📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂

𑀲𑀴𑀸𑀬𑀢𑀦𑀯𑀕𑁆𑀕𑀝𑀻𑀓𑀸

𑁧. 𑀲𑀴𑀸𑀬𑀢𑀦𑀲𑀁𑀬𑀼𑀢𑁆𑀢𑀁

𑁧. 𑀅𑀦𑀺𑀘𑁆𑀘𑀯𑀕𑁆𑀕𑁄

𑁧. 𑀅𑀚𑁆𑀛𑀢𑁆𑀢𑀸𑀦𑀺𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸

𑁧. 𑀘𑀓𑁆𑀔𑀢𑀻𑀢𑀺 ¶ ¶ 𑀘𑀓𑁆𑀔𑀼, 𑀜𑀸𑀡𑀁, 𑀬𑀣𑀸𑀲𑀪𑀸𑀯𑀢𑁄 𑀆𑀭𑀫𑁆𑀫𑀡𑀲𑁆𑀲 𑀚𑀸𑀦𑀦𑁂𑀦 𑀲𑀫𑀯𑀺𑀲𑀫𑀁 𑀆𑀘𑀺𑀓𑁆𑀔𑀦𑁆𑀢𑀁 𑀯𑀺𑀬 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸 𑀫𑀁𑀲𑀘𑀓𑁆𑀔𑀼. 𑀢𑀫𑁆𑀧𑀺 𑀳𑀺 𑀭𑀽𑀧𑀤𑀲𑁆𑀲𑀦𑁂 𑀘𑀓𑁆𑀔𑀢𑀻𑀢𑀺 𑀘𑀓𑁆𑀔𑀼. 𑀩𑀼𑀤𑁆𑀥𑀸𑀦𑀁𑀬𑁂𑀯 𑀘𑀓𑁆𑀔𑀽𑀢𑀺 𑀩𑀼𑀤𑁆𑀥𑀘𑀓𑁆𑀔𑀼, 𑀅𑀲𑀸𑀥𑀸𑀭𑀡𑀢𑁄 𑀳𑀺 𑀲𑀢𑁆𑀢𑀲𑀦𑁆𑀢𑀸𑀦𑁂𑀲𑀼 𑀲𑀲𑁆𑀲𑀢𑀼𑀘𑁆𑀙𑁂𑀤𑀤𑀺𑀝𑁆𑀞𑀺 𑀅𑀦𑀼𑀮𑁄𑀫𑀺𑀓𑀜𑀸𑀡𑀬𑀣𑀸𑀪𑀽𑀢𑀜𑀸𑀡𑀸𑀦𑀜𑁆𑀘𑁂𑀯 𑀓𑀸𑀫𑀭𑀸𑀕𑀸𑀦𑀼𑀲𑀬𑀸𑀤𑀻𑀦𑀜𑁆𑀘 𑀬𑀸𑀣𑀸𑀯𑀢𑁄 𑀯𑀺𑀪𑀸𑀯𑀺𑀢𑀜𑀸𑀡𑀁 𑀆𑀲𑀬𑀸𑀦𑀼𑀲𑀬𑀜𑀸𑀡𑀁 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀜𑀸𑀡𑀜𑁆𑀘. 𑀳𑁂𑀝𑁆𑀞𑀺𑀫𑀸 𑀢𑀬𑁄 𑀫𑀕𑁆𑀕𑀸 𑀘𑀢𑀼𑀲𑀘𑁆𑀘𑀥𑀫𑁆𑀫𑁂𑀲𑀼 𑀯𑀼𑀢𑁆𑀢𑀸𑀓𑀸𑀭𑁂𑀦 𑀧𑀯𑀢𑁆𑀢𑀺𑀬𑀸 𑀥𑀫𑁆𑀫𑁂 𑀘𑀓𑁆𑀔𑀽𑀢𑀺 𑀥𑀫𑁆𑀫𑀘𑀓𑁆𑀔𑀼, 𑀢𑀣𑀸 𑀢𑁂𑀲𑀁 𑀨𑀮𑀸𑀦𑀺 𑀢𑀁𑀢𑀁𑀧𑀝𑀺𑀧𑀓𑁆𑀔𑁂𑀲𑀼 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑀳𑀸𑀦𑀯𑀲𑁂𑀦 ¶ 𑀧𑀯𑀢𑁆𑀢𑀦𑀢𑁄. 𑀲𑀫𑀦𑁆𑀢𑀢𑁄 𑀲𑀩𑁆𑀩𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀓𑀺𑀘𑁆𑀘𑀲𑀸𑀥𑀦𑀢𑁄 𑀲𑀫𑀦𑁆𑀢𑀘𑀓𑁆𑀔𑀼, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁. 𑀤𑀺𑀩𑁆𑀩𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀬𑁂𑀦 𑀮𑀤𑁆𑀥𑀩𑁆𑀩𑀢𑁄 𑀤𑁂𑀯𑀸𑀦𑀁 𑀤𑀺𑀩𑁆𑀩𑀘𑀓𑁆𑀔𑀼 𑀯𑀺𑀬𑀸𑀢𑀺 𑀢𑀁 𑀤𑀺𑀩𑁆𑀩𑀘𑀓𑁆𑀔𑀼, 𑀅𑀪𑀺𑀜𑁆𑀜𑀸𑀯𑀺𑀲𑁂𑀲𑁄. 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀭𑀽𑀧𑀤𑀲𑁆𑀲𑀦𑀢𑁄 ‘‘𑀆𑀮𑁄𑀓𑀨𑀭𑀡𑁂𑀦𑀸’’𑀢𑀺 𑀯𑀼𑀢𑁆𑀢𑀁. ‘‘𑀇𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁧𑁦𑁮𑁧; 𑀫𑀳𑀸𑀯. 𑁧𑁫) 𑀦𑀬𑁂𑀦 ¶ 𑀆𑀕𑀢𑀢𑁆𑀢𑀸 𑀘𑀢𑀼𑀲𑀘𑁆𑀘𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀁 ‘‘𑀧𑀜𑁆𑀜𑀸𑀘𑀓𑁆𑀔𑀽’’𑀢𑀺 𑀯𑀼𑀢𑁆𑀢𑀁. 𑀢𑀤𑀺𑀤𑀁 ‘‘𑀯𑀺𑀧𑀲𑁆𑀲𑀦𑀸𑀜𑀸𑀡’’𑀦𑁆𑀢𑀺 𑀯𑀤𑀦𑁆𑀢𑀺, ‘‘𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀸𑀦𑀻’’𑀢𑀺 𑀅𑀧𑀭𑁂.

𑀧𑀘𑁆𑀘𑀬𑀪𑀽𑀢𑁂𑀳𑀺 𑀏𑀢𑁂𑀳𑀺 𑀅𑀪𑀺𑀲𑀫𑁆𑀪𑀭𑀻𑀬𑀦𑁆𑀢𑀻𑀢𑀺 𑀲𑀫𑁆𑀪𑀸𑀭𑀸, 𑀉𑀧𑀢𑁆𑀣𑀫𑁆𑀪𑀪𑀽𑀢𑀸 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀸. 𑀲𑀳 𑀲𑀫𑁆𑀪𑀸𑀭𑁂𑀳𑀻𑀢𑀺 𑀲𑀲𑀫𑁆𑀪𑀸𑀭𑀁. 𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬 𑀧𑀲𑀻𑀤𑀢𑀻𑀢𑀺 𑀧𑀲𑀸𑀤𑁄. 𑀅𑀓𑁆𑀔𑀺𑀓𑀽𑀧𑀓𑁂 𑀅𑀓𑁆𑀔𑀺𑀧𑀝𑀮𑁂𑀳𑀻𑀢𑀺 𑀉𑀪𑁄𑀳𑀺 𑀅𑀓𑁆𑀔𑀺𑀤𑀮𑁂𑀳𑀺. 𑀲𑀫𑁆𑀪𑀯𑁄𑀢𑀺 𑀆𑀧𑁄𑀥𑀸𑀢𑀼𑀫𑁂𑀯 𑀲𑀫𑁆𑀪𑀯𑀪𑀽𑀢𑀫𑀸𑀳. 𑀇𑀥 ‘‘𑀢𑁂𑀭𑀲 𑀲𑀫𑁆𑀪𑀸𑀭𑀸’’𑀢𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 (𑀥. 𑀲. 𑀅𑀝𑁆𑀞. 𑁫𑁯𑁬) 𑀧𑀦 𑀲𑀡𑁆𑀞𑀸𑀦𑁂𑀦 𑀲𑀤𑁆𑀥𑀺𑀁 ‘‘𑀘𑀼𑀤𑁆𑀤𑀲 𑀲𑀫𑁆𑀪𑀸𑀭𑀸’’𑀢𑀺 𑀆𑀕𑀢𑀁. 𑀢𑀢𑁆𑀣 𑀲𑀡𑁆𑀞𑀸𑀦𑀦𑁆𑀢𑀺 𑀯𑀡𑁆𑀡𑀸𑀬𑀢𑀦𑀫𑁂𑀯 𑀧𑀭𑀺𑀫𑀡𑁆𑀟𑀮𑀸𑀤𑀺𑀲𑀡𑁆𑀞𑀸𑀦𑀪𑀽𑀢𑀁. 𑀯𑀺𑀲𑀼𑀁 𑀯𑀘𑀦𑀁 𑀧𑀦 𑀦𑁂𑀲𑀁 𑀢𑀣𑀸𑀪𑀽𑀢𑀸𑀦𑀁 𑀅𑀢𑀣𑀸𑀪𑀽𑀢𑀸𑀦𑀜𑁆𑀘 𑀆𑀧𑁄𑀥𑀸𑀢𑀼𑀯𑀡𑁆𑀡𑀸𑀬𑀢𑀦𑀸𑀦𑀁 𑀬𑀣𑀸𑀯𑀼𑀢𑁆𑀢𑁂 𑀫𑀁𑀲𑀧𑀺𑀡𑁆𑀟𑁂 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀲𑀫𑁆𑀪𑀯𑀲𑁆𑀲 𑀘𑀢𑀼𑀥𑀸𑀢𑀼𑀦𑀺𑀲𑁆𑀲𑀺𑀢𑁂𑀳𑀺 𑀲𑀳 𑀯𑀼𑀢𑁆𑀢𑀲𑁆𑀲 𑀥𑀸𑀢𑀼𑀢𑁆𑀢𑀬𑀦𑀺𑀲𑁆𑀲𑀺𑀢𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀤𑀺𑀝𑁆𑀞𑀺𑀫𑀡𑁆𑀟𑀮𑁂𑀢𑀺 𑀅𑀪𑀺𑀫𑀼𑀔𑀁 𑀞𑀺𑀢𑀸𑀦𑀁 𑀧𑀝𑀺𑀩𑀺𑀫𑁆𑀩𑀧𑀜𑁆𑀜𑀸𑀬𑀦𑀝𑁆𑀞𑀸𑀦𑀪𑀽𑀢𑁂 𑀘𑀓𑁆𑀔𑀼𑀲𑀜𑁆𑀜𑀺𑀢𑀸𑀬 𑀤𑀺𑀝𑁆𑀞𑀺𑀬𑀸 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑁂 𑀫𑀡𑁆𑀟𑀮𑁂. 𑀲𑀦𑁆𑀦𑀺𑀯𑀺𑀝𑁆𑀞𑀦𑁆𑀢𑀺 𑀏𑀢𑁂𑀦 𑀘𑀓𑁆𑀔𑀼𑀧𑀲𑀸𑀤𑀲𑁆𑀲 𑀅𑀦𑁂𑀓𑀓𑀮𑀸𑀧𑀕𑀢𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀢𑀣𑀸 𑀳𑀺 𑀲𑁄 𑀲𑀢𑁆𑀢 𑀅𑀓𑁆𑀔𑀺𑀧𑀝𑀮𑀸𑀦𑀺 𑀅𑀪𑀺𑀩𑁆𑀬𑀸𑀧𑁂𑀢𑁆𑀯𑀸 𑀯𑀢𑁆𑀢𑀢𑀺. 𑀬𑀲𑁆𑀫𑀸 𑀲𑁄 𑀲𑀢𑁆𑀢 𑀅𑀓𑁆𑀔𑀺𑀧𑀝𑀮𑀸𑀦𑀺 𑀩𑁆𑀬𑀸𑀧𑁂𑀢𑁆𑀯𑀸 𑀞𑀺𑀢𑁂𑀳𑀺 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑀪𑀽𑀢𑁂𑀳𑀺 𑀓𑀢𑀽𑀧𑀓𑀸𑀭𑀁 𑀢𑀁𑀦𑀺𑀲𑁆𑀲𑀺𑀢𑁂𑀳𑁂𑀯 𑀆𑀬𑀼𑀯𑀡𑁆𑀡𑀸𑀤𑀻𑀳𑀺 𑀅𑀦𑀼𑀧𑀸𑀮𑀺𑀢𑀧𑀭𑀺𑀯𑀸𑀭𑀺𑀢𑀁 𑀢𑀺𑀲𑀦𑁆𑀢𑀢𑀺𑀭𑀽𑀧𑀲𑀫𑀼𑀝𑁆𑀞𑀸𑀧𑀓𑁂𑀳𑀺 𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑁂𑀳𑀺 𑀉𑀧𑀢𑁆𑀣𑀫𑁆𑀪𑀺𑀬𑀫𑀸𑀦𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀭𑀽𑀧𑀤𑀲𑁆𑀲𑀦𑀲𑀫𑀢𑁆𑀣𑀦𑁆𑀢𑀺 𑀅𑀢𑁆𑀢𑀸𑀦𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀲𑁆𑀲 𑀯𑀲𑁂𑀦 𑀭𑀽𑀧𑀸𑀬𑀢𑀦𑀤𑀲𑁆𑀲𑀦𑀲𑀫𑀢𑁆𑀣𑀁. 𑀯𑀺𑀢𑁆𑀣𑀸𑀭𑀓𑀣𑀸𑀢𑀺 𑀢𑀲𑁆𑀲 𑀘𑀓𑁆𑀔𑀼𑀦𑁄 𑀲𑁄𑀢𑀸𑀤𑀻𑀦𑀜𑁆𑀘 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀯𑀲𑁂𑀦 𑀘𑁂𑀯 𑀮𑀓𑁆𑀔𑀡𑀸𑀤𑀺𑀯𑀲𑁂𑀦 𑀘 𑀯𑀺𑀢𑁆𑀣𑀸𑀭𑀓𑀣𑀸.

𑀲𑀫𑁆𑀫𑀲𑀦𑀘𑀸𑀭𑀘𑀺𑀢𑁆𑀢𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀬 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀽𑀢𑀁 𑀯𑀺𑀧𑀲𑁆𑀲𑀺𑀢𑀩𑁆𑀩𑀁 𑀘𑀺𑀢𑁆𑀢𑀁. 𑀓𑁂𑀘𑀺 ‘‘𑀯𑀺𑀧𑀲𑁆𑀲𑀦𑀼𑀧𑀕𑀢𑀓𑀺𑀭𑀺𑀬𑀫𑀬𑀘𑀺𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁. 𑀢𑀻𑀡𑀺 𑀮𑀓𑁆𑀔𑀡𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀲𑁆𑀲 𑀧𑀸𑀧𑀦𑀯𑀲𑁂𑀦 𑀤𑁂𑀲𑀦𑀸𑀬 𑀧𑀯𑀢𑁆𑀢𑀢𑁆𑀢𑀸.

𑀅𑀚𑁆𑀛𑀢𑁆𑀢𑀸𑀦𑀺𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨-𑁩. 𑀅𑀚𑁆𑀛𑀢𑁆𑀢𑀤𑀼𑀓𑁆𑀔𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨-𑁩. 𑀤𑁆𑀯𑁂 ¶ ¶ 𑀮𑀓𑁆𑀔𑀡𑀸𑀦𑀻𑀢𑀺 𑀤𑀼𑀓𑁆𑀔𑀸𑀦𑀢𑁆𑀢𑀮𑀓𑁆𑀔𑀡𑀸𑀦𑀺. 𑀏𑀓𑀁 𑀮𑀓𑁆𑀔𑀡𑀦𑁆𑀢𑀺 𑀅𑀦𑀢𑁆𑀢𑀮𑀓𑁆𑀔𑀡𑀁. 𑀲𑁂𑀲𑀸𑀦𑀻𑀢𑀺 𑀯𑀼𑀢𑁆𑀢𑀸𑀯𑀲𑁂𑀲𑀸𑀦𑀺 𑀮𑀓𑁆𑀔𑀡𑀸𑀦𑀺. 𑀢𑁂𑀳𑀻𑀢𑀺 𑀬𑁂𑀳𑀺 𑀤𑀼𑀢𑀺𑀬𑀢𑀢𑀺𑀬𑀸𑀦𑀺 𑀲𑀼𑀢𑁆𑀢𑀸𑀦𑀺 𑀤𑁂𑀲𑀺𑀢𑀸𑀦𑀺, 𑀢𑁂𑀳𑀺. 𑀲𑀮𑁆𑀮𑀓𑁆𑀔𑀺𑀢𑀸𑀦𑀻𑀢𑀺 𑀲𑀫𑁆𑀫𑀤𑁂𑀯 𑀉𑀧𑀥𑀸𑀭𑀺𑀢𑀸𑀦𑀺. 𑀏𑀢𑁆𑀢𑀓𑁂𑀦𑀸𑀢𑀺 𑀤𑁆𑀯𑀺𑀦𑁆𑀦𑀁 𑀏𑀓𑀲𑁆𑀲𑁂𑀯 𑀯𑀸 𑀮𑀓𑁆𑀔𑀡𑀲𑁆𑀲 𑀓𑀣𑀦𑁂𑀦.

𑀅𑀚𑁆𑀛𑀢𑁆𑀢𑀤𑀼𑀓𑁆𑀔𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪-𑁬. 𑀩𑀸𑀳𑀺𑀭𑀸𑀦𑀺𑀘𑁆𑀘𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪-𑁬. 𑀯𑀼𑀢𑁆𑀢𑀲𑀤𑀺𑀲𑁄𑀯𑀸𑀢𑀺 ‘‘𑀤𑁆𑀯𑁂 𑀮𑀓𑁆𑀔𑀡𑀸𑀦𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑀤𑀺𑀲𑁄 𑀏𑀯. 𑀦𑀬𑁄𑀢𑀺 𑀅𑀢𑀺𑀤𑁂𑀲𑀦𑀬𑁄.

𑀩𑀸𑀳𑀺𑀭𑀸𑀦𑀺𑀘𑁆𑀘𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁧𑁨. 𑀅𑀚𑁆𑀛𑀢𑁆𑀢𑀸𑀦𑀺𑀘𑁆𑀘𑀸𑀢𑀻𑀢𑀸𑀦𑀸𑀕𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭-𑁧𑁨. 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 𑀅𑀢𑀻𑀢𑀸𑀦𑀸𑀕𑀢𑀸𑀦𑀁 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀕𑀸𑀳𑀲𑁆𑀲 𑀤𑀴𑁆𑀳𑀢𑀸𑀬 𑀲𑀮𑁆𑀮𑀓𑁆𑀔𑁂𑀢𑁆𑀯𑀸. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀩𑀮𑀯𑀢𑀸 𑀢𑀡𑁆𑀳𑀸𑀤𑀺𑀕𑀸𑀳𑁂𑀦 𑀯𑀺𑀧𑀲𑁆𑀲𑀦𑀸𑀯𑀻𑀣𑀺𑀁 𑀧𑀝𑀺𑀧𑀸𑀤𑁂𑀢𑀼𑀁 𑀓𑀺𑀮𑀫𑀦𑁆𑀢𑀸𑀦𑀁 𑀯𑀺𑀦𑁂𑀬𑁆𑀬𑀸𑀦𑀁 𑀯𑀲𑁂𑀦.

𑀅𑀚𑁆𑀛𑀢𑁆𑀢𑀸𑀦𑀺𑀘𑁆𑀘𑀸𑀢𑀻𑀢𑀸𑀦𑀸𑀕𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀺𑀘𑁆𑀘𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀬𑀫𑀓𑀯𑀕𑁆𑀕𑁄

𑁧-𑁪. 𑀧𑀞𑀫𑀧𑀼𑀩𑁆𑀩𑁂𑀲𑀫𑁆𑀩𑁄𑀥𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁩-𑁧𑁬. 𑀤𑁆𑀯𑀻𑀲𑀼𑀧𑀺 𑀲𑀼𑀢𑁆𑀢𑁂𑀲𑀼 𑀆𑀬𑀢𑀦𑀸𑀦𑀁 𑀯𑀲𑁂𑀦 𑀤𑁂𑀲𑀦𑀸 𑀏𑀓𑀭𑀲𑀸𑀯𑀸𑀢𑀺 ‘‘𑀧𑀞𑀫𑀤𑀼𑀢𑀺𑀬𑁂𑀲𑀽’’𑀢𑀺 𑀏𑀓𑀚𑁆𑀛𑀁 𑀧𑀤𑀼𑀤𑁆𑀥𑀸𑀭𑁄 𑀓𑀢𑁄. 𑀆𑀳𑀺𑀢𑁄 𑀅𑀳𑀁𑀫𑀸𑀦𑁄 𑀏𑀢𑁆𑀣𑀸𑀢𑀺 𑀅𑀢𑁆𑀢𑀸, 𑀅𑀢𑁆𑀢𑀪𑀸𑀯𑁄. 𑀅𑀢𑁆𑀢𑀸𑀦𑀫𑀥𑀺 𑀅𑀚𑁆𑀛𑀢𑁆𑀢𑀁, 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀢𑀢𑁆𑀣 𑀪𑀯𑀸𑀦𑀺 𑀅𑀚𑁆𑀛𑀢𑁆𑀢𑀺𑀓𑀸𑀦𑀺, 𑀢𑁂𑀲𑀁 𑀅𑀚𑁆𑀛𑀢𑁆𑀢𑀺𑀓𑀸𑀦𑀁. 𑀅𑀚𑁆𑀛𑀢𑁆𑀢𑀜𑁆𑀘 ¶ 𑀦𑀸𑀫 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑀁 ¶ , 𑀦𑀺𑀬𑀓𑀚𑁆𑀛𑀢𑁆𑀢𑀁, 𑀕𑁄𑀘𑀭𑀚𑁆𑀛𑀢𑁆𑀢𑀁, 𑀯𑀺𑀲𑀬𑀚𑁆𑀛𑀢𑁆𑀢𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁. 𑀢𑀢𑁆𑀣 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑀁 𑀅𑀚𑁆𑀛𑀢𑁆𑀢𑁂 𑀪𑀯𑀦𑁆𑀢𑀺 𑀅𑀚𑁆𑀛𑀢𑁆𑀢𑀺𑀓𑀦𑁆𑀢𑀺 𑀆𑀳 ‘‘𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑀯𑀲𑁂𑀦 𑀅𑀚𑁆𑀛𑀢𑁆𑀢𑀺𑀓𑀸𑀦’’𑀦𑁆𑀢𑀺. 𑀢𑁂𑀲𑀁 𑀘𑀓𑁆𑀔𑀸𑀤𑀻𑀦𑀁 𑀅𑀚𑁆𑀛𑀢𑁆𑀢𑁂𑀲𑀼𑀧𑀺 𑀅𑀚𑁆𑀛𑀢𑁆𑀢𑀺𑀓𑀪𑀸𑀯𑁄 𑀅𑀥𑀺𑀓𑀲𑀺𑀦𑁂𑀳𑀯𑀢𑁆𑀣𑀼𑀢𑀸𑀬𑀸𑀢𑀺 𑀆𑀳 ‘‘𑀙𑀦𑁆𑀤𑀭𑀸𑀕𑀲𑁆𑀲 𑀅𑀥𑀺𑀫𑀢𑁆𑀢𑀩𑀮𑀯𑀢𑀸𑀬𑀸’’𑀢𑀺. 𑀇𑀤𑀸𑀦𑀺 𑀢𑀢𑁆𑀣 𑀢𑀫𑀢𑁆𑀣𑀁 𑀧𑀝𑀺𑀬𑁄𑀕𑀺𑀦𑀸 𑀲𑀤𑁆𑀥𑀺𑀁 𑀉𑀤𑀸𑀳𑀭𑀡𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀦𑀼𑀲𑁆𑀲𑀸𑀦𑀁 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀁 𑀉𑀢𑁆𑀢𑀸𑀦𑀫𑁂𑀯. 𑀩𑀸𑀳𑀺𑀭𑀸𑀦𑀻𑀢𑀺 𑀅𑀚𑁆𑀛𑀢𑁆𑀢𑀺𑀓𑀢𑁄 𑀩𑀳𑀺 𑀪𑀯𑀸𑀦𑀺.

𑀧𑀞𑀫𑀧𑀼𑀩𑁆𑀩𑁂𑀲𑀫𑁆𑀩𑁄𑀥𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁬. 𑀧𑀞𑀫𑀦𑁄𑀘𑁂𑀅𑀲𑁆𑀲𑀸𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁭-𑁧𑁮. 𑀦𑀺𑀓𑁆𑀔𑀦𑁆𑀢𑀸𑀢𑀺 𑀮𑁄𑀓𑀢𑁄 𑀦𑀺𑀓𑁆𑀔𑀦𑁆𑀢𑀸. 𑀯𑀺𑀲𑀁𑀬𑀼𑀢𑁆𑀢𑀸 𑀲𑀁𑀬𑁄𑀕𑀳𑁂𑀢𑀽𑀦𑀁 𑀓𑀺𑀮𑁂𑀲𑀸𑀦𑀁 𑀧𑀳𑀻𑀦𑀢𑁆𑀢𑀸 𑀦𑁄 𑀲𑀁𑀬𑀼𑀢𑁆𑀢𑀸. 𑀦𑁄 𑀅𑀥𑀺𑀫𑀼𑀢𑁆𑀢𑀸𑀢𑀺 𑀦 𑀉𑀲𑁆𑀲𑀼𑀓𑁆𑀓𑀚𑀸𑀢𑀸. 𑀯𑀺𑀫𑀭𑀺𑀬𑀸𑀤𑀻…𑀧𑁂… 𑀘𑁂𑀢𑀲𑀸𑀢𑀺 𑀯𑀺𑀕𑀢𑀓𑀺𑀮𑁂𑀲𑀯𑀝𑁆𑀝𑀫𑀭𑀺𑀬𑀸𑀤𑀢𑀸𑀬 𑀦𑀺𑀫𑁆𑀫𑀭𑀺𑀬𑀸𑀤𑀻𑀓𑀢𑁂𑀦 𑀘𑀺𑀢𑁆𑀢𑁂𑀦. 𑀘𑀢𑀼𑀲𑀘𑁆𑀘𑀫𑁂𑀯 𑀓𑀣𑀺𑀢𑀁 𑀘𑀓𑁆𑀔𑀸𑀤𑀻𑀦𑀁 𑀅𑀲𑁆𑀲𑀸𑀤𑀸𑀤𑀺𑀦𑁄 𑀓𑀣𑀺𑀢𑀢𑁆𑀢𑀸.

𑀧𑀞𑀫𑀦𑁄𑀘𑁂𑀅𑀲𑁆𑀲𑀸𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁧𑁦. 𑀧𑀞𑀫𑀸𑀪𑀺𑀦𑀦𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁯-𑁨𑁨. 𑀯𑀝𑁆𑀝𑀯𑀺𑀯𑀝𑁆𑀝𑀫𑁂𑀯 𑀓𑀣𑀺𑀢𑀁 𑀅𑀪𑀺𑀦𑀦𑁆𑀤𑀦𑀸𑀦𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑀸𑀦𑀜𑁆𑀘 𑀯𑀲𑁂𑀦 𑀤𑁂𑀲𑀦𑀸𑀬 𑀧𑀯𑀢𑁆𑀢𑀢𑁆𑀢𑀸. 𑀅𑀦𑀼𑀧𑀼𑀩𑁆𑀩𑀓𑀣𑀸𑀢𑀺 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀤𑀢𑁆𑀣𑀯𑀡𑁆𑀡𑀦𑀸. 𑀦𑁂𑀲𑀦𑁆𑀢𑀺 𑀲𑀼𑀢𑁆𑀢𑀸𑀦𑀁.

𑀧𑀞𑀫𑀸𑀪𑀺𑀦𑀦𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀬𑀫𑀓𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀩𑁆𑀩𑀯𑀕𑁆𑀕𑁄

𑁧. 𑀲𑀩𑁆𑀩𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩. 𑀲𑀩𑁆𑀩-𑀲𑀤𑁆𑀤𑁄 ¶ 𑀧𑀓𑀭𑀡𑀯𑀲𑁂𑀦 𑀓𑀢𑁆𑀣𑀘𑀺 𑀲𑀧𑁆𑀧𑀤𑁂𑀲𑁂𑀧𑀺 𑀧𑀯𑀢𑁆𑀢𑀢𑀻𑀢𑀺 𑀢𑀢𑁄 𑀦𑀺𑀯𑀢𑁆𑀢𑀦𑀢𑁆𑀣𑀁 𑀅𑀦𑀯𑀲𑁂𑀲𑀯𑀺𑀲𑀬𑁂𑀦 𑀲𑀩𑁆𑀩-𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀲𑀩𑁆𑀩𑀲𑀩𑁆𑀩’’𑀦𑁆𑀢𑀺, 𑀲𑀩𑁆𑀩𑀫𑁂𑀯 𑀳𑀼𑀢𑁆𑀯𑀸 𑀲𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀆𑀬𑀢𑀦𑀪𑀸𑀯𑀁 𑀲𑀩𑁆𑀩𑀁 𑀆𑀬𑀢𑀦𑀲𑀩𑁆𑀩𑀁, 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑀢𑀲𑁆𑀲 ¶ 𑀅𑀯𑀺𑀲𑀬𑀸𑀪𑀸𑀯𑀢𑁄 𑀦 𑀅𑀤𑁆𑀤𑀺𑀝𑁆𑀞𑀫𑀺𑀥𑀢𑁆𑀣𑀺 𑀓𑀺𑀜𑁆𑀘𑀻𑀢𑀺. 𑀇𑀥𑀸𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀇𑀥 𑀯𑀸 𑀲𑀤𑁂𑀯𑀓𑁂 𑀮𑁄𑀓𑁂, 𑀤𑀲𑁆𑀲𑀦𑀪𑀽𑀢𑁂𑀦 𑀜𑀸𑀡𑁂𑀦 𑀅𑀤𑀺𑀝𑁆𑀞𑀁 𑀦𑀸𑀫 𑀓𑀺𑀜𑁆𑀘𑀺 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄. 𑀬𑀤𑀺 𑀏𑀯𑀁 𑀅𑀦𑀼𑀫𑀸𑀦𑀯𑀺𑀲𑀬𑀁 𑀦𑀼 𑀔𑁄 𑀓𑀣𑀦𑁆𑀢𑀺 𑀆𑀳 ‘‘𑀅𑀣𑁄 𑀅𑀯𑀺𑀜𑁆𑀜𑀸𑀢’’𑀦𑁆𑀢𑀺. 𑀅𑀜𑁆𑀜𑁂𑀲𑀁 𑀅𑀧𑀘𑁆𑀘𑀓𑁆𑀔𑀫𑁆𑀧𑀺 𑀅𑀯𑀺𑀜𑁆𑀜𑀸𑀢𑀁 𑀢𑀲𑁆𑀲 𑀓𑀺𑀜𑁆𑀘𑀺 𑀦𑀢𑁆𑀣𑀻𑀢𑀺 𑀅𑀤𑀺𑀝𑁆𑀞𑀁 𑀅𑀯𑀺𑀜𑁆𑀜𑀸𑀢𑀁 𑀦𑀢𑁆𑀣𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀢𑀻𑀢𑀫𑁂𑀯 𑀜𑁂𑀬𑁆𑀬𑀁 𑀕𑀳𑀺𑀢𑀁, 𑀅𑀦𑀸𑀕𑀢𑀁 𑀦𑀼 𑀔𑁄 𑀓𑀣𑀦𑁆𑀢𑀺 𑀆𑀳 𑁋 ‘‘𑀅𑀚𑀸𑀦𑀺𑀢𑀩𑁆𑀩’’𑀦𑁆𑀢𑀺, 𑀢𑀲𑁆𑀲 𑀓𑀺𑀜𑁆𑀘𑀺 𑀦𑀢𑁆𑀣𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀚𑀸𑀦𑀺𑀢𑀼𑀁 𑀜𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀁 𑀦𑀸𑀫 𑀢𑀲𑁆𑀲 𑀓𑀺𑀜𑁆𑀘𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀩𑁆𑀩𑀁 𑀅𑀪𑀺𑀜𑁆𑀜𑀸𑀲𑀻’’𑀢𑀺𑀆𑀤𑀺.

𑀲𑀓𑀮𑀲𑁆𑀲 𑀲𑀓𑁆𑀓𑀸𑀬𑀥𑀫𑁆𑀫𑀲𑁆𑀲 𑀧𑀭𑀺𑀕𑁆𑀕𑀳𑀺𑀢𑀢𑁆𑀢𑀸 𑀲𑀓𑁆𑀓𑀸𑀬𑀲𑀩𑁆𑀩𑀁. 𑀲𑀩𑁆𑀩𑀥𑀫𑁆𑀫𑁂𑀲𑀽𑀢𑀺 𑀧𑀜𑁆𑀘𑀦𑁆𑀦𑀁 𑀤𑁆𑀯𑀸𑀭𑀸𑀦𑀁 𑀆𑀭𑀫𑁆𑀫𑀡𑀪𑀽𑀢𑁂𑀲𑀼 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼. 𑀬𑀲𑁆𑀫𑀸 𑀙𑀲𑀼𑀧𑀺 𑀆𑀭𑀫𑁆𑀫𑀡𑁂𑀲𑀼 𑀕𑀳𑀺𑀢𑁂𑀲𑀼 𑀧𑀤𑁂𑀲𑀲𑀩𑁆𑀩𑀁 𑀦𑀸𑀫 𑀦 𑀳𑁄𑀢𑀺, 𑀢𑀲𑁆𑀫𑀸 ‘‘𑀧𑀜𑁆𑀘𑀸𑀭𑀫𑁆𑀫𑀡𑀫𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀤𑁂𑀲𑀲𑀩𑁆𑀩𑀁 𑀲𑀓𑁆𑀓𑀸𑀬𑀲𑀩𑁆𑀩𑀁 𑀦 𑀧𑀸𑀧𑀼𑀡𑀸𑀢𑀺 𑀢𑀲𑁆𑀲 𑀢𑁂𑀪𑀽𑀫𑀓𑀥𑀫𑁆𑀫𑁂𑀲𑀼 𑀏𑀓𑀤𑁂𑀲𑀲𑁆𑀲 𑀅𑀲𑀗𑁆𑀕𑀡𑁆𑀳𑀦𑀢𑁄. 𑀲𑀓𑁆𑀓𑀸𑀬𑀲𑀩𑁆𑀩𑀁 𑀆𑀬𑀢𑀦𑀲𑀩𑁆𑀩𑀁 𑀦 𑀧𑀸𑀧𑀼𑀡𑀸𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀦𑀁 𑀅𑀲𑀗𑁆𑀕𑀡𑁆𑀳𑀦𑀢𑁄. 𑀆𑀬𑀢𑀦𑀲𑀩𑁆𑀩𑀁 𑀲𑀩𑁆𑀩𑀲𑀩𑁆𑀩𑀁 𑀦 𑀧𑀸𑀧𑀼𑀡𑀸𑀢𑀺. 𑀬𑀲𑁆𑀫𑀸 𑀆𑀬𑀢𑀦𑀲𑀩𑁆𑀩𑁂𑀦 𑀘𑀢𑀼𑀪𑀽𑀫𑀓𑀥𑀫𑁆𑀫𑀸𑀯 𑀧𑀭𑀺𑀕𑁆𑀕𑀳𑀺𑀢𑀸, 𑀦 𑀮𑀓𑁆𑀔𑀡𑀧𑀜𑁆𑀜𑀢𑁆𑀢𑀺𑀬𑁄, 𑀬𑀲𑁆𑀫𑀸 𑀲𑀩𑁆𑀩𑀲𑀩𑁆𑀩𑀁 𑀤𑀲𑁆𑀲𑁂𑀦𑁆𑀢𑁂𑀦 𑀩𑀼𑀤𑁆𑀥𑀜𑀸𑀡𑀯𑀺𑀲𑀬𑁄 𑀤𑀲𑁆𑀲𑀺𑀢𑁄, 𑀢𑀲𑁆𑀫𑀸 ‘‘𑀲𑀩𑁆𑀩𑀲𑀩𑁆𑀩𑀁 𑀦 𑀧𑀸𑀧𑀼𑀡𑀸𑀢𑀻’’𑀢𑀺 𑀏𑀢𑁆𑀣𑀸𑀧𑀺 ‘‘𑀓𑀲𑁆𑀫𑀸…𑀧𑁂… 𑀦𑀢𑁆𑀣𑀺𑀢𑀸𑀬𑀸’’𑀢𑀺 𑀲𑀩𑁆𑀩𑀁 𑀜𑀸𑀢𑀸𑀭𑀫𑁆𑀫𑀡𑁂𑀦𑁂𑀯 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑀓𑀢𑀁. ‘‘𑀆𑀬𑀢𑀦𑀲𑀩𑁆𑀩𑁂𑀧𑀺 𑀇𑀥 𑀯𑀺𑀧𑀲𑁆𑀲𑀦𑀼𑀧𑀕𑀥𑀫𑁆𑀫𑀸𑀯 𑀕𑀳𑁂𑀢𑀩𑁆𑀩𑀸 𑀅𑀪𑀺𑀜𑁆𑀜𑁂𑀬𑁆𑀬𑀦𑀺𑀤𑁆𑀤𑁂𑀲𑀯𑀲𑁂𑀦𑀧𑀺 𑀲𑀫𑁆𑀫𑀲𑀦𑀘𑀸𑀭𑀲𑁆𑀲𑁂𑀯 𑀇𑀘𑁆𑀙𑀺𑀢𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺.

𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 ‘‘𑀇𑀤𑀁 𑀲𑀩𑁆𑀩𑀁 𑀦𑀸𑀫 𑀦 𑀳𑁄𑀢𑀻’’𑀢𑀺 𑀏𑀯𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸. 𑀢𑀲𑁆𑀲𑀸𑀢𑀺 ‘‘𑀅𑀜𑁆𑀜𑀁 𑀲𑀩𑁆𑀩𑀁 𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀯𑀤𑀦𑁆𑀢𑀲𑁆𑀲. 𑀯𑀸𑀘𑀸𑀬 𑀯𑀢𑁆𑀢𑀩𑁆𑀩𑀯𑀢𑁆𑀣𑀼𑀫𑀢𑁆𑀢𑀓𑀫𑁂𑀯𑀸𑀢𑀺 𑀯𑀜𑁆𑀛𑀸𑀧𑀼𑀢𑁆𑀢𑀕𑀕𑀦𑀓𑀼𑀲𑀼𑀫𑀸𑀤𑀺𑀯𑀸𑀘𑀸 𑀯𑀺𑀬 𑀏𑀢𑀲𑁆𑀲 𑀯𑀸𑀘𑀸𑀬 𑀓𑁂𑀯𑀮𑀁 𑀯𑀢𑁆𑀢𑀩𑁆𑀩𑀯𑀢𑁆𑀣𑀼𑀓𑀫𑁂𑀯 𑀪𑀯𑁂𑀬𑁆𑀬, 𑀦 𑀅𑀢𑁆𑀣𑁄, 𑀯𑀘𑀦𑀫𑀢𑁆𑀢𑀓𑀫𑁂𑀯𑀸𑀢𑀺 𑀅𑀢𑁆𑀣𑁄 ¶ . 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀅𑀦𑀸𑀫𑀲𑀺𑀢𑁆𑀯𑀸 𑀅𑀕𑁆𑀕𑀳𑁂𑀢𑁆𑀯𑀸. 𑀢𑀁 𑀓𑀺𑀲𑁆𑀲 𑀳𑁂𑀢𑀽𑀢𑀺 𑀯𑀺𑀖𑀸𑀢𑀸𑀧𑀚𑁆𑀚𑀦𑀁 𑀓𑁂𑀦 𑀳𑁂𑀢𑀼𑀦𑀸. 𑀬𑀣𑀸 𑀢𑀁 𑀅𑀯𑀺𑀲𑀬𑀲𑁆𑀫𑀺𑀦𑁆𑀢𑀺 𑀬𑀣𑀸 𑀅𑀜𑁆𑀜𑁄𑀧𑀺 𑀓𑁄𑀘𑀺 𑀅𑀯𑀺𑀲𑀬𑁂 𑀯𑀸𑀬𑀫𑀦𑁆𑀢𑁄, 𑀏𑀯𑀦𑁆𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀬𑀲𑁆𑀫𑀸 𑀧𑀸𑀴𑀺𑀬𑀁 ‘‘𑀢𑀁 𑀓𑀺𑀲𑁆𑀲 𑀳𑁂𑀢𑀽’’𑀢𑀺 𑀯𑀼𑀢𑁆𑀢𑀓𑀸𑀭𑀡𑀫𑁂𑀯 𑀉𑀧𑀦𑀬𑀦𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀸𑀭𑀡𑁄𑀧𑀦𑀬𑀦𑀜𑁆𑀘 𑀓𑀸𑀭𑀡𑀫𑁂𑀯𑀸𑀢𑀺 ‘‘𑀬𑀣𑀸𑀢𑀺 𑀓𑀸𑀭𑀡𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀏𑀯𑀁 𑀇𑀫𑀲𑁆𑀫𑀺𑀫𑁆𑀧𑀺 𑀅𑀯𑀺𑀲𑀬𑁂’’𑀢𑀺𑀆𑀤𑀺.

𑀲𑀩𑁆𑀩𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀳𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪. 𑀲𑀩𑁆𑀩𑀲𑁆𑀲𑀸𑀢𑀺 𑀤𑁆𑀯𑀸𑀭𑀸𑀭𑀫𑁆𑀫𑀡𑁂𑀳𑀺 𑀲𑀤𑁆𑀥𑀺𑀁 𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀲𑁆𑀲. 𑀧𑀳𑀸𑀦𑀸𑀬𑀸𑀢𑀺 𑀢𑀧𑁆𑀧𑀝𑀺𑀩𑀤𑁆𑀥𑀙𑀦𑁆𑀤𑀭𑀸𑀕𑀧𑀳𑀸𑀦𑀯𑀲𑁂𑀦 ¶ 𑀧𑀚𑀳𑀦𑀸𑀬. 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀦𑁆𑀢𑀺 𑀘𑀓𑁆𑀔𑀼𑀲𑀦𑁆𑀦𑀺𑀲𑁆𑀲𑀺𑀢𑀨𑀲𑁆𑀲𑀁. 𑀫𑀽𑀮𑀧𑀘𑁆𑀘𑀬𑀦𑁆𑀢𑀺 𑀫𑀽𑀮𑀪𑀽𑀢𑀁 𑀧𑀘𑁆𑀘𑀬𑀁 𑀓𑀢𑁆𑀯𑀸, 𑀲𑀳𑀚𑀸𑀢𑀯𑁂𑀤𑀦𑀸𑀬 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀧𑀘𑁆𑀘𑀬𑀪𑀸𑀯𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀏𑀲𑁂𑀯 𑀦𑀬𑁄𑀢𑀺 𑀅𑀧𑀤𑁂𑀲𑁂𑀦 ‘‘𑀲𑁄𑀢𑀲𑀫𑁆𑀨𑀲𑁆𑀲𑀁 𑀫𑀽𑀮𑀧𑀘𑁆𑀘𑀬𑀁 𑀓𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀫𑀦𑁄𑀢𑀺 𑀪𑀯𑀗𑁆𑀕𑀘𑀺𑀢𑁆𑀢𑀁 𑀫𑀦𑁄𑀤𑁆𑀯𑀸𑀭𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀆𑀭𑀫𑁆𑀫𑀡𑀦𑁆𑀢𑀺 𑀥𑀫𑁆𑀫𑀸𑀭𑀫𑁆𑀫𑀡𑀁. 𑀲𑀳𑀸𑀯𑀚𑁆𑀚𑀦𑀓𑀚𑀯𑀦𑀦𑁆𑀢𑀺 𑀲𑀳𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀓𑀁 𑀚𑀯𑀦𑀁. 𑀢𑀁𑀧𑀼𑀩𑁆𑀩𑀓𑀢𑁆𑀢𑀸 𑀫𑀦𑁄𑀯𑀺𑀜𑁆𑀜𑀸𑀡𑀨𑀲𑁆𑀲𑀯𑁂𑀤𑀦𑀸𑀦𑀁 𑀫𑀽𑀮𑀧𑀘𑁆𑀘𑀬𑀪𑀽𑀢𑀸 𑀲𑀩𑁆𑀩𑁂𑀲𑁆𑀯𑁂𑀯 𑀘𑀓𑁆𑀔𑀼𑀤𑁆𑀯𑀸𑀭𑀸𑀤𑀻𑀲𑀼 𑀯𑀼𑀢𑁆𑀢𑀺𑀢𑁆𑀢𑀸 𑀢𑀤𑀦𑀼𑀭𑀽𑀧𑀢𑁄 ‘‘𑀪𑀯𑀗𑁆𑀕𑀲𑀳𑀚𑀸𑀢𑁄 𑀲𑀫𑁆𑀨𑀲𑁆𑀲𑁄’’𑀢𑀺 𑀯𑀼𑀢𑁆𑀢𑀁. 𑀲𑀳𑀸𑀯𑀚𑁆𑀚𑀦𑀯𑁂𑀤𑀦𑀸𑀬 𑀚𑀯𑀦𑀯𑁂𑀤𑀦𑀸 ‘‘𑀯𑁂𑀤𑀬𑀺𑀢’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀪𑀯𑀗𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀬 𑀧𑀦 𑀯𑁂𑀤𑀦𑀸𑀬 𑀕𑀳𑀡𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀪𑀯𑀗𑁆𑀕𑀢𑁄 𑀅𑀫𑁄𑀘𑁂𑀢𑁆𑀯𑀸 𑀪𑀯𑀗𑁆𑀕𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁𑀬𑁂𑀯 𑀆𑀯𑀚𑁆𑀚𑀦𑀁 𑀕𑀳𑁂𑀢𑁆𑀯𑀸 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀪𑀯𑀗𑁆𑀕𑀁 𑀤𑀝𑁆𑀞𑀩𑁆𑀩𑀁. 𑀬𑀸 𑀧𑀦𑁂𑀢𑁆𑀣 𑀤𑁂𑀲𑀦𑀸𑀢𑀺 𑀬𑀸 𑀏𑀢𑁆𑀣 ‘‘𑀧𑀳𑀸𑀦𑀸𑀬𑀸’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀤𑁂𑀲𑀦𑀸 𑀲𑀢𑁆𑀣𑀼 𑀅𑀦𑀲𑀺𑀝𑁆𑀞𑀺 𑀆𑀡𑀸. 𑀅𑀬𑀁 𑀧𑀡𑁆𑀡𑀢𑁆𑀢𑀺 𑀦𑀸𑀫 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀓𑀸𑀭𑀢𑁄 𑀜𑀸𑀧𑀦𑀢𑁄. 𑀏𑀢𑁆𑀣 𑀲𑀩𑁆𑀩𑀕𑁆𑀕𑀳𑀡𑁂𑀦 𑀲𑀩𑁆𑀩𑁂 𑀲𑀪𑀸𑀯𑀥𑀫𑁆𑀫𑀸 𑀕𑀳𑀺𑀢𑀸, 𑀧𑀜𑁆𑀜𑀢𑁆𑀢𑀺 𑀧𑀦 𑀓𑀢𑀫𑀸𑀢𑀺 𑀯𑀺𑀘𑀸𑀭𑀡𑀸𑀬 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀬𑀸 𑀧𑀦𑁂𑀢𑁆𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀳𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀪𑀺𑀜𑁆𑀜𑀸𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫. 𑀅𑀪𑀺𑀜𑁆𑀜𑀸𑀢𑀺 ¶ 𑀅𑀪𑀺𑀜𑁆𑀜𑀸𑀬. 𑀬-𑀓𑀸𑀭𑀮𑁄𑀧𑀯𑀲𑁂𑀦𑀸𑀬𑀁 𑀦𑀺𑀤𑁆𑀤𑁂𑀲𑁄 ‘‘𑀲𑀬𑀁 𑀅𑀪𑀺𑀜𑁆𑀜𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁮, 𑁪𑁦𑁫; 𑀫. 𑀦𑀺. 𑁧.𑁧𑁫𑁪) 𑀯𑀺𑀬, 𑀢𑀣𑀸 ‘‘𑀧𑀭𑀺𑀜𑁆𑀜𑀸’’𑀢𑀺 𑀏𑀢𑁆𑀣𑀸𑀧𑀺. 𑀲𑀩𑁆𑀩𑀦𑁆𑀢𑀺 𑀆𑀬𑀢𑀦𑀲𑀩𑁆𑀩𑀁. 𑀢𑀜𑁆𑀳𑀺 𑀅𑀪𑀺𑀜𑁆𑀜𑁂𑀬𑁆𑀬𑀁. 𑀅𑀪𑀺𑀚𑀸𑀦𑀺𑀢𑁆𑀯𑀸𑀢𑀺 𑀅𑀪𑀺𑀜𑁆𑀜𑀸𑀬 𑀚𑀸𑀦𑀺𑀢𑁆𑀯𑀸. 𑀧𑀭𑀺𑀚𑀸𑀦𑀺𑀢𑁆𑀯𑀸𑀢𑀺 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀅𑀦𑀺𑀘𑁆𑀘𑀸𑀤𑀺𑀢𑁄 𑀧𑀭𑀺𑀚𑀸𑀦𑀺𑀢𑁆𑀯𑀸. 𑀧𑀚𑀳𑀦𑀢𑁆𑀣𑀸𑀬𑀸𑀢𑀺 𑀧𑀳𑀸𑀦𑀧𑀭𑀺𑀜𑁆𑀜𑀸𑀬 𑀅𑀦𑀯𑀲𑁂𑀲𑀢𑁄 𑀧𑀚𑀳𑀦𑀸𑀬.

𑀅𑀪𑀺𑀜𑁆𑀜𑀸𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀞𑀫𑀅𑀧𑀭𑀺𑀚𑀸𑀦𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬. ‘‘𑀅𑀪𑀺𑀚𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀏𑀢𑁆𑀣 𑀪𑀕𑀯𑀸 𑀧𑀞𑀫𑀁 𑀓𑀡𑁆𑀳𑀧𑀓𑁆𑀔𑀁 𑀤𑀲𑁆𑀲𑁂𑀢𑁆𑀯𑀸 𑀲𑀼𑀓𑁆𑀓𑀧𑀓𑁆𑀔𑀁 𑀤𑀲𑁆𑀲𑁂𑀢𑀺 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦. 𑀢𑁂𑀦𑁂𑀢𑁆𑀣 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.

𑀧𑀞𑀫𑀅𑀧𑀭𑀺𑀚𑀸𑀦𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀤𑀼𑀢𑀺𑀬𑀅𑀧𑀭𑀺𑀚𑀸𑀦𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑀥𑀫𑁆𑀫𑁄 ¶ 𑀦𑀸𑀫 𑀭𑀽𑀧𑀸𑀬𑀢𑀦𑀫𑁂𑀯𑀸𑀢𑀺 𑀆𑀳 ‘‘𑀳𑁂𑀝𑁆𑀞𑀸 𑀕𑀳𑀺𑀢𑀭𑀽𑀧𑀫𑁂𑀯𑀸’’𑀢𑀺. 𑀇𑀥 𑀅𑀦𑀸𑀧𑀸𑀣𑀕𑀢𑀁 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑀸𑀢𑀩𑁆𑀩𑀸 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀳𑁂𑀝𑁆𑀞𑀸 𑀆𑀧𑀸𑀣𑀕𑀢𑀫𑁆𑀧𑀺 𑀅𑀦𑀸𑀧𑀸𑀣𑀕𑀢𑀫𑁆𑀧𑀺 𑀕𑀳𑀺𑀢𑀫𑁂𑀯 ‘‘𑀬𑁂 𑀘 𑀭𑀽𑀧𑀸’’𑀢𑀺 𑀅𑀦𑀯𑀲𑁂𑀲𑀢𑁄 𑀯𑀼𑀢𑁆𑀢𑀢𑁆𑀢𑀸. 𑀢𑁂 𑀳𑀺 𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀸 𑀲𑀳 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀢𑀩𑁆𑀩𑀢𑁆𑀢𑀸. 𑀢𑀣𑀸 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀢𑁂𑀳𑀺 𑀏𑀓𑀼𑀧𑁆𑀧𑀸𑀤𑀁 𑀏𑀓𑀯𑀢𑁆𑀣𑀼𑀓𑀁 𑀏𑀓𑀦𑀺𑀭𑁄𑀥𑀁 𑀏𑀓𑀸𑀭𑀫𑁆𑀫𑀡𑀫𑁂𑀯. 𑀲𑁂𑀲𑀧𑀤𑁂𑀲𑀽𑀢𑀺 𑀲𑁂𑀲𑁂𑀲𑀼 ‘‘𑀬𑀜𑁆𑀘 𑀲𑁄𑀢𑀁 𑀬𑁂 𑀘 𑀲𑀤𑁆𑀤𑀸’’𑀢𑀺𑀆𑀤𑀺𑀦𑀸 𑀆𑀕𑀢𑁂𑀲𑀼 𑀓𑀡𑁆𑀳𑀧𑀓𑁆𑀔𑁂 𑀧𑀜𑁆𑀘𑀲𑀼, 𑀲𑀼𑀓𑁆𑀓𑀧𑀓𑁆𑀔𑁂 𑀙𑀲𑀼𑀧𑀺 𑀧𑀤𑁂𑀲𑀼. 𑀏𑀲𑁂𑀯 𑀦𑀬𑁄𑀢𑀺 𑀬𑁆𑀯𑀸𑀬𑀁 ‘‘𑀳𑁂𑀝𑁆𑀞𑀸 𑀕𑀳𑀺𑀢𑀭𑀽𑀧𑀫𑁂𑀯 𑀕𑀡𑁆𑀳𑀺𑀢𑁆𑀯𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀏𑀲𑁄 𑀏𑀯 𑀢𑀢𑁆𑀣𑀧𑀺 𑀅𑀢𑁆𑀣𑀯𑀡𑁆𑀡𑀦𑀸𑀦𑀬𑁄.

𑀤𑀼𑀢𑀺𑀬𑀅𑀧𑀭𑀺𑀚𑀸𑀦𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀆𑀤𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮. 𑀕𑀬𑀸𑀦𑀸𑀫𑀺𑀓𑀸𑀬 ¶ 𑀦𑀤𑀺𑀬𑀸 𑀅𑀯𑀺𑀤𑀽𑀭𑁂 𑀧𑀯𑀢𑁆𑀢𑁄 𑀕𑀸𑀫𑁄 𑀕𑀬𑀸 𑀦𑀸𑀫, 𑀢𑀲𑁆𑀲𑀁 𑀕𑀬𑀸𑀬𑀁 𑀯𑀺𑀳𑀭𑀢𑀻𑀢𑀺 𑀲𑀫𑀻𑀧𑀢𑁆𑀣𑁂 𑀘𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀕𑀬𑀸𑀕𑀸𑀫𑀲𑁆𑀲 𑀳𑀺 𑀆𑀲𑀦𑁆𑀦𑁂 𑀕𑀬𑀸𑀲𑀻𑀲𑀦𑀸𑀫𑀓𑁂 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀪𑀕𑀯𑀸 𑀢𑀤𑀸 𑀯𑀺𑀳𑀸𑀲𑀺. 𑀢𑁂𑀦𑀸𑀳 ‘‘𑀪𑀕𑀯𑀸 𑀢𑀢𑁆𑀣 𑀯𑀺𑀳𑀭𑀢𑀻’’𑀢𑀺.

𑀢𑀢𑁆𑀭𑀸𑀢𑀺 ‘‘𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀻’’𑀢𑀺 𑀬𑁂 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺, 𑀬𑀣𑀸 𑀘𑀸𑀬𑀁 𑀤𑁂𑀲𑀦𑀸 𑀢𑁂𑀲𑀁 𑀲𑀧𑁆𑀧𑀸𑀬𑀸 𑀚𑀸𑀢𑀸, 𑀢𑀢𑁆𑀭 𑀢𑀲𑁆𑀫𑀺𑀁 𑀅𑀢𑁆𑀣𑀤𑁆𑀯𑀬𑁂 𑀯𑀺𑀪𑀸𑀯𑁂𑀢𑀩𑁆𑀩𑁂 𑀅𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑀲𑀫𑀼𑀤𑀸𑀕𑀫𑀢𑁄 𑀧𑀝𑁆𑀞𑀸𑀬 𑀅𑀦𑀼𑀧𑀝𑀺𑀧𑀸𑀝𑀺𑀓𑀣𑀸. 𑀇𑀢𑁄𑀢𑀺 𑀇𑀫𑀲𑁆𑀫𑀸 𑀓𑀧𑁆𑀧𑀢𑁄. 𑀓𑀺𑀭𑀸𑀢𑀺 𑀅𑀦𑀼𑀲𑁆𑀲𑀯𑀦𑀢𑁆𑀣𑁂 𑀦𑀺𑀧𑀸𑀢𑁄. 𑀧𑀸𑀭𑀫𑀺𑀢𑀸𑀧𑀭𑀺𑀪𑀸𑀯𑀦𑀸𑀬 𑀧𑀭𑀺𑀧𑀸𑀓𑀕𑀢𑁂. 𑀜𑀸𑀡𑁂𑀢𑀺 𑀩𑁄𑀥𑀺𑀜𑀸𑀡𑁂. 𑀓𑀦𑀺𑀝𑁆𑀞𑀧𑀼𑀢𑁆𑀢𑁄 𑀯𑁂𑀫𑀸𑀢𑀺𑀓𑀪𑀸𑀢𑀸 𑀪𑀕𑀯𑀢𑁄. 𑀯𑁂𑀴𑀼𑀪𑀺𑀢𑁆𑀢𑀺𑀓𑀼𑀝𑀺𑀓𑀸𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀩𑀳𑀺𑀤𑁆𑀥𑀸, 𑀅𑀦𑁆𑀢𑁄 𑀧𑀦 𑀧𑀝𑀲𑀸𑀡𑀻𑀳𑀺.

𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁. 𑀧𑀼𑀜𑁆𑀜𑀘𑁂𑀢𑀦𑀁 𑀅𑀦𑁆𑀢𑁄 𑀅𑀩𑁆𑀪𑀦𑁆𑀢𑀭𑁂 𑀧𑀯𑁂𑀲𑁂𑀢𑀺. 𑀪𑀕𑀯𑀸𑀧𑀺 𑀢𑀲𑁆𑀲 𑀧𑀼𑀢𑁆𑀢𑁄𑀢𑀺 𑀓𑀢𑁆𑀯𑀸 ‘‘𑀅𑀜𑁆𑀜𑁂 𑀢𑀬𑁄 𑀧𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀅𑀯𑀺𑀧𑁆𑀧𑀓𑀺𑀭𑀺𑀢𑁆𑀯𑀸𑀢𑀺 𑀧𑀭𑀸𑀚𑀬𑁂𑀦 𑀅𑀯𑀺𑀧𑁆𑀧𑀓𑀺𑀭𑀺𑀬 𑀅𑀧𑀮𑀸𑀬𑀺𑀢𑁆𑀯𑀸. 𑀧𑀺𑀤𑀳𑀻𑀢𑀺 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀫𑀻𑀢𑀺 𑀢𑀣𑀸 𑀅𑀓𑀸𑀲𑀺. 𑀲𑀘𑁆𑀘𑀯𑀸𑀤𑀺𑀢𑀸𑀬 𑀕𑀡𑁆𑀳𑀺𑀁𑀲𑀽𑀢𑀺 𑀭𑀸𑀚𑀓𑀼𑀮𑀲𑁆𑀲 𑀲𑀘𑁆𑀘𑀯𑀸𑀤𑀺𑀢𑀸𑀬 𑀅𑀢𑁆𑀢𑀦𑁄 𑀯𑀭𑀁 𑀕𑀡𑁆𑀳𑀺𑀁𑀲𑀼.

𑀯𑀺𑀦𑀺𑀯𑀢𑁆𑀢𑀺𑀢𑀼𑀦𑁆𑀢𑀺 𑀧𑀝𑀺𑀜𑁆𑀜𑀸𑀬 𑀦𑀺𑀯𑀢𑁆𑀢𑀺𑀢𑀼𑀁. 𑀅𑀦𑁆𑀢𑀭𑀸𑀢𑀺 𑀢𑀼𑀫𑁆𑀳𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀲𑁆𑀲 𑀅𑀦𑁆𑀢𑀭𑀸 𑀏𑀯 𑀫𑀢𑀸. 𑀅𑀝𑁆𑀞𑀯𑀻𑀲𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀉𑀲𑀪𑀁 𑀦𑀸𑀫. 𑀉𑀲𑀪𑁂 𑀅𑀝𑁆𑀞𑀯𑀻𑀲𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑁂 𑀞𑀸𑀦𑁂. 𑀤𑀸𑀦𑀕𑁆𑀕𑁂 𑀩𑁆𑀬𑀸𑀯𑀝𑁄𑀢𑀺 𑀧𑀲𑀼𑀢𑁄.

𑀲𑁄𑀢𑀺 ¶ 𑀪𑀕𑀯𑀸. 𑀢𑀣𑀸𑀭𑀽𑀧𑀜𑁆𑀳𑀺 𑀩𑀼𑀤𑁆𑀥𑀸𑀦𑀁 𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀁, 𑀬𑀣𑀸 𑀤𑁂𑀲𑀦𑀸𑀬 𑀕𑀳𑀺𑀢𑁄 𑀅𑀢𑁆𑀣𑁄 𑀧𑀘𑁆𑀘𑀓𑁆𑀔𑀢𑁄 𑀯𑀺𑀪𑀽𑀢𑁄 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀢𑁂𑀦𑀸𑀳 ‘‘𑀇𑀫𑁂𑀲𑀁…𑀧𑁂… 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺. 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺 𑀘𑀺𑀭𑀓𑀸𑀮𑀧𑀭𑀺𑀘𑀺𑀢𑀸𑀤𑀺𑀢𑁆𑀢𑀅𑀕𑁆𑀕𑀺𑀓𑀸𑀦𑀁 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀤𑁂𑀲𑀦𑀸𑀯 𑀲𑀧𑁆𑀧𑀸𑀬𑀸𑀢𑀺 𑀦𑀺𑀘𑁆𑀙𑀬𑀫𑀓𑀸𑀲𑀺. 𑀧𑀤𑀺𑀢𑁆𑀢𑀦𑁆𑀢𑀺 𑀧𑀤𑀻𑀧𑀺𑀢𑀁 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺 𑀏𑀓𑀚𑀸𑀮𑀻𑀪𑀽𑀢𑀁. 𑀢𑁂𑀦𑀸𑀳 ‘‘𑀲𑀫𑁆𑀧𑀚𑁆𑀚𑀮𑀺𑀢’’𑀦𑁆𑀢𑀺. 𑀤𑀼𑀓𑁆𑀔𑀮𑀓𑁆𑀔𑀡𑀁 𑀓𑀣𑀺𑀢𑀁 𑀘𑀓𑁆𑀔𑀸𑀤𑀻𑀦𑀁 𑀏𑀓𑀸𑀤𑀲𑀳𑀺 𑀅𑀕𑁆𑀕𑀻𑀳𑀺 𑀆𑀤𑀺𑀢𑁆𑀢𑀪𑀸𑀯𑁂𑀦 𑀤𑀼𑀓𑁆𑀔𑀫𑀢𑀸𑀬 𑀤𑀼𑀓𑁆𑀔𑀲𑁆𑀲 𑀓𑀣𑀺𑀢𑀢𑁆𑀢𑀸.

𑀆𑀤𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀅𑀤𑁆𑀥𑀪𑀽𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁯. 𑀅𑀥𑀺𑀲𑀤𑁆𑀤𑁂𑀦 ¶ 𑀲𑀫𑀸𑀦𑀢𑁆𑀣𑁄 𑀅𑀤𑁆𑀥𑀲𑀤𑁆𑀤𑁄𑀢𑀺 𑀆𑀳 ‘‘𑀅𑀤𑁆𑀥𑀪𑀽𑀢𑀦𑁆𑀢𑀺 𑀅𑀥𑀺𑀪𑀽𑀢’’𑀦𑁆𑀢𑀺𑀆𑀤𑀺. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀅𑀤𑁆𑀥𑀪𑀽𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀫𑀼𑀕𑁆𑀖𑀸𑀢𑀲𑀸𑀭𑀼𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦. 𑀫𑀜𑁆𑀜𑀺𑀢𑀁 𑀦𑀸𑀫 𑀢𑀡𑁆𑀳𑀸𑀫𑀸𑀦𑀤𑀺𑀝𑁆𑀞𑀻𑀳𑀺 𑀕𑀳𑁂𑀢𑀩𑁆𑀩𑀁 𑀫𑀜𑁆𑀜𑀺𑀢𑀁. 𑀲𑀩𑁆𑀩𑀲𑁆𑀫𑀺𑀁 𑀫𑀜𑁆𑀜𑀺𑀢𑀦𑁆𑀢𑀺 𑀲𑀩𑁆𑀩𑀫𑀜𑁆𑀜𑀺𑀢𑀁, 𑀢𑀲𑁆𑀲 𑀲𑀫𑀼𑀕𑁆𑀖𑀸𑀢𑁄 𑀲𑁂𑀢𑀼𑀖𑀸𑀢𑁄, 𑀢𑀤𑀸𑀯𑀳𑀁 𑀲𑀩𑁆𑀩𑀫𑀜𑁆𑀜𑀺𑀢𑀲𑀫𑀼𑀕𑁆𑀖𑀸𑀢𑀲𑀸𑀭𑀼𑀧𑁆𑀧𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀫𑀜𑁆𑀜𑀺𑀢𑀁 𑀦𑀸𑀫 𑀘𑀓𑁆𑀔𑀸𑀤𑀻𑀲𑀼 𑀏𑀯 𑀉𑀧𑁆𑀧𑀚𑁆𑀚𑀢𑀺, 𑀦𑀸𑀜𑁆𑀜𑀲𑁆𑀫𑀺’’𑀦𑁆𑀢𑀺 𑀤𑀼𑀢𑀺𑀬𑀦𑀬𑁄 𑀯𑀼𑀢𑁆𑀢𑁄. 𑀅𑀦𑀼𑀘𑁆𑀙𑀯𑀺𑀓𑀦𑁆𑀢𑀺 𑀅𑀦𑀼𑀭𑀽𑀧𑀁 𑀅𑀯𑀺𑀮𑁄𑀫𑀁. 𑀇𑀥𑀸𑀢𑀺 𑀇𑀥𑁂𑀯 𑀲𑀸𑀲𑀦𑁂 𑀅𑀜𑁆𑀜𑀢𑁆𑀣 𑀢𑀤𑀪𑀸𑀯𑀢𑁄. ‘‘𑀢𑀡𑁆𑀳𑀸-𑀫𑀸𑀦𑀤𑀺𑀝𑁆𑀞𑀺𑀫𑀜𑁆𑀜𑀺𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁 𑀫𑀜𑁆𑀜𑀺𑀢𑀢𑁆𑀢𑀬𑀁 𑀲𑀧𑀭𑀲𑀦𑁆𑀢𑀸𑀦𑁂𑀲𑀼 𑀧𑀝𑀺𑀧𑀓𑁆𑀔𑀯𑀲𑁂𑀦 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀘𑀓𑁆𑀔𑀼𑀁 𑀅𑀳𑀦𑁆𑀢𑀺 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀘𑀓𑁆𑀔𑀼𑀁 𑀅𑀳’’𑀦𑁆𑀢𑀺 𑀇𑀫𑀺𑀦𑀸 𑀅𑀚𑁆𑀛𑀢𑁆𑀢𑀯𑀺𑀲𑀬𑀁 𑀤𑀺𑀝𑁆𑀞𑀺𑀫𑀜𑁆𑀜𑀺𑀢𑀜𑁆𑀘 𑀤𑀲𑁆𑀲𑁂𑀢𑀺 𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀸𑀳𑀁𑀓𑀸𑀭𑀤𑀻𑀧𑀦𑀢𑁄. ‘‘𑀫𑀫’’𑀦𑁆𑀢𑀺 𑀇𑀫𑀺𑀦𑀸 𑀢𑀡𑁆𑀳𑀸𑀫𑀜𑁆𑀜𑀺𑀢𑀁 𑀫𑀸𑀦𑀫𑀜𑁆𑀜𑀺𑀢𑀫𑁆𑀧𑀺 𑀯𑀸, 𑀧𑀭𑀺𑀕𑁆𑀕𑀳𑀫𑀼𑀔𑁂𑀦𑀧𑀺 𑀲𑁂𑀬𑁆𑀬𑀸𑀤𑀺𑀢𑁄 𑀫𑀸𑀦𑀼𑀧𑁆𑀧𑀚𑁆𑀚𑀦𑀢𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀫𑀜𑁆𑀜𑀺𑀢𑀯𑀺𑀪𑀸𑀕𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀳𑀦𑁆𑀢𑀺 𑀅𑀢𑁆𑀢𑀸𑀯, 𑀲𑁄 𑀘 𑀘𑀓𑁆𑀔𑀼𑀲𑁆𑀫𑀺𑀁 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑁆𑀢𑀸 ‘‘𑀧𑀭𑁄’’𑀢𑀺 𑀦 𑀫𑀜𑁆𑀜𑀢𑀺. 𑀫𑀫 𑀓𑀺𑀜𑁆𑀘𑀦𑀧𑀮𑀺𑀩𑁄𑀥𑁄 𑀘𑀓𑁆𑀔𑀼𑀲𑁆𑀫𑀺𑀁 𑀲𑀢𑀺 𑀮𑀩𑁆𑀪𑀦𑀢𑁄, 𑀅𑀲𑀢𑀺 𑀦 𑀫𑀜𑁆𑀜𑀢𑀺 𑀢𑀣𑀸𑀫𑀜𑁆𑀜𑀺𑀢𑀲𑁆𑀲 𑀧𑀘𑁆𑀘𑀬𑀖𑀸𑀢𑀢𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑀅𑀳𑀁 𑀘𑀓𑁆𑀔𑀼𑀢𑁄 𑀦𑀺𑀕𑁆𑀕𑀢𑁄𑀢𑀺 ‘‘𑀅𑀳’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁄 𑀅𑀬𑀁 𑀲𑀢𑁆𑀢𑁄 𑀘𑀓𑁆𑀔𑀼𑀢𑁄 𑀦𑀺𑀕𑁆𑀕𑀢𑁄 𑀢𑀢𑁆𑀣 𑀲𑀼𑀔𑀼𑀫𑀸𑀓𑀸𑀭𑁂𑀦 𑀉𑀧𑀮𑀩𑁆𑀪𑀦𑀢𑁄. 𑀫𑀫 𑀓𑀺𑀜𑁆𑀘𑀦𑀧𑀮𑀺𑀩𑁄𑀥𑁄 𑀘𑀓𑁆𑀔𑀼𑀢𑁄 𑀦𑀺𑀕𑁆𑀕𑀢𑁄 𑀢𑀲𑁆𑀫𑀺𑀁 𑀲𑀢𑀺 𑀏𑀯 𑀉𑀧𑀮𑀩𑁆𑀪𑀦𑀢𑁄 ¶ . 𑀲𑁂𑀲𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀢𑁆𑀣 𑀧𑀭𑁄𑀢𑀺 𑀧𑀭𑁄 𑀲𑀢𑁆𑀢𑁄. 𑀫𑀫 𑀘𑀓𑁆𑀔𑀽𑀢𑀺 𑀦 𑀫𑀜𑁆𑀜𑀢𑀺 𑀬𑀲𑁆𑀲 𑀢𑀁 𑀘𑀓𑁆𑀔𑀼, 𑀢𑀲𑁆𑀲 ‘‘𑀅𑀳’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀫𑀫𑀢𑁆𑀢𑀪𑀽𑀢𑀦𑁆𑀢𑀺 𑀫𑀫 𑀓𑀸𑀭𑀡𑀁. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯. 𑀏𑀯𑀫𑁂𑀢𑀲𑁆𑀫𑀺𑀁 𑀲𑀼𑀢𑁆𑀢𑁂 𑀘𑀓𑁆𑀔𑀼𑀭𑀽𑀧-𑀘𑀓𑁆𑀔𑀼𑀯𑀺𑀜𑁆𑀜𑀸𑀡-𑀘𑀓𑁆𑀔𑀼𑀲𑀫𑁆𑀨𑀲𑁆𑀲-𑀲𑀼𑀔𑀤𑀼𑀓𑁆𑀔𑀸𑀤𑀼𑀓𑁆𑀔𑀫𑀲𑀼𑀔𑀯𑀲𑁂𑀦 𑀲𑀢𑁆𑀢 𑀯𑀸𑀭𑀸 𑀘𑀓𑁆𑀔𑀼𑀤𑁆𑀯𑀸𑀭𑁂, 𑀢𑀣𑀸 𑀲𑁄𑀢𑀤𑁆𑀯𑀸𑀭𑀸𑀤𑀻𑀲𑀽𑀢𑀺 𑀙 𑀲𑀢𑁆𑀢𑀓𑀸 𑀤𑁆𑀯𑁂𑀘𑀢𑁆𑀢𑀸𑀮𑀻𑀲. 𑀧𑀼𑀦 𑀲𑀓𑁆𑀓𑀸𑀬𑀯𑀲𑁂𑀦 ‘‘𑀲𑀩𑁆𑀩𑀁 𑀦 𑀫𑀜𑁆𑀜𑀢𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁, 𑀢𑁂𑀦 𑀢𑁂𑀘𑀢𑁆𑀢𑀸𑀮𑀻𑀲. 𑀧𑀼𑀦 𑀢𑁂𑀪𑀽𑀫𑀓𑀯𑀝𑁆𑀝𑀁 ‘‘𑀮𑁄𑀓𑁄’’𑀢𑀺 𑀕𑀳𑁂𑀢𑁆𑀯𑀸 ‘‘𑀦 𑀓𑀺𑀜𑁆𑀘𑀺 𑀮𑁄𑀓𑁂 𑀉𑀧𑀸𑀤𑀺𑀬𑀢𑀻’’𑀢𑀺 ¶ 𑀯𑀼𑀢𑁆𑀢𑀁, 𑀢𑁂𑀦 𑀘𑀢𑀼𑀘𑀢𑁆𑀢𑀸𑀮𑀻𑀲 𑀳𑁄𑀦𑁆𑀢𑀺. 𑀏𑀯𑀁 𑀲𑀩𑁆𑀩𑀣𑀸𑀧𑀺 𑀘𑀢𑀼𑀘𑀢𑁆𑀢𑀸𑀮𑀻𑀲𑀸𑀬 𑀞𑀸𑀦𑁂𑀲𑀼 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀘𑀢𑀼𑀘𑀢𑁆𑀢𑀸𑀮𑀻𑀲𑀸𑀥𑀺𑀓𑀲𑀢𑁂𑀲𑀽’’𑀢𑀺 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀦𑁆𑀢𑀺, 𑀲𑀸 𑀘 𑀧𑀫𑀸𑀤𑀮𑁂𑀔𑀸.

𑀲𑀫𑀼𑀕𑁆𑀖𑀸𑀢𑀲𑀸𑀭𑀼𑀧𑁆𑀧𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀞𑀫𑀲𑀫𑀼𑀕𑁆𑀖𑀸𑀢𑀲𑀧𑁆𑀧𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧. 𑀉𑀧𑀓𑀸𑀭𑀪𑀽𑀢𑀸 𑀢𑀤𑀸𑀯𑀳𑀢𑁆𑀢𑀸. 𑀢𑀢𑁄𑀢𑀺 𑀫𑀜𑁆𑀜𑀺𑀢𑀸𑀓𑀸𑀭𑀢𑁄. 𑀢𑀦𑁆𑀢𑀺 𑀫𑀜𑁆𑀜𑀦𑀸𑀯𑀢𑁆𑀣𑀼𑀁. 𑀅𑀜𑁆𑀜𑁂𑀦𑀸𑀓𑀸𑀭𑁂𑀦𑀸𑀢𑀺 𑀬𑀣𑀸 𑀫𑀜𑁆𑀜𑀢𑀺 𑀅𑀦𑀺𑀘𑁆𑀘𑀸𑀤𑀺𑀆𑀓𑀸𑀭𑀢𑁄, 𑀅𑀜𑁆𑀜𑁂𑀦 𑀅𑀦𑀺𑀘𑁆𑀘𑀸𑀤𑀺𑀦𑀸 𑀆𑀓𑀸𑀭𑁂𑀦 𑀳𑁄𑀢𑀺. 𑀅𑀜𑁆𑀜𑀣𑀸𑀪𑀸𑀯𑀁 𑀯𑀺𑀧𑀭𑀺𑀡𑀸𑀫𑀦𑁆𑀢𑀺 𑀉𑀧𑁆𑀧𑀸𑀤𑀯𑀬𑀢𑀸𑀬 𑀅𑀜𑁆𑀜𑀣𑀸𑀪𑀸𑀯𑀁 𑀚𑀭𑀸𑀬 𑀫𑀭𑀡𑁂𑀦 𑀘 𑀤𑁆𑀯𑁂𑀥𑀸 𑀯𑀺𑀧𑀭𑀺𑀡𑀸𑀫𑁂𑀢𑀩𑁆𑀩𑀁. 𑀢𑀁 𑀉𑀧𑀕𑀫𑀦𑁂𑀦 𑀅𑀜𑁆𑀜𑀣𑀸𑀪𑀸𑀯𑀻, 𑀏𑀯𑀁𑀪𑀽𑀢𑁄 𑀳𑀼𑀢𑁆𑀯𑀸𑀧𑀺 𑀚𑀻𑀭𑀡𑀪𑀺𑀚𑁆𑀚𑀦𑀲𑀪𑀸𑀯𑁂𑀲𑀼. 𑀪𑀯𑁂𑀲𑀼 𑀲𑀢𑁆𑀢𑁄 𑀮𑁄𑀓𑁄 𑀉𑀧𑀭𑀺𑀧𑀺 𑀪𑀯𑀁𑀬𑁂𑀯 𑀅𑀪𑀺𑀦𑀦𑁆𑀤𑀢𑀺. 𑀳𑁂𑀝𑁆𑀞𑀸 𑀕𑀳𑀺𑀢𑀫𑁂𑀯 𑀲𑀗𑁆𑀓𑀟𑁆𑀠𑀺𑀢𑁆𑀯𑀸𑀢𑀺 ‘‘𑀘𑀓𑁆𑀔𑀼𑀁 𑀦 𑀫𑀜𑁆𑀜𑀢𑀻’’𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀸 𑀕𑀳𑀺𑀢𑀫𑁂𑀯 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀸𑀢𑀺 𑀔𑀦𑁆𑀥𑀸𑀤𑀺𑀧𑀭𑀺𑀬𑀸𑀬𑁂𑀦 𑀏𑀓𑀢𑁄 𑀕𑀳𑁂𑀢𑁆𑀯𑀸 𑀧𑀼𑀦𑀧𑀺 𑀫𑀜𑁆𑀜𑀦𑀸𑀯𑀢𑁆𑀣𑀼𑀁 𑀤𑀲𑁆𑀲𑁂𑀢𑀺. 𑀅𑀯𑀲𑀸𑀦𑁂 ‘‘𑀢𑀢𑁄 𑀢𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀧𑀤𑁂𑀦 𑀲𑀤𑁆𑀥𑀺𑀁 𑀲𑀩𑁆𑀩𑀯𑀸𑀭𑁂𑀲𑀼 𑀅𑀝𑁆𑀞 𑀅𑀝𑁆𑀞 𑀳𑁄𑀦𑁆𑀢𑀻𑀢𑀺 ‘‘𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀸𑀬 𑀞𑀸𑀦𑁂𑀲𑀽’’𑀢𑀺 𑀯𑀼𑀢𑁆𑀢𑀁.

𑀧𑀞𑀫𑀲𑀫𑀼𑀕𑁆𑀖𑀸𑀢𑀲𑀧𑁆𑀧𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀼𑀢𑀺𑀬𑀲𑀫𑀼𑀕𑁆𑀖𑀸𑀢𑀲𑀧𑁆𑀧𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨. 𑀤𑀲𑁆𑀲𑁂𑀢𑁆𑀯𑀸𑀢𑀺 𑀏𑀢𑁆𑀣 𑀮𑀓𑁆𑀔𑀡𑁂 𑀅𑀬𑀁 𑀢𑁆𑀯𑀸-𑀲𑀤𑁆𑀤𑁄, 𑀳𑁂𑀢𑀼𑀫𑁆𑀳𑀺 𑀯𑀸. 𑀅𑀦𑀸𑀤𑀺𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑀕𑀸𑀳𑀢𑁆𑀢𑀬𑀮𑀓𑁆𑀔𑀺𑀢𑀸 𑀳𑀺 𑀲𑀢𑁆𑀣𑀼, 𑀢𑀺𑀧𑀭𑀺𑀯𑀝𑁆𑀝𑀤𑁂𑀲𑀦𑀸 𑀢𑀁𑀦𑀺𑀫𑀺𑀢𑁆𑀢𑀁 𑀬𑀸𑀯𑀤𑁂𑀯 𑀢𑀧𑁆𑀧𑀳𑀸𑀦𑀸𑀬 𑀧𑀯𑀢𑁆𑀢𑀺𑀢𑀪𑀸𑀯𑀢𑁄. 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀲𑀳 𑀯𑀺𑀧𑀲𑁆𑀲𑀦𑀸𑀬 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀓𑀣𑀺𑀢𑀸’’𑀢𑀺.

𑀤𑀼𑀢𑀺𑀬𑀲𑀫𑀼𑀕𑁆𑀖𑀸𑀢𑀲𑀧𑁆𑀧𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀩𑁆𑀩𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀚𑀸𑀢𑀺𑀥𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸

𑁩𑁩-𑁪𑁨. 𑀦𑀺𑀩𑁆𑀩𑀢𑁆𑀢𑀦𑀲𑀪𑀸𑀯𑀦𑁆𑀢𑀺 ¶ ¶ 𑀳𑁂𑀢𑀼𑀧𑀘𑁆𑀘𑀬𑁂𑀳𑀺 𑀉𑀧𑁆𑀧𑀚𑁆𑀚𑀦𑀲𑀪𑀸𑀯𑀁. 𑀉𑀧𑁆𑀧𑀸𑀤𑀸𑀦𑀦𑁆𑀢𑀭𑀁 𑀩𑀼𑀤𑁆𑀥𑀺𑀧𑁆𑀧𑀢𑁆𑀢𑀺𑀬𑀸 𑀚𑀻𑀭𑀡𑀲𑀪𑀸𑀯𑀁. 𑀬𑀢𑁆𑀣 𑀘𑀓𑁆𑀔𑀸𑀤𑀬𑁄, 𑀢𑀢𑁆𑀣𑁂𑀯 𑀯𑀺𑀲𑀪𑀸𑀕𑀲𑀫𑀼𑀝𑁆𑀞𑀸𑀦𑀮𑀓𑁆𑀔𑀡𑁂𑀦 𑀩𑁆𑀬𑀸𑀥𑀺𑀦𑁄 𑀉𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑀪𑀸𑀯𑁂𑀦 𑀩𑁆𑀬𑀸𑀥𑀺𑀲𑀪𑀸𑀯𑀁. 𑀫𑀭𑀡𑀲𑀪𑀸𑀯𑀦𑁆𑀢𑀺 𑀯𑀺𑀦𑀸𑀲𑀲𑀪𑀸𑀯𑀁. 𑀲𑁄𑀓𑀲𑀪𑀸𑀯𑀦𑁆𑀢𑀺 𑀜𑀸𑀢𑀺𑀩𑁆𑀬𑀲𑀦𑀸𑀤𑀺𑀦𑀸 𑀟𑀬𑁆𑀳𑀫𑀸𑀦𑀤𑀼𑀓𑁆𑀔𑀲𑀪𑀸𑀯𑀁. 𑀲𑀁𑀓𑀺𑀮𑁂𑀲𑀺𑀓𑀲𑀪𑀸𑀯𑀦𑁆𑀢𑀺 𑀢𑀡𑁆𑀳𑀸𑀤𑀺𑀯𑀲𑁂𑀦 𑀲𑀁𑀓𑀺𑀮𑀺𑀲𑁆𑀲𑀦𑀲𑀪𑀸𑀯𑀁.

𑀚𑀸𑀢𑀺𑀥𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀩𑁆𑀩𑀅𑀦𑀺𑀘𑁆𑀘𑀯𑀕𑁆𑀕𑀯𑀡𑁆𑀡𑀦𑀸

𑁪𑁩-𑁫𑁨. 𑀜𑀸𑀢𑀧𑀭𑀺𑀜𑁆𑀜𑀸 𑀆𑀕𑀢𑀸 𑀯𑀺𑀲𑀬𑀯𑀲𑁂𑀦 𑀢𑀩𑁆𑀩𑀺𑀲𑀬𑀲𑁆𑀲 𑀥𑀫𑁆𑀫𑀲𑁆𑀲 𑀚𑁄𑀢𑀺𑀢𑀢𑁆𑀢𑀸. 𑀇𑀢𑀭𑀸 𑀤𑁆𑀯𑁂 𑀢𑀻𑀭𑀡𑀧𑀳𑀸𑀦𑀧𑀭𑀺𑀜𑁆𑀜𑀸𑀧𑀺 𑀆𑀕𑀢𑀸 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀢𑀸𑀲𑀁 𑀅𑀪𑀺𑀜𑁆𑀜𑁂𑀬𑁆𑀬𑀥𑀫𑁆𑀫𑀯𑀺𑀲𑀬𑀢𑁆𑀢𑀸 𑀜𑀸𑀡𑀲𑁆𑀲 𑀘 𑀢𑀻𑀭𑀡𑀧𑀳𑀸𑀦𑀧𑀭𑀺𑀜𑁆𑀜𑀸𑀲𑀫𑁆𑀪𑀯𑀢𑁄. 𑀧𑀭𑀺𑀜𑁆𑀜𑁂𑀬𑁆𑀬𑀧𑀤𑁂 𑀢𑀻𑀭𑀡𑀧𑀭𑀺𑀜𑁆𑀜𑀸𑀯 𑀆𑀕𑀢𑀸, 𑀧𑀳𑀸𑀢𑀩𑁆𑀩𑀧𑀤𑁂 𑀧𑀳𑀸𑀦𑀧𑀭𑀺𑀜𑁆𑀜𑀸𑀯 𑀆𑀕𑀢𑀸𑀢𑀺 𑀬𑁄𑀚𑀦𑀸. 𑀇𑀢𑀭𑀸𑀧𑀺 𑀤𑁆𑀯𑁂 𑀕𑀳𑀺𑀢𑀸𑀬𑁂𑀯 𑀢𑀸𑀳𑀺 𑀯𑀺𑀦𑀸 𑀅𑀢𑁆𑀣𑀲𑀺𑀤𑁆𑀥𑀺𑀬𑀸 𑀅𑀪𑀸𑀯𑀢𑁄. 𑀧𑀘𑁆𑀘𑀓𑁆𑀔𑀁 𑀓𑀸𑀢𑀩𑁆𑀩𑀁 𑀆𑀭𑀫𑁆𑀫𑀡𑀢𑁄 𑀅𑀲𑀫𑁆𑀫𑁄𑀳𑀢𑁄 𑀧𑀝𑀺𑀯𑀺𑀚𑁆𑀛𑀦𑁂𑀦. 𑀅𑀯𑀼𑀢𑁆𑀢𑀸𑀧𑀺 𑀕𑀳𑀺𑀢𑀸𑀬𑁂𑀯 𑀧𑀭𑀺𑀚𑀸𑀦𑀦𑀲𑁆𑀲 𑀬𑀸𑀯𑀤𑁂𑀯 𑀧𑀳𑀸𑀦𑀢𑁆𑀣𑀢𑁆𑀢𑀸. 𑀏𑀓𑀲𑀪𑀸𑀯𑁂𑀦 𑀯𑀺𑀦𑀸𑀪𑀸𑀯𑁄 𑀅𑀦𑁂𑀓𑀕𑁆𑀕𑀝𑁆𑀞𑁄. 𑀉𑀧𑀲𑀝𑁆𑀞𑀭𑁄𑀕𑁂𑀦 𑀯𑀺𑀬 𑀅𑀦𑁆𑀢𑁄 𑀏𑀯 𑀅𑀪𑀺𑀳𑀢𑀲𑀩𑁆𑀩𑀢𑀸 𑀉𑀧𑀳𑀢𑀝𑁆𑀞𑁄.

𑀲𑀩𑁆𑀩𑀅𑀦𑀺𑀘𑁆𑀘𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀞𑀫𑁄 𑀧𑀡𑁆𑀡𑀸𑀲𑀓𑁄.

𑁬. 𑀅𑀯𑀺𑀚𑁆𑀚𑀸𑀯𑀕𑁆𑀕𑀯𑀡𑁆𑀡𑀦𑀸

𑁫𑁩-𑁬𑁨. 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀅𑀜𑁆𑀜𑀸𑀡𑀁 𑀢𑀧𑁆𑀧𑀝𑀺𑀘𑁆𑀙𑀸𑀤𑀓𑀲𑀫𑁆𑀫𑁄𑀳𑁄. 𑀅𑀯𑀺𑀦𑁆𑀤𑀺𑀬𑀁 𑀯𑀺𑀦𑁆𑀤𑀢𑀺, 𑀯𑀺𑀦𑁆𑀤𑀺𑀬𑀁 𑀦 𑀯𑀺𑀦𑁆𑀤𑀢𑀻𑀢𑀺 𑀓𑀢𑁆𑀯𑀸 𑀯𑀺𑀚𑁆𑀚𑀸𑀬 𑀧𑀝𑀺𑀧𑀓𑁆𑀔𑁄𑀯 𑀅𑀯𑀺𑀚𑁆𑀚𑀸. 𑀯𑀺𑀚𑁆𑀚𑀸𑀬 𑀉𑀧𑁆𑀧𑀦𑁆𑀦𑀸𑀬 𑀅𑀦𑀯𑀲𑁂𑀲𑀢𑁄 𑀅𑀯𑀺𑀚𑁆𑀚𑀸 𑀧𑀳𑀻𑀬𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀚𑁆𑀚𑀸𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀯𑀺𑀚𑁆𑀚𑀸’’𑀢𑀺 ¶ 𑀆𑀳. 𑀦 𑀓𑁂𑀯𑀮𑀁 ¶ 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦𑁂𑀯 𑀫𑀕𑁆𑀕𑀯𑀼𑀝𑁆𑀞𑀸𑀦𑀁, 𑀅𑀣 𑀔𑁄 𑀇𑀢𑀭𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀤𑀼𑀓𑁆𑀔𑀸…𑀧𑁂… 𑀧𑀳𑀻𑀬𑀢𑀺𑀬𑁂𑀯𑀸’’𑀢𑀺 𑀆𑀳. 𑀲𑀩𑁆𑀩𑀢𑁆𑀣𑀸𑀢𑀺 𑀉𑀧𑀭𑀺𑀲𑀼𑀢𑁆𑀢𑀦𑁆𑀢𑁂 𑀲𑀦𑁆𑀥𑀸𑀬𑀸𑀳. 𑀢𑀢𑁄 𑀅𑀧𑀭𑁂𑀧𑀺 𑀢𑀁𑀅𑀢𑁆𑀣𑀮𑀓𑁆𑀔𑀡𑀯𑀲𑁂𑀦 𑀓𑀣𑀺𑀢𑀲𑀼𑀢𑁆𑀢𑀦𑁆𑀢𑁂𑀧𑀺. 𑀢𑀸𑀦𑀺𑀧𑀺 𑀳𑀺 𑀢𑀣𑀸 𑀩𑀼𑀚𑁆𑀛𑀦𑀓𑀧𑀼𑀕𑁆𑀕𑀮𑀸𑀦𑀫𑀚𑁆𑀛𑀸𑀲𑀬𑁂𑀦 𑀯𑀼𑀢𑁆𑀢𑀸𑀦𑀻𑀢𑀺.

𑀅𑀯𑀺𑀚𑁆𑀚𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀫𑀺𑀕𑀚𑀸𑀮𑀯𑀕𑁆𑀕𑁄

𑁧. 𑀧𑀞𑀫𑀫𑀺𑀕𑀚𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁩. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀤𑀲𑁆𑀲𑀦𑀓𑀺𑀘𑁆𑀘𑀦𑁆𑀢𑀺 𑀯𑀼𑀢𑁆𑀢𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀧𑀲𑁆𑀲𑀺𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀇𑀝𑁆𑀞𑀸𑀭𑀫𑁆𑀫𑀡𑀪𑀽𑀢𑀸’’𑀢𑀺. 𑀓𑀫𑀦𑀻𑀬𑀸𑀢𑀺 𑀓𑀸𑀫𑁂𑀢𑀩𑁆𑀩𑀸. 𑀫𑀦𑀁 𑀅𑀧𑁆𑀧𑀸𑀬𑀦𑁆𑀢𑀻𑀢𑀺 𑀫𑀦𑀸𑀧𑀸𑀢𑀺 𑀆𑀳 ‘‘𑀫𑀦𑀯𑀟𑁆𑀠𑀦𑀓𑀸’’𑀢𑀺. 𑀧𑀺𑀬𑀸𑀬𑀺𑀢𑀩𑁆𑀩𑀲𑀪𑀸𑀯𑀸 𑀧𑀺𑀬𑀭𑀽𑀧𑀸. 𑀓𑀸𑀫𑀽𑀧𑀲𑀁𑀳𑀺𑀢𑀸𑀢𑀺 𑀓𑀸𑀫𑀧𑀝𑀺𑀲𑀁𑀬𑀼𑀢𑁆𑀢𑀸. 𑀆𑀮𑀫𑁆𑀩𑀺𑀢𑀩𑁆𑀩𑀢𑀸 𑀏𑀯 𑀘𑁂𑀢𑁆𑀣 𑀉𑀧𑀲𑀁𑀳𑀺𑀢𑀢𑀸𑀢𑀺 ‘‘𑀆𑀭𑀫𑁆𑀫𑀡𑀁 𑀓𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀡𑁆𑀳𑀸𑀲𑀗𑁆𑀔𑀸𑀢𑀸 𑀦𑀦𑁆𑀤𑀻 𑀢𑀡𑁆𑀳𑀸𑀦𑀦𑁆𑀤𑀻, 𑀦 𑀢𑀼𑀝𑁆𑀞𑀺𑀦𑀦𑁆𑀤𑀻𑀬𑁂𑀯 ‘‘𑀦𑀦𑁆𑀤𑀺𑀁 𑀘𑀭𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀕𑀸𑀫𑀦𑁆𑀢𑀦𑁆𑀢𑀺 𑀕𑀸𑀫𑀲𑀫𑀻𑀧𑀁. ‘‘𑀅𑀦𑀼𑀧𑀘𑀸𑀭𑀝𑁆𑀞𑀸𑀦’’𑀦𑁆𑀢𑀺 𑀯𑀢𑁆𑀯𑀸 𑀢𑀁 𑀤𑀲𑁆𑀲𑁂𑀢𑀺 ‘‘𑀬𑀢𑁆𑀣𑀸’’𑀢𑀺𑀆𑀤𑀺𑀦𑀸.

𑀏𑀢𑁆𑀣𑀸𑀢𑀺 𑀬𑀣𑀸𑀦𑀻𑀳𑀢𑁂 𑀧𑀸𑀞𑁂. ‘‘𑀇𑀫𑀁 𑀏𑀓𑀁 𑀧𑀭𑀺𑀬𑀸𑀬𑀁 𑀞𑀧𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁 𑀢𑀲𑁆𑀲 ‘‘𑀧𑀦𑁆𑀢𑀸𑀦𑀻’’𑀢𑀺𑀧𑀤𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀅𑀧𑁆𑀧𑀲𑀤𑁆𑀤𑀸𑀦𑀺 𑀅𑀧𑁆𑀧𑀦𑀺𑀕𑁆𑀖𑁄𑀲𑀸𑀦𑀻𑀢𑀺 𑀏𑀢𑁆𑀣 𑀅𑀧𑁆𑀧-𑀲𑀤𑁆𑀤𑁄 𑀅𑀪𑀸𑀯𑀢𑁆𑀣𑁄.

𑀧𑀞𑀫𑀫𑀺𑀕𑀚𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀫𑀺𑀤𑁆𑀥𑀺𑀮𑁄𑀓𑀧𑀜𑁆𑀳𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁮. 𑀆𑀬𑀸𑀘𑀦𑀲𑀼𑀢𑁆𑀢𑀢𑁄 𑀧𑀝𑁆𑀞𑀸𑀬𑀸𑀢𑀺 𑀫𑀺𑀕𑀚𑀸𑀮𑀯𑀕𑁆𑀕𑁂 𑀤𑀼𑀢𑀺𑀬𑀲𑀼𑀢𑁆𑀢𑀢𑁄 𑀧𑀝𑁆𑀞𑀸𑀬. 𑀧𑀞𑀫𑀲𑀼𑀢𑁆𑀢𑁂 𑀧𑀦 𑀤𑀼𑀢𑀺𑀬𑀓𑀯𑀺𑀳𑀸𑀭𑀸𑀤𑀺𑀪𑀸𑀯𑁄 𑀯𑀼𑀢𑁆𑀢𑁄𑀢𑀺.

𑀲𑀫𑀺𑀤𑁆𑀥𑀺𑀮𑁄𑀓𑀧𑀜𑁆𑀳𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀉𑀧𑀲𑁂𑀦𑀆𑀲𑀻𑀯𑀺𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁬𑁯. 𑀕𑀳𑁂𑀢𑁆𑀯𑀸𑀢𑀺 ¶ ¶ 𑀧𑀸𑀭𑀼𑀧𑀦𑀲𑁆𑀲 𑀲𑀺𑀣𑀺𑀮𑀓𑀭𑀡𑁂𑀦 𑀯𑀻𑀫𑀁𑀲𑀢𑁄 𑀫𑁄𑀘𑁂𑀢𑁆𑀯𑀸. 𑀮𑁂𑀡𑀘𑁆𑀙𑀸𑀬𑀸𑀬𑀸𑀢𑀺 𑀧𑀼𑀭𑀺𑀫𑀤𑀺𑀲𑀸𑀬 𑀮𑁂𑀡𑀘𑁆𑀙𑀸𑀬𑀸𑀬𑀁. 𑀧𑀢𑀺𑀢𑁆𑀯𑀸𑀢𑀺 𑀮𑁂𑀡𑀘𑁆𑀙𑀤𑀦𑀢𑁄 𑀪𑀲𑁆𑀲𑀺𑀢𑁆𑀯𑀸. 𑀨𑀼𑀝𑁆𑀞𑀯𑀺𑀲𑁄𑀢𑀺 𑀘𑀢𑀽𑀲𑀼 𑀆𑀲𑀻𑀯𑀺𑀲𑁂𑀲𑀼 𑀲𑁄 𑀨𑀼𑀝𑁆𑀞𑀯𑀺𑀲𑁄. 𑀢𑁂𑀦𑀸𑀳 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀧𑀭𑀺𑀬𑀸𑀤𑀺𑀬𑀫𑀸𑀦𑀫𑁂𑀯𑀸𑀢𑀺 𑀔𑁂𑀧𑁂𑀦𑁆𑀢𑀫𑁂𑀯, 𑀯𑀺𑀦𑀸𑀲𑁂𑀦𑁆𑀢𑀫𑁂𑀯𑀸𑀢𑀺 𑀅𑀢𑁆𑀣𑁄. 𑀬𑀣𑀸𑀧𑀭𑀺𑀘𑁆𑀙𑁂𑀤𑁂𑀦𑀸𑀢𑀺 𑀅𑀢𑁆𑀢𑀦𑁄 𑀯𑀺𑀲𑀧𑀭𑀺𑀘𑁆𑀙𑁂𑀤𑀸𑀦𑀼𑀭𑀽𑀧𑀁. 𑀅𑀜𑁆𑀜𑀣𑀸𑀪𑀸𑀯𑀦𑁆𑀢𑀺 𑀯𑀟𑁆𑀠𑀪𑀸𑀯𑀸𑀤𑀺𑀧𑀓𑀢𑀺𑀚𑀳𑀦𑀁. 𑀲𑀪𑀸𑀯𑀯𑀺𑀕𑀫𑁄𑀢𑀺 𑀯𑀺𑀦𑀸𑀲𑁄.

𑀉𑀧𑀲𑁂𑀦𑀆𑀲𑀻𑀯𑀺𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀉𑀧𑀯𑀸𑀡𑀲𑀦𑁆𑀤𑀺𑀝𑁆𑀞𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁦. 𑀭𑀽𑀧𑀁 𑀧𑀝𑀺𑀲𑀁𑀯𑀺𑀤𑀺𑀢𑀁 𑀓𑀭𑁄𑀢𑀺 𑀜𑀸𑀢𑀧𑀭𑀺𑀜𑁆𑀜𑀸𑀯𑀲𑁂𑀦. 𑀭𑀽𑀧𑀭𑀸𑀕𑀦𑁆𑀢𑀺 𑀦𑀻𑀮𑀸𑀤𑀺𑀪𑁂𑀤𑁂 𑀭𑀽𑀧𑀥𑀫𑁆𑀫𑁂 𑀭𑀸𑀕𑀁. 𑀧𑀝𑀺𑀲𑀁𑀯𑀺𑀤𑀺𑀢𑀁 𑀓𑀭𑁄𑀢𑀺 ‘‘𑀅𑀬𑀁 𑀫𑁂 𑀭𑀸𑀕𑁄 𑀅𑀧𑁆𑀧𑀳𑀻𑀦𑁄’’𑀢𑀺. 𑀏𑀢𑁂𑀦 𑀲𑁂𑀓𑁆𑀔𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀸 𑀓𑀣𑀺𑀢𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀏𑀯𑀫𑁆𑀧𑀺 𑀔𑁄, 𑀉𑀧𑀯𑀸𑀡, 𑀲𑀦𑁆𑀤𑀺𑀝𑁆𑀞𑀺𑀓𑁄 𑀥𑀫𑁆𑀫𑁄 𑀳𑁄𑀢𑀻’’𑀢𑀺𑀆𑀤𑀺. 𑀭𑀽𑀧𑀭𑀸𑀕𑀁 𑀧𑀝𑀺𑀲𑀁𑀯𑀺𑀤𑀺𑀢𑀁 𑀓𑀭𑁄𑀢𑀺 ‘‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀭𑀽𑀧𑁂𑀲𑀼 𑀭𑀸𑀕𑁄’’𑀢𑀺 𑀧𑀚𑀸𑀦𑀸𑀢𑀺. 𑀅𑀲𑁂𑀓𑁆𑀔𑀸𑀦𑀁 𑀳𑀸𑀬𑀁 𑀧𑀘𑁆𑀘𑀯𑁂𑀓𑁆𑀔𑀡𑀸.

𑀉𑀧𑀯𑀸𑀡𑀲𑀦𑁆𑀤𑀺𑀝𑁆𑀞𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀞𑀫𑀙𑀨𑀲𑁆𑀲𑀸𑀬𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁧. 𑀨𑀲𑁆𑀲𑀸𑀓𑀭𑀸𑀦𑀦𑁆𑀢𑀺 𑀙𑀦𑁆𑀦𑀁 𑀨𑀲𑁆𑀲𑀸𑀦𑀁 𑀆𑀓𑀭𑀸𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀸𑀦𑀁, 𑀘𑀓𑁆𑀔𑀸𑀤𑀻𑀦𑀦𑁆𑀢𑀺 𑀅𑀢𑁆𑀣𑁄. 𑀦𑀝𑁆𑀞𑁄 𑀦𑀸𑀫 𑀅𑀳𑀦𑁆𑀢𑀺 𑀯𑀤𑀢𑀺, 𑀬𑁄 𑀙𑀦𑁆𑀦𑀁 𑀨𑀲𑁆𑀲𑀸𑀬𑀢𑀦𑀸𑀦𑀁 𑀲𑀫𑀼𑀤𑀬𑀸𑀤𑀺𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀲𑁄 𑀯𑀼𑀲𑀺𑀢𑀯𑀸, 𑀇𑀢𑀭𑁄 𑀅𑀯𑀼𑀲𑀺𑀢𑀯𑀸 𑀅𑀳𑀜𑁆𑀘 𑀢𑀸𑀤𑀺𑀲𑁄𑀢𑀺. 𑀅𑀬𑀫𑁂𑀯𑀸𑀢𑀺 𑀅𑀬𑀁 𑀘𑀓𑁆𑀔𑀼𑀲𑁆𑀫𑀺𑀁 ‘‘𑀦𑁂𑀢𑀁 𑀫𑀫𑀸’’𑀢𑀺𑀆𑀤𑀺𑀦𑀸 𑀢𑀺𑀡𑁆𑀡𑀁 𑀕𑀸𑀳𑀸𑀦𑀁 𑀅𑀪𑀸𑀯𑁄 𑀏𑀯.

𑀧𑀞𑀫𑀙𑀨𑀲𑁆𑀲𑀸𑀬𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀼𑀢𑀺𑀬𑀙𑀨𑀲𑁆𑀲𑀸𑀬𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁨. 𑀅𑀧𑀼𑀦𑀩𑁆𑀪𑀯𑁄𑀢𑀺 ¶ 𑀧𑀼𑀦𑀩𑁆𑀪𑀯𑀸𑀪𑀸𑀯𑁄.

𑁧𑁧. 𑀢𑀢𑀺𑀬𑀙𑀨𑀲𑁆𑀲𑀸𑀬𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁭𑁩. 𑀧𑀦𑀲𑁆𑀲𑀲𑀦𑁆𑀢𑀺 ¶ 𑀏𑀓𑀁𑀲𑁂𑀦 𑀦𑀝𑁆𑀞𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀆𑀳 ‘‘𑀅𑀢𑀺𑀦𑀝𑁆𑀞𑁄’’𑀢𑀺, 𑀥𑀼𑀭𑀢𑁄 𑀏𑀯 𑀦𑀝𑁆𑀞𑁄𑀢𑀺 𑀅𑀢𑁆𑀣𑁄.

𑀢𑀢𑀺𑀬𑀙𑀨𑀲𑁆𑀲𑀸𑀬𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀺𑀕𑀚𑀸𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀕𑀺𑀮𑀸𑀦𑀯𑀕𑁆𑀕𑁄

𑁧-𑁫. 𑀧𑀞𑀫𑀕𑀺𑀮𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁭𑁪-𑁭𑁮. 𑀅𑀧𑁆𑀧𑀜𑁆𑀜𑀸𑀢𑁄𑀢𑀺 𑀦𑀸𑀫𑀕𑁄𑀢𑁆𑀢𑀢𑁄 𑀘𑁂𑀯 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀘 𑀅𑀧𑁆𑀧𑀜𑁆𑀜𑀸𑀢𑁄 𑀅𑀯𑀺𑀲𑁆𑀲𑀼𑀢𑁄. 𑀣𑁂𑀭𑀫𑀚𑁆𑀛𑀺𑀫𑀪𑀸𑀯𑀁 𑀅𑀧𑁆𑀧𑀢𑁆𑀢𑀢𑀸𑀬 𑀦𑀯𑁄.

𑀧𑀞𑀫𑀕𑀺𑀮𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀤𑀼𑀢𑀺𑀬𑀅𑀯𑀺𑀚𑁆𑀚𑀸𑀧𑀳𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁦. 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀅𑀪𑀺𑀦𑀺𑀯𑀺𑀲𑀦𑀁 𑀅𑀪𑀺𑀦𑀺𑀯𑁂𑀲𑁄, 𑀲𑁄 𑀏𑀯 𑀥𑀫𑁆𑀫𑀲𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀢𑁄 𑀆𑀫𑀲𑀦𑀢𑁄 𑀧𑀭𑀸𑀫𑀸𑀲𑁄, 𑀲𑁄 𑀏𑀯 𑀕𑀸𑀳𑁄. 𑀢𑁂𑀦 𑀅𑀪𑀺𑀦𑀺𑀯𑁂𑀲𑀧𑀭𑀸𑀫𑀸𑀲𑀕𑁆𑀕𑀸𑀳𑁂𑀦 𑀕𑀡𑁆𑀳𑀺𑀢𑀼𑀁 𑀦 𑀬𑀼𑀢𑁆𑀢𑀸 𑀅𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑀢𑁆𑀢𑀸. 𑀲𑀗𑁆𑀔𑀸𑀭𑀸 𑀏𑀯 𑀧𑀯𑀢𑁆𑀢𑀺𑀬𑀸 𑀓𑀸𑀭𑀡𑀪𑀸𑀯𑀢𑁄 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀸𑀦𑀺. 𑀬𑁄 𑀲𑀗𑁆𑀔𑀸𑀭𑁂𑀲𑀼 𑀅𑀧𑀭𑀺𑀜𑁆𑀜𑀸𑀢𑀸𑀪𑀺𑀦𑀺𑀯𑁂𑀲𑁂𑀦 𑀧𑀲𑁆𑀲𑀺𑀢𑀩𑁆𑀩𑁄 𑀅𑀢𑁆𑀢𑀸𑀓𑀸𑀭𑁄, 𑀲𑁄 𑀦 𑀳𑁄𑀢𑀻𑀢𑀺 𑀅𑀜𑁆𑀜𑁄 𑀅𑀦𑀢𑁆𑀢𑀸𑀓𑀸𑀭𑁄, 𑀢𑀢𑁄 𑀅𑀜𑁆𑀜𑀢𑁄 𑀧𑀲𑁆𑀲𑀢𑀺. 𑀧𑀭𑀺𑀜𑁆𑀜𑀸𑀢𑀸𑀪𑀺𑀦𑀺𑀯𑁂𑀲𑁄𑀢𑀺 𑀢𑀻𑀭𑀡𑀧𑀭𑀺𑀜𑁆𑀜𑀸𑀬 𑀧𑀭𑀺𑀘𑁆𑀙𑀺𑀚𑁆𑀚 𑀜𑀸𑀢𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑁄. 𑀧𑀭𑀺𑀜𑁆𑀜𑀸𑀢𑀸𑀪𑀺𑀦𑀺𑀯𑁂𑀲𑁄𑀢𑀺 𑀯𑀸 𑀧𑀭𑀺𑀜𑁆𑀜𑀸𑀢𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁄. 𑀯𑀺𑀧𑀲𑁆𑀲𑀦𑀸𑀢𑀺 𑀅𑀭𑀽𑀧𑀲𑀢𑁆𑀢𑀓𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀬 𑀧𑀭𑀺𑀚𑀸𑀦𑀺𑀢𑀩𑁆𑀩𑀸.

𑀤𑀼𑀢𑀺𑀬𑀅𑀯𑀺𑀚𑁆𑀚𑀸𑀧𑀳𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀫𑁆𑀩𑀳𑀼𑀮𑀪𑀺𑀓𑁆𑀔𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁧. 𑀓𑁂𑀯𑀮𑀦𑁆𑀢𑀺 ¶ 𑀇𑀢𑀭𑀮𑀓𑁆𑀔𑀡𑁂𑀳𑀺 𑀅𑀯𑁄𑀫𑀺𑀲𑁆𑀲𑀁.

𑁧𑁦. 𑀨𑀕𑁆𑀕𑀼𑀦𑀧𑀜𑁆𑀳𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁩. 𑀢𑀡𑁆𑀳𑀸𑀬 ¶ 𑀧𑀳𑀻𑀦𑀸𑀬 𑀤𑀺𑀝𑁆𑀞𑀺𑀫𑀸𑀦𑀸𑀧𑀺 𑀧𑀳𑀻𑀦𑀸 𑀏𑀯𑀸𑀢𑀺 ‘‘𑀢𑀡𑁆𑀳𑀸𑀧𑀧𑀜𑁆𑀘𑀲𑁆𑀲 𑀙𑀺𑀦𑁆𑀦𑀢𑁆𑀢𑀸 𑀙𑀺𑀦𑁆𑀦𑀧𑀧𑀜𑁆𑀘𑁂’’𑀢𑀺 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄. 𑀇𑀥 𑀲𑀢𑁆𑀢𑀯𑁄𑀳𑀸𑀭𑁄 𑀘𑀓𑁆𑀔𑀸𑀤𑀻𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀏𑀯 𑀳𑁄𑀢𑀺, 𑀢𑀲𑁆𑀫𑀸 𑀧𑀭𑀺𑀦𑀺𑀩𑁆𑀩𑀼𑀢𑀸𑀦𑀜𑁆𑀘 𑀯𑁄𑀳𑀸𑀭𑁄 𑀘𑀓𑁆𑀔𑀸𑀤𑀻𑀲𑀼 𑀲𑀦𑁆𑀦𑀺𑀲𑁆𑀲𑀬𑁂𑀦𑁂𑀯, 𑀦𑀸𑀜𑁆𑀜𑀣𑀸𑀢𑀺 𑀅𑀢𑀺𑀓𑁆𑀓𑀦𑁆𑀢𑀩𑀼𑀤𑁆𑀥𑁂𑀳𑀺 𑀧𑀭𑀺𑀳𑀭𑀺𑀢𑀸𑀦𑀺 𑀘𑀓𑁆𑀔𑀼𑀲𑁄𑀢𑀸𑀤𑀻𑀦𑀺 𑀧𑀼𑀘𑁆𑀙𑀸𑀫𑀻𑀢𑀺 𑀧𑀼𑀘𑁆𑀙𑀢𑀺 ‘‘𑀅𑀢𑁆𑀣𑀺 𑀦𑀼 𑀔𑁄 𑀪𑀦𑁆𑀢𑁂’’𑀢𑀺𑀆𑀤𑀺𑀦𑀸. 𑀘𑀓𑁆𑀔𑀼𑀲𑁄𑀢𑀸𑀤𑀺𑀯𑀝𑁆𑀝𑀁 𑀯𑀝𑁆𑀝𑁂 𑀧𑀯𑀢𑁆𑀢𑁂𑀬𑁆𑀬.

𑀨𑀕𑁆𑀕𑀼𑀦𑀧𑀜𑁆𑀳𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀕𑀺𑀮𑀸𑀦𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀙𑀦𑁆𑀦𑀯𑀕𑁆𑀕𑁄

𑁧. 𑀧𑀮𑁄𑀓𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁪. 𑀅𑀦𑀺𑀘𑁆𑀘𑀮𑀓𑁆𑀔𑀡𑀫𑁂𑀯 𑀓𑀣𑀺𑀢𑀁, 𑀢𑀜𑁆𑀘 𑀧𑀭𑀺𑀬𑀸𑀬𑁂𑀦, 𑀅𑀦𑀺𑀘𑁆𑀘𑀮𑀓𑁆𑀔𑀡𑁂 𑀓𑀣𑀺𑀢𑁂 𑀇𑀢𑀭𑀮𑀓𑁆𑀔𑀡𑀸𑀦𑀺 𑀓𑀣𑀺𑀢𑀸𑀦𑁂𑀯 𑀳𑁄𑀦𑁆𑀢𑀺 𑀩𑁆𑀬𑀪𑀺𑀘𑀸𑀭𑀪𑀸𑀯𑀢𑁄.

𑁨. 𑀲𑀼𑀜𑁆𑀜𑀢𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁫. 𑀅𑀢𑁆𑀢𑀦𑁄 𑀇𑀤𑀦𑁆𑀢𑀺 𑀅𑀢𑁆𑀢𑀦𑀺𑀬𑀦𑁆𑀢𑀺 𑀆𑀳 ‘‘𑀅𑀢𑁆𑀢𑀦𑁄 𑀲𑀦𑁆𑀢𑀓𑁂𑀦𑀸’’𑀢𑀺.

𑁩. 𑀲𑀁𑀔𑀺𑀢𑁆𑀢𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁬. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀔𑀦𑁆𑀥𑀺𑀬𑀯𑀕𑁆𑀕𑁂 𑀔𑀦𑁆𑀥𑀯𑀲𑁂𑀦 𑀆𑀕𑀢𑀁, 𑀇𑀥 𑀆𑀬𑀢𑀦𑀯𑀲𑁂𑀦𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄.

𑁪. 𑀙𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁭. 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀳𑀺 𑀧𑀝𑀺𑀲𑀮𑁆𑀮𑀻𑀬𑀢𑀺 𑀏𑀢𑁂𑀦𑀸𑀢𑀺 𑀧𑀝𑀺𑀲𑀮𑁆𑀮𑀸𑀦𑀁, 𑀨𑀮𑀲𑀫𑀸𑀧𑀢𑁆𑀢𑀺. 𑀚𑀻𑀯𑀺𑀢𑀳𑀸𑀭𑀓𑀲𑀢𑁆𑀣𑀁 ¶ 𑀚𑀻𑀯𑀺𑀢𑀲𑁆𑀲 𑀳𑀭𑀡𑀢𑁄, 𑀲𑀢𑁆𑀢𑀸𑀦𑀜𑁆𑀘 𑀲𑀲𑀦𑀢𑁄 𑀳𑀺𑀁𑀲𑀦𑀢𑁄 ¶ . 𑀧𑀭𑀺𑀘𑀭𑀺𑀢𑁄𑀢𑀺 𑀧𑀬𑀺𑀭𑀼𑀧𑀸𑀲𑀺𑀢𑁄. 𑀢𑁂𑀦 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀺𑀦𑁆𑀢𑀺 𑀤𑀻𑀧𑁂𑀢𑀺.

𑀅𑀦𑀼𑀧𑀯𑀚𑁆𑀚𑀦𑁆𑀢𑀺 𑀧𑀭𑁂𑀳𑀺 𑀦 𑀉𑀧𑀯𑀤𑀺𑀢𑀩𑁆𑀩𑀁. 𑀢𑀁 𑀧𑀦𑁂𑀢𑁆𑀣 𑀆𑀬𑀢𑀺𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀪𑀸𑀯𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀅𑀧𑁆𑀧𑀯𑀢𑁆𑀢𑀺𑀓’’𑀦𑁆𑀢𑀺. ‘‘𑀦𑁂𑀢𑀁 𑀫𑀫𑀸’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑁄 𑀅𑀭𑀳𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀣𑁂𑀲𑀺. 𑀧𑀼𑀣𑀼𑀚𑁆𑀚𑀦𑀪𑀸𑀯𑀫𑁂𑀯 𑀤𑀻𑀧𑁂𑀦𑁆𑀢𑁄 𑀯𑀤𑀢𑀺 𑀅𑀓𑀢𑀓𑀺𑀘𑁆𑀘𑀪𑀸𑀯𑀤𑀻𑀧𑀦𑁂𑀦. 𑀓𑀺𑀜𑁆𑀘𑀸𑀧𑀺 𑀣𑁂𑀭𑁄 𑀧𑀼𑀘𑁆𑀙𑀺𑀢𑀁 𑀧𑀜𑁆𑀳𑀁 𑀅𑀭𑀳𑀢𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀣𑁂𑀲𑀺, ‘‘𑀦 𑀲𑀫𑀦𑀼𑀧𑀲𑁆𑀲𑀸𑀫𑀻’’𑀢𑀺 𑀧𑀦 𑀯𑀤𑀦𑁆𑀢𑁄 𑀓𑀺𑀜𑁆𑀘𑀺 𑀦𑀺𑀧𑁆𑀨𑀢𑁆𑀢𑀺𑀁 𑀦 𑀓𑀣𑁂𑀲𑀺, 𑀢𑀲𑁆𑀫𑀸 ‘‘𑀇𑀤𑀫𑁆𑀧𑀺 𑀫𑀦𑀲𑀺 𑀓𑀸𑀢𑀩𑁆𑀩’’𑀦𑁆𑀢𑀺 𑀇𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄.

