📜

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂

𑀏𑀓𑀓𑀦𑀺𑀧𑀸𑀢-𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀅𑀦𑀦𑁆𑀢𑀜𑀸𑀡𑀁 ¶ ¶ 𑀓𑀭𑀼𑀡𑀸𑀦𑀺𑀓𑁂𑀢𑀁,

𑀦𑀫𑀸𑀫𑀺 𑀦𑀸𑀣𑀁 𑀚𑀺𑀢𑀧𑀜𑁆𑀘𑀫𑀸𑀭𑀁;

𑀥𑀫𑁆𑀫𑀁 𑀯𑀺𑀲𑀼𑀤𑁆𑀥𑀁 𑀪𑀯𑀦𑀸𑀲𑀳𑁂𑀢𑀼𑀁,

𑀲𑀗𑁆𑀖𑀜𑁆𑀘 𑀲𑁂𑀝𑁆𑀞𑀁 𑀳𑀢𑀲𑀩𑁆𑀩𑀧𑀸𑀧𑀁.

𑀓𑀲𑁆𑀲𑀧𑀁 𑀢𑀁 𑀫𑀳𑀸𑀣𑁂𑀭𑀁, 𑀲𑀗𑁆𑀖𑀲𑁆𑀲 𑀧𑀭𑀺𑀡𑀸𑀬𑀓𑀁;

𑀤𑀻𑀧𑀲𑁆𑀫𑀺𑀁 𑀢𑀫𑁆𑀩𑀧𑀡𑁆𑀡𑀺𑀫𑁆𑀳𑀺, 𑀲𑀸𑀲𑀦𑁄𑀤𑀬𑀓𑀸𑀭𑀓𑀁.

𑀧𑀝𑀺𑀧𑀢𑁆𑀢𑀺𑀧𑀭𑀸𑀥𑀻𑀦𑀁, 𑀲𑀤𑀸𑀭𑀜𑁆𑀜𑀦𑀺𑀯𑀸𑀲𑀺𑀦𑀁;

𑀧𑀸𑀓𑀝𑀁 𑀕𑀕𑀦𑁂 𑀘𑀦𑁆𑀤-𑀫𑀡𑁆𑀟𑀮𑀁 𑀯𑀺𑀬 𑀲𑀸𑀲𑀦𑁂.

𑀲𑀗𑁆𑀖𑀲𑁆𑀲 ¶ 𑀧𑀺𑀢𑀭𑀁 𑀯𑀦𑁆𑀤𑁂, 𑀯𑀺𑀦𑀬𑁂 𑀲𑀼𑀯𑀺𑀲𑀸𑀭𑀤𑀁;

𑀬𑀁 𑀦𑀺𑀲𑁆𑀲𑀸𑀬 𑀯𑀲𑀦𑁆𑀢𑁄𑀳𑀁, 𑀯𑀼𑀟𑁆𑀠𑀺𑀧𑁆𑀧𑀢𑁆𑀢𑁄𑀲𑁆𑀫𑀺 𑀲𑀸𑀲𑀦𑁂.

𑀅𑀦𑀼𑀣𑁂𑀭𑀁 𑀫𑀳𑀸𑀧𑀜𑁆𑀜𑀁, 𑀲𑀼𑀫𑁂𑀥𑀁 𑀲𑀼𑀢𑀺𑀯𑀺𑀲𑁆𑀲𑀼𑀢𑀁;

𑀅𑀯𑀺𑀔𑀡𑁆𑀟𑀺𑀢𑀲𑀻𑀮𑀸𑀤𑀺-𑀧𑀭𑀺𑀲𑀼𑀤𑁆𑀥𑀕𑀼𑀡𑁄𑀤𑀬𑀁.

𑀩𑀳𑀼𑀲𑁆𑀲𑀼𑀢𑀁 𑀲𑀢𑀺𑀫𑀦𑁆𑀢𑀁, 𑀤𑀦𑁆𑀢𑀁 𑀲𑀦𑁆𑀢𑀁 𑀲𑀫𑀸𑀳𑀺𑀢𑀁;

𑀦𑀫𑀸𑀫𑀺 𑀲𑀺𑀭𑀲𑀸 𑀥𑀻𑀭𑀁, 𑀕𑀭𑀼𑀁 𑀫𑁂 𑀕𑀡𑀯𑀸𑀘𑀓𑀁.

𑀆𑀕𑀢𑀸𑀕𑀫𑀢𑀓𑁆𑀓𑁂𑀲𑀼 ¶ , 𑀲𑀤𑁆𑀤𑀲𑀢𑁆𑀣𑀦𑀬𑀜𑁆𑀜𑀼𑀲𑀼;

𑀬𑀲𑁆𑀲𑀦𑁆𑀢𑁂𑀯𑀸𑀲𑀺𑀪𑀺𑀓𑁆𑀔𑀽𑀲𑀼, 𑀲𑀸𑀲𑀦𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀁.

𑀬𑁄 𑀲𑀻𑀳𑀴𑀺𑀦𑁆𑀤𑁄 𑀥𑀺𑀢𑀺𑀫𑀸 𑀬𑀲𑀲𑁆𑀲𑀻,

𑀉𑀴𑀸𑀭𑀧𑀜𑁆𑀜𑁄 𑀦𑀺𑀧𑀼𑀡𑁄 𑀓𑀮𑀸𑀲𑀼;

𑀚𑀸𑀢𑁄 𑀯𑀺𑀲𑀼𑀤𑁆𑀥𑁂 𑀭𑀯𑀺𑀲𑁄𑀫𑀯𑀁𑀲𑁂,

𑀫𑀳𑀩𑁆𑀩𑀮𑁄 𑀅𑀩𑁆𑀪𑀼𑀢𑀯𑀼𑀢𑁆𑀢𑀺𑀢𑁂𑀚𑁄.

𑀚𑀺𑀢𑁆𑀯𑀸𑀭𑀺𑀯𑀕𑁆𑀕𑀁 𑀅𑀢𑀺𑀤𑀼𑀧𑁆𑀧𑀲𑀬𑁆𑀳𑀁,

𑀅𑀦𑀜𑁆𑀜𑀲𑀸𑀥𑀸𑀭𑀡𑀯𑀺𑀓𑁆𑀓𑀫𑁂𑀦;

𑀧𑀢𑁆𑀢𑀸𑀪𑀺𑀲𑁂𑀓𑁄 𑀚𑀺𑀦𑀥𑀫𑁆𑀫𑀲𑁂𑀯𑀻,

𑀅𑀪𑀺𑀧𑁆𑀧𑀲𑀦𑁆𑀦𑁄 𑀭𑀢𑀦𑀢𑁆𑀢𑀬𑀫𑁆𑀳𑀺.

𑀘𑀺𑀭𑀁 𑀯𑀺𑀪𑀺𑀦𑁆𑀦𑁂 𑀚𑀺𑀦𑀲𑀸𑀲𑀦𑀲𑁆𑀫𑀺𑀁,

𑀧𑀘𑁆𑀘𑀢𑁆𑀣𑀺𑀓𑁂 𑀲𑀼𑀝𑁆𑀞𑀼 𑀯𑀺𑀦𑀺𑀕𑁆𑀕𑀳𑁂𑀢𑁆𑀯𑀸;

𑀲𑀼𑀥𑀁𑀯 𑀲𑀸𑀫𑀕𑁆𑀕𑀺𑀭𑀲𑀁 𑀧𑀲𑀢𑁆𑀣𑀁,

𑀧𑀸𑀬𑁂𑀲𑀺 𑀪𑀺𑀓𑁆𑀔𑀽 𑀧𑀭𑀺𑀲𑀼𑀤𑁆𑀥𑀲𑀻𑀮𑁂.

𑀓𑀢𑁆𑀯𑀸 𑀯𑀺𑀳𑀸𑀭𑁂 𑀯𑀺𑀧𑀼𑀮𑁂 𑀘 𑀭𑀫𑁆𑀫𑁂,

𑀢𑀢𑁆𑀭𑀧𑁆𑀧𑀺𑀢𑁂𑀦𑁂𑀓𑀲𑀳𑀲𑁆𑀲𑀲𑀗𑁆𑀔𑁂;

𑀪𑀺𑀓𑁆𑀔𑀽 ¶ 𑀅𑀲𑁂𑀲𑁂 𑀘𑀢𑀼𑀧𑀘𑁆𑀘𑀬𑁂𑀳𑀺,

𑀲𑀦𑁆𑀢𑀧𑁆𑀧𑀬𑀦𑁆𑀢𑁄 𑀲𑀼𑀘𑀺𑀭𑀁 𑀅𑀔𑀡𑁆𑀟𑀁.

𑀲𑀤𑁆𑀥𑀫𑁆𑀫𑀯𑀼𑀤𑁆𑀥𑀺𑀁 𑀅𑀪𑀺𑀓𑀗𑁆𑀔𑀫𑀸𑀦𑁄,

𑀲𑀬𑀫𑁆𑀧𑀺 𑀪𑀺𑀓𑁆𑀔𑀽 𑀅𑀦𑀼𑀲𑀸𑀲𑀬𑀺𑀢𑁆𑀯𑀸;

𑀦𑀺𑀬𑁄𑀚𑀬𑀁 𑀕𑀦𑁆𑀣𑀯𑀺𑀧𑀲𑁆𑀲𑀦𑀸𑀲𑀼,

𑀅𑀓𑀸𑀲𑀺 𑀯𑀼𑀤𑁆𑀥𑀺𑀁 𑀚𑀺𑀦𑀲𑀸𑀲𑀦𑀲𑁆𑀲.

𑀢𑁂𑀦𑀸𑀳𑀫𑀘𑁆𑀘𑀦𑁆𑀢𑀫𑀦𑀼𑀕𑁆𑀕𑀳𑀻𑀢𑁄,

𑀅𑀦𑀜𑁆𑀜𑀲𑀸𑀥𑀸𑀭𑀡𑀲𑀗𑁆𑀕𑀳𑁂𑀦;

𑀬𑀲𑁆𑀫𑀸 𑀧𑀭𑀓𑁆𑀓𑀦𑁆𑀢𑀪𑀼𑀚𑀯𑁆𑀳𑀬𑁂𑀦,

𑀅𑀚𑁆𑀛𑁂𑀲𑀺𑀢𑁄 𑀪𑀺𑀓𑁆𑀔𑀼𑀕𑀡𑀲𑁆𑀲 𑀫𑀚𑁆𑀛𑁂.

