📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂

𑀫𑀳𑀸𑀯𑀕𑁆𑀕-𑀅𑀝𑁆𑀞𑀓𑀣𑀸

𑁧. 𑀫𑀕𑁆𑀕𑀲𑀁𑀬𑀼𑀢𑁆𑀢𑀁

𑁧. 𑀅𑀯𑀺𑀚𑁆𑀚𑀸𑀯𑀕𑁆𑀕𑁄

𑁧-𑁨. 𑀅𑀯𑀺𑀚𑁆𑀚𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧-𑁨. 𑀫𑀳𑀸𑀯𑀕𑁆𑀕𑀲𑁆𑀲 𑀧𑀞𑀫𑁂 𑀧𑀼𑀩𑁆𑀩𑀗𑁆𑀕𑀫𑀸𑀢𑀺 𑀲𑀳𑀚𑀸𑀢𑀯𑀲𑁂𑀦 𑀘 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀘𑀸𑀢𑀺 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀧𑀼𑀩𑁆𑀩𑀗𑁆𑀕𑀫𑀸. 𑀲𑀫𑀸𑀧𑀢𑁆𑀢𑀺𑀬𑀸𑀢𑀺 𑀲𑀫𑀸𑀧𑀚𑁆𑀚𑀦𑀸𑀬 𑀲𑀪𑀸𑀯𑀧𑀝𑀺𑀮𑀸𑀪𑀸𑀬, 𑀉𑀧𑁆𑀧𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄. 𑀅𑀦𑁆𑀯𑀤𑁂𑀯 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀦𑁆𑀢𑀺 𑀲𑀸 𑀧𑀦𑁂𑀲𑀸 𑀬𑀤𑁂𑀢𑀁 𑀅𑀮𑀚𑁆𑀚𑀦𑀸𑀓𑀸𑀭𑀲𑀡𑁆𑀞𑀺𑀓𑀁 𑀅𑀳𑀺𑀭𑀺𑀓𑀁, 𑀅𑀪𑀸𑀬𑀦𑀸𑀓𑀸𑀭𑀲𑀡𑁆𑀞𑀺𑀢𑀜𑁆𑀘 𑀅𑀦𑁄𑀢𑁆𑀢𑀧𑁆𑀧𑀁, 𑀏𑀢𑀁 𑀅𑀦𑀼𑀤𑁂𑀯 𑀲𑀳𑁂𑀯 𑀏𑀓𑀢𑁄𑀯, 𑀦 𑀯𑀺𑀦𑀸 𑀢𑁂𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀸𑀕𑀢𑀲𑁆𑀲𑀸𑀢𑀺 𑀅𑀯𑀺𑀚𑁆𑀚𑀸𑀬 𑀉𑀧𑀕𑀢𑀲𑁆𑀲 𑀲𑀫𑀦𑁆𑀦𑀸𑀕𑀢𑀲𑁆𑀲. 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀅𑀬𑀸𑀣𑀸𑀯𑀤𑀺𑀝𑁆𑀞𑀺 𑀅𑀦𑀺𑀬𑁆𑀬𑀸𑀦𑀺𑀓𑀤𑀺𑀝𑁆𑀞𑀺. 𑀧𑀳𑁄𑀢𑀻𑀢𑀺 𑀳𑁄𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀤𑀻𑀲𑀼𑀧𑀺 𑀅𑀬𑀸𑀣𑀸𑀯𑀅𑀦𑀺𑀬𑁆𑀬𑀸𑀦𑀺𑀓𑀯𑀲𑁂𑀦𑁂𑀯 𑀫𑀺𑀘𑁆𑀙𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀇𑀫𑀸𑀦𑀺 𑀅𑀝𑁆𑀞𑀧𑀺 𑀅𑀓𑀼𑀲𑀮𑀥𑀫𑁆𑀫𑀲𑀫𑀸𑀧𑀢𑁆𑀢𑀺𑀬𑀸 𑀫𑀺𑀘𑁆𑀙𑀢𑁆𑀢𑀅𑀗𑁆𑀕𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀢𑀸𑀦𑀺 𑀧𑀦 𑀦 𑀏𑀓𑀓𑁆𑀔𑀡𑁂 𑀲𑀩𑁆𑀩𑀸𑀦𑀺 𑀮𑀩𑁆𑀪𑀦𑁆𑀢𑀺, 𑀦𑀸𑀦𑀓𑁆𑀔𑀡𑁂 𑀮𑀩𑁆𑀪𑀦𑁆𑀢𑀺.

𑀓𑀣𑀁? 𑀬𑀤𑀸 𑀳𑀺 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀁 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑁄 𑀫𑀺𑀘𑁆𑀙𑀸𑀯𑀸𑀬𑀸𑀫𑁄 𑀫𑀺𑀘𑁆𑀙𑀸𑀲𑀢𑀺 𑀫𑀺𑀘𑁆𑀙𑀸𑀲𑀫𑀸𑀥𑀺 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑁄𑀢𑀺 𑀙 𑀅𑀗𑁆𑀕𑀸𑀦𑀺 𑀳𑁄𑀦𑁆𑀢𑀺. 𑀬𑀤𑀸 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀁, 𑀢𑀤𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀚𑁆𑀚𑀸𑀦𑀺 𑀧𑀜𑁆𑀘. 𑀬𑀤𑀸 𑀢𑀸𑀦𑁂𑀯 𑀤𑁆𑀯𑁂 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀁 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺, 𑀢𑀤𑀸 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀝𑁆𑀞𑀸𑀦𑁂 𑀫𑀺𑀘𑁆𑀙𑀸𑀯𑀸𑀘𑀸𑀬 𑀲𑀤𑁆𑀥𑀺𑀁 𑀢𑀸𑀦𑁂𑀯 𑀙 𑀯𑀸 𑀧𑀜𑁆𑀘 𑀯𑀸. 𑀅𑀬𑀁 𑀆𑀚𑀻𑀯𑁄 𑀦𑀸𑀫 𑀓𑀼𑀧𑁆𑀧𑀫𑀸𑀦𑁄 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼𑀬𑁂𑀯 𑀅𑀜𑁆𑀜𑀢𑀭𑀲𑁆𑀫𑀺𑀁 𑀓𑀼𑀧𑁆𑀧𑀢𑀺, 𑀦 𑀫𑀦𑁄𑀤𑁆𑀯𑀸𑀭𑁂. 𑀢𑀲𑁆𑀫𑀸 𑀬𑀤𑀸 𑀆𑀚𑀻𑀯𑀲𑀻𑀲𑁂𑀦 𑀢𑀸𑀦𑁂𑀯 𑀘𑀺𑀢𑁆𑀢𑀸𑀦𑀺 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑁄 𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀺, 𑀢𑀤𑀸 𑀓𑀸𑀬𑀓𑀫𑁆𑀫𑀁 𑀫𑀺𑀘𑁆𑀙𑀸𑀚𑀻𑀯𑁄 𑀦𑀸𑀫 𑀳𑁄𑀢𑀺, 𑀢𑀣𑀸 𑀯𑀘𑀻𑀓𑀫𑁆𑀫𑀦𑁆𑀢𑀺 𑀫𑀺𑀘𑁆𑀙𑀸𑀚𑀻𑀯𑀲𑁆𑀲 𑀯𑀲𑁂𑀦 𑀢𑀸𑀦𑁂𑀯 𑀙 𑀯𑀸 𑀧𑀜𑁆𑀘 𑀯𑀸. 𑀬𑀤𑀸 𑀧𑀦 𑀯𑀺𑀜𑁆𑀜𑀢𑁆𑀢𑀺𑀁 𑀅𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀢𑀸𑀦𑀺 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀤𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀫𑀺𑀘𑁆𑀙𑀸𑀯𑀸𑀬𑀸𑀫𑀫𑀺𑀘𑁆𑀙𑀸𑀲𑀢𑀺𑀫𑀺𑀘𑁆𑀙𑀸𑀲𑀫𑀸𑀥𑀺𑀯𑀲𑁂𑀦 𑀧𑀜𑁆𑀘 𑀯𑀸, 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀤𑀺𑀯𑀲𑁂𑀦 𑀘𑀢𑁆𑀢𑀸𑀭𑀺 𑀯𑀸 𑀳𑁄𑀦𑁆𑀢𑀻𑀢𑀺 𑀏𑀯𑀁 𑀦 𑀏𑀓𑀓𑁆𑀔𑀡𑁂 𑀲𑀩𑁆𑀩𑀸𑀦𑀺 𑀮𑀩𑁆𑀪𑀦𑁆𑀢𑀺, 𑀦𑀸𑀦𑀓𑁆𑀔𑀡𑁂 𑀮𑀩𑁆𑀪𑀦𑁆𑀢𑀻𑀢𑀺.

𑀲𑀼𑀓𑁆𑀓𑀧𑀓𑁆𑀔𑁂 𑀯𑀺𑀚𑁆𑀚𑀸𑀢𑀺 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀁. 𑀇𑀳𑀸𑀧𑀺 𑀲𑀳𑀚𑀸𑀢𑀯𑀲𑁂𑀦 𑀘 𑀉𑀧𑀦𑀺𑀲𑁆𑀲𑀬𑀯𑀲𑁂𑀦 𑀘𑀸𑀢𑀺 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀧𑀼𑀩𑁆𑀩𑀗𑁆𑀕𑀫𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀳𑀺𑀭𑁄𑀢𑁆𑀢𑀧𑁆𑀧𑀦𑁆𑀢𑀺 𑀳𑀺𑀭𑀻 𑀘 𑀑𑀢𑁆𑀢𑀧𑁆𑀧𑀜𑁆𑀘. 𑀢𑀢𑁆𑀣 𑀮𑀚𑁆𑀚𑀦𑀸𑀓𑀸𑀭𑀲𑀡𑁆𑀞𑀺𑀢𑀸 𑀳𑀺𑀭𑀻, 𑀪𑀸𑀬𑀦𑀸𑀓𑀸𑀭𑀲𑀡𑁆𑀞𑀺𑀢𑀁 𑀑𑀢𑁆𑀢𑀧𑁆𑀧𑀁. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀢𑁆𑀢𑁄𑀯. 𑀯𑀺𑀚𑁆𑀚𑀸𑀕𑀢𑀲𑁆𑀲𑀸𑀢𑀺 𑀯𑀺𑀚𑁆𑀚𑀸𑀬 𑀉𑀧𑀕𑀢𑀲𑁆𑀲 𑀲𑀫𑀦𑁆𑀦𑀸𑀕𑀢𑀲𑁆𑀲. 𑀯𑀺𑀤𑁆𑀤𑀲𑀼𑀦𑁄𑀢𑀺 𑀯𑀺𑀤𑀼𑀦𑁄 𑀧𑀡𑁆𑀟𑀺𑀢𑀲𑁆𑀲. 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀬𑀸𑀣𑀸𑀯𑀤𑀺𑀝𑁆𑀞𑀺 𑀦𑀺𑀬𑁆𑀬𑀸𑀦𑀺𑀓𑀤𑀺𑀝𑁆𑀞𑀺. 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀓𑀼𑀲𑀮𑀥𑀫𑁆𑀫𑀲𑀫𑀸𑀧𑀢𑁆𑀢𑀺𑀬𑀸 𑀇𑀫𑀸𑀦𑀺 𑀅𑀝𑁆𑀞𑀗𑁆𑀕𑀸𑀦𑀺 𑀳𑁄𑀦𑁆𑀢𑀺, 𑀢𑀸𑀦𑀺 𑀮𑁄𑀓𑀺𑀬𑀫𑀕𑁆𑀕𑀓𑁆𑀔𑀡𑁂 𑀦 𑀏𑀓𑀢𑁄 𑀲𑀩𑁆𑀩𑀸𑀦𑀺 𑀮𑀩𑁆𑀪𑀦𑁆𑀢𑀺, 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀧𑀦 𑀮𑀩𑁆𑀪𑀦𑁆𑀢𑀺. 𑀢𑀸𑀦𑀺 𑀘 𑀔𑁄 𑀧𑀞𑀫𑀚𑁆𑀛𑀸𑀦𑀺𑀓𑀫𑀕𑁆𑀕𑁂, 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀸𑀤𑀻𑀲𑀼 𑀧𑀦 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀯𑀚𑁆𑀚𑀸𑀦𑀺 𑀲𑀢𑁆𑀢𑁂𑀯 𑀳𑁄𑀦𑁆𑀢𑀺.

𑀢𑀢𑁆𑀣 𑀬𑁄 𑀏𑀯𑀁 𑀯𑀤𑁂𑀬𑁆𑀬 ‘‘𑀬𑀲𑁆𑀫𑀸 𑀫𑀚𑁆𑀛𑀺𑀫𑀦𑀺𑀓𑀸𑀬𑀫𑁆𑀳𑀺 𑀫𑀳𑀸𑀲𑀴𑀸𑀬𑀢𑀦𑀺𑀓𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁪𑁩𑁧) ‘𑀬𑀸 𑀢𑀣𑀸𑀪𑀽𑀢𑀲𑁆𑀲 𑀤𑀺𑀝𑁆𑀞𑀺, 𑀲𑀸𑀲𑁆𑀲 𑀳𑁄𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀬𑁄 𑀢𑀣𑀸𑀪𑀽𑀢𑀲𑁆𑀲, 𑀲𑀗𑁆𑀓𑀧𑁆𑀧𑁄, 𑀲𑁆𑀯𑀸𑀲𑁆𑀲 𑀳𑁄𑀢𑀺 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄. 𑀬𑁄 𑀢𑀣𑀸𑀪𑀽𑀢𑀲𑁆𑀲 𑀯𑀸𑀬𑀸𑀫𑁄, 𑀲𑁆𑀯𑀸𑀲𑁆𑀲 𑀳𑁄𑀢𑀺 𑀲𑀫𑁆𑀫𑀸𑀯𑀸𑀬𑀸𑀫𑁄. 𑀬𑀸 𑀢𑀣𑀸𑀪𑀽𑀢𑀲𑁆𑀲 𑀲𑀢𑀺, 𑀲𑁆𑀯𑀸𑀲𑁆𑀲 𑀳𑁄𑀢𑀺 𑀲𑀫𑁆𑀫𑀸𑀲𑀢𑀺. 𑀬𑁄 𑀢𑀣𑀸𑀪𑀽𑀢𑀲𑁆𑀲 𑀲𑀫𑀸𑀥𑀺, 𑀲𑁆𑀯𑀸𑀲𑁆𑀲 𑀳𑁄𑀢𑀺 𑀲𑀫𑁆𑀫𑀸𑀲𑀫𑀸𑀥𑀺. 𑀧𑀼𑀩𑁆𑀩𑁂𑀯 𑀔𑁄 𑀧𑀦𑀲𑁆𑀲 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀁 𑀆𑀚𑀻𑀯𑁄 𑀘 𑀲𑀼𑀧𑀭𑀺𑀲𑀼𑀤𑁆𑀥𑁄’𑀢𑀺 𑀯𑀼𑀢𑁆𑀢𑀁 𑀢𑀲𑁆𑀫𑀸 𑀧𑀜𑁆𑀘𑀗𑁆𑀕𑀺𑀓𑁄𑀧𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀳𑁄𑀢𑀻’’𑀢𑀺 𑀲𑁄 𑀯𑀢𑁆𑀢𑀩𑁆𑀩𑁄 𑁋 𑀢𑀲𑁆𑀫𑀺𑀁𑀬𑁂𑀯 𑀲𑀼𑀢𑁆𑀢𑁂 ‘‘𑀏𑀯𑀫𑀲𑁆𑀲𑀸𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀻’’𑀢𑀺 𑀇𑀤𑀁 𑀓𑀲𑁆𑀫𑀸 𑀦 𑀧𑀲𑁆𑀲𑀲𑀺? 𑀬𑀁 𑀧𑀦𑁂𑀢𑀁 ‘‘𑀧𑀼𑀩𑁆𑀩𑁂𑀯 𑀔𑁄 𑀧𑀦𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀧𑀭𑀺𑀲𑀼𑀤𑁆𑀥𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀳𑀺 𑀧𑀭𑀺𑀲𑀼𑀤𑁆𑀥𑀸𑀦𑀺 𑀓𑀸𑀬𑀓𑀫𑁆𑀫𑀸𑀤𑀻𑀦𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀅𑀢𑀺𑀧𑀭𑀺𑀲𑀼𑀤𑁆𑀥𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀬𑀫𑀢𑁆𑀣𑁄 𑀤𑀻𑀧𑀺𑀢𑁄.

𑀬𑀫𑁆𑀧𑀺 𑀅𑀪𑀺𑀥𑀫𑁆𑀫𑁂 𑀯𑀼𑀢𑁆𑀢𑀁 ‘‘𑀢𑀲𑁆𑀫𑀺𑀁 𑀔𑁄 𑀧𑀦 𑀲𑀫𑀬𑁂 𑀧𑀜𑁆𑀘𑀗𑁆𑀕𑀺𑀓𑁄 𑀫𑀕𑁆𑀕𑁄 𑀳𑁄𑀢𑀻’’𑀢𑀺 (𑀯𑀺𑀪. 𑁨𑁧𑁨), 𑀢𑀁 𑀏𑀓𑀁 𑀓𑀺𑀘𑁆𑀘𑀦𑁆𑀢𑀭𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀬𑀲𑁆𑀫𑀺𑀜𑁆𑀳𑀺 𑀓𑀸𑀮𑁂 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀁 𑀧𑀳𑀸𑀬 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀁 𑀧𑀽𑀭𑁂𑀢𑀺, 𑀢𑀲𑁆𑀫𑀺𑀁 𑀓𑀸𑀮𑁂 𑀫𑀺𑀘𑁆𑀙𑀸𑀯𑀸𑀘𑀸 𑀯𑀸 𑀫𑀺𑀘𑁆𑀙𑀸𑀚𑀻𑀯𑁄 𑀯𑀸 𑀦 𑀳𑁄𑀢𑀺, 𑀤𑀺𑀝𑁆𑀞𑀺 𑀲𑀗𑁆𑀓𑀧𑁆𑀧𑁄 𑀯𑀸𑀬𑀸𑀫𑁄 𑀲𑀢𑀺 𑀲𑀫𑀸𑀥𑀻𑀢𑀺 𑀇𑀫𑁂𑀲𑀼𑀬𑁂𑀯 𑀧𑀜𑁆𑀘𑀲𑀼 𑀓𑀸𑀭𑀓𑀗𑁆𑀕𑁂𑀲𑀼 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀧𑀽𑀭𑀢𑀺. 𑀯𑀺𑀭𑀢𑀺𑀯𑀲𑁂𑀦 𑀳𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀧𑀽𑀭𑀢𑀺 𑀦𑀸𑀫. 𑀲𑀫𑁆𑀫𑀸𑀯𑀸𑀘𑀸𑀲𑀫𑁆𑀫𑀸𑀆𑀚𑀻𑀯𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀢𑀺 𑀇𑀫𑀁 𑀓𑀺𑀘𑁆𑀘𑀦𑁆𑀢𑀭𑀁 𑀤𑀲𑁆𑀲𑁂𑀢𑀼𑀁 𑀏𑀯𑀁 𑀯𑀼𑀢𑁆𑀢𑀁. 𑀮𑁄𑀓𑀺𑀬𑀫𑀕𑁆𑀕𑀓𑁆𑀔𑀡𑁂 𑀘 𑀧𑀜𑁆𑀘𑁂𑀯 𑀳𑁄𑀦𑁆𑀢𑀺, 𑀯𑀺𑀭𑀢𑀺 𑀧𑀦 𑀅𑀦𑀺𑀬𑀢𑀸. 𑀢𑀲𑁆𑀫𑀸 ‘‘𑀙𑀅𑀗𑁆𑀕𑀺𑀓𑁄’’𑀢𑀺 𑀅𑀯𑀢𑁆𑀯𑀸 ‘‘𑀧𑀜𑁆𑀘𑀗𑁆𑀕𑀺𑀓𑁄’’𑀢𑁆𑀯𑁂𑀯 𑀯𑀼𑀢𑁆𑀢𑀁. ‘‘𑀬𑀸 𑀘, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀘𑀺𑀢𑁆𑀢𑀲𑁆𑀲 𑀅𑀦𑀸𑀲𑀯𑀘𑀺𑀢𑁆𑀢𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑀫𑀗𑁆𑀕𑀺𑀦𑁄 𑀅𑀭𑀺𑀬𑀫𑀕𑁆𑀕𑀁 𑀪𑀸𑀯𑀬𑀢𑁄 𑀢𑀻𑀳𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀳𑀺 𑀆𑀭𑀢𑀺 𑀯𑀺𑀭𑀢𑀺 𑀧𑀝𑀺𑀯𑀺𑀭𑀢𑀺 𑀯𑁂𑀭𑀫𑀡𑀻 𑀅𑀓𑀺𑀭𑀺𑀬𑀸 𑀅𑀓𑀭𑀡𑀁, 𑀅𑀬𑀁 𑀪𑀺𑀓𑁆𑀔𑀯𑁂 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀅𑀭𑀺𑀬𑁄 𑀅𑀦𑀸𑀲𑀯𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄’’𑀢𑀺 (𑀫. 𑀦𑀺. 𑁩.𑁧𑁩𑁯). 𑀏𑀯𑀁 𑀧𑀦 𑀫𑀳𑀸𑀘𑀢𑁆𑀢𑀸𑀮𑀻𑀲𑀓𑀲𑀼𑀢𑁆𑀢𑀸𑀤𑀻𑀲𑀼 𑀅𑀦𑁂𑀓𑁂𑀲𑀼 𑀲𑀼𑀢𑁆𑀢𑁂𑀲𑀼 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀸𑀤𑀻𑀦𑀜𑁆𑀘 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑁆𑀲 𑀅𑀗𑁆𑀕𑀪𑀸𑀯𑀲𑀺𑀤𑁆𑀥𑀺𑀢𑁄 𑀅𑀝𑁆𑀞𑀗𑁆𑀕𑀺𑀓𑁄𑀯 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀬𑀁 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑁄𑀯 𑀓𑀣𑀺𑀢𑁄. 𑀤𑀼𑀢𑀺𑀬𑀁 𑀓𑁄𑀲𑀮𑀲𑀁𑀬𑀼𑀢𑁆𑀢𑁂 𑀯𑀼𑀢𑁆𑀢𑀫𑁂𑀯.

𑁩. 𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩. 𑀢𑀢𑀺𑀬𑁂 𑀲𑀓𑀮𑀫𑀺𑀤𑀁 𑀪𑀦𑁆𑀢𑁂𑀢𑀺 𑀆𑀦𑀦𑁆𑀤𑀢𑁆𑀣𑁂𑀭𑁄 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀲𑁆𑀲 𑀫𑀢𑁆𑀣𑀓𑀁 𑀅𑀧𑁆𑀧𑀢𑁆𑀢𑀢𑀸𑀬 𑀲𑀓𑀮𑀫𑁆𑀧𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀬𑁂𑀦 𑀮𑀩𑁆𑀪𑀢𑀻𑀢𑀺 𑀦 𑀅𑀜𑁆𑀜𑀸𑀲𑀺, 𑀥𑀫𑁆𑀫𑀲𑁂𑀦𑀸𑀧𑀢𑀺 𑀧𑀦 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀲𑁆𑀲 𑀫𑀢𑁆𑀣𑀓𑁂 𑀞𑀺𑀢𑀢𑁆𑀢𑀸 𑀅𑀜𑁆𑀜𑀸𑀲𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀢𑁂𑀦𑁂𑀯𑀲𑁆𑀲 𑀪𑀕𑀯𑀸 𑀲𑀸𑀥𑀼 𑀲𑀸𑀥𑀽𑀢𑀺 𑀲𑀸𑀥𑀼𑀓𑀸𑀭𑀫𑀤𑀸𑀲𑀺.

𑁪. 𑀚𑀸𑀡𑀼𑀲𑁆𑀲𑁄𑀡𑀺𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁪. 𑀘𑀢𑀼𑀢𑁆𑀣𑁂 𑀲𑀩𑁆𑀩𑀲𑁂𑀢𑁂𑀦 𑀯𑀴𑀯𑀸𑀪𑀺𑀭𑀣𑁂𑀦𑀸𑀢𑀺 𑀲𑀓𑀮𑀲𑁂𑀢𑁂𑀦 𑀘𑀢𑀽𑀳𑀺 𑀯𑀴𑀯𑀸𑀳𑀺 𑀬𑀼𑀢𑁆𑀢𑀭𑀣𑁂𑀦. 𑀲𑁄 𑀓𑀺𑀭 𑀲𑀩𑁆𑀩𑁄 𑀲𑀘𑀓𑁆𑀓𑀧𑀜𑁆𑀚𑀭𑀓𑀼𑀩𑁆𑀩𑀭𑁄 𑀭𑀚𑀢𑀧𑀭𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺. 𑀭𑀣𑁄 𑀘 𑀦𑀸𑀫𑁂𑀲 𑀤𑀼𑀯𑀺𑀥𑁄 𑀳𑁄𑀢𑀺 𑁋 𑀬𑁄𑀥𑀭𑀣𑁄, 𑀅𑀮𑀗𑁆𑀓𑀸𑀭𑀭𑀣𑁄𑀢𑀺. 𑀢𑀢𑁆𑀣 𑀬𑁄𑀥𑀭𑀣𑁄 𑀘𑀢𑀼𑀭𑀲𑁆𑀲𑀲𑀡𑁆𑀞𑀸𑀦𑁄 𑀳𑁄𑀢𑀺 𑀦𑀸𑀢𑀺𑀫𑀳𑀸 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀯𑀸 𑀚𑀦𑀸𑀦𑀁 𑀕𑀳𑀡𑀲𑀫𑀢𑁆𑀣𑁄. 𑀅𑀮𑀗𑁆𑀓𑀸𑀭𑀭𑀣𑁄 𑀫𑀳𑀸 𑀳𑁄𑀢𑀺 𑀤𑀻𑀖𑀢𑁄 𑀤𑀻𑀖𑁄 𑀧𑀼𑀣𑀼𑀮𑀢𑁄 𑀧𑀼𑀣𑀼𑀮𑁄 𑀘, 𑀢𑀢𑁆𑀣 𑀙𑀢𑁆𑀢𑀕𑁆𑀕𑀸𑀳𑀓𑁄 𑀯𑀸𑀮𑀩𑀻𑀚𑀦𑀺𑀕𑁆𑀕𑀸𑀳𑀓𑁄 𑀢𑀸𑀮𑀯𑀡𑁆𑀝𑀕𑁆𑀕𑀸𑀳𑀓𑁄𑀢𑀺 𑀏𑀯𑀁 𑀅𑀝𑁆𑀞 𑀯𑀸 𑀤𑀲 𑀯𑀸 𑀲𑀼𑀔𑁂𑀦𑁂𑀯 𑀞𑀸𑀢𑀼𑀁 𑀯𑀸 𑀦𑀺𑀲𑀻𑀤𑀺𑀢𑀼𑀁 𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀯𑀸 𑀲𑀓𑁆𑀓𑁄𑀦𑁆𑀢𑀺. 𑀅𑀬𑀫𑁆𑀧𑀺 𑀅𑀮𑀗𑁆𑀓𑀸𑀭𑀭𑀣𑁄𑀬𑁂𑀯.

𑀲𑁂𑀢𑀸 𑀲𑀼𑀤𑀁 𑀅𑀲𑁆𑀲𑀸𑀢𑀺 𑀢𑀸 𑀯𑀴𑀯𑀸 𑀧𑀓𑀢𑀺𑀬𑀸 𑀲𑁂𑀢𑀯𑀡𑁆𑀡𑀸𑀯. 𑀲𑁂𑀢𑀸𑀮𑀗𑁆𑀓𑀸𑀭𑀸𑀢𑀺 𑀧𑀲𑀸𑀥𑀦𑀁 𑀢𑀸𑀲𑀁 𑀭𑀚𑀢𑀫𑀬𑀁 𑀅𑀳𑁄𑀲𑀺. 𑀲𑁂𑀢𑁄 𑀭𑀣𑁄𑀢𑀺 𑀭𑀣𑁄𑀧𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀭𑀚𑀢𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀢𑀢𑁆𑀣 𑀢𑀢𑁆𑀣 𑀤𑀦𑁆𑀢𑀓𑀫𑁆𑀫𑀔𑀘𑀺𑀢𑀢𑁆𑀢𑀸 𑀘 𑀲𑁂𑀢𑁄𑀯. 𑀲𑁂𑀢𑀧𑀭𑀺𑀯𑀸𑀭𑁄𑀢𑀺 𑀬𑀣𑀸 𑀅𑀜𑁆𑀜𑁂 𑀭𑀣𑀸 𑀲𑀻𑀳𑀘𑀫𑁆𑀫𑀧𑀭𑀺𑀯𑀸𑀭𑀸𑀧𑀺 𑀳𑁄𑀦𑁆𑀢𑀺, 𑀩𑁆𑀬𑀕𑁆𑀖𑀘𑀫𑁆𑀫𑀧𑀭𑀺𑀯𑀸𑀭𑀸𑀧𑀺 𑀧𑀡𑁆𑀟𑀼𑀓𑀫𑁆𑀩𑀮𑀧𑀭𑀺𑀯𑀸𑀭𑀸𑀧𑀺 𑀳𑁄𑀦𑁆𑀢𑀺, 𑀦 𑀏𑀯𑀁 𑀏𑀲. 𑀏𑀲 𑀧𑀦 𑀖𑀦𑀤𑀼𑀓𑀽𑀮𑁂𑀦 𑀧𑀭𑀺𑀯𑀸𑀭𑀺𑀢𑁄 𑀅𑀳𑁄𑀲𑀺. 𑀲𑁂𑀢𑀸 𑀭𑀲𑁆𑀫𑀺𑀬𑁄𑀢𑀺 𑀭𑀲𑁆𑀫𑀺𑀬𑁄𑀧𑀺 𑀭𑀚𑀢𑀧𑀦𑀸𑀴𑀺𑀲𑀼𑀧𑀭𑀺𑀓𑁆𑀔𑀺𑀢𑁆𑀢𑀸. 𑀲𑁂𑀢𑀸 𑀧𑀢𑁄𑀤𑀮𑀝𑁆𑀞𑀻𑀢𑀺 𑀧𑀢𑁄𑀤𑀮𑀝𑁆𑀞𑀺𑀧𑀺 𑀭𑀚𑀢𑀧𑀭𑀺𑀓𑁆𑀔𑀺𑀢𑁆𑀢𑀸.

𑀲𑁂𑀢𑀁 𑀙𑀢𑁆𑀢𑀦𑁆𑀢𑀺 𑀭𑀣𑀫𑀚𑁆𑀛𑁂 𑀉𑀲𑁆𑀲𑀸𑀧𑀺𑀢𑀙𑀢𑁆𑀢𑀫𑁆𑀧𑀺 𑀲𑁂𑀢𑀫𑁂𑀯 𑀅𑀳𑁄𑀲𑀺. 𑀲𑁂𑀢𑀁 𑀉𑀡𑁆𑀳𑀻𑀲𑀦𑁆𑀢𑀺 𑀅𑀝𑁆𑀞𑀗𑁆𑀕𑀼𑀮𑀯𑀺𑀢𑁆𑀣𑀸𑀭𑁄 𑀭𑀚𑀢𑀫𑀬𑁄 𑀉𑀡𑁆𑀳𑀻𑀲𑀧𑀝𑁆𑀝𑁄 𑀲𑁂𑀢𑁄. 𑀲𑁂𑀢𑀸𑀦𑀺 𑀯𑀢𑁆𑀣𑀸𑀦𑀻𑀢𑀺 𑀯𑀢𑁆𑀣𑀸𑀦𑀺𑀧𑀺 𑀲𑁂𑀢𑀸𑀦𑀺 𑀨𑁂𑀡𑀧𑀼𑀜𑁆𑀚𑀯𑀡𑁆𑀡𑀸𑀦𑀺. 𑀢𑁂𑀲𑀼 𑀦𑀺𑀯𑀸𑀲𑀦𑀁 𑀧𑀜𑁆𑀘𑀲𑀢𑀕𑁆𑀖𑀦𑀓𑀁, 𑀉𑀢𑁆𑀢𑀭𑀸𑀲𑀗𑁆𑀕𑁄 𑀲𑀳𑀲𑁆𑀲𑀕𑁆𑀖𑀦𑀓𑁄. 𑀲𑁂𑀢𑀸 𑀉𑀧𑀸𑀳𑀦𑀸𑀢𑀺 𑀉𑀧𑀸𑀳𑀦𑀸 𑀦𑀸𑀫 𑀫𑀕𑁆𑀕𑀸𑀭𑀼𑀴𑁆𑀳𑀲𑁆𑀲 𑀯𑀸 𑀳𑁄𑀦𑁆𑀢𑀺 𑀅𑀝𑀯𑀺𑀁 𑀯𑀸 𑀧𑀯𑀺𑀲𑀦𑁆𑀢𑀲𑁆𑀲. 𑀅𑀬𑀁 𑀧𑀦 𑀭𑀣𑀁 𑀅𑀪𑀺𑀭𑀼𑀴𑁆𑀳𑁄, 𑀢𑁂𑀦𑀲𑁆𑀲 𑀢𑀤𑀦𑀼𑀘𑁆𑀙𑀯𑀺𑀓𑁄 𑀭𑀚𑀢𑀧𑀝𑀺𑀲𑁂𑀯𑀺𑀢𑁄 𑀧𑀸𑀤𑀸𑀮𑀗𑁆𑀓𑀸𑀭𑁄 𑀦𑀸𑀫 𑀏𑀲 𑀏𑀯𑀁 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀢𑀸𑀬 𑀲𑀼𑀤𑀁 𑀯𑀸𑀮𑀩𑀻𑀚𑀦𑀺𑀬𑀸𑀢𑀺 𑀨𑀮𑀺𑀓𑀫𑀬𑀤𑀡𑁆𑀟𑀸𑀬 𑀲𑁂𑀢𑀘𑀫𑀭𑀯𑀸𑀮𑀩𑀻𑀚𑀦𑀺𑀬𑀸. 𑀦 𑀓𑁂𑀯𑀮𑀜𑁆𑀘 𑀏𑀢𑁆𑀢𑀓𑀫𑁂𑀯𑀲𑁆𑀲 𑀲𑁂𑀢𑀁 𑀅𑀳𑁄𑀲𑀺, 𑀲𑁄 𑀧𑀦 𑀩𑁆𑀭𑀸𑀳𑁆𑀫𑀡𑁄 𑀲𑁂𑀢𑀯𑀺𑀮𑁂𑀧𑀦𑀁 𑀯𑀺𑀮𑀺𑀫𑁆𑀧𑀺, 𑀲𑁂𑀢𑀫𑀸𑀮𑀁 𑀧𑀺𑀴𑀦𑁆𑀥𑀺, 𑀤𑀲𑀲𑀼 𑀅𑀗𑁆𑀕𑀼𑀮𑀻𑀲𑀼 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀸 𑀓𑀡𑁆𑀡𑁂𑀲𑀼 𑀓𑀼𑀡𑁆𑀟𑀮𑀸𑀦𑀻𑀢𑀺 𑀏𑀯𑀫𑀸𑀤𑀺 𑀅𑀮𑀗𑁆𑀓𑀸𑀭𑁄𑀧𑀺𑀲𑁆𑀲 𑀭𑀚𑀢𑀫𑀬𑁄𑀯 𑀅𑀳𑁄𑀲𑀺. 𑀧𑀭𑀺𑀯𑀸𑀭𑀩𑁆𑀭𑀸𑀳𑁆𑀫𑀡𑀸𑀧𑀺𑀲𑁆𑀲 𑀤𑀲𑀲𑀳𑀲𑁆𑀲𑀫𑀢𑁆𑀢𑀸 𑀢𑀣𑁂𑀯 𑀲𑁂𑀢𑀯𑀢𑁆𑀣𑀯𑀺𑀮𑁂𑀧𑀦𑀫𑀸𑀮𑀸𑀮𑀗𑁆𑀓𑀸𑀭𑀸 𑀅𑀳𑁂𑀲𑀼𑀁.

𑀬𑀁 𑀧𑀦𑁂𑀢𑀁 𑀲𑀸𑀯𑀢𑁆𑀣𑀺𑀬𑀸 𑀦𑀺𑀬𑁆𑀬𑀸𑀬𑀦𑁆𑀢𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀭𑀸𑀬𑀁 𑀦𑀺𑀬𑁆𑀬𑀸𑀬𑀦𑀯𑀺𑀪𑀸𑀯𑀦𑀸 𑁋 𑀲𑁄 𑀓𑀺𑀭 𑀙𑀦𑁆𑀦𑀁 𑀙𑀦𑁆𑀦𑀁 𑀫𑀸𑀲𑀸𑀦𑀁 𑀏𑀓𑀯𑀸𑀭𑀁 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀢𑀺 𑁋 ‘‘𑀇𑀢𑁄 𑀏𑀢𑁆𑀢𑀓𑁂𑀳𑀺 𑀤𑀺𑀯𑀲𑁂𑀳𑀺 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀧𑀼𑀭𑁂𑀢𑀭𑀫𑁂𑀯 𑀖𑁄𑀲𑀦𑀸 𑀓𑀬𑀺𑀭𑀢𑀺. 𑀢𑀁 𑀲𑀼𑀢𑁆𑀯𑀸 𑀬𑁂 𑀦𑀕𑀭𑀢𑁄 𑀦 𑀧𑀓𑁆𑀓𑀦𑁆𑀢𑀸, 𑀢𑁂 𑀦 𑀧𑀓𑁆𑀓𑀫𑀦𑁆𑀢𑀺. 𑀬𑁂𑀧𑀺 𑀧𑀓𑁆𑀓𑀦𑁆𑀢𑀸, 𑀢𑁂𑀧𑀺 ‘‘𑀧𑀼𑀜𑁆𑀜𑀯𑀢𑁄 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀁 𑀧𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀆𑀕𑀘𑁆𑀙𑀦𑁆𑀢𑀺. 𑀬𑀁 𑀤𑀺𑀯𑀲𑀁 𑀩𑁆𑀭𑀸𑀳𑁆𑀫𑀡𑁄 𑀦𑀕𑀭𑀁 𑀅𑀦𑀼𑀯𑀺𑀘𑀭𑀢𑀺, 𑀢𑀤𑀸 𑀧𑀸𑀢𑁄𑀯 𑀦𑀕𑀭𑀯𑀻𑀣𑀺𑀬𑁄 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀯𑀸𑀮𑀺𑀓𑀁 𑀑𑀓𑀺𑀭𑀺𑀢𑁆𑀯𑀸 𑀮𑀸𑀚𑀧𑀜𑁆𑀘𑀫𑁂𑀳𑀺 𑀧𑀼𑀧𑁆𑀨𑁂𑀳𑀺 𑀯𑀺𑀧𑁆𑀧𑀓𑀺𑀭𑀺𑀢𑁆𑀯𑀸 𑀧𑀼𑀡𑁆𑀡𑀖𑀝𑁂 𑀞𑀧𑁂𑀢𑁆𑀯𑀸 𑀓𑀤𑀮𑀺𑀬𑁄 𑀘 𑀥𑀚𑁂 𑀘 𑀉𑀲𑁆𑀲𑀸𑀧𑁂𑀢𑁆𑀯𑀸 𑀲𑀓𑀮𑀦𑀕𑀭𑀁 𑀥𑀽𑀧𑀺𑀢𑀯𑀸𑀲𑀺𑀢𑀁 𑀓𑀭𑁄𑀦𑁆𑀢𑀺.

𑀩𑁆𑀭𑀸𑀳𑁆𑀫𑀡𑁄 𑀧𑀸𑀢𑁄𑀯 𑀲𑀻𑀲𑀁 𑀦𑁆𑀳𑀸𑀬𑀺𑀢𑁆𑀯𑀸 𑀧𑀼𑀭𑁂𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑁂𑀢𑀯𑀢𑁆𑀣𑀸𑀤𑀻𑀳𑀺 𑀅𑀢𑁆𑀢𑀸𑀦𑀁 𑀅𑀮𑀗𑁆𑀓𑀭𑀺𑀢𑁆𑀯𑀸 𑀧𑀸𑀲𑀸𑀤𑀸 𑀑𑀭𑀼𑀬𑁆𑀳 𑀭𑀣𑀁 𑀅𑀪𑀺𑀭𑀼𑀳𑀢𑀺. 𑀅𑀣 𑀦𑀁 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀲𑀩𑁆𑀩𑀲𑁂𑀢𑀯𑀢𑁆𑀣𑀯𑀺𑀮𑁂𑀧𑀦𑀫𑀸𑀮𑀸𑀮𑀗𑁆𑀓𑀸𑀭𑀸 𑀲𑁂𑀢𑀘𑁆𑀙𑀢𑁆𑀢𑀸𑀦𑀺 𑀕𑀳𑁂𑀢𑁆𑀯𑀸 𑀧𑀭𑀺𑀯𑀸𑀭𑁂𑀦𑁆𑀢𑀺. 𑀢𑀢𑁄 𑀫𑀳𑀸𑀚𑀦𑀲𑁆𑀲 𑀲𑀦𑁆𑀦𑀺𑀧𑀸𑀢𑀢𑁆𑀣𑀁 𑀧𑀞𑀫𑀁𑀬𑁂𑀯 𑀢𑀭𑀼𑀡𑀤𑀸𑀭𑀓𑀸𑀦𑀁 𑀨𑀮𑀸𑀨𑀮𑀸𑀦𑀺 𑀯𑀺𑀓𑀺𑀭𑀦𑁆𑀢𑀺, 𑀢𑀤𑀦𑀦𑁆𑀢𑀭𑀁 𑀫𑀸𑀲𑀓𑀭𑀽𑀧𑀸𑀤𑀻𑀦𑀺, 𑀢𑀤𑀦𑀦𑁆𑀢𑀭𑀁 𑀓𑀳𑀸𑀧𑀡𑁂 𑀯𑀺𑀓𑀺𑀭𑀦𑁆𑀢𑀺. 𑀫𑀳𑀸𑀚𑀦𑁄 𑀲𑀦𑁆𑀦𑀺𑀧𑀢𑀢𑀺, 𑀉𑀓𑁆𑀓𑀼𑀝𑁆𑀞𑀺𑀬𑁄 𑀘𑁂𑀯 𑀘𑁂𑀮𑀼𑀓𑁆𑀔𑁂𑀧𑀸 𑀘 𑀯𑀢𑁆𑀢𑀦𑁆𑀢𑀺. 𑀅𑀣 𑀩𑁆𑀭𑀸𑀳𑁆𑀫𑀡𑁄 𑀫𑀗𑁆𑀕𑀮𑀺𑀓𑀲𑁄𑀯𑀢𑁆𑀣𑀺𑀓𑀸𑀤𑀻𑀲𑀼 𑀫𑀗𑁆𑀕𑀮𑀸𑀦𑀺 𑀘𑁂𑀯 𑀲𑀼𑀯𑀢𑁆𑀣𑀺𑀬𑁄 𑀘 𑀓𑀭𑁄𑀦𑁆𑀢𑁂𑀲𑀼 𑀫𑀳𑀸𑀲𑀫𑁆𑀧𑀢𑁆𑀢𑀺𑀬𑀸 𑀦𑀕𑀭𑀁 𑀅𑀦𑀼𑀯𑀺𑀘𑀭𑀢𑀺. 𑀧𑀼𑀜𑁆𑀜𑀯𑀦𑁆𑀢𑀸 𑀫𑀦𑀼𑀲𑁆𑀲𑀸 𑀏𑀓𑀪𑀽𑀫𑀺𑀓𑀸𑀤𑀺𑀧𑀸𑀲𑀸𑀤𑁂 𑀆𑀭𑀼𑀬𑁆𑀳 𑀲𑀼𑀓𑀧𑀢𑁆𑀢𑀲𑀤𑀺𑀲𑀸𑀦𑀺 𑀯𑀸𑀢𑀧𑀸𑀦𑀓𑀯𑀸𑀝𑀸𑀦𑀺 𑀯𑀺𑀯𑀭𑀺𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀺. 𑀩𑁆𑀭𑀸𑀳𑁆𑀫𑀡𑁄𑀧𑀺 𑀅𑀢𑁆𑀢𑀦𑁄 𑀬𑀲𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀬𑀸 𑀦𑀕𑀭𑀁 𑀅𑀚𑁆𑀛𑁄𑀢𑁆𑀣𑀭𑀦𑁆𑀢𑁄 𑀯𑀺𑀬 𑀤𑀓𑁆𑀔𑀺𑀡𑀤𑁆𑀯𑀸𑀭𑀸𑀪𑀺𑀫𑀼𑀔𑁄 𑀳𑁄𑀢𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀢𑀫𑁂𑀦𑀁 𑀚𑀦𑁄 𑀤𑀺𑀲𑁆𑀯𑀸𑀢𑀺 𑀫𑀳𑀸𑀚𑀦𑁄 𑀢𑀁 𑀭𑀣𑀁 𑀤𑀺𑀲𑁆𑀯𑀸. 𑀩𑁆𑀭𑀳𑁆𑀫𑀦𑁆𑀢𑀺 𑀲𑁂𑀝𑁆𑀞𑀸𑀥𑀺𑀯𑀘𑀦𑀫𑁂𑀢𑀁. 𑀩𑁆𑀭𑀳𑁆𑀫𑀁 𑀯𑀢 𑀪𑁄 𑀬𑀸𑀦𑀦𑁆𑀢𑀺 𑀲𑁂𑀝𑁆𑀞𑀬𑀸𑀦𑀲𑀤𑀺𑀲𑀁 𑀯𑀢 𑀪𑁄 𑀬𑀸𑀦𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀇𑀫𑀲𑁆𑀲𑁂𑀯 𑀔𑁄 𑀏𑀢𑀦𑁆𑀢𑀺, 𑀆𑀦𑀦𑁆𑀤, 𑀫𑀦𑀼𑀲𑁆𑀲𑀸 𑀦𑀸𑀫 𑀯𑀡𑁆𑀡𑀪𑀸𑀡𑀓𑀸𑀦𑀁 𑀥𑀦𑀁 𑀤𑀢𑁆𑀯𑀸 𑀅𑀢𑁆𑀢𑀦𑁄 𑀤𑀸𑀭𑀺𑀓𑀸𑀦𑀁 𑀯𑀡𑁆𑀡𑀕𑀻𑀢𑀁 𑀕𑀸𑀬𑀸𑀧𑁂𑀦𑁆𑀢𑀺 ‘‘𑀅𑀪𑀺𑀭𑀽𑀧𑁄 𑀳𑁄𑀢𑀺 𑀤𑀲𑁆𑀲𑀦𑀻𑀬𑁄 𑀫𑀳𑀤𑁆𑀥𑀦𑁄 𑀫𑀳𑀸𑀪𑁄𑀕𑁄’’𑀢𑀺, 𑀦 𑀘 𑀢𑁂𑀦 𑀯𑀡𑁆𑀡𑀪𑀡𑀦𑀫𑀢𑁆𑀢𑁂𑀦 𑀅𑀪𑀺𑀭𑀽𑀧𑀸 𑀯𑀸 𑀳𑁄𑀦𑁆𑀢𑀺 𑀫𑀳𑀤𑁆𑀥𑀦𑀸 𑀯𑀸, 𑀏𑀯𑀫𑁂𑀯 𑀫𑀳𑀸𑀚𑀦𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀭𑀣𑀁 𑀤𑀺𑀲𑁆𑀯𑀸 𑁋 ‘‘𑀩𑁆𑀭𑀳𑁆𑀫𑀁 𑀯𑀢 𑀪𑁄 𑀬𑀸𑀦’’𑀦𑁆𑀢𑀺 𑀓𑀺𑀜𑁆𑀘𑀸𑀧𑀺 𑀏𑀯𑀁 𑀯𑀡𑁆𑀡𑀁 𑀪𑀡𑀢𑀺, 𑀦 𑀧𑀦𑁂𑀢𑀁 𑀬𑀸𑀦𑀁 𑀯𑀡𑁆𑀡𑀪𑀡𑀦𑀫𑀢𑁆𑀢𑁂𑀦𑁂𑀯 𑀩𑁆𑀭𑀳𑁆𑀫𑀬𑀸𑀦𑀁 𑀦𑀸𑀫 𑀳𑁄𑀢𑀺. 𑀮𑀸𑀫𑀓𑀜𑁆𑀳𑀺 𑀏𑀢𑀁 𑀙𑀯𑀁. 𑀧𑀭𑀫𑀢𑁆𑀣𑁂𑀦 𑀧𑀦 𑀇𑀫𑀲𑁆𑀲𑁂𑀯 𑀔𑁄 𑀏𑀢𑀁, 𑀆𑀦𑀦𑁆𑀤, 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀅𑀥𑀺𑀯𑀘𑀦𑀁. 𑀅𑀬𑀜𑁆𑀳𑀺 𑀲𑀩𑁆𑀩𑀤𑁄𑀲𑀯𑀺𑀕𑀫𑁂𑀦 𑀲𑁂𑀝𑁆𑀞𑁄, 𑀇𑀫𑀺𑀦𑀸 𑀘 𑀅𑀭𑀺𑀬𑀸 𑀦𑀺𑀩𑁆𑀩𑀸𑀦𑀁 𑀬𑀦𑁆𑀢𑀻𑀢𑀺 𑀩𑁆𑀭𑀳𑁆𑀫𑀬𑀸𑀦𑀁 𑀇𑀢𑀺𑀧𑀺, 𑀥𑀫𑁆𑀫𑀪𑀽𑀢𑀢𑁆𑀢𑀸 𑀬𑀸𑀦𑀢𑁆𑀢𑀸 𑀘 𑀥𑀫𑁆𑀫𑀬𑀸𑀦𑀁 𑀇𑀢𑀺𑀧𑀺, 𑀅𑀦𑀼𑀢𑁆𑀢𑀭𑀢𑁆𑀢𑀸 𑀓𑀺𑀮𑁂𑀲𑀲𑀗𑁆𑀕𑀸𑀫𑀲𑁆𑀲 𑀘 𑀯𑀺𑀚𑀺𑀢𑀢𑁆𑀢𑀸 𑀅𑀦𑀼𑀢𑁆𑀢𑀭𑁄 𑀲𑀗𑁆𑀕𑀸𑀫𑀯𑀺𑀚𑀬𑁄 𑀇𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺.

𑀇𑀤𑀸𑀦𑀺𑀲𑁆𑀲 𑀦𑀺𑀤𑁆𑀤𑁄𑀲𑀪𑀸𑀯𑀜𑁆𑀘𑁂𑀯 𑀲𑀗𑁆𑀕𑀸𑀫𑀯𑀺𑀚𑀬𑀪𑀸𑀯𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 𑀭𑀸𑀕𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀭𑀸𑀕𑀁 𑀯𑀺𑀦𑀬𑀫𑀸𑀦𑀸 𑀧𑀭𑀺𑀬𑁄𑀲𑀸𑀧𑁂𑀢𑀺 𑀧𑀭𑀺𑀬𑁄𑀲𑀸𑀦𑀁 𑀕𑀘𑁆𑀙𑀢𑀺 𑀦𑀺𑀧𑁆𑀨𑀚𑁆𑀚𑀢𑀻𑀢𑀺 𑀭𑀸𑀕𑀯𑀺𑀦𑀬𑀧𑀭𑀺𑀬𑁄𑀲𑀸𑀦𑀸. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑀬𑀲𑁆𑀲 𑀲𑀤𑁆𑀥𑀸 𑀘 𑀧𑀜𑁆𑀜𑀸 𑀘𑀸𑀢𑀺 𑀬𑀲𑁆𑀲 𑀅𑀭𑀺𑀬𑀫𑀕𑁆𑀕𑀬𑀸𑀦𑀲𑁆𑀲 𑀲𑀤𑁆𑀥𑀸𑀦𑀼𑀲𑀸𑀭𑀺𑀯𑀲𑁂𑀦 𑀲𑀤𑁆𑀥𑀸, 𑀥𑀫𑁆𑀫𑀸𑀦𑀼𑀲𑀸𑀭𑀺𑀯𑀲𑁂𑀦 𑀧𑀜𑁆𑀜𑀸𑀢𑀺 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀲𑀤𑀸 𑀥𑀼𑀭𑀁 𑀬𑀼𑀢𑁆𑀢𑀸, 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀬𑀼𑀕𑁂 𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀳𑀺𑀭𑀻 𑀈𑀲𑀸𑀢𑀺 𑀅𑀢𑁆𑀢𑀦𑀸 𑀲𑀤𑁆𑀥𑀺𑀁 𑀅𑀥𑀺𑀯𑀺𑀝𑁆𑀞𑁂𑀦 𑀩𑀳𑀺𑀤𑁆𑀥𑀸𑀲𑀫𑀼𑀝𑁆𑀞𑀸𑀦𑁂𑀦 𑀑𑀢𑁆𑀢𑀧𑁆𑀧𑁂𑀦 𑀲𑀤𑁆𑀥𑀺𑀁 𑀅𑀚𑁆𑀛𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀳𑀺𑀭𑀻 𑀬𑀲𑁆𑀲 𑀫𑀕𑁆𑀕𑀭𑀣𑀲𑁆𑀲 𑀈𑀲𑀸. 𑀫𑀦𑁄 𑀬𑁄𑀢𑁆𑀢𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀜𑁆𑀘 𑀫𑀕𑁆𑀕𑀘𑀺𑀢𑁆𑀢𑀜𑁆𑀘 𑀬𑁄𑀢𑁆𑀢𑀁. 𑀬𑀣𑀸 𑀳𑀺 𑀭𑀣𑀲𑁆𑀲 𑀯𑀸𑀓𑀸𑀤𑀺𑀫𑀬𑀁 𑀬𑁄𑀢𑁆𑀢𑀁 𑀕𑁄𑀡𑁂 𑀏𑀓𑀸𑀩𑀤𑁆𑀥𑁂 𑀓𑀭𑁄𑀢𑀺 𑀏𑀓𑀲𑀗𑁆𑀕𑀳𑀺𑀢𑁂, 𑀏𑀯𑀁 𑀫𑀕𑁆𑀕𑀭𑀣𑀲𑁆𑀲 𑀮𑁄𑀓𑀺𑀬𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀅𑀢𑀺𑀭𑁂𑀓𑀧𑀜𑁆𑀜𑀸𑀲, 𑀮𑁄𑀓𑀼𑀢𑁆𑀢𑀭𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀁 𑀅𑀢𑀺𑀭𑁂𑀓𑀲𑀝𑁆𑀞𑀺 𑀓𑀼𑀲𑀮𑀥𑀫𑁆𑀫𑁂 𑀏𑀓𑀸𑀩𑀤𑁆𑀥𑁂 𑀏𑀓𑀲𑀗𑁆𑀕𑀳𑁂 𑀓𑀭𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀫𑀦𑁄 𑀬𑁄𑀢𑁆𑀢’’𑀦𑁆𑀢𑀺. 𑀲𑀢𑀺 𑀆𑀭𑀓𑁆𑀔𑀲𑀸𑀭𑀣𑀻𑀢𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸 𑀲𑀢𑀺 𑀆𑀭𑀓𑁆𑀔𑀲𑀸𑀭𑀣𑀺. 𑀬𑀣𑀸 𑀳𑀺 𑀭𑀣𑀲𑁆𑀲 𑀆𑀭𑀓𑁆𑀔𑁄 𑀲𑀸𑀭𑀣𑀺 𑀦𑀸𑀫 𑀬𑁄𑀕𑁆𑀕𑀺𑀬𑁄. 𑀥𑀼𑀭𑀁 𑀯𑀸𑀳𑁂𑀢𑀺 𑀬𑁄𑀚𑁂𑀢𑀺 𑀅𑀓𑁆𑀔𑀁 𑀅𑀩𑁆𑀪𑀜𑁆𑀚𑀢𑀺 𑀭𑀣𑀁 𑀧𑁂𑀲𑁂𑀢𑀺 𑀭𑀣𑀬𑀼𑀢𑁆𑀢𑀓𑁂 𑀦𑀺𑀩𑁆𑀩𑀺𑀲𑁂𑀯𑀦𑁂 𑀓𑀭𑁄𑀢𑀺, 𑀏𑀯𑀁 𑀫𑀕𑁆𑀕𑀭𑀣𑀲𑁆𑀲 𑀲𑀢𑀺. 𑀅𑀬𑀜𑁆𑀳𑀺 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀘𑁂𑀯 𑀓𑀼𑀲𑀮𑀸𑀓𑀼𑀲𑀮𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀯𑁂𑀲𑀢𑀻𑀢𑀺 𑀯𑀼𑀢𑁆𑀢𑀸.

𑀭𑀣𑁄𑀢𑀺 𑀅𑀭𑀺𑀬𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀭𑀣𑁄. 𑀲𑀻𑀮𑀧𑀭𑀺𑀓𑁆𑀔𑀸𑀭𑁄𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀮𑀗𑁆𑀓𑀸𑀭𑁄. 𑀛𑀸𑀦𑀓𑁆𑀔𑁄𑀢𑀺 𑀯𑀺𑀧𑀲𑁆𑀲𑀦𑀸𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀛𑀸𑀦𑀗𑁆𑀕𑀸𑀦𑀁 𑀯𑀲𑁂𑀦 𑀛𑀸𑀦𑀫𑀬𑀅𑀓𑁆𑀔𑁄. 𑀘𑀓𑁆𑀓𑀯𑀻𑀭𑀺𑀬𑁄𑀢𑀺 𑀯𑀻𑀭𑀺𑀬𑀘𑀓𑁆𑀓𑁄, 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀗𑁆𑀔𑀸𑀢𑀸𑀦𑀺 𑀤𑁆𑀯𑁂 𑀯𑀻𑀭𑀺𑀬𑀸𑀦𑀺 𑀅𑀲𑁆𑀲 𑀘𑀓𑁆𑀓𑀸𑀦𑀻𑀢𑀺 𑀅𑀢𑁆𑀣𑁄. 𑀉𑀧𑁂𑀓𑁆𑀔𑀸 𑀥𑀼𑀭𑀲𑀫𑀸𑀥𑀻𑀢𑀺 𑀥𑀼𑀭𑀲𑁆𑀲 𑀲𑀫𑀸𑀥𑀺, 𑀉𑀦𑁆𑀦𑀢𑁄𑀦𑀢𑀸𑀓𑀸𑀭𑀲𑁆𑀲 𑀅𑀪𑀸𑀯𑁂𑀦 𑀤𑁆𑀯𑀺𑀦𑁆𑀦𑀫𑁆𑀧𑀺 𑀬𑀼𑀕𑀧𑀤𑁂𑀲𑀸𑀦𑀁 𑀲𑀫𑀢𑀸𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀳𑀺 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀮𑀻𑀦𑀼𑀤𑁆𑀥𑀘𑁆𑀘𑀪𑀸𑀯𑀁 𑀳𑀭𑀺𑀢𑁆𑀯𑀸 𑀧𑀬𑁄𑀕𑀫𑀚𑁆𑀛𑀢𑁆𑀢𑁂 𑀘𑀺𑀢𑁆𑀢𑀁 𑀞𑀧𑁂𑀢𑀺, 𑀢𑀲𑁆𑀫𑀸 𑀇𑀫𑀲𑁆𑀲 𑀫𑀕𑁆𑀕𑀭𑀣𑀲𑁆𑀲 ‘‘𑀥𑀼𑀭𑀲𑀫𑀸𑀥𑀻’’𑀢𑀺 𑀯𑀼𑀢𑁆𑀢𑀸. 𑀅𑀦𑀺𑀘𑁆𑀙𑀸 𑀧𑀭𑀺𑀯𑀸𑀭𑀡𑀦𑁆𑀢𑀺 𑀩𑀸𑀳𑀺𑀭𑀓𑀭𑀣𑀲𑁆𑀲 𑀲𑀻𑀳𑀘𑀫𑁆𑀫𑀸𑀤𑀻𑀦𑀺 𑀯𑀺𑀬 𑀇𑀫𑀲𑁆𑀲𑀸𑀧𑀺 𑀅𑀭𑀺𑀬𑀫𑀕𑁆𑀕𑀭𑀣𑀲𑁆𑀲 𑀅𑀮𑁄𑀪𑀲𑀗𑁆𑀔𑀸𑀢𑀸 𑀅𑀦𑀺𑀘𑁆𑀙𑀸 𑀧𑀭𑀺𑀯𑀸𑀭𑀡𑀁 𑀦𑀸𑀫.

𑀅𑀩𑁆𑀬𑀸𑀧𑀸𑀤𑁄𑀢𑀺 𑀫𑁂𑀢𑁆𑀢𑀸 𑀘 𑀫𑁂𑀢𑁆𑀢𑀸𑀧𑀼𑀩𑁆𑀩𑀪𑀸𑀕𑁄 𑀘. 𑀅𑀯𑀺𑀳𑀺𑀁𑀲𑀸𑀢𑀺 𑀓𑀭𑀼𑀡𑀸 𑀘 𑀓𑀭𑀼𑀡𑀸𑀧𑀼𑀩𑁆𑀩𑀪𑀸𑀕𑁄 𑀘. 𑀯𑀺𑀯𑁂𑀓𑁄𑀢𑀺 𑀓𑀸𑀬𑀯𑀺𑀯𑁂𑀓𑀸𑀤𑀺 𑀢𑀺𑀯𑀺𑀥𑀯𑀺𑀯𑁂𑀓𑁄. 𑀬𑀲𑁆𑀲 𑀆𑀯𑀼𑀥𑀦𑁆𑀢𑀺 𑀬𑀲𑁆𑀲 𑀅𑀭𑀺𑀬𑀫𑀕𑁆𑀕𑀭𑀣𑁂 𑀞𑀺𑀢𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀏𑀢𑀁 𑀧𑀜𑁆𑀘𑀯𑀺𑀥𑀁 𑀆𑀯𑀼𑀥𑀁. 𑀬𑀣𑀸 𑀳𑀺 𑀭𑀣𑁂 𑀞𑀺𑀢𑁄 𑀧𑀜𑁆𑀘𑀳𑀺 𑀆𑀯𑀼𑀥𑁂𑀳𑀺 𑀲𑀧𑀢𑁆𑀢𑁂 𑀯𑀺𑀚𑁆𑀛𑀢𑀺, 𑀏𑀯𑀁 𑀬𑁄𑀕𑀸𑀯𑀘𑀭𑁄𑀧𑀺 𑀇𑀫𑀲𑁆𑀫𑀺𑀁 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀭𑀣𑁂 𑀞𑀺𑀢𑁄 𑀫𑁂𑀢𑁆𑀢𑀸𑀬 𑀤𑁄𑀲𑀁 𑀯𑀺𑀚𑁆𑀛𑀢𑀺, 𑀓𑀭𑀼𑀡𑀸𑀬 𑀯𑀺𑀳𑀺𑀁𑀲𑀁, 𑀓𑀸𑀬𑀯𑀺𑀯𑁂𑀓𑁂𑀦 𑀕𑀡𑀲𑀗𑁆𑀕𑀡𑀺𑀓𑀁, 𑀘𑀺𑀢𑁆𑀢𑀯𑀺𑀯𑁂𑀓𑁂𑀦 𑀓𑀺𑀮𑁂𑀲𑀲𑀗𑁆𑀕𑀡𑀺𑀓𑀁, 𑀉𑀧𑀥𑀺𑀯𑀺𑀯𑁂𑀓𑁂𑀦 𑀲𑀩𑁆𑀩𑀸𑀓𑀼𑀲𑀮𑀁 𑀯𑀺𑀚𑁆𑀛𑀢𑀺. 𑀢𑁂𑀦𑀲𑁆𑀲𑁂𑀢𑀁 𑀧𑀜𑁆𑀘𑀯𑀺𑀥𑀁 ‘‘𑀆𑀯𑀼𑀥’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀺𑀢𑀺𑀓𑁆𑀔𑀸𑀢𑀺 𑀤𑀼𑀭𑀼𑀢𑁆𑀢𑀸𑀦𑀁 𑀤𑀼𑀭𑀸𑀕𑀢𑀸𑀦𑀁 𑀯𑀘𑀦𑀧𑀣𑀸𑀦𑀁 𑀅𑀥𑀺𑀯𑀸𑀲𑀦𑀓𑁆𑀔𑀦𑁆𑀢𑀺. 𑀘𑀫𑁆𑀫𑀲𑀦𑁆𑀦𑀸𑀳𑁄𑀢𑀺 𑀲𑀦𑁆𑀦𑀤𑁆𑀥𑀘𑀫𑁆𑀫𑁄. 𑀬𑀣𑀸 𑀳𑀺 𑀭𑀣𑁂 𑀞𑀺𑀢𑁄 𑀭𑀣𑀺𑀓𑁄 𑀧𑀝𑀺𑀫𑀼𑀓𑁆𑀓𑀘𑀫𑁆𑀫𑁄 𑀆𑀕𑀢𑀸𑀕𑀢𑁂 𑀲𑀭𑁂 𑀔𑀫𑀢𑀺, 𑀦 𑀦𑀁 𑀢𑁂 𑀯𑀺𑀚𑁆𑀛𑀦𑁆𑀢𑀺, 𑀏𑀯𑀁 𑀅𑀥𑀺𑀯𑀸𑀲𑀦𑀓𑁆𑀔𑀦𑁆𑀢𑀺𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀆𑀕𑀢𑀸𑀕𑀢𑁂 𑀯𑀘𑀦𑀧𑀣𑁂 𑀔𑀫𑀢𑀺, 𑀦 𑀦𑀁 𑀢𑁂 𑀯𑀺𑀚𑁆𑀛𑀦𑁆𑀢𑀺. 𑀢𑀲𑁆𑀫𑀸 ‘‘𑀢𑀺𑀢𑀺𑀓𑁆𑀔𑀸 𑀘𑀫𑁆𑀫𑀲𑀦𑁆𑀦𑀸𑀳𑁄’’𑀢𑀺 𑀯𑀼𑀢𑁆𑀢𑁄. 𑀬𑁄𑀕𑀓𑁆𑀔𑁂𑀫𑀸𑀬 𑀯𑀢𑁆𑀢𑀢𑀻𑀢𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀔𑁂𑀫𑀸𑀬 𑀦𑀺𑀩𑁆𑀩𑀸𑀦𑀸𑀬 𑀯𑀢𑁆𑀢𑀢𑀺, 𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑁄 𑀕𑀘𑁆𑀙𑀢𑀺𑀬𑁂𑀯, 𑀦 𑀢𑀺𑀝𑁆𑀞𑀢𑀺 𑀦 𑀪𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑀏𑀢𑀤𑀢𑁆𑀢𑀦𑀺 𑀲𑀫𑁆𑀪𑀽𑀢𑀦𑁆𑀢𑀺 𑀏𑀢𑀁 𑀫𑀕𑁆𑀕𑀬𑀸𑀦𑀁 𑀅𑀢𑁆𑀢𑀦𑁄 𑀧𑀼𑀭𑀺𑀲𑀓𑀸𑀭𑀁 𑀦𑀺𑀲𑁆𑀲𑀸𑀬 𑀮𑀤𑁆𑀥𑀢𑁆𑀢𑀸 𑀅𑀢𑁆𑀢𑀦𑀺 𑀲𑀫𑁆𑀪𑀽𑀢𑀁 𑀦𑀸𑀫 𑀳𑁄𑀢𑀺. 𑀩𑁆𑀭𑀳𑁆𑀫𑀬𑀸𑀦𑀁 𑀅𑀦𑀼𑀢𑁆𑀢𑀭𑀦𑁆𑀢𑀺 𑀅𑀲𑀤𑀺𑀲𑀁 𑀲𑁂𑀝𑁆𑀞𑀬𑀸𑀦𑀁. 𑀦𑀺𑀬𑁆𑀬𑀦𑁆𑀢𑀺 𑀥𑀻𑀭𑀸 𑀮𑁄𑀓𑀫𑁆𑀳𑀸𑀢𑀺 𑀬𑁂𑀲𑀁 𑀏𑀢𑀁 𑀬𑀸𑀦𑀁 𑀅𑀢𑁆𑀣𑀺, 𑀢𑁂 𑀥𑀻𑀭𑀸 𑀧𑀡𑁆𑀟𑀺𑀢𑀧𑀼𑀭𑀺𑀲𑀸 𑀮𑁄𑀓𑀫𑁆𑀳𑀸 𑀦𑀺𑀬𑁆𑀬𑀦𑁆𑀢𑀺 𑀕𑀘𑁆𑀙𑀦𑁆𑀢𑀺. 𑀅𑀜𑁆𑀜𑀤𑀢𑁆𑀣𑀽𑀢𑀺 𑀏𑀓𑀁𑀲𑁂𑀦. 𑀚𑀬𑀁 𑀚𑀬𑀦𑁆𑀢𑀺 𑀭𑀸𑀕𑀸𑀤𑀬𑁄 𑀲𑀧𑀢𑁆𑀢𑁂 𑀚𑀺𑀦𑀦𑁆𑀢𑀸 𑀚𑀺𑀦𑀦𑁆𑀢𑀸.

𑁫-𑁬. 𑀓𑀺𑀫𑀢𑁆𑀣𑀺𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫-𑁬. 𑀧𑀜𑁆𑀘𑀫𑁂 𑀅𑀬𑀫𑁂𑀯𑀸𑀢𑀺 𑀏𑀯𑀲𑀤𑁆𑀤𑁄 𑀦𑀺𑀬𑀫𑀢𑁆𑀣𑁄. 𑀢𑁂𑀦 𑀅𑀜𑁆𑀜𑀁 𑀫𑀕𑁆𑀕𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀝𑁆𑀝𑀤𑀼𑀓𑁆𑀔𑀜𑁆𑀘𑁂𑀯 𑀫𑀺𑀲𑁆𑀲𑀓𑀫𑀕𑁆𑀕𑁄 𑀘 𑀓𑀣𑀺𑀢𑁄. 𑀙𑀝𑁆𑀞𑀁 𑀉𑀢𑁆𑀢𑀸𑀦𑀫𑁂𑀯.

𑁭. 𑀤𑀼𑀢𑀺𑀬𑀅𑀜𑁆𑀜𑀢𑀭𑀪𑀺𑀓𑁆𑀔𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁭. 𑀲𑀢𑁆𑀢𑀫𑁂 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀔𑁄 𑀏𑀢𑀁 𑀪𑀺𑀓𑁆𑀔𑀼 𑀅𑀥𑀺𑀯𑀘𑀦𑀦𑁆𑀢𑀺 𑀅𑀲𑀗𑁆𑀔𑀢𑀸𑀬 𑀅𑀫𑀢𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀏𑀢𑀁 𑀅𑀥𑀺𑀯𑀘𑀦𑀁. 𑀆𑀲𑀯𑀸𑀦𑀁 𑀔𑀬𑁄 𑀢𑁂𑀦 𑀯𑀼𑀘𑁆𑀘𑀢𑀻𑀢𑀺 𑀅𑀧𑀺𑀘 𑀢𑁂𑀦 𑀭𑀸𑀕𑀸𑀤𑀺𑀯𑀺𑀦𑀬𑁂𑀦 𑀆𑀲𑀯𑀸𑀦𑀁 𑀔𑀬𑁄𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀆𑀲𑀯𑀓𑁆𑀔𑀬𑁄 𑀦𑀸𑀫 𑀅𑀭𑀳𑀢𑁆𑀢𑀁, 𑀅𑀭𑀳𑀢𑁆𑀢𑀲𑁆𑀲𑀸𑀧𑀺 𑀏𑀢𑀁 𑀭𑀸𑀕𑀯𑀺𑀦𑀬𑁄𑀢𑀺𑀆𑀤𑀺 𑀦𑀸𑀫𑀫𑁂𑀯𑀸𑀢𑀺 𑀤𑀻𑀧𑁂𑀢𑀺. 𑀏𑀢𑀤𑀯𑁄𑀘𑀸𑀢𑀺 ‘‘𑀲𑀢𑁆𑀣𑀸𑀭𑀸 𑀦𑀺𑀩𑁆𑀩𑀸𑀦𑀥𑀸𑀢𑀽𑀢𑀺 𑀯𑀤𑀦𑁆𑀢𑁂𑀦 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 𑀓𑀣𑀺𑀢𑀁, 𑀫𑀕𑁆𑀕𑁄 𑀧𑀦𑀲𑁆𑀲 𑀦 𑀓𑀣𑀺𑀢𑁄. 𑀢𑀁 𑀓𑀣𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀅𑀦𑀼𑀲𑀦𑁆𑀥𑀺𑀓𑀼𑀲𑀮𑀢𑀸𑀬 𑀧𑀼𑀘𑁆𑀙𑀦𑁆𑀢𑁄 𑀏𑀢𑀁 𑀅𑀯𑁄𑀘.

𑁮. 𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁮. 𑀅𑀝𑁆𑀞𑀫𑁂 𑀓𑀢𑀫𑀸 𑀘 𑀪𑀺𑀓𑁆𑀔𑀯𑁂 𑀲𑀫𑁆𑀫𑀸𑀤𑀺𑀝𑁆𑀞𑀻𑀢𑀺 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀁 𑀯𑀺𑀪𑀚𑀺𑀢𑁆𑀯𑀸 𑀧𑀼𑀦 𑀅𑀧𑀭𑁂𑀦 𑀧𑀭𑀺𑀬𑀸𑀬𑁂𑀦 𑀯𑀺𑀪𑀚𑀺𑀢𑀼𑀓𑀸𑀫𑁄 𑀇𑀤𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀤𑀼𑀓𑁆𑀔𑁂 𑀜𑀸𑀡𑀦𑁆𑀢𑀺 𑀲𑀯𑀦𑀲𑀫𑁆𑀫𑀲𑀦𑀧𑀝𑀺𑀯𑁂𑀥𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀘𑀢𑀽𑀳𑀸𑀓𑀸𑀭𑁂𑀳𑀺 𑀉𑀧𑁆𑀧𑀦𑁆𑀦𑀁 𑀜𑀸𑀡𑀁. 𑀲𑀫𑀼𑀤𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀲𑀫𑁆𑀫𑀲𑀦𑀲𑁆𑀲 𑀅𑀪𑀸𑀯𑀸 𑀢𑀺𑀯𑀺𑀥𑀫𑁂𑀯 𑀯𑀝𑁆𑀝𑀢𑀺. 𑀏𑀯𑀫𑁂𑀢𑀁 ‘‘𑀤𑀼𑀓𑁆𑀔𑁂 𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀁 𑀤𑀲𑁆𑀲𑀺𑀢𑀁.

𑀢𑀢𑁆𑀣 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀯𑀝𑁆𑀝𑀁, 𑀧𑀘𑁆𑀙𑀺𑀫𑀸𑀦𑀺 𑀯𑀺𑀯𑀝𑁆𑀝𑀁. 𑀢𑁂𑀲𑀼 𑀪𑀺𑀓𑁆𑀔𑀼𑀦𑁄 𑀯𑀝𑁆𑀝𑁂 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀺, 𑀯𑀺𑀯𑀝𑁆𑀝𑁂 𑀦𑀢𑁆𑀣𑀺 𑀅𑀪𑀺𑀦𑀺𑀯𑁂𑀲𑁄. 𑀧𑀼𑀭𑀺𑀫𑀸𑀦𑀺 𑀳𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀁, 𑀢𑀡𑁆𑀳𑀸 𑀲𑀫𑀼𑀤𑀬𑁄’’𑀢𑀺 𑀏𑀯𑀁 𑀲𑀗𑁆𑀔𑁂𑀧𑁂𑀦 𑀘, ‘‘𑀓𑀢𑀫𑁂 𑀧𑀜𑁆𑀘𑀓𑁆𑀔𑀦𑁆𑀥𑀸 𑀭𑀽𑀧𑀓𑁆𑀔𑀦𑁆𑀥𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀺𑀢𑁆𑀣𑀸𑀭𑁂𑀦 𑀘 𑀆𑀘𑀭𑀺𑀬𑀲𑀦𑁆𑀢𑀺𑀓𑁂 𑀉𑀕𑁆𑀕𑀡𑁆𑀳𑀺𑀢𑁆𑀯𑀸 𑀯𑀸𑀘𑀸𑀬 𑀧𑀼𑀦𑀧𑁆𑀧𑀼𑀦𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑀬𑁄𑀕𑀸𑀯𑀘𑀭𑁄 𑀓𑀫𑁆𑀫𑀁 𑀓𑀭𑁄𑀢𑀺. 𑀇𑀢𑀭𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀲𑀘𑁆𑀘𑁂𑀲𑀼 𑁋 ‘‘𑀦𑀺𑀭𑁄𑀥𑀲𑀘𑁆𑀘𑀁 𑀇𑀝𑁆𑀞𑀁 𑀓𑀦𑁆𑀢𑀁 𑀫𑀦𑀸𑀧𑀁, 𑀫𑀕𑁆𑀕𑀲𑀘𑁆𑀘𑀁 𑀇𑀝𑁆𑀞𑀁 𑀓𑀦𑁆𑀢𑀁 𑀫𑀦𑀸𑀧’’𑀦𑁆𑀢𑀺 𑀏𑀯𑀁 𑀲𑀯𑀦𑁂𑀦𑁂𑀯 𑀓𑀫𑁆𑀫𑀁 𑀓𑀭𑁄𑀢𑀺. 𑀲𑁄 𑀏𑀯𑀁 𑀓𑀭𑁄𑀦𑁆𑀢𑁄 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀏𑀓𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀢𑀺, 𑀏𑀓𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺. 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀢𑀺, 𑀲𑀫𑀼𑀤𑀬𑀁 𑀧𑀳𑀸𑀦𑀧𑀝𑀺𑀯𑁂𑀥𑁂𑀦, 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀺𑀭𑀺𑀬𑀧𑀝𑀺𑀯𑁂𑀥𑁂𑀦, 𑀫𑀕𑁆𑀕𑀁 𑀪𑀸𑀯𑀦𑀸𑀧𑀝𑀺𑀯𑁂𑀥𑁂𑀦 𑀧𑀝𑀺𑀯𑀺𑀚𑁆𑀛𑀢𑀺. 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑁂𑀦…𑀧𑁂… 𑀫𑀕𑁆𑀕𑀁 𑀪𑀸𑀯𑀦𑀸𑀪𑀺𑀲𑀫𑀬𑁂𑀦 𑀅𑀪𑀺𑀲𑀫𑁂𑀢𑀺.

𑀏𑀯𑀫𑀲𑁆𑀲 𑀧𑀼𑀩𑁆𑀩𑀪𑀸𑀕𑁂 𑀤𑁆𑀯𑀻𑀲𑀼 𑀲𑀘𑁆𑀘𑁂𑀲𑀼 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀲𑀯𑀦𑀥𑀸𑀭𑀡𑀲𑀫𑁆𑀫𑀲𑀦𑀧𑀝𑀺𑀯𑁂𑀥𑁄 𑀳𑁄𑀢𑀺, 𑀤𑁆𑀯𑀻𑀲𑀼 𑀲𑀯𑀦𑀧𑀝𑀺𑀯𑁂𑀥𑁄𑀬𑁂𑀯. 𑀅𑀧𑀭𑀪𑀸𑀕𑁂 𑀢𑀻𑀲𑀼 𑀓𑀺𑀘𑁆𑀘𑀢𑁄 𑀧𑀝𑀺𑀯𑁂𑀥𑁄 𑀳𑁄𑀢𑀺, 𑀦𑀺𑀭𑁄𑀥𑁂 𑀆𑀭𑀫𑁆𑀫𑀡𑀧𑀝𑀺𑀯𑁂𑀥𑁄. 𑀧𑀘𑁆𑀘𑀯𑁂𑀓𑁆𑀔𑀡𑀸 𑀧𑀦 𑀧𑀢𑁆𑀢𑀲𑀘𑁆𑀘𑀲𑁆𑀲 𑀳𑁄𑀢𑀺. 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀼𑀩𑁆𑀩𑁂 𑀧𑀭𑀺𑀕𑁆𑀕𑀳𑀢𑁄 𑁋 ‘‘𑀤𑀼𑀓𑁆𑀔𑀁 𑀧𑀭𑀺𑀚𑀸𑀦𑀸𑀫𑀺, 𑀲𑀫𑀼𑀤𑀬𑀁 𑀧𑀚𑀳𑀸𑀫𑀺, 𑀦𑀺𑀭𑁄𑀥𑀁 𑀲𑀘𑁆𑀙𑀺𑀓𑀭𑁄𑀫𑀺, 𑀫𑀕𑁆𑀕𑀁 𑀪𑀸𑀯𑁂𑀫𑀻’’𑀢𑀺 𑀆𑀪𑁄𑀕𑀲𑀫𑀦𑁆𑀦𑀸𑀳𑀸𑀭𑀫𑀦𑀲𑀺𑀓𑀸𑀭𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀢𑁆𑀣𑀺, 𑀧𑀭𑀺𑀕𑁆𑀕𑀳𑀢𑁄 𑀧𑀝𑁆𑀞𑀸𑀬 𑀳𑁄𑀢𑀺. 𑀅𑀧𑀭𑀪𑀸𑀕𑁂 𑀧𑀦 𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑀸𑀢𑀫𑁂𑀯 𑀳𑁄𑀢𑀺…𑀧𑁂… 𑀫𑀕𑁆𑀕𑁄 𑀪𑀸𑀯𑀺𑀢𑁄𑀯 𑀳𑁄𑀢𑀺.

𑀢𑀢𑁆𑀣 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀤𑀼𑀤𑁆𑀤𑀲𑀢𑁆𑀢𑀸 𑀕𑀫𑁆𑀪𑀻𑀭𑀸𑀦𑀺, 𑀤𑁆𑀯𑁂 𑀕𑀫𑁆𑀪𑀻𑀭𑀢𑁆𑀢𑀸 𑀤𑀼𑀤𑁆𑀤𑀲𑀸𑀦𑀺. 𑀤𑀼𑀓𑁆𑀔𑀲𑀘𑁆𑀘𑀜𑁆𑀳𑀺 𑀉𑀧𑁆𑀧𑀢𑁆𑀢𑀺𑀢𑁄 𑀧𑀸𑀓𑀝𑀁, 𑀔𑀸𑀡𑀼𑀓𑀡𑁆𑀝𑀓𑀧𑀳𑀸𑀭𑀸𑀤𑀻𑀲𑀼 ‘‘𑀅𑀳𑁄 𑀤𑀼𑀓𑁆𑀔’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀫𑁆𑀧𑀺 𑀆𑀧𑀚𑁆𑀚𑀢𑀺. 𑀲𑀫𑀼𑀤𑀬𑀫𑁆𑀧𑀺 𑀔𑀸𑀤𑀺𑀢𑀼𑀓𑀸𑀫𑀢𑀸𑀪𑀼𑀜𑁆𑀚𑀺𑀢𑀼𑀓𑀸𑀫𑀢𑀸𑀤𑀺𑀯𑀲𑁂𑀦 𑀉𑀧𑁆𑀧𑀢𑁆𑀢𑀺𑀢𑁄 𑀧𑀸𑀓𑀝𑀁. 𑀮𑀓𑁆𑀔𑀡𑀧𑀝𑀺𑀯𑁂𑀥𑀢𑁄 𑀧𑀦 𑀉𑀪𑀬𑀫𑁆𑀧𑀺 𑀕𑀫𑁆𑀪𑀻𑀭𑀁. 𑀇𑀢𑀺 𑀢𑀸𑀦𑀺 𑀤𑀼𑀤𑁆𑀤𑀲𑀢𑁆𑀢𑀸 𑀕𑀫𑁆𑀪𑀻𑀭𑀸𑀦𑀺. 𑀇𑀢𑀭𑁂𑀲𑀁 𑀤𑁆𑀯𑀺𑀦𑁆𑀦𑀁 𑀤𑀲𑁆𑀲𑀦𑀢𑁆𑀣𑀸𑀬 𑀧𑀬𑁄𑀕𑁄 𑀪𑀯𑀕𑁆𑀕𑀕𑁆𑀕𑀳𑀡𑀢𑁆𑀣𑀁 𑀳𑀢𑁆𑀣𑀧𑀲𑀸𑀭𑀡𑀁 𑀯𑀺𑀬 𑀅𑀯𑀻𑀘𑀺𑀨𑀼𑀲𑀦𑀢𑁆𑀣𑀁 𑀧𑀸𑀤𑀧𑀲𑀸𑀭𑀡𑀁 𑀯𑀺𑀬 𑀲𑀢𑀥𑀸 𑀪𑀺𑀦𑁆𑀦𑀲𑁆𑀲 𑀯𑀸𑀮𑀲𑁆𑀲 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀧𑀝𑀺𑀧𑀸𑀤𑀦𑀁 𑀯𑀺𑀬 𑀘 𑀳𑁄𑀢𑀺. 𑀇𑀢𑀺 𑀢𑀸𑀦𑀺 𑀕𑀫𑁆𑀪𑀻𑀭𑀢𑁆𑀢𑀸 𑀤𑀼𑀤𑁆𑀤𑀲𑀸𑀦𑀺. 𑀏𑀯𑀁 𑀤𑀼𑀤𑁆𑀤𑀲𑀢𑁆𑀢𑀸 𑀕𑀫𑁆𑀪𑀻𑀭𑁂𑀲𑀼 𑀕𑀫𑁆𑀪𑀻𑀭𑀢𑁆𑀢𑀸 𑀘 𑀤𑀼𑀤𑁆𑀤𑀲𑁂𑀲𑀼 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀉𑀕𑁆𑀕𑀳𑀸𑀤𑀺𑀯𑀲𑁂𑀦 𑀇𑀤𑀁 ‘‘𑀤𑀼𑀓𑁆𑀔𑁂 𑀜𑀸𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀝𑀺𑀯𑁂𑀥𑀓𑁆𑀔𑀡𑁂 𑀧𑀦 𑀏𑀓𑀫𑁂𑀯 𑀢𑀁 𑀜𑀸𑀡𑀁 𑀳𑁄𑀢𑀺.

𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀸𑀤𑀻𑀲𑀼 𑀓𑀸𑀫𑀧𑀘𑁆𑀘𑀦𑀻𑀓𑀝𑁆𑀞𑁂𑀦 𑀓𑀸𑀫𑀢𑁄 𑀦𑀺𑀲𑁆𑀲𑀝𑀪𑀸𑀯𑁂𑀦 𑀯𑀸, 𑀓𑀸𑀫𑀁 𑀲𑀫𑁆𑀫𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑁄𑀢𑀺 𑀯𑀸, 𑀓𑀸𑀫𑀧𑀤𑀖𑀸𑀢𑀁 𑀓𑀸𑀫𑀯𑀽𑀧𑀲𑀫𑀁 𑀓𑀭𑁄𑀦𑁆𑀢𑁄 𑀉𑀧𑁆𑀧𑀦𑁆𑀦𑁄𑀢𑀺 𑀯𑀸, 𑀓𑀸𑀫𑀯𑀺𑀯𑀺𑀢𑁆𑀢𑀦𑁆𑀢𑁂 𑀉𑀧𑁆𑀧𑀦𑁆𑀦𑁄𑀢𑀺 𑀯𑀸 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀲𑀩𑁆𑀩𑁂𑀧𑀺 𑀘 𑀢𑁂 𑀦𑁂𑀓𑁆𑀔𑀫𑁆𑀫𑀲𑀗𑁆𑀓𑀧𑁆𑀧𑀸𑀤𑀬𑁄 𑀓𑀸𑀫𑀩𑁆𑀬𑀸𑀧𑀸𑀤𑀯𑀺𑀳𑀺𑀁𑀲𑀸𑀯𑀺𑀭𑀫𑀡𑀲𑀜𑁆𑀜𑀸𑀦𑀁 𑀦𑀸𑀦𑀢𑁆𑀢𑀸 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀉𑀧𑁆𑀧𑀦𑁆𑀦𑀲𑁆𑀲 𑀅𑀓𑀼𑀲𑀮𑀲𑀗𑁆𑀓𑀧𑁆𑀧𑀲𑁆𑀲 𑀧𑀤𑀘𑁆𑀙𑁂𑀤𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀲𑀸𑀥𑀦𑀯𑀲𑁂𑀦 𑀫𑀕𑁆𑀕𑀗𑁆𑀕𑀁 𑀧𑀽𑀭𑀬𑀫𑀸𑀦𑁄 𑀏𑀓𑁄𑀯 𑀓𑀼𑀲𑀮𑀲𑀗𑁆𑀓𑀧𑁆𑀧𑁄 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀦𑀸𑀫.

𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀻𑀆𑀤𑀬𑁄𑀧𑀺 𑀫𑀼𑀲𑀸𑀯𑀸𑀤𑀸𑀤𑀻𑀳𑀺 𑀯𑀺𑀭𑀫𑀡𑀲𑀜𑁆𑀜𑀸𑀦𑀁 𑀦𑀸𑀦𑀢𑁆𑀢𑀸 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀇𑀫𑁂𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀉𑀧𑁆𑀧𑀦𑁆𑀦𑀸𑀬 𑀅𑀓𑀼𑀲𑀮𑀤𑀼𑀲𑁆𑀲𑀻𑀮𑁆𑀬𑀘𑁂𑀢𑀦𑀸𑀬 𑀧𑀤𑀘𑁆𑀙𑁂𑀤𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀲𑀸𑀥𑀦𑀯𑀲𑁂𑀦 𑀫𑀕𑁆𑀕𑀗𑁆𑀕𑀁 𑀧𑀽𑀭𑀬𑀫𑀸𑀦𑀸 𑀏𑀓𑀸𑀯 𑀓𑀼𑀲𑀮𑀯𑁂𑀭𑀫𑀡𑀻 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀲𑀫𑁆𑀫𑀸𑀯𑀸𑀘𑀸 𑀦𑀸𑀫.

𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻 𑀆𑀤𑀬𑁄𑀧𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀯𑀺𑀭𑀫𑀡𑀲𑀜𑁆𑀜𑀸𑀦𑀁 𑀦𑀸𑀦𑀢𑁆𑀢𑀸 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀉𑀧𑁆𑀧𑀦𑁆𑀦𑀸𑀬 𑀅𑀓𑀼𑀲𑀮𑀤𑀼𑀲𑁆𑀲𑀻𑀮𑁆𑀬𑀘𑁂𑀢𑀦𑀸𑀬 𑀅𑀓𑀺𑀭𑀺𑀬𑀢𑁄 𑀧𑀤𑀘𑁆𑀙𑁂𑀤𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀲𑀸𑀥𑀦𑀯𑀲𑁂𑀦 𑀫𑀕𑁆𑀕𑀗𑁆𑀕𑀁 𑀧𑀽𑀭𑀬𑀫𑀸𑀦𑀸 𑀏𑀓𑀸𑀯 𑀓𑀼𑀲𑀮𑀯𑁂𑀭𑀫𑀡𑀻 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀦𑀸𑀫.

𑀫𑀺𑀘𑁆𑀙𑀸𑀆𑀚𑀻𑀯𑀦𑁆𑀢𑀺 𑀔𑀸𑀤𑀦𑀻𑀬𑀪𑁄𑀚𑀦𑀻𑀬𑀸𑀤𑀻𑀦𑀁 𑀅𑀢𑁆𑀣𑀸𑀬 𑀧𑀯𑀢𑁆𑀢𑀺𑀢𑀁 𑀓𑀸𑀬𑀯𑀘𑀻𑀤𑀼𑀘𑁆𑀘𑀭𑀺𑀢𑀁. 𑀧𑀳𑀸𑀬𑀸𑀢𑀺 𑀯𑀚𑁆𑀚𑁂𑀢𑁆𑀯𑀸. 𑀲𑀫𑁆𑀫𑀸𑀆𑀚𑀻𑀯𑁂𑀦𑀸𑀢𑀺 𑀩𑀼𑀤𑁆𑀥𑀧𑀲𑀢𑁆𑀣𑁂𑀦 𑀆𑀚𑀻𑀯𑁂𑀦. 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑀻𑀢𑀺 𑀚𑀻𑀯𑀺𑀢𑀯𑀼𑀢𑁆𑀢𑀺𑀁 𑀧𑀯𑀢𑁆𑀢𑁂𑀢𑀺. 𑀲𑀫𑁆𑀫𑀸𑀚𑀻𑀯𑁄𑀧𑀺 𑀓𑀼𑀳𑀦𑀸𑀤𑀻𑀳𑀺 𑀯𑀺𑀭𑀫𑀡𑀲𑀜𑁆𑀜𑀸𑀦𑀁 𑀦𑀸𑀦𑀢𑁆𑀢𑀸 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸. 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀇𑀫𑁂𑀲𑀼𑀬𑁂𑀯 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀉𑀧𑁆𑀧𑀦𑁆𑀦𑀸𑀬 𑀫𑀺𑀘𑁆𑀙𑀸𑀚𑀻𑀯𑀤𑀼𑀲𑁆𑀲𑀻𑀮𑁆𑀬𑀘𑁂𑀢𑀦𑀸𑀬 𑀧𑀤𑀘𑁆𑀙𑁂𑀤𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀲𑀸𑀥𑀦𑀯𑀲𑁂𑀦 𑀫𑀕𑁆𑀕𑀗𑁆𑀕𑀁 𑀧𑀽𑀭𑀬𑀫𑀸𑀦𑀸 𑀏𑀓𑀸𑀯 𑀓𑀼𑀲𑀮𑀯𑁂𑀭𑀫𑀡𑀻 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀲𑀫𑁆𑀫𑀸𑀆𑀚𑀻𑀯𑁄 𑀦𑀸𑀫.

𑀅𑀦𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀏𑀓𑀲𑁆𑀫𑀺𑀁 𑀪𑀯𑁂 𑀢𑀣𑀸𑀭𑀽𑀧𑁂 𑀯𑀸 𑀆𑀭𑀫𑁆𑀫𑀡𑁂 𑀅𑀢𑁆𑀢𑀦𑁄 𑀦 𑀉𑀧𑁆𑀧𑀦𑁆𑀦𑀸𑀦𑀁, 𑀧𑀭𑀲𑁆𑀲 𑀧𑀦 𑀉𑀧𑁆𑀧𑀚𑁆𑀚𑀫𑀸𑀦𑁂 𑀤𑀺𑀲𑁆𑀯𑀸 𑁋 ‘‘𑀅𑀳𑁄 𑀯𑀢 𑀫𑁂 𑀏𑀯𑀭𑀽𑀧𑀸 𑀧𑀸𑀧𑀓𑀸 𑀥𑀫𑁆𑀫𑀸 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺 𑀏𑀯𑀁 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀸𑀤𑀸𑀬. 𑀙𑀦𑁆𑀤𑀦𑁆𑀢𑀺 𑀢𑁂𑀲𑀁 𑀅𑀓𑀼𑀲𑀮𑀸𑀦𑀁 𑀅𑀦𑀼𑀧𑁆𑀧𑀸𑀤𑀓𑀧𑀝𑀺𑀧𑀢𑁆𑀢𑀺𑀲𑀸𑀥𑀓𑀁 𑀯𑀻𑀭𑀺𑀬𑀘𑁆𑀙𑀦𑁆𑀤𑀁 𑀚𑀦𑁂𑀢𑀺. 𑀯𑀸𑀬𑀫𑀢𑀻𑀢𑀺 𑀯𑀸𑀬𑀸𑀫𑀁 𑀓𑀭𑁄𑀢𑀺. 𑀯𑀻𑀭𑀺𑀬𑀁 𑀆𑀭𑀪𑀢𑀻𑀢𑀺 𑀯𑀻𑀭𑀺𑀬𑀁 𑀧𑀯𑀢𑁆𑀢𑁂𑀢𑀺. 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀻𑀢𑀺 𑀯𑀻𑀭𑀺𑀬𑁂𑀦 𑀘𑀺𑀢𑁆𑀢𑀁 𑀧𑀕𑁆𑀕𑀳𑀺𑀢𑀁 𑀓𑀭𑁄𑀢𑀺. 𑀧𑀤𑀳𑀢𑀻𑀢𑀺 ‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘 𑀅𑀝𑁆𑀞𑀺 𑀘 𑀅𑀯𑀲𑀺𑀲𑁆𑀲𑀢𑀽’’𑀢𑀺 (𑀫. 𑀦𑀺. 𑁨.𑁧𑁮𑁪) 𑀧𑀥𑀸𑀦𑀁 𑀧𑀯𑀢𑁆𑀢𑁂𑀢𑀺. 𑀉𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀅𑀢𑁆𑀢𑀦𑁄 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀸𑀦𑀁. 𑀇𑀤𑀸𑀦𑀺 𑀢𑀸𑀤𑀺𑀲𑁂 𑀦 𑀉𑀧𑁆𑀧𑀸𑀤𑁂𑀲𑁆𑀲𑀸𑀫𑀻𑀢𑀺 𑀢𑁂𑀲𑀁 𑀧𑀳𑀸𑀦𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺.

𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀦𑁆𑀢𑀺 𑀅𑀧𑀝𑀺𑀮𑀤𑁆𑀥𑀸𑀦𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁. 𑀉𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀢𑁂𑀲𑀁𑀬𑁂𑀯 𑀧𑀝𑀺𑀮𑀤𑁆𑀥𑀸𑀦𑀁. 𑀞𑀺𑀢𑀺𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀉𑀧𑁆𑀧𑀢𑁆𑀢𑀺𑀧𑀩𑀦𑁆𑀥𑀯𑀲𑁂𑀦 𑀞𑀺𑀢𑀢𑁆𑀣𑀁. 𑀅𑀲𑀫𑁆𑀫𑁄𑀲𑀸𑀬𑀸𑀢𑀺 𑀅𑀯𑀺𑀦𑀸𑀲𑀢𑁆𑀣𑀁. 𑀪𑀺𑀬𑁆𑀬𑁄𑀪𑀸𑀯𑀸𑀬𑀸𑀢𑀺 𑀉𑀧𑀭𑀺𑀪𑀸𑀯𑀸𑀬. 𑀯𑁂𑀧𑀼𑀮𑁆𑀮𑀸𑀬𑀸𑀢𑀺 𑀯𑀺𑀧𑀼𑀮𑀪𑀸𑀯𑀸𑀬. 𑀧𑀸𑀭𑀺𑀧𑀽𑀭𑀺𑀬𑀸𑀢𑀺 𑀪𑀸𑀯𑀦𑀸𑀬 𑀧𑀭𑀺𑀧𑀽𑀭𑀡𑀢𑁆𑀣𑀁. 𑀅𑀬𑀫𑁆𑀧𑀺 𑀲𑀫𑁆𑀫𑀸𑀯𑀸𑀬𑀸𑀫𑁄 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀅𑀓𑀼𑀲𑀮𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀸𑀤𑀺𑀘𑀺𑀢𑁆𑀢𑀦𑀸𑀦𑀢𑁆𑀢𑀸 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸. 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀇𑀫𑁂𑀲𑀼𑀬𑁂𑀯 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀫𑀕𑁆𑀕𑀗𑁆𑀕𑀁 𑀧𑀽𑀭𑀬𑀫𑀸𑀦𑀁 𑀏𑀓𑀫𑁂𑀯 𑀓𑀼𑀲𑀮𑀯𑀻𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀲𑀫𑁆𑀫𑀸𑀯𑀸𑀬𑀸𑀫𑁄 𑀦𑀸𑀫.

𑀲𑀫𑁆𑀫𑀸𑀲𑀢𑀺𑀧𑀺 𑀓𑀸𑀬𑀸𑀤𑀺𑀧𑀭𑀺𑀕𑁆𑀕𑀸𑀳𑀓𑀘𑀺𑀢𑁆𑀢𑀸𑀦𑀁 𑀦𑀸𑀦𑀢𑁆𑀢𑀸 𑀧𑀼𑀩𑁆𑀩𑀪𑀸𑀕𑁂 𑀦𑀸𑀦𑀸, 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀇𑀫𑁂𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦 𑀫𑀕𑁆𑀕𑀗𑁆𑀕𑀁 𑀧𑀽𑀭𑀬𑀫𑀸𑀦𑀸 𑀏𑀓𑀸 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀅𑀬𑀁 𑀲𑀫𑁆𑀫𑀸𑀲𑀢𑀺 𑀦𑀸𑀫.

𑀛𑀸𑀦𑀸𑀤𑀻𑀦𑀺 𑀧𑀼𑀩𑁆𑀩𑀪𑀸𑀕𑁂𑀧𑀺 𑀫𑀕𑁆𑀕𑀓𑁆𑀔𑀡𑁂𑀧𑀺 𑀦𑀸𑀦𑀸, 𑀧𑀼𑀩𑁆𑀩𑀪𑀸𑀕𑁂 𑀲𑀫𑀸𑀧𑀢𑁆𑀢𑀺𑀯𑀲𑁂𑀦 𑀦𑀸𑀦𑀸, 𑀫𑀕𑁆𑀕𑀓𑁆𑀔𑀡𑁂 𑀦𑀸𑀦𑀸𑀫𑀕𑁆𑀕𑀯𑀲𑁂𑀦. 𑀏𑀓𑀲𑁆𑀲 𑀳𑀺 𑀧𑀞𑀫𑀫𑀕𑁆𑀕𑁄 𑀧𑀞𑀫𑀚𑁆𑀛𑀸𑀦𑀺𑀓𑁄 𑀳𑁄𑀢𑀺, 𑀤𑀼𑀢𑀺𑀬𑀫𑀕𑁆𑀕𑀸𑀤𑀬𑁄𑀧𑀺 𑀧𑀞𑀫𑀚𑁆𑀛𑀸𑀦𑀺𑀓𑀸 𑀯𑀸 𑀤𑀼𑀢𑀺𑀬𑀸𑀤𑀻𑀲𑀼 𑀅𑀜𑁆𑀜𑀢𑀭𑀚𑁆𑀛𑀸𑀦𑀺𑀓𑀸 𑀯𑀸. 𑀏𑀓𑀲𑁆𑀲 𑀧𑀞𑀫𑀫𑀕𑁆𑀕𑁄 𑀤𑀼𑀢𑀺𑀬𑀸𑀤𑀻𑀦𑀁 𑀅𑀜𑁆𑀜𑀢𑀭𑀚𑁆𑀛𑀸𑀦𑀺𑀓𑁄 𑀳𑁄𑀢𑀺, 𑀤𑀼𑀢𑀺𑀬𑀸𑀤𑀬𑁄𑀧𑀺 𑀤𑀼𑀢𑀺𑀬𑀸𑀤𑀻𑀦𑀁 𑀅𑀜𑁆𑀜𑀢𑀭𑀚𑁆𑀛𑀸𑀦𑀺𑀓𑀸 𑀯𑀸 𑀧𑀞𑀫𑀚𑁆𑀛𑀸𑀦𑀺𑀓𑀸 𑀯𑀸. 𑀏𑀯𑀁 𑀘𑀢𑁆𑀢𑀸𑀭𑁄𑀧𑀺 𑀫𑀕𑁆𑀕𑀸 𑀛𑀸𑀦𑀯𑀲𑁂𑀦 𑀲𑀤𑀺𑀲𑀸 𑀯𑀸 𑀅𑀲𑀤𑀺𑀲𑀸 𑀯𑀸 𑀏𑀓𑀘𑁆𑀘𑀲𑀤𑀺𑀲𑀸 𑀯𑀸 𑀳𑁄𑀦𑁆𑀢𑀺.

𑀅𑀬𑀁 𑀧𑀦𑀲𑁆𑀲 𑀯𑀺𑀲𑁂𑀲𑁄 𑀧𑀸𑀤𑀓𑀚𑁆𑀛𑀸𑀦𑀦𑀺𑀬𑀫𑁂𑀦 𑀳𑁄𑀢𑀺. 𑀧𑀸𑀤𑀓𑀚𑁆𑀛𑀸𑀦𑀦𑀺𑀬𑀫𑁂𑀦 𑀳𑀺 𑀧𑀞𑀫𑀚𑁆𑀛𑀸𑀦𑀮𑀸𑀪𑀺𑀦𑁄 𑀧𑀞𑀫𑀚𑁆𑀛𑀸𑀦𑀸 𑀯𑀼𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀫𑀕𑁆𑀕𑁄 𑀧𑀞𑀫𑀚𑁆𑀛𑀸𑀦𑀺𑀓𑁄 𑀳𑁄𑀢𑀺, 𑀫𑀕𑁆𑀕𑀗𑁆𑀕𑀩𑁄𑀚𑁆𑀛𑀗𑁆𑀕𑀸𑀦𑀺 𑀧𑀦𑁂𑀢𑁆𑀣 𑀧𑀭𑀺𑀧𑀼𑀡𑁆𑀡𑀸𑀦𑁂𑀯 𑀳𑁄𑀦𑁆𑀢𑀺. 𑀤𑀼𑀢𑀺𑀬𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑁄 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑁄 𑀳𑁄𑀢𑀺, 𑀫𑀕𑁆𑀕𑀗𑁆𑀕𑀸𑀦𑀺 𑀧𑀦𑁂𑀢𑁆𑀣 𑀲𑀢𑁆𑀢 𑀳𑁄𑀦𑁆𑀢𑀺. 𑀢𑀢𑀺𑀬𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀯𑀺𑀧𑀲𑁆𑀲𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑁄 𑀢𑀢𑀺𑀬𑀚𑁆𑀛𑀸𑀦𑀺𑀓𑁄, 𑀫𑀕𑁆𑀕𑀗𑁆𑀕𑀸𑀦𑀺 𑀧𑀦𑁂𑀢𑁆𑀣 𑀲𑀢𑁆𑀢, 𑀩𑁄𑀚𑁆𑀛𑀗𑁆𑀕𑀸𑀦𑀺 𑀙 𑀳𑁄𑀦𑁆𑀢𑀺. 𑀏𑀲 𑀦𑀬𑁄 𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀸.

𑀆𑀭𑀼𑀧𑁆𑀧𑁂 𑀘𑀢𑀼𑀓𑁆𑀓𑀧𑀜𑁆𑀘𑀓𑀚𑁆𑀛𑀸𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀜𑁆𑀘 𑀮𑁄𑀓𑀼𑀢𑁆𑀢𑀭𑀁, 𑀦𑁄 𑀮𑁄𑀓𑀺𑀬𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀓𑀣𑀦𑁆𑀢𑀺? 𑀏𑀢𑁆𑀣𑀸𑀧𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼 𑀬𑀢𑁄 𑀯𑀼𑀝𑁆𑀞𑀸𑀬 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀝𑀺𑀮𑀪𑀺𑀢𑁆𑀯𑀸 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀁 𑀪𑀸𑀯𑁂𑀢𑁆𑀯𑀸 𑀲𑁄 𑀆𑀭𑀼𑀧𑁆𑀧𑁂 𑀉𑀧𑁆𑀧𑀦𑁆𑀦𑁄, 𑀢𑀁𑀛𑀸𑀦𑀺𑀓𑀸𑀯𑀲𑁆𑀲 𑀢𑀢𑁆𑀣 𑀢𑀬𑁄 𑀫𑀕𑁆𑀕𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀏𑀯𑀁 𑀧𑀸𑀤𑀓𑀚𑁆𑀛𑀸𑀦𑀫𑁂𑀯 𑀦𑀺𑀬𑀫𑁂𑀢𑀺. 𑀓𑁂𑀘𑀺 𑀧𑀦 𑀣𑁂𑀭𑀸 𑁋 ‘‘𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀸 𑀔𑀦𑁆𑀥𑀸 𑀦𑀺𑀬𑀫𑁂𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 ‘‘𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁄 𑀦𑀺𑀬𑀫𑁂𑀢𑀻’’𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 ‘‘𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀯𑀺𑀧𑀲𑁆𑀲𑀦𑀸 𑀦𑀺𑀬𑀫𑁂𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑁂𑀲𑀁 𑀯𑀸𑀤𑀯𑀺𑀦𑀺𑀘𑁆𑀙𑀬𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀯𑀺𑀧𑀲𑁆𑀲𑀦𑀸𑀥𑀺𑀓𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑀅𑀬𑀁 𑀧𑀼𑀩𑁆𑀩𑀪𑀸𑀕𑁂 𑀮𑁄𑀓𑀺𑀬𑁄, 𑀅𑀧𑀭𑀪𑀸𑀕𑁂 𑀮𑁄𑀓𑀼𑀢𑁆𑀢𑀭𑁄 𑀲𑀫𑁆𑀫𑀸𑀲𑀫𑀸𑀥𑀻𑀢𑀺 𑀯𑀼𑀘𑁆𑀘𑀢𑀺.

𑁯. 𑀲𑀽𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁯. 𑀦𑀯𑀫𑁂 𑀫𑀺𑀘𑁆𑀙𑀸𑀧𑀡𑀺𑀳𑀺𑀢𑀦𑁆𑀢𑀺 𑀲𑀽𑀓𑀁 𑀦𑀸𑀫 𑀉𑀤𑁆𑀥𑀕𑁆𑀕𑀁 𑀓𑀢𑁆𑀯𑀸 𑀞𑀧𑀺𑀢𑀁 𑀳𑀢𑁆𑀣𑀁 𑀯𑀸 𑀧𑀸𑀤𑀁 𑀯𑀸 𑀪𑀺𑀦𑁆𑀤𑀢𑀺, 𑀢𑀣𑀸 𑀅𑀝𑁆𑀞𑀧𑀺𑀢𑀁 𑀧𑀦 𑀫𑀺𑀘𑁆𑀙𑀸𑀧𑀡𑀺𑀳𑀺𑀢𑀁 𑀦𑀸𑀫. 𑀫𑀺𑀘𑁆𑀙𑀸𑀧𑀡𑀺𑀳𑀺𑀢𑀸𑀬 𑀤𑀺𑀝𑁆𑀞𑀺𑀬𑀸𑀢𑀺 𑀫𑀺𑀘𑁆𑀙𑀸𑀞𑀧𑀺𑀢𑀸𑀬 𑀓𑀫𑁆𑀫𑀲𑁆𑀲𑀓𑀢𑀧𑀜𑁆𑀜𑀸𑀬. 𑀅𑀯𑀺𑀚𑁆𑀚𑀁 𑀪𑀺𑀦𑁆𑀤𑀺𑀲𑁆𑀲𑀢𑀻𑀢𑀺 𑀘𑀢𑀼𑀲𑀘𑁆𑀘𑀧𑀝𑀺𑀘𑁆𑀙𑀸𑀤𑀓𑀁 𑀅𑀯𑀺𑀚𑁆𑀚𑀁 𑀪𑀺𑀦𑁆𑀤𑀺𑀲𑁆𑀲𑀢𑀺. 𑀯𑀺𑀚𑁆𑀚𑀁 𑀉𑀧𑁆𑀧𑀸𑀤𑁂𑀲𑁆𑀲𑀢𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑀯𑀺𑀚𑁆𑀚𑀁 𑀉𑀧𑁆𑀧𑀸𑀤𑁂𑀲𑁆𑀲𑀢𑀺. 𑀫𑀺𑀘𑁆𑀙𑀸𑀧𑀡𑀺𑀳𑀺𑀢𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀤𑀺𑀝𑁆𑀞𑀺𑀬𑀸𑀢𑀺 𑀓𑀫𑁆𑀫𑀲𑁆𑀲𑀓𑀢𑀧𑀜𑁆𑀜𑀸𑀬 𑀘𑁂𑀯 𑀫𑀕𑁆𑀕𑀪𑀸𑀯𑀦𑀸𑀬 𑀘 𑀫𑀺𑀘𑁆𑀙𑀸 𑀞𑀧𑀺𑀢𑀢𑁆𑀢𑀸, 𑀅𑀧𑁆𑀧𑀯𑀢𑁆𑀢𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀁 𑀫𑀕𑁆𑀕𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀫𑀺𑀲𑁆𑀲𑀓𑀫𑀕𑁆𑀕𑁄 𑀓𑀣𑀺𑀢𑁄.

𑁧𑁦. 𑀦𑀦𑁆𑀤𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦. 𑀤𑀲𑀫𑁂 𑀧𑀭𑀺𑀩𑁆𑀩𑀸𑀚𑀓𑁄𑀢𑀺 𑀙𑀦𑁆𑀦𑀧𑀭𑀺𑀩𑁆𑀩𑀸𑀚𑀓𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀯𑀺𑀚𑁆𑀚𑀸𑀯𑀕𑁆𑀕𑁄 𑀧𑀞𑀫𑁄.

𑁨. 𑀯𑀺𑀳𑀸𑀭𑀯𑀕𑁆𑀕𑁄

𑁧. 𑀧𑀞𑀫𑀯𑀺𑀳𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀇𑀘𑁆𑀙𑀸𑀫𑀳𑀁, 𑀪𑀺𑀓𑁆𑀔𑀯𑁂, 𑀅𑀟𑁆𑀠𑀫𑀸𑀲𑀁 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀦𑁆𑀢𑀺 𑀅𑀳𑀁, 𑀪𑀺𑀓𑁆𑀔𑀯𑁂, 𑀏𑀓𑀁 𑀅𑀟𑁆𑀠𑀫𑀸𑀲𑀁 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀁 𑀦𑀺𑀮𑀻𑀬𑀺𑀢𑀼𑀁 𑀏𑀓𑁄𑀯 𑀳𑀼𑀢𑁆𑀯𑀸 𑀯𑀺𑀳𑀭𑀺𑀢𑀼𑀁 𑀇𑀘𑁆𑀙𑀸𑀫𑀻𑀢𑀺 𑀅𑀢𑁆𑀣𑁄. 𑀦𑀫𑁆𑀳𑀺 𑀓𑁂𑀦𑀘𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀏𑀓𑁂𑀦 𑀧𑀺𑀡𑁆𑀟𑀧𑀸𑀢𑀦𑀻𑀳𑀸𑀭𑀓𑁂𑀦𑀸𑀢𑀺 𑀬𑁄 𑀅𑀢𑁆𑀢𑀦𑀸 𑀧𑀬𑀼𑀢𑁆𑀢𑀯𑀸𑀘𑀁 𑀅𑀓𑀢𑁆𑀯𑀸 𑀫𑀫𑀢𑁆𑀣𑀸𑀬 𑀲𑀤𑁆𑀥𑁂𑀲𑀼 𑀓𑀼𑀮𑁂𑀲𑀼 𑀧𑀝𑀺𑀬𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀁 𑀦𑀻𑀳𑀭𑀺𑀢𑁆𑀯𑀸 𑀫𑀬𑁆𑀳𑀁 𑀉𑀧𑀦𑀸𑀫𑁂𑀬𑁆𑀬, 𑀢𑀁 𑀧𑀺𑀡𑁆𑀟𑀧𑀸𑀢𑀦𑀻𑀳𑀸𑀭𑀓𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀞𑀧𑁂𑀢𑁆𑀯𑀸 𑀦𑀫𑁆𑀳𑀺 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀪𑀺𑀓𑁆𑀔𑀼𑀦𑀸 𑀯𑀸 𑀕𑀳𑀝𑁆𑀞𑁂𑀦 𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄𑀢𑀺.

𑀓𑀲𑁆𑀫𑀸 𑀧𑀦 𑀏𑀯𑀫𑀸𑀳𑀸𑀢𑀺? 𑀢𑀲𑁆𑀫𑀺𑀁 𑀓𑀺𑀭 𑀅𑀟𑁆𑀠𑀫𑀸𑀲𑁂 𑀯𑀺𑀦𑁂𑀢𑀩𑁆𑀩𑁄 𑀲𑀢𑁆𑀢𑁄 𑀦𑀸𑀳𑁄𑀲𑀺. 𑀅𑀣 𑀲𑀢𑁆𑀣𑀸 𑁋 ‘‘𑀇𑀫𑀁 𑀅𑀟𑁆𑀠𑀫𑀸𑀲𑀁 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦𑁂𑀯 𑀯𑀻𑀢𑀺𑀦𑀸𑀫𑁂𑀲𑁆𑀲𑀸𑀫𑀺, 𑀇𑀢𑀺 𑀫𑀬𑁆𑀳𑀜𑁆𑀘𑁂𑀯 𑀲𑀼𑀔𑀯𑀺𑀳𑀸𑀭𑁄 𑀪𑀯𑀺𑀲𑁆𑀲𑀢𑀺, 𑀅𑀦𑀸𑀕𑀢𑁂 𑀘 𑀧𑀘𑁆𑀙𑀺𑀫𑀸 𑀚𑀦𑀢𑀸 ‘𑀲𑀢𑁆𑀣𑀸𑀧𑀺 𑀕𑀡𑀁 𑀯𑀺𑀳𑀸𑀬 𑀏𑀓𑀓𑁄 𑀯𑀺𑀳𑀸𑀲𑀺, 𑀓𑀺𑀫𑀗𑁆𑀕𑀁 𑀧𑀦 𑀫𑀬’𑀦𑁆𑀢𑀺 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀤𑀲𑁆𑀲𑀸 𑀪𑀯𑀺𑀲𑁆𑀲𑀢𑀺 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀏𑀯𑀫𑀸𑀳. 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀲𑀢𑁆𑀣𑀼 𑀯𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀏𑀓𑀁 𑀪𑀺𑀓𑁆𑀔𑀼𑀁 𑀅𑀤𑀸𑀲𑀺. 𑀲𑁄 𑀧𑀸𑀢𑁄𑀯 𑀕𑀦𑁆𑀥𑀓𑀼𑀝𑀺𑀧𑀭𑀺𑀯𑁂𑀡𑀲𑀫𑁆𑀫𑀚𑁆𑀚𑀦𑀫𑀼𑀔𑁄𑀤𑀓𑀤𑀦𑁆𑀢𑀓𑀝𑁆𑀞𑀤𑀸𑀦𑀸𑀤𑀻𑀦𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀢𑀲𑁆𑀫𑀺𑀁 𑀔𑀡𑁂 𑀓𑀢𑁆𑀯𑀸 𑀅𑀧𑀕𑀘𑁆𑀙𑀢𑀺.

𑀬𑁂𑀦 𑀲𑁆𑀯𑀸𑀳𑀦𑁆𑀢𑀺 𑀬𑁂𑀦 𑀲𑁄 𑀅𑀳𑀁. 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀧𑀞𑀫𑀁𑀬𑁂𑀯 𑀏𑀓𑀽𑀦𑀧𑀜𑁆𑀜𑀸𑀲𑀤𑀺𑀯𑀲𑀩𑁆𑀪𑀦𑁆𑀢𑀭𑁂. 𑀯𑀺𑀳𑀭𑀸𑀫𑀻𑀢𑀺 𑀇𑀤𑀁 𑀅𑀢𑀻𑀢𑀢𑁆𑀣𑁂 𑀯𑀢𑁆𑀢𑀫𑀸𑀦𑀯𑀘𑀦𑀁. 𑀢𑀲𑁆𑀲 𑀧𑀤𑁂𑀲𑁂𑀦 𑀯𑀺𑀳𑀸𑀲𑀺𑀦𑁆𑀢𑀺 𑀢𑀲𑁆𑀲 𑀧𑀞𑀫𑀸𑀪𑀺𑀲𑀫𑁆𑀩𑀼𑀤𑁆𑀥𑀯𑀺𑀳𑀸𑀭𑀲𑁆𑀲 𑀧𑀤𑁂𑀲𑁂𑀦. 𑀢𑀢𑁆𑀣 𑀧𑀤𑁂𑀲𑁄 𑀦𑀸𑀫 𑀔𑀦𑁆𑀥𑀧𑀤𑁂𑀲𑁄 𑀆𑀬𑀢𑀦𑀥𑀸𑀢𑀼𑀲𑀘𑁆𑀘𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸𑀓𑀸𑀭𑀲𑀢𑀺𑀧𑀝𑁆𑀞𑀸𑀦𑀛𑀸𑀦𑀦𑀸𑀫𑀭𑀽𑀧𑀧𑀤𑁂𑀲𑁄 𑀥𑀫𑁆𑀫𑀧𑀤𑁂𑀲𑁄𑀢𑀺 𑀦𑀸𑀦𑀸𑀯𑀺𑀥𑁄. 𑀢𑀁 𑀲𑀩𑁆𑀩𑀫𑁆𑀧𑀺 𑀲𑀦𑁆𑀥𑀸𑀬 𑁋 ‘‘𑀢𑀲𑁆𑀲 𑀧𑀤𑁂𑀲𑁂𑀦 𑀯𑀺𑀳𑀸𑀲𑀺’’𑀦𑁆𑀢𑀺 𑀆𑀳. 𑀪𑀕𑀯𑀸 𑀳𑀺 𑀧𑀞𑀫𑀩𑁄𑀥𑀺𑀬𑀁 𑀏𑀓𑀽𑀦𑀧𑀜𑁆𑀜𑀸𑀲𑀤𑀺𑀯𑀲𑀩𑁆𑀪𑀦𑁆𑀢𑀭𑁂 𑀬𑀣𑀸 𑀦𑀸𑀫 𑀧𑀢𑁆𑀢𑀭𑀚𑁆𑀚𑁄 𑀭𑀸𑀚𑀸 𑀅𑀢𑁆𑀢𑀦𑁄 𑀯𑀺𑀪𑀯𑀲𑀸𑀭𑀤𑀲𑁆𑀲𑀦𑀢𑁆𑀣𑀁 𑀢𑀁 𑀢𑀁 𑀕𑀩𑁆𑀪𑀁 𑀯𑀺𑀯𑀭𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀭𑀚𑀢𑀫𑀼𑀢𑁆𑀢𑀸𑀫𑀡𑀺𑀆𑀤𑀻𑀦𑀺 𑀭𑀢𑀦𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀯𑀺𑀳𑀭𑁂𑀬𑁆𑀬, 𑀏𑀯𑀫𑁂𑀯 𑀧𑀜𑁆𑀘𑀓𑁆𑀔𑀦𑁆𑀥𑁂 𑀦𑀺𑀧𑁆𑀧𑀤𑁂𑀲𑁂 𑀓𑀢𑁆𑀯𑀸 𑀲𑀫𑁆𑀫𑀲𑀦𑁆𑀢𑁄 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀯𑀺𑀳𑀸𑀲𑀺. 𑀇𑀫𑀲𑁆𑀫𑀺𑀁 𑀧𑀦 𑀅𑀟𑁆𑀠𑀫𑀸𑀲𑁂 𑀢𑁂𑀲𑀁 𑀔𑀦𑁆𑀥𑀸𑀦𑀁 𑀧𑀤𑁂𑀲𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀫𑁂𑀯 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀯𑀺𑀳𑀸𑀲𑀺. 𑀢𑀲𑁆𑀲 ‘‘𑀇𑀫𑁂 𑀲𑀢𑁆𑀢𑀸 𑀏𑀯𑀭𑀽𑀧𑀁 𑀦𑀸𑀫 𑀲𑀼𑀔𑀁 𑀧𑀝𑀺𑀲𑀁𑀯𑁂𑀤𑁂𑀦𑁆𑀢𑀺, 𑀏𑀯𑀭𑀽𑀧𑀁 𑀤𑀼𑀓𑁆𑀔’’𑀦𑁆𑀢𑀺 𑀑𑀮𑁄𑀓𑀬𑀢𑁄 𑀬𑀸𑀯 𑀪𑀯𑀕𑁆𑀕𑀸 𑀧𑀯𑀢𑁆𑀢𑀸 𑀲𑀼𑀔𑀯𑁂𑀤𑀦𑀸, 𑀬𑀸𑀯 𑀅𑀯𑀻𑀘𑀺𑀢𑁄 𑀧𑀯𑀢𑁆𑀢𑀸 𑀤𑀼𑀓𑁆𑀔𑀯𑁂𑀤𑀦𑀸, 𑀲𑀩𑁆𑀩𑀸 𑀲𑀩𑁆𑀩𑀸𑀓𑀸𑀭𑁂𑀦 𑀉𑀧𑀝𑁆𑀞𑀸𑀲𑀺. 𑀅𑀣 𑀦𑀁 ‘‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸𑀧𑀺 𑀯𑁂𑀤𑀬𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀯𑀺𑀳𑀸𑀲𑀺.

𑀢𑀣𑀸 𑀧𑀞𑀫𑀩𑁄𑀥𑀺𑀬𑀁 𑀤𑁆𑀯𑀸𑀤𑀲𑀸𑀬𑀢𑀦𑀸𑀦𑀺 𑀦𑀺𑀧𑁆𑀧𑀤𑁂𑀲𑀸𑀦𑁂𑀯 𑀓𑀢𑁆𑀯𑀸 𑀯𑀺𑀳𑀸𑀲𑀺, 𑀇𑀫𑀲𑁆𑀫𑀺𑀁 𑀧𑀦 𑀅𑀟𑁆𑀠𑀫𑀸𑀲𑁂 𑀢𑁂𑀲𑀁 𑀆𑀬𑀢𑀦𑀸𑀦𑀁 𑀧𑀤𑁂𑀲𑀁 𑀯𑁂𑀤𑀦𑀸𑀯𑀲𑁂𑀦 𑀥𑀫𑁆𑀫𑀸𑀬𑀢𑀦𑁂𑀓𑀤𑁂𑀲𑀁, 𑀥𑀸𑀢𑀽𑀦𑀁 𑀧𑀤𑁂𑀲𑀁 𑀯𑁂𑀤𑀦𑀸𑀯𑀲𑁂𑀦 𑀥𑀫𑁆𑀫𑀥𑀸𑀢𑀼𑀏𑀓𑀤𑁂𑀲𑀁, 𑀲𑀘𑁆𑀘𑀸𑀦𑀁 𑀧𑀤𑁂𑀲𑀁 𑀯𑁂𑀤𑀦𑀸𑀓𑁆𑀔𑀦𑁆𑀥𑀯𑀲𑁂𑀦𑁂𑀯 𑀤𑀼𑀓𑁆𑀔𑀲𑀘𑁆𑀘𑁂𑀓𑀤𑁂𑀲𑀁, 𑀧𑀘𑁆𑀘𑀬𑀸𑀦𑀁 𑀧𑀤𑁂𑀲𑀁 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀯𑀲𑁂𑀦 𑀧𑀘𑁆𑀘𑀬𑁂𑀓𑀤𑁂𑀲𑀁 𑀛𑀸𑀦𑀸𑀦𑀁 𑀧𑀤𑁂𑀲𑀁 𑀯𑁂𑀤𑀦𑀸𑀯𑀲𑁂𑀦𑁂𑀯 𑀛𑀸𑀦𑀗𑁆𑀕𑁂𑀓𑀤𑁂𑀲𑀁, 𑀦𑀸𑀫𑀭𑀽𑀧𑀸𑀦𑀁 𑀧𑀤𑁂𑀲𑀁 𑀯𑁂𑀤𑀦𑀸𑀯𑀲𑁂𑀦𑁂𑀯 𑀦𑀸𑀫𑁂𑀓𑀤𑁂𑀲𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀯𑀺𑀳𑀸𑀲𑀺. 𑀧𑀞𑀫𑀩𑁄𑀥𑀺𑀬𑀜𑁆𑀳𑀺 𑀏𑀓𑀽𑀦𑀧𑀜𑁆𑀜𑀸𑀲𑀤𑀺𑀯𑀲𑀩𑁆𑀪𑀦𑁆𑀢𑀭𑁂 𑀓𑀼𑀲𑀮𑀸𑀤𑀺𑀥𑀫𑁆𑀫𑁂 𑀦𑀺𑀧𑁆𑀧𑀤𑁂𑀲𑁂 𑀓𑀢𑁆𑀯𑀸 𑀅𑀦𑀦𑁆𑀢𑀦𑀬𑀸𑀦𑀺 𑀲𑀢𑁆𑀢 𑀧𑀓𑀭𑀡𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀯𑀺𑀳𑀸𑀲𑀺. 𑀇𑀫𑀲𑁆𑀫𑀺𑀁 𑀧𑀦 𑀅𑀟𑁆𑀠𑀫𑀸𑀲𑁂 𑀲𑀩𑁆𑀩𑀥𑀫𑁆𑀫𑀸𑀦𑀁 𑀧𑀤𑁂𑀲𑀁 𑀯𑁂𑀤𑀦𑀸𑀢𑁆𑀢𑀺𑀓𑀫𑁂𑀯 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀯𑀺𑀳𑀸𑀲𑀺. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀲𑀸 𑀲𑀸 𑀘 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺 𑀯𑁂𑀤𑀦𑀸𑀦𑀼𑀪𑀸𑀯𑁂𑀦 𑀚𑀸𑀢𑀸.

𑀇𑀤𑀸𑀦𑀺 𑀬𑁂𑀦𑀸𑀓𑀸𑀭𑁂𑀦 𑀯𑀺𑀳𑀸𑀲𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸𑀧𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸𑀧𑀻𑀢𑀺 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸𑀧𑀺 𑀯𑀝𑁆𑀝𑀢𑀺. 𑀤𑀺𑀝𑁆𑀞𑀺𑀁 𑀉𑀧𑀦𑀺𑀲𑁆𑀲𑀬𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀸 𑀓𑀼𑀲𑀮𑀸𑀓𑀼𑀲𑀮𑀯𑁂𑀤𑀦𑀸𑀧𑀺 𑀯𑀝𑁆𑀝𑀢𑀺 𑀯𑀺𑀧𑀸𑀓𑀯𑁂𑀤𑀦𑀸𑀧𑀺. 𑀢𑀢𑁆𑀣 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸 𑀅𑀓𑀼𑀲𑀮𑀸𑀯 𑀳𑁄𑀢𑀺, 𑀤𑀺𑀝𑁆𑀞𑀺𑀁 𑀧𑀦 𑀉𑀧𑀦𑀺𑀲𑁆𑀲𑀸𑀬 𑀓𑀼𑀲𑀮𑀸𑀧𑀺 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀓𑀼𑀲𑀮𑀸𑀧𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀳𑀺 𑀤𑀺𑀝𑁆𑀞𑀺𑀁 𑀉𑀧𑀦𑀺𑀲𑁆𑀲𑀸𑀬 𑀧𑀓𑁆𑀔𑀤𑀺𑀯𑀲𑁂𑀲𑀼 𑀬𑀸𑀕𑀼𑀪𑀢𑁆𑀢𑀸𑀤𑀻𑀦𑀺 𑀤𑁂𑀦𑁆𑀢𑀺, 𑀅𑀤𑁆𑀥𑀺𑀓𑀸𑀤𑀻𑀦𑀁 𑀯𑀝𑁆𑀝𑀁 𑀧𑀝𑁆𑀞𑀧𑁂𑀦𑁆𑀢𑀺, 𑀘𑀢𑀼𑀫𑀳𑀸𑀧𑀣𑁂 𑀲𑀸𑀮𑀁 𑀓𑀭𑁄𑀦𑁆𑀢𑀺, 𑀧𑁄𑀓𑁆𑀔𑀭𑀡𑀺𑀜𑁆𑀘 𑀔𑀡𑀸𑀧𑁂𑀦𑁆𑀢𑀺, 𑀤𑁂𑀯𑀓𑀼𑀮𑀸𑀤𑀻𑀲𑀼 𑀫𑀸𑀮𑀸𑀕𑀘𑁆𑀙𑀁 𑀭𑁄𑀧𑁂𑀦𑁆𑀢𑀺, 𑀦𑀤𑀻𑀯𑀺𑀤𑀼𑀕𑁆𑀕𑀸𑀤𑀻𑀲𑀼 𑀲𑁂𑀢𑀼𑀁 𑀅𑀢𑁆𑀣𑀭𑀦𑁆𑀢𑀺, 𑀯𑀺𑀲𑀫𑀁 𑀲𑀫𑀁 𑀓𑀭𑁄𑀦𑁆𑀢𑀺, 𑀇𑀢𑀺 𑀦𑁂𑀲𑀁 𑀓𑀼𑀲𑀮𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀧𑀦 𑀦𑀺𑀲𑁆𑀲𑀸𑀬 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑁂 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺, 𑀯𑀥𑀩𑀦𑁆𑀥𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀺, 𑀧𑀸𑀡𑀁 𑀯𑀥𑀺𑀢𑁆𑀯𑀸 𑀤𑁂𑀯𑀢𑀸𑀦𑀁 𑀉𑀧𑀳𑀸𑀭𑀁 𑀉𑀧𑀳𑀭𑀦𑁆𑀢𑀺, 𑀇𑀢𑀺 𑀦𑁂𑀲𑀁 𑀅𑀓𑀼𑀲𑀮𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀯𑀺𑀧𑀸𑀓𑀯𑁂𑀤𑀦𑀸 𑀧𑀦 𑀪𑀯𑀦𑁆𑀢𑀭𑀕𑀢𑀸𑀦𑀁𑀬𑁂𑀯 𑀳𑁄𑀢𑀺.

𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸𑀢𑀺 𑀏𑀢𑁆𑀣𑀸𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸𑀧𑀺 𑀯𑀝𑁆𑀝𑀢𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀉𑀧𑀦𑀺𑀲𑁆𑀲𑀬𑀁 𑀓𑀢𑁆𑀯𑀸 𑀉𑀧𑁆𑀧𑀦𑁆𑀦𑀸 𑀓𑀼𑀲𑀮𑀸𑀓𑀼𑀲𑀮𑀯𑁂𑀤𑀦𑀸𑀧𑀺 𑀯𑀺𑀧𑀸𑀓𑀯𑁂𑀤𑀦𑀸𑀧𑀺. 𑀢𑀢𑁆𑀣 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀸 𑀓𑀼𑀲𑀮𑀸𑀯 𑀳𑁄𑀢𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀧𑀦 𑀉𑀧𑀦𑀺𑀲𑁆𑀲𑀸𑀬 𑀩𑀼𑀤𑁆𑀥𑀧𑀽𑀚𑀁 𑀤𑀻𑀧𑀫𑀸𑀮𑀁 𑀫𑀳𑀸𑀥𑀫𑁆𑀫𑀲𑁆𑀲𑀯𑀦𑀁 𑀅𑀧𑁆𑀧𑀢𑀺𑀝𑁆𑀞𑀺𑀢𑁂 𑀤𑀺𑀲𑀸𑀪𑀸𑀕𑁂 𑀘𑁂𑀢𑀺𑀬𑀧𑀢𑀺𑀝𑁆𑀞𑀸𑀧𑀦𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀧𑀼𑀜𑁆𑀜𑀸𑀦𑀺 𑀓𑀭𑁄𑀦𑁆𑀢𑀺, 𑀇𑀢𑀺 𑀦𑁂𑀲𑀁 𑀓𑀼𑀲𑀮𑀸 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀲𑀫𑁆𑀫𑀸𑀤𑀺𑀝𑁆𑀞𑀺𑀁𑀬𑁂𑀯 𑀦𑀺𑀲𑁆𑀲𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁂 𑀅𑀓𑁆𑀓𑁄𑀲𑀦𑁆𑀢𑀺 𑀧𑀭𑀺𑀪𑀸𑀲𑀦𑁆𑀢𑀺, 𑀅𑀢𑁆𑀢𑀸𑀦𑀁 𑀉𑀓𑁆𑀓𑀁𑀲𑁂𑀦𑁆𑀢𑀺, 𑀧𑀭𑀁 𑀯𑀫𑁆𑀪𑁂𑀦𑁆𑀢𑀺, 𑀇𑀢𑀺 𑀦𑁂𑀲𑀁 𑀅𑀓𑀼𑀲𑀮𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀯𑀺𑀧𑀸𑀓𑀯𑁂𑀤𑀦𑀸 𑀧𑀦 𑀪𑀯𑀦𑁆𑀢𑀭𑀕𑀢𑀸𑀦𑀁𑀬𑁂𑀯 𑀳𑁄𑀢𑀺. 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀧𑀘𑁆𑀘𑀬𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀙𑀦𑁆𑀤𑀧𑀘𑁆𑀘𑀬𑀸𑀢𑀺𑀆𑀤𑀻𑀲𑀼 𑀧𑀦 𑀙𑀦𑁆𑀤𑀧𑀘𑁆𑀘𑀬𑀸 𑀅𑀝𑁆𑀞𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸 𑀯𑁂𑀤𑀺𑀢𑀩𑁆𑀩𑀸, 𑀯𑀺𑀢𑀓𑁆𑀓𑀧𑀘𑁆𑀘𑀬𑀸 𑀧𑀞𑀫𑀚𑁆𑀛𑀸𑀦𑀯𑁂𑀤𑀦𑀸𑀯. 𑀲𑀜𑁆𑀜𑀸 𑀧𑀘𑁆𑀘𑀬𑀸 𑀞𑀧𑁂𑀢𑁆𑀯𑀸 𑀧𑀞𑀫𑀚𑁆𑀛𑀸𑀦𑀁 𑀲𑁂𑀲𑀸 𑀙 𑀲𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀯𑁂𑀤𑀦𑀸.

𑀙𑀦𑁆𑀤𑁄 𑀘 𑀅𑀯𑀽𑀧𑀲𑀦𑁆𑀢𑁄𑀢𑀺𑀆𑀤𑀻𑀲𑀼 𑀢𑀺𑀡𑁆𑀡𑀁 𑀅𑀯𑀽𑀧𑀲𑀫𑁂 𑀅𑀝𑁆𑀞𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸 𑀳𑁄𑀢𑀺, 𑀙𑀦𑁆𑀤𑀫𑀢𑁆𑀢𑀲𑁆𑀲 𑀯𑀽𑀧𑀲𑀫𑁂 𑀧𑀞𑀫𑀚𑁆𑀛𑀸𑀦𑀯𑁂𑀤𑀦𑀸𑀯. 𑀙𑀦𑁆𑀤𑀯𑀺𑀢𑀓𑁆𑀓𑀸𑀦𑀁 𑀯𑀽𑀧𑀲𑀫𑁂 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀺𑀯𑁂𑀤𑀦𑀸 𑀅𑀥𑀺𑀧𑁆𑀧𑁂𑀢𑀸, 𑀢𑀺𑀡𑁆𑀡𑀫𑁆𑀧𑀺 𑀯𑀽𑀧𑀲𑀫𑁂 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀯𑁂𑀤𑀦𑀸. 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸𑀢𑀺 𑀅𑀭𑀳𑀢𑁆𑀢𑀨𑀮𑀲𑁆𑀲 𑀧𑀢𑁆𑀢𑀢𑁆𑀣𑀸𑀬. 𑀅𑀢𑁆𑀣𑀺 𑀆𑀬𑀸𑀫𑀦𑁆𑀢𑀺 𑀅𑀢𑁆𑀣𑀺 𑀯𑀻𑀭𑀺𑀬𑀁. 𑀢𑀲𑁆𑀫𑀺𑀫𑁆𑀧𑀺 𑀞𑀸𑀦𑁂 𑀅𑀦𑀼𑀧𑁆𑀧𑀢𑁆𑀢𑁂𑀢𑀺 𑀢𑀲𑁆𑀲 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀯𑀲𑁂𑀦 𑀢𑀲𑁆𑀲 𑀅𑀭𑀳𑀢𑁆𑀢𑀨𑀮𑀲𑁆𑀲 𑀓𑀸𑀭𑀡𑁂 𑀅𑀦𑀼𑀧𑁆𑀧𑀢𑁆𑀢𑁂. 𑀢𑀧𑁆𑀧𑀘𑁆𑀘𑀬𑀸𑀧𑀺 𑀯𑁂𑀤𑀬𑀺𑀢𑀦𑁆𑀢𑀺 𑀅𑀭𑀳𑀢𑁆𑀢𑀲𑁆𑀲 𑀞𑀸𑀦𑀧𑀘𑁆𑀘𑀬𑀸 𑀯𑁂𑀤𑀬𑀺𑀢𑀁. 𑀏𑀢𑁂𑀦 𑀘𑀢𑀼𑀫𑀕𑁆𑀕𑀲𑀳𑀚𑀸𑀢𑀸 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀯𑁂𑀤𑀦𑀸𑀯 𑀕𑀳𑀺𑀢𑀸.

𑁨. 𑀤𑀼𑀢𑀺𑀬𑀯𑀺𑀳𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁨. 𑀤𑀼𑀢𑀺𑀬𑁂 𑀧𑀝𑀺𑀲𑀮𑁆𑀮𑀸𑀦𑀓𑀸𑀭𑀡𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀽𑀧𑀲𑀫𑀧𑀘𑁆𑀘𑀬𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀽𑀧𑀲𑀫𑁄 𑀦𑀸𑀫 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀢𑀲𑁆𑀫𑀸 𑀬𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸 𑀯𑁂𑀤𑀬𑀺𑀢𑀁 𑀯𑀼𑀢𑁆𑀢𑀁, 𑀢𑀤𑁂𑀯 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀽𑀧𑀲𑀫𑀧𑀘𑁆𑀘𑀬𑀸 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀯𑀺𑀧𑀸𑀓𑀯𑁂𑀤𑀦𑀁 𑀅𑀢𑀺𑀤𑀽𑀭𑁂𑀢𑀺 𑀫𑀜𑁆𑀜𑀫𑀸𑀦𑀸 𑀦 𑀕𑀡𑁆𑀳𑀦𑁆𑀢𑀻𑀢𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀲 𑀬𑀲𑁆𑀲 𑀳𑀺 𑀯𑀽𑀧𑀲𑀫𑀧𑀘𑁆𑀘𑀬𑀸𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀢𑀲𑁆𑀲 𑀧𑀝𑀺𑀧𑀓𑁆𑀔𑀥𑀫𑁆𑀫𑀧𑀘𑁆𑀘𑀬𑀸𑀯 𑀢𑀁 𑀢𑀁 𑀯𑁂𑀤𑀬𑀺𑀢𑀁 𑀅𑀥𑀺𑀧𑁆𑀧𑁂𑀢𑀁. 𑀙𑀦𑁆𑀤𑀯𑀽𑀧𑀲𑀫𑀧𑀘𑁆𑀘𑀬𑀸𑀢𑀺𑀆𑀤𑀻𑀲𑀼 𑀧𑀦 𑀙𑀦𑁆𑀤𑀯𑀽𑀧𑀲𑀫𑀧𑀘𑁆𑀘𑀬𑀸 𑀢𑀸𑀯 𑀧𑀞𑀫𑀚𑁆𑀛𑀸𑀦𑀯𑁂𑀤𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀢𑀓𑁆𑀓𑀯𑀽𑀧𑀲𑀫𑀧𑀘𑁆𑀘𑀬𑀸 𑀤𑀼𑀢𑀺𑀬𑀚𑁆𑀛𑀸𑀦𑀯𑁂𑀤𑀦𑀸. 𑀲𑀜𑁆𑀜𑀸𑀧𑀘𑁆𑀘𑀬𑀸 𑀙𑀲𑀫𑀸𑀧𑀢𑁆𑀢𑀺𑀯𑁂𑀤𑀦𑀸. 𑀲𑀜𑁆𑀜𑀸𑀯𑀽𑀧𑀲𑀫𑀧𑀘𑁆𑀘𑀬𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀯𑁂𑀤𑀦𑀸. 𑀙𑀦𑁆𑀤𑁄 𑀘 𑀯𑀽𑀧𑀲𑀦𑁆𑀢𑁄𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯.

𑁩-𑁭. 𑀲𑁂𑀓𑁆𑀔𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁩-𑁧𑁭. 𑀢𑀢𑀺𑀬𑁂 𑀲𑁂𑀓𑁆𑀔𑁄𑀢𑀺 𑀲𑀺𑀓𑁆𑀔𑀦𑀲𑀻𑀮𑁄. 𑀓𑀺𑀁 𑀲𑀺𑀓𑁆𑀔𑀢𑀻𑀢𑀺? 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸. 𑀲𑁂𑀓𑁆𑀔𑀸𑀬𑀸𑀢𑀺 𑀢𑀻𑀳𑀺 𑀨𑀮𑁂𑀳𑀺 𑀘𑀢𑀽𑀳𑀺 𑀘 𑀫𑀕𑁆𑀕𑁂𑀳𑀺 𑀲𑀤𑁆𑀥𑀺𑀁 𑀉𑀧𑁆𑀧𑀦𑁆𑀦𑀸𑀬. 𑀲𑀸𑀧𑀺 𑀳𑀺 𑀅𑀦𑀺𑀝𑁆𑀞𑀺𑀢𑀓𑀺𑀘𑁆𑀘𑀢𑁆𑀢𑀸 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀲𑀺𑀓𑁆𑀔𑀢𑁂𑀯𑀸𑀢𑀺 𑀲𑁂𑀓𑁆𑀔𑀸. 𑀘𑀢𑀼𑀢𑁆𑀣𑀧𑀜𑁆𑀘𑀫𑀙𑀝𑁆𑀞𑀲𑀢𑁆𑀢𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯𑀸𑀢𑀺.

𑁮-𑁧𑁦. 𑀧𑀞𑀫𑀓𑀼𑀓𑁆𑀓𑀼𑀝𑀸𑀭𑀸𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁮-𑁨𑁦. 𑀅𑀝𑁆𑀞𑀫𑁂 𑀉𑀫𑁆𑀫𑀗𑁆𑀕𑁄𑀢𑀺 𑀧𑀜𑁆𑀜𑀸𑀉𑀫𑁆𑀫𑀗𑁆𑀕𑁄, 𑀧𑀜𑁆𑀜𑀸𑀯𑀻𑀫𑀁𑀲𑀦𑀁, 𑀧𑀜𑁆𑀜𑀸𑀕𑀯𑁂𑀲𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀜𑁆𑀳𑀺 𑀢𑁆𑀯𑀁 𑀆𑀯𑀼𑀲𑁄𑀢𑀺 𑀇𑀤𑀁 𑀢𑀲𑁆𑀲 𑀧𑀼𑀘𑁆𑀙𑀸𑀧𑀢𑀺𑀝𑁆𑀞𑀸𑀧𑀦𑀢𑁆𑀣𑀸𑀬 𑀆𑀳. 𑀦𑀯𑀫𑀤𑀲𑀫𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀫𑁂𑀯𑀸𑀢𑀺.

𑀯𑀺𑀳𑀸𑀭𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀫𑀺𑀘𑁆𑀙𑀢𑁆𑀢𑀯𑀕𑁆𑀕𑀯𑀡𑁆𑀡𑀦𑀸

𑁨𑁧-𑁩𑁦. 𑀢𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀫𑀺𑀘𑁆𑀙𑀢𑁆𑀢𑀦𑁆𑀢𑀺 𑀫𑀺𑀘𑁆𑀙𑀸𑀲𑀪𑀸𑀯𑀁. 𑀲𑀫𑁆𑀫𑀢𑁆𑀢𑀦𑁆𑀢𑀺 𑀲𑀫𑁆𑀫𑀸𑀲𑀪𑀸𑀯𑀁. 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀸𑀥𑀺𑀓𑀭𑀡𑀳𑁂𑀢𑀽𑀢𑀺 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀓𑀭𑀡𑀳𑁂𑀢𑀼. 𑀬𑀲𑁆𑀫𑀸 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀁 𑀓𑀭𑁄𑀢𑀺, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀦𑀸𑀭𑀸𑀥𑀓𑁄𑀢𑀺 𑀦 𑀲𑀫𑁆𑀧𑀸𑀤𑀓𑁄. 𑀜𑀸𑀬𑀁 𑀥𑀫𑁆𑀫𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑀁. 𑀫𑀺𑀘𑁆𑀙𑀸𑀜𑀸𑀡𑀻𑀢𑀺 𑀫𑀺𑀘𑁆𑀙𑀸𑀯𑀺𑀜𑁆𑀜𑀸𑀡𑁄 𑀫𑀺𑀘𑁆𑀙𑀸𑀧𑀘𑁆𑀘𑀯𑁂𑀓𑁆𑀔𑀡𑁄. 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀻𑀢𑀺 𑀅𑀬𑀸𑀣𑀸𑀯𑀯𑀺𑀫𑀼𑀢𑁆𑀢𑀺, 𑀅𑀦𑀺𑀬𑁆𑀬𑀸𑀦𑀺𑀓𑀯𑀺𑀫𑀼𑀢𑁆𑀢𑀺. 𑀇𑀫𑁂𑀲𑀼 𑀢𑀢𑀺𑀬𑀸𑀤𑀻𑀲𑀼 𑀘𑀢𑀽𑀲𑀼 𑀲𑀼𑀢𑁆𑀢𑁂𑀲𑀼 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀁, 𑀧𑀘𑁆𑀙𑀺𑀫𑁂𑀲𑀼 𑀧𑀦𑁂𑀢𑁆𑀣 𑀤𑁆𑀯𑀻𑀲𑀼 𑀧𑀼𑀕𑁆𑀕𑀮𑁄 𑀧𑀼𑀘𑁆𑀙𑀺𑀢𑁄 𑀥𑀫𑁆𑀫𑁄 𑀯𑀺𑀪𑀢𑁆𑀢𑁄, 𑀏𑀯𑀁 𑀥𑀫𑁆𑀫𑁂𑀦 𑀧𑀼𑀕𑁆𑀕𑀮𑁄 𑀤𑀲𑁆𑀲𑀺𑀢𑁄𑀢𑀺. 𑀲𑀼𑀧𑁆𑀧𑀯𑀢𑁆𑀢𑀺𑀬𑁄𑀢𑀺 𑀲𑀼𑀧𑁆𑀧𑀯𑀢𑁆𑀢𑀦𑀺𑀬𑁄. 𑀬𑀣𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀁 𑀤𑀺𑀲𑀁 𑀧𑀯𑀢𑁆𑀢𑁂𑀦𑁆𑀢𑁄 𑀥𑀸𑀯𑀢𑀺, 𑀏𑀯𑀁 𑀧𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀉𑀧𑀦𑀺𑀲𑀁 𑀲𑀧𑀭𑀺𑀓𑁆𑀔𑀸𑀭𑀦𑁆𑀢𑀺 𑀲𑀧𑁆𑀧𑀘𑁆𑀘𑀬𑀁 𑀲𑀧𑀭𑀺𑀯𑀸𑀭𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀫𑀺𑀘𑁆𑀙𑀢𑁆𑀢𑀯𑀕𑁆𑀕𑁄 𑀢𑀢𑀺𑀬𑁄.

𑁪. 𑀧𑀝𑀺𑀧𑀢𑁆𑀢𑀺𑀯𑀕𑁆𑀕𑀯𑀡𑁆𑀡𑀦𑀸

𑁩𑁧-𑁪𑁦. 𑀘𑀢𑀼𑀢𑁆𑀣𑁂 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀦𑁆𑀢𑀺 𑀅𑀬𑀸𑀣𑀸𑀯𑀧𑀝𑀺𑀧𑀢𑁆𑀢𑀺𑀁. 𑀫𑀺𑀘𑁆𑀙𑀸𑀧𑀝𑀺𑀧𑀦𑁆𑀦𑀦𑁆𑀢𑀺 𑀅𑀬𑀸𑀣𑀸𑀯𑀧𑀝𑀺𑀧𑀦𑁆𑀦𑀁. 𑀇𑀢𑀺 𑀏𑀓𑀁 𑀲𑀼𑀢𑁆𑀢𑀁 𑀥𑀫𑁆𑀫𑀯𑀲𑁂𑀦 𑀓𑀣𑀺𑀢𑀁, 𑀏𑀓𑀁 𑀧𑀼𑀕𑁆𑀕𑀮𑀯𑀲𑁂𑀦. 𑀅𑀧𑀸𑀭𑀸 𑀧𑀸𑀭𑀦𑁆𑀢𑀺 𑀯𑀝𑁆𑀝𑀢𑁄 𑀦𑀺𑀩𑁆𑀩𑀸𑀦𑀁. 𑀧𑀸𑀭𑀕𑀸𑀫𑀺𑀦𑁄𑀢𑀺 𑀏𑀢𑁆𑀣 𑀬𑁂𑀧𑀺 𑀧𑀸𑀭𑀗𑁆𑀕𑀢𑀸, 𑀬𑁂𑀧𑀺 𑀕𑀘𑁆𑀙𑀦𑁆𑀢𑀺, 𑀬𑁂𑀧𑀺 𑀕𑀫𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑁂 𑀧𑀸𑀭𑀕𑀸𑀫𑀺𑀦𑁄𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀢𑀻𑀭𑀫𑁂𑀯𑀸𑀦𑀼𑀥𑀸𑀯𑀢𑀻𑀢𑀺 𑀯𑀝𑁆𑀝𑀫𑁂𑀯 𑀅𑀦𑀼𑀥𑀸𑀯𑀢𑀺, 𑀯𑀝𑁆𑀝𑁂 𑀯𑀺𑀘𑀭𑀢𑀺. 𑀓𑀡𑁆𑀳𑀦𑁆𑀢𑀺 𑀅𑀓𑀼𑀲𑀮𑀥𑀫𑁆𑀫𑀁. 𑀲𑀼𑀓𑁆𑀓𑀦𑁆𑀢𑀺 𑀓𑀼𑀲𑀮𑀥𑀫𑁆𑀫𑀁. 𑀑𑀓𑀸 𑀅𑀦𑁄𑀓𑀦𑁆𑀢𑀺 𑀯𑀝𑁆𑀝𑀢𑁄 𑀦𑀺𑀩𑁆𑀩𑀸𑀦𑀁. 𑀆𑀕𑀫𑁆𑀫𑀸𑀢𑀺 𑀆𑀭𑀩𑁆𑀪 𑀲𑀦𑁆𑀥𑀸𑀬 𑀧𑀝𑀺𑀘𑁆𑀘. 𑀧𑀭𑀺𑀬𑁄𑀤𑀧𑁂𑀬𑁆𑀬𑀸𑀢𑀺 𑀧𑀭𑀺𑀲𑀼𑀤𑁆𑀥𑀁 𑀓𑀭𑁂𑀬𑁆𑀬. 𑀘𑀺𑀢𑁆𑀢𑀓𑁆𑀮𑁂𑀲𑁂𑀳𑀻𑀢𑀺 𑀘𑀺𑀢𑁆𑀢𑀁 𑀓𑀺𑀮𑀺𑀲𑁆𑀲𑀸𑀧𑁂𑀦𑁆𑀢𑁂𑀳𑀺 𑀦𑀻𑀯𑀭𑀡𑁂𑀳𑀺. 𑀲𑀫𑁆𑀩𑁄𑀥𑀺𑀬𑀗𑁆𑀕𑁂𑀲𑀽𑀢𑀺 𑀲𑀢𑁆𑀢𑀲𑀼 𑀩𑁄𑀚𑁆𑀛𑀗𑁆𑀕𑁂𑀲𑀼.

𑀲𑀸𑀫𑀜𑁆𑀜𑀢𑁆𑀣𑀦𑁆𑀢𑀺 𑀦𑀺𑀩𑁆𑀩𑀸𑀦𑀁. 𑀢𑀜𑁆𑀳𑀺 𑀲𑀸𑀫𑀜𑁆𑀜𑁂𑀦 𑀉𑀧𑀕𑀦𑁆𑀢𑀩𑁆𑀩𑀢𑁄 𑀲𑀸𑀫𑀜𑁆𑀜𑀢𑁆𑀣𑁄𑀢𑀺 𑀯𑀼𑀘𑁆𑀘𑀢𑀺. 𑀩𑁆𑀭𑀳𑁆𑀫𑀜𑁆𑀜𑀦𑁆𑀢𑀺 𑀲𑁂𑀝𑁆𑀞𑀪𑀸𑀯𑀁. 𑀩𑁆𑀭𑀳𑁆𑀫𑀜𑁆𑀜𑀢𑁆𑀣𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀩𑁆𑀭𑀳𑁆𑀫𑀜𑁆𑀜𑁂𑀦 𑀉𑀧𑀕𑀦𑁆𑀢𑀩𑁆𑀩𑀢𑁄. 𑀬𑀢𑁆𑀣 𑀬𑀢𑁆𑀣 𑀧𑀦 𑀳𑁂𑀝𑁆𑀞𑀸 𑀘 𑀇𑀫𑁂𑀲𑀼 𑀘 𑀢𑀻𑀲𑀼 𑀲𑀼𑀢𑁆𑀢𑁂𑀲𑀼 ‘‘𑀭𑀸𑀕𑀓𑁆𑀔𑀬𑁄’’𑀢𑀺 𑀆𑀕𑀢𑀁, 𑀢𑀢𑁆𑀣 𑀢𑀢𑁆𑀣 𑀅𑀭𑀳𑀢𑁆𑀢𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀯𑀤𑀦𑁆𑀢𑀺.

𑀧𑀝𑀺𑀧𑀢𑁆𑀢𑀺𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑁫. 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑁂𑀬𑁆𑀬𑀸𑀮𑀯𑀕𑁆𑀕𑀯𑀡𑁆𑀡𑀦𑀸

𑁪𑁧-𑁪𑁮. 𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑁂𑀬𑁆𑀬𑀸𑀮𑁂 𑀅𑀤𑁆𑀥𑀸𑀦𑀧𑀭𑀺𑀜𑁆𑀜𑀢𑁆𑀣𑀦𑁆𑀢𑀺 𑀲𑀁𑀲𑀸𑀭𑀤𑁆𑀥𑀸𑀦𑀁 𑀦𑀺𑀩𑁆𑀩𑀸𑀦𑀁 𑀧𑀢𑁆𑀯𑀸 𑀧𑀭𑀺𑀜𑁆𑀜𑀸𑀢𑀁 𑀦𑀸𑀫 𑀳𑁄𑀢𑀺. 𑀢𑀲𑁆𑀫𑀸 𑀦𑀺𑀩𑁆𑀩𑀸𑀦𑀁 ‘‘𑀅𑀤𑁆𑀥𑀸𑀦𑀧𑀭𑀺𑀜𑁆𑀜𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀤𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀦𑁆𑀢𑀺 𑀅𑀧𑀘𑁆𑀘𑀬𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀁. 𑀇𑀢𑀺 𑀇𑀫𑀲𑁆𑀫𑀺𑀁 𑀧𑁂𑀬𑁆𑀬𑀸𑀮𑁂 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑁂𑀦 𑀅𑀭𑀳𑀢𑁆𑀢𑀁 𑀓𑀣𑀺𑀢𑀁. 𑀜𑀸𑀡𑀤𑀲𑁆𑀲𑀦𑁂𑀦 𑀧𑀘𑁆𑀘𑀯𑁂𑀓𑁆𑀔𑀡𑀸, 𑀲𑁂𑀲𑁂𑀳𑀺 𑀦𑀺𑀩𑁆𑀩𑀸𑀦𑀦𑁆𑀢𑀺.

𑀅𑀜𑁆𑀜𑀢𑀺𑀢𑁆𑀣𑀺𑀬𑀧𑁂𑀬𑁆𑀬𑀸𑀮𑀯𑀕𑁆𑀕𑁄.

𑁬. 𑀲𑀽𑀭𑀺𑀬𑀧𑁂𑀬𑁆𑀬𑀸𑀮𑀯𑀕𑁆𑀕𑀯𑀡𑁆𑀡𑀦𑀸

𑁪𑁯-𑁬𑁨. 𑀲𑀽𑀭𑀺𑀬𑀧𑁂𑀬𑁆𑀬𑀸𑀮𑁂 𑀅𑀭𑀼𑀡𑀼𑀕𑁆𑀕𑀁 𑀯𑀺𑀬 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑁆𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀬 𑀞𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀺𑀢𑁄 𑀲𑀯𑀺𑀧𑀲𑁆𑀲𑀦𑀅𑀭𑀺𑀬𑀫𑀕𑁆𑀕𑁄 𑀲𑀽𑀭𑀺𑀬𑀧𑀸𑀢𑀼𑀪𑀸𑀯𑁄 𑀯𑀺𑀬𑀸𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀻𑀮𑀲𑀫𑁆𑀧𑀤𑀸𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁. 𑀙𑀦𑁆𑀤𑀲𑀫𑁆𑀧𑀤𑀸𑀢𑀺 𑀓𑀼𑀲𑀮𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄. 𑀅𑀢𑁆𑀢𑀲𑀫𑁆𑀧𑀤𑀸𑀢𑀺 𑀲𑀫𑁆𑀧𑀦𑁆𑀦𑀘𑀺𑀢𑁆𑀢𑀢𑀸. 𑀤𑀺𑀝𑁆𑀞𑀺𑀲𑀫𑁆𑀧𑀤𑀸𑀢𑀺 𑀜𑀸𑀡𑀲𑀫𑁆𑀧𑀢𑁆𑀢𑀺. 𑀅𑀧𑁆𑀧𑀫𑀸𑀤𑀲𑀫𑁆𑀧𑀤𑀸𑀢𑀺 𑀓𑀸𑀭𑀸𑀧𑀓𑀅𑀧𑁆𑀧𑀫𑀸𑀤𑀲𑀫𑁆𑀧𑀢𑁆𑀢𑀺. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑁆𑀧𑀤𑀸𑀢𑀺 𑀉𑀧𑀸𑀬𑀫𑀦𑀲𑀺𑀓𑀸𑀭𑀲𑀫𑁆𑀧𑀢𑁆𑀢𑀺. 𑀧𑀼𑀦 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀢𑀺𑀆𑀤𑀻𑀦𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀅𑀜𑁆𑀜𑁂𑀦𑀧𑀺 𑀆𑀓𑀸𑀭𑁂𑀦 𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸𑀦𑀺. 𑀲𑀩𑁆𑀩𑀸𑀦𑁂𑀯 𑀘𑁂𑀢𑀸𑀦𑀺 𑀲𑀼𑀢𑁆𑀢𑀸𑀦𑀺 𑀧𑀸𑀝𑀺𑀬𑁂𑀓𑁆𑀓𑀁 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦 𑀯𑀼𑀢𑁆𑀢𑀸𑀦𑀻𑀢𑀺.

𑀲𑀽𑀭𑀺𑀬𑀧𑁂𑀬𑁆𑀬𑀸𑀮𑀯𑀕𑁆𑀕𑁄.

𑁭. 𑀏𑀓𑀥𑀫𑁆𑀫𑀧𑁂𑀬𑁆𑀬𑀸𑀮𑀯𑀕𑁆𑀕𑀸𑀤𑀺𑀯𑀡𑁆𑀡𑀦𑀸

𑁬𑁩-𑁧𑁩𑁮. 𑀏𑀓𑀥𑀫𑁆𑀫𑀧𑁂𑀬𑁆𑀬𑀸𑀮𑁄𑀧𑀺 𑀕𑀗𑁆𑀕𑀸𑀧𑁂𑀬𑁆𑀬𑀸𑀮𑁄𑀧𑀺 𑀧𑀸𑀝𑀺𑀬𑁂𑀓𑁆𑀓𑀁 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑀯𑀲𑁂𑀦𑁂𑀯 𑀢𑀣𑀸 𑀢𑀣𑀸 𑀯𑀼𑀢𑁆𑀢𑁂 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑀯𑀲𑁂𑀦 𑀓𑀣𑀺𑀢𑁄.

𑁮. 𑀅𑀧𑁆𑀧𑀫𑀸𑀤𑀧𑁂𑀬𑁆𑀬𑀸𑀮𑀯𑀕𑁆𑀕𑁄

𑁧. 𑀢𑀣𑀸𑀕𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁩𑁯. 𑀅𑀧𑁆𑀧𑀫𑀸𑀤𑀧𑁂𑀬𑁆𑀬𑀸𑀮𑁂 𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀬𑀣𑀸 𑀲𑀩𑁆𑀩𑀲𑀢𑁆𑀢𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀅𑀕𑁆𑀕𑁄, 𑀏𑀯𑀁 𑀲𑀩𑁆𑀩𑁂𑀲𑀁 𑀓𑀼𑀲𑀮𑀥𑀫𑁆𑀫𑀸𑀦𑀁 𑀓𑀸𑀭𑀸𑀧𑀓𑀅𑀧𑁆𑀧𑀫𑀸𑀤𑁄 𑀅𑀕𑁆𑀕𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀦𑀦𑀼 𑀘𑁂𑀲 𑀮𑁄𑀓𑀺𑀬𑁄𑀯, 𑀓𑀼𑀲𑀮𑀥𑀫𑁆𑀫𑀸 𑀧𑀦 𑀮𑁄𑀓𑀼𑀢𑁆𑀢𑀭𑀸𑀧𑀺. 𑀅𑀬𑀜𑁆𑀘 𑀓𑀸𑀫𑀸𑀯𑀘𑀭𑁄𑀯, 𑀓𑀼𑀲𑀮𑀥𑀫𑁆𑀫𑀸 𑀧𑀦 𑀘𑀢𑀼𑀪𑀽𑀫𑀓𑀸. 𑀓𑀣𑀫𑁂𑀲 𑀢𑁂𑀲𑀁 𑀅𑀕𑁆𑀕𑁄𑀢𑀺? 𑀧𑀝𑀺𑀮𑀸𑀪𑀓𑀝𑁆𑀞𑁂𑀦. 𑀅𑀧𑁆𑀧𑀫𑀸𑀤𑁂𑀦 𑀳𑀺 𑀢𑁂 𑀧𑀝𑀺𑀮𑀩𑁆𑀪𑀦𑁆𑀢𑀺, 𑀢𑀲𑁆𑀫𑀸 𑀲𑁄 𑀢𑁂𑀲𑀁 𑀅𑀕𑁆𑀕𑁄. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁 𑀲𑀩𑁆𑀩𑁂 𑀢𑁂 𑀅𑀧𑁆𑀧𑀫𑀸𑀤𑀫𑀽𑀮𑀓𑀸𑀢𑀺𑀆𑀤𑀺.

𑁨. 𑀧𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁦. 𑀚𑀗𑁆𑀕𑀮𑀸𑀦𑀦𑁆𑀢𑀺 𑀧𑀣𑀯𑀻𑀢𑀮𑀯𑀸𑀲𑀻𑀦𑀁. 𑀧𑀸𑀡𑀸𑀦𑀦𑁆𑀢𑀺 𑀲𑀧𑀸𑀤𑀓𑀧𑀸𑀡𑀸𑀦𑀁. 𑀧𑀤𑀚𑀸𑀢𑀸𑀦𑀻𑀢𑀺 𑀧𑀤𑀸𑀦𑀺. 𑀲𑀫𑁄𑀥𑀸𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀑𑀥𑀸𑀦𑀁 𑀉𑀧𑀓𑁆𑀔𑁂𑀧𑀁 𑀕𑀘𑁆𑀙𑀦𑁆𑀢𑀺. 𑀅𑀕𑁆𑀕𑀫𑀓𑁆𑀔𑀸𑀬𑀢𑀻𑀢𑀺 𑀲𑁂𑀝𑁆𑀞𑀁 𑀅𑀓𑁆𑀔𑀸𑀬𑀢𑀺. 𑀬𑀤𑀺𑀤𑀁 𑀫𑀳𑀦𑁆𑀢𑀢𑁆𑀢𑁂𑀦𑀸𑀢𑀺 𑀫𑀳𑀦𑁆𑀢𑀪𑀸𑀯𑁂𑀦 𑀅𑀕𑁆𑀕𑀫𑀓𑁆𑀔𑀸𑀬𑀢𑀺, 𑀦 𑀕𑀼𑀡𑀯𑀲𑁂𑀦𑀸𑀢𑀺 𑀅𑀢𑁆𑀣𑁄.

𑁩-𑁧𑁦. 𑀓𑀽𑀝𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁪𑁧-𑁧𑁪𑁮. 𑀯𑀲𑁆𑀲𑀺𑀓𑀦𑁆𑀢𑀺 𑀲𑀼𑀫𑀦𑀧𑀼𑀧𑁆𑀨𑀁. 𑀇𑀫𑀁 𑀓𑀺𑀭 𑀲𑀼𑀢𑁆𑀢𑀁 𑀲𑀼𑀢𑁆𑀯𑀸 𑀪𑀸𑀢𑀺𑀬𑀫𑀳𑀸𑀭𑀸𑀚𑀸 𑀯𑀻𑀫𑀁𑀲𑀺𑀢𑀼𑀓𑀸𑀫𑀢𑀸𑀬 𑀏𑀓𑀲𑁆𑀫𑀺𑀁 𑀕𑀩𑁆𑀪𑁂 𑀘𑀢𑀼𑀚𑀸𑀢𑀺𑀕𑀦𑁆𑀥𑁂𑀳𑀺 𑀧𑀭𑀺𑀪𑀡𑁆𑀟𑀁 𑀓𑀸𑀭𑁂𑀢𑁆𑀯𑀸 𑀲𑀼𑀕𑀦𑁆𑀥𑀸𑀦𑀺 𑀧𑀼𑀧𑁆𑀨𑀸𑀦𑀺 𑀆𑀳𑀭𑀸𑀧𑁂𑀢𑁆𑀯𑀸 𑀏𑀓𑀲𑁆𑀲 𑀲𑀫𑀼𑀕𑁆𑀕𑀲𑁆𑀲 𑀫𑀚𑁆𑀛𑁂 𑀲𑀼𑀫𑀦𑀧𑀼𑀧𑁆𑀨𑀫𑀼𑀝𑁆𑀞𑀺𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀺 𑀢𑀲𑁆𑀲 𑀲𑀫𑀦𑁆𑀢𑀢𑁄 𑀫𑀼𑀝𑁆𑀞𑀺𑀫𑀼𑀝𑁆𑀞𑀺𑀁 𑀓𑀢𑁆𑀯𑀸 𑀞𑀧𑁂𑀢𑁆𑀯𑀸 𑀤𑁆𑀯𑀸𑀭𑀁 𑀧𑀺𑀥𑀸𑀬 𑀩𑀳𑀺 𑀦𑀺𑀓𑁆𑀔𑀦𑁆𑀢𑁄. 𑀅𑀣𑀲𑁆𑀲 𑀫𑀼𑀳𑀼𑀢𑁆𑀢𑀁 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀧𑀯𑀺𑀲𑀦𑁆𑀢𑀲𑁆𑀲 𑀲𑀩𑁆𑀩𑀧𑀞𑀫𑀁 𑀲𑀼𑀫𑀦𑀧𑀼𑀧𑁆𑀨𑀕𑀦𑁆𑀥𑁄 𑀖𑀸𑀦𑀁 𑀧𑀳𑀭𑀺. 𑀲𑁄 𑀫𑀳𑀸𑀢𑀮𑀲𑁆𑀫𑀺𑀁𑀬𑁂𑀯 𑀫𑀳𑀸𑀘𑁂𑀢𑀺𑀬𑀸𑀪𑀺𑀫𑀼𑀔𑁄 𑀦𑀺𑀧𑀚𑁆𑀚𑀺𑀢𑁆𑀯𑀸 𑁋 ‘‘𑀯𑀲𑁆𑀲𑀺𑀓𑀁 𑀢𑁂𑀲𑀁 𑀅𑀕𑁆𑀕𑀦𑁆𑀢𑀺 𑀓𑀣𑁂𑀦𑁆𑀢𑁂𑀦 𑀲𑀼𑀓𑀣𑀺𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑀸’’𑀢𑀺 𑀘𑁂𑀢𑀺𑀬𑀁 𑀯𑀦𑁆𑀤𑀺. 𑀓𑀼𑀝𑁆𑀝𑀭𑀸𑀚𑀸𑀦𑁄𑀢𑀺 𑀔𑀼𑀤𑁆𑀤𑀓𑀭𑀸𑀚𑀸𑀦𑁄. ‘‘𑀔𑀼𑀤𑁆𑀤𑀭𑀸𑀚𑀸𑀦𑁄’’𑀢𑀺𑀧𑀺 𑀧𑀸𑀞𑁄. 𑀢𑀦𑁆𑀢𑀸𑀯𑀼𑀢𑀸𑀦𑀦𑁆𑀢𑀺 𑀢𑀦𑁆𑀢𑁂 𑀆𑀯𑀼𑀢𑀸𑀦𑀁, 𑀢𑀦𑁆𑀢𑀁 𑀆𑀭𑁄𑀧𑁂𑀢𑁆𑀯𑀸 𑀯𑀸𑀬𑀺𑀢𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀘 𑀧𑀘𑁆𑀘𑀢𑁆𑀢𑁂 𑀲𑀸𑀫𑀺𑀯𑀘𑀦𑀁. 𑀬𑀸𑀦𑀺 𑀓𑀸𑀦𑀺𑀘𑀺 𑀢𑀦𑁆𑀢𑀸𑀯𑀼𑀢𑀸𑀦𑀺 𑀯𑀢𑁆𑀣𑀸𑀦𑀻𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀅𑀣 𑀯𑀸 𑀢𑀦𑁆𑀢𑀸𑀯𑀼𑀢𑀸𑀦𑀁 𑀯𑀢𑁆𑀣𑀸𑀦𑀁 𑀬𑀸𑀦𑀺 𑀓𑀸𑀦𑀺𑀘𑀺 𑀯𑀢𑁆𑀣𑀸𑀦𑀻𑀢𑀺 𑀏𑀯𑀁 𑀲𑀸𑀯𑀲𑁂𑀲𑀧𑀸𑀞𑀦𑀬𑁂𑀦𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀧𑁆𑀧𑀫𑀸𑀤𑀯𑀕𑁆𑀕𑁄 𑀅𑀝𑁆𑀞𑀫𑁄.

𑁯. 𑀩𑀮𑀓𑀭𑀡𑀻𑀬𑀯𑀕𑁆𑀕𑁄

𑁧. 𑀩𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁪𑁯. 𑀩𑀮𑀓𑀭𑀡𑀻𑀬𑀯𑀕𑁆𑀕𑁂 𑀩𑀮𑀓𑀭𑀡𑀻𑀬𑀸𑀢𑀺 𑀊𑀭𑀼𑀩𑀮𑀩𑀸𑀳𑀼𑀩𑀮𑁂𑀦 𑀓𑀢𑁆𑀢𑀩𑁆𑀩𑀸 𑀥𑀸𑀯𑀦𑀮𑀗𑁆𑀖𑀦𑀢𑀸𑀧𑀦𑀯𑀳𑀦𑀸𑀤𑀬𑁄 𑀓𑀫𑁆𑀫𑀦𑁆𑀢𑀸. 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬𑀸𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂 𑀞𑀢𑁆𑀯𑀸. 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀦𑁆𑀢𑀺 𑀲𑀳𑀯𑀺𑀧𑀲𑁆𑀲𑀦𑀁 𑀅𑀭𑀺𑀬𑀫𑀕𑁆𑀕𑀁.

𑁨. 𑀩𑀻𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁦. 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀸𑀢𑀺 𑀏𑀢𑁆𑀣 𑀧𑀜𑁆𑀘𑀯𑀺𑀥𑀫𑁆𑀧𑀺 𑀩𑀻𑀚𑀁 𑀩𑀻𑀚𑀕𑀸𑀫𑁄 𑀦𑀸𑀫, 𑀢𑀤𑁂𑀯 𑀧𑀡𑁆𑀡𑀲𑀫𑁆𑀧𑀦𑁆𑀦𑀁 𑀦𑀻𑀮𑀪𑀸𑀯𑀢𑁄 𑀧𑀝𑁆𑀞𑀸𑀬 𑀪𑀽𑀢𑀕𑀸𑀫𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁩. 𑀦𑀸𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁧. 𑀩𑀮𑀁 𑀕𑀸𑀳𑁂𑀦𑁆𑀢𑀻𑀢𑀺 𑀩𑀮𑀁 𑀕𑀡𑁆𑀳𑀦𑁆𑀢𑀺, 𑀕𑀳𑀺𑀢𑀩𑀮𑀸 𑀣𑀺𑀭𑀲𑀭𑀻𑀭𑀸 𑀳𑁄𑀦𑁆𑀢𑀺. 𑀓𑀼𑀲𑁄𑀩𑁆𑀪𑁂 𑀑𑀢𑀭𑀦𑁆𑀢𑀻𑀢𑀺𑀆𑀤𑀻𑀲𑀼 𑀅𑀬𑀫𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀦𑀸𑀕𑀺𑀦𑀺𑀬𑁄 𑀓𑀺𑀭 𑀉𑀢𑀼𑀲𑀫𑀬𑁂 𑀧𑀢𑀺𑀝𑁆𑀞𑀺𑀢𑀕𑀩𑁆𑀪𑀸 𑀘𑀺𑀦𑁆𑀢𑁂𑀦𑁆𑀢𑀺 𑁋 ‘‘𑀲𑀘𑁂 𑀫𑀬𑀁 𑀇𑀥 𑀯𑀺𑀚𑀸𑀬𑀺𑀲𑁆𑀲𑀸𑀫, 𑀏𑀯𑀁 𑀦𑁄 𑀤𑀸𑀭𑀓𑀸 𑀊𑀫𑀺𑀯𑁂𑀕𑀜𑁆𑀘 𑀲𑀼𑀧𑀡𑁆𑀡𑀲𑁆𑀲 𑀘 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀆𑀕𑀢𑀲𑁆𑀲 𑀯𑁂𑀕𑀁 𑀲𑀳𑀺𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺 𑀢𑀸 𑀫𑀳𑀸𑀲𑀫𑀼𑀤𑁆𑀤𑁂 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀲𑀫𑁆𑀪𑀚𑁆𑀚𑀫𑀼𑀔𑀤𑁆𑀯𑀸𑀭𑀁 𑀧𑀢𑁆𑀯𑀸 𑀧𑀜𑁆𑀘 𑀫𑀳𑀸𑀦𑀤𑀺𑀬𑁄 𑀧𑀯𑀺𑀲𑀺𑀢𑁆𑀯𑀸 𑀳𑀺𑀫𑀯𑀦𑁆𑀢𑀁 𑀕𑀘𑁆𑀙𑀦𑁆𑀢𑀺. 𑀢𑀢𑁆𑀣 𑀲𑀼𑀧𑀡𑁆𑀡𑁂𑀳𑀺 𑀅𑀧𑀓𑁆𑀔𑀦𑁆𑀤𑀦𑀻𑀬𑀸𑀲𑀼 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀕𑀼𑀳𑀸𑀲𑀼 𑀯𑀲𑀫𑀸𑀦𑀸 𑀯𑀺𑀚𑀸𑀬𑀺𑀢𑁆𑀯𑀸 𑀦𑀸𑀕𑀧𑁄𑀢𑀓𑁂 𑀕𑁄𑀧𑁆𑀨𑀓𑀸𑀤𑀺𑀧𑀫𑀸𑀡𑁂𑀲𑀼 𑀉𑀤𑀓𑁂𑀲𑀼 𑀑𑀢𑀸𑀭𑁂𑀢𑁆𑀯𑀸 𑀉𑀤𑀓𑀢𑀭𑀡𑀁 𑀲𑀺𑀓𑁆𑀔𑀸𑀧𑁂𑀦𑁆𑀢𑀺.

𑀅𑀣 𑀬𑀤𑀸 𑀅𑀦𑀼𑀓𑁆𑀓𑀫𑁂𑀦 𑀢𑁂 𑀦𑀸𑀕𑀸 𑀕𑀗𑁆𑀕𑀸𑀤𑀻𑀦𑀁 𑀦𑀤𑀻𑀦𑀁 𑀑𑀭𑀺𑀫𑀢𑀻𑀭𑀢𑁄 𑀧𑀭𑀢𑀻𑀭𑀁, 𑀧𑀭𑀢𑀻𑀭𑀢𑁄 𑀑𑀭𑀺𑀫𑀢𑀻𑀭𑀦𑁆𑀢𑀺 𑀢𑀭𑀡𑀧𑀝𑀺𑀢𑀭𑀡𑀁 𑀓𑀸𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀢𑀤𑀸 ‘‘𑀇𑀤𑀸𑀦𑀺 𑀦𑁄 𑀤𑀸𑀭𑀓𑀸 𑀊𑀫𑀺𑀯𑁂𑀕𑀜𑁆𑀘 𑀕𑀭𑀼𑀴𑀯𑁂𑀕𑀜𑁆𑀘 𑀲𑀳𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀦𑁆𑀢𑀻’’𑀢𑀺 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀫𑀳𑀸𑀫𑁂𑀖𑀁 𑀲𑀫𑀼𑀝𑁆𑀞𑀸𑀧𑁂𑀢𑁆𑀯𑀸 𑀲𑀓𑀮𑀳𑀺𑀫𑀯𑀦𑁆𑀢𑀁 𑀏𑀓𑁄𑀤𑀓𑀁 𑀯𑀺𑀬 𑀓𑀼𑀭𑀼𑀫𑀸𑀦𑀸 𑀤𑁂𑀯𑀁 𑀯𑀲𑁆𑀲𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀭𑀚𑀢𑀸𑀤𑀺𑀫𑀬𑀸 𑀦𑀸𑀯𑀸 𑀫𑀸𑀧𑁂𑀢𑁆𑀯𑀸 𑀉𑀧𑀭𑀺 𑀲𑀼𑀯𑀡𑁆𑀡𑀢𑀸𑀭𑀓𑀯𑀺𑀘𑀺𑀢𑁆𑀢𑀁 𑀲𑀫𑁄𑀲𑀭𑀺𑀢𑀕𑀦𑁆𑀥𑀧𑀼𑀧𑁆𑀨𑀤𑀸𑀫𑀁 𑀘𑁂𑀮𑀯𑀺𑀢𑀸𑀦𑀁 𑀩𑀦𑁆𑀥𑀺𑀢𑁆𑀯𑀸 𑀲𑀼𑀭𑀪𑀺𑀘𑀦𑁆𑀤𑀦𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀦𑀺 𑀆𑀤𑀸𑀬 𑀢𑀸𑀳𑀺 𑀦𑀸𑀯𑀸𑀳𑀺 𑀧𑀜𑁆𑀘 𑀫𑀳𑀸𑀦𑀤𑀺𑀬𑁄 𑀑𑀕𑀸𑀳𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀫𑀳𑀸𑀲𑀫𑀼𑀤𑁆𑀤𑀁 𑀧𑀸𑀧𑀼𑀡𑀦𑁆𑀢𑀺. 𑀢𑀢𑁆𑀣 𑀘 𑀯𑀲𑀦𑁆𑀢𑀸 𑀤𑀲𑀩𑁆𑀬𑀸𑀫-𑀲𑀢𑀩𑁆𑀬𑀸𑀫-𑀲𑀳𑀲𑁆𑀲𑀩𑁆𑀬𑀸𑀫-𑀲𑀢𑀲𑀳𑀲𑁆𑀲𑀩𑁆𑀬𑀸𑀫-𑀧𑀫𑀸𑀡𑀢𑀁 𑀆𑀧𑀚𑁆𑀚𑀦𑁆𑀢𑀸 𑀫𑀳𑀦𑁆𑀢𑀢𑁆𑀢𑀁 𑀯𑁂𑀧𑀼𑀮𑁆𑀮𑀢𑁆𑀢𑀁 𑀆𑀧𑀚𑁆𑀚𑀦𑁆𑀢𑀺 𑀦𑀸𑀫.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀳𑀺𑀫𑀯𑀦𑁆𑀢𑀧𑀩𑁆𑀩𑀢𑁄 𑀯𑀺𑀬 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀤𑀝𑁆𑀞𑀩𑁆𑀩𑀁, 𑀦𑀸𑀕𑀧𑁄𑀢𑀓𑀸 𑀯𑀺𑀬 𑀬𑁄𑀕𑀸𑀯𑀘𑀭𑀸, 𑀓𑀼𑀲𑁄𑀩𑁆𑀪𑀸𑀤𑀬𑁄 𑀯𑀺𑀬 𑀅𑀭𑀺𑀬𑀫𑀕𑁆𑀕𑁄, 𑀫𑀳𑀸𑀲𑀫𑀼𑀤𑁆𑀤𑁄 𑀯𑀺𑀬 𑀦𑀺𑀩𑁆𑀩𑀸𑀦𑀁. 𑀬𑀣𑀸 𑀦𑀸𑀕𑀧𑁄𑀢𑀓𑀸 𑀳𑀺𑀫𑀯𑀦𑁆𑀢𑁂 𑀧𑀢𑀺𑀝𑁆𑀞𑀸𑀬 𑀓𑀼𑀲𑁄𑀩𑁆𑀪𑀸𑀤𑀻𑀳𑀺 𑀫𑀳𑀸𑀲𑀫𑀼𑀤𑁆𑀤𑀁 𑀧𑀢𑁆𑀯𑀸 𑀓𑀸𑀬𑀫𑀳𑀦𑁆𑀢𑀢𑁆𑀢𑀁 𑀆𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀬𑁄𑀕𑀺𑀦𑁄 𑀲𑀻𑀮𑀁 𑀦𑀺𑀲𑁆𑀲𑀸𑀬 𑀲𑀻𑀮𑁂 𑀧𑀢𑀺𑀝𑁆𑀞𑀸𑀬 𑀅𑀭𑀺𑀬𑀫𑀕𑁆𑀕𑁂𑀦 𑀦𑀺𑀩𑁆𑀩𑀸𑀦𑀁 𑀧𑀢𑁆𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑁂𑀯 𑀆𑀕𑀢𑁂𑀲𑀼 𑀙𑀲𑀼 𑀅𑀪𑀺𑀜𑁆𑀜𑀸𑀥𑀫𑁆𑀫𑁂𑀲𑀼 𑀕𑀼𑀡𑀲𑀭𑀻𑀭𑀫𑀳𑀦𑁆𑀢𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑀻𑀢𑀺.

𑁫. 𑀓𑀼𑀫𑁆𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁩. 𑀓𑀼𑀫𑁆𑀪𑁄𑀢𑀺 𑀉𑀤𑀓𑀖𑀝𑁄. 𑀦𑁄 𑀧𑀘𑁆𑀘𑀸𑀯𑀫𑀢𑀻𑀢𑀺 𑀦 𑀧𑀢𑀺𑀆𑀯𑀫𑀢𑀺, 𑀦 𑀅𑀦𑁆𑀢𑁄 𑀧𑀯𑁂𑀲𑁂𑀢𑀻𑀢𑀺 𑀅𑀢𑁆𑀣𑁄.

𑁭. 𑀆𑀓𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁫. 𑀧𑀼𑀭𑀢𑁆𑀣𑀺𑀫𑀸𑀢𑀺 𑀧𑀼𑀭𑀢𑁆𑀣𑀺𑀫𑀤𑀺𑀲𑀢𑁄 𑀆𑀕𑀢𑀯𑀸𑀢𑀸. 𑀧𑀘𑁆𑀙𑀺𑀫𑀤𑀺𑀲𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀘𑀢𑁆𑀢𑀸𑀭𑁄𑀧𑀺 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀬𑀣𑁂𑀯 𑀳𑀺 𑀏𑀢𑁂𑀲𑀁 𑀧𑀼𑀭𑀢𑁆𑀣𑀺𑀫𑀸𑀤𑀺𑀪𑁂𑀤𑀸𑀦𑀁 𑀯𑀸𑀢𑀸𑀦𑀁 𑀲𑀦𑁆𑀦𑀺𑀧𑀸𑀢𑁄 𑀆𑀓𑀸𑀲𑁂 𑀇𑀚𑁆𑀛𑀢𑀺, 𑀏𑀯𑀁 𑀇𑀥𑀸𑀧𑀺 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀸 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 𑀲𑀳𑀯𑀺𑀧𑀲𑁆𑀲𑀦𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀬 𑀇𑀚𑁆𑀛𑀦𑁆𑀢𑀺, 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁.

𑁮-𑁯. 𑀧𑀞𑀫𑀫𑁂𑀖𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁫𑁬-𑁧𑁫𑁭. 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂𑀢𑀺 𑀆𑀲𑀸𑀴𑁆𑀳𑀫𑀸𑀲𑁂. 𑀊𑀳𑀢𑀦𑁆𑀢𑀺 𑀤𑁆𑀯𑀺𑀧𑀤𑀘𑀢𑀼𑀧𑁆𑀧𑀤𑀸𑀦𑀁 𑀧𑀸𑀤𑀧𑁆𑀧𑀳𑀸𑀭𑁂𑀦 𑀧𑀣𑀯𑀻𑀢𑀮𑁂 𑀉𑀝𑁆𑀞𑀳𑀺𑀢𑁆𑀯𑀸 𑀉𑀤𑁆𑀥𑀁 𑀕𑀢𑀁 𑀯𑀝𑁆𑀝𑀺𑀯𑀝𑁆𑀝𑀺 𑀳𑀼𑀢𑁆𑀯𑀸 𑀆𑀓𑀸𑀲𑁂 𑀧𑀓𑁆𑀔𑀦𑁆𑀢𑀁. 𑀭𑀚𑁄𑀚𑀮𑁆𑀮𑀦𑁆𑀢𑀺 𑀧𑀁𑀲𑀼𑀭𑀚𑁄𑀚𑀮𑁆𑀮𑀁.

𑁧𑁦. 𑀦𑀸𑀯𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁫𑁮. 𑀲𑀸𑀫𑀼𑀤𑁆𑀤𑀺𑀓𑀸𑀬 𑀦𑀸𑀯𑀸𑀬𑀸𑀢𑀺𑀆𑀤𑀺 𑀳𑁂𑀝𑁆𑀞𑀸 𑀯𑀸𑀡𑀺𑀚𑀓𑁄𑀧𑀫𑁂 𑀯𑀺𑀢𑁆𑀣𑀸𑀭𑀺𑀢𑀫𑁂𑀯.

𑁧𑁧-𑁧𑁨. 𑀆𑀕𑀦𑁆𑀢𑀼𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁫𑁯-𑁧𑁬𑁦. 𑀆𑀕𑀦𑁆𑀢𑀼𑀓𑀸𑀕𑀸𑀭𑀦𑁆𑀢𑀺 𑀧𑀼𑀜𑁆𑀜𑀢𑁆𑀣𑀺𑀓𑁂𑀳𑀺 𑀦𑀕𑀭𑀫𑀚𑁆𑀛𑁂 𑀓𑀢𑀁 𑀆𑀕𑀦𑁆𑀢𑀼𑀓𑀖𑀭𑀁, 𑀬𑀢𑁆𑀣 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑁂𑀳𑀺𑀧𑀺 𑀲𑀓𑁆𑀓𑀸 𑀳𑁄𑀢𑀺 𑀦𑀺𑀯𑀸𑀲𑀁 𑀉𑀧𑀕𑀦𑁆𑀢𑀼𑀁. 𑀅𑀪𑀺𑀜𑁆𑀜𑀸 𑀧𑀭𑀺𑀜𑁆𑀜𑁂𑀬𑁆𑀬𑀸𑀢𑀺 𑀬𑀣𑁂𑀯 𑀳𑀺 𑀢𑁂𑀲𑀁 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀤𑀻𑀳𑀺 𑀆𑀕𑀢𑀸𑀦𑀁 𑀔𑀢𑁆𑀢𑀺𑀬𑀸𑀤𑀻𑀦𑀁 𑀯𑀸𑀲𑁄 𑀆𑀕𑀦𑁆𑀢𑀼𑀓𑀸𑀕𑀸𑀭𑁂 𑀇𑀚𑁆𑀛𑀢𑀺, 𑀏𑀯𑀁 𑀇𑀫𑁂𑀲𑀁 𑀅𑀪𑀺𑀜𑁆𑀜𑀸𑀧𑀭𑀺𑀜𑁆𑀜𑁂𑀬𑁆𑀬𑀸𑀢𑀺𑀆𑀤𑀻𑀦𑀁 𑀥𑀫𑁆𑀫𑀸𑀦𑀁 𑀅𑀪𑀺𑀜𑁆𑀜𑀸𑀧𑀭𑀺𑀚𑀸𑀦𑀦𑀸𑀤𑀻𑀳𑀺 𑀲𑀳𑀯𑀺𑀧𑀲𑁆𑀲𑀦𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀪𑀸𑀯𑀦𑀸𑀬 𑀇𑀚𑁆𑀛𑀦𑁆𑀢𑀺, 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀦𑀤𑀻𑀲𑀼𑀢𑁆𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺.

𑀩𑀮𑀓𑀭𑀡𑀻𑀬𑀯𑀕𑁆𑀕𑁄 𑀦𑀯𑀫𑁄.

𑁧𑁦. 𑀏𑀲𑀦𑀸𑀯𑀕𑁆𑀕𑁄

𑁧. 𑀏𑀲𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁬𑁧. 𑀏𑀲𑀦𑀸𑀯𑀕𑁆𑀕𑁂 𑀓𑀸𑀫𑁂𑀲𑀦𑀸𑀢𑀺 𑀓𑀸𑀫𑀸𑀦𑀁 𑀏𑀲𑀦𑀸 𑀕𑀯𑁂𑀲𑀦𑀸 𑀫𑀕𑁆𑀕𑀦𑀸 𑀧𑀢𑁆𑀣𑀦𑀸. 𑀪𑀯𑁂𑀲𑀦𑀸𑀢𑀺 𑀪𑀯𑀸𑀦𑀁 𑀏𑀲𑀦𑀸. 𑀩𑁆𑀭𑀳𑁆𑀫𑀘𑀭𑀺𑀬𑁂𑀲𑀦𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀲𑁆𑀲 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀏𑀲𑀦𑀸.

𑁨-𑁧𑁧. 𑀯𑀺𑀥𑀸𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁬𑁨-𑁧𑁭𑁧. 𑀯𑀺𑀥𑀸𑀢𑀺 𑀫𑀸𑀦𑀓𑁄𑀝𑁆𑀞𑀸𑀲𑀸 𑀫𑀸𑀦𑀞𑀧𑀦𑀸 𑀯𑀸. 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺 𑀯𑀺𑀥𑀸𑀢𑀺 𑀅𑀳𑀫𑀲𑁆𑀫𑀺 𑀲𑁂𑀬𑁆𑀬𑁄𑀢𑀺 𑀏𑀯𑀁 𑀫𑀸𑀦𑀓𑁄𑀝𑁆𑀞𑀸𑀲𑁄 𑀫𑀸𑀦𑀞𑀧𑀦𑀸 𑀯𑀸. 𑀦𑀻𑀖𑀸𑀢𑀺 𑀤𑀼𑀓𑁆𑀔𑀸. 𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑀬𑀲𑁆𑀲 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀁 𑀧𑀼𑀭𑀺𑀲𑀁 𑀦𑀻𑀳𑀦𑀦𑁆𑀢𑀻𑀢𑀺 𑀦𑀻𑀖𑀸. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀏𑀲𑀦𑀸𑀯𑀕𑁆𑀕𑁄 𑀤𑀲𑀫𑁄.

𑁧𑁧. 𑀑𑀖𑀯𑀕𑁆𑀕𑁄

𑁧-𑁨. 𑀑𑀖𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁭𑁨-𑁧𑁭𑁩. 𑀑𑀖𑀯𑀕𑁆𑀕𑁂 𑀓𑀸𑀫𑁄𑀖𑁄𑀢𑀺 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀙𑀦𑁆𑀤𑀭𑀸𑀕𑁄. 𑀪𑀯𑁄𑀖𑁄𑀢𑀺 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀙𑀦𑁆𑀤𑀭𑀸𑀕𑁄. 𑀤𑀺𑀝𑁆𑀞𑁄𑀖𑁄𑀢𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄. 𑀅𑀯𑀺𑀚𑁆𑀚𑁄𑀖𑁄𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀅𑀜𑁆𑀜𑀸𑀡𑀁. 𑀓𑀸𑀫𑀬𑁄𑀕𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑁩-𑁪. 𑀉𑀧𑀸𑀤𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁭𑁪-𑁧𑁭𑁫. 𑀓𑀸𑀫𑀼𑀧𑀸𑀤𑀸𑀦𑀦𑁆𑀢𑀺 𑀓𑀸𑀫𑀕𑁆𑀕𑀳𑀡𑀁. 𑀤𑀺𑀝𑁆𑀞𑀼𑀧𑀸𑀤𑀸𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀕𑀦𑁆𑀣𑀸𑀢𑀺 𑀕𑀦𑁆𑀣𑀦𑀸 𑀖𑀝𑀦𑀸. 𑀓𑀸𑀬𑀕𑀦𑁆𑀣𑁄𑀢𑀺 𑀦𑀸𑀫𑀓𑀸𑀬𑀲𑁆𑀲 𑀕𑀦𑁆𑀣𑁄 𑀕𑀦𑁆𑀣𑀦𑀖𑀝𑀦𑀓𑀺𑀮𑁂𑀲𑁄. 𑀇𑀤𑀁𑀲𑀘𑁆𑀘𑀸𑀪𑀺𑀦𑀺𑀯𑁂𑀲𑁄𑀢𑀺 𑀅𑀦𑁆𑀢𑀕𑁆𑀕𑀸𑀳𑀺𑀓𑀤𑀺𑀝𑁆𑀞𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 ‘‘𑀇𑀤𑀫𑁂𑀯 𑀲𑀘𑁆𑀘’’𑀦𑁆𑀢𑀺 𑀏𑀯𑀁 𑀅𑀪𑀺𑀦𑀺𑀯𑁂𑀲𑁄.

𑁫-𑁧𑁦. 𑀅𑀦𑀼𑀲𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁭𑁬-𑁧𑁮𑁧. 𑀓𑀸𑀫𑀭𑀸𑀕𑀸𑀦𑀼𑀲𑀬𑁄𑀢𑀺 𑀣𑀸𑀫𑀕𑀢𑀝𑁆𑀞𑁂𑀦 𑀓𑀸𑀫𑀭𑀸𑀕𑁄𑀯 𑀅𑀦𑀼𑀲𑀬𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀑𑀭𑀫𑁆𑀪𑀸𑀕𑀺𑀬𑀸𑀦𑀻𑀢𑀺 𑀳𑁂𑀝𑁆𑀞𑀸𑀓𑁄𑀝𑁆𑀞𑀸𑀲𑀺𑀬𑀸𑀦𑀺. 𑀲𑀁𑀬𑁄𑀚𑀦𑀸𑀦𑀻𑀢𑀺 𑀩𑀦𑁆𑀥𑀦𑀸𑀦𑀺. 𑀉𑀤𑁆𑀥𑀫𑁆𑀪𑀸𑀕𑀺𑀬𑀸𑀦𑀻𑀢𑀺 𑀉𑀧𑀭𑀺𑀓𑁄𑀝𑁆𑀞𑀸𑀲𑀺𑀬𑀸𑀦𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀑𑀖𑀯𑀕𑁆𑀕𑁄 𑀏𑀓𑀸𑀤𑀲𑀫𑁄.

𑀫𑀕𑁆𑀕𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀩𑁄𑀚𑁆𑀛𑀗𑁆𑀕𑀲𑀁𑀬𑀼𑀢𑁆𑀢𑀁

𑁧. 𑀧𑀩𑁆𑀩𑀢𑀯𑀕𑁆𑀕𑁄

𑁧. 𑀳𑀺𑀫𑀯𑀦𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁨. 𑀩𑁄𑀚𑁆𑀛𑀗𑁆𑀕𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀦𑀸𑀕𑀸𑀢𑀺 𑀇𑀫𑁂𑀧𑀺 𑀫𑀳𑀸𑀲𑀫𑀼𑀤𑁆𑀤𑀧𑀺𑀝𑁆𑀞𑁂 𑀊𑀫𑀺𑀅𑀦𑁆𑀢𑀭𑀯𑀸𑀲𑀺𑀦𑁄𑀯, 𑀦 𑀯𑀺𑀫𑀸𑀦𑀝𑁆𑀞𑀓𑀦𑀸𑀕𑀸. 𑀢𑁂𑀲𑀁 𑀳𑀺𑀫𑀯𑀦𑁆𑀢𑀁 𑀦𑀺𑀲𑁆𑀲𑀸𑀬 𑀓𑀸𑀬𑀯𑀟𑁆𑀠𑀦𑀸𑀤𑀺𑀲𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀩𑁄𑀚𑁆𑀛𑀗𑁆𑀕𑁂𑀢𑀺 𑀏𑀢𑁆𑀣 𑀩𑁄𑀥𑀺𑀬𑀸, 𑀩𑁄𑀥𑀺𑀲𑁆𑀲 𑀯𑀸 𑀅𑀗𑁆𑀕𑀸𑀢𑀺 𑀩𑁄𑀚𑁆𑀛𑀗𑁆𑀕𑀸. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀸 𑀳𑀺 𑀅𑀬𑀁 𑀥𑀫𑁆𑀫𑀲𑀸𑀫𑀕𑁆𑀕𑀻, 𑀬𑀸𑀬 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀓𑁆𑀔𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑀸𑀬 𑀮𑀻𑀦𑀼𑀤𑁆𑀥𑀘𑁆𑀘𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦 𑀓𑀸𑀫𑀲𑀼𑀔𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀉𑀘𑁆𑀙𑁂𑀤𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀉𑀧𑀤𑁆𑀤𑀯𑀸𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑀸𑀬 𑀲𑀢𑀺𑀥𑀫𑁆𑀫𑀯𑀺𑀘𑀬𑀯𑀻𑀭𑀺𑀬𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀲𑀗𑁆𑀔𑀸𑀢𑀸𑀬 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀅𑀭𑀺𑀬𑀲𑀸𑀯𑀓𑁄 𑀩𑀼𑀚𑁆𑀛𑀢𑀻𑀢𑀺 𑀓𑀢𑁆𑀯𑀸 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀺. 𑀩𑀼𑀚𑁆𑀛𑀢𑀻𑀢𑀺 𑀓𑀺𑀮𑁂𑀲𑀲𑀦𑁆𑀢𑀸𑀦𑀦𑀺𑀤𑁆𑀤𑀸𑀬 𑀉𑀝𑁆𑀞𑀳𑀢𑀺, 𑀘𑀢𑁆𑀢𑀸𑀭𑀺 𑀯𑀸 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀢𑀺, 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸 𑀲𑀘𑁆𑀙𑀺𑀓𑀭𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸𑀳 ‘‘𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀪𑀸𑀯𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄’’𑀢𑀺 (𑀲𑀁. 𑀦𑀺. 𑁫.𑁩𑁭𑁮; 𑀤𑀻. 𑀦𑀺. 𑁩.𑁧𑁪𑁩). 𑀢𑀲𑁆𑀲𑀸 𑀥𑀫𑁆𑀫𑀲𑀸𑀫𑀕𑁆𑀕𑀺𑀲𑀗𑁆𑀔𑀸𑀢𑀸𑀬 𑀩𑁄𑀥𑀺𑀬𑀸 𑀅𑀗𑁆𑀕𑀸𑀢𑀺 𑀩𑁄𑀚𑁆𑀛𑀗𑁆𑀕𑀸 𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀸𑀤𑀬𑁄 𑀯𑀺𑀬. 𑀬𑁄𑀧𑁂𑀲 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀏𑀢𑀸𑀬 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀩𑀼𑀚𑁆𑀛𑀢𑀻𑀢𑀺 𑀓𑀢𑁆𑀯𑀸 𑀅𑀭𑀺𑀬𑀲𑀸𑀯𑀓𑁄 𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀩𑁄𑀥𑀺𑀲𑁆𑀲 𑀅𑀗𑁆𑀕𑀸𑀢𑀺𑀧𑀺 𑀩𑁄𑀚𑁆𑀛𑀗𑁆𑀕𑀸 𑀲𑁂𑀦𑀗𑁆𑀕𑀭𑀣𑀗𑁆𑀕𑀸𑀤𑀬𑁄 𑀯𑀺𑀬. 𑀢𑁂𑀦𑀸𑀳𑀼 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑁋 ‘‘𑀩𑀼𑀚𑁆𑀛𑀦𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀗𑁆𑀕𑀸𑀢𑀺 𑀯𑀸 𑀩𑁄𑀚𑁆𑀛𑀗𑁆𑀕𑀸’’𑀢𑀺.

𑀅𑀧𑀺𑀘 ‘‘𑀩𑁄𑀚𑁆𑀛𑀗𑁆𑀕𑀸𑀢𑀺 𑀓𑁂𑀦𑀝𑁆𑀞𑁂𑀦 𑀩𑁄𑀚𑁆𑀛𑀗𑁆𑀕𑀸? 𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀅𑀦𑀼𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀧𑀝𑀺𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀲𑀫𑁆𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸’’𑀇𑀘𑁆𑀘𑀸𑀤𑀺𑀦𑀸 (𑀧𑀝𑀺. 𑀫. 𑁨.𑁧𑁭) 𑀧𑀝𑀺𑀲𑀫𑁆𑀪𑀺𑀤𑀸𑀦𑀬𑁂𑀦𑀸𑀧𑀺 𑀩𑁄𑀚𑁆𑀛𑀗𑁆𑀕𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀦𑁆𑀢𑀺𑀆𑀤𑀻𑀲𑀼 𑀧𑀦 𑀧𑀲𑀢𑁆𑀣𑁄 𑀲𑀼𑀦𑁆𑀤𑀭𑁄 𑀘 𑀩𑁄𑀚𑁆𑀛𑀗𑁆𑀕𑁄𑀢𑀺 𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀲𑀢𑀺𑀬𑁂𑀯 𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀢𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀦𑁆𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀪𑀸𑀯𑁂𑀢𑀻𑀢𑀺 𑀯𑀟𑁆𑀠𑁂𑀢𑀺, 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑀦𑁆𑀢𑀸𑀦𑁂 𑀧𑀼𑀦𑀧𑁆𑀧𑀼𑀦𑀁 𑀚𑀦𑁂𑀢𑀺, 𑀅𑀪𑀺𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀦𑁆𑀢𑀺𑀆𑀤𑀻𑀦𑀺 𑀓𑁄𑀲𑀮𑀲𑀁𑀬𑀼𑀢𑁆𑀢𑁂 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀺 𑀯𑀺𑀯𑁂𑀓𑀦𑀺𑀲𑁆𑀲𑀺𑀢’’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀢𑀢𑁆𑀣 𑀢𑀤𑀗𑁆𑀕𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁, 𑀲𑀫𑀼𑀘𑁆𑀙𑁂𑀤𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁, 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀦𑁆𑀢𑀺, 𑀯𑀺𑀯𑁂𑀓𑀢𑁆𑀢𑀬𑀫𑁂𑀯 𑀯𑀼𑀢𑁆𑀢𑀁, 𑀩𑁄𑀚𑁆𑀛𑀗𑁆𑀕𑀪𑀸𑀯𑀦𑀁 𑀧𑀢𑁆𑀯𑀸 𑀧𑀦 𑀧𑀜𑁆𑀘𑀯𑀺𑀥𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀫𑁆𑀧𑀺 𑀏𑀓𑁂 𑀯𑀡𑁆𑀡𑀬𑀦𑁆𑀢𑀺. 𑀢𑁂 𑀳𑀺 𑀦 𑀓𑁂𑀯𑀮𑀁 𑀩𑀮𑀯𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀓𑁆𑀔𑀡𑁂𑀲𑀼 𑀏𑀯 𑀩𑁄𑀚𑁆𑀛𑀗𑁆𑀕𑁂 𑀉𑀤𑁆𑀥𑀭𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀧𑀸𑀤𑀓-𑀓𑀲𑀺𑀡𑀚𑁆𑀛𑀸𑀦-𑀆𑀦𑀸𑀧𑀸𑀦𑀸𑀲𑀼𑀪-𑀩𑁆𑀭𑀳𑁆𑀫𑀯𑀺𑀳𑀸𑀭𑀚𑁆𑀛𑀸𑀦𑁂𑀲𑀼𑀧𑀺 𑀉𑀤𑁆𑀥𑀭𑀦𑁆𑀢𑀺, 𑀦 𑀘 𑀧𑀝𑀺𑀲𑀺𑀤𑁆𑀥𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺. 𑀢𑀲𑁆𑀫𑀸 𑀢𑁂𑀲𑀁 𑀫𑀢𑁂𑀦 𑀏𑀢𑁂𑀲𑀁 𑀛𑀸𑀦𑀸𑀦𑀁 𑀧𑀯𑀢𑁆𑀢𑀺𑀓𑁆𑀔𑀡𑁂 𑀓𑀺𑀘𑁆𑀘𑀢𑁄 𑀏𑀯 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀁. 𑀬𑀣𑀸 𑀘 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 ‘‘𑀅𑀚𑁆𑀛𑀸𑀲𑀬𑀢𑁄 𑀦𑀺𑀲𑁆𑀲𑀭𑀡𑀯𑀺𑀯𑁂𑀓𑀦𑀺𑀲𑁆𑀲𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀧𑀝𑀺𑀧𑀲𑁆𑀲𑀤𑁆𑀥𑀺𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀫𑁆𑀧𑀺 𑀪𑀸𑀯𑁂𑀢𑀻𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀲𑁂𑀲𑀫𑁂𑀢𑁆𑀣 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯.

𑁨. 𑀓𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁩. 𑀤𑀼𑀢𑀺𑀬𑁂 𑀆𑀳𑀸𑀭𑀝𑁆𑀞𑀺𑀢𑀺𑀓𑁄𑀢𑀺 𑀧𑀘𑁆𑀘𑀬𑀝𑁆𑀞𑀺𑀢𑀺𑀓𑁄. 𑀆𑀳𑀸𑀭𑀁 𑀧𑀝𑀺𑀘𑁆𑀘𑀸𑀢𑀺 𑀧𑀘𑁆𑀘𑀬𑀁 𑀧𑀝𑀺𑀘𑁆𑀘. 𑀲𑀼𑀪𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀼𑀪𑀫𑁆𑀧𑀺 𑀲𑀼𑀪𑀦𑀺𑀫𑀺𑀢𑁆𑀢𑀁, 𑀲𑀼𑀪𑀲𑁆𑀲 𑀆𑀭𑀫𑁆𑀫𑀡𑀫𑁆𑀧𑀺 𑀲𑀼𑀪𑀦𑀺𑀫𑀺𑀢𑁆𑀢𑀁. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄𑀢𑀺 𑀅𑀦𑀼𑀧𑀸𑀬𑀫𑀦𑀲𑀺𑀓𑀸𑀭𑁄 𑀉𑀧𑁆𑀧𑀣𑀫𑀦𑀲𑀺𑀓𑀸𑀭𑁄 𑀅𑀦𑀺𑀘𑁆𑀘𑁂 ‘‘𑀦𑀺𑀘𑁆𑀘’’𑀦𑁆𑀢𑀺 𑀯𑀸, 𑀤𑀼𑀓𑁆𑀔𑁂 ‘‘𑀲𑀼𑀔’’𑀦𑁆𑀢𑀺, 𑀅𑀦𑀢𑁆𑀢𑀦𑀺 ‘‘𑀅𑀢𑁆𑀢𑀸’’𑀢𑀺 𑀯𑀸, 𑀅𑀲𑀼𑀪𑁂 ‘‘𑀲𑀼𑀪’’𑀦𑁆𑀢𑀺 𑀯𑀸, 𑀫𑀦𑀲𑀺𑀓𑀸𑀭𑁄. 𑀢𑀁 𑀢𑀲𑁆𑀫𑀺𑀁 𑀲𑀼𑀪𑀸𑀭𑀫𑁆𑀫𑀡𑁂 𑀩𑀳𑀼𑀮𑀁 𑀧𑀯𑀢𑁆𑀢𑀬𑀢𑁄 𑀓𑀸𑀫𑀘𑁆𑀙𑀦𑁆𑀤𑁄 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀺, 𑀪𑀺𑀓𑁆𑀔𑀯𑁂, 𑀲𑀼𑀪𑀦𑀺𑀫𑀺𑀢𑁆𑀢’’𑀦𑁆𑀢𑀺𑀆𑀤𑀺. 𑀏𑀯𑀁 𑀲𑀩𑁆𑀩𑀦𑀻𑀯𑀭𑀡𑁂𑀲𑀼 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑀧𑀝𑀺𑀖𑀦𑀺𑀫𑀺𑀢𑁆𑀢𑀦𑁆𑀢𑀺𑀆𑀤𑀻𑀲𑀼 𑀧𑀦 𑀧𑀝𑀺𑀖𑁄𑀧𑀺 𑀧𑀝𑀺𑀖𑀦𑀺𑀫𑀺𑀢𑁆𑀢𑀁 𑀧𑀝𑀺𑀖𑀸𑀭𑀫𑁆𑀫𑀡𑀫𑁆𑀧𑀺. 𑀅𑀭𑀢𑀻𑀢𑀺 𑀉𑀓𑁆𑀓𑀡𑁆𑀞𑀺𑀢𑀸. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀢𑀢𑁆𑀣 𑀓𑀢𑀫𑀸 𑀅𑀭𑀢𑀺? 𑀧𑀦𑁆𑀢𑁂𑀲𑀼 𑀯𑀸 𑀲𑁂𑀦𑀸𑀲𑀦𑁂𑀲𑀼 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀲𑀼 𑀯𑀸 𑀅𑀥𑀺𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀭𑀢𑀺 𑀅𑀭𑀢𑀺𑀢𑀸 𑀅𑀦𑀪𑀺𑀭𑀢𑀺 𑀅𑀦𑀪𑀺𑀭𑀫𑀦𑀸 𑀉𑀓𑁆𑀓𑀡𑁆𑀞𑀺𑀢𑀸 𑀧𑀭𑀺𑀢𑀲𑁆𑀲𑀺𑀢𑀸, 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀭𑀢𑀻’’𑀢𑀺 (𑀯𑀺𑀪. 𑁮𑁫𑁬).