𑀓𑀺𑀮𑁂𑀲𑀧𑀲𑁆𑀲𑀤𑁆𑀥𑀻𑀢𑀺 𑀓𑀺𑀮𑁂𑀲𑀧𑀭𑀺𑀴𑀸𑀳𑀯𑀽𑀧𑀲𑀫𑁄. 𑀪𑀯𑀢𑁆𑀣𑀸𑀬 𑀧𑀼𑀦 𑀪𑀯𑀢𑁆𑀣𑀸𑀬. 𑀆𑀮𑀬𑀦𑀺𑀓𑀦𑁆𑀢𑀺 𑀧𑀭𑀺𑀬𑀼𑀝𑁆𑀞𑀸𑀦𑁂𑀢𑀺 𑀪𑀯𑀦𑁆𑀢𑀭𑁂 𑀅𑀧𑁂𑀓𑁆𑀔𑀸𑀲𑀜𑁆𑀜𑀺𑀢𑁂 𑀆𑀮𑀬𑁂 𑀦𑀺𑀓𑀦𑁆𑀢𑀺𑀬𑀸 𑀘 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀢𑁆𑀢𑀺𑀬𑀸. 𑀅𑀲𑀢𑀺 𑀅𑀯𑀺𑀚𑁆𑀚𑀫𑀸𑀦𑀸𑀬. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀜𑁆𑀜𑀪𑀯𑀢𑁄 𑀇𑀥𑀸𑀕𑀫𑀦𑀁 𑀆𑀕𑀢𑀺 𑀦𑀸𑀫. 𑀘𑀼𑀢𑀺𑀯𑀲𑁂𑀦 𑀕𑀫𑀦𑀦𑁆𑀢𑀺 𑀘𑀯𑀦𑀯𑀲𑁂𑀦 𑀇𑀢𑁄 𑀕𑀢𑀺. 𑀅𑀦𑀼𑀭𑀽𑀧𑀕𑀫𑀦𑀁 𑀕𑀢𑀺 𑀦𑀸𑀫 𑀢𑀤𑀼𑀪𑀬𑀁 𑀦 𑀳𑁄𑀢𑀺. 𑀘𑀼𑀢𑀽𑀧𑀧𑀸𑀢𑁄 𑀅𑀧𑀭𑀸𑀧𑀭𑀪𑀯𑀦𑀯𑀲𑁂𑀦 𑀘𑀼𑀢𑀺, 𑀉𑀧𑀧𑀚𑁆𑀚𑀦𑀯𑀲𑁂𑀦 𑀉𑀧𑀧𑀸𑀢𑁄, 𑀢𑀤𑀼𑀪𑀬𑀫𑁆𑀧𑀺 𑀦 𑀳𑁄𑀢𑀺. 𑀏𑀯𑀁 𑀧𑀦 𑀘𑀼𑀢𑀽𑀧𑀧𑀸𑀢𑁂 𑀅𑀲𑀢𑀺 𑀦𑁂𑀯𑀺𑀥 𑀦 𑀇𑀥 𑀮𑁄𑀓𑁂. 𑀦 𑀳𑀼𑀭𑀁 𑀦 𑀧𑀭𑀮𑁄𑀓𑁂 𑀳𑁄𑀢𑀺. 𑀢𑀢𑁄 𑀏𑀯 𑀦 𑀉𑀪𑀬𑀢𑁆𑀣 𑀳𑁄𑀢𑀺. 𑀅𑀬𑀫𑁂𑀯 𑀅𑀦𑁆𑀢𑁄 𑀅𑀬𑀁 𑀇𑀥𑀮𑁄𑀓𑁂 𑀧𑀭𑀮𑁄𑀓𑁂 𑀘 𑀅𑀪𑀸𑀯𑁄𑀬𑁂𑀯 𑀤𑀼𑀓𑁆𑀔𑀲𑁆𑀲 𑀧𑀭𑀺𑀬𑁄𑀲𑀸𑀦𑀁. 𑀅𑀬𑀫𑁂𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑁄 𑀏𑀯 𑁋 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀧𑀸𑀞𑁂 𑀧𑀭𑀫𑁆𑀧𑀭𑀸𑀕𑀢𑁄 𑀧𑀫𑀸𑀡𑀪𑀽𑀢𑁄 𑀅𑀢𑁆𑀣𑁄.

𑀬𑁂 𑀧𑀦𑀸𑀢𑀺 𑀲𑀫𑁆𑀫𑀯𑀸𑀤𑀺𑀦𑁄 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀦𑁆𑀢𑀭𑀸𑀪𑀯𑀁 𑀇𑀘𑁆𑀙𑀦𑁆𑀢𑀺 ‘‘𑀏𑀯𑀁 𑀪𑀯𑁂𑀦 𑀪𑀯𑀦𑁆𑀢𑀭𑀲𑀫𑁆𑀩𑀦𑁆𑀥𑁄 𑀬𑀼𑀚𑁆𑀚𑁂𑀬𑁆𑀬𑀸’’𑀢𑀺. 𑀦𑀺𑀭𑀢𑁆𑀣𑀓𑀁 𑀅𑀦𑁆𑀢𑀭𑀸𑀪𑀯𑀲𑁆𑀲 𑀦𑀸𑀫 𑀓𑀲𑁆𑀲𑀘𑀺 𑀅𑀪𑀸𑀯𑀢𑁄. 𑀘𑀼𑀢𑀺𑀓𑁆𑀔𑀦𑁆𑀥𑀸𑀦𑀦𑁆𑀢𑀭𑀜𑁆𑀳𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀦𑁆𑀥𑀸𑀦𑀁𑀬𑁂𑀯 𑀧𑀸𑀢𑀼𑀪𑀸𑀯𑁄. 𑀢𑁂𑀦𑀸𑀳 ‘‘𑀅𑀦𑁆𑀢𑀭𑀸𑀪𑀯𑀲𑁆𑀲…𑀧𑁂… 𑀧𑀝𑀺𑀓𑁆𑀔𑀺𑀢𑁆𑀢𑁄𑀬𑁂𑀯𑀸’’𑀢𑀺. 𑀢𑀢𑁆𑀣 𑀪𑀸𑀯𑁄𑀢𑀺 𑀅𑀢𑁆𑀣𑀺𑀢𑀸. 𑀅𑀪𑀺𑀥𑀫𑁆𑀫𑁂 𑀓𑀣𑀸𑀯𑀢𑁆𑀣𑀼𑀧𑁆𑀧𑀓𑀭𑀡𑁂 (𑀓𑀣𑀸. 𑁫𑁦𑁫-𑁫𑁦𑁭) 𑀧𑀝𑀺𑀓𑁆𑀔𑀺𑀢𑁆𑀢𑁄𑀬𑁂𑀯. 𑀬𑀤𑀺 𑀏𑀯𑀁 ‘‘𑀅𑀦𑁆𑀢𑀭𑁂𑀦𑀸’’𑀢𑀺 𑀇𑀤𑀁 𑀓𑀣𑀦𑁆𑀢𑀺 𑀆𑀳 ‘‘𑀅𑀦𑁆𑀢𑀭𑁂𑀦𑀸’’𑀢𑀺𑀆𑀤𑀺. 𑀯𑀺𑀓𑀧𑁆𑀧𑀢𑁄 𑀅𑀜𑁆𑀜𑀁 𑀯𑀺𑀓𑀧𑁆𑀧𑀦𑁆𑀢𑀭𑀁, 𑀢𑀲𑁆𑀲 𑀤𑀻𑀧𑀦𑀁 ‘‘𑀅𑀦𑁆𑀢𑀭𑁂𑀦𑀸’’𑀢𑀺 𑀯𑀘𑀦𑀁. 𑀦 𑀅𑀦𑁆𑀢𑀭𑀸𑀪𑀯𑀤𑀻𑀧𑀦𑀁 𑀢𑀸𑀤𑀺𑀲𑀲𑁆𑀲 𑀅𑀦𑀼𑀧𑀮𑀩𑁆𑀪𑀦𑀢𑁄 𑀧𑀬𑁄𑀚𑀦𑀸𑀪𑀸𑀯𑀢𑁄 𑀘. 𑀬𑀢𑁆𑀣 𑀳𑀺 𑀯𑀺𑀧𑀸𑀓𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑁄, 𑀢𑀢𑁆𑀣𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀲𑁆𑀲 𑀯𑀢𑁆𑀣𑀼𑀲𑁆𑀲 𑀲𑀳𑀪𑀸𑀯𑀻𑀦𑀜𑁆𑀘 ¶ 𑀔𑀦𑁆𑀥𑀸𑀦𑀁 𑀲𑀫𑁆𑀪𑀯𑁄𑀢𑀺 𑀲𑀤𑁆𑀥𑀺𑀁 𑀅𑀢𑁆𑀢𑀦𑁄 𑀦𑀺𑀲𑁆𑀲𑀬𑁂𑀦 𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑁂𑀯𑀸𑀢𑀺 𑀦𑀸𑀲𑁆𑀲 𑀉𑀧𑁆𑀧𑀢𑁆𑀢𑀺𑀬𑀸 𑀤𑁂𑀲𑀤𑀽𑀭𑀢𑀸 𑀯𑁂𑀤𑀺𑀢𑀩𑁆𑀩𑀸. ‘‘𑀦𑁂𑀯 𑀇𑀥 𑀦 𑀳𑀼𑀭’’𑀦𑁆𑀢𑀺 𑀯𑀼𑀢𑁆𑀢𑀤𑁆𑀯𑀬𑀢𑁄 𑀅𑀧𑀭𑀁 𑀯𑀺𑀓𑀧𑁆𑀧𑁂𑀦 ‘‘𑀦 𑀉𑀪𑀬’’𑀦𑁆𑀢𑀺, 𑀢𑀢𑁆𑀣𑀧𑀺 𑀦 𑀳𑁄𑀢𑀺𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀦𑁆𑀢𑀭𑁂𑀦𑀸’’𑀢𑀺 𑀯𑀸 ‘‘𑀯𑀺𑀦𑀸’’𑀢𑀺 𑀇𑀫𑀺𑀦𑀸 𑀲𑀫𑀸𑀦𑀢𑁆𑀣𑁄 𑀦𑀺𑀧𑀸𑀢𑁄, 𑀢𑀲𑁆𑀫𑀸 𑀦𑁂𑀯𑀺𑀥, 𑀦 𑀳𑀼𑀭𑀁, 𑀉𑀪𑀬𑀁 𑀯𑀺𑀦𑀸𑀧𑀺 𑀦𑁂𑀯𑀸𑀢𑀺 𑀅𑀢𑁆𑀣𑁄.

𑀆𑀳𑀭𑀻𑀢𑀺 ¶ 𑀙𑀺𑀦𑁆𑀦𑀯𑀲𑁂𑀦 𑀕𑀡𑁆𑀳𑀺. 𑀢𑁂𑀦𑀸𑀳 ‘‘𑀓𑀡𑁆𑀞𑀦𑀸𑀴𑀁 𑀙𑀺𑀦𑁆𑀤𑀻’’𑀢𑀺. 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄𑀢𑀺 𑀲𑀫𑁆𑀫𑀲𑀦𑁆𑀢𑁄. 𑀧𑀭𑀺𑀦𑀺𑀩𑁆𑀩𑀼𑀢𑁄 𑀤𑀻𑀖𑀭𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀬𑀁 𑀬𑀼𑀢𑁆𑀢𑀧𑀬𑀼𑀢𑁆𑀢𑀪𑀸𑀯𑀢𑁄. ‘‘𑀅𑀦𑀼𑀧𑀯𑀚𑁆𑀚𑀁 𑀙𑀦𑁆𑀦𑁂𑀦 𑀪𑀺𑀓𑁆𑀔𑀼𑀦𑀸 𑀲𑀢𑁆𑀣𑀁 𑀆𑀳𑀭𑀺𑀢’’𑀦𑁆𑀢𑀺, 𑀓𑀣𑁂𑀲𑀻𑀢𑀺 𑀅𑀲𑁂𑀓𑁆𑀔𑀓𑀸𑀮𑁂 𑀩𑁆𑀬𑀸𑀓𑀭𑀡𑀁 𑀯𑀺𑀬 𑀓𑀢𑁆𑀯𑀸 𑀓𑀣𑁂𑀲𑀺.

𑀇𑀫𑀺𑀦𑀸𑀢𑀺 ‘‘𑀉𑀧𑀯𑀚𑁆𑀚𑀓𑀼𑀮𑀸𑀦𑀻’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦. 𑀣𑁂𑀭𑁄𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄. 𑀏𑀯𑀦𑁆𑀢𑀺 𑀏𑀯𑀁 𑀧𑀼𑀩𑁆𑀩𑀓𑀸𑀮𑁂𑀲𑀼 𑀲𑀁𑀲𑀝𑁆𑀞𑀯𑀺𑀳𑀸𑀭𑀻 𑀳𑀼𑀢𑁆𑀯𑀸 𑀞𑀺𑀢𑁄 𑀧𑀘𑁆𑀙𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀢𑀻𑀢𑀺 𑀆𑀲𑀗𑁆𑀓𑀦𑁆𑀢𑁄 𑀧𑀼𑀘𑁆𑀙𑀢𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯.

𑀙𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁬. 𑀧𑀼𑀡𑁆𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁮𑁮-𑁮𑁯. 𑀢𑀦𑁆𑀢𑀺 𑀘𑀓𑁆𑀔𑀼𑀭𑀽𑀧𑀤𑁆𑀯𑀬𑀁. 𑀢𑁂𑀦𑀸𑀳 ‘‘𑀘𑀓𑁆𑀔𑀼𑀜𑁆𑀘𑁂𑀯 𑀭𑀽𑀧𑀜𑁆𑀘𑀸’’𑀢𑀺. 𑀦𑀦𑁆𑀤𑀺𑀲𑀫𑀼𑀤𑀬𑀸𑀢𑀺 𑀦𑀦𑁆𑀤𑀺𑀬𑀸 𑀲𑀫𑀼𑀤𑀬𑀢𑀡𑁆𑀳𑀸𑀬 𑀲𑁂𑀲𑀓𑀸𑀭𑀡𑁂𑀳𑀺 𑀦𑀦𑁆𑀤𑀺𑀬𑀸 𑀲𑀫𑀼𑀤𑀺𑀢𑀺 𑀲𑀫𑁄𑀥𑀸𑀦𑀁 𑀦𑀦𑁆𑀤𑀺𑀲𑀫𑀼𑀤𑀬𑁄, 𑀢𑀲𑁆𑀫𑀸 𑀦𑀦𑁆𑀤𑀺𑀲𑀫𑀼𑀤𑀬𑀸. 𑀢𑁂𑀦𑀸𑀳 ‘‘𑀢𑀡𑁆𑀳𑀸𑀬 𑀲𑀫𑁄𑀥𑀸𑀦𑁂𑀦𑀸’’𑀢𑀺. 𑀧𑀜𑁆𑀘𑀓𑁆𑀔𑀦𑁆𑀥𑀲𑀗𑁆𑀔𑀸𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀲𑀫𑁄𑀥𑀸𑀦𑁂𑀦 𑀲𑀫𑀼𑀤𑀺𑀢𑀺 𑀧𑀯𑀢𑁆𑀢𑀺𑀬𑁂𑀯𑀸𑀢𑀺 𑀲𑀳 𑀲𑀫𑀼𑀤𑀬𑁂𑀦 𑀤𑀼𑀓𑁆𑀔𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 ‘‘𑀯𑀝𑁆𑀝𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀦𑀺𑀭𑁄𑀥𑀽𑀧𑀸𑀬𑁂𑀦 𑀲𑀤𑁆𑀥𑀺𑀁 𑀦𑀺𑀭𑁄𑀥𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 ‘‘𑀯𑀺𑀯𑀝𑁆𑀝𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸’’𑀢𑀺. 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀆𑀤𑀻𑀲𑀼 𑀅𑀜𑁆𑀜𑀢𑀭𑁄 𑀦 𑀳𑁄𑀢𑀻𑀢𑀺 𑀆𑀳 𑁋 ‘‘𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀻’’𑀢𑀺.

𑀘𑀡𑁆𑀟𑀸𑀢𑀺 𑀓𑁄𑀥𑀦𑀸. 𑀤𑀼𑀝𑁆𑀞𑀸𑀢𑀺 𑀤𑁄𑀲𑀯𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀓𑀺𑀩𑁆𑀩𑀺𑀲𑀸𑀢𑀺 𑀧𑀸𑀧𑀸. 𑀓𑀓𑁆𑀔𑀴𑀸𑀢𑀺 𑀤𑀸𑀭𑀼𑀡𑀸. 𑀖𑀝𑀺𑀓𑀫𑀼𑀕𑁆𑀕𑀭𑁂𑀦𑀸𑀢𑀺 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀖𑀝𑀺𑀓𑀁 𑀤𑀲𑁆𑀲𑁂𑀢𑁆𑀯𑀸 𑀓𑀢𑁂𑀦 𑀭𑀲𑁆𑀲𑀤𑀡𑁆𑀟𑁂𑀦. 𑀲𑀢𑁆𑀢𑀸𑀦𑀁 𑀲𑀲𑀦𑀢𑁄 𑀲𑀢𑁆𑀣𑀁, 𑀢𑀢𑁄 𑀏𑀯 𑀚𑀻𑀯𑀺𑀢𑀲𑁆𑀲 𑀳𑀭𑀡𑀢𑁄 𑀳𑀸𑀭𑀓𑀜𑁆𑀘𑀸𑀢𑀺 𑀲𑀢𑁆𑀣𑀳𑀸𑀭𑀓𑀁. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 ‘‘𑀤𑀫𑁄’’𑀢𑀺 𑀯𑀼𑀢𑁆𑀢𑁄 𑀫𑀦𑀘𑁆𑀙𑀝𑁆𑀞𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀤𑀫𑀦𑀢𑁄. 𑀧𑀜𑁆𑀜𑀸 ‘‘𑀤𑀫𑁄’’𑀢𑀺 𑀯𑀼𑀢𑁆𑀢𑀸 𑀓𑀺𑀮𑁂𑀲𑀯𑀺𑀲𑁂𑀯𑀺𑀢𑀸𑀦𑀁 𑀤𑀫𑀦𑀢𑁄 𑀯𑀽𑀧𑀲𑀫𑀦𑀢𑁄. 𑀉𑀧𑁄𑀲𑀣𑀓𑀫𑁆𑀫𑀁 ‘‘𑀤𑀫𑁄’’𑀢𑀺 ¶ 𑀯𑀼𑀢𑁆𑀢𑀁 𑀓𑀸𑀬𑀤𑁆𑀯𑀸𑀭𑀸𑀤𑀻𑀳𑀺 𑀉𑀧𑁆𑀧𑀚𑁆𑀚𑀦𑀓𑀅𑀲𑀫𑀲𑁆𑀲 𑀤𑀫𑀦𑀢𑁄. 𑀔𑀦𑁆𑀢𑀺 ‘‘𑀤𑀫𑁄’’𑀢𑀺 𑀯𑁂𑀤𑀺𑀢𑀩𑁆𑀩𑀸 𑀅𑀓𑁆𑀔𑀦𑁆𑀢𑀺𑀬𑀸 𑀤𑀫𑀦𑀢𑁄 𑀯𑀽𑀧𑀲𑀫𑀦𑀢𑁄. 𑀢𑁂𑀦𑀸𑀳 ‘‘𑀉𑀧𑀲𑀫𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦’’𑀦𑁆𑀢𑀺.

𑀏𑀢𑁆𑀣𑀸𑀢𑀺 𑀲𑀼𑀦𑀸𑀧𑀭𑀦𑁆𑀢𑀚𑀦𑀧𑀤𑁂. 𑀏𑀢𑁂 𑀤𑁆𑀯𑁂𑀢𑀺 𑀅𑀬𑀁 𑀧𑀼𑀡𑁆𑀡𑀢𑁆𑀣𑁂𑀭𑁄 𑀢𑀲𑁆𑀲 𑀓𑀦𑀺𑀝𑁆𑀞𑁄𑀢𑀺 𑀏𑀢𑁂 𑀤𑁆𑀯𑁂 𑀪𑀸𑀢𑀭𑁄. 𑀆𑀳𑀘𑁆𑀘 𑀅𑀝𑁆𑀞𑀸𑀲𑀺 𑀉𑀴𑀸𑀭𑀁 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀲𑀢𑁆𑀢 𑀲𑀻𑀳𑀦𑀸𑀤𑁂 𑀦𑀤𑀺𑀢𑁆𑀯𑀸𑀢𑀺 𑀫𑀫𑁆𑀫𑀘𑁆𑀙𑁂𑀤𑀓𑀸𑀦𑀫𑁆𑀧𑀺 𑀅𑀓𑁆𑀓𑁄𑀲𑀧𑀭𑀺𑀪𑀸𑀲𑀸𑀦𑀁 𑀔𑀫𑀦𑁂 𑀲𑀦𑁆𑀢𑁄𑀲𑀸𑀪𑀸𑀯𑀤𑀻𑀧𑀦𑀁, 𑀧𑀸𑀡𑀺𑀧𑁆𑀧𑀳𑀸𑀭𑀲𑁆𑀲, 𑀮𑁂𑀟𑁆𑀟𑀼𑀧𑁆𑀧𑀳𑀸𑀭𑀲𑁆𑀲, 𑀤𑀡𑁆𑀟𑀧𑁆𑀧𑀳𑀸𑀭𑀲𑁆𑀲, 𑀲𑀢𑁆𑀣𑀧𑁆𑀧𑀳𑀸𑀭𑀲𑁆𑀲, 𑀚𑀻𑀯𑀺𑀢𑀯𑁄𑀭𑁄𑀧𑀦𑀲𑁆𑀲, 𑀔𑀫𑀦𑁂 𑀲𑀦𑁆𑀢𑁄𑀲𑀸𑀪𑀸𑀯𑀤𑀻𑀧𑀦𑀜𑁆𑀘𑀸𑀢𑀺 ¶ 𑀏𑀯𑀁 𑀲𑀢𑁆𑀢 𑀲𑀻𑀳𑀦𑀸𑀤𑁂 𑀦𑀤𑀺𑀢𑁆𑀯𑀸. 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀲𑀺𑀢𑀢𑁆𑀢𑀸 𑀧𑀸𑀴𑀺𑀬𑀁 𑀯𑀲𑀦𑀝𑁆𑀞𑀸𑀦𑀁 𑀅𑀦𑀼𑀤𑁆𑀤𑁂𑀲𑀺𑀓𑀁 𑀓𑀢𑁆𑀯𑀸 ‘‘𑀲𑀼𑀦𑀸𑀧𑀭𑀦𑁆𑀢𑀲𑁆𑀫𑀺𑀁 𑀚𑀦𑀧𑀤𑁂 𑀯𑀺𑀳𑀭𑀢𑀺’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁.

𑀘𑀢𑀽𑀲𑀼 𑀞𑀸𑀦𑁂𑀲𑀽𑀢𑀺 𑀅𑀩𑁆𑀩𑀼𑀳𑀢𑁆𑀣𑀧𑀩𑁆𑀩𑀢𑁂, 𑀲𑀫𑀼𑀤𑁆𑀤𑀕𑀺𑀭𑀺𑀯𑀺𑀳𑀸𑀭𑁂, 𑀫𑀸𑀢𑀼𑀮𑀕𑀺𑀭𑀺𑀫𑁆𑀳𑀺, 𑀫𑀓𑀼𑀴𑀓𑀸𑀭𑀸𑀫𑀯𑀺𑀳𑀸𑀭𑁂𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼. 𑀢𑀦𑁆𑀢𑀺 𑀘𑀗𑁆𑀓𑀫𑀁 𑀆𑀭𑀼𑀬𑁆𑀳 𑀓𑁄𑀘𑀺 𑀪𑀺𑀓𑁆𑀔𑀼 𑀘𑀗𑁆𑀓𑀫𑀺𑀢𑀼𑀁 𑀲𑀫𑀢𑁆𑀣𑁄 𑀦𑀢𑁆𑀣𑀺 𑀫𑀳𑀢𑀸 𑀲𑀫𑀼𑀤𑁆𑀤𑀧𑀭𑀺𑀲𑁆𑀲𑀬𑁂𑀦 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑀲𑁆𑀲 𑀅𑀦𑀪𑀺𑀲𑀫𑁆𑀪𑀼𑀡𑀦𑀢𑁄. 𑀉𑀧𑁆𑀧𑀸𑀢𑀺𑀓𑀦𑁆𑀢𑀺 𑀉𑀧𑁆𑀧𑀸𑀢𑀓𑀭𑀁 𑀫𑀳𑀸𑀲𑀗𑁆𑀔𑁄𑀪𑀁 𑀉𑀝𑁆𑀞𑀧𑁂𑀢𑁆𑀯𑀸. 𑀲𑀫𑁆𑀫𑀼𑀔𑁂𑀢𑀺 𑀅𑀦𑀺𑀮𑀧𑀤𑁂𑀲𑁂. 𑀧𑀝𑀺𑀯𑁂𑀤𑁂𑀲𑀼𑀦𑁆𑀢𑀺 𑀧𑀯𑁂𑀤𑁂𑀲𑀼𑀁.

𑀆𑀭𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬𑀸𑀢𑀺 𑀫𑀡𑁆𑀟𑀮𑀫𑀸𑀴𑀲𑁆𑀲 𑀓𑀸𑀢𑀼𑀁 𑀧𑀣𑀯𑀻𑀫𑀺𑀢𑀓𑀸𑀮𑀢𑁄 𑀧𑀪𑀼𑀢𑀺. 𑀲𑀘𑁆𑀘𑀩𑀦𑁆𑀥𑁂𑀦 𑀧𑀜𑁆𑀘𑀲𑀢𑀸𑀦𑀺 𑀧𑀭𑀺𑀧𑀽𑀭𑁂𑀢𑀼𑀁 ‘‘𑀏𑀓𑀽𑀦𑀧𑀜𑁆𑀘𑀲𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀕𑀦𑁆𑀥𑀓𑀼𑀝𑀺𑀦𑁆𑀢𑀺 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀫𑀳𑀸𑀕𑀦𑁆𑀥𑀓𑀼𑀝𑀺𑀁.

𑀲𑀘𑁆𑀘𑀩𑀦𑁆𑀥𑀦𑀸𑀫𑁄𑀢𑀺 𑀲𑀘𑁆𑀘𑀩𑀦𑁆𑀥𑁂 𑀧𑀩𑁆𑀩𑀢𑁂 𑀘𑀺𑀭𑀦𑀺𑀯𑀸𑀲𑀺𑀢𑀸𑀬 ‘‘𑀲𑀘𑁆𑀘𑀩𑀦𑁆𑀥𑁄’’𑀢𑁆𑀯𑁂𑀯 𑀮𑀤𑁆𑀥𑀦𑀸𑀫𑁄. 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺 𑀧𑀜𑁆𑀘𑀸𑀪𑀺𑀜𑁆𑀜𑀸𑀧𑀭𑀺𑀯𑀸𑀭𑀁 𑀅𑀭𑀳𑀢𑁆𑀢𑀁 𑀅𑀥𑀺𑀕𑀘𑁆𑀙𑀺. 𑀢𑁂𑀦𑀸𑀳 ‘‘𑀫𑀕𑁆𑀕𑁂𑀦𑁂𑀯𑀲𑁆𑀲 𑀅𑀪𑀺𑀜𑁆𑀜𑀸 𑀆𑀕𑀢𑀸’’𑀢𑀺.

𑀢𑀲𑁆𑀫𑀺𑀁 𑀲𑀦𑁆𑀦𑀺𑀧𑀢𑀺𑀢𑀸 𑀫𑀳𑀸𑀚𑀦𑀸 𑀓𑁂𑀘𑀺 𑀲𑁄𑀢𑀸𑀧𑀦𑁆𑀦𑀸, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀦𑀸𑀕𑀸𑀫𑀺𑀦𑁄, 𑀓𑁂𑀘𑀺 𑀅𑀭𑀳𑀦𑁆𑀢𑁄 𑀅𑀳𑁂𑀲𑀼𑀁. 𑀢𑀢𑁆𑀣𑀸𑀧𑀺 𑀓𑁂𑀘𑀺 𑀢𑁂𑀯𑀺𑀚𑁆𑀚𑀸, 𑀓𑁂𑀘𑀺 𑀙𑀴𑀪𑀺𑀜𑁆𑀜𑀸, 𑀓𑁂𑀘𑀺 𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑀸 𑀅𑀳𑁂𑀲𑀼𑀁. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀫𑀳𑀸𑀚𑀦𑀲𑁆𑀲 𑀩𑀦𑁆𑀥𑀦𑀫𑁄𑀓𑁆𑀔𑁄 𑀚𑀸𑀢𑁄’’𑀢𑀺. 𑀬𑁂 𑀧𑀦 𑀢𑀢𑁆𑀣 𑀲𑀭𑀡𑀕𑀫𑀦𑀧𑀜𑁆𑀘𑀲𑀻𑀮𑀤𑀲𑀲𑀻𑀮𑀲𑀫𑀸𑀤𑀸𑀦𑁂𑀦 𑀮𑀤𑁆𑀥𑀸𑀦𑀼𑀕𑁆𑀕𑀳𑀸, 𑀢𑁂𑀲𑀁 𑀤𑁂𑀯𑀢𑀸𑀦𑀜𑁆𑀘 𑀯𑀲𑁂𑀦 ‘‘𑀫𑀳𑀦𑁆𑀢𑀁 𑀩𑀼𑀤𑁆𑀥𑀓𑁄𑀮𑀸𑀳𑀮𑀁 𑀅𑀳𑁄𑀲𑀻’’𑀢𑀺 𑀯𑀼𑀢𑁆𑀢𑀁.

𑀅𑀭𑀼𑀡𑀁 ¶ 𑀧𑀦 𑀫𑀳𑀸𑀕𑀦𑁆𑀥𑀓𑀼𑀝𑀺𑀬𑀁𑀬𑁂𑀯 𑀉𑀝𑁆𑀞𑀧𑁂𑀲𑀺 𑀤𑁂𑀯𑀢𑀸𑀦𑀼𑀕𑁆𑀕𑀳𑀢𑁆𑀣𑀜𑁆𑀘𑁂𑀯 𑀓𑀼𑀮𑀸𑀦𑀼𑀤𑀬𑀸𑀬 𑀘. 𑀅𑀧𑀸𑀬𑀫𑀕𑁆𑀕𑁂 𑀑𑀢𑀸𑀭𑀺𑀢𑁄 ‘‘𑀓𑁄𑀘𑀺 𑀮𑁄𑀓𑀲𑁆𑀲 𑀲𑀚𑀺𑀢𑀸 𑀅𑀢𑁆𑀣𑀺, 𑀢𑀲𑁆𑀲 𑀯𑀲𑁂𑀦 𑀧𑀯𑀢𑁆𑀢𑀺𑀲𑀁𑀳𑀸𑀭𑀸 𑀳𑁄𑀦𑁆𑀢𑀺, 𑀢𑁂𑀦𑁂𑀯𑀸𑀬𑀁 𑀧𑀚𑀸 𑀲𑀦𑀸𑀣𑀸 𑀳𑁄𑀢𑀺, 𑀢𑀁 𑀬𑀼𑀜𑁆𑀚𑀢𑀺 𑀘 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀫𑁆𑀫𑁂’’𑀢𑀺 𑀫𑀺𑀘𑁆𑀙𑀸𑀕𑀸𑀳𑁂𑀳𑀺. 𑀧𑀭𑀺𑀘𑀭𑀺𑀢𑀩𑁆𑀩𑀁 𑀬𑀸𑀘𑀺 ‘‘𑀏𑀢𑁆𑀣 𑀫𑀬𑀸 𑀘𑀺𑀭𑀁 𑀯𑀲𑀺𑀢𑀩𑁆𑀩’’𑀦𑁆𑀢𑀺.

𑀙𑀝𑁆𑀞𑀦𑁆𑀢𑀺 𑀩𑀸𑀳𑀺𑀬𑀲𑀼𑀢𑁆𑀢𑀁. 𑀢𑀁 𑀉𑀢𑁆𑀢𑀸𑀦𑀫𑁂𑀯 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸.

𑀧𑀼𑀡𑁆𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁮. 𑀧𑀞𑀫𑀏𑀚𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁦-𑁯𑁧. 𑀏𑀚𑀢𑀺 ¶ 𑀙𑀴𑀸𑀭𑀫𑁆𑀫𑀡𑀦𑀺𑀫𑀺𑀢𑁆𑀢𑀁 𑀓𑀫𑁆𑀧𑀢𑀻𑀢𑀺 𑀏𑀚𑀸. 𑀢𑁂𑀦𑀸𑀳 ‘‘𑀘𑀮𑀦𑀝𑁆𑀞𑁂𑀦𑀸’’𑀢𑀺. 𑀆𑀩𑀸𑀥𑀦𑀝𑁆𑀞𑁂𑀦 𑀧𑀻𑀴𑀦𑀝𑁆𑀞𑁂𑀦. 𑀅𑀦𑁆𑀢𑁄 𑀤𑁄𑀲𑀦𑀝𑁆𑀞𑁂𑀦𑀸𑀢𑀺 𑀅𑀦𑁆𑀢𑁄𑀘𑀺𑀢𑁆𑀢𑁂 𑀏𑀯 𑀧𑀤𑀼𑀲𑁆𑀲𑀦𑀝𑁆𑀞𑁂𑀦. 𑀦𑀺𑀓𑀦𑁆𑀢𑀦𑀝𑁆𑀞𑁂𑀦𑀸𑀢𑀺 𑀙𑀺𑀦𑁆𑀤𑀦𑀝𑁆𑀞𑁂𑀦. 𑀳𑁂𑀝𑁆𑀞𑀸 𑀕𑀳𑀺𑀢𑀫𑁂𑀯𑀸𑀢𑀺 𑀳𑁂𑀝𑁆𑀞𑀸 𑀫𑀜𑁆𑀜𑀺𑀢𑀲𑀫𑀼𑀕𑁆𑀖𑀸𑀢𑀲𑀸𑀭𑀼𑀧𑁆𑀧𑀲𑀼𑀢𑁆𑀢𑁂 𑀆𑀕𑀢𑀫𑁂𑀯. 𑀯𑀼𑀢𑁆𑀢𑀦𑀬𑀫𑁂𑀯 𑀫𑀜𑁆𑀜𑀺𑀢𑀲𑀫𑀼𑀕𑁆𑀖𑀸𑀢𑀲𑀼𑀢𑁆𑀢𑁂.

𑀧𑀞𑀫𑀏𑀚𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯-𑁧𑁦. 𑀧𑀞𑀫𑀤𑁆𑀯𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁨-𑁯𑁩. 𑀤𑁆𑀯𑀬𑀦𑁆𑀢𑀺 𑀤𑀼𑀓𑀁. 𑀧𑀸𑀴𑀺𑀬𑀁 𑀆𑀫𑁂𑀟𑀺𑀢𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄𑀢𑀺 𑀆𑀳 ‘‘𑀤𑁆𑀯𑁂 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂’’𑀢𑀺. 𑀏𑀯𑀫𑁂𑀢𑀦𑁆𑀢𑀺 𑀏𑀯𑀁 𑀅𑀦𑀺𑀘𑁆𑀘𑀸𑀤𑀺𑀪𑀸𑀯𑁂𑀦 𑀏𑀢𑀁 𑀘𑀓𑁆𑀔𑀼𑀭𑀽𑀧𑀜𑁆𑀘𑀸𑀢𑀺 𑀤𑁆𑀯𑀬𑀁. 𑀘𑀮𑀢𑀻𑀢𑀺 𑀅𑀦𑀯𑀝𑁆𑀞𑀸𑀦𑁂𑀦 𑀧𑀘𑀮𑀢𑀺. 𑀩𑁆𑀬𑀣𑀢𑀻𑀢𑀺 𑀚𑀭𑀸𑀬 𑀫𑀭𑀡𑁂𑀦 𑀘 𑀧𑀯𑁂𑀥𑀢𑀺. 𑀳𑁂𑀢𑀼 𑀘𑁂𑀯 𑀉𑀧𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑁆𑀢𑀸. 𑀲𑀳𑀕𑀢𑀻𑀢𑀺 𑀲𑀳𑀧𑁆𑀧𑀯𑀢𑁆𑀢𑀺, 𑀢𑀸𑀬 𑀕𑀳𑁂𑀢𑀩𑁆𑀩𑀢𑁆𑀢𑀸 ‘‘𑀲𑀗𑁆𑀕𑀢𑀻’’𑀢𑀺 𑀨𑀲𑁆𑀲𑁄 𑀯𑀼𑀢𑁆𑀢𑁄. 𑀏𑀲 𑀦𑀬𑁄 𑀲𑁂𑀲𑀧𑀤𑀤𑁆𑀯𑀬𑁂𑀧𑀺. 𑀬𑀲𑁆𑀫𑀸 𑀘 𑀲𑀁𑀕𑀘𑁆𑀙𑀫𑀸𑀦𑀥𑀫𑁆𑀫𑀯𑀺𑀫𑀼𑀢𑁆𑀢𑀸 𑀲𑀗𑁆𑀕𑀢𑀺 𑀦𑀸𑀫 𑀦𑀢𑁆𑀣𑀺, 𑀢𑀣𑀸 𑀲𑀦𑁆𑀦𑀺𑀧𑀸𑀢𑀲𑀫𑀯𑀸𑀬𑀸, 𑀢𑁂𑀲𑀁 𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑁄 𑀨𑀲𑁆𑀲𑁄 𑀢𑀣𑀸 𑀯𑀼𑀘𑁆𑀘𑀢𑀻𑀢𑀺. 𑀢𑁂𑀦𑀸𑀳 ‘‘𑀇𑀫𑀺𑀦𑀸’’𑀢𑀺𑀆𑀤𑀺.

𑀯𑀢𑁆𑀣𑀽𑀢𑀺 ¶ 𑀘𑀓𑁆𑀔𑀼 𑀦𑀺𑀲𑁆𑀲𑀬𑀧𑀘𑁆𑀘𑀬𑀸𑀤𑀺𑀪𑀸𑀯𑁂𑀦. 𑀆𑀭𑀫𑁆𑀫𑀡𑀦𑁆𑀢𑀺 𑀭𑀽𑀧𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑀸𑀤𑀺𑀪𑀸𑀯𑁂𑀦. 𑀲𑀳𑀚𑀸𑀢𑀸 𑀢𑀬𑁄 𑀔𑀦𑁆𑀥𑀸 𑀯𑁂𑀤𑀦𑀸𑀤𑀬𑁄, 𑀢𑁂 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑀪𑀸𑀯𑁂𑀦. 𑀅𑀬𑀁 𑀳𑁂𑀢𑀽𑀢𑀺 𑀅𑀬𑀁 𑀢𑀺𑀯𑀺𑀥𑁄 𑀳𑁂𑀢𑀽. 𑀨𑀲𑁆𑀲𑁂𑀦𑀸𑀢𑀺𑀆𑀤𑀻𑀲𑀼 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀬𑀲𑁆𑀫𑀸 𑀭𑀽𑀧𑀸𑀭𑀫𑁆𑀫𑀡𑁂 𑀨𑀲𑁆𑀲𑁂 𑀅𑀢𑁆𑀢𑀦𑁄 𑀨𑀼𑀲𑀦𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑁂 𑀏𑀯𑀁 𑀯𑁂𑀤𑀦𑀸 𑀅𑀦𑀼𑀪𑀯𑀦𑀓𑀺𑀘𑁆𑀘𑀁, 𑀲𑀜𑁆𑀜𑀸 𑀲𑀜𑁆𑀚𑀸𑀦𑀦𑀓𑀺𑀘𑁆𑀘𑀁 𑀓𑀭𑁄𑀢𑀺, 𑀢𑀲𑁆𑀫𑀸 ‘‘𑀨𑀲𑁆𑀲𑁂𑀦 𑀨𑀼𑀝𑁆𑀞𑀫𑁂𑀯𑀸’’𑀢𑀺𑀆𑀤𑀺𑀯𑀼𑀢𑁆𑀢𑀫𑁂𑀯 𑀅𑀢𑁆𑀣𑀁 𑀇𑀤𑀸𑀦𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀨𑀼𑀝𑁆𑀞𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀜𑁆𑀘𑁂𑀯 𑀔𑀦𑁆𑀥𑀸 𑀪𑀕𑀯𑀢𑀸 𑀲𑀫𑀢𑀺𑀁𑀲𑀸𑀬 𑀆𑀓𑀸𑀭𑁂𑀳𑀺 𑀯𑀼𑀢𑁆𑀢𑀸. 𑀓𑀲𑁆𑀫𑀸𑀢𑀺 𑀆𑀳 ‘‘𑀓𑀣’’𑀦𑁆𑀢𑀺𑀆𑀤𑀺. 𑀭𑀼𑀓𑁆𑀔𑀲𑀸𑀔𑀸𑀲𑀼 𑀭𑀼𑀓𑁆𑀔𑀯𑁄𑀳𑀸𑀭𑁄 𑀯𑀺𑀬 𑀏𑀓𑁂𑀓𑀥𑀫𑁆𑀫𑁂𑀧𑀺 𑀔𑀦𑁆𑀥𑀯𑁄𑀳𑀸𑀭𑁄 𑀳𑁄𑀢𑀺𑀬𑁂𑀯. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀯𑀺𑀜𑁆𑀜𑀸𑀡𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 (𑀬𑀫. 𑀔𑀦𑁆𑀥𑀬𑀫𑀓 𑁨).

𑀧𑀞𑀫𑀤𑁆𑀯𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀙𑀦𑁆𑀦𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀴𑀯𑀕𑁆𑀕𑁄

𑁧. 𑀅𑀤𑀦𑁆𑀢𑀅𑀕𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁪. 𑀅𑀤𑀫𑀺𑀢𑀸𑀢𑀺 ¶ 𑀤𑀫𑀁 𑀦𑀺𑀩𑁆𑀩𑀺𑀲𑁂𑀯𑀦𑀪𑀸𑀯𑀁 𑀅𑀦𑀻𑀢𑀸. 𑀅𑀕𑁄𑀧𑀺𑀢𑀸𑀢𑀺 𑀲𑀢𑀺𑀲𑀗𑁆𑀔𑀸𑀢𑀸𑀬 𑀯𑀢𑀺𑀬𑀸 𑀦 𑀭𑀓𑁆𑀔𑀺𑀢𑀸. 𑀅𑀧𑀺𑀳𑀺𑀢𑀸𑀢𑀺 𑀲𑀢𑀺𑀓𑀯𑀸𑀝𑁂𑀦 𑀦 𑀧𑀺𑀳𑀺𑀢𑀸. 𑀘𑀢𑀽𑀳𑀺𑀧𑀺 𑀧𑀤𑁂𑀳𑀺 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀦𑀸𑀯𑀭𑀡𑀫𑁂𑀯𑀸𑀳. 𑀅𑀥𑀺𑀓𑀁 𑀯𑀳𑀦𑁆𑀢𑀻𑀢𑀺 𑀅𑀥𑀺𑀯𑀸𑀳𑀸, 𑀤𑀼𑀓𑁆𑀔𑀲𑁆𑀲 𑀅𑀥𑀺𑀯𑀸𑀳𑀸 𑀤𑀼𑀓𑁆𑀔𑀸𑀥𑀺𑀯𑀸𑀳𑀸. 𑀦𑀺𑀭𑀬𑁂𑀲𑀼 𑀉𑀧𑁆𑀧𑀚𑁆𑀚𑀦𑀓𑀁 𑀦𑁂𑀭𑀬𑀺𑀓𑀁. 𑀆𑀤𑀺-𑀲𑀤𑁆𑀤𑁂𑀦 𑀲𑁂𑀲𑀧𑀸𑀴𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀲𑀴𑁂𑀯𑀸𑀢𑀺 𑀙-𑀓𑀸𑀭𑀲𑁆𑀲 𑀲-𑀓𑀸𑀭𑁄, 𑀴-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀬𑀢𑁆𑀣𑀸𑀢𑀺 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁. 𑀅𑀦𑀯𑀲𑁆𑀲𑀼𑀢𑀸 𑀅𑀢𑀺𑀦𑁆𑀢𑀸𑀢𑀺 𑀭𑀸𑀕𑁂𑀦 𑀅𑀢𑁂𑀫𑀺𑀢𑀸.

𑀅𑀲𑁆𑀲𑀸𑀤𑀺𑀢𑀦𑁆𑀢𑀺 𑀅𑀲𑁆𑀲𑀸𑀤𑀁 𑀇𑀢𑀁 𑀉𑀧𑀕𑀢𑀁. 𑀢𑁂𑀦𑀸𑀳 ‘‘𑀅𑀲𑁆𑀲𑀸𑀤𑀯𑀦𑁆𑀢’’𑀦𑁆𑀢𑀺. 𑀲𑀼𑀔𑀤𑀼𑀓𑁆𑀔𑀦𑁆𑀢𑀺 𑀇𑀝𑁆𑀞𑀸𑀦𑀺𑀝𑁆𑀞𑀁. 𑀅𑀦𑁆𑀯𑀬𑀢𑀻𑀢𑀺 𑀅𑀦𑁆𑀯𑀬𑁄, 𑀳𑁂𑀢𑀼. 𑀨𑀲𑁆𑀲𑁄𑀢𑀺 𑀅𑀦𑁆𑀯𑀬𑁄 𑀏𑀢𑀲𑁆𑀲𑀸𑀢𑀺 𑀨𑀲𑁆𑀲𑀦𑁆𑀯𑀬𑀦𑁆𑀢𑀺 𑀆𑀳 𑁋 ‘‘𑀨𑀲𑁆𑀲𑀳𑁂𑀢𑀼𑀓’’𑀦𑁆𑀢𑀺. ‘‘𑀅𑀯𑀺𑀭𑀼𑀤𑁆𑀥’’𑀇𑀢𑀺 𑀯𑀺𑀪𑀢𑁆𑀢𑀺𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄.

𑀧𑀧𑀜𑁆𑀘𑀲𑀜𑁆𑀜𑀸𑀢𑀺 ¶ 𑀢𑀡𑁆𑀳𑀸𑀤𑀺𑀲𑀫𑀥𑀽𑀧𑀲𑀁𑀳𑀢𑀲𑀜𑁆𑀜𑀸. 𑀢𑁂𑀦𑀸𑀳 ‘‘𑀓𑀺𑀮𑁂𑀲𑀲𑀜𑁆𑀜𑀸𑀬 𑀧𑀧𑀜𑁆𑀘𑀲𑀜𑁆𑀜𑀸 𑀦𑀸𑀫 𑀳𑀼𑀢𑁆𑀯𑀸’’𑀢𑀺. 𑀧𑀧𑀜𑁆𑀘𑀲𑀜𑁆𑀜𑀸 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀧𑀧𑀜𑁆𑀘𑀲𑀜𑁆𑀜𑀸, 𑀇𑀢𑀭𑀻𑀢𑀭𑀸 𑀦𑀭𑀸. 𑀧𑀧𑀜𑁆𑀘𑀬𑀦𑁆𑀢𑀸𑀢𑀺 𑀲𑀁𑀲𑀸𑀭𑁂 𑀧𑀧𑀜𑁆𑀘𑀁 𑀘𑀺𑀭𑀸𑀬𑀦𑀁 𑀓𑀭𑁄𑀦𑁆𑀢𑀸. 𑀲𑀜𑁆𑀜𑀺𑀦𑁄𑀢𑀺 𑀕𑁂𑀳𑀲𑁆𑀲𑀺𑀢𑀲𑀜𑁆𑀜𑀸𑀬 𑀲𑀜𑁆𑀜𑀸𑀯𑀦𑁆𑀢𑁄. 𑀫𑀦𑁄𑀫𑀬𑀁 𑀯𑀺𑀢𑀓𑁆𑀓𑀦𑁆𑀢𑀺 𑀓𑁂𑀯𑀮𑀁 𑀫𑀦𑀲𑀸 𑀲𑀫𑁆𑀪𑀸𑀯𑀺𑀢𑀁 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀁. 𑀇𑀭𑀻𑀬𑀢𑀻𑀢𑀺 𑀇𑀭𑀺𑀬𑀁 𑀧𑀝𑀺𑀧𑀢𑁆𑀢𑀺𑀁 𑀇𑀭𑀻𑀬𑀢𑀺 𑀧𑀝𑀺𑀧𑀚𑁆𑀚𑀢𑀺.

𑀲𑀼𑀝𑁆𑀞𑀼 𑀪𑀸𑀯𑀺𑀢𑁄𑀢𑀺 𑀲𑀼𑀝𑁆𑀞𑀼𑀪𑀸𑀯𑀁 𑀲𑀼𑀪𑀸𑀯𑀦𑀁 𑀇𑀢𑁄 𑀪𑀸𑀯𑀺𑀢𑀪𑀸𑀯𑀺𑀢𑁄. 𑀨𑀼𑀝𑁆𑀞𑀲𑁆𑀲 𑀘𑀺𑀢𑁆𑀢𑀦𑁆𑀢𑀺 𑀢𑁂𑀦 𑀬𑀣𑀸𑀯𑀼𑀢𑁆𑀢𑀨𑀲𑁆𑀲𑁂𑀦 𑀨𑀼𑀝𑁆𑀞𑀁 𑀅𑀲𑁆𑀲 𑀘𑀺𑀢𑁆𑀢𑀁. 𑀦 𑀯𑀺𑀓𑀫𑁆𑀧𑀢𑁂 𑀓𑁆𑀯𑀘𑀻𑀢𑀺 𑀓𑀺𑀲𑁆𑀫𑀺𑀜𑁆𑀘𑀺 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑁂 𑀦 𑀓𑀫𑁆𑀧𑀢𑀺. 𑀧𑀸𑀭𑀕𑀸𑀢𑀺 𑀧𑀸𑀭𑀕𑀸𑀫𑀺𑀦𑁄 𑀪𑀯𑀣.

𑀅𑀤𑀦𑁆𑀢𑀅𑀕𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁫. 𑀅𑀧𑀲𑀸𑀤𑁂𑀢𑀻𑀢𑀺 ¶ 𑀢𑀚𑁆𑀚𑁂𑀢𑀺. 𑀉𑀲𑁆𑀲𑀸𑀤𑁂𑀢𑀻𑀢𑀺 𑀉𑀓𑁆𑀓𑀁𑀲𑁂𑀢𑀺. 𑀅𑀬𑀁 𑀓𑀺𑀭 𑀣𑁂𑀭𑁄 𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑁄. 𑀧𑀫𑀚𑁆𑀚𑀺𑀢𑁆𑀯𑀸𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲 𑀅𑀦𑀦𑀼𑀬𑀼𑀚𑁆𑀚𑀦𑁂𑀦 𑀧𑀫𑀚𑁆𑀚𑀺𑀢𑁆𑀯𑀸.

𑀬𑀢𑁆𑀭𑀸𑀢𑀺 𑀧𑀘𑁆𑀘𑀢𑁆𑀢𑀁 𑀯𑀘𑀦𑀸𑀮𑀗𑁆𑀓𑀸𑀭𑁂. 𑀦𑀸𑀫𑀸𑀢𑀺 𑀅𑀲𑀫𑁆𑀪𑀸𑀯𑀦𑁂 𑀅𑀧𑀲𑀸𑀤𑀦𑀧𑀓𑁆𑀔𑁂, 𑀉𑀲𑁆𑀲𑀸𑀤𑀦𑀧𑀓𑁆𑀔𑁂 𑀧𑀦 𑀲𑀫𑁆𑀪𑀸𑀯𑀦𑁂. 𑀓𑀺𑀁 𑀚𑀸𑀢𑀦𑁆𑀢𑀺 𑀓𑀺𑀁 𑀢𑁂𑀦 𑀫𑀳𑀮𑁆𑀮𑀓𑀪𑀸𑀯𑁂𑀦 𑀚𑀸𑀢𑀦𑁆𑀢𑀺 𑀫𑀳𑀮𑁆𑀮𑀓𑀪𑀸𑀯𑀁 𑀢𑀺𑀡𑀸𑀬𑀧𑀺 𑀅𑀫𑀜𑁆𑀜𑀫𑀸𑀦𑁄 𑀯𑀤𑀢𑀺. 𑀢𑁂𑀦𑀸𑀳 ‘‘𑀬𑀤𑀺…𑀧𑁂… 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄’’𑀢𑀺. 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄𑀢𑀺 𑀅𑀘𑀺𑀦𑁆𑀢𑁂𑀦𑁆𑀢𑁄. 𑀫𑀸𑀤𑀺𑀲𑀸𑀦𑀁 𑀪𑀕𑀯𑀢𑁄 𑀑𑀯𑀸𑀤𑁄 𑀉𑀧𑀓𑀸𑀭𑀸𑀯𑀳𑁄𑀢𑀺 𑀏𑀢𑀭𑀳𑀺 𑀑𑀯𑀸𑀤𑀜𑁆𑀘 𑀧𑀲𑀁𑀲𑀦𑁆𑀢𑁄.

‘‘𑀅𑀤𑀺𑀝𑁆𑀞𑀸 𑀅𑀤𑀺𑀝𑁆𑀞𑀧𑀼𑀩𑁆𑀩𑀸’’𑀢𑀺𑀆𑀤𑀺𑀦𑀸 𑀧𑀭𑀺𑀓𑀧𑁆𑀧𑀯𑀲𑁂𑀦 𑀯𑀼𑀢𑁆𑀢𑀦𑀺𑀤𑀲𑁆𑀲𑀦𑀁 ‘‘𑀬𑀣𑀸 𑀏𑀢𑁂𑀲𑀼 𑀙𑀦𑁆𑀤𑀸𑀤𑀬𑁄 𑀦 𑀳𑁄𑀦𑁆𑀢𑀺, 𑀏𑀯𑀫𑀺𑀢𑀭𑁂𑀲𑀼𑀧𑀺 𑀧𑀭𑀺𑀜𑁆𑀜𑀸𑀢𑁂𑀲𑀽’’𑀢𑀺 𑀦𑀬𑀧𑀝𑀺𑀧𑀚𑁆𑀚𑀦𑀢𑁆𑀣𑀁, 𑀢𑁂𑀲𑀫𑁆𑀧𑀺 𑀇𑀫𑁂𑀳𑀺 𑀲𑀫𑀸𑀦𑁂𑀢𑀩𑁆𑀩𑀢𑁆𑀢𑀸. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀼𑀧𑀺𑀦𑀓𑀽𑀧𑀫𑀸 𑀓𑀸𑀫𑀸’’𑀢𑀺 (𑀫. 𑀦𑀺. 𑁧.𑁨𑁩𑁪; 𑁨.𑁪𑁬; 𑀧𑀸𑀘𑀺. 𑁪𑁧𑁭; 𑀘𑀽𑀴𑀯. 𑁬𑁫).

𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀭𑀽𑀧𑀸𑀬𑀢𑀦𑀁 𑀬𑀢𑁆𑀢𑀓𑁄 𑀕𑀳𑀡𑀸𑀓𑀸𑀭𑁄, 𑀢𑀢𑁆𑀢𑀓𑀁. 𑀓𑀺𑀢𑁆𑀢𑀓𑀁 𑀧𑀫𑀸𑀡𑀦𑁆𑀢𑀺 𑀅𑀢𑁆𑀢𑀲𑀁𑀯𑁂𑀤𑀺𑀬𑀁 𑀧𑀭𑀲𑁆𑀲 𑀦 ¶ 𑀤𑀺𑀲𑀺𑀢𑀩𑁆𑀩𑀁, 𑀓𑀧𑁆𑀧𑀦𑀸𑀫𑀢𑁆𑀢𑀁 𑀭𑀽𑀧𑀁. 𑀢𑁂𑀦𑀸𑀳 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀳𑀻’’𑀢𑀺𑀆𑀤𑀺. 𑀭𑀽𑀧𑁂𑀢𑀺 𑀭𑀽𑀧𑀸𑀬𑀢𑀦𑁂. 𑀭𑀽𑀧𑀫𑀢𑁆𑀢𑀫𑁂𑀯𑀸𑀢𑀺 𑀦𑀻𑀮𑀸𑀤𑀺𑀪𑁂𑀤𑀁 𑀭𑀽𑀧𑀸𑀬𑀢𑀦𑀫𑀢𑁆𑀢𑀁, 𑀦 𑀦𑀻𑀮𑀸𑀤𑀺. 𑀯𑀺𑀲𑁂𑀲𑀦𑀺𑀯𑀢𑁆𑀢𑀦𑀢𑁆𑀣𑁄 𑀳𑀺 𑀅𑀬𑀁 𑀫𑀢𑁆𑀢-𑀲𑀤𑁆𑀤𑁄. 𑀬𑀤𑀺 𑀏𑀯𑀁, 𑀏𑀯-𑀓𑀸𑀭𑁄 𑀓𑀺𑀫𑀢𑁆𑀣𑀺𑀬𑁄? 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀜𑁆𑀳𑀺 𑀭𑀽𑀧𑀸𑀬𑀢𑀦𑁂 𑀮𑀩𑁆𑀪𑀫𑀸𑀦𑀫𑁆𑀧𑀺 𑀦𑀻𑀮𑀸𑀤𑀺𑀯𑀺𑀲𑁂𑀲𑀁 ‘‘𑀇𑀤𑀁 𑀦𑀻𑀮𑀁 𑀦𑀸𑀫, 𑀇𑀤𑀁 𑀧𑀻𑀢𑀁 𑀦𑀸𑀫𑀸’’𑀢𑀺 𑀦 𑀕𑀡𑁆𑀳𑀸𑀢𑀺. 𑀓𑀼𑀢𑁄 𑀦𑀺𑀘𑁆𑀘𑀸𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑀢𑁆𑀣𑀦𑁆𑀢𑀺 𑀲𑀁𑀳𑀺𑀢𑀲𑁆𑀲𑀧𑀺 𑀦𑀺𑀯𑀢𑁆𑀢𑀦𑀢𑁆𑀣𑀁 𑀏𑀯𑀓𑀸𑀭𑀕𑁆𑀕𑀳𑀡𑀁. 𑀢𑁂𑀦𑀸𑀳 ‘‘𑀦 𑀦𑀺𑀘𑁆𑀘𑀸𑀤𑀺𑀲𑀪𑀸𑀯’’𑀦𑁆𑀢𑀺. 𑀲𑁂𑀲𑀯𑀺𑀜𑁆𑀜𑀸𑀡𑁂𑀳𑀺𑀧𑀻𑀢𑀺 𑀚𑀯𑀦𑀯𑀺𑀜𑁆𑀜𑀸𑀡𑁂𑀳𑀺𑀧𑀺.

𑀤𑀺𑀝𑁆𑀞𑀁 𑀦𑀸𑀫 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀭𑀽𑀧𑀸𑀬𑀢𑀦𑀲𑁆𑀲 𑀤𑀲𑁆𑀲𑀦𑀦𑁆𑀢𑀺 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀭𑀽𑀧𑁂 𑀭𑀽𑀧𑀯𑀺𑀚𑀸𑀦𑀦’’𑀦𑁆𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀫𑀢𑁆𑀢𑀫𑁂𑀯𑀸𑀢𑀺 𑀬𑀢𑁆𑀢𑀓𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀭𑀽𑀧𑀸𑀬𑀢𑀦𑁂 𑀕𑀳𑀡𑀫𑀢𑁆𑀢𑀁, 𑀢𑀁𑀫𑀢𑁆𑀢𑀫𑁂𑀯 𑀫𑁂 𑀲𑀩𑁆𑀩𑀁 𑀘𑀺𑀢𑁆𑀢𑀁 𑀪𑀯𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. ‘‘𑀭𑀸𑀕𑀸𑀤𑀺𑀭𑀳𑁂𑀦𑀸’’𑀢𑀺 𑀯𑀸 𑀧𑀸𑀞𑁄. 𑀤𑀺𑀝𑁆𑀞𑀁 𑀦𑀸𑀫 𑀧𑀤𑀢𑁆𑀣𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀤𑀺𑀝𑁆𑀞𑀁 𑀭𑀽𑀧𑀁. 𑀢𑀢𑁆𑀣𑁂𑀯𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀤𑀺𑀝𑁆𑀞𑀫𑀢𑁆𑀢𑁂 𑀭𑀽𑀧𑁂. 𑀘𑀺𑀢𑁆𑀢𑀢𑁆𑀢𑀬𑀁 𑀤𑀺𑀝𑁆𑀞𑀫𑀢𑁆𑀢𑀁 𑀦𑀸𑀫 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀯𑀺𑀬 𑀭𑀸𑀕𑀸𑀤𑀺𑀯𑀺𑀭𑀳𑁂𑀦 𑀧𑀯𑀢𑁆𑀢𑀦𑀢𑁄. 𑀢𑁂𑀦𑀸𑀳 ‘‘𑀬𑀣𑀸 𑀢’’𑀦𑁆𑀢𑀺 𑀆𑀤𑀺.

𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑁂𑀦 ¶ 𑀯𑀺𑀜𑁆𑀜𑀸𑀢𑀸𑀭𑀫𑁆𑀫𑀡𑀁 𑀯𑀺𑀜𑁆𑀜𑀸𑀢𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁 𑀭𑀸𑀕𑀸𑀤𑀺𑀯𑀺𑀭𑀳𑁂𑀦 𑀯𑀺𑀜𑁆𑀜𑁂𑀬𑁆𑀬𑀢𑁄. 𑀢𑁂𑀦𑀸𑀳 ‘‘𑀬𑀣𑀸 𑀆𑀯𑀚𑁆𑀚𑀦𑁂𑀦𑀸’’𑀢𑀺𑀆𑀤𑀺.

𑀢𑀤𑀸𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂, 𑀦 𑀢𑀢𑁄 𑀧𑀝𑁆𑀞𑀸𑀬𑀸𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. ‘‘𑀤𑀺𑀝𑁆𑀞𑀫𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀬𑁂𑀲𑀁 𑀭𑀸𑀕𑀸𑀤𑀻𑀦𑀁 𑀦𑀺𑀯𑀢𑁆𑀢𑀦𑀁 𑀅𑀥𑀺𑀧𑁆𑀧𑁂𑀢𑀁, 𑀢𑁂 ‘‘𑀢𑁂𑀦𑀸’’𑀢𑀺 𑀏𑀢𑁆𑀣 𑀢-𑀲𑀤𑁆𑀤𑁂𑀦 𑀧𑀘𑁆𑀘𑀸𑀫𑀲𑀻𑀬𑀦𑁆𑀢𑀻𑀢𑀺 ‘‘𑀢𑁂𑀦 𑀭𑀸𑀕𑁂𑀦 𑀯𑀸 𑀭𑀢𑁆𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀯𑀺𑀲𑀬𑁂 𑀪𑀼𑀫𑁆𑀫𑀁, 𑀯𑀺𑀲𑀬𑀪𑀸𑀯𑁄 𑀘 𑀯𑀺𑀲𑀬𑀺𑀦𑀸 𑀲𑀫𑁆𑀩𑀦𑁆𑀥𑀯𑀲𑁂𑀦 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀝𑀺𑀩𑀤𑁆𑀥𑁄’’𑀢𑀺𑀆𑀤𑀺.

𑀲𑀢𑀻𑀢𑀺 𑀭𑀽𑀧𑀲𑁆𑀲 𑀬𑀣𑀸𑀲𑀪𑀸𑀯𑀲𑀮𑁆𑀮𑀓𑁆𑀔𑀡𑀸 𑀲𑀢𑀺 𑀫𑀼𑀝𑁆𑀞𑀸 𑀧𑀺𑀬𑀦𑀺𑀫𑀺𑀢𑁆𑀢𑀫𑀦𑀲𑀺𑀓𑀸𑀭𑁂𑀦 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀦 𑀤𑀺𑀲𑁆𑀲𑀢𑀺 𑀦𑀧𑁆𑀧𑀯𑀢𑁆𑀢𑀢𑀺. 𑀅𑀚𑁆𑀛𑁄𑀲𑀸𑀢𑀺 𑀅𑀚𑁆𑀛𑁄𑀲𑀸𑀬. 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀅𑀢𑁆𑀢𑀦𑀺𑀬𑀓𑀭𑀡𑁂𑀦.

𑀅𑀪𑀺𑀚𑁆𑀛𑀸 𑀘 𑀯𑀺𑀳𑁂𑀲𑀸 𑀘𑀸𑀢𑀺 𑀓𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀦𑁆𑀢𑀺 𑀆𑀳 𑁋 ‘‘𑀅𑀪𑀺𑀚𑁆𑀛𑀸𑀬 𑀘 𑀯𑀺𑀳𑁂𑀲𑀸𑀬 𑀘𑀸’’𑀢𑀺. 𑀅𑀢𑁆𑀣𑀯𑀲𑁂𑀦 𑀯𑀺𑀪𑀢𑁆𑀢𑀺𑀧𑀭𑀺𑀡𑀸𑀫𑁄𑀢𑀺 𑀆𑀳 𑁋 ‘‘𑀅𑀪𑀺𑀚𑁆𑀛𑀸𑀯𑀺𑀳𑁂𑀲𑀸𑀳𑀻’’𑀢𑀺. 𑀆𑀘𑀺𑀦𑀦𑁆𑀢𑀲𑁆𑀲𑀸𑀢𑀺 𑀯𑀟𑁆𑀠𑁂𑀦𑁆𑀢𑀲𑁆𑀲. 𑀧𑀝𑀺𑀲𑁆𑀲𑀢𑁄𑀢𑀺 𑀧𑀢𑀺𑀲𑁆𑀲𑀢𑁄 𑀲𑀩𑁆𑀩𑀢𑁆𑀣 𑀲𑀢𑀺𑀬𑀸 𑀬𑀼𑀢𑁆𑀢𑁄. 𑀲𑁂𑀯𑀢𑁄 𑀘𑀸𑀧𑀻𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀅𑀧𑀺-𑀲𑀤𑁆𑀤𑁄 𑀘 𑀦𑀺𑀧𑀸𑀢𑀫𑀢𑁆𑀢𑀦𑁆𑀢𑀺 ‘‘𑀲𑁂𑀯𑀦𑁆𑀢𑀲𑁆𑀲’’𑀇𑀘𑁆𑀘𑁂𑀯 𑀅𑀢𑁆𑀣𑁄 𑀯𑀼𑀢𑁆𑀢𑁄.

𑀫𑀸𑀮𑀼𑀓𑁆𑀬𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀭𑀺𑀳𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁬. 𑀧𑀭𑀺𑀳𑀸𑀦𑀲𑀪𑀸𑀯𑀦𑁆𑀢𑀺 ¶ 𑀅𑀦𑀯𑀚𑁆𑀚𑀥𑀫𑁆𑀫𑁂𑀳𑀺 𑀧𑀭𑀺𑀳𑀸𑀬𑀦𑀲𑀪𑀸𑀯𑀁. 𑀅𑀪𑀺𑀪𑀯𑀺𑀢𑀸𑀦𑀻𑀢𑀺 𑀅𑀪𑀺𑀪𑀽𑀢𑀸𑀦𑀺 𑀦𑀺𑀩𑁆𑀩𑀺𑀲𑁂𑀯𑀦𑀪𑀸𑀯𑀸𑀓𑀸𑀭𑁂𑀦. 𑀲𑀭𑀲𑀗𑁆𑀓𑀧𑁆𑀧𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀺𑀲𑀬𑁂 𑀅𑀦𑀯𑀝𑁆𑀞𑀺𑀢𑀪𑀸𑀯𑁂𑀦 𑀲𑀗𑁆𑀓𑀧𑁆𑀧𑀸. 𑀲𑀁𑀬𑁄𑀚𑀦𑀺𑀬𑀸𑀢𑀺 𑀲𑀁𑀬𑁄𑀚𑁂𑀢𑀩𑁆𑀩𑀸. 𑀲𑀁𑀬𑁄𑀚𑀦𑀸𑀦𑀜𑁆𑀳𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀑𑀓𑀸𑀲𑀁 𑀤𑁂𑀦𑁆𑀢𑁄 𑀓𑀺𑀮𑁂𑀲𑀚𑀸𑀢𑀁 𑀅𑀥𑀺𑀯𑀸𑀲𑁂𑀢𑀺 𑀦𑀸𑀫. 𑀓𑀺𑀮𑁂𑀲𑁄 𑀏𑀯 𑀓𑀺𑀮𑁂𑀲𑀚𑀸𑀢𑀁. 𑀆𑀭𑀫𑁆𑀫𑀡𑀁 𑀧𑀦 𑀘𑀺𑀢𑁆𑀢𑁂 𑀓𑀭𑁄𑀦𑁆𑀢𑁄 𑀅𑀥𑀺𑀯𑀸𑀲𑁂𑀢𑀺 𑀦𑀸𑀫. 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑁂𑀦 𑀦 𑀧𑀚𑀳𑀢𑀺 𑀆𑀭𑀫𑁆𑀫𑀡𑀁, 𑀓𑀺𑀮𑁂𑀲𑀁 𑀧𑀦 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑁂𑀦 𑀏𑀯. 𑀅𑀪𑀺𑀪𑀯𑀺𑀢𑀁 𑀆𑀬𑀢𑀦𑀦𑁆𑀢𑀺 𑀓𑀣𑀺𑀢𑀁 𑀅𑀥𑀺𑀯𑀸𑀲𑀦𑀸𑀤𑀺𑀦𑀸. ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀭𑀺𑀳𑀸𑀦𑀥𑀫𑁆𑀫𑁄 𑀳𑁄𑀢𑀻’’𑀢𑀺 𑀥𑀫𑁆𑀫𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑀁 𑀯𑀺𑀪𑀚𑀦𑁆𑀢𑁂𑀦 𑀪𑀕𑀯𑀢𑀸 ‘‘𑀢𑀜𑁆𑀘𑁂 𑀪𑀺𑀓𑁆𑀔𑀼 𑀅𑀥𑀺𑀯𑀸𑀲𑁂𑀢𑀻’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑁂𑀦 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀥𑀫𑁆𑀫𑁄 𑀤𑀲𑁆𑀲𑀺𑀢𑁄.

𑀧𑀭𑀺𑀳𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀫𑀸𑀤𑀯𑀺𑀳𑀸𑀭𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁭. 𑀦 ¶ 𑀧𑀺𑀤𑀳𑀺𑀢𑁆𑀯𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀦 𑀧𑀺𑀤𑀳𑀺𑀢𑁆𑀯𑀸 𑀲𑀜𑁆𑀙𑀸𑀤𑀺𑀢𑁆𑀯𑀸 𑀞𑀺𑀢𑀲𑁆𑀲. 𑀩𑁆𑀬𑀸𑀲𑀺𑀜𑁆𑀘𑀢𑀻𑀢𑀺 𑀓𑀺𑀮𑁂𑀲𑁂𑀳𑀺 𑀯𑀺𑀲𑁂𑀲𑁂𑀦 𑀆𑀲𑀺𑀜𑁆𑀘𑀢𑀺. 𑀓𑀺𑀮𑁂𑀲𑀢𑀺𑀦𑁆𑀢𑀦𑁆𑀢𑀺 𑀓𑀺𑀮𑁂𑀲𑁂𑀳𑀺 𑀅𑀯𑀲𑁆𑀲𑀼𑀢𑀁. 𑀤𑀼𑀩𑁆𑀩𑀮𑀧𑀻𑀢𑀺 𑀢𑀭𑀼𑀡𑀸 𑀦 𑀩𑀮𑀧𑁆𑀧𑀢𑁆𑀢𑀸. 𑀩𑀮𑀯𑀧𑀻𑀢𑀺 𑀉𑀩𑁆𑀩𑁂𑀕𑀸 𑀨𑀭𑀡𑀧𑁆𑀧𑀢𑁆𑀢𑀸 𑀘 𑀧𑀻𑀢𑀺. 𑀤𑀭𑀣𑀧𑁆𑀧𑀲𑁆𑀲𑀤𑁆𑀥𑀻𑀢𑀺 𑀓𑀸𑀬𑀘𑀺𑀢𑁆𑀢𑀤𑀭𑀣𑀯𑀽𑀧𑀲𑀫𑀮𑀓𑁆𑀔𑀡𑀸 𑀧𑀲𑁆𑀲𑀤𑁆𑀥𑀺. 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺 𑀧𑀘𑁆𑀘𑀬𑀧𑀭𑀫𑁆𑀧𑀭𑀸𑀬 𑀅𑀲𑀺𑀤𑁆𑀥𑀢𑁆𑀢𑀸. ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀫𑀸𑀤𑀯𑀺𑀳𑀸𑀭𑀻 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀧𑀼𑀕𑁆𑀕𑀮𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀧𑀸𑀫𑁄𑀚𑁆𑀚𑀁 𑀦 𑀳𑁄𑀢𑀺, 𑀧𑀸𑀫𑁄𑀚𑁆𑀚𑀁 𑀚𑀸𑀬𑀢𑀻’’𑀢𑀺𑀆𑀤𑀺𑀦𑀸 𑀘, 𑀥𑀫𑁆𑀫𑁂𑀦 ‘‘𑀧𑀫𑀸𑀤𑀯𑀺𑀳𑀸𑀭𑀻 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑀻’’𑀢𑀺 𑀘 𑀧𑀼𑀕𑁆𑀕𑀮𑁄 𑀤𑀲𑁆𑀲𑀺𑀢𑁄.

𑀧𑀫𑀸𑀤𑀯𑀺𑀳𑀸𑀭𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀁𑀯𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁮. 𑀇𑀤𑀦𑁆𑀢𑀺 ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀲𑀁𑀯𑀭𑁄’’𑀢𑀺? 𑀇𑀤𑀁 𑀯𑀘𑀦𑀁. 𑀧𑀳𑀸𑀢𑀩𑁆𑀩𑀥𑀫𑁆𑀫𑀓𑁆𑀔𑀸𑀦𑀯𑀲𑁂𑀦𑀸𑀢𑀺 𑀧𑀳𑀸𑀢𑀩𑁆𑀩𑀥𑀫𑁆𑀫𑀲𑁆𑀲𑁂𑀯 𑀓𑀣𑀦𑀁 𑀯𑀼𑀢𑁆𑀢𑀁. ‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀲𑀁𑀯𑀭𑁄 ¶ 𑀳𑁄𑀢𑀻’’𑀢𑀺 𑀥𑀫𑁆𑀫𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸’’𑀢𑀺𑀆𑀤𑀺𑀦𑀸 𑀥𑀫𑁆𑀫𑁄𑀯 𑀯𑀺𑀪𑀢𑁆𑀢𑁄.

𑀲𑀁𑀯𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁯. 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬𑀸𑀢𑀺 𑀲𑀫𑀣𑀯𑀲𑁂𑀦 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬. 𑀧𑀭𑀺𑀳𑀸𑀬𑀫𑀸𑀦𑁂𑀢𑀺 𑀢𑀲𑁆𑀲 𑀅𑀮𑀸𑀪𑁂𑀦 𑀧𑀭𑀺𑀳𑀸𑀬𑀫𑀸𑀦𑁂. 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁, 𑀲𑀫𑀣𑀫𑁂𑀯 𑀯𑀸.

𑁭. 𑀧𑀝𑀺𑀲𑀮𑁆𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁦. 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁.

𑁮-𑁯. 𑀧𑀞𑀫𑀦𑀢𑀼𑀫𑁆𑀳𑀸𑀓𑀁𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁧-𑁧𑁦𑁨. 𑀉𑀧𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸𑀢𑀺 𑀉𑀧𑀫𑀁 𑀧𑀭𑀺𑀳𑀭𑀺𑀢𑁆𑀯𑀸. 𑀲𑀼𑀤𑁆𑀥𑀺𑀓𑀯𑀲𑁂𑀦𑀸𑀢𑀺 𑀉𑀧𑀫𑀸𑀬 𑀯𑀺𑀦𑀸 𑀓𑁂𑀯𑀮𑀫𑁂𑀯.

𑁧𑁦. 𑀉𑀤𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩. 𑀉𑀤𑀓𑁄𑀢𑀺 ¶ 𑀢𑀲𑁆𑀲 𑀦𑀸𑀫𑀁. 𑀯𑁂𑀤𑀁 𑀜𑀸𑀡𑀁. 𑀲𑀩𑁆𑀩𑀁 𑀚𑀺𑀢𑀯𑀸𑀢𑀺 𑀲𑀩𑁆𑀩𑀚𑀺. 𑀅𑀯𑀔𑀢𑀦𑁆𑀢𑀺 𑀦𑀺𑀔𑀢𑀁. 𑀉𑀘𑁆𑀙𑀸𑀤𑀦𑀥𑀫𑁆𑀫𑁄𑀢𑀺 𑀉𑀘𑁆𑀙𑀸𑀤𑁂𑀢𑀩𑁆𑀩𑀲𑀪𑀸𑀯𑁄. 𑀧𑀭𑀺𑀫𑀤𑁆𑀤𑀦𑀥𑀫𑁆𑀫𑁄𑀢𑀺 𑀧𑀭𑀺𑀫𑀤𑁆𑀤𑀺𑀢𑀩𑁆𑀩𑀲𑀪𑀸𑀯𑁄. 𑀧𑀭𑀺𑀳𑀢𑁄𑀢𑀺 𑀧𑀭𑀺𑀳𑀭𑀺𑀢𑁄. 𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑀼𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀧𑀤𑁂𑀳𑀻𑀢𑀺 𑀯𑀢𑁆𑀢𑀩𑁆𑀩𑀁. 𑀉𑀘𑁆𑀙𑀸𑀤𑀦𑀁 𑀯𑀸 𑀧𑀭𑀺𑀫𑀤𑁆𑀤𑀦𑀫𑀢𑁆𑀢𑀫𑁂𑀯𑀸𑀢𑀺 𑀓𑀢𑁆𑀯𑀸 𑀦 𑀕𑀳𑀺𑀢𑀁.

𑀉𑀤𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀴𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀢𑀺𑀬𑁄 𑀧𑀡𑁆𑀡𑀸𑀲𑀓𑁄.

𑁧𑁧. 𑀬𑁄𑀕𑀓𑁆𑀔𑁂𑀫𑀺𑀯𑀕𑁆𑀕𑁄

𑁧. 𑀬𑁄𑀕𑀓𑁆𑀔𑁂𑀫𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁪. 𑀘𑀢𑀽𑀳𑀺 ¶ 𑀬𑁄𑀕𑁂𑀳𑀻𑀢𑀺 𑀓𑀸𑀫𑀬𑁄𑀕𑀸𑀤𑀻𑀳𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺. 𑀔𑁂𑀫𑀺𑀦𑁄𑀢𑀺 𑀔𑁂𑀫𑀯𑀢𑁄 𑀓𑀼𑀲𑀮𑀺𑀦𑁄. 𑀓𑀸𑀭𑀡𑀪𑀽𑀢𑀦𑁆𑀢𑀺 𑀓𑀢𑁆𑀢𑀩𑁆𑀩𑀉𑀧𑀸𑀬𑀲𑁆𑀲 𑀓𑀸𑀭𑀡𑀪𑀽𑀢𑀁. 𑀧𑀭𑀺𑀬𑀸𑀬𑀢𑀺 𑀧𑀯𑀢𑁆𑀢𑀺𑀁 𑀦𑀺𑀯𑀢𑁆𑀢𑀺𑀜𑁆𑀘 𑀜𑀸𑀧𑁂𑀢𑀻𑀢𑀺 𑀧𑀭𑀺𑀬𑀸𑀬𑁄, 𑀥𑀫𑁆𑀫𑁄 𑀘 𑀲𑁄 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀢𑁆𑀢𑀸 𑀧𑀭𑀺𑀬𑀸𑀬𑁄 𑀘𑀸𑀢𑀺 𑀥𑀫𑁆𑀫𑀧𑀭𑀺𑀬𑀸𑀬𑁄, 𑀢𑀁 𑀥𑀫𑁆𑀫𑀧𑀭𑀺𑀬𑀸𑀬𑀁. 𑀬𑀲𑁆𑀫𑀸 𑀧𑀦 𑀲𑁄 𑀢𑀲𑁆𑀲𑀸𑀥𑀺𑀕𑀫𑀲𑁆𑀲 𑀓𑀸𑀭𑀡𑀁 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀥𑀫𑁆𑀫𑀓𑀸𑀭𑀡’’𑀦𑁆𑀢𑀺. 𑀬𑀼𑀢𑁆𑀢𑀺𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀸𑀦𑀻𑀢𑀺 𑀯𑀸 𑀘𑀢𑀼𑀲𑀘𑁆𑀘𑀥𑀫𑁆𑀫𑀸𑀦𑀻𑀢𑀺 𑀯𑀸. ‘‘𑀢𑀲𑁆𑀫𑀸’’𑀢𑀺 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 𑁋 ‘‘𑀓𑀲𑁆𑀫𑀸’’𑀢𑀺 𑀓𑀸𑀭𑀡𑀁 𑀧𑀼𑀘𑁆𑀙𑀦𑁆𑀢𑁄 ‘‘𑀓𑀺𑀁 𑀅𑀓𑁆𑀔𑀸𑀢𑀢𑁆𑀢𑀸, 𑀉𑀤𑀸𑀳𑀼 𑀧𑀳𑀻𑀦𑀢𑁆𑀢𑀸’’𑀢𑀺 𑀯𑀺𑀪𑀚𑀺𑀢𑁆𑀯𑀸 𑀧𑀼𑀘𑁆𑀙𑀺. 𑀬𑀲𑁆𑀫𑀸 𑀧𑀦 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁 𑀬𑁄𑀕𑀓𑁆𑀔𑁂𑀫𑀺𑀪𑀸𑀯𑀲𑁆𑀲 𑀓𑀸𑀭𑀡𑀁, 𑀦 𑀓𑀣𑀦𑀁, 𑀢𑀲𑁆𑀫𑀸 ‘‘𑀧𑀳𑀻𑀦𑀢𑁆𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀬𑁄𑀕𑀓𑁆𑀔𑁂𑀫𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨-𑁧𑁦. 𑀉𑀧𑀸𑀤𑀸𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁫-𑁧𑁧𑁩. 𑀯𑁂𑀤𑀦𑀸𑀲𑀼𑀔𑀤𑀼𑀓𑁆𑀔𑀦𑁆𑀢𑀺 𑀯𑁂𑀤𑀦𑀸𑀲𑀗𑁆𑀔𑀸𑀢𑀁 𑀲𑀼𑀔𑀜𑁆𑀘 𑀤𑀼𑀓𑁆𑀔𑀜𑁆𑀘 𑀓𑀣𑀺𑀢𑀁. ‘‘𑀅𑀚𑁆𑀛𑀢𑁆𑀢𑀁 𑀲𑀼𑀔𑀁 𑀤𑀼𑀓𑁆𑀔’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀺𑀫𑀼𑀢𑁆𑀢𑀺𑀲𑀼𑀔𑀲𑁆𑀲 𑀘 𑀲𑀴𑀸𑀬𑀢𑀦𑀤𑀼𑀓𑁆𑀔𑀲𑁆𑀲 𑀘 𑀓𑀣𑀺𑀢𑀢𑁆𑀢𑀸 𑀯𑀺𑀯𑀝𑁆𑀝𑀲𑀼𑀔𑀁 𑀘𑁂𑀢𑁆𑀣 𑀓𑀣𑀺𑀢𑀫𑁂𑀯𑀸𑀢𑀺 ¶ 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀓𑀸𑀫𑀁 𑀔𑀦𑁆𑀥𑀺𑀬𑀯𑀕𑁆𑀕𑁂 𑀔𑀦𑁆𑀥𑀯𑀲𑁂𑀦 𑀤𑁂𑀲𑀦𑀸 𑀆𑀕𑀢𑀸, 𑀦 𑀆𑀬𑀢𑀦𑀯𑀲𑁂𑀦. 𑀏𑀢𑁆𑀣 𑀧𑀦 𑀯𑀢𑁆𑀢𑀩𑁆𑀩𑀁 𑀅𑀢𑁆𑀣𑀚𑀸𑀢𑀁 𑀔𑀦𑁆𑀥𑀺𑀬𑀯𑀕𑁆𑀕𑁂 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀉𑀧𑀸𑀤𑀸𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀬𑁄𑀕𑀓𑁆𑀔𑁂𑀫𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀮𑁄𑀓𑀓𑀸𑀫𑀕𑀼𑀡𑀯𑀕𑁆𑀕𑁄

𑁧-𑁨. 𑀧𑀞𑀫𑀫𑀸𑀭𑀧𑀸𑀲𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁪-𑁧𑁧𑁫. 𑀆𑀯𑀲𑀢𑀺 𑀏𑀢𑁆𑀣 𑀓𑀺𑀮𑁂𑀲𑀫𑀸𑀭𑁄𑀢𑀺 𑀆𑀯𑀸𑀲𑁄. 𑀓𑀸𑀫𑀕𑀼𑀡𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺. 𑀓𑀺𑀮𑁂𑀲𑀫𑀸𑀭𑀲𑁆𑀲 𑀆𑀯𑀸𑀲𑀁 𑀕𑀢𑁄 ¶ 𑀯𑀲𑀁 𑀕𑀢𑁄. 𑀢𑀺𑀯𑀺𑀥𑀲𑁆𑀲𑀸𑀢𑀺 𑀧𑀧𑀜𑁆𑀘𑀲𑀜𑁆𑀜𑀸𑀲𑀗𑁆𑀔𑀸𑀢𑀲𑁆𑀲 𑀢𑀺𑀯𑀺𑀥𑀲𑁆𑀲𑀧𑀺 𑀫𑀸𑀭𑀲𑁆𑀲. 𑀢𑀢𑁄 𑀏𑀯 𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑁆𑀲𑀧𑀺 𑀯𑀲𑀁 𑀕𑀢𑁄𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁.

𑀧𑀞𑀫𑀫𑀸𑀭𑀧𑀸𑀲𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀮𑁄𑀓𑀦𑁆𑀢𑀕𑀫𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁬. 𑀮𑁄𑀓𑀺𑀬𑀦𑁆𑀢𑀺 𑀏𑀢𑁆𑀣 𑀲𑀢𑁆𑀢𑀓𑀸𑀬𑀪𑀽𑀢𑀕𑀸𑀫𑀸𑀤𑀻𑀢𑀺 𑀮𑁄𑀓𑁄, 𑀘𑀓𑁆𑀓𑀯𑀸𑀴𑁄. 𑀲𑀗𑁆𑀔𑀸𑀭𑁄 𑀧𑀦 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄. 𑀅𑀦𑁆𑀢𑀦𑁆𑀢𑀺 𑀑𑀲𑀸𑀦𑀁. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀕𑀢𑀺𑀬𑀸 𑀲𑀫𑀸𑀦𑁂𑀢𑁆𑀯𑀸 𑀅𑀯𑀺𑀭𑁄𑀥𑁂𑀢𑁆𑀯𑀸. 𑀣𑁄𑀫𑁂𑀲𑁆𑀲𑀸𑀫𑀻𑀢𑀺 𑀧𑀲𑀁𑀲𑀺𑀲𑁆𑀲𑀸𑀫𑀺.

𑀏𑀯𑀁𑀲𑀫𑁆𑀧𑀢𑁆𑀢𑀺𑀓𑀦𑁆𑀢𑀺 𑀏𑀯𑀁𑀲𑀫𑁆𑀧𑀚𑁆𑀚𑀦𑀓𑀁 𑀏𑀯𑀁𑀧𑀲𑁆𑀲𑀺𑀢𑀩𑁆𑀩𑀁 𑀇𑀤𑀁 𑀫𑀫 𑀅𑀚𑁆𑀛𑁂𑀲𑀦𑀁. 𑀢𑁂𑀦𑀸𑀳 ‘‘𑀈𑀤𑀺𑀲𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀚𑀸𑀦𑀁 𑀚𑀸𑀦𑀸𑀢𑀻𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀚𑀸𑀦𑀺𑀢𑀩𑁆𑀩𑀁 𑀚𑀸𑀦𑀸𑀢𑀺 𑀏𑀯. 𑀦 𑀳𑀺 𑀧𑀤𑁂𑀲𑀜𑁆𑀜𑀸𑀡𑁂 𑀞𑀺𑀢𑁄 𑀚𑀸𑀦𑀺𑀢𑀩𑁆𑀩𑀁 𑀲𑀩𑁆𑀩𑀁 𑀚𑀸𑀦𑀸𑀢𑀺. 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦 𑀳𑀺 𑀅𑀯𑀺𑀲𑁂𑀲𑀕𑁆𑀕𑀳𑀡𑁂𑀦 𑀘 ‘‘𑀚𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀦𑀺𑀭𑀯𑀲𑁂𑀲𑀁 𑀜𑁂𑀬𑁆𑀬𑀚𑀸𑀢𑀁 𑀧𑀭𑀺𑀕𑁆𑀕𑀬𑁆𑀳𑀢𑀻𑀢𑀺 𑀢𑀩𑁆𑀩𑀺𑀲𑀬𑀸𑀬 𑀚𑀸𑀦𑀦𑀓𑀺𑀭𑀺𑀬𑀸𑀬 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀓𑀭𑀡𑀁 𑀪𑀯𑀺𑀢𑀼𑀁 𑀬𑀼𑀢𑁆𑀢𑀁. 𑀧𑀓𑀭𑀡𑀯𑀲𑁂𑀦 ‘‘𑀪𑀕𑀯𑀸’’𑀢𑀺 𑀧𑀤𑀲𑀦𑁆𑀦𑀺𑀥𑀸𑀦𑁂𑀦 𑀘 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀧𑀲𑁆𑀲𑀺𑀢𑀩𑁆𑀩𑀫𑁂𑀯 𑀧𑀲𑁆𑀲𑀢𑀻𑀢𑀺 𑀤𑀺𑀩𑁆𑀩𑀘𑀓𑁆𑀔𑀼-𑀧𑀜𑁆𑀜𑀸𑀘𑀓𑁆𑀔𑀼-𑀥𑀫𑁆𑀫𑀘𑀓𑁆𑀔𑀼-𑀩𑀼𑀤𑁆𑀥𑀘𑀓𑁆𑀔𑀼-𑀲𑀫𑀦𑁆𑀢𑀘𑀓𑁆𑀔𑀼-𑀲𑀗𑁆𑀔𑀸𑀢𑁂𑀳𑀺 𑀜𑀸𑀡𑀘𑀓𑁆𑀔𑀽𑀳𑀺 𑀧𑀲𑁆𑀲𑀺𑀢𑀩𑁆𑀩𑀁 𑀧𑀲𑁆𑀲𑀢𑀺 𑀏𑀯. 𑀅𑀣 𑀯𑀸 𑀚𑀸𑀦𑀁 𑀚𑀸𑀦𑀸𑀢𑀻𑀢𑀺 𑀬𑀣𑀸 𑀅𑀜𑁆𑀜𑁂 ¶ 𑀲𑀯𑀺𑀧𑀮𑁆𑀮𑀸𑀲𑀸 𑀓𑀸𑀫𑀭𑀽𑀧𑀧𑀭𑀺𑀜𑁆𑀜𑀸𑀯𑀸𑀤𑀺𑀦𑁄 𑀚𑀸𑀦𑀦𑁆𑀢𑀸𑀧𑀺 𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀚𑀸𑀦𑀦𑁆𑀢𑀺, 𑀦 𑀏𑀯𑀁 𑀪𑀕𑀯𑀸. 𑀪𑀕𑀯𑀸 𑀧𑀦 𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑁆𑀢𑀸 𑀚𑀸𑀦𑀦𑁆𑀢𑁄 𑀚𑀸𑀦𑀸𑀢𑀺 𑀏𑀯, 𑀤𑀺𑀝𑁆𑀞𑀺𑀤𑀲𑁆𑀲𑀦𑀲𑁆𑀲 𑀅𑀪𑀸𑀯𑀸 𑀧𑀲𑁆𑀲𑀦𑁆𑀢𑁄 𑀧𑀲𑁆𑀲𑀢𑀺 𑀏𑀯𑀸𑀢𑀺 𑀅𑀢𑁆𑀣𑁄.

𑀤𑀲𑁆𑀲𑀦𑀧𑀭𑀺𑀡𑀸𑀬𑀓𑀝𑁆𑀞𑁂𑀦𑀸𑀢𑀺 𑀬𑀣𑀸 𑀘𑀓𑁆𑀔𑀼 𑀲𑀢𑁆𑀢𑀸𑀦𑀁 𑀤𑀲𑁆𑀲𑀦𑀢𑁆𑀣𑀁 𑀧𑀭𑀺𑀡𑁂𑀢𑀺 𑀲𑀸𑀥𑁂𑀢𑀺, 𑀏𑀯𑀁 𑀮𑁄𑀓𑀲𑁆𑀲 𑀬𑀸𑀣𑀸𑀯𑀤𑀲𑁆𑀲𑀦𑀲𑀸𑀥𑀦𑀢𑁄𑀧𑀺 𑀤𑀲𑁆𑀲𑀦𑀓𑀺𑀘𑁆𑀘𑀧𑀭𑀺𑀡𑀸𑀬𑀓𑀝𑁆𑀞𑁂𑀦 𑀘𑀓𑁆𑀔𑀼𑀪𑀽𑀢𑁄, 𑀧𑀜𑁆𑀜𑀸𑀘𑀓𑁆𑀔𑀼𑀫𑀬𑀢𑁆𑀢𑀸 𑀯𑀸 𑀲𑀬𑀫𑁆𑀪𑀽𑀜𑀸𑀡𑁂𑀦 𑀧𑀜𑁆𑀜𑀸𑀘𑀓𑁆𑀔𑀼𑀁 𑀪𑀽𑀢𑁄 𑀧𑀢𑁆𑀢𑁄𑀢𑀺 𑀯𑀸 𑀘𑀓𑁆𑀔𑀼𑀪𑀽𑀢𑁄. 𑀜𑀸𑀡𑀪𑀽𑀢𑁄𑀢𑀺 𑀏𑀢𑀲𑁆𑀲 𑀘 𑀏𑀯𑀫𑁂𑀯 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀥𑀫𑁆𑀫𑀸 𑀯𑀸 𑀩𑁄𑀥𑀺𑀧𑀓𑁆𑀔𑀺𑀬𑀸, 𑀢𑁂𑀳𑀺 𑀉𑀧𑁆𑀧𑀦𑁆𑀦𑀢𑁆𑀢𑀸 𑀮𑁄𑀓𑀲𑁆𑀲 𑀘 𑀢𑀤𑀼𑀧𑁆𑀧𑀸𑀤𑀦𑀢𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀯𑀸 𑀥𑀫𑁆𑀫𑀁 𑀧𑀢𑁆𑀢𑁄 𑀅𑀥𑀺𑀕𑀢𑁄𑀢𑀺 𑀥𑀫𑁆𑀫𑀪𑀽𑀢𑁄. ‘‘𑀩𑁆𑀭𑀳𑁆𑀫𑀸’’𑀯𑀼𑀘𑁆𑀘𑀢𑀺 𑀲𑁂𑀝𑁆𑀞𑀝𑁆𑀞𑁂𑀦 𑀫𑀕𑁆𑀕𑀜𑀸𑀡𑀁, 𑀢𑁂𑀦 𑀉𑀧𑁆𑀧𑀦𑁆𑀦𑀢𑁆𑀢𑀸 𑀮𑁄𑀓𑀲𑁆𑀲 ¶ 𑀘 𑀢𑀤𑀼𑀧𑁆𑀧𑀸𑀤𑀦𑀢𑁄 𑀢𑀜𑁆𑀘 𑀲𑀬𑀫𑁆𑀪𑀽𑀜𑀸𑀡𑁂𑀦 𑀧𑀢𑁆𑀢𑁄𑀢𑀺 𑀩𑁆𑀭𑀳𑁆𑀫𑀪𑀽𑀢𑁄. 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀯𑀤𑀢𑀻𑀢𑀺 𑀯𑀢𑁆𑀢𑀸. 𑀘𑀺𑀭𑀁 𑀲𑀘𑁆𑀘𑀧𑀝𑀺𑀯𑁂𑀥𑀁 𑀧𑀯𑀢𑁆𑀢𑁂𑀦𑁆𑀢𑁄 𑀯𑀤𑀢𑀻𑀢𑀺 𑀧𑀯𑀢𑁆𑀢𑀸. 𑀅𑀢𑁆𑀣𑀁 𑀦𑀻𑀳𑀭𑀺𑀢𑁆𑀯𑀸𑀢𑀺 𑀤𑀼𑀓𑁆𑀔𑀸𑀤𑀺𑀅𑀢𑁆𑀣𑀁 𑀉𑀤𑁆𑀥𑀭𑀺𑀢𑁆𑀯𑀸. 𑀧𑀭𑀫𑀢𑁆𑀣𑀁 𑀯𑀸 𑀦𑀺𑀩𑁆𑀩𑀸𑀦𑀁 𑀧𑀸𑀧𑀬𑀺𑀢𑀸. 𑀅𑀫𑀢𑀲𑀘𑁆𑀙𑀺𑀓𑀺𑀭𑀺𑀬𑀁 𑀲𑀢𑁆𑀢𑁂𑀲𑀼 𑀉𑀧𑁆𑀧𑀸𑀤𑁂𑀦𑁆𑀢𑁄 𑀅𑀫𑀢𑀁 𑀤𑀤𑀸𑀢𑀻𑀢𑀺 𑀅𑀫𑀢𑀲𑁆𑀲 𑀤𑀸𑀢𑀸. 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀢𑀤𑀸𑀬𑀢𑁆𑀢𑀪𑀸𑀯𑀢𑁄 𑀥𑀫𑁆𑀫𑀲𑁆𑀲𑀸𑀫𑀻. 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀸𑀧𑁂𑀦𑁆𑀢𑁄 𑀪𑀸𑀭𑀺𑀬𑀁 𑀓𑀭𑁄𑀦𑁆𑀢𑁄 𑀕𑀭𑀼𑀁 𑀓𑀭𑁄𑀢𑀺 𑀦𑀸𑀫, 𑀢𑀣𑀸 𑀤𑀼𑀯𑀺𑀜𑁆𑀜𑁂𑀬𑁆𑀬𑀁 𑀓𑀢𑁆𑀯𑀸 𑀓𑀣𑁂𑀦𑁆𑀢𑁄𑀧𑀺.

𑀘𑀓𑁆𑀔𑀼𑀦𑀸 𑀯𑀺𑀚𑁆𑀚𑀫𑀸𑀦𑁂𑀦 𑀮𑁄𑀓𑀲𑀜𑁆𑀜𑀻 𑀳𑁄𑀢𑀺, 𑀦 𑀢𑀲𑁆𑀫𑀺𑀁 𑀅𑀲𑀢𑀺. 𑀦 𑀳𑀺 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀯𑀺𑀭𑀳𑁂𑀦 𑀮𑁄𑀓𑀲𑀫𑀜𑁆𑀜𑀸 𑀅𑀢𑁆𑀣𑀺. 𑀢𑁂𑀦𑀸𑀳 ‘‘𑀘𑀓𑁆𑀔𑀼𑀜𑁆𑀳𑀺 𑀮𑁄𑀓𑁄’’𑀢𑀺𑀆𑀤𑀺. 𑀅𑀧𑁆𑀧𑀳𑀻𑀦𑀤𑀺𑀝𑁆𑀞𑀻𑀢𑀺 𑀅𑀲𑀫𑀽𑀳𑀢𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀓𑁄 𑀖𑀦𑀯𑀺𑀦𑀺𑀩𑁆𑀪𑁄𑀕𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀲𑀫𑀼𑀤𑀸𑀬𑀁 𑀯𑀺𑀬 𑀅𑀯𑀬𑀯𑀁 ‘‘𑀮𑁄𑀓𑁄’’𑀢𑀺 𑀲𑀜𑁆𑀚𑀸𑀦𑀸𑀢𑀺 𑀘𑁂𑀯 𑀫𑀜𑁆𑀜𑀢𑀺 𑀘. 𑀢𑀣𑀸𑀢𑀺 𑀇𑀫𑀺𑀦𑀸 ‘‘𑀮𑁄𑀓𑁄𑀢𑀺 𑀲𑀜𑁆𑀚𑀸𑀦𑀸𑀢𑀺 𑀘𑁂𑀯 𑀫𑀜𑁆𑀜𑀢𑀺 𑀘𑀸’’𑀢𑀺 𑀧𑀤𑀢𑁆𑀢𑀬𑀁 𑀆𑀓𑀟𑁆𑀠𑀢𑀺. 𑀢𑀲𑁆𑀲𑀸𑀢𑀺 𑀧𑀼𑀣𑀼𑀚𑁆𑀚𑀦𑀲𑁆𑀲, 𑀘𑀓𑁆𑀓𑀯𑀸𑀴𑀮𑁄𑀓𑀲𑁆𑀲 𑀯𑀸. 𑀘𑀓𑁆𑀔𑀸𑀤𑀺𑀫𑁂𑀯 𑀳𑀺 𑀲𑀳𑁄𑀓𑀸𑀲𑁂𑀦 ‘‘𑀘𑀓𑁆𑀓𑀯𑀸𑀴𑁄’’𑀢𑀺 𑀧𑀼𑀣𑀼𑀚𑁆𑀚𑀦𑁄 𑀲𑀜𑁆𑀚𑀸𑀦𑀸𑀢𑀺. 𑀕𑀫𑀦𑁂𑀦𑀸𑀢𑀺 𑀧𑀤𑀲𑀸 𑀕𑀫𑀦𑁂𑀦. 𑀦 𑀲𑀓𑁆𑀓𑀸 𑀢𑁂𑀲𑀁 𑀅𑀦𑀦𑁆𑀢𑀢𑁆𑀢𑀸. 𑀮𑀼𑀚𑁆𑀚𑀦𑀝𑁆𑀞𑁂𑀦𑀸𑀢𑀺 𑀅𑀪𑀺𑀲𑀗𑁆𑀔𑀸𑀭𑀮𑁄𑀓𑀯𑀲𑁂𑀦 𑀮𑁄𑀓𑀲𑁆𑀲 𑀅𑀦𑁆𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀲𑁆𑀲 𑀅𑀦𑁆𑀢𑁄 𑀦𑀸𑀫 𑀦𑀺𑀩𑁆𑀩𑀸𑀦𑀁. 𑀢𑀁 𑀧𑀢𑁆𑀢𑀼𑀁 𑀲𑀓𑁆𑀓𑀸 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀧𑀢𑁆𑀢𑀩𑁆𑀩𑀢𑁆𑀢𑀸. 𑀘𑀓𑁆𑀓𑀯𑀸𑀴𑀮𑁄𑀓𑀲𑁆𑀲 𑀧𑀦 𑀅𑀦𑁆𑀢𑁄 𑀦𑀸𑀫, 𑀦𑀢𑁆𑀣𑀺 𑀢𑀲𑁆𑀲 𑀕𑀫𑀦𑁂𑀦 𑀅𑀧𑁆𑀧𑀢𑁆𑀢𑀩𑁆𑀩𑀢𑁆𑀢𑀸.

𑀇𑀫𑁂𑀳𑀺 𑀧𑀤𑁂𑀳𑀻𑀢𑀺 𑀇𑀫𑁂𑀳𑀺 𑀯𑀸𑀓𑁆𑀬𑀯𑀺𑀪𑀸𑀕𑁂𑀳𑀺 𑀧𑀤𑁂𑀳𑀺. 𑀢𑀸𑀦𑀺 𑀧𑀦 𑀅𑀓𑁆𑀔𑀭𑀲𑀫𑀼𑀤𑀸𑀬𑀮𑀓𑁆𑀔𑀡𑀸𑀦𑀻𑀢𑀺 𑀆𑀳 ‘‘𑀅𑀓𑁆𑀔𑀭𑀲𑀫𑁆𑀧𑀺𑀡𑁆𑀟𑀦𑁂𑀳𑀻’’𑀢𑀺. 𑀧𑀸𑀝𑀺𑀬𑁂𑀓𑁆𑀓𑀅𑀓𑁆𑀔𑀭𑁂𑀳𑀻𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀧𑀤𑁂 𑀧𑀝𑀺𑀦𑀺𑀬𑀢𑀲𑀦𑁆𑀦𑀺𑀯𑁂𑀲𑁂𑀳𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀘𑀺𑀢𑁆𑀢𑁂𑀦 𑀕𑀬𑁆𑀳𑀫𑀸𑀦𑁂𑀳𑀺 𑀅𑀓𑁆𑀔𑀭𑁂𑀳𑀻𑀢𑀺 𑀅𑀢𑁆𑀣𑁄.

𑀕𑀫𑀦𑀝𑁆𑀞𑁂𑀦 ‘‘𑀧𑀡𑁆𑀟𑀸’’ 𑀯𑀼𑀘𑁆𑀘𑀢𑀺 𑀧𑀜𑁆𑀜𑀸, 𑀢𑀸𑀬 𑀇𑀢𑁄 𑀕𑀢𑁄 𑀧𑀢𑁆𑀢𑁄𑀢𑀺 𑀧𑀡𑁆𑀟𑀺𑀢𑁄, 𑀧𑀜𑁆𑀜𑀯𑀸. 𑀫𑀳𑀸𑀧𑀜𑁆𑀜𑀢𑀸 ¶ 𑀦𑀸𑀫 𑀧𑀝𑀺𑀲𑀫𑁆𑀪𑀺𑀤𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀆𑀳 ‘‘𑀫𑀳𑀦𑁆𑀢𑁂 𑀅𑀢𑁆𑀣𑁂’’𑀢𑀺𑀆𑀤𑀺. 𑀬𑀣𑀸 𑀢𑀦𑁆𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁 𑀧𑀞𑀫𑀯𑀺𑀓𑀧𑁆𑀧𑁂, 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀦 𑀧𑀘𑁆𑀘𑀸𑀫𑀲𑀦𑀦𑁆𑀢𑀺 𑀆𑀳 ‘‘𑀢𑀁 𑀩𑁆𑀬𑀸𑀓𑀢’’𑀦𑁆𑀢𑀺.

𑀮𑁄𑀓𑀦𑁆𑀢𑀕𑀫𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀓𑀸𑀫𑀕𑀼𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁭. 𑀘𑁂𑀢𑀲𑁄𑀢𑀺 ¶ 𑀓𑀭𑀡𑁂 𑀲𑀸𑀫𑀺𑀯𑀘𑀦𑀁. 𑀘𑀺𑀢𑁆𑀢𑁂𑀦 𑀲𑀁𑀨𑀼𑀲𑀦𑀁 𑀦𑀸𑀫 𑀅𑀦𑀼𑀪𑀯𑁄𑀢𑀺 𑀆𑀳 ‘‘𑀘𑀺𑀢𑁆𑀢𑁂𑀦 𑀅𑀦𑀼𑀪𑀽𑀢𑀧𑀼𑀩𑁆𑀩𑀸’’𑀢𑀺. 𑀉𑀢𑀼𑀢𑁆𑀢𑀬𑀸𑀦𑀼𑀭𑀽𑀧𑀢𑀸𑀯𑀲𑁂𑀦 𑀧𑀸𑀲𑀸𑀤𑀢𑁆𑀢𑀬𑀁, 𑀢𑀁 𑀯𑀲𑁂𑀦 𑀢𑀺𑀯𑀺𑀥𑀦𑀸𑀝𑀓𑀪𑁂𑀤𑁄. 𑀫𑀦𑁄𑀭𑀫𑁆𑀫𑀢𑀸𑀫𑀢𑁆𑀢𑁂𑀦 𑀓𑀸𑀫𑀕𑀼𑀡𑀁 𑀓𑀢𑁆𑀯𑀸 𑀤𑀲𑁆𑀲𑀺𑀢𑀁, 𑀦 𑀓𑀸𑀫𑀯𑀲𑁂𑀦. 𑀦 𑀳𑀺 𑀅𑀪𑀺𑀦𑀺𑀓𑁆𑀔𑀫𑀦𑀢𑁄 𑀉𑀤𑁆𑀥𑀁 𑀩𑁄𑀥𑀺𑀲𑀢𑁆𑀢𑀲𑁆𑀲 𑀓𑀸𑀫𑀯𑀺𑀢𑀓𑁆𑀓𑀸 𑀪𑀽𑀢𑀧𑀼𑀩𑁆𑀩𑀸. 𑀢𑁂𑀦𑀸𑀳 𑀫𑀸𑀭𑁄 𑀧𑀸𑀧𑀺𑀫𑀸 𑁋

‘‘𑀲𑀢𑁆𑀢 𑀯𑀲𑁆𑀲𑀸𑀦𑀺 𑀪𑀕𑀯𑀦𑁆𑀢𑀁, 𑀅𑀦𑀼𑀩𑀦𑁆𑀥𑀺𑀁 𑀧𑀤𑀸𑀧𑀤𑀁;

𑀑𑀢𑀸𑀭𑀁 𑀦𑀸𑀥𑀺𑀕𑀘𑁆𑀙𑀺𑀲𑁆𑀲𑀁, 𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀢𑀻𑀫𑀢𑁄’’𑀢𑀺. (𑀲𑀼. 𑀦𑀺. 𑁪𑁪𑁮);

𑀫𑁂𑀢𑁆𑀢𑁂𑀬𑁆𑀬𑁄 𑀦𑀸𑀫𑀸𑀢𑀺𑀆𑀤𑀺 𑀅𑀦𑀸𑀕𑀢𑀸𑀭𑀫𑁆𑀫𑀡𑀤𑀲𑁆𑀲𑀦𑀫𑀢𑁆𑀢𑀁, 𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀏𑀯𑀁 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀅𑀢𑁆𑀢𑀸 𑀧𑀺𑀬𑀸𑀬𑀺𑀢𑀩𑁆𑀩𑀭𑀽𑀧𑁄 𑀏𑀢𑀲𑁆𑀲𑀸𑀢𑀺 𑀅𑀢𑁆𑀢𑀭𑀽𑀧𑁄, 𑀉𑀢𑁆𑀢𑀭𑀧𑀤𑁂 𑀧𑀼𑀭𑀺𑀫𑀧𑀤𑀮𑁄𑀧𑁂𑀦𑀸𑀢𑀺 ‘‘𑀅𑀢𑁆𑀢𑀦𑁄 𑀳𑀺𑀢𑀓𑀸𑀫𑀚𑀸𑀢𑀺𑀓𑁂𑀦𑀸’’𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀅𑀢𑁆𑀢𑀭𑀽𑀧𑁂𑀦𑀸𑀢𑀺 𑀯𑀸 𑀧𑀻𑀢𑀺𑀲𑁄𑀫𑀦𑀲𑁆𑀲𑁂𑀳𑀺 𑀕𑀳𑀺𑀢𑀲𑀪𑀸𑀯𑁂𑀦 𑀢𑀼𑀝𑁆𑀞𑀧𑀳𑀝𑁆𑀞𑁂𑀦 𑀉𑀤𑀕𑁆𑀕𑀼𑀤𑀕𑁆𑀕𑁂𑀦. 𑀅𑀧𑁆𑀧𑀫𑀸𑀤𑁄𑀢𑀺 𑀅𑀧𑁆𑀧𑀫𑀚𑁆𑀚𑀦𑀁 𑀓𑀼𑀲𑀮𑀥𑀫𑁆𑀫𑁂𑀲𑀼 𑀅𑀔𑀡𑁆𑀟𑀓𑀸𑀭𑀺𑀢𑀸𑀢𑀺 𑀆𑀳 ‘‘𑀲𑀸𑀢𑀘𑁆𑀘𑀓𑀺𑀭𑀺𑀬𑀸’’𑀢𑀺. 𑀅𑀯𑁄𑀲𑁆𑀲𑀕𑁆𑀕𑁄𑀢𑀺 𑀘𑀺𑀢𑁆𑀢𑀲𑁆𑀲 𑀓𑀸𑀫𑀕𑀼𑀡𑁂𑀲𑀼 𑀅𑀯𑁄𑀲𑁆𑀲𑀚𑁆𑀚𑀦𑀁 𑀧𑀓𑁆𑀔𑀦𑁆𑀤𑀺𑀢𑀼𑀁 𑀅𑀧𑁆𑀧𑀤𑀸𑀦𑀁. 𑀧𑀼𑀭𑀺𑀫𑁄 𑀯𑀺𑀓𑀧𑁆𑀧𑁄 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀓𑀭𑀡𑀯𑀲𑁂𑀦 𑀤𑀲𑁆𑀲𑀺𑀢𑁄, 𑀧𑀘𑁆𑀙𑀺𑀫𑁄 𑀅𑀓𑀼𑀲𑀮𑀸𑀦𑀁 𑀅𑀓𑀭𑀡𑀯𑀲𑁂𑀦. 𑀤𑁆𑀯𑁂 𑀥𑀫𑁆𑀫𑀸𑀢𑀺 𑀅𑀧𑁆𑀧𑀫𑀸𑀤𑁄 𑀲𑀢𑀻𑀢𑀺 𑀤𑁆𑀯𑁂 𑀥𑀫𑁆𑀫𑀸. 𑀅𑀧𑁆𑀧𑀫𑀸𑀤𑁄 𑀲𑀢𑀺 𑀘 𑀢𑀣𑀸 𑀧𑀯𑀢𑁆𑀢𑀸 𑀘𑀢𑁆𑀢𑀸𑀭𑁄 𑀓𑀼𑀲𑀮𑀥𑀫𑁆𑀫𑀓𑁆𑀔𑀦𑁆𑀥𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀢𑁆𑀢𑀩𑁆𑀩𑀸𑀢𑀺 𑀧𑀯𑀢𑁆𑀢𑁂𑀢𑀩𑁆𑀩𑀸.

𑀢𑀲𑁆𑀫𑀺𑀁 𑀆𑀬𑀢𑀦𑁂𑀢𑀺 𑀢𑀲𑁆𑀫𑀺𑀁 𑀦𑀺𑀩𑁆𑀩𑀸𑀦𑀲𑀜𑁆𑀜𑀺𑀢𑁂 𑀓𑀸𑀭𑀡𑁂 𑀧𑀝𑀺𑀯𑁂𑀥𑁂. 𑀢𑀁 𑀓𑀸𑀭𑀡𑀦𑁆𑀢𑀺 𑀙𑀦𑁆𑀦𑀁 𑀆𑀬𑀢𑀦𑀸𑀦𑀁 𑀓𑀸𑀭𑀡𑀁. 𑀲𑀴𑀸𑀬𑀢𑀦𑀁 𑀦𑀺𑀭𑀼𑀚𑁆𑀛𑀢𑀺 𑀏𑀢𑁆𑀣𑀸𑀢𑀺 𑀲𑀴𑀸𑀬𑀢𑀦𑀦𑀺𑀭𑁄𑀥𑁄 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁. 𑀢𑁂𑀦𑀸𑀳 ‘‘𑀦𑀺𑀩𑁆𑀩𑀸𑀦𑀁. 𑀢𑀁 𑀲𑀦𑁆𑀥𑀸𑀬𑀸’’𑀢𑀺𑀆𑀤𑀺. 𑀦𑀺𑀩𑁆𑀩𑀸𑀦𑀲𑁆𑀫𑀺𑀦𑁆𑀢𑀺 𑀦𑀺𑀩𑁆𑀩𑀸𑀦𑀫𑁆𑀳𑀺.

𑀓𑀸𑀫𑀕𑀼𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁬. 𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁮-𑁧𑁧𑁯. 𑀤𑀺𑀝𑁆𑀞𑁂𑀢𑀺 ¶ 𑀧𑀘𑁆𑀘𑀓𑁆𑀔𑀪𑀽𑀢𑁂. 𑀥𑀫𑁆𑀫𑁂𑀢𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀥𑀫𑁆𑀫𑁂. 𑀢𑀢𑁆𑀣 𑀳𑀺 𑀅𑀢𑁆𑀢𑀸𑀢𑀺 𑀪𑀯𑀢𑀺 𑀲𑀜𑁆𑀜𑀸 𑀤𑀺𑀝𑁆𑀞𑀺 𑀘𑀸𑀢𑀺 𑀅𑀢𑁆𑀢𑀪𑀸𑀯𑀲𑀜𑁆𑀜𑀸. 𑀢𑁂𑀦𑀸𑀳 𑁋 ‘‘𑀤𑀺𑀝𑁆𑀞𑁂𑀯 ¶ 𑀥𑀫𑁆𑀫𑁂𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂’’𑀢𑀺. ‘‘𑀢𑀦𑁆𑀦𑀺𑀲𑁆𑀲𑀺𑀢’’𑀦𑁆𑀢𑀺 𑀏𑀢𑁆𑀣 𑀢𑀁-𑀲𑀤𑁆𑀤𑁂𑀦 𑀳𑁂𑀝𑁆𑀞𑀸 𑀅𑀪𑀺𑀦𑀦𑁆𑀤𑀦𑀸𑀤𑀺𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸 𑀢𑀡𑁆𑀳𑀸 𑀧𑀘𑁆𑀘𑀸𑀫𑀝𑁆𑀞𑀸𑀢𑀺 𑀆𑀳 𑁋 ‘‘𑀢𑀡𑁆𑀳𑀸𑀦𑀺𑀲𑁆𑀲𑀺𑀢’’𑀦𑁆𑀢𑀺. 𑀢𑀁 𑀉𑀧𑀸𑀤𑀸𑀦𑀁 𑀏𑀢𑀲𑁆𑀲𑀸𑀢𑀺 𑀢𑀤𑀼𑀧𑀸𑀤𑀸𑀦𑀁. 𑀢𑁂𑀦𑀸𑀳 𑁋 ‘‘𑀢𑀁𑀕𑀳𑀡’’𑀦𑁆𑀢𑀺𑀆𑀤𑀺. 𑀢𑀡𑁆𑀳𑀼𑀧𑀸𑀤𑀸𑀦𑀲𑀗𑁆𑀔𑀸𑀢𑀁 𑀕𑀳𑀡𑀁 𑀏𑀢𑀲𑁆𑀲𑀸𑀢𑀺 𑀢𑀁𑀕𑀳𑀡𑀁. 𑀙𑀝𑁆𑀞𑀁 𑀉𑀢𑁆𑀢𑀸𑀦𑀫𑁂𑀯 𑀧𑀜𑁆𑀘𑀫𑁂 𑀯𑀼𑀢𑁆𑀢𑀦𑀬𑀢𑁆𑀢𑀸.

𑀲𑀓𑁆𑀓𑀧𑀜𑁆𑀳𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀸𑀭𑀺𑀧𑀼𑀢𑁆𑀢𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁦. 𑀖𑀝𑁂𑀲𑁆𑀲𑀢𑀻𑀢𑀺 𑀧𑀼𑀩𑁆𑀩𑁂𑀦𑀸𑀧𑀭𑀁 𑀖𑀝𑀺𑀢𑀁 𑀲𑀫𑁆𑀩𑀦𑁆𑀥𑀁 𑀓𑀭𑀺𑀲𑁆𑀲𑀢𑀺. 𑀯𑀺𑀘𑁆𑀙𑁂𑀤𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀫𑀼𑀧𑁆𑀧𑀢𑁆𑀢𑀺𑀬𑀸 𑀉𑀘𑁆𑀙𑁂𑀤𑀁.

𑁮. 𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁧. 𑀬𑁂 𑀥𑀫𑁆𑀫𑀸 𑀲𑀫𑁆𑀫𑀤𑁂𑀯 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀯𑀺𑀫𑀼𑀢𑁆𑀢𑀺𑀬𑀸 𑀅𑀭𑀳𑀢𑁆𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀺, 𑀢𑁂 𑀲𑀤𑁆𑀥𑀸𑀤𑀬𑁄 𑀲𑀫𑁆𑀪𑀸𑀭𑀸 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀺𑀬𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀧𑀭𑀺𑀧𑀸𑀘𑁂𑀦𑁆𑀢𑀻𑀢𑀺 𑀧𑀭𑀺𑀧𑀸𑀓𑀁 𑀧𑀭𑀺𑀡𑀸𑀫𑀁 𑀕𑀫𑁂𑀦𑁆𑀢𑀺. 𑀥𑀫𑁆𑀫𑀸𑀢𑀺 𑀓𑀸𑀭𑀡𑀪𑀽𑀢𑀸 𑀥𑀫𑁆𑀫𑀸. 𑀯𑀺𑀲𑀼𑀤𑁆𑀥𑀺𑀓𑀸𑀭𑀡𑀯𑀲𑁂𑀦𑀸𑀢𑀺 𑀯𑀺𑀲𑀼𑀤𑁆𑀥𑀺𑀓𑀸𑀭𑀡𑀢𑀸𑀯𑀲𑁂𑀦, 𑀲𑀸 𑀧𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀓𑀸𑀭𑀡𑀢𑁄 𑀯𑀺𑀲𑀼𑀤𑁆𑀥𑀺. 𑀬𑀣𑀸 𑀦𑀸𑀫 𑀚𑀸𑀢𑀺𑀲𑀫𑁆𑀧𑀦𑁆𑀦𑀲𑁆𑀲 𑀔𑀢𑁆𑀢𑀺𑀬𑀓𑀼𑀫𑀸𑀭𑀲𑁆𑀲 𑀯𑀺𑀧𑀓𑁆𑀔𑀯𑀺𑀕𑀫𑁂𑀦 𑀧𑀓𑁆𑀔𑀲𑀗𑁆𑀕𑀳𑁂𑀦 𑀧𑀯𑀢𑁆𑀢𑀺𑀝𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀬𑀸 𑀘 𑀧𑀭𑀺𑀲𑀼𑀤𑁆𑀥𑀺 𑀳𑁄𑀢𑀺, 𑀏𑀯𑀫𑁂𑀯𑀁 𑀤𑀝𑁆𑀞𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀼𑀢𑁆𑀢𑀁 𑀳𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳.

𑀅𑀲𑁆𑀲𑀤𑁆𑀥𑀸𑀤𑀬𑁄𑀧𑀺 𑀧𑀼𑀕𑁆𑀕𑀮𑀸 𑀲𑀤𑁆𑀥𑀸𑀤𑀻𑀦𑀁 𑀬𑀸𑀯𑀤𑁂𑀯 𑀧𑀭𑀺𑀳𑀸𑀦𑀸𑀬 𑀳𑁄𑀦𑁆𑀢𑀺, 𑀲𑀤𑁆𑀥𑀸𑀤𑀬𑁄 𑀧𑀸𑀭𑀺𑀧𑀽𑀭𑀺𑀬𑀸𑀯, 𑀢𑀣𑀸 𑀧𑀲𑀸𑀤𑀦𑀺𑀬𑀲𑀼𑀢𑁆𑀢𑀦𑁆𑀢𑀸𑀤𑀺𑀧𑀘𑁆𑀘𑀯𑁂𑀓𑁆𑀔𑀡𑀸, 𑀧𑀲𑀸𑀤𑀦𑀺𑀬𑀲𑀼𑀢𑁆𑀢𑀦𑁆𑀢𑀸 𑀦𑀸𑀫 𑀲𑀫𑁆𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀸𑀤𑀬𑁄. 𑀲𑀫𑁆𑀫𑀧𑁆𑀧𑀥𑀸𑀦𑁂𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑀲𑀼𑀢𑁆𑀢𑀦𑁆𑀢𑁂. 𑀲𑀢𑀺𑀧𑀝𑁆𑀞𑀸𑀦𑁂𑀢𑀺 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂. 𑀛𑀸𑀦𑀯𑀺𑀫𑁄𑀓𑁆𑀔𑁂𑀢𑀺 𑀛𑀸𑀦𑀸𑀦𑀺 𑀘𑁂𑀯 𑀯𑀺𑀫𑁄𑀓𑁆𑀔𑁂 𑀘 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀲𑀼𑀢𑁆𑀢𑀦𑁆𑀢𑁂. 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑁂𑀢𑀺 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀲𑀼𑀢𑁆𑀢𑀦𑁆𑀢𑁂.

𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀤𑀬𑁄𑀢𑀺 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸 𑀲𑀻𑀮𑀲𑀁𑀯𑀭𑁄 𑀅𑀪𑀺𑀲𑀮𑁆𑀮𑁂𑀔𑀓𑀣𑀸 𑀯𑀻𑀭𑀺𑀬𑀸𑀭𑀫𑁆𑀪𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸𑀢𑀺 ¶ 𑀇𑀫𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀤𑀬𑁄 𑀧𑀜𑁆𑀘 𑀥𑀫𑁆𑀫𑀸, 𑀬𑁂 ‘‘𑀇𑀥, 𑀫𑁂𑀖𑀺𑀬, 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀉𑀤𑀸𑀦𑁂 ¶ (𑀉𑀤𑀸. 𑁩𑁧) 𑀓𑀣𑀺𑀢𑀸. 𑀮𑁄𑀓𑀁 𑀯𑁄𑀮𑁄𑀓𑁂𑀦𑁆𑀢𑀲𑁆𑀲𑀸𑀢𑀺 𑀆𑀬𑀲𑁆𑀫𑀢𑁄 𑀭𑀸𑀳𑀼𑀮𑀲𑁆𑀲 𑀢𑀸𑀲𑀜𑁆𑀘 𑀤𑁂𑀯𑀢𑀸𑀦𑀁 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀁 𑀧𑀲𑁆𑀲𑀦𑁆𑀢𑀲𑁆𑀲. 𑀢𑀢𑁄 𑀬𑁂𑀦 𑀅𑀦𑁆𑀥𑀯𑀦𑀁, 𑀢𑀢𑁆𑀣 𑀤𑀺𑀯𑀸𑀯𑀺𑀳𑀸𑀭𑀸𑀬 𑀫𑀳𑀸𑀲𑀫𑀸𑀕𑀫𑁄 𑀪𑀯𑀺𑀲𑁆𑀲𑀢𑀻𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀏𑀢𑁆𑀢𑀓𑀸𑀢𑀺 𑀕𑀡𑀦𑀸𑀯𑀲𑁂𑀦 𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀻’’𑀢𑀺.

𑀭𑀼𑀓𑁆𑀔𑀧𑀩𑁆𑀩𑀢𑀦𑀺𑀲𑁆𑀲𑀺𑀢𑀸 𑀪𑀽𑀫𑀝𑁆𑀞𑀓𑀸, 𑀆𑀓𑀸𑀲𑀘𑀸𑀭𑀺𑀯𑀺𑀫𑀸𑀦𑀯𑀸𑀲𑀺𑀦𑁄 𑀅𑀦𑁆𑀢𑀮𑀺𑀓𑁆𑀔𑀝𑁆𑀞𑀓𑀸. 𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀸𑀦𑀁 𑀤𑀲𑁆𑀲𑀦𑀝𑁆𑀞𑁂𑀦.

𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀮𑁄𑀓𑀓𑀸𑀫𑀕𑀼𑀡𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀕𑀳𑀧𑀢𑀺𑀯𑀕𑁆𑀕𑁄

𑁧-𑁩. 𑀯𑁂𑀲𑀸𑀮𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁨𑁪-𑁧𑁨𑁬. 𑀤𑁆𑀯𑀻𑀲𑀽𑀢𑀺 𑀇𑀫𑀲𑁆𑀫𑀺𑀁 𑀕𑀳𑀧𑀢𑀺𑀯𑀕𑁆𑀕𑁂 𑀧𑀞𑀫𑀤𑀼𑀢𑀺𑀬𑁂𑀲𑀼 𑀢𑀢𑀺𑀬𑁂 𑀘 𑀯𑀼𑀢𑁆𑀢𑀢𑁆𑀣𑀫𑁂𑀯 𑀧𑀸𑀞𑀚𑀸𑀢𑀁 𑀅𑀧𑀼𑀩𑁆𑀩𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑁪-𑁫. 𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁨𑁭-𑁧𑁨𑁮. 𑀓𑀸𑀫𑀁 𑀅𑀜𑁆𑀜𑁂𑀧𑀺 𑀧𑀩𑁆𑀩𑀚𑀺𑀢𑀸 𑀬𑀼𑀢𑁆𑀢𑀓𑀸𑀮𑁂 𑀧𑀺𑀡𑁆𑀟𑀁 𑀉𑀮𑀫𑀸𑀦𑀸 𑀘𑀭𑀦𑁆𑀢𑀺𑀬𑁂𑀯, 𑀅𑀬𑀁 𑀧𑀦 𑀑𑀤𑀭𑀺𑀢𑁄, 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀧𑀩𑁆𑀩𑀚𑀺𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀺𑀡𑁆𑀟𑀁 𑀉𑀮𑀫𑀸𑀦𑁄’’𑀢𑀺𑀆𑀤𑀺𑀫𑀸𑀳. 𑀖𑀁𑀲𑀦𑁆𑀢𑁄𑀯𑀸𑀢𑀺 𑀪𑀽𑀫𑀺𑀬𑀁 𑀖𑀁𑀲𑀦𑁆𑀢𑁄 𑀏𑀯 𑀧𑀢𑁆𑀢𑀁 𑀞𑀧𑁂𑀢𑀺. 𑀧𑀭𑀺𑀓𑁆𑀔𑀻𑀡𑀦𑁆𑀢𑀺 𑀲𑀫𑀦𑁆𑀢𑀢𑁄 𑀧𑀭𑀺𑀓𑁆𑀔𑀻𑀡𑀁. 𑀦𑀸𑀴𑀺𑀓𑁄 …𑀧𑁂… 𑀚𑀸𑀢𑀁, 𑀅𑀢𑀺𑀭𑁂𑀓𑀧𑀢𑁆𑀢𑀝𑁆𑀞𑀧𑀦𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀅𑀜𑁆𑀜𑀁 𑀦 𑀕𑀡𑁆𑀳𑀸𑀢𑀺. ‘‘𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀦𑁆𑀢𑀺 𑀘𑀓𑁆𑀔𑀸𑀤𑀺𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀪𑀸𑀯𑀦’’𑀦𑁆𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀣𑀸 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀁 𑀓𑀢𑁆𑀯𑀸 𑀉𑀧𑀭𑀺𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑀺𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑀭𑁂 𑀧𑀦 ‘‘𑀲𑀤𑁆𑀥𑀸𑀧𑀜𑁆𑀘𑀫𑀸𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀁 𑀓𑀢𑁆𑀯𑀸 𑀢𑁂𑀦 𑀲𑀼𑀔𑁂𑀦 𑀅𑀪𑀺𑀜𑁆𑀜𑀸𑀧𑀳𑀸𑀦𑀸𑀦𑀁 𑀲𑀫𑁆𑀧𑀸𑀤𑀦𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀁 𑀪𑀸𑀯𑁂𑀢𑁆𑀯𑀸’’𑀢𑀺 𑀯𑀤𑀦𑁆𑀢𑀺.

𑀉𑀧𑀲𑀗𑁆𑀓𑀫𑀢𑀻𑀢𑀺 ¶ ¶ 𑀏𑀢𑁆𑀣 𑀬𑀣𑀸 𑀲𑁄 𑀭𑀸𑀚𑀸 𑀉𑀧𑀲𑀗𑁆𑀓𑀫𑀺, 𑀢𑀁 𑀆𑀕𑀫𑀦𑀢𑁄 𑀧𑀝𑁆𑀞𑀸𑀬 𑀤𑀲𑁆𑀲𑁂𑀢𑀼𑀁 ‘‘𑀣𑁂𑀭𑁄 𑀓𑀺𑀭𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀫𑀳𑀸𑀧𑀸𑀦𑀁 𑀦𑀸𑀫 𑀅𑀜𑁆𑀜𑀁 𑀓𑀫𑁆𑀫𑀁 𑀅𑀓𑀢𑁆𑀯𑀸 𑀧𑀸𑀦𑀧𑀲𑀼𑀢𑁄 𑀳𑀼𑀢𑁆𑀯𑀸 𑀲𑀢𑁆𑀢𑀸𑀳𑀁 𑀢𑀤𑀦𑀼𑀭𑀽𑀧𑀧𑀭𑀺𑀚𑀦𑀲𑁆𑀲 𑀲𑀼𑀭𑀸𑀧𑀺𑀯𑀦𑀁. 𑀢𑁂𑀦𑀸𑀳 ‘‘𑀫𑀳𑀸𑀧𑀸𑀦𑀁 𑀦𑀸𑀫 𑀧𑀺𑀯𑀺𑀢𑁆𑀯𑀸’’𑀢𑀺. 𑀲𑀸𑀮𑀺𑀣𑀼𑀲𑁂𑀳𑀻𑀢𑀺 𑀭𑀢𑁆𑀢𑀲𑀸𑀮𑀺𑀣𑀼𑀲𑁂𑀳𑀺. 𑀟𑀬𑁆𑀳𑀫𑀸𑀦𑀁 𑀯𑀺𑀬 𑀓𑀺𑀧𑀺𑀮𑁆𑀮𑀺𑀓𑀤𑀁𑀲𑀦𑀚𑀸𑀢𑀸𑀳𑀺 𑀤𑀼𑀓𑁆𑀔𑀯𑁂𑀤𑀦𑀸𑀳𑀺. 𑀫𑀼𑀔𑀲𑀢𑁆𑀢𑀻𑀳𑀺 𑀯𑀺𑀚𑁆𑀛𑀺𑀁𑀲𑀼 𑀯𑀮𑁆𑀮𑀪𑀢𑀸𑀬. 𑀇𑀢𑁆𑀣𑀺𑀮𑁄𑀮𑁄 𑀳𑀺 𑀲𑁄 𑀭𑀸𑀚𑀸.

𑀧𑀯𑁂𑀡𑀺𑀦𑁆𑀢𑀺 𑀢𑁂𑀲𑀁 𑀲𑀫𑀸𑀤𑀸𑀦𑀧𑀯𑁂𑀡𑀺𑀁 𑀩𑁆𑀭𑀳𑁆𑀫𑀘𑀭𑀺𑀬𑀧𑀩𑀦𑁆𑀥𑀁. 𑀧𑀝𑀺𑀧𑀸𑀤𑁂𑀦𑁆𑀢𑀻𑀢𑀺 𑀲𑀫𑁆𑀧𑀸𑀤𑁂𑀦𑁆𑀢𑀺. 𑀕𑀭𑀼𑀓𑀸𑀭𑀫𑁆𑀫𑀡𑀦𑁆𑀢𑀺 𑀕𑀭𑀼𑀓𑀸𑀢𑀩𑁆𑀩𑀆𑀭𑀫𑁆𑀫𑀡𑀁, 𑀅𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀸𑀭𑀫𑁆𑀫𑀡𑀦𑁆𑀢𑀺 𑀅𑀢𑁆𑀣𑁄. 𑀅𑀲𑁆𑀲𑀸𑀢𑀺 𑀭𑀜𑁆𑀜𑁄. 𑀘𑀺𑀢𑁆𑀢𑀁 𑀅𑀦𑁄𑀢𑀭𑀦𑁆𑀢𑀦𑁆𑀢𑀺 𑀧𑀲𑀸𑀤𑀯𑀻𑀣𑀺𑀁 𑀅𑀦𑁄𑀢𑀭𑀦𑁆𑀢𑀁 𑀅𑀦𑀼𑀧𑀕𑀘𑁆𑀙𑀦𑁆𑀢𑀁. 𑀯𑀺𑀳𑁂𑀞𑁂𑀢𑀼𑀦𑁆𑀢𑀺 𑀯𑀺𑀩𑀸𑀥𑀺𑀢𑀼𑀁.

𑀮𑁄𑀪𑀲𑁆𑀲 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀬𑀸 𑀩𑀳𑀼𑀯𑀘𑀦𑀯𑀲𑁂𑀦 ‘‘𑀮𑁄𑀪𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀁. 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺𑀧𑀺 𑀅𑀢𑁆𑀣𑁄 𑀬𑁂𑀯, 𑀬𑀲𑁆𑀫𑀸 𑀉𑀧𑁆𑀧𑀚𑁆𑀚𑀫𑀸𑀦𑁄 𑀮𑁄𑀪𑀥𑀫𑁆𑀫𑁄 𑀅𑀢𑁆𑀢𑀦𑁄 𑀳𑁂𑀢𑀼𑀧𑀘𑁆𑀘𑀬𑁂 𑀧𑀭𑀺𑀕𑁆𑀕𑀳𑀸𑀧𑁂𑀦𑁆𑀢𑁄 𑀚𑀸𑀦𑀸𑀧𑁂𑀦𑁆𑀢𑁄 𑀯𑀺𑀬 𑀲𑀳𑀢𑀺 𑀧𑀯𑀢𑁆𑀢𑀢𑀻𑀢𑀺. 𑀇𑀫𑀫𑁂𑀯 𑀓𑀸𑀬𑀦𑁆𑀢𑀺 𑀏𑀢𑁆𑀣 𑀲𑀫𑀽𑀳𑀢𑁆𑀣𑁂 𑀏𑀯 𑀓𑀸𑀬-𑀲𑀤𑁆𑀤𑁄 𑀕𑀩𑁆𑀪𑀸𑀲𑀬𑀸𑀤𑀺𑀝𑁆𑀞𑀸𑀦𑁂𑀲𑀼 𑀉𑀧𑁆𑀧𑀚𑁆𑀚𑀦𑀥𑀫𑁆𑀫𑀲𑀫𑀽𑀳𑀯𑀺𑀲𑀬𑀢𑁆𑀢𑀸, 𑀇𑀢𑀭𑁂 𑀧𑀦 𑀓𑀸𑀬𑀽𑀧𑀮𑀓𑁆𑀔𑀺𑀢𑀢𑀸𑀬 ‘‘𑀓𑀸𑀬𑁄’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀉𑀢𑁆𑀢𑀸𑀦𑀫𑁂𑀯 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸.

𑀪𑀸𑀭𑀤𑁆𑀯𑀸𑀚𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀖𑁄𑀲𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨𑁯. 𑀭𑀽𑀧𑀸 𑀘 𑀫𑀦𑀸𑀧𑀸𑀢𑀺 𑀦𑀻𑀮𑀸𑀤𑀺𑀪𑁂𑀤𑀸 𑀭𑀽𑀧𑀥𑀫𑁆𑀫𑀸 𑀘 𑀫𑀦𑀲𑀸 𑀫𑀦𑀼𑀜𑁆𑀜𑀸 𑀧𑀺𑀬𑀭𑀽𑀧𑀸 𑀲𑀁𑀯𑀺𑀚𑁆𑀚𑀦𑁆𑀢𑀺, 𑀇𑀤𑀜𑁆𑀘 𑀲𑀼𑀔𑀯𑁂𑀤𑀦𑀻𑀬𑀲𑁆𑀲 𑀨𑀲𑁆𑀲𑀲𑁆𑀲 𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀏𑀯𑀁 ‘‘𑀭𑀽𑀧𑀸 𑀘 𑀫𑀦𑀸𑀧𑀸 𑀉𑀧𑁂𑀓𑁆𑀔𑀸𑀯𑁂𑀤𑀦𑀺𑀬𑀸’’𑀢𑀺 𑀏𑀢𑁆𑀣𑀸𑀧𑀺 𑀬𑀣𑀸𑀭𑀳𑀁 𑀯𑀢𑁆𑀢𑀩𑁆𑀩𑀁. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡…𑀧𑁂… 𑀨𑀲𑁆𑀲𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀨𑀲𑁆𑀲𑁄 𑀲𑀼𑀔𑀯𑁂𑀤𑀦𑀻𑀬𑁄, 𑀦 𑀲𑀳𑀚𑀸𑀢𑀓𑁄𑀝𑀺𑀬𑀸. 𑀢𑁂𑀦𑀸𑀳 𑁋 ‘‘𑀏𑀓𑀁 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀚𑀯𑀦𑀯𑀲𑁂𑀦 𑀲𑀼𑀔𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀲𑁂𑀲𑀧𑀤𑁂𑀲𑀽𑀢𑀺 ‘‘𑀲𑀁𑀯𑀺𑀚𑁆𑀚𑀢𑀺 𑀔𑁄, 𑀕𑀳𑀧𑀢𑀺, 𑀲𑁄𑀢𑀥𑀸𑀢𑀽’’𑀢𑀺 𑀆𑀕𑀢𑁂𑀲𑀼 𑀧𑀜𑁆𑀘𑀲𑀼 𑀓𑁄𑀝𑁆𑀞𑀸𑀲𑁂𑀲𑀼.

𑀢𑁂𑀯𑀻𑀲𑀢𑀺 ¶ 𑀥𑀸𑀢𑀼𑀬𑁄 𑀓𑀣𑀺𑀢𑀸 𑀙𑀦𑁆𑀦𑀁 𑀤𑁆𑀯𑀸𑀭𑀸𑀦𑀁 𑀯𑀲𑁂𑀦 𑀯𑀺𑀪𑀚𑁆𑀚𑀕𑀳𑀡𑁂𑀦. 𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀦𑁆𑀢𑀺 𑀳𑀤𑀬𑀯𑀢𑁆𑀣𑀼𑀦𑀺𑀲𑁆𑀲𑀺𑀢𑀁. 𑀧𑀜𑁆𑀘𑀤𑁆𑀯𑀸𑀭𑁂 𑀯𑀻𑀲𑀢𑀺, 𑀫𑀦𑁄𑀤𑁆𑀯𑀸𑀭𑁂 𑀢𑀺𑀲𑁆𑀲𑁄 𑀏𑀯𑀁 𑀢𑁂𑀯𑀻𑀲𑀢𑀺.

𑀖𑁄𑀲𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁮. 𑀳𑀸𑀮𑀺𑀤𑁆𑀤𑀺𑀓𑀸𑀦𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁩𑁦-𑁧𑁩𑁧. 𑀢𑀁 ¶ 𑀇𑀢𑁆𑀣𑁂𑀢𑀦𑁆𑀢𑀺 𑀘𑀓𑁆𑀔𑀼𑀦𑀸 𑀬𑀁 𑀭𑀽𑀧𑀁 𑀤𑀺𑀝𑁆𑀞𑀁, 𑀢𑀁 𑀇𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀢𑀁 𑀲𑀼𑀔𑀯𑁂𑀤𑀦𑀺𑀬𑀦𑁆𑀢𑀺 𑀢𑀁 𑀲𑀼𑀔𑀯𑁂𑀤𑀦𑀸𑀬 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀧𑀘𑁆𑀘𑀬𑀪𑀽𑀢𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀜𑁆𑀘𑁂𑀯, 𑀬𑁄 𑀘 𑀬𑀣𑀸𑀭𑀳𑀁 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀯𑀸, 𑀅𑀦𑀦𑁆𑀢𑀭𑁄 𑀘𑁂 𑀅𑀦𑀦𑁆𑀢𑀭𑀓𑁄𑀝𑀺𑀬𑀸 𑀯𑀸, 𑀲𑀳𑀚𑀸𑀢𑁄 𑀘𑁂 𑀲𑀫𑁆𑀧𑀬𑀼𑀢𑁆𑀢𑀓𑁄𑀝𑀺𑀬𑀸 𑀯𑀸, 𑀲𑀼𑀔𑀯𑁂𑀤𑀦𑀸𑀬 𑀧𑀘𑁆𑀘𑀬𑁄 𑀨𑀲𑁆𑀲𑁄. 𑀢𑀁 𑀲𑀼𑀔𑀯𑁂𑀤𑀦𑀺𑀬𑀜𑁆𑀘 𑀨𑀲𑁆𑀲𑀁 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀯𑁂𑀤𑀦𑀸𑀢𑀺 𑀬𑁄𑀚𑀦𑀸. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣 𑀲𑀩𑁆𑀩𑁂𑀲𑀼 𑀲𑁂𑀲𑁂𑀲𑀼 𑀲𑀢𑁆𑀢𑀲𑀼 𑀯𑀸𑀭𑁂𑀲𑀼. 𑀫𑀦𑁄𑀥𑀸𑀢𑀼𑀬𑁂𑀯 𑀯𑀸 𑀲𑀫𑀸𑀦𑀸𑀢𑀺 𑀅𑀪𑀺𑀥𑀫𑁆𑀫𑀦𑀬𑁂𑀦. 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀧𑀦 𑀲𑀼𑀜𑁆𑀜𑀢𑀝𑁆𑀞𑁂𑀦 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀝𑁆𑀞𑁂𑀦 𑀘 𑀫𑀦𑁄𑀥𑀸𑀢𑀼𑀲𑀫𑀜𑁆𑀜𑀁 𑀮𑀪𑀢𑁂𑀯. 𑀅𑀝𑁆𑀞𑀫𑀁 𑀉𑀢𑁆𑀢𑀸𑀦𑀫𑁂𑀯 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸.

𑀳𑀸𑀮𑀺𑀤𑁆𑀤𑀺𑀓𑀸𑀦𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀮𑁄𑀳𑀺𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁨. 𑀢𑁂𑀧𑀺 𑀫𑀸𑀡𑀯𑀓𑀸𑀢𑁆𑀯𑁂𑀯 𑀯𑀼𑀢𑁆𑀢𑀸, 𑀦 𑀩𑁆𑀭𑀸𑀳𑁆𑀫𑀡𑀓𑀼𑀫𑀸𑀭𑀸 𑀏𑀯. 𑀲𑁂𑀮𑁂𑀬𑁆𑀬𑀓𑀸𑀦𑀻𑀢𑀺 𑀅𑀜𑁆𑀜𑀫𑀜𑁆𑀜𑀁 𑀲𑀺𑀮𑀺𑀲𑁆𑀲𑀦𑀮𑀗𑁆𑀖𑀦𑀓𑀻𑀴𑀦𑀸𑀦𑀺.

𑀉𑀧𑀝𑁆𑀞𑀸𑀦𑀯𑀲𑁂𑀦 𑀇𑀪𑀁 𑀳𑀭𑀦𑁆𑀢𑀻𑀢𑀺 𑀇𑀩𑁆𑀪𑀸, 𑀳𑀢𑁆𑀣𑀺𑀕𑁄𑀧𑀓𑀸. 𑀢𑁂 𑀧𑀦 𑀦𑀺𑀳𑀻𑀦𑀓𑀼𑀝𑀼𑀫𑁆𑀩𑀲𑁆𑀲 𑀪𑁄𑀕𑁆𑀕𑀁 𑀉𑀧𑀸𑀤𑀸𑀬 𑀕𑀳𑀧𑀢𑀺𑀪𑀸𑀯𑀁 𑀉𑀧𑀸𑀤𑀸𑀬 ‘‘𑀕𑀳𑀧𑀢𑀺𑀓𑀸’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀳 ‘‘𑀕𑀳𑀧𑀢𑀺𑀓𑀸’’𑀢𑀺. 𑀓𑀡𑁆𑀳𑀸𑀢𑀺 𑀓𑀡𑁆𑀳𑀸𑀪𑀺𑀚𑀸𑀢𑀺𑀓𑀸. 𑀭𑀝𑁆𑀞𑀁 𑀪𑀭𑀦𑁆𑀢𑀻𑀢𑀺 𑀬𑀲𑁆𑀫𑀺𑀁 𑀭𑀝𑁆𑀞𑁂 𑀯𑀲𑀦𑁆𑀢𑀺, 𑀢𑀲𑁆𑀲 𑀭𑀝𑁆𑀞𑀲𑁆𑀲 𑀩𑀮𑀺𑀁 𑀪𑀭𑀡𑁂𑀦, 𑀅𑀢𑁆𑀢𑀦𑁄 𑀯𑀸 𑀓𑀼𑀝𑀼𑀫𑁆𑀩𑀲𑁆𑀲 𑀪𑀭𑀡𑁂𑀦 𑀪𑀭𑀢𑀸. 𑀧𑀭𑀺𑀬𑀸𑀬𑀦𑁆𑀢𑀸𑀢𑀺 𑀧𑀭𑀺𑀢𑁄 𑀲𑀁𑀘𑀭𑀦𑁆𑀢𑀸 𑀓𑀻𑀴𑀦𑁆𑀢𑀺.

𑀲𑀻𑀮𑀚𑁂𑀝𑁆𑀞𑀓𑀸𑀢𑀺 𑀲𑀻𑀮𑀧𑁆𑀧𑀥𑀸𑀦𑀸. 𑀬𑁂 𑀧𑀼𑀭𑀸𑀡𑀁 𑀲𑀭𑀦𑁆𑀢𑀺, 𑀢𑁂 𑀲𑀻𑀮𑀼𑀢𑁆𑀢𑀫𑀸 𑀅𑀳𑁂𑀲𑀼𑀁. 𑀤𑁆𑀯𑀸𑀭𑀸𑀦𑀺 𑀘𑀓𑁆𑀔𑀸𑀤𑀺𑀤𑁆𑀯𑀸𑀭𑀸𑀦𑀺.

𑀅𑀧𑀓𑁆𑀓𑀫𑀺𑀢𑁆𑀯𑀸 ¶ 𑀅𑀧𑁂𑀢𑀸 𑀯𑀺𑀭𑀳𑀺𑀢𑀸 𑀳𑀼𑀢𑁆𑀯𑀸. 𑀯𑀺𑀲𑀫𑀸𑀦𑀻𑀢𑀺 𑀯𑀺𑀕𑀢𑀲𑀫𑀸𑀦𑀺 𑀤𑀼𑀘𑁆𑀘𑀭𑀺𑀢𑀲𑀪𑀸𑀯𑀸𑀦𑀺. 𑀦𑀸𑀦𑀸𑀯𑀺𑀥𑀤𑀡𑁆𑀟𑀸 𑀦𑀸𑀦𑀸𑀯𑀺𑀥𑀤𑀡𑁆𑀟𑀦𑀺𑀧𑀸𑀢𑀸.

𑀅𑀦𑀸𑀳𑀸𑀭𑀓𑀸𑀢𑀺 𑀓𑀺𑀜𑁆𑀘𑀺 𑀅𑀪𑀼𑀜𑁆𑀚𑀦𑀓𑀸. 𑀧𑀗𑁆𑀓𑁄 𑀯𑀺𑀬 𑀧𑀗𑁆𑀓𑁄, 𑀫𑀮𑀁. 𑀤𑀦𑁆𑀢𑀧𑀗𑁆𑀓𑁄 𑀧𑀼𑀭𑀺𑀫𑀧𑀤𑀮𑁄𑀧𑁂𑀦 𑀧𑀗𑁆𑀓𑁄𑀢𑀺 𑀯𑀼𑀢𑁆𑀢𑁄𑀢𑀺 ‘‘𑀧𑀗𑁆𑀓𑁄 𑀦𑀸𑀫 𑀤𑀦𑁆𑀢𑀫𑀮’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀚𑁂𑀳𑀺 𑀓𑀸𑀢𑀩𑁆𑀩𑀓𑀸𑀦𑀁 𑀅𑀓𑁄𑀧𑁂𑀢𑁆𑀯𑀸 𑀓𑀭𑀡𑀁 𑀲𑀫𑀸𑀤𑀸𑀦𑀯𑀲𑁂𑀦 𑀯𑀢𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀓𑁄𑀳𑀜𑁆𑀜𑀁 𑀦𑀸𑀫 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀤𑁄𑀲𑀁 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 ¶ 𑀅𑀲𑀦𑁆𑀢𑀕𑀼𑀡𑀧𑀓𑀸𑀲𑀦𑀸𑀢𑀺 𑀆𑀳 𑁋 ‘‘𑀧𑀝𑀺𑀘𑁆𑀙𑀦𑁆𑀦…𑀧𑁂… 𑀓𑁄𑀳𑀜𑁆𑀜𑀜𑁆𑀘𑁂𑀯𑀸’’𑀢𑀺. 𑀧𑀭𑀺𑀓𑁆𑀔𑀸𑀭𑀪𑀡𑁆𑀟𑀓𑀯𑀡𑁆𑀡𑀸𑀢𑀺 𑀧𑀭𑀺𑀓𑁆𑀔𑀸𑀭𑀪𑀡𑁆𑀟𑀸 𑀓𑀧𑁆𑀧𑀓𑀸𑀢𑀺. 𑀢𑁂 𑀘 𑀔𑁄 𑀅𑀢𑁆𑀢𑀦𑁄 𑀚𑀻𑀯𑀺𑀓𑀢𑁆𑀣𑀸𑀬 𑀆𑀫𑀺𑀲𑀓𑀺𑀜𑁆𑀚𑀓𑁆𑀔𑀲𑁆𑀲 𑀅𑀢𑁆𑀢𑀦𑀺𑀩𑀦𑁆𑀥𑀦𑀢𑁆𑀣𑀸𑀬 𑀅𑀫𑁄𑀘𑀦𑀢𑁆𑀣𑀸𑀬 𑀓𑀢𑀸.

𑀅𑀔𑀺𑀮𑀦𑁆𑀢𑀺 𑀘𑁂𑀢𑁄𑀔𑀺𑀮𑀭𑀳𑀺𑀢𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀯𑀲𑁂𑀦. 𑀢𑁂𑀦𑀸𑀳 ‘‘𑀫𑀼𑀤𑀼 𑀅𑀣𑀤𑁆𑀥’’𑀦𑁆𑀢𑀺.

𑀅𑀥𑀺𑀫𑀼𑀢𑁆𑀢𑁄𑀢𑀺 𑀅𑀪𑀺𑀭𑀢𑀺𑀯𑀲𑁂𑀦 𑀬𑀼𑀢𑁆𑀢𑀧𑀬𑀼𑀢𑁆𑀢𑁄. 𑀧𑀭𑀺𑀢𑁆𑀢𑀘𑀺𑀢𑁆𑀢𑁄𑀢𑀺 𑀧𑀭𑀺𑀢𑁄 𑀔𑀡𑁆𑀟𑀺𑀢𑀘𑀺𑀢𑁆𑀢𑁄. 𑀅𑀧𑁆𑀧𑀫𑀸𑀡𑀘𑀺𑀢𑁆𑀢𑁄𑀢𑀺 𑀏𑀢𑁆𑀣 ‘‘𑀓𑁄 𑀅𑀬’’𑀦𑁆𑀢𑀺 𑀧𑀝𑀺𑀓𑁆𑀔𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀘𑀺𑀢𑁆𑀢𑁄.

𑀮𑁄𑀳𑀺𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀯𑁂𑀭𑀳𑀘𑁆𑀘𑀸𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁩. 𑀩𑁆𑀭𑀸𑀳𑁆𑀫𑀡𑀺𑀁 𑀥𑀫𑁆𑀫𑀲𑀯𑀦𑀸𑀬 𑀘𑁄𑀤𑁂𑀦𑁆𑀢𑁄 𑀫𑀸𑀡𑀯𑀓𑁄 ‘‘𑀬𑀕𑁆𑀖𑁂’’𑀢𑀺 𑀅𑀯𑁄𑀘. 𑀢𑁂𑀦𑀸𑀳 ‘‘𑀬𑀕𑁆𑀖𑁂𑀢𑀺 𑀘𑁄𑀤𑀦𑀢𑁆𑀣𑁂 𑀦𑀺𑀧𑀸𑀢𑁄’’𑀢𑀺.

𑀯𑁂𑀭𑀳𑀘𑁆𑀘𑀸𑀦𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀕𑀳𑀧𑀢𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀤𑁂𑀯𑀤𑀳𑀯𑀕𑁆𑀕𑁄

𑁧. 𑀤𑁂𑀯𑀤𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁪. 𑀫𑀦𑀁 𑀭𑀫𑀬𑀦𑁆𑀢𑀸𑀢𑀺 𑀆𑀧𑀸𑀣𑀕𑀢𑀸 𑀫𑀦𑀲𑁆𑀲 𑀭𑀫𑀡𑀯𑀲𑁂𑀦 𑀧𑀺𑀬𑀸𑀬𑀺𑀢𑀩𑁆𑀩𑀢𑀸𑀯𑀲𑁂𑀦 𑀧𑀯𑀢𑁆𑀢𑀦𑁆𑀢𑀸.

𑁨. 𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁫. 𑀙𑀨𑀲𑁆𑀲𑀸𑀬𑀢𑀦𑀺𑀓𑀸𑀢𑀺 ¶ 𑀙𑀳𑀺 𑀨𑀲𑁆𑀲𑀸𑀬𑀢𑀦𑁂𑀳𑀺 𑀅𑀦𑀺𑀝𑁆𑀞𑀲𑀁𑀯𑁂𑀤𑀦𑀺𑀬𑀸. 𑀙𑀤𑁆𑀯𑀸𑀭𑀨𑀲𑁆𑀲𑀧𑀝𑀺𑀯𑀺𑀜𑁆𑀜𑀢𑁆𑀢𑀻𑀢𑀺 𑀙𑀳𑀺𑀧𑀺 𑀤𑁆𑀯𑀸𑀭𑁂𑀳𑀺 𑀆𑀭𑀫𑁆𑀫𑀡𑀲𑁆𑀲 𑀧𑀝𑀺𑀲𑀁𑀯𑁂𑀤𑀦𑀸 𑀳𑁄𑀢𑀺𑀬𑁂𑀯 𑀲𑀩𑁆𑀩𑀲𑁄 𑀤𑀼𑀓𑁆𑀔𑀸𑀦𑀼𑀪𑀯𑀦𑀢𑁆𑀣𑀁. 𑀢𑀸𑀯𑀢𑀺𑀁𑀲𑀧𑀼𑀭𑀦𑁆𑀢𑀺 ¶ 𑀲𑀼𑀤𑀲𑁆𑀲𑀦𑀫𑀳𑀸𑀦𑀕𑀭𑀁. 𑀅𑀪𑀸𑀯𑁄 𑀦𑀸𑀫 𑀦𑀢𑁆𑀣𑀺 𑀲𑀩𑁆𑀩𑀣𑀸 𑀲𑀼𑀔𑀸𑀦𑀼𑀪𑀯𑀦𑀢𑁄. 𑀦𑀺𑀭𑀬𑁂𑀢𑀺 𑀇𑀫𑀺𑀦𑀸 𑀤𑀼𑀕𑁆𑀕𑀢𑀺 𑀪𑀯𑀲𑀸𑀫𑀜𑁆𑀜𑁂𑀦 𑀇𑀢𑀭𑀸𑀧𑀸𑀬𑀸𑀧𑀺 𑀕𑀳𑀺𑀢𑀸 𑀏𑀯. 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀯𑀲𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀇𑀫𑀺𑀦𑀸 𑀧𑀦 𑀲𑀩𑁆𑀩𑁂𑀲𑀫𑁆𑀧𑀺 𑀅𑀘𑁆𑀙𑀺𑀦𑁆𑀤𑀺𑀓𑀝𑁆𑀞𑀸𑀦𑀸𑀦𑀁 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀇𑀫𑁂𑀯𑀸𑀢𑀺 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀮𑁄𑀓𑁂 𑀏𑀯. 𑀅𑀧𑀸𑀬𑁄𑀧𑀺 𑀧𑀜𑁆𑀜𑀸𑀬𑀢𑀺 𑀅𑀧𑀸𑀬𑀤𑀼𑀓𑁆𑀔𑀲𑀤𑀺𑀲𑀲𑁆𑀲 𑀤𑀼𑀓𑁆𑀔𑀲𑁆𑀲 𑀓𑀤𑀸𑀘𑀺 𑀧𑀝𑀺𑀲𑀁𑀯𑁂𑀤𑀦𑀢𑁄. 𑀲𑀕𑁆𑀕𑁄𑀧𑀺 𑀧𑀜𑁆𑀜𑀸𑀬𑀢𑀺 𑀤𑁂𑀯𑀪𑁄𑀕𑀲𑀤𑀺𑀲𑀲𑀫𑁆𑀧𑀢𑁆𑀢𑀺𑀬𑀸 𑀓𑀤𑀸𑀘𑀺 𑀧𑀝𑀺𑀮𑀪𑀺𑀢𑀩𑁆𑀩𑀢𑁄.

𑀅𑀬𑀁 𑀓𑀫𑁆𑀫𑀪𑀽𑀫𑀻𑀢𑀺 𑀅𑀬𑀁 𑀫𑀦𑀼𑀲𑁆𑀲𑀮𑁄𑀓𑁄 𑀧𑀼𑀭𑀺𑀲𑀣𑀸𑀫𑀓𑀭𑀡𑀸𑀬 𑀓𑀫𑁆𑀫𑀪𑀽𑀫𑀺 𑀦𑀸𑀫 𑀢𑀸𑀲𑀁 𑀬𑁄𑀕𑁆𑀬𑀝𑁆𑀞𑀸𑀦𑀪𑀸𑀯𑀢𑁄. 𑀢𑀢𑁆𑀣 𑀧𑀥𑀸𑀦𑀓𑀫𑁆𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀥 𑀫𑀕𑁆𑀕𑀪𑀸𑀯𑀦𑀸’’𑀢𑀺 𑀆𑀳. 𑀞𑀸𑀦𑀸𑀦𑀻𑀢𑀺 𑀓𑀸𑀭𑀡𑀸𑀦𑀺. 𑀲𑀁𑀯𑁂𑀚𑀦𑀺𑀬𑀸𑀦𑀻𑀢𑀺 𑀲𑀁𑀯𑁂𑀕𑀚𑀦𑀦𑀸𑀦𑀺 𑀩𑀳𑀽𑀦𑀺 𑀚𑀸𑀢𑀺𑀆𑀤𑀻𑀦𑀺. 𑀢𑀣𑀸 𑀳𑀺 𑀚𑀸𑀢𑀺, 𑀚𑀭𑀸, 𑀩𑁆𑀬𑀸𑀥𑀺, 𑀫𑀭𑀡𑀁, 𑀅𑀧𑀸𑀬𑀪𑀯𑀁, 𑀢𑀢𑁆𑀣𑀧𑀺 𑀦𑀺𑀭𑀬𑀽𑀧𑀧𑀢𑁆𑀢𑀺𑀳𑁂𑀢𑀼𑀓𑀁, 𑀢𑀺𑀭𑀘𑁆𑀙𑀸𑀦𑀼𑀧𑀧𑀢𑁆𑀢𑀺𑀳𑁂𑀢𑀼𑀓𑀁, 𑀅𑀲𑀽𑀭𑀓𑀸𑀬𑀽𑀧𑀧𑀢𑁆𑀢𑀺𑀳𑁂𑀢𑀼𑀓𑀁, 𑀅𑀢𑀻𑀢𑁂 𑀯𑀝𑁆𑀝𑀫𑀽𑀮𑀓𑀁, 𑀅𑀦𑀸𑀕𑀢𑁂 𑀯𑀝𑁆𑀝𑀫𑀽𑀮𑀓𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀆𑀳𑀸𑀭𑀧𑀭𑀺𑀬𑁂𑀝𑁆𑀞𑀺𑀫𑀽𑀮𑀓𑀦𑁆𑀢𑀺 𑀩𑀳𑀽𑀦𑀺 𑀲𑀁𑀯𑁂𑀕𑀯𑀢𑁆𑀣𑀽𑀦𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀲𑀁𑀯𑁂𑀕𑀚𑀸𑀢𑁄 𑀲𑀜𑁆𑀚𑀸𑀢𑀲𑀁𑀯𑁂𑀕𑁄 𑀬𑁄𑀦𑀺𑀲𑁄 𑀧𑀥𑀸𑀦𑀫𑀦𑀼𑀬𑀼𑀜𑁆𑀚𑀲𑁆𑀲𑀼. 𑀲𑀁𑀯𑁂𑀕𑀸𑀢𑀺 𑀲𑀁𑀯𑁂𑀕𑀫𑀸𑀧𑀚𑁆𑀚𑀲𑁆𑀲𑀼.

𑀔𑀡𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀞𑀫𑀭𑀽𑀧𑀸𑀭𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁬. 𑀲𑀫𑁆𑀫𑀼𑀤𑀺𑀢𑀸 𑀲𑀫𑁆𑀫𑁄𑀤𑀧𑁆𑀧𑀢𑁆𑀢𑀸, 𑀧𑀫𑁄𑀤𑀺𑀢𑀸 𑀲𑀜𑁆𑀚𑀸𑀢𑀧𑀫𑁄𑀤𑀸. 𑀤𑀼𑀓𑁆𑀔𑀸𑀢𑀺 𑀤𑀼𑀓𑁆𑀔𑀯𑀦𑁆𑀢𑁄 𑀲𑀜𑁆𑀚𑀸𑀢𑀤𑀼𑀓𑁆𑀔𑀸. 𑀢𑁂𑀦𑀸𑀳 ‘‘𑀤𑀼𑀓𑁆𑀔𑀺𑀢𑀸’’𑀢𑀺. 𑀲𑀼𑀔𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀼𑀔𑁄, 𑀲𑀼𑀔𑀻. 𑀢𑁂𑀦𑀸𑀳 ‘‘𑀲𑀼𑀔𑀺𑀢𑁄’’𑀢𑀺. 𑀬𑀢𑁆𑀢𑀓𑀸 𑀭𑀽𑀧𑀸𑀤𑀬𑁄 𑀥𑀫𑁆𑀫𑀸 𑀮𑁄𑀓𑁂 𑀅𑀢𑁆𑀣𑀻𑀢𑀺 𑀯𑀼𑀘𑁆𑀘𑀢𑀺. 𑀧𑀲𑁆𑀲𑀦𑁆𑀢𑀸𑀦𑀦𑁆𑀢𑀺 𑀲𑀘𑁆𑀘𑀧𑀝𑀺𑀯𑁂𑀥𑁂𑀦 𑀲𑀫𑁆𑀫𑀤𑁂𑀯 𑀧𑀲𑁆𑀲𑀦𑁆𑀢𑀸𑀦𑀁. ‘‘𑀧𑀘𑁆𑀘𑀦𑀻𑀓𑀁 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀢𑀁 𑀧𑀘𑁆𑀘𑀦𑀻𑀓𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀮𑁄𑀓𑁄 𑀳𑀻’’𑀢𑀺𑀆𑀤𑀺 ¶ 𑀯𑀼𑀢𑁆𑀢𑀁. 𑀅𑀲𑀼𑀪𑀸𑀢𑀺 ‘‘𑀆𑀳𑀽’’𑀢𑀺𑀧𑀤𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀲𑀩𑁆𑀩𑀫𑁂𑀢𑀦𑁆𑀢𑀺 ‘‘𑀲𑀼𑀔𑀁 𑀤𑀺𑀝𑁆𑀞𑀫𑀭𑀺𑀬𑁂𑀪𑀺…𑀧𑁂… 𑀢𑀤𑀭𑀺𑀬𑀸 𑀲𑀼𑀔𑀢𑁄 𑀯𑀺𑀤𑀽’’𑀢𑀺 𑀘 𑀯𑀼𑀢𑁆𑀢𑀁. 𑀲𑀩𑁆𑀩𑀫𑁂𑀢𑀁 𑀦𑀺𑀩𑁆𑀩𑀸𑀦𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦𑀺𑀩𑁆𑀩𑀸𑀦𑀫𑁂𑀯 𑀳𑀺 𑀏𑀓𑀦𑁆𑀢𑀢𑁄 𑀲𑀼𑀔𑀁 𑀦𑀸𑀫.

𑀧𑀜𑁆𑀘𑀦𑀯𑀼𑀢𑀺𑀧𑀸𑀲𑀡𑁆𑀟𑀺𑀦𑁄 𑀢𑁂𑀲𑀜𑁆𑀘 𑀧𑀸𑀲𑀡𑁆𑀟𑀺𑀪𑀸𑀯𑁄 𑀧𑀧𑀜𑁆𑀘𑀲𑀽𑀤𑀦𑀺𑀝𑁆𑀞𑀓𑀣𑀸𑀬𑀁 𑀧𑀓𑀸𑀲𑀺𑀢𑁄 𑀏𑀯. 𑀓𑀺𑀮𑁂𑀲𑀦𑀻𑀯𑀭𑀡𑁂𑀦 𑀦𑀺𑀯𑀼𑀢𑀸𑀦𑀦𑁆𑀢𑀺 𑀓𑀺𑀮𑁂𑀲𑀔𑀦𑁆𑀥𑀸 𑀓𑀺𑀮𑁂𑀲𑀦𑀻𑀯𑀭𑀡𑀁, 𑀢𑁂𑀦 𑀦𑀺𑀯𑀸𑀭𑀺𑀢𑀸𑀦𑀁. 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀁 𑀦𑀸𑀫 𑀅𑀭𑀺𑀬𑀫𑀕𑁆𑀕𑁄, 𑀢𑁂𑀦 𑀢𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑀜𑁆𑀘 𑀓𑀸𑀴𑀫𑁂𑀖𑀅𑀯𑀘𑁆𑀙𑀸𑀤𑀺𑀢𑀁 𑀯𑀺𑀬 𑀘𑀦𑁆𑀤𑀫𑀡𑁆𑀟𑀮𑀁.

𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 ¶ 𑀅𑀲𑀼𑀪𑀪𑀸𑀯𑀧𑀭𑀺𑀘𑁆𑀙𑀺𑀦𑁆𑀤𑀦𑁂𑀦 𑀲𑀫𑁆𑀫𑀸𑀯𑀺𑀜𑁆𑀜𑀸𑀡𑀤𑀲𑁆𑀲𑀦𑁂𑀦 𑀘 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸. 𑀫𑀕𑁆𑀕𑀥𑀫𑁆𑀫𑀲𑁆𑀲𑀸𑀢𑀺 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑀲𑁆𑀲.

𑀅𑀦𑀼𑀧𑀦𑁆𑀦𑁂𑀳𑀻𑀢𑀺 𑀅𑀦𑀼 𑀅𑀦𑀼 𑀅𑀯𑀺𑀳𑀸𑀬 𑀧𑀝𑀺𑀧𑀦𑁆𑀦𑁂𑀳𑀺. 𑀓𑁄 𑀦𑀼 𑀅𑀜𑁆𑀜𑁄 𑀚𑀸𑀦𑀺𑀢𑀼𑀁 𑀅𑀭𑀳𑀢𑀺, 𑀅𑀜𑁆𑀜𑁄 𑀦 𑀚𑀸𑀦𑀸𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀧𑀞𑀫𑀭𑀽𑀧𑀸𑀭𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪-𑁧𑁨. 𑀤𑀼𑀢𑀺𑀬𑀭𑀽𑀧𑀸𑀭𑀸𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁩𑁭-𑁧𑁪𑁫. 𑀲𑀼𑀤𑁆𑀥𑀺𑀓𑀁 𑀓𑀢𑁆𑀯𑀸 𑀕𑀸𑀣𑀸𑀩𑀦𑁆𑀥𑀦𑁂𑀦 𑀯𑀺𑀦𑀸 𑀓𑁂𑀯𑀮𑀁 𑀘𑀼𑀡𑁆𑀡𑀺𑀬𑀧𑀤𑀯𑀲𑁂𑀦𑁂𑀯. 𑀢𑀣𑀸 𑀢𑀣𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀩𑀸𑀳𑀺𑀭𑀸𑀦𑀺 𑀘 𑀆𑀬𑀢𑀦𑀸𑀦𑀺 𑀅𑀦𑀺𑀘𑁆𑀘𑀮𑀓𑁆𑀔𑀡𑁂𑀦 𑀤𑀼𑀓𑁆𑀔𑀸𑀦𑀢𑁆𑀢𑀮𑀓𑁆𑀔𑀡𑁂𑀳𑀺 𑀘 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑀦𑀯𑀲𑁂𑀦.

𑀤𑀼𑀢𑀺𑀬𑀭𑀽𑀧𑀸𑀭𑀸𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑁂𑀯𑀤𑀳𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫. 𑀦𑀯𑀧𑀼𑀭𑀸𑀡𑀯𑀕𑁆𑀕𑁄

𑁧. 𑀓𑀫𑁆𑀫𑀦𑀺𑀭𑁄𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁬. 𑀲𑀫𑁆𑀧𑀢𑀺 𑀯𑀺𑀚𑁆𑀚𑀫𑀸𑀦𑀲𑁆𑀲 𑀘𑀓𑁆𑀔𑀼𑀲𑁆𑀲 𑀢𑀁𑀦𑀺𑀩𑁆𑀩𑀢𑁆𑀢𑀲𑁆𑀲 𑀓𑀫𑁆𑀫𑀲𑁆𑀲 𑀘 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀦 𑀘𑀓𑁆𑀔𑀼 𑀧𑀼𑀭𑀸𑀡𑀁, 𑀓𑀫𑁆𑀫𑀫𑁂𑀯 𑀧𑀼𑀭𑀸𑀡’’𑀦𑁆𑀢𑀺 𑀯𑀢𑁆𑀯𑀸 𑀬𑀣𑀸 𑀢𑀲𑁆𑀲 𑀘𑀓𑁆𑀔𑀼𑀲𑁆𑀲 𑀧𑀼𑀭𑀸𑀡𑀧𑀭𑀺𑀬𑀸𑀬𑁄 ¶ 𑀯𑀼𑀢𑁆𑀢𑁄, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀓𑀫𑁆𑀫𑀢𑁄 𑀧𑀦𑀸’’𑀢𑀺𑀆𑀤𑀺. 𑀧𑀘𑁆𑀘𑀬𑀦𑀸𑀫𑁂𑀦𑀸𑀢𑀺 𑀧𑀼𑀭𑀺𑀫𑀚𑀸𑀢𑀺𑀲𑀁𑀲𑀺𑀤𑁆𑀥𑀢𑁆𑀢𑀸 ‘‘𑀧𑀼𑀭𑀸𑀡’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀲𑁆𑀲 𑀧𑀘𑁆𑀘𑀬𑀪𑀽𑀢𑀲𑁆𑀲 𑀓𑀫𑁆𑀫𑀲𑁆𑀲 𑀦𑀸𑀫𑁂𑀦. 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 ‘‘𑀧𑀼𑀭𑀸𑀡𑀓𑀫𑁆𑀫’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀧𑀘𑁆𑀘𑀬𑁂𑀳𑀺 𑀅𑀪𑀺𑀲𑀫𑀸𑀕𑀦𑁆𑀢𑁆𑀯𑀸 𑀓𑀢𑀦𑁆𑀢𑀺 𑀢𑀡𑁆𑀳𑀸𑀯𑀺𑀚𑁆𑀚𑀸𑀤𑀺𑀧𑀘𑁆𑀘𑀬𑁂𑀳𑀺 𑀅𑀪𑀺𑀫𑀼𑀔𑀪𑀸𑀯𑁂𑀦 𑀲𑀫𑀸𑀕𑀦𑁆𑀢𑁆𑀯𑀸 𑀲𑀫𑁂𑀘𑁆𑀘 𑀦𑀺𑀩𑁆𑀩𑀢𑁆𑀢𑀺𑀢𑀁. 𑀘𑁂𑀢𑀦𑀸𑀬𑀸𑀢𑀺 𑀓𑀫𑁆𑀫𑀘𑁂𑀢𑀦𑀸𑀬. 𑀧𑀓𑀧𑁆𑀧𑀺𑀢𑀦𑁆𑀢𑀺 𑀅𑀪𑀺𑀲𑀫𑀻𑀳𑀺𑀢𑀁. 𑀯𑁂𑀤𑀦𑀸𑀬𑀸𑀢𑀺 𑀅𑀢𑁆𑀢𑀸𑀦𑀁 𑀦𑀺𑀲𑁆𑀲𑀸𑀬 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀸𑀬 𑀯𑁂𑀤𑀦𑀸𑀬. 𑀯𑀢𑁆𑀣𑀽𑀢𑀺 𑀦𑀺𑀩𑁆𑀩𑀢𑁆𑀢𑀺𑀓𑀸𑀭𑀡𑀁 𑀧𑀯𑀢𑁆𑀢𑀝𑁆𑀞𑀸𑀦𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀧𑀲𑁆𑀲𑀺𑀢𑀩𑁆𑀩𑀁. 𑀓𑀫𑁆𑀫𑀲𑁆𑀲 𑀦𑀺𑀭𑁄𑀥𑁂𑀦𑀸𑀢𑀺 𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀲𑀺𑀤𑁆𑀥𑁂𑀦 𑀓𑀫𑁆𑀫𑀲𑁆𑀲 𑀦𑀺𑀭𑁄𑀥𑁂𑀦. 𑀯𑀺𑀫𑀼𑀢𑁆𑀢𑀺𑀁 𑀨𑀼𑀲𑀢𑀻𑀢𑀺 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀁 𑀧𑀸𑀧𑀼𑀡𑀸𑀢𑀺. 𑀆𑀭𑀫𑁆𑀫𑀡𑀪𑀽𑀢𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁 ‘‘𑀓𑀫𑁆𑀫𑀦𑀺𑀭𑁄𑀥𑁄’’𑀢𑀺 ¶ 𑀯𑀼𑀘𑁆𑀘𑀢𑀺, ‘‘𑀓𑀫𑁆𑀫𑀁 𑀦𑀺𑀭𑀼𑀚𑁆𑀛𑀢𑀺 𑀏𑀢𑁆𑀣𑀸’’𑀢𑀺 𑀓𑀢𑁆𑀯𑀸. ‘‘𑀛𑀸𑀬𑀣, 𑀪𑀺𑀓𑁆𑀔𑀯𑁂, 𑀫𑀸 𑀧𑀫𑀸𑀤𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸’’𑀢𑀺 𑀯𑀼𑀢𑁆𑀢𑀁.

𑀓𑀫𑁆𑀫𑀦𑀺𑀭𑁄𑀥𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨-𑁫. 𑀅𑀦𑀺𑀘𑁆𑀘𑀦𑀺𑀩𑁆𑀩𑀸𑀦𑀲𑀧𑁆𑀧𑀸𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁪𑁭-𑁧𑁫𑁦. 𑀦𑀺𑀩𑁆𑀩𑀸𑀦𑀲𑁆𑀲𑀸𑀢𑀺 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀲𑁆𑀲, 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑀲𑁆𑀲𑁂𑀯 𑀯𑀸. 𑀉𑀧𑀓𑀸𑀭𑀧𑀝𑀺𑀧𑀤𑀦𑁆𑀢𑀺 𑀉𑀧𑀓𑀸𑀭𑀸𑀯𑀳𑀁 𑀧𑀝𑀺𑀧𑀤𑀁. 𑀘𑀢𑀽𑀲𑀽𑀢𑀺 𑀤𑀼𑀢𑀺𑀬𑀸𑀤𑀻𑀲𑀼 𑀘𑀢𑀽𑀲𑀼. 𑀦𑀺𑀩𑁆𑀩𑀸𑀦𑀲𑀧𑁆𑀧𑀸𑀬𑀸 𑀧𑀝𑀺𑀧𑀤𑀸 𑀤𑁂𑀲𑀺𑀢𑀸𑀢𑀺 𑀓𑀢𑁆𑀯𑀸 ‘‘𑀲𑀳 𑀯𑀺𑀧𑀲𑁆𑀲𑀦𑀸𑀬 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀓𑀣𑀺𑀢𑀸’’𑀢𑀺 𑀯𑀼𑀢𑁆𑀢𑀁.

𑀅𑀦𑀺𑀘𑁆𑀘𑀦𑀺𑀩𑁆𑀩𑀸𑀦𑀲𑀧𑁆𑀧𑀸𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬-𑁭. 𑀅𑀦𑁆𑀢𑁂𑀯𑀸𑀲𑀺𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁫𑁧-𑁧𑁫𑁨. 𑀅𑀦𑁆𑀢-𑀲𑀤𑁆𑀤𑁄 𑀲𑀫𑀻𑀧𑀢𑁆𑀣𑁂 𑀯𑀢𑁆𑀢𑀢𑀺 ‘‘𑀉𑀤𑀓𑀦𑁆𑀢𑀁 𑀯𑀦𑀦𑁆𑀢’’𑀦𑁆𑀢𑀺𑀆𑀤𑀻𑀲𑀼, 𑀓𑀺𑀮𑁂𑀲𑁄 𑀧𑀦 𑀅𑀢𑀺𑀆𑀲𑀦𑁆𑀦𑁂 𑀯𑀲𑀢𑀺 𑀅𑀩𑁆𑀪𑀦𑁆𑀢𑀭𑀯𑀼𑀢𑁆𑀢𑀺𑀢𑀸𑀬𑀸𑀢𑀺 ‘‘𑀅𑀦𑁆𑀢𑁂𑀯𑀸𑀲𑀺𑀓’’𑀦𑁆𑀢𑀺 𑀯𑀼𑀢𑁆𑀢𑁄 𑀯𑀺𑀪𑀢𑁆𑀢𑀺𑀅𑀮𑁄𑀧𑁂𑀦 𑀬𑀣𑀸 ‘‘𑀯𑀦𑁂𑀓𑀼𑀲𑀮𑁄, 𑀓𑀽𑀮𑁂𑀭𑀼𑀓𑁆𑀔𑀸’’𑀢𑀺. 𑀢𑁂𑀦𑀸𑀳 𑁋 ‘‘𑀅𑀦𑀦𑁆𑀢𑁂𑀯𑀸𑀲𑀺𑀓𑀦𑁆𑀢𑀺 𑀅𑀦𑁆𑀢𑁄𑀯𑀲𑀦𑀓𑀺𑀮𑁂𑀲𑀯𑀺𑀭𑀳𑀺𑀢’’𑀦𑁆𑀢𑀺. 𑀆𑀘𑀭𑀡𑀓𑀓𑀺𑀮𑁂𑀲𑀯𑀺𑀭𑀳𑀺𑀢𑀦𑁆𑀢𑀺 𑀲𑀫𑀼𑀤𑀸𑀘𑀭𑀡𑀓𑀺𑀮𑁂𑀲𑀭𑀳𑀺𑀢𑀁. 𑀅𑀦𑁆𑀢𑁄 ¶ 𑀅𑀲𑁆𑀲 𑀯𑀲𑀦𑁆𑀢𑀻𑀢𑀺 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀦𑁆𑀢𑁄 𑀅𑀩𑁆𑀪𑀦𑁆𑀢𑀭𑁂 𑀘𑀺𑀢𑁆𑀢𑁂 𑀯𑀲𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺. 𑀢𑁂 𑀏𑀢𑀁 𑀅𑀥𑀺𑀪𑀯𑀦𑁆𑀢𑀻𑀢𑀺 𑀢𑁂 𑀓𑀺𑀮𑁂𑀲𑀸 𑀏𑀢𑀁 𑀧𑀼𑀕𑁆𑀕𑀮𑀁 𑀅𑀪𑀺𑀪𑀯𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑁂 𑀯𑀢𑁆𑀢𑁂𑀦𑁆𑀢𑀺. 𑀢𑁂𑀦𑀸𑀳 𑁋 ‘‘𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑀺 𑀲𑀺𑀓𑁆𑀔𑀸𑀧𑁂𑀦𑁆𑀢𑀺 𑀯𑀸’’𑀢𑀺. 𑀢𑁂𑀳𑀺 𑀆𑀘𑀭𑀺𑀬𑁂𑀳𑀻𑀢𑀺 𑀢𑁂𑀳𑀺 𑀓𑀺𑀮𑁂𑀲𑀲𑀗𑁆𑀔𑀸𑀢𑁂𑀳𑀺 𑀲𑀢𑁆𑀢𑁂 𑀅𑀢𑁆𑀢𑀦𑁄 𑀕𑀢𑀺𑀬𑀁 𑀞𑀧𑁂𑀦𑁆𑀢𑁂𑀳𑀺 𑀆𑀘𑀭𑀺𑀬𑁂𑀳𑀺. 𑀲𑀢𑁆𑀢𑀫𑀁 𑀳𑁂𑀝𑁆𑀞𑀸 𑀓𑀣𑀺𑀢𑀦𑀬𑀫𑁂𑀯𑀸𑀢𑀺 𑀬𑀲𑁆𑀫𑀸 𑀳𑁂𑀝𑁆𑀞𑀸 𑀔𑀦𑁆𑀥𑀯𑀲𑁂𑀦 𑀤𑁂𑀲𑀦𑀸 𑀆𑀕𑀢𑀸, 𑀇𑀥 𑀆𑀬𑀢𑀦𑀯𑀲𑁂𑀦𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄.

𑀅𑀦𑁆𑀢𑁂𑀯𑀸𑀲𑀺𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀢𑁆𑀣𑀺𑀦𑀼𑀔𑁄𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁩. 𑀧𑀭𑀺𑀬𑀸𑀬𑀢𑀺 𑀧𑀭𑀺𑀕𑀘𑁆𑀙𑀢𑀺 𑀨𑀮𑀁 𑀏𑀢𑀲𑁆𑀲𑀸𑀢𑀺 𑀧𑀭𑀺𑀬𑀸𑀬𑁄 𑀳𑁂𑀢𑀽𑀢𑀺 𑀆𑀳 𑁋 ‘‘𑀬𑀁 𑀧𑀭𑀺𑀬𑀸𑀬𑀦𑁆𑀢𑀺 𑀬𑀁 𑀓𑀸𑀭𑀡’’𑀦𑁆𑀢𑀺. 𑀧𑀘𑁆𑀘𑀓𑁆𑀔𑀤𑀺𑀝𑁆𑀞𑁂 𑀅𑀯𑀺𑀧𑀭𑀻𑀢𑁂 𑀅𑀢𑁆𑀣𑁂 𑀧𑀯𑀢𑁆𑀢𑀲𑀤𑁆𑀥𑀸 𑀧𑀘𑁆𑀘𑀓𑁆𑀔𑀲𑀤𑁆𑀥𑀸 𑀬𑀣𑀸 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀪𑀕𑀯𑀸, 𑀲𑁆𑀯𑀸𑀔𑀸𑀢𑁄 𑀥𑀫𑁆𑀫𑁄’’𑀢𑀺 (𑀫. 𑀦𑀺. 𑁧.𑁨𑁮𑁮) 𑀘. 𑀏𑀯𑀁 𑀓𑀺𑀭𑀸𑀢𑀺 𑀇𑀢𑀺 𑀓𑀺𑀭𑀸𑀬 𑀉𑀧𑁆𑀧𑀦𑁆𑀦𑁄 𑀲𑀤𑁆𑀤𑀳𑀦𑀸𑀓𑀸𑀭𑁄 𑀲𑀤𑁆𑀥𑀸𑀧𑀢𑀺𑀭𑀽𑀧𑀓𑁄. 𑀏𑀢𑀦𑁆𑀢𑀺 ‘‘𑀅𑀜𑁆𑀜𑀢𑁆𑀭𑁂𑀯 𑀲𑀤𑁆𑀥𑀸𑀬𑀸’’𑀢𑀺 𑀏𑀢𑀁 𑀯𑀘𑀦𑀁 ¶ . 𑀭𑀼𑀘𑀸𑀧𑁂𑀢𑁆𑀯𑀸𑀢𑀺 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀅𑀢𑁆𑀢𑀦𑁄 𑀫𑀢𑀺𑀬𑀸 𑀭𑁄𑀘𑁂𑀢𑁆𑀯𑀸. 𑀔𑀫𑀸𑀧𑁂𑀢𑁆𑀯𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀘𑀺𑀢𑁆𑀢𑀁 𑀢𑀣𑀸 𑀔𑀫𑀸𑀧𑁂𑀢𑁆𑀯𑀸. 𑀢𑁂𑀦𑀸𑀳 𑁋 ‘‘𑀅𑀢𑁆𑀣𑁂𑀢𑀦𑁆𑀢𑀺 𑀕𑀳𑀡𑀸𑀓𑀸𑀭𑁄’’𑀢𑀺. 𑀧𑀭𑀫𑁆𑀧𑀭𑀸𑀕𑀢𑀲𑁆𑀲 𑀅𑀢𑁆𑀣𑀲𑁆𑀲 𑀏𑀯𑀁 𑀓𑀺𑀭𑀲𑁆𑀲𑀸𑀢𑀺 𑀅𑀦𑀼𑀲𑁆𑀲𑀯𑀦𑀁. 𑀓𑀸𑀭𑀡𑀁 𑀘𑀺𑀦𑁆𑀢𑁂𑀦𑁆𑀢𑀲𑁆𑀲𑀸𑀢𑀺 𑀬𑀼𑀢𑁆𑀢𑀺𑀁 𑀘𑀺𑀦𑁆𑀢𑁂𑀦𑁆𑀢𑀲𑁆𑀲. 𑀓𑀸𑀭𑀡𑀁 𑀉𑀧𑀝𑁆𑀞𑀸𑀢𑀻𑀢𑀺 ‘‘𑀲𑀸𑀥𑀽’’𑀢𑀺 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑁆𑀲 𑀉𑀧𑀢𑀺𑀝𑁆𑀞𑀢𑀺. 𑀅𑀢𑁆𑀣𑁂𑀢𑀦𑁆𑀢𑀺 ‘‘𑀏𑀢𑀁 𑀓𑀸𑀭𑀡𑀁 𑀏𑀯𑀫𑀬𑀫𑀢𑁆𑀣𑁄 𑀬𑀼𑀚𑁆𑀚𑀢𑀻’’𑀢𑀺 𑀘𑀺𑀢𑁆𑀢𑁂𑀦 𑀕𑀳𑀡𑀁. 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁄𑀢𑀺 𑀬𑀼𑀢𑁆𑀢𑀺𑀧𑀭𑀺𑀓𑀧𑁆𑀧𑀦𑀸. 𑀮𑀤𑁆𑀥𑀻𑀢𑀺 𑀦𑀺𑀘𑁆𑀙𑀬𑁂𑀦 𑀕𑀳𑀡𑀁, 𑀲𑀸 𑀘 𑀔𑁄 𑀤𑀺𑀝𑁆𑀞𑀺 𑀅𑀬𑀸𑀣𑀸𑀯𑀕𑁆𑀕𑀳𑀡𑁂𑀦 𑀅𑀜𑁆𑀜𑀸𑀡𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀦𑁆𑀢𑀺 𑀮𑀤𑁆𑀥𑀺𑀁. 𑀅𑀢𑁆𑀣𑁂𑀲𑀸𑀢𑀺 𑀏𑀲𑀸 𑀮𑀤𑁆𑀥𑀺 𑀫𑀫 𑀉𑀧𑁆𑀧𑀦𑁆𑀦𑀸 𑀅𑀢𑁆𑀣𑀺 𑀬𑀼𑀢𑁆𑀢𑀭𑀽𑀧𑀸 𑀳𑀼𑀢𑁆𑀯𑀸 𑀉𑀧𑀮𑀩𑁆𑀪𑀢𑀺. 𑀏𑀯𑀁 𑀕𑀳𑀡𑀸𑀓𑀸𑀭𑁄 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺 𑀦𑀸𑀫, 𑀧𑀞𑀫𑀼𑀧𑁆𑀧𑀦𑁆𑀦𑀮𑀤𑁆𑀥𑀺𑀲𑀗𑁆𑀔𑀸𑀢𑀸𑀬 𑀤𑀺𑀝𑁆𑀞𑀺𑀬𑀸 𑀦𑀺𑀚𑁆𑀛𑀸𑀦𑀁 𑀔𑀫𑀦𑀸𑀓𑀸𑀭𑁄 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺 𑀦𑀸𑀫. 𑀧𑀜𑁆𑀘 𑀞𑀸𑀦𑀸𑀦𑀻𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀺 𑀲𑀤𑁆𑀥𑀸𑀤𑀻𑀦𑀺 𑀧𑀜𑁆𑀘 𑀓𑀸𑀭𑀡𑀸𑀦𑀺. 𑀫𑀼𑀜𑁆𑀘𑀺𑀢𑁆𑀯𑀸 𑀅𑀕𑁆𑀕𑀳𑁂𑀢𑁆𑀯𑀸. 𑀳𑁂𑀝𑁆𑀞𑀺𑀫𑀫𑀕𑁆𑀕𑀯𑀚𑁆𑀛𑀸𑀦𑀁 𑀭𑀸𑀕𑀸𑀤𑀻𑀦𑀁 𑀅𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀦𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀭𑀸𑀕𑀤𑁄𑀲𑀫𑁄𑀳𑁄’’𑀢𑀺 𑀅𑀬𑀁 𑀲𑁂𑀓𑁆𑀔𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀸, 𑀲𑀩𑁆𑀩𑀲𑁄 𑀅𑀪𑀸𑀯𑀁 𑀲𑀦𑁆𑀥𑀸𑀬 𑀅𑀲𑁂𑀓𑁆𑀔𑀸𑀦𑀦𑁆𑀢𑀺 𑀆𑀳 𑁋 ‘‘𑀲𑁂𑀓𑁆𑀔𑀸𑀲𑁂𑀓𑁆𑀔𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀸 𑀓𑀣𑀺𑀢𑀸’’𑀢𑀺. ‘‘𑀲𑀦𑁆𑀢𑀁 ¶ 𑀯𑀸 𑀅𑀚𑁆𑀛𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀲𑁂𑀓𑁆𑀔𑀸𑀦𑀁, ‘‘𑀅𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀅𑀲𑁂𑀓𑁆𑀔𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀸 𑀓𑀣𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀢𑁆𑀣𑀺𑀦𑀼𑀔𑁄𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯-𑁧𑁦. 𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀦𑁆𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁫𑁪-𑁧𑁫𑁫. ‘‘𑀲𑀫𑁆𑀧𑀦𑁆𑀦𑀲𑀻𑀮𑀸, 𑀪𑀺𑀓𑁆𑀔𑀯𑁂, 𑀯𑀺𑀳𑀭𑀣𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁬𑁪) 𑀯𑀺𑀬 𑀧𑀭𑀺𑀧𑀼𑀡𑁆𑀡𑀢𑁆𑀣𑁄 𑀇𑀥 𑀲𑀫𑁆𑀧𑀦𑁆𑀦-𑀲𑀤𑁆𑀤𑁄𑀢𑀺 𑀆𑀳 ‘‘𑀧𑀭𑀺𑀧𑀼𑀡𑁆𑀡𑀺𑀦𑁆𑀤𑁆𑀭𑀺𑀬𑁄’’𑀢𑀺. 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀭𑀺𑀧𑀼𑀡𑁆𑀡𑀺𑀦𑁆𑀤𑁆𑀭𑀺𑀬𑁄 𑀦𑀸𑀫 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀏𑀯𑀁 𑀲𑀢𑀺 𑀲𑀫𑀦𑁆𑀦𑀸𑀕𑀫𑀲𑀫𑁆𑀧𑀢𑁆𑀢𑀺 𑀯𑀼𑀢𑁆𑀢𑀸 𑀳𑁄𑀢𑀻𑀢𑀺 𑀆𑀲𑀗𑁆𑀓𑀦𑁆𑀢𑁄 ‘‘𑀘𑀓𑁆𑀔𑀸𑀤𑀻𑀦𑀺 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀁 𑀲𑀦𑁆𑀥𑀸𑀬𑀸𑀢𑀺 𑀤𑀼𑀢𑀺𑀬𑀯𑀺𑀓𑀧𑁆𑀧𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 𑀲𑀦𑁆𑀥𑀸𑀬. 𑀳𑁂𑀝𑁆𑀞𑀸 𑀔𑀦𑁆𑀥𑀺𑀬𑀯𑀕𑁆𑀕𑁂 𑀔𑀦𑁆𑀥𑀯𑀲𑁂𑀦 𑀤𑁂𑀲𑀦𑀸 𑀆𑀕𑀢𑀸, 𑀇𑀥 𑀆𑀬𑀢𑀦𑀯𑀲𑁂𑀦𑀸𑀢𑀺 𑀆𑀳 ‘‘𑀯𑀼𑀢𑁆𑀢𑀦𑀬𑀫𑁂𑀯𑀸’’𑀢𑀺.

𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀦𑁆𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀯𑀧𑀼𑀭𑀸𑀡𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑁄 𑀧𑀡𑁆𑀡𑀸𑀲𑀓𑁄.

𑁧𑁬. 𑀦𑀦𑁆𑀤𑀺𑀓𑁆𑀔𑀬𑀯𑀕𑁆𑀕𑁄

𑁧-𑁪. 𑀅𑀚𑁆𑀛𑀢𑁆𑀢𑀦𑀦𑁆𑀤𑀺𑀓𑁆𑀔𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁫𑁬-𑁧𑁫𑁯. 𑀅𑀢𑁆𑀣𑀢𑁄𑀢𑀺 ¶ 𑀲𑀪𑀸𑀯𑀢𑁄. 𑀜𑀸𑀡𑁂𑀦 𑀅𑀭𑀺𑀬𑀢𑁄 𑀜𑀸𑀢𑀩𑁆𑀩𑀢𑁄 𑀅𑀢𑁆𑀣𑁄, 𑀲𑀪𑀸𑀯𑁄𑀢𑀺. 𑀏𑀯𑀜𑁆𑀳𑀺 𑀅𑀪𑀺𑀚𑁆𑀚𑀦𑀲𑀪𑀸𑀯𑁄 𑀦𑀦𑁆𑀤𑀦𑀝𑁆𑀞𑁂𑀦 𑀦𑀦𑁆𑀤𑀻, 𑀭𑀜𑁆𑀚𑀦𑀝𑁆𑀞𑁂𑀦 𑀭𑀸𑀕𑁄. 𑀯𑀺𑀫𑀼𑀢𑁆𑀢𑀺𑀯𑀲𑁂𑀦𑀸𑀢𑀺 𑀯𑀺𑀫𑀼𑀢𑁆𑀢𑀺𑀬𑀸 𑀅𑀥𑀺𑀕𑀫𑀯𑀲𑁂𑀦. 𑀏𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀧𑀞𑀫𑀲𑀼𑀢𑁆𑀢𑁂. 𑀤𑀼𑀢𑀺𑀬𑀸𑀤𑀻𑀲𑀽𑀢𑀺 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑁂𑀲𑀼. 𑀉𑀢𑁆𑀢𑀸𑀦𑀫𑁂𑀯 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸.

𑀅𑀚𑁆𑀛𑀢𑁆𑀢𑀦𑀦𑁆𑀤𑀺𑀓𑁆𑀔𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁬. 𑀚𑀻𑀯𑀓𑀫𑁆𑀩𑀯𑀦𑀲𑀫𑀸𑀥𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁬𑁦-𑁧𑁬𑁧. 𑀲𑀫𑀸𑀥𑀺𑀯𑀺𑀓𑀮𑀸𑀦𑀁 ¶ 𑀘𑀺𑀢𑁆𑀢𑁂𑀓𑀕𑁆𑀕𑀢𑀁 𑀮𑀪𑀦𑁆𑀢𑀸𑀦𑀁, 𑀧𑀝𑀺𑀲𑀮𑁆𑀮𑀸𑀦𑀯𑀺𑀓𑀮𑀸𑀦𑀁 𑀓𑀸𑀬𑀯𑀺𑀯𑁂𑀓𑀜𑁆𑀘 𑀘𑀺𑀢𑁆𑀢𑁂𑀓𑀕𑁆𑀕𑀢𑀜𑁆𑀘 𑀮𑀪𑀦𑁆𑀢𑀸𑀦𑀦𑁆𑀢𑀺 𑀬𑁄𑀚𑀦𑀸. 𑀧𑀸𑀓𑀝𑀁 𑀳𑁄𑀢𑀻𑀢𑀺 𑀯𑀺𑀪𑀽𑀢𑀁 𑀳𑀼𑀢𑁆𑀯𑀸 𑀉𑀧𑀝𑁆𑀞𑀸𑀢𑀺. 𑀑𑀓𑁆𑀔𑀸𑀬𑀢𑀺 𑀧𑀘𑁆𑀘𑀓𑁆𑀔𑀸𑀬𑀢𑀻𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑀸𑀦𑀁 𑀯𑀺𑀪𑀽𑀢𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀲𑁆𑀲 𑀓𑀣𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 𑁋 ‘‘𑀤𑁆𑀯𑀻𑀲𑀼𑀧𑀺…𑀧𑁂… 𑀓𑀣𑀺𑀢𑀸’’𑀢𑀺.

𑀚𑀻𑀯𑀓𑀫𑁆𑀩𑀯𑀦𑀲𑀫𑀸𑀥𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭-𑁯. 𑀓𑁄𑀝𑁆𑀞𑀺𑀓𑀅𑀦𑀺𑀘𑁆𑀘𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁬𑁨-𑁧𑁬𑁪. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀬𑁄 𑀏𑀯 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀺𑀬𑀸 𑀥𑀫𑁆𑀫𑀸 𑀦𑀸𑀫. 𑀣𑁂𑀭𑀲𑁆𑀲 𑀢𑀤𑀸 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀦 𑀧𑀭𑀺𑀧𑀸𑀓𑀁 𑀉𑀧𑀕𑀢𑀸𑀦𑀺, 𑀣𑁂𑀭𑁄 𑀇𑀫𑀸𑀳𑀺 𑀤𑁂𑀲𑀦𑀸𑀳𑀺 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀫𑀕𑀫𑀸𑀲𑀺.

𑀓𑁄𑀝𑁆𑀞𑀺𑀓𑀅𑀦𑀺𑀘𑁆𑀘𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦-𑁧𑁨. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀳𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁬𑁫-𑁧𑁬𑁭. 𑀧𑀸𑀝𑀺𑀬𑁂𑀓𑁆𑀓𑀦𑁆𑀢𑀺 ¶ 𑀯𑀺𑀲𑀼𑀁 𑀯𑀺𑀲𑀼𑀁. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀧𑀼𑀩𑁆𑀩𑀲𑁆𑀲 𑀯𑀢𑁆𑀢𑀩𑁆𑀩𑀲𑁆𑀲 𑀅𑀪𑀸𑀯𑀸.

𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀳𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀦𑁆𑀤𑀺𑀓𑁆𑀔𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁭. 𑀲𑀝𑁆𑀞𑀺𑀧𑁂𑀬𑁆𑀬𑀸𑀮𑀯𑀕𑁆𑀕𑁄

𑁧-𑁬𑁦. 𑀅𑀚𑁆𑀛𑀢𑁆𑀢𑀅𑀦𑀺𑀘𑁆𑀘𑀙𑀦𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁬𑁮-𑁨𑁨𑁭. ‘‘𑀬𑀁, 𑀪𑀺𑀓𑁆𑀔𑀯𑁂, 𑀅𑀦𑀺𑀘𑁆𑀘𑀁, 𑀢𑀢𑁆𑀭 𑀯𑁄 𑀙𑀦𑁆𑀤𑁄 𑀧𑀳𑀸𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀢𑁂𑀲𑀁 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀲𑀝𑁆𑀞𑀺 𑀲𑀼𑀢𑁆𑀢𑀸𑀦𑀺 𑀓𑀣𑀺𑀢𑀸𑀦𑀺 ¶ , 𑀢𑀸𑀦𑀺 𑀘 𑀧𑁂𑀬𑁆𑀬𑀸𑀮𑀦𑀬𑁂𑀦 𑀤𑁂𑀲𑀦𑀁 𑀆𑀭𑀼𑀴𑁆𑀳𑀸𑀦𑀻𑀢𑀺 ‘‘𑀲𑀝𑁆𑀞𑀺𑀧𑁂𑀬𑁆𑀬𑀸𑀮𑁄 𑀦𑀸𑀫 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀬𑀸𑀦𑀺 𑀧𑀦𑁂𑀢𑁆𑀣𑀸’’𑀢𑀺𑀆𑀤𑀺.

𑀅𑀚𑁆𑀛𑀢𑁆𑀢𑀅𑀦𑀺𑀘𑁆𑀘𑀙𑀦𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀝𑁆𑀞𑀺𑀧𑁂𑀬𑁆𑀬𑀸𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁮. 𑀲𑀫𑀼𑀤𑁆𑀤𑀯𑀕𑁆𑀕𑁄

𑁧. 𑀧𑀞𑀫𑀲𑀫𑀼𑀤𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁮. 𑀬𑀤𑀺 ‘‘𑀤𑀼𑀧𑁆𑀧𑀽𑀭𑀡𑀝𑁆𑀞𑁂𑀦 𑀲𑀫𑀼𑀤𑁆𑀤𑀦𑀝𑁆𑀞𑁂𑀦𑀸’’𑀢𑀺 𑀇𑀫𑀺𑀦𑀸 𑀅𑀢𑁆𑀣𑀤𑁆𑀯𑀬𑁂𑀦 𑀲𑀸𑀕𑀭𑁄 ‘‘𑀲𑀫𑀼𑀤𑁆𑀤𑁄’’𑀢𑀺 𑀯𑀼𑀘𑁆𑀘𑀢𑀺, 𑀘𑀓𑁆𑀔𑀼𑀲𑁆𑀲𑁂𑀯𑁂𑀢𑀁 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀬𑀼𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀤𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀤𑀼𑀧𑁆𑀧𑀽𑀭𑀡𑀝𑁆𑀞𑁂𑀦𑀸𑀢𑀺 𑀧𑀽𑀭𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑁂𑀦. 𑀲𑀫𑀼𑀤𑁆𑀤𑀦𑀝𑁆𑀞𑁂𑀦𑀸𑀢𑀺 𑀲𑀩𑁆𑀩𑀲𑁄 𑀉𑀧𑀭𑀽𑀧𑀭𑀺𑀧𑀓𑁆𑀔𑀺𑀢𑁆𑀢𑀕𑀫𑀦𑁂𑀦. 𑀫𑀳𑀸𑀕𑀗𑁆𑀕𑀸𑀤𑀺𑀫𑀳𑀸𑀦𑀤𑀻𑀦𑀁 𑀫𑀳𑀢𑀸 𑀉𑀤𑀓𑁄𑀖𑁂𑀦 𑀅𑀦𑀼𑀲𑀁𑀯𑀘𑁆𑀙𑀭𑀁 𑀅𑀦𑀼𑀧𑀓𑁆𑀔𑀦𑁆𑀤𑀫𑀸𑀦𑁄𑀧𑀺 𑀳𑀺 𑀲𑀫𑀼𑀤𑁆𑀤𑁄 𑀧𑀸𑀭𑀺𑀧𑀽𑀭𑀺𑀁 𑀦 𑀕𑀘𑁆𑀙𑀢𑀺, 𑀬𑀜𑁆𑀘 𑀪𑀽𑀫𑀺𑀧𑀤𑁂𑀲𑀁 𑀑𑀢𑁆𑀣𑀭𑀢𑀺, 𑀢𑀁 𑀲𑀫𑀼𑀤𑁆𑀤𑀪𑀸𑀯𑀁 𑀦𑁂𑀢𑀺, 𑀅𑀪𑀸𑀯𑀁 𑀯𑀸 𑀧𑀸𑀧𑀼𑀡𑀸𑀢𑀺 𑀅𑀧𑀬𑀸𑀢𑁂 𑀲𑀫𑀼𑀤𑁆𑀤𑁄𑀤𑀓𑁂, 𑀢𑀁 𑀯𑀸 𑀅𑀦𑀼𑀤𑀓𑀪𑀸𑀯𑀧𑀢𑁆𑀢𑀺𑀬𑀸 𑀅𑀢𑀣𑀫𑁂𑀯 𑀳𑁄𑀢𑀺. 𑀓𑀸𑀫𑀜𑁆𑀘𑁂𑀲 𑀤𑀼𑀧𑁆𑀧𑀽𑀭𑀡𑀝𑁆𑀞𑁄 𑀲𑀫𑀼𑀤𑁆𑀤𑀦𑀝𑁆𑀞𑁄 ¶ 𑀲𑀸𑀕𑀭𑁂 𑀮𑀩𑁆𑀪𑀢𑀺, 𑀢𑀣𑀸𑀧𑀺 𑀢𑀁 𑀤𑁆𑀯𑀬𑀁 𑀘𑀓𑁆𑀔𑀼𑀲𑁆𑀫𑀺𑀁𑀬𑁂𑀯 𑀯𑀺𑀲𑁂𑀲𑀢𑁄 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀲𑁆𑀲 𑀳𑀻’’𑀢𑀺𑀆𑀤𑀺𑀫𑀸𑀳. 𑀲𑀫𑁄𑀲𑀭𑀦𑁆𑀢𑀦𑁆𑀢𑀺 𑀲𑀩𑁆𑀩𑀲𑁄 𑀦𑀻𑀮𑀸𑀤𑀺𑀪𑀸𑀕𑁂𑀳𑀺 𑀑𑀲𑀭𑀦𑁆𑀢𑀁, 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀤𑀼𑀧𑁆𑀧𑀽𑀭𑀡𑀻𑀬𑀢𑁆𑀢𑀸. 𑀲𑀤𑁄𑀲𑀕𑀫𑀦𑁂𑀦 𑀕𑀘𑁆𑀙𑀢𑀺 𑀲𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀤𑀼𑀲𑁆𑀲𑀦𑀢𑁄. 𑀤𑀼𑀲𑁆𑀲𑀦𑀝𑁆𑀞𑀢𑀸 𑀘𑀲𑁆𑀲 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀢𑀡𑁆𑀳𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀲𑀫𑀼𑀤𑁆𑀤𑁂 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑀫𑀸𑀦𑁄 𑀊𑀫𑀺𑀬𑀸 𑀯𑁂𑀕𑁄 𑀲𑀫𑀼𑀤𑁆𑀤𑀲𑁆𑀲𑀸𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀘𑀓𑁆𑀔𑀼𑀲𑀫𑀼𑀤𑁆𑀤𑀲𑁆𑀲 𑀧𑀼𑀭𑀢𑁄 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑀫𑀸𑀦𑀁 𑀦𑀻𑀮𑀸𑀤𑀺𑀪𑁂𑀤𑀁 𑀭𑀽𑀧𑀸𑀭𑀫𑁆𑀫𑀡𑀁 𑀘𑀓𑁆𑀔𑀼𑀲𑁆𑀲𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 ‘‘𑀭𑀽𑀧𑀫𑀬𑁄 𑀯𑁂𑀕𑁄’’𑀢𑀺. 𑀅𑀲𑀫𑀧𑁂𑀓𑁆𑀔𑀺𑀢𑁂𑀢𑀺 𑀲𑀫𑁆𑀫𑀸𑀤𑀲𑁆𑀲𑀦𑁂 𑀭𑀽𑀧𑁂 𑀫𑀦𑀸𑀧𑀪𑀸𑀯𑀁 𑀅𑀫𑀦𑀸𑀧𑀪𑀸𑀯𑀜𑁆𑀘 𑀕𑀳𑁂𑀢𑁆𑀯𑀸, ‘‘𑀇𑀤𑀁 𑀦𑀸𑀫 𑀫𑀬𑀸 𑀤𑀺𑀝𑁆𑀞’’𑀦𑁆𑀢𑀺 𑀅𑀦𑀼𑀧𑀥𑀸𑀭𑁂𑀦𑁆𑀢𑀲𑁆𑀲 𑀓𑁂𑀯𑀮𑀁 𑀲𑀫𑀽𑀳𑀖𑀦𑀯𑀲𑁂𑀦 𑀕𑀡𑁆𑀳𑀦𑁆𑀢𑀲𑁆𑀲 𑀕𑀳𑀡𑀁 𑀅𑀲𑀫𑀧𑁂𑀓𑁆𑀔𑀦𑀁. 𑀲𑀳𑀢𑀻𑀢𑀺 𑀅𑀥𑀺𑀪𑀯𑀢𑀺, 𑀢𑀁𑀦𑀺𑀫𑀺𑀢𑁆𑀢𑀁 𑀓𑀜𑁆𑀘𑀺 𑀯𑀺𑀓𑀸𑀭𑀁 𑀦𑀸𑀧𑀚𑁆𑀚𑀢𑀺.

𑀊𑀫𑀻𑀢𑀺 ¶ 𑀯𑀻𑀘𑀺𑀬𑁄. 𑀆𑀯𑀝𑁆𑀝𑁄 𑀆𑀯𑀝𑁆𑀝𑀦𑀯𑀲𑁂𑀦 𑀧𑀯𑀢𑁆𑀢𑀁 𑀉𑀤𑀓𑀁. 𑀕𑀸𑀳𑀭𑀓𑁆𑀔𑀲𑀫𑀓𑀭𑀸𑀤𑀬𑁄 𑀕𑀸𑀳𑀭𑀓𑁆𑀔𑀲𑁄. 𑀬𑀣𑀸 𑀲𑀫𑀼𑀤𑁆𑀤𑁂 𑀊𑀫𑀺𑀬𑁄 𑀉𑀧𑀭𑀽𑀧𑀭𑀺 𑀯𑀢𑁆𑀢𑀫𑀸𑀦𑀸 𑀅𑀢𑁆𑀢𑀦𑀺 𑀧𑀢𑀺𑀢𑀧𑀼𑀕𑁆𑀕𑀮𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀆𑀧𑀸𑀤𑁂𑀦𑁆𑀢𑀺, 𑀢𑀣𑀸 𑀆𑀯𑀝𑁆𑀝𑀕𑀸𑀳𑀭𑀓𑁆𑀔𑀲𑀸. 𑀏𑀯𑀫𑁂𑀢𑁂 𑀭𑀸𑀕𑀸𑀤𑀬𑁄 𑀓𑀺𑀮𑁂𑀲𑀸 𑀲𑀬𑀁 𑀉𑀧𑁆𑀧𑀦𑁆𑀦𑀓𑀲𑀢𑁆𑀢𑁂 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀁 𑀆𑀧𑀸𑀤𑁂𑀦𑁆𑀢𑀺, 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀢𑀸𑀬 𑀲𑀢𑁆𑀢𑀸𑀦𑀁 𑀅𑀦𑀬𑀩𑁆𑀬𑀲𑀦𑀸𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀲𑁆𑀲 𑀊𑀫𑀺𑀪𑀬𑀲𑁆𑀲 𑀆𑀭𑀫𑁆𑀫𑀡𑀯𑀲𑁂𑀦 𑀘𑀓𑁆𑀔𑀼𑀲𑀫𑀼𑀤𑁆𑀤𑁄 ‘‘𑀲𑀊𑀫𑀺𑀲𑀸𑀯𑀝𑁆𑀝𑁄 𑀲𑀕𑀸𑀳𑁄 𑀲𑀭𑀓𑁆𑀔𑀲𑁄’’𑀢𑀺 𑀯𑀼𑀢𑁆𑀢𑁄.

𑀊𑀫𑀺𑀪𑀬𑀦𑁆𑀢𑀺 𑀏𑀢𑁆𑀣 𑀪𑀸𑀬𑀢𑀺 𑀏𑀢𑀲𑁆𑀫𑀸𑀢𑀺 𑀪𑀬𑀁, 𑀊𑀫𑀻𑀯 𑀪𑀬𑀁 𑀊𑀫𑀺𑀪𑀬𑀁. 𑀓𑀼𑀚𑁆𑀛𑀦𑀝𑁆𑀞𑁂𑀦 𑀓𑁄𑀥𑁄. 𑀲𑁆𑀯𑁂𑀯 𑀘𑀺𑀢𑁆𑀢𑀲𑁆𑀲 𑀘 𑀅𑀪𑀺𑀫𑀤𑁆𑀤𑀦𑀯𑀲𑁂𑀦𑀼𑀧𑁆𑀧𑀸𑀤𑀦𑀢𑁆𑀣𑁂𑀦 𑀤𑀴𑁆𑀳𑀁 𑀆𑀬𑀸𑀲𑀦𑀝𑁆𑀞𑁂𑀦 𑀉𑀧𑀸𑀬𑀸𑀲𑁄. 𑀏𑀢𑁆𑀣 𑀘 𑀅𑀦𑁂𑀓𑀯𑀸𑀭𑀁 𑀧𑀯𑀢𑁆𑀢𑀺𑀢𑁆𑀯𑀸 𑀲𑀢𑁆𑀢𑁂 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑀼𑀁 𑀅𑀤𑀢𑁆𑀯𑀸 𑀅𑀦𑀬𑀩𑁆𑀬𑀲𑀦𑀦𑀺𑀧𑁆𑀨𑀸𑀤𑀦𑁂𑀦 𑀓𑁄𑀥𑀽𑀧𑀸𑀬𑀸𑀲𑀲𑁆𑀲 𑀊𑀫𑀺𑀲𑀤𑀺𑀲𑀢𑀸 𑀤𑀝𑁆𑀞𑀩𑁆𑀩𑀸. 𑀢𑀣𑀸 𑀓𑀸𑀫𑀕𑀼𑀡𑀸 𑀓𑀺𑀮𑁂𑀲𑀸𑀪𑀺𑀪𑀽𑀢𑁂 𑀲𑀢𑁆𑀢𑁂 𑀫𑀸𑀦𑁂 𑀯𑀺𑀬 𑀭𑀽𑀧𑀸𑀤𑀺𑀯𑀺𑀲𑀬𑀲𑀗𑁆𑀔𑀸𑀢𑁂 𑀅𑀢𑁆𑀢𑀦𑀺 𑀲𑀁𑀲𑀸𑀭𑁂𑀢𑁆𑀯𑀸 𑀬𑀣𑀸 𑀢𑀢𑁄 𑀩𑀳𑀺𑀪𑀽𑀢𑁂 𑀦𑁂𑀓𑁆𑀔𑀫𑁆𑀫𑁂 𑀘𑀺𑀢𑁆𑀢𑀫𑁆𑀧𑀺 𑀦 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀆𑀯𑀝𑁆𑀝𑁂𑀢𑁆𑀯𑀸 𑀩𑁆𑀬𑀲𑀦𑀸𑀧𑀸𑀤𑀦𑁂𑀦 𑀆𑀯𑀝𑁆𑀝𑀲𑀤𑀺𑀲𑀢𑀸 𑀤𑀝𑁆𑀞𑀩𑁆𑀩𑀸. 𑀬𑀤𑀸 𑀧𑀦 𑀕𑀸𑀳𑀭𑀓𑁆𑀔𑀲𑁄 𑀆𑀭𑀓𑁆𑀔𑀭𑀳𑀺𑀢𑀁 𑀅𑀢𑁆𑀢𑀦𑁄 𑀕𑁄𑀘𑀭𑀪𑀽𑀫𑀺𑀕𑀢𑀁 𑀧𑀼𑀭𑀺𑀲𑀁 𑀅𑀪𑀺𑀪𑀼𑀬𑁆𑀬 𑀕𑀳𑁂𑀢𑁆𑀯𑀸 𑀅𑀕𑁄𑀘𑀭𑁂 𑀞𑀺𑀢𑀫𑁆𑀧𑀺 𑀕𑁄𑀘𑀭𑀁 𑀦𑁂𑀢𑁆𑀯𑀸 𑀪𑁂𑀭𑀯𑀭𑀽𑀧𑀤𑀲𑁆𑀲𑀦𑀸𑀤𑀺𑀦𑀸 𑀅𑀢𑁆𑀢𑀦𑁄 𑀉𑀧𑀓𑁆𑀓𑀫𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑀁 𑀓𑀢𑁆𑀯𑀸 𑀅𑀦𑁆𑀯𑀸𑀯𑀺𑀲𑀺𑀢𑁆𑀯𑀸 𑀯𑀡𑁆𑀡𑀩𑀮𑀪𑁄𑀕𑀆𑀬𑀼𑀲𑀼𑀔𑁂𑀳𑀺 𑀯𑀺𑀬𑁄𑀚𑁂𑀢𑁆𑀯𑀸 𑀫𑀳𑀦𑁆𑀢𑀁 𑀅𑀦𑀬𑀩𑁆𑀬𑀲𑀦𑀁 𑀆𑀧𑀸𑀤𑁂𑀢𑀺, 𑀏𑀯𑀁 𑀫𑀸𑀢𑀼𑀕𑀸𑀫𑁄𑀧𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀭𑀳𑀺𑀢𑀁 𑀅𑀯𑀻𑀭𑀧𑀼𑀭𑀺𑀲𑀁 𑀅𑀢𑁆𑀢𑀦𑁄 𑀭𑀽𑀧𑀸𑀤𑀻𑀳𑀺 𑀧𑀮𑁄𑀪𑀦𑀯𑀲𑁂𑀦 𑀅𑀪𑀺𑀪𑀼𑀬𑁆𑀬 𑀕𑀳𑁂𑀢𑁆𑀯𑀸 𑀯𑀸 𑀯𑀻𑀭𑀚𑀸𑀢𑀺𑀬𑀫𑁆𑀧𑀺 𑀇𑀢𑁆𑀣𑀺𑀓𑀼𑀢𑁆𑀢𑀪𑀽𑀢𑁂𑀳𑀺 𑀅𑀢𑁆𑀢𑀦𑁄 𑀳𑀸𑀯𑀪𑀸𑀯𑀯𑀺𑀮𑀸𑀲𑁂𑀳𑀺 𑀇𑀢𑁆𑀣𑀺𑀫𑀸𑀬𑀸𑀬 𑀅𑀦𑁆𑀯𑀸𑀯𑀺𑀲𑀺𑀢𑁆𑀯𑀸 𑀯𑀸 𑀅𑀯𑀲𑀁 𑀅𑀢𑁆𑀢𑀦𑁄 𑀉𑀧𑀓𑀸𑀭𑀥𑀫𑁆𑀫𑁂 𑀲𑀻𑀮𑀸𑀤𑀬𑁄 𑀲𑀫𑁆𑀧𑀸𑀤𑁂𑀢𑀼𑀁 𑀅𑀲𑀫𑀢𑁆𑀣𑀁 𑀓𑀭𑁄𑀦𑁆𑀢𑁄 𑀕𑀼𑀡𑀯𑀡𑁆𑀡𑀸𑀤𑀻𑀳𑀺 𑀯𑀺𑀬𑁄𑀚𑁂𑀢𑁆𑀯𑀸 𑀫𑀳𑀦𑁆𑀢𑀁 𑀅𑀦𑀬𑀩𑁆𑀬𑀲𑀦𑀁 𑀆𑀧𑀸𑀤𑁂𑀢𑀺, 𑀏𑀯𑀁 𑀫𑀸𑀢𑀼𑀕𑀸𑀫𑀲𑁆𑀲 𑀕𑀸𑀳𑀭𑀓𑁆𑀔𑀲𑀲𑀤𑀺𑀲𑀢𑀸 𑀤𑀝𑁆𑀞𑀩𑁆𑀩𑀸. 𑀊𑀫𑀺𑀪𑀬𑀦𑁆𑀢𑀺 𑀮𑀓𑁆𑀔𑀡𑀯𑀘𑀦𑀁 ¶ . 𑀬𑀣𑀸 𑀳𑀺 𑀊𑀫𑀺 𑀪𑀸𑀬𑀺𑀢𑀩𑁆𑀩𑀝𑁆𑀞𑁂𑀦 𑀪𑀬𑀁, 𑀏𑀯𑀁 𑀆𑀯𑀝𑁆𑀝𑀕𑀸𑀳𑀭𑀓𑁆𑀔𑀲𑀸𑀧𑀻𑀢𑀺 𑀊𑀫𑀺𑀆𑀤𑀺𑀪𑀬𑁂𑀦 𑀲𑀪𑀬𑀦𑁆𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀦𑁆𑀢𑀁 𑀅𑀯𑀲𑀸𑀦𑀁 𑀕𑀢𑁄, 𑀏𑀯𑀁 𑀧𑀸𑀭𑀁 𑀦𑀺𑀩𑁆𑀩𑀸𑀦𑀁 𑀕𑀢𑁄𑀢𑀺 𑀯𑀼𑀘𑁆𑀘𑀢𑀺.

𑀧𑀞𑀫𑀲𑀫𑀼𑀤𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨-𑁩. 𑀤𑀼𑀢𑀺𑀬𑀲𑀫𑀼𑀤𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁨𑁯-𑁨𑁩𑁦. 𑀓𑀺𑀮𑁂𑀲𑀸𑀦𑀁 ¶ 𑀅𑀮𑁆𑀮𑀪𑀸𑀯𑀽𑀧𑀦𑀬𑀦𑀦𑁆𑀢𑀺 𑀆𑀳 ‘‘𑀢𑁂𑀫𑀦𑀝𑁆𑀞𑁂𑀦𑀸’’𑀢𑀺. 𑀅𑀭𑀺𑀬𑀲𑀸𑀯𑀓𑁂𑀢𑀺 𑀅𑀦𑀸𑀕𑀸𑀫𑀺𑀦𑁄. 𑀢𑁂 𑀳𑀺 𑀓𑀸𑀫𑀪𑀯𑀯𑀲𑁂𑀦 𑀅𑀢𑀺𑀦𑁆𑀢𑀢𑀸𑀬 𑀦 𑀲𑀫𑀼𑀦𑁆𑀦𑀸. 𑀢𑀬𑁄 𑀫𑀘𑁆𑀘𑀽𑀢𑀺 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀤𑁂𑀯𑀧𑀼𑀢𑁆𑀢𑀫𑀸𑀭𑁂. 𑀢𑀻𑀳𑀺 𑀉𑀧𑀥𑀻𑀳𑀻𑀢𑀺 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀓𑀸𑀫𑀕𑀼𑀡𑀸𑀦𑀁 𑀯𑀲𑁂𑀦 𑀢𑀻𑀳𑀺 𑀉𑀧𑀥𑀻𑀳𑀺. 𑀔𑀦𑁆𑀥𑀼𑀧𑀥𑀺𑀦𑀸 𑀧𑀦 𑀲𑁄 𑀦 𑀦𑀺𑀭𑀽𑀧𑀥𑀺 𑀲𑀉𑀧𑀸𑀤𑀺𑀲𑁂𑀲𑀲𑁆𑀲𑁂𑀯 𑀦𑀺𑀩𑁆𑀩𑀸𑀦𑀲𑁆𑀲 𑀅𑀥𑀺𑀕𑀢𑀢𑁆𑀢𑀸. 𑀕𑀢𑁄𑀢𑀺 𑀧𑀝𑀺𑀧𑀢𑁆𑀢𑀺𑀕𑀫𑀦𑁂𑀦 𑀕𑀢𑁄.

𑀤𑀼𑀢𑀺𑀬𑀲𑀫𑀼𑀤𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪-𑁬. 𑀔𑀻𑀭𑀭𑀼𑀓𑁆𑀔𑁄𑀧𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁩𑁧-𑁨𑁩𑁩. 𑀅𑀧𑁆𑀧𑀳𑀻𑀦𑀝𑁆𑀞𑁂𑀦𑀸𑀢𑀺 𑀫𑀕𑁆𑀕𑁂𑀦 𑀅𑀲𑀫𑀼𑀕𑁆𑀖𑀸𑀝𑀺𑀢𑀪𑀸𑀯𑁂𑀦. 𑀅𑀢𑁆𑀣𑀻𑀢𑀺 𑀯𑀺𑀚𑁆𑀚𑀢𑀺. 𑀲𑀢𑀺 𑀧𑀘𑁆𑀘𑀬𑁂 𑀯𑀺𑀚𑁆𑀚𑀫𑀸𑀦𑀓𑀺𑀘𑁆𑀘𑀓𑀭𑀡𑀢𑁄 𑀧𑀭𑀺𑀬𑀼𑀝𑁆𑀞𑀸𑀦𑀁 𑀅𑀧𑁆𑀧𑀓𑀁 𑀫𑀽𑀲𑀺𑀓𑀸𑀯𑀺𑀲𑀁 𑀯𑀺𑀬 𑀧𑀭𑀺𑀢𑁆𑀢𑀁 𑀦𑀸𑀫 𑀳𑁄𑀢𑀺 𑀅𑀧𑁆𑀧𑀸𑀦𑀼𑀪𑀸𑀯𑀢𑁆𑀢𑀸. 𑀏𑀯𑀭𑀽𑀧𑀸𑀧𑀻𑀢𑀺 𑀅𑀧𑁆𑀧𑀓𑀸𑀧𑀺. 𑀅𑀲𑁆𑀲𑀸𑀢𑀺 𑀅𑀧𑁆𑀧𑀳𑀻𑀦𑀓𑀺𑀮𑁂𑀲𑀲𑁆𑀲. 𑀅𑀥𑀺𑀫𑀢𑁆𑀢𑀸𑀦𑀦𑁆𑀢𑀺 𑀇𑀝𑁆𑀞𑀸𑀦𑀁 𑀭𑀚𑀦𑀻𑀬𑀸𑀦𑀁, 𑀯𑀢𑁆𑀣𑀼𑀯𑀲𑁂𑀦 𑀧𑀭𑀺𑀢𑁆𑀢𑀓𑀫𑁆𑀧𑀺 𑀇𑀝𑁆𑀞𑀸𑀭𑀫𑁆𑀫𑀡𑀁 𑀅𑀥𑀺𑀫𑀢𑁆𑀢𑀫𑁂𑀯. 𑀢𑁂𑀦𑀸𑀳 ‘‘𑀦𑀔𑀧𑀺𑀝𑁆𑀞𑀺𑀧𑁆𑀧𑀫𑀸𑀡𑀫𑁆𑀧𑀻’’𑀢𑀺𑀆𑀤𑀺. 𑀤𑀳𑀭𑁄𑀢𑀺𑀆𑀤𑀻𑀦𑀺 𑀢𑀻𑀡𑀺𑀧𑀺 𑀧𑀤𑀸𑀦𑀺. 𑀆𑀪𑀺𑀦𑁆𑀤𑁂𑀬𑁆𑀬𑀸𑀢𑀺 𑀪𑀺𑀦𑁆𑀤𑁂𑀬𑁆𑀬. 𑀢𑀁 𑀉𑀪𑀬𑀦𑁆𑀢𑀺 𑀢𑀁 𑀘𑀓𑁆𑀔𑀼𑀭𑀽𑀧𑀦𑁆𑀢𑀺 𑀉𑀪𑀬𑀫𑁆𑀧𑀺 𑀆𑀬𑀢𑀦𑀁.

𑀔𑀻𑀭𑀭𑀼𑀓𑁆𑀔𑁄𑀧𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀉𑀤𑀸𑀬𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁪. 𑀇𑀢𑀺𑀧𑀻𑀢𑀺 𑀇𑀫𑀺𑀦𑀸𑀧𑀺 𑀓𑀸𑀭𑀡𑁂𑀦. 𑀅𑀦𑀺𑀘𑁆𑀘𑁂𑀦𑀸𑀢𑀺 𑀅𑀦𑀺𑀘𑁆𑀘𑀪𑀸𑀯𑁂𑀦 𑀅𑀦𑀢𑁆𑀢𑀮𑀓𑁆𑀔𑀡𑀁 𑀓𑀣𑀺𑀢𑀁. 𑀬𑀲𑁆𑀫𑀸 𑀳𑁂𑀢𑀼𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀲𑁆𑀲 𑀉𑀧𑁆𑀧𑀢𑁆𑀢𑀺 𑀲𑀢𑀺 𑀘 𑀉𑀧𑁆𑀧𑀸𑀤𑁂 𑀦𑀺𑀭𑁄𑀥𑁂𑀦 𑀪𑀯𑀺𑀢𑀩𑁆𑀩𑀁, 𑀉𑀧𑁆𑀧𑀸𑀤𑀯𑀬𑀯𑀦𑁆𑀢𑀢𑀸𑀬 𑀅𑀦𑀺𑀘𑁆𑀘𑀁 𑀯𑀺𑀜𑁆𑀜𑀸𑀡𑀁, 𑀬𑀤𑀺 𑀘 𑀅𑀢𑁆𑀢𑀸 𑀲𑀺𑀬𑀸 𑀧𑀘𑁆𑀘𑀬𑁂𑀳𑀺 𑀯𑀺𑀦𑀸 𑀲𑀺𑀚𑁆𑀛𑁂𑀬𑁆𑀬, 𑀦 𑀘 𑀢𑀣𑀸𑀲𑁆𑀲 𑀲𑀺𑀤𑁆𑀥𑀺, 𑀢𑀲𑁆𑀫𑀸 ‘‘𑀯𑀺𑀜𑁆𑀜𑀸𑀡𑀁 𑀅𑀦𑀢𑁆𑀢𑀸’’𑀢𑀺 𑀅𑀦𑀺𑀘𑁆𑀘𑀢𑀸𑀬 𑀅𑀦𑀢𑁆𑀢𑀢𑀸 𑀓𑀣𑀺𑀢𑀸.

𑀉𑀤𑀸𑀬𑀻𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁫. 𑀓𑀺𑀮𑁂𑀲𑀸𑀦𑀁 ¶ ¶ 𑀅𑀦𑀼 𑀅𑀦𑀼 𑀩𑁆𑀬𑀜𑁆𑀚𑀦𑀢𑁄 𑀧𑀭𑀺𑀩𑁆𑀬𑀢𑁆𑀢𑀺𑀬𑀸 𑀉𑀧𑁆𑀧𑀢𑁆𑀢𑀺𑀧𑀘𑁆𑀘𑀬𑀪𑀸𑀯𑀢𑁄 𑀅𑀦𑀼𑀩𑁆𑀬𑀜𑁆𑀚𑀦𑀁, 𑀳𑀢𑁆𑀣𑀧𑀸𑀤𑀸𑀤𑀺𑀅𑀯𑀬𑀯𑀸𑀢𑀺 𑀆𑀳 𑁋 ‘‘𑀳𑀢𑁆𑀣𑀸 𑀲𑁄𑀪𑀦𑀸’’𑀢𑀺𑀆𑀤𑀺. 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄𑀢𑀺 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀬𑀸 𑀦𑀺𑀫𑀺𑀢𑁆𑀢𑀪𑀽𑀢𑁄 𑀕𑀸𑀳𑁄. 𑀲𑀁𑀲𑀦𑁆𑀤𑁂𑀢𑁆𑀯𑀸 𑀕𑀳𑀡𑀦𑁆𑀢𑀺 𑀅𑀯𑀬𑀯𑁂 𑀲𑀫𑁄𑀥𑀸𑀦𑁂𑀢𑁆𑀯𑀸 ‘‘𑀇𑀢𑁆𑀣𑀺𑀧𑀼𑀭𑀺𑀲𑁄’’𑀢𑀺𑀆𑀤𑀺𑀦𑀸 𑀏𑀓𑀚𑁆𑀛𑀁 𑀕𑀳𑀡𑀁. 𑀯𑀺𑀪𑀢𑁆𑀢𑀺𑀕𑀳𑀡𑀦𑁆𑀢𑀺 𑀯𑀺𑀪𑀸𑀕𑁂𑀦 𑀅𑀦𑀯𑀲𑁂𑀲𑀕𑁆𑀕𑀳𑀡𑀁. 𑀓𑀼𑀫𑁆𑀪𑀻𑀮𑀲𑀤𑀺𑀲𑁄𑀢𑀺 𑀓𑀼𑀫𑁆𑀪𑀻𑀮𑀕𑀸𑀳𑀲𑀤𑀺𑀲𑁄. 𑀢𑁂𑀦𑀸𑀳 𑁋 ‘‘𑀲𑀩𑁆𑀩𑀫𑁂𑀯 𑀕𑀡𑁆𑀳𑀸𑀢𑀻’’𑀢𑀺 𑀳𑀢𑁆𑀣𑀧𑀸𑀤𑀸𑀤𑀻𑀲𑀼 𑀢𑀁 𑀢𑀁 𑀓𑁄𑀝𑁆𑀞𑀸𑀲𑀁 𑀯𑀺𑀪𑀚𑀺𑀢𑁆𑀯𑀸 𑀕𑀳𑀡𑀁 𑀭𑀢𑁆𑀢𑀧𑀸𑀲𑀤𑀺𑀲𑁄 𑀚𑀮𑀽𑀓𑀕𑀸𑀳𑀲𑀤𑀺𑀲𑁄. 𑀏𑀓𑀚𑀯𑀦𑀯𑀸𑀭𑁂𑀧𑀺 𑀮𑀩𑁆𑀪𑀦𑁆𑀢𑀻𑀢𑀺 𑀇𑀤𑀁 𑀘𑀓𑁆𑀔𑀼𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀉𑀧𑁆𑀧𑀦𑁆𑀦𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀦𑀺𑀫𑀺𑀢𑁆𑀢𑀲𑁆𑀲𑀸𑀤𑁂𑀦 𑀕𑀦𑁆𑀣𑀺𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑁂 𑀦𑀺𑀫𑀺𑀢𑁆𑀢𑁂 𑀅𑀲𑁆𑀲𑀸𑀤𑀕𑀸𑀳𑁂𑀦 𑀕𑀦𑁆𑀣𑀺𑀢𑀁 𑀲𑀫𑁆𑀩𑀤𑁆𑀥𑀁. 𑀪𑀯𑀗𑁆𑀕𑁂𑀦𑁂𑀯𑀸𑀢𑀺 𑀫𑀽𑀮𑀪𑀯𑀗𑁆𑀕𑁂𑀦𑁂𑀯. 𑀓𑀺𑀮𑁂𑀲𑀪𑀬𑀁 𑀤𑀲𑁆𑀲𑁂𑀦𑁆𑀢𑁄𑀢𑀺 𑀢𑀣𑀸 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀬𑀸 𑀲𑀢𑀺 𑀅𑀓𑀼𑀲𑀮𑀘𑀺𑀢𑁆𑀢𑁂𑀦 𑀅𑀦𑁆𑀢𑀭𑀺𑀢𑀁 𑀘𑁂 𑀫𑀭𑀡𑀘𑀺𑀢𑁆𑀢𑀁 𑀪𑀯𑁂𑀬𑁆𑀬, 𑀏𑀓𑀦𑁆𑀢𑀢𑁄 𑀦𑀺𑀭𑀬𑁂 𑀯𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀯𑀸 𑀉𑀧𑁆𑀧𑀢𑁆𑀢𑀺 𑀲𑀺𑀬𑀸𑀢𑀺 𑀓𑀺𑀮𑁂𑀲𑀸𑀦𑀁 𑀪𑀸𑀬𑀺𑀢𑀩𑁆𑀩𑀁 𑀤𑀲𑁆𑀲𑁂𑀦𑁆𑀢𑁄. ‘‘𑀲𑀫𑀬𑀯𑀲𑁂𑀦 𑀯𑀸 𑀏𑀯𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀘𑀓𑁆𑀔𑀼𑀤𑁆𑀯𑀸𑀭𑀲𑁆𑀫𑀺𑀜𑁆𑀳𑀻’’𑀢𑀺𑀆𑀤𑀺𑀫𑀸𑀳. 𑀭𑀢𑁆𑀢𑀘𑀺𑀢𑁆𑀢𑀁 𑀯𑀸𑀢𑀺 𑀭𑀸𑀕𑀯𑀲𑁂𑀦 𑀭𑀢𑁆𑀢𑀘𑀺𑀢𑁆𑀢𑀁 𑀯𑀸. 𑀤𑀼𑀝𑁆𑀞𑀘𑀺𑀢𑁆𑀢𑁂𑀦 𑀓𑀣𑀁 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀦𑁆𑀢𑀺? 𑀤𑁄𑀫𑀦𑀲𑁆𑀲𑀯𑁂𑀤𑀦𑀼𑀧𑁆𑀧𑀢𑁆𑀢𑀺 𑀏𑀯 𑀢𑀲𑁆𑀲 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀁 𑀤𑀝𑁆𑀞𑀩𑁆𑀩𑀁. 𑀇𑀫𑀲𑁆𑀲 𑀲𑀫𑀬𑀲𑁆𑀲𑀸𑀢𑀺 𑀫𑀭𑀡𑀲𑀫𑀬𑀲𑁆𑀲.

𑀉𑀪𑀺𑀦𑁆𑀦𑀁 𑀦𑀸𑀲𑀘𑁆𑀙𑀺𑀤𑁆𑀤𑀸𑀦𑀁 𑀫𑀚𑁆𑀛𑁂 𑀞𑀺𑀢-𑀅𑀝𑁆𑀞𑀺𑀢𑀼𑀤𑀦𑀁 𑀲𑀳 𑀔𑀼𑀭𑀝𑁆𑀞𑁂𑀦 𑀙𑀺𑀦𑁆𑀤𑀦𑀁. 𑀤𑀡𑁆𑀟𑀓𑀯𑀸𑀲𑀻𑀢𑀺 𑀤𑀻𑀖𑀤𑀡𑁆𑀟𑀓𑀸 𑀫𑀳𑀸𑀯𑀸𑀲𑀺. 𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀤𑁆𑀤𑁄𑀓𑁆𑀓𑀫𑀦𑀦𑁆𑀢𑀺 𑀇𑀫𑀺𑀦𑀸 𑀧𑀘𑀮𑀸𑀬𑀺𑀓𑀦𑀺𑀤𑁆𑀤𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀢𑀢𑁆𑀣 𑀳𑀺 𑀓𑀤𑀸𑀘𑀺 𑀅𑀦𑁆𑀢𑀭𑀸 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸𑀦𑀁 𑀲𑀮𑁆𑀮𑀓𑀸𑀦𑀁 𑀅𑀯𑀲𑀭𑁄 𑀲𑀺𑀬𑀸, 𑀦𑀢𑁆𑀣𑁂𑀯 𑀦𑀺𑀧𑀚𑁆𑀚𑀺𑀢𑁆𑀯𑀸 𑀫𑀳𑀸𑀦𑀺𑀤𑁆𑀤𑀁 𑀑𑀓𑁆𑀓𑀦𑁆𑀢𑀓𑀸𑀮𑁂. 𑀯𑀺𑀢𑀓𑁆𑀓𑀸𑀦𑀦𑁆𑀢𑀺 𑀫𑀺𑀘𑁆𑀙𑀸𑀯𑀺𑀢𑀓𑁆𑀓𑀸𑀦𑀁.

𑀆𑀤𑀺𑀢𑁆𑀢𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯-𑁧𑁦. 𑀧𑀞𑀫𑀳𑀢𑁆𑀣𑀧𑀸𑀤𑁄𑀧𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁩𑁬-𑁨𑁩𑁭. 𑀦𑀯𑀫𑀁 ¶ ‘‘𑀧𑀜𑁆𑀜𑀸𑀬𑀢𑀻’’𑀢𑀺 𑀯𑀼𑀘𑁆𑀘𑀫𑀸𑀦𑁂 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀤𑀲𑀫𑁂 𑀦 𑀳𑁄𑀢𑀻𑀢𑀺 𑀯𑀼𑀘𑁆𑀘𑀫𑀸𑀦𑁂’’𑀢𑀺𑀆𑀤𑀺. 𑀏𑀢𑁆𑀢𑀓𑀫𑁂𑀯 𑀳𑀺 𑀤𑁆𑀯𑀺𑀦𑁆𑀦𑀁 𑀲𑀼𑀢𑁆𑀢𑀸𑀦𑀁 𑀯𑀺𑀲𑁂𑀲𑁄𑀢𑀺.

𑀧𑀞𑀫𑀳𑀢𑁆𑀣𑀧𑀸𑀤𑁄𑀧𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀼𑀤𑁆𑀤𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁯. 𑀆𑀲𑀻𑀯𑀺𑀲𑀯𑀕𑁆𑀕𑁄

𑁧. 𑀆𑀲𑀻𑀯𑀺𑀲𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁮. 𑀬𑁂 ¶ 𑀪𑀺𑀓𑁆𑀔𑀽 𑀢𑀤𑀸 𑀪𑀕𑀯𑀦𑁆𑀢𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸, 𑀢𑁂𑀲𑀼 𑀓𑁂𑀘𑀺 𑀏𑀓𑀯𑀺𑀳𑀸𑀭𑀺𑀦𑁄, 𑀓𑁂𑀘𑀺 𑀅𑀢𑁆𑀢𑀤𑀼𑀢𑀺𑀬𑀸, 𑀓𑁂𑀘𑀺 𑀅𑀢𑁆𑀢𑀢𑀢𑀺𑀬𑀸, 𑀓𑁂𑀘𑀺 𑀅𑀢𑁆𑀢𑀘𑀢𑀼𑀢𑁆𑀣𑀸, 𑀓𑁂𑀘𑀺 𑀅𑀢𑁆𑀢𑀧𑀜𑁆𑀘𑀫𑀸 𑀳𑀼𑀢𑁆𑀯𑀸 𑀅𑀭𑀜𑁆𑀜𑀸𑀬𑀢𑀦𑁂𑀲𑀼 𑀯𑀺𑀳𑀭𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑁋 ‘‘𑀏𑀓𑀘𑀸𑀭𑀺𑀓…𑀧𑁂… 𑀧𑀜𑁆𑀘𑀘𑀸𑀭𑀺𑀓𑁂’’𑀢𑀺. 𑀲𑀫𑀸𑀦𑀚𑁆𑀛𑀸𑀲𑀬𑀢𑀸 𑀲𑀪𑀸𑀕𑀯𑀼𑀢𑁆𑀢𑀺𑀦𑁄. 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑀼𑀜𑁆𑀚𑀦𑀲𑁆𑀲 𑀓𑀸𑀭𑀓𑁂. 𑀢𑀢𑁄 𑀏𑀯 𑀢𑀢𑁆𑀣 𑀬𑀼𑀢𑁆𑀢𑀧𑀬𑀼𑀢𑁆𑀢𑁂. 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁂𑀦 𑀓𑀸𑀭𑀡𑀪𑀽𑀢𑁂𑀦. 𑀧𑀘𑁆𑀘𑀬𑀪𑀽𑀢𑀦𑁆𑀢𑀺 𑀅𑀧𑀲𑁆𑀲𑀬𑀪𑀽𑀢𑀁. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂’’𑀢𑀺 𑀆𑀭𑀪𑀺𑀢𑁆𑀯𑀸 𑀬𑀸𑀯 ‘‘𑀢𑀺𑀡𑁆𑀡𑁄 𑀧𑀸𑀭𑀗𑁆𑀕𑀢𑁄 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺 𑀅𑀬𑀁 𑀫𑀸𑀢𑀺𑀓𑀸𑀦𑀺𑀓𑁆𑀔𑁂𑀧𑁄. 𑀢𑁂𑀲𑀁 𑀫𑀸𑀢𑀺𑀓𑀸𑀬 𑀯𑀺𑀢𑁆𑀣𑀸𑀭𑀪𑀸𑀚𑀦𑀁. 𑀯𑀸𑀲𑀦𑀸 𑀪𑀯𑀺𑀲𑁆𑀲𑀢𑀻𑀢𑀺 𑀯𑀸𑀲𑀦𑀸𑀯𑀳𑀁 𑀪𑀯𑀺𑀲𑁆𑀲𑀢𑀺. 𑀲𑀺𑀦𑁂𑀭𑀼𑀁 𑀉𑀓𑁆𑀔𑀺𑀧𑀦𑁆𑀢𑁄 𑀯𑀺𑀬𑀸𑀢𑀺𑀆𑀤𑀺 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀲𑀼𑀤𑀼𑀓𑁆𑀓𑀭𑀪𑀸𑀯𑀤𑀲𑁆𑀲𑀦𑀁.

