀺𑀕𑁆𑀕𑀼𑀡𑀣𑀤𑁆𑀥𑀤𑀸𑀭𑀼𑀡𑀸𑀦𑀁 𑀅𑀕𑁆𑀕𑀲𑁆𑀲 𑀤𑁂𑀯𑀤𑀢𑁆𑀢𑀲𑁆𑀲 𑀙𑀦𑁆𑀦𑀁 𑀯𑀸 𑀲𑀢𑁆𑀣𑀸𑀭𑀸𑀦𑀁 𑀪𑀸𑀬𑁂𑀬𑁆𑀬𑀼𑀁, 𑀦 𑀘 𑀮𑀚𑁆𑀚𑀦𑁆𑀢𑀺 𑀦 𑀘 𑀪𑀸𑀬𑀦𑁆𑀢𑀺, 𑀓𑀼𑀧𑁆𑀧𑀺𑀢𑁆𑀯𑀸 𑀬𑀁𑀓𑀺𑀜𑁆𑀘𑀺 𑀅𑀦𑀬𑀩𑁆𑀬𑀲𑀦𑀁 𑀆𑀧𑀸𑀤𑁂𑀦𑁆𑀢𑀺𑀬𑁂𑀯. 𑀏𑀯𑀁 𑀅𑀯𑀺𑀲𑁂𑀲𑀓𑀸𑀭𑀺𑀢𑁄 𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀦𑀦𑁆𑀢𑀤𑁄𑀲𑀽𑀧𑀤𑁆𑀤𑀯𑀢𑁄𑀢𑀺 𑀆𑀲𑀻𑀯𑀺𑀲𑁂 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀸𑀦𑀜𑁆𑀳𑀺 𑀤𑁄𑀲𑀽𑀧𑀤𑁆𑀤𑀯𑀸𑀦𑀁 𑀧𑀫𑀸𑀡𑀁 𑀦𑀢𑁆𑀣𑀺. 𑀢𑀣𑀸 𑀳𑁂𑀢𑁂 𑀟𑀁𑀲𑀺𑀢𑁆𑀯𑀸 𑀓𑀸𑀡𑀫𑁆𑀧𑀺 𑀓𑀭𑁄𑀦𑁆𑀢𑀺 𑀔𑀼𑀚𑁆𑀚𑀫𑁆𑀧𑀺 𑀧𑀻𑀞𑀲𑀧𑁆𑀧𑀺𑀫𑁆𑀧𑀺 𑀏𑀓𑀧𑀓𑁆𑀔𑀮𑀫𑁆𑀧𑀻𑀢𑀺 𑀏𑀯𑀁 𑀅𑀧𑀭𑀺𑀫𑀸𑀡𑀁 𑀯𑀺𑀧𑁆𑀧𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑀺. 𑀪𑀽𑀢𑀸𑀦𑀺𑀧𑀺 𑀓𑀼𑀧𑁆𑀧𑀺𑀢𑀸𑀦𑀺 𑀦 𑀓𑀸𑀡𑀸𑀤𑀺𑀪𑀸𑀯𑁂𑀲𑀼 𑀦 𑀓𑀺𑀜𑁆𑀘𑀺 𑀯𑀺𑀧𑁆𑀧𑀓𑀸𑀭𑀁 𑀦 𑀓𑀭𑁄𑀦𑁆𑀢𑀺, 𑀅𑀧𑁆𑀧𑀫𑀸𑀡𑁄 𑀏𑀢𑁂𑀲𑀁 𑀤𑁄𑀲𑀽𑀧𑀤𑁆𑀤𑀯𑁄𑀢𑀺. 𑀏𑀯𑀁 𑀅𑀦𑀦𑁆𑀢𑀤𑁄𑀲𑀽𑀧𑀤𑁆𑀤𑀯𑀢𑁄 𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀇𑀤𑀸𑀦𑁂𑀢𑁆𑀣 𑀘𑀢𑀼𑀫𑀳𑀸𑀪𑀽𑀢𑀯𑀲𑁂𑀦 𑀬𑀸𑀯 𑀅𑀭𑀳𑀢𑁆𑀢𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀦𑀺𑀤𑁆𑀤𑁂𑀲𑁂 𑀓𑀣𑀺𑀢𑀫𑁂𑀯.

𑀧𑀜𑁆𑀘 𑀯𑀥𑀓𑀸 𑀧𑀘𑁆𑀘𑀢𑁆𑀣𑀺𑀓𑀸𑀢𑀺 𑀔𑁄 𑀪𑀺𑀓𑁆𑀔𑀯𑁂 𑀧𑀜𑁆𑀘𑀦𑁆𑀦𑁂𑀢𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦𑀁 𑀅𑀥𑀺𑀯𑀘𑀦𑀦𑁆𑀢𑀺 𑀏𑀢𑁆𑀣 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀔𑀦𑁆𑀥𑀸𑀦𑀁 𑀯𑀥𑀓𑀧𑀘𑁆𑀘𑀢𑁆𑀣𑀺𑀓𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀔𑀦𑁆𑀥𑀸 𑀳𑀺 𑀅𑀜𑁆𑀜𑀫𑀜𑁆𑀜𑀜𑁆𑀘 𑀯𑀥𑁂𑀦𑁆𑀢𑀺, 𑀢𑁂𑀲𑀼 𑀘 𑀲𑀦𑁆𑀢𑁂𑀲𑀼 𑀯𑀥𑁄 𑀦𑀸𑀫 𑀧𑀜𑁆𑀜𑀸𑀬𑀢𑀺. 𑀓𑀣𑀁? 𑀭𑀽𑀧𑀁 𑀢𑀸𑀯 𑀭𑀽𑀧𑀫𑁆𑀧𑀺 𑀯𑀥𑁂𑀢𑀺 𑀅𑀭𑀽𑀧𑀫𑁆𑀧𑀺, 𑀢𑀣𑀸 𑀅𑀭𑀽𑀧𑀁 𑀅𑀭𑀽𑀧𑀫𑁆𑀧𑀺 𑀯𑀥𑁂𑀢𑀺 𑀭𑀽𑀧𑀫𑁆𑀧𑀺. 𑀓𑀣𑀁? 𑀅𑀬𑀜𑁆𑀳𑀺 𑀧𑀣𑀯𑀻𑀥𑀸𑀢𑀼 𑀪𑀺𑀚𑁆𑀚𑀫𑀸𑀦𑀸 𑀇𑀢𑀭𑀸 𑀢𑀺𑀲𑁆𑀲𑁄 𑀥𑀸𑀢𑀼𑀬𑁄 𑀕𑀳𑁂𑀢𑁆𑀯𑀸𑀯 𑀪𑀺𑀚𑁆𑀚𑀢𑀺, 𑀆𑀧𑁄𑀥𑀸𑀢𑀼𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄, 𑀏𑀯𑀁 𑀢𑀸𑀯 𑀭𑀽𑀧𑀁 𑀭𑀽𑀧𑀫𑁂𑀯 𑀯𑀥𑁂𑀢𑀺. 𑀭𑀽𑀧𑀓𑁆𑀔𑀦𑁆𑀥𑁄 𑀧𑀦 𑀪𑀺𑀚𑁆𑀚𑀫𑀸𑀦𑁄 𑀘𑀢𑁆𑀢𑀸𑀭𑁄 𑀅𑀭𑀽𑀧𑀓𑁆𑀔𑀦𑁆𑀥𑁂 𑀕𑀳𑁂𑀢𑁆𑀯𑀸𑀯 𑀪𑀺𑀚𑁆𑀚𑀢𑀺, 𑀏𑀯𑀁 𑀭𑀽𑀧𑀁 𑀅𑀭𑀽𑀧𑀫𑁆𑀧𑀺 𑀯𑀥𑁂𑀢𑀺. 𑀯𑁂𑀤𑀦𑀸𑀓𑁆𑀔𑀦𑁆𑀥𑁄𑀧𑀺 𑀪𑀺𑀚𑁆𑀚𑀫𑀸𑀦𑁄 𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁂 𑀕𑀳𑁂𑀢𑁆𑀯𑀸𑀯 𑀪𑀺𑀚𑁆𑀚𑀢𑀺. 𑀲𑀜𑁆𑀜𑀸𑀓𑁆𑀔𑀦𑁆𑀥𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀅𑀭𑀽𑀧𑀁 𑀅𑀭𑀽𑀧𑀫𑁂𑀯 𑀯𑀥𑁂𑀢𑀺. 𑀘𑀼𑀢𑀺𑀓𑁆𑀔𑀡𑁂 𑀧𑀦 𑀘𑀢𑁆𑀢𑀸𑀭𑁄 𑀅𑀭𑀽𑀧𑀓𑁆𑀔𑀦𑁆𑀥𑀸 𑀪𑀺𑀚𑁆𑀚𑀫𑀸𑀦𑀸 𑀯𑀢𑁆𑀣𑀼𑀭𑀽𑀧𑀫𑁆𑀧𑀺 𑀕𑀳𑁂𑀢𑁆𑀯𑀸𑀯 𑀪𑀺𑀚𑁆𑀚𑀦𑁆𑀢𑀺, 𑀏𑀯𑀁 𑀅𑀭𑀽𑀧𑀁 𑀭𑀽𑀧𑀫𑁆𑀧𑀺 𑀯𑀥𑁂𑀢𑀺. 𑀏𑀯𑀁 𑀢𑀸𑀯 𑀅𑀜𑁆𑀜𑀫𑀜𑁆𑀜𑀁 𑀯𑀥𑁂𑀦𑁆𑀢𑀻𑀢𑀺 𑀯𑀥𑀓𑀸. 𑀬𑀢𑁆𑀣 𑀧𑀦 𑀔𑀦𑁆𑀥𑀸 𑀅𑀢𑁆𑀣𑀺, 𑀢𑀢𑁆𑀣 𑀙𑁂𑀤𑀦𑀪𑁂𑀤𑀦𑀯𑀥𑀩𑀦𑁆𑀥𑀦𑀸𑀤𑀬𑁄 𑀳𑁄𑀦𑁆𑀢𑀺, 𑀦 𑀅𑀜𑁆𑀜𑀢𑁆𑀣𑀸𑀢𑀺. 𑀏𑀯𑀁 𑀔𑀦𑁆𑀥𑁂𑀲𑀼 𑀲𑀦𑁆𑀢𑁂𑀲𑀼 𑀯𑀥𑁄 𑀧𑀜𑁆𑀜𑀸𑀬𑀢𑀻𑀢𑀺𑀧𑀺 𑀯𑀥𑀓𑀸.

𑀇𑀤𑀸𑀦𑀺 𑀧𑀜𑁆𑀘𑀓𑁆𑀔𑀦𑁆𑀥𑁂 𑀭𑀽𑀧𑀸𑀭𑀽𑀧𑀯𑀲𑁂𑀦 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀓𑀢𑁆𑀯𑀸, 𑀭𑀽𑀧𑀯𑀲𑁂𑀦 𑀯𑀸 𑀦𑀸𑀫𑀯𑀲𑁂𑀦 𑀯𑀸 𑀭𑀽𑀧𑀧𑀭𑀺𑀕𑁆𑀕𑀳𑀁 𑀆𑀤𑀺𑀁 𑀓𑀢𑁆𑀯𑀸, 𑀬𑀸𑀯 𑀅𑀭𑀳𑀢𑁆𑀢𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀢𑀩𑁆𑀩𑀁 𑀲𑀺𑀬𑀸 𑀢𑀫𑁆𑀧𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀓𑀣𑀺𑀢𑀫𑁂𑀯.

𑀙𑀝𑁆𑀞𑁄 𑀅𑀦𑁆𑀢𑀭𑀘𑀭𑁄 𑀯𑀥𑀓𑁄 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀦𑀦𑁆𑀤𑀻𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀏𑀢𑁆𑀣 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀦𑀦𑁆𑀤𑀻𑀭𑀸𑀕𑀲𑁆𑀲 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀯𑀥𑀓𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸 𑀧𑀜𑁆𑀜𑀸𑀲𑀺𑀭𑀧𑀸𑀢𑀦𑀢𑁄 𑀘 𑀬𑁄𑀦𑀺𑀲𑀫𑁆𑀧𑀝𑀺𑀧𑀸𑀤𑀦𑀢𑁄 𑀘. 𑀓𑀣𑀁? 𑀘𑀓𑁆𑀔𑀼𑀤𑁆𑀯𑀸𑀭𑀲𑁆𑀫𑀺𑀜𑁆𑀳𑀺 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀢𑀁 𑀆𑀭𑀫𑁆𑀫𑀡𑀁 𑀦𑀺𑀲𑁆𑀲𑀸𑀬 𑀮𑁄𑀪𑁄 𑀉𑀧𑁆𑀧𑀚𑁆𑀚𑀢𑀺, 𑀏𑀢𑁆𑀢𑀸𑀯𑀢𑀸 𑀧𑀜𑁆𑀜𑀸𑀲𑀻𑀲𑀁 𑀧𑀢𑀺𑀢𑀁 𑀦𑀸𑀫 𑀳𑁄𑀢𑀺, 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀢𑀸𑀯 𑀧𑀜𑁆𑀜𑀸𑀲𑀺𑀭𑀧𑀸𑀢𑀦𑀢𑁄 𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀦𑀦𑁆𑀤𑀻𑀭𑀸𑀕𑁄 𑀧𑀦𑁂𑀲 𑀅𑀡𑁆𑀟𑀚𑀸𑀤𑀺𑀪𑁂𑀤𑀸 𑀘𑀢𑀲𑁆𑀲𑁄 𑀬𑁄𑀦𑀺𑀬𑁄 𑀉𑀧𑀦𑁂𑀢𑀺. 𑀢𑀲𑁆𑀲 𑀬𑁄𑀦𑀺𑀉𑀧𑀕𑀫𑀦𑀫𑀽𑀮𑀓𑀸𑀦𑀺 𑀧𑀜𑁆𑀘𑀯𑀻𑀲𑀢𑀺 𑀫𑀳𑀸𑀪𑀬𑀸𑀦𑀺 𑀤𑁆𑀯𑀢𑁆𑀢𑀺𑀁𑀲 𑀓𑀫𑁆𑀫𑀓𑀸𑀭𑀡𑀸𑀦𑀺 𑀘 𑀆𑀕𑀢𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀏𑀯𑀁 𑀬𑁄𑀦𑀺𑀲𑀫𑁆𑀧𑀝𑀺𑀧𑀸𑀤𑀦𑀢𑁄𑀧𑀺𑀲𑁆𑀲 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑀯𑀥𑀓𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀇𑀢𑀺 𑀦𑀦𑁆𑀤𑀻𑀭𑀸𑀕𑀯𑀲𑁂𑀦𑀸𑀧𑀺 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀺𑀢𑀫𑁂𑀯 𑀳𑁄𑀢𑀺. 𑀓𑀣𑀁? 𑀅𑀬𑀜𑁆𑀳𑀺 𑀦𑀦𑁆𑀤𑀻𑀭𑀸𑀕𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀢𑀁 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑀺 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀢𑁂𑀲𑀁 𑀯𑀢𑁆𑀣𑀸𑀭𑀫𑁆𑀫𑀡𑀁 𑀭𑀽𑀧𑀓𑁆𑀔𑀦𑁆𑀥𑁄𑀢𑀺, 𑀏𑀯𑀁 𑀧𑀜𑁆𑀘𑀓𑁆𑀔𑀦𑁆𑀥𑁂 𑀯𑀯𑀢𑁆𑀣𑀧𑁂𑀢𑀺. 𑀇𑀤𑀸𑀦𑀺 𑀢𑁂 𑀧𑀜𑁆𑀘𑀓𑁆𑀔𑀦𑁆𑀥𑁂 𑀦𑀸𑀫𑀭𑀽𑀧𑀯𑀲𑁂𑀦 𑀯𑀯𑀢𑁆𑀣𑀧𑁂𑀢𑁆𑀯𑀸, 𑀢𑁂𑀲𑀁 𑀧𑀘𑁆𑀘𑀬𑀧𑀭𑀺𑀬𑁂𑀲𑀦𑀢𑁄 𑀧𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸, 𑀅𑀦𑀼𑀧𑀼𑀩𑁆𑀩𑁂𑀦 𑀏𑀓𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀻𑀢𑀺 𑀏𑀯𑀁 𑀦𑀦𑁆𑀤𑀻𑀭𑀸𑀕𑀯𑀲𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀺𑀢𑀁 𑀳𑁄𑀢𑀺.

𑀙𑀦𑁆𑀦𑀁 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀦𑀁 𑀲𑀼𑀜𑁆𑀜𑀕𑀸𑀫𑁂𑀦 𑀲𑀤𑀺𑀲𑀢𑀸 𑀧𑀸𑀴𑀺𑀬𑀁𑀬𑁂𑀯 𑀆𑀕𑀢𑀸. 𑀅𑀬𑀁 𑀧𑀦𑁂𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑀦𑀬𑁄 𑁋 𑀬𑀣𑀸 𑀘 𑀢𑁂 𑀙 𑀘𑁄𑀭𑀸 𑀙𑀓𑀼𑀝𑀺𑀓𑀁 𑀲𑀼𑀜𑁆𑀜𑀁 𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀅𑀧𑀭𑀸𑀧𑀭𑀁 𑀯𑀺𑀘𑀭𑀦𑁆𑀢𑀸 𑀓𑀺𑀜𑁆𑀘𑀺 𑀅𑀮𑀪𑀺𑀢𑁆𑀯𑀸 𑀕𑀸𑀫𑁂𑀦 𑀅𑀦𑀢𑁆𑀣𑀺𑀓𑀸 𑀳𑁄𑀦𑁆𑀢𑀺, 𑀏𑀯𑀫𑁂𑀯𑀁 𑀪𑀺𑀓𑁆𑀔𑀼 𑀙𑀲𑀼 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑁂𑀲𑀼 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀯𑀺𑀘𑀺𑀦𑀦𑁆𑀢𑁄 ‘‘𑀅𑀳’’𑀦𑁆𑀢𑀺 𑀯𑀸 ‘‘𑀫𑀫’’𑀦𑁆𑀢𑀺 𑀯𑀸 𑀕𑀳𑁂𑀢𑀩𑁆𑀩𑀁 𑀓𑀺𑀜𑁆𑀘𑀺 𑀅𑀤𑀺𑀲𑁆𑀯𑀸 𑀢𑁂𑀳𑀺 𑀅𑀦𑀢𑁆𑀣𑀺𑀓𑁄 𑀳𑁄𑀢𑀺. 𑀲𑁄 ‘‘𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀲𑁆𑀲𑀸𑀫𑀻’’𑀢𑀺 𑀉𑀧𑀸𑀤𑀸𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦 𑀘𑀓𑁆𑀔𑀼𑀧𑀲𑀸𑀤𑀸𑀤𑀬𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 ‘‘𑀅𑀬𑀁 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺 𑀯𑀯𑀢𑁆𑀣𑀧𑁂𑀢𑀺, 𑀫𑀦𑀸𑀬𑀢𑀦𑀁 ‘‘𑀅𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺. 𑀇𑀢𑀺 𑀲𑀩𑁆𑀩𑀸𑀦𑀺𑀧𑁂𑀢𑀸𑀦𑀺 𑀦𑀸𑀫𑀜𑁆𑀘𑁂𑀯 𑀭𑀽𑀧𑀜𑁆𑀘𑀸𑀢𑀺 𑀦𑀸𑀫𑀭𑀽𑀧𑀯𑀲𑁂𑀦 𑀯𑀯𑀢𑁆𑀣𑀧𑁂𑀢𑁆𑀯𑀸, 𑀢𑁂𑀲𑀁 𑀧𑀘𑁆𑀘𑀬𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸, 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀢𑀺. 𑀇𑀤𑀁 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀬𑀸𑀯 𑀅𑀭𑀳𑀢𑁆𑀢𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀺𑀢𑀁 𑀳𑁄𑀢𑀺.

𑀇𑀤𑀸𑀦𑀺 𑀩𑀸𑀳𑀺𑀭𑀸𑀦𑀁 𑀕𑀸𑀫𑀖𑀸𑀢𑀓𑀘𑁄𑀭𑁂𑀳𑀺 𑀲𑀤𑀺𑀲𑀢𑀁 𑀤𑀲𑁆𑀲𑁂𑀦𑁆𑀢𑁄 𑀘𑁄𑀭𑀸 𑀕𑀸𑀫𑀖𑀸𑀢𑀓𑀸𑀢𑀺 𑀔𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀦𑀸𑀧𑀸𑀫𑀦𑀸𑀧𑁂𑀲𑀽𑀢𑀺 𑀓𑀭𑀡𑀢𑁆𑀣𑁂 𑀪𑀼𑀫𑁆𑀫𑀁, 𑀫𑀦𑀸𑀧𑀸𑀫𑀦𑀸𑀧𑁂𑀳𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀘𑁄𑀭𑁂𑀲𑀼 𑀕𑀸𑀫𑀁 𑀳𑀦𑀦𑁆𑀢𑁂𑀲𑀼 𑀧𑀜𑁆𑀘 𑀓𑀺𑀘𑁆𑀘𑀸𑀦𑀺 𑀯𑀢𑁆𑀢𑀦𑁆𑀢𑀺 𑁋 𑀘𑁄𑀭𑀸 𑀢𑀸𑀯 𑀕𑀸𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸 𑀅𑀕𑁆𑀕𑀺𑀁 𑀤𑀢𑁆𑀯𑀸 𑀓𑀝𑀓𑀝𑀲𑀤𑁆𑀤𑀁 𑀉𑀝𑁆𑀞𑀸𑀧𑁂𑀦𑁆𑀢𑀺, 𑀢𑀢𑁄 𑀫𑀦𑀼𑀲𑁆𑀲𑀸 𑀳𑀢𑁆𑀣𑀲𑀸𑀭𑀁 𑀕𑀳𑁂𑀢𑁆𑀯𑀸 𑀩𑀳𑀺 𑀦𑀺𑀓𑁆𑀔𑀫𑀦𑁆𑀢𑀺. 𑀢𑀢𑁄 𑀢𑁂𑀳𑀺 𑀲𑀤𑁆𑀥𑀺𑀁 𑀪𑀡𑁆𑀟𑀓𑀲𑁆𑀲 𑀓𑀸𑀭𑀡𑀸 𑀳𑀢𑁆𑀣𑀧𑀭𑀸𑀫𑀸𑀲𑀁 𑀓𑀭𑁄𑀦𑁆𑀢𑀺. 𑀓𑁂𑀘𑀺 𑀧𑀦𑁂𑀢𑁆𑀣 𑀧𑀳𑀸𑀭𑀁 𑀧𑀸𑀧𑀼𑀡𑀦𑁆𑀢𑀺, 𑀓𑁂𑀘𑀺 𑀧𑀳𑀸𑀭𑀝𑁆𑀞𑀸𑀦𑁂 𑀧𑀢𑀦𑁆𑀢𑀺, 𑀅𑀯𑀲𑁂𑀲𑁂 𑀧𑀦 𑀅𑀭𑁄𑀕𑀚𑀦𑁂 𑀩𑀦𑁆𑀥𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀦𑁂𑀢𑁆𑀯𑀸 𑀭𑀚𑁆𑀚𑀼𑀩𑀦𑁆𑀥𑀦𑀸𑀤𑀻𑀳𑀺 𑀩𑀦𑁆𑀥𑀺𑀢𑁆𑀯𑀸 𑀤𑀸𑀲𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀦𑁆𑀢𑀺.

𑀢𑀢𑁆𑀣 𑀕𑀸𑀫𑀖𑀸𑀢𑀓𑀘𑁄𑀭𑀸𑀦𑀁 𑀕𑀸𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀅𑀕𑁆𑀕𑀺𑀤𑀸𑀦𑀁 𑀯𑀺𑀬 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀆𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀓𑀺𑀮𑁂𑀲𑀧𑀭𑀺𑀴𑀸𑀳𑀼𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀳𑀢𑁆𑀣𑀲𑀸𑀭𑀁 𑀆𑀤𑀸𑀬 𑀩𑀳𑀺 𑀦𑀺𑀓𑁆𑀔𑀫𑀦𑀁 𑀯𑀺𑀬. 𑀢𑀗𑁆𑀔𑀡𑁂 𑀓𑀼𑀲𑀮𑀥𑀫𑁆𑀫𑀁 𑀧𑀳𑀸𑀬 𑀅𑀓𑀼𑀲𑀮𑀲𑀫𑀗𑁆𑀕𑀺𑀢𑀸, 𑀪𑀡𑁆𑀟𑀓𑀲𑁆𑀲 𑀓𑀸𑀭𑀡𑀸 𑀳𑀢𑁆𑀣𑀧𑀭𑀸𑀫𑀲𑀦𑀸𑀧𑀚𑁆𑀚𑀦𑀁 𑀯𑀺𑀬 𑀤𑀼𑀓𑁆𑀓𑀝𑀤𑀼𑀩𑁆𑀪𑀸𑀲𑀺𑀢𑀧𑀸𑀘𑀺𑀢𑁆𑀢𑀺𑀬𑀣𑀼𑀮𑁆𑀮𑀘𑁆𑀘𑀬𑀸𑀦𑀁 𑀆𑀧𑀚𑁆𑀚𑀦𑀓𑀸𑀮𑁄, 𑀧𑀳𑀸𑀭𑀮𑀤𑁆𑀥𑀓𑀸𑀮𑁄 𑀯𑀺𑀬 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀦𑀓𑀸𑀮𑁄, 𑀧𑀳𑀸𑀭𑀁 𑀮𑀤𑁆𑀥𑀸 𑀧𑀦 𑀧𑀳𑀸𑀭𑀝𑁆𑀞𑀸𑀦𑁂 𑀧𑀢𑀺𑀢𑀓𑀸𑀮𑁄 𑀯𑀺𑀬 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀺𑀢𑁆𑀯𑀸 𑀅𑀲𑁆𑀲𑀫𑀡𑀓𑀸𑀮𑁄, 𑀅𑀯𑀲𑁂𑀲𑀚𑀦𑀲𑁆𑀲 𑀩𑀦𑁆𑀥𑀺𑀢𑁆𑀯𑀸 𑀯𑀲𑀦𑀝𑁆𑀞𑀸𑀦𑀁 𑀦𑁂𑀢𑁆𑀯𑀸 𑀤𑀸𑀲𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀦𑀓𑀸𑀮𑁄 𑀯𑀺𑀬 𑀢𑀫𑁂𑀯 𑀆𑀭𑀫𑁆𑀫𑀡𑀁 𑀦𑀺𑀲𑁆𑀲𑀸𑀬 𑀲𑀩𑁆𑀩𑁂𑀲𑀁 𑀧𑀲𑁆𑀲𑀦𑁆𑀢𑀸𑀦𑀁𑀬𑁂𑀯 𑀘𑀽𑀴𑀲𑀻𑀮𑀫𑀚𑁆𑀛𑀺𑀫𑀲𑀻𑀮𑀫𑀳𑀸𑀲𑀻𑀮𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀕𑀺𑀳𑀺𑀪𑀸𑀯𑀁 𑀆𑀧𑀚𑁆𑀚𑀦𑀓𑀸𑀮𑁄. 𑀢𑀢𑁆𑀭𑀲𑁆𑀲 𑀧𑀼𑀢𑁆𑀢𑀤𑀸𑀭𑀁 𑀧𑁄𑀲𑁂𑀦𑁆𑀢𑀲𑁆𑀲 𑀲𑀦𑁆𑀤𑀺𑀝𑁆𑀞𑀺𑀓𑁄 𑀤𑀼𑀓𑁆𑀔𑀓𑁆𑀔𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀓𑀸𑀮𑀁 𑀓𑀢𑁆𑀯𑀸 𑀅𑀧𑀸𑀬𑁂 𑀦𑀺𑀩𑁆𑀩𑀢𑁆𑀢𑀲𑁆𑀲 𑀲𑀫𑁆𑀧𑀭𑀸𑀬𑀺𑀓𑁄.

𑀇𑀫𑀸𑀦𑀺𑀧𑀺 𑀩𑀸𑀳𑀺𑀭𑀸𑀬𑀢𑀦𑀸𑀦𑀺 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦𑁂𑀯 𑀓𑀣𑀺𑀢𑀸𑀦𑀺. 𑀏𑀢𑁆𑀣 𑀳𑀺 𑀭𑀽𑀧𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀉𑀧𑀸𑀤𑀸𑀭𑀽𑀧𑀸𑀦𑀺, 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀢𑀺𑀲𑁆𑀲𑁄 𑀥𑀸𑀢𑀼𑀬𑁄, 𑀥𑀫𑁆𑀫𑀸𑀬𑀢𑀦𑁂 𑀆𑀧𑁄𑀥𑀸𑀢𑀼𑀬𑀸 𑀲𑀤𑁆𑀥𑀺𑀁 𑀢𑀸 𑀘𑀢𑀲𑁆𑀲𑁄𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀪𑀽𑀢𑀸𑀦𑀺, 𑀢𑁂𑀲𑀁 𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀆𑀓𑀸𑀲𑀥𑀸𑀢𑀼, 𑀮𑀳𑀼𑀢𑀸𑀤𑀺𑀯𑀲𑁂𑀦 𑀮𑀳𑀼𑀢𑀸𑀤𑀬𑁄𑀢𑀺 𑀏𑀯𑀫𑀺𑀤𑀁 𑀲𑀩𑁆𑀩𑀫𑁆𑀧𑀺 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀢𑀤𑀸𑀭𑀫𑁆𑀫𑀡𑀸 𑀯𑁂𑀤𑀦𑀸𑀤𑀬𑁄 𑀘𑀢𑁆𑀢𑀸𑀭𑁄 𑀅𑀭𑀽𑀧𑀓𑁆𑀔𑀦𑁆𑀥𑀸. 𑀢𑀢𑁆𑀣 ‘‘𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀁, 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀦𑀸𑀫’’𑀦𑁆𑀢𑀺. 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀼𑀭𑀺𑀫𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀦𑁆𑀢𑀲𑁆𑀲 𑀬𑀸𑀯 𑀅𑀭𑀳𑀢𑁆𑀢𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀺𑀢𑀁 𑀳𑁄𑀢𑀺.

𑀑𑀖𑀸𑀦𑀦𑁆𑀢𑀺 𑀏𑀢𑁆𑀣 𑀤𑀼𑀭𑀼𑀢𑁆𑀢𑀭𑀡𑀝𑁆𑀞𑁄 𑀑𑀖𑀝𑁆𑀞𑁄. 𑀏𑀢𑁂 𑀳𑀺 ‘‘𑀲𑀻𑀮𑀲𑀁𑀯𑀭𑀁 𑀧𑀽𑀭𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’’𑀢𑀺 𑀅𑀚𑁆𑀛𑀸𑀲𑀬𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀦𑀺𑀲𑁆𑀲𑀸𑀬 𑀲𑀫𑁆𑀫𑀸 𑀯𑀸𑀬𑀫𑀦𑁆𑀢𑁂𑀦 𑀢𑀭𑀺𑀢𑀩𑁆𑀩𑀸, 𑀬𑁂𑀦 𑀯𑀸 𑀢𑁂𑀦 𑀯𑀸 𑀤𑀼𑀭𑀼𑀢𑁆𑀢𑀭𑀸. 𑀇𑀫𑀺𑀦𑀸 𑀤𑀼𑀭𑀼𑀢𑁆𑀢𑀭𑀡𑀝𑁆𑀞𑁂𑀦 𑀑𑀖𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀧𑀺 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦 𑀓𑀣𑀺𑀢𑀸. 𑀘𑀢𑁆𑀢𑀸𑀭𑁄𑀧𑀺 𑀳𑀺 𑀏𑀢𑁂 𑀏𑀓𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄 𑀯𑀸𑀢𑀺. 𑀲𑁂𑀲𑀁 𑀦𑀦𑁆𑀤𑀻𑀭𑀸𑀕𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀲𑀓𑁆𑀓𑀸𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺, 𑀲𑀓𑁆𑀓𑀸𑀬𑁄𑀧𑀺 𑀳𑀺 𑀆𑀲𑀻𑀯𑀺𑀲𑀸𑀤𑀻𑀳𑀺 𑀉𑀤𑀓𑀡𑁆𑀡𑀯𑀲𑁆𑀲 𑀑𑀭𑀺𑀫𑀢𑀻𑀭𑀁 𑀯𑀺𑀬 𑀘𑀢𑀼𑀫𑀳𑀸𑀪𑀽𑀢𑀸𑀤𑀻𑀳𑀺 𑀲𑀸𑀲𑀗𑁆𑀓𑁄 𑀲𑀧𑁆𑀧𑀝𑀺𑀪𑀬𑁄, 𑀲𑁄𑀧𑀺 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦𑁂𑀯 𑀓𑀣𑀺𑀢𑁄. 𑀲𑀓𑁆𑀓𑀸𑀬𑁄 𑀳𑀺 𑀢𑁂𑀪𑀽𑀫𑀓𑀧𑀜𑁆𑀘𑀓𑁆𑀔𑀦𑁆𑀥𑀸, 𑀢𑁂 𑀘 𑀲𑀫𑀸𑀲𑀢𑁄 𑀦𑀸𑀫𑀭𑀽𑀧𑀫𑁂𑀯𑀸𑀢𑀺. 𑀏𑀯𑀫𑁂𑀢𑁆𑀣 𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀅𑀭𑀳𑀢𑁆𑀢𑀸 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀦𑁆𑀢𑀺.

𑀦𑀺𑀩𑁆𑀩𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀦𑀺𑀩𑁆𑀩𑀸𑀦𑀜𑁆𑀳𑀺 𑀉𑀤𑀓𑀡𑁆𑀡𑀯𑀲𑁆𑀲 𑀧𑀸𑀭𑀺𑀫𑀢𑀻𑀭𑀁 𑀯𑀺𑀬 𑀘𑀢𑀼𑀫𑀳𑀸𑀪𑀽𑀢𑀸𑀤𑀻𑀳𑀺 𑀔𑁂𑀫𑀁 𑀅𑀧𑁆𑀧𑀝𑀺𑀪𑀬𑀁. 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀏𑀢𑁆𑀣 𑀘𑀺𑀢𑁆𑀢𑀓𑀺𑀭𑀺𑀬𑀤𑀲𑁆𑀲𑀦𑀢𑁆𑀣𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀯𑀸𑀬𑀸𑀫𑀫𑁂𑀯 𑀯𑀻𑀭𑀺𑀬𑀦𑁆𑀢𑀺 𑀕𑀡𑁆𑀳𑀺𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄𑀢𑀺 𑀢𑀭𑀺𑀢𑁆𑀯𑀸 𑀧𑀸𑀭𑀁 𑀕𑀢𑁄.

𑀢𑀢𑁆𑀣 𑀬𑀣𑀸 𑀲𑀸𑀲𑀗𑁆𑀓𑀑𑀭𑀺𑀫𑀢𑀻𑀭𑁂 𑀞𑀺𑀢𑁂𑀦 𑀉𑀤𑀓𑀡𑁆𑀡𑀯𑀁 𑀢𑀭𑀺𑀢𑀼𑀓𑀸𑀫𑁂𑀦 𑀓𑀢𑀺𑀧𑀸𑀳𑀁 𑀯𑀲𑀺𑀢𑁆𑀯𑀸 𑀲𑀡𑀺𑀓𑀁 𑀦𑀸𑀯𑀁 𑀲𑀚𑁆𑀚𑁂𑀢𑁆𑀯𑀸 𑀉𑀤𑀓𑀓𑀻𑀴𑀁 𑀓𑀻𑀴𑀦𑁆𑀢𑁂𑀦 𑀯𑀺𑀬 𑀦 𑀦𑀸𑀯𑀸 𑀅𑀪𑀺𑀭𑀼𑀳𑀺𑀢𑀩𑁆𑀩𑀸. 𑀏𑀯𑀁 𑀓𑀭𑁄𑀦𑁆𑀢𑁄 𑀳𑀺 𑀅𑀦𑀸𑀭𑀼𑀴𑁆𑀳𑁄𑀯 𑀩𑁆𑀬𑀲𑀦𑀁 𑀧𑀸𑀧𑀼𑀡𑀸𑀢𑀺. 𑀏𑀯𑀫𑁂𑀯 𑀓𑀺𑀮𑁂𑀲𑀡𑁆𑀡𑀯𑀁 𑀢𑀭𑀺𑀢𑀼𑀓𑀸𑀫𑁂𑀦 ‘‘𑀢𑀭𑀼𑀡𑁄 𑀢𑀸𑀯𑀫𑁆𑀳𑀺, 𑀫𑀳𑀮𑁆𑀮𑀓𑀓𑀸𑀮𑁂 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀓𑀼𑀮𑁆𑀮𑀁 𑀩𑀦𑁆𑀥𑀺𑀲𑁆𑀲𑀸𑀫𑀻’’𑀢𑀺 𑀧𑀧𑀜𑁆𑀘𑁄 𑀦 𑀓𑀸𑀢𑀩𑁆𑀩𑁄. 𑀏𑀯𑀁 𑀓𑀭𑁄𑀦𑁆𑀢𑁄 𑀳𑀺 𑀫𑀳𑀮𑁆𑀮𑀓𑀓𑀸𑀮𑀁 𑀅𑀧𑀢𑁆𑀯𑀸𑀧𑀺 𑀯𑀺𑀦𑀸𑀲𑀁 𑀧𑀸𑀧𑀼𑀡𑀸𑀢𑀺, 𑀧𑀢𑁆𑀯𑀸𑀧𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀪𑀤𑁆𑀤𑁂𑀓𑀭𑀢𑁆𑀢𑀸𑀤𑀻𑀦𑀺 𑀧𑀦 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀯𑁂𑀕𑁂𑀦𑁂𑀯 𑀅𑀬𑀁 𑀅𑀭𑀺𑀬𑀫𑀕𑁆𑀕𑀓𑀼𑀮𑁆𑀮𑁄 𑀩𑀦𑁆𑀥𑀺𑀢𑀩𑁆𑀩𑁄.

𑀬𑀣𑀸 𑀘 𑀓𑀼𑀮𑁆𑀮𑀁 𑀩𑀦𑁆𑀥𑀦𑁆𑀢𑀲𑁆𑀲 𑀳𑀢𑁆𑀣𑀧𑀸𑀤𑀧𑀸𑀭𑀺𑀧𑀽𑀭𑀺 𑀇𑀘𑁆𑀙𑀺𑀢𑀩𑁆𑀩𑀸. 𑀓𑀼𑀡𑁆𑀞𑀧𑀸𑀤𑁄 𑀳𑀺 𑀔𑀜𑁆𑀚𑀧𑀸𑀤𑁄 𑀯𑀸 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀨𑀡𑀳𑀢𑁆𑀣𑀓𑀸𑀤𑀬𑁄 𑀢𑀺𑀡𑀧𑀡𑁆𑀡𑀸𑀤𑀻𑀦𑀺 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀏𑀯𑀫𑀺𑀫𑀫𑁆𑀧𑀺 𑀅𑀭𑀺𑀬𑀫𑀕𑁆𑀕𑀓𑀼𑀮𑁆𑀮𑀁 𑀩𑀦𑁆𑀥𑀦𑁆𑀢𑀲𑁆𑀲 𑀲𑀻𑀮𑀧𑀸𑀤𑀸𑀦𑀜𑁆𑀘𑁂𑀯 𑀲𑀤𑁆𑀥𑀸𑀳𑀢𑁆𑀣𑀲𑁆𑀲 𑀘 𑀧𑀸𑀭𑀺𑀧𑀽𑀭𑀺 𑀇𑀘𑁆𑀙𑀺𑀢𑀩𑁆𑀩𑀸. 𑀦 𑀳𑀺 𑀤𑀼𑀲𑁆𑀲𑀻𑀮𑁄 𑀅𑀲𑁆𑀲𑀤𑁆𑀥𑁄 𑀲𑀸𑀲𑀦𑁂 𑀅𑀧𑁆𑀧𑀢𑀺𑀝𑁆𑀞𑀺𑀢𑁄 𑀧𑀝𑀺𑀧𑀢𑁆𑀢𑀺𑀁 𑀅𑀲𑁆𑀲𑀤𑁆𑀤𑀳𑀦𑁆𑀢𑁄 𑀅𑀭𑀺𑀬𑀫𑀕𑁆𑀕𑀓𑀼𑀮𑁆𑀮𑀁 𑀩𑀦𑁆𑀥𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀬𑀣𑀸 𑀘 𑀧𑀭𑀺𑀧𑀼𑀡𑁆𑀡𑀳𑀢𑁆𑀣𑀧𑀸𑀤𑁄𑀧𑀺 𑀤𑀼𑀩𑁆𑀩𑀮𑁄 𑀩𑁆𑀬𑀸𑀥𑀺𑀧𑀻𑀴𑀺𑀢𑁄 𑀓𑀼𑀮𑁆𑀮𑀁 𑀩𑀦𑁆𑀥𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀣𑀸𑀫𑀲𑀫𑁆𑀧𑀦𑁆𑀦𑁄𑀯 𑀲𑀓𑁆𑀓𑁄𑀢𑀺, 𑀏𑀯𑀁 𑀲𑀻𑀮𑀯𑀸 𑀲𑀤𑁆𑀥𑁄𑀧𑀺 𑀅𑀮𑀲𑁄 𑀓𑀼𑀲𑀻𑀢𑁄 𑀇𑀫𑀁 𑀫𑀕𑁆𑀕𑀓𑀼𑀮𑁆𑀮𑀁 𑀩𑀦𑁆𑀥𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀆𑀭𑀤𑁆𑀥𑀯𑀻𑀭𑀺𑀬𑁄𑀯 𑀲𑀓𑁆𑀓𑁄𑀢𑀻𑀢𑀺 𑀇𑀫𑀁 𑀩𑀦𑁆𑀥𑀺𑀢𑀼𑀓𑀸𑀫𑁂𑀦 𑀆𑀭𑀤𑁆𑀥𑀯𑀻𑀭𑀺𑀬𑁂𑀦 𑀪𑀯𑀺𑀢𑀩𑁆𑀩𑀁. 𑀬𑀣𑀸 𑀲𑁄 𑀧𑀼𑀭𑀺𑀲𑁄 𑀓𑀼𑀮𑁆𑀮𑀁 𑀩𑀦𑁆𑀥𑀺𑀢𑁆𑀯𑀸 𑀢𑀻𑀭𑁂 𑀞𑀢𑁆𑀯𑀸 𑀬𑁄𑀚𑀦𑀯𑀺𑀢𑁆𑀣𑀸𑀭𑀁 𑀉𑀤𑀓𑀡𑁆𑀡𑀯𑀁 ‘‘𑀅𑀬𑀁 𑀫𑀬𑀸 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑀁 𑀦𑀺𑀲𑁆𑀲𑀸𑀬 𑀦𑀺𑀢𑁆𑀣𑀭𑀺𑀢𑀩𑁆𑀩𑁄’’𑀢𑀺 𑀫𑀸𑀦𑀲𑀁 𑀩𑀦𑁆𑀥𑀢𑀺, 𑀏𑀯𑀁 𑀬𑁄𑀕𑀺𑀦𑀸𑀧𑀺 𑀘𑀗𑁆𑀓𑀫𑀸 𑀑𑀭𑀼𑀬𑁆𑀳 ‘‘𑀅𑀚𑁆𑀚 𑀫𑀬𑀸 𑀘𑀢𑀼𑀫𑀕𑁆𑀕𑀯𑀚𑁆𑀛𑀁 𑀓𑀺𑀮𑁂𑀲𑀡𑁆𑀡𑀯𑀁 𑀢𑀭𑀺𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀢𑀩𑁆𑀩’’𑀦𑁆𑀢𑀺 𑀫𑀸𑀦𑀲𑀁 𑀩𑀦𑁆𑀥𑀺𑀢𑀩𑁆𑀩𑀁.

𑀬𑀣𑀸 𑀘 𑀲𑁄 𑀧𑀼𑀭𑀺𑀲𑁄 𑀓𑀼𑀮𑁆𑀮𑀁 𑀦𑀺𑀲𑁆𑀲𑀸𑀬 𑀉𑀤𑀓𑀡𑁆𑀡𑀯𑀁 𑀢𑀭𑀦𑁆𑀢𑁄 𑀕𑀸𑀯𑀼𑀢𑀫𑀢𑁆𑀢𑀁 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 ‘‘𑀏𑀓𑀓𑁄𑀝𑁆𑀞𑀸𑀲𑀁 𑀅𑀢𑀺𑀓𑁆𑀓𑀦𑁆𑀢𑁄𑀫𑁆𑀳𑀺, 𑀅𑀜𑁆𑀜𑁂 𑀢𑀬𑁄 𑀲𑁂𑀲𑀸’’𑀢𑀺 𑀚𑀸𑀦𑀸𑀢𑀺, 𑀅𑀧𑀭𑀫𑁆𑀧𑀺 𑀕𑀸𑀯𑀼𑀢𑀫𑀢𑁆𑀢𑀁 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 ‘‘𑀤𑁆𑀯𑁂 𑀅𑀢𑀺𑀓𑁆𑀓𑀦𑁆𑀢𑁄𑀫𑁆𑀳𑀺, 𑀤𑁆𑀯𑁂 𑀲𑁂𑀲𑀸’’𑀢𑀺 𑀚𑀸𑀦𑀸𑀢𑀺, 𑀅𑀧𑀭𑀫𑁆𑀧𑀺 𑀕𑀸𑀯𑀼𑀢𑀫𑀢𑁆𑀢𑀁 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 ‘‘𑀢𑀬𑁄 𑀅𑀢𑀺𑀓𑁆𑀓𑀦𑁆𑀢𑁄𑀫𑁆𑀳𑀺, 𑀏𑀓𑁄 𑀲𑁂𑀲𑁄’’𑀢𑀺 𑀚𑀸𑀦𑀸𑀢𑀺, 𑀢𑀫𑁆𑀧𑀺 𑀅𑀢𑀺𑀓𑁆𑀓𑀫𑁆𑀫 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 ‘‘𑀘𑀢𑁆𑀢𑀸𑀭𑁄𑀧𑀺 𑀫𑁂 𑀓𑁄𑀝𑁆𑀞𑀲𑀸 𑀅𑀢𑀺𑀓𑁆𑀓𑀦𑁆𑀢𑀸’’𑀢𑀺 𑀚𑀸𑀦𑀸𑀢𑀺, 𑀢𑀜𑁆𑀘 𑀓𑀼𑀮𑁆𑀮𑀁 𑀧𑀸𑀤𑁂𑀦 𑀅𑀓𑁆𑀓𑀫𑀺𑀢𑁆𑀯𑀸 𑀲𑁄𑀢𑀸𑀪𑀺𑀫𑀼𑀔𑀁 𑀔𑀺𑀧𑀺𑀢𑁆𑀯𑀸 𑀉𑀢𑁆𑀢𑀭𑀺𑀢𑁆𑀯𑀸 𑀢𑀻𑀭𑁂 𑀢𑀺𑀝𑁆𑀞𑀢𑀺. 𑀏𑀯𑀁 𑀅𑀬𑀫𑁆𑀧𑀺 𑀪𑀺𑀓𑁆𑀔𑀼 𑀅𑀭𑀺𑀬𑀫𑀕𑁆𑀕𑀓𑀼𑀮𑁆𑀮𑀁 𑀦𑀺𑀲𑁆𑀲𑀸𑀬 𑀓𑀺𑀮𑁂𑀲𑀡𑁆𑀡𑀯𑀁 𑀢𑀭𑀦𑁆𑀢𑁄 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀧𑀞𑀫𑀫𑀕𑁆𑀕𑀯𑀚𑁆𑀛𑁂 𑀓𑀺𑀮𑁂𑀲𑁂 𑀢𑀭𑀺𑀢𑁆𑀯𑀸 𑀫𑀕𑁆𑀕𑀸𑀦𑀦𑁆𑀢𑀭𑁂 𑀨𑀮𑁂 𑀞𑀺𑀢𑁄 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 ‘‘𑀘𑀢𑀼𑀫𑀕𑁆𑀕𑀯𑀚𑁆𑀛𑀸𑀦𑀁 𑀫𑁂 𑀓𑀺𑀮𑁂𑀲𑀸𑀦𑀁 𑀏𑀓𑁄 𑀓𑁄𑀝𑁆𑀞𑀸𑀲𑁄 𑀧𑀳𑀻𑀦𑁄, 𑀇𑀢𑀭𑁂 𑀢𑀬𑁄 𑀲𑁂𑀲𑀸’’𑀢𑀺 𑀚𑀸𑀦𑀸𑀢𑀺. 𑀧𑀼𑀦 𑀢𑀣𑁂𑀯 𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂𑀦 𑀤𑀼𑀢𑀺𑀬𑀫𑀕𑁆𑀕𑀯𑀚𑁆𑀛𑁂 𑀓𑀺𑀮𑁂𑀲𑁂 𑀢𑀭𑀺𑀢𑁆𑀯𑀸 𑀫𑀕𑁆𑀕𑀸𑀦𑀦𑁆𑀢𑀭𑁂 𑀨𑀮𑁂 𑀞𑀺𑀢𑁄 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦 𑀦𑀺𑀯𑀢𑁆𑀢𑀺𑀢𑁆𑀯𑀸, 𑀑𑀮𑁄𑀓𑁂𑀦𑁆𑀢𑁄 ‘‘𑀘𑀢𑀼𑀫𑀕𑁆𑀕𑀯𑀚𑁆𑀛𑀸𑀦𑀁 𑀫𑁂 𑀓𑀺𑀮𑁂𑀲𑀸𑀦𑀁 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀧𑀳𑀻𑀦𑀸, 𑀇𑀢𑀭𑁂 𑀤𑁆𑀯𑁂 𑀲𑁂𑀲𑀸’’𑀢𑀺 𑀚𑀸𑀦𑀸𑀢𑀺. 𑀧𑀼𑀦 𑀢𑀣𑁂𑀯 𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀢𑀢𑀺𑀬𑀫𑀕𑁆𑀕𑀯𑀚𑁆𑀛𑁂 𑀓𑀺𑀮𑁂𑀲𑁂 𑀢𑀭𑀺𑀢𑁆𑀯𑀸 𑀫𑀕𑁆𑀕𑀸𑀦𑀦𑁆𑀢𑀭𑁂 𑀨𑀮𑁂 𑀞𑀺𑀢𑁄 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 ‘‘𑀘𑀢𑀼𑀫𑀕𑁆𑀕𑀯𑀚𑁆𑀛𑀸𑀦𑀁 𑀫𑁂 𑀓𑀺𑀮𑁂𑀲𑀸𑀦𑀁 𑀢𑀬𑁄 𑀓𑁄𑀝𑁆𑀞𑀸𑀲𑀸 𑀧𑀳𑀻𑀦𑀸, 𑀏𑀓𑁄 𑀲𑁂𑀲𑁄’’𑀢𑀺 𑀚𑀸𑀦𑀸𑀢𑀺. 𑀧𑀼𑀦 𑀢𑀣𑁂𑀯 𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀘𑀢𑀼𑀢𑁆𑀣𑀫𑀕𑁆𑀕𑀯𑀚𑁆𑀛𑁂 𑀓𑀺𑀮𑁂𑀲𑁂 𑀢𑀭𑀺𑀢𑁆𑀯𑀸 𑀫𑀕𑁆𑀕𑀸𑀦𑀦𑁆𑀢𑀭𑁂 𑀨𑀮𑁂 𑀞𑀺𑀢𑁄 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦 𑀦𑀺𑀯𑀢𑁆𑀢𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 ‘‘𑀲𑀩𑁆𑀩𑀓𑀺𑀮𑁂𑀲𑀸 𑀫𑁂 𑀧𑀳𑀻𑀦𑀸’’𑀢𑀺 𑀚𑀸𑀦𑀸𑀢𑀺.

𑀬𑀣𑀸 𑀲𑁄 𑀧𑀼𑀭𑀺𑀲𑁄 𑀢𑀁 𑀓𑀼𑀮𑁆𑀮𑀁 𑀲𑁄𑀢𑁂 𑀧𑀯𑀸𑀳𑁂𑀢𑁆𑀯𑀸 𑀉𑀢𑁆𑀢𑀭𑀺𑀢𑁆𑀯𑀸 𑀣𑀮𑁂 𑀞𑀺𑀢𑁄 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀉𑀧𑀭𑀺𑀧𑀸𑀲𑀸𑀤𑀯𑀭𑀕𑀢𑁄 ‘‘𑀏𑀢𑁆𑀢𑀓𑁂𑀦 𑀯𑀢𑀫𑁆𑀳𑀺 𑀅𑀦𑀢𑁆𑀣𑁂𑀦 𑀫𑀼𑀢𑁆𑀢𑁄’’𑀢𑀺 𑀏𑀓𑀕𑁆𑀕𑀘𑀺𑀢𑁆𑀢𑁄 𑀢𑀼𑀝𑁆𑀞𑀫𑀸𑀦𑀲𑁄 𑀦𑀺𑀲𑀻𑀤𑀢𑀺, 𑀏𑀯𑀁 𑀢𑀲𑁆𑀫𑀺𑀁𑀬𑁂𑀯 𑀯𑀸 𑀆𑀲𑀦𑁂 𑀅𑀜𑁆𑀜𑁂𑀲𑀼 𑀯𑀸 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀸𑀤𑀻𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀲𑀺𑀦𑁆𑀦𑁄 ‘‘𑀏𑀢𑁆𑀢𑀓𑁂𑀦 𑀯𑀢𑀫𑁆𑀳𑀺 𑀅𑀦𑀢𑁆𑀣𑁂𑀦 𑀫𑀼𑀢𑁆𑀢𑁄’’𑀢𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑁆𑀯𑀸 𑀏𑀓𑀕𑁆𑀕𑀘𑀺𑀢𑁆𑀢𑁄 𑀢𑀼𑀝𑁆𑀞𑀫𑀸𑀦𑀲𑁄 𑀦𑀺𑀲𑀻𑀤𑀢𑀺. 𑀇𑀤𑀁 𑀯𑀸 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀭𑀳𑀢𑁄 𑀏𑀢𑀁 𑀅𑀥𑀺𑀯𑀘𑀦𑀦𑁆𑀢𑀺. 𑀏𑀯𑀁 𑀢𑀸𑀯𑁂𑀢𑁆𑀣 𑀦𑀸𑀦𑀸𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀓𑀣𑀺𑀢𑀸𑀦𑀺, 𑀲𑀫𑁄𑀥𑀸𑀦𑁂𑀢𑁆𑀯𑀸 𑀧𑀦 𑀲𑀩𑁆𑀩𑀸𑀦𑀺𑀧𑀺 𑀏𑀓𑀫𑁂𑀯 𑀓𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸𑀦𑀺. 𑀏𑀓𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁂𑀦𑀸𑀧𑀺 𑀧𑀜𑁆𑀘𑀓𑁆𑀔𑀦𑁆𑀥𑀯𑀲𑁂𑀦𑁂𑀯 𑀯𑀺𑀦𑀺𑀯𑀢𑁆𑀢𑁂𑀢𑀩𑁆𑀩𑀸𑀦𑀺.

𑀓𑀣𑀁? 𑀏𑀢𑁆𑀣 𑀳𑀺 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀧𑀜𑁆𑀘𑀸𑀬𑀢𑀦𑀸𑀦𑀺 𑀩𑀸𑀳𑀺𑀭𑀸𑀦𑀺 𑀧𑀜𑁆𑀘𑀸𑀬𑀢𑀦𑀸𑀦𑀺 𑀥𑀫𑁆𑀫𑀸𑀬𑀢𑀦𑁂 𑀧𑀦𑁆𑀦𑀭𑀲 𑀲𑀼𑀔𑀼𑀫𑀭𑀽𑀧𑀸𑀦𑀺 𑀲𑀓𑁆𑀓𑀸𑀬𑀲𑁆𑀲 𑀏𑀓𑀤𑁂𑀲𑁄𑀢𑀺 𑀅𑀬𑀁 𑀭𑀽𑀧𑀓𑁆𑀔𑀦𑁆𑀥𑁄, 𑀫𑀦𑀸𑀬𑀢𑀦𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑁄 𑀘𑀢𑁆𑀢𑀸𑀭𑁄 𑀑𑀖𑀸 𑀲𑀓𑁆𑀓𑀸𑀬𑁂𑀓𑀤𑁂𑀲𑁄𑀢𑀺 𑀇𑀫𑁂 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸. 𑀢𑀢𑁆𑀣 𑀭𑀽𑀧𑀓𑁆𑀔𑀦𑁆𑀥𑁄 𑀭𑀽𑀧𑀁, 𑀘𑀢𑁆𑀢𑀸𑀭𑁄 𑀅𑀭𑀽𑀧𑀺𑀦𑁄 𑀔𑀦𑁆𑀥𑀸 𑀦𑀸𑀫𑀦𑁆𑀢𑀺 𑀇𑀤𑀁 𑀦𑀸𑀫𑀭𑀽𑀧𑀁. 𑀢𑀲𑁆𑀲 𑀦𑀦𑁆𑀤𑀻𑀭𑀸𑀕𑁄 𑀓𑀸𑀫𑁄𑀖𑁄 𑀪𑀯𑁄𑀖𑁄 𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑁄 𑀲𑀓𑁆𑀓𑀸𑀬𑁂𑀓𑀤𑁂𑀲𑁄𑀢𑀺 𑀇𑀫𑁂 𑀧𑀘𑁆𑀘𑀬𑀸. 𑀇𑀢𑀺 𑀲𑀧𑁆𑀧𑀘𑁆𑀘𑀬𑀁 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑀺 𑀦𑀸𑀫. 𑀲𑀧𑁆𑀧𑀘𑁆𑀘𑀬𑀁 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑀺𑀮𑀓𑁆𑀔𑀡𑀁 𑀆𑀭𑁄𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀻𑀢𑀺 𑀇𑀤𑀁 𑀏𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀦𑀺𑀬𑁆𑀬𑀸𑀦𑀫𑀼𑀔𑀁.

𑀢𑀢𑁆𑀣 𑀘𑀢𑁆𑀢𑀸𑀭𑁄 𑀫𑀳𑀸𑀪𑀽𑀢𑀸 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀺 𑀏𑀓𑀸𑀤𑀲𑀸𑀬𑀢𑀦𑀸𑀦𑀺 𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑁄 𑀤𑀺𑀝𑁆𑀞𑁄𑀖𑁄 𑀅𑀯𑀺𑀚𑁆𑀚𑁄𑀖𑁄 𑀲𑀓𑁆𑀓𑀸𑀬𑁂𑀓𑀤𑁂𑀲𑁄𑀢𑀺 𑀇𑀤𑀁 𑀤𑀼𑀓𑁆𑀔𑀲𑀘𑁆𑀘𑀁, 𑀦𑀦𑁆𑀤𑀻𑀭𑀸𑀕𑁄 𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑁄 𑀓𑀸𑀫𑁄𑀖𑁄 𑀪𑀯𑁄𑀖𑁄 𑀲𑀓𑁆𑀓𑀸𑀬𑁂𑀓𑀤𑁂𑀲𑁄𑀢𑀺 𑀇𑀤𑀁 𑀲𑀫𑀼𑀤𑀬𑀲𑀘𑁆𑀘𑀁, 𑀧𑀸𑀭𑀺𑀫𑀢𑀻𑀭𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀦𑀺𑀭𑁄𑀥𑀲𑀘𑁆𑀘𑀁, 𑀅𑀭𑀺𑀬𑀫𑀕𑁆𑀕𑁄 𑀫𑀕𑁆𑀕𑀲𑀘𑁆𑀘𑀁. 𑀢𑀢𑁆𑀣 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀯𑀝𑁆𑀝𑀁, 𑀤𑁆𑀯𑁂 𑀯𑀺𑀯𑀝𑁆𑀝𑀁, 𑀤𑁆𑀯𑁂 𑀮𑁄𑀓𑀺𑀬𑀸𑀦𑀺, 𑀤𑁆𑀯𑁂 𑀮𑁄𑀓𑀼𑀢𑁆𑀢𑀭𑀸𑀦𑀻𑀢𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀲𑁄𑀴𑀲𑀳𑀸𑀓𑀸𑀭𑁂𑀳𑀺 𑀲𑀝𑁆𑀞𑀺𑀦𑀬𑀲𑀳𑀲𑁆𑀲𑁂𑀳𑀺 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸𑀦𑀻𑀢𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀺𑀁𑀲𑀼. 𑀲𑀼𑀢𑁆𑀢𑀁 𑀧𑀦 𑀤𑀼𑀓𑁆𑀔𑀮𑀓𑁆𑀔𑀡𑀯𑀲𑁂𑀦 𑀓𑀣𑀺𑀢𑀁.

𑁨. 𑀭𑀣𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁯. 𑀤𑀼𑀢𑀺𑀬𑁂 𑀲𑀼𑀔𑀲𑁄𑀫𑀦𑀲𑁆𑀲𑀩𑀳𑀼𑀮𑁄𑀢𑀺 𑀓𑀸𑀬𑀺𑀓𑀲𑀼𑀔𑀜𑁆𑀘𑁂𑀯 𑀘𑁂𑀢𑀲𑀺𑀓𑀲𑁄𑀫𑀦𑀲𑁆𑀲𑀜𑁆𑀘 𑀩𑀳𑀼𑀮𑀁 𑀅𑀲𑁆𑀲𑀸𑀢𑀺 𑀲𑀼𑀔𑀲𑁄𑀫𑀦𑀲𑁆𑀲𑀩𑀳𑀼𑀮𑁄. 𑀬𑁄𑀦𑀺 𑀘𑀲𑁆𑀲 𑀆𑀭𑀤𑁆𑀥𑀸 𑀳𑁄𑀢𑀻𑀢𑀺 𑀓𑀸𑀭𑀡𑀜𑁆𑀘𑀲𑁆𑀲 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺. 𑀆𑀲𑀯𑀸𑀦𑀁 𑀔𑀬𑀸𑀬𑀸𑀢𑀺 𑀇𑀥 𑀆𑀲𑀯𑀓𑁆𑀔𑀬𑁄𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁄 𑀅𑀥𑀺𑀧𑁆𑀧𑁂𑀢𑁄, 𑀢𑀤𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄. 𑀑𑀥𑀲𑁆𑀢𑀧𑀢𑁄𑀤𑁄𑀢𑀺 𑀭𑀣𑀫𑀚𑁆𑀛𑁂 𑀢𑀺𑀭𑀺𑀬𑀁 𑀞𑀧𑀺𑀢𑀧𑀢𑁄𑀤𑁄. 𑀬𑁂𑀦𑀺𑀘𑁆𑀙𑀓𑀦𑁆𑀢𑀺 𑀬𑁂𑀦 𑀤𑀺𑀲𑀸𑀪𑀸𑀕𑁂𑀦 𑀇𑀘𑁆𑀙𑀢𑀺. 𑀬𑀤𑀺𑀘𑁆𑀙𑀓𑀦𑁆𑀢𑀺 𑀬𑀁 𑀬𑀁 𑀕𑀫𑀦𑀁 𑀇𑀘𑁆𑀙𑀢𑀺. 𑀲𑀸𑀭𑁂𑀬𑁆𑀬𑀸𑀢𑀺 𑀧𑁂𑀲𑁂𑀬𑁆𑀬. 𑀧𑀘𑁆𑀘𑀸𑀲𑀸𑀭𑁂𑀬𑁆𑀬𑀸𑀢𑀺 𑀧𑀝𑀺𑀯𑀺𑀦𑀺𑀯𑀢𑁆𑀢𑁂𑀬𑁆𑀬. 𑀆𑀭𑀓𑁆𑀔𑀸𑀬𑀸𑀢𑀺 𑀭𑀓𑁆𑀔𑀡𑀢𑁆𑀣𑀸𑀬. 𑀲𑀁𑀬𑀫𑀸𑀬𑀸𑀢𑀺 𑀯𑁂𑀕𑀦𑀺𑀕𑁆𑀕𑀳𑀡𑀢𑁆𑀣𑀸𑀬. 𑀤𑀫𑀸𑀬𑀸𑀢𑀺 𑀦𑀺𑀩𑁆𑀩𑀺𑀲𑁂𑀯𑀦𑀢𑁆𑀣𑀸𑀬. 𑀉𑀧𑀲𑀫𑀸𑀬𑀸𑀢𑀺 𑀓𑀺𑀮𑁂𑀲𑀽𑀧𑀲𑀫𑀢𑁆𑀣𑀸𑀬.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀬𑀣𑀸 𑀅𑀓𑀼𑀲𑀮𑀲𑁆𑀲 𑀲𑀸𑀭𑀣𑀺𑀦𑁄 𑀅𑀤𑀦𑁆𑀢𑁂 𑀲𑀺𑀦𑁆𑀥𑀯𑁂 𑀬𑁄𑀚𑁂𑀢𑁆𑀯𑀸 𑀯𑀺𑀲𑀫𑀫𑀕𑁆𑀕𑁂𑀦 𑀭𑀣𑀁 𑀧𑁂𑀲𑁂𑀦𑁆𑀢𑀲𑁆𑀲 𑀘𑀓𑁆𑀓𑀸𑀦𑀺𑀧𑀺 𑀪𑀺𑀚𑁆𑀚𑀦𑁆𑀢𑀺, 𑀅𑀓𑁆𑀔𑁄𑀧𑀺 𑀲𑀺𑀦𑁆𑀥𑀯𑀸𑀦𑀜𑁆𑀘 𑀔𑀼𑀭𑀸, 𑀅𑀢𑁆𑀢𑀦𑀸𑀧𑀺 𑀅𑀦𑀬𑀩𑁆𑀬𑀲𑀦𑀁 𑀧𑀸𑀧𑀼𑀡𑀸𑀢𑀺, 𑀦 𑀘 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑁂𑀦 𑀕𑀫𑀦𑁂𑀦 𑀲𑀸𑀭𑁂𑀢𑀼𑀁 𑀲𑀓𑁆𑀓𑁄𑀢𑀺; 𑀏𑀯𑀁 𑀙𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑁄 𑀪𑀺𑀓𑁆𑀔𑀼 𑀦 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀲𑀫𑀡𑀭𑀢𑀺𑀁 𑀅𑀦𑀼𑀪𑀯𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀬𑀣𑀸 𑀧𑀦 𑀙𑁂𑀓𑁄 𑀲𑀸𑀭𑀣𑀺 𑀤𑀦𑁆𑀢𑁂 𑀲𑀺𑀦𑁆𑀥𑀯𑁂 𑀬𑁄𑀚𑁂𑀢𑁆𑀯𑀸, 𑀲𑀫𑁂 𑀪𑀽𑀫𑀺𑀪𑀸𑀕𑁂 𑀭𑀣𑀁 𑀑𑀢𑀸𑀭𑁂𑀢𑁆𑀯𑀸 𑀭𑀲𑁆𑀫𑀺𑀬𑁄 𑀕𑀳𑁂𑀢𑁆𑀯𑀸, 𑀲𑀺𑀦𑁆𑀥𑀯𑀸𑀦𑀁 𑀔𑀼𑀭𑁂𑀲𑀼 𑀲𑀢𑀺𑀁 𑀞𑀧𑁂𑀢𑁆𑀯𑀸, 𑀧𑀢𑁄𑀤𑀁 𑀆𑀤𑀸𑀬 𑀦𑀺𑀩𑁆𑀩𑀺𑀲𑁂𑀯𑀦𑁂 𑀓𑀢𑁆𑀯𑀸, 𑀧𑁂𑀲𑁂𑀦𑁆𑀢𑁄 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑁂𑀦 𑀕𑀫𑀦𑁂𑀦 𑀲𑀸𑀭𑁂𑀢𑀺. 𑀏𑀯𑀫𑁂𑀯 𑀙𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀪𑀺𑀓𑁆𑀔𑀼 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀲𑀫𑀡𑀭𑀢𑀺𑀁 𑀅𑀦𑀼𑀪𑁄𑀢𑀺, 𑀲𑀘𑁂 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀪𑀺𑀫𑀼𑀔𑀁 𑀜𑀸𑀡𑀁 𑀧𑁂𑀲𑁂𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀤𑀪𑀺𑀫𑀼𑀔𑀁 𑀜𑀸𑀡𑀁 𑀕𑀘𑁆𑀙𑀢𑀺. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽𑀢𑀺 𑀪𑁄𑀚𑀦𑀫𑁆𑀳𑀺 𑀧𑀫𑀸𑀡𑀜𑁆𑀜𑀽. 𑀢𑀢𑁆𑀣 𑀤𑁆𑀯𑁂 𑀧𑀫𑀸𑀡𑀸𑀦𑀺 𑁋 𑀧𑀝𑀺𑀕𑁆𑀕𑀳𑀡𑀧𑀫𑀸𑀡𑀜𑁆𑀘 𑀧𑀭𑀺𑀪𑁄𑀕𑀧𑀫𑀸𑀡𑀜𑁆𑀘. 𑀢𑀢𑁆𑀣 𑀧𑀝𑀺𑀕𑁆𑀕𑀳𑀡𑀧𑀫𑀸𑀡𑁂 𑀤𑀸𑀬𑀓𑀲𑁆𑀲 𑀯𑀲𑁄 𑀯𑁂𑀤𑀺𑀢𑀩𑁆𑀩𑁄, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀯𑀲𑁄 𑀯𑁂𑀤𑀺𑀢𑀩𑁆𑀩𑁄, 𑀅𑀢𑁆𑀢𑀦𑁄 𑀣𑀸𑀫𑁄 𑀚𑀸𑀦𑀺𑀢𑀩𑁆𑀩𑁄. 𑀏𑀯𑀭𑀽𑀧𑁄 𑀳𑀺 𑀪𑀺𑀓𑁆𑀔𑀼 𑀲𑀘𑁂 𑀤𑁂𑀬𑁆𑀬𑀥𑀫𑁆𑀫𑁄 𑀩𑀳𑀼𑀓𑁄 𑀳𑁄𑀢𑀺, 𑀤𑀸𑀬𑀓𑁄 𑀅𑀧𑁆𑀧𑀁 𑀤𑀸𑀢𑀼𑀓𑀸𑀫𑁄, 𑀤𑀸𑀬𑀓𑀲𑁆𑀲 𑀯𑀲𑁂𑀦 𑀅𑀧𑁆𑀧𑀁 𑀕𑀡𑁆𑀳𑀸𑀢𑀺. 𑀤𑁂𑀬𑁆𑀬𑀥𑀫𑁆𑀫𑁄 𑀅𑀧𑁆𑀧𑁄, 𑀤𑀸𑀬𑀓𑁄 𑀩𑀳𑀼𑀁 𑀤𑀸𑀢𑀼𑀓𑀸𑀫𑁄, 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀯𑀲𑁂𑀦 𑀅𑀧𑁆𑀧𑀁 𑀕𑀡𑁆𑀳𑀸𑀢𑀺. 𑀤𑁂𑀬𑁆𑀬𑀥𑀫𑁆𑀫𑁄𑀧𑀺 𑀩𑀳𑀼, 𑀤𑀸𑀬𑀓𑁄𑀧𑀺 𑀩𑀳𑀼𑀁 𑀤𑀸𑀢𑀼𑀓𑀸𑀫𑁄, 𑀅𑀢𑁆𑀢𑀦𑁄 𑀣𑀸𑀫𑀁 𑀜𑀢𑁆𑀯𑀸 𑀧𑀫𑀸𑀡𑁂𑀦 𑀕𑀡𑁆𑀳𑀸𑀢𑀺. 𑀲𑁄 𑀢𑀸𑀬 𑀧𑀝𑀺𑀕𑁆𑀕𑀳𑀡𑁂 𑀫𑀢𑁆𑀢𑀜𑁆𑀜𑀼𑀢𑀸𑀬 𑀅𑀦𑀼𑀧𑁆𑀧𑀦𑁆𑀦𑀜𑁆𑀘 𑀮𑀸𑀪𑀁 𑀉𑀧𑁆𑀧𑀸𑀤𑁂𑀢𑀺, 𑀉𑀧𑁆𑀧𑀦𑁆𑀦𑀜𑁆𑀘 𑀣𑀸𑀯𑀭𑀁 𑀓𑀭𑁄𑀢𑀺 𑀥𑀫𑁆𑀫𑀺𑀓𑀢𑀺𑀲𑁆𑀲𑀫𑀳𑀸𑀭𑀸𑀚𑀓𑀸𑀮𑁂 𑀲𑀢𑁆𑀢𑀯𑀲𑁆𑀲𑀺𑀓𑁄 𑀲𑀸𑀫𑀡𑁂𑀭𑁄 𑀯𑀺𑀬.

𑀭𑀜𑁆𑀜𑁄 𑀓𑀺𑀭 𑀧𑀜𑁆𑀘𑀳𑀺 𑀲𑀓𑀝𑀲𑀢𑁂𑀳𑀺 𑀕𑀼𑀴𑀁 𑀆𑀳𑀭𑀺𑀁𑀲𑀼. 𑀭𑀸𑀚𑀸 ‘‘𑀫𑀦𑀸𑀧𑁄 𑀧𑀡𑁆𑀡𑀸𑀓𑀸𑀭𑁄, 𑀅𑀬𑁆𑀬𑁂𑀳𑀺 𑀯𑀺𑀦𑀸 𑀦 𑀔𑀸𑀤𑀺𑀲𑁆𑀲𑀸𑀫𑀸’’𑀢𑀺 𑀅𑀟𑁆𑀠𑀢𑁂𑀬𑁆𑀬𑀸𑀦𑀺 𑀲𑀓𑀝𑀲𑀢𑀸𑀦𑀺 𑀫𑀳𑀸𑀯𑀺𑀳𑀸𑀭𑀁 𑀧𑁂𑀲𑁂𑀢𑁆𑀯𑀸 𑀲𑀬𑀫𑁆𑀧𑀺 𑀪𑀼𑀢𑁆𑀢𑀧𑀸𑀢𑀭𑀸𑀲𑁄 𑀅𑀕𑀫𑀸𑀲𑀺. 𑀪𑁂𑀭𑀺𑀬𑀸 𑀧𑀳𑀝𑀸𑀬 𑀤𑁆𑀯𑀸𑀤𑀲 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀭𑀸𑀚𑀸 𑀏𑀓𑀫𑀦𑁆𑀢𑁂 𑀞𑀺𑀢𑁄 𑀆𑀭𑀸𑀫𑀺𑀓𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀆𑀳 𑁋 ‘‘𑀭𑀜𑁆𑀜𑁄 𑀦𑀸𑀫 𑀤𑀸𑀦𑁂 𑀧𑀢𑁆𑀢𑀧𑀽𑀭𑁄𑀯 𑀧𑀫𑀸𑀡𑀁, 𑀕𑀳𑀺𑀢𑀪𑀸𑀚𑀦𑀁 𑀧𑀽𑀭𑁂𑀢𑁆𑀯𑀸𑀯 𑀤𑁂𑀳𑀺, 𑀲𑀘𑁂 𑀓𑁄𑀘𑀺 𑀫𑀢𑁆𑀢𑀧𑀝𑀺𑀕𑁆𑀕𑀳𑀡𑁂 𑀞𑀺𑀢𑁄 𑀦 𑀕𑀡𑁆𑀳𑀸𑀢𑀺, 𑀫𑀬𑁆𑀳𑀁 𑀆𑀭𑁄𑀘𑁂𑀬𑁆𑀬𑀸𑀲𑀻’’𑀢𑀺.

𑀅𑀣𑁂𑀓𑁄 𑀫𑀳𑀸𑀣𑁂𑀭𑁄 ‘‘𑀫𑀳𑀸𑀩𑁄𑀥𑀺𑀫𑀳𑀸𑀘𑁂𑀢𑀺𑀬𑀸𑀦𑀺 𑀯𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀘𑁂𑀢𑀺𑀬𑀧𑀩𑁆𑀩𑀢𑀸 𑀆𑀕𑀦𑁆𑀢𑁆𑀯𑀸, 𑀯𑀺𑀳𑀸𑀭𑀁 𑀧𑀯𑀺𑀲𑀦𑁆𑀢𑁄 𑀫𑀳𑀸𑀫𑀡𑁆𑀟𑀧𑀝𑁆𑀞𑀸𑀦𑁂 𑀪𑀺𑀓𑁆𑀔𑀽 𑀕𑀼𑀴𑀁 𑀕𑀡𑁆𑀳𑀦𑁆𑀢𑁂 𑀤𑀺𑀲𑁆𑀯𑀸 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑀁 𑀲𑀸𑀫𑀡𑁂𑀭𑀁 𑀆𑀳, ‘‘𑀦𑀢𑁆𑀣𑀺 𑀢𑁂 𑀕𑀼𑀴𑁂𑀦 𑀅𑀢𑁆𑀣𑁄’’𑀢𑀺. ‘‘𑀆𑀫, 𑀪𑀦𑁆𑀢𑁂, 𑀦𑀢𑁆𑀣𑀻’’𑀢𑀺. 𑀲𑀸𑀫𑀡𑁂𑀭 𑀫𑀬𑀁 𑀫𑀕𑁆𑀕𑀓𑀺𑀮𑀦𑁆𑀢𑀸, 𑀏𑀓𑁂𑀦 𑀓𑀧𑀺𑀝𑁆𑀞𑀨𑀮𑀫𑀢𑁆𑀢𑁂𑀦 𑀧𑀺𑀡𑁆𑀟𑀓𑁂𑀦 𑀅𑀫𑁆𑀳𑀸𑀓𑀁 𑀅𑀢𑁆𑀣𑁄𑀢𑀺. 𑀲𑀸𑀫𑀡𑁂𑀭𑁄 𑀣𑀸𑀮𑀓𑀁 𑀦𑀻𑀳𑀭𑀺𑀢𑁆𑀯𑀸 𑀣𑁂𑀭𑀲𑁆𑀲 𑀯𑀲𑁆𑀲𑀕𑁆𑀕𑀧𑀝𑀺𑀧𑀸𑀝𑀺𑀬𑀁 𑀅𑀝𑁆𑀞𑀸𑀲𑀺. 𑀆𑀭𑀸𑀫𑀺𑀓𑁄 𑀕𑀳𑀡𑀫𑀸𑀦𑀁 𑀧𑀽𑀭𑁂𑀢𑁆𑀯𑀸 𑀉𑀓𑁆𑀔𑀺𑀧𑀺, 𑀲𑀸𑀫𑀡𑁂𑀭𑁄 𑀅𑀗𑁆𑀕𑀼𑀮𑀺𑀁 𑀘𑀸𑀮𑁂𑀲𑀺. 𑀢𑀸𑀢 𑀲𑀸𑀫𑀡𑁂𑀭, 𑀭𑀸𑀚𑀓𑀼𑀮𑀸𑀦𑀁 𑀤𑀸𑀦𑁂 𑀪𑀸𑀚𑀦𑀧𑀽𑀭𑀫𑁂𑀯 𑀧𑀫𑀸𑀡𑀁, 𑀣𑀸𑀮𑀓𑀧𑀽𑀭𑀁 𑀕𑀡𑁆𑀳𑀸𑀳𑀻𑀢𑀺. 𑀆𑀫, 𑀉𑀧𑀸𑀲𑀓, 𑀭𑀸𑀚𑀸𑀦𑁄 𑀦𑀸𑀫 𑀫𑀳𑀚𑁆𑀛𑀸𑀲𑀬𑀸 𑀳𑁄𑀦𑁆𑀢𑀺, 𑀅𑀫𑁆𑀳𑀸𑀓𑀁 𑀧𑀦 𑀉𑀧𑀚𑁆𑀛𑀸𑀬𑀲𑁆𑀲 𑀏𑀢𑁆𑀢𑀓𑁂𑀦𑁂𑀯 𑀅𑀢𑁆𑀣𑁄𑀢𑀺.

𑀭𑀸𑀚𑀸 𑀢𑀲𑁆𑀲 𑀓𑀣𑀁 𑀲𑀼𑀢𑁆𑀯𑀸, ‘‘𑀓𑀺𑀁 𑀪𑁄 𑀲𑀸𑀫𑀡𑁂𑀭𑁄 𑀪𑀡𑀢𑀻’’𑀢𑀺? 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀢𑁄. 𑀆𑀭𑀸𑀫𑀺𑀓𑁄 𑀆𑀳 𑁋 ‘‘𑀲𑀸𑀫𑀺, 𑀲𑀸𑀫𑀡𑁂𑀭𑀲𑁆𑀲 𑀪𑀸𑀚𑀦𑀁 𑀔𑀼𑀤𑁆𑀤𑀓𑀁, 𑀩𑀳𑀼𑀁 𑀦 𑀕𑀡𑁆𑀳𑀸𑀢𑀻’’𑀢𑀺. 𑀭𑀸𑀚𑀸 𑀆𑀳, ‘‘𑀆𑀦𑀻𑀢𑀪𑀸𑀚𑀦𑀁 𑀧𑀽𑀭𑁂𑀢𑁆𑀯𑀸 𑀕𑀡𑁆𑀳𑀣, 𑀪𑀦𑁆𑀢𑁂’’𑀢𑀺. 𑀫𑀳𑀸𑀭𑀸𑀚, 𑀭𑀸𑀚𑀸𑀦𑁄 𑀦𑀸𑀫 𑀫𑀳𑀚𑁆𑀛𑀸𑀲𑀬𑀸 𑀳𑁄𑀦𑁆𑀢𑀺, 𑀉𑀓𑁆𑀔𑀺𑀢𑁆𑀢𑀪𑀸𑀚𑀦𑀁 𑀧𑀽𑀭𑁂𑀢𑁆𑀯𑀸𑀯 𑀤𑀸𑀢𑀼𑀓𑀸𑀫𑀸, 𑀅𑀫𑁆𑀳𑀸𑀓𑀁 𑀧𑀦 𑀉𑀧𑀚𑁆𑀛𑀸𑀬𑀲𑁆𑀲 𑀏𑀢𑁆𑀢𑀓𑁂𑀦𑁂𑀯 𑀅𑀢𑁆𑀣𑁄𑀢𑀺. 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀲𑀢𑁆𑀢𑀯𑀲𑁆𑀲𑀺𑀓𑀤𑀸𑀭𑀓𑁄, 𑀅𑀚𑁆𑀚𑀸𑀧𑀺𑀲𑁆𑀲 𑀫𑀼𑀔𑀢𑁄 𑀔𑀻𑀭𑀕𑀦𑁆𑀥𑁄 𑀦 𑀫𑀼𑀘𑁆𑀘𑀢𑀺, 𑀕𑀳𑁂𑀢𑁆𑀯𑀸 𑀓𑀼𑀝𑁂 𑀯𑀸 𑀓𑀼𑀝𑀼𑀫𑁆𑀩𑁂 𑀯𑀸 𑀧𑀽𑀭𑁂𑀢𑁆𑀯𑀸 𑀲𑁆𑀯𑁂𑀧𑀺 𑀧𑀼𑀦𑀤𑀺𑀯𑀲𑁂𑀧𑀺 𑀔𑀸𑀤𑀺𑀲𑁆𑀲𑀸𑀫𑀸𑀢𑀺 𑀦 𑀯𑀤𑀢𑀺, 𑀲𑀓𑁆𑀓𑀸 𑀩𑀼𑀤𑁆𑀥𑀲𑀸𑀲𑀦𑀁 𑀧𑀭𑀺𑀕𑁆𑀕𑀳𑁂𑀢𑀼’’𑀦𑁆𑀢𑀺 𑀧𑀼𑀭𑀺𑀲𑁂 𑀆𑀡𑀸𑀧𑁂𑀲𑀺, ‘‘𑀪𑁄, 𑀧𑀲𑀦𑁆𑀦𑁄𑀫𑁆𑀳𑀺 𑀲𑀸𑀫𑀡𑁂𑀭𑀲𑁆𑀲, 𑀇𑀢𑀭𑀸𑀦𑀺𑀧𑀺 𑀅𑀟𑁆𑀠𑀢𑁂𑀬𑁆𑀬𑀸𑀦𑀺 𑀲𑀓𑀝𑀲𑀢𑀸𑀦𑀺 𑀆𑀦𑁂𑀢𑁆𑀯𑀸 𑀲𑀖𑀁𑀲𑁆𑀲 𑀤𑁂𑀣𑀸’’𑀢𑀺.

𑀲𑁄𑀬𑁂𑀯 𑀧𑀦 𑀭𑀸𑀚𑀸 𑀏𑀓𑀤𑀺𑀯𑀲𑀁 𑀢𑀺𑀢𑁆𑀢𑀺𑀭𑀫𑀁𑀲𑀁 𑀔𑀸𑀤𑀺𑀢𑀼𑀓𑀸𑀫𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀅𑀳𑀁 𑀅𑀗𑁆𑀕𑀸𑀭𑀧𑀓𑁆𑀓𑀁 𑀢𑀺𑀢𑁆𑀢𑀺𑀭𑀫𑀁𑀲𑀁 𑀔𑀸𑀤𑀺𑀢𑀼𑀓𑀸𑀫𑁄𑀲𑁆𑀫𑀻𑀢𑀺 𑀅𑀜𑁆𑀜𑀲𑁆𑀲 𑀓𑀣𑁂𑀲𑁆𑀲𑀸𑀫𑀺, 𑀲𑀫𑀦𑁆𑀢𑀸 𑀬𑁄𑀚𑀦𑀝𑁆𑀞𑀸𑀦𑁂 𑀢𑀺𑀢𑁆𑀢𑀺𑀭𑀲𑀫𑀼𑀕𑁆𑀖𑀸𑀢𑀁 𑀓𑀭𑀺𑀲𑁆𑀲𑀦𑁆𑀢𑀻’’𑀢𑀺 𑀉𑀧𑁆𑀧𑀦𑁆𑀦𑀁 𑀧𑀺𑀧𑀸𑀲𑀁 𑀅𑀥𑀺𑀯𑀸𑀲𑁂𑀦𑁆𑀢𑁄 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀯𑀻𑀢𑀺𑀦𑀸𑀫𑁂𑀲𑀺. 𑀅𑀣𑀲𑁆𑀲 𑀓𑀡𑁆𑀡𑁂𑀲𑀼 𑀧𑀼𑀩𑁆𑀩𑁄 𑀲𑀡𑁆𑀞𑀸𑀲𑀺, 𑀲𑁄 𑀅𑀥𑀺𑀯𑀸𑀲𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 ‘‘𑀅𑀢𑁆𑀣𑀺 𑀦𑀼 𑀔𑁄, 𑀪𑁄, 𑀅𑀫𑁆𑀳𑀸𑀓𑀁 𑀓𑁄𑀘𑀺 𑀉𑀧𑀝𑁆𑀞𑀸𑀓𑀼𑀧𑀸𑀲𑀓𑁄 𑀲𑀻𑀮𑀭𑀓𑁆𑀔𑀓𑁄’’𑀢𑀺 𑀧𑀼𑀘𑁆𑀙𑀺. 𑀆𑀫, 𑀤𑁂𑀯, 𑀅𑀢𑁆𑀣𑀺, 𑀢𑀺𑀲𑁆𑀲𑁄 𑀦𑀸𑀫 𑀲𑁄 𑀅𑀔𑀡𑁆𑀟𑀲𑀻𑀮𑀁 𑀭𑀓𑁆𑀔𑀢𑀻𑀢𑀺. 𑀅𑀣 𑀦𑀁 𑀯𑀻𑀫𑀁𑀲𑀺𑀢𑀼𑀓𑀸𑀫𑁄 𑀧𑀓𑁆𑀓𑁄𑀲𑀸𑀧𑁂𑀲𑀺. 𑀲𑁄 𑀆𑀕𑀦𑁆𑀢𑁆𑀯𑀸 𑀭𑀸𑀚𑀸𑀦𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀢𑁄 𑀦𑀁 𑀆𑀳 𑁋 ‘‘𑀢𑁆𑀯𑀁, 𑀢𑀸𑀢, 𑀢𑀺𑀲𑁆𑀲𑁄 𑀦𑀸𑀫𑀸’’𑀢𑀺? ‘‘𑀆𑀫 𑀤𑁂𑀯𑀸’’𑀢𑀺. 𑀢𑁂𑀦 𑀳𑀺 𑀕𑀘𑁆𑀙𑀸𑀢𑀺. 𑀢𑀲𑁆𑀫𑀺𑀁 𑀕𑀢𑁂 𑀏𑀓𑀁 𑀓𑀼𑀓𑁆𑀓𑀼𑀝𑀁 𑀆𑀳𑀭𑀸𑀧𑁂𑀢𑁆𑀯𑀸 𑀏𑀓𑀁 𑀧𑀼𑀭𑀺𑀲𑀁 𑀆𑀡𑀸𑀧𑁂𑀲𑀺, ‘‘𑀕𑀘𑁆𑀙 𑀢𑀺𑀲𑁆𑀲𑀁 𑀯𑀤𑀸𑀳𑀺, 𑀇𑀫𑀁 𑀢𑀻𑀳𑀺 𑀧𑀸𑀓𑁂𑀳𑀺 𑀧𑀘𑀺𑀢𑁆𑀯𑀸 𑀅𑀫𑁆𑀳𑀸𑀓𑀁 𑀉𑀧𑀝𑁆𑀞𑀸𑀧𑁂𑀳𑀻’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑀢𑀣𑀸 𑀅𑀯𑁄𑀘. 𑀲𑁄 𑀆𑀳 𑁋 ‘‘𑀲𑀘𑁂, 𑀪𑁄, 𑀅𑀬𑀁 𑀫𑀢𑀓𑁄 𑀅𑀲𑁆𑀲, 𑀬𑀣𑀸 𑀚𑀸𑀦𑀸𑀫𑀺, 𑀢𑀣𑀸 𑀧𑀘𑀺𑀢𑁆𑀯𑀸 𑀉𑀧𑀝𑁆𑀞𑀳𑁂𑀬𑁆𑀬𑀁. 𑀧𑀸𑀡𑀸𑀢𑀺𑀧𑀸𑀢𑀁 𑀧𑀦𑀸𑀳𑀁 𑀦 𑀓𑀭𑁄𑀫𑀻’’𑀢𑀺. 𑀲𑁄 𑀆𑀕𑀦𑁆𑀢𑁆𑀯𑀸 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺.

𑀭𑀸𑀚𑀸 𑀧𑀼𑀦 ‘‘𑀏𑀓𑀯𑀸𑀭𑀁 𑀕𑀘𑁆𑀙𑀸’’𑀢𑀺 𑀧𑁂𑀲𑁂𑀲𑀺. 𑀲𑁄 𑀕𑀦𑁆𑀢𑁆𑀯𑀸, ‘‘𑀪𑁄, 𑀭𑀸𑀚𑀼𑀧𑀝𑁆𑀞𑀸𑀦𑀁 𑀦𑀸𑀫 𑀪𑀸𑀭𑀺𑀬𑀁, 𑀫𑀸 𑀏𑀯𑀁 𑀓𑀭𑀺, 𑀧𑀼𑀦𑀧𑀺 𑀲𑀻𑀮𑀁 𑀲𑀓𑁆𑀓𑀸 𑀲𑀫𑀸𑀤𑀸𑀢𑀼𑀁, 𑀧𑀘𑁂𑀢’’𑀦𑁆𑀢𑀺 𑀆𑀳. 𑀅𑀣 𑀦𑀁 𑀢𑀺𑀲𑁆𑀲𑁄 𑀅𑀯𑁄𑀘, ‘‘𑀪𑁄, 𑀏𑀓𑀲𑁆𑀫𑀺𑀁 𑀦𑀸𑀫 𑀅𑀢𑁆𑀢𑀪𑀸𑀯𑁂 𑀥𑀼𑀯𑀁 𑀏𑀓𑀁 𑀫𑀭𑀡𑀁, 𑀦𑀸𑀳𑀁 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺. 𑀲𑁄 𑀧𑀼𑀦𑀧𑀺 𑀭𑀜𑁆𑀜𑁄 𑀆𑀭𑁄𑀘𑁂𑀲𑀺. 𑀭𑀸𑀚𑀸 𑀢𑀢𑀺𑀬𑀫𑁆𑀧𑀺 𑀧𑁂𑀲𑁂𑀢𑁆𑀯𑀸 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀅𑀢𑁆𑀢𑀦𑀸 𑀧𑀼𑀘𑁆𑀙𑀺. 𑀭𑀜𑁆𑀜𑁄𑀧𑀺 𑀢𑀣𑁂𑀯 𑀧𑀝𑀺𑀯𑀘𑀦𑀁 𑀅𑀤𑀸𑀲𑀺. 𑀅𑀣 𑀭𑀸𑀚𑀸 𑀧𑀼𑀭𑀺𑀲𑁂 𑀆𑀡𑀸𑀧𑁂𑀲𑀺, ‘‘𑀅𑀬𑀁 𑀭𑀜𑁆𑀜𑁄 𑀆𑀡𑀁 𑀓𑁄𑀧𑁂𑀢𑀺, 𑀕𑀘𑁆𑀙𑀣𑁂𑀢𑀲𑁆𑀲 𑀆𑀖𑀸𑀢𑀦𑀪𑀡𑁆𑀟𑀺𑀓𑀸𑀬𑀁 𑀞𑀧𑁂𑀢𑁆𑀯𑀸, 𑀲𑀻𑀲𑀁 𑀙𑀺𑀦𑁆𑀤𑀣𑀸’’𑀢𑀺. 𑀭𑀳𑁄 𑀘 𑀧𑀦 𑀦𑁂𑀲𑀁 𑀲𑀜𑁆𑀜𑀫𑀤𑀸𑀲𑀺 𑁋 ‘‘𑀇𑀫𑀁 𑀲𑀦𑁆𑀢𑀚𑁆𑀚𑀬𑀫𑀸𑀦𑀸 𑀦𑁂𑀢𑁆𑀯𑀸 𑀲𑀻𑀲𑀫𑀲𑁆𑀲 𑀆𑀖𑀸𑀢𑀦𑀪𑀡𑁆𑀟𑀺𑀓𑀸𑀬𑀁 𑀞𑀧𑁂𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀫𑀬𑁆𑀳𑀁 𑀆𑀭𑁄𑀘𑁂𑀣𑀸’’𑀢𑀺.

𑀢𑁂 𑀢𑀁 𑀆𑀖𑀸𑀢𑀦𑀪𑀡𑁆𑀟𑀺𑀓𑀸𑀬𑀁 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 𑀢𑀫𑀲𑁆𑀲 𑀓𑀼𑀓𑁆𑀓𑀼𑀝𑀁 𑀳𑀢𑁆𑀣𑁂𑀲𑀼 𑀞𑀧𑀬𑀺𑀁𑀲𑀼. 𑀲𑁄 𑀢𑀁 𑀳𑀤𑀬𑁂 𑀞𑀧𑁂𑀢𑁆𑀯𑀸 ‘‘𑀅𑀳𑀁, 𑀢𑀸𑀢, 𑀫𑀫 𑀚𑀻𑀯𑀺𑀢𑀁 𑀢𑀼𑀬𑁆𑀳𑀁 𑀤𑁂𑀫𑀺, 𑀢𑀯 𑀚𑀻𑀯𑀺𑀢𑀁 𑀅𑀳𑀁 𑀕𑀡𑁆𑀳𑀸𑀫𑀺, 𑀢𑁆𑀯𑀁 𑀦𑀺𑀩𑁆𑀪𑀬𑁄 𑀕𑀘𑁆𑀙𑀸’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀓𑀼𑀓𑁆𑀓𑀼𑀝𑁄 𑀧𑀓𑁆𑀔𑁂 𑀧𑀧𑁆𑀨𑁄𑀝𑁂𑀢𑁆𑀯𑀸 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀯𑀝𑀭𑀼𑀓𑁆𑀔𑁂 𑀦𑀺𑀮𑀻𑀬𑀺. 𑀢𑀲𑁆𑀲 𑀓𑀼𑀓𑁆𑀓𑀼𑀝𑀲𑁆𑀲 𑀅𑀪𑀬𑀤𑀺𑀦𑁆𑀦𑀝𑁆𑀞𑀸𑀦𑀁 𑀓𑀼𑀓𑁆𑀓𑀼𑀝𑀕𑀺𑀭𑀺 𑀦𑀸𑀫 𑀚𑀸𑀢𑀁.

𑀭𑀸𑀚𑀸 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀅𑀫𑀘𑁆𑀘𑀧𑀼𑀢𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀩𑁆𑀩𑀸𑀪𑀭𑀡𑁂𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀆𑀳 𑁋 ‘‘𑀢𑀸𑀢, 𑀫𑀬𑀸 𑀢𑁆𑀯𑀁 𑀏𑀢𑀤𑀢𑁆𑀣𑀫𑁂𑀯 𑀯𑀻𑀫𑀁𑀲𑀺𑀢𑁄, 𑀫𑀬𑁆𑀳𑀁 𑀢𑀺𑀢𑁆𑀢𑀺𑀭𑀫𑀁𑀲𑀁 𑀔𑀸𑀤𑀺𑀢𑀼𑀓𑀸𑀫𑀲𑁆𑀲 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀅𑀢𑀺𑀓𑁆𑀓𑀦𑁆𑀢𑀸𑀦𑀺, 𑀲𑀓𑁆𑀔𑀺𑀲𑁆𑀲𑀲𑀺 𑀫𑁂 𑀢𑀺𑀓𑁄𑀝𑀺𑀧𑀭𑀺𑀲𑀼𑀤𑁆𑀥𑀁 𑀓𑀢𑁆𑀯𑀸 𑀉𑀧𑀝𑁆𑀞𑀸𑀧𑁂𑀢𑀼’’𑀦𑁆𑀢𑀺. ‘‘𑀏𑀢𑀁 𑀦𑀸𑀫, 𑀤𑁂𑀯, 𑀫𑀬𑁆𑀳𑀁 𑀓𑀫𑁆𑀫’’𑀦𑁆𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑁆𑀯𑀸𑀭𑀦𑁆𑀢𑀭𑁂 𑀞𑀺𑀢𑁄 𑀏𑀓𑀁 𑀧𑀼𑀭𑀺𑀲𑀁 𑀧𑀸𑀢𑁄𑀯 𑀢𑀬𑁄 𑀢𑀺𑀢𑁆𑀢𑀺𑀭𑁂 𑀕𑀳𑁂𑀢𑁆𑀯𑀸 𑀧𑀯𑀺𑀲𑀦𑁆𑀢𑀁 𑀤𑀺𑀲𑁆𑀯𑀸, 𑀤𑁆𑀯𑁂 𑀓𑀳𑀸𑀧𑀡𑁂 𑀤𑀢𑁆𑀯𑀸 𑀢𑀺𑀢𑁆𑀢𑀺𑀭𑁂 𑀆𑀤𑀸𑀬 𑀧𑀭𑀺𑀲𑁄𑀥𑁂𑀢𑁆𑀯𑀸, 𑀚𑀻𑀭𑀓𑀸𑀤𑀻𑀳𑀺 𑀯𑀸𑀲𑁂𑀢𑁆𑀯𑀸, 𑀅𑀗𑁆𑀕𑀸𑀭𑁂𑀲𑀼 𑀲𑀼𑀧𑀓𑁆𑀓𑁂 𑀧𑀘𑀺𑀢𑁆𑀯𑀸 𑀭𑀜𑁆𑀜𑁄 𑀉𑀧𑀝𑁆𑀞𑀸𑀧𑁂𑀲𑀺. 𑀭𑀸𑀚𑀸 𑀫𑀳𑀸𑀢𑀮𑁂 𑀲𑀺𑀭𑀻𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄𑀯 𑀏𑀓𑀁 𑀕𑀳𑁂𑀢𑁆𑀯𑀸 𑀣𑁄𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀫𑀼𑀔𑁂 𑀧𑀓𑁆𑀔𑀺𑀧𑀺, 𑀢𑀸𑀯𑀤𑁂𑀯𑀲𑁆𑀲 𑀲𑀢𑁆𑀢𑀭𑀲𑀳𑀭𑀡𑀻𑀲𑀳𑀲𑁆𑀲𑀸𑀦𑀺 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺.

𑀢𑀲𑁆𑀫𑀺𑀁 𑀲𑀫𑀬𑁂 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀭𑀺𑀢𑁆𑀯𑀸, ‘‘𑀫𑀸𑀤𑀺𑀲𑁄 𑀦𑀸𑀫 𑀧𑀣𑀯𑀺𑀲𑁆𑀲𑀭𑁄 𑀭𑀸𑀚𑀸 𑀢𑀺𑀢𑁆𑀢𑀺𑀭𑀫𑀁𑀲𑀁 𑀔𑀸𑀤𑀺𑀢𑀼𑀓𑀸𑀫𑁄 𑀢𑀻𑀡𑀺 𑀲𑀁𑀯𑀘𑁆𑀙𑀭𑀸𑀦𑀺 𑀦 𑀮𑀪𑀺, 𑀅𑀧𑀘𑁆𑀘𑀫𑀸𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀓𑀼𑀢𑁄 𑀮𑀪𑀺𑀲𑁆𑀲𑀢𑀻’’𑀢𑀺? 𑀫𑀼𑀔𑁂 𑀧𑀓𑁆𑀔𑀺𑀢𑁆𑀢𑀓𑁆𑀔𑀡𑁆𑀟𑀁 𑀪𑀽𑀫𑀺𑀬𑀁 𑀙𑀟𑁆𑀟𑁂𑀲𑀺. 𑀅𑀫𑀘𑁆𑀘𑀧𑀼𑀢𑁆𑀢𑁄 𑀚𑀡𑁆𑀡𑀼𑀓𑁂𑀳𑀺 𑀧𑀢𑀺𑀢𑁆𑀯𑀸 𑀫𑀼𑀔𑁂𑀦 𑀕𑀡𑁆𑀳𑀺. 𑀭𑀸𑀚𑀸 ‘‘𑀅𑀧𑁂𑀳𑀺, 𑀢𑀸𑀢, 𑀚𑀸𑀦𑀸𑀫𑀳𑀁 𑀢𑀯 𑀦𑀺𑀤𑁆𑀤𑁄𑀲𑀪𑀸𑀯𑀁, 𑀇𑀫𑀺𑀦𑀸 𑀦𑀸𑀫 𑀓𑀸𑀭𑀡𑁂𑀦 𑀫𑀬𑀸 𑀏𑀢𑀁 𑀙𑀟𑁆𑀟𑀺𑀢’’𑀦𑁆𑀢𑀺 𑀓𑀣𑁂𑀢𑁆𑀯𑀸, ‘‘𑀲𑁂𑀲𑀓𑀁 𑀢𑀣𑁂𑀯 𑀲𑀗𑁆𑀕𑁄𑀧𑁂𑀢𑁆𑀯𑀸 𑀞𑀧𑁂𑀳𑀻’’𑀢𑀺 𑀆𑀳.

𑀧𑀼𑀦𑀤𑀺𑀯𑀲𑁂 𑀭𑀸𑀚𑀓𑀼𑀮𑀽𑀧𑀓𑁄 𑀣𑁂𑀭𑁄 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀫𑀘𑁆𑀘𑀧𑀼𑀢𑁆𑀢𑁄 𑀢𑀁 𑀤𑀺𑀲𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀭𑀸𑀚𑀕𑁂𑀳𑀁 𑀧𑀯𑁂𑀲𑁂𑀲𑀺. 𑀅𑀜𑁆𑀜𑀢𑀭𑁄 𑀯𑀼𑀟𑁆𑀠𑀧𑀩𑁆𑀩𑀚𑀺𑀢𑁄𑀧𑀺 𑀣𑁂𑀭𑀲𑁆𑀲 𑀧𑀘𑁆𑀙𑀸𑀲𑀫𑀡𑁄 𑀯𑀺𑀬 𑀳𑀼𑀢𑁆𑀯𑀸 𑀅𑀦𑀼𑀩𑀦𑁆𑀥𑀦𑁆𑀢𑁄 𑀧𑀸𑀯𑀺𑀲𑀺. 𑀣𑁂𑀭𑁄 ‘‘𑀭𑀜𑁆𑀜𑀸 𑀧𑀓𑁆𑀓𑁄𑀲𑀸𑀧𑀺𑀢𑀪𑀺𑀓𑁆𑀔𑀼 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀫𑀚𑁆𑀚𑀺. 𑀅𑀫𑀘𑁆𑀘𑀧𑀼𑀢𑁆𑀢𑁄𑀧𑀺 ‘‘𑀣𑁂𑀭𑀲𑁆𑀲 𑀉𑀧𑀝𑁆𑀞𑀸𑀓𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀫𑀸𑀤𑀁 𑀆𑀧𑀚𑁆𑀚𑀺. 𑀢𑁂𑀲𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀁 𑀅𑀤𑀁𑀲𑀼. 𑀬𑀸𑀕𑀼𑀬𑀸 𑀧𑀻𑀢𑀸𑀬 𑀭𑀸𑀚𑀸 𑀢𑀺𑀢𑁆𑀢𑀺𑀭𑁂 𑀉𑀧𑀦𑁂𑀲𑀺. 𑀣𑁂𑀭𑁄 𑀏𑀓𑀁 𑀕𑀡𑁆𑀳𑀺, 𑀇𑀢𑀭𑁄𑀧𑀺 𑀏𑀓𑀁 𑀕𑀡𑁆𑀳𑀺. 𑀭𑀸𑀚𑀸 ‘‘𑀅𑀦𑀼𑀪𑀸𑀕𑁄 𑀅𑀢𑁆𑀣𑀺, 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸 𑀔𑀸𑀤𑀺𑀢𑀼𑀁 𑀦 𑀬𑀼𑀢𑁆𑀢’’𑀦𑁆𑀢𑀺 𑀫𑀳𑀸𑀣𑁂𑀭𑀁 𑀆𑀧𑀼𑀘𑁆𑀙𑀺. 𑀣𑁂𑀭𑁄 𑀳𑀢𑁆𑀣𑀁 𑀧𑀺𑀤𑀳𑀺, 𑀫𑀳𑀮𑁆𑀮𑀓𑀢𑁆𑀣𑁂𑀭𑁄 𑀲𑀫𑁆𑀧𑀝𑀺𑀘𑁆𑀙𑀺. 𑀭𑀸𑀚𑀸 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 𑀓𑀢𑀪𑀢𑁆𑀢𑀓𑀺𑀘𑁆𑀘𑀁 𑀣𑁂𑀭𑀁 𑀧𑀢𑁆𑀢𑀁 𑀆𑀤𑀸𑀬 𑀅𑀦𑀼𑀕𑀘𑁆𑀙𑀦𑁆𑀢𑁄 𑀆𑀳 𑁋 ‘‘𑀪𑀦𑁆𑀢𑁂, 𑀓𑀼𑀮𑀕𑁂𑀳𑀁 𑀆𑀕𑀘𑁆𑀙𑀦𑁆𑀢𑁂𑀳𑀺 𑀉𑀕𑁆𑀕𑀳𑀺𑀢𑀯𑀢𑁆𑀢𑀁 𑀪𑀺𑀓𑁆𑀔𑀼𑀁 𑀕𑀳𑁂𑀢𑁆𑀯𑀸 𑀆𑀕𑀦𑁆𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀣𑁂𑀭𑁄 𑀢𑀲𑁆𑀫𑀺𑀁 𑀔𑀡𑁂 𑀅𑀜𑁆𑀜𑀸𑀲𑀺 ‘‘𑀦 𑀏𑀲 𑀭𑀜𑁆𑀜𑀸 𑀧𑀓𑁆𑀓𑁄𑀲𑀸𑀧𑀺𑀢𑁄’’𑀢𑀺.

𑀧𑀼𑀦𑀤𑀺𑀯𑀲𑁂 𑀉𑀧𑀝𑁆𑀞𑀸𑀓𑀲𑀸𑀫𑀡𑁂𑀭𑀁 𑀕𑀳𑁂𑀢𑁆𑀯𑀸 𑀧𑀸𑀯𑀺𑀲𑀺. 𑀭𑀸𑀚𑀸 𑀢𑀤𑀸𑀧𑀺 𑀬𑀸𑀕𑀼𑀬𑀸 𑀧𑀻𑀢𑀸𑀬 𑀢𑀺𑀢𑁆𑀢𑀺𑀭𑁂 𑀉𑀧𑀦𑀸𑀫𑁂𑀲𑀺. 𑀣𑁂𑀭𑁄 𑀏𑀓𑀁 𑀅𑀕𑁆𑀕𑀳𑁂𑀲𑀺, 𑀲𑀸𑀫𑀡𑁂𑀭𑁄 𑀅𑀗𑁆𑀕𑀼𑀮𑀺𑀁 𑀘𑀸𑀮𑁂𑀢𑁆𑀯𑀸 𑀫𑀚𑁆𑀛𑁂 𑀙𑀺𑀦𑁆𑀤𑀸𑀧𑁂𑀢𑁆𑀯𑀸 𑀏𑀓𑀓𑁄𑀝𑁆𑀞𑀸𑀲𑀫𑁂𑀯 𑀅𑀕𑁆𑀕𑀳𑁂𑀲𑀺. 𑀭𑀸𑀚𑀸 𑀢𑀁 𑀓𑁄𑀝𑁆𑀞𑀸𑀲𑀁 𑀫𑀳𑀸𑀣𑁂𑀭𑀲𑁆𑀲 𑀉𑀧𑀦𑀸𑀫𑁂𑀲𑀺. 𑀫𑀳𑀸𑀣𑁂𑀭𑁄 𑀳𑀢𑁆𑀣𑀁 𑀧𑀺𑀤𑀳𑀺, 𑀲𑀸𑀫𑀡𑁂𑀭𑁄𑀧𑀺 𑀧𑀺𑀤𑀳𑀺. 𑀭𑀸𑀚𑀸 𑀅𑀯𑀺𑀤𑀽𑀭𑁂 𑀦𑀺𑀲𑀻𑀤𑀺𑀢𑁆𑀯𑀸 𑀔𑀡𑁆𑀟𑀸𑀔𑀡𑁆𑀟𑀁 𑀙𑀺𑀦𑁆𑀤𑀺𑀢𑁆𑀯𑀸 𑀔𑀸𑀤𑀦𑁆𑀢𑁄 ‘‘𑀉𑀕𑁆𑀕𑀳𑀺𑀢𑀯𑀢𑁆𑀢𑁂 𑀦𑀺𑀲𑁆𑀲𑀸𑀬 𑀤𑀺𑀬𑀟𑁆𑀠𑀢𑀺𑀢𑁆𑀢𑀺𑀭𑁂 𑀔𑀸𑀤𑀺𑀢𑀼𑀁 𑀮𑀪𑀺𑀫𑁆𑀳𑀸’’𑀢𑀺 𑀆𑀳. 𑀢𑀲𑁆𑀲 𑀫𑀁𑀲𑁂 𑀔𑀸𑀤𑀺𑀢𑀫𑀢𑁆𑀢𑁂𑀯 𑀓𑀡𑁆𑀡𑁂𑀳𑀺 𑀧𑀼𑀩𑁆𑀩𑁄 𑀦𑀺𑀓𑁆𑀔𑀫𑀺. 𑀢𑀢𑁄 𑀫𑀼𑀔𑀁 𑀯𑀺𑀓𑁆𑀔𑀸𑀮𑁂𑀢𑁆𑀯𑀸 𑀲𑀸𑀫𑀡𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀧𑀲𑀦𑁆𑀦𑁄𑀲𑁆𑀫𑀺, 𑀢𑀸𑀢, 𑀅𑀝𑁆𑀞 𑀢𑁂 𑀥𑀼𑀯𑀪𑀢𑁆𑀢𑀸𑀦𑀺 𑀤𑁂𑀫𑀻’’𑀢𑀺 𑀆𑀳. 𑀅𑀳𑀁, 𑀫𑀳𑀸𑀭𑀸𑀚, 𑀉𑀧𑀚𑁆𑀛𑀸𑀬𑀲𑁆𑀲 𑀤𑀫𑁆𑀫𑀻𑀢𑀺. 𑀅𑀧𑀭𑀸𑀦𑀺 𑀅𑀝𑁆𑀞 𑀤𑁂𑀫𑀻𑀢𑀺. 𑀢𑀸𑀦𑀺 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀲𑁆𑀲 𑀤𑀫𑁆𑀫𑀻𑀢𑀺. 𑀅𑀧𑀭𑀸𑀦𑀺𑀧𑀺 𑀅𑀝𑁆𑀞 𑀤𑁂𑀫𑀻𑀢𑀺. 𑀢𑀸𑀦𑀺 𑀲𑀫𑀸𑀦𑀼𑀧𑀚𑁆𑀛𑀸𑀬𑀸𑀦𑀁 𑀤𑀫𑁆𑀫𑀻𑀢𑀺. 𑀅𑀧𑀭𑀸𑀦𑀺𑀧𑀺 𑀅𑀝𑁆𑀞 𑀤𑁂𑀫𑀻𑀢𑀺. 𑀢𑀸𑀦𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑀫𑁆𑀫𑀻𑀢𑀺. 𑀅𑀧𑀭𑀸𑀦𑀺𑀧𑀺 𑀅𑀝𑁆𑀞 𑀤𑁂𑀫𑀻𑀢𑀺. 𑀲𑀸𑀫𑀡𑁂𑀭𑁄 𑀅𑀥𑀺𑀯𑀸𑀲𑁂𑀲𑀺. 𑀏𑀯𑀁 𑀧𑀝𑀺𑀕𑁆𑀕𑀳𑀡𑀫𑀢𑁆𑀢𑀁 𑀚𑀸𑀦𑀦𑁆𑀢𑁄 𑀅𑀦𑀼𑀧𑁆𑀧𑀦𑁆𑀦𑀜𑁆𑀘𑁂𑀯 𑀮𑀸𑀪𑀁 𑀉𑀧𑁆𑀧𑀸𑀤𑁂𑀢𑀺, 𑀉𑀧𑁆𑀧𑀦𑁆𑀦𑀜𑁆𑀘 𑀣𑀸𑀯𑀭𑀁 𑀓𑀭𑁄𑀢𑀺. 𑀇𑀤𑀁 𑀧𑀝𑀺𑀕𑁆𑀕𑀳𑀡𑀧𑀫𑀸𑀡𑀁 𑀦𑀸𑀫. 𑀢𑀢𑁆𑀣 𑀧𑀭𑀺𑀪𑁄𑀕𑀧𑀫𑀸𑀡𑀁 𑀧𑀘𑁆𑀘𑀯𑁂𑀓𑁆𑀔𑀡𑀧𑀬𑁄𑀚𑀦𑀁, ‘‘𑀇𑀤𑀫𑀢𑁆𑀣𑀺𑀬𑀁 𑀪𑁄𑀚𑀦𑀁 𑀪𑀼𑀜𑁆𑀚𑀸𑀫𑀻’’𑀢𑀺 𑀧𑀦 𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑀲𑁆𑀲𑁂𑀯 𑀧𑀬𑁄𑀚𑀦𑀢𑁆𑀢𑀸 𑀧𑀭𑀺𑀪𑁄𑀕𑀧𑀫𑀸𑀡𑀁𑀬𑁂𑀯 𑀦𑀸𑀫, 𑀢𑀁 𑀇𑀥 𑀅𑀥𑀺𑀧𑁆𑀧𑁂𑀢𑀁. 𑀢𑁂𑀦𑁂𑀯 𑀧𑀝𑀺𑀲𑀗𑁆𑀔𑀸 𑀬𑁄𑀦𑀺𑀲𑁄𑀢𑀺𑀆𑀤𑀺𑀫𑀸𑀳, 𑀇𑀢𑀭𑀫𑁆𑀧𑀺 𑀧𑀦 𑀯𑀝𑁆𑀝𑀢𑀺𑀬𑁂𑀯.