𑀢𑀲𑁆𑀫𑀸 ¶ 𑀅𑀦𑀼𑀢𑁆𑀢𑀸𑀦𑀧𑀤𑀸𑀦𑀫𑀢𑁆𑀣𑀁,

𑀲𑁂𑀝𑁆𑀞𑀸𑀬 𑀅𑀗𑁆𑀕𑀼𑀢𑁆𑀢𑀭𑀯𑀡𑁆𑀡𑀦𑀸𑀬;

𑀲𑀦𑁆𑀤𑀲𑁆𑀲𑀬𑀺𑀲𑁆𑀲𑀁 𑀲𑀓𑀮𑀁 𑀲𑀼𑀩𑁄𑀤𑁆𑀥𑀼𑀁,

𑀦𑀺𑀲𑁆𑀲𑀸𑀬 𑀧𑀼𑀩𑁆𑀩𑀸𑀘𑀭𑀺𑀬𑀧𑁆𑀧𑀪𑀸𑀯𑀁.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸

𑁧. 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀁 𑀦𑀫𑀲𑁆𑀲𑀺𑀢𑀼𑀓𑀸𑀫𑁄 𑀢𑀲𑁆𑀲 𑀯𑀺𑀲𑀺𑀝𑁆𑀞𑀕𑀼𑀡𑀬𑁄𑀕𑀲𑀦𑁆𑀤𑀲𑁆𑀲𑀦𑀢𑁆𑀣𑀁 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀯𑀺𑀲𑀺𑀝𑁆𑀞𑀕𑀼𑀡𑀬𑁄𑀕𑁂𑀦 𑀳𑀺 𑀯𑀦𑁆𑀤𑀦𑀸𑀭𑀳𑀪𑀸𑀯𑁄, 𑀯𑀦𑁆𑀤𑀦𑀸𑀭𑀳𑁂 𑀘 𑀓𑀢𑀸 𑀯𑀦𑁆𑀤𑀦𑀸 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀲𑀸𑀥𑁂𑀢𑀺. 𑀏𑀢𑁆𑀣 𑀘 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑀓𑀭𑀡𑀧𑁆𑀧𑀬𑁄𑀚𑀦𑀁 𑀢𑀢𑁆𑀣 𑀢𑀢𑁆𑀣 𑀩𑀳𑀼𑀥𑀸 𑀧𑀧𑀜𑁆𑀘𑁂𑀦𑁆𑀢𑀺 𑀆𑀘𑀭𑀺𑀬𑀸, 𑀫𑀬𑀁 𑀧𑀦 𑀇𑀥𑀸𑀥𑀺𑀧𑁆𑀧𑁂𑀢𑀫𑁂𑀯 𑀧𑀬𑁄𑀚𑀦𑀁 𑀤𑀲𑁆𑀲𑀬𑀺𑀲𑁆𑀲𑀸𑀫, 𑀢𑀲𑁆𑀫𑀸 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑀓𑀭𑀡𑀁 𑀬𑀣𑀸𑀧𑀝𑀺𑀜𑁆𑀜𑀸𑀢𑀲𑀁𑀯𑀡𑁆𑀡𑀦𑀸𑀬 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀢𑁆𑀣𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀫𑁂𑀯 𑀳𑀺 𑀧𑀬𑁄𑀚𑀦𑀁 𑀆𑀘𑀭𑀺𑀬𑁂𑀦 𑀇𑀥𑀸𑀥𑀺𑀧𑁆𑀧𑁂𑀢𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 𑁋

‘‘𑀇𑀢𑀺 𑀫𑁂 𑀧𑀲𑀦𑁆𑀦𑀫𑀢𑀺𑀦𑁄, 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸𑀫𑀬𑀁 𑀧𑀼𑀜𑁆𑀜𑀁;

𑀬𑀁 𑀲𑀼𑀯𑀺𑀳𑀢𑀦𑁆𑀢𑀭𑀸𑀬𑁄, 𑀳𑀼𑀢𑁆𑀯𑀸 𑀢𑀲𑁆𑀲𑀸𑀦𑀼𑀪𑀸𑀯𑁂𑀦𑀸’’𑀢𑀺.

𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑀓𑀭𑀡𑁂𑀦 ¶ 𑀘𑁂𑀢𑁆𑀣 𑀬𑀣𑀸𑀧𑀝𑀺𑀜𑁆𑀜𑀸𑀢𑀲𑀁𑀯𑀡𑁆𑀡𑀦𑀸𑀬 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀁 𑀭𑀢𑀦𑀢𑁆𑀢𑀬𑀧𑀽𑀚𑀸𑀬 𑀧𑀜𑁆𑀜𑀸𑀧𑀸𑀝𑀯𑀢𑁄, 𑀢𑀸𑀬 𑀧𑀜𑁆𑀜𑀸𑀧𑀸𑀝𑀯𑀜𑁆𑀘 𑀭𑀸𑀕𑀸𑀤𑀺𑀫𑀮𑀯𑀺𑀥𑀫𑀦𑀢𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑀲𑁆𑀫𑀺𑀁, 𑀫𑀳𑀸𑀦𑀸𑀫, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀉𑀚𑀼𑀕𑀢𑀫𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁬.𑁧𑁦; 𑁧𑁧.𑁧𑁧).

𑀢𑀲𑁆𑀫𑀸 𑀭𑀢𑀦𑀢𑁆𑀢𑀬𑀧𑀽𑀚𑀦𑁂𑀦 𑀯𑀺𑀓𑁆𑀔𑀸𑀮𑀺𑀢𑀫𑀮𑀸𑀬 𑀧𑀜𑁆𑀜𑀸𑀬 𑀧𑀸𑀝𑀯𑀲𑀺𑀤𑁆𑀥𑀺.

𑀅𑀣 𑀯𑀸 𑀭𑀢𑀦𑀢𑁆𑀢𑀬𑀧𑀽𑀚𑀦𑀲𑁆𑀲 𑀧𑀜𑁆𑀜𑀸𑀧𑀤𑀝𑁆𑀞𑀸𑀦𑀲𑀫𑀸𑀥𑀺𑀳𑁂𑀢𑀼𑀢𑁆𑀢𑀸 𑀧𑀜𑁆𑀜𑀸𑀧𑀸𑀝𑀯𑀁. 𑀯𑀼𑀢𑁆𑀢𑀜𑁆𑀳𑀺 𑀢𑀲𑁆𑀲 𑀲𑀫𑀸𑀥𑀺𑀳𑁂𑀢𑀼𑀢𑁆𑀢𑀁 𑁋

‘‘𑀉𑀚𑀼𑀕𑀢𑀘𑀺𑀢𑁆𑀢𑁄 ¶ 𑀔𑁄 𑀧𑀦, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚𑀁, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀺, 𑀧𑀻𑀢𑀺𑀫𑀦𑀲𑁆𑀲 𑀓𑀸𑀬𑁄 𑀧𑀲𑁆𑀲𑀫𑁆𑀪𑀢𑀺, 𑀧𑀲𑁆𑀲𑀤𑁆𑀥𑀓𑀸𑀬𑁄 𑀲𑀼𑀔𑀁 𑀯𑁂𑀤𑀺𑀬𑀢𑀺, 𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻’’𑀢𑀺 (𑀅. 𑀦𑀺. 𑁬.𑁧𑁦; 𑁧𑁧.𑁧𑁧).

𑀲𑀫𑀸𑀥𑀺𑀲𑁆𑀲 𑀘 𑀧𑀜𑁆𑀜𑀸𑀬 𑀧𑀤𑀝𑁆𑀞𑀸𑀦𑀪𑀸𑀯𑁄 𑀯𑀼𑀢𑁆𑀢𑁄𑀬𑁂𑀯 𑁋 ‘‘𑀲𑀫𑀸𑀳𑀺𑀢𑁄 𑀬𑀣𑀸𑀪𑀽𑀢𑀁 𑀧𑀚𑀸𑀦𑀸𑀢𑀻’’𑀢𑀺 (𑀲𑀁. 𑀦𑀺. 𑁩.𑁫; 𑁪.𑁯𑁯; 𑁫.𑁧𑁦𑁭𑁧). 𑀢𑀢𑁄 𑀏𑀯𑀁 𑀧𑀝𑀼𑀪𑀽𑀢𑀸𑀬 𑀧𑀜𑁆𑀜𑀸𑀬 𑀧𑀝𑀺𑀜𑁆𑀜𑀸𑀫𑀳𑀢𑁆𑀢𑀓𑀢𑀁 𑀔𑁂𑀤𑀫𑀪𑀺𑀪𑀼𑀬𑁆𑀬 𑀅𑀦𑀦𑁆𑀢𑀭𑀸𑀬𑁂𑀦 𑀲𑀁𑀯𑀡𑁆𑀡𑀦𑀁 𑀲𑀫𑀸𑀧𑀬𑀺𑀲𑁆𑀲𑀢𑀺.

𑀅𑀣 𑀯𑀸 𑀭𑀢𑀦𑀢𑁆𑀢𑀬𑀧𑀽𑀚𑀸𑀬 𑀆𑀬𑀼𑀯𑀡𑁆𑀡𑀲𑀼𑀔𑀩𑀮𑀯𑀟𑁆𑀠𑀦𑀢𑁄 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑁂𑀦 𑀳𑀺 𑀆𑀬𑀼𑀯𑀡𑁆𑀡𑀲𑀼𑀔𑀩𑀮𑀸𑀦𑀺 𑀯𑀟𑁆𑀠𑀦𑁆𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀅𑀪𑀺𑀯𑀸𑀤𑀦𑀲𑀻𑀮𑀺𑀲𑁆𑀲, 𑀦𑀺𑀘𑁆𑀘𑀁 𑀯𑀼𑀟𑁆𑀠𑀸𑀧𑀘𑀸𑀬𑀺𑀦𑁄;

𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀯𑀟𑁆𑀠𑀦𑁆𑀢𑀺, 𑀆𑀬𑀼 𑀯𑀡𑁆𑀡𑁄 𑀲𑀼𑀔𑀁 𑀩𑀮’’𑀦𑁆𑀢𑀺. (𑀥. 𑀧. 𑁧𑁦𑁯) 𑁋

𑀢𑀢𑁄 𑀆𑀬𑀼𑀯𑀡𑁆𑀡𑀲𑀼𑀔𑀩𑀮𑀯𑀼𑀤𑁆𑀥𑀺𑀬𑀸 𑀳𑁄𑀢𑁂𑀯 𑀓𑀸𑀭𑀺𑀬𑀦𑀺𑀝𑁆𑀞𑀸𑀦𑀁.

𑀅𑀣 ¶ 𑀯𑀸 𑀭𑀢𑀦𑀢𑁆𑀢𑀬𑀕𑀸𑀭𑀯𑀲𑁆𑀲 𑀧𑀝𑀺𑀪𑀸𑀦𑀸𑀧𑀭𑀺𑀳𑀸𑀦𑀸𑀯𑀳𑀢𑁆𑀢𑀸. 𑀅𑀧𑀭𑀺𑀳𑀸𑀦𑀸𑀯𑀳𑀜𑁆𑀳𑀺 𑀢𑀻𑀲𑀼𑀧𑀺 𑀭𑀢𑀦𑁂𑀲𑀼 𑀕𑀸𑀭𑀯𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀳𑀸𑀦𑀻𑀬𑀸 𑀥𑀫𑁆𑀫𑀸. 𑀓𑀢𑀫𑁂 𑀲𑀢𑁆𑀢? 𑀲𑀢𑁆𑀣𑀼𑀕𑀸𑀭𑀯𑀢𑀸, 𑀥𑀫𑁆𑀫𑀕𑀸𑀭𑀯𑀢𑀸, 𑀲𑀗𑁆𑀖𑀕𑀸𑀭𑀯𑀢𑀸, 𑀲𑀺𑀓𑁆𑀔𑀸𑀕𑀸𑀭𑀯𑀢𑀸, 𑀲𑀫𑀸𑀥𑀺𑀕𑀸𑀭𑀯𑀢𑀸, 𑀲𑁄𑀯𑀘𑀲𑁆𑀲𑀢𑀸, 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸’’𑀢𑀺 (𑀅. 𑀦𑀺. 𑁭.𑁩𑁪).

𑀳𑁄𑀢𑁂𑀯 𑀘 𑀢𑀢𑁄 𑀧𑀝𑀺𑀪𑀸𑀦𑀸𑀧𑀭𑀺𑀳𑀸𑀦𑁂𑀦 𑀬𑀣𑀸𑀧𑀝𑀺𑀜𑁆𑀜𑀸𑀢𑀧𑀭𑀺𑀲𑀫𑀸𑀧𑀦𑀁.

𑀅𑀣 𑀯𑀸 𑀧𑀲𑀸𑀤𑀯𑀢𑁆𑀣𑀽𑀲𑀼 𑀧𑀽𑀚𑀸𑀬 𑀧𑀼𑀜𑁆𑀜𑀸𑀢𑀺𑀲𑀬𑀪𑀸𑀯𑀢𑁄. 𑀯𑀼𑀢𑁆𑀢𑀜𑁆𑀳𑀺 𑀢𑀲𑁆𑀲𑀸 𑀧𑀼𑀜𑁆𑀜𑀸𑀢𑀺𑀲𑀬𑀢𑁆𑀢𑀁 𑁋

‘‘𑀧𑀽𑀚𑀸𑀭𑀳𑁂 𑀧𑀽𑀚𑀬𑀢𑁄, 𑀩𑀼𑀤𑁆𑀥𑁂 𑀬𑀤𑀺 𑀯 𑀲𑀸𑀯𑀓𑁂;

𑀧𑀧𑀜𑁆𑀘𑀲𑀫𑀢𑀺𑀓𑁆𑀓𑀦𑁆𑀢𑁂, 𑀢𑀺𑀡𑁆𑀡𑀲𑁄𑀓𑀧𑀭𑀺𑀤𑁆𑀤𑀯𑁂.