𑀢𑀦𑁆𑀤𑀻𑀢𑀺 𑀅𑀢𑀺𑀲𑀻𑀢𑀸𑀤𑀺𑀧𑀘𑁆𑀘𑀬𑀸 𑀉𑀧𑁆𑀧𑀦𑁆𑀦𑀁 𑀆𑀕𑀦𑁆𑀢𑀼𑀓𑀓𑀸𑀬𑀸𑀮𑀲𑀺𑀬𑀁. 𑀬𑀲𑁆𑀫𑀺𑀁 𑀉𑀧𑁆𑀧𑀦𑁆𑀦𑁂 ‘‘𑀅𑀢𑀺𑀲𑀻𑀢𑀁 𑀅𑀢𑀺𑀉𑀡𑁆𑀳𑀁 𑀅𑀢𑀺𑀘𑁆𑀙𑀸𑀢𑁄𑀲𑁆𑀫𑀺 𑀅𑀢𑀺𑀥𑀸𑀢𑁄𑀲𑁆𑀫𑀺 𑀅𑀢𑀺𑀤𑀽𑀭𑀫𑀕𑁆𑀕𑀁 𑀕𑀢𑁄𑀲𑁆𑀫𑀻’’𑀢𑀺 𑀯𑀤𑀢𑀺, 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀢𑀢𑁆𑀣 𑀓𑀢𑀫𑀸 𑀢𑀦𑁆𑀤𑀺, 𑀬𑀸 𑀢𑀦𑁆𑀤𑀻 𑀢𑀦𑁆𑀤𑀺𑀬𑀦𑀸 𑀢𑀦𑁆𑀤𑀺𑀫𑀦𑀓𑀢𑀸 𑀆𑀮𑀲𑁆𑀬𑀁 𑀆𑀮𑀲𑁆𑀬𑀸𑀬𑀦𑀸 𑀆𑀮𑀲𑁆𑀬𑀸𑀬𑀺𑀢𑀢𑁆𑀢𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀢𑀦𑁆𑀤𑀻’’𑀢𑀺 (𑀯𑀺𑀪. 𑁮𑁫𑁭).

𑀯𑀺𑀚𑀫𑁆𑀪𑀺𑀢𑀸𑀢𑀺 𑀓𑀺𑀮𑁂𑀲𑀯𑀲𑁂𑀦 𑀓𑀸𑀬𑀯𑀺𑀦𑀫𑀦𑀸. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀢𑀢𑁆𑀣 𑀓𑀢𑀫𑀸 𑀯𑀺𑀚𑀫𑁆𑀪𑀺𑀢𑀸? 𑀬𑀸 𑀓𑀸𑀬𑀲𑁆𑀲 𑀚𑀫𑁆𑀪𑀦𑀸 𑀯𑀺𑀚𑀫𑁆𑀪𑀦𑀸 𑀆𑀦𑀫𑀦𑀸 𑀯𑀺𑀦𑀫𑀦𑀸 𑀲𑀦𑁆𑀦𑀫𑀦𑀸 𑀧𑀡𑀫𑀦𑀸 𑀩𑁆𑀬𑀸𑀥𑀺𑀬𑀓𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀯𑀺𑀚𑀫𑁆𑀪𑀺𑀢𑀸’’𑀢𑀺 (𑀯𑀺𑀪. 𑁮𑁫𑁮).

𑀪𑀢𑁆𑀢𑀲𑀫𑁆𑀫𑀤𑁄𑀢𑀺 𑀪𑀢𑁆𑀢𑀧𑀭𑀺𑀴𑀸𑀳𑁄. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀢𑀢𑁆𑀣 𑀓𑀢𑀫𑁄 𑀪𑀢𑁆𑀢𑀲𑀫𑁆𑀫𑀤𑁄? 𑀬𑀸 𑀪𑀼𑀢𑁆𑀢𑀸𑀯𑀺𑀲𑁆𑀲 𑀪𑀢𑁆𑀢𑀫𑀼𑀘𑁆𑀙𑀸 𑀪𑀢𑁆𑀢𑀓𑀺𑀮𑀫𑀣𑁄 𑀪𑀢𑁆𑀢𑀧𑀭𑀺𑀴𑀸𑀳𑁄 𑀓𑀸𑀬𑀤𑀼𑀝𑁆𑀞𑀼𑀮𑁆𑀮𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀪𑀢𑁆𑀢𑀲𑀫𑁆𑀫𑀤𑁄’’𑀢𑀺 (𑀯𑀺𑀪. 𑁮𑁫𑁯).

𑀘𑁂𑀢𑀲𑁄 𑀘 𑀮𑀻𑀦𑀢𑁆𑀢𑀦𑁆𑀢𑀺 𑀘𑀺𑀢𑁆𑀢𑀲𑁆𑀲 𑀮𑀻𑀬𑀦𑀸𑀓𑀸𑀭𑁄, 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀢𑀢𑁆𑀣 𑀓𑀢𑀫𑀁 𑀘𑁂𑀢𑀲𑁄 𑀮𑀻𑀦𑀢𑁆𑀢𑀁? 𑀬𑀸 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀬𑀢𑀸 𑀅𑀓𑀫𑁆𑀫𑀜𑁆𑀜𑀢𑀸 𑀑𑀮𑀻𑀬𑀦𑀸 𑀲𑀮𑁆𑀮𑀻𑀬𑀦𑀸 𑀮𑀻𑀦𑀁 𑀮𑀻𑀬𑀦𑀸 𑀮𑀻𑀬𑀺𑀢𑀢𑁆𑀢𑀁 𑀣𑀺𑀦𑀁 𑀣𑀺𑀬𑀦𑀸 𑀣𑀺𑀬𑀺𑀢𑀢𑁆𑀢𑀁 𑀘𑀺𑀢𑁆𑀢𑀲𑁆𑀲, 𑀇𑀤𑀁 𑀯𑀼𑀘𑁆𑀘𑀢𑀺 𑀘𑁂𑀢𑀲𑁄 𑀮𑀻𑀦𑀢𑁆𑀢’’𑀦𑁆𑀢𑀺 (𑀯𑀺𑀪. 𑁮𑁬𑁦).

𑀘𑁂𑀢𑀲𑁄 𑀅𑀯𑀽𑀧𑀲𑀫𑁄𑀢𑀺 𑀬𑀣𑀸 𑀦𑀸𑀫 𑀯𑀻𑀢𑀘𑁆𑀘𑀺𑀓𑁄𑀧𑀺 𑀅𑀗𑁆𑀕𑀸𑀭𑁄 𑀦𑁂𑀯 𑀢𑀸𑀯 𑀲𑀦𑁆𑀦𑀺𑀲𑀻𑀤𑀢𑀺 𑀧𑀢𑀸𑀧𑀁 𑀓𑀭𑁄𑀢𑀺𑀬𑁂𑀯, 𑀬𑀣𑀸 𑀘 𑀧𑀢𑁆𑀢𑀧𑀘𑀦𑀝𑁆𑀞𑀸𑀦𑁂 𑀦𑁂𑀯 𑀢𑀸𑀯 𑀲𑀦𑁆𑀦𑀺𑀲𑀻𑀤𑀢𑀺 𑀧𑀢𑀸𑀧𑀁 𑀓𑀭𑁄𑀢𑀺𑀬𑁂𑀯, 𑀏𑀯𑀁 𑀘𑀺𑀢𑁆𑀢𑀲𑁆𑀲 𑀅𑀯𑀽𑀧𑀲𑀦𑁆𑀢𑀸𑀓𑀸𑀭𑁄, 𑀅𑀢𑁆𑀣𑀢𑁄 𑀧𑀦𑁂𑀢𑀁 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀫𑁂𑀯 𑀳𑁄𑀢𑀺.

𑀯𑀺𑀘𑀺𑀓𑀺𑀘𑁆𑀙𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀬 𑀆𑀭𑀫𑁆𑀫𑀡𑀥𑀫𑁆𑀫𑀸. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀦𑀬𑁄𑀯. 𑀏𑀯𑀫𑁂𑀢𑁆𑀣 𑀓𑀸𑀫𑀘𑁆𑀙𑀦𑁆𑀤𑁄 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀇𑀫𑁂 𑀤𑁆𑀯𑁂 𑀥𑀫𑁆𑀫𑀸 𑀆𑀭𑀫𑁆𑀫𑀡𑁂𑀦 𑀓𑀣𑀺𑀢𑀸, 𑀩𑁆𑀬𑀸𑀧𑀸𑀤𑁄 𑀆𑀭𑀫𑁆𑀫𑀡𑁂𑀦 𑀘 𑀉𑀧𑀦𑀺𑀲𑁆𑀲𑀬𑁂𑀦 𑀘, 𑀲𑁂𑀲𑀸 𑀲𑀳𑀚𑀸𑀢𑁂𑀦 𑀘 𑀉𑀧𑀦𑀺𑀲𑁆𑀲𑀬𑁂𑀦 𑀘𑀸𑀢𑀺.

𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑀸𑀢𑀺 𑀲𑀢𑀺𑀬𑀸 𑀆𑀭𑀫𑁆𑀫𑀡𑀥𑀫𑁆𑀫𑀸 𑀲𑀢𑁆𑀢𑀢𑀺𑀁𑀲 𑀩𑁄𑀥𑀺𑀧𑀓𑁆𑀔𑀺𑀬𑀸 𑀘 𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀘. 𑀢𑀢𑁆𑀣 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄𑀢𑀺 𑀢𑀢𑁆𑀣 𑀉𑀧𑀸𑀬𑀫𑀦𑀲𑀺𑀓𑀸𑀭𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀓𑀭𑀡𑀁.

𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸𑀢𑀺𑀆𑀤𑀻𑀲𑀼 𑀓𑀼𑀲𑀮𑀸𑀢𑀺 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀸 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀸. 𑀅𑀓𑀼𑀲𑀮𑀸𑀢𑀺 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀸 𑀲𑀸𑀯𑀚𑁆𑀚𑀤𑀼𑀓𑁆𑀔𑀯𑀺𑀧𑀸𑀓𑀸. 𑀲𑀸𑀯𑀚𑁆𑀚𑀸𑀢𑀺 𑀅𑀓𑀼𑀲𑀮𑀸. 𑀅𑀦𑀯𑀚𑁆𑀚𑀸𑀢𑀺 𑀓𑀼𑀲𑀮𑀸. 𑀳𑀻𑀦𑀧𑀡𑀻𑀢𑀓𑀡𑁆𑀳𑀲𑀼𑀓𑁆𑀓𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀧𑁆𑀧𑀝𑀺𑀪𑀸𑀕𑀸𑀢𑀺 𑀓𑀡𑁆𑀳𑀲𑀼𑀓𑁆𑀓𑀸𑀬𑁂𑀯. 𑀓𑀡𑁆𑀳𑀸 𑀳𑀺 𑀓𑀡𑁆𑀳𑀯𑀺𑀧𑀸𑀓𑀤𑀸𑀦𑀢𑁄, 𑀲𑀼𑀓𑁆𑀓𑀸 𑀘 𑀲𑀼𑀓𑁆𑀓𑀯𑀺𑀧𑀸𑀓𑀤𑀸𑀦𑀢𑁄 𑀲𑀧𑁆𑀧𑀝𑀺𑀪𑀸𑀕𑀸 𑀦𑀸𑀫, 𑀲𑀤𑀺𑀲𑀯𑀺𑀧𑀸𑀓𑀓𑁄𑀝𑁆𑀞𑀸𑀲𑀸𑀢𑀺 𑀅𑀢𑁆𑀣𑁄. 𑀧𑀝𑀺𑀧𑀓𑁆𑀔𑀪𑀽𑀢𑀲𑁆𑀲 𑀯𑀸 𑀪𑀸𑀕𑀲𑁆𑀲 𑀅𑀢𑁆𑀣𑀺𑀢𑀸𑀬 𑀲𑀧𑁆𑀧𑀝𑀺𑀪𑀸𑀕𑀸. 𑀓𑀡𑁆𑀳𑀸𑀦𑀜𑁆𑀳𑀺 𑀲𑀼𑀓𑁆𑀓𑀸 𑀧𑀝𑀺𑀧𑀓𑁆𑀔𑀪𑀸𑀕𑀸, 𑀲𑀼𑀓𑁆𑀓𑀸𑀦𑀜𑁆𑀘 𑀓𑀡𑁆𑀳𑀸 𑀧𑀝𑀺𑀧𑀓𑁆𑀔𑀪𑀸𑀕𑀸𑀢𑀺 𑀏𑀯𑀫𑁆𑀧𑀺 𑀲𑀧𑁆𑀧𑀝𑀺𑀪𑀸𑀕𑀸. 𑀲𑀧𑁆𑀧𑀝𑀺𑀩𑀸𑀳𑀺𑀢𑀝𑁆𑀞𑁂𑀦 𑀯𑀸 𑀲𑀧𑁆𑀧𑀝𑀺𑀪𑀸𑀕𑀸. 𑀅𑀓𑀼𑀲𑀮𑀜𑁆𑀳𑀺 𑀓𑀼𑀲𑀮𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀁 𑀤𑁂𑀢𑀺, 𑀓𑀼𑀲𑀮𑀜𑁆𑀘 𑀅𑀓𑀼𑀲𑀮𑀁 𑀧𑀝𑀺𑀩𑀸𑀳𑀺𑀢𑁆𑀯𑀸𑀢𑀺 𑀏𑀯𑀫𑁆𑀧𑀺 𑀓𑀡𑁆𑀳𑀲𑀼𑀓𑁆𑀓𑀸 𑀲𑀧𑁆𑀧𑀝𑀺𑀪𑀸𑀕𑀸.

𑀆𑀭𑀫𑁆𑀪𑀥𑀸𑀢𑀽𑀢𑀺 𑀧𑀞𑀫𑀸𑀭𑀫𑁆𑀪𑀯𑀻𑀭𑀺𑀬𑀁. 𑀦𑀺𑀓𑁆𑀓𑀫𑀥𑀸𑀢𑀽𑀢𑀺 𑀓𑁄𑀲𑀚𑁆𑀚𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀢𑀢𑁄 𑀩𑀮𑀯𑀢𑀭𑀁. 𑀧𑀭𑀓𑁆𑀓𑀫𑀥𑀸𑀢𑀽𑀢𑀺 𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀦𑀢𑀸𑀬 𑀢𑀢𑁄𑀧𑀺 𑀩𑀮𑀯𑀢𑀭𑀦𑁆𑀢𑀺 𑀢𑀻𑀳𑀺𑀧𑀺 𑀧𑀤𑁂𑀳𑀺 𑀯𑀻𑀭𑀺𑀬𑀫𑁂𑀯 𑀓𑀣𑀺𑀢𑀁.

𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸𑀢𑀺 𑀧𑀻𑀢𑀺𑀬𑀸 𑀆𑀭𑀫𑁆𑀫𑀡𑀥𑀫𑁆𑀫𑀸. 𑀓𑀸𑀬𑀧𑀲𑁆𑀲𑀤𑁆𑀥𑀻𑀢𑀺 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁 𑀤𑀭𑀣𑀧𑀲𑁆𑀲𑀤𑁆𑀥𑀺. 𑀘𑀺𑀢𑁆𑀢𑀧𑀲𑁆𑀲𑀤𑁆𑀥𑀻𑀢𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀤𑀭𑀣𑀧𑀲𑁆𑀲𑀤𑁆𑀥𑀺. 𑀲𑀫𑀣𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀫𑀣𑁄𑀧𑀺 𑀲𑀫𑀣𑀦𑀺𑀫𑀺𑀢𑁆𑀢𑀁, 𑀆𑀭𑀫𑁆𑀫𑀡𑀫𑁆𑀧𑀺. 𑀅𑀩𑁆𑀬𑀕𑁆𑀕𑀦𑀺𑀫𑀺𑀢𑁆𑀢𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁.

𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀝𑁆𑀞𑀸𑀦𑀻𑀬𑀸𑀢𑀺 𑀉𑀧𑁂𑀓𑁆𑀔𑀸𑀬 𑀆𑀭𑀫𑁆𑀫𑀡𑀥𑀫𑁆𑀫𑀸, 𑀅𑀢𑁆𑀣𑀢𑁄 𑀧𑀦 𑀫𑀚𑁆𑀛𑀢𑁆𑀢𑀸𑀓𑀸𑀭𑁄 𑀉𑀧𑁂𑀓𑁆𑀔𑀸𑀝𑁆𑀞𑀸𑀦𑀻𑀬𑀸 𑀥𑀫𑁆𑀫𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀫𑁂𑀢𑁆𑀣 𑀲𑀢𑀺𑀥𑀫𑁆𑀫𑀯𑀺𑀘𑀬𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀸 𑀆𑀭𑀫𑁆𑀫𑀡𑁂𑀦 𑀓𑀣𑀺𑀢𑀸, 𑀲𑁂𑀲𑀸 𑀆𑀭𑀫𑁆𑀫𑀡𑁂𑀦𑀧𑀺 𑀉𑀧𑀦𑀺𑀲𑁆𑀲𑀬𑁂𑀦𑀧𑀺.

𑁩. 𑀲𑀻𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁪. 𑀢𑀢𑀺𑀬𑁂 𑀲𑀻𑀮𑀲𑀫𑁆𑀧𑀦𑁆𑀦𑀸𑀢𑀺 𑀏𑀢𑁆𑀣 𑀔𑀻𑀡𑀸𑀲𑀯𑀲𑁆𑀲 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀻𑀮𑀁 𑀓𑀣𑀺𑀢𑀁, 𑀢𑁂𑀦 𑀲𑀫𑁆𑀧𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀲𑀫𑀸𑀥𑀺𑀧𑀜𑁆𑀜𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀫𑀼𑀢𑁆𑀢𑀺 𑀧𑀦 𑀨𑀮𑀯𑀺𑀫𑀼𑀢𑁆𑀢𑀺𑀬𑁂𑀯. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. 𑀏𑀯𑀫𑁂𑀢𑁆𑀣 𑀲𑀻𑀮𑀸𑀤𑀬𑁄 𑀢𑀬𑁄 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸, 𑀯𑀺𑀫𑀼𑀢𑁆𑀢𑀺 𑀮𑁄𑀓𑀼𑀢𑁆𑀢𑀭𑀸𑀯, 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀮𑁄𑀓𑀺𑀬𑀫𑁂𑀯.

𑀤𑀲𑁆𑀲𑀦𑀫𑁆𑀧𑀸𑀳𑀦𑁆𑀢𑀺 𑀤𑀲𑁆𑀲𑀦𑀫𑁆𑀧𑀺 𑀅𑀳𑀁. 𑀢𑀁 𑀧𑀦𑁂𑀢𑀁 𑀤𑀲𑁆𑀲𑀦𑀁 𑁋 𑀘𑀓𑁆𑀔𑀼𑀤𑀲𑁆𑀲𑀦𑀁, 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀢𑁆𑀣 𑀧𑀲𑀦𑁆𑀦𑁂𑀳𑀺 𑀘𑀓𑁆𑀔𑀽𑀳𑀺 𑀅𑀭𑀺𑀬𑀸𑀦𑀁 𑀤𑀲𑁆𑀲𑀦𑀁 𑀑𑀮𑁄𑀓𑀦𑀁 𑀘𑀓𑁆𑀔𑀼𑀤𑀲𑁆𑀲𑀦𑀁 𑀦𑀸𑀫. 𑀅𑀭𑀺𑀬𑁂𑀳𑀺 𑀧𑀦 𑀤𑀺𑀝𑁆𑀞𑀲𑁆𑀲 𑀮𑀓𑁆𑀔𑀡𑀲𑁆𑀲 𑀤𑀲𑁆𑀲𑀦𑀁, 𑀧𑀝𑀺𑀯𑀺𑀤𑁆𑀥𑀲𑁆𑀲 𑀘 𑀧𑀝𑀺𑀯𑀺𑀚𑁆𑀛𑀦𑀁 𑀛𑀸𑀦𑁂𑀦 𑀯𑀸 𑀯𑀺𑀧𑀲𑁆𑀲𑀦𑀸𑀬 𑀯𑀸 𑀫𑀕𑁆𑀕𑀨𑀮𑁂𑀳𑀺 𑀯𑀸 𑀜𑀸𑀡𑀤𑀲𑁆𑀲𑀦𑀁 𑀦𑀸𑀫. 𑀇𑀫𑀲𑁆𑀫𑀺𑀁 𑀧𑀦𑁂𑀢𑁆𑀣 𑀘𑀓𑁆𑀔𑀼𑀤𑀲𑁆𑀲𑀦𑀁 𑀅𑀥𑀺𑀧𑁆𑀧𑁂𑀢𑀁. 𑀅𑀭𑀺𑀬𑀸𑀦𑀜𑁆𑀳𑀺 𑀧𑀲𑀦𑁆𑀦𑁂𑀳𑀺 𑀘𑀓𑁆𑀔𑀽𑀳𑀺 𑀑𑀮𑁄𑀓𑀦𑀫𑁆𑀧𑀺 𑀩𑀳𑀼𑀓𑀸𑀭𑀫𑁂𑀯. 𑀲𑀯𑀦𑀦𑁆𑀢𑀺 ‘‘𑀅𑀲𑀼𑀓𑁄 𑀦𑀸𑀫 𑀔𑀻𑀡𑀸𑀲𑀯𑁄 𑀅𑀲𑀼𑀓𑀲𑁆𑀫𑀺𑀁 𑀦𑀸𑀫 𑀭𑀝𑁆𑀞𑁂 𑀯𑀸 𑀚𑀦𑀧𑀤𑁂 𑀯𑀸 𑀕𑀸𑀫𑁂 𑀯𑀸 𑀦𑀺𑀕𑀫𑁂 𑀯𑀸 𑀯𑀺𑀳𑀸𑀭𑁂 𑀯𑀸 𑀮𑁂𑀡𑁂 𑀯𑀸 𑀯𑀲𑀢𑀻’’𑀢𑀺 𑀓𑀣𑁂𑀦𑁆𑀢𑀸𑀦𑀁 𑀲𑁄𑀢𑁂𑀦 𑀲𑀯𑀦𑀁, 𑀏𑀢𑀫𑁆𑀧𑀺 𑀩𑀳𑀼𑀓𑀸𑀭𑀫𑁂𑀯. 𑀉𑀧𑀲𑀗𑁆𑀓𑀫𑀦𑀦𑁆𑀢𑀺 ‘‘𑀤𑀸𑀦𑀁 𑀯𑀸 𑀤𑀲𑁆𑀲𑀸𑀫𑀺, 𑀧𑀜𑁆𑀳𑀁 𑀯𑀸 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀥𑀫𑁆𑀫𑀁 𑀯𑀸 𑀲𑁄𑀲𑁆𑀲𑀸𑀫𑀺, 𑀲𑀓𑁆𑀓𑀸𑀭𑀁 𑀯𑀸 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀭𑀽𑀧𑁂𑀦 𑀘𑀺𑀢𑁆𑀢𑁂𑀦 𑀅𑀭𑀺𑀬𑀸𑀦𑀁 𑀉𑀧𑀲𑀗𑁆𑀓𑀫𑀦𑀁. 𑀧𑀬𑀺𑀭𑀼𑀧𑀸𑀲𑀦𑀦𑁆𑀢𑀺 𑀧𑀜𑁆𑀳𑀸𑀧𑀬𑀺𑀭𑀼𑀧𑀸𑀲𑀦𑀁. 𑀅𑀭𑀺𑀬𑀸𑀦𑀁 𑀕𑀼𑀡𑁂 𑀲𑀼𑀢𑁆𑀯𑀸 𑀢𑁂 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀦𑀺𑀫𑀦𑁆𑀢𑁂𑀢𑁆𑀯𑀸 𑀤𑀸𑀦𑀁 𑀤𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂, 𑀓𑀼𑀲𑀮’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀜𑁆𑀳𑀧𑀼𑀘𑁆𑀙𑀦𑀦𑁆𑀢𑀺 𑀅𑀢𑁆𑀣𑁄.

𑀅𑀦𑀼𑀲𑁆𑀲𑀢𑀺𑀦𑁆𑀢𑀺 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑁂𑀲𑀼 𑀦𑀺𑀲𑀺𑀦𑁆𑀦𑀲𑁆𑀲 ‘‘𑀇𑀤𑀸𑀦𑀺 𑀅𑀭𑀺𑀬𑀸 𑀮𑁂𑀡𑀕𑀼𑀳𑀫𑀡𑁆𑀟𑀧𑀸𑀤𑀻𑀲𑀼 𑀛𑀸𑀦𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀲𑀼𑀔𑁂𑀳𑀺 𑀯𑀻𑀢𑀺𑀦𑀸𑀫𑁂𑀦𑁆𑀢𑀻’’𑀢𑀺 𑀅𑀦𑀼𑀲𑁆𑀲𑀭𑀡𑀁. 𑀬𑁄 𑀯𑀸 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀑𑀯𑀸𑀤𑁄 𑀮𑀤𑁆𑀥𑁄 𑀳𑁄𑀢𑀺, 𑀢𑀁 𑀆𑀯𑀚𑁆𑀚𑀺𑀢𑁆𑀯𑀸 ‘‘𑀇𑀫𑀲𑁆𑀫𑀺𑀁 𑀞𑀸𑀦𑁂 𑀲𑀻𑀮𑀁 𑀓𑀣𑀺𑀢𑀁, 𑀇𑀫𑀲𑁆𑀫𑀺𑀁 𑀲𑀫𑀸𑀥𑀺, 𑀇𑀫𑀲𑁆𑀫𑀺𑀁 𑀯𑀺𑀧𑀲𑁆𑀲𑀦𑀸, 𑀇𑀫𑀲𑁆𑀫𑀺𑀁 𑀫𑀕𑁆𑀕𑁄, 𑀇𑀫𑀲𑁆𑀫𑀺𑀁 𑀨𑀮’’𑀦𑁆𑀢𑀺 𑀏𑀯𑀁 𑀅𑀦𑀼𑀲𑁆𑀲𑀭𑀡𑀁. 𑀅𑀦𑀼𑀧𑀩𑁆𑀩𑀚𑁆𑀚𑀦𑁆𑀢𑀺 𑀅𑀭𑀺𑀬𑁂𑀲𑀼 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀖𑀭𑀸 𑀦𑀺𑀓𑁆𑀔𑀫𑁆𑀫 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁. 𑀅𑀭𑀺𑀬𑀸𑀦𑀜𑁆𑀳𑀺 𑀲𑀦𑁆𑀢𑀺𑀓𑁂 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀢𑁂𑀲𑀁𑀬𑁂𑀯 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀢𑁂𑀲𑀁𑀬𑁂𑀯 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀁 𑀧𑀘𑁆𑀘𑀸𑀲𑀻𑀲𑀫𑀸𑀦𑀲𑁆𑀲 𑀘𑀭𑀢𑁄𑀧𑀺 𑀧𑀩𑁆𑀩𑀚𑁆𑀚𑀸 𑀅𑀦𑀼𑀧𑀩𑁆𑀩𑀚𑁆𑀚𑀸 𑀦𑀸𑀫. 𑀅𑀭𑀺𑀬𑁂𑀲𑀼 𑀧𑀲𑀸𑀤𑁂𑀦 𑀅𑀜𑁆𑀜𑀢𑁆𑀣 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀺𑀬𑀸𑀦𑀁 𑀲𑀦𑁆𑀢𑀺𑀓𑁂 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀁 𑀧𑀘𑁆𑀘𑀸𑀲𑀻𑀲𑀫𑀸𑀦𑀲𑁆𑀲 𑀘𑀭𑀢𑁄 𑀧𑀩𑁆𑀩𑀚𑁆𑀚𑀸𑀧𑀺 𑀅𑀦𑀼𑀧𑀩𑁆𑀩𑀚𑁆𑀚𑀸 𑀦𑀸𑀫. 𑀅𑀜𑁆𑀜𑁂𑀲𑀼 𑀧𑀦 𑀧𑀲𑀸𑀤𑁂𑀦 𑀅𑀜𑁆𑀜𑁂𑀲𑀁𑀬𑁂𑀯 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀜𑁆𑀜𑁂𑀲𑀁𑀬𑁂𑀯 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀁 𑀧𑀘𑁆𑀘𑀸𑀲𑀻𑀲𑀫𑀸𑀦𑀲𑁆𑀲 𑀘𑀭𑀢𑁄 𑀧𑀩𑁆𑀩𑀚𑁆𑀚𑀸 𑀅𑀦𑀼𑀧𑀩𑁆𑀩𑀚𑁆𑀚𑀸 𑀦𑀸𑀫 𑀦 𑀳𑁄𑀢𑀺.

𑀏𑀯𑀁 𑀧𑀩𑁆𑀩𑀚𑀺𑀢𑁂𑀲𑀼 𑀧𑀦 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑁆𑀲 𑀢𑀸𑀯 𑀅𑀦𑀼𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑀸 𑀲𑀢𑀲𑀳𑀲𑁆𑀲𑀫𑀢𑁆𑀢𑀸 𑀅𑀳𑁂𑀲𑀼𑀁, 𑀢𑀣𑀸 𑀣𑁂𑀭𑀲𑁆𑀲𑁂𑀯 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀘 𑀘𑀦𑁆𑀤𑀕𑀼𑀢𑁆𑀢𑀢𑁆𑀣𑁂𑀭𑀲𑁆𑀲, 𑀢𑀲𑁆𑀲𑀸𑀧𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀲𑀽𑀭𑀺𑀬𑀕𑀼𑀢𑁆𑀢𑀢𑁆𑀣𑁂𑀭𑀲𑁆𑀲, 𑀢𑀲𑁆𑀲𑀸𑀧𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀅𑀲𑁆𑀲𑀕𑀼𑀢𑁆𑀢𑀢𑁆𑀣𑁂𑀭𑀲𑁆𑀲, 𑀢𑀲𑁆𑀲𑀸𑀧𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀲𑁆𑀲 𑀬𑁄𑀦𑀓𑀥𑀫𑁆𑀫𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲, 𑀢𑀲𑁆𑀲 𑀧𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀅𑀲𑁄𑀓𑀭𑀜𑁆𑀜𑁄 𑀓𑀦𑀺𑀝𑁆𑀞𑀪𑀸𑀢𑀸 𑀢𑀺𑀲𑁆𑀲𑀢𑁆𑀣𑁂𑀭𑁄 𑀦𑀸𑀫 𑀅𑀳𑁄𑀲𑀺, 𑀢𑀲𑁆𑀲 𑀅𑀦𑀼𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑀸 𑀅𑀟𑁆𑀠𑀢𑁂𑀬𑁆𑀬𑀓𑁄𑀝𑀺𑀲𑀗𑁆𑀔𑀸 𑀅𑀳𑁂𑀲𑀼𑀁. 𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲 𑀅𑀦𑀼𑀧𑀩𑁆𑀩𑀚𑀺𑀢𑀸𑀦𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑁄 𑀦𑀢𑁆𑀣𑀺. 𑀬𑀸𑀯𑀚𑁆𑀚𑀤𑀺𑀯𑀲𑀸 𑀮𑀗𑁆𑀓𑀸𑀤𑀻𑀧𑁂 𑀲𑀢𑁆𑀣𑀭𑀺 𑀧𑀲𑀸𑀤𑁂𑀦 𑀧𑀩𑁆𑀩𑀚𑀦𑁆𑀢𑀸 𑀫𑀳𑀺𑀦𑁆𑀤𑀢𑁆𑀣𑁂𑀭𑀲𑁆𑀲𑁂𑀯 𑀧𑀩𑁆𑀩𑀚𑁆𑀚𑀁 𑀅𑀦𑀼𑀧𑀩𑁆𑀩𑀚𑀦𑁆𑀢𑀺 𑀦𑀸𑀫.

𑀢𑀁 𑀥𑀫𑁆𑀫𑀦𑁆𑀢𑀺 𑀢𑀁 𑀢𑁂𑀲𑀁 𑀑𑀯𑀸𑀤𑀸𑀦𑀼𑀲𑀸𑀲𑀦𑀻𑀥𑀫𑁆𑀫𑀁. 𑀅𑀦𑀼𑀲𑁆𑀲𑀭𑀢𑀻𑀢𑀺 𑀲𑀭𑀢𑀺. 𑀅𑀦𑀼𑀯𑀺𑀢𑀓𑁆𑀓𑁂𑀢𑀻𑀢𑀺 𑀯𑀺𑀢𑀓𑁆𑀓𑀸𑀳𑀢𑀁 𑀓𑀭𑁄𑀢𑀺. 𑀆𑀭𑀤𑁆𑀥𑁄 𑀳𑁄𑀢𑀻𑀢𑀺 𑀧𑀭𑀺𑀧𑀼𑀡𑁆𑀡𑁄 𑀳𑁄𑀢𑀺. 𑀧𑀯𑀺𑀘𑀺𑀦𑀢𑀻𑀢𑀺𑀆𑀤𑀺 𑀲𑀩𑁆𑀩𑀁 𑀢𑀢𑁆𑀣 𑀜𑀸𑀡𑀘𑀸𑀭𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀅𑀣 𑀯𑀸 𑀧𑀯𑀺𑀘𑀺𑀦𑀢𑀻𑀢𑀺 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀮𑀓𑁆𑀔𑀡𑀁 𑀯𑀺𑀘𑀺𑀦𑀢𑀺. 𑀧𑀯𑀺𑀘𑀭𑀢𑀻𑀢𑀺 𑀢𑀢𑁆𑀣 𑀜𑀸𑀡𑀁 𑀘𑀭𑀸𑀧𑁂𑀢𑀺. 𑀧𑀭𑀺𑀯𑀻𑀫𑀁𑀲𑀫𑀸𑀧𑀚𑁆𑀚𑀢𑀻𑀢𑀺 𑀯𑀻𑀫𑀁𑀲𑀦𑀁 𑀑𑀮𑁄𑀓𑀦𑀁 𑀕𑀯𑁂𑀲𑀦𑀁 𑀆𑀧𑀚𑁆𑀚𑀢𑀺.

𑀲𑀢𑁆𑀢 𑀨𑀮𑀸 𑀲𑀢𑁆𑀢𑀸𑀦𑀺𑀲𑀁𑀲𑀸𑀢𑀺 𑀉𑀪𑀬𑀫𑁆𑀧𑁂𑀢𑀁 𑀅𑀢𑁆𑀣𑀢𑁄 𑀏𑀓𑀁. 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀝𑀺𑀓𑀘𑁆𑀘 𑀅𑀜𑁆𑀜𑀁 𑀆𑀭𑀸𑀥𑁂𑀢𑀻𑀢𑀺 𑀅𑀭𑀳𑀢𑁆𑀢𑀁 𑀆𑀭𑀸𑀥𑁂𑀦𑁆𑀢𑁄 𑀇𑀫𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀆𑀭𑀸𑀥𑁂𑀢𑀺, 𑀢𑀜𑁆𑀘 𑀔𑁄 𑀧𑀝𑀺𑀓𑀘𑁆𑀘, 𑀅𑀲𑀫𑁆𑀧𑀢𑁆𑀢𑁂𑀬𑁂𑀯 𑀫𑀭𑀡𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀅𑀣 𑀫𑀭𑀡𑀓𑀸𑀮𑁂𑀢𑀺 𑀅𑀣 𑀫𑀭𑀡𑀲𑁆𑀲 𑀆𑀲𑀦𑁆𑀦𑀓𑀸𑀮𑁂.

𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀬𑁄 𑀆𑀬𑀼𑀯𑁂𑀫𑀚𑁆𑀛𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀢𑀺, 𑀲𑁄 𑀢𑀺𑀯𑀺𑀥𑁄 𑀳𑁄𑀢𑀺. 𑀓𑀧𑁆𑀧𑀲𑀳𑀲𑁆𑀲𑀸𑀬𑀼𑀓𑁂𑀲𑀼 𑀢𑀸𑀯 𑀅𑀯𑀺𑀳𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀏𑀓𑁄 𑀦𑀺𑀩𑁆𑀩𑀢𑁆𑀢𑀤𑀺𑀯𑀲𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀦𑁄 𑀘𑁂 𑀦𑀺𑀩𑁆𑀩𑀢𑁆𑀢𑀤𑀺𑀯𑀲𑁂 𑀧𑀸𑀧𑀼𑀡𑀸𑀢𑀺, 𑀧𑀞𑀫𑀲𑁆𑀲 𑀧𑀦 𑀓𑀧𑁆𑀧𑀲𑀢𑀲𑁆𑀲 𑀫𑀢𑁆𑀣𑀓𑁂 𑀧𑀸𑀧𑀼𑀡𑀸𑀢𑀺. 𑀅𑀬𑀫𑁂𑀓𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻. 𑀅𑀧𑀭𑁄 𑀏𑀯𑀁 𑀅𑀲𑀓𑁆𑀓𑁄𑀦𑁆𑀢𑁄 𑀤𑁆𑀯𑀺𑀦𑁆𑀦𑀁 𑀓𑀧𑁆𑀧𑀲𑀢𑀸𑀦𑀁 𑀫𑀢𑁆𑀣𑀓𑁂 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀤𑀼𑀢𑀺𑀬𑁄. 𑀅𑀧𑀭𑁄 𑀏𑀯𑀫𑁆𑀧𑀺 𑀅𑀲𑀓𑁆𑀓𑁄𑀦𑁆𑀢𑁄 𑀘𑀢𑀼𑀦𑁆𑀦𑀁 𑀓𑀧𑁆𑀧𑀲𑀢𑀸𑀦𑀁 𑀫𑀢𑁆𑀣𑀓𑁂 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀢𑀢𑀺𑀬𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻.

𑀧𑀜𑁆𑀘𑀫𑀁 𑀧𑀦 𑀓𑀧𑁆𑀧𑀲𑀢𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀦𑀸𑀫 𑀳𑁄𑀢𑀺. 𑀅𑀢𑀧𑁆𑀧𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀬𑀢𑁆𑀣 𑀓𑀢𑁆𑀣𑀘𑀺 𑀉𑀧𑁆𑀧𑀦𑁆𑀦𑁄 𑀧𑀦 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀦𑀸𑀫, 𑀅𑀲𑀗𑁆𑀔𑀸𑀭𑁂𑀦 𑀅𑀧𑁆𑀧𑀬𑁄𑀕𑁂𑀦 𑀧𑀢𑁆𑀢𑁄 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀦𑀸𑀫. 𑀅𑀯𑀺𑀳𑀸𑀤𑀻𑀲𑀼𑀧𑀺 𑀦𑀺𑀩𑁆𑀩𑀢𑁆𑀢𑁄 𑀢𑀢𑁆𑀣 𑀬𑀸𑀯𑀢𑀸𑀬𑀼𑀓𑀁 𑀞𑀢𑁆𑀯𑀸 𑀉𑀧𑀭𑀽𑀧𑀭𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀓𑀦𑀺𑀝𑁆𑀞𑀁 𑀧𑀢𑁆𑀢𑁄 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀦𑀸𑀫.

𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀅𑀝𑁆𑀞𑀘𑀢𑁆𑀢𑀸𑀭𑀻𑀲 𑀅𑀦𑀸𑀕𑀸𑀫𑀺𑀦𑁄 𑀓𑀣𑁂𑀢𑀩𑁆𑀩𑀸. 𑀅𑀯𑀺𑀳𑁂𑀲𑀼 𑀳𑀺 𑀢𑀬𑁄 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻, 𑀏𑀓𑁄 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻, 𑀏𑀓𑁄 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻𑀢𑀺 𑀧𑀜𑁆𑀘 𑀳𑁄𑀦𑁆𑀢𑀺. 𑀢𑁂 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀧𑀜𑁆𑀘, 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄 𑀧𑀜𑁆𑀘𑀸𑀢𑀺 𑀤𑀲 𑀳𑁄𑀦𑁆𑀢𑀺, 𑀢𑀣𑀸 𑀅𑀢𑀧𑁆𑀧𑀸𑀤𑀻𑀲𑀼. 𑀅𑀓𑀦𑀺𑀝𑁆𑀞𑁂𑀲𑀼 𑀧𑀦 𑀉𑀤𑁆𑀥𑀁𑀲𑁄𑀢𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀢𑀢𑁆𑀣 𑀘𑀢𑁆𑀢𑀸𑀭𑁄 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻, 𑀘𑀢𑁆𑀢𑀸𑀭𑁄 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀅𑀝𑁆𑀞𑀸𑀢𑀺 𑀏𑀯𑀁 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀳𑁄𑀦𑁆𑀢𑀺. 𑀢𑁂𑀲𑀁 𑀉𑀤𑁆𑀥𑀁𑀲𑁄𑀢𑁄 𑀅𑀓𑀦𑀺𑀝𑁆𑀞𑀕𑀸𑀫𑀻 𑀲𑀩𑁆𑀩𑀚𑁂𑀝𑁆𑀞𑁄 𑀘𑁂𑀯 𑀳𑁄𑀢𑀺 𑀲𑀩𑁆𑀩𑀓𑀦𑀺𑀝𑁆𑀞𑁄 𑀘. 𑀓𑀣𑀁? 𑀲𑁄 𑀳𑀺 𑀲𑁄𑀴𑀲𑀓𑀧𑁆𑀧𑀲𑀳𑀲𑁆𑀲𑀸𑀬𑀼𑀓𑀢𑁆𑀢𑀸 𑀆𑀬𑀼𑀦𑀸 𑀲𑀩𑁆𑀩𑁂𑀲𑀁 𑀚𑁂𑀝𑁆𑀞𑁄, 𑀲𑀩𑁆𑀩𑀧𑀘𑁆𑀙𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻𑀢𑀺 𑀲𑀩𑁆𑀩𑁂𑀲𑀁 𑀓𑀦𑀺𑀝𑁆𑀞𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸 𑀦𑀸𑀦𑀸𑀮𑀓𑁆𑀔𑀡𑀸 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸 𑀩𑁄𑀚𑁆𑀛𑀗𑁆𑀕𑀸 𑀓𑀣𑀺𑀢𑀸.

𑁪. 𑀯𑀢𑁆𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁫. 𑀘𑀢𑀼𑀢𑁆𑀣𑁂 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀇𑀢𑀺 𑀘𑁂 𑀫𑁂 𑀳𑁄𑀢𑀻𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺 𑀏𑀯𑀁 𑀘𑁂 𑀫𑀬𑁆𑀳𑀁 𑀳𑁄𑀢𑀺. 𑀅𑀧𑁆𑀧𑀫𑀸𑀡𑁄𑀢𑀺 𑀫𑁂 𑀳𑁄𑀢𑀻𑀢𑀺 𑀅𑀧𑁆𑀧𑀫𑀸𑀡𑁄𑀢𑀺 𑀏𑀯𑀁 𑀫𑁂 𑀳𑁄𑀢𑀺. 𑀲𑀼𑀲𑀫𑀸𑀭𑀤𑁆𑀥𑁄𑀢𑀺 𑀲𑀼𑀧𑀭𑀺𑀧𑀼𑀡𑁆𑀡𑁄. 𑀢𑀺𑀝𑁆𑀞𑀢𑀻𑀢𑀺 𑀏𑀢𑁆𑀣 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀺𑀝𑁆𑀞𑀢𑀺 𑁋 𑀉𑀧𑁆𑀧𑀸𑀤𑀁 𑀅𑀦𑀸𑀯𑀚𑁆𑀚𑀺𑀢𑀢𑁆𑀢𑀸 𑀅𑀦𑀼𑀧𑁆𑀧𑀸𑀤𑀁 𑀆𑀯𑀚𑁆𑀚𑀺𑀢𑀢𑁆𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀺𑀝𑁆𑀞𑀢𑀺, 𑀧𑀯𑀢𑁆𑀢𑀁, 𑀅𑀧𑁆𑀧𑀯𑀢𑁆𑀢𑀁, 𑀦𑀺𑀫𑀺𑀢𑁆𑀢𑀁, 𑀅𑀦𑀺𑀫𑀺𑀢𑁆𑀢𑀁 𑀲𑀗𑁆𑀔𑀸𑀭𑁂 𑀅𑀦𑀸𑀯𑀚𑁆𑀚𑀺𑀢𑀢𑁆𑀢𑀸, 𑀯𑀺𑀲𑀗𑁆𑀔𑀸𑀭𑀁 𑀆𑀯𑀚𑁆𑀚𑀺𑀢𑀢𑁆𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀢𑀺𑀝𑁆𑀞𑀢𑀻𑀢𑀺. 𑀇𑀫𑁂𑀳𑀺 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀢𑀺𑀝𑁆𑀞𑀢𑀻𑀢𑀺 𑀣𑁂𑀭𑁄 𑀚𑀸𑀦𑀸𑀢𑀺, 𑀯𑀼𑀢𑁆𑀢𑀸𑀓𑀸𑀭𑀯𑀺𑀧𑀭𑀻𑀢𑁂𑀳𑁂𑀯 𑀅𑀝𑁆𑀞𑀳𑀸𑀓𑀸𑀭𑁂𑀳𑀺 𑀘𑀯𑀦𑁆𑀢𑀁 𑀘𑀯𑀢𑀻𑀢𑀺 𑀧𑀚𑀸𑀦𑀸𑀢𑀺. 𑀲𑁂𑀲𑀩𑁄𑀚𑁆𑀛𑀗𑁆𑀕𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀣𑁂𑀭𑀲𑁆𑀲 𑀨𑀮𑀩𑁄𑀚𑁆𑀛𑀗𑁆𑀕𑀸 𑀓𑀣𑀺𑀢𑀸. 𑀬𑀤𑀸 𑀳𑀺 𑀣𑁂𑀭𑁄 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀲𑀻𑀲𑀁 𑀓𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀢𑀤𑀸 𑀇𑀢𑀭𑁂 𑀙 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀺. 𑀬𑀤𑀸 𑀥𑀫𑁆𑀫𑀯𑀺𑀘𑀬𑀸𑀤𑀻𑀲𑀼 𑀅𑀜𑁆𑀜𑀢𑀭𑀁, 𑀢𑀤𑀸𑀧𑀺 𑀲𑁂𑀲𑀸 𑀢𑀤𑀦𑁆𑀯𑀬𑀸 𑀳𑁄𑀦𑁆𑀢𑀻𑀢𑀺 𑀏𑀯𑀁 𑀨𑀮𑀲𑀫𑀸𑀧𑀢𑁆𑀢𑀺𑀬𑀁 𑀅𑀢𑁆𑀢𑀦𑁄 𑀘𑀺𑀡𑁆𑀡𑀯𑀲𑀺𑀢𑀁 𑀤𑀲𑁆𑀲𑁂𑀦𑁆𑀢𑁄 𑀣𑁂𑀭𑁄 𑀇𑀫𑀁 𑀲𑀼𑀢𑁆𑀢𑀁 𑀓𑀣𑁂𑀲𑀻𑀢𑀺.

𑁫. 𑀪𑀺𑀓𑁆𑀔𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁬. 𑀧𑀜𑁆𑀘𑀫𑁂 𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀩𑀼𑀚𑁆𑀛𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀺𑀁 𑀩𑀼𑀚𑁆𑀛𑀦𑀢𑁆𑀣𑀸𑀬? 𑀫𑀕𑁆𑀕𑁂𑀦 𑀅𑀲𑀗𑁆𑀔𑀢𑀁 𑀦𑀺𑀩𑁆𑀩𑀸𑀦𑀁, 𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀓𑀢𑀓𑀺𑀘𑁆𑀘𑀢𑀁, 𑀫𑀕𑁆𑀕𑁂𑀦 𑀯𑀸 𑀓𑀺𑀮𑁂𑀲𑀦𑀺𑀤𑁆𑀤𑀸𑀢𑁄 𑀧𑀩𑀼𑀚𑁆𑀛𑀦𑀢𑁆𑀣𑀸𑀬, 𑀨𑀮𑁂𑀦 𑀧𑀩𑀼𑀚𑁆𑀛𑀦𑀪𑀸𑀯𑀢𑁆𑀣𑀸𑀬𑀸𑀢𑀺𑀧𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦𑁂𑀯𑁂𑀢𑁆𑀣 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸 𑀓𑀺𑀮𑁂𑀲𑀧𑀳𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀸𑀢𑀺 𑀲𑀩𑁆𑀩𑀁 𑀤𑀲𑁆𑀲𑀺𑀢𑀁.

𑁬-𑁭. 𑀓𑀼𑀡𑁆𑀟𑀮𑀺𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁮𑁭-𑁧𑁮𑁮. 𑀙𑀝𑁆𑀞𑁂 𑀆𑀭𑀸𑀫𑀦𑀺𑀲𑁆𑀲𑀬𑀻𑀢𑀺 𑀆𑀭𑀸𑀫𑀁 𑀦𑀺𑀲𑁆𑀲𑀸𑀬 𑀯𑀲𑀦𑀪𑀸𑀯𑁂𑀦 𑀆𑀭𑀸𑀫𑀦𑀺𑀲𑁆𑀲𑀬𑀻. 𑀧𑀭𑀺𑀲𑀸𑀯𑀘𑀭𑁄𑀢𑀺 𑀧𑀭𑀺𑀲𑀸𑀬 𑀅𑀯𑀘𑀭𑁄. 𑀧𑀭𑀺𑀲𑀁 𑀦𑀸𑀫 𑀩𑀸𑀮𑀸𑀧𑀺, 𑀧𑀡𑁆𑀟𑀺𑀢𑀸𑀧𑀺 𑀑𑀲𑀭𑀦𑁆𑀢𑀺, 𑀬𑁄 𑀧𑀦 𑀧𑀭𑀧𑁆𑀧𑀯𑀸𑀤𑀁 𑀫𑀤𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀸𑀤𑀁 𑀤𑀻𑀧𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀅𑀬𑀁 𑀧𑀭𑀺𑀲𑀸𑀯𑀘𑀭𑁄 𑀦𑀸𑀫. 𑀆𑀭𑀸𑀫𑁂𑀦 𑀆𑀭𑀸𑀫𑀦𑁆𑀢𑀺 𑀆𑀭𑀸𑀫𑁂𑀦𑁂𑀯 𑀆𑀭𑀸𑀫𑀁 𑀅𑀦𑀼𑀘𑀗𑁆𑀓𑀫𑀸𑀫𑀺, 𑀦 𑀩𑀸𑀳𑀺𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀉𑀬𑁆𑀬𑀸𑀦𑁂𑀦 𑀉𑀬𑁆𑀬𑀸𑀦𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀅𑀜𑁆𑀜𑁂𑀦 𑀯𑀸 𑀆𑀭𑀸𑀫𑁂𑀦 𑀧𑀯𑀺𑀲𑀺𑀢𑁆𑀯𑀸 𑀅𑀜𑁆𑀜𑀁 𑀆𑀭𑀸𑀫𑀁, 𑀅𑀜𑁆𑀜𑁂𑀦 𑀉𑀬𑁆𑀬𑀸𑀦𑁂𑀦 𑀅𑀜𑁆𑀜𑀁 𑀉𑀬𑁆𑀬𑀸𑀦𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀇𑀢𑀺𑀯𑀸𑀤𑀧𑁆𑀧𑀫𑁄𑀓𑁆𑀔𑀸𑀦𑀺𑀲𑀁𑀲𑀦𑁆𑀢𑀺 ‘‘𑀏𑀯𑀁 𑀧𑀼𑀘𑁆𑀙𑀸 𑀳𑁄𑀢𑀺, 𑀏𑀯𑀁 𑀯𑀺𑀲𑁆𑀲𑀚𑁆𑀚𑀦𑀁, 𑀏𑀯𑀁 𑀕𑀳𑀡𑀁, 𑀏𑀯𑀁 𑀦𑀺𑀩𑁆𑀩𑁂𑀞𑀦’’𑀦𑁆𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀇𑀢𑀺𑀯𑀸𑀤𑁄 𑀳𑁄𑀢𑀺 𑀇𑀢𑀺𑀯𑀸𑀤𑀧𑁆𑀧𑀫𑁄𑀓𑁆𑀔𑁄𑀢𑀺 𑀏𑀢𑀁 𑀆𑀦𑀺𑀲𑀁𑀲𑀁. 𑀉𑀧𑀸𑀭𑀫𑁆𑀪𑀸𑀦𑀺𑀲𑀁𑀲𑀦𑁆𑀢𑀺 ‘‘𑀅𑀬𑀁 𑀧𑀼𑀘𑁆𑀙𑀸𑀬 𑀤𑁄𑀲𑁄, 𑀅𑀬𑀁 𑀯𑀺𑀲𑁆𑀲𑀚𑁆𑀚𑀦𑁂’’𑀢𑀺 𑀏𑀯𑀁 𑀯𑀸𑀤𑀤𑁄𑀲𑀸𑀦𑀺𑀲𑀁𑀲𑀁.

𑀓𑀣𑀁 𑀪𑀸𑀯𑀺𑀢𑁄 𑀘, 𑀓𑀼𑀡𑁆𑀟𑀮𑀺𑀬, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄𑀢𑀺 𑀲𑀢𑁆𑀣𑀸 ‘‘𑀏𑀢𑁆𑀢𑀓𑀁 𑀞𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑁂𑀦 𑀧𑀼𑀘𑁆𑀙𑀺𑀢𑀁, 𑀇𑀤𑀸𑀦𑀺 𑀧𑀼𑀘𑁆𑀙𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺 𑀜𑀢𑁆𑀯𑀸 ‘‘𑀦 𑀢𑀸𑀯 𑀅𑀬𑀁 𑀤𑁂𑀲𑀦𑀸 𑀬𑀣𑀸𑀦𑀼𑀲𑀦𑁆𑀥𑀺𑀁 𑀕𑀢𑀸. 𑀇𑀤𑀸𑀦𑀺 𑀦𑀁 𑀬𑀣𑀸𑀦𑀼𑀲𑀦𑁆𑀥𑀺𑀁 𑀧𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀲𑀬𑀫𑁂𑀯 𑀧𑀼𑀘𑁆𑀙𑀦𑁆𑀢𑁄 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀢𑁆𑀣 𑀫𑀦𑀸𑀧𑀁 𑀦𑀸𑀪𑀺𑀚𑁆𑀛𑀢𑀻𑀢𑀺 𑀇𑀝𑁆𑀞𑀸𑀭𑀫𑁆𑀫𑀡𑀁 𑀦𑀸𑀪𑀺𑀚𑁆𑀛𑀸𑀬𑀢𑀺. 𑀦𑀸𑀪𑀺𑀳𑀁𑀲𑀢𑀻𑀢𑀺 𑀦 𑀲𑀸𑀫𑀺𑀲𑀸𑀬 𑀢𑀼𑀝𑁆𑀞𑀺𑀬𑀸 𑀅𑀪𑀺𑀳𑀁𑀲𑀢𑀺. 𑀢𑀲𑁆𑀲 𑀞𑀺𑀢𑁄 𑀘 𑀓𑀸𑀬𑁄 𑀳𑁄𑀢𑀺, 𑀞𑀺𑀢𑀁 𑀘𑀺𑀢𑁆𑀢𑀁 𑀅𑀚𑁆𑀛𑀢𑁆𑀢𑀦𑁆𑀢𑀺 𑀢𑀲𑁆𑀲 𑀦𑀸𑀫𑀓𑀸𑀬𑁄 𑀘 𑀘𑀺𑀢𑁆𑀢𑀜𑁆𑀘 𑀕𑁄𑀘𑀭𑀚𑁆𑀛𑀢𑁆𑀢𑁂 𑀞𑀺𑀢𑀁 𑀳𑁄𑀢𑀺. 𑀲𑀼𑀲𑀡𑁆𑀞𑀺𑀢𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦 𑀲𑀼𑀝𑁆𑀞𑀼 𑀲𑀡𑁆𑀞𑀺𑀢𑀁. 𑀲𑀼𑀯𑀺𑀫𑀼𑀢𑁆𑀢𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀯𑀺𑀫𑀼𑀢𑁆𑀢𑀺𑀬𑀸 𑀲𑀼𑀯𑀺𑀫𑀼𑀢𑁆𑀢𑀁. 𑀅𑀫𑀦𑀸𑀧𑀦𑁆𑀢𑀺 𑀅𑀦𑀺𑀝𑁆𑀞𑀸𑀭𑀫𑁆𑀫𑀡𑀁. 𑀦 𑀫𑀗𑁆𑀓𑀼 𑀳𑁄𑀢𑀻𑀢𑀺 𑀢𑀲𑁆𑀫𑀺𑀁 𑀦 𑀫𑀗𑁆𑀓𑀼 𑀳𑁄𑀢𑀺. 𑀅𑀧𑁆𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑁄𑀢𑀺 𑀓𑀺𑀮𑁂𑀲𑀯𑀲𑁂𑀦 𑀅𑀝𑁆𑀞𑀺𑀢𑀘𑀺𑀢𑁆𑀢𑁄. 𑀅𑀤𑀻𑀦𑀫𑀸𑀦𑀲𑁄𑀢𑀺 𑀤𑁄𑀫𑀦𑀲𑁆𑀲𑀯𑀲𑁂𑀦 𑀅𑀤𑀻𑀦𑀘𑀺𑀢𑁆𑀢𑁄. 𑀅𑀩𑁆𑀬𑀸𑀧𑀦𑁆𑀦𑀘𑁂𑀢𑀲𑁄𑀢𑀺 𑀤𑁄𑀲𑀯𑀲𑁂𑀦 𑀅𑀧𑀽𑀢𑀺𑀘𑀺𑀢𑁆𑀢𑁄.

𑀏𑀯𑀁 𑀪𑀸𑀯𑀺𑀢𑁄 𑀔𑁄, 𑀓𑀼𑀡𑁆𑀟𑀮𑀺𑀬, 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀏𑀯𑀁 𑀩𑀳𑀼𑀮𑀻𑀓𑀢𑁄 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀧𑀭𑀺𑀧𑀽𑀭𑁂𑀢𑀻𑀢𑀺 𑀏𑀢𑁆𑀣 𑀏𑀯𑀁 𑀲𑀼𑀘𑀭𑀺𑀢𑀧𑀽𑀭𑀡𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀇𑀫𑁂𑀲𑀼 𑀢𑀸𑀯 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀅𑀝𑁆𑀞𑀸𑀭𑀲 𑀤𑀼𑀘𑁆𑀘𑀭𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀓𑀣𑀁? 𑀘𑀓𑁆𑀔𑀼𑀤𑁆𑀯𑀸𑀭𑁂 𑀢𑀸𑀯 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀸𑀦𑀺 𑀅𑀘𑁄𑀧𑁂𑀢𑁆𑀯𑀸 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀮𑁄𑀪𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀫𑀦𑁄𑀤𑀼𑀘𑁆𑀘𑀭𑀺𑀢𑀁 𑀳𑁄𑀢𑀺. 𑀮𑁄𑀪𑀲𑀳𑀕𑀢𑁂𑀦 𑀘𑀺𑀢𑁆𑀢𑁂𑀦 ‘‘𑀅𑀳𑁄 𑀯𑀢𑀺𑀤𑀁 𑀇𑀝𑁆𑀞𑀁 𑀓𑀦𑁆𑀢𑀁 𑀫𑀦𑀸𑀧’’𑀦𑁆𑀢𑀺 𑀪𑀡𑀦𑁆𑀢𑀲𑁆𑀲 𑀯𑀘𑀻𑀤𑀼𑀘𑁆𑀘𑀭𑀺𑀢𑀁, 𑀢𑀤𑁂𑀯 𑀳𑀢𑁆𑀣𑁂𑀦 𑀧𑀭𑀸𑀫𑀲𑀦𑁆𑀢𑀲𑁆𑀲 𑀓𑀸𑀬𑀤𑀼𑀘𑁆𑀘𑀭𑀺𑀢𑀁. 𑀲𑁂𑀲𑀤𑁆𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀲𑁄𑀢𑀤𑁆𑀯𑀸𑀭𑀲𑁆𑀫𑀺𑀜𑁆𑀳𑀺 𑀲𑀤𑁆𑀤𑀸𑀭𑀫𑁆𑀫𑀡𑀲𑁆𑀲 𑀯𑀢𑁆𑀣𑀼𑀪𑀽𑀢𑀁 𑀲𑀗𑁆𑀔𑀧𑀡𑀯𑀸𑀤𑀺𑀢𑀽𑀭𑀺𑀬𑀪𑀡𑁆𑀟𑀁 𑀅𑀦𑀸𑀫𑀸𑀲𑀁 𑀆𑀫𑀲𑀦𑁆𑀢𑀲𑁆𑀲, 𑀖𑀸𑀦𑀤𑁆𑀯𑀸𑀭𑁂 𑀕𑀦𑁆𑀥𑀸𑀭𑀫𑁆𑀫𑀡𑀲𑁆𑀲 𑀯𑀢𑁆𑀣𑀼𑀪𑀽𑀢𑀁 𑀕𑀦𑁆𑀥𑀫𑀸𑀮𑀸𑀤𑀺𑀁, 𑀚𑀺𑀯𑁆𑀳𑀸𑀤𑁆𑀯𑀸𑀭𑁂 𑀭𑀲𑀸𑀭𑀫𑁆𑀫𑀡𑀲𑁆𑀲 𑀯𑀢𑁆𑀣𑀼𑀪𑀽𑀢𑀁 𑀫𑀘𑁆𑀙𑀫𑀁𑀲𑀸𑀤𑀺𑀁, 𑀓𑀸𑀬𑀤𑁆𑀯𑀸𑀭𑁂 𑀨𑁄𑀝𑁆𑀞𑀩𑁆𑀩𑀸𑀭𑀫𑁆𑀫𑀡𑀲𑁆𑀲 𑀯𑀢𑁆𑀣𑀼𑀪𑀽𑀢𑀁 𑀯𑀢𑁆𑀣𑀢𑀽𑀮𑀓𑀧𑀸𑀯𑀸𑀭𑀸𑀤𑀺𑀁, 𑀫𑀦𑁄𑀤𑁆𑀯𑀸𑀭𑁂 𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀥𑀫𑁆𑀫𑀸𑀭𑀫𑁆𑀫𑀡𑀪𑀽𑀢𑀁 𑀲𑀧𑁆𑀧𑀺𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀺𑀁 𑀆𑀫𑀲𑀦𑁆𑀢𑀲𑁆𑀲 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀗𑁆𑀔𑁂𑀧𑀢𑁄 𑀧𑀦𑁂𑀢𑁆𑀣 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀓𑀸𑀬𑀯𑀻𑀢𑀺𑀓𑁆𑀓𑀫𑁄 𑀓𑀸𑀬𑀤𑀼𑀘𑁆𑀘𑀭𑀺𑀢𑀁, 𑀯𑀘𑀻𑀯𑀻𑀢𑀺𑀓𑁆𑀓𑀫𑁄 𑀯𑀘𑀻𑀤𑀼𑀘𑁆𑀘𑀭𑀺𑀢𑀁, 𑀫𑀦𑁄𑀯𑀻𑀢𑀺𑀓𑁆𑀓𑀫𑁄 𑀫𑀦𑁄𑀤𑀼𑀘𑁆𑀘𑀭𑀺𑀢𑀦𑁆𑀢𑀺 𑀢𑀻𑀡𑁂𑀯 𑀤𑀼𑀘𑁆𑀘𑀭𑀺𑀢𑀸𑀦𑀺 𑀳𑁄𑀦𑁆𑀢𑀺.

𑀅𑀬𑀁 𑀧𑀦 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀪𑀸𑀯𑀦𑀸𑀧𑀝𑀺𑀲𑀗𑁆𑀔𑀸𑀦𑁂 𑀞𑀺𑀢𑁄 𑀇𑀫𑀸𑀦𑀺 𑀤𑀼𑀘𑁆𑀘𑀭𑀺𑀢𑀸𑀦𑀺 𑀲𑀼𑀘𑀭𑀺𑀢𑀁 𑀓𑀢𑁆𑀯𑀸 𑀯𑀺𑀧𑀭𑀺𑀡𑀸𑀫𑁂𑀢𑀺. 𑀓𑀣𑀁? 𑀘𑀓𑁆𑀔𑀼𑀤𑁆𑀯𑀸𑀭𑁂 𑀢𑀸𑀯 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀸𑀦𑀺 𑀅𑀘𑀸𑀮𑁂𑀢𑁆𑀯𑀸 𑀭𑀽𑀧𑀸𑀭𑀫𑁆𑀫𑀡𑀁 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀸𑀧𑀬𑀢𑁄 𑀫𑀦𑁄𑀲𑀼𑀘𑀭𑀺𑀢𑀁 𑀳𑁄𑀢𑀺, 𑀯𑀺𑀧𑀲𑁆𑀲𑀦𑀸𑀲𑀳𑀕𑀢𑁂𑀦 𑀘𑀺𑀢𑁆𑀢𑁂𑀦 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀦𑁆𑀢𑀺 𑀪𑀡𑀦𑁆𑀢𑀲𑁆𑀲 𑀯𑀘𑀻𑀲𑀼𑀘𑀭𑀺𑀢𑀁, ‘‘𑀅𑀦𑀸𑀫𑀸𑀲𑀪𑀡𑁆𑀟𑀁 𑀏𑀢’’𑀦𑁆𑀢𑀺 𑀅𑀦𑀸𑀫𑀲𑀦𑁆𑀢𑀲𑁆𑀲 𑀓𑀸𑀬𑀲𑀼𑀘𑀭𑀺𑀢𑀁. 𑀲𑁂𑀲𑀤𑁆𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀇𑀫𑀸𑀦𑀺 𑀯𑀺𑀢𑁆𑀣𑀸𑀭𑀢𑁄 𑀅𑀝𑁆𑀞𑀸𑀭𑀲 𑀲𑀼𑀘𑀭𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀲𑀗𑁆𑀔𑁂𑀧𑀢𑁄 𑀧𑀦𑁂𑀢𑁆𑀣𑀸𑀧𑀺 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀓𑀸𑀬𑀲𑀁𑀯𑀭𑁄 𑀓𑀸𑀬𑀲𑀼𑀘𑀭𑀺𑀢𑀁, 𑀯𑀘𑀻𑀲𑀁𑀯𑀭𑁄 𑀯𑀘𑀻𑀲𑀼𑀘𑀭𑀺𑀢𑀁, 𑀫𑀦𑁄𑀲𑀁𑀯𑀭𑁄 𑀫𑀦𑁄𑀲𑀼𑀘𑀭𑀺𑀢𑀦𑁆𑀢𑀺 𑀢𑀻𑀡𑁂𑀯 𑀲𑀼𑀘𑀭𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀏𑀯𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀢𑀻𑀡𑀺 𑀲𑀼𑀘𑀭𑀺𑀢𑀸𑀦𑀺 𑀧𑀭𑀺𑀧𑀽𑀭𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀢𑀸𑀯𑀢𑀸 𑀲𑀻𑀮𑀸𑀦𑀼𑀭𑀓𑁆𑀔𑀺𑀢𑀁 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑀻𑀮𑀁 𑀓𑀣𑀺𑀢𑀁.

𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀧𑀳𑀸𑀬𑀸𑀢𑀺𑀆𑀤𑀻𑀲𑀼 𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁, 𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁, 𑀢𑀺𑀯𑀺𑀥𑀁 𑀫𑀦𑁄𑀤𑀼𑀘𑁆𑀘𑀭𑀺𑀢𑀁. 𑀢𑀲𑁆𑀲 𑀧𑀝𑀺𑀧𑀓𑁆𑀔𑀯𑀲𑁂𑀦 𑀓𑀸𑀬𑀲𑀼𑀘𑀭𑀺𑀢𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀢𑁆𑀢𑀸𑀯𑀢𑀸 𑀓𑀸𑀬𑀲𑀁𑀯𑀭𑀯𑀘𑀻𑀲𑀁𑀯𑀭𑁂𑀳𑀺 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑀁, 𑀫𑀦𑁄𑀲𑀁𑀯𑀭𑁂𑀦 𑀢𑀻𑀡𑀺 𑀲𑀻𑀮𑀸𑀦𑀻𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀓𑀣𑀺𑀢𑀁 𑀳𑁄𑀢𑀺. 𑀲𑀓𑀮𑁂 𑀧𑀦 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀼𑀘𑀭𑀺𑀢𑀫𑀽𑀮𑀓𑀸 𑀲𑀢𑀺𑀧𑀝𑁆𑀞𑀸𑀦𑀸 𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸, 𑀲𑀢𑁆𑀢𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀫𑀽𑀮𑀪𑀽𑀢𑀸 𑀲𑀢𑀺𑀧𑀝𑁆𑀞𑀸𑀦𑀸 𑀧𑀼𑀩𑁆𑀩𑀪𑀸𑀕𑀸, 𑀢𑁂𑀧𑀺 𑀲𑀢𑀺𑀧𑀝𑁆𑀞𑀸𑀦𑀫𑀽𑀮𑀓𑀸 𑀩𑁄𑀚𑁆𑀛𑀗𑁆𑀕𑀸 𑀧𑀼𑀩𑁆𑀩𑀪𑀸𑀕𑀸𑀯. 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀫𑀽𑀮𑀓𑀸 𑀧𑀦 𑀮𑁄𑀓𑀼𑀢𑁆𑀢𑀭𑀸𑀯 𑀓𑀣𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀢𑁆𑀢𑀫𑀁 𑀉𑀢𑁆𑀢𑀸𑀦𑀫𑁂𑀯.

𑁮. 𑀉𑀧𑀯𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁮𑁯. 𑀅𑀝𑁆𑀞𑀫𑁂 𑀧𑀘𑁆𑀘𑀢𑁆𑀢𑀦𑁆𑀢𑀺 𑀅𑀢𑁆𑀢𑀦𑀸𑀯. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀢𑀺 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁂𑀦. 𑀆𑀭𑀩𑁆𑀪𑀫𑀸𑀦𑁄𑀯𑀸𑀢𑀺 𑀓𑀼𑀭𑀼𑀫𑀸𑀦𑁄𑀬𑁂𑀯. 𑀲𑀼𑀯𑀺𑀫𑀼𑀢𑁆𑀢𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀯𑀺𑀫𑀼𑀢𑁆𑀢𑀺𑀬𑀸 𑀲𑀼𑀝𑁆𑀞𑀼 𑀯𑀺𑀫𑀼𑀢𑁆𑀢𑀁. 𑀅𑀝𑁆𑀞𑀺𑀁𑀓𑀢𑁆𑀯𑀸𑀢𑀺 𑀅𑀢𑁆𑀣𑀁 𑀓𑀭𑀺𑀢𑁆𑀯𑀸, 𑀅𑀢𑁆𑀣𑀺𑀓𑁄 𑀳𑀼𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁯. 𑀧𑀞𑀫𑀉𑀧𑁆𑀧𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁦. 𑀦𑀯𑀫𑁂 𑀦𑀸𑀜𑁆𑀜𑀢𑁆𑀭 𑀢𑀣𑀸𑀕𑀢𑀲𑁆𑀲 𑀧𑀸𑀢𑀼𑀪𑀸𑀯𑀸𑀢𑀺 𑀢𑀣𑀸𑀕𑀢𑀲𑁆𑀲 𑀧𑀸𑀢𑀼𑀪𑀸𑀯𑀁 𑀯𑀺𑀦𑀸 𑀦 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁧𑁦. 𑀤𑀼𑀢𑀺𑀬𑀉𑀧𑁆𑀧𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁯𑁧. 𑀤𑀲𑀫𑁂 𑀦𑀸𑀜𑁆𑀜𑀢𑁆𑀭 𑀲𑀼𑀕𑀢𑀯𑀺𑀦𑀬𑀸𑀢𑀺 𑀲𑀼𑀕𑀢𑁄𑀯𑀸𑀤𑀁 𑀯𑀺𑀦𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺.

𑀧𑀩𑁆𑀩𑀢𑀯𑀕𑁆𑀕𑁄.

𑁨. 𑀕𑀺𑀮𑀸𑀦𑀯𑀕𑁆𑀕𑁄

𑁧-𑁩. 𑀧𑀸𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁯𑁨-𑁧𑁯𑁪. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀘𑀢𑁆𑀢𑀸𑀭𑁄 𑀇𑀭𑀺𑀬𑀸𑀧𑀣𑁂 𑀓𑀧𑁆𑀧𑁂𑀦𑁆𑀢𑀻𑀢𑀺 𑀬𑁂𑀲𑀁 𑀘𑀢𑁆𑀢𑀸𑀭𑁄 𑀇𑀭𑀺𑀬𑀸𑀧𑀣𑀸 𑀅𑀢𑁆𑀣𑀺, 𑀢𑁂𑀲𑀁𑀬𑁂𑀯 𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀲𑀻𑀮𑀁 𑀦𑀺𑀲𑁆𑀲𑀸𑀬𑀸𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸. 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂𑀢𑀺 𑀲𑀳𑀯𑀺𑀧𑀲𑁆𑀲𑀦𑀓𑁂 𑀫𑀕𑁆𑀕𑀩𑁄𑀚𑁆𑀛𑀗𑁆𑀕𑁂. 𑀤𑀼𑀢𑀺𑀬𑀢𑀢𑀺𑀬𑀸𑀦𑀺 𑀉𑀢𑁆𑀢𑀸𑀦𑀢𑁆𑀣𑀸𑀦𑁂𑀯.

𑁪-𑁧𑁦. 𑀧𑀞𑀫𑀕𑀺𑀮𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁯𑁫-𑁨𑁦𑁧. 𑀘𑀢𑀼𑀢𑁆𑀣𑁂 𑀢𑀣𑀸 𑀧𑀳𑀻𑀦𑁄 𑀘𑀸𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀲𑁄 𑀆𑀩𑀸𑀥𑁄 𑀅𑀳𑁄𑀲𑀻𑀢𑀺 𑀣𑁂𑀭𑀲𑁆𑀲 𑀓𑀺𑀭 𑀇𑀫𑀁 𑀩𑁄𑀚𑁆𑀛𑀗𑁆𑀕𑀪𑀸𑀯𑀦𑀁 𑀲𑀸𑀥𑀼𑀓𑀁 𑀲𑀼𑀡𑀦𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 ‘‘𑀫𑀬𑁆𑀳𑀁 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀲𑁆𑀲 𑀇𑀫𑁂 𑀩𑁄𑀚𑁆𑀛𑀗𑁆𑀕𑀸 𑀧𑀸𑀢𑀼𑀪𑀽𑀢𑀸’’𑀢𑀺. 𑀅𑀣𑀲𑁆𑀲 ‘‘𑀦𑀺𑀬𑁆𑀬𑀸𑀦𑀺𑀓𑀁 𑀯𑀢 𑀲𑀢𑁆𑀣𑀼𑀲𑀸𑀲𑀦’’𑀦𑁆𑀢𑀺 𑀘𑀺𑀦𑁆𑀢𑀬𑀢𑁄 𑀮𑁄𑀳𑀺𑀢𑀁 𑀧𑀲𑀻𑀤𑀺, 𑀉𑀧𑀸𑀤𑀸𑀭𑀽𑀧𑀁 𑀯𑀺𑀲𑀼𑀤𑁆𑀥𑀁 𑀅𑀳𑁄𑀲𑀺, 𑀧𑁄𑀓𑁆𑀔𑀭𑀧𑀢𑁆𑀢𑁂 𑀧𑀢𑀺𑀢𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀲𑀭𑀻𑀭𑀢𑁄 𑀭𑁄𑀕𑁄 𑀯𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀢𑀣𑀸 𑀧𑀳𑀻𑀦𑁄 𑀘𑀸𑀬𑀲𑁆𑀫𑀢𑁄 𑀫𑀳𑀸𑀓𑀲𑁆𑀲𑀧𑀲𑁆𑀲 𑀲𑁄 𑀆𑀩𑀸𑀥𑁄 𑀅𑀳𑁄𑀲𑀻’’𑀢𑀺. 𑀧𑀜𑁆𑀘𑀫𑀙𑀝𑁆𑀞𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀫𑁆𑀧𑀺 𑀚𑀦𑀸𑀦𑀁 𑀧𑀩𑁆𑀩𑀢𑀧𑀸𑀤𑁂 𑀧𑀼𑀧𑁆𑀨𑀺𑀢𑀯𑀺𑀲𑀭𑀼𑀓𑁆𑀔𑀯𑀸𑀢𑀲𑀫𑁆𑀨𑀲𑁆𑀲𑁂𑀦 𑀉𑀧𑁆𑀧𑀦𑁆𑀦𑁄 𑀫𑀦𑁆𑀤𑀲𑀻𑀢𑀚𑀭𑁄 𑀆𑀩𑀸𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀕𑀺𑀮𑀸𑀦𑀯𑀕𑁆𑀕𑁄.

𑁩. 𑀉𑀤𑀸𑀬𑀺𑀯𑀕𑁆𑀕𑁄

𑁧-𑁨. 𑀩𑁄𑀥𑀸𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁦𑁨-𑁨𑁦𑁩. 𑀢𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀩𑁄𑀚𑁆𑀛𑀗𑁆𑀕𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺 𑀪𑀦𑁆𑀢𑁂, 𑀓𑀺𑀢𑁆𑀢𑀓𑁂𑀦 𑀦𑀼 𑀔𑁄 𑀩𑀼𑀚𑁆𑀛𑀦𑀓𑀅𑀗𑁆𑀕𑀸 𑀦𑀸𑀫 𑀯𑀼𑀘𑁆𑀘𑀦𑁆𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀩𑀼𑀚𑁆𑀛𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀫𑀺𑀲𑁆𑀲𑀓𑀩𑁄𑀚𑁆𑀛𑀗𑁆𑀕𑀸 𑀓𑀣𑀺𑀢𑀸. 𑀤𑀼𑀢𑀺𑀬𑁂 𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑁄 𑀓𑀣𑀺𑀢𑁄.

𑁩-𑁫. 𑀞𑀸𑀦𑀺𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁦𑁪-𑁨𑁦𑁬. 𑀢𑀢𑀺𑀬𑁂 𑀓𑀸𑀫𑀭𑀸𑀕𑀝𑁆𑀞𑀸𑀦𑀺𑀬𑀸𑀦𑀦𑁆𑀢𑀺 𑀓𑀸𑀫𑀭𑀸𑀕𑀲𑁆𑀲 𑀓𑀸𑀭𑀡𑀪𑀽𑀢𑀸𑀦𑀁 𑀆𑀭𑀫𑁆𑀫𑀡𑀥𑀫𑁆𑀫𑀸𑀦𑀁. 𑀩𑁆𑀬𑀸𑀧𑀸𑀤𑀝𑁆𑀞𑀸𑀦𑀺𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑀓𑀮𑀜𑁆𑀳𑀺 𑀇𑀤𑀁 𑀲𑀼𑀢𑁆𑀢𑀁 𑀆𑀭𑀫𑁆𑀫𑀡𑁂𑀦𑁂𑀯 𑀓𑀣𑀺𑀢𑀁. 𑀧𑀞𑀫𑀯𑀕𑁆𑀕𑀲𑁆𑀲 𑀤𑀼𑀢𑀺𑀬𑀲𑀼𑀢𑁆𑀢𑁂 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑁄𑀧𑁂𑀢𑁆𑀣 𑀮𑀩𑁆𑀪𑀢𑁂𑀯. 𑀘𑀢𑀼𑀢𑁆𑀣𑁂 𑀫𑀺𑀲𑁆𑀲𑀓𑀩𑁄𑀚𑁆𑀛𑀗𑁆𑀕𑀸 𑀓𑀣𑀺𑀢𑀸. 𑀧𑀜𑁆𑀘𑀫𑁂 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂𑀢𑀺 𑀅𑀧𑀭𑀺𑀳𑀸𑀦𑀺𑀓𑀭𑁂 𑀲𑀪𑀸𑀯𑀥𑀫𑁆𑀫𑁂.

𑁬-𑁭. 𑀢𑀡𑁆𑀳𑀓𑁆𑀔𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁦𑁭-𑁨𑁦𑁮. 𑀙𑀝𑁆𑀞𑁂 𑀏𑀢𑀤𑀯𑁄𑀘𑀸𑀢𑀺 ‘‘𑀇𑀫𑀺𑀲𑁆𑀲𑀁 𑀧𑀭𑀺𑀲𑀢𑀺 𑀦𑀺𑀲𑀺𑀦𑁆𑀦𑁄 𑀉𑀤𑀸𑀬𑀺𑀢𑁆𑀣𑁂𑀭𑁄 𑀦𑀸𑀫 𑀅𑀦𑀼𑀲𑀦𑁆𑀥𑀺𑀓𑀼𑀲𑀮𑁄 𑀪𑀺𑀓𑁆𑀔𑀼 𑀅𑀢𑁆𑀣𑀺, 𑀲𑁄 𑀫𑀁 𑀧𑀼𑀘𑁆𑀙𑀺𑀲𑁆𑀲𑀢𑀻𑀢𑀺 𑀪𑀕𑀯𑀢𑀸 𑀑𑀲𑀸𑀧𑀺𑀢𑀤𑁂𑀲𑀦𑀁 𑀜𑀢𑁆𑀯𑀸 𑀤𑁂𑀲𑀦𑀸𑀦𑀼𑀲𑀦𑁆𑀥𑀺𑀁 𑀖𑀝𑁂𑀲𑁆𑀲𑀸𑀫𑀻’’𑀢𑀺 𑀧𑀼𑀘𑁆𑀙𑀦𑁆𑀢𑁄 𑀏𑀢𑀁 𑀅𑀯𑁄𑀘. 𑀯𑀺𑀧𑀼𑀮𑀦𑁆𑀢𑀺𑀆𑀤𑀺 𑀲𑀩𑁆𑀩𑀁 𑀲𑀼𑀪𑀸𑀯𑀺𑀢𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀼𑀪𑀸𑀯𑀺𑀢𑁄 𑀳𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀯𑀺𑀧𑀼𑀮𑁄 𑀘 𑀫𑀳𑀕𑁆𑀕𑀢𑁄 𑀘 𑀅𑀧𑁆𑀧𑀫𑀸𑀡𑁄 𑀘 𑀅𑀩𑁆𑀬𑀸𑀧𑀚𑁆𑀚𑁄 𑀘 𑀦𑀸𑀫 𑀳𑁄𑀢𑀺. 𑀲𑁄 𑀳𑀺 𑀧𑀢𑁆𑀣𑀝𑀢𑁆𑀢𑀸 𑀯𑀺𑀧𑀼𑀮𑁄, 𑀫𑀳𑀦𑁆𑀢𑀪𑀸𑀯𑀁 𑀕𑀢𑀢𑁆𑀢𑀸 𑀫𑀳𑀕𑁆𑀕𑀢𑁄, 𑀯𑀟𑁆𑀠𑀺𑀧𑀫𑀸𑀡𑀢𑁆𑀢𑀸 𑀅𑀧𑁆𑀧𑀫𑀸𑀡𑁄, 𑀦𑀻𑀯𑀭𑀡𑀸𑀦𑀁 𑀤𑀽𑀭𑀻𑀪𑀸𑀯𑁂𑀦 𑀩𑁆𑀬𑀸𑀧𑀸𑀤𑀭𑀳𑀺𑀢𑀢𑁆𑀢𑀸 𑀅𑀩𑁆𑀬𑀸𑀧𑀚𑁆𑀛𑁄 𑀦𑀸𑀫 𑀳𑁄𑀢𑀺. 𑀢𑀡𑁆𑀳𑀸𑀬 𑀧𑀳𑀸𑀦𑀸 𑀓𑀫𑁆𑀫𑀁 𑀧𑀳𑀻𑀬𑀢𑀻𑀢𑀺 𑀬𑀁 𑀢𑀡𑁆𑀳𑀸𑀫𑀽𑀮𑀓𑀁 𑀓𑀫𑁆𑀫𑀁 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀁 𑀢𑀡𑁆𑀳𑀸𑀧𑀳𑀸𑀦𑁂𑀦 𑀧𑀳𑀻𑀬𑀢𑀺. 𑀓𑀫𑁆𑀫𑀲𑁆𑀲 𑀧𑀳𑀸𑀦𑀸 𑀤𑀼𑀓𑁆𑀔𑀦𑁆𑀢𑀺 𑀬𑀫𑁆𑀧𑀺 𑀓𑀫𑁆𑀫𑀫𑀽𑀮𑀓𑀁 𑀯𑀝𑁆𑀝𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀢𑀁 𑀓𑀫𑁆𑀫𑀧𑀳𑀸𑀦𑁂𑀦 𑀧𑀳𑀻𑀬𑀢𑀺. 𑀢𑀡𑁆𑀳𑀓𑁆𑀔𑀬𑀸𑀤𑀬𑁄 𑀢𑀡𑁆𑀳𑀸𑀤𑀻𑀦𑀁𑀬𑁂𑀯 𑀔𑀬𑀸, 𑀅𑀢𑁆𑀣𑀢𑁄 𑀧𑀦𑁂𑀢𑁂𑀳𑀺 𑀦𑀺𑀩𑁆𑀩𑀸𑀦𑀁 𑀓𑀣𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀢𑁆𑀢𑀫𑀁 𑀉𑀢𑁆𑀢𑀸𑀦𑀫𑁂𑀯.

𑁮. 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁦𑁯. 𑀅𑀝𑁆𑀞𑀫𑁂 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀦𑁆𑀢𑀺 𑀦𑀺𑀩𑁆𑀩𑀺𑀚𑁆𑀛𑀦𑀓𑁄𑀝𑁆𑀞𑀸𑀲𑀺𑀬𑀁. 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑀺𑀢𑁂𑀦𑀸𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁂𑀦 𑀪𑀸𑀯𑀺𑀢𑁂𑀦, 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀯𑀸 𑀪𑀸𑀯𑁂𑀢𑁆𑀯𑀸 𑀞𑀺𑀢𑁂𑀦, 𑀏𑀯𑀫𑁂𑀢𑁆𑀣 𑀫𑀕𑁆𑀕𑀩𑁄𑀚𑁆𑀛𑀗𑁆𑀕𑀸 𑀫𑀺𑀲𑁆𑀲𑀓𑀸. 𑀢𑁂𑀳𑀺 𑀪𑀸𑀯𑀺𑀢𑀁, 𑀢𑁂 𑀯𑀸 𑀪𑀸𑀯𑁂𑀢𑁆𑀯𑀸 𑀞𑀺𑀢𑀁 𑀘𑀺𑀢𑁆𑀢𑀁 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀫𑁂𑀯. 𑀢𑀫𑁆𑀧𑀺 𑀧𑀦 𑀫𑀕𑁆𑀕𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀫𑀺𑀲𑁆𑀲𑀓𑀫𑁂𑀯 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺.

𑁯. 𑀏𑀓𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁦. 𑀦𑀯𑀫𑁂 𑀲𑀁𑀬𑁄𑀚𑀦𑀯𑀺𑀦𑀺𑀩𑀦𑁆𑀥𑀸𑀢𑀺 𑀲𑀁𑀬𑁄𑀚𑀦𑀲𑀗𑁆𑀔𑀸𑀢𑀸 𑀯𑀺𑀦𑀺𑀩𑀦𑁆𑀥𑀸. 𑀅𑀚𑁆𑀛𑁄𑀲𑀸𑀦𑀸𑀢𑀺 𑀧𑀭𑀺𑀦𑀺𑀝𑁆𑀞𑀧𑁂𑀢𑁆𑀯𑀸 𑀕𑀳𑀡𑀸.

𑁧𑁦. 𑀉𑀤𑀸𑀬𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁧. 𑀤𑀲𑀫𑁂 𑀅𑀩𑀳𑀼𑀓𑀢𑁄𑀢𑀺 𑀅𑀓𑀢𑀩𑀳𑀼𑀫𑀸𑀦𑁄. 𑀉𑀓𑁆𑀓𑀼𑀚𑁆𑀚𑀸𑀯𑀓𑀼𑀚𑁆𑀚𑀦𑁆𑀢𑀺 𑀏𑀢𑁆𑀣 𑀉𑀓𑁆𑀓𑀼𑀚𑁆𑀚𑀁 𑀯𑀼𑀘𑁆𑀘𑀢𑀺 𑀉𑀤𑀬𑁄, 𑀅𑀯𑀓𑀼𑀚𑁆𑀚𑀁 𑀯𑀬𑁄𑀢𑀺 𑀉𑀤𑀬𑀩𑁆𑀩𑀬𑀯𑀲𑁂𑀦 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑀲𑀫𑁆𑀫𑀲𑀦𑁆𑀢𑁄𑀢𑀺 𑀤𑀻𑀧𑁂𑀢𑀺. 𑀥𑀫𑁆𑀫𑁄 𑀘 𑀫𑁂, 𑀪𑀦𑁆𑀢𑁂, 𑀅𑀪𑀺𑀲𑀫𑀺𑀢𑁄𑀢𑀺 𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁄 𑀅𑀪𑀺𑀲𑀫𑀸𑀕𑀢𑁄. 𑀫𑀕𑁆𑀕𑁄𑀢𑀺 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑁄𑀯. 𑀲𑀘𑁂 𑀳𑀺 𑀣𑁂𑀭𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀲𑁄𑀢𑀸𑀧𑀦𑁆𑀦𑁄, 𑀉𑀧𑀭𑀺 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀅𑀢𑁆𑀣𑀸𑀬, 𑀲𑀘𑁂 𑀅𑀦𑀸𑀕𑀸𑀫𑀻, 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀅𑀢𑁆𑀣𑀸𑀬 𑀅𑀬𑀁 𑀯𑀺𑀧𑀲𑁆𑀲𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀢𑀣𑀸 𑀯𑀺𑀳𑀭𑀦𑁆𑀢𑀦𑁆𑀢𑀺 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦 𑀯𑀺𑀳𑀭𑀦𑁆𑀢𑀁. 𑀢𑀣𑀢𑁆𑀢𑀸𑀬𑀸𑀢𑀺 𑀢𑀣𑀸𑀪𑀸𑀯𑀸𑀬. 𑀔𑀻𑀡𑀸 𑀚𑀸𑀢𑀻𑀢𑀺𑀆𑀤𑀻𑀳𑀺 𑀢𑀣𑀢𑁆𑀢𑀸𑀬𑀸𑀢𑀺 𑀅𑀥𑀺𑀧𑁆𑀧𑁂𑀢𑀁 𑀢𑀣𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀧𑀘𑁆𑀘𑀯𑁂𑀓𑁆𑀔𑀡𑀢𑁆𑀣𑀸𑀬 𑀉𑀧𑀦𑀻𑀬𑀢𑀻𑀢𑀺 𑀳𑀺 𑀏𑀢𑁆𑀣 𑀅𑀥𑀺𑀧𑁆𑀧𑀸𑀬𑁄, 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀉𑀤𑀸𑀬𑀺𑀯𑀕𑁆𑀕𑁄.

𑁪. 𑀦𑀻𑀯𑀭𑀡𑀯𑀕𑁆𑀕𑁄

𑁩-𑁪. 𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁧𑁪-𑁨𑁧𑁫. 𑀘𑀢𑀼𑀢𑁆𑀣𑀯𑀕𑁆𑀕𑀲𑁆𑀲 𑀢𑀢𑀺𑀬𑁂 𑀦 𑀘 𑀧𑀪𑀲𑁆𑀲𑀭𑀦𑁆𑀢𑀺 𑀦 𑀘 𑀧𑀪𑀸𑀯𑀦𑁆𑀢𑀁. 𑀧𑀪𑀗𑁆𑀕𑀼 𑀘𑀸𑀢𑀺 𑀧𑀪𑀺𑀚𑁆𑀚𑀦𑀲𑀪𑀸𑀯𑀁. 𑀅𑀬𑁄𑀢𑀺 𑀓𑀸𑀴𑀮𑁄𑀳𑀁. 𑀞𑀧𑁂𑀢𑁆𑀯𑀸 𑀇𑀥 𑀯𑀼𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀺 𑀅𑀯𑀲𑁂𑀲𑀁 𑀮𑁄𑀳𑀁 𑀦𑀸𑀫. 𑀲𑀚𑁆𑀛𑀽𑀢𑀺 𑀭𑀚𑀢𑀁. 𑀘𑀺𑀢𑁆𑀢𑀲𑁆𑀲𑀸𑀢𑀺 𑀘𑀢𑀼𑀪𑀽𑀫𑀓𑀘𑀺𑀢𑁆𑀢𑀲𑁆𑀲. 𑀮𑁄𑀓𑀺𑀬𑀲𑁆𑀲 𑀢𑀸𑀯 𑀉𑀧𑀓𑁆𑀓𑀺𑀮𑁂𑀲𑁄 𑀳𑁄𑀢𑀼, 𑀮𑁄𑀓𑀼𑀢𑁆𑀢𑀭𑀲𑁆𑀲 𑀓𑀣𑀁 𑀳𑁄𑀢𑀻𑀢𑀺? 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑁆𑀧𑀤𑀸𑀦𑁂𑀦. 𑀬𑀤𑀕𑁆𑀕𑁂𑀦 𑀳𑀺 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀤𑁂𑀦𑁆𑀢𑀺, 𑀢𑀤𑀕𑁆𑀕𑁂𑀦𑁂𑀯 𑀢𑁂 𑀮𑁄𑀓𑀺𑀬𑀲𑁆𑀲𑀸𑀧𑀺 𑀮𑁄𑀓𑀼𑀢𑁆𑀢𑀭𑀲𑁆𑀲𑀸𑀧𑀺 𑀉𑀧𑀓𑁆𑀓𑀺𑀮𑁂𑀲𑀸 𑀦𑀸𑀫 𑀳𑁄𑀦𑁆𑀢𑀺. 𑀧𑀪𑀗𑁆𑀕𑀼 𑀘𑀸𑀢𑀺 𑀆𑀭𑀫𑁆𑀫𑀡𑁂 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀪𑀸𑀯𑀽𑀧𑀕𑀫𑀦𑁂𑀦 𑀪𑀺𑀚𑁆𑀚𑀦𑀲𑀪𑀸𑀯𑀁. 𑀅𑀦𑀸𑀯𑀭𑀡𑀸 𑀅𑀦𑀻𑀯𑀭𑀡𑀸𑀢𑀺 𑀓𑀼𑀲𑀮𑀥𑀫𑁆𑀫𑁂 𑀦 𑀆𑀯𑀭𑀦𑁆𑀢𑀻𑀢𑀺 𑀅𑀦𑀸𑀯𑀭𑀡𑀸, 𑀦 𑀦𑀻𑀯𑀭𑀦𑁆𑀢𑀺 𑀦 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀻𑀢𑀺 𑀅𑀦𑀻𑀯𑀭𑀡𑀸. 𑀘𑁂𑀢𑀲𑁄 𑀅𑀦𑀼𑀧𑀓𑁆𑀓𑀺𑀮𑁂𑀲𑀸𑀢𑀺 𑀘𑀢𑀼𑀪𑀽𑀫𑀓𑀘𑀺𑀢𑁆𑀢𑀲𑁆𑀲 𑀅𑀦𑀼𑀧𑀓𑁆𑀓𑀺𑀮𑁂𑀲𑀸.

𑁮. 𑀆𑀯𑀭𑀡𑀦𑀻𑀯𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁧𑁯. 𑀅𑀝𑁆𑀞𑀫𑁂 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸𑀢𑀺 𑀧𑀜𑁆𑀜𑀸𑀬 𑀫𑀦𑁆𑀤𑀪𑀸𑀯𑀓𑀭𑀸. 𑀦𑀻𑀯𑀭𑀡𑀸𑀦𑀜𑁆𑀳𑀺 𑀅𑀪𑀺𑀡𑁆𑀳𑀼𑀧𑁆𑀧𑀸𑀤𑁂 𑀲𑀢𑀺 𑀅𑀦𑁆𑀢𑀭𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀧𑀜𑁆𑀜𑀸 𑀤𑀼𑀩𑁆𑀩𑀮𑀸 𑀳𑁄𑀢𑀺 𑀫𑀦𑁆𑀤𑀸 𑀅𑀯𑀺𑀲𑀤𑀸.

𑀧𑀜𑁆𑀘 𑀦𑀻𑀯𑀭𑀡𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀦 𑀳𑁄𑀦𑁆𑀢𑀺. 𑀲𑀢𑁆𑀢𑀩𑁄𑀚𑁆𑀛𑀗𑁆𑀕𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀭𑀺𑀬𑀲𑀸𑀯𑀓𑀲𑁆𑀲 𑀳𑀺 𑀲𑀧𑁆𑀧𑀸𑀬𑀥𑀫𑁆𑀫𑀲𑁆𑀲𑀯𑀦𑀁 𑀲𑀼𑀡𑀦𑁆𑀢𑀲𑁆𑀲 𑀧𑀜𑁆𑀘 𑀦𑀻𑀯𑀭𑀡𑀸 𑀤𑀽𑀭𑁂 𑀳𑁄𑀦𑁆𑀢𑀺. 𑀲𑁄 𑀲𑀘𑁂 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀏𑀯𑀫𑀲𑁆𑀲 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺. 𑀦𑁄 𑀘𑁂 𑀲𑀓𑁆𑀓𑁄𑀢𑀺, 𑀢𑀢𑁄 𑀯𑀼𑀝𑁆𑀞𑀸𑀬 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀁 𑀕𑀢𑁄 𑀢𑀫𑁂𑀯 𑀧𑀻𑀢𑀺𑀁 𑀅𑀯𑀺𑀚𑀳𑀦𑁆𑀢𑁄 𑀧𑀜𑁆𑀘 𑀦𑀻𑀯𑀭𑀡𑁂 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀢𑀺. 𑀢𑀢𑁆𑀣 𑀅𑀲𑀓𑁆𑀓𑁄𑀦𑁆𑀢𑁄𑀧𑀺 𑀬𑀸𑀯 𑀲𑀢𑁆𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑀸 𑀢𑀫𑁂𑀯 𑀧𑀻𑀢𑀺𑀁 𑀅𑀯𑀺𑀚𑀳𑀦𑁆𑀢𑁄 𑀦𑀻𑀯𑀭𑀡𑁂 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀢𑀻𑀢𑀺 𑀇𑀤𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀥𑀫𑁆𑀫𑀲𑁆𑀲𑀯𑀦𑀯𑀲𑁂𑀦 𑀲𑀓𑀺𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀧𑀓𑁆𑀔𑀺𑀬𑀸 𑀧𑀝𑀺𑀮𑀤𑁆𑀥𑀩𑁄𑀚𑁆𑀛𑀗𑁆𑀕𑀸 𑀳𑀺 𑀓𑀫𑁆𑀫𑀸𑀭𑀸𑀫𑀢𑀸𑀤𑀻𑀦𑀺 𑀆𑀕𑀫𑁆𑀫 𑀦𑀲𑁆𑀲𑀦𑁆𑀢𑀺, 𑀢𑀣𑀸𑀭𑀽𑀧𑀁 𑀧𑀦 𑀉𑀢𑀼𑀲𑀧𑁆𑀧𑀸𑀬𑀸𑀤𑀺𑀁 𑀮𑀪𑀺𑀢𑁆𑀯𑀸 𑀧𑀼𑀦 𑀉𑀧𑁆𑀧𑀚𑁆𑀚𑀦𑁆𑀢𑀸𑀧𑀺 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀦𑁆𑀢𑀺 𑀇𑀘𑁆𑀘𑁂𑀯 𑀯𑀼𑀘𑁆𑀘𑀢𑀺.

𑁯. 𑀭𑀼𑀓𑁆𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁦. 𑀦𑀯𑀫𑁂 𑀅𑀚𑁆𑀛𑀸𑀭𑀼𑀳𑀸𑀢𑀺 𑀅𑀪𑀺𑀭𑀼𑀳𑀦𑀓𑀸. 𑀓𑀘𑁆𑀙𑀓𑁄𑀢𑀺 𑀅𑀝𑁆𑀞𑀺𑀓𑀘𑁆𑀙𑀓𑁄. 𑀓𑀧𑀺𑀢𑁆𑀣𑀦𑁄𑀢𑀺 𑀫𑀓𑁆𑀓𑀝𑀣𑀦𑀲𑀤𑀺𑀲𑀨𑀮𑁄 𑀯𑀺𑀚𑀸𑀢𑀧𑀺𑀮𑀓𑁆𑀔𑁄.

𑁧𑁦. 𑀦𑀻𑀯𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁧. 𑀤𑀲𑀫𑁂 𑀅𑀦𑁆𑀥𑀓𑀭𑀡𑀸𑀢𑀺 𑀅𑀦𑁆𑀥𑀪𑀸𑀯𑀓𑀭𑀡𑀸. 𑀅𑀘𑀓𑁆𑀔𑀼𑀓𑀭𑀡𑀸𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀲𑁆𑀲 𑀅𑀓𑀭𑀡𑀸. 𑀧𑀜𑁆𑀜𑀸𑀦𑀺𑀭𑁄𑀥𑀺𑀓𑀸𑀢𑀺 𑀧𑀜𑁆𑀜𑀸𑀬 𑀦𑀺𑀭𑁄𑀥𑀦𑀸. 𑀯𑀺𑀖𑀸𑀢𑀧𑀓𑁆𑀔𑀺𑀬𑀸𑀢𑀺 𑀤𑀼𑀓𑁆𑀔𑀧𑀓𑁆𑀔𑀺𑀓𑀸. 𑀅𑀦𑀺𑀩𑁆𑀩𑀸𑀦𑀲𑀁𑀯𑀢𑁆𑀢𑀦𑀺𑀓𑀸𑀢𑀺 𑀦𑀺𑀩𑁆𑀩𑀸𑀦𑀢𑁆𑀣𑀸𑀬 𑀅𑀲𑀁𑀯𑀢𑁆𑀢𑀦𑀺𑀓𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀲𑀓𑀮𑁂𑀧𑀺 𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀫𑀺𑀲𑁆𑀲𑀓𑀩𑁄𑀚𑁆𑀛𑀗𑁆𑀕𑀸𑀯 𑀓𑀣𑀺𑀢𑀸𑀢𑀺.

𑀦𑀻𑀯𑀭𑀡𑀯𑀕𑁆𑀕𑁄.

𑁫. 𑀘𑀓𑁆𑀓𑀯𑀢𑁆𑀢𑀺𑀯𑀕𑁆𑀕𑁄

𑁧. 𑀯𑀺𑀥𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁨. 𑀧𑀜𑁆𑀘𑀫𑀯𑀕𑁆𑀕𑀲𑁆𑀲 𑀧𑀞𑀫𑁂 𑀢𑀺𑀲𑁆𑀲𑁄 𑀯𑀺𑀥𑀸𑀢𑀺 𑀢𑀬𑁄 𑀫𑀸𑀦𑀓𑁄𑀝𑁆𑀞𑀸𑀲𑀸, 𑀫𑀸𑀦𑁄𑀬𑁂𑀯 𑀯𑀸. 𑀢𑀣𑀸 𑀢𑀣𑀸 𑀯𑀺𑀤𑀳𑀦𑀢𑁄 𑀳𑀺 𑀫𑀸𑀦𑁄𑀯 𑀯𑀺𑀥𑀸𑀢𑀺 𑀯𑀼𑀘𑁆𑀘𑀢𑀺.

𑁨. 𑀘𑀓𑁆𑀓𑀯𑀢𑁆𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁨𑁩. 𑀤𑀼𑀢𑀺𑀬𑁂 𑀭𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀯𑀢𑁆𑀢𑀺𑀲𑁆𑀲𑀸𑀢𑀺 𑀏𑀢𑁆𑀣 𑀅𑀢𑁆𑀢𑀦𑁄 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀬𑀸 𑀭𑀸𑀚𑀢𑀺, 𑀘𑀢𑀽𑀳𑀺 𑀯𑀸 𑀲𑀗𑁆𑀕𑀳𑀯𑀢𑁆𑀣𑀽𑀳𑀺 𑀮𑁄𑀓𑀁 𑀭𑀜𑁆𑀚𑁂𑀢𑀻𑀢𑀺 𑀭𑀸𑀚𑀸, 𑀢𑀲𑁆𑀲 𑀭𑀜𑁆𑀜𑁄. ‘‘𑀧𑀯𑀢𑁆𑀢𑀢𑀼 𑀪𑀯𑀁 𑀘𑀓𑁆𑀓𑀭𑀢𑀦’’𑀦𑁆𑀢𑀺 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦 𑀅𑀩𑁆𑀪𑀼𑀕𑁆𑀕𑀢𑀸𑀬 𑀯𑀸𑀘𑀸𑀬 𑀘𑁄𑀤𑁂𑀦𑁆𑀢𑁄 𑀘𑀓𑁆𑀓𑀁 𑀯𑀢𑁆𑀢𑁂𑀢𑀻𑀢𑀺 𑀘𑀓𑁆𑀓𑀯𑀢𑁆𑀢𑀻, 𑀢𑀲𑁆𑀲 𑀘𑀓𑁆𑀓𑀯𑀢𑁆𑀢𑀺𑀲𑁆𑀲. 𑀧𑀸𑀢𑀼𑀪𑀸𑀯𑀸𑀢𑀺 𑀧𑀸𑀢𑀼𑀪𑀸𑀯𑁂𑀦. 𑀲𑀢𑁆𑀢𑀦𑁆𑀦𑀦𑁆𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀭𑀢𑀦𑀸𑀦𑀦𑁆𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀅𑀢𑁆𑀣𑀤𑀲𑁆𑀲𑀦𑀁. 𑀯𑀘𑀦𑀢𑁆𑀣𑁄 𑀧𑀦𑁂𑀢𑁆𑀣 𑀭𑀢𑀺𑀚𑀦𑀦𑀝𑁆𑀞𑁂𑀦 𑀭𑀢𑀦𑀁. 𑀅𑀧𑀺𑀘 𑁋

‘‘𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀁 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺.

𑀘𑀓𑁆𑀓𑀭𑀢𑀦𑀲𑁆𑀲 𑀘 𑀦𑀺𑀩𑁆𑀩𑀢𑁆𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀜𑁆𑀜𑀁 𑀤𑁂𑀯𑀝𑁆𑀞𑀸𑀦𑀁 𑀦𑀸𑀫 𑀦 𑀳𑁄𑀢𑀺, 𑀲𑀩𑁆𑀩𑁂𑀯 𑀕𑀦𑁆𑀥𑀧𑀼𑀧𑁆𑀨𑀸𑀤𑀻𑀳𑀺 𑀢𑀲𑁆𑀲𑁂𑀯 𑀧𑀽𑀚𑀜𑁆𑀘 𑀅𑀪𑀺𑀯𑀸𑀤𑀦𑀸𑀤𑀻𑀦𑀺 𑀘 𑀓𑀭𑁄𑀦𑁆𑀢𑀻𑀢𑀺 𑀘𑀺𑀢𑁆𑀢𑀻𑀓𑀢𑀝𑁆𑀞𑁂𑀦 𑀭𑀢𑀦𑀁. 𑀘𑀓𑁆𑀓𑀭𑀢𑀦𑀲𑁆𑀲 𑀘 ‘‘𑀏𑀢𑁆𑀢𑀓𑀁 𑀦𑀸𑀫 𑀥𑀦𑀁 𑀅𑀕𑁆𑀖𑀢𑀻’’𑀢𑀺 𑀅𑀕𑁆𑀖𑁄 𑀦𑀢𑁆𑀣𑀺, 𑀇𑀢𑀺 𑀫𑀳𑀕𑁆𑀖𑀝𑁆𑀞𑁂𑀦𑀸𑀧𑀺 𑀭𑀢𑀦𑀁. 𑀘𑀓𑁆𑀓𑀭𑀢𑀦𑀜𑁆𑀘 𑀅𑀜𑁆𑀜𑁂𑀳𑀺 𑀮𑁄𑀓𑁂 𑀯𑀺𑀚𑁆𑀚𑀫𑀸𑀦𑀭𑀢𑀦𑁂𑀳𑀺 𑀅𑀲𑀤𑀺𑀲𑀦𑁆𑀢𑀺 𑀅𑀢𑀼𑀮𑀝𑁆𑀞𑁂𑀦 𑀭𑀢𑀦𑀁. 𑀬𑀲𑁆𑀫𑀸 𑀧𑀦 𑀬𑀲𑁆𑀫𑀺𑀁 𑀓𑀧𑁆𑀧𑁂 𑀩𑀼𑀤𑁆𑀥𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀘𑀓𑁆𑀓𑀯𑀢𑁆𑀢𑀺𑀦𑁄, 𑀩𑀼𑀤𑁆𑀥𑀸 𑀘 𑀓𑀤𑀸𑀘𑀺 𑀓𑀭𑀳𑀘𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀲𑁆𑀫𑀸 𑀤𑀼𑀮𑁆𑀮𑀪𑀤𑀲𑁆𑀲𑀦𑀝𑁆𑀞𑁂𑀦 𑀭𑀢𑀦𑀁. 𑀢𑀤𑁂𑀢𑀁 𑀚𑀸𑀢𑀺𑀭𑀽𑀧𑀓𑀼𑀮𑀇𑀲𑁆𑀲𑀭𑀺𑀬𑀸𑀤𑀻𑀳𑀺 𑀅𑀦𑁄𑀫𑀲𑁆𑀲 𑀉𑀴𑀸𑀭𑀲𑀢𑁆𑀢𑀲𑁆𑀲𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀅𑀜𑁆𑀜𑀲𑁆𑀲𑀸𑀢𑀺 𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀝𑁆𑀞𑁂𑀦𑀸𑀧𑀺 𑀭𑀢𑀦𑀁. 𑀬𑀣𑀸 𑀘 𑀘𑀓𑁆𑀓𑀭𑀢𑀦𑀁, 𑀏𑀯𑀁 𑀲𑁂𑀲𑀸𑀦𑀺𑀧𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋

‘‘𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀁 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺.

𑀧𑀸𑀢𑀼𑀪𑀸𑀯𑁄 𑀳𑁄𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀺 𑀳𑁄𑀢𑀺. 𑀢𑀢𑁆𑀭𑀸𑀬𑀁 𑀬𑁄𑀚𑀦𑀸 𑁋 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀸𑀢𑀼𑀪𑀸𑀯𑀸 𑀲𑀢𑁆𑀢𑀦𑁆𑀦𑀁 𑀭𑀢𑀦𑀸𑀦𑀁 𑀧𑀸𑀢𑀼𑀪𑀸𑀯𑁄𑀢𑀺 𑀅𑀬𑀼𑀢𑁆𑀢𑀁. 𑀉𑀧𑁆𑀧𑀦𑁆𑀦𑀜𑁆𑀳𑀺 𑀘𑀓𑁆𑀓𑀁 𑀯𑀢𑁆𑀢𑁂𑀢𑁆𑀯𑀸 𑀲𑁄 𑀘𑀓𑁆𑀓𑀯𑀢𑁆𑀢𑀻 𑀦𑀸𑀫 𑀳𑁄𑀢𑀻𑀢𑀺 𑀦𑀸𑀬𑀼𑀢𑁆𑀢𑀁. 𑀓𑀲𑁆𑀫𑀸? 𑀘𑀓𑁆𑀓𑀯𑀢𑁆𑀢𑀦𑀦𑀺𑀬𑀫𑀸𑀧𑁂𑀓𑁆𑀔𑀢𑀸𑀬. 𑀬𑁄 𑀳𑀺 𑀦𑀺𑀬𑀫𑁂𑀦 𑀘𑀓𑁆𑀓𑀁 𑀯𑀢𑁆𑀢𑁂𑀲𑁆𑀲𑀢𑀺, 𑀲𑁄 𑀧𑀝𑀺𑀲𑀦𑁆𑀥𑀺𑀢𑁄 𑀧𑀪𑀼𑀢𑀺 ‘‘𑀘𑀓𑁆𑀓𑀯𑀢𑁆𑀢𑀺 𑀧𑀸𑀢𑀼𑀪𑀽𑀢𑁄’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺. 𑀮𑀤𑁆𑀥𑀦𑀸𑀫𑀲𑁆𑀲 𑀘 𑀧𑀼𑀭𑀺𑀲𑀲𑁆𑀲 𑀫𑀽𑀮𑀼𑀧𑁆𑀧𑀢𑁆𑀢𑀺𑀯𑀘𑀦𑀢𑁄𑀧𑀺 𑀬𑀼𑀢𑁆𑀢𑀫𑁂𑀯𑁂𑀢𑀁. 𑀬𑁄 𑀳𑀺 𑀏𑀲 𑀘𑀓𑁆𑀓𑀯𑀢𑁆𑀢𑀻𑀢𑀺 𑀮𑀤𑁆𑀥𑀦𑀸𑀫𑁄 𑀲𑀢𑁆𑀢𑀯𑀺𑀲𑁂𑀲𑁄, 𑀢𑀲𑁆𑀲 𑀧𑀝𑀺𑀲𑀦𑁆𑀥𑀺𑀲𑀗𑁆𑀔𑀸𑀢𑁄 𑀧𑀸𑀢𑀼𑀪𑀸𑀯𑁄𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀢𑀲𑁆𑀲 𑀳𑀺 𑀧𑀸𑀢𑀼𑀪𑀸𑀯𑀸 𑀭𑀢𑀦𑀸𑀦𑀺 𑀧𑀸𑀢𑀼𑀪𑀯𑀦𑁆𑀢𑀺. 𑀧𑀸𑀢𑀼𑀪𑀽𑀢𑁂𑀳𑀺 𑀧𑀦 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀭𑀺𑀧𑀓𑁆𑀓𑁂 𑀧𑀼𑀜𑁆𑀜𑀲𑀫𑁆𑀪𑀸𑀭𑁂 𑀲𑁄 𑀲𑀁𑀬𑀼𑀚𑁆𑀚𑀢𑀺, 𑀢𑀤𑀸 𑀮𑁄𑀓𑀲𑁆𑀲 𑀢𑁂𑀲𑀼 𑀧𑀸𑀢𑀼𑀪𑀸𑀯𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺. 𑀩𑀳𑀼𑀮𑀯𑀘𑀦𑀢𑁄 𑀘𑀸𑀧𑀺 𑀬𑀼𑀢𑁆𑀢𑀫𑁂𑀯𑁂𑀢𑀁. 𑀬𑀤𑀸 𑀳𑀺 𑀮𑁄𑀓𑀲𑁆𑀲 𑀢𑁂𑀲𑀼 𑀧𑀸𑀢𑀼𑀪𑀸𑀯𑀲𑀜𑁆𑀜𑀸 𑀉𑀧𑁆𑀧𑀚𑁆𑀚𑀢𑀺, 𑀢𑀤𑀸 𑀏𑀓𑀫𑁂𑀯 𑀧𑀞𑀫𑀁, 𑀧𑀘𑁆𑀙𑀸 𑀇𑀢𑀭𑀸𑀦𑀺 𑀙 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀩𑀳𑀼𑀮𑀯𑀘𑀦𑀢𑁄 𑀘𑀸𑀧𑀺 𑀏𑀢𑀁 𑀬𑀼𑀢𑁆𑀢𑀁. 𑀧𑀸𑀢𑀼𑀪𑀸𑀯𑀲𑁆𑀲 𑀘 𑀅𑀢𑁆𑀣𑀪𑁂𑀤𑀢𑁄𑀧𑀺 𑀬𑀼𑀢𑁆𑀢𑀫𑁂𑀯𑁂𑀢𑀁. 𑀦 𑀓𑁂𑀯𑀮𑀜𑁆𑀳𑀺 𑀧𑀸𑀢𑀼𑀪𑀽𑀢𑀫𑁂𑀯 𑀧𑀸𑀢𑀼𑀪𑀸𑀯𑁄, 𑀧𑀸𑀢𑀼𑀪𑀸𑀯𑀬𑀢𑀻𑀢𑀺 𑀧𑀸𑀢𑀼𑀪𑀸𑀯𑁄. 𑀅𑀬𑀁 𑀧𑀸𑀢𑀼𑀪𑀸𑀯𑀲𑁆𑀲 𑀅𑀢𑁆𑀣𑀪𑁂𑀤𑁄. 𑀬𑀲𑁆𑀫𑀸 𑀬𑁄 𑀲𑁄 𑀧𑀼𑀜𑁆𑀜𑀲𑀫𑁆𑀪𑀸𑀭𑁄 𑀭𑀸𑀚𑀸𑀦𑀁 𑀘𑀓𑁆𑀓𑀯𑀢𑁆𑀢𑀺𑀁 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀧𑀸𑀢𑀼𑀪𑀸𑀯𑀬𑀢𑀺, 𑀢𑀲𑁆𑀫𑀸 𑀭𑀜𑁆𑀜𑁄 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀸𑀢𑀼𑀪𑀸𑀯𑀸. 𑀦 𑀓𑁂𑀯𑀮𑀜𑁆𑀳𑀺 𑀘𑀓𑁆𑀓𑀯𑀢𑁆𑀢𑀺𑀬𑁂𑀯, 𑀇𑀫𑀸𑀦𑀺 𑀧𑀦 𑀲𑀢𑁆𑀢 𑀭𑀢𑀦𑀸𑀦𑀺𑀧𑀺 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀬𑀣𑁂𑀯 𑀳𑀺 𑀲𑁄 𑀧𑀼𑀜𑁆𑀜𑀲𑀫𑁆𑀪𑀸𑀭𑁄 𑀭𑀜𑁆𑀜𑁄 𑀚𑀦𑀓𑀳𑁂𑀢𑀼, 𑀏𑀯𑀁 𑀭𑀢𑀦𑀸𑀦𑀫𑁆𑀧𑀺 𑀧𑀭𑀺𑀬𑀸𑀬𑁂𑀦 𑀉𑀧𑀦𑀺𑀲𑁆𑀲𑀬𑀳𑁂𑀢𑀽𑀢𑀺 𑀬𑀼𑀢𑁆𑀢𑀫𑁂𑀯𑁂𑀢𑀁 ‘‘𑀭𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀯𑀢𑁆𑀢𑀺𑀲𑁆𑀲 𑀧𑀸𑀢𑀼𑀪𑀸𑀯𑀸 𑀲𑀢𑁆𑀢𑀦𑁆𑀦𑀁 𑀭𑀢𑀦𑀸𑀦𑀁 𑀧𑀸𑀢𑀼𑀪𑀸𑀯𑁄 𑀳𑁄𑀢𑀻’’𑀢𑀺.

𑀇𑀤𑀸𑀦𑀺 𑀢𑁂𑀲𑀁 𑀭𑀢𑀦𑀸𑀦𑀁 𑀲𑀭𑀽𑀧𑀯𑀲𑁂𑀦 𑀤𑀲𑁆𑀲𑀦𑀢𑁆𑀣𑀁 𑀓𑀢𑀫𑁂𑀲𑀁 𑀲𑀢𑁆𑀢𑀦𑁆𑀦𑀁 𑀘𑀓𑁆𑀓𑀭𑀢𑀦𑀲𑁆𑀲𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀓𑁆𑀓𑀭𑀢𑀦𑀲𑁆𑀲𑀸𑀢𑀺𑀆𑀤𑀻𑀲𑀼 𑀅𑀬𑀁 𑀲𑀗𑁆𑀔𑁂𑀧𑀸𑀥𑀺𑀧𑁆𑀧𑀸𑀬𑁄 𑁋 𑀤𑁆𑀯𑀺𑀲𑀳𑀲𑁆𑀲𑀤𑀻𑀧𑀧𑀭𑀺𑀯𑀸𑀭𑀸𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀤𑀻𑀧𑀸𑀦𑀁 𑀲𑀺𑀭𑀺𑀯𑀺𑀪𑀯𑀁 𑀕𑀳𑁂𑀢𑁆𑀯𑀸 𑀤𑀸𑀢𑀼𑀁 𑀲𑀫𑀢𑁆𑀣𑀲𑁆𑀲 𑀘𑀓𑁆𑀓𑀭𑀢𑀦𑀲𑁆𑀲 𑀧𑀸𑀢𑀼𑀪𑀸𑀯𑁄 𑀳𑁄𑀢𑀺, 𑀢𑀣𑀸 𑀧𑀼𑀭𑁂𑀪𑀢𑁆𑀢𑀫𑁂𑀯 𑀲𑀸𑀕𑀭𑀧𑀭𑀺𑀬𑀦𑁆𑀢𑀁 𑀧𑀣𑀯𑀺𑀁 𑀅𑀦𑀼𑀧𑀭𑀺𑀬𑀸𑀬𑀦𑀲𑀫𑀢𑁆𑀣𑀲𑁆𑀲 𑀯𑁂𑀳𑀸𑀲𑀗𑁆𑀕𑀫𑀲𑁆𑀲 𑀳𑀢𑁆𑀣𑀺𑀭𑀢𑀦𑀲𑁆𑀲, 𑀢𑀸𑀤𑀺𑀲𑀲𑁆𑀲𑁂𑀯 𑀅𑀲𑁆𑀲𑀭𑀢𑀦𑀲𑁆𑀲, 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀧𑀺 𑀅𑀦𑁆𑀥𑀓𑀸𑀭𑁂 𑀬𑁄𑀚𑀦𑀧𑁆𑀧𑀫𑀸𑀡𑀁 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀆𑀮𑁄𑀓𑀤𑀲𑁆𑀲𑀦𑀲𑀫𑀢𑁆𑀣𑀲𑁆𑀲 𑀫𑀡𑀺𑀭𑀢𑀦𑀲𑁆𑀲, 𑀙𑀩𑁆𑀩𑀺𑀥𑀁 𑀤𑁄𑀲𑀁 𑀯𑀺𑀯𑀚𑁆𑀚𑁂𑀢𑁆𑀯𑀸 𑀫𑀦𑀸𑀧𑀘𑀸𑀭𑀺𑀦𑁄 𑀇𑀢𑁆𑀣𑀺𑀭𑀢𑀦𑀲𑁆𑀲, 𑀬𑁄𑀚𑀦𑀧𑁆𑀧𑀫𑀸𑀡𑁂 𑀧𑀤𑁂𑀲𑁂 𑀅𑀦𑁆𑀢𑁄𑀧𑀣𑀯𑀺𑀕𑀢𑀸𑀦𑀁 𑀦𑀺𑀥𑀻𑀦𑀁 𑀤𑀲𑁆𑀲𑀦𑀲𑀫𑀢𑁆𑀣𑀲𑁆𑀲 𑀕𑀳𑀧𑀢𑀺𑀭𑀢𑀦𑀲𑁆𑀲, 𑀅𑀕𑁆𑀕𑀫𑀳𑁂𑀲𑀺𑀬𑀸 𑀓𑀼𑀘𑁆𑀙𑀺𑀫𑁆𑀳𑀺 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀲𑀓𑀮𑀭𑀚𑁆𑀚𑀸𑀦𑀼𑀲𑀸𑀲𑀦𑀲𑀫𑀢𑁆𑀣𑀲𑁆𑀲 𑀚𑁂𑀝𑁆𑀞𑀧𑀼𑀢𑁆𑀢𑀲𑀗𑁆𑀔𑀸𑀢𑀲𑁆𑀲 𑀧𑀭𑀺𑀡𑀸𑀬𑀓𑀭𑀢𑀦𑀲𑁆𑀲 𑀘 𑀧𑀸𑀢𑀼𑀪𑀸𑀯𑁄 𑀳𑁄𑀢𑀻𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄. 𑀯𑀺𑀢𑁆𑀣𑀸𑀭𑀢𑁄 𑀧𑀦 𑀢𑁂𑀲𑀁 𑀘𑀓𑁆𑀓𑀭𑀢𑀦𑀸𑀤𑀻𑀦𑀁 𑀧𑀸𑀢𑀼𑀪𑀸𑀯𑀯𑀺𑀥𑀸𑀦𑀁 𑀫𑀳𑀸𑀲𑀼𑀤𑀲𑁆𑀲𑀦𑀸𑀤𑀻𑀲𑀼 𑀲𑀼𑀢𑁆𑀢𑁂𑀲𑀼 𑀆𑀕𑀢𑀫𑁂𑀯. 𑀅𑀢𑁆𑀣𑁄𑀧𑀺𑀲𑁆𑀲 𑀢𑁂𑀲𑀁 𑀯𑀡𑁆𑀡𑀦𑀸𑀬 𑀲𑀁𑀯𑀡𑁆𑀡𑀺𑀢𑁄𑀬𑁂𑀯.

𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀭𑀢𑀦𑀲𑁆𑀲𑀸𑀢𑀺𑀆𑀤𑀻𑀲𑀼 𑀲𑀭𑀺𑀓𑁆𑀔𑀓𑀢𑀸 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸 𑁋 𑀬𑀣𑁂𑀯 𑀳𑀺 𑀘𑀓𑁆𑀓𑀯𑀢𑁆𑀢𑀺𑀦𑁄 𑀘𑀓𑁆𑀓𑀭𑀢𑀦𑀁 𑀲𑀩𑁆𑀩𑀭𑀢𑀦𑀸𑀦𑀁 𑀧𑀼𑀭𑁂𑀘𑀭𑀁, 𑀏𑀯𑀁 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀭𑀢𑀦𑀁 𑀲𑀩𑁆𑀩𑁂𑀲𑀁 𑀘𑀢𑀼𑀪𑀽𑀫𑀓𑀥𑀫𑁆𑀫𑀸𑀦𑀁 𑀧𑀼𑀭𑁂𑀘𑀭𑀦𑁆𑀢𑀺, 𑀧𑀼𑀭𑁂𑀘𑀭𑀡𑀝𑁆𑀞𑁂𑀦 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀘𑀓𑁆𑀓𑀭𑀢𑀦𑀲𑀤𑀺𑀲𑀁 𑀳𑁄𑀢𑀺. 𑀘𑀓𑁆𑀓𑀯𑀢𑁆𑀢𑀺𑀦𑁄 𑀘 𑀭𑀢𑀦𑁂𑀲𑀼 𑀫𑀳𑀸𑀓𑀸𑀬𑀽𑀧𑀧𑀦𑁆𑀦𑀁 𑀅𑀘𑁆𑀘𑀼𑀕𑁆𑀕𑀢𑀁 𑀯𑀺𑀧𑀼𑀮𑀁 𑀫𑀳𑀦𑁆𑀢𑀁 𑀳𑀢𑁆𑀣𑀺𑀭𑀢𑀦𑀁, 𑀇𑀤𑀫𑁆𑀧𑀺 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀭𑀢𑀦𑀁 𑀫𑀳𑀦𑁆𑀢𑀁 𑀥𑀫𑁆𑀫𑀓𑀸𑀬𑀽𑀧𑀧𑀦𑁆𑀦𑀁 𑀅𑀘𑁆𑀘𑀼𑀕𑁆𑀕𑀢𑀁 𑀯𑀺𑀧𑀼𑀮𑀁 𑀫𑀳𑀦𑁆𑀢𑀦𑁆𑀢𑀺 𑀳𑀢𑁆𑀣𑀺𑀭𑀢𑀦𑀲𑀤𑀺𑀲𑀁 𑀳𑁄𑀢𑀺. 𑀘𑀓𑁆𑀓𑀯𑀢𑁆𑀢𑀺𑀦𑁄 𑀅𑀲𑁆𑀲𑀭𑀢𑀦𑀁 𑀲𑀻𑀖𑀁 𑀮𑀳𑀼 𑀚𑀯𑀁, 𑀇𑀤𑀫𑁆𑀧𑀺 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀭𑀢𑀦𑀁 𑀲𑀻𑀖𑀁 𑀮𑀳𑀼 𑀚𑀯𑀦𑁆𑀢𑀺 𑀇𑀫𑀸𑀬 𑀲𑀻𑀖𑀮𑀳𑀼𑀚𑀯𑀢𑀸𑀬 𑀅𑀲𑁆𑀲𑀭𑀢𑀦𑀲𑀤𑀺𑀲𑀁 𑀳𑁄𑀢𑀺. 𑀘𑀓𑁆𑀓𑀯𑀢𑁆𑀢𑀺𑀦𑁄 𑀫𑀡𑀺𑀭𑀢𑀦𑀁 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀢𑀺, 𑀆𑀮𑁄𑀓𑀁 𑀤𑀲𑁆𑀲𑁂𑀢𑀺, 𑀇𑀤𑀫𑁆𑀧𑀺 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀭𑀢𑀦𑀁 𑀢𑀸𑀬 𑀏𑀓𑀦𑁆𑀢𑀓𑀼𑀲𑀮𑀢𑁆𑀢𑀸 𑀓𑀺𑀮𑁂𑀲𑀦𑁆𑀥𑀓𑀸𑀭𑀁 𑀯𑀺𑀥𑀫𑀢𑀺, 𑀲𑀳𑀚𑀸𑀢𑀧𑀘𑁆𑀘𑀬𑀸𑀤𑀺𑀯𑀲𑁂𑀦 𑀜𑀸𑀡𑀸𑀮𑁄𑀓𑀁 𑀤𑀲𑁆𑀲𑁂𑀢𑀻𑀢𑀺 𑀇𑀫𑀺𑀦𑀸 𑀅𑀦𑁆𑀥𑀓𑀸𑀭𑀯𑀺𑀥𑀫𑀦𑀆𑀮𑁄𑀓𑀤𑀲𑁆𑀲𑀦𑀪𑀸𑀯𑁂𑀦 𑀫𑀡𑀺𑀭𑀢𑀦𑀲𑀤𑀺𑀲𑀁 𑀳𑁄𑀢𑀺.

𑀘𑀓𑁆𑀓𑀯𑀢𑁆𑀢𑀺𑀦𑁄 𑀇𑀢𑁆𑀣𑀺𑀭𑀢𑀦𑀁 𑀓𑀸𑀬𑀘𑀺𑀢𑁆𑀢𑀤𑀭𑀣𑀁 𑀧𑀝𑀺𑀧𑀲𑁆𑀲𑀫𑁆𑀪𑁂𑀢𑀺, 𑀧𑀭𑀺𑀴𑀸𑀳𑀁 𑀯𑀽𑀧𑀲𑀫𑁂𑀢𑀺. 𑀇𑀤𑀫𑁆𑀧𑀺 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀭𑀢𑀦𑀁 𑀓𑀸𑀬𑀘𑀺𑀢𑁆𑀢𑀤𑀭𑀣𑀁 𑀧𑀝𑀺𑀧𑀲𑁆𑀲𑀫𑁆𑀪𑁂𑀢𑀺, 𑀧𑀭𑀺𑀴𑀸𑀳𑀁 𑀯𑀽𑀧𑀲𑀫𑁂𑀢𑀻𑀢𑀺 𑀇𑀢𑁆𑀣𑀺𑀭𑀢𑀦𑀲𑀤𑀺𑀲𑀁 𑀳𑁄𑀢𑀺. 𑀘𑀓𑁆𑀓𑀯𑀢𑁆𑀢𑀺𑀦𑁄 𑀕𑀳𑀧𑀢𑀺𑀭𑀢𑀦𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀥𑀦𑀤𑀸𑀦𑁂𑀦 𑀯𑀺𑀓𑁆𑀔𑁂𑀧𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀓𑀭𑁄𑀢𑀺, 𑀇𑀤𑀫𑁆𑀧𑀺 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀭𑀢𑀦𑀁 𑀬𑀣𑀺𑀘𑁆𑀙𑀺𑀢𑀸𑀤𑀺𑀯𑀲𑁂𑀦 𑀅𑀧𑁆𑀧𑀦𑀁 𑀲𑀫𑁆𑀧𑀸𑀤𑁂𑀢𑀺, 𑀯𑀺𑀓𑁆𑀔𑁂𑀧𑀁 𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀓𑀭𑁄𑀢𑀻𑀢𑀺 𑀕𑀳𑀧𑀢𑀺𑀭𑀢𑀦𑀲𑀤𑀺𑀲𑀁 𑀳𑁄𑀢𑀺. 𑀘𑀓𑁆𑀓𑀯𑀢𑁆𑀢𑀺𑀦𑁄 𑀘 𑀧𑀭𑀺𑀡𑀸𑀬𑀓𑀭𑀢𑀦𑀁 𑀲𑀩𑁆𑀩𑀢𑁆𑀣𑀓𑀺𑀘𑁆𑀘𑀲𑀫𑁆𑀧𑀸𑀤𑀦𑁂𑀦 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀁 𑀓𑀭𑁄𑀢𑀺. 𑀇𑀤𑀫𑁆𑀧𑀺 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀭𑀢𑀦𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀁 𑀮𑀻𑀦𑀼𑀤𑁆𑀥𑀘𑁆𑀘𑀢𑁄 𑀫𑁄𑀘𑁂𑀢𑁆𑀯𑀸 𑀧𑀬𑁄𑀕𑀫𑀚𑁆𑀛𑀢𑁆𑀢𑁂 𑀞𑀧𑀬𑀫𑀸𑀦𑀁 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀁 𑀓𑀭𑁄𑀢𑀻𑀢𑀺 𑀧𑀭𑀺𑀡𑀸𑀬𑀓𑀭𑀢𑀦𑀲𑀤𑀺𑀲𑀁 𑀳𑁄𑀢𑀺. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀘𑀢𑀼𑀪𑀽𑀫𑀓𑁄 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑁄 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁪-𑁧𑁦. 𑀤𑀼𑀧𑁆𑀧𑀜𑁆𑀜𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁨𑁫-𑁨𑁩𑁧. 𑀘𑀢𑀼𑀢𑁆𑀣𑁂 𑀏𑀴𑀫𑀽𑀕𑁄𑀢𑀺 𑀫𑀼𑀔𑁂𑀦 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑁄𑀧𑀺 𑀤𑁄𑀲𑁂𑀳𑀺 𑀫𑀽𑀕𑁄 𑀅𑀲𑀫𑁆𑀧𑀦𑁆𑀦𑀯𑀘𑀦𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀘𑀓𑁆𑀓𑀯𑀢𑁆𑀢𑀺𑀯𑀕𑁆𑀕𑁄.

𑁬. 𑀲𑀸𑀓𑀘𑁆𑀙𑀯𑀕𑁆𑀕𑁄

𑁧. 𑀆𑀳𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁨. 𑀙𑀝𑁆𑀞𑀯𑀕𑁆𑀕𑀲𑁆𑀲 𑀧𑀞𑀫𑁂 𑀅𑀬𑀫𑀸𑀳𑀸𑀭𑁄 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀯𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬𑀸𑀢𑀺𑀆𑀤𑀻𑀲𑀼 𑀅𑀬𑀁 𑀧𑀼𑀭𑀺𑀫𑀦𑀬𑀢𑁄 𑀯𑀺𑀲𑁂𑀲𑁄. 𑀦 𑀓𑁂𑀯𑀮𑀜𑁆𑀳𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀻𑀦𑀁 𑀏𑀢𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀯 𑀉𑀧𑁆𑀧𑀸𑀤𑀸𑀬, 𑀉𑀧𑁆𑀧𑀦𑁆𑀦𑀸𑀦𑀁 𑀯𑀸 𑀪𑀸𑀯𑀦𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀅𑀜𑁆𑀜𑁂𑀧𑀺 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸. 𑀅𑀧𑀭𑁂𑀧𑀺 𑀳𑀺 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑀁 𑀫𑀼𑀝𑁆𑀞𑀲𑁆𑀲𑀢𑀺𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀧𑀼𑀕𑁆𑀕𑀮𑀲𑁂𑀯𑀦𑀢𑀸 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀅𑀪𑀺𑀓𑁆𑀓𑀦𑁆𑀢𑀸𑀤𑀻𑀲𑀼 𑀳𑀺 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼 𑀲𑀢𑀺𑀲𑀫𑁆𑀧𑀚𑀜𑁆𑀜𑁂𑀦, 𑀪𑀢𑁆𑀢𑀦𑀺𑀓𑁆𑀔𑀺𑀢𑁆𑀢𑀓𑀸𑀓𑀲𑀤𑀺𑀲𑁂 𑀫𑀼𑀝𑁆𑀞𑀲𑁆𑀲𑀢𑀺𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀦𑁂𑀦, 𑀢𑀺𑀲𑁆𑀲𑀤𑀢𑁆𑀢𑀢𑁆𑀣𑁂𑀭𑀅𑀪𑀬𑀢𑁆𑀣𑁂𑀭𑀸𑀤𑀺𑀲𑀤𑀺𑀲𑁂 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀧𑀼𑀕𑁆𑀕𑀮𑁂 𑀲𑁂𑀯𑀦𑁂𑀦, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀲𑀢𑀺𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀢𑀸𑀬 𑀘 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀘𑀢𑀽𑀳𑀺 𑀓𑀸𑀭𑀡𑁂𑀳𑀺 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀻 𑀳𑁄𑀢𑀺.

𑀲𑀢𑁆𑀢 𑀥𑀫𑁆𑀫𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀧𑀭𑀺𑀧𑀼𑀘𑁆𑀙𑀓𑀢𑀸 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀸 𑀤𑀼𑀧𑁆𑀧𑀜𑁆𑀜𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸 𑀧𑀜𑁆𑀜𑀯𑀦𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀸 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀧𑀘𑁆𑀘𑀯𑁂𑀓𑁆𑀔𑀡𑀸 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀢𑀢𑁆𑀣 𑀧𑀭𑀺𑀧𑀼𑀘𑁆𑀙𑀓𑀢𑀸𑀢𑀺 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀛𑀸𑀦𑀗𑁆𑀕𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀁 𑀅𑀢𑁆𑀣𑀲𑀦𑁆𑀦𑀺𑀲𑁆𑀲𑀺𑀢𑀧𑀭𑀺𑀧𑀼𑀘𑁆𑀙𑀸𑀩𑀳𑀼𑀮𑀢𑀸.

𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸𑀢𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦𑀁 𑀯𑀢𑁆𑀣𑀽𑀦𑀁 𑀯𑀺𑀲𑀤𑀪𑀸𑀯𑀓𑀭𑀡𑀁. 𑀬𑀤𑀸 𑀳𑀺𑀲𑁆𑀲 𑀓𑁂𑀲𑀦𑀔𑀮𑁄𑀫𑀸𑀦𑀺 𑀤𑀻𑀖𑀸𑀦𑀺 𑀳𑁄𑀦𑁆𑀢𑀺, 𑀲𑀭𑀻𑀭𑀁 𑀯𑀸 𑀉𑀲𑁆𑀲𑀦𑁆𑀦𑀤𑁄𑀲𑀜𑁆𑀘𑁂𑀯 𑀲𑁂𑀤𑀫𑀮𑀫𑀓𑁆𑀔𑀺𑀢𑀜𑁆𑀘, 𑀢𑀤𑀸 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼 𑀅𑀯𑀺𑀲𑀤𑀁 𑀳𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀁. 𑀬𑀤𑀸 𑀧𑀦 𑀘𑀻𑀯𑀭𑀁 𑀚𑀺𑀡𑁆𑀡𑀁 𑀓𑀺𑀮𑀺𑀝𑁆𑀞𑀁 𑀤𑀼𑀕𑁆𑀕𑀦𑁆𑀥𑀁 𑀳𑁄𑀢𑀺, 𑀲𑁂𑀦𑀸𑀲𑀦𑀁 𑀯𑀸 𑀉𑀓𑁆𑀮𑀸𑀧𑀁, 𑀢𑀤𑀸 𑀩𑀸𑀳𑀺𑀭𑀯𑀢𑁆𑀣𑀼 𑀅𑀯𑀺𑀲𑀤𑀁 𑀳𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀁. 𑀢𑀲𑁆𑀫𑀸 𑀓𑁂𑀲𑀸𑀤𑀺𑀙𑁂𑀤𑀦𑁂𑀦 𑀉𑀤𑁆𑀥𑀁𑀯𑀺𑀭𑁂𑀘𑀦𑀅𑀥𑁄𑀯𑀺𑀭𑁂𑀘𑀦𑀸𑀤𑀻𑀳𑀺 𑀲𑀭𑀻𑀭𑀲𑀮𑁆𑀮𑀳𑀼𑀓𑀪𑀸𑀯𑀓𑀭𑀡𑁂𑀦 𑀉𑀘𑁆𑀙𑀸𑀤𑀦𑀦𑀳𑀸𑀧𑀦𑁂𑀦 𑀘 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼 𑀯𑀺𑀲𑀤𑀁 𑀓𑀸𑀢𑀩𑁆𑀩𑀁. 𑀲𑀽𑀘𑀺𑀓𑀫𑁆𑀫𑀥𑁄𑀯𑀦𑀭𑀚𑀦𑀧𑀭𑀺𑀪𑀡𑁆𑀟𑀓𑀭𑀡𑀸𑀤𑀻𑀳𑀺 𑀩𑀸𑀳𑀺𑀭𑀯𑀢𑁆𑀣𑀼 𑀯𑀺𑀲𑀤𑀁 𑀓𑀸𑀢𑀩𑁆𑀩𑀁. 𑀏𑀢𑀲𑁆𑀫𑀺𑀜𑁆𑀳𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂 𑀯𑀢𑁆𑀣𑀼𑀫𑁆𑀳𑀺 𑀅𑀯𑀺𑀲𑀤𑁂 𑀉𑀧𑁆𑀧𑀦𑁆𑀦𑁂𑀲𑀼 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑀼 𑀜𑀸𑀡𑀫𑁆𑀧𑀺 𑀅𑀯𑀺𑀲𑀤𑀁 𑀅𑀧𑀭𑀺𑀲𑀼𑀤𑁆𑀥𑀁 𑀳𑁄𑀢𑀺 𑀅𑀧𑀭𑀺𑀲𑀼𑀤𑁆𑀥𑀸𑀦𑀺 𑀤𑀻𑀧𑀓𑀧𑀮𑁆𑀮𑀓𑀯𑀝𑁆𑀝𑀺𑀢𑁂𑀮𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀤𑀻𑀧𑀲𑀺𑀔𑀸𑀬 𑀑𑀪𑀸𑀲𑁄 𑀯𑀺𑀬. 𑀯𑀺𑀲𑀤𑁂 𑀧𑀦 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂 𑀯𑀢𑁆𑀣𑀼𑀫𑁆𑀳𑀺 𑀉𑀧𑁆𑀧𑀦𑁆𑀦𑁂𑀲𑀼 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑀼 𑀜𑀸𑀡𑀫𑁆𑀧𑀺 𑀯𑀺𑀲𑀤𑀁 𑀳𑁄𑀢𑀺 𑀧𑀭𑀺𑀲𑀼𑀤𑁆𑀥𑀸𑀦𑀺 𑀤𑀻𑀧𑀓𑀧𑀮𑁆𑀮𑀓𑀯𑀝𑁆𑀝𑀺𑀢𑁂𑀮𑀸𑀦𑀺 𑀦𑀺𑀲𑁆𑀲𑀸𑀬 𑀉𑀧𑁆𑀧𑀦𑁆𑀦𑀤𑀻𑀧𑀲𑀺𑀔𑀸𑀬 𑀑𑀪𑀸𑀲𑁄 𑀯𑀺𑀬. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺.

𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀸 𑀦𑀸𑀫 𑀲𑀤𑁆𑀥𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀫𑀪𑀸𑀯𑀓𑀭𑀡𑀁. 𑀲𑀘𑁂 𑀳𑀺𑀲𑁆𑀲 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀳𑁄𑀢𑀺, 𑀇𑀢𑀭𑀸𑀦𑀺 𑀫𑀦𑁆𑀤𑀸𑀦𑀺, 𑀢𑀢𑁄 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀧𑀕𑁆𑀕𑀳𑀓𑀺𑀘𑁆𑀘𑀁, 𑀲𑀢𑀺𑀦𑁆𑀤𑁆𑀭𑀺𑀬𑀁 𑀉𑀧𑀝𑁆𑀞𑀸𑀦𑀓𑀺𑀘𑁆𑀘𑀁, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀅𑀯𑀺𑀓𑁆𑀔𑁂𑀧𑀓𑀺𑀘𑁆𑀘𑀁, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑀤𑀲𑁆𑀲𑀦𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀢𑀲𑁆𑀫𑀸 𑀢𑀁 𑀥𑀫𑁆𑀫𑀲𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀯𑀸, 𑀬𑀣𑀸 𑀯𑀸 𑀫𑀦𑀲𑀺𑀓𑀭𑁄𑀢𑁄 𑀩𑀮𑀯𑀁 𑀚𑀸𑀢𑀁, 𑀢𑀣𑀸 𑀅𑀫𑀦𑀲𑀺𑀓𑀭𑀡𑁂𑀦 𑀳𑀸𑀧𑁂𑀢𑀩𑁆𑀩𑀁. 𑀯𑀓𑁆𑀓𑀮𑀺𑀢𑁆𑀣𑁂𑀭𑀯𑀢𑁆𑀣𑀼 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦𑀁. 𑀲𑀘𑁂 𑀧𑀦 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀳𑁄𑀢𑀺, 𑀅𑀣 𑀦𑁂𑀯 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀅𑀥𑀺𑀫𑁄𑀓𑁆𑀔𑀓𑀺𑀘𑁆𑀘𑀁 𑀓𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀦 𑀇𑀢𑀭𑀸𑀦𑀺 𑀇𑀢𑀭𑀓𑀺𑀘𑁆𑀘𑀪𑁂𑀤𑀁. 𑀢𑀲𑁆𑀫𑀸 𑀢𑀁 𑀧𑀲𑁆𑀲𑀤𑁆𑀥𑀸𑀤𑀺𑀪𑀸𑀯𑀦𑀸𑀬 𑀳𑀸𑀧𑁂𑀢𑀩𑁆𑀩𑀁. 𑀢𑀢𑁆𑀣𑀸𑀧𑀺 𑀲𑁄𑀡𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼 𑀤𑀲𑁆𑀲𑁂𑀢𑀩𑁆𑀩𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀏𑀓𑀲𑁆𑀲 𑀩𑀮𑀯𑀪𑀸𑀯𑁂 𑀲𑀢𑀺 𑀇𑀢𑀭𑁂𑀲𑀁 𑀅𑀢𑁆𑀢𑀦𑁄 𑀓𑀺𑀘𑁆𑀘𑁂𑀲𑀼 𑀅𑀲𑀫𑀢𑁆𑀣𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀯𑀺𑀲𑁂𑀲𑀢𑁄 𑀧𑀦𑁂𑀢𑁆𑀣 𑀲𑀤𑁆𑀥𑀸𑀧𑀜𑁆𑀜𑀸𑀦𑀁 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀜𑁆𑀘 𑀲𑀫𑀢𑀁 𑀧𑀲𑀁𑀲𑀦𑁆𑀢𑀺. 𑀩𑀮𑀯𑀲𑀤𑁆𑀥𑁄 𑀳𑀺 𑀫𑀦𑁆𑀤𑀧𑀜𑁆𑀜𑁄 𑀫𑀼𑀥𑀧𑁆𑀧𑀲𑀦𑁆𑀦𑁄 𑀳𑁄𑀢𑀺, 𑀅𑀯𑀢𑁆𑀣𑀼𑀲𑁆𑀫𑀺𑀁 𑀧𑀲𑀻𑀤𑀢𑀺. 𑀩𑀮𑀯𑀧𑀜𑁆𑀜𑁄 𑀧𑀦 𑀫𑀦𑁆𑀤𑀲𑀤𑁆𑀥𑁄 𑀓𑁂𑀭𑀸𑀝𑀺𑀓𑀧𑀓𑁆𑀔𑀁 𑀪𑀚𑀢𑀺, 𑀪𑁂𑀲𑀚𑁆𑀚𑀲𑀫𑀼𑀝𑁆𑀞𑀺𑀢𑁄 𑀯𑀺𑀬 𑀭𑁄𑀕𑁄 𑀅𑀢𑁂𑀓𑀺𑀘𑁆𑀙𑁄 𑀳𑁄𑀢𑀺. 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦𑁂𑀯 𑀓𑀼𑀲𑀮𑀁 𑀳𑁄𑀢𑀻𑀢𑀺 𑀅𑀢𑀺𑀥𑀸𑀯𑀺𑀢𑁆𑀯𑀸 𑀤𑀸𑀦𑀸𑀤𑀻𑀦𑀺 𑀅𑀓𑀭𑁄𑀦𑁆𑀢𑁄 𑀦𑀺𑀭𑀬𑁂 𑀉𑀧𑁆𑀧𑀚𑁆𑀚𑀢𑀺. 𑀉𑀪𑀺𑀦𑁆𑀦𑀁 𑀲𑀫𑀢𑀸𑀬 𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 𑀧𑀲𑀻𑀤𑀢𑀺. 𑀩𑀮𑀯𑀲𑀫𑀸𑀥𑀺𑀁 𑀧𑀦 𑀫𑀦𑁆𑀤𑀯𑀻𑀭𑀺𑀬𑀁 𑀲𑀫𑀸𑀥𑀺𑀲𑁆𑀲 𑀓𑁄𑀲𑀚𑁆𑀚𑀧𑀓𑁆𑀔𑀢𑁆𑀢𑀸 𑀓𑁄𑀲𑀚𑁆𑀚𑀁 𑀅𑀪𑀺𑀪𑀯𑀢𑀺. 𑀩𑀮𑀯𑀯𑀻𑀭𑀺𑀬𑀁 𑀫𑀦𑁆𑀤𑀲𑀫𑀸𑀥𑀺𑀁 𑀯𑀻𑀭𑀺𑀬𑀲𑁆𑀲 𑀉𑀤𑁆𑀥𑀘𑁆𑀘𑀧𑀓𑁆𑀔𑀢𑁆𑀢𑀸 𑀉𑀤𑁆𑀥𑀘𑁆𑀘𑀁 𑀅𑀪𑀺𑀪𑀯𑀢𑀺. 𑀲𑀫𑀸𑀥𑀺 𑀧𑀦 𑀯𑀻𑀭𑀺𑀬𑁂𑀦 𑀲𑀁𑀬𑁄𑀚𑀺𑀢𑁄 𑀓𑁄𑀲𑀚𑁆𑀚𑁂 𑀧𑀢𑀺𑀢𑀼𑀁 𑀦 𑀮𑀪𑀢𑀺, 𑀯𑀻𑀭𑀺𑀬𑀁 𑀲𑀫𑀸𑀥𑀺𑀦𑀸 𑀲𑀁𑀬𑁄𑀚𑀺𑀢𑀁 𑀉𑀤𑁆𑀥𑀘𑁆𑀘𑁂 𑀧𑀢𑀺𑀢𑀼𑀁 𑀦 𑀮𑀪𑀢𑀺. 𑀢𑀲𑁆𑀫𑀸 𑀢𑀤𑀼𑀪𑀬𑀁 𑀲𑀫𑀁 𑀓𑀸𑀢𑀩𑁆𑀩𑀁. 𑀉𑀪𑀬𑀲𑀫𑀢𑀸𑀬 𑀳𑀺 𑀅𑀧𑁆𑀧𑀦𑀸 𑀳𑁄𑀢𑀺.

𑀅𑀧𑀺 𑀘 𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲 𑀩𑀮𑀯𑀢𑀻𑀧𑀺 𑀲𑀤𑁆𑀥𑀸 𑀯𑀝𑁆𑀝𑀢𑀺. 𑀏𑀯𑀁 𑀲𑀤𑁆𑀤𑀳𑀦𑁆𑀢𑁄 𑀑𑀓𑀧𑁆𑀧𑁂𑀦𑁆𑀢𑁄 𑀅𑀧𑁆𑀧𑀦𑀁 𑀧𑀸𑀧𑀼𑀡𑀺𑀲𑁆𑀲𑀢𑀺. 𑀲𑀫𑀸𑀥𑀺𑀧𑀜𑁆𑀜𑀸𑀲𑀼 𑀧𑀦 𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲 𑀏𑀓𑀕𑁆𑀕𑀢𑀸 𑀩𑀮𑀯𑀢𑀻 𑀯𑀝𑁆𑀝𑀢𑀺. 𑀏𑀯𑀜𑁆𑀳𑀺 𑀲𑁄 𑀅𑀧𑁆𑀧𑀦𑀁 𑀧𑀸𑀧𑀼𑀡𑀸𑀢𑀺. 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀺𑀓𑀲𑁆𑀲 𑀧𑀜𑁆𑀜𑀸 𑀩𑀮𑀯𑀢𑀻 𑀯𑀝𑁆𑀝𑀢𑀺. 𑀏𑀯𑀜𑁆𑀳𑀺 𑀲𑁄 𑀮𑀓𑁆𑀔𑀡𑀧𑀝𑀺𑀯𑁂𑀥𑀁 𑀧𑀸𑀧𑀼𑀡𑀸𑀢𑀺. 𑀉𑀪𑀺𑀦𑁆𑀦𑀁 𑀧𑀦 𑀲𑀫𑀢𑀸𑀬𑀧𑀺 𑀅𑀧𑁆𑀧𑀦𑀸 𑀳𑁄𑀢𑀺𑀬𑁂𑀯. 𑀲𑀢𑀺 𑀧𑀦 𑀲𑀩𑁆𑀩𑀢𑁆𑀣 𑀩𑀮𑀯𑀢𑀻 𑀯𑀝𑁆𑀝𑀢𑀺. 𑀲𑀢𑀺 𑀳𑀺 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀸𑀦𑀁 𑀲𑀤𑁆𑀥𑀸𑀯𑀻𑀭𑀺𑀬𑀧𑀜𑁆𑀜𑀸𑀦𑀁 𑀯𑀲𑁂𑀦 𑀉𑀤𑁆𑀥𑀘𑁆𑀘𑀧𑀸𑀢𑀢𑁄, 𑀓𑁄𑀲𑀚𑁆𑀚𑀧𑀓𑁆𑀔𑀺𑀓𑁂𑀦 𑀘 𑀲𑀫𑀸𑀥𑀺𑀦𑀸 𑀓𑁄𑀲𑀚𑁆𑀚𑀧𑀸𑀢𑀢𑁄 𑀭𑀓𑁆𑀔𑀢𑀺. 𑀢𑀲𑁆𑀫𑀸 𑀲𑀸 𑀮𑁄𑀡𑀥𑀽𑀧𑀦𑀁 𑀯𑀺𑀬 𑀲𑀩𑁆𑀩𑀩𑁆𑀬𑀜𑁆𑀚𑀦𑁂𑀲𑀼, 𑀲𑀩𑁆𑀩𑀓𑀫𑁆𑀫𑀺𑀓𑀅𑀫𑀘𑁆𑀘𑁄 𑀯𑀺𑀬 𑀘 𑀲𑀩𑁆𑀩𑀭𑀸𑀚𑀓𑀺𑀘𑁆𑀘𑁂𑀲𑀼 𑀲𑀩𑁆𑀩𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑀸. 𑀢𑁂𑀦𑀸𑀳 ‘‘𑀲𑀢𑀺 𑀘 𑀧𑀦 𑀲𑀩𑁆𑀩𑀢𑁆𑀣𑀺𑀓𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸. 𑀓𑀺𑀁 𑀓𑀸𑀭𑀡𑀸? 𑀘𑀺𑀢𑁆𑀢𑀜𑁆𑀳𑀺 𑀲𑀢𑀺𑀧𑀝𑀺𑀲𑀭𑀡𑀁, 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀘 𑀲𑀢𑀺, 𑀦 𑀯𑀺𑀦𑀸 𑀲𑀢𑀺𑀬𑀸 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀳𑀦𑀺𑀕𑁆𑀕𑀳𑁄 𑀳𑁄𑀢𑀻’’𑀢𑀺.

𑀤𑀼𑀧𑁆𑀧𑀜𑁆𑀜𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸 𑀦𑀸𑀫 𑀔𑀦𑁆𑀥𑀸𑀤𑀺𑀪𑁂𑀤𑁂 𑀅𑀦𑁄𑀕𑀸𑀴𑁆𑀳𑀧𑀜𑁆𑀜𑀸𑀦𑀁 𑀤𑀼𑀫𑁆𑀫𑁂𑀥𑀧𑀼𑀕𑁆𑀕𑀮𑀸𑀦𑀁 𑀆𑀭𑀓𑀸 𑀧𑀭𑀺𑀯𑀚𑁆𑀚𑀦𑀁. 𑀧𑀜𑁆𑀜𑀯𑀦𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀸 𑀦𑀸𑀫 𑀲𑀫𑀧𑀜𑁆𑀜𑀸𑀲𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀺𑀓𑀸𑀬 𑀉𑀤𑀬𑀩𑁆𑀩𑀬𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀧𑀼𑀕𑁆𑀕𑀮𑀲𑁂𑀯𑀦𑀸. 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀧𑀘𑁆𑀘𑀯𑁂𑀓𑁆𑀔𑀡𑀸 𑀦𑀸𑀫 𑀕𑀫𑁆𑀪𑀻𑀭𑁂𑀲𑀼 𑀔𑀦𑁆𑀥𑀸𑀤𑀻𑀲𑀼 𑀧𑀯𑀢𑁆𑀢𑀸𑀬 𑀕𑀫𑁆𑀪𑀻𑀭𑀧𑀜𑁆𑀜𑀸𑀬 𑀧𑀪𑁂𑀤𑀧𑀘𑁆𑀘𑀯𑁂𑀓𑁆𑀔𑀡𑀸. 𑀢𑀤𑀥𑀺𑀫𑀼𑀢𑁆𑀢𑀢𑀸 𑀦𑀸𑀫 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀢𑀸. 𑀏𑀯𑀁 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀻 𑀳𑁄𑀢𑀺.

𑀏𑀓𑀸𑀤𑀲 𑀥𑀫𑁆𑀫𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀅𑀧𑀸𑀬𑀪𑀬𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸, 𑀕𑀫𑀦𑀯𑀻𑀣𑀺𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀧𑀺𑀡𑁆𑀟𑀧𑀸𑀢𑀸𑀧𑀘𑀸𑀬𑀦𑀢𑀸, 𑀤𑀸𑀬𑀚𑁆𑀚𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀲𑀢𑁆𑀣𑀼𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀚𑀸𑀢𑀺𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀲𑀩𑁆𑀭𑀳𑁆𑀫𑀘𑀸𑀭𑀺𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀓𑀼𑀲𑀻𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀆𑀭𑀤𑁆𑀥𑀯𑀻𑀭𑀺𑀬𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺.

𑀢𑀢𑁆𑀣 ‘‘𑀦𑀺𑀭𑀬𑁂𑀲𑀼 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀓𑀫𑁆𑀫𑀓𑀸𑀭𑀡𑀢𑁄 𑀧𑀝𑁆𑀞𑀸𑀬 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑀓𑀸𑀮𑁂𑀧𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀁 𑀚𑀸𑀮𑀔𑀺𑀧𑀦𑀓𑀼𑀫𑀻𑀦𑀸𑀤𑀻𑀳𑀺 𑀕𑀳𑀺𑀢𑀓𑀸𑀮𑁂𑀧𑀺, 𑀧𑀸𑀚𑀦𑀓𑀡𑁆𑀝𑀓𑀸𑀤𑀺𑀧𑁆𑀧𑀳𑀸𑀭𑀢𑀼𑀦𑁆𑀦𑀲𑁆𑀲 𑀧𑀦 𑀲𑀓𑀝𑀯𑀳𑀦𑀸𑀤𑀺𑀓𑀸𑀮𑁂𑀧𑀺, 𑀧𑁂𑀢𑁆𑀢𑀺𑀯𑀺𑀲𑀬𑁂 𑀅𑀦𑁂𑀓𑀸𑀦𑀺𑀧𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀫𑁆𑀧𑀺 𑀔𑀼𑀧𑁆𑀧𑀺𑀧𑀸𑀲𑀸𑀳𑀺 𑀆𑀢𑀼𑀭𑀻𑀪𑀽𑀢𑀓𑀸𑀮𑁂𑀧𑀺, 𑀓𑀸𑀮𑀓𑀜𑁆𑀘𑀺𑀓𑀅𑀲𑀼𑀭𑁂𑀲𑀼 𑀲𑀝𑁆𑀞𑀺𑀳𑀢𑁆𑀣𑀅𑀲𑀻𑀢𑀺𑀳𑀢𑁆𑀣𑀧𑁆𑀧𑀫𑀸𑀡𑁂𑀦 𑀅𑀝𑁆𑀞𑀺𑀘𑀫𑁆𑀫𑀫𑀢𑁆𑀢𑁂𑀦𑁂𑀯 𑀅𑀢𑁆𑀢𑀪𑀸𑀯𑁂𑀦 𑀯𑀸𑀢𑀸𑀢𑀧𑀸𑀤𑀺𑀤𑀼𑀓𑁆𑀔𑀸𑀦𑀼𑀪𑀯𑀦𑀓𑀸𑀮𑁂𑀧𑀺 𑀦 𑀲𑀓𑁆𑀓𑀸 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀉𑀧𑁆𑀧𑀸𑀤𑁂𑀢𑀼𑀁. 𑀅𑀬𑀫𑁂𑀯 𑀢𑁂 𑀪𑀺𑀓𑁆𑀔𑀼 𑀓𑀸𑀮𑁄’’𑀢𑀺 𑀏𑀯𑀁 𑀅𑀧𑀸𑀬𑀪𑀬𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀺.

‘‘𑀦 𑀲𑀓𑁆𑀓𑀸 𑀓𑀼𑀲𑀻𑀢𑁂𑀦 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀮𑀤𑁆𑀥𑀼𑀁, 𑀆𑀭𑀤𑁆𑀥𑀯𑀻𑀭𑀺𑀬𑁂𑀦𑁂𑀯 𑀲𑀓𑁆𑀓𑀸 𑀅𑀬𑀫𑀸𑀦𑀺𑀲𑀁𑀲𑁄 𑀯𑀻𑀭𑀺𑀬𑀲𑁆𑀲𑀸’’𑀢𑀺 𑀏𑀯𑀁 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀦𑁄𑀧𑀺 𑀉𑀧𑁆𑀧𑀚𑁆𑀚𑀢𑀺. ‘‘𑀲𑀩𑁆𑀩𑀩𑀼𑀤𑁆𑀥-𑀧𑀘𑁆𑀘𑁂𑀓𑀩𑀼𑀤𑁆𑀥-𑀫𑀳𑀸𑀲𑀸𑀯𑀓𑁂𑀳𑁂𑀯 𑀕𑀢𑀫𑀕𑁆𑀕𑁄 𑀢𑁂 𑀕𑀦𑁆𑀢𑀩𑁆𑀩𑁄. 𑀲𑁄 𑀘 𑀦 𑀲𑀓𑁆𑀓𑀸 𑀓𑀼𑀲𑀻𑀢𑁂𑀦 𑀕𑀦𑁆𑀢𑀼’’𑀦𑁆𑀢𑀺 𑀏𑀯𑀁 𑀕𑀫𑀦𑀯𑀻𑀣𑀺𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀬𑁂 𑀢𑀁 𑀧𑀺𑀡𑁆𑀟𑀧𑀸𑀢𑀸𑀤𑀻𑀳𑀺 𑀉𑀧𑀝𑁆𑀞𑀳𑀦𑁆𑀢𑀺, 𑀇𑀫𑁂 𑀢𑁂 𑀫𑀦𑀼𑀲𑁆𑀲𑀸 𑀦𑁂𑀯 𑀜𑀸𑀢𑀓𑀸, 𑀦 𑀤𑀸𑀲𑀓𑀫𑁆𑀫𑀓𑀭𑀸, 𑀦𑀸𑀧𑀺 ‘𑀢𑀁 𑀦𑀺𑀲𑁆𑀲𑀸𑀬 𑀚𑀻𑀯𑀺𑀲𑁆𑀲𑀸𑀫𑀸’𑀢𑀺 𑀢𑁂 𑀧𑀡𑀻𑀢𑀸𑀦𑀺 𑀧𑀺𑀡𑁆𑀟𑀧𑀸𑀢𑀸𑀤𑀻𑀦𑀺 𑀤𑁂𑀦𑁆𑀢𑀺. 𑀅𑀣 𑀔𑁄 𑀅𑀢𑁆𑀢𑀦𑁄 𑀓𑀸𑀭𑀸𑀦𑀁 𑀫𑀳𑀧𑁆𑀨𑀮𑀢𑀁 𑀧𑀘𑁆𑀘𑀸𑀲𑀻𑀲𑀫𑀸𑀦𑀸 𑀤𑁂𑀦𑁆𑀢𑀺. 𑀲𑀢𑁆𑀣𑀸𑀭𑀸𑀧𑀺 ‘‘𑀅𑀬𑀁 𑀇𑀫𑁂 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀓𑀸𑀬𑀤𑀴𑁆𑀳𑀺𑀩𑀳𑀼𑀮𑁄 𑀲𑀼𑀔𑀁 𑀯𑀺𑀳𑀭𑀺𑀲𑁆𑀲𑀢𑀻’’𑀢𑀺 𑀦 𑀏𑀯𑀁 𑀲𑀫𑁆𑀧𑀲𑁆𑀲𑀢𑀸 𑀢𑀼𑀬𑁆𑀳𑀁 𑀧𑀘𑁆𑀘𑀬𑀸 𑀅𑀦𑀼𑀜𑁆𑀜𑀸𑀢𑀸, 𑀅𑀣 𑀔𑁄 ‘‘𑀅𑀬𑀁 𑀇𑀫𑁂 𑀧𑀭𑀺𑀪𑀼𑀜𑁆𑀚𑀫𑀸𑀦𑁄𑀯 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀯𑀝𑁆𑀝𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑀺𑀲𑁆𑀲𑀢𑀻’𑀢𑀺 𑀢𑁂 𑀧𑀘𑁆𑀘𑀬𑀸 𑀅𑀦𑀼𑀜𑁆𑀜𑀸𑀢𑀸, 𑀲𑁄 𑀤𑀸𑀦𑀺 𑀢𑁆𑀯𑀁 𑀓𑀼𑀲𑀻𑀢𑁄 𑀯𑀺𑀳𑀭𑀦𑁆𑀢𑁄 𑀦 𑀢𑀁 𑀧𑀺𑀡𑁆𑀟𑀁 𑀅𑀧𑀘𑀸𑀬𑀺𑀲𑁆𑀲𑀲𑀺, 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲𑁂𑀯 𑀳𑀺 𑀧𑀺𑀡𑁆𑀟𑀧𑀸𑀢𑀸𑀧𑀘𑀸𑀬𑀦𑀁 𑀦𑀸𑀫 𑀳𑁄𑀢𑀻’’𑀢𑀺 𑀏𑀯𑀁 𑀧𑀺𑀡𑁆𑀟𑀧𑀸𑀢𑀸𑀧𑀘𑀸𑀬𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺 𑀫𑀳𑀸𑀫𑀺𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀺𑀬.

𑀣𑁂𑀭𑁄 𑀓𑀺𑀭 𑀓𑀲𑁆𑀲𑀓𑀮𑁂𑀡𑁂 𑀦𑀸𑀫 𑀧𑀝𑀺𑀯𑀲𑀢𑀺. 𑀢𑀲𑁆𑀲𑁂𑀯 𑀕𑁄𑀘𑀭𑀕𑀸𑀫𑁂 𑀏𑀓𑀸 𑀫𑀳𑀸𑀉𑀧𑀸𑀲𑀺𑀓𑀸 𑀣𑁂𑀭𑀁 𑀧𑀼𑀢𑁆𑀢𑀁 𑀓𑀢𑁆𑀯𑀸 𑀧𑀝𑀺𑀚𑀕𑁆𑀕𑀢𑀺. 𑀲𑀸 𑀏𑀓𑀤𑀺𑀯𑀲𑀁 𑀅𑀭𑀜𑁆𑀜𑀁 𑀕𑀘𑁆𑀙𑀦𑁆𑀢𑀻 𑀥𑀻𑀢𑀭𑀁 𑀆𑀳 𑁋 ‘‘𑀅𑀫𑁆𑀫, 𑀅𑀲𑀼𑀓𑀲𑁆𑀫𑀺𑀁 𑀞𑀸𑀦𑁂 𑀧𑀼𑀭𑀸𑀡𑀢𑀡𑁆𑀟𑀼𑀮𑀸, 𑀅𑀲𑀼𑀓𑀲𑁆𑀫𑀺𑀁 𑀔𑀻𑀭𑀁, 𑀅𑀲𑀼𑀓𑀲𑁆𑀫𑀺𑀁 𑀲𑀧𑁆𑀧𑀺, 𑀅𑀲𑀼𑀓𑀲𑁆𑀫𑀺𑀁 𑀨𑀸𑀡𑀺𑀢𑀁, 𑀢𑀯 𑀪𑀸𑀢𑀺𑀓𑀲𑁆𑀲 𑀅𑀬𑁆𑀬𑀫𑀺𑀢𑁆𑀢𑀲𑁆𑀲 𑀆𑀕𑀢𑀓𑀸𑀮𑁂 𑀪𑀢𑁆𑀢𑀁 𑀧𑀘𑀺𑀢𑁆𑀯𑀸 𑀔𑀻𑀭𑀲𑀧𑁆𑀧𑀺𑀨𑀸𑀡𑀺𑀢𑁂𑀳𑀺 𑀲𑀤𑁆𑀥𑀺𑀁 𑀤𑁂𑀳𑀺, 𑀢𑁆𑀯𑀜𑁆𑀘 𑀪𑀼𑀜𑁆𑀚𑁂𑀬𑁆𑀬𑀸𑀲𑀺, 𑀅𑀳𑀁 𑀧𑀦 𑀳𑀺𑀬𑁆𑀬𑁄 𑀧𑀓𑁆𑀓𑀁 𑀧𑀸𑀭𑀺𑀯𑀸𑀲𑀺𑀓𑀪𑀢𑁆𑀢𑀁 𑀓𑀜𑁆𑀚𑀺𑀬𑁂𑀦 𑀪𑀼𑀢𑁆𑀢𑀸𑀫𑁆𑀳𑀻’’𑀢𑀺. ‘‘𑀤𑀺𑀯𑀸 𑀓𑀺𑀁 𑀪𑀼𑀜𑁆𑀚𑀺𑀲𑁆𑀲𑀲𑀺, 𑀅𑀫𑁆𑀫𑀸’’𑀢𑀺? ‘‘𑀲𑀸𑀓𑀧𑀡𑁆𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀡𑀢𑀡𑁆𑀟𑀼𑀮𑁂𑀳𑀺 𑀅𑀫𑁆𑀩𑀺𑀮𑀬𑀸𑀕𑀼𑀁 𑀧𑀘𑀺𑀢𑁆𑀯𑀸 𑀞𑀧𑁂𑀳𑀺, 𑀅𑀫𑁆𑀫𑀸’’𑀢𑀺.

𑀣𑁂𑀭𑁄 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀧𑀢𑁆𑀢𑀁 𑀦𑀻𑀳𑀭𑀦𑁆𑀢𑁄𑀯 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸 𑀅𑀢𑁆𑀢𑀸𑀦𑀁 𑀑𑀯𑀤𑀺 ‘‘𑀫𑀳𑀸𑀉𑀧𑀸𑀲𑀺𑀓𑀸 𑀓𑀺𑀭 𑀓𑀜𑁆𑀚𑀺𑀬𑁂𑀦 𑀧𑀸𑀭𑀺𑀯𑀸𑀲𑀺𑀓𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑁆𑀯𑀸 𑀤𑀺𑀯𑀸𑀧𑀺 𑀓𑀡𑀧𑀡𑁆𑀡𑀫𑁆𑀩𑀺𑀮𑀬𑀸𑀕𑀼𑀁 𑀪𑀼𑀜𑁆𑀚𑀺𑀲𑁆𑀲𑀢𑀺, 𑀢𑀼𑀬𑁆𑀳𑀁 𑀅𑀢𑁆𑀣𑀸𑀬 𑀧𑀦 𑀧𑀼𑀭𑀸𑀡𑀢𑀡𑁆𑀟𑀼𑀮𑀸𑀤𑀻𑀦𑀺 𑀆𑀘𑀺𑀓𑁆𑀔𑀢𑀺, 𑀢𑀁 𑀦𑀺𑀲𑁆𑀲𑀸𑀬 𑀔𑁄 𑀧𑀦𑁂𑀲𑀸 𑀦𑁂𑀯 𑀔𑁂𑀢𑁆𑀢𑀁 𑀦 𑀯𑀢𑁆𑀣𑀼𑀁 𑀦 𑀪𑀢𑁆𑀢𑀁 𑀦 𑀯𑀢𑁆𑀣𑀁 𑀧𑀘𑁆𑀘𑀸𑀲𑀻𑀲𑀢𑀺, 𑀢𑀺𑀲𑁆𑀲𑁄 𑀧𑀦 𑀲𑀫𑁆𑀧𑀢𑁆𑀢𑀺𑀬𑁄 𑀧𑀢𑁆𑀣𑀬𑀫𑀸𑀦𑀸 𑀤𑁂𑀢𑀺, 𑀢𑁆𑀯𑀁 𑀏𑀢𑀺𑀲𑁆𑀲𑀸 𑀢𑀸 𑀲𑀫𑁆𑀧𑀢𑁆𑀢𑀺𑀬𑁄 𑀤𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀦 𑀲𑀓𑁆𑀔𑀺𑀲𑁆𑀲𑀲𑀻𑀢𑀺, 𑀅𑀬𑀁 𑀔𑁄 𑀧𑀦 𑀧𑀺𑀡𑁆𑀟𑀧𑀸𑀢𑁄 𑀢𑀬𑀸 𑀲𑀭𑀸𑀕𑁂𑀦 𑀲𑀤𑁄𑀲𑁂𑀦 𑀲𑀫𑁄𑀳𑁂𑀦 𑀦 𑀲𑀓𑁆𑀓𑀸 𑀕𑀡𑁆𑀳𑀺𑀢𑀼’’𑀦𑁆𑀢𑀺 𑀧𑀢𑁆𑀢𑀁 𑀣𑀯𑀺𑀓𑀸𑀬 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀞𑀺𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑁆𑀯𑀸 𑀓𑀲𑁆𑀲𑀓𑀮𑁂𑀡𑀫𑁂𑀯 𑀕𑀦𑁆𑀢𑁆𑀯𑀸 𑀧𑀢𑁆𑀢𑀁 𑀳𑁂𑀝𑁆𑀞𑀸𑀫𑀜𑁆𑀘𑁂, 𑀘𑀻𑀯𑀭𑀁 𑀘𑀻𑀯𑀭𑀯𑀁𑀲𑁂 𑀞𑀧𑁂𑀢𑁆𑀯𑀸 ‘‘𑀅𑀭𑀳𑀢𑁆𑀢𑀁 𑀅𑀧𑀸𑀧𑀼𑀡𑀺𑀢𑁆𑀯𑀸 𑀦 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀻’’𑀢𑀺 𑀯𑀻𑀭𑀺𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀤𑀻𑀖𑀭𑀢𑁆𑀢𑀁 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀦𑀺𑀯𑀼𑀢𑁆𑀣𑀪𑀺𑀓𑁆𑀔𑀼 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀧𑀼𑀭𑁂𑀪𑀢𑁆𑀢𑀫𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀯𑀺𑀓𑀲𑀫𑀸𑀦𑀫𑀺𑀯 𑀧𑀤𑀼𑀫𑀁 𑀫𑀳𑀸𑀔𑀻𑀡𑀸𑀲𑀯𑁄 𑀲𑀺𑀢𑀁 𑀓𑀭𑁄𑀦𑁆𑀢𑁄𑀯 𑀦𑀺𑀓𑁆𑀔𑀫𑀺. 𑀮𑁂𑀡𑀤𑁆𑀯𑀸𑀭𑁂 𑀭𑀼𑀓𑁆𑀔𑀫𑁆𑀳𑀺 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑁋

‘‘𑀦𑀫𑁄 𑀢𑁂 𑀧𑀼𑀭𑀺𑀲𑀸𑀚𑀜𑁆𑀜, 𑀦𑀫𑁄 𑀢𑁂 𑀧𑀼𑀭𑀺𑀲𑀼𑀢𑁆𑀢𑀫;

𑀬𑀲𑁆𑀲 𑀢𑁂 𑀆𑀲𑀯𑀸 𑀔𑀻𑀡𑀸, 𑀤𑀓𑁆𑀔𑀺𑀡𑁂𑀬𑁆𑀬𑁄𑀲𑀺 𑀫𑀸𑀭𑀺𑀲𑀸’’𑀢𑀺. 𑁋

𑀉𑀤𑀸𑀦𑀁 𑀉𑀤𑀸𑀦𑁂𑀢𑁆𑀯𑀸 ‘‘𑀪𑀦𑁆𑀢𑁂, 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀸𑀦𑀁 𑀢𑀼𑀫𑁆𑀳𑀸𑀤𑀺𑀲𑀸𑀦𑀁 𑀅𑀭𑀳𑀦𑁆𑀢𑀸𑀦𑀁 𑀪𑀺𑀓𑁆𑀔𑀁 𑀤𑀢𑁆𑀯𑀸 𑀫𑀳𑀮𑁆𑀮𑀓𑀺𑀢𑁆𑀣𑀺𑀬𑁄 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀲𑁆𑀲𑀦𑁆𑀢𑀻’’𑀢𑀺 𑀆𑀳. 𑀣𑁂𑀭𑁄 𑀉𑀝𑁆𑀞𑀳𑀺𑀢𑁆𑀯𑀸 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀓𑀸𑀮𑀁 𑀑𑀮𑁄𑀓𑁂𑀦𑁆𑀢𑁄 ‘‘𑀧𑀸𑀢𑁄𑀬𑁂𑀯𑀸’’𑀢𑀺 𑀜𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀁 𑀆𑀤𑀸𑀬 𑀕𑀸𑀫𑀁 𑀧𑀸𑀯𑀺𑀲𑀺.

𑀤𑀸𑀭𑀺𑀓𑀸𑀧𑀺 𑀪𑀢𑁆𑀢𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 ‘‘𑀇𑀤𑀸𑀦𑀺 𑀫𑁂 𑀪𑀸𑀢𑀸 𑀆𑀕𑀫𑀺𑀲𑁆𑀲𑀢𑀺, 𑀇𑀤𑀸𑀦𑀺 𑀆𑀕𑀫𑀺𑀲𑁆𑀲𑀢𑀻’’𑀢𑀺 𑀤𑁆𑀯𑀸𑀭𑀁 𑀑𑀮𑁄𑀓𑀬𑀫𑀸𑀦𑀸 𑀦𑀺𑀲𑀻𑀤𑀺. 𑀲𑀸 𑀣𑁂𑀭𑁂 𑀖𑀭𑀤𑁆𑀯𑀸𑀭𑀁 𑀲𑀫𑁆𑀧𑀢𑁆𑀢𑁂 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀲𑀧𑁆𑀧𑀺𑀨𑀸𑀡𑀺𑀢𑀬𑁄𑀚𑀺𑀢𑀲𑁆𑀲 𑀔𑀻𑀭𑀧𑀺𑀡𑁆𑀟𑀧𑀸𑀢𑀲𑁆𑀲 𑀧𑀽𑀭𑁂𑀢𑁆𑀯𑀸 𑀳𑀢𑁆𑀣𑁂 𑀞𑀧𑁂𑀲𑀺. 𑀣𑁂𑀭𑁄 ‘‘𑀲𑀼𑀔𑀁 𑀳𑁄𑀢𑀽’’𑀢𑀺 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀲𑀸𑀧𑀺 𑀢𑀁 𑀑𑀮𑁄𑀓𑀬𑀫𑀸𑀦𑀸𑀯 𑀅𑀝𑁆𑀞𑀸𑀲𑀺. 𑀣𑁂𑀭𑀲𑁆𑀲 𑀳𑀺 𑀢𑀤𑀸 𑀅𑀢𑀺𑀯𑀺𑀬 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄 𑀅𑀳𑁄𑀲𑀺, 𑀯𑀺𑀧𑁆𑀧𑀲𑀦𑁆𑀦𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺, 𑀫𑀼𑀔𑀁 𑀩𑀦𑁆𑀥𑀦𑀸 𑀫𑀼𑀢𑁆𑀢𑀢𑀸𑀮𑀧𑀓𑁆𑀓𑀁 𑀯𑀺𑀬 𑀅𑀢𑀺𑀯𑀺𑀬 𑀯𑀺𑀭𑁄𑀘𑀺𑀢𑁆𑀣.

𑀫𑀳𑀸𑀉𑀧𑀸𑀲𑀺𑀓𑀸 𑀅𑀭𑀜𑁆𑀜𑀢𑁄 𑀆𑀕𑀦𑁆𑀢𑁆𑀯𑀸 ‘‘𑀓𑀺𑀁, 𑀅𑀫𑁆𑀫, 𑀪𑀸𑀢𑀺𑀓𑁄 𑀢𑁂 𑀆𑀕𑀢𑁄’’𑀢𑀺 𑀧𑀼𑀘𑁆𑀙𑀺. 𑀲𑀸 𑀲𑀩𑁆𑀩𑀁 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀉𑀧𑀸𑀲𑀺𑀓𑀸 ‘‘𑀅𑀚𑁆𑀚 𑀫𑁂 𑀧𑀼𑀢𑁆𑀢𑀲𑁆𑀲 𑀧𑀩𑁆𑀩𑀚𑀺𑀢𑀓𑀺𑀘𑁆𑀘𑀁 𑀫𑀢𑁆𑀣𑀓𑀁 𑀧𑀢𑁆𑀢’’𑀦𑁆𑀢𑀺 𑀜𑀢𑁆𑀯𑀸 ‘‘𑀅𑀪𑀺𑀭𑀫𑀢𑀺 𑀢𑁂, 𑀅𑀫𑁆𑀫, 𑀪𑀸𑀢𑀸 𑀩𑀼𑀤𑁆𑀥𑀲𑀸𑀲𑀦𑁂, 𑀦 𑀉𑀓𑁆𑀓𑀡𑁆𑀞𑀢𑀻’’𑀢𑀺 𑀆𑀳.

‘‘𑀫𑀳𑀦𑁆𑀢𑀁 𑀔𑁄 𑀧𑀦𑁂𑀢𑀁 𑀲𑀢𑁆𑀣𑀼𑀤𑀸𑀬𑀚𑁆𑀚𑀁, 𑀬𑀤𑀺𑀤𑀁 𑀲𑀢𑁆𑀢 𑀅𑀭𑀺𑀬𑀥𑀦𑀸𑀦𑀺 𑀦𑀸𑀫, 𑀢𑀁 𑀦 𑀲𑀓𑁆𑀓𑀸 𑀓𑀼𑀲𑀻𑀢𑁂𑀦 𑀕𑀳𑁂𑀢𑀼𑀁. 𑀬𑀣𑀸 𑀳𑀺 𑀯𑀺𑀧𑁆𑀧𑀝𑀺𑀧𑀦𑁆𑀦𑀁 𑀧𑀼𑀢𑁆𑀢𑀁 𑀫𑀸𑀢𑀸𑀧𑀺𑀢𑀭𑁄 ‘𑀅𑀬𑀁 𑀅𑀫𑁆𑀳𑀸𑀓𑀁 𑀅𑀧𑀼𑀢𑁆𑀢𑁄’𑀢𑀺 𑀧𑀭𑀺𑀩𑀸𑀳𑀺𑀭𑀁 𑀓𑀭𑁄𑀦𑁆𑀢𑀺, 𑀲𑁄 𑀢𑁂𑀲𑀁 𑀅𑀘𑁆𑀘𑀬𑁂𑀦 𑀤𑀸𑀬𑀚𑁆𑀚𑀁 𑀦 𑀮𑀪𑀢𑀺, 𑀏𑀯𑀁 𑀓𑀼𑀲𑀻𑀢𑁄𑀧𑀺 𑀇𑀤𑀁 𑀅𑀭𑀺𑀬𑀥𑀦𑀤𑀸𑀬𑀚𑁆𑀚𑀁 𑀦 𑀮𑀪𑀢𑀺, 𑀆𑀭𑀤𑁆𑀥𑀯𑀻𑀭𑀺𑀬𑁄𑀯 𑀮𑀪𑀢𑀻’’𑀢𑀺 𑀤𑀸𑀬𑀚𑁆𑀚𑀫𑀳𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀫𑀳𑀸 𑀔𑁄 𑀧𑀦 𑀢𑁂 𑀲𑀢𑁆𑀣𑀸, 𑀲𑀢𑁆𑀣𑀼𑀦𑁄 𑀳𑀺 𑀢𑁂 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀁 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀓𑀸𑀮𑁂𑀧𑀺 𑀅𑀪𑀺𑀦𑀺𑀓𑁆𑀔𑀫𑀦𑁂𑀧𑀺 𑀅𑀪𑀺𑀲𑀫𑁆𑀩𑁄𑀥𑀺𑀬𑀫𑁆𑀧𑀺 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦-𑀬𑀫𑀓𑀧𑀸𑀝𑀺𑀳𑀸𑀭𑀺𑀬-𑀤𑁂𑀯𑁄𑀭𑁄𑀳𑀦-𑀆𑀬𑀼𑀲𑀗𑁆𑀔𑀸𑀭𑀯𑁄𑀲𑁆𑀲𑀚𑁆𑀚𑀦𑁂𑀲𑀼𑀧𑀺 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂𑀧𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀅𑀓𑀫𑁆𑀧𑀺𑀢𑁆𑀣. 𑀬𑀼𑀢𑁆𑀢𑀁 𑀦𑀼 𑀔𑁄 𑀢𑁂 𑀏𑀯𑀭𑀽𑀧𑀲𑁆𑀲 𑀲𑀢𑁆𑀣𑀼 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀓𑀼𑀲𑀻𑀢𑁂𑀦 𑀪𑀯𑀺𑀢𑀼’’𑀦𑁆𑀢𑀺 𑀏𑀯𑀁 𑀲𑀢𑁆𑀣𑀼𑀫𑀳𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀚𑀸𑀢𑀺𑀬𑀸𑀧𑀺 𑀢𑁆𑀯𑀁 𑀇𑀤𑀸𑀦𑀺 𑀦 𑀮𑀸𑀫𑀓𑀚𑀸𑀢𑀺𑀓𑁄, 𑀅𑀲𑀫𑁆𑀪𑀺𑀦𑁆𑀦𑀸𑀬 𑀫𑀳𑀸𑀲𑀫𑁆𑀫𑀢𑀧𑀯𑁂𑀡𑀺𑀬𑀸 𑀆𑀕𑀢𑀉𑀓𑁆𑀓𑀸𑀓𑀭𑀸𑀚𑀯𑀁𑀲𑁂 𑀚𑀸𑀢𑁄𑀲𑀺, 𑀲𑀼𑀤𑁆𑀥𑁄𑀤𑀦𑀫𑀳𑀸𑀭𑀸𑀚𑀲𑁆𑀲 𑀘 𑀫𑀳𑀸𑀫𑀸𑀬𑀸𑀤𑁂𑀯𑀺𑀬𑀸 𑀘 𑀦𑀢𑁆𑀢𑀸, 𑀭𑀸𑀳𑀼𑀮𑀪𑀤𑁆𑀤𑀲𑁆𑀲 𑀓𑀦𑀺𑀝𑁆𑀞𑁄, 𑀢𑀬𑀸 𑀦𑀸𑀫 𑀏𑀯𑀭𑀽𑀧𑁂𑀦 𑀚𑀺𑀦𑀧𑀼𑀢𑁆𑀢𑁂𑀦 𑀳𑀼𑀢𑁆𑀯𑀸 𑀦 𑀬𑀼𑀢𑁆𑀢𑀁 𑀓𑀼𑀲𑀻𑀢𑁂𑀦 𑀯𑀺𑀳𑀭𑀺𑀢𑀼’’𑀦𑁆𑀢𑀺 𑀏𑀯𑀁 𑀚𑀸𑀢𑀺𑀫𑀳𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺 𑀉𑀧𑁆𑀧𑀚𑁆𑀚𑀢𑀺.

‘‘𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀘𑁂𑀯 𑀅𑀲𑀻𑀢𑀺 𑀫𑀳𑀸𑀲𑀸𑀯𑀓𑀸 𑀘 𑀯𑀻𑀭𑀺𑀬𑁂𑀦𑁂𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀧𑀝𑀺𑀯𑀺𑀚𑁆𑀛𑀺𑀁𑀲𑀼. 𑀢𑁆𑀯𑀁 𑀧𑀦 𑀏𑀢𑁂𑀲𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀲𑀺, 𑀦 𑀧𑀝𑀺𑀧𑀚𑁆𑀚𑀲𑀻’’𑀢𑀺 𑀏𑀯𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀫𑀳𑀢𑁆𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺 𑀉𑀧𑁆𑀧𑀚𑁆𑀚𑀢𑀺.

𑀓𑀼𑀘𑁆𑀙𑀺𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑀅𑀚𑀕𑀭𑀲𑀤𑀺𑀲𑁂 𑀯𑀺𑀲𑁆𑀲𑀝𑁆𑀞𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑁂 𑀓𑀼𑀲𑀻𑀢𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑁂𑀦𑁆𑀢𑀲𑁆𑀲𑀸𑀧𑀺, 𑀆𑀭𑀤𑁆𑀥𑀯𑀻𑀭𑀺𑀬𑁂 𑀧𑀳𑀺𑀢𑀢𑁆𑀢𑁂 𑀧𑀼𑀕𑁆𑀕𑀮𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀯𑀻𑀭𑀺𑀬𑀼𑀧𑁆𑀧𑀸𑀤𑀦𑀢𑁆𑀣𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀻 𑀳𑁄𑀢𑀺.

𑀏𑀓𑀸𑀤𑀲 𑀥𑀫𑁆𑀫𑀸 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺 𑀥𑀫𑁆𑀫𑁄, 𑀲𑀗𑁆𑀖𑁄, 𑀲𑀻𑀮𑀁, 𑀘𑀸𑀕𑁄, 𑀤𑁂𑀯𑀢𑀸𑀦𑀼𑀲𑁆𑀲𑀢𑀺, 𑀉𑀧𑀲𑀫𑀸𑀦𑀼𑀲𑁆𑀲𑀢𑀺, 𑀮𑀽𑀔𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀲𑀺𑀦𑀺𑀤𑁆𑀥𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀦𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺.

𑀩𑀼𑀤𑁆𑀥𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲𑀸𑀧𑀺 𑀳𑀺 𑀬𑀸𑀯 𑀉𑀧𑀘𑀸𑀭𑀸 𑀲𑀓𑀮𑀲𑀭𑀻𑀭𑀁 𑀨𑀭𑀫𑀸𑀦𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀥𑀫𑁆𑀫𑀲𑀗𑁆𑀖𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲𑀸𑀧𑀺, 𑀤𑀻𑀖𑀭𑀢𑁆𑀢𑀁 𑀅𑀔𑀡𑁆𑀟𑀁 𑀓𑀢𑁆𑀯𑀸 𑀭𑀓𑁆𑀔𑀺𑀢𑀁 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀕𑀺𑀳𑀺𑀦𑁄 𑀤𑀲𑀲𑀻𑀮𑀧𑀜𑁆𑀘𑀲𑀻𑀮𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀤𑀼𑀩𑁆𑀪𑀺𑀓𑁆𑀔𑀪𑀬𑀸𑀤𑀻𑀲𑀼 𑀧𑀡𑀻𑀢𑀁 𑀪𑁄𑀚𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀤𑀢𑁆𑀯𑀸 ‘‘𑀏𑀯𑀁 𑀦𑀸𑀫 𑀅𑀤𑀫𑁆𑀳𑀸’’𑀢𑀺 𑀘𑀸𑀕𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀕𑀺𑀳𑀺𑀦𑁄𑀧𑀺 𑀏𑀯𑀭𑀽𑀧𑁂 𑀓𑀸𑀮𑁂 𑀲𑀻𑀮𑀯𑀦𑁆𑀢𑀸𑀦𑀁 𑀤𑀺𑀦𑁆𑀦𑀤𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀬𑁂𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀤𑁂𑀯𑀢𑁆𑀢𑀁 𑀧𑀢𑁆𑀢𑀸, 𑀢𑀣𑀸𑀭𑀽𑀧𑀸𑀦𑀁 𑀅𑀢𑁆𑀢𑀦𑀺 𑀅𑀢𑁆𑀣𑀺𑀢𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀲𑀫𑀸𑀧𑀢𑁆𑀢𑀺𑀬𑀸 𑀯𑀺𑀓𑁆𑀔𑀫𑁆𑀪𑀺𑀢𑀸 𑀓𑀺𑀮𑁂𑀲𑀸 𑀲𑀝𑁆𑀞𑀺𑀧𑀺 𑀲𑀢𑁆𑀢𑀢𑀺𑀧𑀺 𑀯𑀲𑁆𑀲𑀸𑀦𑀺 𑀦 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀘𑁂𑀢𑀺𑀬𑀤𑀲𑁆𑀲𑀦𑀩𑁄𑀥𑀺𑀤𑀲𑁆𑀲𑀦𑀣𑁂𑀭𑀤𑀲𑁆𑀲𑀦𑁂𑀲𑀼 𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸𑀬 𑀲𑀁𑀲𑀽𑀘𑀺𑀢𑀮𑀽𑀔𑀪𑀸𑀯𑁂 𑀩𑀼𑀤𑁆𑀥𑀸𑀤𑀻𑀲𑀼 𑀧𑀲𑀸𑀤𑀲𑀺𑀦𑁂𑀳𑀸𑀪𑀸𑀯𑁂𑀦 𑀕𑀤𑁆𑀭𑀪𑀧𑀺𑀝𑁆𑀞𑀭𑀚𑀲𑀤𑀺𑀲𑁂 𑀮𑀽𑀔𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑁂𑀦𑁆𑀢𑀲𑁆𑀲𑀸𑀧𑀺, 𑀩𑀼𑀤𑁆𑀥𑀸𑀤𑀻𑀲𑀼 𑀧𑀲𑀸𑀤𑀩𑀳𑀼𑀮𑁂 𑀫𑀼𑀤𑀼𑀘𑀺𑀢𑁆𑀢𑁂 𑀲𑀺𑀦𑀺𑀤𑁆𑀥𑀧𑀼𑀕𑁆𑀕𑀮𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺, 𑀭𑀢𑀦𑀢𑁆𑀢𑀬𑀕𑀼𑀡𑀧𑀭𑀺𑀤𑀻𑀧𑀓𑁂 𑀧𑀲𑀸𑀤𑀦𑀻𑀬𑁂 𑀲𑀼𑀢𑁆𑀢𑀦𑁆𑀢𑁂 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀧𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀧𑀻𑀢𑀺𑀉𑀧𑁆𑀧𑀸𑀤𑀦𑀢𑁆𑀣𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀻 𑀳𑁄𑀢𑀺.

𑀲𑀢𑁆𑀢 𑀥𑀫𑁆𑀫𑀸 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀧𑀡𑀻𑀢𑀪𑁄𑀚𑀦𑀲𑁂𑀯𑀦𑀢𑀸, 𑀉𑀢𑀼𑀲𑀼𑀔𑀲𑁂𑀯𑀦𑀢𑀸, 𑀇𑀭𑀺𑀬𑀸𑀧𑀣𑀲𑀼𑀔𑀲𑁂𑀯𑀦𑀢𑀸, 𑀫𑀚𑁆𑀛𑀢𑁆𑀢𑀧𑀬𑁄𑀕𑀢𑀸, 𑀲𑀸𑀭𑀤𑁆𑀥𑀓𑀸𑀬𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀧𑀲𑁆𑀲𑀤𑁆𑀥𑀓𑀸𑀬-𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺.

𑀧𑀡𑀻𑀢𑀜𑁆𑀳𑀺 𑀲𑀺𑀦𑀺𑀤𑁆𑀥𑀁 𑀪𑁄𑀚𑀦𑀁 𑀪𑀼𑀜𑁆𑀚𑀦𑁆𑀢𑀲𑁆𑀲𑀸𑀧𑀺, 𑀲𑀻𑀢𑀼𑀡𑁆𑀳𑁂𑀲𑀼 𑀉𑀢𑀽𑀲𑀼 𑀞𑀸𑀦𑀸𑀤𑀻𑀲𑀼 𑀘 𑀇𑀭𑀺𑀬𑀸𑀧𑀣𑁂𑀲𑀼 𑀲𑀧𑁆𑀧𑀸𑀬𑀁 𑀉𑀢𑀼𑀜𑁆𑀘 𑀇𑀭𑀺𑀬𑀸𑀧𑀣𑀜𑁆𑀘 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀧𑀲𑁆𑀲𑀤𑁆𑀥𑀺 𑀉𑀧𑁆𑀧𑀚𑁆𑀚𑀢𑀺. 𑀬𑁄 𑀧𑀦 𑀫𑀳𑀸𑀧𑀼𑀭𑀺𑀲𑀚𑀸𑀢𑀺𑀓𑁄 𑀲𑀩𑁆𑀩𑀉𑀢𑀼𑀇𑀭𑀺𑀬𑀸𑀧𑀣𑀓𑁆𑀔𑀫𑁄𑀯 𑀳𑁄𑀢𑀺, 𑀦 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀬𑀲𑁆𑀲 𑀲𑀪𑀸𑀕𑀯𑀺𑀲𑀪𑀸𑀕𑀢𑀸 𑀅𑀢𑁆𑀣𑀺, 𑀢𑀲𑁆𑀲𑁂𑀯 𑀯𑀺𑀲𑀪𑀸𑀕𑁂 𑀉𑀢𑀼𑀇𑀭𑀺𑀬𑀸𑀧𑀣𑁂 𑀯𑀚𑁆𑀚𑁂𑀢𑁆𑀯𑀸 𑀲𑀪𑀸𑀕𑁂 𑀲𑁂𑀯𑀦𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀢𑀺. 𑀫𑀚𑁆𑀛𑀢𑁆𑀢𑀧𑀬𑁄𑀕𑁄 𑀯𑀼𑀘𑁆𑀘𑀢𑀺 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀓𑀫𑁆𑀫𑀲𑁆𑀲𑀓𑀢𑀧𑀘𑁆𑀘𑀯𑁂𑀓𑁆𑀔𑀡𑀸. 𑀇𑀫𑀺𑀦𑀸 𑀫𑀚𑁆𑀛𑀢𑁆𑀢𑀧𑀬𑁄𑀕𑁂𑀦 𑀉𑀧𑁆𑀧𑀚𑁆𑀚𑀢𑀺. 𑀬𑁄 𑀮𑁂𑀟𑁆𑀟𑀼𑀤𑀡𑁆𑀟𑀸𑀤𑀻𑀳𑀺 𑀧𑀭𑀁 𑀯𑀺𑀳𑁂𑀞𑀬𑀫𑀸𑀦𑁄𑀯 𑀯𑀺𑀘𑀭𑀢𑀺, 𑀏𑀯𑀭𑀽𑀧𑀁 𑀲𑀸𑀭𑀤𑁆𑀥𑀓𑀸𑀬𑀧𑀼𑀕𑁆𑀕𑀮𑀁 𑀧𑀭𑀺𑀯𑀚𑁆𑀚𑁂𑀦𑁆𑀢𑀲𑁆𑀲𑀸𑀧𑀺, 𑀲𑀁𑀬𑀢𑀧𑀸𑀤𑀧𑀸𑀡𑀺𑀁 𑀧𑀲𑁆𑀲𑀤𑁆𑀥𑀓𑀸𑀬𑀁 𑀧𑀼𑀕𑁆𑀕𑀮𑀁 𑀲𑁂𑀯𑀦𑁆𑀢𑀲𑁆𑀲𑀸𑀧𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀧𑀲𑁆𑀲𑀤𑁆𑀥𑀺𑀉𑀧𑁆𑀧𑀸𑀤𑀦𑀢𑁆𑀣𑀸𑀬 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀻 𑀳𑁄𑀢𑀺.

𑀤𑀲 𑀥𑀫𑁆𑀫𑀸 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀢𑀸, 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀢𑀸, 𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑀸, 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀡𑁆𑀳𑀦𑀢𑀸, 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀦𑀺𑀕𑁆𑀕𑀡𑁆𑀳𑀦𑀢𑀸, 𑀲𑀫𑀬𑁂 𑀲𑀫𑁆𑀧𑀳𑀁𑀲𑀦𑀢𑀸, 𑀲𑀫𑀬𑁂 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑀸, 𑀅𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀢𑀢𑁆𑀣 𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀢𑀸 𑀘 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑀝𑀺𑀧𑀸𑀤𑀦𑀢𑀸 𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑀸 𑀦𑀸𑀫 𑀓𑀲𑀺𑀡𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑀡𑀓𑀼𑀲𑀮𑀢𑀸. 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀡𑁆𑀳𑀦𑀢𑀸𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀢𑀺𑀲𑀺𑀣𑀺𑀮𑀯𑀻𑀭𑀺𑀬𑀢𑀸𑀤𑀻𑀳𑀺 𑀮𑀻𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀯𑀺𑀘𑀬𑀯𑀻𑀭𑀺𑀬𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀫𑀼𑀝𑁆𑀞𑀸𑀧𑀦𑁂𑀦 𑀢𑀲𑁆𑀲 𑀧𑀕𑁆𑀕𑀡𑁆𑀳𑀦𑀁. 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀦𑀺𑀕𑁆𑀕𑀡𑁆𑀳𑀦𑀢𑀸𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑀸𑀤𑀻𑀳𑀺 𑀉𑀤𑁆𑀥𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀫𑀼𑀝𑁆𑀞𑀸𑀧𑀦𑁂𑀦 𑀢𑀲𑁆𑀲 𑀦𑀺𑀕𑁆𑀕𑀡𑁆𑀳𑀦𑀁. 𑀲𑀫𑀬𑁂 𑀲𑀫𑁆𑀧𑀳𑀁𑀲𑀦𑀢𑀸𑀢𑀺 𑀬𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀧𑀜𑁆𑀜𑀸𑀧𑀬𑁄𑀕𑀫𑀦𑁆𑀤𑀢𑀸𑀬 𑀯𑀸 𑀉𑀧𑀲𑀫𑀲𑀼𑀔𑀸𑀦𑀁 𑀯𑀺𑀕𑀫𑁂𑀦 𑀯𑀸 𑀦𑀺𑀭𑀲𑁆𑀲𑀸𑀤𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀝𑁆𑀞𑀲𑀁𑀯𑁂𑀕𑀯𑀢𑁆𑀣𑀼𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀲𑀁𑀯𑁂𑀚𑁂𑀢𑀺. 𑀅𑀝𑁆𑀞 𑀲𑀁𑀯𑁂𑀕𑀯𑀢𑁆𑀣𑀽𑀦𑀺 𑀦𑀸𑀫 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀸𑀦𑀺 𑀘𑀢𑁆𑀢𑀸𑀭𑀺, 𑀅𑀧𑀸𑀬𑀤𑀼𑀓𑁆𑀔𑀁 𑀧𑀜𑁆𑀘𑀫𑀁, 𑀅𑀢𑀻𑀢𑁂 𑀯𑀝𑁆𑀝𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀅𑀦𑀸𑀕𑀢𑁂 𑀯𑀝𑁆𑀝𑀫𑀽𑀮𑀓𑀁 𑀤𑀼𑀓𑁆𑀔𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀆𑀳𑀸𑀭𑀧𑀭𑀺𑀬𑁂𑀝𑁆𑀞𑀺𑀫𑀽𑀮𑀓𑀁 𑀤𑀼𑀓𑁆𑀔𑀦𑁆𑀢𑀺. 𑀭𑀢𑀦𑀢𑁆𑀢𑀬𑀕𑀼𑀡𑀸𑀦𑀼𑀲𑁆𑀲𑀭𑀡𑁂𑀦 𑀘 𑀧𑀲𑀸𑀤𑀁 𑀚𑀦𑁂𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀫𑀬𑁂 𑀲𑀫𑁆𑀧𑀳𑀁𑀲𑀦𑀢𑀸’’𑀢𑀺.

𑀲𑀫𑀬𑁂 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑀸 𑀦𑀸𑀫 𑀬𑀲𑁆𑀫𑀺𑀁 𑀲𑀫𑀬𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀆𑀕𑀫𑁆𑀫 𑀅𑀮𑀻𑀦𑀁 𑀅𑀦𑀼𑀤𑁆𑀥𑀢𑀁 𑀅𑀦𑀺𑀭𑀲𑁆𑀲𑀸𑀤𑀁 𑀆𑀭𑀫𑁆𑀫𑀡𑁂 𑀲𑀫𑀧𑁆𑀧𑀯𑀢𑁆𑀢𑀁 𑀲𑀫𑀣𑀯𑀻𑀣𑀺𑀧𑀝𑀺𑀧𑀦𑁆𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀢𑀤𑀸𑀲𑁆𑀲 𑀧𑀕𑁆𑀕𑀳𑀦𑀺𑀕𑁆𑀕𑀳𑀲𑀫𑁆𑀧𑀳𑀁𑀲𑀦𑁂𑀲𑀼 𑀦 𑀩𑁆𑀬𑀸𑀧𑀸𑀭𑀁 𑀆𑀧𑀚𑁆𑀚𑀢𑀺 𑀲𑀸𑀭𑀣𑀺 𑀯𑀺𑀬 𑀲𑀫𑀧𑁆𑀧𑀯𑀢𑁆𑀢𑁂𑀲𑀼 𑀅𑀲𑁆𑀲𑁂𑀲𑀼. 𑀅𑀬𑀁 𑀯𑀼𑀘𑁆𑀘𑀢𑀺 ‘‘𑀲𑀫𑀬𑁂 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑀸’’𑀢𑀺. 𑀅𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸 𑀦𑀸𑀫 𑀉𑀧𑀘𑀸𑀭𑀁 𑀯𑀸 𑀅𑀧𑁆𑀧𑀦𑀁 𑀯𑀸 𑀅𑀧𑁆𑀧𑀢𑁆𑀢𑀸𑀦𑀁 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀆𑀭𑀓𑀸 𑀧𑀭𑀺𑀯𑀚𑁆𑀚𑀦𑀁. 𑀲𑀫𑀸𑀳𑀺𑀢𑀧𑀼𑀕𑁆𑀕𑀮𑀲𑁂𑀯𑀦𑀢𑀸 𑀦𑀸𑀫 𑀉𑀧𑀘𑀸𑀭𑁂𑀦 𑀯𑀸 𑀅𑀧𑁆𑀧𑀦𑀸𑀬 𑀯𑀸 𑀲𑀫𑀸𑀳𑀺𑀢𑀘𑀺𑀢𑁆𑀢𑀸𑀦𑀁 𑀲𑁂𑀯𑀦𑀸 𑀪𑀚𑀦𑀸 𑀧𑀬𑀺𑀭𑀼𑀧𑀸𑀲𑀦𑀸. 𑀢𑀤𑀥𑀺𑀫𑀼𑀢𑁆𑀢𑀢𑀸 𑀦𑀸𑀫 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀲𑀫𑀸𑀥𑀺𑀉𑀧𑁆𑀧𑀸𑀤𑀦𑀢𑁆𑀣𑀫𑁂𑀯 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀢𑀸. 𑀏𑀯𑀜𑁆𑀳𑀺 𑀧𑀝𑀺𑀧𑀚𑁆𑀚𑀢𑁄 𑀏𑀲 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀻 𑀳𑁄𑀢𑀺.

𑀧𑀜𑁆𑀘 𑀥𑀫𑁆𑀫𑀸 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀲𑀢𑁆𑀢𑀫𑀚𑁆𑀛𑀢𑁆𑀢𑀢𑀸, 𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀢𑀸, 𑀲𑀢𑁆𑀢𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸, 𑀲𑀢𑁆𑀢𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀧𑀼𑀕𑁆𑀕𑀮𑀲𑁂𑀯𑀦𑀢𑀸, 𑀢𑀤𑀥𑀺𑀫𑀼𑀢𑁆𑀢𑀢𑀸𑀢𑀺. 𑀢𑀢𑁆𑀣 𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀲𑀢𑁆𑀢𑀫𑀚𑁆𑀛𑀢𑁆𑀢𑀢𑀁 𑀲𑀫𑀼𑀝𑁆𑀞𑀸𑀧𑁂𑀢𑀺 𑁋 ‘‘𑀢𑁆𑀯𑀁 𑀅𑀢𑁆𑀢𑀦𑁄𑀯 𑀓𑀫𑁆𑀫𑁂𑀦 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄𑀯 𑀓𑀫𑁆𑀫𑁂𑀦 𑀕𑀫𑀺𑀲𑁆𑀲𑀲𑀺, 𑀏𑀲𑁄𑀧𑀺 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄𑀯 𑀓𑀫𑁆𑀫𑁂𑀦 𑀕𑀫𑀺𑀲𑁆𑀲𑀢𑀺, 𑀢𑁆𑀯𑀁 𑀓𑀁 𑀓𑁂𑀮𑀸𑀬𑀲𑀻’’𑀢𑀺 𑀏𑀯𑀁 𑀓𑀫𑁆𑀫𑀲𑁆𑀲𑀓𑀢𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀘 𑁋 ‘‘𑀧𑀭𑀫𑀢𑁆𑀣𑀢𑁄 𑀲𑀢𑁆𑀢𑁄𑀬𑁂𑀯 𑀦𑀢𑁆𑀣𑀺, 𑀲𑁄 𑀢𑁆𑀯𑀁 𑀓𑀁 𑀓𑁂𑀮𑀸𑀬𑀲𑀻’’𑀢𑀺 𑀏𑀯𑀁 𑀦𑀺𑀲𑁆𑀲𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀘. 𑀤𑁆𑀯𑀻𑀳𑁂𑀯𑀸𑀓𑀸𑀭𑁂𑀳𑀺 𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀢𑀁 𑀲𑀫𑀼𑀝𑁆𑀞𑀸𑀧𑁂𑀢𑀺 𑁋 ‘‘𑀇𑀤𑀁 𑀘𑀻𑀯𑀭𑀁 𑀅𑀦𑀼𑀧𑀼𑀩𑁆𑀩𑁂𑀦 𑀯𑀡𑁆𑀡𑀯𑀺𑀓𑀸𑀭𑀢𑀜𑁆𑀘𑁂𑀯 𑀚𑀺𑀡𑁆𑀡𑀪𑀸𑀯𑀜𑁆𑀘 𑀉𑀧𑀕𑀦𑁆𑀢𑁆𑀯𑀸 𑀧𑀸𑀤𑀧𑀼𑀜𑁆𑀙𑀦𑀘𑁄𑀴𑀓𑀁 𑀳𑀼𑀢𑁆𑀯𑀸 𑀬𑀝𑁆𑀞𑀺𑀓𑁄𑀝𑀺𑀬𑀸 𑀙𑀟𑁆𑀟𑀦𑀻𑀬𑀁 𑀪𑀯𑀺𑀲𑁆𑀲𑀢𑀺, 𑀲𑀘𑁂 𑀧𑀦𑀲𑁆𑀲 𑀲𑀸𑀫𑀺𑀓𑁄 𑀪𑀯𑁂𑀬𑁆𑀬, 𑀦𑀸𑀬𑀁 𑀏𑀯𑀁 𑀯𑀺𑀦𑀲𑁆𑀲𑀺𑀢𑀼𑀁 𑀤𑀤𑁂𑀬𑁆𑀬𑀸’’𑀢𑀺 𑀏𑀯𑀁 𑀅𑀲𑁆𑀲𑀸𑀫𑀺𑀓𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀘, ‘‘𑀅𑀦𑀤𑁆𑀥𑀦𑀺𑀬𑀁 𑀇𑀤𑀁 𑀢𑀸𑀯𑀓𑀸𑀮𑀺𑀓’’𑀦𑁆𑀢𑀺 𑀏𑀯𑀁 𑀢𑀸𑀯𑀓𑀸𑀮𑀺𑀓𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀘. 𑀬𑀣𑀸 𑀘 𑀘𑀻𑀯𑀭𑁂, 𑀏𑀯𑀁 𑀧𑀢𑁆𑀢𑀸𑀤𑀻𑀲𑀼𑀧𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸.