𑀫𑀜𑁆𑀘𑀝𑁆𑀞𑁂𑀲𑀼 𑀫𑀜𑁆𑀘𑀲𑀫𑀜𑁆𑀜𑀸 𑀯𑀺𑀬 𑀫𑀼𑀔𑀝𑁆𑀞𑀁 𑀯𑀺𑀲𑀁 ‘‘𑀫𑀼𑀔’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀲𑀼𑀓𑁆𑀔𑀓𑀝𑁆𑀞𑀲𑀤𑀺𑀲𑀪𑀸𑀯𑀸𑀧𑀸𑀤𑀦𑀢𑁄 ‘‘𑀓𑀝𑁆𑀞’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀓𑀝𑁆𑀞𑀁 𑀫𑀼𑀔𑀁 𑀏𑀢𑀲𑁆𑀲𑀸𑀢𑀺 𑀓𑀝𑁆𑀞𑀫𑀼𑀔𑁄, 𑀤𑀁𑀲𑀦𑀸𑀤𑀺𑀦𑀸 𑀓𑀝𑁆𑀞𑀲𑀤𑀺𑀲𑀪𑀸𑀯𑀓𑀭𑁄 𑀲𑀧𑁆𑀧𑁄. 𑀅𑀣 𑀯𑀸 𑀓𑀝𑁆𑀞𑀲𑀤𑀺𑀲𑀪𑀸𑀯𑀸𑀧𑀸𑀤𑀦𑀢𑁄 𑀓𑀝𑁆𑀞𑀁 𑀯𑀺𑀲𑀁 𑀯𑀸 𑀫𑀼𑀔𑁂 𑀏𑀢𑀲𑁆𑀲𑀸𑀢𑀺 𑀓𑀝𑁆𑀞𑀫𑀼𑀔𑁄. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀧𑀤𑁂𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑁂 𑀘𑀢𑁆𑀢𑀸𑀭𑁄𑀢𑀺 𑀇𑀫𑁂 𑀯𑀺𑀲𑀓𑀺𑀘𑁆𑀘𑀪𑁂𑀤𑁂𑀦 𑀘𑀢𑁆𑀢𑀸𑀭𑁄. 𑀇𑀤𑀸𑀦𑀺 𑀢𑀁 𑀦𑁂𑀲𑀁 𑀯𑀺𑀲𑀓𑀺𑀘𑁆𑀘𑀪𑁂𑀤𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀲𑀽𑀮𑀲𑀫𑀧𑁆𑀧𑀺𑀢𑀁 𑀯𑀺𑀬𑀸𑀢𑀺 𑀅𑀩𑁆𑀪𑀦𑁆𑀢𑀭𑁂 𑀅𑀬𑀲𑀽𑀮𑀁 𑀅𑀦𑀼𑀧𑁆𑀧𑀯𑁂𑀲𑀺𑀢𑀁 𑀯𑀺𑀬. 𑀧𑀓𑁆𑀓𑀧𑀽𑀢𑀺𑀧𑀦𑀲𑀁 𑀯𑀺𑀬𑀸𑀢𑀺 𑀧𑀘𑁆𑀘𑀺𑀢𑁆𑀯𑀸 𑀓𑀸𑀮𑀸𑀢𑀺𑀓𑁆𑀓𑀫𑁂 𑀓𑀼𑀣𑀺𑀢𑀧𑀦𑀲𑀨𑀮𑀁 ¶ 𑀯𑀺𑀬. 𑀘𑀗𑁆𑀕𑀯𑀸𑀭𑁂𑀢𑀺 𑀭𑀚𑀓𑀸𑀦𑀁 𑀔𑀸𑀭𑀧𑀭𑀺𑀲𑁆𑀲𑀸𑀯𑀦𑁂 𑀲𑀼𑀭𑀸𑀧𑀭𑀺𑀲𑁆𑀲𑀸𑀯𑀦𑁂 𑀯𑀸. 𑀅𑀦𑀯𑀲𑁂𑀲𑀁 𑀙𑀺𑀚𑁆𑀚𑀦𑁂𑀦 𑀅𑀲𑀦𑀺𑀧𑀸𑀢𑀝𑁆𑀞𑀸𑀦𑀁 𑀯𑀺𑀬. 𑀫𑀳𑀸𑀦𑀺𑀔𑀸𑀤𑀦𑁂𑀦𑀸𑀢𑀺 𑀫𑀳𑀦𑁆𑀢𑁂𑀦 𑀦𑀺𑀔𑀸𑀤𑀦𑁂𑀦.

𑀯𑀺𑀲𑀯𑁂𑀕𑀯𑀺𑀓𑀸𑀭𑁂𑀦𑀸𑀢𑀺 𑀯𑀺𑀲𑀯𑁂𑀕𑀕𑀢𑁂𑀦 𑀯𑀺𑀓𑀸𑀭𑁂𑀦. 𑀯𑀸𑀢𑁂𑀦𑀸𑀢𑀺 𑀢𑀲𑁆𑀲 𑀲𑀧𑁆𑀧𑀲𑁆𑀲 𑀲𑀭𑀻𑀭𑀁 𑀨𑀼𑀲𑀺𑀢𑁆𑀯𑀸 𑀉𑀕𑁆𑀕𑀢𑀯𑀸𑀢𑁂𑀦. 𑀦𑀸𑀲𑀯𑀸𑀢𑁂 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀧𑀼𑀕𑁆𑀕𑀮𑀧𑀡𑁆𑀡𑀢𑁆𑀢𑀺𑀯𑀲𑁂𑀦𑀸𑀢𑀺 𑀢𑁂𑀲𑀁𑀬𑁂𑀯 𑀲𑁄𑀴𑀲𑀦𑁆𑀦𑀁 𑀲𑀧𑁆𑀧𑀸𑀦𑀁 𑀆𑀕𑀢𑀯𑀺𑀲𑁄𑀢𑀺𑀆𑀤𑀺𑀧𑀼𑀕𑁆𑀕𑀮𑀦𑀸𑀫𑀲𑁆𑀲 𑀯𑀲𑁂𑀦 𑀘𑀢𑀼𑀲𑀝𑁆𑀞𑀺 𑀳𑁄𑀦𑁆𑀢𑀺 𑀧𑀘𑁆𑀘𑁂𑀓𑀁 𑀘𑀢𑀼𑀩𑁆𑀩𑀺𑀥𑀪𑀸𑀯𑀢𑁄. 𑀆𑀕𑀢𑀯𑀺𑀲𑁄𑀢𑀺 𑀆𑀕𑀘𑁆𑀙𑀯𑀺𑀲𑁄, 𑀲𑀻𑀖𑀢𑀭𑀁 𑀅𑀪𑀺𑀭𑀼𑀳𑀦𑀯𑀺𑀲𑁄𑀢𑀺 𑀅𑀢𑁆𑀣𑁄. 𑀖𑁄𑀭𑀯𑀺𑀲𑁄𑀢𑀺 𑀓𑀓𑁆𑀔𑀴𑀯𑀺𑀲𑁄, 𑀤𑀼𑀢𑁆𑀢𑀺𑀓𑀺𑀘𑁆𑀙𑀯𑀺𑀲𑁄. 𑀅𑀬𑀁 𑀲𑀻𑀢𑀉𑀤𑀓𑀁 𑀯𑀺𑀬 𑀳𑁄𑀢𑀺 𑀕𑀸𑀴𑁆𑀳𑀤𑀼𑀩𑁆𑀩𑀺𑀦𑀺𑀫𑁆𑀫𑁄𑀘𑀬𑀪𑀸𑀯𑁂𑀦. 𑀉𑀤𑀓𑀲𑀧𑁆𑀧𑁄 𑀳𑀺 𑀖𑁄𑀭𑀯𑀺𑀲𑁄 𑀳𑁄𑀢𑀺 𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀉𑀤𑀓𑀲𑀧𑁆𑀧𑀸𑀤𑀻𑀦𑀁 𑀯𑀺𑀲𑀁 𑀯𑀺𑀬𑀸’’𑀢𑀺. 𑀧𑀜𑁆𑀜𑀸𑀬𑀢𑀻𑀢𑀺 𑀕𑀡𑁆𑀟𑀧𑀺𑀴𑀓𑀸𑀤𑀺𑀯𑀲𑁂𑀦 𑀧𑀜𑁆𑀜𑀸𑀬𑀢𑀺. 𑀅𑀦𑁂𑀴𑀓𑀲𑀧𑁆𑀧𑁄 𑀦𑀸𑀫 𑀫𑀳𑀸𑀆𑀲𑀻𑀯𑀺𑀲𑁄. 𑀦𑀻𑀮𑀲𑀧𑁆𑀧𑁄 𑀦𑀸𑀫 𑀲𑀸𑀔𑀯𑀡𑁆𑀡𑁄 ¶ 𑀭𑀼𑀓𑁆𑀔𑀕𑁆𑀕𑀸𑀤𑀻𑀲𑀼 𑀯𑀺𑀘𑀭𑀡𑀓𑀲𑀧𑁆𑀧𑁄. 𑀇𑀫𑀺𑀦𑀸 𑀉𑀧𑀸𑀬𑁂𑀦𑀸𑀢𑀺 𑀬𑁄𑀬𑀁 𑀓𑀝𑁆𑀞𑀫𑀼𑀔𑁂𑀲𑀼 𑀤𑀝𑁆𑀞𑀯𑀺𑀲𑀸𑀦𑀁𑀬𑁂𑀯 ‘‘𑀆𑀕𑀢𑀯𑀺𑀲𑁄 𑀦𑁄 𑀖𑁄𑀭𑀯𑀺𑀲𑁄’’𑀢𑀺𑀆𑀤𑀺𑀦𑀸 𑀘𑀢𑀼𑀩𑁆𑀩𑀺𑀥𑀪𑀸𑀯𑁄 𑀯𑀼𑀢𑁆𑀢𑁄, 𑀇𑀫𑀺𑀦𑀸 𑀉𑀧𑀸𑀬𑁂𑀦. 𑀓𑀝𑁆𑀞𑀫𑀼𑀔𑁂 𑀤𑀝𑁆𑀞𑀯𑀺𑀲𑀸𑀤𑀬𑁄𑀢𑀺 𑀓𑀝𑁆𑀞𑀫𑀼𑀔𑁂𑀲𑀼 𑀤𑀝𑁆𑀞𑀯𑀺𑀲𑁄, 𑀨𑀼𑀝𑁆𑀞𑀯𑀺𑀲𑁄, 𑀯𑀸𑀢𑀯𑀺𑀪𑁄𑀢𑀺 𑀢𑀬𑁄, 𑀧𑀽𑀢𑀺𑀫𑀼𑀔𑀸𑀤𑀻𑀲𑀼 𑀘 𑀤𑀝𑁆𑀞𑀯𑀺𑀲𑀸𑀤𑀬𑁄 𑀘𑀢𑁆𑀢𑀸𑀭𑁄 𑀘𑀢𑁆𑀢𑀸𑀭𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀓𑁂𑀓𑀦𑁆𑀢𑀺 𑀘𑀢𑀼𑀲𑀝𑁆𑀞𑀺𑀬𑁄 𑀏𑀓𑁂𑀓𑀁. 𑀘𑀢𑀼𑀥𑀸𑀢𑀺 𑀅𑀡𑁆𑀟𑀚𑀸𑀤𑀺𑀯𑀺𑀪𑀸𑀕𑁂𑀦 𑀘𑀢𑀼𑀥𑀸 𑀯𑀺𑀪𑀚𑀺𑀢𑁆𑀯𑀸. 𑀙𑀧𑀡𑁆𑀡𑀸𑀲𑀸𑀦𑀻𑀢𑀺 𑀙𑀧𑀡𑁆𑀡𑀸𑀲𑀸𑀥𑀺𑀓𑀸𑀦𑀺. 𑀕𑀢𑀫𑀕𑁆𑀕𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑀗𑁆𑀔𑁆𑀬𑀸𑀕𑀢𑀫𑀕𑁆𑀕𑀲𑁆𑀲 𑀧𑀝𑀺𑀮𑁄𑀫𑀢𑁄 𑀲𑀁𑀔𑀺𑀧𑁆𑀧𑀫𑀸𑀦𑀸 𑀅𑀦𑀼𑀓𑁆𑀓𑀫𑁂𑀦 𑀘𑀢𑁆𑀢𑀸𑀭𑁄𑀯 𑀳𑁄𑀦𑁆𑀢𑀺. 𑀓𑀼𑀮𑀯𑀲𑁂𑀦𑀸𑀢𑀺 𑀓𑀝𑁆𑀞𑀫𑀼𑀔𑀸𑀤𑀺𑀚𑀸𑀢𑀺𑀯𑀲𑁂𑀦.

𑀲𑀓𑀮𑀓𑀸𑀬𑁂 𑀆𑀲𑀺𑀜𑁆𑀘𑀺𑀢𑁆𑀯𑀸 𑀯𑀺𑀬 𑀞𑀧𑀺𑀢𑀯𑀺𑀲𑀸𑀢𑀺 𑀳𑀺 𑀢𑁂𑀲𑀁 𑀨𑀼𑀝𑁆𑀞𑀯𑀺𑀲𑀢𑀸, 𑀯𑀸𑀢𑀯𑀺𑀲𑀢𑀸 𑀯𑀼𑀘𑁆𑀘𑀢𑀺. 𑀏𑀯𑀦𑁆𑀢𑀺 ‘‘𑀆𑀲𑀺𑀢𑁆𑀢𑀯𑀺𑀲𑀸’’𑀢𑀺𑀆𑀤𑀺𑀦𑀸. 𑀏𑀢𑁆𑀣𑀸𑀢𑀺 𑀆𑀲𑀻𑀯𑀺𑀲𑀲𑀤𑁆𑀤𑁂 𑀯𑀘𑀦𑀢𑁆𑀣𑁄 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀉𑀕𑁆𑀕𑀢𑀢𑁂𑀚𑀸𑀢𑀺 𑀉𑀤𑀕𑁆𑀕𑀢𑁂𑀚𑀸, 𑀅𑀢𑁆𑀢𑀦𑁄 𑀯𑀺𑀲𑀢𑁂𑀚𑁂𑀦 𑀦𑁂𑀲𑀁 𑀓𑀼𑀭𑀽𑀭𑀤𑀩𑁆𑀩𑀢𑀸 𑀯𑀸. 𑀤𑀼𑀦𑁆𑀦𑀺𑀫𑁆𑀫𑀤𑁆𑀤𑀦𑀯𑀺𑀲𑀸𑀢𑀺 𑀫𑀦𑁆𑀢𑀸𑀕𑀤𑁂𑀳𑀺 𑀅𑀦𑀺𑀫𑁆𑀫𑀤𑁆𑀤𑀦𑀻𑀬𑀯𑀺𑀲𑀸. 𑀘𑀢𑁆𑀢𑀸𑀭𑁄 𑀆𑀲𑀻𑀯𑀺𑀲𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄. 𑀢𑁂𑀦𑁂𑀢𑁆𑀣 𑀅𑀯𑀲𑁂𑀲𑀧𑀸𑀴𑀺𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀆𑀲𑀻𑀯𑀺𑀲𑁂𑀲𑀽𑀢𑀺 ¶ 𑀇𑀫𑁂 𑀆𑀲𑀻𑀯𑀺𑀲𑀸 𑀤𑀝𑁆𑀞𑀯𑀺𑀲𑀸 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀭𑀻𑀭𑀝𑁆𑀞𑀓𑁂𑀲𑀼𑀬𑁂𑀯𑀸𑀢𑀺 𑀢𑁂𑀦 𑀧𑀼𑀭𑀺𑀲𑁂𑀦 𑀢𑁂𑀲𑀁 𑀓𑀲𑁆𑀲𑀘𑀺 𑀅𑀦𑀺𑀝𑁆𑀞𑀲𑁆𑀲 𑀅𑀓𑀢𑀢𑁆𑀢𑀸 𑀆𑀬𑀼𑀲𑁂𑀲𑀲𑁆𑀲 𑀘 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀦𑀁 𑀦 𑀤𑀁𑀲𑀺𑀁𑀲𑀽𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀼𑀘𑁆𑀙𑀺 𑀬𑀣𑀸𑀪𑀽𑀢𑀁 𑀧𑀯𑁂𑀤𑁂𑀢𑀼𑀓𑀸𑀫𑁄. 𑀤𑀼𑀭𑀼𑀧𑀝𑁆𑀞𑀸𑀳𑀸𑀢𑀺 𑀤𑀼𑀭𑀼𑀧𑀝𑁆𑀞𑀸𑀦𑀸. 𑀲𑁄𑀢𑁆𑀣𑀺𑀫𑀕𑁆𑀕𑁄𑀢𑀺 𑀲𑁄𑀢𑁆𑀣𑀺𑀪𑀸𑀯𑀲𑁆𑀲 𑀉𑀧𑀸𑀬𑁄.

𑀅𑀦𑁆𑀢𑀭𑀘𑀭𑁄𑀢𑀺 𑀅𑀦𑁆𑀢𑀭𑀁 𑀘𑀭𑁄 𑀲𑀼𑀔𑀲𑀢𑁆𑀢𑀼 𑀯𑀺𑀲𑁆𑀲𑀸𑀲𑀖𑀸𑀢𑀻. 𑀢𑁂𑀦𑀸𑀳 ‘‘𑀯𑀥𑀓𑁄’’𑀢𑀺. 𑀇𑀤𑀸𑀦𑀺 𑀢𑀸𑀲𑀁 𑀧𑁂𑀲𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀞𑀫’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀪𑀺𑀫𑀼𑀔𑀕𑀢𑀁 𑀯𑀺𑀬 𑀅𑀪𑀺𑀫𑀼𑀔𑀕𑀢𑀁. 𑀈𑀤𑀺𑀲𑀻𑀧𑀺 𑀳𑀺 𑀯𑀘𑁄𑀬𑀼𑀢𑁆𑀢𑀺 𑀮𑁄𑀓𑁂 𑀦𑀺𑀭𑀽𑀧𑀻𑀬𑀢𑀺 𑀲𑀦𑁆𑀢𑀺𑀬𑀁 𑀧𑀼𑀭𑀺𑀲𑀁 𑀞𑀧𑁂𑀢𑀻𑀢𑀺 𑀯𑀺𑀬. 𑀢𑀲𑁆𑀫𑀸 𑀅𑀪𑀺𑀫𑀼𑀔𑀕𑀢𑀦𑁆𑀢𑀺 𑀅𑀪𑀺𑀫𑀼𑀔𑀁 𑀢𑁂𑀦 𑀲𑀫𑁆𑀧𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀗𑁆𑀓𑀲𑀡𑁆𑀞𑀸𑀦𑀁 𑀨𑀮𑀓𑀁 𑀭𑀼𑀓𑁆𑀔𑀫𑀽𑀮𑁂 𑀆𑀕𑀢𑀸𑀕𑀢𑀸𑀦𑀁 𑀦𑀺𑀲𑀻𑀤𑀦𑀢𑁆𑀣𑀸𑀬 𑀅𑀢𑁆𑀣𑀢𑀁.

𑀅𑀭𑀺𑀢𑁆𑀢𑀳𑀢𑁆𑀣𑁄 𑀧𑀼𑀭𑀺𑀲𑁄 𑀲𑀦𑁆𑀢𑀸𑀭𑁂𑀢𑀺 𑀏𑀢𑀸𑀬𑀸𑀢𑀺 𑀲𑀦𑁆𑀢𑀸𑀭𑀡𑀻. 𑀑𑀭𑀺𑀫𑀢𑀻𑀭𑀢𑁄 𑀉𑀢𑁆𑀢𑀭𑀡𑀸𑀬 𑀲𑁂𑀢𑀼 𑀉𑀢𑁆𑀢𑀭𑀲𑁂𑀢𑀼. 𑀏𑀓𑁂𑀦 𑀤𑁆𑀯𑀻𑀳𑀺 𑀯𑀸 𑀕𑀦𑁆𑀢𑀩𑁆𑀩𑁄 𑀭𑀼𑀓𑁆𑀔𑀫𑀬𑁄 𑀲𑁂𑀢𑀼 𑀭𑀼𑀓𑁆𑀔𑀲𑁂𑀢𑀼. 𑀚𑀗𑁆𑀖𑀲𑀢𑁆𑀣𑁂𑀦 𑀕𑀫𑀦𑀬𑁄𑀕𑁆𑀕𑁄 𑀲𑁂𑀢𑀼 𑀚𑀗𑁆𑀖𑀲𑁂𑀢𑀼. 𑀲𑀓𑀝𑁂𑀦 𑀕𑀦𑁆𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑁄 𑀲𑀓𑀝𑀲𑁂𑀢𑀼. 𑀦 𑀔𑁄 𑀏𑀲 𑀩𑁆𑀭𑀸𑀳𑁆𑀫𑀡𑁄 𑀧𑀭𑀫𑀢𑁆𑀣𑀢𑁄. 𑀢𑀤𑀢𑁆𑀣𑁄 𑀧𑀦 𑀏𑀓𑀤𑁂𑀲𑁂𑀦 𑀲𑀫𑁆𑀪𑀯𑀢𑀻𑀢𑀺 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀢𑁆𑀢𑀓𑀸𑀦𑀁 𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀩𑀸𑀳𑀺𑀢𑀢𑁆𑀢𑀸’’𑀢𑀺 𑀆𑀳. 𑀤𑁂𑀲𑀦𑀦𑁆𑀢𑀺 ¶ 𑀉𑀤𑁆𑀤𑁂𑀲𑀤𑁂𑀲𑀦𑀁. 𑀯𑀺𑀦𑀺𑀯𑀢𑁆𑀢𑁂𑀦𑁆𑀢𑁄𑀢𑀺 𑀧𑀝𑀺𑀲𑀁𑀳𑀭𑀦𑁆𑀢𑁄. 𑀦 𑀮𑀤𑁆𑀥𑁄 𑀯𑀢𑀸𑀲𑀻𑀢𑀺 𑀦 𑀮𑀤𑁆𑀥𑁄 𑀯𑀢 𑀆𑀲𑀺.

𑀭𑀸𑀚𑀸 𑀯𑀺𑀬 𑀓𑀫𑁆𑀫𑀁 𑀲𑀢𑁆𑀢𑁂𑀲𑀼 𑀇𑀲𑁆𑀲𑀭𑀺𑀬𑀲𑁆𑀲 𑀯𑀢𑁆𑀢𑀸𑀧𑀦𑀢𑁄. 𑀭𑀸𑀚𑀸…𑀧𑁂… 𑀧𑀼𑀣𑀼𑀚𑁆𑀚𑀦𑁄 𑀯𑀝𑁆𑀝𑀤𑀼𑀓𑁆𑀔𑀲𑀗𑁆𑀔𑀸𑀢𑀸𑀧𑀭𑀸𑀥𑀢𑀸𑀬. 𑀜𑀸𑀡𑀧𑀮𑀸𑀬𑀦𑁂𑀦𑀸𑀢𑀺 𑀫𑀳𑀸𑀪𑀽𑀢𑁂𑀳𑀺 𑀦𑀺𑀩𑁆𑀩𑀺𑀦𑁆𑀤𑀺𑀢𑁆𑀯𑀸 𑀯𑀺𑀭𑀚𑁆𑀚𑀺𑀢𑁆𑀯𑀸 𑀯𑀺𑀫𑀼𑀘𑁆𑀘𑀺𑀢𑀼𑀓𑀸𑀫𑀢𑀸𑀯𑀲𑁂𑀦 𑀉𑀧𑁆𑀧𑀦𑁆𑀦𑀜𑀸𑀡𑀧𑀮𑀸𑀬𑀦𑁂 𑀫𑀕𑁆𑀕𑀸𑀥𑀺𑀕𑀫𑀲𑀺𑀤𑁆𑀥𑁂𑀦𑁂𑀯 𑀜𑀸𑀡𑀧𑀮𑀸𑀬𑀦𑁂𑀦. 𑀏𑀯𑀜𑁆𑀳𑁂𑀢𑁆𑀣 𑀉𑀧𑀫𑀸𑀲𑀁𑀲𑀦𑁆𑀤𑀦𑀁 𑀫𑀢𑁆𑀣𑀓𑀁 𑀧𑀸𑀧𑀺𑀢𑀫𑁂𑀯 𑀳𑁄𑀢𑀺.

𑀬𑀣𑁂𑀯 𑀳𑀻𑀢𑀺𑀆𑀤𑀺𑀦𑀸 𑀏𑀓𑀤𑁂𑀲𑀦𑀸𑀲𑀫𑀼𑀤𑀸𑀬𑀲𑁆𑀲 𑀦𑀺𑀤𑀲𑁆𑀲𑀦𑀁 𑀆𑀭𑀤𑁆𑀥𑀁. 𑀬𑀣𑀸𑀯𑀼𑀢𑁆𑀢𑀯𑀘𑀦𑀁 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀯𑀘𑀦𑁂𑀦 𑀲𑀫𑀢𑁆𑀣𑁂𑀢𑀺 ‘‘𑀧𑀢𑁆𑀣𑀤𑁆𑀥𑁄 𑀪𑀯𑀢𑀻’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀓𑀝𑁆𑀞𑀫𑀼𑀔𑁂𑀦 𑀯𑀸𑀢𑀺 𑀯𑀸-𑀲𑀤𑁆𑀤𑁄 𑀉𑀧𑀫𑀢𑁆𑀣𑁄. 𑀬𑀣𑀸 𑀓𑀝𑁆𑀞𑀫𑀼𑀔𑁂𑀦 𑀲𑀧𑁆𑀧𑁂𑀦 𑀤𑀝𑁆𑀞𑁄 𑀧𑀢𑁆𑀣𑀤𑁆𑀥𑁄 𑀳𑁄𑀢𑀺, 𑀏𑀯𑀁 𑀧𑀣𑀯𑀻𑀥𑀸𑀢𑀼𑀧𑁆𑀧𑀓𑁄𑀧𑁂𑀦 𑀲𑁄 ¶ 𑀓𑀸𑀬𑁄 𑀓𑀝𑁆𑀞𑀫𑀼𑀔𑁂𑀯 𑀳𑁄𑀢𑀺, 𑀓𑀝𑁆𑀞𑀫𑀼𑀔𑀕𑀢𑁄 𑀯𑀺𑀬 𑀧𑀢𑁆𑀣𑀤𑁆𑀥𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀯𑀸-𑀲𑀤𑁆𑀤𑁄 𑀅𑀯𑀥𑀸𑀭𑀡𑀢𑁆𑀣𑁄. 𑀲𑁄 ‘‘𑀧𑀣𑀯𑀻𑀥𑀸𑀢𑀼𑀧𑀓𑁄𑀧𑁂𑀦 𑀯𑀸’’𑀢𑀺 𑀏𑀯𑀁 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑁄. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀓𑀝𑁆𑀞𑀫𑀼𑀔𑁂𑀦 𑀤𑀝𑁆𑀞𑁄𑀧𑀺 𑀓𑀸𑀬𑁄 𑀧𑀣𑀯𑀻𑀥𑀸𑀢𑀼𑀧𑁆𑀧𑀓𑁄𑀧𑁂𑀦𑁂𑀯 𑀧𑀢𑁆𑀣𑀤𑁆𑀥𑁄 𑀳𑁄𑀢𑀺, 𑀢𑀲𑁆𑀫𑀸 𑀧𑀣𑀯𑀻𑀥𑀸𑀢𑀼𑀬𑀸 𑀅𑀯𑀺𑀬𑀼𑀢𑁆𑀢𑁄 𑀲𑁄 𑀓𑀸𑀬𑁄 𑀲𑀩𑁆𑀩𑀤𑀸 𑀓𑀝𑁆𑀞𑀫𑀼𑀔𑀕𑀢𑁄 𑀯𑀺𑀬 𑀳𑁄𑀢𑀻𑀢𑀺. 𑀯𑀸-𑀲𑀤𑁆𑀤𑁄 𑀯𑀸 𑀅𑀦𑀺𑀬𑀫𑀢𑁆𑀣𑁄. 𑀢𑀢𑁆𑀭𑀸𑀬𑀫𑀢𑁆𑀣𑁄 𑁋 𑀓𑀝𑁆𑀞𑀫𑀼𑀔𑁂𑀦 𑀤𑀝𑁆𑀞𑁄 𑀓𑀸𑀬𑁄 𑀧𑀢𑁆𑀣𑀤𑁆𑀥𑁄 𑀳𑁄𑀢𑀺 𑀯𑀸, 𑀦 𑀯𑀸 𑀫𑀦𑁆𑀢𑀸𑀕𑀤𑀯𑀲𑁂𑀦. 𑀧𑀣𑀯𑀻𑀥𑀸𑀢𑀼𑀧𑁆𑀧𑀓𑁄𑀧𑁂𑀦 𑀧𑀦 𑀫𑀦𑁆𑀢𑀸𑀕𑀤𑀭𑀳𑀺𑀢𑁄 𑀲𑁄 𑀓𑀸𑀬𑁄 𑀓𑀝𑁆𑀞𑀫𑀼𑀔𑀕𑀢𑁄 𑀯𑀺𑀬 𑀳𑁄𑀢𑀺 𑀏𑀓𑀦𑁆𑀢𑀧𑀢𑁆𑀣𑀤𑁆𑀥𑁄𑀢𑀺. 𑀢𑀢𑁆𑀣 𑀓𑀸𑀬𑁄𑀢𑀺 𑀧𑀓𑀢𑀺𑀓𑀸𑀬𑁄. 𑀧𑀽𑀢𑀺𑀓𑁄𑀢𑀺 𑀓𑀼𑀣𑀺𑀢𑁄. 𑀲𑀦𑁆𑀢𑀢𑁆𑀢𑁄𑀢𑀺 𑀲𑀩𑁆𑀩𑀲𑁄 𑀢𑀢𑁆𑀢𑁄 𑀫𑀳𑀸𑀤𑀸𑀳𑀧𑁆𑀧𑀢𑁆𑀢𑁄. 𑀲𑀜𑁆𑀙𑀺𑀦𑁆𑀦𑁄𑀢𑀺 𑀲𑀩𑁆𑀩𑀲𑁄 𑀙𑀺𑀦𑁆𑀦𑁄 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀪𑀽𑀢𑁄. 𑀬𑀤𑀸 𑀓𑀸𑀬𑁄 𑀧𑀢𑁆𑀣𑀤𑁆𑀥𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑁄 𑀳𑁄𑀢𑀺, 𑀢𑀤𑀸 𑀧𑀼𑀭𑀺𑀲𑁄 𑀓𑀝𑁆𑀞𑀫𑀼𑀔𑀸𑀤𑀺𑀲𑀧𑁆𑀧𑀲𑁆𑀲 𑀫𑀼𑀔𑁂 𑀯𑀢𑁆𑀢𑀫𑀸𑀦𑁄 𑀯𑀺𑀬 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀯𑀺𑀲𑁂𑀲𑀢𑁄𑀢𑀺 𑀓𑀝𑁆𑀞𑀫𑀼𑀔𑀸𑀤𑀺𑀯𑀺𑀲𑁂𑀲𑀢𑁄 𑀘 𑀧𑀣𑀯𑀻𑀆𑀤𑀺𑀯𑀺𑀲𑁂𑀲𑀢𑁄 𑀘. 𑀅𑀦𑀢𑁆𑀣𑀕𑁆𑀕𑀳𑀡𑀢𑁄𑀢𑀺𑀆𑀤𑀺 𑀅𑀘𑁂𑀢𑀦𑁂𑀲𑀼𑀧𑀺 𑀪𑀽𑀢𑁂𑀲𑀼 𑀲𑀘𑁂𑀢𑀦𑁂𑀲𑀼 𑀯𑀺𑀬 𑀅𑀦𑀢𑁆𑀣𑀸𑀤𑀻𑀦𑀁 𑀧𑀘𑁆𑀘𑀓𑁆𑀔𑀢𑀸𑀬 𑀦𑀺𑀩𑁆𑀩𑁂𑀤𑀚𑀦𑀦𑀢𑁆𑀣𑀁 𑀆𑀭𑀤𑁆𑀥𑀁. 𑀢𑀢𑁆𑀣 𑀆𑀲𑀬𑀢𑁄𑀢𑀺 𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑁄. 𑀏𑀢𑁂𑀲𑀦𑁆𑀢𑀺 𑀫𑀳𑀸𑀪𑀽𑀢𑀸𑀦𑀁. 𑀲𑀤𑀺𑀲𑀢𑀸𑀢𑀺 𑀯𑀫𑁆𑀫𑀺𑀓𑀸𑀲𑀬𑀲𑀼𑀲𑀺𑀭𑀕𑀳𑀦𑀲𑀗𑁆𑀓𑀸𑀭𑀝𑁆𑀞𑀸𑀦𑀸𑀲𑀬𑀢𑀸𑀬 𑀘 𑀲𑀤𑀺𑀲𑀢𑀸.

𑀧𑀘𑁆𑀘𑀢𑁆𑀢𑀮𑀓𑁆𑀔𑀡𑀯𑀲𑁂𑀦𑀸𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀮𑀓𑁆𑀔𑀡𑀯𑀲𑁂𑀦. 𑀧𑀣𑀯𑀻𑀆𑀤𑀻𑀦𑀁 𑀓𑀓𑁆𑀔𑀴𑀪𑀸𑀯𑀸𑀤𑀺, 𑀢𑀁𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀓𑀓𑁆𑀔𑀴𑀪𑀸𑀯𑀸𑀧𑀸𑀤𑀦𑀸𑀤𑀺𑀦𑀸 𑀯𑀺𑀓𑀸𑀭𑀼𑀧𑁆𑀧𑀸𑀤𑀦𑀢𑁄 𑀯𑀺𑀲𑀯𑁂𑀕𑀯𑀺𑀓𑀸𑀭𑀢𑁄 𑀲𑀤𑀺𑀲𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀦𑀢𑁆𑀣𑀸𑀢𑀺 ¶ 𑀩𑁆𑀬𑀲𑀦𑀸. 𑀩𑁆𑀬𑀸𑀥𑀺𑀦𑁆𑀢𑀺 𑀓𑀼𑀝𑁆𑀞𑀸𑀤𑀺𑀩𑁆𑀬𑀸𑀥𑀺𑀁. 𑀪𑀯𑁂 𑀚𑀸𑀢𑀸𑀪𑀺𑀦𑀦𑁆𑀤𑀺𑀦𑁄𑀢𑀺 𑀪𑀯𑁂𑀲𑀼 𑀚𑀸𑀢𑀺𑀬𑀸 𑀅𑀪𑀺𑀦𑀦𑁆𑀤𑀦𑀲𑀻𑀮𑀸. 𑀧𑀜𑁆𑀘𑀯𑁄𑀓𑀸𑀭𑁂 𑀳𑀺 𑀚𑀸𑀢𑀺𑀬𑀸 𑀅𑀪𑀺𑀦𑀦𑁆𑀤𑀦𑀸 𑀦𑀸𑀫 𑀫𑀳𑀸𑀪𑀽𑀢𑀸𑀪𑀺𑀦𑀦𑁆𑀤𑀦𑀸 𑀏𑀯.

𑀤𑀼𑀭𑀼𑀧𑀝𑁆𑀞𑀸𑀦𑀢𑀭𑀸𑀦𑀻𑀢𑀺 𑀤𑀼𑀧𑁆𑀧𑀝𑀺𑀓𑀸𑀭𑀢𑀭𑀸𑀦𑀺. 𑀤𑀼𑀭𑀸𑀲𑀤𑀸𑀢𑀺 𑀤𑀼𑀭𑀼𑀧𑀲𑀗𑁆𑀓𑀫𑀦𑀸. ‘‘𑀉𑀧𑀝𑁆𑀞𑀸𑀫𑀻’’𑀢𑀺 𑀉𑀧𑀲𑀗𑁆𑀓𑀫𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺. 𑀧𑀭𑀺𑀚𑀸𑀦𑀸𑀫 𑀓𑀫𑁆𑀫𑀦𑀸𑀫𑀸𑀦𑀺, 𑀉𑀧𑀓𑀸𑀭𑀸 𑀦𑀸𑀫 𑀦𑀢𑁆𑀣𑀺. 𑀅𑀦𑀦𑁆𑀢𑀤𑁄𑀲𑀽𑀧𑀤𑁆𑀤𑀯𑀢𑁄𑀢𑀺 𑀅𑀧𑀭𑀺𑀫𑀸𑀡𑀤𑁄𑀲𑀽𑀧𑀤𑁆𑀤𑀯𑀳𑁂𑀢𑀼𑀢𑁄. 𑀏𑀓𑀧𑀓𑁆𑀔𑀮𑀦𑁆𑀢𑀺 𑀏𑀓𑀤𑀼𑀓𑁆𑀔𑀁.

𑀭𑀽𑀧𑀓𑁆𑀔𑀦𑁆𑀥𑁄 ¶ 𑀪𑀺𑀚𑁆𑀚𑀫𑀸𑀦𑁄 𑀘𑀢𑁆𑀢𑀸𑀭𑁄 𑀅𑀭𑀽𑀧𑀓𑁆𑀔𑀦𑁆𑀥𑁂 𑀕𑀳𑁂𑀢𑁆𑀯𑀸𑀯 𑀪𑀺𑀚𑁆𑀚𑀢𑀺 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀏𑀓𑀦𑀺𑀭𑁄𑀥𑀢𑁆𑀢𑀸. 𑀯𑀢𑁆𑀣𑀼𑀭𑀽𑀧𑀫𑁆𑀧𑀺 𑀕𑀳𑁂𑀢𑁆𑀯𑀸𑀯 𑀪𑀺𑀚𑁆𑀚𑀦𑁆𑀢𑀺 𑀧𑀜𑁆𑀘𑀯𑁄𑀓𑀸𑀭𑁂 𑀅𑀭𑀽𑀧𑀓𑁆𑀔𑀦𑁆𑀥𑁂𑀲𑀼 𑀪𑀺𑀦𑁆𑀦𑁂𑀲𑀼 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀅𑀯𑀝𑁆𑀞𑀸𑀦𑀸𑀪𑀸𑀯𑀢𑁄. 𑀏𑀢𑁆𑀢𑀸𑀯𑀢𑀸𑀢𑀺 𑀮𑁄𑀪𑀼𑀧𑁆𑀧𑀸𑀤𑀦𑀫𑀢𑁆𑀢𑁂𑀦. 𑀧𑀜𑁆𑀜𑀸 𑀦𑀸𑀫 𑀅𑀢𑁆𑀢𑀪𑀸𑀯𑁂 𑀉𑀢𑁆𑀢𑀫𑀗𑁆𑀕𑀁 𑀧𑀜𑁆𑀜𑀼𑀢𑁆𑀢𑀭𑀢𑁆𑀢𑀸 𑀓𑀼𑀲𑀮𑀥𑀫𑁆𑀫𑀸𑀦𑀁, 𑀲𑀢𑀺 𑀘 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀬𑀁 𑀧𑀜𑁆𑀜𑀸𑀬 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀯𑀼𑀢𑁆𑀢𑀁 𑁋 ‘‘𑀏𑀢𑁆𑀢𑀸𑀯𑀢𑀸 𑀧𑀜𑁆𑀜𑀸𑀲𑀻𑀲𑀁 𑀧𑀢𑀺𑀢𑀁 𑀦𑀸𑀫 𑀳𑁄𑀢𑀻’’𑀢𑀺. 𑀬𑁄𑀦𑀺𑀬𑁄 𑀉𑀧𑀦𑁂𑀢𑀺 𑀢𑀤𑀼𑀧𑀕𑀲𑁆𑀲 𑀓𑀫𑁆𑀫𑀧𑀘𑁆𑀘𑀬𑀲𑁆𑀲 𑀪𑀸𑀯𑁂. ‘‘𑀚𑀸𑀢𑀺𑀪𑀬𑀁, 𑀚𑀭𑀸𑀪𑀬𑀁, 𑀫𑀭𑀡𑀪𑀬𑀁, 𑀘𑁄𑀭𑀪𑀬’’𑀦𑁆𑀢𑀺𑀆𑀤𑀺𑀦𑀸 𑀆𑀕𑀢𑀸𑀦𑀺 𑀧𑀜𑁆𑀘𑀯𑀻𑀲𑀢𑀺 𑀫𑀳𑀸𑀪𑀬𑀸𑀦𑀺, ‘‘𑀳𑀢𑁆𑀣𑀫𑁆𑀧𑀺 𑀙𑀺𑀦𑁆𑀤𑀢𑀻’’𑀢𑀺𑀆𑀤𑀺𑀦𑀸 𑀆𑀕𑀢𑀸𑀦𑀺 𑀤𑁆𑀯𑀢𑁆𑀢𑀺𑀁𑀲 𑀓𑀫𑁆𑀫𑀓𑀸𑀭𑀡𑀸𑀦𑀺 𑀆𑀕𑀢𑀸𑀦𑁂𑀯 𑀳𑁄𑀦𑁆𑀢𑀺 𑀓𑀸𑀭𑀡𑀲𑁆𑀲 𑀲𑀫𑀯𑀝𑁆𑀞𑀺𑀢𑀢𑁆𑀢𑀸. 𑀦𑀦𑁆𑀤𑀻𑀭𑀸𑀕𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀁.

𑀧𑀸𑀴𑀺𑀬𑀁𑀬𑁂𑀯 𑀆𑀕𑀢𑀸 ‘‘𑀘𑀓𑁆𑀔𑀼𑀢𑁄 𑀘𑁂𑀧𑀺 𑀦𑀁, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀦𑀸. 𑀓𑀺𑀜𑁆𑀘𑀺 𑀅𑀮𑀪𑀺𑀢𑁆𑀯𑀸𑀢𑀺 𑀢𑀲𑁆𑀫𑀺𑀁 𑀲𑀼𑀜𑁆𑀜𑀕𑀸𑀫𑁂 𑀘𑁄𑀭𑀸𑀦𑀁 𑀕𑀬𑁆𑀳𑀽𑀧𑀕𑀲𑁆𑀲 𑀅𑀮𑀸𑀪𑀯𑀘𑀦𑁂𑀦𑁂𑀯 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀢𑁆𑀢𑀦𑁄 𑀧𑀝𑀺𑀲𑀭𑀡𑀲𑁆𑀲 𑀅𑀮𑀸𑀪𑁄 𑀯𑀼𑀢𑁆𑀢𑁄 𑀏𑀯 𑀳𑁄𑀢𑀻𑀢𑀺 𑀦 𑀉𑀤𑁆𑀥𑀝𑁄, 𑀧𑀼𑀭𑀺𑀲𑀝𑁆𑀞𑀸𑀦𑀺𑀬𑁄 𑀪𑀺𑀓𑁆𑀔𑀼, 𑀘𑁄𑀭𑀸 𑀧𑀦 𑀩𑀸𑀳𑀺𑀭𑀸𑀬𑀢𑀦𑀝𑁆𑀞𑀸𑀦𑀺𑀬𑀸. 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸𑀢𑀺 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀁 𑀓𑀢𑁆𑀯𑀸. 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀯𑀲𑁂𑀦 𑀤𑁂𑀲𑀦𑀸𑀬 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀉𑀧𑀸𑀤𑀸𑀭𑀽𑀧𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦𑀸’’𑀢𑀺.

𑀩𑀸𑀳𑀺𑀭𑀸𑀦𑀦𑁆𑀢𑀺 𑀩𑀸𑀳𑀺𑀭𑀸𑀬𑀢𑀦𑀸𑀦𑀁. 𑀧𑀜𑁆𑀘 𑀓𑀺𑀘𑁆𑀘𑀸𑀦𑀻𑀢𑀺 𑀘𑁄𑀭𑁂𑀳𑀺 𑀢𑀤𑀸 𑀓𑀸𑀢𑀩𑁆𑀩𑀸𑀦𑀺 𑀧𑀜𑁆𑀘 𑀓𑀺𑀘𑁆𑀘𑀸𑀦𑀺. 𑀳𑀢𑁆𑀣𑀲𑀸𑀭𑀦𑁆𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑁂 𑀳𑀢𑁆𑀣𑁂𑀳𑀺 𑀕𑀳𑁂𑀢𑀩𑁆𑀩𑀲𑀸𑀭𑀪𑀡𑁆𑀟𑀁. 𑀧𑀸𑀢𑀦𑀸𑀤𑀺𑀯𑀲𑁂𑀦 𑀳𑀢𑁆𑀣𑀧𑀭𑀸𑀫𑀸𑀲𑀁 𑀓𑀭𑁄𑀦𑁆𑀢𑀺. 𑀧𑀳𑀸𑀭𑀞𑀸𑀦𑁂𑀢𑀺 𑀧𑀳𑀝𑀝𑁆𑀞𑀸𑀦𑁂. 𑀞𑀸𑀦𑀲𑁄 𑀢𑀲𑁆𑀫𑀺𑀁 𑀏𑀯 𑀔𑀡𑁂𑀢𑀺 𑀯𑀤𑀦𑁆𑀢𑀺. 𑀅𑀢𑁆𑀢𑀦𑁄 𑀲𑀼𑀔𑀸𑀯𑀳𑀁 𑀓𑀼𑀲𑀮𑀥𑀫𑁆𑀫𑀁 𑀧𑀳𑀸𑀬 𑀤𑀼𑀓𑁆𑀔𑀸𑀯𑀳𑁂𑀦 𑀅𑀓𑀼𑀲𑀮𑁂𑀦 𑀲𑀫𑀗𑁆𑀕𑀺𑀢𑀸 𑀲𑀼𑀔𑀸𑀯𑀳𑀁 𑀪𑀡𑁆𑀟𑀁 𑀧𑀳𑀸𑀬 𑀩𑀳𑀺 𑀦𑀺𑀓𑁆𑀔𑀫𑀦𑀁 𑀯𑀺𑀬𑀸𑀢𑀺 𑀯𑀼𑀢𑁆𑀢𑀁 𑀲𑀼𑀔𑀦𑀺𑀲𑁆𑀲𑀬𑀢𑁆𑀢𑀸 𑀢𑀲𑁆𑀲. 𑀳𑀢𑁆𑀣𑀧𑀭𑀸…𑀧𑁂… 𑀆𑀧𑀚𑁆𑀚𑀦𑀓𑀸𑀮𑁄 𑀕𑀼𑀡𑀲𑀭𑀻𑀭𑀲𑁆𑀲 𑀢𑀤𑀸 𑀧𑀫𑀸𑀤𑁂𑀦 𑀩𑀸𑀥𑀺𑀢𑀢𑁆𑀢𑀸. 𑀧𑀳𑀸𑀭…𑀧𑁂… 𑀓𑀸𑀮𑁄 𑀢𑀢𑁄 𑀤𑀴𑁆𑀳𑀢𑀭𑀁 𑀕𑀼𑀡𑀲𑀭𑀻𑀭𑀲𑁆𑀲 𑀩𑀸𑀥𑀺𑀢𑀢𑁆𑀢𑀸. 𑀧𑀳𑀸𑀭𑀁…𑀧𑁂… 𑀅𑀲𑁆𑀲𑀫𑀡𑀓𑀸𑀮𑁄 𑀕𑀼𑀡𑀲𑀭𑀻𑀭𑀲𑁆𑀲 𑀫𑀭𑀡𑀧𑁆𑀧𑀢𑁆𑀢𑀺𑀲𑀤𑀺𑀲𑀢𑁆𑀢𑀸. 𑀅𑀯𑀲𑁂𑀲𑀚𑀦𑀲𑁆𑀲 𑀤𑀸𑀲𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀢𑀸 𑀅𑀜𑁆𑀜𑀣𑀢𑁆𑀢𑀧𑁆𑀧𑀢𑁆𑀢𑀺𑀕𑀺𑀳𑀺𑀪𑀸𑀯𑀸𑀧𑀢𑁆𑀢𑀺𑀬𑀸 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑀸. 𑀬𑀁 ‘‘𑀙𑀲𑀼 𑀤𑁆𑀯𑀸𑀭𑁂𑀲𑀼 𑀆𑀭𑀫𑁆𑀫𑀡𑁂 ¶ 𑀆𑀧𑀸𑀣𑀕𑀢𑁂’’𑀢𑀺 𑀯𑀼𑀢𑁆𑀢𑀁, 𑀢𑀫𑁂𑀯 𑀆𑀭𑀫𑁆𑀫𑀡𑀁 𑀦𑀺𑀲𑁆𑀲𑀸𑀬 𑀲𑀫𑁆𑀧𑀭𑀸𑀬𑀺𑀓𑁄 𑀤𑀼𑀓𑁆𑀔𑀓𑁆𑀔𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀬𑁄𑀚𑀦𑀸.

𑀭𑀽𑀧𑀸𑀤𑀻𑀦𑀻𑀢𑀺 ¶ 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀸𑀦𑀺. 𑀢𑁂𑀲𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀪𑀽𑀢𑀼𑀧𑀸𑀤𑀸𑀭𑀽𑀧𑀸𑀦𑀁. 𑀮𑀳𑀼𑀢𑀸𑀤𑀺𑀯𑀲𑁂𑀦𑀸𑀢𑀺 𑀢𑁂𑀲𑀁 𑀮𑀳𑀼𑀢𑀸𑀤𑀺𑀯𑀲𑁂𑀦. 𑀤𑀼𑀭𑀼𑀢𑁆𑀢𑀭𑀡𑀝𑁆𑀞𑁄𑀢𑀺 𑀉𑀢𑁆𑀢𑀭𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑁄 𑀑𑀖𑀝𑁆𑀞𑁄. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. 𑀘𑀢𑀼𑀫𑀳𑀸𑀪𑀽𑀢𑀸𑀤𑀻𑀳𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀤𑀻𑀦𑀁 𑀕𑀳𑀡𑀁. 𑀘𑀺𑀢𑁆𑀢𑀓𑀺𑀭𑀺𑀬𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀘𑀺𑀢𑁆𑀢𑀧𑀬𑁄𑀕𑀤𑀲𑁆𑀲𑀦𑀢𑁆𑀣𑀁. 𑀯𑀼𑀢𑁆𑀢𑀯𑀸𑀬𑀸𑀫𑀫𑁂𑀯𑀸𑀢𑀺 ‘‘𑀲𑀫𑁆𑀫𑀸𑀯𑀸𑀬𑀸𑀫𑁄’’𑀢𑀺 𑀬𑁄 𑀅𑀭𑀺𑀬𑀫𑀕𑁆𑀕𑁂 𑀯𑀼𑀢𑁆𑀢𑁄. 𑀪𑀤𑁆𑀤𑁂𑀓𑀭𑀢𑁆𑀢𑀸𑀤𑀻𑀦𑀻𑀢𑀺 ‘‘𑀅𑀚𑁆𑀚𑁂𑀯 𑀓𑀺𑀘𑁆𑀘𑀁 𑀆𑀢𑀧𑁆𑀧’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁨𑁭𑁨, 𑁨𑁭𑁫, 𑁨𑁭𑁬) 𑀯𑀼𑀢𑁆𑀢𑀸𑀦𑀺 𑀪𑀤𑁆𑀤𑁂𑀓𑀭𑀢𑁆𑀢𑀲𑀼𑀢𑁆𑀢𑀸𑀤𑀻𑀦𑀺.

𑀓𑀼𑀡𑁆𑀞𑀧𑀸𑀤𑁄𑀢𑀺 𑀙𑀺𑀦𑁆𑀦𑀧𑀸𑀤𑁄𑀯 𑀳𑀼𑀢𑁆𑀯𑀸 𑀕𑀢𑀺𑀯𑀺𑀓𑀮𑁄. 𑀫𑀸𑀦𑀲𑀁 𑀩𑀦𑁆𑀥𑀢𑀻𑀢𑀺 𑀢𑀲𑁆𑀫𑀺𑀁 𑀘𑀺𑀢𑁆𑀢𑁂 𑀓𑀺𑀘𑁆𑀘𑀁 𑀦𑀺𑀩𑀦𑁆𑀥𑀢𑀺. ‘‘𑀅𑀬𑀁 𑀅𑀭𑀺𑀬𑀫𑀕𑁆𑀕𑁄 𑀫𑀬𑁆𑀳𑀁 𑀑𑀖𑀼𑀢𑁆𑀢𑀭𑀦𑀼𑀧𑀸𑀬𑁄’’𑀢𑀺 𑀢𑀢𑁆𑀣 𑀘𑀺𑀢𑁆𑀢𑀲𑁆𑀲 𑀲𑀦𑁆𑀦𑀺𑀝𑁆𑀞𑀸𑀦𑀁 𑀧𑀼𑀦 𑀢𑀢𑁆𑀣 𑀧𑀯𑀢𑁆𑀢𑀦𑀁 𑀯𑀻𑀭𑀺𑀬𑀸𑀭𑀫𑁆𑀪𑁄 𑀘𑀺𑀢𑁆𑀢𑀩𑀦𑁆𑀥𑀦𑀁.

𑀢𑀲𑁆𑀲 𑀦𑀸𑀫𑀭𑀽𑀧𑀲𑁆𑀲 𑀇𑀫𑁂 𑀦𑀦𑁆𑀤𑀻𑀭𑀸𑀕𑀸𑀤𑀬𑁄 𑀢𑀡𑁆𑀳𑀸𑀯𑀺𑀚𑁆𑀚𑀸𑀤𑀬𑁄𑀢𑀺 𑀓𑀢𑁆𑀯𑀸 𑀧𑀘𑁆𑀘𑀬𑁄 𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑁄. 𑀅𑀭𑀺𑀬𑀫𑀕𑁆𑀕𑀦𑀺𑀩𑁆𑀩𑀸𑀦𑀢𑀡𑁆𑀳𑀸𑀯𑀚𑁆𑀚𑁄 𑀇𑀥 𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑁄𑀢𑀺 𑀘. 𑀲𑁄𑀴𑀲𑀳𑀸𑀓𑀸𑀭𑁂𑀳𑀻𑀢𑀺 𑀧𑀻𑀴𑀦𑀸𑀤𑀻𑀳𑀺 𑀲𑁄𑀴𑀲𑀳𑀺 𑀆𑀓𑀸𑀭𑁂𑀳𑀺. 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑁂 𑀆𑀕𑀢𑀦𑀬𑁂𑀦 𑀲𑀝𑁆𑀞𑀺𑀦𑀬𑀲𑀳𑀲𑁆𑀲𑁂𑀳𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂…𑀧𑁂… 𑀧𑀢𑀺𑀝𑁆𑀞𑀳𑀺𑀁𑀲𑀽𑀢𑀺 𑀯𑀺𑀧𑀜𑁆𑀘𑀺𑀢𑀜𑁆𑀜𑀽 𑀏𑀯𑁂𑀢𑁆𑀣 𑀕𑀳𑀡𑀯𑀲𑁂𑀦 𑀅𑀥𑀺𑀕𑀢𑀯𑀺𑀲𑁂𑀲𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀸. 𑀢𑁂 𑀳𑀺 𑀢𑀤𑀸 𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑀪𑀸𑀯𑁂𑀦 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀲𑀦𑁆𑀦𑀺𑀲𑀺𑀦𑁆𑀦𑀸. 𑀉𑀕𑁆𑀖𑀝𑀺𑀢𑀜𑁆𑀜𑀽𑀦𑀁 𑀧𑀦 𑀦𑁂𑀬𑁆𑀬𑀸𑀦𑀜𑁆𑀘 𑀯𑀺𑀲𑁂𑀲𑀸𑀥𑀺𑀕𑀫𑁄 𑀅𑀝𑁆𑀞𑀓𑀣𑀸𑀬𑀁 𑀦 𑀭𑀼𑀴𑁆𑀳𑁄𑀢𑀺 𑀇𑀥 𑀦 𑀕𑀳𑀺𑀢𑁄𑀢𑀺.

𑀆𑀲𑀻𑀯𑀺𑀲𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀭𑀣𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁯. 𑀲𑀼𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀦𑁄 𑀲𑀢𑀲𑁆𑀲 𑀲𑀫𑁆𑀧𑀚𑀸𑀦𑀲𑁆𑀲 𑀯𑀺𑀳𑀭𑀢𑁄 𑀓𑀺𑀮𑁂𑀲𑀦𑀺𑀫𑀺𑀢𑁆𑀢𑀁 𑀤𑀼𑀓𑁆𑀔𑀁 𑀅𑀦𑀯𑀲𑀭𑀦𑁆𑀢𑀺 𑀲𑀼𑀔𑀲𑁄𑀫𑀦𑀲𑁆𑀲𑀩𑀳𑀼𑀮𑀢𑀸 𑀯𑀼𑀢𑁆𑀢𑀸. 𑀬𑀯𑀢𑀺 𑀢𑁂𑀦 𑀨𑀮𑀁 𑀫𑀺𑀲𑁆𑀲𑀺𑀢𑀁 𑀯𑀺𑀬 𑀳𑁄𑀢𑀻𑀢𑀺 𑀬𑁄𑀦𑀺, 𑀏𑀓𑀦𑁆𑀢𑀺𑀓𑀁 𑀓𑀸𑀭𑀡𑀁. 𑀅𑀲𑁆𑀲𑀸𑀢𑀺 𑀪𑀺𑀓𑁆𑀔𑀼𑀦𑁄. 𑀧𑀭𑀺𑀧𑀼𑀡𑁆𑀡𑀦𑁆𑀢𑀺 𑀅𑀯𑀺𑀓𑀮𑀁. 𑀅𑀦𑀯𑀲𑁂𑀲𑀁 𑀆𑀲𑀯𑁂 𑀔𑁂𑀧𑁂𑀢𑀻𑀢𑀺 𑀆𑀲𑀯𑀓𑁆𑀔𑀬𑁄, 𑀅𑀕𑁆𑀕𑀫𑀕𑁆𑀕𑁄. 𑀬𑀁 𑀬𑀦𑁆𑀢𑀺 𑀤𑀦𑁆𑀥𑀁 𑀫𑀚𑁆𑀛𑀁 𑀚𑀯𑁄𑀢𑀺 𑀚𑀯𑀸𑀤𑀻𑀲𑀼 𑀬𑀁 𑀬𑀁 𑀕𑀫𑀦𑀁. 𑀭𑀓𑁆𑀔𑀡𑀢𑁆𑀣𑀸𑀬𑀸𑀢𑀺 𑀓𑀺𑀮𑁂𑀲𑀘𑁄𑀭𑁂𑀳𑀺 𑀭𑀓𑁆𑀔𑀡𑀢𑁆𑀣𑀸𑀬 ¶ . 𑀯𑁂𑀕𑀦𑀺𑀕𑁆𑀕𑀳𑀡𑀢𑁆𑀣𑀸𑀬𑀸𑀢𑀺 𑀓𑀺𑀮𑁂𑀲𑀳𑁂𑀢𑀼𑀓𑀲𑁆𑀲 ¶ 𑀇𑀦𑁆𑀤𑁆𑀭𑀺𑀬𑀯𑁂𑀕𑀲𑁆𑀲 𑀦𑀺𑀕𑁆𑀕𑀡𑁆𑀳𑀦𑀢𑁆𑀣𑀸𑀬. 𑀦𑀺𑀩𑁆𑀩𑀺𑀲𑁂𑀯𑀦𑀢𑁆𑀣𑀸𑀬𑀸𑀢𑀺 𑀯𑀺𑀲𑁂𑀯𑀦𑀲𑁆𑀲 𑀯𑀺𑀧𑁆𑀨𑀦𑁆𑀤𑀺𑀢𑀲𑁆𑀲 𑀦𑀺𑀭𑁄𑀥𑀦𑀸𑀬. 𑀓𑀺𑀮𑁂𑀲𑀽𑀧𑀲𑀫𑀢𑁆𑀣𑀸𑀬𑀸𑀢𑀺 𑀓𑀺𑀮𑁂𑀲𑀸𑀦𑀁 𑀉𑀧𑀭𑀽𑀧𑀭𑀺 𑀲𑀫𑀦𑀢𑁆𑀣𑀸𑀬 𑀯𑀽𑀧𑀲𑀫𑀦𑀢𑁆𑀣𑀸𑀬.

𑀲𑀫𑀡𑀭𑀢𑀺 𑀦𑀸𑀫 𑀲𑀫𑀣𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀲𑀼𑀔𑀸𑀦𑀺. 𑀤𑀦𑁆𑀢𑀸𑀦𑀫𑁆𑀧𑀺 𑀲𑀺𑀦𑁆𑀥𑀯𑀸𑀦𑀁 𑀲𑀸𑀭𑀣𑀺𑀦𑁄 𑀧𑀬𑁄𑀕𑁂𑀦 𑀲𑀺𑀬𑀸 𑀓𑀸𑀘𑀺 𑀯𑀺𑀲𑁂𑀯𑀦𑀫𑀢𑁆𑀢𑀸𑀢𑀺 𑀢𑀤𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀺𑀩𑁆𑀩𑀺𑀲𑁂𑀯𑀦𑁂 𑀓𑀢𑁆𑀯𑀸 𑀧𑁂𑀲𑁂𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀜𑀸𑀡𑀁 𑀕𑀘𑁆𑀙𑀢𑀻𑀢𑀺 𑀅𑀲𑀗𑁆𑀕𑀫𑀦𑀁 𑀧𑀯𑀢𑁆𑀢𑀢𑀺 𑀧𑀕𑁂𑀯 𑀇𑀦𑁆𑀤𑁆𑀭𑀺𑀬𑀪𑀸𑀯𑀦𑀸𑀬 𑀓𑀢𑀢𑁆𑀢𑀸, 𑀓𑀺𑀮𑁂𑀲𑀦𑀺𑀕𑁆𑀕𑀳𑀲𑁆𑀲 𑀲𑀼𑀔𑁂𑀦𑁂𑀯 𑀲𑀺𑀤𑁆𑀥𑀢𑁆𑀢𑀸. 𑀤𑀸𑀬𑀓𑀲𑁆𑀲 𑀅𑀚𑁆𑀛𑀸𑀲𑀬𑁄 𑀯𑀲𑁄 𑀉𑀴𑀸𑀭𑁄 𑀮𑀸𑀫𑀓𑁄. 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀧𑀫𑀸𑀡𑀁 𑀯𑀲𑁄 𑀅𑀧𑁆𑀧𑀓𑀁 𑀩𑀳𑀼𑀓𑀜𑁆𑀘.

𑀫𑀳𑀸𑀫𑀡𑁆𑀟𑀧𑀝𑁆𑀞𑀸𑀦𑀁 𑀦𑀸𑀫 𑀮𑁄𑀳𑀧𑀸𑀲𑀸𑀤𑀲𑁆𑀲 𑀧𑀼𑀭𑀢𑁄 𑀏𑀯 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀦𑁆𑀦𑀺𑀧𑀸𑀢𑀓𑀸𑀮𑁂 𑀢𑁂𑀲𑀁 𑀧𑀳𑁄𑀦𑀓𑀯𑀲𑁂𑀦 𑀫𑀳𑀸𑀫𑀡𑁆𑀟𑀧𑀲𑁆𑀲 𑀓𑀢𑁆𑀢𑀩𑁆𑀩𑀝𑁆𑀞𑀸𑀦𑀁. 𑀕𑀳𑀡𑀫𑀸𑀦𑀦𑁆𑀢𑀺 𑀧𑀭𑀺𑀯𑀺𑀲𑀕𑀳𑀡𑀪𑀸𑀚𑀦𑀁.

𑀧𑀓𑀢𑀺𑀬𑀸 𑀪𑀢𑁆𑀢𑀓𑀸𑀭𑀓𑀺𑀘𑁆𑀘𑁂 𑀅𑀥𑀺𑀕𑀢𑁄 𑀉𑀧𑀝𑁆𑀞𑀸𑀓𑀼𑀧𑀸𑀲𑀓𑁄. 𑀫𑀼𑀤𑀼𑀲𑀫𑀔𑀭𑀲𑀜𑁆𑀜𑀺𑀢𑁂𑀳𑀺, 𑀤𑀳𑀦𑀧𑀘𑀦𑀪𑀚𑁆𑀚𑀦𑀲𑀜𑁆𑀜𑀺𑀢𑁂𑀳𑀺 𑀯𑀸 𑀢𑀻𑀳𑀺 𑀧𑀸𑀓𑁂𑀳𑀺.

𑀧𑀭𑀺𑀲𑁄𑀥𑁂𑀢𑁆𑀯𑀸𑀢𑀺 𑀭𑀜𑁆𑀜𑁄 𑀅𑀦𑀼𑀘𑁆𑀙𑀯𑀺𑀓𑀪𑀸𑀯𑀁 𑀧𑀭𑀺𑀲𑁄𑀥𑁂𑀢𑁆𑀯𑀸. 𑀪𑀽𑀫𑀺𑀬𑀁 𑀙𑀟𑁆𑀟𑁂𑀲𑀺 ‘‘𑀪𑀺𑀓𑁆𑀔𑀽𑀦𑀁 𑀅𑀤𑀢𑁆𑀯𑀸 𑀫𑀬𑀸 𑀫𑀼𑀔𑁂 𑀧𑀓𑁆𑀔𑀺𑀢𑁆𑀢’’𑀦𑁆𑀢𑀺. 𑀫𑀼𑀔𑁂𑀦 𑀕𑀡𑁆𑀳𑀺 𑀢𑀲𑁆𑀲 𑀦𑀺𑀤𑁆𑀤𑁄𑀲𑀪𑀸𑀯𑀁 𑀤𑀲𑁆𑀲𑁂𑀢𑀼𑀁. 𑀫𑀢𑁆𑀢𑀁 𑀚𑀸𑀦𑀸𑀧𑁂𑀢𑀼𑀁 𑀧𑀫𑀚𑁆𑀚𑀺. ‘‘𑀢𑁆𑀯𑀁 𑀓𑀼𑀢𑁄 𑀆𑀕𑀢𑁄’’𑀢𑀺 𑀧𑀼𑀘𑁆𑀙𑀦𑁂 𑀧𑀫𑀸𑀤𑀁 𑀆𑀧𑀚𑁆𑀚𑀺. 𑀅𑀦𑀼𑀪𑀸𑀕𑁄𑀢𑀺 𑀅𑀯𑀲𑀺𑀝𑁆𑀞𑀪𑀸𑀕𑁄. 𑀇𑀤𑀫𑀢𑁆𑀣𑀺𑀬𑀦𑁆𑀢𑀺 𑀇𑀤𑀁 𑀧𑀬𑁄𑀚𑀦𑀁. 𑀇𑀢𑀭𑀦𑁆𑀢𑀺 𑀧𑀸𑀴𑀺𑀬𑀁 𑀅𑀦𑀸𑀕𑀢𑀫𑁆𑀧𑀺 𑀆𑀳𑀸𑀭𑁂 𑀧𑀫𑀸𑀡𑀚𑀸𑀦𑀦𑀁.

𑀲𑀬𑀦𑀁 𑀲𑁂𑀬𑁆𑀬𑀸, 𑀓𑀸𑀫𑀪𑁄𑀕𑀻𑀦𑀁 𑀲𑁂𑀬𑁆𑀬𑀸 𑀓𑀸𑀫𑀪𑁄𑀕𑀺𑀲𑁂𑀬𑁆𑀬𑀸. 𑀤𑀓𑁆𑀔𑀺𑀡𑀧𑀲𑁆𑀲𑁂𑀦 𑀲𑀬𑀸𑀦𑁄 𑀦𑀸𑀫 𑀦𑀢𑁆𑀣𑀺 𑀤𑀓𑁆𑀔𑀺𑀡𑀳𑀢𑁆𑀣𑁂𑀦 𑀓𑀸𑀢𑀩𑁆𑀩𑀓𑀺𑀘𑁆𑀘𑀓𑀭𑀡𑀢𑁄. 𑀢𑁂𑀚𑀼𑀲𑁆𑀲𑀤𑀢𑁆𑀢𑀸𑀢𑀺 𑀇𑀤𑀁 𑀅𑀦𑀼𑀢𑁆𑀭𑀸𑀲𑀲𑁆𑀲𑁂𑀯 𑀲𑀻𑀳𑀲𑁆𑀲 𑀲𑀬𑀦𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀤𑁆𑀯𑁂 𑀧𑀼𑀭𑀺𑀫𑀧𑀸𑀤𑁂 𑀏𑀓𑀲𑁆𑀫𑀺𑀁, 𑀧𑀘𑁆𑀙𑀺𑀫𑀧𑀸𑀤𑁂 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀞𑀧𑁂𑀢𑁆𑀯𑀸𑀢𑀺 𑀳𑀺 𑀇𑀤𑀁 𑀧𑀸𑀤𑀸𑀦𑀁 𑀅𑀯𑀺𑀓𑁆𑀔𑀺𑀢𑁆𑀢𑀪𑀸𑀯𑀓𑀭𑀡𑀤𑀲𑁆𑀲𑀦𑀁.

𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁂𑀬𑁆𑀬𑀸𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀯𑀤𑀢𑀺. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀢𑀣𑀸𑀕𑀢𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸𑀯 𑀲𑀬𑀦𑁆𑀢𑀺. 𑀲𑀸 𑀘 𑀦𑁂𑀲𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬, 𑀓𑀺𑀮𑁂𑀲𑀧𑀭𑀺𑀦𑀺𑀩𑁆𑀩𑀸𑀦𑀲𑁆𑀲 𑀘 𑀓𑀢𑀢𑁆𑀢𑀸𑀢𑀺 𑀯𑀤𑀦𑁆𑀢𑀺 ¶ . 𑀇𑀥 𑀲𑀻𑀳𑀲𑁂𑀬𑁆𑀬𑀸 𑀆𑀕𑀢𑀸 𑀧𑀸𑀤𑀁 𑀅𑀘𑁆𑀘𑀸𑀥𑀸𑀬 𑀧𑀼𑀩𑁆𑀩𑁂𑀦𑀸𑀧𑀭𑀁 𑀅𑀚𑀳𑀺𑀢𑀲𑀁𑀮𑀓𑁆𑀔𑀡𑀸 𑀲𑁂𑀬𑁆𑀬𑀸𑀢𑀺 𑀓𑀢𑁆𑀯𑀸. 𑀢𑁂𑀦𑀸𑀳 ‘‘𑀅𑀬𑀁 𑀳𑀻’’𑀢𑀺𑀆𑀤𑀺. 𑀏𑀯𑀦𑁆𑀢𑀺 ‘‘𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀸𑀓𑀸𑀭𑁂𑀦 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺.

𑀓𑀣𑀁 ¶ 𑀦𑀺𑀤𑁆𑀤𑀸𑀬𑀦𑁆𑀢𑁄 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺? 𑀪𑀯𑀗𑁆𑀕𑀘𑀺𑀢𑁆𑀢𑁂𑀦 𑀳𑀺 𑀦𑀺𑀤𑁆𑀤𑀽𑀧𑀕𑀫𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑁆𑀧𑀳𑀸𑀦𑁂𑀦𑀸𑀢𑀺 𑀢𑀤𑀥𑀺𑀫𑀼𑀢𑁆𑀢𑀢𑀸𑀬 𑀢𑀤𑀧𑁆𑀧𑀳𑀸𑀦𑀁 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀢𑁂𑀲𑀼 𑀦𑀺𑀤𑁆𑀤𑁄𑀓𑁆𑀓𑀫𑀦𑀲𑁆𑀲 𑀆𑀤𑀺𑀧𑀭𑀺𑀬𑁄𑀲𑀸𑀦𑁂𑀲𑀼 𑀅𑀚𑀳𑀺𑀢𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀳𑁄𑀢𑀺. 𑀢𑁂𑀦𑀸𑀳 𑁋 ‘‘𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑁄𑀧𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀳𑁄𑀢𑀻’’𑀢𑀺. 𑀏𑀢𑀁 𑀧𑀦𑀸𑀢𑀺 ‘‘𑀦𑀺𑀤𑁆𑀤𑀁 𑀑𑀓𑁆𑀓𑀫𑀦𑁆𑀢𑁄𑀧𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀦𑀬𑀁 𑀯𑀤𑀢𑀺. 𑀜𑀸𑀡𑀥𑀸𑀢𑀼𑀓𑀦𑁆𑀢𑀺 𑀦 𑀭𑁄𑀘𑀬𑀺𑀁𑀲𑀽𑀢𑀺 𑀦𑀺𑀤𑁆𑀤𑁄𑀓𑁆𑀓𑀫𑀦𑁂𑀧𑀺 𑀚𑀸𑀕𑀭𑀡𑁂 𑀧𑀯𑀢𑁆𑀢𑀜𑀸𑀡𑀲𑀪𑀸𑀯𑀫𑁂𑀯𑀸𑀢𑀺 𑀦 𑀭𑁄𑀘𑀬𑀺𑀁𑀲𑀼 𑀧𑁄𑀭𑀸𑀡𑀸. 𑀦𑀺𑀭𑀦𑁆𑀢𑀭𑀁 𑀪𑀯𑀗𑁆𑀕𑀘𑀺𑀢𑁆𑀢𑁂𑀲𑀼 𑀯𑀢𑁆𑀢𑀫𑀸𑀦𑁂𑀲𑀼 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀲𑀫𑁆𑀪𑀯𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀭𑀺𑀫𑀲𑁆𑀫𑀺𑀜𑁆𑀳𑀺 𑀦𑀬𑁂 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑁆𑀲 𑀅𑀲𑀁𑀯𑀭𑁄, 𑀦 𑀪𑀯𑀗𑁆𑀕𑀲𑁆𑀲. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄𑀢𑀺 𑀇𑀫𑁂𑀳𑀺 𑀢𑀺𑀯𑀗𑁆𑀕𑀺𑀓𑀸, 𑀦𑀺𑀫𑀺𑀢𑁆𑀢𑀸𑀦𑀼𑀩𑁆𑀬𑀜𑁆𑀚𑀦𑀧𑀭𑀺𑀯𑀚𑁆𑀚𑀦𑀸𑀤𑀺 𑀲𑀩𑁆𑀩𑀁 𑀯𑀺𑀧𑀲𑁆𑀲𑀦𑀸𑀧𑀓𑁆𑀔𑀺𑀓𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑀸𑀦𑁂𑀯𑀸𑀢𑀺 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀧𑀯𑀢𑁆𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀤𑀻𑀦𑀺. 𑀬𑀸𑀯 𑀅𑀭𑀳𑀢𑁆𑀢𑀸 𑀤𑁂𑀲𑀦𑀸 𑀯𑀺𑀢𑁆𑀣𑀸𑀭𑀢𑁄 𑀓𑀣𑁂𑀢𑀩𑁆𑀩𑀸. 𑀧𑀸𑀴𑀺𑀬𑀁 𑀧𑀦 ‘‘𑀬𑁄𑀦𑀺 𑀘𑀲𑁆𑀲 𑀆𑀭𑀤𑁆𑀥𑀸 𑀳𑁄𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬𑀸’’𑀢𑀺 𑀲𑀗𑁆𑀔𑁂𑀧𑁂𑀦 𑀓𑀣𑀺𑀢𑀸.

𑀭𑀣𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀓𑀼𑀫𑁆𑀫𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁦. 𑀅𑀝𑁆𑀞𑀺𑀓𑀼𑀫𑁆𑀫𑁄𑀢𑀺 𑀧𑀺𑀝𑁆𑀞𑀺𑀬𑀁 𑀢𑀺𑀔𑀺𑀡𑀝𑁆𑀞𑀺𑀓𑁄 𑀓𑀼𑀫𑁆𑀫𑁄. 𑀢𑀦𑁆𑀢𑀺𑀩𑀦𑁆𑀥𑁄𑀢𑀺 𑀩𑁆𑀬𑀸𑀯𑀝𑁄. 𑀲𑀫𑀼𑀕𑁆𑀕𑁂 𑀯𑀺𑀬 𑀅𑀢𑁆𑀢𑀦𑁄 𑀓𑀧𑀸𑀮𑁂 𑀧𑀓𑁆𑀔𑀺𑀧𑀺𑀢𑁆𑀯𑀸. 𑀲𑀫𑁄𑀤𑀳𑀦𑁆𑀢𑁄 𑀲𑀫𑁆𑀫𑀸 𑀑𑀤𑀳𑀦𑁆𑀢𑁄 𑀅𑀚𑁆𑀛𑀢𑁆𑀢𑀫𑁂𑀯 𑀤𑀳𑀦𑁆𑀢𑁄. 𑀆𑀭𑀫𑁆𑀫𑀡𑀓𑀧𑀸𑀮𑁂𑀢𑀺 𑀆𑀭𑀫𑁆𑀫𑀡𑀓𑀝𑀸𑀳𑁂. 𑀲𑀫𑁄𑀤𑀳𑀦𑁆𑀢𑁄𑀢𑀺 𑀤𑀺𑀝𑁆𑀞𑀫𑀢𑁆𑀢𑀲𑁆𑀲𑁂𑀯 𑀘 𑀕𑀳𑀡𑀢𑁄 𑀫𑀦𑁄𑀯𑀺𑀢𑀓𑁆𑀓𑁂 𑀢𑀢𑁆𑀣𑁂𑀯 𑀲𑀫𑁆𑀫𑀤𑁂𑀯 𑀑𑀤𑀳𑀦𑁆𑀢𑁄. 𑀢𑀜𑁆𑀳𑀺 𑀯𑀺𑀲𑀬𑀯𑀲𑁂𑀦 𑀧𑀯𑀢𑁆𑀢𑀺𑀢𑀼𑀁 𑀅𑀤𑁂𑀦𑁆𑀢𑁄. 𑀧𑀜𑁆𑀘 𑀥𑀫𑁆𑀫𑁂𑀢𑀺 ‘‘𑀓𑀸𑀮𑁂𑀦 𑀯𑀓𑁆𑀔𑀸𑀫𑀻’’𑀢𑀺𑀆𑀤𑀺𑀦𑀸 (𑀧𑀭𑀺. 𑁩𑁬𑁨) 𑀯𑀼𑀘𑁆𑀘𑀫𑀸𑀦𑁂.

𑀓𑀼𑀫𑁆𑀫𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀞𑀫𑀤𑀸𑀭𑀼𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁧. 𑀯𑀺𑀮𑀸𑀲𑀫𑀸𑀦𑁄 ¶ 𑀯𑀺𑀬 𑀲𑀸𑀕𑀭𑀁 𑀧𑀢𑁆𑀯𑀸. 𑀅𑀦𑁆𑀢𑁄𑀲𑀸𑀔𑁄𑀢𑀺 𑀕𑀗𑁆𑀕𑀸𑀬 𑀢𑀻𑀭𑀲𑁆𑀲 𑀅𑀦𑁆𑀢𑁄 𑀑𑀦𑀢𑀲𑀸𑀔𑁄. 𑀢𑁂𑀫𑁂𑀢𑀻𑀢𑀺 𑀢𑀺𑀦𑁆𑀢𑁄 𑀳𑁄𑀢𑀺. 𑀢𑀺𑀭𑀺𑀬𑀁 𑀧𑀢𑀺𑀢𑁄 𑀤𑀡𑁆𑀟𑀲𑁂𑀢𑀼 𑀯𑀺𑀬 𑀞𑀺𑀢𑀢𑁆𑀢𑀸 𑀫𑀳𑀸𑀚𑀦𑀲𑁆𑀲 𑀧𑀘𑁆𑀘𑀬𑁄 𑀚𑀸𑀢𑁄, 𑀢𑀣𑀸 𑀫𑀳𑀦𑁆𑀢𑀪𑀸𑀯𑁂𑀦 𑀕𑀗𑁆𑀕𑀸𑀲𑁄𑀢𑀁 𑀑𑀢𑀭𑀡𑀸𑀤𑀺 𑀦𑀢𑁆𑀣𑀺.

𑀅𑀬𑀁 ¶ 𑀳𑀻𑀢𑀺 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀧𑀼𑀕𑁆𑀕𑀮𑁄. 𑀅𑀭𑀺𑀬𑀫𑀕𑁆𑀕𑀁 𑀑𑀭𑀼𑀬𑁆𑀳𑀸𑀢𑀺 𑀘𑀢𑀼𑀩𑁆𑀩𑀺𑀥𑀁 𑀅𑀭𑀺𑀬𑀫𑀕𑁆𑀕𑀯𑀻𑀣𑀺𑀁 𑀑𑀢𑀭𑀺𑀢𑁆𑀯𑀸. ‘‘𑀘𑀺𑀢𑁆𑀢𑀁 𑀦𑀸𑀫𑁂𑀢’’𑀦𑁆𑀢𑀺𑀆𑀤𑀺𑀦𑀸 𑀘𑀺𑀦𑁆𑀢𑁂𑀢𑁆𑀯𑀸 𑀕𑀺𑀳𑀺𑀩𑀦𑁆𑀥𑀦𑀁 𑀦 𑀯𑀺𑀲𑁆𑀲𑀚𑁆𑀚𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀢𑁆𑀢𑀦𑁄 𑀪𑀚𑀫𑀸𑀦𑀓𑁂𑀢𑀺 𑀅𑀢𑁆𑀢𑀦𑁄 𑀪𑀚𑀦𑁆𑀢𑁂. 𑀚𑀻𑀯𑀺𑀓𑀢𑁆𑀣𑀸𑀬 𑀧𑀬𑀼𑀚𑁆𑀚𑀺𑀢𑀩𑁆𑀩𑀢𑁄 𑀧𑀬𑁄𑀕𑁄, 𑀔𑁂𑀢𑁆𑀢𑀯𑀢𑁆𑀣𑀸𑀤𑀺. 𑀢𑀢𑁄 𑀧𑀬𑁄𑀕𑀢𑁄 𑀉𑀝𑁆𑀞𑀺𑀢𑀁 𑀆𑀬𑀁. 𑀓𑀺𑀜𑁆𑀘𑀸𑀧𑀺 𑀪𑀺𑀓𑁆𑀔𑀽𑀦𑀁 𑀓𑀸𑀬𑀲𑀸𑀫𑀕𑁆𑀕𑀺𑀁 𑀤𑁂𑀢𑀺 𑀪𑀺𑀓𑁆𑀔𑀢𑁆𑀣𑀸𑀬.

𑀫𑀼𑀡𑁆𑀟𑀖𑀝𑀦𑁆𑀢𑀺 𑀪𑀺𑀦𑁆𑀦𑁄𑀝𑁆𑀞𑀁 𑀖𑀝𑀁. 𑀔𑀦𑁆𑀥𑁂𑀢𑀺 𑀅𑀁𑀲𑁂. 𑀲𑀗𑁆𑀖𑀪𑁄𑀕𑀦𑁆𑀢𑀺 𑀲𑀗𑁆𑀖𑀲𑀦𑁆𑀢𑀓𑀁 𑀪𑁄𑀕𑀕𑀸𑀫𑀁 𑀕𑀦𑁆𑀢𑁆𑀯𑀸. 𑀅𑀢𑁆𑀣𑀢𑁄 𑀏𑀯𑀁 𑀯𑀤𑀦𑁆𑀢𑀻𑀢𑀺 𑀢𑀣𑀸 𑀅𑀢𑁆𑀣𑀲𑁆𑀲 𑀲𑀫𑁆𑀪𑀯𑀢𑁄 𑀏𑀯𑀁 𑀯𑀤𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀺. 𑀬𑀸𑀕𑀼𑀫𑀢𑁆𑀢𑀓𑁂 𑀬𑀸𑀕𑀼𑀦𑁆𑀢𑀺 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀢𑀸𑀬 𑀅𑀧𑀭𑀺𑀧𑀓𑁆𑀓𑀸𑀬 𑀏𑀯 𑀅𑀜𑁆𑀜𑀁 𑀬𑀸𑀕𑀼𑀁 𑀅𑀚𑁆𑀛𑁄𑀳𑀭𑀺𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀓𑀺𑀮𑁂𑀲𑀸𑀦𑀼𑀭𑀜𑁆𑀚𑀺𑀢𑁄𑀯𑀸𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲 𑀅𑀪𑀸𑀯𑁂𑀦 𑀓𑀺𑀮𑁂𑀲𑀸𑀦𑀼𑀕𑀢𑀘𑀺𑀢𑁆𑀢𑁄 𑀏𑀯. 𑀅𑀓𑁆𑀔𑀻𑀦𑀺 𑀦𑀻𑀳𑀭𑀺𑀢𑁆𑀯𑀸𑀢𑀺 𑀓𑁄𑀥𑀯𑀲𑁂𑀦 𑀅𑀓𑁆𑀔𑀺𑀓𑁂 𑀓𑀭𑁄𑀦𑁆𑀢𑁄 𑀅𑀓𑁆𑀔𑀻𑀦𑀺 𑀦𑀻𑀳𑀭𑀺𑀢𑁆𑀯𑀸 𑀯𑀺𑀘𑀭𑀺𑀲𑁆𑀲𑀢𑀺. 𑀉𑀤𑁆𑀥𑀢𑁄 𑀳𑁄𑀢𑀺 𑀅𑀯𑀽𑀧𑀲𑀦𑁆𑀢𑁄.

𑀤𑀺𑀝𑁆𑀞𑀺𑀕𑀢𑀺𑀓𑁄𑀢𑀺 𑀲𑀸𑀲𑀦𑀺𑀓𑁄 𑀏𑀯𑀁 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀲𑀸𑀲𑀦𑀁 𑀉𑀤𑁆𑀥𑀫𑁆𑀫𑀁 𑀉𑀩𑁆𑀩𑀺𑀦𑀬𑀁 𑀓𑀢𑁆𑀯𑀸 𑀤𑀻𑀧𑁂𑀦𑁆𑀢𑁄 𑀅𑀭𑀺𑀝𑁆𑀞𑀲𑀤𑀺𑀲𑁄. 𑀢𑁂𑀦𑀸𑀳 ‘‘𑀲𑁄 𑀳𑀻’’𑀢𑀺𑀆𑀤𑀺. 𑀅𑀭𑀽𑀧𑀪𑀯𑁂 𑀭𑀽𑀧𑀁 𑀅𑀢𑁆𑀣𑀺, 𑀅𑀜𑁆𑀜𑀣𑀸 𑀢𑀢𑁄 𑀘𑀼𑀢𑀲𑁆𑀲 𑀓𑀼𑀢𑁄 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀲𑀫𑁆𑀪𑀯𑁄. 𑀅𑀲𑀜𑁆𑀜𑀻𑀪𑀯𑁂 𑀘𑀺𑀢𑁆𑀢𑀁 𑀅𑀢𑁆𑀣𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀩𑀳𑀼𑀘𑀺𑀢𑁆𑀢𑀓𑁆𑀔𑀡𑀺𑀓𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 ‘‘𑀬𑁄 𑀇𑀫𑁂 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀪𑀸𑀯𑁂𑀬𑁆𑀬 𑀲𑀢𑁆𑀢𑀯𑀲𑁆𑀲𑀸𑀦𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀤𑀻. 𑀦𑀺. 𑁨.𑁪𑁦𑁪; 𑀫. 𑀦𑀺. 𑁧.𑁧𑁩𑁭). 𑀅𑀦𑀼𑀲𑀬𑁄 𑀘𑀺𑀢𑁆𑀢𑀯𑀺𑀧𑁆𑀧𑀬𑀼𑀢𑁆𑀢𑁄, 𑀅𑀜𑁆𑀜𑀣𑀸 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀥𑀫𑁆𑀫𑀸𑀦𑀁 𑀏𑀓𑀚𑁆𑀛𑀁 𑀉𑀧𑁆𑀧𑀢𑁆𑀢𑀺 𑀲𑀺𑀬𑀸. 𑀢𑁂 𑀘 𑀲𑀢𑁆𑀢𑀸 𑀲𑀦𑁆𑀥𑀸𑀯𑀦𑁆𑀢𑀺 𑀲𑀁𑀲𑀭𑀦𑁆𑀢𑀺, 𑀅𑀜𑁆𑀜𑀣𑀸 𑀓𑀫𑁆𑀫𑀨𑀮𑀸𑀦𑀁 𑀲𑀫𑁆𑀩𑀦𑁆𑀥𑁄 𑀦 𑀲𑀺𑀬𑀸𑀢𑀺. 𑀇𑀢𑀺 𑀯𑀤𑀦𑁆𑀢𑁄 𑀏𑀯𑀁 𑀫𑀺𑀘𑁆𑀙𑀸𑀯𑀸𑀤𑀁 𑀧𑀕𑁆𑀕𑀬𑁆𑀳 𑀯𑀤𑀦𑁆𑀢𑁄.

𑀢𑁂𑀫𑀦𑀭𑀼𑀓𑁆𑀔𑁄 𑀯𑀺𑀬…𑀧𑁂… 𑀤𑀼𑀮𑁆𑀮𑀪𑀥𑀫𑁆𑀫𑀲𑁆𑀲𑀯𑀦𑁄 𑀘 𑀧𑀼𑀕𑁆𑀕𑀮𑁄 𑀲𑀤𑁆𑀥𑀸𑀲𑀺𑀦𑁂𑀳𑁂𑀦 𑀅𑀢𑁂𑀫𑀦𑀢𑁄. 𑀓𑀢𑀯𑀺𑀦𑀬𑁄 𑀲𑀺𑀓𑁆𑀔𑀺𑀢𑀯𑀺𑀦𑀬𑁄 𑀬𑀣𑀸 ‘‘𑀓𑀢𑀯𑀺𑀚𑁆𑀚𑁄’’𑀢𑀺. 𑀥𑀫𑁆𑀫𑀓𑀣𑀺𑀓𑀸𑀦𑀁 ¶ 𑀯𑀺𑀘𑀸𑀭𑁂𑀣𑀸𑀢𑀺 𑀇𑀤𑀁 𑀤𑁂𑀬𑁆𑀬𑀥𑀫𑁆𑀫𑀁 𑀥𑀫𑁆𑀫𑀓𑀣𑀺𑀓𑀸𑀦𑀁 𑀅𑀬𑁆𑀬𑀸𑀦𑀁 𑀢𑀲𑁆𑀲 𑀢𑀲𑁆𑀲 𑀬𑀼𑀢𑁆𑀢𑀯𑀲𑁂𑀦 𑀯𑀺𑀘𑀸𑀭𑁂𑀣𑀸𑀢𑀺 𑀦𑀺𑀬𑁆𑀬𑀸𑀢𑀦𑀯𑀲𑁂𑀦 𑀯𑀢𑁆𑀯𑀸. 𑀤𑀺𑀯𑀸𑀓𑀣𑀺𑀓𑁄 𑀲𑀭𑀪𑀸𑀡𑀓𑁄 𑀲𑀸𑀬𑀦𑁆𑀳𑁂 𑀓𑀣𑁂𑀢𑀺, 𑀧𑀼𑀭𑀺𑀫𑀬𑀸𑀫𑀁 𑀓𑀣𑁂𑀦𑁆𑀢𑁄 𑀭𑀢𑁆𑀢𑀺𑀓𑀣𑀺𑀓𑁄 𑀪𑀸𑀡𑀓𑀧𑀼𑀕𑁆𑀕𑀮𑁄.

𑀦𑀦𑁆𑀤𑀦𑀯𑀦𑀸𑀪𑀺𑀭𑀸𑀫𑁂𑀢𑀺 𑀦𑀦𑁆𑀤𑀦𑀯𑀦𑀁 𑀯𑀺𑀬 𑀫𑀦𑁄𑀭𑀫𑁂. 𑀅𑀲𑁆𑀲 𑀪𑀸𑀭𑀳𑀸𑀭𑀪𑀺𑀓𑁆𑀔𑀽𑀢𑀺 𑀅𑀲𑁆𑀲 𑀓𑀺𑀘𑁆𑀘𑀯𑀸𑀳𑀓𑀪𑀺𑀓𑁆𑀔𑀽 𑀉𑀧𑀚𑁆𑀛𑀸𑀬𑀸𑀤𑀬𑁄. 𑀲𑀼𑀔𑀦𑀺𑀲𑀺𑀦𑁆𑀦𑀓𑀣𑀦𑁆𑀢𑀺 𑀧𑀝𑀺𑀲𑀦𑁆𑀣𑀸𑀭𑀓𑀣𑀸𑀧𑀼𑀩𑁆𑀩𑀓𑀁 𑀉𑀧𑀦𑀺𑀲𑀺𑀦𑁆𑀦𑀓𑀣𑀁 𑀲𑀼𑀢𑁆𑀯𑀸.

𑀞𑀺𑀢𑀲𑀡𑁆𑀞𑀸𑀦𑁂𑀦𑁂𑀯 ¶ 𑀞𑀺𑀢𑀸𑀓𑀸𑀭𑁂𑀦𑁂𑀯 𑀞𑀺𑀢𑀁, 𑀦𑀧𑁆𑀧𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀓𑀫𑁆𑀫𑀫𑀽𑀮𑀸𑀤𑀻𑀦𑀺 𑀞𑀺𑀢𑀲𑀡𑁆𑀞𑀸𑀦𑁂𑀦𑁂𑀯 𑀞𑀺𑀢𑀸𑀢𑀺 𑀬𑁄𑀚𑀦𑀸. 𑀫𑀼𑀤𑀼𑀢𑀸𑀬𑀸𑀢𑀺 𑀫𑀼𑀤𑀼𑀳𑀤𑀬𑀢𑀸𑀬 𑀲𑀸𑀧𑁂𑀓𑁆𑀔𑀢𑀸𑀬.

𑀧𑀝𑀺𑀧𑀤𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀧𑀝𑀺𑀧𑀢𑁆𑀢𑀺𑀁. 𑀤𑀻𑀧𑁂𑀢𑁆𑀯𑀸 𑀧𑀓𑀸𑀲𑁂𑀢𑁆𑀯𑀸 𑀧𑀸𑀓𑀝𑀁 𑀓𑀢𑁆𑀯𑀸. 𑀢𑀢𑁆𑀭𑀼𑀧𑁆𑀧𑀸𑀤𑁄𑀢𑀺 𑀢𑀢𑁆𑀭 𑀉𑀧𑁆𑀧𑀚𑁆𑀚𑀦𑀓𑀆𑀬𑀼𑀧𑁆𑀧𑀸𑀤𑁄. 𑀔𑁂𑀢𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑁂𑀮…𑀧𑁂… 𑀳𑀢𑁆𑀣𑀸𑀢𑀺 𑀢𑁂𑀮𑀖𑀝-𑀫𑀥𑀼𑀖𑀝𑀨𑀸𑀡𑀺𑀢𑀖𑀝𑀸𑀤𑀺𑀳𑀢𑁆𑀣𑀸. 𑀅𑀧𑀓𑁆𑀓𑀫𑀺𑀁𑀲𑀼 𑀤𑀼𑀩𑁆𑀩𑀺𑀘𑀸𑀭𑀺𑀢𑀢𑁆𑀢𑀸. 𑀧𑀽𑀭𑁂𑀲𑀻𑀢𑀺 𑀳𑁂𑀝𑁆𑀞𑀸 𑀘 𑀢𑀢𑁆𑀣 𑀢𑀢𑁆𑀣 𑀅𑀢𑀻𑀢𑀸𑀦𑀺 𑀓𑀸𑀮𑀯𑀘𑀦𑀸𑀦𑀺 𑀧𑁄𑀭𑀸𑀡𑀝𑁆𑀞𑀓𑀣𑀸𑀬 𑀆𑀕𑀢𑀢𑁆𑀢𑀸 𑀓𑀺𑀭 𑀯𑀼𑀢𑁆𑀢𑀸𑀦𑀺.

𑀉𑀧𑀕𑀫𑀦𑀸𑀦𑀼𑀧𑀕𑀫𑀦𑀸𑀤𑀻𑀦𑀺 𑀑𑀭𑀺𑀫𑀲𑁆𑀲 𑀧𑀸𑀭𑀺𑀫𑀲𑁆𑀲 𑀘 𑀉𑀧𑀕𑀫𑀦𑀸𑀦𑀼𑀧𑀕𑀫𑀦𑀸𑀦𑀺 𑀘𑁂𑀯 𑀫𑀚𑁆𑀛𑁂 𑀲𑀁𑀲𑀻𑀤𑀦𑀸𑀦𑀺 𑀘. 𑀧𑀝𑀺𑀯𑀺𑀚𑁆𑀛𑀺𑀢𑀼𑀦𑁆𑀢𑀺 𑀚𑀸𑀦𑀺𑀢𑀼𑀁. 𑀏𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀁 𑀘𑀓𑁆𑀔𑀼𑀲𑀪𑀸𑀯𑀁. 𑀤𑁄𑀫𑀦𑀲𑁆𑀲𑀦𑁆𑀢𑀺 𑀢𑀲𑁆𑀲𑁂𑀯 𑀫𑀦𑁆𑀤𑀪𑀸𑀯𑀧𑀘𑁆𑀘𑀬𑀁 𑀤𑁄𑀫𑀦𑀲𑁆𑀲𑀁. 𑀆𑀧𑀚𑁆𑀚𑀦𑁆𑀢𑁄𑀧𑀺 𑀉𑀧𑀕𑀘𑁆𑀙𑀢𑀺 𑀦𑀸𑀫 𑀢𑀦𑁆𑀦𑀺𑀫𑀺𑀢𑁆𑀢𑀲𑀁𑀓𑀺𑀮𑁂𑀲𑀲𑁆𑀲 𑀉𑀧𑁆𑀧𑀸𑀤𑀺𑀢𑀢𑁆𑀢𑀸. 𑀢𑀺𑀡𑁆𑀡𑀁 𑀮𑀓𑁆𑀔𑀡𑀸𑀦𑀦𑁆𑀢𑀺 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄 𑀆𑀤𑀺𑀅𑀦𑁆𑀢𑀯𑀦𑁆𑀢𑀢𑁄 𑀢𑀸𑀯𑀓𑀸𑀮𑀺𑀓𑀢𑁄 𑀦𑀺𑀘𑁆𑀘𑀧𑀝𑀺𑀓𑁆𑀔𑁂𑀧𑀢𑁄𑀢𑀺𑀆𑀤𑀻𑀦𑀁 𑀢𑀺𑀡𑁆𑀡𑀁 𑀮𑀓𑁆𑀔𑀡𑀸𑀦𑀁 𑀲𑀮𑁆𑀮𑀓𑁆𑀔𑀡𑀯𑀲𑁂𑀦.

𑀯𑀸𑀫𑀢𑁄𑀢𑀺 𑀫𑀺𑀘𑁆𑀙𑀸. 𑀤𑀓𑁆𑀔𑀺𑀡𑀢𑁄𑀢𑀺 𑀲𑀫𑁆𑀫𑀸. 𑀬𑀣𑀸 𑀢𑀲𑁆𑀲 𑀢𑀲𑁆𑀲 𑀲𑀢𑁆𑀢𑀲𑁆𑀲 𑀑𑀭𑀪𑀸𑀯𑀢𑁆𑀢𑀸 𑀅𑀚𑁆𑀛𑀢𑁆𑀢𑀺𑀓𑀸𑀦𑀺 𑀆𑀬𑀢𑀦𑀸𑀦𑀺 𑀑𑀭𑀺𑀫𑀁 𑀢𑀻𑀭𑀁 𑀓𑀢𑁆𑀯𑀸 𑀯𑀼𑀢𑁆𑀢𑀸𑀦𑀺, 𑀏𑀯𑀁 𑀦𑁂𑀲𑀁 𑀧𑀭𑀪𑀸𑀯𑀢𑁆𑀢𑀸 𑀩𑀸𑀳𑀺𑀭𑀸𑀦𑀺 𑀆𑀬𑀢𑀦𑀸𑀦𑀺 𑀧𑀸𑀭𑀺𑀫𑀁 𑀯𑀼𑀢𑁆𑀢𑀸𑀦𑀺. 𑀅𑀧𑀸𑀬𑀫𑀚𑁆𑀛𑁂 𑀲𑀁𑀲𑀭𑀡𑀳𑁂𑀢𑀼𑀢𑀸𑀬 𑀦𑀦𑁆𑀤𑀻𑀭𑀸𑀕𑁄𑀯 ‘‘𑀫𑀚𑁆𑀛𑁂 𑀲𑀁𑀲𑀸𑀤𑁄’’𑀢𑀺 𑀯𑀼𑀢𑁆𑀢𑁄.

𑀉𑀦𑁆𑀦𑀢𑁄𑀢𑀺 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸 𑀉𑀦𑁆𑀦𑀢𑀺𑀁 𑀉𑀧𑀕𑀢𑁄. 𑀅𑀢𑁆𑀢𑀼𑀓𑁆𑀓𑀁𑀲𑀦𑁂 𑀧𑀁𑀲𑀼𑀓𑀽𑀮𑀺𑀓𑀪𑀸𑀯𑁂𑀦 𑀅𑀢𑁆𑀢𑀸𑀦𑀁 𑀤𑀳𑀦𑀢𑁄 𑀅𑀜𑁆𑀜𑀸𑀓𑀸𑀭𑀢𑀸𑀕𑀳𑁂𑀢𑀩𑁆𑀩𑁄. 𑀧𑀸𑀲𑀸𑀡𑁄 𑀦𑀼 𑀔𑁄 𑀏𑀲 𑀔𑀸𑀡𑀼𑀓𑁄𑀢𑀺 𑀕𑀳𑁂𑀢𑀩𑁆𑀩𑀤𑀸𑀭𑀼𑀓𑁆𑀔𑀦𑁆𑀥𑀲𑀤𑀺𑀲𑁄 𑀯𑀼𑀢𑁆𑀢𑁄.

𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 ¶ 𑀳𑁄𑀢𑀺 𑀆𑀯𑀝𑁆𑀝𑀯𑁂𑀕𑀲𑁆𑀲 𑀩𑀮𑀯𑀪𑀸𑀯𑀢𑁄. 𑀘𑀢𑀽𑀲𑀼 𑀅𑀧𑀸𑀬𑁂𑀲𑀽𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀸𑀯𑀝𑁆𑀝𑁂 𑀧𑀢𑀺𑀢𑀧𑀼𑀕𑁆𑀕𑀮𑁄 𑀫𑀦𑀼𑀲𑁆𑀲𑀮𑁄𑀓𑁂𑀧𑀺 𑀕𑀼𑀡𑀲𑀭𑀻𑀭𑀪𑁂𑀤𑀦𑁂𑀦 𑀤𑀻𑀖𑀭𑀢𑁆𑀢𑀁 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀆𑀧𑀚𑁆𑀚𑀢𑀺𑀬𑁂𑀯, 𑀢𑀲𑁆𑀲 𑀢𑀣𑀸 𑀆𑀧𑀦𑁆𑀦𑀢𑁆𑀢𑀸. 𑀏𑀯𑀜𑁆𑀳𑀺 𑀲𑁄 𑀅𑀧𑀸𑀬𑁂𑀲𑀼 𑀢𑀸𑀤𑀺𑀲𑁂𑀲𑀼 𑀚𑀸𑀬𑀢𑀺.

𑀲𑀻𑀮𑀲𑁆𑀲 𑀤𑀼𑀝𑁆𑀞𑀁 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀪𑀸𑀯𑀢𑁆𑀣𑁄 𑀇𑀥 𑀤𑀼-𑀲𑀤𑁆𑀤𑁄𑀢𑀺 𑀆𑀳 ‘‘𑀦𑀺𑀲𑁆𑀲𑀻𑀮𑁄’’𑀢𑀺. ‘‘𑀧𑀸𑀧𑀁 𑀧𑀸𑀧𑁂𑀦 𑀲𑀼𑀓𑀭’’𑀦𑁆𑀢𑀺𑀆𑀤𑀻𑀲𑀼 (𑀉𑀤𑀸. 𑁪𑁮) 𑀯𑀺𑀬 𑀧𑀸𑀧-𑀲𑀤𑁆𑀤𑁄 𑀦𑀺𑀳𑀻𑀦𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀮𑀸𑀫𑀓𑀥𑀫𑁆𑀫𑁄’’𑀢𑀺. 𑀦 𑀲𑀼𑀘𑀻𑀢𑀺 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀦 𑀲𑀼𑀘𑀺. 𑀲𑀗𑁆𑀓𑀸𑀬 𑀯𑀸𑀢𑀺 𑀅𑀢𑁆𑀢𑀦𑁄 𑀯𑀸 𑀲𑀗𑁆𑀓𑀸𑀬 ¶ 𑀧𑀭𑁂𑀲𑀁 𑀲𑀫𑀸𑀘𑀸𑀭𑀓𑀺𑀭𑀺𑀬𑀁 𑀲𑀭𑀢𑀺 𑀆𑀲𑀗𑁆𑀓𑀢𑀺. 𑀢𑁂𑀦𑀸𑀳 ‘‘𑀢𑀲𑁆𑀲 𑀳𑀻’’𑀢𑀺𑀆𑀤𑀺. 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀧𑀯𑀺𑀲𑀢𑀻𑀢𑀺 𑀢𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀸𑀦𑀁 𑀅𑀦𑁆𑀢𑀭𑁂 𑀧𑀯𑀺𑀲𑀢𑀺. 𑀕𑀼𑀡𑀸𑀦𑀁 𑀧𑀽𑀢𑀺𑀪𑀸𑀯𑁂𑀦𑀸𑀢𑀺 𑀕𑀼𑀡𑀪𑀸𑀯𑁂𑀦 𑀕𑀳𑀺𑀢𑀸𑀦𑀁 𑀲𑀻𑀮𑀥𑀫𑁆𑀫𑀸𑀦𑀁 𑀲𑀁𑀓𑀺𑀮𑀺𑀝𑁆𑀞𑀪𑀸𑀯𑀧𑁆𑀧𑀢𑁆𑀢𑀺𑀬𑀸. 𑀓𑀘𑀯𑀭𑀚𑀸𑀢𑁄𑀢𑀺 𑀅𑀩𑁆𑀪𑀦𑁆𑀢𑀭𑀁 𑀲𑀜𑁆𑀚𑀸𑀢𑀓𑀘𑀯𑀭𑁄, 𑀓𑀘𑀯𑀭𑀪𑀽𑀢𑁄 𑀯𑀸.

𑀅𑀡𑀡𑀸 𑀧𑀩𑁆𑀩𑀚𑁆𑀚𑀸𑀢𑀺 𑀅𑀡𑀡𑀲𑁆𑀲𑁂𑀯 𑀧𑀩𑁆𑀩𑀚𑁆𑀚𑀸. 𑀑𑀭𑀺𑀫𑀢𑀻𑀭𑀸𑀤𑀻𑀦𑀁 𑀉𑀧𑀕𑀫𑀦𑀸𑀦𑀼𑀧𑀕𑀫𑀦𑀸𑀤𑀻𑀦𑀁 𑀚𑁄𑀢𑀺𑀢𑀢𑁆𑀢𑀸 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁.

𑀧𑀞𑀫𑀤𑀸𑀭𑀼𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀤𑀼𑀢𑀺𑀬𑀤𑀸𑀭𑀼𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁨. 𑀬𑀸 𑀆𑀧𑀢𑁆𑀢𑀺 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻 𑀤𑁂𑀲𑀦𑀸𑀕𑀸𑀫𑀺𑀦𑀻, 𑀢𑀁 𑀧𑀝𑀺𑀘𑁆𑀙𑀸𑀤𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀁𑀓𑀺𑀮𑀺𑀝𑁆𑀞𑀸 𑀦𑀸𑀫 𑀅𑀦𑁆𑀢𑀭𑀸𑀬𑀺𑀓𑀪𑀸𑀯𑀢𑁄. 𑀆𑀯𑀻𑀓𑀢𑀸 𑀧𑀦 𑀅𑀦𑀸𑀧𑀢𑁆𑀢𑀺𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀻𑀢𑀺 𑀅𑀲𑀁𑀓𑀺𑀮𑀺𑀝𑁆𑀞𑀸 𑀦𑀸𑀫. 𑀢𑁂𑀦𑀸𑀳 𑁋 ‘‘𑀆𑀯𑀻𑀓𑀢𑀸 𑀳𑀺𑀲𑁆𑀲 𑀨𑀸𑀲𑀼 𑀳𑁄𑀢𑀻’’𑀢𑀺. 𑀏𑀯𑀭𑀽𑀧𑀁 𑀲𑀁𑀓𑀺𑀮𑀺𑀝𑁆𑀞𑀦𑁆𑀢𑀺 𑀧𑀝𑀺𑀘𑁆𑀙𑀸𑀤𑀺𑀢𑀢𑀸𑀬 𑀯𑀸 𑀤𑀼𑀝𑁆𑀞𑀼𑀮𑁆𑀮𑀪𑀸𑀯𑁂𑀦 𑀯𑀸 𑀲𑀁𑀓𑀺𑀮𑀺𑀝𑁆𑀞𑀁.

𑀤𑀼𑀢𑀺𑀬𑀤𑀸𑀭𑀼𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀯𑀲𑁆𑀲𑀼𑀢𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁩. 𑀲𑀦𑁆𑀣𑀸𑀕𑀸𑀭𑀦𑁆𑀢𑀺 𑀲𑀜𑁆𑀜𑀸𑀧𑀦𑀸𑀕𑀸𑀭𑀁. 𑀢𑁂𑀦𑀸𑀳 ‘‘𑀉𑀬𑁆𑀬𑁄𑀕𑀓𑀸𑀮𑀸𑀤𑀻𑀲𑀽’’𑀢𑀺𑀆𑀤𑀺. 𑀆𑀤𑀺-𑀲𑀤𑁆𑀤𑁂𑀦 𑀫𑀗𑁆𑀕𑀮𑀫𑀳𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀦𑁆𑀣𑀭𑀦𑁆𑀢𑀻𑀢𑀺 𑀯𑀺𑀲𑁆𑀲𑀫𑀦𑁆𑀢𑀺 ¶ , 𑀧𑀭𑀺𑀲𑁆𑀲𑀫𑀁 𑀯𑀺𑀦𑁄𑀤𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀲𑀳𑀸𑀢𑀺 𑀲𑀦𑁆𑀦𑀺𑀧𑀸𑀢𑀯𑀲𑁂𑀦 𑀏𑀓𑀚𑁆𑀛𑀁. 𑀲𑀳 𑀅𑀢𑁆𑀣𑀸𑀦𑀼𑀲𑀸𑀲𑀦𑀁 𑀅𑀕𑀸𑀭𑀦𑁆𑀢𑀺 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀢𑁆𑀣-𑀓𑀸𑀭𑀲𑁆𑀲 𑀦𑁆𑀣-𑀓𑀸𑀭𑀁 𑀓𑀢𑁆𑀯𑀸 ‘‘𑀲𑀦𑁆𑀣𑀸𑀕𑀸𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀤𑀝𑁆𑀞𑀩𑁆𑀩𑀁, 𑀧𑀞𑀫𑀁 𑀢𑀢𑁆𑀣 𑀲𑀫𑁆𑀫𑀦𑁆𑀢𑀦𑀯𑀲𑁂𑀦 𑀲𑀦𑁆𑀣𑀭𑀦𑁆𑀢𑀺 𑀯𑀺𑀘𑀸𑀭𑁂𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀆𑀕𑀢𑀫𑁂𑀯 𑀪𑀯𑀺𑀲𑁆𑀲𑀢𑀻𑀢𑀺 𑀩𑀼𑀤𑁆𑀥𑀯𑀘𑀦𑀲𑁆𑀲 𑀆𑀕𑀫𑀦𑀲𑀻𑀲𑁂𑀦 𑀅𑀭𑀺𑀬𑀨𑀮𑀥𑀫𑁆𑀫𑀸𑀦𑀫𑁆𑀧𑀺 𑀆𑀕𑀫𑀦𑀁 𑀯𑀼𑀢𑁆𑀢𑀫𑁂𑀯. 𑀢𑀺𑀬𑀸𑀫𑀭𑀢𑁆𑀢𑀺𑀁 𑀢𑀢𑁆𑀣 𑀯𑀲𑀦𑁆𑀢𑀸𑀦𑀁 𑀨𑀮𑀲𑀫𑀸𑀧𑀢𑁆𑀢𑀺𑀯𑀴𑀜𑁆𑀚𑀦𑀁 𑀳𑁄𑀢𑀻𑀢𑀺. 𑀢𑀲𑁆𑀫𑀺𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑁂 𑀓𑀮𑁆𑀬𑀸𑀡𑀥𑀫𑁆𑀫𑀸 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀸 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀦𑁆𑀢𑀸 𑀳𑁄𑀦𑁆𑀢𑀻𑀢𑀺 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑀸𑀦𑀫𑁆𑀧𑀺 𑀢𑀢𑁆𑀣 𑀆𑀕𑀫𑀦𑀁 𑀳𑁄𑀢𑀺𑀬𑁂𑀯.

𑀅𑀮𑁆𑀮𑀕𑁄𑀫𑀬𑁂𑀦𑀸𑀢𑀺 ¶ 𑀅𑀘𑁆𑀙𑁂𑀦 𑀅𑀮𑁆𑀮𑀕𑁄𑀫𑀬𑀭𑀲𑁂𑀦. 𑀑𑀧𑀼𑀜𑁆𑀚𑀸𑀧𑁂𑀢𑁆𑀯𑀸𑀢𑀺 𑀯𑀺𑀮𑀺𑀫𑁆𑀧𑁂𑀢𑁆𑀯𑀸. 𑀘𑀢𑀼𑀚𑁆𑀚𑀸𑀢𑀺𑀬𑀕𑀦𑁆𑀥𑁂𑀳𑀻𑀢𑀺 𑀓𑀼𑀗𑁆𑀓𑀼𑀫𑀢𑀼𑀭𑀼𑀓𑁆𑀔𑀬𑀯𑀦𑀧𑀼𑀧𑁆𑀨𑀢𑀫𑀸𑀮𑀧𑀢𑁆𑀢𑀕𑀦𑁆𑀥𑁂𑀳𑀺. 𑀦𑀸𑀦𑀸𑀯𑀡𑁆𑀡𑁂𑀢𑀺 𑀦𑀻𑀮𑀸𑀤𑀺𑀯𑀲𑁂𑀦 𑀦𑀸𑀦𑀸𑀯𑀡𑁆𑀡𑁂, 𑀪𑀺𑀢𑁆𑀢𑀺𑀯𑀺𑀲𑁂𑀲𑀯𑀲𑁂𑀦 𑀦𑀸𑀦𑀸𑀲𑀡𑁆𑀞𑀸𑀦𑀭𑀽𑀧𑁂. ‘‘𑀫𑀳𑀸𑀧𑀺𑀝𑁆𑀞𑀺𑀓𑀓𑁄𑀚𑀯𑁂𑀢𑀺 𑀳𑀢𑁆𑀣𑀺𑀧𑀺𑀝𑁆𑀞𑀺𑀆𑀤𑀻𑀲𑀼 𑀅𑀢𑁆𑀣𑀭𑀺𑀢𑀩𑁆𑀩𑀢𑀸𑀬 ‘𑀫𑀳𑀸𑀧𑀺𑀝𑁆𑀞𑀺𑀓𑀸’𑀢𑀺 𑀮𑀤𑁆𑀥𑀲𑀫𑀜𑁆𑀜𑁂 𑀓𑁄𑀚𑀯𑁂’’𑀢𑀺 𑀯𑀤𑀦𑁆𑀢𑀺. 𑀓𑀼𑀢𑁆𑀢𑀓𑁂 𑀧𑀦 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁, ‘‘𑀘𑀢𑀼𑀭𑀗𑁆𑀕𑀼𑀮𑀸𑀥𑀺𑀓𑀧𑀼𑀧𑁆𑀨𑀸 𑀫𑀳𑀸𑀧𑀺𑀝𑁆𑀞𑀺𑀓𑀓𑁄𑀚𑀯𑀸’’𑀢𑀺𑀧𑀺 𑀯𑀤𑀦𑁆𑀢𑀺. 𑀳𑀢𑁆𑀣𑀢𑁆𑀣𑀭𑀅𑀲𑁆𑀲𑀢𑁆𑀣𑀭𑀸 𑀳𑀢𑁆𑀣𑀺𑀅𑀲𑁆𑀲𑀧𑀺𑀝𑁆𑀞𑀻𑀲𑀼 𑀅𑀢𑁆𑀣𑀭𑀺𑀢𑀩𑁆𑀩𑀸 𑀳𑀢𑁆𑀣𑀺𑀅𑀲𑁆𑀲𑀭𑀽𑀧𑀯𑀺𑀘𑀺𑀢𑁆𑀢𑀸 𑀘 𑀅𑀢𑁆𑀣𑀭𑀓𑀸. 𑀲𑀻𑀳𑀢𑁆𑀣𑀭𑀓𑀸𑀤𑀬𑁄 𑀧𑀦 𑀲𑀻𑀳𑀭𑀽𑀧𑀸𑀤𑀺𑀯𑀺𑀘𑀺𑀢𑁆𑀢𑀸 𑀏𑀯 𑀅𑀢𑁆𑀣𑀭𑀓𑀸. 𑀘𑀺𑀢𑁆𑀢𑀢𑁆𑀣𑀭𑀓𑀁 𑀦𑀸𑀦𑀸𑀯𑀺𑀥𑀭𑀽𑀧𑁂𑀳𑀺 𑀘𑁂𑀯 𑀦𑀸𑀦𑀸𑀯𑀺𑀥𑀫𑀸𑀮𑀸𑀓𑀫𑁆𑀫𑀸𑀤𑀻𑀳𑀺 𑀘 𑀯𑀺𑀘𑀺𑀢𑁆𑀢𑀁 𑀅𑀢𑁆𑀣𑀭𑀓𑀁.

𑀉𑀧𑀥𑀸𑀦𑀦𑁆𑀢𑀺 𑀅𑀧𑀲𑁆𑀲𑀬𑀦𑀁. 𑀉𑀧𑀤𑀳𑀺𑀢𑁆𑀯𑀸𑀢𑀺 𑀅𑀧𑀲𑁆𑀲𑀬𑀬𑁄𑀕𑁆𑀕𑀪𑀸𑀯𑁂𑀦 𑀞𑀧𑁂𑀢𑁆𑀯𑀸. 𑀕𑀦𑁆𑀥𑁂𑀳𑀺 𑀓𑀢𑀫𑀸𑀮𑀸 𑀕𑀦𑁆𑀥𑀤𑀸𑀫𑀁. 𑀢𑀫𑀸𑀮𑀧𑀢𑁆𑀢𑀸𑀤𑀻𑀳𑀺 𑀓𑀢𑀫𑀸𑀮𑀸 𑀧𑀢𑁆𑀢𑀤𑀸𑀫𑀁. 𑀆𑀤𑀺-𑀲𑀤𑁆𑀤𑁂𑀦 𑀳𑀺𑀗𑁆𑀕𑀼𑀮𑀢𑀓𑁆𑀓𑁄𑀮𑀚𑀸𑀢𑀺𑀨𑀮𑀚𑀸𑀢𑀺𑀧𑀼𑀧𑁆𑀨𑀸𑀤𑀻𑀳𑀺 𑀓𑀢𑀤𑀸𑀫𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀮𑁆𑀮𑀗𑁆𑀓𑀸𑀓𑀸𑀭𑁂𑀦 𑀓𑀢𑀧𑀻𑀞𑀁 𑀧𑀮𑁆𑀮𑀗𑁆𑀓𑀧𑀻𑀞𑀁. 𑀢𑀻𑀲𑀼 𑀧𑀲𑁆𑀲𑁂𑀲𑀼 𑀏𑀓𑀧𑀲𑁆𑀲𑁂 𑀏𑀯 𑀯𑀸 𑀲𑀉𑀧𑀲𑁆𑀲𑀬𑀁 𑀅𑀧𑀲𑁆𑀲𑀬𑀧𑀻𑀞𑀁. 𑀅𑀦𑀧𑀲𑁆𑀲𑀬𑀁 𑀫𑀼𑀡𑁆𑀟𑀧𑀻𑀞𑀁. 𑀬𑁄𑀚𑀦𑀸𑀯𑀝𑁆𑀝𑁂𑀢𑀺 𑀬𑁄𑀚𑀦𑀧𑀭𑀺𑀓𑁆𑀔𑁂𑀧𑁄𑀓𑀸𑀲𑁂.