𑀢𑁂 ¶ 𑀢𑀸𑀤𑀺𑀲𑁂 𑀧𑀽𑀚𑀬𑀢𑁄, 𑀦𑀺𑀩𑁆𑀩𑀼𑀢𑁂 𑀅𑀓𑀼𑀢𑁄𑀪𑀬𑁂;

𑀦 𑀲𑀓𑁆𑀓𑀸 𑀧𑀼𑀜𑁆𑀜𑀁 𑀲𑀗𑁆𑀔𑀸𑀢𑀼𑀁, 𑀇𑀫𑁂𑀢𑁆𑀢𑀫𑀧𑀺 𑀓𑁂𑀦𑀘𑀻’’𑀢𑀺. (𑀥. 𑀧. 𑁧𑁯𑁫-𑁧𑁯𑁬; 𑀅𑀧. 𑀣𑁂𑀭 𑁧.𑁧𑁦.𑁧-𑁨);

𑀧𑀼𑀜𑁆𑀜𑀸𑀢𑀺𑀲𑀬𑁄 𑀘 𑀬𑀣𑀸𑀥𑀺𑀧𑁆𑀧𑁂𑀢𑀧𑀭𑀺𑀲𑀫𑀸𑀧𑀦𑀽𑀧𑀸𑀬𑁄. 𑀬𑀣𑀸𑀳 𑁋

‘‘𑀏𑀲 𑀤𑁂𑀯𑀫𑀦𑀼𑀲𑁆𑀲𑀸𑀦𑀁, 𑀲𑀩𑁆𑀩𑀓𑀸𑀫𑀤𑀤𑁄 𑀦𑀺𑀥𑀺;

𑀬𑀁 𑀬𑀤𑁂𑀯𑀸𑀪𑀺𑀧𑀢𑁆𑀣𑁂𑀦𑁆𑀢𑀺, 𑀲𑀩𑁆𑀩𑀫𑁂𑀢𑁂𑀦 𑀮𑀩𑁆𑀪𑀢𑀻’’𑀢𑀺. (𑀔𑀼. 𑀧𑀸. 𑁮.𑁧𑁦);

𑀉𑀧𑀸𑀬𑁂𑀲𑀼 𑀘 𑀧𑀝𑀺𑀧𑀦𑁆𑀦𑀲𑁆𑀲 𑀳𑁄𑀢𑁂𑀯 𑀓𑀸𑀭𑀺𑀬𑀦𑀺𑀝𑁆𑀞𑀸𑀦𑀁. 𑀭𑀢𑀦𑀢𑁆𑀢𑀬𑀧𑀽𑀚𑀸 𑀳𑀺 𑀦𑀺𑀭𑀢𑀺𑀲𑀬𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀲𑀫𑁆𑀩𑀼𑀤𑁆𑀥𑀺𑀬𑀸 𑀅𑀧𑀭𑀺𑀫𑁂𑀬𑁆𑀬𑀧𑁆𑀧𑀪𑀸𑀯𑁄 𑀧𑀼𑀜𑁆𑀜𑀸𑀢𑀺𑀲𑀬𑁄𑀢𑀺 𑀩𑀳𑀼𑀯𑀺𑀥𑀦𑁆𑀢𑀭𑀸𑀬𑁂𑀧𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀅𑀦𑁆𑀢𑀭𑀸𑀬𑀦𑀺𑀩𑀦𑁆𑀥𑀦𑀲𑀓𑀮𑀲𑀁𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀸𑀬 𑀧𑀳𑁄𑀢𑀺, 𑀪𑀬𑀸𑀤𑀺𑀉𑀧𑀤𑁆𑀤𑀯𑀜𑁆𑀘 𑀦𑀺𑀯𑀸𑀭𑁂𑀢𑀺. 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀧𑁆𑀧𑀡𑀸𑀫𑀓𑀭𑀡𑀁 𑀬𑀣𑀸𑀧𑀝𑀺𑀜𑁆𑀜𑀸𑀢𑀲𑀁𑀯𑀡𑁆𑀡𑀦𑀸𑀬 𑀅𑀦𑀦𑁆𑀢𑀭𑀸𑀬𑁂𑀦 𑀧𑀭𑀺𑀲𑀫𑀸𑀧𑀦𑀢𑁆𑀣’’𑀦𑁆𑀢𑀺.

𑀏𑀯𑀜𑁆𑀘 𑀲𑀧𑁆𑀧𑀬𑁄𑀚𑀦𑀁 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀁 𑀓𑀢𑁆𑀢𑀼𑀓𑀸𑀫𑁄 𑀧𑀞𑀫𑀁 𑀢𑀸𑀯 𑀪𑀕𑀯𑀢𑁄 𑀯𑀦𑁆𑀤𑀦𑀁 𑀓𑀸𑀢𑀼𑀁 𑀢𑀫𑁆𑀫𑀽𑀮𑀓𑀢𑁆𑀢𑀸 ¶ 𑀲𑁂𑀲𑀭𑀢𑀦𑀸𑀦𑀁 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑀁…𑀧𑁂… 𑀕𑀢𑀺𑀯𑀺𑀫𑀼𑀢𑁆𑀢’’𑀦𑁆𑀢𑀺 𑀆𑀳. 𑀢𑀢𑁆𑀣 𑀬𑀲𑁆𑀲𑀸 𑀤𑁂𑀲𑀦𑀸𑀬 𑀲𑀁𑀯𑀡𑁆𑀡𑀦𑀁 𑀓𑀢𑁆𑀢𑀼𑀓𑀸𑀫𑁄, 𑀲𑀸 𑀦 𑀯𑀺𑀦𑀬𑀤𑁂𑀲𑀦𑀸 𑀯𑀺𑀬 𑀓𑀭𑀼𑀡𑀸𑀧𑀥𑀸𑀦𑀸, 𑀦𑀸𑀧𑀺 𑀅𑀪𑀺𑀥𑀫𑁆𑀫𑀤𑁂𑀲𑀦𑀸 𑀯𑀺𑀬 𑀧𑀜𑁆𑀜𑀸𑀧𑀥𑀸𑀦𑀸, 𑀅𑀣 𑀔𑁄 𑀓𑀭𑀼𑀡𑀸𑀧𑀜𑁆𑀜𑀸𑀧𑀥𑀸𑀦𑀸𑀢𑀺 𑀢𑀤𑀼𑀪𑀬𑀧𑁆𑀧𑀥𑀸𑀦𑀫𑁂𑀯 𑀢𑀸𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀣𑁄𑀫𑀦𑀁 𑀓𑀸𑀢𑀼𑀁 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑀁, 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀺𑀭𑀢𑀻𑀢𑀺 𑀓𑀭𑀼𑀡𑀸, 𑀧𑀭𑀤𑀼𑀓𑁆𑀔𑀁 𑀯𑀺𑀓𑁆𑀔𑀺𑀧𑀢𑀺 𑀅𑀧𑀦𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀓𑀺𑀡𑀸𑀢𑀻𑀢𑀺 𑀓𑀭𑀼𑀡𑀸, 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀓𑀸𑀭𑀼𑀡𑀺𑀓𑀁 𑀳𑀺𑀁𑀲𑀢𑀺 𑀯𑀺𑀩𑀸𑀥𑀢𑀻𑀢𑀺 𑀅𑀢𑁆𑀣𑁄. 𑀧𑀭𑀤𑀼𑀓𑁆𑀔𑁂 𑀲𑀢𑀺 𑀲𑀸𑀥𑀽𑀦𑀁 𑀓𑀫𑁆𑀧𑀦𑀁 𑀳𑀤𑀬𑀔𑁂𑀤𑀁 𑀓𑀭𑁄𑀢𑀻𑀢𑀺 𑀯𑀸 𑀓𑀭𑀼𑀡𑀸. 𑀅𑀣 𑀯𑀸 𑀓𑀫𑀺𑀢𑀺 𑀲𑀼𑀔𑀁, 𑀢𑀁 𑀭𑀼𑀦𑁆𑀥𑀢𑀻𑀢𑀺 𑀓𑀭𑀼𑀡𑀸. 𑀏𑀲𑀸 𑀳𑀺 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸𑀮𑀓𑁆𑀔𑀡𑀸 𑀅𑀢𑁆𑀢𑀲𑀼𑀔𑀦𑀺𑀭𑀧𑁂𑀓𑁆𑀔𑀢𑀸𑀬 𑀓𑀸𑀭𑀼𑀡𑀺𑀓𑀸𑀦𑀁 𑀲𑀼𑀔𑀁 𑀭𑀼𑀦𑁆𑀥𑀢𑀺 𑀯𑀺𑀩𑀦𑁆𑀥𑀢𑀻𑀢𑀺 𑀅𑀢𑁆𑀣𑁄. 𑀓𑀭𑀼𑀡𑀸𑀬 𑀲𑀻𑀢𑀮𑀁 𑀓𑀭𑀼𑀡𑀸𑀲𑀻𑀢𑀮𑀁, 𑀓𑀭𑀼𑀡𑀸𑀲𑀻𑀢𑀮𑀁 𑀳𑀤𑀬𑀁 𑀅𑀲𑁆𑀲𑀸𑀢𑀺 𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑁄, 𑀢𑀁 𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑀁.

𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 𑀧𑀭𑁂𑀲𑀁 𑀳𑀺𑀢𑁄𑀧𑀲𑀁𑀳𑀸𑀭𑀲𑀼𑀔𑀸𑀤𑀺𑀅𑀧𑀭𑀺𑀳𑀸𑀦𑀺𑀘𑁆𑀙𑀦𑀲𑀪𑀸𑀯𑀢𑀸𑀬, 𑀩𑁆𑀬𑀸𑀧𑀸𑀤𑀸𑀭𑀢𑀻𑀦𑀁 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑀸𑀬 𑀘 𑀲𑀢𑁆𑀢𑀲𑀦𑁆𑀢𑀸𑀦𑀕𑀢𑀲𑀦𑁆𑀢𑀸𑀧𑀯𑀺𑀘𑁆𑀙𑁂𑀤𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀫𑁂𑀢𑁆𑀢𑀸𑀫𑀼𑀤𑀺𑀢𑀸𑀦𑀫𑁆𑀧𑀺 𑀘𑀺𑀢𑁆𑀢𑀲𑀻𑀢𑀮𑀪𑀸𑀯𑀓𑀸𑀭𑀡𑀢𑀸 𑀉𑀧𑀮𑀩𑁆𑀪𑀢𑀺, 𑀢𑀣𑀸𑀧𑀺 𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀧𑀭𑀽𑀧𑀢𑀸𑀧𑀸𑀲𑀳𑀦𑀭𑀲𑀸 𑀅𑀯𑀺𑀳𑀺𑀁𑀲𑀪𑀽𑀢𑀸 ¶ 𑀓𑀭𑀼𑀡𑀸 𑀯𑀺𑀲𑁂𑀲𑁂𑀦 𑀪𑀕𑀯𑀢𑁄 𑀘𑀺𑀢𑁆𑀢𑀲𑁆𑀲 𑀘𑀺𑀢𑁆𑀢𑀧𑁆𑀧𑀲𑁆𑀲𑀤𑁆𑀥𑀺 𑀯𑀺𑀬 𑀲𑀻𑀢𑀺𑀪𑀸𑀯𑀦𑀺𑀫𑀺𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑁋 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺. 𑀓𑀭𑀼𑀡𑀸𑀫𑀼𑀔𑁂𑀦 𑀯𑀸 𑀫𑁂𑀢𑁆𑀢𑀸𑀫𑀼𑀤𑀺𑀢𑀸𑀦𑀫𑁆𑀧𑀺 𑀳𑀤𑀬𑀲𑀻𑀢𑀮𑀪𑀸𑀯𑀓𑀸𑀭𑀡𑀢𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀅𑀲𑀸𑀥𑀸𑀭𑀡𑀜𑀸𑀡𑀯𑀺𑀲𑁂𑀲𑀦𑀺𑀩𑀦𑁆𑀥𑀦𑀪𑀽𑀢𑀸 𑀲𑀸𑀢𑀺𑀲𑀬𑀁 𑀦𑀺𑀭𑀯𑀲𑁂𑀲𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀯𑀺𑀬 𑀲𑀯𑀺𑀲𑀬𑀩𑁆𑀬𑀸𑀧𑀺𑀢𑀸𑀬 𑀫𑀳𑀸𑀓𑀭𑀼𑀡𑀸𑀪𑀸𑀯𑀁 𑀉𑀧𑀕𑀢𑀸 𑀓𑀭𑀼𑀡𑀸𑀯 𑀪𑀕𑀯𑀢𑁄 𑀅𑀢𑀺𑀲𑀬𑁂𑀦 𑀳𑀤𑀬𑀲𑀻𑀢𑀮𑀪𑀸𑀯𑀳𑁂𑀢𑀽𑀢𑀺 𑀆𑀳 𑁋 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺. 𑀅𑀣 𑀯𑀸 𑀲𑀢𑀺𑀧𑀺 𑀫𑁂𑀢𑁆𑀢𑀸𑀫𑀼𑀤𑀺𑀢𑀸𑀦𑀁 𑀲𑀸𑀢𑀺𑀲𑀬𑁂 𑀳𑀤𑀬𑀲𑀻𑀢𑀺𑀪𑀸𑀯𑀦𑀺𑀩𑀦𑁆𑀥𑀦𑀢𑁆𑀢𑁂 𑀲𑀓𑀮𑀩𑀼𑀤𑁆𑀥𑀕𑀼𑀡𑀯𑀺𑀲𑁂𑀲𑀓𑀸𑀭𑀡𑀢𑀸𑀬 𑀢𑀸𑀲𑀫𑁆𑀧𑀺 𑀓𑀸𑀭𑀡𑀦𑁆𑀢𑀺 𑀓𑀭𑀼𑀡𑀸𑀯 𑀪𑀕𑀯𑀢𑁄 ‘‘𑀳𑀤𑀬𑀲𑀻𑀢𑀮𑀪𑀸𑀯𑀓𑀸𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀸. 𑀓𑀭𑀼𑀡𑀸𑀦𑀺𑀤𑀸𑀦𑀸 𑀳𑀺 𑀲𑀩𑁆𑀩𑁂𑀧𑀺 𑀩𑀼𑀤𑁆𑀥𑀕𑀼𑀡𑀸. 𑀓𑀭𑀼𑀡𑀸𑀦𑀼𑀪𑀸𑀯𑀦𑀺𑀩𑁆𑀩𑀸𑀧𑀺𑀬𑀫𑀸𑀦𑀲𑀁𑀲𑀸𑀭𑀤𑀼𑀓𑁆𑀔𑀲𑀦𑁆𑀢𑀸𑀧𑀲𑁆𑀲 𑀳𑀺 𑀪𑀕𑀯𑀢𑁄 𑀧𑀭𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀢𑀸𑀬 𑀅𑀦𑁂𑀓𑀸𑀦𑀺𑀧𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀸𑀦𑀁 𑀅𑀓𑀺𑀮𑀦𑁆𑀢𑀭𑀽𑀧𑀲𑁆𑀲𑁂𑀯 𑀦𑀺𑀭𑀯𑀲𑁂𑀲𑀩𑀼𑀤𑁆𑀥𑀓𑀭𑀥𑀫𑁆𑀫𑀲𑀫𑁆𑀪𑀭𑀡𑀦𑀺𑀭𑀢𑀲𑁆𑀲 𑀲𑀫𑀥𑀺𑀕𑀢𑀥𑀫𑁆𑀫𑀸𑀥𑀺𑀧𑀢𑁂𑀬𑁆𑀬𑀲𑁆𑀲 𑀘 𑀲𑀦𑁆𑀦𑀺𑀳𑀺𑀢𑁂𑀲𑀼𑀧𑀺 𑀲𑀢𑁆𑀢𑀲𑀗𑁆𑀔𑀸𑀭𑀲𑀫𑀼𑀧𑀦𑀻𑀢𑀳𑀤𑀬𑀽𑀧𑀢𑀸𑀧𑀦𑀺𑀫𑀺𑀢𑁆𑀢𑁂𑀲𑀼 𑀦 𑀈𑀲𑀓𑀫𑁆𑀧𑀺 𑀘𑀺𑀢𑁆𑀢𑀲𑀻𑀢𑀺𑀪𑀸𑀯𑀲𑁆𑀲 𑀅𑀜𑁆𑀜𑀣𑀢𑁆𑀢𑀫𑀳𑁄𑀲𑀻𑀢𑀺. 𑀏𑀢𑀲𑁆𑀫𑀺𑀜𑁆𑀘 𑀅𑀢𑁆𑀣𑀯𑀺𑀓𑀧𑁆𑀧𑁂 𑀢𑀻𑀲𑀼𑀧𑀺 𑀅𑀯𑀢𑁆𑀣𑀸𑀲𑀼 𑀪𑀕𑀯𑀢𑁄 𑀓𑀭𑀼𑀡𑀸 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀚𑀸𑀦𑀸𑀢𑀻𑀢𑀺 𑀧𑀜𑁆𑀜𑀸, 𑀬𑀣𑀸𑀲𑀪𑀸𑀯𑀁 𑀧𑀓𑀸𑀭𑁂𑀳𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀧𑀜𑁆𑀜𑀸𑀯 𑀜𑁂𑀬𑁆𑀬𑀸𑀯𑀭𑀡𑀧𑁆𑀧𑀳𑀸𑀦𑀢𑁄 𑀧𑀓𑀸𑀭𑁂𑀳𑀺 𑀥𑀫𑁆𑀫𑀲𑀪𑀸𑀯𑀸𑀯𑀚𑁄𑀢𑀦𑀝𑁆𑀞𑁂𑀦 𑀧𑀚𑁆𑀚𑁄𑀢𑁄𑀢𑀺 𑀧𑀜𑁆𑀜𑀸𑀧𑀚𑁆𑀚𑁄𑀢𑁄. 𑀲𑀯𑀸𑀲𑀦𑀧𑁆𑀧𑀳𑀸𑀦𑀢𑁄 𑀯𑀺𑀲𑁂𑀲𑁂𑀦 𑀳𑀢𑀁 𑀲𑀫𑀼𑀕𑁆𑀖𑀸𑀢𑀺𑀢𑀁 𑀯𑀺𑀳𑀢𑀁. 𑀧𑀜𑁆𑀜𑀸𑀧𑀚𑁆𑀚𑁄𑀢𑁂𑀦 𑀯𑀺𑀳𑀢𑀁 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀁 ¶ , 𑀫𑀼𑀬𑁆𑀳𑀦𑁆𑀢𑀺 𑀢𑁂𑀦, 𑀲𑀬𑀁 𑀯𑀸 𑀫𑀼𑀬𑁆𑀳𑀢𑀺, 𑀫𑁄𑀳𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀫𑁄𑀳𑁄, 𑀅𑀯𑀺𑀚𑁆𑀚𑀸. 𑀲𑁆𑀯𑁂𑀯 𑀯𑀺𑀲𑀬𑀲𑀪𑀸𑀯𑀧𑁆𑀧𑀝𑀺𑀘𑁆𑀙𑀸𑀤𑀦𑀢𑁄 𑀅𑀦𑁆𑀥𑀓𑀸𑀭𑀲𑀭𑀺𑀓𑁆𑀔𑀢𑀸𑀬 𑀢𑀫𑁄 𑀯𑀺𑀬𑀸𑀢𑀺 𑀫𑁄𑀳𑀢𑀫𑁄, 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑁄 𑀫𑁄𑀳𑀢𑀫𑁄 𑀏𑀢𑀲𑁆𑀲𑀸𑀢𑀺 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫𑁄, 𑀢𑀁 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫𑀁. 𑀲𑀩𑁆𑀩𑁂𑀲𑀫𑁆𑀧𑀺 𑀳𑀺 𑀔𑀻𑀡𑀸𑀲𑀯𑀸𑀦𑀁 𑀲𑀢𑀺𑀧𑀺 𑀧𑀜𑁆𑀜𑀸𑀧𑀚𑁆𑀚𑁄𑀢𑁂𑀦 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀲𑁆𑀲 𑀯𑀺𑀳𑀢𑀪𑀸𑀯𑁂 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁂𑀳𑀺 𑀯𑀺𑀬 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑀸𑀦𑀁 𑀲𑀸𑀯𑀓𑁂𑀳𑀺 𑀧𑀘𑁆𑀘𑁂𑀓𑀲𑀫𑁆𑀩𑀼𑀤𑁆𑀥𑁂𑀳𑀺 𑀘 𑀲𑀯𑀸𑀲𑀦𑀧𑁆𑀧𑀳𑀸𑀦𑁂𑀦 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀓𑀺𑀮𑁂𑀲𑀧𑁆𑀧𑀳𑀸𑀦𑀲𑁆𑀲 𑀯𑀺𑀲𑁂𑀲𑁄 𑀯𑀺𑀚𑁆𑀚𑀢𑀻𑀢𑀺 𑀲𑀸𑀢𑀺𑀲𑀬𑁂𑀦 𑀅𑀯𑀺𑀚𑁆𑀚𑀸𑀧𑀳𑀸𑀦𑁂𑀦 𑀪𑀕𑀯𑀦𑁆𑀢𑀁 𑀣𑁄𑀫𑁂𑀦𑁆𑀢𑁄 𑀆𑀳 𑁋 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺.