𑀲𑀢𑁆𑀢𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸𑀢𑀺 𑀏𑀢𑁆𑀣 𑀬𑁄 𑀧𑀼𑀕𑁆𑀕𑀮𑁄 𑀕𑀺𑀳𑀺 𑀯𑀸 𑀅𑀢𑁆𑀢𑀦𑁄 𑀧𑀼𑀢𑁆𑀢𑀥𑀻𑀢𑀸𑀤𑀺𑀓𑁂, 𑀧𑀩𑁆𑀩𑀚𑀺𑀢𑁄 𑀯𑀸 𑀅𑀢𑁆𑀢𑀦𑁄 𑀅𑀦𑁆𑀢𑁂𑀯𑀸𑀲𑀺𑀓𑀲𑀫𑀸𑀦𑀼𑀧𑀚𑁆𑀛𑀸𑀬𑀓𑀸𑀤𑀺𑀓𑁂 𑀫𑀫𑀸𑀬𑀢𑀺, 𑀲𑀳𑀢𑁆𑀣𑀸𑀯 𑀦𑁂𑀲𑀁 𑀓𑁂𑀲𑀘𑁆𑀙𑁂𑀤𑀦-𑀲𑀽𑀘𑀺𑀓𑀫𑁆𑀫-𑀘𑀻𑀯𑀭𑀥𑁄𑀯𑀦-𑀭𑀚𑀦-𑀧𑀢𑁆𑀢𑀧𑀘𑀦𑀸𑀤𑀻𑀦𑀺 𑀓𑀭𑁄𑀢𑀺, 𑀫𑀼𑀳𑀼𑀢𑁆𑀢𑀫𑁆𑀧𑀺 𑀅𑀧𑀲𑁆𑀲𑀦𑁆𑀢𑁄 ‘‘𑀅𑀲𑀼𑀓𑁄 𑀲𑀸𑀫𑀡𑁂𑀭𑁄 𑀓𑀼𑀳𑀺𑀁, 𑀅𑀲𑀼𑀓𑁄 𑀤𑀳𑀭𑁄 𑀓𑀼𑀳𑀺’’𑀦𑁆𑀢𑀺 𑀪𑀦𑁆𑀢𑀫𑀺𑀕𑁄 𑀯𑀺𑀬 𑀇𑀢𑁄 𑀘𑀺𑀢𑁄 𑀘 𑀆𑀮𑁄𑀓𑁂𑀢𑀺, 𑀅𑀜𑁆𑀜𑁂𑀦 𑀓𑁂𑀲𑀘𑁆𑀙𑁂𑀤𑀦𑀸𑀤𑀻𑀦𑀁 𑀅𑀢𑁆𑀣𑀸𑀬 ‘‘𑀫𑀼𑀳𑀼𑀢𑁆𑀢𑀁 𑀢𑀸𑀯 𑀅𑀲𑀼𑀓𑀁 𑀧𑁂𑀲𑁂𑀣𑀸’’𑀢𑀺 𑀬𑀸𑀘𑀺𑀬𑀫𑀸𑀦𑁄𑀧𑀺 ‘‘𑀅𑀫𑁆𑀳𑁂𑀧𑀺 𑀢𑀁 𑀅𑀢𑁆𑀢𑀦𑁄 𑀓𑀫𑁆𑀫𑀁 𑀦 𑀓𑀸𑀭𑁂𑀫, 𑀢𑀼𑀫𑁆𑀳𑁂 𑀦𑀁 𑀕𑀳𑁂𑀢𑁆𑀯𑀸 𑀓𑀺𑀮𑀫𑁂𑀲𑁆𑀲𑀣𑀸’’𑀢𑀺 𑀦 𑀤𑁂𑀢𑀺, 𑀅𑀬𑀁 𑀲𑀢𑁆𑀢𑀓𑁂𑀮𑀸𑀬𑀦𑁄 𑀦𑀸𑀫. 𑀬𑁄 𑀧𑀦 𑀘𑀻𑀯𑀭𑀧𑀢𑁆𑀢𑀣𑀸𑀮𑀓𑀓𑀢𑁆𑀢𑀭𑀬𑀝𑁆𑀞𑀺𑀆𑀤𑀻𑀦𑀺 𑀫𑀫𑀸𑀬𑀢𑀺, 𑀅𑀜𑁆𑀜𑀲𑁆𑀲 𑀳𑀢𑁆𑀣𑁂𑀦 𑀧𑀭𑀸𑀫𑀲𑀺𑀢𑀼𑀫𑁆𑀧𑀺 𑀦 𑀤𑁂𑀢𑀺, 𑀢𑀸𑀯𑀓𑀸𑀮𑀺𑀓𑀁 𑀬𑀸𑀘𑀺𑀢𑁄𑀧𑀺 ‘‘𑀫𑀬𑀫𑁆𑀧𑀺 𑀇𑀫𑀁 𑀥𑀦𑀸𑀬𑀦𑁆𑀢𑀸 𑀦 𑀧𑀭𑀺𑀪𑀼𑀜𑁆𑀚𑀸𑀫, 𑀢𑀼𑀫𑁆𑀳𑀸𑀓𑀁 𑀓𑀺𑀁 𑀤𑀲𑁆𑀲𑀸𑀫𑀸’’𑀢𑀺 𑀯𑀤𑀢𑀺, 𑀅𑀬𑀁 𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑁄 𑀦𑀸𑀫. 𑀬𑁄 𑀧𑀦 𑀢𑁂𑀲𑀼 𑀤𑁆𑀯𑀻𑀲𑀼𑀧𑀺 𑀯𑀢𑁆𑀣𑀽𑀲𑀼 𑀫𑀚𑁆𑀛𑀢𑁆𑀢𑁄 𑀉𑀤𑀸𑀲𑀺𑀦𑁄, 𑀅𑀬𑀁 𑀲𑀢𑁆𑀢𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑁄 𑀦𑀸𑀫. 𑀇𑀢𑀺 𑀅𑀬𑀁 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀏𑀯𑀭𑀽𑀧𑀁 𑀲𑀢𑁆𑀢𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑀧𑀼𑀕𑁆𑀕𑀮𑀁 𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀦𑁆𑀢𑀲𑁆𑀲𑀸𑀧𑀺, 𑀲𑀢𑁆𑀢𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀧𑀼𑀕𑁆𑀕𑀮𑀁 𑀲𑁂𑀯𑀦𑁆𑀢𑀲𑁆𑀲𑀸𑀧𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀢𑀤𑀼𑀧𑁆𑀧𑀸𑀤𑀦𑀢𑁆𑀣𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀘𑀺𑀢𑁆𑀢𑀲𑁆𑀲𑀸𑀧𑀺 𑀉𑀧𑁆𑀧𑀚𑁆𑀚𑀢𑀺. 𑀏𑀯𑀁 𑀉𑀧𑁆𑀧𑀦𑁆𑀦𑀲𑁆𑀲 𑀧𑀦𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀻 𑀳𑁄𑀢𑀺.

𑀅𑀲𑀼𑀪𑀦𑀺𑀫𑀺𑀢𑁆𑀢𑀦𑁆𑀢𑀺 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀪𑁂𑀤𑀸 𑀤𑀲 𑀅𑀲𑀼𑀪𑀸𑀭𑀫𑁆𑀫𑀡𑀸 𑀥𑀫𑁆𑀫𑀸. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑀻𑀓𑀸𑀭𑁄𑀢𑀺 𑀏𑀢𑁆𑀣 𑀧𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀦𑀸𑀫 𑀉𑀧𑀸𑀬𑀫𑀦𑀲𑀺𑀓𑀸𑀭𑁄, 𑀧𑀣𑀫𑀦𑀲𑀺𑀓𑀸𑀭𑁄, 𑀉𑀧𑁆𑀧𑀸𑀤𑀓𑀫𑀦𑀲𑀺𑀓𑀸𑀭𑁄. 𑀅𑀧𑀺𑀘 𑀙 𑀥𑀫𑁆𑀫𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀅𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑁄, 𑀅𑀲𑀼𑀪𑀪𑀸𑀯𑀦𑀸𑀦𑀼𑀬𑁄𑀕𑁄, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺.

𑀤𑀲𑀯𑀺𑀥𑀜𑁆𑀳𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀺, 𑀪𑀸𑀯𑁂𑀦𑁆𑀢𑀲𑁆𑀲𑀸𑀧𑀺, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀲𑁆𑀲𑀸𑀧𑀺, 𑀘𑀢𑀼𑀦𑁆𑀦𑀁 𑀧𑀜𑁆𑀘𑀦𑁆𑀦𑀁 𑀆𑀮𑁄𑀧𑀸𑀦𑀁 𑀑𑀓𑀸𑀲𑁂 𑀲𑀢𑀺 𑀉𑀤𑀓𑀁 𑀧𑀺𑀯𑀺𑀢𑁆𑀯𑀸 𑀬𑀸𑀧𑀦𑀲𑀻𑀮𑀢𑀸𑀬 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀦𑁄𑀧𑀺. 𑀢𑁂𑀦𑁂𑀢𑀁 𑀯𑀼𑀢𑁆𑀢𑀁 𑁋

‘‘𑀘𑀢𑁆𑀢𑀸𑀭𑁄 𑀧𑀜𑁆𑀘 𑀆𑀮𑁄𑀧𑁂, 𑀅𑀪𑀼𑀢𑁆𑀯𑀸 𑀉𑀤𑀓𑀁 𑀧𑀺𑀯𑁂;

𑀅𑀮𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀧𑀳𑀺𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄’’𑀢𑀺. (𑀣𑁂𑀭𑀕𑀸. 𑁯𑁮𑁩);

𑀅𑀲𑀼𑀪𑀓𑀫𑁆𑀫𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑀲𑀤𑀺𑀲𑁂 𑀅𑀲𑀼𑀪𑀪𑀸𑀯𑀦𑀸𑀭𑀢𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀤𑀲𑀅𑀲𑀼𑀪𑀦𑀺𑀫𑀺𑀢𑁆𑀢𑀸𑀬-𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀙 𑀥𑀫𑁆𑀫𑀸 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀇𑀫𑁂𑀳𑀺 𑀧𑀦 𑀙𑀳𑀺 𑀥𑀫𑁆𑀫𑁂𑀳𑀺 𑀧𑀳𑀻𑀦𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺.

𑀫𑁂𑀢𑁆𑀢𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀏𑀢𑁆𑀣 𑀫𑁂𑀢𑁆𑀢𑀸𑀢𑀺 𑀯𑀼𑀢𑁆𑀢𑁂 𑀅𑀧𑁆𑀧𑀦𑀸𑀧𑀺 𑀉𑀧𑀘𑀸𑀭𑁄𑀧𑀺 𑀯𑀝𑁆𑀝𑀢𑀺, 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 𑀅𑀧𑁆𑀧𑀦𑀸𑀬𑁂𑀯. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀯𑀼𑀢𑁆𑀢𑀮𑀓𑁆𑀔𑀡𑁄𑀯. 𑀅𑀧𑀺𑀘 𑀙 𑀥𑀫𑁆𑀫𑀸 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀫𑁂𑀢𑁆𑀢𑀸𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑁄, 𑀫𑁂𑀢𑁆𑀢𑀸𑀪𑀸𑀯𑀦𑀸𑀦𑀼𑀬𑁄𑀕𑁄, 𑀓𑀫𑁆𑀫𑀲𑁆𑀲𑀓𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀢𑀸, 𑀧𑀝𑀺𑀲𑀗𑁆𑀔𑀸𑀦𑀩𑀳𑀼𑀮𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺.

𑀑𑀤𑀺𑀲𑁆𑀲𑀓𑀅𑀦𑁄𑀤𑀺𑀲𑁆𑀲𑀓𑀤𑀺𑀲𑀸𑀨𑀭𑀡𑀸𑀦𑀜𑁆𑀳𑀺 𑀅𑀜𑁆𑀜𑀢𑀭𑀯𑀲𑁂𑀦 𑀫𑁂𑀢𑁆𑀢𑀁 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀩𑁆𑀬𑀸𑀧𑀸𑀤𑁄 𑀧𑀳𑀻𑀬𑀢𑀺, 𑀢𑀣𑀸 𑀑𑀥𑀺𑀲𑁄𑀅𑀦𑁄𑀥𑀺𑀲𑁄𑀤𑀺𑀲𑀸𑀨𑀭𑀡𑀯𑀲𑁂𑀦 𑀫𑁂𑀢𑁆𑀢𑀁 𑀪𑀸𑀯𑁂𑀦𑁆𑀢𑀲𑁆𑀲𑀸𑀧𑀺. ‘‘𑀢𑁆𑀯𑀁 𑀏𑀢𑀲𑁆𑀲 𑀓𑀼𑀤𑁆𑀥𑁄 𑀓𑀺𑀁 𑀓𑀭𑀺𑀲𑁆𑀲𑀲𑀺? 𑀓𑀺𑀫𑀲𑁆𑀲 𑀲𑀻𑀮𑀸𑀤𑀻𑀦𑀺 𑀦𑀸𑀲𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺? 𑀦𑀦𑀼 𑀢𑁆𑀯𑀁 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦𑁂𑀯 𑀕𑀫𑀺𑀲𑁆𑀲𑀲𑀺? 𑀧𑀭𑀲𑁆𑀲 𑀓𑀼𑀚𑁆𑀛𑀦𑀁 𑀦𑀸𑀫 𑀯𑀻𑀢𑀘𑁆𑀘𑀺𑀓𑀗𑁆𑀕𑀸𑀭𑀢𑀢𑁆𑀢𑀅𑀬𑀲𑀮𑀸𑀓𑀕𑀽𑀣𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀧𑀭𑀁 𑀧𑀳𑀭𑀺𑀢𑀼𑀓𑀸𑀫𑀢𑀸𑀲𑀤𑀺𑀲𑀁 𑀳𑁄𑀢𑀺. 𑀏𑀲𑁄𑀧𑀺 𑀢𑀯 𑀓𑀼𑀤𑁆𑀥𑁄 𑀓𑀺𑀁 𑀓𑀭𑀺𑀲𑁆𑀲𑀢𑀺? 𑀓𑀺𑀁 𑀢𑁂 𑀲𑀻𑀮𑀸𑀤𑀻𑀦𑀺 𑀯𑀺𑀦𑀸𑀲𑁂𑀢𑀼𑀁 𑀲𑀓𑁆𑀔𑀺𑀲𑁆𑀲𑀢𑀺? 𑀏𑀲 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦 𑀆𑀕𑀦𑁆𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑁂𑀦𑁂𑀯 𑀕𑀫𑀺𑀲𑁆𑀲𑀢𑀺? 𑀅𑀧𑁆𑀧𑀝𑀺𑀘𑁆𑀙𑀺𑀢𑀧𑀳𑁂𑀡𑀓𑀁 𑀯𑀺𑀬 𑀧𑀝𑀺𑀯𑀸𑀢𑀁 𑀔𑀺𑀢𑁆𑀢𑀭𑀚𑁄𑀫𑀼𑀝𑁆𑀞𑀺 𑀯𑀺𑀬 𑀘 𑀏𑀢𑀲𑁆𑀲𑁂𑀯𑁂𑀲 𑀓𑁄𑀥𑁄 𑀫𑀢𑁆𑀣𑀓𑁂 𑀧𑀢𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀅𑀢𑁆𑀢𑀦𑁄 𑀘 𑀧𑀭𑀲𑁆𑀲 𑀘 𑀓𑀫𑁆𑀫𑀲𑁆𑀲𑀓𑀢𑀁 𑀧𑀘𑁆𑀘𑀯𑁂𑀓𑁆𑀔𑀢𑁄𑀧𑀺, 𑀉𑀪𑀬𑀓𑀫𑁆𑀫𑀲𑁆𑀲𑀓𑀢𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀝𑀺𑀲𑀗𑁆𑀔𑀸𑀦𑁂 𑀞𑀺𑀢𑀲𑁆𑀲𑀸𑀧𑀺, 𑀅𑀲𑁆𑀲𑀕𑀼𑀢𑁆𑀢𑀢𑁆𑀣𑁂𑀭𑀲𑀤𑀺𑀲𑁂 𑀫𑁂𑀢𑁆𑀢𑀸𑀪𑀸𑀯𑀦𑀸𑀭𑀢𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀩𑁆𑀬𑀸𑀧𑀸𑀤𑁄 𑀧𑀳𑀻𑀬𑀢𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀫𑁂𑀢𑁆𑀢𑀸𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀙 𑀥𑀫𑁆𑀫𑀸 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀇𑀫𑁂𑀳𑀺 𑀧𑀦 𑀙𑀳𑀺 𑀥𑀫𑁆𑀫𑁂𑀳𑀺 𑀧𑀳𑀻𑀦𑀲𑁆𑀲 𑀩𑁆𑀬𑀸𑀧𑀸𑀤𑀲𑁆𑀲 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺.

𑀅𑀢𑁆𑀣𑀺 𑀪𑀺𑀓𑁆𑀔𑀯𑁂 𑀅𑀭𑀢𑀻𑀢𑀺𑀆𑀤𑀺 𑀯𑀼𑀢𑁆𑀢𑀢𑁆𑀣𑀫𑁂𑀯. 𑀅𑀧𑀺 𑀘 𑀙 𑀥𑀫𑁆𑀫𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀅𑀢𑀺𑀪𑁄𑀚𑀦𑁂 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄, 𑀇𑀭𑀺𑀬𑀸𑀧𑀣𑀲𑀫𑁆𑀧𑀭𑀺𑀯𑀢𑁆𑀢𑀦𑀢𑀸, 𑀆𑀮𑁄𑀓𑀲𑀜𑁆𑀜𑀸𑀫𑀦𑀲𑀺𑀓𑀸𑀭𑁄, 𑀅𑀩𑁆𑀪𑁄𑀓𑀸𑀲𑀯𑀸𑀲𑁄, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺.

𑀆𑀳𑀭𑀳𑀢𑁆𑀣𑀓𑀁, 𑀪𑀼𑀢𑁆𑀢𑀯𑀫𑀺𑀢𑀓𑀁, 𑀢𑀢𑁆𑀭𑀯𑀝𑁆𑀝𑀓𑀁, 𑀅𑀮𑀁𑀲𑀸𑀝𑀓𑀁, 𑀓𑀸𑀓𑀫𑀸𑀲𑀓𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀳𑀺 𑀲𑀫𑀡𑀥𑀫𑁆𑀫𑀁 𑀓𑀭𑁄𑀢𑁄 𑀣𑀺𑀦𑀫𑀺𑀤𑁆𑀥𑀁 𑀫𑀳𑀸𑀳𑀢𑁆𑀣𑀻 𑀯𑀺𑀬 𑀑𑀢𑁆𑀣𑀭𑀦𑁆𑀢𑀁 𑀆𑀕𑀘𑁆𑀙𑀢𑀺, 𑀘𑀢𑀼𑀧𑀜𑁆𑀘𑀆𑀮𑁄𑀧𑀑𑀓𑀸𑀲𑀁 𑀧𑀦 𑀞𑀧𑁂𑀢𑁆𑀯𑀸 𑀧𑀸𑀦𑀻𑀬𑀁 𑀧𑀺𑀯𑀺𑀢𑁆𑀯𑀸 𑀬𑀸𑀧𑀦𑀲𑀻𑀮𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀁 𑀦 𑀳𑁄𑀢𑀻𑀢𑀺 𑀏𑀯𑀁 𑀅𑀢𑀺𑀪𑁄𑀚𑀦𑁂 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀦𑁆𑀢𑀲𑁆𑀲𑀧𑀺 𑀣𑀺𑀦𑀫𑀺𑀤𑁆𑀥𑀁 𑀧𑀳𑀻𑀬𑀢𑀺. 𑀬𑀲𑁆𑀫𑀺𑀁 𑀇𑀭𑀺𑀬𑀸𑀧𑀣𑁂 𑀣𑀺𑀦𑀫𑀺𑀤𑁆𑀥𑀁 𑀑𑀓𑁆𑀓𑀫𑀢𑀺, 𑀢𑀢𑁄 𑀅𑀜𑁆𑀜𑀁 𑀧𑀭𑀺𑀯𑀢𑁆𑀢𑁂𑀦𑁆𑀢𑀲𑁆𑀲𑀸𑀧𑀺, 𑀭𑀢𑁆𑀢𑀺𑀁 𑀘𑀦𑁆𑀤𑀸𑀮𑁄𑀓𑀤𑀻𑀧𑀸𑀮𑁄𑀓𑀉𑀓𑁆𑀓𑀸𑀮𑁄𑀓𑁂 𑀤𑀺𑀯𑀸 𑀲𑀽𑀭𑀺𑀬𑀸𑀮𑁄𑀓𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲𑀸𑀧𑀺, 𑀅𑀩𑁆𑀪𑁄𑀓𑀸𑀲𑁂 𑀯𑀲𑀦𑁆𑀢𑀲𑁆𑀲𑀸𑀧𑀺, 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀲𑀤𑀺𑀲𑁂 𑀧𑀳𑀻𑀦𑀣𑀺𑀦𑀫𑀺𑀤𑁆𑀥𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀣𑀺𑀦𑀫𑀺𑀤𑁆𑀥𑀁 𑀧𑀳𑀻𑀬𑀢𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀥𑀼𑀢𑀗𑁆𑀕𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀙 𑀥𑀫𑁆𑀫𑀸 𑀣𑀺𑀦𑀫𑀺𑀤𑁆𑀥𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀇𑀫𑁂𑀳𑀺 𑀧𑀦 𑀙𑀳𑀺 𑀥𑀫𑁆𑀫𑁂𑀳𑀺 𑀧𑀳𑀻𑀦𑀲𑁆𑀲 𑀣𑀺𑀦𑀫𑀺𑀤𑁆𑀥𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺.

𑀅𑀢𑁆𑀣𑀺 𑀪𑀺𑀓𑁆𑀔𑀯𑁂 𑀘𑁂𑀢𑀲𑁄 𑀯𑀽𑀧𑀲𑀫𑁄𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀅𑀧𑀺𑀘 𑀙 𑀥𑀫𑁆𑀫𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀩𑀳𑀼𑀲𑁆𑀲𑀼𑀢𑀢𑀸, 𑀧𑀭𑀺𑀧𑀼𑀘𑁆𑀙𑀓𑀢𑀸, 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀸, 𑀯𑀼𑀤𑁆𑀥𑀲𑁂𑀯𑀺𑀢𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺.

𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀳𑀺 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀢𑀬𑁄 𑀯𑀸 𑀘𑀢𑁆𑀢𑀸𑀭𑁄 𑀯𑀸 𑀧𑀜𑁆𑀘 𑀯𑀸 𑀦𑀺𑀓𑀸𑀬𑁂 𑀧𑀸𑀴𑀺𑀯𑀲𑁂𑀦 𑀘 𑀅𑀢𑁆𑀣𑀯𑀲𑁂𑀦 𑀘 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀬𑀢𑀺, 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀧𑀭𑀺𑀧𑀼𑀘𑁆𑀙𑀸𑀩𑀳𑀼𑀮𑀲𑁆𑀲𑀸𑀧𑀺, 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀁 𑀘𑀺𑀡𑁆𑀡𑀯𑀲𑀻𑀪𑀸𑀯𑀢𑀸𑀬 𑀧𑀓𑀢𑀜𑁆𑀜𑀼𑀦𑁄𑀧𑀺, 𑀯𑀼𑀤𑁆𑀥𑁂 𑀫𑀳𑀮𑁆𑀮𑀓𑀢𑁆𑀣𑁂𑀭𑁂 𑀉𑀧𑀲𑀗𑁆𑀓𑀫𑀦𑁆𑀢𑀲𑁆𑀲𑀸𑀧𑀺, 𑀉𑀧𑀸𑀮𑀺𑀢𑁆𑀣𑁂𑀭𑀲𑀤𑀺𑀲𑁂 𑀯𑀺𑀦𑀬𑀥𑀭𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀬𑀢𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀙 𑀥𑀫𑁆𑀫𑀸 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀇𑀫𑁂𑀳𑀺 𑀧𑀦 𑀙𑀳𑀺 𑀥𑀫𑁆𑀫𑁂𑀳𑀺 𑀧𑀳𑀻𑀦𑁂 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑁂 𑀉𑀤𑁆𑀥𑀘𑁆𑀘𑀲𑁆𑀲 𑀅𑀭𑀳𑀢𑁆𑀢𑀫𑀕𑁆𑀕𑁂𑀦, 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀻𑀢𑀺.

𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸𑀢𑀺𑀆𑀤𑀻𑀦𑀺𑀧𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀅𑀧𑀺𑀘 𑀙 𑀥𑀫𑁆𑀫𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺 𑁋 𑀩𑀳𑀼𑀲𑁆𑀲𑀼𑀢𑀢𑀸, 𑀧𑀭𑀺𑀧𑀼𑀘𑁆𑀙𑀓𑀢𑀸, 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀸, 𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀲𑀧𑁆𑀧𑀸𑀬𑀓𑀣𑀸𑀢𑀺.

𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀳𑀺 𑀏𑀓𑀁 𑀯𑀸…𑀧𑁂… 𑀧𑀜𑁆𑀘 𑀯𑀸 𑀦𑀺𑀓𑀸𑀬𑁂 𑀧𑀸𑀴𑀺𑀯𑀲𑁂𑀦 𑀘 𑀅𑀢𑁆𑀣𑀯𑀲𑁂𑀦 𑀘 𑀉𑀕𑁆𑀕𑀡𑁆𑀳𑀦𑁆𑀢𑀲𑁆𑀲𑀸𑀧𑀺 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀢𑀺, 𑀢𑀻𑀡𑀺 𑀭𑀢𑀦𑀸𑀦𑀺 𑀆𑀭𑀩𑁆𑀪 𑀧𑀭𑀺𑀧𑀼𑀘𑁆𑀙𑀸𑀩𑀳𑀼𑀮𑀲𑁆𑀲𑀸𑀧𑀺, 𑀯𑀺𑀦𑀬𑁂 𑀘𑀺𑀡𑁆𑀡𑀯𑀲𑀻𑀪𑀸𑀯𑀲𑁆𑀲𑀸𑀧𑀺, 𑀢𑀻𑀲𑀼 𑀭𑀢𑀦𑁂𑀲𑀼 𑀑𑀓𑀧𑁆𑀧𑀦𑀺𑀬𑀲𑀤𑁆𑀥𑀸𑀲𑀗𑁆𑀔𑀸𑀢𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀲𑁆𑀲𑀸𑀧𑀺, 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁂 𑀯𑀓𑁆𑀓𑀮𑀺𑀢𑁆𑀣𑁂𑀭𑀲𑀤𑀺𑀲𑁂 𑀓𑀮𑁆𑀬𑀸𑀡𑀫𑀺𑀢𑁆𑀢𑁂 𑀲𑁂𑀯𑀦𑁆𑀢𑀲𑁆𑀲𑀸𑀧𑀺 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀢𑀺, 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀺 𑀧𑀳𑀻𑀬𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀙 𑀥𑀫𑁆𑀫𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀇𑀫𑁂𑀳𑀺 𑀧𑀦 𑀙𑀳𑀺 𑀥𑀫𑁆𑀫𑁂𑀳𑀺 𑀧𑀳𑀻𑀦𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑁄 𑀳𑁄𑀢𑀺. 𑀇𑀢𑀺 𑀪𑀕𑀯𑀸 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀤𑁂𑀲𑀦𑀁 𑀢𑀻𑀳𑀺 𑀪𑀯𑁂𑀳𑀺 𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀭𑀳𑀢𑁆𑀢𑁂𑀦 𑀓𑀽𑀝𑀁 𑀕𑀡𑁆𑀳𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼.

𑁨. 𑀧𑀭𑀺𑀬𑀸𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁩. 𑀤𑀼𑀢𑀺𑀬𑁂 𑀲𑀫𑁆𑀩𑀳𑀼𑀮𑀸𑀢𑀺 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀢𑀬𑁄 𑀚𑀦𑀸 𑀲𑀫𑁆𑀩𑀳𑀼𑀮𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀢𑀢𑁄 𑀧𑀭𑀁 𑀲𑀗𑁆𑀖𑁄. 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀢𑀬𑁄 𑀢𑀬𑁄 𑀏𑀯, 𑀢𑀢𑁄 𑀉𑀤𑁆𑀥𑀁 𑀲𑀫𑁆𑀩𑀳𑀼𑀮𑀸. 𑀇𑀥 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀲𑀫𑁆𑀩𑀳𑀼𑀮𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀁𑀲𑀽𑀢𑀺 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑀸. 𑀢𑁂 𑀧𑀦 𑀦 𑀢𑀸𑀯 𑀧𑀯𑀺𑀝𑁆𑀞𑀸, ‘‘𑀧𑀯𑀺𑀲𑀺𑀲𑁆𑀲𑀸𑀫𑀸’’𑀢𑀺 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀧𑀦 𑀧𑀯𑀺𑀲𑀺𑀁𑀲𑀽𑀢𑀺 𑀯𑀼𑀢𑁆𑀢𑀸. 𑀬𑀣𑀸 𑀓𑀺𑀁? 𑀬𑀣𑀸 ‘‘𑀕𑀸𑀫𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀦𑀺𑀓𑁆𑀔𑀦𑁆𑀢𑀧𑀼𑀭𑀺𑀲𑁄 𑀢𑀁 𑀕𑀸𑀫𑀁 𑀅𑀧𑀢𑁆𑀢𑁄𑀧𑀺 ‘‘𑀓𑀳𑀁 𑀇𑀢𑁆𑀣𑀦𑁆𑀦𑀸𑀫𑁄’’𑀢𑀺 𑀯𑀼𑀢𑁆𑀢𑁂 ‘‘𑀕𑀸𑀫𑀁 𑀕𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁. 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄𑀢𑀺 𑀚𑁂𑀢𑀯𑀦𑀲𑁆𑀲 𑀅𑀯𑀺𑀤𑀽𑀭𑁂 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄 𑀅𑀢𑁆𑀣𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀲𑀫𑀡𑁄 𑀆𑀯𑀼𑀲𑁄𑀢𑀺 𑀆𑀯𑀼𑀲𑁄 𑀢𑀼𑀫𑁆𑀳𑀸𑀓𑀁 𑀲𑀢𑁆𑀣𑀸 𑀲𑀫𑀡𑁄 𑀕𑁄𑀢𑀫𑁄.

𑀫𑀬𑀫𑁆𑀧𑀺 𑀔𑁄 𑀆𑀯𑀼𑀲𑁄 𑀲𑀸𑀯𑀓𑀸𑀦𑀁 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀫𑀸𑀢𑀺 𑀢𑀺𑀢𑁆𑀣𑀺𑀬𑀸𑀦𑀁 𑀲𑀫𑀬𑁂 ‘‘𑀧𑀜𑁆𑀘 𑀦𑀻𑀯𑀭𑀡𑀸 𑀧𑀳𑀸𑀢𑀩𑁆𑀩𑀸, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑁂𑀢𑀩𑁆𑀩𑀸’’𑀢𑀺 𑀏𑀢𑀁 𑀦𑀢𑁆𑀣𑀺. 𑀢𑁂 𑀧𑀦 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀧𑀭𑀺𑀲𑀧𑀭𑀺𑀬𑀦𑁆𑀢𑁂 𑀞𑀢𑁆𑀯𑀸 𑀅𑀜𑁆𑀜𑀁 𑀑𑀮𑁄𑀓𑁂𑀦𑁆𑀢𑁄 𑀯𑀺𑀬 𑀅𑀜𑁆𑀜𑀯𑀺𑀳𑀺𑀢𑀓𑀸 𑀯𑀺𑀬 𑀳𑀼𑀢𑁆𑀯𑀸 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀡𑀦𑁆𑀢𑀺. 𑀢𑀢𑁄 ‘‘𑀲𑀫𑀡𑁄 𑀕𑁄𑀢𑀫𑁄 ‘𑀇𑀤𑀁 𑀧𑀚𑀳𑀣 𑀇𑀤𑀁 𑀪𑀸𑀯𑁂𑀣𑀸’𑀢𑀺 𑀯𑀤𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀢𑁆𑀢𑀦𑁄 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀆𑀭𑀸𑀫𑀫𑀚𑁆𑀛𑁂 𑀆𑀲𑀦𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀉𑀧𑀝𑁆𑀞𑀸𑀬𑀓𑀉𑀧𑀝𑁆𑀞𑀸𑀬𑀺𑀓𑀸𑀳𑀺 𑀧𑀭𑀺𑀯𑀼𑀢𑀸 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀓𑀸𑀬𑀁 𑀉𑀦𑁆𑀦𑀸𑀫𑁂𑀢𑁆𑀯𑀸 𑀅𑀢𑁆𑀢𑀦𑁄 𑀲𑀬𑀫𑁆𑀪𑀽𑀜𑀸𑀡𑁂𑀦 𑀧𑀝𑀺𑀯𑀺𑀤𑁆𑀥𑀸𑀓𑀸𑀭𑀁 𑀤𑀲𑁆𑀲𑁂𑀦𑁆𑀢𑀸 𑁋 ‘‘𑀧𑀜𑁆𑀘 𑀦𑀻𑀯𑀭𑀡𑀸 𑀦𑀸𑀫 𑀧𑀳𑀸𑀢𑀩𑁆𑀩𑀸, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀦𑀸𑀫 𑀪𑀸𑀯𑁂𑀢𑀩𑁆𑀩𑀸’’𑀢𑀺 𑀓𑀣𑁂𑀦𑁆𑀢𑀺.

𑀇𑀥 𑀦𑁄 𑀆𑀯𑀼𑀲𑁄𑀢𑀺 𑀏𑀢𑁆𑀣 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀧𑀜𑁆𑀜𑀸𑀧𑀦𑁂. 𑀓𑁄 𑀯𑀺𑀲𑁂𑀲𑁄𑀢𑀺 𑀓𑀺𑀁 𑀅𑀥𑀺𑀓𑀁? 𑀓𑁄 𑀅𑀥𑀺𑀧𑁆𑀧𑀬𑀸𑀲𑁄𑀢𑀺 𑀓𑁄 𑀅𑀥𑀺𑀓𑀧𑁆𑀧𑀬𑁄𑀕𑁄? 𑀓𑀺𑀁 𑀦𑀸𑀦𑀸𑀓𑀭𑀡𑀦𑁆𑀢𑀺 𑀓𑀺𑀁 𑀦𑀸𑀦𑀢𑁆𑀢𑀁? 𑀥𑀫𑁆𑀫𑀤𑁂𑀲𑀦𑀸𑀬 𑀯𑀸 𑀥𑀫𑁆𑀫𑀤𑁂𑀲𑀦𑀦𑁆𑀢𑀺 𑀬𑀤𑀺𑀤𑀁 𑀲𑀫𑀡𑀲𑁆𑀲 𑀯𑀸 𑀕𑁄𑀢𑀫𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀬 𑀲𑀤𑁆𑀥𑀺𑀁 𑀅𑀫𑁆𑀳𑀸𑀓𑀁 𑀥𑀫𑁆𑀫𑀤𑁂𑀲𑀦𑀁, 𑀅𑀫𑁆𑀳𑀸𑀓𑀁 𑀯𑀸 𑀥𑀫𑁆𑀫𑀤𑁂𑀲𑀦𑀸𑀬 𑀲𑀤𑁆𑀥𑀺𑀁 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀆𑀭𑀩𑁆𑀪 𑀦𑀸𑀦𑀸𑀓𑀭𑀡𑀁 𑀯𑀼𑀘𑁆𑀘𑁂𑀬𑁆𑀬, 𑀢𑀁 𑀓𑀺𑀦𑁆𑀦𑀸𑀫𑀸𑀢𑀺 𑀯𑀤𑀦𑁆𑀢𑀺. 𑀤𑀼𑀢𑀺𑀬𑀧𑀤𑁂𑀧𑀺 𑀏𑀲𑁂𑀯 𑀦𑀬𑁄.

𑀦𑁂𑀯 𑀅𑀪𑀺𑀦𑀦𑁆𑀤𑀺𑀁𑀲𑀽𑀢𑀺 ‘‘𑀏𑀯𑀫𑁂𑀯’’𑀦𑁆𑀢𑀺 𑀦 𑀲𑀫𑁆𑀧𑀝𑀺𑀘𑁆𑀙𑀺𑀁𑀲𑀼. 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀁𑀲𑀽𑀢𑀺 ‘‘𑀦𑀬𑀺𑀤𑀁 𑀏𑀯’’𑀦𑁆𑀢𑀺 𑀦 𑀧𑀝𑀺𑀲𑁂𑀥𑀺𑀁𑀲𑀼. 𑀓𑀺𑀁 𑀧𑀦 𑀢𑁂 𑀧𑀳𑁄𑀦𑁆𑀢𑀸 𑀏𑀯𑀁 𑀅𑀓𑀁𑀲𑀼, 𑀉𑀤𑀸𑀳𑀼 𑀅𑀧𑁆𑀧𑀳𑁄𑀦𑁆𑀢𑀸𑀢𑀺? 𑀧𑀳𑁄𑀦𑁆𑀢𑀸. 𑀦 𑀳𑀺 𑀢𑁂 𑀏𑀢𑁆𑀢𑀓𑀁 𑀓𑀣𑀁 𑀓𑀣𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺 ‘‘𑀆𑀯𑀼𑀲𑁄 𑀢𑀼𑀫𑁆𑀳𑀸𑀓𑀁 𑀲𑀫𑀬𑁂 𑀧𑀜𑁆𑀘 𑀦𑀻𑀯𑀭𑀡𑀸 𑀧𑀳𑀸𑀢𑀩𑁆𑀩𑀸 𑀦𑀸𑀫 𑀦𑀢𑁆𑀣𑀺, 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸 𑀪𑀸𑀯𑁂𑀢𑀩𑁆𑀩𑀸 𑀦𑀸𑀫 𑀦𑀢𑁆𑀣𑀻’’𑀢𑀺. 𑀏𑀯𑀁 𑀧𑀦 𑀢𑁂𑀲𑀁 𑀅𑀳𑁄𑀲𑀺 𑁋 ‘‘𑀅𑀢𑁆𑀣𑀺 𑀦𑁄 𑀏𑀢𑀁 𑀓𑀣𑀸𑀧𑀸𑀪𑀢𑀁, 𑀫𑀬𑀁 𑀏𑀢𑀁 𑀲𑀢𑁆𑀣𑀼 𑀆𑀭𑁄𑀘𑁂𑀲𑁆𑀲𑀸𑀫, 𑀅𑀣 𑀦𑁄 𑀲𑀢𑁆𑀣𑀸 𑀫𑀥𑀼𑀭𑀥𑀫𑁆𑀫𑀤𑁂𑀲𑀦𑀁 𑀤𑁂𑀲𑁂𑀲𑁆𑀲𑀢𑀻’’𑀢𑀺.

𑀧𑀭𑀺𑀬𑀸𑀬𑁄𑀢𑀺 𑀓𑀸𑀭𑀡𑀁. 𑀦 𑀘𑁂𑀯 𑀲𑀫𑁆𑀧𑀸𑀬𑀺𑀲𑁆𑀲𑀦𑁆𑀢𑀻𑀢𑀺 𑀲𑀫𑁆𑀧𑀸𑀤𑁂𑀢𑁆𑀯𑀸 𑀓𑀣𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀉𑀢𑁆𑀢𑀭𑀺𑀜𑁆𑀘 𑀯𑀺𑀖𑀸𑀢𑀦𑁆𑀢𑀺 𑀅𑀲𑀫𑁆𑀧𑀸𑀬𑀦𑀢𑁄 𑀉𑀢𑁆𑀢𑀭𑀺𑀫𑁆𑀧𑀺 𑀤𑀼𑀓𑁆𑀔𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀺. 𑀲𑀫𑁆𑀧𑀸𑀤𑁂𑀢𑁆𑀯𑀸 𑀓𑀣𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀜𑁆𑀳𑀺 𑀤𑀼𑀓𑁆𑀔𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸 𑀢𑀁, 𑀪𑀺𑀓𑁆𑀔𑀯𑁂, 𑀅𑀯𑀺𑀲𑀬𑀲𑁆𑀫𑀺𑀦𑁆𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁, 𑀬𑀣𑀸𑀢𑀺 𑀓𑀸𑀭𑀡𑀯𑀘𑀦𑀁, 𑀬𑀲𑁆𑀫𑀸 𑀅𑀯𑀺𑀲𑀬𑁂 𑀧𑀜𑁆𑀳𑁄 𑀧𑀼𑀘𑁆𑀙𑀺𑀢𑁄𑀢𑀺 𑀅𑀢𑁆𑀣𑁄. 𑀲𑀤𑁂𑀯𑀓𑁂𑀢𑀺 𑀲𑀳 𑀤𑁂𑀯𑁂𑀳𑀺 𑀲𑀤𑁂𑀯𑀓𑁂. 𑀲𑀫𑀸𑀭𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀢𑀻𑀡𑀺 𑀞𑀸𑀦𑀸𑀦𑀺 𑀮𑁄𑀓𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑁆𑀯𑁂 𑀧𑀚𑀸𑀬𑀸𑀢𑀺, 𑀧𑀜𑁆𑀘𑀳𑀺𑀧𑀺 𑀲𑀢𑁆𑀢𑀮𑁄𑀓𑀫𑁂𑀯 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀏𑀢𑀲𑁆𑀫𑀺𑀁 𑀲𑀤𑁂𑀯𑀓𑀸𑀤𑀺𑀪𑁂𑀤𑁂 𑀮𑁄𑀓𑁂 𑀤𑁂𑀯𑀁 𑀯𑀸 𑀫𑀦𑀼𑀲𑁆𑀲𑀁 𑀯𑀸 𑀦 𑀲𑀫𑀦𑀼𑀧𑀲𑁆𑀲𑀸𑀫𑀻𑀢𑀺 𑀤𑀻𑀧𑁂𑀢𑀺. 𑀇𑀢𑁄 𑀯𑀸 𑀧𑀦 𑀲𑀼𑀢𑁆𑀯𑀸𑀢𑀺 𑀇𑀢𑁄 𑀯𑀸 𑀧𑀦 𑀫𑀫 𑀲𑀸𑀲𑀦𑀢𑁄 𑀲𑀼𑀢𑁆𑀯𑀸. 𑀇𑀢𑁄 𑀲𑀼𑀢𑁆𑀯𑀸 𑀳𑀺 𑀢𑀣𑀸𑀕𑀢𑁄 𑀢𑀣𑀸𑀕𑀢𑀲𑀸𑀯𑀓𑁄𑀧𑀺 𑀆𑀭𑀸𑀥𑁂𑀬𑁆𑀬, 𑀧𑀭𑀺𑀢𑁄𑀲𑁂𑀬𑁆𑀬, 𑀅𑀜𑁆𑀜𑀣𑀸 𑀆𑀭𑀸𑀥𑀦𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 𑀅𑀢𑁆𑀢𑀦𑁄 𑀢𑁂𑀲𑀁 𑀧𑀜𑁆𑀳𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑁂𑀦 𑀘𑀺𑀢𑁆𑀢𑀸𑀭𑀸𑀥𑀦𑀁 𑀤𑀲𑁆𑀲𑁂𑀦𑁆𑀢𑁄 𑀓𑀢𑀫𑁄 𑀘 𑀪𑀺𑀓𑁆𑀔𑀯𑁂 𑀧𑀭𑀺𑀬𑀸𑀬𑁄𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀚𑁆𑀛𑀢𑁆𑀢𑀁 𑀓𑀸𑀫𑀘𑁆𑀙𑀦𑁆𑀤𑁄𑀢𑀺 𑀅𑀢𑁆𑀢𑀦𑁄 𑀧𑀜𑁆𑀘𑀓𑁆𑀔𑀦𑁆𑀥𑁂 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀙𑀦𑁆𑀤𑀭𑀸𑀕𑁄. 𑀩𑀳𑀺𑀤𑁆𑀥𑀸 𑀓𑀸𑀫𑀘𑁆𑀙𑀦𑁆𑀤𑁄𑀢𑀺 𑀧𑀭𑁂𑀲𑀁 𑀧𑀜𑁆𑀘𑀓𑁆𑀔𑀦𑁆𑀥𑁂 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑀙𑀦𑁆𑀤𑀭𑀸𑀕𑁄. 𑀉𑀤𑁆𑀤𑁂𑀲𑀁 𑀕𑀘𑁆𑀙𑀢𑀻𑀢𑀺 𑀕𑀡𑀦𑀁 𑀕𑀘𑁆𑀙𑀢𑀺. 𑀅𑀚𑁆𑀛𑀢𑁆𑀢𑀁 𑀩𑁆𑀬𑀸𑀧𑀸𑀤𑁄𑀢𑀺 𑀅𑀢𑁆𑀢𑀦𑁄 𑀳𑀢𑁆𑀣𑀧𑀸𑀤𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑀧𑀝𑀺𑀖𑁄. 𑀩𑀳𑀺𑀤𑁆𑀥𑀸 𑀩𑁆𑀬𑀸𑀧𑀸𑀤𑁄𑀢𑀺 𑀧𑀭𑁂𑀲𑀁 𑀢𑁂𑀲𑀼 𑀉𑀧𑁆𑀧𑀦𑁆𑀦𑀧𑀝𑀺𑀖𑁄. 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀅𑀢𑁆𑀢𑀦𑁄 𑀔𑀦𑁆𑀥𑁂𑀲𑀼 𑀯𑀺𑀫𑀢𑀺. 𑀩𑀳𑀺𑀤𑁆𑀥𑀸 𑀥𑀫𑁆𑀫𑁂𑀲𑀼 𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀩𑀳𑀺𑀤𑁆𑀥𑀸 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀫𑀳𑀸𑀯𑀺𑀘𑀺𑀓𑀺𑀘𑁆𑀙𑀸. 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑁂𑀲𑀼 𑀲𑀢𑀻𑀢𑀺 𑀅𑀚𑁆𑀛𑀢𑁆𑀢𑀺𑀓𑁂 𑀲𑀗𑁆𑀔𑀸𑀭𑁂 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀲𑀢𑀺. 𑀩𑀳𑀺𑀤𑁆𑀥𑀸 𑀥𑀫𑁆𑀫𑁂𑀲𑀼 𑀲𑀢𑀻𑀢𑀺 𑀩𑀳𑀺𑀤𑁆𑀥𑀸 𑀲𑀗𑁆𑀔𑀸𑀭𑁂 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀲𑀢𑀺. 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁂𑀧𑀺 𑀏𑀲𑁂𑀯 𑀦𑀬𑁄.

𑀓𑀸𑀬𑀺𑀓𑀦𑁆𑀢𑀺 𑀘𑀗𑁆𑀓𑀫𑀁 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀯𑀻𑀭𑀺𑀬𑀁. 𑀘𑁂𑀢𑀲𑀺𑀓𑀦𑁆𑀢𑀺 𑁋 ‘‘𑀦 𑀢𑀸𑀯𑀸𑀳𑀁 𑀇𑀫𑀁 𑀧𑀮𑁆𑀮𑀗𑁆𑀓𑀁 𑀪𑀺𑀦𑁆𑀤𑀺𑀲𑁆𑀲𑀸𑀫𑀺, 𑀬𑀸𑀯 𑀫𑁂 𑀅𑀦𑀼𑀧𑀸𑀤𑀸𑀬 𑀆𑀲𑀯𑁂𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀺𑀲𑁆𑀲𑀢𑀻’’𑀢𑀺 𑀏𑀯𑀁 𑀓𑀸𑀬𑀧𑀬𑁄𑀕𑀁 𑀯𑀺𑀦𑀸 𑀉𑀧𑁆𑀧𑀦𑁆𑀦𑀯𑀻𑀭𑀺𑀬𑀁. 𑀓𑀸𑀬𑀧𑁆𑀧𑀲𑁆𑀲𑀤𑁆𑀥𑀻𑀢𑀺 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁 𑀤𑀭𑀣𑀧𑀲𑁆𑀲𑀤𑁆𑀥𑀺. 𑀘𑀺𑀢𑁆𑀢𑀧𑁆𑀧𑀲𑁆𑀲𑀤𑁆𑀥𑀻𑀢𑀺 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑀲𑁆𑀲 𑀤𑀭𑀣𑀧𑀲𑁆𑀲𑀤𑁆𑀥𑀺. 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁂 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄.

𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀫𑀺𑀲𑁆𑀲𑀓𑀲𑀫𑁆𑀩𑁄𑀚𑁆𑀛𑀗𑁆𑀕𑀸 𑀓𑀣𑀺𑀢𑀸. 𑀏𑀢𑁂𑀲𑀼 𑀳𑀺 𑀅𑀚𑁆𑀛𑀢𑁆𑀢𑀥𑀫𑁆𑀫𑁂𑀲𑀼 𑀲𑀢𑀺, 𑀧𑀯𑀺𑀘𑀬𑁄, 𑀉𑀧𑁂𑀓𑁆𑀔𑀸𑀢𑀺 𑀇𑀫𑁂 𑀅𑀢𑁆𑀢𑀦𑁄 𑀔𑀦𑁆𑀥𑀸𑀭𑀫𑁆𑀫𑀡𑀢𑁆𑀢𑀸 𑀮𑁄𑀓𑀺𑀬𑀸𑀯 𑀳𑁄𑀦𑁆𑀢𑀺, 𑀢𑀣𑀸 𑀫𑀕𑁆𑀕𑀁 𑀅𑀧𑀢𑁆𑀢𑀁 𑀓𑀸𑀬𑀺𑀓𑀯𑀻𑀭𑀺𑀬𑀁. 𑀅𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑀸 𑀧𑀦 𑀧𑀻𑀢𑀺𑀲𑀫𑀸𑀥𑀻 𑀓𑀺𑀜𑁆𑀘𑀸𑀧𑀺 𑀭𑀽𑀧𑀸𑀯𑀘𑀭𑀸 𑀳𑁄𑀦𑁆𑀢𑀺, 𑀭𑀽𑀧𑀸𑀯𑀘𑀭𑁂 𑀧𑀦 𑀩𑁄𑀚𑁆𑀛𑀗𑁆𑀕𑀸 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑀸𑀯 𑀳𑁄𑀦𑁆𑀢𑀺. 𑀬𑁂 𑀘 𑀣𑁂𑀭𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀚𑁆𑀛𑀸𑀦𑀸𑀤𑀻𑀲𑀼 𑀩𑁄𑀚𑁆𑀛𑀗𑁆𑀕𑁂 𑀉𑀤𑁆𑀥𑀭𑀦𑁆𑀢𑀺, 𑀢𑁂𑀲𑀁 𑀫𑀢𑁂𑀦 𑀭𑀽𑀧𑀸𑀯𑀘𑀭𑀸𑀧𑀺 𑀅𑀭𑀽𑀧𑀸𑀯𑀘𑀭𑀸𑀧𑀺 𑀳𑁄𑀦𑁆𑀢𑀺. 𑀩𑁄𑀚𑁆𑀛𑀗𑁆𑀕𑁂𑀲𑀼 𑀳𑀺 𑀅𑀭𑀽𑀧𑀸𑀯𑀘𑀭𑁂 𑀧𑀻𑀢𑀺𑀬𑁂𑀯 𑀏𑀓𑀦𑁆𑀢𑁂𑀦 𑀦 𑀮𑀩𑁆𑀪𑀢𑀺, 𑀲𑁂𑀲𑀸 𑀙 𑀫𑀺𑀲𑁆𑀲𑀓𑀸𑀯 𑀳𑁄𑀦𑁆𑀢𑀻𑀢𑀺. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀓𑁂𑀘𑀺 𑀪𑀺𑀓𑁆𑀔𑀽 𑀲𑁄𑀢𑀸𑀧𑀦𑁆𑀦𑀸 𑀚𑀸𑀢𑀸, 𑀓𑁂𑀘𑀺 𑀲𑀓𑀤𑀸𑀕𑀸𑀫𑀻, 𑀓𑁂𑀘𑀺 𑀅𑀦𑀸𑀕𑀸𑀫𑀻, 𑀓𑁂𑀘𑀺 𑀅𑀭𑀳𑀦𑁆𑀢𑁄𑀢𑀺.

𑁩. 𑀅𑀕𑁆𑀕𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁪. 𑀢𑀢𑀺𑀬𑁂 𑀲𑀢𑀺𑀜𑁆𑀘 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀢𑁆𑀣𑀺𑀓𑀁 𑀯𑀤𑀸𑀫𑀻𑀢𑀺 𑀮𑁄𑀡𑀥𑀽𑀧𑀦𑀁 𑀯𑀺𑀬 𑀲𑀩𑁆𑀩𑀓𑀫𑁆𑀫𑀺𑀓𑀸𑀫𑀘𑁆𑀘𑀁 𑀯𑀺𑀬 𑀘 𑀲𑀩𑁆𑀩𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀳𑀺 𑀮𑁄𑀡𑀥𑀽𑀧𑀦𑀁 𑀲𑀩𑁆𑀩𑀩𑁆𑀬𑀜𑁆𑀚𑀦𑁂𑀲𑀼𑀧𑀺 𑀦𑀺𑀯𑀺𑀲𑀢𑀺, 𑀬𑀣𑀸 𑀘 𑀲𑀩𑁆𑀩𑀓𑀫𑁆𑀫𑀺𑀓𑁄 𑀅𑀫𑀘𑁆𑀘𑁄 𑀬𑁄𑀥𑀓𑀫𑁆𑀫𑀫𑁆𑀧𑀺 𑀓𑀭𑁄𑀢𑀺 𑀫𑀦𑁆𑀢𑀓𑀫𑁆𑀫𑀫𑁆𑀧𑀺 𑀧𑀝𑀺𑀳𑀸𑀭𑀓𑀫𑁆𑀫𑀫𑁆𑀧𑀻𑀢𑀺 𑀲𑀩𑁆𑀩𑀓𑀺𑀘𑁆𑀘𑀸𑀦𑀺 𑀲𑀸𑀥𑁂𑀢𑀺, 𑀏𑀯𑀁 𑀉𑀤𑁆𑀥𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀦𑀺𑀕𑁆𑀕𑀡𑁆𑀳𑀦𑀁, 𑀮𑀻𑀦𑀲𑁆𑀲 𑀧𑀕𑁆𑀕𑀡𑁆𑀳𑀦𑀦𑁆𑀢𑀺 𑀲𑀩𑁆𑀩𑀫𑁂𑀢𑀁 𑀲𑀢𑀺𑀬𑀸 𑀇𑀚𑁆𑀛𑀢𑀺, 𑀦 𑀲𑀓𑁆𑀓𑀸 𑀯𑀺𑀦𑀸 𑀲𑀢𑀺𑀬𑀸 𑀏𑀢𑀁 𑀲𑀫𑁆𑀧𑀸𑀤𑁂𑀢𑀼𑀁, 𑀢𑀲𑁆𑀫𑀸 𑀏𑀯𑀫𑀸𑀳. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸 𑀩𑁄𑀚𑁆𑀛𑀗𑁆𑀕𑀸𑀯 𑀓𑀣𑀺𑀢𑀸.

𑁪. 𑀫𑁂𑀢𑁆𑀢𑀸𑀲𑀳𑀕𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁫. 𑀘𑀢𑀼𑀢𑁆𑀣𑁂 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸𑀢𑀺𑀆𑀤𑀺 𑀲𑀩𑁆𑀩𑀁 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁪𑁦-𑁨𑁪𑁧) 𑀯𑀺𑀢𑁆𑀣𑀸𑀭𑀺𑀢𑀫𑁂𑀯. 𑀫𑀬𑀫𑁆𑀧𑀺 𑀔𑁄, 𑀆𑀯𑀼𑀲𑁄, 𑀲𑀸𑀯𑀓𑀸𑀦𑀁 𑀏𑀯𑀁 𑀥𑀫𑁆𑀫𑀁 𑀤𑁂𑀲𑁂𑀫𑀸𑀢𑀺 𑀇𑀤𑀫𑁆𑀧𑀺 𑀢𑁂 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀯𑀤𑀦𑁆𑀢𑀺. 𑀢𑀺𑀢𑁆𑀣𑀺𑀬𑀸𑀦𑀜𑁆𑀳𑀺 𑀲𑀫𑀬𑁂 𑀧𑀜𑁆𑀘𑀦𑀻𑀯𑀭𑀡𑀧𑁆𑀧𑀳𑀸𑀦𑀁 𑀯𑀸 𑀫𑁂𑀢𑁆𑀢𑀸𑀤𑀺𑀩𑁆𑀭𑀳𑁆𑀫𑀯𑀺𑀳𑀸𑀭𑀪𑀸𑀯𑀦𑀸 𑀯𑀸 𑀦𑀢𑁆𑀣𑀺. 𑀓𑀺𑀁 𑀕𑀢𑀺𑀓𑀸 𑀳𑁄𑀢𑀻𑀢𑀺 𑀓𑀺𑀁 𑀦𑀺𑀧𑁆𑀨𑀢𑁆𑀢𑀺 𑀳𑁄𑀢𑀺. 𑀓𑀺𑀁 𑀧𑀭𑀫𑀸𑀢𑀺 𑀓𑀺𑀁 𑀉𑀢𑁆𑀢𑀫𑀸. 𑀓𑀺𑀁 𑀨𑀮𑀸𑀢𑀺 𑀓𑀺𑀁 𑀆𑀦𑀺𑀲𑀁𑀲𑀸. 𑀓𑀺𑀁 𑀧𑀭𑀺𑀬𑁄𑀲𑀸𑀦𑀸𑀢𑀺 𑀓𑀺𑀁 𑀦𑀺𑀝𑁆𑀞𑀸. 𑀫𑁂𑀢𑁆𑀢𑀸𑀲𑀳𑀕𑀢𑀦𑁆𑀢𑀺 𑀫𑁂𑀢𑁆𑀢𑀸𑀬 𑀲𑀳𑀕𑀢𑀁 𑀲𑀁𑀲𑀝𑁆𑀞𑀁 𑀲𑀫𑁆𑀧𑀬𑀼𑀢𑁆𑀢𑀁. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣. 𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀸𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯.

𑀅𑀧𑁆𑀧𑀝𑀺𑀓𑀽𑀮𑀦𑁆𑀢𑀺 𑀤𑀼𑀯𑀺𑀥𑀁 𑀅𑀧𑁆𑀧𑀝𑀺𑀓𑀽𑀮𑀁 𑁋 𑀲𑀢𑁆𑀢𑀅𑀧𑁆𑀧𑀝𑀺𑀓𑀽𑀮𑀜𑁆𑀘, 𑀲𑀗𑁆𑀔𑀸𑀭𑀅𑀧𑁆𑀧𑀝𑀺𑀓𑀽𑀮𑀜𑁆𑀘. 𑀢𑀲𑁆𑀫𑀺𑀁 𑀅𑀧𑁆𑀧𑀝𑀺𑀓𑀽𑀮𑁂 𑀇𑀝𑁆𑀞𑁂 𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀓𑀽𑀮𑀲𑀜𑁆𑀜𑀻𑀢𑀺 𑀅𑀦𑀺𑀝𑁆𑀞𑀲𑀜𑁆𑀜𑀻. 𑀓𑀣𑀁 𑀧𑀦𑁂𑀢𑁆𑀣 𑀏𑀯𑀁 𑀯𑀺𑀳𑀭𑀢𑀺? 𑀅𑀲𑀼𑀪𑀨𑀭𑀡𑀁 𑀯𑀸 𑀅𑀦𑀺𑀘𑁆𑀘𑀦𑁆𑀢𑀺 𑀫𑀦𑀲𑀺𑀓𑀸𑀭𑀁 𑀯𑀸 𑀓𑀭𑁄𑀦𑁆𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 ‘‘𑀓𑀣𑀁 𑀅𑀧𑁆𑀧𑀝𑀺𑀓𑀽𑀮𑁂 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺. 𑀇𑀝𑁆𑀞𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀅𑀲𑀼𑀪𑀸𑀬 𑀯𑀸 𑀨𑀭𑀢𑀺, 𑀅𑀦𑀺𑀘𑁆𑀘𑀢𑁄 𑀯𑀸 𑀉𑀧𑀲𑀁𑀳𑀭𑀢𑀻’’𑀢𑀺. 𑀧𑀝𑀺𑀓𑀽𑀮𑁂 𑀧𑀦 𑀅𑀦𑀺𑀝𑁆𑀞𑁂 𑀯𑀢𑁆𑀣𑀼𑀲𑁆𑀫𑀺𑀁 𑀫𑁂𑀢𑁆𑀢𑀸𑀨𑀭𑀡𑀁 𑀯𑀸 𑀥𑀸𑀢𑀼𑀫𑀦𑀲𑀺𑀓𑀸𑀭𑀁 𑀯𑀸 𑀓𑀭𑁄𑀦𑁆𑀢𑁄 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺 𑀦𑀸𑀫. 𑀬𑀣𑀸𑀳 ‘‘𑀓𑀣𑀁 𑀧𑀝𑀺𑀓𑀽𑀮𑁂 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺. 𑀅𑀦𑀺𑀝𑁆𑀞𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀫𑁂𑀢𑁆𑀢𑀸𑀬 𑀯𑀸 𑀨𑀭𑀢𑀺, 𑀥𑀸𑀢𑀼𑀢𑁄 𑀯𑀸 𑀉𑀧𑀲𑀁𑀳𑀭𑀢𑀻’’𑀢𑀺 (𑀧𑀝𑀺. 𑀫. 𑁨.𑁧𑁭). 𑀉𑀪𑀬𑀫𑀺𑀲𑁆𑀲𑀓𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀧𑁆𑀧𑀝𑀺𑀓𑀽𑀮𑀧𑁆𑀧𑀝𑀺𑀓𑀽𑀮𑁂𑀲𑀼 𑀳𑀺 𑀢𑀤𑁂𑀯 𑀅𑀲𑀼𑀪𑀨𑀭𑀡𑀁 𑀯𑀸 𑀅𑀦𑀺𑀘𑁆𑀘𑀦𑁆𑀢𑀺 𑀫𑀦𑀲𑀺𑀓𑀸𑀭𑀁 𑀯𑀸 𑀓𑀭𑁄𑀦𑁆𑀢𑁄 𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺 𑀦𑀸𑀫. 𑀧𑀝𑀺𑀓𑀽𑀮𑀸𑀧𑀝𑀺𑀓𑀽𑀮𑁂𑀲𑀼 𑀘 𑀢𑀤𑁂𑀯 𑀫𑁂𑀢𑁆𑀢𑀸𑀨𑀭𑀡𑀁 𑀯𑀸 𑀥𑀸𑀢𑀼𑀫𑀦𑀲𑀺𑀓𑀸𑀭𑀁 𑀯𑀸 𑀓𑀭𑁄𑀦𑁆𑀢𑁄 𑀅𑀧𑁆𑀧𑀝𑀺𑀓𑀽𑀮𑀲𑀜𑁆𑀜𑀻 𑀯𑀺𑀳𑀭𑀢𑀺 𑀦𑀸𑀫. ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸 𑀦𑁂𑀯 𑀲𑀼𑀫𑀦𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁨.𑁧𑁭) 𑀦𑀬𑁂𑀦 𑀯𑀼𑀢𑁆𑀢𑀁 𑀧𑀦 𑀙𑀴𑀗𑁆𑀕𑀼𑀧𑁂𑀓𑁆𑀔𑀁 𑀧𑀯𑀢𑁆𑀢𑀬𑀫𑀸𑀦𑁄 ‘‘𑀅𑀧𑁆𑀧𑀝𑀺𑀓𑀽𑀮𑁂 𑀘 𑀧𑀝𑀺𑀓𑀽𑀮𑁂 𑀘 𑀢𑀤𑀼𑀪𑀬𑀁 𑀅𑀪𑀺𑀦𑀺𑀯𑀚𑁆𑀚𑁂𑀢𑁆𑀯𑀸 𑀉𑀧𑁂𑀓𑁆𑀔𑀓𑁄 𑀢𑀢𑁆𑀣 𑀯𑀺𑀳𑀭𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄’’𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀢𑁆𑀢𑀸𑀯𑀢𑀸 𑀘 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀫𑁂𑀢𑁆𑀢𑀸𑀬 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀤𑁂𑀯 𑀧𑀸𑀤𑀓𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀲𑁆𑀲 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀭𑀺𑀬𑀺𑀤𑁆𑀥𑀺𑀬𑀸 𑀘 𑀤𑀲𑁆𑀲𑀺𑀢𑀢𑁆𑀢𑀸 𑀤𑁂𑀲𑀦𑀸 𑀯𑀺𑀦𑀺𑀯𑀝𑁆𑀝𑁂𑀢𑀩𑁆𑀩𑀸 𑀲𑀺𑀬𑀸. 𑀇𑀤𑀁 𑀧𑀦 𑀫𑁂𑀢𑁆𑀢𑀸𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄𑀧𑀺 𑀬𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀬𑀲𑁆𑀫𑀸 𑀢𑀲𑁆𑀲 𑀅𑀭𑀳𑀢𑁆𑀢𑀧𑀭𑀫𑀸 𑀫𑁂𑀢𑁆𑀢𑀸 𑀦 𑀳𑁄𑀢𑀺. 𑀬𑀁𑀧𑀭𑀫𑀸 𑀧𑀦 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀩𑁆𑀩𑀁. 𑀢𑀲𑁆𑀫𑀸 𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀅𑀬𑀁 𑀤𑁂𑀲𑀦𑀸 𑀆𑀭𑀤𑁆𑀥𑀸. 𑀧𑀭𑀢𑁄 𑀲𑀩𑁆𑀩𑀲𑁄 𑀯𑀸 𑀧𑀦 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸 𑀦𑀬𑁂𑀦 𑀧𑀼𑀦 𑀤𑁂𑀲𑀦𑀸𑀭𑀫𑁆𑀪𑀧𑀬𑁄𑀚𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀼𑀪𑀧𑀭𑀫𑀦𑁆𑀢𑀺 𑀲𑀼𑀪𑀦𑀺𑀝𑁆𑀞𑀁, 𑀲𑀼𑀪𑀓𑁄𑀝𑀺𑀓𑀁, 𑀲𑀼𑀪𑀦𑀺𑀧𑁆𑀨𑀢𑁆𑀢𑀺𑀁. 𑀇𑀥𑀧𑀜𑁆𑀜𑀲𑁆𑀲𑀸𑀢𑀺 𑀇𑀥𑁂𑀯 𑀧𑀜𑁆𑀜𑀸 𑀅𑀲𑁆𑀲, 𑀦𑀬𑀺𑀫𑀁 𑀮𑁄𑀓𑀁 𑀅𑀢𑀺𑀓𑁆𑀓𑀫𑀢𑀻𑀢𑀺 𑀇𑀥𑀧𑀜𑁆𑀜𑁄, 𑀢𑀲𑁆𑀲 𑀇𑀥𑀧𑀜𑁆𑀜𑀲𑁆𑀲, 𑀮𑁄𑀓𑀺𑀬𑀧𑀜𑁆𑀜𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀉𑀢𑁆𑀢𑀭𑀺𑀯𑀺𑀫𑀼𑀢𑁆𑀢𑀺𑀁 𑀅𑀧𑁆𑀧𑀝𑀺𑀯𑀺𑀚𑁆𑀛𑀢𑁄𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁆𑀢𑀲𑁆𑀲. 𑀬𑁄 𑀧𑀦 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀲𑁆𑀲 𑀅𑀭𑀳𑀢𑁆𑀢𑀧𑀭𑀫𑀸𑀯 𑀫𑁂𑀢𑁆𑀢𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀭𑀼𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀓𑀲𑁆𑀫𑀸 𑀧𑀦𑁂𑀢𑀸𑀲𑀁 𑀫𑁂𑀢𑁆𑀢𑀸𑀤𑀻𑀦𑀁 𑀲𑀼𑀪𑀧𑀭𑀫𑀸𑀤𑀺𑀢𑀸 𑀯𑀼𑀢𑁆𑀢𑀸 𑀪𑀕𑀯𑀢𑀸𑀢𑀺? 𑀲𑀪𑀸𑀕𑀯𑀲𑁂𑀦 𑀢𑀲𑁆𑀲 𑀢𑀲𑁆𑀲 𑀉𑀧𑀦𑀺𑀲𑁆𑀲𑀬𑀢𑁆𑀢𑀸. 𑀫𑁂𑀢𑁆𑀢𑀸𑀯𑀺𑀳𑀸𑀭𑀺𑀲𑁆𑀲 𑀳𑀺 𑀲𑀢𑁆𑀢𑀸 𑀅𑀧𑁆𑀧𑀝𑀺𑀓𑀽𑀮𑀸 𑀳𑁄𑀦𑁆𑀢𑀺, 𑀅𑀣𑀲𑁆𑀲 𑀅𑀧𑁆𑀧𑀝𑀺𑀓𑀽𑀮𑀧𑀭𑀺𑀘𑀬𑀸 𑀅𑀧𑁆𑀧𑀝𑀺𑀓𑀽𑀮𑁂𑀲𑀼 𑀧𑀭𑀺𑀲𑀼𑀤𑁆𑀥𑀯𑀡𑁆𑀡𑁂𑀲𑀼 𑀦𑀻𑀮𑀸𑀤𑀻𑀲𑀼 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑁄 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺. 𑀇𑀢𑀺 𑀫𑁂𑀢𑁆𑀢𑀸 𑀲𑀼𑀪𑀯𑀺𑀫𑁄𑀓𑁆𑀔𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀦 𑀢𑀢𑁄 𑀧𑀭𑀁, 𑀢𑀲𑁆𑀫𑀸 𑀲𑀼𑀪𑀧𑀭𑀫𑀸𑀢𑀺 𑀯𑀼𑀢𑁆𑀢𑀸.

𑀓𑀭𑀼𑀡𑀸𑀯𑀺𑀳𑀸𑀭𑀺𑀲𑁆𑀲 𑀉𑀡𑁆𑀳𑀸𑀪𑀺𑀖𑀸𑀢𑀸𑀤𑀺𑀭𑀽𑀧𑀦𑀺𑀫𑀺𑀢𑁆𑀢𑀁 𑀲𑀢𑁆𑀢𑀤𑀼𑀓𑁆𑀔𑀁 𑀲𑀫𑀦𑀼𑀧𑀲𑁆𑀲𑀦𑁆𑀢𑀲𑁆𑀲 𑀓𑀭𑀼𑀡𑀸𑀬 𑀧𑀯𑀢𑁆𑀢𑀺𑀲𑀫𑁆𑀪𑀯𑀢𑁄 𑀭𑀽𑀧𑁂 𑀆𑀤𑀻𑀦𑀯𑁄 𑀧𑀭𑀺𑀯𑀺𑀤𑀺𑀢𑁄 𑀳𑁄𑀢𑀺, 𑀅𑀣𑀲𑁆𑀲 𑀧𑀭𑀺𑀯𑀺𑀤𑀺𑀢𑀭𑀽𑀧𑀸𑀤𑀻𑀦𑀯𑀢𑁆𑀢𑀸 𑀧𑀣𑀯𑀻𑀓𑀲𑀺𑀡𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀭𑀽𑀧𑀦𑀺𑀲𑁆𑀲𑀭𑀡𑁂 𑀆𑀓𑀸𑀲𑁂 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑁄 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺. 𑀇𑀢𑀺 𑀓𑀭𑀼𑀡𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀦 𑀢𑀢𑁄 𑀧𑀭𑀁, 𑀢𑀲𑁆𑀫𑀸 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀧𑀭𑀫𑀸𑀢𑀺 𑀯𑀼𑀢𑁆𑀢𑀸.

𑀫𑀼𑀤𑀺𑀢𑀸𑀯𑀺𑀳𑀸𑀭𑀺𑀲𑁆𑀲 𑀧𑀦 𑀢𑁂𑀦 𑀢𑁂𑀦 𑀧𑀸𑀫𑁄𑀚𑁆𑀚𑀓𑀸𑀭𑀡𑁂𑀦 𑀉𑀧𑁆𑀧𑀦𑁆𑀦𑀧𑀸𑀫𑁄𑀚𑁆𑀚𑀲𑀢𑁆𑀢𑀸𑀦𑀁 𑀯𑀺𑀜𑁆𑀜𑀸𑀡𑀁 𑀲𑀫𑀦𑀼𑀧𑀲𑁆𑀲𑀦𑁆𑀢𑀲𑁆𑀲 𑀫𑀼𑀤𑀺𑀢𑀸𑀬 𑀧𑀯𑀢𑁆𑀢𑀺𑀲𑀫𑁆𑀪𑀯𑀢𑁄 𑀯𑀺𑀜𑁆𑀜𑀸𑀡𑀕𑁆𑀕𑀳𑀡𑀧𑀭𑀺𑀘𑀺𑀢𑀁 𑀳𑁄𑀢𑀺, 𑀅𑀣𑀲𑁆𑀲 𑀅𑀦𑀼𑀓𑁆𑀓𑀫𑀸𑀥𑀺𑀕𑀢𑀁 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀅𑀢𑀺𑀓𑁆𑀓𑀫𑁆𑀫 𑀆𑀓𑀸𑀲𑀦𑀺𑀫𑀺𑀢𑁆𑀢𑀕𑁄𑀘𑀭𑁂 𑀯𑀺𑀜𑁆𑀜𑀸𑀡𑁂 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑁄 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺. 𑀇𑀢𑀺 𑀫𑀼𑀤𑀺𑀢𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀦 𑀢𑀢𑁄 𑀧𑀭𑀁, 𑀢𑀲𑁆𑀫𑀸 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀧𑀭𑀫𑀸𑀢𑀺 𑀯𑀼𑀢𑁆𑀢𑀸.

𑀉𑀧𑁂𑀓𑁆𑀔𑀸𑀯𑀺𑀳𑀸𑀭𑀺𑀲𑁆𑀲 𑀧𑀦 ‘‘𑀲𑀢𑁆𑀢𑀸 𑀲𑀼𑀔𑀺𑀢𑀸 𑀯𑀸 𑀳𑁄𑀦𑁆𑀢𑀼, 𑀤𑀼𑀓𑁆𑀔𑀢𑁄 𑀯𑀸 𑀯𑀺𑀫𑀼𑀘𑁆𑀘𑀦𑁆𑀢𑀼, 𑀲𑀫𑁆𑀧𑀢𑁆𑀢𑀲𑀼𑀔𑀢𑁄 𑀯𑀸 𑀫𑀸 𑀯𑀺𑀕𑀘𑁆𑀙𑀦𑁆𑀢𑀽’’𑀢𑀺 𑀆𑀪𑁄𑀕𑀸𑀪𑀸𑀯𑀢𑁄 𑀲𑀼𑀔𑀤𑀼𑀓𑁆𑀔𑀸𑀤𑀺𑀧𑀭𑀫𑀢𑁆𑀣𑀕𑀸𑀳𑀯𑀺𑀫𑀼𑀔𑀲𑀫𑁆𑀪𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑀕𑁆𑀕𑀳𑀡𑀤𑀼𑀓𑁆𑀔𑀘𑀺𑀢𑁆𑀢𑀁 𑀳𑁄𑀢𑀺. 𑀅𑀣𑀲𑁆𑀲 𑀧𑀭𑀫𑀢𑁆𑀣𑀕𑀸𑀳𑀢𑁄 𑀯𑀺𑀫𑀼𑀔𑀪𑀸𑀯𑀧𑀭𑀺𑀘𑀺𑀢𑀘𑀺𑀢𑁆𑀢𑀲𑁆𑀲 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀕𑁆𑀕𑀳𑀡𑀤𑀼𑀓𑁆𑀔𑀘𑀺𑀢𑁆𑀢𑀲𑁆𑀲 𑀘 𑀅𑀦𑀼𑀓𑁆𑀓𑀫𑀸𑀥𑀺𑀕𑀢𑀁 𑀯𑀺𑀜𑁆𑀜𑀸𑀡𑀸𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫𑀲𑀫𑁆𑀪𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑁂 𑀧𑀭𑀫𑀢𑁆𑀣𑀪𑀽𑀢𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀅𑀪𑀸𑀯𑁂 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑁄 𑀅𑀧𑁆𑀧𑀓𑀲𑀺𑀭𑁂𑀦𑁂𑀯 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀓𑁆𑀔𑀦𑁆𑀤𑀢𑀺. 𑀇𑀢𑀺 𑀉𑀧𑁂𑀓𑁆𑀔𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺, 𑀦 𑀢𑀢𑁄 𑀧𑀭𑀁, 𑀢𑀲𑁆𑀫𑀸 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀧𑀭𑀫𑀸𑀢𑀺 𑀯𑀼𑀢𑁆𑀢𑀸. 𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸𑀢𑀺.

𑁫. 𑀲𑀗𑁆𑀕𑀸𑀭𑀯𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁬. 𑀧𑀜𑁆𑀘𑀫𑁂 𑀧𑀕𑁂𑀯𑀸𑀢𑀺 𑀧𑀞𑀫𑀜𑁆𑀜𑁂𑀯. 𑀓𑀸𑀫𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑁂𑀦𑀸𑀢𑀺 𑀓𑀸𑀫𑀭𑀸𑀕𑀕𑀳𑀺𑀢𑁂𑀦. 𑀓𑀸𑀫𑀭𑀸𑀕𑀧𑀭𑁂𑀢𑁂𑀦𑀸𑀢𑀺 𑀓𑀸𑀫𑀭𑀸𑀕𑀸𑀦𑀼𑀕𑀢𑁂𑀦. 𑀦𑀺𑀲𑁆𑀲𑀭𑀡𑀦𑁆𑀢𑀺 𑀢𑀺𑀯𑀺𑀥𑀁 𑀓𑀸𑀫𑀭𑀸𑀕𑀲𑁆𑀲 𑀦𑀺𑀲𑁆𑀲𑀭𑀡𑀁 𑀯𑀺𑀓𑁆𑀔𑀫𑁆𑀪𑀦𑀦𑀺𑀲𑁆𑀲𑀭𑀡𑀁 𑀢𑀤𑀗𑁆𑀕𑀦𑀺𑀲𑁆𑀲𑀭𑀡𑀁 𑀲𑀫𑀼𑀘𑁆𑀙𑁂𑀤𑀦𑀺𑀲𑁆𑀲𑀭𑀡𑀦𑁆𑀢𑀺. 𑀢𑀢𑁆𑀣 𑀅𑀲𑀼𑀪𑁂 𑀧𑀞𑀫𑀚𑁆𑀛𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀦𑀺𑀲𑁆𑀲𑀭𑀡𑀁 𑀦𑀸𑀫, 𑀯𑀺𑀧𑀲𑁆𑀲𑀦𑀸 𑀢𑀤𑀗𑁆𑀕𑀦𑀺𑀲𑁆𑀲𑀭𑀡𑀁 𑀦𑀸𑀫, 𑀅𑀭𑀳𑀢𑁆𑀢𑀫𑀕𑁆𑀕𑁄 𑀲𑀫𑀼𑀘𑁆𑀙𑁂𑀤𑀦𑀺𑀲𑁆𑀲𑀭𑀡𑀁 𑀦𑀸𑀫. 𑀢𑀁 𑀢𑀺𑀯𑀺𑀥𑀫𑁆𑀧𑀺 𑀦𑀧𑁆𑀧𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀢𑁆𑀣𑀫𑁆𑀧𑀻𑀢𑀺𑀆𑀤𑀻𑀲𑀼 𑀅𑀭𑀳𑀢𑁆𑀢𑀲𑀗𑁆𑀔𑀸𑀢𑁄 𑀅𑀢𑁆𑀢𑀦𑁄 𑀅𑀢𑁆𑀣𑁄 𑀅𑀢𑁆𑀢𑀢𑁆𑀣𑁄 𑀦𑀸𑀫, 𑀧𑀘𑁆𑀘𑀬𑀤𑀸𑀬𑀓𑀸𑀦𑀁 𑀅𑀢𑁆𑀣𑁄 𑀧𑀭𑀢𑁆𑀣𑁄 𑀦𑀸𑀫, 𑀲𑁆𑀯𑁂𑀯 𑀤𑀼𑀯𑀺𑀥𑁄𑀧𑀺 𑀉𑀪𑀬𑀢𑁆𑀣𑁄 𑀦𑀸𑀫. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀯𑀸𑀭𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀩𑁆𑀬𑀸𑀧𑀸𑀤𑀲𑁆𑀲 𑀦𑀺𑀲𑁆𑀲𑀭𑀡𑀦𑁆𑀢𑀺𑀆𑀤𑀻𑀲𑀼 𑀳𑀺 𑀤𑁆𑀯𑁂𑀯 𑀦𑀺𑀲𑁆𑀲𑀭𑀡𑀸𑀦𑀺 𑀯𑀺𑀓𑁆𑀔𑀫𑁆𑀪𑀦𑀦𑀺𑀲𑁆𑀲𑀭𑀡𑀜𑁆𑀘 𑀲𑀫𑀼𑀘𑁆𑀙𑁂𑀤𑀦𑀺𑀲𑁆𑀲𑀭𑀡𑀜𑁆𑀘. 𑀢𑀢𑁆𑀣 𑀩𑁆𑀬𑀸𑀧𑀸𑀤𑀲𑁆𑀲 𑀢𑀸𑀯 𑀫𑁂𑀢𑁆𑀢𑀸𑀬 𑀧𑀞𑀫𑀚𑁆𑀛𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀦𑀺𑀲𑁆𑀲𑀭𑀡𑀁, 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀲𑀫𑀼𑀘𑁆𑀙𑁂𑀤𑀦𑀺𑀲𑁆𑀲𑀭𑀡𑀁. 𑀣𑀺𑀦𑀫𑀺𑀤𑁆𑀥𑀲𑁆𑀲 𑀆𑀮𑁄𑀓𑀲𑀜𑁆𑀜𑀸 𑀯𑀺𑀓𑁆𑀔𑀫𑁆𑀪𑀦𑀦𑀺𑀲𑁆𑀲𑀭𑀡𑀁, 𑀅𑀭𑀳𑀢𑁆𑀢𑀫𑀕𑁆𑀕𑁄 𑀲𑀫𑀼𑀘𑁆𑀙𑁂𑀤𑀦𑀺𑀲𑁆𑀲𑀭𑀡𑀁. 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀬𑁄 𑀓𑁄𑀘𑀺 𑀲𑀫𑀣𑁄 𑀯𑀺𑀓𑁆𑀔𑀫𑁆𑀪𑀦𑀦𑀺𑀲𑁆𑀲𑀭𑀡𑀁, 𑀉𑀤𑁆𑀥𑀘𑁆𑀘𑀲𑁆𑀲 𑀧𑀦𑁂𑀢𑁆𑀣 𑀅𑀭𑀳𑀢𑁆𑀢𑀫𑀕𑁆𑀕𑁄, 𑀓𑀼𑀓𑁆𑀓𑀼𑀘𑁆𑀘𑀲𑁆𑀲 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀲𑀫𑀼𑀘𑁆𑀙𑁂𑀤𑀦𑀺𑀲𑁆𑀲𑀭𑀡𑀁. 𑀯𑀺𑀘𑀺𑀓𑀺𑀘𑁆𑀙𑀸𑀬 𑀥𑀫𑁆𑀫𑀯𑀯𑀢𑁆𑀣𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀦𑀺𑀲𑁆𑀲𑀭𑀡𑀁, 𑀧𑀞𑀫𑀫𑀕𑁆𑀕𑁄 𑀲𑀫𑀼𑀘𑁆𑀙𑁂𑀤𑀦𑀺𑀲𑁆𑀲𑀭𑀡𑀁.

𑀬𑀸 𑀧𑀦𑁂𑀢𑁆𑀣 𑀲𑁂𑀬𑁆𑀬𑀣𑀸𑀧𑀺 𑀩𑁆𑀭𑀸𑀳𑁆𑀫𑀡 𑀉𑀤𑀧𑀢𑁆𑀢𑁄 𑀲𑀁𑀲𑀝𑁆𑀞𑁄 𑀮𑀸𑀔𑀸𑀬 𑀯𑀸𑀢𑀺𑀆𑀤𑀺𑀓𑀸 𑀉𑀧𑀫𑀸 𑀯𑀼𑀢𑁆𑀢𑀸, 𑀢𑀸𑀲𑀼 𑀉𑀤𑀧𑀢𑁆𑀢𑁄𑀢𑀺 𑀉𑀤𑀓𑀪𑀭𑀺𑀢𑀸 𑀧𑀸𑀢𑀺. 𑀲𑀁𑀲𑀝𑁆𑀞𑁄𑀢𑀺 𑀯𑀡𑁆𑀡𑀪𑁂𑀤𑀓𑀭𑀡𑀯𑀲𑁂𑀦 𑀲𑀁𑀲𑀝𑁆𑀞𑁄. 𑀧𑀓𑁆𑀓𑀼𑀣𑀺𑀢𑁄𑀢𑀺 𑀓𑀼𑀣𑀺𑀢𑁄. 𑀉𑀲𑁆𑀫𑀼𑀤𑀓𑀚𑀸𑀢𑁄𑀢𑀺 𑀉𑀲𑀼𑀫𑀚𑀸𑀢𑁄. 𑀲𑁂𑀯𑀸𑀮𑀧𑀡𑀓𑀧𑀭𑀺𑀬𑁄𑀦𑀤𑁆𑀥𑁄𑀢𑀺 𑀢𑀺𑀮𑀩𑀻𑀚𑀓𑀸𑀤𑀺𑀪𑁂𑀤𑁂𑀦 𑀲𑁂𑀯𑀸𑀮𑁂𑀦 𑀯𑀸 𑀦𑀻𑀮𑀫𑀡𑁆𑀟𑀽𑀓𑀧𑀺𑀝𑁆𑀞𑀺𑀯𑀡𑁆𑀡𑁂𑀦 𑀯𑀸 𑀉𑀤𑀓𑀧𑀺𑀝𑁆𑀞𑀺𑀁 𑀙𑀸𑀤𑁂𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀧𑀡𑀓𑁂𑀦 𑀧𑀭𑀺𑀬𑁄𑀦𑀤𑁆𑀥𑁄. 𑀯𑀸𑀢𑁂𑀭𑀺𑀢𑁄𑀢𑀺 𑀯𑀸𑀢𑁂𑀦 𑀏𑀭𑀺𑀢𑁄 𑀓𑀫𑁆𑀧𑀺𑀢𑁄. 𑀆𑀯𑀺𑀮𑁄𑀢𑀺 𑀅𑀧𑁆𑀧𑀲𑀦𑁆𑀦𑁄. 𑀮𑀼𑀴𑀺𑀢𑁄𑀢𑀺 𑀅𑀲𑀦𑁆𑀦𑀺𑀲𑀺𑀦𑁆𑀦𑁄. 𑀓𑀮𑀮𑀻𑀪𑀽𑀢𑁄𑀢𑀺 𑀓𑀤𑁆𑀤𑀫𑀻𑀪𑀽𑀢𑁄. 𑀅𑀦𑁆𑀥𑀓𑀸𑀭𑁂 𑀦𑀺𑀓𑁆𑀔𑀺𑀢𑁆𑀢𑁄𑀢𑀺 𑀓𑁄𑀝𑁆𑀞𑀦𑁆𑀢𑀭𑀸𑀤𑀺𑀪𑁂𑀤𑁂 𑀅𑀦𑀸𑀮𑁄𑀓𑀝𑁆𑀞𑀸𑀦𑁂 𑀞𑀧𑀺𑀢𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀪𑀕𑀯𑀸 𑀢𑀻𑀳𑀺 𑀪𑀯𑁂𑀳𑀺 𑀤𑁂𑀲𑀦𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀦𑀺𑀝𑁆𑀞𑀸𑀧𑁂𑀲𑀺, 𑀩𑁆𑀭𑀸𑀳𑁆𑀫𑀡𑁄 𑀧𑀦 𑀲𑀭𑀡𑀫𑀢𑁆𑀢𑁂 𑀧𑀢𑀺𑀝𑁆𑀞𑀺𑀢𑁄.

𑁬. 𑀅𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁨𑁩𑁭. 𑀙𑀝𑁆𑀞𑁂 𑀅𑀜𑁆𑀜𑀸𑀡𑀸𑀬 𑀅𑀤𑀲𑁆𑀲𑀦𑀸𑀬𑀸𑀢𑀺 𑀅𑀜𑁆𑀜𑀸𑀡𑀢𑁆𑀣𑀸𑀬 𑀅𑀤𑀲𑁆𑀲𑀦𑀢𑁆𑀣𑀸𑀬. 𑀢𑀕𑁆𑀖 𑀪𑀕𑀯𑀸 𑀦𑀻𑀯𑀭𑀡𑀸𑀢𑀺 𑀏𑀓𑀁𑀲𑁂𑀦 𑀪𑀕𑀯𑀸 𑀦𑀻𑀯𑀭𑀡𑀸. 𑀓𑀸𑀬𑀓𑀺𑀮𑀫𑀣𑁄𑀢𑀺 𑀓𑀸𑀬𑀤𑀭𑀣𑁄. 𑀘𑀺𑀢𑁆𑀢𑀓𑀺𑀮𑀫𑀣𑁄𑀢𑀺 𑀘𑀺𑀢𑁆𑀢𑀤𑀭𑀣𑁄. 𑀲𑁄𑀧𑀺 𑀫𑁂 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑁄𑀢𑀺 𑀢𑀲𑁆𑀲 𑀓𑀺𑀭 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀲𑀻𑀢𑀮𑀁 𑀉𑀢𑀼𑀲𑀧𑁆𑀧𑀸𑀬𑀝𑁆𑀞𑀸𑀦𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀓𑀸𑀬𑀤𑀭𑀣𑁄 𑀧𑀝𑀺𑀧𑀲𑁆𑀲𑀫𑁆𑀪𑀺, 𑀢𑀲𑁆𑀫𑀺𑀁 𑀧𑀝𑀺𑀧𑀲𑁆𑀲𑀤𑁆𑀥𑁂 𑀢𑀤𑀦𑁆𑀯𑀬𑁂𑀦𑁂𑀯 𑀘𑀺𑀢𑁆𑀢𑀤𑀭𑀣𑁄𑀧𑀺. 𑀅𑀧𑀺𑀘 𑀫𑀕𑁆𑀕𑁂𑀦𑁂𑀯𑀲𑁆𑀲 𑀏𑀢𑀁 𑀉𑀪𑀬𑀫𑁆𑀧𑀺 𑀧𑀲𑁆𑀲𑀤𑁆𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁭. 𑀆𑀦𑀸𑀧𑀸𑀦𑀯𑀕𑁆𑀕𑁄

𑁧. 𑀅𑀝𑁆𑀞𑀺𑀓𑀫𑀳𑀧𑁆𑀨𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁩𑁮. 𑀲𑀢𑁆𑀢𑀫𑀸𑀤𑀻𑀲𑀼 𑀅𑀝𑁆𑀞𑀺𑀓𑀲𑀜𑁆𑀜𑀸𑀢𑀺 𑀅𑀝𑁆𑀞𑀺𑀓𑀁 𑀅𑀝𑁆𑀞𑀺𑀓𑀦𑁆𑀢𑀺 𑀪𑀸𑀯𑁂𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀲𑀜𑁆𑀜𑀸. 𑀢𑀁 𑀧𑀦𑁂𑀢𑀁 𑀪𑀸𑀯𑀬𑀢𑁄 𑀬𑀸𑀯 𑀦𑀺𑀫𑀺𑀢𑁆𑀢𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀸𑀯 𑀙𑀯𑀺𑀧𑀺 𑀘𑀫𑁆𑀫𑀫𑁆𑀧𑀺 𑀉𑀧𑀝𑁆𑀞𑀸𑀢𑀺. 𑀦𑀺𑀫𑀺𑀢𑁆𑀢𑁂 𑀧𑀦 𑀉𑀧𑁆𑀧𑀦𑁆𑀦𑁂 𑀙𑀯𑀺𑀘𑀫𑁆𑀫𑀸𑀦𑀺 𑀦𑁂𑀯 𑀉𑀧𑀝𑁆𑀞𑀳𑀦𑁆𑀢𑀺, 𑀲𑀗𑁆𑀔𑀯𑀡𑁆𑀡𑁄 𑀲𑀼𑀤𑁆𑀥𑀅𑀝𑁆𑀞𑀺𑀓𑀲𑀗𑁆𑀖𑀸𑀝𑁄𑀯 𑀉𑀧𑀝𑁆𑀞𑀸𑀢𑀺 𑀳𑀢𑁆𑀣𑀺𑀓𑁆𑀔𑀦𑁆𑀥𑀕𑀢𑀁 𑀥𑀫𑁆𑀫𑀺𑀓𑀢𑀺𑀲𑁆𑀲𑀭𑀸𑀚𑀸𑀦𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀲𑀸𑀫𑀡𑁂𑀭𑀲𑁆𑀲 𑀯𑀺𑀬, 𑀧𑀝𑀺𑀫𑀕𑁆𑀕𑁂 𑀳𑀲𑀫𑀸𑀦𑀁 𑀇𑀢𑁆𑀣𑀺𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀘𑁂𑀢𑀺𑀬𑀧𑀩𑁆𑀩𑀢𑀯𑀸𑀲𑀺𑀦𑁄 𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀯𑀺𑀬 𑀘𑀸𑀢𑀺. 𑀯𑀢𑁆𑀣𑀽𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁫) 𑀯𑀺𑀢𑁆𑀣𑀸𑀭𑀺𑀢𑀸𑀦𑀺. 𑀲𑀢𑀺 𑀯𑀸 𑀉𑀧𑀸𑀤𑀺𑀲𑁂𑀲𑁂𑀢𑀺 𑀕𑀳𑀡𑀲𑁂𑀲𑁂 𑀉𑀧𑀸𑀤𑀸𑀦𑀲𑁂𑀲𑁂 𑀯𑀺𑀚𑁆𑀚𑀫𑀸𑀦𑀫𑁆𑀳𑀺.

𑁨-𑁧𑁦. 𑀧𑀼𑀴𑀯𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁩𑁯-𑁨𑁪𑁭. 𑀧𑀼𑀴𑀯𑀓𑀲𑀜𑁆𑀜𑀸𑀢𑀺 𑀧𑀼𑀴𑀯𑀁 𑀧𑀼𑀴𑀯𑀦𑁆𑀢𑀺 𑀪𑀸𑀯𑁂𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀲𑀜𑁆𑀜𑀸. 𑀯𑀺𑀦𑀻𑀮𑀓𑀲𑀜𑁆𑀜𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀦𑀺𑀘𑁆𑀙𑀬𑀓𑀣𑀸 𑀧𑀦𑁂𑀢𑁆𑀣 𑀲𑀤𑁆𑀥𑀺𑀁 𑀪𑀸𑀯𑀦𑀸𑀦𑀬𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁦𑁨) 𑀯𑀼𑀢𑁆𑀢𑀸. 𑀫𑁂𑀢𑁆𑀢𑀸𑀤𑀬𑁄 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀉𑀧𑁂𑀓𑁆𑀔𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀯𑀲𑁂𑀦𑁂𑀯.

𑁮. 𑀦𑀺𑀭𑁄𑀥𑀯𑀕𑁆𑀕𑁄

𑁧-𑁧𑁦. 𑀅𑀲𑀼𑀪𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁨𑁪𑁮-𑁨𑁫𑁭. 𑀅𑀲𑀼𑀪𑀲𑀜𑁆𑀜𑀸𑀢𑀺 𑀅𑀲𑀼𑀪𑁂 𑀧𑀞𑀫𑀚𑁆𑀛𑀸𑀦𑀲𑀜𑁆𑀜𑀸. 𑀫𑀭𑀡𑀲𑀜𑁆𑀜𑀸𑀢𑀺 ‘‘𑀅𑀯𑀲𑁆𑀲𑀁 𑀫𑀭𑀺𑀢𑀩𑁆𑀩𑀁, 𑀫𑀭𑀡𑀧𑀝𑀺𑀩𑀤𑁆𑀥𑀁 𑀫𑁂 𑀚𑀻𑀯𑀺𑀢’’𑀦𑁆𑀢𑀺 𑀅𑀪𑀺𑀡𑁆𑀳𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀲𑀜𑁆𑀜𑀸. 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸𑀢𑀺 𑀑𑀤𑀦𑀓𑀼𑀫𑁆𑀫𑀸𑀲𑀸𑀤𑀺𑀫𑁆𑀳𑀺 𑀅𑀚𑁆𑀛𑁄𑀳𑀭𑀡𑀻𑀬𑁂 𑀧𑀝𑀺𑀓𑀽𑀮𑀲𑀜𑁆𑀜𑀸. 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀺𑀲𑀜𑁆𑀜𑀸𑀢𑀺 𑀲𑀓𑀮𑀮𑁄𑀓𑀲𑁆𑀫𑀺𑀁 𑀅𑀦𑀪𑀺𑀭𑀢𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀲𑀜𑁆𑀜𑀸. 𑀧𑀳𑀸𑀦𑀲𑀜𑁆𑀜𑀸𑀯𑀺𑀭𑀸𑀕𑀲𑀜𑁆𑀜𑀸𑀢𑀺 𑀤𑁆𑀯𑁂 𑀧𑀼𑀩𑁆𑀩𑀪𑀸𑀕𑀸. 𑀦𑀺𑀭𑁄𑀥𑀲𑀜𑁆𑀜𑀸 𑀫𑀺𑀲𑁆𑀲𑀓𑀸. 𑀏𑀯𑀫𑁂𑀢𑀸𑀦𑀺 𑀅𑀝𑁆𑀞𑀺𑀓𑀲𑀜𑁆𑀜𑀸𑀤𑀻𑀦𑀺 𑀯𑀻𑀲𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀺. 𑀢𑁂𑀲𑀁 𑀦𑀯𑀲𑀼 𑀅𑀧𑁆𑀧𑀦𑀸 𑀳𑁄𑀦𑁆𑀢𑀺, 𑀏𑀓𑀸𑀤𑀲 𑀉𑀧𑀘𑀸𑀭𑀚𑁆𑀛𑀸𑀦𑀺𑀓𑀸. 𑀲𑁂𑀲𑀸 𑀧𑀦𑁂𑀢𑁆𑀣 𑀯𑀺𑀦𑀺𑀘𑁆𑀙𑀬𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁯𑁪) 𑀆𑀕𑀢𑀸𑀯. 𑀕𑀗𑁆𑀕𑀸𑀧𑁂𑀬𑁆𑀬𑀸𑀮𑀸𑀤𑀬𑁄 𑀫𑀕𑁆𑀕𑀲𑀁𑀬𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸.

𑀩𑁄𑀚𑁆𑀛𑀗𑁆𑀕𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀢𑀺𑀧𑀝𑁆𑀞𑀸𑀦𑀲𑀁𑀬𑀼𑀢𑁆𑀢𑀁

𑁧. 𑀅𑀫𑁆𑀩𑀧𑀸𑀮𑀺𑀯𑀕𑁆𑀕𑁄

𑁧. 𑀅𑀫𑁆𑀩𑀧𑀸𑀮𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬𑁭. 𑀲𑀢𑀺𑀧𑀝𑁆𑀞𑀸𑀦𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀅𑀫𑁆𑀩𑀧𑀸𑀮𑀺𑀯𑀦𑁂𑀢𑀺 𑀅𑀫𑁆𑀩𑀧𑀸𑀮𑀺𑀬𑀸 𑀦𑀸𑀫 𑀭𑀽𑀧𑀽𑀧𑀚𑀻𑀯𑀺𑀦𑀺𑀬𑀸 𑀭𑁄𑀧𑀺𑀢𑁂 𑀅𑀫𑁆𑀩𑀯𑀦𑁂. 𑀢𑀁 𑀓𑀺𑀭 𑀢𑀲𑁆𑀲𑀸 𑀉𑀬𑁆𑀬𑀸𑀦𑀁 𑀅𑀳𑁄𑀲𑀺. 𑀲𑀸 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀲𑀦𑁆𑀦𑀘𑀺𑀢𑁆𑀢𑀸 𑀢𑀢𑁆𑀣 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸 𑀢𑀣𑀸𑀕𑀢𑀲𑁆𑀲 𑀦𑀺𑀬𑁆𑀬𑀸𑀢𑁂𑀲𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀏𑀓𑀸𑀬𑀦𑁆𑀯𑀸𑀬𑀦𑁆𑀢𑀺 𑀏𑀓𑀸𑀬𑀦𑁄 𑀅𑀬𑀁. 𑀢𑀢𑁆𑀣 𑀏𑀓𑀸𑀬𑀦𑁄𑀢𑀺 𑀏𑀓𑀫𑀕𑁆𑀕𑁄. 𑀫𑀕𑁆𑀕𑀲𑁆𑀲 𑀳𑀺 𑁋

‘‘𑀫𑀕𑁆𑀕𑁄 𑀧𑀦𑁆𑀣𑁄 𑀧𑀣𑁄 𑀧𑀚𑁆𑀚𑁄, 𑀅𑀜𑁆𑀚𑀲𑀁 𑀯𑀝𑀼𑀫𑀸𑀬𑀦𑀁;

𑀦𑀸𑀯𑀸 𑀉𑀢𑁆𑀢𑀭𑀲𑁂𑀢𑀽 𑀘, 𑀓𑀼𑀮𑁆𑀮𑁄 𑀘 𑀪𑀺𑀲𑀺 𑀲𑀗𑁆𑀓𑀫𑁄’’𑀢𑀺. (𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲𑁄 𑁧𑁦𑁧) 𑁋

𑀩𑀳𑀽𑀦𑀺 𑀦𑀸𑀫𑀸𑀦𑀺. 𑀲𑁆𑀯𑀸𑀬𑀁 𑀇𑀥 𑀅𑀬𑀦𑀦𑀸𑀫𑁂𑀦 𑀯𑀼𑀢𑁆𑀢𑁄. 𑀢𑀲𑁆𑀫𑀸 𑀏𑀓𑀸𑀬𑀦𑁆𑀯𑀸𑀬𑀁, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄𑀢𑀺 𑀏𑀢𑁆𑀣 𑀏𑀓𑀫𑀕𑁆𑀕𑁄. 𑀅𑀬𑀁, 𑀪𑀺𑀓𑁆𑀔𑀯𑁂, 𑀫𑀕𑁆𑀕𑁄, 𑀦 𑀤𑁆𑀯𑁂𑀥𑀸𑀧𑀣𑀪𑀽𑀢𑁄𑀢𑀺 𑀏𑀯𑀫𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀫𑀕𑁆𑀕𑁄𑀢𑀺 𑀓𑁂𑀦𑀝𑁆𑀞𑁂𑀦 𑀫𑀕𑁆𑀕𑁄? 𑀦𑀺𑀩𑁆𑀩𑀸𑀦𑀕𑀫𑀦𑀝𑁆𑀞𑁂𑀦, 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀫𑀕𑁆𑀕𑀦𑀻𑀬𑀝𑁆𑀞𑁂𑀦 𑀘.

𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀭𑀸𑀕𑀸𑀤𑀻𑀳𑀺 𑀫𑀮𑁂𑀳𑀺 𑀅𑀪𑀺𑀚𑁆𑀛𑀸𑀯𑀺𑀲𑀫𑀮𑁄𑀪𑀸𑀤𑀻𑀳𑀺 𑀘 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀲𑀁𑀓𑀺𑀮𑀺𑀝𑁆𑀞𑀘𑀺𑀢𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀯𑀺𑀲𑀼𑀤𑁆𑀥𑀢𑁆𑀣𑀸𑀬. 𑀲𑁄𑀓𑀧𑀭𑀺𑀤𑁂𑀯𑀸𑀦𑀁 𑀲𑀫𑀢𑀺𑀓𑁆𑀓𑀫𑀸𑀬𑀸𑀢𑀺 𑀲𑁄𑀓𑀲𑁆𑀲 𑀘 𑀧𑀭𑀺𑀤𑁂𑀯𑀲𑁆𑀲 𑀘 𑀲𑀫𑀢𑀺𑀓𑁆𑀓𑀫𑀸𑀬, 𑀧𑀳𑀸𑀦𑀸𑀬𑀸𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸𑀬𑀸𑀢𑀺 𑀓𑀸𑀬𑀺𑀓𑀤𑀼𑀓𑁆𑀔𑀲𑁆𑀲 𑀘 𑀘𑁂𑀢𑀲𑀺𑀓𑀤𑁄𑀫𑀦𑀲𑁆𑀲𑀲𑁆𑀲 𑀘𑀸𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀅𑀢𑁆𑀣𑀗𑁆𑀕𑀫𑀸𑀬, 𑀦𑀺𑀭𑁄𑀥𑀸𑀬𑀸𑀢𑀺 𑀅𑀢𑁆𑀣𑁄. 𑀜𑀸𑀬𑀲𑁆𑀲 𑀅𑀥𑀺𑀕𑀫𑀸𑀬𑀸𑀢𑀺 𑀜𑀸𑀬𑁄 𑀯𑀼𑀘𑁆𑀘𑀢𑀺 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀢𑀲𑁆𑀲 𑀅𑀥𑀺𑀕𑀫𑀸𑀬 𑀧𑀢𑁆𑀢𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀜𑁆𑀳𑀺 𑀧𑀼𑀩𑁆𑀩𑀪𑀸𑀕𑁂 𑀮𑁄𑀓𑀺𑀬𑁄 𑀲𑀢𑀺𑀧𑀝𑁆𑀞𑀸𑀦𑀫𑀕𑁆𑀕𑁄 𑀪𑀸𑀯𑀺𑀢𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑁆𑀲 𑀅𑀥𑀺𑀕𑀫𑀸𑀬 𑀲𑀁𑀯𑀢𑁆𑀢𑀢𑀺. 𑀢𑁂𑀦𑀸𑀳 ‘‘𑀜𑀸𑀬𑀲𑁆𑀲 𑀅𑀥𑀺𑀕𑀫𑀸𑀬𑀸’’𑀢𑀺. 𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸𑀢𑀺 𑀢𑀡𑁆𑀳𑀸𑀯𑀸𑀦𑀯𑀺𑀭𑀳𑀺𑀢𑀢𑁆𑀢𑀸 𑀦𑀺𑀩𑁆𑀩𑀸𑀦𑀦𑁆𑀢𑀺 𑀮𑀤𑁆𑀥𑀦𑀸𑀫𑀲𑁆𑀲 𑀅𑀫𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬, 𑀅𑀢𑁆𑀢𑀧𑀘𑁆𑀘𑀓𑁆𑀔𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀬𑀜𑁆𑀳𑀺 𑀫𑀕𑁆𑀕𑁄 𑀪𑀸𑀯𑀺𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀁 𑀲𑀸𑀥𑁂𑀢𑀺. 𑀢𑁂𑀦𑀸𑀳 ‘‘𑀦𑀺𑀩𑁆𑀩𑀸𑀦𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’’𑀢𑀺.

𑀏𑀯𑀁 𑀪𑀕𑀯𑀢𑀸 𑀲𑀢𑁆𑀢𑀳𑀺 𑀧𑀤𑁂𑀳𑀺 𑀏𑀓𑀸𑀬𑀦𑀫𑀕𑁆𑀕𑀲𑁆𑀲 𑀯𑀡𑁆𑀡𑁄 𑀪𑀸𑀲𑀺𑀢𑁄, 𑀲𑁄 𑀓𑀲𑁆𑀫𑀸𑀢𑀺 𑀘𑁂? 𑀪𑀺𑀓𑁆𑀔𑀽𑀦𑀁 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁. 𑀯𑀡𑁆𑀡𑀪𑀸𑀲𑀦𑀜𑁆𑀳𑀺 𑀲𑀼𑀢𑁆𑀯𑀸 𑀢𑁂 𑀪𑀺𑀓𑁆𑀔𑀽 𑁋 ‘‘𑀅𑀬𑀁 𑀓𑀺𑀭 𑀫𑀕𑁆𑀕𑁄 𑀳𑀤𑀬𑀲𑀦𑁆𑀢𑀸𑀧𑀪𑀽𑀢𑀁 𑀲𑁄𑀓𑀁, 𑀯𑀸𑀘𑀸𑀯𑀺𑀧𑁆𑀧𑀮𑀸𑀧𑀪𑀽𑀢𑀁 𑀧𑀭𑀺𑀤𑁂𑀯𑀁, 𑀓𑀸𑀬𑀺𑀓𑀅𑀲𑀸𑀢𑀪𑀽𑀢𑀁 𑀤𑀼𑀓𑁆𑀔𑀁, 𑀘𑁂𑀢𑀲𑀺𑀓𑀅𑀲𑀸𑀢𑀪𑀽𑀢𑀁 𑀤𑁄𑀫𑀦𑀲𑁆𑀲𑀦𑁆𑀢𑀺 𑀘𑀢𑁆𑀢𑀸𑀭𑁄 𑀉𑀧𑀤𑁆𑀤𑀯𑁂 𑀳𑀭𑀢𑀺. 𑀯𑀺𑀲𑀼𑀤𑁆𑀥𑀺𑀁, 𑀜𑀸𑀬𑀁, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀢𑀬𑁄 𑀯𑀺𑀲𑁂𑀲𑁂 𑀆𑀯𑀳𑀢𑀻’’𑀢𑀺 𑀉𑀲𑁆𑀲𑀸𑀳𑀚𑀸𑀢𑀸 𑀇𑀫𑀁 𑀤𑁂𑀲𑀦𑀁 𑀉𑀕𑁆𑀕𑀳𑁂𑀢𑀩𑁆𑀩𑀁 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀁, 𑀥𑀸𑀭𑁂𑀢𑀩𑁆𑀩𑀁, 𑀇𑀫𑀜𑁆𑀘 𑀫𑀕𑁆𑀕𑀁 𑀪𑀸𑀯𑁂𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺. 𑀇𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀁 𑀯𑀡𑁆𑀡𑀁 𑀅𑀪𑀸𑀲𑀺 𑀓𑀫𑁆𑀩𑀮𑀯𑀸𑀡𑀺𑀚𑀸𑀤𑀬𑁄 𑀓𑀫𑁆𑀩𑀮𑀸𑀤𑀻𑀦𑀁 𑀯𑀡𑁆𑀡𑀁 𑀯𑀺𑀬.

𑀬𑀤𑀺𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀬𑁂 𑀇𑀫𑁂𑀢𑀺 𑀅𑀬𑀫𑀲𑁆𑀲 𑀅𑀢𑁆𑀣𑁄. 𑀘𑀢𑁆𑀢𑀸𑀭𑁄𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀢𑁂𑀦 ‘‘𑀦 𑀢𑀢𑁄 𑀳𑁂𑀝𑁆𑀞𑀸, 𑀦 𑀉𑀤𑁆𑀥’’𑀦𑁆𑀢𑀺 𑀲𑀢𑀺𑀧𑀝𑁆𑀞𑀸𑀦𑀧𑀭𑀺𑀘𑁆𑀙𑁂𑀤𑀁 𑀤𑀻𑀧𑁂𑀢𑀺. 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸 𑀲𑀢𑀺𑀕𑁄𑀘𑀭𑁄𑀧𑀺, 𑀢𑀺𑀥𑀸 𑀧𑀝𑀺𑀧𑀦𑁆𑀦𑁂𑀲𑀼 𑀲𑀸𑀯𑀓𑁂𑀲𑀼 𑀲𑀢𑁆𑀣𑀼𑀦𑁄 𑀧𑀝𑀺𑀖𑀸𑀦𑀼𑀦𑀬𑀯𑀻𑀢𑀺𑀯𑀢𑁆𑀢𑀢𑀸𑀧𑀺, 𑀲𑀢𑀺𑀧𑀺. ‘‘𑀘𑀢𑀼𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀲𑀫𑀼𑀤𑀬𑀜𑁆𑀘 𑀅𑀢𑁆𑀣𑀗𑁆𑀕𑀫𑀜𑁆𑀘 𑀤𑁂𑀲𑁂𑀲𑁆𑀲𑀸𑀫𑀺 𑀢𑀁 𑀲𑀼𑀡𑀸𑀣. 𑀓𑁄 𑀘, 𑀪𑀺𑀓𑁆𑀔𑀯𑁂, 𑀓𑀸𑀬𑀲𑁆𑀲 𑀲𑀫𑀼𑀤𑀬𑁄? 𑀆𑀳𑀭𑀲𑀫𑀼𑀤𑀬𑀸 𑀓𑀸𑀬𑀲𑀫𑀼𑀤𑀬𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁫.𑁪𑁦𑁮) 𑀳𑀺 𑀲𑀢𑀺𑀕𑁄𑀘𑀭𑁄 𑀲𑀢𑀺𑀧𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑁄. 𑀢𑀣𑀸 ‘‘𑀓𑀸𑀬𑁄 𑀉𑀧𑀝𑁆𑀞𑀸𑀦𑀁, 𑀦𑁄 𑀲𑀢𑀺, 𑀲𑀢𑀺 𑀉𑀧𑀝𑁆𑀞𑀸𑀦𑀜𑁆𑀘𑁂𑀯 𑀲𑀢𑀺 𑀘𑀸’’𑀢𑀺𑀆𑀤𑀻𑀲𑀼𑀧𑀺 (𑀧𑀝𑀺. 𑀫. 𑁨.𑁩𑁫). 𑀢𑀲𑁆𑀲 𑀅𑀢𑁆𑀣𑁄 𑁋 𑀧𑀢𑀺𑀝𑁆𑀞𑀸𑀢𑀺 𑀅𑀲𑁆𑀫𑀺𑀦𑁆𑀢𑀺 𑀧𑀝𑁆𑀞𑀸𑀦𑀁. 𑀓𑀸 𑀧𑀢𑀺𑀝𑁆𑀞𑀸𑀢𑀺? 𑀲𑀢𑀺. 𑀲𑀢𑀺𑀬𑀸 𑀧𑀝𑁆𑀞𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀁. 𑀧𑀥𑀸𑀦𑀁 𑀞𑀸𑀦𑀦𑁆𑀢𑀺 𑀯𑀸 𑀧𑀝𑁆𑀞𑀸𑀦𑀁. 𑀲𑀢𑀺𑀬𑀸 𑀧𑀝𑁆𑀞𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀁 𑀳𑀢𑁆𑀣𑀺𑀝𑁆𑀞𑀸𑀦𑀅𑀲𑁆𑀲𑀝𑁆𑀞𑀸𑀦𑀸𑀤𑀻𑀦𑀺 𑀯𑀺𑀬.

‘‘𑀢𑀬𑁄 𑀲𑀢𑀺𑀧𑀝𑁆𑀞𑀸𑀦𑀸, 𑀬𑀤𑀭𑀺𑀬𑁄 𑀲𑁂𑀯𑀢𑀺, 𑀬𑀤𑀭𑀺𑀬𑁄 𑀲𑁂𑀯𑀫𑀸𑀦𑁄 𑀲𑀢𑁆𑀣𑀸 𑀕𑀡𑀫𑀦𑀼𑀲𑀸𑀲𑀺𑀢𑀼𑀫𑀭𑀳𑀢𑀻’’𑀢𑀺 (𑀫. 𑀦𑀺. 𑁩.𑁩𑁧𑁧) 𑀏𑀢𑁆𑀣 𑀢𑀺𑀥𑀸 𑀧𑀝𑀺𑀧𑀦𑁆𑀦𑁂𑀲𑀼 𑀲𑀸𑀯𑀓𑁂𑀲𑀼 𑀲𑀢𑁆𑀣𑀼𑀦𑁄 𑀧𑀝𑀺𑀖𑀸𑀦𑀼𑀦𑀬𑀯𑀻𑀢𑀺𑀯𑀢𑁆𑀢𑀢𑀸 𑀲𑀢𑀺𑀧𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀸. 𑀢𑀲𑁆𑀲𑀢𑁆𑀣𑁄 𑁋 𑀧𑀝𑁆𑀞𑀧𑁂𑀢𑀩𑁆𑀩𑀢𑁄 𑀧𑀝𑁆𑀞𑀸𑀦𑀁, 𑀧𑀯𑀢𑁆𑀢𑀬𑀺𑀢𑀩𑁆𑀩𑀢𑁄𑀢𑀺 𑀅𑀢𑁆𑀣𑁄. 𑀓𑁂𑀦 𑀧𑀝𑁆𑀞𑀧𑁂𑀢𑀩𑁆𑀩𑁄𑀢𑀺? 𑀲𑀢𑀺𑀬𑀸. 𑀲𑀢𑀺𑀬𑀸 𑀧𑀝𑁆𑀞𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀦𑁆𑀢𑀺.

‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀧𑀭𑀺𑀧𑀽𑀭𑁂𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁪𑁭; 𑀲𑀁. 𑀦𑀺. 𑁫.𑁯𑁮𑁯) 𑀧𑀦 𑀲𑀢𑀺𑀬𑁂𑀯 𑀲𑀢𑀺𑀧𑀝𑁆𑀞𑀸𑀦𑀦𑁆𑀢𑀺 𑀯𑀼𑀢𑁆𑀢𑀸. 𑀢𑀲𑁆𑀲𑀢𑁆𑀣𑁄 𑁋 𑀧𑀢𑀺𑀝𑁆𑀞𑀸𑀢𑀻𑀢𑀺 𑀧𑀝𑁆𑀞𑀸𑀦𑀁, 𑀉𑀧𑀝𑁆𑀞𑀸𑀢𑀺 𑀑𑀓𑁆𑀓𑀦𑁆𑀤𑀺𑀢𑁆𑀯𑀸 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀲𑀢𑀺𑀬𑁂𑀯 𑀧𑀝𑁆𑀞𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀁. 𑀅𑀣 𑀯𑀸 𑀲𑀭𑀡𑀝𑁆𑀞𑁂𑀦 𑀲𑀢𑀺, 𑀉𑀧𑀝𑁆𑀞𑀸𑀦𑀝𑁆𑀞𑁂𑀦 𑀧𑀝𑁆𑀞𑀸𑀦𑀁, 𑀇𑀢𑀺 𑀲𑀢𑀺 𑀘 𑀲𑀸 𑀧𑀝𑁆𑀞𑀸𑀦𑀜𑁆𑀘𑀸𑀢𑀺𑀧𑀺 𑀲𑀢𑀺𑀧𑀝𑁆𑀞𑀸𑀦𑀁. 𑀇𑀤𑀫𑀺𑀥 𑀅𑀥𑀺𑀧𑁆𑀧𑁂𑀢𑀁.

𑀬𑀤𑀺 𑀏𑀯𑀁 𑀓𑀲𑁆𑀫𑀸 ‘‘𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺 𑀩𑀳𑀼𑀯𑀘𑀦𑀁 𑀓𑀢𑀦𑁆𑀢𑀺? 𑀲𑀢𑀻𑀦𑀁 𑀩𑀳𑀼𑀢𑁆𑀢𑀸. 𑀆𑀭𑀫𑁆𑀫𑀡𑀪𑁂𑀤𑁂𑀦 𑀳𑀺 𑀩𑀳𑀼𑀓𑀸 𑀲𑀢𑀺𑀬𑁄. 𑀅𑀣 ‘‘𑀫𑀕𑁆𑀕𑁄’’𑀢𑀺 𑀓𑀲𑁆𑀫𑀸 𑀏𑀓𑀯𑀘𑀦𑀦𑁆𑀢𑀺? 𑀫𑀕𑁆𑀕𑀦𑀝𑁆𑀞𑁂𑀦 𑀏𑀓𑀢𑁆𑀢𑀸. 𑀘𑀢𑀲𑁆𑀲𑁄𑀧𑀺 𑀳𑀺 𑀏𑀢𑀸 𑀲𑀢𑀺𑀬𑁄 𑀫𑀕𑁆𑀕𑀦𑀝𑁆𑀞𑁂𑀦 𑀏𑀓𑀢𑁆𑀢𑀁 𑀕𑀘𑁆𑀙𑀦𑁆𑀢𑀺. 𑀯𑀼𑀢𑀜𑁆𑀳𑁂𑀢𑀁 ‘‘𑀫𑀕𑁆𑀕𑁄𑀢𑀺 𑀓𑁂𑀦𑀝𑁆𑀞𑁂𑀦 𑀫𑀕𑁆𑀕𑁄? 𑀦𑀺𑀩𑁆𑀩𑀸𑀦𑀫𑀕𑁆𑀕𑀦𑀝𑁆𑀞𑁂𑀦, 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀫𑀕𑁆𑀕𑀦𑀻𑀬𑀝𑁆𑀞𑁂𑀦 𑀘𑀸’’𑀢𑀺. 𑀘𑀢𑀲𑁆𑀲𑁄𑀧𑀺 𑀘𑁂𑀢𑀸 𑀅𑀧𑀭𑀪𑀸𑀕𑁂 𑀓𑀸𑀬𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸 𑀦𑀺𑀩𑁆𑀩𑀸𑀦𑀁 𑀕𑀘𑁆𑀙𑀦𑁆𑀢𑀺, 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀘 𑀦𑀺𑀩𑁆𑀩𑀸𑀦𑀢𑁆𑀣𑀺𑀓𑁂𑀳𑀺 𑀫𑀕𑁆𑀕𑀺𑀬𑀦𑁆𑀢𑀻𑀢𑀺 𑀢𑀲𑁆𑀫𑀸 𑀘𑀢𑀲𑁆𑀲𑁄𑀧𑀺 𑀏𑀓𑁄 𑀫𑀕𑁆𑀕𑁄𑀢𑀺 𑀯𑀼𑀢𑁆𑀢𑀸. 𑀏𑀯𑀜𑁆𑀘 𑀲𑀢𑀺 𑀯𑀘𑀦𑀸𑀦𑀼𑀲𑀦𑁆𑀥𑀺𑀦𑀸 𑀲𑀸𑀦𑀼𑀲𑀦𑁆𑀥𑀺𑀓𑀸𑀯 𑀤𑁂𑀲𑀦𑀸 𑀳𑁄𑀢𑀺.

𑀓𑀢𑀫𑁂 𑀘𑀢𑁆𑀢𑀸𑀭𑁄𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸. 𑀓𑀸𑀬𑁂𑀢𑀺 𑀭𑀽𑀧𑀓𑀸𑀬𑁂. 𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺 𑀓𑀸𑀬𑀁 𑀅𑀦𑀼𑀧𑀲𑁆𑀲𑀦𑀲𑀻𑀮𑁄, 𑀓𑀸𑀬𑀁 𑀯𑀸 𑀅𑀦𑀼𑀧𑀲𑁆𑀲𑀫𑀸𑀦𑁄. 𑀅𑀬𑀜𑁆𑀳𑀺 𑀪𑀺𑀓𑁆𑀔𑀼 𑀇𑀫𑀁 𑀓𑀸𑀬𑀁 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀻𑀦𑀁 𑀲𑀢𑁆𑀢𑀦𑁆𑀦𑀁 𑀅𑀦𑀼𑀧𑀲𑁆𑀲𑀦𑀸𑀦𑀁 𑀯𑀲𑁂𑀦 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀦𑀺𑀘𑁆𑀘𑀢𑁄, 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀲𑀼𑀔𑀢𑁄, 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀢𑀺, 𑀦𑁄 𑀅𑀢𑁆𑀢𑀢𑁄, 𑀦𑀺𑀩𑁆𑀩𑀺𑀦𑁆𑀤𑀢𑀺, 𑀦𑁄 𑀦𑀦𑁆𑀤𑀢𑀺, 𑀯𑀺𑀭𑀚𑁆𑀚𑀢𑀺, 𑀦𑁄 𑀭𑀚𑁆𑀚𑀢𑀺, 𑀦𑀺𑀭𑁄𑀥𑁂𑀢𑀺, 𑀦𑁄 𑀲𑀫𑀼𑀤𑁂𑀢𑀺, 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀦𑁄 𑀆𑀤𑀺𑀬𑀢𑀺. 𑀲𑁄 𑀢𑀁 𑀅𑀦𑀺𑀘𑁆𑀘𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀺, 𑀤𑀼𑀓𑁆𑀔𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀲𑀼𑀔𑀲𑀜𑁆𑀜𑀁 𑀧𑀚𑀳𑀢𑀺, 𑀅𑀦𑀢𑁆𑀢𑀢𑁄 𑀅𑀦𑀼𑀧𑀲𑁆𑀲𑀦𑁆𑀢𑁄 𑀅𑀢𑁆𑀢𑀲𑀜𑁆𑀜𑀁 𑀧𑀚𑀳𑀢𑀺, 𑀦𑀺𑀩𑁆𑀩𑀺𑀦𑁆𑀤𑀦𑁆𑀢𑁄 𑀦𑀦𑁆𑀤𑀺𑀁 𑀧𑀚𑀳𑀢𑀺, 𑀯𑀺𑀭𑀚𑁆𑀚𑀦𑁆𑀢𑁄 𑀭𑀸𑀕𑀁 𑀧𑀚𑀳𑀢𑀺, 𑀦𑀺𑀭𑁄𑀥𑁂𑀦𑁆𑀢𑁄 𑀲𑀫𑀼𑀤𑀬𑀁 𑀧𑀚𑀳𑀢𑀺, 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑁄 𑀆𑀤𑀸𑀦𑀁 𑀧𑀚𑀳𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀳𑀭𑀢𑀻𑀢𑀺 𑀇𑀭𑀻𑀬𑀢𑀺. 𑀆𑀢𑀸𑀧𑀻𑀢𑀺 𑀢𑀻𑀲𑀼 𑀪𑀯𑁂𑀲𑀼 𑀓𑀺𑀮𑁂𑀲𑁂 𑀆𑀢𑀧𑀢𑀻𑀢𑀺 𑀆𑀢𑀸𑀧𑁄, 𑀯𑀻𑀭𑀺𑀬𑀲𑁆𑀲𑁂𑀢𑀁 𑀦𑀸𑀫𑀁. 𑀆𑀢𑀸𑀧𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀆𑀢𑀸𑀧𑀻. 𑀲𑀫𑁆𑀧𑀚𑀸𑀦𑁄𑀢𑀺 𑀲𑀫𑁆𑀧𑀚𑀜𑁆𑀜𑀲𑀗𑁆𑀔𑀸𑀢𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀲𑀢𑀺𑀫𑀸𑀢𑀺 𑀓𑀸𑀬𑀧𑀭𑀺𑀕𑁆𑀕𑀸𑀳𑀺𑀓𑀸𑀬 𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀅𑀬𑀁 𑀧𑀦 𑀬𑀲𑁆𑀫𑀸 𑀲𑀢𑀺𑀬𑀸 𑀆𑀭𑀫𑁆𑀫𑀡𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀧𑀜𑁆𑀜𑀸𑀬 𑀅𑀦𑀼𑀧𑀲𑁆𑀲𑀢𑀺. 𑀦 𑀳𑀺 𑀲𑀢𑀺𑀯𑀺𑀭𑀳𑀺𑀢𑀲𑁆𑀲 𑀅𑀦𑀼𑀧𑀲𑁆𑀲𑀦𑀸 𑀦𑀸𑀫 𑀅𑀢𑁆𑀣𑀺, 𑀢𑁂𑀦𑁂𑀯𑀸𑀳 ‘‘𑀲𑀢𑀺𑀜𑁆𑀘 𑀔𑁆𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀲𑀩𑁆𑀩𑀢𑁆𑀣𑀺𑀓𑀁 𑀯𑀤𑀸𑀫𑀻’’𑀢𑀺 (𑀲𑀁. 𑀦𑀺. 𑁫.𑁨𑁩𑁪). 𑀢𑀲𑁆𑀫𑀸 𑀏𑀢𑁆𑀣 ‘‘𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀻’’𑀢𑀺 𑀏𑀢𑁆𑀢𑀸𑀯𑀢𑀸 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀬𑀲𑁆𑀫𑀸 𑀅𑀦𑀸𑀢𑀸𑀧𑀺𑀦𑁄 𑀅𑀦𑁆𑀢𑁄𑀲𑀗𑁆𑀔𑁂𑀧𑁄 𑀅𑀦𑁆𑀢𑀭𑀸𑀬𑀓𑀭𑁄 𑀳𑁄𑀢𑀺, 𑀅𑀲𑀫𑁆𑀧𑀚𑀸𑀦𑁄 𑀉𑀧𑀸𑀬𑀧𑀭𑀺𑀕𑁆𑀕𑀳𑁂 𑀅𑀦𑀼𑀧𑀸𑀬𑀧𑀭𑀺𑀯𑀚𑁆𑀚𑀦𑁂 𑀘 𑀲𑀫𑁆𑀫𑀼𑀬𑁆𑀳𑀢𑀺, 𑀫𑀼𑀝𑁆𑀞𑀲𑁆𑀲𑀢𑀺 𑀉𑀧𑀸𑀬𑀸𑀧𑀭𑀺𑀘𑁆𑀘𑀸𑀕𑁂 𑀅𑀦𑀼𑀧𑀸𑀬𑀸𑀧𑀭𑀺𑀕𑁆𑀕𑀳𑁂 𑀘 𑀅𑀲𑀫𑀢𑁆𑀣𑁄 𑀳𑁄𑀢𑀺, 𑀢𑁂𑀦𑀲𑁆𑀲 𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀦 𑀲𑀫𑁆𑀧𑀚𑁆𑀚𑀢𑀺. 𑀢𑀲𑁆𑀫𑀸 𑀬𑁂𑀲𑀁 𑀥𑀫𑁆𑀫𑀸𑀦𑀁 𑀆𑀦𑀼𑀪𑀸𑀯𑁂𑀦 𑀢𑀁 𑀲𑀫𑁆𑀧𑀚𑁆𑀚𑀢𑀺, 𑀢𑁂𑀲𑀁 𑀤𑀲𑁆𑀲𑀦𑀢𑁆𑀣𑀁 ‘‘𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸’’𑀢𑀺 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀇𑀢𑀺 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀲𑀢𑀺𑀧𑀝𑁆𑀞𑀸𑀦𑀁 𑀲𑀫𑁆𑀧𑀬𑁄𑀕𑀗𑁆𑀕𑀜𑁆𑀚𑀲𑁆𑀲 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀳𑀸𑀦𑀗𑁆𑀕𑀁 𑀤𑀲𑁆𑀲𑁂𑀢𑀼𑀁 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀺𑀦𑁂𑀬𑁆𑀬𑀸𑀢𑀺 𑀢𑀤𑀗𑁆𑀕𑀯𑀺𑀦𑀬𑁂𑀦 𑀯𑀸 𑀯𑀺𑀓𑁆𑀔𑀫𑁆𑀪𑀦𑀯𑀺𑀦𑀬𑁂𑀦 𑀯𑀸 𑀯𑀺𑀦𑀬𑀺𑀢𑁆𑀯𑀸. 𑀮𑁄𑀓𑁂𑀢𑀺 𑀢𑀲𑁆𑀫𑀺𑀁𑀬𑁂𑀯 𑀓𑀸𑀬𑁂. 𑀓𑀸𑀬𑁄 𑀳𑀺 𑀇𑀥 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀬𑀲𑁆𑀫𑀸 𑀧𑀦𑀲𑁆𑀲 𑀦 𑀓𑀸𑀬𑀫𑀢𑁆𑀢𑁂𑀬𑁂𑀯 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁 𑀧𑀳𑀻𑀬𑀢𑀺, 𑀯𑁂𑀤𑀦𑀸𑀤𑀻𑀲𑀼𑀧𑀺 𑀧𑀳𑀻𑀬𑀢𑀺 𑀏𑀯. 𑀢𑀲𑁆𑀫𑀸 ‘‘𑀧𑀜𑁆𑀘𑀧𑀺 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀮𑁄𑀓𑁄’’𑀢𑀺 𑀯𑀺𑀪𑀗𑁆𑀕𑁂 (𑀯𑀺𑀪. 𑁩𑁬𑁨) 𑀯𑀼𑀢𑁆𑀢𑀁. 𑀮𑁄𑀓𑀲𑀗𑁆𑀔𑀸𑀢𑀢𑁆𑀢𑀸 𑀯𑀸 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀼𑀤𑁆𑀥𑀸𑀭𑀦𑀬𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀬𑀁 𑀧𑀦𑀸𑀳 ‘‘𑀢𑀢𑁆𑀣 𑀓𑀢𑀫𑁄 𑀮𑁄𑀓𑁄, 𑀲𑁆𑀯𑁂𑀯 𑀓𑀸𑀬𑁄 𑀮𑁄𑀓𑁄’’𑀢𑀺, 𑀅𑀬𑀫𑁂𑀯𑁂𑀢𑁆𑀣 𑀅𑀢𑁆𑀣𑁄. 𑀢𑀲𑁆𑀫𑀺𑀁 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁 𑀯𑀺𑀦𑁂𑀬𑁆𑀬𑀸𑀢𑀺 𑀏𑀯𑀁 𑀲𑀫𑁆𑀩𑀦𑁆𑀥𑁄 𑀤𑀝𑁆𑀞𑀩𑁆𑀩𑁄.

𑀯𑁂𑀤𑀦𑀸𑀲𑀽𑀢𑀺 𑀏𑀢𑁆𑀣 𑀢𑀺𑀲𑁆𑀲𑁄 𑀯𑁂𑀤𑀦𑀸, 𑀢𑀸 𑀘 𑀮𑁄𑀓𑀺𑀬𑀸 𑀏𑀯, 𑀘𑀺𑀢𑁆𑀢𑀫𑁆𑀧𑀺 𑀮𑁄𑀓𑀺𑀬𑀁, 𑀢𑀣𑀸 𑀥𑀫𑁆𑀫𑀸. 𑀬𑀣𑀸 𑀧𑀦 𑀯𑁂𑀤𑀦𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸, 𑀢𑀣𑀸 𑀅𑀦𑀼𑀧𑀲𑁆𑀲𑀦𑁆𑀢𑁄 𑀏𑀲 𑀯𑁂𑀤𑀦𑀸𑀦𑀼𑀧𑀲𑁆𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀲 𑀦𑀬𑁄 𑀘𑀺𑀢𑁆𑀢𑀥𑀫𑁆𑀫𑁂𑀲𑀼. 𑀓𑀣𑀜𑁆𑀘 𑀯𑁂𑀤𑀦𑀸 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸𑀢𑀺? 𑀲𑀼𑀔𑀸 𑀢𑀸𑀯 𑀯𑁂𑀤𑀦𑀸 𑀤𑀼𑀓𑁆𑀔𑀢𑁄, 𑀤𑀼𑀓𑁆𑀔𑀸 𑀲𑀮𑁆𑀮𑀢𑁄, 𑀅𑀤𑀼𑀓𑁆𑀔𑀫𑀲𑀼𑀔𑀸 𑀅𑀦𑀺𑀘𑁆𑀘𑀢𑁄. 𑀬𑀣𑀸𑀳 𑁋

‘‘𑀬𑁄 𑀲𑀼𑀔𑀁 𑀤𑀼𑀓𑁆𑀔𑀢𑁄 𑀅𑀤𑁆𑀤, 𑀤𑀼𑀓𑁆𑀔𑀫𑀤𑁆𑀤𑀓𑁆𑀔𑀺 𑀲𑀮𑁆𑀮𑀢𑁄;

𑀅𑀤𑀼𑀓𑁆𑀔𑀫𑀲𑀼𑀔𑀁 𑀲𑀦𑁆𑀢𑀁, 𑀅𑀤𑁆𑀤𑀓𑁆𑀔𑀺 𑀦𑀁 𑀅𑀦𑀺𑀘𑁆𑀘𑀢𑁄;

𑀲 𑀯𑁂 𑀲𑀫𑁆𑀫𑀤𑁆𑀤𑀲𑁄 𑀪𑀺𑀓𑁆𑀔𑀼, 𑀉𑀧𑀲𑀦𑁆𑀢𑁄 𑀘𑀭𑀺𑀲𑁆𑀲𑀢𑀻’’𑀢𑀺.

𑀲𑀩𑁆𑀩𑀸 𑀏𑀯 𑀘𑁂𑀢𑀸 𑀤𑀼𑀓𑁆𑀔𑀸𑀢𑀺𑀧𑀺 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑀁𑀓𑀺𑀜𑁆𑀘𑀺 𑀯𑁂𑀤𑀬𑀺𑀢𑀁, 𑀲𑀩𑁆𑀩𑀁 𑀢𑀁 𑀤𑀼𑀓𑁆𑀔𑀲𑁆𑀫𑀺𑀦𑁆𑀢𑀺 𑀯𑀤𑀸𑀫𑀻’’𑀢𑀺 (𑀲𑀁. 𑀦𑀺. 𑁪.𑁨𑁫𑁯). 𑀲𑀼𑀔𑀤𑀼𑀓𑁆𑀔𑀢𑁄𑀧𑀺 𑀘 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸, 𑀬𑀣𑀸𑀳 𑁋 ‘‘𑀲𑀼𑀔𑀸 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀯𑁂𑀤𑀦𑀸 𑀞𑀺𑀢𑀺𑀲𑀼𑀔𑀸 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀸’’𑀢𑀺 (𑀫. 𑀦𑀺. 𑁧.𑁪𑁬𑁫) 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀅𑀧𑀺𑀘 𑀅𑀦𑀺𑀘𑁆𑀘𑀸𑀤𑀺𑀲𑀢𑁆𑀢𑀅𑀦𑀼𑀧𑀲𑁆𑀲𑀦𑀸𑀯𑀲𑁂𑀦𑀧𑀺 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸.

𑀘𑀺𑀢𑁆𑀢𑀥𑀫𑁆𑀫𑁂𑀲𑀼𑀧𑀺 𑀘𑀺𑀢𑁆𑀢𑀁 𑀢𑀸𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀲𑀳𑀚𑀸𑀢𑀪𑀽𑀫𑀺𑀓𑀫𑁆𑀫𑀯𑀺𑀧𑀸𑀓𑀓𑀺𑀭𑀺𑀬𑀸𑀤𑀺𑀦𑀸𑀦𑀢𑁆𑀢𑀪𑁂𑀤𑀸𑀦𑀁 𑀅𑀦𑀺𑀘𑁆𑀘𑀸𑀤𑀺𑀅𑀦𑀼𑀧𑀲𑁆𑀲𑀦𑀸𑀦𑀁 𑀲𑀭𑀸𑀕𑀸𑀤𑀻𑀦𑀜𑁆𑀘 𑀪𑁂𑀤𑀸𑀦𑀁 𑀯𑀲𑁂𑀦 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀁. 𑀥𑀫𑁆𑀫𑀸 𑀲𑀮𑀓𑁆𑀔𑀡𑀲𑀸𑀫𑀜𑁆𑀜𑀮𑀓𑁆𑀔𑀡𑀸𑀦𑀁 𑀲𑀼𑀜𑁆𑀜𑀢𑀥𑀫𑁆𑀫𑀲𑁆𑀲 𑀅𑀦𑀺𑀘𑁆𑀘𑀸𑀤𑀺𑀲𑀢𑁆𑀢𑀅𑀦𑀼𑀧𑀲𑁆𑀲𑀦𑀸𑀦𑀁 ‘‘𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀓𑀸𑀫𑀘𑁆𑀙𑀦𑁆𑀤’’𑀦𑁆𑀢𑀺𑀆𑀤𑀻𑀦𑀜𑁆𑀘 𑀧𑀪𑁂𑀤𑀸𑀦𑀁 𑀯𑀲𑁂𑀦 𑀅𑀦𑀼𑀧𑀲𑁆𑀲𑀺𑀢𑀩𑁆𑀩𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀤𑀻𑀖𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁭𑁩 𑀆𑀤𑀬𑁄; 𑀫. 𑀦𑀺. 𑀅𑀝𑁆𑀞. 𑁧.𑁧𑁦𑁫 𑀆𑀤𑀬𑁄) 𑀲𑀢𑀺𑀧𑀝𑁆𑀞𑀸𑀦𑀯𑀡𑁆𑀡𑀦𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁨. 𑀲𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬𑁮. 𑀤𑀼𑀢𑀺𑀬𑁂 𑀲𑀢𑁄𑀢𑀺 𑀓𑀸𑀬𑀸𑀤𑀺𑀅𑀦𑀼𑀧𑀲𑁆𑀲𑀦𑀸𑀲𑀢𑀺𑀬𑀸 𑀲𑀫𑀦𑁆𑀦𑀸𑀕𑀢𑁄. 𑀲𑀫𑁆𑀧𑀚𑀸𑀦𑁄𑀢𑀺 𑀘𑀢𑀼𑀲𑀫𑁆𑀧𑀚𑀜𑁆𑀜𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂𑀢𑀺 𑀏𑀢𑁆𑀣 𑀅𑀪𑀺𑀓𑁆𑀓𑀦𑁆𑀢𑀁 𑀯𑀼𑀘𑁆𑀘𑀢𑀺 𑀕𑀫𑀦𑀁, 𑀧𑀝𑀺𑀓𑁆𑀓𑀦𑁆𑀢𑀁 𑀦𑀺𑀯𑀢𑁆𑀢𑀦𑀁, 𑀢𑀤𑀼𑀪𑀬𑀫𑁆𑀧𑀺 𑀘𑀢𑀽𑀲𑀼 𑀇𑀭𑀺𑀬𑀸𑀧𑀣𑁂𑀲𑀼 𑀮𑀩𑁆𑀪𑀢𑀺. 𑀕𑀫𑀦𑁂 𑀢𑀸𑀯 𑀧𑀼𑀭𑀢𑁄 𑀓𑀸𑀬𑀁 𑀅𑀪𑀺𑀳𑀭𑀦𑁆𑀢𑁄 𑀅𑀪𑀺𑀓𑁆𑀓𑀫𑀢𑀺 𑀦𑀸𑀫, 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑁄 𑀧𑀝𑀺𑀓𑁆𑀓𑀫𑀢𑀺 𑀦𑀸𑀫. 𑀞𑀸𑀦𑁂𑀧𑀺 𑀞𑀺𑀢𑀓𑁄𑀯 𑀓𑀸𑀬𑀁 𑀧𑀼𑀭𑀢𑁄 𑀑𑀦𑀫𑀦𑁆𑀢𑁄 𑀅𑀪𑀺𑀓𑁆𑀓𑀫𑀢𑀺 𑀦𑀸𑀫, 𑀧𑀘𑁆𑀙𑀢𑁄 𑀅𑀧𑀦𑀸𑀫𑁂𑀦𑁆𑀢𑁄 𑀧𑀝𑀺𑀓𑁆𑀓𑀫𑀢𑀺 𑀦𑀸𑀫. 𑀦𑀺𑀲𑀚𑁆𑀚𑀸𑀬𑀧𑀺 𑀦𑀺𑀲𑀺𑀦𑁆𑀦𑀓𑁄𑀯 𑀆𑀲𑀦𑀲𑁆𑀲 𑀧𑀼𑀭𑀺𑀫𑀅𑀗𑁆𑀕𑀸𑀪𑀺𑀫𑀼𑀔𑁄 𑀲𑀁𑀲𑀭𑀦𑁆𑀢𑁄 𑀅𑀪𑀺𑀓𑁆𑀓𑀫𑀢𑀺 𑀦𑀸𑀫, 𑀧𑀘𑁆𑀙𑀺𑀫𑀅𑀗𑁆𑀕𑀧𑁆𑀧𑀤𑁂𑀲𑀁 𑀧𑀘𑁆𑀘𑀸𑀲𑀁𑀲𑀭𑀦𑁆𑀢𑁄 𑀧𑀝𑀺𑀓𑁆𑀓𑀫𑀢𑀺 𑀦𑀸𑀫. 𑀦𑀺𑀧𑀚𑁆𑀚𑀦𑁂𑀧𑀺 𑀏𑀲𑁂𑀯 𑀦𑀬𑁄.

𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀻𑀢𑀺 𑀲𑀫𑁆𑀧𑀚𑀜𑁆𑀜𑁂𑀦 𑀲𑀩𑁆𑀩𑀓𑀺𑀘𑁆𑀘𑀓𑀸𑀭𑀻, 𑀲𑀫𑁆𑀧𑀚𑀜𑁆𑀜𑀲𑁆𑀲𑁂𑀯 𑀯𑀸 𑀓𑀸𑀭𑀻. 𑀲𑁄 𑀳𑀺 𑀅𑀪𑀺𑀓𑁆𑀓𑀦𑁆𑀢𑀸𑀤𑀻𑀲𑀼 𑀲𑀫𑁆𑀧𑀚𑀜𑁆𑀜𑀁 𑀓𑀭𑁄𑀢𑁂𑀯, 𑀦 𑀓𑀢𑁆𑀣𑀘𑀺 𑀲𑀫𑁆𑀧𑀚𑀜𑁆𑀜𑀯𑀺𑀭𑀳𑀺𑀢𑁄 𑀳𑁄𑀢𑀺.

𑀢𑀢𑁆𑀣 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁, 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁, 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁, 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀲𑀫𑁆𑀧𑀚𑀜𑁆𑀜𑀁. 𑀢𑀢𑁆𑀣 𑀅𑀪𑀺𑀓𑁆𑀓𑀫𑀦𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀘𑀺𑀢𑁆𑀢𑀯𑀲𑁂𑀦𑁂𑀯 𑀅𑀕𑀦𑁆𑀢𑁆𑀯𑀸 ‘‘𑀓𑀺𑀁 𑀦𑀼 𑀫𑁂 𑀏𑀢𑁆𑀣 𑀕𑀢𑁂𑀦 𑀅𑀢𑁆𑀣𑁄 𑀅𑀢𑁆𑀣𑀺, 𑀦𑀢𑁆𑀣𑀻’’𑀢𑀺 𑀅𑀢𑁆𑀣𑀸𑀦𑀢𑁆𑀣𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀢𑁆𑀣𑀧𑀭𑀺𑀕𑁆𑀕𑀡𑁆𑀳𑀦𑀁 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁. 𑀢𑀢𑁆𑀣 𑀘 𑀅𑀢𑁆𑀣𑁄𑀢𑀺 𑀘𑁂𑀢𑀺𑀬𑀤𑀲𑁆𑀲𑀦𑀩𑁄𑀥𑀺𑀤𑀲𑁆𑀲𑀦𑀲𑀗𑁆𑀖𑀤𑀲𑁆𑀲𑀦𑀣𑁂𑀭𑀤𑀲𑁆𑀲𑀦𑀅𑀲𑀼𑀪𑀤𑀲𑁆𑀲𑀦𑀸𑀤𑀺𑀯𑀲𑁂𑀦 𑀥𑀫𑁆𑀫𑀢𑁄 𑀯𑀟𑁆𑀠𑀺. 𑀘𑁂𑀢𑀺𑀬𑀁 𑀤𑀺𑀲𑁆𑀯𑀸𑀧𑀺 𑀳𑀺 𑀩𑀼𑀤𑁆𑀥𑀸𑀭𑀫𑁆𑀫𑀡𑀁, 𑀲𑀗𑁆𑀖𑀤𑀲𑁆𑀲𑀦𑁂𑀦 𑀲𑀗𑁆𑀖𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀤𑁂𑀯 𑀔𑀬𑀢𑁄 𑀲𑀫𑁆𑀫𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀫𑀳𑀸𑀯𑀺𑀳𑀸𑀭𑀲𑁆𑀫𑀺𑀜𑁆𑀳𑀺 𑀤𑀓𑁆𑀔𑀺𑀡𑀤𑁆𑀯𑀸𑀭𑁂 𑀞𑀢𑁆𑀯𑀸 𑀫𑀳𑀸𑀘𑁂𑀢𑀺𑀬𑀁 𑀑𑀮𑁄𑀓𑁂𑀦𑁆𑀢𑀸 𑀢𑀺𑀁𑀲𑀲𑀳𑀲𑁆𑀲𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼, 𑀢𑀣𑀸 𑀧𑀘𑁆𑀙𑀺𑀫𑀤𑁆𑀯𑀸𑀭𑁂 𑀉𑀢𑁆𑀢𑀭𑀤𑁆𑀯𑀸𑀭𑁂 𑀧𑀸𑀘𑀻𑀦𑀤𑁆𑀯𑀸𑀭𑁂 𑀘, 𑀢𑀣𑀸 𑀧𑀜𑁆𑀳𑀫𑀡𑁆𑀟𑀧𑀝𑁆𑀞𑀸𑀦𑁂 𑀅𑀪𑀬𑀯𑀸𑀧𑀺𑀧𑀸𑀴𑀺𑀬𑀁, 𑀣𑀽𑀧𑀸𑀭𑀸𑀫𑀤𑁆𑀯𑀸𑀭𑁂 𑀦𑀕𑀭𑀲𑁆𑀲 𑀤𑀓𑁆𑀔𑀺𑀡𑀤𑁆𑀯𑀸𑀭𑁂 𑀅𑀦𑀼𑀭𑀸𑀥𑀯𑀸𑀧𑀺𑀧𑀸𑀴𑀺𑀬𑀁.

𑀫𑀳𑀸𑀅𑀭𑀺𑀬𑀯𑀁𑀲𑀪𑀸𑀡𑀓𑀢𑁆𑀣𑁂𑀭𑁄 𑀧𑀦𑀸𑀳 ‘‘𑀓𑀺𑀁 𑀢𑀼𑀫𑁆𑀳𑁂 𑀯𑀤𑀣, 𑀫𑀳𑀸𑀘𑁂𑀢𑀺𑀬𑀲𑁆𑀲 𑀲𑀫𑀦𑁆𑀢𑀸 𑀓𑀼𑀘𑁆𑀙𑀺𑀯𑁂𑀤𑀺𑀓𑀸𑀬 𑀳𑁂𑀝𑁆𑀞𑀺𑀫𑀪𑀸𑀕𑀢𑁄 𑀧𑀝𑁆𑀞𑀸𑀬 𑀧𑀜𑁆𑀜𑀸𑀬𑀦𑀝𑁆𑀞𑀸𑀦𑁂 𑀬𑀢𑁆𑀣 𑀬𑀢𑁆𑀣 𑀤𑁆𑀯𑁂 𑀧𑀸𑀤𑀸 𑀲𑀓𑁆𑀓𑀸 𑀳𑁄𑀦𑁆𑀢𑀺 𑀲𑀫𑀁 𑀧𑀢𑀺𑀝𑁆𑀞𑀸𑀧𑁂𑀢𑀼𑀁, 𑀢𑀢𑁆𑀣 𑀢𑀢𑁆𑀣 𑀏𑀓𑀧𑀤𑀼𑀤𑁆𑀥𑀸𑀭𑁂 𑀢𑀺𑀁𑀲𑀢𑀺𑀁𑀲 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀽𑀢𑀺 𑀲𑀓𑁆𑀓𑀸 𑀯𑀢𑀼’’𑀦𑁆𑀢𑀺. 𑀅𑀧𑀭𑁄 𑀧𑀦 𑀫𑀳𑀸𑀣𑁂𑀭𑁄 𑀆𑀳 𑁋 ‘‘𑀫𑀳𑀸𑀘𑁂𑀢𑀺𑀬𑀢𑀮𑁂 𑀆𑀓𑀺𑀡𑁆𑀡𑀯𑀸𑀮𑀺𑀓𑀸𑀬 𑀩𑀳𑀼𑀢𑀭𑀸 𑀪𑀺𑀓𑁆𑀔𑀽 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸’’𑀢𑀺. 𑀣𑁂𑀭𑁂 𑀤𑀺𑀲𑁆𑀯𑀸 𑀢𑁂𑀲𑀁 𑀑𑀯𑀸𑀤𑁂 𑀧𑀢𑀺𑀝𑁆𑀞𑀸𑀬 𑀅𑀲𑀼𑀪𑀁 𑀤𑀺𑀲𑁆𑀯𑀸 𑀢𑀢𑁆𑀣 𑀧𑀞𑀫𑀁 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀤𑁂𑀯 𑀔𑀬𑀢𑁄 𑀲𑀫𑁆𑀫𑀲𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀢𑀲𑁆𑀫𑀸 𑀏𑀢𑁂𑀲𑀁 𑀤𑀲𑁆𑀲𑀦𑀁 𑀲𑀸𑀢𑁆𑀣𑀁. 𑀓𑁂𑀘𑀺 𑀧𑀦 𑁋 ‘‘𑀆𑀫𑀺𑀲𑀢𑁄𑀧𑀺 𑀯𑀟𑁆𑀠𑀺 𑀅𑀢𑁆𑀣𑁄𑀬𑁂𑀯, 𑀢𑀁 𑀦𑀺𑀲𑁆𑀲𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀼𑀕𑁆𑀕𑀳𑀸𑀬 𑀧𑀝𑀺𑀧𑀦𑁆𑀦𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺.

𑀢𑀲𑁆𑀫𑀺𑀁 𑀧𑀦 𑀕𑀫𑀦𑁂 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑀧𑁆𑀧𑀸𑀬𑀧𑀭𑀺𑀕𑁆𑀕𑀡𑁆𑀳𑀦𑀁 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁. 𑀲𑁂𑀬𑁆𑀬𑀣𑀺𑀤𑀁? 𑀘𑁂𑀢𑀺𑀬𑀤𑀲𑁆𑀲𑀦𑀁 𑀢𑀸𑀯 𑀲𑀸𑀢𑁆𑀣𑀁. 𑀲𑀘𑁂 𑀧𑀦 𑀘𑁂𑀢𑀺𑀬𑀲𑁆𑀲 𑀫𑀳𑀸𑀧𑀽𑀚𑀸𑀬 𑀤𑀲𑀤𑁆𑀯𑀸𑀤𑀲𑀬𑁄𑀚𑀦𑀦𑁆𑀢𑀭𑁂 𑀧𑀭𑀺𑀲𑀸 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀅𑀢𑁆𑀢𑀦𑁄 𑀯𑀺𑀪𑀯𑀸𑀦𑀼𑀭𑀽𑀧𑀸 𑀇𑀢𑁆𑀣𑀺𑀬𑁄𑀧𑀺 𑀧𑀼𑀭𑀺𑀲𑀸𑀧𑀺 𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑀸 𑀘𑀺𑀢𑁆𑀢𑀓𑀫𑁆𑀫𑀭𑀽𑀧𑀓𑀸𑀦𑀺 𑀯𑀺𑀬 𑀲𑀜𑁆𑀘𑀭𑀦𑁆𑀢𑀺. 𑀢𑀢𑁆𑀭 𑀘𑀲𑁆𑀲 𑀇𑀝𑁆𑀞𑁂 𑀆𑀭𑀫𑁆𑀫𑀡𑁂 𑀮𑁄𑀪𑁄, 𑀅𑀦𑀺𑀝𑁆𑀞𑁂 𑀧𑀝𑀺𑀖𑁄, 𑀅𑀲𑀫𑀧𑁂𑀓𑁆𑀔𑀦𑁂 𑀫𑁄𑀳𑁄 𑀉𑀧𑁆𑀧𑀚𑁆𑀚𑀢𑀺, 𑀓𑀸𑀬𑀲𑀁𑀲𑀕𑁆𑀕𑁂 𑀓𑀸𑀬𑀲𑀁𑀲𑀕𑁆𑀕𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀚𑀻𑀯𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀸𑀦𑀁 𑀯𑀸 𑀅𑀦𑁆𑀢𑀭𑀸𑀬𑁄 𑀘 𑀳𑁄𑀢𑀺. 𑀏𑀯𑀁 𑀢𑀁 𑀞𑀸𑀦𑀁 𑀅𑀲𑀧𑁆𑀧𑀸𑀬𑀁 𑀳𑁄𑀢𑀺, 𑀯𑀼𑀢𑁆𑀢𑀧𑁆𑀧𑀓𑀸𑀭𑀅𑀦𑁆𑀢𑀭𑀸𑀬𑀸𑀪𑀸𑀯𑁂 𑀲𑀧𑁆𑀧𑀸𑀬𑀁. 𑀲𑀗𑁆𑀖𑀤𑀲𑁆𑀲𑀦𑀫𑁆𑀧𑀺 𑀲𑀸𑀢𑁆𑀣𑀁. 𑀲𑀘𑁂 𑀧𑀦 𑀅𑀦𑁆𑀢𑁄𑀕𑀸𑀫𑁂 𑀫𑀳𑀸𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀲𑀩𑁆𑀩𑀭𑀢𑁆𑀢𑀺𑀁 𑀥𑀫𑁆𑀫𑀲𑁆𑀲𑀯𑀦𑀁 𑀓𑀸𑀭𑁂𑀦𑁆𑀢𑁂𑀲𑀼 𑀫𑀦𑀼𑀲𑁆𑀲𑁂𑀲𑀼 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦𑁂𑀯 𑀚𑀦𑀲𑀦𑁆𑀦𑀺𑀧𑀸𑀢𑁄 𑀘𑁂𑀯 𑀅𑀦𑁆𑀢𑀭𑀸𑀬𑁄 𑀘 𑀳𑁄𑀢𑀺, 𑀏𑀯𑀁 𑀢𑀁 𑀞𑀸𑀦𑀁 𑀅𑀲𑀧𑁆𑀧𑀸𑀬𑀁, 𑀅𑀦𑁆𑀢𑀭𑀸𑀬𑀸𑀪𑀸𑀯𑁂 𑀲𑀧𑁆𑀧𑀸𑀬𑀁. 𑀫𑀳𑀸𑀧𑀭𑀺𑀯𑀸𑀭𑀸𑀦𑀁 𑀣𑁂𑀭𑀸𑀦𑀁 𑀤𑀲𑁆𑀲𑀦𑁂𑀧𑀺 𑀏𑀲𑁂𑀯 𑀦𑀬𑁄.

𑀅𑀲𑀼𑀪𑀤𑀲𑁆𑀲𑀦𑀫𑁆𑀧𑀺 𑀲𑀸𑀢𑁆𑀣𑀁. 𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀜𑁆𑀘 𑀇𑀤𑀁 𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀤𑀳𑀭𑀪𑀺𑀓𑁆𑀔𑀼 𑀲𑀸𑀫𑀡𑁂𑀭𑀁 𑀕𑀳𑁂𑀢𑁆𑀯𑀸 𑀤𑀦𑁆𑀢𑀓𑀝𑁆𑀞𑀢𑁆𑀣𑀸𑀬 𑀕𑀢𑁄. 𑀲𑀸𑀫𑀡𑁂𑀭𑁄 𑀫𑀕𑁆𑀕𑀸 𑀑𑀓𑁆𑀓𑀫𑀺𑀢𑁆𑀯𑀸 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄 𑀅𑀲𑀼𑀪𑀁 𑀤𑀺𑀲𑁆𑀯𑀸 𑀧𑀞𑀫𑀚𑁆𑀛𑀸𑀦𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀢𑀤𑁂𑀯 𑀧𑀸𑀤𑀓𑀁 𑀓𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀢𑀻𑀡𑀺 𑀨𑀮𑀸𑀦𑀺 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀭𑀺𑀫𑀕𑁆𑀕𑀢𑁆𑀣𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀤𑀳𑀭𑁄 𑀢𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀲𑀸𑀫𑀡𑁂𑀭𑀸’’𑀢𑀺 𑀧𑀓𑁆𑀓𑁄𑀲𑀺. 𑀲𑁄 𑁋 ‘‘𑀫𑀬𑀸 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀤𑁆𑀯𑁂 𑀓𑀣𑀸 𑀦𑀸𑀫 𑀦 𑀓𑀣𑀺𑀢𑀧𑀼𑀩𑁆𑀩𑀸, 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀤𑀺𑀯𑀲𑁂 𑀉𑀧𑀭𑀺𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀓𑀺𑀁, 𑀪𑀦𑁆𑀢𑁂,’’𑀢𑀺 𑀧𑀝𑀺𑀯𑀘𑀦𑀁 𑀅𑀤𑀸𑀲𑀺. ‘‘𑀏𑀳𑀻’’𑀢𑀺 𑀯𑀼𑀢𑁆𑀢𑁂 𑀏𑀓𑀯𑀘𑀦𑁂𑀦𑁂𑀯 𑀆𑀕𑀦𑁆𑀢𑁆𑀯𑀸 𑁋 ‘‘𑀪𑀦𑁆𑀢𑁂, 𑀇𑀫𑀺𑀦𑀸 𑀢𑀸𑀯 𑀫𑀕𑁆𑀕𑁂𑀦 𑀕𑀦𑁆𑀢𑁆𑀯𑀸 𑀫𑀬𑀸 𑀞𑀺𑀢𑁄𑀓𑀸𑀲𑁂 𑀫𑀼𑀳𑀼𑀢𑁆𑀢𑀁 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑀸 𑀳𑀼𑀢𑁆𑀯𑀸 𑀑𑀮𑁄𑀓𑁂𑀣𑀸’’𑀢𑀺 𑀆𑀳. 𑀲𑁄 𑀢𑀣𑀸 𑀓𑀢𑁆𑀯𑀸 𑀢𑁂𑀦 𑀧𑀢𑁆𑀢𑀯𑀺𑀲𑁂𑀲𑀫𑁂𑀯 𑀧𑀸𑀧𑀼𑀡𑀺. 𑀏𑀯𑀁 𑀏𑀓𑀁 𑀅𑀲𑀼𑀪𑀁 𑀤𑁆𑀯𑀺𑀦𑁆𑀦𑀁 𑀚𑀦𑀸𑀦𑀁 𑀅𑀢𑁆𑀣𑀸𑀬 𑀚𑀸𑀢𑀁. 𑀏𑀯𑀁 𑀲𑀸𑀢𑁆𑀣𑀫𑁆𑀧𑀺 𑀧𑀦𑁂𑀢𑀁 𑀧𑀼𑀭𑀺𑀲𑀲𑁆𑀲 𑀫𑀸𑀢𑀼𑀕𑀸𑀫𑀸𑀲𑀼𑀪𑀁 𑀅𑀲𑀧𑁆𑀧𑀸𑀬𑀁, 𑀫𑀸𑀢𑀼𑀕𑀸𑀫𑀲𑁆𑀲 𑀘 𑀧𑀼𑀭𑀺𑀲𑀸𑀲𑀼𑀪𑀁, 𑀲𑀪𑀸𑀕𑀫𑁂𑀯 𑀲𑀧𑁆𑀧𑀸𑀬𑀦𑁆𑀢𑀺 𑀏𑀯𑀁 𑀲𑀧𑁆𑀧𑀸𑀬𑀧𑀭𑀺𑀕𑁆𑀕𑀡𑁆𑀳𑀦𑀁 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁.

𑀏𑀯𑀁 𑀧𑀭𑀺𑀕𑁆𑀕𑀳𑀺𑀢𑀲𑀸𑀢𑁆𑀣𑀲𑀧𑁆𑀧𑀸𑀬𑀲𑁆𑀲 𑀧𑀦 𑀅𑀝𑁆𑀞𑀢𑀺𑀁𑀲𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀅𑀢𑁆𑀢𑀦𑁄 𑀘𑀺𑀢𑁆𑀢𑀭𑀼𑀘𑀺𑀓𑀁 𑀓𑀫𑁆𑀫𑀝𑁆𑀞𑀸𑀦𑀲𑀗𑁆𑀔𑀸𑀢𑀁 𑀕𑁄𑀘𑀭𑀁 𑀉𑀕𑁆𑀕𑀳𑁂𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀕𑁄𑀘𑀭𑁂 𑀢𑀁 𑀕𑀳𑁂𑀢𑁆𑀯𑀸𑀯 𑀕𑀫𑀦𑀁 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁 𑀦𑀸𑀫.

𑀢𑀲𑁆𑀲𑀸𑀯𑀺𑀪𑀸𑀯𑀢𑁆𑀣𑀁 𑀇𑀤𑀁 𑀘𑀢𑀼𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀇𑀥𑁂𑀓𑀘𑁆𑀘𑁄 𑀪𑀺𑀓𑁆𑀔𑀼 𑀳𑀭𑀢𑀺 𑀦 𑀧𑀘𑁆𑀘𑀸𑀳𑀭𑀢𑀺, 𑀏𑀓𑀘𑁆𑀘𑁄 𑀧𑀘𑁆𑀘𑀸𑀳𑀭𑀢𑀺 𑀦 𑀳𑀭𑀢𑀺, 𑀏𑀓𑀘𑁆𑀘𑁄 𑀧𑀦 𑀦𑁂𑀯 𑀳𑀭𑀢𑀺 𑀦 𑀧𑀘𑁆𑀘𑀸𑀳𑀭𑀢𑀺, 𑀏𑀓𑀘𑁆𑀘𑁄 𑀳𑀭𑀢𑀺 𑀘 𑀧𑀘𑁆𑀘𑀸𑀳𑀭𑀢𑀺 𑀘.

𑀢𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀤𑀺𑀯𑀲𑀁 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬 𑀘 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀢𑁆𑀯𑀸 𑀢𑀣𑀸 𑀭𑀢𑁆𑀢𑀺𑀬𑀸 𑀧𑀞𑀫𑀁 𑀬𑀸𑀫𑀁 𑀫𑀚𑁆𑀛𑀺𑀫𑀬𑀸𑀫𑁂 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑁆𑀯𑀸, 𑀧𑀘𑁆𑀙𑀺𑀫𑀬𑀸𑀫𑁂𑀧𑀺 𑀦𑀺𑀲𑀚𑁆𑀚𑀸𑀘𑀗𑁆𑀓𑀫𑁂𑀳𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸, 𑀧𑀕𑁂𑀯 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑀯𑀢𑁆𑀢𑀁 𑀓𑀢𑁆𑀯𑀸 𑀩𑁄𑀥𑀺𑀭𑀼𑀓𑁆𑀔𑁂 𑀉𑀤𑀓𑀁 𑀆𑀲𑀺𑀜𑁆𑀘𑀺𑀢𑁆𑀯𑀸 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑁆𑀯𑀸 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀯𑀢𑁆𑀢𑀸𑀤𑀻𑀦𑀺 𑀲𑀫𑀸𑀤𑀸𑀬 𑀯𑀢𑁆𑀢𑀢𑀺. 𑀲𑁄 𑀲𑀭𑀻𑀭𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀲𑁂𑀦𑀸𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀤𑁆𑀯𑁂 𑀢𑀬𑁄 𑀧𑀮𑁆𑀮𑀗𑁆𑀓𑁂 𑀉𑀲𑀼𑀫𑀁 𑀕𑀸𑀳𑀸𑀧𑁂𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀫𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀯𑁂𑀮𑀸𑀬 𑀉𑀝𑁆𑀞𑀳𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑁂𑀦𑀸𑀲𑀦𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑁄𑀯 𑀘𑁂𑀢𑀺𑀬𑀗𑁆𑀕𑀡𑀁 𑀕𑀦𑁆𑀢𑁆𑀯𑀸 𑀲𑀘𑁂 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀘𑁂𑀢𑀺𑀬𑀗𑁆𑀕𑀡𑀁 𑀧𑀯𑀺𑀲𑀢𑀺. 𑀅𑀜𑁆𑀜𑀁 𑀘𑁂 𑀓𑀫𑁆𑀫𑀝𑁆𑀞𑀸𑀦𑀁 𑀳𑁄𑀢𑀺, 𑀲𑁄𑀧𑀸𑀦𑀧𑀸𑀤𑀫𑀽𑀮𑁂 𑀞𑀢𑁆𑀯𑀸 𑀳𑀢𑁆𑀣𑁂𑀦 𑀕𑀳𑀺𑀢𑀪𑀡𑁆𑀟𑀁 𑀯𑀺𑀬 𑀢𑀁 𑀞𑀧𑁂𑀢𑁆𑀯𑀸 𑀩𑀼𑀤𑁆𑀥𑀸𑀭𑀫𑁆𑀫𑀡𑀁 𑀧𑀻𑀢𑀺𑀁 𑀕𑀳𑁂𑀢𑁆𑀯𑀸 𑀘𑁂𑀢𑀺𑀬𑀗𑁆𑀕𑀡𑀁 𑀆𑀭𑀼𑀬𑁆𑀳 𑀫𑀳𑀦𑁆𑀢𑀁 𑀘𑁂𑀢𑀺𑀬𑀁 𑀘𑁂, 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀦𑁆𑀤𑀺𑀢𑀩𑁆𑀩𑀁, 𑀔𑀼𑀤𑁆𑀤𑀓𑀁 𑀘𑁂, 𑀢𑀣𑁂𑀯 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼 𑀯𑀦𑁆𑀤𑀺𑀢𑀩𑁆𑀩𑀁. 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀩𑁄𑀥𑀺𑀬𑀗𑁆𑀕𑀡𑀁 𑀧𑀢𑁆𑀢𑁂𑀦𑀸𑀧𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀯𑀺𑀬 𑀦𑀺𑀧𑀘𑁆𑀘𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸 𑀩𑁄𑀥𑀺 𑀯𑀦𑁆𑀤𑀺𑀢𑀩𑁆𑀩𑀸. 𑀲𑁄 𑀏𑀯𑀁 𑀘𑁂𑀢𑀺𑀬𑀜𑁆𑀘 𑀩𑁄𑀥𑀺𑀜𑁆𑀘 𑀯𑀦𑁆𑀤𑀺𑀢𑁆𑀯𑀸 𑀧𑀝𑀺𑀲𑀸𑀫𑀺𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀧𑀝𑀺𑀲𑀸𑀫𑀺𑀢𑀪𑀡𑁆𑀟𑀓𑀁 𑀳𑀢𑁆𑀣𑁂𑀦 𑀕𑀡𑁆𑀳𑀦𑁆𑀢𑁄 𑀯𑀺𑀬 𑀦𑀺𑀓𑁆𑀔𑀺𑀢𑁆𑀢𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀕𑀸𑀫𑀲𑀫𑀻𑀧𑁂 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀢𑀺.

𑀅𑀣 𑀦𑀁 𑀫𑀦𑀼𑀲𑁆𑀲𑀸 𑀤𑀺𑀲𑁆𑀯𑀸 ‘‘𑀅𑀬𑁆𑀬𑁄 𑀦𑁄 𑀆𑀕𑀢𑁄’’𑀢𑀺 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀁 𑀕𑀳𑁂𑀢𑁆𑀯𑀸 𑀆𑀲𑀦𑀲𑀸𑀮𑀸𑀬 𑀯𑀸 𑀕𑁂𑀳𑁂 𑀯𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀬𑀸𑀕𑀼𑀁 𑀤𑀢𑁆𑀯𑀸 𑀬𑀸𑀯 𑀪𑀢𑁆𑀢𑀁 𑀦 𑀦𑀺𑀝𑁆𑀞𑀸𑀢𑀺, 𑀢𑀸𑀯 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀫𑀓𑁆𑀔𑁂𑀢𑁆𑀯𑀸 𑀧𑀼𑀭𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀧𑀜𑁆𑀳𑀁 𑀯𑀸 𑀧𑀼𑀘𑁆𑀙𑀦𑁆𑀢𑀺, 𑀥𑀫𑁆𑀫𑀁 𑀯𑀸 𑀲𑁄𑀢𑀼𑀓𑀸𑀫𑀸 𑀳𑁄𑀦𑁆𑀢𑀺. 𑀲𑀘𑁂𑀧𑀺 𑀦 𑀓𑀣𑀸𑀧𑁂𑀦𑁆𑀢𑀺, 𑀚𑀦𑀲𑀗𑁆𑀕𑀳𑀡𑀢𑁆𑀣𑀁 𑀥𑀫𑁆𑀫𑀓𑀣𑀸 𑀦𑀸𑀫 𑀓𑀸𑀢𑀩𑁆𑀩𑀸𑀬𑁂𑀯𑀸𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀯𑀤𑀦𑁆𑀢𑀺. 𑀥𑀫𑁆𑀫𑀓𑀣𑀸 𑀳𑀺 𑀓𑀫𑁆𑀫𑀝𑁆𑀞𑀸𑀦𑀯𑀺𑀦𑀺𑀫𑀼𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯 𑀥𑀫𑁆𑀫𑀁 𑀓𑀣𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯 𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀦𑀼𑀫𑁄𑀤𑀦𑀁 𑀓𑀢𑁆𑀯𑀸 𑀦𑀺𑀯𑀢𑁆𑀢𑀺𑀬𑀫𑀸𑀦𑁂𑀳𑀺𑀧𑀺 𑀫𑀦𑀼𑀲𑁆𑀲𑁂𑀳𑀺 𑀅𑀦𑀼𑀕𑀢𑁄𑀯 𑀕𑀸𑀫𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀢𑁆𑀣 𑀢𑁂 𑀦𑀺𑀯𑀢𑁆𑀢𑁂𑀢𑁆𑀯𑀸 𑀫𑀕𑁆𑀕𑀁 𑀧𑀝𑀺𑀧𑀚𑁆𑀚𑀢𑀺.

𑀅𑀣 𑀦𑀁 𑀧𑀼𑀭𑁂𑀢𑀭𑀁 𑀦𑀺𑀓𑁆𑀔𑀫𑀺𑀢𑁆𑀯𑀸 𑀩𑀳𑀺𑀕𑀸𑀫𑁂 𑀓𑀢𑀪𑀢𑁆𑀢𑀓𑀺𑀘𑁆𑀘𑀸 𑀲𑀸𑀫𑀡𑁂𑀭𑀤𑀳𑀭𑀪𑀺𑀓𑁆𑀔𑀽 𑀤𑀺𑀲𑁆𑀯𑀸 𑀧𑀘𑁆𑀘𑀼𑀕𑁆𑀕𑀦𑁆𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀲𑁆𑀲 𑀕𑀡𑁆𑀳𑀦𑁆𑀢𑀺. 𑀧𑁄𑀭𑀸𑀡𑀓𑀪𑀺𑀓𑁆𑀔𑀽 𑀓𑀺𑀭 𑀦 ‘‘𑀅𑀫𑁆𑀳𑀸𑀓𑀁 𑀉𑀧𑀚𑁆𑀛𑀸𑀬𑁄 𑀆𑀘𑀭𑀺𑀬𑁄’’𑀢𑀺 𑀫𑀼𑀔𑀁 𑀑𑀮𑁄𑀓𑁂𑀢𑁆𑀯𑀸 𑀯𑀢𑁆𑀢𑀁 𑀓𑀭𑁄𑀦𑁆𑀢𑀺, 𑀲𑀫𑁆𑀧𑀢𑁆𑀢𑀧𑀭𑀺𑀘𑁆𑀙𑁂𑀤𑁂𑀦𑁂𑀯 𑀓𑀭𑁄𑀦𑁆𑀢𑀺. 𑀢𑁂 𑀢𑀁 𑀧𑀼𑀘𑁆𑀙𑀦𑁆𑀢𑀺 𑁋 ‘‘𑀪𑀦𑁆𑀢𑁂, 𑀏𑀢𑁂 𑀫𑀦𑀼𑀲𑁆𑀲𑀸 𑀢𑀼𑀫𑁆𑀳𑀸𑀓𑀁 𑀓𑀺𑀁 𑀳𑁄𑀦𑁆𑀢𑀺, 𑀫𑀸𑀢𑀺𑀧𑀓𑁆𑀔𑀢𑁄 𑀲𑀫𑁆𑀩𑀦𑁆𑀥𑀸 𑀧𑀺𑀢𑀺𑀧𑀓𑁆𑀔𑀢𑁄’’𑀢𑀺? 𑀓𑀺𑀁 𑀤𑀺𑀲𑁆𑀯𑀸 𑀧𑀼𑀘𑁆𑀙𑀣𑀸𑀢𑀺? 𑀢𑀼𑀫𑁆𑀳𑁂𑀲𑀼 𑀏𑀢𑁂𑀲𑀁 𑀧𑁂𑀫𑀁 𑀩𑀳𑀼𑀫𑀸𑀦𑀦𑁆𑀢𑀺. ‘‘𑀆𑀯𑀼𑀲𑁄, 𑀬𑀁 𑀫𑀸𑀢𑀸𑀧𑀺𑀢𑀽𑀳𑀺𑀧𑀺 𑀤𑀼𑀓𑁆𑀓𑀭𑀢𑀭𑀁, 𑀢𑀁 𑀏𑀢𑁂 𑀅𑀫𑁆𑀳𑀸𑀓𑀁 𑀓𑀭𑁄𑀦𑁆𑀢𑀺, 𑀧𑀢𑁆𑀢𑀘𑀻𑀯𑀭𑀫𑁆𑀧𑀺 𑀦𑁄 𑀏𑀢𑁂𑀲𑀁 𑀲𑀦𑁆𑀢𑀓𑀫𑁂𑀯, 𑀏𑀢𑁂𑀲𑀁 𑀆𑀦𑀼𑀪𑀸𑀯𑁂𑀦 𑀦𑁂𑀯 𑀪𑀬𑁂 𑀪𑀬𑀁, 𑀦 𑀙𑀸𑀢𑀓𑁂 𑀙𑀸𑀢𑀓𑀁 𑀚𑀸𑀦𑀸𑀫, 𑀏𑀤𑀺𑀲𑀸 𑀦𑀸𑀫 𑀅𑀫𑁆𑀳𑀸𑀓𑀁 𑀉𑀧𑀓𑀸𑀭𑀺𑀦𑁄 𑀦𑀢𑁆𑀣𑀻’’𑀢𑀺 𑀢𑁂𑀲𑀁 𑀕𑀼𑀡𑁂 𑀓𑀣𑀬𑀦𑁆𑀢𑁄 𑀕𑀘𑁆𑀙𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀳𑀭𑀢𑀺 𑀦 𑀧𑀘𑁆𑀘𑀸𑀳𑀭𑀢𑀻𑀢𑀺.

𑀬𑀲𑁆𑀲 𑀧𑀦 𑀧𑀕𑁂𑀯 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀯𑀢𑁆𑀢𑀧𑀝𑀺𑀧𑀢𑁆𑀢𑀺𑀁 𑀓𑀭𑁄𑀦𑁆𑀢𑀲𑁆𑀲 𑀓𑀫𑁆𑀫𑀚𑀢𑁂𑀚𑁄 𑀧𑀚𑁆𑀚𑀮𑀢𑀺, 𑀅𑀦𑀼𑀧𑀸𑀤𑀺𑀡𑁆𑀡𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀉𑀧𑀸𑀤𑀺𑀡𑁆𑀡𑀓𑀁 𑀕𑀡𑁆𑀳𑀸𑀢𑀺, 𑀲𑀭𑀻𑀭𑀢𑁄 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀓𑀫𑁆𑀫𑀝𑁆𑀞𑀸𑀦𑀯𑀻𑀣𑀺𑀁 𑀦𑀸𑀭𑁄𑀳𑀢𑀺, 𑀲𑁄 𑀧𑀕𑁂𑀯 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀯𑁂𑀕𑀲𑀸𑀯 𑀘𑁂𑀢𑀺𑀬𑀁 𑀯𑀦𑁆𑀤𑀺𑀢𑁆𑀯𑀸 𑀕𑁄𑀭𑀽𑀧𑀸𑀦𑀁 𑀦𑀺𑀓𑁆𑀔𑀫𑀦𑀯𑁂𑀮𑀸𑀬𑀫𑁂𑀯 𑀕𑀸𑀫𑀁 𑀬𑀸𑀕𑀼𑀪𑀺𑀓𑁆𑀔𑀸𑀬 𑀧𑀯𑀺𑀲𑀺𑀢𑁆𑀯𑀸 𑀬𑀸𑀕𑀼𑀁 𑀮𑀪𑀺𑀢𑁆𑀯𑀸 𑀆𑀲𑀦𑀲𑀸𑀮𑀁 𑀕𑀦𑁆𑀢𑁆𑀯𑀸 𑀧𑀺𑀯𑀢𑀺. 𑀅𑀣𑀲𑁆𑀲 𑀤𑁆𑀯𑀺𑀢𑁆𑀢𑀺𑀓𑁆𑀔𑀢𑁆𑀢𑀼𑀁 𑀅𑀚𑁆𑀛𑁄𑀳𑀭𑀡𑀫𑀢𑁆𑀢𑁂𑀦𑁂𑀯 𑀓𑀫𑁆𑀫𑀚𑀢𑁂𑀚𑁄 𑀉𑀧𑀸𑀤𑀺𑀡𑁆𑀡𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀦𑀼𑀧𑀸𑀤𑀺𑀡𑁆𑀡𑀓𑀁 𑀕𑀡𑁆𑀳𑀸𑀢𑀺, 𑀖𑀝𑀲𑀢𑁂𑀦 𑀦𑁆𑀳𑀸𑀢𑁄 𑀯𑀺𑀬 𑀢𑁂𑀚𑁄𑀥𑀸𑀢𑀼𑀧𑀭𑀺𑀴𑀸𑀳𑀦𑀺𑀩𑁆𑀩𑀸𑀦𑀁 𑀧𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦 𑀬𑀸𑀕𑀼𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀧𑀢𑁆𑀢𑀜𑁆𑀘 𑀫𑀼𑀔𑀜𑁆𑀘 𑀥𑁄𑀯𑀺𑀢𑁆𑀯𑀸 𑀅𑀦𑁆𑀢𑀭𑀸𑀪𑀢𑁆𑀢𑁂 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀢𑁆𑀯𑀸 𑀅𑀯𑀲𑁂𑀲𑀝𑁆𑀞𑀸𑀦𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦 𑀆𑀳𑀸𑀭𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀢𑀢𑁄 𑀧𑀝𑁆𑀞𑀸𑀬 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀁 𑀉𑀧𑀝𑁆𑀞𑀳𑀫𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸𑀯 𑀆𑀕𑀘𑁆𑀙𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀘𑁆𑀘𑀸𑀳𑀭𑀢𑀺 𑀦 𑀳𑀭𑀢𑀻𑀢𑀺. 𑀏𑀤𑀺𑀲𑀸 𑀘 𑀪𑀺𑀓𑁆𑀔𑀽 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀆𑀭𑀪𑀺𑀢𑁆𑀯𑀸 𑀩𑀼𑀤𑁆𑀥𑀲𑀸𑀲𑀦𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸 𑀦𑀸𑀫 𑀕𑀡𑀦𑀧𑀣𑀁 𑀯𑀻𑀢𑀺𑀯𑀢𑁆𑀢𑀸. 𑀲𑀻𑀳𑀴𑀤𑀻𑀧𑁂𑀬𑁂𑀯 𑀢𑁂𑀲𑀼 𑀢𑁂𑀲𑀼 𑀕𑀸𑀫𑁂𑀲𑀼 𑀆𑀲𑀦𑀲𑀸𑀮𑀸𑀬𑀁 𑀦 𑀢𑀁 𑀆𑀲𑀦𑀫𑀢𑁆𑀣𑀺, 𑀬𑀢𑁆𑀣 𑀬𑀸𑀕𑀼𑀁 𑀧𑀺𑀯𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸 𑀪𑀺𑀓𑁆𑀔𑀽 𑀦𑀢𑁆𑀣𑀻𑀢𑀺.

𑀬𑁄 𑀧𑀦 𑀧𑀫𑀸𑀤𑀯𑀺𑀳𑀸𑀭𑀻 𑀳𑁄𑀢𑀺 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄, 𑀲𑀩𑁆𑀩𑀯𑀢𑁆𑀢𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 𑀧𑀜𑁆𑀘𑀯𑀺𑀥𑀘𑁂𑀢𑁄𑀯𑀺𑀦𑀺𑀩𑀦𑁆𑀥𑀩𑀤𑁆𑀥𑀘𑀺𑀢𑁆𑀢𑁄 𑀯𑀺𑀳𑀭𑀦𑁆𑀢𑁄 ‘‘𑀓𑀫𑁆𑀫𑀝𑁆𑀞𑀸𑀦𑀁 𑀦𑀸𑀫 𑀅𑀢𑁆𑀣𑀻’’𑀢𑀺𑀧𑀺 𑀲𑀜𑁆𑀜𑀁 𑀅𑀓𑀢𑁆𑀯𑀸 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑁆𑀯𑀸 𑀅𑀦𑀦𑀼𑀮𑁄𑀫𑀺𑀓𑁂𑀦 𑀕𑀺𑀳𑀺𑀲𑀁𑀲𑀕𑁆𑀕𑁂𑀦 𑀲𑀁𑀲𑀝𑁆𑀞𑁄 𑀘𑀭𑀺𑀢𑁆𑀯𑀸 𑀘 𑀪𑀼𑀜𑁆𑀚𑀺𑀢𑁆𑀯𑀸 𑀘 𑀢𑀼𑀘𑁆𑀙𑁄 𑀦𑀺𑀓𑁆𑀔𑀫𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀦𑁂𑀯 𑀳𑀭𑀢𑀺 𑀦 𑀧𑀘𑁆𑀘𑀸𑀳𑀭𑀢𑀻𑀢𑀺.

𑀬𑁄 𑀧𑀦𑀸𑀬𑀁 𑀳𑀭𑀢𑀺 𑀘 𑀧𑀘𑁆𑀘𑀸𑀳𑀭𑀢𑀺 𑀘𑀸𑀢𑀺 𑀯𑀼𑀢𑁆𑀢𑁄, 𑀲𑁄 𑀕𑀢𑀧𑀘𑁆𑀘𑀸𑀕𑀢𑀺𑀓𑀯𑀢𑁆𑀢𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀢𑀓𑀸𑀫𑀸 𑀳𑀺 𑀓𑀼𑀮𑀧𑀼𑀢𑁆𑀢𑀸 𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑁆𑀯𑀸 𑀤𑀲𑀧𑀺 𑀯𑀻𑀲𑀫𑁆𑀧𑀺 𑀢𑀺𑀁𑀲𑀫𑁆𑀧𑀺 𑀘𑀢𑁆𑀢𑀸𑀮𑀻𑀲𑀫𑁆𑀧𑀺 𑀧𑀜𑁆𑀜𑀸𑀲𑀫𑁆𑀧𑀺 𑀲𑀢𑀫𑁆𑀧𑀺 𑀏𑀓𑀢𑁄 𑀯𑀲𑀦𑁆𑀢𑀸 𑀓𑀢𑀺𑀓𑀯𑀢𑁆𑀢𑀁 𑀓𑀢𑁆𑀯𑀸 𑀯𑀺𑀳𑀭𑀦𑁆𑀢𑀺 ‘‘𑀆𑀯𑀼𑀲𑁄, 𑀢𑀼𑀫𑁆𑀳𑁂 𑀦 𑀇𑀡𑀝𑁆𑀝𑀸, 𑀦 𑀪𑀬𑀝𑁆𑀝𑀸, 𑀦 𑀚𑀻𑀯𑀺𑀓𑀸𑀧𑀓𑀢𑀸 𑀧𑀩𑁆𑀩𑀚𑀺𑀢𑀸, 𑀤𑀼𑀓𑁆𑀔𑀸 𑀫𑀼𑀘𑁆𑀘𑀺𑀢𑀼𑀓𑀸𑀫𑀸 𑀧𑀦𑁂𑀢𑁆𑀣 𑀧𑀩𑁆𑀩𑀚𑀺𑀢𑀸, 𑀢𑀲𑁆𑀫𑀸 𑀕𑀫𑀦𑁂 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀁 𑀕𑀫𑀦𑁂𑀬𑁂𑀯 𑀦𑀺𑀕𑁆𑀕𑀡𑁆𑀳𑀣, 𑀞𑀸𑀦𑁂, 𑀦𑀺𑀲𑀚𑁆𑀚𑀸𑀬, 𑀲𑀬𑀦𑁂 𑀉𑀧𑁆𑀧𑀦𑁆𑀦𑀓𑀺𑀮𑁂𑀲𑀁 𑀲𑀬𑀦𑁂𑀬𑁂𑀯 𑀦𑀺𑀕𑁆𑀕𑀡𑁆𑀳𑀣𑀸’’𑀢𑀺. 𑀢𑁂 𑀏𑀯𑀁 𑀓𑀢𑀺𑀓𑀯𑀢𑁆𑀢𑀁 𑀓𑀢𑁆𑀯𑀸 𑀪𑀺𑀓𑁆𑀔𑀸𑀘𑀸𑀭𑀁 𑀕𑀘𑁆𑀙𑀦𑁆𑀢𑀸 𑀅𑀟𑁆𑀠𑀉𑀲𑀪𑀉𑀲𑀪𑀅𑀟𑁆𑀠𑀕𑀸𑀯𑀼𑀢𑀕𑀸𑀯𑀼𑀢𑀦𑁆𑀢𑀭𑁂𑀲𑀼 𑀧𑀸𑀲𑀸𑀡𑀸 𑀳𑁄𑀦𑁆𑀢𑀺, 𑀢𑀸𑀬 𑀲𑀜𑁆𑀜𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑀸𑀯 𑀕𑀘𑁆𑀙𑀦𑁆𑀢𑀺. 𑀲𑀘𑁂 𑀓𑀲𑁆𑀲𑀘𑀺 𑀕𑀫𑀦𑁂 𑀓𑀺𑀮𑁂𑀲𑁄 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣𑁂𑀯 𑀦𑀁 𑀦𑀺𑀕𑁆𑀕𑀡𑁆𑀳𑀸𑀢𑀺. 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑁄 𑀢𑀺𑀝𑁆𑀞𑀢𑀺. 𑀅𑀣𑀲𑁆𑀲 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑁄𑀧𑀺 𑀢𑀺𑀝𑁆𑀞𑀢𑀺, 𑀲𑁄 ‘‘𑀅𑀬𑀁 𑀪𑀺𑀓𑁆𑀔𑀼 𑀢𑀼𑀬𑁆𑀳𑀁 𑀉𑀧𑁆𑀧𑀦𑁆𑀦𑀯𑀺𑀢𑀓𑁆𑀓𑀁 𑀚𑀸𑀦𑀸𑀢𑀺, 𑀅𑀦𑀦𑀼𑀘𑁆𑀙𑀯𑀺𑀓𑀁 𑀢𑁂 𑀏𑀢’’𑀦𑁆𑀢𑀺 𑀅𑀢𑁆𑀢𑀸𑀦𑀁 𑀧𑀝𑀺𑀘𑁄𑀤𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀢𑀢𑁆𑀣𑁂𑀯 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀢𑀺, 𑀢𑀣𑀸 𑀅𑀲𑀓𑁆𑀓𑁄𑀦𑁆𑀢𑁄 𑀦𑀺𑀲𑀻𑀤𑀢𑀻𑀢𑀺 𑀲𑁄 𑀏𑀯 𑀦𑀬𑁄. 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄𑀧𑀺, 𑀢𑀁 𑀓𑀺𑀮𑁂𑀲𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑁄𑀯 𑀕𑀘𑁆𑀙𑀢𑀺, 𑀦 𑀓𑀫𑁆𑀫𑀝𑁆𑀞𑀸𑀦𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀧𑀸𑀤𑀁 𑀉𑀤𑁆𑀥𑀭𑀢𑀺. 𑀉𑀤𑁆𑀥𑀭𑀢𑀺 𑀘𑁂, 𑀧𑀝𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀧𑀼𑀭𑀺𑀫𑀧𑀤𑁂𑀲𑀁𑀬𑁂𑀯 𑀏𑀢𑀺 𑀆𑀮𑀺𑀦𑁆𑀤𑀓𑀯𑀸𑀲𑀻 𑀫𑀳𑀸𑀨𑀼𑀲𑁆𑀲𑀤𑁂𑀯𑀢𑁆𑀣𑁂𑀭𑁄 𑀯𑀺𑀬.

𑀲𑁄 𑀓𑀺𑀭 𑀏𑀓𑀽𑀦𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀕𑀢𑀧𑀘𑁆𑀘𑀸𑀕𑀢𑀺𑀓𑀯𑀢𑁆𑀢𑀁 𑀧𑀽𑀭𑁂𑀦𑁆𑀢𑁄 𑀏𑀯 𑀯𑀺𑀳𑀸𑀲𑀺. 𑀫𑀦𑀼𑀲𑁆𑀲𑀸𑀧𑀺 𑀲𑀼𑀤𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀓𑀲𑀦𑁆𑀢𑀸 𑀘 𑀯𑀧𑀦𑁆𑀢𑀸 𑀘 𑀫𑀤𑁆𑀤𑀦𑁆𑀢𑀸 𑀘 𑀓𑀫𑁆𑀫𑀸𑀦𑀺 𑀘 𑀓𑀭𑁄𑀦𑁆𑀢𑀸 𑀣𑁂𑀭𑀁 𑀢𑀣𑀸 𑀕𑀘𑁆𑀙𑀦𑁆𑀢𑀁 𑀤𑀺𑀲𑁆𑀯𑀸 𑁋 ‘‘𑀅𑀬𑀁 𑀣𑁂𑀭𑁄 𑀧𑀼𑀦𑀧𑁆𑀧𑀼𑀦𑀁 𑀦𑀺𑀯𑀢𑁆𑀢𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀓𑀺𑀁 𑀦𑀼 𑀔𑁄 𑀫𑀕𑁆𑀕𑀫𑀽𑀴𑁆𑀳𑁄, 𑀉𑀤𑀸𑀳𑀼 𑀓𑀺𑀜𑁆𑀘𑀺 𑀧𑀫𑀼𑀝𑁆𑀞𑁄’’𑀢𑀺 𑀲𑀫𑀼𑀮𑁆𑀮𑀧𑀦𑁆𑀢𑀺. 𑀲𑁄 𑀢𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀬𑀼𑀢𑁆𑀢𑀘𑀺𑀢𑁆𑀢𑁂𑀦𑁂𑀯 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀻𑀲𑀢𑀺𑀯𑀲𑁆𑀲𑀩𑁆𑀪𑀦𑁆𑀢𑀭𑁂 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀤𑀺𑀯𑀲𑁂 𑀘𑀲𑁆𑀲 𑀘𑀗𑁆𑀓𑀫𑀦𑀓𑁄𑀝𑀺𑀬𑀁 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸 𑀅𑀗𑁆𑀕𑀼𑀮𑀻𑀳𑀺 𑀤𑀻𑀧𑀁 𑀉𑀚𑁆𑀚𑀸𑀮𑁂𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀘𑀢𑁆𑀢𑀸𑀭𑁄𑀧𑀺 𑀫𑀳𑀸𑀭𑀸𑀚𑀸𑀦𑁄 𑀲𑀓𑁆𑀓𑁄 𑀘 𑀤𑁂𑀯𑀸𑀦𑀫𑀺𑀦𑁆𑀤𑁄 𑀩𑁆𑀭𑀳𑁆𑀫𑀸 𑀘 𑀲𑀳𑀫𑁆𑀧𑀢𑀺 𑀉𑀧𑀝𑁆𑀞𑀸𑀦𑀁 𑀆𑀕𑀫𑀁𑀲𑀼. 𑀢𑀜𑁆𑀘 𑀑𑀪𑀸𑀲𑀁 𑀤𑀺𑀲𑁆𑀯𑀸 𑀯𑀦𑀯𑀸𑀲𑀻𑀫𑀳𑀸𑀢𑀺𑀲𑁆𑀲𑀢𑁆𑀣𑁂𑀭𑁄 𑀢𑀁 𑀤𑀼𑀢𑀺𑀬𑀤𑀺𑀯𑀲𑁂 𑀧𑀼𑀘𑁆𑀙𑀺 𑁋 ‘‘𑀭𑀢𑁆𑀢𑀺𑀪𑀸𑀕𑁂 𑀆𑀬𑀲𑁆𑀫𑀢𑁄 𑀲𑀦𑁆𑀢𑀺𑀓𑁂 𑀑𑀪𑀸𑀲𑁄 𑀅𑀳𑁄𑀲𑀺, 𑀓𑀺𑀁 𑀲𑁄 𑀑𑀪𑀸𑀲𑁄’’𑀢𑀺? 𑀣𑁂𑀭𑁄 𑀯𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑁄 ‘‘𑀑𑀪𑀸𑀲𑁄 𑀦𑀸𑀫 𑀤𑀻𑀧𑁄𑀪𑀸𑀲𑁄𑀧𑀺 𑀳𑁄𑀢𑀺, 𑀫𑀡𑀺𑀑𑀪𑀸𑀲𑁄𑀧𑀻’’𑀢𑀺 𑀏𑀯𑀫𑀸𑀤𑀺𑀫𑀸𑀳. 𑀢𑀢𑁄 ‘‘𑀧𑀝𑀺𑀘𑁆𑀙𑀸𑀤𑁂𑀣 𑀢𑀼𑀫𑁆𑀳𑁂’’𑀢𑀺 𑀦𑀺𑀩𑀤𑁆𑀥𑁄 𑀆𑀫𑀸𑀢𑀺 𑀧𑀝𑀺𑀚𑀸𑀦𑀺𑀢𑁆𑀯𑀸 𑀆𑀭𑁄𑀘𑁂𑀲𑀺.

𑀓𑀸𑀴𑀯𑀮𑁆𑀮𑀺𑀫𑀡𑁆𑀟𑀧𑀯𑀸𑀲𑀻𑀫𑀳𑀸𑀦𑀸𑀕𑀢𑁆𑀣𑁂𑀭𑁄 𑀯𑀺𑀬 𑀘. 𑀲𑁄𑀧𑀺 𑀓𑀺𑀭 𑀕𑀢𑀧𑀘𑁆𑀘𑀸𑀕𑀢𑀺𑀓𑀯𑀢𑁆𑀢𑀁 𑀧𑀽𑀭𑁂𑀦𑁆𑀢𑁄 𑀧𑀞𑀫𑀁 𑀢𑀸𑀯 ‘‘𑀪𑀕𑀯𑀢𑁄 𑀫𑀳𑀸𑀧𑀥𑀸𑀦𑀁 𑀧𑀽𑀚𑁂𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀞𑀸𑀦𑀘𑀗𑁆𑀓𑀫𑀫𑁂𑀯 𑀅𑀥𑀺𑀝𑁆𑀞𑀸𑀲𑀺. 𑀧𑀼𑀦 𑀲𑁄𑀴𑀲 𑀯𑀲𑁆𑀲𑀸𑀦𑀺 𑀕𑀢𑀧𑀘𑁆𑀘𑀸𑀕𑀢𑀺𑀓𑀯𑀢𑁆𑀢𑀁 𑀧𑀽𑀭𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀲𑁄 𑀓𑀫𑁆𑀫𑀝𑁆𑀞𑀸𑀦𑀬𑀼𑀢𑁆𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀧𑀸𑀤𑀁 𑀉𑀤𑁆𑀥𑀭𑀦𑁆𑀢𑁄 𑀯𑀺𑀧𑁆𑀧𑀬𑀼𑀢𑁆𑀢𑁂𑀦 𑀉𑀤𑁆𑀥𑀝𑁂 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑁄 𑀕𑀸𑀫𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 ‘‘𑀕𑀸𑀯𑀻 𑀦𑀼 𑀧𑀩𑁆𑀩𑀚𑀺𑀢𑁄 𑀦𑀽’’𑀢𑀺 𑀆𑀲𑀗𑁆𑀓𑀦𑀻𑀬𑀧𑀤𑁂𑀲𑁂 𑀞𑀢𑁆𑀯𑀸 𑀘𑀻𑀯𑀭𑀁 𑀧𑀸𑀭𑀼𑀧𑀺𑀢𑁆𑀯𑀸 𑀓𑀘𑁆𑀙𑀓𑀭𑀓𑀢𑁄 𑀉𑀤𑀓𑁂𑀦 𑀧𑀢𑁆𑀢𑀁 𑀥𑁄𑀯𑀺𑀢𑁆𑀯𑀸 𑀉𑀤𑀓𑀕𑀡𑁆𑀟𑀽𑀲𑀁 𑀓𑀭𑁄𑀢𑀺. 𑀓𑀺𑀁 𑀓𑀸𑀭𑀡𑀸? ‘‘𑀫𑀸 𑀫𑁂 𑀪𑀺𑀓𑁆𑀔𑀁 𑀤𑀸𑀢𑀼𑀁 𑀯𑀸 𑀯𑀦𑁆𑀤𑀺𑀢𑀼𑀁 𑀯𑀸 𑀆𑀕𑀢𑁂 𑀫𑀦𑀼𑀲𑁆𑀲𑁂 ‘𑀤𑀻𑀖𑀸𑀬𑀼𑀓𑀸 𑀳𑁄𑀣𑀸’𑀢𑀺 𑀯𑀘𑀦𑀫𑀢𑁆𑀢𑁂𑀦𑀸𑀧𑀺 𑀓𑀫𑁆𑀫𑀝𑁆𑀞𑀸𑀦𑀯𑀺𑀓𑁆𑀔𑁂𑀧𑁄 𑀅𑀳𑁄𑀲𑀻’’𑀢𑀺 ‘‘𑀅𑀚𑁆𑀚, 𑀪𑀦𑁆𑀢𑁂, 𑀓𑀢𑀺𑀫𑀻’’𑀢𑀺 𑀤𑀺𑀯𑀲𑀁 𑀯𑀸 𑀪𑀺𑀓𑁆𑀔𑀼𑀕𑀡𑀦𑀁 𑀯𑀸 𑀧𑀜𑁆𑀳𑀁 𑀯𑀸 𑀧𑀼𑀘𑁆𑀙𑀺𑀢𑁄 𑀧𑀦 𑀉𑀤𑀓𑀁 𑀕𑀺𑀮𑀺𑀢𑁆𑀯𑀸 𑀆𑀭𑁄𑀘𑁂𑀢𑀺. 𑀲𑀘𑁂 𑀤𑀺𑀯𑀲𑀸𑀤𑀺𑀧𑀼𑀘𑁆𑀙𑀓𑀸 𑀦 𑀳𑁄𑀦𑁆𑀢𑀺, 𑀦𑀺𑀓𑁆𑀔𑀫𑀦𑀯𑁂𑀮𑀸𑀬𑀁 𑀕𑀸𑀫𑀤𑁆𑀯𑀸𑀭𑁂 𑀦𑀺𑀝𑁆𑀞𑀼𑀪𑀺𑀢𑁆𑀯𑀸 𑀬𑀸𑀢𑀺.

𑀓𑀮𑀫𑁆𑀩𑀢𑀺𑀢𑁆𑀣𑀯𑀺𑀳𑀸𑀭𑁂 𑀯𑀲𑁆𑀲𑀽𑀧𑀕𑀢𑀸 𑀧𑀜𑁆𑀜𑀸𑀲 𑀪𑀺𑀓𑁆𑀔𑀽 𑀯𑀺𑀬 𑀘. 𑀢𑁂 𑀓𑀺𑀭 𑀆𑀲𑀸𑀴𑁆𑀳𑀺𑀧𑀼𑀡𑁆𑀡𑀫𑀺𑀬𑀁 𑀓𑀢𑀺𑀓𑀯𑀢𑁆𑀢𑀁 𑀅𑀓𑀁𑀲𑀼 𑁋 ‘‘𑀅𑀭𑀳𑀢𑁆𑀢𑀁 𑀅𑀧𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀦𑀸𑀮𑀧𑀺𑀲𑁆𑀲𑀸𑀫𑀸’’𑀢𑀺. 𑀕𑀸𑀫𑀜𑁆𑀘 𑀧𑀺𑀡𑁆𑀟𑀸𑀬 𑀧𑀯𑀺𑀲𑀦𑁆𑀢𑀸 𑀉𑀤𑀓𑀕𑀡𑁆𑀟𑀽𑀲𑀁 𑀓𑀢𑁆𑀯𑀸 𑀧𑀯𑀺𑀲𑀺𑀁𑀲𑀼. 𑀤𑀺𑀯𑀲𑀸𑀤𑀻𑀲𑀼 𑀧𑀼𑀘𑁆𑀙𑀺𑀢𑁂𑀲𑀼 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀁𑀲𑀼. 𑀢𑀢𑁆𑀣 𑀫𑀦𑀼𑀲𑁆𑀲𑀸 𑀦𑀺𑀝𑁆𑀞𑀼𑀪𑀦𑀁 𑀤𑀺𑀲𑁆𑀯𑀸 𑀚𑀸𑀦𑀺𑀁𑀲𑀼 𑁋 ‘‘𑀅𑀚𑁆𑀚𑁂𑀓𑁄 𑀆𑀕𑀢𑁄, 𑀅𑀚𑁆𑀚 𑀤𑁆𑀯𑁂’’𑀢𑀺. 𑀏𑀯𑀜𑁆𑀘 𑀘𑀺𑀦𑁆𑀢𑁂𑀲𑀼𑀁 𑁋 ‘‘𑀓𑀺𑀁 𑀦𑀼 𑀔𑁄 𑀏𑀢𑁂 𑀅𑀫𑁆𑀳𑁂𑀳𑁂𑀯 𑀲𑀤𑁆𑀥𑀺𑀁 𑀦 𑀲𑀮𑁆𑀮𑀧𑀦𑁆𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀫𑀜𑁆𑀜𑀫𑁆𑀧𑀺. 𑀬𑀤𑀺 𑀅𑀜𑁆𑀜𑀫𑀜𑁆𑀜𑀁 𑀦 𑀲𑀮𑁆𑀮𑀧𑀦𑁆𑀢𑀺, 𑀅𑀤𑁆𑀥𑀸 𑀯𑀺𑀯𑀸𑀤𑀚𑀸𑀢𑀸 𑀪𑀯𑀺𑀲𑁆𑀲𑀦𑁆𑀢𑀺. 𑀏𑀣 𑀦𑁂 𑀅𑀜𑁆𑀜𑀫𑀜𑁆𑀜𑀁 𑀔𑀫𑀸𑀧𑁂𑀲𑁆𑀲𑀸𑀫𑀸’’𑀢𑀺 𑀲𑀩𑁆𑀩𑁂 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀜𑁆𑀜𑀸𑀲𑀸𑀬 𑀪𑀺𑀓𑁆𑀔𑀽𑀲𑀼 𑀤𑁆𑀯𑁂𑀧𑀺 𑀪𑀺𑀓𑁆𑀔𑀽 𑀏𑀓𑁄𑀓𑀸𑀲𑁂 𑀦𑀸𑀤𑁆𑀤𑀲𑀁𑀲𑀼. 𑀢𑀢𑁄 𑀬𑁄 𑀢𑁂𑀲𑀼 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄, 𑀲𑁄 𑀆𑀳 𑁋 ‘‘𑀦 𑀪𑁄 𑀓𑀮𑀳𑀓𑀸𑀭𑀓𑀸𑀦𑀁 𑀑𑀓𑀸𑀲𑁄 𑀈𑀤𑀺𑀲𑁄 𑀳𑁄𑀢𑀺, 𑀲𑀼𑀲𑀫𑁆𑀫𑀝𑁆𑀞𑀁 𑀘𑁂𑀢𑀺𑀬𑀗𑁆𑀕𑀡𑀁 𑀩𑁄𑀥𑀺𑀬𑀗𑁆𑀕𑀡𑀁, 𑀲𑀼𑀦𑀺𑀓𑁆𑀔𑀺𑀢𑁆𑀢𑀸 𑀲𑀫𑁆𑀫𑀚𑁆𑀚𑀦𑀺𑀬𑁄, 𑀲𑀼𑀧𑀝𑁆𑀞𑀺𑀢𑀁 𑀧𑀸𑀦𑀻𑀬𑀁 𑀧𑀭𑀺𑀪𑁄𑀚𑀦𑀻𑀬’’𑀦𑁆𑀢𑀺. 𑀢𑁂 𑀢𑀢𑁄𑀯 𑀦𑀺𑀯𑀢𑁆𑀢𑀸. 𑀢𑁂𑀧𑀺 𑀪𑀺𑀓𑁆𑀔𑀽 𑀅𑀦𑁆𑀢𑁄𑀢𑁂𑀫𑀸𑀲𑁂𑀬𑁂𑀯 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀫𑀳𑀸𑀧𑀯𑀸𑀭𑀡𑀸𑀬𑀁 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀁 𑀧𑀯𑀸𑀭𑁂𑀲𑀼𑀁.

𑀏𑀯𑀁 𑀓𑀸𑀴𑀯𑀮𑁆𑀮𑀺𑀫𑀡𑁆𑀟𑀧𑀯𑀸𑀲𑀻 𑀫𑀳𑀸𑀦𑀸𑀕𑀢𑁆𑀣𑁂𑀭𑁄 𑀯𑀺𑀬, 𑀓𑀮𑀫𑁆𑀩𑀢𑀺𑀢𑁆𑀣𑀯𑀺𑀳𑀸𑀭𑁂 𑀯𑀲𑁆𑀲𑀽𑀧𑀕𑀢𑀸 𑀪𑀺𑀓𑁆𑀔𑀽 𑀯𑀺𑀬 𑀘 𑀓𑀫𑁆𑀫𑀝𑁆𑀞𑀸𑀦𑀬𑀼𑀢𑁆𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀧𑀸𑀤𑀁 𑀉𑀤𑁆𑀥𑀭𑀦𑁆𑀢𑁄 𑀕𑀸𑀫𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀉𑀤𑀓𑀕𑀡𑁆𑀟𑀽𑀲𑀁 𑀓𑀢𑁆𑀯𑀸 𑀯𑀻𑀣𑀺𑀬𑁄 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀬𑀢𑁆𑀣 𑀲𑀼𑀭𑀸𑀲𑁄𑀡𑁆𑀟𑀥𑀼𑀢𑁆𑀢𑀸𑀤𑀬𑁄 𑀓𑀮𑀳𑀓𑀸𑀭𑀓𑀸 𑀘𑀡𑁆𑀟𑀳𑀢𑁆𑀣𑀺𑀅𑀲𑁆𑀲𑀸𑀤𑀬𑁄 𑀯𑀸 𑀦𑀢𑁆𑀣𑀺, 𑀢𑀁 𑀯𑀻𑀣𑀺𑀁 𑀧𑀝𑀺𑀧𑀚𑁆𑀚𑀢𑀺. 𑀢𑀢𑁆𑀣 𑀘 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑁄 𑀦 𑀢𑀼𑀭𑀺𑀢𑀢𑀼𑀭𑀺𑀢𑁄 𑀯𑀺𑀬 𑀚𑀯𑁂𑀦 𑀕𑀘𑁆𑀙𑀢𑀺. 𑀦 𑀳𑀺 𑀚𑀯𑁂𑀦 𑀧𑀺𑀡𑁆𑀟𑀧𑀸𑀢𑀺𑀓𑀥𑀼𑀢𑀗𑁆𑀕𑀁 𑀦𑀸𑀫 𑀓𑀺𑀜𑁆𑀘𑀺 𑀅𑀢𑁆𑀣𑀺. 𑀯𑀺𑀲𑀫𑀪𑀽𑀫𑀺𑀪𑀸𑀕𑀧𑀢𑁆𑀢𑀁 𑀧𑀦 𑀉𑀤𑀓𑀲𑀓𑀝𑀁 𑀯𑀺𑀬 𑀦𑀺𑀘𑁆𑀘𑀮𑁄 𑀳𑀼𑀢𑁆𑀯𑀸 𑀕𑀘𑁆𑀙𑀢𑀺. 𑀅𑀦𑀼𑀖𑀭𑀁 𑀧𑀯𑀺𑀝𑁆𑀞𑁄 𑀘 𑀤𑀸𑀢𑀼𑀓𑀸𑀫𑀁 𑀯𑀸 𑀅𑀤𑀸𑀢𑀼𑀓𑀸𑀫𑀁 𑀯𑀸 𑀲𑀮𑁆𑀮𑀓𑁆𑀔𑁂𑀢𑀼𑀁 𑀢𑀤𑀦𑀼𑀭𑀽𑀧𑀁 𑀓𑀸𑀮𑀁 𑀆𑀕𑀫𑁂𑀦𑁆𑀢𑁄 𑀪𑀺𑀓𑁆𑀔𑀁 𑀕𑀳𑁂𑀢𑁆𑀯𑀸 𑀅𑀦𑁆𑀢𑁄𑀕𑀸𑀫𑁂 𑀯𑀸 𑀩𑀳𑀺𑀕𑀸𑀫𑁂 𑀯𑀸 𑀯𑀺𑀳𑀸𑀭𑀫𑁂𑀯 𑀯𑀸 𑀆𑀕𑀦𑁆𑀢𑁆𑀯𑀸 𑀬𑀣𑀸𑀨𑀸𑀲𑀼𑀓𑁂 𑀧𑀢𑀺𑀭𑀽𑀧𑁂 𑀑𑀓𑀸𑀲𑁂 𑀦𑀺𑀲𑀻𑀤𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀁 𑀉𑀧𑀝𑁆𑀞𑀧𑁂𑀢𑁆𑀯𑀸 𑀅𑀓𑁆𑀔𑀩𑁆𑀪𑀜𑁆𑀚𑀦𑀯𑀡𑀮𑁂𑀧𑀦𑀧𑀼𑀢𑁆𑀢𑀫𑀁𑀲𑀽𑀧𑀫𑀸𑀯𑀲𑁂𑀦 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀆𑀳𑀸𑀭𑀁 𑀆𑀳𑀸𑀭𑁂𑀢𑀺, 𑀦𑁂𑀯 𑀤𑀯𑀸𑀬 𑀦 𑀫𑀤𑀸𑀬 𑀦 𑀫𑀡𑁆𑀟𑀦𑀸𑀬 𑀦 𑀯𑀺𑀪𑀽𑀲𑀦𑀸𑀬…𑀧𑁂… 𑀪𑀼𑀢𑁆𑀢𑀸𑀯𑀻 𑀘 𑀉𑀤𑀓𑀓𑀺𑀘𑁆𑀘𑀁 𑀓𑀢𑁆𑀯𑀸 𑀫𑀼𑀳𑀼𑀢𑁆𑀢𑀁 𑀪𑀢𑁆𑀢𑀓𑀺𑀮𑀫𑀣𑀁 𑀧𑀝𑀺𑀧𑀲𑁆𑀲𑀫𑁆𑀪𑁂𑀢𑁆𑀯𑀸 𑀬𑀣𑀸 𑀧𑀼𑀭𑁂𑀪𑀢𑁆𑀢𑀁, 𑀏𑀯𑀁 𑀧𑀘𑁆𑀙𑀸𑀪𑀢𑁆𑀢𑀁 𑀧𑀼𑀭𑀺𑀫𑀬𑀸𑀫𑀁 𑀧𑀘𑁆𑀙𑀺𑀫𑀬𑀸𑀫𑀜𑁆𑀘 𑀓𑀫𑁆𑀫𑀝𑁆𑀞𑀸𑀦𑀫𑁂𑀯 𑀫𑀦𑀲𑀺𑀓𑀭𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀳𑀭𑀢𑀺 𑀘 𑀧𑀘𑁆𑀘𑀸𑀳𑀭𑀢𑀺 𑀘𑀸𑀢𑀺.