𑀲𑀁𑀯𑀺𑀥𑀸𑀬𑀸𑀢𑀺 𑀅𑀦𑁆𑀢𑀭𑀯𑀸𑀲𑀓𑀲𑁆𑀲 𑀓𑁄𑀡𑀧𑀤𑁂𑀲𑀁 𑀇𑀢𑀭𑀧𑀤𑁂𑀲𑀜𑁆𑀘 𑀲𑀫𑀁 𑀓𑀢𑁆𑀯𑀸 𑀯𑀺𑀥𑀸𑀬. 𑀢𑁂𑀦𑀸𑀳 𑁋 ‘‘𑀓𑀢𑁆𑀢𑀭𑀺𑀬𑀸 𑀧𑀤𑀼𑀫𑀁 𑀓𑀦𑁆𑀢𑁂𑀦𑁆𑀢𑁄 𑀯𑀺𑀬𑀸’’𑀢𑀺, ‘‘𑀢𑀺𑀫𑀡𑁆𑀟𑀮𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑁄’’𑀢𑀺 𑀘. 𑀬𑀲𑁆𑀫𑀸 𑀩𑀼𑀤𑁆𑀥𑀸𑀦𑀁 𑀭𑀽𑀧𑀲𑀫𑁆𑀧𑀤𑀸 𑀯𑀺𑀬 𑀆𑀓𑀧𑁆𑀧𑀲𑀫𑁆𑀧𑀤𑀸𑀧𑀺 𑀧𑀭𑀫𑀼𑀓𑁆𑀓𑀁𑀲𑀢𑀁 𑀕𑀢𑀸, 𑀢𑀲𑁆𑀫𑀸 𑀢𑀤𑀸 𑀪𑀕𑀯𑀸 𑀏𑀯𑀁 𑀲𑁄𑀪𑁂𑀬𑁆𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀼𑀯𑀡𑁆𑀡𑀧𑀸𑀫𑀗𑁆𑀕𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀅𑀲𑀫𑁂𑀦 𑀩𑀼𑀤𑁆𑀥𑀯𑁂𑀲𑁂𑀦𑀸’’𑀢𑀺𑀆𑀤𑀺𑀦𑀸 ¶ 𑀢𑀤𑀸 𑀪𑀕𑀯𑀸 𑀩𑀼𑀤𑁆𑀥𑀸𑀦𑀼𑀪𑀸𑀯𑀲𑁆𑀲 𑀦𑀺𑀕𑀼𑀳𑀦𑁂 𑀓𑀸𑀭𑀡𑀸𑀪𑀸𑀯𑀢𑁄 𑀢𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀤𑁂𑀯𑀫𑀦𑀼𑀲𑁆𑀲𑀦𑀸𑀕𑀬𑀓𑁆𑀔𑀕𑀦𑁆𑀥𑀩𑁆𑀩𑀸𑀤𑀻𑀦𑀁 𑀧𑀲𑀸𑀤𑀚𑀦𑀦𑀢𑁆𑀣𑀁 𑀅𑀢𑁆𑀢𑀦𑁄 𑀲𑀪𑀸𑀯𑀧𑀓𑀢𑀺𑀬𑀸𑀯 𑀓𑀧𑀺𑀮𑀯𑀢𑁆𑀣𑀼𑀁 𑀧𑀸𑀯𑀺𑀲𑀻𑀢𑀺 𑀤𑀲𑁆𑀲𑁂𑀢𑀺. 𑀩𑀼𑀤𑁆𑀥𑀸𑀦𑀁 𑀓𑀸𑀬𑀧𑀪𑀸 𑀦𑀸𑀫 𑀧𑀓𑀢𑀺𑀬𑀸 𑀅𑀲𑀻𑀢𑀺𑀳𑀢𑁆𑀣𑀫𑀢𑁆𑀢𑀧𑀤𑁂𑀲𑀁 𑀯𑀺𑀲𑀭𑀢𑀻𑀢𑀺 𑀆𑀳 ‘‘𑀅𑀲𑀻𑀢𑀺𑀳𑀢𑁆𑀣𑀝𑁆𑀞𑀸𑀦𑀁 𑀅𑀕𑁆𑀕𑀳𑁂𑀲𑀻’’𑀢𑀺. 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀫𑀜𑁆𑀚𑀺𑀝𑁆𑀞𑀧𑀪𑀲𑁆𑀲𑀭𑀸𑀦𑀁 𑀯𑀲𑁂𑀦 𑀙𑀩𑁆𑀩𑀡𑁆𑀡𑀸 𑀩𑀼𑀤𑁆𑀥𑀭𑀲𑁆𑀫𑀺𑀬𑁄.

𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑁄𑀢𑀺 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀲𑀸𑀔𑀕𑁆𑀕𑀸 𑀲𑀫𑀦𑁆𑀢𑀢𑁄 𑀨𑀼𑀮𑁆𑀮𑁄 𑀯𑀺𑀓𑀲𑀺𑀢𑁄. 𑀧𑀝𑀺𑀧𑀸𑀝𑀺𑀬𑀸 𑀞𑀧𑀺𑀢𑀸𑀦𑀦𑁆𑀢𑀺𑀆𑀤𑀺 𑀧𑀭𑀺𑀓𑀧𑁆𑀧𑀽𑀧𑀫𑀸, 𑀬𑀣𑀸 𑀢𑀁…𑀧𑁂… 𑀅𑀮𑀗𑁆𑀓𑀢𑀁 𑀅𑀜𑁆𑀜𑀁 𑀯𑀺𑀭𑁄𑀘𑀢𑀺, 𑀏𑀯𑀁 𑀯𑀺𑀭𑁄𑀘𑀺𑀢𑁆𑀣, 𑀲𑀫𑀢𑀺𑀁𑀲𑀸𑀬 𑀧𑀸𑀭𑀫𑀺𑀢𑀸𑀳𑀺 𑀅𑀪𑀺𑀲𑀗𑁆𑀔𑀢𑀢𑁆𑀢𑀸 𑀏𑀯𑀁 𑀯𑀺𑀭𑁄𑀘𑀺𑀢𑁆𑀣𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀧𑀜𑁆𑀘𑀯𑀻𑀲𑀢𑀺𑀬𑀸 𑀕𑀗𑁆𑀕𑀸𑀦𑀦𑁆𑀢𑀺 𑀲𑀢𑀫𑀼𑀔𑀸 𑀳𑀼𑀢𑁆𑀯𑀸 𑀲𑀫𑀼𑀤𑁆𑀤𑀁 𑀧𑀯𑀺𑀝𑁆𑀞𑀸𑀬 𑀫𑀳𑀸𑀕𑀗𑁆𑀕𑀸𑀬 𑀫𑀳𑀦𑁆𑀢𑀫𑀳𑀦𑁆𑀢𑀸𑀦𑀁 𑀕𑀗𑁆𑀕𑀸𑀦𑀁 𑀧𑀜𑁆𑀘𑀯𑀻𑀲𑀢𑀻’’𑀢𑀺 𑀯𑀤𑀦𑁆𑀢𑀺. 𑀧𑀧𑀜𑁆𑀘𑀲𑀽𑀤𑀦𑀺𑀬𑀁 (𑀫. 𑀦𑀺. 𑀅𑀝𑁆𑀞. 𑁨.𑁨𑁨) ‘‘𑀧𑀜𑁆𑀘𑀯𑀻𑀲𑀢𑀺𑀬𑀸 𑀦𑀤𑀻𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀕𑀗𑁆𑀕𑀸𑀤𑀻𑀦𑀁 𑀘𑀦𑁆𑀤𑀪𑀸𑀕𑀸𑀧𑀭𑀺𑀬𑁄𑀲𑀸𑀦𑀸𑀦𑀁 𑀧𑀜𑁆𑀘𑀯𑀻𑀲𑀢𑀺𑀬𑀸 𑀫𑀳𑀸𑀦𑀤𑀻𑀦𑀦𑁆𑀢𑀺 𑀅𑀢𑁆𑀣𑁄. 𑀧𑀭𑀺𑀓𑀧𑁆𑀧𑀯𑀘𑀦𑀜𑁆𑀳𑁂𑀢𑀁. 𑀲𑀫𑁆𑀪𑀺𑀚𑁆𑀚𑀸𑀢𑀺 𑀲𑀫𑁆𑀪𑁂𑀤𑀁 𑀫𑀺𑀲𑁆𑀲𑀻𑀪𑀸𑀯𑀁 𑀧𑀢𑁆𑀯𑀸 𑀫𑀼𑀔𑀤𑁆𑀯𑀸𑀭𑁂𑀢𑀺 𑀲𑀫𑀼𑀤𑁆𑀤𑀁 𑀧𑀯𑀺𑀝𑁆𑀞𑀝𑁆𑀞𑀸𑀦𑁂.

𑀦𑀸𑀕𑀲𑀼𑀧𑀡𑁆𑀡𑀕𑀦𑁆𑀥𑀩𑁆𑀩𑀬𑀓𑁆𑀔𑀸𑀤𑀻𑀦𑀦𑁆𑀢𑀺𑀆𑀤𑀺 ¶ 𑀧𑀭𑀺𑀓𑀧𑁆𑀧𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀳𑀲𑁆𑀲𑁂𑀦𑀸𑀢𑀺 𑀧𑀤𑀲𑀳𑀲𑁆𑀲𑁂𑀦, 𑀪𑀸𑀡𑀯𑀸𑀭𑀧𑁆𑀧𑀫𑀸𑀡𑁂𑀦 𑀕𑀦𑁆𑀣𑁂𑀦𑀸𑀢𑀺 𑀅𑀢𑁆𑀣𑁄.

𑀓𑀫𑁆𑀧𑀬𑀦𑁆𑀢𑁄 𑀯𑀲𑀼𑀦𑁆𑀥𑀭𑀦𑁆𑀢𑀺 𑀅𑀢𑁆𑀢𑀦𑁄 𑀕𑀼𑀡𑀯𑀺𑀲𑁂𑀲𑁂𑀳𑀺 𑀧𑀣𑀯𑀻𑀓𑀫𑁆𑀫𑀁 𑀉𑀦𑁆𑀦𑀸𑀤𑁂𑀦𑁆𑀢𑁄, 𑀏𑀯𑀁𑀪𑀽𑀢𑁄𑀧𑀺 𑀅𑀳𑁂𑀞𑀬𑀦𑁆𑀢𑁄 𑀧𑀸𑀡𑀸𑀦𑀺. 𑀲𑀩𑁆𑀩𑀧𑀤𑀓𑁆𑀔𑀺𑀡𑀢𑁆𑀢𑀸 𑀩𑀼𑀤𑁆𑀥𑀸𑀦𑀁 𑀤𑀓𑁆𑀔𑀺𑀡𑀁 𑀧𑀞𑀫𑀁 𑀧𑀸𑀤𑀁 𑀉𑀤𑁆𑀥𑀭𑀦𑁆𑀢𑁄. 𑀲𑀫𑀁 𑀲𑀫𑁆𑀨𑀼𑀲𑀢𑁂 𑀪𑀽𑀫𑀺𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀸𑀬. 𑀬𑀤𑀺𑀧𑀺 𑀪𑀽𑀫𑀺𑀁 𑀲𑀫𑀁 𑀨𑀼𑀲𑀢𑀺, 𑀭𑀚𑀲𑀸 𑀦𑀼𑀧𑀮𑀺𑀧𑁆𑀧𑀢𑀺 𑀲𑀼𑀔𑀼𑀫𑀢𑁆𑀢𑀸 𑀙𑀯𑀺𑀬𑀸. 𑀦𑀺𑀦𑁆𑀦𑀝𑁆𑀞𑀸𑀦𑀁 𑀉𑀦𑁆𑀦𑀫𑀢𑀻𑀢𑀺𑀆𑀤𑀺 𑀩𑀼𑀤𑁆𑀥𑀸𑀦𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀸𑀲𑀗𑁆𑀔𑀸𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀧𑀝𑀺𑀮𑀸𑀪𑀲𑁆𑀲 𑀦𑀺𑀲𑁆𑀲𑀦𑁆𑀤𑀨𑀮𑀁. 𑀦𑀸𑀢𑀺𑀤𑀽𑀭𑁂 𑀉𑀤𑁆𑀥𑀭𑀢𑀻𑀢𑀺 𑀅𑀢𑀺𑀤𑀽𑀭𑁂 𑀞𑀧𑁂𑀢𑀼𑀁 𑀦 𑀉𑀤𑁆𑀥𑀭𑀢𑀺. 𑀦𑀘𑁆𑀘𑀸𑀲𑀦𑁆𑀦𑁂 𑀘 𑀦𑀺𑀓𑁆𑀔𑀺𑀧𑀦𑁆𑀢𑀺 𑀅𑀘𑁆𑀘𑀸𑀲𑀦𑁆𑀦𑁂 𑀘 𑀞𑀸𑀦𑁂 𑀅𑀦𑀺𑀓𑁆𑀔𑀺𑀧𑀦𑁆𑀢𑁄 𑀦𑀺𑀬𑁆𑀬𑀸𑀢𑀺. 𑀳𑀸𑀲𑀬𑀦𑁆𑀢𑁄 𑀲𑀤𑁂𑀯𑀓𑁂 𑀮𑁄𑀓𑁂 𑀢𑁄𑀲𑁂𑀦𑁆𑀢𑁄. 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀘𑀭𑀢𑀻𑀢𑀺 𑀘𑀢𑀼𑀘𑀸𑀭𑀻.

𑀩𑀼𑀤𑁆𑀥𑀸𑀦𑀼𑀪𑀸𑀯𑀲𑁆𑀲 𑀧𑀓𑀸𑀲𑀦𑀯𑀲𑁂𑀦 𑀕𑀢𑀢𑁆𑀢𑀸 𑀯𑀡𑁆𑀡𑀓𑀸𑀮𑁄 𑀦𑀸𑀫 𑀏𑀲. 𑀲𑀭𑀻𑀭𑀯𑀡𑁆𑀡𑁂 𑀯𑀸 𑀕𑀼𑀡𑀯𑀡𑁆𑀡𑁂 𑀯𑀸 𑀓𑀣𑀺𑀬𑀫𑀸𑀦𑁂 𑀤𑀼𑀓𑁆𑀓𑀣𑀺𑀢𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀅𑀧𑁆𑀧𑀫𑀸𑀡𑀯𑀡𑁆𑀡𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄, 𑀩𑀼𑀤𑁆𑀥𑀕𑀼𑀡𑀲𑀁𑀯𑀡𑁆𑀡𑀦𑀸 𑀚𑀸𑀦𑀦𑁆𑀢𑀲𑁆𑀲 𑀬𑀣𑀸𑀭𑀤𑁆𑀥𑀲𑀁𑀯𑀡𑁆𑀡𑀦𑀁𑀬𑁂𑀯 ¶ 𑀅𑀦𑀼𑀧𑀯𑀺𑀲𑀢𑀺. 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂𑀦𑀸𑀢𑀺 𑀕𑀦𑁆𑀣𑀺𑀢𑁆𑀯𑀸 𑀕𑀳𑀺𑀢𑀤𑀼𑀓𑀽𑀮𑀯𑀢𑁆𑀣𑁂𑀦.

𑀦𑀸𑀕𑀯𑀺𑀓𑁆𑀓𑀦𑁆𑀢𑀘𑀸𑀭𑀡𑁄𑀢𑀺 𑀳𑀢𑁆𑀣𑀺𑀦𑀸𑀕𑀲𑀤𑀺𑀲𑀧𑀤𑀦𑀺𑀓𑁆𑀔𑁂𑀧𑁄. 𑀲𑀢𑀧𑀼𑀜𑁆𑀜𑀮𑀓𑁆𑀔𑀡𑁄𑀢𑀺 𑀅𑀦𑁂𑀓𑀲𑀢𑀧𑀼𑀜𑁆𑀜𑀸𑀪𑀺𑀦𑀺𑀩𑁆𑀩𑀢𑁆𑀢𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑁄. 𑀫𑀡𑀺𑀯𑁂𑀭𑁄𑀘𑀦𑁄 𑀬𑀣𑀸𑀢𑀺 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀫𑀡𑀺𑀧𑀭𑀺𑀯𑀸𑀭𑀺𑀢𑁄 𑀅𑀢𑀺𑀯𑀺𑀬 𑀯𑀺𑀭𑁄𑀘𑀫𑀸𑀦𑁄 𑀯𑀺𑀚𑁆𑀚𑁄𑀢𑀫𑀸𑀦𑁄 𑀫𑀡𑀺 𑀯𑀺𑀬. ‘‘𑀯𑁂𑀭𑁄𑀘𑀦𑁄 𑀦𑀸𑀫 𑀏𑀓𑁄 𑀫𑀡𑀻’’𑀢𑀺 𑀓𑁂𑀘𑀺. 𑀫𑀳𑀸𑀲𑀸𑀮𑁄𑀯𑀸𑀢𑀺 𑀫𑀳𑀦𑁆𑀢𑁄 𑀲𑀸𑀮𑀭𑀼𑀓𑁆𑀔𑁄 𑀯𑀺𑀬, 𑀲𑀼𑀤𑁆𑀥𑀝𑁆𑀞𑀺𑀢𑁄 𑀓𑁄𑀯𑀺𑀴𑀸𑀭𑀸𑀤𑀺 𑀫𑀳𑀸𑀭𑀼𑀓𑁆𑀔𑁄 𑀯𑀺𑀬 𑀯𑀸. 𑀧𑀤𑀼𑀫𑁄 𑀓𑁄𑀓𑀦𑀤𑁄 𑀬𑀣𑀸𑀢𑀺 𑀓𑁄𑀓𑀦𑀤𑀲𑀗𑁆𑀔𑀸𑀢𑀁 𑀫𑀳𑀸𑀧𑀤𑀼𑀫𑀁 𑀯𑀺𑀬, 𑀯𑀺𑀓𑀲𑀫𑀸𑀦𑀧𑀤𑀼𑀫𑀁 𑀯𑀺𑀬 𑀯𑀸.

𑀆𑀓𑀸𑀲𑀕𑀗𑁆𑀕𑀁 𑀑𑀢𑀸𑀭𑁂𑀦𑁆𑀢𑁄 𑀯𑀺𑀬𑀸𑀢𑀺𑀆𑀤𑀺 𑀢𑀲𑁆𑀲𑀸 𑀧𑀓𑀺𑀡𑁆𑀡𑀓𑀓𑀣𑀸𑀬 𑀅𑀜𑁆𑀜𑁂𑀲𑀁 𑀲𑀼𑀤𑀼𑀓𑁆𑀓𑀭𑀪𑀸𑀯𑀤𑀲𑁆𑀲𑀦𑀜𑁆𑀘𑁂𑀯 𑀲𑀼𑀡𑀦𑁆𑀢𑀸𑀦𑀁 𑀅𑀘𑁆𑀘𑀦𑁆𑀢𑀲𑀼𑀔𑀸𑀯𑀳𑀪𑀸𑀯𑀤𑀲𑁆𑀲𑀦𑀜𑁆𑀘. 𑀧𑀣𑀯𑁄𑀚𑀁 𑀆𑀓𑀟𑁆𑀠𑀦𑁆𑀢𑁄 𑀯𑀺𑀬𑀸𑀢𑀺 𑀦𑀸𑀴𑀺𑀬𑀦𑁆𑀢𑀁 𑀬𑁄𑀚𑁂𑀢𑁆𑀯𑀸 𑀫𑀳𑀸𑀧𑀣𑀯𑀺𑀬𑀸 𑀳𑁂𑀝𑁆𑀞𑀺𑀫𑀢𑀮𑁂 𑀧𑀧𑁆𑀧𑀝𑀓𑁄𑀚𑀁 𑀉𑀤𑁆𑀥𑀁 𑀫𑀼𑀔𑀁 𑀓𑀢𑁆𑀯𑀸 𑀆𑀓𑀟𑁆𑀠𑀦𑁆𑀢𑁄 𑀯𑀺𑀬. 𑀬𑁄𑀚𑀦𑀺𑀓𑀦𑁆𑀢𑀺 𑀬𑁄𑀚𑀦𑀧𑀫𑀸𑀡𑀁. 𑀫𑀥𑀼𑀪𑀡𑁆𑀟𑀦𑁆𑀢𑀺 𑀫𑀥𑀼𑀧𑀝𑀮𑀁.

𑀫𑀳𑀦𑁆𑀢𑀦𑁆𑀢𑀺 𑀯𑀺𑀧𑀼𑀮𑀁 𑀉𑀴𑀸𑀭𑀧𑀼𑀜𑁆𑀜𑀁. 𑀲𑀩𑁆𑀩𑀤𑀸𑀦𑀁 𑀤𑀺𑀦𑁆𑀦𑀫𑁂𑀯 𑀳𑁄𑀢𑀻𑀢𑀺 𑀲𑀩𑁆𑀩𑀫𑁂𑀯 𑀧𑀘𑁆𑀘𑀬𑀚𑀸𑀢𑀁 𑀆𑀯𑀸𑀲𑀤𑀸𑀬𑀓𑁂𑀦 𑀤𑀺𑀦𑁆𑀦𑀫𑁂𑀯 𑀳𑁄𑀢𑀺. 𑀢𑀣𑀸 𑀳𑀺 𑀤𑁆𑀯𑁂 𑀢𑀬𑁄 𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀺𑀜𑁆𑀘𑀺 𑀅𑀮𑀤𑁆𑀥𑀸 𑀆𑀕𑀢𑀲𑁆𑀲𑀧𑀺 ¶ 𑀙𑀸𑀬𑀽𑀤𑀓𑀲𑀫𑁆𑀧𑀦𑁆𑀦𑀁 𑀆𑀭𑀸𑀫𑀁 𑀧𑀯𑀺𑀲𑀺𑀢𑁆𑀯𑀸 𑀦𑁆𑀳𑀸𑀬𑀺𑀢𑁆𑀯𑀸 𑀧𑀝𑀺𑀲𑁆𑀲𑀬𑁂 𑀫𑀼𑀳𑀼𑀢𑁆𑀢𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀉𑀝𑁆𑀞𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀓𑀸𑀬𑁂 𑀩𑀮𑀁 𑀆𑀳𑀭𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑀁 𑀯𑀺𑀬 𑀳𑁄𑀢𑀺. 𑀩𑀳𑀺 𑀯𑀺𑀘𑀭𑀦𑁆𑀢𑀲𑁆𑀲 𑀘 𑀓𑀸𑀬𑁂 𑀯𑀡𑁆𑀡𑀥𑀸𑀢𑀼 𑀯𑀸𑀢𑀸𑀢𑀧𑁂𑀳𑀺 𑀓𑀺𑀮𑀫𑀢𑀺, 𑀧𑀝𑀺𑀲𑁆𑀲𑀬𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀫𑀼𑀳𑀼𑀢𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀯𑀺𑀲𑀪𑀸𑀕𑀲𑀦𑁆𑀢𑀢𑀺 𑀯𑀽𑀧𑀲𑀫𑁆𑀫𑀢𑀺, 𑀲𑀪𑀸𑀕𑀲𑀦𑁆𑀢𑀢𑀺 𑀧𑀢𑀺𑀝𑁆𑀞𑀸𑀢𑀺, 𑀯𑀡𑁆𑀡𑀥𑀸𑀢𑀼 𑀆𑀳𑀭𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑀸 𑀯𑀺𑀬 𑀳𑁄𑀢𑀺, 𑀩𑀳𑀺 𑀯𑀺𑀘𑀭𑀦𑁆𑀢𑀲𑁆𑀲 𑀘 𑀧𑀸𑀤𑁂 𑀓𑀡𑁆𑀝𑀓𑀸 𑀯𑀺𑀚𑁆𑀛𑀦𑁆𑀢𑀺, 𑀔𑀸𑀡𑀼 𑀧𑀳𑀭𑀢𑀺, 𑀲𑀭𑀻𑀲𑀧𑀸𑀤𑀺𑀧𑀭𑀺𑀲𑁆𑀲𑀬𑀸 𑀘𑁂𑀯 𑀘𑁄𑀭𑀪𑀬𑀜𑁆𑀘 𑀉𑀧𑁆𑀧𑀚𑁆𑀚𑀢𑀺, 𑀧𑀝𑀺𑀲𑁆𑀲𑀬𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀧𑀦 𑀲𑀩𑁆𑀩𑁂𑀧𑁂𑀢𑁂 𑀧𑀭𑀺𑀲𑁆𑀲𑀬𑀸 𑀦 𑀳𑁄𑀦𑁆𑀢𑀺. 𑀲𑀚𑁆𑀛𑀸𑀬𑀦𑁆𑀢𑀲𑁆𑀲 𑀥𑀫𑁆𑀫𑀧𑀻𑀢𑀺𑀲𑀼𑀔𑀁, 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀉𑀧𑀲𑀫𑀲𑀼𑀔𑀁 𑀉𑀧𑁆𑀧𑀚𑁆𑀚𑀢𑀺 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑁂𑀧𑀸𑀪𑀸𑀯𑀢𑁄. 𑀩𑀳𑀺 𑀯𑀺𑀘𑀭𑀦𑁆𑀢𑀲𑁆𑀲 𑀘 𑀓𑀸𑀬𑁂 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀅𑀓𑁆𑀔𑀻𑀦𑀺 𑀨𑀦𑁆𑀤𑀦𑁆𑀢𑀺, 𑀲𑁂𑀦𑀸𑀲𑀦𑀁 𑀧𑀯𑀺𑀲𑀦𑀓𑁆𑀔𑀡𑁂 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀦 𑀧𑀜𑁆𑀜𑀸𑀬𑀦𑁆𑀢𑀺, 𑀫𑀼𑀳𑀼𑀢𑁆𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀧𑀦 𑀅𑀓𑁆𑀔𑀺𑀧𑀲𑀸𑀤𑁄 𑀆𑀳𑀭𑀺𑀢𑁆𑀯𑀸 𑀧𑀓𑁆𑀔𑀺𑀢𑁆𑀢𑁄 𑀯𑀺𑀬 𑀳𑁄𑀢𑀺, 𑀤𑁆𑀯𑀸𑀭𑀯𑀸𑀢𑀧𑀸𑀦𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀧𑀜𑁆𑀜𑀸𑀬𑀦𑁆𑀢𑀺. 𑀏𑀢𑀲𑁆𑀫𑀺𑀜𑁆𑀘 𑀆𑀯𑀸𑀲𑁂 𑀯𑀲𑀦𑁆𑀢𑀁 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀆𑀯𑀸𑀲𑀤𑀸𑀦𑀲𑁆𑀫𑀺𑀜𑁆𑀳𑀺 𑀤𑀺𑀦𑁆𑀦𑁂 𑀲𑀩𑁆𑀩𑀤𑀸𑀦𑀁 𑀤𑀺𑀦𑁆𑀦𑀫𑁂𑀯 𑀳𑁄𑀢𑀻’’𑀢𑀺. 𑀪𑀽𑀫𑀝𑁆𑀞𑀓…𑀧𑁂… 𑀦 ¶ 𑀲𑀓𑁆𑀓𑀸𑀢𑀺 𑀅𑀬𑀫𑀢𑁆𑀣𑁄 𑀫𑀳𑀸𑀲𑀼𑀤𑀲𑁆𑀲𑀦𑀯𑀢𑁆𑀣𑀼𑀦𑀸 (𑀤𑀻. 𑀦𑀺. 𑁨.𑁨𑁪𑁧 𑀆𑀤𑀬𑁄) 𑀤𑀻𑀧𑁂𑀢𑀩𑁆𑀩𑁄. 𑀫𑀸𑀢𑀼𑀓𑀼𑀘𑁆𑀙𑀺 𑀅𑀲𑀫𑁆𑀩𑀸𑀥𑁄𑀯 𑀳𑁄𑀢𑀻𑀢𑀺 𑀅𑀬𑀫𑀢𑁆𑀣𑁄 𑀅𑀦𑁆𑀢𑀺𑀫𑀪𑀯𑀺𑀓𑀸𑀦𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀤𑀻𑀧𑁂𑀢𑀩𑁆𑀩𑁄.

𑀲𑀻𑀢𑀦𑁆𑀢𑀺 𑀅𑀚𑁆𑀛𑀢𑁆𑀢𑀁 𑀥𑀸𑀢𑀼𑀓𑁆𑀔𑁄𑀪𑀯𑀲𑁂𑀦 𑀯𑀸 𑀩𑀳𑀺𑀤𑁆𑀥𑀸 𑀉𑀢𑀼𑀯𑀺𑀧𑀭𑀺𑀡𑀸𑀫𑀯𑀲𑁂𑀦 𑀯𑀸 𑀉𑀧𑁆𑀧𑀚𑁆𑀚𑀦𑀓𑀲𑀻𑀢𑀁. 𑀉𑀡𑁆𑀳𑀦𑁆𑀢𑀺 𑀅𑀕𑁆𑀕𑀺𑀲𑀦𑁆𑀢𑀸𑀧𑀁, 𑀢𑀲𑁆𑀲 𑀘 𑀤𑀯𑀤𑀸𑀳𑀸𑀤𑀻𑀲𑀼 𑀲𑀫𑁆𑀪𑀯𑁄 𑀤𑀝𑁆𑀞𑀩𑁆𑀩𑁄. 𑀧𑀝𑀺𑀳𑀦𑁆𑀢𑀻𑀢𑀺 𑀧𑀝𑀺𑀳𑀦𑀢𑀺. 𑀬𑀣𑀸 𑀢𑀤𑀼𑀪𑀬𑀯𑀲𑁂𑀦 𑀓𑀸𑀬𑀘𑀺𑀢𑁆𑀢𑀸𑀦𑀁 𑀆𑀩𑀸𑀥𑁄 𑀦 𑀳𑀦𑀢𑀺, 𑀏𑀯𑀁 𑀓𑀭𑁄𑀢𑀺. 𑀲𑀻𑀢𑀼𑀡𑁆𑀳𑀩𑁆𑀪𑀸𑀳𑀢𑁂 𑀳𑀺 𑀲𑀭𑀻𑀭𑁂 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀪𑀺𑀓𑁆𑀔𑀼 𑀬𑁄𑀦𑀺𑀲𑁄 𑀧𑀤𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀯𑀸𑀴𑀫𑀺𑀕𑀸𑀦𑀻𑀢𑀺 𑀲𑀻𑀳𑀩𑁆𑀬𑀕𑁆𑀖𑀸𑀤𑀺𑀯𑀸𑀴𑀫𑀺𑀕𑁂. 𑀕𑀼𑀢𑁆𑀢𑀲𑁂𑀦𑀸𑀲𑀦𑀜𑁆𑀳𑀺 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀦𑀺𑀲𑀺𑀦𑁆𑀦𑀲𑁆𑀲 𑀢𑁂 𑀧𑀭𑀺𑀲𑁆𑀲𑀬𑀸 𑀦 𑀳𑁄𑀦𑁆𑀢𑀺. 𑀲𑀭𑀻𑀲𑀧𑁂𑀢𑀺 𑀬𑁂 𑀓𑁂𑀘𑀺 𑀲𑀭𑀦𑁆𑀢𑀸 𑀕𑀘𑁆𑀙𑀦𑁆𑀢𑁂 𑀤𑀻𑀖𑀚𑀸𑀢𑀺𑀓𑁂 𑀲𑀧𑁆𑀧𑀸𑀤𑀺𑀓𑁂 𑀅𑀜𑁆𑀜𑁂 𑀘 𑀢𑀣𑀸𑀭𑀽𑀧𑁂. 𑀫𑀓𑀲𑁂𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁, 𑀟𑀁𑀲𑀸𑀤𑀻𑀦𑀁 𑀏𑀢𑁂𑀦𑁂𑀯 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀺𑀲𑀺𑀭𑁂𑀢𑀺 𑀲𑀻𑀢𑀓𑀸𑀮𑀯𑀲𑁂𑀦 𑀲𑀢𑁆𑀢𑀸𑀳𑀯𑀤𑁆𑀤𑀮𑀺𑀓𑀸𑀤𑀺𑀯𑀲𑁂𑀦 𑀘 𑀉𑀧𑁆𑀧𑀦𑁆𑀦𑁂 𑀲𑀺𑀲𑀺𑀭𑀲𑀫𑁆𑀨𑀲𑁆𑀲𑁂. 𑀯𑀼𑀝𑁆𑀞𑀺𑀬𑁄𑀢𑀺 𑀬𑀤𑀸 𑀢𑀤𑀸 𑀉𑀧𑁆𑀧𑀦𑁆𑀦𑀸 𑀯𑀲𑁆𑀲𑀯𑀼𑀝𑁆𑀞𑀺𑀬𑁄 𑀧𑀝𑀺𑀳𑀦𑀢𑀻𑀢𑀺 𑀬𑁄𑀚𑀦𑀸.

𑀯𑀸𑀢𑀸𑀢𑀧𑁄 𑀖𑁄𑀭𑁄𑀢𑀺 𑀭𑀼𑀓𑁆𑀔𑀕𑀘𑁆𑀙𑀸𑀤𑀻𑀦𑀁 𑀉𑀩𑁆𑀩𑀳𑀦𑀪𑀜𑁆𑀚𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀖𑁄𑀭𑁄 𑀲𑀭𑀚𑀅𑀭𑀚𑀸𑀤𑀺𑀪𑁂𑀤𑁄 𑀯𑀸𑀢𑁄 𑀘𑁂𑀯 𑀕𑀺𑀫𑁆𑀳𑀧𑀭𑀺𑀴𑀸𑀳𑀲𑀫𑀬𑁂𑀲𑀼 𑀉𑀧𑁆𑀧𑀢𑁆𑀢𑀺𑀬𑀸 𑀖𑁄𑀭𑁄 𑀲𑀽𑀭𑀺𑀬𑀸𑀢𑀧𑁄 𑀘. 𑀧𑀝𑀺𑀳𑀜𑁆𑀜𑀢𑀻𑀢𑀺 𑀧𑀝𑀺𑀩𑀸𑀳𑀻𑀬𑀢𑀺. 𑀮𑁂𑀡𑀢𑁆𑀣𑀦𑁆𑀢𑀺 𑀦𑀸𑀦𑀸𑀭𑀫𑁆𑀫𑀡𑀢𑁄 𑀘𑀺𑀢𑁆𑀢𑀁 𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀝𑀺𑀲𑀮𑁆𑀮𑀸𑀡𑀸𑀭𑀸𑀫𑀢𑁆𑀣𑀁. 𑀲𑀼𑀔𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀧𑀭𑀺𑀲𑁆𑀲𑀬𑀸𑀪𑀸𑀯𑁂𑀦 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀁. 𑀛𑀸𑀬𑀺𑀢𑀼𑀦𑁆𑀢𑀺 𑀅𑀝𑁆𑀞𑀢𑀺𑀁𑀲𑀸𑀬 𑀆𑀭𑀫𑁆𑀫𑀡𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀺 ¶ 𑀘𑀺𑀢𑁆𑀢𑀁 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀲𑀫𑀸𑀤𑀳𑀦𑀯𑀲𑁂𑀦 𑀛𑀸𑀬𑀺𑀢𑀼𑀁. 𑀯𑀺𑀧𑀲𑁆𑀲𑀺𑀢𑀼𑀦𑁆𑀢𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑀼𑀁.

𑀯𑀺𑀳𑀸𑀭𑁂𑀢𑀺 𑀧𑀝𑀺𑀲𑁆𑀲𑀬𑁂. 𑀓𑀸𑀭𑀬𑁂𑀢𑀺 𑀓𑀸𑀭𑀸𑀧𑁂𑀬𑁆𑀬. 𑀭𑀫𑁆𑀫𑁂𑀢𑀺 𑀫𑀦𑁄𑀭𑀫𑁂. 𑀯𑀸𑀲𑀬𑁂𑀢𑁆𑀣 𑀩𑀳𑀼𑀲𑁆𑀲𑀼𑀢𑁂𑀢𑀺 𑀓𑀸𑀭𑁂𑀢𑁆𑀯𑀸 𑀧𑀦 𑀏𑀢𑁆𑀣 𑀯𑀺𑀳𑀸𑀭𑁂𑀲𑀼 𑀩𑀳𑀼𑀲𑁆𑀲𑀼𑀢𑁂 𑀲𑀻𑀮𑀯𑀦𑁆𑀢𑁂 𑀓𑀮𑁆𑀬𑀸𑀡𑀥𑀫𑁆𑀫𑁂 𑀦𑀺𑀯𑀸𑀲𑁂𑀬𑁆𑀬. 𑀢𑁂 𑀦𑀺𑀯𑀸𑀲𑁂𑀦𑁆𑀢𑁄 𑀧𑀦 𑀢𑁂𑀲𑀁 𑀩𑀳𑀼𑀲𑁆𑀲𑀼𑀢𑀸𑀦𑀁 𑀬𑀣𑀸 𑀧𑀘𑁆𑀘𑀬𑁂𑀳𑀺 𑀓𑀺𑀮𑀫𑀣𑁄 𑀦 𑀳𑁄𑀢𑀺. 𑀏𑀯𑀁 𑀅𑀦𑁆𑀦𑀜𑁆𑀘 𑀧𑀸𑀦𑀜𑁆𑀘 𑀯𑀢𑁆𑀣𑀲𑁂𑀦𑀸𑀲𑀦𑀸𑀦𑀺 𑀘 𑀤𑀤𑁂𑀬𑁆𑀬 𑀉𑀚𑀼𑀪𑀽𑀢𑁂𑀲𑀼 𑀅𑀚𑁆𑀛𑀸𑀲𑀬𑀲𑀫𑁆𑀧𑀦𑁆𑀦𑁂𑀲𑀼 𑀓𑀫𑁆𑀫𑀨𑀮𑀸𑀦𑀁 𑀭𑀢𑀦𑀢𑁆𑀢𑀬𑀕𑀼𑀡𑀸𑀦𑀜𑁆𑀘 𑀲𑀤𑁆𑀤𑀳𑀦𑁂𑀦 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸. 𑀇𑀤𑀸𑀦𑀺 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀽𑀧𑀓𑀸𑀭𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂 𑀢𑀲𑁆𑀲𑀸’’𑀢𑀺 𑀕𑀸𑀣𑀫𑀸𑀳. 𑀢𑀢𑁆𑀣 𑀢𑁂𑀢𑀺 𑀩𑀳𑀼𑀲𑁆𑀲𑀼𑀢𑀸. 𑀢𑀲𑁆𑀲𑀸𑀢𑀺 𑀉𑀧𑀸𑀲𑀓𑀲𑁆𑀲. 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀻𑀢𑀺 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀧𑀦𑀽𑀤𑀦𑀁 ¶ 𑀦𑀺𑀬𑁆𑀬𑀸𑀦𑀺𑀓𑀁 𑀥𑀫𑁆𑀫𑀁 𑀓𑀣𑁂𑀦𑁆𑀢𑀺. 𑀬𑀁 𑀲𑁄 𑀥𑀫𑁆𑀫𑀁 𑀇𑀥𑀜𑁆𑀜𑀸𑀬𑀸𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀬𑀁 𑀲𑀤𑁆𑀥𑀫𑁆𑀫𑀁 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀦𑁂𑀦 𑀚𑀸𑀦𑀺𑀢𑁆𑀯𑀸 𑀅𑀕𑁆𑀕𑀫𑀕𑁆𑀕𑀸𑀥𑀺𑀕𑀫𑁂𑀦 𑀅𑀦𑀸𑀲𑀯𑁄 𑀳𑀼𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺.

𑀆𑀯𑀸𑀲𑁂𑀢𑀺 𑀆𑀯𑀸𑀲𑀤𑀸𑀦𑁂. 𑀆𑀦𑀺𑀲𑀁𑀲𑁄𑀢𑀺 𑀉𑀤𑁆𑀭𑀬𑁄. 𑀧𑀽𑀚𑀸𑀲𑀓𑁆𑀓𑀸𑀭𑀯𑀲𑁂𑀦 𑀧𑀞𑀫𑀬𑀸𑀫𑁄 𑀔𑁂𑀧𑀺𑀢𑁄, 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀸𑀬 𑀅𑀧𑁆𑀧𑀸𑀯𑀲𑁂𑀲𑁄 𑀫𑀚𑁆𑀛𑀺𑀫𑀬𑀸𑀫𑁄 𑀕𑀢𑁄𑀢𑀺 𑀧𑀸𑀴𑀺𑀬𑀁 ‘‘𑀩𑀳𑀼𑀤𑁂𑀯 𑀭𑀢𑁆𑀢𑀺’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀅𑀢𑀺𑀭𑁂𑀓𑀢𑀭𑀁 𑀤𑀺𑀬𑀟𑁆𑀠𑀬𑀸𑀫’’𑀦𑁆𑀢𑀺. 𑀲𑀗𑁆𑀕𑀳𑀁 𑀦𑀸𑀭𑁄𑀳𑀢𑀺 𑀯𑀺𑀧𑀼𑀮𑀯𑀺𑀢𑁆𑀣𑀸𑀭𑀪𑀸𑀯𑀢𑁄. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀪𑀢𑁆𑀢𑀸𑀦𑀼𑀫𑁄𑀤𑀦𑀸𑀧𑀺 𑀣𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀯𑀼𑀘𑁆𑀘𑀫𑀸𑀦𑀸 𑀤𑀻𑀖𑀫𑀚𑁆𑀛𑀺𑀫𑀧𑀫𑀸𑀡𑀸𑀧𑀺 𑀳𑁄𑀢𑀺. 𑀢𑀣𑀸 𑀳𑀺 𑀲𑀼𑀨𑀼𑀲𑀺𑀢𑀁 𑀤𑀦𑁆𑀢𑀸𑀯𑀭𑀡𑀁, 𑀚𑀺𑀯𑁆𑀳𑀸 𑀢𑀦𑀼𑀓𑀸, 𑀪𑀯𑀗𑁆𑀕𑀧𑀭𑀺𑀯𑀸𑀲𑁄 𑀧𑀭𑀺𑀢𑁆𑀢𑁄, 𑀦𑀢𑁆𑀣𑀺 𑀯𑁂𑀕𑀸𑀬𑀺𑀢𑀁, 𑀦𑀢𑁆𑀣𑀺 𑀯𑀺𑀢𑁆𑀣𑀸𑀬𑀺𑀢𑀁, 𑀦𑀢𑁆𑀣𑀺 𑀅𑀩𑁆𑀬𑀸𑀯𑀝𑀫𑀦𑁄, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀲𑀫𑀼𑀧𑀩𑁆𑀬𑀽𑀴𑁆𑀳𑀁, 𑀅𑀧𑀭𑀺𑀓𑁆𑀔𑀬𑀸 𑀧𑀝𑀺𑀲𑀫𑁆𑀪𑀺𑀤𑀸.

𑀲𑀦𑁆𑀤𑀲𑁆𑀲𑁂𑀢𑁆𑀯𑀸𑀢𑀺𑀆𑀤𑀻𑀲𑀼 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀆𑀯𑀸𑀲𑀤𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀺𑀁 𑀓𑀣𑀁 𑀓𑀢𑁆𑀯𑀸. 𑀢𑀢𑁄 𑀧𑀭𑀁, 𑀫𑀳𑀸𑀭𑀸𑀚, 𑀇𑀢𑀺𑀧𑀺 𑀲𑀻𑀮𑀁, 𑀇𑀢𑀺𑀧𑀺 𑀲𑀫𑀸𑀥𑀺, 𑀇𑀢𑀺𑀧𑀺 𑀧𑀜𑁆𑀜𑀸𑀢𑀺 𑀲𑀻𑀮𑀸𑀤𑀺𑀕𑀼𑀡𑁂 𑀢𑁂𑀲𑀁 𑀲𑀫𑁆𑀫𑀸 𑀤𑀲𑁆𑀲𑁂𑀢𑁆𑀯𑀸 𑀳𑀢𑁆𑀣𑁂𑀦 𑀕𑀳𑁂𑀢𑁆𑀯𑀸 𑀯𑀺𑀬 𑀧𑀘𑁆𑀘𑀓𑁆𑀔𑀢𑁄 𑀧𑀓𑀸𑀲𑁂𑀢𑁆𑀯𑀸. 𑀲𑀫𑀸𑀤𑀧𑁂𑀢𑁆𑀯𑀸𑀢𑀺 𑀏𑀯𑀁 𑀲𑀻𑀮𑀁 𑀲𑀫𑀸𑀤𑀸𑀢𑀩𑁆𑀩𑀁, 𑀲𑀻𑀮𑁂 𑀧𑀢𑀺𑀝𑁆𑀞𑀺𑀢𑁂𑀦 𑀏𑀯𑀁 𑀲𑀫𑀸𑀥𑀺𑀧𑀜𑁆𑀜𑀸 𑀪𑀸𑀯𑁂𑀢𑀩𑁆𑀩𑀸𑀢𑀺 𑀬𑀣𑀸 𑀢𑁂 𑀲𑀻𑀮𑀸𑀤𑀺𑀕𑀼𑀡𑁂 𑀲𑀫𑁆𑀫𑀸 𑀆𑀤𑀺𑀬𑀦𑁆𑀢𑀺, 𑀢𑀣𑀸 𑀕𑀡𑁆𑀳𑀸𑀧𑁂𑀢𑁆𑀯𑀸. 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸𑀢𑀺 𑀬𑀣𑀸𑀲𑀫𑀸𑀤𑀺𑀦𑁆𑀦𑀁 𑀲𑀻𑀮𑀁 𑀲𑀼𑀯𑀺𑀲𑀼𑀤𑁆𑀥𑀁 𑀳𑁄𑀢𑀺, 𑀲𑀫𑀣𑀯𑀺𑀧𑀲𑁆𑀲𑀦𑀸 𑀘 𑀪𑀸𑀯𑀺𑀬𑀫𑀸𑀦𑀸 𑀬𑀣𑀸 𑀲𑀼𑀝𑁆𑀞𑀼 𑀯𑀺𑀲𑁄𑀥𑀺𑀢𑀸 𑀉𑀧𑀭𑀽𑀧𑀭𑀺 𑀯𑀺𑀲𑁂𑀲𑀸𑀯𑀳𑀸 𑀳𑁄𑀦𑁆𑀢𑀺, 𑀏𑀯𑀁 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀦𑀺𑀲𑀸𑀫𑀦𑀯𑀲𑁂𑀦 𑀯𑁄𑀤𑀸𑀧𑁂𑀢𑁆𑀯𑀸. 𑀲𑀫𑁆𑀧𑀳𑀁𑀲𑁂𑀢𑁆𑀯𑀸𑀢𑀺 𑀬𑀣𑀸𑀦𑀼𑀲𑀺𑀝𑁆𑀞𑀁 𑀞𑀺𑀢𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀲𑀫𑁆𑀧𑀢𑀺 𑀧𑀝𑀺𑀮𑀤𑁆𑀥𑀕𑀼𑀡𑀸𑀦𑀺𑀲𑀁𑀲𑁂𑀳𑀺 𑀘𑁂𑀯 𑀉𑀧𑀭𑀺𑀮𑀤𑁆𑀥𑀩𑁆𑀩𑀨𑀮𑀯𑀺𑀲𑁂𑀲𑁂𑀳𑀺 𑀘 𑀘𑀺𑀢𑁆𑀢𑀁 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀮𑀤𑁆𑀥𑀲𑁆𑀲𑀸𑀲𑀯𑀲𑁂𑀦 𑀲𑀼𑀝𑁆𑀞𑀼 𑀢𑁄𑀲𑁂𑀢𑁆𑀯𑀸. 𑀏𑀯𑀫𑁂𑀢𑁂𑀲𑀁 𑀧𑀤𑀸𑀦𑀁 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀓𑁆𑀬𑀭𑀸𑀚𑀸𑀦𑁄 𑀬𑁂𑀪𑀼𑀬𑁆𑀬𑁂𑀦 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸𑀬 𑀲𑀸𑀲𑀦𑁂 𑀮𑀤𑁆𑀥𑀲𑁆𑀲𑀸𑀤𑀸 𑀮𑀤𑁆𑀥𑀧𑁆𑀧𑀢𑀺𑀝𑁆𑀞𑀸 𑀘.

𑀉𑀧𑀲𑀕𑁆𑀕𑀲𑀤𑁆𑀤𑀸𑀦𑀁 ¶ 𑀅𑀦𑁂𑀓𑀢𑁆𑀣𑀢𑁆𑀢𑀸 𑀅𑀪𑀺-𑀲𑀤𑁆𑀤𑁄 𑀅𑀢𑀺-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄𑀧𑀺 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀪𑀺𑀓𑁆𑀓𑀦𑁆𑀢𑀸𑀢𑀺 𑀅𑀢𑀺𑀓𑁆𑀓𑀦𑁆𑀢𑀸’’𑀢𑀺.

𑀢𑀢𑁆𑀭 𑀓𑀺𑀭𑀸𑀢𑀺𑀆𑀤𑀺 𑀓𑁂𑀘𑀺𑀯𑀸𑀤𑁄𑀢𑀺 𑀩𑀤𑁆𑀥𑁄𑀧𑀺 𑀦 𑀳𑁄𑀢𑀺. 𑀢𑁂𑀦𑀸𑀳 ‘‘𑀅𑀓𑀸𑀭𑀡𑀫𑁂𑀢’’𑀦𑁆𑀢𑀺𑀆𑀤𑀺. 𑀓𑀸𑀬𑀘𑀺𑀢𑁆𑀢𑀮𑀳𑀼𑀢𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀇𑀤𑀁 𑀓𑀸𑀬𑀺𑀓𑀘𑁂𑀢𑀲𑀺𑀓𑀅𑀜𑁆𑀜𑀣𑀸𑀪𑀸𑀯𑀲𑁆𑀲 𑀓𑀸𑀭𑀡𑀯𑀘𑀦𑀁, 𑀮𑀳𑀼𑀢𑀸𑀤𑀺𑀉𑀧𑁆𑀧𑀦𑁆𑀦𑁂 𑀲𑀯𑀦𑀸𑀦𑀼𑀢𑁆𑀢𑀭𑀺𑀬𑀧𑀝𑀺𑀮𑀸𑀪𑁂𑀦 𑀮𑀤𑁆𑀥𑀩𑁆𑀩𑀥𑀫𑁆𑀫𑀢𑁆𑀣𑀯𑁂𑀤𑀲𑀫𑀥𑀺𑀕𑀫𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑀣𑀸 ¶ , 𑀬𑀣𑀸𑀯𑀼𑀲𑁄, 𑀪𑀺𑀓𑁆𑀔𑀼𑀦𑁄 𑀲𑀢𑁆𑀣𑀸 𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀅𑀜𑁆𑀜𑀢𑀭𑁄 𑀯𑀸 𑀕𑀭𑀼𑀝𑁆𑀞𑀸𑀦𑀺𑀓𑁄 𑀲𑀩𑁆𑀭𑀳𑁆𑀫𑀘𑀸𑀭𑀻, 𑀢𑀣𑀸 𑀢𑀣𑀸 𑀲𑁄 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚’’𑀦𑁆𑀢𑀺𑀆𑀤𑀺 (𑀤𑀻. 𑀦𑀺. 𑁩.𑁩𑁨𑁨, 𑁩𑁫𑁫; 𑀅. 𑀦𑀺. 𑁫.𑁨𑁬).

𑀧𑀺𑀝𑁆𑀞𑀺𑀯𑀸𑀢𑁄 𑀉𑀧𑁆𑀧𑀚𑁆𑀚𑀺 𑀉𑀧𑀸𑀤𑀺𑀦𑁆𑀦𑀲𑀭𑀻𑀭𑀲𑁆𑀲 𑀢𑀣𑀸𑀭𑀽𑀧𑀢𑁆𑀢𑀸 𑀲𑀗𑁆𑀔𑀸𑀭𑀸𑀦𑀜𑁆𑀘 𑀅𑀦𑀺𑀘𑁆𑀘𑀢𑀸𑀬 𑀤𑀼𑀓𑁆𑀔𑀸𑀦𑀼𑀩𑀦𑁆𑀥𑀢𑁆𑀢𑀸. 𑀅𑀓𑀸𑀭𑀡𑀁 𑀯𑀸 𑀏𑀢𑀦𑁆𑀢𑀺 𑀬𑁂𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁, 𑀢𑀫𑁂𑀯 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀺𑀢𑀼𑀁 ‘‘𑀧𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀓𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑀼𑀁 𑀧𑀳𑁄𑀢𑀺 𑀬𑀣𑀸 𑀢𑀁 𑀯𑁂𑀮𑀼𑀯𑀕𑀸𑀫𑀓𑁂. 𑀏𑀢𑁆𑀢𑀓𑁂 𑀞𑀸𑀦𑁂𑀢𑀺 𑀏𑀢𑁆𑀢𑀓𑁂 𑀞𑀸𑀦𑁂 𑀞𑀸𑀦𑀁 𑀦𑀺𑀧𑁆𑀨𑀦𑁆𑀦𑀦𑁆𑀢𑀺 𑀬𑁄𑀚𑀦𑀸. 𑀢𑀜𑁆𑀘 𑀔𑁄𑀢𑀺 𑀯𑀼𑀝𑁆𑀞𑀸𑀦𑀲𑀜𑁆𑀜𑀁 𑀘𑀺𑀢𑁆𑀢𑁂 𑀞𑀧𑀦𑀁. 𑀥𑀫𑁆𑀫𑀓𑀣𑀁 𑀲𑀼𑀡𑀫𑀸𑀦𑁄 𑀥𑀫𑁆𑀫𑀕𑀸𑀭𑀯𑁂𑀦.

𑀅𑀯𑀲𑁆𑀲𑀼𑀢𑀲𑁆𑀲𑀸𑀢𑀺 𑀅𑀯𑀲𑁆𑀲𑀼𑀢𑀪𑀸𑀯𑀲𑁆𑀲 𑀭𑀸𑀕𑀸𑀤𑀺𑀯𑀲𑁂𑀦. 𑀅𑀯𑀲𑁆𑀲𑀼𑀢𑀲𑁆𑀲 𑀓𑀸𑀭𑀡𑀦𑁆𑀢𑀺 𑀢𑀺𑀦𑁆𑀢𑀪𑀸𑀯𑀓𑀸𑀭𑀡𑀁. 𑀓𑀺𑀮𑁂𑀲𑀸𑀥𑀺𑀫𑀼𑀘𑁆𑀘𑀦𑁂𑀦𑀸𑀢𑀺 𑀓𑀺𑀮𑁂𑀲𑀯𑀲𑁂𑀦 𑀧𑀭𑀺𑀧𑁆𑀨𑀦𑁆𑀤𑀺𑀢𑀯𑀲𑁂𑀦. 𑀦𑀺𑀩𑁆𑀩𑀸𑀧𑀦𑀁 𑀯𑀺𑀬𑀸𑀢𑀺 𑀯𑀽𑀧𑀲𑀫𑁄 𑀯𑀺𑀬. 𑀦𑀺𑀩𑁆𑀩𑀺𑀲𑁂𑀯𑀦𑀸𑀦𑀦𑁆𑀢𑀺 𑀧𑀭𑀺𑀧𑁆𑀨𑀦𑁆𑀤𑀦𑀭𑀳𑀺𑀢𑀸𑀦𑀁.

𑀅𑀯𑀲𑁆𑀲𑀼𑀢𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀤𑀼𑀓𑁆𑀔𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁪. 𑀤𑀼𑀓𑁆𑀔𑀥𑀫𑁆𑀫𑀸𑀦𑀦𑁆𑀢𑀺 𑀤𑀼𑀓𑁆𑀔𑀓𑀸𑀭𑀡𑀸𑀦𑀁. 𑀢𑁂𑀦𑀸𑀳 ‘‘𑀤𑀼𑀓𑁆𑀔𑀲𑀫𑁆𑀪𑀯𑀥𑀫𑁆𑀫𑀸𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀓𑀺𑀁 𑀤𑀼𑀓𑁆𑀔𑀁, 𑀓𑀸 𑀤𑀼𑀓𑁆𑀔𑀥𑀫𑁆𑀫𑀸𑀢𑀺 𑀢𑀤𑀼𑀪𑀬𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀜𑁆𑀘𑀲𑀼 𑀳𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀢𑀺 𑀧𑀜𑁆𑀘𑀓𑁆𑀔𑀦𑁆𑀥𑀸. 𑀤𑀼𑀓𑁆𑀔𑀲𑀫𑁆𑀪𑀯𑀥𑀫𑁆𑀫𑀢𑁆𑀢𑀸𑀢𑀺 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀢𑁆𑀢𑀸. 𑀅𑀲𑁆𑀲𑀸𑀢𑀺 𑀢𑁂𑀦. 𑀓𑀭𑀡𑁂 𑀳𑁂𑀢𑀁 𑀲𑀸𑀫𑀺𑀯𑀘𑀦𑀁. 𑀓𑀸𑀫𑁂𑀢𑀺 𑀯𑀢𑁆𑀣𑀼𑀓𑀸𑀫𑁂 𑀓𑀺𑀮𑁂𑀲𑀓𑀸𑀫𑁂 𑀘. 𑀧𑀼𑀦 𑀅𑀲𑁆𑀲𑀸𑀢𑀺 𑀲𑀸𑀫𑀺𑀅𑀢𑁆𑀣𑁂 𑀏𑀯 𑀲𑀸𑀫𑀺𑀯𑀘𑀦𑀁. 𑀘𑀸𑀭𑀦𑁆𑀢𑀺 𑀘𑀺𑀢𑁆𑀢𑀸𑀘𑀸𑀭𑀁. 𑀯𑀺𑀳𑀸𑀭𑀦𑁆𑀢𑀺 𑀧𑀜𑁆𑀘𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀺𑀘𑀸𑀭𑀯𑀺𑀳𑀸𑀭𑀁. ‘‘𑀏𑀓𑀝𑁆𑀞𑀸’’𑀢𑀺 𑀘 𑀯𑀤𑀦𑁆𑀢𑀺. 𑀢𑁂𑀦𑁂𑀯 𑀳𑀺 ‘‘𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀘𑀭𑀦𑁆𑀢𑀁’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀅𑀦𑀼𑀩𑀦𑁆𑀥𑀺𑀢𑁆𑀯𑀸𑀢𑀺 𑀘 𑀯𑀻𑀣𑀺𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀢𑀢𑀺𑀬𑀚𑀯𑀦𑀯𑀸𑀭𑀸 𑀅𑀦𑀼 ¶ 𑀅𑀦𑀼 𑀩𑀦𑁆𑀥𑀺𑀢𑁆𑀯𑀸. 𑀧𑀓𑁆𑀔𑀦𑁆𑀤𑀦𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀲𑀺𑀕𑁄𑀭𑀓𑁆𑀔𑀸𑀤𑀺𑀯𑀲𑁂𑀦𑀧𑀺 𑀓𑀸𑀫𑀸𑀦𑀁 𑀧𑀭𑀺𑀬𑁂𑀲𑀦𑀤𑀼𑀓𑁆𑀔𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀤𑀸𑀬𑀢𑀻𑀢𑀺 ¶ 𑀤𑀸𑀬𑁄, 𑀯𑀦𑀁. 𑀢𑁂𑀦𑀸𑀳 ‘‘𑀅𑀝𑀯𑀺’’𑀦𑁆𑀢𑀺. 𑀓𑀡𑁆𑀝𑀓𑀕𑀩𑁆𑀪𑀦𑁆𑀢𑀺 𑀑𑀯𑀭𑀓𑀲𑀤𑀺𑀲𑀁 𑀯𑀦𑀁. 𑀦𑀸𑀫𑀧𑀤𑀁 𑀦𑀸𑀫 𑀓𑀺𑀭𑀺𑀬𑀸𑀧𑀤𑀸𑀧𑁂𑀓𑁆𑀔𑀦𑁆𑀢𑀺 ‘‘𑀯𑀺𑀚𑁆𑀛𑀻’’𑀢𑀺 𑀯𑀘𑀦𑀲𑁂𑀲𑁂𑀦 𑀓𑀺𑀭𑀺𑀬𑀸𑀧𑀤𑀁 𑀕𑀡𑁆𑀳𑀸𑀢𑀺.

𑀤𑀦𑁆𑀥𑀸𑀬𑀺𑀢𑀢𑁆𑀢𑀁 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀸𑀦𑀁 𑀅𑀯𑀝𑁆𑀞𑀸𑀦𑀁. 𑀢𑁂𑀦𑀸𑀳 ‘‘𑀉𑀧𑁆𑀧𑀦𑁆𑀦𑀫𑀢𑁆𑀢𑀸𑀬𑀸’’𑀢𑀺𑀆𑀤𑀺. 𑀢𑀸𑀬𑀸𑀢𑀺 𑀲𑀢𑀺𑀬𑀸. 𑀓𑀸𑀘𑀺 𑀓𑀺𑀮𑁂𑀲𑀸𑀢𑀺 𑀘𑀼𑀤𑁆𑀤𑀲𑀯𑀺𑀥𑁂 𑀘𑀺𑀢𑁆𑀢𑀲𑁆𑀲 𑀓𑀺𑀘𑁆𑀘𑁂 𑀚𑀯𑀦𑀓𑀺𑀘𑁆𑀘𑁂 𑀏𑀯 𑀘𑀺𑀢𑁆𑀢𑀓𑀺𑀮𑁂𑀲𑀸𑀦𑀁 𑀉𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸 𑀢𑀣𑀸 𑀯𑀼𑀢𑁆𑀢𑀁. 𑀦𑀺𑀕𑁆𑀕𑀳𑀺𑀢𑀸𑀯 𑀳𑁄𑀦𑁆𑀢𑀺 𑀧𑀯𑀢𑁆𑀢𑀺𑀢𑀼𑀁 𑀅𑀧𑁆𑀧𑀤𑀸𑀦𑀯𑀲𑁂𑀦. 𑀢𑁂𑀦𑀸𑀳 ‘‘𑀦 𑀲𑀡𑁆𑀞𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀻’’𑀢𑀺. 𑀘𑀓𑁆𑀔𑀼𑀤𑁆𑀯𑀸𑀭𑀲𑁆𑀫𑀺𑀦𑁆𑀢𑀺 𑀧𑀸𑀴𑀺𑀬𑀁 𑀢𑀲𑁆𑀲 𑀧𑀞𑀫𑀁 𑀕𑀳𑀺𑀢𑀢𑀸𑀬 𑀯𑀼𑀢𑁆𑀢𑀁, 𑀢𑁂𑀦 𑀦𑀬𑁂𑀦 𑀲𑁂𑀲𑀤𑁆𑀯𑀸𑀭𑀸𑀦𑀺𑀧𑀺 𑀕𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀭𑀸𑀕𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀧𑀞𑀫𑀚𑀯𑀦𑀯𑀸𑀭𑁂. 𑀲𑀢𑀺𑀲𑀫𑁆𑀫𑁄𑀲𑁂𑀦 ‘‘𑀓𑀺𑀮𑁂𑀲𑀸 𑀫𑁂 𑀉𑀧𑁆𑀧𑀦𑁆𑀦𑀸’’𑀢𑀺 𑀜𑀢𑁆𑀯𑀸 𑀢𑀣𑀸 𑀧𑀘𑁆𑀘𑀸𑀫𑀸𑀲𑀲𑀢𑀺𑀬𑀸 𑀮𑀩𑁆𑀪𑀦𑀢𑁄. 𑀢𑁂𑀦𑀸𑀳 𑁋 ‘‘𑀅𑀦𑀘𑁆𑀙𑀭𑀺𑀬𑀁 𑀘𑁂𑀢’’𑀦𑁆𑀢𑀺. 𑀆𑀯𑀝𑁆𑀝𑁂𑀢𑁆𑀯𑀸𑀢𑀺 𑀅𑀬𑁄𑀦𑀺𑀲𑁄 𑀆𑀯𑀝𑁆𑀝𑁂𑀢𑁆𑀯𑀸. 𑀆𑀯𑀚𑁆𑀚𑀦𑀸𑀤𑀻𑀲𑀽𑀢𑀺 𑀢𑀢𑁄 𑀏𑀯 𑀅𑀬𑁄𑀦𑀺𑀲𑁄 𑀆𑀯𑀚𑁆𑀚𑀦𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑀲𑁆𑀲 𑀮𑀤𑁆𑀥𑀢𑁆𑀢𑀸 𑀧𑀘𑁆𑀘𑀬𑀲𑀺𑀤𑁆𑀥𑀺𑀬𑀸 𑀲𑀫𑁆𑀧𑀢𑁆𑀢𑀁 𑀧𑀯𑀢𑁆𑀢𑀦𑀸𑀭𑀳𑀁. 𑀦𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀤𑀼𑀢𑀺𑀬𑀚𑀯𑀦𑀯𑀸𑀭𑁂𑀧𑀺 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀁 𑀦𑀺𑀯𑀢𑁆𑀢𑁂𑀢𑁆𑀯𑀸. 𑀓𑀣𑀁 𑀧𑀦𑀲𑁆𑀲 𑀏𑀯𑀁 𑀮𑀤𑁆𑀥𑀼𑀁 𑀲𑀓𑁆𑀓𑀸𑀢𑀺 𑀆𑀳 ‘‘𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀸𑀦𑀁 𑀳𑀻’’𑀢𑀺𑀆𑀤𑀺. 𑀪𑀸𑀯𑀦𑀸𑀧𑀝𑀺𑀲𑀗𑁆𑀔𑀸𑀦𑁂𑀢𑀺 𑀪𑀸𑀯𑀦𑀸𑀬𑀁 𑀧𑀝𑀺𑀲𑀗𑁆𑀔𑀸𑀦𑁂 𑀘 𑀬𑁄𑀕𑀺𑀦𑁄 𑀧𑀢𑀺𑀝𑁆𑀞𑀺𑀢𑀪𑀸𑀯𑁄. 𑀢𑀲𑁆𑀲 𑀅𑀬𑀫𑀸𑀦𑀺𑀲𑀁𑀲𑁄 𑁋 𑀬𑀁 𑀧𑀘𑁆𑀘𑀬𑀮𑀸𑀪𑁂𑀦 𑀉𑀧𑁆𑀧𑀚𑁆𑀚𑀺𑀢𑀼𑀁 𑀮𑀤𑁆𑀥𑁄𑀓𑀸𑀲𑀸𑀧𑀺 𑀓𑀺𑀮𑁂𑀲𑀸 𑀧𑀼𑀩𑁆𑀩𑁂 𑀧𑀯𑀢𑁆𑀢𑀪𑀸𑀯𑀦𑀸𑀦𑀼𑀪𑀸𑀯𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑀸 𑀢𑀣𑀸 𑀢𑀣𑀸 𑀦𑀺𑀕𑁆𑀕𑀳𑀺𑀢𑀸 𑀏𑀯 𑀳𑀼𑀢𑁆𑀯𑀸 𑀦𑀺𑀯𑀢𑁆𑀢𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸𑀯 𑀮𑀤𑁆𑀥𑁄𑀓𑀸𑀲𑀸 𑀉𑀧𑀭𑀽𑀧𑀭𑀺 𑀯𑀟𑁆𑀠𑀦𑁆𑀢𑀺.

𑀅𑀪𑀺𑀳𑀝𑁆𑀞𑀼𑀦𑁆𑀢𑀺 𑀅𑀪𑀺𑀳𑀭𑀺𑀢𑁆𑀯𑀸. 𑀅𑀦𑀼𑀤𑀳𑀦𑁆𑀢𑀻𑀢𑀺 𑀅𑀦𑀼𑀤𑀳𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀺. 𑀅𑀦𑀼𑀲𑁂𑀦𑁆𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀦𑀸𑀯𑀝𑁆𑀝𑀦𑁆𑀢𑁂𑀢𑀺 𑀅𑀦𑀺𑀯𑀢𑁆𑀢𑀦𑁆𑀢𑁂 𑀲𑀸𑀫𑀜𑁆𑀜𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀧𑀲𑁆𑀲𑀦𑀸𑀩𑀮𑀫𑁂𑀯 𑀤𑀻𑀧𑀺𑀢𑀁 𑀫𑀕𑁆𑀕𑀨𑀮𑀸𑀥𑀺𑀕𑀫𑀲𑁆𑀲 𑀅𑀚𑁄𑀢𑀺𑀢𑀢𑁆𑀢𑀸.

𑀤𑀼𑀓𑁆𑀔𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀓𑀺𑀁𑀲𑀼𑀓𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁫. 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀺𑀯𑀲𑁂𑀦 𑀯𑀺𑀯𑀺𑀥𑀤𑀲𑁆𑀲𑀦𑀦𑁆𑀢𑀺 𑀓𑀺𑀘𑁆𑀘𑀯𑀲𑁂𑀦 𑀦𑀸𑀦𑀸𑀤𑀲𑁆𑀲𑀦𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁, ‘‘𑀤𑀲𑁆𑀲𑀦𑀦𑁆𑀢𑀺 𑀧𑀞𑀫𑀫𑀕𑁆𑀕𑀲𑁆𑀲𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺 ¶ . 𑀢𑀬𑀺𑀤𑀁 𑀉𑀧𑀭𑀺𑀫𑀕𑁆𑀕𑁂𑀲𑀼 𑀪𑀸𑀯𑀦𑀸𑀧𑀭𑀺𑀬𑀸𑀬𑀲𑁆𑀲 𑀦𑀺𑀭𑀼𑀴𑁆𑀳𑀢𑁆𑀢𑀸 𑀧𑀞𑀫𑀫𑀕𑁆𑀕𑀲𑁆𑀲 𑀧𑀞𑀫𑀁 𑀦𑀺𑀩𑁆𑀩𑀸𑀦𑀤𑀲𑁆𑀲𑀦𑀢𑁄. 𑀢𑁂𑀦𑀸𑀳 ‘‘𑀧𑀞𑀫𑀫𑀕𑁆𑀕𑁄 𑀳𑀻’’𑀢𑀺𑀆𑀤𑀺 ¶ . 𑀓𑁄𑀘𑀺 𑀬𑀣𑀸𑀯𑀼𑀢𑁆𑀢𑀁 𑀅𑀯𑀺𑀧𑀭𑀻𑀢𑀁 𑀅𑀢𑁆𑀣𑀁 𑀅𑀚𑀸𑀦𑀦𑁆𑀢𑁄 𑀜𑀸𑀡𑀤𑀲𑁆𑀲𑀦𑀁 𑀦𑀸𑀫 𑀆𑀭𑀫𑁆𑀫𑀡𑀓𑀭𑀡𑀲𑁆𑀲 𑀯𑀲𑁂𑀦 𑀅𑀢𑀺𑀧𑁆𑀧𑀲𑀗𑁆𑀕𑀁 𑀆𑀲𑀗𑁆𑀓𑁂𑀬𑁆𑀬𑀸𑀢𑀺 𑀢𑀁 𑀦𑀺𑀯𑀢𑁆𑀢𑁂𑀢𑀼𑀁 ‘‘𑀕𑁄𑀢𑁆𑀭𑀪𑀽 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀦 𑀤𑀲𑁆𑀲𑀦𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀏𑀢𑁆𑀣 𑀭𑀸𑀚𑀤𑀲𑁆𑀲𑀦𑀁 𑀉𑀤𑀸𑀳𑀭𑀦𑁆𑀢𑀺. 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀤𑀲𑁆𑀲𑀦𑀫𑁂𑀯 𑀬𑀣𑀸𑀯𑀼𑀢𑁆𑀢𑁂𑀦𑀢𑁆𑀣𑁂𑀦, 𑀪𑀸𑀯𑀦𑀸𑀧𑀭𑀺𑀬𑀸𑀬𑁄 𑀧𑀦 𑀉𑀧𑀭𑀺 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀧𑀞𑀫𑀫𑀕𑁆𑀕𑀉𑀧𑀸𑀬𑀲𑁆𑀲 𑀪𑀸𑀯𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀦𑀢𑁄. 𑀤𑀲𑁆𑀲𑀦𑀁 𑀯𑀺𑀲𑀼𑀤𑁆𑀥𑀺 𑀏𑀢𑁆𑀣𑀸𑀢𑀺 𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀓𑀁, 𑀦𑀺𑀩𑁆𑀩𑀸𑀦𑀁. 𑀨𑀲𑁆𑀲𑀸𑀬𑀢𑀦𑀁 𑀓𑀫𑁆𑀫𑀝𑁆𑀞𑀸𑀦𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀨𑀲𑁆𑀲𑀸𑀬𑀢𑀦𑀓𑀫𑁆𑀫𑀝𑁆𑀞𑀸𑀦𑀺𑀓𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺 𑀧𑀤𑁂𑀲𑀼.

𑀧𑀤𑁂𑀲𑀲𑀗𑁆𑀔𑀸𑀭𑁂𑀲𑀽𑀢𑀺 𑀲𑀗𑁆𑀔𑀸𑀭𑁂𑀓𑀤𑁂𑀲𑁂𑀲𑀼. 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀧𑀣𑀯𑀺𑀆𑀤𑀺𑀓𑁂 𑀥𑀫𑁆𑀫𑀫𑀢𑁆𑀢𑁂 𑀤𑀺𑀝𑁆𑀞𑁂 𑀭𑀽𑀧𑀧𑀭𑀺𑀕𑁆𑀕𑀳𑁄, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀓𑁂 𑀢𑀁𑀲𑀳𑀕𑀢𑀥𑀫𑁆𑀫𑀫𑀢𑁆𑀢𑁂 𑀤𑀺𑀝𑁆𑀞𑁂 𑀅𑀭𑀽𑀧𑀧𑀭𑀺𑀕𑁆𑀕𑀳𑁄 𑀘 𑀲𑀺𑀚𑁆𑀛𑀢𑀻𑀢𑀺 𑀯𑀤𑀦𑁆𑀢𑀺.

𑀅𑀥𑀺𑀕𑀢𑀫𑀕𑁆𑀕𑀫𑁂𑀯 𑀓𑀣𑁂𑀲𑀻𑀢𑀺 𑀬𑁂𑀦 𑀫𑀼𑀔𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀁 𑀅𑀓𑀸𑀲𑀺, 𑀢𑀫𑁂𑀯𑀲𑁆𑀲 𑀫𑀼𑀔𑀁 𑀓𑀣𑁂𑀲𑀺. 𑀅𑀬𑀁 𑀧𑀦𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀁 𑀧𑀼𑀘𑁆𑀙𑀦𑁆𑀢𑁄 𑀪𑀺𑀓𑁆𑀔𑀼. 𑀇𑀫𑁂𑀲𑀦𑁆𑀢𑀺 𑀨𑀲𑁆𑀲𑀸𑀬𑀢𑀦𑀓𑀫𑁆𑀫𑀝𑁆𑀞𑀸𑀦𑀺𑀓𑀧𑀜𑁆𑀘𑀓𑁆𑀔𑀦𑁆𑀥𑀓𑀫𑁆𑀫𑀝𑁆𑀞𑀸𑀦𑀺𑀓𑀸𑀦𑀁 𑀯𑀘𑀦𑀁. ‘‘𑀅𑀜𑁆𑀜𑀫𑀜𑁆𑀜𑀁 𑀦 𑀲𑀫𑁂𑀢𑀻’’𑀢𑀺 𑀯𑀢𑁆𑀯𑀸 𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀭𑁄𑀢𑀺 ‘‘𑀧𑀞𑀫𑁂𑀦𑀸’’𑀢𑀺𑀆𑀤𑀺𑀦𑀸. 𑀧𑀜𑁆𑀘𑀓𑁆𑀔𑀦𑁆𑀥𑀯𑀺𑀫𑀼𑀢𑁆𑀢𑀲𑁆𑀲 𑀲𑀗𑁆𑀔𑀸𑀭𑀲𑁆𑀲 𑀅𑀪𑀸𑀯𑀸 ‘‘𑀦𑀺𑀧𑁆𑀧𑀤𑁂𑀲𑁂𑀲𑀽’’𑀢𑀺 𑀯𑀼𑀢𑁆𑀢𑀁. 𑀢𑀣𑁂𑀯𑀸𑀢𑀺 𑀬𑀣𑁂𑀯 𑀨𑀲𑁆𑀲𑀸𑀬𑀢𑀦𑀓𑀫𑁆𑀫𑀝𑁆𑀞𑀸𑀦𑀺𑀓𑀁, 𑀢𑀣𑁂𑀯 𑀢𑀁 𑀧𑀜𑁆𑀘𑀓𑁆𑀔𑀦𑁆𑀥𑀓𑀫𑁆𑀫𑀝𑁆𑀞𑀸𑀦𑀺𑀓𑀁 𑀧𑀼𑀘𑁆𑀙𑀺𑀢𑁆𑀯𑀸.

𑀲𑀫𑀧𑁆𑀧𑀯𑀢𑁆𑀢𑀸 𑀥𑀸𑀢𑀼𑀬𑁄𑀢𑀺 𑀭𑀲𑀸𑀤𑀬𑁄 𑀲𑀭𑀻𑀭𑀥𑀸𑀢𑀼𑀬𑁄 𑀲𑀫𑀧𑁆𑀧𑀯𑀢𑁆𑀢𑀸, 𑀦 𑀯𑀺𑀲𑀫𑀸𑀓𑀸𑀭𑀲𑀡𑁆𑀞𑀺𑀢𑀸 𑀅𑀳𑁂𑀲𑀼𑀁. 𑀢𑁂𑀦𑀸𑀳 ‘‘𑀓𑀮𑁆𑀮𑀲𑀭𑀻𑀭𑀁 𑀩𑀮𑀧𑁆𑀧𑀢𑁆𑀢’’𑀦𑁆𑀢𑀺. ‘‘𑀅𑀢𑀻𑀢𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀫𑁆𑀫𑀲𑀦𑀁 𑀲𑀩𑁆𑀩𑀢𑁆𑀣𑀓𑀫𑁂𑀯 𑀇𑀘𑁆𑀙𑀺𑀢𑀩𑁆𑀩𑀁. 𑀘𑀸𑀭𑀺𑀪𑀽𑀫𑀺𑀦𑁆𑀢𑀺 𑀕𑁄𑀘𑀭𑀝𑁆𑀞𑀸𑀦𑀁.

𑀓𑀸𑀭𑀓𑀪𑀸𑀯𑀦𑁆𑀢𑀺 𑀪𑀸𑀯𑀦𑀸𑀦𑀼𑀬𑀼𑀜𑁆𑀚𑀦𑀪𑀸𑀯𑀁. 𑀧𑀡𑁆𑀟𑀼𑀭𑁄𑀕𑀧𑀼𑀭𑀺𑀲𑁄𑀢𑀺 𑀧𑀡𑁆𑀟𑀼𑀭𑁄𑀕𑀻 𑀧𑀼𑀭𑀺𑀲𑁄. 𑀅𑀭𑀺𑀝𑁆𑀞𑀦𑁆𑀢𑀺 𑀲𑀼𑀢𑁆𑀢𑀁. 𑀪𑁂𑀲𑀚𑁆𑀚𑀁 𑀓𑀢𑁆𑀯𑀸𑀢𑀺 𑀪𑁂𑀲𑀚𑁆𑀚𑀧𑀬𑁄𑀕𑀁 𑀓𑀢𑁆𑀯𑀸. 𑀓𑀭𑀺𑀲𑁆𑀲𑀸𑀫𑀻𑀢𑀺 𑀪𑁂𑀲𑀚𑁆𑀚𑀁 𑀓𑀭𑀺𑀲𑁆𑀲𑀸𑀫𑀺. 𑀛𑀸𑀫𑀣𑀼𑀡𑁄 𑀯𑀺𑀬𑀸𑀢𑀺 𑀤𑀟𑁆𑀠𑀣𑀼𑀡𑁄 𑀯𑀺𑀬 𑀔𑀸𑀭𑀓𑀚𑀸𑀮𑀦𑀤𑁆𑀥𑀢𑁆𑀢𑀸 𑀢𑀭𑀼𑀡𑀫𑀓𑀼𑀮𑀲𑀦𑁆𑀢𑀸𑀦𑀲𑀜𑁆𑀙𑀦𑁆𑀦𑀢𑁆𑀢𑀸.

𑀤𑀓𑁆𑀔𑀺𑀡𑀤𑁆𑀯𑀸𑀭𑀕𑀸𑀫𑁂𑀢𑀺 𑀤𑀓𑁆𑀔𑀺𑀡𑀤𑁆𑀯𑀸𑀭𑀲𑀫𑀻𑀧𑁂 𑀕𑀸𑀫𑁂. 𑀮𑁄𑀳𑀺𑀢𑀓𑁄𑀢𑀺 𑀮𑁄𑀳𑀺𑀢𑀯𑀡𑁆𑀡𑁄. 𑀑𑀘𑀺𑀭𑀓𑀚𑀸𑀢𑁄𑀢𑀺 𑀚𑀸𑀢𑀑𑀮𑀫𑁆𑀩𑀫𑀸𑀦𑀘𑀺𑀭𑀓𑁄 𑀯𑀺𑀬. 𑀆𑀤𑀺𑀦𑁆𑀦𑀲𑀺𑀧𑀸𑀝𑀺𑀓𑁄𑀢𑀺 ¶ 𑀕𑀳𑀺𑀢𑀨𑀮𑀧𑁄𑀢𑀓𑁄. 𑀲𑀦𑁆𑀤𑀘𑁆𑀙𑀸𑀬𑁄𑀢𑀺 𑀩𑀳𑀮𑀘𑁆𑀙𑀸𑀬𑁄. 𑀬𑀲𑁆𑀫𑀸 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀲𑀸𑀔𑀸 𑀅𑀯𑀺𑀭𑀴𑀸 𑀖𑀦𑀧𑁆𑀧𑀢𑁆𑀢𑀸 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀦𑁆𑀤𑀺𑀢𑁆𑀯𑀸 𑀞𑀺𑀢𑀸, 𑀢𑀲𑁆𑀫𑀸 𑀙𑀸𑀬𑀸𑀧𑀺𑀲𑁆𑀲 𑀢𑀸𑀤𑀺𑀲𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀦𑁆𑀤𑀘𑁆𑀙𑀸𑀬𑁄 𑀦𑀸𑀫 𑀲𑀁𑀲𑀦𑁆𑀤𑀺𑀢𑁆𑀯𑀸 𑀞𑀺𑀢𑀘𑁆𑀙𑀸𑀬𑁄’’𑀢𑀺, 𑀖𑀦𑀘𑁆𑀙𑀸𑀬𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺𑀆𑀤𑀺 𑀉𑀧𑀫𑀸𑀲𑀁𑀲𑀦𑁆𑀤𑀦𑀁.

𑀬𑁂𑀦 ¶ 𑀬𑁂𑀦𑀸𑀓𑀸𑀭𑁂𑀦 𑀅𑀥𑀺𑀫𑀼𑀢𑁆𑀢𑀸𑀦𑀦𑁆𑀢𑀺 𑀙𑀨𑀲𑁆𑀲𑀸𑀬𑀢𑀦𑀸𑀤𑀺𑀫𑀼𑀔𑁂𑀦 𑀬𑁂𑀦 𑀬𑁂𑀦 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑁂𑀦 𑀯𑀺𑀧𑀲𑁆𑀲𑀦𑁆𑀢𑀸𑀦𑀁 𑀦𑀺𑀩𑁆𑀩𑀸𑀦𑀜𑁆𑀘 𑀅𑀥𑀺𑀫𑀼𑀢𑁆𑀢𑀸𑀦𑀁. 𑀲𑀼𑀝𑁆𑀞𑀼 𑀯𑀺𑀲𑀼𑀤𑁆𑀥𑀁 𑀧𑀭𑀺𑀜𑁆𑀜𑀸𑀢𑀺𑀲𑀫𑀬𑀸𑀤𑀺𑀲𑀺𑀤𑁆𑀥𑀺𑀬𑀸. 𑀢𑁂𑀦 𑀢𑁂𑀦𑁂𑀯𑀸𑀓𑀸𑀭𑁂𑀦𑀸𑀢𑀺 𑀅𑀢𑁆𑀢𑀦𑀸𑀥𑀺𑀫𑀼𑀢𑁆𑀢𑀸𑀓𑀸𑀭𑁂𑀦. 𑀇𑀤𑀸𑀦𑀺 𑀢𑀁 𑀢𑀁 𑀆𑀓𑀸𑀭𑀁 𑀉𑀧𑀫𑀸𑀬 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀇𑀤𑀦𑁆𑀢𑀺 𑀦𑀕𑀭𑁄𑀧𑀫𑀁. 𑀢𑀁 𑀲𑀮𑁆𑀮𑀓𑁆𑀔𑀺𑀢𑀦𑁆𑀢𑀺 𑀓𑀺𑀁𑀲𑀼𑀓𑁄𑀧𑀫𑀤𑀻𑀧𑀺𑀢𑀁 𑀅𑀢𑁆𑀣𑀚𑀸𑀢𑀁 𑀲𑀘𑁂 𑀲𑀮𑁆𑀮𑀓𑁆𑀔𑀺𑀢𑀁. 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀥𑀫𑁆𑀫𑀤𑁂𑀲𑀦𑀢𑁆𑀣𑀦𑁆𑀢𑀺 𑀬𑀣𑀸𑀲𑀮𑁆𑀮𑀓𑁆𑀔𑀺𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀲𑁂𑀦 𑀮𑀤𑁆𑀥𑀯𑀺𑀲𑁂𑀲𑀲𑁆𑀲 𑀉𑀧𑀩𑁆𑀭𑀽𑀳𑀦𑀸𑀬. 𑀢𑀲𑁆𑀲𑁂𑀯𑀢𑁆𑀣𑀲𑁆𑀲𑀸𑀢𑀺 𑀢𑀲𑁆𑀲 𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲. 𑀘𑁄𑀭𑀸𑀲𑀗𑁆𑀓𑀸 𑀦 𑀳𑁄𑀦𑁆𑀢𑀺 𑀫𑀚𑁆𑀛𑀺𑀫𑀤𑁂𑀲𑀭𑀚𑁆𑀚𑀲𑁆𑀲 𑀧𑀲𑀦𑁆𑀦𑀪𑀸𑀯𑀢𑁄. 𑀢𑀺𑀧𑀼𑀭𑀺𑀲𑀼𑀩𑁆𑀩𑁂𑀥𑀸𑀦𑀻𑀢𑀺 𑀉𑀩𑁆𑀩𑁂𑀥𑁂𑀦 𑀢𑀺𑀧𑀼𑀭𑀺𑀲𑀧𑁆𑀧𑀫𑀸𑀡𑀸𑀦𑀺 𑀦𑀸𑀦𑀸𑀪𑀺𑀢𑁆𑀢𑀺𑀯𑀺𑀘𑀺𑀢𑁆𑀢𑀸𑀦𑀺 𑀣𑀫𑁆𑀪𑀸𑀦𑀁 𑀉𑀧𑀭𑀺 𑀯𑀺𑀯𑀺𑀥𑀫𑀸𑀮𑀸𑀓𑀫𑁆𑀫𑀸𑀤𑀺𑀯𑀺𑀘𑀺𑀢𑁆𑀢𑀥𑀦𑀼𑀭𑀸𑀓𑀸𑀭𑀮𑀓𑁆𑀔𑀺𑀢𑀸𑀦𑀺 𑀫𑀦𑁄𑀭𑀫𑀸𑀦𑀺. 𑀢𑁂𑀦𑀸𑀳 ‘‘𑀦𑀕𑀭𑀲𑁆𑀲 𑀅𑀮𑀗𑁆𑀓𑀸𑀭𑀢𑁆𑀣’’𑀦𑁆𑀢𑀺. 𑀦𑀕𑀭𑀤𑁆𑀯𑀸𑀭𑀲𑁆𑀲 𑀣𑀺𑀭𑀪𑀸𑀯𑀸𑀧𑀸𑀤𑀦𑀯𑀲𑁂𑀦 𑀞𑀧𑁂𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀘𑁄𑀭𑀦𑀺𑀯𑀸𑀭𑀡𑀢𑁆𑀣𑀸𑀦𑀺𑀧𑀺 𑀳𑁄𑀦𑁆𑀢𑀺𑀬𑁂𑀯𑀸’’𑀢𑀺. 𑀧𑀺𑀝𑁆𑀞𑀲𑀗𑁆𑀖𑀸𑀢𑀲𑁆𑀲𑀸𑀢𑀺 𑀤𑁆𑀯𑀸𑀭𑀩𑀸𑀳𑀲𑁆𑀲. ‘‘𑀇𑀫𑁂 𑀆𑀯𑀸𑀲𑀺𑀓𑀸, 𑀇𑀫𑁂 𑀆𑀕𑀦𑁆𑀢𑀼𑀓𑀸, 𑀢𑀢𑁆𑀣𑀸𑀧𑀺 𑀘 𑀇𑀫𑁂𑀳𑀺 𑀦𑀕𑀭𑀲𑁆𑀲 𑀦𑀕𑀭𑀲𑀸𑀫𑀺𑀓𑀲𑁆𑀲 𑀘 𑀅𑀢𑁆𑀣𑁄. 𑀇𑀫𑁂𑀲𑀁 𑀯𑀲𑁂𑀦 𑀅𑀦𑀢𑁆𑀣𑁄 𑀲𑀺𑀬𑀸’’𑀢𑀺 𑀚𑀸𑀦𑀦𑀜𑀸𑀡𑀲𑀗𑁆𑀔𑀸𑀢𑁂𑀦 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀅𑀜𑁆𑀜𑀸𑀢𑀦𑀺𑀯𑀸𑀭𑀡𑁂 𑀧𑀝𑀼𑀪𑀸𑀯𑀲𑀗𑁆𑀔𑀸𑀢𑁂𑀦 𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀜𑁆𑀜𑀸𑀲𑀗𑁆𑀔𑀸𑀢𑀸𑀬𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑀓𑀺𑀘𑁆𑀘𑁂 𑀢𑀗𑁆𑀔𑀡𑀼𑀧𑁆𑀧𑀚𑁆𑀚𑀦𑀓𑀧𑀝𑀺𑀪𑀸𑀦𑀲𑀗𑁆𑀔𑀸𑀢𑀸𑀬.

𑀭𑀜𑁆𑀜𑀸 𑀆𑀬𑀼𑀢𑁆𑀢𑁄 𑀦𑀺𑀬𑁄𑀚𑀺𑀢𑁄 𑀭𑀸𑀚𑀸𑀬𑀼𑀢𑁆𑀢𑁄, 𑀢𑀢𑁆𑀣 𑀢𑀢𑁆𑀣 𑀭𑀜𑁆𑀜𑁄 𑀓𑀸𑀢𑀩𑁆𑀩𑀓𑀺𑀘𑁆𑀘𑁂 𑀞𑀧𑀺𑀢𑀧𑀼𑀭𑀺𑀲𑁄. 𑀓𑀢𑀺𑀧𑀸𑀳𑁂𑀬𑁂𑀯𑀸𑀢𑀺 𑀓𑀢𑀺𑀧𑀬𑀤𑀺𑀯𑀲𑁂𑀬𑁂𑀯 𑀅𑀓𑀺𑀘𑁆𑀘𑀓𑀭𑀡𑁂𑀦 𑀢𑀲𑁆𑀲 𑀞𑀸𑀦𑀁 𑀯𑀺𑀩𑁆𑀪𑀫𑁄 𑀚𑀸𑀢𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 𑁋 ‘‘𑀲𑀩𑁆𑀩𑀸𑀦𑀺 𑀯𑀺𑀦𑀺𑀘𑁆𑀙𑀬𑀝𑁆𑀞𑀸𑀦𑀸𑀤𑀻𑀦𑀺 𑀳𑀸𑀭𑁂𑀢𑁆𑀯𑀸’’𑀢𑀺.

𑀲𑀻𑀲𑀫𑀲𑁆𑀲 𑀙𑀺𑀦𑁆𑀤𑀸𑀳𑀻𑀢𑀺 𑀲𑀻𑀲𑀪𑀽𑀢𑀁 𑀉𑀢𑁆𑀢𑀫𑀗𑁆𑀕𑀝𑁆𑀞𑀸𑀦𑀺𑀬𑀁 𑀢𑀢𑁆𑀣 𑀢𑀲𑁆𑀲 𑀭𑀸𑀚𑀓𑀺𑀘𑁆𑀘𑀁 𑀙𑀺𑀦𑁆𑀤𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀣𑀸 𑀢𑀲𑁆𑀲 𑀧𑀸𑀓𑀢𑀺𑀓𑁂 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀧𑀸𑀡𑀸𑀢𑀺𑀧𑀸𑀢𑁄 ¶ 𑀆𑀡𑀢𑁆𑀢𑁄 𑀦𑀸𑀫 𑀲𑀺𑀬𑀸. 𑀦 𑀳𑀺 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀢𑀸𑀤𑀺𑀲𑀁 𑀆𑀡𑀸𑀧𑁂𑀢𑀺, 𑀅𑀜𑁆𑀜𑁂𑀲𑀫𑁆𑀧𑀺 𑀢𑀢𑁄 𑀦𑀺𑀯𑀸𑀭𑀓𑀢𑁆𑀢𑀸. 𑀅𑀣 𑀯𑀸 𑀙𑀺𑀦𑁆𑀤𑀸𑀳𑀻𑀢𑀺 𑀫𑀫 𑀆𑀡𑀸𑀬 𑀅𑀲𑁆𑀲 𑀲𑀻𑀲𑀁 𑀙𑀺𑀦𑁆𑀤𑀦𑁆𑀢𑁄 𑀯𑀺𑀬 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀳𑀺, 𑀏𑀯𑀁 𑀲𑁄 𑀢𑀢𑁆𑀣𑁄𑀯𑀸𑀤𑀧𑀝𑀺𑀓𑀭𑀢𑁆𑀢𑀧𑀢𑁆𑀢𑁄 𑀑𑀤𑀫𑁂𑀬𑁆𑀬𑀸𑀢𑀺, 𑀢𑀣𑀸 𑀘𑁂𑀯 𑀉𑀧𑀭𑀺 𑀧𑀝𑀺𑀧𑀢𑁆𑀢𑀺 𑀆𑀕𑀢𑀸. 𑀢𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀧𑀘𑁆𑀘𑀦𑁆𑀢𑀺𑀫𑀦𑀕𑀭𑁂.

𑀉𑀧𑁆𑀧𑀦𑁆𑀦𑁂𑀦𑀸𑀢𑀺 𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑁂 𑀉𑀧𑁆𑀧𑀦𑁆𑀦𑁂𑀦.

𑀢𑀲𑁆𑀲𑁂𑀯𑀸𑀢𑀺 𑀲𑀓𑁆𑀓𑀸𑀬𑀲𑀗𑁆𑀔𑀸𑀢𑀲𑁆𑀲 𑀦𑀕𑀭𑀲𑁆𑀲 ‘‘𑀤𑁆𑀯𑀸𑀭𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. ‘‘𑀲𑀻𑀖𑀁 ¶ 𑀤𑀽𑀢𑀬𑀼𑀕’’𑀦𑁆𑀢𑀺 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀳𑀤𑀬𑀯𑀢𑁆𑀣𑀼𑀭𑀽𑀧𑀲𑁆𑀲 𑀫𑀚𑁆𑀛𑁂 𑀲𑀺𑀗𑁆𑀖𑀸𑀝𑀓𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 ‘‘𑀳𑀤𑀬𑀯𑀢𑁆𑀣𑀼𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀸𑀦𑀁 𑀫𑀳𑀸𑀪𑀽𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 𑀯𑀢𑁆𑀣𑀼𑀭𑀽𑀧𑀫𑁂𑀯 𑀕𑀳𑁂𑀢𑀩𑁆𑀩𑀁, 𑀢𑀤𑁂𑀯𑁂𑀢𑁆𑀣 𑀅𑀕𑁆𑀕𑀳𑁂𑀢𑁆𑀯𑀸 𑀓𑀲𑁆𑀫𑀸 𑀫𑀳𑀸𑀪𑀽𑀢𑀕𑁆𑀕𑀳𑀡𑀦𑁆𑀢𑀺 𑀆𑀳 ‘‘𑀯𑀢𑁆𑀣𑀼𑀭𑀽𑀧𑀲𑁆𑀲 𑀳𑀻’’𑀢𑀺𑀆𑀤𑀺. 𑀬𑀸𑀤𑀺𑀲𑁄𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀯𑀲𑁂𑀦 𑀬𑀸𑀤𑀺𑀲𑁄 𑀏𑀯 𑀧𑀼𑀩𑁆𑀩𑁂 𑀆𑀕𑀢𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁄. ‘‘𑀅𑀬𑀫𑁆𑀧𑀺 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀢𑀸𑀤𑀺𑀲𑁄 𑀏𑀯𑀸’’𑀢𑀺 𑀯𑀢𑁆𑀯𑀸 𑀅𑀭𑀺𑀬𑀫𑀕𑁆𑀕𑁄 ‘‘𑀬𑀣𑀸𑀕𑀢𑀫𑀕𑁆𑀕𑁄’’𑀢𑀺 𑀯𑀼𑀢𑁆𑀢𑁄. 𑀇𑀤𑀁 𑀢𑀸𑀯𑁂𑀢𑁆𑀣𑀸𑀢𑀺 𑀏𑀢𑁆𑀣 𑀏𑀢𑀲𑁆𑀫𑀺𑀁 𑀲𑀼𑀢𑁆𑀢𑁂 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀆𑀪𑀢𑀸𑀬 𑀬𑀣𑀸𑀯𑀼𑀢𑁆𑀢𑀉𑀧𑀫𑀸𑀬 𑀇𑀤𑀁 𑀲𑀁𑀲𑀦𑁆𑀤𑀦𑀁.

𑀇𑀤𑀁 𑀲𑀁𑀲𑀦𑁆𑀤𑀦𑀦𑁆𑀢𑀺 𑀇𑀤𑀸𑀦𑀺 𑀯𑀓𑁆𑀔𑀫𑀸𑀦𑀁 𑀉𑀧𑀫𑀸𑀬 𑀲𑀁𑀲𑀦𑁆𑀤𑀦𑀁. 𑀦𑀕𑀭𑀲𑀸𑀫𑀺𑀉𑀧𑀫𑀸 𑀧𑀜𑁆𑀘𑀓𑁆𑀔𑀦𑁆𑀥𑀯𑀲𑁂𑀦 𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀧𑀢𑁆𑀢𑀁 𑀔𑀻𑀡𑀸𑀲𑀯𑀁 𑀤𑀲𑁆𑀲𑁂𑀢𑀼𑀁 𑀆𑀪𑀢𑀸. 𑀲𑀺𑀗𑁆𑀖𑀸𑀝𑀓𑀽𑀧𑀫𑀸 𑀘𑀢𑀼𑀫𑀳𑀸𑀪𑀽𑀢𑀯𑀲𑁂𑀦 𑀤𑀲𑁆𑀲𑀦𑀯𑀺𑀲𑀼𑀤𑁆𑀥𑀺𑀧𑀢𑁆𑀢𑀁 𑀔𑀻𑀡𑀸𑀲𑀯𑀁 𑀤𑀲𑁆𑀲𑁂𑀢𑀼𑀁 𑀆𑀪𑀢𑀸𑀢𑀺 𑀬𑁄𑀚𑀦𑀸. ‘‘𑀘𑀢𑀼𑀲𑀘𑁆𑀘𑀫𑁂𑀯 𑀓𑀣𑀺𑀢’’𑀦𑁆𑀢𑀺 𑀯𑀢𑁆𑀯𑀸 𑀢𑀸𑀦𑀺 𑀲𑀘𑁆𑀘𑀸𑀦𑀺 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀲𑀓𑀮𑁂𑀦𑀧𑀺 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀥 𑀦𑀕𑀭𑀲𑀫𑁆𑀪𑀸𑀭𑁄 𑀙𑀤𑁆𑀯𑀸𑀭𑀸𑀤𑀬𑁄. 𑀢𑁂𑀦 𑀳𑀺 𑀙𑀨𑀲𑁆𑀲𑀸𑀬𑀢𑀦𑀸𑀤𑀬𑁄 𑀉𑀧𑀫𑀺𑀢𑀸. 𑀢𑁂 𑀧𑀦 𑀤𑀼𑀓𑁆𑀔𑀲𑀘𑁆𑀘𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀦𑀕𑀭𑀲𑀫𑁆𑀪𑀸𑀭𑁂𑀦 𑀤𑀼𑀓𑁆𑀔𑀲𑀘𑁆𑀘𑀫𑁂𑀯 𑀓𑀣𑀺𑀢’’𑀦𑁆𑀢𑀺.

𑀓𑀺𑀁𑀲𑀼𑀓𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀯𑀻𑀡𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁬. 𑀪𑀺𑀓𑁆𑀔𑀼𑀲𑁆𑀲 𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸𑀢𑀺 𑀓𑀸𑀫𑀁 𑀧𑀸𑀴𑀺𑀬𑀁 𑀧𑀭𑀺𑀲𑀸𑀤𑁆𑀯𑀬𑀫𑁂𑀯 𑀕𑀳𑀺𑀢𑀁, 𑀲𑁂𑀲𑀧𑀭𑀺𑀲𑀸𑀦𑀁 𑀧𑀦 𑀢𑀤𑀜𑁆𑀜𑁂𑀲𑀫𑁆𑀧𑀺 𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀲𑀩𑁆𑀩𑀲𑀸𑀥𑀸𑀭𑀡𑁄𑀯𑀸𑀬𑀁 𑀥𑀫𑁆𑀫𑀲𑀗𑁆𑀕𑀳𑁄𑀢𑀺 𑀇𑀫𑀫𑀢𑁆𑀣𑀁 𑀉𑀧𑀫𑀸𑀧𑀼𑀩𑁆𑀩𑀓𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑀣𑀸 𑀦𑀸𑀫𑀸’’𑀢𑀺𑀆𑀤𑀺 ¶ 𑀆𑀭𑀤𑁆𑀥𑀁. 𑀬𑀚𑀦𑁆𑀢𑁄𑀢𑀺 𑀤𑀤𑀦𑁆𑀢𑁄. 𑀯𑀺𑀦𑁆𑀤𑀺𑀢𑀩𑁆𑀩𑁄𑀢𑀺 𑀮𑀤𑁆𑀥𑀩𑁆𑀩𑁄, 𑀅𑀥𑀺𑀕𑀦𑁆𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.

𑀙𑀦𑁆𑀤𑁄𑀢𑀺 𑀢𑀡𑁆𑀳𑀸𑀙𑀦𑁆𑀤𑁄. 𑀢𑁂𑀦𑀸𑀳 𑁋 ‘‘𑀤𑀼𑀩𑁆𑀩𑀮𑀢𑀡𑁆𑀳𑀸 𑀲𑁄 𑀭𑀜𑁆𑀚𑁂𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺. 𑀧𑀼𑀩𑁆𑀩𑀼𑀧𑁆𑀧𑀢𑁆𑀢𑀺𑀓𑀸 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀧𑀞𑀫𑀁 𑀉𑀧𑁆𑀧𑀦𑁆𑀦𑀸. 𑀲𑀸 𑀳𑀺 𑀅𑀦𑀸𑀲𑁂𑀯𑀦𑀢𑁆𑀢𑀸 𑀫𑀦𑁆𑀤𑀸. 𑀲𑁄𑀢𑀺 𑀙𑀦𑁆𑀤𑁄. 𑀭𑀜𑁆𑀚𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀮𑀤𑁆𑀥𑀸𑀲𑁂𑀯𑀦𑀢𑁆𑀢𑀸. 𑀤𑁄𑀲𑁄 𑀦𑀸𑀫 𑀘𑀺𑀢𑁆𑀢𑀤𑀽𑀲𑀦𑀢𑁆𑀢𑀸. 𑀢𑀸𑀦𑀻𑀢𑀺 𑀤𑀡𑁆𑀟𑀸𑀤𑀸𑀦𑀸𑀤𑀻𑀦𑀺. 𑀢𑀫𑁆𑀫𑀽𑀮𑀓𑀸𑀢𑀺 𑀮𑁄𑀪𑀫𑀽𑀮𑀓𑀸 𑀢𑀸𑀯 𑀫𑀸𑀬𑀸𑀲𑀸𑀞𑁂𑀬𑁆𑀬𑀫𑀸𑀦𑀸𑀢𑀺𑀫𑀸𑀦𑀤𑀺𑀝𑁆𑀞𑀺𑀘𑀸𑀧𑀮𑀸𑀤𑀬𑁄, 𑀤𑁄𑀲𑀫𑀽𑀮𑀓𑀸 𑀉𑀧𑀦𑀸𑀳𑀫𑀓𑁆𑀔𑀧𑀮𑀸𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬𑀣𑀫𑁆𑀪𑀲𑀸𑀭𑀫𑁆𑀪𑀸𑀤𑀬𑁄, 𑀫𑁄𑀳𑀫𑀽𑀮𑀓𑀸 𑀅𑀳𑀺𑀭𑀺𑀓-𑀅𑀦𑁄𑀢𑁆𑀢𑀧𑁆𑀧-𑀣𑀺𑀦𑀫𑀺𑀤𑁆𑀥𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘-𑀯𑀺𑀧𑀭𑀻𑀢𑀫𑀦𑀲𑀺𑀓𑀸𑀭𑀸𑀤𑀬𑁄, 𑀲𑀁𑀓𑀺𑀮𑁂𑀲𑀥𑀫𑁆𑀫𑀸 𑀕𑀳𑀺𑀢𑀸𑀯 𑀳𑁄𑀦𑁆𑀢𑀺 𑀢𑀁𑀫𑀽𑀮𑀓𑀢𑁆𑀢𑀸. 𑀬𑀲𑁆𑀫𑀸 𑀧𑀦 𑀲𑀩𑁆𑀩𑁂𑀧𑀺 𑀲𑀁𑀓𑀺𑀮𑁂𑀲𑀥𑀫𑁆𑀫𑀸 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀸 𑀏𑀯, 𑀢𑀲𑁆𑀫𑀸 𑀢𑁂𑀲𑀫𑁆𑀧𑁂𑀢𑁆𑀣 𑀕𑀳𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀙𑀦𑁆𑀤𑁄 𑀭𑀸𑀕𑁄𑀢𑀺 𑀯𑀸’’𑀢𑀺 𑀯𑀼𑀢𑁆𑀢𑀁.

𑀪𑀸𑀬𑀺𑀢𑀩𑁆𑀩𑀝𑁆𑀞𑁂𑀦 ¶ 𑀲𑀪𑀬𑁄. 𑀪𑁂𑀭𑀯𑀝𑁆𑀞𑁂𑀦 𑀲𑀧𑁆𑀧𑀝𑀺𑀪𑀬𑁄. 𑀓𑀼𑀲𑀮𑀧𑀓𑁆𑀔𑀲𑁆𑀲 𑀯𑀺𑀓𑁆𑀔𑀫𑁆𑀪𑀦𑀝𑁆𑀞𑁂𑀦 𑀲𑀓𑀡𑁆𑀝𑀓𑁄. 𑀓𑀼𑀲𑀮𑀅𑀦𑀯𑀚𑁆𑀚𑀥𑀫𑁆𑀫𑁂𑀳𑀺 𑀤𑀼𑀭𑀯𑀕𑀸𑀳𑀝𑁆𑀞𑁂𑀦 𑀲𑀕𑀳𑀦𑁄. 𑀪𑀯𑀲𑀫𑁆𑀧𑀢𑁆𑀢𑀺𑀪𑀯𑀦𑀺𑀩𑁆𑀩𑀸𑀦𑀸𑀦𑀁 𑀅𑀧𑁆𑀧𑀤𑀸𑀦𑀪𑀸𑀯𑀢𑁄 𑀉𑀫𑁆𑀫𑀕𑁆𑀕𑁄. 𑀤𑀼𑀕𑁆𑀕𑀢𑀺𑀕𑀸𑀫𑀺𑀫𑀕𑁆𑀕𑀢𑁆𑀢𑀸 𑀓𑀼𑀫𑁆𑀫𑀕𑁆𑀕𑁄. 𑀇𑀭𑀺𑀬𑀦𑀸𑀢𑀺 𑀯𑀢𑁆𑀢𑀦𑀸 𑀧𑀝𑀺𑀧𑀚𑁆𑀚𑀦𑀸. 𑀤𑀼𑀕𑁆𑀕𑀢𑀺𑀕𑀸𑀫𑀺𑀢𑀸𑀬 𑀓𑀺𑀮𑁂𑀲𑁄 𑀏𑀯 𑀓𑀺𑀮𑁂𑀲𑀫𑀕𑁆𑀕𑁄. 𑀦 𑀲𑀓𑁆𑀓𑀸 𑀲𑀫𑁆𑀧𑀢𑁆𑀢𑀺𑀪𑀯𑀁 𑀕𑀦𑁆𑀢𑀼𑀁 𑀓𑀼𑀢𑁄 𑀦𑀺𑀩𑁆𑀩𑀸𑀦𑀕𑀫𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀲𑀼𑀪𑀸𑀯𑀚𑁆𑀚𑀦𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀦𑀺𑀘𑁆𑀘𑀫𑀦𑀲𑀺𑀓𑀸𑀭𑀸𑀤𑀻𑀦𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀘𑀺𑀢𑁆𑀢𑀁 𑀦𑀺𑀯𑀢𑁆𑀢𑀢𑀺 𑀲𑀭𑀸𑀕𑀘𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺 𑀧𑀝𑀺𑀧𑀓𑁆𑀔𑀫𑀦𑀲𑀺𑀓𑀸𑀭𑁂𑀦 𑀯𑀺𑀦𑁄𑀤𑀺𑀢𑀢𑁆𑀢𑀸. 𑀫𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑁂𑀢𑀺 𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀝𑁆𑀞𑀸𑀦𑀺𑀬𑁂 𑀆𑀭𑀫𑁆𑀫𑀡𑁂. 𑀉𑀤𑁆𑀤𑁂𑀲…𑀧𑁂… 𑀆𑀯𑀚𑁆𑀚𑀦𑁆𑀢𑀲𑁆𑀲𑀸𑀢𑀺 𑀉𑀤𑁆𑀤𑀺𑀲𑀸𑀧𑀦𑀯𑀲𑁂𑀦 𑀉𑀤𑁆𑀤𑁂𑀲𑀁, 𑀧𑀭𑀺𑀧𑀼𑀘𑁆𑀙𑀸𑀧𑀦𑀯𑀲𑁂𑀦 𑀧𑀭𑀺𑀧𑀼𑀘𑁆𑀙𑀁, 𑀕𑀭𑀽𑀦𑀁 𑀲𑀦𑁆𑀢𑀺𑀓𑁂 𑀯𑀲𑀦𑀯𑀲𑁂𑀦 𑀕𑀭𑀼𑀯𑀸𑀲𑀁 𑀆𑀯𑀚𑁆𑀚𑀦𑁆𑀢𑀲𑁆𑀲. 𑀘𑀺𑀢𑁆𑀢𑀦𑁆𑀢𑀺 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬-𑀧𑀘𑁆𑀘𑀯𑁂𑀓𑁆𑀔𑀡-𑀧𑀜𑁆𑀜𑀯𑀦𑁆𑀢-𑀧𑀼𑀕𑁆𑀕𑀮𑀲𑁂𑀯𑀦𑀯𑀲𑁂𑀦 𑀢𑀤𑀥𑀺𑀫𑀼𑀢𑁆𑀢𑀺𑀲𑀺𑀤𑁆𑀥𑀺𑀬𑀸 𑀅𑀜𑁆𑀜𑀸𑀡𑀘𑀺𑀢𑁆𑀢𑀁 𑀦𑀺𑀯𑀢𑁆𑀢𑀢𑀺.

𑀬𑀣𑀸 ‘‘𑀧𑀼𑀚𑁆𑀚𑀪𑀯𑀨𑀮𑀁 𑀧𑀼𑀜𑁆𑀜’’𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀏𑀯𑀫𑀺𑀤𑀁 𑀧𑀼𑀜𑁆𑀜𑀁 𑀧𑀯𑀟𑁆𑀠𑀢𑀻’’𑀢𑀺 (𑀤𑀻. 𑀦𑀺. 𑁩.𑁮𑁦), 𑀏𑀯𑀁 𑀓𑀺𑀝𑁆𑀞𑀲𑀫𑁆𑀪𑀯𑀢𑁆𑀢𑀸 ‘‘𑀓𑀺𑀝𑁆𑀞’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀓𑀺𑀝𑁆𑀞𑀦𑁆𑀢𑀺 𑀓𑀺𑀝𑁆𑀞𑀝𑁆𑀞𑀸𑀦𑁂 𑀉𑀧𑁆𑀧𑀦𑁆𑀦𑀲𑀲𑁆𑀲’’𑀦𑁆𑀢𑀺.

𑀖𑀝𑀸𑀢𑀺 ¶ 𑀲𑀺𑀗𑁆𑀕𑀬𑀼𑀕𑀁 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 ‘‘𑀤𑁆𑀯𑀺𑀦𑁆𑀦𑀁 𑀲𑀺𑀗𑁆𑀕𑀸𑀦𑀁 𑀅𑀦𑁆𑀢𑀭𑁂’’𑀢𑀺. 𑀖𑀝𑀸𑀢𑀺 𑀕𑁄𑀡𑀸𑀤𑀻𑀦𑀁 𑀲𑀺𑀗𑁆𑀕𑀦𑁆𑀢𑀭𑀝𑁆𑀞𑀲𑁆𑀲 𑀲𑀫𑀜𑁆𑀜𑀸𑀢𑀺 𑀯𑀤𑀦𑁆𑀢𑀺. 𑀦𑀸𑀲𑀸𑀭𑀚𑁆𑀚𑀼𑀓𑁂𑀢𑀺 𑀦𑀸𑀲𑀸𑀭𑀚𑁆𑀚𑀼𑀧𑀸𑀢𑀝𑁆𑀞𑀸𑀦𑁂.

𑀤𑀫𑁂𑀢𑀺 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑀢𑁄 𑀦𑀺𑀯𑀸𑀭𑁂𑀢𑀺. 𑀦𑀦𑁆𑀢𑀺 𑀘𑀺𑀢𑁆𑀢𑀁. 𑀬𑀁 𑀲𑀼𑀢𑁆𑀢𑀁 𑀲𑀼𑀪𑀸𑀲𑀺𑀢𑀁 𑀫𑀬𑀸. 𑀢𑀤𑀲𑁆𑀲𑀸𑀢𑀺 𑀢𑀤𑀸 𑀅𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀆𑀭𑀫𑁆𑀫𑀡𑁂𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀭𑀫𑁆𑀫𑀡𑁂.

𑀲𑀼𑀤𑀼𑀚𑀺𑀢𑀦𑁆𑀢𑀺 𑀦𑀺𑀩𑁆𑀩𑀺𑀲𑁂𑀯𑀦𑀪𑀸𑀯𑀓𑀭𑀡𑁂𑀦 𑀚𑀺𑀢𑀁. 𑀲𑀼𑀢𑀚𑁆𑀚𑀺𑀢𑀦𑁆𑀢𑀺 𑀲𑀼𑀝𑁆𑀞𑀼 𑀤𑀽𑀭𑀓𑀭𑀡𑁂𑀦 𑀚𑀺𑀢𑀁, 𑀢𑀣𑀸𑀪𑀽𑀢𑀜𑁆𑀘 𑀢𑀚𑁆𑀚𑀺𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀢𑀣𑀸 𑀯𑀼𑀢𑁆𑀢𑀁. 𑀕𑁄𑀘𑀭𑀚𑁆𑀛𑀢𑁆𑀢𑀦𑁆𑀢𑀺 𑀅𑀚𑁆𑀛𑀢𑁆𑀢𑀪𑀽𑀢𑁄 𑀕𑁄𑀘𑀭𑁄. 𑀓𑀫𑁆𑀫𑀝𑁆𑀞𑀸𑀦𑀸𑀭𑀫𑁆𑀫𑀡𑀜𑁆𑀳𑀺 𑀩𑀳𑀺𑀤𑁆𑀥𑀸𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀯𑀺𑀥𑀼𑀭𑀢𑀸𑀬 𑀅𑀚𑁆𑀛𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀣𑁄 𑀅𑀦𑀼𑀭𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀲𑀫𑀣𑀸𑀦𑀼𑀭𑀓𑁆𑀔𑀡𑀁. 𑀬𑀣𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀁 𑀲𑀫𑀣𑀸𑀦𑀼𑀭𑀓𑁆𑀔𑀡𑀁 𑀳𑁄𑀢𑀺, 𑀢𑀣𑀸 𑀓𑀣𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀬𑀣𑀸 𑀳𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀁 𑀲𑀫𑀣𑀲𑁆𑀲 𑀧𑀘𑁆𑀘𑀬𑁄, 𑀏𑀯𑀁 𑀲𑀫𑀣𑁄𑀧𑀺 𑀢𑀲𑁆𑀲 𑀧𑀘𑁆𑀘𑀬𑁄𑀢𑀺.

𑀯𑀸𑀤𑀺𑀬𑀫𑀸𑀦𑀸𑀬 𑀯𑀻𑀡𑀸𑀬. 𑀘𑀺𑀢𑁆𑀢𑀁 𑀭𑀜𑁆𑀚𑁂𑀢𑀻𑀢𑀺 𑀭𑀚𑁆𑀚𑀦𑁂𑀦. 𑀅𑀯𑀺𑀲𑁆𑀲𑀚𑁆𑀚𑀦𑀻𑀬𑀢𑀸𑀬 𑀘𑀺𑀢𑁆𑀢𑀁 𑀩𑀦𑁆𑀥𑀢𑀻𑀢𑀺 ¶ 𑀩𑀦𑁆𑀥𑀦𑀻𑀬𑁄. 𑀯𑁂𑀝𑁆𑀞𑀓𑁂𑀢𑀺 𑀢𑀦𑁆𑀢𑀻𑀦𑀁 𑀆𑀲𑀚𑁆𑀚𑀦𑀯𑁂𑀝𑁆𑀞𑀓𑁂. 𑀓𑁄𑀡𑀦𑁆𑀢𑀺 𑀓𑀯𑀡𑀢𑁄 𑀯𑀻𑀡𑀸𑀬 𑀲𑀤𑁆𑀤𑀓𑀭𑀡𑀢𑁄 𑀓𑁄𑀡𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀤𑀸𑀭𑀼𑀤𑀡𑁆𑀟𑀁 𑀲𑀺𑀗𑁆𑀕𑀸𑀤𑀻𑀲𑀼 𑀬𑁂𑀦 𑀓𑁂𑀦𑀘𑀺 𑀓𑀢𑀁 𑀖𑀝𑀺𑀓𑀁. 𑀢𑁂𑀦𑀸𑀳 ‘‘𑀘𑀢𑀼𑀭𑀲𑁆𑀲𑀁 𑀲𑀸𑀭𑀤𑀡𑁆𑀟𑀓’’𑀦𑁆𑀢𑀺.

𑀬𑀲𑁆𑀫𑀸 𑀲𑁄 𑀭𑀸𑀚𑀸 𑀭𑀸𑀚𑀫𑀳𑀸𑀫𑀢𑁆𑀢𑁄 𑀯𑀸 𑀲𑀤𑁆𑀤𑀁 𑀬𑀣𑀸𑀲𑀪𑀸𑀯𑀢𑁄 𑀦 𑀅𑀜𑁆𑀜𑀸𑀲𑀺, 𑀢𑀲𑁆𑀫𑀺𑀁 𑀢𑀲𑁆𑀲 𑀅𑀚𑀸𑀦𑀦𑀸𑀓𑀸𑀭𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀲𑀤𑁆𑀤𑀁 𑀧𑀲𑁆𑀲𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀲𑀢𑀻 𑀓𑀺𑀭𑀸𑀬𑀦𑁆𑀢𑀺 𑀧𑀸𑀴𑀺𑀬𑀁 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀬𑀣𑀸𑀮𑀺𑀗𑁆𑀕𑀫𑁂𑀯 𑀯𑀤𑀦𑁆𑀢𑁄 ‘‘𑀅𑀲𑀸’’𑀢𑀺 𑀆𑀳. ‘‘𑀅𑀲𑀢𑀻𑀢𑀺 𑀮𑀸𑀫𑀓𑀸𑀥𑀺𑀯𑀘𑀦’’𑀦𑁆𑀢𑀺 𑀯𑀢𑁆𑀯𑀸 𑀢𑀢𑁆𑀣 𑀧𑀬𑁄𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀸 𑀮𑁄𑀓𑀺𑀢𑁆𑀣𑀺𑀬𑁄 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁, 𑀮𑁄𑀓𑁂 𑀇𑀢𑁆𑀣𑀺𑀬𑁄 𑀦𑀸𑀫 𑀅𑀲𑀢𑀺𑀬𑁄𑀢𑀺 𑀅𑀢𑁆𑀣𑁄, 𑀢𑀢𑁆𑀣 𑀓𑀸𑀭𑀡𑀫𑀸𑀳 ‘‘𑀯𑁂𑀮𑀸 𑀢𑀸𑀲𑀁 𑀦 𑀯𑀺𑀚𑁆𑀚𑀢𑀻’’𑀢𑀺. 𑀧𑀓𑀢𑀺𑀬𑀸 𑀮𑁄𑀓𑁂 𑀚𑁂𑀝𑁆𑀞𑀪𑀸𑀢𑀸 𑀓𑀦𑀺𑀝𑁆𑀞𑀪𑀸𑀢𑀸 𑀫𑀸𑀢𑀼𑀮𑁄𑀢𑀺𑀆𑀤𑀺𑀓𑀸 𑀯𑁂𑀮𑀸 𑀫𑀭𑀺𑀬𑀸𑀤𑀸 𑀢𑀸𑀲𑀁 𑀦 𑀯𑀺𑀚𑁆𑀚𑀢𑀺. 𑀓𑀲𑁆𑀫𑀸? 𑀲𑀸𑀭𑀢𑁆𑀢𑀸 𑀘 𑀧𑀕𑀩𑁆𑀩𑀸 𑀘 𑀲𑀩𑁆𑀩𑁂𑀲𑀫𑁆𑀧𑀺 𑀲𑀫𑁆𑀪𑁄𑀕𑀯𑀲𑁂𑀦 𑀯𑀺𑀦𑀺𑀬𑁄𑀕𑀁 𑀕𑀘𑁆𑀙𑀦𑁆𑀢𑀺. 𑀓𑀣𑀁? 𑀲𑀺𑀔𑀻 𑀲𑀩𑁆𑀩𑀖𑀲𑁄 𑀬𑀣𑀸. 𑀢𑁂𑀦𑁂𑀯𑀸𑀳 𑁋

‘‘𑀲𑀩𑁆𑀩𑀸 ¶ 𑀦𑀤𑀻 𑀯𑀗𑁆𑀓𑀕𑀢𑀻, 𑀲𑀩𑁆𑀩𑁂 𑀓𑀝𑁆𑀞𑀫𑀬𑀸 𑀯𑀦𑀸;

𑀲𑀩𑁆𑀩𑀺𑀢𑁆𑀣𑀺𑀬𑁄 𑀓𑀭𑁂 𑀧𑀸𑀧𑀁, 𑀮𑀪𑀫𑀸𑀦𑁂 𑀦𑀺𑀯𑀸𑀢𑀓𑁂’’𑀢𑀺. (𑀚𑀸. 𑁨.𑁨𑁧.𑁩𑁦𑁮);

𑀅𑀜𑁆𑀜𑀫𑁆𑀧𑀺 𑀢𑀦𑁆𑀢𑀺𑀩𑀤𑁆𑀥𑀁 𑀘𑀢𑀼𑀭𑀲𑁆𑀲𑀅𑀫𑁆𑀩𑀡𑀯𑀸𑀤𑀺𑀢𑀸𑀤𑀻𑀦𑀺. 𑀯𑀻𑀡𑀸 𑀯𑀺𑀬 𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀦𑁂𑀓𑀥𑀫𑁆𑀫𑀲𑀫𑀽𑀳𑀪𑀸𑀯𑀢𑁄. 𑀭𑀸𑀚𑀸 𑀯𑀺𑀬 𑀬𑁄𑀕𑀸𑀯𑀘𑀭𑁄 𑀢𑀧𑁆𑀧𑀝𑀺𑀩𑀤𑁆𑀥𑀥𑀫𑁆𑀫𑀕𑀯𑁂𑀲𑀓𑀢𑁆𑀢𑀸. 𑀅𑀲𑁆𑀲𑀸𑀢𑀺 𑀬𑁄𑀕𑀸𑀯𑀘𑀭𑀲𑁆𑀲.