𑀲𑀻𑀳𑀲𑁂𑀬𑁆𑀬𑀦𑁆𑀢𑀺 𑀏𑀢𑁆𑀣 𑀓𑀸𑀫𑀪𑁄𑀕𑀺𑀲𑁂𑀬𑁆𑀬𑀸, 𑀧𑁂𑀢𑀲𑁂𑀬𑁆𑀬𑀸, 𑀲𑀻𑀳𑀲𑁂𑀬𑁆𑀬𑀸, 𑀢𑀣𑀸𑀕𑀢𑀲𑁂𑀬𑁆𑀬𑀸𑀢𑀺 𑀘𑀢𑀲𑁆𑀲𑁄 𑀲𑁂𑀬𑁆𑀬𑀸. 𑀢𑀢𑁆𑀣 ‘‘𑀬𑁂𑀪𑀼𑀬𑁆𑀬𑁂𑀦, 𑀪𑀺𑀓𑁆𑀔𑀯𑁂, 𑀓𑀸𑀫𑀪𑁄𑀕𑀻 𑀯𑀸𑀫𑁂𑀦 𑀧𑀲𑁆𑀲𑁂𑀦 𑀲𑁂𑀦𑁆𑀢𑀻’’𑀢𑀺 (𑀅. 𑀦𑀺. 𑁪.𑁨𑁪𑁬) 𑀅𑀬𑀁 𑀓𑀸𑀫𑀪𑁄𑀕𑀺𑀲𑁂𑀬𑁆𑀬𑀸. 𑀢𑁂𑀲𑀜𑁆𑀳𑀺 𑀬𑁂𑀪𑀼𑀬𑁆𑀬𑁂𑀦 𑀤𑀓𑁆𑀔𑀺𑀡𑀧𑀲𑁆𑀲𑁂𑀦 𑀲𑀬𑀸𑀦𑁄 𑀦𑀸𑀫 𑀦𑀢𑁆𑀣𑀺.

‘‘𑀬𑁂𑀪𑀼𑀬𑁆𑀬𑁂𑀦, 𑀪𑀺𑀓𑁆𑀔𑀯𑁂, 𑀧𑁂𑀢𑀸 𑀉𑀢𑁆𑀢𑀸𑀦𑀸 𑀲𑁂𑀦𑁆𑀢𑀻’’𑀢𑀺 (𑀅. 𑀦𑀺. 𑁪.𑁨𑁪𑁬) 𑀅𑀬𑀁 𑀧𑁂𑀢𑀲𑁂𑀬𑁆𑀬𑀸. 𑀧𑁂𑀢𑀸 𑀳𑀺 𑀅𑀧𑁆𑀧𑀫𑀁𑀲𑀮𑁄𑀳𑀺𑀢𑀢𑁆𑀢𑀸 𑀅𑀝𑁆𑀞𑀺𑀲𑀗𑁆𑀖𑀸𑀝𑀚𑀝𑀺𑀢𑀸 𑀏𑀓𑁂𑀦 𑀧𑀲𑁆𑀲𑁂𑀦 𑀲𑀬𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀉𑀢𑁆𑀢𑀸𑀦𑀸𑀯 𑀲𑀬𑀦𑁆𑀢𑀺.

‘‘𑀬𑁂𑀪𑀼𑀬𑁆𑀬𑁂𑀦, 𑀪𑀺𑀓𑁆𑀔𑀯𑁂, 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀦𑀗𑁆𑀕𑀼𑀝𑁆𑀞𑀁 𑀅𑀦𑁆𑀢𑀭𑀲𑀢𑁆𑀣𑀺𑀫𑁆𑀳𑀺 𑀅𑀦𑀼𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀬𑀢𑀻’’𑀢𑀺 𑀅𑀬𑀁 𑀲𑀻𑀳𑀲𑁂𑀬𑁆𑀬𑀸. 𑀢𑁂𑀚𑀼𑀲𑁆𑀲𑀤𑀢𑁆𑀢𑀸 𑀳𑀺 𑀲𑀻𑀳𑁄 𑀫𑀺𑀕𑀭𑀸𑀚𑀸 𑀤𑁆𑀯𑁂 𑀧𑀼𑀭𑀺𑀫𑀧𑀸𑀤𑁂 𑀏𑀓𑀲𑁆𑀫𑀺𑀁, 𑀧𑀘𑁆𑀙𑀺𑀫𑀧𑀸𑀤𑁂 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀞𑀧𑁂𑀢𑁆𑀯𑀸 𑀦𑀗𑁆𑀕𑀼𑀝𑁆𑀞𑀁 𑀅𑀦𑁆𑀢𑀭𑀲𑀢𑁆𑀣𑀺𑀫𑁆𑀳𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀭𑀺𑀫𑀧𑀸𑀤𑀧𑀘𑁆𑀙𑀺𑀫𑀧𑀸𑀤𑀦𑀗𑁆𑀕𑀼𑀝𑁆𑀞𑀸𑀦𑀁 𑀞𑀺𑀢𑁄𑀓𑀸𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀤𑁆𑀯𑀺𑀦𑁆𑀦𑀁 𑀧𑀼𑀭𑀺𑀫𑀧𑀸𑀤𑀸𑀦𑀁 𑀫𑀢𑁆𑀣𑀓𑁂 𑀲𑀻𑀲𑀁 𑀞𑀧𑁂𑀢𑁆𑀯𑀸 𑀲𑀬𑀢𑀺, 𑀤𑀺𑀯𑀲𑀫𑁆𑀧𑀺 𑀲𑀬𑀺𑀢𑁆𑀯𑀸 𑀧𑀩𑀼𑀚𑁆𑀛𑀫𑀸𑀦𑁄 𑀦 𑀉𑀢𑁆𑀭𑀲𑀦𑁆𑀢𑁄 𑀧𑀩𑀼𑀚𑁆𑀛𑀢𑀺, 𑀲𑀻𑀲𑀁 𑀧𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀭𑀺𑀫𑀧𑀸𑀤𑀸𑀤𑀻𑀦𑀁 𑀞𑀺𑀢𑁄𑀓𑀸𑀲𑀁 𑀲𑀮𑁆𑀮𑀓𑁆𑀔𑁂𑀢𑀺. 𑀲𑀘𑁂 𑀓𑀺𑀜𑁆𑀘𑀺 𑀞𑀸𑀦𑀁 𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑀁 𑀳𑁄𑀢𑀺, ‘‘𑀦𑀬𑀺𑀤𑀁 𑀢𑀼𑀬𑁆𑀳𑀁 𑀚𑀸𑀢𑀺𑀬𑀸 𑀲𑀽𑀭𑀪𑀸𑀯𑀲𑁆𑀲 𑀘 𑀅𑀦𑀼𑀭𑀽𑀧’’𑀦𑁆𑀢𑀺 𑀅𑀦𑀢𑁆𑀢𑀫𑀦𑁄 𑀳𑀼𑀢𑁆𑀯𑀸 𑀢𑀢𑁆𑀣𑁂𑀯 𑀲𑀬𑀢𑀺, 𑀦 𑀕𑁄𑀘𑀭𑀸𑀬 𑀧𑀓𑁆𑀓𑀫𑀢𑀺. 𑀅𑀯𑀺𑀚𑀳𑀺𑀢𑁆𑀯𑀸 𑀞𑀺𑀢𑁂 𑀧𑀦 ‘‘𑀢𑀼𑀬𑁆𑀳𑀁 𑀚𑀸𑀢𑀺𑀬𑀸 𑀘 𑀲𑀽𑀭𑀪𑀸𑀯𑀲𑁆𑀲 𑀘 𑀅𑀦𑀼𑀭𑀽𑀧𑀫𑀺𑀤’’𑀦𑁆𑀢𑀺 𑀳𑀝𑁆𑀞𑀢𑀼𑀝𑁆𑀞𑁄 𑀉𑀝𑁆𑀞𑀸𑀬 𑀲𑀻𑀳𑀯𑀺𑀚𑀫𑁆𑀪𑀺𑀢𑀁 𑀯𑀺𑀚𑀫𑁆𑀪𑀺𑀢𑁆𑀯𑀸 𑀓𑁂𑀲𑀭𑀪𑀸𑀭𑀁 𑀯𑀺𑀥𑀼𑀦𑀺𑀢𑁆𑀯𑀸 𑀢𑀺𑀓𑁆𑀔𑀢𑁆𑀢𑀼𑀁 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀕𑁄𑀘𑀭𑀸𑀬 𑀧𑀓𑁆𑀓𑀫𑀢𑀺.

𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁂𑀬𑁆𑀬𑀸 𑀧𑀦 𑀢𑀣𑀸𑀕𑀢𑀲𑁂𑀬𑁆𑀬𑀸𑀢𑀺 𑀯𑀼𑀘𑁆𑀘𑀢𑀺. 𑀢𑀸𑀲𑀼 𑀇𑀥 𑀲𑀻𑀳𑀲𑁂𑀬𑁆𑀬𑀸 𑀆𑀕𑀢𑀸. 𑀅𑀬𑀜𑁆𑀳𑀺 𑀢𑁂𑀚𑀼𑀲𑁆𑀲𑀤𑀇𑀭𑀺𑀬𑀸𑀧𑀣𑀢𑁆𑀢𑀸 𑀉𑀢𑁆𑀢𑀫𑀲𑁂𑀬𑁆𑀬𑀸 𑀦𑀸𑀫.

𑀧𑀸𑀤𑁂 𑀧𑀸𑀤𑀦𑁆𑀢𑀺 𑀤𑀓𑁆𑀔𑀺𑀡𑀧𑀸𑀤𑁂 𑀯𑀸𑀫𑀧𑀸𑀤𑀁. 𑀅𑀘𑁆𑀘𑀸𑀥𑀸𑀬𑀸𑀢𑀺 𑀅𑀢𑀺𑀆𑀥𑀸𑀬, 𑀈𑀲𑀓𑀁 𑀅𑀢𑀺𑀓𑁆𑀓𑀫𑁆𑀫 𑀞𑀧𑁂𑀢𑁆𑀯𑀸. 𑀕𑁄𑀧𑁆𑀨𑀓𑁂𑀦 𑀳𑀺 𑀕𑁄𑀧𑁆𑀨𑀓𑁂, 𑀚𑀸𑀡𑀼𑀦𑀸 𑀯𑀸 𑀚𑀸𑀡𑀼𑀫𑁆𑀳𑀺 𑀲𑀗𑁆𑀖𑀝𑁆𑀝𑀺𑀬𑀫𑀸𑀦𑁂 𑀅𑀪𑀺𑀡𑁆𑀳𑀁 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀦 𑀳𑁄𑀢𑀺, 𑀲𑁂𑀬𑁆𑀬𑀸 𑀅𑀨𑀸𑀲𑀼𑀓𑀸 𑀳𑁄𑀢𑀺. 𑀬𑀣𑀸 𑀧𑀦 𑀦 𑀲𑀗𑁆𑀖𑀁𑀝𑁆𑀝𑁂𑀢𑀺, 𑀏𑀯𑀁 𑀅𑀢𑀺𑀓𑁆𑀓𑀫𑁆𑀫 𑀞𑀧𑀺𑀢𑁂 𑀯𑁂𑀤𑀦𑀸 𑀦𑀼𑀧𑁆𑀧𑀚𑁆𑀚𑀢𑀺, 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺, 𑀲𑁂𑀬𑁆𑀬𑀸 𑀨𑀸𑀲𑀼𑀓𑀸 𑀳𑁄𑀢𑀺. 𑀢𑀲𑁆𑀫𑀸 𑀏𑀯𑀁 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺.

𑀲𑀢𑁄 𑀲𑀫𑁆𑀧𑀚𑀸𑀦𑁄𑀢𑀺 𑀲𑀢𑀺𑀬𑀸 𑀘𑁂𑀯 𑀲𑀫𑁆𑀧𑀚𑀜𑁆𑀜𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄. 𑀓𑀣𑀁 𑀦𑀺𑀤𑁆𑀤𑀸𑀬𑀦𑁆𑀢𑁄 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀳𑁄𑀢𑀻𑀢𑀺? 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑁆𑀲 𑀅𑀧𑁆𑀧𑀳𑀸𑀦𑁂𑀦. 𑀅𑀬𑀜𑁆𑀳𑀺 𑀤𑀺𑀯𑀲𑀜𑁆𑀘𑁂𑀯 𑀲𑀓𑀮𑀬𑀸𑀫𑀜𑁆𑀘 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑁆𑀯𑀸 𑀧𑀞𑀫𑀬𑀸𑀫𑀸𑀯𑀲𑀸𑀦𑁂 𑀘𑀗𑁆𑀓𑀫𑀸 𑀑𑀭𑀼𑀬𑁆𑀳 𑀧𑀸𑀤𑁂 𑀥𑁄𑀯𑀦𑁆𑀢𑁄𑀧𑀺 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀚𑀳𑀦𑁆𑀢𑁄𑀯 𑀥𑁄𑀯𑀢𑀺, 𑀢𑀁 𑀅𑀯𑀺𑀚𑀳𑀦𑁆𑀢𑁄𑀯 𑀤𑁆𑀯𑀸𑀭𑀁 𑀯𑀺𑀯𑀭𑀢𑀺, 𑀫𑀜𑁆𑀘𑁂 𑀦𑀺𑀲𑀻𑀤𑀢𑀺, 𑀅𑀯𑀺𑀚𑀳𑀦𑁆𑀢𑁄𑀯 𑀦𑀺𑀤𑁆𑀤𑀁 𑀑𑀓𑁆𑀓𑀫𑀢𑀺. 𑀧𑀩𑀼𑀚𑁆𑀛𑀦𑁆𑀢𑁄 𑀧𑀦 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸𑀯 𑀧𑀩𑀼𑀚𑁆𑀛𑀢𑀺. 𑀏𑀯𑀁 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑁄𑀧𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀏𑀯𑀁 𑀧𑀦 𑀜𑀸𑀡𑀥𑀸𑀢𑀼𑀓𑀦𑁆𑀢𑀺 𑀦 𑀭𑁄𑀘𑀬𑀺𑀁𑀲𑀼.

𑀯𑀼𑀢𑁆𑀢𑀦𑀬𑁂𑀦 𑀧𑀦𑁂𑀲 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑁆𑀯𑀸 𑀧𑀞𑀫𑀬𑀸𑀫𑀸𑀯𑀲𑀸𑀦𑁂 ‘‘𑀉𑀧𑀸𑀤𑀺𑀦𑁆𑀦𑀓𑀁 𑀲𑀭𑀻𑀭𑀁 𑀦𑀺𑀤𑁆𑀤𑀸𑀬 𑀲𑀫𑀲𑁆𑀲𑀸𑀲𑁂𑀲𑁆𑀲𑀸𑀫𑀻’’𑀢𑀺 𑀘𑀗𑁆𑀓𑀫𑀸 𑀑𑀭𑀼𑀬𑁆𑀳 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀅𑀯𑀺𑀚𑀳𑀦𑁆𑀢𑁄𑀯 𑀧𑀸𑀤𑁂 𑀥𑁄𑀯𑀢𑀺, 𑀤𑁆𑀯𑀸𑀭𑀁 𑀯𑀺𑀯𑀭𑀢𑀺, 𑀫𑀜𑁆𑀘𑁂 𑀧𑀦 𑀦𑀺𑀲𑀻𑀤𑀺𑀢𑁆𑀯𑀸 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀧𑀳𑀸𑀬, ‘‘𑀔𑀦𑁆𑀥𑀸𑀯 𑀔𑀦𑁆𑀥𑁂𑀲𑀼, 𑀥𑀸𑀢𑀼𑀬𑁄𑀯 𑀥𑀸𑀢𑀽𑀲𑀼 𑀧𑀝𑀺𑀳𑀜𑁆𑀜𑀦𑁆𑀢𑀻’’𑀢𑀺 𑀲𑁂𑀦𑀸𑀲𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀓𑀫𑁂𑀦 𑀦𑀺𑀤𑁆𑀤𑀁 𑀑𑀓𑁆𑀓𑀫𑀢𑀺, 𑀧𑀩𑀼𑀚𑁆𑀛𑀦𑁆𑀢𑁄 𑀧𑀦 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸𑀯 𑀧𑀩𑀼𑀚𑁆𑀛𑀢𑀺. 𑀏𑀯𑀁 𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑁄𑀧𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀦𑀸𑀫 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀢𑀺𑀯𑀗𑁆𑀕𑀺𑀓𑀸 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸𑀯 𑀓𑀣𑀺𑀢𑀸. 𑀏𑀢𑁆𑀢𑀓𑁂𑀦𑁂𑀯 𑀧𑀦 𑀯𑁄𑀲𑀸𑀦𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀢𑀸𑀦𑁂𑀯 𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀪𑀺𑀓𑁆𑀔𑀼 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀻𑀢𑀺. 𑀏𑀯𑀁 𑀬𑀸𑀯 𑀅𑀭𑀳𑀢𑁆𑀢𑀸 𑀤𑁂𑀲𑀦𑀸 𑀓𑀣𑁂𑀢𑀩𑁆𑀩𑀸.

𑁩. 𑀓𑀼𑀫𑁆𑀫𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁦. 𑀢𑀢𑀺𑀬𑁂 𑀓𑀼𑀫𑁆𑀫𑁄𑀢𑀺 𑀅𑀝𑁆𑀞𑀺𑀓𑀼𑀫𑁆𑀫𑁄. 𑀓𑀘𑁆𑀙𑀧𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀦𑀼𑀦𑀤𑀻𑀢𑀻𑀭𑁂𑀢𑀺 𑀦𑀤𑀺𑀬𑀸 𑀅𑀦𑀼𑀢𑀻𑀭𑁂. 𑀕𑁄𑀘𑀭𑀧𑀲𑀼𑀢𑁄𑀢𑀺 ‘‘𑀲𑀘𑁂 𑀓𑀺𑀜𑁆𑀘𑀺 𑀨𑀮𑀸𑀨𑀮𑀁 𑀮𑀪𑀺𑀲𑁆𑀲𑀸𑀫𑀺, 𑀔𑀸𑀤𑀺𑀲𑁆𑀲𑀸𑀫𑀻’’𑀢𑀺 𑀕𑁄𑀘𑀭𑀢𑁆𑀣𑀸𑀬 𑀧𑀲𑀼𑀢𑁄 𑀉𑀲𑁆𑀲𑀼𑀓𑁆𑀓𑁄 𑀢𑀦𑁆𑀦𑀺𑀩𑀦𑁆𑀥𑁄. 𑀲𑀫𑁄𑀤𑀳𑀺𑀢𑁆𑀯𑀸𑀢𑀺 𑀲𑀫𑀼𑀕𑁆𑀕𑁂 𑀯𑀺𑀬 𑀧𑀓𑁆𑀔𑀺𑀧𑀺𑀢𑁆𑀯𑀸. 𑀲𑀗𑁆𑀓𑀲𑀸𑀬𑀢𑀻𑀢𑀺 𑀅𑀘𑁆𑀙𑀢𑀺. 𑀲𑀫𑁄𑀤𑀳𑀦𑁆𑀢𑀺 𑀲𑀫𑁄𑀤𑀳𑀦𑁆𑀢𑁄 𑀞𑀧𑁂𑀦𑁆𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀓𑀼𑀫𑁆𑀫𑁄 𑀅𑀗𑁆𑀕𑀸𑀦𑀺 𑀲𑀓𑁂 𑀓𑀧𑀸𑀮𑁂 𑀲𑀫𑁄𑀤𑀳𑀦𑁆𑀢𑁄 𑀲𑀺𑀗𑁆𑀕𑀸𑀮𑀲𑁆𑀲 𑀑𑀢𑀸𑀭𑀁 𑀦 𑀤𑁂𑀢𑀺, 𑀦 𑀘 𑀦𑀁 𑀲𑀺𑀗𑁆𑀕𑀸𑀮𑁄 𑀧𑀲𑀳𑀢𑀺, 𑀏𑀯𑀁 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀫𑀦𑁄𑀯𑀺𑀢𑀓𑁆𑀓𑁂 𑀲𑀓𑁂 𑀆𑀭𑀫𑁆𑀫𑀡𑀓𑀧𑀸𑀮𑁂 𑀲𑀫𑁄𑀤𑀳𑀦𑁆𑀢𑁄 𑀓𑀺𑀮𑁂𑀲𑀫𑀸𑀭𑀲𑁆𑀲 𑀑𑀢𑀸𑀭𑀁 𑀦 𑀤𑁂𑀢𑀺, 𑀦 𑀘 𑀦𑀁 𑀫𑀸𑀭𑁄 𑀧𑀲𑀳𑀢𑀺.

𑀅𑀦𑀺𑀲𑁆𑀲𑀺𑀢𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀦𑀺𑀲𑁆𑀲𑀬𑁂𑀳𑀺 𑀅𑀦𑀺𑀲𑁆𑀲𑀺𑀢𑁄. 𑀅𑀜𑁆𑀜𑀫𑀳𑁂𑀞𑀬𑀸𑀦𑁄𑀢𑀺 𑀅𑀜𑁆𑀜𑀁 𑀓𑀜𑁆𑀘𑀺 𑀧𑀼𑀕𑁆𑀕𑀮𑀁 𑀅𑀯𑀺𑀳𑁂𑀞𑁂𑀦𑁆𑀢𑁄. 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀦𑀽𑀧𑀯𑀤𑁂𑀬𑁆𑀬 𑀓𑀜𑁆𑀘𑀻𑀢𑀺 𑀅𑀜𑁆𑀜𑀁 𑀓𑀜𑁆𑀘𑀺 𑀧𑀼𑀕𑁆𑀕𑀮𑀁 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀯𑀸 𑀆𑀘𑀸𑀭𑀯𑀺𑀧𑀢𑁆𑀢𑀺𑀬𑀸 𑀯𑀸 𑀅𑀢𑁆𑀢𑀸𑀦𑀁 𑀉𑀓𑁆𑀓𑀁𑀲𑁂𑀢𑀼𑀓𑀸𑀫𑀢𑀸𑀬 𑀯𑀸 𑀧𑀭𑀁 𑀯𑀫𑁆𑀪𑁂𑀢𑀼𑀓𑀸𑀫𑀢𑀸𑀬 𑀯𑀸 𑀦 𑀉𑀧𑀯𑀤𑁂𑀬𑁆𑀬, 𑀅𑀜𑁆𑀜𑀤𑀢𑁆𑀣𑀼 𑀧𑀜𑁆𑀘 𑀥𑀫𑁆𑀫𑁂 𑀅𑀚𑁆𑀛𑀢𑁆𑀢𑀁 𑀉𑀧𑀝𑁆𑀞𑀧𑁂𑀢𑁆𑀯𑀸, ‘‘𑀓𑀸𑀮𑁂𑀦 𑀯𑀓𑁆𑀔𑀸𑀫𑀺, 𑀦𑁄 𑀅𑀓𑀸𑀮𑁂𑀦, 𑀪𑀽𑀢𑁂𑀦 𑀯𑀓𑁆𑀔𑀸𑀫𑀺, 𑀦𑁄 𑀅𑀪𑀽𑀢𑁂𑀦, 𑀲𑀡𑁆𑀳𑁂𑀦 𑀯𑀓𑁆𑀔𑀸𑀫𑀺, 𑀦𑁄 𑀨𑀭𑀼𑀲𑁂𑀦, 𑀅𑀢𑁆𑀣𑀲𑀁𑀳𑀺𑀢𑁂𑀦 𑀯𑀓𑁆𑀔𑀸𑀫𑀺, 𑀦𑁄 𑀅𑀦𑀢𑁆𑀣𑀲𑀁𑀳𑀺𑀢𑁂𑀦, 𑀫𑁂𑀢𑁆𑀢𑀘𑀺𑀢𑁆𑀢𑁄 𑀯𑀓𑁆𑀔𑀸𑀫𑀺, 𑀦𑁄 𑀤𑁄𑀲𑀦𑁆𑀢𑀭𑁄’’𑀢𑀺 𑀏𑀯𑀁 𑀉𑀮𑁆𑀮𑀼𑀫𑁆𑀧𑀦𑀲𑀪𑀸𑀯𑀲𑀡𑁆𑀞𑀺𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀯𑀺𑀳𑀭𑀢𑀺.

𑁪. 𑀧𑀞𑀫𑀤𑀸𑀭𑀼𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁧. 𑀘𑀢𑀼𑀢𑁆𑀣𑁂 𑀅𑀤𑁆𑀤𑀲𑀸𑀢𑀺 𑀕𑀗𑁆𑀕𑀸𑀢𑀻𑀭𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀅𑀤𑁆𑀤𑀲. 𑀯𑀼𑀬𑁆𑀳𑀫𑀸𑀦𑀦𑁆𑀢𑀺 𑀘𑀢𑀼𑀭𑀲𑁆𑀲𑀁 𑀢𑀘𑁆𑀙𑁂𑀢𑁆𑀯𑀸 𑀧𑀩𑁆𑀩𑀢𑀦𑁆𑀢𑀭𑁂 𑀞𑀧𑀺𑀢𑀁 𑀯𑀸𑀢𑀸𑀢𑀧𑁂𑀦 𑀲𑀼𑀧𑀭𑀺𑀲𑀼𑀓𑁆𑀔𑀁 𑀧𑀸𑀯𑀼𑀲𑁆𑀲𑀓𑁂 𑀫𑁂𑀖𑁂 𑀯𑀲𑁆𑀲𑀦𑁆𑀢𑁂 𑀉𑀤𑀓𑁂𑀦 𑀉𑀧𑁆𑀮𑀯𑀺𑀢𑁆𑀯𑀸 𑀅𑀦𑀼𑀧𑀼𑀩𑁆𑀩𑁂𑀦 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀲𑁄𑀢𑁂 𑀧𑀢𑀺𑀢𑀁 𑀢𑁂𑀦 𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦𑀁. 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻𑀢𑀺 ‘‘𑀇𑀫𑀺𑀦𑀸 𑀤𑀸𑀭𑀼𑀓𑁆𑀔𑀦𑁆𑀥𑁂𑀦 𑀲𑀤𑀺𑀲𑀁 𑀓𑀢𑁆𑀯𑀸 𑀫𑀫 𑀲𑀸𑀲𑀦𑁂 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀁 𑀓𑀼𑀮𑀧𑀼𑀢𑁆𑀢𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀥𑀫𑁆𑀫𑀁 𑀤𑁂𑀲𑁂𑀢𑀼𑀓𑀸𑀫𑀢𑀸𑀬 𑀆𑀫𑀦𑁆𑀢𑁂𑀲𑀺. 𑀅𑀫𑀼𑀁 𑀫𑀳𑀦𑁆𑀢𑀁 𑀤𑀸𑀭𑀼𑀓𑁆𑀔𑀦𑁆𑀥𑀁 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦𑀦𑁆𑀢𑀺 𑀇𑀤𑀁 𑀧𑀦 𑀅𑀝𑁆𑀞𑀤𑁄𑀲𑀯𑀺𑀫𑀼𑀢𑁆𑀢𑀢𑁆𑀢𑀸 𑀲𑁄𑀢𑀧𑀝𑀺𑀧𑀦𑁆𑀦𑀲𑁆𑀲 𑀤𑀸𑀭𑀼𑀓𑁆𑀔𑀦𑁆𑀥𑀲𑁆𑀲 𑀅𑀧𑀭𑁂 𑀲𑀫𑀼𑀤𑁆𑀤𑀧𑀢𑁆𑀢𑀺𑀬𑀸 𑀅𑀦𑁆𑀢𑀭𑀸𑀬𑀓𑀭𑁂 𑀅𑀝𑁆𑀞 𑀤𑁄𑀲𑁂 𑀤𑀲𑁆𑀲𑁂𑀢𑀼𑀁 𑀆𑀭𑀪𑀺.

𑀢𑀢𑁆𑀭𑀲𑁆𑀲 𑀏𑀯𑀁 𑀅𑀝𑁆𑀞𑀤𑁄𑀲𑀯𑀺𑀫𑀼𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀏𑀓𑁄 𑀳𑀺 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀅𑀯𑀺𑀤𑀽𑀭𑁂 𑀧𑀩𑁆𑀩𑀢𑀢𑀮𑁂 𑀚𑀸𑀢𑁄 𑀦𑀸𑀦𑀸𑀯𑀮𑁆𑀮𑀻𑀳𑀺 𑀧𑀮𑀺𑀯𑁂𑀞𑀺𑀢𑁄 𑀧𑀡𑁆𑀟𑀼𑀧𑀮𑀸𑀲𑀢𑀁 𑀆𑀧𑀚𑁆𑀚𑀺𑀢𑁆𑀯𑀸 𑀉𑀧𑀘𑀺𑀓𑀸𑀤𑀻𑀳𑀺 𑀔𑀚𑁆𑀚𑀫𑀸𑀦𑁄 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀁 𑀕𑀘𑁆𑀙𑀢𑀺, 𑀅𑀬𑀁 𑀤𑀸𑀭𑀼𑀓𑁆𑀔𑀦𑁆𑀥𑁄 𑀕𑀗𑁆𑀕𑀁 𑀑𑀢𑀭𑀺𑀢𑁆𑀯𑀸 𑀯𑀗𑁆𑀓𑀝𑁆𑀞𑀸𑀦𑁂𑀲𑀼 𑀯𑀺𑀮𑀸𑀲𑀫𑀸𑀦𑁄 𑀲𑀸𑀕𑀭𑀁 𑀧𑀢𑁆𑀯𑀸 𑀫𑀡𑀺𑀯𑀡𑁆𑀡𑁂 𑀊𑀫𑀺𑀧𑀺𑀝𑁆𑀞𑁂 𑀲𑁄𑀪𑀺𑀢𑀼𑀁 𑀦 𑀮𑀪𑀢𑀺.

𑀅𑀧𑀭𑁄 𑀕𑀗𑁆𑀕𑀸𑀢𑀻𑀭𑁂 𑀩𑀳𑀺𑀫𑀽𑀮𑁄 𑀅𑀦𑁆𑀢𑁄𑀲𑀸𑀔𑁄 𑀳𑀼𑀢𑁆𑀯𑀸 𑀚𑀸𑀢𑁄, 𑀅𑀬𑀁 𑀓𑀺𑀜𑁆𑀘𑀸𑀧𑀺 𑀓𑀸𑀮𑁂𑀦 𑀓𑀸𑀮𑀁 𑀑𑀮𑀫𑁆𑀩𑀺𑀦𑀻𑀳𑀺 𑀲𑀸𑀔𑀸𑀳𑀺 𑀉𑀤𑀓𑀁 𑀨𑀼𑀲𑀢𑀺, 𑀩𑀳𑀺𑀫𑀽𑀮𑀢𑁆𑀢𑀸 𑀧𑀦 𑀕𑀗𑁆𑀕𑀁 𑀑𑀢𑀭𑀺𑀢𑁆𑀯𑀸 𑀯𑀗𑁆𑀓𑀝𑁆𑀞𑀸𑀦𑁂𑀲𑀼 𑀯𑀺𑀮𑀸𑀲𑀫𑀸𑀦𑁄 𑀲𑀸𑀕𑀭𑀁 𑀧𑀢𑁆𑀯𑀸 𑀫𑀡𑀺𑀯𑀡𑁆𑀡𑁂 𑀊𑀫𑀺𑀧𑀺𑀝𑁆𑀞𑁂 𑀲𑁄𑀪𑀺𑀢𑀼𑀁 𑀦 𑀮𑀪𑀢𑀺.

𑀅𑀧𑀭𑁄 𑀫𑀚𑁆𑀛𑁂 𑀕𑀗𑁆𑀕𑀸𑀬 𑀚𑀸𑀢𑁄, 𑀤𑀴𑁆𑀳𑀫𑀽𑀮𑁂𑀦 𑀧𑀦 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄, 𑀩𑀳𑀺 𑀘𑀲𑁆𑀲 𑀕𑀢𑀸 𑀯𑀗𑁆𑀓𑀲𑀸𑀔𑀸 𑀦𑀸𑀦𑀸𑀯𑀮𑁆𑀮𑀻𑀳𑀺 𑀆𑀩𑀤𑁆𑀥𑀸, 𑀅𑀬𑀫𑁆𑀧𑀺 𑀤𑀴𑁆𑀳𑀫𑀽𑀮𑀢𑁆𑀢𑀸 𑀩𑀳𑀺𑀤𑁆𑀥𑀸 𑀯𑀮𑁆𑀮𑀻𑀳𑀺 𑀆𑀩𑀤𑁆𑀥𑀢𑁆𑀢𑀸 𑀘 𑀕𑀗𑁆𑀕𑀁 𑀑𑀢𑀭𑀺𑀢𑁆𑀯𑀸…𑀧𑁂… 𑀲𑁄𑀪𑀺𑀢𑀼𑀁 𑀦 𑀮𑀪𑀢𑀺.

𑀅𑀧𑀭𑁄 𑀧𑀢𑀺𑀢𑀝𑁆𑀞𑀸𑀦𑁂𑀬𑁂𑀯 𑀯𑀸𑀮𑀺𑀓𑀸𑀬 𑀑𑀢𑁆𑀣𑀝𑁄 𑀧𑀽𑀢𑀺𑀪𑀸𑀯𑀁 𑀆𑀧𑀚𑁆𑀚𑀢𑀺, 𑀅𑀬𑀫𑁆𑀧𑀺 𑀕𑀗𑁆𑀕𑀁 𑀑𑀢𑀭𑀺𑀢𑁆𑀯𑀸…𑀧𑁂… 𑀦 𑀮𑀪𑀢𑀺.

𑀅𑀧𑀭𑁄 𑀤𑁆𑀯𑀺𑀦𑁆𑀦𑀁 𑀧𑀸𑀲𑀸𑀡𑀸𑀦𑀁 𑀅𑀦𑁆𑀢𑀭𑁂 𑀚𑀸𑀢𑀢𑁆𑀢𑀸, 𑀲𑀼𑀦𑀺𑀔𑀸𑀢𑁄 𑀯𑀺𑀬 𑀦𑀺𑀘𑁆𑀘𑀮𑁄 𑀞𑀺𑀢𑁄, 𑀆𑀕𑀢𑀸𑀕𑀢𑀁 𑀉𑀤𑀓𑀁 𑀤𑁆𑀯𑀺𑀥𑀸 𑀨𑀸𑀮𑁂𑀢𑀺, 𑀅𑀬𑀁 𑀧𑀸𑀲𑀸𑀡𑀦𑁆𑀢𑀭𑁂 𑀲𑀼𑀝𑁆𑀞𑀼 𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀕𑀗𑁆𑀕𑀁 𑀑𑀢𑀭𑀺𑀢𑁆𑀯𑀸…𑀧𑁂… 𑀦 𑀮𑀪𑀢𑀺.

𑀅𑀧𑀭𑁄 𑀅𑀩𑁆𑀪𑁄𑀓𑀸𑀲𑀝𑁆𑀞𑀸𑀦𑁂 𑀦𑀪𑀁 𑀧𑀽𑀭𑁂𑀢𑁆𑀯𑀸 𑀯𑀮𑁆𑀮𑀻𑀳𑀺 𑀆𑀩𑀤𑁆𑀥𑁄 𑀞𑀺𑀢𑁄. 𑀏𑀓𑀁 𑀤𑁆𑀯𑁂 𑀲𑀁𑀯𑀘𑁆𑀙𑀭𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀆𑀕𑀢𑁂 𑀫𑀳𑁄𑀖𑁂 𑀲𑀓𑀺𑀁 𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀢𑁂𑀫𑁂𑀢𑀺, 𑀅𑀬𑀫𑁆𑀧𑀺 𑀦𑀪𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑀢𑀸𑀬 𑀘𑁂𑀯 𑀏𑀓𑀲𑁆𑀲 𑀯𑀸 𑀤𑁆𑀯𑀺𑀦𑁆𑀦𑀁 𑀯𑀸 𑀲𑀁𑀯𑀘𑁆𑀙𑀭𑀸𑀦𑀁 𑀅𑀘𑁆𑀘𑀬𑁂𑀦 𑀲𑀓𑀺𑀁 𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀢𑁂𑀫𑀦𑀢𑀸𑀬 𑀘 𑀕𑀗𑁆𑀕𑀁 𑀑𑀢𑀭𑀺𑀢𑁆𑀯𑀸…𑀧𑁂… 𑀦 𑀮𑀪𑀢𑀺.

𑀅𑀧𑀭𑁄𑀧𑀺 𑀫𑀚𑁆𑀛𑁂 𑀕𑀗𑁆𑀕𑀸𑀬 𑀤𑀻𑀧𑀓𑁂 𑀚𑀸𑀢𑁄 𑀫𑀼𑀤𑀼𑀓𑁆𑀔𑀦𑁆𑀥𑀲𑀸𑀔𑁄 𑀑𑀖𑁂 𑀆𑀕𑀢𑁂 𑀅𑀦𑀼𑀲𑁄𑀢𑀁 𑀦𑀺𑀧𑀚𑁆𑀚𑀺𑀢𑁆𑀯𑀸, 𑀉𑀤𑀓𑁂 𑀕𑀢𑁂 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸, 𑀦𑀘𑁆𑀘𑀦𑁆𑀢𑁄 𑀯𑀺𑀬 𑀢𑀺𑀝𑁆𑀞𑀢𑀺. 𑀬𑀲𑁆𑀲𑀢𑁆𑀣𑀸𑀬 𑀲𑀸𑀕𑀭𑁄 𑀕𑀗𑁆𑀕𑀁 𑀏𑀯𑀁 𑀯𑀺𑀬 𑀯𑀤𑀢𑀺, ‘‘𑀪𑁄𑀢𑀺 𑀕𑀗𑁆𑀕𑁂 𑀢𑁆𑀯𑀁 𑀫𑀬𑁆𑀳𑀁 𑀘𑀦𑁆𑀤𑀦𑀲𑀸𑀭𑀲𑀮𑀴𑀲𑀸𑀭𑀸𑀤𑀻𑀦𑀺 𑀦𑀸𑀦𑀸𑀤𑀸𑀭𑀽𑀦𑀺 𑀆𑀳𑀭𑀲𑀺, 𑀤𑀸𑀭𑀼𑀓𑁆𑀔𑀦𑁆𑀥𑀁 𑀧𑀦 𑀦𑀸𑀳𑀭𑀲𑀻’’𑀢𑀺. 𑀲𑀼𑀮𑀪𑁄 𑀏𑀲, 𑀤𑁂𑀯, 𑀧𑀼𑀦𑀯𑀸𑀭𑁂 𑀚𑀸𑀦𑀺𑀲𑁆𑀲𑀸𑀫𑀻𑀢𑀺. 𑀧𑀼𑀦𑀯𑀸𑀭𑁂 𑀢𑀫𑁆𑀩𑀯𑀡𑁆𑀡𑁂𑀦 𑀉𑀤𑀓𑁂𑀦 𑀆𑀮𑀺𑀗𑁆𑀕𑀫𑀸𑀦𑀸 𑀯𑀺𑀬 𑀆𑀕𑀘𑁆𑀙𑀢𑀺. 𑀲𑁄𑀧𑀺 𑀢𑀣𑁂𑀯 𑀅𑀦𑀼𑀲𑁄𑀢𑀁 𑀦𑀺𑀧𑀚𑁆𑀚𑀺𑀢𑁆𑀯𑀸, 𑀉𑀤𑀓𑁂 𑀕𑀢𑁂 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸, 𑀦𑀘𑁆𑀘𑀦𑁆𑀢𑁄 𑀯𑀺𑀬 𑀢𑀺𑀝𑁆𑀞𑀢𑀺. 𑀅𑀬𑀁 𑀅𑀢𑁆𑀢𑀦𑁄 𑀫𑀼𑀤𑀼𑀢𑀸𑀬 𑀕𑀗𑁆𑀕𑀁 𑀑𑀢𑀭𑀺𑀢𑁆𑀯𑀸…𑀧𑁂… 𑀦 𑀮𑀪𑀢𑀺.

𑀅𑀧𑀭𑁄 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀢𑀺𑀭𑀺𑀬𑀁 𑀧𑀢𑀺𑀢𑁄 𑀯𑀸𑀮𑀺𑀓𑀸𑀬 𑀑𑀢𑁆𑀣𑀭𑀺𑀢𑁄 𑀅𑀦𑁆𑀢𑀭𑀲𑁂𑀢𑀼 𑀯𑀺𑀬 𑀩𑀳𑀽𑀦𑀁 𑀧𑀘𑁆𑀘𑀬𑁄 𑀚𑀸𑀢𑁄, 𑀉𑀪𑁄𑀲𑀼 𑀢𑀻𑀭𑁂𑀲𑀼 𑀯𑁂𑀴𑀼𑀦𑀴𑀓𑀭𑀜𑁆𑀚𑀓𑀓𑀼𑀥𑀸𑀤𑀬𑁄 𑀉𑀧𑁆𑀮𑀯𑀺𑀢𑁆𑀯𑀸 𑀢𑀢𑁆𑀣𑁂𑀯 𑀮𑀕𑁆𑀕𑀦𑁆𑀢𑀺. 𑀢𑀣𑀸 𑀦𑀸𑀦𑀸𑀯𑀺𑀥𑀸 𑀕𑀘𑁆𑀙𑀸 𑀯𑀼𑀬𑁆𑀳𑀫𑀸𑀦𑀸 𑀪𑀺𑀦𑁆𑀦𑀫𑀼𑀲𑀮𑀪𑀺𑀦𑁆𑀦𑀲𑀼𑀧𑁆𑀧𑀅𑀳𑀺𑀓𑀼𑀓𑁆𑀓𑀼𑀭𑀳𑀢𑁆𑀣𑀺𑀅𑀲𑁆𑀲𑀸𑀤𑀺𑀓𑀼𑀡𑀧𑀸𑀦𑀺𑀧𑀺 𑀢𑀢𑁆𑀣𑁂𑀯 𑀮𑀕𑁆𑀕𑀦𑁆𑀢𑀺. 𑀫𑀳𑀸𑀕𑀗𑁆𑀕𑀸𑀧𑀺 𑀦𑀁 𑀆𑀲𑀚𑁆𑀚 𑀪𑀺𑀚𑁆𑀚𑀺𑀢𑁆𑀯𑀸 𑀤𑁆𑀯𑀺𑀥𑀸 𑀕𑀘𑁆𑀙𑀢𑀺, 𑀫𑀘𑁆𑀙𑀓𑀘𑁆𑀙𑀧𑀓𑀼𑀫𑁆𑀪𑀻𑀮𑀫𑀓𑀭𑀸𑀤𑀬𑁄𑀧𑀺 𑀢𑀢𑁆𑀣𑁂𑀯 𑀯𑀸𑀲𑀁 𑀓𑀧𑁆𑀧𑁂𑀦𑁆𑀢𑀺. 𑀅𑀬𑀫𑁆𑀧𑀺 𑀢𑀺𑀭𑀺𑀬𑀁 𑀧𑀢𑀺𑀢𑁆𑀯𑀸 𑀫𑀳𑀸𑀚𑀦𑀲𑁆𑀲 𑀧𑀘𑁆𑀘𑀬𑀢𑁆𑀢𑀓𑀢𑀪𑀸𑀯𑁂𑀦 𑀕𑀗𑁆𑀕𑀁 𑀑𑀢𑀭𑀺𑀢𑁆𑀯𑀸 𑀯𑀗𑁆𑀓𑀝𑁆𑀞𑀸𑀦𑁂𑀲𑀼 𑀯𑀺𑀮𑀸𑀲𑀫𑀸𑀦𑁄 𑀲𑀸𑀕𑀭𑀁 𑀧𑀢𑁆𑀯𑀸 𑀫𑀡𑀺𑀯𑀡𑁆𑀡𑁂 𑀊𑀫𑀺𑀧𑀺𑀝𑁆𑀞𑁂 𑀲𑁄𑀪𑀺𑀢𑀼𑀁 𑀦 𑀮𑀪𑀢𑀺.

𑀇𑀢𑀺 𑀪𑀕𑀯𑀸 𑀇𑀫𑁂𑀳𑀺 𑀅𑀝𑁆𑀞𑀳𑀺 𑀤𑁄𑀲𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀲𑁄𑀢𑀧𑀝𑀺𑀧𑀦𑁆𑀦𑀲𑁆𑀲 𑀤𑀸𑀭𑀼𑀓𑁆𑀔𑀦𑁆𑀥𑀲𑁆𑀲 𑀅𑀧𑀭𑁂 𑀲𑀫𑀼𑀤𑁆𑀤𑀧𑀢𑁆𑀢𑀺𑀬𑀸 𑀅𑀦𑁆𑀢𑀭𑀸𑀬𑀓𑀭𑁂 𑀅𑀝𑁆𑀞 𑀤𑁄𑀲𑁂 𑀤𑀲𑁆𑀲𑁂𑀢𑀼𑀁 𑀅𑀫𑀼𑀁 𑀫𑀳𑀦𑁆𑀢𑀁 𑀤𑀸𑀭𑀼𑀓𑁆𑀔𑀦𑁆𑀥𑀁 𑀕𑀗𑁆𑀕𑀸𑀬 𑀦𑀤𑀺𑀬𑀸 𑀲𑁄𑀢𑁂𑀦 𑀯𑀼𑀬𑁆𑀳𑀫𑀸𑀦𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦 𑀣𑀮𑁂 𑀉𑀲𑁆𑀲𑀻𑀤𑀺𑀲𑁆𑀲𑀢𑀻𑀢𑀺 𑀣𑀮𑀁 𑀦𑀸𑀪𑀺𑀭𑀼𑀳𑀺𑀲𑁆𑀲𑀢𑀺. 𑀦 𑀫𑀦𑀼𑀲𑁆𑀲𑀕𑁆𑀕𑀸𑀳𑁄 𑀕𑀳𑁂𑀲𑁆𑀲𑀢𑀻𑀢𑀺 ‘‘𑀫𑀳𑀸 𑀯𑀢𑀸𑀬𑀁 𑀤𑀸𑀭𑀼𑀓𑁆𑀔𑀦𑁆𑀥𑁄’’𑀢𑀺 𑀤𑀺𑀲𑁆𑀯𑀸, 𑀉𑀴𑀼𑀫𑁆𑀧𑁂𑀦 𑀢𑀭𑀫𑀸𑀦𑀸 𑀕𑀦𑁆𑀢𑁆𑀯𑀸, 𑀕𑁄𑀧𑀸𑀦𑀲𑀻𑀆𑀤𑀻𑀦𑀁 𑀅𑀢𑁆𑀣𑀸𑀬 𑀫𑀦𑀼𑀲𑁆𑀲𑀸 𑀦 𑀕𑀡𑁆𑀳𑀺𑀲𑁆𑀲𑀦𑁆𑀢𑀺. 𑀦 𑀅𑀫𑀦𑀼𑀲𑁆𑀲𑀕𑁆𑀕𑀸𑀳𑁄 𑀕𑀳𑁂𑀲𑁆𑀲𑀢𑀻𑀢𑀺 ‘‘𑀫𑀳𑀕𑁆𑀖𑁄 𑀅𑀬𑀁 𑀘𑀦𑁆𑀤𑀦𑀲𑀸𑀭𑁄, 𑀯𑀺𑀫𑀸𑀦𑀤𑁆𑀯𑀸𑀭𑁂 𑀦𑀁 𑀞𑀧𑁂𑀲𑁆𑀲𑀸𑀫𑀸’’𑀢𑀺 𑀫𑀜𑁆𑀜𑀫𑀸𑀦𑀸 𑀦 𑀅𑀫𑀦𑀼𑀲𑁆𑀲𑀸 𑀕𑀡𑁆𑀳𑀺𑀲𑁆𑀲𑀦𑁆𑀢𑀺.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀲𑀤𑁆𑀥𑀺𑀁 𑀩𑀸𑀳𑀺𑀭𑁂𑀳𑀺 𑀅𑀝𑁆𑀞𑀳𑀺 𑀤𑁄𑀲𑁂𑀳𑀺 𑀏𑀯𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀕𑀗𑁆𑀕𑀸𑀬 𑀅𑀯𑀺𑀤𑀽𑀭𑁂 𑀧𑀩𑁆𑀩𑀢𑀢𑀮𑁂 𑀚𑀸𑀢𑁄 𑀢𑀢𑁆𑀣𑁂𑀯 𑀉𑀧𑀘𑀺𑀓𑀸𑀤𑀻𑀳𑀺 𑀔𑀚𑁆𑀚𑀫𑀸𑀦𑁄 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀁 𑀕𑀢𑀤𑀸𑀭𑀼𑀓𑁆𑀔𑀦𑁆𑀥𑁄 𑀯𑀺𑀬 𑀳𑀺 ‘‘𑀦𑀢𑁆𑀣𑀺 𑀤𑀺𑀦𑁆𑀦’’𑀦𑁆𑀢𑀺𑀆𑀤𑀺𑀓𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀜𑁆𑀳𑀺 𑀲𑀸𑀲𑀦𑀲𑁆𑀲 𑀤𑀽𑀭𑀻𑀪𑀽𑀢𑀢𑁆𑀢𑀸 𑀅𑀭𑀺𑀬𑀫𑀕𑁆𑀕𑀁 𑀑𑀭𑀼𑀬𑁆𑀳 𑀲𑀫𑀸𑀥𑀺𑀓𑀼𑀮𑁆𑀮𑁂 𑀦𑀺𑀲𑀺𑀦𑁆𑀦𑁄 𑀦𑀺𑀩𑁆𑀩𑀸𑀦𑀲𑀸𑀕𑀭𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀕𑀗𑁆𑀕𑀸𑀢𑀻𑀭𑁂 𑀩𑀳𑀺𑀫𑀽𑀮𑁄 𑀅𑀦𑁆𑀢𑁄𑀲𑀸𑀔𑁄 𑀳𑀼𑀢𑁆𑀯𑀸 𑀚𑀸𑀢𑁄 𑀯𑀺𑀬 𑀅𑀘𑁆𑀙𑀺𑀦𑁆𑀦𑀕𑀺𑀳𑀺𑀩𑀦𑁆𑀥𑀦𑁄 𑀲𑀫𑀡𑀓𑀼𑀝𑀺𑀫𑁆𑀩𑀺𑀓𑀧𑀼𑀕𑁆𑀕𑀮𑁄 𑀤𑀝𑁆𑀞𑀩𑁆𑀩𑁄. 𑀅𑀬𑀜𑁆𑀳𑀺 ‘‘𑀘𑀺𑀢𑁆𑀢𑀁 𑀦𑀸𑀫𑁂𑀢𑀁 𑀅𑀦𑀺𑀩𑀤𑁆𑀥𑀁, ‘𑀲𑀫𑀡𑁄𑀫𑁆𑀳𑀻’𑀢𑀺 𑀯𑀤𑀦𑁆𑀢𑁄𑀯 𑀕𑀺𑀳𑀻 𑀳𑁄𑀢𑀺, ‘𑀕𑀺𑀳𑀻𑀫𑁆𑀳𑀻’𑀢𑀺 𑀯𑀤𑀦𑁆𑀢𑁄𑀯 𑀲𑀫𑀡𑁄 𑀳𑁄𑀢𑀺. 𑀓𑁄 𑀚𑀸𑀦𑀺𑀲𑁆𑀲𑀢𑀺, 𑀓𑀺𑀁 𑀪𑀯𑀺𑀲𑁆𑀲𑀢𑀻’’𑀢𑀺? 𑀫𑀳𑀮𑁆𑀮𑀓𑀓𑀸𑀮𑁂 𑀧𑀩𑁆𑀩𑀚𑀦𑁆𑀢𑁄𑀧𑀺 𑀕𑀺𑀳𑀺𑀩𑀦𑁆𑀥𑀦𑀁 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀫𑀳𑀮𑁆𑀮𑀓𑀧𑀩𑁆𑀩𑀚𑀺𑀢𑀸𑀦𑀜𑁆𑀘 𑀲𑀫𑁆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀲 𑀲𑀘𑁂 𑀘𑀻𑀯𑀭𑀁 𑀧𑀸𑀧𑀼𑀡𑀸𑀢𑀺, 𑀅𑀦𑁆𑀢𑀘𑁆𑀙𑀺𑀦𑁆𑀦𑀓𑀁 𑀯𑀸 𑀚𑀺𑀡𑁆𑀡𑀤𑀼𑀩𑁆𑀩𑀡𑁆𑀡𑀁 𑀯𑀸 𑀧𑀸𑀧𑀼𑀡𑀸𑀢𑀺. 𑀲𑁂𑀦𑀸𑀲𑀦𑀫𑁆𑀧𑀺 𑀯𑀺𑀳𑀸𑀭𑀧𑀘𑁆𑀘𑀦𑁆𑀢𑁂 𑀧𑀡𑁆𑀡𑀲𑀸𑀮𑀸 𑀯𑀸 𑀫𑀡𑁆𑀟𑀧𑁄 𑀯𑀸 𑀧𑀸𑀧𑀼𑀡𑀸𑀢𑀺. 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑁂𑀦𑀸𑀧𑀺 𑀧𑀼𑀢𑁆𑀢𑀦𑀢𑁆𑀢𑀓𑀸𑀦𑀁 𑀤𑀸𑀭𑀓𑀸𑀦𑀁 𑀧𑀘𑁆𑀙𑀢𑁄 𑀘𑀭𑀺𑀢𑀩𑁆𑀩𑀁 𑀳𑁄𑀢𑀺, 𑀧𑀭𑀺𑀬𑀦𑁆𑀢𑁂 𑀦𑀺𑀲𑀻𑀤𑀺𑀢𑀩𑁆𑀩𑀁 𑀳𑁄𑀢𑀺. 𑀢𑁂𑀦 𑀲𑁄 𑀤𑀼𑀓𑁆𑀔𑀻 𑀤𑀼𑀫𑁆𑀫𑀦𑁄 𑀅𑀲𑁆𑀲𑀽𑀦𑀺 𑀫𑀼𑀜𑁆𑀘𑀦𑁆𑀢𑁄, ‘‘𑀅𑀢𑁆𑀣𑀺 𑀫𑁂 𑀓𑀼𑀮𑀲𑀦𑁆𑀢𑀓𑀁 𑀥𑀦𑀁, 𑀓𑀧𑁆𑀧𑀢𑀺 𑀦𑀼 𑀔𑁄 𑀢𑀁 𑀔𑀸𑀤𑀦𑁆𑀢𑁂𑀦 𑀚𑀻𑀯𑀺𑀢𑀼’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀓𑀁 𑀯𑀺𑀦𑀬𑀥𑀭𑀁 𑀧𑀼𑀘𑁆𑀙𑀢𑀺 𑁋 ‘‘𑀓𑀺𑀁, 𑀪𑀦𑁆𑀢𑁂 𑀆𑀘𑀭𑀺𑀬, 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀯𑀺𑀘𑀸𑀭𑁂𑀢𑁆𑀯𑀸 𑀔𑀸𑀤𑀺𑀢𑀼𑀁 𑀓𑀧𑁆𑀧𑀢𑀺, 𑀦𑁄 𑀓𑀧𑁆𑀧𑀢𑀻’’𑀢𑀺? ‘‘𑀦𑀢𑁆𑀣𑁂𑀢𑁆𑀣 𑀤𑁄𑀲𑁄, 𑀓𑀧𑁆𑀧𑀢𑁂𑀢’’𑀦𑁆𑀢𑀺. 𑀲𑁄 𑀅𑀢𑁆𑀢𑀦𑁄 𑀪𑀚𑀫𑀸𑀦𑀓𑁂 𑀓𑀢𑀺𑀧𑀬𑁂 𑀤𑀼𑀩𑁆𑀩𑀘𑁂 𑀤𑀼𑀭𑀸𑀘𑀸𑀭𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸, 𑀲𑀸𑀬𑀦𑁆𑀳𑀲𑀫𑀬𑁂 𑀅𑀦𑁆𑀢𑁄𑀕𑀸𑀫𑀁 𑀕𑀦𑁆𑀢𑁆𑀯𑀸, 𑀕𑀸𑀫𑀫𑀚𑁆𑀛𑁂 𑀞𑀺𑀢𑁄 𑀕𑀸𑀫𑀺𑀓𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸, ‘‘𑀅𑀫𑁆𑀳𑀸𑀓𑀁 𑀧𑀬𑁄𑀕𑀢𑁄 𑀉𑀝𑁆𑀞𑀺𑀢𑀁 𑀆𑀬𑀁 𑀓𑀲𑁆𑀲 𑀤𑁂𑀣𑀸’’𑀢𑀺 𑀆𑀳. 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀧𑀩𑁆𑀩𑀚𑀺𑀢𑀸, 𑀫𑀬𑀁 𑀓𑀲𑁆𑀲 𑀤𑀲𑁆𑀲𑀸𑀫𑀸𑀢𑀺? 𑀓𑀺𑀁 𑀧𑀩𑁆𑀩𑀚𑀺𑀢𑀸𑀦𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀦 𑀯𑀝𑁆𑀝𑀢𑀻𑀢𑀺? 𑀓𑀼𑀤𑁆𑀤𑀸𑀮-𑀧𑀺𑀝𑀓𑀁 𑀕𑀳𑁂𑀢𑁆𑀯𑀸, 𑀔𑁂𑀢𑁆𑀢𑀫𑀭𑀺𑀬𑀸𑀤𑀩𑀦𑁆𑀥𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑁄 𑀦𑀸𑀦𑀸𑀧𑁆𑀧𑀓𑀸𑀭𑀁 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀜𑁆𑀘𑁂𑀯 𑀨𑀮𑀸𑀨𑀮𑁂 𑀘 𑀲𑀗𑁆𑀕𑀡𑁆𑀳𑀺𑀢𑁆𑀯𑀸, 𑀳𑁂𑀫𑀦𑁆𑀢𑀕𑀺𑀫𑁆𑀳𑀯𑀲𑁆𑀲𑀸𑀦𑁂𑀲𑀼 𑀬𑀁 𑀬𑀁 𑀇𑀘𑁆𑀙𑀢𑀺, 𑀢𑀁 𑀢𑀁 𑀧𑀘𑀸𑀧𑁂𑀢𑁆𑀯𑀸 𑀔𑀸𑀤𑀦𑁆𑀢𑁄 𑀲𑀫𑀡𑀓𑀼𑀝𑀼𑀫𑁆𑀩𑀺𑀓𑁄 𑀳𑀼𑀢𑁆𑀯𑀸 𑀚𑀻𑀯𑀢𑀺. 𑀓𑁂𑀯𑀮𑀫𑀲𑁆𑀲 𑀧𑀜𑁆𑀘𑀘𑀽𑀴𑀓𑁂𑀦 𑀤𑀸𑀭𑀓𑁂𑀦 𑀲𑀤𑁆𑀥𑀺𑀁 𑀧𑀸𑀤𑀧𑀭𑀺𑀘𑀸𑀭𑀺𑀓𑀸𑀯 𑀏𑀓𑀸 𑀦𑀢𑁆𑀣𑀺. 𑀅𑀬𑀁 𑀧𑀼𑀕𑁆𑀕𑀮𑁄 𑀓𑀺𑀜𑁆𑀘𑀸𑀧𑀺 𑀑𑀮𑀫𑁆𑀩𑀺𑀦𑀻𑀳𑀺 𑀲𑀸𑀔𑀸𑀳𑀺 𑀉𑀤𑀓𑀁 𑀨𑀼𑀲𑀫𑀸𑀦𑁄 𑀅𑀦𑁆𑀢𑁄𑀲𑀸𑀔𑁄 𑀭𑀼𑀓𑁆𑀔𑁄 𑀯𑀺𑀬 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑀸𑀤𑀻𑀲𑀼 𑀪𑀺𑀓𑁆𑀔𑀽𑀦𑀁 𑀓𑀸𑀬𑀲𑀸𑀫𑀕𑁆𑀕𑀺𑀁 𑀤𑁂𑀢𑀺, 𑀕𑀺𑀳𑀺𑀩𑀦𑁆𑀥𑀦𑀲𑁆𑀲 𑀧𑀦 𑀅𑀘𑁆𑀙𑀺𑀦𑁆𑀦𑀢𑀸𑀬 𑀩𑀳𑀺𑀫𑀽𑀮𑀢𑁆𑀢𑀸 𑀅𑀭𑀺𑀬𑀫𑀕𑁆𑀕𑀁 𑀑𑀢𑀭𑀺𑀢𑁆𑀯𑀸 𑀲𑀫𑀸𑀥𑀺𑀓𑀼𑀮𑁆𑀮𑁂 𑀦𑀺𑀲𑀺𑀦𑁆𑀦𑁄 𑀦𑀺𑀩𑁆𑀩𑀸𑀦𑀲𑀸𑀕𑀭𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀕𑀗𑁆𑀕𑀸𑀬 𑀫𑀚𑁆𑀛𑁂 𑀚𑀸𑀢𑁄 𑀩𑀳𑀺𑀤𑁆𑀥𑀸 𑀯𑀮𑁆𑀮𑀻𑀳𑀺 𑀆𑀩𑀤𑁆𑀥𑀯𑀗𑁆𑀓𑀲𑀸𑀔𑀸 𑀯𑀺𑀬 𑀲𑀗𑁆𑀖𑀲𑀦𑁆𑀢𑀓𑀁 𑀦𑀺𑀲𑁆𑀲𑀸𑀬 𑀚𑀻𑀯𑀫𑀸𑀦𑁄 𑀪𑀺𑀦𑁆𑀦𑀸𑀚𑀻𑀯𑀧𑀼𑀕𑁆𑀕𑀮𑁄 𑀤𑀝𑁆𑀞𑀩𑁆𑀩𑁄. 𑀏𑀓𑀘𑁆𑀘𑁄 𑀕𑀺𑀳𑀺𑀩𑀦𑁆𑀥𑀦𑀁 𑀧𑀳𑀸𑀬 𑀧𑀩𑁆𑀩𑀚𑀦𑁆𑀢𑁄𑀧𑀺 𑀲𑀸𑀭𑀼𑀧𑁆𑀧𑀝𑁆𑀞𑀸𑀦𑁂 𑀧𑀩𑁆𑀩𑀚𑁆𑀚𑀁 𑀦 𑀮𑀪𑀢𑀺. 𑀧𑀩𑁆𑀩𑀚𑁆𑀚𑀸 𑀳𑀺 𑀦𑀸𑀫𑁂𑀲𑀸 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀲𑀤𑀺𑀲𑀸. 𑀬𑀣𑀸 𑀫𑀦𑀼𑀲𑁆𑀲𑀸 𑀬𑀢𑁆𑀣 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀦𑁆𑀢𑀺, 𑀢𑁂𑀲𑀁𑀬𑁂𑀯 𑀓𑀼𑀮𑀸𑀦𑀁 𑀆𑀘𑀸𑀭𑀁 𑀲𑀺𑀓𑁆𑀔𑀦𑁆𑀢𑀺, 𑀏𑀯𑀁 𑀪𑀺𑀓𑁆𑀔𑀽𑀧𑀺 𑀬𑁂𑀲𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀦𑁆𑀢𑀺, 𑀢𑁂𑀲𑀁𑀬𑁂𑀯 𑀆𑀘𑀸𑀭𑀁 𑀕𑀡𑁆𑀳𑀦𑁆𑀢𑀺. 𑀢𑀲𑁆𑀫𑀸 𑀏𑀓𑀘𑁆𑀘𑁄 𑀅𑀲𑀸𑀭𑀼𑀧𑁆𑀧𑀝𑁆𑀞𑀸𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀑𑀯𑀸𑀤𑀸𑀦𑀼𑀲𑀸𑀲𑀦𑀻𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀤𑀻𑀳𑀺 𑀧𑀭𑀺𑀩𑀸𑀳𑀺𑀭𑁄 𑀳𑀼𑀢𑁆𑀯𑀸 𑀧𑀸𑀢𑁄𑀯 𑀫𑀼𑀡𑁆𑀟𑀖𑀝𑀁 𑀕𑀳𑁂𑀢𑁆𑀯𑀸 𑀉𑀤𑀓𑀢𑀺𑀢𑁆𑀣𑀁 𑀕𑀘𑁆𑀙𑀢𑀺, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀪𑀢𑁆𑀢𑀢𑁆𑀣𑀸𑀬 𑀔𑀦𑁆𑀥𑁂 𑀧𑀢𑁆𑀢𑀁 𑀓𑀢𑁆𑀯𑀸 𑀪𑀢𑁆𑀢𑀲𑀸𑀮𑀁 𑀕𑀘𑁆𑀙𑀢𑀺, 𑀤𑀼𑀩𑁆𑀩𑀘𑀲𑀸𑀫𑀡𑁂𑀭𑁂𑀳𑀺 𑀲𑀤𑁆𑀥𑀺𑀁 𑀦𑀸𑀦𑀸𑀓𑀻𑀴𑀁 𑀓𑀻𑀴𑀢𑀺, 𑀆𑀭𑀸𑀫𑀺𑀓𑀤𑀸𑀭𑀓𑁂𑀳𑀺 𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺.

𑀲𑁄 𑀤𑀳𑀭𑀪𑀺𑀓𑁆𑀔𑀼𑀓𑀸𑀮𑁂 𑀅𑀢𑁆𑀢𑀦𑁄 𑀅𑀦𑀼𑀭𑀽𑀧𑁂𑀳𑀺 𑀤𑀳𑀭𑀪𑀺𑀓𑁆𑀔𑀽𑀳𑀺 𑀘𑁂𑀯 𑀆𑀭𑀸𑀫𑀺𑀓𑁂𑀳𑀺 𑀘 𑀲𑀤𑁆𑀥𑀺𑀁 𑀲𑀗𑁆𑀖𑀪𑁄𑀕𑀁 𑀕𑀦𑁆𑀢𑁆𑀯𑀸, ‘‘𑀅𑀬𑀁 𑀔𑀻𑀡𑀸𑀲𑀯𑁂𑀳𑀺 𑀅𑀲𑀼𑀓𑀭𑀜𑁆𑀜𑁄 𑀲𑀦𑁆𑀢𑀺𑀓𑀸 𑀧𑀝𑀺𑀕𑁆𑀕𑀳𑀺𑀢𑀲𑀗𑁆𑀖𑀪𑁄𑀕𑁄, 𑀢𑀼𑀫𑁆𑀳𑁂 𑀲𑀗𑁆𑀖𑀲𑁆𑀲 𑀇𑀤𑀜𑁆𑀘𑀺𑀤𑀜𑁆𑀘 𑀦 𑀤𑁂𑀣, 𑀦 𑀳𑀺 𑀢𑀼𑀫𑁆𑀳𑀸𑀓𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑀸 𑀯𑀸 𑀅𑀢𑁆𑀢𑀫𑀦𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀏𑀣 𑀤𑀸𑀦𑀺 𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑁄𑀣𑀸’’𑀢𑀺 𑀓𑀼𑀤𑁆𑀤𑀸𑀮-𑀧𑀺𑀝𑀓𑀸𑀦𑀺 𑀕𑀸𑀳𑀸𑀧𑁂𑀢𑁆𑀯𑀸 𑀳𑁂𑀝𑁆𑀞𑀸 𑀢𑀴𑀸𑀓𑀫𑀸𑀢𑀺𑀓𑀸𑀲𑀼 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀸𑀦𑀺 𑀓𑀸𑀭𑀸𑀧𑁂𑀢𑁆𑀯𑀸 𑀩𑀳𑀼𑀁 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀁 𑀯𑀺𑀳𑀸𑀭𑀁 𑀧𑀯𑁂𑀲𑁂𑀢𑁆𑀯𑀸 𑀆𑀭𑀸𑀫𑀺𑀓𑁂𑀳𑀺 𑀅𑀢𑁆𑀢𑀦𑁄 𑀉𑀧𑀓𑀸𑀭𑀪𑀸𑀯𑀁 𑀲𑀗𑁆𑀖𑀲𑁆𑀲 𑀆𑀭𑁄𑀘𑀸𑀧𑁂𑀢𑀺. 𑀲𑀗𑁆𑀖𑁄 ‘‘𑀅𑀬𑀁 𑀤𑀳𑀭𑁄 𑀩𑀳𑀽𑀧𑀓𑀸𑀭𑁄, 𑀇𑀫𑀲𑁆𑀲 𑀲𑀢𑀁 𑀯𑀸 𑀤𑁆𑀯𑀺𑀲𑀢𑀁 𑀯𑀸 𑀤𑁂𑀣𑀸’’𑀢𑀺 𑀤𑀸𑀧𑁂𑀢𑀺. 𑀇𑀢𑀺 𑀲𑁄 𑀇𑀢𑁄 𑀘𑀺𑀢𑁄 𑀘 𑀲𑀗𑁆𑀖𑀲𑀦𑁆𑀢𑀓𑁂𑀦𑁂𑀯 𑀯𑀟𑁆𑀠𑀦𑁆𑀢𑁄 𑀩𑀳𑀺𑀤𑁆𑀥𑀸 𑀏𑀓𑀯𑀻𑀲𑀢𑀺𑀯𑀺𑀥𑀸𑀳𑀺 𑀅𑀦𑁂𑀲𑀦𑀸𑀳𑀺 𑀩𑀤𑁆𑀥𑁄 𑀅𑀭𑀺𑀬𑀫𑀕𑁆𑀕𑀁 𑀑𑀢𑀭𑀺𑀢𑁆𑀯𑀸 𑀲𑀫𑀸𑀥𑀺𑀓𑀼𑀮𑁆𑀮𑁂 𑀦𑀺𑀲𑀺𑀦𑁆𑀦𑁄 𑀦𑀺𑀩𑁆𑀩𑀸𑀦𑀲𑀸𑀕𑀭𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀧𑀢𑀺𑀢𑀝𑁆𑀞𑀸𑀦𑁂𑀬𑁂𑀯 𑀯𑀸𑀮𑀺𑀓𑀸𑀬 𑀑𑀢𑁆𑀣𑀭𑀺𑀢𑁆𑀯𑀸 𑀧𑀽𑀢𑀺𑀪𑀸𑀯𑀁 𑀆𑀧𑀸𑀤𑀺𑀢𑀭𑀼𑀓𑁆𑀔𑁄 𑀯𑀺𑀬 𑀆𑀮𑀲𑀺𑀬𑀫𑀳𑀕𑁆𑀖𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀭𑀽𑀧𑀜𑁆𑀳𑀺 𑀧𑀼𑀕𑁆𑀕𑀮𑀁 𑀆𑀫𑀺𑀲𑀘𑀓𑁆𑀔𑀼𑀁 𑀧𑀘𑁆𑀘𑀬𑀮𑁄𑀮𑀁 𑀯𑀺𑀲𑁆𑀲𑀝𑁆𑀞𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀯𑀢𑁆𑀢𑀁 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀯𑀚𑁆𑀚𑀺𑀢𑀁 𑀲𑀦𑁆𑀥𑀸𑀬 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀦𑁆𑀢𑀺 𑁋 ‘‘𑀪𑁄, 𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀘𑁆𑀙𑀸𑀫𑀸’’𑀢𑀺? 𑀅𑀣 𑀣𑀺𑀦𑀫𑀺𑀤𑁆𑀥𑀁 𑀉𑀝𑁆𑀞𑀸𑀬 𑀏𑀯𑀫𑀸𑀳 𑁋 ‘‘𑀓𑀺𑀁 𑀦 𑀧𑀲𑁆𑀲𑀣? 𑀏𑀲𑁄 𑀅𑀲𑀼𑀓𑀯𑀺𑀳𑀸𑀭𑀯𑀸𑀲𑀻 𑀓𑀼𑀲𑀻𑀢𑀧𑀼𑀕𑁆𑀕𑀮𑁄 𑀅𑀲𑀼𑀓𑀁 𑀦𑀸𑀫 𑀕𑀸𑀫𑀁 𑀕𑀦𑁆𑀢𑁆𑀯𑀸 𑀬𑀸𑀕𑀼𑀫𑀢𑁆𑀣𑀓𑁂 𑀬𑀸𑀕𑀼𑀁, 𑀧𑀽𑀯𑀫𑀢𑁆𑀣𑀓𑁂 𑀧𑀽𑀯𑀁, 𑀪𑀢𑁆𑀢𑀫𑀢𑁆𑀣𑀓𑁂 𑀪𑀢𑁆𑀢𑀁 𑀅𑀚𑁆𑀛𑁄𑀳𑀭𑀺𑀢𑁆𑀯𑀸 𑀯𑀺𑀳𑀸𑀭𑀁 𑀆𑀕𑀫𑁆𑀫 𑀯𑀺𑀲𑁆𑀲𑀝𑁆𑀞𑀲𑀩𑁆𑀩𑀯𑀢𑁆𑀢𑁄 𑀉𑀤𑁆𑀤𑁂𑀲𑀸𑀤𑀺𑀯𑀺𑀭𑀳𑀺𑀢𑁄 𑀫𑀜𑁆𑀘𑀁 𑀉𑀧𑀕𑀘𑁆𑀙𑀦𑁆𑀢𑁄 𑀫𑀬𑁆𑀳𑀁 𑀑𑀓𑀸𑀲𑀁 𑀓𑀭𑁄𑀢𑀻’’𑀢𑀺.

𑀢𑀢𑁄 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀉𑀝𑁆𑀞𑀸𑀬𑀸𑀳 𑁋 ‘‘𑀪𑁄, 𑀢𑀯 𑀑𑀓𑀸𑀲𑁂 𑀓𑀢𑁂 𑀫𑀬𑁆𑀳𑀁 𑀓𑀢𑁄𑀯 𑀳𑁄𑀢𑀺, 𑀇𑀤𑀸𑀦𑁂𑀯 𑀲𑁄 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀓𑀺𑀮𑁂𑀲𑀸𑀦𑀼𑀭𑀜𑁆𑀚𑀺𑀢𑁄𑀯 𑀧𑀩𑀼𑀚𑁆𑀛𑀺𑀢𑁆𑀯𑀸 𑀓𑀸𑀫𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀲𑁆𑀲𑀢𑀻’’𑀢𑀺. 𑀢𑀢𑁄 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁 𑀉𑀝𑁆𑀞𑀸𑀬𑀸𑀳 𑁋 ‘‘𑀢𑀼𑀫𑁆𑀳𑀸𑀓𑀁 𑀑𑀓𑀸𑀲𑁂 𑀓𑀢𑁂 𑀫𑀬𑁆𑀳𑀁 𑀓𑀢𑁄𑀯 𑀳𑁄𑀢𑀺. 𑀇𑀤𑀸𑀦𑁂𑀯 𑀦𑀺𑀤𑁆𑀤𑀸𑀬𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑁄 ‘𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀭𑁄𑀳𑀻’𑀢𑀺 𑀯𑀼𑀘𑁆𑀘𑀫𑀸𑀦𑁄, ‘𑀪𑁄, 𑀇𑀫𑁂 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀅𑀓𑀢𑁆𑀯𑀸 𑀅𑀫𑁆𑀳𑁂𑀲𑀼 𑀩𑁆𑀬𑀸𑀯𑀝𑀸’𑀢𑀺 𑀦𑀸𑀦𑀧𑁆𑀧𑀓𑀸𑀭𑀁 𑀨𑀭𑀼𑀲𑀯𑀘𑀦𑀁 𑀯𑀤𑀦𑁆𑀢𑁄 𑀅𑀓𑁆𑀔𑀻𑀦𑀺 𑀦𑀻𑀳𑀭𑀺𑀢𑁆𑀯𑀸 𑀯𑀺𑀘𑀭𑀺𑀲𑁆𑀲𑀢𑀻’’𑀢𑀺. 𑀢𑀢𑁄 𑀉𑀤𑁆𑀥𑀘𑁆𑀘𑀦𑀻𑀯𑀭𑀡𑀁 𑀉𑀝𑁆𑀞𑀸𑀬𑀸𑀳 𑁋 ‘‘𑀢𑀼𑀫𑁆𑀳𑀸𑀓𑀁 𑀑𑀓𑀸𑀲𑁂 𑀓𑀢𑁂 𑀫𑀬𑁆𑀳𑀁 𑀓𑀢𑁄𑀯 𑀳𑁄𑀢𑀺, 𑀓𑀼𑀲𑀻𑀢𑁄 𑀦𑀸𑀫 𑀯𑀸𑀢𑀸𑀳𑀢𑁄 𑀅𑀕𑁆𑀕𑀺𑀓𑁆𑀔𑀦𑁆𑀥𑁄 𑀯𑀺𑀬 𑀉𑀤𑁆𑀥𑀢𑁄 𑀳𑁄𑀢𑀻’’𑀢𑀺. 𑀅𑀣 𑀓𑀼𑀓𑀼𑀘𑁆𑀘𑀦𑀻𑀯𑀭𑀡𑀁 𑀉𑀝𑁆𑀞𑀸𑀬𑀸𑀳 𑁋 ‘‘𑀢𑀼𑀫𑁆𑀳𑀸𑀓𑀁 𑀑𑀓𑀸𑀲𑁂 𑀓𑀢𑁂 𑀫𑀬𑁆𑀳𑀁 𑀓𑀢𑁄𑀯 𑀳𑁄𑀢𑀺, 𑀓𑀼𑀲𑀻𑀢𑁄 𑀦𑀸𑀫 𑀓𑀼𑀓𑁆𑀓𑀼𑀘𑁆𑀘𑀧𑀓𑀢𑁄𑀯 𑀳𑁄𑀢𑀺, 𑀅𑀓𑀧𑁆𑀧𑀺𑀬𑁂 𑀓𑀧𑁆𑀧𑀺𑀬𑀲𑀜𑁆𑀜𑀁 𑀓𑀧𑁆𑀧𑀺𑀬𑁂 𑀘 𑀅𑀓𑀧𑁆𑀧𑀺𑀬𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑀻’’𑀢𑀺. 𑀅𑀣 𑀯𑀺𑀘𑀺𑀓𑀺𑀘𑁆𑀙𑀸𑀦𑀻𑀯𑀭𑀡𑀁 𑀉𑀝𑁆𑀞𑀸𑀬𑀸𑀳 𑁋 ‘‘𑀢𑀼𑀫𑁆𑀳𑀸𑀓𑀁 𑀑𑀓𑀸𑀲𑁂 𑀓𑀢𑁂 𑀫𑀬𑁆𑀳𑀁 𑀓𑀢𑁄𑀯 𑀳𑁄𑀢𑀺. 𑀏𑀯𑀭𑀽𑀧𑁄 𑀳𑀺 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀫𑀳𑀸𑀯𑀺𑀘𑀺𑀓𑀺𑀘𑁆𑀙𑀁 𑀉𑀧𑁆𑀧𑀸𑀤𑁂𑀲𑀻’’𑀢𑀺. 𑀏𑀯𑀁 𑀆𑀮𑀲𑀺𑀬𑀫𑀳𑀕𑁆𑀖𑀲𑀁 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 𑀘𑀡𑁆𑀟𑀲𑀼𑀦𑀔𑀸𑀤𑀬𑁄 𑀯𑀺𑀬 𑀲𑀺𑀗𑁆𑀕𑀘𑁆𑀙𑀺𑀦𑁆𑀦𑀁 𑀚𑀭𑀕𑁆𑀕𑀯𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀺. 𑀲𑁄𑀧𑀺 𑀅𑀭𑀺𑀬𑀫𑀕𑁆𑀕𑀲𑁄𑀢𑀁 𑀑𑀢𑀭𑀺𑀢𑁆𑀯𑀸 𑀲𑀫𑀸𑀥𑀺𑀓𑀼𑀮𑁆𑀮𑁂 𑀦𑀺𑀲𑀺𑀦𑁆𑀦𑁄 𑀦𑀺𑀩𑁆𑀩𑀸𑀦𑀲𑀸𑀕𑀭𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀤𑁆𑀯𑀺𑀦𑁆𑀦𑀁 𑀧𑀸𑀲𑀸𑀡𑀸𑀦𑀁 𑀅𑀦𑁆𑀢𑀭𑁂 𑀦𑀺𑀔𑀸𑀢𑀫𑀽𑀮𑀸𑀓𑀸𑀭𑁂𑀦 𑀞𑀺𑀢𑀭𑀼𑀓𑁆𑀔𑁄 𑀯𑀺𑀬 𑀤𑀺𑀝𑁆𑀞𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀞𑀺𑀢𑁄 𑀤𑀺𑀝𑁆𑀞𑀺𑀕𑀢𑀺𑀓𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀳𑀺 ‘‘𑀅𑀭𑀽𑀧𑀪𑀯𑁂 𑀭𑀽𑀧𑀁 𑀅𑀢𑁆𑀣𑀺, 𑀅𑀲𑀜𑁆𑀜𑀻𑀪𑀯𑁂 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀺, 𑀩𑀳𑀼𑀘𑀺𑀢𑁆𑀢𑀓𑁆𑀔𑀡𑀺𑀓𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄, 𑀅𑀦𑀼𑀲𑀬𑁄 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁄, 𑀢𑁂 𑀘 𑀲𑀢𑁆𑀢𑀸 𑀲𑀦𑁆𑀥𑀸𑀯𑀦𑁆𑀢𑀺 𑀲𑀁𑀲𑀭𑀦𑁆𑀢𑀻’’𑀢𑀺 𑀯𑀤𑀦𑁆𑀢𑁄 𑀅𑀭𑀺𑀝𑁆𑀞𑁄 𑀯𑀺𑀬 𑀓𑀡𑁆𑀝𑀓𑀲𑀸𑀫𑀡𑁂𑀭𑁄 𑀯𑀺𑀬 𑀘 𑀯𑀺𑀘𑀭𑀢𑀺. 𑀧𑀺𑀲𑀼𑀡𑀯𑀸𑀘𑁄 𑀧𑀦 𑀳𑁄𑀢𑀺, 𑀉𑀧𑀚𑁆𑀛𑀸𑀬𑀸𑀤𑀬𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀳𑀺 𑀪𑀺𑀦𑁆𑀤𑀦𑁆𑀢𑁄 𑀯𑀺𑀘𑀭𑀢𑀺. 𑀲𑁄𑀧𑀺 𑀅𑀭𑀺𑀬𑀫𑀕𑁆𑀕𑀲𑁄𑀢𑀁 𑀑𑀢𑀭𑀺𑀢𑁆𑀯𑀸 𑀲𑀫𑀸𑀥𑀺𑀓𑀼𑀮𑁆𑀮𑁂 𑀦𑀺𑀲𑀺𑀦𑁆𑀦𑁄 𑀦𑀺𑀩𑁆𑀩𑀸𑀦𑀲𑀸𑀕𑀭𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀅𑀩𑁆𑀪𑁄𑀓𑀸𑀲𑁂 𑀦𑀪𑀁 𑀧𑀽𑀭𑁂𑀢𑁆𑀯𑀸 𑀯𑀮𑁆𑀮𑀻𑀳𑀺 𑀆𑀩𑀤𑁆𑀥𑁄 𑀞𑀺𑀢𑁄 𑀏𑀓𑀁 𑀤𑁆𑀯𑁂 𑀲𑀁𑀯𑀘𑁆𑀙𑀭𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀆𑀕𑀢𑁂 𑀫𑀳𑁄𑀖𑁂 𑀲𑀓𑀺𑀁 𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀢𑁂𑀫𑀦𑀭𑀼𑀓𑁆𑀔𑁄 𑀯𑀺𑀬 𑀫𑀳𑀮𑁆𑀮𑀓𑀓𑀸𑀮𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀘𑁆𑀘𑀦𑁆𑀢𑁂 𑀯𑀲𑀫𑀸𑀦𑁄 𑀤𑀼𑀮𑁆𑀮𑀪𑀲𑀗𑁆𑀖𑀤𑀲𑁆𑀲𑀦𑁄 𑀘𑁂𑀯 𑀤𑀼𑀮𑁆𑀮𑀪𑀥𑀫𑁆𑀫𑀲𑁆𑀲𑀯𑀦𑁄 𑀘 𑀧𑀼𑀕𑁆𑀕𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀓𑀘𑁆𑀘𑁄 𑀳𑀺 𑀯𑀼𑀟𑁆𑀠𑀓𑀸𑀮𑁂 𑀧𑀩𑁆𑀩𑀚𑀺𑀢𑁄 𑀓𑀢𑀺𑀧𑀸𑀳𑁂𑀦 𑀉𑀧𑀲𑀫𑁆𑀧𑀤𑀁 𑀮𑀪𑀺𑀢𑁆𑀯𑀸 𑀧𑀜𑁆𑀘𑀯𑀲𑁆𑀲𑀓𑀸𑀮𑁂 𑀧𑀸𑀢𑀺𑀫𑁄𑀓𑁆𑀔𑀁 𑀧𑀕𑀼𑀡𑀁 𑀓𑀢𑁆𑀯𑀸 𑀤𑀲𑀯𑀲𑁆𑀲𑀓𑀸𑀮𑁂 𑀯𑀺𑀦𑀬𑀥𑀭𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀯𑀺𑀦𑀬𑀓𑀣𑀸𑀓𑀸𑀮𑁂 𑀫𑀭𑀺𑀘𑀁 𑀯𑀸 𑀳𑀭𑀻𑀢𑀓𑀔𑀡𑁆𑀟𑀁 𑀯𑀸 𑀫𑀼𑀔𑁂 𑀞𑀧𑁂𑀢𑁆𑀯𑀸 𑀩𑀻𑀚𑀦𑁂𑀦 𑀫𑀼𑀔𑀁 𑀧𑀺𑀥𑀸𑀬 𑀦𑀺𑀤𑁆𑀤𑀸𑀬𑀦𑁆𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀮𑁂𑀲𑀓𑀧𑁆𑀧𑁂𑀦 𑀓𑀢𑀯𑀺𑀦𑀬𑁄 𑀦𑀸𑀫 𑀳𑀼𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀧𑀘𑁆𑀘𑀦𑁆𑀢𑀁 𑀕𑀘𑁆𑀙𑀢𑀺. 𑀢𑀢𑁆𑀭 𑀦𑀁 𑀫𑀦𑀼𑀲𑁆𑀲𑀸 𑀲𑀓𑁆𑀓𑀭𑀺𑀢𑁆𑀯𑀸 𑀪𑀺𑀓𑁆𑀔𑀼𑀤𑀲𑁆𑀲𑀦𑀲𑁆𑀲 𑀤𑀼𑀮𑁆𑀮𑀪𑀢𑀸𑀬 ‘‘𑀇𑀥𑁂𑀯, 𑀪𑀦𑁆𑀢𑁂, 𑀯𑀲𑀣𑀸’’𑀢𑀺 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀧𑀼𑀧𑁆𑀨𑀽𑀧𑀕𑀨𑀮𑀽𑀧𑀕𑀭𑀼𑀓𑁆𑀔𑁂 𑀭𑁄𑀧𑁂𑀢𑁆𑀯𑀸 𑀢𑀢𑁆𑀣 𑀯𑀸𑀲𑁂𑀦𑁆𑀢𑀺.

𑀅𑀣 𑀫𑀳𑀸𑀯𑀺𑀳𑀸𑀭𑀲𑀤𑀺𑀲𑀯𑀺𑀳𑀸𑀭𑀸 𑀩𑀳𑀼𑀲𑁆𑀲𑀼𑀢𑀸 𑀪𑀺𑀓𑁆𑀔𑀽, ‘‘𑀚𑀦𑀧𑀤𑁂 𑀘𑀻𑀯𑀭𑀭𑀚𑀦𑀸𑀤𑀻𑀦𑀺 𑀓𑀢𑁆𑀯𑀸 𑀆𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀢𑀢𑁆𑀣 𑀕𑀘𑁆𑀙𑀦𑁆𑀢𑀺. 𑀲𑁄 𑀢𑁂 𑀤𑀺𑀲𑁆𑀯𑀸, 𑀳𑀝𑁆𑀞𑀢𑀼𑀝𑁆𑀞𑁄 𑀯𑀢𑁆𑀢𑀧𑀝𑀺𑀯𑀢𑁆𑀢𑀁 𑀓𑀢𑁆𑀯𑀸, 𑀧𑀼𑀦𑀤𑀺𑀯𑀲𑁂 𑀆𑀤𑀸𑀬 𑀪𑀺𑀓𑁆𑀔𑀸𑀘𑀸𑀭𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸, ‘‘𑀅𑀲𑀼𑀓𑁄 𑀣𑁂𑀭𑁄 𑀲𑀼𑀢𑁆𑀢𑀦𑁆𑀢𑀺𑀓𑁄, 𑀅𑀲𑀼𑀓𑁄 𑀅𑀪𑀺𑀥𑀫𑁆𑀫𑀺𑀓𑁄, 𑀅𑀲𑀼𑀓𑁄 𑀯𑀺𑀦𑀬𑀥𑀭𑁄, 𑀅𑀲𑀼𑀓𑁄 𑀢𑁂𑀧𑀺𑀝𑀓𑁄, 𑀏𑀯𑀭𑀽𑀧𑁂 𑀣𑁂𑀭𑁂 𑀓𑀤𑀸 𑀮𑀪𑀺𑀲𑁆𑀲𑀣, 𑀥𑀫𑁆𑀫𑀲𑀯𑀦𑀁 𑀓𑀸𑀭𑁂𑀣𑀸’’𑀢𑀺 𑀯𑀤𑀢𑀺. 𑀉𑀧𑀸𑀲𑀓𑀸 ‘‘𑀥𑀫𑁆𑀫𑀲𑁆𑀲𑀯𑀦𑀁 𑀓𑀸𑀭𑁂𑀲𑁆𑀲𑀸𑀫𑀸’’𑀢𑀺 𑀯𑀺𑀳𑀸𑀭𑀫𑀕𑁆𑀕𑀁 𑀲𑁄𑀥𑁂𑀢𑁆𑀯𑀸, 𑀲𑀧𑁆𑀧𑀺𑀢𑁂𑀮𑀸𑀤𑀻𑀦𑀺 𑀆𑀤𑀸𑀬, 𑀫𑀳𑀸𑀣𑁂𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀥𑀫𑁆𑀫𑀲𑁆𑀲𑀯𑀦𑀁 𑀓𑀸𑀭𑁂𑀲𑁆𑀲𑀸𑀫, 𑀥𑀫𑁆𑀫𑀓𑀣𑀺𑀓𑀸𑀦𑀁 𑀯𑀺𑀘𑀸𑀭𑁂𑀣𑀸’’𑀢𑀺 𑀯𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀆𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺.

𑀦𑁂𑀯𑀸𑀲𑀺𑀓𑀢𑁆𑀣𑁂𑀭𑁄 𑀆𑀕𑀦𑁆𑀢𑀼𑀓𑀸𑀦𑀁 𑀧𑀢𑁆𑀢𑀘𑀻𑀯𑀭𑀸𑀦𑀺 𑀧𑀝𑀺𑀲𑀸𑀫𑁂𑀦𑁆𑀢𑁄 𑀅𑀦𑁆𑀢𑁄𑀕𑀩𑁆𑀪𑁂𑀬𑁂𑀯 𑀤𑀺𑀯𑀲𑀪𑀸𑀕𑀁 𑀯𑀻𑀢𑀺𑀦𑀸𑀫𑁂𑀢𑀺. 𑀤𑀺𑀯𑀸𑀓𑀣𑀺𑀓𑁄 𑀉𑀝𑁆𑀞𑀺𑀢𑁄 𑀲𑀭𑀪𑀸𑀡𑀓𑁄 𑀖𑀝𑁂𑀦 𑀉𑀤𑀓𑀁 𑀯𑀫𑁂𑀦𑁆𑀢𑁄 𑀯𑀺𑀬 𑀲𑀭𑀪𑀸𑀡𑀁 𑀪𑀡𑀺𑀢𑁆𑀯𑀸 𑀉𑀝𑁆𑀞𑀺𑀢𑁄, 𑀢𑀫𑁆𑀧𑀺 𑀲𑁄 𑀦 𑀚𑀸𑀦𑀸𑀢𑀺. 𑀭𑀢𑁆𑀢𑀺𑀓𑀣𑀺𑀓𑁄 𑀲𑀸𑀕𑀭𑀁 𑀔𑁄𑀪𑁂𑀦𑁆𑀢𑁄 𑀯𑀺𑀬 𑀭𑀢𑁆𑀢𑀺𑀁 𑀓𑀣𑁂𑀢𑁆𑀯𑀸 𑀉𑀝𑁆𑀞𑀺𑀢𑁄, 𑀢𑀫𑁆𑀧𑀺 𑀲𑁄 𑀦 𑀚𑀸𑀦𑀸𑀢𑀺. 𑀧𑀘𑁆𑀘𑀽𑀲𑀓𑀣𑀺𑀓𑁄 𑀓𑀣𑁂𑀢𑁆𑀯𑀸 𑀉𑀝𑁆𑀞𑀸𑀲𑀺, 𑀢𑀫𑁆𑀧𑀺 𑀲𑁄 𑀦 𑀚𑀸𑀦𑀸𑀢𑀺. 𑀧𑀸𑀢𑁄𑀯 𑀧𑀦 𑀉𑀝𑁆𑀞𑀸𑀬 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸, 𑀣𑁂𑀭𑀸𑀦𑀁 𑀧𑀢𑁆𑀢𑀘𑀻𑀯𑀭𑀸𑀦𑀺 𑀉𑀧𑀦𑀸𑀫𑁂𑀢𑁆𑀯𑀸, 𑀪𑀺𑀓𑁆𑀔𑀸𑀘𑀸𑀭𑀁 𑀉𑀧𑀕𑀘𑁆𑀙𑀦𑁆𑀢𑁄 𑀫𑀳𑀸𑀣𑁂𑀭𑀁 𑀆𑀳 𑁋 ‘‘𑀪𑀦𑁆𑀢𑁂, 𑀤𑀺𑀯𑀸𑀓𑀣𑀺𑀓𑁄 𑀓𑀢𑀭𑀁 𑀚𑀸𑀢𑀓𑀁 𑀦𑀸𑀫 𑀓𑀣𑁂𑀲𑀺, 𑀲𑀭𑀪𑀸𑀡𑀓𑁄 𑀓𑀢𑀭𑀁 𑀲𑀼𑀢𑁆𑀢𑀁 𑀦𑀸𑀫 𑀪𑀡𑀺, 𑀭𑀢𑁆𑀢𑀺𑀓𑀣𑀺𑀓𑁄 𑀓𑀢𑀭𑀁 𑀥𑀫𑁆𑀫𑀓𑀣𑀁 𑀦𑀸𑀫 𑀓𑀣𑁂𑀲𑀺, 𑀧𑀘𑁆𑀘𑀽𑀲𑀓𑀣𑀺𑀓𑁄 𑀓𑀢𑀭𑀁 𑀚𑀸𑀢𑀓𑀁 𑀦𑀸𑀫 𑀓𑀣𑁂𑀲𑀺, 𑀔𑀦𑁆𑀥𑀸 𑀦𑀸𑀫 𑀓𑀢𑀺, 𑀥𑀸𑀢𑀼𑀬𑁄 𑀦𑀸𑀫 𑀓𑀢𑀺, 𑀆𑀬𑀢𑀦𑀸 𑀦𑀸𑀫 𑀓𑀢𑀻’’𑀢𑀺. 𑀏𑀯𑀭𑀽𑀧𑁄 𑀏𑀓𑀁 𑀤𑁆𑀯𑁂 𑀲𑀁𑀯𑀘𑁆𑀙𑀭𑀸𑀦𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀪𑀺𑀓𑁆𑀔𑀼𑀤𑀲𑁆𑀲𑀦𑀜𑁆𑀘𑁂𑀯 𑀥𑀫𑁆𑀫𑀲𑁆𑀲𑀯𑀦𑀜𑁆𑀘 𑀮𑀪𑀦𑁆𑀢𑁄𑀧𑀺 𑀑𑀖𑁂 𑀆𑀕𑀢𑁂 𑀉𑀤𑀓𑁂𑀦 𑀲𑀓𑀺𑀁 𑀯𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀸 𑀢𑁂𑀫𑀺𑀢𑀭𑀼𑀓𑁆𑀔𑀲𑀤𑀺𑀲𑁄 𑀳𑁄𑀢𑀺. 𑀲𑁄 𑀏𑀯𑀁 𑀲𑀗𑁆𑀖𑀤𑀲𑁆𑀲𑀦𑀢𑁄 𑀘 𑀥𑀫𑁆𑀫𑀲𑁆𑀲𑀯𑀦𑀢𑁄 𑀘 𑀧𑀝𑀺𑀓𑁆𑀓𑀫𑁆𑀫 𑀤𑀽𑀭𑁂 𑀯𑀲𑀦𑁆𑀢𑁄 𑀅𑀭𑀺𑀬𑀫𑀕𑁆𑀕𑀁 𑀑𑀢𑀭𑀺𑀢𑁆𑀯𑀸 𑀲𑀫𑀸𑀥𑀺𑀓𑀼𑀮𑁆𑀮𑁂 𑀦𑀺𑀲𑀺𑀦𑁆𑀦𑁄 𑀦𑀺𑀩𑁆𑀩𑀸𑀦𑀲𑀸𑀕𑀭𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀫𑀚𑁆𑀛𑁂 𑀕𑀗𑁆𑀕𑀸𑀬 𑀤𑀻𑀧𑀓𑁂 𑀚𑀸𑀢𑁄 𑀫𑀼𑀤𑀼𑀭𑀼𑀓𑁆𑀔𑁄 𑀯𑀺𑀬 𑀫𑀥𑀼𑀭𑀲𑁆𑀲𑀭𑀪𑀸𑀡𑀓𑀧𑀼𑀕𑁆𑀕𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀳𑀺 𑀅𑀪𑀺𑀜𑁆𑀜𑀸𑀢𑀸𑀦𑀺 𑀅𑀪𑀺𑀜𑁆𑀜𑀸𑀢𑀸𑀦𑀺 𑀯𑁂𑀲𑁆𑀲𑀦𑁆𑀢𑀭𑀸𑀤𑀻𑀦𑀺 𑀚𑀸𑀢𑀓𑀸𑀦𑀺 𑀉𑀕𑁆𑀕𑀡𑁆𑀳𑀺𑀢𑁆𑀯𑀸, 𑀤𑀼𑀮𑁆𑀮𑀪𑀪𑀺𑀓𑁆𑀔𑀼𑀤𑀲𑁆𑀲𑀦𑀁 𑀧𑀘𑁆𑀘𑀦𑁆𑀢𑀁 𑀕𑀦𑁆𑀢𑁆𑀯𑀸, 𑀢𑀢𑁆𑀣 𑀥𑀫𑁆𑀫𑀓𑀣𑀸𑀬 𑀧𑀲𑀸𑀤𑀺𑀢𑀳𑀤𑀬𑁂𑀦 𑀚𑀦𑁂𑀦 𑀉𑀧𑀝𑁆𑀞𑀺𑀬𑀫𑀸𑀦𑁄 𑀅𑀢𑁆𑀢𑀸𑀦𑀁 𑀉𑀤𑁆𑀤𑀺𑀲𑁆𑀲 𑀓𑀢𑁂 𑀲𑀫𑁆𑀧𑀦𑁆𑀦𑀧𑀼𑀧𑁆𑀨𑀨𑀮𑀭𑀼𑀓𑁆𑀔𑁂 𑀦𑀦𑁆𑀤𑀦𑀯𑀦𑀸𑀪𑀺𑀭𑀸𑀫𑁂 𑀯𑀺𑀳𑀸𑀭𑁂 𑀯𑀲𑀢𑀺. 𑀅𑀣𑀲𑁆𑀲 𑀪𑀸𑀭𑀳𑀸𑀭𑀪𑀺𑀓𑁆𑀔𑀽 𑀢𑀁 𑀧𑀯𑀢𑁆𑀢𑀺𑀁 𑀲𑀼𑀢𑁆𑀯𑀸, ‘‘𑀅𑀲𑀼𑀓𑁄 𑀓𑀺𑀭 𑀏𑀯𑀁 𑀉𑀧𑀝𑁆𑀞𑀸𑀓𑁂𑀲𑀼 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑁄 𑀯𑀺𑀳𑀭𑀢𑀺. 𑀧𑀡𑁆𑀟𑀺𑀢𑁄 𑀪𑀺𑀓𑁆𑀔𑀼 𑀧𑀝𑀺𑀩𑀮𑁄 𑀩𑀼𑀤𑁆𑀥𑀯𑀘𑀦𑀁 𑀯𑀸 𑀉𑀕𑁆𑀕𑀡𑁆𑀳𑀺𑀢𑀼𑀁, 𑀓𑀫𑁆𑀫𑀝𑁆𑀞𑀸𑀦𑀁 𑀯𑀸 𑀫𑀦𑀲𑀺𑀓𑀸𑀢𑀼𑀁, 𑀆𑀦𑁂𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀅𑀲𑀼𑀓𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀉𑀕𑁆𑀕𑀡𑁆𑀳𑀺𑀲𑁆𑀲𑀸𑀫, 𑀅𑀲𑀼𑀓𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦’’𑀦𑁆𑀢𑀺 𑀢𑀢𑁆𑀣 𑀕𑀘𑁆𑀙𑀦𑁆𑀢𑀺.

𑀲𑁄 𑀢𑁂𑀲𑀁 𑀯𑀢𑁆𑀢𑀁 𑀓𑀢𑁆𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀯𑀺𑀳𑀸𑀭𑀘𑀸𑀭𑀺𑀓𑀁 𑀦𑀺𑀓𑁆𑀔𑀦𑁆𑀢𑁂𑀳𑀺 𑀢𑁂𑀳𑀺 ‘‘𑀇𑀫𑀁, 𑀆𑀯𑀼𑀲𑁄, 𑀘𑁂𑀢𑀺𑀬𑀁 𑀢𑀬𑀸 𑀓𑀸𑀭𑀺𑀢’’𑀦𑁆𑀢𑀺 𑀧𑀼𑀝𑁆𑀞𑁄, ‘‘𑀆𑀫, 𑀪𑀦𑁆𑀢𑁂’’𑀢𑀺 𑀯𑀤𑀢𑀺. ‘‘𑀅𑀬𑀁 𑀩𑁄𑀥𑀺, 𑀅𑀬𑀁 𑀫𑀡𑁆𑀟𑀧𑁄, 𑀇𑀤𑀁 𑀉𑀧𑁄𑀲𑀣𑀸𑀕𑀸𑀭𑀁, 𑀏𑀲𑀸 𑀅𑀕𑁆𑀕𑀺𑀲𑀸𑀮𑀸, 𑀅𑀬𑀁 𑀘𑀗𑁆𑀓𑀫𑁄 𑀢𑀬𑀸 𑀓𑀸𑀭𑀺𑀢𑁄. 𑀇𑀫𑁂 𑀭𑀼𑀓𑁆𑀔𑁂 𑀭𑁄𑀧𑀸𑀧𑁂𑀢𑁆𑀯𑀸 𑀢𑀬𑀸 𑀦𑀦𑁆𑀤𑀦𑀯𑀦𑀸𑀪𑀺𑀭𑀸𑀫𑁄 𑀯𑀺𑀳𑀸𑀭𑁄 𑀓𑀸𑀭𑀺𑀢𑁄’’𑀢𑀺. ‘‘𑀆𑀫, 𑀪𑀦𑁆𑀢𑁂’’𑀢𑀺, 𑀯𑀤𑀢𑀺.

𑀲𑁄 𑀲𑀸𑀬𑀁 𑀣𑁂𑀭𑀼𑀧𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀼𑀘𑁆𑀙𑀢𑀺 𑁋 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀆𑀕𑀢𑀢𑁆𑀣𑀸’’𑀢𑀺? ‘‘𑀆𑀯𑀼𑀲𑁄, 𑀢𑀁 𑀆𑀤𑀸𑀬 𑀕𑀦𑁆𑀢𑁆𑀯𑀸, 𑀅𑀲𑀼𑀓𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸, 𑀅𑀲𑀼𑀓𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁, 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀅𑀭𑀜𑁆𑀜𑁂 𑀲𑀫𑀕𑁆𑀕𑀸 𑀲𑀫𑀡𑀥𑀫𑁆𑀫𑀁 𑀓𑀭𑀺𑀲𑁆𑀲𑀸𑀫𑀸𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀆𑀕𑀢𑀫𑁆𑀳𑀸’’𑀢𑀺. 𑀲𑀸𑀥𑀼, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀦𑀸𑀫 𑀫𑀬𑁆𑀳𑀁 𑀅𑀢𑁆𑀣𑀸𑀬 𑀆𑀕𑀢𑀸, 𑀅𑀳𑀫𑁆𑀧𑀺 𑀘𑀺𑀭𑀦𑀺𑀯𑀸𑀲𑁂𑀦 𑀇𑀥 𑀉𑀓𑁆𑀓𑀡𑁆𑀞𑀺𑀢𑁄 𑀕𑀘𑁆𑀙𑀸𑀫𑀺, 𑀧𑀢𑁆𑀢𑀘𑀻𑀯𑀭𑀁 𑀕𑀡𑁆𑀳𑀸𑀫𑀺, 𑀪𑀦𑁆𑀢𑁂𑀢𑀺. 𑀆𑀯𑀼𑀲𑁄, 𑀲𑀸𑀫𑀡𑁂𑀭𑀤𑀳𑀭𑀸 𑀫𑀕𑁆𑀕𑀓𑀺𑀮𑀦𑁆𑀢𑀸, 𑀅𑀚𑁆𑀚 𑀯𑀲𑀺𑀢𑁆𑀯𑀸 𑀲𑁆𑀯𑁂 𑀧𑀘𑁆𑀙𑀸𑀪𑀢𑁆𑀢𑀁 𑀕𑀫𑀺𑀲𑁆𑀲𑀸𑀫𑀸𑀢𑀺. 𑀲𑀸𑀥𑀼, 𑀪𑀦𑁆𑀢𑁂𑀢𑀺 𑀧𑀼𑀦𑀤𑀺𑀯𑀲𑁂 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺. 𑀕𑀸𑀫𑀯𑀸𑀲𑀺𑀦𑁄 ‘‘𑀅𑀫𑁆𑀳𑀸𑀓𑀁 𑀅𑀬𑁆𑀬𑁄 𑀩𑀳𑀽 𑀆𑀕𑀦𑁆𑀢𑀼𑀓𑁂 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀆𑀕𑀢𑁄’’𑀢𑀺 𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀬𑀸𑀕𑀼𑀁 𑀧𑀸𑀬𑁂𑀢𑁆𑀯𑀸 𑀲𑀼𑀔𑀦𑀺𑀲𑀺𑀦𑁆𑀦𑀓𑀣𑀁 𑀲𑀼𑀢𑁆𑀯𑀸 𑀪𑀢𑁆𑀢𑀁 𑀅𑀤𑀁𑀲𑀼. 𑀣𑁂𑀭𑀸 ‘‘𑀢𑁆𑀯𑀁, 𑀆𑀯𑀼𑀲𑁄, 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀦𑀺𑀓𑁆𑀔𑀫, 𑀫𑀬𑀁 𑀉𑀤𑀓𑀨𑀸𑀲𑀼𑀓𑀝𑁆𑀞𑀸𑀦𑁂 𑀪𑀢𑁆𑀢𑀓𑀺𑀘𑁆𑀘𑀁 𑀓𑀭𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀓𑁆𑀔𑀦𑁆𑀢𑀸.

𑀕𑀸𑀫𑀯𑀸𑀲𑀺𑀦𑁄 𑀅𑀦𑀼𑀫𑁄𑀤𑀦𑀁 𑀲𑀼𑀢𑁆𑀯𑀸 𑀧𑀼𑀘𑁆𑀙𑀺𑀁𑀲𑀼, ‘‘𑀓𑀼𑀢𑁄, 𑀪𑀦𑁆𑀢𑁂, 𑀣𑁂𑀭𑀸 𑀆𑀕𑀢𑀸’’𑀢𑀺? 𑀏𑀢𑁂 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸 𑀲𑀫𑀸𑀦𑀼𑀧𑀚𑁆𑀛𑀸𑀬𑀸 𑀲𑀦𑁆𑀤𑀺𑀝𑁆𑀞𑀸 𑀲𑀫𑁆𑀪𑀢𑁆𑀢𑀸𑀢𑀺. 𑀓𑀲𑁆𑀫𑀸 𑀆𑀕𑀢𑀸𑀢𑀺? 𑀫𑀁 𑀕𑀳𑁂𑀢𑁆𑀯𑀸 𑀕𑀦𑁆𑀢𑀼𑀓𑀸𑀫𑀢𑀸𑀬𑀸𑀢𑀺. 𑀢𑀼𑀫𑁆𑀳𑁂 𑀧𑀦 𑀕𑀦𑁆𑀢𑀼𑀓𑀸𑀫𑀸𑀢𑀺? 𑀆𑀫𑀸𑀯𑀼𑀲𑁄𑀢𑀺. 𑀓𑀺𑀁 𑀯𑀤𑁂𑀣, 𑀪𑀦𑁆𑀢𑁂, 𑀅𑀫𑁆𑀳𑁂𑀳𑀺 𑀓𑀲𑁆𑀲 𑀉𑀧𑁄𑀲𑀣𑀸𑀕𑀸𑀭𑀁 𑀓𑀸𑀭𑀺𑀢𑀁, 𑀓𑀲𑁆𑀲 𑀪𑁄𑀚𑀦𑀲𑀸𑀮𑀸, 𑀓𑀲𑁆𑀲 𑀅𑀕𑁆𑀕𑀺𑀲𑀸𑀮𑀸𑀤𑀬𑁄 𑀓𑀸𑀭𑀺𑀢𑀸, 𑀫𑀬𑀁 𑀫𑀗𑁆𑀕𑀮𑀸𑀫𑀗𑁆𑀕𑀮𑁂𑀲𑀼 𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫𑀸𑀢𑀺? 𑀫𑀳𑀸𑀉𑀧𑀸𑀲𑀺𑀓𑀸𑀬𑁄𑀧𑀺 𑀢𑀢𑁆𑀣𑁂𑀯 𑀦𑀺𑀲𑀻𑀤𑀺𑀢𑁆𑀯𑀸 𑀅𑀲𑁆𑀲𑀽𑀦𑀺 𑀧𑀯𑀢𑁆𑀢𑀬𑀺𑀁𑀲𑀼. 𑀤𑀳𑀭𑁄 ‘‘𑀢𑀼𑀫𑁆𑀳𑁂𑀲𑀼 𑀏𑀯𑀁 𑀤𑀼𑀓𑁆𑀔𑀺𑀢𑁂𑀲𑀼 𑀅𑀳𑀁 𑀕𑀦𑁆𑀢𑁆𑀯𑀸 𑀓𑀺𑀁 𑀓𑀭𑀺𑀲𑁆𑀲𑀸𑀫𑀺? 𑀣𑁂𑀭𑁂 𑀉𑀬𑁆𑀬𑁄𑀚𑁂𑀲𑁆𑀲𑀸𑀫𑀻’’𑀢𑀺 𑀯𑀺𑀳𑀸𑀭𑀁 𑀕𑀢𑁄.

𑀣𑁂𑀭𑀸𑀧𑀺 𑀓𑀢𑀪𑀢𑁆𑀢𑀓𑀺𑀘𑁆𑀘𑀸 𑀧𑀢𑁆𑀢𑀘𑀻𑀯𑀭𑀸𑀦𑀺 𑀕𑀳𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸 𑀢𑀁 𑀤𑀺𑀲𑁆𑀯𑀸𑀯, ‘‘𑀓𑀺𑀁, 𑀆𑀯𑀼𑀲𑁄, 𑀘𑀺𑀭𑀸𑀬𑀲𑀺, 𑀤𑀺𑀯𑀸 𑀳𑁄𑀢𑀺, 𑀕𑀘𑁆𑀙𑀸𑀫𑀸’’𑀢𑀺 𑀆𑀳𑀁𑀲𑀼. 𑀆𑀫, 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀲𑀼𑀔𑀺𑀢𑀸, 𑀅𑀲𑀼𑀓𑀕𑁂𑀳𑀲𑁆𑀲 𑀇𑀝𑁆𑀞𑀓𑀸𑀫𑀽𑀮𑀁 𑀞𑀺𑀢𑀲𑀡𑁆𑀞𑀸𑀦𑁂𑀦𑁂𑀯 𑀞𑀺𑀢𑀁, 𑀅𑀲𑀼𑀓𑀕𑁂𑀳𑀸𑀤𑀻𑀦𑀁 𑀘𑀺𑀢𑁆𑀢𑀓𑀫𑁆𑀫𑀫𑀽𑀮𑀸𑀤𑀻𑀦𑀺 𑀅𑀢𑁆𑀣𑀺, 𑀕𑀢𑀲𑁆𑀲𑀸𑀧𑀺 𑀫𑁂 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑁄 𑀪𑀯𑀺𑀲𑁆𑀲𑀢𑀺, 𑀢𑀼𑀫𑁆𑀳𑁂 𑀧𑀼𑀭𑀢𑁄 𑀕𑀦𑁆𑀢𑁆𑀯𑀸 𑀅𑀲𑀼𑀓𑀯𑀺𑀳𑀸𑀭𑁂 𑀘𑀻𑀯𑀭𑀥𑁄𑀯𑀦𑀭𑀚𑀦𑀸𑀤𑀻𑀦𑀺 𑀓𑀭𑁄𑀣, 𑀅𑀳𑀁 𑀢𑀢𑁆𑀣 𑀲𑀫𑁆𑀧𑀸𑀧𑀼𑀡𑀺𑀲𑁆𑀲𑀸𑀫𑀻𑀢𑀺. 𑀢𑁂 𑀢𑀲𑁆𑀲 𑀑𑀲𑀓𑁆𑀓𑀺𑀢𑀼𑀓𑀸𑀫𑀢𑀁 𑀜𑀢𑁆𑀯𑀸 𑀢𑁆𑀯𑀁 𑀧𑀘𑁆𑀙𑀸 𑀆𑀕𑀘𑁆𑀙𑁂𑀬𑁆𑀬𑀸𑀲𑀻𑀢𑀺 𑀧𑀓𑁆𑀓𑀫𑀺𑀁𑀲𑀼.