𑀇𑀫𑀁 𑀧𑀦 𑀳𑀭𑀡𑀧𑀘𑁆𑀘𑀸𑀳𑀭𑀡𑀲𑀗𑁆𑀔𑀸𑀢𑀁 𑀕𑀢𑀧𑀘𑁆𑀘𑀸𑀕𑀢𑀺𑀓𑀯𑀢𑁆𑀢𑀁 𑀧𑀽𑀭𑁂𑀦𑁆𑀢𑁄 𑀬𑀤𑀺 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀳𑁄𑀢𑀺, 𑀧𑀞𑀫𑀯𑀬𑁂 𑀏𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀦𑁄 𑀘𑁂 𑀧𑀞𑀫𑀯𑀬𑁂 𑀧𑀸𑀧𑀼𑀡𑀸𑀢𑀺, 𑀅𑀣 𑀫𑀚𑁆𑀛𑀺𑀫𑀯𑀬𑁂 𑀧𑀸𑀧𑀼𑀡𑀸𑀢𑀺. 𑀦𑁄 𑀘𑁂 𑀫𑀚𑁆𑀛𑀺𑀫𑀯𑀬𑁂 𑀧𑀸𑀧𑀼𑀡𑀸𑀢𑀺, 𑀅𑀣 𑀧𑀘𑁆𑀙𑀺𑀫𑀯𑀬𑁂 𑀧𑀸𑀧𑀼𑀡𑀸𑀢𑀺, 𑀦𑁄 𑀘𑁂 𑀧𑀘𑁆𑀙𑀺𑀫𑀯𑀬𑁂 𑀧𑀸𑀧𑀼𑀡𑀸𑀢𑀺, 𑀅𑀣 𑀫𑀭𑀡𑀲𑀫𑀬𑁂. 𑀦𑁄 𑀘𑁂 𑀫𑀭𑀡𑀲𑀫𑀬𑁂 𑀧𑀸𑀧𑀼𑀡𑀸𑀢𑀺, 𑀅𑀣 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸. 𑀦𑁄 𑀘𑁂 𑀤𑁂𑀯𑀧𑀼𑀢𑁆𑀢𑁄 𑀳𑀼𑀢𑁆𑀯𑀸 𑀧𑀸𑀧𑀼𑀡𑀸𑀢𑀺, 𑀅𑀦𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀦𑀺𑀩𑁆𑀩𑀢𑁆𑀢𑁄 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀭𑁄𑀢𑀺. 𑀦𑁄 𑀘𑁂 𑀧𑀘𑁆𑀘𑁂𑀓𑀩𑁄𑀥𑀺𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀅𑀣 𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑁂 𑀔𑀺𑀧𑁆𑀧𑀸𑀪𑀺𑀜𑁆𑀜𑁄 𑀯𑀸 𑀳𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀩𑀸𑀳𑀺𑀬𑁄 𑀤𑀸𑀭𑀼𑀘𑀻𑀭𑀺𑀬𑁄 𑀫𑀳𑀸𑀧𑀜𑁆𑀜𑁄 𑀯𑀸, 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀲𑀸𑀭𑀺𑀧𑀼𑀢𑁆𑀢𑁄, 𑀫𑀳𑀺𑀤𑁆𑀥𑀺𑀓𑁄 𑀯𑀸, 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄, 𑀥𑀼𑀢𑀯𑀸𑀤𑁄 𑀯𑀸, 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀫𑀳𑀸𑀓𑀲𑁆𑀲𑀧𑁄, 𑀤𑀺𑀩𑁆𑀩𑀘𑀓𑁆𑀔𑀼𑀓𑁄 𑀯𑀸, 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀅𑀦𑀼𑀭𑀼𑀤𑁆𑀥𑁄, 𑀯𑀺𑀦𑀬𑀥𑀭𑁄 𑀯𑀸, 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀉𑀧𑀸𑀮𑀺, 𑀥𑀫𑁆𑀫𑀓𑀣𑀺𑀓𑁄 𑀯𑀸, 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀧𑀼𑀡𑁆𑀡𑁄 𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑁄, 𑀆𑀭𑀜𑁆𑀜𑀺𑀓𑁄 𑀯𑀸, 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀭𑁂𑀯𑀢𑁄, 𑀩𑀳𑀼𑀲𑁆𑀲𑀼𑀢𑁄 𑀯𑀸, 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀆𑀦𑀦𑁆𑀤𑁄, 𑀲𑀺𑀓𑁆𑀔𑀸𑀓𑀸𑀫𑁄 𑀯𑀸, 𑀲𑁂𑀬𑁆𑀬𑀣𑀸𑀧𑀺 𑀣𑁂𑀭𑁄 𑀭𑀸𑀳𑀼𑀮𑁄 𑀩𑀼𑀤𑁆𑀥𑀧𑀼𑀢𑁆𑀢𑁄𑀢𑀺. 𑀇𑀢𑀺 𑀇𑀫𑀲𑁆𑀫𑀺𑀁 𑀘𑀢𑀼𑀓𑁆𑀓𑁂 𑀬𑁆𑀯𑀸𑀬𑀁 𑀳𑀭𑀢𑀺 𑀧𑀘𑁆𑀘𑀸𑀳𑀭𑀢𑀺 𑀘, 𑀢𑀲𑁆𑀲 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁 𑀲𑀺𑀔𑀸𑀧𑀢𑁆𑀢𑀁 𑀳𑁄𑀢𑀺.

𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀧𑀦 𑀅𑀲𑀫𑁆𑀫𑀼𑀬𑁆𑀳𑀦𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁. 𑀢𑀁 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀇𑀥 𑀪𑀺𑀓𑁆𑀔𑀼 𑀅𑀪𑀺𑀓𑁆𑀓𑀫𑀦𑁆𑀢𑁄 𑀯𑀸 𑀧𑀝𑀺𑀓𑁆𑀓𑀫𑀦𑁆𑀢𑁄 𑀯𑀸 𑀬𑀣𑀸 𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑀸 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑁋 ‘‘𑀅𑀢𑁆𑀢𑀸 𑀅𑀪𑀺𑀓𑁆𑀓𑀫𑀢𑀺, 𑀅𑀢𑁆𑀢𑀦𑀸 𑀅𑀪𑀺𑀓𑁆𑀓𑀫𑁄 𑀦𑀺𑀩𑁆𑀩𑀢𑁆𑀢𑀺𑀢𑁄’’𑀢𑀺 𑀯𑀸 ‘‘𑀅𑀳𑀁 𑀅𑀪𑀺𑀓𑁆𑀓𑀫𑀸𑀫𑀺, 𑀫𑀬𑀸 𑀅𑀪𑀺𑀓𑁆𑀓𑀫𑁄 𑀦𑀺𑀩𑁆𑀩𑀢𑁆𑀢𑀺𑀢𑁄’’𑀢𑀺 𑀯𑀸 𑀲𑀫𑁆𑀫𑀼𑀬𑁆𑀳𑀦𑁆𑀢𑀺, 𑀢𑀣𑀸 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁄 𑀅𑀪𑀺𑀓𑁆𑀓𑀫𑀸𑀫𑀻𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀫𑀸𑀦𑁂 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀯𑀸𑀬𑁄𑀥𑀸𑀢𑀼 𑀯𑀺𑀜𑁆𑀜𑀢𑁆𑀢𑀺𑀁 𑀚𑀦𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀇𑀢𑀺 𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑀯𑀲𑁂𑀦 𑀅𑀬𑀁 𑀓𑀸𑀬𑀲𑀫𑁆𑀫𑀢𑁄 𑀅𑀝𑁆𑀞𑀺𑀲𑀗𑁆𑀖𑀸𑀝𑁄 𑀅𑀪𑀺𑀓𑁆𑀓𑀫𑀢𑀺. 𑀢𑀲𑁆𑀲𑁂𑀯𑀁 𑀅𑀪𑀺𑀓𑁆𑀓𑀫𑀢𑁄 𑀏𑀓𑁂𑀓𑀧𑀸𑀤𑀼𑀤𑁆𑀥𑀭𑀡𑁂 𑀧𑀣𑀯𑀻𑀥𑀸𑀢𑀼 𑀆𑀧𑁄𑀥𑀸𑀢𑀽𑀢𑀺 𑀤𑁆𑀯𑁂 𑀥𑀸𑀢𑀼𑀬𑁄 𑀑𑀫𑀢𑁆𑀢𑀸 𑀳𑁄𑀦𑁆𑀢𑀺 𑀫𑀦𑁆𑀤𑀸, 𑀇𑀢𑀭𑀸 𑀤𑁆𑀯𑁂 𑀅𑀥𑀺𑀫𑀢𑁆𑀢𑀸 𑀳𑁄𑀦𑁆𑀢𑀺 𑀩𑀮𑀯𑀢𑀺𑀬𑁄, 𑀢𑀣𑀸 𑀅𑀢𑀺𑀳𑀭𑀡𑀯𑀻𑀢𑀺𑀳𑀭𑀡𑁂𑀲𑀼, 𑀯𑁄𑀲𑁆𑀲𑀚𑁆𑀚𑀦𑁂 𑀢𑁂𑀚𑁄𑀥𑀸𑀢𑀼 𑀯𑀸𑀬𑁄𑀥𑀸𑀢𑀽𑀢𑀺 𑀤𑁆𑀯𑁂 𑀥𑀸𑀢𑀼𑀬𑁄 𑀑𑀫𑀢𑁆𑀢𑀸 𑀳𑁄𑀦𑁆𑀢𑀺 𑀫𑀦𑁆𑀤𑀸, 𑀇𑀢𑀭𑀸 𑀤𑁆𑀯𑁂 𑀅𑀥𑀺𑀫𑀢𑁆𑀢𑀸 𑀳𑁄𑀦𑁆𑀢𑀺 𑀩𑀮𑀯𑀢𑀺𑀬𑁄, 𑀢𑀣𑀸 𑀲𑀦𑁆𑀦𑀺𑀓𑁆𑀔𑁂𑀧𑀦𑀲𑀦𑁆𑀦𑀺𑀭𑀼𑀫𑁆𑀪𑀦𑁂𑀲𑀼.

𑀢𑀢𑁆𑀣 𑀉𑀤𑁆𑀥𑀭𑀡𑁂 𑀧𑀯𑀢𑁆𑀢𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀅𑀢𑀺𑀳𑀭𑀡𑀁 𑀦 𑀧𑀸𑀧𑀼𑀡𑀦𑁆𑀢𑀺, 𑀢𑀣𑀸 𑀅𑀢𑀺𑀳𑀭𑀡𑁂 𑀧𑀯𑀢𑁆𑀢𑀸 𑀯𑀻𑀢𑀺𑀳𑀭𑀡𑀁, 𑀯𑀻𑀢𑀺𑀳𑀭𑀡𑁂 𑀧𑀯𑀢𑁆𑀢𑀸 𑀯𑁄𑀲𑁆𑀲𑀚𑁆𑀚𑀦𑀁, 𑀯𑁄𑀲𑁆𑀲𑀚𑁆𑀚𑀦𑁂 𑀧𑀯𑀢𑁆𑀢𑀸 𑀲𑀦𑁆𑀦𑀺𑀓𑁆𑀔𑁂𑀧𑀦𑀁, 𑀲𑀦𑁆𑀦𑀺𑀓𑁆𑀔𑁂𑀧𑀦𑁂 𑀧𑀯𑀢𑁆𑀢𑀸 𑀲𑀦𑁆𑀦𑀺𑀭𑀼𑀫𑁆𑀪𑀦𑀁 𑀦 𑀧𑀸𑀧𑀼𑀡𑀦𑁆𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀧𑀩𑁆𑀩𑀧𑀩𑁆𑀩𑀁 𑀲𑀦𑁆𑀥𑀺𑀲𑀦𑁆𑀥𑀺 𑀑𑀥𑀺𑀑𑀥𑀺 𑀳𑀼𑀢𑁆𑀯𑀸 𑀢𑀢𑁆𑀢𑀓𑀧𑀸𑀮𑁂 𑀧𑀓𑁆𑀔𑀺𑀢𑁆𑀢𑀢𑀺𑀮𑀸𑀦𑀺 𑀯𑀺𑀬 𑀢𑀝𑀢𑀝𑀸𑀬𑀦𑁆𑀢𑀸 𑀪𑀺𑀚𑁆𑀚𑀦𑁆𑀢𑀺. 𑀢𑀢𑁆𑀣 𑀓𑁄 𑀏𑀓𑁄 𑀅𑀪𑀺𑀓𑁆𑀓𑀫𑀢𑀺, 𑀓𑀲𑁆𑀲 𑀯𑀸 𑀏𑀓𑀲𑁆𑀲 𑀅𑀪𑀺𑀓𑁆𑀓𑀫𑀦𑀁? 𑀧𑀭𑀫𑀢𑁆𑀣𑀢𑁄 𑀳𑀺 𑀥𑀸𑀢𑀽𑀦𑀁𑀬𑁂𑀯 𑀕𑀫𑀦𑀁, 𑀥𑀸𑀢𑀽𑀦𑀁 𑀞𑀸𑀦𑀁, 𑀥𑀸𑀢𑀽𑀦𑀁 𑀦𑀺𑀲𑀚𑁆𑀚𑀸, 𑀥𑀸𑀢𑀽𑀦𑀁 𑀲𑀬𑀦𑀁. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀜𑁆𑀳𑀺 𑀓𑁄𑀝𑁆𑀞𑀸𑀲𑁂 𑀲𑀤𑁆𑀥𑀺𑀁 𑀭𑀽𑀧𑁂𑀦 𑁋

‘‘𑀅𑀜𑁆𑀜𑀁 𑀉𑀧𑁆𑀧𑀚𑁆𑀚𑀢𑁂 𑀘𑀺𑀢𑁆𑀢𑀁, 𑀅𑀜𑁆𑀜𑀁 𑀘𑀺𑀢𑁆𑀢𑀁 𑀦𑀺𑀭𑀼𑀚𑁆𑀛𑀢𑀺;

𑀅𑀯𑀻𑀘𑀺𑀫𑀦𑀼𑀲𑀫𑁆𑀩𑀦𑁆𑀥𑁄, 𑀦𑀤𑀻𑀲𑁄𑀢𑁄𑀯 𑀯𑀢𑁆𑀢𑀢𑀻’’𑀢𑀺. 𑁋

𑀏𑀯𑀁 𑀅𑀪𑀺𑀓𑁆𑀓𑀫𑀸𑀤𑀻𑀲𑀼 𑀅𑀲𑀫𑁆𑀫𑀼𑀬𑁆𑀳𑀦𑀁 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀦𑀸𑀫𑀸𑀢𑀺.

𑀦𑀺𑀝𑁆𑀞𑀺𑀢𑁄 ‘‘𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀻’’𑀢𑀺𑀧𑀤𑀲𑁆𑀲 𑀅𑀢𑁆𑀣𑁄.

𑀆𑀮𑁄𑀓𑀺𑀢𑁂 𑀯𑀺𑀮𑁄𑀓𑀺𑀢𑁂𑀢𑀺 𑀏𑀢𑁆𑀣 𑀧𑀦 𑀆𑀮𑁄𑀓𑀺𑀢𑀁 𑀦𑀸𑀫 𑀧𑀼𑀭𑀢𑁄 𑀧𑁂𑀓𑁆𑀔𑀦𑀁, 𑀯𑀺𑀮𑁄𑀓𑀺𑀢𑀁 𑀦𑀸𑀫 𑀅𑀦𑀼𑀤𑀺𑀲𑀸𑀧𑁂𑀓𑁆𑀔𑀦𑀁. 𑀅𑀜𑁆𑀜𑀸𑀦𑀺𑀧𑀺 𑀳𑁂𑀝𑁆𑀞𑀸 𑀉𑀧𑀭𑀺 𑀧𑀘𑁆𑀙𑀢𑁄 𑀅𑀦𑀼𑀧𑁂𑀓𑁆𑀔𑀦𑀯𑀲𑁂𑀦 𑀑𑀮𑁄𑀓𑀺𑀢𑀉𑀮𑁆𑀮𑁄𑀓𑀺𑀢𑀸𑀧𑀮𑁄𑀓𑀺𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀢𑀸𑀦𑀺 𑀇𑀥 𑀦 𑀕𑀳𑀺𑀢𑀸𑀦𑀺, 𑀲𑀸𑀭𑀼𑀧𑁆𑀧𑀯𑀲𑁂𑀦 𑀧𑀦 𑀇𑀫𑀸𑀦𑁂𑀯 𑀤𑁆𑀯𑁂 𑀕𑀳𑀺𑀢𑀸𑀦𑀺. 𑀇𑀫𑀺𑀦𑀸 𑀯𑀸 𑀫𑀼𑀔𑁂𑀦 𑀲𑀩𑁆𑀩𑀸𑀦𑀺𑀧𑀺 𑀢𑀸𑀦𑀺 𑀕𑀳𑀺𑀢𑀸𑀦𑁂𑀯𑀸𑀢𑀺.

𑀢𑀢𑁆𑀣 ‘‘𑀆𑀮𑁄𑀓𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀘𑀺𑀢𑁆𑀢𑀯𑀲𑁂𑀦𑁂𑀯 𑀅𑀦𑁄𑀮𑁄𑀓𑁂𑀢𑁆𑀯𑀸 𑀅𑀢𑁆𑀣𑀧𑀭𑀺𑀕𑁆𑀕𑀡𑁆𑀳𑀦𑀁 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁. 𑀢𑀁 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀁 𑀓𑀸𑀬𑀲𑀓𑁆𑀔𑀺𑀁 𑀓𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀦𑀦𑁆𑀤𑀲𑁆𑀲 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀆𑀮𑁄𑀓𑁂𑀢𑀩𑁆𑀩𑀸 𑀳𑁄𑀢𑀺, 𑀲𑀩𑁆𑀩𑀁 𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀦𑀦𑁆𑀤𑁄 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀆𑀮𑁄𑀓𑁂𑀢𑀺 ‘𑀏𑀯𑀁 𑀫𑁂 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀆𑀮𑁄𑀓𑀬𑀢𑁄 𑀦𑀸𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑀯𑀺𑀲𑁆𑀲𑀦𑁆𑀢𑀻’𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀲𑀘𑁂, 𑀪𑀺𑀓𑁆𑀔𑀯𑁂, 𑀦𑀦𑁆𑀤𑀲𑁆𑀲 𑀧𑀘𑁆𑀙𑀺𑀫𑀸 𑀤𑀺𑀲𑀸, 𑀉𑀢𑁆𑀢𑀭𑀸 𑀤𑀺𑀲𑀸, 𑀤𑀓𑁆𑀔𑀺𑀡𑀸 𑀤𑀺𑀲𑀸, 𑀉𑀤𑁆𑀥𑀁, 𑀅𑀥𑁄, 𑀅𑀦𑀼𑀤𑀺𑀲𑀸 𑀆𑀮𑁄𑀓𑁂𑀢𑀩𑁆𑀩𑀸 𑀳𑁄𑀢𑀺, 𑀲𑀩𑁆𑀩𑀁 𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀦𑀦𑁆𑀤𑁄 𑀅𑀦𑀼𑀤𑀺𑀲𑀁 𑀆𑀮𑁄𑀓𑁂𑀢𑀺 ‘𑀏𑀯𑀁 𑀫𑁂 𑀅𑀦𑀼𑀤𑀺𑀲𑀁 𑀆𑀮𑁄𑀓𑀬𑀢𑁄’…𑀧𑁂… 𑀲𑀫𑁆𑀧𑀚𑀸𑀦𑁄 𑀳𑁄𑀢𑀻’’𑀢𑀺 (𑀅. 𑀦𑀺. 𑁮.𑁯).

𑀅𑀧𑀺𑀘 𑀇𑀥𑀸𑀧𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀘𑁂𑀢𑀺𑀬𑀤𑀲𑁆𑀲𑀦𑀸𑀤𑀺𑀯𑀲𑁂𑀦𑁂𑀯 𑀲𑀸𑀢𑁆𑀣𑀓𑀢𑀸 𑀘 𑀲𑀧𑁆𑀧𑀸𑀬𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀧𑀦 𑀅𑀯𑀺𑀚𑀳𑀦𑀫𑁂𑀯 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁, 𑀢𑀲𑁆𑀫𑀸 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀓𑀫𑁆𑀫𑀝𑁆𑀞𑀸𑀦𑀺𑀓𑁂𑀳𑀺 𑀅𑀢𑁆𑀢𑀦𑁄 𑀓𑀫𑀝𑁆𑀞𑀸𑀦𑀯𑀲𑁂𑀦𑁂𑀯 𑀓𑀲𑀺𑀡𑀸𑀤𑀺𑀓𑀫𑁆𑀫𑀝𑁆𑀞𑀸𑀦𑀺𑀓𑁂𑀳𑀺 𑀯𑀸 𑀧𑀦 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦𑁂𑀯 𑀆𑀮𑁄𑀓𑀦𑀯𑀺𑀮𑁄𑀓𑀦𑀁 𑀓𑀸𑀢𑀩𑁆𑀩𑀁.

‘‘𑀅𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀸 𑀦𑀸𑀫 𑀆𑀮𑁄𑀓𑁂𑀢𑀸 𑀯𑀸 𑀯𑀺𑀮𑁄𑀓𑁂𑀢𑀸 𑀯𑀸 𑀦𑀢𑁆𑀣𑀺, ‘𑀆𑀮𑁄𑀓𑁂𑀲𑁆𑀲𑀸𑀫𑀻’𑀢𑀺 𑀧𑀦 𑀘𑀺𑀢𑁆𑀢𑁂 𑀉𑀧𑁆𑀧𑀚𑁆𑀚𑀫𑀸𑀦𑁂 𑀢𑁂𑀦𑁂𑀯 𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀯𑀸𑀬𑁄𑀥𑀸𑀢𑀼 𑀯𑀺𑀜𑁆𑀜𑀢𑁆𑀢𑀺𑀁 𑀚𑀦𑀬𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺 𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑀯𑀲𑁂𑀦 𑀳𑁂𑀝𑁆𑀞𑀺𑀫𑀁 𑀅𑀓𑁆𑀔𑀺𑀤𑀮𑀁 𑀅𑀥𑁄 𑀲𑀻𑀤𑀢𑀺, 𑀉𑀧𑀭𑀺𑀫𑀁 𑀉𑀤𑁆𑀥𑀁 𑀮𑀗𑁆𑀖𑁂𑀢𑀺, 𑀓𑁄𑀘𑀺 𑀬𑀦𑁆𑀢𑀓𑁂𑀦 𑀯𑀺𑀯𑀭𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀢𑀢𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀤𑀲𑁆𑀲𑀦𑀓𑀺𑀘𑁆𑀘𑀁 𑀲𑀸𑀥𑁂𑀦𑁆𑀢𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀯𑀁 𑀧𑀚𑀸𑀦𑀦𑀁 𑀧𑀦𑁂𑀢𑁆𑀣 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀦𑀸𑀫.

𑀅𑀧𑀺𑀘 𑀫𑀽𑀮𑀧𑀭𑀺𑀜𑁆𑀜𑀸𑀆𑀕𑀦𑁆𑀢𑀼𑀓𑀢𑀸𑀯𑀓𑀸𑀮𑀺𑀓𑀪𑀸𑀯𑀯𑀲𑁂𑀦𑀧𑁂𑀢𑁆𑀣 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁. 𑀫𑀽𑀮𑀧𑀭𑀺𑀜𑁆𑀜𑀸𑀯𑀲𑁂𑀦 𑀢𑀸𑀯 𑁋

‘‘𑀪𑀯𑀗𑁆𑀕𑀸𑀯𑀚𑁆𑀚𑀦𑀜𑁆𑀘𑁂𑀯, 𑀤𑀲𑁆𑀲𑀦𑀁 𑀲𑀫𑁆𑀧𑀝𑀺𑀘𑁆𑀙𑀦𑀁;

𑀲𑀦𑁆𑀢𑀻𑀭𑀡𑀁 𑀯𑁄𑀝𑁆𑀞𑀩𑁆𑀩𑀦𑀁, 𑀚𑀯𑀦𑀁 𑀪𑀯𑀢𑀺 𑀲𑀢𑁆𑀢𑀫𑀁’’.

𑀢𑀢𑁆𑀣 𑀪𑀯𑀗𑁆𑀕𑀁 𑀉𑀧𑀧𑀢𑁆𑀢𑀺𑀪𑀯𑀲𑁆𑀲 𑀅𑀗𑁆𑀕𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀁 𑀧𑀯𑀢𑁆𑀢𑀢𑀺, 𑀢𑀁 𑀆𑀯𑀝𑁆𑀝𑁂𑀢𑁆𑀯𑀸 𑀓𑀺𑀭𑀺𑀬𑀫𑀦𑁄𑀥𑀸𑀢𑀼 𑀆𑀯𑀚𑁆𑀚𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸, 𑀢𑀦𑁆𑀦𑀺𑀭𑁄𑀥𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀤𑀲𑁆𑀲𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀁, 𑀢𑀦𑁆𑀦𑀺𑀭𑁄𑀥𑀸 𑀯𑀺𑀧𑀸𑀓𑀫𑀦𑁄𑀥𑀸𑀢𑀼 𑀲𑀫𑁆𑀧𑀝𑀺𑀘𑁆𑀙𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸, 𑀢𑀦𑁆𑀦𑀺𑀭𑁄𑀥𑀸 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸, 𑀢𑀦𑁆𑀦𑀺𑀭𑁄𑀥𑀸 𑀓𑀺𑀭𑀺𑀬𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀯𑁄𑀝𑁆𑀞𑀩𑁆𑀩𑀦𑀓𑀺𑀘𑁆𑀘𑀁 𑀲𑀸𑀥𑀬𑀫𑀸𑀦𑀸, 𑀢𑀦𑁆𑀦𑀺𑀭𑁄𑀥𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀚𑀯𑀦𑀁 𑀚𑀯𑀢𑀺. 𑀢𑀢𑁆𑀣 𑀧𑀞𑀫𑀚𑀯𑀦𑁂𑀧𑀺 ‘‘𑀅𑀬𑀁 𑀇𑀢𑁆𑀣𑀻, 𑀅𑀬𑀁 𑀧𑀼𑀭𑀺𑀲𑁄’’𑀢𑀺 𑀭𑀚𑁆𑀚𑀦𑀤𑀼𑀲𑁆𑀲𑀦𑀫𑀼𑀬𑁆𑀳𑀦𑀯𑀲𑁂𑀦 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀁 𑀦 𑀳𑁄𑀢𑀺, 𑀤𑀼𑀢𑀺𑀬𑀚𑀯𑀦𑁂𑀧𑀺…𑀧𑁂… 𑀲𑀢𑁆𑀢𑀫𑀚𑀯𑀦𑁂𑀧𑀺. 𑀏𑀢𑁂𑀲𑀼 𑀧𑀦 𑀬𑀼𑀤𑁆𑀥𑀫𑀡𑁆𑀟𑀮𑁂 𑀬𑁄𑀥𑁂𑀲𑀼 𑀯𑀺𑀬 𑀳𑁂𑀝𑁆𑀞𑀼𑀧𑀭𑀺𑀬𑀯𑀲𑁂𑀦 𑀪𑀺𑀚𑁆𑀚𑀺𑀢𑁆𑀯𑀸 𑀧𑀢𑀺𑀢𑁂𑀲𑀼 ‘‘𑀅𑀬𑀁 𑀇𑀢𑁆𑀣𑀻, 𑀅𑀬𑀁 𑀧𑀼𑀭𑀺𑀲𑁄’’𑀢𑀺 𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀆𑀮𑁄𑀓𑀺𑀢𑀯𑀺𑀮𑁄𑀓𑀺𑀢𑀁 𑀳𑁄𑀢𑀺. 𑀏𑀯𑀁 𑀢𑀸𑀯𑁂𑀢𑁆𑀣 𑀫𑀽𑀮𑀧𑀭𑀺𑀜𑁆𑀜𑀸𑀯𑀲𑁂𑀦 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁.

𑀘𑀓𑁆𑀔𑀼𑀤𑁆𑀯𑀸𑀭𑁂 𑀧𑀦 𑀭𑀽𑀧𑁂 𑀆𑀧𑀸𑀣𑀫𑀸𑀕𑀢𑁂 𑀪𑀯𑀗𑁆𑀕𑀘𑀮𑀦𑀢𑁄 𑀉𑀤𑁆𑀥𑀁 𑀲𑀓𑀓𑀺𑀘𑁆𑀘𑀦𑀺𑀧𑁆𑀨𑀸𑀤𑀦𑀯𑀲𑁂𑀦 𑀆𑀯𑀚𑁆𑀚𑀦𑀸𑀤𑀻𑀲𑀼 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑁂𑀲𑀼 𑀅𑀯𑀲𑀸𑀦𑁂 𑀚𑀯𑀦𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀧𑀼𑀩𑁆𑀩𑁂 𑀉𑀧𑁆𑀧𑀦𑁆𑀦𑀸𑀦𑀁 𑀆𑀯𑀚𑁆𑀚𑀦𑀸𑀤𑀻𑀦𑀁 𑀕𑁂𑀳𑀪𑀽𑀢𑁂 𑀘𑀓𑁆𑀔𑀼𑀤𑁆𑀯𑀸𑀭𑁂 𑀆𑀕𑀦𑁆𑀢𑀼𑀓𑀧𑀼𑀭𑀺𑀲𑁄 𑀯𑀺𑀬 𑀳𑁄𑀢𑀺. 𑀢𑀲𑁆𑀲 𑀬𑀣𑀸 𑀧𑀭𑀕𑁂𑀳𑁂 𑀓𑀺𑀜𑁆𑀘𑀺 𑀬𑀸𑀘𑀺𑀢𑀼𑀁 𑀧𑀯𑀺𑀝𑁆𑀞𑀲𑁆𑀲 𑀆𑀕𑀦𑁆𑀢𑀼𑀓𑀧𑀼𑀭𑀺𑀲𑀲𑁆𑀲 𑀕𑁂𑀳𑀲𑀸𑀫𑀺𑀓𑁂𑀲𑀼 𑀢𑀼𑀡𑁆𑀳𑀻𑀫𑀸𑀲𑀺𑀦𑁂𑀲𑀼 𑀆𑀡𑀸𑀓𑀭𑀡𑀁 𑀦 𑀬𑀼𑀢𑁆𑀢𑀁, 𑀏𑀯𑀁 𑀆𑀯𑀚𑁆𑀚𑀦𑀸𑀤𑀻𑀦𑀁 𑀕𑁂𑀳𑀪𑀽𑀢𑁂 𑀘𑀓𑁆𑀔𑀼𑀤𑁆𑀯𑀸𑀭𑁂 𑀆𑀯𑀚𑁆𑀚𑀦𑀸𑀤𑀻𑀲𑀼𑀧𑀺 𑀅𑀭𑀚𑁆𑀚𑀦𑁆𑀢𑁂𑀲𑀼 𑀅𑀤𑀼𑀲𑁆𑀲𑀦𑁆𑀢𑁂𑀲𑀼 𑀅𑀫𑀼𑀬𑁆𑀳𑀦𑁆𑀢𑁂𑀲𑀼 𑀘 𑀭𑀚𑁆𑀚𑀦𑀤𑀼𑀲𑁆𑀲𑀦𑀫𑀼𑀬𑁆𑀳𑀦𑀁 𑀅𑀬𑀼𑀢𑁆𑀢𑀦𑁆𑀢𑀺 𑀏𑀯𑀁 𑀆𑀕𑀦𑁆𑀢𑀼𑀓𑀪𑀸𑀯𑀯𑀲𑁂𑀦 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁.

𑀬𑀸𑀦𑀺 𑀧𑀦𑁂𑀢𑀸𑀦𑀺 𑀘𑀓𑁆𑀔𑀼𑀤𑁆𑀯𑀸𑀭𑁂 𑀯𑁄𑀝𑁆𑀞𑀩𑁆𑀩𑀦𑀧𑀭𑀺𑀬𑁄𑀲𑀸𑀦𑀸𑀦𑀺 𑀘𑀺𑀢𑁆𑀢𑀸𑀦𑀺 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀸𑀦𑀺 𑀲𑀤𑁆𑀥𑀺𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺 𑀢𑀢𑁆𑀣 𑀢𑀢𑁆𑀣𑁂𑀯 𑀪𑀺𑀚𑁆𑀚𑀦𑁆𑀢𑀺, 𑀅𑀜𑁆𑀜𑀫𑀜𑁆𑀜𑀁 𑀦 𑀧𑀲𑁆𑀲𑀦𑁆𑀢𑀺, 𑀇𑀢𑁆𑀢𑀭𑀸𑀦𑀺 𑀢𑀸𑀯𑀓𑀸𑀮𑀺𑀓𑀸𑀦𑀺 𑀳𑁄𑀦𑁆𑀢𑀺. 𑀢𑀢𑁆𑀣 𑀬𑀣𑀸 𑀏𑀓𑀲𑁆𑀫𑀺𑀁 𑀖𑀭𑁂 𑀲𑀩𑁆𑀩𑁂𑀲𑀼 𑀫𑀸𑀦𑀼𑀲𑀓𑁂𑀲𑀼 𑀫𑀢𑁂𑀲𑀼 𑀅𑀯𑀲𑁂𑀲𑀲𑁆𑀲 𑀏𑀓𑀲𑁆𑀲 𑀢𑀗𑁆𑀔𑀡𑀁𑀬𑁂𑀯 𑀫𑀭𑀡𑀥𑀫𑁆𑀫𑀲𑁆𑀲 𑀦 𑀬𑀼𑀢𑁆𑀢𑀸 𑀦𑀘𑁆𑀘𑀕𑀻𑀢𑀸𑀤𑀻𑀲𑀼 𑀅𑀪𑀺𑀭𑀢𑀺 𑀦𑀸𑀫, 𑀏𑀯𑀫𑁂𑀯 𑀏𑀓𑀤𑁆𑀯𑀸𑀭𑁂 𑀲𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀆𑀯𑀚𑁆𑀚𑀦𑀸𑀤𑀻𑀲𑀼 𑀢𑀢𑁆𑀣 𑀢𑀢𑁆𑀣𑁂𑀯 𑀫𑀢𑁂𑀲𑀼 𑀅𑀯𑀲𑁂𑀲𑀲𑁆𑀲 𑀢𑀗𑁆𑀔𑀡𑀁𑀬𑁂𑀯 𑀫𑀭𑀡𑀥𑀫𑁆𑀫𑀲𑁆𑀲 𑀚𑀯𑀦𑀲𑁆𑀲𑀸𑀧𑀺 𑀭𑀚𑁆𑀚𑀦𑀤𑀼𑀲𑁆𑀲𑀦𑀫𑀼𑀬𑁆𑀳𑀦𑀯𑀲𑁂𑀦 𑀅𑀪𑀺𑀭𑀢𑀺 𑀦𑀸𑀫 𑀦 𑀬𑀼𑀢𑁆𑀢𑀸𑀢𑀺 𑀏𑀯𑀁 𑀢𑀸𑀯𑀓𑀸𑀮𑀺𑀓𑀪𑀸𑀯𑀯𑀲𑁂𑀦 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀺𑀘 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀧𑀘𑁆𑀘𑀬𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦𑀧𑁂𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀳𑀺 𑀘𑀓𑁆𑀔𑀼 𑀘𑁂𑀯 𑀭𑀽𑀧𑀸 𑀘 𑀭𑀽𑀧𑀓𑁆𑀔𑀦𑁆𑀥𑁄, 𑀤𑀲𑁆𑀲𑀦𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁄, 𑀲𑀜𑁆𑀜𑀸 𑀲𑀜𑁆𑀜𑀸𑀓𑁆𑀔𑀦𑁆𑀥𑁄, 𑀨𑀲𑁆𑀲𑀸𑀤𑀺𑀓𑀸 𑀲𑀗𑁆𑀔𑀸𑀭𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄, 𑀏𑀯𑀫𑁂𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀲𑀫𑀯𑀸𑀬𑁂 𑀆𑀮𑁄𑀓𑀦𑀯𑀺𑀮𑁄𑀓𑀦𑀁 𑀧𑀜𑁆𑀜𑀸𑀬𑀢𑀺. 𑀢𑀢𑁆𑀣 𑀓𑁄 𑀏𑀓𑁄 𑀆𑀮𑁄𑀓𑁂𑀢𑀺, 𑀓𑁄 𑀯𑀺𑀮𑁄𑀓𑁂𑀢𑀺? 𑀢𑀣𑀸 𑀘𑀓𑁆𑀔𑀼 𑀘𑀓𑁆𑀔𑀸𑀬𑀢𑀦𑀁, 𑀭𑀽𑀧𑀁 𑀭𑀽𑀧𑀸𑀬𑀢𑀦𑀁, 𑀤𑀲𑁆𑀲𑀦𑀁 𑀫𑀦𑀸𑀬𑀢𑀦𑀁, 𑀯𑁂𑀤𑀦𑀸𑀤𑀬𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀥𑀫𑁆𑀫𑀸𑀬𑀢𑀦𑀁, 𑀏𑀯𑀫𑁂𑀢𑁂𑀲𑀁 𑀘𑀢𑀼𑀦𑁆𑀦𑀁 𑀆𑀬𑀢𑀦𑀸𑀦𑀁 𑀲𑀫𑀯𑀸𑀬𑁂 𑀆𑀮𑁄𑀓𑀦𑀯𑀺𑀮𑁄𑀓𑀦𑀁 𑀧𑀜𑁆𑀜𑀸𑀬𑀢𑀺. 𑀢𑀢𑁆𑀣 𑀓𑁄 𑀏𑀓𑁄 𑀆𑀮𑁄𑀓𑁂𑀢𑀺, 𑀓𑁄 𑀯𑀺𑀮𑁄𑀓𑁂𑀢𑀺? 𑀢𑀣𑀸 𑀘𑀓𑁆𑀔𑀼 𑀘𑀓𑁆𑀔𑀼𑀥𑀸𑀢𑀼, 𑀭𑀽𑀧𑀁 𑀭𑀽𑀧𑀥𑀸𑀢𑀼, 𑀤𑀲𑁆𑀲𑀦𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀥𑀸𑀢𑀼, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑁂𑀤𑀦𑀸𑀤𑀬𑁄 𑀥𑀫𑁆𑀫𑀸 𑀥𑀫𑁆𑀫𑀥𑀸𑀢𑀼, 𑀏𑀯𑀫𑁂𑀢𑁂𑀲𑀁 𑀘𑀢𑀼𑀦𑁆𑀦𑀁 𑀥𑀸𑀢𑀽𑀦𑀁 𑀲𑀫𑀯𑀸𑀬𑁂 𑀆𑀮𑁄𑀓𑀦𑀯𑀺𑀮𑁄𑀓𑀦𑀁 𑀧𑀜𑁆𑀜𑀸𑀬𑀢𑀺. 𑀢𑀢𑁆𑀣 𑀓𑁄 𑀏𑀓𑁄 𑀆𑀮𑁄𑀓𑁂𑀢𑀺, 𑀓𑁄 𑀯𑀺𑀮𑁄𑀓𑁂𑀢𑀺? 𑀢𑀣𑀸 𑀘𑀓𑁆𑀔𑀼 𑀦𑀺𑀲𑁆𑀲𑀬𑀧𑀘𑁆𑀘𑀬𑁄, 𑀭𑀽𑀧𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄, 𑀆𑀯𑀚𑁆𑀚𑀦𑀁 𑀅𑀦𑀦𑁆𑀢𑀭𑀲𑀫𑀦𑀦𑁆𑀢𑀭𑀽𑀧𑀦𑀺𑀲𑁆𑀲𑀬𑀦𑀢𑁆𑀣𑀺𑀯𑀺𑀕𑀢𑀧𑀘𑁆𑀘𑀬𑁄, 𑀆𑀮𑁄𑀓𑁄 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑁄, 𑀯𑁂𑀤𑀦𑀸𑀤𑀬𑁄 𑀲𑀳𑀚𑀸𑀢𑀧𑀘𑁆𑀘𑀬𑁄. 𑀏𑀯𑀫𑁂𑀢𑁂𑀲𑀁 𑀧𑀘𑁆𑀘𑀬𑀸𑀦𑀁 𑀲𑀫𑀯𑀸𑀬𑁂 𑀆𑀮𑁄𑀓𑀦𑀯𑀺𑀮𑁄𑀓𑀦𑀁 𑀧𑀜𑁆𑀜𑀸𑀬𑀢𑀺. 𑀢𑀢𑁆𑀣 𑀓𑁄 𑀏𑀓𑁄 𑀆𑀮𑁄𑀓𑁂𑀢𑀺, 𑀓𑁄 𑀯𑀺𑀮𑁄𑀓𑁂𑀢𑀻𑀢𑀺 𑀏𑀯𑀫𑁂𑀢𑁆𑀣 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀧𑀘𑁆𑀘𑀬𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦𑀧𑀺 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁.

𑀲𑀫𑀺𑀜𑁆𑀚𑀺𑀢𑁂 𑀧𑀲𑀸𑀭𑀺𑀢𑁂𑀢𑀺 𑀧𑀩𑁆𑀩𑀸𑀦𑀁 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑁂. 𑀢𑀢𑁆𑀣 𑀘𑀺𑀢𑁆𑀢𑀯𑀲𑁂𑀦𑁂𑀯 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀁 𑀅𑀓𑀢𑁆𑀯𑀸 𑀳𑀢𑁆𑀣𑀧𑀸𑀤𑀸𑀦𑀁 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀧𑀘𑁆𑀘𑀬𑀸 𑀅𑀢𑁆𑀣𑀸𑀦𑀢𑁆𑀣𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀅𑀢𑁆𑀣𑀧𑀭𑀺𑀕𑁆𑀕𑀡𑁆𑀳𑀦𑀁 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁. 𑀢𑀢𑁆𑀣 𑀳𑀢𑁆𑀣𑀧𑀸𑀤𑁂 𑀅𑀢𑀺𑀘𑀺𑀭𑀁 𑀲𑀫𑀺𑀜𑁆𑀚𑀺𑀢𑁆𑀯𑀸 𑀯𑀸 𑀧𑀲𑀸𑀭𑁂𑀢𑁆𑀯𑀸 𑀯𑀸 𑀞𑀺𑀢𑀲𑁆𑀲 𑀔𑀡𑁂 𑀔𑀡𑁂 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀦 𑀮𑀪𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀧𑀭𑀺𑀧𑀢𑀢𑀺, 𑀯𑀺𑀲𑁂𑀲𑀁 𑀦𑀸𑀥𑀺𑀕𑀘𑁆𑀙𑀢𑀺. 𑀓𑀸𑀮𑁂 𑀲𑀫𑀺𑀜𑁆𑀚𑀦𑁆𑀢𑀲𑁆𑀲 𑀓𑀸𑀮𑁂 𑀧𑀲𑀸𑀭𑁂𑀦𑁆𑀢𑀲𑁆𑀲 𑀧𑀦 𑀢𑀸 𑀯𑁂𑀤𑀦𑀸 𑀦𑀼𑀧𑁆𑀧𑀚𑁆𑀚𑀦𑁆𑀢𑀺, 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀨𑀸𑀢𑀺𑀁 𑀕𑀘𑁆𑀙𑀢𑀺, 𑀯𑀺𑀲𑁂𑀲𑀫𑀥𑀺𑀕𑀘𑁆𑀙𑀢𑀻𑀢𑀺 𑀏𑀯𑀁 𑀅𑀢𑁆𑀣𑀸𑀦𑀢𑁆𑀣𑀧𑀭𑀺𑀕𑁆𑀕𑀡𑁆𑀳𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀢𑁆𑀣𑁂 𑀧𑀦 𑀲𑀢𑀺𑀧𑀺 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀁 𑀧𑀭𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀲𑀧𑁆𑀧𑀸𑀬𑀧𑀭𑀺𑀕𑁆𑀕𑀡𑁆𑀳𑀦𑀁 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁. 𑀢𑀢𑁆𑀭𑀸𑀬𑀁 𑀦𑀬𑁄 𑁋 𑀫𑀳𑀸𑀘𑁂𑀢𑀺𑀬𑀗𑁆𑀕𑀡𑁂 𑀓𑀺𑀭 𑀤𑀳𑀭𑀪𑀺𑀓𑁆𑀔𑀽 𑀲𑀚𑁆𑀛𑀸𑀬𑀁 𑀕𑀡𑁆𑀳𑀦𑁆𑀢𑀺. 𑀢𑁂𑀲𑀁 𑀧𑀺𑀝𑁆𑀞𑀺𑀧𑀲𑁆𑀲𑁂 𑀤𑀳𑀭𑀪𑀺𑀓𑁆𑀔𑀼𑀦𑀺𑀬𑁄 𑀥𑀫𑁆𑀫𑀁 𑀲𑀼𑀡𑀦𑁆𑀢𑀺. 𑀢𑀢𑁆𑀣𑁂𑀓𑁄 𑀤𑀳𑀭𑁄 𑀳𑀢𑁆𑀣𑀁 𑀧𑀲𑀸𑀭𑁂𑀦𑁆𑀢𑁄 𑀓𑀸𑀬𑀲𑀁𑀲𑀕𑁆𑀕𑀁 𑀧𑀢𑁆𑀯𑀸 𑀢𑁂𑀦𑁂𑀯 𑀓𑀸𑀭𑀡𑁂𑀦 𑀕𑀺𑀳𑀻 𑀚𑀸𑀢𑁄. 𑀅𑀧𑀭𑁄 𑀪𑀺𑀓𑁆𑀔𑀼 𑀧𑀸𑀤𑀁 𑀧𑀲𑀸𑀭𑁂𑀦𑁆𑀢𑁄 𑀅𑀕𑁆𑀕𑀺𑀫𑁆𑀳𑀺 𑀧𑀲𑀸𑀭𑁂𑀲𑀺, 𑀅𑀝𑁆𑀞𑀺𑀁 𑀆𑀳𑀘𑁆𑀘 𑀧𑀸𑀤𑁄 𑀛𑀸𑀬𑀺. 𑀅𑀧𑀭𑁄 𑀯𑀫𑁆𑀫𑀺𑀓𑁂 𑀧𑀲𑀸𑀭𑁂𑀲𑀺, 𑀲𑁄 𑀆𑀲𑀻𑀯𑀺𑀲𑁂𑀦 𑀤𑀝𑁆𑀞𑁄. 𑀅𑀧𑀭𑁄 𑀘𑀻𑀯𑀭𑀓𑀼𑀝𑀺𑀤𑀡𑁆𑀟𑀓𑁂 𑀧𑀲𑀸𑀭𑁂𑀲𑀺, 𑀢𑀁 𑀫𑀡𑀺𑀲𑀧𑁆𑀧𑁄 𑀟𑀁𑀲𑀺. 𑀢𑀲𑁆𑀫𑀸 𑀏𑀯𑀭𑀽𑀧𑁂 𑀅𑀲𑀧𑁆𑀧𑀸𑀬𑁂 𑀅𑀧𑀲𑀸𑀭𑁂𑀢𑁆𑀯𑀸 𑀲𑀧𑁆𑀧𑀸𑀬𑁂 𑀧𑀲𑀸𑀭𑁂𑀢𑀩𑁆𑀩𑀁. 𑀇𑀤𑀫𑁂𑀢𑁆𑀣 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁.

𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁 𑀧𑀦 𑀫𑀳𑀸𑀣𑁂𑀭𑀯𑀢𑁆𑀣𑀼𑀦𑀸 𑀤𑀻𑀧𑁂𑀢𑀩𑁆𑀩𑀁 𑁋 𑀫𑀳𑀸𑀣𑁂𑀭𑁄 𑀓𑀺𑀭 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑁄 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀲𑀤𑁆𑀥𑀺𑀁 𑀓𑀣𑀬𑀫𑀸𑀦𑁄 𑀲𑀳𑀲𑀸 𑀳𑀢𑁆𑀣𑀁 𑀲𑀫𑀺𑀜𑁆𑀚𑀺𑀢𑁆𑀯𑀸 𑀧𑀼𑀦 𑀬𑀣𑀸𑀞𑀸𑀦𑁂 𑀞𑀧𑁂𑀢𑁆𑀯𑀸 𑀲𑀡𑀺𑀓𑀁 𑀲𑀫𑀺𑀜𑁆𑀚𑁂𑀲𑀺. 𑀢𑀁 𑀅𑀦𑁆𑀢𑁂𑀯𑀸𑀲𑀺𑀓𑀸 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀓𑀲𑁆𑀫𑀸, 𑀪𑀦𑁆𑀢𑁂, 𑀲𑀳𑀲𑀸 𑀳𑀢𑁆𑀣𑀁 𑀲𑀫𑀺𑀜𑁆𑀚𑀺𑀢𑁆𑀯𑀸 𑀧𑀼𑀦 𑀬𑀣𑀸𑀞𑀸𑀦𑁂 𑀞𑀧𑁂𑀢𑁆𑀯𑀸 𑀲𑀡𑀺𑀓𑀁 𑀲𑀫𑀺𑀜𑁆𑀚𑀺𑀢𑁆𑀣𑀸’’𑀢𑀺. 𑀬𑀢𑁄 𑀧𑀝𑁆𑀞𑀸𑀬𑀸𑀳𑀁, 𑀆𑀯𑀼𑀲𑁄, 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀸𑀢𑀼𑀁 𑀆𑀭𑀤𑁆𑀥𑁄, 𑀦 𑀫𑁂 𑀓𑀫𑁆𑀫𑀝𑁆𑀞𑀸𑀦𑀁 𑀫𑀼𑀜𑁆𑀘𑀺𑀢𑁆𑀯𑀸 𑀳𑀢𑁆𑀣𑁄 𑀲𑀫𑀺𑀜𑁆𑀚𑀺𑀢𑀧𑀼𑀩𑁆𑀩𑁄, 𑀇𑀤𑀸𑀦𑀺 𑀧𑀦 𑀢𑀼𑀫𑁆𑀳𑁂𑀳𑀺 𑀲𑀤𑁆𑀥𑀺𑀁 𑀓𑀣𑀬𑀫𑀸𑀦𑁂𑀦 𑀓𑀫𑁆𑀫𑀝𑁆𑀞𑀸𑀦𑀁 𑀫𑀼𑀜𑁆𑀘𑀺𑀢𑁆𑀯𑀸 𑀲𑀫𑀺𑀜𑁆𑀚𑀺𑀢𑁄, 𑀢𑀲𑁆𑀫𑀸 𑀧𑀼𑀦 𑀬𑀣𑀸𑀞𑀸𑀦𑁂 𑀞𑀧𑁂𑀢𑁆𑀯𑀸 𑀲𑀫𑀺𑀜𑁆𑀚𑁂𑀲𑀺𑀦𑁆𑀢𑀺. 𑀲𑀸𑀥𑀼, 𑀪𑀦𑁆𑀢𑁂, 𑀪𑀺𑀓𑁆𑀔𑀼𑀦𑀸 𑀦𑀸𑀫 𑀏𑀯𑀭𑀽𑀧𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺. 𑀏𑀯𑀫𑁂𑀢𑁆𑀣𑀸𑀧𑀺 𑀓𑀫𑁆𑀫𑀝𑁆𑀞𑀸𑀦𑀸𑀯𑀺𑀚𑀳𑀦𑀫𑁂𑀯 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀸 𑀦𑀸𑀫 𑀓𑁄𑀘𑀺 𑀲𑀫𑀺𑀜𑁆𑀚𑀦𑁆𑀢𑁄 𑀯𑀸 𑀧𑀲𑀸𑀭𑁂𑀦𑁆𑀢𑁄 𑀯𑀸 𑀦𑀢𑁆𑀣𑀺, 𑀯𑀼𑀢𑁆𑀢𑀧𑁆𑀧𑀓𑀸𑀭𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦 𑀧𑀦 𑀲𑀼𑀢𑁆𑀢𑀸𑀓𑀟𑁆𑀠𑀦𑀯𑀲𑁂𑀦 𑀤𑀸𑀭𑀼𑀬𑀦𑁆𑀢𑀲𑁆𑀲 𑀳𑀢𑁆𑀣𑀧𑀸𑀤𑀮𑀴𑀦𑀁 𑀯𑀺𑀬 𑀲𑀫𑀺𑀜𑁆𑀚𑀦𑀧𑀲𑀸𑀭𑀡𑀁 𑀳𑁄𑀢𑀻𑀢𑀺 𑀧𑀭𑀺𑀚𑀸𑀦𑀦𑀁 𑀧𑀦𑁂𑀢𑁆𑀣 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂𑀢𑀺 𑀏𑀢𑁆𑀣 𑀲𑀗𑁆𑀖𑀸𑀝𑀺𑀘𑀻𑀯𑀭𑀸𑀦𑀁 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀯𑀲𑁂𑀦, 𑀧𑀢𑁆𑀢𑀲𑁆𑀲 𑀪𑀺𑀓𑁆𑀔𑀸𑀧𑀝𑀺𑀕𑁆𑀕𑀳𑀡𑀸𑀤𑀺𑀯𑀲𑁂𑀦 𑀧𑀭𑀺𑀪𑁄𑀕𑁄 𑀥𑀸𑀭𑀡𑀁 𑀦𑀸𑀫. 𑀢𑀢𑁆𑀣 𑀲𑀗𑁆𑀖𑀸𑀝𑀺𑀘𑀻𑀯𑀭𑀥𑀸𑀭𑀡𑁂 𑀢𑀸𑀯 𑀦𑀺𑀯𑀸𑀲𑁂𑀢𑁆𑀯𑀸 𑀧𑀸𑀭𑀼𑀧𑀺𑀢𑁆𑀯𑀸 𑀘 𑀧𑀺𑀡𑁆𑀟𑀸𑀬 𑀘𑀭𑀢𑁄 𑀆𑀫𑀺𑀲𑀮𑀸𑀪𑁄, ‘‘𑀲𑀻𑀢𑀲𑁆𑀲 𑀧𑀝𑀺𑀖𑀸𑀢𑀸𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀪𑀕𑀯𑀢𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑁄𑀬𑁂𑀯 𑀘 𑀅𑀢𑁆𑀣𑁄 𑀅𑀢𑁆𑀣𑁄 𑀦𑀸𑀫. 𑀢𑀲𑁆𑀲 𑀯𑀲𑁂𑀦 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁.

𑀉𑀡𑁆𑀳𑀧𑀓𑀢𑀺𑀓𑀲𑁆𑀲 𑀧𑀦 𑀤𑀼𑀩𑁆𑀩𑀮𑀲𑁆𑀲 𑀘 𑀘𑀻𑀯𑀭𑀁 𑀲𑀼𑀔𑀼𑀫𑀁 𑀲𑀧𑁆𑀧𑀸𑀬𑀁, 𑀲𑀻𑀢𑀸𑀮𑀼𑀓𑀲𑁆𑀲 𑀖𑀦𑀁 𑀤𑀼𑀧𑀝𑁆𑀝𑀁. 𑀯𑀺𑀧𑀭𑀻𑀢𑀁 𑀅𑀲𑀧𑁆𑀧𑀸𑀬𑀁. 𑀬𑀲𑁆𑀲 𑀓𑀲𑁆𑀲𑀘𑀺 𑀚𑀺𑀡𑁆𑀡𑀁 𑀅𑀲𑀧𑁆𑀧𑀸𑀬𑀫𑁂𑀯. 𑀅𑀕𑁆𑀕𑀴𑀸𑀤𑀺𑀤𑀸𑀦𑁂𑀦 𑀳𑀺𑀲𑁆𑀲 𑀢𑀁 𑀧𑀮𑀺𑀩𑁄𑀥𑀓𑀭𑀁 𑀳𑁄𑀢𑀺. 𑀢𑀣𑀸 𑀧𑀝𑁆𑀝𑀼𑀡𑁆𑀡𑀤𑀼𑀓𑀽𑀮𑀸𑀤𑀺𑀪𑁂𑀤𑀁 𑀮𑁄𑀪𑀦𑀻𑀬𑀘𑀻𑀯𑀭𑀁. 𑀢𑀸𑀤𑀺𑀲𑀜𑁆𑀳𑀺 𑀅𑀭𑀜𑁆𑀜𑁂 𑀏𑀓𑀓𑀲𑁆𑀲 𑀦𑀺𑀯𑀸𑀲𑀦𑁆𑀢𑀭𑀸𑀬𑀓𑀭𑀁, 𑀚𑀻𑀯𑀺𑀢𑀦𑁆𑀢𑀭𑀸𑀬𑀓𑀭𑀜𑁆𑀘𑀸𑀧𑀺 𑀳𑁄𑀢𑀺. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀦 𑀬𑀁 𑀦𑀺𑀫𑀺𑀢𑁆𑀢𑀓𑀫𑁆𑀫𑀸𑀤𑀺𑀫𑀺𑀘𑁆𑀙𑀸𑀚𑀻𑀯𑀯𑀲𑁂𑀦 𑀉𑀧𑁆𑀧𑀦𑁆𑀦𑀁, 𑀬𑀜𑁆𑀘𑀲𑁆𑀲 𑀲𑁂𑀯𑀫𑀸𑀦𑀲𑁆𑀲 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀢𑀁 𑀅𑀲𑀧𑁆𑀧𑀸𑀬𑀁. 𑀯𑀺𑀧𑀭𑀻𑀢𑀁 𑀲𑀧𑁆𑀧𑀸𑀬𑀁, 𑀢𑀲𑁆𑀲 𑀯𑀲𑁂𑀦𑁂𑀢𑁆𑀣 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁, 𑀓𑀫𑁆𑀫𑀝𑁆𑀞𑀸𑀦𑀸𑀯𑀺𑀚𑀳𑀦𑀯𑀲𑁂𑀦𑁂𑀯 𑀘 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀸 𑀦𑀸𑀫 𑀓𑁄𑀘𑀺 𑀘𑀻𑀯𑀭𑀁 𑀧𑀸𑀭𑀼𑀧𑀦𑁆𑀢𑁄 𑀦𑀢𑁆𑀣𑀺, 𑀯𑀼𑀢𑁆𑀢𑀧𑁆𑀧𑀓𑀸𑀭𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦𑁂𑀯 𑀧𑀦 𑀘𑀻𑀯𑀭𑀧𑀸𑀭𑀼𑀧𑀦𑀁 𑀳𑁄𑀢𑀺. 𑀢𑀢𑁆𑀣 𑀘𑀻𑀯𑀭𑀫𑁆𑀧𑀺 𑀅𑀘𑁂𑀢𑀦𑀁, 𑀓𑀸𑀬𑁄𑀧𑀺 𑀅𑀘𑁂𑀢𑀦𑁄. 𑀘𑀻𑀯𑀭𑀁 𑀦 𑀚𑀸𑀦𑀸𑀢𑀺 ‘‘𑀫𑀬𑀸 𑀓𑀸𑀬𑁄 𑀧𑀸𑀭𑀼𑀧𑀺𑀢𑁄’’𑀢𑀺. 𑀓𑀸𑀬𑁄𑀧𑀺 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀘𑀻𑀯𑀭𑁂𑀦 𑀧𑀸𑀭𑀼𑀧𑀺𑀢𑁄’’𑀢𑀺. 𑀥𑀸𑀢𑀼𑀬𑁄𑀯 𑀥𑀸𑀢𑀼𑀲𑀫𑀽𑀳𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀺 𑀧𑀝𑀧𑀺𑀮𑁄𑀢𑀺𑀓𑀸𑀬 𑀧𑁄𑀢𑁆𑀣𑀓𑀭𑀽𑀧𑀧𑀝𑀺𑀘𑁆𑀙𑀸𑀤𑀦𑁂 𑀯𑀺𑀬. 𑀢𑀲𑁆𑀫𑀸 𑀦𑁂𑀯 𑀲𑀼𑀦𑁆𑀤𑀭𑀁 𑀘𑀻𑀯𑀭𑀁 𑀮𑀪𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀁 𑀓𑀸𑀢𑀩𑁆𑀩𑀁, 𑀦 𑀅𑀲𑀼𑀦𑁆𑀤𑀭𑀁 𑀮𑀪𑀺𑀢𑁆𑀯𑀸 𑀤𑁄𑀫𑀦𑀲𑁆𑀲𑀁. 𑀦𑀸𑀕𑀯𑀫𑁆𑀫𑀺𑀓𑀘𑁂𑀢𑀺𑀬𑀭𑀼𑀓𑁆𑀔𑀸𑀤𑀻𑀲𑀼 𑀳𑀺 𑀓𑁂𑀘𑀺 𑀫𑀸𑀮𑀸𑀕𑀦𑁆𑀥𑀥𑀽𑀫𑀯𑀢𑁆𑀣𑀸𑀤𑀻𑀳𑀺 𑀲𑀓𑁆𑀓𑀸𑀭𑀁 𑀓𑀭𑁄𑀦𑁆𑀢𑀺, 𑀓𑁂𑀘𑀺 𑀕𑀽𑀣𑀫𑀼𑀢𑁆𑀢𑀓𑀤𑁆𑀤𑀫𑀤𑀡𑁆𑀟𑀲𑀢𑁆𑀣𑀧𑀳𑀸𑀭𑀸𑀤𑀻𑀳𑀺 𑀅𑀲𑀓𑁆𑀓𑀸𑀭𑀁. 𑀦 𑀢𑁂𑀳𑀺 𑀦𑀸𑀕𑀯𑀫𑁆𑀫𑀺𑀓𑀭𑀼𑀓𑁆𑀔𑀸𑀤𑀬𑁄 𑀲𑁄𑀫𑀦𑀲𑁆𑀲𑀁 𑀯𑀸 𑀓𑀭𑁄𑀦𑁆𑀢𑀺 𑀤𑁄𑀫𑀦𑀲𑁆𑀲𑀁 𑀯𑀸. 𑀏𑀯𑀫𑁂𑀯𑀁 𑀦𑁂𑀯 𑀲𑀼𑀦𑁆𑀤𑀭𑀁 𑀘𑀻𑀯𑀭𑀁 𑀮𑀪𑀺𑀢𑁆𑀯𑀸 𑀲𑁄𑀫𑀦𑀲𑁆𑀲𑀁 𑀓𑀸𑀢𑀩𑁆𑀩𑀁, 𑀦 𑀅𑀲𑀼𑀦𑁆𑀤𑀭𑀁 𑀮𑀪𑀺𑀢𑁆𑀯𑀸 𑀤𑁄𑀫𑀦𑀲𑁆𑀲𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀧𑀝𑀺𑀲𑀗𑁆𑀔𑀸𑀦𑀯𑀲𑁂𑀦𑁂𑀢𑁆𑀣 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁.

𑀧𑀢𑁆𑀢𑀥𑀸𑀭𑀡𑁂𑀧𑀺 𑀧𑀢𑁆𑀢𑀁 𑀲𑀳𑀲𑀸𑀯 𑀅𑀕𑁆𑀕𑀳𑁂𑀢𑁆𑀯𑀸 𑁋 ‘‘𑀇𑀫𑀁 𑀕𑀳𑁂𑀢𑁆𑀯𑀸 𑀧𑀺𑀡𑁆𑀟𑀸𑀬 𑀘𑀭𑀫𑀸𑀦𑁄 𑀪𑀺𑀓𑁆𑀔𑀁 𑀮𑀪𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀧𑀢𑁆𑀢𑀕𑁆𑀕𑀳𑀡𑀧𑀘𑁆𑀘𑀬𑀸 𑀧𑀝𑀺𑀮𑀪𑀺𑀢𑀩𑁆𑀩𑀅𑀢𑁆𑀣𑀯𑀲𑁂𑀦 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀺𑀲𑀤𑀼𑀩𑁆𑀩𑀮𑀲𑀭𑀻𑀭𑀲𑁆𑀲 𑀧𑀦 𑀕𑀭𑀼𑀧𑀢𑁆𑀢𑁄 𑀅𑀲𑀧𑁆𑀧𑀸𑀬𑁄. 𑀬𑀲𑁆𑀲 𑀓𑀲𑁆𑀲𑀘𑀺 𑀘𑀢𑀼𑀧𑀜𑁆𑀘𑀕𑀡𑁆𑀞𑀺𑀓𑀸𑀳𑀢𑁄 𑀤𑀼𑀩𑁆𑀩𑀺𑀲𑁄𑀥𑀦𑀻𑀬𑁄 𑀅𑀲𑀧𑁆𑀧𑀸𑀬𑁄𑀯. 𑀤𑀼𑀤𑁆𑀥𑁄𑀢𑀧𑀢𑁆𑀢𑁄 𑀳𑀺 𑀦 𑀯𑀝𑁆𑀝𑀢𑀺, 𑀢𑀁 𑀥𑁄𑀯𑀦𑁆𑀢𑀲𑁆𑀲𑁂𑀯 𑀘𑀲𑁆𑀲 𑀧𑀮𑀺𑀩𑁄𑀥𑁄 𑀳𑁄𑀢𑀺. 𑀫𑀡𑀺𑀯𑀡𑁆𑀡𑀧𑀢𑁆𑀢𑁄 𑀧𑀦 𑀮𑁄𑀪𑀦𑀻𑀬𑁄 𑀘𑀻𑀯𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀲𑀧𑁆𑀧𑀸𑀬𑁄. 𑀦𑀺𑀫𑀺𑀢𑁆𑀢𑀓𑀫𑁆𑀫𑀸𑀤𑀺𑀯𑀲𑁂𑀦 𑀮𑀤𑁆𑀥𑁄, 𑀧𑀦 𑀬𑀜𑁆𑀘𑀲𑁆𑀲 𑀲𑁂𑀯𑀫𑀸𑀦𑀲𑁆𑀲 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀅𑀬𑀁 𑀏𑀓𑀦𑁆𑀢𑀅𑀲𑀧𑁆𑀧𑀸𑀬𑁄𑀯. 𑀯𑀺𑀧𑀭𑀻𑀢𑁄 𑀲𑀧𑁆𑀧𑀸𑀬𑁄. 𑀢𑀲𑁆𑀲 𑀯𑀲𑁂𑀦𑁂𑀢𑁆𑀣 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁, 𑀓𑀫𑁆𑀫𑀝𑁆𑀞𑀸𑀦𑀸𑀯𑀺𑀚𑀳𑀦𑀯𑀲𑁂𑀦𑁂𑀯 𑀘 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀸 𑀦𑀸𑀫 𑀓𑁄𑀘𑀺 𑀧𑀢𑁆𑀢𑀁 𑀕𑀡𑁆𑀳𑀦𑁆𑀢𑁄 𑀦𑀢𑁆𑀣𑀺, 𑀯𑀼𑀢𑁆𑀢𑀧𑁆𑀧𑀓𑀸𑀭𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦𑁂𑀯 𑀧𑀢𑁆𑀢𑀕𑁆𑀕𑀳𑀡𑀁 𑀦𑀸𑀫 𑀳𑁄𑀢𑀺. 𑀢𑀢𑁆𑀣 𑀧𑀢𑁆𑀢𑁄𑀧𑀺 𑀅𑀘𑁂𑀢𑀦𑁄, 𑀳𑀢𑁆𑀣𑀸𑀧𑀺 𑀅𑀘𑁂𑀢𑀦𑀸. 𑀧𑀢𑁆𑀢𑁄 𑀦 𑀚𑀸𑀦𑀸𑀢𑀺 ‘‘𑀅𑀳𑀁 𑀳𑀢𑁆𑀣𑁂𑀳𑀺 𑀕𑀳𑀺𑀢𑁄’’𑀢𑀺. 𑀳𑀢𑁆𑀣𑀸𑀧𑀺 𑀦 𑀚𑀸𑀦𑀦𑁆𑀢𑀺 ‘‘𑀧𑀢𑁆𑀢𑁄 𑀅𑀫𑁆𑀳𑁂𑀳𑀺 𑀕𑀳𑀺𑀢𑁄’’𑀢𑀺. 𑀥𑀸𑀢𑀼𑀬𑁄𑀯 𑀥𑀸𑀢𑀼𑀲𑀫𑀽𑀳𑀁 𑀕𑀡𑁆𑀳𑀦𑁆𑀢𑀺, 𑀲𑀡𑁆𑀟𑀸𑀲𑁂𑀦 𑀅𑀕𑁆𑀕𑀺𑀯𑀡𑁆𑀡𑀧𑀢𑁆𑀢𑀕𑁆𑀕𑀳𑀡𑁂 𑀯𑀺𑀬𑀸𑀢𑀺 𑀏𑀯𑀁 𑀧𑀯𑀢𑁆𑀢𑀧𑀝𑀺𑀲𑀗𑁆𑀔𑀸𑀦𑀯𑀲𑁂𑀦𑁂𑀢𑁆𑀣 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀺𑀘 𑀬𑀣𑀸 𑀙𑀺𑀦𑁆𑀦𑀳𑀢𑁆𑀣𑀧𑀸𑀤𑁂 𑀯𑀡𑀫𑀼𑀔𑁂𑀳𑀺 𑀧𑀕𑁆𑀖𑀭𑀺𑀢𑀧𑀼𑀩𑁆𑀩𑀮𑁄𑀳𑀺𑀢𑀓𑀺𑀫𑀺𑀓𑀼𑀮𑁂 𑀦𑀻𑀮𑀫𑀓𑁆𑀔𑀺𑀓𑀲𑀫𑁆𑀧𑀭𑀺𑀓𑀺𑀡𑁆𑀡𑁂 𑀅𑀦𑀸𑀣𑀲𑀸𑀮𑀸𑀬 𑀅𑀦𑀸𑀣𑀫𑀦𑀼𑀲𑁆𑀲𑁂 𑀤𑀺𑀲𑁆𑀯𑀸 𑀤𑀬𑀸𑀮𑀼𑀓𑀸 𑀧𑀼𑀭𑀺𑀲𑀸 𑀢𑁂𑀲𑀁 𑀯𑀡𑀧𑀝𑁆𑀝𑀘𑁄𑀴𑀓𑀸𑀦𑀺 𑀘𑁂𑀯 𑀓𑀧𑀸𑀮𑀸𑀤𑀻𑀳𑀺 𑀪𑁂𑀲𑀚𑁆𑀚𑀸𑀦𑀺 𑀘 𑀉𑀧𑀦𑀸𑀫𑁂𑀦𑁆𑀢𑀺. 𑀢𑀢𑁆𑀣 𑀘𑁄𑀴𑀓𑀸𑀦𑀺𑀧𑀺 𑀓𑁂𑀲𑀜𑁆𑀘𑀺 𑀲𑀡𑁆𑀳𑀸𑀦𑀺, 𑀓𑁂𑀲𑀜𑁆𑀘𑀺 𑀣𑀽𑀮𑀸𑀦𑀺 𑀧𑀸𑀧𑀼𑀡𑀦𑁆𑀢𑀺, 𑀪𑁂𑀲𑀚𑁆𑀚𑀓𑀧𑀸𑀮𑀸𑀦𑀺𑀧𑀺 𑀓𑁂𑀲𑀜𑁆𑀘𑀺 𑀲𑀼𑀲𑀡𑁆𑀞𑀸𑀦𑀸𑀦𑀺, 𑀓𑁂𑀲𑀜𑁆𑀘𑀺 𑀤𑀼𑀲𑁆𑀲𑀡𑁆𑀞𑀸𑀦𑀸𑀦𑀺 𑀧𑀸𑀧𑀼𑀡𑀦𑁆𑀢𑀺, 𑀦 𑀢𑁂 𑀢𑀢𑁆𑀣 𑀲𑀼𑀫𑀦𑀸 𑀯𑀸 𑀤𑀼𑀫𑁆𑀫𑀦𑀸 𑀯𑀸 𑀳𑁄𑀦𑁆𑀢𑀺. 𑀯𑀡𑀧𑀝𑀺𑀘𑁆𑀙𑀸𑀤𑀦𑀫𑀢𑁆𑀢𑁂𑀦𑁂𑀯 𑀳𑀺 𑀘𑁄𑀴𑀓𑁂𑀦 𑀪𑁂𑀲𑀚𑁆𑀚𑀧𑀝𑀺𑀕𑁆𑀕𑀳𑀫𑀢𑁆𑀢𑁂𑀦𑁂𑀯 𑀘 𑀓𑀧𑀸𑀮𑀓𑁂𑀦 𑀢𑁂𑀲𑀁 𑀅𑀢𑁆𑀣𑁄. 𑀏𑀯𑀫𑁂𑀯 𑀬𑁄 𑀪𑀺𑀓𑁆𑀔𑀼 𑀯𑀡𑀘𑁄𑀴𑀓𑀁 𑀯𑀺𑀬 𑀘𑀻𑀯𑀭𑀁, 𑀪𑁂𑀲𑀚𑁆𑀚𑀓𑀧𑀸𑀮𑀓𑀁 𑀯𑀺𑀬 𑀘 𑀧𑀢𑁆𑀢𑀁, 𑀓𑀧𑀸𑀮𑁂 𑀪𑁂𑀲𑀚𑁆𑀚𑀫𑀺𑀯 𑀘 𑀧𑀢𑁆𑀢𑁂 𑀮𑀤𑁆𑀥𑀪𑀺𑀓𑁆𑀔𑀁 𑀲𑀮𑁆𑀮𑀓𑁆𑀔𑁂𑀢𑀺. 𑀅𑀬𑀁 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑁂𑀦 𑀉𑀢𑁆𑀢𑀫𑀲𑀫𑁆𑀧𑀚𑀸𑀦𑀓𑀸𑀭𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀲𑀺𑀢𑀸𑀤𑀻𑀲𑀼 𑀅𑀲𑀺𑀢𑁂𑀢𑀺 𑀧𑀺𑀡𑁆𑀟𑀧𑀸𑀢𑀪𑁄𑀚𑀦𑁂. 𑀧𑀻𑀢𑁂𑀢𑀺 𑀬𑀸𑀕𑀼𑀆𑀤𑀺𑀧𑀸𑀦𑁂. 𑀔𑀸𑀬𑀺𑀢𑁂𑀢𑀺 𑀧𑀺𑀝𑁆𑀞𑀔𑀚𑁆𑀚𑀓𑀸𑀤𑀺𑀔𑀸𑀤𑀦𑁂. 𑀲𑀸𑀬𑀺𑀢𑁂𑀢𑀺 𑀫𑀥𑀼𑀨𑀸𑀡𑀺𑀢𑀸𑀤𑀺𑀲𑀸𑀬𑀦𑁂. 𑀢𑀢𑁆𑀣 ‘‘𑀦𑁂𑀯 𑀤𑀯𑀸𑀬𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑁄 𑀅𑀝𑁆𑀞𑀯𑀺𑀥𑁄𑀧𑀺 𑀅𑀢𑁆𑀣𑁄 𑀅𑀢𑁆𑀣𑁄 𑀦𑀸𑀫, 𑀢𑀲𑁆𑀲 𑀯𑀲𑁂𑀦 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁.

𑀮𑀽𑀔𑀧𑀡𑀻𑀢𑀢𑀺𑀢𑁆𑀢𑀫𑀥𑀼𑀭𑀸𑀤𑀻𑀲𑀼 𑀧𑀦 𑀬𑁂𑀦 𑀪𑁄𑀚𑀦𑁂𑀦 𑀬𑀲𑁆𑀲 𑀅𑀨𑀸𑀲𑀼 𑀳𑁄𑀢𑀺, 𑀢𑀁 𑀢𑀲𑁆𑀲 𑀅𑀲𑀧𑁆𑀧𑀸𑀬𑀁. 𑀬𑀁 𑀧𑀦 𑀦𑀺𑀫𑀺𑀢𑁆𑀢𑀓𑀫𑁆𑀫𑀸𑀤𑀺𑀯𑀲𑁂𑀦 𑀧𑀝𑀺𑀮𑀤𑁆𑀥𑀁, 𑀬𑀜𑁆𑀘𑀲𑁆𑀲 𑀪𑀼𑀜𑁆𑀚𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀢𑀁 𑀏𑀓𑀦𑁆𑀢𑀅𑀲𑀧𑁆𑀧𑀸𑀬𑀫𑁂𑀯. 𑀯𑀺𑀧𑀭𑀻𑀢𑀁 𑀲𑀧𑁆𑀧𑀸𑀬𑀁. 𑀢𑀲𑁆𑀲 𑀯𑀲𑁂𑀦𑁂𑀢𑁆𑀣 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁, 𑀓𑀫𑁆𑀫𑀝𑁆𑀞𑀸𑀦𑀸𑀯𑀺𑀚𑀳𑀦𑀯𑀲𑁂𑀦𑁂𑀯 𑀘 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀸 𑀦𑀸𑀫 𑀓𑁄𑀘𑀺 𑀪𑀼𑀜𑁆𑀚𑀓𑁄 𑀦𑀢𑁆𑀣𑀺, 𑀯𑀼𑀢𑁆𑀢𑀧𑁆𑀧𑀓𑀸𑀭𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦𑁂𑀯 𑀧𑀢𑁆𑀢𑀧𑀝𑀺𑀕𑁆𑀕𑀳𑀡𑀁 𑀦𑀸𑀫 𑀳𑁄𑀢𑀺, 𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦𑁂𑀯 𑀳𑀢𑁆𑀣𑀲𑁆𑀲 𑀧𑀢𑁆𑀢𑁂 𑀑𑀢𑀸𑀭𑀡𑀁 𑀦𑀸𑀫 𑀳𑁄𑀢𑀺, 𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦𑁂𑀯 𑀆𑀮𑁄𑀧𑀓𑀭𑀡𑀁 𑀆𑀮𑁄𑀧𑀼𑀤𑁆𑀥𑀭𑀡𑀁 𑀫𑀼𑀔𑀯𑀺𑀯𑀭𑀡𑀜𑁆𑀘 𑀳𑁄𑀢𑀺. 𑀦 𑀓𑁄𑀘𑀺 𑀓𑀼𑀜𑁆𑀘𑀺𑀓𑀸𑀬 𑀦 𑀬𑀦𑁆𑀢𑀓𑁂𑀦 𑀳𑀦𑀼𑀓𑀝𑁆𑀞𑀻𑀦𑀺 𑀯𑀺𑀯𑀭𑀢𑀺, 𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦𑁂𑀯 𑀆𑀮𑁄𑀧𑀲𑁆𑀲 𑀫𑀼𑀔𑁂 𑀞𑀧𑀦𑀁 𑀉𑀧𑀭𑀺𑀤𑀦𑁆𑀢𑀸𑀦𑀁 𑀫𑀼𑀲𑀮𑀓𑀺𑀘𑁆𑀘𑀲𑀸𑀥𑀦𑀁 𑀳𑁂𑀝𑁆𑀞𑀸𑀤𑀦𑁆𑀢𑀸𑀦𑀁 𑀉𑀤𑀼𑀓𑁆𑀔𑀮𑀓𑀺𑀘𑁆𑀘𑀲𑀸𑀥𑀦𑀁 𑀚𑀺𑀯𑁆𑀳𑀸𑀬 𑀳𑀢𑁆𑀣𑀓𑀺𑀘𑁆𑀘𑀲𑀸𑀥𑀦𑀜𑁆𑀘 𑀳𑁄𑀢𑀺. 𑀇𑀢𑀺 𑀦𑀁 𑀢𑀢𑁆𑀣 𑀅𑀕𑁆𑀕𑀚𑀺𑀯𑁆𑀳𑀸𑀬 𑀢𑀦𑀼𑀓𑀔𑁂𑀴𑁄, 𑀫𑀽𑀮𑀚𑀺𑀯𑁆𑀳𑀸𑀬 𑀩𑀳𑀮𑀔𑁂𑀴𑁄 𑀫𑀓𑁆𑀔𑁂𑀢𑀺. 𑀢𑀁 𑀳𑁂𑀝𑁆𑀞𑀸𑀤𑀦𑁆𑀢𑀉𑀤𑀼𑀓𑁆𑀔𑀮𑁂 𑀚𑀺𑀯𑁆𑀳𑀸𑀳𑀢𑁆𑀣𑀧𑀭𑀺𑀯𑀢𑁆𑀢𑀺𑀢𑀁 𑀔𑁂𑀴𑀉𑀤𑀓𑀢𑁂𑀫𑀺𑀢𑀁 𑀉𑀧𑀭𑀺𑀤𑀦𑁆𑀢𑀫𑀼𑀲𑀮𑀲𑀜𑁆𑀘𑀼𑀡𑁆𑀡𑀺𑀢𑀁 𑀓𑁄𑀘𑀺 𑀓𑀝𑀘𑁆𑀙𑀼𑀦𑀸 𑀯𑀸 𑀤𑀩𑁆𑀩𑀺𑀬𑀸 𑀯𑀸 𑀅𑀦𑁆𑀢𑁄 𑀧𑀯𑁂𑀲𑁂𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀯𑀸𑀬𑁄𑀥𑀸𑀢𑀼𑀬𑀸𑀯 𑀧𑀯𑀺𑀲𑀢𑀺. 𑀧𑀯𑀺𑀝𑁆𑀞𑀁 𑀧𑀯𑀺𑀝𑁆𑀞𑀁 𑀓𑁄𑀘𑀺 𑀧𑀮𑀸𑀮𑀲𑀦𑁆𑀣𑀭𑀁 𑀓𑀢𑁆𑀯𑀸 𑀥𑀸𑀭𑁂𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀯𑀸𑀬𑁄𑀥𑀸𑀢𑀼𑀯𑀲𑁂𑀦𑁂𑀯 𑀢𑀺𑀝𑁆𑀞𑀢𑀺. 𑀞𑀺𑀢𑀁 𑀞𑀺𑀢𑀁 𑀓𑁄𑀘𑀺 𑀉𑀤𑁆𑀥𑀦𑀁 𑀓𑀢𑁆𑀯𑀸 𑀅𑀕𑁆𑀕𑀺𑀁 𑀚𑀸𑀮𑁂𑀢𑁆𑀯𑀸 𑀧𑀘𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺, 𑀢𑁂𑀚𑁄𑀥𑀸𑀢𑀼𑀬𑀸𑀯 𑀧𑀘𑁆𑀘𑀢𑀺. 𑀧𑀓𑁆𑀓𑀁 𑀧𑀓𑁆𑀓𑀁 𑀓𑁄𑀘𑀺 𑀤𑀡𑁆𑀟𑀓𑁂𑀦 𑀯𑀸 𑀬𑀝𑁆𑀞𑀺𑀬𑀸 𑀯𑀸 𑀩𑀳𑀺 𑀦𑀻𑀳𑀭𑀓𑁄 𑀦𑀸𑀫 𑀦𑀢𑁆𑀣𑀺, 𑀯𑀸𑀬𑁄𑀥𑀸𑀢𑀼𑀬𑁂𑀯 𑀦𑀻𑀳𑀭𑀢𑀺. 𑀇𑀢𑀺 𑀯𑀸𑀬𑁄𑀥𑀸𑀢𑀼 𑀅𑀢𑀺𑀳𑀭𑀢𑀺 𑀘 𑀯𑀻𑀢𑀺𑀳𑀭𑀢𑀺 𑀘 𑀥𑀸𑀭𑁂𑀢𑀺 𑀘 𑀧𑀭𑀺𑀯𑀢𑁆𑀢𑁂𑀢𑀺 𑀘 𑀲𑀜𑁆𑀘𑀼𑀡𑁆𑀡𑁂𑀢𑀺 𑀘 𑀯𑀺𑀲𑁄𑀲𑁂𑀢𑀺 𑀘 𑀦𑀻𑀳𑀭𑀢𑀺 𑀘; 𑀧𑀣𑀯𑀻𑀥𑀸𑀢𑀼 𑀥𑀸𑀭𑁂𑀢𑀺 𑀘 𑀧𑀭𑀺𑀯𑀢𑁆𑀢𑁂𑀢𑀺 𑀘 𑀲𑀜𑁆𑀘𑀼𑀡𑁆𑀡𑁂𑀢𑀺 𑀘 𑀯𑀺𑀲𑁄𑀲𑁂𑀢𑀺 𑀘; 𑀆𑀧𑁄𑀥𑀸𑀢𑀼 𑀲𑀺𑀦𑁂𑀳𑁂𑀢𑀺 𑀘 𑀅𑀮𑁆𑀮𑀢𑁆𑀢𑀜𑁆𑀘 𑀅𑀦𑀼𑀧𑀸𑀮𑁂𑀢𑀺; 𑀢𑁂𑀚𑁄𑀥𑀸𑀢𑀼 𑀅𑀦𑁆𑀢𑁄𑀧𑀯𑀺𑀝𑁆𑀞𑀁 𑀧𑀭𑀺𑀧𑀸𑀘𑁂𑀢𑀺; 𑀆𑀓𑀸𑀲𑀥𑀸𑀢𑀼 𑀅𑀜𑁆𑀚𑀲𑁄 𑀳𑁄𑀢𑀺; 𑀯𑀺𑀜𑁆𑀜𑀸𑀡𑀥𑀸𑀢𑀼 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀫𑀸𑀧𑀬𑁄𑀕𑀫𑀦𑁆𑀯𑀸𑀬 𑀆𑀪𑀼𑀚𑀢𑀻𑀢𑀺 𑀏𑀯𑀁 𑀧𑀯𑀢𑁆𑀢𑀧𑀝𑀺𑀲𑀗𑁆𑀔𑀸𑀦𑀯𑀲𑁂𑀦𑁂𑀢𑁆𑀣 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀧𑀺𑀘 𑀕𑀫𑀦𑀢𑁄, 𑀧𑀭𑀺𑀬𑁂𑀲𑀦𑀢𑁄, 𑀧𑀭𑀺𑀪𑁄𑀕𑀢𑁄, 𑀆𑀲𑀬𑀢𑁄, 𑀦𑀺𑀥𑀸𑀦𑀢𑁄, 𑀅𑀧𑀭𑀺𑀧𑀓𑁆𑀓𑀢𑁄, 𑀧𑀭𑀺𑀧𑀓𑁆𑀓𑀢𑁄, 𑀨𑀮𑀢𑁄, 𑀦𑀺𑀲𑁆𑀲𑀦𑁆𑀤𑀢𑁄, 𑀲𑀫𑁆𑀫𑀓𑁆𑀔𑀦𑀢𑁄𑀢𑀺 𑀏𑀯𑀁 𑀤𑀲𑀯𑀺𑀥𑀁 𑀧𑀝𑀺𑀓𑀽𑀮𑀪𑀸𑀯𑀁 𑀧𑀘𑁆𑀘𑀯𑁂𑀓𑁆𑀔𑀡𑀢𑁄𑀧𑁂𑀢𑁆𑀣 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀢𑁆𑀣𑀸𑀭𑀓𑀣𑀸 𑀧𑀦𑁂𑀢𑁆𑀣 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁯𑁪 𑀆𑀤𑀬𑁄) 𑀆𑀳𑀸𑀭𑀧𑀝𑀺𑀓𑀽𑀮𑀲𑀜𑁆𑀜𑀸𑀦𑀺𑀤𑁆𑀤𑁂𑀲𑀢𑁄 𑀕𑀳𑁂𑀢𑀩𑁆𑀩𑀸.

𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑁂𑀢𑀺 𑀉𑀘𑁆𑀘𑀸𑀭𑀲𑁆𑀲 𑀘 𑀧𑀲𑁆𑀲𑀸𑀯𑀲𑁆𑀲 𑀘 𑀓𑀭𑀡𑁂. 𑀢𑀢𑁆𑀣 𑀧𑀢𑁆𑀢𑀓𑀸𑀮𑁂 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀅𑀓𑀭𑁄𑀦𑁆𑀢𑀲𑁆𑀲 𑀲𑀓𑀮𑀲𑀭𑀻𑀭𑀢𑁄 𑀲𑁂𑀤𑀸 𑀫𑀼𑀘𑁆𑀘𑀦𑁆𑀢𑀺, 𑀅𑀓𑁆𑀔𑀻𑀦𑀺 𑀪𑀫𑀦𑁆𑀢𑀺, 𑀘𑀺𑀢𑁆𑀢𑀁 𑀦 𑀏𑀓𑀕𑁆𑀕𑀁 𑀳𑁄𑀢𑀺, 𑀅𑀜𑁆𑀜𑁂 𑀘 𑀭𑁄𑀕𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀓𑀭𑁄𑀦𑁆𑀢𑀲𑁆𑀲 𑀧𑀦 𑀲𑀩𑁆𑀩𑀁 𑀢𑀁 𑀦 𑀳𑁄𑀢𑀻𑀢𑀺 𑀅𑀬𑀫𑁂𑀢𑁆𑀣 𑀅𑀢𑁆𑀣𑁄. 𑀢𑀲𑁆𑀲 𑀯𑀲𑁂𑀦 𑀲𑀸𑀢𑁆𑀣𑀓𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀝𑁆𑀞𑀸𑀦𑁂 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀓𑀭𑁄𑀦𑁆𑀢𑀲𑁆𑀲 𑀧𑀦 𑀆𑀧𑀢𑁆𑀢𑀺 𑀳𑁄𑀢𑀺, 𑀅𑀬𑀲𑁄 𑀯𑀟𑁆𑀠𑀢𑀺, 𑀚𑀻𑀯𑀺𑀢𑀦𑁆𑀢𑀭𑀸𑀬𑁄𑀧𑀺 𑀳𑁄𑀢𑀺. 𑀧𑀢𑀺𑀭𑀽𑀧𑁂 𑀞𑀸𑀦𑁂 𑀓𑀭𑁄𑀦𑁆𑀢𑀲𑁆𑀲 𑀲𑀩𑁆𑀩𑀁 𑀢𑀁 𑀦 𑀳𑁄𑀢𑀻𑀢𑀺 𑀇𑀤𑀫𑁂𑀢𑁆𑀣 𑀲𑀧𑁆𑀧𑀸𑀬𑀁. 𑀢𑀲𑁆𑀲 𑀯𑀲𑁂𑀦 𑀲𑀧𑁆𑀧𑀸𑀬𑀲𑀫𑁆𑀧𑀚𑀜𑁆𑀜𑀁, 𑀓𑀫𑁆𑀫𑀝𑁆𑀞𑀸𑀦𑀸𑀯𑀺𑀚𑀳𑀦𑀯𑀲𑁂𑀦 𑀘 𑀕𑁄𑀘𑀭𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀸 𑀦𑀸𑀫 𑀓𑁄𑀘𑀺 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀦𑀢𑁆𑀣𑀺, 𑀘𑀺𑀢𑁆𑀢𑀓𑀺𑀭𑀺𑀬𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑁂𑀦𑁂𑀯 𑀧𑀦 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑀁 𑀳𑁄𑀢𑀺. 𑀬𑀣𑀸 𑀧𑀦 𑀧𑀓𑁆𑀓𑁂 𑀕𑀡𑁆𑀟𑁂 𑀕𑀡𑁆𑀟𑀪𑁂𑀤𑁂𑀦 𑀧𑀼𑀩𑁆𑀩𑀮𑁄𑀳𑀺𑀢𑀁 𑀅𑀓𑀸𑀫𑀢𑀸𑀬 𑀦𑀺𑀓𑁆𑀔𑀫𑀢𑀺, 𑀬𑀣𑀸 𑀘 𑀅𑀢𑀺𑀪𑀭𑀺𑀢𑀸 𑀉𑀤𑀓𑀪𑀸𑀚𑀦𑀸 𑀉𑀤𑀓𑀁 𑀅𑀓𑀸𑀫𑀢𑀸𑀬 𑀦𑀺𑀓𑁆𑀔𑀫𑀢𑀺, 𑀏𑀯𑀁 𑀧𑀓𑁆𑀓𑀸𑀲𑀬𑀫𑀼𑀢𑁆𑀢𑀯𑀢𑁆𑀣𑀻𑀲𑀼 𑀲𑀦𑁆𑀦𑀺𑀘𑀺𑀢𑀸 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸 𑀯𑀸𑀬𑀼𑀯𑁂𑀕𑀲𑀫𑀼𑀧𑁆𑀧𑀻𑀴𑀺𑀢𑀸 𑀅𑀓𑀸𑀫𑀢𑀸𑀬𑀧𑀺 𑀦𑀺𑀓𑁆𑀔𑀫𑀦𑁆𑀢𑀺. 𑀲𑁄 𑀧𑀦𑀸𑀬𑀁 𑀏𑀯𑀁 𑀦𑀺𑀓𑁆𑀔𑀫𑀦𑁆𑀢𑁄 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑁄 𑀦𑁂𑀯 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀢𑁆𑀢𑀦𑁄 𑀳𑁄𑀢𑀺 𑀦 𑀧𑀭𑀲𑁆𑀲, 𑀓𑁂𑀯𑀮𑀁 𑀲𑀭𑀻𑀭𑀦𑀺𑀲𑁆𑀲𑀦𑁆𑀤𑁄𑀯 𑀳𑁄𑀢𑀺. 𑀬𑀣𑀸 𑀓𑀺𑀁? 𑀬𑀣𑀸 𑀉𑀤𑀓𑀢𑀼𑀫𑁆𑀩𑀢𑁄 𑀧𑀼𑀭𑀸𑀡𑀉𑀤𑀓𑀁 𑀙𑀟𑁆𑀟𑁂𑀦𑁆𑀢𑀲𑁆𑀲 𑀦𑁂𑀯 𑀢𑀁 𑀅𑀢𑁆𑀢𑀦𑁄 𑀳𑁄𑀢𑀺 𑀦 𑀧𑀭𑁂𑀲𑀁, 𑀓𑁂𑀯𑀮𑀁 𑀧𑀝𑀺𑀚𑀕𑁆𑀕𑀦𑀫𑀢𑁆𑀢𑀫𑁂𑀯 𑀳𑁄𑀢𑀺. 𑀏𑀯𑀁 𑀧𑀯𑀢𑁆𑀢𑀧𑀝𑀺𑀲𑀗𑁆𑀔𑀸𑀦𑀯𑀲𑁂𑀦𑁂𑀢𑁆𑀣 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁.

𑀕𑀢𑀸𑀤𑀻𑀲𑀼 𑀕𑀢𑁂𑀢𑀺 𑀕𑀫𑀦𑁂. 𑀞𑀺𑀢𑁂𑀢𑀺 𑀞𑀸𑀦𑁂. 𑀦𑀺𑀲𑀺𑀦𑁆𑀦𑁂𑀢𑀺 𑀦𑀺𑀲𑀚𑁆𑀚𑀸𑀬. 𑀲𑀼𑀢𑁆𑀢𑁂𑀢𑀺 𑀲𑀬𑀦𑁂. 𑀚𑀸𑀕𑀭𑀺𑀢𑁂 𑀢𑀺 𑀚𑀸𑀕𑀭𑀡𑁂. 𑀪𑀸𑀲𑀺𑀢𑁂𑀢𑀺 𑀓𑀣𑀦𑁂. 𑀢𑀼𑀡𑁆𑀳𑀻𑀪𑀸𑀯𑁂𑀢𑀺 𑀅𑀓𑀣𑀦𑁂. 𑀏𑀢𑁆𑀣 𑀘 𑀬𑁄 𑀘𑀺𑀭𑀁 𑀕𑀦𑁆𑀢𑁆𑀯𑀸 𑀯𑀸 𑀘𑀗𑁆𑀓𑀫𑀺𑀢𑁆𑀯𑀸 𑀯𑀸 𑀅𑀧𑀭𑀪𑀸𑀕𑁂 𑀞𑀺𑀢𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 ‘‘𑀘𑀗𑁆𑀓𑀫𑀦𑀓𑀸𑀮𑁂 𑀧𑀯𑀢𑁆𑀢𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸’’𑀢𑀺, 𑀅𑀬𑀁 𑀕𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫.

𑀬𑁄 𑀲𑀚𑁆𑀛𑀸𑀬𑀁 𑀯𑀸 𑀓𑀭𑁄𑀦𑁆𑀢𑁄 𑀧𑀜𑁆𑀳𑀁 𑀯𑀸 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀯𑀸 𑀫𑀦𑀲𑀺𑀓𑀭𑁄𑀦𑁆𑀢𑁄 𑀘𑀺𑀭𑀁 𑀞𑀢𑁆𑀯𑀸 𑀅𑀧𑀭𑀪𑀸𑀕𑁂 𑀦𑀺𑀲𑀺𑀦𑁆𑀦𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 ‘‘𑀞𑀺𑀢𑀓𑀸𑀮𑁂 𑀧𑀯𑀢𑁆𑀢𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸’’𑀢𑀺, 𑀅𑀬𑀁 𑀞𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫.

𑀬𑁄 𑀲𑀚𑁆𑀛𑀸𑀬𑀸𑀤𑀺𑀓𑀭𑀡𑀯𑀲𑁂𑀦𑁂𑀯 𑀘𑀺𑀭𑀁 𑀦𑀺𑀲𑀻𑀤𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀦𑀺𑀧𑀦𑁆𑀦𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘‘𑀦𑀺𑀲𑀺𑀦𑁆𑀦𑀓𑀸𑀮𑁂 𑀧𑀯𑀢𑁆𑀢𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸’’𑀢𑀺, 𑀅𑀬𑀁 𑀦𑀺𑀲𑀺𑀦𑁆𑀦𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫.

𑀬𑁄 𑀧𑀦 𑀦𑀺𑀧𑀦𑁆𑀦𑀓𑁄𑀯 𑀲𑀚𑁆𑀛𑀸𑀬𑀁 𑀓𑀭𑁄𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀯𑀸 𑀫𑀦𑀲𑀺𑀓𑀭𑁄𑀦𑁆𑀢𑁄 𑀦𑀺𑀤𑁆𑀤𑀁 𑀑𑀓𑁆𑀓𑀫𑀺𑀢𑁆𑀯𑀸 𑀅𑀧𑀭𑀪𑀸𑀕𑁂 𑀉𑀝𑁆𑀞𑀸𑀬 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘‘𑀲𑀬𑀦𑀓𑀸𑀮𑁂 𑀧𑀯𑀢𑁆𑀢𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸’’𑀢𑀺, 𑀅𑀬𑀁 𑀲𑀼𑀢𑁆𑀢𑁂 𑀘 𑀚𑀸𑀕𑀭𑀺𑀢𑁂 𑀘 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫. 𑀓𑀺𑀭𑀺𑀬𑀫𑀬𑀘𑀺𑀢𑁆𑀢𑀸𑀦𑀜𑁆𑀳𑀺 𑀅𑀧𑁆𑀧𑀯𑀢𑁆𑀢𑀁 𑀲𑀼𑀢𑁆𑀢𑀁 𑀦𑀸𑀫, 𑀧𑀯𑀢𑁆𑀢𑀁 𑀚𑀸𑀕𑀭𑀺𑀢𑀁 𑀦𑀸𑀫𑀸𑀢𑀺.

𑀬𑁄 𑀧𑀦 𑀪𑀸𑀲𑀫𑀸𑀦𑁄 𑁋 ‘‘𑀅𑀬𑀁 𑀲𑀤𑁆𑀤𑁄 𑀦𑀸𑀫 𑀑𑀝𑁆𑀞𑁂 𑀘 𑀧𑀝𑀺𑀘𑁆𑀘 𑀤𑀦𑁆𑀢𑁂 𑀘 𑀚𑀺𑀯𑁆𑀳𑀜𑁆𑀘 𑀢𑀸𑀮𑀼𑀜𑁆𑀘 𑀧𑀝𑀺𑀘𑁆𑀘 𑀘𑀺𑀢𑁆𑀢𑀲𑁆𑀲 𑀘 𑀢𑀤𑀦𑀼𑀭𑀽𑀧𑀁 𑀧𑀬𑁄𑀕𑀁 𑀧𑀝𑀺𑀘𑁆𑀘 𑀚𑀸𑀬𑀢𑀻’’𑀢𑀺 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀪𑀸𑀲𑀢𑀺, 𑀘𑀺𑀭𑀁 𑀯𑀸 𑀧𑀦 𑀓𑀸𑀮𑀁 𑀲𑀚𑁆𑀛𑀸𑀬𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀯𑀸 𑀓𑀣𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀯𑀸 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀜𑁆𑀳𑀁 𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀧𑀭𑀪𑀸𑀕𑁂 𑀢𑀼𑀡𑁆𑀳𑀻𑀪𑀽𑀢𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 ‘‘𑀪𑀸𑀲𑀺𑀢𑀓𑀸𑀮𑁂 𑀉𑀧𑁆𑀧𑀦𑁆𑀦𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸’’𑀢𑀺 𑀅𑀬𑀁 𑀪𑀸𑀲𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫.

𑀬𑁄 𑀢𑀼𑀡𑁆𑀳𑀻𑀪𑀽𑀢𑁄 𑀘𑀺𑀭𑀁 𑀥𑀫𑁆𑀫𑀁 𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀯𑀸 𑀫𑀦𑀲𑀺𑀓𑀢𑁆𑀯𑀸 𑀅𑀧𑀭𑀪𑀸𑀕𑁂 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘‘𑀢𑀼𑀡𑁆𑀳𑀻𑀪𑀽𑀢𑀓𑀸𑀮𑁂 𑀧𑀯𑀢𑁆𑀢𑀸 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀏𑀢𑁆𑀣𑁂𑀯 𑀦𑀺𑀭𑀼𑀤𑁆𑀥𑀸’’𑀢𑀺. 𑀉𑀧𑀸𑀤𑀸𑀭𑀽𑀧𑀧𑀯𑀢𑁆𑀢𑀺𑀬𑀸 𑀲𑀢𑀺 𑀪𑀸𑀲𑀢𑀺 𑀦𑀸𑀫, 𑀅𑀲𑀢𑀺 𑀢𑀼𑀡𑁆𑀳𑀻 𑀪𑀯𑀢𑀺 𑀦𑀸𑀫𑀸𑀢𑀺, 𑀅𑀬𑀁 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀦𑀸𑀫𑀸𑀢𑀺. 𑀏𑀯𑀫𑁂𑀢𑁆𑀣 𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀁 𑀢𑀲𑁆𑀲 𑀯𑀲𑁂𑀦 𑀲𑀫𑁆𑀧𑀚𑀸𑀦𑀓𑀸𑀭𑀺𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀢𑀺𑀧𑀝𑁆𑀞𑀸𑀦𑀫𑀺𑀲𑁆𑀲𑀓𑀲𑀫𑁆𑀧𑀚𑀜𑁆𑀜𑀁 𑀧𑀼𑀩𑁆𑀩𑀪𑀸𑀕𑀁 𑀓𑀣𑀺𑀢𑀁.

𑁩. 𑀪𑀺𑀓𑁆𑀔𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁬𑁯. 𑀢𑀢𑀺𑀬𑁂 𑀏𑀯𑀫𑁂𑀯 𑀧𑀦𑀺𑀥𑁂𑀓𑀘𑁆𑀘𑁂𑀢𑀺 𑀲𑁄 𑀓𑀺𑀭 𑀪𑀺𑀓𑁆𑀔𑀼 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑀸𑀧𑁂𑀢𑁆𑀯𑀸 𑀇𑀢𑁄 𑀘𑀺𑀢𑁄 𑀘 𑀆𑀳𑀺𑀡𑁆𑀟𑀢𑀺, 𑀓𑀸𑀬𑀯𑀺𑀯𑁂𑀓𑀁 𑀦𑀸𑀦𑀼𑀬𑀼𑀜𑁆𑀚𑀢𑀺. 𑀢𑁂𑀦 𑀦𑀁 𑀪𑀕𑀯𑀸 𑀦𑀺𑀕𑁆𑀕𑀡𑁆𑀳𑀦𑁆𑀢𑁄 𑀏𑀯𑀫𑀸𑀳. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀁𑀔𑀺𑀢𑁆𑀢𑁂𑀦 𑀤𑁂𑀲𑀦𑀁 𑀬𑀸𑀘𑀲𑀺, 𑀢𑀲𑁆𑀫𑀸. 𑀤𑀺𑀝𑁆𑀞𑀻𑀢𑀺 𑀓𑀫𑁆𑀫𑀲𑁆𑀲𑀓𑀢𑀸𑀤𑀺𑀝𑁆𑀞𑀺.

𑁪. 𑀲𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭𑁦. 𑀘𑀢𑀼𑀢𑁆𑀣𑁂 𑀥𑀫𑁆𑀫𑀯𑀺𑀦𑀬𑁄𑀢𑀺 𑀥𑀫𑁆𑀫𑁄𑀢𑀺 𑀯𑀸 𑀯𑀺𑀦𑀬𑁄𑀢𑀺 𑀯𑀸 𑀉𑀪𑀬𑀫𑁂𑀢𑀁 𑀲𑀢𑁆𑀣𑀼𑀲𑀸𑀲𑀦𑀲𑁆𑀲𑁂𑀯 𑀦𑀸𑀫𑀁. 𑀲𑀫𑀸𑀤𑀧𑁂𑀢𑀩𑁆𑀩𑀸𑀢𑀺 𑀕𑀡𑁆𑀳𑀸𑀧𑁂𑀢𑀩𑁆𑀩𑀸. 𑀏𑀓𑁄𑀤𑀺𑀪𑀽𑀢𑀸𑀢𑀺 𑀔𑀡𑀺𑀓𑀲𑀫𑀸𑀥𑀺𑀦𑀸 𑀏𑀓𑀕𑁆𑀕𑀪𑀽𑀢𑀸. 𑀲𑀫𑀸𑀳𑀺𑀢𑀸 𑀏𑀓𑀕𑁆𑀕𑀘𑀺𑀢𑁆𑀢𑀸𑀢𑀺 𑀉𑀧𑀘𑀸𑀭𑀧𑁆𑀧𑀦𑀸𑀯𑀲𑁂𑀦 𑀲𑀫𑁆𑀫𑀸 𑀞𑀧𑀺𑀢𑀘𑀺𑀢𑁆𑀢𑀸 𑀘 𑀏𑀓𑀕𑁆𑀕𑀘𑀺𑀢𑁆𑀢𑀸 𑀘. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀦𑀯𑀓𑀪𑀺𑀓𑁆𑀔𑀽𑀳𑀺 𑀘𑁂𑀯 𑀔𑀻𑀡𑀸𑀲𑀯𑁂𑀳𑀺 𑀘 𑀪𑀸𑀯𑀺𑀢𑀲𑀢𑀺𑀧𑀝𑁆𑀞𑀸𑀦𑀸 𑀧𑀼𑀩𑁆𑀩𑀪𑀸𑀕𑀸, 𑀲𑀢𑁆𑀢𑀳𑀺 𑀲𑁂𑀔𑁂𑀳𑀺 𑀪𑀸𑀯𑀺𑀢𑀸 𑀫𑀺𑀲𑁆𑀲𑀓𑀸.

𑁬. 𑀲𑀓𑀼𑀡𑀕𑁆𑀖𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭𑁨. 𑀙𑀝𑁆𑀞𑁂 𑀲𑀓𑀼𑀡𑀕𑁆𑀖𑀻𑀢𑀺 𑀲𑀓𑀼𑀡𑀁 𑀳𑀦𑀢𑀻𑀢𑀺 𑀲𑀓𑀼𑀡𑀕𑁆𑀖𑀺, 𑀲𑁂𑀦𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀲𑀳𑀲𑀸 𑀅𑀚𑁆𑀛𑀧𑀢𑁆𑀢𑀸𑀢𑀺 𑀮𑁄𑀪𑀲𑀸𑀳𑀲𑁂𑀦 𑀧𑀢𑁆𑀢𑀸. 𑀅𑀮𑀓𑁆𑀔𑀺𑀓𑀸𑀢𑀺 𑀦𑀺𑀲𑁆𑀲𑀺𑀭𑀺𑀓𑀸. 𑀅𑀧𑁆𑀧𑀧𑀼𑀜𑁆𑀜𑀸𑀢𑀺 𑀧𑀭𑀺𑀢𑁆𑀢𑀧𑀼𑀜𑁆𑀜𑀸. 𑀲𑀘𑁂𑀚𑁆𑀚 𑀫𑀬𑀦𑁆𑀢𑀺 𑀲𑀘𑁂 𑀅𑀚𑁆𑀚 𑀫𑀬𑀁. 𑀦𑀗𑁆𑀕𑀮𑀓𑀝𑁆𑀞𑀓𑀭𑀡𑀦𑁆𑀢𑀺 𑀦𑀗𑁆𑀕𑀮𑁂𑀦 𑀓𑀲𑀺𑀓𑀭𑀡𑀁, 𑀅𑀥𑀼𑀦𑀸 𑀓𑀝𑁆𑀞𑀁 𑀔𑁂𑀢𑁆𑀢𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀮𑁂𑀟𑁆𑀟𑀼𑀝𑁆𑀞𑀸𑀦𑀦𑁆𑀢𑀺 𑀮𑁂𑀟𑁆𑀟𑀽𑀦𑀁 𑀞𑀸𑀦𑀁. 𑀲𑀁𑀯𑀤𑀫𑀸𑀦𑀸𑀢𑀺 𑀲𑀫𑁆𑀫𑀸 𑀯𑀤𑀫𑀸𑀦𑀸, 𑀅𑀢𑁆𑀢𑀦𑁄 𑀩𑀮𑀲𑁆𑀲 𑀲𑀼𑀝𑁆𑀞𑀼 𑀯𑀡𑁆𑀡𑀁 𑀯𑀤𑀫𑀸𑀦𑀸𑀢𑀺 𑀅𑀢𑁆𑀣𑁄. 𑀫𑀳𑀦𑁆𑀢𑀁 𑀮𑁂𑀟𑁆𑀟𑀼𑀁 𑀅𑀪𑀺𑀭𑀼𑀳𑀺𑀢𑁆𑀯𑀸𑀢𑀺 𑀉𑀤𑁆𑀥𑀦𑀲𑀡𑁆𑀞𑀸𑀦𑁂𑀦 𑀞𑀺𑀢𑁂𑀲𑀼 𑀢𑀻𑀲𑀼 𑀮𑁂𑀟𑁆𑀟𑀽𑀲𑀼 ‘‘𑀇𑀢𑁄 𑀲𑁂𑀦𑁂 𑀆𑀕𑀘𑁆𑀙𑀦𑁆𑀢𑁂 𑀇𑀢𑁄 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀺, 𑀇𑀢𑁄 𑀆𑀕𑀘𑁆𑀙𑀦𑁆𑀢𑁂 𑀇𑀢𑁄’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀢𑁂𑀲𑀼 𑀏𑀓𑀁 𑀮𑁂𑀟𑁆𑀟𑀼𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀅𑀝𑁆𑀞𑀸𑀲𑀺 𑀅𑀯𑀤𑀫𑀸𑀦𑁄. 𑀲𑀦𑁆𑀦𑀬𑁆𑀳𑀸𑀢𑀺 𑀔𑀼𑀭𑀧𑁆𑀧𑀁 𑀲𑀦𑁆𑀦𑀬𑁆𑀳𑀫𑀸𑀦𑁄 𑀯𑀺𑀬 𑀲𑀦𑁆𑀦𑀬𑁆𑀳𑀺𑀢𑁆𑀯𑀸 𑀲𑀼𑀝𑁆𑀞𑀼 𑀞𑀧𑁂𑀢𑁆𑀯𑀸. 𑀩𑀳𑀼𑀆𑀕𑀢𑁄 𑀔𑁄 𑀫𑁆𑀬𑀸𑀬𑀦𑁆𑀢𑀺 ‘‘𑀫𑀬𑁆𑀳𑀁 𑀅𑀢𑁆𑀣𑀸𑀬 𑀅𑀬𑀁 𑀩𑀳𑀼𑀢𑀁 𑀞𑀸𑀦𑀁 𑀆𑀕𑀢𑁄, 𑀅𑀧𑁆𑀧𑀁 𑀅𑀯𑀲𑀺𑀝𑁆𑀞𑀁, 𑀇𑀤𑀸𑀦𑀺 𑀫𑀁 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀤𑀸𑀭𑀼𑀕𑀼𑀴𑁄 𑀯𑀺𑀬 𑀯𑀺𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀲𑁆𑀲𑁂𑀯 𑀮𑁂𑀟𑁆𑀟𑀼𑀲𑁆𑀲 𑀅𑀦𑁆𑀢𑀭𑁂 𑀧𑀘𑁆𑀘𑀼𑀧𑀸𑀤𑀺, 𑀧𑀝𑀺𑀧𑀦𑁆𑀦𑁄 𑀧𑀯𑀺𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀉𑀭𑀁 𑀧𑀘𑁆𑀘𑀢𑀸𑀴𑁂𑀲𑀻𑀢𑀺 ‘‘𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀮𑀸𑀧𑀲𑁆𑀲 𑀲𑀻𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀧𑀓𑁆𑀔𑀦𑁆𑀤𑀢𑁆𑀢𑀸 𑀯𑁂𑀕𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀢𑀲𑁆𑀫𑀺𑀁 𑀮𑁂𑀟𑁆𑀟𑀼𑀲𑁆𑀫𑀺𑀁 𑀉𑀭𑀁 𑀧𑀢𑀸𑀴𑁂𑀲𑀺. 𑀢𑀸𑀯𑀤𑁂𑀯𑀲𑁆𑀲 𑀳𑀤𑀬𑀫𑀁𑀲𑀁 𑀨𑀸𑀮𑀺𑀬𑀺𑀢𑁆𑀣. 𑀅𑀣 𑀮𑀸𑀧𑁄 ‘‘𑀤𑀺𑀝𑁆𑀞𑀸 𑀯𑀢 𑀲𑀢𑁆𑀢𑀼𑀦𑁄 𑀧𑀺𑀝𑁆𑀞𑀻’’𑀢𑀺 𑀳𑀝𑁆𑀞𑀢𑀼𑀝𑁆𑀞𑁄 𑀢𑀲𑁆𑀲 𑀳𑀤𑀬𑁂 𑀅𑀧𑀭𑀸𑀧𑀭𑀁 𑀘𑀗𑁆𑀓𑀫𑀺.

𑁭. 𑀫𑀓𑁆𑀓𑀝𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭𑁩. 𑀲𑀢𑁆𑀢𑀫𑁂 𑀤𑀼𑀕𑁆𑀕𑀸𑀢𑀺 𑀤𑀼𑀕𑁆𑀕𑀫𑀸. 𑀘𑀸𑀭𑀻𑀢𑀺 𑀲𑀜𑁆𑀘𑀸𑀭𑁄. 𑀮𑁂𑀧𑀁 𑀑𑀟𑁆𑀟𑁂𑀦𑁆𑀢𑀻𑀢𑀺 𑀯𑀝𑀭𑀼𑀓𑁆𑀔𑀔𑀻𑀭𑀸𑀤𑀻𑀳𑀺 𑀬𑁄𑀚𑁂𑀢𑁆𑀯𑀸 𑀮𑁂𑀧𑀁 𑀓𑀭𑁄𑀦𑁆𑀢𑀺, 𑀢𑀁 𑀫𑀓𑁆𑀓𑀝𑀸𑀦𑀁 𑀥𑀼𑀯𑀕𑀫𑀦𑀝𑁆𑀞𑀸𑀦𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀭𑀼𑀓𑁆𑀔𑀲𑀸𑀔𑀸𑀤𑀻𑀲𑀼 𑀞𑀧𑁂𑀦𑁆𑀢𑀺. 𑀧𑀜𑁆𑀘𑁄𑀟𑁆𑀟𑀺𑀢𑁄𑀢𑀺 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀓𑀸𑀚𑀤𑀡𑁆𑀟𑀓𑀁 𑀧𑀯𑁂𑀲𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀸 𑀓𑀸𑀚𑀲𑀺𑀓𑁆𑀓𑀸 𑀯𑀺𑀬 𑀑𑀟𑁆𑀟𑀺𑀢𑁄. 𑀣𑀼𑀦𑀁 𑀲𑁂𑀢𑀻𑀢𑀺 𑀣𑀼𑀦𑀦𑁆𑀢𑁄 𑀲𑀬𑀢𑀺.

𑁮. 𑀲𑀽𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭𑁪. 𑀅𑀝𑁆𑀞𑀫𑁂 𑀲𑀽𑀤𑁄𑀢𑀺 𑀪𑀢𑁆𑀢𑀓𑀸𑀭𑀓𑁄. 𑀦𑀸𑀦𑀘𑁆𑀘𑀬𑁂𑀳𑀻𑀢𑀺 𑀦𑀸𑀦𑀸𑀘𑀬𑁂𑀳𑀺, 𑀦𑀸𑀦𑀸𑀯𑀺𑀥𑁂𑀳𑀻𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀅𑀫𑁆𑀩𑀺𑀮𑀕𑁆𑀕𑁂𑀳𑀻𑀢𑀺 𑀅𑀫𑁆𑀩𑀺𑀮𑀓𑁄𑀝𑁆𑀞𑀸𑀲𑁂𑀳𑀺. 𑀏𑀲𑁂𑀯 𑀦𑀬𑁄 𑀲𑀩𑁆𑀩𑀢𑁆𑀣. 𑀅𑀪𑀺𑀳𑀭𑀢𑀻𑀢𑀺 𑀕𑀳𑀡𑀢𑁆𑀣𑀸𑀬 𑀳𑀢𑁆𑀣𑀁 𑀧𑀲𑀸𑀭𑁂𑀢𑀺. 𑀩𑀳𑀼𑀁 𑀕𑀡𑁆𑀳𑀸𑀢𑀻𑀢𑀺 𑀏𑀓𑀕𑁆𑀕𑀳𑀡𑁂𑀦 𑀩𑀳𑀼𑀁 𑀕𑀡𑁆𑀳𑀦𑁆𑀢𑁄𑀧𑀺 𑀧𑀼𑀦𑀧𑁆𑀧𑀼𑀦𑀁 𑀕𑀡𑁆𑀳𑀦𑁆𑀢𑁄𑀧𑀺 𑀩𑀳𑀼𑀁 𑀕𑀡𑁆𑀳𑀢𑁂𑀯. 𑀅𑀪𑀺𑀳𑀸𑀭𑀸𑀦𑀦𑁆𑀢𑀺 𑀲𑀢𑀁 𑀯𑀸 𑀲𑀳𑀲𑁆𑀲𑀁 𑀯𑀸 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀪𑀺𑀳𑀝𑀸𑀦𑀁 𑀤𑀸𑀬𑀸𑀦𑀁. 𑀉𑀧𑀓𑁆𑀓𑀺𑀮𑁂𑀲𑀸𑀢𑀺 𑀧𑀜𑁆𑀘 𑀦𑀻𑀯𑀭𑀡𑀸. 𑀦𑀺𑀫𑀺𑀢𑁆𑀢𑀁 𑀦 𑀉𑀕𑁆𑀕𑀡𑁆𑀳𑀸𑀢𑀻𑀢𑀺 ‘‘𑀇𑀫𑀁 𑀫𑁂 𑀓𑀫𑁆𑀫𑀝𑁆𑀞𑀸𑀦𑀁 𑀅𑀦𑀼𑀮𑁄𑀫𑀁 𑀯𑀸 𑀕𑁄𑀢𑁆𑀭𑀪𑀼𑀁 𑀯𑀸 𑀆𑀳𑀘𑁆𑀘 𑀞𑀺𑀢’’𑀦𑁆𑀢𑀺 𑀦 𑀚𑀸𑀦𑀸𑀢𑀺, 𑀅𑀢𑁆𑀢𑀦𑁄 𑀘𑀺𑀢𑁆𑀢𑀲𑁆𑀲 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸 𑀲𑀢𑀺𑀧𑀝𑁆𑀞𑀸𑀦𑀸𑀯 𑀓𑀣𑀺𑀢𑀸.

𑁯. 𑀕𑀺𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭𑁫. 𑀦𑀯𑀫𑁂 𑀩𑁂𑀴𑀼𑀯𑀕𑀸𑀫𑀓𑁂𑀢𑀺 𑀯𑁂𑀲𑀸𑀮𑀺𑀬𑀸 𑀲𑀫𑀻𑀧𑁂 𑀏𑀯𑀁𑀦𑀸𑀫𑀓𑁄 𑀧𑀸𑀤𑀕𑀸𑀫𑁄 𑀅𑀢𑁆𑀣𑀺, 𑀢𑀲𑁆𑀫𑀺𑀁. 𑀬𑀣𑀸𑀫𑀺𑀢𑁆𑀢𑀦𑁆𑀢𑀺𑀆𑀤𑀻𑀲𑀼 𑀫𑀺𑀢𑁆𑀢𑀸𑀢𑀺 𑀫𑀺𑀢𑁆𑀢𑀸𑀯. 𑀲𑀦𑁆𑀤𑀺𑀝𑁆𑀞𑀸𑀢𑀺 𑀢𑀢𑁆𑀣 𑀢𑀢𑁆𑀣 𑀲𑀗𑁆𑀕𑀫𑁆𑀫 𑀤𑀺𑀝𑁆𑀞𑀫𑀢𑁆𑀢𑀸 𑀦𑀸𑀢𑀺𑀤𑀴𑁆𑀳𑀫𑀺𑀢𑁆𑀢𑀸. 𑀲𑀫𑁆𑀪𑀢𑁆𑀢𑀸𑀢𑀺 𑀲𑀼𑀝𑁆𑀞𑀼 𑀪𑀢𑁆𑀢𑀸 𑀲𑀺𑀦𑁂𑀳𑀯𑀦𑁆𑀢𑁄 𑀤𑀴𑁆𑀳𑀫𑀺𑀢𑁆𑀢𑀸. 𑀬𑁂𑀲𑀁 𑀬𑀢𑁆𑀣 𑀬𑀢𑁆𑀣 𑀏𑀯𑀭𑀽𑀧𑀸 𑀪𑀺𑀓𑁆𑀔𑀽 𑀅𑀢𑁆𑀣𑀺, 𑀢𑁂 𑀢𑀢𑁆𑀣 𑀢𑀢𑁆𑀣 𑀯𑀲𑁆𑀲𑀁 𑀉𑀧𑁂𑀣𑀸𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸 𑀏𑀯𑀫𑀸𑀳? 𑀢𑁂𑀲𑀁 𑀨𑀸𑀲𑀼𑀯𑀺𑀳𑀸𑀭𑀢𑁆𑀣𑀸𑀬. 𑀢𑁂𑀲𑀁 𑀓𑀺𑀭 𑀩𑁂𑀴𑀼𑀯𑀕𑀸𑀫𑀓𑁂 𑀲𑁂𑀦𑀸𑀲𑀦𑀁 𑀦𑀧𑁆𑀧𑀳𑁄𑀢𑀺, 𑀪𑀺𑀓𑁆𑀔𑀸𑀧𑀺 𑀫𑀦𑁆𑀤𑀸. 𑀲𑀫𑀦𑁆𑀢𑀸 𑀯𑁂𑀲𑀸𑀮𑀺𑀬𑀸 𑀧𑀦 𑀩𑀳𑀽𑀦𑀺 𑀲𑁂𑀦𑀸𑀲𑀦𑀸𑀦𑀺, 𑀪𑀺𑀓𑁆𑀔𑀸𑀧𑀺 𑀲𑀼𑀮𑀪𑀸. 𑀢𑀲𑁆𑀫𑀸 𑀏𑀯𑀫𑀸𑀳.

𑀅𑀣 𑀓𑀲𑁆𑀫𑀸 ‘‘𑀬𑀣𑀸𑀲𑀼𑀔𑀁 𑀕𑀘𑁆𑀙𑀣𑀸’’𑀢𑀺 𑀦 𑀯𑀺𑀲𑁆𑀲𑀚𑁆𑀚𑁂𑀲𑀺? 𑀢𑁂𑀲𑀁 𑀅𑀦𑀼𑀓𑀫𑁆𑀧𑀸𑀬. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 𑁋 ‘‘𑀅𑀳𑀁 𑀤𑀲𑀫𑀸𑀲𑀫𑀢𑁆𑀢𑀁 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀺. 𑀲𑀘𑁂 𑀇𑀫𑁂 𑀤𑀽𑀭𑀁 𑀕𑀘𑁆𑀙𑀺𑀲𑁆𑀲𑀦𑁆𑀢𑀺, 𑀫𑀁 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁂 𑀤𑀝𑁆𑀞𑀼𑀁 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺. 𑀅𑀣 𑀦𑁂𑀲𑀁 ‘𑀲𑀢𑁆𑀣𑀸 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑁄 𑀅𑀫𑁆𑀳𑀸𑀓𑀁 𑀲𑀢𑀺𑀫𑀢𑁆𑀢𑀫𑁆𑀧𑀺 𑀦 𑀅𑀤𑀸𑀲𑀺. 𑀲𑀘𑁂 𑀚𑀸𑀦𑁂𑀬𑁆𑀬𑀸𑀫, 𑀦 𑀏𑀯𑀁 𑀤𑀽𑀭𑁂 𑀯𑀲𑁂𑀬𑁆𑀬𑀸𑀫𑀸’𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑁄 𑀪𑀯𑁂𑀬𑁆𑀬. 𑀯𑁂𑀲𑀸𑀮𑀺𑀬𑀸 𑀲𑀫𑀦𑁆𑀢𑀸 𑀧𑀦 𑀯𑀲𑁆𑀲𑀁 𑀯𑀲𑀦𑁆𑀢𑀸 𑀫𑀸𑀲𑀲𑁆𑀲 𑀅𑀝𑁆𑀞 𑀯𑀸𑀭𑁂 𑀆𑀕𑀦𑁆𑀢𑁆𑀯𑀸 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀦𑁆𑀢𑀺, 𑀲𑀼𑀕𑀢𑁄𑀯𑀸𑀤𑀁 𑀮𑀪𑀺𑀲𑁆𑀲𑀦𑁆𑀢𑀻’’𑀢𑀺 𑀦 𑀯𑀺𑀲𑁆𑀲𑀚𑁆𑀚𑁂𑀲𑀺.

𑀔𑀭𑁄𑀢𑀺 𑀨𑀭𑀼𑀲𑁄. 𑀆𑀩𑀸𑀥𑁄𑀢𑀺 𑀯𑀺𑀲𑀪𑀸𑀕𑀭𑁄𑀕𑁄. 𑀩𑀸𑀴𑁆𑀳𑀸𑀢𑀺 𑀩𑀮𑀯𑀢𑀺𑀬𑁄. 𑀫𑀸𑀭𑀡𑀦𑁆𑀢𑀺𑀓𑀸𑀢𑀺 𑀫𑀭𑀡𑀦𑁆𑀢𑀁 𑀫𑀭𑀡𑀲𑀦𑁆𑀢𑀺𑀓𑀁 𑀧𑀸𑀧𑀦𑀲𑀫𑀢𑁆𑀣𑀸. 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀅𑀥𑀺𑀯𑀸𑀲𑁂𑀲𑀻𑀢𑀺 𑀲𑀢𑀺𑀁 𑀲𑀽𑀧𑀝𑁆𑀞𑀺𑀢𑀁 𑀓𑀢𑁆𑀯𑀸 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀥𑀺𑀯𑀸𑀲𑁂𑀲𑀺. 𑀅𑀯𑀺𑀳𑀜𑁆𑀜𑀫𑀸𑀦𑁄𑀢𑀺 𑀯𑁂𑀤𑀦𑀸𑀦𑀼𑀯𑀢𑁆𑀢𑀦𑀯𑀲𑁂𑀦 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑀦𑀁 𑀅𑀓𑀭𑁄𑀦𑁆𑀢𑁄 𑀅𑀧𑀻𑀴𑀺𑀬𑀫𑀸𑀦𑁄 𑀅𑀤𑀼𑀓𑁆𑀔𑀺𑀬𑀫𑀸𑀦𑁄 𑀘 𑀅𑀥𑀺𑀯𑀸𑀲𑁂𑀲𑀺. 𑀅𑀦𑀸𑀫𑀦𑁆𑀢𑁂𑀢𑁆𑀯𑀸𑀢𑀺 𑀅𑀚𑀸𑀦𑀸𑀧𑁂𑀢𑁆𑀯𑀸. 𑀅𑀦𑀧𑀮𑁄𑀓𑁂𑀢𑁆𑀯𑀸𑀢𑀺 𑀅𑀚𑀸𑀦𑀸𑀧𑁂𑀢𑁆𑀯𑀸𑀯 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀁 𑀅𑀤𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀻𑀭𑀺𑀬𑁂𑀦𑀸𑀢𑀺 𑀧𑀼𑀩𑁆𑀩𑀪𑀸𑀕𑀯𑀻𑀭𑀺𑀬𑁂𑀦 𑀘𑁂𑀯 𑀨𑀮𑀲𑀫𑀸𑀧𑀢𑁆𑀢𑀺𑀯𑀻𑀭𑀺𑀬𑁂𑀦 𑀘. 𑀧𑀝𑀺𑀧𑀡𑀸𑀫𑁂𑀢𑁆𑀯𑀸𑀢𑀺 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸. 𑀚𑀻𑀯𑀺𑀢𑀲𑀗𑁆𑀔𑀸𑀭𑀦𑁆𑀢𑀺 𑀏𑀢𑁆𑀣 𑀚𑀻𑀯𑀺𑀢𑀫𑁆𑀧𑀺 𑀚𑀻𑀯𑀺𑀢𑀲𑀗𑁆𑀔𑀸𑀭𑁄. 𑀬𑁂𑀦 𑀚𑀻𑀯𑀺𑀢𑀁 𑀲𑀗𑁆𑀔𑀭𑀻𑀬𑀢𑀺 𑀙𑀺𑀚𑁆𑀚𑀫𑀸𑀦𑀁 𑀖𑀝𑁂𑀢𑁆𑀯𑀸 𑀞𑀧𑀻𑀬𑀢𑀺, 𑀲𑁄 𑀨𑀮𑀲𑀫𑀸𑀧𑀢𑁆𑀢𑀺𑀥𑀫𑁆𑀫𑁄𑀧𑀺 𑀚𑀻𑀯𑀺𑀢𑀲𑀗𑁆𑀔𑀸𑀭𑁄. 𑀲𑁄 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀅𑀥𑀺𑀝𑁆𑀞𑀸𑀬𑀸𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀯𑀢𑁆𑀢𑁂𑀢𑁆𑀯𑀸 𑀚𑀻𑀯𑀺𑀢𑀞𑀧𑀦𑀲𑀫𑀢𑁆𑀣𑀁 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑁂𑀬𑁆𑀬𑀦𑁆𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄.

𑀓𑀺𑀁 𑀧𑀦 𑀪𑀕𑀯𑀸 𑀇𑀢𑁄 𑀧𑀼𑀩𑁆𑀩𑁂 𑀨𑀮𑀲𑀫𑀸𑀧𑀢𑁆𑀢𑀺𑀁 𑀦 𑀲𑀫𑀸𑀧𑀚𑁆𑀚𑀢𑀻𑀢𑀺? 𑀲𑀫𑀸𑀧𑀚𑁆𑀚𑀢𑀺. 𑀲𑀸 𑀧𑀦 𑀔𑀡𑀺𑀓𑀲𑀫𑀸𑀧𑀢𑁆𑀢𑀺. 𑀔𑀡𑀺𑀓𑀲𑀫𑀸𑀧𑀢𑁆𑀢𑀺 𑀘 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁𑀬𑁂𑀯 𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀢𑀺, 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀫𑀢𑁆𑀢𑀲𑁆𑀲 𑀓𑀝𑁆𑀞𑀧𑀸𑀢𑁂𑀦 𑀯𑀸 𑀓𑀞𑀮𑀧𑀸𑀢𑁂𑀦 𑀯𑀸 𑀙𑀺𑀦𑁆𑀦𑀲𑁂𑀯𑀸𑀮𑁄 𑀯𑀺𑀬 𑀉𑀤𑀓𑀁, 𑀧𑀼𑀦 𑀲𑀭𑀻𑀭𑀁 𑀯𑁂𑀤𑀦𑀸 𑀅𑀚𑁆𑀛𑁄𑀢𑁆𑀣𑀭𑀢𑀺. 𑀬𑀸 𑀧𑀦 𑀭𑀽𑀧𑀲𑀢𑁆𑀢𑀓𑀁 𑀅𑀭𑀽𑀧𑀲𑀢𑁆𑀢𑀓𑀜𑁆𑀘 𑀦𑀺𑀕𑁆𑀕𑀼𑀫𑁆𑀩𑀁 𑀦𑀺𑀚𑁆𑀚𑀝𑀁 𑀓𑀢𑁆𑀯𑀸 𑀫𑀳𑀸𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀲𑀫𑀸𑀧𑀦𑁆𑀦𑀸 𑀲𑀫𑀸𑀧𑀢𑁆𑀢𑀺, 𑀲𑀸 𑀲𑀼𑀝𑁆𑀞𑀼 𑀯𑀺𑀓𑁆𑀔𑀫𑁆𑀪𑁂𑀢𑀺. 𑀬𑀣𑀸 𑀦𑀸𑀫 𑀧𑀼𑀭𑀺𑀲𑁂𑀦 𑀧𑁄𑀓𑁆𑀔𑀭𑀡𑀺𑀁 𑀑𑀕𑀸𑀳𑁂𑀢𑁆𑀯𑀸 𑀳𑀢𑁆𑀣𑁂𑀳𑀺 𑀘 𑀧𑀸𑀤𑁂𑀳𑀺 𑀘 𑀲𑀼𑀝𑁆𑀞𑀼 𑀅𑀧𑀩𑁆𑀬𑀼𑀴𑁆𑀳𑀲𑁂𑀯𑀸𑀮𑁄 𑀘𑀺𑀭𑁂𑀦 𑀉𑀤𑀓𑀁 𑀑𑀢𑁆𑀣𑀭𑀢𑀺, 𑀏𑀯𑀫𑁂𑀯 𑀢𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀘𑀺𑀭𑁂𑀦 𑀯𑁂𑀤𑀦𑀸 𑀉𑀧𑁆𑀧𑀚𑁆𑀚𑀢𑀺. 𑀇𑀢𑀺 𑀪𑀕𑀯𑀸 𑀢𑀁𑀤𑀺𑀯𑀲𑀁 𑀫𑀳𑀸𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀅𑀪𑀺𑀦𑀯𑀁 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀦𑁆𑀢𑁄 𑀯𑀺𑀬 𑀭𑀽𑀧𑀲𑀢𑁆𑀢𑀓𑀁 𑀅𑀭𑀽𑀧𑀲𑀢𑁆𑀢𑀓𑀜𑁆𑀘 𑀦𑀺𑀕𑁆𑀕𑀼𑀫𑁆𑀩𑀁 𑀦𑀺𑀚𑁆𑀚𑀝𑀁 𑀓𑀢𑁆𑀯𑀸 𑀘𑀼𑀤𑁆𑀤𑀲𑀳𑀸𑀓𑀸𑀭𑁂𑀳𑀺 𑀲𑀦𑁆𑀦𑁂𑀢𑁆𑀯𑀸 𑀫𑀳𑀸𑀯𑀺𑀧𑀲𑁆𑀲𑀦𑀸𑀬 𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 ‘‘𑀤𑀲𑀫𑀸𑀲𑁂 𑀫𑀸 𑀉𑀧𑁆𑀧𑀚𑁆𑀚𑀺𑀢𑁆𑀣𑀸’’𑀢𑀺 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺, 𑀲𑀫𑀸𑀧𑀢𑁆𑀢𑀺𑀯𑀺𑀓𑁆𑀔𑀫𑁆𑀪𑀺𑀢𑀸 𑀯𑁂𑀤𑀦𑀸 𑀤𑀲 𑀫𑀸𑀲𑁂 𑀦 𑀉𑀧𑁆𑀧𑀚𑁆𑀚𑀺𑀬𑁂𑀯.

𑀕𑀺𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀕𑀺𑀮𑀸𑀦𑁄 𑀳𑀼𑀢𑁆𑀯𑀸 𑀧𑀼𑀦 𑀯𑀼𑀝𑁆𑀞𑀺𑀢𑁄. 𑀫𑀥𑀼𑀭𑀓𑀚𑀸𑀢𑁄 𑀯𑀺𑀬𑀸𑀢𑀺 𑀲𑀜𑁆𑀚𑀸𑀢𑀕𑀭𑀼𑀪𑀸𑀯𑁄 𑀲𑀜𑁆𑀚𑀸𑀢𑀣𑀤𑁆𑀥𑀪𑀸𑀯𑁄 𑀲𑀽𑀮𑁂 𑀉𑀢𑁆𑀢𑀸𑀲𑀺𑀢𑀧𑀼𑀭𑀺𑀲𑁄 𑀯𑀺𑀬. 𑀦 𑀧𑀓𑁆𑀔𑀸𑀬𑀦𑁆𑀢𑀻𑀢𑀺 𑀦 𑀧𑀓𑀸𑀲𑀦𑁆𑀢𑀺, 𑀦𑀸𑀦𑀸𑀓𑀸𑀭𑀢𑁄 𑀦 𑀉𑀧𑀝𑁆𑀞𑀳𑀦𑁆𑀢𑀺. 𑀥𑀫𑁆𑀫𑀸𑀧𑀺 𑀫𑀁 𑀦𑀧𑁆𑀧𑀝𑀺𑀪𑀦𑁆𑀢𑀻𑀢𑀺 𑀲𑀢𑀺𑀧𑀝𑁆𑀞𑀸𑀦𑀥𑀫𑁆𑀫𑀸 𑀫𑀬𑁆𑀳𑀁 𑀧𑀸𑀓𑀝𑀸 𑀦 𑀳𑁄𑀦𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀢𑀦𑁆𑀢𑀺𑀥𑀫𑁆𑀫𑀸 𑀧𑀦 𑀣𑁂𑀭𑀲𑁆𑀲 𑀲𑀼𑀧𑁆𑀧𑀕𑀼𑀡𑀸. 𑀦 𑀉𑀤𑀸𑀳𑀭𑀢𑀻𑀢𑀺 𑀧𑀘𑁆𑀙𑀺𑀫𑀑𑀯𑀸𑀤𑀁 𑀦 𑀤𑁂𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑀅𑀦𑀦𑁆𑀢𑀭𑀁 𑀅𑀩𑀸𑀳𑀺𑀭𑀦𑁆𑀢𑀺 𑀥𑀫𑁆𑀫𑀯𑀲𑁂𑀦 𑀯𑀸 𑀧𑀼𑀕𑁆𑀕𑀮𑀯𑀲𑁂𑀦 𑀯𑀸 𑀉𑀪𑀬𑀁 𑀅𑀓𑀢𑁆𑀯𑀸. ‘‘𑀏𑀢𑁆𑀢𑀓𑀁 𑀥𑀫𑁆𑀫𑀁 𑀧𑀭𑀲𑁆𑀲 𑀦 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀳𑀺 𑀘𑀺𑀦𑁆𑀢𑁂𑀦𑁆𑀢𑁄 𑀥𑀫𑁆𑀫𑀁 𑀅𑀩𑁆𑀪𑀦𑁆𑀢𑀭𑀁 𑀓𑀭𑁄𑀢𑀺 𑀦𑀸𑀫, ‘‘𑀏𑀢𑁆𑀢𑀓𑀁 𑀧𑀭𑀲𑁆𑀲 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀩𑀸𑀳𑀺𑀭𑀁 𑀓𑀭𑁄𑀢𑀺 𑀦𑀸𑀫. ‘‘𑀇𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀧𑀦 𑀧𑀼𑀕𑁆𑀕𑀮𑀁 𑀅𑀩𑁆𑀪𑀦𑁆𑀢𑀭𑀁 𑀓𑀭𑁄𑀢𑀺 𑀦𑀸𑀫, ‘‘𑀇𑀫𑀲𑁆𑀲 𑀦 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀧𑀼𑀕𑁆𑀕𑀮𑀁 𑀩𑀸𑀳𑀺𑀭𑀁 𑀓𑀭𑁄𑀢𑀺 𑀦𑀸𑀫. 𑀏𑀯𑀁 𑀅𑀓𑀢𑁆𑀯𑀸 𑀤𑁂𑀲𑀺𑀢𑁄𑀢𑀺 𑀅𑀢𑁆𑀣𑁄. 𑀆𑀘𑀭𑀺𑀬𑀫𑀼𑀝𑁆𑀞𑀻𑀢𑀺 𑀬𑀣𑀸 𑀩𑀸𑀳𑀺𑀭𑀓𑀸𑀦𑀁 𑀆𑀘𑀭𑀺𑀬𑀫𑀼𑀝𑁆𑀞𑀺 𑀦𑀸𑀫 𑀳𑁄𑀢𑀺, 𑀤𑀳𑀭𑀓𑀸𑀮𑁂 𑀓𑀲𑁆𑀲𑀘𑀺 𑀅𑀓𑀣𑁂𑀢𑁆𑀯𑀸 𑀧𑀘𑁆𑀙𑀺𑀫𑀓𑀸𑀮𑁂 𑀫𑀭𑀡𑀫𑀜𑁆𑀘𑁂 𑀦𑀺𑀧𑀦𑁆𑀦𑀸 𑀧𑀺𑀬𑀫𑀦𑀸𑀧𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀓𑀣𑁂𑀦𑁆𑀢𑀺, 𑀏𑀯𑀁 𑀢𑀣𑀸𑀕𑀢𑀲𑁆𑀲 ‘‘𑀇𑀤𑀁 𑀫𑀳𑀮𑁆𑀮𑀓𑀓𑀸𑀮𑁂 𑀧𑀘𑁆𑀙𑀺𑀫𑀞𑀸𑀦𑁂 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀫𑀼𑀝𑁆𑀞𑀺𑀁 𑀓𑀢𑁆𑀯𑀸 𑀧𑀭𑀺𑀳𑀭𑀺𑀢𑁆𑀯𑀸 𑀞𑀧𑀺𑀢𑀁 𑀓𑀺𑀜𑁆𑀘𑀺 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺.

𑀅𑀳𑀁 𑀪𑀺𑀓𑁆𑀔𑀼𑀲𑀗𑁆𑀖𑀦𑁆𑀢𑀺 𑀅𑀳𑀫𑁂𑀯 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀳𑀭𑀺𑀲𑁆𑀲𑀸𑀫𑀻𑀢𑀺 𑀯𑀸, 𑀫𑀫𑀼𑀤𑁆𑀤𑁂𑀲𑀺𑀓𑁄𑀢𑀺 𑀅𑀳𑀁 𑀉𑀤𑁆𑀤𑀺𑀲𑀺𑀢𑀩𑁆𑀩𑀝𑁆𑀞𑁂𑀦 𑀉𑀤𑁆𑀤𑁂𑀲𑁄 𑀅𑀲𑁆𑀲𑀸𑀢𑀺 𑀫𑀫𑀼𑀤𑁆𑀤𑁂𑀲𑀺𑀓𑁄, 𑀫𑀫𑁂𑀯 𑀉𑀤𑁆𑀤𑀺𑀲𑁆𑀲𑀺𑀢𑁆𑀯𑀸 𑀫𑀁 𑀧𑀘𑁆𑀘𑀸𑀲𑀻𑀲𑀫𑀸𑀦𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀳𑁄𑀢𑀼 𑀫𑀫 𑀅𑀘𑁆𑀘𑀬𑁂𑀦 𑀫𑀸 𑀯𑀸 𑀅𑀳𑁄𑀲𑀺, 𑀬𑀁 𑀯𑀸 𑀢𑀁 𑀯𑀸 𑀳𑁄𑀢𑀽𑀢𑀺 𑀇𑀢𑀺 𑀯𑀸 𑀧𑀦 𑀬𑀲𑁆𑀲 𑀅𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀦 𑀏𑀯𑀁 𑀳𑁄𑀢𑀻𑀢𑀺 𑀩𑁄𑀥𑀺𑀧𑀮𑁆𑀮𑀗𑁆𑀓𑁂𑀬𑁂𑀯 𑀇𑀲𑁆𑀲𑀸𑀫𑀘𑁆𑀙𑁂𑀭𑀸𑀦𑀁 𑀯𑀺𑀕𑀢𑀢𑁆𑀢𑀸 𑀏𑀯𑀁 𑀦 𑀳𑁄𑀢𑀺. 𑀲 𑀓𑀺𑀦𑁆𑀢𑀺 𑀲𑁄 𑀓𑀺𑀁. 𑀆𑀲𑀻𑀢𑀺𑀓𑁄𑀢𑀺 𑀅𑀲𑀻𑀢𑀺𑀲𑀁𑀯𑀘𑁆𑀙𑀭𑀺𑀓𑁄, 𑀇𑀤𑀁 𑀧𑀘𑁆𑀙𑀺𑀫𑀯𑀬𑀁 𑀅𑀦𑀼𑀧𑁆𑀧𑀢𑁆𑀢𑀪𑀸𑀯𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀯𑁂𑀞𑀫𑀺𑀲𑁆𑀲𑀓𑁂𑀦𑀸𑀢𑀺 𑀩𑀸𑀳𑀩𑀦𑁆𑀥𑀘𑀓𑁆𑀓𑀩𑀦𑁆𑀥𑀸𑀤𑀺𑀦𑀸 𑀧𑀝𑀺𑀲𑀗𑁆𑀔𑀭𑀡𑁂𑀦 𑀯𑁂𑀞𑀫𑀺𑀲𑁆𑀲𑀓𑁂𑀦. 𑀫𑀜𑁆𑀜𑁂𑀢𑀺 𑀚𑀭𑀲𑀓𑀝𑀁 𑀯𑀺𑀬 𑀯𑁂𑀞𑀫𑀺𑀲𑁆𑀲𑀓𑁂𑀦 𑀫𑀜𑁆𑀜𑁂 𑀬𑀸𑀧𑁂𑀢𑀺, 𑀅𑀭𑀳𑀢𑁆𑀢𑀨𑀮𑀯𑁂𑀞𑀦𑁂𑀦 𑀘𑀢𑀼𑀇𑀭𑀺𑀬𑀸𑀧𑀣𑀓𑀧𑁆𑀧𑀦𑀁 𑀢𑀣𑀸𑀕𑀢𑀲𑁆𑀲 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 𑀢𑀫𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑁄 𑀬𑀲𑁆𑀫𑀺𑀁 𑀆𑀦𑀦𑁆𑀤 𑀲𑀫𑀬𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀦𑁆𑀢𑀺 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀻𑀦𑀁. 𑀏𑀓𑀘𑁆𑀘𑀸𑀦𑀁 𑀯𑁂𑀤𑀦𑀸𑀦𑀦𑁆𑀢𑀺 𑀮𑁄𑀓𑀺𑀬𑀸𑀦𑀁 𑀯𑁂𑀤𑀦𑀸𑀦𑀁. 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤𑀸𑀢𑀺 𑀬𑀲𑁆𑀫𑀸 𑀇𑀫𑀺𑀦𑀸 𑀨𑀮𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑁂𑀦 𑀨𑀸𑀲𑀼 𑀳𑁄𑀢𑀺, 𑀢𑀲𑁆𑀫𑀸 𑀢𑀼𑀫𑁆𑀳𑁂𑀧𑀺 𑀢𑀤𑀢𑁆𑀣𑀸𑀬 𑀏𑀯𑀁 𑀯𑀺𑀳𑀭𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀢𑁆𑀢𑀤𑀻𑀧𑀸𑀢𑀺 𑀫𑀳𑀸𑀲𑀫𑀼𑀤𑁆𑀤𑀕𑀢𑀸 𑀤𑀻𑀧𑀁 𑀯𑀺𑀬 𑀅𑀢𑁆𑀢𑀸𑀦𑀁 𑀤𑀻𑀧𑀁 𑀧𑀢𑀺𑀝𑁆𑀞𑀁 𑀓𑀢𑁆𑀯𑀸 𑀯𑀺𑀳𑀭𑀣. 𑀅𑀢𑁆𑀢𑀲𑀭𑀡𑀸𑀢𑀺 𑀅𑀢𑁆𑀢𑀕𑀢𑀺𑀓𑀸𑀯 𑀳𑁄𑀣, 𑀫𑀸 𑀅𑀜𑁆𑀜𑀕𑀢𑀺𑀓𑀸. 𑀥𑀫𑁆𑀫𑀤𑀻𑀧𑀥𑀫𑁆𑀫𑀲𑀭𑀡𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀥𑀫𑁆𑀫𑁄𑀢𑀺 𑀦𑀯𑀯𑀺𑀥𑁄 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀫𑀢𑀕𑁆𑀕𑁂𑀢𑀺 𑀢𑀫𑀅𑀕𑁆𑀕𑁂, 𑀫𑀚𑁆𑀛𑁂 𑀢-𑀓𑀸𑀭𑁄 𑀧𑀤𑀲𑀦𑁆𑀥𑀺𑀯𑀲𑁂𑀦 𑀯𑀼𑀢𑁆𑀢𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀇𑀫𑁂 𑀅𑀕𑁆𑀕𑀢𑀫𑀸𑀢𑀺 𑀢𑀫𑀢𑀕𑁆𑀕𑀸𑀢𑀺. 𑀏𑀯𑀁 𑀲𑀩𑁆𑀩𑀁 𑀢𑀫𑀲𑁄𑀢𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀢𑀺𑀯𑀺𑀬 𑀅𑀕𑁆𑀕𑁂 𑀉𑀢𑁆𑀢𑀫𑀪𑀸𑀯𑁂 𑀏𑀢𑁂, 𑀆𑀦𑀦𑁆𑀤, 𑀫𑀫 𑀪𑀺𑀓𑁆𑀔𑀽 𑀪𑀯𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀅𑀕𑁆𑀕𑁂 𑀪𑀯𑀺𑀲𑁆𑀲𑀦𑁆𑀢𑀺. 𑀬𑁂 𑀓𑁂𑀘𑀺 𑀲𑀺𑀓𑁆𑀔𑀸𑀓𑀸𑀫𑀸, 𑀲𑀩𑁆𑀩𑁂𑀲𑀁 𑀢𑁂𑀲𑀁 𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀕𑁄𑀘𑀭𑀸𑀯 𑀪𑀺𑀓𑁆𑀔𑀽 𑀅𑀕𑁆𑀕𑁂 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀅𑀭𑀳𑀢𑁆𑀢𑀦𑀺𑀓𑀽𑀝𑁂𑀦 𑀤𑁂𑀲𑀦𑀁 𑀕𑀡𑁆𑀳𑀻𑀢𑀺.

𑁧𑁦. 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭𑁬. 𑀤𑀲𑀫𑁂 𑀢𑁂𑀦𑀼𑀧𑀲𑀗𑁆𑀓𑀫𑀻𑀢𑀺 𑀢𑀲𑁆𑀫𑀺𑀁 𑀉𑀧𑀲𑁆𑀲𑀬𑁂 𑀓𑀫𑁆𑀫𑀝𑁆𑀞𑀸𑀦𑀓𑀫𑁆𑀫𑀺𑀓𑀸 𑀪𑀺𑀓𑁆𑀔𑀼𑀦𑀺𑀬𑁄 𑀅𑀢𑁆𑀣𑀺, 𑀢𑀸𑀲𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀓𑀣𑁂𑀲𑁆𑀲𑀸𑀫𑀻𑀢𑀺 𑀉𑀧𑀲𑀗𑁆𑀓𑀫𑀺. 𑀉𑀴𑀸𑀭𑀁 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀦𑁆𑀢𑀺 𑀧𑀼𑀩𑁆𑀩𑀯𑀺𑀲𑁂𑀲𑀢𑁄 𑀅𑀧𑀭𑀁 𑀉𑀴𑀸𑀭𑀯𑀺𑀲𑁂𑀲𑀁. 𑀢𑀢𑁆𑀣 𑀫𑀳𑀸𑀪𑀽𑀢𑀧𑀭𑀺𑀕𑁆𑀕𑀳𑁄 𑀧𑀼𑀩𑁆𑀩𑀯𑀺𑀲𑁂𑀲𑁄, 𑀉𑀧𑀸𑀤𑀸𑀭𑀽𑀧𑀧𑀭𑀺𑀕𑁆𑀕𑀳𑁄 𑀅𑀧𑀭𑀯𑀺𑀲𑁂𑀲𑁄 𑀦𑀸𑀫. 𑀢𑀣𑀸 𑀲𑀓𑀮𑀭𑀽𑀧𑀧𑀭𑀺𑀕𑁆𑀕𑀳𑁄 𑀧𑀼𑀩𑁆𑀩𑀯𑀺𑀲𑁂𑀲𑁄, 𑀅𑀭𑀽𑀧𑀧𑀭𑀺𑀕𑁆𑀕𑀳𑁄 𑀅𑀧𑀭𑀯𑀺𑀲𑁂𑀲𑁄 𑀦𑀸𑀫. 𑀭𑀽𑀧𑀸𑀭𑀽𑀧𑀧𑀭𑀺𑀕𑁆𑀕𑀳𑁄 𑀧𑀼𑀩𑁆𑀩𑀯𑀺𑀲𑁂𑀲𑁄, 𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑁄 𑀅𑀧𑀭𑀯𑀺𑀲𑁂𑀲𑁄 𑀦𑀸𑀫 𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀤𑀲𑁆𑀲𑀦𑀁 𑀧𑀼𑀩𑁆𑀩𑀯𑀺𑀲𑁂𑀲𑁄, 𑀢𑀺𑀮𑀓𑁆𑀔𑀡𑀸𑀭𑁄𑀧𑀦𑀁 𑀅𑀧𑀭𑀯𑀺𑀲𑁂𑀲𑁄 𑀦𑀸𑀫. 𑀏𑀯𑀁 𑀧𑀼𑀩𑁆𑀩𑁂𑀦𑀸𑀧𑀭𑀁 𑀉𑀴𑀸𑀭𑀯𑀺𑀲𑁂𑀲𑀁 𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄.

𑀓𑀸𑀬𑀸𑀭𑀫𑁆𑀫𑀡𑁄𑀢𑀺 𑀬𑀁 𑀓𑀸𑀬𑀁 𑀅𑀦𑀼𑀧𑀲𑁆𑀲𑀢𑀺, 𑀢𑀫𑁂𑀯 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀓𑀺𑀮𑁂𑀲𑀧𑀭𑀺𑀴𑀸𑀳𑁄. 𑀩𑀳𑀺𑀤𑁆𑀥𑀸 𑀯𑀸 𑀘𑀺𑀢𑁆𑀢𑀁 𑀯𑀺𑀓𑁆𑀔𑀺𑀧𑀢𑀻𑀢𑀺 𑀩𑀳𑀺𑀤𑁆𑀥𑀸 𑀯𑀸 𑀧𑀼𑀣𑀼𑀢𑁆𑀢𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀯𑀺𑀓𑁆𑀔𑀺𑀧𑀢𑀺. 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀧𑀲𑀸𑀤𑀦𑀻𑀬𑁂 𑀦𑀺𑀫𑀺𑀢𑁆𑀢𑁂 𑀘𑀺𑀢𑁆𑀢𑀁 𑀧𑀡𑀺𑀤𑀳𑀺𑀢𑀩𑁆𑀩𑀦𑁆𑀢𑀺 𑀏𑀯𑀁 𑀓𑀺𑀮𑁂𑀲𑀧𑀭𑀺𑀴𑀸𑀳𑁂 𑀘 𑀮𑀻𑀦𑀢𑁆𑀢𑁂 𑀘 𑀩𑀳𑀺𑀤𑁆𑀥𑀸𑀯𑀺𑀓𑁆𑀔𑁂𑀧𑁂 𑀘 𑀉𑀧𑁆𑀧𑀦𑁆𑀦𑁂 𑀓𑀺𑀮𑁂𑀲𑀸𑀦𑀼𑀭𑀜𑁆𑀚𑀺𑀢𑁂𑀦 𑀦 𑀯𑀢𑁆𑀢𑀺𑀢𑀩𑁆𑀩𑀁, 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀧𑀲𑀸𑀤𑀦𑀻𑀬𑁂 𑀧𑀲𑀸𑀤𑀸𑀯𑀳𑁂 𑀩𑀼𑀤𑁆𑀥𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀞𑀸𑀦𑁂 𑀓𑀫𑁆𑀫𑀝𑁆𑀞𑀸𑀦𑀘𑀺𑀢𑁆𑀢𑀁 𑀞𑀧𑁂𑀢𑀩𑁆𑀩𑀁. 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻𑀢𑀺 𑀆𑀭𑀫𑁆𑀫𑀡𑁂 𑀲𑀫𑁆𑀫𑀸 𑀆𑀥𑀺𑀬𑀢𑀺 𑀲𑀼𑀝𑁆𑀞𑀼 𑀞𑀧𑀺𑀢𑀁 𑀞𑀧𑀺𑀬𑀢𑀺. 𑀧𑀝𑀺𑀲𑀁𑀳𑀭𑀸𑀫𑀻𑀢𑀺 𑀧𑀲𑀸𑀤𑀦𑀻𑀬𑀝𑁆𑀞𑀸𑀦𑀢𑁄 𑀧𑀝𑀺𑀲𑀁𑀳𑀭𑀸𑀫𑀺, 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀫𑀼𑀔𑀁𑀬𑁂𑀯 𑀦𑀁 𑀓𑀭𑁄𑀫𑀻𑀢𑀺 𑀅𑀢𑁆𑀣𑁄. 𑀲𑁄 𑀧𑀝𑀺𑀲𑀁𑀳𑀭𑀢𑀺 𑀘𑁂𑀯𑀸𑀢𑀺 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀫𑀼𑀔𑀜𑁆𑀘 𑀧𑁂𑀲𑁂𑀢𑀺. 𑀦 𑀘 𑀯𑀺𑀢𑀓𑁆𑀓𑁂𑀢𑀺 𑀦 𑀘 𑀯𑀺𑀘𑀸𑀭𑁂𑀢𑀻𑀢𑀺 𑀓𑀺𑀮𑁂𑀲𑀯𑀺𑀢𑀓𑁆𑀓𑀁 𑀦 𑀯𑀺𑀢𑀓𑁆𑀓𑁂𑀢𑀺, 𑀓𑀺𑀮𑁂𑀲𑀯𑀺𑀘𑀸𑀭𑀁 𑀦 𑀯𑀺𑀘𑀸𑀭𑁂𑀢𑀺. 𑀅𑀯𑀺𑀢𑀓𑁆𑀓𑁄𑀫𑁆𑀳𑀺 𑀅𑀯𑀺𑀘𑀸𑀭𑁄𑀢𑀺 𑀓𑀺𑀮𑁂𑀲𑀯𑀺𑀢𑀓𑁆𑀓𑀯𑀺𑀘𑀸𑀭𑁂𑀳𑀺 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑁄. 𑀅𑀚𑁆𑀛𑀢𑁆𑀢𑀁 𑀲𑀢𑀺𑀫𑀸 𑀲𑀼𑀔𑀫𑀲𑁆𑀫𑀻𑀢𑀺 𑀕𑁄𑀘𑀭𑀚𑁆𑀛𑀢𑁆𑀢𑁂 𑀧𑀯𑀢𑁆𑀢𑀸𑀬 𑀲𑀢𑀺𑀬𑀸 ‘‘𑀲𑀢𑀺𑀫𑀸𑀳𑀫𑀲𑁆𑀫𑀺 𑀲𑀼𑀔𑀺𑀢𑁄 𑀘𑀸’’𑀢𑀺 𑀧𑀚𑀸𑀦𑀸𑀢𑀺.

𑀏𑀯𑀁 𑀔𑁄, 𑀆𑀦𑀦𑁆𑀤, 𑀧𑀡𑀺𑀥𑀸𑀬 𑀪𑀸𑀯𑀦𑀸 𑀳𑁄𑀢𑀻𑀢𑀺 𑀏𑀯𑀁, 𑀆𑀦𑀦𑁆𑀤, 𑀞𑀧𑁂𑀢𑁆𑀯𑀸 𑀪𑀸𑀯𑀦𑀸 𑀳𑁄𑀢𑀺. 𑀇𑀫𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄 𑀬𑀣𑀸 𑀦𑀸𑀫 𑀧𑀼𑀭𑀺𑀲𑀲𑁆𑀲 𑀫𑀳𑀦𑁆𑀢𑀁 𑀉𑀘𑁆𑀙𑀼𑀪𑀸𑀭𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀬𑀦𑁆𑀢𑀲𑀸𑀮𑀁 𑀦𑁂𑀦𑁆𑀢𑀲𑁆𑀲 𑀓𑀺𑀮𑀦𑁆𑀢𑀓𑀺𑀮𑀦𑁆𑀢𑀓𑀸𑀮𑁂 𑀪𑀽𑀫𑀺𑀬𑀁 𑀞𑀧𑁂𑀢𑁆𑀯𑀸 𑀉𑀘𑁆𑀙𑀼𑀔𑀡𑁆𑀟𑀁 𑀔𑀸𑀤𑀺𑀢𑁆𑀯𑀸 𑀧𑀼𑀦 𑀉𑀓𑁆𑀔𑀺𑀧𑀺𑀢𑁆𑀯𑀸 𑀕𑀫𑀦𑀁 𑀳𑁄𑀢𑀺; 𑀏𑀯𑀫𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀉𑀕𑁆𑀕𑀳𑀺𑀢𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀓𑀸𑀬𑀧𑀭𑀺𑀴𑀸𑀳𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀞𑀧𑁂𑀢𑁆𑀯𑀸 𑀩𑀼𑀤𑁆𑀥𑀕𑀼𑀡𑀸𑀤𑀺𑀅𑀦𑀼𑀲𑁆𑀲𑀭𑀡𑁂𑀦 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀓𑀫𑁆𑀫𑀦𑀺𑀬𑀁 𑀓𑀢𑁆𑀯𑀸 𑀪𑀸𑀯𑀦𑀸 𑀧𑀯𑀢𑁆𑀢𑀸, 𑀢𑀲𑁆𑀫𑀸 ‘‘𑀧𑀡𑀺𑀥𑀸𑀬 𑀪𑀸𑀯𑀦𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀧𑀦 𑀧𑀼𑀭𑀺𑀲𑀲𑁆𑀲 𑀉𑀘𑁆𑀙𑀼𑀪𑀸𑀭𑀁 𑀬𑀦𑁆𑀢𑀲𑀸𑀮𑀁 𑀦𑁂𑀢𑁆𑀯𑀸 𑀧𑀻𑀴𑁂𑀢𑁆𑀯𑀸 𑀭𑀲𑀧𑀸𑀦𑀁 𑀯𑀺𑀬 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀫𑁆𑀫𑀝𑁆𑀞𑀸𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀲𑁆𑀲 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀸𑀦𑀼𑀪𑀯𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀩𑀳𑀺𑀤𑁆𑀥𑀸𑀢𑀺 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀧𑀳𑀸𑀬 𑀩𑀳𑀺 𑀅𑀜𑁆𑀜𑀲𑁆𑀫𑀺𑀁 𑀆𑀭𑀫𑁆𑀫𑀡𑁂. 𑀅𑀧𑁆𑀧𑀡𑀺𑀥𑀸𑀬𑀸𑀢𑀺 𑀅𑀝𑁆𑀞𑀧𑁂𑀢𑁆𑀯𑀸. 𑀅𑀣 𑀧𑀘𑁆𑀙𑀸 𑀧𑀼𑀭𑁂 𑀅𑀲𑀁𑀔𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀅𑀧𑁆𑀧𑀡𑀺𑀳𑀺𑀢𑀦𑁆𑀢𑀺 𑀧𑀚𑀸𑀦𑀸𑀢𑀻𑀢𑀺 𑀏𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦 𑀯𑀸 𑀲𑀭𑀻𑀭𑀯𑀲𑁂𑀦 𑀯𑀸 𑀤𑁂𑀲𑀦𑀸𑀯𑀲𑁂𑀦 𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑁂 𑀢𑀸𑀯 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀅𑀪𑀺𑀦𑀺𑀯𑁂𑀲𑁄 𑀧𑀼𑀭𑁂 𑀦𑀸𑀫, 𑀅𑀭𑀳𑀢𑁆𑀢𑀁 𑀧𑀘𑁆𑀙𑀸 𑀦𑀸𑀫. 𑀢𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀓𑀺𑀮𑁂𑀲𑀧𑀭𑀺𑀴𑀸𑀳𑀲𑁆𑀲 𑀯𑀸 𑀮𑀻𑀦𑀢𑁆𑀢𑀲𑁆𑀲 𑀯𑀸 𑀩𑀳𑀺𑀤𑁆𑀥𑀸𑀯𑀺𑀓𑁆𑀔𑁂𑀧𑀲𑁆𑀲 𑀯𑀸 𑀉𑀧𑁆𑀧𑀚𑁆𑀚𑀺𑀢𑀼𑀁 𑀑𑀓𑀸𑀲𑀁 𑀅𑀤𑁂𑀦𑁆𑀢𑁄 𑀲𑀼𑀤𑀦𑁆𑀢𑀕𑁄𑀡𑁂 𑀬𑁄𑀚𑁂𑀢𑁆𑀯𑀸 𑀲𑀸𑀭𑁂𑀦𑁆𑀢𑁄 𑀯𑀺𑀬 𑀘𑀢𑀼𑀭𑀲𑁆𑀲𑀘𑁆𑀙𑀺𑀤𑁆𑀤𑁂 𑀲𑀼𑀢𑀘𑁆𑀙𑀺𑀢𑀁 𑀘𑀢𑀼𑀭𑀲𑁆𑀲𑀖𑀝𑀺𑀓𑀁 𑀧𑀓𑁆𑀔𑀺𑀧𑀦𑁆𑀢𑁄 𑀯𑀺𑀬 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀅𑀢𑀺𑀝𑁆𑀞𑀦𑁆𑀢𑁄 𑀅𑀮𑀕𑁆𑀕𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀲𑁄 𑀧𑀼𑀭𑁂𑀲𑀗𑁆𑀔𑀸𑀢𑀲𑁆𑀲 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑀲𑁆𑀲 𑀧𑀘𑁆𑀙𑀸𑀲𑀗𑁆𑀔𑀸𑀢𑀲𑁆𑀲 𑀅𑀭𑀳𑀢𑁆𑀢𑀲𑁆𑀲 𑀘 𑀯𑀲𑁂𑀦 𑀧𑀘𑁆𑀙𑀸 𑀧𑀼𑀭𑁂 𑀅𑀲𑀁𑀔𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀅𑀧𑁆𑀧𑀡𑀺𑀳𑀺𑀢𑀦𑁆𑀢𑀺 𑀧𑀚𑀸𑀦𑀸𑀢𑀺 𑀦𑀸𑀫.

𑀲𑀭𑀻𑀭𑁂 𑀧𑀦 𑀧𑀸𑀤𑀗𑁆𑀕𑀼𑀮𑀻𑀦𑀁 𑀅𑀕𑁆𑀕𑀧𑀩𑁆𑀩𑀸𑀦𑀺 𑀧𑀼𑀭𑁂 𑀦𑀸𑀫, 𑀲𑀻𑀲𑀓𑀝𑀸𑀳𑀁 𑀧𑀘𑁆𑀙𑀸 𑀦𑀸𑀫. 𑀢𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀧𑀸𑀤𑀗𑁆𑀕𑀼𑀮𑀻𑀦𑀁 𑀅𑀕𑁆𑀕𑀧𑀩𑁆𑀩𑀅𑀝𑁆𑀞𑀺𑀓𑁂𑀲𑀼 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀩𑁆𑀬𑀸𑀪𑀗𑁆𑀕𑀺𑀬𑀸 𑀬𑀯𑀓𑀮𑀸𑀧𑀁 𑀫𑁄𑀘𑁂𑀦𑁆𑀢𑁄 𑀯𑀺𑀬 𑀯𑀡𑁆𑀡𑀲𑀡𑁆𑀞𑀸𑀦𑀤𑀺𑀲𑁄𑀓𑀸𑀲𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀅𑀝𑁆𑀞𑀻𑀦𑀺 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀅𑀦𑁆𑀢𑀭𑀸 𑀓𑀺𑀮𑁂𑀲𑀧𑀭𑀺𑀴𑀸𑀳𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀁 𑀯𑀸𑀭𑁂𑀢𑁆𑀯𑀸 𑀬𑀸𑀯 𑀲𑀻𑀲𑀓𑀝𑀸𑀳𑀸 𑀪𑀸𑀯𑀦𑀁 𑀧𑀸𑀧𑁂𑀢𑀺, 𑀲𑁄 𑀧𑀼𑀭𑁂𑀲𑀗𑁆𑀔𑀸𑀢𑀸𑀦𑀁 𑀅𑀕𑁆𑀕𑀧𑀸𑀤𑀗𑁆𑀕𑀼𑀮𑀺𑀧𑀩𑁆𑀩𑀸𑀦𑀁 𑀧𑀘𑁆𑀙𑀸𑀲𑀗𑁆𑀔𑀸𑀢𑀲𑁆𑀲 𑀲𑀻𑀲𑀓𑀝𑀸𑀳𑀲𑁆𑀲 𑀘 𑀯𑀲𑁂𑀦 𑀧𑀘𑁆𑀙𑀸 𑀧𑀼𑀭𑁂 𑀅𑀲𑀁𑀔𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀅𑀧𑁆𑀧𑀡𑀺𑀳𑀺𑀢𑀦𑁆𑀢𑀺 𑀧𑀚𑀸𑀦𑀸𑀢𑀺 𑀦𑀸𑀫.

𑀤𑁂𑀲𑀦𑀸𑀬𑀧𑀺 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀤𑁂𑀲𑀦𑀸𑀬 𑀓𑁂𑀲𑀸 𑀧𑀼𑀭𑁂 𑀦𑀸𑀫, 𑀫𑀢𑁆𑀣𑀮𑀼𑀗𑁆𑀕𑀁 𑀧𑀘𑁆𑀙𑀸 𑀦𑀸𑀫. 𑀢𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀓𑁂𑀲𑁂𑀲𑀼 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀯𑀡𑁆𑀡𑀲𑀡𑁆𑀞𑀸𑀦𑀤𑀺𑀲𑁄𑀓𑀸𑀲𑀯𑀲𑁂𑀦 𑀓𑁂𑀲𑀸𑀤𑀬𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀅𑀦𑁆𑀢𑀭𑀸 𑀓𑀺𑀮𑁂𑀲𑀧𑀭𑀺𑀴𑀸𑀳𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀁 𑀯𑀸𑀭𑁂𑀢𑁆𑀯𑀸 𑀬𑀸𑀯 𑀫𑀢𑁆𑀣𑀮𑀼𑀗𑁆𑀕𑀸 𑀪𑀸𑀯𑀦𑀁 𑀧𑀸𑀧𑁂𑀢𑀺. 𑀲𑁄 𑀧𑀼𑀭𑁂𑀲𑀗𑁆𑀔𑀸𑀢𑀸𑀦𑀁 𑀓𑁂𑀲𑀸𑀦𑀁 𑀧𑀘𑁆𑀙𑀸𑀲𑀗𑁆𑀔𑀸𑀢𑀲𑁆𑀲 𑀫𑀢𑁆𑀣𑀮𑀼𑀗𑁆𑀕𑀲𑁆𑀲 𑀘 𑀯𑀲𑁂𑀦 𑀧𑀘𑁆𑀙𑀸 𑀧𑀼𑀭𑁂 𑀅𑀲𑀁𑀔𑀺𑀢𑁆𑀢𑀁 𑀯𑀺𑀫𑀼𑀢𑁆𑀢𑀁 𑀅𑀧𑁆𑀧𑀡𑀺𑀳𑀺𑀢𑀦𑁆𑀢𑀺 𑀧𑀚𑀸𑀦𑀸𑀢𑀺 𑀦𑀸𑀫.

𑀏𑀯𑀁 𑀔𑁄, 𑀆𑀦𑀦𑁆𑀤, 𑀅𑀧𑁆𑀧𑀡𑀺𑀥𑀸𑀬 𑀪𑀸𑀯𑀦𑀸 𑀳𑁄𑀢𑀻𑀢𑀺 𑀏𑀯𑀁, 𑀆𑀦𑀦𑁆𑀤, 𑀅𑀝𑁆𑀞𑀧𑁂𑀢𑁆𑀯𑀸 𑀪𑀸𑀯𑀦𑀸 𑀳𑁄𑀢𑀺. 𑀇𑀫𑀲𑁆𑀲 𑀳𑀺 𑀪𑀺𑀓𑁆𑀔𑀼𑀦𑁄 𑀬𑀣𑀸 𑀦𑀸𑀫 𑀧𑀼𑀭𑀺𑀲𑀲𑁆𑀲 𑀕𑀼𑀴𑀪𑀸𑀭𑀁 𑀮𑀪𑀺𑀢𑁆𑀯𑀸 𑀅𑀢𑁆𑀢𑀦𑁄 𑀕𑀸𑀫𑀁 𑀅𑀢𑀺𑀳𑀭𑀦𑁆𑀢𑀲𑁆𑀲 𑀅𑀦𑁆𑀢𑀭𑀸 𑀅𑀝𑁆𑀞𑀧𑁂𑀢𑁆𑀯𑀸𑀯 𑀉𑀘𑁆𑀘𑀗𑁆𑀕𑁂 𑀧𑀓𑁆𑀔𑀺𑀢𑁆𑀢𑀸𑀦𑀺 𑀕𑀼𑀴𑀔𑀡𑁆𑀟𑀸𑀤𑀻𑀦𑀺 𑀔𑀸𑀤𑀦𑀻𑀬𑀸𑀦𑀺 𑀔𑀸𑀤𑀦𑁆𑀢𑀲𑁆𑀲 𑀅𑀢𑁆𑀢𑀦𑁄 𑀕𑀸𑀫𑁂𑀬𑁂𑀯 𑀑𑀢𑀭𑀡𑀁 𑀳𑁄𑀢𑀺, 𑀏𑀯𑀫𑁂𑀯 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀢𑀼𑀁 𑀆𑀭𑀤𑁆𑀥𑀪𑀸𑀯𑀦𑀲𑁆𑀲 𑀓𑀸𑀬𑀧𑀭𑀺𑀴𑀸𑀳𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀁 𑀯𑀸𑀭𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸 𑀧𑀯𑀢𑁆𑀢𑀸, 𑀢𑀲𑁆𑀫𑀸 ‘‘𑀅𑀧𑁆𑀧𑀡𑀺𑀥𑀸𑀬 𑀪𑀸𑀯𑀦𑀸’’𑀢𑀺 𑀯𑀼𑀢𑁆𑀢𑀸. 𑀢𑀲𑁆𑀲 𑀧𑀦 𑀧𑀼𑀭𑀺𑀲𑀲𑁆𑀲 𑀢𑀁 𑀕𑀼𑀴𑀪𑀸𑀭𑀁 𑀅𑀢𑁆𑀢𑀦𑁄 𑀕𑀸𑀫𑀁 𑀦𑁂𑀢𑁆𑀯𑀸 𑀜𑀸𑀢𑀻𑀳𑀺 𑀲𑀤𑁆𑀥𑀺𑀁 𑀧𑀭𑀺𑀪𑁄𑀕𑁄 𑀯𑀺𑀬 𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀫𑁆𑀫𑀝𑁆𑀞𑀸𑀦𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀲𑁆𑀲 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀸𑀦𑀼𑀪𑀯𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀫𑁆𑀩𑀧𑀸𑀮𑀺𑀯𑀕𑁆𑀕𑁄 𑀧𑀞𑀫𑁄.

𑁨. 𑀦𑀸𑀮𑀦𑁆𑀤𑀯𑀕𑁆𑀕𑁄

𑁨. 𑀦𑀸𑀮𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭𑁮. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 𑀤𑀼𑀢𑀺𑀬𑁂 𑀦𑀸𑀮𑀦𑁆𑀤𑀸𑀬𑀦𑁆𑀢𑀺 𑀦𑀸𑀮𑀦𑁆𑀤𑀸𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂, 𑀢𑀁 𑀦𑀕𑀭𑀁 𑀕𑁄𑀘𑀭𑀕𑀸𑀫𑀁 𑀓𑀢𑁆𑀯𑀸. 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑁂𑀢𑀺 𑀤𑀼𑀲𑁆𑀲𑀧𑀸𑀯𑀸𑀭𑀺𑀓𑀲𑁂𑀝𑁆𑀞𑀺𑀦𑁄 𑀅𑀫𑁆𑀩𑀯𑀦𑁂. 𑀢𑀁 𑀓𑀺𑀭 𑀢𑀲𑁆𑀲 𑀉𑀬𑁆𑀬𑀸𑀦𑀁 𑀅𑀳𑁄𑀲𑀺. 𑀲𑁄 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀪𑀕𑀯𑀢𑀺 𑀧𑀲𑀦𑁆𑀦𑁄 𑀢𑀲𑁆𑀫𑀺𑀁 𑀉𑀬𑁆𑀬𑀸𑀦𑁂 𑀓𑀼𑀝𑀺𑀮𑁂𑀡𑀫𑀡𑁆𑀟𑀧𑀸𑀤𑀺𑀧𑀝𑀺𑀫𑀡𑁆𑀟𑀺𑀢𑀁 𑀪𑀕𑀯𑀢𑁄 𑀯𑀺𑀳𑀸𑀭𑀁 𑀓𑀢𑁆𑀯𑀸 𑀦𑀺𑀬𑁆𑀬𑀸𑀢𑁂𑀲𑀺. 𑀲𑁄 𑀯𑀺𑀳𑀸𑀭𑁄 𑀚𑀻𑀯𑀓𑀫𑁆𑀩𑀯𑀦𑀁 𑀯𑀺𑀬 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑀦𑁆𑀢𑁆𑀯𑁂𑀯 𑀲𑀗𑁆𑀔𑀁 𑀕𑀢𑁄. 𑀢𑀲𑁆𑀫𑀺𑀁 𑀧𑀸𑀯𑀸𑀭𑀺𑀓𑀫𑁆𑀩𑀯𑀦𑁂 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄.

𑀏𑀯𑀁𑀧𑀲𑀦𑁆𑀦𑁄𑀢𑀺 𑀏𑀯𑀁 𑀉𑀧𑁆𑀧𑀦𑁆𑀦𑀲𑀤𑁆𑀥𑁄, 𑀏𑀯𑀁 𑀲𑀤𑁆𑀤𑀳𑀸𑀫𑀻𑀢𑀺 𑀅𑀢𑁆𑀣𑁄. 𑀪𑀺𑀬𑁆𑀬𑁄𑀪𑀺𑀜𑁆𑀜𑀢𑀭𑁄𑀢𑀺 𑀪𑀺𑀬𑁆𑀬𑀢𑀭𑁄 𑀅𑀪𑀺𑀜𑁆𑀜𑀸𑀢𑁄 𑀪𑀺𑀬𑁆𑀬𑀢𑀭𑀸𑀪𑀺𑀬𑁆𑀬𑁄 𑀯𑀸, 𑀉𑀢𑁆𑀢𑀭𑀺𑀢𑀭𑀜𑀸𑀡𑁄𑀢𑀺 𑀅𑀢𑁆𑀣𑁄. 𑀲𑀫𑁆𑀩𑁄𑀥𑀺𑀬𑀦𑁆𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑁂 𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑁂𑀯 𑀳𑀺 𑀩𑀼𑀤𑁆𑀥𑀕𑀼𑀡𑀸 𑀦𑀺𑀧𑁆𑀧𑀤𑁂𑀲𑀸 𑀕𑀳𑀺𑀢𑀸 𑀳𑁄𑀦𑁆𑀢𑀺, 𑀤𑁆𑀯𑁂𑀧𑀺 𑀅𑀕𑁆𑀕𑀲𑀸𑀯𑀓𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑁂𑀯 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑀁 𑀧𑀝𑀺𑀮𑀪𑀦𑁆𑀢𑀺, 𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀧𑀘𑁆𑀘𑁂𑀓𑀩𑁄𑀥𑀺𑀜𑀸𑀡𑀁, 𑀩𑀼𑀤𑁆𑀥𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘𑁂𑀯 𑀲𑀓𑀮𑁂 𑀘 𑀩𑀼𑀤𑁆𑀥𑀕𑀼𑀡𑁂. 𑀲𑀩𑁆𑀩𑀫𑁆𑀧𑀺 𑀦𑁂𑀲𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦𑁂𑀯 𑀇𑀚𑁆𑀛𑀢𑀺. 𑀢𑀲𑁆𑀫𑀸 𑀅𑀭𑀳𑀢𑁆𑀢𑀫𑀕𑁆𑀕𑀜𑀸𑀡𑀁 𑀲𑀫𑁆𑀩𑁄𑀥𑀺 𑀦𑀸𑀫 𑀳𑁄𑀢𑀺. 𑀢𑁂𑀦 𑀉𑀢𑁆𑀢𑀭𑀺𑀢𑀭𑁄 𑀘 𑀪𑀕𑀯𑀢𑀸 𑀦𑀢𑁆𑀣𑀺. 𑀢𑁂𑀦𑀸𑀳 ‘‘𑀪𑀕𑀯𑀢𑀸 𑀪𑀺𑀬𑁆𑀬𑁄𑀪𑀺𑀜𑁆𑀜𑀢𑀭𑁄, 𑀬𑀤𑀺𑀤𑀁 𑀲𑀫𑁆𑀩𑁄𑀥𑀺𑀬’’𑀦𑁆𑀢𑀺.

𑀉𑀴𑀸𑀭𑀸𑀢𑀺 𑀲𑁂𑀝𑁆𑀞𑀸. 𑀅𑀬𑀜𑁆𑀳𑀺 𑀉𑀴𑀸𑀭𑀲𑀤𑁆𑀤𑁄 ‘‘𑀉𑀴𑀸𑀭𑀸𑀦𑀺 𑀔𑀸𑀤𑀦𑀻𑀬𑀸𑀦𑀺 𑀔𑀸𑀤𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁬𑁬) 𑀫𑀥𑀼𑀭𑁂 𑀆𑀕𑀘𑁆𑀙𑀢𑀺. ‘‘𑀉𑀴𑀸𑀭𑀸𑀬 𑀔𑀮𑀼 𑀪𑀯𑀁 𑀯𑀘𑁆𑀙𑀸𑀬𑀦𑁄 𑀲𑀫𑀡𑀁 𑀕𑁄𑀢𑀫𑀁 𑀧𑀲𑀁𑀲𑀸𑀬 𑀧𑀲𑀁𑀲𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁮𑁮) 𑀲𑁂𑀝𑁆𑀞𑁂. ‘‘𑀅𑀧𑁆𑀧𑀫𑀸𑀡𑁄 𑀉𑀴𑀸𑀭𑁄 𑀑𑀪𑀸𑀲𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁩𑁨; 𑀫. 𑀦𑀺. 𑁩.𑁨𑁦𑁧) 𑀯𑀺𑀧𑀼𑀮𑁂. 𑀲𑁆𑀯𑀸𑀬𑀫𑀺𑀥 𑀲𑁂𑀝𑁆𑀞𑁂 𑀆𑀕𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀉𑀴𑀸𑀭𑀸𑀢𑀺 𑀲𑁂𑀝𑁆𑀞𑀸’’𑀢𑀺. 𑀆𑀲𑀪𑀻𑀢𑀺 𑀉𑀲𑀪𑀲𑁆𑀲 𑀯𑀸𑀘𑀸𑀲𑀤𑀺𑀲𑀻 𑀅𑀘𑀮𑀸 𑀅𑀲𑀫𑁆𑀧𑀯𑁂𑀥𑀻. 𑀏𑀓𑀁𑀲𑁄 𑀕𑀳𑀺𑀢𑁄𑀢𑀺 𑀅𑀦𑀼𑀲𑁆𑀲𑀯𑁂𑀦 𑀯𑀸 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀯𑀸 𑀇𑀢𑀺𑀓𑀺𑀭𑀸𑀬 𑀯𑀸 𑀧𑀺𑀝𑀓𑀲𑀫𑁆𑀧𑀤𑀸𑀦𑁂𑀦 𑀯𑀸 𑀆𑀓𑀸𑀭𑀧𑀭𑀺𑀯𑀺𑀢𑀓𑁆𑀓𑁂𑀦 𑀯𑀸 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀬𑀸 𑀯𑀸 𑀢𑀓𑁆𑀓𑀳𑁂𑀢𑀼 𑀯𑀸 𑀦𑀬𑀳𑁂𑀢𑀼 𑀯𑀸 𑀅𑀓𑀣𑁂𑀢𑁆𑀯𑀸 𑀧𑀘𑁆𑀘𑀓𑁆𑀔𑀢𑁄 𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀯𑀺𑀬 𑀏𑀓𑀁𑀲𑁄 𑀕𑀳𑀺𑀢𑁄, 𑀲𑀦𑁆𑀦𑀺𑀝𑁆𑀞𑀸𑀦𑀓𑀣𑀸𑀯 𑀓𑀣𑀺𑀢𑀸𑀢𑀺 𑀅𑀢𑁆𑀣𑁄. 𑀲𑀻𑀳𑀦𑀸𑀤𑁄𑀢𑀺 𑀲𑁂𑀝𑁆𑀞𑀦𑀸𑀤𑁄, 𑀯𑀦𑁂 𑀉𑀦𑁆𑀦𑀸𑀤𑀬𑀦𑁆𑀢𑁂𑀦 𑀲𑀻𑀳𑁂𑀦 𑀯𑀺𑀬 𑀉𑀢𑁆𑀢𑀫𑀦𑀸𑀤𑁄 𑀦𑀤𑀺𑀢𑁄𑀢𑀺 𑀅𑀢𑁆𑀣𑁄.

𑀓𑀺𑀁 𑀦𑀼 𑀢𑁂 𑀲𑀸𑀭𑀺𑀧𑀼𑀢𑁆𑀢𑀸𑀢𑀺 𑀇𑀫𑀁 𑀤𑁂𑀲𑀦𑀁 𑀓𑀲𑁆𑀫𑀸 𑀆𑀭𑀪𑀺? 𑀅𑀦𑀼𑀬𑁄𑀕𑀤𑀸𑀧𑀦𑀢𑁆𑀣𑀁. 𑀏𑀓𑀘𑁆𑀘𑁄 𑀳𑀺 𑀲𑀻𑀳𑀦𑀸𑀤𑀁 𑀦𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀲𑀻𑀳𑀦𑀸𑀤𑁂 𑀅𑀦𑀼𑀬𑁄𑀕𑀁 𑀤𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀦𑀺𑀖𑀁𑀲𑀦𑀁 𑀦 𑀔𑀫𑀢𑀺, 𑀲𑀺𑀮𑁂𑀲𑁂 𑀧𑀢𑀺𑀢𑀫𑀓𑁆𑀓𑀝𑁄 𑀯𑀺𑀬 𑀳𑁄𑀢𑀺. 𑀬𑀣𑀸 𑀥𑀫𑀫𑀸𑀦𑀁 𑀅𑀧𑀭𑀺𑀲𑀼𑀤𑁆𑀥𑀁 𑀮𑁄𑀳𑀁 𑀛𑀸𑀬𑀺𑀢𑁆𑀯𑀸 𑀅𑀗𑁆𑀕𑀸𑀭𑁄 𑀳𑁄𑀢𑀺, 𑀏𑀯𑀁 𑀛𑀸𑀫𑀗𑁆𑀕𑀸𑀭𑁄 𑀯𑀺𑀬 𑀳𑁄𑀢𑀺. 𑀏𑀓𑁄 𑀲𑀻𑀳𑀦𑀸𑀤𑁂 𑀅𑀦𑀼𑀬𑁄𑀕𑀁 𑀤𑀸𑀧𑀺𑀬𑀫𑀸𑀦𑁄 𑀤𑀸𑀢𑀼𑀁 𑀲𑀓𑁆𑀓𑁄𑀢𑀺, 𑀦𑀺𑀖𑀁𑀲𑀦𑀁 𑀔𑀫𑀢𑀺, 𑀥𑀫𑀫𑀸𑀦𑀁 𑀦𑀺𑀤𑁆𑀤𑁄𑀲𑀚𑀸𑀢𑀭𑀽𑀧𑀁 𑀯𑀺𑀬 𑀅𑀥𑀺𑀓𑀢𑀭𑀁 𑀲𑁄𑀪𑀢𑀺, 𑀢𑀸𑀤𑀺𑀲𑁄 𑀣𑁂𑀭𑁄. 𑀢𑁂𑀦 𑀦𑀁 𑀪𑀕𑀯𑀸 ‘‘𑀅𑀦𑀼𑀬𑁄𑀕𑀓𑁆𑀔𑀫𑁄 𑀅𑀬’’𑀦𑁆𑀢𑀺 𑀜𑀢𑁆𑀯𑀸 𑀲𑀻𑀳𑀦𑀸𑀤𑁂 𑀅𑀦𑀼𑀬𑁄𑀕𑀤𑀸𑀧𑀦𑀢𑁆𑀣𑀁 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺.

𑀢𑀢𑁆𑀣 𑀲𑀩𑁆𑀩𑁂 𑀢𑁂𑀢𑀺 𑀲𑀩𑁆𑀩𑁂 𑀢𑁂 𑀢𑀬𑀸. 𑀏𑀯𑀁𑀲𑀻𑀮𑀸𑀢𑀺 𑀫𑀕𑁆𑀕𑀲𑀻𑀮𑁂𑀦 𑀨𑀮𑀲𑀻𑀮𑁂𑀦 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀻𑀮𑁂𑀦 𑀏𑀯𑀁𑀲𑀻𑀮𑀸. 𑀏𑀯𑀁𑀥𑀫𑁆𑀫𑀸𑀢𑀺 𑀏𑀢𑁆𑀣 𑀲𑀫𑀸𑀥𑀺𑀧𑀓𑁆𑀔𑀸 𑀥𑀫𑁆𑀫𑀸 𑀅𑀥𑀺𑀧𑁆𑀧𑁂𑀢𑀸, 𑀫𑀕𑁆𑀕𑀲𑀫𑀸𑀥𑀺𑀦𑀸 𑀨𑀮𑀲𑀫𑀸𑀥𑀺𑀦𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂𑀦 𑀲𑀫𑀸𑀥𑀺𑀦𑀸 𑀏𑀯𑀁𑀲𑀫𑀸𑀥𑀻𑀢𑀺 𑀅𑀢𑁆𑀣𑁄. 𑀏𑀯𑀁𑀧𑀜𑁆𑀜𑀸𑀢𑀺 𑀫𑀕𑁆𑀕𑀧𑀜𑁆𑀜𑀸𑀤𑀺𑀯𑀲𑁂𑀦𑁂𑀯 𑀏𑀯𑀁𑀧𑀜𑁆𑀜𑀸. 𑀏𑀯𑀁𑀯𑀺𑀳𑀸𑀭𑀺𑀦𑁄𑀢𑀺 𑀏𑀢𑁆𑀣 𑀧𑀦 𑀳𑁂𑀝𑁆𑀞𑀸 𑀲𑀫𑀸𑀥𑀺𑀧𑀓𑁆𑀔𑀸𑀦𑀁 𑀥𑀫𑁆𑀫𑀸𑀦𑀁 𑀕𑀳𑀺𑀢𑀢𑁆𑀢𑀸 𑀯𑀺𑀳𑀸𑀭𑁄 𑀕𑀳𑀺𑀢𑁄𑀧𑀺 𑀧𑀼𑀦 𑀓𑀲𑁆𑀫𑀸 𑀕𑀳𑀺𑀢𑀫𑁂𑀯 𑀕𑀡𑁆𑀳𑀢𑀻𑀢𑀺 𑀘𑁂. 𑀣𑁂𑀭𑁂𑀦 𑀇𑀤𑀁 𑀕𑀳𑀺𑀢𑀫𑁂𑀯. 𑀇𑀤𑀜𑁆𑀳𑀺 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀏𑀯𑀁 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀺𑀦𑁄 𑀢𑁂 𑀪𑀕𑀯𑀦𑁆𑀢𑁄 𑀅𑀳𑁂𑀲𑀼𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀏𑀯𑀁𑀯𑀺𑀫𑀼𑀢𑁆𑀢𑀸𑀢𑀺 𑀏𑀢𑁆𑀣 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀺, 𑀢𑀤𑀗𑁆𑀕𑀯𑀺𑀫𑀼𑀢𑁆𑀢𑀺, 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀺, 𑀧𑀝𑀺𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀺, 𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀻𑀢𑀺 𑀧𑀜𑁆𑀘𑀯𑀺𑀥𑀸 𑀯𑀺𑀫𑀼𑀢𑁆𑀢𑀺. 𑀢𑀢𑁆𑀣 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀲𑀬𑀁 𑀯𑀺𑀓𑁆𑀔𑀫𑁆𑀪𑀺𑀢𑁂𑀳𑀺 𑀦𑀻𑀯𑀭𑀡𑀸𑀤𑀻𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀻𑀢𑀺 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺𑀓𑀸 𑀲𑀢𑁆𑀢 𑀅𑀦𑀼𑀧𑀲𑁆𑀲𑀦𑀸 𑀲𑀬𑀁 𑀢𑀲𑁆𑀲 𑀢𑀲𑁆𑀲 𑀧𑀘𑁆𑀘𑀦𑀻𑀓𑀯𑀲𑁂𑀦 𑀧𑀭𑀺𑀘𑁆𑀘𑀢𑁆𑀢𑀸𑀳𑀺 𑀦𑀺𑀘𑁆𑀘𑀲𑀜𑁆𑀜𑀸𑀤𑀻𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀢𑀤𑀗𑁆𑀕𑀯𑀺𑀫𑀼𑀢𑁆𑀢𑀻𑀢𑀺 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺. 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸 𑀲𑀬𑀁 𑀲𑀫𑀼𑀘𑁆𑀙𑀺𑀦𑁆𑀦𑁂𑀳𑀺 𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀲𑀫𑀼𑀘𑁆𑀙𑁂𑀤𑀯𑀺𑀫𑀼𑀢𑁆𑀢𑀻𑀢𑀺 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺. 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀫𑀕𑁆𑀕𑀸𑀦𑀼𑀪𑀸𑀯𑁂𑀦 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑀲𑁆𑀲𑀤𑁆𑀥𑀦𑁆𑀢𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀧𑀝𑀺𑀧𑀲𑁆𑀲𑀤𑁆𑀥𑀺𑀯𑀺𑀫𑀼𑀢𑁆𑀢𑀻𑀢𑀺 𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺. 𑀦𑀺𑀩𑁆𑀩𑀸𑀦𑀁 𑀲𑀩𑁆𑀩𑀓𑀺𑀮𑁂𑀲𑁂𑀳𑀺 𑀦𑀺𑀲𑁆𑀲𑀝𑀢𑁆𑀢𑀸 𑀅𑀧𑀕𑀢𑀢𑁆𑀢𑀸 𑀤𑀽𑀭𑁂 𑀞𑀺𑀢𑀢𑁆𑀢𑀸 𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀻𑀢𑀺 𑀲𑀗𑁆𑀔𑀁 𑀕𑀢𑀁. 𑀇𑀢𑀺 𑀇𑀫𑀸𑀲𑀁 𑀧𑀜𑁆𑀘𑀦𑁆𑀦𑀁 𑀯𑀺𑀫𑀼𑀢𑁆𑀢𑀻𑀦𑀁 𑀯𑀲𑁂𑀦 𑀏𑀯𑀁 𑀯𑀺𑀫𑀼𑀢𑁆𑀢𑀸𑀢𑀺 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀓𑀺𑀁 𑀧𑀦 𑀢𑁂 𑀲𑀸𑀭𑀺𑀧𑀼𑀢𑁆𑀢 𑀬𑁂 𑀢𑁂 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑀻𑀢𑀸 𑀢𑀸𑀯 𑀦𑀺𑀭𑀼𑀤𑁆𑀥𑀸 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀁 𑀕𑀢𑀸 𑀤𑀻𑀧𑀲𑀺𑀔𑀸 𑀯𑀺𑀬 𑀦𑀺𑀩𑁆𑀩𑀼𑀢𑀸, 𑀏𑀯𑀁 𑀦𑀺𑀭𑀼𑀤𑁆𑀥𑁂 𑀅𑀧𑀡𑁆𑀡𑀢𑁆𑀢𑀺𑀓𑀪𑀸𑀯𑀁 𑀕𑀢𑁂 𑀢𑁆𑀯𑀁 𑀓𑀣𑀁 𑀚𑀸𑀦𑀺𑀲𑁆𑀲𑀲𑀺, 𑀅𑀦𑀸𑀕𑀢𑀩𑀼𑀤𑁆𑀥𑀸𑀦𑀁 𑀧𑀦 𑀕𑀼𑀡𑀸 𑀓𑀺𑀁 𑀢𑀬𑀸 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀺𑀤𑀺𑀢𑀸𑀢𑀺 𑀧𑀼𑀘𑁆𑀙𑀦𑁆𑀢𑁄 𑀏𑀯𑀫𑀸𑀳.

𑀓𑀺𑀁 𑀧𑀦 𑀢𑁆𑀬𑀸𑀳𑀁 𑀲𑀸𑀭𑀺𑀧𑀼𑀢𑁆𑀢 𑀏𑀢𑀭𑀳𑀻𑀢𑀺 𑀅𑀦𑀸𑀕𑀢𑀸𑀧𑀺 𑀩𑀼𑀤𑁆𑀥𑀸 𑀅𑀚𑀸𑀢𑀸 𑀅𑀦𑀺𑀩𑁆𑀩𑀢𑁆𑀢𑀸 𑀅𑀦𑀼𑀧𑁆𑀧𑀦𑁆𑀦𑀸, 𑀢𑁂 𑀓𑀣𑀁 𑀚𑀸𑀦𑀺𑀲𑁆𑀲𑀲𑀺. 𑀢𑁂𑀲𑀜𑁆𑀳𑀺 𑀚𑀸𑀦𑀦𑀁 𑀅𑀧𑀤𑁂 𑀆𑀓𑀸𑀲𑁂 𑀧𑀤𑀤𑀲𑁆𑀲𑀦𑀁 𑀯𑀺𑀬 𑀳𑁄𑀢𑀺. 𑀇𑀤𑀸𑀦𑀺 𑀫𑀬𑀸 𑀲𑀤𑁆𑀥𑀺𑀁 𑀏𑀓𑀯𑀺𑀳𑀸𑀭𑁂 𑀯𑀲𑀲𑀺, 𑀏𑀓𑀢𑁄 𑀪𑀺𑀓𑁆𑀔𑀸𑀬 𑀘𑀭𑀲𑀺, 𑀥𑀫𑁆𑀫𑀤𑁂𑀲𑀦𑀸𑀓𑀸𑀮𑁂 𑀤𑀓𑁆𑀔𑀺𑀡𑀧𑀲𑁆𑀲𑁂 𑀦𑀺𑀲𑀻𑀤𑀲𑀺, 𑀓𑀺𑀁 𑀧𑀦 𑀫𑀬𑁆𑀳𑀁 𑀕𑀼𑀡𑀸 𑀅𑀢𑁆𑀢𑀦𑁄 𑀘𑁂𑀢𑀲𑀸 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀺𑀤𑀺𑀢𑀸 𑀢𑀬𑀸𑀢𑀺 𑀅𑀦𑀼𑀬𑀼𑀜𑁆𑀚𑀦𑁆𑀢𑁄 𑀏𑀯𑀫𑀸𑀳. 𑀣𑁂𑀭𑁄 𑀧𑀦 𑀧𑀼𑀘𑁆𑀙𑀺𑀢𑀧𑀼𑀘𑁆𑀙𑀺𑀢𑁂 ‘‘𑀦𑁄 𑀳𑁂𑀢𑀁 𑀪𑀦𑁆𑀢𑁂’’𑀢𑀺 𑀧𑀝𑀺𑀓𑁆𑀔𑀺𑀧𑀢𑀺.

𑀣𑁂𑀭𑀲𑁆𑀲 𑀘 𑀯𑀺𑀤𑀺𑀢𑀫𑁆𑀧𑀺 𑀅𑀢𑁆𑀣𑀺, 𑀅𑀯𑀺𑀤𑀺𑀢𑀫𑁆𑀧𑀺. 𑀓𑀺𑀁 𑀲𑁄 𑀅𑀢𑁆𑀢𑀦𑁄 𑀯𑀺𑀤𑀺𑀢𑀝𑁆𑀞𑀸𑀦𑁂 𑀧𑀝𑀺𑀓𑁆𑀔𑁂𑀧𑀁 𑀓𑀭𑁄𑀢𑀺, 𑀅𑀯𑀺𑀤𑀺𑀢𑀝𑁆𑀞𑀸𑀦𑁂𑀢𑀺? 𑀯𑀺𑀤𑀺𑀢𑀝𑁆𑀞𑀸𑀦𑁂 𑀦 𑀓𑀭𑁄𑀢𑀺, 𑀅𑀯𑀺𑀤𑀺𑀢𑀝𑁆𑀞𑀸𑀦𑁂𑀬𑁂𑀯 𑀓𑀭𑁄𑀢𑀺. 𑀣𑁂𑀭𑁄 𑀓𑀺𑀭 𑀅𑀦𑀼𑀬𑁄𑀕𑁂 𑀆𑀭𑀤𑁆𑀥𑁂 𑀏𑀯𑀁 𑀅𑀜𑁆𑀜𑀸𑀲𑀺 ‘‘𑀦𑀸𑀬𑀁 𑀅𑀦𑀼𑀬𑁄𑀕𑁄 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑁂, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂 𑀧𑀦 𑀅𑀬𑀁 𑀅𑀦𑀼𑀬𑁄𑀕𑁄’’𑀢𑀺 𑀅𑀢𑁆𑀢𑀦𑁄 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑁂 𑀧𑀝𑀺𑀓𑁆𑀔𑁂𑀧𑀁 𑀅𑀓𑀢𑁆𑀯𑀸𑀯 𑀅𑀯𑀺𑀤𑀺𑀢𑀝𑁆𑀞𑀸𑀦𑁂 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂 𑀧𑀝𑀺𑀓𑁆𑀔𑁂𑀧𑀁 𑀓𑀭𑁄𑀢𑀺. 𑀢𑁂𑀦 𑀇𑀤𑀫𑁆𑀧𑀺 𑀤𑀻𑀧𑁂𑀢𑀺 𑁋 𑀪𑀕𑀯𑀸 𑀫𑀬𑁆𑀳𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀩𑀼𑀤𑁆𑀥𑀸𑀦𑀁 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀓𑀸𑀭𑀡𑀚𑀸𑀦𑀦𑀲𑀫𑀢𑁆𑀣𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀦𑀢𑁆𑀣𑀻𑀢𑀺.

𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀅𑀢𑀻𑀢𑀸𑀤𑀺𑀪𑁂𑀤𑁂𑀲𑀼 𑀩𑀼𑀤𑁆𑀥𑁂𑀲𑀼. 𑀅𑀣 𑀓𑀺𑀜𑁆𑀘𑀭𑀳𑀻𑀢𑀺 𑀅𑀣 𑀓𑀲𑁆𑀫𑀸 𑀏𑀯𑀁 𑀜𑀸𑀡𑁂 𑀅𑀲𑀢𑀺 𑀢𑀬𑀸 𑀏𑀯𑀁 𑀓𑀣𑀺𑀢𑀦𑁆𑀢𑀺 𑀯𑀤𑀢𑀺. 𑀥𑀫𑁆𑀫𑀦𑁆𑀯𑀬𑁄𑀢𑀺 𑀥𑀫𑁆𑀫𑀲𑁆𑀲 𑀧𑀘𑁆𑀘𑀓𑁆𑀔𑀢𑁄 𑀜𑀸𑀡𑀲𑁆𑀲 𑀅𑀦𑀼𑀬𑁄𑀕𑀁 𑀅𑀦𑀼𑀕𑀦𑁆𑀢𑁆𑀯𑀸 𑀉𑀧𑁆𑀧𑀦𑁆𑀦𑀁 𑀅𑀦𑀼𑀫𑀸𑀦𑀜𑀸𑀡𑀁 𑀦𑀬𑀕𑁆𑀕𑀸𑀳𑁄 𑀯𑀺𑀤𑀺𑀢𑁄, 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑁂 𑀞𑀢𑁆𑀯𑀸𑀯 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀚𑀸𑀦𑀸𑀫𑀺 𑀪𑀕𑀯𑀸𑀢𑀺 𑀯𑀤𑀢𑀺. 𑀣𑁂𑀭𑀲𑁆𑀲 𑀳𑀺 𑀦𑀬𑀕𑁆𑀕𑀸𑀳𑁄 𑀅𑀧𑁆𑀧𑀫𑀸𑀡𑁄 𑀅𑀧𑀭𑀺𑀬𑀦𑁆𑀢𑁄. 𑀬𑀣𑀸 𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀧𑀫𑀸𑀡𑀁 𑀯𑀸 𑀧𑀭𑀺𑀬𑀦𑁆𑀢𑁄 𑀯𑀸 𑀦𑀢𑁆𑀣𑀺, 𑀏𑀯𑀁 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑁄 𑀦𑀬𑀕𑁆𑀕𑀸𑀳𑀲𑁆𑀲. 𑀢𑁂𑀦 𑀲𑁄 𑁋 ‘‘𑀇𑀫𑀺𑀦𑀸 𑀏𑀯𑀁𑀯𑀺𑀥𑁄 𑀇𑀫𑀺𑀦𑀸 𑀏𑀯𑀁𑀯𑀺𑀥𑁄, 𑀇𑀫𑀺𑀦𑀸 𑀅𑀦𑀼𑀢𑁆𑀢𑀭𑁄 𑀇𑀫𑀺𑀦𑀸 𑀅𑀦𑀼𑀢𑁆𑀢𑀭𑁄 𑀲𑀢𑁆𑀣𑀸’’𑀢𑀺 𑀚𑀸𑀦𑀸𑀢𑀺. 𑀣𑁂𑀭𑀲𑁆𑀲 𑀳𑀺 𑀦𑀬𑀕𑁆𑀕𑀸𑀳𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀕𑀢𑀺𑀓𑁄 𑀏𑀯.

𑀇𑀤𑀸𑀦𑀺 𑀢𑀁 𑀦𑀬𑀕𑁆𑀕𑀸𑀳𑀁 𑀧𑀸𑀓𑀝𑀁 𑀓𑀸𑀢𑀼𑀁 𑀉𑀧𑀫𑀁 𑀤𑀲𑁆𑀲𑁂𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀺 𑀪𑀦𑁆𑀢𑁂𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑁆𑀫𑀸 𑀫𑀚𑁆𑀛𑀺𑀫𑀤𑁂𑀲𑁂 𑀦𑀕𑀭𑀲𑁆𑀲 𑀉𑀤𑁆𑀥𑀸𑀧𑀧𑀸𑀓𑀸𑀭𑀸𑀤𑀻𑀦𑀺 𑀣𑀺𑀭𑀸𑀦𑀺 𑀯𑀸 𑀳𑁄𑀦𑁆𑀢𑀼 𑀤𑀼𑀩𑁆𑀩𑀮𑀸𑀦𑀺 𑀯𑀸, 𑀲𑀩𑁆𑀩𑀲𑁄 𑀯𑀸 𑀧𑀦 𑀫𑀸 𑀳𑁄𑀦𑁆𑀢𑀼, 𑀘𑁄𑀭𑀸𑀦𑀁 𑀆𑀲𑀗𑁆𑀓𑀸 𑀦 𑀳𑁄𑀢𑀺. 𑀢𑀲𑁆𑀫𑀸 𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀘𑁆𑀘𑀦𑁆𑀢𑀺𑀫𑀁 𑀦𑀕𑀭𑀦𑁆𑀢𑀺 𑀆𑀳. 𑀤𑀴𑁆𑀳𑀼𑀤𑁆𑀥𑀸𑀧𑀦𑁆𑀢𑀺 𑀣𑀺𑀭𑀫𑀽𑀮𑀧𑀸𑀓𑀸𑀭𑀁. 𑀤𑀴𑁆𑀳𑀧𑀸𑀓𑀸𑀭𑀢𑁄𑀭𑀡𑀦𑁆𑀢𑀺 𑀣𑀺𑀭𑀧𑀸𑀓𑀸𑀭𑀜𑁆𑀘𑁂𑀯 𑀣𑀺𑀭𑀧𑀺𑀝𑁆𑀞𑀲𑀗𑁆𑀖𑀸𑀝𑀜𑁆𑀘. 𑀏𑀓𑀤𑁆𑀯𑀸𑀭𑀦𑁆𑀢𑀺 𑀓𑀲𑁆𑀫𑀸 𑀆𑀳? 𑀩𑀳𑀼𑀤𑁆𑀯𑀸𑀭𑁂 𑀳𑀺 𑀦𑀕𑀭𑁂 𑀩𑀳𑀽𑀳𑀺 𑀧𑀡𑁆𑀟𑀺𑀢𑀤𑁄𑀯𑀸𑀭𑀺𑀓𑁂𑀳𑀺 𑀪𑀯𑀺𑀢𑀩𑁆𑀩𑀁, 𑀏𑀓𑀤𑁆𑀯𑀸𑀭𑁂𑀯 𑀏𑀓𑁄 𑀯𑀝𑁆𑀝𑀢𑀺. 𑀣𑁂𑀭𑀲𑁆𑀲 𑀘 𑀧𑀜𑁆𑀜𑀸𑀬 𑀲𑀤𑀺𑀲𑁄 𑀅𑀜𑁆𑀜𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀧𑀡𑁆𑀟𑀺𑀢𑀪𑀸𑀯𑀲𑁆𑀲 𑀑𑀧𑀫𑁆𑀫𑀢𑁆𑀣𑀁 𑀏𑀓𑀁𑀬𑁂𑀯 𑀤𑁄𑀯𑀸𑀭𑀺𑀓𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀓𑀤𑁆𑀯𑀸𑀭’’𑀦𑁆𑀢𑀺 𑀆𑀳.

𑀧𑀡𑁆𑀟𑀺𑀢𑁄𑀢𑀺 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀩𑁆𑀬𑀢𑁆𑀢𑁄𑀢𑀺 𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀲𑀫𑀦𑁆𑀦𑀸𑀕𑀢𑁄 𑀯𑀺𑀲𑀤𑀜𑀸𑀡𑁄. 𑀫𑁂𑀥𑀸𑀯𑀻𑀢𑀺 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀜𑁆𑀜𑀸𑀲𑀗𑁆𑀔𑀸𑀢𑀸𑀬 𑀫𑁂𑀥𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀅𑀦𑀼𑀧𑀭𑀺𑀬𑀸𑀬𑀧𑀣𑀦𑁆𑀢𑀺 𑀅𑀦𑀼𑀧𑀭𑀺𑀬𑀸𑀬𑀦𑀸𑀫𑀓𑀁 𑀧𑀸𑀓𑀸𑀭𑀫𑀕𑁆𑀕𑀁. 𑀧𑀸𑀓𑀸𑀭𑀲𑀦𑁆𑀥𑀺𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀇𑀝𑁆𑀞𑀓𑀸𑀦𑀁 𑀅𑀧𑀕𑀢𑀝𑁆𑀞𑀸𑀦𑀁. 𑀧𑀸𑀓𑀸𑀭𑀯𑀺𑀯𑀭𑀦𑁆𑀢𑀺 𑀧𑀸𑀓𑀸𑀭𑀲𑁆𑀲 𑀙𑀺𑀦𑁆𑀦𑀝𑁆𑀞𑀸𑀦𑀁. 𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑁂𑀢𑀺 𑀧𑀜𑁆𑀘𑀦𑀻𑀯𑀭𑀡𑀸 𑀘𑀺𑀢𑁆𑀢𑀁 𑀉𑀧𑀓𑁆𑀓𑀺𑀮𑀺𑀲𑁆𑀲𑀦𑁆𑀢𑀺 𑀓𑀺𑀮𑀺𑀝𑁆𑀞𑀁 𑀓𑀭𑁄𑀦𑁆𑀢𑀺 𑀉𑀧𑀢𑀸𑀧𑁂𑀦𑁆𑀢𑀺 𑀯𑀺𑀳𑁂𑀞𑁂𑀦𑁆𑀢𑀺, 𑀢𑀲𑁆𑀫𑀸 ‘‘𑀘𑁂𑀢𑀲𑁄 𑀉𑀧𑀓𑁆𑀓𑀺𑀮𑁂𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑁂𑀢𑀺 𑀦𑀻𑀯𑀭𑀡𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀼𑀧𑁆𑀧𑀦𑁆𑀦𑀸𑀬 𑀧𑀜𑁆𑀜𑀸𑀬 𑀉𑀧𑁆𑀧𑀚𑁆𑀚𑀺𑀢𑀼𑀁 𑀦 𑀤𑁂𑀦𑁆𑀢𑀺, 𑀢𑀲𑁆𑀫𑀸 ‘‘𑀧𑀜𑁆𑀜𑀸𑀬 𑀤𑀼𑀩𑁆𑀩𑀮𑀻𑀓𑀭𑀡𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀲𑀼𑀧𑀢𑀺𑀝𑁆𑀞𑀺𑀢𑀘𑀺𑀢𑁆𑀢𑀸𑀢𑀺 𑀘𑀢𑀽𑀲𑀼 𑀲𑀢𑀺𑀧𑀝𑁆𑀞𑀸𑀦𑁂𑀲𑀼 𑀲𑀼𑀝𑁆𑀞𑀼 𑀞𑀧𑀺𑀢𑀘𑀺𑀢𑁆𑀢𑀸 𑀳𑀼𑀢𑁆𑀯𑀸. 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀬𑀣𑀸𑀪𑀽𑀢𑀦𑁆𑀢𑀺 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑁂 𑀬𑀣𑀸𑀲𑀪𑀸𑀯𑁂𑀦 𑀪𑀸𑀯𑁂𑀢𑁆𑀯𑀸. 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀦𑁆𑀢𑀺 𑀅𑀭𑀳𑀢𑁆𑀢𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀧𑀝𑀺𑀯𑀺𑀚𑁆𑀛𑀺𑀁𑀲𑀽𑀢𑀺 𑀤𑀲𑁆𑀲𑁂𑀢𑀺.