𑀦𑀺𑀭𑀬𑀸𑀤𑀺𑀢𑁄 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀕𑀢𑀺-𑀲𑀤𑁆𑀤𑁄 𑀯𑀢𑁆𑀢𑀢𑀺. 𑀢𑀢𑁄 𑀯𑀺𑀲𑁂𑀲𑀦𑀢𑁆𑀣𑀁 ‘‘𑀕𑀢𑀺𑀕𑀢𑀻’’𑀢𑀺 𑀯𑀼𑀢𑁆𑀢𑀁 ‘‘𑀤𑀼𑀓𑁆𑀔𑀤𑀼𑀓𑁆𑀔𑀁, 𑀭𑀽𑀧𑀭𑀽𑀧’’𑀦𑁆𑀢𑀺 𑀘 𑀬𑀣𑀸, 𑀕𑀢𑀺𑀲𑀜𑁆𑀜𑀺𑀢𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 𑁋 ‘‘𑀏𑀢𑁆𑀣𑀦𑁆𑀢𑀭𑁂 𑀲𑀁𑀲𑀭𑀢𑀺 𑀯𑀢𑁆𑀢𑀢𑀻’’𑀢𑀺. 𑀲𑀜𑁆𑀚𑀸𑀬𑀦𑀧𑀤𑁂𑀲𑁄 𑀏𑀯 𑀕𑀢𑀻𑀢𑀺 𑀲𑀜𑁆𑀚𑀸𑀢𑀺𑀕𑀢𑀺.

𑀢𑀁 𑀧𑀦 𑀕𑀢𑀺𑀁 𑀲𑀢𑁆𑀢𑀸𑀦𑀁 𑀲𑀁𑀯𑁂𑀕𑀯𑀢𑁆𑀣𑀼𑀪𑀽𑀢𑀲𑁆𑀲 𑀧𑀘𑁆𑀘𑀓𑁆𑀔𑀲𑁆𑀲 𑀕𑀩𑁆𑀪𑀸𑀲𑀬𑀲𑁆𑀲 𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀬𑀫𑀲𑁆𑀲 𑀓𑀸𑀬𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀭𑀽𑀧𑀥𑀫𑁆𑀫𑀲𑁆𑀲 𑀲𑀮𑀓𑁆𑀔𑀡𑀁 𑀕𑀢𑀺 𑀦𑀺𑀝𑁆𑀞𑀸, 𑀢𑀢𑁄 𑀧𑀭𑀁 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀦𑀢𑁆𑀣𑀻𑀢𑀺 𑀲𑀮𑀓𑁆𑀔𑀡𑀕𑀢𑀺. 𑀅𑀪𑀸𑀯𑁄 𑀅𑀘𑁆𑀘𑀦𑁆𑀢𑀸𑀪𑀸𑀯𑁄. 𑀲𑀦𑁆𑀢𑀸𑀦𑀯𑀺𑀘𑁆𑀙𑁂𑀤𑁄 𑀯𑀺𑀪𑀯𑀕𑀢𑀺 𑀢𑀁𑀦𑀺𑀝𑁆𑀞𑀸𑀦𑀪𑀸𑀯𑀸. 𑀪𑁂𑀤𑁄𑀢𑀺 𑀔𑀡𑀦𑀺𑀭𑁄𑀥𑁄, 𑀇𑀥𑀸𑀧𑀺 𑀢𑀁𑀦𑀺𑀝𑁆𑀞𑀸𑀦𑀢𑀸𑀬𑁂𑀯 𑀧𑀭𑀺𑀬𑀸𑀬𑁄. 𑀬𑀸𑀯 𑀪𑀯𑀕𑁆𑀕𑀸𑀢𑀺 𑀬𑀸𑀯 𑀲𑀩𑁆𑀩𑀪𑀯𑀕𑁆𑀕𑀸. 𑀲𑀮𑀓𑁆𑀔𑀡𑀯𑀺𑀪𑀯𑀕𑀢𑀺𑀪𑁂𑀤𑀕𑀢𑀺𑀬𑁄 ‘‘𑀏𑀲𑁂𑀯 𑀦𑀬𑁄’’𑀢𑀺 𑀇𑀫𑀺𑀦𑀸𑀯 𑀧𑀓𑀸𑀲𑀺𑀢𑀸𑀢𑀺 𑀦 𑀕𑀳𑀺𑀢𑀸. 𑀢𑀲𑁆𑀲 𑀔𑀻𑀡𑀸𑀲𑀯𑀲𑁆𑀲 𑀦 𑀳𑁄𑀢𑀺 𑀅𑀕𑁆𑀕𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸.

𑀲𑀻𑀮𑀁 ¶ 𑀓𑀣𑀺𑀢𑀁 𑀭𑀽𑀧𑀸𑀤𑀻𑀲𑀼 𑀙𑀦𑁆𑀤𑀸𑀤𑀺𑀦𑀺𑀯𑀸𑀭𑀡𑀲𑁆𑀲 𑀓𑀣𑀺𑀢𑀢𑁆𑀢𑀸. 𑀫𑀚𑁆𑀛𑁂 𑀲𑀫𑀸𑀥𑀺𑀪𑀸𑀯𑀦𑀸 𑀓𑀣𑀺𑀢𑀸 ‘‘𑀅𑀚𑁆𑀛𑀢𑁆𑀢𑀫𑁂𑀯 𑀲𑀦𑁆𑀢𑀺𑀝𑁆𑀞𑀢𑀺…𑀧𑁂… 𑀲𑀫𑀸𑀥𑀺𑀬𑀢𑀻’’𑀢𑀺 𑀚𑁄𑀢𑀺𑀢𑀢𑁆𑀢𑀸. 𑀧𑀭𑀺𑀬𑁄𑀲𑀸𑀦𑁂 𑀘 𑀦𑀺𑀩𑁆𑀩𑀸𑀦𑀁 𑀓𑀣𑀺𑀢𑀁 ‘‘𑀬𑀫𑁆𑀧𑀺𑀲𑁆𑀲…𑀧𑁂… 𑀦 𑀳𑁄𑀢𑀻’’𑀢𑀺 𑀯𑀘𑀦𑀢𑁄.

𑀯𑀻𑀡𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀙𑀧𑁆𑀧𑀸𑀡𑀓𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁭. 𑀯𑀡𑀲𑀭𑀻𑀭𑁄𑀢𑀺 𑀯𑀡𑀺𑀢𑀲𑀭𑀻𑀭𑁄. 𑀧𑀓𑁆𑀓𑀢𑁆𑀢𑀸𑀢𑀺 𑀓𑀼𑀣𑀺𑀢𑀢𑁆𑀢𑀸. 𑀲𑀭𑀤𑀡𑁆𑀟𑁂𑀲𑀼 𑀲𑀭𑀲𑀫𑀜𑁆𑀜𑀸𑀢𑀺 𑀓𑀡𑁆𑀟-𑀲𑀤𑁆𑀤𑁄 𑀲𑀭𑀧𑀭𑀺𑀬𑀸𑀬𑁄𑀢𑀺 𑀆𑀳 𑁋 ‘‘𑀲𑀭𑀯𑀦𑀦𑁆𑀢𑀺 𑀓𑀡𑁆𑀟𑀯𑀦’’𑀦𑁆𑀢𑀺. 𑀅𑀭𑀼𑀕𑀢𑁆𑀢𑁄…𑀧𑁂… 𑀯𑁂𑀤𑀺𑀢𑀩𑁆𑀩𑁄 𑀕𑀼𑀡𑀲𑀭𑀻𑀭𑀲𑁆𑀲 𑀔𑀡𑁆𑀟𑀙𑀺𑀤𑁆𑀤𑀲𑀻𑀮𑀸𑀤𑀻𑀳𑀺 𑀳𑁂𑀝𑁆𑀞𑀸 𑀫𑀚𑁆𑀛𑁂 𑀉𑀧𑀭𑀺𑀪𑀸𑀕𑁂 𑀘 𑀪𑁂𑀤𑀯𑀺𑀲𑀫𑀘𑁆𑀙𑀺𑀦𑁆𑀦𑀯𑀺𑀓𑀸𑀭𑀤𑁄𑀲𑀢𑁆𑀢𑀸. 𑀏𑀢𑁆𑀣 ¶ 𑀓𑀼𑀲𑀸 ‘‘𑀓𑀡𑁆𑀝𑀓𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀸 𑀓𑀡𑁆𑀝𑀓𑀲𑀤𑀺𑀲𑀢𑁆𑀢𑀸, 𑀓𑀼𑀲𑀢𑀺𑀡𑀸𑀦𑀁 𑀏𑀯 𑀯𑀸 𑀯𑀼𑀢𑁆𑀢𑀸𑀓𑀸𑀭𑀧𑀤𑁂𑀲𑁄 ‘‘𑀓𑀼𑀲𑀓𑀡𑁆𑀝𑀓𑁄’’𑀢𑀺 𑀯𑀼𑀢𑁆𑀢𑁄.

𑀕𑀸𑀫𑀯𑀸𑀲𑀻𑀦𑀁 𑀯𑀺𑀚𑁆𑀛𑀦𑀝𑁆𑀞𑁂𑀦𑀸𑀢𑀺 𑀦𑀸𑀭𑀳𑁄𑀯 𑀳𑀼𑀢𑁆𑀯𑀸 𑀢𑁂𑀲𑀁 𑀓𑀸𑀭𑀸𑀦𑀁 𑀧𑀝𑀺𑀕𑁆𑀕𑀳𑀡𑀯𑀲𑁂𑀦 𑀧𑀻𑀴𑀦𑀝𑁆𑀞𑁂𑀦.

𑀧𑀓𑁆𑀔𑀺𑀦𑁆𑀢𑀺 𑀳𑀢𑁆𑀣𑀺𑀮𑀺𑀗𑁆𑀕𑀲𑀓𑀼𑀡𑀁. 𑀢𑀲𑁆𑀲 𑀓𑀺𑀭 𑀳𑀢𑁆𑀣𑀺𑀲𑁄𑀡𑁆𑀟𑀲𑀤𑀺𑀲𑀁 𑀫𑀼𑀔𑀁, 𑀢𑀲𑁆𑀫𑀸 ‘‘𑀳𑀢𑁆𑀣𑀺𑀲𑁄𑀡𑁆𑀟𑀲𑀓𑀼𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀺𑀲𑁆𑀲𑀚𑁆𑀚𑁂𑀬𑁆𑀬𑀸𑀢𑀺 𑀭𑀚𑁆𑀚𑀼𑀬𑀸 𑀬𑀣𑀸𑀩𑀤𑁆𑀥𑀁 𑀏𑀯 𑀯𑀺𑀲𑁆𑀲𑀚𑁆𑀚𑁂𑀬𑁆𑀬.

𑀪𑁄𑀕𑁂𑀳𑀻𑀢𑀺 𑀅𑀢𑁆𑀢𑀦𑁄 𑀲𑀭𑀻𑀭𑀪𑁄𑀕𑁂𑀳𑀺. 𑀫𑀡𑁆𑀟𑀮𑀁 𑀩𑀦𑁆𑀥𑀺𑀢𑁆𑀯𑀸𑀢𑀺 𑀬𑀣𑀸 𑀲𑀭𑀻𑀭𑀁 𑀫𑀡𑁆𑀟𑀮𑀸𑀓𑀸𑀭𑁂𑀦 𑀢𑀺𑀝𑁆𑀞𑀢𑀺, 𑀏𑀯𑀁 𑀓𑀢𑁆𑀯𑀸. 𑀲𑀼𑀧𑀺𑀲𑁆𑀲𑀸𑀫𑀻𑀢𑀺 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺𑀲𑁆𑀲𑀸𑀫𑀺. 𑀟𑁂𑀢𑀼𑀓𑀸𑀫𑁄𑀢𑀺 𑀉𑀧𑁆𑀧𑀢𑀺𑀢𑀼𑀓𑀸𑀫𑁄. 𑀤𑀺𑀲𑀸 𑀤𑀺𑀲𑀦𑁆𑀢𑀺 𑀤𑀺𑀲𑀢𑁄 𑀤𑀺𑀲𑀁.

𑀙 𑀧𑀸𑀡𑀓𑀸 𑀯𑀺𑀬 𑀙 𑀆𑀬𑀢𑀦𑀸𑀦𑀺 𑀦𑀸𑀦𑀚𑁆𑀛𑀸𑀲𑀬𑀢𑁆𑀢𑀸, 𑀦𑀸𑀦𑀚𑁆𑀛𑀸𑀲𑀬𑀢𑀸 𑀘 𑀦𑁂𑀲𑀁 𑀦𑀸𑀦𑀸𑀯𑀺𑀲𑀬𑀦𑀺𑀦𑁆𑀦𑀢𑀸𑀬 𑀤𑀝𑁆𑀞𑀩𑁆𑀩𑀸. 𑀤𑀴𑁆𑀳𑀭𑀚𑁆𑀚𑀼 𑀯𑀺𑀬 𑀢𑀡𑁆𑀳𑀸 𑀢𑁂𑀲𑀁 𑀩𑀦𑁆𑀥𑀦𑀢𑁄. 𑀫𑀚𑁆𑀛𑁂 𑀕𑀡𑁆𑀞𑀺 𑀯𑀺𑀬 𑀅𑀯𑀺𑀚𑁆𑀚𑀸 𑀩𑀦𑁆𑀥𑀦𑀲𑁆𑀲 𑀤𑀼𑀩𑁆𑀩𑀺𑀦𑀺𑀫𑁆𑀫𑁄𑀘𑀦𑀳𑁂𑀢𑀼𑀢𑁄. 𑀆𑀭𑀫𑁆𑀫𑀡𑀁 𑀩𑀮𑀯𑀁 𑀳𑁄𑀢𑀺 𑀫𑀦𑀼𑀜𑁆𑀜𑀪𑀸𑀯𑁂𑀦 𑀘𑁂𑀯 𑀢𑀢𑁆𑀣 𑀢𑀡𑁆𑀳𑀸𑀪𑀺𑀦𑀺𑀯𑁂𑀲𑀲𑁆𑀲 𑀤𑀴𑁆𑀳𑀪𑀸𑀯𑁂𑀦 𑀘.

𑀲𑀭𑀺𑀓𑁆𑀔𑀓𑁂𑀦 𑀯𑀸 𑀉𑀧𑀫𑀸𑀬 𑀆𑀳𑀭𑀡𑀧𑀓𑁆𑀔𑁂. 𑀅𑀧𑁆𑀧𑀦𑀸𑀢𑀺 𑀲𑀁𑀲𑀦𑁆𑀤𑀦𑀸. 𑀧𑀸𑀴𑀺𑀬𑀁𑀬𑁂𑀯 𑀅𑀧𑁆𑀧𑀺𑀢𑀸 𑀉𑀧𑀫𑀸 ‘‘𑀏𑀯𑀫𑁂𑀯 𑀔𑁄’’𑀢𑀺𑀆𑀤𑀺𑀦𑀸. 𑀭𑀽𑀧𑀘𑀺𑀢𑁆𑀢𑀸𑀤𑀺𑀯𑀺𑀲𑀫𑀦𑀺𑀦𑁆𑀦𑀢𑁆𑀢𑀸 𑀘𑀓𑁆𑀔𑀼𑀲𑁆𑀲 𑀯𑀺𑀲𑀫𑀚𑁆𑀛𑀸𑀲𑀬𑀢𑀸. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑀓𑀡𑁆𑀡𑀘𑁆𑀙𑀺𑀤𑁆𑀤𑀓𑀽𑀧𑀓𑁂𑀢𑀺 ¶ 𑀓𑀡𑁆𑀡𑀘𑁆𑀙𑀺𑀤𑁆𑀤𑀲𑀜𑁆𑀜𑀺𑀢𑁂 𑀆𑀯𑀸𑀝𑁂. 𑀢𑀲𑁆𑀲𑀸𑀢𑀺 𑀲𑁄𑀢𑀲𑁆𑀲. 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺 𑀢𑁂𑀦 𑀯𑀺𑀦𑀸 𑀲𑀤𑁆𑀤𑀕𑁆𑀕𑀳𑀡𑀲𑁆𑀲 𑀅𑀪𑀸𑀯𑀢𑁄. ‘‘𑀅𑀚𑀝𑀸𑀓𑀸𑀲𑁄𑀧𑀺 𑀯𑀝𑁆𑀝𑀢𑀺 𑀏𑀯𑀸’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀧𑀘𑁆𑀘𑀬𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑁆𑀢𑁄𑀮𑁂𑀡𑀲𑁆𑀫𑀺’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀥𑀸𑀢𑀼𑀧𑀭𑀫𑁆𑀧𑀭𑀸 𑀖𑀝𑁆𑀝𑁂𑀦𑁆𑀢𑁄𑀢𑀺 𑀪𑀽𑀢𑀧𑀭𑀫𑁆𑀧𑀭𑀸𑀲𑀗𑁆𑀖𑀝𑁆𑀝𑁂𑀦𑁆𑀢𑁄.

𑀏𑀯𑀁 𑀲𑀦𑁆𑀢𑁂𑀢𑀺 𑀏𑀯𑀁 𑀪𑀽𑀢𑀧𑀭𑀫𑁆𑀧𑀭𑀸𑀯𑀲𑁂𑀦 𑀲𑀤𑁆𑀤𑁂 𑀲𑁄𑀢𑀧𑀣𑀫𑀸𑀕𑀘𑁆𑀙𑀦𑁆𑀢𑁂. 𑀲𑀫𑁆𑀧𑀢𑁆𑀢𑀕𑁄𑀘𑀭𑀢𑀸 𑀳𑁄𑀢𑀺 𑀲𑁄𑀢𑀲𑁆𑀲. 𑀖𑀸𑀦𑀸𑀤𑀻𑀦𑀁 𑀯𑀺𑀬 ‘‘𑀤𑀽𑀭𑁂 𑀲𑀤𑁆𑀤𑁄’’𑀢𑀺 𑀚𑀸𑀦𑀦𑀁 𑀦 𑀲𑀫𑁆𑀪𑀯𑁂𑀬𑁆𑀬 𑀲𑀫𑁆𑀧𑀢𑁆𑀢𑀕𑀸𑀳𑀺𑀪𑀸𑀯𑀢𑁄. 𑀢𑀣𑀸 𑀢𑀣𑀸 𑀚𑀸𑀦𑀦𑀸𑀓𑀸𑀭𑁄 𑀳𑁄𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀕𑀳𑀡𑀸𑀓𑀸𑀭𑀯𑀺𑀲𑁂𑀲𑀢𑁄. 𑀲𑁄𑀢𑀯𑀺𑀜𑁆𑀜𑀸𑀡𑀧𑁆𑀧𑀯𑀢𑁆𑀢𑀺 𑀧𑀦 𑀉𑀪𑀬𑀢𑁆𑀣 𑀲𑀫𑀸𑀦𑀸𑀯. 𑀤𑀽𑀭𑁂 𑀞𑀺𑀢𑁄𑀧𑀺 𑀲𑀤𑁆𑀤𑁄 𑀢𑀸𑀤𑀺𑀲𑁂 𑀞𑀸𑀦𑁂 ¶ 𑀧𑀝𑀺𑀖𑁄𑀲𑀸𑀤𑀻𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺 𑀅𑀬𑁄𑀓𑀦𑁆𑀢𑁄 𑀯𑀺𑀬 𑀅𑀬𑁄𑀘𑀮𑀦𑀲𑁆𑀲𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀥𑀫𑁆𑀫𑀢𑀸𑀢𑀺 𑀥𑀫𑁆𑀫𑀲𑀪𑀸𑀯𑁄, 𑀲𑀤𑁆𑀤𑀲𑁆𑀲 𑀲𑁄 𑀲𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀢𑀢𑁄 𑀢𑀢𑁄 𑀲𑀯𑀦𑀁 𑀳𑁄𑀢𑀺 𑀆𑀓𑀸𑀲𑀲𑀜𑁆𑀜𑀺𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀲𑁆𑀲 𑀮𑀩𑁆𑀪𑀦𑀢𑁄. 𑀬𑀤𑀺 𑀧𑀦 𑀲𑁄𑀢𑀁 𑀲𑀫𑁆𑀧𑀢𑁆𑀢𑀕𑀸𑀳𑀻 𑀲𑀺𑀬𑀸, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑀤𑁆𑀤𑁄 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀦 𑀲𑀺𑀬𑀸. 𑀧𑀝𑁆𑀞𑀸𑀦𑁂 𑀘 𑀅𑀯𑀺𑀲𑁂𑀲𑁂𑀦 ‘‘𑀲𑀤𑁆𑀤𑀸𑀬𑀢𑀦𑀁 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑁄, 𑀩𑀳𑀺𑀤𑁆𑀥𑀸 𑀘 𑀘𑀺𑀢𑁆𑀢𑀚𑀲𑁆𑀲 𑀲𑀤𑁆𑀤𑀲𑁆𑀲 𑀲𑀫𑁆𑀪𑀯𑁄 𑀦𑀢𑁆𑀣𑀺. 𑀅𑀣 𑀯𑀸 𑀘𑀺𑀢𑁆𑀢𑀚𑁄 𑀲𑀤𑁆𑀤𑁄 𑀥𑀸𑀢𑀼𑀧𑀭𑀫𑁆𑀧𑀭𑀸𑀬 𑀲𑁄𑀢𑀧𑀲𑀸𑀤𑀁 𑀖𑀝𑁆𑀝𑁂𑀢𑀺, 𑀦 𑀲𑁄 𑀘𑀺𑀢𑁆𑀢𑀚𑁄 𑀲𑀤𑁆𑀤𑁄, 𑀬𑁄 𑀧𑀭𑀫𑁆𑀧𑀭𑀸𑀬 𑀧𑀯𑀢𑁆𑀢𑁄. 𑀉𑀢𑀼𑀚𑁄 𑀳𑀺 𑀲𑁄, 𑀢𑀲𑁆𑀫𑀸 𑀬𑀣𑀼𑀧𑁆𑀧𑀦𑁆𑀦𑁄 𑀲𑀤𑁆𑀤𑁄, 𑀢𑀢𑁆𑀣 𑀞𑀺𑀢𑁄𑀯 𑀲𑁄𑀢𑀧𑀲𑀸𑀤𑀲𑁆𑀲 𑀆𑀧𑀸𑀣𑀁 𑀆𑀕𑀘𑁆𑀙𑀢𑀻𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀲𑀫𑁆𑀧𑀢𑁆𑀢𑀕𑁄𑀘𑀭𑀫𑁂𑀯𑁂𑀢’’𑀦𑁆𑀢𑀺.

𑀢𑀤𑀸 𑀏𑀓𑀕𑁆𑀕𑀘𑀺𑀢𑁆𑀢𑀢𑀁 𑀆𑀧𑀚𑁆𑀚𑀢𑀺 𑀧𑀭𑀺𑀲𑁆𑀲𑀬𑀸𑀦𑀁 𑀅𑀪𑀸𑀯𑀢𑁄. 𑀦𑀸𑀲𑀘𑁆𑀙𑀺𑀤𑁆𑀤𑀲𑀗𑁆𑀔𑀸𑀢𑀆𑀓𑀸𑀲𑀲𑀦𑁆𑀦𑀺𑀲𑁆𑀲𑀬𑁂 𑀯𑀢𑁆𑀢𑀦𑀢𑁄 𑀖𑀸𑀦𑀁 𑀆𑀓𑀸𑀲𑀚𑁆𑀛𑀸𑀲𑀬𑀁 𑀯𑀼𑀢𑁆𑀢𑀁. 𑀯𑀸𑀢𑁂𑀦 𑀯𑀺𑀦𑀸 𑀕𑀦𑁆𑀥𑀕𑀳𑀡𑀲𑁆𑀲 𑀅𑀲𑀫𑁆𑀪𑀯𑀢𑁄 𑀯𑀸𑀢𑀽𑀧𑀦𑀺𑀲𑁆𑀲𑀬𑀕𑀦𑁆𑀥𑀕𑁄𑀘𑀭𑀁. 𑀢𑁂𑀦𑀸𑀳 ‘‘𑀢𑀣𑀸 𑀳𑀻’’𑀢𑀺𑀆𑀤𑀺.

𑀕𑀸𑀫𑀢𑁄 𑀮𑀤𑁆𑀥𑀩𑁆𑀩𑀁 𑀆𑀳𑀸𑀭𑀁 𑀕𑀸𑀫𑀁, 𑀢𑀦𑁆𑀦𑀺𑀦𑁆𑀦𑀢𑀸𑀬 𑀕𑀸𑀫𑀚𑁆𑀛𑀸𑀲𑀬𑀢𑀸 𑀯𑀼𑀢𑁆𑀢𑀸. 𑀢𑀣𑀸 𑀳𑀺 𑀚𑀻𑀯𑀺𑀢𑀦𑀺𑀫𑀺𑀢𑁆𑀢𑀁 𑀭𑀲𑁄 𑀚𑀻𑀯𑀺𑀢𑀁, 𑀢𑀲𑁆𑀫𑀺𑀁 𑀦𑀺𑀦𑁆𑀦𑀢𑀸𑀬 𑀢𑀁 𑀅𑀯𑁆𑀳𑀸𑀬𑀢𑀻𑀢𑀺 𑀚𑀺𑀯𑁆𑀳𑀸. 𑀦 𑀲𑀓𑁆𑀓𑀸 𑀔𑁂𑀴𑁂𑀦 𑀅𑀢𑁂𑀫𑀺𑀢𑀲𑁆𑀲 𑀭𑀲𑀁 𑀚𑀸𑀦𑀺𑀢𑀼𑀁, 𑀢𑀲𑁆𑀫𑀸 𑀆𑀧𑁄𑀲𑀦𑁆𑀦𑀺𑀲𑁆𑀲𑀺𑀢𑀭𑀲𑀸𑀭𑀫𑁆𑀫𑀡𑀸 𑀚𑀺𑀯𑁆𑀳𑀸𑀢𑀺.

𑀆𑀫𑀓𑀲𑀼𑀲𑀸𑀦𑀢𑁄 𑀩𑀳𑀺. 𑀉𑀧𑀸𑀤𑀺𑀡𑁆𑀡𑀓𑀚𑁆𑀛𑀸𑀲𑀬𑁄𑀢𑀺 𑀉𑀧𑀸𑀤𑀺𑀡𑁆𑀡𑀓𑀦𑀺𑀦𑁆𑀦𑁄. 𑀓𑀸𑀬𑀧𑀲𑀸𑀤𑀲𑀦𑁆𑀦𑀺𑀲𑁆𑀲𑀬𑀪𑀽𑀢𑀸𑀬 𑀧𑀣𑀯𑀺𑀬𑀸 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑁂 𑀖𑀝𑀺𑀢𑁂 𑀏𑀯 𑀢𑀢𑁆𑀣 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀯𑀼𑀢𑁆𑀢𑀁 ‘‘𑀧𑀣𑀯𑀻𑀲𑀦𑁆𑀦𑀺𑀲𑁆𑀲𑀺𑀢𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑁄’’𑀢𑀺. 𑀢𑀣𑀸 𑀳𑀻𑀢𑀺𑀆𑀤𑀺 𑀓𑀸𑀬𑀲𑁆𑀲 𑀉𑀧𑀸𑀤𑀺𑀡𑁆𑀡𑀓𑀚𑁆𑀛𑀸𑀲𑀬𑀢𑀸𑀬 𑀲𑀸𑀥𑀓𑀁 ¶ . 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑀸 𑀩𑀸𑀳𑀺𑀭𑀸 𑀯𑀸. 𑀅𑀲𑁆𑀲𑀸𑀢𑀺 𑀓𑀸𑀬𑀲𑁆𑀲. 𑀲𑀼𑀲𑀦𑁆𑀣𑀢𑀲𑁆𑀲𑀸𑀢𑀺𑀆𑀤𑀺 𑀢𑀲𑁆𑀲 𑀧𑀣𑀯𑀺𑀬𑀸 𑀧𑀘𑁆𑀘𑀬𑀪𑀸𑀯𑀤𑀲𑁆𑀲𑀦𑀁.

𑀦𑀸𑀦𑀚𑁆𑀛𑀸𑀲𑀬𑁄𑀢𑀺 𑀦𑀸𑀦𑀸𑀭𑀫𑁆𑀫𑀡𑀦𑀺𑀦𑁆𑀦𑁄. 𑀢𑁂𑀦 𑀫𑀦𑀲𑁆𑀲 𑀫𑀓𑁆𑀓𑀝𑀲𑁆𑀲 𑀯𑀺𑀬 𑀅𑀦𑀯𑀝𑁆𑀞𑀺𑀢𑀢𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 ‘‘𑀤𑀺𑀝𑁆𑀞𑀧𑀼𑀩𑁆𑀩𑁂𑀧𑀻’’𑀢𑀺𑀆𑀤𑀺. 𑀫𑀽𑀮𑀪𑀯𑀗𑁆𑀕𑀕𑁆𑀕𑀳𑀡𑁂𑀦 𑀧𑀺𑀝𑁆𑀞𑀺𑀪𑀯𑀗𑁆𑀕𑀁 𑀦𑀺𑀯𑀢𑁆𑀢𑁂𑀢𑀺. 𑀅𑀲𑁆𑀲𑀸𑀢𑀺 𑀫𑀦𑀲𑁆𑀲. 𑀏𑀯𑀁 𑀓𑀺𑀭𑀺𑀬𑀫𑀬𑀁 𑀯𑀺𑀜𑁆𑀜𑀸𑀡𑀁 𑀤𑀝𑁆𑀞𑀩𑁆𑀩𑀁. 𑀦𑀸𑀦𑀢𑁆𑀢𑀦𑁆𑀢𑀺 𑀪𑁂𑀤𑁄.

𑀬𑀣𑀸𑀭𑀼𑀘𑀺𑀧𑁆𑀧𑀯𑀢𑁆𑀢𑀺𑀬𑀸 ¶ 𑀦𑀺𑀯𑀸𑀭𑀡𑀯𑀲𑁂𑀦 𑀩𑀤𑁆𑀥𑀸𑀦𑀁. 𑀦𑀺𑀩𑁆𑀩𑀺𑀲𑁂𑀯𑀦𑀪𑀸𑀯𑀦𑁆𑀢𑀺 𑀮𑁄𑀮𑀢𑀸𑀲𑀗𑁆𑀔𑀸𑀢𑀧𑀭𑀺𑀧𑁆𑀨𑀦𑁆𑀤𑀲𑁆𑀲 𑀅𑀪𑀸𑀯𑀁. 𑀦𑀸𑀓𑀟𑁆𑀠𑀢𑀻𑀢𑀺 𑀲𑀯𑀺𑀲𑀬𑁂 𑀭𑀽𑀧𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑀦𑁆𑀢𑀸𑀦𑀁, 𑀢𑀁𑀲𑀫𑀗𑁆𑀕𑀺𑀦𑀁 𑀯𑀸 𑀧𑀼𑀕𑁆𑀕𑀮𑀁 𑀦𑀸𑀓𑀟𑁆𑀠𑀢𑀺. 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸𑀯 𑀓𑀣𑀺𑀢𑀸 𑀆𑀬𑀢𑀦𑀫𑀼𑀔𑁂𑀦 ‘‘𑀏𑀯𑀜𑁆𑀳𑀺 𑀯𑁄, 𑀪𑀺𑀓𑁆𑀔𑀯𑁂, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸.

𑀙𑀧𑁆𑀧𑀸𑀡𑀓𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀬𑀯𑀓𑀮𑀸𑀧𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁮. 𑀬𑀯𑀧𑀼𑀜𑁆𑀚𑁄 𑀲𑀼𑀧𑀭𑀺𑀧𑀓𑁆𑀓𑀬𑀯𑀲𑀫𑀼𑀤𑀸𑀬𑁄. 𑀓𑀸𑀚𑀳𑀢𑁆𑀣𑀸𑀢𑀺 𑀤𑀡𑁆𑀟𑀳𑀢𑁆𑀣𑀸. 𑀧𑁄𑀣𑁂𑀬𑁆𑀬𑀼𑀦𑁆𑀢𑀺 𑀬𑀣𑀸 𑀬𑀯𑀲𑀗𑁆𑀔𑀸𑀢𑀁 𑀥𑀜𑁆𑀜𑀁 𑀯𑀡𑁆𑀝𑀢𑁄 𑀫𑀼𑀘𑁆𑀘𑀢𑀺, 𑀏𑀯𑀁 𑀧𑁄𑀣𑁂𑀬𑁆𑀬𑀼𑀁. 𑀬𑀯𑁂 𑀲𑀸𑀯𑁂𑀢𑁆𑀯𑀸𑀢𑀺 𑀬𑀯𑀲𑀻𑀲𑀢𑁄 𑀬𑀯𑁂 𑀧𑁄𑀣𑀦𑁂𑀦 𑀫𑁄𑀘𑁂𑀢𑁆𑀯𑀸 𑀯𑀺𑀯𑁂𑀘𑁂𑀢𑁆𑀯𑀸.

𑀘𑀢𑀼𑀫𑀳𑀸𑀧𑀣𑁄 𑀯𑀺𑀬 𑀙 𑀆𑀬𑀢𑀦𑀸𑀦𑀺 𑀆𑀭𑀫𑁆𑀫𑀡𑀤𑀡𑁆𑀟𑀓𑁂𑀳𑀺 𑀳𑀦𑀦𑀝𑁆𑀞𑀸𑀦𑀢𑁆𑀢𑀸. 𑀬𑀯𑀓𑀮𑀸𑀧𑀻 𑀯𑀺𑀬 𑀲𑀢𑁆𑀢𑁄 𑀢𑁂𑀳𑀺 𑀳𑀜𑁆𑀜𑀫𑀸𑀦𑀢𑁆𑀢𑀸. 𑀙 𑀩𑁆𑀬𑀸𑀪𑀗𑁆𑀕𑀺𑀬𑁄 𑀯𑀺𑀬 𑀲𑀪𑀸𑀯𑀢𑁄 𑀙𑀥𑀸𑀧𑀺 𑀧𑀘𑁆𑀘𑁂𑀓𑀁 𑀇𑀝𑁆𑀞𑀸𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑀯𑀲𑁂𑀦 𑀅𑀝𑁆𑀞𑀸𑀭𑀲 𑀆𑀭𑀫𑁆𑀫𑀡𑀸𑀦𑀺 𑀬𑀯𑀓𑀮𑀸𑀧𑀝𑁆𑀞𑀸𑀦𑀺𑀬𑀲𑁆𑀲 𑀲𑀢𑁆𑀢𑀲𑁆𑀲 𑀳𑀦𑀦𑀢𑁄. 𑀪𑀯𑀧𑀢𑁆𑀣𑀦𑀸𑀬 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀁 𑀲𑀦𑁆𑀥𑀸𑀬 ‘‘𑀪𑀯𑀧𑀢𑁆𑀣𑀦𑀸 𑀓𑀺𑀮𑁂𑀲𑀸’’𑀢𑀺 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄. 𑀪𑀯𑀧𑀢𑁆𑀣𑀦𑀸 𑀘 𑀢𑀲𑁆𑀲 𑀧𑀘𑁆𑀘𑀬𑀪𑀽𑀢𑀸 𑀓𑀺𑀮𑁂𑀲𑀸 𑀘𑀸𑀢𑀺 𑀪𑀯𑀧𑀢𑁆𑀣𑀦𑀸𑀓𑀺𑀮𑁂𑀲𑀸𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀲𑁆𑀫𑀸 𑀲𑀢𑁆𑀢𑀸𑀦𑀁 𑀯𑀝𑁆𑀝𑀤𑀼𑀓𑁆𑀔𑀁 𑀦𑀸𑀫 𑀲𑀩𑁆𑀩𑀫𑁆𑀧𑀺 𑀢𑀁 𑀪𑀯𑀧𑀢𑁆𑀣𑀦𑀸𑀫𑀽𑀮𑀓𑀁, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀏𑀯𑀁 𑀲𑀢𑁆𑀢𑀸’’𑀢𑀺𑀆𑀤𑀺. 𑀪𑀯𑀧𑀢𑁆𑀣𑀦𑀓𑀺𑀮𑁂𑀲𑀸𑀢𑀺 𑀘 𑀪𑀯𑀧𑀢𑁆𑀣𑀦𑀸𑀫𑀽𑀮𑀓𑀁 𑀓𑀺𑀮𑁂𑀲𑀁.

𑀪𑀼𑀫𑁆𑀫𑀦𑁆𑀢𑀺 𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀁. 𑀢𑁂𑀦𑀸𑀳 ‘‘𑀲𑀼𑀥𑀫𑁆𑀫𑀸𑀬 𑀤𑁆𑀯𑀸𑀭𑁂’’𑀢𑀺. 𑀦 𑀓𑀢𑀦𑁆𑀢𑀺 𑀤𑀼𑀓𑁆𑀔𑀼𑀧𑁆𑀧𑀸𑀤𑀦𑀁 𑀦 𑀓𑀢𑀁. 𑀦𑀯𑀕𑀽𑀣𑀲𑀽𑀓𑀭𑀁 𑀯𑀺𑀬𑀸𑀢𑀺 𑀦𑀯𑀕𑀽𑀣𑀪𑀓𑁆𑀔𑀲𑀽𑀓𑀭𑀁 𑀯𑀺𑀬. 𑀘𑀺𑀢𑁆𑀢𑁂𑀦𑁂𑀯𑀸𑀢𑀺 𑀬𑁄 𑀩𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑁂𑀦𑁂𑀯 ¶ . 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀯𑁂𑀧𑀘𑀺𑀢𑁆𑀢𑀺𑀩𑀦𑁆𑀥𑀦𑀲𑁆𑀲 𑀩𑀦𑁆𑀥𑀦𑀫𑀼𑀘𑁆𑀘𑀦𑀁 𑀯𑀺𑀬, 𑀢𑀲𑁆𑀫𑀸 ‘‘𑀯𑁂𑀧𑀘𑀺𑀢𑁆𑀢𑀺𑀩𑀦𑁆𑀥𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀜𑀸𑀡𑀫𑁄𑀓𑁆𑀔𑀁 𑀩𑀦𑁆𑀥𑀦𑀦𑁆𑀢𑀺 𑀜𑀸𑀡𑁂𑀦 𑀫𑀼𑀘𑁆𑀘𑀦𑀁 𑀩𑀦𑁆𑀥𑀦𑀁.

𑀫𑀜𑁆𑀜𑀫𑀸𑀦𑁄𑀢𑀺 𑀧𑀭𑀺𑀓𑀧𑁆𑀧𑀺𑀢𑀢𑀡𑁆𑀳𑀸𑀯𑀲𑁂𑀦 ‘‘𑀏𑀢𑀁 𑀫𑀫𑀸’’𑀢𑀺, 𑀤𑀺𑀝𑁆𑀞𑀺𑀯𑀲𑁂𑀦 ‘‘𑀏𑀲𑁄 𑀫𑁂 𑀅𑀢𑁆𑀢𑀸’’𑀢𑀺, 𑀫𑀸𑀦𑀯𑀲𑁂𑀦 ‘‘𑀏𑀲𑁄𑀳𑀫𑀲𑁆𑀫𑀻’’𑀢𑀺 𑀫𑀜𑁆𑀜𑀦𑁆𑀢𑁄. 𑀔𑀦𑁆𑀥𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀫𑀜𑁆𑀜𑀫𑀸𑀦𑀯𑀢𑁆𑀣𑀼𑀦𑁄 𑀅𑀪𑀸𑀯𑀸 ‘‘𑀔𑀦𑁆𑀥𑁂 𑀫𑀜𑁆𑀜𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀏𑀢𑀦𑁆𑀢𑀺 ‘‘𑀫𑀸𑀭𑀲𑁆𑀲𑀸’’𑀢𑀺 ¶ 𑀏𑀢𑀁 𑀲𑀸𑀫𑀺𑀯𑀘𑀦𑀁. 𑀓𑀺𑀮𑁂𑀲𑀫𑀸𑀭𑁂𑀦 𑀩𑀤𑁆𑀥𑁄𑀢𑀺 𑀓𑀺𑀮𑁂𑀲𑀫𑀸𑀭𑁂𑀦 𑀢𑁂𑀦𑁂𑀯 𑀓𑀺𑀮𑁂𑀲𑀩𑀦𑁆𑀥𑀦𑁂𑀦 𑀩𑀤𑁆𑀥𑁄. 𑀫𑀼𑀢𑁆𑀢𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄.

𑀢𑀡𑁆𑀳𑀸𑀫𑀜𑁆𑀜𑀦𑀸𑀬 𑀲𑀢𑀺 𑀤𑀺𑀝𑁆𑀞𑀺𑀫𑀸𑀦𑀫𑀜𑁆𑀜𑀦𑀸𑀦𑀁 𑀧𑀲𑀗𑁆𑀕𑁄 𑀏𑀯 𑀦𑀢𑁆𑀣𑀻𑀢𑀺 𑀬𑀣𑀸 ‘‘𑀅𑀲𑁆𑀫𑀻’’𑀢𑀺 𑀧𑀤𑁂𑀦 𑀤𑀺𑀝𑁆𑀞𑀺𑀫𑀸𑀦𑀫𑀜𑁆𑀜𑀦𑀸 𑀯𑀼𑀢𑁆𑀢𑀸 𑀳𑁄𑀦𑁆𑀢𑀺, 𑀏𑀯𑀁 𑀢𑀡𑁆𑀳𑀸𑀫𑀜𑁆𑀜𑀺𑀢𑀸𑀧𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀲𑁆𑀫𑀻𑀢𑀺 𑀧𑀤𑁂𑀦 𑀢𑀡𑁆𑀳𑀸𑀫𑀜𑁆𑀜𑀺𑀢𑀁 𑀯𑀼𑀢𑁆𑀢’’𑀦𑁆𑀢𑀺. 𑀅𑀬𑀫𑀳𑀫𑀲𑁆𑀫𑀻𑀢𑀺 𑀧𑀤𑁂𑀦 𑀤𑀺𑀝𑁆𑀞𑀺𑀫𑀜𑁆𑀜𑀺𑀢𑀦𑁆𑀢𑀺 𑀏𑀢𑀭𑀳𑀺 𑀮𑀩𑁆𑀪𑀫𑀸𑀦𑀤𑀺𑀝𑁆𑀞𑀺𑀯𑀢𑁆𑀣𑀼𑀯𑀲𑁂𑀦𑁂𑀯. 𑀪𑀯𑀺𑀲𑁆𑀲𑀦𑁆𑀢𑀺 𑀅𑀦𑀸𑀕𑀢𑀤𑀺𑀝𑁆𑀞𑀺𑀯𑀢𑁆𑀣𑀼𑀧𑀭𑀺𑀓𑀧𑁆𑀧𑀦𑀯𑀲𑁂𑀦𑁂𑀯 𑀤𑀺𑀝𑁆𑀞𑀺𑀫𑀜𑁆𑀜𑀺𑀢𑀁. 𑀬𑁂𑀪𑀼𑀬𑁆𑀬𑁂𑀦 𑀳𑀺 𑀅𑀦𑀸𑀕𑀢𑀸𑀮𑀺𑀗𑁆𑀕𑀦𑀸 𑀲𑀲𑁆𑀲𑀢𑀤𑀺𑀝𑁆𑀞𑀺. 𑀉𑀘𑁆𑀙𑁂𑀤𑀯𑀲𑁂𑀦 𑀤𑀺𑀝𑁆𑀞𑀺𑀫𑀜𑁆𑀜𑀺𑀢𑀫𑁂𑀯𑀸𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀭𑀽𑀧𑀻𑀢𑀺𑀆𑀤𑀻𑀦𑀺 𑀧𑀤𑀸𑀦𑀺. 𑀲𑀲𑁆𑀲𑀢𑀲𑁆𑀲𑁂𑀯𑀸𑀢𑀺 𑀲𑀲𑁆𑀲𑀢𑀕𑀸𑀳𑀲𑁆𑀲𑁂𑀯 𑀧𑀪𑁂𑀤𑀤𑀻𑀧𑀦𑀸𑀦𑀺. 𑀬𑀲𑁆𑀫𑀸 𑀫𑀜𑁆𑀜𑀺𑀢𑀁 𑀆𑀩𑀸𑀥𑀯𑀲𑁂𑀦 𑀭𑁄𑀕𑁄, 𑀅𑀦𑁆𑀢𑁄𑀤𑁄𑀲𑀯𑀲𑁂𑀦 𑀕𑀡𑁆𑀟𑁄, 𑀅𑀗𑁆𑀕𑀦𑀺𑀓𑀦𑁆𑀢𑀯𑀲𑁂𑀦 𑀲𑀮𑁆𑀮𑀁, 𑀢𑀲𑁆𑀫𑀸 𑀇𑀫𑁂𑀳𑀺 𑀢𑀡𑁆𑀳𑀸𑀤𑀻𑀳𑀺 𑀓𑀺𑀮𑁂𑀲𑁂𑀳𑀺 𑀧𑀸𑀓𑀝𑀘𑀮𑀦𑀯𑀲𑁂𑀦 𑀇𑀜𑁆𑀚𑀦𑁆𑀢𑀺 𑀘𑁂𑀯, 𑀅𑀧𑀸𑀓𑀝𑀲𑀜𑁆𑀘𑀮𑀦𑀯𑀲𑁂𑀦 𑀨𑀦𑁆𑀤𑀦𑁆𑀢𑀺 𑀘. 𑀧𑀧𑀜𑁆𑀘𑀺𑀢𑀁 𑀲𑀁𑀲𑀸𑀭𑁂 𑀘𑀺𑀭𑀸𑀬𑀦𑀁 𑀤𑀝𑁆𑀞𑀩𑁆𑀩𑀁, 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀯𑀸 𑀯𑀺𑀢𑁆𑀣𑀸𑀭𑀡𑀁. 𑀧𑀫𑀢𑁆𑀢𑀸𑀓𑀸𑀭𑀧𑁆𑀧𑀢𑁆𑀢𑀸 𑀫𑀼𑀘𑁆𑀙𑀦𑀸𑀓𑀸𑀭𑀧𑁆𑀧𑀢𑁆𑀢𑀸. 𑀢𑁂𑀲𑀦𑁆𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀓𑀺𑀮𑁂𑀲𑀸𑀦𑀁. 𑀆𑀓𑀸𑀭𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀧𑀯𑀢𑁆𑀢𑀺𑀆𑀓𑀸𑀭𑀤𑀲𑁆𑀲𑀦𑀢𑁆𑀣𑀁.

𑀫𑀸𑀦𑁄 𑀦𑀸𑀫 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸 𑀫𑀚𑁆𑀚𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺. 𑀢𑀡𑁆𑀳𑀸𑀬 𑀲𑀫𑁆𑀧𑀬𑀼𑀢𑁆𑀢𑀫𑀸𑀦𑀯𑀲𑁂𑀦𑀸𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁? 𑀦𑀦𑀼 𑀲𑀩𑁆𑀩𑁄 𑀫𑀸𑀦𑁄 𑀢𑀡𑁆𑀳𑀸𑀲𑀫𑁆𑀧𑀬𑀼𑀢𑁆𑀢𑁄? 𑀲𑀢𑀺 𑀳𑀺 𑀩𑁆𑀬𑀪𑀺𑀘𑀸𑀭𑁂 𑀯𑀺𑀲𑁂𑀲𑀦𑀁 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺. 𑀲𑀘𑁆𑀘𑀫𑁂𑀢𑀁, 𑀢𑀡𑁆𑀳𑀸 𑀧𑀦 𑀅𑀢𑁆𑀣𑀺 𑀫𑀸𑀦𑀲𑁆𑀲 𑀧𑀘𑁆𑀘𑀬𑀪𑀽𑀢𑀸, 𑀅𑀢𑁆𑀣𑀺 𑀫𑀸𑀦𑀲𑁆𑀲 𑀅𑀧𑁆𑀧𑀘𑁆𑀘𑀬𑀪𑀽𑀢𑀸, 𑀬𑀢𑁄 𑀫𑀸𑀦𑁄 𑀅𑀦𑀺𑀬𑀢𑁄 𑀯𑀼𑀘𑁆𑀘𑀢𑀺. 𑀢𑀣𑀸 𑀳𑀺 𑀧𑀝𑁆𑀞𑀸𑀦𑁂 ‘‘𑀲𑀁𑀬𑁄𑀚𑀦𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀲𑀁𑀬𑁄𑀚𑀦𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺 𑀏𑀢𑁆𑀣 𑀲𑀁𑀬𑁄𑀚𑀦𑀸𑀦𑀺 𑀲𑀁𑀬𑁄𑀚𑀦𑁂𑀳𑀺 𑀬𑀣𑀸𑀮𑀸𑀪𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑀺𑀢𑀬𑁄𑀚𑀦𑀸𑀬 ‘‘𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁 𑀧𑀝𑀺𑀘𑁆𑀘 𑀫𑀸𑀦𑀲𑀁𑀬𑁄𑀚𑀦𑀁 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦’’𑀦𑁆𑀢𑀺 𑀯𑀢𑁆𑀯𑀸 ‘‘𑀓𑀸𑀫𑀭𑀸𑀕𑀲𑀁𑀬𑁄𑀚𑀦𑀁 𑀧𑀝𑀺𑀘𑁆𑀘 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦’’𑀦𑁆𑀢𑀺, ‘‘𑀫𑀸𑀦𑀲𑀁𑀬𑁄𑀚𑀦𑀁 𑀧𑀝𑀺𑀘𑁆𑀘 𑀪𑀯𑀭𑀸𑀕𑀲𑀁𑀬𑁄𑀚𑀦𑀁 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦’’𑀦𑁆𑀢𑀺 𑀘 𑀯𑀢𑁆𑀯𑀸 ‘‘𑀪𑀯𑀭𑀸𑀕𑀲𑀁𑀬𑁄𑀚𑀦𑀁 𑀧𑀝𑀺𑀘𑁆𑀘 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀓𑀸𑀫𑀭𑀸𑀕𑀪𑀯𑀭𑀸𑀕𑀲𑀁𑀬𑁄𑀚𑀦𑁂𑀳𑀺 𑀫𑀸𑀦𑀲𑁆𑀲 𑀅𑀦𑀺𑀬𑀢𑀪𑀸𑀯𑁄 𑀧𑀓𑀸𑀲𑀺𑀢𑁄. 𑀢𑀢𑁆𑀣 𑀬𑀸 𑀢𑀡𑁆𑀳𑀸 𑀩𑀮𑀯𑀢𑀻, 𑀢𑀁 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 ‘‘𑀢𑀡𑁆𑀳𑀸𑀬 𑀲𑀫𑁆𑀧𑀬𑀼𑀢𑁆𑀢𑀫𑀸𑀦𑀯𑀲𑁂𑀦𑀸’’𑀢𑀺. 𑀩𑀮𑀯𑀢𑀡𑁆𑀳𑀸𑀲𑀫𑁆𑀧𑀬𑀼𑀢𑁆𑀢𑁄 𑀳𑀺 𑀫𑀸𑀦𑁄 𑀲𑀬𑀫𑁆𑀧𑀺 𑀩𑀮𑀯𑀸 𑀳𑀼𑀢𑁆𑀯𑀸 𑀅𑀲𑁆𑀫𑀻𑀢𑀺 𑀲𑀯𑀺𑀲𑁂𑀲𑀁 𑀫𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀢𑀻𑀢𑀺.

𑀤𑀺𑀝𑁆𑀞𑀺𑀯𑀲𑁂𑀦𑀸𑀢𑀺 ¶ ¶ 𑀫𑀸𑀦𑀫𑀽𑀮𑀓𑀤𑀺𑀝𑁆𑀞𑀺𑀯𑀲𑁂𑀦. ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸 𑀳𑀺 𑀩𑀳𑀼𑀮𑀫𑀸𑀦𑀼𑀧𑁂𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀭𑀽𑀧𑀸𑀤𑀻𑀲𑀼 𑀏𑀓𑀁 𑀉𑀤𑁆𑀤𑀺𑀲𑁆𑀲 𑀅𑀬𑀫𑀳𑀫𑀲𑁆𑀫𑀻𑀢𑀺 𑀤𑀺𑀝𑁆𑀞𑀺𑀬𑀸 𑀉𑀧𑁆𑀧𑀦𑁆𑀦𑀸𑀬 𑀫𑀸𑀦𑀲𑁆𑀲 𑀅𑀧𑁆𑀧𑀳𑀻𑀦𑀢𑁆𑀢𑀸 𑀫𑀸𑀦𑁄𑀧𑀺 𑀢𑀢𑁆𑀣 𑀢𑀢𑁆𑀣𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺 𑀫𑀸𑀦𑀫𑀽𑀮𑀓𑀁 𑀤𑀺𑀝𑁆𑀞𑀺𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀬𑀫𑀳𑀫𑀲𑁆𑀫𑀻𑀢𑀺 𑀤𑀺𑀝𑁆𑀞𑀺𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺. 𑀘𑁄𑀤𑀓𑁄 𑀧𑀦 𑀇𑀫𑀫𑀢𑁆𑀣𑀁 𑀅𑀚𑀸𑀦𑀦𑁆𑀢𑁄 𑀅𑀦𑀼𑀧𑀮𑀩𑁆𑀪𑀫𑀸𑀦𑀫𑁂𑀯 𑀲𑀫𑁆𑀧𑀬𑁄𑀕𑀢𑁆𑀣𑀁 𑀕𑀳𑁂𑀢𑁆𑀯𑀸 ‘‘𑀦𑀦𑀼 𑀘𑀸’’𑀢𑀺𑀆𑀤𑀺𑀦𑀸 𑀘𑁄𑀤𑁂𑀢𑀺. 𑀇𑀢𑀭𑁄 ‘‘𑀆𑀫 𑀦𑀢𑁆𑀣𑀻’’𑀢𑀺 𑀢𑀫𑀢𑁆𑀣𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀫𑀸𑀦𑀲𑁆𑀲 𑀧𑀦𑀸’’𑀢𑀺𑀆𑀤𑀺𑀦𑀸 𑀧𑀭𑀺𑀳𑀸𑀭𑀫𑀸𑀳. 𑀢𑀲𑁆𑀲𑀢𑁆𑀣𑁄 𑀯𑀼𑀢𑁆𑀢𑁄 𑀏𑀯.

𑀬𑀯𑀓𑀮𑀸𑀧𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀲𑀻𑀯𑀺𑀲𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀢𑁆𑀣𑁄 𑀧𑀡𑁆𑀡𑀸𑀲𑀓𑁄.

𑀲𑀴𑀸𑀬𑀢𑀦𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀯𑁂𑀤𑀦𑀸𑀲𑀁𑀬𑀼𑀢𑁆𑀢𑀁

𑁧. 𑀲𑀕𑀸𑀣𑀸𑀯𑀕𑁆𑀕𑁄

𑁧. 𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁪𑁯. 𑀯𑁂𑀤𑀦𑀸 ¶ ¶ 𑀘 𑀧𑀚𑀸𑀦𑀸𑀢𑀻𑀢𑀺 𑀲𑀘𑁆𑀘𑀸𑀪𑀺𑀲𑀫𑁆𑀩𑁄𑀥𑀯𑀲𑁂𑀦 𑀯𑀼𑀘𑁆𑀘𑀫𑀸𑀦𑀯𑁂𑀤𑀦𑀸𑀦𑀁 𑀧𑀚𑀸𑀦𑀦𑀁 𑀲𑀸𑀢𑀺𑀲𑀬𑀲𑀫𑀸𑀥𑀸𑀦𑀧𑀼𑀩𑁆𑀩𑀓𑀦𑁆𑀢𑀺 𑀪𑀕𑀯𑀢𑀸 ‘‘𑀲𑀫𑀸𑀳𑀺𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀉𑀧𑀘𑀸𑀭𑁂𑀦 𑀯𑀸 𑀅𑀧𑁆𑀧𑀦𑀸𑀬 𑀯𑀸 𑀲𑀫𑀸𑀳𑀺𑀢𑁄’’𑀢𑀺. 𑀯𑁂𑀤𑀦𑀸𑀢𑀺 𑀢𑀺𑀲𑁆𑀲𑁄𑀧𑀺 𑀯𑁂𑀤𑀦𑀸. 𑀤𑀼𑀓𑁆𑀔𑀲𑀘𑁆𑀘𑀯𑀲𑁂𑀦𑀸𑀢𑀺 𑀤𑀼𑀓𑁆𑀔𑀲𑀘𑁆𑀘𑀪𑀸𑀯𑁂𑀦, 𑀧𑀭𑀺𑀚𑀸𑀦𑀦𑀯𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀫𑁆𑀪𑀯𑀦𑁆𑀢𑀺 𑀲𑀫𑀼𑀤𑀬𑀁 𑀢𑀡𑁆𑀳𑀸𑀯𑀺𑀚𑁆𑀚𑀸𑀓𑀫𑁆𑀫𑀨𑀲𑁆𑀲𑀸𑀤𑀺𑀧𑁆𑀧𑀪𑁂𑀤𑀁 𑀉𑀧𑁆𑀧𑀢𑁆𑀢𑀺𑀓𑀸𑀭𑀡𑀁. 𑀢𑁂𑀦𑀸𑀳 ‘‘𑀲𑀫𑀼𑀤𑀬𑀲𑀘𑁆𑀘𑀯𑀲𑁂𑀦 𑀧𑀚𑀸𑀦𑀸𑀢𑀻’’𑀢𑀺. 𑀬𑀢𑁆𑀣𑀸𑀢𑀺 𑀬𑀁𑀦𑀺𑀫𑀺𑀢𑁆𑀢𑀁, 𑀬𑀁 𑀆𑀕𑀫𑁆𑀫 𑀓𑀸𑀫𑀢𑀡𑁆𑀳𑀸𑀯𑀺𑀚𑁆𑀚𑀸𑀤𑀺𑀦𑀺𑀭𑁄𑀥𑀸 𑀯𑁂𑀤𑀦𑀸𑀦𑀺𑀭𑁄𑀥𑁄, 𑀢𑁂𑀲𑀁 𑀅𑀬𑀁 𑀦𑀺𑀭𑁄𑀥𑁄. 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀅𑀭𑀺𑀬𑀫𑀕𑁆𑀕𑀧𑁆𑀧𑀯𑀢𑁆𑀢𑀺𑀬𑀸 𑀳𑀺 𑀦𑀺𑀩𑁆𑀩𑀸𑀦𑀁 𑀯𑁂𑀤𑀦𑀸𑀦𑀺𑀭𑁄𑀥𑁄𑀢𑀺 𑀯𑀼𑀢𑁆𑀢𑁄. 𑀔𑀬𑀁 𑀕𑀫𑁂𑀢𑀻𑀢𑀺 𑀔𑀬𑀕𑀸𑀫𑀻, 𑀢𑀁 𑀔𑀬𑀕𑀸𑀫𑀺𑀦𑀁. 𑀙𑀸𑀢𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸 𑀓𑀸𑀫𑀸𑀦𑀁 𑀧𑀸𑀢𑀼𑀓𑀸𑀫𑀢𑀸𑀯𑀲𑁂𑀦 𑀧𑀯𑀢𑁆𑀢𑀦𑀢𑁄, 𑀅𑀘𑁆𑀘𑀦𑁆𑀢𑀫𑁂𑀯 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸 𑀦𑀢𑁆𑀣𑀺 𑀏𑀢𑀲𑁆𑀫𑀺𑀁 𑀙𑀸𑀢𑀦𑁆𑀢𑀺 𑀦𑀺𑀘𑁆𑀙𑀸𑀢𑁄. 𑀢𑁂𑀦𑀸𑀳 ‘‘𑀦𑀺𑀢𑁆𑀢𑀡𑁆𑀳𑁄’’𑀢𑀺. 𑀲𑀫𑁆𑀫𑀲𑀦𑀘𑀸𑀭𑀯𑁂𑀤𑀦𑀸𑀢𑀺 𑀲𑀫𑁆𑀫𑀲𑀦𑀽𑀧𑀘𑀸𑀭𑀯𑁂𑀤𑀦𑀸. 𑀤𑁆𑀯𑀻𑀳𑀺 𑀧𑀤𑁂𑀳𑀻𑀢𑀺 ‘‘𑀲𑀫𑀸𑀳𑀺𑀢𑁄 𑀲𑀫𑁆𑀧𑀚𑀸𑀦𑁄’’𑀢𑀺 𑀇𑀫𑁂𑀳𑀺 𑀤𑁆𑀯𑀻𑀳𑀺. ‘‘𑀲𑀢𑁄’’𑀢𑀺 𑀧𑀦 𑀇𑀤𑀁 𑀲𑀫𑁆𑀧𑀚𑀸𑀦𑀧𑀤𑀲𑁆𑀲𑁂𑀯 𑀉𑀧𑀩𑁆𑀭𑀽𑀳𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑁂𑀲𑁂𑀳𑀺 𑀘𑀢𑀽𑀳𑀺 𑀘𑀢𑀼𑀲𑀘𑁆𑀘𑀁 𑀓𑀣𑀺𑀢𑀁, 𑀇𑀢𑀭𑁂𑀳𑀺 𑀧𑀦 𑀤𑁆𑀯𑀻𑀳𑀺 𑀘𑀢𑀼𑀲𑀘𑁆𑀘𑀩𑀼𑀚𑁆𑀛𑀦𑀫𑁂𑀯 𑀓𑀣𑀺𑀢𑀁. 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑁄𑀢𑀺 𑀲𑀩𑁆𑀩𑀲𑀪𑀸𑀯𑀥𑀫𑁆𑀫𑀸𑀦𑀁 𑀲𑀗𑁆𑀕𑀡𑁆𑀳𑀦𑀓𑁄. 𑀢𑁂𑀦𑀸𑀳 ‘‘𑀘𑀢𑀼𑀪𑀽𑀫𑀓𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑁄 𑀯𑀼𑀢𑁆𑀢𑁄’’𑀢𑀺.

𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀼𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁦. 𑀤𑀼𑀓𑁆𑀔𑀁 𑀦 𑀳𑁄𑀢𑀻𑀢𑀺 𑀅𑀤𑀼𑀓𑁆𑀔𑀁, 𑀲𑀼𑀔𑀁 𑀦 𑀳𑁄𑀢𑀻𑀢𑀺 𑀅𑀲𑀼𑀔𑀁, 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄. 𑀅𑀤𑀼𑀓𑁆𑀔𑀫𑀲𑀼𑀔𑀦𑁆𑀢𑀺 𑀯𑁂𑀤𑀬𑀺𑀢𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀦𑀧𑀼𑀁𑀲𑀓𑀦𑀺𑀤𑁆𑀤𑁂𑀲𑁄. 𑀲𑀧𑀭𑀲𑀦𑁆𑀢𑀸𑀦𑀕𑀢𑁂 𑀲𑀦𑁆𑀥𑀸𑀬 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀕𑀳𑀡𑀦𑁆𑀢𑀺 𑀆𑀳 ‘‘𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘𑀸’’𑀢𑀺. 𑀢𑁂𑀦 𑀲𑀩𑁆𑀩𑀫𑁆𑀧𑀺 𑀯𑁂𑀤𑀬𑀺𑀢𑀁 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁 ¶ . 𑀦𑀲𑁆𑀲𑀦𑀲𑀪𑀸𑀯𑀦𑁆𑀢𑀺 𑀇𑀢𑁆𑀢𑀭𑀔𑀡𑀢𑀸𑀬 ¶ 𑀪𑀗𑁆𑀕𑀢𑁄 𑀉𑀤𑁆𑀥𑀁 𑀅𑀧𑀲𑁆𑀲𑀺𑀢𑀩𑁆𑀩𑀲𑀪𑀸𑀯𑀁. 𑀧𑀮𑁄𑀓𑁄 𑀪𑁂𑀤𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀧𑀮𑁄𑀓𑀺𑀦𑀁. 𑀢𑁂𑀦𑀸𑀳 ‘‘𑀪𑀺𑀚𑁆𑀚𑀦𑀲𑀪𑀸𑀯’’𑀦𑁆𑀢𑀺. 𑀜𑀸𑀡𑁂𑀦 𑀨𑀼𑀲𑀺𑀢𑁆𑀯𑀸 𑀨𑀼𑀲𑀺𑀢𑁆𑀯𑀸𑀢𑀺 𑀧𑀼𑀩𑁆𑀩𑀪𑀸𑀕𑁂 𑀯𑀺𑀧𑀲𑁆𑀲𑀦𑀸𑀜𑀸𑀡𑁂𑀦 𑀅𑀦𑀺𑀘𑁆𑀘𑀸 𑀧𑀪𑀗𑁆𑀕𑀼𑀦𑁄𑀢𑀺 𑀆𑀭𑀫𑁆𑀫𑀡𑀢𑁄, 𑀉𑀢𑁆𑀢𑀭𑀓𑀸𑀮𑀁 𑀅𑀲𑀫𑁆𑀫𑁄𑀳𑀢𑁄 𑀫𑀕𑁆𑀕𑀧𑀭𑀫𑁆𑀧𑀭𑀸𑀬 𑀨𑀼𑀲𑀺𑀢𑁆𑀯𑀸 𑀨𑀼𑀲𑀺𑀢𑁆𑀯𑀸 𑀯𑀬𑀁 𑀧𑀲𑁆𑀲𑀦𑁆𑀢𑁄. 𑀯𑀺𑀭𑀚𑁆𑀚𑀢𑀻𑀢𑀺 𑀫𑀕𑁆𑀕𑀯𑀺𑀭𑀸𑀕𑁂𑀦 𑀯𑀺𑀭𑀚𑁆𑀚𑀢𑀺. 𑀲𑀫𑁆𑀫𑀲𑀦𑀘𑀸𑀭𑀯𑁂𑀤𑀦𑀸 𑀓𑀣𑀺𑀢𑀸 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀸𑀦𑀁 𑀯𑀲𑁂𑀦 𑀤𑁂𑀲𑀦𑀸𑀢𑀺. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂𑀳𑀺 𑀜𑀸𑀡𑁂𑀳𑀺 𑀬𑀸𑀣𑀸𑀯𑀢𑁄 𑀧𑀭𑀺𑀚𑀸𑀦𑀦𑀁 𑀧𑀝𑀺𑀯𑀺𑀚𑁆𑀛𑀦𑀁 𑀜𑀸𑀡𑀨𑀼𑀲𑀦𑀁.

𑀲𑀼𑀔𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀳𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁧. 𑀲𑀩𑁆𑀩𑀫𑁆𑀧𑀺 𑀅𑀝𑁆𑀞𑀲𑀢𑀧𑀪𑁂𑀤𑀁 𑀢𑀡𑁆𑀳𑀁 𑀙𑀺𑀦𑁆𑀤𑀺 𑀲𑀫𑀼𑀘𑁆𑀙𑁂𑀤𑀧𑀳𑀸𑀦𑀯𑀲𑁂𑀦 𑀧𑀚𑀳𑀺. 𑀢𑁂𑀦𑀸𑀳 ‘‘𑀲𑀫𑀼𑀘𑁆𑀙𑀺𑀦𑁆𑀤𑀻’’𑀢𑀺. 𑀬𑀤𑀕𑁆𑀕𑁂𑀦 𑀢𑀡𑁆𑀳𑀸 𑀲𑀩𑁆𑀩𑀲𑁄 𑀲𑀫𑀼𑀘𑁆𑀙𑀺𑀦𑁆𑀦𑀸, 𑀢𑀤𑀕𑁆𑀕𑁂𑀦 𑀲𑀩𑁆𑀩𑀸𑀦𑀺𑀧𑀺 𑀲𑀜𑁆𑀜𑁄𑀚𑀦𑀸𑀦𑀻𑀢𑀺 𑀆𑀳 ‘‘𑀤𑀲𑀯𑀺𑀥𑀫𑁆𑀧𑀻’’𑀢𑀺𑀆𑀤𑀺. 𑀲𑀫𑁆𑀫𑀸𑀢𑀺 𑀲𑀼𑀝𑁆𑀞𑀼. 𑀧𑀳𑀸𑀦𑀜𑁆𑀘 𑀦𑀸𑀫 𑀉𑀧𑀸𑀬𑁂𑀦 𑀜𑀸𑀬𑁂𑀦 𑀧𑀳𑀸𑀦𑀦𑁆𑀢𑀺 𑀆𑀳 ‘‘𑀳𑁂𑀢𑀼𑀦𑀸 𑀓𑀸𑀭𑀡𑁂𑀦𑀸’’𑀢𑀺. 𑀤𑀲𑁆𑀲𑀦𑀸𑀪𑀺𑀲𑀫𑀬𑀸𑀢𑀺 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑀸. 𑀅𑀭𑀳𑀢𑁆𑀢𑀫𑀕𑁆𑀕𑁄 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑁄𑀯 𑀲𑀪𑀸𑀯𑀧𑀝𑀺𑀘𑁆𑀙𑀸𑀤𑀓𑀁 𑀫𑁄𑀳𑀁 𑀯𑀺𑀤𑁆𑀥𑀁𑀲𑁂𑀦𑁆𑀢𑁄 𑀏𑀯 𑀧𑀯𑀢𑁆𑀢𑀢𑀺, 𑀢𑁂𑀦 𑀫𑀸𑀦𑁄 𑀬𑀸𑀣𑀸𑀯𑀢𑁄 𑀤𑀺𑀝𑁆𑀞𑁄 𑀦𑀸𑀫 𑀳𑁄𑀢𑀺, 𑀅𑀬𑀫𑀲𑁆𑀲 𑀤𑀲𑁆𑀲𑀦𑀸𑀪𑀺𑀲𑀫𑀬𑁄. 𑀬𑀣𑀸 𑀳𑀺 𑀲𑀽𑀭𑀺𑀬𑁂 𑀉𑀝𑁆𑀞𑀺𑀢𑁂 𑀅𑀦𑁆𑀥𑀓𑀸𑀭𑁄 𑀯𑀺𑀤𑁆𑀥𑀁𑀲𑀺𑀬𑀫𑀸𑀦𑁄 𑀯𑀺𑀳𑀢𑁄, 𑀏𑀯𑀁 𑀅𑀭𑀳𑀢𑁆𑀢𑀫𑀕𑁆𑀕𑁂 𑀉𑀧𑁆𑀧𑀚𑁆𑀚𑀫𑀸𑀦𑁂 𑀲𑁄 𑀲𑀩𑁆𑀩𑀲𑁄 𑀧𑀳𑀻𑀦𑁄 𑀏𑀯 𑀳𑁄𑀢𑀺, 𑀦 𑀢𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀧𑀢𑀺𑀝𑁆𑀞𑀁 𑀮𑀪𑀢𑀺, 𑀅𑀬𑀫𑀲𑁆𑀲 𑀧𑀳𑀸𑀦𑀸𑀪𑀺𑀲𑀫𑀬𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀭𑀳𑀢𑁆𑀢𑀫𑀕𑁆𑀕𑁄 𑀳𑀻’’𑀢𑀺𑀆𑀤𑀺. 𑀓𑀺𑀘𑁆𑀘𑀯𑀲𑁂𑀦𑀸𑀢𑀺 𑀅𑀲𑀫𑁆𑀫𑁄𑀳𑀧𑀝𑀺𑀯𑁂𑀥𑀲𑀗𑁆𑀔𑀸𑀢𑀲𑁆𑀲 𑀤𑀲𑁆𑀲𑀦𑀓𑀺𑀘𑁆𑀘𑀲𑁆𑀲 𑀅𑀦𑀺𑀧𑁆𑀨𑀸𑀤𑀦𑀯𑀲𑁂𑀦.

𑀬𑁂 𑀇𑀫𑁂 𑀘𑀢𑁆𑀢𑀸𑀭𑁄 𑀅𑀦𑁆𑀢𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀫𑀭𑀺𑀬𑀸𑀤𑀦𑁆𑀢𑁄𑀢𑀺 𑀫𑀭𑀺𑀬𑀸𑀤𑀲𑀗𑁆𑀔𑀸𑀢𑁄 𑀅𑀦𑁆𑀢𑁄. 𑀏𑀲 𑀦𑀬𑁄 𑀲𑁂𑀲𑀢𑁆𑀢𑀬𑁂𑀧𑀺. 𑀢𑁂𑀲𑀽𑀢𑀺 𑀘𑀢𑀽𑀲𑀼 𑀅𑀦𑁆𑀢𑁂𑀲𑀼. 𑀅𑀤𑀼𑀁 𑀘𑀢𑀼𑀢𑁆𑀣𑀓𑁄𑀝𑀺𑀲𑀗𑁆𑀔𑀸𑀢𑀁 𑀲𑀩𑁆𑀩𑀲𑁆𑀲𑁂𑀯 𑀯𑀝𑁆𑀝𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀁 𑀧𑀭𑀺𑀘𑁆𑀙𑁂𑀤𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀫𑀸𑀦𑀲𑁆𑀲 𑀤𑀺𑀝𑁆𑀞𑀢𑁆𑀢𑀸 𑀧𑀳𑀻𑀦𑀢𑁆𑀢𑀸 𑀘 𑀅𑀓𑀸𑀲𑀻𑀢𑀺 𑀬𑁄𑀚𑀦𑀸. 𑀲𑀫𑀼𑀲𑁆𑀲𑀬𑁄 𑀅𑀢𑁆𑀢𑀪𑀸𑀯𑁄.

𑀦 𑀭𑀺𑀜𑁆𑀘𑀢𑀻𑀢𑀺 𑀦 𑀯𑀺𑀯𑁂𑀘𑁂𑀢𑀺 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺. 𑀢𑁂𑀦𑀸𑀳 ‘‘𑀲𑀫𑁆𑀧𑀚𑀜𑁆𑀜𑀁 𑀦 𑀚𑀳𑀢𑀻’’𑀢𑀺, 𑀲𑀫𑁆𑀧𑀚𑀜𑁆𑀜𑀁 𑀦 𑀧𑀭𑀺𑀘𑁆𑀘𑀚𑀢𑀻𑀢𑀺 𑀅𑀢𑁆𑀣𑁄. 𑀲𑀗𑁆𑀔𑁆𑀬𑀁 𑀦𑁄𑀧𑁂𑀢𑀻𑀢𑀺 𑀇𑀫𑀲𑁆𑀲 ‘‘𑀤𑀺𑀝𑁆𑀞𑀥𑀫𑁆𑀫𑁂 𑀅𑀦𑀸𑀲𑀯𑁄’’𑀢𑀺 ¶ 𑀇𑀫𑀲𑁆𑀲 𑀯𑀲𑁂𑀦 𑀅𑀢𑁆𑀣𑀁 𑀯𑀤𑀦𑁆𑀢𑁄 ‘‘𑀭𑀢𑁆𑀢𑁄 𑀤𑀼𑀝𑁆𑀞𑁄’’𑀢𑀺 𑀅𑀯𑁄𑀘 𑀲𑀉𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀯𑀲𑁂𑀦. 𑀲𑀗𑁆𑀔𑁆𑀬𑀁 𑀦𑁄𑀧𑁂𑀢𑀻𑀢𑀺 𑀯𑀸 𑀤𑀺𑀝𑁆𑀞𑁂-𑀥𑀫𑁆𑀫𑁂 𑀅𑀦𑀸𑀲𑀯𑁄 𑀥𑀫𑁆𑀫𑀝𑁆𑀞𑁄 𑀯𑁂𑀤𑀕𑀽 𑀓𑀸𑀬𑀲𑁆𑀲 𑀪𑁂𑀤𑀸 𑀫𑀦𑀼𑀲𑁆𑀲𑁄 𑀤𑁂𑀯𑁄𑀢𑀺 𑀯𑀸 𑀧𑀜𑁆𑀜𑀢𑁆𑀢𑀺𑀁 𑀦 𑀉𑀧𑁂𑀢𑀻𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀯𑀲𑁂𑀦𑀧𑀺 𑀅𑀢𑁆𑀣𑁄 𑀯𑀢𑁆𑀢𑀩𑁆𑀩𑁄. 𑀏𑀢𑁆𑀣 𑀘 𑀲𑀼𑀔𑀸𑀤𑀻𑀲𑀼 𑀯𑁂𑀤𑀦𑀸𑀲𑀼 𑀬𑀣𑀸𑀓𑁆𑀓𑀫𑀁 ¶ 𑀭𑀸𑀕𑀸𑀦𑀼𑀲𑀬𑀸𑀤𑀬𑁄 𑀓𑀣𑀺𑀢𑀸𑀢𑀺 𑀆𑀳 𑁋 ‘‘𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀆𑀭𑀫𑁆𑀫𑀡𑀸𑀦𑀼𑀲𑀬𑁄 𑀓𑀣𑀺𑀢𑁄’’𑀢𑀺. 𑀬𑁄 𑀳𑀺 𑀭𑀸𑀕𑀸𑀤𑀺 𑀧𑀘𑁆𑀘𑀬𑀲𑀫𑀯𑀸𑀬𑁂 𑀅𑀢𑀺𑀇𑀝𑁆𑀞𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀦𑀸𑀭𑀳𑁄 𑀫𑀕𑁆𑀕𑁂𑀦 𑀅𑀧𑁆𑀧𑀳𑀻𑀦𑁄, 𑀲𑁄 ‘‘𑀭𑀸𑀕𑀸𑀦𑀼𑀲𑀬𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄, 𑀅𑀧𑁆𑀧𑀳𑀻𑀦𑀢𑁆𑀣𑁄 𑀲𑁄 𑀫𑀕𑁆𑀕𑁂𑀦 𑀧𑀳𑀸𑀢𑀩𑁆𑀩𑁄, 𑀦 𑀧𑀭𑀺𑀬𑀼𑀝𑁆𑀞𑀸𑀦𑀸𑀪𑀺𑀪𑀯𑀢𑁆𑀣𑁄𑀢𑀺.

𑀧𑀳𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀸𑀢𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁨. 𑀬𑀢𑁆𑀣 𑀧𑀢𑀺𑀝𑁆𑀞𑀸 𑀦𑀢𑁆𑀣𑀺 𑀏𑀓𑀦𑁆𑀢𑀺𑀓𑀸𑀢𑀺 𑀏𑀓𑀦𑁆𑀢𑀺𑀓𑀲𑁆𑀲 𑀫𑀳𑀢𑁄 𑀧𑀸𑀢𑀲𑁆𑀲 𑀅𑀮𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 ‘‘𑀦𑀢𑁆𑀣𑀺 𑀏𑀢𑁆𑀣 𑀧𑀢𑀺𑀝𑁆𑀞𑀸’’𑀢𑀺. 𑀅𑀲𑀫𑁆𑀪𑀽𑀢𑀢𑁆𑀣𑀦𑁆𑀢𑀺 𑀦 𑀲𑀫𑁆𑀪𑀽𑀢𑀢𑁆𑀣𑀁, 𑀫𑀼𑀲𑀸𑀢𑀺 𑀅𑀢𑁆𑀣𑁄. 𑀲𑁄𑀢𑀺 𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄. 𑀬𑀁 𑀢𑀁 𑀉𑀤𑀓𑀁 𑀧𑀢𑀢𑀻𑀢𑀺 𑀬𑁄𑀚𑀦𑀸. 𑀬𑀲𑁆𑀫𑀸 𑀲𑀫𑀼𑀤𑁆𑀤𑀧𑀺𑀝𑁆𑀞𑁂 𑀅𑀦𑁆𑀢𑀭𑀦𑁆𑀢𑀭𑀸 𑀯𑁂𑀭𑀫𑁆𑀪𑀯𑀸𑀢𑀲𑀤𑀺𑀲𑁄 𑀫𑀳𑀸𑀯𑀸𑀢𑁄 𑀉𑀝𑁆𑀞𑀳𑀺𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑁂 𑀉𑀤𑀓𑀁 𑀉𑀕𑁆𑀕𑀘𑁆𑀙𑀸𑀧𑁂𑀢𑀺, 𑀢𑀁 𑀓𑀤𑀸𑀘𑀺 𑀘𑀓𑁆𑀓𑀯𑀸𑀴𑀸𑀪𑀺𑀫𑀼𑀔𑀁, 𑀓𑀤𑀸𑀘𑀺 𑀲𑀺𑀦𑁂𑀭𑀼𑀧𑀸𑀤𑀸𑀪𑀺𑀫𑀼𑀔𑀁 𑀕𑀦𑁆𑀢𑁆𑀯𑀸 𑀢𑀁 𑀧𑀢𑀺𑀳𑀦𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀩𑀮𑀯𑀸𑀫𑀼𑀔𑀁 𑀫𑀳𑀸𑀲𑀫𑀼𑀤𑁆𑀤𑀲𑁆𑀲𑀸’’𑀢𑀺𑀆𑀤𑀺. 𑀯𑁂𑀕𑁂𑀦 𑀧𑀓𑁆𑀔𑀦𑁆𑀤𑀺𑀢𑁆𑀯𑀸𑀢𑀺 𑀫𑀳𑀢𑀸 𑀯𑀸𑀢𑀯𑁂𑀕𑁂𑀦 𑀲𑀫𑀼𑀤𑁆𑀥𑀢𑀁 𑀢𑁂𑀦𑁂𑀯 𑀯𑁂𑀕𑁂𑀦 𑀧𑀓𑁆𑀔𑀦𑁆𑀤𑀦𑁆𑀢𑀜𑁆𑀘 𑀳𑀼𑀢𑁆𑀯𑀸. 𑀫𑀳𑀸𑀦𑀭𑀓𑀧𑀧𑀸𑀢𑁄 𑀯𑀺𑀬𑀸𑀢𑀺 𑀬𑁄𑀚𑀦𑀸𑀬𑀸𑀫𑀯𑀺𑀢𑁆𑀣𑀸𑀭𑀕𑀫𑁆𑀪𑀻𑀭𑀲𑁄𑀩𑁆𑀪𑀧𑀧𑀸𑀢𑁄 𑀯𑀺𑀬 𑀳𑁄𑀢𑀺. 𑀢𑀣𑀸𑀭𑀽𑀧𑀸𑀦𑀦𑁆𑀢𑀺 𑀢𑀢𑁆𑀣 𑀯𑀲𑀺𑀢𑀼𑀁 𑀲𑀫𑀢𑁆𑀣𑀸𑀦𑀁. 𑀅𑀲𑀦𑁆𑀢𑀦𑁆𑀢𑀺 𑀅𑀪𑀽𑀢𑀁. 𑀅𑀢𑁆𑀣𑀯𑀲𑁂𑀦 𑀳𑀺 𑀯𑀸𑀘𑀸 𑀅𑀪𑀽𑀢𑀁 𑀦𑀸𑀫.

𑀦 𑀧𑀢𑀺𑀝𑁆𑀞𑀸𑀲𑀻𑀢𑀺 𑀧𑀢𑀺𑀝𑁆𑀞𑀁 𑀦 𑀮𑀪𑀺. 𑀅𑀦𑀺𑀩𑀤𑁆𑀥𑀦𑁆𑀢𑀺 𑀅𑀦𑀺𑀩𑀦𑁆𑀥𑀦𑀢𑁆𑀣𑀁 𑀬𑀁𑀓𑀺𑀜𑁆𑀘𑀺. 𑀤𑀼𑀩𑁆𑀩𑀮𑀜𑀸𑀡𑁄𑀢𑀺 𑀜𑀸𑀡𑀩𑀮𑀭𑀳𑀺𑀢𑁄. ‘‘𑀅𑀲𑁆𑀲𑀼𑀢𑀯𑀸 𑀧𑀼𑀣𑀼𑀚𑁆𑀚𑀦𑁄’’𑀢𑀺 𑀯𑀢𑁆𑀯𑀸 ‘‘𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀲𑁄𑀢𑀸𑀧𑀦𑁆𑀦𑁄 𑀥𑀼𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀢𑀭𑁂𑀲𑀼 𑀅𑀭𑀺𑀬𑀲𑀸𑀯𑀓𑁂𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑁂𑀲𑀜𑁆𑀳𑀺 𑀯𑁂𑀤𑀦𑀸 𑀲𑀼𑀧𑀭𑀺𑀜𑁆𑀜𑀸𑀢𑀸. 𑀩𑀮𑀯𑀯𑀺𑀧𑀲𑁆𑀲𑀓𑁄…𑀧𑁂… 𑀬𑁄𑀕𑀸𑀯𑀘𑀭𑁄𑀧𑀺 𑀯𑀝𑁆𑀝𑀢𑀺 𑀫𑀢𑁆𑀢𑀲𑁄 𑀯𑁂𑀤𑀦𑀸𑀦𑀁 𑀧𑀭𑀺𑀜𑁆𑀜𑀸𑀢𑀢𑁆𑀢𑀸.

𑀧𑀸𑀢𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀤𑀝𑁆𑀞𑀩𑁆𑀩𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁩. 𑀯𑀺𑀧𑀭𑀺𑀡𑀸𑀫𑀦𑀯𑀲𑁂𑀦 ¶ 𑀤𑀼𑀓𑁆𑀔𑀢𑁄 𑀤𑀝𑁆𑀞𑀩𑁆𑀩𑀸𑀢𑀺 𑀓𑀺𑀜𑁆𑀘𑀸𑀧𑀺 𑀲𑀼𑀔𑀸, 𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸 𑀧𑀦 𑀲𑀼𑀔𑀯𑁂𑀤𑀦𑀸𑀬 𑀏𑀓𑀦𑁆𑀢𑀺𑀓𑀸𑀢𑀺. 𑀯𑀺𑀦𑀺𑀯𑀺𑀚𑁆𑀛𑀦𑀝𑁆𑀞𑁂𑀦𑀸𑀢𑀺 𑀧𑀻𑀴𑀦𑀯𑀲𑁂𑀦 𑀅𑀢𑁆𑀢𑀪𑀸𑀯𑀲𑁆𑀲 𑀯𑀺𑀚𑁆𑀛𑀦𑀝𑁆𑀞𑁂𑀦. 𑀳𑀼𑀢𑁆𑀯𑀸𑀢𑀺 𑀧𑀘𑁆𑀘𑀬𑀲𑀫𑀸𑀕𑀫𑁂𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸. 𑀢𑁂𑀦 𑀧𑀸𑀓𑀪𑀸𑀯𑀧𑀼𑀩𑁆𑀩𑀓𑁄 𑀅𑀢𑁆𑀢𑀮𑀸𑀪𑁄 𑀯𑀼𑀢𑁆𑀢𑁄. 𑀅𑀪𑀸𑀯𑀸𑀓𑀸𑀭𑁂𑀦𑀸𑀢𑀺 𑀪𑀗𑁆𑀕𑀼𑀧𑀕𑀫𑀦𑀸𑀓𑀸𑀭𑁂𑀦. 𑀢𑁂𑀦 𑀯𑀺𑀤𑁆𑀥𑀁𑀲𑀪𑀸𑀯𑁄 𑀯𑀼𑀢𑁆𑀢𑁄. 𑀉𑀪𑀬𑁂𑀦 𑀉𑀤𑀬𑀩𑁆𑀩𑀬𑀧𑀭𑀺𑀘𑁆𑀙𑀺𑀦𑁆𑀦𑀢𑀸𑀬 𑀲𑀺𑀔𑀧𑁆𑀧𑀢𑁆𑀢𑀁 𑀅𑀦𑀺𑀘𑁆𑀘𑀢𑀁 ¶ 𑀤𑀲𑁆𑀲𑁂𑀢𑀺. 𑀲𑁆𑀯𑀸𑀬𑀁 𑀳𑀼𑀢𑁆𑀯𑀸 𑀅𑀪𑀸𑀯𑀸𑀓𑀸𑀭𑁄 𑀇𑀢𑀭𑀸𑀲𑀼𑀧𑀺 𑀯𑁂𑀤𑀦𑀸𑀲𑀼 𑀮𑀩𑁆𑀪𑀢𑁂𑀯, 𑀅𑀥𑀺𑀓𑁄 𑀘 𑀧𑀦 𑀤𑁆𑀯𑀺𑀦𑁆𑀦𑀁 𑀤𑀼𑀓𑁆𑀔𑀲𑀪𑀸𑀯𑁄. 𑀤𑀼𑀓𑁆𑀔𑀢𑀸𑀯𑀲𑁂𑀦 𑀧𑀼𑀭𑀺𑀫𑀸𑀦𑀁 𑀯𑁂𑀤𑀦𑀸𑀦𑀁 𑀤𑀝𑁆𑀞𑀩𑁆𑀩𑀢𑀸𑀬 𑀤𑀲𑁆𑀲𑀺𑀢𑀢𑁆𑀢𑀸 𑀧𑀘𑁆𑀙𑀺𑀫𑀸𑀬 𑀯𑁂𑀤𑀦𑀸𑀬 𑀏𑀯𑀁 𑀤𑀝𑁆𑀞𑀩𑁆𑀩𑀢𑀸 𑀤𑀲𑁆𑀲𑀺𑀢𑀸. 𑀅𑀤𑁆𑀤𑀸𑀢𑀺 𑀜𑀸𑀡𑀕𑀢𑀺𑀬𑀸 𑀲𑀘𑁆𑀙𑀺𑀓𑀢𑁆𑀯𑀸 𑀅𑀤𑀓𑁆𑀔𑀺. 𑀜𑀸𑀡𑀕𑀫𑀦𑀜𑁆𑀳𑁂𑀢𑀁, 𑀬𑀤𑀺𑀤𑀁 𑀤𑀼𑀓𑁆𑀔𑀢𑁄 𑀤𑀲𑁆𑀲𑀦𑀁. 𑀲𑀦𑁆𑀢𑀲𑀪𑀸𑀯𑀁 𑀲𑀼𑀔𑀤𑀼𑀓𑁆𑀔𑀢𑁄 𑀉𑀧𑀲𑀦𑁆𑀢𑀭𑀽𑀧𑀢𑁆𑀢𑀸.

𑀤𑀝𑁆𑀞𑀩𑁆𑀩𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀮𑁆𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁪. 𑀤𑁆𑀯𑀻𑀲𑀼 𑀚𑀦𑁂𑀲𑀽𑀢𑀺 𑀲𑀼𑀢𑀯𑀦𑁆𑀢𑀅𑀲𑁆𑀲𑀼𑀢𑀯𑀦𑁆𑀢𑁂𑀲𑀼 𑀤𑁆𑀯𑀻𑀲𑀼 𑀚𑀦𑁂𑀲𑀼. 𑀅𑀦𑀼𑀕𑀢𑀯𑁂𑀥𑀦𑁆𑀢𑀺 𑀧𑀼𑀩𑁆𑀩𑁂 𑀧𑀯𑀢𑁆𑀢𑀯𑁂𑀥𑀲𑁆𑀲 𑀅𑀦𑀼𑀕𑀢𑀯𑁂𑀥𑀁. 𑀩𑀮𑀯𑀢𑀭𑀸 𑀤𑀺𑀕𑀼𑀡𑀸 𑀯𑀺𑀬 𑀳𑀼𑀢𑁆𑀯𑀸 𑀤𑀴𑁆𑀳𑀢𑀭𑀧𑀯𑀢𑁆𑀢𑀺𑀬𑀸. 𑀏𑀯𑀫𑁂𑀯𑀸𑀢𑀺 𑀬𑀣𑀸 𑀯𑀺𑀤𑁆𑀥𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀦𑀼𑀯𑁂𑀥𑀦𑀸 𑀩𑀮𑀯𑀢𑀭𑀸, 𑀏𑀯𑀫𑁂𑀯. 𑀲𑀫𑀸𑀥𑀺𑀫𑀕𑁆𑀕𑀨𑀮𑀸𑀦𑀺 𑀦𑀺𑀲𑁆𑀲𑀭𑀡𑀁 𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀲𑁂𑀦. 𑀲𑀫𑀸𑀥𑀺𑀲𑀻𑀲𑁂𑀦 𑀳𑁂𑀢𑁆𑀣 𑀛𑀸𑀦𑀜𑁆𑀘 𑀕𑀳𑀺𑀢𑀁. 𑀲𑁄 𑀦 𑀚𑀸𑀦𑀸𑀢𑀺 𑀅𑀦𑀥𑀺𑀕𑀢𑀢𑁆𑀢𑀸. 𑀦𑀺𑀲𑁆𑀲𑀭𑀡𑀦𑁆𑀢𑀺 𑀚𑀸𑀦𑀸𑀢𑀺 𑀅𑀦𑀺𑀲𑁆𑀲𑀭𑀡𑀫𑁂𑀯. 𑀢𑀸𑀲𑀁 𑀲𑀫𑀥𑀺𑀕𑀢𑀸𑀦𑀁 𑀲𑀼𑀔𑀤𑀼𑀓𑁆𑀔𑀯𑁂𑀤𑀦𑀸𑀦𑀁. 𑀦 𑀯𑀺𑀧𑁆𑀧𑀬𑀼𑀢𑁆𑀢𑁄 𑀅𑀧𑁆𑀧𑀳𑀻𑀦𑀓𑀺𑀮𑁂𑀲𑀢𑁆𑀢𑀸. 𑀲𑀗𑁆𑀔𑀸𑀢𑀥𑀫𑁆𑀫𑀲𑁆𑀲𑀸𑀢𑀺 𑀲𑀗𑁆𑀔𑀸𑀬 𑀧𑀜𑁆𑀜𑀸𑀬 𑀧𑀭𑀺𑀜𑁆𑀜𑀸𑀢𑀘𑀢𑀼𑀓𑁆𑀔𑀦𑁆𑀥𑀲𑁆𑀲. 𑀢𑁂𑀦𑀸𑀳 ‘‘𑀢𑀼𑀮𑀺𑀢𑀥𑀫𑁆𑀫𑀲𑁆𑀲𑀸’’𑀢𑀺. 𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑁂 𑀧𑀼𑀭𑀺𑀫𑀲𑀼𑀢𑁆𑀢𑁂 𑀯𑀺𑀬 𑀆𑀭𑀫𑁆𑀫𑀡𑀸𑀦𑀼𑀲𑀬𑁄𑀯 𑀓𑀣𑀺𑀢𑁄, 𑀲𑁄 𑀧𑀦 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀦𑀼𑀭𑁄𑀥𑀯𑀺𑀭𑁄𑀥𑀧𑀳𑀸𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀔𑀻𑀡𑀸𑀲𑀯𑁄 𑀥𑀼𑀭𑀁. 𑀅𑀦𑀸𑀕𑀸𑀫𑀻𑀧𑀺 𑀯𑀝𑁆𑀝𑀢𑀺, 𑀢𑀲𑁆𑀲 𑀯𑀺𑀭𑁄𑀥𑀧𑁆𑀧𑀳𑀸𑀦𑀁 𑀮𑀩𑁆𑀪𑀢𑀺.

𑀲𑀮𑁆𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀧𑀞𑀫𑀕𑁂𑀮𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁫. 𑀲𑀤𑁆𑀤𑀳𑀺𑀢𑁆𑀯𑀸 ¶ 𑀕𑀺𑀮𑀸𑀦𑁂 𑀉𑀧𑀝𑁆𑀞𑀸𑀢𑀩𑁆𑀩𑁂 𑀫𑀜𑁆𑀜𑀺𑀲𑁆𑀲𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀢𑀢𑁆𑀣𑀸𑀢𑀺 𑀢𑀲𑁆𑀫𑀺𑀁 𑀞𑀸𑀦𑁂. 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑁄 𑀲𑀧𑁆𑀧𑀸𑀬𑁄 𑀬𑁂𑀲𑀁 𑀢𑁂 𑀓𑀫𑁆𑀫𑀝𑁆𑀞𑀸𑀦𑀲𑀧𑁆𑀧𑀸𑀬𑀸, 𑀲𑀢𑀺𑀧𑀝𑁆𑀞𑀸𑀦𑀭𑀢𑀸𑀢𑀺 𑀅𑀢𑁆𑀣𑁄. 𑀅𑀦𑀺𑀘𑁆𑀘𑀢𑀁 𑀅𑀦𑀼𑀧𑀲𑁆𑀲𑀦𑁆𑀢𑁄𑀢𑀺 𑀓𑀸𑀬𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑀸𑀬 𑀯𑁂𑀤𑀦𑀸𑀬 𑀘 𑀅𑀦𑀺𑀘𑁆𑀘𑀢𑀁 𑀅𑀦𑀼𑀧𑀲𑁆𑀲𑀦𑁆𑀢𑁄. 𑀯𑀬𑀁 𑀅𑀦𑀼𑀧𑀲𑁆𑀲𑀦𑁆𑀢𑁄𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀬𑀦𑁆𑀢𑀺 𑀧𑀦 𑀢𑀸𑀬 𑀏𑀯 𑀔𑀬𑀲𑀗𑁆𑀔𑀸𑀢𑀁. 𑀯𑀺𑀭𑀸𑀕𑀦𑁆𑀢𑀺 𑀯𑀺𑀭𑀚𑁆𑀚𑀦𑀁. 𑀧𑀝𑀺𑀦𑀺𑀲𑁆𑀲𑀕𑁆𑀕𑀦𑁆𑀢𑀺 𑀧𑀭𑀺𑀘𑁆𑀘𑀸𑀕𑀧𑀝𑀺𑀦𑀺𑀲𑁆𑀲𑀕𑁆𑀕𑀁, 𑀧𑀓𑁆𑀔𑀦𑁆𑀤𑀦𑀧𑀝𑀺𑀦𑀺𑀲𑁆𑀲𑀕𑁆𑀕𑀫𑁆𑀧𑀺 𑀯𑀸.

𑀆𑀕𑀫𑀦𑀻𑀬𑀧𑀝𑀺𑀧𑀤𑀸𑀢𑀺 𑀅𑀭𑀺𑀬𑀫𑀕𑁆𑀕𑀲𑁆𑀲 𑀆𑀕𑀫𑀦𑀝𑁆𑀞𑀸𑀦𑀺𑀬𑀸 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸. 𑀧𑀼𑀩𑁆𑀩𑀪𑀸𑀕𑀸𑀬𑁂𑀯 𑀦 𑀮𑁄𑀓𑀼𑀢𑁆𑀢𑀭𑀸. 𑀲𑀫𑁆𑀧𑀚𑀜𑁆𑀜𑀁 𑀧𑀼𑀩𑁆𑀩𑀪𑀸𑀕𑀺𑀬𑀫𑁂𑀯. 𑀢𑀺𑀲𑁆𑀲𑁄 𑀅𑀦𑀼𑀧𑀲𑁆𑀲𑀦𑀸 𑀧𑀼𑀩𑁆𑀩𑀪𑀸𑀕𑀸𑀬𑁂𑀯 𑀯𑀺𑀧𑀲𑁆𑀲𑀦𑀸𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 ¶ . 𑀫𑀺𑀲𑁆𑀲𑀓𑀸𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸. 𑀪𑀸𑀯𑀦𑀸𑀓𑀸𑀮𑁄 𑀤𑀲𑁆𑀲𑀺𑀢𑁄 ‘‘𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀭𑀸𑀕𑀸𑀦𑀼𑀲𑀬𑁄 𑀧𑀳𑀻𑀬𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸.

𑀧𑀞𑀫𑀕𑁂𑀮𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮-𑁯. 𑀤𑀼𑀢𑀺𑀬𑀕𑁂𑀮𑀜𑁆𑀜𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁫𑁬-𑁨𑁫𑁭. 𑀨𑀲𑁆𑀲𑀁 𑀧𑀝𑀺𑀘𑁆𑀘𑀸𑀢𑀺 𑀏𑀢𑁆𑀣 𑀨𑀲𑁆𑀲𑀲𑀻𑀲𑁂𑀦 𑀨𑀲𑁆𑀲𑀸𑀬𑀢𑀦𑀸𑀦𑀁 𑀕𑀳𑀡𑀁. 𑀦 𑀳𑀺 𑀨𑀲𑁆𑀲𑀸𑀬𑀢𑀦𑁂𑀳𑀺 𑀯𑀺𑀦𑀸 𑀨𑀲𑁆𑀲𑀲𑁆𑀲 𑀲𑀫𑁆𑀪𑀯𑁄. 𑀢𑁂𑀦𑀸𑀳 ‘‘𑀓𑀸𑀬𑁄𑀯 𑀳𑀺 𑀏𑀢𑁆𑀣 𑀨𑀲𑁆𑀲𑁄𑀢𑀺 𑀯𑀼𑀢𑁆𑀢𑁄’’𑀢𑀺, 𑀨𑀲𑁆𑀲𑀲𑀻𑀲𑁂𑀦 𑀯𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀯𑀫𑀁 𑀉𑀢𑁆𑀢𑀸𑀦𑀫𑁂𑀯 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸.

𑀤𑀼𑀢𑀺𑀬𑀕𑁂𑀮𑀜𑁆𑀜𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀨𑀲𑁆𑀲𑀫𑀽𑀮𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁮. 𑀲𑀼𑀔𑀯𑁂𑀤𑀦𑀸𑀬 𑀳𑀺𑀢𑀁 𑀲𑀼𑀔𑀯𑁂𑀤𑀦𑀺𑀬𑀁. 𑀲𑁄 𑀧𑀦𑁂𑀲 𑀳𑀺𑀢𑀪𑀸𑀯𑁄 𑀧𑀘𑁆𑀘𑀬𑀪𑀸𑀯𑁂𑀦𑀸𑀢𑀺 𑀆𑀳 ‘‘𑀲𑀼𑀔𑀯𑁂𑀤𑀦𑀸𑀬 𑀧𑀘𑁆𑀘𑀬𑀪𑀽𑀢’’𑀦𑁆𑀢𑀺. 𑀇𑀫𑀲𑁆𑀫𑀺𑀫𑁆𑀧𑀺 𑀲𑀼𑀢𑁆𑀢𑀤𑁆𑀯𑀬𑁂𑀢𑀺 ¶ 𑀇𑀫𑀲𑁆𑀫𑀺𑀁 𑀦𑀯𑀫𑁂 𑀤𑀲𑀫𑁂 𑀘 𑀲𑀼𑀢𑁆𑀢𑁂𑀧𑀺. 𑀲𑀫𑁆𑀫𑀲𑀦𑀘𑀸𑀭𑀯𑁂𑀤𑀦𑀸𑀢𑀺 𑀲𑀫𑁆𑀫𑀲𑀦𑀻𑀬𑀯𑁂𑀤𑀦𑀸 𑀏𑀯 𑀓𑀣𑀺𑀢𑀸, 𑀦 𑀮𑁄𑀓𑀼𑀢𑁆𑀢𑀭𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀨𑀲𑁆𑀲𑀫𑀽𑀮𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀕𑀸𑀣𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀭𑀳𑁄𑀕𑀢𑀯𑀕𑁆𑀕𑁄

𑁧. 𑀭𑀳𑁄𑀕𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁫𑁯. 𑀬𑀁𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀦𑁆𑀢𑀺 ‘‘𑀲𑀼𑀔𑀁 𑀤𑀼𑀓𑁆𑀔𑀁 𑀅𑀤𑀼𑀓𑁆𑀔𑀫𑀲𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀁 𑀯𑁂𑀤𑀬𑀺𑀢𑀁 𑀤𑀼𑀓𑁆𑀔𑀲𑁆𑀫𑀺𑀁 𑀅𑀦𑁆𑀢𑁄𑀕𑀥𑀁, 𑀤𑀼𑀓𑁆𑀔𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺 𑀧𑀭𑀺𑀬𑀸𑀬𑁂𑀦𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 ‘‘𑀢𑀁 𑀲𑀩𑁆𑀩𑀁 𑀤𑀼𑀓𑁆𑀔𑀦𑁆𑀢𑀺 𑀅𑀢𑁆𑀣𑁄’’𑀢𑀺. 𑀬𑀸 𑀏𑀲𑀸𑀢𑀺𑀆𑀤𑀻𑀲𑀼 𑀬𑁄 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀢𑀸𑀲𑀗𑁆𑀔𑀸𑀢𑁄 𑀳𑀼𑀢𑁆𑀯𑀸 𑀅𑀪𑀸𑀯𑀸𑀓𑀸𑀭𑁄, 𑀬𑀸 𑀔𑀬𑀲𑀪𑀸𑀯𑀢𑀸 𑀯𑀺𑀦𑀲𑁆𑀲𑀦𑀲𑀪𑀸𑀯𑀢𑀸 𑀚𑀭𑀸𑀬 𑀫𑀭𑀡𑁂𑀦 𑀘𑀸𑀢𑀺 𑀤𑁆𑀯𑀺𑀥𑀸 𑀯𑀺𑀧𑀭𑀺𑀡𑀸𑀫𑀦𑀲𑀪𑀸𑀯𑀢𑀸, 𑀏𑀢𑀁 𑀲𑀦𑁆𑀥𑀸𑀬 𑀉𑀤𑁆𑀤𑀺𑀲𑁆𑀲 𑀲𑀩𑁆𑀩𑀁 𑀯𑁂𑀤𑀬𑀺𑀢𑀁 𑀤𑀼𑀓𑁆𑀔𑀦𑁆𑀢𑀺 𑀫𑀬𑀸 𑀯𑀼𑀢𑁆𑀢𑀦𑁆𑀢𑀺 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄. 𑀲𑀸𑀢𑀺 𑀲𑀗𑁆𑀔𑀸𑀭𑀸𑀦𑀁 𑀅𑀦𑀺𑀘𑁆𑀘𑀢𑀸 ¶ . 𑀯𑁂𑀤𑀦𑀸𑀦𑀫𑁆𑀧𑀺 𑀅𑀦𑀺𑀘𑁆𑀘𑀢𑀸 𑀏𑀯 𑀲𑀗𑁆𑀔𑀸𑀭𑀲𑀪𑀸𑀯𑀢𑁆𑀢𑀸. 𑀢𑀸𑀲𑀁 𑀅𑀦𑀺𑀘𑁆𑀘𑀢𑀸 𑀘 𑀦𑀸𑀫 𑀫𑀭𑀡𑀁 𑀪𑀗𑁆𑀕𑁄𑀢𑀺 𑀓𑀢𑁆𑀯𑀸 𑀢𑀢𑁄 𑀉𑀢𑁆𑀢𑀭𑀺 𑀤𑀼𑀓𑁆𑀔𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀲𑀩𑁆𑀩𑀸 𑀯𑁂𑀤𑀦𑀸 ‘‘𑀤𑀼𑀓𑁆𑀔𑀸’’𑀢𑀺 𑀯𑀼𑀢𑁆𑀢𑀸, 𑀬𑀣𑀸 ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔’’𑀦𑁆𑀢𑀺 𑀘, ‘‘𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸’’𑀢𑀺 𑀘 𑀯𑀼𑀢𑁆𑀢𑀁. 𑀇𑀤𑀁 𑀲𑀼𑀢𑁆𑀢𑀧𑀤𑀁. 𑀘𑀢𑁆𑀢𑀸𑀭𑁄 𑀆𑀭𑀼𑀧𑁆𑀧𑀸𑀢𑀺 𑀘𑀢𑀲𑁆𑀲𑁄 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄. 𑀏𑀢𑁆𑀣𑀸𑀢𑀺 𑀘 𑀏𑀢𑀲𑁆𑀫𑀺𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀯𑀸𑀭𑁂.

𑀭𑀳𑁄𑀕𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀕𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁨. 𑀧𑀼𑀭𑀢𑁆𑀣𑀺𑀫𑀸𑀢𑀺 𑀯𑀺𑀪𑀢𑁆𑀢𑀺𑀮𑁄𑀧𑁂𑀦 𑀦𑀺𑀤𑁆𑀤𑁂𑀲𑁄, 𑀦𑀺𑀲𑁆𑀲𑀓𑁆𑀓𑁂 𑀯𑀸 𑀏𑀢𑀁 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀧𑀞𑀫𑀚𑁆𑀛𑀸𑀦𑀸𑀤𑀺𑀯𑀲𑁂𑀦𑀸𑀢𑀺 𑀧𑀞𑀫𑀤𑀼𑀢𑀺𑀬𑀚𑁆𑀛𑀸𑀦𑀯𑀲𑁂𑀦. 𑀅𑀦𑀼𑀲𑁆𑀲𑀢𑀺𑀯𑀲𑁂𑀦𑀸𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀅𑀜𑁆𑀜𑀲𑁆𑀲𑀧𑀺 𑀉𑀧𑀘𑀸𑀭𑀚𑁆𑀛𑀸𑀦𑀕𑁆𑀕𑀳𑀺𑀢𑀲𑁆𑀲 𑀲𑀯𑀺𑀢𑀓𑁆𑀓𑀘𑀸𑀭𑀲𑁆𑀲 𑀦𑀺𑀭𑀸𑀫𑀺𑀲𑀲𑁆𑀲 𑀲𑀼𑀔𑀲𑁆𑀲 𑀮𑀩𑁆𑀪𑀦𑀢𑁄. 𑀢𑀲𑁆𑀲𑀧𑀺 𑀯𑀸 𑀧𑀞𑀫𑀚𑁆𑀛𑀸𑀦𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀓𑀸𑀫𑀳𑁂𑀢𑀼 𑀤𑀼𑀓𑁆𑀔𑀧𑁆𑀧𑀢𑁆𑀢𑀸𑀦𑀁 𑀤𑀼𑀓𑁆𑀔𑀯𑁂𑀤𑀦𑀸 𑀓𑀸𑀫𑀸𑀫𑀺𑀲𑁂𑀦 ¶ 𑀲𑀸𑀫𑀺𑀲𑀸 𑀯𑁂𑀤𑀦𑀸. 𑀅𑀦𑀼𑀢𑁆𑀢𑀭𑀯𑀺𑀫𑁄𑀓𑁆𑀔𑀸 𑀦𑀸𑀫 𑀅𑀭𑀳𑀢𑁆𑀢𑀨𑀮𑀁. ‘‘𑀓𑀼𑀤𑀸𑀲𑁆𑀲𑀼 𑀦𑀸𑀫𑀸𑀳𑀁 𑀢𑀤𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀧𑀺𑀳𑀁 𑀉𑀧𑀝𑁆𑀞𑀸𑀧𑀬𑀢𑁄 𑀢𑀲𑁆𑀫𑀺𑀁 𑀅𑀦𑀺𑀚𑁆𑀛𑀫𑀸𑀦𑁂 𑀧𑀺𑀳𑀧𑁆𑀧𑀘𑁆𑀘𑀬𑀸 𑀉𑀧𑁆𑀧𑀦𑁆𑀦𑀤𑁄𑀫𑀦𑀲𑁆𑀲𑀯𑁂𑀤𑀦𑀸. 𑀦𑁂𑀓𑁆𑀔𑀫𑁆𑀫𑀦𑀺𑀲𑁆𑀲𑀺𑀢𑀸 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 𑀦𑀺𑀭𑀸𑀫𑀺𑀲𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀦𑀸𑀫. 𑀲𑀯𑀺𑀲𑁂𑀲𑀁 𑀧𑀦 𑀤𑀲𑁆𑀲𑁂𑀢𑀼𑀁 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀲𑁂𑀦 𑀉𑀧𑁆𑀧𑀦𑁆𑀦𑀸 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀸’’𑀢𑀺 𑀯𑀼𑀢𑁆𑀢𑀁.

𑀅𑀕𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫-𑁮. 𑀧𑀞𑀫𑀆𑀦𑀦𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁬𑁩-𑁨𑁬𑁬. 𑀳𑁂𑀝𑁆𑀞𑀸 𑀓𑀣𑀺𑀢𑀦𑀬𑀸𑀦𑁂𑀯, 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀢𑁄 𑀧𑀦 𑀢𑁂𑀲𑀁 𑀤𑁂𑀲𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀘𑀢𑀽𑀲𑀼 𑀲𑀼𑀢𑁆𑀢𑁂𑀲𑀼. 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 ‘‘𑀧𑀞𑀫𑀁 𑀛𑀸𑀦𑀁 𑀲𑀫𑀸𑀧𑀦𑁆𑀦𑀲𑁆𑀲 𑀯𑀸𑀘𑀸 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀸𑀯 𑀔𑀻𑀡𑀸𑀲𑀯𑀲𑁆𑀲 𑀓𑀺𑀮𑁂𑀲𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀢𑀸𑀯 𑀤𑁂𑀲𑀦𑀸𑀬 𑀧𑀯𑀢𑁆𑀢𑀢𑁆𑀢𑀸 ‘‘𑀧𑀭𑀺𑀧𑀼𑀡𑁆𑀡𑀧𑀲𑁆𑀲𑀤𑁆𑀥𑀺𑀓𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺. 𑀢𑀸𑀯 𑀧𑀭𑀺𑀧𑀽𑀭𑀁 𑀓𑀢𑁆𑀯𑀸 𑀅𑀤𑁂𑀲𑀺𑀢𑀢𑁆𑀢𑀸 ‘‘𑀧𑀘𑁆𑀙𑀺𑀫𑀸𑀦𑀺 𑀉𑀧𑀟𑁆𑀠𑀧𑀲𑁆𑀲𑀤𑁆𑀥𑀺𑀓𑀸𑀦𑀺, 𑀤𑁂𑀲𑀦𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀧𑀞𑀫𑀆𑀦𑀦𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯-𑁧𑁦. 𑀧𑀜𑁆𑀘𑀓𑀗𑁆𑀕𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁬𑁭-𑁨𑁬𑁮. 𑀤𑀡𑁆𑀟𑀫𑀼𑀕𑁆𑀕𑀭𑀁 𑀅𑀕𑁆𑀕𑀲𑁄𑀡𑁆𑀟𑀫𑀼𑀕𑁆𑀕𑀭𑀁. 𑀓𑀸𑀴𑀲𑀼𑀢𑁆𑀢𑀧𑀓𑁆𑀔𑀺𑀧𑀦𑀁 𑀓𑀸𑀴𑀲𑀼𑀢𑁆𑀢𑀦𑀸𑀴𑀺. 𑀯𑀸𑀲𑀺𑀆𑀤𑀻𑀦𑀺 ¶ 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀅𑀲𑁆𑀲𑀸𑀢𑀺 𑀧𑀜𑁆𑀘𑀓𑀗𑁆𑀕𑁄. 𑀯𑀢𑁆𑀣𑀼𑀯𑀺𑀚𑁆𑀚𑀸𑀬 𑀯𑀼𑀢𑁆𑀢𑀯𑀺𑀥𑀺𑀦𑀸 𑀓𑀢𑁆𑀢𑀩𑁆𑀩𑀦𑀺𑀲𑁆𑀲𑀬𑀸𑀦𑀺 𑀞𑀧𑁂𑀢𑀻𑀢𑀺 𑀣𑀧𑀢𑀺. 𑀧𑀡𑁆𑀟𑀺𑀢𑀉𑀤𑀸𑀬𑀺𑀢𑁆𑀣𑁂𑀭𑁄, 𑀦 𑀮𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑁄. 𑀤𑁆𑀯𑁂𑀧𑀸𑀦𑀦𑁆𑀤𑀸𑀢𑀺 𑀅𑀝𑁆𑀞𑀓𑀣𑀸𑀬 𑀧𑀤𑀼𑀤𑁆𑀥𑀸𑀭𑁄 𑀓𑀢𑁄 𑁋 ‘‘𑀤𑁆𑀯𑁂𑀧𑀺 𑀫𑀬𑀸 𑀆𑀦𑀦𑁆𑀤𑀸’’𑀢𑀺 𑀧𑀦 𑀧𑀸𑀴𑀺𑀬𑀁. 𑀧𑀲𑀸𑀤𑀓𑀸𑀬𑀲𑀦𑁆𑀦𑀺𑀲𑁆𑀲𑀺𑀢𑀸 𑀓𑀸𑀬𑀺𑀓𑀸, 𑀘𑁂𑀢𑁄𑀲𑀦𑁆𑀦𑀺𑀲𑁆𑀲𑀺𑀢𑀸 𑀘𑁂𑀢𑀲𑀺𑀓𑀸. 𑀆𑀥𑀺𑀧𑀘𑁆𑀘𑀝𑁆𑀞𑁂𑀦 𑀲𑀼𑀔𑀫𑁂𑀯 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀲𑀼𑀔𑀺𑀦𑁆𑀤𑁆𑀭𑀺𑀬𑀁. 𑀉𑀧𑀯𑀺𑀘𑀸𑀭𑀯𑀲𑁂𑀦𑀸𑀢𑀺 𑀭𑀽𑀧𑀸𑀤𑀻𑀦𑀺 𑀉𑀧𑁂𑀘𑁆𑀘 𑀯𑀺𑀘𑀭𑀡𑀯𑀲𑁂𑀦. 𑀅𑀢𑀻𑀢𑁂 𑀆𑀭𑀫𑁆𑀫𑀡𑁂. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀢𑀺 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑁂. 𑀏𑀯𑀁 𑀅𑀝𑁆𑀞𑀸𑀥𑀺𑀓𑀁 𑀲𑀢𑀁 𑀅𑀝𑁆𑀞𑀲𑀢𑀁.

𑀧𑀸𑀝𑀺𑀬𑁂𑀓𑁆𑀓𑁄 𑀅𑀦𑀼𑀲𑀦𑁆𑀥𑀻𑀢𑀺 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀆𑀤𑀻𑀳𑀺 𑀯𑀺𑀲𑀼𑀁 𑀢𑁂𑀳𑀺 𑀅𑀲𑀫𑁆𑀫𑀺𑀲𑁆𑀲𑁄 𑀏𑀓𑁄 𑀅𑀦𑀼𑀲𑀦𑁆𑀥𑀺. 𑀏𑀓𑀸𑀧𑀺 𑀯𑁂𑀤𑀦𑀸 𑀓𑀣𑀺𑀢𑀸 ‘‘𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀲𑀼𑀢𑀯𑀸 𑀅𑀭𑀺𑀬𑀲𑀸𑀯𑀓𑁄’’𑀢𑀺 𑀆𑀳𑀭𑀺𑀢𑁆𑀯𑀸 ‘‘𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸’’𑀢𑀺. 𑀬𑀲𑁆𑀫𑀸 𑀪𑀕𑀯𑀸 ¶ 𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑁂𑀓𑁆𑀔𑀸𑀯𑁂𑀤𑀦𑀁 𑀯𑀢𑁆𑀯𑀸 𑁋 ‘‘𑀅𑀢𑁆𑀣𑀸𑀦𑀦𑁆𑀤, 𑀏𑀢𑀲𑁆𑀫𑀸 𑀲𑀼𑀔𑀸 𑀅𑀜𑁆𑀜𑀁 𑀲𑀼𑀔’’𑀦𑁆𑀢𑀺𑀆𑀤𑀺𑀁 𑀯𑀤𑀦𑁆𑀢𑁄 𑀣𑀧𑀢𑀺𑀦𑁄 𑀯𑀸𑀤𑀁 𑀉𑀧𑀢𑁆𑀣𑀫𑁆𑀪𑁂𑀢𑀺 𑀦𑀸𑀫. 𑀢𑁂𑀦 𑀳𑀺 𑀉𑀧𑁂𑀓𑁆𑀔𑀸𑀯𑁂𑀤𑀦𑀸 ‘‘𑀲𑀼𑀔’’𑀦𑁆𑀢𑁂𑀯 𑀯𑀼𑀢𑁆𑀢𑀸 𑀲𑀦𑁆𑀢𑀲𑀪𑀸𑀯𑀢𑁆𑀢𑀸. 𑀅𑀪𑀺𑀓𑁆𑀓𑀦𑁆𑀢𑀢𑀭𑀦𑁆𑀢𑀺 𑀅𑀢𑀺𑀯𑀺𑀬 𑀓𑀦𑁆𑀢𑀢𑀭𑀁 𑀫𑀦𑁄𑀭𑀫𑀢𑀭𑀁. 𑀢𑁂𑀦𑀸𑀳 ‘‘𑀲𑀼𑀦𑁆𑀤𑀭𑀢𑀭’’𑀦𑁆𑀢𑀺. 𑀧𑀡𑀻𑀢𑀢𑀭𑀦𑁆𑀢𑀺 𑀧𑀥𑀸𑀦𑀪𑀸𑀯𑀁 𑀦𑀻𑀢𑀢𑀸𑀬 𑀉𑀴𑀸𑀭𑀢𑀭𑀁. 𑀢𑁂𑀦𑀸𑀳 ‘‘𑀅𑀢𑀧𑁆𑀧𑀓𑀢𑀭’’𑀦𑁆𑀢𑀺. 𑀲𑀼𑀔𑀦𑁆𑀢𑀺 𑀯𑀼𑀢𑁆𑀢𑀸 𑀧𑀝𑀺𑀧𑀓𑁆𑀔𑀲𑁆𑀲 𑀲𑀼𑀝𑁆𑀞𑀼 𑀔𑀸𑀤𑀦𑁂𑀦, 𑀲𑀼𑀓𑀭𑀁 𑀑𑀓𑀸𑀲𑀤𑀸𑀦𑀫𑀲𑁆𑀲𑀸𑀢𑀺 𑀯𑀸. 𑀦𑀺𑀭𑁄𑀥𑁄 𑀲𑀼𑀔𑀁 𑀦𑀸𑀫 𑀲𑀩𑁆𑀩𑀲𑁄 𑀉𑀤𑀬𑀩𑁆𑀩𑀬𑀸𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀦𑀺𑀤𑁆𑀤𑀼𑀓𑁆𑀔𑀪𑀸𑀯𑀲𑀗𑁆𑀔𑀸𑀢𑁂𑀦 𑀲𑀼𑀔𑀝𑁆𑀞𑁂𑀦𑀸’’𑀢𑀺.