𑀲𑁄 𑀣𑁂𑀭𑁂 𑀅𑀦𑀼𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑁄 𑀯𑀺𑀳𑀸𑀭𑀫𑁂𑀯 𑀆𑀕𑀦𑁆𑀢𑁆𑀯𑀸 𑀪𑁄𑀚𑀦𑀲𑀸𑀮𑀸𑀤𑀻𑀦𑀺 𑀑𑀮𑁄𑀓𑁂𑀦𑁆𑀢𑁄 𑀯𑀺𑀳𑀸𑀭𑀁 𑀭𑀸𑀫𑀡𑁂𑀬𑁆𑀬𑀓𑀁 𑀤𑀺𑀲𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀸𑀥𑀼 𑀯𑀢𑀫𑁆𑀳𑀺 𑀦 𑀕𑀢𑁄. 𑀲𑀘𑁂 𑀅𑀕𑀫𑀺𑀲𑁆𑀲𑀁, 𑀓𑁄𑀘𑀺, 𑀤𑁂𑀯, 𑀥𑀫𑁆𑀫𑀓𑀣𑀺𑀓𑁄 𑀆𑀕𑀦𑁆𑀢𑁆𑀯𑀸, 𑀲𑀩𑁆𑀩𑁂𑀲𑀁 𑀫𑀦𑀁 𑀪𑀺𑀦𑁆𑀤𑀺𑀢𑁆𑀯𑀸, 𑀯𑀺𑀳𑀸𑀭𑀁 𑀅𑀢𑁆𑀢𑀦𑁄 𑀦𑀺𑀓𑀸𑀬𑀲𑀦𑁆𑀢𑀓𑀁 𑀓𑀭𑁂𑀬𑁆𑀬, 𑀅𑀣 𑀫𑀬𑀸 𑀧𑀘𑁆𑀙𑀸 𑀆𑀕𑀦𑁆𑀢𑁆𑀯𑀸 𑀏𑀢𑀲𑁆𑀲 𑀧𑀘𑁆𑀙𑀢𑁄 𑀮𑀤𑁆𑀥𑀧𑀺𑀡𑁆𑀟𑀁 𑀪𑀼𑀜𑁆𑀚𑀦𑁆𑀢𑁂𑀦 𑀘𑀭𑀺𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀻’’𑀢𑀺.

𑀲𑁄 𑀅𑀧𑀭𑁂𑀦 𑀲𑀫𑀬𑁂𑀦 𑀲𑀼𑀡𑀸𑀢𑀺, ‘‘𑀢𑁂 𑀓𑀺𑀭 𑀪𑀺𑀓𑁆𑀔𑀽 𑀕𑀢𑀝𑁆𑀞𑀸𑀦𑁂 𑀏𑀓𑀦𑀺𑀓𑀸𑀬𑀤𑁆𑀯𑁂𑀦𑀺𑀓𑀸𑀬𑀏𑀓𑀧𑀺𑀝𑀓𑀤𑁆𑀯𑁂𑀧𑀺𑀝𑀓𑀸𑀤𑀺𑀯𑀲𑁂𑀦 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀚𑀸𑀢𑀸 𑀯𑀺𑀦𑀬𑀥𑀭𑀸 𑀚𑀸𑀢𑀸 𑀲𑀢𑀧𑀭𑀺𑀯𑀸𑀭𑀸𑀧𑀺 𑀲𑀳𑀲𑁆𑀲𑀧𑀭𑀺𑀯𑀸𑀭𑀸𑀧𑀺 𑀘𑀭𑀦𑁆𑀢𑀺. 𑀬𑁂 𑀧𑀦𑁂𑀢𑁆𑀣 𑀲𑀫𑀡𑀥𑀫𑁆𑀫𑀁 𑀓𑀸𑀢𑀼𑀁 𑀕𑀢𑀸, 𑀢𑁂 𑀖𑀝𑁂𑀦𑁆𑀢𑀸 𑀯𑀸𑀬𑀫𑀦𑁆𑀢𑀸 𑀲𑁄𑀢𑀸𑀧𑀦𑁆𑀦𑀸 𑀚𑀸𑀢𑀸, 𑀲𑀓𑀤𑀸𑀕𑀸𑀫𑀺𑀦𑁄 𑀅𑀦𑀸𑀕𑀸𑀫𑀺𑀦𑁄 𑀅𑀭𑀳𑀦𑁆𑀢𑁄 𑀚𑀸𑀢𑀸, 𑀫𑀳𑀸𑀲𑀓𑁆𑀓𑀸𑀭𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑀸’’𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀘𑁂 𑀅𑀳𑀫𑁆𑀧𑀺 𑀅𑀕𑀫𑀺𑀲𑁆𑀲𑀁, 𑀫𑀬𑁆𑀳𑀫𑁆𑀧𑁂𑀲𑀸 𑀲𑀫𑁆𑀧𑀢𑁆𑀢𑀺 𑀅𑀪𑀯𑀺𑀲𑁆𑀲, 𑀇𑀫𑀁 𑀧𑀦 𑀞𑀸𑀦𑀁 𑀫𑀼𑀜𑁆𑀘𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀢𑀺𑀯𑀺𑀬 𑀧𑀭𑀺𑀳𑀻𑀦𑀫𑁆𑀳𑀻’’𑀢𑀺. 𑀅𑀬𑀁 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁄 𑀫𑀼𑀤𑀼𑀢𑀸𑀬 𑀢𑀁 𑀞𑀸𑀦𑀁 𑀅𑀫𑀼𑀜𑁆𑀘𑀦𑁆𑀢𑁄 𑀅𑀭𑀺𑀬𑀫𑀕𑁆𑀕𑀁 𑀑𑀢𑀭𑀺𑀢𑁆𑀯𑀸 𑀲𑀫𑀸𑀥𑀺𑀓𑀼𑀮𑁆𑀮𑁂 𑀦𑀺𑀲𑀺𑀦𑁆𑀦𑁄 𑀦𑀺𑀩𑁆𑀩𑀸𑀦𑀲𑀸𑀕𑀭𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀕𑀗𑁆𑀕𑀸𑀬 𑀦𑀤𑀺𑀬𑀸 𑀢𑀺𑀭𑀺𑀬𑀁 𑀧𑀢𑀺𑀢𑁆𑀯𑀸, 𑀯𑀸𑀮𑀺𑀓𑀸𑀬 𑀑𑀢𑁆𑀣𑀝𑀪𑀸𑀯𑁂𑀦 𑀅𑀦𑁆𑀢𑀭𑀲𑁂𑀢𑀼 𑀯𑀺𑀬 𑀳𑀼𑀢𑁆𑀯𑀸, 𑀩𑀳𑀽𑀦𑀁 𑀧𑀘𑁆𑀘𑀬𑁄 𑀚𑀸𑀢𑀭𑀼𑀓𑁆𑀔𑁄 𑀯𑀺𑀬 𑀭𑀣𑀯𑀺𑀦𑀻𑀢𑀫𑀳𑀸𑀅𑀭𑀺𑀬𑀯𑀁𑀲𑀘𑀦𑁆𑀤𑁄𑀧𑀫𑀸𑀤𑀺𑀧𑀝𑀺𑀧𑀤𑀸𑀲𑀼 𑀅𑀜𑁆𑀜𑀢𑀭𑀁 𑀧𑀝𑀺𑀧𑀤𑀁 𑀉𑀕𑁆𑀕𑀳𑁂𑀢𑁆𑀯𑀸 𑀞𑀺𑀢𑁄 𑀑𑀮𑀻𑀦𑀯𑀼𑀢𑁆𑀢𑀺𑀓𑁄 𑀧𑀼𑀕𑁆𑀕𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀳𑀺 𑀢𑀁 𑀧𑀝𑀺𑀧𑀢𑁆𑀢𑀺𑀦𑀺𑀲𑁆𑀲𑀺𑀢𑀁 𑀥𑀫𑁆𑀫𑀁 𑀉𑀕𑁆𑀕𑀳𑁂𑀢𑁆𑀯𑀸 𑀧𑀓𑀢𑀺𑀬𑀸 𑀫𑀜𑁆𑀚𑀼𑀲𑁆𑀲𑀭𑁄 𑀘𑀺𑀢𑁆𑀢𑀮𑀧𑀩𑁆𑀩𑀢𑀸𑀤𑀺𑀲𑀤𑀺𑀲𑀁 𑀫𑀳𑀦𑁆𑀢𑀁 𑀞𑀸𑀦𑀁 𑀕𑀦𑁆𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑀯𑀢𑁆𑀢𑀸𑀤𑀻𑀦𑀺 𑀓𑀭𑁄𑀢𑀺. 𑀅𑀣 𑀦𑀁 𑀥𑀫𑁆𑀫𑀲𑁆𑀲𑀯𑀦𑀕𑁆𑀕𑀁 𑀧𑀢𑁆𑀢𑀁 𑀆𑀕𑀦𑁆𑀢𑀼𑀓𑀸 𑀤𑀳𑀭𑀸 ‘‘𑀥𑀫𑁆𑀫𑀁 𑀓𑀣𑁂𑀳𑀻’’𑀢𑀺 𑀯𑀤𑀦𑁆𑀢𑀺. 𑀲𑁄 𑀲𑀫𑁆𑀫𑀸 𑀉𑀕𑁆𑀕𑀳𑀺𑀢𑀁 𑀥𑀫𑁆𑀫𑀁 𑀧𑀝𑀺𑀧𑀤𑀁 𑀤𑀻𑀧𑁂𑀢𑁆𑀯𑀸 𑀓𑀣𑁂𑀢𑀺. 𑀅𑀣𑀲𑁆𑀲 𑀧𑀁𑀲𑀼𑀓𑀽𑀮𑀺𑀓𑀧𑀺𑀡𑁆𑀟𑀧𑀸𑀢𑀺𑀓𑀸𑀤𑀬𑁄 𑀲𑀩𑁆𑀩𑁂 𑀣𑁂𑀭𑀦𑀯𑀫𑀚𑁆𑀛𑀺𑀫𑀸 𑀪𑀺𑀓𑁆𑀔𑀽 ‘‘𑀅𑀳𑁄 𑀲𑀧𑁆𑀧𑀼𑀭𑀺𑀲𑁄’’𑀢𑀺 𑀅𑀢𑁆𑀢𑀫𑀦𑀸 𑀪𑀯𑀦𑁆𑀢𑀺.

𑀲𑁄 𑀓𑀲𑁆𑀲𑀘𑀺 𑀦𑀺𑀤𑀸𑀦𑀫𑀢𑁆𑀢𑀁, 𑀓𑀲𑁆𑀲𑀘𑀺 𑀉𑀧𑀟𑁆𑀠𑀕𑀸𑀣𑀁, 𑀓𑀲𑁆𑀲𑀘𑀺 𑀕𑀸𑀣𑀁 𑀉𑀧𑀝𑁆𑀞𑀸𑀧𑁂𑀦𑁆𑀢𑁄 𑀅𑀬𑀧𑀝𑁆𑀝𑀓𑁂𑀦 𑀆𑀩𑀦𑁆𑀥𑀦𑁆𑀢𑁄 𑀯𑀺𑀬 𑀤𑀳𑀭𑀲𑀸𑀫𑀡𑁂𑀭𑁂 𑀲𑀗𑁆𑀕𑀡𑁆𑀳𑀺𑀢𑁆𑀯𑀸 𑀫𑀳𑀸𑀣𑁂𑀭𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀪𑀦𑁆𑀢𑁂, 𑀅𑀬𑀁 𑀧𑁄𑀭𑀸𑀡𑀓𑀯𑀺𑀳𑀸𑀭𑁄 𑀅𑀢𑁆𑀣𑀺, 𑀏𑀢𑁆𑀣 𑀓𑁄𑀘𑀺 𑀢𑀢𑁆𑀭𑀼𑀧𑁆𑀧𑀸𑀤𑁄’’𑀢𑀺?, 𑀧𑀼𑀘𑁆𑀙𑀢𑀺. 𑀣𑁂𑀭𑀸 𑁋 ‘‘𑀓𑀺𑀁 𑀯𑀤𑁂𑀲𑀺, 𑀆𑀯𑀼𑀲𑁄, 𑀘𑀢𑀼𑀯𑀻𑀲𑀢𑀺 𑀓𑀭𑀻𑀲𑀲𑀳𑀲𑁆𑀲𑀸𑀦𑀺 𑀢𑀢𑁆𑀭𑀼𑀧𑁆𑀧𑀸𑀤𑁄’’𑀢𑀺. 𑀪𑀦𑁆𑀢𑁂, 𑀢𑀼𑀫𑁆𑀳𑁂 𑀏𑀯𑀁 𑀯𑀤𑁂𑀣, 𑀉𑀤𑁆𑀥𑀦𑁂 𑀧𑀦 𑀅𑀕𑁆𑀕𑀺𑀧𑀺 𑀦 𑀚𑀮𑀢𑀻𑀢𑀺. 𑀆𑀯𑀼𑀲𑁄, 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀳𑀺 𑀮𑀤𑁆𑀥𑀸 𑀦𑀸𑀫 𑀏𑀯𑀫𑁂𑀯 𑀦𑀲𑁆𑀲𑀦𑁆𑀢𑀺, 𑀦 𑀓𑁄𑀘𑀺 𑀲𑀡𑁆𑀞𑀧𑁂𑀢𑀻𑀢𑀺. 𑀪𑀦𑁆𑀢𑁂, 𑀧𑁄𑀭𑀸𑀡𑀓𑀭𑀸𑀚𑀽𑀳𑀺 𑀤𑀺𑀦𑁆𑀦𑀁 𑀔𑀻𑀡𑀸𑀲𑀯𑁂𑀳𑀺 𑀧𑀝𑀺𑀕𑁆𑀕𑀳𑀺𑀢𑀁 𑀓𑀲𑁆𑀫𑀸 𑀏𑀢𑁂 𑀦𑀸𑀲𑁂𑀦𑁆𑀢𑀻𑀢𑀺? 𑀆𑀯𑀼𑀲𑁄, 𑀢𑀸𑀤𑀺𑀲𑁂𑀦 𑀥𑀫𑁆𑀫𑀓𑀣𑀺𑀓𑁂𑀦 𑀲𑀓𑁆𑀓𑀸 𑀪𑀯𑁂𑀬𑁆𑀬 𑀮𑀤𑁆𑀥𑀼𑀦𑁆𑀢𑀺. 𑀪𑀦𑁆𑀢𑁂, 𑀫𑀸 𑀏𑀯𑀁 𑀯𑀤𑁂𑀣, 𑀅𑀫𑁆𑀳𑁂 𑀧𑀝𑀺𑀧𑀢𑁆𑀢𑀺𑀤𑀻𑀧𑀓𑀥𑀫𑁆𑀫𑀓𑀣𑀺𑀓𑀸 𑀦𑀸𑀫, 𑀢𑀼𑀫𑁆𑀳𑁂 𑀫𑀁 ‘‘𑀲𑀗𑁆𑀖𑀓𑀼𑀝𑀼𑀫𑁆𑀩𑀺𑀓𑁄 𑀯𑀺𑀳𑀸𑀭𑀼𑀧𑀝𑁆𑀞𑀸𑀓𑁄’’𑀢𑀺 𑀫𑀜𑁆𑀜𑀫𑀸𑀦𑀸 𑀓𑀸𑀢𑀼𑀓𑀸𑀫𑀸𑀢𑀺. 𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀅𑀓𑀧𑁆𑀧𑀺𑀬𑀫𑁂𑀢𑀁, 𑀢𑀼𑀫𑁆𑀳𑀸𑀤𑀺𑀲𑁂𑀳𑀺 𑀧𑀦 𑀓𑀣𑀺𑀢𑁂 𑀅𑀫𑁆𑀳𑀸𑀓𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺? 𑀢𑁂𑀦 𑀳𑀺, 𑀪𑀦𑁆𑀢𑁂, 𑀆𑀭𑀸𑀫𑀺𑀓𑁂𑀲𑀼 𑀆𑀕𑀢𑁂𑀲𑀼 𑀅𑀫𑁆𑀳𑀸𑀓𑀁 𑀪𑀸𑀭𑀁 𑀓𑀭𑁄𑀣, 𑀏𑀓𑀁 𑀓𑀧𑁆𑀧𑀺𑀬𑀤𑁆𑀯𑀸𑀭𑀁 𑀓𑀣𑁂𑀲𑁆𑀲𑀸𑀫𑀸𑀢𑀺.

𑀲𑁄 𑀧𑀸𑀢𑁄𑀯 𑀕𑀦𑁆𑀢𑁆𑀯𑀸, 𑀲𑀦𑁆𑀦𑀺𑀧𑀸𑀢𑀲𑀸𑀮𑀸𑀬𑀁 𑀞𑀢𑁆𑀯𑀸, 𑀆𑀭𑀸𑀫𑀺𑀓𑁂𑀲𑀼 𑀆𑀕𑀢𑁂𑀲𑀼 ‘‘𑀉𑀧𑀸𑀲𑀓𑀸 𑀅𑀲𑀼𑀓𑀔𑁂𑀢𑁆𑀢𑁂 𑀪𑀸𑀕𑁄 𑀓𑀼𑀳𑀺𑀁, 𑀅𑀲𑀼𑀓𑀔𑁂𑀢𑁆𑀢𑁂 𑀓𑀳𑀸𑀧𑀡𑀁 𑀓𑀼𑀳𑀺’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸, 𑀅𑀜𑁆𑀜𑀲𑁆𑀲 𑀔𑁂𑀢𑁆𑀢𑀁 𑀕𑀳𑁂𑀢𑁆𑀯𑀸, 𑀅𑀜𑁆𑀜𑀲𑁆𑀲 𑀤𑁂𑀢𑀺. 𑀏𑀯𑀁 𑀅𑀦𑀼𑀓𑁆𑀓𑀫𑁂𑀦 𑀢𑀁 𑀢𑀁 𑀧𑀝𑀺𑀲𑁂𑀥𑁂𑀦𑁆𑀢𑁄 𑀢𑀲𑁆𑀲 𑀢𑀲𑁆𑀲 𑀤𑁂𑀦𑁆𑀢𑁄 𑀢𑀣𑀸 𑀅𑀓𑀸𑀲𑀺, 𑀬𑀣𑀸 𑀬𑀸𑀕𑀼𑀳𑀢𑁆𑀣𑀸 𑀧𑀽𑀯𑀳𑀢𑁆𑀣𑀸 𑀪𑀢𑁆𑀢𑀳𑀢𑁆𑀣𑀸 𑀢𑁂𑀮𑀫𑀥𑀼𑀨𑀸𑀡𑀺𑀢𑀖𑀢𑀸𑀤𑀺𑀳𑀢𑁆𑀣𑀸 𑀘 𑀅𑀢𑁆𑀢𑀦𑁄𑀯 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙𑀦𑁆𑀢𑀺. 𑀲𑀓𑀮𑀯𑀺𑀳𑀸𑀭𑁄 𑀏𑀓𑀓𑁄𑀮𑀸𑀳𑀮𑁄 𑀳𑁄𑀢𑀺, 𑀧𑁂𑀲𑀮𑀸 𑀪𑀺𑀓𑁆𑀔𑀽 𑀦𑀺𑀩𑁆𑀩𑀺𑀚𑁆𑀚 𑀅𑀧𑀓𑁆𑀓𑀫𑀺𑀁𑀲𑀼.

𑀲𑁄𑀧𑀺 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀯𑀺𑀲𑁆𑀲𑀝𑁆𑀞𑀓𑀸𑀦𑀁 𑀩𑀳𑀽𑀦𑀁 𑀤𑀼𑀩𑁆𑀩𑀘𑀧𑀼𑀕𑁆𑀕𑀮𑀸𑀦𑀁 𑀉𑀧𑀚𑁆𑀛𑀁 𑀤𑁂𑀦𑁆𑀢𑁄 𑀯𑀺𑀳𑀸𑀭𑀁 𑀧𑀽𑀭𑁂𑀢𑀺. 𑀆𑀕𑀦𑁆𑀢𑀼𑀓𑀸 𑀪𑀺𑀓𑁆𑀔𑀽 𑀯𑀺𑀳𑀸𑀭𑀤𑁆𑀯𑀸𑀭𑁂 𑀞𑀢𑁆𑀯𑀸𑀯 ‘‘𑀯𑀺𑀳𑀸𑀭𑁂 𑀓𑁂 𑀯𑀲𑀦𑁆𑀢𑀻’’𑀢𑀺, 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀏𑀯𑀭𑀽𑀧𑀸 𑀦𑀸𑀫 𑀪𑀺𑀓𑁆𑀔𑀽’’𑀢𑀺 𑀲𑀼𑀢𑁆𑀯𑀸 𑀩𑀸𑀳𑀺𑀭𑁂𑀦𑁂𑀯 𑀧𑀓𑁆𑀓𑀫𑀦𑁆𑀢𑀺. 𑀅𑀬𑀁 𑀧𑀼𑀕𑁆𑀕𑀮𑁄 𑀲𑀸𑀲𑀦𑁂 𑀢𑀺𑀭𑀺𑀬𑀁 𑀦𑀺𑀧𑀦𑁆𑀦𑀢𑀸𑀬 𑀫𑀳𑀸𑀚𑀦𑀲𑁆𑀲 𑀧𑀘𑁆𑀘𑀬𑀪𑀸𑀯𑀁 𑀉𑀧𑀕𑀢𑁄 𑀅𑀭𑀺𑀬𑀫𑀕𑁆𑀕𑀁 𑀑𑀢𑀭𑀺𑀢𑁆𑀯𑀸 𑀲𑀫𑀸𑀥𑀺𑀓𑀼𑀮𑁆𑀮𑁂 𑀦𑀺𑀲𑀺𑀦𑁆𑀦𑁄 𑀦𑀺𑀩𑁆𑀩𑀸𑀦𑀲𑀸𑀕𑀭𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺.

𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀸𑀢𑀺 ‘‘𑀦𑀺𑀩𑁆𑀩𑀸𑀦𑀧𑀩𑁆𑀪𑀸𑀭𑀸’’𑀢𑀺 𑀧𑀤𑁂𑀦 𑀑𑀲𑀸𑀧𑀺𑀢𑀁 𑀥𑀫𑁆𑀫𑀤𑁂𑀲𑀦𑀁 𑀜𑀢𑁆𑀯𑀸 𑀅𑀦𑀼𑀲𑀦𑁆𑀥𑀺𑀓𑀼𑀲𑀮𑀢𑀸𑀬 𑀏𑀢𑀁 ‘‘𑀓𑀺𑀁 𑀦𑀼 𑀔𑁄, 𑀪𑀦𑁆𑀢𑁂’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀢𑀣𑀸𑀕𑀢𑁄𑀧𑀺 𑀳𑀺 𑀇𑀫𑀺𑀲𑁆𑀲𑀁 𑀧𑀭𑀺𑀲𑀢𑀺 𑀦𑀺𑀲𑀺𑀦𑁆𑀦𑁄 ‘‘𑀅𑀦𑀼𑀲𑀦𑁆𑀥𑀺𑀓𑀼𑀲𑀮𑁄 𑀪𑀺𑀓𑁆𑀔𑀼 𑀅𑀢𑁆𑀣𑀺, 𑀲𑁄 𑀫𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀲𑁆𑀲𑀢𑀻’’𑀢𑀺 𑀢𑀲𑁆𑀲𑁂𑀯 𑀑𑀓𑀸𑀲𑀓𑀭𑀡𑀢𑁆𑀣𑀸𑀬 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺.

𑀇𑀤𑀸𑀦𑀺 𑀑𑀭𑀺𑀫𑀁 𑀢𑀻𑀭𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁂𑀲𑀼 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀤𑀻𑀲𑀼 𑀏𑀯𑀁 𑀉𑀧𑀕𑀫𑀦𑀸𑀦𑀼𑀧𑀕𑀫𑀦𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. ‘‘𑀫𑀬𑁆𑀳𑀁 𑀘𑀓𑁆𑀔𑀼-𑀧𑀲𑀦𑁆𑀦𑀁, 𑀅𑀳𑀁 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀭𑀽𑀧𑀸𑀭𑀫𑁆𑀫𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀓𑁆𑀓𑁄𑀫𑀻’’𑀢𑀺 𑀏𑀢𑀁 𑀦𑀺𑀲𑁆𑀲𑀸𑀬 𑀘𑀓𑁆𑀔𑀼𑀁 𑀅𑀲𑁆𑀲𑀸𑀤𑁂𑀦𑁆𑀢𑁄𑀧𑀺 𑀢𑀺𑀫𑀺𑀭𑀓𑀯𑀸𑀢𑀸𑀤𑀻𑀳𑀺 𑀉𑀧𑀳𑀢𑀧𑀲𑀸𑀤𑁄 ‘‘𑀅𑀫𑀦𑀸𑀧𑀁 𑀫𑀬𑁆𑀳𑀁 𑀘𑀓𑁆𑀔𑀼, 𑀫𑀳𑀦𑁆𑀢𑀫𑁆𑀧𑀺 𑀭𑀽𑀧𑀸𑀭𑀫𑁆𑀫𑀡𑀁 𑀯𑀺𑀪𑀸𑀯𑁂𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀤𑁄𑀫𑀦𑀲𑁆𑀲𑀁 𑀆𑀧𑀚𑁆𑀚𑀦𑁆𑀢𑁄𑀧𑀺 𑀘𑀓𑁆𑀔𑀸𑀬𑀢𑀦𑀁 𑀉𑀧𑀕𑀘𑁆𑀙𑀢𑀺 𑀦𑀸𑀫. 𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀅𑀦𑀢𑁆𑀢𑀸𑀢𑀺 𑀢𑀺𑀡𑁆𑀡𑀁 𑀮𑀓𑁆𑀔𑀡𑀸𑀦𑀁 𑀯𑀲𑁂𑀦 𑀯𑀺𑀧𑀲𑁆𑀲𑀦𑁆𑀢𑁄 𑀧𑀦 𑀦 𑀉𑀧𑀕𑀘𑁆𑀙𑀢𑀺 𑀦𑀸𑀫. 𑀲𑁄𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀫𑀦𑀸𑀬𑀢𑀦𑁂 𑀧𑀦 ‘‘𑀫𑀦𑀸𑀧𑀁 𑀯𑀢 𑀫𑁂 𑀫𑀦𑁄, 𑀓𑀺𑀜𑁆𑀘𑀺 𑀯𑀸𑀫𑀢𑁄 𑀅𑀕𑁆𑀕𑀳𑁂𑀢𑁆𑀯𑀸 𑀲𑀩𑁆𑀩𑀁 𑀤𑀓𑁆𑀔𑀺𑀡𑀢𑁄𑀯 𑀕𑀡𑁆𑀳𑀸𑀢𑀻’’𑀢𑀺 𑀯𑀸 ‘‘𑀫𑀦𑁂𑀦 𑀫𑁂 𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀺𑀢𑀲𑁆𑀲 𑀅𑀮𑀸𑀪𑁄 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀸 𑀏𑀯𑀁 𑀅𑀲𑁆𑀲𑀸𑀤𑁂𑀦𑁆𑀢𑁄𑀧𑀺, ‘‘𑀤𑀼𑀘𑀺𑀦𑁆𑀢𑀺𑀢𑀘𑀺𑀦𑁆𑀢𑀺𑀢𑀲𑁆𑀲 𑀫𑁂 𑀫𑀦𑁄 𑀅𑀧𑁆𑀧𑀤𑀓𑁆𑀔𑀺𑀡𑀕𑁆𑀕𑀸𑀳𑀻’’𑀢𑀺 𑀏𑀯𑀁 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀸𑀤𑁂𑀦𑁆𑀢𑁄𑀧𑀺 𑀫𑀦𑀸𑀬𑀢𑀦𑀁 𑀉𑀧𑀕𑀘𑁆𑀙𑀢𑀺 𑀦𑀸𑀫. 𑀇𑀝𑁆𑀞𑁂 𑀧𑀦 𑀭𑀽𑀧𑁂 𑀭𑀸𑀕𑀁, 𑀅𑀦𑀺𑀝𑁆𑀞𑁂 𑀧𑀝𑀺𑀖𑀁 𑀉𑀧𑁆𑀧𑀸𑀤𑁂𑀦𑁆𑀢𑁄 𑀭𑀽𑀧𑀸𑀬𑀢𑀦𑀁 𑀉𑀧𑀕𑀘𑁆𑀙𑀢𑀺 𑀦𑀸𑀫. 𑀲𑀤𑁆𑀤𑀸𑀬𑀢𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀦𑀦𑁆𑀤𑀻𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀬𑀣𑀸 𑀳𑀺 𑀫𑀚𑁆𑀛𑁂 𑀲𑀁𑀲𑀻𑀤𑀺𑀢𑁆𑀯𑀸 𑀣𑀮𑀁 𑀧𑀢𑁆𑀢𑀁 𑀤𑀸𑀭𑀼𑀓𑁆𑀔𑀦𑁆𑀥𑀁 𑀲𑀡𑁆𑀳𑀣𑀽𑀮𑀯𑀸𑀮𑀺𑀓𑀸 𑀧𑀺𑀤𑀳𑀢𑀺, 𑀲𑁄 𑀧𑀼𑀦 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀦𑀦𑁆𑀤𑀻𑀭𑀸𑀕𑁂𑀦 𑀆𑀩𑀤𑁆𑀥𑁄 𑀧𑀼𑀕𑁆𑀕𑀮𑁄 𑀘𑀢𑀽𑀲𑀼 𑀫𑀳𑀸𑀅𑀧𑀸𑀬𑁂𑀲𑀼 𑀧𑀢𑀺𑀢𑁄 𑀫𑀳𑀸𑀤𑀼𑀓𑁆𑀔𑁂𑀦 𑀧𑀺𑀥𑀻𑀬𑀢𑀺, 𑀲𑁄 𑀅𑀦𑁂𑀓𑁂𑀳𑀺𑀧𑀺 𑀯𑀲𑁆𑀲𑀲𑀳𑀲𑁆𑀲𑁂𑀳𑀺 𑀧𑀼𑀦 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀦𑀦𑁆𑀤𑀻𑀭𑀸𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺.

𑀅𑀲𑁆𑀫𑀺𑀫𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀬𑀣𑀸 𑀳𑀺 𑀣𑀮𑁂 𑀆𑀭𑀼𑀴𑁆𑀳𑁄 𑀤𑀸𑀭𑀼𑀓𑁆𑀔𑀦𑁆𑀥𑁄 𑀳𑁂𑀝𑁆𑀞𑀸 𑀕𑀗𑁆𑀕𑁄𑀤𑀓𑁂𑀦 𑀘𑁂𑀯 𑀉𑀧𑀭𑀺 𑀯𑀲𑁆𑀲𑁂𑀦 𑀘 𑀢𑁂𑀫𑁂𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀲𑁂𑀯𑀸𑀮𑀧𑀭𑀺𑀬𑁄𑀦𑀤𑁆𑀥𑁄 ‘‘𑀧𑀸𑀲𑀸𑀡𑁄 𑀦𑀼 𑀔𑁄 𑀏𑀲 𑀔𑀸𑀡𑀼𑀓𑁄’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺, 𑀏𑀯𑀫𑁂𑀯 𑀅𑀲𑁆𑀫𑀺𑀫𑀸𑀦𑁂𑀦 𑀉𑀦𑁆𑀦𑀢𑁄 𑀧𑀼𑀕𑁆𑀕𑀮𑁄 𑀧𑀁𑀲𑀼𑀓𑀽𑀮𑀺𑀓𑀝𑁆𑀞𑀸𑀦𑁂 𑀧𑀁𑀲𑀼𑀓𑀽𑀮𑀺𑀓𑁄 𑀳𑁄𑀢𑀺, 𑀥𑀫𑁆𑀫𑀓𑀣𑀺𑀓𑀝𑁆𑀞𑀸𑀦𑁂 𑀥𑀫𑁆𑀫𑀓𑀣𑀺𑀓𑁄, 𑀪𑀡𑁆𑀟𑀦𑀓𑀸𑀭𑀓𑀝𑁆𑀞𑀸𑀦𑁂 𑀪𑀡𑁆𑀟𑀦𑀓𑀸𑀭𑀓𑁄, 𑀯𑁂𑀚𑁆𑀚𑀝𑁆𑀞𑀸𑀦𑁂 𑀯𑁂𑀚𑁆𑀚𑁄, 𑀧𑀺𑀲𑀼𑀡𑀝𑁆𑀞𑀸𑀦𑁂 𑀧𑀺𑀲𑀼𑀡𑁄. 𑀲𑁄 𑀦𑀸𑀦𑀧𑁆𑀧𑀓𑀸𑀭𑀁 𑀅𑀦𑁂𑀲𑀦𑀁 𑀆𑀧𑀚𑁆𑀚𑀦𑁆𑀢𑁄 𑀢𑀸𑀳𑀺 𑀢𑀸𑀳𑀺 𑀆𑀧𑀢𑁆𑀢𑀻𑀳𑀺 𑀧𑀮𑀺𑀯𑁂𑀞𑀺𑀢𑁄 ‘‘𑀅𑀢𑁆𑀣𑀺 𑀦𑀼 𑀔𑁄 𑀅𑀲𑁆𑀲 𑀅𑀩𑁆𑀪𑀦𑁆𑀢𑀭𑁂 𑀓𑀺𑀜𑁆𑀘𑀺 𑀲𑀻𑀮𑀁, 𑀉𑀤𑀸𑀳𑀼 𑀦𑀢𑁆𑀣𑀻’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀲𑁆𑀫𑀺𑀫𑀸𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺.

𑀧𑀜𑁆𑀘𑀦𑁆𑀦𑁂𑀢𑀁 𑀓𑀸𑀫𑀕𑀼𑀡𑀸𑀦𑀁 𑀅𑀥𑀺𑀯𑀘𑀦𑀦𑁆𑀢𑀺 𑀬𑀣𑀸 𑀳𑀺 𑀆𑀯𑀝𑁆𑀝𑁂 𑀧𑀢𑀺𑀢𑀤𑀸𑀭𑀼𑀔𑀦𑁆𑀥𑁄 𑀅𑀦𑁆𑀢𑁄𑀬𑁂𑀯 𑀧𑀸𑀲𑀸𑀡𑀸𑀤𑀻𑀲𑀼 𑀆𑀳𑀢𑀲𑀫𑀩𑁆𑀪𑀸𑀳𑀢𑁄 𑀪𑀺𑀚𑁆𑀚𑀺𑀢𑁆𑀯𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀳𑁄𑀢𑀺, 𑀏𑀯𑀁 𑀧𑀜𑁆𑀘𑀓𑀸𑀫𑀕𑀼𑀡𑀸𑀯𑀝𑁆𑀝𑁂 𑀧𑀢𑀺𑀢𑀧𑀼𑀕𑁆𑀕𑀮𑁄 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀓𑀫𑁆𑀫𑀓𑀸𑀭𑀡𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀤𑀼𑀓𑁆𑀔𑁂𑀳𑀺 𑀆𑀳𑀢𑀲𑀫𑀩𑁆𑀪𑀸𑀳𑀢𑁄 𑀤𑀻𑀖𑀭𑀢𑁆𑀢𑀁 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀢𑀁 𑀆𑀧𑀚𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀜𑁆𑀘𑀦𑁆𑀦𑁂𑀢𑀁 𑀓𑀸𑀫𑀕𑀼𑀡𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺.

𑀤𑀼𑀲𑁆𑀲𑀻𑀮𑁄𑀢𑀺 𑀦𑀺𑀲𑁆𑀲𑀻𑀮𑁄. 𑀧𑀸𑀧𑀥𑀫𑁆𑀫𑁄𑀢𑀺 𑀮𑀸𑀫𑀓𑀥𑀫𑁆𑀫𑁄. 𑀅𑀲𑀼𑀘𑀻𑀢𑀺 𑀦 𑀲𑀼𑀘𑀺. 𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑁄𑀢𑀺 ‘‘𑀇𑀫𑀲𑁆𑀲 𑀫𑀜𑁆𑀜𑁂 𑀇𑀫𑀲𑁆𑀲 𑀫𑀜𑁆𑀜𑁂 𑀇𑀤𑀁 𑀓𑀫𑁆𑀫’’𑀦𑁆𑀢𑀺 𑀏𑀯𑀁 𑀧𑀭𑁂𑀳𑀺 𑀲𑀗𑁆𑀓𑀸𑀬 𑀲𑀭𑀺𑀢𑀩𑁆𑀩𑀲𑀫𑀸𑀘𑀸𑀭𑁄. 𑀲𑀗𑁆𑀓𑀸𑀬 𑀯𑀸 𑀧𑀭𑁂𑀲𑀁 𑀲𑀫𑀸𑀘𑀸𑀭𑀁 𑀲𑀭𑀢𑀻𑀢𑀺𑀧𑀺 𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑁄. 𑀢𑀲𑁆𑀲 𑀳𑀺 𑀤𑁆𑀯𑁂 𑀢𑀬𑁄 𑀚𑀦𑁂 𑀓𑀣𑁂𑀦𑁆𑀢𑁂 𑀤𑀺𑀲𑁆𑀯𑀸, ‘‘𑀫𑀫 𑀤𑁄𑀲𑀁 𑀫𑀜𑁆𑀜𑁂 𑀓𑀣𑁂𑀦𑁆𑀢𑀻’’𑀢𑀺 𑀢𑁂𑀲𑀁 𑀲𑀫𑀸𑀘𑀸𑀭𑀁 𑀲𑀗𑁆𑀓𑀲𑁆𑀲𑀭𑀢𑀺 𑀥𑀸𑀯𑀢𑀻𑀢𑀺 𑀲𑀗𑁆𑀓𑀲𑁆𑀲𑀭𑀲𑀫𑀸𑀘𑀸𑀭𑁄.

𑀲𑀫𑀡𑀧𑀝𑀺𑀜𑁆𑀜𑁄𑀢𑀺 𑀲𑀮𑀸𑀓𑀕𑁆𑀕𑀳𑀡𑀸𑀤𑀻𑀲𑀼 ‘‘𑀓𑀺𑀢𑁆𑀢𑀓𑀸 𑀯𑀺𑀳𑀸𑀭𑁂 𑀲𑀫𑀡𑀸’’𑀢𑀺 𑀕𑀡𑀦𑀸𑀬 𑀆𑀭𑀤𑁆𑀥𑀸𑀬 ‘‘𑀅𑀳𑀫𑁆𑀧𑀺 𑀲𑀫𑀡𑁄, 𑀅𑀳𑀫𑁆𑀧𑀺 𑀲𑀫𑀡𑁄’’𑀢𑀺 𑀧𑀝𑀺𑀜𑁆𑀜𑀁 𑀤𑁂𑀢𑀺, 𑀲𑀮𑀸𑀓𑀕𑁆𑀕𑀳𑀡𑀸𑀤𑀻𑀦𑀺 𑀓𑀭𑁄𑀢𑀺. 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑁄𑀢𑀺 𑀉𑀧𑁄𑀲𑀣𑀧𑀯𑀸𑀭𑀡𑀸𑀤𑀻𑀲𑀼 ‘‘𑀅𑀳𑀫𑁆𑀧𑀺 𑀩𑁆𑀭𑀳𑁆𑀫𑀘𑀸𑀭𑀻’’𑀢𑀺 𑀧𑀝𑀺𑀜𑁆𑀜𑀸𑀬 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀧𑀯𑀺𑀲𑀢𑀺. 𑀅𑀦𑁆𑀢𑁄𑀧𑀽𑀢𑀻𑀢𑀺 𑀯𑀓𑁆𑀓𑀳𑀤𑀬𑀸𑀤𑀻𑀲𑀼 𑀅𑀧𑀽𑀢𑀺𑀓𑀲𑁆𑀲𑀧𑀺 𑀕𑀼𑀡𑀸𑀦𑀁 𑀧𑀽𑀢𑀺𑀪𑀸𑀯𑁂𑀦, 𑀅𑀦𑁆𑀢𑁄𑀧𑀽𑀢𑀺. 𑀅𑀯𑀲𑁆𑀲𑀼𑀢𑁄𑀢𑀺 𑀭𑀸𑀕𑁂𑀦 𑀢𑀺𑀦𑁆𑀢𑁄. 𑀓𑀲𑀫𑁆𑀩𑀼𑀚𑀸𑀢𑁄𑀢𑀺 𑀭𑀸𑀕𑀸𑀤𑀻𑀳𑀺 𑀓𑀺𑀮𑁂𑀲𑁂𑀳𑀺 𑀓𑀘𑀯𑀭𑀚𑀸𑀢𑁄.

𑀏𑀢𑀤𑀯𑁄𑀘𑀸𑀢𑀺 𑀕𑁄𑀕𑀡𑀁 𑀕𑀗𑁆𑀕𑀸𑀢𑀻𑀭𑀸𑀪𑀺𑀫𑀼𑀔𑀁 𑀓𑀢𑁆𑀯𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀞𑀺𑀢𑁄 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀭𑀺𑀬𑁄𑀲𑀸𑀦𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸, ‘‘𑀲𑀢𑁆𑀣𑀸 𑀑𑀭𑀺𑀫𑀢𑀻𑀭𑀸𑀤𑀻𑀦𑀁 𑀅𑀦𑀼𑀧𑀕𑀘𑁆𑀙𑀦𑁆𑀢𑀸𑀤𑀺𑀯𑀲𑁂𑀦 𑀲𑀓𑁆𑀓𑀸 𑀧𑀝𑀺𑀧𑀢𑁆𑀢𑀺𑀁 𑀧𑀽𑀭𑁂𑀢𑀼𑀦𑁆𑀢𑀺 𑀯𑀤𑀢𑀺. 𑀬𑀤𑀺 𑀏𑀯𑀁 𑀧𑀽𑀭𑁂𑀢𑀼𑀁 𑀲𑀓𑁆𑀓𑀸, 𑀅𑀳𑀁 𑀧𑀩𑁆𑀩𑀚𑀺𑀢𑁆𑀯𑀸 𑀧𑀽𑀭𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀢𑀁 ‘‘𑀅𑀳𑀁 𑀔𑁄, 𑀪𑀦𑁆𑀢𑁂’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘.

𑀯𑀘𑁆𑀙𑀕𑀺𑀤𑁆𑀥𑀺𑀦𑀺𑀬𑁄𑀢𑀺 𑀯𑀘𑁆𑀙𑁂𑀲𑀼 𑀲𑀲𑁆𑀦𑁂𑀳𑀸 𑀣𑀦𑁂𑀳𑀺 𑀔𑀻𑀭𑀁 𑀧𑀕𑁆𑀖𑀭𑀦𑁆𑀢𑁂𑀳𑀺 𑀯𑀘𑁆𑀙𑀓𑀲𑁆𑀦𑁂𑀳𑁂𑀦 𑀲𑀬𑀫𑁂𑀯 𑀕𑀫𑀺𑀲𑁆𑀲𑀦𑁆𑀢𑀻𑀢𑀺. 𑀦𑀺𑀬𑁆𑀬𑀸𑀢𑁂𑀳𑁂𑀯𑀸𑀢𑀺 𑀦𑀺𑀬𑁆𑀬𑀸𑀢𑁂𑀳𑀺𑀬𑁂𑀯. 𑀕𑀸𑀯𑀻𑀲𑀼 𑀳𑀺 𑀅𑀦𑀺𑀬𑁆𑀬𑀸𑀢𑀺𑀢𑀸𑀲𑀼 𑀕𑁄𑀲𑀸𑀫𑀺𑀓𑀸 𑀆𑀕𑀦𑁆𑀢𑁆𑀯𑀸, ‘‘𑀏𑀓𑀸 𑀕𑀸𑀯𑀻 𑀦 𑀤𑀺𑀲𑁆𑀲𑀢𑀺, 𑀏𑀓𑁄 𑀕𑁄𑀡𑁄, 𑀏𑀓𑁄 𑀯𑀘𑁆𑀙𑀓𑁄 𑀦 𑀤𑀺𑀲𑁆𑀲𑀢𑀻’’𑀢𑀺 𑀢𑀼𑀬𑁆𑀳𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀯𑀺𑀘𑀭𑀺𑀲𑁆𑀲𑀦𑁆𑀢𑀺, 𑀇𑀢𑀺 𑀢𑁂 𑀅𑀨𑀸𑀲𑀼𑀓𑀁 𑀪𑀯𑀺𑀲𑁆𑀲𑀢𑀺. 𑀧𑀩𑁆𑀩𑀚𑁆𑀚𑀸 𑀘 𑀦𑀸𑀫𑁂𑀲𑀸 𑀲𑀇𑀡𑀲𑁆𑀲 𑀦 𑀭𑀼𑀳𑀢𑀺, 𑀅𑀡𑀡𑀸 𑀧𑀩𑁆𑀩𑀚𑁆𑀚𑀸 𑀘 𑀩𑀼𑀤𑁆𑀥𑀸𑀤𑀻𑀳𑀺 𑀲𑀁𑀯𑀡𑁆𑀡𑀺𑀢𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀏𑀯𑀫𑀸𑀳. 𑀦𑀺𑀬𑁆𑀬𑀸𑀢𑀸𑀢𑀺 𑀦𑀺𑀬𑁆𑀬𑀸𑀢𑀺𑀢𑀸. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.

𑁫. 𑀤𑀼𑀢𑀺𑀬𑀤𑀸𑀭𑀼𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁨. 𑀧𑀜𑁆𑀘𑀫𑁂 𑀓𑀺𑀫𑀺𑀮𑀸𑀬𑀦𑁆𑀢𑀺 𑀓𑀺𑀫𑀺𑀮𑀸𑀦𑀸𑀫𑀓𑁂 𑀦𑀕𑀭𑁂. 𑀲𑀁𑀓𑀺𑀮𑀺𑀝𑁆𑀞𑀦𑁆𑀢𑀺 𑀧𑀝𑀺𑀘𑁆𑀙𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀲𑀁𑀓𑀺𑀮𑀺𑀝𑁆𑀞𑀸 𑀦𑀸𑀫 𑀆𑀧𑀢𑁆𑀢𑀺 𑀦𑀢𑁆𑀣𑀺, 𑀏𑀯𑀭𑀽𑀧𑀁 𑀲𑀁𑀓𑀺𑀮𑀺𑀝𑁆𑀞𑀁 𑀆𑀧𑀢𑁆𑀢𑀺𑀁. 𑀦 𑀯𑀼𑀝𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀻𑀢𑀺 𑀧𑀭𑀺𑀯𑀸𑀲𑀫𑀸𑀦𑀢𑁆𑀢𑀅𑀩𑁆𑀪𑀸𑀦𑁂𑀳𑀺 𑀯𑀼𑀝𑁆𑀞𑀸𑀦𑀁 𑀦 𑀤𑀺𑀲𑁆𑀲𑀢𑀺.

𑁬. 𑀅𑀯𑀲𑁆𑀲𑀼𑀢𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁩. 𑀙𑀝𑁆𑀞𑁂 𑀦𑀯𑀁 𑀲𑀦𑁆𑀣𑀸𑀕𑀸𑀭𑀦𑁆𑀢𑀺 𑀅𑀥𑀼𑀦𑀸 𑀓𑀸𑀭𑀺𑀢𑀁 𑀲𑀦𑁆𑀣𑀸𑀕𑀸𑀭𑀁, 𑀏𑀓𑀸 𑀫𑀳𑀸𑀲𑀸𑀮𑀸𑀢𑀺 𑀅𑀢𑁆𑀣𑁄. 𑀉𑀬𑁆𑀬𑁄𑀕𑀓𑀸𑀮𑀸𑀤𑀻𑀲𑀼 𑀳𑀺 𑀭𑀸𑀚𑀸𑀦𑁄 𑀢𑀢𑁆𑀣 𑀞𑀢𑁆𑀯𑀸, ‘‘𑀏𑀢𑁆𑀢𑀓𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀼, 𑀏𑀢𑁆𑀢𑀓𑀸 𑀧𑀘𑁆𑀙𑀸, 𑀏𑀢𑁆𑀢𑀓𑀸 𑀉𑀪𑁄𑀳𑀺 𑀧𑀲𑁆𑀲𑁂𑀳𑀺, 𑀏𑀢𑁆𑀢𑀓𑀸 𑀳𑀢𑁆𑀣𑀻 𑀅𑀪𑀺𑀭𑀼𑀳𑀦𑁆𑀢𑀼, 𑀏𑀢𑁆𑀢𑀓𑀸 𑀅𑀲𑁆𑀲𑁂, 𑀏𑀢𑁆𑀢𑀓𑀸 𑀭𑀣𑁂𑀲𑀼 𑀢𑀺𑀝𑁆𑀞𑀦𑁆𑀢𑀽’’𑀢𑀺 𑀏𑀯𑀁 𑀲𑀦𑁆𑀣𑀁 𑀓𑀭𑁄𑀦𑁆𑀢𑀺, 𑀫𑀭𑀺𑀬𑀸𑀤𑀁 𑀩𑀦𑁆𑀥𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀞𑀸𑀦𑀁 𑀲𑀦𑁆𑀣𑀸𑀕𑀸𑀭𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀉𑀬𑁆𑀬𑁄𑀕𑀝𑁆𑀞𑀸𑀦𑀢𑁄 𑀘 𑀆𑀕𑀦𑁆𑀢𑁆𑀯𑀸 𑀬𑀸𑀯 𑀕𑁂𑀳𑁂𑀲𑀼 𑀅𑀮𑁆𑀮𑀕𑁄𑀫𑀬𑀧𑀭𑀺𑀪𑀡𑁆𑀟𑀸𑀤𑀻𑀦𑀺 𑀓𑀸𑀭𑁂𑀦𑁆𑀢𑀺, 𑀢𑀸𑀯 𑀤𑁆𑀯𑁂 𑀢𑀻𑀡𑀺 𑀤𑀺𑀯𑀲𑀸𑀦𑀺 𑀢𑁂 𑀭𑀸𑀚𑀸𑀦𑁄 𑀢𑀢𑁆𑀣 𑀲𑀦𑁆𑀣𑀭𑀦𑁆𑀢𑀻𑀢𑀺𑀧𑀺 𑀲𑀦𑁆𑀣𑀸𑀕𑀸𑀭𑀁. 𑀢𑁂𑀲𑀁 𑀭𑀸𑀚𑀽𑀦𑀁 𑀲𑀳 𑀅𑀢𑁆𑀣𑀸𑀦𑀼𑀲𑀸𑀲𑀦𑀁 𑀅𑀕𑀸𑀭𑀦𑁆𑀢𑀺𑀧𑀺 𑀲𑀦𑁆𑀣𑀸𑀕𑀸𑀭𑀁. 𑀕𑀡𑀭𑀸𑀚𑀸𑀦𑁄 𑀳𑀺 𑀢𑁂, 𑀢𑀲𑁆𑀫𑀸 𑀉𑀧𑁆𑀧𑀦𑁆𑀦𑀁 𑀓𑀺𑀘𑁆𑀘𑀁 𑀏𑀓𑀲𑁆𑀲 𑀯𑀲𑁂𑀦 𑀦 𑀙𑀺𑀚𑁆𑀚𑀢𑀺, 𑀲𑀩𑁆𑀩𑁂𑀲𑀁 𑀙𑀦𑁆𑀤𑁄𑀧𑀺 𑀮𑀤𑁆𑀥𑀼𑀁 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀲𑀩𑁆𑀩𑁂 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑁆𑀯𑀸 𑀅𑀦𑀼𑀲𑀸𑀲𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀳 𑀅𑀢𑁆𑀣𑀸𑀦𑀼𑀲𑀸𑀲𑀦𑀁 𑀅𑀕𑀸𑀭𑀦𑁆𑀢𑀺𑀧𑀺 𑀲𑀦𑁆𑀣𑀸𑀕𑀸𑀭’’𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀢𑁂 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑁆𑀯𑀸, ‘‘𑀇𑀫𑀲𑁆𑀫𑀺𑀁 𑀓𑀸𑀮𑁂 𑀓𑀲𑀺𑀢𑀼𑀁 𑀯𑀝𑁆𑀝𑀢𑀺, 𑀇𑀫𑀲𑁆𑀫𑀺𑀁 𑀓𑀸𑀮𑁂 𑀯𑀧𑀺𑀢𑀼’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀖𑀭𑀸𑀯𑀸𑀲𑀓𑀺𑀘𑁆𑀘𑀸𑀦𑀺 𑀲𑀫𑁆𑀫𑀦𑁆𑀢𑀬𑀦𑁆𑀢𑀺, 𑀢𑀲𑁆𑀫𑀸 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁 𑀖𑀭𑀸𑀯𑀸𑀲𑀁 𑀢𑀢𑁆𑀣 𑀲𑀦𑁆𑀣𑀭𑀦𑁆𑀢𑀻𑀢𑀺𑀧𑀺, 𑀲𑀦𑁆𑀣𑀸𑀕𑀸𑀭𑀁. 𑀅𑀘𑀺𑀭𑀓𑀸𑀭𑀺𑀢𑀁 𑀳𑁄𑀢𑀻𑀢𑀺 𑀇𑀝𑁆𑀞𑀓𑀓𑀫𑁆𑀫𑀲𑀼𑀥𑀸𑀓𑀫𑁆𑀫𑀘𑀺𑀢𑁆𑀢𑀓𑀫𑁆𑀫𑀸𑀤𑀺𑀯𑀲𑁂𑀦 𑀲𑀼𑀲𑀚𑁆𑀚𑀺𑀢𑀁 𑀤𑁂𑀯𑀯𑀺𑀫𑀸𑀦𑀁 𑀯𑀺𑀬 𑀅𑀥𑀼𑀦𑀸 𑀦𑀺𑀝𑁆𑀞𑀸𑀧𑀺𑀢𑀁. 𑀲𑀫𑀡𑁂𑀦 𑀯𑀸𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀖𑀭𑀯𑀢𑁆𑀣𑀼𑀧𑀭𑀺𑀕𑁆𑀕𑀳𑀡𑀓𑀸𑀮𑁂𑀬𑁂𑀯 𑀤𑁂𑀯𑀢𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀕𑀡𑁆𑀳𑀦𑁆𑀢𑀺, 𑀢𑀲𑁆𑀫𑀸 ‘‘𑀤𑁂𑀯𑁂𑀦 𑀯𑀸’’𑀢𑀺 𑀅𑀯𑀢𑁆𑀯𑀸, ‘‘𑀲𑀫𑀡𑁂𑀦 𑀯𑀸 𑀩𑁆𑀭𑀸𑀳𑁆𑀫𑀡𑁂𑀦 𑀯𑀸 𑀓𑁂𑀦𑀘𑀺 𑀯𑀸 𑀫𑀦𑀼𑀲𑁆𑀲𑀪𑀽𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁.

𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀽𑀢𑀺 𑀲𑀦𑁆𑀣𑀸𑀕𑀸𑀭𑀁 𑀦𑀺𑀝𑁆𑀞𑀺𑀢𑀦𑁆𑀢𑀺 𑀲𑀼𑀢𑁆𑀯𑀸 ‘‘𑀕𑀘𑁆𑀙𑀸𑀫 𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑀓𑁄𑀝𑁆𑀞𑀓𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀇𑀤𑀁 𑀲𑀦𑁆𑀣𑀸𑀕𑀸𑀭𑀁 𑀅𑀢𑀺𑀯𑀺𑀬 𑀫𑀦𑁄𑀭𑀫𑀁 𑀲𑀲𑁆𑀲𑀺𑀭𑀺𑀓𑀁. 𑀓𑁂𑀦 𑀧𑀞𑀫𑀁 𑀧𑀭𑀺𑀪𑀼𑀢𑁆𑀢𑀁 𑀅𑀫𑁆𑀳𑀸𑀓𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀅𑀲𑁆𑀲𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀅𑀫𑁆𑀳𑀸𑀓𑀁 𑀜𑀸𑀢𑀺𑀲𑁂𑀝𑁆𑀞𑀲𑁆𑀲 𑀧𑀞𑀫𑀁 𑀤𑀺𑀬𑁆𑀬𑀫𑀸𑀦𑁂𑀧𑀺 𑀲𑀢𑁆𑀣𑀼𑀦𑁄𑀯 𑀅𑀦𑀼𑀘𑁆𑀙𑀯𑀺𑀓𑀁, 𑀤𑀓𑁆𑀔𑀺𑀡𑁂𑀬𑁆𑀬𑀯𑀲𑁂𑀦 𑀤𑀺𑀬𑁆𑀬𑀫𑀸𑀦𑁂𑀧𑀺 𑀲𑀢𑁆𑀣𑀼𑀦𑁄𑀯 𑀅𑀦𑀼𑀘𑁆𑀙𑀯𑀺𑀓𑀁, 𑀢𑀲𑁆𑀫𑀸 𑀲𑀢𑁆𑀣𑀸𑀭𑀁 𑀧𑀞𑀫𑀁 𑀧𑀭𑀺𑀪𑀼𑀜𑁆𑀚𑀸𑀧𑁂𑀲𑁆𑀲𑀸𑀫, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀆𑀕𑀫𑀦𑀁 𑀓𑀭𑀺𑀲𑁆𑀲𑀸𑀫, 𑀪𑀺𑀓𑁆𑀔𑀼𑀲𑀗𑁆𑀖𑁂 𑀆𑀕𑀢𑁂 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀆𑀕𑀢𑀫𑁂𑀯 𑀪𑀯𑀺𑀲𑁆𑀲𑀢𑀺, 𑀲𑀢𑁆𑀣𑀸𑀭𑀁 𑀢𑀺𑀬𑀸𑀫𑀭𑀢𑁆𑀢𑀺𑀁 𑀅𑀫𑁆𑀳𑀸𑀓𑀁 𑀥𑀫𑁆𑀫𑀓𑀣𑀁 𑀓𑀣𑀸𑀧𑁂𑀲𑁆𑀲𑀸𑀫, 𑀇𑀢𑀺 𑀢𑀻𑀳𑀺 𑀭𑀢𑀦𑁂𑀳𑀺 𑀧𑀭𑀺𑀪𑀼𑀢𑁆𑀢𑀁 𑀧𑀘𑁆𑀙𑀸 𑀫𑀬𑀁 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫, 𑀏𑀯𑀁 𑀦𑁄 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀁𑀲𑀼.

𑀬𑁂𑀦 𑀦𑀯𑀁 𑀲𑀦𑁆𑀣𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀽𑀢𑀺 𑀢𑀁𑀤𑀺𑀯𑀲𑀁 𑀓𑀺𑀭 𑀲𑀦𑁆𑀣𑀸𑀕𑀸𑀭𑀁 𑀓𑀺𑀜𑁆𑀘𑀸𑀧𑀺 𑀭𑀸𑀚𑀓𑀼𑀮𑀸𑀦𑀁 𑀤𑀲𑁆𑀲𑀦𑀢𑁆𑀣𑀸𑀬 𑀤𑁂𑀯𑀯𑀺𑀫𑀸𑀦𑀁 𑀯𑀺𑀬 𑀲𑀼𑀲𑀚𑁆𑀚𑀺𑀢𑀁 𑀳𑁄𑀢𑀺 𑀲𑀼𑀧𑀝𑀺𑀚𑀕𑁆𑀕𑀺𑀢𑀁, 𑀩𑀼𑀤𑁆𑀥𑀸𑀭𑀳𑀁 𑀧𑀦 𑀓𑀢𑁆𑀯𑀸 𑀅𑀧𑀜𑁆𑀜𑀢𑁆𑀢𑀁. 𑀩𑀼𑀤𑁆𑀥𑀸 𑀳𑀺 𑀦𑀸𑀫 𑀅𑀭𑀜𑁆𑀜𑀚𑁆𑀛𑀸𑀲𑀬𑀸 𑀅𑀭𑀜𑁆𑀜𑀸𑀭𑀸𑀫𑀸 𑀅𑀦𑁆𑀢𑁄𑀕𑀸𑀫𑁂 𑀯𑀲𑁂𑀬𑁆𑀬𑀼𑀁 𑀯𑀸 𑀦𑁄 𑀯𑀸, 𑀢𑀲𑁆𑀫𑀸 ‘‘𑀪𑀕𑀯𑀢𑁄 𑀫𑀦𑀁 𑀚𑀸𑀦𑀺𑀢𑁆𑀯𑀸𑀯, 𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀢𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀁𑀲𑀼, 𑀇𑀤𑀸𑀦𑀺 𑀧𑀦 𑀫𑀦𑀁 𑀮𑀪𑀺𑀢𑁆𑀯𑀸 𑀧𑀜𑁆𑀜𑀸𑀧𑁂𑀢𑀼𑀓𑀸𑀫𑀸 𑀬𑁂𑀦 𑀲𑀦𑁆𑀣𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼.

𑀲𑀩𑁆𑀩𑀲𑀦𑁆𑀣𑀭𑀺𑀁 𑀲𑀦𑁆𑀣𑀸𑀕𑀸𑀭𑀁 𑀲𑀦𑁆𑀣𑀭𑀺𑀢𑁆𑀯𑀸𑀢𑀺 𑀬𑀣𑀸 𑀲𑀩𑁆𑀩𑀫𑁂𑀯 𑀲𑀦𑁆𑀣𑀢𑀁 𑀳𑁄𑀢𑀺, 𑀏𑀯𑀁 𑀢𑀁 𑀲𑀦𑁆𑀣𑀭𑀸𑀧𑁂𑀢𑁆𑀯𑀸. 𑀲𑀩𑁆𑀩𑀧𑀞𑀫𑀁 𑀢𑀸𑀯 ‘‘𑀕𑁄𑀫𑀬𑀁 𑀦𑀸𑀫 𑀲𑀩𑁆𑀩𑀫𑀗𑁆𑀕𑀮𑁂𑀲𑀼 𑀯𑀝𑁆𑀝𑀢𑀻’’𑀢𑀺 𑀲𑀼𑀥𑀸𑀧𑀭𑀺𑀓𑀫𑁆𑀫𑀓𑀢𑀫𑁆𑀧𑀺 𑀪𑀽𑀫𑀺𑀁 𑀅𑀮𑁆𑀮𑀕𑁄𑀫𑀬𑁂𑀦 𑀑𑀧𑀼𑀜𑁆𑀚𑀸𑀧𑁂𑀢𑁆𑀯𑀸, 𑀧𑀭𑀺𑀲𑀼𑀓𑁆𑀔𑀪𑀸𑀯𑀁 𑀜𑀢𑁆𑀯𑀸, 𑀬𑀣𑀸 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑁂 𑀧𑀤𑀁 𑀧𑀜𑁆𑀜𑀸𑀬𑀢𑀺, 𑀏𑀯𑀁 𑀘𑀢𑀼𑀚𑁆𑀚𑀸𑀢𑀺𑀬𑀕𑀦𑁆𑀥𑁂𑀳𑀺 𑀮𑀺𑀫𑁆𑀧𑀸𑀧𑁂𑀢𑁆𑀯𑀸 𑀉𑀧𑀭𑀺 𑀦𑀸𑀦𑀸𑀯𑀡𑁆𑀡𑀓𑀝𑀲𑀸𑀭𑀓𑁂 𑀲𑀦𑁆𑀣𑀭𑀺𑀢𑁆𑀯𑀸 𑀢𑁂𑀲𑀁 𑀉𑀧𑀭𑀺 𑀫𑀳𑀸𑀧𑀺𑀝𑁆𑀞𑀺𑀓𑀓𑁄𑀚𑀯𑁂 𑀆𑀤𑀺𑀁 𑀓𑀢𑁆𑀯𑀸 𑀳𑀢𑁆𑀣𑀢𑁆𑀣𑀭𑀅𑀲𑁆𑀲𑀢𑁆𑀣𑀭𑀲𑀻𑀳𑀢𑁆𑀣𑀭𑀩𑁆𑀬𑀕𑁆𑀖𑀢𑁆𑀣𑀭𑀘𑀦𑁆𑀤𑀢𑁆𑀣𑀭𑀓𑀲𑀽𑀭𑀺𑀬𑀢𑁆𑀣𑀭𑀓𑀘𑀺𑀢𑁆𑀢𑀢𑁆𑀣𑀭𑀓𑀸𑀤𑀻𑀳𑀺 𑀦𑀸𑀦𑀸𑀯𑀡𑁆𑀡𑁂𑀳𑀺 𑀅𑀢𑁆𑀣𑀭𑀓𑁂𑀳𑀺 𑀲𑀦𑁆𑀣𑀭𑀺𑀢𑀩𑁆𑀩𑀬𑀼𑀢𑁆𑀢𑀓𑀁 𑀲𑀩𑁆𑀩𑁄𑀓𑀸𑀲𑀁 𑀲𑀦𑁆𑀣𑀭𑀸𑀧𑁂𑀲𑀼𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀲𑀦𑁆𑀣𑀭𑀺𑀁 𑀲𑀦𑁆𑀣𑀸𑀕𑀸𑀭𑀁 𑀲𑀦𑁆𑀣𑀭𑀺𑀢𑁆𑀯𑀸’’𑀢𑀺.

𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀫𑀚𑁆𑀛𑀝𑁆𑀞𑀸𑀦𑁂 𑀢𑀸𑀯 𑀫𑀗𑁆𑀕𑀮𑀣𑀫𑁆𑀪𑀁 𑀦𑀺𑀲𑁆𑀲𑀸𑀬 𑀫𑀳𑀸𑀭𑀳𑀁 𑀩𑀼𑀤𑁆𑀥𑀸𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸, 𑀢𑀢𑁆𑀣 𑀢𑀢𑁆𑀣 𑀬𑀁 𑀬𑀁 𑀫𑀼𑀤𑀼𑀓𑀜𑁆𑀘 𑀫𑀦𑁄𑀭𑀫𑀜𑁆𑀘 𑀧𑀘𑁆𑀘𑀢𑁆𑀣𑀭𑀡𑀁, 𑀢𑀁 𑀢𑀁 𑀧𑀘𑁆𑀘𑀢𑁆𑀣𑀭𑀺𑀢𑁆𑀯𑀸 𑀉𑀪𑀢𑁄𑀮𑁄𑀳𑀺𑀢𑀓𑀁 𑀫𑀦𑀼𑀜𑁆𑀜𑀤𑀲𑁆𑀲𑀦𑀁 𑀉𑀧𑀥𑀸𑀦𑀁 𑀉𑀧𑀤𑀳𑀺𑀢𑁆𑀯𑀸 𑀉𑀧𑀭𑀺 𑀲𑀼𑀯𑀡𑁆𑀡𑀭𑀚𑀢𑀢𑀸𑀭𑀓𑀯𑀺𑀘𑀺𑀢𑁆𑀢𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀕𑀦𑁆𑀥𑀤𑀸𑀫𑀧𑀼𑀧𑁆𑀨𑀤𑀸𑀫𑀧𑀢𑁆𑀢𑀤𑀸𑀫𑀸𑀤𑀻𑀳𑀺 𑀅𑀮𑀗𑁆𑀓𑀭𑀺𑀢𑁆𑀯𑀸 𑀲𑀫𑀦𑁆𑀢𑀸 𑀤𑁆𑀯𑀸𑀤𑀲𑀳𑀢𑁆𑀣𑁂 𑀞𑀸𑀦𑁂 𑀧𑀼𑀧𑁆𑀨𑀚𑀸𑀮𑀁 𑀓𑀸𑀭𑁂𑀢𑁆𑀯𑀸, 𑀢𑀺𑀁𑀲𑀳𑀢𑁆𑀣𑀫𑀢𑁆𑀢𑀁 𑀞𑀸𑀦𑀁 𑀧𑀝𑀲𑀸𑀡𑀺𑀬𑀸 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀧𑀘𑁆𑀙𑀺𑀫𑀪𑀺𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀮𑁆𑀮𑀗𑁆𑀓𑀧𑀻𑀞𑀅𑀧𑀲𑁆𑀲𑀬𑀧𑀻𑀞𑀫𑀼𑀡𑁆𑀟𑀧𑀻𑀞𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀉𑀧𑀭𑀺 𑀲𑁂𑀢𑀧𑀘𑁆𑀘𑀢𑁆𑀣𑀭𑀡𑁂𑀳𑀺 𑀧𑀘𑁆𑀘𑀢𑁆𑀣𑀭𑀸𑀧𑁂𑀢𑁆𑀯𑀸 𑀧𑀸𑀘𑀻𑀦𑀪𑀺𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀫𑀳𑀸𑀧𑀺𑀝𑁆𑀞𑀺𑀓𑀓𑁄𑀚𑀯𑁂 𑀧𑀜𑁆𑀜𑀸𑀧𑁂𑀢𑁆𑀯𑀸 𑀫𑀦𑁄𑀭𑀫𑀸𑀦𑀺 𑀳𑀁𑀲𑀮𑁄𑀫𑀸𑀤𑀺𑀧𑀽𑀭𑀺𑀢𑀸𑀦𑀺 𑀉𑀧𑀥𑀸𑀦𑀸𑀦𑀺 𑀞𑀧𑀸𑀧𑁂𑀲𑀼𑀁 ‘‘𑀏𑀯𑀁 𑀅𑀓𑀺𑀮𑀫𑀫𑀸𑀦𑀸 𑀲𑀩𑁆𑀩𑀭𑀢𑁆𑀢𑀺𑀁 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀸’’𑀢𑀺. 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀆𑀲𑀦𑀸𑀦𑀺 𑀧𑀜𑁆𑀜𑀸𑀧𑁂𑀢𑁆𑀯𑀸’’𑀢𑀺.

𑀉𑀤𑀓𑀫𑀡𑀺𑀓𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀫𑀳𑀸𑀓𑀼𑀘𑁆𑀙𑀺𑀓𑀁 𑀉𑀤𑀓𑀘𑀸𑀝𑀺𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀏𑀯𑀁 𑀪𑀕𑀯𑀸 𑀘 𑀪𑀺𑀓𑁆𑀔𑀼𑀲𑀗𑁆𑀖𑁄 𑀘 𑀬𑀣𑀸𑀭𑀼𑀘𑀺𑀬𑀸 𑀳𑀢𑁆𑀣𑁂 𑀯𑀸 𑀥𑁄𑀯𑀺𑀲𑁆𑀲𑀦𑁆𑀢𑀺 𑀧𑀸𑀤𑁂 𑀯𑀸, 𑀫𑀼𑀔𑀁 𑀯𑀸 𑀯𑀺𑀓𑁆𑀔𑀸𑀮𑁂𑀲𑁆𑀲𑀦𑁆𑀢𑀻’’𑀢𑀺 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀫𑀡𑀺𑀯𑀡𑁆𑀡𑀲𑁆𑀲 𑀉𑀤𑀓𑀲𑁆𑀲 𑀧𑀽𑀭𑀸𑀧𑁂𑀢𑁆𑀯𑀸 𑀯𑀸𑀲𑀢𑁆𑀣𑀸𑀬 𑀦𑀸𑀦𑀸𑀧𑀼𑀧𑁆𑀨𑀸𑀦𑀺 𑀘𑁂𑀯 𑀉𑀤𑀓𑀯𑀸𑀲𑀘𑀼𑀡𑁆𑀡𑀸𑀦𑀺 𑀘 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀤𑀮𑀺𑀧𑀡𑁆𑀡𑁂𑀳𑀺 𑀧𑀺𑀤𑀳𑀺𑀢𑁆𑀯𑀸 𑀧𑀢𑀺𑀝𑁆𑀞𑀸𑀧𑁂𑀲𑀼𑀁. 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀉𑀤𑀓𑀫𑀡𑀺𑀓𑀁 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸’’𑀢𑀺.

𑀢𑁂𑀮𑀧𑁆𑀧𑀤𑀻𑀧𑀁 𑀆𑀭𑁄𑀧𑁂𑀢𑁆𑀯𑀸𑀢𑀺 𑀭𑀚𑀢𑀲𑀼𑀯𑀡𑁆𑀡𑀸𑀤𑀺𑀫𑀬𑀤𑀡𑁆𑀟𑀤𑀻𑀧𑀺𑀓𑀸𑀲𑀼 𑀬𑁄𑀦𑀓𑀭𑀽𑀧𑀓𑀺𑀭𑀸𑀢𑀭𑀽𑀧𑀓𑀸𑀤𑀻𑀦𑀁 𑀳𑀢𑁆𑀣𑁂 𑀞𑀧𑀺𑀢𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀫𑀬𑀓𑀧𑀮𑁆𑀮𑀺𑀓𑀸𑀲𑀼 𑀘 𑀢𑁂𑀮𑀧𑁆𑀧𑀤𑀻𑀧𑀁 𑀚𑀸𑀮𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀽𑀢𑀺 𑀏𑀢𑁆𑀣 𑀧𑀦 𑀢𑁂 𑀲𑀓𑁆𑀬𑀭𑀸𑀚𑀸𑀦𑁄 𑀦 𑀓𑁂𑀯𑀮𑀁 𑀲𑀦𑁆𑀣𑀸𑀕𑀸𑀭𑀫𑁂𑀯, 𑀅𑀣 𑀔𑁄 𑀬𑁄𑀚𑀦𑀸𑀯𑀝𑁆𑀝𑁂 𑀓𑀧𑀺𑀮𑀯𑀢𑁆𑀣𑀼𑀲𑁆𑀫𑀺𑀁 𑀦𑀕𑀭𑀯𑀻𑀣𑀺𑀬𑁄𑀧𑀺 𑀲𑀫𑁆𑀫𑀚𑁆𑀚𑀸𑀧𑁂𑀢𑁆𑀯𑀸 𑀥𑀚𑁂 𑀉𑀲𑁆𑀲𑀸𑀧𑁂𑀢𑁆𑀯𑀸 𑀕𑁂𑀳𑀤𑁆𑀯𑀸𑀭𑁂𑀲𑀼 𑀧𑀼𑀡𑁆𑀡𑀖𑀝𑁂 𑀘 𑀓𑀤𑀮𑀺𑀬𑁄 𑀘 𑀞𑀧𑀸𑀧𑁂𑀢𑁂𑀯𑀸 𑀲𑀓𑀮𑀦𑀕𑀭𑀁 𑀤𑀻𑀧𑀫𑀸𑀮𑀸𑀤𑀻𑀳𑀺 𑀯𑀺𑀧𑁆𑀧𑀓𑀺𑀡𑁆𑀡𑀢𑀸𑀭𑀓𑀁 𑀯𑀺𑀬 𑀓𑀢𑁆𑀯𑀸 ‘‘𑀔𑀻𑀭𑀽𑀧𑀕𑁂 𑀤𑀸𑀭𑀓𑁂 𑀔𑀻𑀭𑀁 𑀧𑀸𑀬𑁂𑀣, 𑀤𑀳𑀭𑁂 𑀓𑀼𑀫𑀸𑀭𑁂 𑀮𑀳𑀼𑀁 𑀮𑀳𑀼𑀁 𑀪𑁄𑀚𑁂𑀢𑁆𑀯𑀸 𑀲𑀬𑀸𑀧𑁂𑀣, 𑀉𑀘𑁆𑀘𑀸𑀲𑀤𑁆𑀤𑀁 𑀫𑀸 𑀓𑀭𑀺𑀢𑁆𑀣, 𑀅𑀚𑁆𑀚 𑀏𑀓𑀭𑀢𑁆𑀢𑀺𑀁 𑀲𑀢𑁆𑀣𑀸 𑀅𑀦𑁆𑀢𑁄𑀕𑀸𑀫𑁂 𑀯𑀲𑀺𑀲𑁆𑀲𑀢𑀺, 𑀩𑀼𑀤𑁆𑀥𑀸 𑀦𑀸𑀫 𑀅𑀧𑁆𑀧𑀲𑀤𑁆𑀤𑀓𑀸𑀫𑀸 𑀳𑁄𑀦𑁆𑀢𑀻’’𑀢𑀺 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀲𑀬𑀁 𑀤𑀡𑁆𑀟𑀤𑀻𑀧𑀺𑀓𑀸 𑀆𑀤𑀸𑀬 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼.

𑀅𑀣 𑀔𑁄 𑀪𑀕𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀦𑀯𑀁 𑀲𑀦𑁆𑀣𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 ‘‘𑀬𑀲𑁆𑀲 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸 𑀓𑀸𑀮𑀁 𑀫𑀜𑁆𑀜𑀢𑀻’’𑀢𑀺 𑀏𑀯𑀁 𑀓𑀺𑀭 𑀓𑀸𑀮𑁂 𑀆𑀭𑁄𑀘𑀺𑀢𑁂 𑀪𑀕𑀯𑀸 𑀮𑀸𑀔𑀸𑀭𑀲𑀢𑀺𑀦𑁆𑀢𑀭𑀢𑁆𑀢𑀓𑁄𑀯𑀺𑀴𑀸𑀭𑀧𑀼𑀧𑁆𑀨𑀯𑀡𑁆𑀡𑀁 𑀭𑀢𑁆𑀢𑀤𑀼𑀧𑀝𑁆𑀝𑀁 𑀓𑀢𑁆𑀢𑀭𑀺𑀬𑀸 𑀧𑀤𑀼𑀫𑀁 𑀓𑀦𑁆𑀢𑁂𑀦𑁆𑀢𑁄 𑀯𑀺𑀬, 𑀲𑀁𑀯𑀺𑀥𑀸𑀬 𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄 𑀦𑀺𑀯𑀸𑀲𑁂𑀢𑁆𑀯𑀸 𑀲𑀼𑀯𑀡𑁆𑀡𑀧𑀸𑀫𑀗𑁆𑀕𑁂𑀦 𑀧𑀤𑀼𑀫𑀓𑀮𑀸𑀧𑀁 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀯𑀺𑀬, 𑀯𑀺𑀚𑁆𑀚𑀼𑀮𑀢𑀸𑀲𑀲𑁆𑀲𑀺𑀭𑀺𑀓𑀁 𑀓𑀸𑀬𑀩𑀦𑁆𑀥𑀦𑀁 𑀩𑀦𑁆𑀥𑀺𑀢𑁆𑀯𑀸 𑀭𑀢𑁆𑀢𑀓𑀫𑁆𑀩𑀮𑁂𑀦 𑀕𑀚𑀓𑀼𑀫𑁆𑀪𑀁 𑀧𑀭𑀺𑀬𑁄𑀦𑀦𑁆𑀥𑀦𑁆𑀢𑁄 𑀯𑀺𑀬, 𑀭𑀢𑀦𑀲𑀢𑀼𑀩𑁆𑀩𑁂𑀥𑁂 𑀲𑀼𑀯𑀡𑁆𑀡𑀕𑁆𑀖𑀺𑀓𑁂 𑀧𑀯𑀸𑀴𑀚𑀸𑀮𑀁 𑀔𑀺𑀧𑀫𑀸𑀦𑁄 𑀯𑀺𑀬 𑀲𑀼𑀯𑀡𑁆𑀡𑀘𑁂𑀢𑀺𑀬𑁂 𑀭𑀢𑁆𑀢𑀓𑀫𑁆𑀩𑀮𑀓𑀜𑁆𑀘𑀼𑀓𑀁 𑀧𑀝𑀺𑀫𑀼𑀜𑁆𑀘𑀦𑁆𑀢𑁄 𑀯𑀺𑀬, 𑀕𑀘𑁆𑀙𑀦𑁆𑀢𑀁 𑀧𑀼𑀡𑁆𑀡𑀘𑀦𑁆𑀤𑀁 𑀭𑀢𑁆𑀢𑀯𑀡𑁆𑀡𑀯𑀮𑀸𑀳𑀓𑁂𑀦 𑀧𑀝𑀺𑀘𑁆𑀙𑀸𑀤𑀬𑀫𑀸𑀦𑁄 𑀯𑀺𑀬, 𑀓𑀜𑁆𑀘𑀦𑀧𑀩𑁆𑀩𑀢𑀫𑀢𑁆𑀣𑀓𑁂 𑀲𑀼𑀧𑀓𑁆𑀓𑀮𑀸𑀔𑀸𑀭𑀲𑀁 𑀧𑀭𑀺𑀲𑀺𑀜𑁆𑀘𑀦𑁆𑀢𑁄 𑀯𑀺𑀬, 𑀘𑀺𑀢𑁆𑀢𑀓𑀽𑀝𑀧𑀩𑁆𑀩𑀢𑀫𑀢𑁆𑀣𑀓𑀁 𑀯𑀺𑀚𑁆𑀚𑀼𑀮𑀢𑀸𑀬 𑀧𑀭𑀺𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀘 𑀲𑀘𑀓𑁆𑀓𑀯𑀸𑀴𑀲𑀺𑀦𑁂𑀭𑀼𑀬𑀼𑀕𑀦𑁆𑀥𑀭𑀁 𑀫𑀳𑀸𑀧𑀣𑀯𑀺𑀁 𑀲𑀜𑁆𑀘𑀸𑀮𑁂𑀢𑁆𑀯𑀸 𑀕𑀳𑀺𑀢𑀁 𑀦𑀺𑀕𑁆𑀭𑁄𑀥𑀧𑀮𑁆𑀮𑀯𑀲𑀫𑀸𑀦𑀯𑀡𑁆𑀡𑀁 𑀭𑀢𑁆𑀢𑀯𑀭𑀧𑀁𑀲𑀼𑀓𑀽𑀮𑀁 𑀧𑀸𑀭𑀼𑀧𑀺𑀢𑁆𑀯𑀸, 𑀕𑀦𑁆𑀥𑀓𑀼𑀝𑀺𑀤𑁆𑀯𑀸𑀭𑀢𑁄 𑀦𑀺𑀓𑁆𑀔𑀫𑀺 𑀓𑀜𑁆𑀘𑀦𑀕𑀼𑀳𑀢𑁄 𑀲𑀻𑀳𑁄 𑀯𑀺𑀬 𑀉𑀤𑀬𑀧𑀩𑁆𑀩𑀢𑀓𑀽𑀝𑀢𑁄 𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀘. 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀦 𑀕𑀦𑁆𑀥𑀓𑀼𑀝𑀺𑀧𑀫𑀼𑀔𑁂 𑀅𑀝𑁆𑀞𑀸𑀲𑀺.

𑀅𑀣𑀲𑁆𑀲 𑀓𑀸𑀬𑀢𑁄 𑀫𑁂𑀖𑀫𑀼𑀔𑁂𑀳𑀺 𑀯𑀺𑀚𑁆𑀚𑀼𑀓𑀮𑀸𑀧𑀸 𑀯𑀺𑀬 𑀭𑀲𑁆𑀫𑀺𑀬𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀲𑀼𑀯𑀡𑁆𑀡𑀭𑀲𑀥𑀸𑀭𑀸𑀧𑀭𑀺𑀲𑁂𑀓𑀧𑀺𑀜𑁆𑀚𑀭𑀧𑀢𑁆𑀢𑀧𑀼𑀧𑁆𑀨𑀨𑀮𑀯𑀺𑀝𑀧𑁂 𑀯𑀺𑀬 𑀆𑀭𑀸𑀫𑀭𑀼𑀓𑁆𑀔𑁂 𑀓𑀭𑀺𑀁𑀲𑀼. 𑀢𑀸𑀯𑀤𑁂𑀯 𑀘 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑁄 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀲𑀺. 𑀢𑁂 𑀧𑀦 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸 𑀪𑀺𑀓𑁆𑀔𑀽 𑀏𑀯𑀭𑀽𑀧𑀸 𑀅𑀳𑁂𑀲𑀼𑀁 𑁋 𑀅𑀧𑁆𑀧𑀺𑀘𑁆𑀙𑀸 𑀲𑀦𑁆𑀢𑀼𑀝𑁆𑀞𑀸 𑀧𑀯𑀺𑀯𑀺𑀢𑁆𑀢𑀸 𑀅𑀲𑀁𑀲𑀝𑁆𑀞𑀸 𑀆𑀭𑀤𑁆𑀥𑀯𑀻𑀭𑀺𑀬𑀸 𑀯𑀢𑁆𑀢𑀸𑀭𑁄 𑀯𑀘𑀦𑀓𑁆𑀔𑀫𑀸 𑀘𑁄𑀤𑀓𑀸 𑀧𑀸𑀧𑀕𑀭𑀳𑀺𑀦𑁄 𑀲𑀻𑀮𑀲𑀫𑁆𑀧𑀦𑁆𑀦𑀸 𑀲𑀫𑀸𑀥𑀺𑀲𑀫𑁆𑀧𑀦𑁆𑀦𑀸 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀦𑁆𑀦𑀸. 𑀢𑁂𑀳𑀺 𑀧𑀭𑀺𑀯𑀸𑀭𑀺𑀢𑁄 𑀪𑀕𑀯𑀸 𑀭𑀢𑁆𑀢𑀓𑀫𑁆𑀩𑀮𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀺𑀬 𑀲𑀼𑀯𑀡𑁆𑀡𑀓𑁆𑀔𑀦𑁆𑀥𑁄, 𑀭𑀢𑁆𑀢𑀧𑀤𑀼𑀫𑀲𑀡𑁆𑀟𑀫𑀚𑁆𑀛𑀕𑀢𑀸 𑀯𑀺𑀬 𑀲𑀼𑀯𑀡𑁆𑀡𑀦𑀸𑀯𑀸, 𑀧𑀯𑀸𑀴𑀯𑁂𑀤𑀺𑀓𑀸𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀺𑀬 𑀲𑀼𑀯𑀡𑁆𑀡𑀧𑀸𑀲𑀸𑀤𑁄 𑀯𑀺𑀭𑁄𑀘𑀺𑀢𑁆𑀣. 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸𑀤𑀬𑁄 𑀫𑀳𑀸𑀣𑁂𑀭𑀸𑀧𑀺 𑀦𑀁 𑀫𑁂𑀖𑀯𑀡𑁆𑀡𑀁 𑀧𑀁𑀲𑀼𑀓𑀽𑀮𑀁 𑀧𑀸𑀭𑀼𑀧𑀺𑀢𑁆𑀯𑀸 𑀫𑀡𑀺𑀯𑀫𑁆𑀫𑀯𑀫𑁆𑀫𑀺𑀓𑀸 𑀯𑀺𑀬 𑀫𑀳𑀸𑀦𑀸𑀕𑀸 𑀧𑀭𑀺𑀯𑀸𑀭𑀬𑀺𑀁𑀲𑀼 𑀯𑀦𑁆𑀢𑀭𑀸𑀕𑀸 𑀪𑀺𑀦𑁆𑀦𑀓𑀺𑀮𑁂𑀲𑀸 𑀯𑀺𑀚𑀝𑀺𑀢𑀚𑀝𑀸 𑀙𑀺𑀦𑁆𑀦𑀩𑀦𑁆𑀥𑀦𑀸 𑀓𑀼𑀮𑁂 𑀯𑀸 𑀕𑀡𑁂 𑀯𑀸 𑀅𑀮𑀕𑁆𑀕𑀸.

𑀇𑀢𑀺 𑀪𑀕𑀯𑀸 𑀲𑀬𑀁 𑀯𑀻𑀢𑀭𑀸𑀕𑁄 𑀯𑀻𑀢𑀭𑀸𑀕𑁂𑀳𑀺, 𑀯𑀻𑀢𑀤𑁄𑀲𑁄 𑀯𑀻𑀢𑀤𑁄𑀲𑁂𑀳𑀺, 𑀯𑀻𑀢𑀫𑁄𑀳𑁄 𑀯𑀻𑀢𑀫𑁄𑀳𑁂𑀳𑀺, 𑀦𑀺𑀢𑁆𑀢𑀡𑁆𑀳𑁄 𑀦𑀺𑀢𑁆𑀢𑀡𑁆𑀳𑁂𑀳𑀺, 𑀦𑀺𑀓𑁆𑀓𑀺𑀮𑁂𑀲𑁄 𑀦𑀺𑀓𑁆𑀓𑀺𑀮𑁂𑀲𑁂𑀳𑀺, 𑀲𑀬𑀁 𑀩𑀼𑀤𑁆𑀥𑁄 𑀩𑀳𑀼𑀲𑁆𑀲𑀼𑀢𑀩𑀼𑀤𑁆𑀥𑁂𑀳𑀺 𑀧𑀭𑀺𑀯𑀸𑀭𑀺𑀢𑁄 𑀧𑀢𑁆𑀢𑀧𑀭𑀺𑀯𑀸𑀭𑀺𑀢𑀁 𑀯𑀺𑀬 𑀓𑁂𑀲𑀭𑀁, 𑀓𑁂𑀲𑀭𑀧𑀭𑀺𑀯𑀸𑀭𑀺𑀢𑀸 𑀯𑀺𑀬 𑀓𑀡𑁆𑀡𑀺𑀓𑀸, 𑀅𑀝𑁆𑀞𑀦𑀸𑀕𑀲𑀳𑀲𑁆𑀲𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀙𑀤𑁆𑀤𑀦𑁆𑀢𑁄 𑀦𑀸𑀕𑀭𑀸𑀚𑀸, 𑀦𑀯𑀼𑀢𑀺𑀳𑀁𑀲𑀲𑀳𑀲𑁆𑀲𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀥𑀢𑀭𑀝𑁆𑀞𑁄 𑀳𑀁𑀲𑀭𑀸𑀚𑀸, 𑀲𑁂𑀦𑀗𑁆𑀕𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸, 𑀫𑀭𑀼𑀕𑀡𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸, 𑀩𑁆𑀭𑀳𑁆𑀫𑀕𑀡𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀳𑀸𑀭𑀺𑀢𑀫𑀳𑀸𑀩𑁆𑀭𑀳𑁆𑀫𑀸, 𑀢𑀸𑀭𑀸𑀕𑀡𑀧𑀭𑀺𑀯𑀸𑀭𑀺𑀢𑁄 𑀯𑀺𑀬 𑀧𑀼𑀡𑁆𑀡𑀘𑀦𑁆𑀤𑁄 𑀅𑀲𑀫𑁂𑀦 𑀩𑀼𑀤𑁆𑀥𑀯𑁂𑀲𑁂𑀦 𑀅𑀧𑀭𑀺𑀫𑀸𑀡𑁂𑀦 𑀩𑀼𑀤𑁆𑀥𑀯𑀺𑀮𑀸𑀲𑁂𑀦 𑀓𑀧𑀺𑀮𑀯𑀢𑁆𑀣𑀼𑀕𑀸𑀫𑀺𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀺.

𑀅𑀣𑀲𑁆𑀲 𑀧𑀼𑀭𑀢𑁆𑀣𑀺𑀫𑀓𑀸𑀬𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀸 𑀭𑀲𑁆𑀫𑀺 𑀉𑀝𑁆𑀞𑀳𑀺𑀢𑁆𑀯𑀸 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕𑀳𑁂𑀲𑀺 𑀧𑀘𑁆𑀙𑀺𑀫-𑀓𑀸𑀬𑀢𑁄, 𑀤𑀓𑁆𑀔𑀺𑀡𑀳𑀢𑁆𑀣𑀢𑁄, 𑀯𑀸𑀫𑀳𑀢𑁆𑀣𑀢𑁄 𑀲𑀼𑀯𑀡𑁆𑀡𑀯𑀡𑁆𑀡𑀸 𑀭𑀲𑁆𑀫𑀺 𑀉𑀝𑁆𑀞𑀳𑀺𑀢𑁆𑀯𑀸 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕𑀳𑁂𑀲𑀺. 𑀉𑀧𑀭𑀺 𑀓𑁂𑀲𑀦𑁆𑀢𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀓𑁂𑀲𑀸𑀯𑀝𑁆𑀝𑁂𑀳𑀺 𑀫𑁄𑀭𑀕𑀻𑀯𑀯𑀡𑁆𑀡𑀸 𑀭𑀲𑁆𑀫𑀺 𑀉𑀝𑁆𑀞𑀳𑀺𑀢𑁆𑀯𑀸 𑀕𑀕𑀦𑀢𑀮𑁂 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕𑀳𑁂𑀲𑀺. 𑀳𑁂𑀝𑁆𑀞𑀸 𑀧𑀸𑀤𑀢𑀮𑁂𑀳𑀺 𑀧𑀯𑀸𑀴𑀯𑀡𑁆𑀡𑀸 𑀭𑀲𑁆𑀫𑀺 𑀉𑀝𑁆𑀞𑀳𑀺𑀢𑁆𑀯𑀸 𑀖𑀦𑀧𑀣𑀯𑀺𑀁 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕𑀳𑁂𑀲𑀺. 𑀏𑀯𑀁 𑀲𑀫𑀦𑁆𑀢𑀸 𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀙𑀩𑁆𑀩𑀡𑁆𑀡𑀸 𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀯𑀺𑀚𑁆𑀚𑁄𑀢𑀫𑀸𑀦𑀸 𑀯𑀺𑀧𑁆𑀨𑀦𑁆𑀤𑀫𑀸𑀦𑀸 𑀓𑀜𑁆𑀘𑀦𑀤𑀡𑁆𑀟𑀤𑀻𑀧𑀺𑀓𑀸𑀳𑀺 𑀦𑀺𑀘𑁆𑀙𑀭𑀺𑀢𑁆𑀯𑀸 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀚𑀸𑀮𑀸 𑀯𑀺𑀬 𑀘𑀸𑀢𑀼𑀤𑁆𑀤𑀻𑀧𑀺𑀓𑀫𑀳𑀸𑀫𑁂𑀖𑀢𑁄 𑀦𑀺𑀓𑁆𑀔𑀦𑁆𑀢𑀯𑀺𑀚𑁆𑀚𑀼𑀮𑀢𑀸 𑀯𑀺𑀬 𑀯𑀺𑀥𑀸𑀯𑀺𑀁𑀲𑀼. 𑀲𑀩𑁆𑀩𑀤𑀺𑀲𑀸𑀪𑀸𑀕𑀸 𑀲𑀼𑀯𑀡𑁆𑀡𑀘𑀫𑁆𑀧𑀓𑀧𑀼𑀧𑁆𑀨𑁂𑀳𑀺 𑀯𑀺𑀓𑀺𑀭𑀺𑀬𑀫𑀸𑀦𑀸 𑀯𑀺𑀬, 𑀲𑀼𑀯𑀡𑁆𑀡𑀖𑀝𑀢𑁄 𑀦𑀺𑀓𑁆𑀔𑀦𑁆𑀢𑀲𑀼𑀯𑀡𑁆𑀡𑀭𑀲𑀥𑀸𑀭𑀸𑀳𑀺 𑀲𑀺𑀜𑁆𑀘𑀫𑀸𑀦𑀸 𑀯𑀺𑀬, 𑀧𑀲𑀸𑀭𑀺𑀢𑀲𑀼𑀯𑀡𑁆𑀡𑀧𑀝𑀧𑀭𑀺𑀓𑁆𑀔𑀺𑀢𑁆𑀢𑀸 𑀯𑀺𑀬, 𑀯𑁂𑀭𑀫𑁆𑀪𑀯𑀸𑀢𑀲𑀫𑀼𑀝𑁆𑀞𑀺𑀢𑀓𑀺𑀁𑀲𑀼𑀓𑀓𑀡𑀺𑀓𑀸𑀭𑀧𑀼𑀧𑁆𑀨𑀘𑀼𑀡𑁆𑀡𑀲𑀫𑁄𑀓𑀺𑀡𑁆𑀡𑀸 𑀯𑀺𑀬 𑀯𑀺𑀧𑁆𑀧𑀪𑀸𑀲𑀺𑀁𑀲𑀼.

𑀪𑀕𑀯𑀢𑁄𑀧𑀺 𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀩𑁆𑀬𑀸𑀫𑀧𑁆𑀧𑀪𑀸𑀤𑁆𑀯𑀢𑁆𑀢𑀺𑀁𑀲𑀯𑀭𑀮𑀓𑁆𑀔𑀡𑀲𑀫𑀼𑀚𑁆𑀚𑀮𑀲𑀭𑀻𑀭𑀁 𑀲𑀫𑀼𑀕𑁆𑀕𑀢𑀢𑀸𑀭𑀓𑀁 𑀯𑀺𑀬 𑀕𑀕𑀦𑀢𑀮𑀁, 𑀯𑀺𑀓𑀲𑀺𑀢𑀫𑀺𑀯 𑀧𑀤𑀼𑀫𑀯𑀦𑀁, 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑁄 𑀯𑀺𑀬 𑀬𑁄𑀚𑀦𑀲𑀢𑀺𑀓𑁄 𑀧𑀸𑀭𑀺𑀘𑁆𑀙𑀢𑁆𑀢𑀓𑁄, 𑀧𑀝𑀺𑀧𑀸𑀝𑀺𑀬𑀸 𑀞𑀧𑀺𑀢𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀘𑀦𑁆𑀤𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀲𑀽𑀭𑀺𑀬𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀘𑀓𑁆𑀓𑀯𑀢𑁆𑀢𑀻𑀦𑀁 𑀤𑁆𑀯𑀢𑁆𑀢𑀺𑀁𑀲𑀤𑁂𑀯𑀭𑀸𑀚𑀸𑀦𑀁 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀩𑁆𑀭𑀳𑁆𑀫𑀸𑀦𑀁 𑀲𑀺𑀭𑀺𑀬𑀸 𑀲𑀺𑀭𑀺𑀁 𑀅𑀪𑀺𑀪𑀯𑀫𑀸𑀦𑀁 𑀯𑀺𑀬 𑀯𑀺𑀭𑁄𑀘𑀺𑀢𑁆𑀣, 𑀬𑀣𑀸 𑀢𑀁 𑀤𑀲𑀳𑀺 𑀧𑀸𑀭𑀫𑀻𑀳𑀺 𑀤𑀲𑀳𑀺 𑀉𑀧𑀧𑀸𑀭𑀫𑀻𑀳𑀺 𑀤𑀲𑀳𑀺 𑀧𑀭𑀫𑀢𑁆𑀣𑀧𑀸𑀭𑀫𑀻𑀳𑀺 𑀲𑀫𑁆𑀫𑀤𑁂𑀯 𑀧𑀽𑀭𑀺𑀢𑀸𑀳𑀺 𑀲𑀫𑀢𑀺𑀁𑀲𑀧𑀸𑀭𑀫𑀺𑀢𑀸𑀳𑀺 𑀅𑀮𑀗𑁆𑀓𑀢𑀁. 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀤𑀺𑀦𑁆𑀦𑀤𑀸𑀦𑀁 𑀭𑀓𑁆𑀔𑀺𑀢𑀲𑀻𑀮𑀁 𑀓𑀢𑀓𑀮𑁆𑀬𑀸𑀡𑀓𑀫𑁆𑀫𑀁 𑀏𑀓𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀑𑀢𑀭𑀺𑀢𑁆𑀯𑀸 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀞𑀸𑀦𑀁 𑀅𑀮𑀪𑀫𑀸𑀦𑀁 𑀲𑀫𑁆𑀩𑀸𑀥𑀧𑀢𑁆𑀢𑀁 𑀯𑀺𑀬 𑀅𑀳𑁄𑀲𑀺. 𑀦𑀸𑀯𑀸𑀲𑀳𑀲𑁆𑀲𑀪𑀡𑁆𑀟𑀁 𑀏𑀓𑀦𑀸𑀯𑀁 𑀆𑀭𑁄𑀧𑀦𑀓𑀸𑀮𑁄 𑀯𑀺𑀬, 𑀲𑀓𑀝𑀲𑀳𑀲𑁆𑀲𑀪𑀡𑁆𑀟𑀁 𑀏𑀓𑀲𑀓𑀝𑀁 𑀆𑀭𑁄𑀧𑀦𑀓𑀸𑀮𑁄 𑀯𑀺𑀬, 𑀧𑀜𑁆𑀘𑀯𑀻𑀲𑀢𑀺𑀬𑀸 𑀕𑀗𑁆𑀕𑀸𑀦𑀁 𑀑𑀖𑀲𑁆𑀲 𑀲𑀫𑁆𑀪𑀺𑀚𑁆𑀚 𑀫𑀼𑀔𑀤𑁆𑀯𑀸𑀭𑁂 𑀏𑀓𑀢𑁄 𑀭𑀸𑀲𑀺𑀪𑀽𑀢𑀓𑀸𑀮𑁄 𑀯𑀺𑀬 𑀅𑀳𑁄𑀲𑀺.

𑀇𑀫𑀸𑀬 𑀩𑀼𑀤𑁆𑀥𑀲𑀺𑀭𑀺𑀬𑀸 𑀑𑀪𑀸𑀲𑀫𑀸𑀦𑀲𑁆𑀲𑀸𑀧𑀺 𑀘 𑀪𑀕𑀯𑀢𑁄 𑀧𑀼𑀭𑀢𑁄 𑀅𑀦𑁂𑀓𑀸𑀦𑀺 𑀤𑀡𑁆𑀟𑀤𑀻𑀧𑀺𑀓𑀸𑀲𑀳𑀲𑁆𑀲𑀸𑀦𑀺 𑀉𑀓𑁆𑀔𑀺𑀧𑀺𑀁𑀲𑀼, 𑀢𑀣𑀸 𑀧𑀘𑁆𑀙𑀢𑁄, 𑀯𑀸𑀫𑀧𑀲𑁆𑀲𑁂, 𑀤𑀓𑁆𑀔𑀺𑀡𑀧𑀲𑁆𑀲𑁂. 𑀚𑀸𑀢𑀺𑀲𑀼𑀫𑀦𑀘𑀫𑁆𑀧𑀓𑀯𑀦𑀫𑀮𑁆𑀮𑀺𑀓𑀸𑀭𑀢𑁆𑀢𑀼𑀧𑁆𑀧𑀮-𑀦𑀻𑀮𑀼𑀧𑁆𑀧𑀮-𑀩𑀓𑀼𑀮𑀲𑀺𑀦𑁆𑀤𑀼𑀯𑀸𑀭𑀧𑀼𑀧𑁆𑀨𑀸𑀦𑀺 𑀘𑁂𑀯 𑀦𑀻𑀮𑀧𑀻𑀢𑀸𑀤𑀺𑀯𑀡𑁆𑀡𑀲𑀼𑀕𑀦𑁆𑀥𑀕𑀦𑁆𑀥𑀘𑀼𑀡𑁆𑀡𑀸𑀦𑀺 𑀘 𑀘𑀸𑀢𑀼𑀤𑁆𑀤𑀻𑀧𑀺𑀓𑀫𑁂𑀖𑀯𑀺𑀲𑁆𑀲𑀝𑁆𑀞𑀸 𑀉𑀤𑀓𑀯𑀼𑀝𑁆𑀞𑀺𑀬𑁄 𑀯𑀺𑀬 𑀯𑀺𑀧𑁆𑀧𑀓𑀺𑀭𑀺𑀬𑀺𑀁𑀲𑀼. 𑀧𑀜𑁆𑀘𑀗𑁆𑀕𑀺𑀓𑀢𑀽𑀭𑀺𑀬𑀦𑀺𑀕𑁆𑀖𑁄𑀲𑀸 𑀘𑁂𑀯 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀕𑀼𑀡𑀧𑀝𑀺𑀲𑀁𑀬𑀼𑀢𑁆𑀢𑀸 𑀣𑀼𑀢𑀺𑀖𑁄𑀲𑀸 𑀘 𑀲𑀩𑁆𑀩𑀸 𑀤𑀺𑀲𑀸 𑀧𑀽𑀭𑀬𑀺𑀁𑀲𑀼. 𑀤𑁂𑀯𑀫𑀦𑀼𑀲𑁆𑀲𑀦𑀸𑀕𑀲𑀼𑀧𑀡𑁆𑀡𑀕𑀦𑁆𑀥𑀩𑁆𑀩𑀬𑀓𑁆𑀔𑀸𑀤𑀻𑀦𑀁 𑀅𑀓𑁆𑀔𑀻𑀦𑀺 𑀅𑀫𑀢𑀧𑀸𑀦𑀁 𑀯𑀺𑀬 𑀮𑀪𑀺𑀁𑀲𑀼. 𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀞𑀢𑁆𑀯𑀸 𑀧𑀤𑀲𑀳𑀲𑁆𑀲𑁂𑀦 𑀕𑀫𑀦𑀯𑀡𑁆𑀡𑀁 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀢𑀢𑁆𑀭𑀺𑀤𑀁 𑀫𑀼𑀔𑀫𑀢𑁆𑀢𑀁 𑁋

‘‘𑀏𑀯𑀁 𑀲𑀩𑁆𑀩𑀗𑁆𑀕𑀲𑀫𑁆𑀧𑀦𑁆𑀦𑁄, 𑀓𑀫𑁆𑀧𑀬𑀦𑁆𑀢𑁄 𑀯𑀲𑀼𑀦𑁆𑀥𑀭𑀁;

𑀅𑀳𑁂𑀞𑀬𑀦𑁆𑀢𑁄 𑀧𑀸𑀡𑀸𑀦𑀺, 𑀬𑀸𑀢𑀺 𑀮𑁄𑀓𑀯𑀺𑀦𑀸𑀬𑀓𑁄.

‘‘𑀤𑀓𑁆𑀔𑀺𑀡𑀁 𑀧𑀞𑀫𑀁 𑀧𑀸𑀤𑀁, 𑀉𑀤𑁆𑀥𑀭𑀦𑁆𑀢𑁄 𑀦𑀭𑀸𑀲𑀪𑁄

𑀕𑀘𑁆𑀙𑀦𑁆𑀢𑁄 𑀲𑀺𑀭𑀺𑀲𑀫𑁆𑀧𑀦𑁆𑀦𑁄, 𑀲𑁄𑀪𑀢𑁂 𑀤𑁆𑀯𑀺𑀧𑀤𑀼𑀢𑁆𑀢𑀫𑁄.

‘‘𑀕𑀘𑁆𑀙𑀢𑁄 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲, 𑀳𑁂𑀝𑁆𑀞𑀸𑀧𑀸𑀤𑀢𑀮𑀁 𑀫𑀼𑀤𑀼;

𑀲𑀫𑀁 𑀲𑀫𑁆𑀨𑀼𑀲𑀢𑁂 𑀪𑀽𑀫𑀺𑀁, 𑀭𑀚𑀲𑀸 𑀦𑀼𑀧𑀮𑀺𑀧𑁆𑀧𑀢𑀺.

‘‘𑀦𑀺𑀦𑁆𑀦𑀝𑁆𑀞𑀸𑀦𑀁 𑀉𑀦𑁆𑀦𑀫𑀢𑀺, 𑀕𑀘𑁆𑀙𑀦𑁆𑀢𑁂 𑀮𑁄𑀓𑀦𑀸𑀬𑀓𑁂;

𑀉𑀦𑁆𑀦𑀢𑀜𑁆𑀘 𑀲𑀫𑀁 𑀳𑁄𑀢𑀺, 𑀧𑀣𑀯𑀻 𑀘 𑀅𑀘𑁂𑀢𑀦𑀸.

‘‘𑀧𑀸𑀲𑀸𑀡𑀸 𑀲𑀓𑁆𑀔𑀭𑀸 𑀘𑁂𑀯, 𑀓𑀣𑀮𑀸 𑀔𑀸𑀡𑀼𑀓𑀡𑁆𑀝𑀓𑀸;

𑀲𑀩𑁆𑀩𑁂 𑀫𑀕𑁆𑀕𑀸 𑀯𑀺𑀯𑀚𑁆𑀚𑀦𑁆𑀢𑀺, 𑀕𑀘𑁆𑀙𑀦𑁆𑀢𑁂 𑀮𑁄𑀓𑀦𑀸𑀬𑀓𑁂.

‘‘𑀦𑀸𑀢𑀺𑀤𑀽𑀭𑁂 𑀉𑀤𑁆𑀥𑀭𑀢𑀺, 𑀦𑀘𑁆𑀘𑀸𑀲𑀦𑁆𑀦𑁂 𑀘 𑀦𑀺𑀓𑁆𑀔𑀺𑀧𑀁;

𑀅𑀖𑀝𑁆𑀝𑀬𑀦𑁆𑀢𑁄 𑀦𑀺𑀬𑁆𑀬𑀸𑀢𑀺, 𑀉𑀪𑁄 𑀚𑀸𑀡𑀽 𑀘 𑀕𑁄𑀧𑁆𑀨𑀓𑁂.

‘‘𑀦𑀸𑀢𑀺𑀲𑀻𑀖𑀁 𑀧𑀓𑁆𑀓𑀫𑀢𑀺, 𑀲𑀫𑁆𑀧𑀦𑁆𑀦𑀘𑀭𑀡𑁄 𑀫𑀼𑀦𑀺;

𑀦 𑀘𑀸𑀧𑀺 𑀲𑀡𑀺𑀓𑀁 𑀬𑀸𑀢𑀺, 𑀕𑀘𑁆𑀙𑀫𑀸𑀦𑁄 𑀲𑀫𑀸𑀳𑀺𑀢𑁄.

‘‘𑀉𑀤𑁆𑀥𑀁 𑀅𑀥𑁄 𑀘 𑀢𑀺𑀭𑀺𑀬𑀜𑁆𑀘, 𑀤𑀺𑀲𑀜𑁆𑀘 𑀯𑀺𑀤𑀺𑀲𑀁 𑀢𑀣𑀸;

𑀦 𑀧𑁂𑀓𑁆𑀔𑀫𑀸𑀦𑁄 𑀲𑁄 𑀬𑀸𑀢𑀺, 𑀬𑀼𑀕𑀫𑀢𑁆𑀢𑀜𑁆𑀳𑀺 𑀧𑁂𑀓𑁆𑀔𑀢𑀺.

‘‘𑀦𑀸𑀕𑀯𑀺𑀓𑁆𑀓𑀦𑁆𑀢𑀘𑀸𑀭𑁄 𑀲𑁄, 𑀕𑀫𑀦𑁂 𑀲𑁄𑀪𑀢𑁂 𑀚𑀺𑀦𑁄;

𑀘𑀸𑀭𑀼𑀁 𑀕𑀘𑁆𑀙𑀢𑀺 𑀮𑁄𑀓𑀕𑁆𑀕𑁄, 𑀳𑀸𑀲𑀬𑀦𑁆𑀢𑁄 𑀲𑀤𑁂𑀯𑀓𑁂.

‘‘𑀉𑀴𑀼𑀭𑀸𑀚𑀸𑀯 𑀲𑁄𑀪𑀦𑁆𑀢𑁄, 𑀘𑀢𑀼𑀘𑀸𑀭𑀻𑀯 𑀓𑁂𑀲𑀭𑀻;

𑀢𑁄𑀲𑀬𑀦𑁆𑀢𑁄 𑀩𑀳𑀽 𑀲𑀢𑁆𑀢𑁂, 𑀧𑀼𑀭𑀁 𑀲𑁂𑀝𑁆𑀞𑀁 𑀉𑀧𑀸𑀕𑀫𑀻’’𑀢𑀺.

𑀯𑀡𑁆𑀡𑀓𑀸𑀮𑁄 𑀦𑀸𑀫 𑀓𑀺𑀭𑁂𑀲, 𑀏𑀯𑀁𑀯𑀺𑀥𑁂𑀲𑀼 𑀓𑀸𑀮𑁂𑀲𑀼 𑀩𑀼𑀤𑁆𑀥𑀲𑁆𑀲 𑀲𑀭𑀻𑀭𑀯𑀡𑁆𑀡𑁂 𑀯𑀸 𑀕𑀼𑀡𑀯𑀡𑁆𑀡𑁂 𑀯𑀸 𑀥𑀫𑁆𑀫𑀓𑀣𑀺𑀓𑀲𑁆𑀲 𑀣𑀸𑀫𑁄𑀬𑁂𑀯 𑀧𑀫𑀸𑀡𑀁. 𑀘𑀼𑀡𑁆𑀡𑀺𑀬𑀧𑀤𑁂𑀳𑀺 𑀯𑀸 𑀕𑀸𑀣𑀸𑀩𑀦𑁆𑀥𑁂𑀦 𑀯𑀸 𑀬𑀢𑁆𑀢𑀓𑀁 𑀲𑀓𑁆𑀓𑁄𑀢𑀺, 𑀢𑀢𑁆𑀢𑀓𑀁 𑀯𑀢𑁆𑀢𑀩𑁆𑀩𑀁. 𑀤𑀼𑀓𑁆𑀓𑀣𑀺𑀢𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀅𑀧𑁆𑀧𑀫𑀸𑀡𑀯𑀡𑁆𑀡𑀸 𑀳𑀺 𑀩𑀼𑀤𑁆𑀥𑀸. 𑀢𑁂𑀲𑀁 𑀩𑀼𑀤𑁆𑀥𑀸𑀧𑀺 𑀅𑀦𑀯𑀲𑁂𑀲𑀢𑁄 𑀯𑀡𑁆𑀡𑀁 𑀯𑀢𑁆𑀢𑀼𑀁 𑀅𑀲𑀫𑀢𑁆𑀣𑀸, 𑀧𑀕𑁂𑀯 𑀇𑀢𑀭𑀸 𑀧𑀚𑀸𑀢𑀺. 𑀇𑀫𑀺𑀦𑀸 𑀲𑀺𑀭𑀺𑀯𑀺𑀮𑀸𑀲𑁂𑀦 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀁 𑀲𑀓𑁆𑀬𑀭𑀸𑀚𑀓𑀼𑀮𑀁 𑀧𑀯𑀺𑀲𑀺𑀢𑁆𑀯𑀸 𑀪𑀕𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑁂𑀦 𑀚𑀦𑁂𑀦 𑀕𑀦𑁆𑀥𑀥𑀽𑀫𑀯𑀸𑀲𑀘𑀼𑀡𑁆𑀡𑀸𑀤𑀻𑀳𑀺 𑀧𑀽𑀚𑀺𑀬𑀫𑀸𑀦𑁄 𑀲𑀦𑁆𑀣𑀸𑀕𑀸𑀭𑀁 𑀧𑀸𑀯𑀺𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀣 𑀔𑁄 𑀪𑀕𑀯𑀸 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀬𑁂𑀦 𑀦𑀯𑀁 𑀲𑀦𑁆𑀣𑀸𑀕𑀸𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀻’’𑀢𑀺.