𑀅𑀧𑀺𑀘𑁂𑀢𑁆𑀣 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀯𑀺𑀧𑀲𑁆𑀲𑀦𑀸, 𑀩𑁄𑀚𑁆𑀛𑀗𑁆𑀕𑀸 𑀫𑀕𑁆𑀕𑁄, 𑀅𑀦𑀼𑀢𑁆𑀢𑀭𑀲𑀫𑁆𑀫𑀸𑀲𑀫𑁆𑀩𑁄𑀥𑀺 𑀅𑀭𑀳𑀢𑁆𑀢𑀁. 𑀲𑀢𑀺𑀧𑀝𑁆𑀞𑀸𑀦𑀸𑀢𑀺 𑀯𑀸 𑀯𑀺𑀧𑀲𑁆𑀲𑀦𑀸, 𑀩𑁄𑀚𑁆𑀛𑀗𑁆𑀕𑀸𑀫𑀺𑀲𑁆𑀲𑀓𑀸, 𑀲𑀫𑁆𑀫𑀸𑀲𑀫𑁆𑀩𑁄𑀥𑀺 𑀅𑀭𑀳𑀢𑁆𑀢𑀫𑁂𑀯. 𑀤𑀻𑀖𑀪𑀸𑀡𑀓𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦𑀸𑀳 ‘‘𑀲𑀢𑀺𑀧𑀝𑁆𑀞𑀸𑀦𑁂 𑀯𑀺𑀧𑀲𑁆𑀲𑀦𑀁 𑀕𑀳𑁂𑀢𑁆𑀯𑀸 𑀩𑁄𑀚𑁆𑀛𑀗𑁆𑀕𑁂 𑀫𑀕𑁆𑀕𑁄 𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀜𑁆𑀘𑀸𑀢𑀺 𑀕𑀳𑀺𑀢𑁂 𑀲𑀼𑀦𑁆𑀤𑀭𑁄 𑀧𑀜𑁆𑀳𑁄 𑀪𑀯𑁂𑀬𑁆𑀬, 𑀦 𑀧𑀦𑁂𑀯𑀁 𑀕𑀳𑀺𑀢’’𑀦𑁆𑀢𑀺. 𑀇𑀢𑀺 𑀣𑁂𑀭𑁄 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀦𑀻𑀯𑀭𑀡𑀧𑁆𑀧𑀳𑀸𑀦𑁂 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀬 𑀲𑀫𑁆𑀩𑁄𑀥𑀺𑀬𑀜𑁆𑀘 𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡𑀭𑀚𑀢𑀸𑀦𑀁 𑀯𑀺𑀬 𑀦𑀸𑀦𑀢𑁆𑀢𑀸𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀇𑀥 𑀞𑀢𑁆𑀯𑀸 𑀉𑀧𑀫𑀸 𑀲𑀁𑀲𑀦𑁆𑀤𑁂𑀢𑀩𑁆𑀩𑀸 𑁋 𑀆𑀬𑀲𑁆𑀫𑀸 𑀳𑀺 𑀲𑀸𑀭𑀺𑀧𑀼𑀢𑁆𑀢𑁄 𑀧𑀘𑁆𑀘𑀦𑁆𑀢𑀦𑀕𑀭𑀁 𑀤𑀲𑁆𑀲𑁂𑀲𑀺, 𑀧𑀸𑀓𑀸𑀭𑀁 𑀤𑀲𑁆𑀲𑁂𑀲𑀺, 𑀅𑀦𑀼𑀧𑀭𑀺𑀬𑀸𑀬𑀧𑀣𑀁 𑀤𑀲𑁆𑀲𑁂𑀲𑀺, 𑀤𑁆𑀯𑀸𑀭𑀁 𑀤𑀲𑁆𑀲𑁂𑀲𑀺, 𑀧𑀡𑁆𑀟𑀺𑀢𑀤𑁄𑀯𑀸𑀭𑀺𑀓𑀁 𑀤𑀲𑁆𑀲𑁂𑀲𑀺, 𑀦𑀕𑀭𑀁 𑀧𑀯𑀺𑀲𑀦𑀓𑀦𑀺𑀓𑁆𑀔𑀫𑀦𑀓𑁂 𑀑𑀴𑀸𑀭𑀺𑀓𑁂 𑀧𑀸𑀡𑁂 𑀤𑀲𑁆𑀲𑁂𑀲𑀺, 𑀤𑁄𑀯𑀸𑀭𑀺𑀓𑀲𑁆𑀲 𑀢𑁂𑀲𑀁 𑀧𑀸𑀡𑀸𑀦𑀁 𑀧𑀸𑀓𑀝𑀪𑀸𑀯𑀁 𑀤𑀲𑁆𑀲𑁂𑀲𑀺. 𑀢𑀢𑁆𑀣 𑀓𑀺𑀁 𑀓𑁂𑀦 𑀲𑀤𑀺𑀲𑀦𑁆𑀢𑀺 𑀘𑁂? 𑀦𑀕𑀭𑀁 𑀯𑀺𑀬 𑀳𑀺 𑀦𑀺𑀩𑁆𑀩𑀸𑀦𑀁, 𑀧𑀸𑀓𑀸𑀭𑁄 𑀯𑀺𑀬 𑀲𑀻𑀮𑀁, 𑀅𑀦𑀼𑀧𑀭𑀺𑀬𑀸𑀬𑀧𑀣𑁄 𑀯𑀺𑀬 𑀳𑀺𑀭𑀻, 𑀤𑁆𑀯𑀸𑀭𑀁 𑀯𑀺𑀬 𑀅𑀭𑀺𑀬𑀫𑀕𑁆𑀕𑁄, 𑀧𑀡𑁆𑀟𑀺𑀢𑀤𑁄𑀯𑀸𑀭𑀺𑀓𑁄 𑀯𑀺𑀬 𑀥𑀫𑁆𑀫𑀲𑁂𑀦𑀸𑀧𑀢𑀺, 𑀦𑀕𑀭𑀁 𑀧𑀯𑀺𑀲𑀦𑀓𑀦𑀺𑀓𑁆𑀔𑀫𑀦𑀓𑀸 𑀑𑀴𑀸𑀭𑀺𑀓𑀧𑀸𑀡𑀸 𑀯𑀺𑀬 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀩𑀼𑀤𑁆𑀥𑀸, 𑀤𑁄𑀯𑀸𑀭𑀺𑀓𑀲𑁆𑀲 𑀢𑁂𑀲𑀁 𑀧𑀸𑀡𑀸𑀦𑀁 𑀧𑀸𑀓𑀝𑀪𑀸𑀯𑁄 𑀯𑀺𑀬 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀁 𑀩𑀼𑀤𑁆𑀥𑀸𑀦𑀁 𑀲𑀻𑀮𑀲𑀫𑀣𑀸𑀤𑀻𑀳𑀺 𑀧𑀸𑀓𑀝𑀪𑀸𑀯𑁄. 𑀏𑀢𑁆𑀢𑀸𑀯𑀢𑀸 𑀣𑁂𑀭𑁂𑀦 𑀪𑀕𑀯𑀢𑁄 𑁋 ‘‘𑀏𑀯𑀫𑀳𑀁 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑁂 𑀞𑀢𑁆𑀯𑀸 𑀥𑀫𑁆𑀫𑀦𑁆𑀯𑀬𑁂𑀦 𑀦𑀬𑀕𑁆𑀕𑀸𑀳𑁂𑀦 𑀚𑀸𑀦𑀸𑀫𑀻’’𑀢𑀺 𑀅𑀢𑁆𑀢𑀦𑁄 𑀲𑀻𑀳𑀦𑀸𑀤𑀲𑁆𑀲 𑀅𑀦𑀼𑀬𑁄𑀕𑁄 𑀤𑀺𑀦𑁆𑀦𑁄 𑀳𑁄𑀢𑀺.

𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 ‘‘𑀦 𑀔𑁄 𑀫𑁂𑀢𑀁, 𑀪𑀦𑁆𑀢𑁂, 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀅𑀭𑀳𑀦𑁆𑀢𑁂𑀲𑀼 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀲𑀼 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀅𑀢𑁆𑀣𑀺, 𑀅𑀧𑀺𑀘 𑀥𑀫𑁆𑀫𑀦𑁆𑀯𑀬𑁄 𑀯𑀺𑀤𑀺𑀢𑁄’’𑀢𑀺 𑀯𑀤𑀢𑀺, 𑀢𑀲𑁆𑀫𑀸. 𑀅𑀪𑀺𑀓𑁆𑀔𑀡𑀁 𑀪𑀸𑀲𑁂𑀬𑁆𑀬𑀸𑀲𑀻𑀢𑀺 𑀧𑀼𑀦𑀧𑁆𑀧𑀼𑀦𑀁 𑀪𑀸𑀲𑁂𑀬𑁆𑀬𑀸𑀲𑀺, ‘‘𑀧𑀼𑀩𑁆𑀩𑀡𑁆𑀳𑁂 𑀫𑁂 𑀓𑀣𑀺𑀢’’𑀦𑁆𑀢𑀺 𑀫𑀸 𑀫𑀚𑁆𑀛𑀦𑁆𑀳𑀺𑀓𑀸𑀤𑀻𑀲𑀼 𑀦 𑀓𑀣𑀬𑀺𑀢𑁆𑀣, ‘‘𑀅𑀚𑁆𑀚 𑀯𑀸 𑀫𑁂 𑀓𑀣𑀺𑀢’’𑀦𑁆𑀢𑀺 𑀫𑀸 𑀧𑀭𑀤𑀺𑀯𑀲𑀸𑀤𑀻𑀲𑀼 𑀦 𑀓𑀣𑀬𑀺𑀢𑁆𑀣𑀸𑀢𑀺 𑀅𑀢𑁆𑀣𑁄. 𑀲𑀸 𑀧𑀳𑀻𑀬𑀺𑀲𑁆𑀲𑀢𑀻𑀢𑀺 ‘‘𑀲𑀸𑀭𑀺𑀧𑀼𑀢𑁆𑀢𑀲𑀤𑀺𑀲𑁄𑀧𑀺 𑀦𑀸𑀫 𑀜𑀸𑀡𑀚𑀯𑀦𑀲𑀫𑁆𑀧𑀦𑁆𑀦𑁄 𑀲𑀸𑀯𑀓𑁄 𑀩𑀼𑀤𑁆𑀥𑀸𑀦𑀁 𑀘𑀺𑀢𑁆𑀢𑀸𑀘𑀸𑀭𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀏𑀯𑀁 𑀅𑀧𑁆𑀧𑀫𑁂𑀬𑁆𑀬𑀸 𑀢𑀣𑀸𑀕𑀢𑀸’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀸𑀦𑀁 𑀬𑀸 𑀢𑀣𑀸𑀕𑀢𑁂 𑀓𑀗𑁆𑀔𑀸 𑀯𑀸 𑀯𑀺𑀫𑀢𑀺 𑀯𑀸, 𑀲𑀸 𑀧𑀳𑀻𑀬𑀺𑀲𑁆𑀲𑀢𑀻𑀢𑀺.

𑁩. 𑀘𑀼𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁭𑁯. 𑀢𑀢𑀺𑀬𑁂 𑀫𑀕𑀥𑁂𑀲𑀽𑀢𑀺 𑀏𑀯𑀁𑀦𑀸𑀫𑀓𑁂 𑀚𑀦𑀧𑀤𑁂. 𑀦𑀸𑀮𑀓𑀕𑀸𑀫𑀓𑁂𑀢𑀺 𑀭𑀸𑀚𑀕𑀳𑀲𑁆𑀲 𑀅𑀯𑀺𑀤𑀽𑀭𑁂 𑀅𑀢𑁆𑀢𑀦𑁄 𑀓𑀼𑀮𑀲𑀦𑁆𑀢𑀓𑁂 𑀏𑀯𑀁𑀦𑀸𑀫𑀓𑁂 𑀕𑀸𑀫𑁂. 𑀘𑀼𑀦𑁆𑀤𑁄 𑀲𑀫𑀡𑀼𑀤𑁆𑀤𑁂𑀲𑁄𑀢𑀺 𑀅𑀬𑀁 𑀣𑁂𑀭𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀺𑀓𑁄, 𑀢𑀁 𑀪𑀺𑀓𑁆𑀔𑀽 𑀅𑀦𑀼𑀧𑀲𑀫𑁆𑀧𑀦𑁆𑀦𑀓𑀸𑀮𑁂 ‘‘𑀘𑀼𑀦𑁆𑀤𑁄 𑀲𑀫𑀡𑀼𑀤𑁆𑀤𑁂𑀲𑁄’’𑀢𑀺 𑀲𑀫𑀼𑀤𑀸𑀘𑀭𑀺𑀢𑁆𑀯𑀸 𑀣𑁂𑀭𑀓𑀸𑀮𑁂𑀧𑀺 𑀢𑀣𑁂𑀯 𑀲𑀫𑀼𑀤𑀸𑀘𑀭𑀺𑀁𑀲𑀼. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀼𑀦𑁆𑀤𑁄 𑀲𑀫𑀡𑀼𑀤𑁆𑀤𑁂𑀲𑁄’’𑀢𑀺. 𑀉𑀧𑀝𑁆𑀞𑀸𑀓𑁄 𑀳𑁄𑀢𑀻𑀢𑀺 𑀫𑀼𑀔𑁄𑀤𑀓𑀤𑀦𑁆𑀢𑀓𑀝𑁆𑀞𑀤𑀸𑀦𑁂𑀦 𑀘𑁂𑀯 𑀧𑀭𑀺𑀯𑁂𑀡𑀲𑀫𑁆𑀫𑀚𑁆𑀚𑀦-𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀓𑀭𑀡-𑀧𑀢𑁆𑀢𑀘𑀻𑀯𑀭𑀕𑁆𑀕𑀳𑀡𑁂𑀦 𑀘 𑀉𑀧𑀝𑁆𑀞𑀸𑀦𑀓𑀭𑁄 𑀳𑁄𑀢𑀺. 𑀧𑀭𑀺𑀦𑀺𑀩𑁆𑀩𑀸𑀬𑀻𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀼𑀢𑁄. 𑀓𑀢𑀭𑀲𑁆𑀫𑀺𑀁 𑀓𑀸𑀮𑁂𑀢𑀺? 𑀪𑀕𑀯𑀢𑁄 𑀧𑀭𑀺𑀦𑀺𑀩𑁆𑀩𑀸𑀦𑀲𑀁𑀯𑀘𑁆𑀙𑀭𑁂.

𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸 𑁋 𑀪𑀕𑀯𑀸 𑀓𑀺𑀭 𑀯𑀼𑀢𑁆𑀣𑀯𑀲𑁆𑀲𑁄 𑀯𑁂𑀴𑀼𑀯𑀕𑀸𑀫𑀓𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 ‘‘𑀲𑀸𑀯𑀢𑁆𑀣𑀺𑀁 𑀕𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀕𑀢𑀫𑀕𑁆𑀕𑁂𑀦𑁂𑀯 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀚𑁂𑀢𑀯𑀦𑀁 𑀧𑀸𑀯𑀺𑀲𑀺. 𑀥𑀫𑁆𑀫𑀲𑁂𑀦𑀸𑀧𑀢𑀺 𑀪𑀕𑀯𑀢𑁄 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑀁 𑀕𑀢𑁄, 𑀲𑁄 𑀢𑀢𑁆𑀣 𑀅𑀦𑁆𑀢𑁂𑀯𑀸𑀲𑀺𑀓𑁂𑀲𑀼 𑀯𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀓𑁆𑀓𑀦𑁆𑀢𑁂𑀲𑀼 𑀤𑀺𑀯𑀸𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀘𑀫𑁆𑀫𑀔𑀡𑁆𑀟𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀧𑀮𑁆𑀮𑀗𑁆𑀓𑀁 𑀆𑀪𑀼𑀚𑀺𑀢𑁆𑀯𑀸 𑀨𑀮𑀲𑀫𑀸𑀧𑀢𑁆𑀢𑀺𑀁 𑀧𑀸𑀯𑀺𑀲𑀺. 𑀅𑀣𑀲𑁆𑀲 𑀬𑀣𑀸 𑀧𑀭𑀺𑀘𑁆𑀙𑁂𑀤𑁂𑀦 𑀢𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀅𑀬𑀁 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 ‘‘𑀩𑀼𑀤𑁆𑀥𑀸 𑀦𑀼 𑀔𑁄 𑀧𑀞𑀫𑀁 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺, 𑀉𑀤𑀸𑀳𑀼 𑀅𑀕𑁆𑀕𑀲𑀸𑀯𑀓𑀸𑀢𑀺, 𑀢𑀢𑁄 ‘‘𑀅𑀕𑁆𑀕𑀲𑀸𑀯𑀓𑀸 𑀧𑀞𑀫’’𑀦𑁆𑀢𑀺 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀆𑀬𑀼𑀲𑀗𑁆𑀔𑀸𑀭𑀁 𑀑𑀮𑁄𑀓𑁂𑀲𑀺. 𑀲𑁄 ‘‘𑀲𑀢𑁆𑀢𑀸𑀳𑀫𑁂𑀯 𑀫𑁂 𑀆𑀬𑀼𑀲𑀗𑁆𑀔𑀸𑀭𑀸 𑀧𑀯𑀢𑁆𑀢𑀺𑀲𑁆𑀲𑀦𑁆𑀢𑀻’’𑀢𑀺 𑀜𑀢𑁆𑀯𑀸 ‘‘𑀓𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺.

𑀢𑀢𑁄 ‘‘𑀭𑀸𑀳𑀼𑀮𑁄 𑀢𑀸𑀯𑀢𑀺𑀁𑀲𑁂𑀲𑀼 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑁄 𑀙𑀤𑁆𑀤𑀦𑁆𑀢𑀤𑀳𑁂, 𑀅𑀳𑀁 𑀓𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀘𑀺𑀦𑁆𑀢𑁂𑀦𑁆𑀢𑁄 𑀫𑀸𑀢𑀭𑀁 𑀆𑀭𑀩𑁆𑀪 𑀲𑀢𑀺𑀁 𑀉𑀧𑁆𑀧𑀸𑀤𑁂𑀲𑀺 𑁋 ‘‘𑀫𑀬𑁆𑀳𑀁 𑀫𑀸𑀢𑀸 𑀲𑀢𑁆𑀢𑀦𑁆𑀦𑀁 𑀅𑀭𑀳𑀦𑁆𑀢𑀸𑀦𑀁 𑀫𑀸𑀢𑀸 𑀳𑀼𑀢𑁆𑀯𑀸𑀧𑀺 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑁂𑀲𑀼 𑀅𑀧𑁆𑀧𑀲𑀦𑁆𑀦𑀸, 𑀅𑀢𑁆𑀣𑀺 𑀦𑀼 𑀔𑁄 𑀢𑀲𑁆𑀲𑀸 𑀉𑀧𑀦𑀺𑀲𑁆𑀲𑀬𑁄, 𑀦𑀢𑁆𑀣𑀺 𑀦𑀼 𑀔𑁄’’𑀢𑀺. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸 ‘‘𑀓𑀲𑁆𑀲 𑀤𑁂𑀲𑀦𑀸𑀬 𑀅𑀪𑀺𑀲𑀫𑀬𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑁄 ‘‘𑀫𑀫𑁂𑀯 𑀥𑀫𑁆𑀫𑀤𑁂𑀲𑀦𑀸𑀬 𑀪𑀯𑀺𑀲𑁆𑀲𑀢𑀺, 𑀦 𑀅𑀜𑁆𑀜𑀲𑁆𑀲. 𑀲𑀘𑁂 𑀔𑁄 𑀧𑀦𑀸𑀳𑀁 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀪𑀯𑁂𑀬𑁆𑀬𑀁, 𑀪𑀯𑀺𑀲𑁆𑀲𑀦𑁆𑀢𑀺 𑀫𑁂 𑀯𑀢𑁆𑀢𑀸𑀭𑁄 𑁋 ‘‘𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀅𑀯𑀲𑁂𑀲𑀚𑀦𑀸𑀦𑀫𑁆𑀧𑀺 𑀅𑀯𑀲𑁆𑀲𑀬𑁄 𑀳𑁄𑀢𑀺. 𑀢𑀣𑀸 𑀳𑀺𑀲𑁆𑀲 𑀲𑀫𑀘𑀺𑀢𑁆𑀢𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀤𑀺𑀯𑀲𑁂 (𑀅. 𑀦𑀺. 𑁨.𑁩𑁩-𑁩𑁭) 𑀓𑁄𑀝𑀺𑀲𑀢𑀲𑀳𑀲𑁆𑀲𑀤𑁂𑀯𑀢𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑀸, 𑀢𑀬𑁄 𑀫𑀕𑁆𑀕𑁂 𑀧𑀝𑀺𑀯𑀺𑀤𑁆𑀥𑀤𑁂𑀯𑀢𑀸𑀦𑀁 𑀕𑀡𑀦𑀸 𑀦𑀢𑁆𑀣𑀺, 𑀅𑀜𑁆𑀜𑁂𑀲𑀼 𑀘 𑀞𑀸𑀦𑁂𑀲𑀼 𑀅𑀦𑁂𑀓𑀸 𑀅𑀪𑀺𑀲𑀫𑀬𑀸 𑀤𑀺𑀲𑁆𑀲𑀦𑁆𑀢𑀺, 𑀣𑁂𑀭𑁂 𑀘 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀲𑀕𑁆𑀕𑁂 𑀦𑀺𑀩𑁆𑀩𑀢𑁆𑀢𑀸𑀦𑁂𑀯 𑀅𑀲𑀻𑀢𑀺 𑀓𑀼𑀮𑀲𑀳𑀲𑁆𑀲𑀸𑀦𑀺, 𑀲𑁄 𑀤𑀸𑀦𑀺 𑀲𑀓𑀫𑀸𑀢𑀼𑀫𑀺𑀘𑁆𑀙𑀸𑀤𑀲𑁆𑀲𑀦𑀫𑀢𑁆𑀢𑀫𑁆𑀧𑀺 𑀳𑀭𑀺𑀢𑀼𑀁 𑀦𑀸𑀲𑀓𑁆𑀔𑀻’’𑀢𑀺. 𑀢𑀲𑁆𑀫𑀸 𑀫𑀸𑀢𑀭𑀁 𑀫𑀺𑀘𑁆𑀙𑀸𑀤𑀲𑁆𑀲𑀦𑀸 𑀫𑁄𑀘𑁂𑀢𑁆𑀯𑀸 𑀚𑀸𑀢𑁄𑀯𑀭𑀓𑁂𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑁆𑀯𑀸 ‘‘𑀅𑀚𑁆𑀚𑁂𑀯 𑀪𑀕𑀯𑀦𑁆𑀢𑀁 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀦𑀺𑀓𑁆𑀔𑀫𑀺𑀲𑁆𑀲𑀸𑀫𑀻’’𑀢𑀺 𑀘𑀼𑀦𑁆𑀤𑀢𑁆𑀣𑁂𑀭𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄, 𑀘𑀼𑀦𑁆𑀤, 𑀅𑀫𑁆𑀳𑀸𑀓𑀁 𑀧𑀜𑁆𑀘𑀲𑀢𑀸𑀬 𑀪𑀺𑀓𑁆𑀔𑀼𑀧𑀭𑀺𑀲𑀸𑀬 𑀲𑀜𑁆𑀜𑀁 𑀤𑁂𑀳𑀺. ‘𑀕𑀡𑁆𑀳𑀣𑀸𑀯𑀼𑀲𑁄 𑀧𑀢𑁆𑀢𑀘𑀻𑀯𑀭𑀸𑀦𑀺, 𑀥𑀫𑁆𑀫𑀲𑁂𑀦𑀸𑀧𑀢𑀺 𑀦𑀸𑀮𑀓𑀕𑀸𑀫𑀁 𑀕𑀦𑁆𑀢𑀼𑀓𑀸𑀫𑁄’’’𑀢𑀺. 𑀣𑁂𑀭𑁄 𑀢𑀣𑀸 𑀅𑀓𑀸𑀲𑀺.

𑀪𑀺𑀓𑁆𑀔𑀽 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼. 𑀣𑁂𑀭𑁄 𑀲𑁂𑀦𑀸𑀲𑀦𑀁 𑀲𑀁𑀲𑀸𑀫𑁂𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑀁 𑀲𑀫𑁆𑀫𑀚𑁆𑀚𑀺𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑀤𑁆𑀯𑀸𑀭𑁂 𑀞𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀇𑀤𑀁 𑀤𑀸𑀦𑀺 𑀧𑀘𑁆𑀙𑀺𑀫𑀤𑀲𑁆𑀲𑀦𑀁, 𑀧𑀼𑀦 𑀆𑀕𑀫𑀦𑀁 𑀦𑀢𑁆𑀣𑀻’’𑀢𑀺 𑀧𑀜𑁆𑀘𑀲𑀢𑀪𑀺𑀓𑁆𑀔𑀽𑀳𑀺 𑀧𑀭𑀺𑀯𑀼𑀢𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 ‘‘𑀅𑀦𑀼𑀚𑀸𑀦𑀸𑀢𑀼 𑀫𑁂 𑀪𑀦𑁆𑀢𑁂 𑀪𑀕𑀯𑀸, 𑀅𑀦𑀼𑀚𑀸𑀦𑀸𑀢𑀼 𑀲𑀼𑀕𑀢𑁄. 𑀧𑀭𑀺𑀦𑀺𑀩𑁆𑀩𑀸𑀦𑀓𑀸𑀮𑁄 𑀫𑁂, 𑀑𑀲𑁆𑀲𑀝𑁆𑀞𑁄 𑀫𑁂 𑀆𑀬𑀼𑀲𑀗𑁆𑀔𑀸𑀭𑁄’’𑀢𑀺. 𑀩𑀼𑀤𑁆𑀥𑀸 𑀧𑀦 𑀬𑀲𑁆𑀫𑀸 ‘‘𑀧𑀭𑀺𑀦𑀺𑀩𑁆𑀩𑀸𑀳𑀻’’𑀢𑀺 𑀯𑀼𑀢𑁆𑀢𑁂 𑀫𑀭𑀡𑀯𑀡𑁆𑀡𑀁 𑀲𑀁𑀯𑀡𑁆𑀡𑁂𑀦𑁆𑀢𑀻𑀢𑀺, ‘‘𑀫𑀸 𑀧𑀭𑀺𑀦𑀺𑀩𑁆𑀩𑀸𑀳𑀻’’𑀢𑀺 𑀯𑀼𑀢𑁆𑀢𑁂 𑀯𑀝𑁆𑀝𑀲𑁆𑀲 𑀕𑀼𑀡𑀁 𑀓𑀣𑁂𑀦𑁆𑀢𑀻𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀸 𑀤𑁄𑀲𑀁 𑀆𑀭𑁄𑀧𑁂𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀢𑀤𑀼𑀪𑀬𑀫𑁆𑀧𑀺 𑀦 𑀯𑀤𑀦𑁆𑀢𑀺. 𑀢𑁂𑀦 𑀦𑀁 𑀪𑀕𑀯𑀸 𑁋 ‘‘𑀓𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀲𑀺 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺 𑀯𑀢𑁆𑀯𑀸 𑁋 ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀫𑀕𑀥𑁂𑀲𑀼 𑀦𑀸𑀮𑀓𑀕𑀸𑀫𑁂 𑀚𑀸𑀢𑁄𑀯𑀭𑀓𑁄, 𑀢𑀢𑁆𑀣𑀸𑀳𑀁 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑁋 ‘‘𑀬𑀲𑁆𑀲 𑀤𑀸𑀦𑀺 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀓𑀸𑀮𑀁 𑀫𑀜𑁆𑀜𑀲𑀺, 𑀇𑀤𑀸𑀦𑀺 𑀧𑀦 𑀢𑁂 𑀚𑁂𑀝𑁆𑀞𑀓𑀦𑀺𑀝𑁆𑀞𑀪𑀸𑀢𑀺𑀓𑀸𑀦𑀁 𑀢𑀸𑀤𑀺𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀲𑁆𑀲𑀦𑀁 𑀤𑀼𑀮𑁆𑀮𑀪𑀁 𑀪𑀯𑀺𑀲𑁆𑀲𑀢𑀺, 𑀤𑁂𑀲𑁂𑀳𑀺 𑀦𑁂𑀲𑀁 𑀥𑀫𑁆𑀫’’𑀦𑁆𑀢𑀺 𑀆𑀳.

𑀣𑁂𑀭𑁄 𑁋 ‘‘𑀲𑀢𑁆𑀣𑀸 𑀫𑀬𑁆𑀳𑀁 𑀇𑀤𑁆𑀥𑀺𑀯𑀺𑀓𑀼𑀩𑁆𑀩𑀦𑀧𑀼𑀩𑁆𑀩𑀗𑁆𑀕𑀫𑀁 𑀥𑀫𑁆𑀫𑀤𑁂𑀲𑀦𑀁 𑀧𑀘𑁆𑀘𑀸𑀲𑀻𑀲𑀢𑀻’’𑀢𑀺 𑀜𑀢𑁆𑀯𑀸 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀢𑀸𑀮𑀧𑁆𑀧𑀫𑀸𑀡𑀁 𑀆𑀓𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀑𑀭𑀼𑀬𑁆𑀳 𑀤𑀲𑀩𑀮𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺, 𑀧𑀼𑀦 𑀤𑁆𑀯𑀺𑀢𑀸𑀮𑀧𑁆𑀧𑀫𑀸𑀡𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀑𑀭𑀼𑀬𑁆𑀳 𑀤𑀲𑀩𑀮𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺, 𑀏𑀢𑁂𑀦𑀼𑀧𑀸𑀬𑁂𑀦 𑀲𑀢𑁆𑀢𑀢𑀸𑀮𑀧𑁆𑀧𑀫𑀸𑀡𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀅𑀦𑁂𑀓𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀲𑀢𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀥𑀫𑁆𑀫𑀓𑀣𑀁 𑀆𑀭𑀪𑀺. 𑀤𑀺𑀲𑁆𑀲𑀫𑀸𑀦𑁂𑀦𑀧𑀺 𑀓𑀸𑀬𑁂𑀦 𑀓𑀣𑁂𑀢𑀺, 𑀅𑀤𑀺𑀲𑁆𑀲𑀫𑀸𑀦𑁂𑀦𑀧𑀺. 𑀉𑀧𑀭𑀺𑀫𑁂𑀦 𑀯𑀸 𑀳𑁂𑀝𑁆𑀞𑀺𑀫𑁂𑀦 𑀯𑀸 𑀉𑀧𑀟𑁆𑀠𑀓𑀸𑀬𑁂𑀦 𑀓𑀣𑁂𑀢𑀺 𑀅𑀤𑀺𑀲𑁆𑀲𑀫𑀸𑀦𑁂𑀦𑀧𑀺 𑀤𑀺𑀲𑁆𑀲𑀫𑀸𑀦𑁂𑀦𑀧𑀺, 𑀓𑀸𑀮𑁂𑀦 𑀘𑀦𑁆𑀤𑀯𑀡𑁆𑀡𑀁 𑀤𑀲𑁆𑀲𑁂𑀢𑀺, 𑀓𑀸𑀮𑁂𑀦 𑀲𑀽𑀭𑀺𑀬𑀯𑀡𑁆𑀡𑀁, 𑀓𑀸𑀮𑁂𑀦 𑀧𑀩𑁆𑀩𑀢𑀯𑀡𑁆𑀡𑀁, 𑀓𑀸𑀮𑁂𑀦 𑀲𑀫𑀼𑀤𑁆𑀤𑀯𑀡𑁆𑀡𑀁, 𑀓𑀸𑀮𑁂𑀦 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀳𑁄𑀢𑀺, 𑀓𑀸𑀮𑁂𑀦 𑀯𑁂𑀲𑁆𑀲𑀯𑀡𑀫𑀳𑀸𑀭𑀸𑀚𑀸, 𑀓𑀸𑀮𑁂𑀦 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸, 𑀓𑀸𑀮𑁂𑀦 𑀫𑀳𑀸𑀩𑁆𑀭𑀳𑁆𑀫𑀸𑀢𑀺 𑀏𑀯𑀁 𑀅𑀦𑁂𑀓𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀲𑀢𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀲𑀓𑀮𑀦𑀕𑀭𑀁 𑀲𑀦𑁆𑀦𑀺𑀧𑀢𑀺. 𑀣𑁂𑀭𑁄 𑀑𑀭𑀼𑀬𑁆𑀳 𑀤𑀲𑀩𑀮𑀲𑁆𑀲 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀅𑀣 𑀦𑀁 𑀲𑀢𑁆𑀣𑀸 𑀆𑀳 𑁋 ‘‘𑀓𑁄 𑀦𑀸𑀫𑁄 𑀅𑀬𑀁 𑀲𑀸𑀭𑀺𑀧𑀼𑀢𑁆𑀢 𑀥𑀫𑁆𑀫𑀧𑀭𑀺𑀬𑀸𑀬𑁄’’𑀢𑀺. 𑀲𑀻𑀳𑀯𑀺𑀓𑀻𑀴𑀺𑀢𑁄 𑀦𑀸𑀫, 𑀪𑀦𑁆𑀢𑁂𑀢𑀺. 𑀢𑀕𑁆𑀖, 𑀲𑀸𑀭𑀺𑀧𑀼𑀢𑁆𑀢, 𑀲𑀻𑀳𑀯𑀺𑀓𑀻𑀴𑀺𑀢𑁄 𑀢𑀕𑁆𑀖, 𑀲𑀸𑀭𑀺𑀧𑀼𑀢𑁆𑀢, 𑀲𑀻𑀳𑀯𑀺𑀓𑀻𑀴𑀺𑀢𑁄𑀢𑀺.

𑀣𑁂𑀭𑁄 𑀅𑀮𑀢𑁆𑀢𑀓𑀯𑀡𑁆𑀡𑁂 𑀳𑀢𑁆𑀣𑁂 𑀧𑀲𑀸𑀭𑁂𑀢𑁆𑀯𑀸 𑀲𑀢𑁆𑀣𑀼 𑀲𑀼𑀯𑀡𑁆𑀡𑀓𑀘𑁆𑀙𑀧𑀲𑀤𑀺𑀲𑁂 𑀧𑀸𑀤𑁂 𑀕𑁄𑀧𑁆𑀨𑀓𑁂𑀲𑀼 𑀕𑀳𑁂𑀢𑁆𑀯𑀸 𑁋 ‘‘𑀪𑀦𑁆𑀢𑁂, 𑀇𑀫𑁂𑀲𑀁 𑀧𑀸𑀤𑀸𑀦𑀁 𑀯𑀦𑁆𑀤𑀦𑀢𑁆𑀣𑀸𑀬 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸, 𑀲𑁄 𑀫𑁂 𑀫𑀦𑁄𑀭𑀣𑁄 𑀫𑀢𑁆𑀣𑀓𑀁 𑀧𑀢𑁆𑀢𑁄, 𑀇𑀢𑁄 𑀤𑀸𑀦𑀺 𑀧𑀝𑁆𑀞𑀸𑀬 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀦 𑀧𑀼𑀦 𑀏𑀓𑀝𑁆𑀞𑀸𑀦𑁂 𑀲𑀦𑁆𑀦𑀺𑀧𑀸𑀢𑁄 𑀲𑀫𑀸𑀕𑀫𑁄 𑀅𑀢𑁆𑀣𑀺, 𑀙𑀺𑀦𑁆𑀦𑁄 𑀏𑀲 𑀯𑀺𑀲𑁆𑀲𑀸𑀲𑁄, 𑀅𑀦𑁂𑀓𑁂𑀳𑀺 𑀩𑀼𑀤𑁆𑀥𑀲𑀢𑀲𑀳𑀲𑁆𑀲𑁂𑀳𑀺 𑀧𑀯𑀺𑀝𑁆𑀞𑀁 𑀅𑀚𑀭𑀁 𑀅𑀫𑀭𑀁 𑀔𑁂𑀫𑀁 𑀲𑀼𑀔𑀁 𑀲𑀻𑀢𑀮𑀁 𑀅𑀪𑀬𑀁 𑀦𑀺𑀩𑁆𑀩𑀸𑀦𑀧𑀼𑀭𑀁 𑀧𑀯𑀺𑀲𑀺𑀲𑁆𑀲𑀸𑀫𑀺, 𑀲𑀘𑁂 𑀫𑁂 𑀓𑀺𑀜𑁆𑀘𑀺 𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸 𑀦 𑀭𑁄𑀘𑁂𑀣, 𑀔𑀫𑀣 𑀢𑀁 𑀪𑀕𑀯𑀸, 𑀕𑀫𑀦𑀓𑀸𑀮𑁄 𑀫𑀬𑁆𑀳’’𑀦𑁆𑀢𑀺. 𑀔𑀫𑀸𑀫𑀺 𑀢𑁂, 𑀲𑀸𑀭𑀺𑀧𑀼𑀢𑁆𑀢, 𑀦 𑀔𑁄 𑀧𑀦 𑀢𑁂 𑀓𑀺𑀜𑁆𑀘𑀺 𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸 𑀫𑀬𑁆𑀳𑀁 𑀅𑀭𑀼𑀘𑁆𑀘𑀦𑀓𑀁 𑀅𑀢𑁆𑀣𑀺, 𑀬𑀲𑁆𑀲 𑀤𑀸𑀦𑀺 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀓𑀸𑀮𑀁 𑀫𑀜𑁆𑀜𑀲𑀻𑀢𑀺.

𑀇𑀢𑀺 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀲𑀫𑀦𑀦𑁆𑀢𑀭𑀁 𑀲𑀢𑁆𑀣𑀼 𑀧𑀸𑀤𑁂 𑀯𑀦𑁆𑀤𑀺𑀢𑁆𑀯𑀸 𑀉𑀝𑁆𑀞𑀺𑀢𑀫𑀢𑁆𑀢𑁂 𑀆𑀬𑀲𑁆𑀫𑀦𑁆𑀢𑁂 𑀲𑀸𑀭𑀺𑀧𑀼𑀢𑁆𑀢𑁂 𑀲𑀺𑀦𑁂𑀭𑀼𑀘𑀓𑁆𑀓𑀯𑀸𑀴𑀳𑀺𑀫𑀯𑀦𑁆𑀢𑀧𑀭𑀺𑀪𑀡𑁆𑀟𑀧𑀩𑁆𑀩𑀢𑁂 𑀥𑀸𑀭𑀬𑀫𑀸𑀦𑀸𑀧𑀺 𑁋 ‘‘𑀅𑀚𑁆𑀚 𑀇𑀫𑀁 𑀕𑀼𑀡𑀭𑀸𑀲𑀺𑀁 𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀫𑀻’’𑀢𑀺 𑀯𑀤𑀦𑁆𑀢𑀻 𑀯𑀺𑀬 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀯𑀺𑀭𑀯𑀫𑀸𑀦𑀸 𑀫𑀳𑀸𑀧𑀣𑀯𑀻 𑀬𑀸𑀯 𑀉𑀤𑀓𑀧𑀭𑀺𑀬𑀦𑁆𑀢𑀸 𑀅𑀓𑀫𑁆𑀧𑀺, 𑀆𑀓𑀸𑀲𑁂 𑀤𑁂𑀯𑀤𑀼𑀦𑁆𑀤𑀼𑀪𑀺𑀬𑁄 𑀨𑀮𑀺𑀁𑀲𑀼, 𑀫𑀳𑀸𑀫𑁂𑀖𑁄 𑀉𑀝𑁆𑀞𑀳𑀺𑀢𑁆𑀯𑀸 𑀧𑁄𑀓𑁆𑀔𑀭𑀯𑀲𑁆𑀲𑀁 𑀯𑀲𑁆𑀲𑀺.

𑀲𑀢𑁆𑀣𑀸 𑁋 ‘‘𑀥𑀫𑁆𑀫𑀲𑁂𑀦𑀸𑀧𑀢𑀺𑀁 𑀧𑀝𑀺𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 𑀥𑀫𑁆𑀫𑀸𑀲𑀦𑀸 𑀯𑀼𑀝𑁆𑀞𑀸𑀬 𑀕𑀦𑁆𑀥𑀓𑀼𑀝𑀺𑀅𑀪𑀺𑀫𑀼𑀔𑁄 𑀕𑀦𑁆𑀢𑁆𑀯𑀸 𑀫𑀡𑀺𑀨𑀮𑀓𑁂 𑀅𑀝𑁆𑀞𑀸𑀲𑀺. 𑀣𑁂𑀭𑁄 𑀢𑀺𑀓𑁆𑀔𑀢𑁆𑀢𑀼𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀯𑀦𑁆𑀤𑀺𑀢𑁆𑀯𑀸 𑁋 ‘‘𑀪𑀕𑀯𑀸 𑀇𑀢𑁄 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀲𑁆𑀲 𑀅𑀲𑀗𑁆𑀔𑁆𑀬𑁂𑀬𑁆𑀬𑀲𑁆𑀲 𑀉𑀧𑀭𑀺 𑀅𑀦𑁄𑀫𑀤𑀲𑁆𑀲𑀻𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀸𑀤𑀫𑀽𑀮𑁂 𑀦𑀺𑀧𑀚𑁆𑀚𑀺𑀢𑁆𑀯𑀸 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀁 𑀧𑀢𑁆𑀣𑁂𑀲𑀺𑀁, 𑀲𑀸 𑀫𑁂 𑀧𑀢𑁆𑀣𑀦𑀸 𑀲𑀫𑀺𑀤𑁆𑀥𑀸, 𑀤𑀺𑀝𑁆𑀞𑀸 𑀢𑀼𑀫𑁆𑀳𑁂, 𑀢𑀁 𑀧𑀞𑀫𑀤𑀲𑁆𑀲𑀦𑀁, 𑀇𑀤𑀁 𑀧𑀘𑁆𑀙𑀺𑀫𑀤𑀲𑁆𑀲𑀦𑀁. 𑀧𑀼𑀦 𑀢𑀼𑀫𑁆𑀳𑀸𑀓𑀁 𑀤𑀲𑁆𑀲𑀦𑀁 𑀦𑀢𑁆𑀣𑀻’’𑀢𑀺 𑀯𑀢𑁆𑀯𑀸 𑀤𑀲𑀦𑀔𑀲𑀫𑁄𑀥𑀸𑀦𑀲𑀫𑀼𑀚𑁆𑀚𑀮𑀁 𑀅𑀜𑁆𑀚𑀮𑀺𑀁 𑀧𑀕𑁆𑀕𑀬𑁆𑀳 𑀬𑀸𑀯 𑀤𑀲𑁆𑀲𑀦𑀯𑀺𑀲𑀬𑀸 𑀅𑀪𑀺𑀫𑀼𑀔𑁄𑀯 𑀧𑀝𑀺𑀓𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀧𑀼𑀦 𑀫𑀳𑀸𑀧𑀣𑀯𑀻 𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀉𑀤𑀓𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸 𑀅𑀓𑀫𑁆𑀧𑀺.

𑀪𑀕𑀯𑀸 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑁂 𑀪𑀺𑀓𑁆𑀔𑀽 𑀆𑀳 𑁋 ‘‘𑀅𑀦𑀼𑀕𑀘𑁆𑀙𑀣, 𑀪𑀺𑀓𑁆𑀔𑀯𑁂, 𑀢𑀼𑀫𑁆𑀳𑀸𑀓𑀁 𑀚𑁂𑀝𑁆𑀞𑀪𑀸𑀢𑀺𑀓’’𑀦𑁆𑀢𑀺. 𑀢𑀲𑁆𑀫𑀺𑀁 𑀔𑀡𑁂 𑀘𑀢𑀲𑁆𑀲𑁄𑀧𑀺 𑀧𑀭𑀺𑀲𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀏𑀓𑀓𑀁𑀬𑁂𑀯 𑀚𑁂𑀢𑀯𑀦𑁂 𑀑𑀳𑀸𑀬 𑀦𑀺𑀭𑀯𑀲𑁂𑀲𑀸 𑀦𑀺𑀓𑁆𑀔𑀫𑀺𑀁𑀲𑀼. 𑀲𑀸𑀯𑀢𑁆𑀣𑀺𑀦𑀕𑀭𑀯𑀸𑀲𑀺𑀦𑁄𑀧𑀺 𑁋 ‘‘𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀓𑀺𑀭 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀢𑀼𑀓𑀸𑀫𑁄 𑀦𑀺𑀓𑁆𑀔𑀦𑁆𑀢𑁄, 𑀧𑀲𑁆𑀲𑀺𑀲𑁆𑀲𑀸𑀫 𑀦’’𑀦𑁆𑀢𑀺 𑀦𑀕𑀭𑀤𑁆𑀯𑀸𑀭𑀸𑀦𑀺 𑀦𑀺𑀭𑁄𑀓𑀸𑀲𑀸𑀦𑀺 𑀓𑀭𑁄𑀦𑁆𑀢𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀦𑁆𑀥𑀫𑀸𑀮𑀸𑀤𑀺𑀳𑀢𑁆𑀣𑀸 𑀓𑁂𑀲𑁂 𑀯𑀺𑀓𑀺𑀭𑀺𑀢𑁆𑀯𑀸 𑁋 ‘‘𑀇𑀤𑀸𑀦𑀺 𑀫𑀬𑀁 𑀓𑀳𑀁 𑀫𑀳𑀸𑀧𑀜𑁆𑀜𑁄 𑀦𑀺𑀲𑀺𑀦𑁆𑀦𑁄, 𑀓𑀳𑀁 𑀥𑀫𑁆𑀫𑀲𑁂𑀦𑀸𑀧𑀢𑀺 𑀦𑀺𑀲𑀺𑀦𑁆𑀦𑁄’’𑀢𑀺 𑀧𑀼𑀘𑁆𑀙𑀦𑁆𑀢𑀸 𑁋 ‘‘𑀓𑀲𑁆𑀲 𑀲𑀦𑁆𑀢𑀺𑀓𑀁 𑀕𑀫𑀺𑀲𑁆𑀲𑀸𑀫, 𑀓𑀲𑁆𑀲 𑀳𑀢𑁆𑀣𑁂 𑀲𑀢𑁆𑀣𑀸𑀭𑀁 𑀞𑀧𑁂𑀢𑁆𑀯𑀸 𑀣𑁂𑀭𑁄 𑀧𑀓𑁆𑀓𑀦𑁆𑀢𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀭𑀺𑀤𑁂𑀯𑀦𑁆𑀢𑀸 𑀭𑁄𑀤𑀦𑁆𑀢𑀸 𑀣𑁂𑀭𑀁 𑀅𑀦𑀼𑀩𑀦𑁆𑀥𑀺𑀁𑀲𑀼.

𑀣𑁂𑀭𑁄 𑀫𑀳𑀸𑀧𑀜𑁆𑀜𑀸𑀬 𑀞𑀺𑀢𑀢𑁆𑀢𑀸 𑁋 ‘‘𑀲𑀩𑁆𑀩𑁂𑀲𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁄 𑀏𑀲 𑀫𑀕𑁆𑀕𑁄’’𑀢𑀺 𑀫𑀳𑀸𑀚𑀦𑀁 𑀑𑀯𑀤𑀺𑀢𑁆𑀯𑀸 𑁋 ‘‘𑀢𑀼𑀫𑁆𑀳𑁂𑀧𑀺, 𑀆𑀯𑀼𑀲𑁄, 𑀢𑀺𑀝𑁆𑀞𑀣, 𑀫𑀸 𑀤𑀲𑀩𑀮𑁂 𑀧𑀫𑀸𑀤𑀁 𑀆𑀧𑀚𑁆𑀚𑀺𑀢𑁆𑀣𑀸’’𑀢𑀺 𑀪𑀺𑀓𑁆𑀔𑀼𑀲𑀗𑁆𑀖𑀫𑁆𑀧𑀺 𑀦𑀺𑀯𑀢𑁆𑀢𑁂𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀲𑀸𑀬𑁂𑀯 𑀲𑀤𑁆𑀥𑀺𑀁 𑀧𑀓𑁆𑀓𑀸𑀫𑀺. 𑀬𑁂𑀧𑀺 𑀫𑀦𑀼𑀲𑁆𑀲𑀸 𑁋 ‘‘𑀧𑀼𑀩𑁆𑀩𑁂 𑀅𑀬𑁆𑀬𑁄 𑀧𑀘𑁆𑀘𑀸𑀕𑀫𑀦𑀘𑀸𑀭𑀺𑀓𑀁 𑀘𑀭𑀢𑀺, 𑀇𑀤𑀁 𑀇𑀤𑀸𑀦𑀺 𑀕𑀫𑀦𑀁 𑀦 𑀧𑀼𑀦 𑀧𑀘𑁆𑀘𑀸𑀕𑀫𑀦𑀸𑀬𑀸’’𑀢𑀺 𑀧𑀭𑀺𑀤𑁂𑀯𑀦𑁆𑀢𑀸 𑀅𑀦𑀼𑀩𑀦𑁆𑀥𑀺𑀁𑀲𑀼𑀬𑁂𑀯. 𑀢𑁂𑀧𑀺 𑁋 ‘‘𑀅𑀧𑁆𑀧𑀫𑀢𑁆𑀢𑀸, 𑀆𑀯𑀼𑀲𑁄, 𑀳𑁄𑀣, 𑀏𑀯𑀁𑀪𑀸𑀯𑀺𑀦𑁄 𑀦𑀸𑀫 𑀲𑀗𑁆𑀔𑀸𑀭𑀸’’𑀢𑀺 𑀦𑀺𑀯𑀢𑁆𑀢𑁂𑀲𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀲𑀩𑁆𑀩𑀢𑁆𑀣 𑀏𑀓𑀭𑀢𑁆𑀢𑀺𑀯𑀸𑀲𑁂𑀦 𑀅𑀦𑁆𑀢𑀭𑀸𑀫𑀕𑁆𑀕𑁂 𑀲𑀢𑁆𑀢𑀸𑀳𑀁 𑀫𑀦𑀼𑀲𑁆𑀲𑀸𑀦𑀁 𑀲𑀗𑁆𑀕𑀳𑀁 𑀓𑀭𑁄𑀦𑁆𑀢𑁄 𑀲𑀸𑀬𑀁 𑀦𑀸𑀮𑀓𑀕𑀸𑀫𑀁 𑀧𑀢𑁆𑀯𑀸 𑀕𑀸𑀫𑀤𑁆𑀯𑀸𑀭𑁂 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀫𑀽𑀮𑁂 𑀅𑀝𑁆𑀞𑀸𑀲𑀺. 𑀅𑀣 𑀉𑀧𑀭𑁂𑀯𑀢𑁄 𑀦𑀸𑀫 𑀣𑁂𑀭𑀲𑁆𑀲 𑀪𑀸𑀕𑀺𑀦𑁂𑀬𑁆𑀬𑁄 𑀩𑀳𑀺𑀕𑀸𑀫𑀁 𑀕𑀘𑁆𑀙𑀦𑁆𑀢𑁄 𑀣𑁂𑀭𑀁 𑀤𑀺𑀲𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀣𑁂𑀭𑁄 𑀢𑀁 𑀆𑀳 𑁋 ‘‘𑀅𑀢𑁆𑀣𑀺 𑀕𑁂𑀳𑁂 𑀢𑁂 𑀅𑀬𑁆𑀬𑀺𑀓𑀸’’𑀢𑀺. 𑀆𑀫 𑀪𑀦𑁆𑀢𑁂𑀢𑀺. 𑀕𑀘𑁆𑀙 𑀅𑀫𑁆𑀳𑀸𑀓𑀁 𑀇𑀥𑀸𑀕𑀢𑀪𑀸𑀯𑀁 𑀆𑀭𑁄𑀘𑁂𑀳𑀺. ‘‘𑀓𑀲𑁆𑀫𑀸 𑀆𑀕𑀢𑁄’’𑀢𑀺 𑀘 𑀯𑀼𑀢𑁆𑀢𑁂 𑁋 ‘‘𑀅𑀚𑁆𑀚 𑀓𑀺𑀭 𑀏𑀓𑀤𑀺𑀯𑀲𑀁 𑀅𑀦𑁆𑀢𑁄𑀕𑀸𑀫𑁂 𑀯𑀲𑀺𑀲𑁆𑀲𑀢𑀺, 𑀚𑀸𑀢𑁄𑀯𑀭𑀓𑀁 𑀧𑀝𑀺𑀚𑀕𑁆𑀕𑀣, 𑀧𑀜𑁆𑀘𑀦𑁆𑀦𑀜𑁆𑀘 𑀓𑀺𑀭 𑀪𑀺𑀓𑁆𑀔𑀼𑀲𑀢𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀚𑀸𑀦𑀸𑀣𑀸’’𑀢𑀺. 𑀲𑁄 𑀕𑀦𑁆𑀢𑁆𑀯𑀸 𑁋 ‘‘𑀅𑀬𑁆𑀬𑀺𑀓𑁂 𑀫𑀬𑁆𑀳𑀁 𑀫𑀸𑀢𑀼𑀮𑁄 𑀆𑀕𑀢𑁄’’𑀢𑀺 𑀆𑀳. 𑀇𑀤𑀸𑀦𑀺 𑀓𑀼𑀳𑀺𑀦𑁆𑀢𑀺? 𑀕𑀸𑀫𑀤𑁆𑀯𑀸𑀭𑁂𑀢𑀺. 𑀏𑀓𑀓𑁄𑀯, 𑀅𑀜𑁆𑀜𑁄𑀧𑀺 𑀓𑁄𑀘𑀺 𑀅𑀢𑁆𑀣𑀻𑀢𑀺? 𑀅𑀢𑁆𑀣𑀺 𑀧𑀜𑁆𑀘𑀲𑀢𑀸 𑀪𑀺𑀓𑁆𑀔𑀽𑀢𑀺. 𑀓𑀺𑀁𑀓𑀸𑀭𑀡𑀸 𑀆𑀕𑀢𑁄𑀢𑀺? 𑀲𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀭𑁄𑀘𑁂𑀲𑀺. 𑀩𑁆𑀭𑀸𑀳𑁆𑀫𑀡𑀻 𑁋 ‘‘𑀓𑀺𑀁 𑀦𑀼 𑀔𑁄 𑀏𑀢𑁆𑀢𑀓𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀧𑀝𑀺𑀚𑀕𑁆𑀕𑀸𑀧𑁂𑀢𑀺, 𑀤𑀳𑀭𑀓𑀸𑀮𑁂 𑀧𑀩𑁆𑀩𑀚𑀺𑀢𑁆𑀯𑀸 𑀫𑀳𑀮𑁆𑀮𑀓𑀓𑀸𑀮𑁂 𑀕𑀺𑀳𑀻 𑀳𑁄𑀢𑀼𑀓𑀸𑀫𑁄’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀻 𑀚𑀸𑀢𑁄𑀯𑀭𑀓𑀁 𑀧𑀝𑀺𑀚𑀕𑁆𑀕𑀸𑀧𑁂𑀢𑁆𑀯𑀸 𑀧𑀜𑁆𑀘𑀲𑀢𑀸𑀦𑀁 𑀯𑀲𑀦𑀝𑁆𑀞𑀸𑀦𑀁 𑀓𑀸𑀭𑁂𑀢𑁆𑀯𑀸 𑀤𑀡𑁆𑀟𑀤𑀻𑀧𑀺𑀓𑀸 𑀚𑀸𑀮𑁂𑀢𑁆𑀯𑀸 𑀣𑁂𑀭𑀲𑁆𑀲 𑀧𑀸𑀳𑁂𑀲𑀺.

𑀣𑁂𑀭𑁄 𑀪𑀺𑀓𑁆𑀔𑀽𑀳𑀺 𑀲𑀤𑁆𑀥𑀺𑀁 𑀧𑀸𑀲𑀸𑀤𑀁 𑀆𑀭𑀼𑀬𑁆𑀳 𑀚𑀸𑀢𑁄𑀯𑀭𑀓𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀻𑀤𑀺, 𑀦𑀺𑀲𑀻𑀤𑀺𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀯𑀲𑀦𑀝𑁆𑀞𑀸𑀦𑀁 𑀕𑀘𑁆𑀙𑀣𑀸’’𑀢𑀺 𑀪𑀺𑀓𑁆𑀔𑀽 𑀉𑀬𑁆𑀬𑁄𑀚𑁂𑀲𑀺. 𑀢𑁂𑀲𑀼 𑀕𑀢𑀫𑀢𑁆𑀢𑁂𑀲𑀼𑀬𑁂𑀯 𑀣𑁂𑀭𑀲𑁆𑀲 𑀔𑀭𑁄 𑀆𑀩𑀸𑀥𑁄 𑀉𑀧𑁆𑀧𑀚𑁆𑀚𑀺, 𑀮𑁄𑀳𑀺𑀢𑀧𑀓𑁆𑀔𑀦𑁆𑀤𑀺𑀓𑀸 𑀫𑀸𑀭𑀡𑀦𑁆𑀢𑀺𑀓𑀸 𑀯𑁂𑀤𑀦𑀸 𑀯𑀢𑁆𑀢𑀦𑁆𑀢𑀺. 𑀏𑀓𑀁 𑀪𑀸𑀚𑀦𑀁 𑀧𑀯𑀺𑀲𑀢𑀺, 𑀏𑀓𑀁 𑀦𑀺𑀓𑁆𑀔𑀫𑀢𑀺. 𑀩𑁆𑀭𑀸𑀳𑁆𑀫𑀡𑀻 𑁋 ‘‘𑀫𑀫 𑀧𑀼𑀢𑁆𑀢𑀲𑁆𑀲 𑀧𑀯𑀢𑁆𑀢𑀺 𑀫𑀬𑁆𑀳𑀁 𑀦 𑀭𑀼𑀘𑁆𑀘𑀢𑀻’’𑀢𑀺 𑀅𑀢𑁆𑀢𑀦𑁄 𑀯𑀲𑀦𑀕𑀩𑁆𑀪𑀤𑁆𑀯𑀸𑀭𑀁 𑀦𑀺𑀲𑁆𑀲𑀸𑀬 𑀅𑀝𑁆𑀞𑀸𑀲𑀺.

𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 ‘‘𑀥𑀫𑁆𑀫𑀲𑁂𑀦𑀸𑀧𑀢𑀺 𑀓𑀼𑀳𑀺𑀁 𑀯𑀺𑀳𑀭𑀢𑀻’’𑀢𑀺 𑀑𑀮𑁄𑀓𑁂𑀦𑁆𑀢𑀸 𑀦𑀸𑀮𑀓𑀕𑀸𑀫𑁂 𑀚𑀸𑀢𑁄𑀯𑀭𑀓𑁂 𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑁂 𑀦𑀺𑀧𑀦𑁆𑀦𑁄, 𑀧𑀘𑁆𑀙𑀺𑀫𑀤𑀲𑁆𑀲𑀦𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀆𑀕𑀫𑁆𑀫 𑀯𑀦𑁆𑀤𑀺𑀢𑁆𑀯𑀸 𑀅𑀝𑁆𑀞𑀁𑀲𑀼. 𑀓𑁂 𑀢𑀼𑀫𑁆𑀳𑁂𑀢𑀺? 𑀫𑀳𑀸𑀭𑀸𑀚𑀸𑀦𑁄 𑀪𑀦𑁆𑀢𑁂𑀢𑀺. 𑀓𑀲𑁆𑀫𑀸 𑀆𑀕𑀢𑀢𑁆𑀣𑀸𑀢𑀺? 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀸 𑀪𑀯𑀺𑀲𑁆𑀲𑀸𑀫𑀸𑀢𑀺. ‘‘𑀳𑁄𑀢𑀼, 𑀅𑀢𑁆𑀣𑀺 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄, 𑀕𑀘𑁆𑀙𑀣 𑀢𑀼𑀫𑁆𑀳𑁂’’𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀢𑁂𑀲𑀁 𑀕𑀢𑀸𑀯𑀲𑀸𑀦𑁂 𑀢𑁂𑀦𑁂𑀯 𑀦𑀬𑁂𑀦 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄. 𑀢𑀲𑁆𑀫𑀺𑀁 𑀕𑀢𑁂 𑀫𑀳𑀸𑀩𑁆𑀭𑀳𑁆𑀫𑀸 𑀘 𑀆𑀕𑀫𑀺𑀁𑀲𑀼. 𑀢𑁂𑀧𑀺 𑀢𑀣𑁂𑀯 𑀣𑁂𑀭𑁄 𑀉𑀬𑁆𑀬𑁄𑀚𑁂𑀲𑀺.

𑀩𑁆𑀭𑀸𑀳𑁆𑀫𑀡𑀻 𑀤𑁂𑀯𑀢𑀸𑀦𑀁 𑀆𑀕𑀫𑀦𑀜𑁆𑀘 𑀕𑀫𑀦𑀜𑁆𑀘 𑀤𑀺𑀲𑁆𑀯𑀸 ‘‘𑀓𑁂 𑀦𑀼 𑀔𑁄 𑀏𑀢𑁂 𑀫𑀫 𑀧𑀼𑀢𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀻’’𑀢𑀺 𑀣𑁂𑀭𑀲𑁆𑀲 𑀕𑀩𑁆𑀪𑀤𑁆𑀯𑀸𑀭𑀁 𑀕𑀦𑁆𑀢𑁆𑀯𑀸 ‘‘𑀢𑀸𑀢, 𑀘𑀼𑀦𑁆𑀤, 𑀓𑀸 𑀧𑀯𑀢𑁆𑀢𑀻’’𑀢𑀺 𑀧𑀼𑀘𑁆𑀙𑀺. 𑀲𑁄 𑀢𑀁 𑀧𑀯𑀢𑁆𑀢𑀺𑀁 𑀆𑀘𑀺𑀓𑁆𑀔𑀺𑀢𑁆𑀯𑀸 ‘‘𑀫𑀳𑀸𑀉𑀧𑀸𑀲𑀺𑀓𑀸, 𑀪𑀦𑁆𑀢𑁂, 𑀆𑀕𑀢𑀸’’𑀢𑀺 𑀆𑀳. 𑀣𑁂𑀭𑁄 ‘‘𑀓𑀲𑁆𑀫𑀸 𑀅𑀯𑁂𑀮𑀸𑀬 𑀆𑀕𑀢𑀸’’𑀢𑀺 𑀧𑀼𑀘𑁆𑀙𑀺. 𑀲𑀸 ‘‘𑀢𑀼𑀬𑁆𑀳𑀁, 𑀢𑀸𑀢, 𑀤𑀲𑁆𑀲𑀦𑀢𑁆𑀣𑀸𑀬𑀸’’𑀢𑀺 𑀯𑀢𑁆𑀯𑀸 ‘‘𑀢𑀸𑀢, 𑀧𑀞𑀫𑀁 𑀓𑁂 𑀆𑀕𑀢𑀸’’𑀢𑀺 𑀧𑀼𑀘𑁆𑀙𑀺. 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀉𑀧𑀸𑀲𑀺𑀓𑁂𑀢𑀺. 𑀢𑀸𑀢, 𑀢𑁆𑀯𑀁 𑀘𑀢𑀽𑀳𑀺 𑀫𑀳𑀸𑀭𑀸𑀚𑁂𑀳𑀺 𑀫𑀳𑀦𑁆𑀢𑀢𑀭𑁄𑀢𑀺? 𑀆𑀭𑀸𑀫𑀺𑀓𑀲𑀤𑀺𑀲𑀸 𑀏𑀢𑁂 𑀉𑀧𑀸𑀲𑀺𑀓𑁂, 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀔𑀕𑁆𑀕𑀳𑀢𑁆𑀣𑀸 𑀳𑀼𑀢𑁆𑀯𑀸 𑀆𑀭𑀓𑁆𑀔𑀁 𑀅𑀓𑀁𑀲𑀽𑀢𑀺. 𑀢𑁂𑀲𑀁 𑀢𑀸𑀢 𑀕𑀢𑀸𑀯𑀲𑀸𑀦𑁂 𑀓𑁄 𑀆𑀕𑀢𑁄𑀢𑀺? 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀦𑁆𑀤𑁄𑀢𑀺. 𑀤𑁂𑀯𑀭𑀸𑀚𑀢𑁄𑀧𑀺 𑀢𑁆𑀯𑀁 𑀢𑀸𑀢 𑀫𑀳𑀦𑁆𑀢𑀢𑀭𑁄𑀢𑀺? 𑀪𑀡𑁆𑀟𑀕𑁆𑀕𑀸𑀳𑀓𑀲𑀸𑀫𑀡𑁂𑀭𑀲𑀤𑀺𑀲𑁄 𑀏𑀲 𑀉𑀧𑀸𑀲𑀺𑀓𑁂, 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼 𑀢𑀸𑀯𑀢𑀺𑀁𑀲𑀢𑁄 𑀑𑀢𑀭𑀡𑀓𑀸𑀮𑁂 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀑𑀢𑀺𑀡𑁆𑀡𑁄𑀢𑀺. 𑀢𑀲𑁆𑀲 𑀢𑀸𑀢 𑀕𑀢𑀸𑀯𑀲𑀸𑀦𑁂 𑀚𑁄𑀢𑀬𑀫𑀸𑀦𑁄 𑀯𑀺𑀬 𑀓𑁄 𑀆𑀕𑀢𑁄𑀢𑀺? 𑀉𑀧𑀸𑀲𑀺𑀓𑁂, 𑀢𑀼𑀬𑁆𑀳𑀁 𑀪𑀕𑀯𑀸 𑀘 𑀲𑀢𑁆𑀣𑀸 𑀘 𑀫𑀳𑀸𑀩𑁆𑀭𑀳𑁆𑀫𑀸 𑀦𑀸𑀫 𑀏𑀲𑁄𑀢𑀺. 𑀫𑀬𑁆𑀳𑀁 𑀪𑀕𑀯𑀢𑁄 𑀫𑀳𑀸𑀩𑁆𑀭𑀳𑁆𑀫𑀢𑁄𑀧𑀺 𑀢𑁆𑀯𑀁, 𑀢𑀸𑀢, 𑀫𑀳𑀦𑁆𑀢𑀢𑀭𑁄𑀢𑀺? 𑀆𑀫 𑀉𑀧𑀸𑀲𑀺𑀓𑁂, 𑀏𑀢𑁂 𑀦𑀸𑀫 𑀓𑀺𑀭 𑀅𑀫𑁆𑀳𑀸𑀓𑀁 𑀲𑀢𑁆𑀣𑀼 𑀚𑀸𑀢𑀤𑀺𑀯𑀲𑁂 𑀘𑀢𑁆𑀢𑀸𑀭𑁄 𑀫𑀳𑀸𑀩𑁆𑀭𑀳𑁆𑀫𑀸𑀦𑁄 𑀫𑀳𑀸𑀧𑀼𑀭𑀺𑀲𑀁 𑀲𑀼𑀯𑀡𑁆𑀡𑀚𑀸𑀮𑁂𑀦 𑀧𑀝𑀺𑀕𑁆𑀕𑀡𑁆𑀳𑀺𑀁𑀲𑀽𑀢𑀺.

𑀅𑀣 𑀩𑁆𑀭𑀸𑀳𑁆𑀫𑀡𑀺𑀬𑀸 𑁋 ‘‘𑀧𑀼𑀢𑁆𑀢𑀲𑁆𑀲 𑀢𑀸𑀯 𑀫𑁂 𑀅𑀬𑀁 𑀆𑀦𑀼𑀪𑀸𑀯𑁄, 𑀓𑀻𑀤𑀺𑀲𑁄 𑀯𑀢 𑀫𑀬𑁆𑀳𑀁 𑀧𑀼𑀢𑁆𑀢𑀲𑁆𑀲 𑀪𑀕𑀯𑀢𑁄 𑀲𑀢𑁆𑀣𑀼 𑀆𑀦𑀼𑀪𑀸𑀯𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑀬𑀦𑁆𑀢𑀺𑀬𑀸 𑀲𑀳𑀲𑀸 𑀧𑀜𑁆𑀘𑀯𑀡𑁆𑀡𑀸 𑀧𑀻𑀢𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀓𑀮𑀲𑀭𑀻𑀭𑀁 𑀨𑀭𑀺. 𑀣𑁂𑀭𑁄 𑁋 ‘‘𑀉𑀧𑁆𑀧𑀦𑁆𑀦𑀁 𑀫𑁂 𑀫𑀸𑀢𑀼 𑀧𑀻𑀢𑀺𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀤𑀸𑀦𑀺 𑀓𑀸𑀮𑁄 𑀥𑀫𑁆𑀫𑀤𑁂𑀲𑀦𑀸𑀬𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 ‘‘𑀓𑀺𑀁 𑀘𑀺𑀦𑁆𑀢𑁂𑀲𑀺 𑀫𑀳𑀸𑀉𑀧𑀸𑀲𑀺𑀓𑁂’’𑀢𑀺 𑀆𑀳. 𑀲𑀸 ‘‘𑀧𑀼𑀢𑁆𑀢𑀲𑁆𑀲 𑀢𑀸𑀯 𑀫𑁂 𑀅𑀬𑀁 𑀕𑀼𑀡𑁄, 𑀲𑀢𑁆𑀣𑀼 𑀧𑀦𑀲𑁆𑀲 𑀓𑀻𑀤𑀺𑀲𑁄 𑀪𑀯𑀺𑀲𑁆𑀲𑀢𑀻𑀢𑀺 𑀇𑀤𑀁, 𑀢𑀸𑀢, 𑀘𑀺𑀦𑁆𑀢𑁂𑀫𑀻’’𑀢𑀺 𑀆𑀳. 𑀫𑀳𑀸𑀉𑀧𑀸𑀲𑀺𑀓𑁂, 𑀫𑀬𑁆𑀳𑀁 𑀲𑀢𑁆𑀣𑀼𑀚𑀸𑀢𑀓𑁆𑀔𑀡𑁂 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑁂 𑀲𑀫𑁆𑀩𑁄𑀥𑀺𑀬𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂 𑀘 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀓𑀫𑁆𑀧𑀺𑀢𑁆𑀣. 𑀲𑀻𑀮𑁂𑀦 𑀲𑀫𑀸𑀥𑀺𑀦𑀸 𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑁂𑀦 𑀲𑀫𑁄 𑀦𑀸𑀫 𑀦𑀢𑁆𑀣𑀺, 𑀇𑀢𑀺𑀧𑀺 𑀲𑁄 𑀪𑀕𑀯𑀸𑀢𑀺 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀩𑀼𑀤𑁆𑀥𑀕𑀼𑀡𑀧𑀝𑀺𑀲𑀁𑀬𑀼𑀢𑁆𑀢𑀁 𑀥𑀫𑁆𑀫𑀤𑁂𑀲𑀦𑀁 𑀓𑀣𑁂𑀲𑀺.

𑀩𑁆𑀭𑀸𑀳𑁆𑀫𑀡𑀻 𑀧𑀺𑀬𑀧𑀼𑀢𑁆𑀢𑀲𑁆𑀲 𑀥𑀫𑁆𑀫𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀧𑀼𑀢𑁆𑀢𑀁 𑀆𑀳 𑁋 ‘‘𑀢𑀸𑀢 𑀉𑀧𑀢𑀺𑀲𑁆𑀲, 𑀓𑀲𑁆𑀫𑀸 𑀏𑀯𑀫𑀓𑀸𑀲𑀺, 𑀏𑀯𑀭𑀽𑀧𑀁 𑀦𑀸𑀫 𑀅𑀫𑀢𑀁 𑀫𑀬𑁆𑀳𑀁 𑀏𑀢𑁆𑀢𑀓𑀁 𑀓𑀸𑀮𑀁 𑀦 𑀅𑀤𑀸𑀲𑀻’’𑀢𑀺. 𑀣𑁂𑀭𑁄 𑁋 ‘‘𑀤𑀺𑀦𑁆𑀦𑀁 𑀤𑀸𑀦𑀺 𑀫𑁂 𑀫𑀸𑀢𑀼 𑀭𑀽𑀧𑀲𑀸𑀭𑀺𑀬𑀸 𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑁄𑀲𑀸𑀯𑀦𑀺𑀓𑀫𑀽𑀮𑀁, 𑀏𑀢𑁆𑀢𑀓𑁂𑀦 𑀯𑀝𑁆𑀝𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀕𑀘𑁆𑀙 𑀫𑀳𑀸𑀉𑀧𑀲𑀺𑀓𑁂’’𑀢𑀺 𑀩𑁆𑀭𑀸𑀳𑁆𑀫𑀡𑀺𑀁 𑀉𑀬𑁆𑀬𑁄𑀚𑁂𑀢𑁆𑀯𑀸 𑁋 ‘‘𑀘𑀼𑀦𑁆𑀤 𑀓𑀸 𑀯𑁂𑀮𑀸’’𑀢𑀺 𑀆𑀳. 𑀩𑀮𑀯𑀧𑀘𑁆𑀘𑀽𑀲𑀓𑀸𑀮𑁄, 𑀪𑀦𑁆𑀢𑁂𑀢𑀺. 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀳𑀻𑀢𑀺. 𑀲𑀦𑁆𑀦𑀺𑀧𑀢𑀺𑀢𑁄 𑀪𑀦𑁆𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑁄𑀢𑀺. ‘‘𑀫𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀳𑀺 𑀘𑀼𑀦𑁆𑀤𑀸’’𑀢𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀦𑀺𑀲𑀻𑀤𑀸𑀧𑁂𑀲𑀺.

𑀣𑁂𑀭𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀆𑀯𑀼𑀲𑁄 𑀘𑀢𑀼𑀘𑀢𑁆𑀢𑀸𑀮𑀻𑀲𑀁 𑀯𑁄 𑀯𑀲𑁆𑀲𑀸𑀦𑀺 𑀫𑀬𑀸 𑀲𑀤𑁆𑀥𑀺𑀁 𑀯𑀺𑀘𑀭𑀦𑁆𑀢𑀸𑀦𑀁 𑀬𑀁 𑀫𑁂 𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸 𑀦 𑀭𑁄𑀘𑁂𑀣, 𑀢𑀁 𑀔𑀫𑀣 𑀆𑀯𑀼𑀲𑁄’’𑀢𑀺. 𑀏𑀢𑁆𑀢𑀓𑀁, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀙𑀸𑀬𑀸 𑀯𑀺𑀬 𑀢𑀼𑀫𑁆𑀳𑁂 𑀅𑀫𑀼𑀜𑁆𑀘𑀺𑀢𑁆𑀯𑀸 𑀯𑀺𑀘𑀭𑀦𑁆𑀢𑀸𑀦𑀁 𑀅𑀭𑀼𑀘𑁆𑀘𑀦𑀓𑀁 𑀦𑀸𑀫 𑀦𑀢𑁆𑀣𑀺, 𑀢𑀼𑀫𑁆𑀳𑁂 𑀧𑀦 𑀅𑀫𑁆𑀳𑀸𑀓𑀁 𑀔𑀫𑀣𑀸𑀢𑀺. 𑀅𑀣 𑀣𑁂𑀭𑁄 𑀫𑀳𑀸𑀘𑀻𑀯𑀭𑀁 𑀲𑀗𑁆𑀓𑀟𑁆𑀠𑀺𑀢𑁆𑀯𑀸 𑀫𑀼𑀔𑀁 𑀧𑀺𑀥𑀸𑀬 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀦𑀺𑀧𑀦𑁆𑀦𑁄 𑀲𑀢𑁆𑀣𑀸 𑀯𑀺𑀬 𑀦𑀯 𑀅𑀦𑀼𑀧𑀼𑀩𑁆𑀩𑀲𑀫𑀸𑀧𑀢𑁆𑀢𑀺𑀬𑁄 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀼𑀦 𑀧𑀞𑀫𑀚𑁆𑀛𑀸𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑀸 𑀲𑀫𑀸𑀧𑀚𑁆𑀚𑀺. 𑀢𑀢𑁄 𑀯𑀼𑀝𑁆𑀞𑀸𑀬 𑀅𑀦𑀦𑁆𑀢𑀭𑀁𑀬𑁂𑀯 𑀫𑀳𑀸𑀧𑀣𑀯𑀺𑀁 𑀉𑀦𑁆𑀦𑀸𑀤𑁂𑀦𑁆𑀢𑁄 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸 𑀧𑀭𑀺𑀦𑀺𑀩𑁆𑀩𑀸𑀬𑀺.

𑀉𑀧𑀸𑀲𑀺𑀓𑀸 𑁋 ‘‘𑀓𑀺𑀁 𑀦𑀼 𑀔𑁄 𑀫𑁂 𑀧𑀼𑀢𑁆𑀢𑁄, 𑀦 𑀓𑀺𑀜𑁆𑀘𑀺 𑀓𑀣𑁂𑀢𑀻’’𑀢𑀺 𑀉𑀝𑁆𑀞𑀸𑀬 𑀧𑀺𑀝𑁆𑀞𑀺𑀧𑀸𑀤𑁂 𑀧𑀭𑀺𑀫𑀚𑁆𑀚𑀦𑁆𑀢𑀻 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀜𑀢𑁆𑀯𑀸 𑀫𑀳𑀸𑀲𑀤𑁆𑀤𑀁 𑀓𑀼𑀭𑀼𑀫𑀸𑀦𑀸 𑀧𑀸𑀤𑁂𑀲𑀼 𑀦𑀺𑀧𑀢𑀺𑀢𑁆𑀯𑀸 𑁋 ‘‘𑀢𑀸𑀢 𑀫𑀬𑀁 𑀇𑀢𑁄 𑀧𑀼𑀩𑁆𑀩𑁂 𑀢𑀯 𑀕𑀼𑀡𑀁 𑀦 𑀚𑀸𑀦𑀺𑀫𑁆𑀳𑀸, 𑀇𑀤𑀸𑀦𑀺 𑀧𑀦 𑀢𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀦𑁂𑀓𑀲𑀢𑁂 𑀅𑀦𑁂𑀓𑀲𑀳𑀲𑁆𑀲𑁂 𑀅𑀦𑁂𑀓𑀲𑀢𑀲𑀳𑀲𑁆𑀲𑁂 𑀪𑀺𑀓𑁆𑀔𑀽 𑀇𑀫𑀲𑁆𑀫𑀺𑀁 𑀦𑀺𑀯𑁂𑀲𑀦𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑁄𑀚𑁂𑀢𑀼𑀁 𑀦 𑀮𑀪𑀺𑀫𑁆𑀳𑀸, 𑀘𑀻𑀯𑀭𑁂𑀳𑀺 𑀅𑀘𑁆𑀙𑀸𑀤𑁂𑀢𑀼𑀁 𑀦 𑀮𑀪𑀺𑀫𑁆𑀳𑀸, 𑀯𑀺𑀳𑀸𑀭𑀲𑀢𑀁 𑀯𑀺𑀳𑀸𑀭𑀲𑀳𑀲𑁆𑀲𑀁 𑀓𑀸𑀭𑁂𑀢𑀼𑀁 𑀦 𑀮𑀪𑀺𑀫𑁆𑀳𑀸’’𑀢𑀺 𑀬𑀸𑀯 𑀅𑀭𑀼𑀡𑀼𑀕𑁆𑀕𑀫𑀦𑀸 𑀧𑀭𑀺𑀤𑁂𑀯𑀺. 𑀅𑀭𑀼𑀡𑁂 𑀉𑀕𑁆𑀕𑀢𑀫𑀢𑁆𑀢𑁂𑀬𑁂𑀯 𑀲𑀼𑀯𑀡𑁆𑀡𑀓𑀸𑀭𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀕𑀩𑁆𑀪𑀁 𑀯𑀺𑀯𑀭𑀸𑀧𑁂𑀢𑁆𑀯𑀸 𑀲𑀼𑀯𑀡𑁆𑀡𑀖𑀝𑀺𑀬𑁄 𑀫𑀳𑀸𑀢𑀼𑀮𑀸𑀬 𑀢𑀼𑀮𑀸𑀧𑁂𑀢𑁆𑀯𑀸 𑁋 ‘‘𑀧𑀜𑁆𑀘 𑀓𑀽𑀝𑀸𑀕𑀸𑀭𑀲𑀢𑀸𑀦𑀺 𑀧𑀜𑁆𑀘 𑀅𑀕𑁆𑀖𑀺𑀓𑀲𑀢𑀸𑀦𑀺 𑀓𑀭𑁄𑀣𑀸’’𑀢𑀺 𑀤𑀸𑀧𑁂𑀢𑀺.

𑀲𑀓𑁆𑀓𑁄𑀧𑀺 𑀤𑁂𑀯𑀭𑀸𑀚𑀸 𑀯𑀺𑀲𑁆𑀲𑀓𑀫𑁆𑀫𑀤𑁂𑀯𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀢𑁆𑀯𑀸 𑁋 ‘‘𑀢𑀸𑀢 𑀥𑀫𑁆𑀫𑀲𑁂𑀦𑀸𑀧𑀢𑀺 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀧𑀜𑁆𑀘 𑀓𑀽𑀝𑀸𑀕𑀸𑀭𑀲𑀢𑀸𑀦𑀺 𑀧𑀜𑁆𑀘 𑀅𑀕𑁆𑀖𑀺𑀓𑀲𑀢𑀸𑀦𑀺 𑀘 𑀫𑀸𑀧𑁂𑀳𑀻’’𑀢𑀺 𑀆𑀳. 𑀇𑀢𑀺 𑀉𑀧𑀸𑀲𑀺𑀓𑀸𑀬 𑀓𑀸𑀭𑀺𑀢𑀸𑀦𑀺 𑀘 𑀯𑀺𑀲𑁆𑀲𑀓𑀫𑁆𑀫𑁂𑀦 𑀦𑀺𑀫𑁆𑀫𑀺𑀢𑀸𑀦𑀺 𑀘 𑀲𑀩𑁆𑀩𑀸𑀦𑀺𑀧𑀺 𑀤𑁆𑀯𑁂𑀲𑀳𑀲𑁆𑀲𑀸𑀦𑀺 𑀅𑀳𑁂𑀲𑀼𑀁. 𑀢𑀢𑁄 𑀦𑀕𑀭𑀫𑀚𑁆𑀛𑁂 𑀲𑀸𑀭𑀫𑀬𑀁 𑀫𑀳𑀸𑀫𑀡𑁆𑀟𑀧𑀁 𑀓𑀸𑀭𑁂𑀢𑁆𑀯𑀸 𑀫𑀡𑁆𑀟𑀧𑀫𑀚𑁆𑀛𑁂 𑀫𑀳𑀸𑀓𑀽𑀝𑀸𑀕𑀸𑀭𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸𑀦𑀺 𑀧𑀭𑀺𑀯𑀸𑀭𑀲𑀗𑁆𑀔𑁂𑀧𑁂𑀦 𑀞𑀧𑁂𑀢𑁆𑀯𑀸 𑀲𑀸𑀥𑀼𑀓𑀻𑀴𑀺𑀓𑀁 𑀆𑀭𑀪𑀺𑀁𑀲𑀼. 𑀤𑁂𑀯𑀸𑀦𑀁 𑀅𑀦𑁆𑀢𑀭𑁂 𑀫𑀦𑀼𑀲𑁆𑀲𑀸, 𑀫𑀦𑀼𑀲𑁆𑀲𑀸𑀦𑀁 𑀅𑀦𑁆𑀢𑀭𑁂 𑀤𑁂𑀯𑀸 𑀅𑀳𑁂𑀲𑀼𑀁.

𑀭𑁂𑀯𑀢𑀻 𑀦𑀸𑀫 𑀏𑀓𑀸 𑀣𑁂𑀭𑀲𑁆𑀲 𑀉𑀧𑀝𑁆𑀞𑀸𑀬𑀺𑀓𑀸 𑁋 ‘‘𑀅𑀳𑀁 𑀣𑁂𑀭𑀲𑁆𑀲 𑀧𑀽𑀚𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀼𑀯𑀡𑁆𑀡𑀧𑀼𑀧𑁆𑀨𑀸𑀦𑀁 𑀢𑀬𑁄 𑀓𑀼𑀫𑁆𑀪𑁂 𑀓𑀸𑀭𑁂𑀲𑀺. ‘‘𑀣𑁂𑀭𑀲𑁆𑀲 𑀧𑀽𑀚𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀅𑀟𑁆𑀠𑀢𑁂𑀬𑁆𑀬𑀓𑁄𑀝𑀺𑀦𑀸𑀝𑀓𑁂𑀳𑀺 𑀧𑀭𑀺𑀯𑀸𑀭𑀺𑀢𑁄 𑀑𑀢𑀭𑀺. ‘‘𑀲𑀓𑁆𑀓𑁄 𑀑𑀢𑀭𑀢𑀻’’𑀢𑀺 𑀫𑀳𑀸𑀚𑀦𑁄 𑀧𑀘𑁆𑀙𑀸𑀫𑀼𑀔𑁄 𑀧𑀝𑀺𑀓𑁆𑀓𑀫𑀺. 𑀢𑀢𑁆𑀣 𑀲𑀸𑀧𑀺 𑀉𑀧𑀸𑀲𑀺𑀓𑀸 𑀧𑀝𑀺𑀓𑁆𑀓𑀫𑀫𑀸𑀦𑀸 𑀕𑀭𑀼𑀪𑀸𑀭𑀢𑁆𑀢𑀸 𑀏𑀓𑀫𑀦𑁆𑀢𑀁 𑀅𑀧𑀲𑀓𑁆𑀓𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀻 𑀫𑀦𑀼𑀲𑁆𑀲𑀸𑀦𑀁 𑀅𑀦𑁆𑀢𑀭𑁂 𑀧𑀢𑀺. 𑀫𑀦𑀼𑀲𑁆𑀲𑀸 𑀅𑀧𑀲𑁆𑀲𑀦𑁆𑀢𑀸 𑀢𑀁 𑀫𑀤𑁆𑀤𑀺𑀢𑁆𑀯𑀸 𑀅𑀕𑀫𑀺𑀁𑀲𑀼. 𑀲𑀸 𑀢𑀢𑁆𑀣𑁂𑀯 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀓𑀦𑀓𑀯𑀺𑀫𑀸𑀦𑁂 𑀦𑀺𑀩𑁆𑀩𑀢𑁆𑀢𑀺. 𑀦𑀺𑀩𑁆𑀩𑀢𑁆𑀢𑀓𑁆𑀔𑀡𑁂𑀬𑁂𑀯𑀲𑁆𑀲𑀸 𑀭𑀢𑀦𑀓𑁆𑀔𑀦𑁆𑀥𑁄 𑀯𑀺𑀬 𑀢𑀺𑀕𑀸𑀯𑀼𑀢𑀧𑁆𑀧𑀫𑀸𑀡𑁄 𑀅𑀢𑁆𑀢𑀪𑀸𑀯𑁄 𑀅𑀳𑁄𑀲𑀺 𑀲𑀝𑁆𑀞𑀺𑀲𑀓𑀝𑀧𑀽𑀭𑀧𑁆𑀧𑀫𑀸𑀡𑀅𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑀸 𑀅𑀘𑁆𑀙𑀭𑀸𑀲𑀳𑀲𑁆𑀲𑀧𑀭𑀺𑀯𑀸𑀭𑀺𑀢𑀸. 𑀅𑀣𑀲𑁆𑀲𑀸 𑀤𑀺𑀩𑁆𑀩𑀁 𑀲𑀩𑁆𑀩𑀓𑀸𑀬𑀺𑀓𑀸𑀤𑀸𑀲𑀁 𑀧𑀼𑀭𑀢𑁄 𑀞𑀧𑀬𑀺𑀁𑀲𑀼. 𑀲𑀸 𑀅𑀢𑁆𑀢𑀦𑁄 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑁋 ‘‘𑀉𑀴𑀸𑀭𑀸 𑀅𑀬𑀁 𑀲𑀫𑁆𑀧𑀢𑁆𑀢𑀺, 𑀓𑀺𑀁 𑀦𑀼 𑀔𑁄 𑀫𑁂 𑀓𑀫𑁆𑀫𑀁 𑀓𑀢’’𑀦𑁆𑀢𑀺 𑀘𑀺𑀦𑁆𑀢𑀬𑀫𑀸𑀦𑀸 𑀅𑀤𑁆𑀤𑀲 𑁋 ‘‘𑀫𑀬𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀝𑁆𑀞𑀸𑀦𑁂 𑀢𑀻𑀳𑀺 𑀲𑀼𑀯𑀡𑁆𑀡𑀧𑀼𑀧𑁆𑀨𑀓𑀼𑀫𑁆𑀪𑁂𑀳𑀺 𑀧𑀽𑀚𑀸 𑀓𑀢𑀸, 𑀫𑀳𑀸𑀚𑀦𑁄 𑀫𑀁 𑀫𑀤𑁆𑀤𑀺𑀢𑁆𑀯𑀸 𑀕𑀢𑁄, 𑀲𑀸𑀳𑀁 𑀢𑀢𑁆𑀣 𑀓𑀸𑀮𑀁 𑀓𑀢𑁆𑀯𑀸 𑀇𑀥𑀽𑀧𑀧𑀦𑁆𑀦𑀸, 𑀣𑁂𑀭𑀁 𑀦𑀺𑀲𑁆𑀲𑀸𑀬 𑀮𑀤𑁆𑀥𑀁 𑀇𑀤𑀸𑀦𑀺 𑀧𑀼𑀜𑁆𑀜𑀯𑀺𑀧𑀸𑀓𑀁 𑀫𑀦𑀼𑀲𑁆𑀲𑀸𑀦𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀲𑀳 𑀯𑀺𑀫𑀸𑀦𑁂𑀦𑁂𑀯 𑀑𑀢𑀭𑀺.

𑀫𑀳𑀸𑀚𑀦𑁄 𑀤𑀽𑀭𑀢𑁄𑀯 𑀤𑀺𑀲𑁆𑀯𑀸 𑁋 ‘‘𑀓𑀺𑀁 𑀦𑀼 𑀔𑁄 𑀤𑁆𑀯𑁂 𑀲𑀽𑀭𑀺𑀬𑀸 𑀉𑀝𑁆𑀞𑀺𑀢𑀸’’𑀢𑀺? 𑀑𑀮𑁄𑀓𑁂𑀦𑁆𑀢𑁄 𑁋 ‘‘𑀯𑀺𑀫𑀸𑀦𑁂 𑀆𑀕𑀘𑁆𑀙𑀦𑁆𑀢𑁂 𑀓𑀽𑀝𑀸𑀕𑀸𑀭𑀲𑀡𑁆𑀞𑀸𑀦𑀁 𑀧𑀜𑁆𑀜𑀸𑀬𑀢𑀺, 𑀦𑀸𑀬𑀁 𑀲𑀽𑀭𑀺𑀬𑁄, 𑀯𑀺𑀫𑀸𑀦𑀫𑁂𑀢𑀁 𑀏𑀓’’𑀦𑁆𑀢𑀺 𑀆𑀳. 𑀢𑀫𑁆𑀧𑀺 𑀯𑀺𑀫𑀸𑀦𑀁 𑀢𑀸𑀯𑀤𑁂𑀯 𑀆𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀤𑀸𑀭𑀼𑀘𑀺𑀢𑀓𑀫𑀢𑁆𑀣𑀓𑁂 𑀯𑁂𑀳𑀸𑀲𑀁 𑀅𑀝𑁆𑀞𑀸𑀲𑀺. 𑀤𑁂𑀯𑀥𑀻𑀢𑀸 𑀯𑀺𑀫𑀸𑀦𑀁 𑀆𑀓𑀸𑀲𑁂𑀬𑁂𑀯 𑀞𑀧𑁂𑀢𑁆𑀯𑀸 𑀧𑀣𑀯𑀺𑀁 𑀑𑀢𑀭𑀺. 𑀫𑀳𑀸𑀚𑀦𑁄 𑁋 ‘‘𑀓𑀸 𑀢𑁆𑀯𑀁, 𑀅𑀬𑁆𑀬𑁂’’𑀢𑀺? 𑀧𑀼𑀘𑁆𑀙𑀺. ‘‘𑀦 𑀫𑀁 𑀢𑀼𑀫𑁆𑀳𑁂 𑀚𑀸𑀦𑀸𑀣, 𑀭𑁂𑀯𑀢𑀻 𑀦𑀸𑀫𑀸𑀳𑀁, 𑀢𑀻𑀳𑀺 𑀲𑀼𑀯𑀡𑁆𑀡𑀧𑀼𑀧𑁆𑀨𑀓𑀼𑀫𑁆𑀪𑁂𑀳𑀺 𑀣𑁂𑀭𑀁 𑀧𑀽𑀚𑀁 𑀓𑀢𑁆𑀯𑀸 𑀫𑀦𑀼𑀲𑁆𑀲𑁂𑀳𑀺 𑀫𑀤𑁆𑀤𑀺𑀢𑀸 𑀓𑀸𑀮𑀁 𑀓𑀢𑁆𑀯𑀸 𑀢𑀸𑀯𑀢𑀺𑀁𑀲𑀪𑀯𑀦𑁂 𑀦𑀺𑀩𑁆𑀩𑀢𑁆𑀢𑀸, 𑀧𑀲𑁆𑀲𑀣 𑀫𑁂 𑀲𑀺𑀭𑀺𑀲𑀫𑁆𑀧𑀢𑁆𑀢𑀺𑀁, 𑀢𑀼𑀫𑁆𑀳𑁂𑀧𑀺 𑀤𑀸𑀦𑀺 𑀤𑀸𑀦𑀸𑀦𑀺 𑀤𑁂𑀣, 𑀧𑀼𑀜𑁆𑀜𑀸𑀦𑀺 𑀓𑀭𑁄𑀣𑀸’’𑀢𑀺 𑀓𑀼𑀲𑀮𑀓𑀺𑀭𑀺𑀬𑀸𑀬 𑀯𑀡𑁆𑀡𑀁 𑀓𑀣𑁂𑀢𑁆𑀯𑀸 𑀣𑁂𑀭𑀲𑁆𑀲 𑀘𑀺𑀢𑀓𑀁 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀯𑀦𑁆𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀤𑁂𑀯𑀝𑁆𑀞𑀸𑀦𑀁𑀬𑁂𑀯 𑀕𑀢𑀸.

𑀫𑀳𑀸𑀚𑀦𑁄𑀧𑀺 𑀲𑀢𑁆𑀢𑀸𑀳𑀁 𑀲𑀸𑀥𑀼𑀓𑀻𑀴𑀺𑀓𑀁 𑀓𑀻𑀴𑀺𑀢𑁆𑀯𑀸 𑀲𑀩𑁆𑀩𑀕𑀦𑁆𑀥𑁂𑀳𑀺 𑀘𑀺𑀢𑀓𑀁 𑀅𑀓𑀸𑀲𑀺, 𑀘𑀺𑀢𑀓𑀸 𑀏𑀓𑀽𑀦𑀭𑀢𑀦𑀲𑀢𑀺𑀓𑀸 𑀅𑀳𑁄𑀲𑀺. 𑀣𑁂𑀭𑀲𑁆𑀲 𑀲𑀭𑀻𑀭𑀁 𑀘𑀺𑀢𑀓𑀁 𑀆𑀭𑁄𑀧𑁂𑀢𑁆𑀯𑀸 𑀉𑀲𑀻𑀭𑀓𑀮𑀸𑀧𑀓𑁂𑀳𑀺 𑀆𑀮𑀺𑀫𑁆𑀧𑁂𑀲𑀼𑀁. 𑀆𑀴𑀸𑀳𑀦𑁂 𑀲𑀩𑁆𑀩𑀭𑀢𑁆𑀢𑀺𑀁 𑀥𑀫𑁆𑀫𑀲𑁆𑀲𑀯𑀦𑀁 𑀧𑀯𑀢𑁆𑀢𑀺. 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁄 𑀲𑀩𑁆𑀩𑀕𑀦𑁆𑀥𑁄𑀤𑀓𑁂𑀦 𑀣𑁂𑀭𑀲𑁆𑀲 𑀘𑀺𑀢𑀓𑀁 𑀦𑀺𑀩𑁆𑀩𑀸𑀧𑁂𑀲𑀺. 𑀘𑀼𑀦𑁆𑀤𑀢𑁆𑀣𑁂𑀭𑁄 𑀥𑀸𑀢𑀼𑀬𑁄 𑀧𑀭𑀺𑀲𑁆𑀲𑀸𑀯𑀦𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑁋 ‘‘𑀦 𑀤𑀸𑀦𑀺 𑀫𑀬𑀸 𑀇𑀥𑁂𑀯 𑀲𑀓𑁆𑀓𑀸 𑀞𑀸𑀢𑀼𑀁, 𑀫𑀬𑁆𑀳𑀁 𑀚𑁂𑀝𑁆𑀞𑀪𑀸𑀢𑀺𑀓𑀲𑁆𑀲 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀧𑀭𑀺𑀦𑀺𑀩𑁆𑀩𑀼𑀢𑀪𑀸𑀯𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀆𑀭𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀥𑀸𑀢𑀼𑀧𑀭𑀺𑀲𑁆𑀲𑀸𑀯𑀦𑀁 𑀣𑁂𑀭𑀲𑁆𑀲 𑀘 𑀧𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑁆𑀯𑀸 𑀲𑀸𑀯𑀢𑁆𑀣𑀺𑀁 𑀅𑀕𑀫𑀸𑀲𑀺. 𑀏𑀓𑀝𑁆𑀞𑀸𑀦𑁂𑀧𑀺 𑀘 𑀤𑁆𑀯𑁂 𑀭𑀢𑁆𑀢𑀺𑀬𑁄 𑀅𑀯𑀲𑀺𑀢𑁆𑀯𑀸 𑀲𑀩𑁆𑀩𑀢𑁆𑀣 𑀏𑀓𑀭𑀢𑁆𑀢𑀺𑀯𑀸𑀲𑁂𑀦𑁂𑀯 𑀲𑀸𑀯𑀢𑁆𑀣𑀺𑀁 𑀧𑀸𑀧𑀼𑀡𑀺. 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀅𑀣 𑀔𑁄 𑀘𑀼𑀦𑁆𑀤𑁄 𑀲𑀫𑀡𑀼𑀤𑁆𑀤𑁂𑀲𑁄𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀬𑁂𑀦𑀸𑀬𑀲𑁆𑀫𑀸 𑀆𑀦𑀦𑁆𑀤𑁄𑀢𑀺 𑀬𑁂𑀦 𑀅𑀢𑁆𑀢𑀦𑁄 𑀉𑀧𑀚𑁆𑀛𑀸𑀬𑁄 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁄 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄, 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀓𑀲𑁆𑀫𑀸 𑀧𑀦𑁂𑀲 𑀉𑀚𑀼𑀓𑀁 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀅𑀕𑀦𑁆𑀢𑁆𑀯𑀸 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀻𑀢𑀺? 𑀲𑀢𑁆𑀣𑀭𑀺 𑀘 𑀣𑁂𑀭𑁂 𑀘 𑀕𑀸𑀭𑀯𑁂𑀦. 𑀚𑁂𑀢𑀯𑀦𑀫𑀳𑀸𑀯𑀺𑀳𑀸𑀭𑁂 𑀧𑁄𑀓𑁆𑀔𑀭𑀡𑀺𑀬𑀁 𑀓𑀺𑀭𑀲𑁆𑀲 𑀦𑁆𑀳𑀢𑁆𑀯𑀸 𑀧𑀘𑁆𑀘𑀼𑀢𑁆𑀢𑀭𑀺𑀢𑁆𑀯𑀸 𑀲𑀼𑀦𑀺𑀯𑀢𑁆𑀣𑀲𑀼𑀧𑀸𑀭𑀼𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀩𑀼𑀤𑁆𑀥𑀸 𑀦𑀸𑀫 𑀫𑀳𑀸𑀧𑀸𑀲𑀸𑀡𑀘𑁆𑀙𑀢𑁆𑀢𑀁 𑀯𑀺𑀬 𑀕𑀭𑀼𑀦𑁄, 𑀨𑀡𑀓𑀢𑀲𑀧𑁆𑀧 𑀲𑀻𑀳𑀩𑁆𑀬𑀕𑁆𑀖𑀫𑀢𑁆𑀢𑀯𑀭𑀯𑀸𑀭𑀡𑀸𑀤𑀬𑁄 𑀯𑀺𑀬 𑀘 𑀤𑀼𑀭𑀸𑀲𑀤𑀸, 𑀦 𑀲𑀓𑁆𑀓𑀸 𑀫𑀬𑀸 𑀉𑀚𑀼𑀓𑀫𑁂𑀯 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀓𑀣𑁂𑀢𑀼𑀁, 𑀓𑀲𑁆𑀲 𑀦𑀼 𑀔𑁄 𑀲𑀦𑁆𑀢𑀺𑀓𑀁 𑀕𑀦𑁆𑀢𑀩𑁆𑀩’’𑀦𑁆𑀢𑀺. 𑀢𑀢𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀉𑀧𑀚𑁆𑀛𑀸𑀬𑁄 𑀫𑁂 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁄 𑀚𑁂𑀝𑁆𑀞𑀪𑀸𑀢𑀺𑀓𑀢𑁆𑀣𑁂𑀭𑀲𑁆𑀲 𑀉𑀢𑁆𑀢𑀫𑀲𑀳𑀸𑀬𑁄, 𑀢𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 𑀢𑀁 𑀆𑀤𑀸𑀬 𑀲𑀢𑁆𑀣𑀸𑀭𑀸 𑀲𑀤𑁆𑀥𑀺𑀁 𑀓𑀣𑁂𑀲𑁆𑀲𑀸𑀫𑀻’’𑀢𑀺 𑀲𑀢𑁆𑀣𑀭𑀺 𑀘𑁂𑀯 𑀣𑁂𑀭𑁂 𑀘 𑀕𑀸𑀭𑀯𑁂𑀦 𑀉𑀧𑀲𑀗𑁆𑀓𑀫𑀺.

𑀇𑀤𑀫𑀲𑁆𑀲 𑀧𑀢𑁆𑀢𑀘𑀻𑀯𑀭𑀦𑁆𑀢𑀺 ‘‘𑀅𑀬𑀫𑀲𑁆𑀲 𑀧𑀭𑀺𑀪𑁄𑀕𑀧𑀢𑁆𑀢𑁄, 𑀇𑀤𑀁 𑀥𑀸𑀢𑀼𑀧𑀭𑀺𑀲𑁆𑀲𑀸𑀯𑀦’’𑀦𑁆𑀢𑀺 𑀏𑀯𑀁 𑀏𑀓𑁂𑀓𑀁 𑀆𑀘𑀺𑀓𑁆𑀔𑀺. 𑀧𑀸𑀴𑀺𑀬𑀁 𑀧𑀦 ‘‘𑀇𑀤𑀫𑀲𑁆𑀲 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀓𑀣𑀸𑀧𑀸𑀪𑀢𑀦𑁆𑀢𑀺 𑀓𑀣𑀸𑀫𑀽𑀮𑀁. 𑀫𑀽𑀮𑀜𑁆𑀳𑀺 𑀧𑀸𑀪𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋

‘‘𑀅𑀧𑁆𑀧𑀓𑁂𑀦𑀧𑀺 𑀫𑁂𑀥𑀸𑀯𑀻, 𑀧𑀸𑀪𑀢𑁂𑀦 𑀯𑀺𑀘𑀓𑁆𑀔𑀡𑁄;

𑀲𑀫𑀼𑀝𑁆𑀞𑀸𑀧𑁂𑀢𑀺 𑀅𑀢𑁆𑀢𑀸𑀦𑀁, 𑀅𑀡𑀼𑀁 𑀅𑀕𑁆𑀕𑀺𑀁𑀯 𑀲𑀦𑁆𑀥𑀫’’𑀦𑁆𑀢𑀺. (𑀚𑀸. 𑁧.𑁧.𑁪);

𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀸𑀬𑀸𑀢𑀺 𑀪𑀕𑀯𑀦𑁆𑀢𑀁 𑀤𑀲𑁆𑀲𑀦𑀢𑁆𑀣𑀸𑀬. 𑀓𑀺𑀁 𑀧𑀦𑀺𑀫𑀺𑀦𑀸 𑀪𑀕𑀯𑀸 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄𑀢𑀺? 𑀦𑁄 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄. 𑀅𑀬𑀜𑁆𑀳𑀺 𑀆𑀬𑀲𑁆𑀫𑀸 𑀤𑀺𑀯𑀸 𑀦𑀯 𑀯𑀸𑀭𑁂, 𑀭𑀢𑁆𑀢𑀺𑀁 𑀦𑀯 𑀯𑀸𑀭𑁂𑀢𑀺 𑀏𑀓𑀸𑀳𑀁 𑀅𑀝𑁆𑀞𑀸𑀭𑀲 𑀯𑀸𑀭𑁂 𑀉𑀧𑀝𑁆𑀞𑀸𑀦𑀫𑁂𑀯 𑀕𑀘𑁆𑀙𑀢𑀺. 𑀤𑀺𑀯𑀲𑀲𑁆𑀲 𑀧𑀦 𑀲𑀢𑀯𑀸𑀭𑀁 𑀯𑀸 𑀲𑀳𑀲𑁆𑀲𑀯𑀸𑀭𑀁 𑀯𑀸 𑀕𑀦𑁆𑀢𑀼𑀓𑀸𑀫𑁄 𑀲𑀫𑀸𑀦𑁄𑀧𑀺 𑀦 𑀅𑀓𑀸𑀭𑀡𑀸 𑀕𑀘𑁆𑀙𑀢𑀺, 𑀏𑀓𑀁 𑀧𑀜𑁆𑀳𑀤𑁆𑀯𑀸𑀭𑀁 𑀕𑀳𑁂𑀢𑁆𑀯𑀸𑀯 𑀕𑀘𑁆𑀙𑀢𑀺. 𑀲𑁄 𑀢𑀁𑀤𑀺𑀯𑀲𑀁 𑀢𑁂𑀦 𑀓𑀣𑀸𑀧𑀸𑀪𑀢𑁂𑀦 𑀕𑀦𑁆𑀢𑀼𑀓𑀸𑀫𑁄 𑀏𑀯𑀫𑀸𑀳. 𑀇𑀤𑀫𑀲𑁆𑀲 𑀧𑀢𑁆𑀢𑀘𑀻𑀯𑀭𑀦𑁆𑀢𑀺 𑀣𑁂𑀭𑁄𑀧𑀺 𑁋 ‘‘𑀇𑀤𑀁 𑀢𑀲𑁆𑀲 𑀧𑀢𑁆𑀢𑀘𑀻𑀯𑀭𑀁, 𑀇𑀤𑀜𑁆𑀘 𑀥𑀸𑀢𑀼𑀧𑀭𑀺𑀲𑁆𑀲𑀸𑀯𑀦’’𑀦𑁆𑀢𑀺 𑀧𑀸𑀝𑀺𑀬𑁂𑀓𑁆𑀓𑀁𑀬𑁂𑀯 𑀤𑀲𑁆𑀲𑁂𑀢𑁆𑀯𑀸 𑀆𑀘𑀺𑀓𑁆𑀔𑀺.

𑀲𑀢𑁆𑀣𑀸 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 𑀥𑀸𑀢𑀼𑀧𑀭𑀺𑀲𑁆𑀲𑀸𑀯𑀦𑀁 𑀕𑀳𑁂𑀢𑁆𑀯𑀸 𑀳𑀢𑁆𑀣𑀢𑀮𑁂 𑀞𑀧𑁂𑀢𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀬𑁄 𑀲𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀧𑀼𑀭𑀺𑀫𑀤𑀺𑀯𑀲𑁂 𑀅𑀦𑁂𑀓𑀸𑀦𑀺 𑀧𑀸𑀝𑀺𑀳𑀸𑀭𑀺𑀬𑀲𑀢𑀸𑀦𑀺 𑀓𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀦𑀼𑀚𑀸𑀦𑀸𑀧𑁂𑀲𑀺, 𑀢𑀲𑁆𑀲 𑀇𑀤𑀸𑀦𑀺 𑀇𑀫𑀸 𑀲𑀗𑁆𑀔𑀯𑀡𑁆𑀡𑀲𑀦𑁆𑀦𑀺𑀪𑀸 𑀥𑀸𑀢𑀼𑀬𑁄𑀯 𑀧𑀜𑁆𑀜𑀸𑀬𑀦𑁆𑀢𑀺, 𑀓𑀧𑁆𑀧𑀲𑀢𑀲𑀳𑀲𑁆𑀲𑀸𑀥𑀺𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀧𑀽𑀭𑀺𑀢𑀧𑀸𑀭𑀫𑀻 𑀏𑀲, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼, 𑀫𑀬𑀸 𑀧𑀯𑀢𑁆𑀢𑀺𑀢𑀁 𑀥𑀫𑁆𑀫𑀘𑀓𑁆𑀓𑀁 𑀅𑀦𑀼𑀧𑀯𑀢𑁆𑀢𑀓𑁄 𑀏𑀲 𑀪𑀺𑀓𑁆𑀔𑀼, 𑀧𑀝𑀺𑀮𑀤𑁆𑀥𑀤𑀼𑀢𑀺𑀬𑀆𑀲𑀦𑁄 𑀏𑀲 𑀪𑀺𑀓𑁆𑀔𑀼, 𑀧𑀽𑀭𑀺𑀢𑀲𑀸𑀯𑀓𑀲𑀦𑁆𑀦𑀺𑀧𑀸𑀢𑁄 𑀏𑀲 𑀪𑀺𑀓𑁆𑀔𑀼, 𑀞𑀧𑁂𑀢𑁆𑀯𑀸 𑀫𑀁 𑀤𑀲𑀲𑀼 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀲𑀼 𑀧𑀜𑁆𑀜𑀸𑀬 𑀅𑀲𑀤𑀺𑀲𑁄 𑀏𑀲 𑀪𑀺𑀓𑁆𑀔𑀼, 𑀫𑀳𑀸𑀧𑀜𑁆𑀜𑁄 𑀏𑀲 𑀪𑀺𑀓𑁆𑀔𑀼, 𑀧𑀼𑀣𑀼𑀧𑀜𑁆𑀜𑁄 𑀳𑀸𑀲𑀧𑀜𑁆𑀜𑁄 𑀚𑀯𑀦𑀧𑀜𑁆𑀜𑁄 𑀢𑀺𑀓𑁆𑀔𑀧𑀜𑁆𑀜𑁄 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄 𑀏𑀲 𑀪𑀺𑀓𑁆𑀔𑀼, 𑀅𑀧𑁆𑀧𑀺𑀘𑁆𑀙𑁄 𑀏𑀲 𑀪𑀺𑀓𑁆𑀔𑀼, 𑀲𑀦𑁆𑀢𑀼𑀝𑁆𑀞𑁄 𑀧𑀯𑀺𑀯𑀺𑀢𑁆𑀢𑁄 𑀅𑀲𑀁𑀲𑀝𑁆𑀞𑁄 𑀆𑀭𑀤𑁆𑀥𑀯𑀻𑀭𑀺𑀬𑁄 𑀘𑁄𑀤𑀓𑁄 𑀧𑀸𑀧𑀕𑀭𑀳𑀻 𑀏𑀲 𑀪𑀺𑀓𑁆𑀔𑀼, 𑀧𑀜𑁆𑀘 𑀚𑀸𑀢𑀺𑀲𑀢𑀸𑀦𑀺 𑀧𑀝𑀺𑀮𑀤𑁆𑀥𑀫𑀳𑀸𑀲𑀫𑁆𑀧𑀢𑁆𑀢𑀺𑀬𑁄 𑀧𑀳𑀸𑀬 𑀧𑀩𑁆𑀩𑀚𑀺𑀢𑁄 𑀏𑀲 𑀪𑀺𑀓𑁆𑀔𑀼, 𑀫𑀫 𑀲𑀸𑀲𑀦𑁂 𑀧𑀣𑀯𑀻𑀲𑀫𑀔𑀦𑁆𑀢𑀺𑀓𑁄 𑀏𑀲 𑀪𑀺𑀓𑁆𑀔𑀼, 𑀙𑀺𑀦𑁆𑀦𑀯𑀺𑀲𑀸𑀡𑀉𑀲𑀪𑀲𑀤𑀺𑀲𑁄 𑀏𑀲 𑀪𑀺𑀓𑁆𑀔𑀼, 𑀘𑀡𑁆𑀟𑀸𑀮𑀧𑀼𑀢𑁆𑀢𑀲𑀤𑀺𑀲𑀦𑀻𑀘𑀘𑀺𑀢𑁆𑀢𑁄 𑀏𑀲 𑀪𑀺𑀓𑁆𑀔𑀼. 𑀧𑀲𑁆𑀲𑀣, 𑀪𑀺𑀓𑁆𑀔𑀯𑁂, 𑀫𑀳𑀸𑀧𑀜𑁆𑀜𑀲𑁆𑀲 𑀥𑀸𑀢𑀼𑀬𑁄, 𑀧𑀲𑁆𑀲𑀣, 𑀪𑀺𑀓𑁆𑀔𑀯𑁂, 𑀧𑀼𑀣𑀼𑀧𑀜𑁆𑀜𑀲𑁆𑀲 𑀳𑀸𑀲𑀧𑀜𑁆𑀜𑀲𑁆𑀲 𑀚𑀯𑀦𑀧𑀜𑁆𑀜𑀲𑁆𑀲 𑀢𑀺𑀓𑁆𑀔𑀧𑀜𑁆𑀜𑀲𑁆𑀲 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀲𑁆𑀲 𑀅𑀧𑁆𑀧𑀺𑀘𑁆𑀙𑀲𑁆𑀲 𑀲𑀦𑁆𑀢𑀼𑀝𑁆𑀞𑀲𑁆𑀲 𑀧𑀯𑀺𑀯𑀺𑀢𑁆𑀢𑀲𑁆𑀲 𑀅𑀲𑀁𑀲𑀝𑁆𑀞𑀲𑁆𑀲 𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲, 𑀘𑁄𑀤𑀓𑀲𑁆𑀲, 𑀧𑀲𑁆𑀲𑀣, 𑀪𑀺𑀓𑁆𑀔𑀯𑁂, 𑀧𑀸𑀧𑀕𑀭𑀳𑀺𑀲𑁆𑀲 𑀥𑀸𑀢𑀼𑀬𑁄𑀢𑀺.

‘‘𑀬𑁄 𑀧𑀩𑁆𑀩𑀚𑀻 𑀚𑀸𑀢𑀺𑀲𑀢𑀸𑀦𑀺 𑀧𑀜𑁆𑀘,

𑀧𑀳𑀸𑀬 𑀓𑀸𑀫𑀸𑀦𑀺 𑀫𑀦𑁄𑀭𑀫𑀸𑀦𑀺;

𑀢𑀁 𑀯𑀻𑀢𑀭𑀸𑀕𑀁 𑀲𑀼𑀲𑀫𑀸𑀳𑀺𑀢𑀺𑀦𑁆𑀤𑁆𑀭𑀺𑀬𑀁,

𑀧𑀭𑀺𑀦𑀺𑀩𑁆𑀩𑀼𑀢𑀁 𑀯𑀦𑁆𑀤𑀣 𑀲𑀸𑀭𑀺𑀧𑀼𑀢𑁆𑀢𑀁.

‘‘𑀔𑀦𑁆𑀢𑀺𑀩𑀮𑁄 𑀧𑀣𑀯𑀺𑀲𑀫𑁄 𑀦 𑀓𑀼𑀧𑁆𑀧𑀢𑀺,

𑀦 𑀘𑀸𑀧𑀺 𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 𑀯𑀢𑁆𑀢𑀢𑀺;

𑀅𑀦𑀼𑀓𑀫𑁆𑀧𑀓𑁄 𑀓𑀸𑀭𑀼𑀡𑀺𑀓𑁄 𑀘 𑀦𑀺𑀩𑁆𑀩𑀼𑀢𑁄,

𑀧𑀭𑀺𑀦𑀺𑀩𑁆𑀩𑀼𑀢𑀁 𑀯𑀦𑁆𑀤𑀣 𑀲𑀸𑀭𑀺𑀧𑀼𑀢𑁆𑀢𑀁.

‘‘𑀘𑀡𑁆𑀟𑀸𑀮𑀧𑀼𑀢𑁆𑀢𑁄 𑀬𑀣𑀸 𑀦𑀕𑀭𑀁 𑀧𑀯𑀺𑀝𑁆𑀞𑁄,

𑀦𑀻𑀘𑀫𑀦𑁄 𑀘𑀭𑀢𑀺 𑀓𑀴𑁄𑀧𑀺𑀳𑀢𑁆𑀣𑁄;

𑀢𑀣𑀸 𑀅𑀬𑀁 𑀯𑀺𑀳𑀭𑀢𑀺 𑀲𑀸𑀭𑀺𑀧𑀼𑀢𑁆𑀢𑁄,

𑀧𑀭𑀺𑀦𑀺𑀩𑁆𑀩𑀼𑀢𑀁 𑀯𑀦𑁆𑀤𑀣 𑀲𑀸𑀭𑀺𑀧𑀼𑀢𑁆𑀢𑀁.

‘‘𑀉𑀲𑀪𑁄 𑀬𑀣𑀸 𑀙𑀺𑀦𑁆𑀦𑀯𑀺𑀲𑀸𑀡𑀓𑁄,

𑀅𑀳𑁂𑀞𑀬𑀦𑁆𑀢𑁄 𑀘𑀭𑀢𑀺 𑀧𑀼𑀭𑀦𑁆𑀢𑀭𑁂 𑀯𑀦𑁂;

𑀢𑀣𑀸 𑀅𑀬𑀁 𑀯𑀺𑀳𑀭𑀢𑀺 𑀲𑀸𑀭𑀺𑀧𑀼𑀢𑁆𑀢𑁄,

𑀧𑀭𑀺𑀦𑀺𑀩𑁆𑀩𑀼𑀢𑀁 𑀯𑀦𑁆𑀤𑀣 𑀲𑀸𑀭𑀺𑀧𑀼𑀢𑁆𑀢’’𑀦𑁆𑀢𑀺.

𑀇𑀢𑀺 𑀪𑀕𑀯𑀸 𑀧𑀜𑁆𑀘𑀳𑀺 𑀕𑀸𑀣𑀸𑀲𑀢𑁂𑀳𑀺 𑀣𑁂𑀭𑀲𑁆𑀲 𑀯𑀡𑁆𑀡𑀁 𑀓𑀣𑁂𑀲𑀺. 𑀬𑀣𑀸 𑀬𑀣𑀸 𑀪𑀕𑀯𑀸 𑀣𑁂𑀭𑀲𑁆𑀲 𑀯𑀡𑁆𑀡𑀁 𑀓𑀣𑁂𑀲𑀺, 𑀢𑀣𑀸 𑀢𑀣𑀸 𑀆𑀦𑀦𑁆𑀤𑀢𑁆𑀣𑁂𑀭𑁄 𑀲𑀦𑁆𑀥𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀩𑀺𑀴𑀸𑀭𑀫𑀼𑀔𑁂 𑀧𑀓𑁆𑀔𑀦𑁆𑀢𑀓𑀼𑀓𑁆𑀓𑀼𑀝𑁄 𑀯𑀺𑀬 𑀧𑀯𑁂𑀥𑀢𑀺. 𑀢𑁂𑀦𑀸𑀳 𑀅𑀧𑀺𑀘 𑀫𑁂, 𑀪𑀦𑁆𑀢𑁂, 𑀫𑀥𑀼𑀭𑀓𑀚𑀸𑀢𑁄 𑀯𑀺𑀬 𑀓𑀸𑀬𑁄𑀢𑀺 𑀲𑀩𑁆𑀩𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁. 𑀢𑀢𑁆𑀣 𑀫𑀥𑀼𑀭𑀓𑀚𑀸𑀢𑁄𑀢𑀺𑀆𑀤𑀻𑀦𑀁 𑀅𑀢𑁆𑀣𑁄 𑀯𑀼𑀢𑁆𑀢𑁄𑀬𑁂𑀯. 𑀇𑀥 𑀧𑀦 𑀥𑀫𑁆𑀫𑀸𑀢𑀺 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀥𑀫𑁆𑀫𑀸 𑀅𑀥𑀺𑀧𑁆𑀧𑁂𑀢𑀸. 𑀢𑀲𑁆𑀲 𑀳𑀺 𑀉𑀤𑁆𑀤𑁂𑀲𑀧𑀭𑀺𑀧𑀼𑀘𑁆𑀙𑀸𑀥𑀫𑁆𑀫𑁂 𑀅𑀕𑀳𑀺𑀢𑁂 𑀯𑀸 𑀕𑀳𑁂𑀢𑀼𑀁, 𑀕𑀳𑀺𑀢𑁂 𑀯𑀸 𑀲𑀚𑁆𑀛𑀸𑀬𑀁 𑀓𑀸𑀢𑀼𑀁 𑀘𑀺𑀢𑁆𑀢𑀁 𑀦 𑀧𑀯𑀢𑁆𑀢𑀢𑀺. 𑀅𑀣 𑀲𑀢𑁆𑀣𑀸 𑀧𑀜𑁆𑀘𑀧𑀲𑀸𑀤𑀯𑀺𑀘𑀺𑀢𑁆𑀭𑀸𑀦𑀺 𑀅𑀓𑁆𑀔𑀻𑀦𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀣𑁂𑀭𑀁 𑀑𑀮𑁄𑀓𑁂𑀦𑁆𑀢𑁄 ‘‘𑀅𑀲𑁆𑀲𑀸𑀲𑁂𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀅𑀲𑁆𑀲𑀸𑀲𑁂𑀦𑁆𑀢𑁄 𑀓𑀺𑀁 𑀦𑀼 𑀔𑁄 𑀢𑁂, 𑀆𑀦𑀦𑁆𑀤, 𑀲𑀸𑀭𑀺𑀧𑀼𑀢𑁆𑀢𑁄𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀲𑀻𑀮𑀓𑁆𑀔𑀦𑁆𑀥𑀦𑁆𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑀻𑀮𑀁. 𑀲𑀫𑀸𑀥𑀺𑀧𑀜𑁆𑀜𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀯𑀺𑀫𑀼𑀢𑁆𑀢𑀺 𑀧𑀦 𑀮𑁄𑀓𑀼𑀢𑁆𑀢𑀭𑀸𑀯. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁, 𑀢𑀁 𑀮𑁄𑀓𑀺𑀬𑀫𑁂𑀯. 𑀑𑀯𑀸𑀤𑀓𑁄𑀢𑀺 𑀑𑀯𑀸𑀤𑀤𑀸𑀬𑀓𑁄. 𑀑𑀢𑀺𑀡𑁆𑀡𑁄𑀢𑀺 𑀑𑀢𑀺𑀡𑁆𑀡𑁂𑀲𑀼 𑀯𑀢𑁆𑀣𑀽𑀲𑀼 𑀦𑀸𑀦𑀧𑁆𑀧𑀓𑀸𑀭𑁂𑀦 𑀑𑀢𑀭𑀡𑀲𑀻𑀮𑁄. 𑀯𑀺𑀜𑁆𑀜𑀸𑀧𑀓𑁄𑀢𑀺 𑀥𑀫𑁆𑀫𑀓𑀣𑀸𑀓𑀸𑀮𑁂 𑀅𑀢𑁆𑀣𑀜𑁆𑀘 𑀓𑀸𑀭𑀡𑀜𑁆𑀘 𑀯𑀺𑀜𑁆𑀜𑀸𑀧𑁂𑀢𑀸. 𑀲𑀦𑁆𑀤𑀲𑁆𑀲𑀓𑁄𑀢𑀺 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀯𑀲𑁂𑀦 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀤𑀲𑁆𑀲𑁂𑀢𑀸. 𑀲𑀫𑀸𑀤𑀧𑀓𑁄𑀢𑀺 ‘‘𑀇𑀤𑀜𑁆𑀘𑀺𑀤𑀜𑁆𑀘 𑀕𑀡𑁆𑀳𑀣𑀸’’𑀢𑀺 𑀏𑀯𑀁 𑀕𑀡𑁆𑀳𑀸𑀧𑀓𑁄. 𑀲𑀫𑀼𑀢𑁆𑀢𑁂𑀚𑀓𑁄𑀢𑀺 𑀅𑀩𑁆𑀪𑀼𑀲𑁆𑀲𑀸𑀳𑀓𑁄. 𑀲𑀫𑁆𑀧𑀳𑀁𑀲𑀓𑁄𑀢𑀺 𑀧𑀝𑀺𑀮𑀤𑁆𑀥𑀕𑀼𑀡𑁂𑀳𑀺 𑀫𑁄𑀤𑀸𑀧𑀓𑁄 𑀚𑁄𑀢𑀸𑀧𑀓𑁄.

𑀅𑀓𑀺𑀮𑀸𑀲𑀼 𑀥𑀫𑁆𑀫𑀤𑁂𑀲𑀦𑀸𑀬𑀸𑀢𑀺 𑀥𑀫𑁆𑀫𑀤𑁂𑀲𑀦𑀁 𑀆𑀭𑀪𑀺𑀢𑁆𑀯𑀸 ‘‘𑀲𑀻𑀲𑀁 𑀯𑀸 𑀫𑁂 𑀭𑀼𑀚𑁆𑀚𑀢𑀺, 𑀳𑀤𑀬𑀁 𑀯𑀸 𑀓𑀼𑀘𑁆𑀙𑀺 𑀯𑀸 𑀧𑀺𑀝𑁆𑀞𑀺 𑀯𑀸’’𑀢𑀺 𑀏𑀯𑀁 𑀑𑀲𑀓𑁆𑀓𑀦𑀸𑀓𑀸𑀭𑀯𑀺𑀭𑀳𑀺𑀢𑁄 𑀦𑀺𑀓𑁆𑀓𑀺𑀮𑀸𑀲𑀼 𑀯𑀺𑀲𑀸𑀭𑀤𑁄 𑀏𑀓𑀲𑁆𑀲𑀸𑀧𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀻𑀳𑀯𑁂𑀕𑁂𑀦𑁂𑀯 𑀧𑀓𑁆𑀔𑀦𑁆𑀤𑀢𑀺. 𑀅𑀦𑀼𑀕𑁆𑀕𑀸𑀳𑀓𑁄 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀦𑁆𑀢𑀺 𑀧𑀤𑀲𑁆𑀲 𑀅𑀢𑁆𑀣𑁄 𑀔𑀦𑁆𑀥𑀓𑀯𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑁄𑀯. 𑀥𑀫𑁆𑀫𑁄𑀚𑀁 𑀥𑀫𑁆𑀫𑀪𑁄𑀕𑀦𑁆𑀢𑀺 𑀉𑀪𑀬𑁂𑀦𑀧𑀺 𑀥𑀫𑁆𑀫𑀧𑀭𑀺𑀪𑁄𑀕𑁄𑀯 𑀓𑀣𑀺𑀢𑁄. 𑀥𑀫𑁆𑀫𑀸𑀦𑀼𑀕𑁆𑀕𑀳𑀦𑁆𑀢𑀺 𑀥𑀫𑁆𑀫𑁂𑀦 𑀅𑀦𑀼𑀕𑁆𑀕𑀳𑀡𑀁.

𑀲𑀢𑁆𑀣𑀸 ‘‘𑀅𑀢𑀺𑀯𑀺𑀬 𑀅𑀬𑀁 𑀪𑀺𑀓𑁆𑀔𑀼 𑀓𑀺𑀮𑀫𑀢𑀻’’𑀢𑀺 𑀧𑀼𑀦 𑀢𑀁 𑀅𑀲𑁆𑀲𑀸𑀲𑁂𑀦𑁆𑀢𑁄 𑀦𑀦𑀼 𑀢𑀁, 𑀆𑀦𑀦𑁆𑀤, 𑀫𑀬𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀻𑀢𑀺 𑀫𑀸𑀢𑀸𑀧𑀺𑀢𑀸𑀪𑀸𑀢𑀸𑀪𑀕𑀺𑀦𑀻𑀆𑀤𑀺𑀓𑁂𑀳𑀺 𑀚𑀸𑀢𑀺𑀬𑀸 𑀦𑀸𑀦𑀸𑀪𑀸𑀯𑁄, 𑀫𑀭𑀡𑁂𑀦 𑀯𑀺𑀦𑀸𑀪𑀸𑀯𑁄, 𑀪𑀯𑁂𑀦 𑀅𑀜𑁆𑀜𑀣𑀸𑀪𑀸𑀯𑁄. 𑀢𑀁 𑀓𑀼𑀢𑁂𑀢𑁆𑀣, 𑀆𑀦𑀦𑁆𑀤, 𑀮𑀩𑁆𑀪𑀸𑀢𑀺 𑀢𑀦𑁆𑀢𑀺 𑀢𑀲𑁆𑀫𑀸. 𑀬𑀲𑁆𑀫𑀸 𑀲𑀩𑁆𑀩𑁂𑀳𑀺 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺 𑀦𑀸𑀦𑀸𑀪𑀸𑀯𑁄, 𑀢𑀲𑁆𑀫𑀸 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸𑀧𑀺 𑀲𑀫𑁆𑀩𑁄𑀥𑀺𑀁 𑀧𑀢𑁆𑀯𑀸𑀧𑀺 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑁆𑀯𑀸𑀧𑀺 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑁆𑀯𑀸𑀧𑀺 𑀤𑁂𑀯𑁄𑀭𑁄𑀳𑀦𑀁 𑀓𑀢𑁆𑀯𑀸𑀧𑀺 𑀬𑀁 𑀢𑀁 𑀚𑀸𑀢𑀁 𑀪𑀽𑀢𑀁 𑀲𑀗𑁆𑀔𑀢𑀁 𑀧𑀮𑁄𑀓𑀥𑀫𑁆𑀫𑀁, 𑀢𑀁 𑀢𑀣𑀸𑀕𑀢𑀲𑁆𑀲𑀸𑀧𑀺 𑀲𑀭𑀻𑀭𑀁 𑀫𑀸 𑀧𑀮𑀼𑀚𑁆𑀚𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺, 𑀭𑁄𑀤𑀦𑁆𑀢𑁂𑀦𑀧𑀺 𑀓𑀦𑁆𑀤𑀦𑁆𑀢𑁂𑀦𑀧𑀺 𑀦 𑀲𑀓𑁆𑀓𑀸 𑀢𑀁 𑀓𑀸𑀭𑀡𑀁 𑀮𑀤𑁆𑀥𑀼𑀦𑁆𑀢𑀺. 𑀲𑁄 𑀧𑀮𑀼𑀚𑁆𑀚𑁂𑀬𑁆𑀬𑀸𑀢𑀺 𑀲𑁄 𑀪𑀺𑀚𑁆𑀚𑁂𑀬𑁆𑀬.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑁄 𑀫𑀳𑀸𑀚𑀫𑁆𑀩𑀼𑀭𑀼𑀓𑁆𑀔𑁄 𑀯𑀺𑀬 𑀪𑀺𑀓𑁆𑀔𑀼𑀲𑀗𑁆𑀖𑁄 𑀢𑀲𑁆𑀲 𑀤𑀓𑁆𑀔𑀺𑀡𑀤𑀺𑀲𑀁 𑀕𑀢𑁄 𑀧𑀜𑁆𑀜𑀸𑀲𑀬𑁄𑀚𑀦𑀺𑀓𑁄 𑀫𑀳𑀸𑀔𑀦𑁆𑀥𑁄 𑀯𑀺𑀬 𑀥𑀫𑁆𑀫𑀲𑁂𑀦𑀸𑀧𑀢𑀺. 𑀢𑀲𑁆𑀫𑀺𑀁 𑀫𑀳𑀸𑀔𑀦𑁆𑀥𑁂 𑀪𑀺𑀦𑁆𑀦𑁂 𑀢𑀢𑁄 𑀧𑀝𑁆𑀞𑀸𑀬 𑀅𑀦𑀼𑀧𑀼𑀩𑁆𑀩𑁂𑀦 𑀯𑀟𑁆𑀠𑀺𑀢𑁆𑀯𑀸 𑀧𑀼𑀧𑁆𑀨𑀨𑀮𑀸𑀤𑀻𑀳𑀺 𑀢𑀁 𑀞𑀸𑀦𑀁 𑀧𑀽𑀭𑁂𑀢𑀼𑀁 𑀲𑀫𑀢𑁆𑀣𑀲𑁆𑀲 𑀅𑀜𑁆𑀜𑀲𑁆𑀲 𑀔𑀦𑁆𑀥𑀲𑁆𑀲 𑀅𑀪𑀸𑀯𑁄 𑀯𑀺𑀬 𑀣𑁂𑀭𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑁄𑀴𑀲𑀦𑁆𑀦𑀁 𑀧𑀜𑁆𑀜𑀸𑀦𑀁 𑀫𑀢𑁆𑀣𑀓𑀁 𑀧𑀢𑁆𑀢𑀲𑁆𑀲 𑀅𑀜𑁆𑀜𑀲𑁆𑀲 𑀤𑀓𑁆𑀔𑀺𑀡𑀸𑀲𑀦𑁂 𑀦𑀺𑀲𑀻𑀤𑀦𑀲𑀫𑀢𑁆𑀣𑀲𑁆𑀲 𑀲𑀸𑀭𑀺𑀧𑀼𑀢𑁆𑀢𑀲𑀤𑀺𑀲𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀪𑀸𑀯𑁄. 𑀢𑀸𑀬 𑀧𑀭𑀺𑀪𑀺𑀦𑁆𑀦𑀸𑀬 𑀲𑁄 𑀭𑀼𑀓𑁆𑀔𑁄 𑀯𑀺𑀬 𑀪𑀺𑀓𑁆𑀔𑀼𑀲𑀗𑁆𑀖𑁄 𑀔𑀦𑁆𑀥𑁄𑀢𑁆𑀯𑁂𑀯 𑀚𑀸𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀲𑀩𑁆𑀩𑀁 𑀲𑀗𑁆𑀔𑀢𑀁 𑀧𑀮𑁄𑀓𑀥𑀫𑁆𑀫𑀁, 𑀢𑀁 𑀫𑀸 𑀧𑀮𑀼𑀚𑁆𑀚𑀻𑀢𑀺 𑀦 𑀲𑀓𑁆𑀓𑀸 𑀮𑀤𑁆𑀥𑀼𑀁, 𑀢𑀲𑁆𑀫𑀸.

𑁪-𑁫. 𑀉𑀓𑁆𑀓𑀘𑁂𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁮𑁦-𑁩𑁮𑁧. 𑀘𑀢𑀼𑀢𑁆𑀣𑁂 𑀅𑀘𑀺𑀭𑀧𑀭𑀺𑀦𑀺𑀩𑁆𑀩𑀼𑀢𑁂𑀲𑀼 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀲𑀽𑀢𑀺 𑀦𑀘𑀺𑀭𑀧𑀭𑀺𑀦𑀺𑀩𑁆𑀩𑀼𑀢𑁂𑀲𑀼 𑀤𑁆𑀯𑀻𑀲𑀼 𑀅𑀕𑁆𑀕𑀲𑀸𑀯𑀓𑁂𑀲𑀼. 𑀢𑁂𑀲𑀜𑁆𑀳𑀺 𑀥𑀫𑁆𑀫𑀲𑁂𑀦𑀸𑀧𑀢𑀺 𑀓𑀢𑁆𑀢𑀺𑀓𑀫𑀸𑀲𑀧𑀼𑀡𑁆𑀡𑀫𑀸𑀬 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀢𑀢𑁄 𑀅𑀟𑁆𑀠𑀫𑀸𑀲𑀁 𑀅𑀢𑀺𑀓𑁆𑀓𑀫𑁆𑀫 𑀅𑀫𑀸𑀯𑀲𑀼𑀧𑁄𑀲𑀣𑁂. 𑀲𑀢𑁆𑀣𑀸 𑀤𑁆𑀯𑀻𑀲𑀼 𑀅𑀕𑁆𑀕𑀲𑀸𑀯𑀓𑁂𑀲𑀼 𑀧𑀭𑀺𑀦𑀺𑀩𑁆𑀩𑀼𑀢𑁂𑀲𑀼 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀫𑀳𑀸𑀫𑀡𑁆𑀟𑀮𑁂 𑀘𑀸𑀭𑀺𑀓𑀁 𑀘𑀭𑀫𑀸𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀉𑀓𑁆𑀓𑀘𑁂𑀮𑀦𑀕𑀭𑀁 𑀧𑀢𑁆𑀯𑀸 𑀢𑀢𑁆𑀣 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀕𑀗𑁆𑀕𑀸𑀧𑀺𑀝𑁆𑀞𑁂 𑀭𑀚𑀢𑀧𑀝𑁆𑀝𑀯𑀡𑁆𑀡𑀯𑀸𑀮𑀺𑀓𑀸𑀧𑀼𑀮𑀺𑀦𑁂 𑀯𑀺𑀳𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀘𑀺𑀭𑀧𑀭𑀺𑀦𑀺𑀩𑁆𑀩𑀼𑀢𑁂𑀲𑀼 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂𑀲𑀽’’𑀢𑀺. 𑀬𑁂 𑀫𑀳𑀦𑁆𑀢𑀢𑀭𑀸 𑀔𑀦𑁆𑀥𑀸 𑀢𑁂 𑀧𑀮𑀼𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀇𑀥𑀸𑀧𑀺 𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑁄 𑀫𑀳𑀸𑀚𑀫𑁆𑀩𑀼𑀭𑀼𑀓𑁆𑀔𑁄 𑀯𑀺𑀬 𑀪𑀺𑀓𑁆𑀔𑀼𑀲𑀗𑁆𑀖𑁄, 𑀢𑀲𑁆𑀲 𑀤𑀓𑁆𑀔𑀺𑀡𑀢𑁄 𑀘 𑀉𑀢𑁆𑀢𑀭𑀢𑁄 𑀘 𑀕𑀢𑀸 𑀧𑀡𑁆𑀡𑀸𑀲𑀬𑁄𑀚𑀦𑀺𑀓𑀸 𑀤𑁆𑀯𑁂 𑀫𑀳𑀸𑀔𑀦𑁆𑀥𑀸 𑀯𑀺𑀬 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀧𑀜𑁆𑀘𑀫𑁂 𑀤𑀺𑀝𑁆𑀞𑀻𑀢𑀺 𑀓𑀫𑁆𑀫𑀲𑁆𑀲𑀓𑀤𑀺𑀝𑁆𑀞𑀺.

𑁬. 𑀉𑀢𑁆𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮𑁨. 𑀙𑀝𑁆𑀞𑁂 𑀫𑀘𑁆𑀘𑀼𑀥𑁂𑀬𑁆𑀬𑀲𑁆𑀲 𑀧𑀸𑀭𑀦𑁆𑀢𑀺 𑀢𑁂𑀪𑀽𑀫𑀓𑀯𑀝𑁆𑀝𑀲𑁆𑀲 𑀧𑀸𑀭𑀪𑀽𑀢𑀁, 𑀦𑀺𑀩𑁆𑀩𑀸𑀦𑀁.

𑁮. 𑀩𑁆𑀭𑀳𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮𑁪. 𑀅𑀝𑁆𑀞𑀫𑁂 𑀓𑀸𑀬𑁂 𑀯𑀸 𑀪𑀺𑀓𑁆𑀔𑀽𑀢𑀺 𑀢𑀲𑁆𑀫𑀺𑀁 𑀓𑀸𑀮𑁂 𑀪𑀺𑀓𑁆𑀔𑀼𑀬𑁂𑀯 𑀦𑀢𑁆𑀣𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀬𑁄 𑀲𑀢𑀺𑀧𑀝𑁆𑀞𑀸𑀦𑁂 𑀪𑀸𑀯𑁂𑀢𑀺, 𑀲𑁄 𑀓𑀺𑀮𑁂𑀲𑀪𑀺𑀦𑁆𑀤𑀦𑁂𑀦 𑀪𑀺𑀓𑁆𑀔𑀼𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀏𑀓𑀸𑀬𑀦𑀦𑁆𑀢𑀺 𑀏𑀓𑀫𑀕𑁆𑀕𑀁. 𑀚𑀸𑀢𑀺𑀓𑁆𑀔𑀬𑀦𑁆𑀢𑀤𑀲𑁆𑀲𑀻𑀢𑀺 𑀚𑀸𑀢𑀺𑀬𑀸 𑀔𑀬𑁄𑀢𑀺 𑀘 𑀅𑀦𑁆𑀢𑁄𑀢𑀺 𑀘 𑀦𑀺𑀩𑁆𑀩𑀸𑀦𑀁, 𑀢𑀁 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀫𑀕𑁆𑀕𑀁 𑀧𑀚𑀸𑀦𑀸𑀢𑀻𑀢𑀺 𑀏𑀓𑀸𑀬𑀦𑀲𑀗𑁆𑀔𑀸𑀢𑀁 𑀏𑀓𑀫𑀕𑁆𑀕𑀪𑀽𑀢𑀁 𑀫𑀕𑁆𑀕𑀁 𑀧𑀚𑀸𑀦𑀸𑀢𑀺. 𑀏𑀓𑀸𑀬𑀦𑀫𑀕𑁆𑀕𑁄 𑀯𑀼𑀘𑁆𑀘𑀢𑀺 𑀧𑀼𑀩𑁆𑀩𑀪𑀸𑀕𑀲𑀢𑀺𑀧𑀝𑁆𑀞𑀸𑀦𑀫𑀕𑁆𑀕𑁄, 𑀢𑀁 𑀧𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄.

𑁯. 𑀲𑁂𑀤𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮𑁫. 𑀦𑀯𑀫𑁂 𑀲𑀼𑀫𑁆𑀪𑁂𑀲𑀽𑀢𑀺 𑀏𑀯𑀁𑀦𑀸𑀫𑀓𑁂 𑀚𑀦𑀧𑀤𑁂. 𑀫𑁂𑀤𑀓𑀣𑀸𑀮𑀺𑀓𑀸𑀢𑀺 𑀏𑀯𑀁 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀮𑀤𑁆𑀥𑀦𑀸𑀫𑀁. 𑀫𑀫𑀁 𑀭𑀓𑁆𑀔, 𑀅𑀳𑀁 𑀢𑀁 𑀭𑀓𑁆𑀔𑀺𑀲𑁆𑀲𑀸𑀫𑀻𑀢𑀺 𑀏𑀢𑁆𑀣 𑀅𑀬𑀁 𑀢𑀲𑁆𑀲 𑀮𑀤𑁆𑀥𑀺 𑁋 𑀆𑀘𑀭𑀺𑀬𑁄 𑀉𑀓𑁆𑀔𑀺𑀢𑁆𑀢𑀯𑀁𑀲𑀁 𑀲𑀼𑀕𑁆𑀕𑀳𑀺𑀢𑀁 𑀅𑀕𑀡𑁆𑀳𑀦𑁆𑀢𑁄, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀧𑀓𑁆𑀔𑀦𑁆𑀢𑀧𑀓𑁆𑀔𑀦𑁆𑀢𑀤𑀺𑀲𑀁 𑀅𑀕𑀘𑁆𑀙𑀦𑁆𑀢𑁄, 𑀲𑀩𑁆𑀩𑀓𑀸𑀮𑀜𑁆𑀘 𑀯𑀁𑀲𑀕𑁆𑀕𑀁 𑀅𑀦𑀼𑀮𑁆𑀮𑁄𑀓𑁂𑀦𑁆𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑀁 𑀦 𑀭𑀓𑁆𑀔𑀢𑀺 𑀦𑀸𑀫, 𑀏𑀯𑀁 𑀅𑀭𑀓𑁆𑀔𑀺𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑁄 𑀧𑀢𑀺𑀢𑁆𑀯𑀸 𑀘𑀼𑀡𑁆𑀡𑀯𑀺𑀘𑀼𑀡𑁆𑀡𑀁 𑀳𑁄𑀢𑀺. 𑀯𑀁𑀲𑀁 𑀧𑀦 𑀲𑀼𑀕𑁆𑀕𑀳𑀺𑀢𑀁 𑀕𑀡𑁆𑀳𑀦𑁆𑀢𑁄, 𑀢𑁂𑀦 𑀧𑀓𑁆𑀔𑀦𑁆𑀢𑀧𑀓𑁆𑀔𑀦𑁆𑀢𑀤𑀺𑀲𑀁 𑀕𑀘𑁆𑀙𑀦𑁆𑀢𑁄, 𑀲𑀩𑁆𑀩𑀓𑀸𑀮𑀜𑁆𑀘 𑀯𑀁𑀲𑀕𑁆𑀕𑀁 𑀉𑀮𑁆𑀮𑁄𑀓𑁂𑀦𑁆𑀢𑁄 𑀢𑀁 𑀭𑀓𑁆𑀔𑀢𑀺 𑀦𑀸𑀫. 𑀅𑀦𑁆𑀢𑁂𑀯𑀸𑀲𑀺𑀓𑁄𑀧𑀺 𑀇𑀢𑁄 𑀘𑀺𑀢𑁄 𑀘 𑀧𑀓𑁆𑀔𑀦𑁆𑀤𑀺𑀢𑁆𑀯𑀸 𑀫𑀺𑀕𑁄 𑀯𑀺𑀬 𑀓𑀻𑀴𑀦𑁆𑀢𑁄 𑀆𑀘𑀭𑀺𑀬𑀁 𑀦 𑀭𑀓𑁆𑀔𑀢𑀺 𑀦𑀸𑀫. 𑀏𑀯𑀜𑁆𑀳𑀺 𑀲𑀢𑀺 𑀢𑀺𑀔𑀺𑀡𑀯𑀁𑀲𑀓𑁄𑀝𑀺 𑀆𑀘𑀭𑀺𑀬𑀲𑁆𑀲 𑀕𑀮𑀯𑀸𑀝𑀓𑁂 𑀯𑀸 𑀦𑀮𑀸𑀝𑁂 𑀯𑀸 𑀞𑀧𑀺𑀢𑀸 𑀞𑀺𑀢𑀝𑁆𑀞𑀸𑀦𑀁 𑀪𑀺𑀦𑁆𑀤𑀺𑀢𑁆𑀯𑀸 𑀕𑀘𑁆𑀙𑁂𑀬𑁆𑀬. 𑀆𑀘𑀸𑀭𑀲𑀫𑁆𑀧𑀦𑁆𑀦𑀢𑀸𑀬 𑀧𑀦 𑀬𑀢𑁄 𑀯𑀁𑀲𑁄 𑀦𑀫𑀢𑀺, 𑀢𑀢𑁄 𑀅𑀦𑀸𑀫𑁂𑀦𑁆𑀢𑁄 𑀢𑀁 𑀆𑀓𑀟𑁆𑀠𑁂𑀦𑁆𑀢𑁄 𑀯𑀺𑀬 𑀏𑀓𑀢𑁄𑀪𑀸𑀕𑀺𑀬𑀁 𑀓𑀢𑁆𑀯𑀸 𑀯𑀸𑀢𑀽𑀧𑀣𑀫𑁆𑀪𑀁 𑀕𑀸𑀳𑀸𑀧𑁂𑀢𑁆𑀯𑀸 𑀲𑀢𑀺𑀁 𑀲𑀽𑀧𑀝𑁆𑀞𑀺𑀢𑀁 𑀓𑀢𑁆𑀯𑀸 𑀦𑀺𑀘𑁆𑀘𑀮𑁄𑀯 𑀦𑀺𑀲𑀻𑀤𑀦𑁆𑀢𑁄 𑀆𑀘𑀭𑀺𑀬𑀁 𑀭𑀓𑁆𑀔𑀢𑀺 𑀦𑀸𑀫𑀸𑀢𑀺.

𑀢𑁆𑀯𑀁 𑀆𑀘𑀭𑀺𑀬 𑀅𑀢𑁆𑀢𑀸𑀦𑀁 𑀭𑀓𑁆𑀔, 𑀅𑀳𑀁 𑀅𑀢𑁆𑀢𑀸𑀦𑀁 𑀭𑀓𑁆𑀔𑀺𑀲𑁆𑀲𑀸𑀫𑀻𑀢𑀺 𑀏𑀢𑁆𑀣 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀆𑀘𑀭𑀺𑀬𑁄 𑀯𑀁𑀲𑀁 𑀲𑀼𑀕𑁆𑀕𑀳𑀺𑀢𑀁 𑀕𑀡𑁆𑀳𑀦𑁆𑀢𑁄, 𑀅𑀦𑁆𑀢𑁂𑀯𑀸𑀲𑀺𑀓𑁂𑀦 𑀧𑀓𑁆𑀔𑀦𑁆𑀢𑀧𑀓𑁆𑀔𑀦𑁆𑀢𑀤𑀺𑀲𑀁𑀕𑀘𑁆𑀙𑀦𑁆𑀢𑁄, 𑀲𑀩𑁆𑀩𑀓𑀸𑀮𑀜𑁆𑀘 𑀯𑀁𑀲𑀕𑁆𑀕𑀁 𑀉𑀮𑁆𑀮𑁄𑀓𑁂𑀦𑁆𑀢𑁄, 𑀅𑀢𑁆𑀢𑀸𑀦𑀫𑁂𑀯 𑀭𑀓𑁆𑀔𑀢𑀺, 𑀦 𑀅𑀦𑁆𑀢𑁂𑀯𑀸𑀲𑀺𑀓𑀁. 𑀅𑀦𑁆𑀢𑁂𑀯𑀸𑀲𑀺𑀓𑁄𑀧𑀺 𑀓𑀸𑀬𑀫𑁆𑀧𑀺 𑀏𑀓𑀢𑁄𑀪𑀸𑀕𑀺𑀬𑀁 𑀓𑀢𑁆𑀯𑀸 𑀯𑀸𑀢𑀽𑀧𑀣𑀫𑁆𑀪𑀁 𑀕𑀸𑀳𑀸𑀧𑁂𑀢𑁆𑀯𑀸 𑀲𑀢𑀺𑀁 𑀲𑀽𑀧𑀝𑁆𑀞𑀺𑀢𑀁 𑀓𑀢𑁆𑀯𑀸 𑀦𑀺𑀘𑁆𑀘𑀮𑁄𑀯 𑀦𑀺𑀲𑀻𑀤𑀫𑀸𑀦𑁄 𑀅𑀢𑁆𑀢𑀸𑀦𑀁𑀬𑁂𑀯 𑀭𑀓𑁆𑀔𑀢𑀺 𑀦𑀸𑀫, 𑀦 𑀆𑀘𑀭𑀺𑀬𑀁.

𑀲𑁄 𑀢𑀢𑁆𑀣 𑀜𑀸𑀬𑁄𑀢𑀺 𑀬𑀁 𑀫𑁂𑀤𑀓𑀣𑀸𑀮𑀺𑀓𑀸 𑀆𑀳. 𑀲𑁄 𑀢𑀢𑁆𑀣 𑀜𑀸𑀬𑁄, 𑀲𑁄 𑀉𑀧𑀸𑀬𑁄, 𑀢𑀁 𑀓𑀸𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀲𑀢𑀺𑀧𑀝𑁆𑀞𑀸𑀦𑀁 𑀲𑁂𑀯𑀺𑀢𑀩𑁆𑀩𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀲𑀢𑀺𑀧𑀝𑁆𑀞𑀸𑀦𑀁 𑀲𑁂𑀯𑀺𑀢𑀩𑁆𑀩𑀁. 𑀆𑀲𑁂𑀯𑀦𑀸𑀬𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀸𑀲𑁂𑀯𑀦𑀸𑀬. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀅𑀢𑁆𑀢𑀸𑀦𑀁 𑀭𑀓𑁆𑀔𑀦𑁆𑀢𑁄 𑀧𑀭𑀁 𑀭𑀓𑁆𑀔𑀢𑀻𑀢𑀺 𑀬𑁄 𑀪𑀺𑀓𑁆𑀔𑀼 𑀓𑀫𑁆𑀫𑀸𑀭𑀸𑀫𑀢𑀸𑀤𑀻𑀦𑀺 𑀧𑀳𑀸𑀬 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑁂𑀲𑀼 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑀁 𑀆𑀲𑁂𑀯𑀦𑁆𑀢𑁄 𑀪𑀸𑀯𑁂𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀣 𑀦𑀁 𑀧𑀭𑁄 𑀤𑀺𑀲𑁆𑀯𑀸 𑁋 ‘‘𑀪𑀤𑁆𑀤𑀓𑁄 𑀯𑀢𑀸𑀬𑀁, 𑀪𑀺𑀓𑁆𑀔𑀼, 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄’’𑀢𑀺 𑀢𑀲𑁆𑀫𑀺𑀁 𑀘𑀺𑀢𑁆𑀢𑀁 𑀧𑀲𑀸𑀤𑁂𑀢𑁆𑀯𑀸 𑀲𑀕𑁆𑀕𑀧𑀭𑀸𑀬𑀡𑁄 𑀳𑁄𑀢𑀺. 𑀅𑀬𑀁 𑀅𑀢𑁆𑀢𑀸𑀦𑀁 𑀭𑀓𑁆𑀔𑀦𑁆𑀢𑁄 𑀧𑀭𑀁 𑀭𑀓𑁆𑀔𑀢𑀺 𑀦𑀸𑀫.

𑀔𑀦𑁆𑀢𑀺𑀬𑀸𑀢𑀺 𑀅𑀥𑀺𑀯𑀸𑀲𑀦𑀔𑀦𑁆𑀢𑀺𑀬𑀸. 𑀅𑀯𑀺𑀳𑀺𑀁𑀲𑀸𑀬𑀸𑀢𑀺 𑀲𑀧𑀼𑀩𑁆𑀩𑀪𑀸𑀕𑀸𑀬 𑀓𑀭𑀼𑀡𑀸𑀬. 𑀫𑁂𑀢𑁆𑀢𑀘𑀺𑀢𑁆𑀢𑀢𑀸𑀬𑀸𑀢𑀺 𑀲𑀧𑀼𑀩𑁆𑀩𑀪𑀸𑀕𑀸𑀬 𑀫𑁂𑀢𑁆𑀢𑀸𑀬. 𑀅𑀦𑀼𑀤𑀬𑀢𑀸𑀬𑀸𑀢𑀺 𑀅𑀦𑀼𑀯𑀟𑁆𑀠𑀺𑀬𑀸, 𑀲𑀧𑀼𑀩𑁆𑀩𑀪𑀸𑀕𑀸𑀬 𑀫𑀼𑀤𑀺𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀧𑀭𑀁 𑀭𑀓𑁆𑀔𑀦𑁆𑀢𑁄 𑀅𑀢𑁆𑀢𑀸𑀦𑀁 𑀭𑀓𑁆𑀔𑀢𑀻𑀢𑀺 𑀏𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀝𑁆𑀞𑀸𑀦𑀁 𑀕𑀢𑁄 𑀢𑀻𑀲𑀼 𑀩𑁆𑀭𑀳𑁆𑀫𑀯𑀺𑀳𑀸𑀭𑁂𑀲𑀼 𑀢𑀺𑀓𑀘𑀢𑀼𑀓𑁆𑀓𑀚𑁆𑀛𑀸𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀛𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀦𑁆𑀢𑁄 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀅𑀬𑀁 𑀧𑀭𑀁 𑀭𑀓𑁆𑀔𑀦𑁆𑀢𑁄 𑀅𑀢𑁆𑀢𑀸𑀦𑀁 𑀭𑀓𑁆𑀔𑀢𑀺 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁧𑁦. 𑀚𑀦𑀧𑀤𑀓𑀮𑁆𑀬𑀸𑀡𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁮𑁬. 𑀤𑀲𑀫𑁂 𑀚𑀦𑀧𑀤𑀓𑀮𑁆𑀬𑀸𑀡𑀻𑀢𑀺 𑀚𑀦𑀧𑀤𑀫𑁆𑀳𑀺 𑀓𑀮𑁆𑀬𑀸𑀡𑀻 𑀉𑀢𑁆𑀢𑀫𑀸 𑀙𑀲𑀭𑀻𑀭𑀤𑁄𑀲𑀭𑀳𑀺𑀢𑀸 𑀧𑀜𑁆𑀘𑀓𑀮𑁆𑀬𑀸𑀡𑀲𑀫𑀦𑁆𑀦𑀸𑀕𑀢𑀸. 𑀲𑀸 𑀳𑀺 𑀬𑀲𑁆𑀫𑀸 𑀦𑀸𑀢𑀺𑀤𑀻𑀖𑀸 𑀦𑀸𑀢𑀺𑀭𑀲𑁆𑀲𑀸, 𑀦𑀸𑀢𑀺𑀓𑀺𑀲𑀸 𑀦𑀸𑀢𑀺𑀣𑀽𑀮𑀸, 𑀦𑀸𑀢𑀺𑀓𑀸𑀴𑀸 𑀦𑀸𑀘𑁆𑀘𑁄𑀤𑀸𑀢𑀸, 𑀅𑀢𑀺𑀓𑁆𑀓𑀦𑁆𑀢𑀸, 𑀫𑀸𑀦𑀼𑀲𑀯𑀡𑁆𑀡𑀁 𑀅𑀧𑁆𑀧𑀢𑁆𑀢𑀸 𑀤𑀺𑀩𑁆𑀩𑀯𑀡𑁆𑀡𑀁, 𑀢𑀲𑁆𑀫𑀸 𑀙𑀲𑀭𑀻𑀭𑀤𑁄𑀲𑀭𑀳𑀺𑀢𑀸. 𑀙𑀯𑀺𑀓𑀮𑁆𑀬𑀸𑀡𑀁, 𑀫𑀁𑀲𑀓𑀮𑁆𑀬𑀸𑀡𑀁, 𑀦𑁆𑀳𑀸𑀭𑀼𑀓𑀮𑁆𑀬𑀸𑀡𑀁, 𑀅𑀝𑁆𑀞𑀺𑀓𑀮𑁆𑀬𑀸𑀡𑀁, 𑀯𑀬𑀓𑀮𑁆𑀬𑀸𑀡𑀦𑁆𑀢𑀺 𑀇𑀫𑁂𑀳𑀺 𑀧𑀦 𑀓𑀮𑁆𑀬𑀸𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀜𑁆𑀘𑀓𑀮𑁆𑀬𑀸𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀦𑀸𑀫. 𑀢𑀲𑁆𑀲𑀸 𑀳𑀺 𑀆𑀕𑀦𑁆𑀢𑀼𑀓𑁄𑀪𑀸𑀲𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀅𑀢𑁆𑀢𑀦𑁄 𑀲𑀭𑀻𑀭𑁄𑀪𑀸𑀲𑁂𑀦𑁂𑀯 𑀤𑁆𑀯𑀸𑀤𑀲𑀳𑀢𑁆𑀣𑀝𑁆𑀞𑀸𑀦𑁂 𑀆𑀮𑁄𑀓𑀁 𑀓𑀭𑁄𑀢𑀺, 𑀧𑀺𑀬𑀗𑁆𑀕𑀼𑀲𑀸𑀫𑀸 𑀯𑀸 𑀳𑁄𑀢𑀺, 𑀲𑀼𑀯𑀡𑁆𑀡𑀲𑀸𑀫𑀸 𑀯𑀸, 𑀅𑀬𑀫𑀲𑁆𑀲𑀸 𑀙𑀯𑀺𑀓𑀮𑁆𑀬𑀸𑀡𑀢𑀸. 𑀘𑀢𑁆𑀢𑀸𑀭𑁄 𑀧𑀦𑀲𑁆𑀲𑀸 𑀳𑀢𑁆𑀣𑀧𑀸𑀤𑀸 𑀫𑀼𑀔𑀧𑀭𑀺𑀬𑁄𑀲𑀸𑀦𑀜𑁆𑀘 𑀮𑀸𑀔𑀸𑀭𑀲𑀧𑀭𑀺𑀓𑀫𑁆𑀫𑀓𑀢𑀁 𑀯𑀺𑀬 𑀭𑀢𑁆𑀢𑀧𑀯𑀸𑀴𑀭𑀢𑁆𑀢𑀓𑀫𑁆𑀩𑀮𑀲𑀤𑀺𑀲𑀁 𑀳𑁄𑀢𑀺, 𑀅𑀬𑀫𑀲𑁆𑀲𑀸 𑀫𑀁𑀲𑀓𑀮𑁆𑀬𑀸𑀡𑀢𑀸. 𑀯𑀻𑀲𑀢𑀺 𑀧𑀦 𑀦𑀔𑀧𑀢𑁆𑀢𑀸𑀦𑀺 𑀫𑀁𑀲𑀢𑁄 𑀅𑀫𑀼𑀢𑁆𑀢𑀝𑁆𑀞𑀸𑀦𑁂 𑀮𑀸𑀔𑀸𑀭𑀲𑀧𑀽𑀭𑀺𑀢𑀸𑀦𑀺 𑀯𑀺𑀬, 𑀫𑀼𑀢𑁆𑀢𑀝𑁆𑀞𑀸𑀦𑁂 𑀔𑀻𑀭𑀥𑀸𑀭𑀸𑀲𑀤𑀺𑀲𑀸𑀦𑀺, 𑀳𑁄𑀦𑁆𑀢𑀺 𑀅𑀬𑀫𑀲𑁆𑀲𑀸 𑀦𑁆𑀳𑀸𑀭𑀼𑀓𑀮𑁆𑀬𑀸𑀡𑀓𑀢𑀸. 𑀤𑁆𑀯𑀢𑁆𑀢𑀺𑀁𑀲 𑀤𑀦𑁆𑀢𑀸 𑀲𑀼𑀨𑀼𑀲𑀺𑀢𑀸 𑀲𑀼𑀥𑁄𑀢𑀯𑀚𑀺𑀭𑀧𑀦𑁆𑀢𑀺 𑀯𑀺𑀬 𑀔𑀸𑀬𑀦𑁆𑀢𑀺, 𑀅𑀬𑀫𑀲𑁆𑀲𑀸 𑀅𑀝𑁆𑀞𑀺𑀓𑀮𑁆𑀬𑀸𑀡𑀢𑀸. 𑀯𑀻𑀲𑀢𑀺𑀯𑀲𑁆𑀲𑀲𑀢𑀺𑀓𑀸𑀧𑀺 𑀧𑀦 𑀲𑀫𑀸𑀦𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀯𑀺𑀬 𑀳𑁄𑀢𑀺 𑀦𑀺𑀧𑁆𑀧𑀮𑀺𑀢𑀸, 𑀅𑀬𑀫𑀲𑁆𑀲𑀸 𑀯𑀬𑀓𑀮𑁆𑀬𑀸𑀡𑀢𑀸.

𑀧𑀭𑀫𑀧𑀸𑀲𑀸𑀯𑀺𑀦𑀻𑀢𑀺 𑀏𑀢𑁆𑀣 𑀧𑀲𑀯𑀦𑀁 𑀧𑀲𑀸𑀯𑁄, 𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀧𑀲𑀸𑀯𑁄 𑀏𑀯 𑀧𑀸𑀲𑀸𑀯𑁄. 𑀧𑀭𑀫𑁄 𑀧𑀸𑀲𑀸𑀯𑁄 𑀧𑀭𑀫𑀧𑀸𑀲𑀸𑀯𑁄, 𑀲𑁄 𑀅𑀲𑁆𑀲𑀸 𑀅𑀢𑁆𑀣𑀻𑀢𑀺 𑀧𑀭𑀫𑀧𑀸𑀲𑀸𑀯𑀺𑀦𑀻. 𑀦𑀘𑁆𑀘𑁂 𑀘 𑀕𑀻𑀢𑁂 𑀘 𑀉𑀢𑁆𑀢𑀫𑀧𑀯𑀢𑁆𑀢𑀺 𑀲𑁂𑀝𑁆𑀞𑀓𑀺𑀭𑀺𑀬𑀸, 𑀉𑀢𑁆𑀢𑀫𑀫𑁂𑀯 𑀦𑀘𑁆𑀘𑀁 𑀦𑀘𑁆𑀘𑀢𑀺, 𑀕𑀻𑀢𑀁 𑀯𑀸 𑀕𑀸𑀬𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯. 𑀇𑀫𑁂𑀲𑀼 𑀧𑀦 𑀤𑁆𑀯𑀻𑀲𑀼 𑀲𑀼𑀢𑁆𑀢𑁂𑀲𑀼 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸𑀯 𑀓𑀣𑀺𑀢𑀸𑀢𑀺.

𑀦𑀸𑀮𑀦𑁆𑀤𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀲𑀻𑀮𑀝𑁆𑀞𑀺𑀢𑀺𑀯𑀕𑁆𑀕𑁄

𑁧-𑁨. 𑀲𑀻𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁮𑁭-𑁩𑁮𑁮. 𑀢𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀲𑀻𑀮𑀸𑀦𑀻𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀦𑀺. 𑀤𑀼𑀢𑀺𑀬𑁂 𑀉𑀫𑁆𑀫𑀗𑁆𑀕𑁄𑀢𑀺 𑀧𑀜𑁆𑀳𑀫𑀕𑁆𑀕𑁄 𑀧𑀜𑁆𑀳𑀕𑀯𑁂𑀲𑀦𑀁.

𑁩-𑁫. 𑀧𑀭𑀺𑀳𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁮𑁯-𑁩𑁯𑁧. 𑀢𑀢𑀺𑀬𑁂 𑀧𑀭𑀺𑀳𑀸𑀦𑀁 𑀳𑁄𑀢𑀻𑀢𑀺 𑀧𑀼𑀕𑁆𑀕𑀮𑀯𑀲𑁂𑀦 𑀧𑀭𑀺𑀳𑀸𑀦𑀁 𑀳𑁄𑀢𑀺. 𑀬𑁄 𑀳𑀺 𑀩𑀼𑀤𑁆𑀥𑁂𑀲𑀼 𑀥𑀭𑀦𑁆𑀢𑁂𑀲𑀼𑀧𑀺 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀦 𑀪𑀸𑀯𑁂𑀢𑀺, 𑀢𑀲𑁆𑀲 𑀲𑀤𑁆𑀥𑀫𑁆𑀫𑁄 𑀅𑀦𑁆𑀢𑀭𑀳𑀺𑀢𑁄 𑀦𑀸𑀫 𑀳𑁄𑀢𑀺 𑀤𑁂𑀯𑀤𑀢𑁆𑀢𑀸𑀤𑀻𑀦𑀁 𑀯𑀺𑀬. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑁂𑀯 𑀥𑀫𑁆𑀫𑀦𑁆𑀢𑀭𑀥𑀸𑀦𑀁 𑀓𑀣𑀺𑀢𑀁. 𑀘𑀢𑀼𑀢𑁆𑀣𑀧𑀜𑁆𑀘𑀫𑁂𑀲𑀼 𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯.

𑁬. 𑀧𑀤𑁂𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯𑁨. 𑀙𑀝𑁆𑀞𑁂 𑀧𑀤𑁂𑀲𑀁 𑀪𑀸𑀯𑀺𑀢𑀢𑁆𑀢𑀸𑀢𑀺 𑀧𑀤𑁂𑀲𑀢𑁄 𑀪𑀸𑀯𑀺𑀢𑀢𑁆𑀢𑀸. 𑀘𑀢𑁆𑀢𑀸𑀭𑁄 𑀳𑀺 𑀫𑀕𑁆𑀕𑁂 𑀢𑀻𑀡𑀺 𑀘 𑀨𑀮𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑁂𑀦 𑀲𑀢𑀺𑀧𑀝𑁆𑀞𑀸𑀦𑀸 𑀧𑀤𑁂𑀲𑀁 𑀪𑀸𑀯𑀺𑀢𑀸 𑀦𑀸𑀫 𑀳𑁄𑀦𑁆𑀢𑀺.

𑁭. 𑀲𑀫𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁩𑁯𑁩. 𑀲𑀢𑁆𑀢𑀫𑁂 𑀲𑀫𑀢𑁆𑀢𑀁 𑀪𑀸𑀯𑀺𑀢𑀢𑁆𑀢𑀸𑀢𑀺 𑀲𑀫𑀢𑁆𑀢𑀸 𑀪𑀸𑀯𑀺𑀢𑀢𑁆𑀢𑀸. 𑀅𑀭𑀳𑀢𑁆𑀢𑀨𑀮𑀁 𑀉𑀧𑁆𑀧𑀸𑀤𑁂𑀦𑁆𑀢𑁂𑀦 𑀳𑀺 𑀲𑀢𑀺𑀧𑀝𑁆𑀞𑀸𑀦𑀸 𑀲𑀫𑀢𑁆𑀢𑀁 𑀪𑀸𑀯𑀺𑀢𑀸 𑀦𑀸𑀫 𑀳𑁄𑀦𑁆𑀢𑀺.

𑁮-𑁧𑁦. 𑀮𑁄𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁩𑁯𑁪-𑁩𑁯𑁬. 𑀅𑀝𑁆𑀞𑀫𑁂 𑀫𑀳𑀸𑀪𑀺𑀜𑁆𑀜𑀢𑀦𑁆𑀢𑀺 𑀙𑀦𑁆𑀦𑀁 𑀅𑀪𑀺𑀜𑁆𑀜𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀳𑀲𑁆𑀲𑀁 𑀮𑁄𑀓𑀁 𑀅𑀪𑀺𑀚𑀸𑀦𑀸𑀫𑀻𑀢𑀺 𑀲𑀢𑀢𑀯𑀺𑀳𑀸𑀭𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀣𑁂𑀭𑁄 𑀓𑀺𑀭 𑀧𑀸𑀢𑁄𑀯 𑀉𑀝𑁆𑀞𑀸𑀬 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀲𑁂𑀦𑀸𑀲𑀦𑁂 𑀦𑀺𑀲𑀺𑀦𑁆𑀦𑁄 𑀅𑀢𑀻𑀢𑁂 𑀓𑀧𑁆𑀧𑀲𑀳𑀲𑁆𑀲𑀁, 𑀅𑀦𑀸𑀕𑀢𑁂 𑀓𑀧𑁆𑀧𑀲𑀳𑀲𑁆𑀲𑀁 𑀅𑀦𑀼𑀲𑁆𑀲𑀭𑀢𑀺, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀧𑀺 𑀲𑀳𑀲𑁆𑀲𑀁 𑀘𑀓𑁆𑀓𑀯𑀸𑀴𑀸𑀦𑀁 𑀢𑀲𑁆𑀲𑀸𑀯𑀚𑁆𑀚𑀦𑀲𑁆𑀲 𑀕𑀢𑀺𑀁 𑀅𑀦𑀼𑀩𑀦𑁆𑀥𑀢𑀺. 𑀇𑀢𑀺 𑀲𑁄 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀲𑀳𑀲𑁆𑀲𑀁 𑀮𑁄𑀓𑀁 𑀅𑀪𑀺𑀚𑀸𑀦𑀸𑀢𑀺, 𑀅𑀬𑀫𑀲𑁆𑀲 𑀲𑀢𑀢𑀯𑀺𑀳𑀸𑀭𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀻𑀮𑀝𑁆𑀞𑀺𑀢𑀺𑀯𑀕𑁆𑀕𑁄 𑀢𑀢𑀺𑀬𑁄.

𑁪. 𑀅𑀦𑀦𑀼𑀲𑁆𑀲𑀼𑀢𑀯𑀕𑁆𑀕𑀯𑀡𑁆𑀡𑀦𑀸

𑁪𑁦𑁧-𑁪𑁦𑁬. 𑀘𑀢𑀼𑀢𑁆𑀣𑀯𑀕𑁆𑀕𑀲𑁆𑀲 𑀧𑀜𑁆𑀘𑀫𑁂 𑀯𑀺𑀤𑀺𑀢𑀸 𑀯𑁂𑀤𑀦𑀸𑀢𑀺 𑀬𑀸 𑀯𑁂𑀤𑀦𑀸 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀢𑀸𑀯𑀲𑁆𑀲 𑀯𑀺𑀤𑀺𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀯𑀺𑀤𑀺𑀢𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀯𑀺𑀤𑀺𑀢𑀸 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀦𑀸𑀫. 𑀬𑀸 𑀘 𑀧𑀦 𑀧𑀭𑀺𑀕𑁆𑀕𑀳𑀺𑀢𑁂𑀲𑀼 𑀯𑀢𑁆𑀣𑀸𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀸 𑀯𑁂𑀤𑀦𑀸, 𑀢𑀸𑀧𑀺 𑀯𑀺𑀤𑀺𑀢𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀯𑀺𑀤𑀺𑀢𑀸 𑀉𑀧𑀝𑁆𑀞𑀳𑀦𑁆𑀢𑀺, 𑀯𑀺𑀤𑀺𑀢𑀸 𑀅𑀩𑁆𑀪𑀢𑁆𑀣𑀁 𑀕𑀘𑁆𑀙𑀦𑁆𑀢𑀺 𑀦𑀸𑀫. 𑀯𑀺𑀢𑀓𑁆𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀅𑀦𑀦𑀼𑀲𑁆𑀲𑀼𑀢𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑁫. 𑀅𑀫𑀢𑀯𑀕𑁆𑀕𑁄

𑁨. 𑀲𑀫𑀼𑀤𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁦𑁮. 𑀧𑀜𑁆𑀘𑀫𑀯𑀕𑁆𑀕𑀲𑁆𑀲 𑀤𑀼𑀢𑀺𑀬𑁂 𑀆𑀳𑀸𑀭𑀲𑀫𑀼𑀤𑀬𑀸 𑀓𑀸𑀬𑀲𑁆𑀲 𑀲𑀫𑀼𑀤𑀬𑁄𑀢𑀺 𑀆𑀳𑀸𑀭𑀲𑀫𑀼𑀤𑀬𑁂𑀦 𑀓𑀸𑀬𑀲𑀫𑀼𑀤𑀬𑁄. 𑀏𑀲𑁂𑀯 𑀦𑀬𑁄 𑀲𑁂𑀲𑁂𑀲𑀼. 𑀫𑀦𑀲𑀺𑀓𑀸𑀭𑀲𑀫𑀼𑀤𑀬𑀸𑀢𑀺 𑀏𑀢𑁆𑀣 𑀧𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑀼𑀤𑀬𑀸 𑀩𑁄𑀚𑁆𑀛𑀗𑁆𑀕𑀥𑀫𑁆𑀫𑀸𑀦𑀁 𑀲𑀫𑀼𑀤𑀬𑁄, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑀫𑀼𑀤𑀬𑀸 𑀦𑀻𑀯𑀭𑀡𑀥𑀫𑁆𑀫𑀸𑀦𑀁. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀸𑀭𑀫𑁆𑀫𑀡𑀲𑀢𑀺𑀧𑀝𑁆𑀞𑀸𑀦𑀸 𑀓𑀣𑀺𑀢𑀸.

𑁪. 𑀲𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧𑁦. 𑀘𑀢𑀼𑀢𑁆𑀣𑀁 𑀲𑀼𑀤𑁆𑀥𑀺𑀓𑀁 𑀓𑀢𑁆𑀯𑀸 𑀲𑀫𑀼𑀤𑀬𑁂 𑀓𑀣𑀺𑀢𑁂 𑀩𑀼𑀚𑁆𑀛𑀦𑀓𑀸𑀦𑀁 𑀅𑀚𑁆𑀛𑀸𑀲𑀬𑁂𑀦 𑀯𑀼𑀢𑁆𑀢𑀁.

𑁬. 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧𑁨. 𑀙𑀝𑁆𑀞𑁂 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄𑀢𑀺 𑀘𑀢𑀼𑀦𑁆𑀦𑀁 𑀲𑀻𑀮𑀸𑀦𑀁 𑀚𑁂𑀝𑁆𑀞𑀓𑀲𑀻𑀮𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄𑀯 𑀲𑀻𑀮𑀁, 𑀇𑀢𑀭𑀸𑀦𑀺 𑀢𑀻𑀡𑀺 𑀲𑀻𑀮𑀦𑁆𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑀁 𑀦𑀸𑀫 𑀦𑀢𑁆𑀣𑀻’’𑀢𑀺. 𑀯𑀢𑁆𑀯𑀸 𑀢𑀁 𑀅𑀦𑀼𑀚𑀸𑀦𑀦𑁆𑀢𑁄 𑀆𑀳 𑁋 ‘‘𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀦𑀸𑀫 𑀙𑀤𑁆𑀯𑀸𑀭𑀭𑀓𑁆𑀔𑀡𑀫𑀢𑁆𑀢𑀫𑁂𑀯, 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺 𑀥𑀫𑁆𑀫𑁂𑀦𑁂𑀯 𑀲𑀫𑁂𑀦 𑀧𑀘𑁆𑀘𑀬𑀼𑀧𑁆𑀧𑀢𑁆𑀢𑀺𑀫𑀢𑁆𑀢𑀓𑀁, 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀁 𑀧𑀝𑀺𑀮𑀤𑁆𑀥𑀧𑀘𑁆𑀘𑀬𑁂 𑀇𑀤𑀫𑀢𑁆𑀣𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑀫𑀢𑁆𑀢𑀓𑀁. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄𑀯 𑀲𑀻𑀮𑀁. 𑀬𑀲𑁆𑀲 𑀲𑁄 𑀪𑀺𑀦𑁆𑀦𑁄, 𑀅𑀬𑀁 𑀙𑀺𑀦𑁆𑀦𑀲𑀻𑀲𑁄 𑀯𑀺𑀬 𑀧𑀼𑀭𑀺𑀲𑁄 𑀳𑀢𑁆𑀣𑀧𑀸𑀤𑁂, 𑀲𑁂𑀲𑀸𑀦𑀺 𑀭𑀓𑁆𑀔𑀺𑀲𑁆𑀲𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑁄. 𑀬𑀲𑁆𑀲 𑀧𑀦 𑀲𑁄 𑀅𑀭𑁄𑀕𑁄, 𑀅𑀬𑀁 𑀅𑀘𑁆𑀙𑀺𑀦𑁆𑀦𑀲𑀻𑀲𑁄 𑀯𑀺𑀬 𑀧𑀼𑀭𑀺𑀲𑁄 𑀚𑀻𑀯𑀺𑀢𑀁, 𑀲𑁂𑀲𑀸𑀦𑀺 𑀧𑀼𑀦 𑀧𑀸𑀓𑀢𑀺𑀓𑀸𑀦𑀺 𑀓𑀢𑁆𑀯𑀸 𑀭𑀓𑁆𑀔𑀺𑀢𑀼𑀫𑁆𑀧𑀺 𑀲𑀓𑁆𑀓𑁄𑀢𑀻’’𑀢𑀺. 𑀢𑀲𑁆𑀫𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁄𑀯 𑀲𑀻𑀮𑀁, 𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑁂𑀦 𑀲𑀁𑀯𑀼𑀢𑁄𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄, 𑀉𑀧𑁂𑀢𑁄 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄.

𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄𑀢𑀺 𑀆𑀘𑀸𑀭𑁂𑀦 𑀘 𑀕𑁄𑀘𑀭𑁂𑀦 𑀘 𑀲𑀫𑁆𑀧𑀦𑁆𑀦𑁄. 𑀅𑀡𑀼𑀫𑀢𑁆𑀢𑁂𑀲𑀽𑀢𑀺 𑀅𑀧𑁆𑀧𑀫𑀢𑁆𑀢𑀓𑁂𑀲𑀼. 𑀯𑀚𑁆𑀚𑁂𑀲𑀽𑀢𑀺 𑀅𑀓𑀼𑀲𑀮𑀥𑀫𑁆𑀫𑁂𑀲𑀼. 𑀪𑀬𑀤𑀲𑁆𑀲𑀸𑀯𑀻𑀢𑀺 𑀪𑀬𑀤𑀲𑁆𑀲𑀻. 𑀲𑀫𑀸𑀤𑀸𑀬𑀸𑀢𑀺 𑀲𑀫𑁆𑀫𑀸 𑀆𑀤𑀺𑀬𑀺𑀢𑁆𑀯𑀸. 𑀲𑀺𑀓𑁆𑀔𑀲𑁆𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀽𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 𑀢𑀁 𑀢𑀁 𑀲𑀺𑀓𑁆𑀔𑀸𑀧𑀤𑀁 𑀲𑀫𑀸𑀤𑀺𑀬𑀺𑀢𑁆𑀯𑀸 𑀲𑀺𑀓𑁆𑀔, 𑀬𑀁 𑀬𑀁 𑀧𑀦 𑀓𑀺𑀜𑁆𑀘𑀺 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀺𑀓𑁆𑀔𑀸𑀓𑁄𑀝𑁆𑀞𑀸𑀲𑁂𑀲𑀼 𑀲𑀺𑀓𑁆𑀔𑀺𑀢𑀩𑁆𑀩𑀁 𑀓𑀸𑀬𑀺𑀓𑀁 𑀯𑀸 𑀯𑀸𑀘𑀲𑀺𑀓𑀁 𑀯𑀸, 𑀢𑀁 𑀢𑀁 𑀲𑀩𑁆𑀩𑀁 𑀲𑀫𑁆𑀫𑀸 𑀆𑀤𑀸𑀬 𑀲𑀺𑀓𑁆𑀔𑀲𑁆𑀲𑀽𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄. 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁧𑁪) 𑀯𑀼𑀢𑁆𑀢𑁄. 𑀇𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀫𑁂𑀯 𑀓𑀣𑀺𑀢𑀁.

𑁭. 𑀤𑀼𑀘𑁆𑀘𑀭𑀺𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁧𑁩. 𑀲𑀢𑁆𑀢𑀫𑁂 𑀓𑀸𑀬𑀲𑀼𑀘𑀭𑀺𑀢𑀯𑀘𑀻𑀲𑀼𑀘𑀭𑀺𑀢𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁, 𑀫𑀦𑁄𑀲𑀼𑀘𑀭𑀺𑀢𑀁 𑀇𑀢𑀭𑀸𑀦𑀺 𑀢𑀻𑀡𑀺 𑀲𑀻𑀮𑀸𑀦𑀻𑀢𑀺 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀓𑀣𑀺𑀢𑀁 𑀳𑁄𑀢𑀺. 𑀇𑀫𑀺𑀦𑀸 𑀦𑀬𑁂𑀦 𑀧𑀜𑁆𑀘𑀲𑀢𑁆𑀢𑀦𑀯𑀤𑀲𑀲𑀼 𑀓𑀼𑀲𑀮𑀓𑀫𑁆𑀫𑀧𑀣𑁂𑀲𑀼 𑀧𑀘𑁆𑀙𑀺𑀫𑀸𑀧𑀺 𑀢𑀬𑁄 𑀲𑀻𑀮𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺. 𑀙𑀝𑁆𑀞𑀲𑀢𑁆𑀢𑀫𑁂𑀲𑀼 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀫𑀢𑀯𑀕𑁆𑀕𑁄 𑀧𑀜𑁆𑀘𑀫𑁄.

𑀲𑀢𑀺𑀧𑀝𑁆𑀞𑀸𑀦𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀇𑀦𑁆𑀤𑁆𑀭𑀺𑀬𑀲𑀁𑀬𑀼𑀢𑁆𑀢𑀁

𑁧. 𑀲𑀼𑀤𑁆𑀥𑀺𑀓𑀯𑀕𑁆𑀕𑁄

𑁧. 𑀲𑀼𑀤𑁆𑀥𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭𑁧. 𑀇𑀦𑁆𑀤𑁆𑀭𑀺𑀬𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀲𑀢𑀺𑀦𑁆𑀤𑁆𑀭𑀺𑀬𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀇𑀫𑀸𑀦𑀺 𑀢𑀻𑀡𑀺 𑀘𑀢𑀼𑀪𑀽𑀫𑀓𑀓𑀼𑀲𑀮𑀯𑀺𑀧𑀸𑀓𑁂𑀲𑀼 𑀘𑁂𑀯 𑀓𑀺𑀭𑀺𑀬𑀸𑀲𑀼 𑀘 𑀮𑀩𑁆𑀪𑀦𑁆𑀢𑀺. 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀸𑀦𑀺 𑀘𑀢𑀼𑀪𑀽𑀫𑀓𑀓𑀼𑀲𑀮𑁂 𑀅𑀓𑀼𑀲𑀮𑁂 𑀯𑀺𑀧𑀸𑀓𑁂 𑀓𑀺𑀭𑀺𑀬𑀸𑀬𑀸𑀢𑀺 𑀲𑀩𑁆𑀩𑀢𑁆𑀣 𑀮𑀩𑁆𑀪𑀦𑁆𑀢𑀺. 𑀇𑀢𑀺 𑀇𑀤𑀁 𑀲𑀼𑀢𑁆𑀢𑀁 𑀘𑀢𑀼𑀪𑀽𑀫𑀓𑀲𑀩𑁆𑀩𑀲𑀗𑁆𑀕𑀸𑀳𑀓𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁭. 𑀤𑀼𑀢𑀺𑀬𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭𑁭. 𑀲𑀢𑁆𑀢𑀫𑁂 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀦𑀧𑁆𑀧𑀚𑀸𑀦𑀦𑁆𑀢𑀻𑀢𑀺 𑀤𑀼𑀓𑁆𑀔𑀲𑀘𑁆𑀘𑀯𑀲𑁂𑀦 𑀦 𑀧𑀚𑀸𑀦𑀦𑁆𑀢𑀺. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑀫𑀼𑀤𑀬𑀁 𑀦𑀧𑁆𑀧𑀚𑀸𑀦𑀦𑁆𑀢𑀻𑀢𑀺 𑀲𑀫𑀼𑀤𑀬𑀲𑀘𑁆𑀘𑀯𑀲𑁂𑀦 𑀦 𑀧𑀚𑀸𑀦𑀦𑁆𑀢𑀺. 𑀏𑀯𑀁 𑀦𑀺𑀭𑁄𑀥𑀁 𑀦𑀺𑀭𑁄𑀥𑀲𑀘𑁆𑀘𑀯𑀲𑁂𑀦, 𑀧𑀝𑀺𑀧𑀤𑀁 𑀫𑀕𑁆𑀕𑀲𑀘𑁆𑀘𑀯𑀲𑁂𑀦𑀸𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀲𑀼𑀓𑁆𑀓𑀧𑀓𑁆𑀔𑁂 𑀧𑀦 𑀅𑀥𑀺𑀫𑁄𑀓𑁆𑀔𑀯𑀲𑁂𑀦 𑀆𑀯𑀚𑁆𑀚𑀦𑀲𑀫𑀼𑀤𑀬𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑀫𑀼𑀤𑀬𑁄 𑀳𑁄𑀢𑀺, 𑀧𑀕𑁆𑀕𑀳𑀯𑀲𑁂𑀦 𑀆𑀯𑀚𑁆𑀚𑀦𑀲𑀫𑀼𑀤𑀬𑀸 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑀫𑀼𑀤𑀬𑁄, 𑀉𑀧𑀝𑁆𑀞𑀸𑀦𑀯𑀲𑁂𑀦 𑀆𑀯𑀚𑁆𑀚𑀦𑀲𑀫𑀼𑀤𑀬𑀸 𑀲𑀢𑀺𑀦𑁆𑀤𑁆𑀭𑀺𑀬𑀲𑀫𑀼𑀤𑀬𑁄, 𑀅𑀯𑀺𑀓𑁆𑀔𑁂𑀧𑀯𑀲𑁂𑀦 𑀆𑀯𑀚𑁆𑀚𑀦𑀲𑀫𑀼𑀤𑀬𑀸 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑀫𑀼𑀤𑀬𑁄, 𑀤𑀲𑁆𑀲𑀦𑀯𑀲𑁂𑀦 𑀆𑀯𑀚𑁆𑀚𑀦𑀲𑀫𑀼𑀤𑀬𑀸 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑀫𑀼𑀤𑀬𑁄 𑀳𑁄𑀢𑀺. 𑀢𑀣𑀸 𑀙𑀦𑁆𑀤𑀯𑀲𑁂𑀦 𑀆𑀯𑀚𑁆𑀚𑀦𑀲𑀫𑀼𑀤𑀬𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑀫𑀼𑀤𑀬𑁄 𑀳𑁄𑀢𑀺, 𑀙𑀦𑁆𑀤𑀯𑀲𑁂𑀦 𑀆𑀯𑀚𑁆𑀚𑀦𑀲𑀫𑀼𑀤𑀬𑀸 𑀯𑀻𑀭𑀺𑀬𑀲𑀢𑀺𑀲𑀫𑀸𑀥𑀺𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑀫𑀼𑀤𑀬𑁄 𑀳𑁄𑀢𑀺. 𑀫𑀦𑀲𑀺𑀓𑀸𑀭𑀯𑀲𑁂𑀦 𑀆𑀯𑀚𑁆𑀚𑀦𑀲𑀫𑀼𑀤𑀬𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑀫𑀼𑀤𑀬𑁄 𑀳𑁄𑀢𑀺. 𑀫𑀦𑀲𑀺𑀓𑀸𑀭𑀯𑀲𑁂𑀦 𑀆𑀯𑀚𑁆𑀚𑀦𑀲𑀫𑀼𑀤𑀬𑀸 𑀯𑀻𑀭𑀺𑀬𑀲𑀢𑀺𑀲𑀫𑀸𑀥𑀺𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑀫𑀼𑀤𑀬𑁄 𑀳𑁄𑀢𑀻𑀢𑀺 𑀏𑀯𑀫𑁆𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑁂𑀲𑀼 𑀧𑀝𑀺𑀧𑀸𑀝𑀺𑀬𑀸 𑀙𑀲𑀼 𑀲𑀼𑀢𑁆𑀢𑁂𑀲𑀼 𑀘𑀢𑀼𑀲𑀘𑁆𑀘𑀫𑁂𑀯 𑀓𑀣𑀺𑀢𑀁.

𑁮. 𑀤𑀝𑁆𑀞𑀩𑁆𑀩𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁭𑁮. 𑀅𑀝𑁆𑀞𑀫𑁂 𑀓𑀢𑁆𑀣 𑀘, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀤𑀝𑁆𑀞𑀩𑁆𑀩𑀁, 𑀘𑀢𑀽𑀲𑀼 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀲𑀽𑀢𑀺𑀆𑀤𑀺 𑀇𑀫𑁂𑀲𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀯𑀺𑀲𑀬𑁂 𑀚𑁂𑀝𑁆𑀞𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀘𑀢𑁆𑀢𑀸𑀭𑁄 𑀲𑁂𑀝𑁆𑀞𑀺𑀧𑀼𑀢𑁆𑀢𑀸 𑀭𑀸𑀚𑀸𑀢𑀺 𑀭𑀸𑀚𑀧𑀜𑁆𑀘𑀫𑁂𑀲𑀼 𑀲𑀳𑀸𑀬𑁂𑀲𑀼 ‘‘𑀦𑀓𑁆𑀔𑀢𑁆𑀢𑀁 𑀓𑀻𑀴𑀺𑀲𑁆𑀲𑀸𑀫𑀸’’𑀢𑀺 𑀯𑀻𑀣𑀺𑀁 𑀑𑀢𑀺𑀡𑁆𑀡𑁂𑀲𑀼 𑀏𑀓𑀲𑁆𑀲 𑀲𑁂𑀝𑁆𑀞𑀺𑀧𑀼𑀢𑁆𑀢𑀲𑁆𑀲 𑀕𑁂𑀳𑀁 𑀕𑀢𑀓𑀸𑀮𑁂 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺, 𑀕𑁂𑀳𑀲𑀸𑀫𑀺𑀓𑁄𑀯 𑁋 ‘‘𑀇𑀫𑁂𑀲𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀤𑁂𑀣, 𑀕𑀦𑁆𑀥𑀫𑀸𑀮𑀸𑀮𑀗𑁆𑀓𑀸𑀭𑀸𑀤𑀻𑀦𑀺 𑀤𑁂𑀣𑀸’’𑀢𑀺 𑀕𑁂𑀳𑁂 𑀯𑀺𑀘𑀸𑀭𑁂𑀢𑀺. 𑀤𑀼𑀢𑀺𑀬𑀲𑁆𑀲, 𑀢𑀢𑀺𑀬𑀲𑁆𑀲, 𑀘𑀢𑀼𑀢𑁆𑀣𑀲𑁆𑀲 𑀕𑁂𑀳𑀁 𑀕𑀢𑀓𑀸𑀮𑁂 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺, 𑀕𑁂𑀳𑀲𑀸𑀫𑀺𑀓𑁄𑀯 𑁋 ‘‘𑀇𑀫𑁂𑀲𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀤𑁂𑀣, 𑀕𑀦𑁆𑀥𑀫𑀸𑀮𑀸𑀮𑀗𑁆𑀓𑀸𑀭𑀸𑀤𑀻𑀦𑀺 𑀤𑁂𑀣𑀸’’𑀢𑀺 𑀕𑁂𑀳𑁂 𑀯𑀺𑀘𑀸𑀭𑁂𑀢𑀺. 𑀅𑀣 𑀲𑀩𑁆𑀩𑀧𑀘𑁆𑀙𑀸 𑀭𑀜𑁆𑀜𑁄 𑀕𑁂𑀳𑀁 𑀕𑀢𑀓𑀸𑀮𑁂 𑀓𑀺𑀜𑁆𑀘𑀸𑀧𑀺 𑀭𑀸𑀚𑀸 𑀲𑀩𑁆𑀩𑀢𑁆𑀣 𑀇𑀲𑁆𑀲𑀭𑁄, 𑀇𑀫𑀲𑁆𑀫𑀺𑀁 𑀧𑀦 𑀓𑀸𑀮𑁂 𑀅𑀢𑁆𑀢𑀦𑁄 𑀕𑁂𑀳𑁂𑀬𑁂𑀯 𑁋 ‘‘𑀇𑀫𑁂𑀲𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀤𑁂𑀣, 𑀕𑀦𑁆𑀥𑀫𑀸𑀮𑀸𑀮𑀗𑁆𑀓𑀸𑀭𑀸𑀤𑀻𑀦𑀺 𑀤𑁂𑀣𑀸’’𑀢𑀺 𑀕𑁂𑀳𑁂 𑀯𑀺𑀘𑀸𑀭𑁂𑀢𑀺. 𑀏𑀯𑀫𑁂𑀯 𑀲𑀤𑁆𑀥𑀸𑀧𑀜𑁆𑀘𑀫𑀓𑁂𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼 𑀢𑁂𑀲𑀼 𑀲𑀳𑀸𑀬𑁂𑀲𑀼 𑀏𑀓𑀢𑁄 𑀯𑀻𑀣𑀺𑀁 𑀑𑀢𑀭𑀦𑁆𑀢𑁂𑀲𑀼 𑀯𑀺𑀬 𑀏𑀓𑀸𑀭𑀫𑁆𑀫𑀡𑁂 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼𑀧𑀺 𑀬𑀣𑀸 𑀧𑀞𑀫𑀲𑁆𑀲 𑀕𑁂𑀳𑁂 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺, 𑀕𑁂𑀳𑀲𑀸𑀫𑀺𑀓𑁄𑀯 𑀯𑀺𑀘𑀸𑀭𑁂𑀢𑀺, 𑀏𑀯𑀁 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺 𑀧𑀢𑁆𑀯𑀸 𑀅𑀥𑀺𑀫𑁄𑀓𑁆𑀔𑀮𑀓𑁆𑀔𑀡𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀫𑁂𑀯 𑀚𑁂𑀝𑁆𑀞𑀓𑀁 𑀳𑁄𑀢𑀺 𑀧𑀼𑀩𑁆𑀩𑀗𑁆𑀕𑀫𑀁, 𑀲𑁂𑀲𑀸𑀦𑀺 𑀢𑀤𑀦𑁆𑀯𑀬𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸 𑀤𑀼𑀢𑀺𑀬𑀲𑁆𑀲 𑀕𑁂𑀳𑁂 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺, 𑀕𑁂𑀳𑀲𑀸𑀫𑀺𑀓𑁄𑀯 𑀯𑀺𑀘𑀸𑀭𑁂𑀢𑀺, 𑀏𑀯𑀁 𑀲𑀫𑁆𑀫𑀧𑁆𑀧𑀥𑀸𑀦𑀸𑀦𑀺 𑀧𑀢𑁆𑀯𑀸 𑀧𑀕𑁆𑀕𑀳𑀮𑀓𑁆𑀔𑀡𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀫𑁂𑀯 𑀚𑁂𑀝𑁆𑀞𑀓𑀁 𑀳𑁄𑀢𑀺 𑀧𑀼𑀩𑁆𑀩𑀗𑁆𑀕𑀫𑀁, 𑀲𑁂𑀲𑀸𑀦𑀺 𑀢𑀤𑀦𑁆𑀯𑀬𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸 𑀢𑀢𑀺𑀬𑀲𑁆𑀲 𑀕𑁂𑀳𑁂 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺, 𑀕𑁂𑀳𑀲𑀸𑀫𑀺𑀓𑁄𑀯 𑀯𑀺𑀘𑀸𑀭𑁂𑀢𑀺, 𑀏𑀯𑀁 𑀲𑀢𑀺𑀧𑀝𑁆𑀞𑀸𑀦𑀸𑀦𑀺 𑀧𑀢𑁆𑀯𑀸 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑀁 𑀲𑀢𑀺𑀦𑁆𑀤𑁆𑀭𑀺𑀬𑀫𑁂𑀯 𑀚𑁂𑀝𑁆𑀞𑀓𑀁 𑀳𑁄𑀢𑀺 𑀧𑀼𑀩𑁆𑀩𑀗𑁆𑀕𑀫𑀁, 𑀲𑁂𑀲𑀸𑀦𑀺 𑀢𑀤𑀦𑁆𑀯𑀬𑀸𑀦𑀺 𑀳𑁄𑀦𑁆𑀢𑀺. 𑀬𑀣𑀸 𑀘𑀢𑀼𑀢𑁆𑀣𑀲𑁆𑀲 𑀕𑁂𑀳𑁂 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺, 𑀕𑁂𑀳𑀲𑀸𑀫𑀺𑀓𑁄𑀯 𑀯𑀺𑀘𑀸𑀭𑁂𑀢𑀺, 𑀏𑀯𑀁 𑀛𑀸𑀦𑀯𑀺𑀫𑁄𑀓𑁆𑀔𑁂 𑀧𑀢𑁆𑀯𑀸 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑀁 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀫𑁂𑀯 𑀚𑁂𑀝𑁆𑀞𑀓𑀁 𑀳𑁄𑀢𑀺 𑀧𑀼𑀩𑁆𑀩𑀗𑁆𑀕𑀫𑀁, 𑀲𑁂𑀲𑀸𑀦𑀺 𑀢𑀤𑀦𑁆𑀯𑀬𑀸𑀦𑀺 𑀳𑁄𑀦𑁆𑀢𑀺. 𑀲𑀩𑁆𑀩𑀧𑀘𑁆𑀙𑀸 𑀭𑀜𑁆𑀜𑁄 𑀕𑁂𑀳𑀁 𑀕𑀢𑀓𑀸𑀮𑁂 𑀧𑀦 𑀬𑀣𑀸 𑀇𑀢𑀭𑁂 𑀘𑀢𑁆𑀢𑀸𑀭𑁄 𑀢𑀼𑀡𑁆𑀳𑀻 𑀦𑀺𑀲𑀻𑀤𑀦𑁆𑀢𑀺, 𑀭𑀸𑀚𑀸𑀯 𑀕𑁂𑀳𑁂 𑀯𑀺𑀘𑀸𑀭𑁂𑀢𑀺, 𑀏𑀯𑀫𑁂𑀯 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀢𑁆𑀯𑀸 𑀧𑀚𑀸𑀦𑀦𑀮𑀓𑁆𑀔𑀡𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀫𑁂𑀯 𑀚𑁂𑀝𑁆𑀞𑀓𑀁 𑀳𑁄𑀢𑀺 𑀧𑀼𑀩𑁆𑀩𑀗𑁆𑀕𑀫𑀁, 𑀲𑁂𑀲𑀸𑀦𑀺 𑀢𑀤𑀦𑁆𑀯𑀬𑀸𑀦𑀺 𑀳𑁄𑀦𑁆𑀢𑀻𑀢𑀺.

𑁯-𑁧𑁦. 𑀧𑀞𑀫𑀯𑀺𑀪𑀗𑁆𑀕𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁭𑁯-𑁪𑁮𑁦. 𑀦𑀯𑀫𑁂 𑀲𑀢𑀺𑀦𑁂𑀧𑀓𑁆𑀓𑁂𑀦𑀸𑀢𑀺 𑀏𑀢𑁆𑀣 𑀦𑀺𑀧𑀓𑀲𑁆𑀲 𑀪𑀸𑀯𑁄 𑀦𑁂𑀧𑀓𑁆𑀓𑀁, 𑀧𑀜𑁆𑀜𑀸𑀬𑁂𑀢𑀁 𑀦𑀸𑀫𑀁. 𑀓𑀲𑁆𑀫𑀸 𑀧𑀦 𑀲𑀢𑀺𑀪𑀸𑀚𑀦𑁂 𑀧𑀜𑁆𑀜𑀸 𑀯𑀼𑀢𑁆𑀢𑀸𑀢𑀺? 𑀲𑀢𑀺𑀬𑀸 𑀩𑀮𑀯𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀩𑀮𑀯𑀲𑀢𑀺 𑀳𑀺 𑀇𑀥 𑀅𑀥𑀺𑀧𑁆𑀧𑁂𑀢𑀸. 𑀲𑀸 𑀘 𑀧𑀜𑁆𑀜𑀸𑀲𑀫𑁆𑀧𑀬𑀼𑀢𑁆𑀢𑀸𑀯 𑀩𑀮𑀯𑀢𑀻 𑀳𑁄𑀢𑀺, 𑀦 𑀯𑀺𑀧𑁆𑀧𑀬𑀼𑀢𑁆𑀢𑀸𑀢𑀺 𑀧𑀜𑁆𑀜𑀸𑀲𑀫𑁆𑀧𑀬𑀼𑀢𑁆𑀢𑀲𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳. 𑀘𑀺𑀭𑀓𑀢𑀦𑁆𑀢𑀺 𑀘𑀺𑀭𑀓𑀸𑀮𑀁 𑀓𑀢𑀁 𑀤𑀸𑀦𑀁 𑀯𑀸 𑀲𑀻𑀮𑀁 𑀯𑀸 𑀉𑀧𑁄𑀲𑀣𑀓𑀫𑁆𑀫𑀁 𑀯𑀸. 𑀘𑀺𑀭𑀪𑀸𑀲𑀺𑀢𑀦𑁆𑀢𑀺 ‘‘𑀅𑀲𑀼𑀓𑀲𑁆𑀫𑀺𑀁 𑀞𑀸𑀦𑁂 𑀅𑀲𑀼𑀓𑀁 𑀦𑀸𑀫 𑀪𑀸𑀲𑀺𑀢’’𑀦𑁆𑀢𑀺 𑀏𑀯𑀁 𑀘𑀺𑀭𑀓𑀸𑀮𑁂 𑀪𑀸𑀲𑀺𑀢𑀁. 𑀯𑁄𑀲𑁆𑀲𑀕𑁆𑀕𑀸𑀭𑀫𑁆𑀫𑀡𑀁 𑀓𑀢𑁆𑀯𑀸𑀢𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀓𑀢𑁆𑀯𑀸. 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸𑀢𑀺 𑀉𑀤𑀬𑀜𑁆𑀘 𑀅𑀢𑁆𑀣𑀜𑁆𑀘 𑀕𑀘𑁆𑀙𑀦𑁆𑀢𑀺𑀬𑀸, 𑀉𑀤𑀬𑀩𑁆𑀩𑀬𑀧𑀭𑀺𑀕𑁆𑀕𑀳𑀺𑀓𑀸𑀬𑀸𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀤𑁆𑀥𑀸𑀲𑀢𑀺𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀸𑀦𑀺 𑀧𑀼𑀩𑁆𑀩𑀪𑀸𑀕𑀸𑀦𑀺, 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁 𑀫𑀺𑀲𑁆𑀲𑀓𑀁, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀫𑁂𑀯 𑀓𑀣𑀺𑀢𑀁. 𑀤𑀲𑀫𑁂𑀧𑀺 𑀅𑀬𑀫𑁂𑀯 𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑁄𑀢𑀺.

𑀲𑀼𑀤𑁆𑀥𑀺𑀓𑀯𑀕𑁆𑀕𑁄 𑀧𑀞𑀫𑁄.

𑁨. 𑀫𑀼𑀤𑀼𑀢𑀭𑀯𑀕𑁆𑀕𑁄

𑁧. 𑀧𑀝𑀺𑀮𑀸𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮𑁧. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀲𑀫𑁆𑀫𑀧𑁆𑀧𑀥𑀸𑀦𑁂 𑀆𑀭𑀩𑁆𑀪𑀸𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑁂 𑀧𑀝𑀺𑀘𑁆𑀘, 𑀲𑀫𑁆𑀫𑀧𑁆𑀧𑀥𑀸𑀦𑁂 𑀪𑀸𑀯𑁂𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀲𑀢𑀺𑀦𑁆𑀤𑁆𑀭𑀺𑀬𑁂𑀧𑀺 𑀏𑀲𑁂𑀯 𑀦𑀬𑁄.

𑁨. 𑀧𑀞𑀫𑀲𑀁𑀔𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮𑁨. 𑀤𑀼𑀢𑀺𑀬𑁂 𑀢𑀢𑁄𑀢𑀺 𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀯𑀲𑁂𑀦 𑀦𑀺𑀲𑁆𑀲𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀫𑀢𑁆𑀢𑀸𑀦𑀺 𑀳𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀢𑀢𑁄 𑀫𑀼𑀤𑀼𑀢𑀭𑁂𑀳𑀻𑀢𑀺 𑀢𑁂𑀳𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑁂𑀳𑀺 𑀫𑀼𑀤𑀼𑀢𑀭𑀸𑀦𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀲𑁆𑀲, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀥𑀫𑁆𑀫𑀸𑀦𑀼𑀲𑀸𑀭𑀺𑀫𑀕𑁆𑀕𑀲𑁆𑀲, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀲𑀤𑁆𑀥𑀸𑀦𑀼𑀲𑀸𑀭𑀺𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺.

𑀢𑀣𑀸 𑀲𑀫𑀢𑁆𑀢𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀅𑀭𑀳𑀢𑁆𑀢𑀫𑀕𑁆𑀕𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀅𑀦𑀸𑀕𑀸𑀫𑀺𑀫𑀕𑁆𑀕𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀥𑀫𑁆𑀫𑀸𑀦𑀼𑀲𑀸𑀭𑀺𑀫𑀕𑁆𑀕𑀺𑀦𑁆𑀤𑁆𑀭𑀺𑀬𑀸𑀦𑀺, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀲𑀤𑁆𑀥𑀸𑀦𑀼𑀲𑀸𑀭𑀺𑀫𑀕𑁆𑀕𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺.

𑀲𑀫𑀢𑁆𑀢𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀅𑀭𑀳𑀢𑁆𑀢𑀨𑀮𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀅𑀦𑀸𑀕𑀸𑀫𑀺𑀨𑀮𑀺𑀦𑁆𑀤𑁆𑀭𑀺𑀬𑀸𑀦𑀺, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀲𑀓𑀤𑀸𑀕𑀸𑀫𑀺𑀨𑀮𑀺𑀦𑁆𑀤𑁆𑀭𑀺𑀬𑀸𑀦𑀺, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺. 𑀥𑀫𑁆𑀫𑀸𑀦𑀼𑀲𑀸𑀭𑀺𑀲𑀤𑁆𑀥𑀸𑀦𑀼𑀲𑀸𑀭𑀺𑀦𑁄 𑀧𑀦 𑀤𑁆𑀯𑁂𑀧𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀧𑀼𑀕𑁆𑀕𑀮𑀸, 𑀫𑀕𑁆𑀕𑀝𑁆𑀞𑀧𑀼𑀕𑁆𑀕𑀮𑀯𑀲𑁂𑀦 𑀦𑁂𑀲𑀁 𑀦𑀸𑀦𑀢𑁆𑀢𑀁 𑀚𑀸𑀢𑀦𑁆𑀢𑀺 𑀆𑀕𑀫𑀦𑁂𑀦𑀧𑀺 𑀫𑀕𑁆𑀕𑁂𑀦𑀧𑀺. 𑀲𑀤𑁆𑀥𑀸𑀦𑀼𑀲𑀸𑀭𑀻 𑀧𑀼𑀕𑁆𑀕𑀮𑁄 𑀳𑀺 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑁄 𑀧𑀭𑀺𑀧𑀼𑀘𑁆𑀙𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀫𑀕𑁆𑀕𑀁 𑀧𑀸𑀧𑀼𑀡𑀸𑀢𑀺, 𑀥𑀫𑁆𑀫𑀸𑀦𑀼𑀲𑀸𑀭𑀻 𑀏𑀓𑁂𑀦 𑀯𑀸 𑀤𑁆𑀯𑀻𑀳𑀺 𑀯𑀸 𑀲𑀯𑀦𑁂𑀳𑀺. 𑀏𑀯𑀁 𑀢𑀸𑀯 𑀦𑁂𑀲𑀁 𑀆𑀕𑀫𑀦𑁂𑀦 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀥𑀫𑁆𑀫𑀸𑀦𑀼𑀲𑀸𑀭𑀺𑀲𑁆𑀲 𑀧𑀦 𑀫𑀕𑁆𑀕𑁄 𑀢𑀺𑀓𑁆𑀔𑁄 𑀳𑁄𑀢𑀺, 𑀲𑀽𑀭𑀁 𑀜𑀸𑀡𑀁 𑀯𑀳𑀢𑀺, 𑀅𑀲𑀗𑁆𑀔𑀸𑀭𑁂𑀦 𑀅𑀧𑁆𑀧𑀬𑁄𑀕𑁂𑀦 𑀓𑀺𑀮𑁂𑀲𑁂 𑀙𑀺𑀦𑁆𑀤𑀢𑀺 𑀓𑀤𑀮𑀺𑀓𑁆𑀔𑀦𑁆𑀥𑀁 𑀯𑀺𑀬 𑀢𑀺𑀔𑀺𑀡𑀸 𑀅𑀲𑀺𑀥𑀸𑀭𑀸. 𑀲𑀤𑁆𑀥𑀸𑀦𑀼𑀲𑀸𑀭𑀺𑀲𑁆𑀲 𑀦 𑀢𑀲𑁆𑀲 𑀯𑀺𑀬 𑀫𑀕𑁆𑀕𑁄 𑀢𑀺𑀓𑁆𑀔𑁄 𑀳𑁄𑀢𑀺, 𑀦 𑀲𑀽𑀭𑀁 𑀜𑀸𑀡𑀁 𑀯𑀳𑀢𑀺, 𑀲𑀲𑀗𑁆𑀔𑀸𑀭𑁂𑀦 𑀲𑀧𑁆𑀧𑀬𑁄𑀕𑁂𑀦 𑀓𑀺𑀮𑁂𑀲𑁂 𑀙𑀺𑀦𑁆𑀤𑀢𑀺 𑀓𑀤𑀮𑀺𑀓𑁆𑀔𑀦𑁆𑀥𑀁 𑀯𑀺𑀬 𑀅𑀢𑀺𑀔𑀺𑀡𑀸 𑀅𑀲𑀺𑀥𑀸𑀭𑀸. 𑀓𑀺𑀮𑁂𑀲𑀓𑁆𑀔𑀬𑁂 𑀧𑀦 𑀢𑁂𑀲𑀁 𑀦𑀸𑀦𑀢𑁆𑀢𑀁 𑀦𑀢𑁆𑀣𑀺. 𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸 𑀔𑀻𑀬𑀦𑁆𑀢𑀺.