𑀅𑀣 ¶ 𑀯𑀸 𑀅𑀦𑁆𑀢𑀭𑁂𑀦 𑀧𑀭𑁄𑀧𑀤𑁂𑀲𑀁 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀅𑀘𑁆𑀘𑀦𑁆𑀢𑀁 𑀅𑀯𑀺𑀚𑁆𑀚𑀦𑁆𑀥𑀓𑀸𑀭𑀯𑀺𑀕𑀫𑀲𑁆𑀲 𑀦𑀺𑀩𑁆𑀩𑀢𑁆𑀢𑀺𑀢𑀢𑁆𑀢𑀸, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀸𑀬 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯𑀲𑁆𑀲 𑀲𑀫𑀥𑀺𑀕𑀢𑀢𑁆𑀢𑀸, 𑀧𑀭𑀲𑀦𑁆𑀢𑀢𑀺𑀬𑀜𑁆𑀘 𑀥𑀫𑁆𑀫𑀤𑁂𑀲𑀦𑀸𑀢𑀺𑀲𑀬𑀸𑀦𑀼𑀪𑀸𑀯𑁂𑀦 𑀲𑀫𑁆𑀫𑀤𑁂𑀯 𑀢𑀲𑁆𑀲 𑀧𑀯𑀢𑁆𑀢𑀺𑀢𑀢𑁆𑀢𑀸 𑀪𑀕𑀯𑀸𑀯 𑀯𑀺𑀲𑁂𑀲𑀢𑁄 𑀫𑁄𑀳𑀢𑀫𑀯𑀺𑀕𑀫𑁂𑀦 𑀣𑁄𑀫𑁂𑀢𑀩𑁆𑀩𑁄𑀢𑀺 𑀆𑀳 𑁋 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺. 𑀇𑀫𑀲𑁆𑀫𑀺𑀜𑁆𑀘 𑀅𑀢𑁆𑀣𑀯𑀺𑀓𑀧𑁆𑀧𑁂 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑁄’’𑀢𑀺 𑀧𑀤𑁂𑀦 𑀪𑀕𑀯𑀢𑁄 𑀧𑀝𑀺𑀯𑁂𑀥𑀧𑀜𑁆𑀜𑀸 𑀯𑀺𑀬 𑀤𑁂𑀲𑀦𑀸𑀧𑀜𑁆𑀜𑀸𑀧𑀺 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁂𑀦, 𑀏𑀓𑀲𑁂𑀲𑀦𑀬𑁂𑀦 𑀯𑀸 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀣 𑀯𑀸 𑀪𑀕𑀯𑀢𑁄 𑀜𑀸𑀡𑀲𑁆𑀲 𑀜𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀢𑁆𑀢𑀸 𑀲𑀓𑀮𑀜𑁂𑀬𑁆𑀬𑀥𑀫𑁆𑀫𑀲𑀪𑀸𑀯𑀸𑀯𑀩𑁄𑀥𑀦𑀲𑀫𑀢𑁆𑀣𑁂𑀦 𑀅𑀦𑀸𑀯𑀭𑀡𑀜𑀸𑀡𑀲𑀗𑁆𑀔𑀸𑀢𑁂𑀦 𑀧𑀜𑁆𑀜𑀸𑀧𑀚𑁆𑀚𑁄𑀢𑁂𑀦 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀲𑀪𑀸𑀯𑀘𑁆𑀙𑀸𑀤𑀓𑀲𑁆𑀲 𑀫𑁄𑀳𑀦𑁆𑀥𑀓𑀸𑀭𑀲𑁆𑀲 𑀯𑀺𑀥𑀫𑀺𑀢𑀢𑁆𑀢𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀪𑀕𑀯𑀢𑁄 𑀫𑁄𑀳𑀢𑀫𑀯𑀺𑀦𑀸𑀲𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 𑁋 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺. 𑀏𑀢𑁆𑀣 𑀘 𑀫𑁄𑀳𑀢𑀫𑀯𑀺𑀥𑀫𑀦𑀦𑁆𑀢𑁂 𑀅𑀥𑀺𑀕𑀢𑀢𑁆𑀢𑀸 𑀅𑀦𑀸𑀯𑀭𑀡𑀜𑀸𑀡𑀁 𑀓𑀸𑀭𑀡𑁄𑀧𑀘𑀸𑀭𑁂𑀦 𑀲𑀲𑀦𑁆𑀢𑀸𑀦𑀫𑁄𑀳𑀢𑀫𑀯𑀺𑀥𑀫𑀦𑀁 𑀤𑀝𑁆𑀞𑀩𑁆𑀩𑀁. 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀢𑁆𑀢𑀺𑀬𑀸 𑀲𑀯𑀸𑀲𑀦𑀧𑁆𑀧𑀳𑀸𑀦𑀫𑁂𑀯 𑀳𑀺 𑀓𑀺𑀮𑁂𑀲𑀸𑀦𑀁 𑀜𑁂𑀬𑁆𑀬𑀸𑀯𑀭𑀡𑀧𑁆𑀧𑀳𑀸𑀦𑀦𑁆𑀢𑀺, 𑀧𑀭𑀲𑀦𑁆𑀢𑀸𑀦𑁂 𑀧𑀦 𑀫𑁄𑀳𑀢𑀫𑀯𑀺𑀥𑀫𑀦𑀲𑁆𑀲 𑀓𑀸𑀭𑀡𑀪𑀸𑀯𑀢𑁄 𑀅𑀦𑀸𑀯𑀭𑀡𑀜𑀸𑀡𑀁 ‘‘𑀫𑁄𑀳𑀢𑀫𑀯𑀺𑀥𑀫𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀓𑀺𑀁 𑀧𑀦 𑀓𑀸𑀭𑀡𑀁 𑀅𑀯𑀺𑀚𑁆𑀚𑀸𑀲𑀫𑀼𑀕𑁆𑀖𑀸𑀢𑁄𑀬𑁂𑀯𑁂𑀓𑁄 𑀧𑀳𑀸𑀦𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀪𑀕𑀯𑀢𑁄 𑀣𑁄𑀫𑀦𑀸𑀦𑀺𑀫𑀺𑀢𑁆𑀢𑀁 𑀕𑀬𑁆𑀳𑀢𑀺, 𑀦 𑀧𑀦 𑀲𑀸𑀢𑀺𑀲𑀬𑀦𑀺𑀭𑀯𑀲𑁂𑀲𑀓𑀺𑀮𑁂𑀲𑀧𑁆𑀧𑀳𑀸𑀦𑀦𑁆𑀢𑀺? 𑀢𑀧𑁆𑀧𑀳𑀸𑀦𑀯𑀘𑀦𑁂𑀦𑁂𑀯 𑀢𑀤𑁂𑀓𑀝𑁆𑀞𑀢𑀸𑀬 𑀲𑀓𑀮𑀲𑀁𑀓𑀺𑀮𑁂𑀲𑀕𑀡𑀲𑀫𑀼𑀕𑁆𑀖𑀸𑀢𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀦 𑀳𑀺 𑀲𑁄 𑀢𑀸𑀤𑀺𑀲𑁄 𑀓𑀺𑀮𑁂𑀲𑁄 𑀅𑀢𑁆𑀣𑀺, 𑀬𑁄 𑀦𑀺𑀭𑀯𑀲𑁂𑀲𑀅𑀯𑀺𑀚𑁆𑀚𑀸𑀧𑀳𑀸𑀦𑁂𑀦 𑀦 𑀧𑀳𑀻𑀬𑀢𑀻𑀢𑀺.

𑀅𑀣 𑀯𑀸 𑀯𑀺𑀚𑁆𑀚𑀸 𑀯𑀺𑀬 𑀲𑀓𑀮𑀓𑀼𑀲𑀮𑀥𑀫𑁆𑀫𑀲𑀫𑀼𑀧𑁆𑀧𑀢𑁆𑀢𑀺𑀬𑀸, 𑀦𑀺𑀭𑀯𑀲𑁂𑀲𑀸𑀓𑀼𑀲𑀮𑀥𑀫𑁆𑀫𑀦𑀺𑀩𑁆𑀩𑀢𑁆𑀢𑀺𑀬𑀸 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀸 ¶ 𑀘 𑀅𑀯𑀺𑀚𑁆𑀚𑀸 𑀧𑀥𑀸𑀦𑀓𑀸𑀭𑀡𑀦𑁆𑀢𑀺 𑀢𑀩𑁆𑀩𑀺𑀖𑀸𑀢𑀯𑀘𑀦𑁂𑀦 𑀲𑀓𑀮𑀲𑀁𑀓𑀺𑀮𑁂𑀲𑀕𑀡𑀲𑀫𑀼𑀕𑁆𑀖𑀸𑀢𑁄 𑀯𑀼𑀢𑁆𑀢𑁄 𑀏𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑁋 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺.

𑀦𑀭𑀸 𑀘 𑀅𑀫𑀭𑀸 𑀘 𑀦𑀭𑀸𑀫𑀭𑀸, 𑀲𑀳 𑀦𑀭𑀸𑀫𑀭𑁂𑀳𑀻𑀢𑀺 𑀲𑀦𑀭𑀸𑀫𑀭𑁄, 𑀲𑀦𑀭𑀸𑀫𑀭𑁄 𑀘 𑀲𑁄 𑀮𑁄𑀓𑁄 𑀘𑀸𑀢𑀺 𑀲𑀦𑀭𑀸𑀫𑀭𑀮𑁄𑀓𑁄, 𑀢𑀲𑁆𑀲 𑀕𑀭𑀽𑀢𑀺 𑀲𑀦𑀭𑀸𑀫𑀭𑀮𑁄𑀓𑀕𑀭𑀼, 𑀢𑀁 𑀲𑀦𑀭𑀸𑀫𑀭𑀮𑁄𑀓𑀕𑀭𑀼𑀁. 𑀏𑀢𑁂𑀦 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀯𑀺𑀬 𑀢𑀤𑀯𑀲𑀺𑀝𑁆𑀞𑀲𑀢𑁆𑀢𑀸𑀦𑀫𑁆𑀧𑀺 𑀬𑀣𑀸𑀭𑀳𑀁 𑀕𑀼𑀡𑀯𑀺𑀲𑁂𑀲𑀸𑀯𑀳𑀢𑀸𑀬 𑀪𑀕𑀯𑀢𑁄 𑀉𑀧𑀓𑀸𑀭𑀢𑀁 ¶ 𑀤𑀲𑁆𑀲𑁂𑀢𑀺. 𑀦 𑀘𑁂𑀢𑁆𑀣 𑀧𑀥𑀸𑀦𑀧𑁆𑀧𑀥𑀸𑀦𑀪𑀸𑀯𑁄 𑀘𑁄𑀤𑁂𑀢𑀩𑁆𑀩𑁄. 𑀅𑀜𑁆𑀜𑁄 𑀳𑀺 𑀲𑀤𑁆𑀤𑀓𑁆𑀓𑀫𑁄, 𑀅𑀜𑁆𑀜𑁄 𑀅𑀢𑁆𑀣𑀓𑁆𑀓𑀫𑁄. 𑀈𑀤𑀺𑀲𑁂𑀲𑀼 𑀳𑀺 𑀲𑀫𑀸𑀲𑀧𑀤𑁂𑀲𑀼 𑀧𑀥𑀸𑀦𑀫𑁆𑀧𑀺 𑀅𑀧𑁆𑀧𑀥𑀸𑀦𑀁 𑀯𑀺𑀬 𑀦𑀺𑀤𑁆𑀤𑀺𑀲𑀻𑀬𑀢𑀺 𑀬𑀣𑀸 ‘‘𑀲𑀭𑀸𑀚𑀺𑀓𑀸𑀬 𑀧𑀭𑀺𑀲𑀸𑀬𑀸’’𑀢𑀺 (𑀘𑀽𑀴𑀯. 𑁩𑁩𑁬). 𑀓𑀸𑀫𑀜𑁆𑀘𑁂𑀢𑁆𑀣 𑀲𑀢𑁆𑀢𑀲𑀗𑁆𑀔𑀸𑀭𑀪𑀸𑀚𑀦𑀯𑀲𑁂𑀦 𑀢𑀺𑀯𑀺𑀥𑁄 𑀮𑁄𑀓𑁄, 𑀕𑀭𑀼𑀪𑀸𑀯𑀲𑁆𑀲 𑀧𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀕𑀭𑀼𑀓𑀭𑀡𑀲𑀫𑀢𑁆𑀣𑀲𑁆𑀲𑁂𑀯 𑀬𑀼𑀚𑁆𑀚𑀦𑀢𑁄 𑀲𑀢𑁆𑀢𑀮𑁄𑀓𑀲𑁆𑀲 𑀯𑀲𑁂𑀦 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀲𑁄 𑀳𑀺 𑀮𑁄𑀓𑀻𑀬𑀦𑁆𑀢𑀺 𑀏𑀢𑁆𑀣 𑀧𑀼𑀜𑁆𑀜𑀧𑀸𑀧𑀸𑀦𑀺 𑀢𑀩𑁆𑀩𑀺𑀧𑀸𑀓𑁄 𑀘𑀸𑀢𑀺 ‘‘𑀮𑁄𑀓𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀫𑀭𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀉𑀧𑀧𑀢𑁆𑀢𑀺𑀤𑁂𑀯𑀸 𑀅𑀥𑀺𑀧𑁆𑀧𑁂𑀢𑀸.