𑀪𑀕𑀯𑀦𑁆𑀢𑀁𑀬𑁂𑀯 𑀧𑀼𑀭𑀓𑁆𑀔𑀢𑁆𑀯𑀸𑀢𑀺 𑀪𑀕𑀯𑀦𑁆𑀢𑀁 𑀧𑀼𑀭𑀢𑁄 𑀓𑀢𑁆𑀯𑀸. 𑀢𑀢𑁆𑀣 𑀪𑀕𑀯𑀸 𑀪𑀺𑀓𑁆𑀔𑀽𑀦𑀜𑁆𑀘𑁂𑀯 𑀉𑀧𑀸𑀲𑀓𑀸𑀦𑀜𑁆𑀘 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄 𑀕𑀦𑁆𑀥𑁄𑀤𑀓𑁂𑀦 𑀦𑁆𑀳𑀸𑀧𑁂𑀢𑁆𑀯𑀸 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂𑀦 𑀯𑁄𑀤𑀓𑀁 𑀓𑀢𑁆𑀯𑀸 𑀚𑀸𑀢𑀺𑀳𑀺𑀗𑁆𑀕𑀼𑀮𑀓𑁂𑀦 𑀫𑀚𑁆𑀚𑀺𑀢𑁆𑀯𑀸 𑀭𑀢𑁆𑀢𑀓𑀫𑁆𑀩𑀮𑀧𑀮𑀺𑀯𑁂𑀞𑀺𑀢𑁂 𑀧𑀻𑀞𑁂 𑀞𑀧𑀺𑀢𑀭𑀢𑁆𑀢𑀲𑀼𑀯𑀡𑁆𑀡𑀖𑀦𑀧𑀝𑀺𑀫𑀸 𑀯𑀺𑀬 𑀅𑀢𑀺𑀯𑀺𑀭𑁄𑀘𑀺𑀢𑁆𑀣. 𑀅𑀬𑀁 𑀧𑀦𑁂𑀢𑁆𑀣 𑀧𑁄𑀭𑀸𑀡𑀸𑀦𑀁 𑀯𑀡𑁆𑀡𑀪𑀡𑀦𑀫𑀕𑁆𑀕𑁄 𑁋

‘‘𑀕𑀦𑁆𑀢𑁆𑀯𑀸𑀦 𑀫𑀡𑁆𑀟𑀮𑀫𑀸𑀴𑀁, 𑀦𑀸𑀕𑀯𑀺𑀓𑁆𑀓𑀦𑁆𑀢𑀘𑀸𑀭𑀡𑁄;

𑀑𑀪𑀸𑀲𑀬𑀦𑁆𑀢𑁄 𑀮𑁄𑀓𑀕𑁆𑀕𑁄, 𑀦𑀺𑀲𑀻𑀤𑀺 𑀯𑀭𑀫𑀸𑀲𑀦𑁂.

‘‘𑀢𑀳𑀺𑀁 𑀦𑀺𑀲𑀺𑀦𑁆𑀦𑁄 𑀦𑀭𑀤𑀫𑁆𑀫𑀲𑀸𑀭𑀣𑀺,

𑀤𑁂𑀯𑀸𑀢𑀺𑀤𑁂𑀯𑁄 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑁄;

𑀩𑀼𑀤𑁆𑀥𑀸𑀲𑀦𑁂 𑀫𑀚𑁆𑀛𑀕𑀢𑁄 𑀯𑀺𑀭𑁄𑀘𑀢𑀺,

𑀲𑀼𑀯𑀡𑁆𑀡𑀦𑁂𑀓𑁆𑀔𑀁 𑀯𑀺𑀬 𑀧𑀡𑁆𑀟𑀼𑀓𑀫𑁆𑀩𑀮𑁂.

‘‘𑀦𑁂𑀓𑁆𑀔𑀁 𑀚𑀫𑁆𑀩𑁄𑀦𑀤𑀲𑁆𑀲𑁂𑀯, 𑀦𑀺𑀓𑁆𑀔𑀺𑀢𑁆𑀢𑀁 𑀧𑀡𑁆𑀟𑀼𑀓𑀫𑁆𑀩𑀮𑁂;

𑀯𑀺𑀭𑁄𑀘𑀢𑀺 𑀯𑀻𑀢𑀫𑀮𑁄, 𑀫𑀡𑀺𑀯𑁂𑀭𑁄𑀘𑀦𑁄 𑀬𑀣𑀸.

‘‘𑀫𑀳𑀸𑀲𑀸𑀮𑁄𑀯 𑀲𑀫𑁆𑀨𑀼𑀮𑁆𑀮𑁄, 𑀦𑁂𑀭𑀼𑀭𑀸𑀚𑀸𑀯’𑀮𑀗𑁆𑀓𑀢𑁄;

𑀲𑀼𑀯𑀡𑁆𑀡𑀬𑀽𑀧𑀲𑀗𑁆𑀓𑀸𑀲𑁄, 𑀧𑀤𑀼𑀫𑁄 𑀓𑁄𑀓𑀦𑀤𑁄 𑀬𑀣𑀸.

‘‘𑀚𑀮𑀦𑁆𑀢𑁄 𑀤𑀻𑀧𑀭𑀼𑀓𑁆𑀔𑁄𑀯, 𑀧𑀩𑁆𑀩𑀢𑀕𑁆𑀕𑁂 𑀬𑀣𑀸 𑀲𑀺𑀔𑀻;

𑀤𑁂𑀯𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑁄𑀯, 𑀲𑀩𑁆𑀩𑀨𑀼𑀮𑁆𑀮𑁄 𑀯𑀺𑀭𑁄𑀘𑀢𑀻’’𑀢𑀺.

𑀓𑀸𑀧𑀺𑀮𑀯𑀢𑁆𑀣𑀯𑁂 𑀲𑀓𑁆𑀬𑁂 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬𑀸𑀢𑀺 𑀏𑀢𑁆𑀣 𑀥𑀫𑁆𑀫𑀓𑀣𑀸 𑀦𑀸𑀫 𑀲𑀦𑁆𑀣𑀸𑀕𑀸𑀭𑀸𑀦𑀼𑀫𑁄𑀤𑀦𑀸𑀧𑀝𑀺𑀲𑀁𑀬𑀼𑀢𑁆𑀢𑀸 𑀧𑀓𑀺𑀡𑁆𑀡𑀓𑀓𑀣𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀤𑀸 𑀳𑀺 𑀪𑀕𑀯𑀸 𑀆𑀓𑀸𑀲𑀕𑀗𑁆𑀕𑀁 𑀑𑀢𑀸𑀭𑁂𑀦𑁆𑀢𑁄 𑀯𑀺𑀬 𑀧𑀣𑀯𑁄𑀚𑀁 𑀆𑀓𑀟𑁆𑀠𑀦𑁆𑀢𑁄 𑀯𑀺𑀬 𑀫𑀳𑀸𑀚𑀫𑁆𑀩𑀼𑀁 𑀫𑀢𑁆𑀣𑀓𑁂 𑀕𑀳𑁂𑀢𑁆𑀯𑀸 𑀘𑀸𑀮𑁂𑀦𑁆𑀢𑁄 𑀯𑀺𑀬 𑀬𑁄𑀚𑀦𑀺𑀓𑀁 𑀫𑀥𑀼𑀪𑀡𑁆𑀟𑀁 𑀘𑀓𑁆𑀓𑀬𑀦𑁆𑀢𑁂𑀦 𑀧𑀻𑀴𑁂𑀢𑁆𑀯𑀸 𑀫𑀥𑀼𑀧𑀸𑀦𑀁 𑀧𑀸𑀬𑀫𑀸𑀦𑁄 𑀯𑀺𑀬 𑀓𑀧𑀺𑀮𑀯𑀢𑁆𑀣𑀼𑀯𑀸𑀲𑀻𑀦𑀁 𑀲𑀓𑁆𑀬𑀸𑀦𑀁 𑀳𑀺𑀢𑀲𑀼𑀔𑀸𑀯𑀳𑀁 𑀧𑀓𑀺𑀡𑁆𑀡𑀓𑀓𑀣𑀁 𑀓𑀣𑁂𑀲𑀺. ‘‘𑀆𑀯𑀸𑀲𑀤𑀸𑀦𑀁 𑀦𑀸𑀫𑁂𑀢𑀁, 𑀫𑀳𑀸𑀭𑀸𑀚, 𑀫𑀳𑀦𑁆𑀢𑀁, 𑀢𑀼𑀫𑁆𑀳𑀸𑀓𑀁 𑀆𑀯𑀸𑀲𑁄 𑀫𑀬𑀸 𑀧𑀭𑀺𑀪𑀼𑀢𑁆𑀢𑁄, 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀘 𑀧𑀭𑀺𑀪𑀼𑀢𑁆𑀢𑁄, 𑀫𑀬𑀸 𑀘 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀘 𑀧𑀭𑀺𑀪𑀼𑀢𑁆𑀢𑁄 𑀧𑀦 𑀥𑀫𑁆𑀫𑀭𑀢𑀦𑁂𑀦 𑀧𑀭𑀺𑀪𑀼𑀢𑁆𑀢𑁄𑀬𑁂𑀯𑀸𑀢𑀺 𑀢𑀻𑀳𑀺 𑀭𑀢𑀦𑁂𑀳𑀺 𑀧𑀭𑀺𑀪𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀆𑀯𑀸𑀲𑀤𑀸𑀦𑀲𑁆𑀫𑀺𑀜𑁆𑀳𑀺 𑀤𑀺𑀦𑁆𑀦𑁂 𑀲𑀩𑁆𑀩𑀤𑀸𑀦𑀁 𑀤𑀺𑀦𑁆𑀦𑀫𑁂𑀯 𑀳𑁄𑀢𑀺. 𑀪𑀼𑀫𑁆𑀫𑀝𑁆𑀞𑀓𑀧𑀡𑁆𑀡𑀲𑀸𑀮𑀸𑀬 𑀯𑀸 𑀲𑀸𑀔𑀸𑀫𑀡𑁆𑀟𑀧𑀲𑁆𑀲 𑀯𑀸𑀧𑀺 𑀆𑀦𑀺𑀲𑀁𑀲𑁄 𑀦𑀸𑀫 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀦 𑀲𑀓𑁆𑀓𑀸. 𑀆𑀯𑀸𑀲𑀤𑀸𑀦𑀸𑀦𑀼𑀪𑀸𑀯𑁂𑀦 𑀳𑀺 𑀪𑀯𑁂 𑀪𑀯𑁂 𑀦𑀺𑀩𑁆𑀩𑀢𑁆𑀢𑀲𑁆𑀲𑀸𑀧𑀺 𑀲𑀫𑁆𑀩𑀸𑀥𑀺𑀢𑀕𑀩𑁆𑀪𑀯𑀸𑀲𑁄 𑀦 𑀳𑁄𑀢𑀺, 𑀤𑁆𑀯𑀸𑀤𑀲𑀳𑀢𑁆𑀣𑁄 𑀑𑀯𑀭𑀓𑁄 𑀯𑀺𑀬 𑀫𑀸𑀢𑀼𑀓𑀼𑀘𑁆𑀙𑀺 𑀅𑀲𑀫𑁆𑀩𑀸𑀥𑁄𑀯 𑀳𑁄𑀢𑀻’’𑀢𑀺. 𑀏𑀯𑀁 𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀁 𑀩𑀳𑀼𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀣𑁂𑀢𑁆𑀯𑀸 𑁋

‘‘𑀲𑀻𑀢𑀁 𑀉𑀡𑁆𑀳𑀁 𑀧𑀝𑀺𑀳𑀦𑁆𑀢𑀺, 𑀢𑀢𑁄 𑀯𑀸𑀴𑀫𑀺𑀕𑀸𑀦𑀺 𑀘;

𑀲𑀺𑀭𑀻𑀲𑀧𑁂 𑀘 𑀫𑀓𑀲𑁂, 𑀲𑀺𑀲𑀺𑀭𑁂 𑀘𑀸𑀧𑀺 𑀯𑀼𑀝𑁆𑀞𑀺𑀬𑁄.

‘‘𑀢𑀢𑁄 𑀯𑀸𑀢𑀸𑀢𑀧𑁄 𑀖𑁄𑀭𑁄, 𑀲𑀜𑁆𑀚𑀸𑀢𑁄 𑀧𑀝𑀺𑀳𑀜𑁆𑀜𑀢𑀺;

𑀮𑁂𑀡𑀢𑁆𑀣𑀜𑁆𑀘 𑀲𑀼𑀔𑀢𑁆𑀣𑀜𑁆𑀘, 𑀛𑀸𑀬𑀺𑀢𑀼𑀜𑁆𑀘 𑀯𑀺𑀧𑀲𑁆𑀲𑀺𑀢𑀼𑀁.

‘‘𑀯𑀺𑀳𑀸𑀭𑀤𑀸𑀦𑀁 𑀲𑀗𑁆𑀖𑀲𑁆𑀲, 𑀅𑀕𑁆𑀕𑀁 𑀩𑀼𑀤𑁆𑀥𑁂𑀦 𑀯𑀡𑁆𑀡𑀺𑀢𑀁;

𑀢𑀲𑁆𑀫𑀸 𑀳𑀺 𑀧𑀡𑁆𑀟𑀺𑀢𑁄 𑀧𑁄𑀲𑁄, 𑀲𑀫𑁆𑀧𑀲𑁆𑀲𑀁 𑀅𑀢𑁆𑀣𑀫𑀢𑁆𑀢𑀦𑁄.

‘‘𑀯𑀺𑀳𑀸𑀭𑁂 𑀓𑀸𑀭𑀬𑁂 𑀭𑀫𑁆𑀫𑁂, 𑀯𑀸𑀲𑀬𑁂𑀢𑁆𑀣 𑀩𑀳𑀼𑀲𑁆𑀲𑀼𑀢𑁂;

𑀢𑁂𑀲𑀁 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘, 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘.

‘‘𑀤𑀤𑁂𑀬𑁆𑀬 𑀉𑀚𑀼𑀪𑀽𑀢𑁂𑀲𑀼, 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸;

𑀢𑁂 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀲𑀩𑁆𑀩𑀤𑀼𑀓𑁆𑀔𑀸𑀧𑀦𑀽𑀤𑀦𑀁;

𑀬𑀁 𑀲𑁄 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬, 𑀧𑀭𑀺𑀦𑀺𑀩𑁆𑀩𑀸𑀢𑀺 𑀅𑀦𑀸𑀲𑀯𑁄’’𑀢𑀺. (𑀘𑀽𑀴𑀯. 𑁨𑁯𑁫) 𑁋

𑀏𑀯𑀁 ‘‘𑀅𑀬𑀫𑁆𑀧𑀺 𑀆𑀯𑀸𑀲𑁂 𑀆𑀦𑀺𑀲𑀁𑀲𑁄, 𑀅𑀬𑀫𑁆𑀧𑀺 𑀆𑀯𑀸𑀲𑁂 𑀆𑀦𑀺𑀲𑀁𑀲𑁄’’𑀢𑀺 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀅𑀢𑀺𑀭𑁂𑀓𑀢𑀭𑀁 𑀤𑀺𑀬𑀟𑁆𑀠𑀬𑀸𑀫𑀁 𑀆𑀯𑀸𑀲𑀸𑀦𑀺𑀲𑀁𑀲𑀓𑀣𑀁 𑀓𑀣𑁂𑀲𑀺. 𑀢𑀢𑁆𑀣 𑀇𑀫𑀸 𑀢𑀸𑀯 𑀕𑀸𑀣𑀸𑀯 𑀲𑀗𑁆𑀕𑀳𑀁 𑀆𑀭𑀼𑀴𑁆𑀳𑀸, 𑀧𑀓𑀺𑀡𑁆𑀡𑀓𑀥𑀫𑁆𑀫𑀤𑁂𑀲𑀦𑀸 𑀧𑀦 𑀲𑀗𑁆𑀕𑀳𑀁 𑀦𑀸𑀭𑁄𑀳𑀢𑀺. 𑀲𑀦𑁆𑀤𑀲𑁆𑀲𑁂𑀢𑁆𑀯𑀸𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯.

𑀅𑀪𑀺𑀓𑁆𑀓𑀦𑁆𑀢𑀸𑀢𑀺 𑀅𑀢𑀺𑀓𑁆𑀓𑀦𑁆𑀢𑀸 𑀤𑁆𑀯𑁂 𑀬𑀸𑀫𑀸 𑀕𑀢𑀸. 𑀬𑀲𑁆𑀲 𑀤𑀸𑀦𑀺 𑀓𑀸𑀮𑀁 𑀫𑀜𑁆𑀜𑀣𑀸𑀢𑀺 𑀬𑀲𑁆𑀲 𑀢𑀼𑀫𑁆𑀳𑁂 𑀕𑀫𑀦𑀲𑁆𑀲 𑀓𑀸𑀮𑀁 𑀫𑀜𑁆𑀜𑀣, 𑀕𑀫𑀦𑀓𑀸𑀮𑁄 𑀢𑀼𑀫𑁆𑀳𑀸𑀓𑀁, 𑀕𑀘𑁆𑀙𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀢𑁂 𑀉𑀬𑁆𑀬𑁄𑀚𑁂𑀲𑀻𑀢𑀺? 𑀅𑀦𑀼𑀓𑀫𑁆𑀧𑀸𑀬. 𑀲𑀼𑀔𑀼𑀫𑀸𑀮𑀸 𑀳𑀺 𑀢𑁂, 𑀢𑀺𑀬𑀸𑀫𑀭𑀢𑁆𑀢𑀺𑀁 𑀦𑀺𑀲𑀻𑀤𑀺𑀢𑁆𑀯𑀸 𑀯𑀻𑀢𑀺𑀦𑀸𑀫𑁂𑀦𑁆𑀢𑀸𑀦𑀁 𑀲𑀭𑀻𑀭𑁂 𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀫𑀳𑀸, 𑀢𑀲𑁆𑀲 𑀞𑀸𑀦𑀦𑀺𑀲𑀚𑁆𑀚𑀸𑀦𑀁 𑀑𑀓𑀸𑀲𑁄 𑀮𑀤𑁆𑀥𑀼𑀁 𑀯𑀝𑁆𑀝𑀢𑀻𑀢𑀺 𑀉𑀪𑀬𑀸𑀦𑀼𑀓𑀫𑁆𑀧𑀸𑀬 𑀉𑀬𑁆𑀬𑁄𑀚𑁂𑀲𑀺.

𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄𑀢𑀺 𑀢𑀢𑁆𑀭 𑀓𑀺𑀭 𑀪𑀺𑀓𑁆𑀔𑀽 𑀬𑀸𑀫𑀤𑁆𑀯𑀬𑀁 𑀞𑀺𑀢𑀸𑀧𑀺 𑀦𑀺𑀲𑀺𑀦𑁆𑀦𑀸𑀧𑀺 𑀅𑀘𑀸𑀮𑀬𑀺𑀁𑀲𑀼, 𑀧𑀘𑁆𑀙𑀺𑀫𑀬𑀸𑀫𑁂 𑀧𑀦 𑀆𑀳𑀸𑀭𑁄 𑀧𑀭𑀺𑀡𑀫𑀢𑀺, 𑀢𑀲𑁆𑀲 𑀧𑀭𑀺𑀡𑀢𑀢𑁆𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁄 𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄 𑀚𑀸𑀢𑁄𑀢𑀺 𑀅𑀓𑀸𑀭𑀡𑀫𑁂𑀢𑀁. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀓𑀣𑀁 𑀲𑀼𑀡𑀦𑁆𑀢𑀲𑁆𑀲 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀭𑀣𑀸 𑀦 𑀳𑁄𑀦𑁆𑀢𑀺, 𑀓𑀸𑀬𑀘𑀺𑀢𑁆𑀢𑀮𑀳𑀼𑀢𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂𑀦 𑀢𑁂𑀲𑀁 𑀤𑁆𑀯𑁂 𑀬𑀸𑀫𑁂 𑀞𑀺𑀢𑀸𑀦𑀫𑁆𑀧𑀺 𑀦𑀺𑀲𑀺𑀦𑁆𑀦𑀸𑀦𑀫𑁆𑀧𑀺 𑀥𑀫𑁆𑀫𑀁 𑀲𑀼𑀡𑀦𑁆𑀢𑀸𑀦𑀁 𑀣𑀺𑀦𑀫𑀺𑀤𑁆𑀥𑀁 𑀯𑀺𑀕𑀢𑀁, 𑀧𑀘𑁆𑀙𑀺𑀫𑀬𑀸𑀫𑁂𑀧𑀺 𑀲𑀫𑁆𑀧𑀢𑁆𑀢𑁂 𑀢𑀣𑀸 𑀯𑀺𑀕𑀢𑀫𑁂𑀯 𑀚𑀸𑀢𑀁. 𑀢𑁂𑀦𑀸𑀳 ‘‘𑀯𑀺𑀕𑀢𑀣𑀺𑀦𑀫𑀺𑀤𑁆𑀥𑁄’’𑀢𑀺.

𑀧𑀺𑀝𑁆𑀞𑀺 𑀫𑁂 𑀆𑀕𑀺𑀮𑀸𑀬𑀢𑀻𑀢𑀺 𑀓𑀲𑁆𑀫𑀸 𑀆𑀕𑀺𑀮𑀸𑀬𑀢𑀺? 𑀪𑀕𑀯𑀢𑁄 𑀳𑀺 𑀙𑀩𑁆𑀩𑀲𑁆𑀲𑀸𑀦𑀺 𑀫𑀳𑀸𑀧𑀥𑀸𑀦𑀁 𑀧𑀤𑀳𑀦𑁆𑀢𑀲𑁆𑀲 𑀫𑀳𑀦𑁆𑀢𑀁 𑀓𑀸𑀬𑀤𑀼𑀓𑁆𑀔𑀁 𑀅𑀳𑁄𑀲𑀺, 𑀅𑀣𑀲𑁆𑀲 𑀅𑀧𑀭𑀪𑀸𑀕𑁂 𑀫𑀳𑀮𑁆𑀮𑀓𑀓𑀸𑀮𑁂 𑀧𑀺𑀝𑁆𑀞𑀺𑀯𑀸𑀢𑁄 𑀉𑀧𑁆𑀧𑀚𑁆𑀚𑀻𑀢𑀺. 𑀅𑀓𑀸𑀭𑀡𑀁 𑀯𑀸 𑀏𑀢𑀁. 𑀧𑀳𑁄𑀢𑀺 𑀳𑀺 𑀪𑀕𑀯𑀸 𑀉𑀧𑁆𑀧𑀦𑁆𑀦𑀁 𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀏𑀓𑀫𑁆𑀧𑀺 𑀤𑁆𑀯𑁂𑀧𑀺 𑀲𑀢𑁆𑀢𑀸𑀳𑀸𑀦𑀺 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑀼𑀁. 𑀲𑀦𑁆𑀣𑀸𑀕𑀸𑀭𑀲𑀸𑀮𑀁 𑀧𑀦 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀢𑀢𑁆𑀣 𑀧𑀸𑀤𑀥𑁄𑀯𑀦𑀝𑁆𑀞𑀸𑀦𑀢𑁄 𑀬𑀸𑀯 𑀥𑀫𑁆𑀫𑀸𑀲𑀦𑀸 𑀅𑀕𑀫𑀸𑀲𑀺, 𑀏𑀢𑁆𑀢𑀓𑁂 𑀞𑀸𑀦𑁂 𑀕𑀫𑀦𑀁 𑀦𑀺𑀧𑁆𑀨𑀦𑁆𑀦𑀁. 𑀥𑀫𑁆𑀫𑀸𑀲𑀦𑀁 𑀧𑀢𑁆𑀢𑀁 𑀣𑁄𑀓𑀁 𑀞𑀢𑁆𑀯𑀸 𑀦𑀺𑀲𑀻𑀤𑀺, 𑀏𑀢𑁆𑀢𑀓𑁂 𑀞𑀸𑀦𑁂 𑀞𑀸𑀦𑀁 𑀦𑀺𑀧𑁆𑀨𑀦𑁆𑀦𑀁. 𑀤𑁆𑀯𑁂𑀬𑀸𑀫𑀁 𑀥𑀫𑁆𑀫𑀸𑀲𑀦𑁂 𑀦𑀺𑀲𑀻𑀤𑀺, 𑀏𑀢𑁆𑀢𑀓𑁂 𑀞𑀸𑀦𑁂 𑀦𑀺𑀲𑀚𑁆𑀚𑀸 𑀦𑀺𑀧𑁆𑀨𑀦𑁆𑀦𑀸. 𑀇𑀤𑀸𑀦𑀺 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀣𑁄𑀓𑀁 𑀦𑀺𑀧𑀦𑁆𑀦𑁂 𑀲𑀬𑀦𑀁 𑀦𑀺𑀧𑁆𑀨𑀚𑁆𑀚𑀺𑀲𑁆𑀲𑀢𑀻𑀢𑀺 𑀏𑀯𑀁 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀓𑀸𑀫𑁄 𑀅𑀳𑁄𑀲𑀺. 𑀉𑀧𑀸𑀤𑀺𑀦𑁆𑀦𑀓𑀲𑀭𑀻𑀭𑀜𑁆𑀘 𑀦𑀸𑀫 ‘‘𑀦𑁄 𑀆𑀕𑀺𑀮𑀸𑀬𑀢𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀢𑀲𑁆𑀫𑀸 𑀘𑀺𑀭𑀦𑀺𑀲𑀚𑁆𑀚𑀸𑀬 𑀲𑀜𑁆𑀚𑀸𑀢𑀁 𑀅𑀧𑁆𑀧𑀓𑀫𑁆𑀧𑀺 𑀆𑀕𑀺𑀮𑀸𑀬𑀦𑀁 𑀕𑀳𑁂𑀢𑁆𑀯𑀸 𑀏𑀯𑀫𑀸𑀳.

𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀲𑀦𑁆𑀣𑀸𑀕𑀸𑀭𑀲𑁆𑀲 𑀓𑀺𑀭 𑀏𑀓𑀧𑀲𑁆𑀲𑁂 𑀢𑁂 𑀭𑀸𑀚𑀸𑀦𑁄 𑀧𑀝𑀲𑀸𑀡𑀺𑀁 𑀧𑀭𑀺𑀓𑁆𑀔𑀺𑀧𑀸𑀧𑁂𑀢𑁆𑀯𑀸 𑀓𑀧𑁆𑀧𑀺𑀬𑀫𑀜𑁆𑀘𑀓𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀓𑀧𑁆𑀧𑀺𑀬𑀧𑀘𑁆𑀘𑀢𑁆𑀣𑀭𑀡𑁂𑀦 𑀅𑀢𑁆𑀣𑀭𑀺𑀢𑁆𑀯𑀸 𑀉𑀧𑀭𑀺 𑀲𑀼𑀯𑀡𑁆𑀡𑀢𑀸𑀭𑀓𑀕𑀦𑁆𑀥𑀫𑀸𑀮𑀸𑀤𑀺𑀤𑀸𑀫𑀧𑀝𑀺𑀫𑀡𑁆𑀟𑀺𑀢𑀁 𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀕𑀦𑁆𑀥𑀢𑁂𑀮𑀧𑁆𑀧𑀤𑀻𑀧𑀁 𑀆𑀭𑁄𑀧𑀬𑀺𑀁𑀲𑀼, ‘‘𑀅𑀧𑁆𑀧𑁂𑀯 𑀦𑀸𑀫 𑀲𑀢𑁆𑀣𑀸 𑀥𑀫𑁆𑀫𑀸𑀲𑀦𑀢𑁄 𑀯𑀼𑀝𑁆𑀞𑀸𑀬 𑀣𑁄𑀓𑀁 𑀯𑀺𑀲𑁆𑀲𑀫𑀦𑁆𑀢𑁄 𑀇𑀥 𑀦𑀺𑀧𑀚𑁆𑀚𑁂𑀬𑁆𑀬, 𑀏𑀯𑀁 𑀦𑁄 𑀇𑀫𑀁 𑀲𑀦𑁆𑀣𑀸𑀕𑀸𑀭𑀁 𑀪𑀕𑀯𑀢𑀸 𑀘𑀢𑀽𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀧𑀭𑀺𑀪𑀼𑀢𑁆𑀢𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺. 𑀲𑀢𑁆𑀣𑀸𑀧𑀺 𑀢𑀤𑁂𑀯 𑀲𑀦𑁆𑀥𑀸𑀬 𑀢𑀢𑁆𑀣 𑀲𑀗𑁆𑀖𑀸𑀝𑀺𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀦𑀺𑀧𑀚𑁆𑀚𑀺. 𑀉𑀝𑁆𑀞𑀸𑀦𑀲𑀜𑁆𑀜𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸𑀢𑀺 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀼𑀝𑁆𑀞𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀝𑁆𑀞𑀸𑀦𑀲𑀜𑁆𑀜𑀁 𑀘𑀺𑀢𑁆𑀢𑁂 𑀞𑀧𑁂𑀢𑁆𑀯𑀸, 𑀢𑀜𑁆𑀘 𑀔𑁄 𑀅𑀦𑀺𑀤𑁆𑀤𑀸𑀬𑀦𑁆𑀢𑁄𑀯 𑀣𑁂𑀭𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀡𑀫𑀸𑀦𑁄.

𑀅𑀯𑀲𑁆𑀲𑀼𑀢𑀧𑀭𑀺𑀬𑀸𑀬𑀦𑁆𑀢𑀺 𑀅𑀯𑀲𑁆𑀲𑀼𑀢𑀲𑁆𑀲 𑀧𑀭𑀺𑀬𑀸𑀬𑀁, 𑀅𑀯𑀲𑁆𑀲𑀼𑀢𑀲𑁆𑀲 𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀅𑀥𑀺𑀫𑀼𑀘𑁆𑀘𑀢𑀻𑀢𑀺 𑀓𑀺𑀮𑁂𑀲𑀸𑀥𑀺𑀫𑀼𑀘𑁆𑀘𑀦𑁂𑀦 𑀅𑀥𑀺𑀫𑀼𑀘𑁆𑀘𑀢𑀺, 𑀕𑀺𑀤𑁆𑀥𑁄 𑀳𑁄𑀢𑀺. 𑀩𑁆𑀬𑀸𑀧𑀚𑁆𑀚𑀢𑀻𑀢𑀺 𑀩𑁆𑀬𑀸𑀧𑀸𑀤𑀯𑀲𑁂𑀦 𑀧𑀽𑀢𑀺𑀘𑀺𑀢𑁆𑀢𑁄 𑀳𑁄𑀢𑀺. 𑀘𑀓𑁆𑀔𑀼𑀢𑁄𑀢𑀺 𑀘𑀓𑁆𑀔𑀼𑀪𑀸𑀯𑁂𑀦. 𑀫𑀸𑀭𑁄𑀢𑀺 𑀓𑀺𑀮𑁂𑀲𑀫𑀸𑀭𑁄𑀧𑀺 𑀤𑁂𑀯𑀧𑀼𑀢𑁆𑀢𑀫𑀸𑀭𑁄𑀧𑀺. 𑀑𑀢𑀸𑀭𑀦𑁆𑀢𑀺 𑀯𑀺𑀯𑀭𑀁. 𑀆𑀭𑀫𑁆𑀫𑀡𑀦𑁆𑀢𑀺 𑀧𑀘𑁆𑀘𑀬𑀁. 𑀦𑀴𑀸𑀕𑀸𑀭𑀢𑀺𑀡𑀸𑀕𑀸𑀭𑀁 𑀯𑀺𑀬 𑀳𑀺 𑀲𑀯𑀺𑀲𑁂𑀯𑀦𑀸𑀦𑀺 𑀆𑀬𑀢𑀦𑀸𑀦𑀺, 𑀢𑀺𑀡𑀼𑀓𑁆𑀓𑀸 𑀯𑀺𑀬 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀭𑀳𑀁 𑀆𑀭𑀫𑁆𑀫𑀡𑀁, 𑀢𑀺𑀡𑀼𑀓𑁆𑀓𑀸𑀬 𑀞𑀧𑀺𑀢𑀞𑀧𑀺𑀢𑀝𑁆𑀞𑀸𑀦𑁂 𑀅𑀗𑁆𑀕𑀸𑀭𑀲𑁆𑀲𑀼𑀚𑁆𑀚𑀮𑀦𑀁 𑀯𑀺𑀬 𑀆𑀭𑀫𑁆𑀫𑀡𑁂 𑀆𑀧𑀸𑀣𑀫𑀸𑀕𑀢𑁂 𑀓𑀺𑀮𑁂𑀲𑀸𑀦𑀁 𑀉𑀧𑁆𑀧𑀢𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀮𑀪𑁂𑀣 𑀫𑀸𑀭𑁄 𑀑𑀢𑀸𑀭𑀦𑁆𑀢𑀺.

𑀲𑀼𑀓𑁆𑀓𑀧𑀓𑁆𑀔𑁂 𑀩𑀳𑀮𑀫𑀢𑁆𑀢𑀺𑀓𑀧𑀺𑀡𑁆𑀟𑀸𑀯𑀮𑁂𑀧𑀦𑀁 𑀓𑀽𑀝𑀸𑀕𑀸𑀭𑀁 𑀯𑀺𑀬 𑀦𑀺𑀩𑁆𑀩𑀺𑀲𑁂𑀯𑀦𑀸𑀦𑀺 𑀆𑀬𑀢𑀦𑀸𑀦𑀺, 𑀢𑀺𑀡𑀼𑀓𑁆𑀓𑀸 𑀯𑀺𑀬 𑀯𑀼𑀢𑁆𑀢𑀧𑀓𑀸𑀭𑀸𑀭𑀫𑁆𑀫𑀡𑀁, 𑀢𑀺𑀡𑀼𑀓𑁆𑀓𑀸𑀬 𑀞𑀧𑀺𑀢𑀞𑀧𑀺𑀢𑀝𑁆𑀞𑀸𑀦𑁂 𑀦𑀺𑀩𑁆𑀩𑀸𑀧𑀦𑀁 𑀯𑀺𑀬 𑀦𑀺𑀩𑁆𑀩𑀺𑀲𑁂𑀯𑀦𑀸𑀦𑀁 𑀆𑀬𑀢𑀦𑀸𑀦𑀁 𑀆𑀭𑀫𑁆𑀫𑀡𑁂 𑀆𑀧𑀸𑀣𑀫𑀸𑀕𑀢𑁂 𑀓𑀺𑀮𑁂𑀲𑀧𑀭𑀺𑀴𑀸𑀳𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑀦𑁂𑀯 𑀮𑀪𑁂𑀣 𑀫𑀸𑀭𑁄 𑀑𑀢𑀸𑀭𑀦𑁆𑀢𑀺.

𑁭. 𑀤𑀼𑀓𑁆𑀔𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁪. 𑀲𑀢𑁆𑀢𑀫𑁂 𑀤𑀼𑀓𑁆𑀔𑀥𑀫𑁆𑀫𑀸𑀦𑀦𑁆𑀢𑀺 𑀤𑀼𑀓𑁆𑀔𑀲𑀫𑁆𑀪𑀯𑀥𑀫𑁆𑀫𑀸𑀦𑀁. 𑀧𑀜𑁆𑀘𑀲𑀼 𑀳𑀺 𑀔𑀦𑁆𑀥𑁂𑀲𑀼 𑀲𑀢𑀺 𑀙𑁂𑀤𑀦𑀯𑀥𑀩𑀦𑁆𑀥𑀦𑀸𑀤𑀺𑀪𑁂𑀤𑀁 𑀤𑀼𑀓𑁆𑀔𑀁 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸 𑀢𑁂 𑀤𑀼𑀓𑁆𑀔𑀲𑀫𑁆𑀪𑀯𑀥𑀫𑁆𑀫𑀢𑁆𑀢𑀸 𑀤𑀼𑀓𑁆𑀔𑀥𑀫𑁆𑀫𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀣𑀸 𑀔𑁄 𑀧𑀦𑀲𑁆𑀲𑀸𑀢𑀺 𑀢𑁂𑀦𑀸𑀓𑀸𑀭𑁂𑀦𑀲𑁆𑀲. 𑀬𑀣𑀸𑀲𑁆𑀲 𑀓𑀸𑀫𑁂 𑀧𑀲𑁆𑀲𑀢𑁄𑀢𑀺 𑀬𑁂𑀦𑀸𑀓𑀸𑀭𑁂𑀦𑀲𑁆𑀲 𑀓𑀸𑀫𑁂 𑀧𑀲𑁆𑀲𑀦𑁆𑀢𑀲𑁆𑀲. 𑀬𑀣𑀸 𑀘𑀭𑀦𑁆𑀢𑀦𑁆𑀢𑀺 𑀬𑁂𑀦𑀸𑀓𑀸𑀭𑁂𑀦 𑀘𑀸𑀭𑀜𑁆𑀘 𑀯𑀺𑀳𑀸𑀭𑀜𑁆𑀘 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀘𑀭𑀦𑁆𑀢𑀁. 𑀅𑀗𑁆𑀕𑀸𑀭𑀓𑀸𑀲𑀽𑀧𑀫𑀸 𑀓𑀸𑀫𑀸 𑀤𑀺𑀝𑁆𑀞𑀸 𑀳𑁄𑀦𑁆𑀢𑀻𑀢𑀺 𑀧𑀭𑀺𑀬𑁂𑀝𑁆𑀞𑀺𑀫𑀽𑀮𑀓𑀲𑁆𑀲 𑀘𑁂𑀯 𑀧𑀝𑀺𑀲𑀦𑁆𑀥𑀺𑀫𑀽𑀮𑀓𑀲𑁆𑀲 𑀘 𑀤𑀼𑀓𑁆𑀔𑀲𑁆𑀲 𑀯𑀲𑁂𑀦 𑀅𑀗𑁆𑀕𑀸𑀭𑀓𑀸𑀲𑀼 𑀯𑀺𑀬 𑀫𑀳𑀸𑀧𑀭𑀺𑀴𑀸𑀳𑀸𑀢𑀺 𑀤𑀺𑀝𑁆𑀞𑀸 𑀳𑁄𑀦𑁆𑀢𑀺. 𑀓𑀸𑀫𑁂 𑀧𑀭𑀺𑀬𑁂𑀲𑀦𑁆𑀢𑀸𑀦𑀜𑁆𑀳𑀺 𑀦𑀸𑀯𑀸𑀬 𑀫𑀳𑀸𑀲𑀫𑀼𑀤𑁆𑀤𑁄𑀕𑀸𑀳𑀦𑀅𑀚𑀧𑀣𑀲𑀗𑁆𑀓𑀼𑀧𑀣𑀧𑀝𑀺𑀧𑀚𑁆𑀚𑀦𑀉𑀪𑀢𑁄𑀩𑁆𑀬𑀽𑀴𑁆𑀳𑀲𑀗𑁆𑀕𑀸𑀫𑀧𑀓𑁆𑀔𑀦𑁆𑀤𑀦𑀸𑀤𑀺𑀯𑀲𑁂𑀦 𑀧𑀭𑀺𑀬𑁂𑀝𑁆𑀞𑀺𑀫𑀽𑀮𑀓𑀫𑁆𑀧𑀺, 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀸𑀦𑀁 𑀓𑀸𑀫𑀧𑀭𑀺𑀪𑁄𑀕𑀘𑁂𑀢𑀦𑀸𑀬 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀤𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀫𑀽𑀮𑀓𑀫𑁆𑀧𑀺 𑀫𑀳𑀸𑀧𑀭𑀺𑀴𑀸𑀳𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀫𑁂𑀢𑀲𑁆𑀲 𑀤𑀼𑀯𑀺𑀥𑀲𑁆𑀲𑀸𑀧𑀺 𑀤𑀼𑀓𑁆𑀔𑀲𑁆𑀲 𑀯𑀲𑁂𑀦 𑀅𑀗𑁆𑀕𑀸𑀭𑀓𑀸𑀲𑀼 𑀯𑀺𑀬 𑀫𑀳𑀸𑀧𑀭𑀺𑀴𑀸𑀳𑀸𑀢𑀺 𑀤𑀺𑀝𑁆𑀞𑀸 𑀳𑁄𑀦𑁆𑀢𑀺.

𑀤𑀸𑀬𑀦𑁆𑀢𑀺 𑀅𑀝𑀯𑀺𑀁. 𑀧𑀼𑀭𑀢𑁄𑀧𑀺 𑀓𑀡𑁆𑀝𑀓𑁄𑀢𑀺 𑀧𑀼𑀭𑀺𑀫𑀧𑀲𑁆𑀲𑁂 𑀯𑀺𑀚𑁆𑀛𑀺𑀢𑀼𑀓𑀸𑀫𑁄 𑀯𑀺𑀬 𑀆𑀲𑀦𑁆𑀦𑀝𑁆𑀞𑀸𑀦𑁂𑀬𑁂𑀯 𑀞𑀺𑀢𑀓𑀡𑁆𑀝𑀓𑁄. 𑀧𑀘𑁆𑀙𑀢𑁄𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀳𑁂𑀝𑁆𑀞𑀸 𑀧𑀦 𑀧𑀸𑀤𑁂𑀳𑀺 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑀲𑁆𑀲 𑀲𑀦𑁆𑀢𑀺𑀓𑁂, 𑀦 𑀅𑀓𑁆𑀓𑀦𑁆𑀢𑀝𑁆𑀞𑀸𑀦𑁂𑀬𑁂𑀯. 𑀏𑀯𑀁 𑀲𑁄 𑀓𑀡𑁆𑀝𑀓𑀕𑀩𑁆𑀪𑀁 𑀧𑀯𑀺𑀝𑁆𑀞𑁄 𑀯𑀺𑀬 𑀪𑀯𑁂𑀬𑁆𑀬. 𑀫𑀸 𑀫𑀁 𑀓𑀡𑁆𑀝𑀓𑁄𑀢𑀺 𑀫𑀸 𑀫𑀁 𑀓𑀡𑁆𑀝𑀓𑁄 𑀯𑀺𑀚𑁆𑀛𑀻𑀢𑀺 𑀓𑀡𑁆𑀝𑀓𑀯𑁂𑀥𑀁 𑀭𑀓𑁆𑀔𑀫𑀸𑀦𑁄.

𑀤𑀦𑁆𑀥𑁄, 𑀪𑀺𑀓𑁆𑀔𑀯𑁂, 𑀲𑀢𑀼𑀧𑁆𑀧𑀸𑀤𑁄𑀢𑀺 𑀲𑀢𑀺𑀬𑀸 𑀉𑀧𑁆𑀧𑀸𑀤𑁄𑀬𑁂𑀯 𑀤𑀦𑁆𑀥𑁄, 𑀉𑀧𑁆𑀧𑀦𑁆𑀦𑀫𑀢𑁆𑀢𑀸𑀬 𑀧𑀦 𑀢𑀸𑀬 𑀓𑀸𑀘𑀺 𑀓𑀺𑀮𑁂𑀲𑀸 𑀦𑀺𑀕𑁆𑀕𑀳𑀺𑀢𑀸𑀯 𑀳𑁄𑀦𑁆𑀢𑀺, 𑀦 𑀲𑀡𑁆𑀞𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀘𑀓𑁆𑀔𑀼𑀤𑁆𑀯𑀸𑀭𑀲𑁆𑀫𑀺𑀜𑁆𑀳𑀺 𑀭𑀸𑀕𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀤𑀼𑀢𑀺𑀬𑀚𑀯𑀦𑀯𑀸𑀭𑁂𑀦 ‘‘𑀓𑀺𑀮𑁂𑀲𑀸 𑀫𑁂 𑀉𑀧𑁆𑀧𑀦𑁆𑀦𑀸’’𑀢𑀺 𑀜𑀢𑁆𑀯𑀸 𑀢𑀢𑀺𑀬𑁂 𑀚𑀯𑀦𑀯𑀸𑀭𑁂 𑀲𑀁𑀯𑀭𑀚𑀯𑀦𑀁𑀬𑁂𑀯 𑀚𑀯𑀢𑀺. 𑀅𑀦𑀘𑁆𑀙𑀭𑀺𑀬𑀜𑁆𑀘𑁂𑀢𑀁, 𑀬𑀁 𑀯𑀺𑀧𑀲𑁆𑀲𑀓𑁄 𑀢𑀢𑀺𑀬𑀚𑀯𑀦𑀯𑀸𑀭𑁂 𑀓𑀺𑀮𑁂𑀲𑁂 𑀦𑀺𑀕𑁆𑀕𑀡𑁆𑀳𑁂𑀬𑁆𑀬. 𑀘𑀓𑁆𑀔𑀼𑀤𑁆𑀯𑀸𑀭𑁂 𑀧𑀦 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀪𑀯𑀗𑁆𑀕𑀁 𑀆𑀯𑀝𑁆𑀝𑁂𑀢𑁆𑀯𑀸 𑀆𑀯𑀚𑁆𑀚𑀦𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀯𑁄𑀝𑁆𑀞𑀩𑁆𑀩𑀦𑀸𑀦𑀦𑁆𑀢𑀭𑀁 𑀲𑀫𑁆𑀧𑀢𑁆𑀢𑀓𑀺𑀮𑁂𑀲𑀚𑀯𑀦𑀯𑀸𑀭𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀓𑀼𑀲𑀮𑀫𑁂𑀯 𑀉𑀧𑁆𑀧𑀸𑀤𑁂𑀢𑀺. 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀸𑀦𑀜𑁆𑀳𑀺 𑀅𑀬𑀫𑀸𑀦𑀺𑀲𑀁𑀲𑁄 𑀪𑀸𑀯𑀦𑀸𑀧𑀝𑀺𑀲𑀗𑁆𑀔𑀸𑀦𑁂 𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑁆𑀲.

𑀅𑀪𑀺𑀳𑀝𑁆𑀞𑀼𑀁 𑀧𑀯𑀸𑀭𑁂𑀬𑁆𑀬𑀼𑀦𑁆𑀢𑀺 𑀲𑀼𑀤𑀺𑀦𑁆𑀦𑀢𑁆𑀣𑁂𑀭𑀲𑁆𑀲 𑀯𑀺𑀬 𑀭𑀝𑁆𑀞𑀧𑀸𑀮𑀓𑀼𑀮𑀧𑀼𑀢𑁆𑀢𑀲𑁆𑀲 𑀯𑀺𑀬 𑀘 𑀓𑀸𑀬𑁂𑀦 𑀯𑀸 𑀲𑀢𑁆𑀢 𑀭𑀢𑀦𑀸𑀦𑀺 𑀅𑀪𑀺𑀳𑀭𑀺𑀢𑁆𑀯𑀸 𑀯𑀸𑀘𑀸𑀬 𑀯𑀸 ‘‘𑀅𑀫𑁆𑀳𑀸𑀓𑀁 𑀥𑀦𑀢𑁄 𑀬𑀢𑁆𑀢𑀓𑀁 𑀇𑀘𑁆𑀙𑀲𑀺, 𑀢𑀢𑁆𑀢𑀓𑀁 𑀕𑀡𑁆𑀳𑀸’’𑀢𑀺 𑀯𑀤𑀦𑁆𑀢𑀸 𑀧𑀯𑀸𑀭𑁂𑀬𑁆𑀬𑀼𑀁. 𑀅𑀦𑀼𑀤𑀳𑀦𑁆𑀢𑀻𑀢𑀺 𑀲𑀭𑀻𑀭𑁂 𑀧𑀮𑀺𑀯𑁂𑀞𑀺𑀢𑀢𑁆𑀢𑀸 𑀉𑀡𑁆𑀳𑀧𑀭𑀺𑀴𑀸𑀳𑀁 𑀚𑀦𑁂𑀢𑁆𑀯𑀸 𑀅𑀦𑀼𑀤𑀳𑀦𑁆𑀢𑀺. 𑀲𑀜𑁆𑀚𑀸𑀢𑀲𑁂𑀤𑁂 𑀯𑀸 𑀲𑀭𑀻𑀭𑁂 𑀮𑀕𑁆𑀕𑀦𑁆𑀢𑀸 𑀅𑀦𑀼𑀲𑁂𑀦𑁆𑀢𑀻𑀢𑀺𑀧𑀺 𑀅𑀢𑁆𑀣𑁄. 𑀬𑀜𑁆𑀳𑀺 𑀢𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀦𑁆𑀢𑀺 𑀇𑀤𑀁 𑀬𑀲𑁆𑀫𑀸 𑀘𑀺𑀢𑁆𑀢𑁂 𑀅𑀦𑀸𑀯𑀝𑁆𑀝𑀦𑁆𑀢𑁂 𑀧𑀼𑀕𑁆𑀕𑀮𑀲𑁆𑀲 𑀆𑀯𑀝𑁆𑀝𑀦𑀁 𑀦𑀸𑀫 𑀦𑀢𑁆𑀣𑀺. 𑀏𑀯𑀭𑀽𑀧𑀜𑁆𑀳𑀺 𑀘𑀺𑀢𑁆𑀢𑀁 𑀅𑀦𑀸𑀯𑀝𑁆𑀝𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀺𑀧𑀲𑁆𑀲𑀦𑀸𑀩𑀮𑀫𑁂𑀯 𑀤𑀻𑀧𑀺𑀢𑀁.

𑁮. 𑀓𑀺𑀁𑀲𑀼𑀓𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁫. 𑀅𑀝𑁆𑀞𑀫𑁂 𑀤𑀲𑁆𑀲𑀦𑀦𑁆𑀢𑀺 𑀧𑀞𑀫𑀫𑀕𑁆𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀞𑀫𑀫𑀕𑁆𑀕𑁄 𑀳𑀺 𑀓𑀺𑀮𑁂𑀲𑀧𑀳𑀸𑀦𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑁄 𑀧𑀞𑀫𑀁 𑀦𑀺𑀩𑁆𑀩𑀸𑀦𑀁 𑀧𑀲𑁆𑀲𑀢𑀺, 𑀢𑀲𑁆𑀫𑀸 𑀤𑀲𑁆𑀲𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀕𑁄𑀢𑁆𑀭𑀪𑀼𑀜𑀸𑀡𑀁 𑀧𑀦 𑀓𑀺𑀜𑁆𑀘𑀸𑀧𑀺 𑀫𑀕𑁆𑀕𑀢𑁄 𑀧𑀞𑀫𑀢𑀭𑀁 𑀧𑀲𑁆𑀲𑀢𑀺, 𑀧𑀲𑁆𑀲𑀺𑀢𑁆𑀯𑀸 𑀧𑀦 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀓𑀺𑀮𑁂𑀲𑀧𑀳𑀸𑀦𑀲𑁆𑀲 𑀅𑀪𑀸𑀯𑁂𑀦 𑀦 𑀤𑀲𑁆𑀲𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀧𑀺𑀘 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀤𑀲𑁆𑀲𑀦𑀫𑁂𑀯. 𑀓𑀲𑁆𑀫𑀸? 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀤𑀲𑁆𑀲𑀦𑀁 𑀯𑀺𑀲𑀼𑀚𑁆𑀛𑀢𑀺, 𑀨𑀮𑀓𑁆𑀔𑀡𑁂 𑀯𑀺𑀲𑀼𑀤𑁆𑀥𑀁. 𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀅𑀭𑀳𑀢𑁆𑀢𑀫𑀕𑁆𑀕𑀓𑁆𑀔𑀡𑁂 𑀯𑀺𑀲𑀼𑀚𑁆𑀛𑀢𑀺, 𑀨𑀮𑀓𑁆𑀔𑀡𑁂 𑀯𑀺𑀲𑀼𑀤𑁆𑀥𑀦𑁆𑀢𑀺 𑀏𑀯𑀁 𑀓𑀣𑁂𑀦𑁆𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀲𑀼𑀢𑁆𑀯𑀸 𑀲𑁄 𑀪𑀺𑀓𑁆𑀔𑀼 ‘‘𑀅𑀳𑀫𑁆𑀧𑀺 𑀤𑀲𑁆𑀲𑀦𑀁 𑀯𑀺𑀲𑁄𑀥𑁂𑀢𑁆𑀯𑀸 𑀅𑀭𑀳𑀢𑁆𑀢𑀨𑀮𑁂 𑀧𑀢𑀺𑀝𑁆𑀞𑀺𑀢𑁄 𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀓𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀯𑀁 𑀧𑀼𑀘𑁆𑀙𑀺. 𑀲𑁄 𑀨𑀲𑁆𑀲𑀸𑀬𑀢𑀦𑀓𑀫𑁆𑀫𑀝𑁆𑀞𑀸𑀦𑀺𑀓𑁄 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀯𑀲𑁂𑀦 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀏𑀢𑁆𑀣 𑀳𑀺 𑀧𑀼𑀭𑀺𑀫𑀸𑀦𑀺 𑀧𑀜𑁆𑀘 𑀆𑀬𑀢𑀦𑀸𑀦𑀺 𑀭𑀽𑀧𑀁, 𑀫𑀦𑀸𑀬𑀢𑀦𑀁 𑀅𑀭𑀽𑀧𑀁. 𑀇𑀢𑀺 𑀲𑁄 𑀅𑀢𑁆𑀢𑀦𑀸 𑀅𑀥𑀺𑀕𑀢𑀫𑀕𑁆𑀕𑀫𑁂𑀯 𑀓𑀣𑁂𑀲𑀺.

𑀅𑀲𑀦𑁆𑀢𑀼𑀝𑁆𑀞𑁄𑀢𑀺 𑀧𑀤𑁂𑀲𑀲𑀗𑁆𑀔𑀸𑀭𑁂𑀲𑀼 𑀞𑀢𑁆𑀯𑀸 𑀓𑀣𑀺𑀢𑀢𑁆𑀢𑀸 𑀅𑀲𑀦𑁆𑀢𑀼𑀝𑁆𑀞𑁄. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀬𑀁 𑀧𑀤𑁂𑀲𑀲𑀗𑁆𑀔𑀸𑀭𑁂𑀲𑀼 𑀞𑀢𑁆𑀯𑀸 𑀓𑀣𑁂𑀲𑀺. 𑀲𑀓𑁆𑀓𑀸 𑀦𑀼 𑀔𑁄 𑀧𑀤𑁂𑀲𑀲𑀗𑁆𑀔𑀸𑀭𑁂𑀲𑀼 𑀞𑀢𑁆𑀯𑀸 𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀓𑀁 𑀦𑀺𑀩𑁆𑀩𑀸𑀦𑀁 𑀧𑀸𑀧𑀼𑀡𑀺𑀢𑀼’’𑀦𑁆𑀢𑀺? 𑀢𑀢𑁄 𑀦𑀁 𑀧𑀼𑀘𑁆𑀙𑀺 𑁋 ‘‘𑀆𑀯𑀼𑀲𑁄, 𑀢𑁆𑀯𑀁𑀬𑁂𑀯 𑀦𑀼 𑀔𑁄 𑀇𑀤𑀁 𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀓𑀁 𑀦𑀺𑀩𑁆𑀩𑀸𑀦𑀁 𑀚𑀸𑀦𑀸𑀲𑀺, 𑀉𑀤𑀸𑀳𑀼 𑀅𑀜𑁆𑀜𑁂𑀧𑀺 𑀚𑀸𑀦𑀦𑁆𑀢𑀸 𑀅𑀢𑁆𑀣𑀻’’𑀢𑀺. 𑀅𑀢𑁆𑀣𑀸𑀯𑀼𑀲𑁄, 𑀅𑀲𑀼𑀓𑀯𑀺𑀳𑀸𑀭𑁂 𑀅𑀲𑀼𑀓𑀢𑁆𑀣𑁂𑀭𑁄 𑀦𑀸𑀫𑀸𑀢𑀺. 𑀲𑁄 𑀢𑀫𑁆𑀧𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺. 𑀏𑀢𑁂𑀦𑀼𑀧𑀸𑀬𑁂𑀦 𑀅𑀜𑁆𑀜𑀫𑁆𑀧𑀺 𑀅𑀜𑁆𑀜𑀫𑁆𑀧𑀻𑀢𑀺.

𑀏𑀢𑁆𑀣 𑀘 𑀤𑀼𑀢𑀺𑀬𑁄 𑀧𑀜𑁆𑀘𑀓𑁆𑀔𑀦𑁆𑀥𑀓𑀫𑁆𑀫𑀝𑁆𑀞𑀸𑀦𑀺𑀓𑁄 𑀭𑀽𑀧𑀓𑁆𑀔𑀦𑁆𑀥𑀯𑀲𑁂𑀦 𑀭𑀽𑀧𑀁, 𑀲𑁂𑀲𑀓𑁆𑀔𑀦𑁆𑀥𑀯𑀲𑁂𑀦 𑀦𑀸𑀫𑀦𑁆𑀢𑀺 𑀦𑀸𑀫𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄. 𑀢𑀲𑁆𑀫𑀸 𑀲𑁄𑀧𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀫𑀕𑁆𑀕𑀫𑁂𑀯 𑀓𑀣𑁂𑀲𑀺. 𑀅𑀬𑀁 𑀧𑀦 ‘‘𑀇𑀫𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀦 𑀲𑀫𑁂𑀢𑀺, 𑀧𑀞𑀫𑁂𑀦 𑀲𑀧𑁆𑀧𑀤𑁂𑀲𑀲𑀗𑁆𑀔𑀸𑀭𑁂𑀲𑀼 𑀞𑀢𑁆𑀯𑀸𑀯 𑀓𑀣𑀺𑀢𑀁, 𑀇𑀫𑀺𑀦𑀸 𑀦𑀺𑀧𑁆𑀧𑀤𑁂𑀲𑁂𑀲𑀽’’𑀢𑀺 𑀅𑀲𑀦𑁆𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 𑀢𑀣𑁂𑀯 𑀢𑀁 𑀧𑀼𑀘𑁆𑀙𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀢𑀢𑀺𑀬𑁄 𑀫𑀳𑀸𑀪𑀽𑀢𑀓𑀫𑁆𑀫𑀝𑁆𑀞𑀸𑀦𑀺𑀓𑁄 𑀘𑀢𑁆𑀢𑀸𑀭𑀺 𑀫𑀳𑀸𑀪𑀽𑀢𑀸𑀦𑀺 𑀲𑀗𑁆𑀔𑁂𑀧𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄, 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀫𑀕𑁆𑀕𑀫𑁂𑀯 𑀓𑀣𑁂𑀲𑀺. 𑀅𑀬𑀁 𑀧𑀦 ‘‘𑀇𑀫𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀦 𑀲𑀫𑁂𑀢𑀺, 𑀧𑀞𑀫𑁂𑀦 𑀲𑀧𑁆𑀧𑀤𑁂𑀲𑀲𑀗𑁆𑀔𑀸𑀭𑁂𑀲𑀼 𑀞𑀢𑁆𑀯𑀸 𑀓𑀣𑀺𑀢𑀁, 𑀤𑀼𑀢𑀺𑀬𑁂𑀦 𑀦𑀺𑀧𑁆𑀧𑀤𑁂𑀲𑁂𑀲𑀼, 𑀢𑀢𑀺𑀬𑁂𑀦 𑀅𑀢𑀺𑀲𑀧𑁆𑀧𑀤𑁂𑀲𑁂𑀲𑀽’’𑀢𑀺 𑀅𑀲𑀦𑁆𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 𑀢𑀣𑁂𑀯 𑀢𑀁 𑀧𑀼𑀘𑁆𑀙𑀺𑀢𑁆𑀯𑀸 𑀧𑀓𑁆𑀓𑀸𑀫𑀺.

𑀘𑀢𑀼𑀢𑁆𑀣𑁄 𑀢𑁂𑀪𑀽𑀫𑀓𑀓𑀫𑁆𑀫𑀝𑁆𑀞𑀸𑀦𑀺𑀓𑁄. 𑀢𑀲𑁆𑀲 𑀓𑀺𑀭 𑀲𑀫𑀧𑁆𑀧𑀯𑀢𑁆𑀢𑀸 𑀥𑀸𑀢𑀼𑀬𑁄 𑀅𑀳𑁂𑀲𑀼𑀁, 𑀓𑀮𑁆𑀮𑀲𑀭𑀻𑀭𑀁 𑀩𑀮𑀧𑀢𑁆𑀢𑀁, 𑀓𑀫𑁆𑀫𑀝𑁆𑀞𑀸𑀦𑀸𑀦𑀺𑀧𑀺𑀲𑁆𑀲 𑀲𑀩𑁆𑀩𑀸𑀦𑁂𑀯 𑀲𑀧𑁆𑀧𑀸𑀬𑀸𑀦𑀺, 𑀅𑀢𑀻𑀢𑀸 𑀯𑀸 𑀲𑀗𑁆𑀔𑀸𑀭𑀸 𑀳𑁄𑀦𑁆𑀢𑀼 𑀅𑀦𑀸𑀕𑀢𑀸 𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀯𑀸 𑀓𑀸𑀫𑀸𑀯𑀘𑀭𑀸 𑀯𑀸 𑀭𑀽𑀧𑀸𑀯𑀘𑀭𑀸 𑀯𑀸 𑀅𑀭𑀽𑀧𑀸𑀯𑀘𑀭𑀸 𑀯𑀸, 𑀲𑀩𑁆𑀩𑁂𑀧𑀺 𑀲𑀧𑁆𑀧𑀸𑀬𑀸𑀯. 𑀅𑀲𑀧𑁆𑀧𑀸𑀬𑀓𑀫𑁆𑀫𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀺. 𑀓𑀸𑀮𑁂𑀲𑀼𑀧𑀺 𑀧𑀼𑀭𑁂𑀪𑀢𑁆𑀢𑀁 𑀯𑀸 𑀳𑁄𑀢𑀼 𑀧𑀘𑁆𑀙𑀸𑀪𑀢𑁆𑀢𑀁 𑀯𑀸 𑀧𑀞𑀫𑀬𑀸𑀫𑀸𑀤𑀬𑁄 𑀯𑀸, 𑀅𑀲𑀧𑁆𑀧𑀸𑀬𑁄 𑀓𑀸𑀮𑁄 𑀦𑀸𑀫 𑀦𑀢𑁆𑀣𑀺. 𑀬𑀣𑀸 𑀦𑀸𑀫 𑀘𑀸𑀭𑀺𑀪𑀽𑀫𑀺𑀁 𑀑𑀢𑀺𑀡𑁆𑀡𑁄 𑀫𑀳𑀸𑀳𑀢𑁆𑀣𑀻 𑀳𑀢𑁆𑀣𑁂𑀦 𑀕𑀳𑁂𑀢𑀩𑁆𑀩𑀁 𑀳𑀢𑁆𑀣𑁂𑀦𑁂𑀯 𑀮𑀼𑀜𑁆𑀘𑀺𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀧𑀸𑀤𑁂𑀳𑀺 𑀧𑀳𑀭𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁 𑀧𑀸𑀤𑁂𑀳𑀺 𑀧𑀳𑀭𑀺𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀏𑀯𑀫𑁂𑀯 𑀲𑀓𑀮𑁂 𑀢𑁂𑀪𑀽𑀫𑀓𑀥𑀫𑁆𑀫𑁂 𑀓𑀮𑀸𑀧𑀕𑁆𑀕𑀸𑀳𑁂𑀦 𑀕𑀳𑁂𑀢𑁆𑀯𑀸 𑀲𑀫𑁆𑀫𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄, 𑀢𑀲𑁆𑀫𑀸 𑀏𑀲𑁄𑀧𑀺 𑀅𑀢𑁆𑀢𑀦𑀸 𑀅𑀥𑀺𑀕𑀢𑀫𑀕𑁆𑀕𑀫𑁂𑀯 𑀓𑀣𑁂𑀲𑀺. 𑀅𑀬𑀁 𑀧𑀦 ‘‘𑀇𑀫𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀦 𑀲𑀫𑁂𑀢𑀺. 𑀧𑀞𑀫𑁂𑀦 𑀲𑀧𑁆𑀧𑀤𑁂𑀲𑀲𑀗𑁆𑀔𑀸𑀭𑁂𑀲𑀼 𑀞𑀢𑁆𑀯𑀸 𑀓𑀣𑀺𑀢𑀁, 𑀤𑀼𑀢𑀺𑀬𑁂𑀦 𑀦𑀺𑀧𑁆𑀧𑀤𑁂𑀲𑁂𑀲𑀼, 𑀧𑀼𑀦 𑀢𑀢𑀺𑀬𑁂𑀦 𑀲𑀧𑁆𑀧𑀤𑁂𑀲𑁂𑀲𑀼, 𑀘𑀢𑀼𑀢𑁆𑀣𑁂𑀦 𑀦𑀺𑀧𑁆𑀧𑀤𑁂𑀲𑁂𑀲𑀼𑀬𑁂𑀯𑀸’’𑀢𑀺 𑀅𑀲𑀦𑁆𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 𑀢𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀇𑀤𑀁 𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀓𑀁 𑀦𑀺𑀩𑁆𑀩𑀸𑀦𑀁 𑀢𑀼𑀫𑁆𑀳𑁂𑀳𑀺 𑀅𑀢𑁆𑀢𑀦𑁄𑀯 𑀥𑀫𑁆𑀫𑀢𑀸𑀬 𑀜𑀸𑀢𑀁, 𑀉𑀤𑀸𑀳𑀼 𑀓𑁂𑀦𑀘𑀺 𑀯𑁄 𑀅𑀓𑁆𑀔𑀸𑀢’’𑀦𑁆𑀢𑀺? 𑀆𑀯𑀼𑀲𑁄, 𑀫𑀬𑀁 𑀓𑀺𑀁 𑀚𑀸𑀦𑀸𑀫? 𑀅𑀢𑁆𑀣𑀺 𑀧𑀦 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀢𑀁 𑀦𑀺𑀲𑁆𑀲𑀸𑀬𑁂𑀢𑀁 𑀅𑀫𑁆𑀳𑁂𑀳𑀺 𑀜𑀸𑀢𑀦𑁆𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀪𑀺𑀓𑁆𑀔𑀽 𑀫𑀬𑁆𑀳𑀁 𑀅𑀚𑁆𑀛𑀸𑀲𑀬𑀁 𑀕𑀳𑁂𑀢𑁆𑀯𑀸 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀅𑀳𑀁 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀫𑁂𑀯 𑀧𑀼𑀘𑁆𑀙𑀺𑀢𑁆𑀯𑀸 𑀦𑀺𑀓𑁆𑀓𑀗𑁆𑀔𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀪𑀕𑀯𑀸 𑀢𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 ‘‘𑀬𑁂𑀳𑀺 𑀢𑁂 𑀧𑀜𑁆𑀳𑁄 𑀓𑀣𑀺𑀢𑁄, 𑀢𑁂 𑀘𑀢𑁆𑀢𑀸𑀭𑁄𑀧𑀺 𑀔𑀻𑀡𑀸𑀲𑀯𑀸, 𑀲𑀼𑀓𑀣𑀺𑀢𑀁 𑀢𑁂𑀳𑀺, 𑀢𑁆𑀯𑀁 𑀧𑀦 𑀅𑀢𑁆𑀢𑀦𑁄 𑀅𑀦𑁆𑀥𑀩𑀸𑀮𑀢𑀸𑀬 𑀢𑀁 𑀦 𑀲𑀮𑁆𑀮𑀓𑁆𑀔𑁂𑀲𑀻’’𑀢𑀺 𑀦 𑀏𑀯𑀁 𑀯𑀺𑀳𑁂𑀲𑁂𑀲𑀺. 𑀓𑀸𑀭𑀓𑀪𑀸𑀯𑀁 𑀧𑀦𑀲𑁆𑀲 𑀜𑀢𑁆𑀯𑀸 ‘‘𑀅𑀢𑁆𑀣𑀕𑀯𑁂𑀲𑀓𑁄 𑀏𑀲, 𑀥𑀫𑁆𑀫𑀤𑁂𑀲𑀦𑀸𑀬 𑀏𑀯 𑀦𑀁 𑀩𑀼𑀚𑁆𑀛𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀓𑀺𑀁𑀲𑀼𑀓𑁄𑀧𑀫𑀁 𑀆𑀳𑀭𑀺. 𑀢𑀢𑁆𑀣 𑀪𑀽𑀢𑀁 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀏𑀯𑀫𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄 𑁋 𑀏𑀓𑀲𑁆𑀫𑀺𑀁 𑀓𑀺𑀭 𑀫𑀳𑀸𑀦𑀕𑀭𑁂 𑀏𑀓𑁄 𑀲𑀩𑁆𑀩𑀕𑀦𑁆𑀣𑀥𑀭𑁄 𑀩𑁆𑀭𑀸𑀳𑁆𑀫𑀡𑀯𑁂𑀚𑁆𑀚𑁄 𑀧𑀡𑁆𑀟𑀺𑀢𑁄 𑀧𑀝𑀺𑀯𑀲𑀢𑀺. 𑀅𑀣𑁂𑀓𑁄 𑀦𑀕𑀭𑀲𑁆𑀲 𑀧𑀸𑀘𑀻𑀦𑀤𑁆𑀯𑀸𑀭𑀕𑀸𑀫𑀯𑀸𑀲𑀻 𑀧𑀡𑁆𑀟𑀼𑀭𑁄𑀕𑀧𑀼𑀭𑀺𑀲𑁄 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀯𑁂𑀚𑁆𑀚𑀧𑀡𑁆𑀟𑀺𑀢𑁄 𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀢𑁆𑀯𑀸 ‘‘𑀓𑁂𑀦𑀢𑁆𑀣𑁂𑀦 𑀆𑀕𑀢𑁄𑀲𑀺 𑀪𑀤𑁆𑀭𑀫𑀼𑀔𑀸’’𑀢𑀺, 𑀧𑀼𑀘𑁆𑀙𑀺. 𑀭𑁄𑀕𑁂𑀦𑀫𑁆𑀳𑀺, 𑀅𑀬𑁆𑀬, 𑀉𑀧𑀤𑁆𑀤𑀼𑀢𑁄, 𑀪𑁂𑀲𑀚𑁆𑀚𑀁 𑀫𑁂 𑀓𑀣𑁂𑀳𑀻𑀢𑀺. 𑀢𑁂𑀦 𑀳𑀺, 𑀪𑁄, 𑀕𑀘𑁆𑀙, 𑀓𑀺𑀁𑀲𑀼𑀓𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸, 𑀲𑁄𑀲𑁂𑀢𑁆𑀯𑀸 𑀛𑀸𑀧𑁂𑀢𑁆𑀯𑀸, 𑀢𑀲𑁆𑀲 𑀔𑀸𑀭𑁄𑀤𑀓𑀁 𑀕𑀳𑁂𑀢𑁆𑀯𑀸 𑀇𑀫𑀺𑀦𑀸 𑀘𑀺𑀫𑀺𑀦𑀸 𑀘 𑀪𑁂𑀲𑀚𑁆𑀚𑁂𑀦 𑀬𑁄𑀚𑁂𑀢𑁆𑀯𑀸, 𑀅𑀭𑀺𑀝𑁆𑀞𑀁 𑀓𑀢𑁆𑀯𑀸 𑀧𑀺𑀯, 𑀢𑁂𑀦 𑀢𑁂 𑀨𑀸𑀲𑀼𑀓𑀁 𑀪𑀯𑀺𑀲𑁆𑀲𑀢𑀻𑀢𑀺. 𑀲𑁄 𑀢𑀣𑀸 𑀓𑀢𑁆𑀯𑀸 𑀦𑀺𑀭𑁄𑀕𑁄 𑀩𑀮𑀯𑀸 𑀧𑀸𑀲𑀸𑀤𑀺𑀓𑁄 𑀚𑀸𑀢𑁄.

𑀅𑀣𑀜𑁆𑀜𑁄 𑀤𑀓𑁆𑀔𑀺𑀡𑀤𑁆𑀯𑀸𑀭𑀕𑀸𑀫𑀯𑀸𑀲𑀻 𑀧𑀼𑀭𑀺𑀲𑁄 𑀢𑁂𑀦𑁂𑀯 𑀭𑁄𑀕𑁂𑀦 𑀆𑀢𑀼𑀭𑁄 ‘‘𑀅𑀲𑀼𑀓𑁄 𑀓𑀺𑀭 𑀪𑁂𑀲𑀚𑁆𑀚𑀁 𑀓𑀢𑁆𑀯𑀸 𑀅𑀭𑁄𑀕𑁄 𑀚𑀸𑀢𑁄’’𑀢𑀺 𑀲𑀼𑀢𑁆𑀯𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺 𑁋 ‘‘𑀓𑁂𑀦 𑀢𑁂, 𑀲𑀫𑁆𑀫, 𑀨𑀸𑀲𑀼𑀓𑀁 𑀚𑀸𑀢’’𑀦𑁆𑀢𑀺. 𑀓𑀺𑀁𑀲𑀼𑀓𑀸𑀭𑀺𑀝𑁆𑀞𑁂𑀦 𑀦𑀸𑀫, 𑀕𑀘𑁆𑀙 𑀢𑁆𑀯𑀫𑁆𑀧𑀺 𑀓𑀭𑁄𑀳𑀻𑀢𑀺. 𑀲𑁄𑀧𑀺 𑀢𑀣𑀸 𑀓𑀢𑁆𑀯𑀸 𑀢𑀸𑀤𑀺𑀲𑁄𑀯 𑀚𑀸𑀢𑁄.

𑀅𑀣𑀜𑁆𑀜𑁄 𑀧𑀘𑁆𑀙𑀺𑀫𑀤𑁆𑀯𑀸𑀭𑀕𑀸𑀫𑀯𑀸𑀲𑀻…𑀧𑁂… 𑀉𑀢𑁆𑀢𑀭𑀤𑁆𑀯𑀸𑀭𑀕𑀸𑀫𑀯𑀸𑀲𑀻 𑀧𑀼𑀭𑀺𑀲𑁄 𑀢𑁂𑀦𑁂𑀯 𑀭𑁄𑀕𑁂𑀦 𑀆𑀢𑀼𑀭𑁄 ‘‘𑀅𑀲𑀼𑀓𑁄 𑀓𑀺𑀭 𑀪𑁂𑀲𑀚𑁆𑀚𑀁 𑀓𑀢𑁆𑀯𑀸 𑀅𑀭𑁄𑀕𑁄 𑀚𑀸𑀢𑁄’’𑀢𑀺 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺 ‘‘𑀓𑁂𑀦 𑀢𑁂, 𑀲𑀫𑁆𑀫, 𑀨𑀸𑀲𑀼𑀓𑀁 𑀚𑀸𑀢’’𑀦𑁆𑀢𑀺? 𑀓𑀺𑀁𑀲𑀼𑀓𑀸𑀭𑀺𑀝𑁆𑀞𑁂𑀦 𑀦𑀸𑀫, 𑀕𑀘𑁆𑀙 𑀢𑁆𑀯𑀫𑁆𑀧𑀺 𑀓𑀭𑁄𑀳𑀻𑀢𑀺. 𑀲𑁄𑀧𑀺 𑀢𑀣𑀸 𑀓𑀢𑁆𑀯𑀸 𑀢𑀸𑀤𑀺𑀲𑁄𑀯 𑀚𑀸𑀢𑁄.

𑀅𑀣𑀜𑁆𑀜𑁄 𑀧𑀘𑁆𑀘𑀦𑁆𑀢𑀯𑀸𑀲𑀻 𑀅𑀤𑀺𑀝𑁆𑀞𑀧𑀼𑀩𑁆𑀩𑀓𑀺𑀁𑀲𑀼𑀓𑁄 𑀏𑀓𑁄 𑀧𑀼𑀭𑀺𑀲𑁄 𑀢𑁂𑀦𑁂𑀯 𑀭𑁄𑀕𑁂𑀦 𑀆𑀢𑀼𑀭𑁄 𑀘𑀺𑀭𑀁 𑀢𑀸𑀦𑀺 𑀢𑀸𑀦𑀺 𑀪𑁂𑀲𑀚𑁆𑀚𑀸𑀦𑀺 𑀓𑀢𑁆𑀯𑀸 𑀭𑁄𑀕𑁂 𑀅𑀯𑀽𑀧𑀲𑀫𑀫𑀸𑀦𑁂 ‘‘𑀅𑀲𑀼𑀓𑁄 𑀓𑀺𑀭 𑀦𑀕𑀭𑀲𑁆𑀲 𑀧𑀸𑀘𑀻𑀦𑀤𑁆𑀯𑀸𑀭𑀕𑀸𑀫𑀯𑀸𑀲𑀻 𑀧𑀼𑀭𑀺𑀲𑁄 𑀪𑁂𑀲𑀚𑁆𑀚𑀁 𑀓𑀢𑁆𑀯𑀸 𑀅𑀭𑁄𑀕𑁄 𑀚𑀸𑀢𑁄’’𑀢𑀺 𑀲𑀼𑀢𑁆𑀯𑀸 ‘‘𑀕𑀘𑁆𑀙𑀸𑀫𑀳𑀫𑁆𑀧𑀺, 𑀢𑁂𑀦 𑀓𑀢𑀪𑁂𑀲𑀚𑁆𑀚𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀤𑀡𑁆𑀟𑀫𑁄𑀮𑀼𑀩𑁆𑀪 𑀅𑀦𑀼𑀧𑀼𑀩𑁆𑀩𑁂𑀦 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, ‘‘𑀓𑁂𑀦 𑀢𑁂, 𑀲𑀫𑁆𑀫, 𑀨𑀸𑀲𑀼𑀓𑀁 𑀚𑀸𑀢’’𑀦𑁆𑀢𑀺 𑀧𑀼𑀘𑁆𑀙𑀺. 𑀓𑀺𑀁𑀲𑀼𑀓𑀸𑀭𑀺𑀝𑁆𑀞𑁂𑀦 𑀲𑀫𑁆𑀫𑀸𑀢𑀺. 𑀓𑀻𑀤𑀺𑀲𑁄 𑀧𑀦 𑀲𑁄 𑀓𑀺𑀁𑀲𑀼𑀓𑁄𑀢𑀺. 𑀛𑀸𑀧𑀺𑀢𑀕𑀸𑀫𑁂 𑀞𑀺𑀢𑀛𑀸𑀫𑀣𑀽𑀡𑁄 𑀯𑀺𑀬𑀸𑀢𑀺. 𑀇𑀢𑀺 𑀲𑁄 𑀧𑀼𑀭𑀺𑀲𑁄 𑀅𑀢𑁆𑀢𑀦𑀸 𑀤𑀺𑀝𑁆𑀞𑀸𑀓𑀸𑀭𑁂𑀦𑀯 𑀓𑀺𑀁𑀲𑀼𑀓𑀁 𑀆𑀘𑀺𑀓𑁆𑀔𑀺. 𑀢𑁂𑀦 𑀳𑀺 𑀤𑀺𑀝𑁆𑀞𑀓𑀸𑀮𑁂 𑀓𑀺𑀁𑀲𑀼𑀓𑁄 𑀧𑀢𑀺𑀢𑀧𑀢𑁆𑀢𑁄 𑀔𑀸𑀡𑀼𑀓𑀓𑀸𑀮𑁂 𑀤𑀺𑀝𑁆𑀞𑀢𑁆𑀢𑀸 𑀢𑀸𑀤𑀺𑀲𑁄𑀯 𑀳𑁄𑀢𑀺.

𑀲𑁄 𑀧𑀦 𑀧𑀼𑀭𑀺𑀲𑁄 𑀲𑀼𑀢𑀫𑀗𑁆𑀕𑀮𑀺𑀓𑀢𑁆𑀢𑀸 ‘‘𑀅𑀬𑀁 ‘𑀛𑀸𑀧𑀺𑀢𑀕𑀸𑀫𑁂 𑀛𑀸𑀫𑀣𑀽𑀡𑁄 𑀯𑀺𑀬𑀸’𑀢𑀺 𑀆𑀳, 𑀅𑀫𑀗𑁆𑀕𑀮𑀫𑁂𑀢𑀁. 𑀏𑀢𑀲𑁆𑀫𑀺𑀜𑁆𑀳𑀺 𑀫𑁂 𑀪𑁂𑀲𑀚𑁆𑀚𑁂 𑀓𑀢𑁂𑀧𑀺 𑀭𑁄𑀕𑁄 𑀦 𑀯𑀽𑀧𑀲𑀫𑀺𑀲𑁆𑀲𑀢𑀻’’𑀢𑀺 𑀢𑀲𑁆𑀲 𑀯𑁂𑀬𑁆𑀬𑀸𑀓𑀭𑀡𑁂𑀦 𑀅𑀲𑀦𑁆𑀢𑀼𑀝𑁆𑀞𑁄 𑀢𑀁 𑀧𑀼𑀘𑁆𑀙𑀺 𑁋 ‘‘𑀓𑀺𑀁 𑀦𑀼 𑀔𑁄, 𑀪𑁄, 𑀢𑁆𑀯𑀜𑁆𑀜𑁂𑀯 𑀓𑀺𑀁𑀲𑀼𑀓𑀁 𑀚𑀸𑀦𑀸𑀲𑀺, 𑀉𑀤𑀸𑀳𑀼 𑀅𑀜𑁆𑀜𑁄𑀧𑀺 𑀅𑀢𑁆𑀣𑀻’’𑀢𑀺. 𑀅𑀢𑁆𑀣𑀺, 𑀪𑁄, 𑀤𑀓𑁆𑀔𑀺𑀡𑀤𑁆𑀯𑀸𑀭𑀕𑀸𑀫𑁂 𑀅𑀲𑀼𑀓𑁄 𑀦𑀸𑀫𑀸𑀢𑀺. 𑀲𑁄 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺, 𑀲𑁆𑀯𑀸𑀲𑁆𑀲 𑀧𑀼𑀧𑁆𑀨𑀺𑀢𑀓𑀸𑀮𑁂 𑀤𑀺𑀝𑁆𑀞𑀢𑁆𑀢𑀸 𑀅𑀢𑁆𑀢𑀦𑁄 𑀤𑀲𑁆𑀲𑀦𑀸𑀦𑀼𑀭𑀽𑀧𑁂𑀦 ‘‘𑀮𑁄𑀳𑀺𑀢𑀓𑁄 𑀓𑀺𑀁𑀲𑀼𑀓𑁄’’𑀢𑀺 𑀆𑀳. 𑀲𑁄 ‘‘𑀅𑀬𑀁 𑀧𑀼𑀭𑀺𑀫𑁂𑀦 𑀯𑀺𑀭𑀼𑀤𑁆𑀥𑀁 𑀆𑀳, 𑀓𑀸𑀴𑀓𑁄 𑀮𑁄𑀳𑀺𑀢𑀓𑀢𑁄 𑀲𑀼𑀯𑀺𑀤𑀽𑀭𑀤𑀽𑀭𑁂’’𑀢𑀺 𑀢𑀲𑁆𑀲𑀧𑀺 𑀯𑁂𑀬𑁆𑀬𑀸𑀓𑀭𑀡𑁂𑀦 𑀅𑀲𑀦𑁆𑀢𑀼𑀝𑁆𑀞𑁄 ‘‘𑀅𑀢𑁆𑀣𑀺 𑀧𑀦, 𑀪𑁄, 𑀅𑀜𑁆𑀜𑁄𑀧𑀺 𑀓𑁄𑀘𑀺 𑀓𑀺𑀁𑀲𑀼𑀓𑀤𑀲𑁆𑀲𑀸𑀯𑀻, 𑀬𑁂𑀦 𑀓𑀺𑀁𑀲𑀼𑀓𑁄 𑀤𑀺𑀝𑁆𑀞𑀧𑀼𑀩𑁆𑀩𑁄’’𑀢𑀺? 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀅𑀢𑁆𑀣𑀺 𑀧𑀘𑁆𑀙𑀺𑀫𑀤𑁆𑀯𑀸𑀭𑀕𑀸𑀫𑁂 𑀅𑀲𑀼𑀓𑁄 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀢𑀫𑁆𑀧𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺. 𑀲𑁆𑀯𑀸𑀲𑁆𑀲 𑀨𑀮𑀺𑀢𑀓𑀸𑀮𑁂 𑀤𑀺𑀝𑁆𑀞𑀢𑁆𑀢𑀸 𑀅𑀢𑁆𑀢𑀦𑁄 𑀤𑀲𑁆𑀲𑀦𑀸𑀦𑀼𑀭𑀽𑀧𑁂𑀦 ‘‘𑀑𑀘𑀺𑀭𑀓𑀚𑀸𑀢𑁄 𑀆𑀤𑀺𑀦𑁆𑀦𑀲𑀺𑀧𑀸𑀝𑀺𑀓𑁄’’𑀢𑀺 𑀆𑀳. 𑀨𑀮𑀺𑀢𑀓𑀸𑀮𑀲𑁆𑀫𑀺𑀜𑁆𑀳𑀺 𑀓𑀺𑀁𑀲𑀼𑀓𑁄 𑀑𑀮𑀫𑁆𑀩𑀫𑀸𑀦𑀘𑀻𑀭𑀓𑁄 𑀯𑀺𑀬 𑀅𑀥𑁄𑀫𑀼𑀔𑀁 𑀓𑀢𑁆𑀯𑀸 𑀕𑀳𑀺𑀢𑀅𑀲𑀺𑀓𑁄𑀲𑁄 𑀯𑀺𑀬 𑀘 𑀲𑀺𑀭𑀻𑀲𑀭𑀼𑀓𑁆𑀔𑁄 𑀯𑀺𑀬 𑀘 𑀮𑀫𑁆𑀩𑀫𑀸𑀦𑀨𑀮𑁄 𑀳𑁄𑀢𑀺. 𑀲𑁄 ‘‘𑀅𑀬𑀁 𑀧𑀼𑀭𑀺𑀫𑁂𑀳𑀺 𑀯𑀺𑀭𑀼𑀤𑁆𑀥𑀁 𑀆𑀳, 𑀦 𑀲𑀓𑁆𑀓𑀸 𑀇𑀫𑀲𑁆𑀲 𑀯𑀘𑀦𑀁 𑀕𑀳𑁂𑀢𑀼’’𑀦𑁆𑀢𑀺 𑀢𑀲𑁆𑀲𑀧𑀺 𑀯𑁂𑀬𑁆𑀬𑀸𑀓𑀭𑀡𑁂𑀦 𑀅𑀲𑀦𑁆𑀢𑀼𑀝𑁆𑀞𑁄 ‘‘𑀅𑀢𑁆𑀣𑀺 𑀧𑀦, 𑀪𑁄, 𑀅𑀜𑁆𑀜𑁄𑀧𑀺 𑀓𑁄𑀘𑀺 𑀓𑀺𑀁𑀲𑀼𑀓𑀤𑀲𑁆𑀲𑀸𑀯𑀻, 𑀬𑁂𑀦 𑀓𑀺𑀁𑀲𑀼𑀓𑁄 𑀤𑀺𑀝𑁆𑀞𑀧𑀼𑀩𑁆𑀩𑁄’’𑀢𑀺? 𑀧𑀼𑀘𑁆𑀙𑀺𑀢𑁆𑀯𑀸, ‘‘𑀅𑀢𑁆𑀣𑀺 𑀉𑀢𑁆𑀢𑀭𑀤𑁆𑀯𑀸𑀭𑀕𑀸𑀫𑁂 𑀅𑀲𑀼𑀓𑁄 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁂 𑀢𑀫𑁆𑀧𑀺 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀺. 𑀲𑁄 𑀅𑀲𑁆𑀲 𑀲𑀜𑁆𑀙𑀦𑁆𑀦𑀧𑀢𑁆𑀢𑀓𑀸𑀮𑁂 𑀤𑀺𑀝𑁆𑀞𑀢𑁆𑀢𑀸 𑀅𑀢𑁆𑀢𑀦𑁄 𑀤𑀲𑁆𑀲𑀦𑀸𑀦𑀼𑀭𑀽𑀧𑁂𑀦 ‘‘𑀩𑀳𑀮𑀧𑀢𑁆𑀢𑀧𑀮𑀸𑀲𑁄 𑀲𑀦𑁆𑀤𑀘𑁆𑀙𑀸𑀬𑁄’’𑀢𑀺 𑀆𑀳. 𑀲𑀦𑁆𑀤𑀘𑁆𑀙𑀸𑀬𑁄 𑀦𑀸𑀫 𑀲𑀁𑀲𑀦𑁆𑀤𑀺𑀢𑁆𑀯𑀸 𑀞𑀺𑀢𑀘𑁆𑀙𑀸𑀬𑁄.

𑀲𑁄 ‘‘𑀅𑀬𑀫𑁆𑀧𑀺 𑀧𑀼𑀭𑀺𑀫𑁂𑀳𑀺 𑀯𑀺𑀭𑀼𑀤𑁆𑀥𑀁 𑀆𑀳, 𑀦 𑀲𑀓𑁆𑀓𑀸 𑀇𑀫𑀲𑁆𑀲 𑀯𑀘𑀦𑀁 𑀕𑀳𑁂𑀢𑀼’’𑀦𑁆𑀢𑀺 𑀢𑀲𑁆𑀲𑀧𑀺 𑀯𑁂𑀬𑁆𑀬𑀸𑀓𑀭𑀡𑁂𑀦 𑀅𑀲𑀦𑁆𑀢𑀼𑀝𑁆𑀞𑁄 𑀢𑀁 𑀆𑀳, ‘‘𑀓𑀺𑀁 𑀦𑀼 𑀔𑁄, 𑀪𑁄, 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄𑀯 𑀥𑀫𑁆𑀫𑀢𑀸𑀬 𑀓𑀺𑀁𑀲𑀼𑀓𑀁 𑀚𑀸𑀦𑀸𑀣, 𑀉𑀤𑀸𑀳𑀼 𑀓𑁂𑀦𑀘𑀺 𑀯𑁄 𑀅𑀓𑁆𑀔𑀸𑀢𑁄’’𑀢𑀺? 𑀓𑀺𑀁, 𑀪𑁄, 𑀫𑀬𑀁 𑀚𑀸𑀦𑀸𑀫? 𑀅𑀢𑁆𑀣𑀺 𑀧𑀦 𑀫𑀳𑀸𑀦𑀕𑀭𑀲𑁆𑀲 𑀫𑀚𑁆𑀛𑁂 𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑁄 𑀯𑁂𑀚𑁆𑀚𑀧𑀡𑁆𑀟𑀺𑀢𑁄, 𑀢𑀁 𑀦𑀺𑀲𑁆𑀲𑀸𑀬 𑀅𑀫𑁆𑀳𑁂𑀳𑀺 𑀜𑀸𑀢𑀦𑁆𑀢𑀺. ‘‘𑀢𑁂𑀦 𑀳𑀺 𑀅𑀳𑀫𑁆𑀧𑀺 𑀆𑀘𑀭𑀺𑀬𑀫𑁂𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀺𑀓𑁆𑀓𑀗𑁆𑀔𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀯𑁂𑀚𑁆𑀚𑀧𑀡𑁆𑀟𑀺𑀢𑁄 𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀢𑁆𑀯𑀸, ‘‘𑀓𑁂𑀦𑀢𑁆𑀣𑁂𑀦 𑀆𑀕𑀢𑁄𑀲𑀺 𑀪𑀤𑁆𑀭𑀫𑀼𑀔𑀸’’𑀢𑀺 𑀧𑀼𑀘𑁆𑀙𑀺. 𑀭𑁄𑀕𑁂𑀦𑀫𑁆𑀳𑀺, 𑀅𑀬𑁆𑀬, 𑀉𑀧𑀤𑁆𑀤𑀼𑀢𑁄, 𑀪𑁂𑀲𑀚𑁆𑀚𑀁 𑀫𑁂 𑀓𑀣𑁂𑀣𑀸𑀢𑀺. 𑀢𑁂𑀦 𑀳𑀺, 𑀪𑁄, 𑀕𑀘𑁆𑀙, 𑀓𑀺𑀁𑀲𑀼𑀓𑀭𑀼𑀓𑁆𑀔𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑁄𑀲𑁂𑀢𑁆𑀯𑀸 𑀛𑀸𑀧𑁂𑀢𑁆𑀯𑀸 𑀢𑀲𑁆𑀲 𑀔𑀸𑀭𑁄𑀤𑀓𑀁 𑀕𑀳𑁂𑀢𑁆𑀯𑀸 𑀇𑀫𑀺𑀦𑀸 𑀘𑀺𑀫𑀺𑀦𑀸 𑀘 𑀪𑁂𑀲𑀚𑁆𑀚𑁂𑀦 𑀬𑁄𑀚𑁂𑀢𑁆𑀯𑀸 𑀅𑀭𑀺𑀝𑁆𑀞𑀁 𑀓𑀢𑁆𑀯𑀸 𑀧𑀺𑀯, 𑀏𑀢𑁂𑀦 𑀢𑁂 𑀨𑀸𑀲𑀼𑀓𑀁 𑀪𑀯𑀺𑀲𑁆𑀲𑀢𑀻𑀢𑀺. 𑀲𑁄 𑀢𑀣𑀸 𑀓𑀢𑁆𑀯𑀸 𑀦𑀺𑀭𑁄𑀕𑁄 𑀩𑀮𑀯𑀸 𑀧𑀸𑀲𑀸𑀤𑀺𑀓𑁄 𑀚𑀸𑀢𑁄.

𑀢𑀢𑁆𑀣 𑀫𑀳𑀸𑀦𑀕𑀭𑀁 𑀯𑀺𑀬 𑀦𑀺𑀩𑁆𑀩𑀸𑀦𑀦𑀕𑀭𑀁 𑀤𑀝𑁆𑀞𑀩𑁆𑀩𑀁. 𑀯𑁂𑀚𑁆𑀚𑀧𑀡𑁆𑀟𑀺𑀢𑁄 𑀯𑀺𑀬 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂 𑀢𑀁 ‘‘𑀪𑀺𑀲𑀓𑁆𑀓𑁄 𑀲𑀮𑁆𑀮𑀓𑀢𑁆𑀢𑁄𑀢𑀺 𑀔𑁄, 𑀲𑀼𑀦𑀓𑁆𑀔𑀢𑁆𑀢, 𑀢𑀣𑀸𑀕𑀢𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀸’’𑀢𑀺 (𑀫. 𑀦𑀺. 𑁩.𑁬𑁫) 𑀘𑀢𑀽𑀲𑀼 𑀤𑁆𑀯𑀸𑀭𑀕𑀸𑀫𑁂𑀲𑀼 𑀘𑀢𑁆𑀢𑀸𑀭𑁄 𑀯𑁂𑀚𑁆𑀚𑀦𑁆𑀢𑁂𑀯𑀸𑀲𑀺𑀓𑀸 𑀯𑀺𑀬 𑀘𑀢𑁆𑀢𑀸𑀭𑁄 𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀧𑀢𑁆𑀢𑀸 𑀔𑀻𑀡𑀸𑀲𑀯𑀸. 𑀧𑀘𑁆𑀘𑀦𑁆𑀢𑀯𑀸𑀲𑀻 𑀧𑀞𑀫𑀧𑀼𑀭𑀺𑀲𑁄 𑀯𑀺𑀬 𑀧𑀜𑁆𑀳𑀧𑀼𑀘𑁆𑀙𑀓𑁄 𑀪𑀺𑀓𑁆𑀔𑀼. 𑀧𑀘𑁆𑀘𑀦𑁆𑀢𑀯𑀸𑀲𑀺𑀦𑁄 𑀘𑀢𑀼𑀦𑁆𑀦𑀁 𑀯𑁂𑀚𑁆𑀚𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀓𑀣𑀸𑀬 𑀅𑀲𑀦𑁆𑀢𑀼𑀝𑁆𑀞𑀲𑁆𑀲 𑀆𑀘𑀭𑀺𑀬𑀫𑁂𑀯 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀦𑀓𑀸𑀮𑁄 𑀯𑀺𑀬 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀢𑀼𑀦𑁆𑀦𑀁 𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀧𑀢𑁆𑀢𑀸𑀦𑀁 𑀔𑀻𑀡𑀸𑀲𑀯𑀸𑀦𑀁 𑀓𑀣𑀸𑀬 𑀅𑀲𑀦𑁆𑀢𑀼𑀝𑁆𑀞𑀲𑁆𑀲 𑀲𑀢𑁆𑀣𑀸𑀭𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀦𑀓𑀸𑀮𑁄.

𑀬𑀣𑀸 𑀬𑀣𑀸 𑀅𑀥𑀺𑀫𑀼𑀢𑁆𑀢𑀸𑀦𑀦𑁆𑀢𑀺 𑀬𑁂𑀦 𑀬𑁂𑀦𑀸𑀓𑀸𑀭𑁂𑀦 𑀅𑀥𑀺𑀫𑀼𑀢𑁆𑀢𑀸𑀦𑀁. 𑀤𑀲𑁆𑀲𑀦𑀁 𑀲𑀼𑀯𑀺𑀲𑀼𑀤𑁆𑀥𑀦𑁆𑀢𑀺 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀁 𑀲𑀼𑀝𑁆𑀞𑀼 𑀯𑀺𑀲𑀼𑀤𑁆𑀥𑀁. 𑀢𑀣𑀸 𑀢𑀣𑀸 𑀔𑁄 𑀢𑁂𑀳𑀺 𑀲𑀧𑁆𑀧𑀼𑀭𑀺𑀲𑁂𑀳𑀺 𑀩𑁆𑀬𑀸𑀓𑀢𑀦𑁆𑀢𑀺 𑀢𑁂𑀦 𑀢𑁂𑀦𑁂𑀯𑀸𑀓𑀸𑀭𑁂𑀦 𑀢𑀼𑀬𑁆𑀳𑀁 𑀢𑁂𑀳𑀺 𑀲𑀧𑁆𑀧𑀼𑀭𑀺𑀲𑁂𑀳𑀺 𑀓𑀣𑀺𑀢𑀁. 𑀬𑀣𑀸 𑀳𑀺 ‘‘𑀓𑀸𑀴𑀓𑁄 𑀓𑀺𑀁𑀲𑀼𑀓𑁄’’𑀢𑀺 𑀓𑀣𑁂𑀦𑁆𑀢𑁄 𑀦 𑀅𑀜𑁆𑀜𑀁 𑀓𑀣𑁂𑀲𑀺, 𑀅𑀢𑁆𑀢𑀦𑀸 𑀤𑀺𑀝𑁆𑀞𑀦𑀬𑁂𑀦 𑀓𑀺𑀁𑀲𑀼𑀓𑀫𑁂𑀯 𑀓𑀣𑁂𑀲𑀺, 𑀏𑀯𑀫𑁂𑀯 𑀙𑀨𑀲𑁆𑀲𑀸𑀬𑀢𑀦𑀸𑀦𑀁 𑀯𑀲𑁂𑀦 𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀧𑀢𑁆𑀢𑀔𑀻𑀡𑀸𑀲𑀯𑁄𑀧𑀺 𑀇𑀫𑀁 𑀧𑀜𑁆𑀳𑀁 𑀓𑀣𑁂𑀦𑁆𑀢𑁄 𑀦 𑀅𑀜𑁆𑀜𑀁 𑀓𑀣𑁂𑀲𑀺, 𑀅𑀢𑁆𑀢𑀦𑀸 𑀅𑀥𑀺𑀕𑀢𑀫𑀕𑁆𑀕𑁂𑀦 𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀓𑀁 𑀦𑀺𑀩𑁆𑀩𑀸𑀦𑀫𑁂𑀯 𑀓𑀣𑁂𑀲𑀺.

𑀬𑀣𑀸 𑀘 ‘‘𑀮𑁄𑀳𑀺𑀢𑀓𑁄 𑀑𑀘𑀺𑀭𑀓𑀚𑀸𑀢𑁄 𑀩𑀳𑀮𑀧𑀢𑁆𑀢𑀧𑀮𑀸𑀲𑁄 𑀓𑀺𑀁𑀲𑀼𑀓𑁄’’𑀢𑀺 𑀓𑀣𑁂𑀦𑁆𑀢𑁄𑀧𑀺 𑀦 𑀅𑀜𑁆𑀜𑀁 𑀓𑀣𑁂𑀲𑀺, 𑀅𑀢𑁆𑀢𑀦𑀸 𑀤𑀺𑀝𑁆𑀞𑀦𑀬𑁂𑀦 𑀓𑀺𑀁𑀲𑀼𑀓𑀫𑁂𑀯 𑀓𑀣𑁂𑀲𑀺, 𑀏𑀯𑀫𑁂𑀯 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀯𑀲𑁂𑀦 𑀘𑀢𑀼𑀫𑀳𑀸𑀪𑀽𑀢𑀯𑀲𑁂𑀦 𑀢𑁂𑀪𑀽𑀫𑀓𑀥𑀫𑁆𑀫𑀯𑀲𑁂𑀦 𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀧𑀢𑁆𑀢𑀔𑀻𑀡𑀸𑀲𑀯𑁄𑀧𑀺 𑀇𑀫𑀁 𑀧𑀜𑁆𑀳𑀁 𑀓𑀣𑁂𑀦𑁆𑀢𑁄 𑀦 𑀅𑀜𑁆𑀜𑀁 𑀓𑀣𑁂𑀲𑀺, 𑀅𑀢𑁆𑀢𑀦𑀸 𑀅𑀥𑀺𑀕𑀢𑀫𑀕𑁆𑀕𑁂𑀦 𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀓𑀁 𑀦𑀺𑀩𑁆𑀩𑀸𑀦𑀫𑁂𑀯 𑀓𑀣𑁂𑀲𑀺.

𑀢𑀢𑁆𑀣 𑀬𑀣𑀸 𑀓𑀸𑀴𑀓𑀓𑀸𑀮𑁂 𑀓𑀺𑀁𑀲𑀼𑀓𑀤𑀲𑁆𑀲𑀸𑀯𑀺𑀦𑁄𑀧𑀺 𑀢𑀁 𑀤𑀲𑁆𑀲𑀦𑀁 𑀪𑀽𑀢𑀁 𑀢𑀘𑁆𑀙𑀁 𑀦 𑀢𑁂𑀦 𑀅𑀜𑁆𑀜𑀁 𑀤𑀺𑀝𑁆𑀞𑀁, 𑀓𑀺𑀁𑀲𑀼𑀓𑁄𑀯 𑀤𑀺𑀝𑁆𑀞𑁄, 𑀏𑀯𑀫𑁂𑀯 𑀙𑀨𑀲𑁆𑀲𑀸𑀬𑀢𑀦𑀯𑀲𑁂𑀦 𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀧𑀢𑁆𑀢𑀲𑁆𑀲𑀸𑀧𑀺 𑀔𑀻𑀡𑀸𑀲𑀯𑀲𑁆𑀲 𑀤𑀲𑁆𑀲𑀦𑀁 𑀪𑀽𑀢𑀁 𑀢𑀘𑁆𑀙𑀁, 𑀦 𑀢𑁂𑀦 𑀅𑀜𑁆𑀜𑀁 𑀓𑀣𑀺𑀢𑀁, 𑀅𑀢𑁆𑀢𑀦𑀸 𑀅𑀥𑀺𑀕𑀢𑀫𑀕𑁆𑀕𑁂𑀦 𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀓𑀁 𑀦𑀺𑀩𑁆𑀩𑀸𑀦𑀫𑁂𑀯 𑀓𑀣𑀺𑀢𑀁. 𑀬𑀣𑀸 𑀘 𑀮𑁄𑀳𑀺𑀢𑀓𑀸𑀮𑁂 𑀑𑀘𑀺𑀭𑀓𑀚𑀸𑀢𑀓𑀸𑀮𑁂 𑀩𑀳𑀮𑀧𑀢𑁆𑀢𑀧𑀮𑀸𑀲𑀓𑀸𑀮𑁂 𑀓𑀺𑀁𑀲𑀼𑀓𑀤𑀲𑁆𑀲𑀸𑀯𑀺𑀦𑁄𑀧𑀺 𑀢𑀁 𑀤𑀲𑁆𑀲𑀦𑀁 𑀪𑀽𑀢𑀁 𑀢𑀘𑁆𑀙𑀁, 𑀦 𑀢𑁂𑀦 𑀅𑀜𑁆𑀜𑀁 𑀤𑀺𑀝𑁆𑀞𑀁, 𑀓𑀺𑀁𑀲𑀼𑀓𑁄𑀯 𑀤𑀺𑀝𑁆𑀞𑁄, 𑀏𑀯𑀫𑁂𑀯 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀯𑀲𑁂𑀦 𑀘𑀢𑀼𑀫𑀳𑀸𑀪𑀽𑀢𑀯𑀲𑁂𑀦 𑀢𑁂𑀪𑀽𑀫𑀓𑀥𑀫𑁆𑀫𑀯𑀲𑁂𑀦 𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀧𑀢𑁆𑀢𑀲𑁆𑀲𑀸𑀧𑀺 𑀔𑀻𑀡𑀸𑀲𑀯𑀲𑁆𑀲 𑀤𑀲𑁆𑀲𑀦𑀁 𑀪𑀽𑀢𑀁 𑀢𑀘𑁆𑀙𑀁, 𑀦 𑀢𑁂𑀦 𑀅𑀜𑁆𑀜𑀁 𑀓𑀣𑀺𑀢𑀁, 𑀅𑀢𑁆𑀢𑀦𑀸 𑀅𑀥𑀺𑀕𑀢𑀫𑀕𑁆𑀕𑁂𑀦 𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀓𑀁 𑀦𑀺𑀩𑁆𑀩𑀸𑀦𑀫𑁂𑀯 𑀓𑀣𑀺𑀢𑀁.

𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀼 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑀺𑀫𑀁 𑀦𑀕𑀭𑀦𑁆𑀢𑀺 𑀇𑀤𑀁 𑀓𑀲𑁆𑀫𑀸 𑀆𑀭𑀤𑁆𑀥𑀁? 𑀲𑀘𑁂 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑀁 𑀲𑀮𑁆𑀮𑀓𑁆𑀔𑀺𑀢𑀁, 𑀅𑀣𑀲𑁆𑀲 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀆𑀭𑀤𑁆𑀥𑀁. 𑀲𑀘𑁂 𑀦 𑀲𑀮𑁆𑀮𑀓𑁆𑀔𑀺𑀢𑀁, 𑀅𑀣𑀲𑁆𑀲 𑀇𑀫𑀺𑀦𑀸 𑀦𑀕𑀭𑁄𑀧𑀫𑁂𑀦 𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀸𑀬 𑀆𑀯𑀺𑀪𑀸𑀯𑀦𑀢𑁆𑀣𑀸𑀬 𑀆𑀭𑀤𑁆𑀥𑀁. 𑀢𑀢𑁆𑀣 𑀬𑀲𑁆𑀫𑀸 𑀫𑀚𑁆𑀛𑀺𑀫𑀧𑀤𑁂𑀲𑁂 𑀦𑀕𑀭𑀲𑁆𑀲 𑀧𑀸𑀓𑀸𑀭𑀸𑀤𑀻𑀦𑀺 𑀣𑀺𑀭𑀸𑀦𑀺 𑀯𑀸 𑀳𑁄𑀦𑁆𑀢𑀼 𑀤𑀼𑀩𑁆𑀩𑀮𑀸𑀦𑀺 𑀯𑀸, 𑀲𑀩𑁆𑀩𑀲𑁄 𑀯𑀸 𑀫𑀸 𑀳𑁄𑀦𑁆𑀢𑀼, 𑀘𑁄𑀭𑀸𑀲𑀗𑁆𑀓𑀸 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 ‘‘𑀧𑀘𑁆𑀘𑀦𑁆𑀢𑀺𑀫𑀁 𑀦𑀕𑀭’’𑀦𑁆𑀢𑀺 𑀆𑀳. 𑀤𑀴𑁆𑀳𑀼𑀤𑁆𑀥𑀸𑀧𑀦𑁆𑀢𑀺 𑀣𑀺𑀭𑀧𑀸𑀓𑀸𑀭𑀁. 𑀤𑀴𑁆𑀳𑀧𑀸𑀓𑀸𑀭𑀢𑁄𑀭𑀡𑀦𑁆𑀢𑀺 𑀣𑀺𑀭𑀧𑀸𑀓𑀸𑀭𑀜𑁆𑀘𑁂𑀯 𑀣𑀺𑀭𑀢𑁄𑀭𑀡𑀜𑁆𑀘. 𑀢𑁄𑀭𑀡𑀸𑀦𑀺 𑀦𑀸𑀫 𑀳𑀺 𑀧𑀼𑀭𑀺𑀲𑀼𑀩𑁆𑀩𑁂𑀥𑀸𑀦𑀺 𑀦𑀕𑀭𑀲𑁆𑀲 𑀅𑀮𑀗𑁆𑀓𑀸𑀭𑀢𑁆𑀣𑀁 𑀓𑀭𑀻𑀬𑀦𑁆𑀢𑀺, 𑀘𑁄𑀭𑀦𑀺𑀯𑀸𑀭𑀡𑀢𑁆𑀣𑀸𑀦𑀺𑀧𑀺 𑀳𑁄𑀦𑁆𑀢𑀺𑀬𑁂𑀯. 𑀅𑀣 𑀯𑀸 𑀢𑁄𑀭𑀡𑀦𑁆𑀢𑀺 𑀧𑀺𑀝𑁆𑀞𑀲𑀗𑁆𑀖𑀸𑀝𑀲𑁆𑀲𑁂𑀢𑀁 𑀦𑀸𑀫𑀁, 𑀣𑀺𑀭𑀧𑀺𑀝𑁆𑀞𑀲𑀗𑁆𑀖𑀸𑀝𑀦𑁆𑀢𑀺𑀧𑀺 𑀅𑀢𑁆𑀣𑁄. 𑀙𑀤𑁆𑀯𑀸𑀭𑀦𑁆𑀢𑀺 𑀦𑀕𑀭𑀤𑁆𑀯𑀸𑀭𑀁 𑀦𑀸𑀫 𑀏𑀓𑀫𑁆𑀧𑀺 𑀳𑁄𑀢𑀺 𑀤𑁆𑀯𑁂𑀧𑀺 𑀲𑀢𑀫𑁆𑀧𑀺 𑀲𑀳𑀲𑁆𑀲𑀫𑁆𑀧𑀺, 𑀇𑀥 𑀧𑀦 𑀲𑀢𑁆𑀣𑀸 𑀙𑀤𑁆𑀯𑀸𑀭𑀺𑀓𑀦𑀕𑀭𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀧𑀡𑁆𑀟𑀺𑀢𑁄𑀢𑀺 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀩𑁆𑀬𑀢𑁆𑀢𑁄𑀢𑀺 𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀯𑀺𑀲𑀤𑀜𑀸𑀡𑁄. 𑀫𑁂𑀥𑀸𑀯𑀻𑀢𑀺 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀜𑁆𑀜𑀸𑀲𑀗𑁆𑀔𑀸𑀢𑀸𑀬 𑀫𑁂𑀥𑀸𑀬 𑀲𑀫𑀦𑁆𑀦𑀸𑀕𑀢𑁄.

𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬𑀸𑀢𑀺𑀆𑀤𑀺𑀫𑁆𑀳𑀺 𑀪𑀽𑀢𑀫𑀢𑁆𑀣𑀁 𑀓𑀢𑁆𑀯𑀸 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋 𑀲𑀫𑀺𑀤𑁆𑀥𑁂 𑀓𑀺𑀭 𑀫𑀳𑀸𑀦𑀕𑀭𑁂 𑀲𑀢𑁆𑀢𑀭𑀢𑀦𑀲𑀫𑁆𑀧𑀦𑁆𑀦𑁄 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀺 𑀭𑀚𑁆𑀚𑀁 𑀅𑀦𑀼𑀲𑀸𑀲𑀢𑀺, 𑀢𑀲𑁆𑀲𑁂𑀢𑀁 𑀧𑀘𑁆𑀘𑀦𑁆𑀢𑀦𑀕𑀭𑀁 𑀭𑀸𑀚𑀸𑀬𑀼𑀢𑁆𑀢𑀯𑀺𑀭𑀳𑀺𑀢𑀁, 𑀅𑀣 𑀧𑀼𑀭𑀺𑀲𑀸 𑀆𑀕𑀦𑁆𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁, 𑀤𑁂𑀯, 𑀦𑀕𑀭𑁂 𑀆𑀬𑀼𑀢𑁆𑀢𑀓𑁄 𑀦𑀢𑁆𑀣𑀺, 𑀤𑁂𑀳𑀺 𑀦𑁄 𑀓𑀺𑀜𑁆𑀘𑀺 𑀆𑀬𑀼𑀢𑁆𑀢𑀓’’𑀦𑁆𑀢𑀺 𑀆𑀳𑀁𑀲𑀼. 𑀭𑀸𑀚𑀸 𑀏𑀓𑀁 𑀧𑀼𑀢𑁆𑀢𑀁 𑀤𑀢𑁆𑀯𑀸 ‘‘𑀕𑀘𑁆𑀙𑀣, 𑀏𑀢𑀁 𑀆𑀤𑀸𑀬 𑀢𑀢𑁆𑀣 𑀅𑀪𑀺𑀲𑀺𑀜𑁆𑀘𑀺𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀸𑀤𑀻𑀦𑀺 𑀓𑀢𑁆𑀯𑀸 𑀯𑀲𑀣𑀸’’𑀢𑀺. 𑀢𑁂 𑀢𑀣𑀸 𑀅𑀓𑀁𑀲𑀼. 𑀭𑀸𑀚𑀧𑀼𑀢𑁆𑀢𑁄 𑀧𑀸𑀧𑀫𑀺𑀢𑁆𑀢𑀲𑀁𑀲𑀕𑁆𑀕𑁂𑀦 𑀓𑀢𑀺𑀧𑀸𑀳𑁂𑀬𑁂𑀯 𑀲𑀼𑀭𑀸𑀲𑁄𑀡𑁆𑀟𑁄 𑀳𑀼𑀢𑁆𑀯𑀸, 𑀲𑀩𑁆𑀩𑀸𑀦𑀺 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀸𑀤𑀻𑀦𑀺 𑀳𑀸𑀭𑁂𑀢𑁆𑀯𑀸, 𑀦𑀕𑀭𑀫𑀚𑁆𑀛𑁂 𑀥𑀼𑀢𑁆𑀢𑁂𑀳𑀺 𑀧𑀭𑀺𑀯𑀸𑀭𑀺𑀢𑁄 𑀲𑀼𑀭𑀁 𑀧𑀺𑀯𑀦𑁆𑀢𑁄 𑀦𑀘𑁆𑀘𑀕𑀻𑀢𑀸𑀤𑀺𑀭𑀢𑀺𑀬𑀸 𑀯𑀻𑀢𑀺𑀦𑀸𑀫𑁂𑀢𑀺. 𑀅𑀣 𑀭𑀜𑁆𑀜𑁄 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑀬𑀺𑀁𑀲𑀼.