𑁩. 𑀤𑀼𑀢𑀺𑀬𑀲𑀁𑀔𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮𑁩. 𑀢𑀢𑀺𑀬𑁂 𑀢𑀢𑁄𑀢𑀺 𑀨𑀮𑀯𑀲𑁂𑀦 𑀦𑀺𑀲𑁆𑀲𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀫𑀢𑁆𑀢𑀸𑀦𑀺 𑀳𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀅𑀭𑀳𑀢𑁆𑀢𑀨𑀮𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀅𑀭𑀳𑀢𑁆𑀢𑀨𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀅𑀭𑀳𑀸 𑀦𑀸𑀫 𑀳𑁄𑀢𑀺. 𑀅𑀭𑀳𑀢𑁆𑀢𑀨𑀮𑀢𑁄 𑀫𑀼𑀤𑀼𑀢𑀭𑀸𑀦𑀺 𑀅𑀦𑀸𑀕𑀸𑀫𑀺𑀨𑀮𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀲𑀓𑀤𑀸𑀕𑀸𑀫𑀺𑀨𑀮𑀺𑀦𑁆𑀤𑁆𑀭𑀺𑀬𑀸𑀦𑀺, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀨𑀮𑀺𑀦𑁆𑀤𑁆𑀭𑀺𑀬𑀸𑀦𑀺, 𑀲𑁄𑀢𑀸𑀧𑀢𑁆𑀢𑀺𑀨𑀮𑁂𑀦 𑀲𑀫𑀦𑁆𑀦𑀸𑀕𑀢𑁄 𑀧𑀼𑀕𑁆𑀕𑀮𑁄 𑀲𑁄𑀢𑀸𑀧𑀦𑁆𑀦𑁄 𑀦𑀸𑀫 𑀳𑁄𑀢𑀺. 𑀇𑀦𑁆𑀤𑁆𑀭𑀺𑀬𑀯𑁂𑀫𑀢𑁆𑀢𑀢𑀸 𑀨𑀮𑀯𑁂𑀫𑀢𑁆𑀢𑀢𑀸 𑀳𑁄𑀢𑀻𑀢𑀺 𑀇𑀦𑁆𑀤𑁆𑀭𑀺𑀬𑀦𑀸𑀦𑀢𑁆𑀢𑁂𑀦 𑀨𑀮𑀦𑀸𑀦𑀢𑁆𑀢𑀁, 𑀨𑀮𑀦𑀸𑀦𑀢𑁆𑀢𑁂𑀦 𑀧𑀼𑀕𑁆𑀕𑀮𑀦𑀸𑀦𑀢𑁆𑀢𑀦𑁆𑀢𑀺.

𑁪. 𑀢𑀢𑀺𑀬𑀲𑀁𑀔𑀺𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮𑁪. 𑀘𑀢𑀼𑀢𑁆𑀣𑁂 𑀧𑀭𑀺𑀧𑀽𑀭𑀁 𑀧𑀭𑀺𑀧𑀽𑀭𑀓𑀸𑀭𑀻 𑀆𑀭𑀸𑀥𑁂𑀢𑀻𑀢𑀺 𑀧𑀭𑀺𑀧𑀽𑀭𑀁 𑀅𑀭𑀳𑀢𑁆𑀢𑀫𑀕𑁆𑀕𑀁 𑀓𑀭𑁄𑀦𑁆𑀢𑁄 𑀅𑀭𑀳𑀢𑁆𑀢𑀨𑀮𑀁 𑀆𑀭𑀸𑀥𑁂𑀢𑀺. 𑀧𑀤𑁂𑀲𑀁 𑀧𑀤𑁂𑀲𑀓𑀸𑀭𑀻𑀢𑀺 𑀅𑀯𑀲𑁂𑀲𑁂 𑀢𑀬𑁄 𑀧𑀤𑁂𑀲𑀫𑀕𑁆𑀕𑁂 𑀓𑀭𑁄𑀦𑁆𑀢𑁄 𑀧𑀤𑁂𑀲𑀁 𑀨𑀮𑀢𑁆𑀢𑀬𑀫𑀢𑁆𑀢𑀫𑁂𑀯 𑀆𑀭𑀸𑀥𑁂𑀢𑀺. 𑀇𑀢𑀺 𑀇𑀫𑁂𑀲𑀼 𑀘𑀢𑀽𑀲𑀼𑀧𑀺 𑀲𑀼𑀢𑁆𑀢𑁂𑀲𑀼 𑀫𑀺𑀲𑁆𑀲𑀓𑀸𑀦𑁂𑀯 𑀇𑀦𑁆𑀤𑁆𑀭𑀺𑀬𑀸𑀦𑀺 𑀓𑀣𑀺𑀢𑀸𑀦𑀺.

𑁫-𑁭. 𑀧𑀞𑀫𑀯𑀺𑀢𑁆𑀣𑀸𑀭𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁮𑁫-𑁪𑁮𑁭. 𑀧𑀜𑁆𑀘𑀫𑁂 𑀢𑀢𑁄 𑀫𑀼𑀤𑀼𑀢𑀭𑁂𑀳𑀻𑀢𑀺 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀦𑀺𑀲𑁆𑀲𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀧𑀭𑀺𑀧𑀼𑀡𑁆𑀡𑀸𑀦𑀺 𑀳𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺 𑀳𑁄𑀦𑁆𑀢𑀺, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀉𑀤𑁆𑀥𑀁𑀲𑁄𑀢𑀅𑀓𑀦𑀺𑀝𑁆𑀞𑀕𑀸𑀫𑀺𑀲𑁆𑀲 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺.

𑀇𑀫𑀲𑁆𑀫𑀺𑀁 𑀧𑀦 𑀞𑀸𑀦𑁂 𑀅𑀭𑀳𑀢𑁆𑀢𑀫𑀕𑁆𑀕𑁂𑀬𑁂𑀯 𑀞𑀢𑁆𑀯𑀸 𑀧𑀜𑁆𑀘 𑀦𑀺𑀲𑁆𑀲𑀓𑁆𑀓𑀸𑀦𑀺 𑀦𑀻𑀳𑀭𑀺𑀢𑀩𑁆𑀩𑀸𑀦𑀺. 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀳𑀺 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑁂𑀳𑀺 𑀫𑀼𑀤𑀼𑀢𑀭𑀸𑀦𑀺 𑀧𑀞𑀫𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀤𑀼𑀢𑀺𑀬𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀢𑀢𑀺𑀬𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀉𑀤𑁆𑀥𑀁𑀲𑁄𑀢𑀅𑀓𑀦𑀺𑀝𑁆𑀞𑀕𑀸𑀫𑀺𑀲𑁆𑀲 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺. 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀦𑁄𑀧𑀺 𑀏𑀢𑁂𑀯 𑀧𑀜𑁆𑀘 𑀚𑀦𑀸.

𑀇𑀤𑀸𑀦𑀺 𑀢𑀻𑀡𑀺 𑀦𑀺𑀲𑁆𑀲𑀓𑁆𑀓𑀸𑀦𑀺. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀫𑀼𑀤𑀼𑀢𑀭𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀺𑀦𑁆𑀤𑁆𑀭𑀺𑀬𑀸𑀦𑀺, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀬𑁂𑀯 𑀇𑀦𑁆𑀤𑁆𑀭𑀺𑀬𑁂𑀳𑀺 𑀫𑀼𑀤𑀼𑀢𑀭𑀸𑀦𑀺 𑀥𑀫𑁆𑀫𑀸𑀦𑀼𑀲𑀸𑀭𑀺𑀫𑀕𑁆𑀕𑀺𑀦𑁆𑀤𑁆𑀭𑀺𑀬𑀸𑀦𑀺. 𑀢𑁂𑀳𑀺𑀧𑀺 𑀫𑀼𑀤𑀼𑀢𑀭𑀸𑀦𑀺 𑀲𑀤𑁆𑀥𑀸𑀦𑀼𑀲𑀸𑀭𑀺𑀫𑀕𑁆𑀕𑀺𑀦𑁆𑀤𑁆𑀭𑀺𑀬𑀸𑀦𑀺. 𑀙𑀝𑁆𑀞𑀲𑀢𑁆𑀢𑀫𑀸𑀦𑀺 𑀯𑀼𑀢𑁆𑀢𑀦𑀬𑀸𑀦𑁂𑀯. 𑀇𑀫𑁂𑀲𑀼 𑀧𑀦 𑀢𑀻𑀲𑀼𑀧𑀺 𑀲𑀼𑀢𑁆𑀢𑁂𑀲𑀼 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑁂𑀯 𑀓𑀣𑀺𑀢𑀸𑀦𑀺.

𑁮. 𑀧𑀝𑀺𑀧𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁮𑁮. 𑀅𑀝𑁆𑀞𑀫𑁂 𑀢𑀢𑁄 𑀫𑀼𑀤𑀼𑀢𑀭𑁂𑀳𑀻𑀢𑀺 𑀫𑀕𑁆𑀕𑀨𑀮𑀯𑀲𑁂𑀦 𑀦𑀺𑀲𑁆𑀲𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀧𑀸𑀴𑀺𑀬𑀁 𑀯𑀼𑀢𑁆𑀢𑀫𑁂𑀯. 𑀩𑀸𑀳𑀺𑀭𑁄𑀢𑀺 𑀇𑀫𑁂𑀳𑀺 𑀅𑀝𑁆𑀞𑀳𑀺 𑀧𑀼𑀕𑁆𑀕𑀮𑁂𑀳𑀺 𑀩𑀳𑀺𑀪𑀽𑀢𑁄. 𑀧𑀼𑀣𑀼𑀚𑁆𑀚𑀦𑀧𑀓𑁆𑀔𑁂 𑀞𑀺𑀢𑁄𑀢𑀺 𑀧𑀼𑀣𑀼𑀚𑁆𑀚𑀦𑀓𑁄𑀝𑁆𑀞𑀸𑀲𑁂 𑀞𑀺𑀢𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀮𑁄𑀓𑀼𑀢𑁆𑀢𑀭𑀸𑀦𑁂𑀯 𑀇𑀦𑁆𑀤𑁆𑀭𑀺𑀬𑀸𑀦𑀺 𑀓𑀣𑀺𑀢𑀸𑀦𑀺.

𑁯-𑁧𑁦. 𑀲𑀫𑁆𑀧𑀦𑁆𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁮𑁯-𑁪𑁯𑁦. 𑀦𑀯𑀫𑁂 𑀇𑀦𑁆𑀤𑁆𑀭𑀺𑀬𑀲𑀫𑁆𑀧𑀦𑁆𑀦𑁄𑀢𑀺 𑀧𑀭𑀺𑀧𑀼𑀡𑁆𑀡𑀺𑀦𑁆𑀤𑁆𑀭𑀺𑀬𑁄. 𑀤𑀲𑀫𑀁 𑀉𑀢𑁆𑀢𑀸𑀦𑀫𑁂𑀯. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑀤𑁆𑀯𑀬𑁂 𑀫𑀺𑀲𑁆𑀲𑀓𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀓𑀣𑀺𑀢𑀸𑀦𑀻𑀢𑀺.

𑀫𑀼𑀤𑀼𑀢𑀭𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀙𑀴𑀺𑀦𑁆𑀤𑁆𑀭𑀺𑀬𑀯𑀕𑁆𑀕𑁄

𑁨. 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁯𑁨. 𑀢𑀢𑀺𑀬𑀯𑀕𑁆𑀕𑀲𑁆𑀲 𑀤𑀼𑀢𑀺𑀬𑁂 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀦𑁆𑀢𑀺𑀆𑀤𑀻𑀲𑀼 𑀇𑀢𑁆𑀣𑀺𑀪𑀸𑀯𑁂 𑀇𑀦𑁆𑀤𑀝𑁆𑀞𑀁 𑀓𑀭𑁄𑀢𑀻𑀢𑀺 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁. 𑀧𑀼𑀭𑀺𑀲𑀪𑀸𑀯𑁂 𑀇𑀦𑁆𑀤𑀝𑁆𑀞𑀁 𑀓𑀭𑁄𑀢𑀻𑀢𑀺 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁. 𑀚𑀻𑀯𑀺𑀢𑁂 𑀇𑀦𑁆𑀤𑀝𑁆𑀞𑀁 𑀓𑀭𑁄𑀢𑀻𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁. 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀓𑀁 𑀓𑀺𑀭𑁂𑀢𑀁 𑀲𑀼𑀢𑁆𑀢𑀁. 𑀲𑀗𑁆𑀖𑀫𑀚𑁆𑀛𑀲𑁆𑀫𑀺𑀜𑁆𑀳𑀺 ‘‘𑀓𑀢𑀺 𑀦𑀼 𑀔𑁄 𑀯𑀝𑁆𑀝𑀺𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺 𑀓𑀣𑀸 𑀉𑀤𑀧𑀸𑀤𑀺, 𑀅𑀣 𑀪𑀕𑀯𑀸 𑀯𑀝𑁆𑀝𑀺𑀦𑁆𑀤𑁆𑀭𑀺𑀬𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀢𑀻𑀡𑀺𑀫𑀸𑀦𑀺 𑀪𑀺𑀓𑁆𑀔𑀯𑁂𑀢𑀺𑀆𑀤𑀺𑀫𑀸𑀳.

𑁩. 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁯𑁩. 𑀢𑀢𑀺𑀬𑁂 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀦𑁆𑀢𑀺 ‘‘𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀅𑀚𑀸𑀦𑀺𑀢𑀧𑀼𑀩𑁆𑀩𑀁 𑀥𑀫𑁆𑀫𑀁 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀧𑀦𑁆𑀦𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀁. 𑀅𑀜𑁆𑀜𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀢𑁂𑀲𑀁𑀬𑁂𑀯 𑀜𑀸𑀢𑀥𑀫𑁆𑀫𑀸𑀦𑀁 𑀆𑀚𑀸𑀦𑀦𑀸𑀓𑀸𑀭𑁂𑀦 𑀲𑁄𑀢𑀸𑀧𑀢𑁆𑀢𑀺𑀨𑀮𑀸𑀤𑀻𑀲𑀼 𑀙𑀲𑀼 𑀞𑀸𑀦𑁂𑀲𑀼 𑀉𑀧𑁆𑀧𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀁. 𑀅𑀜𑁆𑀜𑀸𑀢𑀸𑀯𑀺𑀦𑁆𑀤𑁆𑀭𑀺𑀬𑀦𑁆𑀢𑀺 𑀅𑀜𑁆𑀜𑀸𑀢𑀸𑀯𑀻𑀲𑀼 𑀅𑀭𑀳𑀢𑁆𑀢𑀨𑀮𑀥𑀫𑁆𑀫𑁂𑀲𑀼 𑀉𑀧𑁆𑀧𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀁. 𑀢𑀢𑁆𑀣 𑀢𑀢𑁆𑀣 𑀢𑁂𑀦 𑀢𑁂𑀦𑀸𑀓𑀸𑀭𑁂𑀦 𑀉𑀧𑁆𑀧𑀦𑁆𑀦𑀲𑁆𑀲 𑀜𑀸𑀡𑀲𑁆𑀲𑁂𑀯𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀤𑀫𑁆𑀧𑀺 𑀲𑀼𑀢𑁆𑀢𑀁 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀓𑀫𑁂𑀯. 𑀲𑀗𑁆𑀖𑀫𑀚𑁆𑀛𑀲𑁆𑀫𑀺𑀜𑁆𑀳𑀺 ‘‘𑀓𑀢𑀺 𑀦𑀼 𑀔𑁄 𑀮𑁄𑀓𑀼𑀢𑁆𑀢𑀭𑀺𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺 𑀓𑀣𑀸 𑀉𑀤𑀧𑀸𑀤𑀺, 𑀅𑀣 𑀪𑀕𑀯𑀸 𑀢𑀸𑀦𑀺 𑀤𑀲𑁆𑀲𑁂𑀦𑁆𑀢𑁄 𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑀸𑀦𑀻𑀢𑀺𑀆𑀤𑀺𑀫𑀸𑀳.

𑁪. 𑀏𑀓𑀩𑀻𑀚𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁪𑁯𑁪. 𑀘𑀢𑀼𑀢𑁆𑀣𑁂 𑀢𑀢𑁄 𑀫𑀼𑀤𑀼𑀢𑀭𑁂𑀳𑀻𑀢𑀺 𑀯𑀺𑀧𑀲𑁆𑀲𑀦𑀢𑁄 𑀦𑀺𑀲𑁆𑀲𑀓𑁆𑀓𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀫𑀢𑁆𑀢𑀸𑀦𑀺 𑀳𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲, 𑀢𑀢𑁄 𑀫𑀼𑀤𑀼𑀢𑀭𑀸𑀦𑀺 𑀉𑀤𑁆𑀥𑀁𑀲𑁄𑀢𑀅𑀓𑀦𑀺𑀝𑁆𑀞𑀕𑀸𑀫𑀺𑀲𑁆𑀲 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫. 𑀇𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀭𑀳𑀢𑁆𑀢𑀫𑀕𑁆𑀕𑁂 𑀞𑀢𑁆𑀯𑀸 𑀧𑀜𑁆𑀘 𑀦𑀺𑀲𑁆𑀲𑀓𑁆𑀓𑀸𑀦𑀺 𑀦𑀻𑀳𑀭𑀺𑀢𑀩𑁆𑀩𑀸𑀦𑀺.

𑀬𑀣𑀸 𑀧𑀦 𑀧𑀼𑀭𑀺𑀫𑀦𑀬𑁂 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑁂 𑀞𑀢𑁆𑀯𑀸 𑀢𑀻𑀡𑀺 𑀦𑀺𑀲𑁆𑀲𑀓𑁆𑀓𑀸𑀦𑀺, 𑀏𑀯𑀫𑀺𑀥 𑀧𑀜𑁆𑀘 𑀦𑀻𑀳𑀭𑀺𑀢𑀩𑁆𑀩𑀸𑀦𑀺. 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀲𑁆𑀲 𑀳𑀺 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑁂𑀳𑀺 𑀫𑀼𑀤𑀼𑀢𑀭𑀸𑀦𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀘 𑀢𑁂𑀳𑀺 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑁂𑀳𑀺 𑀫𑀼𑀤𑀼𑀢𑀭𑀸𑀦𑀺 𑀏𑀓𑀩𑀻𑀚𑀺𑀆𑀤𑀻𑀦𑀁 𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀺𑀦𑁆𑀤𑁆𑀭𑀺𑀬𑀸𑀦𑀺.

𑀏𑀢𑁆𑀣 𑀘 𑀏𑀓𑀩𑀻𑀚𑀻𑀢𑀺𑀆𑀤𑀻𑀲𑀼 𑀬𑁄 𑀲𑁄𑀢𑀸𑀧𑀦𑁆𑀦𑁄 𑀳𑀼𑀢𑁆𑀯𑀸 𑀏𑀓𑀫𑁂𑀯 𑀅𑀢𑁆𑀢𑀪𑀸𑀯𑀁 𑀚𑀦𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀅𑀬𑀁 𑀏𑀓𑀩𑀻𑀚𑀻 𑀦𑀸𑀫. 𑀬𑀣𑀸𑀳 ‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀏𑀓𑀩𑀻𑀚𑀻, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄, 𑀲𑁄 𑀏𑀓𑀜𑁆𑀜𑁂𑀯 𑀫𑀸𑀦𑀼𑀲𑀓𑀁 𑀪𑀯𑀁 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀏𑀓𑀩𑀻𑀚𑀻’’𑀢𑀺 (𑀧𑀼. 𑀧. 𑁩𑁩).

𑀬𑁄 𑀧𑀦 𑀤𑁆𑀯𑁂 𑀢𑀬𑁄 𑀪𑀯𑁂 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺, 𑀅𑀬𑀁 𑀓𑁄𑀮𑀁𑀓𑁄𑀮𑁄 𑀦𑀸𑀫. 𑀬𑀣𑀸𑀳 ‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀓𑁄𑀮𑀁𑀓𑁄𑀮𑁄. 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄, 𑀲𑁄 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀓𑀼𑀮𑀸𑀦𑀺 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀓𑁄𑀮𑀁𑀓𑁄𑀮𑁄’’𑀢𑀺 (𑀧𑀼. 𑀧. 𑁩𑁨). 𑀢𑀢𑁆𑀣 𑀓𑀼𑀮𑀸𑀦𑀻𑀢𑀺 𑀪𑀯𑀸 𑀯𑁂𑀤𑀺𑀢𑀩𑁆𑀩𑀸. ‘‘𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸’’𑀢𑀺 𑀇𑀤𑀁 𑀤𑁂𑀲𑀦𑀸𑀫𑀢𑁆𑀢𑀫𑁂𑀯, 𑀬𑀸𑀯 𑀙𑀝𑁆𑀞𑀪𑀯𑀸 𑀲𑀁𑀲𑀭𑀦𑁆𑀢𑁄 𑀧𑀦 𑀓𑁄𑀮𑀁𑀓𑁄𑀮𑁄𑀯 𑀳𑁄𑀢𑀺.

𑀬𑀲𑁆𑀲 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀭𑀫𑀸 𑀉𑀧𑀧𑀢𑁆𑀢𑀺, 𑀅𑀝𑁆𑀞𑀫𑀁 𑀪𑀯𑀁 𑀦𑀸𑀤𑀺𑀬𑀢𑀺, 𑀅𑀬𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀦𑀸𑀫. 𑀬𑀣𑀸𑀳 ‘‘𑀓𑀢𑀫𑁄 𑀘 𑀧𑀼𑀕𑁆𑀕𑀮𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄. 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄, 𑀲𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀤𑁂𑀯𑁂 𑀘 𑀫𑀦𑀼𑀲𑁆𑀲𑁂 𑀘 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺 𑀧𑀼𑀕𑁆𑀕𑀮𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄’’𑀢𑀺 (𑀧𑀼. 𑀧. 𑁩𑁧).

𑀪𑀕𑀯𑀢𑀸 𑀕𑀳𑀺𑀢𑀦𑀸𑀫𑀯𑀲𑁂𑀦𑁂𑀯 𑀘𑁂𑀢𑀸𑀦𑀺 𑀢𑁂𑀲𑀁 𑀦𑀸𑀫𑀸𑀦𑀺. ‘‘𑀏𑀢𑁆𑀢𑀓𑀜𑁆𑀳𑀺 𑀞𑀸𑀦𑀁 𑀕𑀢𑁄 𑀏𑀓𑀩𑀻𑀚𑀻 𑀦𑀸𑀫 𑀳𑁄𑀢𑀺, 𑀏𑀢𑁆𑀢𑀓𑀁 𑀓𑁄𑀮𑀁𑀓𑁄𑀮𑁄, 𑀏𑀢𑁆𑀢𑀓𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄’’𑀢𑀺 𑀪𑀕𑀯𑀢𑀸 𑀏𑀢𑁂𑀲𑀁 𑀦𑀸𑀫𑀁 𑀕𑀳𑀺𑀢𑀁. 𑀦𑀺𑀬𑀫𑀢𑁄 𑀧𑀦 ‘‘𑀅𑀬𑀁 𑀏𑀓𑀩𑀻𑀚𑀻, 𑀅𑀬𑀁 𑀓𑁄𑀮𑀁𑀓𑁄𑀮𑁄, 𑀅𑀬𑀁 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄’’𑀢𑀺 𑀦𑀢𑁆𑀣𑀺.

𑀓𑁄 𑀧𑀦 𑀦𑁂𑀲𑀁 𑀏𑀢𑀁 𑀧𑀪𑁂𑀤𑀁 𑀦𑀺𑀬𑀫𑁂𑀢𑀻𑀢𑀺? 𑀓𑁂𑀘𑀺 𑀧𑀦 𑀣𑁂𑀭𑀸 ‘‘𑀧𑀼𑀩𑁆𑀩𑀳𑁂𑀢𑀼 𑀦𑀺𑀬𑀫𑁂𑀢𑀻’’𑀢𑀺 𑀯𑀤𑀦𑁆𑀢𑀺, 𑀓𑁂𑀘𑀺 ‘‘𑀧𑀞𑀫𑀫𑀕𑁆𑀕𑁄’’, 𑀓𑁂𑀘𑀺 ‘‘𑀉𑀧𑀭𑀺𑀫 𑀢𑀬𑁄 𑀫𑀕𑁆𑀕𑀸’’, 𑀓𑁂𑀘𑀺 ‘‘𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀯𑀺𑀧𑀲𑁆𑀲𑀦𑀸’’𑀢𑀺. 𑀢𑀢𑁆𑀣 ‘‘𑀧𑀼𑀩𑁆𑀩𑀳𑁂𑀢𑀼 𑀦𑀺𑀬𑀫𑁂𑀢𑀻’’𑀢𑀺 𑀯𑀸𑀤𑁂 𑀧𑀞𑀫𑀫𑀕𑁆𑀕𑀲𑁆𑀲 𑀉𑀧𑀦𑀺𑀲𑁆𑀲𑀬𑁄 𑀓𑀢𑁄 𑀦𑀸𑀫 𑀳𑁄𑀢𑀺, 𑀉𑀧𑀭𑀺 𑀢𑀬𑁄 𑀫𑀕𑁆𑀕𑀸 𑀅𑀦𑀼𑀧𑀦𑀺𑀲𑁆𑀲𑀬𑀸 𑀉𑀧𑁆𑀧𑀦𑁆𑀦𑀸𑀢𑀺 𑀯𑀘𑀦𑀁 𑀆𑀧𑀚𑁆𑀚𑀢𑀺. ‘‘𑀧𑀞𑀫𑀫𑀕𑁆𑀕𑁄 𑀦𑀺𑀬𑀫𑁂𑀢𑀻’’𑀢𑀺 𑀯𑀸𑀤𑁂 𑀉𑀧𑀭𑀺 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀦𑀺𑀭𑀢𑁆𑀣𑀓𑀢𑀸 𑀆𑀧𑀚𑁆𑀚𑀢𑀺. ‘‘𑀉𑀧𑀭𑀺 𑀢𑀬𑁄 𑀫𑀕𑁆𑀕𑀸 𑀦𑀺𑀬𑀫𑁂𑀦𑁆𑀢𑀻’’𑀢𑀺 𑀯𑀸𑀤𑁂 𑀧𑀞𑀫𑀫𑀕𑁆𑀕𑁂 𑀅𑀦𑀼𑀧𑁆𑀧𑀦𑁆𑀦𑁂𑀯 𑀉𑀧𑀭𑀺 𑀢𑀬𑁄 𑀫𑀕𑁆𑀕𑀸 𑀉𑀧𑁆𑀧𑀦𑁆𑀦𑀸𑀢𑀺 𑀆𑀧𑀚𑁆𑀚𑀢𑀺. ‘‘𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀯𑀺𑀧𑀲𑁆𑀲𑀦𑀸 𑀦𑀺𑀬𑀫𑁂𑀢𑀻’’𑀢𑀺 𑀯𑀸𑀤𑁄 𑀧𑀦 𑀬𑀼𑀚𑁆𑀚𑀢𑀺. 𑀲𑀘𑁂 𑀳𑀺 𑀉𑀧𑀭𑀺 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀯𑀺𑀧𑀲𑁆𑀲𑀦𑀸 𑀩𑀮𑀯𑀢𑀻 𑀳𑁄𑀢𑀺, 𑀏𑀓𑀩𑀻𑀚𑀻 𑀦𑀸𑀫 𑀳𑁄𑀢𑀺, 𑀢𑀢𑁄 𑀫𑀦𑁆𑀤𑀢𑀭𑀸𑀬 𑀓𑁄𑀮𑀁𑀓𑁄𑀮𑁄, 𑀢𑀢𑁄 𑀫𑀦𑁆𑀤𑀢𑀭𑀸𑀬 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄𑀢𑀺.

𑀏𑀓𑀘𑁆𑀘𑁄 𑀳𑀺 𑀲𑁄𑀢𑀸𑀧𑀦𑁆𑀦𑁄 𑀯𑀝𑁆𑀝𑀚𑁆𑀛𑀸𑀲𑀬𑁄 𑀳𑁄𑀢𑀺 𑀯𑀝𑁆𑀝𑀸𑀪𑀺𑀭𑀢𑁄 𑀧𑀼𑀦𑀧𑁆𑀧𑀼𑀦𑀁 𑀯𑀝𑁆𑀝𑀲𑁆𑀫𑀺𑀁𑀬𑁂𑀯 𑀯𑀺𑀘𑀭𑀢𑀺 𑀲𑀦𑁆𑀤𑀺𑀲𑁆𑀲𑀢𑀺. 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀲𑁂𑀝𑁆𑀞𑀺, 𑀯𑀺𑀲𑀸𑀔𑀸 𑀉𑀧𑀸𑀲𑀺𑀓𑀸, 𑀘𑀽𑀴𑀭𑀣𑀫𑀳𑀸𑀭𑀣𑀸 𑀤𑁂𑀯𑀧𑀼𑀢𑁆𑀢𑀸, 𑀅𑀦𑁂𑀓𑀯𑀡𑁆𑀡𑁄 𑀤𑁂𑀯𑀧𑀼𑀢𑁆𑀢𑁄, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸, 𑀦𑀸𑀕𑀤𑀢𑁆𑀢𑁄 𑀤𑁂𑀯𑀧𑀼𑀢𑁆𑀢𑁄𑀢𑀺 𑀇𑀫𑁂 𑀳𑀺 𑀏𑀢𑁆𑀢𑀓𑀸 𑀚𑀦𑀸 𑀯𑀝𑁆𑀝𑀚𑁆𑀛𑀸𑀲𑀬𑀸 𑀯𑀝𑁆𑀝𑀸𑀪𑀺𑀭𑀢𑀸 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀙 𑀤𑁂𑀯𑀮𑁄𑀓𑁂 𑀲𑁄𑀥𑁂𑀢𑁆𑀯𑀸 𑀅𑀓𑀦𑀺𑀝𑁆𑀞𑁂 𑀞𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀺, 𑀇𑀫𑁂 𑀇𑀥 𑀦 𑀕𑀳𑀺𑀢𑀸. 𑀦 𑀓𑁂𑀯𑀮𑀜𑁆𑀘𑀺𑀫𑁂, 𑀬𑁄𑀧𑀺 𑀫𑀦𑀼𑀲𑁆𑀲𑁂𑀲𑀼𑀬𑁂𑀯 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀲𑀁𑀲𑀭𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀬𑁄𑀧𑀺 𑀤𑁂𑀯𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑁄 𑀤𑁂𑀯𑁂𑀲𑀼𑀬𑁂𑀯 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀅𑀧𑀭𑀸𑀧𑀭𑀁 𑀲𑀁𑀲𑀭𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺, 𑀇𑀫𑁂𑀧𑀺 𑀇𑀥 𑀦 𑀕𑀳𑀺𑀢𑀸. 𑀓𑀸𑀮𑁂𑀦 𑀤𑁂𑀯𑁂, 𑀓𑀸𑀮𑁂𑀦 𑀫𑀦𑀼𑀲𑁆𑀲𑁂 𑀲𑀁𑀲𑀭𑀺𑀢𑁆𑀯𑀸 𑀧𑀦 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑁄𑀯 𑀇𑀥 𑀕𑀳𑀺𑀢𑁄. 𑀢𑀲𑁆𑀫𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄𑀢𑀺 𑀇𑀤𑀁 𑀇𑀥𑀝𑁆𑀞𑀓𑀯𑁄𑀓𑀺𑀡𑁆𑀡𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀲𑁆𑀲 𑀦𑀸𑀫𑀁 𑀓𑀣𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀥𑀫𑁆𑀫𑀸𑀦𑀼𑀲𑀸𑀭𑀻 𑀲𑀤𑁆𑀥𑀸𑀦𑀼𑀲𑀸𑀭𑀻𑀢𑀺 𑀏𑀢𑁆𑀣 𑀧𑀦 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀲𑁆𑀲 𑀤𑁆𑀯𑁂 𑀥𑀼𑀭𑀸𑀦𑀺, 𑀤𑁆𑀯𑁂 𑀲𑀻𑀲𑀸𑀦𑀺, 𑀤𑁆𑀯𑁂 𑀅𑀪𑀺𑀦𑀺𑀯𑁂𑀲𑀸 𑁋 𑀲𑀤𑁆𑀥𑀸𑀥𑀼𑀭𑀁, 𑀧𑀜𑁆𑀜𑀸𑀥𑀼𑀭𑀁, 𑀲𑀤𑁆𑀥𑀸𑀲𑀻𑀲𑀁, 𑀧𑀜𑁆𑀜𑀸𑀲𑀻𑀲𑀁, 𑀲𑀤𑁆𑀥𑀸𑀪𑀺𑀦𑀺𑀯𑁂𑀲𑁄, 𑀧𑀜𑁆𑀜𑀸𑀪𑀺𑀦𑀺𑀯𑁂𑀲𑁄𑀢𑀺. 𑀢𑀢𑁆𑀣 𑀬𑁄 𑀪𑀺𑀓𑁆𑀔𑀼 ‘‘𑀲𑀘𑁂 𑀲𑀤𑁆𑀥𑀸𑀬 𑀲𑀓𑁆𑀓𑀸 𑀦𑀺𑀩𑁆𑀩𑀢𑁆𑀢𑁂𑀢𑀼𑀁, 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕’’𑀦𑁆𑀢𑀺 𑀲𑀤𑁆𑀥𑀁 𑀥𑀼𑀭𑀁 𑀓𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀲𑁄 𑀫𑀕𑁆𑀕𑀓𑁆𑀔𑀡𑁂 𑀲𑀤𑁆𑀥𑀸𑀦𑀼𑀲𑀸𑀭𑀻 𑀦𑀸𑀫 𑀳𑁄𑀢𑀺. 𑀨𑀮𑀓𑁆𑀔𑀡𑁂 𑀧𑀦 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄 𑀦𑀸𑀫 𑀳𑀼𑀢𑁆𑀯𑀸 𑀏𑀓𑀩𑀻𑀚𑀻 𑀓𑁄𑀮𑀁𑀓𑁄𑀮𑁄 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄𑀢𑀺 𑀢𑀺𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀏𑀓𑁂𑀓𑁄 𑀤𑀼𑀓𑁆𑀔𑀸𑀧𑀝𑀺𑀧𑀤𑀸𑀤𑀺𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀪𑀸𑀯𑀁 𑀆𑀧𑀚𑁆𑀚𑀢𑀻𑀢𑀺 𑀲𑀤𑁆𑀥𑀸𑀥𑀼𑀭𑁂𑀦 𑀤𑁆𑀯𑀸𑀤𑀲 𑀚𑀦𑀸 𑀳𑁄𑀦𑁆𑀢𑀺.

𑀬𑁄 𑀧𑀦 ‘‘𑀲𑀘𑁂 𑀧𑀜𑁆𑀜𑀸𑀬 𑀲𑀓𑁆𑀓𑀸 𑀦𑀺𑀩𑁆𑀩𑀢𑁆𑀢𑁂𑀢𑀼𑀁, 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀺 𑀮𑁄𑀓𑀼𑀢𑁆𑀢𑀭𑀫𑀕𑁆𑀕’’𑀦𑁆𑀢𑀺 𑀧𑀜𑁆𑀜𑀁 𑀥𑀼𑀭𑀁 𑀓𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀦𑀺𑀩𑁆𑀩𑀢𑁆𑀢𑁂𑀢𑀺, 𑀲𑁄 𑀫𑀕𑁆𑀕𑀓𑁆𑀔𑀡𑁂 𑀥𑀫𑁆𑀫𑀸𑀦𑀼𑀲𑀸𑀭𑀻 𑀦𑀸𑀫 𑀳𑁄𑀢𑀺. 𑀨𑀮𑀓𑁆𑀔𑀡𑁂 𑀧𑀦 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄 𑀦𑀸𑀫 𑀳𑀼𑀢𑁆𑀯𑀸 𑀏𑀓𑀩𑀻𑀚𑀺𑀆𑀤𑀺𑀪𑁂𑀤𑁂𑀦 𑀤𑁆𑀯𑀸𑀤𑀲𑀪𑁂𑀤𑁄𑀯 𑀳𑁄𑀢𑀺. 𑀏𑀯𑀁 𑀤𑁆𑀯𑁂 𑀫𑀕𑁆𑀕𑀝𑁆𑀞𑀸 𑀨𑀮𑀓𑁆𑀔𑀡𑁂 𑀘𑀢𑀼𑀯𑀻𑀲𑀢𑀺 𑀲𑁄𑀢𑀸𑀧𑀦𑁆𑀦𑀸 𑀳𑁄𑀦𑁆𑀢𑀻𑀢𑀺.

𑀢𑀺𑀧𑀺𑀝𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀓𑀺𑀭 ‘‘𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑁄𑀥𑁂𑀲𑁆𑀲𑀸𑀫𑀻’’𑀢𑀺 𑀧𑀭𑀢𑀻𑀭𑀁 𑀕𑀢𑁄. 𑀢𑀁 𑀏𑀓𑁄 𑀓𑀼𑀝𑀼𑀫𑁆𑀩𑀺𑀓𑁄 𑀘𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀉𑀧𑀝𑁆𑀞𑀸𑀲𑀺, 𑀣𑁂𑀭𑁄 𑀆𑀕𑀫𑀦𑀓𑀸𑀮𑁂 ‘‘𑀕𑀘𑁆𑀙𑀸𑀫𑀺 𑀉𑀧𑀸𑀲𑀓𑀸’’𑀢𑀺 𑀆𑀳. ‘‘𑀓𑀳𑀁 𑀪𑀦𑁆𑀢𑁂’’𑀢𑀺? ‘‘𑀅𑀫𑁆𑀳𑀸𑀓𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀲𑀦𑁆𑀢𑀺𑀓’’𑀦𑁆𑀢𑀺. ‘‘𑀦 𑀲𑀓𑁆𑀓𑀸, 𑀪𑀦𑁆𑀢𑁂, 𑀫𑀬𑀸 𑀕𑀦𑁆𑀢𑀼𑀁, 𑀪𑀤𑁆𑀤𑀦𑁆𑀢𑀁 𑀧𑀦 𑀦𑀺𑀲𑁆𑀲𑀸𑀬 𑀫𑀬𑀸 𑀲𑀸𑀲𑀦𑀲𑁆𑀲 𑀕𑀼𑀡𑁄 𑀜𑀸𑀢𑁄, 𑀢𑀼𑀫𑁆𑀳𑀸𑀓𑀁 𑀧𑀭𑀫𑁆𑀫𑀼𑀔𑀸 𑀓𑀻𑀤𑀺𑀲𑀁 𑀪𑀺𑀓𑁆𑀔𑀼𑀁 𑀉𑀧𑀲𑀗𑁆𑀓𑀫𑀸𑀫𑀻’’𑀢𑀺? 𑀅𑀣 𑀦𑀁 𑀣𑁂𑀭𑁄 𑀆𑀳 𑁋 ‘‘𑀬𑁄 𑀪𑀺𑀓𑁆𑀔𑀼 𑀘𑀢𑀼𑀯𑀻𑀲𑀢𑀺 𑀲𑁄𑀢𑀸𑀧𑀦𑁆𑀦𑁂 𑀤𑁆𑀯𑀸𑀤𑀲 𑀲𑀓𑀤𑀸𑀕𑀸𑀫𑀻 𑀅𑀝𑁆𑀞𑀘𑀢𑁆𑀢𑀸𑀮𑀻𑀲 𑀅𑀦𑀸𑀕𑀸𑀫𑀻 𑀤𑁆𑀯𑀸𑀤𑀲 𑀅𑀭𑀳𑀦𑁆𑀢𑁂 𑀤𑀲𑁆𑀲𑁂𑀢𑁆𑀯𑀸 𑀥𑀫𑁆𑀫𑀓𑀣𑀁 𑀓𑀣𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀏𑀯𑀭𑀽𑀧𑀁 𑀪𑀺𑀓𑁆𑀔𑀼𑀁 𑀉𑀧𑀝𑁆𑀞𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸𑀢𑀺.

𑁫-𑁧𑁦. 𑀲𑀼𑀤𑁆𑀥𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁪𑁯𑁫-𑁫𑁦𑁦. 𑀧𑀜𑁆𑀘𑀫𑁂 𑀘𑀓𑁆𑀔𑀼 𑀘 𑀢𑀁 𑀘𑀓𑁆𑀔𑀼𑀤𑁆𑀯𑀸𑀭𑁂 𑀦𑀺𑀩𑁆𑀩𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀆𑀥𑀺𑀧𑀢𑁂𑀬𑁆𑀬𑀲𑀗𑁆𑀔𑀸𑀢𑁂𑀦 𑀇𑀦𑁆𑀤𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀜𑁆𑀘𑀸𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁. 𑀲𑁄𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀇𑀫𑀲𑁆𑀫𑀺𑀁 𑀯𑀕𑁆𑀕𑁂 𑀧𑀞𑀫𑀲𑀼𑀢𑁆𑀢𑀜𑁆𑀘𑁂𑀯 𑀙𑀝𑁆𑀞𑀸𑀤𑀻𑀦𑀺 𑀘 𑀧𑀜𑁆𑀘𑀸𑀢𑀺 𑀙 𑀲𑀼𑀢𑁆𑀢𑀸𑀦𑀺 𑀘𑀢𑀼𑀲𑀘𑁆𑀘𑀯𑀲𑁂𑀦 𑀓𑀣𑀺𑀢𑀸𑀦𑀻𑀢𑀺.

𑀙𑀴𑀺𑀦𑁆𑀤𑁆𑀭𑀺𑀬𑀯𑀕𑁆𑀕𑁄 𑀢𑀢𑀺𑀬𑁄.

𑁪. 𑀲𑀼𑀔𑀺𑀦𑁆𑀤𑁆𑀭𑀺𑀬𑀯𑀕𑁆𑀕𑁄

𑁧-𑁫. 𑀲𑀼𑀤𑁆𑀥𑀺𑀓𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫𑁦𑁧-𑁫𑁦𑁫. 𑀘𑀢𑀼𑀢𑁆𑀣𑀯𑀕𑁆𑀕𑀲𑁆𑀲 𑀧𑀞𑀫𑁂 𑀲𑀼𑀔𑀜𑁆𑀘 𑀢𑀁 𑀲𑀳𑀚𑀸𑀢𑀸𑀦𑀁 𑀆𑀥𑀺𑀧𑀢𑁂𑀬𑁆𑀬𑀲𑀗𑁆𑀔𑀸𑀢𑁂𑀦 𑀇𑀦𑁆𑀤𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀜𑁆𑀘𑀸𑀢𑀺 𑀲𑀼𑀔𑀺𑀦𑁆𑀤𑁆𑀭𑀺𑀬𑀁. 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀢𑁆𑀣 𑀘 𑀲𑀼𑀔𑀺𑀦𑁆𑀤𑁆𑀭𑀺𑀬𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀸𑀦𑀺 𑀓𑀸𑀫𑀸𑀯𑀘𑀭𑀸𑀦𑁂𑀯, 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀞𑀧𑁂𑀢𑁆𑀯𑀸 𑀅𑀭𑀽𑀧𑀸𑀯𑀘𑀭𑀁 𑀲𑁂𑀲𑀁 𑀢𑁂𑀪𑀽𑀫𑀓𑀁, 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀘𑀢𑀼𑀪𑀽𑀫𑀓𑀁. 𑀤𑀼𑀢𑀺𑀬𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀘𑀢𑀼𑀲𑀘𑁆𑀘𑀯𑀲𑁂𑀦𑁂𑀯 𑀓𑀣𑀺𑀢𑀸𑀦𑀺.

𑁬. 𑀧𑀞𑀫𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦𑁬. 𑀙𑀝𑁆𑀞𑁂 𑀓𑀸𑀬𑀺𑀓𑀦𑁆𑀢𑀺 𑀓𑀸𑀬𑀧𑀲𑀸𑀤𑀯𑀢𑁆𑀣𑀼𑀓𑀁. 𑀲𑀼𑀔𑀦𑁆𑀢𑀺 𑀅𑀬𑀫𑀲𑁆𑀲 𑀲𑀭𑀽𑀧𑀦𑀺𑀤𑁆𑀤𑁂𑀲𑁄. 𑀲𑀸𑀢𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀫𑀥𑀼𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀸𑀬𑀲𑀫𑁆𑀨𑀲𑁆𑀲𑀚𑀦𑁆𑀢𑀺 𑀓𑀸𑀬𑀲𑀫𑁆𑀨𑀲𑁆𑀲𑀢𑁄 𑀚𑀸𑀢𑀁. 𑀲𑀼𑀔𑀁 𑀲𑀸𑀢𑀦𑁆𑀢𑀺 𑀯𑀼𑀢𑁆𑀢𑀦𑀬𑀫𑁂𑀯. 𑀯𑁂𑀤𑀬𑀺𑀢𑀦𑁆𑀢𑀺 𑀅𑀬𑀫𑀲𑁆𑀲 𑀲𑀩𑁆𑀩𑀯𑁂𑀤𑀦𑀸𑀲𑀸𑀥𑀸𑀭𑀡𑁄 𑀅𑀜𑁆𑀜𑀥𑀫𑁆𑀫𑀯𑀺𑀲𑀺𑀝𑁆𑀞𑁄 𑀲𑀪𑀸𑀯𑀦𑀺𑀤𑁆𑀤𑁂𑀲𑁄. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑁂𑀲𑀼𑀧𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀸𑀬𑀺𑀓𑀁 𑀯𑀸 𑀘𑁂𑀢𑀲𑀺𑀓𑀁 𑀯𑀸𑀢𑀺 𑀏𑀢𑁆𑀣 𑀧𑀦 𑀘𑀓𑁆𑀔𑀸𑀤𑀬𑁄 𑀘𑀢𑁆𑀢𑀸𑀭𑁄 𑀧𑀲𑀸𑀤𑀓𑀸𑀬𑁂 𑀯𑀢𑁆𑀣𑀼𑀁 𑀓𑀢𑁆𑀯𑀸 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀓𑀸𑀬𑀺𑀓𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀸𑀬𑀧𑀲𑀸𑀤𑀯𑀢𑁆𑀣𑀼𑀓𑀁 𑀧𑀦 𑀅𑀤𑀼𑀓𑁆𑀔𑀫𑀲𑀼𑀔𑀁 𑀦𑀸𑀫 𑀦𑀢𑁆𑀣𑀺.

𑁯. 𑀓𑀝𑁆𑀞𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁦𑁯. 𑀦𑀯𑀫𑁂 𑀤𑁆𑀯𑀺𑀦𑁆𑀦𑀁 𑀓𑀝𑁆𑀞𑀸𑀦𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀅𑀭𑀡𑀻𑀦𑀁. 𑀲𑀗𑁆𑀖𑀝𑁆𑀝𑀦𑀲𑀫𑁄𑀥𑀸𑀦𑀸𑀢𑀺 𑀲𑀗𑁆𑀖𑀝𑁆𑀝𑀦𑁂𑀦 𑀘𑁂𑀯 𑀲𑀫𑁄𑀥𑀸𑀦𑁂𑀦 𑀘. 𑀉𑀲𑁆𑀫𑀸𑀢𑀺 𑀉𑀲𑀼𑀫𑀸𑀓𑀸𑀭𑁄. 𑀢𑁂𑀚𑁄𑀢𑀺 𑀅𑀕𑁆𑀕𑀺𑀥𑀽𑀫𑁄. 𑀏𑀢𑁆𑀣 𑀘 𑀅𑀥𑀭𑀸𑀭𑀡𑀻 𑀯𑀺𑀬 𑀯𑀢𑁆𑀣𑀸𑀭𑀫𑁆𑀫𑀡𑀁, 𑀉𑀢𑁆𑀢𑀭𑀸𑀭𑀡𑀻 𑀯𑀺𑀬 𑀨𑀲𑁆𑀲𑁄, 𑀲𑀗𑁆𑀖𑀝𑁆𑀝𑁄 𑀯𑀺𑀬 𑀨𑀲𑁆𑀲𑀲𑀗𑁆𑀖𑀝𑁆𑀝𑀦𑀁, 𑀅𑀕𑁆𑀕𑀺 𑀯𑀺𑀬 𑀯𑁂𑀤𑀦𑀸 𑀤𑀝𑁆𑀞𑀩𑁆𑀩𑀸. 𑀯𑀢𑁆𑀣𑀸𑀭𑀫𑁆𑀫𑀡𑀁 𑀯𑀸 𑀉𑀢𑁆𑀢𑀭𑀸𑀭𑀡𑀻 𑀯𑀺𑀬, 𑀨𑀲𑁆𑀲𑁄 𑀅𑀥𑀭𑀸𑀭𑀡𑀻 𑀯𑀺𑀬 𑀤𑀝𑁆𑀞𑀩𑁆𑀩𑁄.

𑁧𑁦. 𑀉𑀧𑁆𑀧𑀝𑀺𑀧𑀸𑀝𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧𑁦. 𑀤𑀲𑀫𑀁 𑀬𑀣𑀸𑀥𑀫𑁆𑀫𑀭𑀲𑁂𑀦 𑀧𑀝𑀺𑀧𑀸𑀝𑀺𑀬𑀸 𑀯𑀼𑀢𑁆𑀢𑀫𑁆𑀧𑀺 𑀇𑀫𑀲𑁆𑀫𑀺𑀁 𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑁂 𑀲𑁂𑀲𑀲𑀼𑀢𑁆𑀢𑀸𑀦𑀺 𑀯𑀺𑀬 𑀅𑀤𑁂𑀲𑀺𑀢𑀢𑁆𑀢𑀸 𑀉𑀧𑁆𑀧𑀝𑀺𑀧𑀸𑀝𑀺𑀓𑀲𑀼𑀢𑁆𑀢𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀦𑀺𑀫𑀺𑀢𑁆𑀢𑀦𑁆𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀧𑀘𑁆𑀘𑀬𑀯𑁂𑀯𑀘𑀦𑀸𑀦𑁂𑀯. 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀜𑁆𑀘 𑀧𑀚𑀸𑀦𑀸𑀢𑀻𑀢𑀺 𑀤𑀼𑀓𑁆𑀔𑀲𑀘𑁆𑀘𑀯𑀲𑁂𑀦𑁂𑀯 𑀧𑀚𑀸𑀦𑀸𑀢𑀺. 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑀫𑀼𑀤𑀬𑀦𑁆𑀢𑀺 𑀓𑀡𑁆𑀝𑀓𑁂𑀦 𑀯𑀸 𑀯𑀺𑀤𑁆𑀥𑀲𑁆𑀲 𑀫𑀗𑁆𑀓𑀼𑀮𑁂𑀦 𑀯𑀸 𑀤𑀝𑁆𑀞𑀲𑁆𑀲 𑀧𑀘𑁆𑀘𑀢𑁆𑀣𑀭𑀡𑁂 𑀯𑀸 𑀯𑀮𑀺𑀬𑀸 𑀨𑀼𑀝𑁆𑀞𑀲𑁆𑀲 𑀤𑀼𑀓𑁆𑀔𑀲𑀳𑀕𑀢𑀁 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀏𑀢𑀲𑁆𑀲 𑀲𑀫𑀼𑀤𑀬𑁄𑀢𑀺 𑀧𑀚𑀸𑀦𑀸𑀢𑀺.

𑀧𑀭𑀢𑁄 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑀫𑀼𑀤𑀬𑀦𑁆𑀢𑀺𑀆𑀤𑀻𑀲𑀼𑀧𑀺 𑀢𑁂𑀲𑀁 𑀢𑁂𑀲𑀁 𑀓𑀸𑀭𑀡𑀯𑀲𑁂𑀦𑁂𑀯 𑀲𑀫𑀼𑀤𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀢𑁆𑀢𑀘𑀻𑀯𑀭𑀸𑀤𑀻𑀦𑀁 𑀯𑀸 𑀳𑀺 𑀲𑀗𑁆𑀔𑀸𑀭𑀸𑀦𑀁 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀦𑀁 𑀯𑀸 𑀲𑀢𑁆𑀢𑀸𑀦𑀁 𑀯𑀺𑀦𑀸𑀲𑁂𑀦 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀢𑁂𑀲𑀁 𑀯𑀺𑀦𑀸𑀲𑀁 𑀢𑀲𑁆𑀲 𑀲𑀫𑀼𑀤𑀬𑁄𑀢𑀺 𑀧𑀚𑀸𑀦𑀸𑀢𑀺. 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀯𑀭𑀲𑀬𑀦𑁂 𑀦𑀺𑀧𑀦𑁆𑀦𑀲𑁆𑀲 𑀳𑀢𑁆𑀣𑀧𑀸𑀤𑀲𑀫𑁆𑀩𑀸𑀳𑀦𑀢𑀸𑀮𑀯𑀡𑁆𑀝𑀯𑀸𑀢𑀸𑀤𑀺𑀲𑀫𑁆𑀨𑀲𑁆𑀲𑁂𑀦 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀨𑀲𑁆𑀲𑀁 𑀢𑀲𑁆𑀲 𑀲𑀫𑀼𑀤𑀬𑁄𑀢𑀺 𑀧𑀚𑀸𑀦𑀸𑀢𑀺. 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀧𑀦 𑀲𑀢𑁆𑀢𑀲𑀗𑁆𑀔𑀸𑀭𑀸𑀦𑀁 𑀫𑀦𑀸𑀧𑀸𑀦𑀁 𑀧𑀝𑀺𑀮𑀸𑀪𑀯𑀲𑁂𑀦 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀧𑀝𑀺𑀮𑀸𑀪𑀁 𑀢𑀲𑁆𑀲 𑀲𑀫𑀼𑀤𑀬𑁄𑀢𑀺 𑀧𑀚𑀸𑀦𑀸𑀢𑀺. 𑀫𑀚𑁆𑀛𑀢𑁆𑀢𑀸𑀓𑀸𑀭𑁂𑀦 𑀧𑀦 𑀉𑀧𑁂𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀢𑁆𑀢𑀲𑀗𑁆𑀔𑀸𑀭𑁂𑀲𑀼 𑀫𑀚𑁆𑀛𑀢𑁆𑀢𑀸𑀓𑀸𑀭𑀁 𑀢𑀲𑁆𑀲 𑀲𑀫𑀼𑀤𑀬𑁄𑀢𑀺 𑀧𑀚𑀸𑀦𑀸𑀢𑀺.

𑀓𑀢𑁆𑀣 𑀘𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀺, 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻𑀢𑀺𑀆𑀤𑀻𑀲𑀼 𑀧𑀦 𑀅𑀬𑀁 𑀏𑀓𑀢𑁄𑀯 𑀯𑀺𑀦𑀺𑀘𑁆𑀙𑀬𑀓𑀣𑀸 𑁋 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀜𑁆𑀳𑀺 𑀧𑀞𑀫𑀚𑁆𑀛𑀸𑀦𑀲𑁆𑀲 𑀉𑀧𑀘𑀸𑀭𑀓𑁆𑀔𑀡𑁂𑀬𑁂𑀯 𑀦𑀺𑀭𑀼𑀚𑁆𑀛𑀢𑀺 𑀧𑀳𑀻𑀦𑀁 𑀳𑁄𑀢𑀺, 𑀤𑁄𑀫𑀦𑀲𑁆𑀲𑀸𑀤𑀻𑀦𑀺 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀢𑁂𑀲𑀁 𑀅𑀢𑀺𑀲𑀬𑀦𑀺𑀭𑁄𑀥𑀢𑁆𑀢𑀸 𑀅𑀬𑀁 𑀛𑀸𑀦𑁂𑀲𑀼𑀬𑁂𑀯 𑀦𑀺𑀭𑁄𑀥𑁄 𑀯𑀼𑀢𑁆𑀢𑁄. 𑀅𑀢𑀺𑀲𑀬𑀦𑀺𑀭𑁄𑀥𑁄 𑀳𑀺 𑀢𑁂𑀲𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀲𑀼, 𑀦 𑀦𑀺𑀭𑁄𑀥𑁄𑀬𑁂𑀯, 𑀦𑀺𑀭𑁄𑀥𑁄𑀬𑁂𑀯 𑀧𑀦 𑀉𑀧𑀘𑀸𑀭𑀓𑁆𑀔𑀡𑁂, 𑀦𑀸𑀢𑀺𑀲𑀬𑀦𑀺𑀭𑁄𑀥𑁄. 𑀢𑀣𑀸 𑀳𑀺 𑀦𑀸𑀦𑀸𑀯𑀚𑁆𑀚𑀦𑁂 𑀧𑀞𑀫𑀚𑁆𑀛𑀸𑀦𑀼𑀧𑀘𑀸𑀭𑁂 𑀦𑀺𑀭𑀼𑀤𑁆𑀥𑀲𑁆𑀲𑀸𑀧𑀺 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀟𑀁𑀲𑀫𑀓𑀲𑀸𑀤𑀺𑀲𑀫𑁆𑀨𑀲𑁆𑀲𑁂𑀦 𑀯𑀸 𑀯𑀺𑀲𑀫𑀸𑀲𑀦𑀼𑀧𑀢𑀸𑀧𑁂𑀦 𑀯𑀸 𑀲𑀺𑀬𑀸 𑀉𑀧𑁆𑀧𑀢𑁆𑀢𑀺, 𑀦 𑀢𑁆𑀯𑁂𑀯 𑀅𑀦𑁆𑀢𑁄𑀅𑀧𑁆𑀧𑀦𑀸𑀬𑀁. 𑀉𑀧𑀘𑀸𑀭𑁂 𑀯𑀸 𑀦𑀺𑀭𑀼𑀤𑁆𑀥𑀫𑁆𑀧𑁂𑀢𑀁 𑀦 𑀲𑀼𑀝𑁆𑀞𑀼 𑀦𑀺𑀭𑀼𑀤𑁆𑀥𑀁 𑀳𑁄𑀢𑀺 𑀧𑀝𑀺𑀧𑀓𑁆𑀔𑁂𑀦 𑀅𑀯𑀺𑀳𑀢𑀢𑁆𑀢𑀸. 𑀅𑀦𑁆𑀢𑁄𑀅𑀧𑁆𑀧𑀦𑀸𑀬𑀁 𑀧𑀦 𑀧𑀻𑀢𑀺𑀨𑀭𑀡𑁂𑀦 𑀲𑀩𑁆𑀩𑁄 𑀓𑀸𑀬𑁄 𑀲𑀼𑀔𑁄𑀓𑁆𑀓𑀦𑁆𑀢𑁄 𑀳𑁄𑀢𑀺, 𑀲𑀼𑀔𑁄𑀓𑁆𑀓𑀦𑁆𑀢𑀓𑀸𑀬𑀲𑁆𑀲 𑀘 𑀲𑀼𑀝𑁆𑀞𑀼 𑀦𑀺𑀭𑀼𑀤𑁆𑀥𑀁 𑀳𑁄𑀢𑀺 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀧𑀓𑁆𑀔𑁂𑀦 𑀯𑀺𑀳𑀢𑀢𑁆𑀢𑀸. 𑀦𑀸𑀦𑀸𑀯𑀚𑁆𑀚𑀦𑁂𑀬𑁂𑀯 𑀘 𑀤𑀼𑀢𑀺𑀬𑀚𑁆𑀛𑀸𑀦𑀼𑀧𑀘𑀸𑀭𑁂 𑀧𑀳𑀻𑀦𑀲𑁆𑀲 𑀤𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀬𑀲𑁆𑀫𑀸 𑀏𑀢𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀧𑀘𑁆𑀘𑀬𑁂𑀧𑀺 𑀓𑀸𑀬𑀓𑀺𑀮𑀫𑀣𑁂 𑀘𑀺𑀢𑁆𑀢𑀼𑀧𑀖𑀸𑀢𑁂 𑀘 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀪𑀸𑀯𑁂 𑀦𑁂𑀯 𑀉𑀧𑁆𑀧𑀚𑁆𑀚𑀢𑀺. 𑀬𑀢𑁆𑀣 𑀧𑀦 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀯𑀺𑀢𑀓𑁆𑀓𑀯𑀺𑀘𑀸𑀭𑀪𑀸𑀯𑁂, 𑀅𑀧𑁆𑀧𑀳𑀻𑀦𑀸 𑀏𑀯 𑀘 𑀤𑀼𑀢𑀺𑀬𑀚𑁆𑀛𑀸𑀦𑀼𑀧𑀘𑀸𑀭𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀢𑀺 𑀢𑀢𑁆𑀣𑀲𑁆𑀲 𑀲𑀺𑀬𑀸 𑀉𑀧𑁆𑀧𑀢𑁆𑀢𑀺. 𑀦 𑀢𑁆𑀯𑁂𑀯 𑀤𑀼𑀢𑀺𑀬𑀚𑁆𑀛𑀸𑀦𑁂 𑀧𑀳𑀻𑀦𑀧𑀘𑁆𑀘𑀬𑀢𑁆𑀢𑀸. 𑀢𑀣𑀸 𑀢𑀢𑀺𑀬𑀚𑁆𑀛𑀸𑀦𑀼𑀧𑀘𑀸𑀭𑁂 𑀧𑀳𑀻𑀦𑀲𑁆𑀲𑀸𑀧𑀺 𑀲𑀼𑀔𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑀧𑀡𑀻𑀢𑀭𑀽𑀧𑀨𑀼𑀝𑁆𑀞𑀓𑀸𑀬𑀲𑁆𑀲 𑀲𑀺𑀬𑀸 𑀉𑀧𑁆𑀧𑀢𑁆𑀢𑀺, 𑀦 𑀢𑁆𑀯𑁂𑀯 𑀢𑀢𑀺𑀬𑀚𑁆𑀛𑀸𑀦𑁂. 𑀢𑀢𑀺𑀬𑀚𑁆𑀛𑀸𑀦𑁂 𑀳𑀺 𑀲𑀼𑀔𑀲𑁆𑀲 𑀧𑀘𑁆𑀘𑀬𑀪𑀽𑀢𑀸 𑀧𑀻𑀢𑀺 𑀲𑀩𑁆𑀩𑀲𑁄 𑀦𑀺𑀭𑀼𑀤𑁆𑀥𑀸. 𑀢𑀣𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀼𑀧𑀘𑀸𑀭𑁂 𑀧𑀳𑀻𑀦𑀲𑁆𑀲𑀸𑀧𑀺 𑀲𑁄𑀫𑀦𑀲𑁆𑀲𑀺𑀦𑁆𑀤𑁆𑀭𑀺𑀬𑀲𑁆𑀲 𑀆𑀲𑀦𑁆𑀦𑀢𑁆𑀢𑀸 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀬 𑀉𑀧𑁂𑀓𑁆𑀔𑀸𑀬 𑀅𑀪𑀸𑀯𑁂𑀦 𑀲𑀫𑁆𑀫𑀸 𑀅𑀦𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀘 𑀲𑀺𑀬𑀸 𑀉𑀧𑁆𑀧𑀢𑁆𑀢𑀺, 𑀦 𑀢𑁆𑀯𑁂𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑁂. 𑀢𑀲𑁆𑀫𑀸 ‘‘𑀏𑀢𑁆𑀣 𑀘𑀼𑀧𑁆𑀧𑀦𑁆𑀦𑀁 𑀤𑀼𑀓𑁆𑀔𑀺𑀦𑁆𑀤𑁆𑀭𑀺𑀬𑀁 𑀅𑀧𑀭𑀺𑀲𑁂𑀲𑀁 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀢𑀢𑁆𑀣 𑀢𑀢𑁆𑀣 𑀅𑀧𑀭𑀺𑀲𑁂𑀲𑀕𑁆𑀕𑀳𑀡𑀁 𑀓𑀢𑀁.

𑀬𑀁 𑀧𑀦𑁂𑀢𑁆𑀣 𑀢𑀤𑀢𑁆𑀣𑀸𑀬 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑀻𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀅𑀮𑀸𑀪𑀻 𑀲𑀫𑀸𑀦𑁄 𑀉𑀧𑁆𑀧𑀸𑀤𑀦𑀢𑁆𑀣𑀸𑀬 𑀘𑀺𑀢𑁆𑀢𑀁 𑀉𑀧𑀲𑀁𑀳𑀭𑀢𑀺, 𑀮𑀸𑀪𑀻 𑀲𑀫𑀸𑀦𑁄 𑀲𑀫𑀸𑀧𑀚𑁆𑀚𑀦𑀢𑁆𑀣𑀸𑀬𑀸𑀢𑀺 𑀏𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑁂𑀲𑀼 𑀤𑁆𑀯𑀻𑀲𑀼𑀧𑀺 𑀲𑀼𑀢𑁆𑀢𑁂𑀲𑀼 𑀲𑀫𑁆𑀫𑀲𑀦𑀯𑀸𑀭𑁄𑀯 𑀓𑀣𑀺𑀢𑁄𑀢𑀺.

𑀲𑀼𑀔𑀺𑀦𑁆𑀤𑁆𑀭𑀺𑀬𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑁫. 𑀚𑀭𑀸𑀯𑀕𑁆𑀕𑁄

𑁧. 𑀚𑀭𑀸𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧𑁧. 𑀧𑀜𑁆𑀘𑀫𑀯𑀕𑁆𑀕𑀲𑁆𑀲 𑀧𑀞𑀫𑁂 𑀧𑀘𑁆𑀙𑀸𑀢𑀧𑁂𑀢𑀺 𑀧𑀸𑀲𑀸𑀤𑀘𑁆𑀙𑀸𑀬𑀸𑀬 𑀧𑀼𑀭𑀢𑁆𑀣𑀺𑀫𑀤𑀺𑀲𑀁 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀧𑀸𑀲𑀸𑀤𑀲𑁆𑀲 𑀧𑀘𑁆𑀙𑀺𑀫𑀤𑀺𑀲𑀸𑀪𑀸𑀕𑁂 𑀆𑀢𑀧𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀞𑀸𑀦𑁂 𑀧𑀜𑁆𑀜𑀢𑁆𑀢𑀯𑀭𑀩𑀼𑀤𑁆𑀥𑀸𑀲𑀦𑁂 𑀦𑀺𑀲𑀺𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀧𑀺𑀝𑁆𑀞𑀺𑀁 𑀑𑀢𑀸𑀧𑀬𑀫𑀸𑀦𑁄𑀢𑀺 𑀬𑀲𑁆𑀫𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲𑀧𑀺 𑀉𑀧𑀸𑀤𑀺𑀦𑁆𑀦𑀓𑀲𑀭𑀻𑀭𑁂 𑀉𑀡𑁆𑀳𑀓𑀸𑀮𑁂 𑀉𑀡𑁆𑀳𑀁 𑀳𑁄𑀢𑀺, 𑀲𑀻𑀢𑀓𑀸𑀮𑁂 𑀲𑀻𑀢𑀁, 𑀅𑀬𑀜𑁆𑀘 𑀳𑀺𑀫𑀧𑀸𑀢𑀲𑀻𑀢𑀲𑀫𑀬𑁄. 𑀢𑀲𑁆𑀫𑀸 𑀫𑀳𑀸𑀘𑀻𑀯𑀭𑀁 𑀑𑀢𑀸𑀭𑁂𑀢𑁆𑀯𑀸 𑀲𑀽𑀭𑀺𑀬𑀭𑀲𑁆𑀫𑀻𑀳𑀺 𑀧𑀺𑀝𑁆𑀞𑀺𑀁 𑀑𑀢𑀸𑀧𑀬𑀫𑀸𑀦𑁄 𑀦𑀺𑀲𑀻𑀤𑀺.

𑀓𑀺𑀁 𑀧𑀦 𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀫𑀤𑁆𑀤𑀺𑀢𑁆𑀯𑀸 𑀲𑀽𑀭𑀺𑀬𑀭𑀲𑁆𑀫𑀺 𑀅𑀦𑁆𑀢𑁄 𑀧𑀯𑀺𑀲𑀺𑀢𑀼𑀁 𑀲𑀓𑁆𑀓𑁄𑀢𑀻𑀢𑀺? 𑀦 𑀲𑀓𑁆𑀓𑁄𑀢𑀺. 𑀏𑀯𑀁 𑀲𑀦𑁆𑀢𑁂 𑀓𑀺𑀁 𑀢𑀸𑀧𑁂𑀢𑀻𑀢𑀺? 𑀭𑀲𑁆𑀫𑀺𑀢𑁂𑀚𑀁. 𑀬𑀣𑁂𑀯 𑀳𑀺 𑀞𑀺𑀢𑀫𑀚𑁆𑀛𑀦𑁆𑀳𑀺𑀓𑁂 𑀧𑀭𑀺𑀫𑀡𑁆𑀟𑀮𑀸𑀬 𑀙𑀸𑀬𑀸𑀬 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀺𑀦𑁆𑀦𑀲𑁆𑀲 𑀓𑀺𑀜𑁆𑀘𑀸𑀧𑀺 𑀲𑀽𑀭𑀺𑀬𑀭𑀲𑁆𑀫𑀺𑀬𑁄 𑀲𑀭𑀻𑀭𑀁 𑀦 𑀨𑀼𑀲𑀦𑁆𑀢𑀺, 𑀲𑀩𑁆𑀩𑀤𑀺𑀲𑀸𑀲𑀼 𑀧𑀦 𑀢𑁂𑀚𑁄 𑀨𑀭𑀢𑀺, 𑀅𑀕𑁆𑀕𑀺𑀚𑀸𑀮𑀸𑀳𑀺 𑀧𑀭𑀺𑀓𑁆𑀔𑀺𑀢𑁆𑀢𑁄 𑀯𑀺𑀬 𑀳𑁄𑀢𑀺, 𑀏𑀯𑀁 𑀲𑀽𑀭𑀺𑀬𑀭𑀲𑁆𑀫𑀻𑀲𑀼 𑀩𑀼𑀤𑁆𑀥𑀭𑀲𑁆𑀫𑀺𑀬𑁄 𑀫𑀤𑁆𑀤𑀺𑀢𑁆𑀯𑀸 𑀅𑀦𑁆𑀢𑁄 𑀧𑀯𑀺𑀲𑀺𑀢𑀼𑀁 𑀅𑀲𑀓𑁆𑀓𑀼𑀡𑀦𑁆𑀢𑀻𑀲𑀼𑀧𑀺 𑀲𑀢𑁆𑀣𑀸 𑀢𑁂𑀚𑀁 𑀢𑀸𑀧𑁂𑀦𑁆𑀢𑁄 𑀦𑀺𑀲𑀺𑀦𑁆𑀦𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀦𑁄𑀫𑀚𑁆𑀚𑀦𑁆𑀢𑁄𑀢𑀺 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀓𑀭𑀡𑀯𑀲𑁂𑀦 𑀅𑀦𑀼𑀫𑀚𑁆𑀚𑀦𑁆𑀢𑁄. 𑀅𑀘𑁆𑀙𑀭𑀺𑀬𑀁 𑀪𑀦𑁆𑀢𑁂𑀢𑀺 𑀣𑁂𑀭𑁄 𑀪𑀕𑀯𑀢𑁄 𑀧𑀺𑀝𑁆𑀞𑀺𑀢𑁄 𑀫𑀳𑀸𑀘𑀻𑀯𑀭𑀁 𑀑𑀢𑀸𑀭𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀲𑁆𑀲 𑀤𑁆𑀯𑀺𑀦𑁆𑀦𑀁 𑀅𑀁𑀲𑀓𑀽𑀝𑀸𑀦𑀁 𑀅𑀦𑁆𑀢𑀭𑁂 𑀲𑀼𑀯𑀡𑁆𑀡𑀸𑀯𑀝𑁆𑀝𑀁 𑀯𑀺𑀬 𑀓𑁂𑀲𑀕𑁆𑀕𑀧𑁆𑀧𑀫𑀸𑀡𑀁 𑀯𑀮𑀺𑀬𑀸𑀯𑀝𑁆𑀝𑀁 𑀤𑀺𑀲𑁆𑀯𑀸 𑁋 ‘‘𑀏𑀯𑀭𑀽𑀧𑁂𑀧𑀺 𑀦𑀸𑀫 𑀲𑀭𑀻𑀭𑁂 𑀚𑀭𑀸 𑀧𑀜𑁆𑀜𑀸𑀬𑀢𑀻’’𑀢𑀺 𑀲𑀜𑁆𑀚𑀸𑀢𑀲𑀁𑀯𑁂𑀕𑁄 𑀚𑀭𑀁 𑀕𑀭𑀳𑀦𑁆𑀢𑁄 𑀏𑀯𑀫𑀸𑀳. 𑀕𑀭𑀳𑀦𑀘𑁆𑀙𑀭𑀺𑀬𑀁 𑀦𑀸𑀫 𑀓𑀺𑀭𑁂𑀢𑀁.

𑀦 𑀘𑁂𑀯𑀁 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑁄 𑀢𑀸𑀯 𑀧𑀭𑀺𑀲𑀼𑀤𑁆𑀥𑁄𑀢𑀺 𑀬𑀣𑀸 𑀧𑀓𑀢𑀺𑀬𑀸 𑀙𑀯𑀺𑀯𑀡𑁆𑀡𑁄 𑀧𑀭𑀺𑀲𑀼𑀤𑁆𑀥𑁄, 𑀦 𑀏𑀯𑀫𑁂𑀢𑀭𑀳𑀻𑀢𑀺 𑀤𑀻𑀧𑁂𑀦𑁆𑀢𑁄 𑀏𑀯𑀫𑀸𑀳. 𑀢𑀣𑀸𑀕𑀢𑀲𑁆𑀲 𑀳𑀺 𑀤𑀳𑀭𑀓𑀸𑀮𑁂 𑀲𑀗𑁆𑀓𑀼𑀲𑀢𑀲𑀫𑀩𑁆𑀪𑀸𑀳𑀢𑀁 𑀉𑀲𑀪𑀘𑀫𑁆𑀫𑀁 𑀯𑀺𑀬 𑀯𑀺𑀳𑀢𑀯𑀮𑀺𑀓𑁄 𑀓𑀸𑀬𑁄 𑀳𑁄𑀢𑀺, 𑀢𑀲𑁆𑀫𑀺𑀁 𑀞𑀧𑀺𑀢𑁄 𑀳𑀢𑁆𑀣𑁄 𑀪𑀲𑁆𑀲𑀢𑁂𑀯, 𑀦 𑀲𑀦𑁆𑀢𑀺𑀝𑁆𑀞𑀢𑀺, 𑀢𑁂𑀮𑀧𑀼𑀜𑁆𑀙𑀦𑀸𑀓𑀸𑀭𑀧𑁆𑀧𑀢𑁆𑀢𑁄 𑀯𑀺𑀬 𑀳𑁄𑀢𑀺. 𑀫𑀳𑀮𑁆𑀮𑀓𑀓𑀸𑀮𑁂 𑀧𑀦 𑀲𑀺𑀭𑀸𑀚𑀸𑀮𑀸 𑀫𑀺𑀮𑀸𑀬𑀦𑁆𑀢𑀺, 𑀲𑀦𑁆𑀥𑀺𑀧𑀩𑁆𑀩𑀸𑀦𑀺 𑀲𑀺𑀣𑀺𑀮𑀸𑀦𑀺 𑀳𑁄𑀦𑁆𑀢𑀺, 𑀫𑀁𑀲𑀁 𑀅𑀝𑁆𑀞𑀺𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀲𑀺𑀣𑀺𑀮𑀪𑀸𑀯𑀁 𑀆𑀧𑀚𑁆𑀚𑀺𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀑𑀮𑀫𑁆𑀩𑀢𑀺. 𑀩𑀼𑀤𑁆𑀥𑀸𑀦𑀁 𑀧𑀦 𑀏𑀯𑀭𑀽𑀧𑀁 𑀦 𑀳𑁄𑀢𑀺. 𑀅𑀜𑁆𑀜𑁂𑀲𑀁 𑀅𑀧𑀸𑀓𑀝𑀁, 𑀲𑀦𑁆𑀢𑀺𑀓𑀸𑀯𑀘𑀭𑀢𑁆𑀢𑀸 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲𑁂𑀯 𑀧𑀸𑀓𑀝𑀁 𑀳𑁄𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳.

𑀲𑀺𑀣𑀺𑀮𑀸𑀦𑀺 𑀘 𑀕𑀢𑁆𑀢𑀸𑀦𑀻𑀢𑀺 𑀅𑀜𑁆𑀜𑁂𑀲𑀁 𑀫𑀼𑀔𑁂 𑀅𑀁𑀲𑀓𑀽𑀝𑀦𑁆𑀢𑀭𑁂𑀳𑀺 𑀢𑁂𑀲𑀼 𑀢𑁂𑀲𑀼 𑀞𑀸𑀦𑁂𑀲𑀼 𑀯𑀮𑀺𑀬𑁄 𑀲𑀦𑁆𑀢𑀺𑀝𑁆𑀞𑀦𑁆𑀢𑀺, 𑀲𑀢𑁆𑀣𑀼 𑀧𑀦𑁂𑀢𑀁 𑀦𑀢𑁆𑀣𑀺, 𑀣𑁂𑀭𑁄 𑀘 𑀤𑁆𑀯𑀺𑀦𑁆𑀦𑀁 𑀅𑀁𑀲𑀓𑀽𑀝𑀸𑀦𑀁 𑀅𑀦𑁆𑀢𑀭𑁂 𑀯𑀮𑀺𑀬𑀸𑀯𑀝𑁆𑀝𑀓𑀁 𑀤𑀺𑀲𑁆𑀯𑀸 𑀏𑀯𑀫𑀸𑀳. 𑀲𑀩𑁆𑀩𑀸𑀦𑀺 𑀯𑀮𑀺𑀬𑀚𑀸𑀢𑀸𑀦𑀻𑀢𑀺 𑀇𑀤𑀫𑁆𑀧𑀺 𑀅𑀢𑁆𑀢𑀦𑁄 𑀧𑀸𑀓𑀝𑀯𑀲𑁂𑀦 𑀏𑀯𑀫𑀸𑀳 𑁋 𑀲𑀢𑁆𑀣𑀼 𑀧𑀦 𑀅𑀜𑁆𑀜𑁂𑀲𑀁 𑀯𑀺𑀬 𑀯𑀮𑀺𑀬𑁄 𑀦𑀸𑀫 𑀦𑀢𑁆𑀣𑀺. 𑀧𑀼𑀭𑀢𑁄 𑀧𑀩𑁆𑀪𑀸𑀭𑁄 𑀘 𑀓𑀸𑀬𑁄𑀢𑀺 𑀲𑀢𑁆𑀣𑀸 𑀩𑁆𑀭𑀳𑁆𑀫𑀼𑀚𑀼𑀕𑀢𑁆𑀢𑁄, 𑀤𑁂𑀯𑀦𑀕𑀭𑁂 𑀲𑀫𑀼𑀲𑁆𑀲𑀺𑀢𑀲𑀼𑀯𑀡𑁆𑀡𑀢𑁄𑀭𑀡𑀁 𑀯𑀺𑀬𑀲𑁆𑀲 𑀓𑀸𑀬𑁄 𑀉𑀚𑀼𑀓𑀫𑁂𑀯 𑀉𑀕𑁆𑀕𑀢𑁄. 𑀫𑀳𑀮𑁆𑀮𑀓𑀓𑀸𑀮𑁂 𑀧𑀦 𑀓𑀸𑀬𑁄 𑀧𑀼𑀭𑀢𑁄 𑀯𑀗𑁆𑀓𑁄 𑀳𑁄𑀢𑀺, 𑀲𑁆𑀯𑀸𑀬𑀁 𑀅𑀜𑁆𑀜𑁂𑀲𑀁 𑀅𑀧𑀸𑀓𑀝𑁄, 𑀲𑀦𑁆𑀢𑀺𑀓𑀸𑀯𑀘𑀭𑀢𑁆𑀢𑀸 𑀧𑀦 𑀣𑁂𑀭𑀲𑁆𑀲𑁂𑀯 𑀧𑀸𑀓𑀝𑁄, 𑀢𑀲𑁆𑀫𑀸 𑀏𑀯𑀫𑀸𑀳. 𑀤𑀺𑀲𑁆𑀲𑀢𑀺 𑀘 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀫 𑀦 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑀺. 𑀬𑀢𑁄 𑀧𑀦 𑀧𑀓𑀢𑀺𑀬𑀸 𑀧𑀭𑀺𑀲𑀼𑀤𑁆𑀥𑁄 𑀙𑀯𑀺𑀯𑀡𑁆𑀡𑁄, 𑀇𑀤𑀸𑀦𑀺 𑀦 𑀢𑀣𑀸 𑀧𑀭𑀺𑀲𑀼𑀤𑁆𑀥𑁄, 𑀅𑀁𑀲𑀓𑀽𑀝𑀦𑁆𑀢𑀭𑁂 𑀯𑀮𑀺 𑀧𑀜𑁆𑀜𑀸𑀬𑀢𑀺, 𑀩𑁆𑀭𑀳𑁆𑀫𑀼𑀚𑀼𑀓𑀸𑀬𑁄 𑀧𑀼𑀭𑀢𑁄 𑀯𑀗𑁆𑀓𑁄, 𑀇𑀫𑀺𑀦𑀸𑀯 𑀓𑀸𑀭𑀡𑁂𑀦 𑀘𑀓𑁆𑀔𑀸𑀤𑀻𑀦𑀜𑁆𑀘 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀜𑁆𑀜𑀣𑀢𑁆𑀢𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀦𑀬𑀕𑁆𑀕𑀸𑀳𑀢𑁄 𑀏𑀯𑀫𑀸𑀳. 𑀥𑀻 𑀢𑀁 𑀚𑀫𑁆𑀫𑀺 𑀚𑀭𑁂 𑀅𑀢𑁆𑀣𑀽𑀢𑀺 𑀮𑀸𑀫𑀓𑁂 𑀚𑀭𑁂 𑀥𑀻 𑀢𑀁 𑀢𑀼𑀬𑁆𑀳𑀁 𑀳𑁄𑀢𑀼, 𑀥𑀺𑀓𑁆𑀓𑀸𑀭𑁄 𑀢𑀁 𑀨𑀼𑀲𑀢𑀼. 𑀩𑀺𑀫𑁆𑀩𑀦𑁆𑀢𑀺 𑀅𑀢𑁆𑀢𑀪𑀸𑀯𑁄.

𑁨. 𑀉𑀡𑁆𑀡𑀸𑀪𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧𑁨. 𑀤𑀼𑀢𑀺𑀬𑁂 𑀕𑁄𑀘𑀭𑀯𑀺𑀲𑀬𑀦𑁆𑀢𑀺 𑀕𑁄𑀘𑀭𑀪𑀽𑀢𑀁 𑀯𑀺𑀲𑀬𑀁. 𑀅𑀜𑁆𑀜𑀫𑀜𑁆𑀜𑀲𑁆𑀲𑀸𑀢𑀺 𑀘𑀓𑁆𑀔𑀼 𑀲𑁄𑀢𑀲𑁆𑀲, 𑀲𑁄𑀢𑀁 𑀯𑀸 𑀘𑀓𑁆𑀔𑀼𑀲𑁆𑀲𑀸𑀢𑀺 𑀏𑀯𑀁 𑀏𑀓𑀁 𑀏𑀓𑀲𑁆𑀲 𑀕𑁄𑀘𑀭𑀯𑀺𑀲𑀬𑀁 𑀦 𑀧𑀘𑁆𑀘𑀦𑀼𑀪𑁄𑀢𑀺. 𑀲𑀘𑁂 𑀳𑀺 𑀦𑀻𑀮𑀸𑀤𑀺𑀪𑁂𑀤𑀁 𑀭𑀽𑀧𑀸𑀭𑀫𑁆𑀫𑀡𑀁 𑀲𑀫𑁄𑀥𑀸𑀦𑁂𑀢𑁆𑀯𑀸 𑀲𑁄𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀦𑁂𑀬𑁆𑀬 𑁋 ‘‘𑀇𑀗𑁆𑀖 𑀢𑁆𑀯𑀁 𑀢𑀸𑀯 𑀦𑀁 𑀯𑀯𑀢𑁆𑀣𑀧𑁂𑀳𑀺 𑀯𑀺𑀪𑀸𑀯𑁂𑀳𑀺 ‘𑀓𑀺𑀦𑁆𑀦𑀸𑀫𑁂𑀢𑀁 𑀆𑀭𑀫𑁆𑀫𑀡’’’𑀦𑁆𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀯𑀺𑀦𑀸𑀧𑀺 𑀫𑀼𑀔𑁂𑀦 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀏𑀯𑀁 𑀯𑀤𑁂𑀬𑁆𑀬 𑁋 ‘‘𑀅𑀭𑁂, 𑀅𑀦𑁆𑀥𑀩𑀸𑀮, 𑀯𑀲𑁆𑀲𑀲𑀢𑀫𑁆𑀧𑀺 𑀯𑀲𑁆𑀲𑀲𑀳𑀲𑁆𑀲𑀫𑁆𑀧𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀫𑁆𑀧𑀺 𑀧𑀭𑀺𑀥𑀸𑀯𑀫𑀸𑀦𑁄 𑀅𑀜𑁆𑀜𑀢𑁆𑀭 𑀫𑀬𑀸 𑀓𑀼𑀳𑀺𑀁 𑀏𑀢𑀲𑁆𑀲 𑀚𑀸𑀦𑀦𑀓𑀁 𑀮𑀪𑀺𑀲𑁆𑀲𑀲𑀺, 𑀢𑀁 𑀆𑀳𑀭, 𑀘𑀓𑁆𑀔𑀼𑀧𑀲𑀸𑀤𑁂 𑀉𑀧𑀦𑁂𑀳𑀺, 𑀅𑀳𑀫𑁂𑀢𑀁 𑀆𑀭𑀫𑁆𑀫𑀡𑀁 𑀚𑀸𑀦𑀺𑀲𑁆𑀲𑀸𑀫𑀺 𑁋 𑀬𑀤𑀺 𑀯𑀸 𑀦𑀻𑀮𑀁, 𑀬𑀤𑀺 𑀯𑀸 𑀧𑀻𑀢𑀓𑀁. 𑀦 𑀳𑀺 𑀏𑀲𑁄 𑀅𑀜𑁆𑀜𑀲𑁆𑀲 𑀯𑀺𑀲𑀬𑁄, 𑀫𑀬𑁆𑀳𑀫𑁂𑀯𑁂𑀲𑁄 𑀯𑀺𑀲𑀬𑁄’’𑀢𑀺. 𑀲𑁂𑀲𑀤𑁆𑀯𑀸𑀭𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀫𑁂𑀢𑀸𑀦𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀕𑁄𑀘𑀭𑀯𑀺𑀲𑀬𑀁 𑀦 𑀧𑀘𑁆𑀘𑀦𑀼𑀪𑁄𑀦𑁆𑀢𑀺 𑀦𑀸𑀫.

𑀓𑀺𑀁 𑀧𑀝𑀺𑀲𑀭𑀡𑀦𑁆𑀢𑀺 𑀏𑀢𑁂𑀲𑀁 𑀓𑀺𑀁 𑀧𑀝𑀺𑀲𑀭𑀡𑀁, 𑀓𑀺𑀁 𑀏𑀢𑀸𑀦𑀺 𑀧𑀝𑀺𑀲𑀭𑀦𑁆𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀫𑀦𑁄 𑀧𑀝𑀺𑀲𑀭𑀡𑀦𑁆𑀢𑀺 𑀚𑀯𑀦𑀫𑀦𑁄 𑀧𑀝𑀺𑀲𑀭𑀡𑀁. 𑀫𑀦𑁄𑀯 𑀦𑁂𑀲𑀦𑁆𑀢𑀺 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀫𑀦𑁄𑀯 𑀏𑀢𑁂𑀲𑀁 𑀕𑁄𑀘𑀭𑀯𑀺𑀲𑀬𑀁 𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀅𑀦𑀼𑀪𑁄𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀜𑁆𑀳𑀺 𑀭𑀽𑀧𑀤𑀲𑁆𑀲𑀦𑀫𑀢𑁆𑀢𑀫𑁂𑀯, 𑀏𑀢𑁆𑀣 𑀭𑀚𑁆𑀚𑀦𑀁 𑀯𑀸 𑀤𑀼𑀲𑁆𑀲𑀦𑀁 𑀯𑀸 𑀫𑀼𑀬𑁆𑀳𑀦𑀁 𑀯𑀸 𑀦𑀢𑁆𑀣𑀺. 𑀏𑀓𑀲𑁆𑀫𑀺𑀁 𑀧𑀦 𑀤𑁆𑀯𑀸𑀭𑁂 𑀚𑀯𑀦𑀁 𑀭𑀚𑁆𑀚𑀢𑀺 𑀯𑀸 𑀤𑀼𑀲𑁆𑀲𑀢𑀺 𑀯𑀸 𑀫𑀼𑀬𑁆𑀳𑀢𑀺 𑀯𑀸. 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀢𑀢𑁆𑀭𑀸𑀬𑀁 𑀉𑀧𑀫𑀸 𑁋 𑀧𑀜𑁆𑀘 𑀓𑀺𑀭 𑀤𑀼𑀩𑁆𑀩𑀮𑀪𑁄𑀚𑀓𑀸 𑀭𑀸𑀚𑀸𑀦𑀁 𑀲𑁂𑀯𑀺𑀢𑁆𑀯𑀸 𑀓𑀺𑀘𑁆𑀙𑁂𑀦 𑀓𑀲𑀺𑀭𑁂𑀦 𑀏𑀓𑀲𑁆𑀫𑀺𑀁 𑀧𑀜𑁆𑀘𑀓𑀼𑀮𑀺𑀓𑁂 𑀕𑀸𑀫𑁂 𑀧𑀭𑀺𑀢𑁆𑀢𑀓𑀁 𑀆𑀬𑀁 𑀮𑀪𑀺𑀁𑀲𑀼. 𑀢𑁂𑀲𑀁 𑀢𑀢𑁆𑀣 𑀫𑀘𑁆𑀙𑀪𑀸𑀕𑁄 𑀫𑀁𑀲𑀪𑀸𑀕𑁄, 𑀅𑀤𑁆𑀤𑀼𑀓𑀳𑀸𑀧𑀡𑁄 𑀯𑀸 𑀬𑁄𑀢𑁆𑀢𑀓𑀳𑀸𑀧𑀡𑁄 𑀯𑀸 𑀫𑀸𑀲𑀓𑀳𑀸𑀧𑀡𑁄 𑀯𑀸 𑀅𑀝𑁆𑀞𑀓𑀳𑀸𑀧𑀡𑁄 𑀯𑀸 𑀲𑁄𑀴𑀲𑀓𑀳𑀸𑀧𑀡𑁄 𑀯𑀸 𑀘𑀢𑀼𑀲𑀝𑁆𑀞𑀺𑀓𑀳𑀸𑀧𑀡𑁄 𑀯𑀸 𑀤𑀡𑁆𑀟𑁄𑀢𑀺 𑀏𑀢𑁆𑀢𑀓𑀫𑀢𑁆𑀢𑀫𑁂𑀯 𑀧𑀸𑀧𑀼𑀡𑀸𑀢𑀺, 𑀲𑀢𑀯𑀢𑁆𑀣𑀼𑀓𑀁 𑀧𑀜𑁆𑀘𑀲𑀢𑀯𑀢𑁆𑀣𑀼𑀓𑀁 𑀲𑀳𑀲𑁆𑀲𑀯𑀢𑁆𑀣𑀼𑀓𑀁 𑀫𑀳𑀸𑀩𑀮𑀺𑀁 𑀭𑀸𑀚𑀸𑀯 𑀕𑀡𑁆𑀳𑀸𑀢𑀺.

𑀢𑀢𑁆𑀣 𑀧𑀜𑁆𑀘𑀓𑀼𑀮𑀺𑀓𑀕𑀸𑀫𑀸 𑀯𑀺𑀬 𑀧𑀜𑁆𑀘𑀧𑀲𑀸𑀤𑀸 𑀤𑀝𑁆𑀞𑀩𑁆𑀩𑀸, 𑀧𑀜𑁆𑀘 𑀤𑀼𑀩𑁆𑀩𑀮𑀪𑁄𑀚𑀓𑀸 𑀯𑀺𑀬 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺; 𑀭𑀸𑀚𑀸 𑀯𑀺𑀬 𑀚𑀯𑀦𑀁, 𑀤𑀼𑀩𑁆𑀩𑀮𑀪𑁄𑀚𑀓𑀸𑀦𑀁 𑀧𑀭𑀺𑀢𑁆𑀢𑀓𑀆𑀬𑀧𑀸𑀧𑀼𑀡𑀦𑀁 𑀯𑀺𑀬 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀭𑀽𑀧𑀤𑀲𑁆𑀲𑀦𑀸𑀤𑀺𑀫𑀢𑁆𑀢𑀁, 𑀭𑀚𑁆𑀚𑀦𑀸𑀤𑀺 𑀧𑀦 𑀏𑀢𑁂𑀲𑀼 𑀦𑀢𑁆𑀣𑀺. 𑀭𑀜𑁆𑀜𑁄 𑀫𑀳𑀸𑀩𑀮𑀺𑀕𑁆𑀕𑀳𑀡𑀁 𑀯𑀺𑀬 𑀢𑁂𑀲𑀼 𑀤𑁆𑀯𑀸𑀭𑁂𑀲𑀼 𑀚𑀯𑀦𑀲𑁆𑀲 𑀭𑀚𑁆𑀚𑀦𑀸𑀤𑀻𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀏𑀯𑀫𑁂𑀢𑁆𑀣 𑀫𑀦𑁄𑀢𑀺 𑀓𑀼𑀲𑀮𑀸𑀓𑀼𑀲𑀮𑀚𑀯𑀦𑀁 𑀯𑀼𑀢𑁆𑀢𑀁.

𑀲𑀢𑀺 𑀧𑀝𑀺𑀲𑀭𑀡𑀦𑁆𑀢𑀺 𑀫𑀕𑁆𑀕𑀲𑀢𑀺 𑀧𑀝𑀺𑀲𑀭𑀡𑀁. 𑀚𑀯𑀦𑀫𑀦𑁄 𑀳𑀺 𑀫𑀕𑁆𑀕𑀲𑀢𑀺𑀁 𑀧𑀝𑀺𑀲𑀭𑀢𑀺. 𑀯𑀺𑀫𑀼𑀢𑁆𑀢𑀻𑀢𑀺 𑀨𑀮𑀯𑀺𑀫𑀼𑀢𑁆𑀢𑀺. 𑀧𑀝𑀺𑀲𑀭𑀡𑀦𑁆𑀢𑀺 𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀦𑀺𑀩𑁆𑀩𑀸𑀦𑀁 𑀧𑀝𑀺𑀲𑀭𑀡𑀁. 𑀢𑀜𑁆𑀳𑀺 𑀲𑀸 𑀧𑀝𑀺𑀲𑀭𑀢𑀺. 𑀦𑀸𑀲𑀓𑁆𑀔𑀺 𑀧𑀜𑁆𑀳𑀲𑁆𑀲 𑀧𑀭𑀺𑀬𑀦𑁆𑀢𑀁 𑀕𑀳𑁂𑀢𑀼𑀦𑁆𑀢𑀺 𑀧𑀜𑁆𑀳𑀲𑁆𑀲 𑀧𑀭𑀺𑀘𑁆𑀙𑁂𑀤𑀁 𑀧𑀫𑀸𑀡𑀁 𑀕𑀳𑁂𑀢𑀼𑀁 𑀦𑀸𑀲𑀓𑁆𑀔𑀺, 𑀅𑀧𑁆𑀧𑀝𑀺𑀲𑀭𑀡𑀁 𑀥𑀫𑁆𑀫𑀁 ‘‘𑀲𑀧𑁆𑀧𑀝𑀺𑀲𑀭𑀡’’𑀦𑁆𑀢𑀺 𑀧𑀼𑀘𑁆𑀙𑀺. 𑀦𑀺𑀩𑁆𑀩𑀸𑀦𑀁 𑀦𑀸𑀫𑁂𑀢𑀁 𑀅𑀧𑁆𑀧𑀝𑀺𑀲𑀭𑀡𑀁, 𑀦 𑀓𑀺𑀜𑁆𑀘𑀺 𑀧𑀝𑀺𑀲𑀭𑀢𑀺. 𑀦𑀺𑀩𑁆𑀩𑀸𑀦𑁄𑀕𑀥𑀦𑁆𑀢𑀺 𑀦𑀺𑀩𑁆𑀩𑀸𑀦𑀩𑁆𑀪𑀦𑁆𑀢𑀭𑀁 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑀯𑀺𑀝𑁆𑀞𑀁. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁. 𑀦𑀺𑀩𑁆𑀩𑀸𑀦𑀧𑀭𑀸𑀬𑀡𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀧𑀭𑀁 𑀅𑀬𑀦𑀫𑀲𑁆𑀲 𑀧𑀭𑀸 𑀕𑀢𑀺, 𑀦 𑀢𑀢𑁄 𑀧𑀭𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀁 𑀅𑀯𑀲𑀸𑀦𑀁 𑀅𑀲𑁆𑀲𑀸𑀢𑀺 𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦𑀁.

𑀫𑀽𑀮𑀚𑀸𑀢𑀸 𑀧𑀢𑀺𑀝𑁆𑀞𑀺𑀢𑀸𑀢𑀺 𑀫𑀕𑁆𑀕𑁂𑀦 𑀆𑀕𑀢𑀲𑀤𑁆𑀥𑀸 𑀯𑀼𑀘𑁆𑀘𑀢𑀺. 𑀇𑀫𑀫𑁆𑀳𑀺 𑀘𑁂, 𑀪𑀺𑀓𑁆𑀔𑀯𑁂, 𑀲𑀫𑀬𑁂𑀢𑀺 𑀓𑀺𑀁 𑀲𑀦𑁆𑀥𑀸𑀬𑀸𑀳? 𑀛𑀸𑀦𑀅𑀦𑀸𑀕𑀸𑀫𑀺𑀢𑀁. 𑀢𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀞𑀫𑀫𑀕𑁆𑀕𑁂𑀦 𑀧𑀜𑁆𑀘 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀧𑀳𑀻𑀦𑀸𑀦𑀺, 𑀧𑀞𑀫𑀚𑁆𑀛𑀸𑀦𑁂𑀦 𑀧𑀜𑁆𑀘 𑀦𑀻𑀯𑀭𑀡𑀸𑀦𑀻𑀢𑀺 𑀛𑀸𑀦𑀅𑀦𑀸𑀕𑀸𑀫𑀺𑀝𑁆𑀞𑀸𑀦𑁂 𑀞𑀺𑀢𑁄. 𑀲𑁄 𑀅𑀧𑀭𑀺𑀳𑀻𑀦𑀚𑁆𑀛𑀸𑀦𑁄 𑀓𑀸𑀮𑀁 𑀓𑀢𑁆𑀯𑀸 𑀢𑀢𑁆𑀣𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑁂𑀬𑁆𑀬. 𑀲𑀘𑁂 𑀧𑀦𑀲𑁆𑀲 𑀧𑀼𑀢𑁆𑀢𑀤𑀸𑀭𑀁 𑀅𑀦𑀼𑀲𑀸𑀲𑀦𑁆𑀢𑀲𑁆𑀲 𑀓𑀫𑁆𑀫𑀦𑁆𑀢𑁂 𑀯𑀺𑀘𑀸𑀭𑁂𑀦𑁆𑀢𑀲𑁆𑀲 𑀛𑀸𑀦𑀁 𑀦𑀲𑁆𑀲𑀢𑀺, 𑀦𑀝𑁆𑀞𑁂 𑀛𑀸𑀦𑁂 𑀕𑀢𑀺 𑀅𑀦𑀺𑀩𑀤𑁆𑀥𑀸 𑀳𑁄𑀢𑀺, 𑀅𑀦𑀝𑁆𑀞𑁂 𑀧𑀦 𑀦𑀺𑀩𑀤𑁆𑀥𑀸𑀢𑀺 𑀇𑀫𑀁 𑀛𑀸𑀦𑀅𑀦𑀸𑀕𑀸𑀫𑀺𑀢𑀁 𑀲𑀦𑁆𑀥𑀸𑀬 𑀏𑀯𑀫𑀸𑀳.

𑁩. 𑀲𑀸𑀓𑁂𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧𑁩. 𑀢𑀢𑀺𑀬𑁂 𑀅𑀜𑁆𑀚𑀦𑀯𑀦𑁂𑀢𑀺 𑀅𑀜𑁆𑀚𑀦𑀯𑀡𑁆𑀡𑀧𑀼𑀧𑁆𑀨𑀸𑀦𑀁 𑀭𑀼𑀓𑁆𑀔𑀸𑀦𑀁 𑀭𑁄𑀧𑀺𑀢𑀯𑀦𑁂. 𑀬𑀁, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀢𑀁 𑀲𑀤𑁆𑀥𑀸𑀩𑀮𑀦𑁆𑀢𑀺 𑀢𑀜𑁆𑀳𑀺 𑀅𑀥𑀺𑀫𑁄𑀓𑁆𑀔𑀮𑀓𑁆𑀔𑀡𑁂 𑀇𑀦𑁆𑀤𑀝𑁆𑀞𑁂𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀅𑀲𑁆𑀲𑀤𑁆𑀥𑀺𑀬𑁂 𑀅𑀓𑀫𑁆𑀧𑀦𑁂𑀦 𑀲𑀤𑁆𑀥𑀸𑀩𑀮𑀁. 𑀇𑀢𑀭𑁂𑀲𑀁 𑀧𑀕𑁆𑀕𑀳𑀉𑀧𑀝𑁆𑀞𑀸𑀦𑀅𑀯𑀺𑀓𑁆𑀔𑁂𑀧𑀧𑀚𑀸𑀦𑀦𑀮𑀓𑁆𑀔𑀡𑁂𑀲𑀼 𑀇𑀦𑁆𑀤𑀝𑁆𑀞𑁂𑀦 𑀇𑀦𑁆𑀤𑁆𑀭𑀺𑀬𑀪𑀸𑀯𑁄, 𑀓𑁄𑀲𑀚𑁆𑀚𑀫𑀼𑀝𑁆𑀞𑀲𑀘𑁆𑀘𑀯𑀺𑀓𑁆𑀔𑁂𑀧𑀸𑀯𑀺𑀚𑁆𑀚𑀸𑀲𑀼 𑀅𑀓𑀫𑁆𑀧𑀦𑁂𑀦 𑀩𑀮𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀫𑁂𑀯 𑀔𑁄𑀢𑀺 𑀢𑀲𑁆𑀲𑀸 𑀦𑀤𑀺𑀬𑀸 𑀏𑀓𑀲𑁄𑀢𑀁 𑀯𑀺𑀬 𑀲𑀤𑁆𑀥𑀸𑀯𑀻𑀭𑀺𑀬𑀲𑀢𑀺𑀲𑀫𑀸𑀥𑀺𑀧𑀜𑁆𑀜𑀸𑀯𑀲𑁂𑀦 𑀏𑀢𑁂𑀲𑀁 𑀦𑀺𑀦𑁆𑀦𑀸𑀦𑀸𑀓𑀭𑀡𑀁 𑀯𑁂𑀤𑀺𑀢𑀩𑁆𑀩𑀁, 𑀤𑁆𑀯𑁂 𑀲𑁄𑀢𑀸𑀦𑀺 𑀯𑀺𑀬 𑀇𑀦𑁆𑀤𑀝𑁆𑀞𑀅𑀓𑀫𑁆𑀧𑀦𑀝𑁆𑀞𑁂𑀳𑀺 𑀇𑀦𑁆𑀤𑁆𑀭𑀺𑀬𑀩𑀮𑀯𑀲𑁂𑀦 𑀦𑀸𑀦𑀸𑀓𑀭𑀡𑀁 𑀯𑁂𑀤𑀺𑀢𑀩𑁆𑀩𑀁.

𑁪. 𑀧𑀼𑀩𑁆𑀩𑀓𑁄𑀝𑁆𑀞𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧𑁪. 𑀘𑀢𑀼𑀢𑁆𑀣𑁂 𑀅𑀫𑀢𑁄𑀕𑀥𑀦𑁆𑀢𑀺 𑀅𑀫𑀢𑀩𑁆𑀪𑀦𑁆𑀢𑀭𑀁. 𑀅𑀫𑀢𑀧𑀭𑀸𑀬𑀡𑀦𑁆𑀢𑀺 𑀅𑀫𑀢𑀦𑀺𑀩𑁆𑀩𑀢𑁆𑀢𑀺𑀓𑀁. 𑀅𑀫𑀢𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀅𑀫𑀢𑀦𑀺𑀝𑁆𑀞𑀁. 𑀲𑀸𑀥𑀼 𑀲𑀸𑀥𑀽𑀢𑀺 𑀣𑁂𑀭𑀲𑁆𑀲 𑀩𑁆𑀬𑀸𑀓𑀭𑀡𑀁 𑀧𑀲𑀁𑀲𑀦𑁆𑀢𑁄 𑀲𑀸𑀥𑀼𑀓𑀸𑀭𑀁 𑀤𑁂𑀢𑀺.

𑁫. 𑀧𑀞𑀫𑀧𑀼𑀩𑁆𑀩𑀸𑀭𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁧𑁫. 𑀧𑀜𑁆𑀘𑀫𑁂 𑀢𑀤𑀦𑁆𑀯𑀬𑀸𑀢𑀺 𑀢𑀁 𑀅𑀦𑀼𑀕𑀘𑁆𑀙𑀫𑀸𑀦𑀸, 𑀅𑀦𑀼𑀯𑀢𑁆𑀢𑀫𑀸𑀦𑀸𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑀓𑁄𑀝𑁆𑀞𑀓𑀁 𑀆𑀤𑀺𑀁 𑀓𑀢𑁆𑀯𑀸 𑀧𑀝𑀺𑀧𑀸𑀝𑀺𑀬𑀸 𑀙𑀲𑀼 𑀲𑀼𑀢𑁆𑀢𑁂𑀲𑀼 𑀨𑀮𑀺𑀦𑁆𑀤𑁆𑀭𑀺𑀬𑀸𑀦𑁂𑀯 𑀓𑀣𑀺𑀢𑀸𑀦𑀺.

𑁧𑁦. 𑀆𑀧𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨𑁦. 𑀤𑀲𑀫𑁂 𑀇𑀫𑁂 𑀔𑁄 𑀢𑁂 𑀥𑀫𑁆𑀫𑀸𑀢𑀺 𑀉𑀧𑀭𑀺 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀢𑀬𑁄 𑀫𑀕𑁆𑀕𑀸. 𑀬𑁂 𑀫𑁂 𑀧𑀼𑀩𑁆𑀩𑁂 𑀲𑀼𑀢𑀸𑀯 𑀅𑀳𑁂𑀲𑀼𑀦𑁆𑀢𑀺 𑀬𑁂 𑀥𑀫𑁆𑀫𑀸 𑀫𑀬𑀸 𑀧𑀼𑀩𑁆𑀩𑁂 ‘‘𑀅𑀭𑀳𑀢𑁆𑀢𑀨𑀮𑀺𑀦𑁆𑀤𑁆𑀭𑀺𑀬𑀁 𑀦𑀸𑀫 𑀅𑀢𑁆𑀣𑀻’’𑀢𑀺 𑀓𑀣𑁂𑀦𑁆𑀢𑀸𑀦𑀁𑀬𑁂𑀯 𑀲𑀼𑀢𑀸 𑀅𑀳𑁂𑀲𑀼𑀁. 𑀓𑀸𑀬𑁂𑀦 𑀘 𑀨𑀼𑀲𑀺𑀢𑁆𑀯𑀸𑀢𑀺 𑀦𑀸𑀫𑀓𑀸𑀬𑁂𑀦 𑀘 𑀨𑀼𑀲𑀺𑀢𑁆𑀯𑀸 𑀧𑀝𑀺𑀮𑀪𑀺𑀢𑁆𑀯𑀸. 𑀧𑀜𑁆𑀜𑀸𑀬 𑀘 𑀅𑀢𑀺𑀯𑀺𑀚𑁆𑀛 𑀧𑀲𑁆𑀲𑀸𑀫𑀻𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀧𑀜𑁆𑀜𑀸𑀬 𑀘 𑀅𑀢𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀲𑁆𑀲𑀸𑀫𑀺. 𑀬𑀸 𑀳𑀺𑀲𑁆𑀲, 𑀪𑀦𑁆𑀢𑁂, 𑀲𑀤𑁆𑀥𑀸𑀢𑀺 𑀅𑀬𑀁 𑀓𑀢𑀭𑀲𑀤𑁆𑀥𑀸? 𑀘𑀢𑀽𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸 𑀲𑀤𑁆𑀥𑀸 𑀳𑁂𑀝𑁆𑀞𑀸 𑀓𑀣𑀺𑀢𑀸𑀯, 𑀅𑀬𑀁 𑀧𑀦 𑀧𑀘𑁆𑀘𑀯𑁂𑀓𑁆𑀔𑀡𑀲𑀤𑁆𑀥𑀸. 𑀲𑀫𑁆𑀧𑀬𑀼𑀢𑁆𑀢𑀲𑀤𑁆𑀥𑀸 𑀳𑀺 𑀫𑀺𑀲𑁆𑀲𑀓𑀸, 𑀧𑀘𑁆𑀘𑀯𑁂𑀓𑁆𑀔𑀡𑀲𑀤𑁆𑀥𑀸 𑀮𑁄𑀓𑀺𑀬𑀸𑀯. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀚𑀭𑀸𑀯𑀕𑁆𑀕𑁄 𑀧𑀜𑁆𑀘𑀫𑁄.

𑁬. 𑀲𑀽𑀓𑀭𑀔𑀢𑀯𑀕𑁆𑀕𑁄

𑁧. 𑀲𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨𑁧. 𑀙𑀝𑁆𑀞𑀯𑀕𑁆𑀕𑀲𑁆𑀲 𑀧𑀞𑀫𑁂 𑀲𑀽𑀭𑁂𑀦𑀸𑀢𑀺 𑀲𑀽𑀭𑀪𑀸𑀯𑁂𑀦. 𑀩𑁄𑀥𑀸𑀬𑀸𑀢𑀺 𑀩𑀼𑀚𑁆𑀛𑀦𑀢𑁆𑀣𑀸𑀬.

𑁨. 𑀫𑀮𑁆𑀮𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨𑁨. 𑀤𑀼𑀢𑀺𑀬𑁂 𑀫𑀮𑁆𑀮𑁂𑀲𑀽𑀢𑀺 𑀏𑀯𑀁𑀦𑀸𑀫𑀓𑁂 𑀚𑀦𑀧𑀤𑁂. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀘𑀢𑁆𑀢𑀸𑀭𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀫𑀺𑀲𑁆𑀲𑀓𑀸𑀦𑀺, 𑀅𑀭𑀺𑀬𑀜𑀸𑀡𑀁 𑀮𑁄𑀓𑀼𑀢𑁆𑀢𑀭𑀁. 𑀢𑀫𑁆𑀧𑀺 𑀧𑀦 𑀘𑀢𑀼𑀓𑁆𑀓𑀺𑀦𑁆𑀤𑁆𑀭𑀺𑀬𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀫𑀺𑀲𑁆𑀲𑀓𑀦𑁆𑀢𑀺 𑀪𑀸𑀚𑁂𑀢𑀼𑀁 𑀯𑀝𑁆𑀝𑀢𑀺.

𑁩. 𑀲𑁂𑀔𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨𑁩. 𑀢𑀢𑀺𑀬𑁂 𑀦 𑀳𑁂𑀯 𑀔𑁄 𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀦 𑀦𑀸𑀫𑀓𑀸𑀬𑁂𑀦 𑀨𑀼𑀲𑀺𑀢𑁆𑀯𑀸 𑀧𑀝𑀺𑀮𑀪𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀨𑀼𑀲𑀺𑀢𑀼𑀁 𑀧𑀝𑀺𑀮𑀪𑀺𑀢𑀼𑀁 𑀦 𑀲𑀓𑁆𑀓𑁄𑀢𑀺. 𑀧𑀜𑁆𑀜𑀸𑀬 𑀘 𑀅𑀢𑀺𑀯𑀺𑀚𑁆𑀛 𑀧𑀲𑁆𑀲𑀢𑀻𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀧𑀜𑁆𑀜𑀸𑀬 𑀧𑀦 ‘‘𑀉𑀧𑀭𑀺 𑀅𑀭𑀳𑀢𑁆𑀢𑀨𑀮𑀺𑀦𑁆𑀤𑁆𑀭𑀺𑀬𑀁 𑀦𑀸𑀫 𑀅𑀢𑁆𑀣𑀻’’𑀢𑀺 𑀧𑀚𑀸𑀦𑀸𑀢𑀺. 𑀅𑀲𑁂𑀔𑀪𑀽𑀫𑀺𑀬𑀁 𑀨𑀼𑀲𑀺𑀢𑁆𑀯𑀸 𑀯𑀺𑀳𑀭𑀢𑀻𑀢𑀺 𑀧𑀝𑀺𑀮𑀪𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀧𑀜𑁆𑀜𑀸𑀬𑀸𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀧𑀜𑁆𑀜𑀸𑀬 ‘‘𑀅𑀭𑀳𑀢𑁆𑀢𑀨𑀮𑀺𑀦𑁆𑀤𑁆𑀭𑀺𑀬𑀁 𑀦𑀸𑀫 𑀅𑀢𑁆𑀣𑀻’’𑀢𑀺 𑀧𑀚𑀸𑀦𑀸𑀢𑀺. 𑀦 𑀓𑀼𑀳𑀺𑀜𑁆𑀘𑀺 𑀓𑀺𑀲𑁆𑀫𑀺𑀜𑁆𑀘𑀻𑀢𑀺 𑀤𑁆𑀯𑁂𑀧𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑁂𑀯, 𑀓𑀺𑀲𑁆𑀫𑀺𑀜𑁆𑀘𑀺 𑀪𑀯𑁂 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺 𑀮𑁄𑀓𑀼𑀢𑁆𑀢𑀭𑀸𑀦𑀺, 𑀙 𑀮𑁄𑀓𑀺𑀓𑀸𑀦𑀺 𑀯𑀝𑁆𑀝𑀦𑀺𑀲𑁆𑀲𑀺𑀢𑀸𑀦𑁂𑀯 𑀓𑀣𑀺𑀢𑀸𑀦𑀺.

𑁪-𑁫. 𑀧𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫𑁨𑁪-𑁫𑁨𑁫. 𑀘𑀢𑀼𑀢𑁆𑀣𑁂 𑀬𑀸𑀦𑀺 𑀓𑀸𑀦𑀺𑀘𑀺 𑀧𑀤𑀸𑀦𑀺 𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑀸𑀦𑀺 𑀓𑀸𑀦𑀺𑀘𑀺 𑀥𑀫𑁆𑀫𑀧𑀤𑀸𑀦𑀺, 𑀬𑁂 𑀓𑁂𑀘𑀺 𑀥𑀫𑁆𑀫𑀓𑁄𑀝𑁆𑀞𑀸𑀲𑀸, 𑀩𑀼𑀚𑁆𑀛𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀧𑀜𑁆𑀘𑀫𑀁 𑀉𑀢𑁆𑀢𑀸𑀦𑀫𑁂𑀯.

𑁬-𑁭. 𑀧𑀢𑀺𑀝𑁆𑀞𑀺𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁫𑁨𑁬-𑁫𑁨𑁭. 𑀙𑀝𑁆𑀞𑁂 𑀘𑀺𑀢𑁆𑀢𑀁 𑀭𑀓𑁆𑀔𑀢𑀺 𑀆𑀲𑀯𑁂𑀲𑀼 𑀘 𑀲𑀸𑀲𑀯𑁂𑀲𑀼 𑀘 𑀥𑀫𑁆𑀫𑁂𑀲𑀽𑀢𑀺 𑀢𑁂𑀪𑀽𑀫𑀓𑀥𑀫𑁆𑀫𑁂 𑀆𑀭𑀩𑁆𑀪 𑀆𑀲𑀯𑀼𑀧𑁆𑀧𑀢𑁆𑀢𑀺𑀁 𑀯𑀸𑀭𑁂𑀦𑁆𑀢𑁄 𑀆𑀲𑀯𑁂𑀲𑀼 𑀘 𑀲𑀸𑀲𑀯𑁂𑀲𑀼 𑀘 𑀥𑀫𑁆𑀫𑁂𑀲𑀼 𑀘𑀺𑀢𑁆𑀢𑀁 𑀭𑀓𑁆𑀔𑀢𑀺 𑀦𑀸𑀫. 𑀲𑀢𑁆𑀢𑀫𑀁 𑀉𑀢𑁆𑀢𑀸𑀦𑀫𑁂𑀯.

𑁮. 𑀲𑀽𑀓𑀭𑀔𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁫𑁨𑁮. 𑀅𑀝𑁆𑀞𑀫𑁂 𑀲𑀽𑀓𑀭𑀔𑀢𑀸𑀬𑀦𑁆𑀢𑀺 𑀲𑀽𑀓𑀭𑀔𑀢𑀮𑁂𑀡𑁂. 𑀓𑀲𑁆𑀲𑀧𑀩𑀼𑀤𑁆𑀥𑀓𑀸𑀮𑁂 𑀓𑀺𑀭 𑀢𑀁 𑀮𑁂𑀡𑀁 𑀏𑀓𑀲𑁆𑀫𑀺𑀁 𑀩𑀼𑀤𑁆𑀥𑀦𑁆𑀢𑀭𑁂 𑀧𑀣𑀯𑀺𑀬𑀸 𑀯𑀟𑁆𑀠𑀫𑀸𑀦𑀸𑀬 𑀅𑀦𑁆𑀢𑁄𑀪𑀽𑀫𑀺𑀕𑀢𑀁 𑀚𑀸𑀢𑀁. 𑀅𑀣𑁂𑀓𑀤𑀺𑀯𑀲𑀁 𑀏𑀓𑁄 𑀲𑀽𑀓𑀭𑁄 𑀢𑀲𑁆𑀲 𑀙𑀤𑀦𑀧𑀭𑀺𑀬𑀦𑁆𑀢𑀲𑀫𑀻𑀧𑁂 𑀧𑀁𑀲𑀼𑀁 𑀔𑀡𑀺. 𑀤𑁂𑀯𑁂 𑀯𑀼𑀝𑁆𑀞𑁂 𑀧𑀁𑀲𑀼 𑀥𑁄𑀢𑀸, 𑀙𑀤𑀦𑀧𑀭𑀺𑀬𑀦𑁆𑀢𑁄 𑀧𑀸𑀓𑀝𑁄 𑀅𑀳𑁄𑀲𑀺. 𑀏𑀓𑁄 𑀯𑀦𑀘𑀭𑀓𑁄 𑀤𑀺𑀲𑁆𑀯𑀸 ‘‘𑀧𑀼𑀩𑁆𑀩𑁂 𑀲𑀻𑀮𑀯𑀦𑁆𑀢𑁂𑀳𑀺 𑀧𑀭𑀺𑀪𑀼𑀢𑁆𑀢𑀝𑁆𑀞𑀸𑀦𑁂𑀦 𑀪𑀯𑀺𑀢𑀩𑁆𑀩𑀁, 𑀧𑀝𑀺𑀚𑀕𑁆𑀕𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀲𑀫𑀦𑁆𑀢𑀢𑁄 𑀧𑀁𑀲𑀼𑀁 𑀅𑀧𑀦𑁂𑀢𑁆𑀯𑀸 𑀮𑁂𑀡𑀁 𑀲𑁄𑀥𑁂𑀢𑁆𑀯𑀸 𑀓𑀼𑀝𑀺𑀧𑀭𑀺𑀓𑁆𑀔𑁂𑀧𑀁 𑀓𑀢𑁆𑀯𑀸 𑀤𑁆𑀯𑀸𑀭𑀯𑀸𑀢𑀧𑀸𑀦𑀁 𑀬𑁄𑀚𑁂𑀢𑁆𑀯𑀸 𑀲𑀼𑀧𑀭𑀺𑀦𑀺𑀝𑁆𑀞𑀺𑀢𑀲𑀼𑀥𑀸𑀓𑀫𑁆𑀫𑀘𑀺𑀢𑁆𑀢𑀓𑀫𑁆𑀫𑀁 𑀭𑀚𑀢𑀧𑀝𑁆𑀝𑀲𑀤𑀺𑀲𑀸𑀬 𑀯𑀸𑀮𑀺𑀓𑀸𑀬 𑀲𑀦𑁆𑀣𑀭𑀺𑀢𑀁 𑀧𑀭𑀺𑀯𑁂𑀡𑀁 𑀓𑀢𑁆𑀯𑀸 𑀫𑀜𑁆𑀘𑀧𑀻𑀞𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀪𑀕𑀯𑀢𑁄 𑀯𑀲𑀦𑀢𑁆𑀣𑀸𑀬 𑀅𑀤𑀸𑀲𑀺, 𑀮𑁂𑀡𑀁 𑀕𑀫𑁆𑀪𑀻𑀭𑀁 𑀅𑀳𑁄𑀲𑀺 𑀑𑀢𑀭𑀺𑀢𑁆𑀯𑀸 𑀆𑀭𑀼𑀳𑀺𑀢𑀩𑁆𑀩𑀁. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀁, 𑀧𑀭𑀫𑀦𑀺𑀧𑀘𑁆𑀘𑀓𑀸𑀭𑀻 𑀳𑀼𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁄 𑀧𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀦𑁆𑀢𑀺 𑀅𑀭𑀳𑀢𑁆𑀢𑀁. 𑀲𑀧𑁆𑀧𑀢𑀺𑀲𑁆𑀲𑁄𑀢𑀺 𑀲𑀚𑁂𑀝𑁆𑀞𑀓𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀲𑀽𑀓𑀭𑀔𑀢𑀯𑀕𑁆𑀕𑁄 𑀙𑀝𑁆𑀞𑁄.

𑁭. 𑀩𑁄𑀥𑀺𑀧𑀓𑁆𑀔𑀺𑀬𑀯𑀕𑁆𑀕𑁄

𑁫𑁩𑁧-𑁬𑁫𑁦. 𑀲𑀢𑁆𑀢𑀫𑀯𑀕𑁆𑀕𑁂 𑀲𑀢𑁆𑀢 𑀨𑀮𑀸𑀦𑀺 𑀧𑀼𑀩𑁆𑀩𑀪𑀸𑀕𑀸𑀦𑀺, 𑀢𑁂𑀲𑀁 𑀳𑁂𑀝𑁆𑀞𑀸 𑀤𑁆𑀯𑁂 𑀨𑀮𑀸𑀦𑀺 𑀆𑀤𑀺𑀁 𑀓𑀢𑁆𑀯𑀸 𑀫𑀺𑀲𑁆𑀲𑀓𑀸𑀦𑀺. 𑀲𑁂𑀲𑀫𑁂𑀢𑁆𑀣 𑀇𑀢𑁄 𑀧𑀭𑀜𑁆𑀘 𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀇𑀦𑁆𑀤𑁆𑀭𑀺𑀬𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀫𑁆𑀫𑀧𑁆𑀧𑀥𑀸𑀦𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸

𑁬𑁫𑁧-𑁭𑁦𑁪. 𑀲𑀫𑁆𑀫𑀧𑁆𑀧𑀥𑀸𑀦𑀲𑀁𑀬𑀼𑀢𑁆𑀢𑁂 𑀲𑀓𑀮𑁂𑀧𑀺 𑀧𑀼𑀩𑁆𑀩𑀪𑀸𑀕𑀯𑀺𑀧𑀲𑁆𑀲𑀦𑀸𑀯 𑀓𑀣𑀺𑀢𑀸𑀢𑀺.

𑀲𑀫𑁆𑀫𑀧𑁆𑀧𑀥𑀸𑀦𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀩𑀮𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸

𑁭𑁦𑁫-𑁮𑁧𑁨. 𑀩𑀮𑀲𑀁𑀬𑀼𑀢𑁆𑀢𑁂 𑀩𑀮𑀸𑀦𑀺 𑀫𑀺𑀲𑁆𑀲𑀓𑀸𑀦𑁂𑀯 𑀓𑀣𑀺𑀢𑀸𑀦𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀩𑀮𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀇𑀤𑁆𑀥𑀺𑀧𑀸𑀤𑀲𑀁𑀬𑀼𑀢𑁆𑀢𑀁

𑁧. 𑀘𑀸𑀧𑀸𑀮𑀯𑀕𑁆𑀕𑁄

𑁧. 𑀅𑀧𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁧𑁩. 𑀇𑀤𑁆𑀥𑀺𑀧𑀸𑀤𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀙𑀦𑁆𑀤𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑁄 𑀲𑀫𑀸𑀥𑀺 𑀙𑀦𑁆𑀤𑀲𑀫𑀸𑀥𑀺. 𑀧𑀥𑀸𑀦𑀪𑀽𑀢𑀸 𑀲𑀗𑁆𑀔𑀸𑀭𑀸 𑀧𑀥𑀸𑀦𑀲𑀗𑁆𑀔𑀸𑀭𑀸. 𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀢𑁂𑀳𑀺 𑀥𑀫𑁆𑀫𑁂𑀳𑀺 𑀉𑀧𑁂𑀢𑀁. 𑀇𑀤𑁆𑀥𑀺𑀬𑀸 𑀧𑀸𑀤𑀁, 𑀇𑀤𑁆𑀥𑀺𑀪𑀽𑀢𑀁 𑀯𑀸 𑀧𑀸𑀤𑀦𑁆𑀢𑀺 𑀇𑀤𑁆𑀥𑀺𑀧𑀸𑀤𑀁. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀇𑀤𑁆𑀥𑀺𑀧𑀸𑀤𑀯𑀺𑀪𑀗𑁆𑀕𑁂 (𑀯𑀺𑀪. 𑁪𑁩𑁧 𑀆𑀤𑀬𑁄) 𑀆𑀕𑀢𑁄𑀯. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁩.𑁬𑁯 𑀆𑀤𑀬𑁄) 𑀧𑀦𑀲𑁆𑀲 𑀅𑀢𑁆𑀣𑁄 𑀤𑀻𑀧𑀺𑀢𑁄. 𑀢𑀣𑀸 𑀫𑀕𑁆𑀕𑀩𑁄𑀚𑁆𑀛𑀗𑁆𑀕𑀲𑀢𑀺𑀧𑀝𑁆𑀞𑀸𑀦𑀲𑀁𑀬𑀼𑀢𑁆𑀢𑁂𑀲𑀼 𑀘𑁂𑀯 𑀇𑀥 𑀘 𑀏𑀓𑀧𑀭𑀺𑀘𑁆𑀙𑁂𑀤𑁄𑀯.

𑁫. 𑀇𑀤𑁆𑀥𑀺𑀧𑀤𑁂𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁧𑁭. 𑀧𑀜𑁆𑀘𑀫𑁂 𑀇𑀤𑁆𑀥𑀺𑀧𑀤𑁂𑀲𑀦𑁆𑀢𑀺 𑀢𑀬𑁄 𑀘 𑀫𑀕𑁆𑀕𑁂 𑀢𑀻𑀡𑀺 𑀘 𑀨𑀮𑀸𑀦𑀺.

𑁬. 𑀲𑀫𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁧𑁮. 𑀙𑀝𑁆𑀞𑁂 𑀲𑀫𑀢𑁆𑀢𑀁 𑀇𑀤𑁆𑀥𑀺𑀦𑁆𑀢𑀺 𑀅𑀭𑀳𑀢𑁆𑀢𑀨𑀮𑀫𑁂𑀯. 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀧𑀦 𑀦𑀯𑀲𑀼𑀧𑀺 𑀲𑀼𑀢𑁆𑀢𑁂𑀲𑀼 𑀯𑀺𑀯𑀝𑁆𑀝𑀧𑀸𑀤𑀓𑀸 𑀏𑀯 𑀇𑀤𑁆𑀥𑀺𑀧𑀸𑀤𑀸 𑀓𑀣𑀺𑀢𑀸.

𑁧𑁦. 𑀘𑁂𑀢𑀺𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁨𑁨. 𑀤𑀲𑀫𑁂 𑀦𑀺𑀲𑀻𑀤𑀦𑀦𑁆𑀢𑀺 𑀘𑀫𑁆𑀫𑀔𑀡𑁆𑀟𑀁 𑀅𑀥𑀺𑀧𑁆𑀧𑁂𑀢𑀁. 𑀉𑀤𑁂𑀦𑀁 𑀘𑁂𑀢𑀺𑀬𑀦𑁆𑀢𑀺 𑀉𑀤𑁂𑀦𑀬𑀓𑁆𑀔𑀲𑁆𑀲 𑀘𑁂𑀢𑀺𑀬𑀝𑁆𑀞𑀸𑀦𑁂 𑀓𑀢𑀯𑀺𑀳𑀸𑀭𑁄 𑀯𑀼𑀘𑁆𑀘𑀢𑀺. 𑀕𑁄𑀢𑀫𑀓𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀪𑀸𑀯𑀺𑀢𑀸𑀢𑀺 𑀯𑀟𑁆𑀠𑀺𑀢𑀸. 𑀩𑀳𑀼𑀮𑀻𑀓𑀢𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀢𑀸. 𑀬𑀸𑀦𑀻𑀓𑀢𑀸𑀢𑀺 𑀬𑀼𑀢𑁆𑀢𑀬𑀸𑀦𑀁 𑀯𑀺𑀬 𑀓𑀢𑀸. 𑀯𑀢𑁆𑀣𑀼𑀓𑀢𑀸𑀢𑀺 𑀧𑀢𑀺𑀝𑁆𑀞𑀸𑀦𑀝𑁆𑀞𑁂𑀦 𑀯𑀢𑁆𑀣𑀼 𑀯𑀺𑀬 𑀓𑀢𑀸. 𑀅𑀦𑀼𑀝𑁆𑀞𑀺𑀢𑀸𑀢𑀺 𑀅𑀥𑀺𑀝𑁆𑀞𑀺𑀢𑀸. 𑀧𑀭𑀺𑀘𑀺𑀢𑀸𑀢𑀺 𑀲𑀫𑀦𑁆𑀢𑀢𑁄 𑀘𑀺𑀢𑀸 𑀲𑀼𑀯𑀟𑁆𑀠𑀺𑀢𑀸. 𑀲𑀼𑀲𑀫𑀸𑀭𑀤𑁆𑀥𑀸𑀢𑀺 𑀲𑀼𑀝𑁆𑀞𑀼 𑀲𑀫𑀸𑀭𑀤𑁆𑀥𑀸.

𑀇𑀢𑀺 𑀅𑀦𑀺𑀬𑀫𑁂𑀦 𑀓𑀣𑁂𑀢𑁆𑀯𑀸 𑀧𑀼𑀦 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀢𑀣𑀸𑀕𑀢𑀲𑁆𑀲 𑀔𑁄𑀢𑀺𑀆𑀤𑀺𑀫𑀸𑀳. 𑀏𑀢𑁆𑀣 𑀘 𑀓𑀧𑁆𑀧𑀦𑁆𑀢𑀺 𑀆𑀬𑀼𑀓𑀧𑁆𑀧𑀁, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀓𑀸𑀮𑁂 𑀬𑀁 𑀫𑀦𑀼𑀲𑁆𑀲𑀸𑀦𑀁 𑀆𑀬𑀼𑀧𑁆𑀧𑀫𑀸𑀡𑀁, 𑀢𑀁 𑀧𑀭𑀺𑀧𑀼𑀡𑁆𑀡𑀁 𑀓𑀭𑁄𑀦𑁆𑀢𑁄 𑀢𑀺𑀝𑁆𑀞𑁂𑀬𑁆𑀬. 𑀓𑀧𑁆𑀧𑀸𑀯𑀲𑁂𑀲𑀁 𑀯𑀸𑀢𑀺 ‘‘𑀅𑀧𑁆𑀧𑀁 𑀯𑀸 𑀪𑀺𑀬𑁆𑀬𑁄’’𑀢𑀺 𑀯𑀼𑀢𑁆𑀢𑀯𑀲𑁆𑀲𑀲𑀢𑀢𑁄 𑀅𑀢𑀺𑀭𑁂𑀓𑀁 𑀯𑀸. 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦𑀸𑀳 ‘‘𑀩𑀼𑀤𑁆𑀥𑀸𑀦𑀁 𑀅𑀝𑁆𑀞𑀸𑀦𑁂 𑀕𑀚𑁆𑀚𑀺𑀢𑀁 𑀦𑀸𑀫 𑀦𑀢𑁆𑀣𑀺. 𑀬𑀣𑁂𑀯 𑀳𑀺 𑀯𑁂𑀴𑀼𑀯𑀕𑀸𑀫𑀓𑁂 𑀉𑀧𑁆𑀧𑀦𑁆𑀦𑀁 𑀫𑀸𑀭𑀡𑀦𑁆𑀢𑀺𑀓𑀯𑁂𑀤𑀦𑀁 𑀤𑀲 𑀫𑀸𑀲𑁂 𑀯𑀺𑀓𑁆𑀔𑀫𑁆𑀪𑁂𑀲𑀺, 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀢𑀁 𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀤𑀲 𑀤𑀲 𑀫𑀸𑀲𑁂𑀧𑀺 𑀯𑀺𑀓𑁆𑀔𑀫𑁆𑀪𑁂𑀦𑁆𑀢𑁄 𑀇𑀫𑀁 𑀪𑀤𑁆𑀤𑀓𑀧𑁆𑀧𑀫𑁂𑀯 𑀢𑀺𑀝𑁆𑀞𑁂𑀬𑁆𑀬𑀸’’𑀢𑀺.

𑀓𑀲𑁆𑀫𑀸 𑀧𑀦 𑀦 𑀞𑀺𑀢𑁄𑀢𑀺? 𑀉𑀧𑀸𑀤𑀺𑀡𑁆𑀡𑀓𑀲𑀭𑀻𑀭𑀁 𑀦𑀸𑀫 𑀔𑀡𑁆𑀟𑀺𑀘𑁆𑀘𑀸𑀤𑀻𑀳𑀺 𑀅𑀪𑀺𑀪𑀼𑀬𑁆𑀬𑀢𑀺, 𑀩𑀼𑀤𑁆𑀥𑀸 𑀦𑀸𑀫 𑀔𑀡𑁆𑀟𑀺𑀘𑁆𑀘𑀸𑀤𑀺𑀪𑀸𑀯𑀁 𑀅𑀧𑀢𑁆𑀯𑀸𑀯 𑀧𑀜𑁆𑀘𑀫𑁂 𑀆𑀬𑀼𑀓𑁄𑀝𑁆𑀞𑀸𑀲𑁂 𑀩𑀳𑀼𑀚𑀦𑀲𑁆𑀲 𑀧𑀺𑀬𑀫𑀦𑀸𑀧𑀓𑀸𑀮𑁂𑀬𑁂𑀯 𑀧𑀭𑀺𑀦𑀺𑀩𑁆𑀩𑀸𑀬𑀦𑁆𑀢𑀺. 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑁂𑀲𑀼 𑀘 𑀫𑀳𑀸𑀲𑀸𑀯𑀓𑁂𑀲𑀼 𑀧𑀭𑀺𑀦𑀺𑀩𑁆𑀩𑀼𑀢𑁂𑀲𑀼 𑀏𑀓𑀓𑁂𑀦 𑀔𑀸𑀡𑀼𑀓𑁂𑀦 𑀯𑀺𑀬 𑀞𑀸𑀢𑀩𑁆𑀩𑀁 𑀳𑁄𑀢𑀺, 𑀤𑀳𑀭𑀲𑀸𑀫𑀡𑁂𑀭𑀧𑀭𑀺𑀯𑀸𑀭𑀺𑀢𑁂𑀦 𑀯𑀸, 𑀢𑀢𑁄 𑁋 ‘‘𑀅𑀳𑁄 𑀩𑀼𑀤𑁆𑀥𑀸𑀦𑀁 𑀧𑀭𑀺𑀲𑀸’’𑀢𑀺 𑀳𑀻𑀴𑁂𑀢𑀩𑁆𑀩𑀢𑀁 𑀆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀫𑀸 𑀦 𑀞𑀺𑀢𑁄𑀢𑀺. 𑀏𑀯𑀁 𑀯𑀼𑀢𑁆𑀢𑁂𑀧𑀺 𑀲𑁄 𑀧𑀦 𑀦 𑀭𑀼𑀘𑁆𑀘𑀢𑀺, ‘‘𑀆𑀬𑀼𑀓𑀧𑁆𑀧𑁄’’𑀢𑀺 𑀇𑀤𑀫𑁂𑀯 𑀅𑀝𑁆𑀞𑀓𑀣𑀸𑀬𑀁 𑀦𑀺𑀬𑀫𑀺𑀢𑀁.

𑀬𑀣𑀸 𑀢𑀁 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄𑀢𑀺 𑀏𑀢𑁆𑀣 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀬𑀣𑀸 𑀫𑀸𑀭𑁂𑀦 𑀧𑀭𑀺𑀬𑀼𑀝𑁆𑀞𑀺𑀢𑀘𑀺𑀢𑁆𑀢𑁄 𑀅𑀚𑁆𑀛𑁄𑀢𑁆𑀣𑀝𑀘𑀺𑀢𑁆𑀢𑁄 𑀅𑀜𑁆𑀜𑁄𑀧𑀺 𑀓𑁄𑀘𑀺 𑀧𑀼𑀣𑀼𑀚𑁆𑀚𑀦𑁄 𑀧𑀝𑀺𑀯𑀺𑀚𑁆𑀛𑀺𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬, 𑀏𑀯𑀫𑁂𑀯 𑀦𑀸𑀲𑀓𑁆𑀔𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀫𑀸𑀭𑁄 𑀳𑀺 𑀬𑀲𑁆𑀲 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀤𑁆𑀯𑀸𑀤𑀲 𑀯𑀺𑀧𑀮𑁆𑀮𑀸𑀲𑀸 𑀅𑀧𑁆𑀧𑀳𑀻𑀦𑀸, 𑀢𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀼𑀝𑁆𑀞𑀸𑀢𑀺. 𑀣𑁂𑀭𑀲𑁆𑀲 𑀘 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸 𑀅𑀧𑁆𑀧𑀳𑀻𑀦𑀸, 𑀢𑁂𑀦𑀲𑁆𑀲 𑀫𑀸𑀭𑁄 𑀘𑀺𑀢𑁆𑀢𑀁 𑀧𑀭𑀺𑀬𑀼𑀝𑁆𑀞𑀸𑀲𑀺. 𑀲𑁄 𑀧𑀦 𑀘𑀺𑀢𑁆𑀢𑀧𑀭𑀺𑀬𑀼𑀝𑁆𑀞𑀸𑀦𑀁 𑀓𑀭𑁄𑀦𑁆𑀢𑁄 𑀓𑀺𑀁 𑀓𑀭𑁄𑀢𑀻𑀢𑀺? 𑀪𑁂𑀭𑀯𑀁 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸 𑀤𑀲𑁆𑀲𑁂𑀢𑀺, 𑀲𑀤𑁆𑀤𑀸𑀭𑀫𑁆𑀫𑀡𑀁 𑀯𑀸 𑀲𑀸𑀯𑁂𑀢𑀺, 𑀢𑀢𑁄 𑀲𑀢𑁆𑀢𑀸 𑀢𑀁 𑀤𑀺𑀲𑁆𑀯𑀸 𑀯𑀸 𑀲𑀼𑀢𑁆𑀯𑀸 𑀯𑀸 𑀲𑀢𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀯𑀺𑀯𑀝𑀫𑀼𑀔𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀫𑀼𑀔𑁂𑀦 𑀳𑀢𑁆𑀣𑀁 𑀧𑀯𑁂𑀲𑁂𑀢𑁆𑀯𑀸 𑀳𑀤𑀬𑀁 𑀫𑀤𑁆𑀤𑀢𑀺, 𑀢𑁂 𑀯𑀺𑀲𑀜𑁆𑀜𑀻 𑀳𑀼𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀺. 𑀣𑁂𑀭𑀲𑁆𑀲 𑀧𑀦𑁂𑀲 𑀫𑀼𑀔𑁂 𑀳𑀢𑁆𑀣𑀁 𑀧𑀯𑁂𑀲𑁂𑀢𑀼𑀁 𑀓𑀺𑀁 𑀲𑀓𑁆𑀔𑀺𑀲𑁆𑀲𑀢𑀺? 𑀪𑁂𑀭𑀯𑀸𑀭𑀫𑁆𑀫𑀡𑀁 𑀧𑀦 𑀤𑀲𑁆𑀲𑁂𑀢𑀺, 𑀢𑀁 𑀤𑀺𑀲𑁆𑀯𑀸 𑀣𑁂𑀭𑁄 𑀦𑀺𑀫𑀺𑀢𑁆𑀢𑁄𑀪𑀸𑀲𑀁 𑀦 𑀧𑀝𑀺𑀯𑀺𑀚𑁆𑀛𑀺. 𑀚𑀸𑀦𑀦𑁆𑀢𑁄𑀬𑁂𑀯 𑀪𑀕𑀯𑀸 𑀓𑀺𑀫𑀢𑁆𑀣𑀁 𑀬𑀸𑀯𑀢𑀢𑀺𑀬𑀓𑀁 𑀆𑀫𑀦𑁆𑀢𑁂𑀲𑀻𑀢𑀺. 𑀧𑀭𑀢𑁄 ‘‘𑀢𑀺𑀝𑁆𑀞𑀢𑀼, 𑀪𑀦𑁆𑀢𑁂, 𑀪𑀕𑀯𑀸’’𑀢𑀺 𑀬𑀸𑀘𑀺𑀢𑁂 ‘‘𑀢𑀼𑀬𑁆𑀳𑁂𑀯𑁂𑀢𑀁 𑀤𑀼𑀓𑁆𑀓𑀝𑀁, 𑀢𑀼𑀬𑁆𑀳𑁂𑀯𑁂𑀢𑀁 𑀅𑀧𑀭𑀤𑁆𑀥’’𑀦𑁆𑀢𑀺 𑀤𑁄𑀲𑀸𑀭𑁄𑀧𑀦𑁂𑀦 𑀲𑁄𑀓𑀢𑀦𑀼𑀓𑀭𑀡𑀢𑁆𑀣𑀁.

𑀫𑀸𑀭𑁄 𑀧𑀸𑀧𑀺𑀫𑀸𑀢𑀺 𑀏𑀢𑁆𑀣 𑀲𑀢𑁆𑀢𑁂 𑀅𑀦𑀢𑁆𑀣𑁂 𑀦𑀺𑀬𑁄𑀚𑁂𑀦𑁆𑀢𑁄 𑀫𑀸𑀭𑁂𑀢𑀻𑀢𑀺 𑀫𑀸𑀭𑁄. 𑀧𑀸𑀧𑀺𑀫𑀸𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑁄 𑀳𑀺 𑀧𑀸𑀧𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀢𑁆𑀢𑀸 ‘‘𑀧𑀸𑀧𑀺𑀫𑀸’’𑀢𑀺 𑀯𑀼𑀘𑁆𑀘𑀢𑀺. 𑀓𑀡𑁆𑀳𑁄, 𑀅𑀦𑁆𑀢𑀓𑁄, 𑀦𑀫𑀼𑀘𑀺, 𑀧𑀫𑀢𑁆𑀢𑀩𑀦𑁆𑀥𑀽𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫𑀸𑀦𑀺. 𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸𑀢𑀺 𑀅𑀬𑀜𑁆𑀳𑀺 𑀪𑀕𑀯𑀢𑁄 𑀲𑀫𑁆𑀩𑁄𑀥𑀺𑀧𑀢𑁆𑀢𑀺𑀬𑀸 𑀅𑀝𑁆𑀞𑀫𑁂 𑀲𑀢𑁆𑀢𑀸𑀳𑁂 𑀩𑁄𑀥𑀺𑀫𑀡𑁆𑀟𑀁𑀬𑁂𑀯 𑀆𑀕𑀦𑁆𑀢𑁆𑀯𑀸 𑁋 ‘‘𑀪𑀕𑀯𑀸 𑀬𑀤𑀢𑁆𑀣𑀁 𑀢𑀼𑀫𑁆𑀳𑁂𑀳𑀺 𑀧𑀸𑀭𑀫𑀺𑀬𑁄 𑀧𑀽𑀭𑀺𑀢𑀸, 𑀲𑁄 𑀯𑁄 𑀅𑀢𑁆𑀣𑁄 𑀅𑀦𑀼𑀧𑁆𑀧𑀢𑁆𑀢𑁄, 𑀧𑀝𑀺𑀯𑀺𑀤𑁆𑀥𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀓𑀺𑀁 𑀯𑁄 𑀮𑁄𑀓𑀯𑀺𑀘𑀭𑀡𑁂𑀦𑀸’’𑀢𑀺 𑀯𑀢𑁆𑀯𑀸 𑀬𑀣𑀸 𑀅𑀚𑁆𑀚, 𑀏𑀯𑀫𑁂𑀯 𑁋 ‘‘𑀧𑀭𑀺𑀦𑀺𑀩𑁆𑀩𑀸𑀢𑀼 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼, 𑀲𑀼𑀕𑀢𑁄,’’𑀢𑀺 𑀬𑀸𑀘𑀺. 𑀪𑀕𑀯𑀸 𑀘𑀲𑁆𑀲 ‘‘𑀦 𑀢𑀸𑀯𑀸𑀳’’𑀦𑁆𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀺. 𑀢𑀁 𑀲𑀦𑁆𑀥𑀸𑀬 ‘‘𑀪𑀸𑀲𑀺𑀢𑀸 𑀔𑁄 𑀧𑀦𑁂𑀲𑀸, 𑀪𑀦𑁆𑀢𑁂,’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀯𑀺𑀬𑀢𑁆𑀢𑀸𑀢𑀺 𑀫𑀕𑁆𑀕𑀯𑀲𑁂𑀦 𑀩𑁆𑀬𑀢𑁆𑀢𑀸. 𑀢𑀣𑁂𑀯 𑀯𑀺𑀦𑀻𑀢𑀸. 𑀢𑀣𑀸 𑀯𑀺𑀲𑀸𑀭𑀤𑀸. 𑀩𑀳𑀼𑀲𑁆𑀲𑀼𑀢𑀸𑀢𑀺 𑀢𑁂𑀧𑀺𑀝𑀓𑀯𑀲𑁂𑀦 𑀩𑀳𑀼 𑀲𑀼𑀢𑀫𑁂𑀢𑁂𑀲𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸. 𑀢𑀤𑁂𑀯 𑀥𑀫𑁆𑀫𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀫𑁆𑀫𑀥𑀭𑀸. 𑀅𑀣 𑀯𑀸 𑀧𑀭𑀺𑀬𑀢𑁆𑀢𑀺𑀩𑀳𑀼𑀲𑁆𑀲𑀼𑀢𑀸 𑀘𑁂𑀯 𑀧𑀝𑀺𑀯𑁂𑀥𑀩𑀳𑀼𑀲𑁆𑀲𑀼𑀢𑀸 𑀘, 𑀧𑀭𑀺𑀬𑀢𑁆𑀢𑀺𑀧𑀝𑀺𑀯𑁂𑀥𑀥𑀫𑁆𑀫𑀸𑀦𑀁𑀬𑁂𑀯 𑀥𑀸𑀭𑀡𑀢𑁄 𑀥𑀫𑁆𑀫𑀥𑀭𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀦𑁆𑀦𑀸𑀢𑀺 𑀅𑀭𑀺𑀬𑀥𑀫𑁆𑀫𑀲𑁆𑀲 𑀅𑀦𑀼𑀥𑀫𑁆𑀫𑀪𑀽𑀢𑀁 𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑀁 𑀧𑀝𑀺𑀧𑀦𑁆𑀦𑀸. 𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀸𑀢𑀺 𑀅𑀦𑀼𑀘𑁆𑀙𑀯𑀺𑀓𑀧𑀝𑀺𑀧𑀤𑀁 𑀧𑀝𑀺𑀧𑀦𑁆𑀦𑀸. 𑀅𑀦𑀼𑀥𑀫𑁆𑀫𑀘𑀸𑀭𑀺𑀦𑁄𑀢𑀺 𑀅𑀦𑀼𑀥𑀫𑁆𑀫𑀘𑀭𑀡𑀲𑀻𑀮𑀸. 𑀲𑀓𑀁 𑀆𑀘𑀭𑀺𑀬𑀓𑀦𑁆𑀢𑀺 𑀅𑀢𑁆𑀢𑀦𑁄 𑀆𑀘𑀭𑀺𑀬𑀯𑀸𑀤𑀁. 𑀆𑀘𑀺𑀓𑁆𑀔𑀺𑀲𑁆𑀲𑀦𑁆𑀢𑀻𑀢𑀺𑀆𑀤𑀻𑀦𑀺 𑀲𑀩𑁆𑀩𑀸𑀦𑀺 𑀅𑀜𑁆𑀜𑀫𑀜𑁆𑀜𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. 𑀲𑀳𑀥𑀫𑁆𑀫𑁂𑀦𑀸𑀢𑀺 𑀲𑀳𑁂𑀢𑀼𑀓𑁂𑀦 𑀲𑀓𑀸𑀭𑀡𑁂𑀦 𑀯𑀘𑀦𑁂𑀦. 𑀲𑀧𑁆𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀬𑀸𑀯 𑀦𑀺𑀬𑁆𑀬𑀸𑀦𑀺𑀓𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀦𑁆𑀢𑀺.

𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑀺𑀢𑀁 𑀲𑀓𑀮𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁. 𑀇𑀤𑁆𑀥𑀦𑁆𑀢𑀺 𑀲𑀫𑀺𑀤𑁆𑀥𑀁 𑀛𑀸𑀦𑀲𑁆𑀲𑀸𑀤𑀯𑀲𑁂𑀦. 𑀨𑀻𑀢𑀦𑁆𑀢𑀺 𑀯𑀼𑀟𑁆𑀠𑀺𑀧𑀢𑁆𑀢𑀁 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀁 𑀯𑀺𑀬 𑀅𑀪𑀺𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀯𑀲𑁂𑀦. 𑀯𑀺𑀢𑁆𑀣𑀸𑀭𑀺𑀓𑀦𑁆𑀢𑀺 𑀯𑀺𑀢𑁆𑀣𑀢𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂 𑀧𑀢𑀺𑀝𑁆𑀞𑀺𑀢𑀯𑀲𑁂𑀦. 𑀩𑀸𑀳𑀼𑀚𑀜𑁆𑀜𑀦𑁆𑀢𑀺 𑀩𑀳𑀽𑀳𑀺 𑀜𑀸𑀢𑀁 𑀧𑀝𑀺𑀯𑀺𑀤𑁆𑀥𑀁 𑀫𑀳𑀸𑀚𑀦𑀸𑀪𑀺𑀲𑀫𑀬𑀯𑀲𑁂𑀦. 𑀧𑀼𑀣𑀼𑀪𑀽𑀢𑀦𑁆𑀢𑀺 𑀲𑀩𑁆𑀩𑀸𑀓𑀸𑀭𑁂𑀦 𑀧𑀼𑀣𑀼𑀮𑀪𑀸𑀯𑀧𑀢𑁆𑀢𑀁. 𑀓𑀣𑀁? 𑀬𑀸𑀯 𑀤𑁂𑀯𑀫𑀦𑀼𑀲𑁆𑀲𑁂𑀳𑀺 𑀲𑀼𑀧𑁆𑀧𑀓𑀸𑀲𑀺𑀢𑀁, 𑀬𑀢𑁆𑀢𑀓𑀸 𑀯𑀺𑀜𑁆𑀜𑀼𑀚𑀸𑀢𑀺𑀓𑀸 𑀤𑁂𑀯𑀸 𑀘𑁂𑀯 𑀫𑀦𑀼𑀲𑁆𑀲𑀸 𑀘 𑀅𑀢𑁆𑀣𑀺, 𑀲𑀩𑁆𑀩𑁂𑀳𑀺 𑀲𑀼𑀝𑁆𑀞𑀼 𑀧𑀓𑀸𑀲𑀺𑀢𑀦𑁆𑀢𑀺 𑀅𑀢𑁆𑀣𑁄.

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄𑀢𑀺 𑀦𑀺𑀭𑀸𑀮𑀬𑁄. 𑀢𑁆𑀯𑀜𑁆𑀳𑀺 𑀧𑀸𑀧𑀺𑀫 𑀅𑀝𑁆𑀞𑀫𑀲𑀢𑁆𑀢𑀸𑀳𑀢𑁄 𑀧𑀝𑁆𑀞𑀸𑀬 ‘‘𑀧𑀭𑀺𑀦𑀺𑀩𑁆𑀩𑀸𑀢𑀼 𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸, 𑀧𑀭𑀺𑀦𑀺𑀩𑁆𑀩𑀸𑀢𑀼 𑀲𑀼𑀕𑀢𑁄’’𑀢𑀺 𑀯𑀺𑀭𑀯𑀦𑁆𑀢𑁄 𑀆𑀳𑀺𑀡𑁆𑀟𑀺𑀢𑁆𑀣, 𑀅𑀚𑁆𑀚 𑀤𑀸𑀦𑀺 𑀧𑀝𑁆𑀞𑀸𑀬 𑀯𑀺𑀕𑀢𑀼𑀲𑁆𑀲𑀸𑀳𑁄 𑀳𑁄𑀳𑀺, 𑀫𑀸 𑀫𑀬𑁆𑀳𑀁 𑀧𑀭𑀺𑀦𑀺𑀩𑁆𑀩𑀸𑀦𑀢𑁆𑀣𑀁 𑀯𑀸𑀬𑀸𑀫𑀁 𑀓𑀭𑁄𑀳𑀻𑀢𑀺 𑀯𑀤𑀢𑀺.

𑀲𑀢𑁄 𑀲𑀫𑁆𑀧𑀚𑀸𑀦𑁄 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑀻𑀢𑀺 𑀲𑀢𑀺𑀁 𑀲𑀽𑀧𑀝𑁆𑀞𑀺𑀢𑀁 𑀓𑀢𑁆𑀯𑀸 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀆𑀬𑀼𑀲𑀗𑁆𑀔𑀸𑀭𑀁 𑀯𑀺𑀲𑁆𑀲𑀚𑀺 𑀧𑀚𑀳𑀺. 𑀢𑀢𑁆𑀣 𑀦 𑀪𑀕𑀯𑀸 𑀳𑀢𑁆𑀣𑁂𑀦 𑀮𑁂𑀟𑁆𑀟𑀼𑀁 𑀯𑀺𑀬 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑀺, 𑀢𑁂𑀫𑀸𑀲𑀫𑀢𑁆𑀢𑀫𑁂𑀯 𑀧𑀦 𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀢𑀢𑁄 𑀧𑀭𑀁 𑀦 𑀲𑀫𑀸𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺. 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀑𑀲𑁆𑀲𑀚𑀻’’𑀢𑀺. 𑀉𑀲𑁆𑀲𑀚𑀻𑀢𑀺𑀧𑀺 𑀧𑀸𑀞𑁄. 𑀫𑀳𑀸𑀪𑀽𑀫𑀺𑀘𑀸𑀮𑁄𑀢𑀺 𑀫𑀳𑀦𑁆𑀢𑁄 𑀧𑀣𑀯𑀺𑀓𑀫𑁆𑀧𑁄. 𑀢𑀤𑀸 𑀓𑀺𑀭 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼 𑀅𑀓𑀫𑁆𑀧𑀺𑀢𑁆𑀣. 𑀪𑀺𑀁𑀲𑀦𑀓𑁄𑀢𑀺 𑀪𑀬𑀚𑀦𑀓𑁄. 𑀤𑁂𑀯𑀤𑀼𑀦𑁆𑀤𑀼𑀪𑀺𑀬𑁄 𑀘 𑀨𑀮𑀺𑀁𑀲𑀽𑀢𑀺 𑀤𑁂𑀯𑀪𑁂𑀭𑀺𑀬𑁄 𑀨𑀮𑀺𑀁𑀲𑀼, 𑀤𑁂𑀯𑁄 𑀲𑀼𑀓𑁆𑀔𑀕𑀚𑁆𑀚𑀺𑀢𑀁 𑀕𑀚𑁆𑀚𑀺, 𑀅𑀓𑀸𑀮𑀯𑀺𑀚𑁆𑀚𑀼𑀮𑀢𑀸 𑀦𑀺𑀘𑁆𑀙𑀭𑀺𑀁𑀲𑀼, 𑀔𑀡𑀺𑀓𑀯𑀲𑁆𑀲𑀁 𑀯𑀲𑁆𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀓𑀲𑁆𑀫𑀸 𑀉𑀤𑀸𑀦𑁂𑀲𑀺? 𑀓𑁄𑀘𑀺 𑀦𑀸𑀫 𑀯𑀤𑁂𑀬𑁆𑀬 ‘‘𑀪𑀕𑀯𑀸 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑁋 ‘𑀧𑀭𑀺𑀦𑀺𑀩𑁆𑀩𑀸𑀬𑀣, 𑀪𑀦𑁆𑀢𑁂, 𑀧𑀭𑀺𑀦𑀺𑀩𑁆𑀩𑀸𑀬𑀣, 𑀪𑀦𑁆𑀢𑁂’𑀢𑀺 𑀉𑀧𑀤𑁆𑀤𑀼𑀢𑁄 𑀪𑀬𑁂𑀦 𑀆𑀬𑀼𑀲𑀗𑁆𑀔𑀸𑀭𑀁 𑀯𑀺𑀲𑁆𑀲𑀚𑁆𑀚𑁂𑀲𑀻’’𑀢𑀺. 𑀢𑀲𑁆𑀲𑁄𑀓𑀸𑀲𑁄 𑀫𑀸 𑀳𑁄𑀢𑀽𑀢𑀺. 𑀪𑀻𑀢𑀲𑁆𑀲 𑀳𑀺 𑀉𑀤𑀸𑀦𑀁 𑀦𑀸𑀫 𑀦𑀢𑁆𑀣𑀻𑀢𑀺 𑀧𑀻𑀢𑀺𑀯𑁂𑀕𑀯𑀺𑀲𑁆𑀲𑀝𑁆𑀞𑀁 𑀉𑀤𑀸𑀦𑁂𑀲𑀺.

𑀢𑀢𑁆𑀣 𑀲𑀩𑁆𑀩𑁂𑀲𑀁 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀻𑀦𑀫𑁆𑀧𑀺 𑀧𑀘𑁆𑀘𑀓𑁆𑀔𑀪𑀸𑀯𑀢𑁄 𑀢𑀼𑀮𑀺𑀢𑀁 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀢𑀼𑀮𑀁. 𑀓𑀺𑀁 𑀢𑀁? 𑀓𑀸𑀫𑀸𑀯𑀘𑀭𑀓𑀫𑁆𑀫𑀁. 𑀦 𑀢𑀼𑀮𑀁, 𑀦 𑀯𑀸 𑀢𑀼𑀮𑀁 𑀲𑀤𑀺𑀲𑀫𑀲𑁆𑀲 𑀅𑀜𑁆𑀜𑀁 𑀮𑁄𑀓𑀺𑀬𑀓𑀫𑁆𑀫𑀁 𑀅𑀢𑁆𑀣𑀻𑀢𑀺 𑀅𑀢𑀼𑀮𑀁. 𑀓𑀺𑀁 𑀢𑀁? 𑀫𑀳𑀕𑁆𑀕𑀢𑀓𑀫𑁆𑀫𑀁. 𑀅𑀣 𑀯𑀸 𑀓𑀸𑀫𑀸𑀯𑀘𑀭𑀁 𑀭𑀽𑀧𑀸𑀯𑀘𑀭𑀜𑁆𑀘 𑀢𑀼𑀮𑀁, 𑀅𑀭𑀽𑀧𑀸𑀯𑀘𑀭𑀁 𑀅𑀢𑀼𑀮𑀁. 𑀅𑀧𑁆𑀧𑀯𑀺𑀧𑀸𑀓𑀁 𑀢𑀼𑀮𑀁, 𑀩𑀳𑀼𑀯𑀺𑀧𑀸𑀓𑀁 𑀅𑀢𑀼𑀮𑀁. 𑀲𑀫𑁆𑀪𑀯𑀦𑁆𑀢𑀺 𑀲𑀫𑁆𑀪𑀯𑀳𑁂𑀢𑀼𑀪𑀽𑀢𑀁, 𑀧𑀺𑀡𑁆𑀟𑀓𑀸𑀭𑀓𑀁 𑀭𑀸𑀲𑀺𑀓𑀸𑀭𑀓𑀦𑁆𑀢𑀺 𑀅𑀢𑁆𑀣𑁄. 𑀪𑀯𑀲𑀗𑁆𑀔𑀸𑀭𑀦𑁆𑀢𑀺 𑀧𑀼𑀦𑀩𑁆𑀪𑀯𑀲𑁆𑀲 𑀲𑀗𑁆𑀔𑀸𑀭𑀁. 𑀅𑀯𑀲𑁆𑀲𑀚𑀻𑀢𑀺 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀫𑀼𑀦𑀻𑀢𑀺 𑀩𑀼𑀤𑁆𑀥𑀫𑀼𑀦𑀺. 𑀅𑀚𑁆𑀛𑀢𑁆𑀢𑀭𑀢𑁄𑀢𑀺 𑀦𑀺𑀬𑀓𑀚𑁆𑀛𑀢𑁆𑀢𑀭𑀢𑁄. 𑀲𑀫𑀸𑀳𑀺𑀢𑁄𑀢𑀺 𑀉𑀧𑀘𑀸𑀭𑀧𑁆𑀧𑀦𑀸𑀲𑀫𑀸𑀥𑀺𑀯𑀲𑁂𑀦 𑀲𑀫𑀸𑀳𑀺𑀢𑁄. 𑀅𑀪𑀺𑀦𑁆𑀤𑀺 𑀓𑀯𑀘𑀫𑀺𑀯𑀸𑀢𑀺 𑀓𑀯𑀘𑀁 𑀯𑀺𑀬 𑀅𑀪𑀺𑀦𑁆𑀤𑀺. 𑀅𑀢𑁆𑀢𑀲𑀫𑁆𑀪𑀯𑀦𑁆𑀢𑀺 𑀅𑀢𑁆𑀢𑀦𑀺 𑀚𑀸𑀢𑀓𑀺𑀮𑁂𑀲𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀲𑀯𑀺𑀧𑀸𑀓𑀝𑁆𑀞𑁂𑀦 𑀲𑀫𑁆𑀪𑀯𑀁 𑀪𑀯𑀸𑀪𑀺𑀲𑀗𑁆𑀔𑀡𑀝𑁆𑀞𑁂𑀦 𑀪𑀯𑀲𑀗𑁆𑀔𑀸𑀭𑀦𑁆𑀢𑀺 𑀘 𑀮𑀤𑁆𑀥𑀦𑀸𑀫𑀁 𑀢𑀼𑀮𑀸𑀢𑀼𑀮𑀲𑀗𑁆𑀔𑀸𑀢𑀁 𑀮𑁄𑀓𑀺𑀬𑀓𑀫𑁆𑀫𑀜𑁆𑀘 𑀑𑀲𑁆𑀲𑀚𑀺, 𑀲𑀗𑁆𑀕𑀸𑀫𑀲𑀻𑀲𑁂 𑀫𑀳𑀸𑀬𑁄𑀥𑁄 𑀓𑀯𑀘𑀁 𑀯𑀺𑀬 𑀅𑀢𑁆𑀢𑀲𑀫𑁆𑀪𑀯𑀁 𑀓𑀺𑀮𑁂𑀲𑀜𑁆𑀘 𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀸𑀳𑀺𑀢𑁄 𑀳𑀼𑀢𑁆𑀯𑀸 𑀅𑀪𑀺𑀦𑁆𑀤𑀻𑀢𑀺.

𑀅𑀣 𑀯𑀸 𑀢𑀼𑀮𑀦𑁆𑀢𑀺 𑀢𑀼𑀮𑁂𑀦𑁆𑀢𑁄 𑀢𑀻𑀭𑁂𑀦𑁆𑀢𑁄. 𑀅𑀢𑀼𑀮𑀜𑁆𑀘 𑀲𑀫𑁆𑀪𑀯𑀦𑁆𑀢𑀺 𑀦𑀺𑀩𑁆𑀩𑀸𑀦𑀜𑁆𑀘𑁂𑀯 𑀪𑀯𑀜𑁆𑀘. 𑀪𑀯𑀲𑀗𑁆𑀔𑀸𑀭𑀦𑁆𑀢𑀺 𑀪𑀯𑀕𑀸𑀫𑀺𑀓𑀫𑁆𑀫𑀁. 𑀅𑀯𑀲𑁆𑀲𑀚𑀺 𑀫𑀼𑀦𑀻𑀢𑀺 ‘‘𑀧𑀜𑁆𑀘𑀓𑁆𑀔𑀦𑁆𑀥𑀸 𑀅𑀦𑀺𑀘𑁆𑀘𑀸, 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁 𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀼𑀮𑀬𑀦𑁆𑀢𑁄 𑀩𑀼𑀤𑁆𑀥𑀫𑀼𑀦𑀺 𑀪𑀯𑁂 𑀆𑀤𑀻𑀦𑀯𑀁 𑀦𑀺𑀩𑁆𑀩𑀸𑀦𑁂 𑀘𑀸𑀦𑀺𑀲𑀁𑀲𑀁 𑀤𑀺𑀲𑁆𑀯𑀸 𑀢𑀁 𑀔𑀦𑁆𑀥𑀸𑀦𑀁 𑀫𑀽𑀮𑀪𑀽𑀢𑀁 𑀪𑀯𑀲𑀗𑁆𑀔𑀸𑀭𑀁 ‘‘𑀓𑀫𑁆𑀫𑀓𑁆𑀔𑀬𑀸𑀬 𑀲𑀁𑀯𑀢𑁆𑀢𑀢𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀦 𑀓𑀫𑁆𑀫𑀓𑁆𑀔𑀬𑀓𑀭𑁂𑀦 𑀅𑀭𑀺𑀬𑀫𑀕𑁆𑀕𑁂𑀦 𑀅𑀯𑀲𑁆𑀲𑀚𑀺. 𑀓𑀣𑀁? 𑀅𑀚𑁆𑀛𑀢𑁆𑀢𑀭𑀢𑁄 𑀲𑀫𑀸𑀳𑀺𑀢𑁄 𑀅𑀪𑀺𑀦𑁆𑀤𑀺 𑀓𑀯𑀘𑀫𑀺𑀯𑀢𑁆𑀢𑀲𑀫𑁆𑀪𑀯𑀁. 𑀲𑁄 𑀳𑀺 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀅𑀚𑁆𑀛𑀢𑁆𑀢𑀭𑀢𑁄, 𑀲𑀫𑀣𑀯𑀲𑁂𑀦 𑀲𑀫𑀸𑀳𑀺𑀢𑁄𑀢𑀺 𑀏𑀯𑀁 𑀧𑀼𑀩𑁆𑀩𑀪𑀸𑀕𑀢𑁄 𑀧𑀝𑁆𑀞𑀸𑀬 𑀲𑀫𑀣𑀯𑀺𑀧𑀲𑁆𑀲𑀦𑀸𑀩𑀮𑁂𑀦 𑀓𑀯𑀘𑀫𑀺𑀯 𑀅𑀢𑁆𑀢𑀪𑀸𑀯𑀁 𑀧𑀭𑀺𑀬𑁄𑀦𑀦𑁆𑀥𑀺𑀢𑁆𑀯𑀸 𑀞𑀺𑀢𑀁, 𑀅𑀢𑁆𑀢𑀦𑀺 𑀲𑀫𑁆𑀪𑀯𑀢𑁆𑀢𑀸 𑀅𑀢𑁆𑀢𑀲𑀫𑁆𑀪𑀯𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀲𑀩𑁆𑀩𑀁 𑀓𑀺𑀮𑁂𑀲𑀚𑀸𑀢𑀁 𑀅𑀪𑀺𑀦𑁆𑀤𑀺. 𑀓𑀺𑀮𑁂𑀲𑀸𑀪𑀸𑀯𑁂𑀦 𑀘 𑀓𑀫𑁆𑀫𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀢𑁆𑀢𑀸 𑀅𑀯𑀲𑁆𑀲𑀝𑁆𑀞𑀁 𑀦𑀸𑀫 𑀳𑁄𑀢𑀻𑀢𑀺 𑀏𑀯𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑁂𑀦 𑀓𑀫𑁆𑀫𑀁 𑀚𑀳𑀺. 𑀧𑀳𑀻𑀦𑀓𑀺𑀮𑁂𑀲𑀲𑁆𑀲 𑀪𑀬𑀁 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀅𑀪𑀻𑀢𑁄𑀯 𑀆𑀬𑀼𑀲𑀗𑁆𑀔𑀸𑀭𑀁 𑀑𑀲𑁆𑀲𑀚𑀺. 𑀅𑀪𑀻𑀢𑀪𑀸𑀯𑀜𑀸𑀧𑀦𑀢𑁆𑀣𑀜𑁆𑀘 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀘𑀸𑀧𑀸𑀮𑀯𑀕𑁆𑀕𑁄 𑀧𑀞𑀫𑁄.

𑁨. 𑀧𑀸𑀲𑀸𑀤𑀓𑀫𑁆𑀧𑀦𑀯𑀕𑁆𑀕𑁄

𑁧-𑁨. 𑀧𑀼𑀩𑁆𑀩𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁮𑁨𑁩-𑁮𑁨𑁪. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀦 𑀘 𑀅𑀢𑀺𑀮𑀻𑀦𑁄𑀢𑀺𑀆𑀤𑀻𑀦𑀺 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀙𑀅𑀪𑀺𑀜𑁆𑀜𑀸𑀧𑀸𑀤𑀓𑀸 𑀇𑀤𑁆𑀥𑀺𑀧𑀸𑀤𑀸 𑀓𑀣𑀺𑀢𑀸, 𑀢𑀣𑀸 𑀤𑀼𑀢𑀺𑀬𑁂 𑀘.

𑁩. 𑀙𑀦𑁆𑀤𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁨𑁫. 𑀢𑀢𑀺𑀬𑁂 𑀙𑀦𑁆𑀤𑀦𑁆𑀢𑀺 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑀁. 𑀦𑀺𑀲𑁆𑀲𑀸𑀬𑀸𑀢𑀺 𑀦𑀺𑀲𑁆𑀲𑀬𑀁 𑀓𑀢𑁆𑀯𑀸, 𑀅𑀥𑀺𑀧𑀢𑀺𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀧𑀥𑀸𑀦𑀲𑀗𑁆𑀔𑀸𑀭𑀸𑀢𑀺 𑀧𑀥𑀸𑀦𑀪𑀽𑀢𑀸 𑀲𑀗𑁆𑀔𑀸𑀭𑀸, 𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀢𑀺 𑀅𑀬𑀜𑁆𑀘 𑀙𑀦𑁆𑀤𑁄𑀢𑀺𑀆𑀤𑀻𑀲𑀼 𑀙𑀦𑁆𑀤𑁄 𑀙𑀦𑁆𑀤𑀲𑀫𑀸𑀥𑀺𑀦𑀸 𑀘𑁂𑀯 𑀧𑀥𑀸𑀦𑀲𑀗𑁆𑀔𑀸𑀭𑁂𑀳𑀺 𑀘, 𑀙𑀦𑁆𑀤𑀲𑀫𑀸𑀥𑀺 𑀙𑀦𑁆𑀤𑁂𑀦 𑀘𑁂𑀯 𑀧𑀥𑀸𑀦𑀲𑀗𑁆𑀔𑀸𑀭𑁂𑀳𑀺 𑀘, 𑀧𑀥𑀸𑀦𑀲𑀗𑁆𑀔𑀸𑀭𑀸𑀧𑀺 𑀙𑀦𑁆𑀤𑁂𑀦 𑀘𑁂𑀯 𑀙𑀦𑁆𑀤𑀲𑀫𑀸𑀥𑀺𑀦𑀸 𑀘 𑀲𑀫𑀦𑁆𑀦𑀸𑀕𑀢𑀸. 𑀢𑀲𑁆𑀫𑀸 𑀲𑀩𑁆𑀩𑁂 𑀢𑁂 𑀥𑀫𑁆𑀫𑁂 𑀏𑀓𑀢𑁄 𑀓𑀢𑁆𑀯𑀸 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀫𑀦𑁆𑀦𑀸𑀕𑀢𑁄 𑀇𑀤𑁆𑀥𑀺𑀧𑀸𑀤𑁄𑀢𑀺 𑀯𑀼𑀢𑁆𑀢𑀁. 𑀇𑀤𑁆𑀥𑀺𑀧𑀸𑀤𑀯𑀺𑀪𑀗𑁆𑀕𑁂 (𑀯𑀺𑀪. 𑁪𑁩𑁭) 𑀧𑀦 ‘‘𑀬𑁄 𑀢𑀣𑀸𑀪𑀽𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀢𑀺𑀆𑀤𑀺𑀦𑀸 𑀦𑀬𑁂𑀦 𑀇𑀫𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀸 𑀲𑁂𑀲𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀤𑀸𑀢𑀺 𑀯𑀼𑀢𑁆𑀢𑀸.

𑀅𑀧𑀺𑀘 𑀇𑀫𑁂𑀧𑀺 𑀢𑀬𑁄 𑀥𑀫𑁆𑀫𑀸 𑀇𑀤𑁆𑀥𑀻𑀧𑀺 𑀳𑁄𑀦𑁆𑀢𑀺 𑀇𑀤𑁆𑀥𑀺𑀧𑀸𑀤𑀸𑀧𑀺. 𑀓𑀣𑀁? 𑀙𑀦𑁆𑀤𑀜𑁆𑀳𑀺 𑀪𑀸𑀯𑀬𑀢𑁄 𑀙𑀦𑁆𑀤𑁄 𑀇𑀤𑁆𑀥𑀺 𑀦𑀸𑀫 𑀳𑁄𑀢𑀺, 𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀸 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄 𑀦𑀸𑀫. 𑀲𑀫𑀸𑀥𑀺𑀁 𑀪𑀸𑀯𑁂𑀦𑁆𑀢𑀲𑁆𑀲 𑀲𑀫𑀸𑀥𑀺 𑀇𑀤𑁆𑀥𑀺 𑀦𑀸𑀫 𑀳𑁄𑀢𑀺, 𑀙𑀦𑁆𑀤𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀸 𑀲𑀫𑀸𑀥𑀺𑀤𑁆𑀥𑀺𑀬𑀸 𑀧𑀸𑀤𑁄 𑀦𑀸𑀫. 𑀧𑀥𑀸𑀦𑀲𑀗𑁆𑀔𑀸𑀭𑁂 𑀪𑀸𑀯𑁂𑀦𑁆𑀢𑀲𑁆𑀲 𑀧𑀥𑀸𑀦𑀲𑀗𑁆𑀔𑀸𑀭𑀸 𑀇𑀤𑁆𑀥𑀺 𑀦𑀸𑀫 𑀳𑁄𑀢𑀺, 𑀙𑀦𑁆𑀤𑀲𑀫𑀸𑀥𑀺 𑀧𑀥𑀸𑀦𑀲𑀗𑁆𑀔𑀸𑀭𑀺𑀤𑁆𑀥𑀺𑀬𑀸 𑀧𑀸𑀤𑁄 𑀦𑀸𑀫, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀳𑀺 𑀏𑀓𑀲𑁆𑀫𑀺𑀁 𑀇𑀚𑁆𑀛𑀫𑀸𑀦𑁂 𑀲𑁂𑀲𑀸𑀧𑀺 𑀇𑀚𑁆𑀛𑀦𑁆𑀢𑀺𑀬𑁂𑀯.

𑀅𑀧𑀺𑀘 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀼𑀩𑁆𑀩𑀪𑀸𑀕𑀯𑀲𑁂𑀦𑀸𑀧𑀺 𑀏𑀢𑁂𑀲𑀁 𑀇𑀤𑁆𑀥𑀺𑀧𑀸𑀤𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀞𑀫𑀚𑁆𑀛𑀸𑀦𑀜𑁆𑀳𑀺 𑀇𑀤𑁆𑀥𑀺 𑀦𑀸𑀫, 𑀧𑀞𑀫𑀚𑁆𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑀭𑀺𑀓𑀫𑁆𑀫𑀲𑀫𑁆𑀧𑀬𑀼𑀢𑁆𑀢𑀸 𑀙𑀦𑁆𑀤𑀸𑀤𑀬𑁄 𑀇𑀤𑁆𑀥𑀺𑀧𑀸𑀤𑁄 𑀦𑀸𑀫. 𑀏𑀢𑁂𑀦𑀼𑀧𑀸𑀬𑁂𑀦 𑀬𑀸𑀯 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀸, 𑀇𑀤𑁆𑀥𑀺𑀯𑀺𑀥𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀤𑀺𑀩𑁆𑀩𑀘𑀓𑁆𑀔𑀼𑀅𑀪𑀺𑀜𑁆𑀜𑀸, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀅𑀭𑀳𑀢𑁆𑀢𑀫𑀕𑁆𑀕𑀸 𑀦𑀬𑁄 𑀦𑁂𑀢𑀩𑁆𑀩𑁄. 𑀲𑁂𑀲𑀺𑀤𑁆𑀥𑀺𑀧𑀸𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀓𑁂𑀘𑀺 𑀧𑀦 ‘‘𑀅𑀦𑀺𑀩𑁆𑀩𑀢𑁆𑀢𑁄 𑀙𑀦𑁆𑀤𑁄 𑀇𑀤𑁆𑀥𑀺𑀧𑀸𑀤𑁄’’𑀢𑀺 𑀯𑀤𑀦𑁆𑀢𑀺. 𑀇𑀥 𑀢𑁂𑀲𑀁 𑀯𑀸𑀤𑀫𑀤𑁆𑀤𑀦𑀢𑁆𑀣𑀸𑀬 𑀅𑀪𑀺𑀥𑀫𑁆𑀫𑁂 𑀉𑀢𑁆𑀢𑀭𑀘𑀽𑀴𑀯𑀸𑀭𑁄 𑀦𑀸𑀫 𑀆𑀕𑀢𑁄 𑁋

‘‘𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸 𑁋 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄, 𑀯𑀻𑀭𑀺𑀬𑀺𑀤𑁆𑀥𑀺𑀧𑀸𑀤𑁄, 𑀘𑀺𑀢𑁆𑀢𑀺𑀤𑁆𑀥𑀺𑀧𑀸𑀤𑁄, 𑀯𑀻𑀫𑀁𑀲𑀺𑀤𑁆𑀥𑀺𑀧𑀸𑀤𑁄. 𑀢𑀢𑁆𑀣 𑀓𑀢𑀫𑁄 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄? 𑀇𑀥, 𑀪𑀺𑀓𑁆𑀔𑀼, 𑀬𑀲𑁆𑀫𑀺𑀁 𑀲𑀫𑀬𑁂 𑀮𑁄𑀓𑀼𑀢𑁆𑀢𑀭𑀁 𑀛𑀸𑀦𑀁 𑀪𑀸𑀯𑁂𑀢𑀺 𑀦𑀺𑀬𑁆𑀬𑀸𑀦𑀺𑀓𑀁 𑀅𑀧𑀘𑀬𑀕𑀸𑀫𑀺𑀁 𑀤𑀺𑀝𑁆𑀞𑀺𑀕𑀢𑀸𑀦𑀁 𑀧𑀳𑀸𑀦𑀸𑀬 𑀧𑀞𑀫𑀸𑀬 𑀪𑀽𑀫𑀺𑀬𑀸 𑀧𑀢𑁆𑀢𑀺𑀬𑀸 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀤𑀼𑀓𑁆𑀔𑀸𑀧𑀝𑀺𑀧𑀤𑀁 𑀤𑀦𑁆𑀥𑀸𑀪𑀺𑀜𑁆𑀜𑀁, 𑀬𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀙𑀦𑁆𑀤𑁄 𑀙𑀦𑁆𑀤𑀺𑀓𑀢𑀸 𑀓𑀢𑁆𑀢𑀼𑀓𑀫𑁆𑀬𑀢𑀸 𑀓𑀼𑀲𑀮𑁄 𑀥𑀫𑁆𑀫𑀘𑁆𑀙𑀦𑁆𑀤𑁄, 𑀅𑀬𑀁 𑀯𑀼𑀘𑁆𑀘𑀢𑀺 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑁄. 𑀅𑀯𑀲𑁂𑀲𑀸 𑀥𑀫𑁆𑀫𑀸 𑀙𑀦𑁆𑀤𑀺𑀤𑁆𑀥𑀺𑀧𑀸𑀤𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 (𑀯𑀺𑀪. 𑁪𑁫𑁭-𑁪𑁫𑁮).

𑀇𑀫𑁂 𑀧𑀦 𑀮𑁄𑀓𑀼𑀢𑁆𑀢𑀭𑀯𑀲𑁂𑀦𑁂𑀯 𑀆𑀕𑀢𑀸.

𑀢𑀢𑁆𑀣 𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑁄 𑀙𑀦𑁆𑀤𑀁 𑀥𑀼𑀭𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀲𑁄𑀡𑀢𑁆𑀣𑁂𑀭𑁄 𑀯𑀻𑀭𑀺𑀬𑀁 𑀥𑀼𑀭𑀁 𑀓𑀢𑁆𑀯𑀸; 𑀲𑀫𑁆𑀪𑀼𑀢𑀢𑁆𑀣𑁂𑀭𑁄 𑀘𑀺𑀢𑁆𑀢𑀁 𑀥𑀼𑀭𑀁 𑀓𑀢𑁆𑀯𑀸, 𑀆𑀬𑀲𑁆𑀫𑀸 𑀫𑁄𑀖𑀭𑀸𑀚𑀸 𑀯𑀻𑀫𑀁𑀲𑀁 𑀥𑀼𑀭𑀁 𑀓𑀢𑁆𑀯𑀸𑀢𑀺. 𑀢𑀢𑁆𑀣 𑀬𑀣𑀸 𑀘𑀢𑀽𑀲𑀼 𑀅𑀫𑀘𑁆𑀘𑀧𑀼𑀢𑁆𑀢𑁂𑀲𑀼 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀭𑀸𑀚𑀸𑀦𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀦𑁆𑀢𑁂𑀲𑀼 𑀏𑀓𑁄 𑀉𑀧𑀝𑁆𑀞𑀸𑀦𑁂 𑀙𑀦𑁆𑀤𑀚𑀸𑀢𑁄 𑀭𑀜𑁆𑀜𑁄 𑀅𑀚𑁆𑀛𑀸𑀲𑀬𑀜𑁆𑀘 𑀭𑀼𑀘𑀺𑀜𑁆𑀘 𑀜𑀢𑁆𑀯𑀸 𑀤𑀺𑀯𑀸 𑀘 𑀭𑀢𑁆𑀢𑁄 𑀘 𑀉𑀧𑀝𑁆𑀞𑀳𑀦𑁆𑀢𑁄 𑀭𑀸𑀚𑀸𑀦𑀁 𑀆𑀭𑀸𑀥𑁂𑀢𑁆𑀯𑀸 𑀞𑀸𑀦𑀦𑁆𑀢𑀭𑀁 𑀧𑀸𑀧𑀼𑀡𑀺. 𑀏𑀯𑀁 𑀙𑀦𑁆𑀤𑀥𑀼𑀭𑁂𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁄 𑀯𑁂𑀤𑀺𑀢𑀩𑁆𑀩𑁄.

𑀏𑀓𑁄 𑀧𑀦 𑁋 ‘‘𑀤𑀺𑀯𑀲𑁂 𑀤𑀺𑀯𑀲𑁂 𑀉𑀧𑀝𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀫𑀺, 𑀉𑀧𑁆𑀧𑀦𑁆𑀦𑁂 𑀓𑀺𑀘𑁆𑀘𑁂 𑀧𑀭𑀓𑁆𑀓𑀫𑁂𑀦 𑀆𑀭𑀸𑀥𑁂𑀲𑁆𑀲𑀸𑀫𑀻’’𑀢𑀺 𑀓𑀼𑀧𑀺𑀢𑁂 𑀧𑀘𑁆𑀘𑀦𑁆𑀢𑁂 𑀭𑀜𑁆𑀜𑀸 𑀧𑀳𑀺𑀢𑁄 𑀧𑀭𑀓𑁆𑀓𑀫𑁂𑀦 𑀲𑀢𑁆𑀢𑀼𑀫𑀤𑁆𑀤𑀦𑀁 𑀓𑀢𑁆𑀯𑀸 𑀧𑀸𑀧𑀼𑀡𑀺. 𑀬𑀣𑀸 𑀲𑁄, 𑀏𑀯𑀁 𑀯𑀻𑀭𑀺𑀬𑀥𑀼𑀭𑁂𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀓𑁄 ‘‘𑀤𑀺𑀯𑀲𑁂 𑀤𑀺𑀯𑀲𑁂 𑀉𑀧𑀝𑁆𑀞𑀸𑀦𑀫𑁆𑀧𑀺 𑀉𑀭𑁂𑀦 𑀲𑀢𑁆𑀢𑀺𑀲𑀭𑀲𑀫𑁆𑀧𑀝𑀺𑀘𑁆𑀙𑀦𑀫𑁆𑀧𑀺 𑀪𑀸𑀭𑁄𑀬𑁂𑀯, 𑀫𑀦𑁆𑀢𑀩𑀮𑁂𑀦 𑀆𑀭𑀸𑀥𑁂𑀲𑁆𑀲𑀸𑀫𑀻’’𑀢𑀺 𑀔𑀢𑁆𑀢𑀯𑀺𑀚𑁆𑀚𑀸𑀬 𑀓𑀢𑀧𑀭𑀺𑀘𑀬𑀢𑁆𑀢𑀸 𑀫𑀦𑁆𑀢𑀲𑀁𑀯𑀺𑀥𑀸𑀦𑁂𑀦 𑀭𑀸𑀚𑀸𑀦𑀁 𑀆𑀭𑀸𑀥𑁂𑀢𑁆𑀯𑀸 𑀧𑀸𑀧𑀼𑀡𑀺. 𑀬𑀣𑀸 𑀲𑁄, 𑀏𑀯𑀁 𑀘𑀺𑀢𑁆𑀢𑀥𑀼𑀭𑁂𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀭𑁄 𑁋 ‘‘𑀓𑀺𑀁 𑀇𑀫𑁂𑀳𑀺 𑀉𑀧𑀝𑁆𑀞𑀸𑀦𑀸𑀤𑀻𑀳𑀺, 𑀭𑀸𑀚𑀸𑀦𑁄 𑀦𑀸𑀫 𑀚𑀸𑀢𑀺𑀲𑀫𑁆𑀧𑀦𑁆𑀦𑀲𑁆𑀲 𑀞𑀸𑀦𑀦𑁆𑀢𑀭𑀁 𑀤𑁂𑀦𑁆𑀢𑀺, 𑀢𑀸𑀤𑀺𑀲𑀲𑁆𑀲 𑀤𑁂𑀦𑁆𑀢𑁄 𑀫𑀬𑁆𑀳𑀁 𑀤𑀲𑁆𑀲𑀢𑀻’’𑀢𑀺 𑀚𑀸𑀢𑀺𑀲𑀫𑁆𑀧𑀢𑁆𑀢𑀺𑀫𑁂𑀯 𑀦𑀺𑀲𑁆𑀲𑀸𑀬 𑀞𑀸𑀦𑀦𑁆𑀢𑀭𑀁 𑀧𑀸𑀧𑀼𑀡𑀺. 𑀬𑀣𑀸 𑀲𑁄, 𑀏𑀯𑀁 𑀲𑀼𑀧𑀭𑀺𑀲𑀼𑀤𑁆𑀥𑀁 𑀯𑀻𑀫𑀁𑀲𑀁 𑀦𑀺𑀲𑁆𑀲𑀸𑀬 𑀯𑀻𑀫𑀁𑀲𑀥𑀼𑀭𑁂𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁄 𑀯𑁂𑀤𑀺𑀢𑀩𑁆𑀩𑁄𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀺𑀯𑀝𑁆𑀝𑀧𑀸𑀤𑀓𑀇𑀤𑁆𑀥𑀺 𑀓𑀣𑀺𑀢𑀸.

𑁪. 𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁨𑁬. 𑀘𑀢𑀼𑀢𑁆𑀣𑁂 𑀉𑀤𑁆𑀥𑀢𑀸𑀢𑀺 𑀉𑀤𑁆𑀥𑀘𑁆𑀘𑀧𑀓𑀢𑀺𑀓𑀸 𑀯𑀺𑀧𑁆𑀨𑀦𑁆𑀤𑀫𑀸𑀦𑀘𑀺𑀢𑁆𑀢𑀸. 𑀉𑀤𑁆𑀥𑀘𑁆𑀘𑁂𑀦 𑀳𑀺 𑀏𑀓𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀯𑀺𑀧𑁆𑀨𑀦𑁆𑀤𑀢𑀺 𑀥𑀚𑀬𑀝𑁆𑀞𑀺𑀬𑀁 𑀯𑀸𑀢𑁂𑀦 𑀧𑀳𑀢𑀥𑀚𑁄 𑀯𑀺𑀬. 𑀉𑀦𑁆𑀦𑀴𑀸𑀢𑀺 𑀉𑀕𑁆𑀕𑀢𑀦𑀴𑀸, 𑀉𑀝𑁆𑀞𑀺𑀢𑀢𑀼𑀘𑁆𑀙𑀫𑀸𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀘𑀧𑀮𑀸𑀢𑀺 𑀧𑀢𑁆𑀢𑀘𑀻𑀯𑀭𑀫𑀡𑁆𑀟𑀦𑀸𑀤𑀺𑀘𑀸𑀧𑀮𑁆𑀮𑁂𑀦 𑀬𑀼𑀢𑁆𑀢𑀸. 𑀫𑀼𑀔𑀭𑀸𑀢𑀺 𑀫𑀼𑀔𑀔𑀭𑀸, 𑀔𑀭𑀯𑀘𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀺𑀓𑀺𑀡𑁆𑀡𑀯𑀸𑀘𑀸𑀢𑀺 𑀅𑀲𑀁𑀬𑀢𑀯𑀘𑀦𑀸 𑀤𑀺𑀯𑀲𑀫𑁆𑀧𑀺 𑀦𑀺𑀭𑀢𑁆𑀣𑀓𑀯𑀘𑀦𑀧𑁆𑀧𑀮𑀸𑀧𑀺𑀦𑁄. 𑀫𑀼𑀝𑁆𑀞𑀲𑁆𑀲𑀢𑀻𑀢𑀺 𑀦𑀝𑁆𑀞𑀲𑁆𑀲𑀢𑀺𑀦𑁄. 𑀅𑀲𑀫𑁆𑀧𑀚𑀸𑀦𑀸𑀢𑀺 𑀧𑀜𑁆𑀜𑀸𑀭𑀳𑀺𑀢𑀸. 𑀅𑀲𑀫𑀸𑀳𑀺𑀢𑀸𑀢𑀺 𑀉𑀧𑀘𑀸𑀭𑀧𑁆𑀧𑀦𑀸𑀲𑀫𑀸𑀥𑀺𑀯𑀺𑀭𑀳𑀺𑀢𑀸. 𑀪𑀦𑁆𑀢𑀘𑀺𑀢𑁆𑀢𑀸𑀢𑀺 𑀉𑀩𑁆𑀪𑀦𑁆𑀢𑀘𑀺𑀢𑁆𑀢𑀸 𑀲𑀫𑀸𑀥𑀺𑀯𑀺𑀭𑀳𑁂𑀦 𑀮𑀤𑁆𑀥𑁄𑀓𑀸𑀲𑁂𑀦 𑀉𑀤𑁆𑀥𑀘𑁆𑀘𑁂𑀦. 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑀸𑀢𑀺 𑀅𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑀸. 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀦𑁆𑀢𑀺 𑀆𑀧𑁄𑀓𑀲𑀺𑀡𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀧𑀸𑀲𑀸𑀤𑀧𑀢𑀺𑀝𑁆𑀞𑀺𑀢𑀁 𑀧𑀣𑀯𑀺𑀪𑀸𑀕𑀁 ‘‘𑀉𑀤𑀓’’𑀦𑁆𑀢𑀺 𑀅𑀥𑀺𑀝𑁆𑀞𑀸𑀬, 𑀉𑀤𑀓𑀧𑀺𑀝𑁆𑀞𑁂 𑀞𑀺𑀢𑀧𑀸𑀲𑀸𑀤𑀁 𑀯𑁂𑀳𑀸𑀲𑀁 𑀅𑀩𑁆𑀪𑀼𑀕𑁆𑀕𑀦𑁆𑀢𑁆𑀯𑀸 𑀅𑀗𑁆𑀕𑀼𑀝𑁆𑀞𑀓𑁂𑀦 𑀧𑀳𑀭𑀺. 𑀕𑀫𑁆𑀪𑀻𑀭𑀦𑁂𑀫𑁄𑀢𑀺 𑀕𑀫𑁆𑀪𑀻𑀭𑀆𑀯𑀸𑀝𑁄, 𑀕𑀫𑁆𑀪𑀻𑀭𑀪𑀽𑀫𑀺𑀪𑀸𑀕𑀁 𑀅𑀦𑀼𑀧𑀯𑀺𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀲𑀼𑀦𑀺𑀔𑀸𑀢𑁄𑀢𑀺 𑀲𑀼𑀝𑁆𑀞𑀼 𑀦𑀺𑀔𑀸𑀢𑁄, 𑀓𑁄𑀝𑁆𑀝𑁂𑀢𑁆𑀯𑀸 𑀲𑀼𑀝𑁆𑀞𑀼 𑀞𑀧𑀺𑀢𑁄. 𑀇𑀥 𑀅𑀪𑀺𑀜𑁆𑀜𑀸𑀧𑀸𑀤𑀓𑀺𑀤𑁆𑀥𑀺 𑀓𑀣𑀺𑀢𑀸.

𑁫. 𑀉𑀡𑁆𑀡𑀸𑀪𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁨𑁭. 𑀧𑀜𑁆𑀘𑀫𑁂 𑀙𑀦𑁆𑀤𑀧𑁆𑀧𑀳𑀸𑀦𑀢𑁆𑀣𑀦𑁆𑀢𑀺 𑀢𑀡𑁆𑀳𑀸𑀙𑀦𑁆𑀤𑀲𑁆𑀲 𑀧𑀳𑀸𑀦𑀢𑁆𑀣𑀁. 𑀇𑀥𑀸𑀧𑀺 𑀯𑀺𑀯𑀝𑁆𑀝𑀧𑀸𑀤𑀓𑀺𑀤𑁆𑀥𑀺 𑀓𑀣𑀺𑀢𑀸.

𑁯. 𑀇𑀤𑁆𑀥𑀸𑀤𑀺𑀤𑁂𑀲𑀦𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁩𑁧. 𑀦𑀯𑀫𑁂 𑀬𑁄 𑀲𑁄 𑀪𑀺𑀓𑁆𑀔𑀯𑁂 𑀫𑀕𑁆𑀕𑁄𑀢𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀅𑀥𑀺𑀧𑁆𑀧𑁂𑀢𑀁.

𑁧𑁦. 𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁩𑁨. 𑀤𑀲𑀫𑁂 𑀓𑁄𑀲𑀚𑁆𑀚𑀲𑀳𑀕𑀢𑁄𑀢𑀺 𑀇𑀥 𑀪𑀺𑀓𑁆𑀔𑀼 𑀙𑀦𑁆𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀦𑀺𑀲𑀻𑀤𑀢𑀺. 𑀅𑀣𑀲𑁆𑀲 𑀘𑀺𑀢𑁆𑀢𑁂 𑀮𑀻𑀦𑀸𑀓𑀸𑀭𑁄 𑀑𑀓𑁆𑀓𑀫𑀢𑀺, 𑀲𑁄 ‘‘𑀮𑀻𑀦𑀸𑀓𑀸𑀭𑁄 𑀫𑁂 𑀑𑀓𑁆𑀓𑀦𑁆𑀢𑁄’’𑀢𑀺 𑀜𑀢𑁆𑀯𑀸 𑀅𑀧𑀸𑀬𑀪𑀬𑁂𑀦 𑀘𑀺𑀢𑁆𑀢𑀁 𑀢𑀚𑁆𑀚𑁂𑀢𑁆𑀯𑀸 𑀧𑀼𑀦 𑀙𑀦𑁆𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀢𑀺. 𑀅𑀣𑀲𑁆𑀲 𑀧𑀼𑀦 𑀮𑀻𑀦𑀸𑀓𑀸𑀭𑁄 𑀑𑀓𑁆𑀓𑀫𑀢𑀺. 𑀲𑁄 𑀧𑀼𑀦 𑀅𑀧𑀸𑀬𑀪𑀬𑁂𑀦 𑀘𑀺𑀢𑁆𑀢𑀁 𑀢𑀚𑁆𑀚𑁂𑀢𑁆𑀯𑀸 𑀙𑀦𑁆𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀏𑀯𑀫𑀲𑁆𑀲 𑀓𑁄𑀲𑀚𑁆𑀚𑁂𑀦 𑀯𑁄𑀓𑀺𑀡𑁆𑀡𑀢𑁆𑀢𑀸 𑀙𑀦𑁆𑀤𑁄 𑀓𑁄𑀲𑀚𑁆𑀚𑀲𑀳𑀕𑀢𑁄 𑀦𑀸𑀫 𑀳𑁄𑀢𑀺. 𑀓𑁄𑀲𑀚𑁆𑀚𑀲𑀫𑁆𑀧𑀬𑀼𑀢𑁆𑀢𑁄𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁.

𑀉𑀤𑁆𑀥𑀘𑁆𑀘𑀲𑀳𑀕𑀢𑁄𑀢𑀺 𑀇𑀥 𑀪𑀺𑀓𑁆𑀔𑀼 𑀙𑀦𑁆𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀦𑀺𑀲𑀻𑀤𑀢𑀺. 𑀅𑀣𑀲𑁆𑀲 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑁂 𑀧𑀢𑀢𑀺. 𑀲𑁄 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀕𑀼𑀡𑁂 𑀆𑀯𑀚𑁆𑀚𑁂𑀢𑁆𑀯𑀸 𑀘𑀺𑀢𑁆𑀢𑀁 𑀳𑀸𑀲𑁂𑀢𑁆𑀯𑀸 𑀢𑁄𑀲𑁂𑀢𑁆𑀯𑀸 𑀓𑀫𑁆𑀫𑀦𑀺𑀬𑀁 𑀓𑀢𑁆𑀯𑀸 𑀧𑀼𑀦 𑀙𑀦𑁆𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀢𑀺. 𑀅𑀣𑀲𑁆𑀲 𑀧𑀼𑀦 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑁂 𑀧𑀢𑀢𑀺. 𑀲𑁄 𑀧𑀼𑀦 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀕𑀼𑀡𑁂 𑀆𑀯𑀚𑁆𑀚𑁂𑀢𑁆𑀯𑀸 𑀘𑀺𑀢𑁆𑀢𑀁 𑀳𑀸𑀲𑁂𑀢𑁆𑀯𑀸 𑀢𑁄𑀲𑁂𑀢𑁆𑀯𑀸 𑀓𑀫𑁆𑀫𑀦𑀺𑀬𑀁 𑀓𑀢𑁆𑀯𑀸 𑀙𑀦𑁆𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀏𑀯𑀫𑀲𑁆𑀲 𑀉𑀤𑁆𑀥𑀘𑁆𑀘𑁂𑀦 𑀯𑁄𑀓𑀺𑀡𑁆𑀡𑀢𑁆𑀢𑀸 𑀙𑀦𑁆𑀤𑁄 𑀉𑀤𑁆𑀥𑀘𑁆𑀘𑀲𑀳𑀕𑀢𑁄 𑀦𑀸𑀫 𑀳𑁄𑀢𑀺.

𑀣𑀺𑀦𑀫𑀺𑀤𑁆𑀥𑀲𑀳𑀕𑀢𑁄𑀢𑀺 𑀇𑀥 𑀪𑀺𑀓𑁆𑀔𑀼 𑀙𑀦𑁆𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀦𑀺𑀲𑀻𑀤𑀢𑀺. 𑀅𑀣𑀲𑁆𑀲 𑀣𑀺𑀦𑀫𑀺𑀤𑁆𑀥𑀁 𑀉𑀧𑁆𑀧𑀚𑁆𑀚𑀢𑀺. 𑀲𑁄 ‘‘𑀉𑀧𑁆𑀧𑀦𑁆𑀦𑀁 𑀫𑁂 𑀣𑀺𑀦𑀫𑀺𑀤𑁆𑀥’’𑀦𑁆𑀢𑀺 𑀜𑀢𑁆𑀯𑀸 𑀉𑀤𑀓𑁂𑀦 𑀫𑀼𑀔𑀁 𑀧𑀼𑀜𑁆𑀙𑀺𑀢𑁆𑀯𑀸, 𑀓𑀡𑁆𑀡𑁂 𑀆𑀓𑀟𑁆𑀠𑀺𑀢𑁆𑀯𑀸 𑀧𑀕𑀼𑀡𑀁 𑀥𑀫𑁆𑀫𑀁 𑀲𑀚𑁆𑀛𑀸𑀬𑀺𑀢𑁆𑀯𑀸 𑀤𑀺𑀯𑀸 𑀕𑀳𑀺𑀢𑀁 𑀯𑀸 𑀆𑀮𑁄𑀓𑀲𑀜𑁆𑀜𑀁 𑀫𑀦𑀲𑀺𑀓𑀭𑀺𑀢𑁆𑀯𑀸 𑀣𑀺𑀦𑀫𑀺𑀤𑁆𑀥𑀁 𑀯𑀺𑀦𑁄𑀤𑁂𑀢𑁆𑀯𑀸 𑀧𑀼𑀦 𑀙𑀦𑁆𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀢𑀺. 𑀅𑀣𑀲𑁆𑀲 𑀧𑀼𑀦 𑀣𑀺𑀦𑀫𑀺𑀤𑁆𑀥𑀁 𑀉𑀧𑁆𑀧𑀚𑁆𑀚𑀢𑀺. 𑀲𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀼𑀦 𑀣𑀺𑀦𑀫𑀺𑀤𑁆𑀥𑀁 𑀯𑀺𑀦𑁄𑀤𑁂𑀢𑁆𑀯𑀸 𑀙𑀦𑁆𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀏𑀯𑀫𑀲𑁆𑀲 𑀣𑀺𑀦𑀫𑀺𑀤𑁆𑀥𑁂𑀦 𑀯𑁄𑀓𑀺𑀡𑁆𑀡𑀢𑁆𑀢𑀸 𑀙𑀦𑁆𑀤𑁄 𑀣𑀺𑀦𑀫𑀺𑀤𑁆𑀥𑀲𑀳𑀕𑀢𑁄 𑀦𑀸𑀫 𑀳𑁄𑀢𑀺.

𑀅𑀦𑀼𑀯𑀺𑀓𑁆𑀔𑀺𑀢𑁆𑀢𑁄𑀢𑀺 𑀇𑀥 𑀪𑀺𑀓𑁆𑀔𑀼 𑀙𑀦𑁆𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺𑀓𑀭𑁄𑀦𑁆𑀢𑁄 𑀦𑀺𑀲𑀻𑀤𑀢𑀺. 𑀅𑀣𑀲𑁆𑀲 𑀓𑀸𑀫𑀕𑀼𑀡𑀸𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀯𑀺𑀓𑁆𑀔𑀺𑀧𑀢𑀺. 𑀲𑁄 ‘‘𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑀁 𑀫𑁂 𑀘𑀺𑀢𑁆𑀢’’𑀦𑁆𑀢𑀺 𑀜𑀢𑁆𑀯𑀸 𑀅𑀦𑀫𑀢𑀕𑁆𑀕 (𑀲𑀁. 𑀦𑀺. 𑁨.𑁧𑁨𑁪-𑁧𑁨𑁫) 𑀤𑁂𑀯𑀤𑀽𑀢- (𑀫. 𑀦𑀺. 𑁩.𑁨𑁬𑁧) 𑀘𑁂𑀮𑁄𑀧𑀫 (𑀲𑀁. 𑀦𑀺. 𑁫.𑁧𑁧𑁦𑁪) 𑀅𑀦𑀸𑀕𑀢𑀪𑀬𑀲𑀼𑀢𑁆𑀢𑀸𑀤𑀻𑀦𑀺 (𑀅. 𑀦𑀺. 𑁫.𑁭𑁭) 𑀆𑀯𑀚𑁆𑀚𑁂𑀦𑁆𑀢𑁄 𑀲𑀼𑀢𑁆𑀢𑀤𑀡𑁆𑀟𑁂𑀦 𑀘𑀺𑀢𑁆𑀢𑀁 𑀢𑀚𑁆𑀚𑁂𑀢𑁆𑀯𑀸 𑀓𑀫𑁆𑀫𑀦𑀺𑀬𑀁 𑀓𑀢𑁆𑀯𑀸 𑀧𑀼𑀦 𑀙𑀦𑁆𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀢𑀺. 𑀅𑀣𑀲𑁆𑀲 𑀧𑀼𑀦 𑀘𑀺𑀢𑁆𑀢𑀁 𑀯𑀺𑀓𑁆𑀔𑀺𑀧𑀢𑀺. 𑀲𑁄 𑀧𑀼𑀦 𑀲𑀼𑀢𑁆𑀢𑀤𑀡𑁆𑀟𑁂𑀦 𑀘𑀺𑀢𑁆𑀢𑀁 𑀓𑀫𑁆𑀫𑀦𑀺𑀬𑀁 𑀓𑀢𑁆𑀯𑀸 𑀙𑀦𑁆𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀢𑀻𑀢𑀺 𑀏𑀯𑀫𑀲𑁆𑀲 𑀓𑀸𑀫𑀯𑀺𑀢𑀓𑁆𑀓𑀯𑁄𑀓𑀺𑀡𑁆𑀡𑀢𑁆𑀢𑀸 𑀙𑀦𑁆𑀤𑁄 𑀩𑀳𑀺𑀤𑁆𑀥𑀸 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀆𑀭𑀩𑁆𑀪 𑀅𑀦𑀼𑀯𑀺𑀓𑁆𑀔𑀺𑀢𑁆𑀢𑁄 𑀅𑀦𑀼𑀯𑀺𑀲𑀝𑁄 𑀳𑁄𑀢𑀺.

𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸𑀢𑀺 𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦𑀧𑀺 𑀤𑁂𑀲𑀦𑀸𑀯𑀲𑁂𑀦𑀧𑀺 𑀧𑀼𑀭𑀺𑀫𑀧𑀘𑁆𑀙𑀺𑀫𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀓𑀣𑀁? 𑀓𑀫𑁆𑀫𑀝𑁆𑀞𑀸𑀦𑁂 𑀢𑀸𑀯 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀅𑀪𑀺𑀦𑀺𑀯𑁂𑀲𑁄 𑀧𑀼𑀭𑁂 𑀦𑀸𑀫, 𑀅𑀭𑀳𑀢𑁆𑀢𑀁 𑀧𑀘𑁆𑀙𑀸 𑀦𑀸𑀫. 𑀢𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀫𑀽𑀮𑀓𑀫𑁆𑀫𑀝𑁆𑀞𑀸𑀦𑁂 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀢𑀺𑀮𑀻𑀦𑀸𑀤𑀻𑀲𑀼 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀘𑀺𑀢𑁆𑀢𑀲𑁆𑀲 𑀑𑀓𑁆𑀓𑀫𑀦𑀁 𑀧𑀝𑀺𑀲𑁂𑀥𑁂𑀢𑁆𑀯𑀸, 𑀤𑀼𑀝𑁆𑀞𑀕𑁄𑀡𑁂 𑀬𑁄𑀚𑁂𑀢𑁆𑀯𑀸 𑀲𑀸𑀭𑁂𑀦𑁆𑀢𑁄 𑀯𑀺𑀬 𑀘𑀢𑀼𑀭𑀲𑁆𑀲𑀖𑀝𑀺𑀓𑀁 𑀑𑀢𑀸𑀭𑁂𑀦𑁆𑀢𑁄 𑀯𑀺𑀬 𑀘𑀢𑀼𑀦𑁆𑀦𑀁 𑀞𑀸𑀦𑀸𑀦𑀁 𑀏𑀓𑀝𑁆𑀞𑀸𑀦𑁂𑀧𑀺 𑀅𑀲𑀚𑁆𑀚𑀦𑁆𑀢𑁄 𑀲𑀗𑁆𑀔𑀸𑀭𑁂 𑀲𑀫𑁆𑀫𑀲𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀺. 𑀅𑀬𑀫𑁆𑀧𑀺 𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸 𑀯𑀺𑀳𑀭𑀢𑀺 𑀦𑀸𑀫. 𑀅𑀬𑀁 𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦 𑀧𑀼𑀭𑀺𑀫𑀧𑀘𑁆𑀙𑀺𑀫𑀢𑀸. 𑀤𑁂𑀲𑀦𑀸𑀯𑀲𑁂𑀦 𑀧𑀦 𑀓𑁂𑀲𑀸 𑀧𑀼𑀭𑁂 𑀦𑀸𑀫, 𑀫𑀢𑁆𑀣𑀮𑀼𑀗𑁆𑀕𑀁 𑀧𑀘𑁆𑀙𑀸 𑀦𑀸𑀫. 𑀢𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀓𑁂𑀲𑁂𑀲𑀼 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀲𑁂𑀦 𑀓𑁂𑀲𑀸𑀤𑀬𑁄 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀅𑀲𑀚𑁆𑀚𑀦𑁆𑀢𑁄 𑀬𑀸𑀯 𑀫𑀢𑁆𑀣𑀮𑀼𑀗𑁆𑀕𑀸 𑀪𑀸𑀯𑀦𑀁 𑀧𑀸𑀧𑁂𑀢𑀺, 𑀅𑀬𑀫𑁆𑀧𑀺 𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸 𑀯𑀺𑀳𑀭𑀢𑀺 𑀦𑀸𑀫. 𑀏𑀯𑀁 𑀤𑁂𑀲𑀦𑀸𑀯𑀲𑁂𑀦 𑀧𑀼𑀭𑀺𑀫𑀧𑀘𑁆𑀙𑀺𑀫𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸 𑀧𑀘𑁆𑀙𑀸 𑀢𑀣𑀸 𑀧𑀼𑀭𑁂𑀢𑀺 𑀇𑀤𑀁 𑀧𑀼𑀭𑀺𑀫𑀲𑁆𑀲𑁂𑀯 𑀯𑁂𑀯𑀘𑀦𑀁.

𑀬𑀣𑀸 𑀅𑀥𑁄 𑀢𑀣𑀸 𑀉𑀤𑁆𑀥𑀦𑁆𑀢𑀺 𑀇𑀤𑀁 𑀲𑀭𑀻𑀭𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀉𑀤𑁆𑀥𑀁 𑀧𑀸𑀤𑀢𑀮𑀸 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸’’𑀢𑀺. 𑀢𑀢𑁆𑀣 𑀬𑁄 𑀪𑀺𑀓𑁆𑀔𑀼 𑀧𑀸𑀤𑀢𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑁂𑀲𑀫𑀢𑁆𑀣𑀓𑀸 𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀯𑀲𑁂𑀦 𑀯𑀸 𑀧𑀸𑀤𑀗𑁆𑀕𑀼𑀮𑀺𑀅𑀕𑁆𑀕𑀧𑀩𑁆𑀩𑀝𑁆𑀞𑀺𑀢𑁄 𑀬𑀸𑀯 𑀲𑀻𑀲𑀓𑀝𑀸𑀳𑀁, 𑀲𑀻𑀲𑀓𑀝𑀸𑀳𑀢𑁄 𑀬𑀸𑀯 𑀧𑀸𑀤𑀗𑁆𑀕𑀼𑀮𑀻𑀦𑀁 𑀅𑀕𑁆𑀕𑀧𑀩𑁆𑀩𑀝𑁆𑀞𑀻𑀦𑀺, 𑀢𑀸𑀯 𑀅𑀝𑁆𑀞𑀺𑀯𑀲𑁂𑀦 𑀯𑀸 𑀪𑀸𑀯𑀦𑀁 𑀧𑀸𑀧𑁂𑀢𑀺 𑀘𑀢𑀽𑀲𑀼 𑀞𑀸𑀦𑁂𑀲𑀼 𑀏𑀓𑀝𑁆𑀞𑀸𑀦𑁂𑀧𑀺 𑀅𑀲𑀚𑁆𑀚𑀦𑁆𑀢𑁄. 𑀅𑀬𑀁 𑀬𑀣𑀸 𑀉𑀤𑁆𑀥𑀁 𑀢𑀣𑀸 𑀅𑀥𑁄, 𑀬𑀣𑀸 𑀅𑀥𑁄 𑀢𑀣𑀸 𑀉𑀤𑁆𑀥𑀁 𑀯𑀺𑀳𑀭𑀢𑀺 𑀦𑀸𑀫.