𑀲𑀼𑀔𑀲𑁆𑀫𑀺𑀁𑀬𑁂𑀯𑀸𑀢𑀺 𑀲𑀼𑀔𑀫𑀺𑀘𑁆𑀘𑁂𑀯 𑀧𑀜𑁆𑀜𑀧𑁂𑀢𑀺. 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀻𑀲𑀁 𑀓𑀢𑁆𑀯𑀸𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀤𑁂𑀲𑀦𑀸𑀬 𑀲𑀻𑀲𑀁 𑀉𑀢𑁆𑀢𑀫𑀁 𑀓𑀢𑁆𑀯𑀸. 𑀤𑁂𑀲𑀦𑀸𑀬 𑀉𑀤𑁆𑀤𑁂𑀲𑀸𑀥𑀺𑀫𑀼𑀢𑁆𑀢𑁂 𑀉𑀝𑁆𑀞𑀸𑀧𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑀺𑀢𑀢𑁆𑀢𑀸 ‘‘𑀦𑁂𑀬𑁆𑀬𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀤𑀲𑀫𑀁 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀧𑀜𑁆𑀘𑀓𑀗𑁆𑀕𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀳𑁄𑀕𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀝𑁆𑀞𑀲𑀢𑀧𑀭𑀺𑀬𑀸𑀬𑀯𑀕𑁆𑀕𑁄

𑁧. 𑀲𑀻𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁬𑁯. 𑀘𑀽𑀴𑀸 𑀧𑀦 𑀅𑀲𑁆𑀲 𑀫𑀳𑀢𑀻 𑀅𑀢𑁆𑀣𑀺 𑀲𑀯𑀺𑀲𑁂𑀲𑀸, 𑀢𑀲𑁆𑀫𑀸 ‘‘𑀫𑁄𑀴𑀺𑀬𑀲𑀻𑀯𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑁄𑀢𑀺 𑀓𑀫𑁆𑀩𑀮𑀸𑀤𑀺𑀦𑀸 𑀓𑁄𑀧𑀻𑀦𑀧𑀝𑀺𑀘𑁆𑀙𑀸𑀤𑀓𑀧𑀭𑀺𑀩𑁆𑀩𑀸𑀚𑀓𑁄. 𑀧𑀺𑀢𑁆𑀢𑀧𑀘𑁆𑀘𑀬𑀸𑀦𑀻𑀢𑀺 𑀧𑀺𑀢𑁆𑀢𑀳𑁂𑀢𑀼𑀓𑀸𑀦𑀺 ¶ . ‘‘𑀢𑀺𑀲𑁆𑀲𑁄 𑀯𑁂𑀤𑀦𑀸’’𑀢𑀺 𑀯𑀢𑁆𑀯𑀸 𑀢𑀸𑀲𑀁 𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀣’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀼𑀲𑀮𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺 𑀧𑀺𑀢𑁆𑀢𑀧𑀘𑁆𑀘𑀬𑀸. 𑀧𑀺𑀢𑁆𑀢𑀪𑁂𑀲𑀚𑁆𑀚𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀪𑁂𑀲𑀚𑁆𑀚𑀲𑀫𑁆𑀪𑀭𑀡𑀢𑁆𑀣𑀜𑁆𑀘𑁂𑀯 𑀢𑀤𑀢𑁆𑀣𑀁 𑀆𑀫𑀺𑀲𑀓𑀺𑀜𑁆𑀚𑀓𑁆𑀔𑀲𑀫𑁆𑀪𑀭𑀡𑀢𑁆𑀣𑀜𑁆𑀘 𑀧𑀸𑀡𑀁 𑀳𑀦𑀢𑀻𑀢𑀺 𑀬𑁄𑀚𑀦𑀸. 𑀫𑀚𑁆𑀛𑀢𑁆𑀢𑁄 𑀪𑁂𑀲𑀚𑁆𑀚𑀓𑀭𑀡𑁂 𑀉𑀤𑀸𑀲𑀻𑀦𑁄.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀺𑀢𑁆𑀢𑀸𑀤𑀺𑀧𑀘𑁆𑀘𑀬𑀳𑁂𑀢𑀼𑀓𑀦𑁆𑀢𑀺 𑀅𑀢𑁆𑀢𑀦𑁄 𑀘 𑀮𑁄𑀓𑀲𑁆𑀲 𑀘 𑀧𑀘𑁆𑀘𑀓𑁆𑀔𑀁 𑀅𑀢𑀺𑀥𑀸𑀯𑀦𑁆𑀢𑀺 𑀬𑁂 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸, 𑀢𑀲𑁆𑀫𑀸 𑀢𑁂𑀲𑀁 𑀫𑀺𑀘𑁆𑀙𑀸. 𑀧𑀺𑀢𑁆𑀢𑀸𑀤𑀻𑀦𑀁 𑀢𑀺𑀡𑁆𑀡𑀫𑁆𑀧𑀺 𑀲𑀫𑁄𑀥𑀸𑀦𑀲𑀦𑁆𑀦𑀺𑀧𑀸𑀢𑁂 𑀚𑀸𑀢𑀸𑀦𑀺 𑀲𑀦𑁆𑀦𑀺𑀧𑀸𑀢𑀺𑀓𑀸𑀦𑀺. 𑀧𑀼𑀭𑀺𑀫𑀉𑀢𑀼𑀦𑁄 𑀯𑀺𑀲𑀤𑀺𑀲𑁄 𑀉𑀢𑀼𑀯𑀺𑀧𑀭𑀺𑀡𑀸𑀫𑁄𑀢𑀺 𑀆𑀳 ‘‘𑀯𑀺𑀲𑀪𑀸𑀕𑀉𑀢𑀼𑀢𑁄 𑀚𑀸𑀢𑀸𑀦𑀻’’𑀢𑀺 ¶ . 𑀅𑀦𑀼𑀤𑀓𑁄 𑀣𑀤𑁆𑀥𑀮𑀽𑀔𑀪𑀽𑀫𑀺𑀯𑀺𑀪𑀸𑀕𑁄 𑀚𑀗𑁆𑀕𑀮𑀤𑁂𑀲𑁄, 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀦𑀼𑀧𑀤𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀮𑀬𑀁 𑀳𑀺𑀫𑀲𑀻𑀢𑀩𑀳𑀼𑀮𑁄, 𑀇𑀢𑀭𑁄 𑀉𑀡𑁆𑀳𑀩𑀳𑀼𑀮𑁄.

𑀅𑀢𑁆𑀢𑀦𑁄 𑀧𑀓𑀢𑀺𑀘𑀭𑀺𑀬𑀸𑀦𑀁 𑀯𑀺𑀲𑀫𑀁 𑀓𑀸𑀬𑀲𑁆𑀲 𑀧𑀭𑀺𑀳𑀭𑀡𑀯𑀲𑁂𑀦, 𑀚𑀸𑀢𑀸𑀦𑀺 𑀧𑀦 𑀅𑀲𑀬𑁆𑀳𑀲𑀳𑀦𑀅𑀤𑁂𑀲𑀅𑀓𑀸𑀮𑀘𑀭𑀡𑀸𑀤𑀺𑀦𑀸 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀆𑀳 ‘‘𑀫𑀳𑀸𑀪𑀸𑀭𑀯𑀳𑀦𑀸’’𑀢𑀺𑀆𑀤𑀺. 𑀧𑀭𑀲𑁆𑀲 𑀉𑀧𑀓𑁆𑀓𑀫𑀢𑁄 𑀦𑀺𑀩𑁆𑀩𑀢𑁆𑀢𑀸𑀦𑀺 𑀑𑀧𑀓𑁆𑀓𑀫𑀺𑀓𑀸𑀦𑀻𑀢𑀺 𑀆𑀳 𑁋 ‘‘𑀅𑀬𑀁 𑀘𑁄𑀭𑁄 𑀯𑀸’’𑀢𑀺𑀆𑀤𑀺. 𑀓𑁂𑀯𑀮𑀦𑁆𑀢𑀺 𑀩𑀸𑀳𑀺𑀭𑀧𑀘𑁆𑀘𑀬𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀓𑁂𑀯𑀮𑀁 𑀢𑁂𑀦𑁂𑀯. 𑀢𑁂𑀦𑀸𑀳 ‘‘𑀓𑀫𑁆𑀫𑀯𑀺𑀧𑀸𑀓𑀢𑁄𑀯 𑀚𑀸𑀢𑀸𑀦𑀻’’𑀢𑀺. 𑀲𑀓𑁆𑀓𑀸 𑀧𑀝𑀺𑀩𑀸𑀳𑀺𑀢𑀼𑀁 𑀧𑀢𑀻𑀓𑀸𑀭𑁂𑀦. 𑀮𑁄𑀓𑀯𑁄𑀳𑀸𑀭𑁄 𑀦𑀸𑀫 𑀓𑀣𑀺𑀢𑁄 𑀧𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀤𑀺𑀲𑀫𑀜𑁆𑀜𑀸𑀬 𑀮𑁄𑀓𑀲𑀺𑀤𑁆𑀥𑀢𑁆𑀢𑀸. 𑀓𑀸𑀫𑀁 𑀲𑀭𑀻𑀭𑀲𑀦𑁆𑀦𑀺𑀲𑁆𑀲𑀺𑀢𑀸 𑀯𑁂𑀤𑀦𑀸 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸𑀯, 𑀢𑀲𑁆𑀲𑀸 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀯𑀲𑁂𑀦 𑀏𑀯𑀫𑀬𑀁 𑀮𑁄𑀓𑀯𑁄𑀳𑀸𑀭𑁄𑀢𑀺 𑀯𑀼𑀢𑁆𑀢𑀜𑁆𑀘𑁂𑀯 𑀕𑀳𑁂𑀢𑁆𑀯𑀸 𑀧𑀭𑀯𑀸𑀤𑀧𑀝𑀺𑀲𑁂𑀥𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀻𑀯𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨-𑁧𑁦. 𑀅𑀝𑁆𑀞𑀲𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁭𑁦-𑁨𑁭𑁮. 𑀯𑁂𑀤𑀦𑀸𑀦𑀁 𑀅𑀝𑁆𑀞𑀸𑀥𑀺𑀓𑀁 𑀲𑀢𑀁, 𑀢𑀲𑁆𑀲 𑀅𑀝𑁆𑀞𑀲𑀢𑀲𑁆𑀲 𑀢𑀩𑁆𑀪𑀸𑀯𑀲𑁆𑀲 𑀧𑀭𑀺𑀬𑀸𑀬𑁄 𑀓𑀸𑀭𑀡𑀁 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀅𑀝𑁆𑀞𑀲𑀢𑀧𑀭𑀺𑀬𑀸𑀬𑁄, 𑀲𑀼𑀢𑁆𑀢𑀁. 𑀢𑁂𑀦𑀸𑀳 ‘‘𑀅𑀝𑁆𑀞𑀲𑀢𑀲𑁆𑀲 𑀓𑀸𑀭𑀡𑀪𑀽𑀢’’𑀦𑁆𑀢𑀺. 𑀥𑀫𑁆𑀫𑀓𑀸𑀭𑀡𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀪𑀽𑀢𑀁 𑀓𑀸𑀭𑀡𑀁. 𑀓𑀸𑀬𑀺𑀓𑀸𑀢𑀺 𑀧𑀜𑁆𑀘𑀤𑁆𑀯𑀸𑀭𑀓𑀸𑀬𑀺𑀓𑀸. 𑀢𑁂𑀦𑀸𑀳 ‘‘𑀓𑀸𑀫𑀸𑀯𑀘𑀭𑁂𑀬𑁂𑀯 𑀮𑀩𑁆𑀪𑀦𑁆𑀢𑀻’’𑀢𑀺, 𑀓𑀸𑀫𑀪𑀽𑀫𑀺𑀓𑀸𑀢𑀺 𑀅𑀢𑁆𑀣𑁄. 𑀅𑀭𑀽𑀧𑀸𑀯𑀘𑀭𑁂 𑀦𑀢𑁆𑀣𑀺, 𑀢𑀺𑀪𑀽𑀫𑀺𑀓𑀸𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 𑁋 ‘‘𑀅𑀭𑀽𑀧𑁂 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀜𑁆𑀘 𑀔𑁄 𑀮𑁄𑀓𑀼𑀢𑁆𑀢𑀭𑀁, 𑀦 𑀮𑁄𑀓𑀺𑀬’’𑀦𑁆𑀢𑀺. 𑀇𑀢𑀭𑀸 𑀉𑀧𑁂𑀓𑁆𑀔𑀸𑀯𑁂𑀤𑀦𑀸. 𑀉𑀧𑀯𑀺𑀘𑀭𑀦𑁆𑀢𑀺 𑀉𑀧𑁂𑀘𑁆𑀘 𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀦𑁆𑀢𑀺 𑀯𑀺𑀘𑀸𑀭𑀲𑀫𑁆𑀧𑀬𑀼𑀢𑁆𑀢𑀸𑀦𑀁.

𑀧𑀝𑀺𑀮𑀸𑀪𑀢𑁄𑀢𑀺 𑀧𑀝𑀺𑀮𑀤𑁆𑀥𑀪𑀸𑀯𑀢𑁄. 𑀲𑀫𑀦𑀼𑀧𑀲𑁆𑀲𑀢𑁄𑀢𑀺 𑀧𑀘𑁆𑀘𑀯𑁂𑀓𑁆𑀔𑀢𑁄 𑀧𑀲𑁆𑀲𑀢𑁄. 𑀅𑀢𑀻𑀢𑀁 𑀔𑀡𑀢𑁆𑀢𑀬𑀸𑀢𑀺𑀓𑁆𑀓𑀫𑁂𑀦 𑀅𑀢𑀺𑀓𑁆𑀓𑀦𑁆𑀢𑀁, 𑀦𑀺𑀭𑀼𑀤𑁆𑀥𑀧𑁆𑀧𑀢𑁆𑀢𑀺𑀬𑀸 𑀦𑀺𑀭𑀼𑀤𑁆𑀥𑀁, 𑀧𑀓𑀢𑀺𑀯𑀺𑀚𑀳𑀦𑁂𑀦 𑀯𑀺𑀧𑀭𑀺𑀡𑀢𑀁. 𑀲𑀫𑀦𑀼𑀲𑁆𑀲𑀭𑀢𑁄𑀢𑀺 ¶ 𑀘𑀺𑀦𑁆𑀢𑀬𑀢𑁄. 𑀕𑁂𑀳𑀲𑁆𑀲𑀺𑀢𑀦𑁆𑀢𑀺 𑀓𑀸𑀫𑀕𑀼𑀡𑀦𑀺𑀲𑁆𑀲𑀺𑀢𑀁. 𑀓𑀸𑀫𑀕𑀼𑀡𑀸 𑀳𑀺 𑀇𑀥 𑀕𑁂𑀳𑀦𑀺𑀲𑁆𑀲𑀺𑀢𑀥𑀫𑁆𑀫𑁂𑀦 𑀕𑁂𑀳𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸.

𑀯𑀺𑀧𑀭𑀺𑀡𑀸𑀫𑀯𑀺𑀭𑀸𑀕𑀦𑀺𑀭𑁄𑀥𑀦𑁆𑀢𑀺 ¶ 𑀯𑀺𑀧𑀭𑀺𑀡𑀸𑀫𑀦𑀁 𑀯𑀺𑀭𑀚𑁆𑀚𑀦𑀮𑀓𑁆𑀔𑀡𑀁 𑀦𑀺𑀭𑀼𑀚𑁆𑀛𑀦𑀜𑁆𑀘 𑀯𑀺𑀤𑀺𑀢𑁆𑀯𑀸. 𑀧𑀼𑀩𑁆𑀩𑁂𑀢𑀺 𑀅𑀢𑀻𑀢𑁂. 𑀏𑀢𑀭𑀳𑀻𑀢𑀺 𑀇𑀤𑀸𑀦𑀺 𑀯𑀢𑁆𑀢𑀫𑀸𑀦𑀸. 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀧𑀲𑁆𑀲𑀢𑁄𑀢𑀺 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀘𑁂𑀯 𑀫𑀕𑁆𑀕𑀧𑀜𑁆𑀜𑀸𑀬 𑀘 𑀬𑀸𑀣𑀸𑀯𑀢𑁄 𑀧𑀲𑁆𑀲𑀢𑁄. 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑀼𑀦𑁆𑀢𑀺 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀫𑀕𑁆𑀕𑀧𑀝𑀺𑀯𑁂𑀥𑀁 𑀧𑀸𑀧𑁂𑀢𑀼𑀁. 𑀦𑀺𑀩𑁆𑀩𑀸𑀦𑀁 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀺𑀢𑀢𑁆𑀢𑀸 𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀲𑁄𑀫𑀦𑀲𑁆𑀲𑀸𑀦𑀺 𑀦𑀸𑀫. 𑀮𑁄𑀓𑀸𑀫𑀺𑀲𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀦𑁆𑀢𑀺 𑀓𑀸𑀫𑀕𑀼𑀡𑀦𑀺𑀲𑁆𑀲𑀺𑀢𑀸𑀦𑀁. 𑀢𑀤𑀸𑀬𑀢𑀦𑀦𑁆𑀢𑀺 𑀢𑀁 𑀆𑀬𑀢𑀦𑀁 𑀢𑀁 𑀓𑀸𑀭𑀡𑀁 𑀅𑀭𑀳𑀢𑁆𑀢𑀁. 𑀅𑀦𑀼𑀢𑁆𑀢𑀭𑁂𑀲𑀼 𑀯𑀺𑀫𑁄𑀓𑁆𑀔𑁂𑀲𑀽𑀢𑀺 𑀅𑀭𑀺𑀬𑀨𑀮𑀥𑀫𑁆𑀫𑁂𑀲𑀼. 𑀧𑀺𑀳𑀦𑁆𑀢𑀺 𑀅𑀥𑀺𑀕𑀫𑀺𑀘𑁆𑀙𑀁.

𑀉𑀧𑁂𑀓𑁆𑀔𑀸𑀢𑀺 𑀲𑁄𑀫𑀦𑀲𑁆𑀲𑀭𑀳𑀺𑀢𑀅𑀜𑁆𑀜𑀸𑀡𑀼𑀧𑁂𑀓𑁆𑀔𑀸. 𑀩𑀸𑀮𑁆𑀬𑀬𑁄𑀕𑀢𑁄 𑀩𑀸𑀮𑀲𑁆𑀲, 𑀢𑀢𑁄 𑀏𑀯 𑀫𑀽𑀴𑁆𑀳𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲. 𑀓𑀺𑀮𑁂𑀲𑁄𑀥𑀻𑀦𑀁 𑀫𑀕𑁆𑀕𑁄𑀥𑀻𑀳𑀺 𑀅𑀚𑀺𑀢𑀢𑁆𑀢𑀸 𑀅𑀦𑁄𑀥𑀺𑀚𑀺𑀦𑀲𑁆𑀲. 𑀲𑀢𑁆𑀢𑀫𑀪𑀯𑀸𑀤𑀺𑀢𑁄 𑀉𑀤𑁆𑀥𑀁 𑀧𑀯𑀢𑁆𑀢𑀦𑀯𑀺𑀧𑀸𑀓𑀲𑁆𑀲 𑀅𑀚𑀺𑀢𑀢𑁆𑀢𑀸 𑀅𑀯𑀺𑀧𑀸𑀓𑀚𑀺𑀦𑀲𑁆𑀲. 𑀅𑀦𑁂𑀓𑀸𑀤𑀻𑀦𑀯𑁂 𑀯𑀝𑁆𑀝𑁂 𑀆𑀤𑀻𑀦𑀯𑀲𑁆𑀲 𑀅𑀚𑀸𑀦𑀦𑁂𑀦 𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀺𑀦𑁄. 𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀩𑀸𑀳𑀼𑀲𑀘𑁆𑀘𑀸𑀪𑀸𑀯𑁂𑀦 𑀅𑀲𑁆𑀲𑀼𑀢𑀯𑀢𑁄 𑀧𑀼𑀣𑀼𑀚𑁆𑀚𑀦𑀲𑁆𑀲. 𑀭𑀽𑀧𑀁 𑀲𑀸 𑀦𑀸𑀢𑀺𑀯𑀢𑁆𑀢𑀢𑀺 𑀦 𑀅𑀢𑀺𑀓𑁆𑀓𑀫𑀢𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀪𑀸𑀯𑀢𑁄. 𑀲𑀩𑁆𑀩𑀲𑀗𑁆𑀕𑀸𑀳𑀓𑁄𑀢𑀺 𑀲𑀩𑁆𑀩𑀥𑀫𑁆𑀫𑁂 𑀲𑀗𑁆𑀕𑀡𑁆𑀳𑀦𑀓𑁄. 𑀢𑀢𑀺𑀬𑀸𑀤𑀻𑀦𑀺 𑀬𑀸𑀯 𑀤𑀲𑀫𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀢𑁆𑀢𑀸 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀅𑀝𑁆𑀞𑀲𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀦𑀺𑀭𑀸𑀫𑀺𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁭𑁯. 𑀆𑀭𑀫𑁆𑀫𑀡𑀢𑁄 𑀲𑀫𑁆𑀧𑀬𑁄𑀕𑀢𑁄 𑀘 𑀓𑀺𑀮𑁂𑀲𑀸𑀫𑀺𑀲𑁂𑀦 𑀲𑀸𑀫𑀺𑀲𑀸. 𑀦𑀺𑀭𑀸𑀫𑀺𑀲𑀸𑀬𑀸𑀢𑀺 𑀦𑀺𑀲𑁆𑀲𑀓𑁆𑀓𑀯𑀘𑀦𑀁. 𑀦𑀺𑀭𑀸𑀫𑀺𑀲𑀢𑀭𑀸𑀯𑀸𑀢𑀺 𑀏𑀓𑀁𑀲𑀯𑀘𑀦𑀁 𑀢𑀲𑁆𑀲𑀸 𑀢𑀣𑀸 𑀦𑀺𑀲𑁆𑀲𑀫𑁂𑀢𑀩𑁆𑀩𑀢𑀸𑀬. 𑀲𑀸 𑀳𑀺 𑀧𑀻𑀢𑀺 𑀲𑀩𑁆𑀩𑀲𑁄 𑀲𑀦𑁆𑀢𑀓𑀺𑀮𑁂𑀲𑀸𑀫𑀺𑀲𑁂 𑀲𑀦𑁆𑀢𑀸𑀦𑁂 𑀧𑀯𑀢𑁆𑀢𑀺𑀬𑀸 𑀅𑀘𑁆𑀘𑀦𑁆𑀢𑀲𑀪𑀸𑀯𑀥𑀫𑁆𑀫𑀸𑀭𑀫𑁆𑀫𑀡𑀯𑀺𑀲𑀬𑀢𑀸𑀬 𑀲𑀬𑀫𑁆𑀧𑀺 𑀲𑀸𑀢𑀺𑀲𑀬𑀁 𑀲𑀦𑁆𑀢𑀲𑀪𑀸𑀯𑀸𑀓𑀸𑀭𑁂𑀦 𑀧𑀯𑀢𑁆𑀢𑀺𑀬𑀸 𑀦𑀺𑀭𑀸𑀫𑀺𑀲𑀸𑀬𑀧𑀺 𑀦𑀺𑀭𑀸𑀫𑀺𑀲𑀢𑀭𑀸 𑀯𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀦𑀦𑀼 𑀘𑀸’’𑀢𑀺𑀆𑀤𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀉𑀧𑀫𑀸𑀬 𑀲𑀸𑀥𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀅𑀧𑁆𑀧𑀝𑀺𑀳𑀸𑀭𑀺𑀓𑀦𑁆𑀢𑀺 𑀧𑀝𑀺𑀳𑀭𑀡𑀭𑀳𑀺𑀢𑀁 𑀅𑀧𑁆𑀧𑀝𑀺𑀳𑀸𑀭𑀁, 𑀓𑁂𑀦𑀘𑀺 𑀅𑀦𑀸𑀯𑀝𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀯𑀸𑀭𑁂𑀲𑀽𑀢𑀺 𑀲𑀼𑀔𑀯𑀸𑀭𑀉𑀧𑁂𑀓𑁆𑀔𑀸𑀯𑀸𑀭𑁂𑀲𑀼.

𑀯𑀺𑀫𑁄𑀓𑁆𑀔𑀯𑀸𑀭𑁄 𑀧𑀦 𑀦 𑀅𑀢𑀺𑀤𑀺𑀝𑁆𑀞𑁄 𑀇𑀢𑀭𑁂𑀳𑀺 𑀯𑀺𑀲𑀤𑀺𑀲𑀢𑁆𑀢𑀸. 𑀢𑁂𑀦𑀸𑀳 ‘‘𑀯𑀺𑀫𑁄𑀓𑁆𑀔𑀯𑀸𑀭𑁂 𑀧𑀦𑀸’’𑀢𑀺𑀆𑀤𑀺. 𑀭𑀽𑀧𑀧𑀝𑀺𑀲𑀁𑀬𑀼𑀢𑁆𑀢𑁄𑀢𑀺 𑀪𑀸𑀯𑀺𑀢𑀭𑀽𑀧𑀧𑀝𑀺𑀲𑀁𑀬𑀼𑀢𑁆𑀢𑁄. 𑀲𑀸𑀫𑀺𑀲𑁄 𑀦𑀸𑀫 𑀬𑀲𑁆𑀫𑀸 𑀲𑀸𑀫𑀺𑀲𑀭𑀽𑀧𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺 ¶ 𑀘𑁂𑀯 𑀲𑀸𑀫𑀺𑀲𑀭𑀽𑀧𑀧𑀝𑀺𑀪𑀸𑀕𑀜𑁆𑀘 ¶ , 𑀢𑀲𑁆𑀫𑀸 ‘‘𑀭𑀽𑀧𑀸𑀫𑀺𑀲’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑁂𑀦 𑀭𑀽𑀧𑀸𑀫𑀺𑀲𑁂𑀦 𑀲𑀸𑀫𑀺𑀲𑁄 𑀦𑀸𑀫. 𑀅𑀭𑀽𑀧𑀸𑀫𑀺𑀲𑀲𑁆𑀲 𑀅𑀪𑀸𑀯𑀢𑁄 𑀅𑀭𑀽𑀧𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀫𑁄𑀓𑁆𑀔𑁄 𑀦𑀺𑀭𑀸𑀫𑀺𑀲𑁄 𑀦𑀸𑀫.

𑀦𑀺𑀭𑀸𑀫𑀺𑀲𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀲𑀢𑀧𑀭𑀺𑀬𑀸𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑁂𑀤𑀦𑀸𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀫𑀸𑀢𑀼𑀕𑀸𑀫𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀧𑁂𑀬𑁆𑀬𑀸𑀮𑀯𑀕𑁆𑀕𑁄

𑁧-𑁨. 𑀫𑀸𑀢𑀼𑀕𑀸𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁮𑁦-𑁨𑁮𑁧. 𑀅𑀕𑀼𑀡𑀗𑁆𑀕𑁂𑀳𑀻𑀢𑀺 ¶ ¶ 𑀅𑀕𑀼𑀡𑀓𑁄𑀝𑁆𑀞𑀸𑀲𑁂𑀳𑀺. 𑀭𑀽𑀧𑀬𑀢𑀻𑀢𑀺 𑀭𑀽𑀧𑀁, 𑀲𑀭𑀻𑀭𑀭𑀽𑀧𑀁. 𑀲𑀭𑀻𑀭𑀭𑀽𑀧𑀁 𑀧𑀸𑀲𑀁𑀲𑀁 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀭𑀽𑀧𑀯𑀸, 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀦 𑀘 𑀭𑀽𑀧𑀯𑀸, 𑀲𑀫𑁆𑀧𑀦𑁆𑀦𑀭𑀽𑀧𑁄 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀜𑀸𑀢𑀺𑀓𑀼𑀮𑀢𑁄 𑀅𑀜𑁆𑀜𑀢𑁄 𑀯𑀸 𑀆𑀕𑀢𑀸𑀬 𑀪𑁄𑀕𑀲𑀫𑁆𑀧𑀤𑀸𑀬 𑀅𑀪𑀸𑀯𑁂𑀦 𑀦 𑀪𑁄𑀕𑀲𑀫𑁆𑀧𑀦𑁆𑀦𑁄. 𑀤𑀼𑀲𑁆𑀲𑀻𑀮𑁄𑀢𑀺 𑀦𑀺𑀲𑁆𑀲𑀻𑀮𑁄. 𑀦𑀺𑀲𑁆𑀲𑀻𑀮𑀢𑀸𑀬 𑀏𑀯 𑀘𑀲𑁆𑀲𑀸 𑀧𑀼𑀩𑁆𑀩𑀼𑀝𑁆𑀞𑀸𑀬𑀺𑀢𑀸𑀤𑀺𑀆𑀘𑀸𑀭𑀸𑀪𑀸𑀯𑁄 𑀯𑀼𑀢𑁆𑀢𑁄. 𑀆𑀮𑀲𑀺𑀬𑁄𑀢𑀺 𑀆𑀮𑀲𑀺𑀬𑀢𑀸𑀬 𑀬𑀼𑀢𑁆𑀢𑁄. 𑀧𑀚𑀜𑁆𑀘𑀲𑁆𑀲 𑀦 𑀮𑀪𑀢𑀻𑀢𑀺 𑀧𑀚𑀸𑀪𑀸𑀯𑀲𑀻𑀲𑁂𑀦 𑀢𑀲𑁆𑀲𑀸 𑀧𑀭𑀺𑀯𑀸𑀭𑀳𑀸𑀦𑀺 𑀯𑀼𑀢𑁆𑀢𑀸. 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀧𑀼𑀭𑀺𑀲𑀯𑀲𑁂𑀦 𑀧𑀭𑀺𑀯𑀢𑁆𑀢𑁂𑀢𑀩𑁆𑀩𑀁.

𑀫𑀸𑀢𑀼𑀕𑀸𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀆𑀯𑁂𑀡𑀺𑀓𑀤𑀼𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁮𑁨. 𑀆𑀯𑁂𑀡𑀺𑀢𑀩𑁆𑀩𑀢𑁄 𑀫𑀭𑀺𑀬𑀸𑀤𑀸𑀬 𑀯𑀺𑀲𑀼𑀁 𑀅𑀲𑀸𑀥𑀸𑀭𑀡𑀢𑁄 𑀧𑀲𑁆𑀲𑀺𑀢𑀩𑁆𑀩𑀢𑁄 𑀆𑀯𑁂𑀡𑀺𑀓𑀸𑀦𑀺. 𑀧𑀝𑀺𑀧𑀘𑁆𑀘𑁂𑀓𑁂 𑀧𑀼𑀕𑁆𑀕𑀮𑁂 𑀦𑀺𑀬𑀼𑀢𑁆𑀢𑀸𑀦𑀻𑀢𑀺 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀸𑀦𑀺. 𑀧𑀭𑀺𑀘𑀸𑀭𑀺𑀓𑀪𑀸𑀯𑀦𑁆𑀢𑀺 𑀉𑀧𑀝𑁆𑀞𑀸𑀬𑀺𑀓𑀪𑀸𑀯𑀁.

𑀆𑀯𑁂𑀡𑀺𑀓𑀤𑀼𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀢𑀻𑀳𑀺𑀥𑀫𑁆𑀫𑁂𑀳𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁮𑁩-𑁩𑁦𑁩. 𑀫𑀘𑁆𑀙𑁂𑀭𑀫𑀮𑀧𑀭𑀺𑀬𑀼𑀝𑁆𑀞𑀺𑀢𑁂𑀦𑀸𑀢𑀺 𑀫𑀘𑁆𑀙𑀭𑀺𑀬𑀫𑀮𑁂𑀦 𑀅𑀪𑀺𑀪𑀽𑀢𑁂𑀦. 𑀢𑁂𑀦𑀸𑀢𑀺 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀅𑀤𑀸𑀦𑁂𑀦 𑀘. 𑀏𑀢𑀁 ‘‘𑀫𑀘𑁆𑀙𑁂𑀭𑀫𑀮𑀧𑀭𑀺𑀬𑀼𑀝𑁆𑀞𑀺𑀢𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀺𑀮𑁄𑀓𑁂𑀦𑁆𑀢𑁄 𑀯𑀺𑀘𑀭𑀢𑀺 𑀇𑀲𑁆𑀲𑀸𑀧𑀓𑀢𑀘𑀺𑀢𑁆𑀢𑀢𑀸𑀬. 𑀧𑀜𑁆𑀘𑀫𑀸𑀤𑀻𑀦𑀺 𑀬𑀸𑀯 𑀏𑀓𑀸𑀤𑀲𑀫𑀸 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑀢𑀻𑀳𑀺𑀥𑀫𑁆𑀫𑁂𑀳𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀩𑀮𑀯𑀕𑁆𑀕𑁄

𑁧. 𑀯𑀺𑀲𑀸𑀭𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁦𑁪. 𑀭𑀽𑀧𑀲𑀫𑁆𑀧𑀢𑁆𑀢𑀺 ¶ ¶ 𑀭𑀽𑀧𑀩𑀮𑀁 𑀢𑀁𑀲𑀫𑀗𑁆𑀕𑀺𑀦𑁄 𑀉𑀧𑀢𑁆𑀣𑀫𑁆𑀪𑀓𑀪𑀸𑀯𑀢𑁄. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀩𑀮𑀸𑀦𑀺 𑀳𑀺 𑀲𑀢𑁆𑀢𑀸𑀦𑀁 𑀯𑀼𑀟𑁆𑀠𑀺𑀬𑀸 𑀉𑀧𑀢𑁆𑀣𑀫𑁆𑀪𑀓𑀧𑀘𑁆𑀘𑀬𑁄 𑀳𑁄𑀢𑀺, 𑀬𑀣𑀸 𑀢𑀁 𑀆𑀳𑀸𑀭𑁄. 𑀢𑁂𑀦𑀸𑀳 𑁋 ‘‘𑀇𑀫𑀸𑀦𑀻’’𑀢𑀺𑀆𑀤𑀺.

𑀯𑀺𑀲𑀸𑀭𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨-𑁧𑁦. 𑀧𑀲𑀬𑁆𑀳𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁦𑁫-𑁩𑁧𑁩. 𑀅𑀪𑀺𑀪𑀯𑀺𑀢𑁆𑀯𑀸 𑀲𑀩𑁆𑀩𑀁 𑀅𑀦𑁆𑀢𑁄𑀚𑀦𑀁 𑀲𑀸𑀫𑀺𑀓𑀜𑁆𑀘. 𑀦𑀸𑀲𑁂𑀦𑁆𑀢𑀻𑀢𑀺 𑀦𑀸𑀲𑀦𑀁 𑀅𑀤𑀲𑁆𑀲𑀦𑀁 𑀦𑁂𑀦𑁆𑀢𑀺 𑀦𑀻𑀳𑀭𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀧𑀲𑀬𑁆𑀳𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀸𑀢𑀼𑀕𑀸𑀫𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀚𑀫𑁆𑀩𑀼𑀔𑀸𑀤𑀓𑀲𑀁𑀬𑀼𑀢𑁆𑀢𑀁

𑁧. 𑀦𑀺𑀩𑁆𑀩𑀸𑀦𑀧𑀜𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁧𑁪. 𑀦𑀺𑀩𑁆𑀩𑀸𑀦𑀁 ¶ ¶ 𑀆𑀕𑀫𑁆𑀫𑀸𑀢𑀺 𑀏𑀢𑁆𑀣 𑀆𑀕𑀫𑁆𑀫𑀸𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑁂𑀳𑀺 𑀦𑀺𑀩𑁆𑀩𑀺𑀦𑁆𑀦𑀲𑁆𑀲 𑀯𑀺𑀲𑀗𑁆𑀔𑀸𑀭𑀦𑀺𑀦𑁆𑀦𑀲𑁆𑀲 𑀕𑁄𑀢𑁆𑀭𑀪𑀼𑀦𑀸 𑀯𑀺𑀯𑀝𑁆𑀝𑀺𑀢𑀫𑀸𑀦𑀲𑀲𑁆𑀲 𑀫𑀕𑁆𑀕𑁂𑀦 𑀲𑀘𑁆𑀙𑀺𑀓𑀭𑀡𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀘𑁆𑀙𑀺𑀓𑀺𑀭𑀺𑀬𑀫𑀸𑀦𑀜𑁆𑀳𑀺 𑀢𑀁 𑀅𑀥𑀺𑀕𑀦𑁆𑀢𑁆𑀯𑀸 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀽𑀢𑀜𑁆𑀘 𑀧𑀝𑀺𑀘𑁆𑀘 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀽𑀢𑁂 𑀘 𑀢𑀲𑁆𑀫𑀺𑀁 𑀧𑀭𑀫𑀲𑁆𑀲𑀸𑀲𑀪𑀸𑀯𑁂𑀦 𑀯𑀺𑀫𑀼𑀢𑁆𑀢𑀲𑀗𑁆𑀔𑀸𑀭𑀲𑁆𑀲 𑀧𑀭𑀫𑀕𑀢𑀺𑀪𑀸𑀯𑁂𑀦 𑀘 𑀧𑀢𑀺𑀝𑁆𑀞𑀸𑀦𑀪𑀽𑀢𑁂 𑀧𑀢𑀺𑀝𑁆𑀞𑀸𑀬 𑀔𑀬𑀲𑀗𑁆𑀔𑀸𑀢𑁄 𑀫𑀕𑁆𑀕𑁄 𑀭𑀸𑀕𑀸𑀤𑀺𑀓𑁂 𑀔𑁂𑀧𑁂𑀢𑀻𑀢𑀺 𑀢𑀁𑀲𑀘𑁆𑀙𑀺𑀓𑀭𑀡𑀸𑀪𑀸𑀯𑁂 𑀭𑀸𑀕𑀸𑀤𑀻𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀦𑀺𑀭𑁄𑀥𑀕𑀫𑀦𑀸𑀪𑀸𑀯𑀢𑁄 ‘‘𑀦𑀺𑀩𑁆𑀩𑀸𑀦𑀁 𑀆𑀕𑀫𑁆𑀫 𑀭𑀸𑀕𑁄 𑀔𑀻𑀬𑀢𑀻’’𑀢𑀺 𑀯𑀼𑀢𑁆𑀢𑀁.

𑀇𑀫𑀺𑀦𑀸𑀯 𑀲𑀼𑀢𑁆𑀢𑁂𑀦𑀸𑀢𑀺 𑀇𑀫𑀺𑀦𑀸𑀯 𑀚𑀫𑁆𑀩𑀼𑀔𑀸𑀤𑀓𑀲𑀼𑀢𑁆𑀢𑁂𑀦. 𑀓𑀺𑀮𑁂𑀲𑀓𑁆𑀔𑀬𑀫𑀢𑁆𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀯𑀤𑁂𑀬𑁆𑀬 ‘‘𑀭𑀸𑀕𑀓𑁆𑀔𑀬𑁄’’𑀢𑀺𑀆𑀤𑀺𑀦𑀸 𑀲𑀼𑀢𑁆𑀢𑁂 𑀆𑀕𑀢𑀢𑁆𑀢𑀸. ‘‘𑀓𑀺𑀮𑁂𑀲𑀓𑁆𑀔𑀬𑀫𑀢𑁆𑀢’’𑀦𑁆𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀓𑀲𑁆𑀲𑀸’’𑀢𑀺𑀆𑀤𑀺. 𑀅𑀤𑁆𑀥𑀸 𑀅𑀢𑁆𑀢𑀦𑁄𑀢𑀺 𑀯𑀓𑁆𑀔𑀢𑀺 ‘‘𑀧𑀭𑀲𑁆𑀲 𑀓𑀺𑀮𑁂𑀲𑀓𑁆𑀔𑀬𑁂𑀦 𑀧𑀭𑀲𑁆𑀲 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺 𑀦 𑀬𑀼𑀢𑁆𑀢𑀸’’𑀢𑀺. 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀓𑀭𑀡𑁂𑀦 𑀕𑁄𑀢𑁆𑀭𑀪𑀼𑀓𑁆𑀔𑀡𑁂 𑀓𑀺𑀮𑁂𑀲𑀓𑁆𑀔𑀬𑀧𑁆𑀧𑀢𑁆𑀢𑀺𑀢𑀸 𑀘 𑀆𑀧𑀦𑁆𑀦𑀸𑀢𑀺 𑀆𑀳 𑁋 ‘‘𑀓𑀺𑀁 𑀧𑀦 𑀢𑁂𑀲𑀼 𑀅𑀔𑀻𑀡𑁂𑀲𑀼𑀬𑁂𑀯𑀸’’𑀢𑀺𑀆𑀤𑀺. 𑀦𑀦𑀼 𑀆𑀭𑀫𑁆𑀫𑀡𑀓𑀭𑀡𑀫𑀢𑁆𑀢𑁂𑀦 𑀓𑀺𑀮𑁂𑀲𑀓𑁆𑀔𑀬𑁄 𑀅𑀦𑀼𑀧𑁆𑀧𑀢𑁆𑀢𑁄𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀘𑀺𑀢𑁆𑀢𑀜𑁆𑀳𑀺 𑀅𑀢𑀻𑀢𑀸𑀦𑀸𑀕𑀢𑀸𑀤𑀺𑀲𑀩𑁆𑀩𑀁 𑀆𑀮𑀫𑁆𑀩𑀦𑀁 𑀓𑀭𑁄𑀢𑀺, 𑀦 𑀦𑀺𑀧𑁆𑀨𑀦𑁆𑀦𑀫𑁂𑀯𑀸𑀢𑀺. 𑀕𑁄𑀢𑁆𑀭𑀪𑀽𑀧𑀺 𑀫𑀕𑁆𑀕𑁂𑀦 𑀬𑀸 𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸 𑀓𑀸𑀢𑀩𑁆𑀩𑀸, 𑀢𑀁 𑀆𑀭𑀩𑁆𑀪 𑀧𑀯𑀢𑁆𑀢𑀺𑀲𑁆𑀲𑀢𑀻𑀢𑀺? 𑀦, 𑀅𑀧𑁆𑀧𑀢𑁆𑀢𑀦𑀺𑀩𑁆𑀩𑀸𑀦𑀲𑁆𑀲 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀜𑀸𑀡𑀸𑀪𑀸𑀯𑀢𑁄. 𑀦 𑀳𑀺 𑀅𑀜𑁆𑀜𑁂 𑀥𑀫𑁆𑀫𑀸 𑀯𑀺𑀬 𑀦𑀺𑀩𑁆𑀩𑀸𑀦𑀁, 𑀢𑀁 𑀧𑀦 𑀅𑀢𑀺𑀕𑀫𑁆𑀪𑀻𑀭𑀢𑁆𑀢𑀸 𑀅𑀧𑁆𑀧𑀢𑁆𑀢𑁂𑀦 𑀆𑀮𑀫𑁆𑀩𑀺𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀢𑁂𑀦 𑀕𑁄𑀢𑁆𑀭𑀪𑀼𑀦𑀸 𑀧𑀢𑁆𑀢𑀩𑁆𑀩𑁂𑀦 𑀢𑀺𑀓𑀸𑀮𑀺𑀓𑀲𑀪𑀸𑀯𑀸𑀢𑀺𑀓𑁆𑀓𑀦𑁆𑀢𑀕𑀫𑁆𑀪𑀻𑀭𑀪𑀸𑀯𑁂𑀦 𑀪𑀯𑀺𑀢𑀩𑁆𑀩𑀁, 𑀓𑀺𑀮𑁂𑀲𑀓𑁆𑀔𑀬𑀫𑀢𑁆𑀢𑀢𑀁 𑀯𑀸 𑀇𑀘𑁆𑀙𑀢𑁄 𑀕𑁄𑀢𑁆𑀭𑀪𑀼𑀢𑁄 𑀧𑀼𑀭𑁂𑀢𑀭𑀁 𑀦𑀺𑀧𑁆𑀨𑀦𑁆𑀦𑁂𑀦 𑀓𑀺𑀮𑁂𑀲𑀓𑁆𑀔𑀬𑁂𑀦 𑀪𑀯𑀺𑀢𑀩𑁆𑀩𑀁. 𑀅𑀧𑁆𑀧𑀢𑁆𑀢𑀓𑀺𑀮𑁂𑀲𑀓𑁆𑀔𑀬𑀸𑀭𑀫𑁆𑀫𑀡𑀓𑀭𑀡𑁂 𑀳𑀺 𑀲𑀢𑀺 𑀕𑁄𑀢𑁆𑀭𑀪𑀼𑀢𑁄 𑀧𑀼𑀭𑁂𑀢𑀭𑀘𑀺𑀢𑁆𑀢𑀸𑀦𑀺𑀧𑀺 𑀆𑀮𑀫𑁆𑀩𑁂𑀬𑁆𑀬𑀼𑀦𑁆𑀢𑀺.

𑀢𑀲𑁆𑀫𑀸𑀢𑀺𑀆𑀤𑀺 𑀯𑀼𑀢𑁆𑀢𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀦𑀺𑀕𑀫𑀦𑀁. 𑀢𑀁 𑀧𑀦𑁂𑀢𑀁 𑀦𑀺𑀩𑁆𑀩𑀸𑀦𑀁. 𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀭𑀽𑀧𑀺𑀦𑁄 𑀥𑀫𑁆𑀫𑀸𑀢𑀺𑀆𑀤𑀻𑀲𑀽𑀢𑀺 𑀆𑀤𑀺𑀲𑀤𑁆𑀤𑁂𑀦 𑀮𑁄𑀓𑀼𑀢𑁆𑀢𑀭𑀅𑀦𑀸𑀲𑀯𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀭𑀽𑀧𑀥𑀫𑁆𑀫𑀸𑀤𑀺𑀪𑀸𑀯𑀕𑁆𑀕𑀳𑀡𑁂𑀦 𑀘𑀲𑁆𑀲 ¶ 𑀧𑀭𑀺𑀦𑀺𑀧𑁆𑀨𑀦𑁆𑀦𑀢𑀸 𑀤𑀻𑀧𑀺𑀢𑀸. 𑀢𑁂𑀦𑀸𑀳 ‘‘𑀦 𑀓𑀺𑀮𑁂𑀲𑀓𑁆𑀔𑀬𑀫𑀢𑁆𑀢𑀫𑁂𑀯𑀸’’𑀢𑀺. 𑀓𑀺𑀮𑁂𑀲𑀓𑁆𑀔𑀬𑀫𑀢𑁆𑀢𑀢𑀸𑀬 ¶ 𑀳𑀺 𑀲𑀢𑀺 𑀦𑀺𑀩𑁆𑀩𑀸𑀦𑀲𑁆𑀲 𑀩𑀳𑀼𑀢𑀸 𑀆𑀧𑀚𑁆𑀚𑀢𑀺 ‘‘𑀬𑀢𑁆𑀢𑀓𑀸 𑀓𑀺𑀮𑁂𑀲𑀸 𑀔𑀻𑀬𑀦𑁆𑀢𑀺, 𑀢𑀢𑁆𑀢𑀓𑀸𑀦𑀺 𑀦𑀺𑀩𑁆𑀩𑀸𑀦𑀸𑀦𑀻’’𑀢𑀺. 𑀅𑀪𑀸𑀯𑀲𑁆𑀲𑀪𑀸𑀯𑀢𑁄 𑀕𑀫𑁆𑀪𑀻𑀭𑀸𑀤𑀺𑀪𑀸𑀯𑁄 𑀅𑀲𑀗𑁆𑀔𑀢𑀸𑀤𑀺𑀪𑀸𑀯𑁄 𑀘 𑀦 𑀲𑀺𑀬𑀸, 𑀯𑀼𑀢𑁆𑀢𑁄 𑀘 𑀲𑁄 𑀦𑀺𑀩𑁆𑀩𑀸𑀦𑀲𑁆𑀲, 𑀢𑀲𑁆𑀫𑀸𑀲𑁆𑀲 𑀧𑀘𑁆𑀘𑁂𑀢𑀩𑁆𑀩𑁄 𑀧𑀭𑀺𑀦𑀺𑀧𑁆𑀨𑀦𑁆𑀦𑀪𑀸𑀯𑁄. 𑀬𑀲𑁆𑀫𑀸 𑀘 𑀲𑀫𑁆𑀫𑀼𑀢𑀺𑀲𑀘𑁆𑀘𑀸𑀭𑀫𑁆𑀫𑀡𑀁 𑀲𑀗𑁆𑀔𑀢𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀸 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀓𑀺𑀮𑁂𑀲𑁂 𑀧𑀚𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀬𑀢𑁄 𑀫𑀳𑀕𑁆𑀕𑀢𑀜𑀸𑀡𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀯𑀸 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀯𑀲𑁂𑀦 𑀢𑀤𑀗𑁆𑀕𑀯𑀲𑁂𑀦 𑀯𑀸 𑀧𑀚𑀳𑀢𑀺, 𑀢𑀲𑁆𑀫𑀸 𑀅𑀭𑀺𑀬𑀫𑀕𑁆𑀕𑀜𑀸𑀡𑀲𑁆𑀲 𑀲𑀫𑁆𑀫𑀼𑀢𑀺𑀲𑀘𑁆𑀘𑀲𑀗𑁆𑀔𑀢𑀥𑀫𑁆𑀫𑀸𑀭𑀫𑁆𑀫𑀡𑁂𑀳𑀺 𑀯𑀺𑀧𑀭𑀻𑀢𑀲𑀪𑀸𑀯𑁂𑀦 𑀆𑀭𑀫𑁆𑀫𑀡𑁂𑀦 𑀪𑀯𑀺𑀢𑀩𑁆𑀩𑀁. 𑀢𑀣𑀸 𑀳𑀺 𑀢𑀁 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀓𑀺𑀮𑁂𑀲𑁂 𑀧𑀚𑀳𑀻𑀢𑀺 𑀏𑀯𑀁 𑀧𑀭𑀺𑀦𑀺𑀧𑁆𑀨𑀦𑁆𑀦𑀸𑀲𑀗𑁆𑀔𑀢𑀲𑀪𑀸𑀯𑀁 𑀦𑀺𑀩𑁆𑀩𑀸𑀦𑀦𑁆𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀦𑁆𑀢𑀺.

𑀦𑀺𑀩𑁆𑀩𑀸𑀦𑀧𑀜𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁧𑁫. 𑀥𑀫𑁆𑀫𑀯𑀸𑀤𑀻𑀧𑀜𑁆𑀳𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁧𑁬-𑁩𑁨𑁮. 𑀧𑀳𑀸𑀬 𑀕𑀢𑀢𑁆𑀢𑀸𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀚𑀳𑀺𑀢𑁆𑀯𑀸 𑀜𑀸𑀡𑀕𑀫𑀦𑁂𑀦 𑀕𑀢𑀢𑁆𑀢𑀸. 𑀲𑀼𑀝𑁆𑀞𑀼 𑀕𑀢𑀸𑀢𑀺 𑀲𑀫𑁆𑀫𑀸 𑀕𑀢𑀸 𑀧𑀝𑀺𑀧𑀦𑁆𑀦𑀸𑀢𑀺 𑀲𑀼𑀕𑀢𑀸. 𑀧𑀭𑀺𑀚𑀸𑀦𑀦𑀢𑁆𑀣𑀦𑁆𑀢𑀺 𑀢𑀻𑀳𑀺 𑀧𑀭𑀺𑀜𑁆𑀜𑀸𑀳𑀺 𑀧𑀭𑀺𑀚𑀸𑀦𑀦𑀢𑁆𑀣𑀁. 𑀤𑀼𑀓𑁆𑀔𑀲𑀗𑁆𑀔𑀸𑀢𑁄𑀢𑀺 ‘‘𑀤𑀼𑀓𑁆𑀔’’𑀦𑁆𑀢𑀺 𑀲𑀗𑁆𑀔𑀸𑀢𑀩𑁆𑀩𑁄 𑀯𑀺𑀤𑀺𑀢𑀩𑁆𑀩𑁄 𑀘 𑀤𑀼𑀓𑁆𑀔𑀲𑀪𑀸𑀯𑁄 𑀥𑀫𑁆𑀫𑁄 𑀤𑀼𑀓𑁆𑀔𑀤𑀼𑀓𑁆𑀔𑀢𑀸. 𑀬𑀲𑁆𑀫𑀸 𑀤𑀼𑀓𑁆𑀔𑀯𑁂𑀤𑀦𑀸𑀯𑀺𑀦𑀺𑀫𑀼𑀢𑁆𑀢𑀲𑀗𑁆𑀔𑀢𑀥𑀫𑁆𑀫𑁂 𑀲𑀼𑀔𑀯𑁂𑀤𑀦𑀸𑀬 𑀘 𑀬𑀣𑀸 𑀇𑀥 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀢𑀺 𑀤𑀼𑀓𑁆𑀔𑀧𑀭𑀺𑀬𑀸𑀬𑁄 𑀦𑀺𑀭𑀼𑀧𑁆𑀧𑀢𑁂𑀯, 𑀢𑀲𑁆𑀫𑀸 𑀤𑀼𑀓𑁆𑀔𑀲𑀪𑀸𑀯𑁄 𑀥𑀫𑁆𑀫𑁄 𑀏𑀓𑁂𑀦 𑀤𑀼𑀓𑁆𑀔𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑁄 ‘‘𑀤𑀼𑀓𑁆𑀔𑀤𑀼𑀓𑁆𑀔𑀢𑀸’’𑀢𑀺. 𑀲𑁂𑀲𑀧𑀤𑀤𑁆𑀯𑀬𑁂𑀢𑀺 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸𑀢𑀺 𑀏𑀢𑀲𑁆𑀫𑀺𑀁 𑀧𑀤𑀤𑁆𑀯𑀬𑁂. 𑀲𑀗𑁆𑀔𑀸𑀭𑀪𑀸𑀯𑁂𑀦 𑀤𑀼𑀓𑁆𑀔𑀲𑀪𑀸𑀯𑁄 𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸. 𑀲𑀼𑀔𑀲𑁆𑀲 𑀯𑀺𑀧𑀭𑀺𑀡𑀸𑀫𑀦𑁂𑀦 𑀤𑀼𑀓𑁆𑀔𑀲𑀪𑀸𑀯𑁄 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀢𑀸.

𑀥𑀫𑁆𑀫𑀯𑀸𑀤𑀻𑀧𑀜𑁆𑀳𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬. 𑀤𑀼𑀓𑁆𑀓𑀭𑀧𑀜𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁨𑁯. 𑀧𑀩𑁆𑀩𑀚𑁆𑀚𑀸𑀬𑀸𑀢𑀺 ¶ 𑀧𑀩𑁆𑀩𑀚𑀺𑀢𑀧𑀝𑀺𑀧𑀢𑁆𑀢𑀺𑀬𑀁. 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑁄 𑀪𑀺𑀓𑁆𑀔𑀽𑀢𑀺 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑀫𑀸𑀦𑁄 𑀪𑀺𑀓𑁆𑀔𑀼. 𑀧𑀸𑀢𑀦𑁆𑀢𑀺 𑀧𑀸𑀢𑁄. 𑀦𑀘𑀺𑀭𑀲𑁆𑀲𑀦𑁆𑀢𑀺 𑀔𑀺𑀧𑁆𑀧𑀫𑁂𑀯. 𑀢𑁂𑀦𑀸𑀳 ‘‘𑀮𑀳𑀼𑀬𑁂𑀯𑀸’’𑀢𑀺.

𑀤𑀼𑀓𑁆𑀓𑀭𑀧𑀜𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀚𑀫𑁆𑀩𑀼𑀔𑀸𑀤𑀓𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀸𑀫𑀡𑁆𑀟𑀓𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸

𑁩𑁩𑁦-𑁩𑁩𑁧. 𑀇𑀫𑀺𑀦𑀸𑀯 ¶ 𑀦𑀬𑁂𑀦𑀸𑀢𑀺 𑀬𑁄 𑀚𑀫𑁆𑀩𑀼𑀔𑀸𑀤𑀓𑀲𑀁𑀬𑀼𑀢𑁆𑀢𑁂 𑀅𑀢𑁆𑀣𑀦𑀬𑁄, 𑀇𑀫𑀺𑀦𑀸𑀯 𑀦𑀬𑁂𑀦. 𑀇𑀫𑀺𑀦𑀸 𑀳𑀺 𑀤𑁆𑀯𑁂 𑀲𑀁𑀬𑀼𑀢𑁆𑀢𑀸𑀦𑀺 𑀧𑀸𑀴𑀺𑀢𑁄 𑀅𑀢𑁆𑀣𑀢𑁄 𑀘 𑀅𑀜𑁆𑀜𑀫𑀜𑁆𑀜𑀁 𑀲𑀤𑀺𑀲𑀸𑀦𑁂𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀲𑀸𑀫𑀡𑁆𑀟𑀓𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀫𑁄𑀕𑁆𑀕𑀮𑁆𑀮𑀸𑀦𑀲𑀁𑀬𑀼𑀢𑁆𑀢𑀁

𑁧-𑁮. 𑀧𑀞𑀫𑀚𑁆𑀛𑀸𑀦𑀧𑀜𑁆𑀳𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁩𑁨-𑁩𑁩𑁯. 𑀓𑀸𑀫𑀲𑀳𑀕𑀢𑁂𑀲𑀼 ¶ ¶ 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑁂𑀲𑀼 𑀉𑀧𑀝𑁆𑀞𑀳𑀦𑁆𑀢𑁂𑀲𑀼 𑀩𑁆𑀬𑀸𑀧𑀸𑀤𑀸𑀤𑀺𑀲𑀳𑀕𑀢𑀸𑀧𑀺 𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑀸 𑀬𑀣𑀸𑀧𑀘𑁆𑀘𑀬𑀁 𑀉𑀧𑀝𑁆𑀞𑀳𑀦𑁆𑀢𑀺𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀓𑀸𑀫𑀲𑀳𑀕𑀢𑀸𑀢𑀺 𑀧𑀜𑁆𑀘𑀦𑀻𑀯𑀭𑀡𑀲𑀳𑀕𑀢𑀸’’𑀢𑀺. 𑀦𑀻𑀯𑀭𑀡𑀸𑀦𑀜𑁆𑀳𑁂𑀢𑁆𑀣 𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀢𑀁, 𑀬𑀤𑀺𑀤𑀁 𑀓𑀸𑀫𑀕𑁆𑀕𑀳𑀡𑀁. 𑀧𑀳𑀻𑀦𑀸𑀯𑀲𑁂𑀲𑀸 𑀘𑁂𑀢𑁆𑀣 𑀦𑀻𑀯𑀭𑀡𑀸 𑀯𑁂𑀤𑀺𑀢𑀩𑁆𑀩𑀸, 𑀢𑀲𑁆𑀫𑀸 𑀧𑀜𑁆𑀘𑀕𑁆𑀕𑀳𑀡𑀁 𑀦 𑀓𑀢𑁆𑀢𑀩𑁆𑀩𑀁. 𑀢𑀲𑁆𑀲𑀸𑀢𑀺 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀢𑁄 𑀉𑀧𑀝𑁆𑀞𑀳𑀺𑀁𑀲𑀼 𑀅𑀘𑀺𑀡𑁆𑀡𑀯𑀲𑀺𑀢𑀸𑀬. 𑀢𑁂𑀦𑀸𑀳 ‘‘𑀳𑀸𑀦𑀪𑀸𑀕𑀺𑀬𑀁 𑀦𑀸𑀫 𑀅𑀳𑁄𑀲𑀻’’𑀢𑀺. 𑀆𑀭𑀫𑁆𑀫𑀡…𑀧𑁂… 𑀲𑀳𑀕𑀢𑀦𑁆𑀢𑀺 𑀯𑀼𑀢𑁆𑀢𑀁 𑀇𑀢𑀭𑁂𑀲𑀁 𑀅𑀪𑀸𑀯𑀢𑁄.

𑀧𑀞𑀫𑀚𑁆𑀛𑀸𑀦𑀧𑀜𑁆𑀳𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀦𑀺𑀫𑀺𑀢𑁆𑀢𑀧𑀜𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁦. 𑀯𑀺𑀧𑀲𑁆𑀲𑀦𑀸𑀲𑀫𑀸𑀥𑀺𑀁𑀬𑁂𑀯, 𑀦 𑀨𑀮𑀲𑀫𑀸𑀥𑀺𑀁. 𑀙𑁂𑀚𑁆𑀚𑀓𑀺𑀘𑁆𑀘𑀁 𑀦 𑀦𑀺𑀧𑁆𑀨𑀚𑁆𑀚𑀢𑀺 𑀅𑀯𑀺𑀘𑁆𑀙𑁂𑀤𑀯𑀲𑁂𑀦 𑀅𑀧𑁆𑀧𑀯𑀢𑁆𑀢𑀦𑀢𑁄. 𑀦𑀺𑀓𑀦𑁆𑀢𑀻𑀢𑀺 𑀯𑀺𑀧𑀲𑁆𑀲𑀦𑀁 𑀅𑀲𑁆𑀲𑀸𑀤𑁂𑀦𑁆𑀢𑀻 𑀧𑀯𑀢𑁆𑀢𑀢𑀡𑁆𑀳𑀸. 𑀲𑀸𑀥𑁂𑀢𑀼𑀁 𑀦𑀸𑀲𑀓𑁆𑀔𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀢𑁆𑀢𑀸. 𑀦𑀺𑀫𑀺𑀢𑁆𑀢𑀸𑀦𑀼𑀲𑀸𑀭𑀻𑀢𑀺 𑀦𑀺𑀘𑁆𑀘𑀲𑀼𑀔𑀅𑀢𑁆𑀢𑀦𑀺𑀫𑀺𑀢𑁆𑀢𑀸𑀦𑀁 𑀅𑀧𑀽𑀭𑀡𑀢𑁄 𑀭𑀸𑀕𑀤𑁄𑀲𑀫𑁄𑀳𑀦𑀺𑀫𑀺𑀢𑁆𑀢𑀸𑀦𑀺𑀧𑁂𑀢𑁆𑀣 𑀦𑀺𑀫𑀺𑀢𑁆𑀢𑀸𑀦𑁂𑀯. 𑀯𑀼𑀝𑁆𑀞𑀸𑀦…𑀧𑁂… 𑀲𑀫𑀸𑀥𑀺𑀦𑁆𑀢𑀺 𑀏𑀢𑁂𑀦 𑀬𑀸𑀯 𑀫𑀕𑁆𑀕𑁄 𑀦𑀸𑀥𑀺𑀕𑀢𑁄, 𑀢𑀸𑀯 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑁄𑀧𑀺 𑀬𑀣𑀸𑀭𑀳𑀁 𑀅𑀦𑀺𑀫𑀺𑀢𑁆𑀢𑀁 𑀅𑀧𑁆𑀧𑀡𑀺𑀳𑀺𑀢𑀁 𑀲𑀼𑀜𑁆𑀜𑀢𑀁 𑀘𑁂𑀢𑁄𑀲𑀫𑀸𑀥𑀺𑀁 𑀅𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀻𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀲𑀗𑁆𑀔𑀸𑀢𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁. 𑀘𑁂𑀢𑁄𑀲𑀫𑀸𑀥𑀺𑀦𑁆𑀢𑀺 𑀘𑀺𑀢𑁆𑀢𑀲𑀻𑀲𑁂𑀦 𑀯𑀺𑀧𑀲𑁆𑀲𑀦𑀸𑀲𑀫𑀸𑀥𑀺𑀫𑀸𑀳. 𑀉𑀧𑀭𑀺𑀫𑀕𑁆𑀕𑀨𑀮𑀲𑀫𑀸𑀥𑀺𑀦𑁆𑀢𑀺 𑀧𑀞𑀫𑀫𑀕𑁆𑀕𑀲𑀫𑀸𑀥𑀺𑀲𑁆𑀲 𑀧𑀕𑁂𑀯 𑀅𑀥𑀺𑀕𑀢𑀢𑁆𑀢𑀸.

𑀅𑀦𑀺𑀫𑀺𑀢𑁆𑀢𑀧𑀜𑁆𑀳𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦-𑁧𑁧. 𑀲𑀓𑁆𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁪𑁧-𑁩𑁪𑁨. 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦𑀸𑀢𑀺 ¶ ¶ 𑀯𑀢𑁆𑀣𑀼𑀢𑁆𑀢𑀬𑀁 𑀬𑀸𑀣𑀸𑀯𑀢𑁄 𑀜𑀢𑁆𑀯𑀸 𑀉𑀧𑁆𑀧𑀦𑁆𑀦𑀧𑀲𑀸𑀤𑁂𑀦, 𑀫𑀕𑁆𑀕𑁂𑀦𑀸𑀕𑀢𑀧𑀲𑀸𑀤𑁂𑀦𑀸𑀢𑀺 𑀅𑀢𑁆𑀣𑁄. 𑀲𑁄 𑀧𑀦 𑀓𑁂𑀦𑀘𑀺 𑀅𑀲𑀁𑀳𑀸𑀭𑀺𑀬𑁄 𑀅𑀲𑀫𑁆𑀧𑀯𑁂𑀥𑀻𑀢𑀺 𑀆𑀳 ‘‘𑀅𑀘𑀮𑀧𑁆𑀧𑀲𑀸𑀤𑁂𑀦𑀸’’𑀢𑀺. 𑀅𑀪𑀺𑀪𑀯𑀦𑁆𑀢𑀺 𑀅𑀢𑁆𑀢𑀦𑁄 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦.

𑀲𑀓𑁆𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑁄𑀕𑁆𑀕𑀮𑁆𑀮𑀸𑀦𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀘𑀺𑀢𑁆𑀢𑀲𑀁𑀬𑀼𑀢𑁆𑀢𑀁

𑁧. 𑀲𑀁𑀬𑁄𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁩. 𑀪𑁄𑀕𑀕𑀸𑀫𑀦𑁆𑀢𑀺 ¶ ¶ 𑀪𑁄𑀕𑀼𑀧𑁆𑀧𑀢𑁆𑀢𑀺𑀕𑀸𑀫𑀁. 𑀧𑀯𑀢𑁆𑀢𑀢𑀻𑀢𑀺 𑀅𑀧𑁆𑀧𑀝𑀺𑀳𑀢𑀁 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺 𑀧𑀝𑀺𑀲𑀫𑁆𑀪𑀺𑀤𑀧𑁆𑀧𑀢𑁆𑀢𑀺𑀬𑀸.

𑀲𑀁𑀬𑁄𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀞𑀫𑀇𑀲𑀺𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁪. 𑀅𑀯𑀺𑀲𑀸𑀭𑀤𑀢𑁆𑀢𑀸𑀢𑀺 𑀧𑀜𑁆𑀳𑀁 𑀩𑁆𑀬𑀸𑀓𑀸𑀢𑀼𑀁 𑀯𑁂𑀬𑁆𑀬𑀢𑁆𑀢𑀺𑀬𑀸𑀪𑀸𑀯𑁂𑀦 𑀅𑀲𑀫𑀢𑁆𑀣𑀢𑁆𑀢𑀸. 𑀉𑀧𑀸𑀲𑀓𑁄 𑀣𑁂𑀭𑁂𑀲𑀼 𑀩𑁆𑀬𑀸𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀲𑀼 𑀲𑀬𑀁 𑀩𑁆𑀬𑀸𑀓𑀸𑀢𑀼𑀓𑀸𑀫𑁄 𑀧𑀼𑀘𑁆𑀙𑀢𑀺, 𑀦 𑀯𑀺𑀳𑁂𑀲𑀸𑀥𑀺𑀧𑁆𑀧𑀸𑀬𑁄. 𑀧𑀞𑀫𑀯𑀘𑀦𑁂𑀦 𑀅𑀩𑁆𑀬𑀸𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸𑀯 𑀧𑀼𑀦𑀧𑁆𑀧𑀼𑀦𑀁 𑀧𑀼𑀘𑁆𑀙𑀺𑀢𑀁 𑀯𑀺𑀳𑁂𑀲𑁄 𑀯𑀺𑀬 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀯𑀺𑀳𑁂𑀲𑁂𑀢𑀻’’𑀢𑀺.

𑀧𑀞𑀫𑀇𑀲𑀺𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀤𑀼𑀢𑀺𑀬𑀇𑀲𑀺𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁫. 𑀅𑀯𑀦𑁆𑀢𑀺𑀬𑀸𑀢𑀺 𑀅𑀯𑀦𑁆𑀢𑀺𑀭𑀝𑁆𑀞𑁂, 𑀢𑀁 𑀧𑀦 𑀫𑀚𑁆𑀛𑀺𑀫𑀧𑀤𑁂𑀲𑀢𑁄 𑀤𑀓𑁆𑀔𑀺𑀡𑀤𑀺𑀲𑀸𑀬𑀁. 𑀢𑁂𑀦𑀸𑀳 ‘‘𑀤𑀓𑁆𑀔𑀺𑀡𑀸𑀧𑀣𑁂’’𑀢𑀺. 𑀅𑀥𑀺𑀧𑁆𑀧𑀸𑀬𑁂𑀦𑀸𑀢𑀺 𑀢𑀲𑁆𑀲 𑀯𑀘𑀦𑀲𑁆𑀲 𑀅𑀦𑀼𑀫𑁄𑀤𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺, 𑀦 𑀧𑀦 𑀢𑀢𑁄 𑀓𑀺𑀜𑁆𑀘𑀺 𑀕𑀳𑁂𑀢𑀼𑀓𑀸𑀫𑀢𑀸𑀥𑀺𑀧𑁆𑀧𑀸𑀬𑁂𑀦.

𑀤𑀼𑀢𑀺𑀬𑀇𑀲𑀺𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀫𑀳𑀓𑀧𑀸𑀝𑀺𑀳𑀸𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁬. 𑀢𑁂𑀲𑀁 𑀅𑀦𑀼𑀚𑀸𑀦𑀦𑁆𑀢𑁄𑀢𑀺 𑀢𑁂𑀲𑀁 𑀤𑀸𑀲𑀓𑀫𑁆𑀫𑀓𑀭𑀸𑀦𑀁 𑀲𑁂𑀲𑀓𑁂 𑀬𑀣𑀸𑀭𑀼𑀘𑀺 𑀯𑀺𑀘𑀸𑀭𑀡𑀁 𑀅𑀦𑀼𑀚𑀸𑀦𑀦𑁆𑀢𑁄. 𑀓𑀼𑀥𑀺𑀢𑀦𑁆𑀢𑀺 𑀩𑀮𑀯𑀢𑀸 𑀲𑀽𑀭𑀺𑀬𑀲𑀦𑁆𑀢𑀸𑀧𑁂𑀦 𑀲𑀗𑁆𑀓𑀼𑀣𑀺𑀢𑀁 ¶ . 𑀢𑁂𑀦𑀸𑀳 ‘‘𑀳𑁂𑀝𑁆𑀞𑀸’’𑀢𑀺𑀆𑀤𑀺. 𑀅𑀢𑀺𑀢𑀺𑀔𑀺𑀡𑀦𑁆𑀢𑀺 𑀅𑀢𑀺𑀯𑀺𑀬 𑀢𑀺𑀓𑁆𑀔𑀥𑀸𑀢𑀼𑀓𑀁. 𑀅𑀲𑀫𑁆𑀪𑀺𑀦𑁆𑀦𑀧𑀤𑀦𑁆𑀢𑀺 ¶ 𑀅𑀜𑁆𑀜𑀢𑁆𑀣 𑀅𑀦𑀸𑀕𑀢𑀢𑁆𑀢𑀸 𑀢𑀺𑀧𑀺𑀝𑀓𑁂 𑀅𑀯𑁄𑀫𑀺𑀲𑁆𑀲𑀓𑀧𑀤𑀁, 𑀇𑀥𑁂𑀯 𑀆𑀕𑀢𑀧𑀤𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀮𑀻𑀬𑀫𑀸𑀦𑁂𑀦𑀸𑀢𑀺 𑀧𑀝𑀺𑀓𑀁𑀲𑁂𑀦 𑀯𑀺𑀲𑁂𑀲𑀦𑁂𑀦 𑀯𑀺𑀮𑀻𑀬𑀫𑀸𑀦𑁂𑀦 𑀓𑀸𑀬𑁂𑀦.

𑀏𑀢𑁆𑀣 𑀘𑀸𑀢𑀺 𑀏𑀢𑀲𑁆𑀫𑀺𑀁 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺𑀓𑀭𑀡𑁂. 𑀅𑀩𑁆𑀪𑀫𑀡𑁆𑀟𑀧𑀁 𑀓𑀢𑁆𑀯𑀸𑀢𑀺 𑀲𑀫𑀦𑁆𑀢𑀢𑁄 𑀙𑀸𑀤𑀦𑀯𑀲𑁂𑀦 𑀫𑀡𑁆𑀟𑀧𑀁 𑀯𑀺𑀬 𑀫𑁂𑀖𑀧𑀝𑀮𑀁 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀤𑁂𑀯𑁄𑀢𑀺 𑀫𑁂𑀖𑁄. 𑀏𑀓𑀫𑁂𑀓𑀁 𑀨𑀼𑀲𑀺𑀢𑀓𑀁 𑀨𑀼𑀲𑀸𑀬𑀢𑀼 𑀚𑀸𑀮𑀯𑀺𑀦𑀤𑁆𑀥𑀁 𑀯𑀺𑀬 𑀯𑀲𑁆𑀲𑀢𑀼. 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀦𑀸𑀦𑀸𑀧𑀭𑀺𑀓𑀫𑁆𑀫𑀁 𑀦𑀸𑀦𑀸𑀥𑀺𑀝𑁆𑀞𑀸𑀦𑀁 𑀏𑀓𑀢𑁄 𑀧𑀭𑀺𑀓𑀫𑁆𑀫𑀁 𑀏𑀓𑀢𑁄 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 𑀘𑀢𑀼𑀓𑁆𑀓𑀫𑁂𑀢𑁆𑀣 𑀲𑀫𑁆𑀪𑀯𑀢𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀏𑀢𑁆𑀣 𑀘𑀸’’𑀢𑀺𑀆𑀤𑀺𑀦𑀸. 𑀬𑀣𑀸 𑀢𑀣𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀘𑀢𑀽𑀲𑀼 𑀧𑀓𑀸𑀭𑁂𑀲𑀼 𑀬𑁂𑀦 𑀯𑀸 𑀢𑁂𑀦 𑀯𑀸 𑀧𑀓𑀸𑀭𑁂𑀦 𑀓𑀭𑁄𑀦𑁆𑀢𑀲𑁆𑀲. 𑀓𑀢𑀧𑀭𑀺𑀓𑀫𑁆𑀫𑀲𑁆𑀲𑀸𑀢𑀺 ‘‘𑀏𑀯𑀁 𑀯𑀸 𑀏𑀯𑀁 𑀯𑀸 𑀳𑁄𑀢𑀽’’𑀢𑀺 𑀧𑀯𑀢𑁆𑀢𑀺𑀢𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀲𑁆𑀲. ‘‘𑀧𑀭𑀺𑀓𑀫𑁆𑀫𑀸𑀦𑀦𑁆𑀢𑀭𑁂𑀦𑀸𑀢𑀺 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀼𑀧𑁆𑀧𑀸𑀤𑀦𑀢𑁆𑀣𑀁 𑀲𑀫𑀸𑀧𑀦𑁆𑀦𑀧𑀸𑀤𑀓𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀲𑁆𑀲 𑀏𑀓𑀸𑀯𑀚𑁆𑀚𑀦𑀯𑀻𑀣𑀺𑀬𑀁 𑀧𑀯𑀢𑁆𑀢𑀧𑀭𑀺𑀓𑀫𑁆𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺.

𑀫𑀳𑀓𑀧𑀸𑀝𑀺𑀳𑀸𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀞𑀫𑀓𑀸𑀫𑀪𑀽𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁭. 𑀏𑀮𑀁 𑀯𑀼𑀘𑁆𑀘𑀢𑀺 𑀤𑁄𑀲𑁄, 𑀢𑀁 𑀏𑀢𑀲𑁆𑀲 𑀦𑀢𑁆𑀣𑀻𑀢𑀺 𑀦𑁂𑀮𑀁, 𑀢𑀁 𑀅𑀗𑁆𑀕𑀁 𑀏𑀢𑀲𑁆𑀲𑀸𑀢𑀺 𑀦𑁂𑀮𑀗𑁆𑀕𑁄, 𑀲𑀼𑀯𑀺𑀲𑀼𑀤𑁆𑀥𑀲𑀻𑀮𑀕𑀼𑀡𑁄. 𑀢𑁂𑀦𑀸𑀳 ‘‘𑀦𑁂𑀮𑀗𑁆𑀕𑀦𑁆𑀢𑀺 𑀔𑁄, 𑀪𑀦𑁆𑀢𑁂, 𑀲𑀻𑀮𑀸𑀦𑀫𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀤𑁄𑀲𑀸𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀦𑁂𑀮𑀗𑁆𑀕𑁄𑀢𑀺 𑀦𑀺𑀤𑁆𑀤𑁄𑀲𑁄’’𑀢𑀺 𑀯𑀼𑀢𑁆𑀢𑀁. 𑀏𑀢𑀁 𑀪𑀺𑀓𑁆𑀔𑀼𑀁 𑀆𑀕𑀘𑁆𑀙𑀦𑁆𑀢𑀦𑁆𑀢𑀺 𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀤𑀺𑀝𑁆𑀞𑁂𑀦 𑀓𑀣𑁂𑀲𑀻𑀢𑀺 𑀅𑀢𑁆𑀢𑀦𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀧𑀘𑁆𑀘𑀓𑁆𑀔𑀢𑁄 𑀉𑀧𑀮𑀓𑁆𑀔𑀺𑀢𑁂𑀦 𑀅𑀢𑁆𑀣𑁂𑀦 𑀓𑀣𑁂𑀲𑀺. 𑀅𑀬𑀁 𑀧𑀦 𑀦𑀬𑀕𑁆𑀕𑀸𑀳𑁂𑀦𑀸𑀢𑀺 𑀅𑀬𑀁 𑀧𑀦 𑀕𑀳𑀧𑀢𑀺 𑀅𑀲𑀼𑀢𑁆𑀯𑀸 𑀓𑁂𑀯𑀮𑀁 𑀦𑀬𑀕𑁆𑀕𑀸𑀳𑁂𑀦 𑀆𑀳.

𑀧𑀞𑀫𑀓𑀸𑀫𑀪𑀽𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀤𑀼𑀢𑀺𑀬𑀓𑀸𑀫𑀪𑀽𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁮. 𑀦𑀺𑀭𑁄𑀥𑀁 ¶ 𑀯𑀮𑀜𑁆𑀚𑁂𑀢𑀺 𑀅𑀦𑀸𑀕𑀸𑀫𑀺𑀪𑀸𑀯𑀢𑁄. 𑀇𑀫𑁂 𑀲𑀗𑁆𑀔𑀸𑀭𑀸𑀢𑀺 𑀇𑀫𑁂 ‘‘𑀓𑀸𑀬𑀲𑀗𑁆𑀔𑀸𑀭𑁄, 𑀯𑀘𑀻𑀲𑀗𑁆𑀔𑀸𑀭𑁄, 𑀘𑀺𑀢𑁆𑀢𑀲𑀗𑁆𑀔𑀸𑀭𑁄’’𑀢𑀺 𑀯𑀼𑀘𑁆𑀘𑀫𑀸𑀦𑀸 𑀢𑀬𑁄 𑀲𑀗𑁆𑀔𑀸𑀭𑀸. 𑀲𑀤𑁆𑀤𑀢𑁄𑀧𑀺, 𑀅𑀢𑁆𑀣𑀢𑁄𑀧𑀺 𑀅𑀜𑁆𑀜𑀫𑀜𑁆𑀜𑀁 𑀫𑀺𑀲𑁆𑀲𑀸, 𑀢𑀢𑁄 𑀏𑀯 𑀆𑀮𑀼𑀴𑀺𑀢𑀸 𑀆𑀓𑀼𑀮𑀸, 𑀅𑀯𑀺𑀪𑀽𑀢𑀸 𑀤𑀼𑀩𑁆𑀩𑀺𑀪𑀸𑀯𑀦𑀸, 𑀤𑀼𑀤𑁆𑀤𑀻𑀧𑀦𑀸 𑀅𑀲𑀗𑁆𑀓𑀭𑀢𑁄 𑀤𑀻𑀧𑁂𑀢𑀼𑀁 𑀤𑀼𑀓𑁆𑀓𑀭𑀸. 𑀢𑀣𑀸 𑀳𑀺 𑀓𑀼𑀲𑀮𑀘𑁂𑀢𑀦𑀸 𑀏𑀯 ‘‘𑀓𑀸𑀬𑀲𑀗𑁆𑀔𑀸𑀭𑁄’’𑀢𑀺𑀧𑀺 ¶ 𑀯𑀼𑀘𑁆𑀘𑀢𑀺, ‘‘𑀯𑀘𑀻𑀲𑀗𑁆𑀔𑀸𑀭𑁄’’𑀢𑀺𑀧𑀺, ‘‘𑀘𑀺𑀢𑁆𑀢𑀲𑀗𑁆𑀔𑀸𑀭𑁄’’𑀢𑀺𑀧𑀺. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸𑀧𑀺 𑀓𑀢𑁆𑀣𑀘𑀺 ‘‘𑀓𑀸𑀬𑀲𑀗𑁆𑀔𑀸𑀭𑁄’’𑀢𑀺, 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀧𑀺 ‘‘𑀯𑀘𑀻𑀲𑀗𑁆𑀔𑀸𑀭𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀲𑀜𑁆𑀜𑀸𑀯𑁂𑀤𑀦𑀸𑀧𑀺 ‘‘𑀘𑀺𑀢𑁆𑀢𑀲𑀗𑁆𑀔𑀸𑀭𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀣𑀸 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀆𑀓𑀟𑁆𑀠𑀺𑀢𑁆𑀯𑀸 𑀕𑀳𑀡𑀁 𑀆𑀤𑀸𑀦𑀁, 𑀲𑀫𑁆𑀧𑀢𑁆𑀢𑀲𑁆𑀲 𑀳𑀢𑁆𑀣𑁂 𑀓𑀭𑀡𑀁 𑀕𑀳𑀡𑀁, 𑀕𑀳𑀺𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀁 𑀫𑀼𑀜𑁆𑀘𑀦𑀁, 𑀨𑀦𑁆𑀤𑀦𑀁 𑀘𑁄𑀧𑀦𑀁 𑀧𑀸𑀧𑁂𑀢𑁆𑀯𑀸 𑀦𑀺𑀧𑁆𑀨𑀸𑀤𑁂𑀢𑁆𑀯𑀸. 𑀳𑀦𑀼𑀲𑀜𑁆𑀘𑁄𑀧𑀦𑀦𑁆𑀢𑀺 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀯𑀲𑁂𑀦 𑀧𑀼𑀩𑁆𑀩𑀪𑀸𑀕𑁂 𑀳𑀦𑀼𑀲𑀜𑁆𑀘𑁄𑀧𑀦𑀁 𑀓𑀢𑁆𑀯𑀸. 𑀏𑀯𑀜𑁆𑀳𑀺 𑀯𑀘𑀻𑀪𑁂𑀤𑀓𑀭𑀡𑀁. 𑀏𑀯𑀁 𑀇𑀫𑁂𑀢𑀺𑀆𑀤𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀕𑀫𑀦𑀁.

𑀧𑀤𑀢𑁆𑀣𑀁 𑀧𑀼𑀘𑁆𑀙𑀢𑀺 𑀇𑀢𑀭𑀲𑀗𑁆𑀔𑀸𑀭𑁂𑀳𑀺 𑀧𑀤𑀢𑁆𑀣𑀢𑁄 𑀯𑀺𑀲𑁂𑀲𑀁 𑀓𑀣𑀸𑀧𑁂𑀲𑁆𑀲𑀸𑀫𑀻𑀢𑀺. 𑀓𑀸𑀬𑀦𑀺𑀲𑁆𑀲𑀺𑀢𑀸𑀢𑀺 𑀏𑀢𑁆𑀣 𑀓𑀸𑀬𑀦𑀺𑀲𑁆𑀲𑀺𑀢𑀢𑀸 𑀘 𑀦𑁂𑀲𑀁 𑀢𑀩𑁆𑀪𑀸𑀯𑀪𑀸𑀯𑀺𑀢𑀸𑀬 𑀯𑁂𑀤𑀺𑀢𑀩𑁆𑀩𑀸, 𑀦 𑀓𑀸𑀬𑀲𑁆𑀲 𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑀸𑀯𑀲𑁂𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀬𑁂 𑀲𑀢𑀺 𑀳𑁄𑀦𑁆𑀢𑀺, 𑀅𑀲𑀢𑀺 𑀦 𑀳𑁄𑀦𑁆𑀢𑀻’’𑀢𑀺 𑀆𑀳. 𑀓𑀸𑀬𑁄𑀢𑀺 𑀘𑁂𑀢𑁆𑀣 𑀓𑀭𑀚𑀓𑀸𑀬𑁄 𑀤𑀝𑁆𑀞𑀩𑁆𑀩𑁄. 𑀘𑀺𑀢𑁆𑀢𑀦𑀺𑀲𑁆𑀲𑀺𑀢𑀸𑀢𑀺 𑀘𑀺𑀢𑁆𑀢𑀁 𑀦𑀺𑀲𑁆𑀲𑀸𑀬 𑀢𑀁 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀽𑀢𑀁 𑀮𑀪𑀺𑀢𑁆𑀯𑀸 𑀉𑀧𑁆𑀧𑀦𑁆𑀦𑀸.

‘‘𑀲𑀫𑀸𑀧𑀚𑁆𑀚𑀸𑀫𑀻’’𑀢𑀺 𑀧𑀤𑀲𑁆𑀲 𑀲𑀫𑀻𑀧𑁂 𑀯𑀼𑀘𑁆𑀘𑀫𑀸𑀦𑀁 ‘‘𑀲𑀫𑀸𑀧𑀚𑁆𑀚𑀺𑀲𑁆𑀲’’𑀦𑁆𑀢𑀺 𑀧𑀤𑀁 𑀆𑀲𑀦𑁆𑀦𑀸𑀦𑀸𑀕𑀢𑀓𑀸𑀮𑀯𑀸𑀘𑀻 𑀏𑀯 𑀪𑀯𑀺𑀢𑀼𑀁 𑀬𑀼𑀢𑁆𑀢𑀁, 𑀦 𑀇𑀢𑀭𑀦𑁆𑀢𑀺 𑀆𑀳 𑁋 ‘‘𑀧𑀤𑀤𑁆𑀯𑀬𑁂𑀦 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀓𑀸𑀮𑁄 𑀓𑀣𑀺𑀢𑁄’’𑀢𑀺. 𑀢𑀬𑀺𑀤𑀁 𑀢𑀲𑁆𑀲 𑀢𑀣𑀸 𑀯𑀢𑁆𑀢𑀩𑁆𑀩𑀢𑀸𑀬 𑀯𑀼𑀢𑁆𑀢𑀁, 𑀦 𑀧𑀦 𑀢𑀲𑁆𑀲 𑀢𑀣𑀸 𑀘𑀺𑀢𑁆𑀢𑀧𑀯𑀢𑁆𑀢𑀺𑀲𑀫𑁆𑀪𑀯𑀢𑁄. 𑀲𑀫𑀸𑀧𑀦𑁆𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀭𑀺𑀫𑁂𑀳𑀻𑀢𑀺 ‘‘𑀲𑀫𑀸𑀧𑀚𑁆𑀚𑀺𑀲𑁆𑀲𑀁 𑀲𑀫𑀸𑀧𑀚𑁆𑀚𑀸𑀫𑀻’’𑀢𑀺 𑀤𑁆𑀯𑀻𑀳𑀺 𑀧𑀤𑁂𑀳𑀺. 𑀧𑀘𑁆𑀙𑀺𑀫𑁂𑀦𑀸𑀢𑀺 ‘‘𑀲𑀫𑀸𑀧𑀦𑁆𑀦𑁄’’𑀢𑀺 𑀧𑀤𑁂𑀦.

𑀪𑀸𑀯𑀺𑀢𑀁 𑀳𑁄𑀢𑀺 𑀉𑀧𑁆𑀧𑀸𑀤𑀺𑀢𑀁 𑀳𑁄𑀢𑀺 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀢𑁆𑀣𑀸𑀬. 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑀲𑀗𑁆𑀔𑀸𑀢𑀸𑀬 𑀦𑀺𑀭𑁄𑀥𑀪𑀸𑀯𑀦𑀸𑀬 𑀢𑀁 𑀘𑀺𑀢𑁆𑀢𑀁 𑀪𑀸𑀯𑀺𑀢𑀁 𑀳𑁄𑀢𑀺. 𑀢𑁂𑀦𑀸𑀳 ‘‘𑀬𑀁 𑀢’’𑀦𑁆𑀢𑀺𑀆𑀤𑀺. 𑀤𑀼𑀢𑀺𑀬𑀚𑁆𑀛𑀸𑀦𑁂𑀬𑁂𑀯𑀸𑀢𑀺 𑀤𑀼𑀢𑀺𑀬𑀚𑁆𑀛𑀸𑀦𑀓𑁆𑀔𑀡𑁂 𑀦𑀺𑀭𑀼𑀚𑁆𑀛𑀢𑀺. 𑀢𑀢𑁆𑀣 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 𑀅𑀦𑀼𑀧𑁆𑀧𑀸𑀤𑀦𑀢𑁄 𑀳𑁂𑀝𑁆𑀞𑀸 𑀦𑀺𑀭𑁄𑀥𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀘𑀢𑀼𑀦𑁆𑀦𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 𑀢𑀚𑁆𑀚𑀸 𑀧𑀭𑀺𑀓𑀫𑁆𑀫𑀲𑀺𑀤𑁆𑀥𑀸 𑀬𑀸 𑀅𑀧𑁆𑀧𑀯𑀢𑁆𑀢𑀺 ¶ , 𑀢𑀢𑁆𑀣 ‘‘𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀲𑀜𑁆𑀜𑀸’’𑀢𑀺, 𑀬𑀸 𑀦𑁂𑀲𑀁 𑀢𑀣𑀸 𑀅𑀧𑁆𑀧𑀯𑀢𑁆𑀢𑀺. 𑀲𑀸 ‘‘𑀅𑀦𑁆𑀢𑁄𑀦𑀺𑀭𑁄𑀥𑁂 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀯𑀼𑀢𑁆𑀢𑀸.

‘‘𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀦𑀺𑀭𑀼𑀤𑁆𑀥𑁄’’𑀢𑀺 𑀯𑀘𑀦𑀢𑁄 𑀢𑀤𑀜𑁆𑀜𑁂𑀲𑀁 𑀅𑀦𑀺𑀭𑁄𑀥𑀁 𑀇𑀘𑁆𑀙𑀦𑁆𑀢𑀸𑀦𑀁 𑀯𑀸𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀦𑀺𑀭𑀼𑀤𑁆𑀥𑁄𑀢𑀺 𑀯𑀘𑀦𑀢𑁄’’𑀢𑀺𑀆𑀤𑀺𑀁 𑀯𑀢𑁆𑀯𑀸 𑀢𑀢𑁆𑀣 𑀅𑀢𑀺𑀧𑁆𑀧𑀲𑀗𑁆𑀕𑀤𑀲𑁆𑀲𑀦𑀫𑀼𑀔𑁂𑀦 𑀢𑀁 𑀯𑀸𑀤𑀁 𑀦𑀺𑀲𑁂𑀥𑁂𑀢𑀼𑀁 ‘‘𑀢𑁂 𑀯𑀢𑁆𑀢𑀩𑁆𑀩𑀸’’𑀢𑀺𑀆𑀤𑀺𑀫𑀸𑀳. 𑀅𑀪𑀺𑀦𑀺𑀯𑁂𑀲𑀁 𑀅𑀓𑀢𑁆𑀯𑀸𑀢𑀺 𑀬𑀣𑀸𑀕𑀢𑁂 𑀩𑁆𑀬𑀜𑁆𑀚𑀦𑀫𑀢𑁆𑀢𑁂 𑀅𑀪𑀺𑀦𑀺𑀯𑁂𑀲𑀁 𑀅𑀓𑀢𑁆𑀯𑀸. 𑀆𑀘𑀭𑀺𑀬𑀸𑀦𑀁 𑀦𑀬𑁂𑀢𑀺 𑀆𑀘𑀭𑀺𑀬𑀸𑀦𑀁 𑀧𑀭𑀫𑁆𑀧𑀭𑀸𑀕𑀢𑁂 𑀥𑀫𑁆𑀫𑀦𑀬𑁂 𑀥𑀫𑁆𑀫𑀦𑁂𑀢𑁆𑀢𑀺𑀬𑀁 𑀞𑀢𑁆𑀯𑀸.

𑀓𑀺𑀭𑀺𑀬𑀫𑀬𑀧𑀯𑀢𑁆𑀢𑀲𑁆𑀫𑀺𑀦𑁆𑀢𑀺 ¶ 𑀧𑀭𑀺𑀢𑁆𑀢𑀪𑀽𑀫𑀓𑀓𑀼𑀲𑀮𑀸𑀓𑀼𑀲𑀮𑀥𑀫𑁆𑀫𑀧𑀩𑀦𑁆𑀥𑁂 𑀯𑀢𑁆𑀢𑀫𑀸𑀦𑁂. 𑀢𑀲𑁆𑀫𑀺𑀜𑁆𑀳𑀺 𑀯𑀢𑁆𑀢𑀫𑀸𑀦𑁂 𑀓𑀸𑀬𑀺𑀓-𑀯𑀸𑀘𑀲𑀺𑀓-𑀓𑀺𑀭𑀺𑀬𑀲𑀫𑁆𑀧𑀯𑀢𑁆𑀢𑀺 𑀳𑁄𑀢𑀺, 𑀤𑀲𑁆𑀲𑀦-𑀲𑀯𑀦𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀕𑁆𑀕𑀳𑀡𑁂 𑀧𑀯𑀢𑁆𑀢𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 𑁋 ‘‘𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑁂𑀲𑀼 𑀧𑀲𑀸𑀤𑁂 𑀖𑀝𑁆𑀝𑁂𑀦𑁆𑀢𑁂𑀲𑀽’’𑀢𑀺. 𑀫𑀓𑁆𑀔𑀺𑀢𑀸𑀦𑀺 𑀯𑀺𑀬𑀸𑀢𑀺 𑀧𑀼𑀜𑁆𑀙𑀺𑀢𑀸𑀦𑀺 𑀯𑀺𑀬 𑀳𑁄𑀦𑁆𑀢𑀺 𑀖𑀝𑁆𑀝𑀦𑀸𑀬 𑀯𑀺𑀩𑀸𑀥𑀺𑀢𑀢𑁆𑀢𑀸. 𑀏𑀢𑁂𑀦𑀸𑀬𑀁 𑀖𑀝𑁆𑀝𑀦𑀸 𑀧𑀜𑁆𑀘𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀸𑀦𑀁 𑀯𑁂𑀕𑀲𑀸 𑀉𑀧𑁆𑀧𑀚𑁆𑀚𑀦𑀸𑀬 𑀦 𑀆𑀭𑀫𑁆𑀫𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀅𑀦𑁆𑀢𑁄𑀦𑀺𑀭𑁄𑀥𑁂 𑀧𑀜𑁆𑀘 𑀧𑀲𑀸𑀤𑀸 𑀅𑀢𑀺𑀯𑀺𑀬 𑀯𑀺𑀭𑁄𑀘𑀦𑁆𑀢𑀻’’𑀢𑀺.

𑀢𑀢𑁄 𑀧𑀭𑀁 𑀲𑀘𑀺𑀢𑁆𑀢𑀓𑁄 𑀪𑀯𑀺𑀲𑁆𑀲𑀸𑀫𑀻𑀢𑀺 𑀇𑀤𑀁 𑀅𑀢𑁆𑀣𑀢𑁄 𑀆𑀧𑀦𑁆𑀦𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁 𑁋 ‘‘𑀏𑀢𑁆𑀢𑀓𑀁 𑀓𑀸𑀮𑀁 𑀅𑀘𑀺𑀢𑁆𑀢𑀓𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀏𑀢𑁂𑀦𑁂𑀯 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀺𑀤𑁆𑀥𑀢𑁆𑀢𑀸. 𑀬𑀁 𑀏𑀯𑀁 𑀪𑀸𑀯𑀺𑀢𑀦𑁆𑀢𑀺 𑀏𑀢𑁆𑀣 𑀯𑀺𑀲𑀼𑀁 𑀘𑀺𑀢𑁆𑀢𑀲𑁆𑀲 𑀪𑀸𑀯𑀦𑀸 𑀦𑀸𑀫 𑀦𑀢𑁆𑀣𑀺, 𑀅𑀤𑁆𑀥𑀸𑀦𑀧𑀭𑀺𑀘𑁆𑀙𑁂𑀤𑀁 𑀧𑀦 𑀓𑀢𑁆𑀯𑀸 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀢𑁆𑀣𑀸𑀬 𑀓𑀸𑀢𑀩𑁆𑀩𑀧𑀭𑀺𑀓𑀫𑁆𑀫𑀪𑀸𑀯𑀦𑀸𑀬 𑀏𑀯 𑀢𑀲𑁆𑀲 𑀲𑀺𑀚𑁆𑀛𑀦𑀢𑁄.

𑀲𑀸 𑀧𑀦𑁂𑀲𑀸 𑀦𑀺𑀭𑁄𑀥𑀓𑀣𑀸. 𑀤𑁆𑀯𑀻𑀳𑀺 𑀩𑀮𑁂𑀳𑀻𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀩𑀮𑁂𑀳𑀺. 𑀢𑀬𑁄 𑀘 𑀲𑀗𑁆𑀔𑀸𑀭𑀸𑀦𑀦𑁆𑀢𑀺 𑀢𑀺𑀡𑁆𑀡𑀁 𑀓𑀸𑀬𑀯𑀘𑀻𑀘𑀺𑀢𑁆𑀢𑀲𑀗𑁆𑀔𑀸𑀭𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸. 𑀲𑁄𑀴𑀲𑀳𑀺 𑀜𑀸𑀡𑀘𑀭𑀺𑀬𑀸𑀳𑀻𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀦𑀁 𑀅𑀝𑁆𑀞𑀦𑁆𑀦𑀁 𑀅𑀦𑀼𑀧𑀲𑁆𑀲𑀦𑀸𑀜𑀸𑀡𑀸𑀦𑀁, 𑀅𑀝𑁆𑀞𑀦𑁆𑀦𑀜𑁆𑀘 𑀫𑀕𑁆𑀕𑀨𑀮𑀜𑀸𑀡𑀸𑀦𑀁 𑀯𑀲𑁂𑀦 𑀇𑀫𑀸𑀳𑀺 𑀲𑁄𑀴𑀲𑀳𑀺 𑀜𑀸𑀡𑀧𑁆𑀧𑀯𑀢𑁆𑀢𑀻𑀳𑀺. 𑀦𑀯𑀳𑀺 𑀲𑀫𑀸𑀥𑀺𑀘𑀭𑀺𑀬𑀸𑀳𑀻𑀢𑀺 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀅𑀝𑁆𑀞 𑀲𑀫𑀸𑀥𑀺𑀘𑀭𑀺𑀬𑀸, 𑀢𑀸𑀲𑀁 𑀉𑀧𑀘𑀸𑀭𑀲𑀫𑀸𑀥𑀺 𑀲𑀫𑀸𑀥𑀺𑀪𑀸𑀯𑀲𑀸𑀫𑀜𑁆𑀜𑁂𑀦 𑀏𑀓𑀸 𑀲𑀫𑀸𑀥𑀺𑀘𑀭𑀺𑀬𑀸𑀢𑀺 𑀏𑀯𑀁 𑀦𑀯𑀳𑀺 𑀲𑀫𑀸𑀥𑀺𑀘𑀭𑀺𑀬𑀸𑀳𑀺. 𑀯𑀲𑀻𑀪𑀸𑀯𑀢𑀸𑀧𑀜𑁆𑀜𑀸𑀢𑀺 𑀯𑀲𑀻𑀪𑀸𑀯𑀢𑀸𑀲𑀗𑁆𑀔𑀸𑀢𑀸 𑀧𑀜𑁆𑀜𑀸. 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀓𑀣𑀺𑀢𑀸, 𑀢𑁂 𑀢𑀸𑀯 𑀆𑀓𑀸𑀭𑀸 ¶ 𑀢𑀺𑀝𑁆𑀞𑀦𑁆𑀢𑀼, 𑀲𑀭𑀽𑀧𑀫𑀢𑁆𑀢𑀲𑁆𑀲 𑀧𑀦𑀲𑁆𑀲 𑀯𑀢𑁆𑀢𑀩𑁆𑀩𑀦𑁆𑀢𑀺 𑀆𑀳 𑁋 ‘‘𑀓𑁄 𑀧𑀦𑀸𑀬𑀁 𑀦𑀺𑀭𑁄𑀥𑁄 𑀦𑀸𑀫𑀸’’𑀢𑀺. 𑀬𑀤𑀺 𑀔𑀦𑁆𑀥𑀸𑀦𑀁 𑀅𑀧𑁆𑀧𑀯𑀢𑁆𑀢𑀺, 𑀅𑀣 𑀓𑀺𑀫𑀢𑁆𑀣𑀫𑁂𑀢𑀁 𑀛𑀸𑀦𑀲𑀼𑀔𑀸𑀤𑀺𑀁 𑀯𑀺𑀬 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺 𑀆𑀳 ‘‘𑀲𑀗𑁆𑀔𑀸𑀭𑀸𑀦’’𑀦𑁆𑀢𑀺𑀆𑀤𑀺.

𑀨𑀮𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀦𑁆𑀢𑀺 𑀅𑀭𑀳𑀢𑁆𑀢𑀁 𑀅𑀦𑀸𑀕𑀸𑀫𑀺𑀨𑀮𑀘𑀺𑀢𑁆𑀢𑀁. ‘‘𑀢𑀢𑁄 𑀧𑀭𑀁 𑀪𑀯𑀗𑁆𑀕𑀲𑀫𑀬𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀆𑀳 ‘‘𑀓𑀺𑀁 𑀧𑀦…𑀧𑁂… 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻’’𑀢𑀺. 𑀲𑀫𑀼𑀝𑁆𑀞𑀸𑀧𑁂𑀢𑀺 𑀭𑀽𑀧𑀲𑀫𑀼𑀧𑁆𑀧𑀸𑀤𑀓𑀢𑁆𑀢𑀸. 𑀇𑀫𑀲𑁆𑀲𑀸𑀢𑀺 𑀦𑀺𑀭𑁄𑀥𑀁 𑀲𑀫𑀸𑀧𑀦𑁆𑀦𑀪𑀺𑀓𑁆𑀔𑀼𑀦𑁄. 𑀲𑀸 𑀦 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 𑀲𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀸 𑀨𑀮𑀲𑀫𑀸𑀧𑀢𑁆𑀢𑀺 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑁂. 𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀺𑀓𑀪𑀸𑀯𑁄 𑀓𑀣𑀁 𑀦𑀺𑀘𑁆𑀙𑀺𑀢𑁄𑀢𑀺 𑀆𑀳 𑁋 ‘‘𑀓𑀺𑀁 𑀯𑀸 𑀏𑀢𑁂𑀦𑀸’’𑀢𑀺𑀆𑀤𑀺. 𑀯𑀓𑁆𑀔𑀫𑀸𑀦𑀸𑀓𑀸𑀭𑁂𑀦𑀧𑀺 𑀧𑀭𑀺𑀳𑀸𑀭𑁄 𑀳𑁄𑀢𑀻𑀢𑀺. 𑀲𑀦𑁆𑀢𑀲𑀫𑀸𑀧𑀢𑁆𑀢𑀺𑀢𑁄𑀢𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀫𑁂𑀯 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀩𑁆𑀩𑁄𑀳𑀸𑀭𑀺𑀓𑀸 𑀳𑁄𑀦𑁆𑀢𑀺 𑀅𑀢𑀺𑀲𑀼𑀔𑀼𑀫𑀲𑀪𑀸𑀯𑀢𑁆𑀢𑀸, 𑀲𑀜𑁆𑀚𑀻𑀯𑀢𑁆𑀣𑁂𑀭𑀲𑁆𑀲 𑀧𑀼𑀩𑁆𑀩𑁂 𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀅𑀩𑁆𑀩𑁄𑀳𑀸𑀭𑀺𑀓𑀪𑀸𑀯𑀁 𑀕𑀘𑁆𑀙𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀪𑀯𑀗𑁆𑀕𑀲𑀫𑀬𑁂𑀦𑁂𑀯𑁂𑀢𑀁 𑀓𑀣𑀺𑀢’’𑀦𑁆𑀢𑀺.

𑀓𑀺𑀭𑀺𑀬𑀫𑀬 ¶ …𑀧𑁂… 𑀉𑀧𑁆𑀧𑀚𑁆𑀚𑀢𑀻𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁? 𑀦𑀦𑀼 𑀪𑀯𑀗𑁆𑀕𑀼𑀧𑁆𑀧𑀢𑁆𑀢𑀺𑀓𑀸𑀮𑀫𑁆𑀧𑀺 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑁂𑀯𑀸𑀢𑀺? 𑀓𑀺𑀜𑁆𑀘𑀸𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀯𑀘𑀻𑀲𑀗𑁆𑀔𑀸𑀭𑀮𑀓𑁆𑀔𑀡𑀧𑁆𑀧𑀢𑁆𑀢𑀸 𑀧𑀦 𑀦 𑀳𑁄𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀁 𑀪𑀯𑀗𑁆𑀕’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀼𑀜𑁆𑀜𑀢𑁄 𑀨𑀲𑁆𑀲𑁄𑀢𑀺𑀆𑀤𑀬𑁄 𑀲𑀕𑀼𑀡𑁂𑀦𑀧𑀺 𑀆𑀭𑀫𑁆𑀫𑀡𑁂𑀦𑀸𑀢𑀺 𑀆𑀭𑀫𑁆𑀫𑀡𑀪𑀽𑀢𑀫𑁂𑀢𑀁. 𑀲𑀼𑀜𑁆𑀜𑀢𑀸 𑀦𑀸𑀫 𑀨𑀮𑀲𑀫𑀸𑀧𑀢𑁆𑀢𑀺 𑀦𑀺𑀘𑁆𑀘𑀲𑀼𑀔𑀅𑀢𑁆𑀢𑀲𑀪𑀸𑀯𑀢𑁄 𑀲𑀼𑀜𑁆𑀜𑀢𑁆𑀢𑀸. ‘‘𑀲𑀼𑀜𑁆𑀜𑀢𑁄 𑀨𑀲𑁆𑀲𑁄’’𑀢𑀺 𑀯𑀼𑀢𑁆𑀢𑀁 𑀯𑀼𑀢𑁆𑀢𑀦𑀬𑁂𑀦 𑀲𑀼𑀜𑁆𑀜𑀲𑀪𑀸𑀯𑀢𑁆𑀢𑀸. 𑀅𑀦𑀺𑀫𑀺𑀢𑁆𑀢𑀸 𑀦𑀸𑀫 𑀨𑀮𑀲𑀫𑀸𑀧𑀢𑁆𑀢𑀺 𑀭𑀸𑀕𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀅𑀪𑀸𑀯𑀢𑁄. 𑀅𑀧𑁆𑀧𑀡𑀺𑀳𑀺𑀢𑀸 𑀦𑀸𑀫 𑀨𑀮𑀲𑀫𑀸𑀧𑀢𑁆𑀢𑀺 𑀭𑀸𑀕𑀧𑀡𑀺𑀥𑀺𑀆𑀤𑀻𑀦𑀫𑀪𑀸𑀯𑀢𑁄. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀢𑁂𑀦𑀸𑀳 ‘‘𑀅𑀦𑀺𑀫𑀺𑀢𑁆𑀢𑀧𑁆𑀧𑀡𑀺𑀳𑀺𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺. 𑀭𑀸𑀕𑀦𑀺𑀫𑀺𑀢𑁆𑀢𑀸𑀤𑀻𑀦𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀔𑀸𑀭𑀦𑀺𑀫𑀺𑀢𑁆𑀢𑀲𑁆𑀲𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀬𑀤𑀕𑁆𑀕𑁂𑀦 𑀨𑀮𑀲𑀫𑀸𑀧𑀢𑁆𑀢𑀺𑀲𑀫𑁆𑀨𑀲𑁆𑀲𑁄 𑀲𑀼𑀜𑁆𑀜𑀢𑁄 𑀦𑀸𑀫, 𑀢𑀤𑀕𑁆𑀕𑁂𑀦 𑀨𑀮𑀲𑀫𑀸𑀧𑀢𑁆𑀢𑀺𑀧𑀺 𑀲𑀼𑀜𑁆𑀜𑀢𑀸 𑀦𑀸𑀫, 𑀨𑀲𑁆𑀲𑀲𑀻𑀲𑁂𑀦 𑀧𑀦 𑀤𑁂𑀲𑀦𑀸 𑀆𑀕𑀢𑀸𑀢𑀺 𑀢𑀣𑀸 𑀯𑀼𑀢𑁆𑀢𑀁. 𑀅𑀦𑀺𑀫𑀺𑀢𑁆𑀢𑀧𑁆𑀧𑀡𑀺𑀳𑀺𑀢𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀆𑀕𑀫𑀦𑀁 𑀏𑀢𑁆𑀣, 𑀏𑀢𑀸𑀬𑀸𑀢𑀺 𑀯𑀸 𑀆𑀕𑀫𑀦𑀺𑀓𑀸, 𑀲𑀸 𑀏𑀯 𑀆𑀕𑀫𑀦𑀺𑀬𑀸 𑀓-𑀓𑀸𑀭𑀲𑁆𑀲 𑀬-𑀓𑀸𑀭𑀁 𑀓𑀢𑁆𑀯𑀸. 𑀯𑀼𑀝𑁆𑀞𑀸𑀢𑀺 𑀦𑀺𑀫𑀺𑀢𑁆𑀢𑀢𑁄 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑀦𑁂𑀦. 𑀅𑀦𑀺𑀫𑀺𑀢𑁆𑀢𑀸 𑀦𑀸𑀫 𑀦𑀺𑀘𑁆𑀘𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀖𑀸𑀝𑀦𑀢𑁄. 𑀏𑀢𑁆𑀣 𑀘 𑀯𑀼𑀝𑁆𑀞𑀸𑀦𑀫𑁂𑀯 𑀧𑀫𑀸𑀡𑀁, 𑀦 ¶ 𑀧𑀭𑀺𑀕𑁆𑀕𑀳𑀤𑀲𑁆𑀲𑀦𑀸𑀦𑀺. 𑀅𑀧𑁆𑀧𑀡𑀺𑀳𑀺𑀢𑀸 𑀦𑀸𑀫 𑀲𑀼𑀔𑀧𑀡𑀺𑀥𑀺𑀬𑀸 𑀧𑀝𑀺𑀧𑀓𑁆𑀔𑀢𑁄. 𑀲𑀼𑀜𑁆𑀜𑀢𑀸 𑀦𑀸𑀫 𑀅𑀢𑁆𑀢𑀤𑀺𑀝𑁆𑀞𑀺𑀬𑀸 𑀉𑀚𑀼𑀧𑀝𑀺𑀧𑀓𑁆𑀔𑀢𑁆𑀢𑀸 𑀲𑀢𑁆𑀢𑀲𑀼𑀜𑁆𑀜𑀢𑀸𑀬 𑀲𑀼𑀤𑀺𑀝𑁆𑀞𑀢𑁆𑀢𑀸. 𑀫𑀕𑁆𑀕𑁄 𑀅𑀦𑀺𑀫𑀺𑀢𑁆𑀢𑁄 𑀦𑀸𑀫 𑀯𑀺𑀧𑀲𑁆𑀲𑀦𑀸𑀕𑀫𑀦𑀢𑁄. 𑀨𑀮𑀁 𑀅𑀦𑀺𑀫𑀺𑀢𑁆𑀢𑀁 𑀦𑀸𑀫 𑀫𑀕𑁆𑀕𑀸𑀕𑀫𑀦𑀢𑁄. 𑀯𑀺𑀓𑀧𑁆𑀧𑁄 𑀆𑀧𑀚𑁆𑀚𑁂𑀬𑁆𑀬 𑀆𑀕𑀫𑀦𑀲𑁆𑀲 𑀯𑀯𑀢𑁆𑀣𑀸𑀦𑀲𑁆𑀲 𑀅𑀪𑀸𑀯𑁂𑀦, 𑀯𑀺𑀧𑀲𑁆𑀲𑀦𑀸𑀬 𑀅𑀦𑀺𑀫𑀺𑀢𑁆𑀢𑀸𑀤𑀺𑀦𑀸𑀫𑀮𑀸𑀪𑁄 𑀅𑀯𑀯𑀢𑁆𑀣𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀲𑁆𑀫𑀸’’𑀢𑀺𑀆𑀤𑀺. 𑀬𑀲𑁆𑀫𑀸 𑀧𑀦 𑀲𑀸 𑀫𑀕𑁆𑀕𑀯𑀼𑀝𑁆𑀞𑀸𑀦𑀓𑀸𑀮𑁂 𑀏𑀯𑀭𑀽𑀧𑀸𑀧𑀺 𑀳𑁄𑀢𑀻𑀢𑀺 𑀢𑀲𑁆𑀲 𑀯𑀲𑁂𑀦 𑀫𑀕𑁆𑀕𑀨𑀮𑀸𑀦𑀁 𑀯𑀺𑀬 𑀨𑀲𑁆𑀲𑀲𑁆𑀲𑀧𑀺 𑀧𑀯𑀢𑁆𑀢𑀺𑀭𑀽𑀧𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑁄 𑀯𑀺𑀓𑀧𑁆𑀧𑁄 𑀅𑀦𑀯𑀲𑀭𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀬𑁄 𑀨𑀲𑁆𑀲𑀸 𑀨𑀼𑀲𑀦𑁆𑀢𑀻𑀢𑀺 𑀧𑀼𑀕𑁆𑀕𑀮𑀪𑁂𑀤𑀯𑀲𑁂𑀦 𑀯𑀼𑀢𑁆𑀢𑀁. 𑀦 𑀳𑀺 𑀏𑀓𑀁𑀬𑁂𑀯 𑀧𑀼𑀕𑁆𑀕𑀮𑀁 𑀏𑀢𑀲𑁆𑀫𑀺𑀁 𑀔𑀡𑁂 𑀢𑀬𑁄 𑀨𑀲𑁆𑀲𑀸 𑀨𑀼𑀲𑀦𑁆𑀢𑀺. ‘‘𑀢𑀺𑀯𑀺𑀥𑁄 𑀨𑀲𑁆𑀲𑁄 𑀨𑀼𑀲𑀢𑀻’’𑀢𑀺 𑀯𑀸 𑀪𑀯𑀺𑀢𑀩𑁆𑀩𑀁. 𑀬𑀲𑁆𑀫𑀸 𑀧𑀦 ‘‘𑀦𑀺𑀭𑁄𑀥𑀨𑀮𑀲𑀫𑀸𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀺𑀢𑀲𑁆𑀲𑀸’’𑀢𑀺𑀆𑀤𑀺 𑀬𑀲𑁆𑀲 𑀬𑀣𑀸𑀯𑀼𑀢𑁆𑀢𑀸 𑀢𑀬𑁄 𑀏𑀯 𑀨𑀲𑁆𑀲𑀸 𑀲𑀫𑁆𑀪𑀯𑀦𑁆𑀢𑀺, 𑀢𑀲𑁆𑀲 𑀅𑀦𑀯𑀲𑁂𑀲𑀕𑁆𑀕𑀳𑀡𑀯𑀲𑁂𑀦𑁂𑀯 𑀯𑀼𑀢𑁆𑀢𑀁 ‘‘𑀢𑀬𑁄 𑀨𑀲𑁆𑀲𑀸 𑀨𑀼𑀲𑀦𑁆𑀢𑀻’’𑀢𑀺.

𑀦𑀺𑀩𑁆𑀩𑀸𑀦𑀁 𑀯𑀺𑀯𑁂𑀓𑁄 𑀦𑀸𑀫 𑀲𑀩𑁆𑀩𑀲𑀗𑁆𑀔𑀸𑀭𑀯𑀺𑀯𑀺𑀢𑁆𑀢𑀪𑀸𑀯𑀢𑁄. 𑀢𑀲𑁆𑀫𑀺𑀁 𑀯𑀺𑀯𑁂𑀓𑁂 𑀏𑀓𑀦𑁆𑀢𑁂𑀦𑁂𑀯 𑀦𑀺𑀦𑁆𑀦𑀧𑁄𑀡𑀢𑁆𑀢𑀸 𑀏𑀯 𑀳𑀺 𑀢𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀲𑀩𑁆𑀩𑀼𑀲𑁆𑀲𑀼𑀓𑁆𑀓𑀸 𑀉𑀢𑁆𑀢𑀫𑀧𑀼𑀭𑀺𑀲𑀸 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀁 𑀅𑀦𑀯𑀲𑁂𑀲𑀕𑁆𑀕𑀳𑀡𑀮𑀓𑁆𑀔𑀡𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀦𑁆𑀢𑀻𑀢𑀺.

𑀤𑀼𑀢𑀺𑀬𑀓𑀸𑀫𑀪𑀽𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀕𑁄𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁪𑁯. 𑀦𑁂𑀲𑀦𑁆𑀢𑀺 ¶ 𑀅𑀧𑁆𑀧𑀫𑀸𑀡𑀘𑁂𑀢𑁄𑀯𑀺𑀫𑀼𑀢𑁆𑀢𑀺-𑀆𑀓𑀺𑀜𑁆𑀘𑀜𑁆𑀜𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀲𑀜𑁆𑀜𑀺𑀢𑀸𑀦𑀁 𑀛𑀸𑀦𑀸𑀦𑀁. 𑀅𑀢𑁆𑀣𑁄𑀧𑀺 𑀦𑀸𑀦𑀸𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑀦𑀸. 𑀨𑀭𑀡𑀅𑀧𑁆𑀧𑀫𑀸𑀡𑀢𑀸𑀬 ‘‘𑀅𑀧𑁆𑀧𑀫𑀸𑀡𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀻’’𑀢𑀺 𑀮𑀤𑁆𑀥𑀦𑀸𑀫𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀚𑁆𑀛𑀸𑀦𑀦𑁆𑀢𑀺 𑀆𑀳 ‘‘𑀪𑀽𑀫𑀦𑁆𑀢𑀭𑀢𑁄’’𑀢𑀺𑀆𑀤𑀺. 𑀆𑀓𑀺𑀜𑁆𑀘𑀜𑁆𑀜𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀚𑁆𑀛𑀸𑀦𑀦𑁆𑀢𑀺 𑀆𑀳 ‘‘𑀪𑀽𑀫𑀦𑁆𑀢𑀭𑀢𑁄’’𑀢𑀺𑀆𑀤𑀺. 𑀯𑀺𑀧𑀲𑁆𑀲𑀦𑀸𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸, 𑀲𑀩𑁆𑀩𑀸𑀧𑀺 𑀯𑀸. 𑀧𑀫𑀸𑀡𑀓𑀭𑀡𑁄 𑀦𑀸𑀫 𑀬𑀲𑁆𑀲 𑀲𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀕𑀼𑀡𑀸𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀧𑀫𑀸𑀡𑀓𑀭𑀡𑀢𑁄.