𑀭𑀸𑀚𑀸 𑀏𑀓𑀁 𑀧𑀡𑁆𑀟𑀺𑀢𑀁 𑀅𑀫𑀘𑁆𑀘𑀁 𑀆𑀡𑀸𑀧𑁂𑀲𑀺 𑁋 ‘‘𑀕𑀘𑁆𑀙 𑀓𑀼𑀫𑀸𑀭𑀁 𑀑𑀯𑀤𑀺𑀢𑁆𑀯𑀸, 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀸𑀤𑀻𑀦𑀺 𑀓𑀸𑀭𑁂𑀢𑁆𑀯𑀸, 𑀧𑀼𑀦 𑀅𑀪𑀺𑀲𑁂𑀓𑀁 𑀓𑀢𑁆𑀯𑀸, 𑀏𑀳𑀻’’𑀢𑀺. 𑀦 𑀲𑀓𑁆𑀓𑀸, 𑀤𑁂𑀯, 𑀓𑀼𑀫𑀸𑀭𑀁 𑀑𑀯𑀤𑀺𑀢𑀼𑀁, 𑀘𑀡𑁆𑀟𑁄 𑀓𑀼𑀫𑀸𑀭𑁄 𑀖𑀸𑀢𑁂𑀬𑁆𑀬𑀸𑀧𑀺 𑀫𑀦𑁆𑀢𑀺. 𑀅𑀣𑁂𑀓𑀁 𑀩𑀮𑀲𑀫𑁆𑀧𑀦𑁆𑀦𑀁 𑀬𑁄𑀥𑀁 𑀆𑀡𑀸𑀧𑁂𑀲𑀺 𑁋 ‘‘𑀢𑁆𑀯𑀁 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀲𑀘𑁂 𑀲𑁄 𑀑𑀯𑀸𑀤𑁂 𑀦 𑀢𑀺𑀝𑁆𑀞𑀢𑀺, 𑀲𑀻𑀲𑀫𑀲𑁆𑀲 𑀙𑀺𑀦𑁆𑀤𑀸𑀳𑀻’’𑀢𑀺. 𑀇𑀢𑀺 𑀲𑁄 𑀅𑀫𑀘𑁆𑀘𑁄 𑀬𑁄𑀥𑁄 𑀘𑀸𑀢𑀺 𑀇𑀤𑀁 𑀲𑀻𑀖𑀁 𑀤𑀽𑀢𑀬𑀼𑀕𑀁 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀤𑁄𑀯𑀸𑀭𑀺𑀓𑀁 𑀧𑀼𑀘𑁆𑀙𑀺 𑁋 ‘‘𑀓𑀳𑀁, 𑀪𑁄, 𑀦𑀕𑀭𑀲𑁆𑀲 𑀲𑀸𑀫𑀺 𑀓𑀼𑀫𑀸𑀭𑁄’’𑀢𑀺. 𑀏𑀲 𑀫𑀚𑁆𑀛𑁂𑀲𑀺𑀗𑁆𑀖𑀸𑀝𑀓𑁂 𑀲𑀼𑀭𑀁 𑀧𑀺𑀯𑀦𑁆𑀢𑁄 𑀥𑀼𑀢𑁆𑀢𑀧𑀭𑀺𑀯𑀸𑀭𑀺𑀢𑁄 𑀕𑀻𑀢𑀸𑀤𑀺𑀭𑀢𑀺𑀁 𑀅𑀦𑀼𑀪𑁄𑀦𑁆𑀢𑁄 𑀦𑀺𑀲𑀺𑀦𑁆𑀦𑁄𑀢𑀺. 𑀅𑀣 𑀢𑀁 𑀤𑀽𑀢𑀬𑀼𑀕𑀁 𑀕𑀦𑁆𑀢𑁆𑀯𑀸 𑀅𑀫𑀘𑁆𑀘𑁄 𑀢𑀸𑀯𑁂𑀢𑁆𑀣, ‘‘𑀲𑀸𑀫𑀺, 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀸𑀤𑀻𑀦𑀺 𑀓𑀺𑀭 𑀓𑀸𑀭𑁂𑀢𑁆𑀯𑀸 𑀲𑀸𑀥𑀼𑀓𑀁 𑀭𑀚𑁆𑀚𑀁 𑀅𑀦𑀼𑀲𑀸𑀲𑀸’’𑀢𑀺 𑀆𑀳. 𑀓𑀼𑀫𑀸𑀭𑁄 𑀅𑀲𑀼𑀡𑀦𑁆𑀢𑁄 𑀯𑀺𑀬 𑀦𑀺𑀲𑀻𑀤𑀺. 𑀅𑀣 𑀦𑀁 𑀬𑁄𑀥𑁄 𑀲𑀻𑀲𑁂 𑀕𑀳𑁂𑀢𑁆𑀯𑀸, ‘‘𑀲𑀘𑁂 𑀭𑀜𑁆𑀜𑁄 𑀆𑀡𑀁 𑀓𑀭𑁄𑀲𑀺, 𑀓𑀭, 𑀦𑁄 𑀘𑁂, 𑀏𑀢𑁆𑀣𑁂𑀯 𑀢𑁂 𑀲𑀻𑀲𑀁 𑀧𑀸𑀢𑁂𑀲𑁆𑀲𑀸𑀫𑀻’’𑀢𑀺 𑀔𑀕𑁆𑀕𑀁 𑀅𑀩𑁆𑀩𑀸𑀳𑀺. 𑀧𑀭𑀺𑀘𑀸𑀭𑀓𑀸 𑀥𑀼𑀢𑁆𑀢𑀸 𑀢𑀸𑀯𑀤𑁂𑀯 𑀤𑀺𑀲𑀸𑀲𑀼 𑀧𑀮𑀸𑀬𑀺𑀁𑀲𑀼. 𑀓𑀼𑀫𑀸𑀭𑁄 𑀪𑀻𑀢𑁄 𑀲𑀸𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀺. 𑀅𑀣𑀲𑁆𑀲 𑀢𑁂 𑀢𑀢𑁆𑀣𑁂𑀯 𑀅𑀪𑀺𑀲𑁂𑀓𑀁 𑀓𑀢𑁆𑀯𑀸 𑀲𑁂𑀢𑀘𑁆𑀙𑀢𑁆𑀢𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 ‘‘𑀲𑀫𑁆𑀫𑀸 𑀭𑀚𑁆𑀚𑀁 𑀅𑀦𑀼𑀲𑀸𑀲𑀸𑀳𑀻’’𑀢𑀺 𑀭𑀜𑁆𑀜𑀸 𑀯𑀼𑀢𑁆𑀢𑀁 𑀬𑀣𑀸𑀪𑀽𑀢𑀯𑀘𑀦𑀁 𑀦𑀺𑀬𑁆𑀬𑀸𑀢𑁂𑀢𑁆𑀯𑀸 𑀬𑀣𑀸𑀕𑀢𑀫𑀕𑁆𑀕𑀫𑁂𑀯 𑀧𑀝𑀺𑀧𑀚𑁆𑀚𑀺𑀁𑀲𑀼. 𑀇𑀫𑀫𑀢𑁆𑀣𑀁 𑀆𑀯𑀺𑀓𑀭𑁄𑀦𑁆𑀢𑁄 𑀪𑀕𑀯𑀸 ‘‘𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬𑀸’’𑀢𑀺 𑀆𑀳.

𑀢𑀢𑁆𑀭𑀺𑀤𑀁 𑀑𑀧𑀫𑁆𑀫𑀲𑀁𑀲𑀦𑁆𑀤𑀦𑀁 𑁋 𑀲𑀫𑀺𑀤𑁆𑀥𑀫𑀳𑀸𑀦𑀕𑀭𑀁 𑀯𑀺𑀬 𑀳𑀺 𑀦𑀺𑀩𑁆𑀩𑀸𑀦𑀦𑀕𑀭𑀁 𑀤𑀝𑁆𑀞𑀩𑁆𑀩𑀁, 𑀲𑀢𑁆𑀢𑀭𑀢𑀦𑀲𑀫𑀦𑁆𑀦𑀸𑀕𑀢𑁄 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀺 𑀯𑀺𑀬 𑀲𑀢𑁆𑀢𑀩𑁄𑀚𑁆𑀛𑀗𑁆𑀕𑀭𑀢𑀦𑀲𑀫𑀦𑁆𑀦𑀸𑀕𑀢𑁄 𑀥𑀫𑁆𑀫𑀭𑀸𑀚𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀧𑀘𑁆𑀘𑀦𑁆𑀢𑀺𑀫𑀦𑀕𑀭𑀁 𑀯𑀺𑀬 𑀲𑀓𑁆𑀓𑀸𑀬𑀦𑀕𑀭𑀁, 𑀢𑀲𑁆𑀫𑀺𑀁 𑀦𑀕𑀭𑁂 𑀓𑀽𑀝𑀭𑀸𑀚𑀧𑀼𑀢𑁆𑀢𑁄 𑀯𑀺𑀬 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀽𑀝𑀘𑀺𑀢𑁆𑀢𑀼𑀧𑁆𑀧𑀸𑀤𑁄, 𑀓𑀽𑀝𑀭𑀸𑀚𑀧𑀼𑀢𑁆𑀢𑀲𑁆𑀲 𑀥𑀼𑀢𑁆𑀢𑁂𑀳𑀺 𑀧𑀭𑀺𑀯𑀸𑀭𑀺𑀢𑀓𑀸𑀮𑁄 𑀯𑀺𑀬 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀜𑁆𑀘𑀳𑀺 𑀦𑀻𑀯𑀭𑀡𑁂𑀳𑀺 𑀲𑀫𑀗𑁆𑀕𑀺𑀓𑀸𑀮𑁄, 𑀤𑁆𑀯𑁂 𑀲𑀻𑀖𑀤𑀽𑀢𑀸 𑀯𑀺𑀬 𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀜𑁆𑀘 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀜𑁆𑀘, 𑀫𑀳𑀸𑀬𑁄𑀥𑁂𑀦 𑀲𑀻𑀲𑁂 𑀕𑀳𑀺𑀢𑀓𑀸𑀮𑁄 𑀯𑀺𑀬 𑀉𑀧𑁆𑀧𑀦𑁆𑀦𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺𑀦𑀸 𑀦𑀺𑀘𑁆𑀘𑀮𑀁 𑀓𑀢𑁆𑀯𑀸 𑀘𑀺𑀢𑁆𑀢𑀕𑁆𑀕𑀳𑀺𑀢𑀓𑀸𑀮𑁄, 𑀬𑁄𑀥𑁂𑀦 𑀲𑀻𑀲𑁂 𑀕𑀳𑀺𑀢𑀫𑀢𑁆𑀢𑁂 𑀥𑀼𑀢𑁆𑀢𑀸𑀦𑀁 𑀤𑀺𑀲𑀸𑀲𑀼 𑀧𑀮𑀸𑀬𑀺𑀢𑁆𑀯𑀸 𑀤𑀽𑀭𑀻𑀪𑀸𑀯𑁄 𑀯𑀺𑀬 𑀧𑀞𑀫𑀚𑁆𑀛𑀸𑀦𑀫𑁆𑀳𑀺 𑀉𑀧𑁆𑀧𑀦𑁆𑀦𑀫𑀢𑁆𑀢𑁂 𑀦𑀻𑀯𑀭𑀡𑀸𑀦𑀁 𑀤𑀽𑀭𑀻𑀪𑀸𑀯𑁄, ‘‘𑀓𑀭𑀺𑀲𑁆𑀲𑀸𑀫𑀺 𑀭𑀜𑁆𑀜𑁄 𑀲𑀸𑀲𑀦’’𑀦𑁆𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀫𑀢𑁆𑀢𑁂 𑀯𑀺𑀲𑁆𑀲𑀝𑁆𑀞𑀓𑀸𑀮𑁄 𑀯𑀺𑀬 𑀛𑀸𑀦𑀢𑁄 𑀯𑀼𑀝𑁆𑀞𑀺𑀢𑀓𑀸𑀮𑁄, 𑀅𑀫𑀘𑁆𑀘𑁂𑀦 𑀭𑀜𑁆𑀜𑁄 𑀲𑀸𑀲𑀦𑀁 𑀆𑀭𑁄𑀘𑀺𑀢𑀓𑀸𑀮𑁄 𑀯𑀺𑀬 𑀲𑀫𑀸𑀥𑀺𑀦𑀸 𑀘𑀺𑀢𑁆𑀢𑀁 𑀓𑀫𑁆𑀫𑀦𑀺𑀬𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀯𑀟𑁆𑀠𑀺𑀢𑀓𑀸𑀮𑁄, 𑀢𑀢𑁆𑀣𑁂𑀯𑀲𑁆𑀲 𑀢𑁂𑀳𑀺 𑀤𑁆𑀯𑀻𑀳𑀺 𑀤𑀽𑀢𑁂𑀳𑀺 𑀓𑀢𑀸𑀪𑀺𑀲𑁂𑀓𑀲𑁆𑀲 𑀲𑁂𑀢𑀘𑁆𑀙𑀢𑁆𑀢𑀉𑀲𑁆𑀲𑀸𑀧𑀦𑀁 𑀯𑀺𑀬 𑀲𑀫𑀣𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁 𑀦𑀺𑀲𑁆𑀲𑀸𑀬 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀲𑁆𑀲 𑀯𑀺𑀫𑀼𑀢𑁆𑀢𑀺𑀲𑁂𑀢𑀘𑁆𑀙𑀢𑁆𑀢𑀼𑀲𑁆𑀲𑀸𑀧𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀦𑀕𑀭𑀦𑁆𑀢𑀺 𑀔𑁄 𑀪𑀺𑀓𑁆𑀔𑀼 𑀇𑀫𑀲𑁆𑀲𑁂𑀢𑀁 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀲 𑀓𑀸𑀬𑀲𑁆𑀲 𑀅𑀥𑀺𑀯𑀘𑀦𑀦𑁆𑀢𑀺𑀆𑀤𑀻𑀲𑀼 𑀧𑀦 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀲𑀸𑀢𑀺𑀆𑀤𑀻𑀦𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑁄𑀯. 𑀓𑁂𑀯𑀮𑀁 𑀧𑀦 𑀯𑀺𑀜𑁆𑀜𑀸𑀡𑀭𑀸𑀚𑀧𑀼𑀢𑁆𑀢𑀲𑁆𑀲 𑀦𑀺𑀯𑀸𑀲𑀝𑁆𑀞𑀸𑀦𑀢𑁆𑀢𑀸 𑀏𑀢𑁆𑀣 𑀓𑀸𑀬𑁄 ‘‘𑀦𑀕𑀭’’𑀦𑁆𑀢𑀺 𑀯𑀼𑀢𑁆𑀢𑁄, 𑀢𑀲𑁆𑀲𑁂𑀯 𑀤𑁆𑀯𑀸𑀭𑀪𑀽𑀢𑀢𑁆𑀢𑀸 𑀙 𑀆𑀬𑀢𑀦𑀸𑀦𑀺 ‘‘𑀤𑁆𑀯𑀸𑀭𑀸𑀦𑀻’’𑀢𑀺, 𑀢𑁂𑀲𑀼 𑀤𑁆𑀯𑀸𑀭𑁂𑀲𑀼 𑀦𑀺𑀘𑁆𑀘𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀲𑀢𑀺 ‘‘𑀤𑁄𑀯𑀸𑀭𑀺𑀓𑁄’’𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀦𑁆𑀢𑁂𑀦 𑀥𑀫𑁆𑀫𑀭𑀸𑀚𑁂𑀦 𑀧𑁂𑀲𑀺𑀢𑀢𑁆𑀢𑀸 𑀲𑀫𑀣𑀯𑀺𑀧𑀲𑁆𑀲𑀦𑀸 ‘‘𑀲𑀻𑀖𑀁 𑀤𑀽𑀢𑀬𑀼𑀕’’𑀦𑁆𑀢𑀺. 𑀏𑀢𑁆𑀣 𑀫𑀳𑀸𑀬𑁄𑀥𑁄 𑀯𑀺𑀬 𑀲𑀫𑀣𑁄, 𑀧𑀡𑁆𑀟𑀺𑀢𑀸𑀫𑀘𑁆𑀘𑁄 𑀯𑀺𑀬 𑀯𑀺𑀧𑀲𑁆𑀲𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀫𑀚𑁆𑀛𑁂 𑀲𑀺𑀗𑁆𑀖𑀸𑀝𑀓𑁄𑀢𑀺 𑀦𑀕𑀭𑀫𑀚𑁆𑀛𑁂 𑀲𑀺𑀗𑁆𑀖𑀸𑀝𑀓𑁄. 𑀫𑀳𑀸𑀪𑀽𑀢𑀸𑀦𑀦𑁆𑀢𑀺 𑀳𑀤𑀬𑀯𑀢𑁆𑀣𑀼𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀸𑀦𑀁 𑀫𑀳𑀸𑀪𑀽𑀢𑀸𑀦𑀁. 𑀯𑀢𑁆𑀣𑀼𑀭𑀽𑀧𑀲𑁆𑀲 𑀳𑀺 𑀧𑀘𑁆𑀘𑀬𑀤𑀲𑁆𑀲𑀦𑀢𑁆𑀣𑀫𑁂𑀯𑁂𑀢𑀁 𑀘𑀢𑀼𑀫𑀳𑀸𑀪𑀽𑀢𑀕𑁆𑀕𑀳𑀡𑀁 𑀓𑀢𑀁. 𑀦𑀕𑀭𑀫𑀚𑁆𑀛𑁂 𑀧𑀦 𑀲𑁄 𑀭𑀸𑀚𑀓𑀼𑀫𑀸𑀭𑁄 𑀯𑀺𑀬 𑀲𑀭𑀻𑀭𑀫𑀚𑁆𑀛𑁂 𑀳𑀤𑀬𑀭𑀽𑀧𑀲𑀺𑀗𑁆𑀖𑀸𑀝𑀓𑁂 𑀦𑀺𑀲𑀺𑀦𑁆𑀦𑁄 𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑀽𑀢𑁂𑀳𑀺 𑀅𑀭𑀳𑀢𑁆𑀢𑀸𑀪𑀺𑀲𑁂𑀓𑁂𑀦 𑀅𑀪𑀺𑀲𑀺𑀜𑁆𑀘𑀺𑀢𑀩𑁆𑀩𑁄 𑀯𑀺𑀧𑀲𑁆𑀲𑀦𑀸𑀯𑀺𑀜𑁆𑀜𑀸𑀡𑀭𑀸𑀚𑀧𑀼𑀢𑁆𑀢𑁄 𑀤𑀝𑁆𑀞𑀩𑁆𑀩𑁄. 𑀦𑀺𑀩𑁆𑀩𑀸𑀦𑀁 𑀧𑀦 𑀬𑀣𑀸𑀪𑀽𑀢𑀲𑀪𑀸𑀯𑀁 𑀅𑀓𑀼𑀧𑁆𑀧𑀁 𑀅𑀥𑀺𑀓𑀸𑀭𑀻𑀢𑀺 𑀓𑀢𑁆𑀯𑀸 𑀬𑀣𑀸𑀪𑀽𑀢𑀁 𑀯𑀘𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀭𑀺𑀬𑀫𑀕𑁆𑀕𑁄 𑀧𑀦 𑀬𑀸𑀤𑀺𑀲𑁄𑀯 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁄, 𑀅𑀬𑀫𑁆𑀧𑀺 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀢𑀸𑀤𑀺𑀲𑁄𑀬𑁂𑀯𑀸𑀢𑀺 𑀓𑀢𑁆𑀯𑀸 𑀬𑀣𑀸𑀕𑀢𑀫𑀕𑁆𑀕𑁄𑀢𑀺 𑀯𑀼𑀢𑁆𑀢𑁄. 𑀇𑀤𑀁 𑀢𑀸𑀯𑁂𑀢𑁆𑀣 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀆𑀪𑀢𑀸𑀬 𑀉𑀧𑀫𑀸𑀬 𑀲𑀁𑀲𑀦𑁆𑀤𑀦𑀁.

𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀸𑀓𑀝𑀻𑀓𑀭𑀡𑀢𑁆𑀣𑀁 𑀆𑀪𑀢𑀧𑀓𑁆𑀔𑁂 𑀧𑀦 𑀇𑀤𑀁 𑀲𑀁𑀲𑀦𑁆𑀤𑀦𑀁 𑁋 𑀏𑀢𑁆𑀣 𑀳𑀺 𑀙𑀤𑁆𑀯𑀸𑀭𑀽𑀧𑀫𑀸 𑀙𑀨𑀲𑁆𑀲𑀸𑀬𑀢𑀦𑀯𑀲𑁂𑀦 𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀧𑀢𑁆𑀢𑀁 𑀔𑀻𑀡𑀸𑀲𑀯𑀁 𑀤𑀲𑁆𑀲𑁂𑀢𑀼𑀁 𑀆𑀪𑀢𑀸, 𑀦𑀕𑀭𑀲𑀸𑀫𑀺𑀉𑀧𑀫𑀸 𑀧𑀜𑁆𑀘𑀓𑁆𑀔𑀦𑁆𑀥𑀯𑀲𑁂𑀦, 𑀲𑀺𑀗𑁆𑀖𑀸𑀝𑀓𑀽𑀧𑀫𑀸 𑀘𑀢𑀼𑀫𑀳𑀸𑀪𑀽𑀢𑀯𑀲𑁂𑀦, 𑀦𑀕𑀭𑀽𑀧𑀫𑀸 𑀢𑁂𑀪𑀽𑀫𑀓𑀥𑀫𑁆𑀫𑀯𑀲𑁂𑀦 𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀧𑀢𑁆𑀢𑀁 𑀔𑀻𑀡𑀸𑀲𑀯𑀁 𑀤𑀲𑁆𑀲𑁂𑀢𑀼𑀁 𑀆𑀪𑀢𑀸. 𑀲𑀗𑁆𑀔𑁂𑀧𑀢𑁄 𑀧𑀦𑀺𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀘𑀢𑀼𑀲𑀘𑁆𑀘𑀫𑁂𑀯 𑀓𑀣𑀺𑀢𑀁. 𑀲𑀓𑀮𑁂𑀦𑀧𑀺 𑀳𑀺 𑀦𑀕𑀭𑀲𑀫𑁆𑀪𑀸𑀭𑁂𑀦 𑀤𑀼𑀓𑁆𑀔𑀲𑀘𑁆𑀘𑀫𑁂𑀯 𑀓𑀣𑀺𑀢𑀁, 𑀬𑀣𑀸𑀪𑀽𑀢𑀯𑀘𑀦𑁂𑀦 𑀦𑀺𑀭𑁄𑀥𑀲𑀘𑁆𑀘𑀁, 𑀬𑀣𑀸𑀕𑀢𑀫𑀕𑁆𑀕𑁂𑀦 𑀫𑀕𑁆𑀕𑀲𑀘𑁆𑀘𑀁, 𑀤𑀼𑀓𑁆𑀔𑀲𑁆𑀲 𑀧𑀦 𑀧𑀪𑀸𑀯𑀺𑀓𑀸 𑀢𑀡𑁆𑀳𑀸 𑀲𑀫𑀼𑀤𑀬𑀲𑀘𑁆𑀘𑀁. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀜𑁆𑀳𑀧𑀼𑀘𑁆𑀙𑀓𑁄 𑀪𑀺𑀓𑁆𑀔𑀼 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀺𑀢𑁄𑀢𑀺.

𑁯. 𑀯𑀻𑀡𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁬. 𑀦𑀯𑀫𑁂 𑀬𑀲𑁆𑀲 𑀓𑀲𑁆𑀲𑀘𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸𑀢𑀺 𑀇𑀤𑀁 𑀲𑀢𑁆𑀣𑀸 𑀬𑀣𑀸 𑀦𑀸𑀫 𑀫𑀳𑀸𑀓𑀼𑀝𑀼𑀫𑁆𑀩𑀺𑀓𑁄 𑀫𑀳𑀦𑁆𑀢𑀁 𑀓𑀲𑀺𑀓𑀫𑁆𑀫𑀁 𑀓𑀢𑁆𑀯𑀸, 𑀦𑀺𑀧𑁆𑀨𑀦𑁆𑀦𑀲𑀲𑁆𑀲𑁄 𑀖𑀭𑀤𑁆𑀯𑀸𑀭𑁂 𑀫𑀡𑁆𑀟𑀧𑀁 𑀓𑀢𑁆𑀯𑀸, 𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑀸𑀦𑀁 𑀧𑀯𑀢𑁆𑀢𑁂𑀬𑁆𑀬. 𑀓𑀺𑀜𑁆𑀘𑀸𑀧𑀺 𑀢𑁂𑀦 𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑀸𑀦𑀁 𑀧𑀝𑁆𑀞𑀧𑀺𑀢𑀁, 𑀤𑁆𑀯𑀻𑀲𑀼 𑀧𑀦 𑀧𑀭𑀺𑀲𑀸𑀲𑀼 𑀲𑀦𑁆𑀢𑀧𑁆𑀧𑀺𑀢𑀸𑀲𑀼 𑀲𑁂𑀲𑀚𑀦𑀫𑁆𑀧𑀺 𑀲𑀦𑁆𑀢𑀧𑁆𑀧𑁂𑀢𑀺𑀬𑁂𑀯, 𑀏𑀯𑀫𑁂𑀯 𑀪𑀕𑀯𑀸 𑀲𑀫𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀩𑁄𑀥𑀺𑀫𑀡𑁆𑀟𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀅𑀥𑀺𑀕𑀦𑁆𑀢𑁆𑀯𑀸 𑀧𑀯𑀢𑁆𑀢𑀺𑀢𑀯𑀭𑀥𑀫𑁆𑀫𑀘𑀓𑁆𑀓𑁄 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀦𑀺𑀲𑀺𑀦𑁆𑀦𑁄 𑀪𑀺𑀓𑁆𑀔𑀼𑀧𑀭𑀺𑀲𑀸𑀬 𑀘𑁂𑀯 𑀪𑀺𑀓𑁆𑀔𑀼𑀦𑀺𑀧𑀭𑀺𑀲𑀸𑀬 𑀘 𑀫𑀳𑀸𑀥𑀫𑁆𑀫𑀬𑀸𑀕𑀁 𑀬𑀚𑀦𑁆𑀢𑁄 𑀯𑀻𑀡𑁄𑀧𑀫𑀲𑀼𑀢𑁆𑀢𑀁 𑀆𑀭𑀪𑀺. 𑀢𑀁 𑀧𑁂𑀦𑁂𑀢𑀁 𑀓𑀺𑀜𑁆𑀘𑀸𑀧𑀺 𑀤𑁆𑀯𑁂 𑀧𑀭𑀺𑀲𑀸 𑀲𑀦𑁆𑀥𑀸𑀬 𑀆𑀭𑀤𑁆𑀥𑀁, 𑀘𑀢𑀼𑀦𑁆𑀦𑀫𑁆𑀧𑀺 𑀧𑀦 𑀧𑀭𑀺𑀲𑀸𑀦𑀁 𑀅𑀯𑀸𑀭𑀺𑀢𑀁. 𑀢𑀲𑁆𑀫𑀸 𑀲𑀩𑁆𑀩𑁂𑀳𑀺𑀧𑀺 𑀲𑁄𑀢𑀩𑁆𑀩𑀜𑁆𑀘𑁂𑀯 𑀲𑀤𑁆𑀥𑀸𑀢𑀩𑁆𑀩𑀜𑁆𑀘, 𑀧𑀭𑀺𑀬𑁄𑀕𑀸𑀳𑀺𑀢𑁆𑀯𑀸 𑀘𑀲𑁆𑀲 𑀅𑀢𑁆𑀣𑀭𑀲𑁄 𑀯𑀺𑀦𑁆𑀤𑀺𑀢𑀩𑁆𑀩𑁄𑀢𑀺.

𑀢𑀢𑁆𑀣 𑀙𑀦𑁆𑀤𑁄𑀢𑀺𑀆𑀤𑀻𑀲𑀼 𑀙𑀦𑁆𑀤𑁄 𑀦𑀸𑀫 𑀧𑀼𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀤𑀼𑀩𑁆𑀩𑀮𑀢𑀡𑁆𑀳𑀸, 𑀲𑁄 𑀭𑀜𑁆𑀚𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀅𑀧𑀭𑀸𑀧𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀧𑀦 𑀩𑀮𑀯𑀢𑀡𑁆𑀳𑀸 𑀭𑀸𑀕𑁄 𑀦𑀸𑀫, 𑀲𑁄 𑀭𑀜𑁆𑀚𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀤𑀡𑁆𑀟𑀸𑀤𑀸𑀦𑀸𑀤𑀻𑀦𑀺 𑀓𑀸𑀢𑀼𑀁 𑀅𑀲𑀫𑀢𑁆𑀣𑁄 𑀧𑀼𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑁄 𑀤𑀼𑀩𑁆𑀩𑀮𑀓𑁄𑀥𑁄 𑀤𑁄𑀲𑁄 𑀦𑀸𑀫. 𑀢𑀸𑀦𑀺 𑀓𑀸𑀢𑀼𑀁 𑀲𑀫𑀢𑁆𑀣𑁄 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀓𑁄 𑀩𑀮𑀯𑀓𑁄𑀥𑁄 𑀧𑀝𑀺𑀖𑀁 𑀦𑀸𑀫. 𑀫𑁄𑀳𑁄 𑀧𑀦 𑀫𑁄𑀳𑀦𑀲𑀫𑁆𑀫𑁄𑀳𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀅𑀜𑁆𑀜𑀸𑀡𑀁. 𑀏𑀯𑀫𑁂𑀢𑁆𑀣 𑀧𑀜𑁆𑀘𑀳𑀺𑀧𑀺 𑀧𑀤𑁂𑀳𑀺 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺 𑀕𑀳𑀺𑀢𑀸𑀦𑀺. 𑀢𑁂𑀲𑀼 𑀕𑀳𑀺𑀢𑁂𑀲𑀼 𑀲𑀩𑁆𑀩𑁂𑀧𑀺 𑀢𑀫𑁆𑀫𑀽𑀮𑀓𑀸 𑀓𑀺𑀮𑁂𑀲𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺. ‘‘𑀙𑀦𑁆𑀤𑁄 𑀭𑀸𑀕𑁄’’𑀢𑀺 𑀯𑀸 𑀧𑀤𑀤𑁆𑀯𑀬𑁂𑀦 𑀅𑀝𑁆𑀞𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸, ‘‘𑀤𑁄𑀲𑁄 𑀧𑀝𑀺𑀖’’𑀦𑁆𑀢𑀺 𑀧𑀤𑀤𑁆𑀯𑀬𑁂𑀦 𑀤𑁆𑀯𑁂 𑀤𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸, 𑀫𑁄𑀳𑀧𑀤𑁂𑀦 𑀮𑁄𑀪𑀤𑁄𑀲𑀭𑀳𑀺𑀢𑀸 𑀤𑁆𑀯𑁂 𑀉𑀤𑁆𑀥𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀕𑀳𑀺𑀢𑀸𑀢𑀺. 𑀏𑀯𑀁 𑀲𑀩𑁆𑀩𑁂𑀧𑀺 𑀤𑁆𑀯𑀸𑀤𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀤𑀲𑁆𑀲𑀺𑀢𑀸𑀯 𑀳𑁄𑀦𑁆𑀢𑀺.

𑀲𑀪𑀬𑁄𑀢𑀺 𑀓𑀺𑀮𑁂𑀲𑀘𑁄𑀭𑀸𑀦𑀁 𑀦𑀺𑀯𑀸𑀲𑀝𑁆𑀞𑀸𑀦𑀢𑁆𑀢𑀸 𑀲𑀪𑀬𑁄. 𑀲𑀧𑁆𑀧𑀝𑀺𑀪𑀬𑁄𑀢𑀺 𑀯𑀥𑀩𑀦𑁆𑀥𑀦𑀸𑀤𑀻𑀦𑀁 𑀓𑀸𑀭𑀡𑀢𑁆𑀢𑀸 𑀲𑀧𑁆𑀧𑀝𑀺𑀪𑀬𑁄. 𑀲𑀓𑀡𑁆𑀝𑀓𑁄𑀢𑀺 𑀭𑀸𑀕𑀸𑀤𑀻𑀳𑀺 𑀓𑀡𑁆𑀝𑀓𑁂𑀳𑀺 𑀲𑀓𑀡𑁆𑀝𑀓𑁄. 𑀲𑀕𑀳𑀦𑁄𑀢𑀺 𑀭𑀸𑀕𑀕𑀳𑀦𑀸𑀤𑀻𑀳𑀺 𑀲𑀕𑀳𑀦𑁄. 𑀉𑀫𑁆𑀫𑀕𑁆𑀕𑁄𑀢𑀺 𑀤𑁂𑀯𑀮𑁄𑀓𑀁 𑀯𑀸 𑀫𑀦𑀼𑀲𑁆𑀲𑀮𑁄𑀓𑀁 𑀯𑀸 𑀦𑀺𑀩𑁆𑀩𑀸𑀦𑀁 𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀅𑀫𑀕𑁆𑀕𑁄. 𑀓𑀼𑀫𑁆𑀫𑀕𑁆𑀕𑁄𑀢𑀺 𑀓𑀼𑀘𑁆𑀙𑀺𑀢𑀚𑁂𑀕𑀼𑀘𑁆𑀙𑀺𑀪𑀽𑀢𑀝𑁆𑀞𑀸𑀦𑀕𑀫𑀦𑀏𑀓𑀧𑀤𑀺𑀓𑀫𑀕𑁆𑀕𑁄 𑀯𑀺𑀬 𑀅𑀧𑀸𑀬𑀲𑀫𑁆𑀧𑀸𑀧𑀓𑀢𑁆𑀢𑀸 𑀓𑀼𑀫𑁆𑀫𑀕𑁆𑀕𑁄. 𑀤𑀼𑀳𑀺𑀢𑀺𑀓𑁄𑀢𑀺 𑀏𑀢𑁆𑀣 𑀇𑀳𑀺𑀢𑀻𑀢𑀺 𑀇𑀭𑀺𑀬𑀦𑀸, 𑀤𑀼𑀓𑁆𑀔𑀸 𑀇𑀳𑀺𑀢𑀺 𑀏𑀢𑁆𑀣𑀸𑀢𑀺, 𑀤𑀼𑀳𑀺𑀢𑀺𑀓𑁄. 𑀬𑀲𑁆𑀫𑀺𑀜𑁆𑀳𑀺 𑀫𑀕𑁆𑀕𑁂 𑀫𑀽𑀮𑀨𑀮𑀸𑀤𑀺𑀔𑀸𑀤𑀦𑀻𑀬𑀁 𑀯𑀸 𑀲𑀸𑀬𑀦𑀻𑀬𑀁 𑀯𑀸 𑀦𑀢𑁆𑀣𑀺, 𑀢𑀲𑁆𑀫𑀺𑀁 𑀇𑀭𑀺𑀬𑀦𑀸 𑀤𑀼𑀓𑁆𑀔𑀸 𑀳𑁄𑀢𑀺, 𑀦 𑀲𑀓𑁆𑀓𑀸 𑀢𑀁 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑀼𑀁. 𑀓𑀺𑀮𑁂𑀲𑀫𑀕𑁆𑀕𑀫𑁆𑀧𑀺 𑀧𑀝𑀺𑀧𑀚𑁆𑀚𑀺𑀢𑁆𑀯𑀸 𑀦 𑀲𑀓𑁆𑀓𑀸 𑀲𑀫𑁆𑀧𑀢𑁆𑀢𑀺𑀪𑀯𑀁 𑀕𑀦𑁆𑀢𑀼𑀦𑁆𑀢𑀺 𑀓𑀺𑀮𑁂𑀲𑀫𑀕𑁆𑀕𑁄 𑀤𑀼𑀳𑀺𑀢𑀺𑀓𑁄𑀢𑀺 𑀯𑀼𑀢𑁆𑀢𑁄. 𑀤𑁆𑀯𑀻𑀳𑀺𑀢𑀺𑀓𑁄𑀢𑀺𑀧𑀺 𑀧𑀸𑀞𑁄, 𑀏𑀲𑁂𑀯𑀢𑁆𑀣𑁄. 𑀅𑀲𑀧𑁆𑀧𑀼𑀭𑀺𑀲𑀲𑁂𑀯𑀺𑀢𑁄𑀢𑀺 𑀓𑁄𑀓𑀸𑀮𑀺𑀓𑀸𑀤𑀻𑀳𑀺 𑀅𑀲𑀧𑁆𑀧𑀼𑀭𑀺𑀲𑁂𑀳𑀺 𑀲𑁂𑀯𑀺𑀢𑁄.

𑀢𑀢𑁄 𑀘𑀺𑀢𑁆𑀢𑀁 𑀦𑀺𑀯𑀸𑀭𑀬𑁂𑀢𑀺 𑀢𑁂𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑁂𑀳𑀺 𑀭𑀽𑀧𑁂𑀳𑀺 𑀢𑀁 𑀙𑀦𑁆𑀤𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑀁 𑀅𑀲𑀼𑀪𑀸𑀯𑀚𑁆𑀚𑀦𑀸𑀤𑀻𑀳𑀺 𑀉𑀧𑀸𑀬𑁂𑀳𑀺 𑀦𑀺𑀯𑀸𑀭𑀬𑁂. 𑀘𑀓𑁆𑀔𑀼𑀤𑁆𑀯𑀸𑀭𑀲𑁆𑀫𑀺𑀜𑁆𑀳𑀺 𑀇𑀝𑁆𑀞𑀸𑀭𑀫𑁆𑀫𑀡𑁂 𑀭𑀸𑀕𑁂 𑀉𑀧𑁆𑀧𑀦𑁆𑀦𑁂 𑀅𑀲𑀼𑀪𑀢𑁄 𑀆𑀯𑀚𑁆𑀚𑀦𑁆𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀯𑀢𑁆𑀢𑀢𑀺, 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑁂 𑀤𑁄𑀲𑁂 𑀉𑀧𑁆𑀧𑀦𑁆𑀦𑁂 𑀫𑁂𑀢𑁆𑀢𑀢𑁄 𑀆𑀯𑀚𑁆𑀚𑀦𑁆𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀯𑀢𑁆𑀢𑀢𑀺, 𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂 𑀫𑁄𑀳𑁂 𑀉𑀧𑁆𑀧𑀦𑁆𑀦𑁂 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀁 𑀕𑀭𑀼𑀯𑀸𑀲𑀁 𑀆𑀯𑀚𑁆𑀚𑀦𑁆𑀢𑀲𑁆𑀲 𑀘𑀺𑀢𑁆𑀢𑀁 𑀦𑀺𑀯𑀢𑁆𑀢𑀢𑀺. 𑀏𑀯𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀧𑀦 𑀲𑀢𑁆𑀣𑀼𑀫𑀳𑀢𑁆𑀢𑀢𑀁 𑀥𑀫𑁆𑀫𑀲𑁆𑀲 𑀲𑁆𑀯𑀸𑀓𑁆𑀔𑀸𑀢𑀢𑀸 𑀲𑀗𑁆𑀖𑀲𑁆𑀲 𑀲𑀼𑀧𑁆𑀧𑀝𑀺𑀧𑀢𑁆𑀢𑀺 𑀘 𑀆𑀯𑀚𑁆𑀚𑀺𑀢𑀩𑁆𑀩𑀸. 𑀲𑀢𑁆𑀣𑀼𑀫𑀳𑀢𑁆𑀢𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺 𑀳𑀺 𑀥𑀫𑁆𑀫𑀲𑁆𑀲 𑀲𑁆𑀯𑀸𑀓𑁆𑀔𑀸𑀢𑀢𑀁 𑀲𑀗𑁆𑀖𑀲𑁆𑀲 𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺 𑀘𑀺𑀢𑁆𑀢𑀁 𑀦𑀺𑀯𑀢𑁆𑀢𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀲𑀼𑀪𑀸𑀯𑀚𑁆𑀚𑀦𑀸𑀤𑀻𑀳𑀺 𑀉𑀧𑀸𑀬𑁂𑀳𑀺 𑀦𑀺𑀯𑀸𑀭𑀬𑁂’’𑀢𑀺.

𑀓𑀺𑀝𑁆𑀞𑀦𑁆𑀢𑀺 𑀓𑀺𑀝𑁆𑀞𑀝𑁆𑀞𑀸𑀦𑁂 𑀉𑀧𑁆𑀧𑀦𑁆𑀦𑀲𑀲𑁆𑀲𑀁. 𑀲𑀫𑁆𑀧𑀦𑁆𑀦𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀁 𑀲𑀼𑀦𑀺𑀧𑁆𑀨𑀦𑁆𑀦𑀁. 𑀓𑀺𑀝𑁆𑀞𑀸𑀤𑁄𑀢𑀺 𑀲𑀲𑁆𑀲𑀔𑀸𑀤𑀓𑁄. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀲𑀫𑁆𑀧𑀦𑁆𑀦𑀓𑀺𑀝𑁆𑀞𑀁 𑀯𑀺𑀬 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀤𑀝𑁆𑀞𑀩𑁆𑀩𑀸, 𑀓𑀺𑀝𑁆𑀞𑀸𑀤𑁄 𑀕𑁄𑀡𑁄 𑀯𑀺𑀬 𑀓𑀽𑀝𑀘𑀺𑀢𑁆𑀢𑀁, 𑀓𑀺𑀝𑁆𑀞𑀸𑀭𑀓𑁆𑀔𑀲𑁆𑀲 𑀧𑀫𑀸𑀤𑀓𑀸𑀮𑁄 𑀯𑀺𑀬 𑀪𑀺𑀓𑁆𑀔𑀼𑀦𑁄 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀲𑀢𑀺𑀁 𑀧𑀳𑀸𑀬 𑀯𑀺𑀘𑀭𑀡𑀓𑀸𑀮𑁄, 𑀓𑀺𑀝𑁆𑀞𑀸𑀭𑀓𑁆𑀔𑀲𑁆𑀲 𑀧𑀫𑀸𑀤𑀫𑀸𑀕𑀫𑁆𑀫 𑀕𑁄𑀡𑁂𑀦 𑀕𑀳𑀺𑀢𑀕𑀩𑁆𑀪𑀲𑁆𑀲 𑀓𑀺𑀝𑁆𑀞𑀲𑁆𑀲 𑀔𑀸𑀤𑀺𑀢𑀢𑁆𑀢𑀸 𑀲𑀲𑁆𑀲𑀲𑀸𑀫𑀺𑀦𑁄 𑀲𑀲𑁆𑀲𑀨𑀮𑀸𑀦𑀥𑀺𑀕𑀫𑁄 𑀯𑀺𑀬 𑀙𑀤𑁆𑀯𑀸𑀭𑀭𑀓𑁆𑀔𑀺𑀓𑀸𑀬 𑀲𑀢𑀺𑀬𑀸 𑀯𑀺𑀧𑁆𑀧𑀯𑀸𑀲𑀫𑀸𑀕𑀫𑁆𑀫 𑀧𑀜𑁆𑀘𑀓𑀸𑀫𑀕𑀼𑀡𑀁 𑀅𑀲𑁆𑀲𑀸𑀤𑁂𑀦𑁆𑀢𑁂𑀦 𑀘𑀺𑀢𑁆𑀢𑁂𑀦 𑀓𑀼𑀲𑀮𑀧𑀓𑁆𑀔𑀲𑁆𑀲 𑀦𑀸𑀲𑀺𑀢𑀢𑁆𑀢𑀸 𑀪𑀺𑀓𑁆𑀔𑀼𑀦𑁄 𑀲𑀸𑀫𑀜𑁆𑀜𑀨𑀮𑀸𑀥𑀺𑀕𑀫𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀉𑀧𑀭𑀺𑀖𑀝𑀸𑀬𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀺𑀗𑁆𑀕𑀸𑀦𑀁 𑀅𑀦𑁆𑀢𑀭𑁂. 𑀲𑀼𑀦𑀺𑀕𑁆𑀕𑀳𑀺𑀢𑀁 𑀦𑀺𑀕𑁆𑀕𑀡𑁆𑀳𑁂𑀬𑁆𑀬𑀸𑀢𑀺 𑀖𑀝𑀸𑀬𑀁 𑀧𑀢𑀺𑀝𑁆𑀞𑀺𑀢𑁂 𑀦𑀸𑀲𑀸𑀭𑀚𑁆𑀚𑀼𑀓𑁂 𑀲𑀼𑀝𑁆𑀞𑀼 𑀦𑀺𑀕𑁆𑀕𑀳𑀺𑀢𑀁 𑀓𑀢𑁆𑀯𑀸 𑀦𑀺𑀕𑁆𑀕𑀡𑁆𑀳𑁂𑀬𑁆𑀬. 𑀤𑀡𑁆𑀟𑁂𑀦𑀸𑀢𑀺 𑀫𑀼𑀕𑁆𑀕𑀭𑀲𑀤𑀺𑀲𑁂𑀦 𑀣𑀽𑀮𑀤𑀡𑁆𑀟𑀓𑁂𑀦. 𑀏𑀯𑀜𑁆𑀳𑀺 𑀲𑁄 𑀪𑀺𑀓𑁆𑀔𑀯𑁂 𑀕𑁄𑀡𑁄𑀢𑀺 𑀏𑀯𑀁 𑀲𑁄 𑀓𑀺𑀝𑁆𑀞𑀸𑀭𑀓𑁆𑀔𑀲𑁆𑀲 𑀧𑀫𑀸𑀤𑀫𑀦𑁆𑀯𑀸𑀬 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀔𑀡𑁂 𑀓𑀺𑀝𑁆𑀞𑀁 𑀑𑀢𑀭𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀔𑀡𑁂 𑀏𑀯𑀁 𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀢𑀸𑀴𑁂𑀢𑁆𑀯𑀸 𑀑𑀲𑀚𑁆𑀚𑀦𑁂𑀦 𑀦𑀺𑀩𑁆𑀩𑀺𑀲𑁂𑀯𑀦𑀪𑀸𑀯𑀁 𑀉𑀧𑀦𑀻𑀢𑁄 𑀕𑁄𑀡𑁄.

𑀏𑀯𑀫𑁂𑀯 𑀔𑁄𑀢𑀺 𑀇𑀥𑀸𑀧𑀺 𑀲𑀫𑁆𑀧𑀦𑁆𑀦𑀓𑀺𑀝𑁆𑀞𑀫𑀺𑀯 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀤𑀝𑁆𑀞𑀩𑁆𑀩𑀸, 𑀓𑀺𑀝𑁆𑀞𑀸𑀤𑁄 𑀯𑀺𑀬 𑀓𑀽𑀝𑀘𑀺𑀢𑁆𑀢𑀁, 𑀓𑀺𑀝𑁆𑀞𑀸𑀭𑀓𑁆𑀔𑀲𑁆𑀲 𑀅𑀧𑁆𑀧𑀫𑀸𑀤𑁄 𑀯𑀺𑀬 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀲𑀢𑀺𑀬𑀸 𑀅𑀯𑀺𑀲𑁆𑀲𑀚𑁆𑀚𑀦𑀁, 𑀤𑀡𑁆𑀟𑁄 𑀯𑀺𑀬 𑀲𑀼𑀢𑁆𑀢𑀦𑁆𑀢𑁄, 𑀕𑁄𑀡𑀲𑁆𑀲 𑀓𑀺𑀝𑁆𑀞𑀸𑀪𑀺𑀫𑀼𑀔𑀓𑀸𑀮𑁂 𑀤𑀡𑁆𑀟𑁂𑀦 𑀢𑀸𑀴𑀦𑀁 𑀯𑀺𑀬 𑀘𑀺𑀢𑁆𑀢𑀲𑁆𑀲 𑀩𑀳𑀺𑀤𑁆𑀥𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑀸𑀪𑀺𑀫𑀼𑀔𑀓𑀸𑀮𑁂 𑀅𑀦𑀫𑀢𑀕𑁆𑀕𑀺𑀬𑀤𑁂𑀯𑀤𑀽𑀢𑀆𑀤𑀺𑀢𑁆𑀢𑀆𑀲𑀻𑀯𑀺𑀲𑀽𑀧𑀫𑀅𑀦𑀸𑀕𑀢𑀪𑀬𑀸𑀤𑀻𑀲𑀼 𑀢𑀁 𑀢𑀁 𑀲𑀼𑀢𑁆𑀢𑀁 𑀆𑀯𑀚𑁆𑀚𑁂𑀢𑁆𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑀢𑁄 𑀦𑀺𑀯𑀸𑀭𑁂𑀢𑁆𑀯𑀸 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑁂 𑀑𑀢𑀸𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑀸𑀳𑀼 𑀧𑁄𑀭𑀸𑀡𑀸 𑁋

‘‘𑀲𑀼𑀪𑀸𑀲𑀺𑀢𑀁 𑀲𑀼𑀢𑁆𑀯𑀸 𑀫𑀦𑁄 𑀧𑀲𑀻𑀤𑀢𑀺,

𑀤𑀫𑁂𑀢𑀺 𑀦𑀁 𑀧𑀻𑀢𑀺𑀲𑀼𑀔𑀜𑁆𑀘 𑀯𑀺𑀦𑁆𑀤𑀢𑀺;

𑀢𑀤𑀲𑁆𑀲 𑀆𑀭𑀫𑁆𑀫𑀡𑁂 𑀢𑀺𑀝𑁆𑀞𑀢𑁂 𑀫𑀦𑁄,

𑀕𑁄𑀡𑁄𑀯 𑀓𑀺𑀝𑁆𑀞𑀸𑀤𑀓𑁄 𑀤𑀡𑁆𑀟𑀢𑀚𑁆𑀚𑀺𑀢𑁄’’𑀢𑀺.

𑀉𑀤𑀼𑀚𑀺𑀢𑀦𑁆𑀢𑀺 𑀢𑀚𑁆𑀚𑀺𑀢𑀁. 𑀲𑀼𑀤𑀼𑀚𑀺𑀢𑀦𑁆𑀢𑀺 𑀲𑀼𑀢𑀚𑁆𑀚𑀺𑀢𑀁, 𑀲𑀼𑀚𑀺𑀢𑀦𑁆𑀢𑀺𑀧𑀺 𑀅𑀢𑁆𑀣𑁄. 𑀉𑀤𑀼, 𑀲𑀼𑀤𑀽𑀢𑀺 𑀇𑀤𑀁 𑀧𑀦 𑀦𑀺𑀧𑀸𑀢𑀫𑀢𑁆𑀢𑀫𑁂𑀯. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀕𑁄𑀘𑀭𑀚𑁆𑀛𑀢𑁆𑀢𑀁. 𑀲𑀦𑁆𑀢𑀺𑀝𑁆𑀞𑀢𑀻𑀢𑀺𑀆𑀤𑀻𑀲𑀼 𑀧𑀞𑀫𑀚𑁆𑀛𑀸𑀦𑀯𑀲𑁂𑀦 𑀲𑀦𑁆𑀢𑀺𑀝𑁆𑀞𑀢𑀺, 𑀤𑀼𑀢𑀺𑀬𑀚𑁆𑀛𑀸𑀦𑀯𑀲𑁂𑀦 𑀲𑀦𑁆𑀦𑀺𑀲𑀻𑀤𑀢𑀺, 𑀢𑀢𑀺𑀬𑀚𑁆𑀛𑀸𑀦𑀯𑀲𑁂𑀦 𑀏𑀓𑁄𑀤𑀺 𑀳𑁄𑀢𑀺, 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀲𑁂𑀦 𑀲𑀫𑀸𑀥𑀺𑀬𑀢𑀺. 𑀲𑀩𑁆𑀩𑀫𑁆𑀧𑀺 𑀯𑀸 𑀏𑀢𑀁 𑀧𑀞𑀫𑀚𑁆𑀛𑀸𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀲𑀫𑀣𑀸𑀦𑀼𑀭𑀓𑁆𑀔𑀡𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀁 𑀦𑀸𑀫 𑀓𑀣𑀺𑀢𑀁.

𑀭𑀜𑁆𑀜𑁄 𑀯𑀸𑀢𑀺 𑀓𑀲𑁆𑀲𑀘𑀺𑀤𑁂𑀯 𑀧𑀘𑁆𑀘𑀦𑁆𑀢𑀭𑀜𑁆𑀜𑁄 𑀯𑀸. 𑀲𑀤𑁆𑀤𑀁 𑀲𑀼𑀡𑁂𑀬𑁆𑀬𑀸𑀢𑀺 𑀧𑀘𑁆𑀘𑀽𑀲𑀓𑀸𑀮𑁂 𑀧𑀩𑀼𑀤𑁆𑀥𑁄 𑀓𑀼𑀲𑀮𑁂𑀦 𑀯𑀻𑀡𑀸𑀯𑀸𑀤𑀓𑁂𑀦 𑀯𑀸𑀤𑀺𑀬𑀫𑀸𑀦𑀸𑀬 𑀫𑀥𑀼𑀭𑀲𑀤𑁆𑀤𑀁 𑀲𑀼𑀡𑁂𑀬𑁆𑀬. 𑀭𑀚𑀦𑀻𑀬𑁄𑀢𑀺𑀆𑀤𑀻𑀲𑀼 𑀘𑀺𑀢𑁆𑀢𑀁 𑀭𑀜𑁆𑀚𑁂𑀢𑀻𑀢𑀺 𑀭𑀚𑀦𑀻𑀬𑁄. 𑀓𑀸𑀫𑁂𑀢𑀩𑁆𑀩𑀢𑀸𑀬 𑀓𑀫𑀦𑀻𑀬𑁄. 𑀘𑀺𑀢𑁆𑀢𑀁 𑀫𑀤𑀬𑀢𑀻𑀢𑀺 𑀫𑀤𑀦𑀻𑀬𑁄. 𑀘𑀺𑀢𑁆𑀢𑀁 𑀫𑀼𑀘𑁆𑀙𑀺𑀢𑀁 𑀯𑀺𑀬 𑀓𑀭𑀡𑀢𑁄 𑀫𑀼𑀘𑁆𑀙𑀺𑀬𑀢𑀻𑀢𑀺 𑀫𑀼𑀘𑁆𑀙𑀦𑀻𑀬𑁄. 𑀆𑀩𑀦𑁆𑀥𑀺𑀢𑁆𑀯𑀸 𑀯𑀺𑀬 𑀕𑀳𑀡𑀢𑁄 𑀩𑀦𑁆𑀥𑀢𑀻𑀢𑀺 𑀩𑀦𑁆𑀥𑀦𑀻𑀬𑁄. 𑀅𑀮𑀁 𑀫𑁂, 𑀪𑁄𑀢𑀺 𑀯𑀻𑀡𑀸𑀬 𑀲𑀡𑁆𑀞𑀸𑀦𑀁 𑀤𑀺𑀲𑁆𑀯𑀸 𑀢𑀁 𑀅𑀦𑀺𑀘𑁆𑀙𑀦𑁆𑀢𑁄 𑀏𑀯𑀫𑀸𑀳. 𑀉𑀧𑀥𑀸𑀭𑀡𑁂𑀢𑀺 𑀯𑁂𑀝𑁆𑀞𑀓𑁂. 𑀓𑁄𑀡𑀦𑁆𑀢𑀺 𑀘𑀢𑀼𑀭𑀲𑁆𑀲𑀁 𑀲𑀸𑀭𑀤𑀡𑁆𑀟𑀓𑀁.

𑀲𑁄 𑀢𑀁 𑀯𑀻𑀡𑀦𑁆𑀢𑀺 𑀲𑁄 𑀭𑀸𑀚𑀸 ‘‘𑀆𑀳𑀭𑀣 𑀦𑀁 𑀯𑀻𑀡𑀁, 𑀅𑀳𑀫𑀲𑁆𑀲𑀸 𑀲𑀤𑁆𑀤𑀁 𑀧𑀲𑀺𑀲𑁆𑀲𑀸𑀫𑀻’’𑀢𑀺 𑀢𑀁 𑀯𑀻𑀡𑀁 𑀕𑀳𑁂𑀢𑁆𑀯𑀸. 𑀤𑀲𑀥𑀸 𑀯𑀸𑀢𑀺𑀆𑀤𑀻𑀲𑀼 𑀧𑀞𑀫𑀁 𑀢𑀸𑀯 𑀤𑀲𑀥𑀸 𑀨𑀸𑀮𑁂𑀬𑁆𑀬, 𑀅𑀣𑀲𑁆𑀲𑀸 𑀲𑀤𑁆𑀤𑀁 𑀅𑀧𑀲𑁆𑀲𑀦𑁆𑀢𑁄 𑀲𑀢𑀥𑀸 𑀨𑀸𑀮𑁂𑀬𑁆𑀬, 𑀢𑀣𑀸𑀧𑀺 𑀅𑀧𑀲𑁆𑀲𑀦𑁆𑀢𑁄 𑀲𑀓𑀮𑀺𑀓𑀁 𑀲𑀓𑀮𑀺𑀓𑀁 𑀓𑀭𑁂𑀬𑁆𑀬, 𑀢𑀣𑀸𑀧𑀺 𑀅𑀧𑀲𑁆𑀲𑀦𑁆𑀢𑁄 ‘‘𑀲𑀓𑀮𑀺𑀓𑀸 𑀛𑀸𑀬𑀺𑀲𑁆𑀲𑀦𑁆𑀢𑀺, 𑀲𑀤𑁆𑀤𑁄 𑀧𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀮𑀸𑀬𑀺𑀲𑁆𑀲𑀢𑀺, 𑀢𑀤𑀸 𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀅𑀕𑁆𑀕𑀺𑀦𑀸 𑀟𑀳𑁂𑀬𑁆𑀬. 𑀢𑀣𑀸𑀧𑀺 𑀅𑀧𑀲𑁆𑀲𑀦𑁆𑀢𑁄 ‘‘𑀲𑀮𑁆𑀮𑀳𑀼𑀓𑀸𑀦𑀺 𑀫𑀲𑀺𑀘𑀼𑀡𑁆𑀡𑀸𑀦𑀺 𑀯𑀸𑀢𑁂𑀦 𑀪𑀲𑁆𑀲𑀺𑀲𑁆𑀲𑀦𑁆𑀢𑀺, 𑀲𑀤𑁆𑀤𑁄 𑀲𑀸𑀭𑀥𑀜𑁆𑀜𑀁 𑀯𑀺𑀬 𑀧𑀸𑀤𑀫𑀽𑀮𑁂 𑀧𑀢𑀺𑀲𑁆𑀲𑀢𑀺, 𑀢𑀤𑀸 𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀫𑀳𑀸𑀯𑀸𑀢𑁂 𑀯𑀸 𑀑𑀨𑀼𑀦𑁂𑀬𑁆𑀬. 𑀢𑀣𑀸𑀧𑀺 𑀅𑀧𑀲𑁆𑀲𑀦𑁆𑀢𑁄 ‘‘𑀫𑀲𑀺𑀘𑀼𑀡𑁆𑀡𑀸𑀦𑀺 𑀬𑀣𑁄𑀤𑀓𑀁 𑀕𑀫𑀺𑀲𑁆𑀲𑀦𑁆𑀢𑀺, 𑀲𑀤𑁆𑀤𑁄 𑀧𑀦 𑀧𑀸𑀭𑀁 𑀕𑀘𑁆𑀙𑀦𑁆𑀢𑁄 𑀧𑀼𑀭𑀺𑀲𑁄 𑀯𑀺𑀬 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀭𑀺𑀲𑁆𑀲𑀢𑀺, 𑀢𑀤𑀸 𑀦𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺 𑀦𑀤𑀺𑀬𑀸 𑀯𑀸 𑀲𑀻𑀖𑀲𑁄𑀢𑀸𑀬 𑀧𑀯𑀸𑀳𑁂𑀬𑁆𑀬.

𑀏𑀯𑀁 𑀯𑀤𑁂𑀬𑁆𑀬𑀸𑀢𑀺 𑀲𑀩𑁆𑀩𑁂𑀳𑀺𑀧𑀺𑀫𑁂𑀳𑀺 𑀉𑀧𑀸𑀬𑁂𑀳𑀺 𑀅𑀧𑀲𑁆𑀲𑀦𑁆𑀢𑁄 𑀢𑁂 𑀫𑀦𑀼𑀲𑁆𑀲𑁂 𑀏𑀯𑀁 𑀯𑀤𑁂𑀬𑁆𑀬. 𑀅𑀲𑀢𑀻 𑀓𑀺𑀭𑀸𑀬𑀦𑁆𑀢𑀺 𑀅𑀲𑀢𑀻 𑀓𑀺𑀭 𑀅𑀬𑀁 𑀯𑀻𑀡𑀸, 𑀮𑀸𑀫𑀺𑀓𑀸𑀢𑀺 𑀅𑀢𑁆𑀣𑁄. 𑀅𑀲𑀢𑀻𑀢𑀺 𑀮𑀸𑀫𑀓𑀸𑀥𑀺𑀯𑀘𑀦𑀫𑁂𑀢𑀁. 𑀬𑀣𑀸𑀳 𑁋

‘‘𑀅𑀲𑀸 𑀮𑁄𑀓𑀺𑀢𑁆𑀣𑀺𑀬𑁄 𑀦𑀸𑀫, 𑀯𑁂𑀮𑀸 𑀢𑀸𑀲𑀁 𑀦 𑀯𑀺𑀚𑁆𑀚𑀢𑀺;

𑀲𑀸𑀭𑀢𑁆𑀢𑀸 𑀘 𑀧𑀕𑀩𑁆𑀪𑀸 𑀘, 𑀲𑀺𑀔𑀻 𑀲𑀩𑁆𑀩𑀖𑀲𑁄 𑀬𑀣𑀸’’𑀢𑀺. (𑀚𑀸. 𑁧.𑁧.𑁬𑁧);

𑀬𑀣𑁂𑀯𑀁 𑀬𑀁𑀓𑀺𑀜𑁆𑀘𑀺 𑀯𑀻𑀡𑀸 𑀦𑀸𑀫𑀸𑀢𑀺 𑀦 𑀓𑁂𑀯𑀮𑀜𑁆𑀘 𑀯𑀻𑀡𑀸𑀬𑁂𑀯 𑀮𑀸𑀫𑀺𑀓𑀸, 𑀬𑀣𑁂𑀯 𑀧𑀦 𑀅𑀬𑀁 𑀯𑀻𑀡𑀸 𑀦𑀸𑀫, 𑀏𑀯𑀁 𑀬𑀁𑀓𑀺𑀜𑁆𑀘𑀺 𑀅𑀜𑁆𑀜𑀫𑁆𑀧𑀺 𑀢𑀦𑁆𑀢𑀺𑀩𑀤𑁆𑀥𑀁, 𑀲𑀩𑁆𑀩𑀁 𑀢𑀁 𑀮𑀸𑀫𑀓𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀯𑀻𑀡𑀸 𑀯𑀺𑀬 𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑀝𑁆𑀞𑀩𑁆𑀩𑀸, 𑀭𑀸𑀚𑀸 𑀯𑀺𑀬 𑀬𑁄𑀕𑀸𑀯𑀘𑀭𑁄. 𑀬𑀣𑀸 𑀲𑁄 𑀭𑀸𑀚𑀸 𑀢𑀁 𑀯𑀻𑀡𑀁 𑀤𑀲𑀥𑀸 𑀨𑀸𑀮𑀦𑀢𑁄 𑀧𑀝𑁆𑀞𑀸𑀬 𑀯𑀺𑀘𑀺𑀦𑀦𑁆𑀢𑁄 𑀲𑀤𑁆𑀤𑀁 𑀅𑀤𑀺𑀲𑁆𑀯𑀸 𑀯𑀻𑀡𑀸𑀬 𑀅𑀦𑀢𑁆𑀣𑀺𑀓𑁄 𑀳𑁄𑀢𑀺, 𑀏𑀯𑀁 𑀬𑁄𑀕𑀸𑀯𑀘𑀭𑁄 𑀧𑀜𑁆𑀘𑀓𑁆𑀔𑀦𑁆𑀥𑁂 𑀲𑀫𑁆𑀫𑀲𑀦𑁆𑀢𑁄 𑀅𑀳𑀦𑁆𑀢𑀺 𑀯𑀸 𑀫𑀫𑀦𑁆𑀢𑀺 𑀯𑀸 𑀕𑀳𑁂𑀢𑀩𑁆𑀩𑀁 𑀅𑀧𑀲𑁆𑀲𑀦𑁆𑀢𑁄 𑀔𑀦𑁆𑀥𑁂𑀳𑀺 𑀅𑀦𑀢𑁆𑀣𑀺𑀓𑁄 𑀳𑁄𑀢𑀺. 𑀢𑁂𑀦𑀲𑁆𑀲 𑀢𑀁 𑀔𑀦𑁆𑀥𑀲𑀫𑁆𑀫𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 𑀭𑀽𑀧𑀁 𑀲𑀫𑀦𑁆𑀯𑁂𑀲𑀢𑀺 𑀬𑀸𑀯𑀢𑀸 𑀭𑀽𑀧𑀲𑁆𑀲 𑀕𑀢𑀻𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀲𑀫𑀦𑁆𑀯𑁂𑀲𑀢𑀻𑀢𑀺 𑀧𑀭𑀺𑀬𑁂𑀲𑀢𑀺. 𑀬𑀸𑀯𑀢𑀸 𑀭𑀽𑀧𑀲𑁆𑀲 𑀕𑀢𑀻𑀢𑀺 𑀬𑀢𑁆𑀢𑀓𑀸 𑀭𑀽𑀧𑀲𑁆𑀲 𑀕𑀢𑀺. 𑀢𑀢𑁆𑀣 𑀕𑀢𑀻𑀢𑀺 𑀕𑀢𑀺𑀕𑀢𑀺, 𑀲𑀜𑁆𑀚𑀸𑀢𑀺𑀕𑀢𑀺, 𑀲𑀮𑀓𑁆𑀔𑀡𑀕𑀢𑀺, 𑀯𑀺𑀪𑀯𑀕𑀢𑀺, 𑀪𑁂𑀤𑀕𑀢𑀻𑀢𑀺 𑀧𑀜𑁆𑀘𑀯𑀺𑀥𑀸 𑀳𑁄𑀦𑁆𑀢𑀺. 𑀢𑀢𑁆𑀣 𑀇𑀤𑀁 𑀭𑀽𑀧𑀁 𑀦𑀸𑀫 𑀳𑁂𑀝𑁆𑀞𑀸 𑀅𑀯𑀻𑀘𑀺𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀉𑀧𑀭𑀺 𑀅𑀓𑀦𑀺𑀝𑁆𑀞𑀩𑁆𑀭𑀳𑁆𑀫𑀮𑁄𑀓𑀁 𑀅𑀦𑁆𑀢𑁄 𑀓𑀢𑁆𑀯𑀸 𑀏𑀢𑁆𑀣𑀦𑁆𑀢𑀭𑁂 𑀲𑀁𑀲𑀭𑀢𑀺 𑀯𑀢𑁆𑀢𑀢𑀺, 𑀅𑀬𑀫𑀲𑁆𑀲 𑀕𑀢𑀺𑀕𑀢𑀺 𑀦𑀸𑀫.

𑀅𑀬𑀁 𑀧𑀦 𑀓𑀸𑀬𑁄 𑀦𑁂𑀯 𑀧𑀤𑀼𑀫𑀕𑀩𑁆𑀪𑁂, 𑀦 𑀧𑀼𑀡𑁆𑀟𑀭𑀻𑀓𑀦𑀻𑀮𑀼𑀧𑁆𑀧𑀮𑀸𑀤𑀻𑀲𑀼 𑀲𑀜𑁆𑀚𑀸𑀬𑀢𑀺, 𑀆𑀫𑀸𑀲𑀬𑀧𑀓𑁆𑀓𑀸𑀲𑀬𑀸𑀦𑀁 𑀧𑀦 𑀅𑀦𑁆𑀢𑀭𑁂 𑀩𑀳𑀮𑀦𑁆𑀥𑀓𑀸𑀭𑁂 𑀤𑀼𑀕𑁆𑀕𑀦𑁆𑀥𑀧𑀯𑀦𑀯𑀺𑀘𑀭𑀺𑀢𑁂 𑀧𑀭𑀫𑀚𑁂𑀕𑀼𑀘𑁆𑀙𑁂 𑀑𑀓𑀸𑀲𑁂 𑀧𑀽𑀢𑀺𑀫𑀘𑁆𑀙𑀸𑀤𑀻𑀲𑀼 𑀓𑀺𑀫𑀺 𑀯𑀺𑀬 𑀲𑀜𑁆𑀚𑀸𑀬𑀢𑀺, 𑀅𑀬𑀁 𑀭𑀽𑀧𑀲𑁆𑀲 𑀲𑀜𑁆𑀚𑀸𑀢𑀺𑀕𑀢𑀺 𑀦𑀸𑀫.

𑀤𑀼𑀯𑀺𑀥𑀁 𑀧𑀦 𑀭𑀽𑀧𑀲𑁆𑀲 𑀮𑀓𑁆𑀔𑀡𑀁, ‘‘𑀭𑀼𑀧𑁆𑀧𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 𑀭𑀽𑀧’’𑀦𑁆𑀢𑀺 (𑀲𑀁. 𑀦𑀺. 𑁩.𑁭𑁯) 𑀏𑀯𑀁 𑀯𑀼𑀢𑁆𑀢 𑀭𑀼𑀧𑁆𑀧𑀦𑀲𑀗𑁆𑀔𑀸𑀢𑀁 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀜𑁆𑀘 𑀅𑀦𑀺𑀘𑁆𑀘𑀸𑀤𑀺𑀪𑁂𑀤𑀁 𑀲𑀸𑀫𑀜𑁆𑀜𑀮𑀓𑁆𑀔𑀡𑀜𑁆𑀘, 𑀅𑀬𑀫𑀲𑁆𑀲 𑀲𑀮𑀓𑁆𑀔𑀡𑀕𑀢𑀺 𑀦𑀸𑀫.

‘‘𑀕𑀢𑀺 𑀫𑀺𑀕𑀸𑀦𑀁 𑀧𑀯𑀦𑀁, 𑀆𑀓𑀸𑀲𑁄 𑀧𑀓𑁆𑀔𑀺𑀦𑀁 𑀕𑀢𑀺;

𑀯𑀺𑀪𑀯𑁄 𑀕𑀢𑀺 𑀥𑀫𑁆𑀫𑀸𑀦𑀁, 𑀦𑀺𑀩𑁆𑀩𑀸𑀦𑀁 𑀅𑀭𑀳𑀢𑁄 𑀕𑀢𑀻’’𑀢𑀺. (𑀧𑀭𑀺. 𑁩𑁩𑁯) 𑁋

𑀏𑀯𑀁 𑀯𑀼𑀢𑁆𑀢𑁄 𑀭𑀽𑀧𑀲𑁆𑀲 𑀅𑀪𑀸𑀯𑁄 𑀯𑀺𑀪𑀯𑀕𑀢𑀺 𑀦𑀸𑀫. 𑀬𑁄 𑀧𑀦𑀲𑁆𑀲 𑀪𑁂𑀤𑁄, 𑀅𑀬𑀁 𑀪𑁂𑀤𑀕𑀢𑀺 𑀦𑀸𑀫. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀓𑁂𑀯𑀮𑀜𑁆𑀳𑁂𑀢𑁆𑀣 𑀉𑀧𑀭𑀺 𑀬𑀸𑀯 𑀪𑀯𑀕𑁆𑀕𑀸 𑀢𑁂𑀲𑀁 𑀲𑀜𑁆𑀚𑀸𑀢𑀺𑀕𑀢𑀺, 𑀲𑀮𑀓𑁆𑀔𑀡𑀕𑀢𑀺𑀬𑀜𑁆𑀘 𑀯𑁂𑀤𑀬𑀺𑀢𑀲𑀜𑁆𑀚𑀸𑀦𑀦𑀅𑀪𑀺𑀲𑀗𑁆𑀔𑀭𑀡𑀯𑀺𑀚𑀸𑀦𑀦𑀯𑀲𑁂𑀦 𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩𑀁.

𑀢𑀫𑁆𑀧𑀺 𑀢𑀲𑁆𑀲 𑀦 𑀳𑁄𑀢𑀻𑀢𑀺 𑀬𑀤𑁂𑀢𑀁 𑀭𑀽𑀧𑀸𑀤𑀻𑀲𑀼 𑀅𑀳𑀦𑁆𑀢𑀺 𑀯𑀸 𑀫𑀫𑀦𑁆𑀢𑀺 𑀯𑀸 𑀅𑀲𑁆𑀫𑀻𑀢𑀺 𑀯𑀸 𑀏𑀯𑀁 𑀦𑀺𑀤𑁆𑀤𑀺𑀝𑁆𑀞𑀁 𑀤𑀺𑀝𑁆𑀞𑀺𑀢𑀡𑁆𑀳𑀸𑀫𑀸𑀦𑀕𑁆𑀕𑀸𑀳𑀢𑁆𑀢𑀬𑀁, 𑀢𑀫𑁆𑀧𑀺 𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀦 𑀳𑁄𑀢𑀻𑀢𑀺 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀲𑀼𑀢𑁆𑀢𑀸𑀕𑀢𑀁. 𑀢𑁂𑀦 𑀯𑀼𑀢𑁆𑀢𑀁 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑁋

‘‘𑀆𑀤𑀺𑀫𑁆𑀳𑀺 𑀲𑀻𑀮𑀁 𑀓𑀣𑀺𑀢𑀁, 𑀫𑀚𑁆𑀛𑁂 𑀲𑀫𑀸𑀥𑀺𑀪𑀸𑀯𑀦𑀸;

𑀧𑀭𑀺𑀬𑁄𑀲𑀸𑀦𑁂 𑀘 𑀦𑀺𑀩𑁆𑀩𑀸𑀦𑀁, 𑀏𑀲𑀸 𑀯𑀻𑀡𑁄𑀧𑀫𑀸 𑀓𑀣𑀸’’𑀢𑀺.

𑁧𑁦. 𑀙𑀧𑁆𑀧𑀸𑀡𑀓𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁭. 𑀤𑀲𑀫𑁂 𑀅𑀭𑀼𑀕𑀢𑁆𑀢𑁄𑀢𑀺 𑀯𑀡𑀲𑀭𑀻𑀭𑁄. 𑀢𑁂𑀲𑀁𑀬𑁂𑀯 𑀅𑀭𑀽𑀦𑀁 𑀧𑀓𑁆𑀓𑀢𑁆𑀢𑀸 𑀧𑀓𑁆𑀓𑀕𑀢𑁆𑀢𑁄. 𑀲𑀭𑀯𑀦𑀦𑁆𑀢𑀺 𑀓𑀡𑁆𑀟𑀯𑀦𑀁. 𑀏𑀯𑀫𑁂𑀯 𑀔𑁄𑀢𑀺 𑀅𑀭𑀼𑀕𑀢𑁆𑀢𑁄 𑀧𑀼𑀭𑀺𑀲𑁄 𑀯𑀺𑀬 𑀤𑀼𑀲𑁆𑀲𑀻𑀮𑀧𑀼𑀕𑁆𑀕𑀮𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀲 𑀓𑀼𑀲𑀓𑀡𑁆𑀝𑀓𑁂𑀳𑀺 𑀯𑀺𑀤𑁆𑀥𑀲𑁆𑀲 𑀲𑀭𑀧𑀢𑁆𑀢𑁂𑀳𑀺 𑀘 𑀅𑀲𑀺𑀥𑀸𑀭𑀽𑀧𑀫𑁂𑀳𑀺 𑀯𑀺𑀮𑀺𑀔𑀺𑀢𑀕𑀢𑁆𑀢𑀲𑁆𑀲 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀁 𑀯𑀺𑀬 𑀢𑀢𑁆𑀣 𑀢𑀢𑁆𑀣 𑀲𑀩𑁆𑀭𑀳𑁆𑀫𑀘𑀸𑀭𑀻𑀳𑀺 ‘‘𑀅𑀬𑀁 𑀲𑁄 𑀇𑀫𑁂𑀲𑀜𑁆𑀘 𑀇𑀫𑁂𑀲𑀜𑁆𑀘 𑀓𑀫𑁆𑀫𑀸𑀦𑀁 𑀓𑀸𑀭𑀓𑁄’’𑀢𑀺 𑀯𑀼𑀘𑁆𑀘𑀫𑀸𑀦𑀲𑁆𑀲 𑀉𑀧𑁆𑀧𑀚𑁆𑀚𑀦𑀤𑀼𑀓𑁆𑀔𑀁 𑀯𑁂𑀤𑀺𑀢𑀩𑁆𑀩𑀁.

𑀮𑀪𑀢𑀺 𑀯𑀢𑁆𑀢𑀸𑀭𑀦𑁆𑀢𑀺 𑀮𑀪𑀢𑀺 𑀘𑁄𑀤𑀓𑀁. 𑀏𑀯𑀁𑀓𑀸𑀭𑀻𑀢𑀺 𑀏𑀯𑀭𑀽𑀧𑀸𑀦𑀁 𑀯𑁂𑀚𑁆𑀚𑀓𑀫𑁆𑀫𑀤𑀽𑀢𑀓𑀫𑁆𑀫𑀸𑀤𑀻𑀦𑀁 𑀓𑀸𑀭𑀓𑁄. 𑀏𑀯𑀁𑀲𑀫𑀸𑀘𑀸𑀭𑁄𑀢𑀺 𑀯𑀺𑀥𑀯𑀸 𑀕𑁄𑀘𑀭𑀸𑀤𑀺𑀯𑀲𑁂𑀦 𑀏𑀯𑀭𑀽𑀧𑀕𑁄𑀘𑀭𑁄. 𑀅𑀲𑀼𑀘𑀺𑀕𑀸𑀫𑀓𑀡𑁆𑀝𑀓𑁄𑀢𑀺 𑀅𑀲𑀼𑀤𑁆𑀥𑀝𑁆𑀞𑁂𑀦 𑀅𑀲𑀼𑀘𑀺, 𑀕𑀸𑀫𑀯𑀸𑀲𑀻𑀦𑀁 𑀯𑀺𑀚𑁆𑀛𑀦𑀝𑁆𑀞𑁂𑀦 𑀓𑀡𑁆𑀝𑀓𑁄𑀢𑀺 𑀕𑀸𑀫𑀓𑀡𑁆𑀝𑀓𑁄.

𑀧𑀓𑁆𑀔𑀺𑀦𑁆𑀢𑀺 𑀳𑀢𑁆𑀣𑀺𑀲𑁄𑀡𑁆𑀟𑀲𑀓𑀼𑀡𑀁. 𑀑𑀲𑁆𑀲𑀚𑁆𑀚𑁂𑀬𑁆𑀬𑀸𑀢𑀺 𑀯𑀺𑀲𑁆𑀲𑀚𑁆𑀚𑁂𑀬𑁆𑀬. 𑀆𑀯𑀺𑀜𑁆𑀙𑁂𑀬𑁆𑀬𑀼𑀦𑁆𑀢𑀺 𑀆𑀓𑀟𑁆𑀠𑁂𑀬𑁆𑀬𑀼𑀁. 𑀧𑀯𑁂𑀓𑁆𑀔𑀸𑀫𑀻𑀢𑀺 𑀧𑀯𑀺𑀲𑀺𑀲𑁆𑀲𑀸𑀫𑀺. 𑀆𑀓𑀸𑀲𑀁 𑀟𑁂𑀲𑁆𑀲𑀸𑀫𑀻𑀢𑀺 𑀆𑀓𑀸𑀲𑀁 𑀉𑀧𑁆𑀧𑀢𑀺𑀲𑁆𑀲𑀸𑀫𑀺.

𑀏𑀢𑁂𑀲𑀼 𑀧𑀦 𑀅𑀳𑀺 ‘‘𑀪𑁄𑀕𑁂𑀳𑀺 𑀫𑀡𑁆𑀟𑀮𑀁 𑀩𑀦𑁆𑀥𑀺𑀢𑁆𑀯𑀸 𑀲𑀼𑀧𑀺𑀲𑁆𑀲𑀸𑀫𑀻’’𑀢𑀺 𑀯𑀫𑁆𑀫𑀺𑀓𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺. 𑀲𑀼𑀲𑀼𑀫𑀸𑀭𑁄 ‘‘𑀤𑀽𑀭𑁂 𑀩𑀺𑀮𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀉𑀤𑀓𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺. 𑀧𑀓𑁆𑀔𑀻 ‘‘𑀅𑀚𑀝𑀸𑀓𑀸𑀲𑁂 𑀲𑀼𑀔𑀁 𑀯𑀺𑀘𑀭𑀺𑀲𑁆𑀲𑀸𑀫𑀻’’𑀢𑀺 𑀆𑀓𑀸𑀲𑀁 𑀟𑁂𑀢𑀼𑀓𑀸𑀫𑁄 𑀳𑁄𑀢𑀺. 𑀓𑀼𑀓𑁆𑀓𑀼𑀭𑁄 ‘‘𑀉𑀤𑁆𑀥𑀦𑀝𑁆𑀞𑀸𑀦𑁂 𑀙𑀸𑀭𑀺𑀓𑀁 𑀩𑁆𑀬𑀽𑀳𑀺𑀢𑁆𑀯𑀸 𑀉𑀲𑀼𑀫𑀁 𑀕𑀡𑁆𑀳𑀦𑁆𑀢𑁄 𑀦𑀺𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀕𑀸𑀫𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺. 𑀲𑀺𑀗𑁆𑀕𑀸𑀮𑁄 ‘‘𑀫𑀦𑀼𑀲𑁆𑀲𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀧𑀺𑀝𑁆𑀞𑀺𑀁 𑀧𑀲𑀸𑀭𑁂𑀢𑁆𑀯𑀸 𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀆𑀫𑀓𑀲𑀼𑀲𑀸𑀦𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺. 𑀫𑀓𑁆𑀓𑀝𑁄 ‘‘𑀉𑀘𑁆𑀘𑁂 𑀭𑀼𑀓𑁆𑀔𑁂 𑀅𑀪𑀺𑀭𑀼𑀳𑀺𑀢𑁆𑀯𑀸 𑀤𑀺𑀲𑀸𑀤𑀺𑀲𑀁 𑀧𑀓𑁆𑀔𑀦𑁆𑀤𑀺𑀲𑁆𑀲𑀸𑀫𑀻’’𑀢𑀺 𑀯𑀦𑀁 𑀧𑀯𑀺𑀲𑀺𑀢𑀼𑀓𑀸𑀫𑁄 𑀳𑁄𑀢𑀺.

𑀅𑀦𑀼𑀯𑀺𑀥𑀸𑀬𑁂𑀬𑁆𑀬𑀼𑀦𑁆𑀢𑀺 𑀅𑀦𑀼𑀕𑀘𑁆𑀙𑁂𑀬𑁆𑀬𑀼𑀁, 𑀅𑀦𑀼𑀯𑀺𑀥𑀺𑀬𑁂𑀬𑁆𑀬𑀼𑀦𑁆𑀢𑀺𑀧𑀺 𑀧𑀸𑀞𑁄, 𑀅𑀦𑀼𑀯𑀺𑀥𑀸𑀦𑀁 𑀆𑀧𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀬𑀢𑁆𑀣 𑀲𑁄 𑀬𑀸𑀢𑀺, 𑀢𑀢𑁆𑀣𑁂𑀯 𑀕𑀘𑁆𑀙𑁂𑀬𑁆𑀬𑀼𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀫𑁂𑀯𑀸𑀢𑀺 𑀏𑀢𑁆𑀣 𑀙 𑀧𑀸𑀡𑀓𑀸 𑀯𑀺𑀬 𑀙𑀸𑀬𑀢𑀦𑀸𑀦𑀺 𑀤𑀝𑁆𑀞𑀩𑁆𑀩𑀸𑀦𑀺, 𑀤𑀴𑁆𑀳𑀭𑀚𑁆𑀚𑀼 𑀯𑀺𑀬 𑀢𑀡𑁆𑀳𑀸, 𑀫𑀚𑁆𑀛𑁂 𑀕𑀡𑁆𑀞𑀺 𑀯𑀺𑀬 𑀅𑀯𑀺𑀚𑁆𑀚𑀸. 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀤𑁆𑀯𑀸𑀭𑁂 𑀆𑀭𑀫𑁆𑀫𑀡𑀁 𑀩𑀮𑀯𑀁 𑀳𑁄𑀢𑀺, 𑀢𑀁 𑀢𑀁 𑀆𑀬𑀢𑀦𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀆𑀯𑀺𑀜𑁆𑀙𑀢𑀺.

𑀇𑀫𑀁 𑀧𑀦 𑀉𑀧𑀫𑀁 𑀪𑀕𑀯𑀸 𑀲𑀭𑀺𑀓𑁆𑀔𑀓𑁂𑀦 𑀯𑀸 𑀆𑀳𑀭𑁂𑀬𑁆𑀬 𑀆𑀬𑀢𑀦𑀸𑀦𑀁 𑀯𑀸 𑀦𑀸𑀦𑀢𑁆𑀢𑀤𑀲𑁆𑀲𑀦𑀯𑀲𑁂𑀦. 𑀢𑀢𑁆𑀣 𑀲𑀭𑀺𑀓𑁆𑀔𑀓𑁂𑀦 𑀢𑀸𑀯 𑀯𑀺𑀲𑀼𑀁 𑀅𑀧𑁆𑀧𑀦𑀸𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀧𑀸𑀴𑀺𑀬𑀁𑀬𑁂𑀯 𑀅𑀧𑁆𑀧𑀺𑀢𑀸. 𑀆𑀬𑀢𑀦𑀸𑀦𑀁 𑀦𑀸𑀦𑀢𑁆𑀢𑀤𑀲𑁆𑀲𑀦𑁂𑀦 𑀧𑀦 𑀅𑀬𑀁 𑀅𑀧𑁆𑀧𑀦𑀸 𑁋 𑀅𑀳𑀺 𑀦𑀸𑀫𑁂𑀲 𑀩𑀳𑀺 𑀲𑀺𑀢𑁆𑀢𑀲𑀫𑁆𑀫𑀝𑁆𑀞𑁂 𑀞𑀸𑀦𑁂 𑀦𑀸𑀪𑀺𑀭𑀫𑀢𑀺, 𑀲𑀗𑁆𑀓𑀸𑀭𑀝𑁆𑀞𑀸𑀦𑀢𑀺𑀡𑀧𑀡𑁆𑀡𑀕𑀳𑀦𑀯𑀫𑁆𑀫𑀺𑀓𑀸𑀦𑀺𑀬𑁂𑀯 𑀧𑀦 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀦𑁆𑀦𑀓𑀸𑀮𑁂 𑀅𑀪𑀺𑀭𑀫𑀢𑀺, 𑀏𑀓𑀕𑁆𑀕𑀢𑀁 𑀆𑀧𑀚𑁆𑀚𑀢𑀺. 𑀏𑀯𑀫𑁂𑀯 𑀘𑀓𑁆𑀔𑀼𑀧𑁂𑀢𑀁 𑀯𑀺𑀲𑀫𑀚𑁆𑀛𑀸𑀲𑀬𑀁, 𑀫𑀝𑁆𑀞𑀸𑀲𑀼 𑀲𑀼𑀯𑀡𑁆𑀡𑀪𑀺𑀢𑁆𑀢𑀺𑀆𑀤𑀻𑀲𑀼 𑀦𑀸𑀪𑀺𑀭𑀫𑀢𑀺, 𑀑𑀮𑁄𑀓𑁂𑀢𑀼𑀫𑁆𑀧𑀺 𑀦 𑀇𑀘𑁆𑀙𑀢𑀺, 𑀭𑀽𑀧𑀘𑀺𑀢𑁆𑀢𑀧𑀼𑀧𑁆𑀨𑀮𑀢𑀸𑀤𑀺𑀯𑀺𑀘𑀺𑀢𑁆𑀢𑁂𑀲𑀼𑀬𑁂𑀯 𑀧𑀦 𑀅𑀪𑀺𑀭𑀫𑀢𑀺. 𑀢𑀸𑀤𑀺𑀲𑁂𑀲𑀼 𑀳𑀺 𑀞𑀸𑀦𑁂𑀲𑀼 𑀘𑀓𑁆𑀔𑀼𑀫𑁆𑀳𑀺 𑀅𑀧𑁆𑀧𑀳𑁄𑀦𑁆𑀢𑁂 𑀫𑀼𑀔𑀫𑁆𑀧𑀺 𑀯𑀺𑀯𑀭𑀺𑀢𑁆𑀯𑀸 𑀑𑀮𑁄𑀓𑁂𑀢𑀼𑀓𑀸𑀫𑁄 𑀳𑁄𑀢𑀺.

𑀲𑀼𑀲𑀼𑀫𑀸𑀭𑁄𑀧𑀺 𑀩𑀳𑀺 𑀦𑀺𑀓𑁆𑀔𑀦𑁆𑀢𑁄 𑀕𑀳𑁂𑀢𑀩𑁆𑀩𑀁 𑀦 𑀧𑀲𑁆𑀲𑀢𑀺, 𑀅𑀓𑁆𑀔𑀺𑀁 𑀦𑀺𑀫𑀻𑀮𑁂𑀢𑁆𑀯𑀸 𑀘𑀭𑀢𑀺. 𑀬𑀤𑀸 𑀧𑀦 𑀩𑁆𑀬𑀸𑀫𑀲𑀢𑀫𑀢𑁆𑀢𑀁 𑀉𑀤𑀓𑀁 𑀑𑀕𑀸𑀳𑀺𑀢𑁆𑀯𑀸 𑀩𑀺𑀮𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 𑀳𑁄𑀢𑀺, 𑀢𑀤𑀸 𑀢𑀲𑁆𑀲 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺, 𑀲𑀼𑀔𑀁 𑀲𑀼𑀧𑀢𑀺. 𑀏𑀯𑀫𑁂𑀯 𑀲𑁄𑀢𑀫𑁆𑀧𑁂𑀢𑀁 𑀩𑀺𑀮𑀚𑁆𑀛𑀸𑀲𑀬𑀁 𑀆𑀓𑀸𑀲𑀲𑀦𑁆𑀦𑀺𑀲𑁆𑀲𑀺𑀢𑀁, 𑀓𑀡𑁆𑀡𑀘𑁆𑀙𑀺𑀤𑁆𑀤𑀓𑀽𑀧𑀓𑁂𑀬𑁂𑀯 𑀅𑀚𑁆𑀛𑀸𑀲𑀬𑀁 𑀓𑀭𑁄𑀢𑀺, 𑀓𑀡𑁆𑀡𑀘𑁆𑀙𑀺𑀤𑁆𑀤𑀸𑀓𑀸𑀲𑁄𑀬𑁂𑀯 𑀢𑀲𑁆𑀲 𑀲𑀤𑁆𑀤𑀲𑀯𑀦𑁂 𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀚𑀝𑀸𑀓𑀸𑀲𑁄𑀧𑀺 𑀯𑀝𑁆𑀝𑀢𑀺𑀬𑁂𑀯. 𑀅𑀦𑁆𑀢𑁄𑀮𑁂𑀡𑀲𑁆𑀫𑀺𑀜𑁆𑀳𑀺 𑀲𑀚𑁆𑀛𑀸𑀬𑁂 𑀓𑀬𑀺𑀭𑀫𑀸𑀦𑁂 𑀦 𑀮𑁂𑀡𑀘𑁆𑀙𑀤𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀲𑀤𑁆𑀤𑁄 𑀩𑀳𑀺 𑀦𑀺𑀓𑁆𑀔𑀫𑀢𑀺, 𑀤𑁆𑀯𑀸𑀭𑀯𑀸𑀢𑀧𑀸𑀦𑀙𑀺𑀤𑁆𑀤𑁂𑀳𑀺 𑀧𑀦 𑀦𑀺𑀓𑁆𑀔𑀫𑀺𑀢𑁆𑀯𑀸 𑀥𑀸𑀢𑀼𑀧𑀭𑀫𑁆𑀧𑀭𑀸 𑀖𑀝𑁆𑀝𑁂𑀦𑁆𑀢𑁄 𑀆𑀕𑀦𑁆𑀢𑁆𑀯𑀸 𑀲𑁄𑀢𑀧𑀲𑀸𑀤𑀁 𑀖𑀝𑁆𑀝𑁂𑀢𑀺. 𑀅𑀣 𑀢𑀲𑁆𑀫𑀺𑀁 𑀓𑀸𑀮𑁂 ‘‘𑀅𑀲𑀼𑀓𑀁 𑀦𑀸𑀫 𑀲𑀚𑁆𑀛𑀸𑀬𑀢𑀻’’𑀢𑀺 𑀮𑁂𑀡𑀧𑀺𑀝𑁆𑀞𑁂 𑀦𑀺𑀲𑀺𑀦𑁆𑀦𑀸 𑀚𑀸𑀦𑀦𑁆𑀢𑀺.

𑀏𑀯𑀁 𑀲𑀦𑁆𑀢𑁂 𑀲𑀫𑁆𑀧𑀢𑁆𑀢𑀕𑁄𑀘𑀭𑀢𑀸 𑀳𑁄𑀢𑀺, 𑀓𑀺𑀁 𑀧𑀦𑁂𑀢𑀁 𑀲𑀫𑁆𑀧𑀢𑁆𑀢𑀕𑁄𑀘𑀭𑀦𑁆𑀢𑀺? 𑀆𑀫 𑀲𑀫𑁆𑀧𑀢𑁆𑀢𑀕𑁄𑀘𑀭𑀁. 𑀬𑀤𑀺 𑀏𑀯𑀁 𑀤𑀽𑀭𑁂 𑀪𑁂𑀭𑀺𑀆𑀤𑀻𑀲𑀼 𑀯𑀚𑁆𑀚𑀫𑀸𑀦𑁂𑀲𑀼 ‘‘𑀤𑀽𑀭𑁂 𑀲𑀤𑁆𑀤𑁄’’𑀢𑀺 𑀚𑀸𑀦𑀦𑀁 𑀦 𑀪𑀯𑁂𑀬𑁆𑀬𑀸𑀢𑀺. 𑀦𑁄 𑀦 𑀪𑀯𑀢𑀺. 𑀲𑁄𑀢𑀧𑀲𑀸𑀤𑀲𑁆𑀫𑀺𑀜𑁆𑀳𑀺 𑀖𑀝𑁆𑀝𑀺𑀢𑁂 ‘‘𑀤𑀽𑀭𑁂 𑀲𑀤𑁆𑀤𑁄, 𑀆𑀲𑀦𑁆𑀦𑁂 𑀲𑀤𑁆𑀤𑁄, 𑀧𑀭𑀢𑀻𑀭𑁂 𑀑𑀭𑀺𑀫𑀢𑀻𑀭𑁂’’𑀢𑀺 𑀢𑀣𑀸 𑀢𑀣𑀸 𑀚𑀸𑀦𑀦𑀸𑀓𑀸𑀭𑁄 𑀳𑁄𑀢𑀺, 𑀥𑀫𑁆𑀫𑀢𑀸 𑀏𑀲𑀸𑀢𑀺. 𑀓𑀺𑀁 𑀏𑀢𑀸𑀬 𑀥𑀫𑁆𑀫𑀢𑀸𑀬? 𑀬𑀢𑁄 𑀬𑀢𑁄 𑀙𑀺𑀤𑁆𑀤𑀁, 𑀢𑀢𑁄 𑀢𑀢𑁄 𑀲𑀯𑀦𑀁 𑀳𑁄𑀢𑀺 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀤𑀻𑀦𑀁 𑀤𑀲𑁆𑀲𑀦𑀁 𑀯𑀺𑀬𑀸𑀢𑀺 𑀅𑀲𑀫𑁆𑀧𑀢𑁆𑀢𑀕𑁄𑀘𑀭𑀫𑁂𑀯𑁂𑀢𑀁.

𑀧𑀓𑁆𑀔𑀻𑀧𑀺 𑀭𑀼𑀓𑁆𑀔𑁂 𑀯𑀸 𑀪𑀽𑀫𑀺𑀬𑀁 𑀯𑀸 𑀦 𑀭𑀫𑀢𑀺. 𑀬𑀤𑀸 𑀧𑀦 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑁆𑀫 𑀅𑀚𑀝𑀸𑀓𑀸𑀲𑀁 𑀧𑀓𑁆𑀔𑀦𑁆𑀤𑁄 𑀳𑁄𑀢𑀺, 𑀢𑀤𑀸 𑀏𑀓𑀕𑁆𑀕𑀘𑀺𑀢𑁆𑀢𑀢𑀁 𑀆𑀧𑀚𑁆𑀚𑀢𑀺. 𑀏𑀯𑀫𑁂𑀯 𑀖𑀸𑀦𑀫𑁆𑀧𑀺 𑀆𑀓𑀸𑀲𑀚𑁆𑀛𑀸𑀲𑀬𑀁 𑀯𑀸𑀢𑀽𑀧𑀦𑀺𑀲𑁆𑀲𑀬𑀕𑀦𑁆𑀥𑀕𑁄𑀘𑀭𑀁. 𑀢𑀣𑀸 𑀳𑀺 𑀕𑀸𑀯𑁄 𑀦𑀯𑀯𑀼𑀝𑁆𑀞𑁂 𑀤𑁂𑀯𑁂 𑀪𑀽𑀫𑀺𑀁 𑀖𑀸𑀬𑀺𑀢𑁆𑀯𑀸 𑀖𑀸𑀬𑀺𑀢𑁆𑀯𑀸 𑀆𑀓𑀸𑀲𑀸𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 𑀯𑀸𑀢𑀁 𑀆𑀓𑀟𑁆𑀠𑀦𑁆𑀢𑀺. 𑀅𑀗𑁆𑀕𑀼𑀮𑀻𑀳𑀺 𑀕𑀦𑁆𑀥𑀧𑀺𑀡𑁆𑀟𑀁 𑀕𑀳𑁂𑀢𑁆𑀯𑀸𑀧𑀺 𑀘 𑀉𑀧𑀲𑀺𑀗𑁆𑀖𑀦𑀓𑀸𑀮𑁂 𑀯𑀸𑀢𑀁 𑀅𑀦𑀸𑀓𑀟𑁆𑀠𑀦𑁆𑀢𑁄 𑀦𑁂𑀯 𑀢𑀲𑁆𑀲 𑀕𑀦𑁆𑀥𑀁 𑀚𑀸𑀦𑀸𑀢𑀺.

𑀓𑀼𑀓𑁆𑀓𑀼𑀭𑁄𑀧𑀺 𑀩𑀳𑀺 𑀘𑀭𑀦𑁆𑀢𑁄 𑀔𑁂𑀫𑀝𑁆𑀞𑀸𑀦𑀁 𑀦 𑀧𑀲𑁆𑀲𑀢𑀺, 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀉𑀧𑀤𑁆𑀤𑀼𑀢𑁄 𑀳𑁄𑀢𑀺. 𑀅𑀦𑁆𑀢𑁄𑀕𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀉𑀤𑁆𑀥𑀦𑀝𑁆𑀞𑀸𑀦𑁂 𑀙𑀸𑀭𑀺𑀓𑀁 𑀩𑁆𑀬𑀽𑀳𑀺𑀢𑁆𑀯𑀸 𑀦𑀺𑀧𑀦𑁆𑀦𑀲𑁆𑀲 𑀧𑀦𑀲𑁆𑀲 𑀨𑀸𑀲𑀼 𑀳𑁄𑀢𑀺. 𑀏𑀯𑀫𑁂𑀯 𑀚𑀺𑀯𑁆𑀳𑀸𑀧𑀺 𑀕𑀸𑀫𑀚𑁆𑀛𑀸𑀲𑀬𑀸 𑀆𑀧𑁄𑀲𑀦𑁆𑀦𑀺𑀲𑁆𑀲𑀺𑀢𑀭𑀲𑀸𑀭𑀫𑁆𑀫𑀡𑀸. 𑀢𑀣𑀸 𑀳𑀺 𑀢𑀺𑀬𑀸𑀫𑀭𑀢𑁆𑀢𑀺𑀁 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸𑀧𑀺 𑀧𑀸𑀢𑁄𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀕𑀸𑀫𑀁 𑀧𑀯𑀺𑀲𑀺𑀢𑀩𑁆𑀩𑀁 𑀳𑁄𑀢𑀺. 𑀲𑀼𑀓𑁆𑀔𑀔𑀸𑀤𑀦𑀻𑀬𑀲𑁆𑀲 𑀘 𑀦 𑀲𑀓𑁆𑀓𑀸 𑀔𑁂𑀴𑁂𑀦 𑀅𑀢𑁂𑀫𑀺𑀢𑀲𑁆𑀲 𑀭𑀲𑀁 𑀚𑀸𑀦𑀺𑀢𑀼𑀁.

𑀲𑀺𑀗𑁆𑀕𑀸𑀮𑁄𑀧𑀺 𑀩𑀳𑀺 𑀘𑀭𑀦𑁆𑀢𑁄 𑀭𑀢𑀺𑀁 𑀦 𑀯𑀺𑀦𑁆𑀤𑀢𑀺, 𑀆𑀫𑀓𑀲𑀼𑀲𑀸𑀦𑁂 𑀫𑀦𑀼𑀲𑁆𑀲𑀫𑀁𑀲𑀁 𑀔𑀸𑀤𑀺𑀢𑁆𑀯𑀸 𑀦𑀺𑀧𑀦𑁆𑀦𑀲𑁆𑀲𑁂𑀯 𑀧𑀦𑀲𑁆𑀲 𑀨𑀸𑀲𑀼 𑀳𑁄𑀢𑀺. 𑀏𑀯𑀫𑁂𑀯 𑀓𑀸𑀬𑁄𑀧𑀺 𑀉𑀧𑀸𑀤𑀺𑀡𑁆𑀡𑀓𑀚𑁆𑀛𑀸𑀲𑀬𑁄 𑀧𑀣𑀯𑀻𑀲𑀦𑁆𑀦𑀺𑀲𑁆𑀲𑀺𑀢𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑁄. 𑀢𑀣𑀸 𑀳𑀺 𑀅𑀜𑁆𑀜𑀁 𑀉𑀧𑀸𑀤𑀺𑀡𑁆𑀡𑀓𑀁 𑀅𑀮𑀪𑀫𑀸𑀦𑀸 𑀲𑀢𑁆𑀢𑀸 𑀅𑀢𑁆𑀢𑀦𑁄𑀯 𑀳𑀢𑁆𑀣𑀢𑀮𑁂 𑀲𑀻𑀲𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀦𑁆𑀢𑀺. 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸 𑀘𑀲𑁆𑀲 𑀧𑀣𑀯𑀻 𑀆𑀭𑀫𑁆𑀫𑀡𑀕𑁆𑀕𑀳𑀡𑁂 𑀧𑀘𑁆𑀘𑀬𑁄 𑀳𑁄𑀢𑀺. 𑀲𑀼𑀲𑀦𑁆𑀣𑀢𑀲𑁆𑀲𑀸𑀧𑀺 𑀳𑀺 𑀲𑀬𑀦𑀲𑁆𑀲 𑀳𑁂𑀝𑁆𑀞𑀸𑀞𑀺𑀢𑀸𑀦𑀫𑁆𑀧𑀺 𑀯𑀸 𑀨𑀮𑀓𑀸𑀦𑀁 𑀦 𑀲𑀓𑁆𑀓𑀸 𑀅𑀦𑀺𑀲𑀻𑀤𑀦𑁆𑀢𑁂𑀦 𑀯𑀸 𑀅𑀦𑀼𑀧𑁆𑀧𑀻𑀴𑀦𑁆𑀢𑁂𑀦 𑀯𑀸 𑀣𑀤𑁆𑀥𑀫𑀼𑀤𑀼𑀪𑀸𑀯𑁄 𑀚𑀸𑀦𑀺𑀢𑀼𑀦𑁆𑀢𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸 𑀧𑀣𑀯𑀻 𑀏𑀢𑀲𑁆𑀲 𑀨𑁄𑀝𑁆𑀞𑀩𑁆𑀩𑀚𑀸𑀦𑀦𑁂 𑀧𑀘𑁆𑀘𑀬𑁄 𑀳𑁄𑀢𑀺.

𑀫𑀓𑁆𑀓𑀝𑁄𑀧𑀺 𑀪𑀽𑀫𑀺𑀬𑀁 𑀯𑀺𑀘𑀭𑀦𑁆𑀢𑁄 𑀦𑀸𑀪𑀺𑀭𑀫𑀢𑀺, 𑀳𑀢𑁆𑀣𑀲𑀢𑀼𑀩𑁆𑀩𑁂𑀥𑀁 𑀧𑀦𑀲𑁆𑀲 𑀭𑀼𑀓𑁆𑀔𑀁 𑀆𑀭𑀼𑀬𑁆𑀳 𑀯𑀺𑀝𑀧𑀧𑀺𑀝𑁆𑀞𑁂 𑀦𑀺𑀲𑀻𑀤𑀺𑀢𑁆𑀯𑀸 𑀤𑀺𑀲𑀸𑀯𑀺𑀤𑀺𑀲𑀸 𑀑𑀮𑁄𑀓𑁂𑀦𑁆𑀢𑀲𑁆𑀲𑁂𑀯 𑀨𑀸𑀲𑀼𑀓𑁄 𑀳𑁄𑀢𑀺. 𑀏𑀯𑀁 𑀫𑀦𑁄𑀧𑀺 𑀦𑀸𑀦𑀚𑁆𑀛𑀸𑀲𑀬𑁄 𑀪𑀯𑀗𑁆𑀕𑀧𑀘𑁆𑀘𑀬𑁄, 𑀤𑀺𑀝𑁆𑀞𑀧𑀼𑀩𑁆𑀩𑁂𑀧𑀺 𑀦𑀸𑀦𑀸𑀭𑀫𑁆𑀫𑀡𑀚𑁆𑀛𑀸𑀲𑀬𑀁 𑀓𑀭𑁄𑀢𑀺𑀬𑁂𑀯 𑀫𑀽𑀮𑀪𑀯𑀗𑁆𑀕𑀁 𑀧𑀦𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁂𑀦 𑀧𑀦 𑀆𑀬𑀢𑀦𑀸𑀦𑀁 𑀦𑀸𑀦𑀢𑁆𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀆𑀬𑀢𑀦𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀫𑁂𑀯.

𑀢𑀁 𑀘𑀓𑁆𑀔𑀼 𑀦𑀸𑀯𑀺𑀜𑁆𑀙𑀢𑀻𑀢𑀺 𑀢𑀡𑁆𑀳𑀸𑀭𑀚𑁆𑀚𑀼𑀓𑀸𑀦𑀁 𑀆𑀬𑀢𑀦𑀧𑀸𑀡𑀓𑀸𑀦𑀁 𑀓𑀸𑀬𑀕𑀢𑀸𑀲𑀢𑀺𑀣𑀫𑁆𑀪𑁂 𑀩𑀤𑁆𑀥𑀸𑀦𑀁 𑀦𑀺𑀩𑁆𑀩𑀺𑀲𑁂𑀯𑀦𑀪𑀸𑀯𑀁 𑀆𑀧𑀦𑁆𑀦𑀢𑁆𑀢𑀸 𑀦𑀸𑀓𑀟𑁆𑀠𑀢𑀻𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸𑀯 𑀓𑀣𑀺𑀢𑀸.

𑁧𑁧. 𑀬𑀯𑀓𑀮𑀸𑀧𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁮. 𑀏𑀓𑀸𑀤𑀲𑀫𑁂 𑀬𑀯𑀓𑀮𑀸𑀧𑀻𑀢𑀺 𑀮𑀸𑀬𑀺𑀢𑁆𑀯𑀸 𑀞𑀧𑀺𑀢𑀬𑀯𑀧𑀼𑀜𑁆𑀚𑁄. 𑀩𑁆𑀬𑀸𑀪𑀗𑁆𑀕𑀺𑀳𑀢𑁆𑀣𑀸𑀢𑀺 𑀓𑀸𑀚𑀳𑀢𑁆𑀣𑀸. 𑀙𑀳𑀺 𑀩𑁆𑀬𑀸𑀪𑀗𑁆𑀕𑀻𑀳𑀺 𑀳𑀦𑁂𑀬𑁆𑀬𑀼𑀦𑁆𑀢𑀺 𑀙𑀳𑀺 𑀧𑀼𑀣𑀼𑀮𑀓𑀸𑀚𑀤𑀡𑁆𑀟𑀓𑁂𑀳𑀺 𑀧𑁄𑀣𑁂𑀬𑁆𑀬𑀼𑀁. 𑀲𑀢𑁆𑀢𑀫𑁄𑀢𑀺 𑀢𑁂𑀲𑀼 𑀙𑀲𑀼 𑀚𑀦𑁂𑀲𑀼 𑀬𑀯𑁂 𑀧𑁄𑀣𑁂𑀢𑁆𑀯𑀸 𑀧𑀲𑀺𑀩𑁆𑀩𑀓𑁂 𑀧𑀽𑀭𑁂𑀢𑁆𑀯𑀸 𑀆𑀤𑀸𑀬 𑀕𑀢𑁂𑀲𑀼 𑀅𑀜𑁆𑀜𑁄 𑀲𑀢𑁆𑀢𑀫𑁄 𑀆𑀕𑀘𑁆𑀙𑁂𑀬𑁆𑀬. 𑀲𑀼𑀳𑀢𑀢𑀭𑀸 𑀅𑀲𑁆𑀲𑀸𑀢𑀺 𑀬𑀁 𑀢𑀢𑁆𑀣 𑀅𑀯𑀲𑀺𑀝𑁆𑀞𑀁 𑀅𑀢𑁆𑀣𑀺 𑀪𑀼𑀲𑀧𑀮𑀸𑀧𑀫𑀢𑁆𑀢𑀫𑁆𑀧𑀺, 𑀢𑀲𑁆𑀲 𑀕𑀳𑀡𑀢𑁆𑀣𑀁 𑀲𑀼𑀝𑁆𑀞𑀼𑀢𑀭𑀁 𑀳𑀢𑀸.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀘𑀢𑀼𑀫𑀳𑀸𑀧𑀣𑁄 𑀯𑀺𑀬 𑀙 𑀆𑀬𑀢𑀦𑀸𑀦𑀺 𑀤𑀝𑁆𑀞𑀩𑁆𑀩𑀸𑀦𑀺, 𑀘𑀢𑀼𑀫𑀳𑀸𑀧𑀣𑁂 𑀦𑀺𑀓𑁆𑀔𑀺𑀢𑁆𑀢𑀬𑀯𑀓𑀮𑀸𑀧𑀻 𑀯𑀺𑀬 𑀲𑀢𑁆𑀢𑁄, 𑀙 𑀩𑁆𑀬𑀸𑀪𑀗𑁆𑀕𑀺𑀬𑁄 𑀯𑀺𑀬 𑀇𑀝𑁆𑀞𑀸𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑀯𑀲𑁂𑀦 𑀅𑀝𑁆𑀞𑀸𑀭𑀲 𑀆𑀭𑀫𑁆𑀫𑀡𑀸𑀦𑀺, 𑀲𑀢𑁆𑀢𑀫𑀸 𑀩𑁆𑀬𑀸𑀪𑀗𑁆𑀕𑀻 𑀯𑀺𑀬 𑀪𑀯𑀧𑀢𑁆𑀣𑀦𑀸 𑀓𑀺𑀮𑁂𑀲𑀸. 𑀬𑀣𑀸 𑀘𑀢𑀼𑀫𑀳𑀸𑀧𑀣𑁂 𑀞𑀧𑀺𑀢𑀸 𑀬𑀯𑀓𑀮𑀸𑀧𑀻 𑀙𑀳𑀺 𑀩𑁆𑀬𑀸𑀪𑀗𑁆𑀕𑀻𑀳𑀺 𑀳𑀜𑁆𑀜𑀢𑀺, 𑀏𑀯𑀫𑀺𑀫𑁂 𑀲𑀢𑁆𑀢𑀸 𑀅𑀝𑁆𑀞𑀸𑀭𑀲𑀳𑀺 𑀆𑀭𑀫𑁆𑀫𑀡𑀤𑀡𑁆𑀟𑀓𑁂𑀳𑀺 𑀙𑀲𑀼 𑀆𑀬𑀢𑀦𑁂𑀲𑀼 𑀳𑀜𑁆𑀜𑀦𑁆𑀢𑀺. 𑀬𑀣𑀸 𑀲𑀢𑁆𑀢𑀫𑁂𑀦 𑀲𑀼𑀳𑀢𑀢𑀭𑀸 𑀳𑁄𑀦𑁆𑀢𑀺, 𑀏𑀯𑀁 𑀲𑀢𑁆𑀢𑀸 𑀪𑀯𑀧𑀢𑁆𑀣𑀦𑀓𑀺𑀮𑁂𑀲𑁂𑀳𑀺 𑀲𑀼𑀳𑀢𑀢𑀭𑀸 𑀳𑁄𑀦𑁆𑀢𑀺 𑀪𑀯𑁂𑀫𑀽𑀮𑀓𑀁 𑀤𑀼𑀓𑁆𑀔𑀁 𑀅𑀦𑀼𑀪𑀯𑀫𑀸𑀦𑀸.