𑀬𑁂𑀳𑀺 𑀆𑀓𑀸𑀭𑁂𑀳𑀻𑀢𑀺 𑀬𑁂𑀳𑀺 𑀓𑁄𑀝𑁆𑀞𑀸𑀲𑁂𑀳𑀺. 𑀬𑁂𑀳𑀺 𑀮𑀺𑀗𑁆𑀕𑁂𑀳𑀻𑀢𑀺 𑀬𑁂𑀳𑀺 𑀲𑀡𑁆𑀞𑀸𑀦𑁂𑀳𑀺. 𑀬𑁂𑀳𑀺 𑀦𑀺𑀫𑀺𑀢𑁆𑀢𑁂𑀳𑀻𑀢𑀺 𑀬𑁂𑀳𑀺 𑀉𑀧𑀝𑁆𑀞𑀸𑀦𑁂𑀳𑀺. 𑀆𑀮𑁄𑀓𑀲𑀜𑁆𑀜𑀸 𑀲𑀼𑀕𑁆𑀕𑀳𑀺𑀢𑀸 𑀳𑁄𑀢𑀻𑀢𑀺 𑀬𑁄 𑀪𑀺𑀓𑁆𑀔𑀼 𑀅𑀗𑁆𑀕𑀡𑁂 𑀦𑀺𑀲𑀻𑀤𑀺𑀢𑁆𑀯𑀸 𑀆𑀮𑁄𑀓𑀲𑀜𑁆𑀜𑀁 𑀫𑀦𑀲𑀺 𑀓𑀭𑁄𑀢𑀺, 𑀓𑀸𑀮𑁂𑀦 𑀦𑀺𑀫𑀻𑀮𑁂𑀢𑀺, 𑀓𑀸𑀮𑁂𑀦 𑀉𑀫𑁆𑀫𑀻𑀮𑁂𑀢𑀺. 𑀅𑀣𑀲𑁆𑀲 𑀬𑀤𑀸 𑀦𑀺𑀫𑀻𑀮𑁂𑀦𑁆𑀢𑀲𑁆𑀲𑀸𑀧𑀺 𑀉𑀫𑁆𑀫𑀻𑀮𑁂𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑀲𑁆𑀲 𑀯𑀺𑀬 𑀏𑀓𑀲𑀤𑀺𑀲𑀫𑁂𑀯 𑀉𑀧𑀝𑁆𑀞𑀸𑀢𑀺, 𑀢𑀤𑀸 𑀆𑀮𑁄𑀓𑀲𑀜𑁆𑀜𑀸 𑀚𑀸𑀢𑀸 𑀦𑀸𑀫 𑀳𑁄𑀢𑀺. ‘‘𑀤𑀺𑀯𑀸𑀲𑀜𑁆𑀜𑀸’’𑀢𑀺𑀧𑀺 𑀢𑀲𑁆𑀲𑁂𑀯 𑀦𑀸𑀫𑀁. 𑀲𑀸 𑀘 𑀧𑀦 𑀭𑀢𑁆𑀢𑀺𑀁 𑀉𑀧𑁆𑀧𑀚𑁆𑀚𑀫𑀸𑀦𑀸 𑀲𑀼𑀕𑁆𑀕𑀳𑀺𑀢𑀸 𑀦𑀸𑀫 𑀳𑁄𑀢𑀺. 𑀲𑁆𑀯𑀸𑀥𑀺𑀝𑁆𑀞𑀺𑀢𑀸𑀢𑀺𑀧𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀲𑀼𑀝𑁆𑀞𑀼 𑀅𑀥𑀺𑀝𑁆𑀞𑀺𑀢𑀸 𑀲𑀼𑀝𑁆𑀞𑀼 𑀞𑀧𑀺𑀢𑀸 𑀲𑁆𑀯𑀸𑀥𑀺𑀝𑁆𑀞𑀺𑀢𑀸 𑀦𑀸𑀫 𑀯𑀼𑀘𑁆𑀘𑀢𑀺. 𑀲𑀸 𑀅𑀢𑁆𑀣𑀢𑁄 𑀲𑀼𑀕𑁆𑀕𑀳𑀺𑀢𑀸𑀬𑁂𑀯. 𑀬𑁄 𑀯𑀸 𑀆𑀮𑁄𑀓𑁂𑀦 𑀣𑀺𑀦𑀫𑀺𑀤𑁆𑀥𑀁 𑀯𑀺𑀦𑁄𑀤𑁂𑀢𑁆𑀯𑀸 𑀙𑀦𑁆𑀤𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀢𑀺, 𑀢𑀲𑁆𑀲 𑀤𑀺𑀯𑀸𑀧𑀺 𑀆𑀮𑁄𑀓𑀲𑀜𑁆𑀜𑀸 𑀲𑀼𑀕𑁆𑀕𑀳𑀺𑀢𑀸 𑀲𑁆𑀯𑀸𑀥𑀺𑀝𑁆𑀞𑀺𑀢𑀸 𑀦𑀸𑀫. 𑀭𑀢𑁆𑀢𑀺 𑀯𑀸 𑀳𑁄𑀢𑀼 𑀤𑀺𑀯𑀸 𑀯𑀸 𑀬𑁂𑀦 𑀆𑀮𑁄𑀓𑁂𑀦 𑀣𑀺𑀦𑀫𑀺𑀤𑁆𑀥𑀁 𑀯𑀺𑀦𑁄𑀤𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀁 𑀫𑀦𑀲𑀺 𑀓𑀭𑁄𑀢𑀺, 𑀢𑀲𑁆𑀫𑀺𑀁 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑁂 𑀆𑀮𑁄𑀓𑁂 𑀉𑀧𑁆𑀧𑀦𑁆𑀦𑀸 𑀲𑀜𑁆𑀜𑀸 𑀲𑀼𑀕𑁆𑀕𑀳𑀺𑀢𑀸𑀬𑁂𑀯 𑀦𑀸𑀫. 𑀯𑀻𑀭𑀺𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀙𑀦𑁆𑀦𑀁 𑀅𑀪𑀺𑀜𑁆𑀜𑀸𑀦𑀁 𑀧𑀸𑀤𑀓𑀺𑀤𑁆𑀥𑀺 𑀓𑀣𑀺𑀢𑀸.

𑀧𑀸𑀲𑀸𑀤𑀓𑀫𑁆𑀧𑀦𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀅𑀬𑁄𑀕𑀼𑀴𑀯𑀕𑁆𑀕𑁄

𑁨. 𑀅𑀬𑁄𑀕𑀼𑀴𑀲𑀼𑀢𑁆𑀢𑀯𑀡𑁆𑀡𑀦𑀸

𑁮𑁩𑁪. 𑀢𑀢𑀺𑀬𑀯𑀕𑁆𑀕𑀲𑁆𑀲 𑀤𑀼𑀢𑀺𑀬𑁂 𑀇𑀫𑀺𑀦𑀸 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑁂𑀦𑀸𑀢𑀺 𑀇𑀫𑀺𑀦𑀸 𑀘𑀢𑀼𑀫𑀳𑀸𑀪𑀽𑀢𑀫𑀬𑁂𑀦 𑀏𑀯𑀁 𑀪𑀸𑀭𑀺𑀓𑁂𑀦 𑀕𑀭𑀼𑀓𑁂𑀦 𑀲𑀫𑀸𑀦𑁂𑀦𑀸𑀧𑀺. 𑀑𑀫𑀸𑀢𑀻𑀢𑀺 𑀧𑀳𑁄𑀢𑀺 𑀲𑀓𑁆𑀓𑁄𑀢𑀺, 𑀇𑀤𑀁 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀅𑀲𑀫𑁆𑀪𑀺𑀦𑁆𑀦𑀧𑀤𑀁. 𑀓𑀸𑀬𑀫𑁆𑀧𑀺 𑀘𑀺𑀢𑁆𑀢𑁂 𑀲𑀫𑁄𑀤𑀳𑀢𑀻𑀢𑀺 𑀓𑀸𑀬𑀁 𑀕𑀳𑁂𑀢𑁆𑀯𑀸 𑀘𑀺𑀢𑁆𑀢𑁂 𑀆𑀭𑁄𑀧𑁂𑀢𑀺, 𑀘𑀺𑀢𑁆𑀢𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀭𑁄𑀢𑀺, 𑀘𑀺𑀢𑁆𑀢𑀕𑀢𑀺𑀬𑀸 𑀧𑁂𑀲𑁂𑀢𑀺. 𑀘𑀺𑀢𑁆𑀢𑀁 𑀦𑀸𑀫 𑀫𑀳𑀕𑁆𑀕𑀢𑀘𑀺𑀢𑁆𑀢𑀁, 𑀘𑀺𑀢𑁆𑀢𑀕𑀢𑀺𑀕𑀫𑀦𑀁 𑀮𑀳𑀼𑀓𑀁 𑀳𑁄𑀢𑀺. 𑀘𑀺𑀢𑁆𑀢𑀫𑁆𑀧𑀺 𑀓𑀸𑀬𑁂 𑀲𑀫𑁄𑀤𑀳𑀢𑀻𑀢𑀺 𑀘𑀺𑀢𑁆𑀢𑀁 𑀕𑀳𑁂𑀢𑁆𑀯𑀸 𑀓𑀸𑀬𑁂 𑀆𑀭𑁄𑀧𑁂𑀢𑀺, 𑀓𑀸𑀬𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀭𑁄𑀢𑀺, 𑀓𑀸𑀬𑀕𑀢𑀺𑀬𑀸 𑀧𑁂𑀲𑁂𑀢𑀺, 𑀓𑀸𑀬𑁄 𑀦𑀸𑀫 𑀓𑀭𑀚𑀓𑀸𑀬𑁄, 𑀓𑀸𑀬𑀕𑀢𑀺𑀕𑀫𑀦𑀁 𑀤𑀦𑁆𑀥𑀁 𑀳𑁄𑀢𑀺. 𑀲𑀼𑀔𑀲𑀜𑁆𑀜𑀜𑁆𑀘 𑀮𑀳𑀼𑀲𑀜𑁆𑀜𑀜𑁆𑀘𑀸𑀢𑀺 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀲𑀳𑀚𑀸𑀢𑀲𑀜𑁆𑀜𑀸. 𑀲𑀸 𑀳𑀺 𑀲𑀦𑁆𑀢𑀲𑀼𑀔𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀲𑀼𑀔𑀲𑀜𑁆𑀜𑀸 𑀦𑀸𑀫 𑀳𑁄𑀢𑀺, 𑀓𑀺𑀮𑁂𑀲𑀤𑀦𑁆𑀥𑀸𑀬𑀺𑀢𑀢𑁆𑀢𑀲𑁆𑀲 𑀘 𑀅𑀪𑀸𑀯𑀸 𑀮𑀳𑀼𑀲𑀜𑁆𑀜𑀸 𑀦𑀸𑀫.

𑀅𑀬𑁄𑀕𑀼𑀴𑁄 𑀤𑀺𑀯𑀲𑀁 𑀲𑀦𑁆𑀢𑀢𑁆𑀢𑁄 𑀮𑀳𑀼𑀢𑀭𑁄 𑀘𑁂𑀯 𑀳𑁄𑀢𑀻𑀢𑀺 𑀲𑁄 𑀳𑀺 𑀤𑁆𑀯𑀻𑀳𑀺 𑀢𑀻𑀳𑀺 𑀚𑀦𑁂𑀳𑀺 𑀉𑀓𑁆𑀔𑀺𑀧𑀺𑀢𑁆𑀯𑀸 𑀓𑀫𑁆𑀫𑀸𑀭𑀼𑀤𑁆𑀥𑀦𑁂 𑀧𑀓𑁆𑀔𑀺𑀢𑁆𑀢𑁄𑀧𑀺 𑀤𑀺𑀯𑀲𑀁 𑀧𑀘𑁆𑀘𑀫𑀸𑀦𑁄 𑀯𑀺𑀯𑀭𑀸𑀦𑀼𑀧𑀯𑀺𑀝𑁆𑀞𑁂𑀦 𑀢𑁂𑀚𑁂𑀦 𑀘𑁂𑀯 𑀯𑀸𑀬𑁂𑀦 𑀘 𑀯𑀸𑀬𑁄𑀲𑀳𑀕𑀢𑁄 𑀘 𑀉𑀲𑁆𑀫𑀸𑀲𑀳𑀕𑀢𑁄 𑀘 𑀢𑁂𑀚𑁄𑀲𑀳𑀕𑀢𑁄 𑀘 𑀳𑀼𑀢𑁆𑀯𑀸 𑀏𑀯𑀁 𑀮𑀳𑀼𑀓𑁄 𑀳𑁄𑀢𑀺, 𑀬𑀣𑀸 𑀦𑀁 𑀓𑀫𑁆𑀫𑀸𑀭𑁄 𑀫𑀳𑀸𑀲𑀡𑁆𑀟𑀸𑀲𑁂𑀦 𑀕𑀳𑁂𑀢𑁆𑀯𑀸 𑀏𑀓𑀢𑁄 𑀧𑀭𑀺𑀯𑀢𑁆𑀢𑁂𑀢𑀺 𑀉𑀓𑁆𑀔𑀺𑀧𑀢𑀺 𑀩𑀳𑀺 𑀦𑀻𑀳𑀭𑀢𑀺. 𑀏𑀯𑀁 𑀧𑀦 𑀫𑀼𑀤𑀼 𑀘 𑀳𑁄𑀢𑀺 𑀓𑀫𑁆𑀫𑀦𑀺𑀬𑁄 𑀘. 𑀬𑀣𑀸 𑀦𑀁 𑀲𑁄 𑀔𑀡𑁆𑀟𑀁 𑀔𑀡𑁆𑀟𑀁 𑀯𑀺𑀘𑁆𑀙𑀺𑀦𑁆𑀤𑀢𑀺, 𑀓𑀽𑀝𑁂𑀦 𑀳𑀦𑀦𑁆𑀢𑁄 𑀤𑀻𑀖𑀘𑀢𑀼𑀭𑀲𑁆𑀲𑀸𑀤𑀺𑀪𑁂𑀤𑀁 𑀓𑀭𑁄𑀢𑀺. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀺𑀓𑀼𑀩𑁆𑀩𑀦𑀺𑀤𑁆𑀥𑀺 𑀓𑀣𑀺𑀢𑀸.

𑁩-𑁧𑁦. 𑀪𑀺𑀓𑁆𑀔𑀼𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁮𑁩𑁫-𑁮𑁪𑁨. 𑀢𑀢𑀺𑀬𑁂 𑀯𑀺𑀯𑀝𑁆𑀝𑀧𑀸𑀤𑀓𑀺𑀤𑁆𑀥𑀺 𑀓𑀣𑀺𑀢𑀸, 𑀢𑀣𑀸 𑀘𑀢𑀼𑀢𑁆𑀣𑁂. 𑀅𑀧𑀺𑀘 𑀤𑁆𑀯𑁂 𑀨𑀮𑀸𑀦𑀺 𑀆𑀤𑀺𑀁 𑀓𑀢𑁆𑀯𑀸 𑀳𑁂𑀝𑁆𑀞𑀸 𑀫𑀺𑀲𑁆𑀲𑀓𑀺𑀤𑁆𑀥𑀺𑀧𑀸𑀤𑀸 𑀓𑀣𑀺𑀢𑀸, 𑀲𑀢𑁆𑀢𑀲𑀼 𑀨𑀮𑁂𑀲𑀼 𑀧𑀼𑀩𑁆𑀩𑀪𑀸𑀕𑀸. 𑀲𑀢𑁆𑀢𑀫𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀳𑁂𑀝𑁆𑀞𑀸 𑀓𑀣𑀺𑀢𑀦𑀬𑀸𑀦𑁂𑀯.

𑁧𑁧-𑁧𑁨. 𑀫𑁄𑀕𑁆𑀕𑀮𑁆𑀮𑀸𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁮𑁪𑁩-𑁮𑁪𑁪. 𑀏𑀓𑀸𑀤𑀲𑀫𑀤𑁆𑀯𑀸𑀤𑀲𑀫𑁂𑀲𑀼 𑀙 𑀅𑀪𑀺𑀜𑁆𑀜𑀸 𑀓𑀣𑀺𑀢𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀇𑀤𑁆𑀥𑀺𑀧𑀸𑀤𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀦𑀼𑀭𑀼𑀤𑁆𑀥𑀲𑀁𑀬𑀼𑀢𑁆𑀢𑀁

𑁧. 𑀭𑀳𑁄𑀕𑀢𑀯𑀕𑁆𑀕𑁄

𑁧-𑁨. 𑀧𑀞𑀫𑀭𑀳𑁄𑀕𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁮𑁯𑁯-𑁯𑁦𑁦. 𑀅𑀦𑀼𑀭𑀼𑀤𑁆𑀥𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀆𑀭𑀤𑁆𑀥𑀸𑀢𑀺 𑀧𑀭𑀺𑀧𑀼𑀡𑁆𑀡𑀸. 𑀲𑀗𑁆𑀔𑁂𑀧𑀢𑁄 𑀧𑀦𑁂𑀢𑁆𑀣 𑀙𑀢𑁆𑀢𑀺𑀁𑀲𑀸𑀬 𑀞𑀸𑀦𑁂𑀲𑀼 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸, 𑀤𑀼𑀢𑀺𑀬𑁂 𑀤𑁆𑀯𑀸𑀤𑀲𑀲𑀼 𑀞𑀸𑀦𑁂𑀲𑀼 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸.

𑁩. 𑀲𑀼𑀢𑀦𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁦𑁧. 𑀢𑀢𑀺𑀬𑁂 𑀫𑀳𑀸𑀪𑀺𑀜𑁆𑀜𑀢𑀦𑁆𑀢𑀺 𑀙𑀅𑀪𑀺𑀜𑁆𑀜𑀸𑀪𑀸𑀯𑀁. 𑀳𑀻𑀦𑀁 𑀥𑀫𑁆𑀫𑀦𑁆𑀢𑀺𑀆𑀤𑀻𑀲𑀼 𑀇𑀫𑀸𑀬 𑀧𑀸𑀴𑀺𑀬𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 𑁋

‘‘𑀓𑀢𑀫𑁂 𑀥𑀫𑁆𑀫𑀸 𑀳𑀻𑀦𑀸? 𑀤𑁆𑀯𑀸𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸, 𑀇𑀫𑁂 𑀥𑀫𑁆𑀫𑀸 𑀳𑀻𑀦𑀸. 𑀓𑀢𑀫𑁂 𑀥𑀫𑁆𑀫𑀸 𑀫𑀚𑁆𑀛𑀺𑀫𑀸? 𑀢𑀻𑀲𑀼 𑀪𑀽𑀫𑀻𑀲𑀼 𑀓𑀼𑀲𑀮𑀁, 𑀢𑀻𑀲𑀼 𑀪𑀽𑀫𑀻𑀲𑀼 𑀯𑀺𑀧𑀸𑀓𑁄, 𑀢𑀻𑀲𑀼 𑀪𑀽𑀫𑀻𑀲𑀼 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁 𑀲𑀩𑁆𑀩𑀜𑁆𑀘 𑀭𑀽𑀧𑀁, 𑀇𑀫𑁂 𑀥𑀫𑁆𑀫𑀸 𑀫𑀚𑁆𑀛𑀺𑀫𑀸. 𑀓𑀢𑀫𑁂 𑀥𑀫𑁆𑀫𑀸 𑀧𑀡𑀻𑀢𑀸? 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀅𑀧𑀭𑀺𑀬𑀸𑀧𑀦𑁆𑀦𑀸, 𑀘𑀢𑁆𑀢𑀸𑀭𑀺 𑀘 𑀲𑀸𑀫𑀜𑁆𑀜𑀨𑀮𑀸𑀦𑀺 𑀦𑀺𑀩𑁆𑀩𑀸𑀦𑀜𑁆𑀘, 𑀇𑀫𑁂 𑀥𑀫𑁆𑀫𑀸 𑀧𑀡𑀻𑀢𑀸’’𑀢𑀺 (𑀥. 𑀲. 𑁧𑁪𑁨𑁩-𑁧𑁪𑁨𑁫).

𑁪-𑁭. 𑀧𑀞𑀫𑀓𑀡𑁆𑀟𑀓𑀻𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁦𑁨-𑁯𑁦𑁫. 𑀘𑀢𑀼𑀢𑁆𑀣𑁂 𑀓𑀡𑁆𑀟𑀓𑀻𑀯𑀦𑁂𑀢𑀺 𑀫𑀳𑀸𑀓𑀭𑀫𑀦𑁆𑀤𑀯𑀦𑁂. 𑀙𑀝𑁆𑀞𑁂 𑀲𑀳𑀲𑁆𑀲𑀁 𑀮𑁄𑀓𑀦𑁆𑀢𑀺 𑀇𑀫𑀺𑀦𑀸 𑀣𑁂𑀭𑀲𑁆𑀲 𑀲𑀢𑀢 𑀯𑀺𑀳𑀸𑀭𑁄 𑀤𑀲𑁆𑀲𑀺𑀢𑁄. 𑀣𑁂𑀭𑁄 𑀳𑀺 𑀧𑀸𑀢𑁄𑀯 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀅𑀢𑀻𑀢𑀸𑀦𑀸𑀕𑀢𑁂 𑀓𑀧𑁆𑀧𑀲𑀳𑀲𑁆𑀲𑀁 𑀅𑀦𑀼𑀲𑁆𑀲𑀭𑀢𑀺. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀧𑀦 𑀤𑀲𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀁 𑀏𑀓𑀸𑀯𑀚𑁆𑀚𑀦𑀲𑁆𑀲 𑀆𑀧𑀸𑀣𑀫𑀸𑀕𑀘𑁆𑀙𑀢𑀺. 𑀲𑀢𑁆𑀢𑀫𑀁 𑀉𑀢𑁆𑀢𑀸𑀦𑀫𑁂𑀯.

𑁮. 𑀲𑀮𑀴𑀸𑀕𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁦𑁬. 𑀅𑀝𑁆𑀞𑀫𑁂 𑀲𑀮𑀴𑀸𑀕𑀸𑀭𑁂𑀢𑀺 𑀲𑀮𑀴𑀭𑀼𑀓𑁆𑀔𑀫𑀬𑀸𑀬 𑀧𑀡𑁆𑀡𑀲𑀸𑀮𑀸𑀬, 𑀲𑀮𑀴𑀭𑀼𑀓𑁆𑀔𑀲𑁆𑀲 𑀯𑀸 𑀤𑁆𑀯𑀸𑀭𑁂 𑀞𑀺𑀢𑀢𑁆𑀢𑀸 𑀏𑀯𑀁𑀦𑀸𑀫𑀓𑁂 𑀅𑀕𑀸𑀭𑁂. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀺𑀧𑀲𑁆𑀲𑀦𑀸𑀬 𑀲𑀤𑁆𑀥𑀺𑀁 𑀯𑀺𑀧𑀲𑁆𑀲𑀓𑀧𑀼𑀕𑁆𑀕𑀮𑁄 𑀓𑀣𑀺𑀢𑁄.

𑁯. 𑀅𑀫𑁆𑀩𑀧𑀸𑀮𑀺𑀯𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁦𑁭. 𑀦𑀯𑀫𑁂 𑀆𑀲𑀪𑀺𑀁 𑀯𑀸𑀘𑀦𑁆𑀢𑀺 𑀅𑀢𑁆𑀢𑀦𑁄 𑀅𑀭𑀳𑀢𑁆𑀢𑀪𑀸𑀯𑀤𑀻𑀧𑀓𑀁 𑀉𑀢𑁆𑀢𑀫𑀯𑀸𑀘𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀭𑀳𑁄𑀕𑀢𑀯𑀕𑁆𑀕𑁄 𑀧𑀞𑀫𑁄.

𑁨. 𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸

𑁯𑁦𑁯-𑁯𑁨𑁨. 𑀤𑀼𑀢𑀺𑀬𑀯𑀕𑁆𑀕𑁂 𑀞𑀸𑀦𑀜𑁆𑀘 𑀞𑀸𑀦𑀢𑁄𑀢𑀺𑀆𑀤𑀻𑀳𑀺 𑀣𑁂𑀭𑁄 𑀤𑀲𑀩𑀮𑀜𑀸𑀡𑀁 𑀧𑀝𑀺𑀚𑀸𑀦𑀸𑀢𑀺. 𑀓𑀺𑀫𑁆𑀧𑀦𑁂𑀢𑀁 𑀲𑀸𑀯𑀓𑀸𑀦𑀁 𑀳𑁄𑀢𑀻𑀢𑀺? 𑀏𑀓𑀤𑁂𑀲𑁂𑀦 𑀳𑁄𑀢𑀺, 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁 𑀧𑀦𑁂𑀢𑀁 𑀦𑀺𑀧𑁆𑀧𑀤𑁂𑀲𑀁 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀦𑁆𑀢𑀺.

𑀅𑀦𑀼𑀭𑀼𑀤𑁆𑀥𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀛𑀸𑀦𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸

𑁯𑁨𑁩. 𑀛𑀸𑀦𑀲𑀁𑀬𑀼𑀢𑁆𑀢𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀛𑀸𑀦𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀆𑀦𑀸𑀧𑀸𑀦𑀲𑀁𑀬𑀼𑀢𑁆𑀢𑀁

𑁧. 𑀏𑀓𑀥𑀫𑁆𑀫𑀯𑀕𑁆𑀕𑁄

𑁧. 𑀏𑀓𑀥𑀫𑁆𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁭𑁭. 𑀆𑀦𑀸𑀧𑀸𑀦𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀏𑀓𑀥𑀫𑁆𑀫𑁄𑀢𑀺 𑀏𑀓𑁄 𑀥𑀫𑁆𑀫𑁄. 𑀲𑁂𑀲𑀫𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀲𑀩𑁆𑀩𑀁 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁧𑁫) 𑀆𑀦𑀸𑀧𑀸𑀦𑀲𑁆𑀲𑀢𑀺𑀓𑀫𑁆𑀫𑀝𑁆𑀞𑀸𑀦𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀫𑁂𑀯.

𑁬. 𑀅𑀭𑀺𑀝𑁆𑀞𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁮𑁨. 𑀙𑀝𑁆𑀞𑁂 𑀪𑀸𑀯𑁂𑀣 𑀦𑁄𑀢𑀺 𑀪𑀸𑀯𑁂𑀣 𑀦𑀼. 𑀓𑀸𑀫𑀘𑁆𑀙𑀦𑁆𑀤𑁄𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀭𑀸𑀕𑁄. 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀘 𑀥𑀫𑁆𑀫𑁂𑀲𑀽𑀢𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑁂𑀲𑀼 𑀤𑁆𑀯𑀸𑀤𑀲𑀲𑀼 𑀆𑀬𑀢𑀦𑀥𑀫𑁆𑀫𑁂𑀲𑀼. 𑀧𑀝𑀺𑀖𑀲𑀜𑁆𑀜𑀸 𑀲𑀼𑀧𑁆𑀧𑀝𑀺𑀯𑀺𑀦𑀻𑀢𑀸𑀢𑀺 𑀧𑀝𑀺𑀖𑀲𑀫𑁆𑀧𑀬𑀼𑀢𑁆𑀢𑀲𑀜𑁆𑀜𑀸 𑀲𑀼𑀝𑁆𑀞𑀼 𑀧𑀝𑀺𑀯𑀺𑀦𑀻𑀢𑀸, 𑀲𑀫𑀼𑀘𑁆𑀙𑀺𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑀁 𑀓𑀣𑁂𑀢𑀺. 𑀇𑀤𑀸𑀦𑀺 𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀁 𑀤𑀲𑁆𑀲𑁂𑀦𑁆𑀢𑁄 𑀲𑁄 𑀲𑀢𑁄𑀯 𑀅𑀲𑁆𑀲𑀲𑀺𑀲𑁆𑀲𑀸𑀫𑀻𑀢𑀺𑀆𑀤𑀺𑀫𑀸𑀳.

𑁭. 𑀫𑀳𑀸𑀓𑀧𑁆𑀧𑀺𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁮𑁩. 𑀲𑀢𑁆𑀢𑀫𑁂 𑀇𑀜𑁆𑀚𑀺𑀢𑀢𑁆𑀢𑀁 𑀯𑀸 𑀨𑀦𑁆𑀤𑀺𑀢𑀢𑁆𑀢𑀁 𑀯𑀸𑀢𑀺 𑀉𑀪𑀬𑁂𑀦𑀧𑀺 𑀘𑀮𑀦𑀫𑁂𑀯 𑀓𑀣𑀺𑀢𑀁.

𑁮. 𑀧𑀤𑀻𑀧𑁄𑀧𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁮𑁪. 𑀅𑀝𑁆𑀞𑀫𑁂 𑀦𑁂𑀯 𑀓𑀸𑀬𑁄𑀧𑀺 𑀓𑀺𑀮𑀫𑀢𑀺 𑀦 𑀘𑀓𑁆𑀔𑀽𑀦𑀻𑀢𑀺 𑀅𑀜𑁆𑀜𑁂𑀲𑀼 𑀳𑀺 𑀓𑀫𑁆𑀫𑀝𑁆𑀞𑀸𑀦𑁂𑀲𑀼 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀓𑀸𑀬𑁄𑀧𑀺 𑀓𑀺𑀮𑀫𑀢𑀺, 𑀘𑀓𑁆𑀔𑀽𑀦𑀺𑀧𑀺 𑀯𑀺𑀳𑀜𑁆𑀜𑀦𑁆𑀢𑀺. 𑀥𑀸𑀢𑀼𑀓𑀫𑁆𑀫𑀝𑁆𑀞𑀸𑀦𑀲𑁆𑀫𑀺𑀜𑁆𑀳𑀺 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀓𑀸𑀬𑁄 𑀓𑀺𑀮𑀫𑀢𑀺, 𑀬𑀦𑁆𑀢𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀻𑀴𑀦𑀸𑀓𑀸𑀭𑀧𑁆𑀧𑀢𑁆𑀢𑁄 𑀯𑀺𑀬 𑀳𑁄𑀢𑀺. 𑀓𑀲𑀺𑀡𑀓𑀫𑁆𑀫𑀝𑁆𑀞𑀸𑀦𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀘𑀓𑁆𑀔𑀽𑀦𑀺 𑀨𑀦𑁆𑀤𑀦𑁆𑀢𑀺 𑀓𑀺𑀮𑀫𑀦𑁆𑀢𑀺, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀢𑀦𑀸𑀓𑀸𑀭𑀧𑁆𑀧𑀢𑁆𑀢𑀸𑀦𑀺 𑀯𑀺𑀬 𑀳𑁄𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀧𑀦 𑀓𑀫𑁆𑀫𑀝𑁆𑀞𑀸𑀦𑁂 𑀓𑀫𑁆𑀫𑀁 𑀓𑀭𑁄𑀦𑁆𑀢𑀲𑁆𑀲 𑀦𑁂𑀯 𑀓𑀸𑀬𑁄 𑀓𑀺𑀮𑀫𑀢𑀺, 𑀦 𑀅𑀓𑁆𑀔𑀻𑀦𑀺 𑀯𑀺𑀳𑀜𑁆𑀜𑀦𑁆𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳.

𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀦𑁆𑀢𑀺𑀆𑀤𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀓𑀺𑀁 𑀆𑀦𑀸𑀧𑀸𑀦𑁂 𑀓𑀲𑀺𑀡𑀼𑀕𑁆𑀖𑀸𑀝𑀦𑀁 𑀮𑀩𑁆𑀪𑀢𑀻𑀢𑀺? 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀬𑀲𑁆𑀫𑀸 𑀆𑀦𑀸𑀧𑀸𑀦𑀦𑀺𑀫𑀺𑀢𑁆𑀢𑀁 𑀢𑀸𑀭𑀓𑀭𑀽𑀧𑀫𑀼𑀢𑁆𑀢𑀸𑀯𑀮𑀺𑀓𑀸𑀤𑀺𑀲𑀤𑀺𑀲𑀁 𑀳𑀼𑀢𑁆𑀯𑀸 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀓𑀲𑀺𑀡𑀼𑀕𑁆𑀖𑀸𑀝𑀦𑀁 𑀮𑀩𑁆𑀪𑀢𑀻’’𑀢𑀺. 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑁄 ‘‘𑀦 𑀮𑀩𑁆𑀪𑀢𑁂𑀯𑀸’’𑀢𑀺 𑀆𑀳. 𑀅𑀮𑀩𑁆𑀪𑀦𑁆𑀢𑁂 𑀅𑀬𑀁 𑀅𑀭𑀺𑀬𑀺𑀤𑁆𑀥𑀺𑀆𑀤𑀺𑀓𑁄 𑀧𑀪𑁂𑀤𑁄 𑀓𑀲𑁆𑀫𑀸 𑀕𑀳𑀺𑀢𑁄𑀢𑀺? 𑀆𑀦𑀺𑀲𑀁𑀲𑀤𑀲𑁆𑀲𑀦𑀢𑁆𑀣𑀁. 𑀅𑀭𑀺𑀬𑀁 𑀯𑀸 𑀳𑀺 𑀇𑀤𑁆𑀥𑀺𑀁 𑀘𑀢𑁆𑀢𑀸𑀭𑀺 𑀯𑀸 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀘𑀢𑀲𑁆𑀲𑁄 𑀯𑀸 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀯𑀸 𑀧𑀢𑁆𑀣𑀬𑀫𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀅𑀬𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺 𑀲𑀸𑀥𑀼𑀓𑀁 𑀫𑀦𑀲𑀺𑀓𑀸𑀢𑀩𑁆𑀩𑁄. 𑀬𑀣𑀸 𑀳𑀺 𑀦𑀕𑀭𑁂 𑀮𑀤𑁆𑀥𑁂 𑀬𑀁 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀉𑀝𑁆𑀞𑀸𑀦𑀓𑀪𑀡𑁆𑀟𑀁, 𑀢𑀁 𑀘𑀢𑀽𑀳𑀺 𑀤𑁆𑀯𑀸𑀭𑁂𑀳𑀺 𑀦𑀕𑀭𑀫𑁂𑀯 𑀧𑀯𑀺𑀲𑀢𑀻𑀢𑀺, 𑀚𑀦𑀧𑀤𑁄 𑀮𑀤𑁆𑀥𑁄 𑀘 𑀳𑁄𑀢𑀺. 𑀦𑀕𑀭𑀲𑁆𑀲𑁂𑀯 𑀳𑁂𑀲𑁄 𑀆𑀦𑀺𑀲𑀁𑀲𑁄. 𑀏𑀯𑀁 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑁄 𑀏𑀲 𑀅𑀭𑀺𑀬𑀺𑀤𑁆𑀥𑀺𑀆𑀤𑀺𑀓𑁄 𑀧𑀪𑁂𑀤𑁄, 𑀲𑀩𑁆𑀩𑀸𑀓𑀸𑀭𑁂𑀦 𑀪𑀸𑀯𑀺𑀢𑁂 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀲𑁆𑀫𑀺𑀁 𑀲𑀩𑁆𑀩𑀫𑁂𑀢𑀁 𑀬𑁄𑀕𑀺𑀦𑁄 𑀦𑀺𑀧𑁆𑀨𑀚𑁆𑀚𑀢𑀻𑀢𑀺 𑀆𑀦𑀺𑀲𑀁𑀲𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑀼𑀔𑀜𑁆𑀘𑁂𑀢𑀺 𑀏𑀢𑁆𑀣 𑀲𑁄𑀢𑀺 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀁? 𑀬𑀲𑁆𑀫𑀸 𑀪𑀺𑀓𑁆𑀔𑀽𑀢𑀺 𑀇𑀫𑀲𑁆𑀫𑀺𑀁 𑀯𑀸𑀭𑁂 𑀦𑀸𑀕𑀢𑀁.

𑁯. 𑀯𑁂𑀲𑀸𑀮𑀻𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁮𑁫. 𑀦𑀯𑀫𑁂 𑀯𑁂𑀲𑀸𑀮𑀺𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀇𑀢𑁆𑀣𑀺𑀮𑀺𑀗𑁆𑀕𑀯𑀲𑁂𑀦 𑀧𑀯𑀢𑁆𑀢𑀯𑁄𑀳𑀸𑀭𑁂 𑀦𑀕𑀭𑁂. 𑀢𑀜𑁆𑀳𑀺 𑀦𑀕𑀭𑀁 𑀢𑀺𑀓𑁆𑀔𑀢𑁆𑀢𑀼𑀁 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑀯𑀟𑁆𑀠𑀦𑁂𑀦 𑀯𑀺𑀲𑀸𑀮𑀻𑀪𑀽𑀢𑀢𑁆𑀢𑀸 𑀯𑁂𑀲𑀸𑀮𑀻𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀫𑁆𑀧𑀺 𑀘 𑀦𑀕𑀭𑀁 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁂𑀬𑁂𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀲𑀩𑁆𑀩𑀸𑀓𑀸𑀭𑀯𑁂𑀧𑀼𑀮𑁆𑀮𑀢𑀁 𑀧𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀕𑁄𑀘𑀭𑀕𑀸𑀫𑀁 𑀤𑀲𑁆𑀲𑁂𑀢𑁆𑀯𑀸 𑀦𑀺𑀯𑀸𑀲𑀝𑁆𑀞𑀸𑀦𑀫𑀸𑀳 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀦𑁆𑀢𑀺. 𑀢𑀢𑁆𑀣 𑀫𑀳𑀸𑀯𑀦𑀁 𑀦𑀸𑀫 𑀲𑀬𑀁𑀚𑀸𑀢𑀁 𑀅𑀭𑁄𑀧𑀺𑀫𑀁 𑀲𑀧𑀭𑀺𑀘𑁆𑀙𑁂𑀤𑀁 𑀫𑀳𑀦𑁆𑀢𑀁 𑀯𑀦𑀁. 𑀓𑀧𑀺𑀮𑀯𑀢𑁆𑀣𑀼𑀲𑀸𑀫𑀦𑁆𑀢𑀸 𑀧𑀦 𑀫𑀳𑀸𑀯𑀦𑀁 𑀳𑀺𑀫𑀯𑀦𑁆𑀢𑁂𑀦 𑀲𑀳 𑀏𑀓𑀸𑀩𑀤𑁆𑀥𑀁 𑀅𑀧𑀭𑀺𑀘𑁆𑀙𑁂𑀤𑀁 𑀳𑀼𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀆𑀳𑀘𑁆𑀘 𑀞𑀺𑀢𑀁. 𑀇𑀤𑀁 𑀢𑀸𑀤𑀺𑀲𑀁 𑀦 𑀳𑁄𑀢𑀺, 𑀲𑀧𑀭𑀺𑀘𑁆𑀙𑁂𑀤𑀁 𑀫𑀳𑀦𑁆𑀢𑀁 𑀯𑀦𑀦𑁆𑀢𑀺 𑀫𑀳𑀸𑀯𑀦𑀁. 𑀓𑀽𑀝𑀸𑀕𑀸𑀭𑀲𑀸𑀮𑀸 𑀧𑀦 𑀫𑀳𑀸𑀯𑀦𑀁 𑀦𑀺𑀲𑁆𑀲𑀸𑀬 𑀓𑀢𑁂 𑀆𑀭𑀸𑀫𑁂 𑀓𑀽𑀝𑀸𑀕𑀸𑀭𑀁 𑀅𑀦𑁆𑀢𑁄𑀓𑀢𑁆𑀯𑀸 𑀳𑀁𑀲𑀯𑀝𑁆𑀝𑀓𑀘𑁆𑀙𑀦𑁆𑀦𑁂𑀦 𑀓𑀢𑀸 𑀲𑀩𑁆𑀩𑀸𑀓𑀸𑀭𑀲𑀫𑁆𑀧𑀦𑁆𑀦𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀕𑀦𑁆𑀥𑀓𑀼𑀝𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀅𑀲𑀼𑀪𑀓𑀣𑀁 𑀓𑀣𑁂𑀢𑀻𑀢𑀺 𑀅𑀦𑁂𑀓𑁂𑀳𑀺 𑀓𑀸𑀭𑀡𑁂𑀳𑀺 𑀅𑀲𑀼𑀪𑀸𑀓𑀸𑀭𑀲𑀦𑁆𑀤𑀲𑁆𑀲𑀦𑀧𑁆𑀧𑀯𑀢𑁆𑀢𑀁 𑀓𑀸𑀬𑀯𑀺𑀘𑁆𑀙𑀦𑁆𑀤𑀦𑀻𑀬𑀓𑀣𑀁 𑀓𑀣𑁂𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀢𑁆𑀣𑀺 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀓𑁂𑀲𑀸 𑀮𑁄𑀫𑀸 𑀦𑀔𑀸 𑀤𑀦𑁆𑀢𑀸…𑀧𑁂… 𑀫𑀼𑀢𑁆𑀢𑀦𑁆𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀩𑁆𑀬𑀸𑀫𑀫𑀢𑁆𑀢𑁂 𑀓𑀴𑁂𑀯𑀭𑁂 𑀲𑀩𑁆𑀩𑀸𑀓𑀸𑀭𑁂𑀦𑀧𑀺 𑀯𑀺𑀘𑀺𑀦𑀦𑁆𑀢𑁄 𑀦 𑀓𑁄𑀘𑀺 𑀓𑀺𑀜𑁆𑀘𑀺 𑀫𑀼𑀢𑁆𑀢𑀁 𑀯𑀸 𑀫𑀡𑀺𑀁 𑀯𑀸 𑀯𑁂𑀴𑀼𑀭𑀺𑀬𑀁 𑀯𑀸 𑀅𑀕𑀭𑀼𑀁 𑀯𑀸 𑀘𑀦𑁆𑀤𑀦𑀁 𑀯𑀸 𑀓𑀼𑀗𑁆𑀓𑀼𑀫𑀁 𑀯𑀸 𑀓𑀧𑁆𑀧𑀼𑀭𑀁 𑀯𑀸 𑀯𑀸𑀲𑀘𑀼𑀡𑁆𑀡𑀸𑀤𑀺𑀁 𑀯𑀸 𑀅𑀡𑀼𑀫𑀢𑁆𑀢𑀫𑁆𑀧𑀺 𑀲𑀼𑀘𑀺𑀪𑀸𑀯𑀁 𑀧𑀲𑁆𑀲𑀢𑀺, 𑀅𑀣 𑀔𑁄 𑀧𑀭𑀫𑀤𑀼𑀕𑁆𑀕𑀦𑁆𑀥𑀁 𑀚𑁂𑀕𑀼𑀘𑁆𑀙𑀅𑀲𑁆𑀲𑀺𑀭𑀺𑀓𑀤𑀲𑁆𑀲𑀦𑀁 𑀓𑁂𑀲𑀮𑁄𑀫𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀁 𑀅𑀲𑀼𑀘𑀺𑀫𑁂𑀯 𑀧𑀲𑁆𑀲𑀢𑀺, 𑀢𑀲𑁆𑀫𑀸 𑀦 𑀏𑀢𑁆𑀣 𑀙𑀦𑁆𑀤𑁄 𑀯𑀸 𑀭𑀸𑀕𑁄 𑀯𑀸 𑀓𑀭𑀡𑀻𑀬𑁄. 𑀬𑁂𑀧𑀺 𑀉𑀢𑁆𑀢𑀫𑀗𑁆𑀕𑁂 𑀲𑀺𑀭𑀲𑀺 𑀚𑀸𑀢𑀸 𑀓𑁂𑀲𑀸 𑀦𑀸𑀫, 𑀢𑁂𑀧𑀺 𑀅𑀲𑀼𑀪𑀸 𑀘𑁂𑀯 𑀅𑀲𑀼𑀘𑀺𑀦𑁄 𑀘 𑀧𑀝𑀺𑀓𑀽𑀮𑀸 𑀘. 𑀲𑁄 𑀘 𑀦𑁂𑀲𑀁 𑀅𑀲𑀼𑀪𑀸𑀲𑀼𑀘𑀺𑀧𑀝𑀺𑀓𑀽𑀮𑀪𑀸𑀯𑁄 𑀯𑀡𑁆𑀡𑀢𑁄𑀧𑀺 𑀲𑀡𑁆𑀞𑀸𑀦𑀢𑁄𑀧𑀺 𑀕𑀦𑁆𑀥𑀢𑁄𑀧𑀺 𑀆𑀲𑀬𑀢𑁄𑀧𑀺 𑀑𑀓𑀸𑀲𑀢𑁄𑀧𑀻𑀢𑀺 𑀧𑀜𑁆𑀘𑀳𑀸𑀓𑀸𑀭𑁂𑀳𑀺 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀮𑁄𑀫𑀸𑀤𑀻𑀦𑀫𑁆𑀧𑀻𑀢𑀺 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁩𑁦𑁭) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀇𑀢𑀺 𑀪𑀕𑀯𑀸 𑀏𑀓𑀫𑁂𑀓𑀲𑁆𑀫𑀺𑀁 𑀓𑁄𑀝𑁆𑀞𑀸𑀲𑁂 𑀧𑀜𑁆𑀘𑀧𑀜𑁆𑀘𑀧𑁆𑀧𑀪𑁂𑀤𑁂𑀦 𑀅𑀦𑁂𑀓𑀧𑀭𑀺𑀬𑀸𑀬𑁂𑀦 𑀅𑀲𑀼𑀪𑀓𑀣𑀁 𑀓𑀣𑁂𑀢𑀺.

𑀅𑀲𑀼𑀪𑀸𑀬 𑀯𑀡𑁆𑀡𑀁 𑀪𑀸𑀲𑀢𑀻𑀢𑀺 𑀉𑀤𑁆𑀥𑀼𑀫𑀸𑀢𑀓𑀸𑀤𑀺𑀯𑀲𑁂𑀦 𑀅𑀲𑀼𑀪𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀤𑀪𑀸𑀚𑀦𑀻𑀬𑁂𑀦 𑀢𑀁 𑀯𑀺𑀪𑀚𑀦𑁆𑀢𑁄 𑀯𑀡𑁆𑀡𑁂𑀦𑁆𑀢𑁄 𑀅𑀲𑀼𑀪𑀸𑀬 𑀯𑀡𑁆𑀡𑀁 𑀪𑀸𑀲𑀢𑀺. 𑀅𑀲𑀼𑀪𑀪𑀸𑀯𑀦𑀸𑀬 𑀯𑀡𑁆𑀡𑀁 𑀪𑀸𑀲𑀢𑀻𑀢𑀺 𑀬𑀸 𑀅𑀬𑀁 𑀓𑁂𑀲𑀸𑀤𑀻𑀲𑀼 𑀯𑀸 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀲𑀼 𑀯𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀯𑀢𑁆𑀣𑀽𑀲𑀼 𑀅𑀲𑀼𑀪𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀪𑀸𑀯𑀦𑀸 𑀯𑀟𑁆𑀠𑀦𑀸 𑀨𑀸𑀢𑀺𑀓𑀫𑁆𑀫𑀁, 𑀢𑀲𑁆𑀲𑀸 𑀅𑀲𑀼𑀪𑀪𑀸𑀯𑀦𑀸𑀬 𑀆𑀦𑀺𑀲𑀁𑀲𑀁 𑀤𑀲𑁆𑀲𑁂𑀦𑁆𑀢𑁄 𑀯𑀡𑁆𑀡𑀁 𑀪𑀸𑀲𑀢𑀺, 𑀕𑀼𑀡𑀁 𑀧𑀭𑀺𑀓𑀺𑀢𑁆𑀢𑁂𑀢𑀺. 𑀲𑁂𑀬𑁆𑀬𑀣𑀺𑀤𑀁 𑁋 ‘‘𑀅𑀲𑀼𑀪𑀪𑀸𑀯𑀦𑀸𑀪𑀺𑀬𑀼𑀢𑁆𑀢𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀓𑁂𑀲𑀸𑀤𑀻𑀲𑀼 𑀯𑀸 𑀯𑀢𑁆𑀣𑀽𑀲𑀼 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀲𑀼 𑀯𑀸 𑀧𑀜𑁆𑀘𑀗𑁆𑀕𑀯𑀺𑀧𑁆𑀧𑀳𑀻𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀢𑀺𑀯𑀺𑀥𑀓𑀮𑁆𑀬𑀸𑀡𑀁 𑀤𑀲𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀁 𑀧𑀞𑀫𑀚𑁆𑀛𑀸𑀦𑀁 𑀧𑀝𑀺𑀮𑀪𑀢𑀺. 𑀲𑁄 𑀢𑀁 𑀧𑀞𑀫𑀚𑁆𑀛𑀸𑀦𑀲𑀗𑁆𑀔𑀸𑀢𑀁 𑀘𑀺𑀢𑁆𑀢𑀫𑀜𑁆𑀚𑀽𑀲𑀁 𑀦𑀺𑀲𑁆𑀲𑀸𑀬 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀉𑀢𑁆𑀢𑀫𑀢𑁆𑀣𑀁 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀸𑀢𑀻’’𑀢𑀺.

𑀇𑀘𑁆𑀙𑀸𑀫𑀳𑀁, 𑀪𑀺𑀓𑁆𑀔𑀯𑁂, 𑀅𑀟𑁆𑀠𑀫𑀸𑀲𑀁 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀦𑁆𑀢𑀺 𑀅𑀳𑀁, 𑀪𑀺𑀓𑁆𑀔𑀯𑁂, 𑀏𑀓𑀁 𑀅𑀟𑁆𑀠𑀫𑀸𑀲𑀁 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀁 𑀦𑀺𑀮𑀻𑀬𑀺𑀢𑀼𑀁 𑀏𑀓𑀓𑁄𑀯 𑀳𑀼𑀢𑁆𑀯𑀸 𑀯𑀺𑀳𑀭𑀺𑀢𑀼𑀁 𑀇𑀘𑁆𑀙𑀸𑀫𑀻𑀢𑀺 𑀅𑀢𑁆𑀣𑁄. 𑀦𑀸𑀫𑁆𑀳𑀺 𑀓𑁂𑀦𑀘𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀏𑀓𑁂𑀦 𑀧𑀺𑀡𑁆𑀟𑀧𑀸𑀢𑀦𑀻𑀳𑀸𑀭𑀓𑁂𑀦𑀸𑀢𑀺 𑀬𑁄 𑀅𑀢𑁆𑀢𑀦𑀸 𑀧𑀬𑀼𑀢𑁆𑀢𑀯𑀸𑀘𑀁 𑀅𑀓𑀢𑁆𑀯𑀸 𑀫𑀫𑀢𑁆𑀣𑀸𑀬 𑀲𑀤𑁆𑀥𑁂𑀲𑀼 𑀓𑀼𑀮𑁂𑀲𑀼 𑀧𑀝𑀺𑀬𑀢𑁆𑀢𑀧𑀺𑀡𑁆𑀟𑀧𑀸𑀢𑀁 𑀦𑀻𑀳𑀭𑀺𑀢𑁆𑀯𑀸 𑀫𑀬𑁆𑀳𑀁 𑀉𑀧𑀦𑀸𑀫𑁂𑀢𑀺, 𑀢𑀁 𑀧𑀺𑀡𑁆𑀟𑀧𑀸𑀢𑀦𑀻𑀳𑀸𑀭𑀓𑀁 𑀏𑀓𑀁 𑀪𑀺𑀓𑁆𑀔𑀼𑀁 𑀞𑀧𑁂𑀢𑁆𑀯𑀸 𑀦𑀸𑀫𑁆𑀳𑀺 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀪𑀺𑀓𑁆𑀔𑀼𑀦𑀸 𑀯𑀸 𑀕𑀳𑀝𑁆𑀞𑁂𑀦 𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄𑀢𑀺.

𑀓𑀲𑁆𑀫𑀸 𑀧𑀦 𑀏𑀯𑀫𑀸𑀳𑀸𑀢𑀺? 𑀅𑀢𑀻𑀢𑁂 𑀓𑀺𑀭 𑀧𑀜𑁆𑀘𑀲𑀢𑀸 𑀫𑀺𑀕𑀮𑀼𑀤𑁆𑀤𑀓𑀸 𑀫𑀳𑀢𑀻𑀳𑀺 𑀤𑀡𑁆𑀟𑀯𑀸𑀕𑀼𑀭𑀸𑀤𑀻𑀳𑀺 𑀅𑀭𑀜𑁆𑀜𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀳𑀝𑁆𑀞𑀢𑀼𑀝𑁆𑀞𑀸 𑀏𑀓𑀢𑁄𑀬𑁂𑀯 𑀬𑀸𑀯𑀚𑀻𑀯𑀁 𑀫𑀺𑀕𑀧𑀓𑁆𑀔𑀺𑀖𑀸𑀢𑀓𑀫𑁆𑀫𑁂𑀦 𑀚𑀻𑀯𑀺𑀓𑀁 𑀓𑀧𑁆𑀧𑁂𑀢𑁆𑀯𑀸 𑀦𑀺𑀭𑀬𑁂 𑀉𑀧𑁆𑀧𑀦𑁆𑀦𑀸. 𑀢𑁂 𑀢𑀢𑁆𑀣 𑀧𑀘𑁆𑀘𑀺𑀢𑁆𑀯𑀸 𑀧𑀼𑀩𑁆𑀩𑁂 𑀓𑀢𑁂𑀦 𑀓𑁂𑀦𑀘𑀺𑀤𑁂𑀯 𑀓𑀼𑀲𑀮𑀓𑀫𑁆𑀫𑁂𑀦 𑀫𑀦𑀼𑀲𑁆𑀲𑁂𑀲𑀼 𑀉𑀧𑁆𑀧𑀦𑁆𑀦𑀸 𑀓𑀮𑁆𑀬𑀸𑀡𑀽𑀧𑀦𑀺𑀲𑁆𑀲𑀬𑀯𑀲𑁂𑀦 𑀲𑀩𑁆𑀩𑁂𑀧𑀺 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀜𑁆𑀘 𑀉𑀧𑀲𑀫𑁆𑀧𑀤𑀜𑁆𑀘 𑀮𑀪𑀺𑀁𑀲𑀼. 𑀢𑁂𑀲𑀁 𑀢𑀢𑁄 𑀫𑀽𑀮𑀸𑀓𑀼𑀲𑀮𑀓𑀫𑁆𑀫𑀢𑁄 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀸 𑀅𑀧𑀭𑀸𑀧𑀭𑀘𑁂𑀢𑀦𑀸 𑀢𑀲𑁆𑀫𑀺𑀁 𑀅𑀟𑁆𑀠𑀫𑀸𑀲𑀩𑁆𑀪𑀦𑁆𑀢𑀭𑁂 𑀅𑀢𑁆𑀢𑀽𑀧𑀓𑁆𑀓𑀫𑁂𑀦 𑀘 𑀧𑀭𑀽𑀧𑀓𑁆𑀓𑀫𑁂𑀦 𑀘 𑀚𑀻𑀯𑀺𑀢𑀽𑀧𑀘𑁆𑀙𑁂𑀤𑀸𑀬 𑀑𑀓𑀸𑀲𑀫𑀓𑀸𑀲𑀺. 𑀢𑀁 𑀪𑀕𑀯𑀸 𑀅𑀤𑁆𑀤𑀲. 𑀓𑀫𑁆𑀫𑀯𑀺𑀧𑀸𑀓𑁄 𑀘 𑀦𑀸𑀫 𑀦 𑀲𑀓𑁆𑀓𑀸 𑀓𑁂𑀦𑀘𑀺 𑀧𑀝𑀺𑀩𑀸𑀳𑀺𑀢𑀼𑀁. 𑀢𑁂𑀲𑀼 𑀘 𑀪𑀺𑀓𑁆𑀔𑀽𑀲𑀼 𑀧𑀼𑀣𑀼𑀚𑁆𑀚𑀦𑀸𑀧𑀺 𑀅𑀢𑁆𑀣𑀺, 𑀲𑁄𑀢𑀸𑀧𑀦𑁆𑀦𑀲𑀓𑀤𑀸𑀕𑀸𑀫𑀺𑀅𑀦𑀸𑀕𑀸𑀫𑀺𑀔𑀻𑀡𑀸𑀲𑀯𑀸𑀧𑀺. 𑀢𑀢𑁆𑀣 𑀔𑀻𑀡𑀸𑀲𑀯𑀸 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀸, 𑀇𑀢𑀭𑁂 𑀅𑀭𑀺𑀬𑀲𑀸𑀯𑀓𑀸 𑀦𑀺𑀬𑀢𑀕𑀢𑀺𑀓𑀸 𑀲𑀼𑀕𑀢𑀺𑀧𑀭𑀸𑀬𑀡𑀸, 𑀧𑀼𑀣𑀼𑀚𑁆𑀚𑀦𑀸𑀦𑀁 𑀕𑀢𑀺 𑀅𑀦𑀺𑀬𑀢𑀸.

𑀅𑀣 𑀪𑀕𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀅𑀢𑁆𑀢𑀪𑀸𑀯𑁂 𑀙𑀦𑁆𑀤𑀭𑀸𑀕𑁂𑀦 𑀫𑀭𑀡𑀪𑀬𑀪𑀻𑀢𑀸 𑀦 𑀲𑀓𑁆𑀔𑀺𑀲𑁆𑀲𑀦𑁆𑀢𑀺 𑀕𑀢𑀺𑀁 𑀯𑀺𑀲𑁄𑀥𑁂𑀢𑀼𑀁, 𑀳𑀦𑁆𑀤 𑀦𑁂𑀲𑀁 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀸𑀬 𑀅𑀲𑀼𑀪𑀓𑀣𑀁 𑀓𑀣𑁂𑀫𑀺. 𑀢𑀁 𑀲𑀼𑀢𑁆𑀯𑀸 𑀅𑀢𑁆𑀢𑀪𑀸𑀯𑁂 𑀯𑀺𑀕𑀢𑀘𑁆𑀙𑀦𑁆𑀤𑀭𑀸𑀕𑀢𑀸𑀬 𑀕𑀢𑀺𑀯𑀺𑀲𑁄𑀥𑀦𑀁 𑀓𑀢𑁆𑀯𑀸 𑀲𑀕𑁆𑀕𑁂 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀺𑀲𑁆𑀲𑀦𑁆𑀢𑀺, 𑀏𑀯𑀁 𑀢𑁂𑀲𑀁 𑀫𑀫 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀸 𑀲𑀸𑀢𑁆𑀣𑀺𑀓𑀸 𑀪𑀯𑀺𑀲𑁆𑀲𑀢𑀻’’𑀢𑀺. 𑀢𑀢𑁄 𑀢𑁂𑀲𑀁 𑀅𑀦𑀼𑀕𑁆𑀕𑀳𑀸𑀬 𑀅𑀲𑀼𑀪𑀓𑀣𑀁 𑀓𑀣𑁂𑀲𑀺 𑀓𑀫𑁆𑀫𑀝𑁆𑀞𑀸𑀦𑀲𑀻𑀲𑁂𑀦, 𑀦𑁄 𑀫𑀭𑀡𑀯𑀡𑁆𑀡𑀲𑀁𑀯𑀡𑁆𑀡𑀦𑀸𑀥𑀺𑀧𑁆𑀧𑀸𑀬𑁂𑀦. 𑀓𑀣𑁂𑀢𑁆𑀯𑀸 𑀘 𑀧𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀲𑀘𑁂 𑀇𑀫𑀁 𑀅𑀟𑁆𑀠𑀫𑀸𑀲𑀁 𑀫𑀁 𑀪𑀺𑀓𑁆𑀔𑀽 𑀧𑀲𑁆𑀲𑀺𑀲𑁆𑀲𑀦𑁆𑀢𑀺, ‘𑀅𑀚𑁆𑀚 𑀏𑀓𑁄 𑀪𑀺𑀓𑁆𑀔𑀼 𑀫𑀢𑁄, 𑀅𑀚𑁆𑀚 𑀤𑁆𑀯𑁂…𑀧𑁂… 𑀅𑀚𑁆𑀚 𑀤𑀲𑀸’𑀢𑀺 𑀆𑀕𑀦𑁆𑀢𑁆𑀯𑀸 𑀆𑀭𑁄𑀘𑁂𑀲𑁆𑀲𑀦𑁆𑀢𑀺, 𑀅𑀬𑀜𑁆𑀘 𑀓𑀫𑁆𑀫𑀯𑀺𑀧𑀸𑀓𑁄 𑀦 𑀲𑀓𑁆𑀓𑀸 𑀫𑀬𑀸 𑀯𑀸 𑀅𑀜𑁆𑀜𑁂𑀦 𑀯𑀸 𑀧𑀝𑀺𑀩𑀸𑀳𑀺𑀢𑀼𑀁, 𑀲𑁆𑀯𑀸𑀳𑀁 𑀢𑀁 𑀲𑀼𑀢𑁆𑀯𑀸𑀧𑀺 𑀓𑀺𑀁 𑀓𑀭𑀺𑀲𑁆𑀲𑀸𑀫𑀺, 𑀓𑀺𑀁 𑀫𑁂 𑀅𑀦𑀢𑁆𑀣𑀓𑁂𑀦 𑀅𑀦𑀬𑀩𑁆𑀬𑀲𑀦𑁂𑀦 𑀲𑀼𑀢𑁂𑀦, 𑀳𑀦𑁆𑀤𑀸𑀳𑀁 𑀪𑀺𑀓𑁆𑀔𑀽𑀦𑀁 𑀅𑀤𑀲𑁆𑀲𑀦𑀁 𑀉𑀧𑀕𑀘𑁆𑀙𑀸𑀫𑀻’’𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳 𑁋 ‘‘𑀇𑀘𑁆𑀙𑀸𑀫𑀳𑀁, 𑀪𑀺𑀓𑁆𑀔𑀯𑁂, 𑀅𑀟𑁆𑀠𑀫𑀸𑀲𑀁 𑀧𑀝𑀺𑀲𑀮𑁆𑀮𑀻𑀬𑀺𑀢𑀼𑀁, 𑀦𑀸𑀫𑁆𑀳𑀺 𑀓𑁂𑀦𑀘𑀺 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑁄 𑀅𑀜𑁆𑀜𑀢𑁆𑀭 𑀏𑀓𑁂𑀦 𑀧𑀺𑀡𑁆𑀟𑀧𑀸𑀢𑀦𑀻𑀳𑀸𑀭𑀓𑁂𑀦𑀸’’𑀢𑀺.

𑀅𑀧𑀭𑁂 𑀧𑀦𑀸𑀳𑀼 𑁋 ‘‘𑀧𑀭𑀽𑀧𑀯𑀸𑀤𑀯𑀺𑀯𑀚𑁆𑀚𑀦𑀢𑁆𑀣𑀁 𑀏𑀯𑀁 𑀯𑀢𑁆𑀯𑀸 𑀧𑀝𑀺𑀲𑀮𑁆𑀮𑀻𑀦𑁄’’𑀢𑀺. 𑀧𑀭𑁂 𑀓𑀺𑀭 𑀪𑀕𑀯𑀦𑁆𑀢𑀁 𑀉𑀧𑀯𑀤𑀺𑀲𑁆𑀲𑀦𑁆𑀢𑀺 𑁋 ‘‘𑀅𑀬𑀁 ‘𑀲𑀩𑁆𑀩𑀜𑁆𑀜𑀽 𑀅𑀳𑀁 𑀲𑀤𑁆𑀥𑀫𑁆𑀫𑀯𑀭𑀘𑀓𑁆𑀓𑀯𑀢𑁆𑀢𑀻’𑀢𑀺 𑀧𑀝𑀺𑀚𑀸𑀦𑀫𑀸𑀦𑁄 𑀅𑀢𑁆𑀢𑀦𑁄𑀧𑀺 𑀲𑀸𑀯𑀓𑁂 𑀅𑀜𑁆𑀜𑀫𑀜𑁆𑀜𑀁 𑀖𑀸𑀢𑁂𑀦𑁆𑀢𑁂 𑀦𑀺𑀯𑀸𑀭𑁂𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀓𑀺𑀁 𑀅𑀜𑁆𑀜𑀁 𑀲𑀓𑁆𑀔𑀺𑀲𑁆𑀲𑀢𑀻’’𑀢𑀺? 𑀢𑀢𑁆𑀭 𑀧𑀡𑁆𑀟𑀺𑀢𑀸 𑀯𑀓𑁆𑀔𑀦𑁆𑀢𑀺 𑁋 ‘‘𑀪𑀕𑀯𑀸 𑀧𑀝𑀺𑀲𑀮𑁆𑀮𑀸𑀦𑀫𑀦𑀼𑀬𑀼𑀢𑁆𑀢𑁄 𑀦 𑀇𑀫𑀁 𑀧𑀯𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀓𑁄𑀘𑀺𑀲𑁆𑀲 𑀆𑀭𑁄𑀘𑀬𑀺𑀢𑀸𑀧𑀺 𑀦𑀢𑁆𑀣𑀺, 𑀲𑀘𑁂 𑀚𑀸𑀦𑁂𑀬𑁆𑀬 𑀅𑀤𑁆𑀥𑀸 𑀦𑀺𑀯𑀸𑀭𑁂𑀬𑁆𑀬𑀸’’𑀢𑀺. 𑀇𑀤𑀁 𑀧𑀦 𑀇𑀘𑁆𑀙𑀸𑀫𑀢𑁆𑀢𑀁, 𑀧𑀞𑀫𑀫𑁂𑀯𑁂𑀢𑁆𑀣 𑀓𑀸𑀭𑀡𑀁. 𑀦𑀸𑀲𑁆𑀲𑀼𑀥𑀸𑀢𑀺 𑀏𑀢𑁆𑀣 𑀅𑀲𑁆𑀲𑀼𑀥𑀸𑀢𑀺 𑀧𑀤𑀧𑀽𑀭𑀡𑀫𑀢𑁆𑀢𑁂 𑀅𑀯𑀥𑀸𑀭𑀡𑀢𑁆𑀣𑁂 𑀯𑀸 𑀦𑀺𑀧𑀸𑀢𑁄, 𑀦𑁂𑀯 𑀓𑁄𑀘𑀺 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀻𑀢𑀺 𑀅𑀢𑁆𑀣𑁄.

𑀅𑀦𑁂𑀓𑁂𑀳𑀺 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀻𑀳𑀺 𑀓𑀸𑀭𑀡𑁂𑀳𑀺 𑀯𑁄𑀓𑀸𑀭𑁄 𑀅𑀲𑁆𑀲𑀸𑀢𑀺 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑁄. 𑀅𑀦𑁂𑀓𑀸𑀓𑀸𑀭𑀯𑁄𑀓𑀺𑀡𑁆𑀡𑁄 𑀅𑀦𑁂𑀓𑀸𑀓𑀸𑀭𑁂𑀦 𑀲𑀫𑁆𑀫𑀺𑀲𑁆𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑁄 𑀲𑁄? 𑀅𑀲𑀼𑀪𑀪𑀸𑀯𑀦𑀸𑀦𑀼𑀬𑁄𑀕𑁄, 𑀢𑀁 𑀅𑀦𑁂𑀓𑀸𑀓𑀸𑀭𑀯𑁄𑀓𑀸𑀭𑀁. 𑀅𑀲𑀼𑀪𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀻𑀢𑀺 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀅𑀝𑁆𑀝𑀻𑀬𑀫𑀸𑀦𑀸𑀢𑀺 𑀢𑁂𑀦 𑀓𑀸𑀬𑁂𑀦 𑀅𑀝𑁆𑀝𑀸 𑀤𑀼𑀓𑁆𑀔𑀺𑀢𑀸 𑀳𑁄𑀦𑁆𑀢𑀺. 𑀳𑀭𑀸𑀬𑀫𑀸𑀦𑀸𑀢𑀺 𑀮𑀚𑁆𑀚𑀫𑀸𑀦𑀸. 𑀚𑀺𑀕𑀼𑀘𑁆𑀙𑀫𑀸𑀦𑀸𑀢𑀺 𑀚𑀺𑀕𑀼𑀘𑁆𑀙𑀁 𑀉𑀧𑁆𑀧𑀸𑀤𑀬𑀫𑀸𑀦𑀸. 𑀲𑀢𑁆𑀣𑀳𑀸𑀭𑀓𑀁 𑀧𑀭𑀺𑀬𑁂𑀲𑀦𑁆𑀢𑀻𑀢𑀺 𑀚𑀻𑀯𑀺𑀢𑀳𑀭𑀡𑀓𑀲𑀢𑁆𑀣𑀁 𑀧𑀭𑀺𑀬𑁂𑀲𑀦𑁆𑀢𑀺. 𑀦 𑀓𑁂𑀯𑀮𑀜𑁆𑀘 𑀢𑁂 𑀲𑀢𑁆𑀣𑀁 𑀧𑀭𑀺𑀬𑁂𑀲𑀺𑀢𑁆𑀯𑀸 𑀅𑀢𑁆𑀢𑀦𑀸 𑀯𑀸 𑀅𑀢𑁆𑀢𑀸𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑀺, 𑀫𑀺𑀕𑀮𑀡𑁆𑀟𑀺𑀓𑀫𑁆𑀧𑀺 𑀧𑀦 𑀲𑀫𑀡𑀓𑀼𑀢𑁆𑀢𑀓𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸, ‘‘𑀲𑀸𑀥𑀼 𑀦𑁄, 𑀆𑀯𑀼𑀲𑁄, 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀳𑀻’’𑀢𑀺 𑀯𑀤𑀦𑁆𑀢𑀺. 𑀏𑀢𑁆𑀣 𑀘 𑀅𑀭𑀺𑀬𑀸 𑀦𑁂𑀯 𑀧𑀸𑀡𑀸𑀢𑀺𑀧𑀸𑀢𑀁 𑀓𑀭𑀺𑀁𑀲𑀼, 𑀦 𑀲𑀫𑀸𑀤𑀧𑁂𑀲𑀼𑀁, 𑀦 𑀲𑀫𑀦𑀼𑀜𑁆𑀜𑀸 𑀅𑀳𑁂𑀲𑀼𑀁. 𑀧𑀼𑀣𑀼𑀚𑁆𑀚𑀦𑀸 𑀧𑀦 𑀲𑀩𑁆𑀩𑀫𑀓𑀁𑀲𑀼.

𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄𑀢𑀺 𑀢𑁂𑀲𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀚𑀻𑀯𑀺𑀢𑀓𑁆𑀔𑀬𑀧𑁆𑀧𑀢𑁆𑀢𑀪𑀸𑀯𑀁 𑀜𑀢𑁆𑀯𑀸 𑀢𑀢𑁄 𑀏𑀓𑀻𑀪𑀸𑀯𑀢𑁄 𑀯𑀼𑀝𑁆𑀞𑀺𑀢𑁄 𑀚𑀸𑀦𑀦𑁆𑀢𑁄𑀧𑀺 𑀅𑀚𑀸𑀦𑀦𑁆𑀢𑁄 𑀯𑀺𑀬 𑀓𑀣𑀸𑀲𑀫𑀼𑀝𑁆𑀞𑀸𑀧𑀦𑀢𑁆𑀣𑀁 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺. 𑀓𑀺𑀁 𑀦𑀼 𑀔𑁄, 𑀆𑀦𑀦𑁆𑀤, 𑀢𑀦𑀼𑀪𑀽𑀢𑁄 𑀯𑀺𑀬 𑀪𑀺𑀓𑁆𑀔𑀼𑀲𑀗𑁆𑀖𑁄𑀢𑀺 𑀇𑀢𑁄, 𑀆𑀦𑀦𑁆𑀤, 𑀧𑀼𑀩𑁆𑀩𑁂 𑀩𑀳𑀽 𑀪𑀺𑀓𑁆𑀔𑀽 𑀏𑀓𑀢𑁄 𑀉𑀧𑀝𑁆𑀞𑀸𑀦𑀁 𑀆𑀕𑀘𑁆𑀙𑀦𑁆𑀢𑀺, 𑀉𑀤𑁆𑀤𑁂𑀲𑀁 𑀧𑀭𑀺𑀧𑀼𑀘𑁆𑀙𑀁 𑀕𑀡𑁆𑀳𑀦𑁆𑀢𑀺, 𑀲𑀚𑁆𑀛𑀸𑀬𑀦𑁆𑀢𑀺, 𑀏𑀓𑀧𑀚𑁆𑀚𑁄𑀢𑁄 𑀯𑀺𑀬 𑀆𑀭𑀸𑀫𑁄 𑀤𑀺𑀲𑁆𑀲𑀢𑀺. 𑀇𑀤𑀸𑀦𑀺 𑀧𑀦 𑀅𑀟𑁆𑀠𑀫𑀸𑀲𑀫𑀢𑁆𑀢𑀲𑁆𑀲 𑀅𑀘𑁆𑀘𑀬𑁂𑀦 𑀢𑀦𑀼𑀪𑀽𑀢𑁄 𑀯𑀺𑀬 𑀢𑀦𑀼𑀓𑁄 𑀫𑀦𑁆𑀤𑁄 𑀅𑀧𑁆𑀧𑀓𑁄 𑀯𑀺𑀭𑀴𑁄 𑀯𑀺𑀬 𑀚𑀸𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁄. 𑀓𑀺𑀁 𑀦𑀼 𑀔𑁄 𑀓𑀸𑀭𑀡𑀁? 𑀓𑀺𑀁 𑀤𑀺𑀲𑀸𑀲𑀼 𑀧𑀓𑁆𑀓𑀦𑁆𑀢𑀸 𑀪𑀺𑀓𑁆𑀔𑀽𑀢𑀺?

𑀅𑀣𑀸𑀬𑀲𑁆𑀫𑀸 𑀆𑀦𑀦𑁆𑀤𑁄 𑀓𑀫𑁆𑀫𑀯𑀺𑀧𑀸𑀓𑁂𑀦 𑀢𑁂𑀲𑀁 𑀚𑀻𑀯𑀺𑀢𑀓𑁆𑀔𑀬𑀧𑁆𑀧𑀢𑁆𑀢𑀺𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀧𑀘𑁆𑀘𑀬𑀸 𑀧𑀦 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀢𑀣𑀸 𑀳𑀺 𑀧𑀦, 𑀪𑀦𑁆𑀢𑁂 𑀪𑀕𑀯𑀸𑀢𑀺𑀆𑀤𑀺𑀁 𑀯𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀅𑀜𑁆𑀜𑀁 𑀓𑀫𑁆𑀫𑀝𑁆𑀞𑀸𑀦𑀁 𑀬𑀸𑀘𑀦𑁆𑀢𑁄, 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸𑀢𑀺𑀆𑀤𑀺𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 𑀲𑀸𑀥𑀼, 𑀪𑀦𑁆𑀢𑁂, 𑀪𑀕𑀯𑀸 𑀅𑀜𑁆𑀜𑀁 𑀓𑀸𑀭𑀡𑀁 𑀆𑀘𑀺𑀓𑁆𑀔𑀢𑀼, 𑀬𑁂𑀦 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑁂𑀬𑁆𑀬. 𑀫𑀳𑀸𑀲𑀫𑀼𑀤𑁆𑀤𑀁 𑀑𑀭𑁄𑀳𑀡𑀢𑀺𑀢𑁆𑀣𑀸𑀦𑀺 𑀯𑀺𑀬 𑀅𑀜𑁆𑀜𑀸𑀦𑀺𑀧𑀺 𑀤𑀲𑀸𑀦𑀼𑀲𑁆𑀲𑀢𑀺, 𑀤𑀲𑀓𑀲𑀺𑀡, 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦, 𑀩𑁆𑀭𑀳𑁆𑀫𑀯𑀺𑀳𑀸𑀭, 𑀆𑀦𑀸𑀧𑀸𑀦𑀲𑁆𑀲𑀢𑀺𑀧𑀪𑁂𑀤𑀸𑀦𑀺 𑀩𑀳𑀽𑀦𑀺 𑀦𑀺𑀩𑁆𑀩𑀸𑀦𑁄𑀭𑁄𑀳𑀡𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀲𑀦𑁆𑀢𑀺, 𑀢𑁂𑀲𑀼 𑀪𑀕𑀯𑀸 𑀪𑀺𑀓𑁆𑀔𑀽 𑀲𑀫𑀲𑁆𑀲𑀸𑀲𑁂𑀢𑁆𑀯𑀸 𑀅𑀜𑁆𑀜𑀢𑀭𑀁 𑀓𑀫𑁆𑀫𑀝𑁆𑀞𑀸𑀦𑀁 𑀆𑀘𑀺𑀓𑁆𑀔𑀢𑀽𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀣 𑀪𑀕𑀯𑀸 𑀢𑀣𑀸 𑀓𑀸𑀢𑀼𑀓𑀸𑀫𑁄 𑀣𑁂𑀭𑀁 𑀉𑀬𑁆𑀬𑁄𑀚𑁂𑀦𑁆𑀢𑁄 𑀢𑁂𑀦𑀳𑀸𑀦𑀦𑁆𑀤𑀸𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑁂𑀲𑀸𑀮𑀺𑀁 𑀉𑀧𑀦𑀺𑀲𑁆𑀲𑀸𑀬𑀸𑀢𑀺 𑀯𑁂𑀲𑀸𑀮𑀺𑀬𑀁 𑀉𑀧𑀦𑀺𑀲𑁆𑀲𑀸𑀬 𑀲𑀫𑀦𑁆𑀢𑀸 𑀕𑀸𑀯𑀼𑀢𑁂𑀧𑀺 𑀅𑀟𑁆𑀠𑀬𑁄𑀚𑀦𑁂𑀧𑀺 𑀬𑀸𑀯𑀢𑀺𑀓𑀸 𑀯𑀺𑀳𑀭𑀦𑁆𑀢𑀺, 𑀢𑁂 𑀲𑀩𑁆𑀩𑁂 𑀲𑀦𑁆𑀦𑀺𑀧𑀸𑀢𑁂𑀳𑀻𑀢𑀺 𑀅𑀢𑁆𑀣𑁄. 𑀲𑀩𑁆𑀩𑁂 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸𑀢𑀺 𑀅𑀢𑁆𑀢𑀦𑀸 𑀕𑀦𑁆𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑀁 𑀲𑀬𑀁 𑀕𑀦𑁆𑀢𑁆𑀯𑀸 𑀅𑀜𑁆𑀜𑀢𑁆𑀣 𑀤𑀳𑀭𑀪𑀺𑀓𑁆𑀔𑀽 𑀧𑀳𑀺𑀡𑀺𑀢𑁆𑀯𑀸 𑀫𑀼𑀳𑀼𑀢𑁆𑀢𑁂𑀦𑁂𑀯 𑀅𑀦𑀯𑀲𑁂𑀲𑁂 𑀪𑀺𑀓𑁆𑀔𑀽 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀲𑀫𑀽𑀳𑀁 𑀓𑀢𑁆𑀯𑀸. 𑀬𑀲𑁆𑀲𑀤𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀸 𑀓𑀸𑀮𑀁 𑀫𑀜𑁆𑀜𑀢𑀻𑀢𑀺 𑀏𑀢𑁆𑀣 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀦𑁆𑀦𑀺𑀧𑀢𑀺𑀢𑁄, 𑀏𑀲 𑀓𑀸𑀮𑁄 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀓𑀣𑀁 𑀓𑀸𑀢𑀼𑀁, 𑀅𑀦𑀼𑀲𑀸𑀲𑀦𑀺𑀁 𑀤𑀸𑀢𑀼𑀁, 𑀇𑀤𑀸𑀦𑀺 𑀬𑀲𑁆𑀲 𑀢𑀼𑀫𑁆𑀳𑁂 𑀓𑀸𑀮𑀁 𑀚𑀸𑀦𑀸𑀣, 𑀢𑀁 𑀓𑀸𑀢𑀩𑁆𑀩𑀦𑁆𑀢𑀺.

𑀅𑀣 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺, 𑀅𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂𑀢𑀺. 𑀆𑀫𑀦𑁆𑀢𑁂𑀢𑁆𑀯𑀸 𑀘 𑀧𑀦 𑀪𑀺𑀓𑁆𑀔𑀽𑀦𑀁 𑀅𑀭𑀳𑀢𑁆𑀢𑀧𑁆𑀧𑀢𑁆𑀢𑀺𑀬𑀸 𑀧𑀼𑀩𑁆𑀩𑁂 𑀆𑀘𑀺𑀓𑁆𑀔𑀺𑀢𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀢𑁄 𑀅𑀜𑁆𑀜𑀁 𑀧𑀭𑀺𑀬𑀸𑀬𑀁 𑀆𑀘𑀺𑀓𑁆𑀔𑀦𑁆𑀢𑁄 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀻𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀻𑀢𑀺 𑀆𑀦𑀸𑀧𑀸𑀦𑀧𑀭𑀺𑀕𑁆𑀕𑀸𑀳𑀺𑀓𑀸𑀬 𑀲𑀢𑀺𑀬𑀸 𑀲𑀤𑁆𑀥𑀺𑀁 𑀲𑀫𑁆𑀧𑀬𑀼𑀢𑁆𑀢𑁄 𑀲𑀫𑀸𑀥𑀺, 𑀆𑀦𑀸𑀧𑀸𑀦𑀲𑁆𑀲𑀢𑀺𑀬𑀁 𑀯𑀸 𑀲𑀫𑀸𑀥𑀺, 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺. 𑀪𑀸𑀯𑀺𑀢𑁄𑀢𑀺 𑀉𑀧𑁆𑀧𑀸𑀤𑀺𑀢𑁄 𑀯𑀟𑁆𑀠𑀺𑀢𑁄 𑀯𑀸. 𑀩𑀳𑀼𑀮𑀻𑀓𑀢𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀓𑀢𑁄. 𑀲𑀦𑁆𑀢𑁄 𑀘𑁂𑀯 𑀧𑀡𑀻𑀢𑁄 𑀘𑀸𑀢𑀺 𑀲𑀦𑁆𑀢𑁄 𑀘𑁂𑀯 𑀧𑀡𑀻𑀢𑁄 𑀘𑁂𑀯. 𑀉𑀪𑀬𑀢𑁆𑀣 𑀏𑀯𑀲𑀤𑁆𑀤𑁂𑀦 𑀦𑀺𑀬𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀅𑀬𑀜𑁆𑀳𑀺 𑀬𑀣𑀸 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁 𑀓𑁂𑀯𑀮𑀁 𑀧𑀝𑀺𑀯𑁂𑀥𑀯𑀲𑁂𑀦 𑀲𑀦𑁆𑀢𑀜𑁆𑀘 𑀧𑀡𑀻𑀢𑀜𑁆𑀘, 𑀑𑀴𑀸𑀭𑀺𑀓𑀸𑀭𑀫𑁆𑀫𑀡𑀢𑁆𑀢𑀸 𑀧𑀦 𑀧𑀝𑀺𑀓𑀽𑀮𑀸𑀭𑀫𑁆𑀫𑀡𑀢𑁆𑀢𑀸 𑀘 𑀆𑀭𑀫𑁆𑀫𑀡𑀯𑀲𑁂𑀦 𑀦𑁂𑀯 𑀲𑀦𑁆𑀢𑀁 𑀦 𑀧𑀡𑀻𑀢𑀁, 𑀦 𑀏𑀯𑀁 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀅𑀲𑀦𑁆𑀢𑁄 𑀯𑀸 𑀅𑀧𑁆𑀧𑀡𑀻𑀢𑁄 𑀯𑀸, 𑀅𑀧𑀺𑀘 𑀔𑁄 𑀆𑀭𑀫𑁆𑀫𑀡𑀲𑀦𑁆𑀢𑀢𑀸𑀬𑀧𑀺 𑀲𑀦𑁆𑀢𑁄 𑀯𑀽𑀧𑀲𑀦𑁆𑀢𑁄 𑀦𑀺𑀩𑁆𑀩𑀼𑀢𑁄, 𑀧𑀝𑀺𑀯𑁂𑀥𑀲𑀗𑁆𑀔𑀸𑀢𑀸𑀬 𑀅𑀗𑁆𑀕𑀲𑀦𑁆𑀢𑀢𑀸𑀬𑀧𑀺, 𑀆𑀭𑀫𑁆𑀫𑀡𑀧𑀡𑀻𑀢𑀢𑀸𑀬 𑀧𑀡𑀻𑀢𑁄 𑀅𑀢𑀺𑀢𑁆𑀢𑀺𑀓𑀭𑁄, 𑀅𑀗𑁆𑀕𑀧𑀡𑀻𑀢𑀢𑀸𑀬𑀧𑀻𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀲𑀦𑁆𑀢𑁄 𑀘𑁂𑀯 𑀧𑀡𑀻𑀢𑁄 𑀘𑀸’’𑀢𑀺.

𑀅𑀲𑁂𑀘𑀦𑀓𑁄 𑀘 𑀲𑀼𑀔𑁄 𑀘 𑀯𑀺𑀳𑀸𑀭𑁄𑀢𑀺 𑀏𑀢𑁆𑀣 𑀧𑀦 𑀦𑀸𑀲𑁆𑀲 𑀲𑁂𑀘𑀦𑀦𑁆𑀢𑀺 𑀅𑀲𑁂𑀘𑀦𑀓𑁄, 𑀅𑀦𑀸𑀲𑀺𑀢𑁆𑀢𑀓𑁄 𑀅𑀩𑁆𑀩𑁄𑀓𑀺𑀡𑁆𑀡𑁄 𑀧𑀸𑀝𑀺𑀬𑁂𑀓𑁆𑀓𑁄 𑀆𑀯𑁂𑀡𑀺𑀓𑁄, 𑀦𑀢𑁆𑀣𑀺 𑀏𑀢𑁆𑀣 𑀧𑀭𑀺𑀓𑀫𑁆𑀫𑁂𑀦 𑀯𑀸 𑀉𑀧𑀘𑀸𑀭𑁂𑀦 𑀯𑀸 𑀲𑀦𑁆𑀢𑀢𑀸, 𑀆𑀤𑀺𑀲𑀫𑀦𑁆𑀦𑀸𑀳𑀸𑀭𑀢𑁄 𑀧𑀪𑀼𑀢𑀺 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀲𑀦𑁆𑀢𑁄 𑀘 𑀧𑀡𑀻𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀓𑁂𑀘𑀺 ‘‘𑀅𑀲𑁂𑀘𑀦𑀓𑁄’’𑀢𑀺 𑀅𑀦𑀸𑀲𑀺𑀢𑁆𑀢𑀓𑁄 𑀑𑀚𑀯𑀦𑁆𑀢𑁄, 𑀲𑀪𑀸𑀯𑁂𑀦𑁂𑀯 𑀫𑀥𑀼𑀭𑁄’’𑀢𑀺 𑀯𑀤𑀦𑁆𑀢𑀺. 𑀏𑀯𑀫𑀬𑀁 𑀅𑀲𑁂𑀘𑀦𑀓𑁄 𑀘 𑀅𑀧𑁆𑀧𑀺𑀢𑀧𑁆𑀧𑀺𑀢𑀓𑁆𑀔𑀡𑁂 𑀓𑀸𑀬𑀺𑀓𑀘𑁂𑀢𑀲𑀺𑀓𑀲𑀼𑀔𑀧𑁆𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀦𑀢𑁄 𑀲𑀼𑀔𑁄 𑀘 𑀯𑀺𑀳𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂𑀢𑀺 𑀅𑀯𑀺𑀓𑁆𑀔𑀫𑁆𑀪𑀺𑀢𑁂. 𑀧𑀸𑀧𑀓𑁂𑀢𑀺 𑀮𑀸𑀫𑀓𑁂. 𑀅𑀓𑀼𑀲𑀮𑁂 𑀥𑀫𑁆𑀫𑁂𑀢𑀺 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑁂 𑀥𑀫𑁆𑀫𑁂. 𑀞𑀸𑀦𑀲𑁄 𑀅𑀦𑁆𑀢𑀭𑀥𑀸𑀧𑁂𑀢𑀻𑀢𑀺 𑀔𑀡𑁂𑀦𑁂𑀯 𑀅𑀦𑁆𑀢𑀭𑀥𑀸𑀧𑁂𑀢𑀺 𑀯𑀺𑀓𑁆𑀔𑀫𑁆𑀪𑁂𑀢𑀺. 𑀯𑀽𑀧𑀲𑀫𑁂𑀢𑀻𑀢𑀺 𑀲𑀼𑀝𑁆𑀞𑀼 𑀉𑀧𑀲𑀫𑁂𑀢𑀺, 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀢𑁆𑀢𑀸 𑀅𑀦𑀼𑀧𑀼𑀩𑁆𑀩𑁂𑀦 𑀅𑀭𑀺𑀬𑀫𑀕𑁆𑀕𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑁄 𑀲𑀫𑀼𑀘𑁆𑀙𑀺𑀦𑁆𑀤𑀢𑀺, 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀕𑀺𑀫𑁆𑀳𑀸𑀦𑀁 𑀧𑀘𑁆𑀙𑀺𑀫𑁂 𑀫𑀸𑀲𑁂𑀢𑀺 𑀆𑀲𑀸𑀴𑁆𑀳𑀫𑀸𑀲𑁂. 𑀊𑀳𑀢𑀁 𑀭𑀚𑁄𑀚𑀮𑁆𑀮𑀦𑁆𑀢𑀺 𑀅𑀝𑁆𑀞 𑀫𑀸𑀲𑁂 𑀯𑀸𑀢𑀸𑀢𑀧𑀲𑀼𑀓𑁆𑀔𑀸𑀬 𑀕𑁄𑀫𑀳𑀺𑀁𑀲𑀸𑀤𑀺𑀧𑀸𑀤𑀧𑁆𑀧𑀳𑀸𑀭𑀲𑀫𑁆𑀪𑀺𑀦𑁆𑀦𑀸𑀬 𑀧𑀣𑀯𑀺𑀬𑀸 𑀉𑀤𑁆𑀥𑀁 𑀳𑀢𑀁 𑀊𑀳𑀢𑀁 𑀆𑀓𑀸𑀲𑁂 𑀲𑀫𑀼𑀝𑁆𑀞𑀺𑀢𑀁 𑀭𑀚𑀜𑁆𑀘 𑀭𑁂𑀡𑀼𑀜𑁆𑀘. 𑀫𑀳𑀸 𑀅𑀓𑀸𑀮𑀫𑁂𑀖𑁄𑀢𑀺 𑀲𑀩𑁆𑀩𑀁 𑀦𑀪𑀁 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀉𑀝𑁆𑀞𑀺𑀢𑁄 𑀆𑀲𑀸𑀴𑁆𑀳𑀚𑀼𑀡𑁆𑀳𑀧𑀓𑁆𑀔𑁂 𑀲𑀓𑀮𑀁 𑀅𑀟𑁆𑀠𑀫𑀸𑀲𑀁 𑀯𑀲𑁆𑀲𑀦𑀓𑀫𑁂𑀖𑁄. 𑀲𑁄 𑀳𑀺 𑀅𑀲𑀫𑁆𑀧𑀢𑁆𑀢𑁂 𑀯𑀲𑁆𑀲𑀓𑀸𑀮𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀅𑀓𑀸𑀮𑀫𑁂𑀖𑁄𑀢𑀺 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀞𑀸𑀦𑀲𑁄 𑀅𑀦𑁆𑀢𑀭𑀸𑀥𑀸𑀧𑁂𑀢𑀺 𑀯𑀽𑀧𑀲𑀫𑁂𑀢𑀻𑀢𑀺 𑀔𑀡𑁂𑀦𑁂𑀯 𑀅𑀤𑀲𑁆𑀲𑀦𑀁 𑀦𑁂𑀢𑀺 𑀧𑀣𑀯𑀺𑀬𑀁 𑀲𑀦𑁆𑀦𑀺𑀲𑀻𑀤𑀸𑀧𑁂𑀢𑀺. 𑀏𑀯𑀫𑁂𑀯 𑀔𑁄𑀢𑀺 𑀑𑀧𑀫𑁆𑀫𑀦𑀺𑀤𑀲𑁆𑀲𑀦𑀫𑁂𑀢𑀁. 𑀢𑀢𑁄 𑀧𑀭𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁧𑁦. 𑀓𑀺𑀫𑀺𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁮𑁬. 𑀤𑀲𑀫𑁂 𑀓𑀺𑀫𑀺𑀮𑀸𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀏𑀢𑀤𑀯𑁄𑀘𑀸𑀢𑀺 𑀣𑁂𑀭𑁄 𑀓𑀺𑀭 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀤𑁂𑀲𑀦𑀸 𑀦 𑀬𑀣𑀸𑀦𑀼𑀲𑀦𑁆𑀥𑀺𑀓𑀸 𑀓𑀢𑀸, 𑀬𑀣𑀸𑀦𑀼𑀲𑀦𑁆𑀥𑀺𑀁 𑀕𑀫𑁂𑀲𑁆𑀲𑀸𑀫𑀻’’𑀢𑀺 𑀤𑁂𑀲𑀦𑀸𑀦𑀼𑀲𑀦𑁆𑀥𑀺𑀁 𑀖𑀝𑁂𑀦𑁆𑀢𑁄 𑀏𑀢𑀁 𑀅𑀯𑁄𑀘. 𑀓𑀸𑀬𑀜𑁆𑀜𑀢𑀭𑀦𑁆𑀢𑀺 𑀧𑀣𑀯𑀻𑀆𑀤𑀻𑀲𑀼 𑀓𑀸𑀬𑁂𑀲𑀼 𑀅𑀜𑁆𑀜𑀢𑀭𑀁 𑀯𑀤𑀸𑀫𑀺 𑀯𑀸𑀬𑁄𑀓𑀸𑀬𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀘𑀓𑁆𑀔𑀸𑀬𑀢𑀦𑀁…𑀧𑁂… 𑀓𑀩𑀴𑀻𑀓𑀸𑀭𑁄 𑀆𑀳𑀸𑀭𑁄𑀢𑀺 𑀧𑀜𑁆𑀘𑀯𑀻𑀲𑀢𑀺 𑀭𑀽𑀧𑀓𑁄𑀝𑁆𑀞𑀸𑀲𑀸 𑀭𑀽𑀧𑀓𑀸𑀬𑁄 𑀦𑀸𑀫, 𑀢𑁂𑀲𑀼 𑀆𑀦𑀸𑀧𑀸𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑁂 𑀲𑀗𑁆𑀕𑀳𑀺𑀢𑀢𑁆𑀢𑀸 𑀓𑀸𑀬𑀜𑁆𑀜𑀢𑀭𑀁 𑀳𑁄𑀢𑀺, 𑀢𑀲𑁆𑀫𑀸𑀧𑀺 𑀏𑀯𑀫𑀸𑀳. 𑀢𑀲𑁆𑀫𑀸𑀢𑀺𑀳𑀸𑀢𑀺 𑀬𑀲𑁆𑀫𑀸 𑀘𑀢𑀽𑀲𑀼 𑀓𑀸𑀬𑁂𑀲𑀼 𑀅𑀜𑁆𑀜𑀢𑀭𑀁 𑀯𑀸𑀬𑁄𑀓𑀸𑀬𑀁, 𑀧𑀜𑁆𑀘𑀯𑀻𑀲𑀢𑀺 𑀓𑁄𑀝𑁆𑀞𑀸𑀲𑁂 𑀯𑀸 𑀭𑀽𑀧𑀓𑀸𑀬𑁂 𑀅𑀜𑁆𑀜𑀢𑀭𑀁 𑀆𑀦𑀸𑀧𑀸𑀦𑀁 𑀅𑀦𑀼𑀧𑀲𑁆𑀲𑀢𑀺, 𑀢𑀲𑁆𑀫𑀸 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀩𑁆𑀩𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀯𑁂𑀤𑀦𑀸𑀜𑁆𑀜𑀢𑀭𑀦𑁆𑀢𑀺 𑀢𑀻𑀲𑀼 𑀯𑁂𑀤𑀦𑀸𑀲𑀼 𑀅𑀜𑁆𑀜𑀢𑀭𑀁, 𑀲𑀼𑀔𑀯𑁂𑀤𑀦𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑀲𑀸𑀥𑀼𑀓𑀁 𑀫𑀦𑀲𑀺𑀓𑀸𑀭𑀦𑁆𑀢𑀺 𑀧𑀻𑀢𑀺𑀧𑀝𑀺𑀲𑀁𑀯𑁂𑀤𑀺𑀢𑀸𑀤𑀺𑀯𑀲𑁂𑀦 𑀉𑀧𑁆𑀧𑀦𑁆𑀦𑀁 𑀲𑀼𑀦𑁆𑀤𑀭𑀁 𑀫𑀦𑀲𑀺𑀓𑀸𑀭𑀁. 𑀓𑀺𑀁 𑀧𑀦 𑀫𑀦𑀲𑀺𑀓𑀸𑀭𑁄 𑀲𑀼𑀔𑀸 𑀯𑁂𑀤𑀦𑀸 𑀳𑁄𑀢𑀻𑀢𑀺? 𑀦 𑀳𑁄𑀢𑀺, 𑀤𑁂𑀲𑀦𑀸𑀲𑀻𑀲𑀁 𑀧𑀦𑁂𑀢𑀁. 𑀬𑀣𑁂𑀯 𑀳𑀺 ‘‘𑀅𑀦𑀺𑀘𑁆𑀘𑀲𑀜𑁆𑀜𑀸𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑀸’’𑀢𑀺 (𑀫. 𑀦𑀺. 𑁩.𑁧𑁪𑁭) 𑀏𑀢𑁆𑀣 𑀲𑀜𑁆𑀜𑀸𑀦𑀸𑀫𑁂𑀦 𑀧𑀜𑁆𑀜𑀸 𑀯𑀼𑀢𑁆𑀢𑀸, 𑀏𑀯𑀫𑀺𑀥𑀸𑀧𑀺 𑀫𑀦𑀲𑀺𑀓𑀸𑀭𑀦𑀸𑀫𑁂𑀦 𑀛𑀸𑀦𑀯𑁂𑀤𑀦𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑀲𑁆𑀫𑀺𑀜𑁆𑀳𑀺 𑀘𑀢𑀼𑀓𑁆𑀓𑁂 𑀧𑀞𑀫𑀧𑀤𑁂 𑀧𑀻𑀢𑀺𑀲𑀻𑀲𑁂𑀦 𑀯𑁂𑀤𑀦𑀸 𑀯𑀼𑀢𑁆𑀢𑀸, 𑀤𑀼𑀢𑀺𑀬𑀧𑀤𑁂 𑀲𑀼𑀔𑀦𑁆𑀢𑀺 𑀲𑀭𑀽𑀧𑁂𑀦𑁂𑀯 𑀯𑀼𑀢𑁆𑀢𑀸. 𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑀤𑀤𑁆𑀯𑀬𑁂 ‘‘𑀲𑀜𑁆𑀜𑀸 𑀘 𑀯𑁂𑀤𑀦𑀸 𑀘 𑀘𑁂𑀢𑀲𑀺𑀓𑀸 𑀏𑀢𑁂 𑀥𑀫𑁆𑀫𑀸 𑀘𑀺𑀢𑁆𑀢𑀧𑁆𑀧𑀝𑀺𑀩𑀤𑁆𑀥𑀸 𑀘𑀺𑀢𑁆𑀢𑀲𑀗𑁆𑀔𑀸𑀭𑀸’’𑀢𑀺 (𑀧𑀝𑀺. 𑀫. 𑁧.𑁧𑁭𑁪) 𑀯𑀘𑀦𑀢𑁄 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑁂 𑀞𑀧𑁂𑀢𑁆𑀯𑀸 𑀲𑀩𑁆𑀩𑁂𑀧𑀺 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀓𑀸 𑀥𑀫𑁆𑀫𑀸 𑀘𑀺𑀢𑁆𑀢𑀲𑀗𑁆𑀔𑀸𑀭𑁂 𑀲𑀗𑁆𑀕𑀳𑀺𑀢𑀸’’𑀢𑀺 𑀯𑀘𑀦𑀢𑁄 𑀘𑀺𑀢𑁆𑀢𑀲𑀗𑁆𑀔𑀸𑀭𑀦𑀸𑀫𑁂𑀦 𑀯𑁂𑀤𑀦𑀸 𑀯𑀼𑀢𑁆𑀢𑀸. 𑀢𑀁 𑀲𑀩𑁆𑀩𑀁 𑀫𑀦𑀲𑀺𑀓𑀸𑀭𑀦𑀸𑀫𑁂𑀦 𑀲𑀗𑁆𑀕𑀳𑁂𑀢𑁆𑀯𑀸 𑀇𑀥 ‘‘𑀲𑀸𑀥𑀼𑀓𑀁 𑀫𑀦𑀲𑀺𑀓𑀸𑀭’’𑀦𑁆𑀢𑀺 𑀆𑀳.

𑀏𑀯𑀁 𑀲𑀦𑁆𑀢𑁂𑀧𑀺 𑀬𑀲𑁆𑀫𑀸 𑀏𑀲𑀸 𑀯𑁂𑀤𑀦𑀸 𑀆𑀭𑀫𑁆𑀫𑀡𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸 𑀦 𑀬𑀼𑀚𑁆𑀚𑀢𑀻𑀢𑀺. 𑀦𑁄 𑀦 𑀬𑀼𑀚𑁆𑀚𑀢𑀺, 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀲𑀼𑀧𑀺 𑀳𑀺 𑀢𑀁 𑀢𑀁 𑀲𑀼𑀔𑀸𑀤𑀻𑀦𑀁 𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑁂𑀤𑀦𑀸 𑀯𑁂𑀤𑀬𑀢𑀺, 𑀢𑀁 𑀧𑀦 𑀯𑁂𑀤𑀦𑀸𑀧𑀯𑀢𑁆𑀢𑀺𑀁 𑀉𑀧𑀸𑀤𑀸𑀬 ‘‘𑀅𑀳𑀁 𑀯𑁂𑀤𑀬𑀸𑀫𑀻’’𑀢𑀺 𑀯𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀺, 𑀢𑀁 𑀲𑀦𑁆𑀥𑀸𑀬 ‘‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀫𑀸𑀦𑁄 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀬𑀸𑀫𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀧𑀺𑀘 ‘‘𑀧𑀻𑀢𑀺𑀧𑁆𑀧𑀝𑀺𑀲𑀁𑀯𑁂𑀤𑀻’’𑀢𑀺𑀆𑀤𑀻𑀦𑀁 𑀅𑀢𑁆𑀣𑀯𑀡𑁆𑀡𑀦𑀸𑀬𑀫𑁂𑀢𑀲𑁆𑀲 𑀧𑀭𑀺𑀳𑀸𑀭𑁄 𑀯𑀼𑀢𑁆𑀢𑁄𑀬𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑁋

‘‘𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺 𑁋 𑀆𑀭𑀫𑁆𑀫𑀡𑀢𑁄 𑀘 𑀅𑀲𑀫𑁆𑀫𑁄𑀳𑀢𑁄 𑀘. 𑀓𑀣𑀁 𑀆𑀭𑀫𑁆𑀫𑀡𑀢𑁄 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺? 𑀲𑀧𑁆𑀧𑀻𑀢𑀺𑀓𑁂 𑀤𑁆𑀯𑁂 𑀛𑀸𑀦𑁂 𑀲𑀫𑀸𑀧𑀚𑁆𑀚𑀢𑀺, 𑀢𑀲𑁆𑀲 𑀲𑀫𑀸𑀧𑀢𑁆𑀢𑀺𑀓𑁆𑀔𑀡𑁂 𑀛𑀸𑀦𑀧𑀝𑀺𑀮𑀸𑀪𑁂𑀦 𑀆𑀭𑀫𑁆𑀫𑀡𑀢𑁄 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺 𑀆𑀭𑀫𑁆𑀫𑀡𑀲𑁆𑀲 𑀧𑀝𑀺𑀲𑀁𑀯𑀺𑀤𑀺𑀢𑀢𑁆𑀢𑀸. 𑀓𑀣𑀁 𑀅𑀲𑀫𑁆𑀫𑁄𑀳𑀢𑁄 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺? 𑀲𑀧𑁆𑀧𑀻𑀢𑀺𑀓𑁂 𑀤𑁆𑀯𑁂 𑀛𑀸𑀦𑁂 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑀧𑀻𑀢𑀺𑀁 𑀔𑀬𑀢𑁄 𑀯𑀬𑀢𑁄 𑀲𑀫𑁆𑀫𑀲𑀢𑀺, 𑀢𑀲𑁆𑀲 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂 𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑁂𑀦 𑀅𑀲𑀫𑁆𑀫𑁄𑀳𑀢𑁄 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁧.𑁧𑁭𑁨) ‘‘‘𑀤𑀻𑀖𑀁 𑀅𑀲𑁆𑀲𑀸𑀲𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀏𑀓𑀕𑁆𑀕𑀢𑀁 𑀅𑀯𑀺𑀓𑁆𑀔𑁂𑀧𑀁 𑀧𑀚𑀸𑀦𑀢𑁄 𑀲𑀢𑀺 𑀉𑀧𑀝𑁆𑀞𑀺𑀢𑀸 𑀳𑁄𑀢𑀺, 𑀢𑀸𑀬 𑀲𑀢𑀺𑀬𑀸 𑀢𑁂𑀦 𑀜𑀸𑀡𑁂𑀦 𑀲𑀸 𑀧𑀻𑀢𑀺 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀻’𑀢𑀺. 𑀏𑀢𑁂𑀦𑁂𑀯 𑀦𑀬𑁂𑀦 𑀅𑀯𑀲𑁂𑀲𑀧𑀤𑀸𑀦𑀺𑀧𑀺 𑀅𑀢𑁆𑀣𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀻’’𑀢𑀺.

𑀇𑀢𑀺 𑀬𑀣𑁂𑀯 𑀛𑀸𑀦𑀧𑀝𑀺𑀮𑀸𑀪𑁂𑀦 𑀆𑀭𑀫𑁆𑀫𑀡𑀢𑁄 𑀧𑀻𑀢𑀺𑀲𑀼𑀔𑀘𑀺𑀢𑁆𑀢𑀲𑀗𑁆𑀔𑀸𑀭𑀸 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀦𑁆𑀢𑀺, 𑀏𑀯𑀁 𑀇𑀫𑀺𑀦𑀸𑀧𑀺 𑀛𑀸𑀦𑀲𑀫𑁆𑀧𑀬𑀼𑀢𑁆𑀢𑁂𑀦 𑀯𑁂𑀤𑀦𑀸𑀲𑀗𑁆𑀔𑀸𑀢𑀫𑀦𑀲𑀺𑀓𑀸𑀭𑀧𑀝𑀺𑀮𑀸𑀪𑁂𑀦 𑀆𑀭𑀫𑁆𑀫𑀡𑀢𑁄 𑀯𑁂𑀤𑀦𑀸 𑀧𑀝𑀺𑀲𑀁𑀯𑀺𑀤𑀺𑀢𑀸 𑀳𑁄𑀢𑀺. 𑀢𑀲𑁆𑀫𑀸 𑀲𑀼𑀯𑀼𑀢𑁆𑀢𑀫𑁂𑀢𑀁 ‘‘𑀯𑁂𑀤𑀦𑀸𑀲𑀼 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀪𑀺𑀓𑁆𑀔𑀼 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀳𑀭𑀢𑀻’’𑀢𑀺.

𑀦𑀸𑀳𑀁, 𑀆𑀦𑀦𑁆𑀤, 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲 𑀅𑀲𑀫𑁆𑀧𑀚𑀸𑀦𑀲𑁆𑀲𑀸𑀢𑀺 𑀏𑀢𑁆𑀣 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀲𑁆𑀫𑀸 ‘‘𑀘𑀺𑀢𑁆𑀢𑀧𑀝𑀺𑀲𑀁𑀯𑁂𑀤𑀻 𑀅𑀲𑁆𑀲𑀸𑀲𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑁄 𑀪𑀺𑀓𑁆𑀔𑀼 𑀓𑀺𑀜𑁆𑀘𑀸𑀧𑀺 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀫𑀺𑀢𑁆𑀢𑀫𑀸𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀢𑀲𑁆𑀲 𑀧𑀦 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑁂 𑀲𑀢𑀺𑀜𑁆𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀧𑀯𑀢𑁆𑀢𑀦𑀢𑁄 𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻𑀬𑁂𑀯 𑀦𑀸𑀫𑁂𑀲 𑀳𑁄𑀢𑀺. 𑀦 𑀳𑀺 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲 𑀅𑀲𑀫𑁆𑀧𑀚𑀸𑀦𑀲𑁆𑀲 𑀆𑀦𑀸𑀧𑀸𑀦𑀲𑁆𑀲𑀢𑀺𑀲𑀫𑀸𑀥𑀺𑀪𑀸𑀯𑀦𑀸 𑀅𑀢𑁆𑀣𑀺, 𑀢𑀲𑁆𑀫𑀸 𑀆𑀭𑀫𑁆𑀫𑀡𑀢𑁄 𑀘𑀺𑀢𑁆𑀢𑀧𑀝𑀺𑀲𑀁𑀯𑀺𑀤𑀺𑀢𑀯𑀲𑁂𑀦 ‘‘𑀘𑀺𑀢𑁆𑀢𑁂 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀪𑀺𑀓𑁆𑀔𑀼 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀳𑀭𑀢𑀻’’𑀢𑀺.

𑀲𑁄 𑀬𑀁 𑀢𑀁 𑀳𑁄𑀢𑀺 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸𑀦𑀁 𑀧𑀳𑀸𑀦𑀁, 𑀢𑀁 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀲𑀸𑀥𑀼𑀓𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀸 𑀳𑁄𑀢𑀻𑀢𑀺 𑀏𑀢𑁆𑀣 𑀅𑀪𑀺𑀚𑁆𑀛𑀸 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀫𑁂𑀯, 𑀤𑁄𑀫𑀦𑀲𑁆𑀲𑀯𑀲𑁂𑀦 𑀩𑁆𑀬𑀸𑀧𑀸𑀤𑀦𑀻𑀯𑀭𑀡𑀁 𑀤𑀲𑁆𑀲𑀺𑀢𑀁. 𑀇𑀤𑀜𑁆𑀳𑀺 𑀘𑀢𑀼𑀓𑁆𑀓𑀁 𑀯𑀺𑀧𑀲𑁆𑀲𑀦𑀸𑀯𑀲𑁂𑀦𑁂𑀯 𑀯𑀼𑀢𑁆𑀢𑀁, 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸 𑀘 𑀦𑀻𑀯𑀭𑀡𑀧𑀩𑁆𑀩𑀸𑀤𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑀸 𑀳𑁄𑀢𑀺, 𑀢𑀲𑁆𑀲𑀸 𑀦𑀻𑀯𑀭𑀡𑀧𑀩𑁆𑀩𑀁 𑀆𑀤𑀺, 𑀢𑀲𑁆𑀲𑀸𑀧𑀺 𑀇𑀤𑀁 𑀦𑀻𑀯𑀭𑀡𑀤𑁆𑀯𑀬𑀁 𑀆𑀤𑀺. 𑀇𑀢𑀺 𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀬 𑀆𑀤𑀺𑀁 𑀤𑀲𑁆𑀲𑁂𑀢𑀼𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸𑀦𑀦𑁆𑀢𑀺 𑀆𑀳. 𑀧𑀳𑀸𑀦𑀦𑁆𑀢𑀺 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀘𑁆𑀘𑀲𑀜𑁆𑀜𑀁 𑀧𑀚𑀳𑀢𑀻𑀢𑀺 𑀏𑀯𑀁 𑀧𑀳𑀸𑀦𑀓𑀭𑀜𑀸𑀡𑀁 𑀅𑀥𑀺𑀧𑁆𑀧𑁂𑀢𑀁. 𑀢𑀁 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸𑀢𑀺 𑀢𑀁 𑀅𑀦𑀺𑀘𑁆𑀘𑀯𑀺𑀭𑀸𑀕𑀦𑀺𑀭𑁄𑀥𑀧𑀝𑀺𑀦𑀺𑀲𑁆𑀲𑀕𑁆𑀕𑀜𑀸𑀡𑀲𑀗𑁆𑀔𑀸𑀢𑀁 𑀧𑀳𑀸𑀦𑀜𑀸𑀡𑀁 𑀅𑀧𑀭𑀸𑀬 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬, 𑀢𑀫𑁆𑀧𑀺 𑀅𑀧𑀭𑀸𑀬𑀸𑀢𑀺 𑀏𑀯𑀁 𑀯𑀺𑀧𑀲𑁆𑀲𑀦𑀸𑀧𑀭𑀫𑁆𑀧𑀭𑀁 𑀤𑀲𑁆𑀲𑁂𑀢𑀺. 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀸 𑀳𑁄𑀢𑀻𑀢𑀺 𑀬𑀜𑁆𑀘𑀲𑁆𑀲 𑀧𑀣𑀧𑀝𑀺𑀧𑀦𑁆𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀬𑀜𑁆𑀘 𑀏𑀓𑀢𑁄 𑀉𑀧𑀝𑁆𑀞𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀻𑀢𑀺 𑀤𑁆𑀯𑀺𑀥𑀸 𑀅𑀚𑁆𑀛𑀼𑀧𑁂𑀓𑁆𑀔𑀢𑀺 𑀦𑀸𑀫. 𑀢𑀢𑁆𑀣 𑀲𑀳𑀚𑀸𑀢𑀸𑀦𑀫𑁆𑀧𑀺𑀅𑀚𑁆𑀛𑀼𑀧𑁂𑀓𑁆𑀔𑀦𑀸 𑀳𑁄𑀢𑀺 𑀆𑀭𑀫𑁆𑀫𑀡𑀲𑁆𑀲𑀸𑀧𑀺 𑀅𑀚𑁆𑀛𑀼𑀧𑁂𑀓𑁆𑀔𑀦𑀸. 𑀇𑀥 𑀆𑀭𑀫𑁆𑀫𑀡 𑀅𑀚𑁆𑀛𑀼𑀧𑁂𑀓𑁆𑀔𑀦𑀸 𑀅𑀥𑀺𑀧𑁆𑀧𑁂𑀢𑀸. 𑀢𑀲𑁆𑀫𑀸𑀢𑀺𑀳𑀸𑀦𑀦𑁆𑀤𑀸𑀢𑀺 𑀬𑀲𑁆𑀫𑀸 ‘‘𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 𑀅𑀲𑁆𑀲𑀸𑀲𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑁄 𑀦 𑀓𑁂𑀯𑀮𑀁 𑀦𑀻𑀯𑀭𑀡𑀸𑀤𑀺𑀥𑀫𑁆𑀫𑁂, 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀲𑀻𑀲𑁂𑀦 𑀧𑀦 𑀯𑀼𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀓𑀭𑀜𑀸𑀡𑀫𑁆𑀧𑀺 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀸 𑀳𑁄𑀢𑀺, 𑀢𑀲𑁆𑀫𑀸 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀪𑀺𑀓𑁆𑀔𑀼 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀳𑀭𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀏𑀯𑀫𑁂𑀯 𑀔𑁄𑀢𑀺 𑀏𑀢𑁆𑀣 𑀘𑀢𑀼𑀫𑀳𑀸𑀧𑀣𑁄 𑀯𑀺𑀬 𑀙 𑀆𑀬𑀢𑀦𑀸𑀦𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀢𑀲𑁆𑀫𑀺𑀁 𑀧𑀁𑀲𑀼𑀧𑀼𑀜𑁆𑀚𑁄 𑀯𑀺𑀬 𑀙𑀲𑀼 𑀆𑀬𑀢𑀦𑁂𑀲𑀼 𑀓𑀺𑀮𑁂𑀲𑀸. 𑀘𑀢𑀽𑀳𑀺 𑀤𑀺𑀲𑀸𑀳𑀺 𑀆𑀕𑀘𑁆𑀙𑀦𑁆𑀢𑀸 𑀲𑀓𑀝𑀭𑀣𑀸 𑀯𑀺𑀬 𑀘𑀢𑀽𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀯𑀢𑁆𑀢𑀸 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸. 𑀏𑀓𑁂𑀦 𑀲𑀓𑀝𑁂𑀦 𑀯𑀸 𑀭𑀣𑁂𑀦 𑀯𑀸 𑀧𑀁𑀲𑀼𑀧𑀼𑀜𑁆𑀚𑀲𑁆𑀲 𑀉𑀧𑀳𑀦𑀦𑀁 𑀯𑀺𑀬 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀤𑀻𑀳𑀺 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀖𑀸𑀢𑁄 𑀯𑁂𑀤𑀺𑀢𑀩𑁆𑀩𑁄𑀢𑀺.

𑀏𑀓𑀥𑀫𑁆𑀫𑀯𑀕𑁆𑀕𑁄 𑀧𑀞𑀫𑁄.

𑁨. 𑀤𑀼𑀢𑀺𑀬𑀯𑀕𑁆𑀕𑁄

𑁧-𑁨. 𑀇𑀘𑁆𑀙𑀸𑀦𑀗𑁆𑀕𑀮𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁮𑁭-𑁯𑁮𑁮. 𑀤𑀼𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀣𑀸𑀢𑀺 𑀓𑀲𑁆𑀫𑀸 𑀅𑀢𑁆𑀢𑀦𑁄 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀁 𑀆𑀘𑀺𑀓𑁆𑀔𑀢𑀺? 𑀉𑀧𑀸𑀭𑀫𑁆𑀪𑀫𑁄𑀘𑀦𑀢𑁆𑀣𑀁. 𑀲𑀘𑁂 𑀳𑀺 𑀢𑁂 ‘‘𑀦 𑀚𑀸𑀦𑀸𑀫𑀸’’𑀢𑀺 𑀯𑀤𑁂𑀬𑁆𑀬𑀼𑀁, 𑀅𑀣 𑀦𑁂𑀲𑀁 𑀢𑀺𑀢𑁆𑀣𑀺𑀬𑀸 ‘‘𑀢𑀼𑀫𑁆𑀳𑁂 ‘𑀅𑀲𑀼𑀓𑀲𑀫𑀸𑀧𑀢𑁆𑀢𑀺𑀬𑀸 𑀦𑀸𑀫 𑀦𑁄 𑀲𑀢𑁆𑀣𑀸 𑀢𑁂𑀫𑀸𑀲𑀁 𑀯𑀺𑀳𑀸𑀲𑀻’𑀢𑀺𑀧𑀺 𑀦 𑀚𑀸𑀦𑀸𑀣, 𑀅𑀣 𑀓𑀲𑁆𑀫𑀸 𑀦𑀁 𑀉𑀧𑀝𑁆𑀞𑀳𑀦𑁆𑀢𑀸 𑀯𑀺𑀳𑀭𑀣𑀸’’𑀢𑀺 𑀉𑀧𑀸𑀭𑀫𑁆𑀪𑀁 𑀆𑀭𑁄𑀧𑁂𑀬𑁆𑀬𑀼𑀁, 𑀢𑀢𑁄 𑀫𑁄𑀘𑀦𑀢𑁆𑀣𑀁 𑀏𑀯𑀫𑀸𑀳.

𑀅𑀣 𑀓𑀲𑁆𑀫𑀸 𑀬𑀣𑀸 𑀅𑀜𑁆𑀜𑀢𑁆𑀣 ‘‘𑀲𑀢𑁄𑀯 𑀅𑀲𑁆𑀲𑀲𑀢𑀺, 𑀤𑀻𑀖𑀁 𑀯𑀸 𑀅𑀲𑁆𑀲𑀲𑀦𑁆𑀢𑁄’’𑀢𑀺 (𑀤𑀻. 𑀦𑀺. 𑁨.𑁩𑁭𑁪; 𑀫. 𑀦𑀺. 𑁧.𑁧𑁦𑁭; 𑀲𑀁. 𑀦𑀺. 𑁫.𑁯𑁭𑁭) 𑀏𑀯-𑀯𑀸𑀓𑀸𑀭𑁄 𑀯𑀼𑀢𑁆𑀢𑁄. 𑀏𑀯𑀁 𑀇𑀥 𑀦 𑀯𑀼𑀢𑁆𑀢𑁄𑀢𑀺? 𑀏𑀓𑀦𑁆𑀢𑀲𑀦𑁆𑀢𑀢𑁆𑀢𑀸. 𑀅𑀜𑁆𑀜𑁂𑀲𑀜𑁆𑀳𑀺 𑀅𑀲𑁆𑀲𑀸𑀲𑁄 𑀯𑀸 𑀧𑀸𑀓𑀝𑁄 𑀳𑁄𑀢𑀺 𑀧𑀲𑁆𑀲𑀸𑀲𑁄 𑀯𑀸, 𑀪𑀕𑀯𑀢𑁄 𑀉𑀪𑀬𑀫𑁆𑀧𑁂𑀢𑀁 𑀧𑀸𑀓𑀝𑀫𑁂𑀯 𑀦𑀺𑀘𑁆𑀘𑀁 𑀉𑀧𑀝𑁆𑀞𑀺𑀢𑀲𑁆𑀲𑀢𑀺𑀢𑀸𑀬𑀸𑀢𑀺 𑀏𑀓𑀦𑁆𑀢𑀲𑀦𑁆𑀢𑀢𑁆𑀢𑀸 𑀦 𑀯𑀼𑀢𑁆𑀢𑁄. 𑀅𑀣 ‘‘𑀲𑀺𑀓𑁆𑀔𑀸𑀫𑀻’’𑀢𑀺 𑀅𑀯𑀢𑁆𑀯𑀸 𑀓𑀲𑁆𑀫𑀸 ‘‘𑀅𑀲𑁆𑀲𑀲𑀸𑀫𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀦𑁆𑀢𑀺? 𑀲𑀺𑀓𑁆𑀔𑀺𑀢𑀩𑁆𑀩𑀸𑀪𑀸𑀯𑀸. 𑀲𑀢𑁆𑀢 𑀳𑀺 𑀲𑁂𑀔𑀸 𑀲𑀺𑀓𑁆𑀔𑀺𑀢𑀩𑁆𑀩𑀪𑀸𑀯𑀸 𑀲𑁂𑀔𑀸 𑀦𑀸𑀫, 𑀔𑀻𑀡𑀸𑀲𑀯𑀸 𑀲𑀺𑀓𑁆𑀔𑀺𑀢𑀩𑁆𑀩𑀸𑀪𑀸𑀯𑀸 𑀅𑀲𑁂𑀔𑀸 𑀦𑀸𑀫, 𑀢𑀣𑀸𑀕𑀢𑀸 𑀅𑀲𑀺𑀓𑁆𑀔𑀺𑀢𑀩𑁆𑀩𑀸 𑀅𑀲𑁂𑀓𑁆𑀔𑀸 𑀦𑀸𑀫 𑀦𑀢𑁆𑀣𑀺 𑀢𑁂𑀲𑀁 𑀲𑀺𑀓𑁆𑀔𑀺𑀢𑀩𑁆𑀩𑀓𑀺𑀘𑁆𑀘𑀦𑁆𑀢𑀺 𑀲𑀺𑀓𑁆𑀔𑀺𑀢𑀩𑁆𑀩𑀸𑀪𑀸𑀯𑀸 𑀦 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀁 𑀉𑀢𑁆𑀢𑀸𑀦𑀫𑁂𑀯.

𑁩-𑁧𑁦. 𑀧𑀞𑀫𑀆𑀦𑀦𑁆𑀤𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁯𑁮𑁯-𑁯𑁯𑁬. 𑀢𑀢𑀺𑀬𑁂 𑀧𑀯𑀺𑀘𑀺𑀦𑀢𑀻𑀢𑀺 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀧𑀯𑀺𑀘𑀺𑀦𑀢𑀺. 𑀇𑀢𑀭𑀁 𑀧𑀤𑀤𑁆𑀯𑀬𑀁 𑀏𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀦𑀺𑀭𑀸𑀫𑀺𑀲𑀸𑀢𑀺 𑀦𑀺𑀓𑁆𑀓𑀺𑀮𑁂𑀲𑀸 𑀓𑀸𑀬𑀺𑀓𑀘𑁂𑀢𑀲𑀺𑀓𑀤𑀭𑀣𑀧𑀝𑀺𑀧𑀲𑁆𑀲𑀤𑁆𑀥𑀺𑀬𑀸 𑀓𑀸𑀬𑁄𑀧𑀺 𑀘𑀺𑀢𑁆𑀢𑀫𑁆𑀧𑀺 𑀧𑀲𑁆𑀲𑀫𑁆𑀪𑀢𑀺. 𑀲𑀫𑀸𑀥𑀺𑀬𑀢𑀻𑀢𑀺 𑀲𑀫𑁆𑀫𑀸 𑀞𑀧𑀺𑀬𑀢𑀺, 𑀅𑀧𑁆𑀧𑀦𑀸𑀘𑀺𑀢𑁆𑀢𑀁 𑀯𑀺𑀬 𑀳𑁄𑀢𑀺. 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀸 𑀳𑁄𑀢𑀻𑀢𑀺 𑀲𑀳𑀚𑀸𑀢𑀅𑀚𑁆𑀛𑀼𑀧𑁂𑀓𑁆𑀔𑀦𑀸𑀬 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀸 𑀳𑁄𑀢𑀺.

𑀏𑀯𑀁 𑀘𑀼𑀤𑁆𑀤𑀲𑀯𑀺𑀥𑁂𑀦 𑀓𑀸𑀬𑀧𑀭𑀺𑀕𑁆𑀕𑀸𑀳𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀲𑁆𑀫𑀺𑀁 𑀓𑀸𑀬𑁂 𑀲𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀢𑀸𑀬 𑀲𑀢𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀜𑀸𑀡𑀁 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀢𑀁𑀲𑀫𑁆𑀧𑀬𑀼𑀢𑁆𑀢𑀫𑁂𑀯 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑀁 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄, 𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀧𑀻𑀢𑀺𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸, 𑀇𑀫𑁂𑀲𑀁 𑀙𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀦𑁄𑀲𑀓𑁆𑀓𑀦𑀅𑀦𑀢𑀺𑀯𑀢𑁆𑀢𑀦𑀲𑀗𑁆𑀔𑀸𑀢𑁄 𑀫𑀚𑁆𑀛𑀢𑁆𑀢𑀸𑀓𑀸𑀭𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀬𑀣𑁂𑀯 𑀳𑀺 𑀲𑀫𑀧𑁆𑀧𑀯𑀢𑁆𑀢𑁂𑀲𑀼 𑀅𑀲𑁆𑀲𑁂𑀲𑀼 𑀲𑀸𑀭𑀣𑀺𑀦𑁄 ‘‘𑀅𑀬𑀁 𑀑𑀮𑀻𑀬𑀢𑀻’’𑀢𑀺 𑀢𑀼𑀤𑀦𑀁 𑀯𑀸, ‘‘𑀅𑀬𑀁 𑀅𑀢𑀺𑀥𑀸𑀯𑀢𑀻’’𑀢𑀺 𑀆𑀓𑀟𑁆𑀠𑀦𑀁 𑀯𑀸 𑀦𑀢𑁆𑀣𑀺, 𑀓𑁂𑀯𑀮𑀁 𑀏𑀯𑀁 𑀧𑀲𑁆𑀲𑀫𑀸𑀦𑀲𑁆𑀲 𑀞𑀺𑀢𑀸𑀓𑀸𑀭𑁄𑀯 𑀳𑁄𑀢𑀺, 𑀏𑀯𑀫𑁂𑀯 𑀇𑀫𑁂𑀲𑀁 𑀙𑀦𑁆𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀅𑀦𑁄𑀲𑀓𑁆𑀓𑀦𑀅𑀦𑀢𑀺𑀯𑀢𑁆𑀢𑀦𑀲𑀗𑁆𑀔𑀸𑀢𑁄 𑀫𑀚𑁆𑀛𑀢𑁆𑀢𑀸𑀓𑀸𑀭𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀦𑀸𑀫 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀓𑀺𑀁 𑀓𑀣𑀺𑀢𑀁? 𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀸 𑀦𑀸𑀦𑀸𑀲𑀭𑀲𑀮𑀓𑁆𑀔𑀡𑀸 𑀯𑀺𑀧𑀲𑁆𑀲𑀦𑀸𑀩𑁄𑀚𑁆𑀛𑀗𑁆𑀕𑀸 𑀦𑀸𑀫 𑀓𑀣𑀺𑀢𑀸.

𑀯𑀺𑀯𑁂𑀓𑀦𑀺𑀲𑁆𑀲𑀺𑀢𑀦𑁆𑀢𑀺𑀆𑀤𑀻𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑁂𑀯. 𑀏𑀢𑁆𑀣 𑀧𑀦 𑀲𑁄𑀴𑀲𑀓𑁆𑀔𑀢𑁆𑀢𑀼𑀓𑀸 𑀆𑀦𑀸𑀧𑀸𑀦𑀲𑁆𑀲𑀢𑀺 𑀫𑀺𑀲𑁆𑀲𑀓𑀸 𑀓𑀣𑀺𑀢𑀸, 𑀆𑀦𑀸𑀧𑀸𑀦𑀫𑀽𑀮𑀓𑀸 𑀲𑀢𑀺𑀧𑀝𑁆𑀞𑀸𑀦𑀸 𑀧𑀼𑀩𑁆𑀩𑀪𑀸𑀕𑀸, 𑀢𑁂𑀲𑀁 𑀫𑀽𑀮𑀪𑀽𑀢𑀸 𑀆𑀦𑀸𑀧𑀸𑀦𑀲𑁆𑀲𑀢𑀺 𑀧𑀼𑀩𑁆𑀩𑀪𑀸𑀕𑀸. 𑀩𑁄𑀚𑁆𑀛𑀗𑁆𑀕𑀫𑀽𑀮𑀓𑀸 𑀲𑀢𑀺𑀧𑀝𑁆𑀞𑀸𑀦𑀸 𑀧𑀼𑀩𑁆𑀩𑀪𑀸𑀕𑀸, 𑀢𑁂𑀧𑀺 𑀩𑁄𑀚𑁆𑀛𑀗𑁆𑀕𑀸 𑀧𑀼𑀩𑁆𑀩𑀪𑀸𑀕𑀸𑀯. 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀧𑀽𑀭𑀓𑀸 𑀧𑀦 𑀩𑁄𑀚𑁆𑀛𑀗𑁆𑀕𑀸 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀸, 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀬𑁄 𑀅𑀭𑀺𑀬𑀨𑀮𑀲𑀫𑁆𑀧𑀬𑀼𑀢𑁆𑀢𑀸. 𑀯𑀺𑀚𑁆𑀚𑀸 𑀯𑀸 𑀘𑀢𑀼𑀢𑁆𑀣𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸, 𑀯𑀺𑀫𑀼𑀢𑁆𑀢𑀺 𑀨𑀮𑀲𑀫𑁆𑀧𑀬𑀼𑀢𑁆𑀢𑀸𑀢𑀺. 𑀘𑀢𑀼𑀢𑁆𑀣𑀧𑀜𑁆𑀘𑀫𑀙𑀝𑁆𑀞𑀸𑀦𑀺𑀧𑀺 𑀇𑀫𑀺𑀦𑀸𑀯 𑀲𑀫𑀸𑀦𑀧𑀭𑀺𑀘𑁆𑀙𑁂𑀤𑀸𑀦𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀆𑀦𑀸𑀧𑀸𑀦𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀲𑁄𑀢𑀸𑀧𑀢𑁆𑀢𑀺𑀲𑀁𑀬𑀼𑀢𑁆𑀢𑀁

𑁧. 𑀯𑁂𑀴𑀼𑀤𑁆𑀯𑀸𑀭𑀯𑀕𑁆𑀕𑁄

𑁧. 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁯𑁭. 𑀲𑁄𑀢𑀸𑀧𑀢𑁆𑀢𑀺𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀓𑀺𑀜𑁆𑀘𑀸𑀧𑀻𑀢𑀺 𑀅𑀦𑀼𑀕𑁆𑀕𑀳𑀕𑀭𑀳𑀡𑁂𑀲𑀼 𑀦𑀺𑀧𑀸𑀢𑁄. 𑀘𑀢𑀼𑀦𑁆𑀦𑀜𑁆𑀳𑀺 𑀫𑀳𑀸𑀤𑀻𑀧𑀸𑀦𑀁 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀁 𑀭𑀚𑁆𑀚𑀁 𑀅𑀦𑀼𑀕𑁆𑀕𑀡𑁆𑀳𑀦𑁆𑀢𑁄 𑀘𑀢𑀼𑀦𑁆𑀦𑀜𑁆𑀘 𑀅𑀧𑀸𑀬𑀸𑀦𑀁 𑀅𑀧𑁆𑀧𑀳𑀻𑀦𑀪𑀸𑀯𑀁 𑀕𑀭𑀳𑀦𑁆𑀢𑁄 𑀲𑀢𑁆𑀣𑀸 ‘‘𑀓𑀺𑀜𑁆𑀘𑀸𑀧𑀺, 𑀪𑀺𑀓𑁆𑀔𑀯𑁂, 𑀭𑀸𑀚𑀸 𑀘𑀓𑁆𑀓𑀯𑀢𑁆𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀢𑀼𑀦𑁆𑀦𑀁 𑀤𑀻𑀧𑀸𑀦𑀦𑁆𑀢𑀺 𑀤𑁆𑀯𑀺𑀲𑀳𑀲𑁆𑀲𑀤𑀻𑀧𑀧𑀭𑀺𑀯𑀸𑀭𑀸𑀦𑀁 𑀘𑀢𑀼𑀦𑁆𑀦𑀁 𑀫𑀳𑀸𑀤𑀻𑀧𑀸𑀦𑀁. 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀦𑁆𑀢𑀺 𑀇𑀲𑁆𑀲𑀭𑀪𑀸𑀯𑁄 𑀇𑀲𑁆𑀲𑀭𑀺𑀬𑀁, 𑀅𑀥𑀺𑀧𑀢𑀺𑀪𑀸𑀯𑁄 𑀆𑀥𑀺𑀧𑀘𑁆𑀘𑀁, 𑀇𑀲𑁆𑀲𑀭𑀺𑀬𑀁 𑀆𑀥𑀺𑀧𑀘𑁆𑀘𑀁 𑀏𑀢𑀲𑁆𑀫𑀺𑀁 𑀭𑀚𑁆𑀚𑁂, 𑀦 𑀙𑁂𑀤𑀦𑀪𑁂𑀤𑀦𑀦𑁆𑀢𑀺 𑀇𑀲𑁆𑀲𑀭𑀺𑀬𑀸𑀥𑀺𑀧𑀘𑁆𑀘𑀁. 𑀓𑀸𑀭𑁂𑀢𑁆𑀯𑀸𑀢𑀺 𑀏𑀯𑀭𑀽𑀧𑀁 𑀭𑀚𑁆𑀚𑀁 𑀧𑀯𑀢𑁆𑀢𑀸𑀧𑁂𑀢𑁆𑀯𑀸. 𑀓𑀺𑀜𑁆𑀘𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄𑀢𑀺 𑀏𑀢𑁆𑀣 𑀅𑀦𑀼𑀕𑁆𑀕𑀳𑀧𑀲𑀁𑀲𑀸𑀲𑀼 𑀦𑀺𑀧𑀸𑀢𑁄. 𑀧𑀺𑀡𑁆𑀟𑀺𑀬𑀸𑀮𑁄𑀧𑁂𑀦 𑀳𑀺 𑀬𑀸𑀧𑀦𑀁 𑀅𑀦𑀼𑀕𑁆𑀕𑀳𑀦𑁆𑀢𑁄 𑀘𑀢𑀼𑀦𑁆𑀦𑀜𑁆𑀘 𑀅𑀧𑀸𑀬𑀸𑀦𑀁 𑀧𑀳𑀻𑀦𑀪𑀸𑀯𑀁 𑀧𑀲𑀁𑀲𑀦𑁆𑀢𑁄 𑀲𑀢𑁆𑀣𑀸 ‘‘𑀓𑀺𑀜𑁆𑀘𑀸𑀧𑀺, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑀦𑁆𑀢𑀓𑀸𑀦𑀻𑀢𑀺 𑀅𑀦𑀦𑁆𑀢𑀓𑀸𑀦𑀺. 𑀢𑁂𑀭𑀲𑀳𑀢𑁆𑀣𑁄𑀧𑀺 𑀳𑀺 𑀯𑀢𑁆𑀣𑀲𑀸𑀝𑀓𑁄 𑀤𑀲𑀘𑁆𑀙𑁂𑀤𑀦𑀢𑁄 𑀧𑀝𑁆𑀞𑀸𑀬 𑀦𑀦𑁆𑀢𑀓𑀦𑁆𑀢𑁂𑀯 𑀲𑀗𑁆𑀔𑀁 𑀕𑀘𑁆𑀙𑀢𑀺.

𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦𑀸𑀢𑀺 𑀅𑀘𑀮𑀧𑁆𑀧𑀲𑀸𑀤𑁂𑀦. 𑀲𑁄 𑀧𑀦𑀸𑀬𑀁 𑀧𑀲𑀸𑀤𑁄 𑀓𑀺𑀁 𑀏𑀓𑁄, 𑀅𑀦𑁂𑀓𑁄𑀢𑀺? 𑀏𑀓𑁄𑀯, 𑀲𑁄 𑀫𑀕𑁆𑀕𑁂𑀦 𑀆𑀕𑀢𑀧𑁆𑀧𑀲𑀸𑀤𑁄. 𑀬𑁂𑀲𑀼 𑀧𑀦 𑀯𑀢𑁆𑀣𑀽𑀲𑀼 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀭𑀼𑀳𑀢𑀺, 𑀢𑁂𑀲𑀁 𑀯𑀲𑁂𑀦 ‘‘𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀺𑀥𑀸 𑀯𑀼𑀢𑁆𑀢𑁄. 𑀬𑀲𑁆𑀫𑀸 𑀘 𑀏𑀓𑁄, 𑀢𑀲𑁆𑀫𑀸𑀯 𑀦𑀺𑀦𑁆𑀦𑀸𑀦𑀸𑀓𑀭𑀡𑁄 𑀳𑁄𑀢𑀺. 𑀅𑀭𑀺𑀬𑀲𑀸𑀯𑀓𑀲𑁆𑀲 𑀳𑀺 𑀩𑀼𑀤𑁆𑀥𑁂𑀬𑁂𑀯 𑀧𑀲𑀸𑀤𑁄 𑀘 𑀧𑁂𑀫𑀜𑁆𑀘 𑀕𑀸𑀭𑀯𑀜𑁆𑀘 𑀫𑀳𑀦𑁆𑀢𑀁, 𑀦 𑀥𑀫𑁆𑀫𑁂 𑀯𑀸 𑀲𑀗𑁆𑀖𑁂 𑀯𑀸, 𑀥𑀫𑁆𑀫𑁂𑀬𑁂𑀯 𑀯𑀸 𑀫𑀳𑀦𑁆𑀢𑀁, 𑀦 𑀩𑀼𑀤𑁆𑀥𑁂 𑀯𑀸 𑀲𑀗𑁆𑀖𑁂 𑀯𑀸, 𑀲𑀗𑁆𑀖𑁂𑀬𑁂𑀯 𑀯𑀸 𑀫𑀳𑀦𑁆𑀢𑀁, 𑀦 𑀩𑀼𑀤𑁆𑀥𑁂 𑀯𑀸 𑀥𑀫𑁆𑀫𑁂 𑀯𑀸𑀢𑀺 𑀏𑀢𑀁 𑀦𑀢𑁆𑀣𑀺. 𑀇𑀢𑀺𑀧𑀺 𑀲𑁄 𑀪𑀕𑀯𑀸𑀢𑀺𑀆𑀤𑀻𑀦𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑁂𑀯.

𑀅𑀭𑀺𑀬𑀓𑀦𑁆𑀢𑁂𑀳𑀻𑀢𑀺 𑀅𑀭𑀺𑀬𑀸𑀦𑀁 𑀓𑀦𑁆𑀢𑁂𑀳𑀺 𑀧𑀺𑀬𑁂𑀳𑀺 𑀫𑀦𑀸𑀧𑁂𑀳𑀺. 𑀧𑀜𑁆𑀘 𑀳𑀺 𑀲𑀻𑀮𑀸𑀦𑀺 𑀪𑀯𑀦𑁆𑀢𑀭𑀕𑀢𑀸𑀧𑀺 𑀅𑀭𑀺𑀬𑀸 𑀦 𑀓𑁄𑀧𑁂𑀦𑁆𑀢𑀺, 𑀏𑀯𑀁 𑀢𑁂𑀲𑀁 𑀧𑀺𑀬𑀸𑀦𑀺. 𑀢𑀸𑀦𑀺 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀅𑀔𑀡𑁆𑀟𑁂𑀳𑀻𑀢𑀺𑀆𑀤𑀺 𑀲𑀤𑀺𑀲𑀯𑀲𑁂𑀦 𑀯𑀼𑀢𑁆𑀢𑀁. 𑀫𑀼𑀔𑀯𑀝𑁆𑀝𑀺𑀬𑀜𑁆𑀳𑀺 𑀙𑀺𑀦𑁆𑀦𑁂𑀓𑀤𑁂𑀲𑀸 𑀧𑀸𑀢𑀺 𑀔𑀡𑁆𑀟𑀸𑀢𑀺 𑀯𑀼𑀘𑁆𑀘𑀢𑀺, 𑀫𑀚𑁆𑀛𑁂 𑀪𑀺𑀦𑁆𑀦𑀸 𑀙𑀺𑀤𑁆𑀤𑀸𑀢𑀺, 𑀏𑀓𑀲𑁆𑀫𑀺𑀁 𑀧𑀤𑁂𑀲𑁂 𑀯𑀺𑀲𑀪𑀸𑀕𑀯𑀡𑁆𑀡𑀸 𑀕𑀸𑀯𑀻 𑀲𑀩𑀮𑀸𑀢𑀺, 𑀦𑀸𑀦𑀸𑀩𑀺𑀦𑁆𑀤𑀼𑀘𑀺𑀢𑁆𑀢𑀸 𑀓𑀫𑁆𑀫𑀸𑀲𑀸𑀢𑀺, 𑀏𑀯𑀫𑁂𑀯 𑀧𑀝𑀺𑀧𑀸𑀝𑀺𑀬𑀸 𑀆𑀤𑀺𑀫𑁆𑀳𑀺 𑀯𑀸 𑀅𑀦𑁆𑀢𑁂 𑀯𑀸 𑀪𑀺𑀦𑁆𑀦𑀁 𑀲𑀻𑀮𑀁 𑀔𑀡𑁆𑀟𑀁 𑀦𑀸𑀫, 𑀫𑀚𑁆𑀛𑁂 𑀪𑀺𑀦𑁆𑀦𑀁 𑀙𑀺𑀤𑁆𑀤𑀁, 𑀬𑀢𑁆𑀣 𑀓𑀢𑁆𑀣𑀘𑀺 𑀤𑁆𑀯𑀺𑀦𑁆𑀦𑀁 𑀯𑀸 𑀢𑀺𑀡𑁆𑀡𑀁 𑀯𑀸 𑀧𑀝𑀺𑀧𑀸𑀝𑀺𑀬𑀸 𑀪𑀺𑀦𑁆𑀦𑀢𑁆𑀢𑀸 𑀲𑀩𑀮𑀁, 𑀏𑀓𑀦𑁆𑀢𑀭𑀁 𑀪𑀺𑀦𑁆𑀦𑀁 𑀓𑀫𑁆𑀫𑀸𑀲𑀁. 𑀢𑁂𑀲𑀁 𑀤𑁄𑀲𑀸𑀦𑀁 𑀅𑀪𑀸𑀯𑁂𑀦 𑀅𑀔𑀡𑁆𑀟𑀸𑀤𑀺𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀪𑀼𑀚𑀺𑀲𑁆𑀲𑁂𑀳𑀻𑀢𑀺 𑀪𑀼𑀚𑀺𑀲𑁆𑀲𑀪𑀸𑀯𑀓𑀭𑁂𑀳𑀺. 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑁂𑀳𑀻𑀢𑀺 𑀩𑀼𑀤𑁆𑀥𑀸𑀤𑀻𑀳𑀺 𑀯𑀺𑀜𑁆𑀜𑀽𑀳𑀺 𑀧𑀲𑀁𑀲𑀺𑀢𑁂𑀳𑀺. 𑀅𑀧𑀭𑀸𑀫𑀝𑁆𑀞𑁂𑀳𑀻𑀢𑀺 ‘‘𑀇𑀤𑀁 𑀦𑀸𑀫 𑀢𑀬𑀸 𑀓𑀢𑀁, 𑀇𑀤𑀁 𑀯𑀻𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺 𑀏𑀯𑀁 𑀧𑀭𑀸𑀫𑀲𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑁂𑀳𑀺. 𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑁂𑀳𑀻𑀢𑀺 𑀅𑀧𑁆𑀧𑀦𑀸𑀲𑀫𑀸𑀥𑀺𑀁 𑀉𑀧𑀘𑀸𑀭𑀲𑀫𑀸𑀥𑀺𑀁 𑀯𑀸 𑀲𑀁𑀯𑀢𑁆𑀢𑁂𑀢𑀼𑀁 𑀲𑀫𑀢𑁆𑀣𑁂𑀳𑀺.

𑁨. 𑀩𑁆𑀭𑀳𑁆𑀫𑀘𑀭𑀺𑀬𑁄𑀕𑀥𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁯𑁮. 𑀤𑀼𑀢𑀺𑀬𑁂 𑀬𑁂𑀲𑀁 𑀲𑀤𑁆𑀥𑀸𑀢𑀺 𑀧𑀤𑁂𑀦 𑀩𑀼𑀤𑁆𑀥𑁂 𑀧𑀲𑀸𑀤𑁄 𑀕𑀳𑀺𑀢𑁄. 𑀲𑀻𑀮𑀦𑁆𑀢𑀺 𑀧𑀤𑁂𑀦 𑀅𑀭𑀺𑀬𑀓𑀦𑁆𑀢𑀸𑀦𑀺 𑀲𑀻𑀮𑀸𑀦𑀺 𑀕𑀳𑀺𑀢𑀸𑀦𑀺. 𑀧𑀲𑀸𑀤𑁄𑀢𑀺 𑀧𑀤𑁂𑀦 𑀲𑀗𑁆𑀖𑁂 𑀧𑀲𑀸𑀤𑁄 𑀕𑀳𑀺𑀢𑁄. 𑀥𑀫𑁆𑀫𑀤𑀲𑁆𑀲𑀦𑀦𑁆𑀢𑀺 𑀧𑀤𑁂𑀦 𑀥𑀫𑁆𑀫𑁂 𑀧𑀲𑀸𑀤𑁄 𑀕𑀳𑀺𑀢𑁄𑀢𑀺 𑀏𑀯𑀁 𑀘𑀢𑁆𑀢𑀸𑀭𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀓𑀸𑀮𑁂𑀦 𑀧𑀘𑁆𑀘𑁂𑀦𑁆𑀢𑀻𑀢𑀺 𑀓𑀸𑀮𑁂𑀦 𑀧𑀸𑀧𑀼𑀡𑀦𑁆𑀢𑀺. 𑀩𑁆𑀭𑀳𑁆𑀫𑀘𑀭𑀺𑀬𑁄𑀕𑀥𑀁 𑀲𑀼𑀔𑀦𑁆𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀑𑀕𑀸𑀳𑀺𑀢𑁆𑀯𑀸 𑀞𑀺𑀢𑀁 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀲𑀫𑁆𑀧𑀬𑀼𑀢𑁆𑀢𑀁 𑀲𑀼𑀔𑀁. 𑀬𑁄 𑀧𑀦𑁂𑀲 𑀕𑀸𑀣𑀸𑀬 𑀆𑀕𑀢𑁄 𑀧𑀲𑀸𑀤𑁄, 𑀲𑁄 𑀓𑀢𑀭𑀧𑀲𑀸𑀤𑁄 𑀳𑁄𑀢𑀻𑀢𑀺. 𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑁄 𑀢𑀸𑀯 ‘‘𑀫𑀕𑁆𑀕𑀧𑀲𑀸𑀤𑁄’’𑀢𑀺 𑀆𑀳, 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑁄 ‘‘𑀆𑀕𑀢𑀫𑀕𑁆𑀕𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀧𑁆𑀧𑀲𑀸𑀤𑁄’’𑀢𑀺. 𑀉𑀪𑁄𑀧𑀺 𑀣𑁂𑀭𑀸 𑀧𑀡𑁆𑀟𑀺𑀢𑀸 𑀩𑀳𑀼𑀲𑁆𑀲𑀼𑀢𑀸, 𑀉𑀪𑀺𑀦𑁆𑀦𑀁 𑀲𑀼𑀪𑀸𑀲𑀺𑀢𑀁. 𑀫𑀺𑀲𑁆𑀲𑀓𑀧𑁆𑀧𑀲𑀸𑀤𑁄 𑀏𑀲𑁄𑀢𑀺.

𑁩. 𑀤𑀻𑀖𑀸𑀯𑀼𑀉𑀧𑀸𑀲𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁯𑁯𑁯. 𑀢𑀢𑀺𑀬𑁂 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀘𑀢𑀽𑀲𑀼 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑁂𑀲𑀼 𑀲𑀦𑁆𑀤𑀺𑀲𑁆𑀲𑀲𑀺, 𑀢𑀲𑁆𑀫𑀸. 𑀯𑀺𑀚𑁆𑀚𑀸𑀪𑀸𑀕𑀺𑀬𑁂𑀢𑀺 𑀯𑀺𑀚𑁆𑀚𑀸𑀓𑁄𑀝𑁆𑀞𑀸𑀲𑀺𑀓𑁂. 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀽𑀢𑀺 𑀲𑀩𑁆𑀩𑁂𑀲𑀼 𑀢𑁂𑀪𑀽𑀫𑀓𑀲𑀗𑁆𑀔𑀸𑀭𑁂𑀲𑀼. 𑀏𑀯𑀫𑀲𑁆𑀲 𑀉𑀧𑀭𑀺 𑀢𑀺𑀡𑁆𑀡𑀁 𑀫𑀕𑁆𑀕𑀸𑀦𑀁 𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸. 𑀯𑀺𑀖𑀸𑀢𑀦𑁆𑀢𑀺 𑀤𑀼𑀓𑁆𑀔𑀁.

𑁪-𑁫. 𑀧𑀞𑀫𑀲𑀸𑀭𑀺𑀧𑀼𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁦𑁦-𑁧𑁦𑁦𑁧. 𑀘𑀢𑀼𑀢𑁆𑀣 𑀉𑀢𑁆𑀢𑀸𑀦𑀫𑁂𑀯. 𑀧𑀜𑁆𑀘𑀫𑁂 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀦𑁆𑀢𑀺 𑀲𑁄𑀢𑀸𑀧𑀢𑁆𑀢𑀺𑀬𑀸 𑀧𑀼𑀩𑁆𑀩𑀪𑀸𑀕𑀧𑀝𑀺𑀮𑀸𑀪𑀗𑁆𑀕𑀁. 𑀩𑀼𑀤𑁆𑀥𑁂 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑀸𑀤𑀬𑁄 𑀧𑀦 𑀧𑀝𑀺𑀮𑀤𑁆𑀥𑀕𑀼𑀡𑀸 𑀲𑁄𑀢𑀸𑀧𑀦𑁆𑀦𑀲𑁆𑀲 𑀅𑀗𑁆𑀕𑀸 𑀦𑀸𑀫, 𑀢𑁂𑀧𑀺 𑀧𑀦 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀦𑁆𑀢𑀺 𑀆𑀕𑀢𑀸. 𑀢𑀢𑁆𑀭𑀸𑀬𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀘𑀦𑀢𑁆𑀣𑁄 𑁋 𑀲𑀧𑁆𑀧𑀼𑀭𑀺𑀲𑁂 𑀲𑁂𑀯𑀦𑁆𑀢𑁄 𑀪𑀚𑀦𑁆𑀢𑁄 𑀧𑀬𑀺𑀭𑀼𑀧𑀸𑀲𑀦𑁆𑀢𑁄 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀦𑁆𑀢𑁄 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀦𑁆𑀢𑁄 𑀲𑁄𑀢𑀸𑀧𑀢𑁆𑀢𑀺𑀁 𑀧𑀝𑀺𑀮𑀪𑀢𑀻𑀢𑀺 𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑀸𑀤𑀬𑁄 𑀲𑁄𑀢𑀸𑀧𑀢𑁆𑀢𑀺𑀅𑀢𑁆𑀣𑀸𑀬 𑀅𑀗𑁆𑀕𑀦𑁆𑀢𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀁 𑀦𑀸𑀫, 𑀇𑀢𑀭𑁂 𑀧𑀞𑀫𑀫𑀕𑁆𑀕𑀲𑀗𑁆𑀔𑀸𑀢𑀸𑀬 𑀲𑁄𑀢𑀸𑀧𑀢𑁆𑀢𑀺𑀬𑀸 𑀅𑀗𑁆𑀕𑀦𑁆𑀢𑀺𑀧𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀁, 𑀧𑀝𑀺𑀯𑀺𑀤𑁆𑀥𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀅𑀗𑁆𑀕𑀦𑁆𑀢𑀺𑀧𑀺 𑀲𑁄𑀢𑀸𑀧𑀢𑁆𑀢𑀺𑀬𑀗𑁆𑀕𑀁.

𑁬. 𑀣𑀧𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁦𑁨. 𑀙𑀝𑁆𑀞𑁂 𑀲𑀸𑀥𑀼𑀓𑁂 𑀧𑀝𑀺𑀯𑀲𑀦𑁆𑀢𑀻𑀢𑀺 𑀲𑀸𑀥𑀼𑀓𑀦𑀸𑀫𑀓𑁂 𑀅𑀢𑁆𑀢𑀦𑁄 𑀪𑁄𑀕𑀕𑀸𑀫𑀓𑁂 𑀯𑀲𑀦𑁆𑀢𑀺. 𑀢𑁂𑀲𑀼 𑀇𑀲𑀺𑀤𑀢𑁆𑀢𑁄 𑀲𑀓𑀤𑀸𑀕𑀸𑀫𑀻, 𑀧𑀼𑀭𑀸𑀡𑁄 𑀲𑁄𑀢𑀸𑀧𑀦𑁆𑀦𑁄 𑀲𑀤𑀸𑀭𑀲𑀦𑁆𑀢𑀼𑀝𑁆𑀞𑁄. 𑀫𑀕𑁆𑀕𑁂 𑀧𑀼𑀭𑀺𑀲𑀁 𑀞𑀧𑁂𑀲𑀼𑀦𑁆𑀢𑀺 𑀢𑁂𑀲𑀁 𑀓𑀺𑀭 𑀕𑀸𑀫𑀤𑁆𑀯𑀸𑀭𑁂𑀦 𑀪𑀕𑀯𑀢𑁄 𑀕𑀫𑀦𑀫𑀕𑁆𑀕𑁄. 𑀢𑀲𑁆𑀫𑀸 ‘‘𑀪𑀕𑀯𑀸 𑀓𑀸𑀮𑁂 𑀯𑀸 𑀅𑀓𑀸𑀮𑁂 𑀯𑀸 𑀅𑀫𑁆𑀳𑀸𑀓𑀁 𑀲𑀼𑀢𑁆𑀢𑀸𑀦𑀁 𑀯𑀸 𑀧𑀫𑀢𑁆𑀢𑀸𑀦𑀁 𑀯𑀸 𑀕𑀘𑁆𑀙𑁂𑀬𑁆𑀬, 𑀅𑀣 𑀧𑀲𑁆𑀲𑀺𑀢𑀼𑀁 𑀦 𑀮𑀪𑁂𑀬𑁆𑀬𑀸𑀫𑀸’’𑀢𑀺 𑀫𑀕𑁆𑀕𑀫𑀚𑁆𑀛𑁂 𑀧𑀼𑀭𑀺𑀲𑀁 𑀞𑀧𑁂𑀲𑀼𑀁.

𑀅𑀦𑀼𑀩𑀦𑁆𑀥𑀺𑀁𑀲𑀽𑀢𑀺 𑀦 𑀤𑀽𑀭𑀢𑁄𑀯 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺𑀁𑀲𑀼, 𑀪𑀕𑀯𑀸 𑀧𑀦 𑀲𑀓𑀝𑀫𑀕𑁆𑀕𑀲𑁆𑀲 𑀫𑀚𑁆𑀛𑁂 𑀚𑀗𑁆𑀖𑀫𑀕𑁆𑀕𑁂𑀦 𑀅𑀕𑀫𑀸𑀲𑀺, 𑀇𑀢𑀭𑁂 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀅𑀦𑀼𑀕𑀘𑁆𑀙𑀦𑁆𑀢𑀸 𑀅𑀕𑀫𑀁𑀲𑀼. 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫𑀸𑀢𑀺 𑀩𑀼𑀤𑁆𑀥𑀸𑀦𑀜𑁆𑀳𑀺 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀸𑀦𑀁𑀬𑁂𑀯 𑀧𑀝𑀺𑀲𑀦𑁆𑀣𑀸𑀭𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀞𑀺𑀢𑀓𑀸𑀦𑀁, 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀤𑀺𑀯𑀲𑀪𑀸𑀕𑀁 𑀦𑀺𑀲𑀺𑀦𑁆𑀦𑀸𑀦𑀁. 𑀢𑀲𑁆𑀫𑀸 𑀪𑀕𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂𑀳𑀺 𑀫𑁂 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑀲𑁆𑀲 𑀧𑀝𑀺𑀲𑀦𑁆𑀣𑀸𑀭𑀁 𑀓𑀸𑀢𑀼𑀁 𑀅𑀬𑀼𑀢𑁆𑀢𑀁, 𑀞𑀺𑀢𑀓𑁂𑀦𑀧𑀺 𑀓𑀸𑀢𑀼𑀁 𑀦 𑀬𑀼𑀢𑁆𑀢𑀁, 𑀇𑀫𑁂 𑀳𑀺 𑀫𑀬𑁆𑀳𑀁 𑀲𑀸𑀲𑀦𑁂 𑀲𑀸𑀫𑀺𑀦𑁄 𑀆𑀕𑀢𑀨𑀮𑀸. 𑀇𑀫𑁂𑀳𑀺 𑀲𑀤𑁆𑀥𑀺𑀁 𑀦𑀺𑀲𑀻𑀤𑀺𑀢𑁆𑀯𑀸𑀯 𑀤𑀺𑀯𑀲𑀪𑀸𑀕𑀁 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀬𑁂𑀦 𑀅𑀜𑁆𑀜𑀢𑀭𑀁 𑀭𑀼𑀓𑁆𑀔𑀫𑀽𑀮𑀁 𑀢𑁂𑀦𑀼𑀧𑀲𑀗𑁆𑀓𑀫𑀺.

𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀻𑀢𑀺 𑀢𑁂 𑀓𑀺𑀭 𑀙𑀢𑁆𑀢𑀼𑀧𑀸𑀳𑀦𑀁 𑀓𑀢𑁆𑀢𑀭𑀤𑀡𑁆𑀟𑀁 𑀧𑀸𑀤𑀩𑁆𑀪𑀜𑁆𑀚𑀦𑀢𑁂𑀮𑀸𑀤𑀻𑀦𑀺 𑀘𑁂𑀯 𑀅𑀝𑁆𑀞𑀯𑀺𑀥𑀜𑁆𑀘 𑀧𑀸𑀦𑀓𑀁 𑀲𑀭𑀪𑀧𑀸𑀤𑀧𑀮𑁆𑀮𑀗𑁆𑀓𑀜𑁆𑀘 𑀕𑀸𑀳𑀸𑀧𑁂𑀢𑁆𑀯𑀸 𑀅𑀕𑀫𑀁𑀲𑀼, 𑀆𑀪𑀢𑀁 𑀧𑀮𑁆𑀮𑀗𑁆𑀓𑀫𑁆𑀧𑀺 𑀧𑀜𑁆𑀜𑀸𑀧𑁂𑀢𑁆𑀯𑀸 𑀅𑀤𑀁𑀲𑀼, 𑀲𑀢𑁆𑀣𑀸 𑀢𑀲𑁆𑀫𑀺𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀽𑀢𑀺 𑀲𑁂𑀲𑀸𑀦𑀺 𑀙𑀢𑁆𑀢𑀼𑀧𑀸𑀳𑀦𑀸𑀤𑀻𑀦𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀤𑁂𑀣𑀸𑀢𑀺 𑀯𑀢𑁆𑀯𑀸 𑀲𑀬𑀫𑁆𑀧𑀺 𑀪𑀕𑀯𑀦𑁆𑀢𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼.

𑀲𑀸𑀯𑀢𑁆𑀣𑀺𑀬𑀸 𑀓𑁄𑀲𑀮𑁂𑀲𑀼 𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀲𑁆𑀲𑀢𑀻𑀢𑀺𑀆𑀤𑀺 𑀲𑀩𑁆𑀩𑀁 𑀫𑀚𑁆𑀛𑀺𑀫𑀧𑀤𑁂𑀲𑀯𑀲𑁂𑀦𑀯 𑀯𑀼𑀢𑁆𑀢𑀁. 𑀓𑀲𑁆𑀫𑀸? 𑀦𑀺𑀬𑀢𑀢𑁆𑀢𑀸. 𑀪𑀕𑀯𑀢𑁄 𑀳𑀺 𑀘𑀸𑀭𑀺𑀓𑀸𑀘𑀭𑀡𑀫𑁆𑀧𑀺 𑀅𑀭𑀼𑀡𑀼𑀝𑁆𑀞𑀸𑀧𑀦𑀫𑁆𑀧𑀺 𑀦𑀺𑀬𑀢𑀁, 𑀫𑀚𑁆𑀛𑀺𑀫𑀧𑀤𑁂𑀲𑁂𑀬𑁂𑀯 𑀘𑀸𑀭𑀺𑀓𑀁 𑀘𑀭𑀢𑀺, 𑀫𑀚𑁆𑀛𑀺𑀫𑀤𑁂𑀲𑁂 𑀅𑀭𑀼𑀡𑀁 𑀉𑀝𑁆𑀞𑀧𑁂𑀢𑀻𑀢𑀺 𑀦𑀺𑀬𑀢𑀢𑁆𑀢𑀸 𑀫𑀚𑁆𑀛𑀺𑀫𑀤𑁂𑀲𑀯𑀲𑁂𑀦 𑀯𑀼𑀢𑁆𑀢𑀁. 𑀆𑀲𑀦𑁆𑀦𑁂 𑀦𑁄 𑀪𑀕𑀯𑀸 𑀪𑀯𑀺𑀲𑁆𑀲𑀢𑀻𑀢𑀺 𑀏𑀢𑁆𑀣 𑀦 𑀓𑁂𑀯𑀮𑀁 𑀆𑀲𑀦𑁆𑀦𑀢𑁆𑀢𑀸𑀬𑁂𑀯 𑀢𑁂𑀲𑀁 𑀲𑁄𑀫𑀦𑀲𑁆𑀲𑀁 𑀳𑁄𑀢𑀺, 𑀅𑀣 𑀔𑁄 ‘‘𑀇𑀤𑀸𑀦𑀺 𑀤𑀸𑀦𑀁 𑀤𑀸𑀢𑀼𑀁 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀁 𑀓𑀸𑀢𑀼𑀁 𑀥𑀫𑁆𑀫𑀁 𑀲𑁄𑀢𑀼𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑀼𑀁 𑀮𑀪𑀺𑀲𑁆𑀲𑀸𑀫𑀸’’𑀢𑀺 𑀢𑁂𑀲𑀁 𑀲𑁄𑀫𑀦𑀲𑁆𑀲𑀁 𑀳𑁄𑀢𑀺.

𑀢𑀲𑁆𑀫𑀸𑀢𑀺𑀳 𑀣𑀧𑀢𑀬𑁄 𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄𑀢𑀺 𑀣𑀧𑀢𑀬𑁄 𑀬𑀲𑁆𑀫𑀸 𑀢𑀼𑀫𑁆𑀳𑀸𑀓𑀁 𑀫𑀬𑀺 𑀤𑀽𑀭𑀻𑀪𑀽𑀢𑁂 𑀅𑀦𑀧𑁆𑀧𑀓𑀁 𑀤𑁄𑀫𑀦𑀲𑁆𑀲𑀁, 𑀆𑀲𑀦𑁆𑀦𑁂 𑀅𑀦𑀧𑁆𑀧𑀓𑀁 𑀲𑁄𑀫𑀦𑀲𑁆𑀲𑀁 𑀳𑁄𑀢𑀺, 𑀢𑀲𑁆𑀫𑀸𑀧𑀺 𑀯𑁂𑀤𑀺𑀢𑀩𑁆𑀩𑀫𑁂𑀢𑀁 ‘‘𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄’’𑀢𑀺. 𑀖𑀭𑀸𑀯𑀸𑀲𑀲𑁆𑀲 𑀳𑀺 𑀤𑁄𑀲𑁂𑀦 𑀢𑀼𑀫𑁆𑀳𑀸𑀓𑀁 𑀏𑀯𑀁 𑀳𑁄𑀢𑀺. 𑀲𑀘𑁂 𑀧𑀦 𑀖𑀭𑀸𑀯𑀸𑀲𑀁 𑀧𑀳𑀸𑀬 𑀧𑀩𑁆𑀩𑀚𑀺𑀢𑀸, 𑀅𑀣 𑀏𑀯𑀁 𑀯𑁄 𑀫𑀬𑀸 𑀲𑀤𑁆𑀥𑀺𑀁𑀬𑁂𑀯 𑀕𑀘𑁆𑀙𑀦𑁆𑀢𑀸𑀦𑀜𑁆𑀘 𑀆𑀕𑀘𑁆𑀙𑀦𑁆𑀢𑀸𑀦𑀜𑁆𑀘 𑀢𑀁 𑀦 𑀪𑀯𑁂𑀬𑁆𑀬𑀸𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑁄 𑀏𑀯𑀫𑀸𑀳. 𑀢𑀢𑁆𑀣 𑀲𑀓𑀺𑀜𑁆𑀘𑀦𑀲𑀧𑀮𑀺𑀩𑁄𑀥𑀝𑁆𑀞𑁂𑀦 𑀲𑀫𑁆𑀩𑀸𑀥𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀫𑀳𑀸𑀯𑀸𑀲𑁂 𑀯𑀲𑀦𑁆𑀢𑀲𑁆𑀲𑀧𑀺 𑀳𑀺 𑀲𑀓𑀺𑀜𑁆𑀘𑀦𑀲𑀧𑀮𑀺𑀩𑁄𑀥𑀝𑁆𑀞𑁂𑀦 𑀖𑀭𑀸𑀯𑀸𑀲𑁄 𑀲𑀫𑁆𑀩𑀸𑀥𑁄𑀯. 𑀭𑀚𑀸𑀧𑀣𑁄𑀢𑀺 𑀭𑀸𑀕𑀤𑁄𑀲𑀫𑁄𑀳𑀭𑀚𑀸𑀦𑀁 𑀆𑀧𑀣𑁄, 𑀆𑀕𑀫𑀦𑀝𑁆𑀞𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸𑀢𑀺 𑀧𑀩𑁆𑀩𑀚𑁆𑀚𑀸 𑀧𑀦 𑀅𑀓𑀺𑀜𑁆𑀘𑀦𑀅𑀧𑀮𑀺𑀩𑁄𑀥𑀝𑁆𑀞𑁂𑀦 𑀅𑀩𑁆𑀪𑁄𑀓𑀸𑀲𑁄. 𑀘𑀢𑀼𑀭𑀢𑀦𑀺𑀓𑁂𑀧𑀺 𑀳𑀺 𑀕𑀩𑁆𑀪𑁂 𑀤𑁆𑀯𑀺𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀧𑀮𑁆𑀮𑀗𑁆𑀓𑁂𑀦 𑀧𑀮𑁆𑀮𑀗𑁆𑀓𑀁 𑀖𑀝𑁂𑀢𑁆𑀯𑀸 𑀦𑀺𑀲𑀺𑀦𑁆𑀦𑀸𑀦𑀫𑁆𑀧𑀺 𑀅𑀓𑀺𑀜𑁆𑀘𑀦𑀅𑀧𑀮𑀺𑀩𑁄𑀥𑀝𑁆𑀞𑁂𑀦 𑀧𑀩𑁆𑀩𑀚𑁆𑀚𑀸 𑀅𑀩𑁆𑀪𑁄𑀓𑀸𑀲𑁄 𑀦𑀸𑀫 𑀳𑁄𑀢𑀺. 𑀅𑀮𑀜𑁆𑀘 𑀧𑀦 𑀯𑁄 𑀣𑀧𑀢𑀬𑁄 𑀅𑀧𑁆𑀧𑀫𑀸𑀤𑀸𑀬𑀸𑀢𑀺 𑀏𑀯𑀁 𑀲𑀫𑁆𑀩𑀸𑀥𑁂 𑀖𑀭𑀸𑀯𑀸𑀲𑁂 𑀯𑀲𑀦𑁆𑀢𑀸𑀦𑀁 𑀢𑀼𑀫𑁆𑀳𑀸𑀓𑀁 𑀅𑀧𑁆𑀧𑀫𑀸𑀤𑀫𑁂𑀯 𑀓𑀸𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀏𑀓𑀁 𑀧𑀼𑀭𑀢𑁄 𑀏𑀓𑀁 𑀧𑀘𑁆𑀙𑀢𑁄 𑀦𑀺𑀲𑀻𑀤𑀸𑀧𑁂𑀫𑀸𑀢𑀺 𑀢𑁂 𑀓𑀺𑀭 𑀤𑁆𑀯𑁂𑀧𑀺 𑀚𑀦𑀸 𑀲𑀩𑁆𑀩𑀸𑀮𑀗𑁆𑀓𑀸𑀭𑀧𑀝𑀺𑀫𑀡𑁆𑀟𑀺𑀢𑁂𑀲𑀼 𑀤𑁆𑀯𑀻𑀲𑀼 𑀦𑀸𑀕𑁂𑀲𑀼 𑀢𑀸 𑀇𑀢𑁆𑀣𑀺𑀬𑁄 𑀏𑀯𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀭𑀜𑁆𑀜𑁄 𑀦𑀸𑀕𑀁 𑀫𑀚𑁆𑀛𑁂 𑀓𑀢𑁆𑀯𑀸 𑀉𑀪𑁄𑀲𑀼 𑀧𑀲𑁆𑀲𑁂𑀲𑀼 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳𑀁𑀲𑀼. 𑀦𑀸𑀕𑁄𑀧𑀺 𑀭𑀓𑁆𑀔𑀺𑀢𑀩𑁆𑀩𑁄𑀢𑀺 𑀬𑀣𑀸 𑀓𑀺𑀜𑁆𑀘𑀺 𑀯𑀺𑀲𑁂𑀯𑀺𑀢𑀁 𑀦 𑀓𑀭𑁄𑀢𑀺, 𑀏𑀯𑀁 𑀭𑀓𑁆𑀔𑀺𑀢𑀩𑁆𑀩𑁄 𑀳𑁄𑀢𑀺. 𑀢𑀸𑀧𑀺 𑀪𑀕𑀺𑀦𑀺𑀬𑁄𑀢𑀺 𑀬𑀣𑀸 𑀧𑀫𑀸𑀤𑀁 𑀦𑀸𑀧𑀚𑁆𑀚𑀦𑁆𑀢𑀺, 𑀏𑀯𑀁 𑀭𑀓𑁆𑀔𑀺𑀢𑀩𑁆𑀩𑀸 𑀳𑁄𑀦𑁆𑀢𑀺. 𑀅𑀢𑁆𑀢𑀸𑀧𑀻𑀢𑀺 𑀲𑀺𑀢𑀳𑀲𑀺𑀢𑀓𑀣𑀺𑀢𑀯𑀺𑀧𑁂𑀓𑁆𑀔𑀺𑀢𑀸𑀤𑀻𑀦𑀺 𑀅𑀓𑀭𑁄𑀦𑁆𑀢𑁂𑀳𑀺 𑀅𑀢𑁆𑀢𑀸𑀧𑀺 𑀭𑀓𑁆𑀔𑀺𑀢𑀩𑁆𑀩𑁄 𑀳𑁄𑀢𑀺. (𑀢𑁂𑀳𑀺 𑀢𑀣𑀸 𑀓𑀭𑁄𑀦𑁆𑀢𑁂𑀳𑀺 𑀦 𑀅𑀢𑁆𑀢𑀸𑀧𑀺 𑀭𑀓𑁆𑀔𑀺𑀢𑀩𑁆𑀩𑁄 𑀳𑁄𑀢𑀺). 𑀢𑀣𑀸 𑀓𑀭𑁄𑀦𑁆𑀢𑁄 𑀳𑀺 ‘‘𑀲𑀸𑀫𑀺𑀤𑀼𑀩𑁆𑀪𑁄 𑀏𑀲𑁄’’𑀢𑀺 𑀦𑀺𑀕𑁆𑀕𑀳𑁂𑀢𑀩𑁆𑀩𑁄 𑀳𑁄𑀢𑀺. 𑀢𑀲𑁆𑀫𑀸𑀢𑀺𑀳 𑀣𑀧𑀢𑀬𑁄𑀢𑀺 𑀬𑀲𑁆𑀫𑀸 𑀢𑀼𑀫𑁆𑀳𑁂 𑀭𑀸𑀚𑀸 𑀦𑀺𑀘𑁆𑀘𑀁 𑀭𑀸𑀚𑀪𑀡𑁆𑀟𑀁 𑀧𑀝𑀺𑀘𑁆𑀙𑀸𑀧𑁂𑀢𑀺, 𑀢𑀲𑁆𑀫𑀸𑀧𑀺 𑀲𑀫𑁆𑀩𑀸𑀥𑁄 𑀖𑀭𑀸𑀯𑀸𑀲𑁄 𑀭𑀚𑀸𑀧𑀣𑁄. 𑀬𑀲𑁆𑀫𑀸 𑀧𑀦 𑀧𑀁𑀲𑀼𑀓𑀽𑀮𑀺𑀓𑀪𑀺𑀓𑁆𑀔𑀼𑀁 𑀏𑀯𑀁 𑀧𑀝𑀺𑀘𑁆𑀙𑀸𑀧𑁂𑀦𑁆𑀢𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀩𑁆𑀪𑁄𑀓𑀸𑀲𑁄 𑀧𑀩𑁆𑀩𑀚𑁆𑀚𑀸. 𑀏𑀯𑀁 𑀲𑀩𑁆𑀩𑀢𑁆𑀣𑀸𑀧𑀺 𑀅𑀮𑀜𑁆𑀘 𑀧𑀦 𑀯𑁄 𑀣𑀧𑀢𑀬𑁄 𑀅𑀧𑁆𑀧𑀫𑀸𑀤𑀸𑀬 𑀅𑀧𑁆𑀧𑀫𑀸𑀤𑀫𑁂𑀯 𑀓𑀭𑁄𑀣𑀸𑀢𑀺 𑀤𑀲𑁆𑀲𑁂𑀢𑀺.

𑀫𑀼𑀢𑁆𑀢𑀘𑀸𑀕𑁄𑀢𑀺 𑀯𑀺𑀲𑁆𑀲𑀝𑁆𑀞𑀘𑀸𑀕𑁄. 𑀧𑀬𑀢𑀧𑀸𑀡𑀻𑀢𑀺 𑀆𑀕𑀢𑀸𑀕𑀢𑀸𑀦𑀁 𑀤𑀸𑀦𑀢𑁆𑀣𑀸𑀬 𑀥𑁄𑀢𑀳𑀢𑁆𑀣𑁄. 𑀯𑁄𑀲𑁆𑀲𑀕𑁆𑀕𑀭𑀢𑁄𑀢𑀺 𑀯𑁄𑀲𑁆𑀲𑀕𑁆𑀕𑀲𑀗𑁆𑀔𑀸𑀢𑁂 𑀘𑀸𑀕𑁂 𑀭𑀢𑁄. 𑀬𑀸𑀘𑀬𑁄𑀕𑁄𑀢𑀺 𑀬𑀸𑀘𑀺𑀢𑀩𑁆𑀩𑀓𑀬𑀼𑀢𑁆𑀢𑁄. 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄𑀢𑀺 𑀤𑀸𑀦𑁂𑀦 𑀘𑁂𑀯 𑀅𑀧𑁆𑀧𑀫𑀢𑁆𑀢𑀓𑀫𑁆𑀧𑀺 𑀓𑀺𑀜𑁆𑀘𑀺 𑀮𑀤𑁆𑀥𑀸 𑀢𑀢𑁄𑀧𑀺 𑀲𑀁𑀯𑀺𑀪𑀸𑀕𑁂 𑀭𑀢𑁄. 𑀅𑀧𑁆𑀧𑀝𑀺𑀯𑀺𑀪𑀢𑁆𑀢𑀦𑁆𑀢𑀺 ‘‘𑀇𑀤𑀁 𑀅𑀫𑁆𑀳𑀸𑀓𑀁 𑀪𑀯𑀺𑀲𑁆𑀲𑀢𑀺, 𑀇𑀤𑀁 𑀪𑀺𑀓𑁆𑀔𑀽𑀦’’𑀦𑁆𑀢𑀺 𑀏𑀯𑀁 𑀅𑀓𑀢𑀯𑀺𑀪𑀸𑀕𑀁, 𑀲𑀩𑁆𑀩𑀁 𑀤𑀸𑀢𑀩𑁆𑀩𑀫𑁂𑀯 𑀳𑀼𑀢𑁆𑀯𑀸 𑀞𑀺𑀢𑀦𑁆𑀢𑀺 𑀅𑀢𑁆𑀣𑁄.

𑁭. 𑀯𑁂𑀴𑀼𑀤𑁆𑀯𑀸𑀭𑁂𑀬𑁆𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁦𑁩. 𑀲𑀢𑁆𑀢𑀫𑁂 𑀯𑁂𑀴𑀼𑀤𑁆𑀯𑀸𑀭𑀦𑁆𑀢𑀺 𑀕𑀸𑀫𑀤𑁆𑀯𑀸𑀭𑁂 𑀧𑀯𑁂𑀡𑀺𑀆𑀕𑀢𑀲𑁆𑀲 𑀯𑁂𑀴𑀼𑀕𑀘𑁆𑀙𑀲𑁆𑀲 𑀅𑀢𑁆𑀣𑀺𑀢𑀸𑀬 𑀏𑀯𑀁𑀮𑀤𑁆𑀥𑀦𑀸𑀫𑁄 𑀕𑀸𑀫𑁄. 𑀅𑀢𑁆𑀢𑀼𑀧𑀦𑀸𑀬𑀺𑀓𑀦𑁆𑀢𑀺 𑀅𑀢𑁆𑀢𑀦𑀺 𑀉𑀧𑀦𑁂𑀢𑀩𑁆𑀩𑀁. 𑀲𑀫𑁆𑀨𑀪𑀸𑀲𑁂𑀦𑀸𑀢𑀺 𑀅𑀫𑀦𑁆𑀢𑀪𑀸𑀲𑁂𑀦. 𑀲𑀫𑁆𑀨𑀧𑁆𑀧𑀮𑀸𑀧𑀪𑀸𑀲𑁂𑀦𑀸𑀢𑀺 𑀲𑀫𑁆𑀨𑀧𑁆𑀧𑀮𑀸𑀧𑀲𑀫𑁆𑀪𑀸𑀲𑁂𑀦 𑀦𑀺𑀭𑀢𑁆𑀣𑀓𑁂𑀦 𑀅𑀜𑁆𑀜𑀸𑀡𑀯𑀘𑀦𑁂𑀦𑀸𑀢𑀺 𑀅𑀢𑁆𑀣𑁄.

𑁮-𑁯. 𑀧𑀞𑀫𑀕𑀺𑀜𑁆𑀚𑀓𑀸𑀯𑀲𑀣𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁦𑁪-𑁫. 𑀅𑀝𑁆𑀞𑀫𑁂 𑀜𑀸𑀢𑀺𑀓𑁂𑀢𑀺 𑀏𑀓𑀁 𑀢𑀴𑀸𑀓𑀁 𑀦𑀺𑀲𑁆𑀲𑀸𑀬 𑀤𑁆𑀯𑀺𑀦𑁆𑀦𑀁 𑀘𑀽𑀴𑀧𑀺𑀢𑀺𑀫𑀳𑀸𑀧𑀺𑀢𑀺𑀧𑀼𑀢𑁆𑀢𑀸𑀦𑀁 𑀤𑁆𑀯𑁂 𑀕𑀸𑀫𑀸, 𑀢𑁂𑀲𑀼 𑀏𑀓𑀲𑁆𑀫𑀺𑀁 𑀕𑀸𑀫𑀓𑁂. 𑀕𑀺𑀜𑁆𑀚𑀓𑀸𑀯𑀲𑀣𑁂𑀢𑀺 𑀇𑀝𑁆𑀞𑀓𑀸𑀫𑀬𑁂 𑀆𑀯𑀲𑀣𑁂. 𑀑𑀭𑀫𑁆𑀪𑀸𑀕𑀺𑀬𑀸𑀦𑀦𑁆𑀢𑀺 𑀳𑁂𑀝𑁆𑀞𑀸𑀪𑀸𑀕𑀺𑀬𑀸𑀦𑀁, 𑀓𑀸𑀫𑀪𑀯𑁂𑀬𑁂𑀯 𑀧𑀝𑀺𑀲𑀦𑁆𑀥𑀺𑀕𑁆𑀕𑀸𑀳𑀸𑀧𑀓𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀑𑀭𑀦𑁆𑀢𑀺 𑀮𑀤𑁆𑀥𑀦𑀸𑀫𑁂𑀳𑀺 𑀯𑀸 𑀢𑀻𑀳𑀺 𑀫𑀕𑁆𑀕𑁂𑀳𑀺 𑀧𑀳𑀸𑀢𑀩𑁆𑀩𑀸𑀦𑀻𑀢𑀺𑀧𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑀺. 𑀢𑀢𑁆𑀣 𑀓𑀸𑀫𑀘𑁆𑀙𑀦𑁆𑀤𑁄 𑀩𑁆𑀬𑀸𑀧𑀸𑀤𑁄𑀢𑀺 𑀇𑀫𑀸𑀦𑀺 𑀤𑁆𑀯𑁂 𑀲𑀫𑀸𑀧𑀢𑁆𑀢𑀺𑀬𑀸 𑀯𑀸 𑀅𑀯𑀺𑀓𑁆𑀔𑀫𑁆𑀪𑀺𑀢𑀸𑀦𑀺 𑀫𑀕𑁆𑀕𑁂𑀦 𑀯𑀸 𑀅𑀲𑀫𑀼𑀘𑁆𑀙𑀺𑀦𑁆𑀦𑀸𑀦𑀺 𑀦𑀺𑀩𑁆𑀩𑀢𑁆𑀢𑀺𑀯𑀲𑁂𑀦 𑀉𑀤𑁆𑀥𑀁 𑀪𑀸𑀕𑀁 𑀭𑀽𑀧𑀪𑀯𑀁 𑀅𑀭𑀽𑀧𑀪𑀯𑀁 𑀯𑀸 𑀕𑀦𑁆𑀢𑀼𑀁 𑀦 𑀤𑁂𑀦𑁆𑀢𑀺. 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀆𑀤𑀻𑀦𑀺 𑀢𑀻𑀡𑀺 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀫𑁆𑀧𑀺 𑀆𑀦𑁂𑀢𑁆𑀯𑀸 𑀧𑀼𑀦 𑀇𑀥𑁂𑀯 𑀦𑀺𑀩𑁆𑀩𑀢𑁆𑀢𑀸𑀧𑁂𑀦𑁆𑀢𑀻𑀢𑀺 𑀲𑀩𑁆𑀩𑀸𑀦𑀺𑀧𑀺 𑀑𑀭𑀫𑁆𑀪𑀸𑀕𑀺𑀬𑀸𑀦𑁂𑀯. 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄𑀢𑀺 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀅𑀦𑀸𑀕𑀫𑀦𑀲𑀪𑀸𑀯𑁄.

𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸𑀢𑀺 𑀏𑀢𑁆𑀣 𑀓𑀤𑀸𑀘𑀺 𑀉𑀧𑁆𑀧𑀢𑁆𑀢𑀺𑀬𑀸 𑀘 𑀧𑀭𑀺𑀬𑀼𑀝𑁆𑀞𑀸𑀦𑀫𑀦𑁆𑀤𑀢𑀸𑀬 𑀘𑀸𑀢𑀺 𑀤𑁆𑀯𑁂𑀥𑀸𑀧𑀺 𑀢𑀦𑀼𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀓𑀤𑀸𑀕𑀸𑀫𑀺𑀲𑁆𑀲 𑀳𑀺 𑀧𑀼𑀣𑀼𑀚𑁆𑀚𑀦𑀸𑀦𑀁 𑀯𑀺𑀬 𑀅𑀪𑀺𑀡𑁆𑀳𑀁 𑀭𑀸𑀕𑀸𑀤𑀬𑁄 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀓𑀤𑀸𑀘𑀺 𑀓𑀭𑀳𑀘𑀺 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀉𑀧𑁆𑀧𑀚𑁆𑀚𑀫𑀸𑀦𑀸 𑀘 𑀦 𑀧𑀼𑀣𑀼𑀚𑁆𑀚𑀦𑀸𑀦𑀁 𑀯𑀺𑀬 𑀩𑀳𑀮𑀩𑀳𑀮𑀸 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀫𑀓𑁆𑀔𑀺𑀧𑀢𑁆𑀢𑀁 𑀯𑀺𑀬 𑀢𑀦𑀼𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀤𑀻𑀖𑀪𑀸𑀡𑀓𑀢𑀺𑀧𑀺𑀝𑀓𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀧𑀦𑀸𑀳 𑁋 ‘‘𑀬𑀲𑁆𑀫𑀸 𑀲𑀓𑀤𑀸𑀕𑀸𑀫𑀺𑀲𑁆𑀲 𑀧𑀼𑀢𑁆𑀢𑀥𑀻𑀢𑀭𑁄 𑀳𑁄𑀦𑁆𑀢𑀺, 𑀑𑀭𑁄𑀥𑀸 𑀘 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀩𑀳𑀮𑀸 𑀓𑀺𑀮𑁂𑀲𑀸. 𑀇𑀤𑀁 𑀧𑀦 𑀪𑀯𑀢𑀦𑀼𑀓𑀯𑀲𑁂𑀦 𑀓𑀣𑀺𑀢’’𑀦𑁆𑀢𑀺. 𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀢𑁆𑀢 𑀪𑀯𑁂 𑀞𑀧𑁂𑀢𑁆𑀯𑀸 𑀅𑀝𑁆𑀞𑀫𑁂 𑀪𑀯𑁂 𑀪𑀯𑀢𑀦𑀼𑀓𑀁 𑀦𑀢𑁆𑀣𑀺, 𑀲𑀓𑀤𑀸𑀕𑀸𑀫𑀺𑀲𑁆𑀲 𑀤𑁆𑀯𑁂 𑀪𑀯𑁂 𑀞𑀧𑁂𑀢𑁆𑀯𑀸 𑀧𑀜𑁆𑀘𑀲𑀼 𑀪𑀯𑁂𑀲𑀼 𑀪𑀯𑀢𑀦𑀼𑀓𑀁 𑀦𑀢𑁆𑀣𑀺, 𑀅𑀦𑀸𑀕𑀸𑀫𑀺𑀲𑁆𑀲 𑀭𑀽𑀧𑀸𑀭𑀽𑀧𑀪𑀯𑀁 𑀞𑀧𑁂𑀢𑁆𑀯𑀸 𑀓𑀸𑀫𑀪𑀯𑁂 𑀪𑀯𑀢𑀦𑀼𑀓𑀁 𑀦𑀢𑁆𑀣𑀺, 𑀔𑀻𑀡𑀸𑀲𑀯𑀲𑁆𑀲 𑀓𑀺𑀲𑁆𑀫𑀺𑀜𑁆𑀘𑀺 𑀪𑀯𑁂 𑀪𑀯𑀢𑀦𑀼𑀓𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺.

𑀇𑀫𑀁 𑀮𑁄𑀓𑀦𑁆𑀢𑀺 𑀇𑀫𑀁 𑀓𑀸𑀫𑀸𑀯𑀘𑀭𑀮𑁄𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀲𑀘𑁂 𑀳𑀺 𑀫𑀦𑀼𑀲𑁆𑀲𑁂𑀲𑀼 𑀲𑀓𑀤𑀸𑀕𑀸𑀫𑀺𑀨𑀮𑀁 𑀧𑀢𑁆𑀢𑁄 𑀤𑁂𑀯𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀅𑀲𑀓𑁆𑀓𑁄𑀦𑁆𑀢𑁄 𑀧𑀦 𑀅𑀯𑀲𑁆𑀲𑀁 𑀫𑀦𑀼𑀲𑁆𑀲𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀲𑀘𑁆𑀙𑀺𑀓𑀭𑁄𑀢𑀺. 𑀤𑁂𑀯𑁂𑀲𑀼 𑀲𑀓𑀤𑀸𑀕𑀸𑀫𑀺𑀨𑀮𑀁 𑀧𑀢𑁆𑀢𑁄𑀧𑀺 𑀲𑀘𑁂 𑀫𑀦𑀼𑀲𑁆𑀲𑁂𑀲𑀼 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀭𑁄𑀢𑀺, 𑀇𑀘𑁆𑀘𑁂𑀢𑀁 𑀓𑀼𑀲𑀮𑀁. 𑀅𑀲𑀓𑁆𑀓𑁄𑀦𑁆𑀢𑁄 𑀧𑀦 𑀅𑀯𑀲𑁆𑀲𑀁 𑀤𑁂𑀯𑀮𑁄𑀓𑀁 𑀕𑀦𑁆𑀢𑁆𑀯𑀸 𑀲𑀘𑁆𑀙𑀺𑀓𑀭𑁄𑀢𑀻𑀢𑀺.

𑀯𑀺𑀦𑀺𑀧𑀢𑀦𑀁 𑀯𑀺𑀦𑀺𑀧𑀸𑀢𑁄, 𑀦𑀸𑀲𑁆𑀲 𑀯𑀺𑀦𑀺𑀧𑀸𑀢𑁄 𑀥𑀫𑁆𑀫𑁄𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄, 𑀘𑀢𑀽𑀲𑀼 𑀅𑀧𑀸𑀬𑁂𑀲𑀼 𑀅𑀯𑀺𑀦𑀺𑀧𑀸𑀢𑀦𑀲𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀦𑀺𑀬𑀢𑁄𑀢𑀺 𑀥𑀫𑁆𑀫𑀦𑀺𑀬𑀸𑀫𑁂𑀦 𑀦𑀺𑀬𑀢𑁄. 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄𑀢𑀺 𑀉𑀧𑀭𑀺𑀫𑀕𑁆𑀕𑀢𑁆𑀢𑀬𑀲𑀗𑁆𑀔𑀸𑀢𑀸 𑀲𑀫𑁆𑀩𑁄𑀥𑀺 𑀧𑀭𑀁 𑀅𑀬𑀦𑀁 𑀅𑀲𑁆𑀲 𑀕𑀢𑀺 𑀧𑀝𑀺𑀲𑀭𑀡𑀁 𑀅𑀯𑀲𑁆𑀲𑀁 𑀧𑀢𑁆𑀢𑀩𑁆𑀩𑀸𑀢𑀺 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄. 𑀯𑀺𑀳𑁂𑀲𑀸𑀯𑁂𑀲𑀸𑀢𑀺 𑀢𑁂𑀲𑀁 𑀢𑁂𑀲𑀁 𑀜𑀸𑀡𑀕𑀢𑀺𑀁 𑀜𑀸𑀡𑀽𑀧𑀧𑀢𑁆𑀢𑀺𑀁 𑀜𑀸𑀡𑀸𑀪𑀺𑀲𑀫𑁆𑀧𑀭𑀸𑀬𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀓𑀸𑀬𑀓𑀺𑀮𑀫𑀣𑁄𑀯 𑀏𑀲, 𑀆𑀦𑀦𑁆𑀤, 𑀢𑀣𑀸𑀕𑀢𑀲𑁆𑀲𑀸𑀢𑀺 𑀤𑀻𑀧𑁂𑀢𑀺. 𑀘𑀺𑀢𑁆𑀢𑀯𑀺𑀳𑁂𑀲𑀸 𑀧𑀦 𑀩𑀼𑀤𑁆𑀥𑀸𑀦𑀁 𑀦𑀢𑁆𑀣𑀺.

𑀥𑀫𑁆𑀫𑀸𑀤𑀸𑀲𑀦𑁆𑀢𑀺 𑀥𑀫𑁆𑀫𑀫𑀬𑀁 𑀆𑀤𑀸𑀲𑀁. 𑀬𑁂𑀦𑀸𑀢𑀺 𑀬𑁂𑀦 𑀥𑀫𑁆𑀫𑀸𑀤𑀸𑀲𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀔𑀻𑀡𑀸𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑁄𑀢𑀺 𑀇𑀤𑀁 𑀦𑀺𑀭𑀬𑀸𑀤𑀻𑀦𑀁𑀬𑁂𑀯 𑀯𑁂𑀯𑀘𑀦𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀦𑀺𑀭𑀬𑀸𑀤𑀬𑁄 𑀳𑀺 𑀯𑀟𑁆𑀠𑀺𑀲𑀗𑁆𑀔𑀸𑀢𑀢𑁄 𑀅𑀬𑀢𑁄 𑀅𑀧𑁂𑀢𑀢𑁆𑀢𑀸 𑀅𑀧𑀸𑀬𑁄, 𑀤𑀼𑀓𑁆𑀔𑀲𑁆𑀲 𑀕𑀢𑀺 𑀧𑀝𑀺𑀲𑀭𑀡𑀦𑁆𑀢𑀺. 𑀤𑀼𑀕𑁆𑀕𑀢𑀺, 𑀤𑀼𑀓𑁆𑀓𑀝𑀓𑀸𑀭𑀺𑀦𑁄 𑀏𑀢𑁆𑀣 𑀯𑀺𑀯𑀲𑀸 𑀦𑀺𑀧𑀢𑀦𑁆𑀢𑀻𑀢𑀺 𑀯𑀺𑀦𑀺𑀧𑀸𑀢𑁄. 𑀦𑀯𑀫𑀁 𑀉𑀢𑁆𑀢𑀸𑀦𑀫𑁂𑀯.

𑁧𑁦. 𑀢𑀢𑀺𑀬𑀕𑀺𑀜𑁆𑀚𑀓𑀸𑀯𑀲𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁦𑁬. 𑀤𑀲𑀫𑁂 𑀧𑀭𑁄𑀧𑀜𑁆𑀜𑀸𑀲𑀸𑀢𑀺 𑀅𑀢𑀺𑀭𑁂𑀓𑀧𑀜𑁆𑀜𑀸𑀲. 𑀲𑀸𑀥𑀺𑀓𑀦𑀯𑀼𑀢𑀻𑀢𑀺 𑀅𑀢𑀺𑀭𑁂𑀓𑀦𑀯𑀼𑀢𑀺. 𑀙𑀸𑀢𑀺𑀭𑁂𑀓𑀸𑀦𑀻𑀢𑀺 𑀙𑀳𑀺 𑀅𑀥𑀺𑀓𑀸𑀦𑀺. 𑀲𑁄 𑀓𑀺𑀭 𑀕𑀸𑀫𑁄 𑀓𑀺𑀜𑁆𑀘𑀸𑀧𑀺 𑀦𑀸𑀢𑀺𑀫𑀳𑀸 𑀅𑀳𑁄𑀲𑀺, 𑀅𑀭𑀺𑀬𑀲𑀸𑀯𑀓𑀸 𑀧𑀦𑁂𑀢𑁆𑀣 𑀩𑀳𑀽. 𑀢𑀢𑁆𑀣 𑀢𑀢𑁆𑀣 𑀅𑀳𑀺𑀯𑀸𑀢𑀭𑁄𑀕𑁂𑀦 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀘𑀢𑀼𑀯𑀻𑀲𑀢𑀺 𑀧𑀸𑀡𑀲𑀢𑀲𑀳𑀲𑁆𑀲𑀸𑀦𑀺 𑀓𑀸𑀮𑀫𑀓𑀁𑀲𑀼, 𑀢𑁂𑀲𑀼 𑀅𑀭𑀺𑀬𑀲𑀸𑀯𑀓𑀸 𑀏𑀢𑁆𑀢𑀓𑀸 𑀦𑀸𑀫 𑀅𑀳𑁂𑀲𑀼𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀯𑁂𑀴𑀼𑀤𑁆𑀯𑀸𑀭𑀯𑀕𑁆𑀕𑁄 𑀧𑀞𑀫𑁄.

𑁨. 𑀭𑀸𑀚𑀓𑀸𑀭𑀸𑀫𑀯𑀕𑁆𑀕𑁄

𑁧. 𑀲𑀳𑀲𑁆𑀲𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁦𑁭. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀭𑀸𑀚𑀓𑀸𑀭𑀸𑀫𑁂𑀢𑀺 𑀭𑀜𑁆𑀜𑀸 𑀓𑀸𑀭𑀺𑀢𑀢𑁆𑀢𑀸 𑀏𑀯𑀁 𑀮𑀤𑁆𑀥𑀦𑀸𑀫𑁂 𑀆𑀭𑀸𑀫𑁂, 𑀢𑀁 𑀭𑀜𑁆𑀜𑀸 𑀧𑀲𑁂𑀦𑀤𑀺𑀓𑁄𑀲𑀮𑁂𑀦 𑀓𑀢𑀁. 𑀧𑀞𑀫𑀩𑁄𑀥𑀺𑀬𑀁 𑀓𑀺𑀭 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑀢𑁆𑀢𑀁 𑀲𑀢𑁆𑀣𑀸𑀭𑀁 𑀤𑀺𑀲𑁆𑀯𑀸 𑀢𑀺𑀢𑁆𑀣𑀺𑀬𑀸 𑀘𑀺𑀦𑁆𑀢𑀬𑀺𑀁𑀲𑀼 𑁋 ‘‘𑀲𑀫𑀡𑁄 𑀕𑁄𑀢𑀫𑁄 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑀢𑁆𑀢𑁄, 𑀦 𑀔𑁄 𑀧𑀦𑁂𑀲 𑀅𑀜𑁆𑀜𑀁 𑀓𑀺𑀜𑁆𑀘𑀺 𑀲𑀻𑀮𑀁 𑀯𑀸 𑀲𑀫𑀸𑀥𑀺𑀁 𑀯𑀸 𑀦𑀺𑀲𑁆𑀲𑀸𑀬 𑀏𑀯𑀁 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑀢𑁆𑀢𑁄. 𑀪𑀽𑀫𑀺𑀲𑀻𑀲𑀁 𑀧𑀦 𑀢𑁂𑀦 𑀕𑀳𑀺𑀢𑀁, 𑀲𑀘𑁂 𑀫𑀬𑀫𑁆𑀧𑀺 𑀚𑁂𑀢𑀯𑀦𑀲𑀫𑀻𑀧𑁂 𑀆𑀭𑀸𑀫𑀁 𑀓𑀸𑀭𑀸𑀧𑁂𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬𑀸𑀫, 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑀢𑁆𑀢𑀸 𑀪𑀯𑁂𑀬𑁆𑀬𑀸𑀫𑀸’’𑀢𑀺. 𑀢𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑁂 𑀲𑀫𑀸𑀤𑀧𑁂𑀢𑁆𑀯𑀸 𑀲𑀢𑀲𑀳𑀲𑁆𑀲𑀫𑀢𑁆𑀢𑁂 𑀓𑀳𑀸𑀧𑀡𑁂 𑀮𑀪𑀺𑀢𑁆𑀯𑀸 𑀢𑁂 𑀆𑀤𑀸𑀬 𑀭𑀜𑁆𑀜𑁄 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼. 𑀭𑀸𑀚𑀸 ‘‘𑀓𑀺𑀁 𑀏𑀢’’𑀦𑁆𑀢𑀺? 𑀧𑀼𑀘𑁆𑀙𑀺. 𑀫𑀬𑀁 𑀚𑁂𑀢𑀯𑀦𑀲𑀫𑀻𑀧𑁂 𑀢𑀺𑀢𑁆𑀣𑀺𑀬𑀸𑀭𑀸𑀫𑀁 𑀓𑀭𑁄𑀫, 𑀲𑀘𑁂 𑀲𑀫𑀡𑁄 𑀕𑁄𑀢𑀫𑁄 𑀯𑀸 𑀲𑀫𑀡𑀲𑁆𑀲 𑀕𑁄𑀢𑀫𑀲𑁆𑀲 𑀲𑀸𑀯𑀓𑀸 𑀯𑀸 𑀆𑀕𑀦𑁆𑀢𑁆𑀯𑀸 𑀯𑀸𑀭𑁂𑀲𑁆𑀲𑀦𑁆𑀢𑀺, 𑀯𑀸𑀭𑁂𑀢𑀼𑀁 𑀫𑀸 𑀅𑀤𑀢𑁆𑀣𑀸𑀢𑀺 𑀮𑀜𑁆𑀚𑀁 𑀅𑀤𑀁𑀲𑀼. 𑀭𑀸𑀚𑀸 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 ‘‘𑀕𑀘𑁆𑀙𑀣 𑀓𑀸𑀭𑁂𑀣𑀸’’𑀢𑀺 𑀆𑀳.

𑀢𑁂 𑀕𑀦𑁆𑀢𑁆𑀯𑀸, 𑀅𑀢𑁆𑀢𑀦𑁄 𑀉𑀧𑀝𑁆𑀞𑀸𑀓𑁂𑀳𑀺 𑀤𑀩𑁆𑀩𑀲𑀫𑁆𑀪𑀸𑀭𑁂 𑀆𑀳𑀭𑀸𑀧𑁂𑀢𑁆𑀯𑀸, 𑀣𑀫𑁆𑀪𑀼𑀲𑁆𑀲𑀸𑀧𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑀸, 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀏𑀓𑀓𑁄𑀮𑀸𑀳𑀮𑀁 𑀅𑀓𑀁𑀲𑀼. 𑀲𑀢𑁆𑀣𑀸 𑀕𑀦𑁆𑀥𑀓𑀼𑀝𑀺𑀢𑁄 𑀦𑀺𑀓𑁆𑀔𑀫𑁆𑀫 𑀧𑀫𑀼𑀔𑁂 𑀞𑀢𑁆𑀯𑀸 ‘‘𑀓𑁂 𑀧𑀦 𑀢𑁂, 𑀆𑀦𑀦𑁆𑀤, 𑀉𑀘𑁆𑀘𑀸𑀲𑀤𑁆𑀤𑀸 𑀫𑀳𑀸𑀲𑀤𑁆𑀤𑀸 𑀓𑁂𑀯𑀝𑁆𑀝𑀸 𑀫𑀜𑁆𑀜𑁂 𑀫𑀘𑁆𑀙𑀯𑀺𑀮𑁄𑀧𑁂’’𑀢𑀺?, 𑀧𑀼𑀘𑁆𑀙𑀺. 𑀢𑀺𑀢𑁆𑀣𑀺𑀬𑀸, 𑀪𑀦𑁆𑀢𑁂, 𑀚𑁂𑀢𑀯𑀦𑀲𑀫𑀻𑀧𑁂 𑀢𑀺𑀢𑁆𑀣𑀺𑀬𑀸𑀭𑀸𑀫𑀁 𑀓𑀭𑁄𑀦𑁆𑀢𑀻𑀢𑀺. 𑀆𑀦𑀦𑁆𑀤, 𑀇𑀫𑁂 𑀲𑀸𑀲𑀦𑁂𑀦 𑀧𑀝𑀺𑀯𑀺𑀭𑀼𑀤𑁆𑀥𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀨𑀸𑀲𑀼𑀯𑀺𑀳𑀸𑀭𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀭𑀜𑁆𑀜𑁄 𑀆𑀭𑁄𑀘𑁂𑀢𑁆𑀯𑀸 𑀯𑀸𑀭𑀸𑀧𑁂𑀳𑀻𑀢𑀺.

𑀣𑁂𑀭𑁄 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁 𑀕𑀦𑁆𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀭𑀜𑁆𑀜𑁄 ‘‘𑀣𑁂𑀭𑀸, 𑀤𑁂𑀯, 𑀆𑀕𑀢𑀸’’𑀢𑀺 𑀦𑀺𑀯𑁂𑀤𑀬𑀺𑀁𑀲𑀼. 𑀭𑀸𑀚𑀸 𑀮𑀜𑁆𑀚𑀲𑁆𑀲 𑀕𑀳𑀺𑀢𑀢𑁆𑀢𑀸 𑀦 𑀦𑀺𑀓𑁆𑀔𑀫𑀺. 𑀣𑁂𑀭𑀸 𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀆𑀭𑁄𑀘𑀬𑀺𑀁𑀲𑀼. 𑀲𑀢𑁆𑀣𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂 𑀧𑁂𑀲𑁂𑀲𑀺. 𑀭𑀸𑀚𑀸 𑀢𑁂𑀲𑀫𑁆𑀧𑀺 𑀤𑀲𑁆𑀲𑀦𑀁 𑀦 𑀅𑀤𑀸𑀲𑀺. 𑀢𑁂 𑀆𑀕𑀦𑁆𑀢𑁆𑀯𑀸 𑀲𑀢𑁆𑀣𑀼 𑀆𑀭𑁄𑀘𑀬𑀺𑀁𑀲𑀼 ‘‘𑀦, 𑀪𑀦𑁆𑀢𑁂, 𑀭𑀸𑀚𑀸 𑀦𑀺𑀓𑁆𑀔𑀦𑁆𑀢𑁄’’𑀢𑀺. 𑀲𑀢𑁆𑀣𑀸 𑀢𑀗𑁆𑀔𑀡𑀁𑀬𑁂𑀯 𑀩𑁆𑀬𑀸𑀓𑀸𑀲𑀺 𑁋 ‘‘𑀅𑀢𑁆𑀢𑀦𑁄 𑀭𑀚𑁆𑀚𑁂 𑀞𑀢𑁆𑀯𑀸 𑀓𑀸𑀮𑀁 𑀓𑀸𑀢𑀼𑀁 𑀦 𑀮𑀪𑀺𑀲𑁆𑀲𑀢𑀻’’𑀢𑀺.

𑀤𑀼𑀢𑀺𑀬𑀤𑀺𑀯𑀲𑁂 𑀘 𑀲𑀸𑀫𑀁𑀬𑁂𑀯 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀸𑀭𑁄 𑀕𑀦𑁆𑀢𑁆𑀯𑀸 𑀭𑀸𑀚𑀤𑁆𑀯𑀸𑀭𑁂 𑀅𑀝𑁆𑀞𑀸𑀲𑀺. 𑀭𑀸𑀚𑀸 ‘‘𑀲𑀢𑁆𑀣𑀸 𑀆𑀕𑀢𑁄’’𑀢𑀺 𑀲𑀼𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸, 𑀦𑀺𑀯𑁂𑀲𑀦𑀁 𑀧𑀯𑁂𑀲𑁂𑀢𑁆𑀯𑀸, 𑀲𑀸𑀭𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸, 𑀬𑀸𑀕𑀼𑀔𑀚𑁆𑀚𑀓𑀁 𑀅𑀤𑀸𑀲𑀺. 𑀲𑀢𑁆𑀣𑀸 𑀧𑀭𑀺𑀪𑀼𑀢𑁆𑀢𑀬𑀸𑀕𑀼𑀔𑀸𑀤𑀦𑀻𑀬𑁄 ‘‘𑀬𑀸𑀯 𑀪𑀢𑁆𑀢𑀁 𑀦𑀺𑀝𑁆𑀞𑀸𑀢𑀺, 𑀢𑀸𑀯 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀦𑀺𑀲𑀻𑀤𑀺𑀲𑁆𑀲𑀸𑀫𑀻’’𑀢𑀺 𑀆𑀕𑀦𑁆𑀢𑁆𑀯𑀸 𑀦𑀺𑀲𑀺𑀦𑁆𑀦𑀁 𑀭𑀸𑀚𑀸𑀦𑀁 ‘‘𑀢𑀬𑀸, 𑀫𑀳𑀸𑀭𑀸𑀚, 𑀇𑀤𑀁 𑀦𑀸𑀫 𑀓𑀢’’𑀦𑁆𑀢𑀺 𑀅𑀯𑀢𑁆𑀯𑀸, ‘‘𑀓𑀸𑀭𑀡𑁂𑀦𑁂𑀯 𑀦𑀁 𑀲𑀜𑁆𑀜𑀸𑀧𑁂𑀲𑁆𑀲𑀸𑀫𑀻’’𑀢𑀺 𑀇𑀤𑀁 𑀅𑀢𑀻𑀢𑀓𑀸𑀭𑀡𑀁 𑀆𑀳𑀭𑀺 𑁋 𑀫𑀳𑀸𑀭𑀸𑀚, 𑀧𑀩𑁆𑀩𑀚𑀺𑀢𑁂 𑀦𑀸𑀫 𑀅𑀜𑁆𑀜𑀫𑀜𑁆𑀜𑀁 𑀬𑀼𑀚𑁆𑀛𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀅𑀢𑀻𑀢𑁂𑀧𑀺 𑀇𑀲𑀬𑁄 𑀅𑀜𑁆𑀜𑀫𑀜𑁆𑀜𑀁 𑀬𑀼𑀚𑁆𑀛𑀸𑀧𑁂𑀢𑁆𑀯𑀸 𑀲𑀳 𑀭𑀝𑁆𑀞𑁂𑀦 𑀭𑀸𑀚𑀸 𑀲𑀫𑀼𑀤𑁆𑀤𑀁 𑀧𑀯𑀺𑀝𑁆𑀞𑁄𑀢𑀺. 𑀓𑀤𑀸 𑀪𑀕𑀯𑀸𑀢𑀺?