𑀅𑀣 𑀯𑀸 𑀲𑀫𑀽𑀳𑀢𑁆𑀣𑁄 𑀮𑁄𑀓𑀲𑀤𑁆𑀤𑁄 𑀲𑀫𑀼𑀤𑀸𑀬𑀯𑀲𑁂𑀦 𑀮𑁄𑀓𑀻𑀬𑀢𑀺 𑀧𑀜𑁆𑀜𑀸𑀧𑀻𑀬𑀢𑀻𑀢𑀺. 𑀲𑀳 𑀦𑀭𑁂𑀳𑀻𑀢𑀺 𑀲𑀦𑀭𑀸, 𑀲𑀦𑀭𑀸 𑀘 𑀢𑁂 𑀅𑀫𑀭𑀸 𑀘𑀸𑀢𑀺 𑀲𑀦𑀭𑀸𑀫𑀭𑀸, 𑀢𑁂𑀲𑀁 𑀮𑁄𑀓𑁄𑀢𑀺 𑀲𑀦𑀭𑀸𑀫𑀭𑀮𑁄𑀓𑁄𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀁. 𑀅𑀫𑀭𑀲𑀤𑁆𑀤𑁂𑀦 𑀘𑁂𑀢𑁆𑀣 𑀯𑀺𑀲𑀼𑀤𑁆𑀥𑀺𑀤𑁂𑀯𑀸𑀧𑀺 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀢𑁂𑀧𑀺 𑀳𑀺 𑀫𑀭𑀡𑀸𑀪𑀸𑀯𑀢𑁄 𑀧𑀭𑀫𑀢𑁆𑀣𑀢𑁄 𑀅𑀫𑀭𑀸. 𑀦𑀭𑀸𑀫𑀭𑀸𑀦𑀁𑀬𑁂𑀯 𑀘 𑀕𑀳𑀡𑀁 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑀯𑀲𑁂𑀦 𑀬𑀣𑀸 ‘‘𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦’’𑀦𑁆𑀢𑀺 (𑀤𑀻. 𑀦𑀺. 𑁧.𑁧𑁫𑁭). 𑀢𑀣𑀸 𑀳𑀺 𑀲𑀩𑁆𑀩𑀸𑀦𑀢𑁆𑀣𑀧𑀭𑀺𑀳𑀭𑀡𑀧𑀼𑀩𑁆𑀩𑀗𑁆𑀕𑀫𑀸𑀬 𑀦𑀺𑀭𑀯𑀲𑁂𑀲𑀳𑀺𑀢𑀲𑀼𑀔𑀯𑀺𑀥𑀸𑀦𑀢𑀧𑁆𑀧𑀭𑀸𑀬 𑀦𑀺𑀭𑀢𑀺𑀲𑀬𑀸𑀬 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀧𑀚𑀸𑀬 𑀅𑀘𑁆𑀘𑀦𑁆𑀢𑀽𑀧𑀓𑀸𑀭𑀺𑀢𑀸𑀬 𑀅𑀧𑀭𑀺𑀫𑀺𑀢𑀦𑀺𑀭𑀼𑀧𑀫𑀧𑁆𑀧𑀪𑀸𑀯𑀕𑀼𑀡𑀯𑀺𑀲𑁂𑀲𑀲𑀫𑀗𑁆𑀕𑀺𑀢𑀸𑀬 𑀘 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑁄 𑀪𑀕𑀯𑀸 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀧𑀭𑀺𑀫𑀸𑀡𑀸𑀦𑀁 𑀲𑀢𑁆𑀢𑀸𑀦𑀁 𑀉𑀢𑁆𑀢𑀫𑀕𑀸𑀭𑀯𑀝𑁆𑀞𑀸𑀦𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀦𑀭𑀸𑀫𑀭𑀮𑁄𑀓𑀕𑀭𑀼’’𑀦𑁆𑀢𑀺.

𑀲𑁄𑀪𑀦𑀁 𑀕𑀢𑀁 𑀕𑀫𑀦𑀁 𑀏𑀢𑀲𑁆𑀲𑀸𑀢𑀺 𑀲𑀼𑀕𑀢𑁄. 𑀪𑀕𑀯𑀢𑁄 𑀳𑀺 𑀯𑁂𑀦𑁂𑀬𑁆𑀬𑀚𑀦𑀽𑀧𑀲𑀗𑁆𑀓𑀫𑀦𑀁 𑀏𑀓𑀦𑁆𑀢𑁂𑀦 𑀢𑁂𑀲𑀁 𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀢𑁄 𑀲𑁄𑀪𑀦𑀁, 𑀢𑀣𑀸 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀧𑁆𑀧𑀝𑀺𑀫𑀡𑁆𑀟𑀺𑀢𑀭𑀽𑀧𑀓𑀸𑀬𑀢𑀸𑀬 𑀤𑀼𑀢𑀯𑀺𑀮𑀫𑁆𑀩𑀺𑀢𑀔𑀮𑀺𑀢𑀸𑀦𑀼𑀓𑀟𑁆𑀠𑀦𑀦𑀺𑀧𑁆𑀧𑀻𑀴𑀦𑀼𑀓𑁆𑀓𑀼𑀝𑀺𑀓𑀓𑀼𑀝𑀺𑀮𑀸𑀓𑀼𑀝𑀺𑀮𑀢𑀸𑀤𑀺- 𑀤𑁄𑀲𑀭𑀳𑀺𑀢𑀫𑀯𑀳𑀲𑀺𑀢𑀭𑀸𑀚𑀳𑀁𑀲𑀯𑀲𑀪𑀯𑀸𑀭𑀡𑀫𑀺𑀕𑀭𑀸𑀚𑀕𑀫𑀦𑀁 𑀓𑀸𑀬𑀕𑀫𑀦𑀁 𑀜𑀸𑀡𑀕𑀫𑀦𑀜𑁆𑀘 𑀯𑀺𑀧𑀼𑀮𑀦𑀺𑀫𑁆𑀫𑀮𑀓𑀭𑀼𑀡𑀸𑀲𑀢𑀺𑀯𑀻𑀭𑀺𑀬𑀸𑀤𑀺𑀕𑀼𑀡𑀯𑀺𑀲𑁂𑀲𑀲𑀳𑀺𑀢𑀫𑀪𑀺𑀦𑀻𑀳𑀸𑀭𑀢𑁄 𑀬𑀸𑀯 𑀫𑀳𑀸𑀩𑁄𑀥𑀺 𑀅𑀦𑀯𑀚𑁆𑀚𑀢𑀸𑀬 𑀲𑁄𑀪𑀦𑀫𑁂𑀯𑀸𑀢𑀺. 𑀅𑀣 𑀯𑀸 𑀲𑀬𑀫𑁆𑀪𑀼𑀜𑀸𑀡𑁂𑀦 𑀲𑀓𑀮𑀫𑁆𑀧𑀺 𑀮𑁄𑀓𑀁 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀯𑀲𑁂𑀦 𑀧𑀭𑀺𑀚𑀸𑀦𑀦𑁆𑀢𑁄 𑀜𑀸𑀡𑁂𑀦 𑀲𑀫𑁆𑀫𑀸 𑀕𑀢𑁄 𑀅𑀯𑀕𑀢𑁄𑀢𑀺 𑀲𑀼𑀕𑀢𑁄, 𑀢𑀣𑀸 𑀮𑁄𑀓𑀲𑀫𑀼𑀤𑀬𑀁 𑀧𑀳𑀸𑀦𑀸𑀪𑀺𑀲𑀫𑀬𑀯𑀲𑁂𑀦 𑀧𑀚𑀳𑀦𑁆𑀢𑁄 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑁂𑀦𑁆𑀢𑁄 𑀲𑀫𑁆𑀫𑀸 𑀕𑀢𑁄 𑀅𑀢𑀻𑀢𑁄𑀢𑀺 𑀲𑀼𑀕𑀢𑁄, 𑀮𑁄𑀓𑀦𑀺𑀭𑁄𑀥𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀺𑀲𑀫𑀬𑀯𑀲𑁂𑀦 𑀲𑀫𑁆𑀫𑀸 ¶ 𑀕𑀢𑁄 𑀅𑀥𑀺𑀕𑀢𑁄𑀢𑀺 ¶ 𑀲𑀼𑀕𑀢𑁄, 𑀮𑁄𑀓𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀁 𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀲𑀫𑁆𑀫𑀸 𑀕𑀢𑁄 𑀧𑀝𑀺𑀧𑀦𑁆𑀦𑁄𑀢𑀺 𑀲𑀼𑀕𑀢𑁄. ‘‘𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁂𑀦 𑀬𑁂 𑀓𑀺𑀮𑁂𑀲𑀸 𑀧𑀳𑀻𑀦𑀸, 𑀢𑁂 𑀓𑀺𑀮𑁂𑀲𑁂 𑀦 𑀧𑀼𑀦𑁂𑀢𑀺 𑀦 𑀧𑀘𑁆𑀘𑁂𑀢𑀺 𑀦 𑀧𑀘𑁆𑀘𑀸𑀕𑀘𑁆𑀙𑀢𑀻𑀢𑀺 𑀲𑀼𑀕𑀢𑁄’’𑀢𑀺𑀆𑀤𑀺𑀦𑀸 (𑀘𑀽𑀴𑀦𑀺. 𑀫𑁂𑀢𑁆𑀢𑀕𑀽𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑁨𑁭) 𑀦𑀬𑁂𑀦 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀅𑀣 𑀯𑀸 𑀲𑀼𑀦𑁆𑀤𑀭𑀁 𑀞𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁, 𑀦𑀺𑀩𑁆𑀩𑀸𑀦𑀫𑁂𑀯 𑀯𑀸 𑀕𑀢𑁄 𑀅𑀥𑀺𑀕𑀢𑁄𑀢𑀺 𑀲𑀼𑀕𑀢𑁄, 𑀬𑀲𑁆𑀫𑀸 𑀯𑀸 𑀪𑀽𑀢𑀁 𑀢𑀘𑁆𑀙𑀁 𑀅𑀢𑁆𑀣𑀲𑀁𑀳𑀺𑀢𑀁 𑀯𑁂𑀦𑁂𑀬𑁆𑀬𑀸𑀦𑀁 𑀬𑀣𑀸𑀭𑀳𑀁 𑀓𑀸𑀮𑀬𑀼𑀢𑁆𑀢𑀫𑁂𑀯 𑀘 𑀥𑀫𑁆𑀫𑀁 𑀪𑀸𑀲𑀢𑀺, 𑀢𑀲𑁆𑀫𑀸 𑀲𑀫𑁆𑀫𑀸 𑀕𑀤𑀢𑀻𑀢𑀺 𑀲𑀼𑀕𑀢𑁄, 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸. 𑀇𑀢𑀺 𑀲𑁄𑀪𑀦𑀕𑀫𑀦𑀢𑀸𑀤𑀻𑀳𑀺 𑀲𑀼𑀕𑀢𑁄, 𑀢𑀁 𑀲𑀼𑀕𑀢𑀁.

𑀧𑀼𑀜𑁆𑀜𑀧𑀸𑀧𑀓𑀫𑁆𑀫𑁂𑀳𑀺 𑀉𑀧𑀧𑀚𑁆𑀚𑀦𑀯𑀲𑁂𑀦 𑀕𑀦𑁆𑀢𑀩𑁆𑀩𑀢𑁄 𑀕𑀢𑀺𑀬𑁄, 𑀉𑀧𑀧𑀢𑁆𑀢𑀺𑀪𑀯𑀯𑀺𑀲𑁂𑀲𑀸. 𑀢𑀸 𑀧𑀦 𑀦𑀺𑀭𑀬𑀸𑀤𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑀸. 𑀢𑀸𑀳𑀺 𑀲𑀓𑀮𑀲𑁆𑀲𑀧𑀺 𑀪𑀯𑀕𑀸𑀫𑀺𑀓𑀫𑁆𑀫𑀲𑁆𑀲 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑁂𑀦 𑀅𑀯𑀺𑀧𑀸𑀓𑀸𑀭𑀳𑀪𑀸𑀯𑀓𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀢𑁆𑀢𑀸 𑀪𑀕𑀯𑀸 𑀧𑀜𑁆𑀘𑀳𑀺𑀧𑀺 𑀕𑀢𑀻𑀳𑀺 𑀲𑀼𑀝𑁆𑀞𑀼 𑀫𑀼𑀢𑁆𑀢𑁄 𑀯𑀺𑀲𑀁𑀬𑀼𑀢𑁆𑀢𑁄𑀢𑀺 𑀆𑀳 𑁋 ‘‘𑀕𑀢𑀺𑀯𑀺𑀫𑀼𑀢𑁆𑀢’’𑀦𑁆𑀢𑀺. 𑀏𑀢𑁂𑀦 𑀪𑀕𑀯𑀢𑁄 𑀓𑀢𑁆𑀣𑀘𑀺𑀧𑀺 𑀕𑀢𑀺𑀬𑀸 𑀅𑀧𑀭𑀺𑀬𑀸𑀧𑀦𑁆𑀦𑀢𑀁 𑀤𑀲𑁆𑀲𑁂𑀢𑀺, 𑀬𑀢𑁄 𑀪𑀕𑀯𑀸 ‘‘𑀤𑁂𑀯𑀸𑀢𑀺𑀤𑁂𑀯𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯𑀸𑀳 𑁋