𑀇𑀤𑀸𑀦𑀺 𑀦𑁂𑀲𑀁 𑀢𑀁 𑀪𑀯𑀧𑀢𑁆𑀣𑀦𑀓𑀺𑀮𑁂𑀲𑀁 𑀤𑀲𑁆𑀲𑁂𑀢𑀼𑀁 𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀭𑀸𑀢𑀺 𑀲𑀼𑀥𑀫𑁆𑀫𑀸𑀬𑀁 𑀪𑀼𑀫𑁆𑀫𑀁, 𑀲𑀼𑀥𑀫𑁆𑀫𑀸𑀬 𑀤𑁂𑀯𑀲𑀪𑀸𑀬 𑀤𑁆𑀯𑀸𑀭𑁂𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀺𑀓𑀸 𑀔𑁄 𑀤𑁂𑀯𑀸𑀢𑀺 𑀥𑀫𑁆𑀫𑀺𑀓𑀸 𑀏𑀢𑁂 𑀤𑁂𑀯𑀸 𑀦𑀸𑀫, 𑀬𑁂𑀳𑀺 𑀫𑀸𑀤𑀺𑀲𑀁 𑀅𑀲𑀼𑀭𑀸𑀥𑀺𑀧𑀢𑀺𑀁 𑀕𑀳𑁂𑀢𑁆𑀯𑀸 𑀫𑀬𑁆𑀳𑀁 𑀪𑁂𑀤𑀦𑀫𑀢𑁆𑀢𑀫𑁆𑀧𑀺 𑀦 𑀓𑀢𑀦𑁆𑀢𑀺 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀥𑀫𑁆𑀫𑀺𑀓𑀸 𑀤𑁂𑀯𑀸𑀢𑀺 𑀅𑀥𑀫𑁆𑀫𑀺𑀓𑀸 𑀏𑀢𑁂 𑀤𑁂𑀯𑀸 𑀦𑀸𑀫, 𑀬𑁂 𑀫𑀸𑀤𑀺𑀲𑀁 𑀅𑀲𑀼𑀭𑀸𑀥𑀺𑀧𑀢𑀺𑀁 𑀦𑀯𑀕𑀽𑀣𑀲𑀽𑀓𑀭𑀁 𑀯𑀺𑀬 𑀓𑀡𑁆𑀞𑀧𑀜𑁆𑀘𑀫𑁂𑀳𑀺 𑀩𑀦𑁆𑀥𑀦𑁂𑀳𑀺 𑀩𑀦𑁆𑀥𑀺𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀦𑁆𑀢𑀺. 𑀏𑀯𑀁 𑀲𑀼𑀔𑀼𑀫𑀁 𑀔𑁄, 𑀪𑀺𑀓𑁆𑀔𑀯𑁂, 𑀯𑁂𑀧𑀘𑀺𑀢𑁆𑀢𑀺𑀩𑀦𑁆𑀥𑀦𑀦𑁆𑀢𑀺 𑀢𑀁 𑀓𑀺𑀭 𑀧𑀤𑀼𑀫𑀦𑀸𑀴𑀲𑀼𑀢𑁆𑀢𑀁 𑀯𑀺𑀬 𑀫𑀓𑁆𑀓𑀝𑀚𑀸𑀮𑀲𑀼𑀢𑁆𑀢𑀁 𑀯𑀺𑀬 𑀘 𑀲𑀼𑀔𑀼𑀫𑀁 𑀳𑁄𑀢𑀺, 𑀙𑁂𑀢𑁆𑀢𑀼𑀁 𑀧𑀦 𑀦𑁂𑀯 𑀯𑀸𑀲𑀺𑀬𑀸 𑀦 𑀨𑀭𑀲𑀼𑀦𑀸 𑀲𑀓𑁆𑀓𑀸. 𑀬𑀲𑁆𑀫𑀸 𑀧𑀦 𑀘𑀺𑀢𑁆𑀢𑁂𑀦𑁂𑀯 𑀩𑀚𑁆𑀛𑀢𑀺, 𑀘𑀺𑀢𑁆𑀢𑁂𑀦 𑀫𑀼𑀘𑁆𑀘𑀢𑀺, 𑀢𑀲𑁆𑀫𑀸 ‘‘𑀯𑁂𑀧𑀘𑀺𑀢𑁆𑀢𑀺𑀩𑀦𑁆𑀥𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀢𑀢𑁄 𑀲𑀼𑀔𑀼𑀫𑀢𑀭𑀁 𑀫𑀸𑀭𑀩𑀦𑁆𑀥𑀦𑀦𑁆𑀢𑀺 𑀓𑀺𑀮𑁂𑀲𑀩𑀦𑁆𑀥𑀦𑀁 𑀧𑀦𑁂𑀲𑀁 𑀢𑀢𑁄𑀧𑀺 𑀲𑀼𑀔𑀼𑀫𑀢𑀭𑀁, 𑀦𑁂𑀯 𑀘𑀓𑁆𑀔𑀼𑀲𑁆𑀲 𑀆𑀧𑀸𑀣𑀁 𑀕𑀘𑁆𑀙𑀢𑀺, 𑀦 𑀇𑀭𑀺𑀬𑀸𑀧𑀣𑀁 𑀦𑀺𑀯𑀸𑀭𑁂𑀢𑀺. 𑀢𑁂𑀦 𑀳𑀺 𑀩𑀤𑁆𑀥𑀸 𑀲𑀢𑁆𑀢𑀸 𑀧𑀣𑀯𑀺𑀢𑀮𑁂𑀧𑀺 𑀆𑀓𑀸𑀲𑁂𑀧𑀺 𑀬𑁄𑀚𑀦𑀲𑀢𑀫𑁆𑀧𑀺 𑀬𑁄𑀚𑀦𑀲𑀳𑀲𑁆𑀲𑀫𑁆𑀧𑀺 𑀕𑀘𑁆𑀙𑀦𑁆𑀢𑀺𑀧𑀺 𑀆𑀕𑀘𑁆𑀙𑀦𑁆𑀢𑀺𑀧𑀺. 𑀙𑀺𑀚𑁆𑀚𑀫𑀸𑀦𑀁 𑀧𑀦𑁂𑀢𑀁 𑀜𑀸𑀡𑁂𑀦𑁂𑀯 𑀙𑀺𑀚𑁆𑀚𑀢𑀺, 𑀦 𑀅𑀜𑁆𑀜𑁂𑀦𑀸𑀢𑀺 ‘‘𑀜𑀸𑀡𑀫𑁄𑀓𑁆𑀔𑀁 𑀩𑀦𑁆𑀥𑀦’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺.

𑀫𑀜𑁆𑀜𑀫𑀸𑀦𑁄𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀫𑀸𑀦𑀸𑀦𑀁 𑀯𑀲𑁂𑀦 𑀔𑀦𑁆𑀥𑁂 𑀫𑀜𑁆𑀜𑀦𑁆𑀢𑁄. 𑀩𑀤𑁆𑀥𑁄 𑀫𑀸𑀭𑀲𑁆𑀲𑀸𑀢𑀺 𑀫𑀸𑀭𑀩𑀦𑁆𑀥𑀦𑁂𑀦 𑀩𑀤𑁆𑀥𑁄. 𑀓𑀭𑀡𑀢𑁆𑀣𑁂 𑀯𑀸 𑀏𑀢𑀁 𑀲𑀸𑀫𑀺𑀯𑀘𑀦𑀁, 𑀓𑀺𑀮𑁂𑀲𑀫𑀸𑀭𑁂𑀦 𑀩𑀤𑁆𑀥𑁄𑀢𑀺 𑀅𑀢𑁆𑀣𑁄. 𑀫𑀼𑀢𑁆𑀢𑁄 𑀧𑀸𑀧𑀺𑀫𑀢𑁄𑀢𑀺 𑀫𑀸𑀭𑀲𑁆𑀲 𑀩𑀦𑁆𑀥𑀦𑁂𑀦 𑀫𑀼𑀢𑁆𑀢𑁄. 𑀓𑀭𑀡𑀢𑁆𑀣𑁂𑀬𑁂𑀯 𑀯𑀸 𑀇𑀤𑀁 𑀲𑀸𑀫𑀺𑀯𑀘𑀦𑀁, 𑀧𑀸𑀧𑀺𑀫𑀢𑀸 𑀓𑀺𑀮𑁂𑀲𑀩𑀦𑁆𑀥𑀦𑁂𑀦 𑀫𑀼𑀢𑁆𑀢𑁄𑀢𑀺 𑀅𑀢𑁆𑀣𑁄.

𑀅𑀲𑁆𑀫𑀻𑀢𑀺 𑀧𑀤𑁂𑀦 𑀢𑀡𑁆𑀳𑀸𑀫𑀜𑁆𑀜𑀺𑀢𑀁 𑀯𑀼𑀢𑁆𑀢𑀁. 𑀅𑀬𑀫𑀳𑀲𑁆𑀫𑀻𑀢𑀺 𑀤𑀺𑀝𑁆𑀞𑀺𑀫𑀜𑁆𑀜𑀺𑀢𑀁. 𑀪𑀯𑀺𑀲𑁆𑀲𑀦𑁆𑀢𑀺 𑀲𑀲𑁆𑀲𑀢𑀯𑀲𑁂𑀦 𑀤𑀺𑀝𑁆𑀞𑀺𑀫𑀜𑁆𑀜𑀺𑀢𑀫𑁂𑀯. 𑀦 𑀪𑀯𑀺𑀲𑁆𑀲𑀦𑁆𑀢𑀺 𑀉𑀘𑁆𑀙𑁂𑀤𑀯𑀲𑁂𑀦. 𑀭𑀽𑀧𑀻𑀢𑀺𑀆𑀤𑀻𑀦𑀺 𑀲𑀲𑁆𑀲𑀢𑀲𑁆𑀲𑁂𑀯 𑀧𑀪𑁂𑀤𑀤𑀻𑀧𑀦𑀸𑀦𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀫𑀜𑁆𑀜𑀺𑀢𑀁 𑀆𑀩𑀸𑀥𑀁 𑀅𑀦𑁆𑀢𑁄𑀤𑁄𑀲𑀦𑀺𑀓𑀦𑁆𑀢𑀦𑀯𑀲𑁂𑀦 𑀭𑁄𑀕𑁄 𑀘𑁂𑀯 𑀕𑀡𑁆𑀟𑁄 𑀘 𑀲𑀮𑁆𑀮𑀜𑁆𑀘, 𑀢𑀲𑁆𑀫𑀸. 𑀇𑀜𑁆𑀚𑀺𑀢𑀦𑁆𑀢𑀺𑀆𑀤𑀻𑀦𑀺 𑀬𑀲𑁆𑀫𑀸 𑀇𑀫𑁂𑀳𑀺 𑀓𑀺𑀮𑁂𑀲𑁂𑀳𑀺 𑀲𑀢𑁆𑀢𑀸 𑀇𑀜𑁆𑀚𑀦𑁆𑀢𑀺 𑀘𑁂𑀯 𑀨𑀦𑁆𑀤𑀦𑁆𑀢𑀺 𑀘 𑀧𑀧𑀜𑁆𑀘𑀺𑀢𑀸 𑀘 𑀳𑁄𑀦𑁆𑀢𑀺 𑀧𑀫𑀢𑁆𑀢𑀸𑀓𑀸𑀭𑀧𑀢𑁆𑀢𑀸, 𑀢𑀲𑁆𑀫𑀸 𑀢𑁂𑀲𑀁 𑀆𑀓𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺.

𑀫𑀸𑀦𑀕𑀢𑀯𑀸𑀭𑁂 𑀧𑀦 𑀫𑀸𑀦𑀲𑁆𑀲 𑀕𑀢𑀁 𑀫𑀸𑀦𑀕𑀢𑀁, 𑀫𑀸𑀦𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀫𑀸𑀦𑁄𑀬𑁂𑀯 𑀫𑀸𑀦𑀕𑀢𑀁 𑀕𑀽𑀣𑀕𑀢𑀁 𑀫𑀼𑀢𑁆𑀢𑀕𑀢𑀁 𑀯𑀺𑀬. 𑀢𑀢𑁆𑀣 𑀅𑀲𑁆𑀫𑀻𑀢𑀺 𑀇𑀤𑀁 𑀢𑀡𑁆𑀳𑀸𑀬 𑀲𑀫𑁆𑀧𑀬𑀼𑀢𑁆𑀢𑀫𑀸𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀬𑀫𑀳𑀫𑀲𑁆𑀫𑀻𑀢𑀺 𑀤𑀺𑀝𑁆𑀞𑀺𑀯𑀲𑁂𑀦. 𑀦𑀦𑀼 𑀘 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑁄 𑀦𑀸𑀫 𑀫𑀸𑀦𑁄 𑀦𑀢𑁆𑀣𑀻𑀢𑀺? 𑀆𑀫 𑀦𑀢𑁆𑀣𑀺, 𑀫𑀸𑀦𑀲𑁆𑀲 𑀧𑀦 𑀅𑀧𑁆𑀧𑀳𑀻𑀦𑀢𑁆𑀢𑀸 𑀤𑀺𑀝𑁆𑀞𑀺 𑀦𑀸𑀫 𑀳𑁄𑀢𑀺. 𑀫𑀸𑀦𑀫𑀽𑀮𑀓𑀁 𑀤𑀺𑀝𑁆𑀞𑀺𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀆𑀲𑀻𑀯𑀺𑀲𑀯𑀕𑁆𑀕𑁄.

𑀘𑀢𑀼𑀢𑁆𑀣𑁄 𑀧𑀡𑁆𑀡𑀸𑀲𑀓𑁄.

𑀲𑀴𑀸𑀬𑀢𑀦𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀯𑁂𑀤𑀦𑀸𑀲𑀁𑀬𑀼𑀢𑁆𑀢𑀁

𑁧. 𑀲𑀕𑀸𑀣𑀸𑀯𑀕𑁆𑀕𑁄

𑁧. 𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁯. 𑀯𑁂𑀤𑀦𑀸𑀲𑀁𑀬𑀼𑀢𑁆𑀢𑁂 𑀲𑀕𑀸𑀣𑀸𑀯𑀕𑁆𑀕𑀲𑁆𑀲 𑀧𑀞𑀫𑁂 𑀲𑀫𑀸𑀳𑀺𑀢𑁄𑀢𑀺 𑀉𑀧𑀘𑀸𑀭𑁂𑀦 𑀯𑀸 𑀅𑀧𑁆𑀧𑀦𑀸𑀬 𑀯𑀸 𑀲𑀫𑀸𑀳𑀺𑀢𑁄. 𑀯𑁂𑀤𑀦𑀸 𑀘 𑀧𑀚𑀸𑀦𑀸𑀢𑀻𑀢𑀺 𑀯𑁂𑀤𑀦𑀸 𑀤𑀼𑀓𑁆𑀔𑀲𑀘𑁆𑀘𑀯𑀲𑁂𑀦 𑀧𑀚𑀸𑀦𑀸𑀢𑀺. 𑀯𑁂𑀤𑀦𑀸𑀦𑀜𑁆𑀘 𑀲𑀫𑁆𑀪𑀯𑀦𑁆𑀢𑀺 𑀢𑀸𑀲𑀁𑀬𑁂𑀯 𑀲𑀫𑁆𑀪𑀯𑀁 𑀲𑀫𑀼𑀤𑀬𑀲𑀘𑁆𑀘𑀯𑀲𑁂𑀦 𑀧𑀚𑀸𑀦𑀸𑀢𑀺. 𑀬𑀢𑁆𑀣 𑀘𑁂𑀢𑀸𑀢𑀺 𑀬𑀢𑁆𑀣𑁂𑀢𑀸 𑀯𑁂𑀤𑀦𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀁 𑀦𑀺𑀩𑁆𑀩𑀸𑀦𑀁 𑀦𑀺𑀭𑁄𑀥𑀲𑀘𑁆𑀘𑀯𑀲𑁂𑀦 𑀧𑀚𑀸𑀦𑀸𑀢𑀺. 𑀔𑀬𑀕𑀸𑀫𑀺𑀦𑀦𑁆𑀢𑀺 𑀢𑀸𑀲𑀁𑀬𑁂𑀯 𑀯𑁂𑀤𑀦𑀸𑀦𑀁 𑀔𑀬𑀕𑀸𑀫𑀺𑀦𑀁 𑀫𑀕𑁆𑀕𑀁 𑀫𑀕𑁆𑀕𑀲𑀘𑁆𑀘𑀯𑀲𑁂𑀦 𑀧𑀚𑀸𑀦𑀸𑀢𑀺. 𑀦𑀺𑀘𑁆𑀙𑀸𑀢𑁄 𑀧𑀭𑀺𑀦𑀺𑀩𑁆𑀩𑀼𑀢𑁄𑀢𑀺 𑀦𑀺𑀢𑁆𑀢𑀡𑁆𑀳𑁄 𑀳𑀼𑀢𑁆𑀯𑀸 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑁂𑀦 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀏𑀯𑀫𑁂𑀢𑁆𑀣 𑀲𑀼𑀢𑁆𑀢𑁂 𑀲𑀫𑁆𑀫𑀲𑀦𑀘𑀸𑀭𑀯𑁂𑀤𑀦𑀸 𑀓𑀣𑀺𑀢𑀸. 𑀕𑀸𑀣𑀸𑀲𑀼 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀫𑀣𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸, 𑀲𑁂𑀲𑁂𑀳𑀺 𑀘𑀢𑀼𑀲𑀘𑁆𑀘𑀁 𑀓𑀣𑀺𑀢𑀁. 𑀏𑀯𑀫𑁂𑀢𑁆𑀣 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑁄 𑀘𑀢𑀼𑀪𑀽𑀫𑀓𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑁄 𑀯𑀼𑀢𑁆𑀢𑁄.

𑁨. 𑀲𑀼𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁦. 𑀤𑀼𑀢𑀺𑀬𑁂 𑀅𑀤𑀼𑀓𑁆𑀔𑀫𑀲𑀼𑀔𑀁 𑀲𑀳𑀸𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀜𑁆𑀘 𑀲𑀼𑀔𑀤𑀼𑀓𑁆𑀔𑁂𑀳𑀺 𑀲𑀳. 𑀅𑀚𑁆𑀛𑀢𑁆𑀢𑀜𑁆𑀘 𑀩𑀳𑀺𑀤𑁆𑀥𑀸 𑀘𑀸𑀢𑀺 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘. 𑀫𑁄𑀲𑀥𑀫𑁆𑀫𑀦𑁆𑀢𑀺 𑀦𑀲𑁆𑀲𑀦𑀲𑀪𑀸𑀯𑀁. 𑀧𑀮𑁄𑀓𑀺𑀦𑀦𑁆𑀢𑀺 𑀧𑀮𑀼𑀚𑁆𑀚𑀦𑀓𑀁 𑀪𑀺𑀚𑁆𑀚𑀦𑀲𑀪𑀸𑀯𑀁. 𑀨𑀼𑀲𑁆𑀲 𑀨𑀼𑀲𑁆𑀲 𑀯𑀬𑀁 𑀧𑀲𑁆𑀲𑀦𑁆𑀢𑀺 𑀜𑀸𑀡𑁂𑀦 𑀨𑀼𑀲𑀺𑀢𑁆𑀯𑀸 𑀨𑀼𑀲𑀺𑀢𑁆𑀯𑀸 𑀯𑀬𑀁 𑀧𑀲𑁆𑀲𑀦𑁆𑀢𑁄. 𑀏𑀯𑀁 𑀢𑀢𑁆𑀣 𑀯𑀺𑀭𑀚𑁆𑀚𑀢𑀻𑀢𑀺 𑀏𑀯𑀁 𑀢𑀸𑀲𑀼 𑀯𑁂𑀤𑀦𑀸𑀲𑀼 𑀯𑀺𑀭𑀚𑁆𑀚𑀢𑀺. 𑀇𑀥𑀸𑀧𑀺 𑀲𑀼𑀢𑁆𑀢𑁂 𑀲𑀫𑁆𑀫𑀲𑀦𑀘𑀸𑀭𑀯𑁂𑀤𑀦𑀸 𑀓𑀣𑀺𑀢𑀸, 𑀕𑀸𑀣𑀸𑀲𑀼 𑀜𑀸𑀡𑀨𑀼𑀲𑀦𑀁.

𑁩. 𑀧𑀳𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁧. 𑀢𑀢𑀺𑀬𑁂 𑀅𑀘𑁆𑀙𑁂𑀘𑁆𑀙𑀺 𑀢𑀡𑁆𑀳𑀦𑁆𑀢𑀺 𑀲𑀩𑁆𑀩𑀫𑁆𑀧𑀺 𑀢𑀡𑁆𑀳𑀁 𑀙𑀺𑀦𑁆𑀤𑀺 𑀲𑀫𑀼𑀘𑁆𑀙𑀺𑀦𑁆𑀤𑀺. 𑀯𑀺𑀯𑀢𑁆𑀢𑀬𑀺 𑀲𑀁𑀬𑁄𑀚𑀦𑀦𑁆𑀢𑀺 𑀤𑀲𑀯𑀺𑀥𑀫𑁆𑀧𑀺 𑀲𑀁𑀬𑁄𑀚𑀦𑀁 𑀧𑀭𑀺𑀯𑀢𑁆𑀢𑀬𑀺 𑀦𑀺𑀫𑁆𑀫𑀽𑀮𑀓𑀫𑀓𑀸𑀲𑀺. 𑀲𑀫𑁆𑀫𑀸𑀢𑀺 𑀳𑁂𑀢𑀼𑀦𑀸 𑀓𑀸𑀭𑀡𑁂𑀦. 𑀫𑀸𑀦𑀸𑀪𑀺𑀲𑀫𑀬𑀸𑀢𑀺 𑀫𑀸𑀦𑀲𑁆𑀲 𑀤𑀲𑁆𑀲𑀦𑀸𑀪𑀺𑀲𑀫𑀬𑀸, 𑀧𑀳𑀸𑀦𑀸𑀪𑀺𑀲𑀫𑀬𑀸 𑀘. 𑀅𑀭𑀳𑀢𑁆𑀢𑀫𑀕𑁆𑀕𑁄 𑀳𑀺 𑀓𑀺𑀘𑁆𑀘𑀯𑀲𑁂𑀦 𑀫𑀸𑀦𑀁 𑀲𑀫𑁆𑀧𑀲𑁆𑀲𑀢𑀺, 𑀅𑀬𑀫𑀲𑁆𑀲 𑀤𑀲𑁆𑀲𑀦𑀸𑀪𑀺𑀲𑀫𑀬𑁄. 𑀢𑁂𑀦 𑀤𑀺𑀝𑁆𑀞𑁄 𑀧𑀦 𑀲𑁄 𑀢𑀸𑀯𑀤𑁂𑀯 𑀧𑀳𑀻𑀬𑀢𑀺, 𑀤𑀺𑀝𑁆𑀞𑀯𑀺𑀲𑁂𑀦 𑀤𑀺𑀝𑁆𑀞𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀁 𑀯𑀺𑀬. 𑀅𑀬𑀫𑀲𑁆𑀲 𑀧𑀳𑀸𑀦𑀸𑀪𑀺𑀲𑀫𑀬𑁄.

𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸𑀢𑀺 𑀏𑀯𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀫𑀸𑀦𑀲𑁆𑀲 𑀤𑀺𑀝𑁆𑀞𑀢𑁆𑀢𑀸 𑀘 𑀧𑀳𑀻𑀦𑀢𑁆𑀢𑀸 𑀘 𑀬𑁂 𑀇𑀫𑁂 ‘‘𑀓𑀸𑀬𑀩𑀦𑁆𑀥𑀦𑀲𑁆𑀲 𑀅𑀦𑁆𑀢𑁄 𑀚𑀻𑀭𑀢𑀺 (𑀘𑀽𑀴𑀯. 𑁨𑁭𑁮) 𑀳𑀭𑀺𑀢𑀦𑁆𑀢𑀁 𑀯𑀸’’𑀢𑀺 (𑀫. 𑀦𑀺. 𑁧.𑁩𑁦𑁪) 𑀏𑀯𑀁 𑀯𑀼𑀢𑁆𑀢𑀅𑀦𑁆𑀢𑀺𑀫𑀫𑀭𑀺𑀬𑀸𑀤𑀦𑁆𑀢𑁄 𑀘, ‘‘𑀅𑀦𑁆𑀢𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀚𑀻𑀯𑀺𑀓𑀸𑀦’’𑀦𑁆𑀢𑀺 (𑀇𑀢𑀺𑀯𑀼. 𑁯𑁧; 𑀲𑀁. 𑀦𑀺. 𑁩.𑁮𑁦) 𑀏𑀯𑀁 𑀯𑀼𑀢𑁆𑀢𑀮𑀸𑀫𑀓𑀦𑁆𑀢𑁄 𑀘, ‘‘𑀲𑀓𑁆𑀓𑀸𑀬𑁄 𑀏𑀓𑁄 𑀅𑀦𑁆𑀢𑁄’’𑀢𑀺 (𑀅. 𑀦𑀺. 𑁬.𑁬𑁧; 𑀘𑀽𑀴𑀦𑀺. 𑀢𑀺𑀲𑁆𑀲𑀫𑁂𑀢𑁆𑀢𑁂𑀬𑁆𑀬𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁧𑁧) 𑀏𑀯𑀁 𑀯𑀼𑀢𑁆𑀢𑀓𑁄𑀝𑁆𑀞𑀸𑀲𑀦𑁆𑀢𑁄 𑀘, ‘‘𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲 𑀲𑀩𑁆𑀩𑀧𑀘𑁆𑀘𑀬𑀲𑀗𑁆𑀔𑀬𑀸’’𑀢𑀺 (𑀲𑀁 𑀦𑀺. 𑁨.𑁫𑁧; 𑁨.𑁪.𑁭𑁧; 𑀉𑀤𑀸. 𑁭𑁧) 𑀏𑀯𑀁 𑀯𑀼𑀢𑁆𑀢𑀓𑁄𑀝𑀦𑁆𑀢𑁄 𑀘𑀸𑀢𑀺 𑀘𑀢𑁆𑀢𑀸𑀭𑁄 𑀅𑀦𑁆𑀢𑀸, 𑀢𑁂𑀲𑀼 𑀲𑀩𑁆𑀩𑀲𑁆𑀲𑁂𑀯 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀤𑀼𑀁 𑀘𑀢𑀼𑀢𑁆𑀣𑀓𑁄𑀝𑀺𑀲𑀗𑁆𑀔𑀸𑀢𑀁 𑀅𑀦𑁆𑀢𑀫𑀓𑀸𑀲𑀺, 𑀧𑀭𑀺𑀘𑁆𑀙𑁂𑀤𑀁 𑀧𑀭𑀺𑀯𑀝𑀼𑀫𑀁 𑀅𑀓𑀸𑀲𑀺, 𑀅𑀦𑁆𑀢𑀺𑀫𑀲𑀫𑀼𑀲𑁆𑀲𑀬𑀫𑀢𑁆𑀢𑀸𑀯𑀲𑁂𑀲𑀁 𑀤𑀼𑀓𑁆𑀔𑀫𑀓𑀸𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀲𑀫𑁆𑀧𑀚𑀜𑁆𑀜𑀁 𑀦 𑀭𑀺𑀜𑁆𑀘𑀢𑀻𑀢𑀺 𑀲𑀫𑁆𑀧𑀚𑀜𑁆𑀜𑀁 𑀦 𑀚𑀳𑀢𑀺. 𑀲𑀗𑁆𑀔𑁆𑀬𑀁 𑀦𑁄𑀧𑁂𑀢𑀻𑀢𑀺 𑀭𑀢𑁆𑀢𑁄 𑀤𑀼𑀝𑁆𑀞𑁄 𑀫𑀽𑀴𑁆𑀳𑁄𑀢𑀺 𑀧𑀜𑁆𑀜𑀢𑁆𑀢𑀺𑀁 𑀦 𑀉𑀧𑁂𑀢𑀺, 𑀢𑀁 𑀧𑀜𑁆𑀜𑀢𑁆𑀢𑀺𑀁 𑀧𑀳𑀸𑀬 𑀔𑀻𑀡𑀸𑀲𑀯𑁄 𑀦𑀸𑀫 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀆𑀭𑀫𑁆𑀫𑀡𑀸𑀦𑀼𑀲𑀬𑁄 𑀓𑀣𑀺𑀢𑁄.

𑁪. 𑀧𑀸𑀢𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁨. 𑀘𑀢𑀼𑀢𑁆𑀣𑁂 𑀧𑀸𑀢𑀸𑀮𑁄𑀢𑀺 𑀧𑀸𑀢𑀲𑁆𑀲 𑀅𑀮𑀁 𑀧𑀭𑀺𑀬𑀢𑁆𑀢𑁄, 𑀦𑀢𑁆𑀣𑀺 𑀏𑀢𑁆𑀣 𑀧𑀢𑀺𑀝𑁆𑀞𑀸𑀢𑀺 𑀧𑀸𑀢𑀸𑀮𑁄. 𑀅𑀲𑀦𑁆𑀢𑀁 𑀅𑀯𑀺𑀚𑁆𑀚𑀫𑀸𑀦𑀦𑁆𑀢𑀺 𑀅𑀲𑀫𑁆𑀪𑀽𑀢𑀢𑁆𑀢𑀁 𑀅𑀧𑀜𑁆𑀜𑀸𑀬𑀫𑀸𑀦𑀢𑁆𑀢𑀁. 𑀏𑀯𑀁 𑀯𑀸𑀘𑀁 𑀪𑀸𑀲𑀢𑀻𑀢𑀺 𑀅𑀢𑁆𑀣𑀺 𑀫𑀳𑀸𑀲𑀫𑀼𑀤𑁆𑀤𑁂 𑀧𑀸𑀢𑀸𑀮𑁄𑀢𑀺 𑀏𑀯𑀁 𑀯𑀸𑀘𑀁. 𑀲𑁄 𑀳𑀺 𑀬𑀁 𑀢𑀁 𑀩𑀮𑀯𑀸𑀫𑀼𑀔𑀁 𑀫𑀳𑀸𑀲𑀫𑀼𑀤𑁆𑀤𑀲𑁆𑀲 𑀉𑀤𑀓𑀁 𑀯𑁂𑀕𑁂𑀦 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀘𑀓𑁆𑀓𑀯𑀸𑀴𑀁 𑀯𑀸 𑀲𑀺𑀦𑁂𑀭𑀼𑀁 𑀯𑀸 𑀆𑀳𑀘𑁆𑀘 𑀬𑁄𑀚𑀦𑀤𑁆𑀯𑀺𑀬𑁄𑀚𑀦𑀤𑀲𑀬𑁄𑀚𑀦𑀧𑁆𑀧𑀫𑀸𑀡𑀫𑁆𑀧𑀺 𑀉𑀕𑁆𑀕𑀦𑁆𑀢𑁆𑀯𑀸 𑀧𑀼𑀦 𑀫𑀳𑀸𑀲𑀫𑀼𑀤𑁆𑀤𑁂 𑀧𑀢𑀢𑀺, 𑀬𑀲𑁆𑀲 𑀧𑀢𑀺𑀢𑀝𑁆𑀞𑀸𑀦𑁂 𑀫𑀳𑀸𑀦𑀭𑀓𑀧𑀧𑀸𑀢𑁄 𑀯𑀺𑀬 𑀳𑁄𑀢𑀺, 𑀬𑀁 𑀮𑁄𑀓𑁂 𑀩𑀮𑀯𑀸𑀫𑀼𑀔𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀁 𑀲𑀦𑁆𑀥𑀸𑀬 𑀏𑀯𑀁 𑀯𑀤𑀢𑀺.

𑀬𑀲𑁆𑀫𑀸 𑀧𑀦 𑀢𑀢𑁆𑀣 𑀢𑀣𑀸𑀭𑀽𑀧𑀸𑀦𑀁 𑀫𑀘𑁆𑀙𑀓𑀘𑁆𑀙𑀧𑀤𑁂𑀯𑀤𑀸𑀦𑀯𑀸𑀦𑀁 𑀧𑀢𑀺𑀝𑁆𑀞𑀸𑀧𑀺 𑀳𑁄𑀢𑀺 𑀲𑀼𑀔𑀦𑀺𑀯𑀸𑀲𑁄𑀧𑀺, 𑀢𑀲𑁆𑀫𑀸 𑀅𑀲𑀦𑁆𑀢𑀁 𑀅𑀲𑀁𑀯𑀺𑀚𑁆𑀚𑀫𑀸𑀦𑀁 𑀢𑀁 𑀢𑀁 𑀯𑀸𑀘𑀁 𑀪𑀸𑀲𑀢𑀺 𑀦𑀸𑀫. 𑀬𑀲𑁆𑀫𑀸 𑀧𑀦 𑀲𑀩𑁆𑀩𑀧𑀼𑀣𑀼𑀚𑁆𑀚𑀦𑀸 𑀲𑀸𑀭𑀻𑀭𑀺𑀓𑀸𑀬 𑀤𑀼𑀓𑁆𑀔𑀯𑁂𑀤𑀦𑀸𑀬 𑀧𑀢𑀺𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀲𑁆𑀫𑀸 𑀧𑀸𑀢𑀲𑁆𑀲 𑀅𑀮𑀦𑁆𑀢𑀺 𑀅𑀢𑁆𑀣𑁂𑀦 𑀅𑀬𑀫𑁂𑀯 𑀧𑀸𑀢𑀸𑀮𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀲𑀸𑀭𑀻𑀭𑀺𑀓𑀸𑀦𑀁 𑀔𑁄 𑀏𑀢𑀁 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳.

𑀧𑀸𑀢𑀸𑀮𑁂 𑀦 𑀧𑀘𑁆𑀘𑀼𑀝𑁆𑀞𑀸𑀲𑀻𑀢𑀺 𑀧𑀸𑀢𑀸𑀮𑀲𑁆𑀫𑀺𑀁 𑀦 𑀧𑀢𑀺𑀝𑁆𑀞𑀸𑀲𑀺. 𑀕𑀸𑀥𑀦𑁆𑀢𑀺 𑀧𑀢𑀺𑀝𑁆𑀞𑀁. 𑀅𑀓𑁆𑀓𑀦𑁆𑀤𑀢𑀻𑀢𑀺 𑀅𑀦𑀺𑀩𑀤𑁆𑀥𑀁 𑀯𑀺𑀧𑁆𑀧𑀮𑀸𑀧𑀁 𑀯𑀺𑀮𑀧𑀦𑁆𑀢𑁄 𑀓𑀦𑁆𑀤𑀢𑀺. 𑀤𑀼𑀩𑁆𑀩𑀮𑁄𑀢𑀺 𑀤𑀼𑀩𑁆𑀩𑀮𑀜𑀸𑀡𑁄. 𑀅𑀧𑁆𑀧𑀣𑀸𑀫𑀓𑁄𑀢𑀺 𑀜𑀸𑀡𑀣𑀸𑀫𑀲𑁆𑀲 𑀧𑀭𑀺𑀢𑁆𑀢𑀢𑀸𑀬 𑀧𑀭𑀺𑀢𑁆𑀢𑀣𑀸𑀫𑀓𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀭𑀺𑀬𑀲𑀸𑀯𑀓𑁄𑀢𑀺 𑀲𑁄𑀢𑀸𑀧𑀦𑁆𑀦𑁄. 𑀲𑁄𑀢𑀸𑀧𑀦𑁆𑀦𑁄 𑀳𑀺 𑀏𑀢𑁆𑀣 𑀥𑀼𑀭𑀁, 𑀩𑀮𑀯𑀯𑀺𑀧𑀲𑁆𑀲𑀓𑁄 𑀦 𑀢𑀺𑀓𑁆𑀔𑀩𑀼𑀤𑁆𑀥𑀺 𑀉𑀧𑁆𑀧𑀦𑁆𑀦𑀁 𑀯𑁂𑀤𑀦𑀁 𑀅𑀦𑀦𑀼𑀯𑀢𑁆𑀢𑀺𑀢𑁆𑀯𑀸 𑀧𑀢𑀺𑀝𑁆𑀞𑀸𑀢𑀼𑀁 𑀲𑀫𑀢𑁆𑀣𑁄 𑀬𑁄𑀕𑀸𑀯𑀘𑀭𑁄𑀧𑀺 𑀯𑀝𑁆𑀝𑀢𑀺.

𑁫. 𑀤𑀝𑁆𑀞𑀩𑁆𑀩𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁩. 𑀧𑀜𑁆𑀘𑀫𑁂 𑀤𑀼𑀓𑁆𑀔𑀢𑁄 𑀤𑀝𑁆𑀞𑀩𑁆𑀩𑀸𑀢𑀺 𑀯𑀺𑀧𑀭𑀺𑀡𑀸𑀫𑀦𑀯𑀲𑁂𑀦 𑀤𑀼𑀓𑁆𑀔𑀢𑁄 𑀤𑀝𑁆𑀞𑀩𑁆𑀩𑀸. 𑀲𑀮𑁆𑀮𑀢𑁄𑀢𑀺 𑀤𑀼𑀓𑁆𑀔𑀸𑀧𑀦𑀯𑀺𑀦𑀺𑀯𑀺𑀚𑁆𑀛𑀦𑀝𑁆𑀞𑁂𑀦 𑀲𑀮𑁆𑀮𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀅𑀦𑀺𑀘𑁆𑀘𑀢𑁄𑀢𑀺 𑀅𑀤𑀼𑀓𑁆𑀔𑀫𑀲𑀼𑀔𑀸 𑀳𑀼𑀢𑁆𑀯𑀸 𑀅𑀪𑀸𑀯𑀸𑀓𑀸𑀭𑁂𑀦 𑀅𑀦𑀺𑀘𑁆𑀘𑀢𑁄 𑀤𑀝𑁆𑀞𑀩𑁆𑀩𑀸. 𑀅𑀤𑁆𑀤𑀸𑀢𑀺 𑀅𑀤𑁆𑀤𑀲. 𑀲𑀦𑁆𑀢𑀦𑁆𑀢𑀺 𑀲𑀦𑁆𑀢𑀲𑀪𑀸𑀯𑀁.

𑁬. 𑀲𑀮𑁆𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁪. 𑀙𑀝𑁆𑀞𑁂 𑀢𑀢𑁆𑀭𑀸𑀢𑀺 𑀢𑁂𑀲𑀼 𑀤𑁆𑀯𑀻𑀲𑀼 𑀚𑀦𑁂𑀲𑀼. 𑀅𑀦𑀼𑀯𑁂𑀥𑀁 𑀯𑀺𑀚𑁆𑀛𑁂𑀬𑁆𑀬𑀸𑀢𑀺 𑀢𑀲𑁆𑀲𑁂𑀯 𑀯𑀡𑀫𑀼𑀔𑀲𑁆𑀲 𑀅𑀗𑁆𑀕𑀼𑀮𑀦𑁆𑀢𑀭𑁂 𑀯𑀸 𑀤𑁆𑀯𑀗𑁆𑀕𑀼𑀮𑀦𑁆𑀢𑀭𑁂 𑀯𑀸 𑀆𑀲𑀦𑁆𑀦𑀧𑀤𑁂𑀲𑁂 𑀅𑀦𑀼𑀕𑀢𑀯𑁂𑀥𑀁. 𑀏𑀯𑀁 𑀯𑀺𑀤𑁆𑀥𑀲𑁆𑀲 𑀳𑀺 𑀲𑀸 𑀅𑀦𑀼𑀯𑁂𑀥𑀸 𑀯𑁂𑀤𑀦𑀸 𑀧𑀞𑀫𑀯𑁂𑀤𑀦𑀸𑀬 𑀩𑀮𑀯𑀢𑀭𑀸 𑀳𑁄𑀢𑀺, 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀤𑁄𑀫𑀦𑀲𑁆𑀲𑀯𑁂𑀤𑀦𑀸𑀧𑀺 𑀏𑀯𑀫𑁂𑀯 𑀧𑀼𑀭𑀺𑀫𑀯𑁂𑀤𑀦𑀸𑀬 𑀩𑀮𑀯𑀢𑀭𑀸 𑀳𑁄𑀢𑀺. 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀦𑀺𑀲𑁆𑀲𑀭𑀡𑀦𑁆𑀢𑀺 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀳𑀺 𑀲𑀫𑀸𑀥𑀺𑀫𑀕𑁆𑀕𑀨𑀮𑀸𑀦𑀺 𑀦𑀺𑀲𑁆𑀲𑀭𑀡𑀁, 𑀢𑀁 𑀲𑁄 𑀦 𑀚𑀸𑀦𑀸𑀢𑀺, 𑀓𑀸𑀫𑀲𑀼𑀔𑀫𑁂𑀯 𑀦𑀺𑀲𑁆𑀲𑀭𑀡𑀦𑁆𑀢𑀺 𑀚𑀸𑀦𑀸𑀢𑀺. 𑀢𑀸𑀲𑀁 𑀯𑁂𑀤𑀦𑀸𑀦𑀦𑁆𑀢𑀺 𑀢𑀸𑀲𑀁 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀦𑀁. 𑀲𑀜𑁆𑀜𑀼𑀢𑁆𑀢𑁄 𑀦𑀁 𑀯𑁂𑀤𑀬𑀢𑀻𑀢𑀺 𑀓𑀺𑀮𑁂𑀲𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑁄𑀯 𑀳𑀼𑀢𑁆𑀯𑀸 𑀢𑀁 𑀯𑁂𑀤𑀦𑀁 𑀯𑁂𑀤𑀬𑀢𑀺, 𑀦 𑀯𑀺𑀧𑁆𑀧𑀬𑀼𑀢𑁆𑀢𑁄. 𑀲𑀜𑁆𑀜𑀼𑀢𑁆𑀢𑁄 𑀤𑀼𑀓𑁆𑀔𑀲𑁆𑀫𑀸𑀢𑀺 𑀓𑀭𑀡𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀁, 𑀤𑀼𑀓𑁆𑀔𑁂𑀦 𑀲𑀫𑁆𑀧𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀲𑀗𑁆𑀔𑀸𑀢𑀥𑀫𑁆𑀫𑀲𑁆𑀲𑀸𑀢𑀺 𑀯𑀺𑀤𑀺𑀢𑀥𑀫𑁆𑀫𑀲𑁆𑀲 𑀢𑀼𑀮𑀺𑀢𑀥𑀫𑁆𑀫𑀲𑁆𑀲. 𑀩𑀳𑀼𑀲𑁆𑀲𑀼𑀢𑀲𑁆𑀲𑀸𑀢𑀺 𑀧𑀭𑀺𑀬𑀢𑁆𑀢𑀺𑀩𑀳𑀼𑀲𑁆𑀲𑀼𑀢𑀲𑁆𑀲 𑀧𑀝𑀺𑀯𑁂𑀥𑀩𑀳𑀼𑀲𑁆𑀲𑀼𑀢𑀲𑁆𑀲 𑀘. 𑀲𑀫𑁆𑀫𑀸 𑀧𑀚𑀸𑀦𑀸𑀢𑀺 𑀪𑀯𑀲𑁆𑀲 𑀧𑀸𑀭𑀕𑀽𑀢𑀺 𑀪𑀯𑀲𑁆𑀲 𑀧𑀸𑀭𑀁 𑀦𑀺𑀩𑁆𑀩𑀸𑀦𑀁 𑀕𑀢𑁄, 𑀢𑀤𑁂𑀯 𑀦𑀺𑀩𑁆𑀩𑀸𑀦𑀁 𑀲𑀫𑁆𑀫𑀸 𑀧𑀚𑀸𑀦𑀸𑀢𑀺. 𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑁂 𑀆𑀭𑀫𑁆𑀫𑀡𑀸𑀦𑀼𑀲𑀬𑁄𑀯 𑀓𑀣𑀺𑀢𑁄. 𑀅𑀭𑀺𑀬𑀲𑀸𑀯𑀓𑁂𑀲𑀼 𑀘 𑀔𑀻𑀡𑀸𑀲𑀯𑁄 𑀏𑀢𑁆𑀣 𑀥𑀼𑀭𑀁, 𑀅𑀦𑀸𑀕𑀸𑀫𑀻𑀧𑀺 𑀯𑀝𑁆𑀝𑀢𑀻𑀢𑀺 𑀯𑀤𑀦𑁆𑀢𑀺.

𑁭. 𑀧𑀞𑀫𑀕𑁂𑀮𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁫. 𑀲𑀢𑁆𑀢𑀫𑁂 𑀬𑁂𑀦 𑀕𑀺𑀮𑀸𑀦𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 ‘‘𑀲𑀤𑁂𑀯𑀓𑁂 𑀮𑁄𑀓𑁂 𑀅𑀕𑁆𑀕𑀧𑀼𑀕𑁆𑀕𑀮𑁄 𑀢𑀣𑀸𑀕𑀢𑁄𑀧𑀺 𑀕𑀺𑀮𑀸𑀦𑀼𑀧𑀝𑁆𑀞𑀸𑀦𑀁 𑀕𑀘𑁆𑀙𑀢𑀺, 𑀉𑀧𑀝𑁆𑀞𑀸𑀢𑀩𑁆𑀩𑀬𑀼𑀢𑁆𑀢𑀓𑀸 𑀦𑀸𑀫 𑀕𑀺𑀮𑀸𑀦𑀸𑀢𑀺 𑀪𑀺𑀓𑁆𑀔𑀽 𑀲𑀤𑁆𑀤𑀳𑀺𑀢𑁆𑀯𑀸 𑀑𑀓𑀧𑁆𑀧𑁂𑀢𑁆𑀯𑀸 𑀕𑀺𑀮𑀸𑀦𑁂 𑀉𑀧𑀝𑁆𑀞𑀸𑀢𑀩𑁆𑀩𑁂 𑀫𑀜𑁆𑀜𑀺𑀲𑁆𑀲𑀦𑁆𑀢𑀻’’𑀢𑀺 𑀘 ‘‘𑀬𑁂 𑀢𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑀲𑀧𑁆𑀧𑀸𑀬𑀸, 𑀢𑁂𑀲𑀁 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀘 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺. 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀯𑀓𑁆𑀔𑀸𑀫. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻𑀢𑀺 𑀅𑀦𑀺𑀘𑁆𑀘𑀢𑀁 𑀅𑀦𑀼𑀧𑀲𑁆𑀲𑀦𑁆𑀢𑁄. 𑀯𑀬𑀸𑀦𑀼𑀧𑀲𑁆𑀲𑀻𑀢𑀺 𑀯𑀬𑀁 𑀅𑀦𑀼𑀧𑀲𑁆𑀲𑀦𑁆𑀢𑁄. 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀻𑀢𑀺 𑀯𑀺𑀭𑀸𑀕𑀁 𑀅𑀦𑀼𑀧𑀲𑁆𑀲𑀦𑁆𑀢𑁄. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀻𑀢𑀺 𑀦𑀺𑀭𑁄𑀥𑀁 𑀅𑀦𑀼𑀧𑀲𑁆𑀲𑀦𑁆𑀢𑁄. 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀻𑀢𑀺 𑀧𑀝𑀺𑀦𑀺𑀲𑁆𑀲𑀕𑁆𑀕𑀁 𑀅𑀦𑀼𑀧𑀲𑁆𑀲𑀦𑁆𑀢𑁄.

𑀏𑀢𑁆𑀢𑀸𑀯𑀢𑀸 𑀓𑀺𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺? 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀕𑀫𑀦𑀻𑀬𑀧𑀝𑀺𑀧𑀤𑀸, 𑀲𑀢𑀺𑀧𑀝𑁆𑀞𑀸𑀦𑀸𑀧𑀺 𑀳𑀺 𑀧𑀼𑀩𑁆𑀩𑀪𑀸𑀕𑀸𑀬𑁂𑀯, 𑀲𑀫𑁆𑀧𑀚𑀜𑁆𑀜𑁂𑀧𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀯𑀬𑀸𑀦𑀼𑀧𑀲𑁆𑀲𑀦𑀸 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀢𑀺 𑀘 𑀇𑀫𑀸𑀧𑀺 𑀢𑀺𑀲𑁆𑀲𑁄 𑀅𑀦𑀼𑀧𑀲𑁆𑀲𑀦𑀸 𑀧𑀼𑀩𑁆𑀩𑀪𑀸𑀕𑀸𑀬𑁂𑀯, 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀧𑀺 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀧𑀺 𑀇𑀫𑀸 𑀤𑁆𑀯𑁂 𑀫𑀺𑀲𑁆𑀲𑀓𑀸. 𑀏𑀢𑁆𑀢𑀸𑀯𑀢𑀸 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀪𑀸𑀯𑀦𑀸𑀓𑀸𑀮𑁄 𑀤𑀲𑁆𑀲𑀺𑀢𑁄𑀢𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁮-𑁯. 𑀤𑀼𑀢𑀺𑀬𑀕𑁂𑀮𑀜𑁆𑀜𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁫𑁬-𑁨𑁫𑁭. 𑀅𑀝𑁆𑀞𑀫𑁂 𑀇𑀫𑀫𑁂𑀯 𑀨𑀲𑁆𑀲𑀁 𑀧𑀝𑀺𑀘𑁆𑀘𑀸𑀢𑀺 𑀯𑀼𑀢𑁆𑀢𑁂 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑁂𑀦 𑀯𑀼𑀢𑁆𑀢𑀁, 𑀅𑀢𑁆𑀣𑀢𑁄 𑀧𑀦𑁂𑀢𑀁 𑀦𑀺𑀦𑁆𑀦𑀸𑀦𑀸𑀓𑀭𑀡𑀁. 𑀓𑀸𑀬𑁄𑀯 𑀳𑀺 𑀏𑀢𑁆𑀣 𑀨𑀲𑁆𑀲𑁄𑀢𑀺 𑀯𑀼𑀢𑁆𑀢𑁄. 𑀦𑀯𑀫𑀁 𑀉𑀢𑁆𑀢𑀸𑀦𑀫𑁂𑀯.

𑁧𑁦. 𑀨𑀲𑁆𑀲𑀫𑀽𑀮𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁮. 𑀤𑀲𑀫𑁂 𑀲𑀼𑀔𑀯𑁂𑀤𑀦𑀺𑀬𑀦𑁆𑀢𑀺 𑀲𑀼𑀔𑀯𑁂𑀤𑀦𑀸𑀬 𑀧𑀘𑁆𑀘𑀬𑀪𑀽𑀢𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑀼𑀧𑀤𑀯𑀡𑁆𑀡𑀦𑀸 𑀧𑀦𑁂𑀢𑁆𑀣 𑀳𑁂𑀝𑁆𑀞𑀸 𑀯𑀺𑀢𑁆𑀣𑀸𑀭𑀺𑀢𑀸𑀯. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑀤𑁆𑀯𑀬𑁂 𑀲𑀫𑁆𑀫𑀲𑀦𑀘𑀸𑀭𑀯𑁂𑀤𑀦𑀸 𑀓𑀣𑀺𑀢𑀸.

𑀲𑀕𑀸𑀣𑀸𑀯𑀕𑁆𑀕𑁄 𑀧𑀞𑀫𑁄.

𑁨. 𑀭𑀳𑁄𑀕𑀢𑀯𑀕𑁆𑀕𑁄

𑁧. 𑀭𑀳𑁄𑀕𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁯. 𑀭𑀳𑁄𑀕𑀢𑀯𑀕𑁆𑀕𑀲𑁆𑀲 𑀧𑀞𑀫𑁂 𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀢𑀁 𑀤𑀼𑀓𑁆𑀔𑀲𑁆𑀫𑀺𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀢𑀁 𑀲𑀩𑁆𑀩𑀁 𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀣𑁄. 𑀲𑀗𑁆𑀔𑀸𑀭𑀸𑀦𑀁𑀬𑁂𑀯 𑀅𑀦𑀺𑀘𑁆𑀘𑀢𑀦𑁆𑀢𑀺𑀆𑀤𑀻𑀲𑀼 𑀬𑀸 𑀏𑀲𑀸 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀢𑀸 𑀔𑀬𑀥𑀫𑁆𑀫𑀢𑀸 𑀯𑀬𑀥𑀫𑁆𑀫𑀢𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀢𑀸, 𑀏𑀢𑀁 𑀲𑀦𑁆𑀥𑀸𑀬 𑀬𑀁 𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀢𑀁 𑀤𑀼𑀓𑁆𑀔𑀦𑁆𑀢𑀺 𑀫𑀬𑀸 𑀪𑀸𑀲𑀺𑀢𑀦𑁆𑀢𑀺 𑀤𑀻𑀧𑁂𑀢𑀺. 𑀬𑀸 𑀳𑀺 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀢𑀸, 𑀯𑁂𑀤𑀦𑀸𑀦𑀫𑁆𑀧𑀺 𑀲𑀸 𑀅𑀦𑀺𑀘𑁆𑀘𑀢𑀸 𑀏𑀯. 𑀅𑀦𑀺𑀘𑁆𑀘𑀢𑀸 𑀘 𑀦𑀸𑀫𑁂𑀲𑀸 𑀫𑀭𑀡𑀁, 𑀫𑀭𑀡𑀢𑁄 𑀉𑀢𑁆𑀢𑀭𑀺 𑀤𑀼𑀓𑁆𑀔𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀲𑀩𑁆𑀩𑀸 𑀯𑁂𑀤𑀦𑀸 𑀤𑀼𑀓𑁆𑀔𑀸𑀢𑀺 𑀯𑀼𑀢𑁆𑀢𑀸. 𑀅𑀣 𑀔𑁄 𑀧𑀦 𑀪𑀺𑀓𑁆𑀔𑀼 𑀫𑀬𑀸𑀢𑀺 𑀇𑀤𑀁 𑀦 𑀓𑁂𑀯𑀮𑀁 𑀅𑀳𑀁 𑀯𑁂𑀤𑀦𑀸𑀦𑀁𑀬𑁂𑀯 𑀦𑀺𑀭𑁄𑀥𑀁 𑀧𑀜𑁆𑀜𑀸𑀧𑁂𑀫𑀺, 𑀇𑀫𑁂𑀲𑀫𑁆𑀧𑀺 𑀥𑀫𑁆𑀫𑀸𑀦𑀁 𑀦𑀺𑀭𑁄𑀥𑀁 𑀧𑀜𑁆𑀜𑀸𑀧𑁂𑀫𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀆𑀭𑀤𑁆𑀥𑀁. 𑀯𑀽𑀧𑀲𑀫𑁄 𑀘 𑀧𑀲𑁆𑀲𑀤𑁆𑀥𑀺𑀬𑁄 𑀘 𑀏𑀯𑀭𑀽𑀧𑀸𑀬 𑀤𑁂𑀲𑀦𑀸𑀬 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑁂𑀦 𑀯𑀼𑀢𑁆𑀢𑀸. 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁨-𑁩. 𑀧𑀞𑀫𑀆𑀓𑀸𑀲𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁬𑁦-𑁨𑁬𑁧. 𑀤𑀼𑀢𑀺𑀬𑁂 𑀧𑀼𑀣𑀽 𑀯𑀸𑀬𑀦𑁆𑀢𑀺 𑀫𑀸𑀮𑀼𑀢𑀸𑀢𑀺 𑀩𑀳𑀽 𑀯𑀸𑀢𑀸 𑀯𑀸𑀬𑀦𑁆𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺. 𑀢𑀢𑀺𑀬𑀁 𑀯𑀺𑀦𑀸 𑀕𑀸𑀣𑀸𑀳𑀺 𑀩𑀼𑀚𑁆𑀛𑀦𑁆𑀢𑀸𑀦𑀁 𑀅𑀚𑁆𑀛𑀸𑀲𑀬𑁂𑀦 𑀯𑀼𑀢𑁆𑀢𑀁.

𑁪. 𑀅𑀕𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁨. 𑀘𑀢𑀼𑀢𑁆𑀣𑁂 𑀧𑀼𑀭𑀢𑁆𑀣𑀺𑀫𑀸𑀢𑀺 𑀧𑀼𑀭𑀢𑁆𑀣𑀺𑀫𑀸𑀬. 𑀏𑀯𑀁 𑀲𑀩𑁆𑀩𑀢𑁆𑀣. 𑀲𑀸𑀫𑀺𑀲𑀸𑀧𑀺 𑀲𑀼𑀔𑀸 𑀯𑁂𑀤𑀦𑀸𑀢𑀺𑀆𑀤𑀻𑀲𑀼 𑀲𑀸𑀫𑀺𑀲𑀸 𑀲𑀼𑀔𑀸 𑀦𑀸𑀫 𑀓𑀸𑀫𑀸𑀫𑀺𑀲𑀧𑀝𑀺𑀲𑀁𑀬𑀼𑀢𑁆𑀢𑀸 𑀯𑁂𑀤𑀦𑀸. 𑀦𑀺𑀭𑀸𑀫𑀺𑀲𑀸 𑀲𑀼𑀔𑀸 𑀦𑀸𑀫 𑀧𑀞𑀫𑀚𑁆𑀛𑀸𑀦𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀦𑀼𑀲𑁆𑀲𑀢𑀺𑀯𑀲𑁂𑀦 𑀘 𑀉𑀧𑁆𑀧𑀦𑁆𑀦𑀸 𑀯𑁂𑀤𑀦𑀸. 𑀲𑀸𑀫𑀺𑀲𑀸 𑀤𑀼𑀓𑁆𑀔𑀸 𑀦𑀸𑀫 𑀓𑀸𑀫𑀸𑀫𑀺𑀲𑁂𑀦𑁂𑀯 𑀲𑀸𑀫𑀺𑀲𑀸 𑀯𑁂𑀤𑀦𑀸, 𑀦𑀺𑀭𑀸𑀫𑀺𑀲𑀸 𑀤𑀼𑀓𑁆𑀔𑀸 𑀦𑀸𑀫 𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀼 𑀧𑀺𑀳𑀁 𑀉𑀧𑀝𑁆𑀞𑀸𑀧𑀬𑀢𑁄 𑀧𑀺𑀳𑀧𑀘𑁆𑀘𑀬𑀸 𑀉𑀧𑁆𑀧𑀦𑁆𑀦𑀤𑁄𑀫𑀦𑀲𑁆𑀲𑀯𑁂𑀤𑀦𑀸. 𑀲𑀸𑀫𑀺𑀲𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀦𑀸𑀫 𑀓𑀸𑀫𑀸𑀫𑀺𑀲𑁂𑀦𑁂𑀯 𑀲𑀸𑀫𑀺𑀲𑀸 𑀯𑁂𑀤𑀦𑀸. 𑀦𑀺𑀭𑀸𑀫𑀺𑀲𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀦𑀸𑀫 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸.

𑁫-𑁮. 𑀧𑀞𑀫𑀆𑀦𑀦𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁬𑁩-𑁨𑁬𑁬. 𑀧𑀜𑁆𑀘𑀫𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀳𑁂𑀝𑁆𑀞𑀸 𑀓𑀣𑀺𑀢𑀦𑀬𑀸𑀦𑁂𑀯. 𑀧𑀼𑀭𑀺𑀫𑀸𑀦𑀺 𑀧𑀦𑁂𑀢𑁆𑀣 𑀤𑁆𑀯𑁂 𑀧𑀭𑀺𑀧𑀼𑀡𑁆𑀡𑀧𑀲𑁆𑀲𑀤𑁆𑀥𑀺𑀓𑀸𑀦𑀺, 𑀧𑀘𑁆𑀙𑀺𑀫𑀸𑀦𑀺 𑀉𑀧𑀟𑁆𑀠𑀧𑀲𑁆𑀲𑀤𑁆𑀥𑀺𑀓𑀸𑀦𑀺. 𑀤𑁂𑀲𑀦𑀸𑀬 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑁂𑀦 𑀯𑀼𑀢𑁆𑀢𑀸𑀦𑀺.

𑁯-𑁧𑁦. 𑀧𑀜𑁆𑀘𑀓𑀗𑁆𑀕𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁬𑁭-𑁨𑁬𑁮. 𑀦𑀯𑀫𑁂 𑀧𑀜𑁆𑀘𑀓𑀗𑁆𑀕𑁄 𑀣𑀧𑀢𑀻𑀢𑀺 𑀧𑀜𑁆𑀘𑀓𑀗𑁆𑀕𑁄𑀢𑀺 𑀢𑀲𑁆𑀲 𑀦𑀸𑀫𑀁, 𑀯𑀸𑀲𑀺𑀨𑀭𑀲𑀼𑀦𑀺𑀔𑀸𑀤𑀦𑀤𑀡𑁆𑀟𑀫𑀼𑀕𑁆𑀕𑀭𑀓𑀸𑀴𑀲𑀼𑀢𑁆𑀢𑀦𑀸𑀴𑀺𑀲𑀗𑁆𑀔𑀸𑀢𑁂𑀳𑀺 𑀯𑀸 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑁄 𑀧𑀜𑁆𑀘𑀓𑀗𑁆𑀕𑁄𑀢𑀺 𑀧𑀜𑁆𑀜𑀸𑀢𑁄. 𑀣𑀧𑀢𑀻𑀢𑀺 𑀯𑀟𑁆𑀠𑀓𑀻𑀚𑁂𑀝𑁆𑀞𑀓𑁄. 𑀉𑀤𑀸𑀬𑀻𑀢𑀺 𑀧𑀡𑁆𑀟𑀺𑀢𑀉𑀤𑀸𑀬𑀺𑀢𑁆𑀣𑁂𑀭𑁄. 𑀧𑀭𑀺𑀬𑀸𑀬𑀦𑁆𑀢𑀺 𑀓𑀸𑀭𑀡𑀁. 𑀤𑁆𑀯𑁂𑀧𑀸𑀦𑀦𑁆𑀤𑀸𑀢𑀺 𑀤𑁆𑀯𑁂𑀧𑀺, 𑀆𑀦𑀦𑁆𑀤, 𑀧𑀭𑀺𑀬𑀸𑀬𑁂𑀦𑀸𑀢𑀺 𑀓𑀸𑀭𑀡𑁂𑀦. 𑀏𑀢𑁆𑀣 𑀘 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀲𑁂𑀦 𑀤𑁆𑀯𑁂 𑀯𑁂𑀤𑀺𑀢𑀩𑁆𑀩𑀸, 𑀲𑀼𑀔𑀸𑀤𑀺𑀯𑀲𑁂𑀦 𑀢𑀺𑀲𑁆𑀲𑁄𑀧𑀺, 𑀇𑀦𑁆𑀤𑁆𑀭𑀺𑀬𑀯𑀲𑁂𑀦 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀺𑀓𑀸 𑀧𑀜𑁆𑀘, 𑀤𑁆𑀯𑀸𑀭𑀯𑀲𑁂𑀦 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸𑀤𑀺𑀓𑀸 𑀙, 𑀉𑀧𑀯𑀺𑀘𑀸𑀭𑀯𑀲𑁂𑀦 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀲𑁄𑀫𑀦𑀲𑁆𑀲𑀞𑀸𑀦𑀺𑀬𑀁 𑀭𑀽𑀧𑀁 𑀉𑀧𑀯𑀺𑀘𑀭𑀢𑀻’’𑀢𑀺𑀆𑀤𑀺𑀓𑀸 𑀅𑀝𑁆𑀞𑀸𑀭𑀲, 𑀙 𑀕𑁂𑀳𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺, 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺, 𑀙 𑀕𑁂𑀳𑀲𑀺𑀢𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺, 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀦𑀺, 𑀙 𑀕𑁂𑀳𑀲𑀺𑀢𑀸 𑀉𑀧𑁂𑀓𑁆𑀔𑀸, 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀢𑀺 𑀏𑀯𑀁 𑀙𑀢𑁆𑀢𑀺𑀁𑀲. 𑀢𑀸 𑀅𑀢𑀻𑀢𑁂 𑀙𑀢𑁆𑀢𑀺𑀁𑀲, 𑀅𑀦𑀸𑀕𑀢𑁂 𑀙𑀢𑁆𑀢𑀺𑀁𑀲, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀙𑀢𑁆𑀢𑀺𑀁𑀲𑀸𑀢𑀺 𑀏𑀯𑀁 𑀅𑀝𑁆𑀞𑀲𑀢𑀁 𑀯𑁂𑀤𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀧𑀜𑁆𑀘𑀺𑀫𑁂 𑀆𑀦𑀦𑁆𑀤 𑀓𑀸𑀫𑀕𑀼𑀡𑀸𑀢𑀺 𑀅𑀬𑀁 𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀺. 𑀦 𑀓𑁂𑀯𑀮𑀜𑁆𑀳𑀺 𑀤𑁆𑀯𑁂 𑀆𑀤𑀺𑀁 𑀓𑀢𑁆𑀯𑀸 𑀯𑁂𑀤𑀦𑀸 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀸, 𑀧𑀭𑀺𑀬𑀸𑀬𑁂𑀦 𑀏𑀓𑀸𑀧𑀺 𑀯𑁂𑀤𑀦𑀸 𑀓𑀣𑀺𑀢𑀸, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀧𑀜𑁆𑀘𑀓𑀗𑁆𑀕𑀲𑁆𑀲 𑀣𑀧𑀢𑀺𑀦𑁄 𑀯𑀸𑀤𑀁 𑀉𑀧𑀢𑁆𑀣𑀫𑁆𑀪𑁂𑀢𑀼𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀅𑀪𑀺𑀓𑁆𑀓𑀦𑁆𑀢𑀢𑀭𑀦𑁆𑀢𑀺 𑀲𑀼𑀦𑁆𑀤𑀭𑀢𑀭𑀁. 𑀧𑀡𑀻𑀢𑀢𑀭𑀦𑁆𑀢𑀺 𑀅𑀢𑀧𑁆𑀧𑀓𑀢𑀭𑀁. 𑀏𑀢𑁆𑀣 𑀘 𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀧𑀝𑁆𑀞𑀸𑀬 𑀅𑀤𑀼𑀓𑁆𑀔𑀫𑀲𑀼𑀔𑀸 𑀯𑁂𑀤𑀦𑀸, 𑀲𑀸𑀧𑀺 𑀲𑀦𑁆𑀢𑀝𑁆𑀞𑁂𑀦 𑀧𑀡𑀻𑀢𑀝𑁆𑀞𑁂𑀦 𑀘 𑀲𑀼𑀔𑀦𑁆𑀢𑀺 𑀯𑀼𑀢𑁆𑀢𑀸. 𑀦𑀺𑀭𑁄𑀥𑁄 𑀅𑀯𑁂𑀤𑀬𑀺𑀢𑀲𑀼𑀔𑀯𑀲𑁂𑀦 𑀲𑀼𑀔𑀁 𑀦𑀸𑀫 𑀚𑀸𑀢𑁄. 𑀧𑀜𑁆𑀘𑀓𑀸𑀫𑀕𑀼𑀡𑀯𑀲𑁂𑀦 𑀳𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀘 𑀉𑀧𑁆𑀧𑀦𑁆𑀦𑀁 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀦𑀸𑀫, 𑀦𑀺𑀭𑁄𑀥𑁄 𑀅𑀯𑁂𑀤𑀬𑀺𑀢𑀲𑀼𑀔𑀁 𑀦𑀸𑀫. 𑀇𑀢𑀺 𑀯𑁂𑀤𑀬𑀺𑀢𑀲𑀼𑀔𑀁 𑀯𑀸 𑀳𑁄𑀢𑀼 𑀅𑀯𑁂𑀤𑀬𑀺𑀢𑀲𑀼𑀔𑀁 𑀯𑀸, 𑀦𑀺𑀤𑁆𑀤𑀼𑀓𑁆𑀔𑀪𑀸𑀯𑀲𑀗𑁆𑀔𑀸𑀢𑁂𑀦 𑀲𑀼𑀔𑀝𑁆𑀞𑁂𑀦 𑀏𑀓𑀦𑁆𑀢𑀲𑀼𑀔𑀫𑁂𑀯 𑀚𑀸𑀢𑀁.

𑀬𑀢𑁆𑀣 𑀬𑀢𑁆𑀣𑀸𑀢𑀺 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀞𑀸𑀦𑁂. 𑀲𑀼𑀔𑀁 𑀉𑀧𑀮𑀩𑁆𑀪𑀢𑀻𑀢𑀺 𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀅𑀯𑁂𑀤𑀬𑀺𑀢𑀁 𑀲𑀼𑀔𑀁 𑀯𑀸 𑀉𑀧𑀮𑀩𑁆𑀪𑀢𑀺. 𑀢𑀁 𑀢𑀁 𑀢𑀣𑀸𑀕𑀢𑁄 𑀲𑀼𑀔𑀲𑁆𑀫𑀺𑀁 𑀧𑀜𑁆𑀜𑀧𑁂𑀢𑀺, 𑀢𑀁 𑀲𑀩𑁆𑀩𑀁 𑀢𑀣𑀸𑀕𑀢𑁄 𑀦𑀺𑀤𑁆𑀤𑀼𑀓𑁆𑀔𑀪𑀸𑀯𑀁 𑀲𑀼𑀔𑀲𑁆𑀫𑀺𑀁𑀬𑁂𑀯 𑀧𑀜𑁆𑀜𑀧𑁂𑀢𑀻𑀢𑀺 𑀇𑀥 𑀪𑀕𑀯𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀻𑀲𑀁 𑀓𑀢𑁆𑀯𑀸 𑀦𑁂𑀬𑁆𑀬𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦𑁂𑀯 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺. 𑀤𑀲𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀭𑀳𑁄𑀕𑀢𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀅𑀝𑁆𑀞𑀲𑀢𑀧𑀭𑀺𑀬𑀸𑀬𑀯𑀕𑁆𑀕𑁄

𑁧. 𑀲𑀻𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁯. 𑀢𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀫𑁄𑀴𑀺𑀬𑀲𑀻𑀯𑀓𑁄𑀢𑀺 𑀲𑀻𑀯𑀓𑁄𑀢𑀺 𑀢𑀲𑁆𑀲 𑀦𑀸𑀫𑀁. 𑀘𑀽𑀴𑀸 𑀧𑀦𑀲𑁆𑀲 𑀅𑀢𑁆𑀣𑀺, 𑀢𑀲𑁆𑀫𑀸 𑀫𑁄𑀴𑀺𑀬𑀲𑀻𑀯𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀧𑀭𑀺𑀩𑁆𑀩𑀸𑀚𑀓𑁄𑀢𑀺 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑁄. 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀻𑀢𑀺 𑀧𑀺𑀢𑁆𑀢𑀧𑀘𑁆𑀘𑀬𑀸𑀦𑀺. 𑀯𑁂𑀤𑀬𑀺𑀢𑀸𑀦𑀻𑀢𑀺 𑀯𑁂𑀤𑀦𑀸. 𑀢𑀢𑁆𑀣 𑀧𑀺𑀢𑁆𑀢𑀧𑀘𑁆𑀘𑀬𑀸 𑀢𑀺𑀲𑁆𑀲𑁄 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀓𑀣𑀁? 𑀏𑀓𑀘𑁆𑀘𑁄 𑀳𑀺 ‘‘𑀧𑀺𑀢𑁆𑀢𑀁 𑀫𑁂 𑀓𑀼𑀧𑀺𑀢𑀁 𑀤𑀼𑀚𑁆𑀚𑀸𑀦𑀁 𑀔𑁄 𑀧𑀦 𑀚𑀻𑀯𑀺𑀢’’𑀦𑁆𑀢𑀺 𑀤𑀸𑀦𑀁 𑀤𑁂𑀢𑀺, 𑀲𑀻𑀮𑀁 𑀲𑀫𑀸𑀤𑀺𑀬𑀢𑀺 𑀉𑀧𑁄𑀲𑀣𑀓𑀫𑁆𑀫𑀁 𑀓𑀭𑁄𑀢𑀺, 𑀏𑀯𑀫𑀲𑁆𑀲 𑀓𑀼𑀲𑀮𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀏𑀓𑀘𑁆𑀘𑁄 ‘‘𑀧𑀺𑀢𑁆𑀢𑀪𑁂𑀲𑀚𑁆𑀚𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀧𑀸𑀡𑀁 𑀳𑀦𑀢𑀺, 𑀅𑀤𑀺𑀦𑁆𑀦𑀁 𑀆𑀤𑀺𑀬𑀢𑀺, 𑀫𑀼𑀲𑀸 𑀪𑀡𑀢𑀺, 𑀤𑀲 𑀤𑀼𑀲𑁆𑀲𑀻𑀮𑁆𑀬𑀓𑀫𑁆𑀫𑀸𑀦𑀺 𑀓𑀭𑁄𑀢𑀺, 𑀏𑀯𑀫𑀲𑁆𑀲 𑀅𑀓𑀼𑀲𑀮𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀏𑀓𑀘𑁆𑀘𑁄 ‘‘𑀏𑀢𑁆𑀢𑀓𑁂𑀦𑀧𑀺 𑀫𑁂 𑀪𑁂𑀲𑀚𑁆𑀚𑀓𑀭𑀡𑁂𑀦 𑀧𑀺𑀢𑁆𑀢𑀁 𑀦 𑀯𑀽𑀧𑀲𑀫𑁆𑀫𑀢𑀺, 𑀅𑀮𑀁 𑀬𑀁 𑀳𑁄𑀢𑀺. 𑀢𑀁 𑀳𑁄𑀢𑀽’’𑀢𑀺 𑀫𑀚𑁆𑀛𑀢𑁆𑀢𑁄 𑀓𑀸𑀬𑀺𑀓𑀯𑁂𑀤𑀦𑀁 𑀅𑀥𑀺𑀯𑀸𑀲𑁂𑀦𑁆𑀢𑁄 𑀦𑀺𑀧𑀚𑁆𑀚𑀢𑀺, 𑀏𑀯𑀁 𑀅𑀲𑁆𑀲 𑀅𑀩𑁆𑀬𑀸𑀓𑀢𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺.

𑀲𑀸𑀫𑀫𑁆𑀧𑀺 𑀔𑁄 𑀏𑀢𑀦𑁆𑀢𑀺 𑀢𑀁 𑀢𑀁 𑀧𑀺𑀢𑁆𑀢𑀯𑀺𑀓𑀸𑀭𑀁 𑀤𑀺𑀲𑁆𑀯𑀸 𑀅𑀢𑁆𑀢𑀦𑀸𑀧𑀺 𑀏𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀘𑁆𑀘𑀲𑀫𑁆𑀫𑀢𑀦𑁆𑀢𑀺 𑀪𑀽𑀢𑀲𑀫𑁆𑀫𑀢𑀁. 𑀮𑁄𑀓𑁄𑀧𑀺 𑀳𑀺𑀲𑁆𑀲 𑀲𑀭𑀻𑀭𑁂 𑀲𑀩𑀮𑀯𑀡𑁆𑀡𑀢𑀸𑀤𑀺𑀧𑀺𑀢𑁆𑀢𑀯𑀺𑀓𑀸𑀭𑀁 𑀤𑀺𑀲𑁆𑀯𑀸 ‘‘𑀧𑀺𑀢𑁆𑀢𑀫𑀲𑁆𑀲 𑀓𑀼𑀧𑀺𑀢’’𑀦𑁆𑀢𑀺 𑀚𑀸𑀦𑀸𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀸𑀫𑀜𑁆𑀘 𑀯𑀺𑀤𑀺𑀢𑀁 𑀮𑁄𑀓𑀲𑁆𑀲 𑀘 𑀲𑀘𑁆𑀘𑀲𑀫𑁆𑀫𑀢𑀁 𑀅𑀢𑀺𑀥𑀸𑀯𑀦𑁆𑀢𑀺, 𑀢𑀲𑁆𑀫𑀸. 𑀲𑁂𑀫𑁆𑀳𑀲𑀫𑀼𑀝𑁆𑀞𑀸𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀧𑀦 𑀲𑀦𑁆𑀦𑀺𑀧𑀸𑀢𑀺𑀓𑀸𑀦𑀻𑀢𑀺 𑀢𑀺𑀡𑁆𑀡𑀫𑁆𑀧𑀺 𑀧𑀺𑀢𑁆𑀢𑀸𑀤𑀻𑀦𑀁 𑀓𑁄𑀧𑁂𑀦 𑀲𑀫𑀼𑀝𑁆𑀞𑀺𑀢𑀸𑀦𑀺. 𑀉𑀢𑀼𑀧𑀭𑀺𑀡𑀸𑀫𑀚𑀸𑀦𑀻𑀢𑀺 𑀯𑀺𑀲𑀪𑀸𑀕𑀉𑀢𑀼𑀢𑁄 𑀚𑀸𑀢𑀸𑀦𑀺. 𑀚𑀗𑁆𑀕𑀮𑀤𑁂𑀲𑀯𑀸𑀲𑀻𑀦𑀜𑁆𑀳𑀺 𑀅𑀦𑀼𑀧𑀤𑁂𑀲𑁂 𑀯𑀲𑀦𑁆𑀢𑀸𑀦𑀁 𑀯𑀺𑀲𑀪𑀸𑀕𑁄 𑀉𑀢𑀼 𑀉𑀧𑁆𑀧𑀚𑁆𑀚𑀢𑀺, 𑀅𑀦𑀼𑀧𑀤𑁂𑀲𑀯𑀸𑀲𑀻𑀦𑀜𑁆𑀘 𑀚𑀗𑁆𑀕𑀮𑀤𑁂𑀲𑁂𑀢𑀺 𑀏𑀯𑀁 𑀫𑀮𑀬𑀲𑀫𑀼𑀤𑁆𑀤𑀢𑀻𑀭𑀸𑀤𑀺𑀯𑀲𑁂𑀦𑀸𑀧𑀺 𑀉𑀢𑀼𑀯𑀺𑀲𑀪𑀸𑀕𑀢𑀸 𑀉𑀧𑁆𑀧𑀚𑁆𑀚𑀢𑀺𑀬𑁂𑀯. 𑀢𑀢𑁄 𑀚𑀸𑀢𑀸𑀢𑀺 𑀉𑀢𑀼𑀧𑀭𑀺𑀡𑀸𑀫𑀚𑀸𑀢𑀸𑀦𑀺 𑀦𑀸𑀫.

𑀯𑀺𑀲𑀫𑀧𑀭𑀺𑀳𑀸𑀭𑀚𑀸𑀦𑀻𑀢𑀺 𑀫𑀳𑀸𑀪𑀸𑀭𑀯𑀳𑀦𑀲𑀼𑀥𑀸𑀓𑁄𑀝𑁆𑀝𑀦𑀸𑀤𑀺𑀢𑁄 𑀯𑀸 𑀅𑀯𑁂𑀮𑀸𑀬 𑀘𑀭𑀦𑁆𑀢𑀲𑁆𑀲 𑀲𑀧𑁆𑀧𑀟𑀁𑀲𑀓𑀽𑀧𑀧𑀸𑀢𑀸𑀤𑀺𑀢𑁄 𑀯𑀸 𑀯𑀺𑀲𑀫𑀧𑀭𑀺𑀳𑀸𑀭𑀢𑁄 𑀚𑀸𑀢𑀸𑀦𑀺. 𑀑𑀧𑀓𑁆𑀓𑀫𑀺𑀓𑀸𑀦𑀻𑀢𑀺 ‘‘𑀅𑀬𑀁 𑀘𑁄𑀭𑁄 𑀯𑀸 𑀧𑀸𑀭𑀤𑀸𑀭𑀺𑀓𑁄 𑀯𑀸’’𑀢𑀺 𑀕𑀳𑁂𑀢𑁆𑀯𑀸 𑀚𑀡𑁆𑀡𑀼𑀓𑀓𑀧𑁆𑀧𑀭𑀫𑀼𑀕𑁆𑀕𑀭𑀸𑀤𑀻𑀳𑀺 𑀦𑀺𑀧𑁆𑀧𑁄𑀣𑀦𑀉𑀧𑀓𑁆𑀓𑀫𑀁 𑀧𑀘𑁆𑀘𑀬𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀸𑀦𑀺. 𑀏𑀢𑀁 𑀩𑀳𑀺 𑀉𑀧𑀓𑁆𑀓𑀫𑀁 𑀮𑀪𑀺𑀢𑁆𑀯𑀸 𑀓𑁄𑀘𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀼𑀲𑀮𑀁 𑀓𑀭𑁄𑀢𑀺, 𑀓𑁄𑀘𑀺 𑀅𑀓𑀼𑀲𑀮𑀁, 𑀓𑁄𑀘𑀺 𑀅𑀥𑀺𑀯𑀸𑀲𑁂𑀦𑁆𑀢𑁄 𑀦𑀺𑀧𑀚𑁆𑀚𑀢𑀺. 𑀓𑀫𑁆𑀫𑀯𑀺𑀧𑀸𑀓𑀚𑀸𑀦𑀻𑀢𑀺 𑀓𑁂𑀯𑀮𑀁 𑀓𑀫𑁆𑀫𑀯𑀺𑀧𑀸𑀓𑀢𑁄, 𑀚𑀸𑀢𑀸𑀦𑀺. 𑀢𑁂𑀲𑀼𑀧𑀺 𑀳𑀺 𑀉𑀧𑁆𑀧𑀦𑁆𑀦𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑁄𑀘𑀺 𑀓𑀼𑀲𑀮𑀁 𑀓𑀭𑁄𑀢𑀺, 𑀓𑁄𑀘𑀺 𑀅𑀓𑀼𑀲𑀮𑀁, 𑀓𑁄𑀘𑀺 𑀅𑀥𑀺𑀯𑀸𑀲𑁂𑀦𑁆𑀢𑁄 𑀦𑀺𑀧𑀚𑁆𑀚𑀢𑀺. 𑀏𑀯𑀁 𑀲𑀩𑁆𑀩𑀯𑀸𑀭𑁂𑀲𑀼 𑀢𑀺𑀯𑀺𑀥𑀸𑀯 𑀯𑁂𑀤𑀦𑀸 𑀳𑁄𑀦𑁆𑀢𑀺.

𑀢𑀢𑁆𑀣 𑀧𑀼𑀭𑀺𑀫𑁂𑀳𑀺 𑀲𑀢𑁆𑀢𑀳𑀺 𑀓𑀸𑀭𑀡𑁂𑀳𑀺 𑀉𑀧𑁆𑀧𑀦𑁆𑀦𑀸 𑀲𑀸𑀭𑀻𑀭𑀺𑀓𑀸 𑀯𑁂𑀤𑀦𑀸 𑀲𑀓𑁆𑀓𑀸 𑀧𑀝𑀺𑀩𑀸𑀳𑀺𑀢𑀼𑀁, 𑀓𑀫𑁆𑀫𑀯𑀺𑀧𑀸𑀓𑀚𑀸𑀦𑀁 𑀧𑀦 𑀲𑀩𑁆𑀩𑀪𑁂𑀲𑀚𑁆𑀚𑀸𑀦𑀺𑀧𑀺 𑀲𑀩𑁆𑀩𑀧𑀭𑀺𑀢𑁆𑀢𑀸𑀦𑀺𑀧𑀺 𑀦𑀸𑀮𑀁 𑀧𑀝𑀺𑀖𑀸𑀢𑀸𑀬. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀮𑁄𑀓𑀯𑁄𑀳𑀸𑀭𑁄 𑀦𑀸𑀫 𑀓𑀣𑀺𑀢𑁄𑀢𑀺.

𑁨-𑁧𑁦. 𑀅𑀝𑁆𑀞𑀲𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁭𑁦-𑁨𑁭𑁮. 𑀤𑀼𑀢𑀺𑀬𑁂 𑀅𑀝𑁆𑀞𑀲𑀢𑀧𑀭𑀺𑀬𑀸𑀬𑀦𑁆𑀢𑀺 𑀅𑀝𑁆𑀞𑀲𑀢𑀲𑁆𑀲 𑀓𑀸𑀭𑀡𑀪𑀽𑀢𑀁. 𑀥𑀫𑁆𑀫𑀧𑀭𑀺𑀬𑀸𑀬𑀦𑁆𑀢𑀺 𑀥𑀫𑁆𑀫𑀓𑀸𑀭𑀡𑀁. 𑀓𑀸𑀬𑀺𑀓𑀸 𑀘 𑀘𑁂𑀢𑀲𑀺𑀓𑀸 𑀘𑀸𑀢𑀺 𑀏𑀢𑁆𑀣 𑀓𑀸𑀬𑀺𑀓𑀸 𑀓𑀸𑀫𑀸𑀯𑀘𑀭𑁂𑀬𑁂𑀯 𑀮𑀩𑁆𑀪𑀦𑁆𑀢𑀺, 𑀘𑁂𑀢𑀲𑀺𑀓𑀸 𑀘𑀢𑀼𑀪𑀽𑀫𑀺𑀓𑀸𑀧𑀺. 𑀲𑀼𑀔𑀸𑀢𑀺𑀆𑀤𑀻𑀲𑀼 𑀲𑀼𑀔𑀸 𑀯𑁂𑀤𑀦𑀸 𑀅𑀭𑀽𑀧𑀸𑀯𑀘𑀭𑁂 𑀦𑀢𑁆𑀣𑀺, 𑀲𑁂𑀲𑀸𑀲𑀼 𑀢𑀻𑀲𑀼 𑀪𑀽𑀫𑀻𑀲𑀼 𑀮𑀩𑁆𑀪𑀦𑁆𑀢𑀺, 𑀤𑀼𑀓𑁆𑀔𑀸 𑀓𑀸𑀫𑀸𑀯𑀘𑀭𑀸𑀯, 𑀇𑀢𑀭𑀸 𑀘𑀢𑀼𑀪𑀽𑀫𑀺𑀓𑀸. 𑀧𑀜𑁆𑀘𑀓𑁂 𑀲𑀼𑀔𑀺𑀦𑁆𑀤𑁆𑀭𑀺𑀬𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑁂𑀯, 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀢𑁂𑀪𑀽𑀫𑀓𑀁, 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀘𑀢𑀼𑀪𑀽𑀫𑀓𑀁. 𑀙𑀓𑁆𑀓𑁂 𑀧𑀜𑁆𑀘𑀲𑀼 𑀤𑁆𑀯𑀸𑀭𑁂𑀲𑀼 𑀯𑁂𑀤𑀦𑀸 𑀓𑀸𑀫𑀸𑀯𑀘𑀭𑀸𑀯, 𑀫𑀦𑁄𑀤𑁆𑀯𑀸𑀭𑁂 𑀘𑀢𑀼𑀪𑀽𑀫𑀺𑀓𑀸, 𑀅𑀝𑁆𑀞𑀸𑀭𑀲𑀓𑁂 𑀙𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂𑀲𑀼 𑀲𑁄𑀫𑀦𑀲𑁆𑀲𑁂𑀦 𑀲𑀳 𑀉𑀧𑀯𑀺𑀘𑀭𑀦𑁆𑀢𑀻𑀢𑀺 𑀲𑁄𑀫𑀦𑀲𑁆𑀲𑀽𑀧𑀯𑀺𑀘𑀸𑀭𑀸. 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀅𑀬𑀁 𑀤𑁂𑀲𑀦𑀸 𑀯𑀺𑀘𑀸𑀭𑀯𑀲𑁂𑀦 𑀆𑀕𑀢𑀸, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀧𑀦 𑀲𑁄𑀫𑀦𑀲𑁆𑀲𑀸𑀤𑀻𑀦𑀁 𑀯𑀲𑁂𑀦 𑀇𑀥 𑀅𑀝𑁆𑀞𑀸𑀭𑀲 𑀯𑁂𑀤𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀙 𑀕𑁂𑀳𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀻𑀢𑀺𑀆𑀤𑀻𑀲𑀼 ‘‘𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀭𑀽𑀧𑀸𑀦𑀁 𑀇𑀝𑁆𑀞𑀸𑀦𑀁 𑀓𑀦𑁆𑀢𑀸𑀦𑀁 𑀫𑀦𑀸𑀧𑀸𑀦𑀁 𑀫𑀦𑁄𑀭𑀫𑀸𑀦𑀁 𑀮𑁄𑀓𑀸𑀫𑀺𑀲𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁 𑀧𑀝𑀺𑀮𑀸𑀪𑀁 𑀯𑀸 𑀧𑀝𑀺𑀮𑀸𑀪𑀢𑁄 𑀲𑀫𑀦𑀼𑀧𑀲𑁆𑀲𑀢𑁄 𑀧𑀼𑀩𑁆𑀩𑁂 𑀯𑀸 𑀧𑀝𑀺𑀮𑀤𑁆𑀥𑀧𑀼𑀩𑁆𑀩𑀁 𑀅𑀢𑀻𑀢𑀁 𑀦𑀺𑀭𑀼𑀤𑁆𑀥𑀁 𑀯𑀺𑀧𑀭𑀺𑀡𑀢𑀁 𑀲𑀫𑀦𑀼𑀲𑁆𑀲𑀭𑀢𑁄 𑀉𑀧𑁆𑀧𑀚𑁆𑀚𑀢𑀺 𑀲𑁄𑀫𑀦𑀲𑁆𑀲𑀁. 𑀬𑀁 𑀏𑀯𑀭𑀽𑀧𑀁 𑀲𑁄𑀫𑀦𑀲𑁆𑀲𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀕𑁂𑀳𑀲𑀺𑀢𑀁 𑀲𑁄𑀫𑀦𑀲𑁆𑀲’’𑀦𑁆𑀢𑀺 (𑀫. 𑀦𑀺. 𑁩.𑁩𑁦𑁬). 𑀏𑀯𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀯𑀼𑀢𑁆𑀢𑀓𑀸𑀫𑀕𑀼𑀡𑀦𑀺𑀲𑁆𑀲𑀺𑀢𑀸𑀦𑀺 𑀲𑁄𑀫𑀦𑀲𑁆𑀲𑀸𑀦𑀺 𑀙 𑀕𑁂𑀳𑀲𑀺𑀢𑀲𑁄𑀫𑀦𑀲𑁆𑀲𑀸𑀦𑀺 𑀦𑀸𑀫.

‘‘𑀭𑀽𑀧𑀸𑀦𑀁 𑀢𑁆𑀯𑁂𑀯 𑀅𑀦𑀺𑀘𑁆𑀘𑀢𑀁 𑀯𑀺𑀤𑀺𑀢𑁆𑀯𑀸 𑀯𑀺𑀧𑀭𑀺𑀡𑀸𑀫𑀯𑀺𑀭𑀸𑀕𑀦𑀺𑀭𑁄𑀥𑀁 ‘𑀧𑀼𑀩𑁆𑀩𑁂 𑀘𑁂𑀯 𑀭𑀽𑀧𑀸 𑀏𑀢𑀭𑀳𑀺 𑀘, 𑀲𑀩𑁆𑀩𑁂 𑀢𑁂 𑀭𑀽𑀧𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄 𑀉𑀧𑁆𑀧𑀚𑁆𑀚𑀢𑀺 𑀲𑁄𑀫𑀦𑀲𑁆𑀲𑀁. 𑀬𑀁 𑀏𑀯𑀭𑀽𑀧𑀁 𑀲𑁄𑀫𑀦𑀲𑁆𑀲𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀦𑁂𑀓𑁆𑀔𑀫𑁆𑀫𑀲𑀺𑀢𑀁 𑀲𑁄𑀫𑀦𑀲𑁆𑀲’’𑀦𑁆𑀢𑀺 (𑀫. 𑀦𑀺. 𑁩.𑁩𑁦𑁬) 𑀏𑀯𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀅𑀦𑀺𑀘𑁆𑀘𑀢𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀲𑁆𑀲 ‘‘𑀉𑀲𑁆𑀲𑀼𑀓𑁆𑀓𑀺𑀢𑀸 𑀫𑁂 𑀯𑀺𑀧𑀲𑁆𑀲𑀦𑀸’’𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑀲𑁆𑀲 𑀉𑀧𑁆𑀧𑀦𑁆𑀦𑀲𑁄𑀫𑀦𑀲𑁆𑀲𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀲𑁄𑀫𑀦𑀲𑁆𑀲𑀸𑀦𑀺 𑀦𑀸𑀫.

‘‘𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀁 𑀭𑀽𑀧𑀸𑀦𑀁 𑀇𑀝𑁆𑀞𑀸𑀦𑀁 𑀓𑀦𑁆𑀢𑀸𑀦𑀁 𑀫𑀦𑀸𑀧𑀸𑀦𑀁 𑀫𑀦𑁄𑀭𑀫𑀸𑀦𑀁 𑀮𑁄𑀓𑀸𑀫𑀺𑀲𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀁 𑀅𑀧𑁆𑀧𑀝𑀺𑀮𑀸𑀪𑀁 𑀯𑀸 𑀅𑀧𑁆𑀧𑀝𑀺𑀮𑀸𑀪𑀢𑁄 𑀲𑀫𑀦𑀼𑀧𑀲𑁆𑀲𑀢𑁄 𑀧𑀼𑀩𑁆𑀩𑁂 𑀯𑀸 𑀧𑀝𑀺𑀮𑀤𑁆𑀥𑀧𑀼𑀩𑁆𑀩𑀁 𑀅𑀢𑀻𑀢𑀁 𑀦𑀺𑀭𑀼𑀤𑁆𑀥𑀁 𑀯𑀺𑀧𑀭𑀺𑀡𑀢𑀁 𑀲𑀫𑀦𑀼𑀲𑁆𑀲𑀭𑀢𑁄 𑀉𑀧𑁆𑀧𑀚𑁆𑀚𑀢𑀺 𑀤𑁄𑀫𑀦𑀲𑁆𑀲𑀁. 𑀬𑀁 𑀏𑀯𑀭𑀽𑀧𑀁 𑀤𑁄𑀫𑀦𑀲𑁆𑀲𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀕𑁂𑀳𑀲𑀺𑀢𑀁 𑀤𑁄𑀫𑀦𑀲𑁆𑀲’’𑀦𑁆𑀢𑀺. 𑀏𑀯𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 ‘‘𑀇𑀝𑁆𑀞𑀸𑀭𑀫𑁆𑀫𑀡𑀁 𑀦𑀸𑀦𑀼𑀪𑀯𑀺𑀲𑁆𑀲𑀸𑀫𑀺 𑀦𑀸𑀦𑀼𑀪𑀯𑀸𑀫𑀻’’𑀢𑀺 𑀯𑀺𑀢𑀓𑁆𑀓𑀬𑀢𑁄 𑀉𑀧𑁆𑀧𑀦𑁆𑀦𑀸𑀦𑀺 𑀓𑀸𑀫𑀕𑀼𑀡𑀦𑀺𑀲𑁆𑀲𑀺𑀢𑀤𑁄𑀫𑀦𑀲𑁆𑀲𑀸𑀦𑀺 𑀙 𑀕𑁂𑀳𑀲𑀺𑀢𑀤𑁄𑀫𑀦𑀲𑁆𑀲𑀸𑀦𑀺 𑀦𑀸𑀫.

‘‘𑀭𑀽𑀧𑀸𑀦𑀁 𑀢𑁆𑀯𑁂𑀯 𑀅𑀦𑀺𑀘𑁆𑀘𑀢𑀁 𑀯𑀺𑀤𑀺𑀢𑁆𑀯𑀸 𑀯𑀺𑀧𑀭𑀺𑀡𑀸𑀫𑀯𑀺𑀭𑀸𑀕𑀦𑀺𑀭𑁄𑀥𑀁 ‘𑀧𑀼𑀩𑁆𑀩𑁂 𑀘𑁂𑀯 𑀭𑀽𑀧𑀸 𑀏𑀢𑀭𑀳𑀺 𑀘, 𑀲𑀩𑁆𑀩𑁂 𑀢𑁂 𑀭𑀽𑀧𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀼 𑀧𑀺𑀳𑀁 𑀉𑀧𑀝𑁆𑀞𑀸𑀧𑁂𑀢𑀺 ‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀁 𑀢𑀤𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀸𑀫𑀺, 𑀬𑀤𑀭𑀺𑀬𑀸 𑀏𑀢𑀭𑀳𑀺 𑀆𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀦𑁆𑀢𑀻’’𑀢𑀺. 𑀇𑀢𑀺 𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀼 𑀧𑀺𑀳𑀁 𑀉𑀧𑀝𑁆𑀞𑀸𑀧𑀬𑀢𑁄 𑀉𑀧𑁆𑀧𑀚𑁆𑀚𑀢𑀺 𑀧𑀺𑀳𑀧𑀘𑁆𑀘𑀬𑀸 𑀤𑁄𑀫𑀦𑀲𑁆𑀲𑀁. 𑀬𑀁 𑀏𑀯𑀭𑀽𑀧𑀁 𑀤𑁄𑀫𑀦𑀲𑁆𑀲𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀦𑁂𑀓𑁆𑀔𑀫𑁆𑀫𑀲𑀺𑀢𑀁 𑀤𑁄𑀫𑀦𑀲𑁆𑀲𑀦𑁆𑀢𑀺; 𑀏𑀯𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀅𑀦𑀼𑀢𑁆𑀢𑀭𑀯𑀺𑀫𑁄𑀓𑁆𑀔𑀲𑀗𑁆𑀔𑀸𑀢𑀅𑀭𑀺𑀬𑀨𑀮𑀥𑀫𑁆𑀫𑁂𑀲𑀼 𑀧𑀺𑀳𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀢𑀤𑀥𑀺𑀕𑀫𑀸𑀬 𑀅𑀦𑀺𑀘𑁆𑀘𑀢𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 ‘‘𑀇𑀫𑀫𑁆𑀧𑀺 𑀧𑀓𑁆𑀔𑀁 𑀇𑀫𑀫𑁆𑀧𑀺 𑀫𑀸𑀲𑀁 𑀇𑀫𑀫𑁆𑀧𑀺 𑀲𑀁𑀯𑀘𑁆𑀙𑀭𑀁 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀺𑀬𑀪𑀽𑀫𑀺𑀁 𑀧𑀸𑀧𑀼𑀡𑀺𑀢𑀼𑀁 𑀦𑀸𑀲𑀓𑁆𑀔𑀺’’𑀦𑁆𑀢𑀺 𑀅𑀦𑀼𑀲𑁄𑀘𑀢𑁄 𑀉𑀧𑁆𑀧𑀦𑁆𑀦𑀸𑀦𑀺 𑀤𑁄𑀫𑀦𑀲𑁆𑀲𑀸𑀦𑀺 𑀙 𑀦𑁂𑀓𑁆𑀔𑀫𑁆𑀫𑀲𑀺𑀢𑀤𑁄𑀫𑀦𑀲𑁆𑀲𑀸𑀦𑀺 𑀦𑀸𑀫.

‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀉𑀧𑁂𑀓𑁆𑀔𑀸 𑀩𑀸𑀮𑀲𑁆𑀲 𑀫𑀽𑀴𑁆𑀳𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀦𑁄𑀥𑀺𑀚𑀺𑀦𑀲𑁆𑀲 𑀅𑀯𑀺𑀧𑀸𑀓𑀚𑀺𑀦𑀲𑁆𑀲 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲. 𑀬𑀸 𑀏𑀯𑀭𑀽𑀧𑀸 𑀉𑀧𑁂𑀓𑁆𑀔𑀸, 𑀭𑀽𑀧𑀁 𑀲𑀸 𑀦𑀸𑀢𑀺𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀲𑀸 𑀉𑀧𑁂𑀓𑁆𑀔𑀸 𑀕𑁂𑀳𑀲𑀺𑀢𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺; 𑀏𑀯𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀕𑀼𑀴𑀧𑀺𑀡𑁆𑀟𑀓𑁂 𑀦𑀺𑀮𑀻𑀦𑀫𑀓𑁆𑀔𑀺𑀓𑀸 𑀯𑀺𑀬 𑀭𑀽𑀧𑀸𑀤𑀻𑀦𑀺 𑀅𑀦𑀢𑀺𑀯𑀢𑁆𑀢𑀫𑀸𑀦𑀸 𑀢𑀢𑁆𑀣𑁂𑀯 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀳𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑀓𑀸𑀫𑀕𑀼𑀡𑀦𑀺𑀲𑁆𑀲𑀺𑀢𑀸 𑀉𑀧𑁂𑀓𑁆𑀔𑀸 𑀙 𑀕𑁂𑀳𑀲𑀺𑀢𑀉𑀧𑁂𑀓𑁆𑀔𑀸 𑀦𑀸𑀫.

‘‘𑀭𑀽𑀧𑀸𑀦𑀁 𑀢𑁆𑀯𑁂𑀯 𑀅𑀦𑀺𑀘𑁆𑀘𑀢𑀁 𑀯𑀺𑀤𑀺𑀢𑁆𑀯𑀸 𑀯𑀺𑀧𑀭𑀺𑀡𑀸𑀫𑀯𑀺𑀭𑀸𑀕𑀦𑀺𑀭𑁄𑀥𑀁 𑀧𑀼𑀩𑁆𑀩𑁂 𑀘𑁂𑀯 𑀭𑀽𑀧𑀸 𑀏𑀢𑀭𑀳𑀺 𑀘, ‘𑀲𑀩𑁆𑀩𑁂 𑀢𑁂 𑀭𑀽𑀧𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄 𑀉𑀧𑁆𑀧𑀚𑁆𑀚𑀢𑀺 𑀉𑀧𑁂𑀓𑁆𑀔𑀸. 𑀬𑀸 𑀏𑀯𑀭𑀽𑀧𑀸 𑀉𑀧𑁂𑀓𑁆𑀔𑀸, 𑀭𑀽𑀧𑀁 𑀲𑀸 𑀅𑀢𑀺𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀲𑀸 𑀉𑀧𑁂𑀓𑁆𑀔𑀸 𑀦𑁂𑀓𑁆𑀔𑀫𑁆𑀫𑀲𑀺𑀢𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺; 𑀏𑀯𑀁 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀤𑀺𑀆𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀇𑀝𑁆𑀞𑁂 𑀅𑀭𑀚𑁆𑀚𑀦𑁆𑀢𑀲𑁆𑀲 𑀅𑀦𑀺𑀝𑁆𑀞𑁂 𑀅𑀤𑀼𑀲𑁆𑀲𑀦𑁆𑀢𑀲𑁆𑀲 𑀅𑀲𑀫𑀧𑁂𑀓𑁆𑀔𑀦𑁂 𑀅𑀫𑀼𑀬𑁆𑀳𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 𑀉𑀧𑁂𑀓𑁆𑀔𑀸 𑀦𑁂𑀓𑁆𑀔𑀫𑁆𑀫𑀲𑀺𑀢𑀉𑀧𑁂𑀓𑁆𑀔𑀸 𑀦𑀸𑀫. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀩𑁆𑀩𑀲𑀗𑁆𑀕𑀸𑀳𑀓𑁄 𑀘𑀢𑀼𑀪𑀽𑀫𑀓𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑁄 𑀓𑀣𑀺𑀢𑁄. 𑀢𑀢𑀺𑀬𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁧𑁧. 𑀦𑀺𑀭𑀸𑀫𑀺𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭𑁯. 𑀏𑀓𑀸𑀤𑀲𑀫𑁂 𑀲𑀸𑀫𑀺𑀲𑀸𑀢𑀺 𑀓𑀺𑀮𑁂𑀲𑀸𑀫𑀺𑀲𑁂𑀦 𑀲𑀸𑀫𑀺𑀲𑀸. 𑀦𑀺𑀭𑀸𑀫𑀺𑀲𑀢𑀭𑀸𑀢𑀺 𑀦𑀺𑀭𑀸𑀫𑀺𑀲𑀸𑀬𑀧𑀺 𑀛𑀸𑀦𑀧𑀻𑀢𑀺𑀬𑀸 𑀦𑀺𑀭𑀸𑀫𑀺𑀲𑀢𑀭𑀸𑀯. 𑀦𑀦𑀼 𑀘 𑀤𑁆𑀯𑀻𑀲𑀼 𑀛𑀸𑀦𑁂𑀲𑀼 𑀧𑀻𑀢𑀺 𑀫𑀳𑀕𑁆𑀕𑀢𑀸𑀧𑀺 𑀳𑁄𑀢𑀺 𑀮𑁄𑀓𑀼𑀢𑁆𑀢𑀭𑀸𑀧𑀺, 𑀧𑀘𑁆𑀘𑀯𑁂𑀓𑁆𑀔𑀡𑀧𑀻𑀢𑀺 𑀮𑁄𑀓𑀺𑀬𑀸𑀯, 𑀲𑀸 𑀓𑀲𑁆𑀫𑀸 𑀦𑀺𑀭𑀸𑀫𑀺𑀲𑀢𑀭𑀸 𑀚𑀸𑀢𑀸𑀢𑀺? 𑀲𑀦𑁆𑀢𑀧𑀡𑀻𑀢𑀥𑀫𑁆𑀫𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀉𑀧𑁆𑀧𑀦𑁆𑀦𑀢𑁆𑀢𑀸. 𑀬𑀣𑀸 𑀳𑀺 𑀭𑀸𑀚𑀯𑀮𑁆𑀮𑀪𑁄 𑀘𑀽𑀴𑀼𑀧𑀝𑁆𑀞𑀸𑀓𑁄 𑀅𑀧𑁆𑀧𑀝𑀺𑀳𑀸𑀭𑀺𑀓𑀁 𑀬𑀣𑀸𑀲𑀼𑀔𑀁 𑀭𑀸𑀚𑀓𑀼𑀮𑀁 𑀧𑀯𑀺𑀲𑀦𑁆𑀢𑁄 𑀲𑁂𑀝𑁆𑀞𑀺𑀲𑁂𑀦𑀸𑀧𑀢𑀺𑀆𑀤𑀬𑁄 𑀧𑀸𑀤𑁂𑀦 𑀧𑀳𑀭𑀦𑁆𑀢𑁄𑀧𑀺 𑀦 𑀕𑀡𑁂𑀢𑀺. 𑀓𑀲𑁆𑀫𑀸? 𑀭𑀜𑁆𑀜𑁄 𑀆𑀲𑀦𑁆𑀦𑀧𑀭𑀺𑀘𑀸𑀭𑀓𑀢𑁆𑀢𑀸. 𑀇𑀢𑀺 𑀲𑁄 𑀢𑁂𑀳𑀺 𑀉𑀢𑁆𑀢𑀭𑀺𑀢𑀭𑁄 𑀳𑁄𑀢𑀺, 𑀏𑀯𑀫𑀬𑀫𑁆𑀧𑀺 𑀲𑀦𑁆𑀢𑀧𑀡𑀻𑀢𑀥𑀫𑁆𑀫𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀉𑀧𑁆𑀧𑀦𑁆𑀦𑀢𑁆𑀢𑀸 𑀮𑁄𑀓𑀼𑀢𑁆𑀢𑀭𑀧𑀻𑀢𑀺𑀢𑁄𑀧𑀺 𑀉𑀢𑁆𑀢𑀭𑀺𑀢𑀭𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀯𑀺𑀫𑁄𑀓𑁆𑀔𑀯𑀸𑀭𑁂 𑀧𑀦 𑀭𑀽𑀧𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀫𑁄𑀓𑁆𑀔𑁄 𑀅𑀢𑁆𑀢𑀦𑁄 𑀆𑀭𑀫𑁆𑀫𑀡𑀪𑀽𑀢𑁂𑀦 𑀭𑀽𑀧𑀸𑀫𑀺𑀲𑀯𑀲𑁂𑀦𑁂𑀯 𑀲𑀸𑀫𑀺𑀲𑁄 𑀦𑀸𑀫, 𑀅𑀭𑀽𑀧𑀧𑀝𑀺𑀲𑀁𑀬𑀼𑀢𑁆𑀢𑁄 𑀭𑀽𑀧𑀸𑀫𑀺𑀲𑀸𑀪𑀸𑀯𑁂𑀦 𑀦𑀺𑀭𑀸𑀫𑀺𑀲𑁄 𑀦𑀸𑀫𑀸𑀢𑀺.

𑀯𑁂𑀤𑀦𑀸𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑀸𑀢𑀼𑀕𑀸𑀫𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀧𑁂𑀬𑁆𑀬𑀸𑀮𑀯𑀕𑁆𑀕𑁄

𑁧-𑁨. 𑀫𑀸𑀢𑀼𑀕𑀸𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁮𑁦-𑁨𑁮𑁧. 𑀫𑀸𑀢𑀼𑀕𑀸𑀫𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀅𑀗𑁆𑀕𑁂𑀳𑀻𑀢𑀺 𑀅𑀕𑀼𑀡𑀗𑁆𑀕𑁂𑀳𑀺. 𑀦 𑀘 𑀭𑀽𑀧𑀯𑀸𑀢𑀺 𑀦 𑀭𑀽𑀧𑀲𑀫𑁆𑀧𑀦𑁆𑀦𑁄 𑀯𑀺𑀭𑀽𑀧𑁄 𑀤𑀼𑀤𑁆𑀤𑀲𑀺𑀓𑁄. 𑀦 𑀘 𑀪𑁄𑀕𑀯𑀸𑀢𑀺 𑀦 𑀪𑁄𑀕𑀲𑀫𑁆𑀧𑀦𑁆𑀦𑁄 𑀦𑀺𑀤𑁆𑀥𑀦𑁄. 𑀦 𑀘 𑀲𑀻𑀮𑀯𑀸𑀢𑀺 𑀦 𑀲𑀻𑀮𑀲𑀫𑁆𑀧𑀦𑁆𑀦𑁄 𑀤𑀼𑀲𑁆𑀲𑀻𑀮𑁄. 𑀅𑀮𑀲𑁄 𑀘𑀸𑀢𑀺 𑀓𑀦𑁆𑀢𑀦𑀧𑀘𑀦𑀸𑀤𑀻𑀦𑀺 𑀓𑀫𑁆𑀫𑀸𑀦𑀺 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀓𑀼𑀲𑀻𑀢𑁄 𑀆𑀮𑀲𑀺𑀬𑁄 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄𑀯, 𑀞𑀺𑀢𑀞𑀸𑀦𑁂 𑀞𑀺𑀢𑁄𑀯 𑀦𑀺𑀤𑁆𑀤𑀸𑀬𑀢𑀺 𑀏𑀯. 𑀧𑀚𑀜𑁆𑀘𑀲𑁆𑀲 𑀦 𑀮𑀪𑀢𑀻𑀢𑀺 𑀅𑀲𑁆𑀲 𑀧𑀼𑀭𑀺𑀲𑀲𑁆𑀲 𑀓𑀼𑀮𑀯𑀁𑀲𑀧𑀢𑀺𑀝𑁆𑀞𑀸𑀧𑀓𑀁 𑀧𑀼𑀢𑁆𑀢𑀁 𑀦 𑀮𑀪𑀢𑀺, 𑀯𑀜𑁆𑀛𑀺𑀢𑁆𑀣𑀻 𑀦𑀸𑀫 𑀳𑁄𑀢𑀺. 𑀲𑀼𑀓𑁆𑀓𑀧𑀓𑁆𑀔𑁄 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀤𑀼𑀢𑀺𑀬𑀁 𑀧𑀞𑀫𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀁.

𑁩. 𑀆𑀯𑁂𑀡𑀺𑀓𑀤𑀼𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮𑁨. 𑀢𑀢𑀺𑀬𑁂 𑀆𑀯𑁂𑀡𑀺𑀓𑀸𑀦𑀻𑀢𑀺 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸𑀦𑀺 𑀧𑀼𑀭𑀺𑀲𑁂𑀳𑀺 𑀅𑀲𑀸𑀥𑀸𑀭𑀡𑀸𑀦𑀺. 𑀧𑀸𑀭𑀺𑀘𑀭𑀺𑀬𑀦𑁆𑀢𑀺 𑀧𑀭𑀺𑀘𑀸𑀭𑀺𑀓𑀪𑀸𑀯𑀁.