𑀨𑀭𑀡𑀅𑀧𑁆𑀧𑀫𑀸𑀡𑀢𑀸𑀬𑀸𑀢𑀺 ¶ 𑀨𑀭𑀡𑀯𑀲𑁂𑀦 𑀅𑀧𑁆𑀧𑀫𑀸𑀡𑀕𑁄𑀘𑀭𑀢𑀸𑀬. 𑀦𑀺𑀩𑁆𑀩𑀸𑀦𑀫𑁆𑀧𑀺 𑀅𑀧𑁆𑀧𑀫𑀸𑀡𑀫𑁂𑀯 𑀧𑀫𑀸𑀡𑀕𑁄𑀘𑀭𑀸𑀦𑀁 𑀓𑀺𑀮𑁂𑀲𑀸𑀦𑀁 𑀆𑀭𑀫𑁆𑀫𑀡𑀪𑀸𑀯𑀲𑁆𑀲𑀧𑀺 𑀅𑀦𑀸𑀕𑀫𑀦𑀢𑁄. 𑀔𑀮𑀦𑁆𑀢𑀺 𑀔𑀮𑁂 𑀧𑀲𑀸𑀭𑀺𑀢𑀲𑀸𑀮𑀺𑀲𑀻𑀲𑀸𑀤𑀺𑀪𑀡𑁆𑀟𑀁. 𑀓𑀺𑀜𑁆𑀘𑁂𑀳𑀻𑀢𑀺 𑀫𑀤𑁆𑀤𑀲𑁆𑀲𑀼. 𑀢𑁂𑀦𑀸𑀳 ‘‘𑀫𑀤𑁆𑀤𑀦𑀝𑁆𑀞𑁄’’𑀢𑀺. 𑀆𑀭𑀫𑁆𑀫𑀡𑀪𑀽𑀢𑀁, 𑀧𑀮𑀺𑀩𑀼𑀤𑁆𑀥𑀓𑀁 𑀯𑀸 𑀦𑀢𑁆𑀣𑀺 𑀏𑀢𑀲𑁆𑀲 𑀓𑀺𑀜𑁆𑀘𑀦𑀦𑁆𑀢𑀺 𑀅𑀓𑀺𑀜𑁆𑀘𑀦𑀁, 𑀅𑀓𑀺𑀜𑁆𑀘𑀦𑀫𑁂𑀯 𑀆𑀓𑀺𑀜𑁆𑀘𑀜𑁆𑀜𑀁.

𑀭𑀽𑀧𑀦𑀺𑀫𑀺𑀢𑁆𑀢𑀲𑁆𑀲𑀸𑀢𑀺 𑀓𑀲𑀺𑀡𑀭𑀽𑀧𑀦𑀺𑀫𑀺𑀢𑁆𑀢𑀲𑁆𑀲. 𑀦 𑀕𑀳𑀺𑀢𑀸𑀢𑀺 𑀲𑀭𑀽𑀧𑀢𑁄 𑀦 𑀕𑀳𑀺𑀢𑀸, 𑀅𑀢𑁆𑀣𑀢𑁄 𑀧𑀦 𑀕𑀳𑀺𑀢𑀸 𑀏𑀯. 𑀢𑁂𑀦𑀸𑀳 𑁋 ‘‘𑀲𑀸 𑀲𑀼𑀜𑁆𑀜𑀸 𑀭𑀸𑀕𑁂𑀦𑀸𑀢𑀺𑀆𑀤𑀺𑀯𑀘𑀦𑀢𑁄 𑀲𑀩𑁆𑀩𑀢𑁆𑀣 𑀅𑀦𑀼𑀧𑀯𑀺𑀢𑁆𑀣𑀸𑀯𑀸’’𑀢𑀺.

𑀦𑀸𑀦𑀸𑀢𑀺 𑀲𑀤𑁆𑀤𑀯𑀲𑁂𑀦. 𑀏𑀓𑀢𑁆𑀣𑀸𑀢𑀺 𑀆𑀭𑀫𑁆𑀫𑀡𑀯𑀲𑁂𑀦 𑀆𑀭𑀫𑁆𑀫𑀡𑀪𑀸𑀯𑁂𑀦 𑀏𑀓𑀲𑀪𑀸𑀯𑀸. 𑀢𑁂𑀦𑀸𑀳 ‘‘𑀅𑀧𑁆𑀧𑀫𑀸𑀡𑀁…𑀧𑁂… 𑀏𑀓𑀢𑁆𑀣𑀸’’𑀢𑀺. 𑀆𑀭𑀫𑁆𑀫𑀡𑀯𑀲𑁂𑀦𑀸𑀢𑀺 𑀆𑀭𑀫𑁆𑀫𑀡𑀲𑁆𑀲 𑀯𑀲𑁂𑀦. 𑀘𑀢𑁆𑀢𑀸𑀭𑁄 𑀳𑀺 𑀫𑀕𑁆𑀕𑀸, 𑀘𑀢𑁆𑀢𑀸𑀭𑀺 𑀨𑀮𑀸𑀦𑀺 𑀆𑀭𑀫𑁆𑀫𑀡𑀯𑀲𑁂𑀦 𑀦𑀺𑀩𑁆𑀩𑀸𑀦𑀧𑀯𑀺𑀝𑁆𑀞𑀢𑀸𑀬 𑀏𑀓𑀢𑁆𑀣𑀸 𑀏𑀓𑀸𑀭𑀫𑁆𑀫𑀡𑀸. 𑀅𑀜𑁆𑀜𑀲𑁆𑀫𑀺𑀁 𑀧𑀦 𑀞𑀸𑀦𑁂𑀢𑀺 𑀇𑀤𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁 𑀅𑀧𑁆𑀧𑀫𑀸𑀡𑀸𑀤𑀺 𑀧𑀭𑀺𑀬𑀸𑀬𑀯𑀼𑀢𑁆𑀢𑀁, 𑀦𑀺𑀩𑁆𑀩𑀸𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑀦𑀢𑁄. 𑀢𑀲𑁆𑀫𑀸 ‘‘𑀅𑀜𑁆𑀜𑀲𑁆𑀫𑀺’’𑀦𑁆𑀢𑀺 𑀇𑀤𑀁 𑀢𑁂𑀦 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀢𑀢𑁆𑀣 𑀢𑀢𑁆𑀣 𑀆𑀕𑀢𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀕𑁄𑀤𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀦𑀺𑀕𑀡𑁆𑀞𑀦𑀸𑀝𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁦. 𑀆𑀕𑀢𑀸𑀕𑀫𑁄𑀢𑀺 𑀯𑀸𑀘𑀼𑀕𑁆𑀕𑀢𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄. 𑀯𑀺𑀜𑁆𑀜𑀸𑀢𑀲𑀸𑀲𑀦𑁄𑀢𑀺 𑀧𑀝𑀺𑀯𑀺𑀤𑁆𑀥𑀲𑀢𑁆𑀣𑀼𑀲𑀸𑀲𑀦𑁄. 𑀢𑁂𑀦𑀸𑀳 ‘‘𑀅𑀦𑀸𑀕𑀸𑀫𑀻’’𑀢𑀺𑀆𑀤𑀺. 𑀦𑀕𑁆𑀕𑀪𑁄𑀕𑁆𑀕𑀦𑁆𑀢𑀺 𑀅𑀯𑀲𑀦𑀪𑀸𑀯𑁂𑀦 𑀦𑀕𑁆𑀕𑀁, 𑀓𑀼𑀝𑀺𑀮𑀚𑁆𑀛𑀸𑀲𑀬𑀢𑀸𑀬 𑀪𑁄𑀕𑁆𑀕𑀁, 𑀢𑀢𑁄 𑀏𑀯 𑀦𑀺𑀲𑁆𑀲𑀺𑀭𑀺𑀓𑀁. 𑀦𑀕𑁆𑀕𑀢𑀸𑀬 𑀳𑀺 𑀲𑁄 𑀭𑀽𑀧𑁂𑀦 𑀦𑀺𑀲𑁆𑀲𑀺𑀭𑀺𑀓𑁄, 𑀪𑁄𑀕𑁆𑀕𑀢𑀸𑀬 𑀘𑀺𑀢𑁆𑀢𑁂𑀦. 𑀪𑀕𑀯𑀢𑁄 𑀲𑀤𑁆𑀥𑀸𑀬𑀸𑀢𑀺 𑀪𑀕𑀯𑀢𑀺 𑀲𑀤𑁆𑀥𑀸𑀬. 𑀢𑀲𑁆𑀫𑀺𑀁 𑀲𑀤𑁆𑀤𑀳𑀦𑀸 𑀑𑀓𑀧𑁆𑀧𑀦𑀸 𑀢𑀲𑁆𑀲 𑀲𑀤𑁆𑀥𑀸𑀢𑀺𑀧𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺. 𑀕𑀘𑁆𑀙𑀸𑀫𑀻𑀢𑀺 𑀆𑀕𑀘𑁆𑀙𑀸𑀫𑀺, 𑀩𑀼𑀚𑁆𑀛𑀸𑀫𑀻𑀢𑀺 𑀅𑀢𑁆𑀣𑁄. 𑀏𑀢𑀁 𑀦𑀺𑀕𑀡𑁆𑀞𑁂𑀦 𑀧𑀼𑀘𑁆𑀙𑀺𑀢𑀫𑀢𑁆𑀣𑀫𑀸𑀳.

𑀓𑀸𑀬𑀁 ¶ 𑀉𑀦𑁆𑀦𑀸𑀫𑁂𑀢𑁆𑀯𑀸𑀢𑀺 𑀓𑀸𑀬𑀁 𑀅𑀩𑁆𑀪𑀼𑀦𑁆𑀦𑀸𑀫𑁂𑀢𑁆𑀯𑀸. 𑀓𑀼𑀘𑁆𑀙𑀺𑀁 𑀦𑀻𑀳𑀭𑀺𑀢𑁆𑀯𑀸𑀢𑀺 𑀧𑀺𑀝𑁆𑀞𑀺𑀬𑀸 𑀦𑀺𑀦𑁆𑀦𑀫𑀦𑁂𑀦 𑀓𑀼𑀘𑁆𑀙𑀺𑀁 𑀧𑀼𑀭𑀢𑁄 𑀦𑀻𑀳𑀭𑀺𑀢𑁆𑀯𑀸. 𑀕𑀻𑀯𑀁 𑀧𑀲𑀸𑀭𑀡𑀯𑀲𑁂𑀦 𑀧𑀕𑁆𑀕𑀬𑁆𑀳 𑀧𑀕𑁆𑀕𑀳𑁂𑀢𑁆𑀯𑀸 ¶ 𑀲𑀩𑁆𑀩𑀁 𑀤𑀺𑀲𑀁 𑀧𑁂𑀓𑁆𑀔𑀫𑀸𑀦𑁄. 𑀲𑀩𑁆𑀩𑀫𑀺𑀤𑀁 𑀦𑀺𑀕𑀡𑁆𑀞𑀲𑁆𑀲 𑀧𑀳𑀝𑁆𑀞𑀸𑀓𑀸𑀭𑀤𑀲𑁆𑀲𑀦𑀢𑁆𑀣𑀁 ‘‘𑀇𑀤𑀸𑀦𑀺 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀉𑀧𑀭𑀺 𑀯𑀸𑀤𑀁 𑀆𑀭𑁄𑀧𑁂𑀢𑀼𑀁 𑀮𑀩𑁆𑀪𑀢𑀻’’𑀢𑀺. 𑀢𑁂𑀦𑀸𑀳 ‘‘𑀯𑀸𑀢𑀁 𑀯𑀸 𑀲𑁄’’𑀢𑀺𑀆𑀤𑀺. 𑀲𑀓𑀸𑀭𑀡𑀸𑀢𑀺 𑀬𑀼𑀢𑁆𑀢𑀺𑀲𑀳𑀺𑀢𑀸. 𑀧𑀜𑁆𑀳𑀫𑀕𑁆𑀕𑁄𑀢𑀺 𑀧𑀜𑁆𑀳𑀲𑀗𑁆𑀔𑀸𑀢𑁄 𑀯𑀻𑀫𑀁𑀲𑀸, 𑀏𑀯𑀁 𑀪𑀯𑀺𑀢𑀩𑁆𑀩𑀦𑁆𑀢𑀺 𑀘𑀺𑀢𑁆𑀢𑁂𑀦𑁂𑀯 𑀧𑀭𑀺𑀯𑀻𑀫𑀁𑀲𑀸 𑀧𑀜𑁆𑀳𑀸. 𑀏𑀓𑁄 𑀉𑀤𑁆𑀤𑁂𑀲𑁄𑀢𑀺 𑀏𑀓𑀁 𑀉𑀤𑁆𑀤𑀺𑀲𑀦𑀁 𑀅𑀢𑁆𑀣𑀲𑁆𑀲 𑀲𑀁𑀔𑀺𑀢𑁆𑀢𑀯𑀘𑀦𑀁. 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺 𑀦𑀺𑀤𑁆𑀤𑀺𑀲𑀦𑀁 𑀅𑀢𑁆𑀣𑀲𑁆𑀲 𑀯𑀺𑀘𑀸𑀭𑁂𑀢𑁆𑀯𑀸 𑀓𑀣𑀦𑀁. 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑁂𑀲𑀼 𑀧𑀜𑁆𑀳𑀼𑀤𑁆𑀤𑁂𑀲𑀯𑁂𑀬𑁆𑀬𑀸𑀓𑀭𑀡𑁂𑀲𑀼 𑀅𑀢𑁆𑀣𑁄 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑁄.

𑀦𑀺𑀕𑀡𑁆𑀞𑀦𑀸𑀝𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀘𑁂𑀮𑀓𑀲𑁆𑀲𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁧. 𑀅𑀮𑀁 𑀲𑀫𑀢𑁆𑀣𑁄 𑀅𑀭𑀺𑀬𑀪𑀸𑀯𑀸𑀬𑀸𑀢𑀺 𑀅𑀮𑀫𑀭𑀺𑀬𑁄. 𑀜𑁂𑀬𑁆𑀬𑀚𑀸𑀦𑀦𑀝𑁆𑀞𑁂𑀦 𑀜𑀸𑀡𑀫𑁂𑀯 𑀧𑀘𑁆𑀘𑀓𑁆𑀔𑀢𑁄 𑀤𑀲𑁆𑀲𑀦𑀝𑁆𑀞𑁂𑀦 𑀜𑀸𑀡𑀤𑀲𑁆𑀲𑀦𑀁, 𑀲𑁄𑀬𑁂𑀯 𑀅𑀢𑀺𑀲𑀬𑀝𑁆𑀞𑁂𑀦 𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄. 𑀧𑀸𑀯𑀴𑀸 𑀯𑀼𑀘𑁆𑀘𑀢𑀺 𑀆𑀦𑀺𑀲𑀤𑀧𑀤𑁂𑀲𑁄, 𑀢𑀁 𑀧𑀸𑀯𑀴𑀁 𑀭𑀚𑁄𑀳𑀭𑀡𑀢𑁆𑀣𑀁 𑀦𑀺𑀧𑁆𑀨𑁄𑀝𑀻𑀬𑀢𑀺 𑀏𑀢𑀸𑀬𑀸𑀢𑀺 𑀧𑀸𑀯𑀴𑀦𑀺𑀧𑁆𑀨𑁄𑀝𑀦𑀸, 𑀫𑁄𑀭𑀧𑀺𑀜𑁆𑀙𑀯𑀢𑁆𑀢𑀺.

𑀅𑀘𑁂𑀮𑀓𑀲𑁆𑀲𑀧𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀕𑀺𑀮𑀸𑀦𑀤𑀲𑁆𑀲𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁨. 𑀫𑀢𑁆𑀢𑀭𑀸𑀚𑀸 𑀦𑀸𑀫 𑀏𑀓𑁄 𑀪𑀼𑀫𑁆𑀫𑀤𑁂𑀯𑁄 𑀪𑀽𑀢𑀸𑀥𑀺𑀧𑀢𑀺 𑀲𑀼𑀭𑀸𑀧𑁄𑀢𑀮𑀭𑀼𑀓𑁆𑀔𑀦𑀺𑀯𑀸𑀲𑀻. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀢𑁆𑀢𑀭𑀸𑀚𑀓𑀸𑀮𑁂’’𑀢𑀺. ‘‘𑀑𑀲𑀥𑀺𑀢𑀺𑀡𑀯𑀦𑀧𑁆𑀧𑀢𑀻𑀲𑀽’’𑀢𑀺 𑀯𑀢𑁆𑀯𑀸 𑀢𑁂 𑀬𑀣𑀸𑀓𑁆𑀓𑀫𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀳𑀭𑀻𑀢𑀓𑀸…𑀧𑁂… 𑀭𑀼𑀓𑁆𑀔𑁂𑀲𑀼 𑀘𑀸’’𑀢𑀺 𑀆𑀳. 𑀧𑀢𑁆𑀣𑀦𑀸𑀯𑀲𑁂𑀦 𑀘𑀺𑀢𑁆𑀢𑀁 𑀞𑀧𑁂𑀳𑀺. 𑀲𑀫𑀺𑀚𑁆𑀛𑀺𑀲𑁆𑀲𑀢𑀻𑀢𑀺 𑀬𑀣𑀸𑀥𑀺𑀧𑁆𑀧𑀸𑀬𑀁 𑀲𑀫𑀺𑀚𑁆𑀛𑀺𑀲𑁆𑀲𑀢𑀺. 𑀢𑁂𑀦 𑀳𑀻𑀢𑀺 𑀬𑀲𑁆𑀫𑀸 𑀢𑀁 𑀤𑁂𑀯𑀸𑀧𑀺 𑀆𑀲𑀦𑁆𑀦𑀫𑀭𑀡𑀁 𑀫𑀜𑁆𑀜𑀦𑁆𑀢𑀺, 𑀢𑀲𑁆𑀫𑀸 𑀲𑀸 𑀯𑀭𑀫𑁂𑀯 𑀪𑀯𑀺𑀲𑁆𑀲𑀢𑀺, 𑀢𑀁 𑀢𑀼𑀫𑁆𑀳𑀸𑀓𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀕𑀺𑀮𑀸𑀦𑀤𑀲𑁆𑀲𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀺𑀢𑁆𑀢𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀕𑀸𑀫𑀡𑀺𑀲𑀁𑀬𑀼𑀢𑁆𑀢𑀁

𑁧. 𑀘𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁩. ‘‘𑀬𑁂𑀦 ¶ ¶ 𑀫𑀺𑀥𑁂𑀓𑀘𑁆𑀘𑁄 𑀘𑀡𑁆𑀟𑁄 𑀘𑀡𑁆𑀟𑁄𑀢𑁆𑀯𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀻’’𑀢𑀺 𑀏𑀯𑀁 𑀧𑀜𑁆𑀳𑀧𑀼𑀘𑁆𑀙𑀦𑁂𑀦 𑀥𑀫𑁆𑀫𑀲𑀗𑁆𑀕𑀸𑀳𑀓𑀢𑁆𑀣𑁂𑀭𑁂𑀳𑀺 𑀘𑀡𑁆𑀟𑁄𑀢𑀺 𑀕𑀳𑀺𑀢𑀦𑀸𑀫𑁄. 𑀧𑀸𑀓𑀝𑀁 𑀓𑀭𑁄𑀢𑀻𑀢𑀺 𑀤𑀲𑁆𑀲𑁂𑀢𑀺 𑀅𑀢𑁆𑀢𑀦𑁄 𑀘𑀡𑁆𑀟𑀪𑀸𑀯𑀁.

𑀘𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀢𑀸𑀮𑀧𑀼𑀝𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁪. 𑀯𑀸𑀮𑁄𑀢𑀺 𑀯𑀼𑀘𑁆𑀘𑀢𑀺 𑀢𑀸𑀮𑁄, 𑀢𑀲𑁆𑀲 𑀢𑀸𑀮𑀧𑀼𑀝𑀁 𑀦𑀸𑀫. 𑀬𑀣𑀸 𑀆𑀫𑀮𑀓𑀻𑀨𑀮𑀲𑀫𑀸𑀦𑀓𑀁, 𑀲𑁄 𑀧𑀦 𑀢𑀸𑀮𑀲𑀤𑀺𑀲𑀫𑀼𑀔𑀯𑀡𑁆𑀡𑀢𑁆𑀢𑀸 𑀢𑀸𑀮𑀧𑀼𑀝𑁄𑀢𑀺 𑀏𑀯𑀁𑀦𑀸𑀫𑀓𑁄. 𑀢𑁂𑀦𑀸𑀳 ‘‘𑀢𑀲𑁆𑀲 𑀓𑀺𑀭𑀸’’𑀢𑀺𑀆𑀤𑀺. 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀦𑁆𑀦𑁄 𑀅𑀦𑁂𑀓𑁂𑀲𑀼 𑀓𑀧𑁆𑀧𑁂𑀲𑀼 𑀲𑀫𑁆𑀪𑀢𑀲𑀸𑀯𑀓𑀩𑁄𑀥𑀺𑀲𑀫𑁆𑀪𑀸𑀭𑁄. 𑀢𑀣𑀸 𑀳𑁂𑀲 𑀅𑀲𑀻𑀢𑀺𑀬𑀸 𑀫𑀳𑀸𑀲𑀸𑀯𑀓𑁂𑀲𑀼 𑀅𑀩𑁆𑀪𑀦𑁆𑀢𑀭𑁄 𑀚𑀸𑀢𑁄. 𑀲𑀳𑀲𑁆𑀲𑀁 𑀤𑁂𑀦𑁆𑀢𑀺 𑀦𑀘𑁆𑀘𑀁 𑀧𑀲𑁆𑀲𑀺𑀢𑀼𑀓𑀸𑀫𑀸. 𑀲𑀫𑀚𑁆𑀚𑀯𑁂𑀲𑀦𑁆𑀢𑀺 𑀦𑁂𑀧𑀘𑁆𑀘𑀯𑁂𑀲𑀁. 𑀓𑀻𑀴𑀁 𑀓𑀢𑁆𑀯𑀸𑀢𑀺 𑀦𑀘𑁆𑀘𑀓𑀻𑀴𑀺𑀢𑀁 𑀓𑀻𑀴𑀺𑀢𑁆𑀯𑀸, 𑀦𑀘𑁆𑀘𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀧𑀼𑀩𑁆𑀩𑁂 𑀢𑀣𑀸𑀧𑀯𑀢𑁆𑀢𑀯𑀼𑀢𑁆𑀢𑀦𑁆𑀢𑀤𑀲𑁆𑀲𑀦𑁂 𑀲𑀘𑁆𑀘𑁂𑀦, 𑀢𑀩𑁆𑀩𑀺𑀧𑀭𑀺𑀬𑀸𑀬𑁂 𑀅𑀮𑀺𑀓𑁂𑀦. 𑀭𑀸𑀕𑀧𑀘𑁆𑀘𑀬𑀸𑀢𑀺 𑀭𑀸𑀕𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀪𑀽𑀢𑀸. 𑀫𑀼𑀔𑀢𑁄…𑀧𑁂… 𑀤𑀲𑁆𑀲𑀦𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀼𑀔𑀢𑁄 𑀅𑀕𑁆𑀕𑀺𑀚𑀸𑀮𑀦𑀺𑀓𑁆𑀔𑀫𑀤𑀲𑁆𑀲𑀦𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀜𑁆𑀜𑁂 𑀘…𑀧𑁂… 𑀅𑀪𑀺𑀦𑀬𑀸𑀢𑀺 𑀓𑀸𑀫𑀲𑁆𑀲𑀸𑀤𑀲𑀁𑀬𑀼𑀢𑁆𑀢𑀸𑀦𑀁 𑀲𑀺𑀗𑁆𑀕𑀸𑀭𑀳𑀲𑁆𑀲𑀅𑀩𑁆𑀪𑀼𑀢𑀭𑀲𑀸𑀦𑀜𑁆𑀘𑁂𑀯 ‘‘𑀅𑀜𑁆𑀜𑁂 𑀘𑀸’’𑀢𑀺 𑀯𑀼𑀢𑁆𑀢𑀲𑀦𑁆𑀢𑀩𑀻𑀪𑀘𑁆𑀙𑀭𑀲𑀸𑀦𑀜𑁆𑀘 𑀤𑀲𑁆𑀲𑀦𑀓𑀸 𑀅𑀪𑀺𑀦𑀬𑀸. 𑀤𑁄𑀲𑀧𑀘𑁆𑀘𑀬𑀸𑀢𑀺 𑀤𑁄𑀲𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀪𑀽𑀢𑀸. 𑀳𑀢𑁆𑀣𑀧𑀸𑀤𑀘𑁆𑀙𑁂𑀤𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀸𑀦𑀁 𑀭𑀼𑀤𑁆𑀤𑀯𑀻𑀭𑀪𑀬𑀸𑀦𑀓𑀭𑀲𑀸𑀦𑀁 𑀤𑀲𑁆𑀲𑀦𑀓𑀸 𑀅𑀪𑀺𑀦𑀬𑀸. 𑀫𑁄𑀳𑀧𑀘𑁆𑀘𑀬𑀸𑀢𑀺 𑀫𑁄𑀳𑀼𑀧𑁆𑀧𑀢𑁆𑀢𑀺𑀬𑀸 𑀓𑀸𑀭𑀡𑀪𑀽𑀢𑀸. 𑀏𑀯𑀫𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀸𑀦𑀁 𑀓𑀭𑀼𑀡𑀸𑀲𑀦𑁆𑀢𑀪𑀬𑀸𑀦𑀓𑀭𑀲𑀸𑀦𑀁 𑀤𑀲𑁆𑀲𑀦𑀓𑀸 𑀅𑀪𑀺𑀦𑀬𑀸. 𑀢𑁂 𑀳𑀺 𑀭𑀲𑁂 𑀲𑀦𑁆𑀥𑀸𑀬 𑀧𑀸𑀴𑀺𑀬𑀁 ‘‘𑀬𑁂 𑀥𑀫𑁆𑀫𑀸 𑀭𑀚𑀦𑀻𑀬𑀸, 𑀬𑁂 𑀥𑀫𑁆𑀫𑀸 𑀤𑁄𑀲𑀦𑀻𑀬𑀸, 𑀬𑁂 𑀥𑀫𑁆𑀫𑀸 𑀫𑁄𑀳𑀦𑀻𑀬𑀸’’𑀢𑀺 𑀘 𑀯𑀼𑀢𑁆𑀢𑀁.

𑀦𑀝𑀯𑁂𑀲𑀁 ¶ 𑀕𑀳𑁂𑀢𑁆𑀯𑀸𑀯 𑀧𑀘𑁆𑀘𑀦𑁆𑀢𑀺 𑀓𑀫𑁆𑀫𑀲𑀭𑀺𑀓𑁆𑀔𑀯𑀺𑀧𑀸𑀓𑀯𑀲𑁂𑀦. 𑀢𑀁 𑀲𑀦𑁆𑀥𑀸𑀬𑀸𑀢𑀺 𑀢𑀁 𑀬𑀣𑀸𑀯𑀼𑀢𑁆𑀢𑀁 𑀦𑀺𑀭𑀬𑁂 𑀧𑀘𑁆𑀘𑀦𑀁 𑀲𑀦𑁆𑀥𑀸𑀬. 𑀏𑀢𑀁 ‘‘𑀧𑀳𑀸𑀲𑁄 𑀦𑀸𑀫 𑀦𑀺𑀭𑀬𑁄, 𑀢𑀢𑁆𑀣 𑀉𑀧𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀮𑁄𑀓𑁂 𑀅𑀢𑁆𑀣𑀯𑀺𑀲𑁂𑀲𑀯𑀲𑁂𑀦 𑀲𑀓𑀫𑁆𑀫𑀓𑀸𑀦𑀺𑀧𑀺 𑀧𑀤𑀸𑀦𑀺 𑀅𑀓𑀫𑁆𑀫𑀓𑀸𑀦𑀺 𑀪𑀯𑀦𑁆𑀢𑀺 ‘‘𑀯𑀺𑀫𑀼𑀘𑁆𑀘𑀢𑀺 𑀧𑀼𑀭𑀺𑀲𑁄’’𑀢𑀺, 𑀏𑀯𑀁 𑀇𑀥 𑀅𑀢𑁆𑀣𑀯𑀺𑀲𑁂𑀲𑀯𑀲𑁂𑀦 𑀅𑀓𑀫𑁆𑀫𑀓𑀁 𑀲𑀓𑀫𑁆𑀫𑀓𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁 𑁋 ‘‘𑀦𑀸𑀳𑀁, 𑀪𑀦𑁆𑀢𑁂, 𑀏𑀢𑀁 𑀭𑁄𑀤𑀸𑀫𑀻’’𑀢𑀺. 𑀓𑁄 ¶ 𑀧𑀦 𑀲𑁄 𑀅𑀢𑁆𑀣𑀯𑀺𑀲𑁂𑀲𑁄? 𑀅𑀲𑀳𑀦𑀁 𑀅𑀓𑁆𑀔𑀫𑀦𑀁, 𑀢𑀲𑁆𑀫𑀸 𑀦 𑀭𑁄𑀤𑀸𑀫𑀺 𑀦 𑀲𑀳𑀸𑀫𑀺, 𑀦 𑀅𑀓𑁆𑀔𑀫𑀸𑀫𑀻𑀢𑀺 𑀅𑀢𑁆𑀣𑁄. 𑀭𑁄𑀤𑀦𑀓𑀸𑀭𑀡𑀜𑁆𑀳𑀺 𑀅𑀲𑀳𑀦𑁆𑀢𑁄 𑀢𑁂𑀦 𑀅𑀪𑀺𑀪𑀽𑀢𑁄 𑀭𑁄𑀤𑀢𑀺. 𑀢𑀫𑁂𑀯𑀲𑁆𑀲 𑀲𑀓𑀫𑁆𑀫𑀓𑀪𑀸𑀯𑀲𑁆𑀲 𑀓𑀸𑀭𑀡𑀪𑀽𑀢𑀁 𑀅𑀢𑁆𑀣𑀯𑀺𑀲𑁂𑀲𑀁 ‘‘𑀦 𑀅𑀲𑁆𑀲𑀼𑀯𑀺𑀫𑁄𑀘𑀦𑀫𑀢𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀫𑀢𑀁 𑀯𑀸, 𑀅𑀫𑁆𑀫, 𑀭𑁄𑀤𑀦𑁆𑀢𑀻𑀢𑀺 𑀏𑀢𑁆𑀣𑀸𑀧𑀺 𑀫𑀢𑀁 𑀭𑁄𑀤𑀦𑁆𑀢𑀺, 𑀢𑀲𑁆𑀲 𑀫𑀭𑀡𑀁 𑀦 𑀲𑀳𑀦𑁆𑀢𑀺, 𑀦𑀓𑁆𑀔𑀫𑀦𑁆𑀢𑀻𑀢𑀺 𑀧𑀸𑀓𑀝𑁄𑀬𑀫𑀢𑁆𑀣𑁄𑀢𑀺.

𑀢𑀸𑀮𑀧𑀼𑀝𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩-𑁫. 𑀬𑁄𑀥𑀸𑀚𑀻𑀯𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁫𑁫-𑁩𑁫𑁭. 𑀬𑀼𑀚𑁆𑀛𑀦𑀁 𑀬𑁄𑀥𑁄, 𑀲𑁄 𑀆𑀚𑀻𑀯𑁄 𑀏𑀢𑀲𑁆𑀲𑀸𑀢𑀺 𑀬𑁄𑀥𑀸𑀚𑀻𑀯𑁄. 𑀢𑁂𑀦𑀸𑀳 𑁋 ‘‘𑀬𑀼𑀤𑁆𑀥𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑀦𑀓𑁄’’𑀢𑀺, 𑀉𑀲𑁆𑀲𑀸𑀳𑀁 𑀯𑀸𑀬𑀸𑀫𑀁 𑀓𑀭𑁄𑀢𑀻𑀢𑀺 𑀬𑀼𑀚𑁆𑀛𑀦𑀯𑀲𑁂𑀦 𑀉𑀲𑁆𑀲𑀸𑀳𑀁 𑀯𑀸𑀬𑀸𑀫𑀁 𑀓𑀭𑁄𑀢𑀺. 𑀧𑀭𑀺𑀬𑀸𑀧𑀸𑀤𑁂𑀦𑁆𑀢𑀻𑀢𑀺 𑀫𑀭𑀡𑀧𑀭𑀺𑀬𑀦𑁆𑀢𑀺𑀓𑀁 𑀆𑀧𑀤𑀁 𑀧𑀸𑀧𑁂𑀦𑁆𑀢𑀺. 𑀢𑁂𑀦𑀸𑀳 ‘‘𑀫𑀭𑀡𑀁 𑀧𑀝𑀺𑀧𑀚𑁆𑀚𑀸𑀧𑁂𑀦𑁆𑀢𑀻’’𑀢𑀺. 𑀤𑀼𑀝𑁆𑀞𑀼 𑀞𑀧𑀺𑀢𑀦𑁆𑀢𑀺 𑀤𑀼𑀝𑁆𑀞𑀸𑀓𑀸𑀭𑁂𑀦 𑀅𑀢𑁆𑀢𑀦𑁄 𑀧𑀭𑁂𑀲𑀜𑁆𑀘 𑀅𑀢𑁆𑀣𑀸𑀯𑀳𑀪𑀸𑀯𑀁 𑀦 𑀕𑀢𑀁 𑀧𑀝𑀺𑀧𑀦𑁆𑀦𑀁. 𑀧𑀭𑁂𑀳𑀺 𑀲𑀗𑁆𑀕𑀸𑀫𑁂 𑀚𑀺𑀢𑀸 𑀳𑀢𑀸 𑀏𑀢𑁆𑀣 𑀚𑀸𑀬𑀦𑁆𑀢𑀻𑀢𑀺 𑀧𑀭𑀚𑀺𑀢𑁄 𑀦𑀸𑀫 𑀦𑀺𑀭𑀬𑁄. 𑀅𑀲𑀺𑀥𑀦𑀼𑀕𑀤𑀸𑀬𑀲𑀗𑁆𑀓𑀼𑀘𑀓𑁆𑀓𑀸𑀦𑀺 𑀧𑀜𑁆𑀘𑀸𑀯𑀼𑀥𑀸𑀦𑀺. 𑀢𑀁 𑀲𑀦𑁆𑀥𑀸𑀬𑀸𑀢𑀺 𑀢𑀁 𑀬𑁄𑀥𑀸𑀚𑀻𑀯𑀁 𑀧𑀼𑀕𑁆𑀕𑀮𑀁 𑀲𑀦𑁆𑀥𑀸𑀬. 𑀏𑀢𑀁 ‘‘𑀬𑁄 𑀲𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀢𑀼𑀢𑁆𑀣𑀧𑀜𑁆𑀘𑀫𑁂𑀲𑀽𑀢𑀺 𑀳𑀢𑁆𑀣𑀸𑀭𑁄𑀳𑀅𑀲𑁆𑀲𑀸𑀭𑁄𑀳𑀲𑀼𑀢𑁆𑀢𑁂𑀲𑀼. 𑀏𑀲𑁂𑀯 𑀦𑀬𑁄𑀢𑀺 𑀏𑀲𑁄 𑀢𑀢𑀺𑀬𑁂 𑀯𑀼𑀢𑁆𑀢𑁄 𑀏𑀯 𑀅𑀢𑁆𑀣𑀢𑁄 𑀯𑀺𑀲𑁂𑀲𑀸𑀪𑀸𑀯𑀢𑁄.

𑀬𑁄𑀥𑀸𑀚𑀻𑀯𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀲𑀺𑀩𑀦𑁆𑀥𑀓𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁮. 𑀧𑀘𑁆𑀙𑀸𑀪𑀽𑀫𑀺𑀯𑀸𑀲𑀺𑀦𑁄𑀢𑀺 ¶ 𑀅𑀧𑀭𑀤𑁂𑀲𑀯𑀸𑀲𑀺𑀦𑁄. 𑀉𑀤𑀓𑀲𑀼𑀤𑁆𑀥𑀺𑀓𑀪𑀸𑀯𑀚𑀸𑀦𑀦𑀢𑁆𑀣𑀸𑀬𑀸𑀢𑀺 𑀅𑀢𑁆𑀢𑀦𑁄 𑀉𑀤𑀓𑀲𑀼𑀤𑁆𑀥𑀺𑀓𑀪𑀸𑀯𑀁 𑀚𑀸𑀦𑀦𑀢𑁆𑀣𑀜𑁆𑀘𑁂𑀯 𑀮𑁄𑀓𑀲𑁆𑀲 𑀘 𑀉𑀤𑀓𑁂𑀦 𑀲𑀼𑀤𑁆𑀥𑀺 𑀳𑁄𑀢𑀻𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀚𑀸𑀦𑀦𑀢𑁆𑀣𑀜𑁆𑀘. 𑀉𑀧𑀭𑀺 𑀬𑀸𑀧𑁂𑀦𑁆𑀢𑀻𑀢𑀺 𑀉𑀧𑀭𑀺 𑀩𑁆𑀭𑀳𑁆𑀫𑀮𑁄𑀓𑀁 𑀬𑀸𑀧𑁂𑀦𑁆𑀢𑀺. 𑀲𑀫𑁆𑀫𑀸 𑀜𑀸𑀧𑁂𑀦𑁆𑀢𑀻𑀢𑀺 𑀲𑀫𑁆𑀫𑀸 𑀉𑀚𑀼𑀓𑀁𑀬𑁂𑀯 𑀲𑀕𑁆𑀕𑀁 𑀮𑁄𑀓𑀁 𑀕𑀫𑁂𑀦𑁆𑀢𑀺. 𑀢𑁂𑀦𑀸𑀳 𑁋 ‘‘𑀲𑀕𑁆𑀕𑀁 𑀦𑀸𑀫 𑀑𑀓𑁆𑀓𑀸𑀫𑁂𑀦𑁆𑀢𑀻’’𑀢𑀺, 𑀅𑀯𑀓𑁆𑀓𑀸𑀫𑁂𑀦𑁆𑀢𑀺 𑀑𑀕𑀸𑀳𑀸𑀧𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀼𑀧𑀭𑀺𑀕𑀘𑁆𑀙𑁂𑀬𑁆𑀬𑀸𑀢𑀺 𑀅𑀦𑀼𑀧𑀭𑀺𑀢𑁄 𑀕𑀘𑁆𑀙𑁂𑀬𑁆𑀬.

𑀅𑀲𑀺𑀩𑀦𑁆𑀥𑀓𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀔𑁂𑀢𑁆𑀢𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁫𑁯. 𑀣𑀤𑁆𑀥𑀦𑁆𑀢𑀺 𑀓𑀣𑀺𑀦𑀁 𑀮𑀽𑀔𑀁. 𑀊𑀲𑀭𑀦𑁆𑀢𑀺 𑀊𑀲𑀚𑀸𑀢𑀁. 𑀘𑀢𑀽𑀳𑀺𑀧𑀺 𑀑𑀖𑁂𑀳𑀺 𑀅𑀦𑀪𑀺𑀪𑀯𑀦𑀻𑀬𑀢𑀸𑀬 ¶ 𑀅𑀳𑀁 𑀤𑀻𑀧𑁄. 𑀲𑀩𑁆𑀩𑀧𑀭𑀺𑀲𑁆𑀲𑀬𑁂𑀳𑀺 𑀅𑀦𑀪𑀺𑀪𑀯𑀦𑀻𑀬𑀢𑀸𑀬 𑀅𑀳𑀁 𑀮𑁂𑀡𑁄. 𑀲𑀩𑁆𑀩𑀤𑀼𑀓𑁆𑀔𑀧𑀭𑀺𑀢𑁆𑀢𑀸𑀲𑀦𑀢𑁄 𑀢𑀸𑀬𑀦𑀝𑁆𑀞𑁂𑀦 𑀅𑀳𑀁 𑀢𑀸𑀡𑀁. 𑀲𑀩𑁆𑀩𑀪𑀬𑀳𑀺𑀁𑀲𑀦𑀢𑁄 𑀅𑀳𑀁 𑀲𑀭𑀡𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀉𑀤𑀓𑀫𑀡𑀺𑀓𑁄𑀢𑀺 𑀫𑀳𑀦𑁆𑀢𑀁 𑀉𑀤𑀓𑀪𑀸𑀚𑀦𑀁. 𑀩𑀳𑀺 𑀯𑀺𑀲𑁆𑀲𑀦𑁆𑀤𑀦𑀯𑀲𑁂𑀦 𑀉𑀤𑀓𑀁 𑀦 𑀳𑀭𑀢𑀻𑀢𑀺 𑀅𑀳𑀸𑀭𑀻, 𑀧𑀭𑀺𑀢𑁄 𑀦 𑀧𑀕𑁆𑀖𑀭𑀢𑀻𑀢𑀺 𑀅𑀧𑀭𑀺𑀳𑀸𑀭𑀻. 𑀲𑀓𑁆𑀓𑀘𑁆𑀘𑀫𑁂𑀯 𑀤𑁂𑀲𑁂𑀦𑁆𑀢𑀺 𑀲𑀤𑁆𑀥𑀫𑁆𑀫𑀕𑀸𑀭𑀯𑀲𑁆𑀲 𑀲𑀩𑁆𑀩𑀲𑀢𑁆𑀢𑁂𑀲𑀼 𑀫𑀳𑀸𑀓𑀭𑀼𑀡𑀸𑀬 𑀘 𑀩𑀼𑀤𑁆𑀥𑀸𑀦𑀁 𑀲𑀫𑀸𑀦𑀭𑀲𑀢𑁆𑀢𑀸. 𑀘𑀢𑀲𑁆𑀲𑁄 𑀧𑀦 𑀧𑀭𑀺𑀲𑀸 𑀲𑀢𑁆𑀣𑀼𑀕𑀸𑀭𑀯𑁂𑀦 𑀅𑀢𑁆𑀢𑀦𑁄 𑀘 𑀲𑀤𑁆𑀥𑀸𑀲𑀫𑁆𑀧𑀦𑁆𑀦𑀢𑀸𑀬 𑀲𑀤𑁆𑀤𑀳𑀺𑀢𑁆𑀯𑀸 𑀑𑀓𑀧𑁆𑀧𑁂𑀢𑁆𑀯𑀸 𑀲𑀼𑀡𑀦𑁆𑀢𑀺, 𑀢𑀲𑁆𑀫𑀸 𑀢𑀸 𑀤𑁂𑀲𑀦𑀸𑀨𑀮𑁂𑀦 𑀬𑀼𑀚𑁆𑀚𑀦𑁆𑀢𑀺. 𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸 𑀲𑀢𑁆𑀣𑀼 𑀤𑁂𑀲𑀦𑀸 𑀢𑀢𑁆𑀣 𑀲𑀓𑁆𑀓𑀘𑁆𑀘𑀤𑁂𑀲𑀦𑀸 𑀦𑀸𑀫 𑀚𑀸𑀢𑀸.

𑀔𑁂𑀢𑁆𑀢𑀽𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀲𑀗𑁆𑀔𑀥𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬𑁦. ‘‘𑀬𑁄 𑀓𑁄𑀘𑀺 𑀧𑀼𑀭𑀺𑀲𑁄 𑀧𑀸𑀡𑀸𑀢𑀺𑀧𑀸𑀢𑀻 𑀫𑀼𑀲𑀸𑀯𑀸𑀤𑀻, 𑀲𑀩𑁆𑀩𑁄 𑀲𑁄 𑀆𑀧𑀸𑀬𑀺𑀓𑁄’’𑀢𑀺 𑀯𑀢𑁆𑀯𑀸 𑀧𑀼𑀦 ‘‘𑀬𑀁𑀩𑀳𑀼𑀮𑀁 𑀬𑀁𑀩𑀳𑀼𑀮𑀁 𑀓𑀭𑁄𑀢𑀺, 𑀢𑁂𑀦 ¶ 𑀤𑀼𑀕𑁆𑀕𑀢𑀺𑀁 𑀕𑀘𑁆𑀙𑀢𑀻’’𑀢𑀺 𑀯𑀤𑀦𑁆𑀢𑁄 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀯𑀸𑀤𑀁 𑀪𑀺𑀦𑁆𑀤𑀢𑀺. 𑀏𑀯𑀁 𑀲𑀦𑁆𑀢𑁂𑀢𑀺 𑀬𑀤𑀺 𑀩𑀳𑀼𑀲𑁄 𑀓𑀢𑁂𑀦 𑀧𑀸𑀧𑀓𑀫𑁆𑀫𑁂𑀦 𑀆𑀧𑀸𑀬𑀺𑀓𑁄, ‘‘𑀬𑁄 𑀓𑁄𑀘𑀺 𑀧𑀸𑀡𑀫𑀢𑀺𑀧𑀸𑀢𑁂𑀢𑀻’’𑀢𑀺𑀆𑀤𑀺𑀯𑀘𑀦𑀁 𑀫𑀺𑀘𑁆𑀙𑀸𑀢𑀺. 𑀘𑀢𑁆𑀢𑀸𑀭𑀺 𑀧𑀤𑀸𑀦𑀻𑀢𑀺 ‘‘𑀬𑁄 𑀓𑁄𑀘𑀺 𑀧𑀸𑀡𑀫𑀢𑀺𑀧𑀸𑀢𑁂𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸 𑀘𑀢𑁆𑀢𑀸𑀭𑁄 𑀅𑀢𑁆𑀣𑀓𑁄𑀝𑁆𑀞𑀸𑀲𑀸. 𑀤𑀺𑀝𑁆𑀞𑀺𑀬𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 ‘‘𑀅𑀢𑁆𑀣𑀺 𑀔𑁄 𑀧𑀦 𑀫𑀬𑀸’’𑀢𑀺𑀆𑀤𑀺𑀦𑀸 𑀅𑀬𑁄𑀦𑀺𑀲𑁄 𑀉𑀫𑁆𑀫𑀼𑀚𑁆𑀚𑀦𑁆𑀢𑀲𑁆𑀲. 𑀩𑀮𑀲𑀫𑁆𑀧𑀦𑁆𑀦𑁄𑀢𑀺 𑀲𑀫𑀢𑁆𑀣𑁄. 𑀲𑀗𑁆𑀔𑀥𑀫𑀓𑁄𑀢𑀺 𑀲𑀗𑁆𑀔𑀲𑁆𑀲 𑀥𑀫𑀦𑀓𑀺𑀘𑁆𑀘𑁂 𑀙𑁂𑀓𑁄. 𑀅𑀤𑀼𑀓𑁆𑀔𑁂𑀦𑀸𑀢𑀺 𑀲𑀼𑀔𑁂𑀦. 𑀉𑀧𑀘𑀸𑀭𑁄𑀧𑀺 𑀅𑀧𑁆𑀧𑀦𑀸𑀧𑀺 𑀯𑀝𑁆𑀝𑀢𑀺 𑀉𑀪𑀺𑀦𑁆𑀦𑀁 𑀲𑀸𑀫𑀜𑁆𑀜𑀯𑀘𑀦𑀪𑀸𑀯𑀢𑁄. 𑀅𑀧𑁆𑀧𑀫𑀸𑀡𑀓𑀢𑀪𑀸𑀯𑁄 𑀮𑀩𑁆𑀪𑀢𑁂𑀯. 𑀢𑀣𑀸 𑀳𑀺 𑀢𑀁 𑀓𑀺𑀮𑁂𑀲𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀲𑀫𑀢𑁆𑀣𑀢𑀸𑀬 𑀤𑀻𑀖𑀲𑀦𑁆𑀢𑀸𑀦𑀢𑀸𑀬 𑀯𑀺𑀧𑀼𑀮𑀨𑀮𑀢𑀸𑀬 𑀘 ‘‘𑀫𑀳𑀕𑁆𑀕𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀦 𑀑𑀳𑀻𑀬𑀢𑀻𑀢𑀺 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀓𑀸𑀫𑀸𑀯𑀘𑀭𑀓𑀫𑁆𑀫𑀁, 𑀫𑀳𑀕𑁆𑀕𑀢𑀓𑀫𑁆𑀫𑀜𑁆𑀘 𑀓𑀢𑀽𑀧𑀘𑀺𑀢𑀁 𑀯𑀺𑀧𑀸𑀓𑀤𑀸𑀦𑁂 𑀮𑀤𑁆𑀥𑀸𑀯𑀲𑀭𑀁 𑀳𑀼𑀢𑁆𑀯𑀸 𑀞𑀺𑀢𑀁, 𑀢𑁂𑀲𑀼 𑀓𑀸𑀫𑀸𑀯𑀘𑀭𑀓𑀫𑁆𑀫𑀁 𑀇𑀢𑀭𑀁 𑀦𑀻𑀳𑀭𑀺𑀢𑁆𑀯𑀸 𑀲𑀬𑀁 𑀢𑀢𑁆𑀣 𑀑𑀳𑀻𑀬𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀫𑀳𑀕𑁆𑀕𑀢𑀓𑀫𑁆𑀫𑀫𑁂𑀯 𑀧𑀦 𑀇𑀢𑀭𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀤𑀸𑀢𑀼𑀁 𑀲𑀓𑁆𑀓𑁄𑀢𑀺 𑀕𑀭𑀼𑀪𑀸𑀯𑀢𑁄. 𑀢𑁂𑀦𑀸𑀳 ‘‘𑀢𑀁 𑀓𑀸𑀫𑀸𑀯𑀘𑀭𑀓𑀫𑁆𑀫’’𑀦𑁆𑀢𑀺𑀆𑀤𑀺. 𑀓𑀺𑀮𑁂𑀲𑀯𑀲𑁂𑀦𑀸𑀢𑀺 𑀧𑀸𑀧𑀓𑀫𑁆𑀫𑀲𑁆𑀲 𑀫𑀽𑀮𑀪𑀽𑀢𑀓𑀺𑀮𑁂𑀲𑀯𑀲𑁂𑀦. 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀳𑀺 𑀤𑁄𑀲𑀫𑁄𑀳𑀮𑁄𑀪𑀸𑀤𑀺𑀫𑀽𑀮𑀓𑀺𑀮𑁂𑀲𑀲𑀫𑀼𑀝𑁆𑀞𑀸𑀦𑀸. 𑀓𑀺𑀮𑁂𑀲𑀯𑀲𑁂𑀦𑀸𑀢𑀺 𑀯𑀸 𑀓𑀫𑁆𑀫𑀓𑀺𑀮𑁂𑀲𑀯𑀲𑁂𑀦. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀧𑀸𑀡𑀸𑀢𑀺𑀧𑀸𑀢𑁄 𑀔𑁄, 𑀕𑀳𑀧𑀢𑀺𑀧𑀼𑀢𑁆𑀢, 𑀓𑀫𑁆𑀫𑀓𑀺𑀮𑁂𑀲𑁄’’𑀢𑀺𑀆𑀤𑀺 (𑀤𑀻. 𑀦𑀺. 𑁩.𑁨𑁪𑁫). 𑀬𑀣𑀸𑀦𑀼𑀲𑀦𑁆𑀥𑀺𑀦𑀸𑀯 𑀕𑀢𑀦𑁆𑀢𑀺 𑀬𑀣𑀸𑀦𑀼𑀲𑀦𑁆𑀥𑀺𑀲𑀗𑁆𑀔𑀸𑀢𑀅𑀦𑀼𑀲𑀦𑁆𑀥𑀺𑀦𑀸 ¶ 𑀑𑀲𑀸𑀦𑀁 𑀕𑀢𑀁 𑀲𑀁𑀓𑀺𑀮𑁂𑀲𑀲𑀫𑁆𑀫𑀼𑀔𑁂𑀦 𑀉𑀝𑁆𑀞𑀺𑀢𑀸𑀬 𑀯𑁄𑀤𑀸𑀦𑀥𑀫𑁆𑀫𑀯𑀲𑁂𑀦 𑀦𑀺𑀝𑁆𑀞𑀸𑀧𑀺𑀢𑀢𑁆𑀢𑀸.

𑀲𑀗𑁆𑀔𑀥𑀫𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀓𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬𑁧. 𑀏𑀯𑀁 𑀧𑀯𑀢𑁆𑀢𑀈𑀳𑀺𑀢𑀺𑀓𑀸𑀢𑀺 𑀏𑀯𑀁 𑀤𑁆𑀯𑀺𑀥𑀸 𑀧𑀯𑀢𑁆𑀢𑀈𑀳𑀺𑀢𑀺𑀓𑀸. 𑀤𑁆𑀯𑀻𑀳𑀺𑀢𑀺𑀓𑀸 𑀤𑀼𑀓𑁆𑀓𑀭𑀚𑀻𑀯𑀺𑀓𑀧𑀬𑁄𑀕𑀸. 𑀲𑀮𑀸𑀓𑀫𑀢𑁆𑀢𑀁 𑀯𑀼𑀢𑁆𑀢𑀁 𑀏𑀢𑁆𑀣𑀸𑀢𑀺 𑀲𑀮𑀸𑀓𑀸 𑀯𑀼𑀢𑁆𑀢𑀸, 𑀧𑀼𑀭𑀺𑀫𑀧𑀤𑁂 𑀉𑀢𑁆𑀢𑀭𑀧𑀤𑀮𑁄𑀧𑁄. 𑀉𑀪𑀢𑁄𑀓𑁄𑀝𑀺𑀓𑀦𑁆𑀢𑀺 𑀬𑀤𑀺 ‘‘𑀓𑀼𑀮𑀸𑀦𑀼𑀤𑀬𑀁 𑀦 𑀯𑀡𑁆𑀡𑁂𑀫𑀻’’𑀢𑀺 𑀯𑀤𑀢𑀺, ‘‘𑀪𑀽𑀢𑀸 𑀦𑀺𑀓𑁆𑀓𑀭𑀼𑀡𑀸 𑀲𑀫𑀡 𑀢𑀼𑀫𑁆𑀳𑁂’’𑀢𑀺 𑀯𑀸𑀤𑀁 𑀆𑀭𑁄𑀧𑁂𑀳𑀺. 𑀅𑀣 ¶ 𑀲𑀩𑁆𑀩𑀤𑀸𑀧𑀺 ‘‘𑀓𑀼𑀮𑀸𑀦𑀼𑀤𑀬𑀁 𑀯𑀡𑁆𑀡𑁂𑀫𑀻’’𑀢𑀺 𑀯𑀤𑀢𑀺. 𑀏𑀯𑀁 𑀲𑀦𑁆𑀢𑁂 ‘‘𑀓𑀲𑁆𑀫𑀸 𑀏𑀯𑀁 𑀤𑀼𑀩𑁆𑀪𑀺𑀓𑁆𑀔𑁂 𑀓𑀸𑀮𑁂 𑀫𑀳𑀢𑀺𑀬𑀸 𑀧𑀭𑀺𑀲𑀸𑀬 𑀧𑀭𑀺𑀯𑀼𑀢𑁄 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀦𑁆𑀢𑀸 𑀓𑀼𑀮𑀽𑀧𑀘𑁆𑀙𑁂𑀤𑀸𑀬 𑀧𑀝𑀺𑀧𑀚𑁆𑀚𑀣𑀸’’𑀢𑀺 𑀏𑀯𑀁 𑀉𑀪𑀢𑁄𑀓𑁄𑀝𑀺𑀓𑀁 𑀯𑀸𑀤𑀁 𑀆𑀭𑁄𑀧𑁂𑀳𑀻𑀢𑀺 𑀕𑀸𑀫𑀡𑀺𑀁 𑀉𑀬𑁆𑀬𑁄𑀚𑁂𑀲𑀺.

𑀤𑁆𑀯𑁂 𑀅𑀦𑁆𑀢𑁂𑀢𑀺 𑀉𑀪𑁄 𑀓𑁄𑀝𑀺𑀬𑁄. 𑀩𑀳𑀺 𑀦𑀻𑀳𑀭𑀺𑀢𑀼𑀦𑁆𑀢𑀺 𑀦 𑀯𑀡𑁆𑀡𑁂𑀫𑀺 𑀯𑀡𑁆𑀡𑁂𑀫𑀻𑀢𑀺 𑀤𑁆𑀯𑁂 𑀅𑀦𑁆𑀢𑁂 𑀫𑁄𑀘𑁂𑀦𑁆𑀢𑁄 𑀢𑀁 𑀧𑀼𑀘𑁆𑀙𑀺𑀢𑀫𑀢𑁆𑀣𑀁 𑀩𑀳𑀺 𑀦𑀻𑀳𑀭𑀢𑀺 𑀦𑀸𑀫. 𑀢𑀢𑁆𑀣 𑀤𑁄𑀲𑀁 𑀤𑀢𑁆𑀯𑀸 𑀘𑁄𑀤𑁂𑀦𑁆𑀢𑁄 𑀢𑀁 𑀅𑀧𑀼𑀘𑁆𑀙𑀁 𑀓𑀭𑁄𑀦𑁆𑀢𑁄 𑀕𑀺𑀮𑀺𑀢𑁆𑀯𑀸 𑀯𑀺𑀬 𑀅𑀦𑁆𑀢𑁄 𑀧𑀯𑁂𑀲𑁂𑀢𑀺 𑀦𑀸𑀫.

𑀇𑀢𑁄 𑀲𑁄 𑀕𑀸𑀫𑀡𑀻𑀢𑀺𑀆𑀤𑀺 𑀅𑀢𑁆𑀢𑀦𑁄 𑀪𑀺𑀓𑁆𑀔𑀽𑀦𑀁 𑀅𑀜𑁆𑀜𑁂𑀲𑀜𑁆𑀘 𑀅𑀢𑁆𑀣𑀓𑀸𑀫𑀸𑀦𑀁 𑀪𑀺𑀓𑁆𑀔𑀧𑁆𑀧𑀤𑀸𑀦𑁂𑀦 𑀅𑀦𑀺𑀝𑁆𑀞𑀧𑁆𑀧𑀢𑁆𑀢𑀺𑀅𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀆𑀭𑀤𑁆𑀥𑀁. 𑀤𑀸𑀦𑁂𑀦 𑀲𑀫𑁆𑀪𑀽𑀢𑀸𑀦𑀻𑀢𑀺 𑀤𑀸𑀦𑀫𑀬𑁂𑀦 𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼𑀦𑀸 𑀲𑀫𑁆𑀫𑀤𑁂𑀯 𑀪𑀽𑀢𑀺𑀁 𑀯𑀟𑁆𑀠𑀺𑀁 𑀧𑀢𑁆𑀢𑀸𑀦𑀺. 𑀲𑀘𑁆𑀘𑁂𑀦 𑀅𑀭𑀺𑀬𑀯𑁄𑀳𑀸𑀭𑁂𑀦 𑀲𑀫𑁆𑀫𑀤𑁂𑀯 𑀪𑀽𑀢𑀸𑀦𑀺 𑀉𑀧𑁆𑀧𑀦𑁆𑀦𑀸𑀦𑀺 𑀲𑀘𑁆𑀘𑀲𑀫𑁆𑀪𑀽𑀢𑀸𑀦𑀻𑀢𑀺 𑀆𑀳 ‘‘𑀲𑀘𑁆𑀘𑀁 𑀦𑀸𑀫 𑀲𑀘𑁆𑀘𑀯𑀸𑀤𑀺𑀢𑀸’’𑀢𑀺. 𑀲𑁂𑀲𑀲𑀻𑀮𑀦𑁆𑀢𑀺 𑀅𑀝𑁆𑀞𑀯𑀺𑀥𑀅𑀭𑀺𑀬𑀯𑁄𑀳𑀸𑀭𑀢𑁄 𑀅𑀜𑁆𑀜𑀲𑀻𑀮𑀁. 𑀦𑀺𑀳𑀺𑀢𑀦𑁆𑀢𑀺 𑀢𑀲𑁆𑀫𑀺𑀁 𑀓𑀼𑀮𑁂 𑀧𑀼𑀩𑁆𑀩𑀧𑀼𑀭𑀺𑀲𑁂𑀳𑀺 𑀦𑀺𑀥𑀸𑀦𑀪𑀸𑀯𑁂𑀦 𑀦𑀺𑀳𑀺𑀢𑀁. 𑀤𑀼𑀧𑁆𑀧𑀬𑀼𑀢𑁆𑀢𑀸𑀢𑀺 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀯𑀲𑁂𑀦 𑀤𑀼𑀝𑁆𑀞𑀼 𑀧𑀬𑀼𑀢𑁆𑀢𑀸 𑀓𑀫𑁆𑀫𑀦𑁆𑀢𑀸. 𑀯𑀺𑀧𑀚𑁆𑀚𑀦𑁆𑀢𑀻𑀢𑀺 𑀦𑀲𑁆𑀲𑀦𑁆𑀢𑀺. 𑀓𑀼𑀮𑀗𑁆𑀕𑀸𑀭𑁄𑀢𑀺 𑀓𑀼𑀮𑀲𑁆𑀲 𑀅𑀗𑁆𑀕𑀸𑀭𑀲𑀤𑀺𑀲𑁄 𑀯𑀺𑀦𑀸𑀲𑀓𑀧𑀼𑀕𑁆𑀕𑀮𑁄. 𑀅𑀦𑀺𑀘𑁆𑀘𑀢𑀸𑀢𑀺 𑀫𑀭𑀡𑀁. 𑀢𑀲𑁆𑀫𑀺𑀁 𑀓𑀼𑀮𑁂 𑀧𑀥𑀸𑀦𑀧𑀼𑀭𑀺𑀲𑀸𑀦𑀁 𑀪𑁄𑀕𑀸𑀦𑀁 𑀯𑀸 𑀲𑀩𑁆𑀩𑀲𑁄 𑀯𑀺𑀦𑀸𑀲𑁄. 𑀢𑁂𑀦𑀸𑀳 ‘‘𑀳𑀼𑀢𑁆𑀯𑀸 𑀅𑀪𑀸𑀯𑁄’’𑀢𑀺𑀆𑀤𑀺.

𑀓𑀼𑀮𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀫𑀡𑀺𑀘𑀽𑀴𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬𑁨. 𑀢𑀁 ¶ 𑀧𑀭𑀺𑀲𑀦𑁆𑀢𑀺 𑀢𑀁 𑀭𑀸𑀚𑀦𑁆𑀢𑁂𑀧𑀼𑀭𑁂 𑀦𑀺𑀲𑀺𑀦𑁆𑀦𑀁 𑀭𑀸𑀚𑀧𑀭𑀺𑀲𑀁. 𑀦𑀬𑀕𑁆𑀕𑀸𑀳𑁂𑀢𑀺 𑀓𑀼𑀢𑁄𑀘𑀺𑀧𑀺 𑀅𑀲𑀼𑀢𑁆𑀯𑀸 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀏𑀯 𑀫𑀢𑀺𑀬𑀸 𑀦𑀬𑀕𑁆𑀕𑀳𑀡𑁂 𑀞𑀢𑁆𑀯𑀸.

𑀓𑀸𑀭𑁂𑀢𑀼𑀁 𑀯𑀝𑁆𑀝𑀢𑀺 𑀲𑀢𑀺 𑀲𑀫𑁆𑀪𑀯𑁂 𑀧𑀝𑀺𑀲𑀗𑁆𑀔𑀸𑀭𑀲𑁆𑀲, 𑀲𑁂𑀦𑀸𑀲𑀦𑀯𑀺𑀦𑀸𑀲𑁄 𑀦 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀢𑁆𑀢𑀦𑁄 𑀏𑀢𑁆𑀣 𑀓𑀺𑀘𑁆𑀘𑀸𑀯𑀲𑀸𑀦𑁂 𑀬𑀁 𑀕𑀺𑀳𑀻𑀦𑀁𑀬𑁂𑀯 𑀲𑀦𑁆𑀢𑀓𑀁 𑀢𑀸𑀯𑀓𑀸𑀮𑀺𑀓𑀁, 𑀢𑀁 𑀕𑀺𑀳𑀺𑀯𑀺𑀓𑀢𑀦𑁆𑀢𑀺 𑀆𑀳 ‘‘𑀕𑀺𑀳𑀺𑀯𑀺𑀓𑀢𑀁 𑀓𑀢𑁆𑀯𑀸’’𑀢𑀺. 𑀦 𑀯𑀤𑀸𑀫𑀺 𑀧𑀩𑁆𑀩𑀚𑁆𑀚𑀺𑀢𑀸𑀲𑀸𑀭𑀼𑀧𑁆𑀧𑀢𑁄.

𑀫𑀡𑀺𑀘𑀽𑀴𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀪𑀤𑁆𑀭𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬𑁩. 𑀏𑀯𑀁𑀦𑀸𑀫𑀓𑁂𑀢𑀺 ¶ 𑀫𑀮𑁆𑀮𑀸 𑀦𑀸𑀫 𑀚𑀸𑀦𑀧𑀤𑀺𑀦𑁄 𑀭𑀸𑀚𑀓𑀼𑀫𑀸𑀭𑀸, 𑀦𑁂𑀲𑀁 𑀦𑀺𑀯𑀸𑀲𑀢𑀸𑀬 ‘‘𑀫𑀮𑁆𑀮𑀸’’𑀇𑀘𑁆𑀘𑁂𑀯 𑀩𑀳𑀼𑀯𑀘𑀦𑀯𑀲𑁂𑀦 𑀮𑀤𑁆𑀥𑀦𑀸𑀫𑀢𑁆𑀢𑀸 𑀏𑀯𑀁𑀦𑀸𑀫𑀓𑁂 𑀚𑀦𑀧𑀤𑁂. 𑀦𑀢𑁆𑀣𑀺 𑀏𑀢𑀲𑁆𑀲 𑀧𑀢𑁆𑀢𑀺𑀬𑀸 𑀓𑀸𑀮𑀦𑁆𑀢𑀭𑀲𑀜𑁆𑀜𑀺𑀢𑁄 𑀓𑀸𑀮𑁄𑀢𑀺 𑀅𑀓𑀸𑀮𑁄, 𑀲𑁄 𑀏𑀯 𑀅𑀓𑀸𑀮𑀺𑀓𑁄. 𑀢𑁂𑀦𑀸𑀳 𑁋 ‘‘𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀢𑁆𑀢𑁂𑀦𑀸’’𑀢𑀺. 𑀲𑁄 𑀧𑀦 ‘‘𑀬𑀁𑀓𑀺𑀜𑁆𑀘𑀺 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀲𑀩𑁆𑀩𑀁 𑀢𑀁 𑀙𑀦𑁆𑀤𑀫𑀽𑀮𑀓’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑁄 𑀤𑀼𑀓𑁆𑀔𑀲𑁆𑀲 𑀙𑀦𑁆𑀤𑀫𑀽𑀮𑀪𑀸𑀯𑁄, 𑀏𑀯𑀁 𑀙𑀦𑁆𑀤𑀫𑀽𑀮𑀓𑀲𑁆𑀲 𑀤𑀼𑀓𑁆𑀔𑀲𑁆𑀲 𑀓𑀣𑀺𑀢𑀢𑁆𑀢𑀸 ‘‘𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀤𑀼𑀓𑁆𑀔𑀁 𑀓𑀣𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀪𑀤𑁆𑀭𑀓𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀭𑀸𑀲𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬𑁪. 𑀭𑀸𑀲𑀺𑀁 𑀓𑀢𑁆𑀯𑀸 𑀫𑀸𑀭𑀧𑀸𑀲𑀯𑀲𑁂𑀦, 𑀢𑀢𑁆𑀭𑀸𑀧𑀺 𑀅𑀦𑁆𑀢𑀭𑀪𑁂𑀤𑁂𑀦 𑀯𑀺𑀪𑀚𑀺𑀢𑁆𑀯𑀸 𑀧𑀼𑀘𑁆𑀙𑀺𑀢𑀩𑁆𑀩𑀧𑀜𑁆𑀳𑁂 𑀏𑀓𑀢𑁄 𑀭𑀸𑀲𑀺𑀁 𑀓𑀢𑁆𑀯𑀸. 𑀢𑀧𑀦𑀁 𑀅𑀢𑁆𑀢𑀧𑀭𑀺𑀢𑀸𑀧𑀦𑀁 𑀢𑀧𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀢𑀧𑀲𑁆𑀲𑀻, 𑀢𑀁 𑀢𑀧𑀲𑁆𑀲𑀺𑀁. 𑀲𑁄 𑀧𑀦 𑀢𑀁 𑀢𑀧𑀁 𑀦𑀺𑀲𑁆𑀲𑀸𑀬 𑀞𑀺𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀢𑀧𑀦𑀺𑀲𑁆𑀲𑀺𑀢𑀓’’𑀦𑁆𑀢𑀺. 𑀲𑁄 𑀧𑀦 𑀅𑀦𑁂𑀓𑀸𑀓𑀸𑀭𑀪𑁂𑀤𑁂𑀦 𑀮𑀽𑀔𑀁 𑀨𑀭𑀼𑀲𑀁 𑀚𑀻𑀯𑀦𑀲𑀻𑀮𑀢𑁆𑀢𑀸 𑀮𑀽𑀔𑀚𑀻𑀯𑀻 𑀦𑀸𑀫. 𑀢𑁂𑀦𑀸𑀳 ‘‘𑀮𑀽𑀔𑀚𑀻𑀯𑀺𑀓’’𑀦𑁆𑀢𑀺. 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀉𑀧𑁆𑀧𑀣𑀪𑀸𑀯𑁂𑀦 𑀅𑀯𑀦𑀺𑀬𑀸 𑀕𑀦𑁆𑀥𑀩𑁆𑀩𑀸𑀢𑀺 𑀅𑀦𑁆𑀢𑀸, 𑀢𑀢𑁄 𑀏𑀯 𑀮𑀸𑀫𑀓𑀢𑁆𑀢𑀸 𑀅𑀦𑁆𑀢𑀸. 𑀮𑀸𑀫𑀓𑀫𑁆𑀧𑀺 ‘‘𑀅𑀦𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺 ‘‘𑀅𑀦𑁆𑀢𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀚𑀻𑀯𑀺𑀓𑀸𑀦𑀁 (𑀇𑀢𑀺𑀯𑀼. 𑁯𑁧; 𑀲𑀁. 𑀦𑀺. 𑁩.𑁮𑁦), 𑀏𑀓𑁄 𑀅𑀦𑁆𑀢𑁄’’𑀢𑀺 𑀏𑀯𑀫𑀸𑀤𑀻𑀲𑀼 (𑀲𑀁. 𑀦𑀺. 𑁨.𑁧𑁫; 𑁩.𑁯𑁦). 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀅𑀜𑁆𑀜𑀫𑀜𑁆𑀜𑀆𑀥𑀸𑀭𑀪𑀸𑀯𑀁 𑀉𑀭𑀻𑀓𑀢𑁆𑀯𑀸 ‘‘𑀓𑁄𑀝𑁆𑀞𑀸𑀲𑀸’’𑀢𑀺 𑀯𑀼𑀢𑁆𑀢𑀁. 𑀳𑀻𑀦𑁄 𑀕𑀸𑀫𑁄𑀢𑀺 𑀧𑀸𑀴𑀺. 𑀕𑀸𑀫-𑀲𑀤𑁆𑀤𑁄 ¶ 𑀳𑀻𑀦𑀧𑀭𑀺𑀬𑀸𑀬𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀕𑀸𑀫𑁆𑀫𑁄’’𑀢𑀺. 𑀕𑀸𑀫𑁂 𑀪𑀯𑁄𑀢𑀺 𑀕𑀸𑀫𑁆𑀫𑁄. 𑀕𑀸𑀫-𑀲𑀤𑁆𑀤𑁄 𑀘𑁂𑀢𑁆𑀣 𑀕𑀸𑀫𑀯𑀸𑀲𑀺𑀯𑀺𑀲𑀬𑁄 ‘‘𑀕𑀸𑀫𑁄 𑀆𑀕𑀢𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀕𑀸𑀫𑀯𑀸𑀲𑀻𑀦𑀁 𑀥𑀫𑁆𑀫𑁄’’𑀢𑀺 𑀯𑀼𑀢𑁆𑀢𑀁, 𑀢𑁂𑀲𑀁 𑀘𑀸𑀭𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀢𑁆𑀢-𑀲𑀤𑁆𑀤𑁄 𑀇𑀥 𑀲𑀭𑀻𑀭𑀧𑀭𑀺𑀬𑀸𑀬𑁄 ‘‘𑀅𑀢𑁆𑀢𑀦𑁆𑀢𑀧𑁄’’𑀢𑀺𑀆𑀤𑀻𑀲𑀼 𑀯𑀺𑀬𑀸𑀢𑀺 𑀆𑀳 ‘‘𑀲𑀭𑀻𑀭𑀤𑀼𑀓𑁆𑀔𑀓𑀭𑀡𑀦𑁆𑀢𑀺 𑀅𑀢𑁆𑀣𑁄’’𑀢𑀺.

𑀏𑀢𑁆𑀣𑀸𑀢𑀺 ¶ 𑀏𑀢𑀲𑁆𑀫𑀺𑀁 𑀢𑀧𑀦𑀺𑀲𑁆𑀲𑀺𑀢𑀕𑀭𑀳𑀺𑀢𑀩𑁆𑀩𑀧𑀤𑁂 𑀓𑀲𑁆𑀫𑀸 𑀅𑀦𑁆𑀢𑀤𑁆𑀯𑀬𑀫𑀚𑁆𑀛𑀺𑀫𑀧𑀝𑀺𑀧𑀤𑀸𑀕𑀳𑀡𑀁? 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄 𑀢𑀸𑀯 𑀕𑀬𑁆𑀳𑀢𑀼 𑀇𑀤𑀫𑀢𑁆𑀣𑀺𑀢𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀸𑀫𑀪𑁄𑀕𑀻𑀢𑀧𑀦𑀺𑀲𑁆𑀲𑀺𑀢𑀓𑀦𑀺𑀚𑁆𑀚𑀭𑀯𑀢𑁆𑀣𑀽𑀦𑀁 𑀤𑀲𑁆𑀲𑀦𑁂 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀪𑀚𑀺𑀢𑁆𑀯𑀸 𑀓𑀣𑀦𑀁 𑀲𑀫𑁆𑀪𑀯𑀢𑀻𑀢𑀺 𑀢𑁂 𑀤𑀲𑁆𑀲𑁂𑀢𑁆𑀯𑀸 𑀅𑀥𑀺𑀧𑁆𑀧𑁂𑀢𑀢𑁆𑀣𑁄 𑀓𑀣𑀺𑀢𑁄.

𑀢𑀫𑀢𑁆𑀣𑀦𑁆𑀢𑀺 𑀬𑁄 ‘‘𑀓𑀸𑀫𑀪𑁄𑀕𑀻𑀢𑀧𑀦𑀺𑀲𑁆𑀲𑀺𑀢𑀓𑁂𑀲𑀼 𑀕𑀭𑀳𑀺𑀢𑀩𑁆𑀩𑁂𑀬𑁂𑀯 𑀕𑀭𑀳𑀢𑀺, 𑀧𑀲𑀁𑀲𑀺𑀢𑀩𑁆𑀩𑁂𑀬𑁂𑀯 𑀘 𑀧𑀲𑀁𑀲𑀢𑀻’’𑀢𑀺 𑀯𑀼𑀢𑁆𑀢𑁄 𑀅𑀢𑁆𑀣𑁄, 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄. 𑀲𑀸𑀳𑀲𑀺𑀓𑀓𑀫𑁆𑀫𑁂𑀦𑀸𑀢𑀺 𑀅𑀬𑀼𑀢𑁆𑀢𑁂𑀦 𑀓𑀫𑁆𑀫𑁂𑀦. 𑀥𑀫𑁆𑀫𑁂𑀦 𑀘 𑀅𑀥𑀫𑁆𑀫𑁂𑀦 𑀘𑀸𑀢𑀺 𑀥𑀫𑁆𑀫𑀺𑀓𑁂𑀦 𑀅𑀥𑀫𑁆𑀫𑀺𑀓𑁂𑀦 𑀘. 𑀅𑀬𑁄𑀦𑀺𑀲𑁄 𑀧𑀯𑀢𑁆𑀢𑀁 𑀩𑀸𑀳𑀺𑀭𑀓𑀁 𑀲𑀦𑁆𑀥𑀸𑀬 𑀘𑁄𑀤𑀓𑁄 ‘‘𑀓𑀣’’𑀦𑁆𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 𑀦𑀬𑀺𑀤𑀁 𑀢𑀸𑀤𑀺𑀲𑀁 𑀅𑀢𑁆𑀢𑀧𑀭𑀺𑀢𑀸𑀧𑀦𑀁 𑀅𑀥𑀺𑀧𑁆𑀧𑁂𑀢𑀁, 𑀅𑀣 𑀔𑁄 𑀬𑁄𑀦𑀺𑀲𑁄 𑀧𑀯𑀢𑁆𑀢𑀁 𑀲𑀸𑀲𑀦𑀺𑀓𑀫𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀢𑀼𑀭𑀗𑁆𑀕𑀯𑀻𑀭𑀺𑀬𑀯𑀲𑁂𑀦 𑀘𑀸’’𑀢𑀺 𑀆𑀳. 𑀢𑀢𑁆𑀣 ‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘 𑀅𑀝𑁆𑀞𑀺 𑀘 𑀅𑀯𑀲𑀺𑀲𑁆𑀲𑀢𑀽’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁨.𑁧𑁮𑁪; 𑀲𑀁. 𑀦𑀺. 𑁨.𑁨𑁨.𑁨𑁩𑁭; 𑀅. 𑀦𑀺. 𑁨.𑁫) 𑀦𑀬𑁂𑀦 𑀯𑀼𑀢𑁆𑀢𑀸 𑀲𑀭𑀻𑀭𑁂𑀦𑀺𑀭𑀧𑁂𑀓𑁆𑀔𑀯𑀺𑀧𑀲𑁆𑀲𑀦𑀸𑀬 𑀉𑀲𑁆𑀲𑀼𑀓𑁆𑀓𑀸𑀧𑀦𑀯𑀲𑁂𑀦 𑀧𑀯𑀢𑁆𑀢𑀸 𑀯𑀻𑀭𑀺𑀬𑀪𑀸𑀯𑀦𑀸 ‘‘𑀘𑀢𑀼𑀭𑀗𑁆𑀕𑀯𑀻𑀭𑀺𑀬𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀸. 𑀢𑀣𑀸 𑀅𑀩𑁆𑀪𑁄𑀓𑀸𑀲𑀺𑀓𑀦𑁂𑀲𑀚𑁆𑀚𑀺𑀓𑀢𑀧𑀸𑀤𑀺𑀦𑀺𑀲𑁆𑀲𑀺𑀢𑀸𑀯 𑀓𑀺𑀮𑁂𑀲𑀦𑀺𑀫𑁆𑀫𑀣𑀦𑀬𑁄𑀕𑁆𑀬𑀸 𑀯𑀻𑀭𑀺𑀬𑀪𑀸𑀯𑀦𑀸 ‘‘𑀥𑀼𑀢𑀗𑁆𑀕𑀯𑀲𑁂𑀦 𑀘𑀸’’𑀢𑀺 𑀯𑀼𑀢𑁆𑀢𑀸𑀢𑀺. 𑀅𑀭𑀺𑀬𑀫𑀕𑁆𑀕𑁂𑀦 𑀦𑀺𑀲𑁆𑀲𑁂𑀲𑀓𑀺𑀮𑁂𑀲𑀸𑀦𑀁 𑀧𑀚𑀳𑀦𑀸 𑀦𑀺𑀚𑁆𑀚𑀭𑀸. 𑀲𑀸 𑀘 𑀅𑀢𑁆𑀢𑀧𑀘𑁆𑀘𑀓𑁆𑀔𑀢𑀸𑀬 𑀲𑀦𑁆𑀤𑀺𑀝𑁆𑀞𑀺𑀓𑀸 𑀢𑀺𑀡𑁆𑀡𑀁 𑀫𑀽𑀮𑀓𑀺𑀮𑁂𑀲𑀸𑀦𑀁 𑀧𑀚𑀳𑀦𑁂𑀦 ‘‘𑀢𑀺𑀲𑁆𑀲𑁄’’𑀢𑀺 𑀘 𑀯𑀼𑀢𑁆𑀢𑀸. 𑀢𑁂𑀦𑀸𑀳 ‘‘𑀏𑀓𑁄𑀧𑀻’’𑀢𑀺𑀆𑀤𑀺.

𑀭𑀸𑀲𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀧𑀸𑀝𑀮𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬𑁫. ‘‘𑀫𑀸𑀬𑀜𑁆𑀘𑀸𑀳𑀁 𑀧𑀚𑀸𑀦𑀸𑀫𑀻’’𑀢𑀺 𑀯𑀘𑀦𑀁 𑀓𑀸𑀫𑀁 𑀢𑁂𑀲𑀁 𑀫𑀸𑀬𑀸𑀯𑀻𑀪𑀸𑀯𑀤𑀲𑁆𑀲𑀦𑀧𑀭𑀁, 𑀪𑀕𑀯𑀢𑁄 𑀧𑀦 𑀫𑀸𑀬𑀸𑀲𑀸𑀞𑁂𑀬𑁆𑀬𑀸𑀤𑀺𑀓𑀲𑁆𑀲 𑀲𑀩𑁆𑀩𑀲𑁆𑀲 𑀧𑀸𑀧𑀥𑀫𑁆𑀫𑀲𑁆𑀲 𑀩𑁄𑀥𑀺𑀫𑀽𑀮𑁂 𑀏𑀯 𑀲𑁂𑀢𑀼𑀖𑀸𑀢𑁄, 𑀢𑀲𑁆𑀫𑀸 𑀲𑀩𑁆𑀩𑀲𑁄 𑀧𑀳𑀻𑀦𑀫𑀸𑀬𑁄, 𑀲𑀩𑁆𑀩𑀜𑁆𑀜𑀼𑀢𑀸𑀬 𑀫𑀸𑀬𑀁 𑀅𑀜𑁆𑀜𑁂 𑀘 𑀜𑁂𑀬𑁆𑀬𑁂 𑀲𑀩𑁆𑀩𑀲𑁄 𑀚𑀸𑀦𑀸𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀸𑀬𑀜𑁆𑀘𑀸𑀳𑀁, 𑀕𑀸𑀫𑀡𑀺, 𑀧𑀚𑀸𑀦𑀸𑀫𑀻’’𑀢𑀺𑀆𑀤𑀺. 𑀫𑀸𑀬𑀜𑁆𑀘 𑀧𑀚𑀸𑀦𑀸𑀫𑀻𑀢𑀺 𑀦 𑀓𑁂𑀯𑀮𑀫𑀳𑀁 𑀫𑀸𑀬𑀁 𑀏𑀯 𑀚𑀸𑀦𑀸𑀫𑀺, 𑀅𑀣 𑀔𑁄 𑀅𑀜𑁆𑀜𑀫𑁆𑀧𑀺 𑀇𑀤𑀜𑁆𑀘𑀺𑀤𑀜𑁆𑀘 𑀚𑀸𑀦𑀸𑀫𑀻𑀢𑀺.

𑀇𑀢𑁆𑀣𑀺𑀓𑀸𑀫𑁂𑀳𑀻𑀢𑀺 ¶ ¶ 𑀇𑀢𑁆𑀣𑀻𑀳𑀺 𑀘𑁂𑀯 𑀢𑀤𑀜𑁆𑀜𑀓𑀸𑀫𑁂𑀳𑀺 𑀘. 𑀏𑀓𑀲𑁆𑀫𑀺𑀁 𑀞𑀸𑀦𑁂𑀢𑀺 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂. 𑀏𑀓𑁂𑀓𑀲𑁆𑀲𑁂𑀯 𑀆𑀕𑀦𑁆𑀢𑀼𑀓𑀲𑁆𑀲 𑀕𑀳𑀝𑁆𑀞𑀲𑁆𑀲 𑀯𑀸 𑀧𑀩𑁆𑀩𑀚𑀺𑀢𑀲𑁆𑀲 𑀯𑀸. 𑀲𑀢𑁆𑀢𑀺𑀅𑀦𑀼𑀭𑀽𑀧𑁂𑀦𑀸𑀢𑀺 𑀯𑀺𑀪𑀯𑀲𑀢𑁆𑀢𑀺𑀅𑀦𑀼𑀭𑀽𑀧𑁂𑀦. 𑀩𑀮𑀸𑀦𑀼𑀭𑀽𑀧𑁂𑀦𑀸𑀢𑀺 𑀧𑀭𑀺𑀯𑀸𑀭𑀩𑀮𑀸𑀦𑀼𑀭𑀽𑀧𑁂𑀦. 𑀲𑀢𑁆𑀢𑀺𑀅𑀦𑀼𑀭𑀽𑀧𑁂𑀦𑀸𑀢𑀺 𑀯𑀸 𑀲𑀤𑁆𑀥𑀸𑀲𑀢𑁆𑀢𑀺𑀅𑀦𑀼𑀭𑀽𑀧𑁂𑀦. 𑀩𑀮𑀸𑀦𑀼𑀭𑀽𑀧𑁂𑀦𑀸𑀢𑀺 𑀯𑀺𑀪𑀯𑀩𑀮𑀸𑀦𑀼𑀭𑀽𑀧𑁂𑀦. 𑀥𑀫𑁆𑀫𑁂𑀲𑀼 𑀲𑀫𑀸𑀥𑀺 𑀤𑀲𑀓𑀼𑀲𑀮𑀥𑀫𑁆𑀫𑁂𑀲𑀼 𑀲𑀫𑀸𑀥𑀸𑀦𑀁. 𑀅𑀕𑁆𑀕𑀳𑀺𑀢𑀘𑀺𑀢𑁆𑀢𑀢𑀸 𑀧𑀭𑀺𑀬𑀼𑀝𑁆𑀞𑀓𑀸𑀭𑀺𑀢𑀸. 𑀢𑁂𑀦 𑀮𑁄𑀓𑀺𑀬𑀲𑀻𑀮𑀯𑀺𑀲𑀼𑀤𑁆𑀥𑀺 𑀤𑀺𑀝𑁆𑀞𑀺𑀯𑀺𑀲𑀼𑀤𑁆𑀥𑀺 𑀘 𑀯𑀼𑀢𑁆𑀢𑀸. 𑀢𑀣𑀸 𑀘𑀸𑀳 𑁋 ‘‘𑀓𑁄 𑀘𑀸𑀤𑀺 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁, 𑀲𑀻𑀮𑀜𑁆𑀘 𑀲𑀼𑀯𑀺𑀲𑀼𑀤𑁆𑀥𑀁 𑀤𑀺𑀝𑁆𑀞𑀺 𑀘 𑀉𑀚𑀼𑀓𑀸’’𑀢𑀺 (𑀲𑀁. 𑀦𑀺. 𑁫.𑁩𑁬𑁯). 𑀢𑀢𑁆𑀣 𑀧𑀢𑀺𑀝𑁆𑀞𑀺𑀢𑀲𑁆𑀲 𑀉𑀧𑀭𑀺 𑀓𑀢𑁆𑀢𑀩𑁆𑀩𑀁 𑀤𑀲𑁆𑀲𑁂𑀢𑀼𑀁 ‘‘𑀥𑀫𑁆𑀫𑀲𑀫𑀸𑀥𑀺𑀲𑁆𑀫𑀺𑀁 𑀞𑀺𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀁 𑀧𑀝𑀺𑀧𑀤𑀸𑀢𑀺 𑀢𑀲𑁆𑀲 𑀓𑀫𑁆𑀫𑀨𑀮𑀯𑀸𑀤𑀺𑀦𑁄 𑀲𑀢𑁆𑀣𑀼 𑀯𑀘𑀦𑀁 𑀲𑀩𑁆𑀩𑁂𑀲𑀜𑁆𑀘 𑀅𑀬𑀁 𑀫𑀬𑁆𑀳𑀁 𑀲𑀻𑀮𑀲𑀁𑀯𑀭𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀸𑀲𑀗𑁆𑀔𑀸𑀢𑀸𑀧𑀝𑀺𑀧𑀤𑀸 𑀅𑀦𑀧𑀭𑀸𑀥𑀓𑀢𑀸𑀬 𑀏𑀯 𑀲𑀁𑀯𑀢𑁆𑀢𑀢𑀺. 𑀚𑀬𑀕𑁆𑀕𑀸𑀳𑁄𑀢𑀺 𑀉𑀪𑀬𑀣𑀸𑀧𑀺 𑀫𑀬𑁆𑀳𑀁 𑀓𑀸𑀘𑀺 𑀚𑀸𑀦𑀺 𑀦𑀢𑁆𑀣𑀺.

𑀧𑀜𑁆𑀘 𑀥𑀫𑁆𑀫𑀸 𑀥𑀫𑁆𑀫𑀲𑀫𑀸𑀥𑀺 𑀦𑀸𑀫, 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀥𑀫𑁆𑀫𑀫𑀢𑁆𑀢𑀁 𑀯𑀸. 𑀢𑀢𑀺𑀬𑀯𑀺𑀓𑀧𑁆𑀧𑁂 𑀲𑀻𑀮𑀸𑀤𑀺𑀯𑀺𑀲𑀼𑀤𑁆𑀥𑀺𑀬𑀸 𑀲𑀤𑁆𑀥𑀺𑀁 𑀩𑁆𑀭𑀳𑁆𑀫𑀯𑀺𑀳𑀸𑀭𑀸 𑀬𑀣𑀸𑀯𑀼𑀢𑁆𑀢𑀢𑀺𑀯𑀺𑀥𑀥𑀫𑁆𑀫𑀸𑀯𑀳𑀢𑁆𑀢𑀸 𑀏𑀯 𑀥𑀫𑁆𑀫𑀲𑀫𑀸𑀥𑀺 𑀦𑀸𑀫. 𑀧𑀽𑀭𑁂𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀢𑀺 𑀯𑀼𑀢𑁆𑀢𑀔𑀡𑀺𑀓𑀘𑀺𑀢𑁆𑀢𑁂𑀓𑀕𑁆𑀕𑀢𑀸. 𑀲𑀸𑀧𑀺 𑀘𑀺𑀢𑁆𑀢𑀲𑁆𑀲 𑀲𑀫𑀸𑀥𑀸𑀦𑀢𑁄 ‘‘𑀘𑀺𑀢𑁆𑀢𑀲𑀫𑀸𑀥𑀻’’𑀢𑀺 𑀯𑀼𑀢𑁆𑀢𑀸, 𑀢𑀲𑁆𑀲 𑀧𑀝𑀺𑀧𑀓𑁆𑀔𑀁 𑀯𑀺𑀓𑁆𑀔𑀫𑁆𑀪𑀦𑁆𑀢𑀻 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀻 𑀘 𑀳𑀼𑀢𑁆𑀯𑀸 𑀧𑀯𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀲𑀫𑀸𑀥𑀺 𑀏𑀯 𑀯𑀺𑀲𑁂𑀲𑁂𑀦 𑀘𑀺𑀢𑁆𑀢𑀲𑀫𑀸𑀥𑀺 𑀦𑀸𑀫.

𑀧𑀸𑀝𑀮𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀕𑀸𑀫𑀡𑀺𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀅𑀲𑀗𑁆𑀔𑀢𑀲𑀁𑀬𑀼𑀢𑁆𑀢𑀁

𑁧. 𑀧𑀞𑀫𑀯𑀕𑁆𑀕𑁄

𑁧-𑁧𑁧. 𑀓𑀸𑀬𑀕𑀢𑀸𑀲𑀢𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁬𑁬-𑁩𑁭𑁬. 𑀅𑀲𑀗𑁆𑀔𑀢𑀦𑁆𑀢𑀺 ¶ ¶ 𑀦 𑀲𑀗𑁆𑀔𑀢𑀁 𑀳𑁂𑀢𑀼𑀧𑀘𑁆𑀘𑀬𑁂𑀢𑀺. 𑀢𑁂𑀦𑀸𑀳 ‘‘𑀅𑀓𑀢’’𑀦𑁆𑀢𑀺. 𑀳𑀺𑀢𑀁 𑀏𑀲𑀦𑁆𑀢𑁂𑀦𑀸𑀢𑀺 𑀫𑁂𑀢𑁆𑀢𑀸𑀬𑀦𑁆𑀢𑁂𑀦. 𑀅𑀦𑀼𑀓𑀫𑁆𑀧𑀫𑀸𑀦𑁂𑀦𑀸𑀢𑀺 𑀓𑀭𑀼𑀡𑀸𑀬𑀦𑁆𑀢𑁂𑀦. 𑀉𑀧𑀸𑀤𑀸𑀬𑀸𑀢𑀺 𑀆𑀤𑀺𑀬𑀺𑀢𑁆𑀯𑀸𑀢𑀺 𑀅𑀬𑀫𑀢𑁆𑀣𑁄𑀢𑀺𑀆𑀳 ‘‘𑀘𑀺𑀢𑁆𑀢𑁂𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸’’𑀢𑀺. 𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑀸𑀢𑀺 𑀅𑀯𑀺𑀧𑀭𑀻𑀢𑀥𑀫𑁆𑀫𑀲𑁆𑀲 𑀤𑁂𑀲𑀦𑀸, 𑀧𑀝𑀺𑀧𑀢𑁆𑀢𑀺𑀫𑁆𑀧𑀺 𑀲𑀸𑀯𑀓𑀸 𑀯𑀺𑀬 𑀕𑀭𑀼𑀓𑁄 𑀪𑀕𑀯𑀸. 𑀤𑀸𑀬𑀚𑁆𑀚𑀁 𑀅𑀢𑁆𑀢𑀦𑁄 𑀅𑀥𑀺𑀝𑁆𑀞𑀺𑀢𑀁 𑀦𑀺𑀬𑁆𑀬𑀸𑀢𑁂𑀢𑀺.

𑀪𑀺𑀓𑁆𑀔𑀸𑀲𑀫𑁆𑀧𑀢𑁆𑀢𑀺𑀓𑀸𑀮𑀸𑀤𑀻𑀦𑀁 𑀲𑀢𑁆𑀢𑀦𑁆𑀦𑀁 𑀲𑀧𑁆𑀧𑀸𑀬𑀸𑀦𑀁 𑀲𑀫𑁆𑀧𑀢𑁆𑀢𑀺𑀬𑀸 𑀮𑀩𑁆𑀪𑀦𑀓𑀸𑀮𑁂. 𑀯𑀺𑀧𑀢𑁆𑀢𑀺𑀓𑀸𑀮𑁂 𑀧𑀦 𑀏𑀢𑁆𑀣 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀪𑀸𑀭𑀺𑀬𑀦𑁆𑀢𑀺 𑀤𑀼𑀓𑁆𑀔𑀩𑀳𑀼𑀮𑀢𑀸𑀬 𑀤𑀸𑀭𑀼𑀡𑀁. 𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑀸 𑀮𑀤𑁆𑀥𑀩𑁆𑀩𑀸. 𑀢𑀼𑀫𑁆𑀳𑀸𑀓𑀁 𑀅𑀦𑀼𑀲𑀸𑀲𑀦𑀻𑀢𑀺 𑀢𑀼𑀫𑁆𑀳𑀸𑀓𑀁 𑀤𑀸𑀢𑀩𑁆𑀩𑀸 𑀅𑀦𑀼𑀲𑀸𑀲𑀦𑀻.

𑀓𑀸𑀬𑀕𑀢𑀸𑀲𑀢𑀺𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁨𑁩-𑁩𑁩. 𑀅𑀲𑀗𑁆𑀔𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁭𑁭-𑁪𑁦𑁯. 𑀢𑀢𑁆𑀣 𑀘 𑀦𑀢𑁆𑀣𑀺 𑀏𑀢𑁆𑀣 𑀢𑀡𑁆𑀳𑀸𑀲𑀗𑁆𑀔𑀸𑀢𑀁 𑀦𑀢𑀁, 𑀦𑀢𑁆𑀣𑀺 𑀏𑀢𑀲𑁆𑀫𑀺𑀁 𑀯𑀸 𑀅𑀥𑀺𑀕𑀢𑁂 𑀧𑀼𑀕𑁆𑀕𑀮𑀪𑀸𑀯𑁄𑀢𑀺 𑀅𑀦𑀢𑀁. 𑀅𑀦𑀸𑀲𑀯𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀘𑁆𑀘𑀥𑀫𑁆𑀫𑀢𑀸𑀬 𑀲𑀘𑁆𑀘𑀁. 𑀯𑀝𑁆𑀝𑀤𑀼𑀓𑁆𑀔𑀢𑁄 𑀧𑀸𑀭𑀫𑁂𑀢𑀻𑀢𑀺 𑀧𑀸𑀭𑀁. 𑀲𑀡𑁆𑀳𑀝𑁆𑀞𑁂𑀦𑀸𑀢𑀺 𑀲𑀼𑀔𑀼𑀫𑀝𑁆𑀞𑁂𑀦 𑀦𑀺𑀧𑀼𑀡𑀁. 𑀢𑀢𑁄 𑀏𑀯 𑀤𑀼𑀤𑁆𑀤𑀲𑀢𑀸𑀬. 𑀅𑀚𑀚𑁆𑀚𑀭𑀁 𑀦𑀺𑀘𑁆𑀘𑀲𑀪𑀸𑀯𑀢𑁆𑀢𑀸. 𑀦𑀢𑁆𑀣𑀺 𑀏𑀢𑀲𑁆𑀲 𑀦𑀺𑀤𑀲𑁆𑀲𑀦𑀦𑁆𑀢𑀺 𑀯𑀸 𑀅𑀦𑀺𑀤𑀲𑁆𑀲𑀦𑀁. 𑀏𑀢𑀲𑁆𑀫𑀺𑀁 𑀅𑀥𑀺𑀕𑀢𑁂 𑀦𑀢𑁆𑀣𑀺 𑀲𑀁𑀲𑀸𑀭𑁂. 𑀧𑀧𑀜𑁆𑀘𑀦𑁆𑀢𑀺 𑀯𑀸 𑀦𑀺𑀧𑁆𑀧𑀧𑀜𑁆𑀘𑀁.

𑀏𑀢𑀲𑁆𑀫𑀺𑀁 ¶ ¶ 𑀅𑀥𑀺𑀕𑀢𑁂 𑀧𑀼𑀕𑁆𑀕𑀮𑀲𑁆𑀲 𑀫𑀭𑀡𑀁 𑀦𑀢𑁆𑀣𑀻𑀢𑀺 𑀯𑀸 𑀅𑀫𑀢𑀁. 𑀅𑀢𑀧𑁆𑀧𑀓𑀝𑁆𑀞𑁂𑀦 𑀯𑀸 𑀧𑀡𑀻𑀢𑀁. 𑀲𑀼𑀔𑀳𑁂𑀢𑀼𑀢𑀸𑀬 𑀯𑀸 𑀲𑀺𑀯𑀁. 𑀢𑀡𑁆𑀳𑀸 𑀔𑀻𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀢𑀡𑁆𑀳𑀓𑁆𑀔𑀬𑀁.

𑀅𑀜𑁆𑀜𑀲𑁆𑀲 𑀢𑀸𑀤𑀺𑀲𑀲𑁆𑀲 𑀅𑀪𑀸𑀯𑀢𑁄 𑀯𑀺𑀫𑁆𑀳𑀸𑀧𑀦𑀻𑀬𑀢𑀸𑀬 𑀅𑀪𑀽𑀢𑀫𑁂𑀯𑀸𑀢𑀺. 𑀓𑀼𑀢𑁄𑀘𑀺 𑀧𑀘𑁆𑀘𑀬𑀢𑁄 𑀅𑀦𑀺𑀩𑁆𑀩𑀢𑁆𑀢𑀫𑁂𑀯 𑀳𑀼𑀢𑁆𑀯𑀸 𑀪𑀽𑀢𑀁 𑀯𑀺𑀚𑁆𑀚𑀫𑀸𑀦𑀁. 𑀢𑁂𑀦𑀸𑀳 ‘‘𑀅𑀚𑀸𑀢𑀁 𑀳𑀼𑀢𑁆𑀯𑀸 𑀅𑀢𑁆𑀣𑀻’’𑀢𑀺. 𑀦𑀢𑁆𑀣𑀺 𑀏𑀢𑁆𑀣 𑀤𑀼𑀓𑁆𑀔𑀦𑁆𑀢𑀺 𑀦𑀺𑀤𑁆𑀤𑀼𑀓𑁆𑀔𑀁, 𑀢𑀲𑁆𑀲 𑀪𑀸𑀯𑁄 𑀦𑀺𑀤𑁆𑀤𑀼𑀓𑁆𑀔𑀢𑁆𑀢𑀁. 𑀢𑀲𑁆𑀫𑀸 𑀅𑀦𑀻𑀢𑀺𑀓𑀁 𑀈𑀢𑀺𑀭𑀳𑀺𑀢𑀁. 𑀯𑀸𑀦𑀁 𑀯𑀼𑀘𑁆𑀘𑀢𑀺 𑀢𑀡𑁆𑀳𑀸, 𑀢𑀤𑀪𑀸𑀯𑁂𑀦 𑀦𑀺𑀩𑁆𑀩𑀸𑀦𑀁. 𑀩𑁆𑀬𑀸𑀩𑀚𑁆𑀛𑀁 𑀯𑀼𑀘𑁆𑀘𑀢𑀺 𑀤𑀼𑀓𑁆𑀔𑀁, 𑀢𑀤𑀪𑀸𑀯𑁂𑀦 𑀅𑀩𑁆𑀬𑀸𑀩𑀚𑁆𑀛𑀁. 𑀧𑀭𑀫𑀢𑁆𑀣𑀢𑁄 𑀲𑀘𑁆𑀘𑀢𑁄 𑀲𑀼𑀤𑁆𑀥𑀺𑀪𑀸𑀯𑁂𑀦. 𑀓𑀸𑀫𑀸 𑀏𑀯 𑀧𑀼𑀣𑀼𑀚𑁆𑀚𑀦𑁂𑀳𑀺 𑀅𑀮𑁆𑀮𑀻𑀬𑀺𑀢𑀩𑁆𑀩𑀢𑁄 𑀆𑀮𑀬𑀸. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀧𑀢𑀺𑀝𑁆𑀞𑀝𑁆𑀞𑁂𑀦𑀸𑀢𑀺 𑀧𑀢𑀺𑀝𑁆𑀞𑀸𑀪𑀸𑀯𑁂𑀦 𑀯𑀝𑁆𑀝𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀺𑀢𑀼𑀓𑀸𑀫𑀸𑀦𑀁 𑀤𑀻𑀧𑀲𑀤𑀺𑀲𑀁 𑀑𑀖𑁂𑀳𑀺 𑀅𑀦𑀚𑁆𑀛𑁄𑀢𑁆𑀣𑀭𑀡𑀻𑀬𑀢𑁆𑀢𑀸. 𑀅𑀮𑁆𑀮𑀻𑀬𑀺𑀢𑀩𑁆𑀩𑀬𑀼𑀢𑁆𑀢𑀝𑁆𑀞𑁂𑀦𑀸𑀢𑀺 𑀅𑀮𑁆𑀮𑀻𑀬𑀺𑀢𑀼𑀁 𑀅𑀭𑀳𑀪𑀸𑀯𑀢𑁄. 𑀢𑀸𑀬𑀦𑀝𑁆𑀞𑁂𑀦𑀸𑀢𑀺 𑀲𑀧𑀭𑀢𑀸𑀬𑀦𑀝𑁆𑀞𑁂𑀦. 𑀪𑀬𑀲𑀭𑀡𑀝𑁆𑀞𑁂𑀦𑀸𑀢𑀺 𑀪𑀬𑀲𑁆𑀲 𑀳𑀺𑀁𑀲𑀦𑀝𑁆𑀞𑁂𑀦. 𑀲𑁂𑀝𑁆𑀞𑀁 𑀉𑀢𑁆𑀢𑀫𑀁. 𑀕𑀢𑀻𑀢𑀺 𑀕𑀦𑁆𑀥𑀩𑁆𑀩𑀝𑁆𑀞𑀸𑀦𑀁.

𑀅𑀲𑀗𑁆𑀔𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀲𑀗𑁆𑀔𑀢𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀅𑀩𑁆𑀬𑀸𑀓𑀢𑀲𑀁𑀬𑀼𑀢𑁆𑀢𑀁

𑁧. 𑀔𑁂𑀫𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧𑁦. 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 ¶ ¶ 𑀉𑀧𑀸𑀲𑀺𑀓𑀸𑀢𑀺 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀑𑀭𑁄𑀥𑀪𑀽𑀢𑀸 𑀉𑀧𑀸𑀲𑀺𑀓𑀸. 𑀧𑀡𑁆𑀟𑀺𑀘𑁆𑀘𑀁 𑀲𑀺𑀓𑁆𑀔𑀺𑀢𑀪𑀸𑀯𑁂𑀦. 𑀯𑁂𑀬𑁆𑀬𑀢𑁆𑀢𑀺𑀬𑀁 𑀯𑀺𑀲𑀸𑀭𑀤𑀪𑀸𑀯𑁂𑀦. 𑀯𑀺𑀲𑀸𑀭𑀤𑀸 𑀦𑀸𑀫 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀲𑀺𑀤𑁆𑀥𑀲𑀸𑀪𑀸𑀯𑀺𑀓𑀧𑀜𑁆𑀜𑀸, 𑀢𑀸𑀬 𑀲𑀫𑀦𑁆𑀦𑀸𑀕𑀢𑀸.

𑀅𑀘𑁆𑀙𑀺𑀤𑁆𑀤𑀓𑀕𑀡𑀦𑀸𑀬 𑀓𑀼𑀲𑀮𑁄𑀢𑀺 𑀦𑀯𑀦𑁆𑀢𑀕𑀡𑀦𑀸𑀬 𑀓𑀼𑀲𑀮𑁄. 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀸𑀬 𑀕𑀡𑀦𑀸𑀬 𑀓𑀼𑀲𑀮𑁄𑀢𑀺 𑀅𑀗𑁆𑀕𑀼𑀮𑀺𑀓𑀸𑀬 𑀏𑀯 𑀕𑀡𑀦𑀸𑀬 𑀓𑀼𑀲𑀮𑁄 𑀲𑁂𑀬𑁆𑀬𑀣𑀸𑀧𑀺 𑀧𑀸𑀤𑀲𑀺𑀓𑀸. 𑀧𑀺𑀡𑁆𑀟𑀕𑀡𑀦𑀸𑀬𑀸𑀢𑀺 𑀲𑀗𑁆𑀓𑀮𑀦𑀧𑀝𑀼𑀧𑁆𑀧𑀦𑁆𑀦𑀓𑀸𑀭𑀺𑀦𑁄 𑀧𑀺𑀡𑁆𑀟𑀯𑀲𑁂𑀦 𑀕𑀡𑀦𑀸. 𑀢𑀣𑀸𑀕𑀢𑁄𑀢𑀺 𑀔𑀻𑀡𑀸𑀲𑀯𑁄, 𑀢𑀣𑀸𑀕𑀢𑀁 𑀲𑀦𑁆𑀥𑀸𑀬 𑀧𑀼𑀘𑁆𑀙𑀢𑀻𑀢𑀺 𑀔𑀻𑀡𑀸𑀲𑀯𑁄𑀢𑀺 𑀘𑀲𑁆𑀲 𑀅𑀭𑀳𑀢𑁆𑀢𑀨𑀮𑀯𑀲𑀺𑀪𑀸𑀯𑀺𑀢𑀔𑀦𑁆𑀥𑁂 𑀉𑀧𑀸𑀤𑀸𑀬 𑀅𑀬𑀁 𑀧𑀜𑁆𑀜𑀢𑁆𑀢𑀺 𑀳𑁄𑀢𑀺. 𑀢𑁂𑀲𑀼 𑀔𑀦𑁆𑀥𑁂𑀲𑀼 𑀲𑀢𑀺 𑀔𑀻𑀡𑀸𑀲𑀯𑀸 𑀲𑀢𑁆𑀢𑀲𑀗𑁆𑀔𑀸𑀢𑀸 𑀳𑁄𑀦𑁆𑀢𑀻𑀢𑀺 𑀯𑁄𑀳𑀸𑀭𑁂𑀦 𑀧𑀜𑁆𑀜𑀧𑁂𑀢𑀼𑀁 𑀲𑀓𑁆𑀓𑀸 𑀪𑀯𑁂𑀬𑁆𑀬, 𑀅𑀲𑀦𑁆𑀢𑁂𑀲𑀼 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀧𑀭𑀁 𑀫𑀭𑀡𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑁂𑀲𑀁 𑀅𑀪𑀸𑀯𑀸 ‘‘𑀅𑀩𑁆𑀬𑀸𑀓𑀢𑀫𑁂𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 𑀢𑁂𑀲𑀁 𑀅𑀪𑀸𑀯𑀢𑁄 ‘‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’’𑀢𑀺 𑀧𑀼𑀝𑁆𑀞𑀸𑀬 ‘‘𑀆𑀫𑀸’’𑀢𑀺 𑀧𑀝𑀺𑀚𑀸𑀦𑀺𑀢𑀩𑁆𑀩𑀸 𑀲𑀺𑀬𑀸, 𑀢𑀁 𑀧𑀦 𑀲𑀢𑁆𑀢𑀲𑀗𑁆𑀔𑀸𑀢𑀲𑁆𑀲 𑀧𑀼𑀘𑁆𑀙𑀺𑀢𑀢𑁆𑀢𑀸 𑀦 𑀧𑀝𑀺𑀜𑁆𑀜𑀸𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑁂𑀦 𑀭𑀽𑀧𑁂𑀦𑀸𑀢𑀺 𑀲𑀢𑁆𑀢𑀢𑀣𑀸𑀕𑀢𑁂 𑀯𑀼𑀢𑁆𑀢𑀭𑀽𑀧𑀁 𑀲𑀩𑁆𑀩𑀜𑁆𑀜𑀼𑀢𑀣𑀸𑀕𑀢𑁂 𑀧𑀝𑀺𑀓𑁆𑀔𑀺𑀧𑀺𑀢𑀼𑀁 ‘‘𑀢𑀁 𑀭𑀽𑀧’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀁 𑀉𑀧𑀸𑀤𑀸𑀬𑀸𑀢𑀺 𑀬𑀁 𑀔𑀦𑁆𑀥𑀧𑀜𑁆𑀘𑀓𑀁 𑀉𑀧𑀸𑀤𑀸𑀬. 𑀢𑀤𑀪𑀸𑀯𑁂𑀦𑀸𑀢𑀺 𑀢𑀲𑁆𑀲 𑀔𑀦𑁆𑀥𑀧𑀜𑁆𑀘𑀓𑀲𑁆𑀲 𑀅𑀪𑀸𑀯𑁂𑀦. 𑀢𑀲𑁆𑀲𑀸 𑀧𑀜𑁆𑀜𑀢𑁆𑀢𑀺𑀬𑀸𑀢𑀺 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀬𑀸 𑀅𑀪𑀸𑀯𑀁. 𑀦𑀺𑀭𑀼𑀤𑁆𑀥𑀁 𑀦 𑀦𑀺𑀤𑀲𑁆𑀲𑁂𑀢𑀺.

𑀔𑁂𑀫𑀸𑀬 𑀣𑁂𑀭𑀺𑀬𑀸 𑀯𑀼𑀢𑁆𑀢𑀁 𑀧𑀞𑀫𑀁 𑀲𑀼𑀢𑁆𑀢𑀁 𑀪𑀕𑀯𑀢𑁄 𑀲𑁂𑀝𑁆𑀞𑀢𑁆𑀣𑀤𑀻𑀧𑀦𑀢𑁄 𑀅𑀕𑁆𑀕𑀧𑀤𑀸𑀯𑀘𑀭𑀁𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀕𑁆𑀕𑀧𑀤𑀲𑁆𑀫𑀺’’𑀦𑁆𑀢𑀺.

𑀔𑁂𑀫𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀦𑀼𑀭𑀸𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧𑁧. 𑀇𑀥 𑀲𑀴𑀸𑀬𑀢𑀦𑀯𑀕𑁆𑀕𑁂 𑀲𑀗𑁆𑀕𑀸𑀬𑀦𑀯𑀲𑁂𑀦 𑀲𑀗𑁆𑀕𑀻𑀢𑀺𑀓𑀸𑀭𑁂𑀳𑀺 𑀯𑀼𑀢𑁆𑀢𑀁.

𑁩-𑁮. 𑀧𑀞𑀫𑀲𑀸𑀭𑀺𑀧𑀼𑀢𑁆𑀢𑀓𑁄𑀝𑁆𑀞𑀺𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁧𑁨-𑁪𑁧𑁭. 𑀭𑀽𑀧𑀫𑀢𑁆𑀢𑀦𑁆𑀢𑀺 ¶ ¶ 𑀏𑀢𑁆𑀣 𑀫𑀢𑁆𑀢-𑀲𑀤𑁆𑀤𑁄 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄. 𑀓𑁄 𑀧𑀦 𑀲𑁄 𑀯𑀺𑀲𑁂𑀲𑁄𑀢𑀺? 𑀬𑁄 𑀩𑀸𑀳𑀺𑀭𑀧𑀭𑀺𑀓𑀧𑁆𑀧𑀺𑀢𑁄 𑀇𑀥 𑀢𑀣𑀸𑀕𑀢𑁄𑀢𑀺 𑀯𑀼𑀘𑁆𑀘𑀫𑀸𑀦𑁄 𑀅𑀢𑁆𑀢𑀸. 𑀅𑀦𑀼𑀧𑀮𑀩𑁆𑀪𑀺𑀬𑀲𑀪𑀸𑀯𑁄𑀢𑀺 𑀅𑀦𑀼𑀧𑀮𑀩𑁆𑀪𑀺𑀬𑀢𑁆𑀢𑀸.

𑀧𑀞𑀫𑀲𑀸𑀭𑀺𑀧𑀼𑀢𑁆𑀢𑀓𑁄𑀝𑁆𑀞𑀺𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀓𑀼𑀢𑀽𑀳𑀮𑀲𑀸𑀮𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧𑁮. 𑀦𑀸𑀦𑀸𑀯𑀺𑀥𑀦𑁆𑀢𑀺 𑀢𑀁𑀢𑀁𑀤𑀺𑀝𑁆𑀞𑀺𑀯𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀁 𑀅𑀜𑁆𑀜𑀫𑁆𑀧𑀺 𑀯𑀸 𑀦𑀸𑀦𑀸𑀯𑀺𑀥𑀁 𑀢𑀺𑀭𑀘𑁆𑀙𑀸𑀦𑀓𑀣𑀁. 𑀩𑀳𑀽𑀦𑀁 𑀓𑀼𑀢𑀽𑀳𑀮𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑁄𑀢𑀺 𑀬𑁄𑀚𑀦𑀸. 𑀬𑀸𑀯 𑀆𑀪𑀲𑁆𑀲𑀭𑀩𑁆𑀭𑀳𑁆𑀫𑀮𑁄𑀓𑀸 𑀕𑀘𑁆𑀙𑀢𑀻𑀢𑀺 𑀅𑀕𑁆𑀕𑀺𑀦𑀸 𑀓𑀧𑁆𑀧𑀯𑀼𑀝𑁆𑀞𑀸𑀦𑀓𑀸𑀮𑁂 𑀕𑀘𑁆𑀙𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀫𑀜𑁆𑀘 𑀓𑀸𑀬𑀦𑁆𑀢𑀺 𑀇𑀫𑀁 𑀭𑀽𑀧𑀓𑀸𑀬𑀁. 𑀘𑀼𑀢𑀺𑀘𑀺𑀢𑁆𑀢𑁂𑀦 𑀦𑀺𑀓𑁆𑀔𑀺𑀧𑀢𑀻𑀢𑀺 𑀘𑀼𑀢𑀺𑀘𑀺𑀢𑁆𑀢𑁂𑀦 𑀪𑀺𑀚𑁆𑀚𑀫𑀸𑀦𑁂𑀦 𑀦𑀺𑀓𑁆𑀔𑀺𑀧𑀢𑀺. 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀳𑀺 𑀑𑀭𑀁 𑀲𑀢𑁆𑀢𑀭𑀲𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀓𑀫𑁆𑀫𑀚𑀭𑀽𑀧𑀁 𑀘𑀼𑀢𑀺𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀢𑀺, 𑀢𑀢𑁄 𑀧𑀭𑀁 𑀓𑀫𑁆𑀫𑀚𑀭𑀽𑀧𑀁 𑀦 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀺 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀫𑀭𑀡𑀁 𑀦 𑀲𑀺𑀬𑀸, 𑀘𑀼𑀢𑀺𑀘𑀺𑀢𑁆𑀢𑀁 𑀭𑀽𑀧𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀆𑀳𑀸𑀭𑀚𑀲𑁆𑀲 𑀘 𑀅𑀲𑀫𑁆𑀪𑀯𑁄 𑀏𑀯, 𑀉𑀢𑀼𑀚𑀁 𑀧𑀦 𑀯𑀢𑁆𑀢𑀢𑁂𑀯. 𑀬𑀲𑁆𑀫𑀸 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀲𑀢𑁆𑀢𑁄 𑀅𑀜𑁆𑀜𑀢𑀭𑀡𑀸𑀬 𑀉𑀧𑀧𑀚𑁆𑀚𑀢𑀺 𑀦𑀸𑀫, 𑀘𑀼𑀢𑀺𑀓𑁆𑀔𑀡𑁂 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀅𑀮𑀤𑁆𑀥𑀁 𑀅𑀜𑁆𑀜𑀢𑀭𑀡𑀸𑀬, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀘𑀼𑀢𑀺𑀓𑁆𑀔𑀡𑁂…𑀧𑁂… 𑀳𑁄𑀢𑀻’’𑀢𑀺.

𑀓𑀼𑀢𑀽𑀳𑀮𑀲𑀸𑀮𑀸𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧𑁯. 𑀢𑁂𑀲𑀁 𑀮𑀤𑁆𑀥𑀺𑀬𑀸𑀢𑀺 𑀢𑁂𑀲𑀁 𑀲𑀲𑁆𑀲𑀢𑀯𑀸𑀤𑀸𑀦𑀁 𑀮𑀤𑁆𑀥𑀺𑀬𑀸 𑀲𑀤𑁆𑀥𑀺𑀁 𑀏𑀢𑀁 ‘‘𑀅𑀢𑁆𑀣𑀢𑁆𑀢𑀸’’𑀢𑀺 𑀯𑀘𑀦𑀁 𑀏𑀓𑀁 𑀅𑀪𑀯𑀺𑀲𑁆𑀲. 𑀢𑀢𑁄 𑀏𑀯 𑀅𑀦𑀼𑀮𑁄𑀫𑀁 𑀢𑀁 𑀦𑀸𑀪𑀯𑀺𑀲𑁆𑀲 𑀜𑀸𑀡𑀲𑁆𑀲𑀸𑀢𑀺 𑀅𑀲𑀸𑀭𑀁 𑀏𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑀺 𑀦𑀼 𑀫𑁂𑀢𑀲𑁆𑀲𑀸𑀢𑀺 𑀫𑁂 𑀏𑀢𑀲𑁆𑀲 𑀅𑀦𑀢𑁆𑀢𑀸𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀅𑀦𑀼𑀮𑁄𑀫𑀁 𑀅𑀧𑀺 𑀦𑀼 𑀅𑀪𑀯𑀺𑀲𑁆𑀲, 𑀯𑀺𑀮𑁄𑀫𑀓𑀫𑁂𑀯 𑀢𑀲𑁆𑀲 𑀲𑀺𑀬𑀸𑀢𑀺 𑀅𑀢𑁆𑀣𑁄.

𑀆𑀦𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀲𑀪𑀺𑀬𑀓𑀘𑁆𑀘𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁨𑁦. 𑀬𑀲𑁆𑀲𑀧’𑀲𑁆𑀲𑀸𑀢𑀺 ¶ ¶ 𑀧𑀸𑀞𑀲𑁆𑀲 𑀅𑀬𑀁 𑀧𑀺𑀡𑁆𑀟𑀢𑁆𑀣𑁄 ‘‘𑀆𑀯𑀼𑀲𑁄’’𑀢𑀺𑀆𑀤𑀺. 𑀢𑀢𑁆𑀣𑀸𑀬𑀁 𑀲𑀫𑁆𑀩𑀦𑁆𑀥𑁄 𑁋 𑀆𑀯𑀼𑀲𑁄, 𑀬𑀲𑁆𑀲𑀧𑀺 𑀧𑀼𑀕𑁆𑀕𑀮𑀲𑁆𑀲 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀯𑀼𑀝𑁆𑀞𑁄, 𑀏𑀢𑁆𑀢𑀓𑁂𑀦 𑀓𑀸𑀮𑁂𑀦 ‘‘𑀳𑁂𑀢𑀼𑀫𑁆𑀳𑀺 𑀲𑀢𑀺 𑀭𑀽𑀧𑀻𑀢𑀺𑀆𑀤𑀺𑀧𑀜𑁆𑀜𑀸𑀧𑀦𑀸 𑀳𑁄𑀢𑀺, 𑀅𑀲𑀢𑀺 𑀦 𑀳𑁄𑀢𑀻’’𑀢𑀺 𑀏𑀢𑁆𑀢𑀓𑀁 𑀩𑁆𑀬𑀸𑀓𑀭𑀡𑀁 𑀪𑀯𑁂𑀬𑁆𑀬, 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀏𑀢𑁆𑀢𑀓𑀫𑁂𑀯 𑀩𑀳𑀼, 𑀓𑁄 𑀧𑀦 𑀯𑀸𑀤𑁄 𑀅𑀢𑀺𑀓𑁆𑀓𑀦𑁆𑀢𑁂! 𑀇𑀢𑁄 𑀅𑀢𑀺𑀓𑁆𑀓𑀦𑁆𑀢𑁂 𑀥𑀫𑁆𑀫𑀤𑁂𑀲𑀦𑀸𑀦𑀬𑁂 𑀯𑀸𑀤𑁄𑀬𑁂𑀯 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀣𑁂𑀭𑀲𑁆𑀲 𑀧𑀜𑁆𑀳𑀩𑁆𑀬𑀸𑀓𑀭𑀡𑀁 𑀲𑀼𑀢𑁆𑀯𑀸 𑀧𑀭𑀺𑀩𑁆𑀩𑀸𑀚𑀓𑁄 𑀧𑀻𑀢𑀺𑀲𑁄𑀫𑀦𑀲𑁆𑀲𑀁 𑀧𑀯𑁂𑀤𑁂𑀲𑀺.

𑀲𑀪𑀺𑀬𑀓𑀘𑁆𑀘𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀩𑁆𑀬𑀸𑀓𑀢𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀲𑀴𑀸𑀬𑀢𑀦𑀯𑀕𑁆𑀕𑀯𑀡𑁆𑀡𑀦𑀸𑀬 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.