‘‘𑀬𑁂𑀦 𑀤𑁂𑀯𑀽𑀧𑀧𑀢𑁆𑀬𑀲𑁆𑀲, 𑀕𑀦𑁆𑀥𑀩𑁆𑀩𑁄 𑀯𑀸 𑀯𑀺𑀳𑀗𑁆𑀕𑀫𑁄;

𑀬𑀓𑁆𑀔𑀢𑁆𑀢𑀁 𑀬𑁂𑀦 𑀕𑀘𑁆𑀙𑁂𑀬𑁆𑀬𑀁, 𑀫𑀦𑀼𑀲𑁆𑀲𑀢𑁆𑀢𑀜𑁆𑀘 𑀅𑀩𑁆𑀩𑀚𑁂;

𑀢𑁂 𑀫𑀬𑁆𑀳𑀁 𑀆𑀲𑀯𑀸 𑀔𑀻𑀡𑀸, 𑀯𑀺𑀤𑁆𑀥𑀲𑁆𑀢𑀸 𑀯𑀺𑀦𑀴𑀻𑀓𑀢𑀸’’𑀢𑀺. (𑀅. 𑀦𑀺. 𑁪.𑁩𑁬);

𑀢𑀁𑀢𑀁𑀕𑀢𑀺𑀲𑀁𑀯𑀢𑁆𑀢𑀦𑀺𑀓𑀸𑀦𑀜𑁆𑀳𑀺 𑀓𑀫𑁆𑀫𑀓𑀺𑀮𑁂𑀲𑀸𑀦𑀁 𑀅𑀕𑁆𑀕𑀫𑀕𑁆𑀕𑁂𑀦 𑀩𑁄𑀥𑀺𑀫𑀽𑀮𑁂𑀬𑁂𑀯 𑀲𑀼𑀧𑁆𑀧𑀳𑀻𑀦𑀢𑁆𑀢𑀸 𑀦𑀢𑁆𑀣𑀺 𑀪𑀕𑀯𑀢𑁄 𑀕𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀢𑀺 𑀅𑀘𑁆𑀘𑀦𑁆𑀢𑀫𑁂𑀯 𑀪𑀕𑀯𑀸 𑀲𑀩𑁆𑀩𑀪𑀯𑀬𑁄𑀦𑀺𑀕𑀢𑀺𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀢𑁆𑀢𑀸𑀯𑀸𑀲𑀲𑀢𑁆𑀢𑀦𑀺𑀓𑀸𑀬𑁂𑀳𑀺 𑀲𑀼𑀧𑀭𑀺𑀫𑀼𑀢𑁆𑀢𑁄, 𑀢𑀁 𑀕𑀢𑀺𑀯𑀺𑀫𑀼𑀢𑁆𑀢𑀁. 𑀯𑀦𑁆𑀤𑁂𑀢𑀺 𑀦𑀫𑀸𑀫𑀺, 𑀣𑁄𑀫𑁂𑀫𑀻𑀢𑀺 𑀯𑀸 𑀅𑀢𑁆𑀣𑁄.

𑀅𑀣 𑀯𑀸 𑀕𑀢𑀺𑀯𑀺𑀫𑀼𑀢𑁆𑀢𑀦𑁆𑀢𑀺 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀥𑀸𑀢𑀼𑀧𑁆𑀧𑀢𑁆𑀢𑀺𑀬𑀸 𑀪𑀕𑀯𑀦𑁆𑀢𑀁 𑀣𑁄𑀫𑁂𑀢𑀺. 𑀏𑀢𑁆𑀣 𑀳𑀺 𑀤𑁆𑀯𑀻𑀳𑀺 𑀆𑀓𑀸𑀭𑁂𑀳𑀺 𑀪𑀕𑀯𑀢𑁄 𑀣𑁄𑀫𑀦𑀸 𑀯𑁂𑀤𑀺𑀢𑀩𑁆𑀩𑀸 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺𑀢𑁄 𑀧𑀭𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺𑀢𑁄 𑀘. 𑀢𑁂𑀲𑀼 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 𑀅𑀦𑀸𑀯𑀭𑀡𑀜𑀸𑀡𑀸𑀥𑀺𑀕𑀫𑀢𑁄 𑀲𑀯𑀸𑀲𑀦𑀸𑀦𑀁 𑀲𑀩𑁆𑀩𑁂𑀲𑀁 𑀓𑀺𑀮𑁂𑀲𑀸𑀦𑀁 𑀅𑀘𑁆𑀘𑀦𑁆𑀢𑀧𑁆𑀧𑀳𑀸𑀦𑀢𑁄 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀧𑁆𑀧𑀢𑁆𑀢𑀺𑀢𑁄 𑀘 𑀯𑁂𑀤𑀺𑀢𑀩𑁆𑀩𑀸, 𑀧𑀭𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺 𑀮𑀸𑀪𑀲𑀓𑁆𑀓𑀸𑀭𑀸𑀤𑀺𑀦𑀺𑀭𑀧𑁂𑀓𑁆𑀔𑀘𑀺𑀢𑁆𑀢𑀲𑁆𑀲 𑀲𑀩𑁆𑀩𑀤𑀼𑀓𑁆𑀔𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑀤𑁂𑀲𑀦𑀢𑁄 𑀯𑀺𑀭𑀼𑀤𑁆𑀥𑁂𑀲𑀼𑀧𑀺 𑀦𑀺𑀘𑁆𑀘𑀁 𑀳𑀺𑀢𑀚𑁆𑀛𑀸𑀲𑀬𑀢𑁄 𑀜𑀸𑀡𑀧𑀭𑀺𑀧𑀸𑀓𑀓𑀸𑀮𑀸𑀕𑀫𑀦𑀢𑁄 𑀘. 𑀲𑀸 𑀧𑀦𑁂𑀢𑁆𑀣 𑀆𑀲𑀬𑀢𑁄 𑀧𑀬𑁄𑀕𑀢𑁄 𑀘 𑀤𑀼𑀯𑀺𑀥𑀸, 𑀧𑀭𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺 𑀢𑀺𑀯𑀺𑀥𑀸 𑀘, 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 ¶ 𑀧𑀓𑀸𑀲𑀺𑀢𑀸 𑀳𑁄𑀢𑀺. 𑀓𑀣𑀁? ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺 𑀏𑀢𑁂𑀦 𑀆𑀲𑀬𑀢𑁄 𑀧𑀭𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺 ¶ , 𑀲𑀫𑁆𑀫𑀸𑀕𑀤𑀦𑀢𑁆𑀣𑁂𑀦 𑀲𑀼𑀕𑀢𑀲𑀤𑁆𑀤𑁂𑀦 𑀧𑀬𑁄𑀕𑀢𑁄 𑀧𑀭𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺, ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫𑀁 𑀕𑀢𑀺𑀯𑀺𑀫𑀼𑀢𑁆𑀢’’𑀦𑁆𑀢𑀺 𑀏𑀢𑁂𑀳𑀺 𑀘𑀢𑀼𑀲𑀘𑁆𑀘𑀲𑀫𑁆𑀧𑀝𑀺𑀯𑁂𑀥𑀦𑀢𑁆𑀣𑁂𑀦 𑀘 𑀲𑀼𑀕𑀢𑀲𑀤𑁆𑀤𑁂𑀦 𑀢𑀺𑀯𑀺𑀥𑀸𑀧𑀺 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺, 𑀅𑀯𑀲𑀺𑀝𑁆𑀞𑁂𑀦 ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺 𑀏𑀢𑁂𑀦 𑀘𑀸𑀧𑀺 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺 𑀧𑀭𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺 𑀧𑀓𑀸𑀲𑀺𑀢𑀸 𑀳𑁄𑀢𑀻𑀢𑀺.