𑁪. 𑀢𑀻𑀳𑀺𑀥𑀫𑁆𑀫𑁂𑀳𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁮𑁩-𑁩𑁦𑁩. 𑀘𑀢𑀼𑀢𑁆𑀣𑁂 𑀫𑀘𑁆𑀙𑁂𑀭𑀫𑀮𑀧𑀭𑀺𑀬𑀼𑀝𑁆𑀞𑀺𑀢𑁂𑀦𑀸𑀢𑀺 𑀧𑀼𑀩𑁆𑀩𑀡𑁆𑀳𑀲𑀫𑀬𑀲𑁆𑀫𑀺𑀜𑁆𑀳𑀺 𑀫𑀸𑀢𑀼𑀕𑀸𑀫𑁄 𑀔𑀻𑀭𑀤𑀥𑀺𑀲𑀗𑁆𑀕𑁄𑀧𑀦𑀭𑀦𑁆𑀥𑀦𑀧𑀘𑀦𑀸𑀤𑀻𑀦𑀺 𑀓𑀸𑀢𑀼𑀁 𑀆𑀭𑀤𑁆𑀥𑁄, 𑀧𑀼𑀢𑁆𑀢𑀓𑁂𑀳𑀺𑀧𑀺 𑀬𑀸𑀘𑀺𑀬𑀫𑀸𑀦𑁄 𑀓𑀺𑀜𑁆𑀘𑀺 𑀤𑀸𑀢𑀼𑀁 𑀦 𑀇𑀘𑁆𑀙𑀢𑀺. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁 ‘‘𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀫𑀘𑁆𑀙𑁂𑀭𑀫𑀮𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸’’𑀢𑀺. 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂 𑀧𑀦 𑀫𑀸𑀢𑀼𑀕𑀸𑀫𑁄 𑀓𑁄𑀥𑀸𑀪𑀺𑀪𑀽𑀢𑁄𑀯 𑀳𑁄𑀢𑀺, 𑀅𑀦𑁆𑀢𑁄𑀖𑀭𑁂 𑀓𑀮𑀳𑀁 𑀅𑀮𑀪𑀦𑁆𑀢𑁄 𑀧𑀝𑀺𑀯𑀺𑀲𑁆𑀲𑀓𑀖𑀭𑀫𑁆𑀧𑀺 𑀕𑀦𑁆𑀢𑁆𑀯𑀸 𑀓𑀮𑀳𑀁 𑀓𑀭𑁄𑀢𑀺, 𑀲𑀸𑀫𑀺𑀓𑀲𑁆𑀲 𑀘 𑀞𑀺𑀢𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀸𑀦𑀺 𑀯𑀺𑀮𑁄𑀓𑁂𑀦𑁆𑀢𑁄 𑀯𑀺𑀘𑀭𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑀁 𑀇𑀲𑁆𑀲𑀸𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸’’𑀢𑀺. 𑀲𑀸𑀬𑀦𑁆𑀳𑁂 𑀧𑀦𑀲𑁆𑀲𑀸 𑀅𑀲𑀤𑁆𑀥𑀫𑁆𑀫𑀧𑀝𑀺𑀲𑁂𑀯𑀦𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀸𑀬𑀦𑁆𑀳𑀲𑀫𑀬𑀁 𑀓𑀸𑀫𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁂𑀦 𑀘𑁂𑀢𑀲𑀸’’𑀢𑀺. 𑀧𑀜𑁆𑀘𑀫𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁩. 𑀩𑀮𑀯𑀕𑁆𑀕𑁄

𑁧. 𑀯𑀺𑀲𑀸𑀭𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦𑁪. 𑀤𑀲𑀫𑁂 𑀭𑀽𑀧𑀩𑀮𑀦𑁆𑀢𑀺𑀆𑀤𑀻𑀲𑀼 𑀭𑀽𑀧𑀲𑀫𑁆𑀧𑀢𑁆𑀢𑀺 𑀭𑀽𑀧𑀩𑀮𑀁, 𑀪𑁄𑀕𑀲𑀫𑁆𑀧𑀢𑁆𑀢𑀺 𑀪𑁄𑀕𑀩𑀮𑀁, 𑀜𑀸𑀢𑀺𑀲𑀫𑁆𑀧𑀢𑁆𑀢𑀺 𑀜𑀸𑀢𑀺𑀩𑀮𑀁, 𑀧𑀼𑀢𑁆𑀢𑀲𑀫𑁆𑀧𑀢𑁆𑀢𑀺 𑀧𑀼𑀢𑁆𑀢𑀩𑀮𑀁, 𑀲𑀻𑀮𑀲𑀫𑁆𑀧𑀢𑁆𑀢𑀺 𑀲𑀻𑀮𑀩𑀮𑀁. 𑀧𑀜𑁆𑀘𑀲𑀻𑀮𑀤𑀲𑀲𑀻𑀮𑀸𑀦𑀺 𑀅𑀔𑀡𑁆𑀟𑀸𑀦𑀺 𑀓𑀢𑁆𑀯𑀸 𑀭𑀓𑁆𑀔𑀦𑁆𑀢𑀲𑁆𑀲 𑀳𑀺 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑁂𑀯 𑀲𑀻𑀮𑀩𑀮𑀁 𑀦𑀸𑀫 𑀳𑁄𑀢𑀺. 𑀇𑀫𑀸𑀦𑀺 𑀔𑁄 𑀪𑀺𑀓𑁆𑀔𑀯𑁂 𑀧𑀜𑁆𑀘 𑀩𑀮𑀸𑀦𑀻𑀢𑀺 𑀇𑀫𑀸𑀦𑀺 𑀧𑀜𑁆𑀘 𑀉𑀧𑀢𑁆𑀣𑀫𑁆𑀪𑀦𑀝𑁆𑀞𑁂𑀦 𑀩𑀮𑀸𑀦𑀺 𑀦𑀸𑀫 𑀯𑀼𑀘𑁆𑀘𑀦𑁆𑀢𑀺.

𑁨-𑁧𑁦. 𑀧𑀲𑀬𑁆𑀳𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁦𑁫-𑁩𑁧𑁩. 𑀧𑀲𑀬𑁆𑀳𑀸𑀢𑀺 𑀅𑀪𑀺𑀪𑀯𑀺𑀢𑁆𑀯𑀸. 𑀅𑀪𑀺𑀪𑀼𑀬𑁆𑀬 𑀯𑀢𑁆𑀢𑀢𑀻𑀢𑀺 𑀅𑀪𑀺𑀪𑀯𑀢𑀺 𑀅𑀚𑁆𑀛𑁄𑀢𑁆𑀣𑀭𑀢𑀺. 𑀦𑁂𑀯 𑀭𑀽𑀧𑀩𑀮𑀁 𑀢𑀸𑀬𑀢𑀻𑀢𑀺 𑀦𑁂𑀯 𑀭𑀽𑀧𑀩𑀮𑀁 𑀢𑀸𑀬𑀺𑀢𑀼𑀁 𑀭𑀓𑁆𑀔𑀺𑀢𑀼𑀁 𑀲𑀓𑁆𑀓𑁄𑀢𑀺. 𑀦𑀸𑀲𑁂𑀦𑁆𑀢𑁂𑀯 𑀦𑀁, 𑀓𑀼𑀮𑁂 𑀦 𑀯𑀸𑀲𑁂𑀦𑁆𑀢𑀻𑀢𑀺 ‘‘𑀤𑀼𑀲𑁆𑀲𑀻𑀮𑀸 𑀲𑀁𑀪𑀺𑀦𑁆𑀦𑀸𑀘𑀸𑀭𑀸 𑀅𑀢𑀺𑀓𑁆𑀓𑀦𑁆𑀢𑀫𑀭𑀺𑀬𑀸𑀤𑀸’’𑀢𑀺 𑀕𑀻𑀯𑀸𑀬𑀁 𑀕𑀳𑁂𑀢𑁆𑀯𑀸 𑀦𑀻𑀳𑀭𑀦𑁆𑀢𑀺, 𑀦 𑀢𑀲𑁆𑀫𑀺𑀁 𑀓𑀼𑀮𑁂 𑀯𑀸𑀲𑁂𑀦𑁆𑀢𑀺. 𑀯𑀸𑀲𑁂𑀦𑁆𑀢𑁂𑀯 𑀦𑀁 𑀓𑀼𑀮𑁂, 𑀦 𑀦𑀸𑀲𑁂𑀦𑁆𑀢𑀻𑀢𑀺 ‘‘𑀓𑀺𑀁 𑀭𑀽𑀧𑁂𑀦 𑀪𑁄𑀕𑀸𑀤𑀻𑀳𑀺 𑀯𑀸, 𑀧𑀭𑀺𑀲𑀼𑀤𑁆𑀥𑀲𑀻𑀮𑀸 𑀏𑀲𑀸 𑀆𑀘𑀸𑀭𑀲𑀫𑁆𑀧𑀦𑁆𑀦𑀸’’𑀢𑀺 𑀜𑀢𑁆𑀯𑀸 𑀜𑀸𑀢𑀓𑀸 𑀢𑀲𑁆𑀫𑀺𑀁 𑀓𑀼𑀮𑁂 𑀯𑀸𑀲𑁂𑀦𑁆𑀢𑀺𑀬𑁂𑀯, 𑀦 𑀦𑀸𑀲𑁂𑀦𑁆𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀫𑀸𑀢𑀼𑀕𑀸𑀫𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀚𑀫𑁆𑀩𑀼𑀔𑀸𑀤𑀓𑀲𑀁𑀬𑀼𑀢𑁆𑀢𑀁

𑁧. 𑀦𑀺𑀩𑁆𑀩𑀸𑀦𑀧𑀜𑁆𑀳𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧𑁪. 𑀚𑀫𑁆𑀩𑀼𑀔𑀸𑀤𑀓𑀲𑀁𑀬𑀼𑀢𑁆𑀢𑁂 𑀚𑀫𑁆𑀩𑀼𑀔𑀸𑀤𑀓𑁄 𑀧𑀭𑀺𑀩𑁆𑀩𑀸𑀚𑀓𑁄𑀢𑀺 𑀏𑀯𑀁𑀦𑀸𑀫𑁄 𑀣𑁂𑀭𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑁄 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑁄. 𑀬𑁄 𑀔𑁄 𑀆𑀯𑀼𑀲𑁄 𑀭𑀸𑀕𑀓𑁆𑀔𑀬𑁄𑀢𑀺 𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀭𑀸𑀕𑁄 𑀔𑀻𑀬𑀢𑀺, 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑀁 𑀭𑀸𑀕𑀓𑁆𑀔𑀬𑁄𑀢𑀺 𑀯𑀼𑀘𑁆𑀘𑀢𑀺. 𑀤𑁄𑀲𑀫𑁄𑀳𑀓𑁆𑀔𑀬𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀬𑁄 𑀧𑀦 𑀇𑀫𑀺𑀦𑀸𑀯 𑀲𑀼𑀢𑁆𑀢𑁂𑀦 𑀓𑀺𑀮𑁂𑀲𑀓𑁆𑀔𑀬𑀫𑀢𑁆𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀯𑀤𑁂𑀬𑁆𑀬, 𑀲𑁄 𑀯𑀢𑁆𑀢𑀩𑁆𑀩𑁄 ‘‘𑀓𑀲𑁆𑀲 𑀓𑀺𑀮𑁂𑀲𑀸𑀦𑀁 𑀔𑀬𑁄, 𑀓𑀺𑀁 𑀅𑀢𑁆𑀢𑀦𑁄, 𑀉𑀤𑀸𑀳𑀼 𑀧𑀭𑁂𑀲’’𑀦𑁆𑀢𑀺? 𑀅𑀤𑁆𑀥𑀸 ‘‘𑀅𑀢𑁆𑀢𑀦𑁄’’𑀢𑀺 𑀯𑀓𑁆𑀔𑀢𑀺. 𑀢𑀢𑁄 𑀧𑀼𑀘𑁆𑀙𑀺𑀢𑀩𑁆𑀩𑁄 ‘‘𑀕𑁄𑀢𑁆𑀭𑀪𑀼𑀜𑀸𑀡𑀲𑁆𑀲 𑀓𑀺𑀁 𑀆𑀭𑀫𑁆𑀫𑀡’’𑀦𑁆𑀢𑀺? 𑀚𑀸𑀦𑀫𑀸𑀦𑁄 ‘‘𑀦𑀺𑀩𑁆𑀩𑀸𑀦’’𑀦𑁆𑀢𑀺 𑀯𑀓𑁆𑀔𑀢𑀺. 𑀓𑀺𑀁 𑀧𑀦 𑀕𑁄𑀢𑁆𑀭𑀪𑀼𑀜𑀸𑀡𑀓𑁆𑀔𑀡𑁂 𑀓𑀺𑀮𑁂𑀲𑀸 𑀔𑀻𑀡𑀸 𑀔𑀻𑀬𑀦𑁆𑀢𑀺 𑀔𑀻𑀬𑀺𑀲𑁆𑀲𑀦𑁆𑀢𑀻𑀢𑀺? ‘‘𑀔𑀻𑀡𑀸’’𑀢𑀺 𑀯𑀸 ‘‘𑀔𑀻𑀬𑀦𑁆𑀢𑀻’’𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑀸, ‘‘𑀔𑀻𑀬𑀺𑀲𑁆𑀲𑀦𑁆𑀢𑀻’’𑀢𑀺 𑀧𑀦 𑀯𑀢𑁆𑀢𑀩𑁆𑀩𑀸𑀢𑀺. 𑀓𑀺𑀁 𑀧𑀦 𑀢𑁂𑀲𑀼 𑀅𑀔𑀻𑀡𑁂𑀲𑀼𑀬𑁂𑀯 𑀓𑀺𑀮𑁂𑀲𑁂𑀲𑀼 𑀕𑁄𑀢𑁆𑀭𑀪𑀼𑀜𑀸𑀡𑀁 𑀓𑀺𑀮𑁂𑀲𑀓𑁆𑀔𑀬𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀻𑀢𑀺? 𑀅𑀤𑁆𑀥𑀸 𑀏𑀯𑀁 𑀯𑀼𑀢𑁆𑀢𑁂 𑀦𑀺𑀭𑀼𑀢𑁆𑀢𑀭𑁄 𑀪𑀯𑀺𑀲𑁆𑀲𑀢𑀺.

𑀫𑀕𑁆𑀕𑀜𑀸𑀡𑁂𑀦𑀸𑀧𑀺 𑀘𑁂𑀢𑀁 𑀬𑁄𑀚𑁂𑀢𑀩𑁆𑀩𑀁. 𑀫𑀕𑁆𑀕𑀓𑁆𑀔𑀡𑁂𑀧𑀺 𑀳𑀺 𑀓𑀺𑀮𑁂𑀲𑀸 ‘‘𑀔𑀻𑀡𑀸’’𑀢𑀺 𑀯𑀸 ‘‘𑀔𑀻𑀬𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑀸, ‘‘𑀔𑀻𑀬𑀦𑁆𑀢𑀻’’𑀢𑀺 𑀧𑀦 𑀯𑀢𑁆𑀢𑀩𑁆𑀩𑀸, 𑀦 𑀘 𑀅𑀔𑀻𑀡𑁂𑀲𑀼𑀬𑁂𑀯 𑀓𑀺𑀮𑁂𑀲𑁂𑀲𑀼 𑀓𑀺𑀮𑁂𑀲𑀓𑁆𑀔𑀬𑁄 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀫𑁂𑀢𑀁. 𑀬𑀁 𑀆𑀕𑀫𑁆𑀫 𑀭𑀸𑀕𑀸𑀤𑀬𑁄 𑀔𑀻𑀬𑀦𑁆𑀢𑀺, 𑀢𑀁 𑀦𑀺𑀩𑁆𑀩𑀸𑀦𑀁. 𑀢𑀁 𑀧𑀦𑁂𑀢𑀁 ‘‘𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁧𑁧) 𑀤𑀼𑀓𑁂𑀲𑀼 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸𑀢𑀺 𑀲𑀗𑁆𑀕𑀳𑀺𑀢𑀢𑁆𑀢𑀸 𑀦 𑀓𑀺𑀮𑁂𑀲𑀓𑁆𑀔𑀬𑀫𑀢𑁆𑀢𑀫𑁂𑀯𑀸𑀢𑀺.

𑁨. 𑀅𑀭𑀳𑀢𑁆𑀢𑀧𑀜𑁆𑀳𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧𑁫. 𑀅𑀭𑀳𑀢𑁆𑀢𑀧𑀜𑁆𑀳𑀩𑁆𑀬𑀸𑀓𑀭𑀡𑁂 𑀬𑀲𑁆𑀫𑀸 𑀅𑀭𑀳𑀢𑁆𑀢𑀁 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀔𑀻𑀡𑀦𑁆𑀢𑁂 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 ‘‘𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄 𑀫𑁄𑀳𑀓𑁆𑀔𑀬𑁄’’𑀢𑀺 𑀯𑀼𑀢𑁆𑀢𑀁.

𑁩-𑁧𑁫. 𑀥𑀫𑁆𑀫𑀯𑀸𑀤𑀻𑀧𑀜𑁆𑀳𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁧𑁬-𑁩𑁨𑁮. 𑀢𑁂 𑀮𑁄𑀓𑁂 𑀲𑀼𑀕𑀢𑀸𑀢𑀺 𑀢𑁂 𑀭𑀸𑀕𑀸𑀤𑀬𑁄 𑀧𑀳𑀸𑀬 𑀕𑀢𑀢𑁆𑀢𑀸 𑀲𑀼𑀝𑁆𑀞𑀼 𑀕𑀢𑀸𑀢𑀺 𑀲𑀼𑀕𑀢𑀸. 𑀤𑀼𑀓𑁆𑀔𑀲𑁆𑀲 𑀔𑁄 𑀆𑀯𑀼𑀲𑁄 𑀧𑀭𑀺𑀜𑁆𑀜𑀢𑁆𑀣𑀦𑁆𑀢𑀺 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀧𑀭𑀺𑀚𑀸𑀦𑀦𑀢𑁆𑀣𑀁. 𑀤𑀼𑀓𑁆𑀔𑀢𑀸𑀢𑀺 𑀤𑀼𑀓𑁆𑀔𑀲𑀪𑀸𑀯𑁄. 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀢𑀺𑀆𑀤𑀻𑀲𑀼 𑀤𑀼𑀓𑁆𑀔𑀲𑀗𑁆𑀔𑀸𑀢𑁄 𑀤𑀼𑀓𑁆𑀔𑀲𑀪𑀸𑀯𑁄 𑀤𑀼𑀓𑁆𑀔𑀤𑀼𑀓𑁆𑀔𑀢𑀸. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑁧𑁬. 𑀤𑀼𑀓𑁆𑀓𑀭𑀧𑀜𑁆𑀳𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨𑁯. 𑀅𑀪𑀺𑀭𑀢𑀻𑀢𑀺 𑀧𑀩𑁆𑀩𑀚𑁆𑀚𑀸𑀬 𑀅𑀦𑀼𑀓𑁆𑀓𑀡𑁆𑀞𑀦𑀢𑀸. 𑀦𑀘𑀺𑀭𑀁 𑀆𑀯𑀼𑀲𑁄𑀢𑀺 𑀆𑀯𑀼𑀲𑁄 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀪𑀺𑀓𑁆𑀔𑀼 ‘‘𑀧𑀸𑀢𑁄 𑀅𑀦𑀼𑀲𑀺𑀝𑁆𑀞𑁄 𑀲𑀸𑀬𑀁 𑀯𑀺𑀲𑁂𑀲𑀫𑀥𑀺𑀕𑀫𑀺𑀲𑁆𑀲𑀢𑀺, 𑀲𑀸𑀬𑀁 𑀅𑀦𑀼𑀲𑀺𑀝𑁆𑀞𑁄 𑀧𑀸𑀢𑁄 𑀯𑀺𑀲𑁂𑀲𑀫𑀥𑀺𑀕𑀫𑀺𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁨.𑁩𑁪𑁫) 𑀯𑀼𑀢𑁆𑀢𑀢𑁆𑀢𑀸 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄 𑀦𑀘𑀺𑀭𑀲𑁆𑀲𑀁 𑀮𑀳𑀼𑀬𑁂𑀯 𑀅𑀭𑀳𑀁 𑀅𑀲𑁆𑀲, 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑁂𑀬𑁆𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀚𑀫𑁆𑀩𑀼𑀔𑀸𑀤𑀓𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀸𑀫𑀡𑁆𑀟𑀓𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸

𑁩𑁩𑁦-𑁩𑁩𑁧. 𑀲𑀸𑀫𑀡𑁆𑀟𑀓𑀲𑀁𑀬𑀼𑀢𑁆𑀢𑁂𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀸𑀫𑀡𑁆𑀟𑀓𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀫𑁄𑀕𑁆𑀕𑀮𑁆𑀮𑀸𑀦𑀲𑀁𑀬𑀼𑀢𑁆𑀢𑀁

𑁧-𑁮. 𑀧𑀞𑀫𑀛𑀸𑀦𑀧𑀜𑁆𑀳𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁩𑁨-𑁩𑁩𑁯. 𑀫𑁄𑀕𑁆𑀕𑀮𑁆𑀮𑀸𑀦𑀲𑀁𑀬𑀼𑀢𑁆𑀢𑁂 𑀓𑀸𑀫𑀲𑀳𑀕𑀢𑀸𑀢𑀺 𑀧𑀜𑁆𑀘𑀦𑀻𑀯𑀭𑀡𑀲𑀳𑀕𑀢𑀸. 𑀢𑀲𑁆𑀲 𑀳𑀺 𑀧𑀞𑀫𑀚𑁆𑀛𑀸𑀦𑀯𑀼𑀝𑁆𑀞𑀺𑀢𑀲𑁆𑀲 𑀧𑀜𑁆𑀘 𑀦𑀻𑀯𑀭𑀡𑀸𑀦𑀺 𑀲𑀦𑁆𑀢𑀢𑁄 𑀉𑀧𑀝𑁆𑀞𑀳𑀺𑀁𑀲𑀼. 𑀢𑁂𑀦𑀲𑁆𑀲 𑀢𑀁 𑀧𑀞𑀫𑀚𑁆𑀛𑀸𑀦𑀁 𑀳𑀸𑀦𑀪𑀸𑀕𑀺𑀬𑀁 𑀦𑀸𑀫 𑀅𑀳𑁄𑀲𑀺. 𑀢𑀁 𑀧𑀫𑀸𑀤𑀁 𑀜𑀢𑁆𑀯𑀸 𑀲𑀢𑁆𑀣𑀸 ‘‘𑀫𑀸 𑀧𑀫𑀸𑀤𑁄’’𑀢𑀺 𑀑𑀯𑀸𑀤𑀁 𑀅𑀤𑀸𑀲𑀺. 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀭𑀫𑁆𑀫𑀡𑀲𑀳𑀕𑀢𑀫𑁂𑀯 𑀳𑁂𑀢𑁆𑀣 ‘‘𑀲𑀳𑀕𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑁯. 𑀅𑀦𑀺𑀫𑀺𑀢𑁆𑀢𑀧𑀜𑁆𑀳𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁦. 𑀅𑀦𑀺𑀫𑀺𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀦𑁆𑀢𑀺 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀸𑀤𑀻𑀦𑀺 𑀧𑀳𑀸𑀬 𑀧𑀯𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀲𑀫𑀸𑀥𑀺𑀁𑀬𑁂𑀯 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀦𑁆𑀢𑀺. 𑀦𑀺𑀫𑀺𑀢𑁆𑀢𑀸𑀦𑀼𑀲𑀸𑀭𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀻𑀢𑀺 𑀏𑀯𑀁 𑀇𑀫𑀺𑀦𑀸 𑀯𑀺𑀧𑀲𑁆𑀲𑀦𑀸𑀲𑀫𑀸𑀥𑀺𑀯𑀺𑀳𑀸𑀭𑁂𑀦 𑀯𑀺𑀳𑀭𑀢𑁄 𑀯𑀺𑀧𑀲𑁆𑀲𑀦𑀸𑀜𑀸𑀡𑁂 𑀢𑀺𑀓𑁆𑀔𑁂 𑀲𑀽𑀭𑁂 𑀯𑀳𑀫𑀸𑀦𑁂. 𑀬𑀣𑀸 𑀦𑀸𑀫 𑀧𑀼𑀭𑀺𑀲𑀲𑁆𑀲 𑀢𑀺𑀔𑀺𑀡𑁂𑀦 𑀨𑀭𑀲𑀼𑀦𑀸 𑀭𑀼𑀓𑁆𑀔𑀁 𑀙𑀺𑀦𑁆𑀤𑀦𑁆𑀢𑀲𑁆𑀲 ‘‘𑀲𑀼𑀝𑁆𑀞𑀼 𑀯𑀢 𑀫𑁂 𑀨𑀭𑀲𑀼 𑀯𑀳𑀢𑀻’’𑀢𑀺 𑀔𑀡𑁂 𑀔𑀡𑁂 𑀨𑀭𑀲𑀼𑀥𑀸𑀭𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀙𑁂𑀚𑁆𑀚𑀓𑀺𑀘𑁆𑀘𑀁 𑀦 𑀦𑀺𑀧𑁆𑀨𑀚𑁆𑀚𑀢𑀺, 𑀏𑀯𑀁 𑀣𑁂𑀭𑀲𑁆𑀲𑀸𑀧𑀺 ‘‘𑀲𑀽𑀭𑀁 𑀯𑀢 𑀫𑁂 𑀳𑀼𑀢𑁆𑀯𑀸 𑀜𑀸𑀡𑀁 𑀯𑀳𑀢𑀻’’𑀢𑀺 𑀯𑀺𑀧𑀲𑁆𑀲𑀦𑀁 𑀆𑀭𑀩𑁆𑀪 𑀦𑀺𑀓𑀦𑁆𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀅𑀣 𑀯𑀺𑀧𑀲𑁆𑀲𑀦𑀸𑀓𑀺𑀘𑁆𑀘𑀁 𑀲𑀸𑀥𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀦𑀺𑀫𑀺𑀢𑁆𑀢𑀸𑀦𑀼𑀲𑀸𑀭𑀺 𑀯𑀺𑀜𑁆𑀜𑀸𑀡𑀁 𑀳𑁄𑀢𑀻’’𑀢𑀺. 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀅𑀦𑀺𑀫𑀺𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺𑀦𑁆𑀢𑀺 𑀲𑀩𑁆𑀩𑁂𑀲𑀁 𑀦𑀺𑀘𑁆𑀘𑀲𑀼𑀔𑀅𑀢𑁆𑀢𑀦𑀺𑀫𑀺𑀢𑁆𑀢𑀸𑀦𑀁 𑀅𑀫𑀦𑀲𑀺𑀓𑀸𑀭𑁂𑀦 𑀅𑀦𑀺𑀫𑀺𑀢𑁆𑀢𑀁 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀉𑀧𑀭𑀺𑀫𑀕𑁆𑀕𑀨𑀮𑀲𑀫𑀸𑀥𑀺𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀸𑀲𑀺𑀁.

𑁧𑁦-𑁧𑁧. 𑀲𑀓𑁆𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁪𑁧-𑁩𑁪𑁨. 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦𑀸𑀢𑀺 𑀅𑀘𑀮𑀧𑁆𑀧𑀲𑀸𑀤𑁂𑀦. 𑀤𑀲𑀳𑀺 𑀞𑀸𑀦𑁂𑀳𑀻𑀢𑀺 𑀤𑀲𑀳𑀺 𑀓𑀸𑀭𑀡𑁂𑀳𑀺. 𑀅𑀥𑀺𑀕𑀡𑁆𑀳𑀦𑁆𑀢𑀻𑀢𑀺 𑀅𑀪𑀺𑀪𑀯𑀦𑁆𑀢𑀺, 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀫𑁄𑀕𑁆𑀕𑀮𑁆𑀮𑀸𑀦𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀘𑀺𑀢𑁆𑀢𑀲𑀁𑀬𑀼𑀢𑁆𑀢𑀁

𑁧. 𑀲𑀁𑀬𑁄𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁩. 𑀘𑀺𑀢𑁆𑀢𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀫𑀘𑁆𑀙𑀺𑀓𑀸𑀲𑀡𑁆𑀟𑁂𑀢𑀺 𑀏𑀯𑀁𑀦𑀸𑀫𑀓𑁂 𑀯𑀦𑀲𑀡𑁆𑀟𑁂. 𑀅𑀬𑀫𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀻𑀢𑀺 𑀧𑁄𑀭𑀸𑀡𑀓𑀢𑁆𑀣𑁂𑀭𑀸 𑀅𑀢𑀺𑀭𑀘𑁆𑀙𑀸𑀦𑀓𑀣𑀸 𑀳𑁄𑀦𑁆𑀢𑀺, 𑀦𑀺𑀲𑀺𑀦𑁆𑀦𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑁂 𑀧𑀜𑁆𑀳𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀅𑀚𑀸𑀦𑀦𑁆𑀢𑀸 𑀧𑀼𑀘𑁆𑀙𑀦𑁆𑀢𑀺, 𑀚𑀸𑀦𑀦𑁆𑀢𑀸 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀺, 𑀢𑁂𑀦 𑀦𑁂𑀲𑀁 𑀅𑀬𑀁 𑀓𑀣𑀸 𑀉𑀤𑀧𑀸𑀤𑀺. 𑀫𑀺𑀕𑀧𑀣𑀓𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀅𑀢𑁆𑀢𑀦𑁄 𑀪𑁄𑀕𑀕𑀸𑀫𑀁. 𑀲𑁄 𑀓𑀺𑀭 𑀅𑀫𑁆𑀩𑀸𑀝𑀓𑀸𑀭𑀸𑀫𑀲𑁆𑀲 𑀧𑀺𑀝𑁆𑀞𑀺𑀪𑀸𑀕𑁂 𑀳𑁄𑀢𑀺. 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 ‘‘𑀣𑁂𑀭𑀸𑀦𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀨𑀸𑀲𑀼𑀯𑀺𑀳𑀸𑀭𑀁 𑀓𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺. 𑀕𑀫𑁆𑀪𑀻𑀭𑁂 𑀩𑀼𑀤𑁆𑀥𑀯𑀘𑀦𑁂𑀢𑀺 𑀅𑀢𑁆𑀣𑀕𑀫𑁆𑀪𑀻𑀭𑁂 𑀘𑁂𑀯 𑀥𑀫𑁆𑀫𑀕𑀫𑁆𑀪𑀻𑀭𑁂 𑀘 𑀩𑀼𑀤𑁆𑀥𑀯𑀘𑀦𑁂. 𑀧𑀜𑁆𑀜𑀸𑀘𑀓𑁆𑀔𑀼 𑀓𑀫𑀢𑀻𑀢𑀺 𑀜𑀸𑀡𑀘𑀓𑁆𑀔𑀼 𑀯𑀳𑀢𑀺 𑀧𑀯𑀢𑁆𑀢𑀢𑀺.

𑁨. 𑀧𑀞𑀫𑀇𑀲𑀺𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁪. 𑀤𑀼𑀢𑀺𑀬𑁂 𑀆𑀬𑀲𑁆𑀫𑀦𑁆𑀢𑀁 𑀣𑁂𑀭𑀦𑁆𑀢𑀺 𑀢𑁂𑀲𑀼 𑀣𑁂𑀭𑁂𑀲𑀼 𑀚𑁂𑀝𑁆𑀞𑀓𑀁 𑀫𑀳𑀸𑀣𑁂𑀭𑀁. 𑀢𑀼𑀡𑁆𑀳𑀻 𑀅𑀳𑁄𑀲𑀻𑀢𑀺 𑀚𑀸𑀦𑀦𑁆𑀢𑁄𑀧𑀺 𑀅𑀯𑀺𑀲𑀸𑀭𑀤𑀢𑁆𑀢𑀸 𑀦 𑀓𑀺𑀜𑁆𑀘𑀺 𑀩𑁆𑀬𑀸𑀳𑀭𑀺. 𑀩𑁆𑀬𑀸𑀓𑀭𑁄𑀫𑀳𑀁 𑀪𑀦𑁆𑀢𑁂𑀢𑀺 ‘‘𑀅𑀬𑀁 𑀣𑁂𑀭𑁄 𑀦𑁂𑀯 𑀅𑀢𑁆𑀢𑀦𑀸 𑀩𑁆𑀬𑀸𑀓𑀭𑁄𑀢𑀺, 𑀦 𑀅𑀜𑁆𑀜𑁂 𑀅𑀚𑁆𑀛𑁂𑀲𑀢𑀺, 𑀉𑀧𑀸𑀲𑀓𑁄𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑀁 𑀯𑀺𑀳𑁂𑀲𑁂𑀢𑀺, 𑀅𑀳𑀫𑁂𑀢𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀨𑀸𑀲𑀼𑀯𑀺𑀳𑀸𑀭𑀁 𑀓𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀲𑀦𑀢𑁄 𑀯𑀼𑀝𑁆𑀞𑀸𑀬 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀏𑀯𑀁 𑀑𑀓𑀸𑀲𑀫𑀓𑀸𑀲𑀺, 𑀓𑀢𑀸𑀯𑀓𑀸𑀲𑁄 𑀧𑀦 𑀅𑀢𑁆𑀢𑀦𑁄 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀩𑁆𑀬𑀸𑀓𑀸𑀲𑀺.

𑀲𑀳𑀢𑁆𑀣𑀸𑀢𑀺 𑀲𑀳𑀢𑁆𑀣𑁂𑀦. 𑀲𑀦𑁆𑀢𑀧𑁆𑀧𑁂𑀲𑀻𑀢𑀺 𑀬𑀸𑀯𑀤𑀺𑀘𑁆𑀙𑀓𑀁 𑀤𑁂𑀦𑁆𑀢𑁄 𑀲𑀼𑀝𑁆𑀞𑀼 𑀢𑀧𑁆𑀧𑁂𑀲𑀺. 𑀲𑀫𑁆𑀧𑀯𑀸𑀭𑁂𑀲𑀻𑀢𑀺 ‘‘𑀅𑀮𑀁 𑀅𑀮’’𑀦𑁆𑀢𑀺 𑀳𑀢𑁆𑀣𑀲𑀜𑁆𑀜𑀸𑀬 𑀘𑁂𑀯 𑀯𑀸𑀘𑀸𑀬 𑀘 𑀧𑀝𑀺𑀓𑁆𑀔𑀺𑀧𑀸𑀧𑁂𑀲𑀺. 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀦𑁄𑀢𑀺 𑀧𑀸𑀡𑀺𑀢𑁄 𑀅𑀧𑀦𑀻𑀢𑀧𑀢𑁆𑀢𑀸 𑀥𑁄𑀯𑀺𑀢𑁆𑀯𑀸 𑀣𑀯𑀺𑀓𑀸𑀬 𑀑𑀲𑀸𑀧𑁂𑀢𑁆𑀯𑀸 𑀅𑀁𑀲𑁂 𑀮𑀕𑁆𑀕𑀺𑀢𑀧𑀢𑁆𑀢𑀸𑀢𑀺 𑀅𑀢𑁆𑀣𑁄.

𑁩. 𑀤𑀼𑀢𑀺𑀬𑀇𑀲𑀺𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁫. 𑀢𑀢𑀺𑀬𑁂 𑀅𑀯𑀦𑁆𑀢𑀺𑀬𑀸𑀢𑀺 𑀤𑀓𑁆𑀔𑀺𑀡𑀸𑀧𑀣𑁂 𑀅𑀯𑀦𑁆𑀢𑀺𑀭𑀝𑁆𑀞𑁂. 𑀓𑀮𑁆𑀬𑀸𑀡𑀁 𑀯𑀼𑀘𑁆𑀘𑀢𑀻𑀢𑀺 ‘‘𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀻’’𑀢𑀺 𑀯𑀘𑀦𑀁 𑀦𑀺𑀤𑁆𑀤𑁄𑀲𑀁 𑀅𑀦𑀯𑀚𑁆𑀚𑀁 𑀯𑀼𑀘𑁆𑀘𑀢𑀺 𑀢𑀬𑀸 𑀉𑀧𑀸𑀲𑀓𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺.

𑁪. 𑀫𑀳𑀓𑀧𑀸𑀝𑀺𑀳𑀸𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁬. 𑀘𑀢𑀼𑀢𑁆𑀣𑁂 𑀲𑁂𑀲𑀓𑀁 𑀯𑀺𑀲𑁆𑀲𑀚𑁆𑀚𑁂𑀣𑀸𑀢𑀺 𑀢𑀲𑁆𑀲 𑀓𑀺𑀭 𑀣𑁂𑀭𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀓𑀁𑀲𑀣𑀸𑀮𑀁 𑀧𑀫𑀚𑁆𑀚𑀺𑀢𑁆𑀯𑀸 𑀧𑀸𑀬𑀸𑀲𑀁 𑀯𑀟𑁆𑀠𑁂𑀢𑁆𑀯𑀸 𑀅𑀤𑀁𑀲𑀼. 𑀲𑁄 𑀪𑀼𑀢𑁆𑀢𑀧𑀸𑀬𑀸𑀲𑁄 𑀣𑁂𑀭𑁂𑀳𑀺𑀬𑁂𑀯 𑀲𑀤𑁆𑀥𑀺𑀁 𑀕𑀦𑁆𑀢𑀼𑀓𑀸𑀫𑁄 𑀘𑀺𑀦𑁆𑀢𑁂𑀲𑀺 ‘‘𑀖𑀭𑁂 𑀢𑀸𑀯 𑀉𑀧𑀸𑀲𑀺𑀓𑀸 𑀲𑁂𑀲𑀓𑀁 𑀯𑀺𑀘𑀸𑀭𑁂𑀢𑀺, 𑀇𑀥 𑀧𑀦𑀺𑀫𑁂 𑀤𑀸𑀲𑀓𑀫𑁆𑀫𑀓𑀸𑀭𑀸 𑀫𑀬𑀸 𑀅𑀯𑀼𑀢𑁆𑀢𑀸 𑀦 𑀯𑀺𑀘𑀸𑀭𑁂𑀲𑁆𑀲𑀦𑁆𑀢𑀺, 𑀏𑀯𑀸𑀬𑀁 𑀧𑀡𑀻𑀢𑀧𑀸𑀬𑀸𑀲𑁄 𑀦𑀲𑁆𑀲𑀺𑀲𑁆𑀲𑀢𑀻’’𑀢𑀺 𑀢𑁂𑀲𑀁 𑀅𑀦𑀼𑀚𑀸𑀦𑀦𑁆𑀢𑁄 𑀏𑀯𑀫𑀸𑀳. 𑀓𑀼𑀣𑀺𑀢𑀦𑁆𑀢𑀺 𑀓𑀼𑀥𑀺𑀢𑀁, 𑀳𑁂𑀝𑁆𑀞𑀸 𑀲𑀦𑁆𑀢𑀢𑁆𑀢𑀸𑀬 𑀯𑀸𑀮𑀺𑀓𑀸𑀬 𑀉𑀧𑀭𑀺 𑀆𑀢𑀧𑁂𑀦 𑀘 𑀅𑀢𑀺𑀢𑀺𑀔𑀺𑀡𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀁 𑀧𑀦 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀅𑀲𑀫𑁆𑀪𑀺𑀦𑁆𑀦𑀧𑀤𑀁. 𑀧𑀯𑁂𑀮𑀺𑀬𑀫𑀸𑀦𑁂𑀦𑀸𑀢𑀺 𑀧𑀝𑀺𑀮𑀺𑀬𑀫𑀸𑀦𑁂𑀦 𑀲𑀸𑀥𑀼 𑀔𑁆𑀯𑀲𑁆𑀲 𑀪𑀦𑁆𑀢𑁂𑀢𑀺 ‘‘𑀨𑀸𑀲𑀼𑀯𑀺𑀳𑀸𑀭𑀁 𑀓𑀭𑀺𑀲𑁆𑀲𑀸𑀫𑀺 𑀦𑁂𑀲’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳.

𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀭𑀻𑀢𑀺 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺𑀁 𑀅𑀓𑀸𑀲𑀺. 𑀏𑀢𑁆𑀣 𑀘 ‘‘𑀫𑀦𑁆𑀤𑀫𑀦𑁆𑀤𑁄 𑀲𑀻𑀢𑀓𑀯𑀸𑀢𑁄 𑀯𑀸𑀬𑀢𑀼, 𑀅𑀩𑁆𑀪𑀫𑀡𑁆𑀟𑀧𑀁 𑀓𑀢𑁆𑀯𑀸 𑀤𑁂𑀯𑁄 𑀏𑀓𑀫𑁂𑀓𑀁 𑀨𑀼𑀲𑀸𑀬𑀢𑀽’’𑀢𑀺 𑀏𑀯𑀁 𑀦𑀸𑀦𑀸𑀧𑀭𑀺𑀓𑀫𑁆𑀫𑀁 𑁋 ‘‘𑀲𑀯𑀸𑀢𑁄 𑀤𑁂𑀯𑁄 𑀯𑀲𑁆𑀲𑀢𑀽’’𑀢𑀺 𑀏𑀯𑀁 𑀅𑀥𑀺𑀝𑁆𑀞𑀸𑀦𑀁 𑀏𑀓𑀢𑁄𑀧𑀺 𑀳𑁄𑀢𑀺. ‘‘𑀲𑀯𑀸𑀢𑁄 𑀤𑁂𑀯𑁄 𑀯𑀲𑁆𑀲𑀢𑀽𑀢𑀺 𑀏𑀓𑀢𑁄𑀧𑀭𑀺𑀓𑀫𑁆𑀫𑀁, 𑀫𑀦𑁆𑀤𑀫𑀦𑁆𑀤𑁄 𑀲𑀻𑀢𑀓𑀯𑀸𑀢𑁄 𑀯𑀸𑀬𑀢𑀼, 𑀅𑀩𑁆𑀪𑀫𑀡𑁆𑀟𑀧𑀁 𑀓𑀢𑁆𑀯𑀸 𑀤𑁂𑀯𑁄 𑀏𑀓𑀫𑁂𑀓𑀁 𑀨𑀼𑀲𑀸𑀬𑀢𑀽’’𑀢𑀺 𑀏𑀯𑀁 𑀦𑀸𑀦𑀸𑀅𑀥𑀺𑀝𑁆𑀞𑀸𑀦𑀁 𑀳𑁄𑀢𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀸𑀦𑀸𑀧𑀭𑀺𑀓𑀫𑁆𑀫𑀁 𑀦𑀸𑀦𑀸𑀥𑀺𑀝𑁆𑀞𑀸𑀦𑀁, 𑀏𑀓𑀢𑁄 𑀧𑀭𑀺𑀓𑀫𑁆𑀫𑀁 𑀏𑀓𑀢𑁄 𑀅𑀥𑀺𑀝𑁆𑀞𑀸𑀦𑀫𑁆𑀧𑀺 𑀳𑁄𑀢𑀺𑀬𑁂𑀯. 𑀬𑀣𑀸 𑀢𑀣𑀸 𑀓𑀭𑁄𑀦𑁆𑀢𑀲𑁆𑀲 𑀧𑀦 𑀧𑀸𑀤𑀓𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀓𑀢𑀧𑀭𑀺𑀓𑀫𑁆𑀫𑀲𑁆𑀲 𑀧𑀭𑀺𑀓𑀫𑁆𑀫𑀸𑀦𑀦𑁆𑀢𑀭𑁂𑀦 𑀫𑀳𑀕𑁆𑀕𑀢𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑁂𑀦𑁂𑀯 𑀢𑀁 𑀇𑀚𑁆𑀛𑀢𑀺. 𑀑𑀓𑀸𑀲𑁂𑀲𑀻𑀢𑀺 𑀯𑀺𑀧𑁆𑀧𑀓𑀺𑀭𑀺.

𑁫. 𑀧𑀞𑀫𑀓𑀸𑀫𑀪𑀽𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁭. 𑀧𑀜𑁆𑀘𑀫𑁂 𑀦𑁂𑀮𑀗𑁆𑀕𑁄𑀢𑀺 𑀦𑀺𑀤𑁆𑀤𑁄𑀲𑁄. 𑀲𑁂𑀢𑀧𑀘𑁆𑀙𑀸𑀤𑁄𑀢𑀺 𑀲𑁂𑀢𑀧𑀝𑀺𑀘𑁆𑀙𑀸𑀤𑀦𑁄. 𑀅𑀦𑀻𑀖𑀦𑁆𑀢𑀺 𑀦𑀺𑀤𑁆𑀤𑀼𑀓𑁆𑀔𑀁. 𑀫𑀼𑀳𑀼𑀢𑁆𑀢𑀁 𑀢𑀼𑀡𑁆𑀳𑀻 𑀳𑀼𑀢𑁆𑀯𑀸𑀢𑀺 𑀢𑀲𑁆𑀲 𑀅𑀢𑁆𑀣𑀧𑁂𑀓𑁆𑀔𑀦𑀢𑁆𑀣𑀁 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀓𑀡𑁆𑀡𑁂 𑀓𑀼𑀡𑁆𑀟𑀮𑀁 𑀯𑀺𑀬 𑀲𑀜𑁆𑀘𑀸𑀮𑁂𑀦𑁆𑀢𑁄 ‘‘𑀅𑀬𑀁 𑀇𑀫𑀲𑁆𑀲 𑀅𑀢𑁆𑀣𑁄, 𑀅𑀬𑀁 𑀇𑀫𑀲𑁆𑀲 𑀅𑀢𑁆𑀣𑁄’’𑀢𑀺 𑀉𑀧𑀧𑀭𑀺𑀓𑁆𑀔𑀡𑀢𑁆𑀣𑀁 𑀫𑀼𑀳𑀼𑀢𑁆𑀢𑀁 𑀢𑀼𑀡𑁆𑀳𑀻 𑀳𑀼𑀢𑁆𑀯𑀸. 𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀬𑀸. 𑀇𑀫𑀁 𑀧𑀦 𑀧𑀜𑁆𑀳𑀁 𑀓𑀣𑁂𑀦𑁆𑀢𑁄 𑀉𑀧𑀸𑀲𑀓𑁄 𑀤𑀼𑀓𑁆𑀓𑀭𑀁 𑀅𑀓𑀸𑀲𑀺. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀳𑀺 ‘‘𑀧𑀲𑁆𑀲𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀏𑀢𑀁 𑀪𑀺𑀓𑁆𑀔𑀼𑀁 𑀆𑀕𑀘𑁆𑀙𑀦𑁆𑀢𑀁 𑀑𑀤𑀸𑀢𑀓𑀁 𑀢𑀦𑀼𑀓𑀁 𑀢𑀼𑀗𑁆𑀕𑀦𑀸𑀲𑀺𑀓’’𑀦𑁆𑀢𑀺 (𑀲𑀁. 𑀦𑀺. 𑁨.𑁨𑁪𑁫) 𑀅𑀢𑁆𑀢𑀦𑁄 𑀤𑀺𑀝𑁆𑀞𑁂𑀦 𑀓𑀣𑁂𑀲𑀺. 𑀅𑀬𑀁 𑀧𑀦 𑀦𑀬𑀕𑁆𑀕𑀸𑀳𑁂𑀦 ‘‘𑀅𑀭𑀳𑀢𑁄 𑀏𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀆𑀳.

𑁬. 𑀤𑀼𑀢𑀺𑀬𑀓𑀸𑀫𑀪𑀽𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁮. 𑀙𑀝𑁆𑀞𑁂 𑀓𑀢𑀺 𑀦𑀼 𑀔𑁄 𑀪𑀦𑁆𑀢𑁂 𑀲𑀗𑁆𑀔𑀸𑀭𑀸𑀢𑀺 𑀅𑀬𑀁 𑀓𑀺𑀭, 𑀕𑀳𑀧𑀢𑀺, 𑀦𑀺𑀭𑁄𑀥𑀁 𑀯𑀮𑀜𑁆𑀚𑁂𑀢𑀺, 𑀢𑀲𑁆𑀫𑀸 ‘‘𑀦𑀺𑀭𑁄𑀥𑀧𑀸𑀤𑀓𑁂 𑀲𑀗𑁆𑀔𑀸𑀭𑁂 𑀧𑀼𑀘𑁆𑀙𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳. 𑀣𑁂𑀭𑁄𑀧𑀺𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀲𑀼 𑀅𑀦𑁂𑀓𑁂𑀲𑀼 𑀲𑀗𑁆𑀔𑀸𑀭𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀓𑀸𑀬𑀲𑀗𑁆𑀔𑀸𑀭𑀸𑀤𑀬𑁄𑀯 𑀆𑀘𑀺𑀓𑁆𑀔𑀦𑁆𑀢𑁄 𑀢𑀬𑁄 𑀔𑁄 𑀕𑀳𑀧𑀢𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸 𑀓𑀸𑀬𑁂𑀦 𑀲𑀗𑁆𑀔𑀭𑀻𑀬𑀢𑀺 𑀦𑀺𑀩𑁆𑀩𑀢𑁆𑀢𑀻𑀬𑀢𑀻𑀢𑀺 𑀓𑀸𑀬𑀲𑀗𑁆𑀔𑀸𑀭𑁄. 𑀯𑀸𑀘𑀸𑀬 𑀲𑀗𑁆𑀔𑀭𑁄𑀢𑀺 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀯𑀘𑀻𑀲𑀗𑁆𑀔𑀸𑀭𑁄. 𑀘𑀺𑀢𑁆𑀢𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸 𑀘𑀺𑀢𑁆𑀢𑁂𑀦 𑀲𑀗𑁆𑀔𑀭𑀻𑀬𑀢𑀺 𑀦𑀺𑀩𑁆𑀩𑀢𑁆𑀢𑀻𑀬𑀢𑀻𑀢𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑁄.

𑀓𑀢𑀫𑁄 𑀧𑀦 𑀪𑀦𑁆𑀢𑁂𑀢𑀺 𑀇𑀥 𑀓𑀺𑀁 𑀧𑀼𑀘𑁆𑀙𑀢𑀺? ‘‘𑀇𑀫𑁂 𑀲𑀗𑁆𑀔𑀸𑀭𑀸 𑀅𑀜𑁆𑀜𑀫𑀜𑁆𑀜𑀁 𑀫𑀺𑀲𑁆𑀲𑀸 𑀆𑀮𑀼𑀴𑀺𑀢𑀸 𑀅𑀯𑀺𑀪𑀽𑀢𑀸 𑀤𑀼𑀤𑁆𑀤𑀻𑀧𑀦𑀸. 𑀢𑀣𑀸 𑀳𑀺 𑀓𑀸𑀬𑀤𑁆𑀯𑀸𑀭𑁂 𑀆𑀤𑀸𑀦𑀕𑁆𑀕𑀳𑀡𑀫𑀼𑀜𑁆𑀘𑀦𑀘𑁄𑀧𑀦𑀸𑀦𑀺 𑀧𑀸𑀧𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑀸 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀘𑁂𑀢𑀦𑀸 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑁂𑀢𑀦𑀸𑀢𑀺 𑀏𑀯𑀁 𑀓𑀼𑀲𑀮𑀸𑀓𑀼𑀲𑀮𑀸 𑀯𑀻𑀲𑀢𑀺 𑀘𑁂𑀢𑀦𑀸𑀧𑀺, 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀧𑀺 𑀓𑀸𑀬𑀲𑀗𑁆𑀔𑀸𑀭𑁄𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀯𑀘𑀻𑀤𑁆𑀯𑀸𑀭𑁂 𑀳𑀦𑀼𑀲𑀜𑁆𑀘𑁄𑀧𑀦𑀁 𑀯𑀘𑀻𑀪𑁂𑀤𑀁 𑀧𑀸𑀧𑁂𑀢𑁆𑀯𑀸 𑀉𑀧𑁆𑀧𑀦𑁆𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀯 𑀯𑀻𑀲𑀢𑀺 𑀘𑁂𑀢𑀦𑀸𑀧𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀧𑀺 𑀯𑀘𑀻𑀲𑀗𑁆𑀔𑀸𑀭𑁄𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀘𑁄𑀧𑀦𑀁 𑀅𑀧𑀢𑁆𑀯𑀸 𑀭𑀳𑁄 𑀦𑀺𑀲𑀺𑀦𑁆𑀦𑀲𑁆𑀲 𑀘𑀺𑀦𑁆𑀢𑀬𑀢𑁄 𑀉𑀧𑁆𑀧𑀦𑁆𑀦𑀸 𑀓𑀼𑀲𑀮𑀸𑀓𑀼𑀲𑀮𑀸 𑀏𑀓𑀽𑀦𑀢𑀺𑀁𑀲𑀘𑁂𑀢𑀦𑀸𑀧𑀺, 𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸𑀧𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑁄𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀁 𑀇𑀫𑁂 𑀲𑀗𑁆𑀔𑀸𑀭𑀸 𑀅𑀜𑁆𑀜𑀫𑀜𑁆𑀜𑀁 𑀫𑀺𑀲𑁆𑀲𑀸 𑀆𑀮𑀼𑀴𑀺𑀢𑀸 𑀅𑀯𑀺𑀪𑀽𑀢𑀸 𑀤𑀼𑀤𑁆𑀤𑀻𑀧𑀦𑀸, 𑀢𑁂 𑀧𑀸𑀓𑀝𑁂 𑀯𑀺𑀪𑀽𑀢𑁂 𑀓𑀢𑁆𑀯𑀸 𑀓𑀣𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀧𑀼𑀘𑁆𑀙𑀺.

𑀓𑀲𑁆𑀫𑀸 𑀧𑀦 𑀪𑀦𑁆𑀢𑁂𑀢𑀺 𑀇𑀥 𑀓𑀸𑀬𑀲𑀗𑁆𑀔𑀸𑀭𑀸𑀤𑀺𑀦𑀸𑀫𑀲𑁆𑀲 𑀧𑀤𑀢𑁆𑀣𑀁 𑀧𑀼𑀘𑁆𑀙𑀢𑀺. 𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀸𑀢𑀺 𑀓𑀸𑀬𑀦𑀺𑀲𑁆𑀲𑀺𑀢𑀸. 𑀓𑀸𑀬𑁂 𑀲𑀢𑀺 𑀳𑁄𑀦𑁆𑀢𑀺, 𑀅𑀲𑀢𑀺 𑀦 𑀳𑁄𑀦𑁆𑀢𑀺. 𑀘𑀺𑀢𑁆𑀢𑀧𑁆𑀧𑀝𑀺𑀩𑀤𑁆𑀥𑀸𑀢𑀺 𑀘𑀺𑀢𑁆𑀢𑀦𑀺𑀲𑁆𑀲𑀺𑀢𑀸. 𑀘𑀺𑀢𑁆𑀢𑁂 𑀲𑀢𑀺 𑀳𑁄𑀦𑁆𑀢𑀺, 𑀅𑀲𑀢𑀺 𑀦 𑀳𑁄𑀦𑁆𑀢𑀺.

𑀇𑀤𑀸𑀦𑀺 ‘‘𑀓𑀺𑀁 𑀦𑀼 𑀔𑁄 𑀏𑀲 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀯𑀮𑀜𑁆𑀚𑁂𑀢𑀺, 𑀦𑁄 𑀯𑀮𑀜𑁆𑀚𑁂𑀢𑀺, 𑀘𑀺𑀡𑁆𑀡𑀯𑀲𑀻 𑀯𑀸 𑀢𑀢𑁆𑀣 𑀦𑁄 𑀘𑀺𑀡𑁆𑀡𑀯𑀲𑀻’’𑀢𑀺 𑀚𑀸𑀦𑀦𑀢𑁆𑀣𑀁 𑀧𑀼𑀘𑁆𑀙𑀦𑁆𑀢𑁄 𑀓𑀣𑀁 𑀧𑀦 𑀪𑀦𑁆𑀢𑁂 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀆𑀳. 𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀲𑀫𑀸𑀧𑀚𑁆𑀚𑀺𑀲𑁆𑀲𑀦𑁆𑀢𑀺 𑀯𑀸 𑀲𑀫𑀸𑀧𑀚𑁆𑀚𑀸𑀫𑀻𑀢𑀺 𑀯𑀸 𑀧𑀤𑀤𑁆𑀯𑀬𑁂𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀓𑀸𑀮𑁄 𑀓𑀣𑀺𑀢𑁄. 𑀲𑀫𑀸𑀧𑀦𑁆𑀦𑁄𑀢𑀺 𑀧𑀤𑁂𑀦 𑀅𑀦𑁆𑀢𑁄𑀦𑀺𑀭𑁄𑀥𑁄. 𑀢𑀣𑀸 𑀧𑀼𑀭𑀺𑀫𑁂𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀲𑀘𑀺𑀢𑁆𑀢𑀓𑀓𑀸𑀮𑁄 𑀓𑀣𑀺𑀢𑁄, 𑀧𑀘𑁆𑀙𑀺𑀫𑁂𑀦 𑀅𑀘𑀺𑀢𑁆𑀢𑀓𑀓𑀸𑀮𑁄.

𑀧𑀼𑀩𑁆𑀩𑁂𑀯 𑀢𑀣𑀸 𑀘𑀺𑀢𑁆𑀢𑀁 𑀪𑀸𑀯𑀺𑀢𑀁 𑀳𑁄𑀢𑀻𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀓𑀸𑀮𑁂𑀬𑁂𑀯 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀅𑀘𑀺𑀢𑁆𑀢𑀓𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀁 𑀘𑀺𑀢𑁆𑀢𑀁 𑀪𑀸𑀯𑀺𑀢𑀁 𑀳𑁄𑀢𑀺. 𑀬𑀁 𑀢𑀁 𑀢𑀣𑀢𑁆𑀢𑀸𑀬 𑀉𑀧𑀦𑁂𑀢𑀻𑀢𑀺 𑀬𑀁 𑀧𑀦 𑀏𑀯𑀁 𑀪𑀸𑀯𑀺𑀢𑀁 𑀘𑀺𑀢𑁆𑀢𑀁, 𑀢𑀁 𑀧𑀼𑀕𑁆𑀕𑀮𑀁 𑀢𑀣𑀢𑁆𑀢𑀸𑀬 𑀅𑀘𑀺𑀢𑁆𑀢𑀓𑀪𑀸𑀯𑀸𑀬 𑀉𑀧𑀦𑁂𑀢𑀺. 𑀯𑀘𑀻𑀲𑀗𑁆𑀔𑀸𑀭𑁄 𑀧𑀞𑀫𑀁 𑀦𑀺𑀭𑀼𑀚𑁆𑀛𑀢𑀻𑀢𑀺 𑀲𑁂𑀲𑀲𑀗𑁆𑀔𑀸𑀭𑁂𑀳𑀺 𑀧𑀞𑀫𑀁 𑀤𑀼𑀢𑀺𑀬𑀚𑁆𑀛𑀸𑀦𑁂𑀬𑁂𑀯 𑀦𑀺𑀭𑀼𑀚𑁆𑀛𑀢𑀺. 𑀢𑀢𑁄 𑀓𑀸𑀬𑀲𑀗𑁆𑀔𑀸𑀭𑁄𑀢𑀺 𑀢𑀢𑁄 𑀧𑀭𑀁 𑀓𑀸𑀬𑀲𑀗𑁆𑀔𑀸𑀭𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑁂 𑀦𑀺𑀭𑀼𑀚𑁆𑀛𑀢𑀺. 𑀢𑀢𑁄 𑀘𑀺𑀢𑁆𑀢𑀲𑀗𑁆𑀔𑀸𑀭𑁄𑀢𑀺 𑀢𑀢𑁄 𑀧𑀭𑀁 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀅𑀦𑁆𑀢𑁄𑀦𑀺𑀭𑁄𑀥𑁂 𑀦𑀺𑀭𑀼𑀚𑁆𑀛𑀢𑀺. 𑀆𑀬𑀽𑀢𑀺 𑀭𑀽𑀧𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀯𑀺𑀧𑀭𑀺𑀪𑀺𑀦𑁆𑀦𑀸𑀦𑀻𑀢𑀺 𑀉𑀧𑀳𑀢𑀸𑀦𑀺 𑀯𑀺𑀦𑀝𑁆𑀞𑀸𑀦𑀺.

𑀢𑀢𑁆𑀣 𑀓𑁂𑀘𑀺 ‘‘𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀲𑁆𑀲 ‘𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀘 𑀦𑀺𑀭𑀼𑀤𑁆𑀥𑁄’𑀢𑀺 𑀯𑀘𑀦𑀢𑁄 𑀘𑀺𑀢𑁆𑀢𑀁 𑀅𑀦𑀺𑀭𑀼𑀤𑁆𑀥𑀁 𑀳𑁄𑀢𑀺, 𑀢𑀲𑁆𑀫𑀸 𑀲𑀘𑀺𑀢𑁆𑀢𑀓𑀸𑀧𑀺 𑀅𑀬𑀁 𑀲𑀫𑀸𑀧𑀢𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑁂 𑀯𑀢𑁆𑀢𑀩𑁆𑀩𑀸 𑁋 ‘‘𑀯𑀘𑀻𑀲𑀗𑁆𑀔𑀸𑀭𑁄𑀧𑀺𑀲𑁆𑀲 𑀦𑀺𑀭𑀼𑀤𑁆𑀥𑁄’’𑀢𑀺 𑀯𑀘𑀦𑀢𑁄 𑀯𑀸𑀘𑀸 𑀅𑀦𑀺𑀭𑀼𑀤𑁆𑀥𑀸 𑀳𑁄𑀢𑀺, 𑀢𑀲𑁆𑀫𑀸 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁂𑀦 𑀥𑀫𑁆𑀫𑀫𑁆𑀧𑀺 𑀓𑀣𑁂𑀦𑁆𑀢𑁂𑀦 𑀲𑀚𑁆𑀛𑀸𑀬𑀫𑁆𑀧𑀺 𑀓𑀭𑁄𑀦𑁆𑀢𑁂𑀦 𑀦𑀺𑀲𑀻𑀤𑀺𑀢𑀩𑁆𑀩𑀁 𑀲𑀺𑀬𑀸. 𑀬𑁄 𑀘𑀸𑀬𑀁 𑀫𑀢𑁄 𑀓𑀸𑀮𑀗𑁆𑀓𑀢𑁄, 𑀢𑀲𑁆𑀲𑀸𑀧𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀦𑀺𑀭𑀼𑀤𑁆𑀥𑁄𑀢𑀺 𑀯𑀘𑀦𑀢𑁄 𑀘𑀺𑀢𑁆𑀢𑀁 𑀅𑀦𑀺𑀭𑀼𑀤𑁆𑀥𑀁 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀓𑀸𑀮𑀗𑁆𑀓𑀢𑁂 𑀫𑀸𑀢𑀸𑀧𑀺𑀢𑀭𑁄 𑀯𑀸 𑀅𑀭𑀳𑀦𑁆𑀢𑁂 𑀯𑀸 𑀛𑀸𑀧𑁂𑀦𑁆𑀢𑁂𑀦 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀁 𑀓𑀢𑀁 𑀪𑀯𑁂𑀬𑁆𑀬. 𑀇𑀢𑀺 𑀩𑁆𑀬𑀜𑁆𑀚𑀦𑁂 𑀅𑀪𑀺𑀦𑀺𑀯𑁂𑀲𑀁 𑀅𑀓𑀢𑁆𑀯𑀸 𑀆𑀘𑀭𑀺𑀬𑀸𑀦𑀁 𑀦𑀬𑁂 𑀞𑀢𑁆𑀯𑀸 𑀅𑀢𑁆𑀣𑁄 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄. 𑀅𑀢𑁆𑀣𑁄 𑀳𑀺 𑀧𑀝𑀺𑀲𑀭𑀡𑀁, 𑀦 𑀩𑁆𑀬𑀜𑁆𑀚𑀦𑀁.

𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀧𑁆𑀧𑀲𑀦𑁆𑀦𑀸𑀦𑀻𑀢𑀺 𑀓𑀺𑀭𑀺𑀬𑀫𑀬𑀧𑀯𑀢𑁆𑀢𑀲𑁆𑀫𑀺𑀜𑁆𑀳𑀺 𑀯𑀢𑁆𑀢𑀫𑀸𑀦𑁂 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑁂𑀲𑀼 𑀧𑀲𑀸𑀤𑁂 𑀖𑀝𑁆𑀝𑁂𑀦𑁆𑀢𑁂𑀲𑀼 𑀇𑀦𑁆𑀤𑁆𑀭𑀺𑀬𑀸𑀦𑀺 𑀓𑀺𑀮𑀫𑀦𑁆𑀢𑀺, 𑀉𑀧𑀳𑀢𑀸𑀦𑀺 𑀫𑀓𑁆𑀔𑀺𑀢𑁆𑀢𑀸𑀦𑀺 𑀯𑀺𑀬 𑀳𑁄𑀦𑁆𑀢𑀺 𑀯𑀸𑀢𑀸𑀤𑀻𑀳𑀺 𑀉𑀝𑁆𑀞𑀺𑀢𑀭𑀚𑁂𑀦 𑀘𑀢𑀼𑀫𑀳𑀸𑀧𑀣𑁂 𑀞𑀧𑀺𑀢𑀆𑀤𑀸𑀲𑁄 𑀯𑀺𑀬. 𑀬𑀣𑀸 𑀧𑀦 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀜𑁆𑀚𑀽𑀲𑀸𑀤𑀻𑀲𑀼 𑀞𑀧𑀺𑀢𑁄 𑀆𑀤𑀸𑀲𑁄 𑀅𑀦𑁆𑀢𑁄𑀬𑁂𑀯 𑀯𑀺𑀭𑁄𑀘𑀢𑀺, 𑀏𑀯𑀁 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀦𑁆𑀢𑁄𑀦𑀺𑀭𑁄𑀥𑁂 𑀧𑀜𑁆𑀘 𑀧𑀲𑀸𑀤𑀸 𑀅𑀢𑀺𑀯𑀺𑀬 𑀯𑀺𑀭𑁄𑀘𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀇𑀦𑁆𑀤𑁆𑀭𑀺𑀬𑀸𑀦𑀺 𑀯𑀺𑀧𑁆𑀧𑀲𑀦𑁆𑀦𑀸𑀦𑀻’’𑀢𑀺.

𑀯𑀼𑀝𑁆𑀞𑀳𑀺𑀲𑁆𑀲𑀦𑁆𑀢𑀺 𑀯𑀸 𑀯𑀼𑀝𑁆𑀞𑀳𑀸𑀫𑀻𑀢𑀺 𑀯𑀸 𑀧𑀤𑀤𑁆𑀯𑀬𑁂𑀦 𑀅𑀦𑁆𑀢𑁄𑀦𑀺𑀭𑁄𑀥𑀓𑀸𑀮𑁄 𑀓𑀣𑀺𑀢𑁄, 𑀯𑀼𑀝𑁆𑀞𑀺𑀢𑁄𑀢𑀺 𑀧𑀤𑁂𑀦 𑀨𑀮𑀲𑀫𑀸𑀧𑀢𑁆𑀢𑀺𑀓𑀸𑀮𑁄. 𑀢𑀣𑀸 𑀧𑀼𑀭𑀺𑀫𑁂𑀳𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺 𑀅𑀘𑀺𑀢𑁆𑀢𑀓𑀓𑀸𑀮𑁄 𑀓𑀣𑀺𑀢𑁄, 𑀧𑀘𑁆𑀙𑀺𑀫𑁂𑀦 𑀲𑀘𑀺𑀢𑁆𑀢𑀓𑀓𑀸𑀮𑁄. 𑀧𑀼𑀩𑁆𑀩𑁂𑀯 𑀢𑀣𑀸 𑀘𑀺𑀢𑁆𑀢𑀁 𑀪𑀸𑀯𑀺𑀢𑀁 𑀳𑁄𑀢𑀻𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀓𑀸𑀮𑁂𑀬𑁂𑀯 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀅𑀘𑀺𑀢𑁆𑀢𑀓𑁄 𑀳𑀼𑀢𑁆𑀯𑀸 𑀢𑀢𑁄 𑀧𑀭𑀁 𑀲𑀘𑀺𑀢𑁆𑀢𑀓𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀁 𑀘𑀺𑀢𑁆𑀢𑀁 𑀪𑀸𑀯𑀺𑀢𑀁 𑀳𑁄𑀢𑀺. 𑀬𑀁 𑀢𑀁 𑀢𑀣𑀢𑁆𑀢𑀸𑀬 𑀉𑀧𑀦𑁂𑀢𑀻𑀢𑀺 𑀬𑀁 𑀏𑀯𑀁 𑀪𑀸𑀯𑀺𑀢𑀁 𑀘𑀺𑀢𑁆𑀢𑀁, 𑀢𑀁 𑀧𑀼𑀕𑁆𑀕𑀮𑀁 𑀢𑀣𑀢𑁆𑀢𑀸𑀬 𑀲𑀘𑀺𑀢𑁆𑀢𑀓𑀪𑀸𑀯𑀸𑀬 𑀉𑀧𑀦𑁂𑀢𑀺. 𑀇𑀢𑀺 𑀳𑁂𑀝𑁆𑀞𑀸 𑀦𑀺𑀭𑁄𑀥𑀲𑀫𑀸𑀧𑀚𑁆𑀚𑀦𑁆𑀦𑀓𑀸𑀮𑁄 𑀕𑀳𑀺𑀢𑁄, 𑀇𑀥 𑀦𑀺𑀭𑁄𑀥𑀢𑁄 𑀯𑀼𑀝𑁆𑀞𑀸𑀦𑀓𑀸𑀮𑁄.

𑀇𑀤𑀸𑀦𑀺 𑀦𑀺𑀭𑁄𑀥𑀓𑀣𑀁 𑀓𑀣𑁂𑀢𑀼𑀁 𑀓𑀸𑀮𑁄𑀢𑀺 𑀦𑀺𑀭𑁄𑀥𑀓𑀣𑀸 𑀓𑀣𑁂𑀢𑀩𑁆𑀩𑀸 𑀲𑀺𑀬𑀸. 𑀲𑀸 𑀧𑀦𑁂𑀲𑀸 ‘‘𑀤𑁆𑀯𑀻𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀢𑀬𑁄 𑀘 𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑀲𑁆𑀲𑀤𑁆𑀥𑀺𑀬𑀸 𑀲𑁄𑀴𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀺 𑀦𑀯𑀳𑀺 𑀲𑀫𑀸𑀥𑀺𑀘𑀭𑀺𑀬𑀸𑀳𑀺 𑀯𑀲𑀻𑀪𑀸𑀯𑀢𑀸𑀧𑀜𑁆𑀜𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑀁 𑀜𑀸𑀡’’𑀦𑁆𑀢𑀺 𑀫𑀸𑀢𑀺𑀓𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀓𑀣𑀺𑀢𑀸, 𑀢𑀲𑁆𑀫𑀸 𑀢𑀢𑁆𑀣 𑀓𑀣𑀺𑀢𑀦𑀬𑁂𑀦𑁂𑀯 𑀕𑀳𑁂𑀢𑀩𑁆𑀩𑀸. 𑀓𑁄 𑀧𑀦𑀸𑀬𑀁 𑀦𑀺𑀭𑁄𑀥𑁄 𑀦𑀸𑀫? 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀧𑀝𑀺𑀲𑀗𑁆𑀔𑀸 𑀅𑀧𑁆𑀧𑀯𑀢𑁆𑀢𑀺. 𑀅𑀣 𑀓𑀺𑀫𑀢𑁆𑀣𑀫𑁂𑀢𑀁 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺? 𑀲𑀗𑁆𑀔𑀸𑀭𑀸𑀦𑀁 𑀧𑀯𑀢𑁆𑀢𑁂 𑀉𑀓𑁆𑀓𑀡𑁆𑀞𑀺𑀢𑀸 𑀲𑀢𑁆𑀢𑀸𑀳𑀁 𑀅𑀘𑀺𑀢𑁆𑀢𑀓𑀸 𑀳𑀼𑀢𑁆𑀯𑀸 𑀲𑀼𑀔𑀁 𑀯𑀺𑀳𑀭𑀺𑀲𑁆𑀲𑀸𑀫, 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀁 𑀦𑀸𑀫𑁂𑀢𑀁 𑀬𑀤𑀺𑀤𑀁 𑀦𑀺𑀭𑁄𑀥𑁄𑀢𑀺 𑀏𑀢𑀤𑀢𑁆𑀣𑀁 𑀲𑀫𑀸𑀧𑀚𑁆𑀚𑀦𑁆𑀢𑀺.

𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀦𑀺𑀭𑁄𑀥𑀸 𑀯𑀼𑀝𑁆𑀞𑀳𑀦𑁆𑀢𑀲𑁆𑀲 𑀳𑀺 𑀨𑀮𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀁 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀺. 𑀢𑀁𑀲𑀫𑁆𑀧𑀬𑀼𑀢𑁆𑀢𑀁 𑀲𑀜𑁆𑀜𑀜𑁆𑀘 𑀯𑁂𑀤𑀦𑀜𑁆𑀘 𑀲𑀦𑁆𑀥𑀸𑀬 ‘‘𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀆𑀳. 𑀢𑀢𑁄 𑀓𑀸𑀬𑀲𑀗𑁆𑀔𑀸𑀭𑁄𑀢𑀺 𑀢𑀢𑁄 𑀧𑀭𑀁 𑀪𑀯𑀗𑁆𑀕𑀲𑀫𑀬𑁂 𑀓𑀸𑀬𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀺.

𑀓𑀺𑀁 𑀧𑀦 𑀨𑀮𑀲𑀫𑀸𑀧𑀢𑁆𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺? 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀇𑀫𑀲𑁆𑀲 𑀧𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀸 𑀨𑀮𑀲𑀫𑀸𑀧𑀢𑁆𑀢𑀺, 𑀲𑀸 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀓𑀺𑀁 𑀯𑀸 𑀏𑀢𑁂𑀦? 𑀨𑀮𑀲𑀫𑀸𑀧𑀢𑁆𑀢𑀺 𑀧𑀞𑀫𑀚𑁆𑀛𑀸𑀦𑀺𑀓𑀸 𑀯𑀸 𑀳𑁄𑀢𑀼 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀸 𑀯𑀸, 𑀲𑀦𑁆𑀢𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀅𑀩𑁆𑀩𑁄𑀳𑀸𑀭𑀺𑀓𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀅𑀩𑁆𑀩𑁄𑀳𑀸𑀭𑀺𑀓𑀪𑀸𑀯𑁄 𑀲𑀜𑁆𑀚𑀻𑀯𑀢𑁆𑀣𑁂𑀭𑀯𑀢𑁆𑀣𑀼𑀦𑀸 𑀯𑁂𑀤𑀺𑀢𑀩𑁆𑀩𑁄. 𑀲𑀜𑁆𑀚𑀻𑀯𑀢𑁆𑀣𑁂𑀭𑀲𑁆𑀲 𑀳𑀺 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀸𑀬 𑀓𑀺𑀁𑀲𑀼𑀓𑀧𑀼𑀧𑁆𑀨𑀲𑀤𑀺𑀲𑁂 𑀯𑀻𑀢𑀘𑁆𑀘𑀺𑀢𑀗𑁆𑀕𑀸𑀭𑁂 𑀫𑀤𑁆𑀤𑀫𑀸𑀦𑀲𑁆𑀲 𑀕𑀘𑁆𑀙𑀢𑁄 𑀘𑀻𑀯𑀭𑁂 𑀅𑀁𑀲𑀼𑀫𑀢𑁆𑀢𑀫𑁆𑀧𑀺 𑀦 𑀛𑀸𑀬𑀺, 𑀉𑀲𑁆𑀫𑀸𑀓𑀸𑀭𑀫𑀢𑁆𑀢𑀫𑁆𑀧𑀺 𑀦𑀸𑀳𑁄𑀲𑀺. 𑀲𑀫𑀸𑀧𑀢𑁆𑀢𑀺𑀩𑀮𑀁 𑀦𑀸𑀫𑁂𑀢𑀦𑁆𑀢𑀺 𑀯𑀤𑀦𑁆𑀢𑀺. 𑀏𑀯𑀫𑁂𑀯 𑀲𑀦𑁆𑀢𑀸𑀬 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀺𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀅𑀩𑁆𑀩𑁄𑀳𑀸𑀭𑀺𑀓𑀸 𑀳𑁄𑀦𑁆𑀢𑀻𑀢𑀺 𑀪𑀯𑀗𑁆𑀕𑀲𑀫𑀬𑁂𑀦𑁂𑀯𑁂𑀢𑀁 𑀓𑀣𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁄 𑀯𑀘𑀻𑀲𑀗𑁆𑀔𑀸𑀭𑁄𑀢𑀺 𑀢𑀢𑁄 𑀧𑀭𑀁 𑀓𑀺𑀭𑀺𑀬𑀫𑀬𑀧𑀯𑀢𑁆𑀢𑀯𑀮𑀜𑁆𑀚𑀦𑀓𑀸𑀮𑁂 𑀯𑀘𑀻𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀺. 𑀓𑀺𑀁 𑀪𑀯𑀗𑁆𑀕𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑁂 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺? 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀁𑀲𑀫𑀼𑀝𑁆𑀞𑀸𑀦𑀸 𑀧𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀯𑀸𑀘𑀁 𑀅𑀪𑀺𑀲𑀗𑁆𑀔𑀸𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻𑀢𑀺 𑀓𑀺𑀭𑀺𑀬𑀫𑀬𑀧𑀯𑀢𑁆𑀢𑀯𑀮𑀜𑁆𑀚𑀦𑀓𑀸𑀮𑁂𑀦𑁂𑀯𑁂𑀢𑀁 𑀓𑀣𑀺𑀢𑀁.

𑀲𑀼𑀜𑁆𑀜𑀢𑁄 𑀨𑀲𑁆𑀲𑁄𑀢𑀺𑀆𑀤𑀬𑁄 𑀲𑀕𑀼𑀡𑁂𑀦𑀸𑀧𑀺 𑀆𑀭𑀫𑁆𑀫𑀡𑁂𑀦𑀸𑀧𑀺 𑀓𑀣𑁂𑀢𑀩𑁆𑀩𑀸. 𑀲𑀕𑀼𑀡𑁂𑀦 𑀢𑀸𑀯 𑀲𑀼𑀜𑁆𑀜𑀢𑀸 𑀦𑀸𑀫 𑀨𑀮𑀲𑀫𑀸𑀧𑀢𑁆𑀢𑀺, 𑀢𑀸𑀬 𑀲𑀳𑀚𑀸𑀢𑀨𑀲𑁆𑀲𑀁 𑀲𑀦𑁆𑀥𑀸𑀬 ‘‘𑀲𑀼𑀜𑁆𑀜𑀢𑁄 𑀨𑀲𑁆𑀲𑁄’’𑀢𑀺 𑀯𑀼𑀢𑁆𑀢𑀁. 𑀅𑀦𑀺𑀫𑀺𑀢𑁆𑀢𑀧𑁆𑀧𑀡𑀺𑀳𑀺𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀆𑀭𑀫𑁆𑀫𑀡𑁂𑀦 𑀧𑀦 𑀦𑀺𑀩𑁆𑀩𑀸𑀦𑀁 𑀭𑀸𑀕𑀸𑀤𑀻𑀳𑀺 𑀲𑀼𑀜𑁆𑀜𑀢𑁆𑀢𑀸 𑀲𑀼𑀜𑁆𑀜𑀢𑀸 𑀦𑀸𑀫, 𑀭𑀸𑀕𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀅𑀪𑀸𑀯𑀸 𑀅𑀦𑀺𑀫𑀺𑀢𑁆𑀢𑀁, 𑀭𑀸𑀕𑀤𑁄𑀲𑀫𑁄𑀳𑀧𑁆𑀧𑀡𑀺𑀥𑀻𑀦𑀁 𑀅𑀪𑀸𑀯𑀸 𑀅𑀧𑁆𑀧𑀡𑀺𑀳𑀺𑀢𑀁, 𑀲𑀼𑀜𑁆𑀜𑀢𑀁 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑁆𑀨𑀲𑁆𑀲𑁄 𑀲𑀼𑀜𑁆𑀜𑀢𑁄 𑀦𑀸𑀫. 𑀅𑀦𑀺𑀫𑀺𑀢𑁆𑀢𑀧𑁆𑀧𑀡𑀺𑀳𑀺𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀅𑀧𑀭𑀸 𑀆𑀕𑀫𑀦𑀺𑀬𑀓𑀣𑀸 𑀦𑀸𑀫 𑀳𑁄𑀢𑀺. 𑀲𑀼𑀜𑁆𑀜𑀢𑀅𑀦𑀺𑀫𑀺𑀢𑁆𑀢𑀅𑀧𑁆𑀧𑀡𑀺𑀳𑀺𑀢𑀸𑀢𑀺 𑀳𑀺 𑀯𑀺𑀧𑀲𑁆𑀲𑀦𑀸𑀧𑀺 𑀯𑀼𑀘𑁆𑀘𑀢𑀺. 𑀢𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀢𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀦𑀺𑀘𑁆𑀘𑀢𑁄 𑀤𑀺𑀲𑁆𑀯𑀸 𑀅𑀦𑀺𑀘𑁆𑀘𑀢𑁄 𑀯𑀼𑀝𑁆𑀞𑀸𑀢𑀺, 𑀢𑀲𑁆𑀲 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸 𑀅𑀦𑀺𑀫𑀺𑀢𑁆𑀢𑀸 𑀦𑀸𑀫 𑀳𑁄𑀢𑀺. 𑀬𑁄 𑀤𑀼𑀓𑁆𑀔𑀢𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀤𑀼𑀓𑁆𑀔𑀢𑁄 𑀤𑀺𑀲𑁆𑀯𑀸 𑀤𑀼𑀓𑁆𑀔𑀢𑁄 𑀯𑀼𑀝𑁆𑀞𑀸𑀢𑀺, 𑀢𑀲𑁆𑀲 𑀅𑀧𑁆𑀧𑀡𑀺𑀳𑀺𑀢𑀸 𑀦𑀸𑀫. 𑀬𑁄 𑀅𑀦𑀢𑁆𑀢𑀢𑁄 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀦𑀢𑁆𑀢𑀢𑁄 𑀤𑀺𑀲𑁆𑀯𑀸 𑀅𑀦𑀢𑁆𑀢𑀢𑁄 𑀯𑀼𑀝𑁆𑀞𑀸𑀢𑀺, 𑀢𑀲𑁆𑀲 𑀲𑀼𑀜𑁆𑀜𑀢𑀸 𑀦𑀸𑀫. 𑀢𑀢𑁆𑀣 𑀅𑀦𑀺𑀫𑀺𑀢𑁆𑀢𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑁄 𑀅𑀦𑀺𑀫𑀺𑀢𑁆𑀢𑁄 𑀦𑀸𑀫, 𑀅𑀦𑀺𑀫𑀺𑀢𑁆𑀢𑀫𑀕𑁆𑀕𑀲𑁆𑀲 𑀨𑀮𑀁 𑀅𑀦𑀺𑀫𑀺𑀢𑁆𑀢𑀁 𑀦𑀸𑀫, 𑀅𑀦𑀺𑀫𑀺𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀲𑀳𑀚𑀸𑀢𑁂 𑀨𑀲𑁆𑀲𑁂 𑀨𑀼𑀲𑀦𑁆𑀢𑁂 ‘‘𑀅𑀦𑀺𑀫𑀺𑀢𑁆𑀢𑁄 𑀨𑀲𑁆𑀲𑁄 𑀨𑀼𑀲𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀅𑀧𑁆𑀧𑀡𑀺𑀳𑀺𑀢𑀲𑀼𑀜𑁆𑀜𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀆𑀕𑀫𑀦𑀺𑀬𑁂𑀦 𑀓𑀣𑀺𑀢𑁂 𑀧𑀦 𑀲𑀼𑀜𑁆𑀜𑀢𑁄 𑀯𑀸 𑀨𑀲𑁆𑀲𑁄 𑀅𑀦𑀺𑀫𑀺𑀢𑁆𑀢𑁄 𑀯𑀸 𑀨𑀲𑁆𑀲𑁄 𑀅𑀧𑁆𑀧𑀡𑀺𑀳𑀺𑀢𑁄 𑀯𑀸 𑀨𑀲𑁆𑀲𑁄𑀢𑀺 𑀯𑀺𑀓𑀧𑁆𑀧𑁄 𑀆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀫𑀸 𑀲𑀕𑀼𑀡𑁂𑀦 𑀘𑁂𑀯 𑀆𑀭𑀫𑁆𑀫𑀡𑁂𑀦 𑀘 𑀓𑀣𑁂𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀢𑀬𑁄 𑀨𑀲𑁆𑀲𑀸 𑀨𑀼𑀲𑀦𑁆𑀢𑀻𑀢𑀺 𑀲𑀫𑁂𑀢𑀺.

𑀯𑀺𑀯𑁂𑀓𑀦𑀺𑀦𑁆𑀦𑀦𑁆𑀢𑀺𑀆𑀤𑀻𑀲𑀼 𑀦𑀺𑀩𑁆𑀩𑀸𑀦𑀁 𑀯𑀺𑀯𑁂𑀓𑁄 𑀦𑀸𑀫. 𑀢𑀲𑁆𑀫𑀺𑀁 𑀯𑀺𑀯𑁂𑀓𑁂 𑀦𑀺𑀦𑁆𑀦𑀁 𑀑𑀦𑀢𑀦𑁆𑀢𑀺 𑀯𑀺𑀯𑁂𑀓𑀦𑀺𑀦𑁆𑀦𑀁. 𑀯𑀺𑀯𑁂𑀓𑀧𑁄𑀡𑀦𑁆𑀢𑀺 𑀅𑀜𑁆𑀜𑀢𑁄 𑀅𑀕𑀦𑁆𑀢𑁆𑀯𑀸 𑀬𑁂𑀦 𑀯𑀺𑀯𑁂𑀓𑁄, 𑀢𑁂𑀦 𑀯𑀗𑁆𑀓𑀁 𑀯𑀺𑀬 𑀳𑀼𑀢𑁆𑀯𑀸 𑀞𑀺𑀢𑀦𑁆𑀢𑀺 𑀯𑀺𑀯𑁂𑀓𑀧𑁄𑀡𑀁. 𑀬𑁂𑀦 𑀯𑀺𑀯𑁂𑀓𑁄, 𑀢𑁂𑀦 𑀧𑀢𑀫𑀸𑀦𑀁 𑀯𑀺𑀬 𑀞𑀺𑀢𑀦𑁆𑀢𑀺 𑀯𑀺𑀯𑁂𑀓𑀧𑀩𑁆𑀪𑀸𑀭𑀁.

𑁭. 𑀕𑁄𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁯. 𑀲𑀢𑁆𑀢𑀫𑁂 𑀦𑀸𑀦𑀢𑁆𑀣𑀸 𑀘𑁂𑀯 𑀦𑀸𑀦𑀸𑀩𑁆𑀬𑀜𑁆𑀚𑀦𑀸 𑀘𑀸𑀢𑀺 𑀩𑁆𑀬𑀜𑁆𑀚𑀦𑀫𑁆𑀧𑀺 𑀦𑁂𑀲𑀁 𑀦𑀸𑀦𑀁, 𑀅𑀢𑁆𑀣𑁄𑀧𑀺. 𑀢𑀢𑁆𑀣 𑀩𑁆𑀬𑀜𑁆𑀚𑀦𑀲𑁆𑀲 𑀦𑀸𑀦𑀢𑀸 𑀧𑀸𑀓𑀝𑀸. 𑀅𑀢𑁆𑀣𑁄 𑀧𑀦 𑀅𑀧𑁆𑀧𑀫𑀸𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀪𑀽𑀫𑀦𑁆𑀢𑀭𑀢𑁄 𑀫𑀳𑀕𑁆𑀕𑀢𑀸 𑀳𑁄𑀢𑀺 𑀭𑀽𑀧𑀸𑀯𑀘𑀭𑀸, 𑀆𑀭𑀫𑁆𑀫𑀡𑀢𑁄 𑀲𑀢𑁆𑀢𑀧𑀡𑁆𑀡𑀢𑁆𑀢𑀺𑀆𑀭𑀫𑁆𑀫𑀡𑀸. 𑀆𑀓𑀺𑀜𑁆𑀘𑀜𑁆𑀜𑀸 𑀪𑀽𑀫𑀦𑁆𑀢𑀭𑀢𑁄 𑀫𑀳𑀕𑁆𑀕𑀢𑀸 𑀅𑀭𑀽𑀧𑀸𑀯𑀘𑀭𑀸, 𑀆𑀭𑀫𑁆𑀫𑀡𑀢𑁄 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸. 𑀲𑀼𑀜𑁆𑀜𑀢𑀸 𑀪𑀽𑀫𑀦𑁆𑀢𑀭𑀢𑁄 𑀓𑀸𑀫𑀸𑀯𑀘𑀭𑀸, 𑀆𑀭𑀫𑁆𑀫𑀡𑀢𑁄 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀸. 𑀯𑀺𑀧𑀲𑁆𑀲𑀦𑀸 𑀳𑀺 𑀏𑀢𑁆𑀣 𑀲𑀼𑀜𑁆𑀜𑀢𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀅𑀦𑀺𑀫𑀺𑀢𑁆𑀢𑀸 𑀪𑀽𑀫𑀦𑁆𑀢𑀭𑀢𑁄 𑀮𑁄𑀓𑀼𑀢𑁆𑀢𑀭𑀸, 𑀆𑀭𑀫𑁆𑀫𑀡𑀢𑁄 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀸.

𑀭𑀸𑀕𑁄 𑀔𑁄 𑀪𑀦𑁆𑀢𑁂 𑀧𑀫𑀸𑀡𑀓𑀭𑀡𑁄𑀢𑀺𑀆𑀤𑀻𑀲𑀼 𑀬𑀣𑀸 𑀧𑀩𑁆𑀩𑀢𑀧𑀸𑀤𑁂 𑀧𑀽𑀢𑀺𑀧𑀡𑁆𑀡𑀓𑀲𑀝𑀉𑀤𑀓𑀁 𑀦𑀸𑀫 𑀳𑁄𑀢𑀺 𑀓𑀸𑀴𑀯𑀡𑁆𑀡𑀁, 𑀑𑀮𑁄𑀓𑁂𑀦𑁆𑀢𑀸𑀦𑀁 𑀩𑁆𑀬𑀸𑀫𑀲𑀢𑀕𑀫𑁆𑀪𑀻𑀭𑀁 𑀯𑀺𑀬 𑀔𑀸𑀬𑀢𑀺, 𑀬𑀝𑁆𑀞𑀺𑀁 𑀯𑀸 𑀭𑀚𑁆𑀚𑀼𑀁 𑀯𑀸 𑀕𑀳𑁂𑀢𑁆𑀯𑀸 𑀫𑀺𑀦𑀦𑁆𑀢𑀲𑁆𑀲 𑀧𑀺𑀝𑁆𑀞𑀺𑀧𑀸𑀤𑁄𑀢𑁆𑀣𑀭𑀡𑀫𑀢𑁆𑀢𑀫𑁆𑀧𑀺 𑀦 𑀳𑁄𑀢𑀺; 𑀏𑀯𑀫𑁂𑀯 𑀬𑀸𑀯 𑀭𑀸𑀕𑀸𑀤𑀬𑁄 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀢𑀸𑀯 𑀧𑀼𑀕𑁆𑀕𑀮𑀁 𑀲𑀜𑁆𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀸 𑀳𑁄𑀢𑀺, 𑀲𑁄𑀢𑀸𑀧𑀦𑁆𑀦𑁄 𑀯𑀺𑀬 𑀲𑀓𑀤𑀸𑀕𑀸𑀫𑀻 𑀯𑀺𑀬 𑀅𑀦𑀸𑀕𑀸𑀫𑀻 𑀯𑀺𑀬 𑀘 𑀔𑀸𑀬𑀢𑀺. 𑀬𑀤𑀸 𑀧𑀦𑀲𑁆𑀲 𑀭𑀸𑀕𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀭𑀢𑁆𑀢𑁄 𑀤𑀼𑀝𑁆𑀞𑁄 𑀫𑀽𑀴𑁆𑀳𑁄𑀢𑀺 𑀧𑀜𑁆𑀜𑀸𑀬𑀢𑀺. 𑀇𑀢𑀺 𑀢𑁂 ‘‘𑀏𑀢𑁆𑀢𑀓𑁄 𑀅𑀬’’𑀦𑁆𑀢𑀺 𑀧𑀼𑀕𑁆𑀕𑀮𑀲𑁆𑀲 𑀧𑀫𑀸𑀡𑀁 𑀤𑀲𑁆𑀲𑁂𑀦𑁆𑀢𑀸𑀯 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀫𑀸𑀡𑀓𑀭𑀡𑀸 𑀦𑀸𑀫 𑀯𑀼𑀢𑁆𑀢𑀸.

𑀬𑀸𑀯𑀢𑀸 𑀔𑁄 𑀪𑀦𑁆𑀢𑁂 𑀅𑀧𑁆𑀧𑀫𑀸𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑁄𑀢𑀺 𑀬𑀢𑁆𑀢𑀓𑀸 𑀅𑀧𑁆𑀧𑀫𑀸𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑁄. 𑀓𑀺𑀢𑁆𑀢𑀓𑀸 𑀧𑀦 𑀢𑀸? 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸, 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀨𑀮𑀸𑀦𑀻𑀢𑀺 𑀤𑁆𑀯𑀸𑀤𑀲. 𑀢𑀢𑁆𑀭 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀨𑀭𑀡𑀅𑀧𑁆𑀧𑀫𑀸𑀡𑀢𑀸𑀬 𑀅𑀧𑁆𑀧𑀫𑀸𑀡𑀸, 𑀲𑁂𑀲𑀸 𑀧𑀫𑀸𑀡𑀓𑀸𑀭𑀓𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑁂𑀦 𑀦𑀺𑀩𑁆𑀩𑀸𑀦𑀫𑁆𑀧𑀺 𑀅𑀧𑁆𑀧𑀫𑀸𑀡𑀫𑁂𑀯, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀧𑀦 𑀦 𑀳𑁄𑀢𑀺, 𑀢𑀲𑁆𑀫𑀸 𑀦 𑀕𑀳𑀺𑀢𑀁. 𑀅𑀓𑀼𑀧𑁆𑀧𑀸𑀢𑀺 𑀅𑀭𑀳𑀢𑁆𑀢𑀨𑀮𑀘𑁂𑀢𑁄𑀯𑀺𑀫𑀼𑀢𑁆𑀢𑀺. 𑀲𑀸 𑀳𑀺 𑀢𑀸𑀲𑀁 𑀲𑀩𑁆𑀩𑀚𑁂𑀝𑁆𑀞𑀺𑀓𑀸, 𑀢𑀲𑁆𑀫𑀸 ‘‘𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺 𑀯𑀼𑀢𑁆𑀢𑀸. 𑀭𑀸𑀕𑁄 𑀔𑁄 𑀪𑀦𑁆𑀢𑁂 𑀓𑀺𑀜𑁆𑀘𑀦𑀦𑁆𑀢𑀺 𑀭𑀸𑀕𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀧𑀼𑀕𑁆𑀕𑀮𑀁 𑀓𑀺𑀜𑁆𑀘𑀢𑀺 𑀫𑀤𑁆𑀤𑀢𑀺 𑀧𑀮𑀺𑀩𑀼𑀦𑁆𑀥𑀢𑀺, 𑀢𑀲𑁆𑀫𑀸 𑀓𑀺𑀜𑁆𑀘𑀦𑀦𑁆𑀢𑀺 𑀯𑀼𑀢𑁆𑀢𑁄. 𑀫𑀦𑀼𑀲𑁆𑀲𑀸 𑀓𑀺𑀭 𑀕𑁄𑀡𑁂𑀳𑀺 𑀔𑀮𑀁 𑀫𑀤𑁆𑀤𑀸𑀧𑁂𑀦𑁆𑀢𑀸 ‘‘𑀓𑀺𑀜𑁆𑀘𑁂𑀳𑀺 𑀓𑀧𑀺𑀮 𑀓𑀺𑀜𑁆𑀘𑁂𑀳𑀺 𑀓𑀸𑀴𑀓𑀸’’𑀢𑀺 𑀯𑀤𑀦𑁆𑀢𑀺. 𑀏𑀯𑀁 𑀫𑀤𑁆𑀤𑀦𑀝𑁆𑀞𑁄 𑀓𑀺𑀜𑁆𑀘𑀦𑀝𑁆𑀞𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀤𑁄𑀲𑀫𑁄𑀳𑁂𑀲𑀼𑀧𑀺𑀏𑀲𑁂𑀯 𑀦𑀬𑁄.

𑀆𑀓𑀺𑀜𑁆𑀘𑀜𑁆𑀜𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑁄 𑀦𑀸𑀫 𑀦𑀯 𑀥𑀫𑁆𑀫𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀫𑀕𑁆𑀕𑀨𑀮𑀸𑀦𑀺 𑀘. 𑀢𑀢𑁆𑀣 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀓𑀺𑀜𑁆𑀘𑀦𑀁 𑀆𑀭𑀫𑁆𑀫𑀡𑀁 𑀅𑀲𑁆𑀲 𑀦𑀢𑁆𑀣𑀻𑀢𑀺 𑀆𑀓𑀺𑀜𑁆𑀘𑀜𑁆𑀜𑀁. 𑀫𑀕𑁆𑀕𑀨𑀮𑀸𑀦𑀺 𑀓𑀺𑀜𑁆𑀘𑀦𑀸𑀦𑀁 𑀫𑀤𑁆𑀤𑀦𑀧𑀮𑀺𑀩𑀼𑀦𑁆𑀥𑀦𑀓𑀺𑀮𑁂𑀲𑀸𑀦𑀁 𑀦𑀢𑁆𑀣𑀺𑀢𑀸𑀬 𑀆𑀓𑀺𑀜𑁆𑀘𑀜𑁆𑀜𑀸𑀦𑀺, 𑀦𑀺𑀩𑁆𑀩𑀸𑀦𑀫𑁆𑀧𑀺 𑀆𑀓𑀺𑀜𑁆𑀘𑀜𑁆𑀜𑀁, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀧𑀦 𑀦 𑀳𑁄𑀢𑀺, 𑀢𑀲𑁆𑀫𑀸 𑀦 𑀕𑀳𑀺𑀢𑀁.

𑀭𑀸𑀕𑁄 𑀔𑁄 𑀪𑀦𑁆𑀢𑁂 𑀦𑀺𑀫𑀺𑀢𑁆𑀢𑀓𑀭𑀡𑁄𑀢𑀺𑀆𑀤𑀻𑀲𑀼 𑀬𑀣𑀸 𑀦𑀸𑀫 𑀤𑁆𑀯𑀺𑀦𑁆𑀦𑀁 𑀓𑀼𑀮𑀸𑀦𑀁 𑀲𑀤𑀺𑀲𑀸 𑀤𑁆𑀯𑁂 𑀯𑀘𑁆𑀙𑀓𑀸 𑀳𑁄𑀦𑁆𑀢𑀺. 𑀬𑀸𑀯 𑀢𑁂𑀲𑀁 𑀮𑀓𑁆𑀔𑀡𑀁 𑀦 𑀓𑀢𑀁 𑀳𑁄𑀢𑀺, 𑀢𑀸𑀯 ‘‘𑀅𑀬𑀁 𑀅𑀲𑀼𑀓𑀓𑀼𑀮𑀲𑁆𑀲 𑀯𑀘𑁆𑀙𑀓𑁄, 𑀅𑀬𑀁 𑀅𑀲𑀼𑀓𑀓𑀼𑀮𑀲𑁆𑀲𑀸’’𑀢𑀺 𑀦 𑀲𑀓𑁆𑀓𑀸 𑀳𑁄𑀢𑀺 𑀚𑀸𑀦𑀺𑀢𑀼𑀁. 𑀬𑀤𑀸 𑀧𑀦 𑀢𑁂𑀲𑀁 𑀢𑀺𑀲𑀽𑀮𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀮𑀓𑁆𑀔𑀡𑀁 𑀓𑀢𑀁 𑀳𑁄𑀢𑀺, 𑀢𑀤𑀸 𑀲𑀓𑁆𑀓𑀸 𑀳𑁄𑀢𑀺 𑀚𑀸𑀦𑀺𑀢𑀼𑀁. 𑀏𑀯𑀫𑁂𑀯 𑀬𑀸𑀯 𑀧𑀼𑀕𑁆𑀕𑀮𑀲𑁆𑀲 𑀭𑀸𑀕𑁄 𑀦𑀼𑀧𑁆𑀧𑀚𑁆𑀚𑀢𑀺, 𑀢𑀸𑀯 𑀦 𑀲𑀓𑁆𑀓𑀸 𑀳𑁄𑀢𑀺 𑀚𑀸𑀦𑀺𑀢𑀼𑀁 ‘‘𑀅𑀭𑀺𑀬𑁄 𑀯𑀸 𑀧𑀼𑀣𑀼𑀚𑁆𑀚𑀦𑁄 𑀯𑀸’’𑀢𑀺. 𑀭𑀸𑀕𑁄 𑀧𑀦𑀲𑁆𑀲 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 ‘‘𑀲𑀭𑀸𑀕𑁄 𑀦𑀸𑀫 𑀅𑀬𑀁 𑀧𑀼𑀕𑁆𑀕𑀮𑁄’’𑀢𑀺 𑀲𑀜𑁆𑀚𑀸𑀦𑀦𑀦𑀺𑀫𑀺𑀢𑁆𑀢𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀦𑀺𑀫𑀺𑀢𑁆𑀢𑀓𑀭𑀡𑁄𑀢𑀺 𑀯𑀼𑀢𑁆𑀢𑁄. 𑀤𑁄𑀲𑀫𑁄𑀳𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀅𑀦𑀺𑀫𑀺𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑁄 𑀦𑀸𑀫 𑀢𑁂𑀭𑀲 𑀥𑀫𑁆𑀫𑀸 𑀯𑀺𑀧𑀲𑁆𑀲𑀦𑀸, 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸, 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺. 𑀢𑀢𑁆𑀣 𑀯𑀺𑀧𑀲𑁆𑀲𑀦𑀸 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀁 𑀲𑀼𑀔𑀦𑀺𑀫𑀺𑀢𑁆𑀢𑀁 𑀅𑀢𑁆𑀢𑀦𑀺𑀫𑀺𑀢𑁆𑀢𑀁 𑀉𑀕𑁆𑀖𑀸𑀝𑁂𑀢𑀻𑀢𑀺 𑀅𑀦𑀺𑀫𑀺𑀢𑁆𑀢𑀸 𑀦𑀸𑀫. 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸 𑀭𑀽𑀧𑀦𑀺𑀫𑀺𑀢𑁆𑀢𑀲𑁆𑀲 𑀅𑀪𑀸𑀯𑀸 𑀅𑀦𑀺𑀫𑀺𑀢𑁆𑀢𑀸 𑀦𑀸𑀫. 𑀫𑀕𑁆𑀕𑀨𑀮𑀸𑀦𑀺 𑀦𑀺𑀫𑀺𑀢𑁆𑀢𑀓𑀭𑀸𑀦𑀁 𑀓𑀺𑀮𑁂𑀲𑀸𑀦𑀁 𑀅𑀪𑀸𑀯𑁂𑀦 𑀅𑀦𑀺𑀫𑀺𑀢𑁆𑀢𑀸𑀦𑀺, 𑀦𑀺𑀩𑁆𑀩𑀸𑀦𑀫𑁆𑀧𑀺 𑀅𑀦𑀺𑀫𑀺𑀢𑁆𑀢𑀫𑁂𑀯, 𑀢𑀁 𑀧𑀦 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀦 𑀳𑁄𑀢𑀺, 𑀢𑀲𑁆𑀫𑀸 𑀦 𑀕𑀳𑀺𑀢𑀁. 𑀅𑀣 𑀓𑀲𑁆𑀫𑀸 𑀲𑀼𑀜𑁆𑀜𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀦 𑀕𑀳𑀺𑀢𑀸𑀢𑀺? 𑀲𑀸 ‘‘𑀲𑀼𑀜𑁆𑀜𑀸 𑀭𑀸𑀕𑁂𑀦𑀸’’𑀢𑀺𑀆𑀤𑀺𑀯𑀘𑀦𑀢𑁄 𑀲𑀩𑁆𑀩𑀢𑁆𑀣 𑀅𑀦𑀼𑀧𑀯𑀺𑀝𑁆𑀞𑀸𑀯, 𑀢𑀲𑁆𑀫𑀸 𑀯𑀺𑀲𑀼𑀁 𑀦 𑀕𑀳𑀺𑀢𑀸𑀢𑀺.

𑀏𑀓𑀢𑁆𑀣𑀸𑀢𑀺 𑀆𑀭𑀫𑁆𑀫𑀡𑀯𑀲𑁂𑀦 𑀏𑀓𑀢𑁆𑀣𑀸 ‘‘𑀅𑀧𑁆𑀧𑀫𑀸𑀡𑀁 𑀆𑀓𑀺𑀜𑁆𑀘𑀜𑁆𑀜𑀁 𑀲𑀼𑀜𑁆𑀜𑀢𑀁 𑀅𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀳𑀺 𑀲𑀩𑁆𑀩𑀸𑀦𑁂𑀢𑀸𑀦𑀺 𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀦𑀸𑀫𑀸𑀦𑀺. 𑀇𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀏𑀓𑀢𑁆𑀣𑀸. 𑀅𑀜𑁆𑀜𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀅𑀧𑁆𑀧𑀫𑀸𑀡𑀸𑀧𑀺 𑀳𑁄𑀢𑀺, 𑀅𑀜𑁆𑀜𑀲𑁆𑀫𑀺𑀁 𑀆𑀓𑀺𑀜𑁆𑀘𑀜𑁆𑀜𑀸, 𑀅𑀜𑁆𑀜𑀲𑁆𑀫𑀺𑀁 𑀲𑀼𑀜𑁆𑀜𑀢𑀸, 𑀅𑀜𑁆𑀜𑀲𑁆𑀫𑀺𑀁 𑀅𑀦𑀺𑀫𑀺𑀢𑁆𑀢𑀸𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀦𑀸𑀦𑀸𑀩𑁆𑀬𑀜𑁆𑀚𑀦𑀸𑀢𑀺.

𑁮. 𑀦𑀺𑀕𑀡𑁆𑀞𑀦𑀸𑀝𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁦. 𑀅𑀝𑁆𑀞𑀫𑁂 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀲𑀬𑀁 𑀆𑀕𑀢𑀸𑀕𑀫𑁄 𑀯𑀺𑀜𑁆𑀜𑀸𑀢𑀲𑀸𑀲𑀦𑁄 𑀅𑀦𑀸𑀕𑀸𑀫𑀻 𑀅𑀭𑀺𑀬𑀲𑀸𑀯𑀓𑁄 𑀲𑀫𑀸𑀦𑁄 𑀓𑀲𑁆𑀫𑀸 𑀦𑀕𑁆𑀕𑀪𑁄𑀕𑁆𑀕𑀁 𑀦𑀺𑀲𑁆𑀲𑀺𑀭𑀺𑀓𑀁 𑀦𑀺𑀕𑀡𑁆𑀞𑀁 𑀉𑀧𑀲𑀗𑁆𑀓𑀫𑀻𑀢𑀺? 𑀉𑀧𑀯𑀸𑀤𑀫𑁄𑀘𑀦𑀢𑁆𑀣𑀜𑁆𑀘𑁂𑀯 𑀯𑀸𑀤𑀸𑀭𑁄𑀧𑀦𑀢𑁆𑀣𑀜𑁆𑀘. 𑀦𑀺𑀕𑀡𑁆𑀞𑀸 𑀓𑀺𑀭 ‘‘𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸 𑀣𑀤𑁆𑀥𑀔𑀤𑀺𑀭𑀔𑀸𑀡𑀼𑀓𑀲𑀤𑀺𑀲𑀸, 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀧𑀝𑀺𑀲𑀦𑁆𑀣𑀸𑀭𑀫𑁆𑀧𑀺 𑀦 𑀓𑀭𑁄𑀦𑁆𑀢𑀻’’𑀢𑀺 𑀉𑀧𑀯𑀤𑀦𑁆𑀢𑀺, 𑀢𑀲𑁆𑀲 𑀉𑀧𑀯𑀸𑀤𑀲𑁆𑀲 𑀫𑁄𑀘𑀦𑀢𑁆𑀣𑀜𑁆𑀘, ‘‘𑀯𑀸𑀤𑀜𑁆𑀘𑀲𑁆𑀲 𑀆𑀭𑁄𑀧𑁂𑀲𑁆𑀲𑀸𑀫𑀻’’𑀢𑀺 𑀉𑀧𑀲𑀗𑁆𑀓𑀫𑀺. 𑀦 𑀔𑁆𑀯𑀸𑀳𑀁 𑀏𑀢𑁆𑀣 𑀪𑀦𑁆𑀢𑁂 𑀪𑀕𑀯𑀢𑁄 𑀲𑀤𑁆𑀥𑀸𑀬 𑀕𑀘𑁆𑀙𑀸𑀫𑀻𑀢𑀺 𑀬𑀲𑁆𑀲 𑀜𑀸𑀡𑁂𑀦 𑀅𑀲𑀘𑁆𑀙𑀺𑀓𑀢𑀁 𑀳𑁄𑀢𑀺. 𑀲𑁄 ‘‘𑀏𑀯𑀁 𑀓𑀺𑀭𑁂𑀢’’𑀦𑁆𑀢𑀺 𑀅𑀜𑁆𑀜𑀲𑁆𑀲 𑀲𑀤𑁆𑀥𑀸𑀬 𑀕𑀘𑁆𑀙𑁂𑀬𑁆𑀬, 𑀫𑀬𑀸 𑀧𑀦 𑀜𑀸𑀡𑁂𑀦𑁂𑀢𑀁 𑀲𑀘𑁆𑀙𑀺𑀓𑀢𑀁, 𑀢𑀲𑁆𑀫𑀸 𑀦𑀸𑀳𑀁 𑀏𑀢𑁆𑀣 𑀪𑀕𑀯𑀢𑁄 𑀲𑀤𑁆𑀥𑀸𑀬 𑀕𑀘𑁆𑀙𑀸𑀫𑀻𑀢𑀺 𑀤𑀻𑀧𑁂𑀦𑁆𑀢𑁄 𑀏𑀯𑀫𑀸𑀳.

𑀉𑀮𑁆𑀮𑁄𑀓𑁂𑀢𑁆𑀯𑀸𑀢𑀺 𑀓𑀸𑀬𑀁 𑀉𑀦𑁆𑀦𑀸𑀫𑁂𑀢𑁆𑀯𑀸 𑀓𑀼𑀘𑁆𑀙𑀺𑀁 𑀦𑀻𑀳𑀭𑀺𑀢𑁆𑀯𑀸 𑀕𑀻𑀯𑀁 𑀧𑀕𑁆𑀕𑀬𑁆𑀳 𑀲𑀩𑁆𑀩𑀁 𑀤𑀺𑀲𑀁 𑀧𑁂𑀓𑁆𑀔𑀫𑀸𑀦𑁄 𑀉𑀮𑁆𑀮𑁄𑀓𑁂𑀢𑁆𑀯𑀸. 𑀩𑀸𑀥𑁂𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬𑀸𑀢𑀺 𑀬𑀣𑀸 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀦 𑀦𑀺𑀓𑁆𑀔𑀫𑀢𑀺, 𑀏𑀯𑀁 𑀧𑀝𑀺𑀩𑀸𑀳𑀺𑀢𑀩𑁆𑀩𑀁 𑀫𑀜𑁆𑀜𑁂𑀬𑁆𑀬 𑀩𑀦𑁆𑀥𑀺𑀢𑀩𑁆𑀩𑀁 𑀯𑀸. 𑀲𑀳𑀥𑀫𑁆𑀫𑀺𑀓𑀸𑀢𑀺 𑀲𑀓𑀸𑀭𑀡𑀸. 𑀅𑀣 𑀫𑀁 𑀧𑀝𑀺𑀳𑀭𑁂𑀬𑁆𑀬𑀸𑀲𑀺 𑀲𑀤𑁆𑀥𑀺𑀁 𑀦𑀺𑀕𑀡𑁆𑀞𑀧𑀭𑀺𑀲𑀸𑀬𑀸𑀢𑀺 𑀏𑀢𑁂𑀲𑀁 𑀅𑀢𑁆𑀣𑁂 𑀜𑀸𑀢𑁂 𑀅𑀣 𑀫𑁂 𑀦𑀺𑀕𑀡𑁆𑀞𑀧𑀭𑀺𑀲𑀸𑀬 𑀲𑀤𑁆𑀥𑀺𑀁 𑀅𑀪𑀺𑀕𑀘𑁆𑀙𑁂𑀬𑁆𑀬𑀸𑀲𑀺, 𑀧𑀢𑀻𑀳𑀸𑀭𑀲𑁆𑀲 𑀫𑁂 𑀲𑀦𑁆𑀢𑀺𑀓𑀁 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀆𑀕𑀢𑀪𑀸𑀯𑀁 𑀚𑀸𑀦𑀸𑀧𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄. 𑀏𑀓𑁄 𑀧𑀜𑁆𑀳𑁄𑀢𑀺 𑀏𑀓𑁄 𑀧𑀜𑁆𑀳𑀫𑀕𑁆𑀕𑁄, 𑀏𑀓𑀁 𑀧𑀜𑁆𑀳𑀕𑀯𑁂𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀓𑁄 𑀉𑀤𑁆𑀤𑁂𑀲𑁄𑀢𑀺 𑀏𑀓𑀁 𑀦𑀸𑀫 𑀓𑀺𑀦𑁆𑀢𑀺? 𑀅𑀬𑀁 𑀏𑀓𑁄 𑀉𑀤𑁆𑀤𑁂𑀲𑁄. 𑀏𑀓𑀁 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 (𑀔𑀼. 𑀧𑀸. 𑁪.𑁧; 𑀅. 𑀦𑀺. 𑁧𑁦.𑁨𑁭) 𑀇𑀤𑀁 𑀏𑀓𑀁 𑀯𑁂𑀬𑁆𑀬𑀸𑀓𑀭𑀡𑀁. 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁯. 𑀅𑀘𑁂𑀮𑀓𑀲𑁆𑀲𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁧. 𑀦𑀯𑀫𑁂 𑀓𑀻𑀯𑀘𑀺𑀭𑀁 𑀧𑀩𑁆𑀩𑀚𑀺𑀢𑀲𑁆𑀲𑀸𑀢𑀺 𑀓𑀻𑀯𑀘𑀺𑀭𑁄 𑀓𑀸𑀮𑁄 𑀧𑀩𑁆𑀩𑀚𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀉𑀢𑁆𑀢𑀭𑀺 𑀫𑀦𑀼𑀲𑁆𑀲𑀥𑀫𑁆𑀫𑀸𑀢𑀺 𑀫𑀦𑀼𑀲𑁆𑀲𑀥𑀫𑁆𑀫𑁄 𑀦𑀸𑀫 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀸, 𑀢𑀢𑁄 𑀫𑀦𑀼𑀲𑁆𑀲𑀥𑀫𑁆𑀫𑀢𑁄 𑀉𑀢𑁆𑀢𑀭𑀺. 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄𑀢𑀺 𑀅𑀭𑀺𑀬𑀪𑀸𑀯𑀁 𑀓𑀸𑀢𑀼𑀁 𑀲𑀫𑀢𑁆𑀣𑀢𑀸𑀬 𑀅𑀮𑀫𑀭𑀺𑀬𑁄𑀢𑀺 𑀲𑀗𑁆𑀔𑀸𑀢𑁄 𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄. 𑀦𑀕𑁆𑀕𑁂𑀬𑁆𑀬𑀸𑀢𑀺 𑀦𑀕𑁆𑀕𑀪𑀸𑀯𑀢𑁄. 𑀫𑀼𑀡𑁆𑀟𑁂𑀬𑁆𑀬𑀸𑀢𑀺 𑀫𑀼𑀡𑁆𑀟𑀪𑀸𑀯𑀢𑁄. 𑀧𑀯𑀸𑀴𑀦𑀺𑀧𑁆𑀨𑁄𑀝𑀦𑀸𑀬𑀸𑀢𑀺 𑀧𑀸𑀯𑀴𑀦𑀺𑀧𑁆𑀨𑁄𑀝𑀦𑀢𑁄, 𑀪𑀽𑀫𑀺𑀬𑀁 𑀦𑀺𑀲𑀻𑀤𑀦𑁆𑀢𑀲𑁆𑀲 𑀆𑀦𑀺𑀲𑀤𑀝𑁆𑀞𑀸𑀦𑁂 𑀮𑀕𑁆𑀕𑀸𑀦𑀁 𑀧𑀁𑀲𑀼𑀭𑀚𑀯𑀸𑀮𑀺𑀓𑀸𑀦𑀁 𑀨𑁄𑀝𑀦𑀢𑁆𑀣𑀁 𑀕𑀳𑀺𑀢𑀫𑁄𑀭𑀧𑀺𑀜𑁆𑀙𑀫𑀢𑁆𑀢𑀢𑁄𑀢𑀺 𑀅𑀢𑁆𑀣𑁄.