𑀅𑀢𑀻𑀢𑁂, 𑀫𑀳𑀸𑀭𑀸𑀚, 𑀪𑀭𑀼𑀭𑀝𑁆𑀞𑁂 𑀪𑀭𑀼𑀭𑀸𑀚𑀸 𑀦𑀸𑀫 𑀭𑀚𑁆𑀚𑀁 𑀓𑀸𑀭𑁂𑀢𑀺. 𑀧𑀜𑁆𑀘𑀲𑀢𑀸 𑀧𑀜𑁆𑀘𑀲𑀢𑀸 𑀤𑁆𑀯𑁂 𑀇𑀲𑀺𑀕𑀡𑀸 𑀧𑀩𑁆𑀩𑀢𑀧𑀸𑀤𑀢𑁄 𑀮𑁄𑀡𑀫𑁆𑀩𑀺𑀮𑀲𑁂𑀯𑀦𑀢𑁆𑀣𑀸𑀬 𑀪𑀭𑀼𑀦𑀕𑀭𑀁 𑀕𑀦𑁆𑀢𑁆𑀯𑀸 𑀦𑀕𑀭𑀲𑁆𑀲 𑀅𑀯𑀺𑀤𑀽𑀭𑁂 𑀤𑁆𑀯𑁂 𑀭𑀼𑀓𑁆𑀔𑀸 𑀅𑀢𑁆𑀣𑀺, 𑀧𑀞𑀫𑀁 𑀆𑀕𑀢𑁄 𑀇𑀲𑀺𑀕𑀡𑁄 𑀏𑀓𑀲𑁆𑀲 𑀭𑀼𑀓𑁆𑀔𑀲𑁆𑀲 𑀫𑀽𑀮𑁂 𑀦𑀺𑀲𑀻𑀤𑀺, 𑀧𑀘𑁆𑀙𑀸𑀕𑀢𑁄𑀧𑀺 𑀏𑀓𑀲𑁆𑀲𑀸𑀢𑀺. 𑀢𑁂 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸 𑀧𑀩𑁆𑀩𑀢𑀧𑀸𑀤𑀁 𑀏𑀯 𑀅𑀕𑀫𑀁𑀲𑀼. 𑀢𑁂 𑀧𑀼𑀦 𑀆𑀕𑀘𑁆𑀙𑀦𑁆𑀢𑀸𑀧𑀺 𑀅𑀢𑁆𑀢𑀦𑁄 𑀭𑀼𑀓𑁆𑀔𑀫𑀽𑀮𑁂𑀬𑁂𑀯 𑀦𑀺𑀲𑀻𑀤𑀦𑁆𑀢𑀺. 𑀅𑀤𑁆𑀥𑀸𑀦𑁂 𑀕𑀘𑁆𑀙𑀦𑁆𑀢𑁂 𑀏𑀓𑁄 𑀭𑀼𑀓𑁆𑀔𑁄 𑀲𑀼𑀓𑁆𑀔𑀺, 𑀢𑀲𑁆𑀫𑀺𑀁 𑀲𑀼𑀓𑁆𑀔𑁂 𑀆𑀕𑀢𑀸 𑀢𑀸𑀧𑀲𑀸 ‘‘𑀅𑀬𑀁 𑀭𑀼𑀓𑁆𑀔𑁄 𑀫𑀳𑀸, 𑀅𑀫𑁆𑀳𑀸𑀓𑀫𑁆𑀧𑀺 𑀢𑁂𑀲𑀫𑁆𑀧𑀺 𑀧𑀳𑁄𑀲𑁆𑀲𑀢𑀻’’𑀢𑀺 𑀇𑀢𑀭𑁂𑀲𑀁 𑀭𑀼𑀓𑁆𑀔𑀫𑀽𑀮𑀲𑁆𑀲 𑀏𑀓𑀧𑀤𑁂𑀲𑁂 𑀦𑀺𑀲𑀻𑀤𑀺𑀁𑀲𑀼. 𑀢𑁂 𑀧𑀘𑁆𑀙𑀸 𑀆𑀕𑀘𑁆𑀙𑀦𑁆𑀢𑀸 𑀭𑀼𑀓𑁆𑀔𑀫𑀽𑀮𑀁 𑀅𑀧𑀯𑀺𑀲𑀺𑀢𑁆𑀯𑀸 𑀩𑀳𑀺 𑀞𑀺𑀢𑀸𑀯 ‘‘𑀓𑀲𑁆𑀫𑀸 𑀢𑀼𑀫𑁆𑀳𑁂 𑀏𑀢𑁆𑀣 𑀦𑀺𑀲𑀻𑀤𑀣𑀸’’𑀢𑀺 𑀆𑀳𑀁𑀲𑀼. 𑀆𑀘𑀭𑀺𑀬𑀸 𑀅𑀫𑁆𑀳𑀸𑀓𑀁 𑀭𑀼𑀓𑁆𑀔𑁄 𑀲𑀼𑀓𑁆𑀔𑁄, 𑀅𑀬𑀁 𑀭𑀼𑀓𑁆𑀔𑁄 𑀫𑀳𑀸, 𑀢𑀼𑀫𑁆𑀳𑁂𑀧𑀺 𑀧𑀯𑀺𑀲𑀣, 𑀢𑀼𑀫𑁆𑀳𑀸𑀓𑀫𑁆𑀧𑀺 𑀅𑀫𑁆𑀳𑀸𑀓𑀫𑁆𑀧𑀺 𑀧𑀳𑁄𑀲𑁆𑀲𑀢𑀻𑀢𑀺. 𑀢𑁂 ‘‘𑀦 𑀫𑀬𑀁 𑀧𑀯𑀺𑀲𑀸𑀫, 𑀦𑀺𑀓𑁆𑀔𑀫𑀣 𑀢𑀼𑀫𑁆𑀳𑁂’’𑀢𑀺 𑀓𑀣𑀁 𑀯𑀟𑁆𑀠𑁂𑀢𑁆𑀯𑀸 ‘‘𑀦 𑀢𑀼𑀫𑁆𑀳𑁂 𑀅𑀢𑁆𑀢𑀦𑁄𑀯 𑀫𑀦𑁂𑀦 𑀦𑀺𑀓𑁆𑀔𑀫𑀺𑀲𑁆𑀲𑀣𑀸’’𑀢𑀺 𑀳𑀢𑁆𑀣𑀸𑀤𑀻𑀲𑀼 𑀕𑀳𑁂𑀢𑁆𑀯𑀸 𑀦𑀺𑀓𑁆𑀓𑀟𑁆𑀠𑀺𑀁𑀲𑀼. 𑀢𑁂 ‘‘𑀳𑁄𑀢𑀼 𑀲𑀺𑀓𑁆𑀔𑀸𑀧𑁂𑀲𑁆𑀲𑀸𑀫 𑀦𑁂’’𑀢𑀺 𑀇𑀤𑁆𑀥𑀺𑀬𑀸 𑀲𑁄𑀯𑀡𑁆𑀡𑀫𑀬𑀸𑀦𑀺 𑀤𑁆𑀯𑁂 𑀘𑀓𑁆𑀓𑀸𑀦𑀺 𑀭𑀚𑀢𑀫𑀬𑀜𑁆𑀘 𑀅𑀓𑁆𑀔𑀁 𑀫𑀸𑀧𑁂𑀢𑁆𑀯𑀸 𑀧𑀯𑀝𑁆𑀝𑁂𑀦𑁆𑀢𑀸 𑀭𑀸𑀚𑀤𑁆𑀯𑀸𑀭𑀁 𑀅𑀕𑀫𑀺𑀁𑀲𑀼. 𑀭𑀜𑁆𑀜𑁄 ‘‘𑀏𑀯𑀭𑀽𑀧𑀁, 𑀤𑁂𑀯, 𑀢𑀸𑀧𑀲𑀸 𑀧𑀡𑁆𑀡𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀞𑀺𑀢𑀸’’𑀢𑀺 𑀦𑀺𑀯𑁂𑀤𑀬𑀺𑀁𑀲𑀼. 𑀭𑀸𑀚𑀸 𑀢𑀼𑀝𑁆𑀞𑁄 ‘‘𑀧𑀓𑁆𑀓𑁄𑀲𑀣𑀸’’𑀢𑀺 𑀢𑁂 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘‘𑀫𑀳𑀸𑀓𑀫𑁆𑀫𑀁 𑀢𑀼𑀫𑁆𑀳𑁂𑀳𑀺 𑀓𑀢𑀁, 𑀅𑀢𑁆𑀣𑀺 𑀯𑁄 𑀓𑀺𑀜𑁆𑀘𑀺 𑀫𑀬𑀸 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀆𑀳. 𑀆𑀫, 𑀫𑀳𑀸𑀭𑀸𑀚, 𑀅𑀫𑁆𑀳𑀸𑀓𑀁 𑀦𑀺𑀲𑀺𑀦𑁆𑀦𑀝𑁆𑀞𑀸𑀦𑀁 𑀏𑀓𑀭𑀼𑀓𑁆𑀔𑀫𑀽𑀮𑀁 𑀅𑀢𑁆𑀣𑀺, 𑀢𑀁 𑀅𑀜𑁆𑀜𑁂𑀳𑀺 𑀇𑀲𑀻𑀳𑀺 𑀕𑀳𑀺𑀢𑀁, 𑀢𑀁 𑀦𑁄 𑀤𑀸𑀧𑁂𑀳𑀻𑀢𑀺. 𑀭𑀸𑀚𑀸 𑀧𑀼𑀭𑀺𑀲𑁂 𑀧𑁂𑀲𑁂𑀢𑁆𑀯𑀸 𑀢𑀸𑀧𑀲𑁂 𑀦𑀺𑀓𑁆𑀓𑀟𑁆𑀠𑀸𑀧𑁂𑀲𑀺.

𑀢𑁂 𑀩𑀳𑀺 𑀞𑀺𑀢𑀸 ‘‘𑀓𑀺𑀁 𑀦𑀼 𑀔𑁄 𑀤𑀢𑁆𑀯𑀸 𑀮𑀪𑀺𑀁𑀲𑀽’’𑀢𑀺 𑀑𑀮𑁄𑀓𑀬𑀫𑀸𑀦𑀸 ‘‘𑀇𑀤𑀁 𑀦𑀸𑀫𑀸’’𑀢𑀺 𑀤𑀺𑀲𑁆𑀯𑀸 ‘‘𑀫𑀬𑀫𑁆𑀧𑀺 𑀮𑀜𑁆𑀚𑀁 𑀤𑀢𑁆𑀯𑀸 𑀧𑀼𑀦 𑀕𑀡𑁆𑀳𑀺𑀲𑁆𑀲𑀸𑀫𑀸’’𑀢𑀺 𑀇𑀤𑁆𑀥𑀺𑀬𑀸 𑀲𑁄𑀯𑀡𑁆𑀡𑀫𑀬𑀁 𑀭𑀣𑀧𑀜𑁆𑀚𑀭𑀁 𑀫𑀸𑀧𑁂𑀢𑁆𑀯𑀸 𑀆𑀤𑀸𑀬 𑀅𑀕𑀫𑀁𑀲𑀼. 𑀭𑀸𑀚𑀸 𑀤𑀺𑀲𑁆𑀯𑀸 𑀢𑀼𑀝𑁆𑀞𑁄 𑁋 ‘‘𑀓𑀺𑀁, 𑀪𑀦𑁆𑀢𑁂, 𑀓𑀸𑀢𑀩𑁆𑀩’’𑀦𑁆𑀢𑀺?, 𑀆𑀳. 𑀫𑀳𑀸𑀭𑀸𑀚 𑀅𑀫𑁆𑀳𑀸𑀓𑀁 𑀭𑀼𑀓𑁆𑀔𑀫𑀽𑀮𑁂 𑀅𑀜𑁆𑀜𑁄 𑀇𑀲𑀺𑀕𑀡𑁄 𑀦𑀺𑀲𑀺𑀦𑁆𑀦𑁄, 𑀢𑀁 𑀦𑁄 𑀭𑀼𑀓𑁆𑀔𑀫𑀽𑀮𑀁 𑀤𑀸𑀧𑁂𑀳𑀻𑀢𑀺. 𑀭𑀸𑀚𑀸 𑀧𑀼𑀭𑀺𑀲𑁂 𑀧𑁂𑀲𑁂𑀢𑁆𑀯𑀸 𑀢𑁂 𑀦𑀺𑀓𑁆𑀓𑀟𑁆𑀠𑀸𑀧𑁂𑀲𑀺. 𑀢𑀸𑀧𑀲𑀸 𑀅𑀜𑁆𑀜𑀫𑀜𑁆𑀜𑀁 𑀓𑀮𑀳𑀁 𑀓𑀢𑁆𑀯𑀸, ‘‘𑀅𑀦𑀦𑀼𑀘𑁆𑀙𑀯𑀺𑀓𑀁 𑀅𑀫𑁆𑀳𑁂𑀳𑀺 𑀓𑀢’’𑀦𑁆𑀢𑀺 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀳𑀼𑀢𑁆𑀯𑀸 𑀧𑀩𑁆𑀩𑀢𑀧𑀸𑀤𑀫𑁂𑀯 𑀅𑀕𑀫𑀁𑀲𑀼. 𑀢𑀢𑁄 𑀤𑁂𑀯𑀢𑀸 ‘‘𑀅𑀬𑀁 𑀭𑀸𑀚𑀸 𑀤𑁆𑀯𑀺𑀦𑁆𑀦𑀁 𑀇𑀲𑀺𑀕𑀡𑀸𑀦𑀁 𑀳𑀢𑁆𑀣𑀢𑁄 𑀮𑀜𑁆𑀚𑀁 𑀕𑀳𑁂𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀁 𑀓𑀮𑀳𑀁 𑀓𑀸𑀭𑀸𑀧𑁂𑀲𑀻’’𑀢𑀺 𑀓𑀼𑀚𑁆𑀛𑀺𑀢𑁆𑀯𑀸 𑀫𑀳𑀸𑀲𑀫𑀼𑀤𑁆𑀤𑀁 𑀉𑀩𑁆𑀩𑀝𑁆𑀝𑁂𑀢𑁆𑀯𑀸 𑀢𑀲𑁆𑀲 𑀭𑀜𑁆𑀜𑁄 𑀯𑀺𑀚𑀺𑀢𑀁 𑀬𑁄𑀚𑀦𑀲𑀳𑀲𑁆𑀲𑀫𑀢𑁆𑀢𑀝𑁆𑀞𑀸𑀦𑀁 𑀲𑀫𑀼𑀤𑁆𑀤𑀫𑁂𑀯 𑀅𑀓𑀁𑀲𑀽𑀢𑀺.

‘‘𑀇𑀲𑀻𑀦𑀫𑀦𑁆𑀢𑀭𑀁 𑀓𑀢𑁆𑀯𑀸, 𑀪𑀭𑀼𑀭𑀸𑀚𑀸𑀢𑀺 𑀫𑁂 𑀲𑀼𑀢𑀁;

𑀉𑀘𑁆𑀙𑀺𑀦𑁆𑀦𑁄 𑀲𑀳 𑀭𑀝𑁆𑀞𑁂𑀳𑀺, 𑀲 𑀭𑀸𑀚𑀸 𑀯𑀺𑀪𑀯𑀗𑁆𑀕𑀢𑁄’’𑀢𑀺. (𑀚𑀸. 𑁧.𑁨.𑁧𑁨𑁫) 𑁋

𑀏𑀯𑀁 𑀪𑀕𑀯𑀢𑀸 𑀇𑀫𑀲𑁆𑀫𑀺𑀁 𑀅𑀢𑀻𑀢𑁂 𑀤𑀲𑁆𑀲𑀺𑀢𑁂 𑀬𑀲𑁆𑀫𑀸 𑀩𑀼𑀤𑁆𑀥𑀸𑀦𑀁 𑀦𑀸𑀫 𑀓𑀣𑀸 𑀑𑀓𑀧𑁆𑀧𑀦𑀺𑀬𑀸 𑀳𑁄𑀢𑀺, ‘‘𑀢𑀲𑁆𑀫𑀸 𑀭𑀸𑀚𑀸 𑀅𑀢𑁆𑀢𑀦𑁄 𑀓𑀺𑀭𑀺𑀬𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀅𑀦𑀼𑀧𑀥𑀸𑀭𑁂𑀢𑁆𑀯𑀸 𑀫𑀬𑀸 𑀅𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁 𑀓𑀢’’𑀦𑁆𑀢𑀺 ‘‘𑀕𑀘𑁆𑀙𑀣, 𑀪𑀡𑁂, 𑀢𑀺𑀢𑁆𑀣𑀺𑀬𑁂 𑀦𑀺𑀓𑁆𑀓𑀟𑁆𑀠𑀣𑀸’’𑀢𑀺 𑀦𑀺𑀓𑁆𑀓𑀟𑁆𑀠𑀸𑀧𑁂𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀫𑀬𑀸 𑀓𑀸𑀭𑀺𑀢𑁄 𑀯𑀺𑀳𑀸𑀭𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀯𑀺𑀳𑀸𑀭𑀁 𑀓𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀢𑁂𑀲𑀁 𑀤𑀩𑁆𑀩𑀲𑀫𑁆𑀪𑀸𑀭𑁂𑀧𑀺 𑀅𑀤𑀢𑁆𑀯𑀸 𑀯𑀺𑀳𑀸𑀭𑀁 𑀓𑀸𑀭𑁂𑀲𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁.

𑁨-𑁩. 𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁦𑁮-𑁯. 𑀤𑀼𑀢𑀺𑀬𑁂 𑀉𑀤𑀬𑀕𑀸𑀫𑀺𑀦𑀺𑀦𑁆𑀢𑀺 𑀅𑀢𑁆𑀢𑀦𑁄 𑀲𑀫𑀬𑁂 𑀯𑀟𑁆𑀠𑀺𑀕𑀸𑀫𑀺𑀦𑀺𑀁. 𑀫𑀭𑀡𑀁 𑀆𑀕𑀫𑁂𑀬𑁆𑀬𑀸𑀲𑀻𑀢𑀺 𑀫𑀭𑀡𑀁 𑀇𑀘𑁆𑀙𑁂𑀬𑁆𑀬𑀸𑀲𑀺, 𑀧𑀢𑁆𑀣𑁂𑀬𑁆𑀬𑀸𑀲𑀺 𑀯𑀸. 𑀢𑀢𑀺𑀬𑀁 𑀉𑀢𑁆𑀢𑀸𑀦𑀫𑁂𑀯.

𑁪. 𑀤𑀼𑀕𑁆𑀕𑀢𑀺𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁧𑁦. 𑀘𑀢𑀼𑀢𑁆𑀣𑁂 𑀲𑀩𑁆𑀩𑀤𑀼𑀕𑁆𑀕𑀢𑀺𑀪𑀬𑀁 𑀲𑀫𑀢𑀺𑀓𑁆𑀓𑀦𑁆𑀢𑁄𑀢𑀺 𑀫𑀦𑀼𑀲𑁆𑀲𑀤𑁄𑀪𑀕𑁆𑀕𑀁 𑀧𑀝𑀺𑀓𑁆𑀔𑀺𑀢𑁆𑀢𑀁.

𑁫. 𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑀪𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁧𑁧. 𑀧𑀜𑁆𑀘𑀫𑁂 𑀲𑀩𑁆𑀩𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑀪𑀬𑀁 𑀲𑀫𑀢𑀺𑀓𑁆𑀓𑀦𑁆𑀢𑁄𑀢𑀺 𑀫𑀦𑀼𑀲𑁆𑀲𑀤𑁄𑀪𑀕𑁆𑀕𑁂𑀦 𑀲𑀤𑁆𑀥𑀺𑀁 𑀘𑀢𑁆𑀢𑀸𑀭𑁄 𑀅𑀧𑀸𑀬𑀸 𑀧𑀝𑀺𑀓𑁆𑀔𑀺𑀢𑁆𑀢𑀸.

𑁬. 𑀧𑀞𑀫𑀫𑀺𑀢𑁆𑀢𑀸𑀫𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁧𑁨. 𑀙𑀝𑁆𑀞𑁂 𑀫𑀺𑀢𑁆𑀢𑀸𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀕𑁂𑀳𑁂 𑀆𑀫𑀺𑀲𑀧𑀭𑀺𑀪𑁄𑀕𑀯𑀲𑁂𑀦 𑀯𑁄𑀳𑀸𑀭𑀫𑀺𑀢𑁆𑀢𑀸. 𑀅𑀫𑀘𑁆𑀘𑀸𑀢𑀺 𑀆𑀫𑀦𑁆𑀢𑀦𑀧𑀝𑀺𑀫𑀦𑁆𑀢𑀦𑀇𑀭𑀺𑀬𑀸𑀧𑀣𑀸𑀤𑀻𑀲𑀼 𑀏𑀓𑀢𑁄 𑀧𑀯𑀢𑁆𑀢𑀓𑀺𑀘𑁆𑀘𑀸. 𑀜𑀸𑀢𑀻𑀢𑀺 𑀲𑀲𑁆𑀲𑀼𑀲𑀲𑀼𑀭𑀧𑀓𑁆𑀔𑀺𑀓𑀸. 𑀲𑀸𑀮𑁄𑀳𑀺𑀢𑀸𑀢𑀺 𑀲𑀫𑀸𑀦𑀮𑁄𑀳𑀺𑀢𑀸 𑀪𑀸𑀢𑀺𑀪𑀕𑀺𑀦𑀺𑀫𑀸𑀢𑀼𑀮𑀸𑀤𑀬𑁄.

𑁭. 𑀤𑀼𑀢𑀺𑀬𑀫𑀺𑀢𑁆𑀢𑀸𑀫𑀘𑁆𑀘𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁧𑁩. 𑀲𑀢𑁆𑀢𑀫𑁂 𑀅𑀜𑁆𑀜𑀣𑀢𑁆𑀢𑀁 𑀦𑀸𑀫 𑀧𑀲𑀸𑀤𑀜𑁆𑀜𑀣𑀢𑁆𑀢𑀁 𑀪𑀸𑀯𑀜𑁆𑀜𑀣𑀢𑁆𑀢𑀁 𑀕𑀢𑀺𑀅𑀜𑁆𑀜𑀣𑀢𑁆𑀢𑀁 𑀮𑀓𑁆𑀔𑀡𑀜𑁆𑀜𑀣𑀢𑁆𑀢𑀁 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀢𑁆𑀢𑀦𑁆𑀢𑀺 𑀅𑀦𑁂𑀓𑀯𑀺𑀥𑀁. 𑀢𑀢𑁆𑀣 𑀫𑀳𑀸𑀪𑀽𑀢𑁂𑀲𑀼 𑀪𑀸𑀯𑀜𑁆𑀜𑀣𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁. 𑀲𑀼𑀯𑀡𑁆𑀡𑀸𑀤𑀺𑀪𑀸𑀯𑁂𑀦 𑀳𑀺 𑀖𑀦𑀲𑀡𑁆𑀞𑀺𑀢𑀸𑀬 𑀧𑀣𑀯𑀺𑀥𑀸𑀢𑀼𑀬𑀸 𑀯𑀺𑀮𑀻𑀬𑀺𑀢𑁆𑀯𑀸 𑀉𑀤𑀓𑀪𑀸𑀯𑀁 𑀆𑀧𑀚𑁆𑀚𑀫𑀸𑀦𑀸𑀬 𑀧𑀼𑀭𑀺𑀫𑀪𑀸𑀯𑁄 𑀯𑀺𑀕𑀘𑁆𑀙𑀢𑀺, 𑀪𑀸𑀯𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀺. 𑀮𑀓𑁆𑀔𑀡𑀁 𑀧𑀦 𑀦 𑀯𑀺𑀕𑀘𑁆𑀙𑀢𑀺, 𑀓𑀓𑁆𑀔𑀴𑀮𑀓𑁆𑀔𑀡𑀸𑀯 𑀳𑁄𑀢𑀺. 𑀉𑀘𑁆𑀙𑀼𑀭𑀲𑀸𑀤𑀺𑀪𑀸𑀯𑁂𑀦 𑀘 𑀬𑀽𑀲𑀸𑀓𑀸𑀭𑀲𑀡𑁆𑀞𑀺𑀢𑀸𑀬 𑀆𑀧𑁄𑀥𑀸𑀢𑀼𑀬𑀸 𑀲𑀼𑀲𑁆𑀲𑀺𑀢𑁆𑀯𑀸 𑀖𑀦𑀧𑀣𑀯𑀺𑀪𑀸𑀯𑀁 𑀆𑀧𑀚𑁆𑀚𑀫𑀸𑀦𑀸𑀬 𑀧𑀼𑀭𑀺𑀫𑀪𑀸𑀯𑁄 𑀯𑀺𑀕𑀘𑁆𑀙𑀢𑀺, 𑀪𑀸𑀯𑀜𑁆𑀜𑀣𑀢𑁆𑀢𑀁 𑀧𑀜𑁆𑀜𑀸𑀬𑀢𑀺. 𑀮𑀓𑁆𑀔𑀡𑀁 𑀧𑀦 𑀦 𑀯𑀺𑀕𑀘𑁆𑀙𑀢𑀺, 𑀆𑀩𑀦𑁆𑀥𑀦𑀮𑀓𑁆𑀔𑀡𑀸𑀯 𑀳𑁄𑀢𑀺. 𑀢𑀢𑁆𑀭𑀺𑀤𑀁 𑀅𑀜𑁆𑀜𑀣𑀢𑁆𑀢𑀦𑁆𑀢𑀺 𑀏𑀢𑁆𑀣 𑀧𑀦 𑀕𑀢𑀺𑀅𑀜𑁆𑀜𑀣𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀜𑁆𑀳𑀺 𑀅𑀭𑀺𑀬𑀲𑀸𑀯𑀓𑀲𑁆𑀲 𑀦𑀢𑁆𑀣𑀺. 𑀧𑀲𑀸𑀤𑀜𑁆𑀜𑀣𑀢𑁆𑀢𑀫𑁆𑀧𑀺 𑀦𑀢𑁆𑀣𑀺𑀬𑁂𑀯, 𑀇𑀥 𑀧𑀦 𑀧𑀲𑀸𑀤𑀨𑀮𑀁 𑀧𑀓𑀸𑀲𑁂𑀢𑀼𑀁 𑀕𑀢𑀺𑀅𑀜𑁆𑀜𑀣𑀢𑁆𑀢𑀫𑁂𑀯 𑀤𑀲𑁆𑀲𑀺𑀢𑀁. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀭𑀸𑀚𑀓𑀸𑀭𑀸𑀫𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀲𑀭𑀡𑀸𑀦𑀺𑀯𑀕𑁆𑀕𑁄

𑁧-𑁨. 𑀧𑀞𑀫𑀫𑀳𑀸𑀦𑀸𑀫𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁧𑁭-𑁧𑁮. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀇𑀤𑁆𑀥𑀦𑁆𑀢𑀺 𑀢𑁂𑀮𑀫𑀥𑀼𑀨𑀸𑀡𑀺𑀢𑀸𑀤𑀻𑀳𑀺 𑀲𑀫𑀺𑀤𑁆𑀥𑀁. 𑀨𑀻𑀢𑀦𑁆𑀢𑀺 𑀳𑀢𑁆𑀣𑀽𑀧𑀕𑀲𑀻𑀲𑀽𑀧𑀕𑀕𑀻𑀯𑀽𑀧𑀕𑀸𑀤𑀺𑀅𑀮𑀗𑁆𑀓𑀸𑀭𑀯𑀲𑁂𑀦 𑀲𑀼𑀧𑀼𑀧𑁆𑀨𑀺𑀢𑀁. 𑀆𑀓𑀺𑀡𑁆𑀡𑀫𑀦𑀼𑀲𑁆𑀲𑀦𑁆𑀢𑀺 𑀦𑀺𑀭𑀦𑁆𑀢𑀭𑀫𑀦𑀼𑀲𑁆𑀲𑀁. 𑀲𑀫𑁆𑀩𑀸𑀥𑀩𑁆𑀬𑀽𑀳𑀦𑁆𑀢𑀺 𑀩𑁆𑀬𑀽𑀳𑀸 𑀯𑀼𑀘𑁆𑀘𑀦𑁆𑀢𑀺 𑀅𑀯𑀺𑀦𑀺𑀩𑁆𑀩𑀺𑀤𑁆𑀥𑀭𑀘𑁆𑀙𑀸𑀬𑁄, 𑀬𑀸 𑀧𑀯𑀺𑀝𑁆𑀞𑀫𑀕𑁆𑀕𑁂𑀦𑁂𑀯 𑀦𑀺𑀕𑁆𑀕𑀘𑁆𑀙𑀦𑁆𑀢𑀺, 𑀢𑀸 𑀲𑀫𑁆𑀩𑀸𑀥𑀸 𑀩𑁆𑀬𑀽𑀳𑀸 𑀩𑀳𑀼𑀓𑀸 𑀏𑀢𑁆𑀣𑀸𑀢𑀺 𑀲𑀫𑁆𑀩𑀸𑀥𑀩𑁆𑀬𑀽𑀳𑀁. 𑀇𑀫𑀺𑀦𑀸𑀧𑀺 𑀦𑀕𑀭𑀲𑁆𑀲 𑀖𑀦𑀯𑀸𑀲𑀫𑁂𑀯 𑀤𑀻𑀧𑁂𑀢𑀺. 𑀪𑀦𑁆𑀢𑁂𑀦𑀸𑀢𑀺 𑀇𑀢𑁄 𑀘𑀺𑀢𑁄 𑀘 𑀧𑀭𑀺𑀩𑁆𑀪𑀫𑀦𑁆𑀢𑁂𑀦 𑀉𑀤𑁆𑀥𑀢𑀘𑀸𑀭𑀺𑀦𑀸. 𑀤𑀼𑀢𑀺𑀬𑀁 𑀉𑀢𑁆𑀢𑀸𑀦𑀫𑁂𑀯.

𑁩. 𑀕𑁄𑀥𑀲𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁧𑁯. 𑀢𑀢𑀺𑀬𑁂 𑀪𑀕𑀯𑀸𑀯 𑀏𑀢𑀁 𑀚𑀸𑀦𑁂𑀬𑁆𑀬 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀯𑀸 𑀅𑀲𑀫𑀦𑁆𑀦𑀸𑀕𑀢𑀁 𑀯𑀸𑀢𑀺 𑀇𑀤𑀁 𑀲𑁄 𑀲𑀓𑁆𑀓𑁄 𑀢𑀻𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑁄𑀢𑀸𑀧𑀦𑁆𑀦𑀪𑀸𑀯𑀁, 𑀘𑀢𑀽𑀳𑀺 𑀯𑀸 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀲𑁄𑀢𑀸𑀧𑀦𑁆𑀦𑀪𑀸𑀯𑀁 𑀪𑀕𑀯𑀸𑀯 𑀚𑀸𑀦𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀆𑀳.

𑀓𑁄𑀘𑀺𑀤𑁂𑀯 𑀥𑀫𑁆𑀫𑀲𑀫𑀼𑀧𑁆𑀧𑀸𑀤𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀓𑀺𑀜𑁆𑀘𑀺𑀤𑁂𑀯 𑀓𑀸𑀭𑀡𑀁 𑀉𑀧𑁆𑀧𑀚𑁆𑀚𑁂𑀬𑁆𑀬. 𑀏𑀓𑀢𑁄 𑀅𑀲𑁆𑀲 𑀪𑀕𑀯𑀸, 𑀏𑀓𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑁄𑀢𑀺 𑀬𑀲𑁆𑀫𑀺𑀁 𑀓𑀸𑀭𑀡𑁂 𑀉𑀧𑁆𑀧𑀦𑁆𑀦𑁂 𑀪𑀕𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀦𑀸𑀦𑀸𑀮𑀤𑁆𑀥𑀺𑀓𑁄 𑀳𑀼𑀢𑁆𑀯𑀸 𑀏𑀓𑀁 𑀯𑀸𑀤𑀁 𑀯𑀤𑀦𑁆𑀢𑁄 𑀏𑀓𑀢𑁄 𑀅𑀲𑁆𑀲, 𑀪𑀺𑀓𑁆𑀔𑀼𑀲𑀗𑁆𑀖𑁄𑀧𑀺 𑀏𑀓𑀁 𑀯𑀤𑀦𑁆𑀢𑁄 𑀏𑀓𑀢𑁄𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳𑀦𑁆𑀢𑀺 𑀬𑀁 𑀯𑀸𑀤𑀁 𑀢𑀼𑀫𑁆𑀳𑁂 𑀯𑀤𑁂𑀣, 𑀢𑀫𑁂𑀯𑀸𑀳𑀁 𑀕𑀡𑁆𑀳𑁂𑀬𑁆𑀬𑀦𑁆𑀢𑀺. 𑀦𑀦𑀼 𑀘 𑀅𑀭𑀺𑀬𑀲𑀸𑀯𑀓𑀲𑁆𑀲 𑀭𑀢𑀦𑀢𑁆𑀢𑀬𑁂 𑀧𑀲𑀸𑀤𑀦𑀸𑀦𑀢𑁆𑀢𑀁 𑀦𑀢𑁆𑀣𑀺, 𑀅𑀣 𑀓𑀲𑁆𑀫𑀸 𑀏𑀲 𑀏𑀯𑀫𑀸𑀳𑀸𑀢𑀺? 𑀪𑀕𑀯𑀢𑁄 𑀲𑀩𑁆𑀩𑀜𑁆𑀜𑀼𑀢𑀸𑀬. 𑀏𑀯𑀜𑁆𑀳𑀺𑀲𑁆𑀲 𑀳𑁄𑀢𑀺 ‘‘𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀢𑁆𑀢𑀦𑁄 𑀅𑀲𑀩𑁆𑀩𑀜𑁆𑀜𑀼𑀢𑀸𑀬 𑀅𑀚𑀸𑀦𑀺𑀢𑁆𑀯𑀸𑀧𑀺 𑀓𑀣𑁂𑀬𑁆𑀬, 𑀲𑀢𑁆𑀣𑀼 𑀧𑀦 𑀅𑀜𑁆𑀜𑀸𑀡𑀁 𑀦𑀸𑀫 𑀦𑀢𑁆𑀣𑀻’’𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳. 𑀅𑀜𑁆𑀜𑀢𑁆𑀭 𑀓𑀮𑁆𑀬𑀸𑀡𑀸 𑀅𑀜𑁆𑀜𑀢𑁆𑀭 𑀓𑀼𑀲𑀮𑀸𑀢𑀺 𑀓𑀮𑁆𑀬𑀸𑀡𑀫𑁂𑀯 𑀓𑀼𑀲𑀮𑀫𑁂𑀯 𑀯𑀤𑀸𑀫𑀺, 𑀦 𑀓𑀮𑁆𑀬𑀸𑀡𑀓𑀼𑀲𑀮𑀯𑀺𑀫𑀼𑀢𑁆𑀢𑀦𑁆𑀢𑀺. 𑀅𑀧𑀺𑀘𑀲𑁆𑀲 𑀅𑀦𑀯𑀚𑁆𑀚𑀦𑀤𑁄𑀲𑁄 𑀏𑀲𑁄𑀢𑀺.

𑁪. 𑀧𑀞𑀫𑀲𑀭𑀡𑀸𑀦𑀺𑀲𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁨𑁦. 𑀘𑀢𑀼𑀢𑁆𑀣𑁂 𑀇𑀥 𑀫𑀳𑀸𑀦𑀸𑀫 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄𑀢𑀺 𑀇𑀤𑀁 𑀦 𑀓𑁂𑀯𑀮𑀁 𑀲𑀭𑀡𑀸𑀦𑀺 𑀏𑀯 𑀅𑀧𑀸𑀬𑀢𑁄 𑀫𑀼𑀢𑁆𑀢𑁄, 𑀇𑀫𑁂𑀧𑀺 𑀧𑀼𑀕𑁆𑀕𑀮𑀸 𑀫𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 𑀆𑀭𑀤𑁆𑀥𑀁. 𑀫𑀢𑁆𑀢𑀲𑁄 𑀦𑀺𑀚𑁆𑀛𑀸𑀦𑀁 𑀔𑀫𑀦𑁆𑀢𑀻𑀢𑀺 𑀧𑀫𑀸𑀡𑁂𑀦 𑀘 𑀑𑀮𑁄𑀓𑀦𑀁 𑀔𑀫𑀦𑁆𑀢𑀺. 𑀇𑀫𑀺𑀦𑀸 𑀥𑀫𑁆𑀫𑀸𑀦𑀼𑀲𑀸𑀭𑀺𑀫𑀕𑁆𑀕𑀝𑁆𑀞𑀧𑀼𑀕𑁆𑀕𑀮𑀁 𑀤𑀲𑁆𑀲𑁂𑀢𑀺. 𑀅𑀕𑀦𑁆𑀢𑀸 𑀦𑀺𑀭𑀬𑀦𑁆𑀢𑀺 𑀫𑀕𑁆𑀕𑀝𑁆𑀞𑀧𑀼𑀕𑁆𑀕𑀮𑁄 𑀳𑀺 𑀅𑀧𑀸𑀬𑀢𑁄 𑀧𑀭𑀺𑀫𑀼𑀢𑁆𑀢𑁄𑀢𑀺 𑀯𑀸 𑀧𑀭𑀺𑀫𑀼𑀘𑁆𑀘𑀺𑀲𑁆𑀲𑀢𑀻𑀢𑀺 𑀯𑀸 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺, 𑀧𑀭𑀺𑀫𑀼𑀘𑁆𑀘𑀢𑀻𑀢𑀺 𑀧𑀦 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀬𑀲𑁆𑀫𑀸 𑀘 𑀧𑀭𑀺𑀫𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀕𑀦𑁆𑀢𑀸 𑀦𑀸𑀫 𑀦 𑀳𑁄𑀢𑀻𑀢𑀺, ‘‘𑀅𑀕𑀦𑁆𑀢𑀸’’𑀢𑀺 𑀯𑀼𑀢𑁆𑀢𑁄, 𑀦 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀲𑀤𑁆𑀥𑀸𑀫𑀢𑁆𑀢𑀁 𑀧𑁂𑀫𑀫𑀢𑁆𑀢𑀦𑁆𑀢𑀺 𑀇𑀫𑀺𑀦𑀸 𑀲𑀤𑁆𑀥𑀸𑀦𑀼𑀲𑀸𑀭𑀺𑀫𑀕𑁆𑀕𑀝𑁆𑀞𑀧𑀼𑀕𑁆𑀕𑀮𑀁 𑀤𑀲𑁆𑀲𑁂𑀢𑀺. 𑀫𑀳𑀸𑀲𑀸𑀮𑀸𑀢𑀺 𑀲𑀫𑀻𑀧𑁂 𑀞𑀺𑀢𑁂𑀯 𑀘𑀢𑁆𑀢𑀸𑀭𑁄 𑀫𑀳𑀸𑀲𑀸𑀭𑀭𑀼𑀓𑁆𑀔𑁂 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀫𑀭𑀡𑀓𑀸𑀮𑁂 𑀲𑀺𑀓𑁆𑀔𑀁 𑀲𑀫𑀸𑀤𑀺𑀬𑀻𑀢𑀺 𑀫𑀭𑀡𑀲𑀫𑀬𑁂 𑀢𑀻𑀲𑀼 𑀲𑀺𑀓𑁆𑀔𑀸𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀅𑀳𑁄𑀲𑀻𑀢𑀺 𑀤𑀲𑁆𑀲𑁂𑀢𑀺.

𑁫. 𑀤𑀼𑀢𑀺𑀬𑀲𑀭𑀡𑀸𑀦𑀺𑀲𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁨𑁧. 𑀧𑀜𑁆𑀘𑀫𑁂 𑀤𑀼𑀓𑁆𑀔𑁂𑀢𑁆𑀢𑀦𑁆𑀢𑀺 𑀯𑀺𑀲𑀫𑀔𑁂𑀢𑁆𑀢𑀁. 𑀤𑀼𑀩𑁆𑀪𑀽𑀫𑀦𑁆𑀢𑀺 𑀊𑀲𑀭𑀪𑀽𑀫𑀺𑀁 𑀮𑁄𑀡𑀽𑀧𑀳𑀢𑀁. 𑀔𑀡𑁆𑀟𑀸𑀦𑀻𑀢𑀺 𑀧𑀭𑀺𑀪𑀺𑀦𑁆𑀦𑀸𑀦𑀺. 𑀧𑀽𑀢𑀻𑀦𑀻𑀢𑀺 𑀉𑀤𑀓𑁂𑀦 𑀢𑁂𑀫𑁂𑀢𑁆𑀯𑀸 𑀧𑀽𑀢𑀺𑀪𑀸𑀯𑀁 𑀆𑀧𑀦𑁆𑀦𑀸𑀦𑀺. 𑀯𑀸𑀢𑀸𑀢𑀧𑀳𑀢𑀸𑀦𑀻𑀢𑀺 𑀯𑀸𑀢𑀸𑀢𑀧𑁂𑀦 𑀳𑀢𑀢𑁆𑀢𑀸 𑀦𑀺𑀭𑁄𑀚𑀪𑀸𑀯𑀁 𑀕𑀢𑀸𑀦𑀺. 𑀅𑀲𑀸𑀭𑀸𑀤𑀸𑀦𑀻𑀢𑀺 𑀅𑀦𑀸𑀤𑀺𑀦𑁆𑀦𑀲𑀸𑀭𑀸𑀦𑀺 𑀅𑀕𑀳𑀺𑀢𑀲𑀸𑀭𑀸𑀦𑀺. 𑀅𑀲𑀼𑀔𑀲𑀬𑀺𑀢𑀸𑀦𑀻𑀢𑀺 𑀦 𑀓𑁄𑀝𑁆𑀞𑀸𑀤𑀻𑀲𑀼 𑀧𑀓𑁆𑀔𑀺𑀧𑀺𑀢𑁆𑀯𑀸 𑀲𑀼𑀝𑁆𑀞𑀼 𑀞𑀧𑀺𑀢𑀸𑀦𑀺. 𑀲𑀼𑀔𑀲𑀬𑀺𑀢𑀸𑀦𑀻𑀢𑀺 𑀞𑀧𑀺𑀢𑀝𑁆𑀞𑀸𑀦𑀢𑁄 𑀘𑀢𑁆𑀢𑀸𑀭𑁄 𑀫𑀸𑀲𑁂 𑀅𑀘𑀮𑀺𑀢𑀸𑀦𑀺.

𑁬. 𑀧𑀞𑀫𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁨𑁨. 𑀙𑀝𑁆𑀞𑁂 𑀞𑀸𑀦𑀲𑁄 𑀯𑁂𑀤𑀦𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬𑀸𑀢𑀺 𑀔𑀡𑁂𑀦 𑀯𑁂𑀤𑀦𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀬𑁆𑀬. 𑀫𑀺𑀘𑁆𑀙𑀸𑀜𑀸𑀡𑁂𑀦𑀸𑀢𑀺 𑀫𑀺𑀘𑁆𑀙𑀸𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀫𑀺𑀘𑁆𑀙𑀸𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀅𑀦𑀺𑀬𑁆𑀬𑀸𑀦𑀺𑀓𑀯𑀺𑀫𑀼𑀢𑁆𑀢𑀺𑀬𑀸. 𑀢𑀲𑁆𑀫𑀸 𑀲𑀤𑁆𑀥𑀜𑁆𑀘 𑀲𑀻𑀮𑀜𑁆𑀘𑀸𑀢𑀺 𑀕𑀸𑀣𑀸 𑀯𑀼𑀢𑁆𑀢𑀢𑁆𑀣𑀸 𑀏𑀯. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑁄 𑀦𑀸𑀫.

𑁭. 𑀤𑀼𑀢𑀺𑀬𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁨𑁩. 𑀲𑀢𑁆𑀢𑀫𑁂 𑀲𑀫𑁆𑀧𑀭𑀸𑀬𑀺𑀓𑀁 𑀫𑀭𑀡𑀪𑀬𑀦𑁆𑀢𑀺 𑀲𑀫𑁆𑀧𑀭𑀸𑀬𑀳𑁂𑀢𑀼𑀓𑀁 𑀫𑀭𑀡𑀪𑀬𑀁 𑀕𑀺𑀳𑀺𑀲𑀸𑀫𑀻𑀘𑀺𑀓𑀸𑀦𑀻𑀢𑀺 𑀕𑀺𑀳𑀻𑀦𑀁 𑀅𑀦𑀼𑀘𑁆𑀙𑀯𑀺𑀓𑀸𑀦𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀲𑀭𑀡𑀸𑀦𑀺𑀯𑀕𑁆𑀕𑁄 𑀢𑀢𑀺𑀬𑁄.

𑁪. 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀯𑀕𑁆𑀕𑁄

𑁧. 𑀧𑀞𑀫𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁨𑁭. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀸 𑀓𑀼𑀲𑀮𑀸𑀪𑀺𑀲𑀦𑁆𑀤𑀸𑀢𑀺 𑀧𑀼𑀜𑁆𑀜𑀦𑀤𑀺𑀬𑁄 𑀓𑀼𑀲𑀮𑀦𑀤𑀺𑀬𑁄. 𑀲𑀼𑀔𑀲𑁆𑀲𑀸𑀳𑀸𑀭𑀸𑀢𑀺 𑀲𑀼𑀔𑀲𑁆𑀲 𑀧𑀘𑁆𑀘𑀬𑀸.

𑁪. 𑀧𑀞𑀫𑀤𑁂𑀯𑀧𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩𑁦. 𑀘𑀢𑀼𑀢𑁆𑀣𑁂 𑀤𑁂𑀯𑀧𑀤𑀸𑀦𑀻𑀢𑀺 𑀤𑁂𑀯𑀸𑀦𑀁 𑀜𑀸𑀡𑁂𑀦, 𑀤𑁂𑀯𑀲𑁆𑀲 𑀯𑀸 𑀜𑀸𑀡𑁂𑀦 𑀅𑀓𑁆𑀓𑀦𑁆𑀢𑀧𑀤𑀸𑀦𑀺. 𑀯𑀺𑀲𑀼𑀤𑁆𑀥𑀺𑀬𑀸𑀢𑀺 𑀯𑀺𑀲𑀼𑀚𑁆𑀛𑀦𑀢𑁆𑀣𑀸𑀬. 𑀧𑀭𑀺𑀬𑁄𑀤𑀧𑀦𑀸𑀬𑀸𑀢𑀺 𑀧𑀼𑀭𑀺𑀬𑁄𑀤𑀧𑀦𑀢𑁆𑀣𑀸𑀬 𑀚𑁄𑀢𑀦𑀢𑁆𑀣𑀸𑀬. 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀘𑀢𑁆𑀢𑀸𑀭𑁄𑀧𑀺 𑀨𑀮𑀝𑁆𑀞𑀧𑀼𑀕𑁆𑀕𑀮𑀸 𑀯𑀺𑀲𑀼𑀤𑁆𑀥𑀝𑁆𑀞𑁂𑀦 𑀤𑁂𑀯𑀸 𑀦𑀸𑀫 𑀚𑀸𑀢𑀸.

𑁮. 𑀯𑀲𑁆𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩𑁪. 𑀅𑀝𑁆𑀞𑀫𑁂 𑀧𑀸𑀭𑀁𑀕𑀦𑁆𑀢𑁆𑀯𑀸𑀢𑀺 𑀧𑀸𑀭𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦𑀁, 𑀢𑀁 𑀧𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀆𑀲𑀯𑀸𑀦𑀁 𑀔𑀬𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀦 𑀧𑀞𑀫𑀁 𑀦𑀺𑀩𑁆𑀩𑀸𑀦𑀁 𑀕𑀦𑁆𑀢𑁆𑀯𑀸 𑀧𑀘𑁆𑀙𑀸 𑀲𑀁𑀯𑀢𑁆𑀢𑀦𑁆𑀢𑀺, 𑀕𑀘𑁆𑀙𑀫𑀸𑀦𑀸 𑀏𑀯 𑀲𑀁𑀯𑀢𑁆𑀢𑀦𑁆𑀢𑀺. 𑀤𑁂𑀲𑀦𑀸 𑀧𑀦 𑀏𑀯𑀁 𑀓𑀢𑀸.

𑁧𑁦. 𑀦𑀦𑁆𑀤𑀺𑀬𑀲𑀓𑁆𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩𑁬. 𑀤𑀲𑀫𑁂 𑀤𑀺𑀯𑀸 𑀧𑀯𑀺𑀯𑁂𑀓𑀸𑀬 𑀭𑀢𑁆𑀢𑀺𑀁 𑀧𑀝𑀺𑀲𑀮𑁆𑀮𑀸𑀦𑀸𑀬𑀸𑀢𑀺 𑀤𑀺𑀯𑀸 𑀧𑀯𑀺𑀯𑁂𑀓𑀢𑁆𑀣𑀸𑀬 𑀭𑀢𑁆𑀢𑀺𑀁 𑀧𑀝𑀺𑀲𑀮𑁆𑀮𑀸𑀦𑀢𑁆𑀣𑀸𑀬. 𑀥𑀫𑁆𑀫𑀸 𑀦 𑀧𑀸𑀢𑀼𑀪𑀯𑀦𑁆𑀢𑀻𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸 𑀥𑀫𑁆𑀫𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑁫. 𑀲𑀕𑀸𑀣𑀓𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀯𑀕𑁆𑀕𑁄

𑁧. 𑀧𑀞𑀫𑀅𑀪𑀺𑀅𑀲𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩𑁭. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑁄𑀢𑀺 𑀆𑀴𑁆𑀳𑀓𑀕𑀡𑀦𑀸𑀬 𑀅𑀲𑀗𑁆𑀔𑁆𑀬𑁂𑀬𑁆𑀬𑁄, 𑀬𑁄𑀚𑀦𑀯𑀲𑁂𑀦 𑀧𑀦𑀲𑁆𑀲 𑀲𑀗𑁆𑀔𑁆𑀬𑀸 𑀅𑀢𑁆𑀣𑀺. 𑀩𑀳𑀼𑀪𑁂𑀭𑀯𑀦𑁆𑀢𑀺 𑀲𑀯𑀺𑀜𑁆𑀜𑀸𑀡𑀓𑀅𑀯𑀺𑀜𑁆𑀜𑀸𑀡𑀓𑀸𑀦𑀁 𑀪𑁂𑀭𑀯𑀸𑀭𑀫𑁆𑀫𑀡𑀸𑀦𑀁 𑀯𑀲𑁂𑀦 𑀩𑀳𑀼𑀪𑁂𑀭𑀯𑀁. 𑀧𑀼𑀣𑀽𑀢𑀺 𑀩𑀳𑀼. 𑀲𑀯𑀦𑁆𑀢𑀻𑀢𑀺 𑀲𑀦𑁆𑀤𑀫𑀸𑀦𑀸. 𑀉𑀧𑀬𑀦𑁆𑀢𑀻𑀢𑀺 𑀉𑀧𑀕𑀘𑁆𑀙𑀦𑁆𑀢𑀺.

𑁨. 𑀤𑀼𑀢𑀺𑀬𑀅𑀪𑀺𑀲𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩𑁮. 𑀤𑀼𑀢𑀺𑀬𑁂 𑀬𑀢𑁆𑀣𑀺𑀫𑀸 𑀫𑀳𑀸𑀦𑀤𑀺𑀬𑁄 𑀲𑀁𑀲𑀦𑁆𑀤𑀦𑁆𑀢𑀺 𑀲𑀫𑁂𑀦𑁆𑀢𑀻𑀢𑀺 𑀬𑀲𑁆𑀫𑀺𑀁 𑀲𑀁𑀪𑀚𑁆𑀚𑁂 𑀏𑀢𑀸 𑀫𑀳𑀸𑀦𑀤𑀺𑀬𑁄 𑀏𑀓𑀻𑀪𑀯𑀦𑁆𑀢𑀺, 𑀦𑀺𑀭𑀦𑁆𑀢𑀭𑀸 𑀪𑀯𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁩. 𑀢𑀢𑀺𑀬𑀅𑀪𑀺𑀲𑀦𑁆𑀤𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁩𑁯. 𑀢𑀢𑀺𑀬𑁂 𑀧𑀼𑀜𑁆𑀜𑀓𑀸𑀫𑁄𑀢𑀺 𑀧𑀼𑀜𑁆𑀜𑀢𑁆𑀣𑀺𑀓𑁄. 𑀓𑀼𑀲𑀮𑁂 𑀧𑀢𑀺𑀝𑁆𑀞𑀺𑀢𑁄𑀢𑀺 𑀫𑀕𑁆𑀕𑀓𑀼𑀲𑀮𑁂 𑀧𑀢𑀺𑀝𑁆𑀞𑀺𑀢𑁄. 𑀪𑀸𑀯𑁂𑀢𑀺 𑀫𑀕𑁆𑀕𑀁 𑀅𑀫𑀢𑀲𑁆𑀲 𑀧𑀢𑁆𑀢𑀺𑀬𑀸𑀢𑀺 𑀦𑀺𑀩𑁆𑀩𑀸𑀦𑀲𑁆𑀲 𑀧𑀸𑀧𑀼𑀡𑀦𑀢𑁆𑀣𑀁 𑀅𑀭𑀳𑀢𑁆𑀢𑀫𑀕𑁆𑀕𑀁 𑀪𑀸𑀯𑁂𑀢𑀺. 𑀥𑀫𑁆𑀫𑀲𑀸𑀭𑀸𑀥𑀺𑀕𑀫𑁄𑀢𑀺 𑀥𑀫𑁆𑀫𑀲𑀸𑀭𑁄 𑀯𑀼𑀘𑁆𑀘𑀢𑀺 𑀅𑀭𑀺𑀬𑀨𑀮𑀁 𑀥𑀫𑁆𑀫𑀲𑀸𑀭𑁄, 𑀅𑀥𑀺𑀕𑀫𑁄 𑀅𑀲𑁆𑀲𑀸𑀢𑀺 𑀥𑀫𑁆𑀫𑀲𑀸𑀭𑀸𑀥𑀺𑀕𑀫𑁄, 𑀅𑀥𑀺𑀕𑀢𑀨𑀮𑁄𑀢𑀺 𑀅𑀢𑁆𑀣𑁄. 𑀔𑀬𑁂 𑀭𑀢𑁄𑀢𑀺 𑀓𑀺𑀮𑁂𑀲𑀓𑁆𑀔𑀬𑁂 𑀭𑀢𑁄.

𑁪. 𑀧𑀞𑀫𑀫𑀳𑀤𑁆𑀥𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁪𑁦. 𑀘𑀢𑀼𑀢𑁆𑀣𑁂 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄𑀢𑀺 𑀲𑀢𑁆𑀢𑀯𑀺𑀥𑁂𑀦 𑀅𑀭𑀺𑀬𑀥𑀦𑁂𑀦 𑀅𑀟𑁆𑀠𑁄 𑀘𑁂𑀯 𑀫𑀳𑀤𑁆𑀥𑀦𑁄 𑀘. 𑀢𑁂𑀦𑁂𑀯 𑀪𑁄𑀕𑁂𑀦 𑀫𑀳𑀸𑀪𑁄𑀕𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀲𑀕𑀸𑀣𑀓𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀯𑀕𑁆𑀕𑁄 𑀧𑀜𑁆𑀘𑀫𑁄.

𑁬. 𑀲𑀧𑁆𑀧𑀜𑁆𑀜𑀯𑀕𑁆𑀕𑁄

𑁨. 𑀯𑀲𑁆𑀲𑀁𑀯𑀼𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁪𑁮. 𑀙𑀝𑁆𑀞𑀲𑁆𑀲 𑀤𑀼𑀢𑀺𑀬𑁂 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀲𑁄𑀢𑀸𑀧𑀦𑁆𑀦𑁄 𑀪𑀺𑀓𑁆𑀔𑀼 𑀏𑀢𑁆𑀢𑀓𑁂𑀦 𑀯𑁄𑀲𑀸𑀦𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀢𑀸𑀦𑁂𑀯 𑀇𑀦𑁆𑀤𑁆𑀭𑀺𑀬𑀩𑀮𑀩𑁄𑀚𑁆𑀛𑀗𑁆𑀕𑀸𑀦𑀺 𑀲𑀫𑁄𑀥𑀸𑀦𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑀓𑀤𑀸𑀕𑀸𑀫𑀺𑀫𑀕𑁆𑀕𑀁 𑀧𑀸𑀧𑀼𑀡𑀺𑀲𑁆𑀲𑀢𑀺, 𑀲𑀓𑀤𑀸𑀕𑀸𑀫𑀻 𑀅𑀦𑀸𑀕𑀸𑀫𑀺𑀫𑀕𑁆𑀕𑀁, 𑀅𑀦𑀸𑀕𑀸𑀫𑀻 𑀅𑀭𑀳𑀢𑁆𑀢𑀫𑀕𑁆𑀕𑀦𑁆𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀪𑀕𑀯𑀢𑀸 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀲𑀸𑀲𑀦𑁂 𑀢𑀦𑁆𑀢𑀺 𑀧𑀯𑁂𑀡𑀻 𑀓𑀣𑀺𑀢𑀸𑀢𑀺.

𑁩. 𑀥𑀫𑁆𑀫𑀤𑀺𑀦𑁆𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁪𑁯. 𑀢𑀢𑀺𑀬𑁂 𑀥𑀫𑁆𑀫𑀤𑀺𑀦𑁆𑀦𑁄𑀢𑀺 𑀲𑀢𑁆𑀢𑀲𑀼 𑀚𑀦𑁂𑀲𑀼 𑀏𑀓𑁄. 𑀩𑀼𑀤𑁆𑀥𑀓𑀸𑀮𑀲𑁆𑀫𑀺𑀜𑁆𑀳𑀺 𑀥𑀫𑁆𑀫𑀤𑀺𑀦𑁆𑀦𑁄 𑀉𑀧𑀸𑀲𑀓𑁄, 𑀯𑀺𑀲𑀸𑀔𑁄 𑀉𑀧𑀸𑀲𑀓𑁄, 𑀉𑀕𑁆𑀕𑁄 𑀕𑀳𑀧𑀢𑀺, 𑀘𑀺𑀢𑁆𑀢𑁄 𑀕𑀳𑀧𑀢𑀺, 𑀳𑀢𑁆𑀣𑀓𑁄 𑀆𑀴𑀯𑀓𑁄, 𑀘𑀽𑀴𑀅𑀦𑀸𑀣𑀧𑀺𑀡𑁆𑀟𑀺𑀓𑁄, 𑀫𑀳𑀸𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑀢𑀺 𑀇𑀫𑁂 𑀲𑀢𑁆𑀢 𑀚𑀦𑀸 𑀧𑀜𑁆𑀘𑀲𑀢𑀉𑀧𑀸𑀲𑀓𑀧𑀭𑀺𑀯𑀸𑀭𑀸 𑀅𑀳𑁂𑀲𑀼𑀁. 𑀏𑀢𑁂𑀲𑀼 𑀏𑀲 𑀅𑀜𑁆𑀜𑀢𑀭𑁄.

𑀕𑀫𑁆𑀪𑀻𑀭𑀸𑀢𑀺 𑀥𑀫𑁆𑀫𑀕𑀫𑁆𑀪𑀻𑀭𑀸 𑀲𑀮𑁆𑀮𑀲𑀼𑀢𑁆𑀢𑀸𑀤𑀬𑁄. 𑀕𑀫𑁆𑀪𑀻𑀭𑀢𑁆𑀣𑀸𑀢𑀺 𑀅𑀢𑁆𑀣𑀕𑀫𑁆𑀪𑀻𑀭𑀸 𑀘𑁂𑀢𑀦𑀸𑀲𑀼𑀢𑁆𑀢𑀦𑁆𑀢𑀸𑀤𑀬𑁄. 𑀮𑁄𑀓𑀼𑀢𑁆𑀢𑀭𑀸𑀢𑀺 𑀮𑁄𑀓𑀼𑀢𑁆𑀢𑀭𑀢𑁆𑀣𑀤𑀻𑀧𑀓𑀸 𑀅𑀲𑀗𑁆𑀔𑀢𑀲𑀁𑀬𑀼𑀢𑁆𑀢𑀸𑀤𑀬𑁄. 𑀲𑀼𑀜𑁆𑀜𑀢𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀸𑀢𑀺 𑀲𑀢𑁆𑀢𑀲𑀼𑀜𑁆𑀜𑀢𑀸𑀤𑀻𑀧𑀓𑀸 𑀔𑀚𑁆𑀚𑀦𑀺𑀓𑀲𑀼𑀢𑁆𑀢𑀦𑁆𑀢𑀸𑀤𑀬𑁄. 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀲𑁆𑀲𑀸𑀫𑀸𑀢𑀺 𑀧𑀝𑀺𑀮𑀪𑀺𑀢𑁆𑀯𑀸 𑀯𑀺𑀳𑀭𑀺𑀲𑁆𑀲𑀸𑀫. 𑀏𑀯𑀜𑁆𑀳𑀺 𑀯𑁄, 𑀥𑀫𑁆𑀫𑀤𑀺𑀦𑁆𑀦, 𑀲𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀏𑀯𑀁 𑀢𑀼𑀫𑁆𑀳𑁂𑀳𑀺 𑀘𑀦𑁆𑀤𑁄𑀧𑀫𑀧𑀝𑀺𑀧𑀤𑀁 𑀭𑀣𑀯𑀺𑀦𑀻𑀢𑀧𑀝𑀺𑀧𑀤𑀁 𑀫𑁄𑀦𑁂𑀬𑁆𑀬𑀧𑀝𑀺𑀧𑀤𑀁 𑀫𑀳𑀸𑀅𑀭𑀺𑀬𑀯𑀁𑀲𑀧𑀝𑀺𑀧𑀤𑀁 𑀧𑀽𑀭𑁂𑀦𑁆𑀢𑁂𑀳𑀺 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀇𑀢𑀺 𑀲𑀢𑁆𑀣𑀸 𑀇𑀫𑁂𑀲𑀁 𑀉𑀧𑀸𑀲𑀓𑀸𑀦𑀁 𑀅𑀲𑀬𑁆𑀳𑀪𑀸𑀭𑀁 𑀆𑀭𑁄𑀧𑁂𑀲𑀺. 𑀓𑀲𑁆𑀫𑀸? 𑀏𑀢𑁂 𑀓𑀺𑀭 𑀦 𑀅𑀢𑁆𑀢𑀦𑁄 𑀪𑀽𑀫𑀺𑀬𑀁 𑀞𑀢𑁆𑀯𑀸 𑀑𑀯𑀸𑀤𑀁 𑀬𑀸𑀘𑀺𑀁𑀲𑀼, 𑀅𑀯𑀺𑀲𑁂𑀲𑁂𑀦 𑀧𑀦 𑀲𑀩𑁆𑀩𑀪𑀸𑀭𑀁 𑀉𑀓𑁆𑀔𑀺𑀧𑀺𑀢𑀼𑀁 𑀲𑀫𑀢𑁆𑀣𑀸 𑀯𑀺𑀬 ‘‘𑀑𑀯𑀤𑀢𑀼 𑀦𑁄, 𑀪𑀦𑁆𑀢𑁂, 𑀪𑀕𑀯𑀸’’𑀢𑀺 𑀬𑀸𑀘𑀺𑀁𑀲𑀼. 𑀢𑁂𑀦 𑀢𑁂𑀲𑀁 𑀲𑀢𑁆𑀣𑀸 𑀅𑀲𑀬𑁆𑀳𑀪𑀸𑀭𑀁 𑀆𑀭𑁄𑀧𑁂𑀦𑁆𑀢𑁄 𑀏𑀯𑀫𑀸𑀳. 𑀦 𑀔𑁄 𑀦𑁂𑀢𑀦𑁆𑀢𑀺 𑀦 𑀔𑁄 𑀏𑀢𑀁. 𑀦𑀓𑀸𑀭𑁄 𑀧𑀦𑁂𑀢𑁆𑀣 𑀩𑁆𑀬𑀜𑁆𑀚𑀦𑀲𑀦𑁆𑀥𑀺𑀫𑀢𑁆𑀢𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀪𑀽𑀫𑀺𑀬𑀁 𑀞𑀢𑁆𑀯𑀸 𑀑𑀯𑀸𑀤𑀁 𑀬𑀸𑀘𑀣, 𑀢𑀲𑁆𑀫𑀸.

𑁪. 𑀕𑀺𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁫𑁦. 𑀘𑀢𑀼𑀢𑁆𑀣𑁂 𑀦 𑀔𑁄 𑀧𑀦𑁂𑀢𑀦𑁆𑀢𑀺 𑀦 𑀔𑁄 𑀅𑀫𑁆𑀳𑁂𑀳𑀺 𑀏𑀢𑀁. 𑀲𑀧𑁆𑀧𑀜𑁆𑀜𑁄 𑀉𑀧𑀸𑀲𑀓𑁄𑀢𑀺 𑀲𑁄𑀢𑀸𑀧𑀦𑁆𑀦𑁄 𑀅𑀥𑀺𑀧𑁆𑀧𑁂𑀢𑁄. 𑀅𑀲𑁆𑀲𑀸𑀲𑀦𑀻𑀬𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀅𑀲𑁆𑀲𑀸𑀲𑀓𑀭𑁂𑀳𑀺 𑀥𑀫𑁆𑀫𑁂𑀳𑀺. 𑀅𑀲𑁆𑀲𑀸𑀲𑀢𑀸𑀬𑀲𑁆𑀫𑀸𑀢𑀺 𑀅𑀲𑁆𑀲𑀸𑀲𑀢𑀼 𑀆𑀬𑀲𑁆𑀫𑀸. 𑀫𑀸𑀭𑀺𑀲𑁄𑀢𑀺 𑀫𑀭𑀡𑀧𑀝𑀺𑀩𑀤𑁆𑀥𑁄. 𑀫𑀭𑀡𑀥𑀫𑁆𑀫𑁄𑀢𑀺 𑀫𑀭𑀡𑀲𑀪𑀸𑀯𑁄. 𑀅𑀥𑀺𑀫𑁄𑀘𑁂𑀳𑀻𑀢𑀺 𑀞𑀧𑁂𑀳𑀺. 𑀅𑀥𑀺𑀫𑁄𑀘𑀺𑀢𑀦𑁆𑀢𑀺 𑀞𑀧𑀺𑀢𑀁. 𑀏𑀯𑀁 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀏𑀯𑀁 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀘𑀺𑀢𑁆𑀢𑀲𑁆𑀲. 𑀬𑀤𑀺𑀤𑀁 𑀯𑀺𑀫𑀼𑀢𑁆𑀢𑀺𑀬𑀸 𑀯𑀺𑀫𑀼𑀢𑁆𑀢𑀦𑁆𑀢𑀺 𑀬𑀁 𑀇𑀤𑀁 𑀯𑀺𑀫𑀼𑀢𑁆𑀢𑀺𑀁 𑀆𑀭𑀩𑁆𑀪 𑀯𑀺𑀫𑀼𑀢𑁆𑀢𑀺𑀬𑀸 𑀦𑀸𑀦𑀸𑀓𑀭𑀡𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀢𑀁 𑀯𑀤𑀸𑀫𑀺. 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀳𑀺 𑀘𑁂𑀢𑀺𑀬𑀗𑁆𑀕𑀡𑀩𑁄𑀥𑀺𑀬𑀗𑁆𑀕𑀡𑀯𑀢𑁆𑀢𑁂𑀲𑀼 𑀘𑁂𑀯 𑀅𑀲𑀻𑀢𑀺𑀓𑁆𑀔𑀦𑁆𑀥𑀓𑀯𑀢𑁆𑀢𑁂𑀲𑀼 𑀘𑀸𑀢𑀺 𑀆𑀕𑀫𑀦𑀻𑀬𑀕𑀼𑀡𑁂𑀲𑀼 𑀧𑀫𑀸𑀡𑀁 𑀦𑀸𑀫 𑀦𑀢𑁆𑀣𑀺, 𑀧𑀝𑀺𑀯𑀺𑀤𑁆𑀥𑁂 𑀧𑀦 𑀫𑀕𑁆𑀕𑁂 𑀯𑀸 𑀨𑀮𑁂 𑀯𑀸 𑀉𑀧𑀸𑀲𑀓𑀸𑀦𑀜𑁆𑀘 𑀪𑀺𑀓𑁆𑀔𑀽𑀦𑀜𑁆𑀘 𑀦𑀸𑀦𑀸𑀓𑀭𑀡𑀁 𑀦𑀢𑁆𑀣𑀺.

𑁯. 𑀧𑀜𑁆𑀜𑀸𑀧𑀝𑀺𑀮𑀸𑀪𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁫𑁫. 𑀦𑀯𑀫𑁂 𑀧𑀜𑁆𑀜𑀸𑀧𑀝𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀏𑀢𑁆𑀣 𑀲𑀢𑁆𑀢 𑀲𑁂𑀓𑁆𑀔𑀸 𑀧𑀜𑁆𑀜𑀁 𑀧𑀝𑀺𑀮𑀪𑀦𑁆𑀢𑀺 𑀦𑀸𑀫, 𑀔𑀻𑀡𑀸𑀲𑀯𑁄 𑀧𑀝𑀺𑀮𑀤𑁆𑀥𑀧𑀜𑁆𑀜𑁄 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀢𑁄 𑀧𑀜𑁆𑀜𑀸𑀩𑀼𑀤𑁆𑀥𑀺𑀬𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀲𑀧𑁆𑀧𑀜𑁆𑀜𑀯𑀕𑁆𑀕𑁄 𑀙𑀝𑁆𑀞𑁄.

𑁭. 𑀫𑀳𑀸𑀧𑀜𑁆𑀜𑀯𑀕𑁆𑀕𑁄

𑁧. 𑀫𑀳𑀸𑀧𑀜𑁆𑀜𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁫𑁮. 𑀲𑀢𑁆𑀢𑀫𑁂 𑀫𑀳𑀸𑀧𑀜𑁆𑀜𑀢𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺𑀆𑀤𑀻𑀲𑀼 ‘‘𑀫𑀳𑀦𑁆𑀢𑁂 𑀅𑀢𑁆𑀣𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀫𑀳𑀸𑀧𑀜𑁆𑀜𑀸’’𑀢𑀺𑀆𑀤𑀺𑀦𑀸 𑀧𑀝𑀺𑀲𑀫𑁆𑀪𑀺𑀤𑀸𑀬𑀁 (𑀧𑀝𑀺. 𑀫. 𑁨.𑁪) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀩𑁆𑀩𑀢𑁆𑀣 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀲𑁄𑀢𑀸𑀧𑀢𑁆𑀢𑀺𑀲𑀁𑀬𑀼𑀢𑁆𑀢𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀲𑀘𑁆𑀘𑀲𑀁𑀬𑀼𑀢𑁆𑀢𑀁

𑁧. 𑀲𑀫𑀸𑀥𑀺𑀯𑀕𑁆𑀕𑁄

𑁧. 𑀲𑀫𑀸𑀥𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁭𑁧. 𑀲𑀘𑁆𑀘𑀲𑀁𑀬𑀼𑀢𑁆𑀢𑀲𑁆𑀲 𑀧𑀞𑀫𑁂 𑀲𑀫𑀸𑀥𑀺𑀁, 𑀪𑀺𑀓𑁆𑀔𑀯𑁂𑀢𑀺 𑀢𑁂 𑀓𑀺𑀭 𑀪𑀺𑀓𑁆𑀔𑀽 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀧𑀭𑀺𑀳𑀸𑀬𑀦𑁆𑀢𑀺, 𑀅𑀣 𑀦𑁂𑀲𑀁 𑀲𑀢𑁆𑀣𑀸 𑁋 ‘‘𑀏𑀯𑀫𑁂𑀢𑁂 𑀘𑀺𑀢𑁆𑀢𑁂𑀓𑀕𑁆𑀕𑀢𑀁 𑀮𑀪𑀺𑀢𑁆𑀯𑀸, 𑀓𑀫𑁆𑀫𑀝𑁆𑀞𑀸𑀦𑀁 𑀯𑀟𑁆𑀠𑁂𑀢𑁆𑀯𑀸, 𑀯𑀺𑀲𑁂𑀲𑀁 𑀧𑀸𑀧𑀼𑀡𑀺𑀲𑁆𑀲𑀦𑁆𑀢𑀻’’𑀢𑀺 𑀇𑀫𑀁 𑀤𑁂𑀲𑀦𑀁 𑀆𑀭𑀪𑀺. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀬𑁄𑀕𑁄 𑀓𑀭𑀡𑀻𑀬𑁄𑀢𑀺 𑀏𑀢𑁆𑀣 𑀬𑀣𑀸𑀪𑀽𑀢𑀸𑀤𑀺𑀯𑀲𑁂𑀦 𑀓𑀸𑀭𑀡𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀜𑁆𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀪𑀺𑀓𑁆𑀔𑀯𑁂, 𑀬𑀲𑁆𑀫𑀸 𑀲𑀫𑀸𑀳𑀺𑀢𑁄 𑀪𑀺𑀓𑁆𑀔𑀼 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀢𑀼𑀫𑁆𑀳𑁂𑀳𑀺 𑀘 𑀲𑀫𑀸𑀳𑀺𑀢𑁂𑀳𑀺 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀬𑀣𑀸𑀪𑀽𑀢𑀁 𑀧𑀚𑀸𑀦𑀦𑀢𑁆𑀣𑀸𑀬 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀬𑁄𑀕𑁄 𑀓𑀭𑀡𑀻𑀬𑁄. 𑀢𑀣𑀸 𑀬𑀲𑁆𑀫𑀸 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺 𑀢𑀣𑀸𑀕𑀢𑀲𑁆𑀲𑁂𑀯 𑀧𑀸𑀢𑀼𑀪𑀸𑀯𑀸 𑀧𑀸𑀓𑀝𑀸𑀦𑀺 𑀳𑁄𑀦𑁆𑀢𑀺, 𑀬𑀲𑁆𑀫𑀸 𑀘 𑀢𑀣𑀸𑀕𑀢𑁂𑀦 𑀲𑀼𑀯𑀺𑀪𑀢𑁆𑀢𑀸𑀦𑀺, 𑀬𑀲𑁆𑀫𑀸 𑀘 𑀢𑁂𑀲𑀼 𑀅𑀧𑀭𑀺𑀫𑀸𑀡𑀸 𑀯𑀡𑁆𑀡𑀸 𑀅𑀧𑀭𑀺𑀫𑀸𑀡𑀸𑀦𑀺 𑀧𑀤𑀩𑁆𑀬𑀜𑁆𑀚𑀦𑀸𑀦𑀺, 𑀬𑀲𑁆𑀫𑀸 𑀘 𑀢𑁂𑀲𑀁 𑀅𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀯𑀝𑁆𑀝𑀁 𑀯𑀟𑁆𑀠𑀢𑀺, 𑀢𑁂𑀲𑀁 𑀧𑀝𑀺𑀯𑀺𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀯𑀟𑁆𑀠𑀢𑀺, 𑀢𑀲𑁆𑀫𑀸 ‘‘𑀏𑀯𑀁 𑀦𑁄 𑀯𑀝𑁆𑀝𑀁 𑀦 𑀯𑀟𑁆𑀠𑀺𑀲𑁆𑀲𑀢𑀻’’𑀢𑀺 𑀢𑀼𑀫𑁆𑀳𑁂𑀳𑀺 ‘‘𑀇𑀤𑀁 𑀤𑀼𑀓𑁆𑀔’’𑀦𑁆𑀢𑀺 𑀬𑁄𑀕𑁄 𑀓𑀭𑀡𑀻𑀬𑁄.

𑁨. 𑀧𑀝𑀺𑀲𑀮𑁆𑀮𑀸𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁭𑁨. 𑀤𑀼𑀢𑀺𑀬𑀁 𑀓𑀸𑀬𑀯𑀺𑀯𑁂𑀓𑀯𑀺𑀓𑀮𑀸𑀦𑀁 𑀓𑀸𑀬𑀯𑀺𑀯𑁂𑀓𑀧𑀝𑀺𑀮𑀸𑀪𑀢𑁆𑀣𑀸𑀬 𑀯𑀼𑀢𑁆𑀢𑀁.

𑁩. 𑀧𑀞𑀫𑀓𑀼𑀮𑀧𑀼𑀢𑁆𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁦𑁭𑁩-𑁭𑁫. 𑀢𑀢𑀺𑀬𑁂 𑀅𑀪𑀺𑀲𑀫𑀬𑀸𑀬𑀸𑀢𑀺 𑀅𑀪𑀺𑀲𑀫𑀬𑀢𑁆𑀣𑀸𑀬. 𑀲𑀫𑀡𑀩𑁆𑀭𑀸𑀳𑁆𑀫𑀡𑀸𑀢𑀺 𑀘𑁂𑀢𑁆𑀣 𑀲𑀸𑀲𑀦𑀸𑀯𑀘𑀭𑀸 𑀅𑀥𑀺𑀧𑁆𑀧𑁂𑀢𑀸. 𑀢𑀣𑀸 𑀘𑀢𑀼𑀢𑁆𑀣𑀧𑀜𑁆𑀘𑀫𑁂𑀲𑀼, 𑀢𑁂𑀦 𑀢𑁂𑀦 𑀅𑀪𑀺𑀮𑀸𑀧𑁂𑀦 𑀩𑀼𑀚𑁆𑀛𑀦𑀓𑀸𑀦𑀁 𑀧𑀦 𑀅𑀚𑁆𑀛𑀸𑀲𑀬𑁂𑀦𑁂𑀢𑀸𑀦𑀺 𑀯𑀼𑀢𑁆𑀢𑀸𑀦𑀺.

𑁬. 𑀤𑀼𑀢𑀺𑀬𑀲𑀫𑀡𑀩𑁆𑀭𑀸𑀳𑁆𑀫𑀡𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁭𑁬. 𑀙𑀝𑁆𑀞𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑀁 𑀧𑀓𑀸𑀲𑁂𑀲𑀼𑀦𑁆𑀢𑀺 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀅𑀳𑀦𑁆𑀢𑀺 𑀏𑀯𑀁 𑀅𑀢𑁆𑀢𑀸𑀦𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑀁 𑀧𑀓𑀸𑀲𑀬𑀺𑀁𑀲𑀼. 𑀇𑀫𑀲𑁆𑀫𑀺𑀜𑁆𑀳𑀺 𑀲𑀼𑀢𑁆𑀢𑁂 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸 𑀘 𑀲𑀫𑀡𑀕𑀳𑀡𑁂𑀦 𑀕𑀳𑀺𑀢𑀸.

𑁧𑁦. 𑀢𑀺𑀭𑀘𑁆𑀙𑀸𑀦𑀓𑀣𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁮𑁦. 𑀤𑀲𑀫𑁂 𑀅𑀦𑁂𑀓𑀯𑀺𑀳𑀺𑀢𑀦𑁆𑀢𑀺 𑀅𑀦𑁂𑀓𑀯𑀺𑀥𑀁. 𑀢𑀺𑀭𑀘𑁆𑀙𑀸𑀦𑀓𑀣𑀦𑁆𑀢𑀺 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸 𑀲𑀕𑁆𑀕𑀫𑁄𑀓𑁆𑀔𑀫𑀕𑁆𑀕𑀸𑀦𑀁 𑀢𑀺𑀭𑀘𑁆𑀙𑀸𑀦𑀪𑀽𑀢𑀁 𑀓𑀣𑀁. 𑀭𑀸𑀚𑀓𑀣𑀦𑁆𑀢𑀺𑀆𑀤𑀻𑀲𑀼 𑀭𑀸𑀚𑀸𑀦𑀁 𑀆𑀭𑀩𑁆𑀪 ‘‘𑀫𑀳𑀸𑀲𑀫𑁆𑀫𑀢𑁄 𑀫𑀦𑁆𑀥𑀸𑀢𑀸 𑀥𑀫𑁆𑀫𑀸𑀲𑁄𑀓𑁄 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀯𑀢𑁆𑀢𑀓𑀣𑀸 𑀭𑀸𑀚𑀓𑀣𑀸. 𑀏𑀲 𑀦𑀬𑁄 𑀘𑁄𑀭𑀓𑀣𑀸𑀤𑀻𑀲𑀼. 𑀢𑁂𑀲𑀼 ‘‘𑀅𑀲𑀼𑀓𑁄 𑀭𑀸𑀚𑀸 𑀅𑀪𑀺𑀭𑀽𑀧𑁄 𑀤𑀲𑁆𑀲𑀦𑀻𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀕𑁂𑀳𑀲𑀺𑀢𑀓𑀣𑀸𑀯 𑀢𑀺𑀭𑀘𑁆𑀙𑀸𑀦𑀓𑀣𑀸 𑀳𑁄𑀢𑀺. ‘‘𑀲𑁄𑀧𑀺 𑀦𑀸𑀫 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄 𑀔𑀬𑀁 𑀕𑀢𑁄’’𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀧𑀦 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑁂 𑀢𑀺𑀝𑁆𑀞𑀢𑀺. 𑀘𑁄𑀭𑁂𑀲𑀼𑀧𑀺 ‘‘𑀫𑀽𑀮𑀤𑁂𑀯𑁄 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄 𑀫𑁂𑀖𑀫𑀸𑀮𑁄 𑀏𑀯𑀁 𑀫𑀳𑀸𑀦𑀼𑀪𑀸𑀯𑁄’’𑀢𑀺 𑀢𑁂𑀲𑀁 𑀓𑀫𑁆𑀫𑀁 𑀧𑀝𑀺𑀘𑁆𑀘 ‘‘𑀅𑀳𑁄 𑀲𑀽𑀭𑀸’’𑀢𑀺 𑀕𑁂𑀳𑀲𑀺𑀢𑀓𑀣𑀸𑀯 𑀢𑀺𑀭𑀘𑁆𑀙𑀸𑀦𑀓𑀣𑀸. 𑀬𑀼𑀤𑁆𑀥𑁂𑀧𑀺 𑀪𑀸𑀭𑀢𑀬𑀼𑀤𑁆𑀥𑀸𑀤𑀻𑀲𑀼 ‘‘𑀅𑀲𑀼𑀓𑁂𑀦 𑀅𑀲𑀼𑀓𑁄 𑀏𑀯𑀁 𑀫𑀸𑀭𑀺𑀢𑁄 𑀏𑀯𑀁 𑀯𑀺𑀤𑁆𑀥𑁄’’𑀢𑀺 𑀓𑀸𑀫𑀲𑁆𑀲𑀸𑀤𑀯𑀲𑁂𑀦𑁂𑀯 𑀓𑀣𑀸 𑀢𑀺𑀭𑀘𑁆𑀙𑀸𑀦𑀓𑀣𑀸, ‘‘𑀢𑁂𑀧𑀺 𑀦𑀸𑀫 𑀔𑀬𑀁 𑀕𑀢𑀸’’𑀢𑀺 𑀏𑀯𑀁 𑀧𑀯𑀢𑁆𑀢𑀸 𑀧𑀦 𑀲𑀩𑁆𑀩𑀢𑁆𑀣 𑀓𑀫𑁆𑀫𑀝𑁆𑀞𑀸𑀦𑀫𑁂𑀯 𑀳𑁄𑀢𑀺. 𑀅𑀧𑀺𑀘 𑀅𑀦𑁆𑀦𑀸𑀤𑀻𑀲𑀼 ‘‘𑀏𑀯𑀁 𑀯𑀡𑁆𑀡𑀯𑀦𑁆𑀢𑀁 𑀕𑀦𑁆𑀥𑀯𑀦𑁆𑀢𑀁 𑀭𑀲𑀯𑀦𑁆𑀢𑀁 𑀨𑀲𑁆𑀲𑀲𑀫𑁆𑀧𑀦𑁆𑀦𑀁 𑀔𑀸𑀤𑀺𑀫𑁆𑀳 𑀪𑀼𑀜𑁆𑀚𑀺𑀫𑁆𑀳 𑀧𑀺𑀯𑀺𑀫𑁆𑀳 𑀧𑀭𑀺𑀪𑀼𑀜𑁆𑀚𑀺𑀫𑁆𑀳𑀸’’𑀢𑀺 𑀓𑀸𑀫𑀲𑁆𑀲𑀸𑀤𑀯𑀲𑁂𑀦 𑀓𑀣𑁂𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀸𑀢𑁆𑀣𑀓𑀁 𑀧𑀦 𑀓𑀢𑁆𑀯𑀸 ‘‘𑀧𑀼𑀩𑁆𑀩𑁂 𑀏𑀯𑀁 𑀯𑀡𑁆𑀡𑀸𑀤𑀺𑀲𑀫𑁆𑀧𑀦𑁆𑀦𑀁 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀲𑀬𑀦𑀁 𑀫𑀸𑀮𑀁 𑀕𑀦𑁆𑀥𑀁 𑀯𑀺𑀮𑁂𑀧𑀦𑀁 𑀲𑀻𑀮𑀯𑀦𑁆𑀢𑀸𑀦𑀁 𑀅𑀤𑀫𑁆𑀳, 𑀘𑁂𑀢𑀺𑀬𑁂 𑀧𑀽𑀚𑀁 𑀅𑀓𑀭𑀺𑀫𑁆𑀳𑀸’’𑀢𑀺 𑀓𑀣𑁂𑀢𑀼𑀁 𑀯𑀝𑁆𑀝𑀢𑀺.

𑀜𑀸𑀢𑀺𑀓𑀣𑀸𑀤𑀻𑀲𑀼𑀧𑀺 ‘‘𑀅𑀫𑁆𑀳𑀸𑀓𑀁 𑀜𑀸𑀢𑀓𑀸 𑀲𑀽𑀭𑀸 𑀲𑀫𑀢𑁆𑀣𑀸’’𑀢𑀺 𑀯𑀸, ‘‘𑀧𑀼𑀩𑁆𑀩𑁂 𑀫𑀬𑀁 𑀏𑀯𑀁 𑀯𑀺𑀘𑀺𑀢𑁆𑀭𑁂𑀳𑀺 𑀬𑀸𑀦𑁂𑀳𑀺 𑀯𑀺𑀘𑀭𑀺𑀫𑁆𑀳𑀸’’𑀢𑀺 𑀯𑀸 𑀅𑀲𑁆𑀲𑀸𑀤𑀯𑀲𑁂𑀦 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺. 𑀲𑀸𑀢𑁆𑀣𑀓𑀁 𑀧𑀦 𑀓𑀢𑁆𑀯𑀸 ‘‘𑀢𑁂𑀧𑀺 𑀦𑁄 𑀜𑀸𑀢𑀓𑀸 𑀔𑀬𑀁 𑀕𑀢𑀸’’𑀢𑀺 𑀯𑀸, ‘‘𑀧𑀼𑀩𑁆𑀩𑁂 𑀫𑀬𑀁 𑀏𑀯𑀭𑀽𑀧𑀸 𑀉𑀧𑀸𑀳𑀦𑀸 𑀲𑀗𑁆𑀖𑀲𑁆𑀲 𑀅𑀤𑀫𑁆𑀳𑀸’’𑀢𑀺 𑀯𑀸 𑀓𑀣𑁂𑀢𑀩𑁆𑀩𑀸. 𑀕𑀸𑀫𑀓𑀣𑀸𑀤𑀻𑀲𑀼𑀧𑀺 𑀲𑀼𑀦𑀺𑀯𑀺𑀝𑁆𑀞𑀤𑀼𑀦𑁆𑀦𑀺𑀯𑀺𑀝𑁆𑀞𑀲𑀼𑀪𑀺𑀓𑁆𑀔𑀤𑀼𑀩𑁆𑀪𑀺𑀓𑁆𑀔𑀸𑀤𑀺𑀯𑀲𑁂𑀦 𑀯𑀸 ‘‘𑀅𑀲𑀼𑀓𑀕𑀸𑀫𑀯𑀸𑀲𑀺𑀦𑁄 𑀲𑀽𑀭𑀸 𑀲𑀫𑀢𑁆𑀣𑀸’’𑀢𑀺 𑀯𑀸 𑀏𑀯𑀁 𑀅𑀲𑁆𑀲𑀸𑀤𑀯𑀲𑁂𑀦 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺, 𑀲𑀸𑀢𑁆𑀣𑀓𑀁 𑀧𑀦 𑀓𑀢𑁆𑀯𑀸 ‘‘𑀲𑀤𑁆𑀥𑀸 𑀧𑀲𑀦𑁆𑀦𑀸’’𑀢𑀺 𑀯𑀸, ‘‘𑀔𑀬𑀁 𑀕𑀢𑀸’’𑀢𑀺 𑀯𑀸 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀦𑀺𑀕𑀫𑀦𑀕𑀭𑀚𑀦𑀧𑀤𑀓𑀣𑀸𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀇𑀢𑁆𑀣𑀺𑀓𑀣𑀸𑀧𑀺 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀻𑀦𑀺 𑀧𑀝𑀺𑀘𑁆𑀘 𑀅𑀲𑁆𑀲𑀸𑀤𑀯𑀲𑁂𑀦 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺, ‘‘𑀲𑀤𑁆𑀥𑀸 𑀧𑀲𑀦𑁆𑀦𑀸 𑀔𑀬𑀁 𑀕𑀢𑀸’’𑀢𑀺 𑀏𑀯𑀫𑁂𑀯 𑀯𑀝𑁆𑀝𑀢𑀺. 𑀲𑀽𑀭𑀓𑀣𑀸𑀧𑀺 ‘‘𑀦𑀦𑁆𑀤𑀺𑀫𑀺𑀢𑁆𑀢𑁄 𑀦𑀸𑀫 𑀬𑁄𑀥𑁄 𑀲𑀽𑀭𑁄 𑀅𑀳𑁄𑀲𑀻’’𑀢𑀺 𑀅𑀲𑁆𑀲𑀸𑀤𑀯𑀲𑁂𑀦 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺, ‘‘𑀲𑀤𑁆𑀥𑁄 𑀧𑀲𑀦𑁆𑀦𑁄 𑀅𑀳𑁄𑀲𑀺, 𑀔𑀬𑀁 𑀕𑀢𑁄’’𑀢𑀺 𑀏𑀯𑀫𑁂𑀯 𑀯𑀝𑁆𑀝𑀢𑀺. 𑀲𑀼𑀭𑀸𑀓𑀣𑀸𑀢𑀺𑀧𑀺 𑀧𑀸𑀞𑁄. 𑀲𑀸𑀧𑀺 𑀘𑁂𑀲𑀸 𑀲𑀼𑀭𑀸𑀓𑀣𑀸 ‘‘𑀏𑀯𑀭𑀽𑀧𑀸 𑀦𑀸𑀫 𑀲𑀼𑀭𑀸 𑀧𑀻𑀢𑀸 𑀭𑀢𑀺𑀚𑀦𑀦𑀻 𑀳𑁄𑀢𑀻’’𑀢𑀺 𑀅𑀲𑁆𑀲𑀸𑀤𑀯𑀲𑁂𑀦𑁂𑀯 𑀦 𑀯𑀝𑁆𑀝𑀢𑀺, 𑀆𑀤𑀻𑀦𑀯𑀯𑀲𑁂𑀦 𑀧𑀦 ‘‘𑀉𑀫𑁆𑀫𑀢𑁆𑀢𑀓𑀲𑀁𑀯𑀢𑁆𑀢𑀦𑀺𑀓𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀝𑁆𑀝𑀢𑀺. 𑀯𑀺𑀲𑀺𑀔𑀸𑀓𑀣𑀸𑀧𑀺 ‘‘𑀅𑀲𑀼𑀓𑀯𑀺𑀲𑀺𑀔𑀸 𑀲𑀼𑀦𑀺𑀯𑀺𑀝𑁆𑀞𑀸 𑀤𑀼𑀦𑁆𑀦𑀺𑀯𑀺𑀝𑁆𑀞𑀸’’𑀢𑀺 𑀯𑀸, ‘‘𑀅𑀲𑀼𑀓𑀯𑀺𑀲𑀺𑀔𑀸𑀬 𑀯𑀸𑀲𑀺𑀦𑁄 𑀲𑀽𑀭𑀸 𑀲𑀫𑀢𑁆𑀣𑀸’’𑀢𑀺 𑀯𑀸 𑀅𑀲𑁆𑀲𑀸𑀤𑀯𑀲𑁂𑀦𑁂𑀯 𑀯𑀢𑁆𑀢𑀼𑀁 𑀦 𑀯𑀝𑁆𑀝𑀢𑀺, ‘‘𑀲𑀤𑁆𑀥𑀸 𑀧𑀲𑀦𑁆𑀦𑀸 𑀔𑀬𑀁 𑀕𑀢𑀸’’𑀢𑀺 𑀏𑀘𑁆𑀘𑁂𑀯𑀁 𑀯𑀝𑁆𑀝𑀢𑀺. 𑀓𑀼𑀫𑁆𑀪𑀝𑁆𑀞𑀸𑀦𑀓𑀣𑀸𑀢𑀺 𑀉𑀤𑀓𑀢𑀺𑀢𑁆𑀣𑀓𑀣𑀸 𑀯𑀼𑀘𑁆𑀘𑀢𑀺, 𑀓𑀼𑀫𑁆𑀪𑀤𑀸𑀲𑀺𑀓𑀣𑀸 𑀯𑀸. 𑀲𑀸𑀧𑀺 ‘‘𑀧𑀸𑀲𑀸𑀤𑀺𑀓𑀸 𑀦𑀘𑁆𑀘𑀺𑀢𑀼𑀁 𑀕𑀸𑀬𑀺𑀢𑀼𑀁 𑀙𑁂𑀓𑀸’’𑀢𑀺 𑀅𑀲𑁆𑀲𑀸𑀤𑀯𑀲𑁂𑀦 𑀦 𑀯𑀝𑁆𑀝𑀢𑀺, ‘‘𑀲𑀤𑁆𑀥𑀸 𑀧𑀲𑀦𑁆𑀦𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦𑁂𑀯 𑀯𑀝𑁆𑀝𑀢𑀺.

𑀧𑀼𑀩𑁆𑀩𑀧𑁂𑀢𑀓𑀣𑀸𑀢𑀺 𑀅𑀢𑀻𑀢𑀜𑀸𑀢𑀺𑀓𑀣𑀸. 𑀢𑀢𑁆𑀣 𑀯𑀢𑁆𑀢𑀫𑀸𑀦𑀜𑀸𑀢𑀺𑀓𑀣𑀸𑀲𑀤𑀺𑀲𑁄𑀯 𑀯𑀺𑀦𑀺𑀘𑁆𑀙𑀬𑁄. 𑀦𑀸𑀦𑀢𑁆𑀢𑀓𑀣𑀸𑀢𑀺 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑀣𑀸𑀳𑀺 𑀯𑀺𑀫𑀼𑀢𑁆𑀢𑀸 𑀅𑀯𑀲𑁂𑀲𑀸 𑀦𑀸𑀦𑀸𑀲𑀪𑀸𑀯𑀸 𑀦𑀺𑀭𑀢𑁆𑀣𑀓𑀓𑀣𑀸. 𑀮𑁄𑀓𑀓𑁆𑀔𑀸𑀬𑀺𑀓𑀸𑀢𑀺 ‘‘𑀅𑀬𑀁 𑀮𑁄𑀓𑁄 𑀓𑁂𑀦 𑀦𑀺𑀫𑁆𑀫𑀺𑀢𑁄, 𑀅𑀲𑀼𑀓𑁂𑀦 𑀦𑀸𑀫 𑀦𑀺𑀫𑁆𑀫𑀺𑀢𑁄, 𑀓𑀸𑀓𑁄 𑀲𑁂𑀢𑁄 𑀅𑀝𑁆𑀞𑀻𑀦𑀁 𑀲𑁂𑀢𑀢𑁆𑀢𑀸, 𑀩𑀮𑀸𑀓𑀸 𑀭𑀢𑁆𑀢𑀸 𑀮𑁄𑀳𑀺𑀢𑀲𑁆𑀲 𑀭𑀢𑁆𑀢𑀢𑁆𑀢𑀸’’𑀢𑀺 𑀏𑀯𑀫𑀸𑀤𑀺𑀓𑀸 𑀮𑁄𑀓𑀸𑀬𑀢𑀯𑀺𑀢𑀡𑁆𑀟𑀲𑀮𑁆𑀮𑀸𑀧𑀓𑀣𑀸. 𑀲𑀫𑀼𑀤𑁆𑀤𑀓𑁆𑀔𑀸𑀬𑀺𑀓𑀸 𑀦𑀸𑀫 ‘‘𑀓𑀲𑁆𑀫𑀸 𑀲𑀫𑀼𑀤𑁆𑀤𑁄 𑀲𑀸𑀕𑀭𑁄, 𑀲𑀸𑀕𑀭𑀤𑁂𑀯𑁂𑀦 𑀔𑀦𑀺𑀢𑀢𑁆𑀢𑀸 𑀲𑀸𑀕𑀭𑁄, 𑀔𑀢𑁄 𑀫𑁂𑀢𑀺 𑀳𑀢𑁆𑀣𑀫𑀼𑀤𑁆𑀤𑀸𑀬 𑀦𑀺𑀯𑁂𑀤𑀺𑀢𑀢𑁆𑀢𑀸 𑀲𑀫𑀼𑀤𑁆𑀤𑁄’’𑀢𑀺 𑀏𑀯𑀫𑀸𑀤𑀺𑀓𑀸 𑀦𑀺𑀭𑀢𑁆𑀣𑀓𑀲𑀫𑀼𑀤𑁆𑀤𑀓𑁆𑀔𑀸𑀬𑀺𑀓𑀓𑀣𑀸. 𑀇𑀢𑀺 𑀪𑀯𑁄 𑀇𑀢𑀺 𑀅𑀪𑀯𑁄𑀢𑀺 𑀬𑀁 𑀯𑀸 𑀢𑀁 𑀯𑀸 𑀦𑀺𑀭𑀢𑁆𑀣𑀓𑀓𑀸𑀭𑀡𑀁 𑀯𑀢𑁆𑀯𑀸 𑀧𑀯𑀢𑁆𑀢𑀺𑀢𑀓𑀣𑀸 𑀇𑀢𑀺𑀪𑀯𑀸𑀪𑀯𑀓𑀣𑀸. 𑀏𑀢𑁆𑀣 𑀘 𑀪𑀯𑁄𑀢𑀺 𑀲𑀲𑁆𑀲𑀢𑀁, 𑀅𑀪𑀯𑁄𑀢𑀺 𑀉𑀘𑁆𑀙𑁂𑀤𑀁. 𑀪𑀯𑁄𑀢𑀺 𑀯𑀼𑀤𑁆𑀥𑀺, 𑀅𑀪𑀯𑁄𑀢𑀺 𑀳𑀸𑀦𑀺. 𑀪𑀯𑁄𑀢𑀺 𑀓𑀸𑀫𑀲𑀼𑀔𑀁, 𑀅𑀪𑀯𑁄𑀢𑀺 𑀅𑀢𑁆𑀢𑀓𑀺𑀮𑀫𑀣𑁄. 𑀇𑀢𑀺 𑀇𑀫𑀸𑀬 𑀙𑀩𑁆𑀩𑀺𑀥𑀸𑀬 𑀇𑀢𑀺𑀪𑀯𑀸𑀪𑀯𑀓𑀣𑀸𑀬 𑀲𑀤𑁆𑀥𑀺𑀁 𑀩𑀸𑀢𑁆𑀢𑀺𑀁𑀲 𑀢𑀺𑀭𑀘𑁆𑀙𑀸𑀦𑀓𑀣𑀸 𑀦𑀸𑀫 𑀳𑁄𑀦𑁆𑀢𑀺. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀧𑀞𑀫𑁄 𑀯𑀕𑁆𑀕𑁄.

𑁨. 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀯𑀕𑁆𑀕𑁄

𑁧. 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁮𑁧. 𑀤𑀼𑀢𑀺𑀬𑀲𑁆𑀲 𑀧𑀞𑀫𑁂 𑀩𑀸𑀭𑀸𑀡𑀲𑀺𑀬𑀦𑁆𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀇𑀲𑀺𑀧𑀢𑀦𑁂 𑀫𑀺𑀕𑀤𑀸𑀬𑁂𑀢𑀺 𑀇𑀲𑀻𑀦𑀁 𑀧𑀢𑀦𑀼𑀧𑁆𑀧𑀢𑀦𑀯𑀲𑁂𑀦 𑀏𑀯𑀁𑀮𑀤𑁆𑀥𑀦𑀸𑀫𑁂 𑀫𑀺𑀕𑀸𑀦𑀁 𑀅𑀪𑀬𑀤𑀸𑀦𑀯𑀲𑁂𑀦 𑀤𑀺𑀦𑁆𑀦𑀢𑁆𑀢𑀸 𑀫𑀺𑀕𑀤𑀸𑀬𑀲𑀗𑁆𑀔𑀸𑀢𑁂 𑀆𑀭𑀸𑀫𑁂. 𑀏𑀢𑁆𑀣 𑀳𑀺 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀸 𑀲𑀩𑁆𑀩𑀜𑁆𑀜𑀼𑀇𑀲𑀬𑁄 𑀧𑀢𑀦𑁆𑀢𑀺, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀢𑁆𑀣𑀁 𑀦𑀺𑀲𑀻𑀤𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀦𑀦𑁆𑀤𑀫𑀽𑀮𑀓𑀧𑀩𑁆𑀪𑀸𑀭𑀢𑁄 𑀲𑀢𑁆𑀢𑀸𑀳𑀘𑁆𑀘𑀬𑁂𑀦 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀸 𑀅𑀦𑁄𑀢𑀢𑁆𑀢𑀤𑀳𑁂 𑀓𑀢𑀫𑀼𑀔𑀥𑁄𑀯𑀦𑀸𑀤𑀺𑀓𑀺𑀘𑁆𑀘𑀸 𑀆𑀓𑀸𑀲𑁂𑀦 𑀆𑀕𑀦𑁆𑀢𑁆𑀯𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀇𑀲𑀬𑁄𑀧𑁂𑀢𑁆𑀣 𑀑𑀢𑀭𑀡𑀯𑀲𑁂𑀦 𑀧𑀢𑀦𑁆𑀢𑀺, 𑀉𑀧𑁄𑀲𑀣𑀢𑁆𑀣𑀜𑁆𑀘 𑀅𑀦𑀼𑀧𑁄𑀲𑀣𑀢𑁆𑀣𑀜𑁆𑀘 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀕𑀦𑁆𑀥𑀫𑀸𑀤𑀦𑀁 𑀧𑀝𑀺𑀕𑀘𑁆𑀙𑀦𑁆𑀢𑀸𑀧𑀺 𑀢𑀢𑁄𑀯 𑀉𑀧𑁆𑀧𑀢𑀦𑁆𑀢𑀻𑀢𑀺 𑀇𑀫𑀺𑀦𑀸 𑀇𑀲𑀻𑀦𑀁 𑀧𑀢𑀦𑀼𑀧𑁆𑀧𑀢𑀦𑀯𑀲𑁂𑀦 𑀢𑀁 ‘‘𑀇𑀲𑀺𑀧𑀢𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀆𑀫𑀦𑁆𑀢𑁂𑀲𑀻𑀢𑀺 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀓𑀢𑀸𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀧𑀘𑁆𑀙𑀺𑀫𑀪𑀯𑁂 𑀓𑀢𑀸𑀪𑀺𑀦𑀺𑀓𑁆𑀔𑀫𑀦𑁄 𑀅𑀦𑀼𑀧𑀼𑀩𑁆𑀩𑁂𑀦 𑀩𑁄𑀥𑀺𑀫𑀡𑁆𑀟𑀁 𑀧𑀢𑁆𑀯𑀸 𑀢𑀢𑁆𑀣 𑀅𑀧𑀭𑀸𑀚𑀺𑀢𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑁄 𑀫𑀸𑀭𑀩𑀮𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀞𑀫𑀬𑀸𑀫𑁂 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀤𑀺𑀩𑁆𑀩𑀘𑀓𑁆𑀔𑀼𑀁 𑀯𑀺𑀲𑁄𑀥𑁂𑀢𑁆𑀯𑀸 𑀧𑀘𑁆𑀙𑀺𑀫𑀬𑀸𑀫𑀸𑀯𑀲𑀸𑀦𑁂 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀉𑀦𑁆𑀦𑀸𑀤𑁂𑀦𑁆𑀢𑁄 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀯𑀸 𑀲𑀢𑁆𑀢 𑀲𑀢𑁆𑀢𑀸𑀳𑀸𑀦𑀺 𑀩𑁄𑀥𑀺𑀫𑀡𑁆𑀟𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀫𑀳𑀸𑀩𑁆𑀭𑀳𑁆𑀫𑀼𑀦𑀸 𑀆𑀬𑀸𑀘𑀺𑀢𑀥𑀫𑁆𑀫𑀤𑁂𑀲𑀦𑁄 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀢𑁆𑀯𑀸 𑀮𑁄𑀓𑀸𑀦𑀼𑀕𑁆𑀕𑀳𑁂𑀦 𑀩𑀸𑀭𑀸𑀡𑀲𑀺𑀁 𑀕𑀦𑁆𑀢𑁆𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑁂 𑀲𑀜𑁆𑀜𑀸𑀧𑁂𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑁂𑀢𑀼𑀓𑀸𑀫𑁄 𑀆𑀫𑀦𑁆𑀢𑁂𑀲𑀺.

𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀸𑀢𑀺 𑀤𑁆𑀯𑁂 𑀇𑀫𑁂, 𑀪𑀺𑀓𑁆𑀔𑀯𑁂, 𑀓𑁄𑀝𑁆𑀞𑀸𑀲𑀸. 𑀇𑀫𑀲𑁆𑀲 𑀧𑀦 𑀧𑀤𑀲𑁆𑀲 𑀲𑀳 𑀲𑀫𑀼𑀤𑀸𑀳𑀸𑀭𑁂𑀦 𑀲𑀫𑀼𑀤𑀸𑀳𑀸𑀭𑀦𑀺𑀕𑁆𑀖𑁄𑀲𑁄 𑀳𑁂𑀝𑁆𑀞𑀸 𑀅𑀯𑀻𑀘𑀺𑀁 𑀉𑀧𑀭𑀺 𑀪𑀯𑀕𑁆𑀕𑀁 𑀧𑀢𑁆𑀯𑀸 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀧𑀢𑁆𑀣𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺. 𑀢𑀲𑁆𑀫𑀺𑀁𑀬𑁂𑀯 𑀲𑀫𑀬𑁂 𑀅𑀝𑁆𑀞𑀸𑀭𑀲𑀓𑁄𑀝𑀺𑀲𑀗𑁆𑀔𑀸 𑀩𑁆𑀭𑀳𑁆𑀫𑀸𑀦𑁄 𑀲𑀫𑀸𑀕𑀘𑁆𑀙𑀺𑀁𑀲𑀼, 𑀧𑀘𑁆𑀙𑀺𑀫𑀤𑀺𑀲𑀸𑀬 𑀲𑀽𑀭𑀺𑀬𑁄 𑀅𑀢𑁆𑀣𑀫𑁂𑀢𑀺, 𑀧𑀸𑀘𑀻𑀦𑀤𑀺𑀲𑀸𑀬 𑀆𑀲𑀸𑀴𑁆𑀳𑀦𑀓𑁆𑀔𑀢𑁆𑀢𑁂𑀦 𑀬𑀼𑀢𑁆𑀢𑁄 𑀧𑀼𑀡𑁆𑀡𑀘𑀦𑁆𑀤𑁄 𑀉𑀕𑁆𑀕𑀘𑁆𑀙𑀢𑀺. 𑀢𑀲𑁆𑀫𑀺𑀁 𑀲𑀫𑀬𑁂 𑀪𑀕𑀯𑀸 𑀇𑀫𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀁 𑀆𑀭𑀪𑀦𑁆𑀢𑁄 ‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑁆𑀢𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀧𑀩𑁆𑀩𑀚𑀺𑀢𑁂𑀦𑀸𑀢𑀺 𑀕𑀺𑀳𑀺𑀲𑀁𑀬𑁄𑀚𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀧𑀩𑁆𑀩𑀚𑁆𑀚𑀼𑀧𑀕𑀢𑁂𑀦. 𑀦 𑀲𑁂𑀯𑀺𑀢𑀩𑁆𑀩𑀸𑀢𑀺 𑀦 𑀯𑀴𑀜𑁆𑀚𑁂𑀢𑀩𑁆𑀩𑀸. 𑀬𑁄 𑀘𑀸𑀬𑀁 𑀓𑀸𑀫𑁂𑀲𑀼 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑁄𑀢𑀺 𑀬𑁄 𑀘 𑀅𑀬𑀁 𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀺𑀮𑁂𑀲𑀓𑀸𑀫𑀲𑀼𑀔𑀲𑁆𑀲 𑀅𑀦𑀼𑀬𑁄𑀕𑁄. 𑀳𑀻𑀦𑁄𑀢𑀺 𑀮𑀸𑀫𑀓𑁄. 𑀕𑀫𑁆𑀫𑁄𑀢𑀺 𑀕𑀸𑀫𑀯𑀸𑀲𑀻𑀦𑀁 𑀲𑀦𑁆𑀢𑀓𑁄. 𑀧𑁄𑀣𑀼𑀚𑁆𑀚𑀦𑀺𑀓𑁄𑀢𑀺 𑀅𑀦𑁆𑀥𑀩𑀸𑀮𑀚𑀦𑁂𑀦 𑀆𑀘𑀺𑀡𑁆𑀡𑁄. 𑀅𑀦𑀭𑀺𑀬𑁄𑀢𑀺 𑀦 𑀅𑀭𑀺𑀬𑁄 𑀦 𑀯𑀺𑀲𑀼𑀤𑁆𑀥𑁄 𑀦 𑀉𑀢𑁆𑀢𑀫𑁄 𑀦 𑀯𑀸 𑀅𑀭𑀺𑀬𑀸𑀦𑀁 𑀲𑀦𑁆𑀢𑀓𑁄. 𑀅𑀦𑀢𑁆𑀣𑀲𑀁𑀳𑀺𑀢𑁄𑀢𑀺 𑀦 𑀅𑀢𑁆𑀣𑀲𑀁𑀳𑀺𑀢𑁄, 𑀳𑀺𑀢𑀲𑀼𑀔𑀸𑀯𑀳𑀓𑀸𑀭𑀡𑀁 𑀅𑀦𑀺𑀲𑁆𑀲𑀺𑀢𑁄𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑁄𑀢𑀺 𑀅𑀢𑁆𑀢𑀦𑁄 𑀓𑀺𑀮𑀫𑀣𑀲𑁆𑀲 𑀅𑀦𑀼𑀬𑁄𑀕𑁄, 𑀅𑀢𑁆𑀢𑀦𑁄 𑀤𑀼𑀓𑁆𑀔𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑁄𑀢𑀺 𑀓𑀡𑁆𑀝𑀓𑀸𑀧𑀲𑁆𑀲𑀬𑀲𑁂𑀬𑁆𑀬𑀸𑀤𑀻𑀳𑀺 𑀅𑀢𑁆𑀢𑀫𑀸𑀭𑀡𑁂𑀳𑀺 𑀤𑀼𑀓𑁆𑀔𑀸𑀯𑀳𑁄.

𑀧𑀜𑁆𑀜𑀸𑀘𑀓𑁆𑀔𑀼𑀁 𑀓𑀭𑁄𑀢𑀻𑀢𑀺 𑀘𑀓𑁆𑀔𑀼𑀓𑀭𑀡𑀻. 𑀤𑀼𑀢𑀺𑀬𑀧𑀤𑀁 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀉𑀧𑀲𑀫𑀸𑀬𑀸𑀢𑀺 𑀓𑀺𑀮𑁂𑀲𑀽𑀧𑀲𑀫𑀢𑁆𑀣𑀸𑀬. 𑀅𑀪𑀺𑀜𑁆𑀜𑀸𑀬𑀸𑀢𑀺 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀅𑀪𑀺𑀚𑀸𑀦𑀦𑀢𑁆𑀣𑀸𑀬. 𑀲𑀫𑁆𑀩𑁄𑀥𑀸𑀬𑀸𑀢𑀺 𑀢𑁂𑀲𑀁𑀬𑁂𑀯 𑀲𑀫𑁆𑀩𑀼𑀚𑁆𑀛𑀦𑀢𑁆𑀣𑀸𑀬. 𑀦𑀺𑀩𑁆𑀩𑀸𑀦𑀸𑀬𑀸𑀢𑀺 𑀦𑀺𑀩𑁆𑀩𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀲𑁂𑀲𑀫𑁂𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀁 𑀳𑁂𑀝𑁆𑀞𑀸 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀫𑁂𑀯. 𑀲𑀘𑁆𑀘𑀓𑀣𑀸𑀧𑀺 𑀲𑀩𑁆𑀩𑀸𑀓𑀸𑀭𑁂𑀦𑁂𑀯 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁨.𑁫𑁨𑁯) 𑀯𑀺𑀢𑁆𑀣𑀸𑀭𑀺𑀢𑀸.

𑀢𑀺𑀧𑀭𑀺𑀯𑀝𑁆𑀝𑀦𑁆𑀢𑀺 𑀲𑀘𑁆𑀘𑀜𑀸𑀡𑀓𑀺𑀘𑁆𑀘𑀜𑀸𑀡𑀓𑀢𑀜𑀸𑀡𑀲𑀗𑁆𑀔𑀸𑀢𑀸𑀦𑀁 𑀢𑀺𑀡𑁆𑀡𑀁 𑀧𑀭𑀺𑀯𑀝𑁆𑀝𑀸𑀦𑀁 𑀯𑀲𑁂𑀦 𑀢𑀺𑀧𑀭𑀺𑀯𑀝𑁆𑀝𑀁. 𑀏𑀢𑁆𑀣 𑀳𑀺 ‘‘𑀇𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁, 𑀇𑀤𑀁 𑀤𑀼𑀓𑁆𑀔𑀲𑀫𑀼𑀤𑀬’’𑀦𑁆𑀢𑀺 𑀏𑀯𑀁 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀬𑀣𑀸𑀪𑀽𑀢𑀁 𑀜𑀸𑀡𑀁 𑀲𑀘𑁆𑀘𑀜𑀸𑀡𑀁 𑀦𑀸𑀫. 𑀢𑁂𑀲𑀼𑀬𑁂𑀯 ‘‘𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀳𑀸𑀢𑀩𑁆𑀩’’𑀦𑁆𑀢𑀺 𑀏𑀯𑀁 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀚𑀸𑀦𑀦𑀜𑀸𑀡𑀁 𑀓𑀺𑀘𑁆𑀘𑀜𑀸𑀡𑀁 𑀦𑀸𑀫. ‘‘𑀧𑀭𑀺𑀜𑁆𑀜𑀸𑀢𑀁 𑀧𑀳𑀻𑀦’’𑀦𑁆𑀢𑀺 𑀏𑀯𑀁 𑀢𑀲𑁆𑀲 𑀢𑀲𑁆𑀲 𑀓𑀺𑀘𑁆𑀘𑀲𑁆𑀲 𑀓𑀢𑀪𑀸𑀯𑀚𑀸𑀦𑀦𑀜𑀸𑀡𑀁 𑀓𑀢𑀜𑀸𑀡𑀁 𑀦𑀸𑀫. 𑀤𑁆𑀯𑀸𑀤𑀲𑀸𑀓𑀸𑀭𑀦𑁆𑀢𑀺 𑀢𑁂𑀲𑀁𑀬𑁂𑀯 𑀏𑀓𑁂𑀓𑀲𑁆𑀫𑀺𑀁 𑀲𑀘𑁆𑀘𑁂 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀆𑀓𑀸𑀭𑀸𑀦𑀁 𑀯𑀲𑁂𑀦 𑀤𑁆𑀯𑀸𑀤𑀲𑀸𑀓𑀸𑀭𑀁. 𑀜𑀸𑀡𑀤𑀲𑁆𑀲𑀦𑀦𑁆𑀢𑀺 𑀏𑀢𑁂𑀲𑀁 𑀢𑀺𑀧𑀭𑀺𑀯𑀝𑁆𑀝𑀸𑀦𑀁 𑀤𑁆𑀯𑀸𑀤𑀲𑀦𑁆𑀦𑀁 𑀆𑀓𑀸𑀭𑀸𑀦𑀁 𑀯𑀲𑁂𑀦 𑀉𑀧𑁆𑀧𑀦𑁆𑀦𑀜𑀸𑀡𑀲𑀗𑁆𑀔𑀸𑀢𑀁 𑀤𑀲𑁆𑀲𑀦𑀁. 𑀥𑀫𑁆𑀫𑀘𑀓𑁆𑀔𑀼𑀦𑁆𑀢𑀺 𑀅𑀜𑁆𑀜𑀢𑁆𑀣 𑀢𑀬𑁄 𑀫𑀕𑁆𑀕𑀸 𑀢𑀻𑀡𑀺 𑀘 𑀨𑀮𑀸𑀦𑀺 𑀥𑀫𑁆𑀫𑀘𑀓𑁆𑀔𑀼 𑀦𑀸𑀫 𑀳𑁄𑀦𑁆𑀢𑀺, 𑀇𑀥 𑀧𑀞𑀫𑀫𑀕𑁆𑀕𑁄𑀯.

𑀥𑀫𑁆𑀫𑀘𑀓𑁆𑀓𑁂𑀢𑀺 𑀧𑀝𑀺𑀯𑁂𑀥𑀜𑀸𑀡𑁂 𑀘𑁂𑀯 𑀤𑁂𑀲𑀦𑀸𑀜𑀸𑀡𑁂 𑀘. 𑀩𑁄𑀥𑀺𑀧𑀮𑁆𑀮𑀗𑁆𑀓𑁂 𑀦𑀺𑀲𑀺𑀦𑁆𑀦𑀲𑁆𑀲 𑀳𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀉𑀧𑁆𑀧𑀦𑁆𑀦𑀁 𑀤𑁆𑀯𑀸𑀤𑀲𑀸𑀓𑀸𑀭𑀁 𑀧𑀝𑀺𑀯𑁂𑀥𑀜𑀸𑀡𑀫𑁆𑀧𑀺, 𑀇𑀲𑀺𑀧𑀢𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀤𑁆𑀯𑀸𑀤𑀲𑀸𑀓𑀸𑀭𑀸𑀬 𑀲𑀘𑁆𑀘𑀤𑁂𑀲𑀦𑀸𑀬 𑀧𑀯𑀢𑁆𑀢𑀺𑀢𑀁 𑀤𑁂𑀲𑀦𑀸𑀜𑀸𑀡𑀫𑁆𑀧𑀺 𑀥𑀫𑁆𑀫𑀘𑀓𑁆𑀓𑀁 𑀦𑀸𑀫. 𑀉𑀪𑀬𑀫𑁆𑀧𑀺 𑀳𑁂𑀢𑀁 𑀤𑀲𑀩𑀮𑀲𑁆𑀲 𑀉𑀭𑁂 𑀧𑀯𑀢𑁆𑀢𑀜𑀸𑀡𑀫𑁂𑀯. 𑀇𑀫𑀸𑀬 𑀤𑁂𑀲𑀦𑀸𑀬 𑀧𑀓𑀸𑀲𑁂𑀦𑁆𑀢𑁂𑀦 𑀪𑀕𑀯𑀢𑀸 𑀥𑀫𑁆𑀫𑀘𑀓𑁆𑀓𑀁 𑀧𑀯𑀢𑁆𑀢𑀺𑀢𑀁 𑀦𑀸𑀫. 𑀢𑀁 𑀧𑀦𑁂𑀢𑀁 𑀥𑀫𑁆𑀫𑀘𑀓𑁆𑀓𑀁 𑀬𑀸𑀯 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑁄 𑀅𑀝𑁆𑀞𑀸𑀭𑀲𑀳𑀺 𑀩𑁆𑀭𑀳𑁆𑀫𑀓𑁄𑀝𑀻𑀳𑀺 𑀲𑀤𑁆𑀥𑀺𑀁 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀢𑀺, 𑀢𑀸𑀯 𑀦𑀁 𑀪𑀕𑀯𑀸 𑀧𑀯𑀢𑁆𑀢𑁂𑀢𑀺 𑀦𑀸𑀫, 𑀧𑀢𑀺𑀝𑁆𑀞𑀺𑀢𑁂 𑀘 𑀧𑀯𑀢𑁆𑀢𑀺𑀢𑀁 𑀦𑀸𑀫. 𑀢𑀁 𑀲𑀦𑁆𑀥𑀸𑀬 𑀧𑀯𑀢𑁆𑀢𑀺𑀢𑁂 𑀘 𑀧𑀦 𑀪𑀕𑀯𑀢𑀸 𑀥𑀫𑁆𑀫𑀘𑀓𑁆𑀓𑁂 𑀪𑀼𑀫𑁆𑀫𑀸 𑀤𑁂𑀯𑀸 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀼𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀪𑀼𑀫𑁆𑀫𑀸𑀢𑀺 𑀪𑀽𑀫𑀝𑁆𑀞𑀓𑀤𑁂𑀯𑀢𑀸. 𑀲𑀤𑁆𑀤𑀫𑀦𑀼𑀲𑁆𑀲𑀸𑀯𑁂𑀲𑀼𑀦𑁆𑀢𑀺 𑀏𑀓𑀧𑁆𑀧𑀳𑀸𑀭𑁂𑀦𑁂𑀯 𑀲𑀸𑀥𑀼𑀓𑀸𑀭𑀁 𑀤𑀢𑁆𑀯𑀸 𑁋 ‘‘𑀏𑀢𑀁 𑀪𑀕𑀯𑀢𑀸’’𑀢𑀺𑀆𑀤𑀻𑀦𑀺 𑀯𑀤𑀦𑁆𑀢𑀸 𑀅𑀦𑀼𑀲𑀸𑀯𑀬𑀺𑀁𑀲𑀼. 𑀑𑀪𑀸𑀲𑁄𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁄𑀪𑀸𑀲𑁄. 𑀲𑁄 𑀳𑀺 𑀢𑀤𑀸 𑀤𑁂𑀯𑀸𑀦𑀁 𑀤𑁂𑀯𑀸𑀦𑀼𑀪𑀸𑀯𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀺𑀭𑁄𑀘𑀺𑀢𑁆𑀣. 𑀅𑀜𑁆𑀜𑀸𑀲𑀺 𑀯𑀢, 𑀪𑁄, 𑀓𑁄𑀡𑁆𑀟𑀜𑁆𑀜𑁄𑀢𑀺 𑀇𑀫𑀲𑁆𑀲𑀧𑀺 𑀉𑀤𑀸𑀦𑀲𑁆𑀲 𑀉𑀤𑀸𑀳𑀸𑀭𑀦𑀺𑀕𑁆𑀖𑁄𑀲𑁄 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀁 𑀨𑀭𑀺𑀢𑁆𑀯𑀸 𑀅𑀝𑁆𑀞𑀸𑀲𑀺.

𑁯. 𑀲𑀗𑁆𑀓𑀸𑀲𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁮𑁯. 𑀦𑀯𑀫𑁂 𑀅𑀧𑀭𑀺𑀫𑀸𑀡𑀸 𑀯𑀡𑁆𑀡𑀸𑀢𑀺 𑀅𑀧𑁆𑀧𑀫𑀸𑀡𑀸𑀦𑀺 𑀅𑀓𑁆𑀔𑀭𑀸𑀦𑀺. 𑀩𑁆𑀬𑀜𑁆𑀚𑀦𑀸𑀢𑀺 𑀢𑁂𑀲𑀁𑀬𑁂𑀯 𑀯𑁂𑀯𑀘𑀦𑀁, 𑀯𑀡𑁆𑀡𑀸𑀦𑀁 𑀯𑀸 𑀏𑀓𑀤𑁂𑀲𑀸 𑀬𑀤𑀺𑀤𑀁 𑀩𑁆𑀬𑀜𑁆𑀚𑀦𑀸 𑀦𑀸𑀫. 𑀲𑀗𑁆𑀓𑀸𑀲𑀦𑀸𑀢𑀺 𑀯𑀺𑀪𑀢𑁆𑀢𑀺𑀬𑁄. 𑀏𑀓𑀫𑁂𑀓𑀲𑁆𑀫𑀺𑀜𑁆𑀳𑀺 𑀲𑀘𑁆𑀘𑁂 𑀲𑀩𑁆𑀩𑀸𑀓𑀸𑀭𑁂𑀦 𑀯𑀺𑀢𑁆𑀣𑀸𑀭𑀺𑀬𑀫𑀸𑀦𑁂 𑀯𑀡𑁆𑀡𑀸𑀤𑀻𑀦𑀁 𑀅𑀦𑁆𑀢𑁄 𑀦𑀸𑀫 𑀦𑀢𑁆𑀣𑀺. 𑀢𑀲𑁆𑀫𑀸 𑀏𑀯𑀫𑀸𑀳.

𑁧𑁦. 𑀢𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁯𑁦. 𑀤𑀲𑀫𑁂 𑀲𑀪𑀸𑀯𑀸𑀯𑀺𑀚𑀳𑀦𑀝𑁆𑀞𑁂𑀦 𑀢𑀣𑀁. 𑀤𑀼𑀓𑁆𑀔𑀜𑁆𑀳𑀺 𑀤𑀼𑀓𑁆𑀔𑀫𑁂𑀯 𑀯𑀼𑀢𑁆𑀢𑀁. 𑀲𑀪𑀸𑀯𑀲𑁆𑀲 𑀅𑀫𑁄𑀖𑀢𑀸𑀬 𑀅𑀯𑀺𑀢𑀣𑀁. 𑀦 𑀳𑀺 𑀤𑀼𑀓𑁆𑀔𑀁 𑀅𑀤𑀼𑀓𑁆𑀔𑀁 𑀦𑀸𑀫 𑀳𑁄𑀢𑀺. 𑀅𑀜𑁆𑀜𑀪𑀸𑀯𑀸𑀦𑀼𑀧𑀕𑀫𑁂𑀦 𑀅𑀦𑀜𑁆𑀜𑀣𑀁. 𑀦 𑀳𑀺 𑀤𑀼𑀓𑁆𑀔𑀁 𑀲𑀫𑀼𑀤𑀬𑀸𑀤𑀺𑀪𑀸𑀯𑀁 𑀉𑀧𑀕𑀘𑁆𑀙𑀢𑀺. 𑀲𑀫𑀼𑀤𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺.

𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀓𑁄𑀝𑀺𑀕𑀸𑀫𑀯𑀕𑁆𑀕𑁄

𑁧. 𑀓𑁄𑀝𑀺𑀕𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁯𑁧. 𑀢𑀢𑀺𑀬𑀲𑁆𑀲 𑀧𑀞𑀫𑁂 𑀅𑀦𑀦𑀼𑀩𑁄𑀥𑀸𑀢𑀺 𑀅𑀦𑀦𑀼𑀩𑀼𑀚𑁆𑀛𑀦𑁂𑀦. 𑀅𑀧𑁆𑀧𑀝𑀺𑀯𑁂𑀥𑀸𑀢𑀺 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑁂𑀦.

𑁨. 𑀤𑀼𑀢𑀺𑀬𑀓𑁄𑀝𑀺𑀕𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁯𑁨. 𑀤𑀼𑀢𑀺𑀬𑁂 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀻𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀨𑀮𑀧𑀜𑁆𑀜𑀸𑀦𑀁 𑀦𑀸𑀫𑀁.

𑁭. 𑀢𑀣𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁯𑁭. 𑀲𑀢𑁆𑀢𑀫𑁂 𑀢𑀲𑁆𑀫𑀸 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀬𑀲𑁆𑀫𑀸 𑀢𑀣𑀸𑀦𑀺 𑀅𑀯𑀺𑀢𑀣𑀸𑀦𑀺 𑀅𑀦𑀜𑁆𑀜𑀣𑀸𑀦𑀺, 𑀢𑀲𑁆𑀫𑀸 𑀅𑀭𑀺𑀬𑀸𑀦𑀁 𑀲𑀘𑁆𑀘𑀸𑀦𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀦 𑀳𑀺 𑀯𑀺𑀢𑀣𑀸𑀦𑀺 𑀅𑀭𑀺𑀬𑀸 𑀅𑀭𑀺𑀬𑀲𑀘𑁆𑀘𑀢𑁄 𑀧𑀝𑀺𑀯𑀺𑀚𑁆𑀛𑀦𑁆𑀢𑀺.

𑁮. 𑀮𑁄𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁦𑁯𑁮. 𑀅𑀝𑁆𑀞𑀫𑁂 𑀢𑀣𑀸𑀕𑀢𑁄 𑀅𑀭𑀺𑀬𑁄, 𑀢𑀲𑁆𑀫𑀸 ‘‘𑀅𑀭𑀺𑀬𑀲𑀘𑁆𑀘𑀸𑀦𑀻’’𑀢𑀺 𑀬𑀲𑁆𑀫𑀸 𑀅𑀭𑀺𑀬𑁂𑀦 𑀢𑀣𑀸𑀕𑀢𑁂𑀦 𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀤𑁂𑀲𑀺𑀢𑀢𑁆𑀢𑀸 𑀘 𑀢𑀸𑀦𑀺 𑀅𑀭𑀺𑀬𑀲𑀦𑁆𑀢𑀓𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀅𑀭𑀺𑀬𑀲𑁆𑀲 𑀲𑀘𑁆𑀘𑀢𑁆𑀢𑀸 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀅𑀢𑁆𑀣𑁄.

𑁧𑁦. 𑀕𑀯𑀫𑁆𑀧𑀢𑀺𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁦𑁦. 𑀤𑀲𑀫𑁂 𑀲𑀳𑀜𑁆𑀘𑀦𑀺𑀓𑁂𑀢𑀺 𑀲𑀳𑀜𑁆𑀘𑀦𑀺𑀬𑀦𑀕𑀭𑁂. 𑀬𑁄, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀲𑀫𑀼𑀤𑀬𑀫𑁆𑀧𑀺 𑀲𑁄 𑀧𑀲𑁆𑀲𑀢𑀻𑀢𑀺𑀆𑀤𑀺 𑀏𑀓𑀧𑀝𑀺𑀯𑁂𑀥𑀯𑀲𑁂𑀦 𑀯𑀼𑀢𑁆𑀢𑀁, 𑀇𑀫𑀲𑁆𑀫𑀺𑀜𑁆𑀳𑀺 𑀲𑀼𑀢𑁆𑀢𑁂 𑀏𑀓𑀧𑀝𑀺𑀯𑁂𑀥𑁄𑀯 𑀓𑀣𑀺𑀢𑁄.

𑀓𑁄𑀝𑀺𑀕𑀸𑀫𑀯𑀕𑁆𑀕𑁄 𑀢𑀢𑀺𑀬𑁄.

𑁪. 𑀲𑀻𑀲𑀧𑀸𑀯𑀦𑀯𑀕𑁆𑀕𑁄

𑁧. 𑀲𑀻𑀲𑀧𑀸𑀯𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁦𑁧. 𑀘𑀢𑀼𑀢𑁆𑀣𑀲𑁆𑀲 𑀧𑀞𑀫𑁂 𑀬𑀤𑀺𑀤𑀁 𑀉𑀧𑀭𑀻𑀢𑀺 𑀬𑀸𑀦𑀺 𑀇𑀫𑀸𑀦𑀺 𑀉𑀧𑀭𑀺. 𑀲𑀻𑀲𑀧𑀸𑀯𑀦𑁂𑀢𑀺 𑀲𑀻𑀲𑀧𑀸𑀭𑀼𑀓𑁆𑀔𑁂.

𑁨. 𑀔𑀤𑀺𑀭𑀧𑀢𑁆𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁦𑁨. 𑀤𑀼𑀢𑀺𑀬𑁂 𑀅𑀦𑀪𑀺𑀲𑀫𑁂𑀘𑁆𑀘𑀸𑀢𑀺 𑀜𑀸𑀡𑁂𑀦 𑀅𑀦𑀪𑀺𑀲𑀫𑀸𑀕𑀦𑁆𑀢𑁆𑀯𑀸, 𑀅𑀧𑁆𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀅𑀢𑁆𑀣𑁄.

𑁩. 𑀤𑀡𑁆𑀟𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁦𑁩. 𑀢𑀢𑀺𑀬𑁂 𑀅𑀲𑁆𑀫𑀸 𑀮𑁄𑀓𑀸 𑀧𑀭𑀁 𑀮𑁄𑀓𑀦𑁆𑀢𑀺 𑀇𑀫𑀫𑁆𑀳𑀸 𑀫𑀦𑀼𑀲𑁆𑀲𑀮𑁄𑀓𑀸 𑀧𑀭𑀁 𑀦𑀺𑀭𑀬𑀫𑁆𑀧𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀫𑁆𑀧𑀺, 𑀧𑁂𑀢𑁆𑀢𑀺𑀯𑀺𑀲𑀬𑀫𑁆𑀧𑀺, 𑀫𑀦𑀼𑀲𑁆𑀲𑀮𑁄𑀓𑀫𑁆𑀧𑀺, 𑀤𑁂𑀯𑀮𑁄𑀓𑀫𑁆𑀧𑀺, 𑀕𑀘𑁆𑀙𑀦𑁆𑀢𑀺, 𑀧𑀼𑀦𑀧𑁆𑀧𑀼𑀦𑀁 𑀯𑀝𑁆𑀝𑀲𑁆𑀫𑀺𑀁𑀬𑁂𑀯 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁫. 𑀲𑀢𑁆𑀢𑀺𑀲𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁦𑁫. 𑀧𑀜𑁆𑀘𑀫𑁂 𑀏𑀯𑀜𑁆𑀘𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀲𑁆𑀲𑀸𑀢𑀺, 𑀪𑀺𑀓𑁆𑀔𑀯𑁂, 𑀏𑀯𑀁 𑀘𑁂 𑀏𑀢𑀁 𑀪𑀯𑁂𑀬𑁆𑀬, 𑀦𑀺𑀭𑀦𑁆𑀢𑀭𑀁 𑀲𑀢𑁆𑀢𑀺𑀲𑀢𑁂𑀳𑀺 𑀳𑀜𑁆𑀜𑀫𑀸𑀦𑀲𑁆𑀲 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑁂𑀳𑀺 𑀲𑀳𑁂𑀯𑁂𑀲 𑀲𑀘𑁆𑀘𑀸𑀪𑀺𑀲𑀫𑀬𑁄 𑀪𑀯𑁂𑀬𑁆𑀬 𑀘𑁂𑀢𑀺 𑀅𑀢𑁆𑀣𑁄.

𑁯. 𑀇𑀦𑁆𑀤𑀔𑀻𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁦𑁯. 𑀦𑀯𑀫𑁂 𑀫𑀼𑀔𑀁 𑀑𑀮𑁄𑀓𑁂𑀦𑁆𑀢𑀻𑀢𑀺 𑀅𑀚𑁆𑀛𑀸𑀲𑀬𑀁 𑀑𑀮𑁄𑀓𑁂𑀦𑁆𑀢𑀺. 𑀅𑀚𑁆𑀛𑀸𑀲𑀬𑁄 𑀇𑀥 𑀫𑀼𑀔𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑁄.

𑁧𑁦. 𑀯𑀸𑀤𑀢𑁆𑀣𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁧𑁦. 𑀤𑀲𑀫𑁂 𑀲𑀺𑀮𑀸𑀬𑀽𑀧𑁄𑀢𑀺 𑀲𑀺𑀮𑀸𑀣𑀫𑁆𑀪𑁄. 𑀲𑁄𑀴𑀲𑀓𑀼𑀓𑁆𑀓𑀼𑀓𑁄𑀢𑀺 𑀲𑁄𑀴𑀲𑀳𑀢𑁆𑀣𑁄. 𑀲𑁄𑀴𑀲𑀓𑀼𑀓𑁆𑀓𑀽𑀢𑀺𑀧𑀺 𑀧𑀸𑀞𑁄. 𑀳𑁂𑀝𑁆𑀞𑀸 𑀦𑁂𑀫𑀗𑁆𑀕𑀫𑀸𑀢𑀺 𑀳𑁂𑀝𑁆𑀞𑀸 𑀆𑀯𑀸𑀝𑀁 𑀧𑀯𑀺𑀝𑁆𑀞𑀸. 𑀅𑀝𑁆𑀞 𑀓𑀼𑀓𑁆𑀓𑀼 𑀉𑀧𑀭𑀺𑀦𑁂𑀫𑀲𑁆𑀲𑀸𑀢𑀺 𑀅𑀝𑁆𑀞 𑀳𑀢𑁆𑀣𑀸 𑀆𑀯𑀸𑀝𑀲𑁆𑀲 𑀉𑀧𑀭𑀺 𑀉𑀕𑁆𑀕𑀦𑁆𑀢𑁆𑀯𑀸 𑀞𑀺𑀢𑀸 𑀪𑀯𑁂𑀬𑁆𑀬𑀼𑀁. 𑀪𑀼𑀲𑀸𑀢𑀺 𑀩𑀮𑀯𑀢𑀻. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀫𑁂𑀯𑀸𑀢𑀺.

𑀲𑀻𑀲𑀧𑀸𑀯𑀦𑀯𑀕𑁆𑀕𑁄 𑀘𑀢𑀼𑀢𑁆𑀣𑁄.

𑁫. 𑀧𑀧𑀸𑀢𑀯𑀕𑁆𑀕𑁄

𑁧. 𑀮𑁄𑀓𑀘𑀺𑀦𑁆𑀢𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁧𑁧. 𑀧𑀜𑁆𑀘𑀫𑀲𑁆𑀲 𑀧𑀞𑀫𑁂 𑀲𑀼𑀫𑀸𑀕𑀥𑀸𑀬 𑀧𑁄𑀓𑁆𑀔𑀭𑀡𑀺𑀬𑀸𑀢𑀺 𑀏𑀯𑀁𑀦𑀸𑀫𑀺𑀓𑀸𑀬 𑀧𑁄𑀓𑁆𑀔𑀭𑀡𑀺𑀬𑀸. 𑀮𑁄𑀓𑀘𑀺𑀦𑁆𑀢𑀁 𑀘𑀺𑀦𑁆𑀢𑁂𑀦𑁆𑀢𑁄𑀢𑀺, ‘‘𑀓𑁂𑀦 𑀦𑀼 𑀔𑁄 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀓𑀢𑀸, 𑀓𑁂𑀦 𑀫𑀳𑀸𑀧𑀣𑀯𑀻, 𑀓𑁂𑀦 𑀫𑀳𑀸𑀲𑀫𑀼𑀤𑁆𑀤𑁄, 𑀓𑁂𑀦 𑀲𑀢𑁆𑀢𑀸 𑀉𑀧𑁆𑀧𑀸𑀤𑀺𑀢𑀸, 𑀓𑁂𑀦 𑀧𑀩𑁆𑀩𑀢𑀸, 𑀓𑁂𑀦 𑀅𑀫𑁆𑀩𑀢𑀸𑀮𑀦𑀸𑀴𑀺𑀓𑁂𑀭𑀸𑀤𑀬𑁄’’𑀢𑀺 𑀏𑀯𑀭𑀽𑀧𑀁 𑀮𑁄𑀓𑀘𑀺𑀦𑁆𑀢𑀁 𑀘𑀺𑀦𑁆𑀢𑁂𑀦𑁆𑀢𑁄 𑀦𑀺𑀲𑀻𑀤𑀺.

𑀯𑀺𑀘𑁂𑀢𑁄𑀢𑀺 𑀯𑀺𑀕𑀢𑀘𑀺𑀢𑁆𑀢𑁄 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀯𑀸. 𑀪𑀽𑀢𑀁𑀬𑁂𑀯 𑀅𑀤𑁆𑀤𑀲𑀸𑀢𑀺 𑀢𑁂 𑀓𑀺𑀭 𑀅𑀲𑀼𑀭𑀸 𑀲𑀫𑁆𑀩𑀭𑀺𑀫𑀸𑀬𑀁 𑀲𑀫𑁆𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀬𑀣𑀸 𑀦𑁂 𑀲𑁄 𑀧𑀼𑀭𑀺𑀲𑁄 𑀳𑀢𑁆𑀣𑀺𑀅𑀲𑁆𑀲𑀸𑀤𑀻𑀲𑀼 𑀆𑀭𑀼𑀳𑀦𑁆𑀢𑁂 𑀉𑀓𑁆𑀔𑀺𑀧𑀺𑀢𑁆𑀯𑀸, 𑀪𑀺𑀲𑀫𑀼𑀴𑀸𑀮𑀘𑁆𑀙𑀺𑀤𑁆𑀤𑁂𑀳𑀺 𑀧𑀯𑀺𑀲𑀦𑁆𑀢𑁂 𑀧𑀲𑁆𑀲𑀢𑀺, 𑀏𑀯𑀁 𑀅𑀥𑀺𑀝𑁆𑀞𑀳𑀺𑀁𑀲𑀼. 𑀢𑀁 𑀲𑀦𑁆𑀥𑀸𑀬 𑀲𑀢𑁆𑀣𑀸 ‘‘𑀪𑀽𑀢𑀁𑀬𑁂𑀯 𑀅𑀤𑁆𑀤𑀲𑀸’’𑀢𑀺 𑀆𑀳. 𑀤𑁂𑀯𑀸𑀦𑀁𑀬𑁂𑀯 𑀫𑁄𑀳𑀬𑀫𑀸𑀦𑀸𑀢𑀺 𑀤𑁂𑀯𑀸𑀦𑀁 𑀘𑀺𑀢𑁆𑀢𑀁 𑀫𑁄𑀳𑀬𑀦𑁆𑀢𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀮𑁄𑀓𑀘𑀺𑀦𑁆𑀢𑀁 𑀘𑀺𑀦𑁆𑀢𑁂𑀦𑁆𑀢𑁄 𑀉𑀫𑁆𑀫𑀢𑁆𑀢𑀓𑁄𑀧𑀺 𑀳𑁄𑀢𑀺, 𑀢𑀲𑁆𑀫𑀸.

𑁨-𑁩. 𑀧𑀧𑀸𑀢𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁧𑁨-𑁧𑁩. 𑀤𑀼𑀢𑀺𑀬𑁂 𑀧𑀝𑀺𑀪𑀸𑀦𑀓𑀽𑀝𑁄𑀢𑀺 𑀏𑀓𑁄 𑀫𑀳𑀦𑁆𑀢𑁄 𑀧𑀩𑁆𑀩𑀢𑀲𑀤𑀺𑀲𑁄 𑀫𑀭𑀺𑀬𑀸𑀤𑀧𑀸𑀲𑀸𑀡𑁄. 𑀢𑀢𑀺𑀬𑁂 𑀅𑀦𑀺𑀝𑁆𑀞𑀭𑀽𑀧𑀦𑁆𑀢𑀺 𑀅𑀦𑀺𑀝𑁆𑀞𑀲𑀪𑀸𑀯𑀁.

𑁪. 𑀓𑀽𑀝𑀸𑀕𑀸𑀭𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁧𑁪. 𑀘𑀢𑀼𑀢𑁆𑀣𑁂 𑀳𑁂𑀝𑁆𑀞𑀺𑀫𑀁 𑀖𑀭𑀁 𑀅𑀓𑀭𑀺𑀢𑁆𑀯𑀸𑀢𑀺 𑀣𑀫𑁆𑀪𑀪𑀺𑀢𑁆𑀢𑀺𑀧𑀸𑀤𑀼𑀲𑁆𑀲𑀸𑀧𑀦𑀸𑀤𑀺𑀦𑀸 𑀖𑀭𑀲𑁆𑀲 𑀳𑁂𑀝𑁆𑀞𑀺𑀫𑀪𑀸𑀕𑀁 𑀅𑀓𑀢𑁆𑀯𑀸.

𑁫. 𑀯𑀸𑀮𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁧𑁫. 𑀧𑀜𑁆𑀘𑀫𑁂 𑀲𑀦𑁆𑀣𑀸𑀕𑀸𑀭𑁂𑀢𑀺 𑀲𑀺𑀧𑁆𑀧𑀼𑀕𑁆𑀕𑀡𑁆𑀳𑀦𑀲𑀸𑀮𑀸𑀬𑀁. 𑀉𑀧𑀸𑀲𑀦𑀁 𑀓𑀭𑁄𑀦𑁆𑀢𑁂𑀢𑀺 𑀓𑀡𑁆𑀟𑀔𑀺𑀧𑀦𑀲𑀺𑀧𑁆𑀧𑀁 𑀓𑀭𑁄𑀦𑁆𑀢𑁂. 𑀅𑀲𑀦𑀁 𑀅𑀢𑀺𑀧𑀸𑀢𑁂𑀦𑁆𑀢𑁂𑀢𑀺 𑀓𑀡𑁆𑀟𑀁 𑀅𑀢𑀺𑀓𑁆𑀓𑀫𑁂𑀦𑁆𑀢𑁂. 𑀧𑁄𑀗𑁆𑀔𑀸𑀦𑀼𑀧𑁄𑀗𑁆𑀔𑀦𑁆𑀢𑀺 𑀏𑀓𑀁 𑀓𑀡𑁆𑀟𑀁 𑀔𑀺𑀧𑀺𑀢𑁆𑀯𑀸 𑀬𑀣𑀸 𑀅𑀲𑁆𑀲 𑀲𑀭𑀲𑁆𑀲 𑀧𑁄𑀗𑁆𑀔𑀁 𑀯𑀺𑀚𑁆𑀛𑀢𑀺, 𑀅𑀧𑀭𑀁 𑀅𑀦𑀼𑀧𑁄𑀗𑁆𑀔𑀁 𑀦𑀸𑀫 𑀤𑀼𑀢𑀺𑀬𑀲𑁆𑀲 𑀧𑁄𑀗𑁆𑀔𑀁, 𑀧𑀼𑀦 𑀅𑀧𑀭𑀁 𑀢𑀲𑁆𑀲 𑀧𑁄𑀗𑁆𑀔𑀦𑁆𑀢𑀺 𑀏𑀯𑀁 𑀅𑀢𑀺𑀧𑀸𑀢𑁂𑀦𑁆𑀢𑁂 𑀅𑀤𑁆𑀤𑀲. 𑀬𑀢𑁆𑀭 𑀳𑀺 𑀦𑀸𑀫𑀸𑀢𑀺 𑀬𑁂 𑀦𑀸𑀫. 𑀤𑀼𑀭𑀪𑀺𑀲𑀫𑁆𑀪𑀯𑀢𑀭𑀦𑁆𑀢𑀺 𑀤𑀼𑀓𑁆𑀓𑀭𑀢𑀭𑀁. 𑀲𑀢𑁆𑀢𑀥𑀸 𑀪𑀺𑀦𑁆𑀦𑀲𑁆𑀲 𑀯𑀸𑀮𑀲𑁆𑀲 𑀓𑁄𑀝𑀺𑀬𑀸 𑀓𑁄𑀝𑀺𑀁 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀸𑀢𑀺 𑀏𑀓𑀁 𑀯𑀸𑀮𑀁 𑀲𑀢𑁆𑀢𑀥𑀸 𑀪𑀺𑀦𑁆𑀤𑀺𑀢𑁆𑀯𑀸, 𑀢𑀲𑁆𑀲 𑀏𑀓𑀁 𑀪𑁂𑀤𑀁 𑀕𑀳𑁂𑀢𑁆𑀯𑀸, 𑀯𑀸𑀢𑀺𑀗𑁆𑀕𑀡𑀫𑀚𑁆𑀛𑁂 𑀩𑀦𑁆𑀥𑀺𑀢𑁆𑀯𑀸, 𑀅𑀧𑀭𑀁 𑀪𑁂𑀤𑀁 𑀓𑀡𑁆𑀟𑀲𑁆𑀲 𑀅𑀕𑁆𑀕𑀓𑁄𑀝𑀺𑀬𑀁 𑀩𑀦𑁆𑀥𑀺𑀢𑁆𑀯𑀸, 𑀉𑀲𑀪𑀫𑀢𑁆𑀢𑁂 𑀞𑀺𑀢𑁄 𑀓𑀡𑁆𑀟𑀩𑀤𑁆𑀥𑀸𑀬 𑀓𑁄𑀝𑀺𑀬𑀸 𑀢𑀁 𑀯𑀸𑀢𑀺𑀗𑁆𑀕𑀡𑀩𑀤𑁆𑀥𑀓𑁄𑀝𑀺𑀁 𑀧𑀝𑀺𑀯𑀺𑀚𑁆𑀛𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀏𑀯𑀁 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀸𑀦𑀺 𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺, 𑀢𑀲𑁆𑀫𑀸.

𑁭. 𑀧𑀞𑀫𑀙𑀺𑀕𑁆𑀕𑀴𑀬𑀼𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁧𑁭. 𑀲𑀢𑁆𑀢𑀫𑁂 𑀅𑀜𑁆𑀜𑀫𑀜𑁆𑀜𑀔𑀸𑀤𑀺𑀓𑀸𑀢𑀺 𑀅𑀜𑁆𑀜𑀫𑀜𑁆𑀜𑀁 𑀔𑀸𑀤𑀦𑀁. 𑀤𑀼𑀩𑁆𑀩𑀮𑀔𑀸𑀤𑀺𑀓𑀸𑀢𑀺 𑀩𑀮𑀯𑀦𑁆𑀢𑁂𑀳𑀺 𑀫𑀘𑁆𑀙𑀸𑀤𑀻𑀳𑀺 𑀤𑀼𑀩𑁆𑀩𑀮𑀸𑀦𑀁 𑀫𑀘𑁆𑀙𑀸𑀤𑀻𑀦𑀁 𑀔𑀸𑀤𑀦𑀁.

𑁮. 𑀤𑀼𑀢𑀺𑀬𑀙𑀺𑀕𑁆𑀕𑀴𑀬𑀼𑀕𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁧𑁮. 𑀅𑀝𑁆𑀞𑀫𑁂 𑀫𑀳𑀸𑀧𑀣𑀯𑀻𑀢𑀺 𑀘𑀓𑁆𑀓𑀯𑀸𑀴𑀕𑀩𑁆𑀪𑀦𑁆𑀢𑀭𑀸 𑀫𑀳𑀸𑀧𑀣𑀯𑀻. 𑀅𑀥𑀺𑀘𑁆𑀘𑀫𑀺𑀤𑀁, 𑀪𑀦𑁆𑀢𑁂𑀢𑀺 𑀇𑀤𑀁 𑀅𑀥𑀺𑀘𑁆𑀘𑀼𑀧𑁆𑀧𑀢𑁆𑀢𑀺𑀓𑀁 𑀲𑀘𑁂 𑀢𑀁 𑀬𑀼𑀕𑀁 𑀦 𑀧𑀽𑀢𑀺 𑀪𑀯𑁂𑀬𑁆𑀬, 𑀲𑀫𑀼𑀤𑁆𑀤𑁂 𑀉𑀤𑀓𑀁 𑀦 𑀲𑀼𑀲𑁆𑀲𑁂𑀬𑁆𑀬, 𑀲𑁄 𑀘 𑀓𑀘𑁆𑀙𑀧𑁄 𑀦 𑀫𑀭𑁂𑀬𑁆𑀬, 𑀅𑀧𑀺 𑀦𑀸𑀫 𑀬𑀤𑀺𑀘𑁆𑀙𑀸𑀯𑀲𑁂𑀦 𑀲𑀺𑀬𑀸𑀢𑀺 𑀅𑀢𑁆𑀣𑁄.

𑀏𑀯𑀁 𑀅𑀥𑀺𑀘𑁆𑀘𑀫𑀺𑀤𑀁, 𑀪𑀺𑀓𑁆𑀔𑀯𑁂𑀢𑀺 𑀏𑀢𑁆𑀣 𑀫𑀳𑀸𑀲𑀻𑀯𑀢𑁆𑀣𑁂𑀭𑁄 𑀘𑀢𑁆𑀢𑀸𑀭𑀺 𑀬𑀼𑀕𑀸𑀦𑀺 𑀤𑀲𑁆𑀲𑁂𑀢𑀺 𑁋 𑀧𑀼𑀭𑀢𑁆𑀣𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀞𑀺𑀢𑁂𑀦 𑀧𑀼𑀭𑀺𑀲𑁂𑀦 𑀧𑀓𑁆𑀔𑀺𑀢𑁆𑀢𑀬𑀼𑀕𑀲𑁆𑀲 𑀳𑀺 𑀙𑀺𑀕𑁆𑀕𑀴𑁂𑀦 𑀢𑀲𑁆𑀲 𑀅𑀦𑁆𑀥𑀓𑀘𑁆𑀙𑀧𑀲𑁆𑀲 𑀕𑀻𑀯𑀸𑀬 𑀧𑀯𑁂𑀲𑀦𑀁 𑀯𑀺𑀬 𑀫𑀦𑀼𑀲𑁆𑀲𑀧𑀝𑀺𑀮𑀸𑀪𑁄 𑀅𑀥𑀺𑀘𑁆𑀘𑀧𑀝𑀺𑀮𑀸𑀪𑀻. 𑀤𑀓𑁆𑀔𑀺𑀡𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀞𑀺𑀢𑁂𑀦 𑀧𑀓𑁆𑀔𑀺𑀢𑁆𑀢𑀲𑁆𑀲 𑀧𑀦 𑀧𑀭𑀺𑀩𑁆𑀪𑀫𑀦𑁆𑀢𑀲𑁆𑀲 𑀧𑀼𑀭𑀺𑀫𑀬𑀼𑀕𑀁 𑀧𑀢𑁆𑀯𑀸 𑀙𑀺𑀕𑁆𑀕𑀴𑁂𑀦 𑀙𑀺𑀕𑁆𑀕𑀴𑀼𑀧𑀭𑀺 𑀆𑀭𑀼𑀴𑁆𑀳𑀲𑁆𑀲 𑀙𑀺𑀕𑁆𑀕𑀴𑁂𑀦 𑀕𑀻𑀯𑀧𑁆𑀧𑀯𑁂𑀲𑀦𑀁 𑀯𑀺𑀬 𑀢𑀣𑀸𑀕𑀢𑀼𑀧𑁆𑀧𑀸𑀤𑁄 𑀅𑀥𑀺𑀘𑁆𑀘𑀢𑀭𑀲𑀫𑁆𑀪𑀯𑁄. 𑀧𑀘𑁆𑀙𑀺𑀫𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀞𑀺𑀢𑁂𑀦 𑀧𑀓𑁆𑀔𑀺𑀢𑁆𑀢𑀲𑁆𑀲 𑀧𑀦 𑀧𑀭𑀺𑀩𑁆𑀪𑀫𑀦𑁆𑀢𑀲𑁆𑀲 𑀧𑀼𑀭𑀺𑀫𑀬𑀼𑀕𑀤𑁆𑀯𑀬𑀁 𑀧𑀢𑁆𑀯𑀸 𑀙𑀺𑀕𑁆𑀕𑀴𑁂𑀦 𑀙𑀺𑀕𑁆𑀕𑀴𑀼𑀧𑀭𑀺 𑀆𑀭𑀼𑀴𑁆𑀳𑀲𑁆𑀲 𑀙𑀺𑀕𑁆𑀕𑀴𑁂𑀦 𑀕𑀻𑀯𑀧𑁆𑀧𑀯𑁂𑀲𑀦𑀁 𑀯𑀺𑀬 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀲𑁆𑀲 𑀥𑀫𑁆𑀫𑀯𑀺𑀦𑀬𑀲𑁆𑀲 𑀤𑀻𑀧𑀦𑀁 𑀅𑀥𑀺𑀘𑁆𑀘𑀢𑀭𑀲𑀫𑁆𑀪𑀯𑀁. 𑀉𑀢𑁆𑀢𑀭𑀘𑀓𑁆𑀓𑀯𑀸𑀴𑀫𑀼𑀔𑀯𑀝𑁆𑀝𑀺𑀬𑀁 𑀞𑀺𑀢𑁂𑀦 𑀧𑀓𑁆𑀔𑀺𑀢𑁆𑀢𑀲𑁆𑀲 𑀧𑀦 𑀧𑀭𑀺𑀩𑁆𑀪𑀫𑀦𑁆𑀢𑀲𑁆𑀲 𑀧𑀼𑀭𑀺𑀫𑀬𑀼𑀕𑀢𑁆𑀢𑀬𑀁 𑀧𑀢𑁆𑀯𑀸 𑀙𑀺𑀕𑁆𑀕𑀴𑁂𑀦 𑀙𑀺𑀕𑁆𑀕𑀴𑀼𑀧𑀭𑀺 𑀆𑀭𑀼𑀴𑁆𑀳𑀲𑁆𑀲 𑀙𑀺𑀕𑁆𑀕𑀴𑁂𑀦 𑀕𑀻𑀯𑀧𑁆𑀧𑀯𑁂𑀲𑀦𑀁 𑀯𑀺𑀬 𑀘𑀢𑀼𑀲𑀘𑁆𑀘𑀧𑀝𑀺𑀯𑁂𑀥𑁄 𑀅𑀢𑀺𑀯𑀺𑀬 𑀅𑀥𑀺𑀘𑁆𑀘𑀢𑀭𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀯𑀫𑀸𑀤𑀻𑀦𑀺 𑀅𑀪𑀺𑀲𑀫𑀬𑀲𑀁𑀬𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑀸𑀦𑁂𑀯𑀸𑀢𑀺.

𑀧𑀧𑀸𑀢𑀯𑀕𑁆𑀕𑁄 𑀧𑀜𑁆𑀘𑀫𑁄.

𑁬. 𑀅𑀪𑀺𑀲𑀫𑀬𑀯𑀕𑁆𑀕𑀯𑀡𑁆𑀡𑀦𑀸

𑁧𑁧𑁨𑁧. 𑀅𑀪𑀺𑀲𑀫𑀬𑀯𑀕𑁆𑀕𑁄 𑀦𑀺𑀤𑀸𑀦𑀯𑀕𑁆𑀕𑁂 𑀅𑀪𑀺𑀲𑀫𑀬𑀲𑀁𑀬𑀼𑀢𑁆𑀢𑁂 𑀯𑀺𑀢𑁆𑀣𑀸𑀭𑀺𑀢𑁄𑀯.

𑁭. 𑀧𑀞𑀫𑀆𑀫𑀓𑀥𑀜𑁆𑀜𑀧𑁂𑀬𑁆𑀬𑀸𑀮𑀯𑀕𑁆𑀕𑁄

𑁩. 𑀧𑀜𑁆𑀜𑀸𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁩𑁩. 𑀆𑀫𑀓𑀥𑀜𑁆𑀜𑀧𑁂𑀬𑁆𑀬𑀸𑀮𑁂 𑀅𑀭𑀺𑀬𑁂𑀦 𑀧𑀜𑁆𑀜𑀸𑀘𑀓𑁆𑀔𑀼𑀦𑀸𑀢𑀺 𑀯𑀺𑀧𑀲𑁆𑀲𑀦𑀁 𑀆𑀤𑀺𑀁 𑀓𑀢𑁆𑀯𑀸 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂𑀦 𑀜𑀸𑀡𑀘𑀓𑁆𑀔𑀼𑀦𑀸.

𑁪. 𑀲𑀼𑀭𑀸𑀫𑁂𑀭𑀬𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁩𑁪. 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑁆𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑀸𑀢𑀺 𑀏𑀢𑁆𑀣 𑀲𑀼𑀭𑀸 𑀦𑀸𑀫 𑀧𑀺𑀝𑁆𑀞𑀲𑀼𑀭𑀸, 𑀑𑀤𑀦𑀲𑀼𑀭𑀸, 𑀧𑀽𑀯𑀲𑀼𑀭𑀸, 𑀓𑀺𑀡𑁆𑀡𑀧𑀓𑁆𑀔𑀺𑀢𑁆𑀢𑀸, 𑀲𑀫𑁆𑀪𑀸𑀭𑀲𑀁𑀬𑀼𑀢𑁆𑀢𑀸𑀢𑀺 𑀧𑀜𑁆𑀘𑀯𑀺𑀥𑀸. 𑀫𑁂𑀭𑀬𑀁 𑀦𑀸𑀫 𑀧𑀼𑀧𑁆𑀨𑀸𑀲𑀯𑁄, 𑀨𑀮𑀸𑀲𑀯𑁄𑀢𑀺, 𑀏𑀯𑀁 𑀯𑀼𑀢𑁆𑀢𑁄 𑀬𑁄 𑀓𑁄𑀘𑀺 𑀆𑀲𑀯𑁄. 𑀫𑀚𑁆𑀚𑀦𑁆𑀢𑀺 𑀢𑀤𑁂𑀯 𑀉𑀪𑀬𑀁, 𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀺 𑀲𑀼𑀭𑀸𑀲𑀯𑀯𑀺𑀦𑀺𑀫𑀼𑀢𑁆𑀢𑀁 𑀫𑀤𑀦𑀻𑀬𑀁. 𑀬𑀸𑀬 𑀘𑁂𑀢𑀦𑀸𑀬 𑀢𑀁 𑀧𑀺𑀯𑀦𑁆𑀢𑀺, 𑀲𑀸 𑀧𑀫𑀸𑀤𑀲𑁆𑀲 𑀓𑀸𑀭𑀡𑀢𑁆𑀢𑀸 𑀧𑀫𑀸𑀤𑀝𑁆𑀞𑀸𑀦𑀁 𑀦𑀸𑀫, 𑀢𑀢𑁄 𑀧𑀝𑀺𑀯𑀺𑀭𑀢𑀸𑀢𑀺 𑀅𑀢𑁆𑀣𑁄.

𑁬-𑁭. 𑀫𑀢𑁆𑀢𑁂𑀬𑁆𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁩𑁬-𑁩𑁭. 𑀫𑀢𑁆𑀢𑁂𑀬𑁆𑀬𑀸𑀢𑀺 𑀫𑀸𑀢𑀼𑀳𑀺𑀢𑀸, 𑀫𑀸𑀢𑀭𑀺 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸𑀢𑀺 𑀅𑀢𑁆𑀣𑁄. 𑀧𑁂𑀢𑁆𑀢𑁂𑀬𑁆𑀬𑀸𑀤𑀻𑀲𑀼 𑀧𑀺𑀢𑀼𑀳𑀺𑀢𑀸 𑀧𑁂𑀢𑁆𑀢𑁂𑀬𑁆𑀬𑀸.

𑁮-𑁯. 𑀲𑀸𑀫𑀜𑁆𑀜𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁩𑁮-𑁩𑁯. 𑀲𑀫𑀡𑀸𑀦𑀁 𑀳𑀺𑀢𑀸 𑀲𑀸𑀫𑀜𑁆𑀜𑀸. 𑀩𑁆𑀭𑀸𑀳𑁆𑀫𑀡𑀸𑀦𑀁 𑀳𑀺𑀢𑀸 𑀩𑁆𑀭𑀳𑁆𑀫𑀜𑁆𑀜𑀸. 𑀢𑁂𑀲𑀼 𑀢𑁂𑀲𑀼 𑀲𑀫𑁆𑀫𑀸 𑀧𑀝𑀺𑀧𑀦𑁆𑀦𑀸𑀦𑀁𑀬𑁂𑀯𑁂𑀢𑀁 𑀅𑀥𑀺𑀯𑀘𑀦𑀁.

𑁧𑁦. 𑀧𑀘𑀸𑀬𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁪𑁦. 𑀓𑀼𑀮𑁂 𑀚𑁂𑀝𑁆𑀞𑀸𑀧𑀘𑀸𑀬𑀺𑀦𑁄𑀢𑀺 𑀓𑀼𑀮𑁂 𑀚𑁂𑀝𑁆𑀞𑀸𑀦𑀁 𑀅𑀧𑀘𑀸𑀬𑀺𑀦𑁄, 𑀦𑀻𑀘𑀯𑀼𑀢𑁆𑀢𑀺𑀦𑁄𑀢𑀺 𑀅𑀢𑁆𑀣𑁄.

𑁮. 𑀤𑀼𑀢𑀺𑀬𑀆𑀫𑀓𑀥𑀜𑁆𑀜𑀧𑁂𑀬𑁆𑀬𑀸𑀮𑀯𑀕𑁆𑀕𑁄

𑁮. 𑀩𑀻𑀚𑀕𑀸𑀫𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁪𑁮. 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀲𑀫𑀸𑀭𑀫𑁆𑀪𑀸𑀢𑀺 𑀫𑀽𑀮𑀩𑀻𑀚𑀁, 𑀔𑀦𑁆𑀥𑀩𑀻𑀚𑀁, 𑀨𑀴𑀼𑀩𑀻𑀚𑀁, 𑀅𑀕𑁆𑀕𑀩𑀻𑀚𑀁, 𑀩𑀻𑀚𑀩𑀻𑀚𑀦𑁆𑀢𑀺 𑀧𑀜𑁆𑀘𑀯𑀺𑀥𑀲𑁆𑀲 𑀩𑀻𑀚𑀕𑀸𑀫𑀲𑁆𑀲 𑀘𑁂𑀯 𑀬𑀲𑁆𑀲 𑀓𑀲𑁆𑀲𑀘𑀺 𑀦𑀻𑀮𑀢𑀺𑀡𑀭𑀼𑀓𑁆𑀔𑀸𑀤𑀺𑀓𑀲𑁆𑀲 𑀪𑀽𑀢𑀕𑀸𑀫𑀲𑁆𑀲 𑀘 𑀲𑀫𑀸𑀭𑀫𑁆𑀪𑀸, 𑀙𑁂𑀤𑀦𑀧𑀘𑀦𑀸𑀤𑀺𑀪𑀸𑀯𑁂𑀦 𑀯𑀺𑀓𑁄𑀧𑀦𑀸 𑀧𑀝𑀺𑀯𑀺𑀭𑀢𑀸𑀢𑀺 𑀅𑀢𑁆𑀣𑁄.

𑁯. 𑀯𑀺𑀓𑀸𑀮𑀪𑁄𑀚𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁪𑁯. 𑀯𑀺𑀓𑀸𑀮𑀪𑁄𑀚𑀦𑀸𑀢𑀺 𑀓𑀸𑀮𑀸𑀢𑀺𑀓𑁆𑀓𑀦𑁆𑀢𑀪𑁄𑀚𑀦𑀸, 𑀫𑀚𑁆𑀛𑀦𑁆𑀳𑀺𑀓𑀸𑀢𑀺𑀓𑁆𑀓𑀫𑀢𑁄 𑀧𑀝𑁆𑀞𑀸𑀬 𑀬𑀸𑀯𑀓𑀸𑀮𑀺𑀓𑀧𑀭𑀺𑀪𑁄𑀕𑀸𑀢𑀺 𑀅𑀢𑁆𑀣𑁄.

𑁧𑁦. 𑀕𑀦𑁆𑀥𑀯𑀺𑀮𑁂𑀧𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁫𑁦. 𑀫𑀸𑀮𑀸𑀤𑀻𑀲𑀼 𑀫𑀸𑀮𑀸𑀢𑀺 𑀬𑀁 𑀓𑀺𑀜𑁆𑀘𑀺 𑀧𑀼𑀧𑁆𑀨𑀁. 𑀕𑀦𑁆𑀥𑀦𑁆𑀢𑀺 𑀬𑀁 𑀓𑀺𑀜𑁆𑀘𑀺 𑀕𑀦𑁆𑀥𑀚𑀸𑀢𑀁. 𑀯𑀺𑀮𑁂𑀧𑀦𑀦𑁆𑀢𑀺 𑀙𑀯𑀺𑀭𑀸𑀕𑀓𑀭𑀡𑀁. 𑀢𑀢𑁆𑀣 𑀧𑀺𑀴𑀦𑁆𑀥𑀦𑁆𑀢𑀸 𑀥𑀸𑀭𑁂𑀦𑁆𑀢𑀺 𑀦𑀸𑀫, 𑀊𑀦𑀝𑁆𑀞𑀸𑀦𑀁 𑀧𑀽𑀭𑁂𑀦𑁆𑀢𑀸 𑀫𑀡𑁆𑀟𑁂𑀦𑁆𑀢𑀺 𑀦𑀸𑀫, 𑀕𑀦𑁆𑀥𑀯𑀲𑁂𑀦 𑀙𑀯𑀺𑀭𑀸𑀕𑀯𑀲𑁂𑀦 𑀘 𑀲𑀸𑀤𑀺𑀬𑀦𑁆𑀢𑀸 𑀯𑀺𑀪𑀽𑀲𑁂𑀦𑁆𑀢𑀺 𑀦𑀸𑀫. 𑀞𑀸𑀦𑀁 𑀯𑀼𑀘𑁆𑀘𑀢𑀺 𑀓𑀸𑀭𑀡𑀁. 𑀢𑀲𑁆𑀫𑀸 𑀬𑀸𑀬 𑀤𑀼𑀲𑁆𑀲𑀻𑀮𑁆𑀬𑀘𑁂𑀢𑀦𑀸𑀬 𑀢𑀸𑀦𑀺 𑀫𑀸𑀮𑀸𑀥𑀸𑀭𑀡𑀸𑀤𑀻𑀦𑀺 𑀫𑀳𑀸𑀚𑀦𑁄 𑀓𑀭𑁄𑀢𑀺, 𑀢𑀢𑁄 𑀧𑀝𑀺𑀯𑀺𑀭𑀢𑀸𑀢𑀺 𑀅𑀢𑁆𑀣𑁄.

𑁯. 𑀢𑀢𑀺𑀬𑀆𑀫𑀓𑀥𑀜𑁆𑀜𑀧𑁂𑀬𑁆𑀬𑀸𑀮𑀯𑀕𑁆𑀕𑁄

𑁧. 𑀦𑀘𑁆𑀘𑀕𑀻𑀢𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁫𑁧. 𑀲𑀸𑀲𑀦𑀲𑁆𑀲 𑀅𑀦𑀦𑀼𑀮𑁄𑀫𑀢𑁆𑀢𑀸 𑀯𑀺𑀲𑀽𑀓𑀁 𑀧𑀝𑀸𑀡𑀻𑀪𑀽𑀢𑀁 𑀤𑀲𑁆𑀲𑀦𑀦𑁆𑀢𑀺 𑀯𑀺𑀲𑀽𑀓𑀤𑀲𑁆𑀲𑀦𑀁. 𑀅𑀢𑁆𑀢𑀦𑀸 𑀦𑀘𑁆𑀘𑀦𑀦𑀘𑁆𑀘𑀸𑀧𑀦𑀸𑀤𑀺𑀯𑀲𑁂𑀦 𑀦𑀘𑁆𑀘𑀸 𑀘 𑀕𑀻𑀢𑀸 𑀘 𑀯𑀸𑀤𑀺𑀢𑀸 𑀘 𑀅𑀦𑁆𑀢𑀫𑀲𑁄 𑀫𑀬𑀽𑀭𑀦𑀘𑁆𑀘𑀸𑀤𑀺𑀯𑀲𑁂𑀦𑀸𑀧𑀺 𑀧𑀯𑀢𑁆𑀢𑀸𑀦𑀁 𑀦𑀘𑁆𑀘𑀸𑀤𑀻𑀦𑀁 𑀯𑀺𑀲𑀽𑀓𑀪𑀽𑀢𑀸 𑀤𑀲𑁆𑀲𑀦𑀸 𑀘𑀸𑀢𑀺 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀸. 𑀦𑀘𑁆𑀘𑀸𑀤𑀻𑀦𑀺 𑀳𑀺 𑀅𑀢𑁆𑀢𑀦𑀸 𑀧𑀬𑁄𑀚𑁂𑀢𑀼𑀁 𑀯𑀸 𑀧𑀭𑁂𑀳𑀺 𑀧𑀬𑁄𑀚𑀸𑀧𑁂𑀢𑀼𑀁 𑀯𑀸 𑀧𑀬𑀼𑀢𑁆𑀢𑀸𑀦𑀺 𑀧𑀲𑁆𑀲𑀺𑀢𑀼𑀁 𑀯𑀸 𑀦𑁂𑀯 𑀪𑀺𑀓𑁆𑀔𑀽𑀦𑀁, 𑀦 𑀪𑀺𑀓𑁆𑀔𑀼𑀦𑀻𑀦𑀁 𑀯𑀝𑁆𑀝𑀦𑁆𑀢𑀺.

𑁨. 𑀉𑀘𑁆𑀘𑀸𑀲𑀬𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁫𑁨. 𑀉𑀘𑁆𑀘𑀸𑀲𑀬𑀦𑀁 𑀯𑀼𑀘𑁆𑀘𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁. 𑀫𑀳𑀸𑀲𑀬𑀦𑀁 𑀅𑀓𑀧𑁆𑀧𑀺𑀬𑀢𑁆𑀣𑀭𑀡𑀁, 𑀢𑀢𑁄 𑀧𑀝𑀺𑀯𑀺𑀭𑀢𑀸𑀢𑀺 𑀅𑀢𑁆𑀣𑁄.

𑁩. 𑀚𑀸𑀢𑀭𑀽𑀧𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁫𑁩. 𑀚𑀸𑀢𑀭𑀽𑀧𑀦𑁆𑀢𑀺 𑀲𑀼𑀯𑀡𑁆𑀡𑀁. 𑀭𑀚𑀢𑀦𑁆𑀢𑀺 𑀓𑀳𑀸𑀧𑀡𑁄 𑁋 𑀮𑁄𑀳𑀫𑀸𑀲𑀓𑁄, 𑀚𑀢𑀼𑀫𑀸𑀲𑀓𑁄, 𑀤𑀸𑀭𑀼𑀫𑀸𑀲𑀓𑁄𑀢𑀺 𑀬𑁂 𑀯𑁄𑀳𑀸𑀭𑀁 𑀕𑀘𑁆𑀙𑀦𑁆𑀢𑀺, 𑀢𑀲𑁆𑀲 𑀉𑀪𑀬𑀲𑁆𑀲𑀸𑀧𑀺 𑀧𑀝𑀺𑀕𑁆𑀕𑀳𑀡𑀸 𑀧𑀝𑀺𑀯𑀺𑀭𑀢𑀸. 𑀦𑁂𑀯 𑀦𑀁 𑀉𑀕𑁆𑀕𑀡𑁆𑀳𑀦𑁆𑀢𑀺 𑀦 𑀉𑀕𑁆𑀕𑀡𑁆𑀳𑀸𑀧𑁂𑀦𑁆𑀢𑀺, 𑀦 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀲𑀸𑀤𑀺𑀬𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁪. 𑀆𑀫𑀓𑀥𑀜𑁆𑀜𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁫𑁪. 𑀆𑀫𑀓𑀥𑀜𑁆𑀜𑀧𑀝𑀺𑀕𑁆𑀕𑀳𑀡𑀸𑀢𑀺 𑀲𑀸𑀮𑀺-𑀯𑀻𑀳𑀺-𑀬𑀯-𑀕𑁄𑀥𑀼𑀫-𑀓𑀗𑁆𑀕𑀼-𑀯𑀭𑀓-𑀓𑀼𑀤𑁆𑀭𑀽𑀲𑀓𑀲𑀗𑁆𑀔𑀸𑀢𑀲𑁆𑀲 𑀲𑀢𑁆𑀢𑀯𑀺𑀥𑀲𑁆𑀲𑀸𑀧𑀺 𑀆𑀫𑀓𑀥𑀜𑁆𑀜𑀲𑁆𑀲 𑀧𑀝𑀺𑀕𑁆𑀕𑀳𑀡𑀸. 𑀦 𑀓𑁂𑀯𑀮𑀜𑁆𑀘 𑀏𑀢𑁂𑀲𑀁 𑀧𑀝𑀺𑀕𑁆𑀕𑀳𑀡𑀫𑁂𑀯, 𑀆𑀫𑀲𑀦𑀫𑁆𑀧𑀺 𑀪𑀺𑀓𑁆𑀔𑀽𑀦𑀁 𑀦 𑀯𑀝𑁆𑀝𑀢𑀺𑀬𑁂𑀯.

𑁫. 𑀆𑀫𑀓𑀫𑀁𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁫𑁫. 𑀆𑀫𑀓𑀫𑀁𑀲𑀧𑀝𑀺𑀕𑁆𑀕𑀳𑀡𑀸𑀢𑀺 𑀏𑀢𑁆𑀣 𑀅𑀜𑁆𑀜𑀢𑁆𑀭 𑀉𑀤𑁆𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀸 𑀆𑀫𑀓𑀫𑀁𑀲𑀫𑀘𑁆𑀙𑀸𑀦𑀁 𑀧𑀝𑀺𑀕𑁆𑀕𑀳𑀡𑀫𑁂𑀯 𑀪𑀺𑀓𑁆𑀔𑀽𑀦𑀁 𑀦 𑀯𑀝𑁆𑀝𑀢𑀺, 𑀦𑁄 𑀆𑀫𑀲𑀦𑀁.

𑁬. 𑀓𑀼𑀫𑀸𑀭𑀺𑀓𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁫𑁬. 𑀇𑀢𑁆𑀣𑀺𑀓𑀼𑀫𑀸𑀭𑀺𑀓𑀧𑀝𑀺𑀕𑁆𑀕𑀳𑀡𑀸𑀢𑀺 𑀏𑀢𑁆𑀣 𑀇𑀢𑁆𑀣𑀻𑀢𑀺 𑀧𑀼𑀭𑀺𑀲𑀦𑁆𑀢𑀭𑀕𑀢𑀸, 𑀇𑀢𑀭𑀸 𑀓𑀼𑀫𑀸𑀭𑀺𑀓𑀸 𑀦𑀸𑀫. 𑀢𑀸𑀲𑀁 𑀧𑀝𑀺𑀕𑁆𑀕𑀳𑀡𑀫𑁆𑀧𑀺 𑀆𑀫𑀲𑀦𑀫𑁆𑀧𑀺 𑀅𑀓𑀧𑁆𑀧𑀺𑀬𑀫𑁂𑀯.

𑁭. 𑀤𑀸𑀲𑀺𑀤𑀸𑀲𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁫𑁭. 𑀤𑀸𑀲𑀺𑀤𑀸𑀲𑀧𑀝𑀺𑀕𑁆𑀕𑀳𑀡𑀸𑀢𑀺 𑀏𑀢𑁆𑀣 𑀤𑀸𑀲𑀺𑀤𑀸𑀲𑀯𑀲𑁂𑀦𑁂𑀯 𑀢𑁂𑀲𑀁 𑀧𑀝𑀺𑀕𑁆𑀕𑀳𑀡𑀁 𑀦 𑀯𑀝𑁆𑀝𑀢𑀺, ‘‘𑀓𑀧𑁆𑀧𑀺𑀬𑀓𑀸𑀭𑀓𑀁 𑀤𑀫𑁆𑀫𑀺, 𑀆𑀭𑀸𑀫𑀺𑀓𑀁 𑀤𑀫𑁆𑀫𑀻’’𑀢𑀺 𑀏𑀯𑀁 𑀯𑀼𑀢𑁆𑀢𑁂 𑀧𑀦 𑀯𑀝𑁆𑀝𑀢𑀺.

𑁧𑁦. 𑀘𑀢𑀼𑀢𑁆𑀣𑀆𑀫𑀓𑀥𑀜𑁆𑀜𑀧𑁂𑀬𑁆𑀬𑀸𑀮𑀯𑀕𑁆𑀕𑁄

𑁧. 𑀔𑁂𑀢𑁆𑀢𑀯𑀢𑁆𑀣𑀼𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁬𑁧. 𑀅𑀚𑁂𑀴𑀓𑀸𑀤𑀻𑀲𑀼 𑀔𑁂𑀢𑁆𑀢𑀯𑀢𑁆𑀣𑀼𑀧𑀭𑀺𑀬𑁄𑀲𑀸𑀦𑁂𑀲𑀼 𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀦𑀬𑁄 𑀯𑀺𑀦𑀬𑀯𑀲𑁂𑀦 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄. 𑀢𑀢𑁆𑀣 𑀔𑁂𑀢𑁆𑀢𑀁 𑀦𑀸𑀫 𑀬𑀲𑁆𑀫𑀺𑀁 𑀧𑀼𑀩𑁆𑀩𑀡𑁆𑀡𑀁 𑀭𑀼𑀳𑀢𑀺. 𑀯𑀢𑁆𑀣𑀼 𑀦𑀸𑀫 𑀬𑀲𑁆𑀫𑀺𑀁 𑀅𑀧𑀭𑀡𑁆𑀡𑀁 𑀭𑀼𑀳𑀢𑀺. 𑀬𑀢𑁆𑀣 𑀯𑀸 𑀉𑀪𑀬𑀁 𑀭𑀼𑀳𑀢𑀺, 𑀢𑀁 𑀔𑁂𑀢𑁆𑀢𑀁. 𑀢𑀤𑀢𑁆𑀣𑀸𑀬 𑀅𑀓𑀢𑀪𑀽𑀫𑀺𑀪𑀸𑀕𑁄 𑀯𑀢𑁆𑀣𑀼. 𑀔𑁂𑀢𑁆𑀢𑀯𑀢𑁆𑀣𑀼𑀲𑀻𑀲𑁂𑀦 𑀘𑁂𑀢𑁆𑀣 𑀯𑀸𑀧𑀺𑀢𑀴𑀸𑀓𑀸𑀤𑀻𑀦𑀺𑀧𑀺 𑀲𑀗𑁆𑀕𑀳𑀺𑀢𑀸𑀦𑁂𑀯.

𑁨-𑁩. 𑀓𑀬𑀯𑀺𑀓𑁆𑀓𑀬𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁬𑁨-𑁬𑁩. 𑀓𑀬𑀯𑀺𑀓𑁆𑀓𑀬𑀸𑀢𑀺 𑀓𑀬𑀸 𑀘 𑀯𑀺𑀓𑁆𑀓𑀬𑀸 𑀘. 𑀤𑀽𑀢𑁂𑀬𑁆𑀬𑀁 𑀯𑀼𑀘𑁆𑀘𑀢𑀺 𑀤𑀽𑀢𑀓𑀫𑁆𑀫𑀁, 𑀕𑀺𑀳𑀻𑀦𑀁 𑀧𑀡𑁆𑀡𑀁 𑀯𑀸 𑀲𑀸𑀲𑀦𑀁 𑀯𑀸 𑀕𑀳𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀕𑀫𑀦𑀁. 𑀧𑀳𑀺𑀡𑀕𑀫𑀦𑀁 𑀯𑀼𑀘𑁆𑀘𑀢𑀺 𑀖𑀭𑀸 𑀖𑀭𑀁 𑀧𑁂𑀲𑀺𑀢𑀲𑁆𑀲 𑀔𑀼𑀤𑁆𑀤𑀓𑀕𑀫𑀦𑀁. 𑀅𑀦𑀼𑀬𑁄𑀕𑁄 𑀦𑀸𑀫 𑀢𑀤𑀼𑀪𑀬𑀓𑀭𑀡𑀁. 𑀢𑀲𑁆𑀫𑀸 𑀤𑀽𑀢𑁂𑀬𑁆𑀬𑀧𑀳𑀺𑀡𑀕𑀫𑀦𑀸𑀦𑀼𑀬𑁄𑀕𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁪. 𑀢𑀼𑀮𑀸𑀓𑀽𑀝𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁬𑁪. 𑀢𑀼𑀮𑀸𑀓𑀽𑀝𑀸𑀤𑀻𑀲𑀼 𑀓𑀽𑀝𑀦𑁆𑀢𑀺 𑀯𑀜𑁆𑀘𑀦𑀁. 𑀢𑀢𑁆𑀣 𑀢𑀼𑀮𑀸𑀓𑀽𑀝𑀁 𑀢𑀸𑀯 𑀭𑀽𑀧𑀓𑀽𑀝𑀁, 𑀅𑀗𑁆𑀕𑀓𑀽𑀝𑀁, 𑀕𑀳𑀡𑀓𑀽𑀝𑀁, 𑀧𑀝𑀺𑀘𑁆𑀙𑀦𑁆𑀦𑀓𑀽𑀝𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀭𑀽𑀧𑀓𑀽𑀝𑀁 𑀦𑀸𑀫 𑀤𑁆𑀯𑁂 𑀢𑀼𑀮𑀸 𑀲𑀫𑀭𑀽𑀧𑀸 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀫𑀳𑀢𑀺𑀬𑀸 𑀕𑀡𑁆𑀳𑀸𑀢𑀺, 𑀤𑀤𑀦𑁆𑀢𑁄 𑀔𑀼𑀤𑁆𑀤𑀺𑀓𑀸𑀬 𑀤𑁂𑀢𑀺. 𑀅𑀗𑁆𑀕𑀓𑀽𑀝𑀁 𑀦𑀸𑀫 𑀕𑀡𑁆𑀳𑀦𑁆𑀢𑁄 𑀧𑀘𑁆𑀙𑀸𑀪𑀸𑀕𑁂 𑀳𑀢𑁆𑀣𑁂𑀦 𑀢𑀼𑀮𑀁 𑀅𑀓𑁆𑀓𑀫𑀢𑀺, 𑀤𑀤𑀦𑁆𑀢𑁄 𑀧𑀼𑀩𑁆𑀩𑀪𑀸𑀕𑁂. 𑀕𑀳𑀡𑀓𑀽𑀝𑀁 𑀦𑀸𑀫 𑀕𑀡𑁆𑀳𑀦𑁆𑀢𑁄 𑀫𑀽𑀮𑁂 𑀭𑀚𑁆𑀚𑀼𑀁 𑀕𑀡𑁆𑀳𑀸𑀢𑀺, 𑀤𑀤𑀦𑁆𑀢𑁄 𑀅𑀕𑁆𑀕𑁂. 𑀧𑀝𑀺𑀘𑁆𑀙𑀦𑁆𑀦𑀓𑀽𑀝𑀁 𑀦𑀸𑀫 𑀢𑀼𑀮𑀁 𑀲𑀼𑀲𑀺𑀭𑀁 𑀓𑀢𑁆𑀯𑀸 𑀅𑀦𑁆𑀢𑁄 𑀅𑀬𑀘𑀼𑀡𑁆𑀡𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀢𑀁 𑀧𑀘𑁆𑀙𑀸𑀪𑀸𑀕𑁂 𑀓𑀭𑁄𑀢𑀺, 𑀤𑀤𑀦𑁆𑀢𑁄 𑀅𑀕𑁆𑀕𑀪𑀸𑀕𑁂.

𑀓𑀁𑀲𑁄 𑀯𑀼𑀘𑁆𑀘𑀢𑀺 𑀲𑀼𑀯𑀡𑁆𑀡𑀧𑀸𑀢𑀺, 𑀢𑀸𑀬 𑀯𑀜𑁆𑀘𑀦𑀁 𑀓𑀁𑀲𑀓𑀽𑀝𑀁. 𑀓𑀣𑀁? 𑀏𑀓𑀁 𑀲𑀼𑀯𑀡𑁆𑀡𑀧𑀸𑀢𑀺𑀁 𑀓𑀢𑁆𑀯𑀸 𑀅𑀜𑁆𑀜𑀸 𑀤𑁆𑀯𑁂 𑀢𑀺𑀲𑁆𑀲𑁄 𑀮𑁄𑀳𑀧𑀸𑀢𑀺𑀬𑁄 𑀲𑀼𑀯𑀡𑁆𑀡𑀯𑀡𑁆𑀡𑀸 𑀓𑀭𑁄𑀦𑁆𑀢𑀺. 𑀢𑀢𑁄 𑀚𑀦𑀧𑀤𑀁 𑀕𑀦𑁆𑀢𑁆𑀯𑀸, 𑀓𑀺𑀜𑁆𑀘𑀺𑀤𑁂𑀯 𑀅𑀟𑁆𑀠𑀓𑀼𑀮𑀁 𑀧𑀯𑀺𑀲𑀺𑀢𑁆𑀯𑀸, ‘‘𑀲𑀼𑀯𑀡𑁆𑀡𑀪𑀸𑀚𑀦𑀸𑀦𑀺 𑀓𑀺𑀡𑀣𑀸’’𑀢𑀺 𑀯𑀢𑁆𑀯𑀸, 𑀅𑀕𑁆𑀖𑁂 𑀧𑀼𑀘𑁆𑀙𑀺𑀢𑁂 𑀲𑀫𑀕𑁆𑀖𑀢𑀭𑀁 𑀤𑀸𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀢𑀢𑁄 𑀢𑁂𑀳𑀺 ‘‘𑀓𑀣𑀁 𑀇𑀫𑁂𑀲𑀁 𑀲𑀼𑀯𑀡𑁆𑀡𑀪𑀸𑀯𑁄 𑀚𑀸𑀦𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑁂 ‘‘𑀯𑀻𑀫𑀁𑀲𑀺𑀢𑁆𑀯𑀸 𑀕𑀡𑁆𑀳𑀣𑀸’’𑀢𑀺 𑀲𑀼𑀯𑀡𑁆𑀡𑀧𑀸𑀢𑀺𑀁 𑀧𑀸𑀲𑀸𑀡𑁂 𑀖𑀁𑀲𑀺𑀢𑁆𑀯𑀸 𑀲𑀩𑁆𑀩𑀧𑀸𑀢𑀺𑀬𑁄 𑀤𑀢𑁆𑀯𑀸 𑀕𑀘𑁆𑀙𑀦𑁆𑀢𑀺.

𑀫𑀸𑀦𑀓𑀽𑀝𑀁 𑀳𑀤𑀬𑀪𑁂𑀤-𑀲𑀺𑀔𑀸𑀪𑁂𑀤-𑀭𑀚𑁆𑀚𑀼𑀪𑁂𑀤𑀯𑀲𑁂𑀦 𑀢𑀺𑀯𑀺𑀥𑀁 𑀳𑁄𑀢𑀺. 𑀢𑀢𑁆𑀣 𑀳𑀤𑀬𑀪𑁂𑀤𑁄 𑀲𑀧𑁆𑀧𑀺𑀢𑁂𑀮𑀸𑀤𑀺𑀫𑀺𑀦𑀦𑀓𑀸𑀮𑁂 𑀮𑀩𑁆𑀪𑀢𑀺. 𑀢𑀸𑀦𑀺 𑀳𑀺 𑀕𑀡𑁆𑀳𑀦𑁆𑀢𑁄 𑀳𑁂𑀝𑁆𑀞𑀸𑀙𑀺𑀤𑁆𑀤𑁂𑀦 𑀫𑀸𑀦𑁂𑀦 ‘‘𑀲𑀡𑀺𑀓𑀁 𑀆𑀲𑀺𑀜𑁆𑀘𑀸’’𑀢𑀺 𑀯𑀢𑁆𑀯𑀸 𑀅𑀦𑁆𑀢𑁄𑀪𑀸𑀚𑀦𑁂 𑀩𑀳𑀼𑀁 𑀧𑀕𑁆𑀖𑀭𑀸𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀤𑀤𑀦𑁆𑀢𑁄 𑀙𑀺𑀤𑁆𑀤𑀁 𑀧𑀺𑀥𑀸𑀬 𑀲𑀻𑀖𑀁 𑀧𑀽𑀭𑁂𑀢𑁆𑀯𑀸 𑀤𑁂𑀢𑀺. 𑀲𑀺𑀔𑀸𑀪𑁂𑀤𑁄 𑀢𑀺𑀮𑀢𑀡𑁆𑀟𑀼𑀮𑀸𑀤𑀺𑀫𑀺𑀦𑀦𑀓𑀸𑀮𑁂 𑀮𑀩𑁆𑀪𑀢𑀺. 𑀢𑀸𑀦𑀺 𑀳𑀺 𑀕𑀡𑁆𑀳𑀦𑁆𑀢𑁄 𑀲𑀡𑀺𑀓𑀁 𑀲𑀺𑀔𑀁 𑀉𑀲𑁆𑀲𑀸𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺, 𑀤𑀤𑀦𑁆𑀢𑁄 𑀯𑁂𑀕𑁂𑀦 𑀲𑀺𑀔𑀁 𑀪𑀺𑀦𑁆𑀤𑀦𑁆𑀢𑁄 𑀤𑁂𑀢𑀺. 𑀭𑀚𑁆𑀚𑀼𑀪𑁂𑀤𑁄 𑀔𑁂𑀢𑁆𑀢𑀯𑀢𑁆𑀣𑀼𑀫𑀺𑀦𑀦𑀓𑀸𑀮𑁂 𑀮𑀩𑁆𑀪𑀢𑀺. 𑀮𑀜𑁆𑀚𑀁 𑀅𑀮𑀪𑀦𑁆𑀢𑀸 𑀳𑀺 𑀔𑁂𑀢𑁆𑀢𑀁 𑀅𑀫𑀳𑀦𑁆𑀢𑀁 𑀫𑀳𑀦𑁆𑀢𑀁 𑀓𑀢𑁆𑀯𑀸 𑀫𑀺𑀦𑀦𑁆𑀢𑀺.

𑁫. 𑀉𑀓𑁆𑀓𑁄𑀝𑀦𑀲𑀼𑀢𑁆𑀢𑀯𑀡𑁆𑀡𑀦𑀸

𑁧𑁧𑁬𑁫. 𑀉𑀓𑁆𑀓𑁄𑀝𑀦𑀸𑀤𑀻𑀲𑀼 𑀉𑀓𑁆𑀓𑁄𑀝𑀦𑀦𑁆𑀢𑀺 𑀲𑀸𑀫𑀺𑀓𑁂 𑀅𑀲𑁆𑀲𑀸𑀫𑀺𑀓𑁂 𑀓𑀸𑀢𑀼𑀁 𑀮𑀜𑁆𑀚𑀕𑁆𑀕𑀳𑀡𑀁. 𑀯𑀜𑁆𑀘𑀦𑀦𑁆𑀢𑀺 𑀢𑁂𑀳𑀺 𑀢𑁂𑀳𑀺 𑀉𑀧𑀸𑀬𑁂𑀳𑀺 𑀧𑀭𑁂𑀲𑀁 𑀯𑀜𑁆𑀘𑀦𑀁. 𑀢𑀢𑁆𑀭𑀺𑀤𑀫𑁂𑀓𑀁𑀯𑀢𑁆𑀣𑀼 𑁋 𑀏𑀓𑁄 𑀓𑀺𑀭 𑀮𑀼𑀤𑁆𑀤𑀓𑁄 𑀫𑀺𑀕𑀜𑁆𑀘 𑀫𑀺𑀕𑀧𑁄𑀢𑀓𑀜𑁆𑀘 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀢𑀺. 𑀢𑀫𑁂𑀓𑁄 𑀥𑀼𑀢𑁆𑀢𑁄 ‘‘𑀓𑀺𑀁, 𑀪𑁄, 𑀫𑀺𑀕𑁄 𑀅𑀕𑁆𑀖𑀢𑀺, 𑀓𑀺𑀁 𑀫𑀺𑀕𑀧𑁄𑀢𑀓𑁄’’𑀢𑀺?, 𑀆𑀳. ‘‘𑀫𑀺𑀕𑁄 𑀤𑁆𑀯𑁂 𑀓𑀳𑀸𑀧𑀡𑁂, 𑀫𑀺𑀕𑀧𑁄𑀢𑀓𑁄 𑀏𑀓’’𑀦𑁆𑀢𑀺 𑀘 𑀯𑀼𑀢𑁆𑀢𑁂 𑀓𑀳𑀸𑀧𑀡𑀁 𑀤𑀢𑁆𑀯𑀸, 𑀫𑀺𑀕𑀧𑁄𑀢𑀓𑀁 𑀕𑀳𑁂𑀢𑁆𑀯𑀸 𑀣𑁄𑀓𑀁 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑁄 ‘‘𑀦 𑀫𑁂, 𑀪𑁄, 𑀫𑀺𑀕𑀧𑁄𑀢𑀓𑁂𑀦 𑀅𑀢𑁆𑀣𑁄, 𑀫𑀺𑀕𑀁 𑀫𑁂 𑀤𑁂𑀳𑀻’’𑀢𑀺 𑀆𑀳. 𑀢𑁂𑀦 𑀳𑀺 𑀤𑁆𑀯𑁂 𑀓𑀳𑀸𑀧𑀡𑁂 𑀤𑁂𑀳𑀻𑀢𑀺. 𑀦𑀦𑀼, 𑀪𑁄, 𑀫𑀬𑀸 𑀧𑀞𑀫𑀁 𑀏𑀓𑁄 𑀓𑀳𑀸𑀧𑀡𑁄 𑀤𑀺𑀦𑁆𑀦𑁄𑀢𑀺. 𑀆𑀫 𑀤𑀺𑀦𑁆𑀦𑁄𑀢𑀺. 𑀇𑀫𑀫𑁆𑀧𑀺 𑀫𑀺𑀕𑀧𑁄𑀢𑀓𑀁 𑀕𑀡𑁆𑀳, 𑀏𑀯𑀁 𑀲𑁄 𑀘 𑀓𑀳𑀸𑀧𑀡𑁄, 𑀅𑀬𑀜𑁆𑀘 𑀓𑀳𑀸𑀧𑀡𑀕𑁆𑀖𑀦𑀓𑁄 𑀫𑀺𑀕𑀧𑁄𑀢𑀓𑁄𑀢𑀺 𑀤𑁆𑀯𑁂 𑀓𑀳𑀸𑀧𑀡𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺. 𑀲𑁄 ‘‘𑀓𑀸𑀭𑀡𑀁 𑀯𑀤𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀫𑀺𑀕𑀧𑁄𑀢𑀓𑀁 𑀕𑀳𑁂𑀢𑁆𑀯𑀸 𑀫𑀺𑀕𑀁 𑀅𑀤𑀸𑀲𑀻𑀢𑀺.

𑀦𑀺𑀓𑀢𑀻𑀢𑀺 𑀬𑁄𑀕𑀯𑀲𑁂𑀦 𑀯𑀸 𑀫𑀸𑀬𑀸𑀯𑀲𑁂𑀦 𑀯𑀸 𑀅𑀧𑀸𑀫𑀗𑁆𑀕𑀁 𑀧𑀸𑀫𑀗𑁆𑀕𑀦𑁆𑀢𑀺 𑀅𑀫𑀡𑀺𑀁 𑀫𑀡𑀺𑀦𑁆𑀢𑀺, 𑀅𑀲𑀼𑀯𑀡𑁆𑀡𑀁 𑀲𑀼𑀯𑀡𑁆𑀡𑀦𑁆𑀢𑀺 𑀓𑀢𑁆𑀯𑀸 𑀧𑀢𑀺𑀭𑀽𑀧𑀓𑁂𑀦 𑀯𑀜𑁆𑀘𑀦𑀁. 𑀲𑀸𑀘𑀺𑀬𑁄𑀕𑁄𑀢𑀺 𑀓𑀼𑀝𑀺𑀮𑀬𑁄𑀕𑁄. 𑀏𑀢𑁂𑀲𑀁𑀬𑁂𑀯 𑀉𑀓𑁆𑀓𑁄𑀝𑀦𑀸𑀤𑀻𑀦𑀫𑁂𑀢𑀁 𑀦𑀸𑀫𑀁. 𑀢𑀲𑁆𑀫𑀸 𑀉𑀓𑁆𑀓𑁄𑀝𑀦𑀲𑀸𑀘𑀺𑀬𑁄𑀕𑀸 𑀯𑀜𑁆𑀘𑀦𑀲𑀸𑀘𑀺𑀬𑁄𑀕𑀸 𑀦𑀺𑀓𑀢𑀺𑀲𑀸𑀘𑀺𑀬𑁄𑀕𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀓𑁂𑀘𑀺 𑀅𑀜𑁆𑀜𑀁 𑀤𑀲𑁆𑀲𑁂𑀢𑁆𑀯𑀸 𑀅𑀜𑁆𑀜𑀲𑁆𑀲 𑀧𑀭𑀺𑀯𑀢𑁆𑀢𑀦𑀁 𑀲𑀸𑀘𑀺𑀬𑁄𑀕𑁄𑀢𑀺 𑀯𑀤𑀦𑁆𑀢𑀺. 𑀢𑀁 𑀧𑀦 𑀯𑀜𑁆𑀘𑀦𑁂𑀦𑁂𑀯 𑀲𑀗𑁆𑀕𑀳𑀺𑀢𑀁.

𑁬-𑁧𑁧. 𑀙𑁂𑀤𑀦𑀲𑀼𑀢𑁆𑀢𑀸𑀤𑀺𑀯𑀡𑁆𑀡𑀦𑀸

𑁧𑁧𑁬𑁬-𑁭𑁧. 𑀙𑁂𑀤𑀦𑀸𑀤𑀻𑀲𑀼 𑀙𑁂𑀤𑀦𑀦𑁆𑀢𑀺 𑀳𑀢𑁆𑀣𑀘𑁆𑀙𑁂𑀤𑀦𑀸𑀤𑀺. 𑀯𑀥𑁄𑀢𑀺 𑀫𑀭𑀡𑀁. 𑀩𑀦𑁆𑀥𑁄𑀢𑀺 𑀭𑀚𑁆𑀚𑀼𑀩𑀦𑁆𑀥𑀦𑀸𑀤𑀻𑀳𑀺 𑀩𑀦𑁆𑀥𑀦𑀁. 𑀯𑀺𑀧𑀭𑀸𑀫𑁄𑀲𑁄𑀢𑀺 𑀳𑀺𑀫𑀯𑀺𑀧𑀭𑀸𑀫𑁄𑀲𑁄, 𑀕𑀼𑀫𑁆𑀩𑀯𑀺𑀧𑀭𑀸𑀫𑁄𑀲𑁄𑀢𑀺 𑀤𑀼𑀯𑀺𑀥𑁄. 𑀬𑀁 𑀳𑀺𑀫𑀧𑀸𑀢𑀲𑀫𑀬𑁂 𑀳𑀺𑀫𑁂𑀦 𑀧𑀝𑀺𑀘𑁆𑀙𑀦𑁆𑀦𑀸 𑀳𑀼𑀢𑁆𑀯𑀸 𑀫𑀕𑁆𑀕𑀧𑀝𑀺𑀧𑀦𑁆𑀦𑀁 𑀚𑀦𑀁 𑀫𑀼𑀲𑀦𑁆𑀢𑀺, 𑀅𑀬𑀁 𑀳𑀺𑀫𑀯𑀺𑀧𑀭𑀸𑀫𑁄𑀲𑁄. 𑀬𑀁 𑀕𑀼𑀫𑁆𑀩𑀸𑀤𑀺𑀧𑀝𑀺𑀘𑁆𑀙𑀦𑁆𑀦𑀸 𑀫𑀼𑀲𑀦𑁆𑀢𑀺, 𑀅𑀬𑀁 𑀕𑀼𑀫𑁆𑀩𑀯𑀺𑀧𑀭𑀸𑀫𑁄𑀲𑁄.

𑀆𑀮𑁄𑀧𑁄 𑀯𑀼𑀘𑁆𑀘𑀢𑀺 𑀕𑀸𑀫𑀦𑀺𑀕𑀫𑀸𑀤𑀻𑀦𑀁 𑀯𑀺𑀮𑁄𑀧𑀓𑀭𑀡𑀁. 𑀲𑀳𑀲𑀸𑀓𑀸𑀭𑁄𑀢𑀺 𑀲𑀸𑀳𑀲𑀓𑀺𑀭𑀺𑀬𑀸, 𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸, 𑀫𑀦𑀼𑀲𑁆𑀲𑀸𑀦𑀁 𑀉𑀭𑁂 𑀲𑀢𑁆𑀣𑀁 𑀞𑀧𑁂𑀢𑁆𑀯𑀸, 𑀇𑀘𑁆𑀙𑀺𑀢𑀪𑀡𑁆𑀟𑀕𑁆𑀕𑀳𑀡𑀁. 𑀏𑀯𑀫𑁂𑀢𑀲𑁆𑀫𑀸 𑀙𑁂𑀤𑀦𑀯𑀥𑀩𑀦𑁆𑀥𑀦𑀯𑀺𑀧𑀭𑀸𑀫𑁄𑀲𑀆𑀮𑁄𑀧𑀲𑀳𑀲𑀸𑀓𑀸𑀭𑀸 𑀧𑀝𑀺𑀯𑀺𑀭𑀢𑀸. 𑀲𑁂𑀲𑀁 𑀲𑀩𑁆𑀩𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸𑀢𑀺.

𑀆𑀫𑀓𑀥𑀜𑁆𑀜𑀧𑁂𑀬𑁆𑀬𑀸𑀮𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀸 𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀫𑀳𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀕𑀫𑀦𑀓𑀣𑀸

𑀏𑀢𑁆𑀢𑀸𑀯𑀢𑀸 𑀳𑀺 𑁋

‘‘𑀩𑀳𑀼𑀓𑀸𑀭𑀲𑁆𑀲 𑀬𑀢𑀻𑀦𑀁 𑀯𑀺𑀧𑀲𑁆𑀲𑀦𑀸𑀘𑀸𑀭𑀦𑀺𑀧𑀼𑀡𑀩𑀼𑀤𑁆𑀥𑀻𑀦𑀁,

𑀲𑀁𑀬𑀼𑀢𑁆𑀢𑀯𑀭𑀦𑀺𑀓𑀸𑀬𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀁 𑀓𑀸𑀢𑀼𑀁.

‘‘𑀲𑀤𑁆𑀥𑀫𑁆𑀫𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀫𑀸𑀲𑀺𑀲𑀫𑀸𑀦𑁂𑀦 𑀬𑀸 𑀫𑀬𑀸;

𑀦𑀺𑀧𑀼𑀡𑀸 𑀅𑀝𑁆𑀞𑀓𑀣𑀸 𑀆𑀭𑀤𑁆𑀥𑀸 𑀲𑀸𑀭𑀢𑁆𑀣𑀧𑀓𑀸𑀲𑀺𑀦𑀻 𑀦𑀸𑀫.

‘‘𑀲𑀸 𑀳𑀺 𑀫𑀳𑀸𑀅𑀝𑁆𑀞𑀓𑀣𑀸𑀬 𑀲𑀸𑀭𑀫𑀸𑀤𑀸𑀬 𑀦𑀺𑀝𑁆𑀞𑀺𑀢𑀸 𑀏𑀲𑀸;

𑀅𑀝𑁆𑀞𑀲𑀢𑁆𑀢𑀢𑀺𑀫𑀢𑁆𑀢𑀸𑀬 𑀧𑀸𑀴𑀺𑀬𑀸 𑀪𑀸𑀡𑀯𑀸𑀭𑁂𑀳𑀺.

‘‘𑀏𑀓𑀽𑀦𑀲𑀝𑁆𑀞𑀺𑀫𑀢𑁆𑀢𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄𑀧𑀺 𑀪𑀸𑀡𑀯𑀸𑀭𑁂𑀳𑀺;

𑀅𑀢𑁆𑀣𑀧𑁆𑀧𑀓𑀸𑀲𑀦𑀢𑁆𑀣𑀸𑀬 𑀆𑀕𑀫𑀸𑀦𑀁 𑀓𑀢𑁄 𑀬𑀲𑁆𑀫𑀸.

‘‘𑀢𑀲𑁆𑀫𑀸 𑀢𑁂𑀦 𑀲𑀳𑀸𑀬𑀁 𑀅𑀝𑁆𑀞𑀓𑀣𑀸 𑀪𑀸𑀡𑀯𑀸𑀭𑀕𑀡𑀦𑀸𑀬;

𑀣𑁄𑀓𑁂𑀦 𑀅𑀧𑀭𑀺𑀧𑀽𑀭𑀁 𑀲𑀢𑁆𑀢𑀢𑀺𑀁𑀲𑀲𑀢𑀁 𑀳𑁄𑀢𑀺.

‘‘𑀲𑀢𑁆𑀢𑀢𑀺𑀁𑀲𑀸𑀥𑀺𑀓𑀲𑀢-𑀧𑀭𑀺𑀫𑀸𑀡𑀁 𑀪𑀸𑀡𑀯𑀸𑀭𑀢𑁄 𑀏𑀯𑀁;

𑀲𑀫𑀬𑀁 𑀧𑀓𑀸𑀲𑀬𑀦𑁆𑀢𑀺𑀁 𑀫𑀳𑀸𑀯𑀺𑀳𑀸𑀭𑀸𑀥𑀺𑀯𑀸𑀲𑀻𑀦𑀁.

‘‘𑀫𑀽𑀮𑀝𑁆𑀞𑀓𑀣𑀸𑀬 𑀲𑀸𑀭𑀫𑀸𑀤𑀸𑀬 𑀫𑀬𑀸 𑀇𑀫𑀁 𑀓𑀭𑁄𑀦𑁆𑀢𑁂𑀦;

𑀬𑀁 𑀧𑀼𑀜𑁆𑀜𑀫𑀼𑀧𑀘𑀺𑀢𑀁 𑀢𑁂𑀦 𑀳𑁄𑀢𑀼 𑀲𑀩𑁆𑀩𑁄 𑀲𑀼𑀔𑀻 𑀮𑁄𑀓𑁄.

‘‘𑀏𑀢𑀺𑀲𑁆𑀲𑀸 𑀓𑀭𑀡𑀢𑁆𑀣𑀁 𑀣𑁂𑀭𑁂𑀦 𑀪𑀤𑀦𑁆𑀢𑀚𑁄𑀢𑀺𑀧𑀸𑀮𑁂𑀦;

𑀲𑀼𑀘𑀺𑀲𑀻𑀮𑁂𑀦 𑀲𑀼𑀪𑀸𑀲𑀺𑀢𑀲𑁆𑀲 𑀧𑀓𑀸𑀲𑀬𑀦𑁆𑀢𑀜𑀸𑀡𑁂𑀦.

‘‘𑀲𑀸𑀲𑀦𑀯𑀺𑀪𑀽𑀢𑀺𑀓𑀸𑀫𑁂𑀦 𑀬𑀸𑀘𑀫𑀸𑀦𑁂𑀦 𑀫𑀁 𑀲𑀼𑀪𑀕𑀼𑀡𑁂𑀦;

𑀬𑀁 𑀲𑀫𑀥𑀺𑀕𑀢𑀁 𑀧𑀼𑀜𑁆𑀜𑀁 𑀢𑁂𑀦𑀸𑀧𑀺 𑀚𑀦𑁄 𑀲𑀼𑀔𑀻 𑀪𑀯𑀢𑀽’’𑀢𑀺.

𑀧𑀭𑀫𑀯𑀺𑀲𑀼𑀤𑁆𑀥𑀲𑀤𑁆𑀥𑀸𑀩𑀼𑀤𑁆𑀥𑀺𑀯𑀻𑀭𑀺𑀬𑀧𑁆𑀧𑀝𑀺𑀫𑀡𑁆𑀟𑀺𑀢𑁂𑀦 𑀲𑀻𑀮𑀸𑀘𑀸𑀭𑀚𑁆𑀚𑀯𑀫𑀤𑁆𑀤𑀯𑀸𑀤𑀺𑀕𑀼𑀡𑀲𑀫𑀼𑀤𑀬𑀲𑀫𑀼𑀤𑀺𑀢𑁂𑀦 𑀲𑀓𑀲𑀫𑀬𑀲𑀫𑀬𑀦𑁆𑀢𑀭𑀕𑀳𑀦𑀚𑁆𑀛𑁄𑀕𑀸𑀳𑀡𑀲𑀫𑀢𑁆𑀣𑁂𑀦 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀲𑀫𑀦𑁆𑀦𑀸𑀕𑀢𑁂𑀦 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀧𑁆𑀧𑀪𑁂𑀤𑁂 𑀲𑀸𑀝𑁆𑀞𑀓𑀣𑁂 𑀲𑀢𑁆𑀣𑀼𑀲𑀸𑀲𑀦𑁂 𑀅𑀧𑁆𑀧𑀝𑀺𑀳𑀢𑀜𑀸𑀡𑀧𑁆𑀧𑀪𑀸𑀯𑁂𑀦 𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁂𑀦 𑀓𑀭𑀡𑀲𑀫𑁆𑀧𑀢𑁆𑀢𑀺𑀚𑀦𑀺𑀢𑀲𑀼𑀔𑀯𑀺𑀦𑀺𑀕𑁆𑀕𑀢𑀫𑀥𑀼𑀭𑁄𑀤𑀸𑀭𑀯𑀘𑀦𑀮𑀸𑀯𑀡𑁆𑀡𑀬𑀼𑀢𑁆𑀢𑁂𑀦 𑀬𑀼𑀢𑁆𑀢𑀫𑀼𑀢𑁆𑀢𑀯𑀸𑀤𑀺𑀦𑀸 𑀯𑀸𑀤𑀻𑀯𑀭𑁂𑀦 𑀫𑀳𑀸𑀓𑀯𑀺𑀦𑀸 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑀸𑀧𑀭𑀺𑀯𑀸𑀭𑁂 𑀙𑀴𑀪𑀺𑀜𑁆𑀜𑀸𑀤𑀺𑀧𑁆𑀧𑀪𑁂𑀤𑀕𑀼𑀡𑀧𑁆𑀧𑀝𑀺𑀫𑀡𑁆𑀟𑀺𑀢𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀩𑀼𑀤𑁆𑀥𑀻𑀦𑀁 𑀣𑁂𑀭𑀯𑀁𑀲𑀧𑁆𑀧𑀤𑀻𑀧𑀸𑀦𑀁 𑀣𑁂𑀭𑀸𑀦𑀁 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀯𑀁𑀲𑀸𑀮𑀗𑁆𑀓𑀸𑀭𑀪𑀽𑀢𑁂𑀦 𑀯𑀺𑀧𑀼𑀮𑀯𑀺𑀲𑀼𑀤𑁆𑀥𑀩𑀼𑀤𑁆𑀥𑀺𑀦𑀸 𑀩𑀼𑀤𑁆𑀥𑀖𑁄𑀲𑁄𑀢𑀺 𑀕𑀭𑀽𑀳𑀺 𑀕𑀳𑀺𑀢𑀦𑀸𑀫𑀥𑁂𑀬𑁆𑀬𑁂𑀦 𑀣𑁂𑀭𑁂𑀦 𑀓𑀢𑀸 𑀅𑀬𑀁 𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀻 𑀦𑀸𑀫 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑀝𑁆𑀞𑀓𑀣𑀸.

‘‘𑀢𑀸𑀯 𑀢𑀺𑀝𑁆𑀞𑀢𑀼 𑀮𑁄𑀓𑀲𑁆𑀫𑀺𑀁, 𑀮𑁄𑀓𑀦𑀺𑀢𑁆𑀣𑀭𑀡𑁂𑀲𑀺𑀦𑀁;

𑀤𑀲𑁆𑀲𑁂𑀦𑁆𑀢𑀻 𑀓𑀼𑀮𑀧𑀼𑀢𑁆𑀢𑀸𑀦𑀁, 𑀦𑀬𑀁 𑀲𑀻𑀮𑀯𑀺𑀲𑀼𑀤𑁆𑀥𑀺𑀬𑀸.

‘‘𑀬𑀸𑀯 𑀩𑀼𑀤𑁆𑀥𑁄𑀢𑀺 𑀦𑀸𑀫𑀫𑁆𑀧𑀺, 𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 𑀢𑀸𑀤𑀺𑀦𑁄;

𑀮𑁄𑀓𑀫𑁆𑀳𑀺 𑀮𑁄𑀓𑀚𑁂𑀝𑁆𑀞𑀲𑁆𑀲, 𑀧𑀯𑀢𑁆𑀢𑀢𑀺 𑀫𑀳𑁂𑀲𑀺𑀦𑁄’’𑀢𑀺.

𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀺𑀦𑀻 𑀦𑀸𑀫

𑀲𑀁𑀬𑀼𑀢𑁆𑀢𑀦𑀺𑀓𑀸𑀬-𑀅𑀝𑁆𑀞𑀓𑀣𑀸 𑀲𑀩𑁆𑀩𑀸𑀓𑀸𑀭𑁂𑀦 𑀦𑀺𑀝𑁆𑀞𑀺𑀢𑀸.