𑁧𑁦. 𑀕𑀺𑀮𑀸𑀦𑀤𑀲𑁆𑀲𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁨. 𑀤𑀲𑀫𑁂 𑀆𑀭𑀸𑀫𑀤𑁂𑀯𑀢𑀸𑀢𑀺 𑀧𑀼𑀧𑁆𑀨𑀸𑀭𑀸𑀫𑀨𑀮𑀸𑀭𑀸𑀫𑁂𑀲𑀼 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸. 𑀯𑀦𑀤𑁂𑀯𑀢𑀸𑀢𑀺 𑀯𑀦𑀲𑀡𑁆𑀟𑁂𑀲𑀼 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸. 𑀭𑀼𑀓𑁆𑀔𑀤𑁂𑀯𑀢𑀸𑀢𑀺 𑀫𑀢𑁆𑀢𑀭𑀸𑀚𑀓𑀸𑀮𑁂 𑀯𑁂𑀲𑁆𑀲𑀯𑀡𑁄 𑀘 𑀤𑁂𑀯𑀢𑀸𑀢𑀺 𑀏𑀯𑀁 𑀢𑁂𑀲𑀼 𑀢𑁂𑀲𑀼 𑀭𑀼𑀓𑁆𑀔𑁂𑀲𑀼 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸. 𑀑𑀲𑀥𑀺𑀢𑀺𑀡𑀯𑀦𑀧𑁆𑀧𑀢𑀻𑀲𑀽𑀢𑀺 𑀳𑀭𑀻𑀢𑀓𑀸𑀫𑀮𑀓𑀻𑀆𑀤𑀻𑀲𑀼 𑀫𑀼𑀜𑁆𑀚𑀧𑀩𑁆𑀩𑀚𑀸𑀤𑀻𑀲𑀼 𑀯𑀦𑀚𑁂𑀝𑁆𑀞𑀭𑀼𑀓𑁆𑀔𑁂𑀲𑀼 𑀘 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸. 𑀲𑀁𑀕𑀫𑁆𑀫𑀸𑀢𑀺 𑀲𑀦𑁆𑀦𑀺𑀧𑀢𑀺𑀢𑁆𑀯𑀸. 𑀲𑀫𑀸𑀕𑀫𑁆𑀫𑀸𑀢𑀺 𑀢𑀢𑁄 𑀢𑀢𑁄 𑀲𑀫𑀸𑀕𑀦𑁆𑀢𑁆𑀯𑀸. 𑀧𑀡𑀺𑀥𑁂𑀳𑀻𑀢𑀺 𑀧𑀢𑁆𑀣𑀦𑀸𑀯𑀲𑁂𑀦 𑀞𑀧𑁂𑀳𑀺. 𑀇𑀚𑁆𑀛𑀺𑀲𑁆𑀲𑀢𑀺 𑀲𑀻𑀮𑀯𑀢𑁄 𑀘𑁂𑀢𑁄𑀧𑀡𑀺𑀥𑀻𑀢𑀺 𑀲𑀫𑀺𑀚𑁆𑀛𑀺𑀲𑁆𑀲𑀢𑀺 𑀲𑀻𑀮𑀯𑀦𑁆𑀢𑀲𑁆𑀲 𑀘𑀺𑀢𑁆𑀢𑀧𑀢𑁆𑀣𑀦𑀸. 𑀥𑀫𑁆𑀫𑀺𑀓𑁄𑀢𑀺 𑀤𑀲𑀓𑀼𑀲𑀮𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑁄 𑀅𑀕𑀢𑀺𑀕𑀫𑀦𑀭𑀳𑀺𑀢𑁄. 𑀥𑀫𑁆𑀫𑀭𑀸𑀚𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀥𑀫𑁆𑀫𑁂𑀦 𑀯𑀸 𑀮𑀤𑁆𑀥𑀭𑀚𑁆𑀚𑀢𑁆𑀢𑀸 𑀥𑀫𑁆𑀫𑀭𑀸𑀚𑀸. 𑀢𑀲𑁆𑀫𑀸𑀢𑀺 ‘‘𑀬𑀲𑁆𑀫𑀸 𑀢𑁂𑀦 𑀳𑀺, 𑀅𑀬𑁆𑀬𑀧𑀼𑀢𑁆𑀢, 𑀅𑀫𑁆𑀳𑁂𑀧𑀺 𑀑𑀯𑀤𑀸𑀳𑀻’’𑀢𑀺 𑀯𑀤𑀣, 𑀢𑀲𑁆𑀫𑀸. 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀦𑁆𑀢𑀺 ‘‘𑀇𑀤𑀁 𑀪𑀺𑀓𑁆𑀔𑀽𑀦𑀁 𑀤𑀲𑁆𑀲𑀸𑀫, 𑀇𑀤𑀁 𑀅𑀢𑁆𑀢𑀦𑀸 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’’𑀢𑀺 𑀏𑀯𑀁 𑀅𑀯𑀺𑀪𑀢𑁆𑀢𑀁 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀲𑀸𑀥𑀸𑀭𑀡𑀫𑁂𑀯 𑀪𑀯𑀺𑀲𑁆𑀲𑀢𑀻𑀢𑀺.

𑀘𑀺𑀢𑁆𑀢𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀕𑀸𑀫𑀡𑀺𑀲𑀁𑀬𑀼𑀢𑁆𑀢𑀁

𑁧. 𑀘𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁩. 𑀕𑀸𑀫𑀡𑀺𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀘𑀡𑁆𑀟𑁄 𑀕𑀸𑀫𑀡𑀻𑀢𑀺 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀘𑀡𑁆𑀟𑁄𑀢𑀺 𑀕𑀳𑀺𑀢𑀦𑀸𑀫𑁄 𑀏𑀓𑁄 𑀕𑀸𑀫𑀡𑀺. 𑀧𑀸𑀢𑀼𑀓𑀭𑁄𑀢𑀻𑀢𑀺 𑀪𑀡𑁆𑀟𑀦𑁆𑀢𑀁 𑀧𑀝𑀺𑀪𑀡𑁆𑀟𑀦𑁆𑀢𑁄 𑀅𑀓𑁆𑀓𑁄𑀲𑀦𑁆𑀢𑀁 𑀧𑀘𑁆𑀘𑀓𑁆𑀓𑁄𑀲𑀦𑁆𑀢𑁄 𑀧𑀳𑀭𑀦𑁆𑀢𑀁 𑀧𑀝𑀺𑀧𑀳𑀭𑀦𑁆𑀢𑁄 𑀧𑀸𑀓𑀝𑀁 𑀓𑀭𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀦 𑀧𑀸𑀢𑀼𑀓𑀭𑁄𑀢𑀻𑀢𑀺 𑀅𑀓𑁆𑀓𑀼𑀝𑁆𑀞𑁄𑀧𑀺 𑀧𑀳𑀝𑁄𑀧𑀺 𑀓𑀺𑀜𑁆𑀘𑀺 𑀧𑀘𑁆𑀘𑀦𑀻𑀓𑀁 𑀅𑀓𑀭𑁄𑀦𑁆𑀢𑁄𑀢𑀺 𑀤𑀲𑁆𑀲𑁂𑀢𑀺.

𑁨. 𑀢𑀸𑀮𑀧𑀼𑀝𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁪. 𑀤𑀼𑀢𑀺𑀬𑁂 𑀢𑀸𑀮𑀧𑀼𑀝𑁄𑀢𑀺 𑀏𑀯𑀁𑀦𑀸𑀫𑀓𑁄. 𑀢𑀲𑁆𑀲 𑀓𑀺𑀭 𑀩𑀦𑁆𑀥𑀦𑀸 𑀧𑀫𑀼𑀢𑁆𑀢𑀢𑀸𑀮𑀧𑀓𑁆𑀓𑀯𑀡𑁆𑀡𑁄 𑀯𑀺𑀬 𑀫𑀼𑀔𑀯𑀡𑁆𑀡𑁄 𑀯𑀺𑀧𑁆𑀧𑀲𑀦𑁆𑀦𑁄 𑀅𑀳𑁄𑀲𑀺, 𑀢𑁂𑀦𑀲𑁆𑀲 𑀢𑀸𑀮𑀧𑀼𑀝𑁄𑀢𑀺 𑀦𑀸𑀫𑀁 𑀅𑀓𑀁𑀲𑀼. 𑀲𑁆𑀯𑀸𑀬𑀁 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑁄 𑀧𑀘𑁆𑀙𑀺𑀫𑀪𑀯𑀺𑀓𑀧𑀼𑀕𑁆𑀕𑀮𑁄. 𑀬𑀲𑁆𑀫𑀸 𑀧𑀦 𑀧𑀝𑀺𑀲𑀦𑁆𑀥𑀺 𑀦𑀸𑀫 𑀅𑀦𑀺𑀬𑀢𑀸 𑀆𑀓𑀸𑀲𑁂 𑀔𑀺𑀢𑁆𑀢𑀤𑀡𑁆𑀟𑀲𑀤𑀺𑀲𑀸, 𑀢𑀲𑁆𑀫𑀸 𑀏𑀲 𑀦𑀝𑀓𑀼𑀮𑁂 𑀦𑀺𑀩𑁆𑀩𑀢𑁆𑀢𑀺. 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁄 𑀧𑀦 𑀦𑀝𑀲𑀺𑀧𑁆𑀧𑁂 𑀅𑀕𑁆𑀕𑁄 𑀳𑀼𑀢𑁆𑀯𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀧𑀸𑀓𑀝𑁄 𑀚𑀸𑀢𑁄. 𑀢𑀲𑁆𑀲 𑀧𑀜𑁆𑀘 𑀲𑀓𑀝𑀲𑀢𑀸𑀦𑀺 𑀧𑀜𑁆𑀘 𑀫𑀸𑀢𑀼𑀕𑀸𑀫𑀲𑀢𑀸𑀦𑀺 𑀧𑀭𑀺𑀯𑀸𑀭𑁄, 𑀪𑀭𑀺𑀬𑀸𑀬𑀧𑀺𑀲𑁆𑀲 𑀢𑀸𑀯𑀢𑀓𑀸𑀯𑀸𑀢𑀺 𑀫𑀸𑀢𑀼𑀕𑀸𑀫𑀲𑀳𑀲𑁆𑀲𑁂𑀦 𑀘𑁂𑀯 𑀲𑀓𑀝𑀲𑀳𑀲𑁆𑀲𑁂𑀦 𑀘 𑀲𑀤𑁆𑀥𑀺𑀁 𑀬𑀁 𑀬𑀁 𑀦𑀕𑀭𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀯𑀺𑀲𑀢𑀺, 𑀢𑀢𑁆𑀣𑀲𑁆𑀲 𑀧𑀼𑀭𑁂𑀢𑀭𑀫𑁂𑀯 𑀲𑀢𑀲𑀳𑀲𑁆𑀲𑀁 𑀤𑁂𑀦𑁆𑀢𑀺. 𑀲𑀫𑀚𑁆𑀚𑀯𑁂𑀲𑀁 𑀕𑀡𑁆𑀳𑀺𑀢𑁆𑀯𑀸 𑀧𑀦 𑀫𑀸𑀢𑀼𑀕𑀸𑀫𑀲𑀳𑀲𑁆𑀲𑁂𑀦 𑀲𑀤𑁆𑀥𑀺𑀁 𑀓𑀻𑀴𑀁 𑀓𑀭𑁄𑀦𑁆𑀢𑀲𑁆𑀲 𑀬𑀁 𑀳𑀢𑁆𑀣𑀽𑀧𑀕𑀧𑀸𑀤𑀽𑀧𑀕𑀸𑀤𑀺𑀆𑀪𑀭𑀡𑀚𑀸𑀢𑀁 𑀔𑀺𑀧𑀦𑁆𑀢𑀺, 𑀢𑀲𑁆𑀲 𑀧𑀭𑀺𑀬𑀦𑁆𑀢𑁄 𑀦𑀢𑁆𑀣𑀺. 𑀲𑁄 𑀢𑀁𑀤𑀺𑀯𑀲𑀁 𑀫𑀸𑀢𑀼𑀕𑀸𑀫𑀲𑀳𑀲𑁆𑀲𑀧𑀭𑀺𑀯𑀸𑀭𑀺𑀢𑁄 𑀭𑀸𑀚𑀕𑀳𑁂 𑀓𑀻𑀴𑀁 𑀓𑀢𑁆𑀯𑀸 𑀧𑀭𑀺𑀧𑀓𑁆𑀓𑀜𑀸𑀡𑀢𑁆𑀢𑀸 𑀲𑀧𑀭𑀺𑀯𑀸𑀭𑁄𑀯 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀲𑀘𑁆𑀘𑀸𑀮𑀺𑀓𑁂𑀦𑀸𑀢𑀺 𑀲𑀘𑁆𑀘𑁂𑀦 𑀘 𑀅𑀮𑀺𑀓𑁂𑀦 𑀘. 𑀢𑀺𑀝𑁆𑀞𑀢𑁂𑀢𑀦𑁆𑀢𑀺 𑀢𑀺𑀝𑁆𑀞𑀢𑀼 𑀏𑀢𑀁. 𑀭𑀚𑀦𑀻𑀬𑀸𑀢𑀺 𑀭𑀸𑀕𑀧𑁆𑀧𑀘𑁆𑀘𑀬𑀸 𑀫𑀼𑀔𑀢𑁄 𑀧𑀜𑁆𑀘𑀯𑀡𑁆𑀡𑀲𑀼𑀢𑁆𑀢𑀦𑀻𑀳𑀭𑀡𑀯𑀸𑀢𑀯𑀼𑀝𑁆𑀞𑀺𑀤𑀲𑁆𑀲𑀦𑀸𑀤𑀬𑁄 𑀅𑀜𑁆𑀜𑁂 𑀘 𑀓𑀸𑀫𑀲𑁆𑀲𑀸𑀤𑀲𑀁𑀬𑀼𑀢𑁆𑀢𑀸𑀓𑀸𑀭𑀤𑀲𑁆𑀲𑀦𑀓𑀸 𑀅𑀪𑀺𑀦𑀬𑀸. 𑀪𑀺𑀬𑁆𑀬𑁄𑀲𑁄𑀫𑀢𑁆𑀢𑀸𑀬𑀸𑀢𑀺 𑀅𑀥𑀺𑀓𑀧𑁆𑀧𑀫𑀸𑀡𑀢𑁆𑀢𑀸𑀬. 𑀤𑁄𑀲𑀦𑀻𑀬𑀸𑀢𑀺 𑀤𑁄𑀲𑀧𑁆𑀧𑀘𑁆𑀘𑀬𑀸 𑀳𑀢𑁆𑀣𑀧𑀸𑀤𑀘𑁆𑀙𑁂𑀤𑀸𑀤𑀺𑀤𑀲𑁆𑀲𑀦𑀸𑀓𑀸𑀭𑀸. 𑀫𑁄𑀳𑀦𑀻𑀬𑀸𑀢𑀺 𑀫𑁄𑀳𑀧𑁆𑀧𑀘𑁆𑀘𑀬𑀸 𑀉𑀤𑀓𑀁 𑀕𑀳𑁂𑀢𑁆𑀯𑀸 𑀢𑁂𑀮𑀓𑀭𑀡𑀁, 𑀢𑁂𑀮𑀁 𑀕𑀳𑁂𑀢𑁆𑀯𑀸 𑀉𑀤𑀓𑀓𑀭𑀡𑀦𑁆𑀢𑀺 𑀏𑀯𑀫𑀸𑀤𑀬𑁄 𑀫𑀸𑀬𑀸𑀧𑀪𑁂𑀤𑀸.

𑀧𑀳𑀸𑀲𑁄 𑀦𑀸𑀫 𑀦𑀺𑀭𑀬𑁄𑀢𑀺 𑀯𑀺𑀲𑀼𑀁 𑀧𑀳𑀸𑀲𑀦𑀸𑀫𑀓𑁄 𑀦𑀺𑀭𑀬𑁄 𑀦𑀸𑀫 𑀦𑀢𑁆𑀣𑀺, 𑀅𑀯𑀻𑀘𑀺𑀲𑁆𑀲𑁂𑀯 𑀧𑀦 𑀏𑀓𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀦𑀘𑁆𑀘𑀦𑁆𑀢𑀸 𑀯𑀺𑀬 𑀕𑀸𑀬𑀦𑁆𑀢𑀸 𑀯𑀺𑀬 𑀘 𑀦𑀝𑀯𑁂𑀲𑀁 𑀕𑀳𑁂𑀢𑁆𑀯𑀸𑀯 𑀧𑀘𑁆𑀘𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀦𑀸𑀳𑀁, 𑀪𑀦𑁆𑀢𑁂, 𑀏𑀢𑀁 𑀭𑁄𑀤𑀸𑀫𑀻𑀢𑀺 𑀅𑀳𑀁, 𑀪𑀦𑁆𑀢𑁂, 𑀏𑀢𑀁 𑀪𑀕𑀯𑀢𑁄 𑀩𑁆𑀬𑀸𑀓𑀭𑀡𑀁 𑀦 𑀭𑁄𑀤𑀸𑀫𑀻𑀢𑀺 𑀏𑀯𑀁 𑀲𑀓𑀫𑁆𑀫𑀓𑀯𑀲𑁂𑀦𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀅𑀲𑁆𑀲𑀼𑀯𑀺𑀫𑁄𑀘𑀦𑀫𑀢𑁆𑀢𑁂𑀦. ‘‘𑀫𑀢𑀁 𑀯𑀸 𑀅𑀫𑁆𑀫𑀭𑁄𑀤𑀦𑁆𑀢𑀻’’𑀢𑀺𑀆𑀤𑀬𑁄 𑀘𑁂𑀢𑁆𑀣 𑀅𑀜𑁆𑀜𑁂𑀧𑀺 𑀯𑁄𑀳𑀸𑀭𑀸 𑀯𑁂𑀤𑀺𑀢𑀩𑁆𑀩𑀸.

𑁩-𑁫. 𑀬𑁄𑀥𑀸𑀚𑀻𑀯𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁫𑁫-𑁩𑁫𑁭. 𑀢𑀢𑀺𑀬𑁂 𑀬𑁄𑀥𑀸𑀚𑀻𑀯𑁄𑀢𑀺 𑀬𑀼𑀤𑁆𑀥𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑀦𑀓𑁄 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀏𑀯𑀁 𑀕𑀳𑀺𑀢𑀦𑀸𑀫𑁄. 𑀉𑀲𑁆𑀲𑀳𑀢𑀺 𑀯𑀸𑀬𑀫𑀢𑀻𑀢𑀺 𑀉𑀲𑁆𑀲𑀸𑀳𑀁 𑀯𑀸𑀬𑀸𑀫𑀁 𑀓𑀭𑁄𑀢𑀺. 𑀧𑀭𑀺𑀬𑀸𑀧𑀸𑀤𑁂𑀦𑁆𑀢𑀻𑀢𑀺 𑀫𑀭𑀡𑀁 𑀧𑀝𑀺𑀧𑀚𑁆𑀚𑀸𑀧𑁂𑀦𑁆𑀢𑀺. 𑀤𑀼𑀓𑁆𑀓𑀝𑀦𑁆𑀢𑀺 𑀤𑀼𑀝𑁆𑀞𑀼 𑀓𑀢𑀁. 𑀤𑀼𑀧𑁆𑀧𑀡𑀺𑀳𑀺𑀢𑀦𑁆𑀢𑀺 𑀤𑀼𑀝𑁆𑀞𑀼 𑀞𑀧𑀺𑀢𑀁. 𑀧𑀭𑀚𑀺𑀢𑁄 𑀦𑀸𑀫 𑀦𑀺𑀭𑀬𑁄𑀢𑀺 𑀅𑀬𑀫𑁆𑀧𑀺 𑀦 𑀯𑀺𑀲𑀼𑀁 𑀏𑀓𑁄 𑀦𑀺𑀭𑀬𑁄, 𑀅𑀯𑀻𑀘𑀺𑀲𑁆𑀲𑁂𑀯 𑀧𑀦 𑀏𑀓𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀧𑀜𑁆𑀘𑀸𑀯𑀼𑀥𑀲𑀦𑁆𑀦𑀤𑁆𑀥𑀸 𑀨𑀮𑀓𑀳𑀢𑁆𑀣𑀸 𑀳𑀢𑁆𑀣𑀺𑀅𑀲𑁆𑀲𑀭𑀣𑁂 𑀆𑀭𑀼𑀬𑁆𑀳 𑀲𑀗𑁆𑀕𑀸𑀫𑁂 𑀬𑀼𑀚𑁆𑀛𑀦𑁆𑀢𑀸 𑀯𑀺𑀬 𑀧𑀘𑁆𑀘𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀘𑀢𑀼𑀢𑁆𑀣𑀧𑀜𑁆𑀘𑀫𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁬. 𑀅𑀲𑀺𑀩𑀦𑁆𑀥𑀓𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁮. 𑀙𑀝𑁆𑀞𑁂 𑀧𑀘𑁆𑀙𑀸𑀪𑀽𑀫𑀓𑀸𑀢𑀺 𑀧𑀘𑁆𑀙𑀸𑀪𑀽𑀫𑀺𑀯𑀸𑀲𑀺𑀦𑁄. 𑀓𑀸𑀫𑀡𑁆𑀟𑀮𑀼𑀓𑀸𑀢𑀺 𑀲𑀓𑀫𑀡𑁆𑀟𑀮𑀼𑀦𑁄. 𑀲𑁂𑀯𑀸𑀮𑀫𑀸𑀮𑀺𑀓𑀸𑀢𑀺 𑀧𑀸𑀢𑁄𑀯 𑀉𑀤𑀓𑀢𑁄 𑀲𑁂𑀯𑀸𑀮𑀜𑁆𑀘𑁂𑀯 𑀉𑀧𑁆𑀧𑀮𑀸𑀤𑀻𑀦𑀺 𑀘 𑀕𑀳𑁂𑀢𑁆𑀯𑀸 𑀉𑀤𑀓𑀲𑀼𑀤𑁆𑀥𑀺𑀓𑀪𑀸𑀯𑀚𑀸𑀦𑀦𑀢𑁆𑀣𑀸𑀬 𑀫𑀸𑀮𑀁 𑀓𑀢𑁆𑀯𑀸 𑀧𑀺𑀴𑀦𑁆𑀥𑀦𑀓𑀸. 𑀉𑀤𑀓𑁄𑀭𑁄𑀳𑀓𑀸𑀢𑀺 𑀲𑀸𑀬𑀁𑀧𑀸𑀢𑀁 𑀉𑀤𑀓𑀁 𑀑𑀭𑁄𑀳𑀦𑀓𑀸. 𑀉𑀬𑁆𑀬𑀸𑀧𑁂𑀦𑁆𑀢𑀻𑀢𑀺 𑀉𑀧𑀭𑀺 𑀬𑀸𑀧𑁂𑀦𑁆𑀢𑀺. 𑀲𑀜𑁆𑀜𑀸𑀧𑁂𑀦𑁆𑀢𑀻𑀢𑀺 𑀲𑀫𑁆𑀫𑀸 𑀜𑀸𑀧𑁂𑀦𑁆𑀢𑀺. 𑀲𑀕𑁆𑀕𑀁 𑀦𑀸𑀫 𑀑𑀓𑁆𑀓𑀸𑀫𑁂𑀦𑁆𑀢𑀻𑀢𑀺 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸 ‘‘𑀕𑀘𑁆𑀙, 𑀪𑁄, 𑀩𑁆𑀭𑀳𑁆𑀫𑀮𑁄𑀓𑀁, 𑀕𑀘𑁆𑀙, 𑀪𑁄, 𑀩𑁆𑀭𑀳𑁆𑀫𑀮𑁄𑀓’’𑀦𑁆𑀢𑀺 𑀯𑀤𑀦𑁆𑀢𑀸 𑀲𑀕𑁆𑀕𑀁 𑀧𑀯𑁂𑀲𑁂𑀦𑁆𑀢𑀺. 𑀅𑀦𑀼𑀧𑀭𑀺𑀲𑀓𑁆𑀓𑁂𑀬𑁆𑀬𑀸𑀢𑀺 𑀅𑀦𑀼𑀧𑀭𑀺𑀕𑀘𑁆𑀙𑁂𑀬𑁆𑀬. 𑀉𑀫𑁆𑀫𑀼𑀚𑁆𑀚𑀸𑀢𑀺 𑀉𑀫𑁆𑀫𑀼𑀚𑁆𑀚 𑀉𑀝𑁆𑀞𑀳. 𑀣𑀮𑀫𑀼𑀧𑁆𑀮𑀯𑀸𑀢𑀺 𑀣𑀮𑀫𑀪𑀺𑀭𑀼𑀳. 𑀢𑀢𑁆𑀭 𑀬𑀸𑀲𑁆𑀲𑀸𑀢𑀺 𑀢𑀢𑁆𑀭 𑀬𑀸 𑀪𑀯𑁂𑀬𑁆𑀬. 𑀲𑀓𑁆𑀔𑀭𑀸 𑀯𑀸 𑀓𑀞𑀮𑀸 𑀯𑀸𑀢𑀺 𑀲𑀓𑁆𑀔𑀭𑀸 𑀘 𑀓𑀞𑀮𑀸 𑀘. 𑀲𑀸 𑀅𑀥𑁄𑀕𑀸𑀫𑀻 𑀅𑀲𑁆𑀲𑀸𑀢𑀺 𑀲𑀸 𑀅𑀥𑁄 𑀕𑀘𑁆𑀙𑁂𑀬𑁆𑀬, 𑀳𑁂𑀝𑁆𑀞𑀸𑀕𑀸𑀫𑀻 𑀪𑀯𑁂𑀬𑁆𑀬. 𑀅𑀥𑁄𑀕𑀘𑁆𑀙𑀸𑀢𑀺 𑀳𑁂𑀝𑁆𑀞𑀸 𑀕𑀘𑁆𑀙.

𑁭. 𑀔𑁂𑀢𑁆𑀢𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁯. 𑀲𑀢𑁆𑀢𑀫𑁂 𑀚𑀗𑁆𑀕𑀮𑀦𑁆𑀢𑀺 𑀣𑀤𑁆𑀥𑀁 𑀦 𑀫𑀼𑀤𑀼. 𑀊𑀲𑀭𑀦𑁆𑀢𑀺 𑀲𑀜𑁆𑀚𑀸𑀢𑀮𑁄𑀡𑀁. 𑀧𑀸𑀧𑀪𑀽𑀫𑀻𑀢𑀺 𑀮𑀸𑀫𑀓𑀪𑀽𑀫𑀺𑀪𑀸𑀕𑀁. 𑀫𑀁𑀤𑀻𑀧𑀸𑀢𑀺𑀆𑀤𑀻𑀲𑀼 𑀅𑀳𑀁 𑀤𑀻𑀧𑁄 𑀧𑀢𑀺𑀝𑁆𑀞𑀸 𑀏𑀢𑁂𑀲𑀦𑁆𑀢𑀺 𑀫𑀁𑀤𑀻𑀧𑀸. 𑀅𑀳𑀁 𑀮𑁂𑀡𑁄 𑀅𑀮𑁆𑀮𑀻𑀬𑀦𑀝𑁆𑀞𑀸𑀦𑀁 𑀏𑀢𑁂𑀲𑀦𑁆𑀢𑀺 𑀫𑀁𑀮𑁂𑀡𑀸. 𑀅𑀳𑀁 𑀢𑀸𑀡𑀁 𑀭𑀓𑁆𑀔𑀸 𑀏𑀢𑁂𑀲𑀦𑁆𑀢𑀺 𑀫𑀁𑀢𑀸𑀡𑀸. 𑀅𑀳𑀁 𑀲𑀭𑀡𑀁 𑀪𑀬𑀦𑀸𑀲𑀦𑀁 𑀏𑀢𑁂𑀲𑀦𑁆𑀢𑀺 𑀫𑀁𑀲𑀭𑀡𑀸. 𑀯𑀺𑀳𑀭𑀦𑁆𑀢𑀻𑀢𑀺 𑀫𑀁 𑀏𑀯𑀁 𑀓𑀢𑁆𑀯𑀸 𑀯𑀺𑀳𑀭𑀦𑁆𑀢𑀺.

𑀕𑁄𑀪𑀢𑁆𑀢𑀫𑁆𑀧𑀻𑀢𑀺 𑀥𑀜𑁆𑀜𑀨𑀮𑀲𑁆𑀲 𑀅𑀪𑀸𑀯𑁂𑀦 𑀮𑀸𑀬𑀺𑀢𑁆𑀯𑀸 𑀓𑀮𑀸𑀧𑀓𑀮𑀸𑀧𑀁 𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀁 𑀕𑀺𑀫𑁆𑀳𑀓𑀸𑀮𑁂 𑀕𑀼𑀦𑁆𑀦𑀫𑁆𑀧𑀺 𑀔𑀸𑀤𑀦𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀉𑀤𑀓𑀫𑀡𑀺𑀓𑁄𑀢𑀺 𑀓𑀼𑀘𑁆𑀙𑀺𑀬𑀁 𑀫𑀡𑀺𑀓𑀫𑁂𑀔𑀮𑀸𑀬 𑀏𑀯𑀁 𑀮𑀤𑁆𑀥𑀦𑀸𑀫𑁄 𑀪𑀸𑀚𑀦𑀯𑀺𑀲𑁂𑀲𑁄. 𑀅𑀳𑀸𑀭𑀻 𑀅𑀧𑀭𑀺𑀳𑀸𑀭𑀻𑀢𑀺 𑀉𑀤𑀓𑀁 𑀦 𑀳𑀭𑀢𑀺 𑀦 𑀧𑀭𑀺𑀳𑀭𑀢𑀺, 𑀦 𑀧𑀭𑀺𑀬𑀸𑀤𑀺𑀬𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀓𑁆𑀓𑀘𑁆𑀘𑀥𑀫𑁆𑀫𑀤𑁂𑀲𑀦𑀸𑀯 𑀓𑀣𑀺𑀢𑀸. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀅𑀲𑀓𑁆𑀓𑀘𑁆𑀘𑀥𑀫𑁆𑀫𑀤𑁂𑀲𑀦𑀸 𑀦𑀸𑀫 𑀦𑀢𑁆𑀣𑀺. 𑀲𑀻𑀳𑀲𑀫𑀸𑀦𑀯𑀼𑀢𑁆𑀢𑀺𑀦𑁄 𑀳𑀺 𑀩𑀼𑀤𑁆𑀥𑀸, 𑀬𑀣𑀸 𑀲𑀻𑀳𑁄 𑀧𑀪𑀺𑀦𑁆𑀦𑀯𑀭𑀯𑀸𑀭𑀡𑀲𑁆𑀲𑀧𑀺 𑀲𑀲𑀩𑀺𑀴𑀸𑀭𑀸𑀤𑀻𑀦𑀫𑁆𑀧𑀺 𑀕𑀳𑀡𑀢𑁆𑀣𑀸𑀬 𑀏𑀓𑀲𑀤𑀺𑀲𑀫𑁂𑀯 𑀯𑁂𑀕𑀁 𑀓𑀭𑁄𑀢𑀺, 𑀏𑀯𑀁 𑀩𑀼𑀤𑁆𑀥𑀸𑀧𑀺 𑀏𑀓𑀲𑁆𑀲 𑀤𑁂𑀲𑁂𑀦𑁆𑀢𑀸𑀧𑀺 𑀤𑁆𑀯𑀺𑀦𑁆𑀦𑀁 𑀩𑀳𑀽𑀦𑀁 𑀪𑀺𑀓𑁆𑀔𑀼𑀧𑀭𑀺𑀲𑀸𑀬 𑀪𑀺𑀓𑁆𑀔𑀼𑀦𑀺𑀉𑀧𑀸𑀲𑀓𑀉𑀧𑀸𑀲𑀺𑀓𑀸𑀧𑀭𑀺𑀲𑀸𑀬𑀧𑀺 𑀢𑀺𑀢𑁆𑀣𑀺𑀬𑀸𑀦𑀫𑁆𑀧𑀺 𑀤𑁂𑀲𑁂𑀦𑁆𑀢𑀸 𑀲𑀓𑁆𑀓𑀘𑁆𑀘𑀫𑁂𑀯 𑀤𑁂𑀲𑁂𑀦𑁆𑀢𑀺. 𑀘𑀢𑀲𑁆𑀲𑁄 𑀧𑀦 𑀧𑀭𑀺𑀲𑀸 𑀲𑀤𑁆𑀤𑀳𑀺𑀢𑁆𑀯𑀸 𑀑𑀓𑀧𑁆𑀧𑁂𑀢𑁆𑀯𑀸 𑀲𑀼𑀡𑀦𑁆𑀢𑀻𑀢𑀺 𑀢𑀸𑀲𑀁 𑀤𑁂𑀲𑀦𑀸 𑀲𑀓𑁆𑀓𑀘𑁆𑀘𑀤𑁂𑀲𑀦𑀸 𑀦𑀸𑀫 𑀚𑀸𑀢𑀸.

𑁮. 𑀲𑀗𑁆𑀔𑀥𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬𑁦. 𑀅𑀝𑁆𑀞𑀫𑁂 𑀬𑀁𑀩𑀳𑀼𑀮𑀁 𑀬𑀁𑀩𑀳𑀼𑀮𑀦𑁆𑀢𑀺 𑀇𑀫𑀺𑀦𑀸 𑀦𑀺𑀕𑀡𑁆𑀞𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀯𑀸𑀤𑀁 𑀪𑀺𑀦𑁆𑀤𑀢𑀺. 𑀢𑀲𑁆𑀫𑀸 𑀪𑀕𑀯𑀸 𑀏𑀯𑀁 𑀲𑀦𑁆𑀢𑁂 𑀦 𑀓𑁄𑀘𑀺 𑀆𑀧𑀸𑀬𑀺𑀓𑁄𑀢𑀺𑀆𑀤𑀺𑀫𑀸𑀳. 𑀧𑀼𑀭𑀺𑀫𑀸𑀦𑀺 𑀧𑀦 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀤𑀺𑀝𑁆𑀞𑀺𑀬𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀢𑁂𑀲𑀼𑀧𑀺 𑀆𑀤𑀻𑀦𑀯𑀁 𑀤𑀲𑁆𑀲𑁂𑀦𑁆𑀢𑁄 𑀇𑀥, 𑀕𑀸𑀫𑀡𑀺, 𑀏𑀓𑀘𑁆𑀘𑁄 𑀲𑀢𑁆𑀣𑀸 𑀏𑀯𑀁𑀯𑀸𑀤𑀻 𑀳𑁄𑀢𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀳𑀫𑁆𑀧𑀫𑁆𑀳𑀻𑀢𑀺 𑀅𑀳𑀫𑁆𑀧𑀺 𑀅𑀫𑁆𑀳𑀺.

𑀫𑁂𑀢𑁆𑀢𑀸𑀲𑀳𑀕𑀢𑁂𑀦𑀸𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀲𑀤𑁆𑀥𑀺𑀁 𑀪𑀸𑀯𑀦𑀸𑀦𑀬𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑀫𑁂𑀯. 𑀲𑁂𑀬𑁆𑀬𑀣𑀸𑀧𑀺, 𑀕𑀸𑀫𑀡𑀺, 𑀩𑀮𑀯𑀸 𑀲𑀗𑁆𑀔𑀥𑀫𑁄𑀢𑀺𑀆𑀤𑀺 𑀧𑀦 𑀇𑀥 𑀅𑀧𑀼𑀩𑁆𑀩𑀁. 𑀢𑀢𑁆𑀣 𑀩𑀮𑀯𑀸𑀢𑀺 𑀩𑀮𑀲𑀫𑁆𑀧𑀦𑁆𑀦𑁄. 𑀲𑀗𑁆𑀔𑀥𑀫𑁄𑀢𑀺 𑀲𑀗𑁆𑀔𑀥𑀫𑀓𑁄. 𑀅𑀧𑁆𑀧𑀓𑀲𑀺𑀭𑁂𑀦𑀸𑀢𑀺 𑀅𑀓𑀺𑀘𑁆𑀙𑁂𑀦 𑀅𑀤𑀼𑀓𑁆𑀔𑁂𑀦. 𑀤𑀼𑀩𑁆𑀩𑀮𑁄 𑀳𑀺 𑀲𑀗𑁆𑀔𑀥𑀫𑁄 𑀲𑀗𑁆𑀔𑀁 𑀥𑀫𑀦𑁆𑀢𑁄𑀧𑀺 𑀦 𑀲𑀓𑁆𑀓𑁄𑀢𑀺 𑀘𑀢𑀲𑁆𑀲𑁄 𑀤𑀺𑀲𑀸 𑀲𑀭𑁂𑀦 𑀯𑀺𑀜𑁆𑀜𑀸𑀧𑁂𑀢𑀼𑀁, 𑀦𑀸𑀲𑁆𑀲 𑀲𑀗𑁆𑀔𑀲𑀤𑁆𑀤𑁄 𑀲𑀩𑁆𑀩𑀢𑁄 𑀨𑀭𑀢𑀺, 𑀩𑀮𑀯𑀢𑁄 𑀧𑀦 𑀯𑀺𑀧𑁆𑀨𑀸𑀭𑀺𑀓𑁄 𑀳𑁄𑀢𑀺, 𑀢𑀲𑁆𑀫𑀸 ‘‘𑀩𑀮𑀯𑀸’’𑀢𑀺 𑀆𑀳.

𑀫𑁂𑀢𑁆𑀢𑀸𑀬 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 ‘‘𑀫𑁂𑀢𑁆𑀢𑀸’’𑀢𑀺 𑀯𑀼𑀢𑁆𑀢𑁂 𑀉𑀧𑀘𑀸𑀭𑁄𑀧𑀺 𑀅𑀧𑁆𑀧𑀦𑀸𑀧𑀺 𑀯𑀝𑁆𑀝𑀢𑀺, ‘‘𑀘𑁂𑀢𑁄𑀯𑀺𑀫𑀼𑀢𑁆𑀢𑀻’’𑀢𑀺 𑀯𑀼𑀢𑁆𑀢𑁂 𑀧𑀦 𑀅𑀧𑁆𑀧𑀦𑀸𑀯 𑀯𑀝𑁆𑀝𑀢𑀺. 𑀬𑀁 𑀧𑀫𑀸𑀡𑀓𑀢𑀁 𑀓𑀫𑁆𑀫𑀦𑁆𑀢𑀺 𑀧𑀫𑀸𑀡𑀓𑀢𑀁 𑀓𑀫𑁆𑀫𑀁 𑀦𑀸𑀫 𑀓𑀸𑀫𑀸𑀯𑀘𑀭𑀁 𑀯𑀼𑀘𑁆𑀘𑀢𑀺, 𑀅𑀧𑁆𑀧𑀫𑀸𑀡𑀓𑀢𑀁 𑀓𑀫𑁆𑀫𑀁 𑀦𑀸𑀫 𑀭𑀽𑀧𑀸𑀯𑀘𑀭𑀁. 𑀢𑀜𑁆𑀳𑀺 𑀧𑀫𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀑𑀥𑀺𑀲𑀓𑀅𑀦𑁄𑀥𑀺𑀲𑀓𑀤𑀺𑀲𑀸𑀨𑀭𑀡𑀯𑀲𑁂𑀦 𑀯𑀟𑁆𑀠𑁂𑀢𑁆𑀯𑀸 𑀓𑀢𑀢𑁆𑀢𑀸 𑀅𑀧𑁆𑀧𑀫𑀸𑀡𑀓𑀢𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀦 𑀢𑀁 𑀢𑀢𑁆𑀭𑀸𑀯𑀲𑀺𑀲𑁆𑀲𑀢𑀺, 𑀦 𑀢𑀁 𑀢𑀢𑁆𑀭𑀸𑀯𑀢𑀺𑀝𑁆𑀞𑀢𑀻𑀢𑀺 𑀢𑀁 𑀓𑀸𑀫𑀸𑀯𑀘𑀭𑀓𑀫𑁆𑀫𑀁 𑀢𑀲𑁆𑀫𑀺𑀁 𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑁂 𑀦 𑀑𑀳𑀻𑀬𑀢𑀺 𑀦 𑀢𑀺𑀝𑁆𑀞𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀢𑀁 𑀓𑀸𑀫𑀸𑀯𑀘𑀭𑀓𑀫𑁆𑀫𑀁 𑀢𑀲𑁆𑀲 𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑀲𑁆𑀲 𑀅𑀦𑁆𑀢𑀭𑀸 𑀮𑀕𑁆𑀕𑀺𑀢𑀼𑀁 𑀯𑀸 𑀞𑀸𑀢𑀼𑀁 𑀯𑀸 𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑀁 𑀨𑀭𑀺𑀢𑁆𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀅𑀢𑁆𑀢𑀦𑁄 𑀑𑀓𑀸𑀲𑀁 𑀕𑀳𑁂𑀢𑁆𑀯𑀸 𑀧𑀢𑀺𑀝𑁆𑀞𑀸𑀢𑀼𑀁 𑀯𑀸 𑀦 𑀲𑀓𑁆𑀓𑁄𑀢𑀺. 𑀅𑀣 𑀔𑁄 𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑀫𑁂𑀯 𑀓𑀸𑀫𑀸𑀯𑀘𑀭𑀁 𑀫𑀳𑁄𑀖𑁄 𑀯𑀺𑀬 𑀧𑀭𑀺𑀢𑁆𑀢𑀁 𑀉𑀤𑀓𑀁 𑀨𑀭𑀺𑀢𑁆𑀯𑀸 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀅𑀢𑁆𑀢𑀦𑁄 𑀑𑀓𑀸𑀲𑀁 𑀓𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀢𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀲𑀬𑀫𑁂𑀯 𑀩𑁆𑀭𑀳𑁆𑀫𑀲𑀳𑀩𑁆𑀬𑀢𑀁 𑀉𑀧𑀦𑁂𑀢𑀻𑀢𑀺. 𑀇𑀢𑀺 𑀇𑀤𑀁 𑀲𑀼𑀢𑁆𑀢𑀁 𑀆𑀤𑀺𑀫𑁆𑀳𑀺 𑀓𑀺𑀮𑁂𑀲𑀯𑀲𑁂𑀦 𑀯𑀼𑀝𑁆𑀞𑀸𑀬 𑀅𑀯𑀲𑀸𑀦𑁂 𑀩𑁆𑀭𑀳𑁆𑀫𑀯𑀺𑀳𑀸𑀭𑀯𑀲𑁂𑀦 𑀕𑀳𑀺𑀢𑀢𑁆𑀢𑀸 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀕𑀢𑀁.

𑁯. 𑀓𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬𑁧. 𑀦𑀯𑀫𑁂 𑀤𑀼𑀩𑁆𑀪𑀺𑀓𑁆𑀔𑀸𑀢𑀺 𑀤𑀼𑀮𑁆𑀮𑀪𑀪𑀺𑀓𑁆𑀔𑀸. 𑀤𑁆𑀯𑀻𑀳𑀺𑀢𑀺𑀓𑀸𑀢𑀺 ‘‘𑀚𑀻𑀯𑀺𑀲𑁆𑀲𑀸𑀫 𑀦𑀼 𑀔𑁄 𑀦 𑀦𑀼 𑀔𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑀈𑀳𑀺𑀢𑀺𑀓𑀸. ‘‘𑀤𑀼𑀳𑀺𑀢𑀺𑀓𑀸’’𑀢𑀺𑀧𑀺 𑀧𑀸𑀞𑁄. 𑀅𑀬𑀫𑁂𑀯 𑀅𑀢𑁆𑀣𑁄. 𑀤𑀼𑀓𑁆𑀔𑀸 𑀈𑀳𑀺𑀢𑀺 𑀏𑀢𑁆𑀣 𑀦 𑀲𑀓𑁆𑀓𑀸 𑀓𑁄𑀘𑀺 𑀧𑀬𑁄𑀕𑁄 𑀲𑀼𑀔𑁂𑀦 𑀓𑀸𑀢𑀼𑀦𑁆𑀢𑀺 𑀤𑀼𑀳𑀺𑀢𑀺𑀓𑀸. 𑀢𑀢𑁆𑀣 𑀢𑀢𑁆𑀣 𑀫𑀢𑀫𑀦𑀼𑀲𑁆𑀲𑀸𑀦𑀁 𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀺 𑀲𑁂𑀢𑀸𑀦𑀺 𑀅𑀝𑁆𑀞𑀺𑀓𑀸𑀦𑀺 𑀏𑀢𑁆𑀣𑀸𑀢𑀺 𑀲𑁂𑀢𑀝𑁆𑀞𑀺𑀓𑀸. 𑀲𑀮𑀸𑀓𑀸𑀯𑀼𑀢𑁆𑀢𑀸𑀢𑀺 𑀲𑀮𑀸𑀓𑀫𑀢𑁆𑀢𑀯𑀼𑀢𑁆𑀢𑀸, 𑀬𑀁 𑀢𑀢𑁆𑀣 𑀯𑀼𑀢𑁆𑀢𑀁 𑀯𑀸𑀧𑀺𑀢𑀁, 𑀢𑀁 𑀲𑀮𑀸𑀓𑀫𑀢𑁆𑀢𑀫𑁂𑀯 𑀅𑀳𑁄𑀲𑀺, 𑀨𑀮𑁂 𑀦 𑀚𑀦𑀬𑀢𑀻𑀢𑀺 𑀅𑀢𑁆𑀣𑁄.

𑀉𑀕𑁆𑀕𑀺𑀮𑀺𑀢𑀼𑀦𑁆𑀢𑀺 𑀤𑁆𑀯𑁂 𑀅𑀦𑁆𑀢𑁂 𑀫𑁄𑀘𑁂𑀢𑁆𑀯𑀸 𑀓𑀣𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀉𑀕𑁆𑀕𑀺𑀮𑀺𑀢𑀼𑀁 𑀩𑀳𑀺 𑀦𑀻𑀳𑀭𑀺𑀢𑀼𑀁 𑀦 𑀲𑀓𑁆𑀔𑀻𑀢𑀺. 𑀑𑀕𑀺𑀮𑀺𑀢𑀼𑀦𑁆𑀢𑀺 𑀧𑀼𑀘𑁆𑀙𑀸𑀬 𑀤𑁄𑀲𑀁 𑀤𑀺𑀲𑁆𑀯𑀸 𑀳𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀑𑀕𑀺𑀮𑀺𑀢𑀼𑀁 𑀅𑀦𑁆𑀢𑁄 𑀧𑀯𑁂𑀲𑁂𑀢𑀼𑀁 𑀦 𑀲𑀓𑁆𑀔𑀻𑀢𑀺.

𑀇𑀢𑁄 𑀲𑁄 𑀕𑀸𑀫𑀡𑀺 𑀏𑀓𑀦𑀯𑀼𑀢𑀺𑀓𑀧𑁆𑀧𑁂𑀢𑀺 𑀪𑀕𑀯𑀸 𑀓𑀣𑀬𑀫𑀸𑀦𑁄𑀯 𑀬𑀸𑀯 𑀦𑀺𑀓𑁆𑀔𑀦𑁆𑀢𑁄 𑀦𑀸𑀲𑀺𑀓𑀯𑀸𑀢𑁄 𑀦 𑀧𑀼𑀦 𑀧𑀯𑀺𑀲𑀢𑀺, 𑀢𑀸𑀯𑀢𑀓𑁂𑀦 𑀓𑀸𑀮𑁂𑀦 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀅𑀦𑀼𑀲𑁆𑀲𑀭𑀺 ‘‘𑀅𑀢𑁆𑀣𑀺 𑀦𑀼 𑀔𑁄 𑀓𑀺𑀜𑁆𑀘𑀺 𑀓𑀼𑀮𑁂 𑀧𑀓𑁆𑀓𑀪𑀺𑀓𑁆𑀔𑀸𑀤𑀸𑀦𑁂𑀦 𑀉𑀧𑀳𑀢𑀧𑀼𑀩𑁆𑀩’’𑀦𑁆𑀢𑀺 𑀧𑀭𑀺𑀚𑀸𑀦𑀦𑀢𑁆𑀣𑀁. 𑀅𑀣𑁂𑀓𑀫𑁆𑀧𑀺 𑀅𑀧𑀲𑁆𑀲𑀦𑁆𑀢𑁄 ‘‘𑀇𑀢𑁄 𑀲𑁄, 𑀕𑀸𑀫𑀡𑀻’’𑀢𑀺𑀆𑀤𑀺𑀫𑀸𑀳. 𑀇𑀤𑀸𑀦𑀺 𑀤𑀸𑀦𑀸𑀤𑀻𑀦𑀁 𑀆𑀦𑀺𑀲𑀁𑀲𑀁 𑀓𑀣𑁂𑀦𑁆𑀢𑁄 𑀅𑀣 𑀔𑁄 𑀬𑀸𑀦𑀺 𑀢𑀸𑀦𑀺 𑀓𑀼𑀮𑀸𑀦𑀺 𑀅𑀟𑁆𑀠𑀸𑀦𑀻𑀢𑀺 𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀤𑀸𑀦𑀲𑀫𑁆𑀪𑀽𑀢𑀸𑀦𑀻𑀢𑀺 𑀤𑀸𑀦𑁂𑀦 𑀲𑀫𑁆𑀪𑀽𑀢𑀸𑀦𑀺 𑀦𑀺𑀩𑁆𑀩𑀢𑁆𑀢𑀸𑀦𑀺. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀧𑀦 𑀲𑀘𑁆𑀘𑀁 𑀦𑀸𑀫 𑀲𑀘𑁆𑀘𑀯𑀸𑀤𑀺𑀢𑀸. 𑀲𑀸𑀫𑀜𑁆𑀜𑀁 𑀦𑀸𑀫 𑀲𑁂𑀲𑀲𑀻𑀮𑀁. 𑀯𑀺𑀓𑀺𑀭𑀢𑀻𑀢𑀺 𑀅𑀬𑁄𑀕𑁂𑀦 𑀯𑀴𑀜𑁆𑀚𑁂𑀦𑁆𑀢𑁄 𑀯𑀺𑀧𑁆𑀧𑀓𑀺𑀭𑀢𑀺. 𑀯𑀺𑀥𑀫𑀢𑀻𑀢𑀺 𑀥𑀫𑁂𑀦𑁆𑀢𑁄 𑀯𑀺𑀬 𑀦𑀸𑀲𑁂𑀢𑀺. 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀦𑀸𑀲𑁂𑀢𑀺. 𑀅𑀦𑀺𑀘𑁆𑀘𑀢𑀸𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑁄 𑀩𑀳𑀼𑀦𑀸𑀧𑀺 𑀓𑀸𑀮𑁂𑀦 𑀲𑀗𑁆𑀕𑀢𑀸𑀦𑀁 𑀔𑀡𑁂𑀦𑁂𑀯 𑀅𑀦𑁆𑀢𑀭𑀥𑀸𑀦𑀁.

𑁧𑁦. 𑀫𑀡𑀺𑀘𑀽𑀴𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬𑁨. 𑀤𑀲𑀫𑁂 𑀢𑀁 𑀧𑀭𑀺𑀲𑀁 𑀏𑀢𑀤𑀯𑁄𑀘𑀸𑀢𑀺 𑀢𑀲𑁆𑀲 𑀓𑀺𑀭 𑀏𑀯𑀁 𑀅𑀳𑁄𑀲𑀺 ‘‘𑀓𑀼𑀮𑀧𑀼𑀢𑁆𑀢𑀸 𑀧𑀩𑁆𑀩𑀚𑀦𑁆𑀢𑀸 𑀧𑀼𑀢𑁆𑀢𑀤𑀸𑀭𑀜𑁆𑀘𑁂𑀯 𑀚𑀸𑀢𑀭𑀽𑀧𑀭𑀚𑀢𑀜𑁆𑀘 𑀧𑀳𑀸𑀬𑁂𑀯 𑀧𑀩𑁆𑀩𑀚𑀦𑁆𑀢𑀺, 𑀦 𑀘 𑀲𑀓𑁆𑀓𑀸 𑀬𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑀸, 𑀢𑀁 𑀢𑁂𑀳𑀺 𑀕𑀳𑁂𑀢𑀼’’𑀦𑁆𑀢𑀺 𑀦𑀬𑀕𑁆𑀕𑀸𑀳𑁂 𑀞𑀢𑁆𑀯𑀸 ‘‘𑀫𑀸 𑀅𑀬𑁆𑀬𑁄’’𑀢𑀺𑀆𑀤𑀺𑀯𑀘𑀦𑀁 𑀅𑀯𑁄𑀘. 𑀏𑀓𑀁𑀲𑁂𑀦𑁂𑀢𑀦𑁆𑀢𑀺 𑀏𑀢𑀁 𑀧𑀜𑁆𑀘𑀓𑀸𑀫𑀕𑀼𑀡𑀓𑀧𑁆𑀧𑀦𑀁 𑀅𑀲𑁆𑀲𑀫𑀡𑀥𑀫𑁆𑀫𑁄 𑀅𑀲𑀓𑁆𑀬𑀧𑀼𑀢𑁆𑀢𑀺𑀬𑀥𑀫𑁆𑀫𑁄𑀢𑀺 𑀏𑀓𑀁𑀲𑁂𑀦 𑀥𑀸𑀭𑁂𑀬𑁆𑀬𑀸𑀲𑀺.

𑀢𑀺𑀡𑀦𑁆𑀢𑀺 𑀲𑁂𑀦𑀸𑀲𑀦𑀘𑁆𑀙𑀤𑀦𑀢𑀺𑀡𑀁. 𑀧𑀭𑀺𑀬𑁂𑀲𑀺𑀢𑀩𑁆𑀩𑀦𑁆𑀢𑀺 𑀢𑀺𑀡𑀘𑁆𑀙𑀤𑀦𑁂 𑀯𑀸 𑀇𑀝𑁆𑀞𑀓𑀘𑁆𑀙𑀤𑀦𑁂 𑀯𑀸 𑀕𑁂𑀳𑁂 𑀧𑀮𑀼𑀚𑁆𑀚𑀦𑁆𑀢𑁂 𑀬𑁂𑀳𑀺 𑀢𑀁 𑀓𑀸𑀭𑀺𑀢𑀁, 𑀢𑁂𑀲𑀁 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀢𑀼𑀫𑁆𑀳𑁂𑀳𑀺 𑀓𑀸𑀭𑀺𑀢𑀲𑁂𑀦𑀸𑀲𑀦𑀁 𑀑𑀯𑀲𑁆𑀲𑀢𑀺, 𑀦 𑀲𑀓𑁆𑀓𑀸 𑀢𑀢𑁆𑀣 𑀯𑀲𑀺𑀢𑀼’’𑀦𑁆𑀢𑀺 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀫𑀦𑀼𑀲𑁆𑀲𑀸 𑀲𑀓𑁆𑀓𑁄𑀦𑁆𑀢𑀸 𑀓𑀭𑀺𑀲𑁆𑀲𑀦𑁆𑀢𑀺, 𑀅𑀲𑀓𑁆𑀓𑁄𑀦𑁆𑀢𑀸 ‘‘𑀢𑀼𑀫𑁆𑀳𑁂 𑀯𑀟𑁆𑀠𑀓𑀺𑀁 𑀕𑀳𑁂𑀢𑁆𑀯𑀸 𑀓𑀸𑀭𑀸𑀧𑁂𑀣, 𑀫𑀬𑀁 𑀢𑁂 𑀲𑀜𑁆𑀜𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀯𑀓𑁆𑀔𑀦𑁆𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀓𑀸𑀭𑁂𑀢𑁆𑀯𑀸 𑀢𑁂𑀲𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀁. 𑀫𑀦𑀼𑀲𑁆𑀲𑀸 𑀯𑀟𑁆𑀠𑀓𑀻𑀦𑀁 𑀤𑀸𑀢𑀩𑁆𑀩𑀁 𑀤𑀲𑁆𑀲𑀦𑁆𑀢𑀺. 𑀲𑀘𑁂 𑀆𑀯𑀸𑀲𑀲𑀸𑀫𑀺𑀓𑀸 𑀦𑀢𑁆𑀣𑀺, 𑀅𑀜𑁆𑀜𑁂𑀲𑀫𑁆𑀧𑀺 𑀪𑀺𑀓𑁆𑀔𑀸𑀘𑀸𑀭𑀯𑀢𑁆𑀢𑁂𑀦 𑀆𑀭𑁄𑀘𑁂𑀢𑁆𑀯𑀸 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀺. 𑀇𑀤𑀁 𑀲𑀦𑁆𑀥𑀸𑀬 ‘‘𑀧𑀭𑀺𑀬𑁂𑀲𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.

𑀤𑀸𑀭𑀼𑀦𑁆𑀢𑀺 𑀲𑁂𑀦𑀸𑀲𑀦𑁂 𑀕𑁄𑀧𑀸𑀦𑀲𑀺𑀆𑀤𑀻𑀲𑀼 𑀧𑀮𑀼𑀚𑁆𑀚𑀫𑀸𑀦𑁂𑀲𑀼 𑀢𑀤𑀢𑁆𑀣𑀸𑀬 𑀤𑀸𑀭𑀼𑀁. 𑀲𑀓𑀝𑀦𑁆𑀢𑀺 𑀕𑀺𑀳𑀺𑀯𑀺𑀓𑀢𑀁 𑀓𑀢𑁆𑀯𑀸 𑀢𑀸𑀯𑀓𑀸𑀮𑀺𑀓𑀲𑀓𑀝𑀁. 𑀦 𑀓𑁂𑀯𑀮𑀜𑁆𑀘 𑀲𑀓𑀝𑀫𑁂𑀯, 𑀅𑀜𑁆𑀜𑀫𑁆𑀧𑀺 𑀯𑀸𑀲𑀺𑀨𑀭𑀲𑀼𑀓𑀼𑀤𑁆𑀤𑀸𑀮𑀸𑀤𑀺𑀉𑀧𑀓𑀭𑀡𑀁 𑀏𑀯𑀁 𑀧𑀭𑀺𑀬𑁂𑀲𑀺𑀢𑀼𑀁 𑀯𑀝𑁆𑀝𑀢𑀺. 𑀧𑀼𑀭𑀺𑀲𑁄𑀢𑀺 𑀳𑀢𑁆𑀣𑀓𑀫𑁆𑀫𑀯𑀲𑁂𑀦 𑀧𑀼𑀭𑀺𑀲𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄. 𑀬𑀁𑀓𑀺𑀜𑁆𑀘𑀺 𑀳𑀺 𑀧𑀼𑀭𑀺𑀲𑀁 ‘‘𑀳𑀢𑁆𑀣𑀓𑀫𑁆𑀫𑀁, 𑀆𑀯𑀼𑀲𑁄, 𑀓𑀢𑁆𑀯𑀸 𑀤𑀲𑁆𑀲𑀲𑀻’’𑀢𑀺 𑀯𑀢𑁆𑀯𑀸 ‘‘𑀤𑀲𑁆𑀲𑀸𑀫𑀺, 𑀪𑀦𑁆𑀢𑁂,’’𑀢𑀺 𑀯𑀼𑀢𑁆𑀢𑁂 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀓𑀭𑁄𑀳𑀻’’𑀢𑀺 𑀬𑀁 𑀇𑀘𑁆𑀙𑀢𑀺, 𑀢𑀁 𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀺. 𑀦 𑀢𑁆𑀯𑁂𑀯𑀸𑀳𑀁, 𑀕𑀸𑀫𑀡𑀺, 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦𑀸𑀢𑀺 𑀚𑀸𑀢𑀭𑀽𑀧𑀭𑀚𑀢𑀁 𑀧𑀦𑀸𑀳𑀁 𑀓𑁂𑀦𑀘𑀺𑀧𑀺 𑀓𑀸𑀭𑀡𑁂𑀦 𑀧𑀭𑀺𑀬𑁂𑀲𑀺𑀢𑀩𑁆𑀩𑀦𑁆𑀢𑀺 𑀦 𑀯𑀤𑀸𑀫𑀺.

𑁧𑁧. 𑀪𑀤𑁆𑀭𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬𑁩. 𑀏𑀓𑀸𑀤𑀲𑀫𑁂 𑀫𑀮𑁆𑀮𑁂𑀲𑀽𑀢𑀺 𑀏𑀯𑀁𑀦𑀸𑀫𑀓𑁂 𑀚𑀦𑀧𑀤𑁂. 𑀯𑀥𑁂𑀦𑀸𑀢𑀺 𑀫𑀸𑀭𑀡𑁂𑀦. 𑀚𑀸𑀦𑀺𑀬𑀸𑀢𑀺 𑀥𑀦𑀚𑀸𑀦𑀺𑀬𑀸. 𑀅𑀓𑀸𑀮𑀺𑀓𑁂𑀦 𑀧𑀢𑁆𑀢𑁂𑀦𑀸𑀢𑀺 𑀦 𑀓𑀸𑀮𑀦𑁆𑀢𑀭𑁂𑀦 𑀧𑀢𑁆𑀢𑁂𑀦, 𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀧𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀘𑀺𑀭𑀯𑀸𑀲𑀻 𑀦𑀸𑀫 𑀓𑀼𑀫𑀸𑀭𑁄𑀢𑀺 𑀏𑀯𑀁𑀦𑀸𑀫𑀓𑁄 𑀢𑀲𑁆𑀲 𑀧𑀼𑀢𑁆𑀢𑁄. 𑀩𑀳𑀺 𑀆𑀯𑀲𑀣𑁂 𑀧𑀝𑀺𑀯𑀲𑀢𑀻𑀢𑀺 𑀩𑀳𑀺𑀦𑀕𑀭𑁂 𑀓𑀺𑀜𑁆𑀘𑀺𑀤𑁂𑀯 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳𑀦𑁆𑀢𑁄 𑀯𑀲𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀤𑀼𑀓𑁆𑀔𑀁 𑀓𑀣𑀺𑀢𑀁.

𑁧𑁨. 𑀭𑀸𑀲𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬𑁪. 𑀤𑁆𑀯𑀸𑀤𑀲𑀫𑁂 𑀭𑀸𑀲𑀺𑀬𑁄𑀢𑀺 𑀭𑀸𑀲𑀺𑀁 𑀓𑀢𑁆𑀯𑀸 𑀧𑀜𑁆𑀳𑀲𑁆𑀲 𑀧𑀼𑀘𑁆𑀙𑀺𑀢𑀢𑁆𑀢𑀸 𑀭𑀸𑀲𑀺𑀬𑁄𑀢𑀺 𑀏𑀯𑀁 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀕𑀳𑀺𑀢𑀦𑀸𑀫𑁄. 𑀢𑀧𑀲𑁆𑀲𑀺𑀦𑁆𑀢𑀺 𑀢𑀧𑀦𑀺𑀲𑁆𑀲𑀺𑀢𑀓𑀁. 𑀮𑀽𑀔𑀚𑀻𑀯𑀺𑀦𑁆𑀢𑀺 𑀮𑀽𑀔𑀚𑀻𑀯𑀺𑀓𑀁. 𑀅𑀦𑁆𑀢𑀸𑀢𑀺 𑀓𑁄𑀝𑁆𑀞𑀸𑀲𑀸. 𑀕𑀸𑀫𑁄𑀢𑀺 𑀕𑀸𑀫𑁆𑀫𑁄. 𑀕𑀫𑁆𑀫𑁄𑀢𑀺𑀧𑀺 𑀧𑀸𑀞𑁄, 𑀕𑀸𑀫𑀯𑀸𑀲𑀻𑀦𑀁 𑀥𑀫𑁆𑀫𑁄𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄𑀢𑀺 𑀅𑀢𑁆𑀢𑀦𑁄 𑀓𑀺𑀮𑀫𑀣𑀸𑀦𑀼𑀬𑁄𑀕𑁄, 𑀲𑀭𑀻𑀭𑀤𑀼𑀓𑁆𑀔𑀓𑀭𑀡𑀦𑁆𑀢𑀺 𑀅𑀢𑁆𑀣𑁄.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄 𑀕𑀳𑀺𑀢𑁄, 𑀓𑀲𑁆𑀫𑀸 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄, 𑀓𑀲𑁆𑀫𑀸 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸𑀢𑀺? 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄 𑀢𑀸𑀯 𑀓𑀸𑀫𑀪𑁄𑀕𑀻𑀦𑀁 𑀤𑀲𑁆𑀲𑀦𑀢𑁆𑀣𑀁 𑀕𑀳𑀺𑀢𑁄, 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀢𑀧𑀦𑀺𑀲𑁆𑀲𑀺𑀢𑀓𑀸𑀦𑀁, 𑀫𑀚𑁆𑀛𑀺𑀫𑀸 𑀧𑀝𑀺𑀧𑀤𑀸 𑀢𑀺𑀡𑁆𑀡𑀁 𑀦𑀺𑀚𑁆𑀚𑀭𑀯𑀢𑁆𑀣𑀽𑀦𑀁 𑀤𑀲𑁆𑀲𑀦𑀢𑁆𑀣𑀁 𑀕𑀳𑀺𑀢𑀸. 𑀓𑀺𑀁 𑀏𑀢𑁂𑀲𑀁 𑀤𑀲𑁆𑀲𑀦𑁂 𑀧𑀬𑁄𑀚𑀦𑀦𑁆𑀢𑀺? 𑀇𑀫𑁂 𑀤𑁆𑀯𑁂 𑀅𑀦𑁆𑀢𑁂 𑀧𑀳𑀸𑀬 𑀢𑀣𑀸𑀕𑀢𑁄 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀤𑀸𑀬 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀢𑁄. 𑀲𑁄 𑀓𑀸𑀫𑀪𑁄𑀕𑀺𑀦𑁄𑀧𑀺 𑀦 𑀲𑀩𑁆𑀩𑁂 𑀕𑀭𑀳𑀢𑀺 𑀦 𑀧𑀲𑀁𑀲𑀢𑀺, 𑀢𑀧𑀦𑀺𑀲𑁆𑀲𑀺𑀢𑀓𑁂𑀧𑀺 𑀦 𑀲𑀩𑁆𑀩𑁂 𑀕𑀭𑀳𑀢𑀺 𑀦 𑀧𑀲𑀁𑀲𑀢𑀺, 𑀕𑀭𑀳𑀺𑀢𑀩𑁆𑀩𑀬𑀼𑀢𑁆𑀢𑀓𑁂𑀬𑁂𑀯 𑀕𑀭𑀳𑀢𑀺, 𑀧𑀲𑀁𑀲𑀺𑀢𑀩𑁆𑀩𑀬𑀼𑀢𑁆𑀢𑀓𑁂 𑀧𑀲𑀁𑀲𑀢𑀻𑀢𑀺 𑀇𑀫𑀲𑁆𑀲𑀢𑁆𑀣𑀲𑁆𑀲 𑀧𑀓𑀸𑀲𑀦𑀁 𑀏𑀢𑁂𑀲𑀁 𑀤𑀲𑁆𑀲𑀦𑁂 𑀧𑀬𑁄𑀚𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀤𑀸𑀦𑀺 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀢𑀬𑁄 𑀔𑁄𑀫𑁂, 𑀕𑀸𑀫𑀡𑀺, 𑀓𑀸𑀫𑀪𑁄𑀕𑀺𑀦𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀸𑀳𑀲𑁂𑀦𑀸𑀢𑀺 𑀲𑀸𑀳𑀲𑀺𑀓𑀓𑀫𑁆𑀫𑁂𑀦. 𑀦 𑀲𑀁𑀯𑀺𑀪𑀚𑀢𑀻𑀢𑀺 𑀫𑀺𑀢𑁆𑀢𑀲𑀳𑀸𑀬𑀲𑀦𑁆𑀤𑀺𑀝𑁆𑀞𑀲𑀫𑁆𑀪𑀢𑁆𑀢𑀸𑀦𑀁 𑀲𑀁𑀯𑀺𑀪𑀸𑀕𑀁 𑀦 𑀓𑀭𑁄𑀢𑀺. 𑀦 𑀧𑀼𑀜𑁆𑀜𑀸𑀦𑀺 𑀓𑀭𑁄𑀢𑀻𑀢𑀺 𑀅𑀦𑀸𑀕𑀢𑀪𑀯𑀲𑁆𑀲 𑀧𑀘𑁆𑀘𑀬𑀪𑀽𑀢𑀸𑀦𑀺 𑀧𑀼𑀜𑁆𑀜𑀸𑀦𑀺 𑀦 𑀓𑀭𑁄𑀢𑀺. 𑀥𑀫𑁆𑀫𑀸𑀥𑀫𑁆𑀫𑁂𑀦𑀸𑀢𑀺 𑀥𑀫𑁆𑀫𑁂𑀦 𑀘 𑀅𑀥𑀫𑁆𑀫𑁂𑀦 𑀘. 𑀞𑀸𑀦𑁂𑀳𑀻𑀢𑀺 𑀓𑀸𑀭𑀡𑁂𑀳𑀺. 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀓𑀣𑀁 𑀅𑀢𑁆𑀢𑀸𑀦𑀁 𑀆𑀢𑀸𑀧𑁂𑀦𑁆𑀢𑁄 𑀧𑀭𑀺𑀢𑀸𑀧𑁂𑀦𑁆𑀢𑁄 𑀲𑀘𑁆𑀙𑀺𑀓𑀭𑁄𑀢𑀺? 𑀘𑀢𑀼𑀭𑀗𑁆𑀕𑀯𑀻𑀭𑀺𑀬𑀯𑀲𑁂𑀦 𑀘 𑀥𑀼𑀢𑀗𑁆𑀕𑀯𑀲𑁂𑀦 𑀘. 𑀢𑀺𑀲𑁆𑀲𑁄 𑀲𑀦𑁆𑀤𑀺𑀝𑁆𑀞𑀺𑀓𑀸 𑀦𑀺𑀚𑁆𑀚𑀭𑀸𑀢𑀺 𑀏𑀢𑁆𑀣 𑀏𑀓𑁄𑀧𑀺 𑀫𑀕𑁆𑀕𑁄 𑀢𑀺𑀡𑁆𑀡𑀁 𑀓𑀺𑀮𑁂𑀲𑀸𑀦𑀁 𑀦𑀺𑀚𑁆𑀚𑀭𑀡𑀢𑀸𑀬 𑀢𑀺𑀲𑁆𑀲𑁄 𑀦𑀺𑀚𑁆𑀚𑀭𑀸𑀢𑀺 𑀯𑀼𑀢𑁆𑀢𑁄𑀢𑀺.

𑁧𑁩. 𑀧𑀸𑀝𑀮𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬𑁫. 𑀢𑁂𑀭𑀲𑀫𑁂 𑀤𑀽𑀢𑁂𑀬𑁆𑀬𑀸𑀦𑀻𑀢𑀺 𑀤𑀽𑀢𑀓𑀫𑁆𑀫𑀸𑀦𑀺 𑀧𑀡𑁆𑀡𑀸𑀦𑀺 𑀘𑁂𑀯 𑀫𑀼𑀔𑀲𑀸𑀲𑀦𑀸𑀦𑀺 𑀘. 𑀧𑀸𑀡𑀸𑀢𑀺𑀧𑀸𑀢𑀜𑁆𑀘𑀸𑀳𑀦𑁆𑀢𑀺 𑀇𑀤𑀁 𑀓𑀲𑁆𑀫𑀸 𑀆𑀭𑀤𑁆𑀥𑀁? 𑀦 𑀓𑁂𑀯𑀮𑀁 𑀅𑀳𑀁 𑀫𑀸𑀬𑀁 𑀚𑀸𑀦𑀸𑀫𑀺, 𑀅𑀜𑁆𑀜𑀫𑁆𑀧𑀺 𑀇𑀤𑀜𑁆𑀘𑀺𑀤𑀜𑁆𑀘 𑀚𑀸𑀦𑀸𑀫𑀻𑀢𑀺 𑀲𑀩𑁆𑀩𑀜𑁆𑀜𑀼𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀆𑀭𑀤𑁆𑀥𑀁. 𑀲𑀦𑁆𑀢𑀺 𑀳𑀺, 𑀕𑀸𑀫𑀡𑀺, 𑀏𑀓𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺 𑀇𑀤𑀁 𑀲𑁂𑀲𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀦𑀁 𑀮𑀤𑁆𑀥𑀺𑀁 𑀤𑀲𑁆𑀲𑁂𑀢𑁆𑀯𑀸 𑀢𑀲𑁆𑀲𑀸 𑀧𑀚𑀳𑀸𑀧𑀦𑀢𑁆𑀣𑀁 𑀆𑀭𑀤𑁆𑀥𑀁.

𑀫𑀸𑀮𑀻 𑀓𑀼𑀡𑁆𑀟𑀮𑀻𑀢𑀺 𑀫𑀸𑀮𑀸𑀬 𑀫𑀸𑀮𑀻, 𑀓𑀼𑀡𑁆𑀟𑀮𑁂𑀳𑀺 𑀓𑀼𑀡𑁆𑀟𑀮𑀻. 𑀇𑀢𑁆𑀣𑀺𑀓𑀸𑀫𑁂𑀳𑀻𑀢𑀺 𑀇𑀢𑁆𑀣𑀻𑀳𑀺 𑀲𑀤𑁆𑀥𑀺𑀁 𑀓𑀸𑀫𑀸 𑀇𑀢𑁆𑀣𑀺𑀓𑀸𑀫𑀸, 𑀢𑁂𑀳𑀺 𑀇𑀢𑁆𑀣𑀺𑀓𑀸𑀫𑁂𑀳𑀺. 𑀆𑀯𑀲𑀣𑀸𑀕𑀸𑀭𑀦𑁆𑀢𑀺 𑀓𑀼𑀮𑀖𑀭𑀲𑁆𑀲 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀏𑀓𑁂𑀓𑀲𑁆𑀲𑁂𑀯 𑀲𑀼𑀔𑀦𑀺𑀯𑀸𑀲𑀢𑁆𑀣𑀸𑀬 𑀓𑀢𑀁 𑀯𑀸𑀲𑀸𑀕𑀸𑀭𑀁. 𑀢𑁂𑀦𑀸𑀳𑀁 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁 𑀲𑀁𑀯𑀺𑀪𑀚𑀸𑀫𑀻𑀢𑀺 𑀢𑀲𑁆𑀲𑀸𑀳𑀁 𑀅𑀢𑁆𑀢𑀦𑁄 𑀲𑀢𑁆𑀢𑀺𑀅𑀦𑀼𑀭𑀽𑀧𑁂𑀦 𑀘𑁂𑀯 𑀩𑀮𑀸𑀦𑀼𑀭𑀽𑀧𑁂𑀦 𑀘 𑀲𑀁𑀯𑀺𑀪𑀸𑀕𑀁 𑀓𑀭𑁄𑀫𑀺. 𑀅𑀮𑀦𑁆𑀢𑀺 𑀬𑀼𑀢𑁆𑀢𑀁. 𑀓𑀗𑁆𑀔𑀦𑀺𑀬𑁂 𑀞𑀸𑀦𑁂𑀢𑀺 𑀓𑀗𑁆𑀔𑀺𑀢𑀩𑁆𑀩𑁂 𑀓𑀸𑀭𑀡𑁂. 𑀘𑀺𑀢𑁆𑀢𑀲𑀫𑀸𑀥𑀺𑀦𑁆𑀢𑀺 𑀢𑀲𑁆𑀫𑀺𑀁 𑀥𑀫𑁆𑀫𑀲𑀫𑀸𑀥𑀺𑀲𑁆𑀫𑀺𑀁 𑀞𑀺𑀢𑁄 𑀢𑁆𑀯𑀁 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀘𑀢𑀼𑀦𑁆𑀦𑀁 𑀫𑀕𑁆𑀕𑀸𑀦𑀁 𑀯𑀲𑁂𑀦 𑀘𑀺𑀢𑁆𑀢𑀲𑀫𑀸𑀥𑀺𑀁 𑀲𑀘𑁂 𑀧𑀝𑀺𑀮𑀪𑁂𑀬𑁆𑀬𑀸𑀲𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀧𑀡𑁆𑀡𑀓𑀢𑀸𑀬 𑀫𑀬𑁆𑀳𑀦𑁆𑀢𑀺 𑀅𑀬𑀁 𑀧𑀝𑀺𑀧𑀤𑀸 𑀫𑀬𑁆𑀳𑀁 𑀅𑀧𑀡𑁆𑀡𑀓𑀢𑀸𑀬 𑀅𑀦𑀧𑀭𑀸𑀥𑀓𑀢𑀸𑀬 𑀏𑀯 𑀲𑀁𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀓𑀝𑀕𑁆𑀕𑀸𑀳𑁄𑀢𑀺 𑀚𑀬𑀕𑁆𑀕𑀸𑀳𑁄.

𑀅𑀬𑀁 𑀔𑁄, 𑀕𑀸𑀫𑀡𑀺, 𑀥𑀫𑁆𑀫𑀲𑀫𑀸𑀥𑀺, 𑀢𑀢𑁆𑀭 𑀘𑁂 𑀢𑁆𑀯𑀁 𑀘𑀺𑀢𑁆𑀢𑀲𑀫𑀸𑀥𑀺𑀁 𑀧𑀝𑀺𑀮𑀪𑁂𑀬𑁆𑀬𑀸𑀲𑀻𑀢𑀺 𑀏𑀢𑁆𑀣 𑀥𑀫𑁆𑀫𑀲𑀫𑀸𑀥𑀻𑀢𑀺 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀸, 𑀘𑀺𑀢𑁆𑀢𑀲𑀫𑀸𑀥𑀻𑀢𑀺 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸. 𑀅𑀣 𑀯𑀸 ‘‘𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀺, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀻’’𑀢𑀺 (𑀅. 𑀦𑀺. 𑁫.𑁨𑁬) 𑀏𑀯𑀁 𑀯𑀼𑀢𑁆𑀢𑀸 𑀧𑀸𑀫𑁄𑀚𑁆𑀚𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀲𑀼𑀔𑀲𑀫𑀸𑀥𑀺𑀲𑀗𑁆𑀔𑀸𑀢𑀸 𑀧𑀜𑁆𑀘 𑀥𑀫𑁆𑀫𑀸 𑀥𑀫𑁆𑀫𑀲𑀫𑀸𑀥𑀺 𑀦𑀸𑀫, 𑀘𑀺𑀢𑁆𑀢𑀲𑀫𑀸𑀥𑀺 𑀧𑀦 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸𑀯. 𑀅𑀣 𑀯𑀸 𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀸 𑀘𑀢𑁆𑀢𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀘𑀸𑀢𑀺 𑀅𑀬𑀁 𑀥𑀫𑁆𑀫𑀲𑀫𑀸𑀥𑀺 𑀦𑀸𑀫, 𑀢𑀁 𑀥𑀫𑁆𑀫𑀲𑀫𑀸𑀥𑀺𑀁 𑀧𑀽𑀭𑁂𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀘𑀺𑀢𑁆𑀢𑀲𑀫𑀸𑀥𑀺 𑀦𑀸𑀫. 𑀏𑀯𑀁 𑀢𑁆𑀯𑀁 𑀇𑀫𑀁 𑀓𑀗𑁆𑀔𑀸𑀥𑀫𑁆𑀫𑀁 𑀧𑀚𑀳𑁂𑀬𑁆𑀬𑀸𑀲𑀻𑀢𑀺 𑀏𑀯𑀁 𑀢𑁆𑀯𑀁 𑀇𑀫𑀲𑁆𑀫𑀺𑀁 𑀯𑀼𑀢𑁆𑀢𑀧𑁆𑀧𑀪𑁂𑀤𑁂 𑀥𑀫𑁆𑀫𑀲𑀫𑀸𑀥𑀺𑀲𑁆𑀫𑀺𑀁 𑀞𑀺𑀢𑁄 𑀲𑀘𑁂 𑀏𑀯𑀁 𑀘𑀺𑀢𑁆𑀢𑀲𑀫𑀸𑀥𑀺𑀁 𑀧𑀝𑀺𑀮𑀪𑁂𑀬𑁆𑀬𑀸𑀲𑀺, 𑀏𑀓𑀁𑀲𑁂𑀦𑁂𑀢𑀁 𑀓𑀗𑁆𑀔𑀁 𑀧𑀚𑀳𑁂𑀬𑁆𑀬𑀸𑀲𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀕𑀸𑀫𑀡𑀺𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀲𑀗𑁆𑀔𑀢𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧-𑁧𑁧. 𑀓𑀸𑀬𑀕𑀢𑀸𑀲𑀢𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁬𑁬-𑁩𑁭𑁬. 𑀅𑀲𑀗𑁆𑀔𑀢𑀲𑀁𑀬𑀼𑀢𑁆𑀢𑁂 𑀅𑀲𑀗𑁆𑀔𑀢𑀦𑁆𑀢𑀺 𑀅𑀓𑀢𑀁. 𑀳𑀺𑀢𑁂𑀲𑀺𑀦𑀸𑀢𑀺 𑀳𑀺𑀢𑀁 𑀏𑀲𑀦𑁆𑀢𑁂𑀦. 𑀅𑀦𑀼𑀓𑀫𑁆𑀧𑀓𑁂𑀦𑀸𑀢𑀺 𑀅𑀦𑀼𑀓𑀫𑁆𑀧𑀫𑀸𑀦𑁂𑀦. 𑀅𑀦𑀼𑀓𑀫𑁆𑀧𑀁 𑀉𑀧𑀸𑀤𑀸𑀬𑀸𑀢𑀺 𑀅𑀦𑀼𑀓𑀫𑁆𑀧𑀁 𑀘𑀺𑀢𑁆𑀢𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸, 𑀧𑀝𑀺𑀘𑁆𑀘𑀸𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀢𑀁 𑀯𑁄 𑀢𑀁 𑀫𑀬𑀸𑀢𑀺 𑀢𑀁 𑀫𑀬𑀸 𑀇𑀫𑀁 𑀅𑀲𑀗𑁆𑀔𑀢𑀜𑁆𑀘 𑀅𑀲𑀗𑁆𑀔𑀢𑀫𑀕𑁆𑀕𑀜𑁆𑀘 𑀤𑁂𑀲𑁂𑀦𑁆𑀢𑁂𑀦 𑀢𑀼𑀫𑁆𑀳𑀸𑀓𑀁 𑀓𑀢𑀁. 𑀏𑀢𑁆𑀢𑀓𑀫𑁂𑀯 𑀳𑀺 𑀅𑀦𑀼𑀓𑀫𑁆𑀧𑀓𑀲𑁆𑀲 𑀲𑀢𑁆𑀣𑀼 𑀓𑀺𑀘𑁆𑀘𑀁, 𑀬𑀤𑀺𑀤𑀁 𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑀸. 𑀇𑀢𑁄 𑀧𑀭𑀁 𑀧𑀦 𑀧𑀝𑀺𑀧𑀢𑁆𑀢𑀺 𑀦𑀸𑀫 𑀲𑀸𑀯𑀓𑀸𑀦𑀁 𑀓𑀺𑀘𑁆𑀘𑀁. 𑀢𑁂𑀦𑀸𑀳 𑀏𑀢𑀸𑀦𑀺, 𑀪𑀺𑀓𑁆𑀔𑀯𑁂, 𑀭𑀼𑀓𑁆𑀔𑀫𑀽𑀮𑀸𑀦𑀺…𑀧𑁂… 𑀅𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻𑀢𑀺 𑀇𑀫𑀺𑀦𑀸 𑀭𑀼𑀓𑁆𑀔𑀫𑀽𑀮𑀲𑁂𑀦𑀸𑀲𑀦𑀁 𑀤𑀲𑁆𑀲𑁂𑀢𑀺. 𑀲𑀼𑀜𑁆𑀜𑀸𑀕𑀸𑀭𑀸𑀦𑀻𑀢𑀺 𑀇𑀫𑀺𑀦𑀸 𑀚𑀦𑀯𑀺𑀯𑀺𑀢𑁆𑀢𑀁 𑀞𑀸𑀦𑀁. 𑀉𑀪𑀬𑁂𑀦 𑀘 𑀬𑁄𑀕𑀸𑀦𑀼𑀭𑀽𑀧𑀁 𑀲𑁂𑀦𑀸𑀲𑀦𑀁 𑀆𑀘𑀺𑀓𑁆𑀔𑀢𑀺, 𑀤𑀸𑀬𑀚𑁆𑀚𑀁 𑀦𑀺𑀬𑁆𑀬𑀸𑀢𑁂𑀢𑀺.

𑀛𑀸𑀬𑀣𑀸𑀢𑀺 𑀆𑀭𑀫𑁆𑀫𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀅𑀝𑁆𑀞𑀢𑀺𑀁𑀲𑀸𑀭𑀫𑁆𑀫𑀡𑀸𑀦𑀺, 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑁂𑀦 𑀘 𑀅𑀦𑀺𑀘𑁆𑀘𑀸𑀤𑀺𑀢𑁄 𑀔𑀦𑁆𑀥𑀸𑀬𑀢𑀦𑀸𑀤𑀻𑀦𑀺 𑀉𑀧𑀦𑀺𑀚𑁆𑀛𑀸𑀬𑀣, 𑀲𑀫𑀣𑀜𑁆𑀘 𑀯𑀺𑀧𑀲𑁆𑀲𑀦𑀜𑁆𑀘 𑀯𑀟𑁆𑀠𑁂𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀫𑀸 𑀧𑀫𑀸𑀤𑀢𑁆𑀣𑀸𑀢𑀺 𑀫𑀸 𑀧𑀫𑀚𑁆𑀚𑀺𑀢𑁆𑀣. 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀅𑀳𑀼𑀯𑀢𑁆𑀣𑀸𑀢𑀺 𑀬𑁂 𑀳𑀺 𑀧𑀼𑀩𑁆𑀩𑁂 𑀤𑀳𑀭𑀓𑀸𑀮𑁂 𑀅𑀭𑁄𑀕𑀓𑀸𑀮𑁂 𑀲𑀢𑁆𑀢𑀲𑀧𑁆𑀧𑀸𑀬𑀸𑀤𑀺𑀲𑀫𑁆𑀧𑀢𑁆𑀢𑀺𑀓𑀸𑀮𑁂 𑀲𑀢𑁆𑀣𑀼 𑀲𑀫𑁆𑀫𑀼𑀔𑀻𑀪𑀸𑀯𑀓𑀸𑀮𑁂 𑀘 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀭𑀳𑀺𑀢𑀸 𑀭𑀢𑁆𑀢𑀺𑀦𑁆𑀤𑀺𑀯𑀁 𑀫𑀗𑁆𑀓𑀼𑀮𑀪𑀢𑁆𑀢𑀁 𑀳𑀼𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀁 𑀫𑀺𑀤𑁆𑀥𑀲𑀼𑀔𑀁 𑀅𑀦𑀼𑀪𑁄𑀦𑁆𑀢𑀸 𑀧𑀫𑀚𑁆𑀚𑀦𑁆𑀢𑀺, 𑀢𑁂 𑀧𑀘𑁆𑀙𑀸 𑀚𑀭𑀸𑀓𑀸𑀮𑁂 𑀭𑁄𑀕𑀓𑀸𑀮𑁂 𑀫𑀭𑀡𑀓𑀸𑀮𑁂 𑀯𑀺𑀧𑀢𑁆𑀢𑀺𑀓𑀸𑀮𑁂 𑀲𑀢𑁆𑀣𑀼 𑀧𑀭𑀺𑀦𑀺𑀩𑁆𑀩𑀼𑀢𑀓𑀸𑀮𑁂 𑀘 𑀢𑀁 𑀧𑀼𑀩𑁆𑀩𑁂 𑀧𑀫𑀸𑀤𑀯𑀺𑀳𑀸𑀭𑀁 𑀅𑀦𑀼𑀲𑁆𑀲𑀭𑀦𑁆𑀢𑀸 𑀲𑀧𑁆𑀧𑀝𑀺𑀲𑀦𑁆𑀥𑀺𑀓𑀸𑀮𑀓𑀺𑀭𑀺𑀬𑀜𑁆𑀘 𑀪𑀸𑀭𑀺𑀬𑀁 𑀲𑀫𑁆𑀧𑀲𑁆𑀲𑀫𑀸𑀦𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀳𑁄𑀦𑁆𑀢𑀺. 𑀢𑀼𑀫𑁆𑀳𑁂 𑀧𑀦 𑀢𑀸𑀤𑀺𑀲𑀸 𑀫𑀸 𑀅𑀳𑀼𑀯𑀢𑁆𑀣𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀅𑀳𑀼𑀯𑀢𑁆𑀣𑀸’’𑀢𑀺.

𑀅𑀬𑀁 𑀯𑁄 𑀅𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻𑀢𑀺 𑀅𑀬𑀁 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀸 ‘‘𑀛𑀸𑀬𑀣 𑀫𑀸 𑀧𑀫𑀸𑀤𑀢𑁆𑀣𑀸’’𑀢𑀺 𑀢𑀼𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻, 𑀑𑀯𑀸𑀤𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧-𑁩𑁩. 𑀅𑀲𑀗𑁆𑀔𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁭𑁭-𑁪𑁦𑁯. 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀧𑀭𑀢𑁄 𑀯𑀓𑁆𑀔𑀸𑀫.

𑀅𑀦𑀢𑀦𑁆𑀢𑀺𑀆𑀤𑀻𑀲𑀼 𑀢𑀡𑁆𑀳𑀸𑀦𑀢𑀺𑀬𑀸 𑀅𑀪𑀸𑀯𑁂𑀦 𑀅𑀦𑀢𑀁. 𑀘𑀢𑀼𑀦𑁆𑀦𑀁 𑀆𑀲𑀯𑀸𑀦𑀁 𑀅𑀪𑀸𑀯𑁂𑀦 𑀅𑀦𑀸𑀲𑀯𑀁. 𑀧𑀭𑀫𑀢𑁆𑀣𑀲𑀘𑁆𑀘𑀢𑀸𑀬 𑀲𑀘𑁆𑀘𑀁. 𑀯𑀝𑁆𑀝𑀲𑁆𑀲 𑀧𑀭𑀪𑀸𑀕𑀝𑁆𑀞𑁂𑀦 𑀧𑀸𑀭𑀁. 𑀲𑀡𑁆𑀳𑀝𑁆𑀞𑁂𑀦 𑀦𑀺𑀧𑀼𑀡𑀁. 𑀲𑀼𑀝𑁆𑀞𑀼 𑀤𑀼𑀤𑁆𑀤𑀲𑀢𑀸𑀬 𑀲𑀼𑀤𑀼𑀤𑁆𑀤𑀲𑀁. 𑀚𑀭𑀸𑀬 𑀅𑀚𑀭𑀺𑀢𑀢𑁆𑀢𑀸 𑀅𑀚𑀚𑁆𑀚𑀭𑀁. 𑀣𑀺𑀭𑀝𑁆𑀞𑁂𑀦 𑀥𑀼𑀯𑀁. 𑀅𑀧𑀮𑀼𑀚𑁆𑀚𑀦𑀢𑀸𑀬 𑀅𑀧𑀮𑁄𑀓𑀺𑀢𑀁. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀅𑀧𑀲𑁆𑀲𑀺𑀢𑀩𑁆𑀩𑀢𑁆𑀢𑀸 𑀅𑀦𑀺𑀤𑀲𑁆𑀲𑀦𑀁. 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀺𑀧𑀧𑀜𑁆𑀘𑀸𑀦𑀁 𑀅𑀪𑀸𑀯𑁂𑀦 𑀦𑀺𑀧𑁆𑀧𑀧𑀜𑁆𑀘𑀁.

𑀲𑀦𑁆𑀢𑀪𑀸𑀯𑀝𑁆𑀞𑁂𑀦 𑀲𑀦𑁆𑀢𑀁. 𑀫𑀭𑀡𑀸𑀪𑀸𑀯𑁂𑀦 𑀅𑀫𑀢𑀁. 𑀉𑀢𑁆𑀢𑀫𑀝𑁆𑀞𑁂𑀦 𑀧𑀡𑀻𑀢𑀁. 𑀲𑀲𑁆𑀲𑀺𑀭𑀺𑀓𑀝𑁆𑀞𑁂𑀦 𑀲𑀺𑀯𑀁. 𑀦𑀺𑀭𑀼𑀧𑀤𑁆𑀤𑀯𑀢𑀸𑀬 𑀔𑁂𑀫𑀁. 𑀢𑀡𑁆𑀳𑀸𑀓𑁆𑀔𑀬𑀲𑁆𑀲 𑀧𑀘𑁆𑀘𑀬𑀢𑁆𑀢𑀸 𑀢𑀡𑁆𑀳𑀓𑁆𑀔𑀬𑀁.

𑀯𑀺𑀫𑁆𑀳𑀸𑀧𑀦𑀻𑀬𑀝𑁆𑀞𑁂𑀦 𑀅𑀘𑁆𑀙𑀭𑀁 𑀧𑀳𑀭𑀺𑀢𑀩𑁆𑀩𑀬𑀼𑀢𑁆𑀢𑀓𑀦𑁆𑀢𑀺 𑀅𑀘𑁆𑀙𑀭𑀺𑀬𑀁. 𑀅𑀪𑀽𑀢𑀫𑁂𑀯 𑀪𑀽𑀢𑀁 𑀅𑀚𑀸𑀢𑀁 𑀳𑀼𑀢𑁆𑀯𑀸 𑀅𑀢𑁆𑀣𑀻𑀢𑀺 𑀯𑀸 𑀅𑀩𑁆𑀪𑀼𑀢𑀁. 𑀦𑀺𑀤𑁆𑀤𑀼𑀓𑁆𑀔𑀢𑁆𑀢𑀸 𑀅𑀦𑀻𑀢𑀺𑀓𑀁. 𑀦𑀺𑀤𑁆𑀤𑀼𑀓𑁆𑀔𑀲𑀪𑀸𑀯𑀢𑁆𑀢𑀸 𑀅𑀦𑀻𑀢𑀺𑀓𑀥𑀫𑁆𑀫𑀁. 𑀯𑀸𑀦𑀸𑀪𑀸𑀯𑁂𑀦 𑀦𑀺𑀩𑁆𑀩𑀸𑀦𑀁. 𑀩𑁆𑀬𑀸𑀩𑀚𑁆𑀛𑀸𑀪𑀸𑀯𑁂𑀦𑁂𑀯 𑀅𑀩𑁆𑀬𑀸𑀩𑀚𑁆𑀛𑀁. 𑀯𑀺𑀭𑀸𑀕𑀸𑀥𑀺𑀕𑀫𑀲𑁆𑀲 𑀧𑀘𑁆𑀘𑀬𑀢𑁄 𑀯𑀺𑀭𑀸𑀕𑀁. 𑀧𑀭𑀫𑀢𑁆𑀣𑀲𑀼𑀤𑁆𑀥𑀺𑀢𑀸𑀬 𑀲𑀼𑀤𑁆𑀥𑀺. 𑀢𑀻𑀳𑀺 𑀪𑀯𑁂𑀳𑀺 𑀫𑀼𑀢𑁆𑀢𑀢𑀸𑀬 𑀫𑀼𑀢𑁆𑀢𑀺. 𑀓𑀸𑀫𑀸𑀮𑀬𑀸𑀦𑀁 𑀅𑀪𑀸𑀯𑁂𑀦 𑀅𑀦𑀸𑀮𑀬𑀁. 𑀧𑀢𑀺𑀝𑁆𑀞𑀝𑁆𑀞𑁂𑀦 𑀤𑀻𑀧𑀁. 𑀅𑀮𑁆𑀮𑀻𑀬𑀺𑀢𑀩𑁆𑀩𑀬𑀼𑀢𑁆𑀢𑀝𑁆𑀞𑁂𑀦 𑀮𑁂𑀡𑀁. 𑀢𑀸𑀬𑀦𑀝𑁆𑀞𑁂𑀦 𑀢𑀸𑀡𑀁. 𑀪𑀬𑀲𑀭𑀡𑀝𑁆𑀞𑁂𑀦 𑀲𑀭𑀡𑀁, 𑀪𑀬𑀦𑀸𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀁 𑀅𑀬𑀦𑀁 𑀕𑀢𑀺 𑀧𑀢𑀺𑀝𑁆𑀞𑀸𑀢𑀺 𑀧𑀭𑀸𑀬𑀡𑀁. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀅𑀲𑀗𑁆𑀔𑀢𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀅𑀩𑁆𑀬𑀸𑀓𑀢𑀲𑀁𑀬𑀼𑀢𑁆𑀢𑀁

𑁧. 𑀔𑁂𑀫𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧𑁦. 𑀅𑀩𑁆𑀬𑀸𑀓𑀢𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀔𑁂𑀫𑀸𑀢𑀺 𑀕𑀺𑀳𑀺𑀓𑀸𑀮𑁂 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀉𑀧𑀸𑀲𑀺𑀓𑀸 𑀲𑀤𑁆𑀥𑀸𑀧𑀩𑁆𑀩𑀚𑀺𑀢𑀸 𑀫𑀳𑀸𑀣𑁂𑀭𑀻 ‘‘𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀫𑀫 𑀲𑀸𑀯𑀺𑀓𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀫𑀳𑀸𑀧𑀜𑁆𑀜𑀸𑀦𑀁 𑀬𑀤𑀺𑀤𑀁 𑀔𑁂𑀫𑀸’’𑀢𑀺 𑀏𑀯𑀁 𑀪𑀕𑀯𑀢𑀸 𑀫𑀳𑀸𑀧𑀜𑁆𑀜𑀢𑀸𑀬 𑀏𑀢𑀤𑀕𑁆𑀕𑁂 𑀞𑀧𑀺𑀢𑀸. 𑀧𑀡𑁆𑀟𑀺𑀢𑀸𑀢𑀺 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀯𑀺𑀬𑀢𑁆𑀢𑀸𑀢𑀺 𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀫𑁂𑀥𑀸𑀯𑀺𑀦𑀻𑀢𑀺 𑀫𑁂𑀥𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸. 𑀩𑀳𑀼𑀲𑁆𑀲𑀼𑀢𑀸𑀢𑀺 𑀧𑀭𑀺𑀬𑀢𑁆𑀢𑀺𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀧𑀝𑀺𑀯𑁂𑀥𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀲𑀫𑀦𑁆𑀦𑀸𑀕𑀢𑀸.

𑀕𑀡𑀓𑁄𑀢𑀺 𑀅𑀘𑁆𑀙𑀺𑀤𑁆𑀤𑀓𑀕𑀡𑀦𑀸𑀬 𑀓𑀼𑀲𑀮𑁄. 𑀫𑀼𑀤𑁆𑀤𑀺𑀓𑁄𑀢𑀺 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀸𑀬 𑀕𑀡𑀦𑀸𑀬 𑀓𑀼𑀲𑀮𑁄. 𑀲𑀗𑁆𑀔𑀸𑀬𑀓𑁄𑀢𑀺 𑀧𑀺𑀡𑁆𑀟𑀕𑀡𑀦𑀸𑀬 𑀓𑀼𑀲𑀮𑁄. 𑀕𑀫𑁆𑀪𑀻𑀭𑁄𑀢𑀺 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀕𑀫𑁆𑀪𑀻𑀭𑁄. 𑀅𑀧𑁆𑀧𑀫𑁂𑀬𑁆𑀬𑁄𑀢𑀺 𑀆𑀴𑁆𑀳𑀓𑀕𑀡𑀦𑀸𑀬 𑀅𑀧𑁆𑀧𑀫𑁂𑀬𑁆𑀬𑁄. 𑀤𑀼𑀧𑁆𑀧𑀭𑀺𑀬𑁄𑀕𑀸𑀳𑁄𑀢𑀺 𑀆𑀴𑁆𑀳𑀓𑀕𑀡𑀦𑀸𑀬 𑀧𑀫𑀸𑀡𑀕𑀳𑀡𑀢𑁆𑀣𑀁 𑀤𑀼𑀭𑁄𑀕𑀸𑀳𑁄. 𑀬𑁂𑀦 𑀭𑀽𑀧𑁂𑀦 𑀢𑀣𑀸𑀕𑀢𑀦𑁆𑀢𑀺 𑀬𑁂𑀦 𑀭𑀽𑀧𑁂𑀦 𑀤𑀻𑀖𑁄 𑀭𑀲𑁆𑀲𑁄 𑀲𑀸𑀫𑁄 𑀑𑀤𑀸𑀢𑁄𑀢𑀺 𑀲𑀢𑁆𑀢𑀲𑀗𑁆𑀔𑀸𑀢𑀁 𑀢𑀣𑀸𑀕𑀢𑀁 𑀧𑀜𑁆𑀜𑀧𑁂𑀬𑁆𑀬. 𑀢𑀁 𑀭𑀽𑀧𑀁 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀦𑁆𑀢𑀺 𑀢𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀭𑀽𑀧𑀁 𑀲𑀫𑀼𑀤𑀬𑀧𑁆𑀧𑀳𑀸𑀦𑁂𑀦 𑀲𑀩𑁆𑀩𑀜𑁆𑀜𑀼𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀁. 𑀭𑀽𑀧𑀲𑀗𑁆𑀔𑀸𑀬 𑀯𑀺𑀫𑀼𑀢𑁆𑀢𑁄𑀢𑀺 𑀆𑀬𑀢𑀺𑀁 𑀭𑀽𑀧𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀬𑀸 𑀭𑀽𑀧𑀸𑀭𑀽𑀧𑀓𑁄𑀝𑁆𑀞𑀸𑀲𑁂𑀦𑀧𑀺 𑀏𑀯𑀭𑀽𑀧𑁄 𑀦𑀸𑀫 𑀪𑀯𑀺𑀲𑁆𑀲𑀢𑀻𑀢𑀺 𑀯𑁄𑀳𑀸𑀭𑀲𑁆𑀲𑀧𑀺 𑀧𑀝𑀺𑀧𑀲𑁆𑀲𑀤𑁆𑀥𑀢𑁆𑀢𑀸 𑀭𑀽𑀧𑀧𑀡𑁆𑀡𑀢𑁆𑀢𑀺𑀬𑀸𑀧𑀺 𑀯𑀺𑀫𑀼𑀢𑁆𑀢𑁄. 𑀕𑀫𑁆𑀪𑀻𑀭𑁄𑀢𑀺 𑀅𑀚𑁆𑀛𑀸𑀲𑀬 𑀕𑀫𑁆𑀪𑀻𑀭𑀢𑀸𑀬 𑀘 𑀕𑀼𑀡𑀕𑀫𑁆𑀪𑀻𑀭𑀢𑀸𑀬 𑀘 𑀕𑀫𑁆𑀪𑀻𑀭𑁄. 𑀢𑀲𑁆𑀲 𑀏𑀯𑀁 𑀕𑀼𑀡𑀕𑀫𑁆𑀪𑀻𑀭𑀲𑁆𑀲 𑀲𑀢𑁄 𑀲𑀩𑁆𑀩𑀜𑁆𑀜𑀼𑀢𑀣𑀸𑀕𑀢𑀲𑁆𑀲 𑀬𑀁 𑀉𑀧𑀸𑀤𑀸𑀬 𑀲𑀢𑁆𑀢𑀲𑀗𑁆𑀔𑀸𑀢𑁄 𑀢𑀣𑀸𑀕𑀢𑁄𑀢𑀺 𑀧𑀜𑁆𑀜𑀢𑁆𑀢𑀺 𑀳𑁄𑀢𑀺, 𑀢𑀤𑀪𑀸𑀯𑁂𑀦 𑀢𑀲𑁆𑀲𑀸 𑀧𑀜𑁆𑀜𑀢𑁆𑀢𑀺𑀬𑀸 𑀅𑀪𑀸𑀯𑀁 𑀧𑀲𑁆𑀲𑀦𑁆𑀢𑀲𑁆𑀲 𑀅𑀬𑀁 𑀲𑀢𑁆𑀢𑀲𑀗𑁆𑀔𑀸𑀢𑁄 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺 𑀇𑀤𑀁 𑀯𑀘𑀦𑀁 𑀦 𑀉𑀧𑁂𑀢𑀺 𑀦 𑀬𑀼𑀚𑁆𑀚𑀢𑀺, 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸𑀢𑀺𑀆𑀤𑀺𑀯𑀘𑀦𑀫𑁆𑀧𑀺 𑀦 𑀉𑀧𑁂𑀢𑀺 𑀦 𑀬𑀼𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑀲𑀁𑀲𑀦𑁆𑀤𑀺𑀲𑁆𑀲𑀢𑀻𑀢𑀺 𑀏𑀓𑀁 𑀪𑀯𑀺𑀲𑁆𑀲𑀢𑀺. 𑀲𑀫𑁂𑀲𑁆𑀲𑀢𑀻𑀢𑀺 𑀦𑀺𑀭𑀦𑁆𑀢𑀭𑀁 𑀪𑀯𑀺𑀲𑁆𑀲𑀢𑀺. 𑀦 𑀯𑀺𑀭𑁄𑀥𑀬𑀺𑀲𑁆𑀲𑀢𑀻𑀢𑀺 𑀦 𑀯𑀺𑀭𑀼𑀤𑁆𑀥𑀁 𑀧𑀤𑀁 𑀪𑀯𑀺𑀲𑁆𑀲𑀢𑀺. 𑀅𑀕𑁆𑀕𑀧𑀤𑀲𑁆𑀫𑀺𑀦𑁆𑀢𑀺 𑀤𑁂𑀲𑀦𑀸𑀬. 𑀤𑁂𑀲𑀦𑀸 𑀳𑀺 𑀇𑀥 𑀅𑀕𑁆𑀕𑀧𑀤𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀸.

𑁨. 𑀅𑀦𑀼𑀭𑀸𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧𑁧. 𑀤𑀼𑀢𑀺𑀬𑀁 𑀔𑀦𑁆𑀥𑀺𑀬𑀯𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯, 𑀅𑀩𑁆𑀬𑀸𑀓𑀢𑀸𑀥𑀺𑀓𑀸𑀭𑀢𑁄 𑀧𑀦 𑀇𑀥 𑀯𑀼𑀢𑁆𑀢𑀁.

𑁩-𑁮. 𑀧𑀞𑀫𑀲𑀸𑀭𑀺𑀧𑀼𑀢𑁆𑀢𑀓𑁄𑀝𑁆𑀞𑀺𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁧𑁨-𑁪𑁧𑁭. 𑀢𑀢𑀺𑀬𑁂 𑀭𑀽𑀧𑀕𑀢𑀫𑁂𑀢𑀦𑁆𑀢𑀺 𑀭𑀽𑀧𑀫𑀢𑁆𑀢𑀫𑁂𑀢𑀁. 𑀏𑀢𑁆𑀣 𑀭𑀽𑀧𑀢𑁄 𑀅𑀜𑁆𑀜𑁄 𑀓𑁄𑀘𑀺 𑀲𑀢𑁆𑀢𑁄 𑀦𑀸𑀫 𑀦 𑀉𑀧𑀮𑀩𑁆𑀪𑀢𑀺, 𑀭𑀽𑀧𑁂 𑀧𑀦 𑀲𑀢𑀺 𑀦𑀸𑀫𑀫𑀢𑁆𑀢𑀁 𑀏𑀢𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀯𑁂𑀤𑀦𑀸𑀕𑀢𑀫𑁂𑀢𑀦𑁆𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀔𑁄 𑀆𑀯𑀼𑀲𑁄 𑀳𑁂𑀢𑀽𑀢𑀺 𑀅𑀬𑀁 𑀭𑀽𑀧𑀸𑀤𑀻𑀦𑀺 𑀫𑀼𑀜𑁆𑀘𑀺𑀢𑁆𑀯𑀸 𑀅𑀦𑀼𑀧𑀮𑀩𑁆𑀪𑀺𑀬𑀲𑀪𑀸𑀯𑁄 𑀳𑁂𑀢𑀼, 𑀬𑁂𑀦𑁂𑀢𑀁 𑀅𑀩𑁆𑀬𑀸𑀓𑀢𑀁 𑀪𑀕𑀯𑀢𑀸𑀢𑀺. 𑀘𑀢𑀼𑀢𑁆𑀣𑀸𑀤𑀻𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁯. 𑀓𑀼𑀢𑀽𑀳𑀮𑀲𑀸𑀮𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧𑁮. 𑀦𑀯𑀫𑁂 𑀓𑀼𑀢𑀽𑀳𑀮𑀲𑀸𑀮𑀸𑀬𑀦𑁆𑀢𑀺 𑀓𑀼𑀢𑀽𑀳𑀮𑀲𑀸𑀮𑀸 𑀦𑀸𑀫 𑀧𑀘𑁆𑀘𑁂𑀓𑀲𑀸𑀮𑀸 𑀦𑀢𑁆𑀣𑀺, 𑀬𑀢𑁆𑀣 𑀧𑀦 𑀦𑀸𑀦𑀸𑀢𑀺𑀢𑁆𑀣𑀺𑀬𑀸 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀦𑀸𑀦𑀸𑀯𑀺𑀥𑀁 𑀓𑀣𑀁 𑀧𑀯𑀢𑁆𑀢𑁂𑀦𑁆𑀢𑀺, 𑀲𑀸 𑀩𑀳𑀽𑀦𑀁 ‘‘𑀅𑀬𑀁 𑀓𑀺𑀁 𑀯𑀤𑀢𑀺, 𑀅𑀬𑀁 𑀓𑀺𑀁 𑀯𑀤𑀢𑀻’’𑀢𑀺 𑀓𑀼𑀢𑀽𑀳𑀮𑀼𑀧𑁆𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑁄 𑀓𑀼𑀢𑀽𑀳𑀮𑀲𑀸𑀮𑀸𑀢𑀺 𑀯𑀼𑀘𑁆𑀘𑀢𑀺. 𑀤𑀽𑀭𑀫𑁆𑀧𑀺 𑀕𑀘𑁆𑀙𑀢𑀻𑀢𑀺 𑀬𑀸𑀯 𑀆𑀪𑀲𑁆𑀲𑀭𑀩𑁆𑀭𑀳𑁆𑀫𑀮𑁄𑀓𑀸 𑀕𑀘𑁆𑀙𑀢𑀺. 𑀇𑀫𑀜𑁆𑀘 𑀓𑀸𑀬𑀁 𑀦𑀺𑀓𑁆𑀔𑀺𑀧𑀢𑀻𑀢𑀺 𑀘𑀼𑀢𑀺𑀘𑀺𑀢𑁆𑀢𑁂𑀦 𑀦𑀺𑀓𑁆𑀔𑀺𑀧𑀢𑀺. 𑀅𑀦𑀼𑀧𑀧𑀦𑁆𑀦𑁄 𑀳𑁄𑀢𑀻𑀢𑀺 𑀘𑀼𑀢𑀺𑀓𑁆𑀔𑀡𑁂𑀬𑁂𑀯 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑁆𑀧𑀦𑁆𑀦𑀢𑁆𑀢𑀸 𑀅𑀦𑀼𑀧𑀧𑀦𑁆𑀦𑁄 𑀳𑁄𑀢𑀺.

𑁧𑁦. 𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧𑁯. 𑀤𑀲𑀫𑁂 𑀢𑁂𑀲𑀫𑁂𑀢𑀁 𑀲𑀤𑁆𑀥𑀺𑀁 𑀅𑀪𑀯𑀺𑀲𑁆𑀲𑀸𑀢𑀺 𑀢𑁂𑀲𑀁 𑀮𑀤𑁆𑀥𑀺𑀬𑀸 𑀲𑀤𑁆𑀥𑀺𑀁 𑀏𑀢𑀁 𑀅𑀪𑀯𑀺𑀲𑁆𑀲. 𑀅𑀦𑀼𑀮𑁄𑀫𑀁 𑀅𑀪𑀯𑀺𑀲𑁆𑀲 𑀜𑀸𑀡𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸𑀢𑀺 𑀬𑀁 𑀏𑀢𑀁 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀧𑀺 𑀦𑀼 𑀫𑁂 𑀢𑀲𑁆𑀲 𑀅𑀦𑀼𑀮𑁄𑀫𑀁 𑀅𑀪𑀯𑀺𑀲𑁆𑀲𑀸𑀢𑀺 𑀅𑀢𑁆𑀣𑁄.

𑁧𑁧. 𑀲𑀪𑀺𑀬𑀓𑀘𑁆𑀘𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁨𑁦. 𑀏𑀓𑀸𑀤𑀲𑀫𑁂 𑀏𑀢𑀫𑁂𑀢𑁆𑀢𑀓𑁂𑀦 𑀏𑀢𑁆𑀢𑀓𑀫𑁂𑀯𑀸𑀢𑀺 𑀆𑀯𑀼𑀲𑁄 𑀬𑀲𑁆𑀲𑀸𑀧𑀺 𑀏𑀢𑀁 𑀏𑀢𑁆𑀢𑀓𑁂𑀦 𑀓𑀸𑀮𑁂𑀦 ‘‘𑀳𑁂𑀢𑀼𑀫𑁆𑀳𑀺 𑀲𑀢𑀺 𑀭𑀽𑀧𑀻𑀢𑀺𑀆𑀤𑀺 𑀧𑀜𑁆𑀜𑀸𑀧𑀦𑀸 𑀳𑁄𑀢𑀺, 𑀅𑀲𑀢𑀺 𑀦 𑀳𑁄𑀢𑀻’’𑀢𑀺 𑀩𑁆𑀬𑀸𑀓𑀭𑀡𑀁 𑀪𑀯𑁂𑀬𑁆𑀬, 𑀢𑀲𑁆𑀲 𑀏𑀢𑁆𑀢𑀓𑀫𑁂𑀯 𑀩𑀳𑀼. 𑀓𑁄 𑀧𑀦 𑀯𑀸𑀤𑁄 𑀅𑀢𑀺𑀓𑁆𑀓𑀦𑁆𑀢𑁂𑀢𑀺 𑀅𑀢𑀺𑀓𑁆𑀓𑀦𑁆𑀢𑁂 𑀧𑀦 𑀅𑀢𑀺𑀫𑀦𑀸𑀧𑁂 𑀥𑀫𑁆𑀫𑀤𑁂𑀲𑀦𑀸𑀦𑀬𑁂 𑀯𑀸𑀤𑁄𑀬𑁂𑀯 𑀓𑁄, 𑀦𑀢𑁆𑀣𑀺 𑀯𑀸𑀤𑁄, 𑀙𑀺𑀦𑁆𑀦𑀸 𑀓𑀣𑀸𑀢𑀺.

𑀅𑀩𑁆𑀬𑀸𑀓𑀢𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀲𑀴𑀸𑀬𑀢𑀦𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.