𑀅𑀣 𑀯𑀸 𑀢𑀻𑀳𑀺 𑀆𑀓𑀸𑀭𑁂𑀳𑀺 𑀪𑀕𑀯𑀢𑁄 𑀣𑁄𑀫𑀦𑀸 𑀯𑁂𑀤𑀺𑀢𑀩𑁆𑀩𑀸 𑀳𑁂𑀢𑀼𑀢𑁄, 𑀨𑀮𑀢𑁄, 𑀉𑀧𑀓𑀸𑀭𑀢𑁄 𑀘. 𑀢𑀢𑁆𑀣 𑀳𑁂𑀢𑀼 𑀫𑀳𑀸𑀓𑀭𑀼𑀡𑀸, 𑀲𑀸 𑀧𑀞𑀫𑀧𑀤𑁂𑀦 𑀤𑀲𑁆𑀲𑀺𑀢𑀸. 𑀨𑀮𑀁 𑀘𑀢𑀼𑀩𑁆𑀩𑀺𑀥𑀁 𑀜𑀸𑀡𑀲𑀫𑁆𑀧𑀤𑀸, 𑀧𑀳𑀸𑀦𑀲𑀫𑁆𑀧𑀤𑀸, 𑀆𑀦𑀼𑀪𑀸𑀯𑀲𑀫𑁆𑀧𑀤𑀸, 𑀭𑀽𑀧𑀓𑀸𑀬𑀲𑀫𑁆𑀧𑀤𑀸 𑀘𑀸𑀢𑀺. 𑀢𑀸𑀲𑀼 𑀜𑀸𑀡𑀧𑁆𑀧𑀳𑀸𑀦𑀲𑀫𑁆𑀧𑀤𑀸 𑀤𑀼𑀢𑀺𑀬𑀧𑀤𑁂𑀦 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀦𑀢𑁆𑀣𑁂𑀦 𑀘 𑀲𑀼𑀕𑀢𑀲𑀤𑁆𑀤𑁂𑀦 𑀧𑀓𑀸𑀲𑀺𑀢𑀸 𑀳𑁄𑀦𑁆𑀢𑀺, 𑀆𑀦𑀼𑀪𑀸𑀯𑀲𑀫𑁆𑀧𑀤𑀸 𑀢𑀢𑀺𑀬𑀧𑀤𑁂𑀦, 𑀭𑀽𑀧𑀓𑀸𑀬𑀲𑀫𑁆𑀧𑀤𑀸 𑀬𑀣𑀸𑀯𑀼𑀢𑁆𑀢𑀓𑀸𑀬𑀕𑀫𑀦𑀲𑁄𑀪𑀦𑀢𑁆𑀣𑁂𑀦 𑀲𑀼𑀕𑀢𑀲𑀤𑁆𑀤𑁂𑀦 𑀮𑀓𑁆𑀔𑀡𑀸𑀦𑀼𑀩𑁆𑀬𑀜𑁆𑀚𑀦𑀧𑀸𑀭𑀺𑀧𑀽𑀭𑀺𑀬𑀸 𑀯𑀺𑀦𑀸 𑀢𑀤𑀪𑀸𑀯𑀢𑁄. 𑀉𑀧𑀓𑀸𑀭𑁄 𑀅𑀦𑀦𑁆𑀢𑀭𑀁 𑀅𑀩𑀸𑀳𑀺𑀭𑀁 𑀓𑀭𑀺𑀢𑁆𑀯𑀸 𑀢𑀺𑀯𑀺𑀥𑀬𑀸𑀦𑀫𑀼𑀔𑁂𑀦 𑀯𑀺𑀫𑀼𑀢𑁆𑀢𑀺𑀥𑀫𑁆𑀫𑀤𑁂𑀲𑀦𑀸. 𑀲𑁄 𑀲𑀫𑁆𑀫𑀸𑀕𑀤𑀦𑀢𑁆𑀣𑁂𑀦 𑀲𑀼𑀕𑀢𑀲𑀤𑁆𑀤𑁂𑀦 𑀧𑀓𑀸𑀲𑀺𑀢𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬’’𑀦𑁆𑀢𑀺 𑀏𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀫𑀽𑀮𑀁 𑀤𑀲𑁆𑀲𑁂𑀢𑀺. 𑀫𑀳𑀸𑀓𑀭𑀼𑀡𑀸𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀳𑀺 𑀪𑀕𑀯𑀸 𑀲𑀁𑀲𑀸𑀭𑀧𑀗𑁆𑀓𑀢𑁄 𑀲𑀢𑁆𑀢𑀸𑀦𑀁 𑀲𑀫𑀼𑀤𑁆𑀥𑀭𑀡𑀢𑁆𑀣𑀁 𑀓𑀢𑀸𑀪𑀺𑀦𑀻𑀳𑀸𑀭𑁄 𑀅𑀦𑀼𑀧𑀼𑀩𑁆𑀩𑁂𑀦 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀢𑁄𑀢𑀺 𑀓𑀭𑀼𑀡𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀫𑀽𑀮𑀁. ‘‘𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺 𑀏𑀢𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀤𑀲𑁆𑀲𑁂𑀢𑀺. 𑀅𑀦𑀸𑀯𑀭𑀡𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀳𑀺 𑀫𑀕𑁆𑀕𑀜𑀸𑀡𑀁, 𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀘 𑀅𑀦𑀸𑀯𑀭𑀡𑀜𑀸𑀡𑀁 ‘‘𑀲𑀫𑁆𑀫𑀸𑀲𑀫𑁆𑀩𑁄𑀥𑀻’’𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀲𑀫𑁆𑀫𑀸𑀕𑀫𑀦𑀢𑁆𑀣𑁂𑀦 𑀲𑀼𑀕𑀢𑀲𑀤𑁆𑀤𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 𑀮𑀻𑀦𑀼𑀤𑁆𑀥𑀘𑁆𑀘𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀓𑀸𑀫𑀲𑀼𑀔𑀮𑁆𑀮𑀺𑀓𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀪𑀺𑀦𑀺𑀯𑁂𑀲𑀸𑀤𑀺𑀅𑀦𑁆𑀢𑀤𑁆𑀯𑀬𑀭𑀳𑀺𑀢𑀸𑀬 𑀓𑀭𑀼𑀡𑀸𑀧𑀜𑁆𑀜𑀸𑀧𑀭𑀺𑀕𑁆𑀕𑀳𑀺𑀢𑀸𑀬 𑀫𑀚𑁆𑀛𑀺𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀧𑀓𑀸𑀲𑀦𑀢𑁄 𑀲𑀼𑀕𑀢𑀲𑀤𑁆𑀤𑀲𑁆𑀲. 𑀇𑀢𑀭𑁂𑀳𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀬𑀸 𑀧𑀥𑀸𑀦𑀧𑁆𑀧𑀥𑀸𑀦𑀪𑁂𑀤𑀁 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀺. 𑀲𑀁𑀲𑀸𑀭𑀫𑀳𑁄𑀖𑀢𑁄 𑀲𑀢𑁆𑀢𑀲𑀦𑁆𑀢𑀸𑀭𑀡𑀜𑁆𑀳𑁂𑀢𑁆𑀣 𑀧𑀥𑀸𑀦𑀁 𑀧𑀬𑁄𑀚𑀦𑀁, 𑀢𑀤𑀜𑁆𑀜𑀫𑀧𑁆𑀧𑀥𑀸𑀦𑀁. 𑀢𑁂𑀲𑀼 𑀧𑀥𑀸𑀦𑁂𑀦 𑀧𑀭𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺, 𑀇𑀢𑀭𑁂𑀦 𑀅𑀢𑁆𑀢𑀳𑀺𑀢𑀲𑀫𑁆𑀧𑀢𑁆𑀢𑀺𑀁. 𑀢𑀤𑀼𑀪𑀬𑁂𑀦 𑀅𑀢𑁆𑀢𑀳𑀺𑀢𑀸𑀬 ¶ 𑀧𑀝𑀺𑀧𑀦𑁆𑀦𑀸𑀤𑀻𑀲𑀼 𑀘𑀢𑀽𑀲𑀼 𑀧𑀼𑀕𑁆𑀕𑀮𑁂𑀲𑀼 𑀪𑀕𑀯𑀢𑁄 𑀘𑀢𑀼𑀢𑁆𑀣𑀧𑀼𑀕𑁆𑀕𑀮𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀢𑁂𑀦 𑀘 𑀅𑀦𑀼𑀢𑁆𑀢𑀭𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀁 𑀉𑀢𑁆𑀢𑀫𑀯𑀦𑁆𑀤𑀦𑁂𑀬𑁆𑀬𑀪𑀸𑀯𑀁 𑀅𑀢𑁆𑀢𑀦𑁄 𑀘 𑀯𑀦𑁆𑀤𑀦𑀓𑀺𑀭𑀺𑀬𑀸𑀬 𑀔𑁂𑀢𑁆𑀢𑀗𑁆𑀕𑀢𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀏𑀢𑁆𑀣 𑀘 𑀓𑀭𑀼𑀡𑀸𑀕𑀳𑀡𑁂𑀦 𑀮𑁄𑀓𑀺𑀬𑁂𑀲𑀼 𑀫𑀳𑀕𑁆𑀕𑀢𑀪𑀸𑀯𑀧𑁆𑀧𑀢𑁆𑀢𑀸𑀲𑀸𑀥𑀸𑀭𑀡𑀕𑀼𑀡𑀤𑀻𑀧𑀦𑀢𑁄 𑀪𑀕𑀯𑀢𑁄 𑀲𑀩𑁆𑀩𑀮𑁄𑀓𑀺𑀬𑀕𑀼𑀡𑀲𑀫𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸 𑀳𑁄𑀢𑀺, 𑀧𑀜𑁆𑀜𑀸𑀕𑀳𑀡𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀫𑀕𑁆𑀕𑀜𑀸𑀡𑀤𑀻𑀧𑀦𑀢𑁄 𑀲𑀩𑁆𑀩𑀮𑁄𑀓𑀼𑀢𑁆𑀢𑀭𑀕𑀼𑀡𑀲𑀫𑁆𑀧𑀢𑁆𑀢𑀺. 𑀢𑀤𑀼𑀪𑀬𑀕𑁆𑀕𑀳𑀡𑀲𑀺𑀤𑁆𑀥𑁄 𑀳𑀺 𑀅𑀢𑁆𑀣𑁄 ‘‘𑀲𑀦𑀭𑀸𑀫𑀭𑀮𑁄𑀓𑀕𑀭𑀼’’𑀦𑁆𑀢𑀺𑀆𑀤𑀺𑀦𑀸 𑀧𑀧𑀜𑁆𑀘𑀻𑀬𑀢𑀻𑀢𑀺 ¶ . 𑀓𑀭𑀼𑀡𑀸𑀕𑀳𑀡𑁂𑀦 𑀘 𑀉𑀧𑀕𑀫𑀦𑀁 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁 𑀤𑀲𑁆𑀲𑁂𑀢𑀺, 𑀧𑀜𑁆𑀜𑀸𑀕𑀳𑀡𑁂𑀦 𑀅𑀧𑀕𑀫𑀦𑀁. 𑀢𑀣𑀸 𑀓𑀭𑀼𑀡𑀸𑀕𑀳𑀡𑁂𑀦 𑀮𑁄𑀓𑀲𑀫𑀜𑁆𑀜𑀸𑀦𑀼𑀭𑀽𑀧𑀁 𑀪𑀕𑀯𑀢𑁄 𑀧𑀯𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 𑀮𑁄𑀓𑀯𑁄𑀳𑀸𑀭𑀯𑀺𑀲𑀬𑀢𑁆𑀢𑀸 𑀓𑀭𑀼𑀡𑀸𑀬, 𑀧𑀜𑁆𑀜𑀸𑀕𑀳𑀡𑁂𑀦 𑀲𑀫𑀜𑁆𑀜𑀸𑀬 𑀅𑀦𑀢𑀺𑀥𑀸𑀯𑀦𑀁. 𑀲𑀪𑀸𑀯𑀸𑀦𑀯𑀩𑁄𑀥𑁂𑀦 𑀳𑀺 𑀥𑀫𑁆𑀫𑀸𑀦𑀁 𑀲𑀫𑀜𑁆𑀜𑀁 𑀅𑀢𑀺𑀥𑀸𑀯𑀺𑀢𑁆𑀯𑀸 𑀲𑀢𑁆𑀢𑀸𑀤𑀺𑀧𑀭𑀸𑀫𑀲𑀦𑀁 𑀳𑁄𑀢𑀻𑀢𑀺. 𑀢𑀣𑀸 𑀓𑀭𑀼𑀡𑀸𑀕𑀳𑀡𑁂𑀦 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀁 𑀤𑀲𑁆𑀲𑁂𑀢𑀺, 𑀧𑀜𑁆𑀜𑀸𑀕𑀳𑀡𑁂𑀦 𑀢𑀻𑀲𑀼 𑀓𑀸𑀮𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀁 𑀘𑀢𑀼𑀲𑀘𑁆𑀘𑀜𑀸𑀡𑀁, 𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀁, 𑀘𑀢𑀼𑀯𑁂𑀲𑀸𑀭𑀚𑁆𑀚𑀜𑀸𑀡𑀁. 𑀓𑀭𑀼𑀡𑀸𑀕𑀳𑀡𑁂𑀦 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀜𑀸𑀡𑀲𑁆𑀲 𑀕𑀳𑀺𑀢𑀢𑁆𑀢𑀸 𑀲𑁂𑀲𑀸𑀲𑀸𑀥𑀸𑀭𑀡𑀜𑀸𑀡𑀸𑀦𑀺, 𑀙 𑀅𑀪𑀺𑀜𑁆𑀜𑀸, 𑀅𑀝𑁆𑀞𑀲𑀼 𑀧𑀭𑀺𑀲𑀸𑀲𑀼 𑀅𑀓𑀫𑁆𑀧𑀦𑀜𑀸𑀡𑀸𑀦𑀺, 𑀤𑀲 𑀩𑀮𑀸𑀦𑀺, 𑀘𑀼𑀤𑁆𑀤𑀲 𑀩𑀼𑀤𑁆𑀥𑀜𑀸𑀡𑀸𑀦𑀺, 𑀲𑁄𑀴𑀲 𑀜𑀸𑀡𑀘𑀭𑀺𑀬𑀸, 𑀅𑀝𑁆𑀞𑀸𑀭𑀲 𑀩𑀼𑀤𑁆𑀥𑀥𑀫𑁆𑀫𑀸, 𑀘𑀢𑀼𑀘𑀢𑁆𑀢𑀸𑀮𑀻𑀲 𑀜𑀸𑀡𑀯𑀢𑁆𑀣𑀽𑀦𑀺, 𑀲𑀢𑁆𑀢𑀲𑀢𑁆𑀢𑀢𑀺 𑀜𑀸𑀡𑀯𑀢𑁆𑀣𑀽𑀦𑀻𑀢𑀺 𑀏𑀯𑀫𑀸𑀤𑀻𑀦𑀁 𑀅𑀦𑁂𑀓𑁂𑀲𑀁 𑀧𑀜𑁆𑀜𑀸𑀧𑀪𑁂𑀤𑀸𑀦𑀁 𑀯𑀲𑁂𑀦 𑀜𑀸𑀡𑀘𑀸𑀭𑀁 𑀤𑀲𑁆𑀲𑁂𑀢𑀺. 𑀢𑀣𑀸 𑀓𑀭𑀼𑀡𑀸𑀕𑀳𑀡𑁂𑀦 𑀘𑀭𑀡𑀲𑀫𑁆𑀧𑀢𑁆𑀢𑀺𑀁, 𑀧𑀜𑁆𑀜𑀸𑀕𑀳𑀡𑁂𑀦 𑀯𑀺𑀚𑁆𑀚𑀸𑀲𑀫𑁆𑀧𑀢𑁆𑀢𑀺𑀁. 𑀓𑀭𑀼𑀡𑀸𑀕𑀳𑀡𑁂𑀦 𑀅𑀢𑁆𑀢𑀸𑀥𑀺𑀧𑀢𑀺𑀢𑀸, 𑀧𑀜𑁆𑀜𑀸𑀕𑀳𑀡𑁂𑀦 𑀥𑀫𑁆𑀫𑀸𑀥𑀺𑀧𑀢𑀺𑀢𑀸. 𑀓𑀭𑀼𑀡𑀸𑀕𑀳𑀡𑁂𑀦 𑀮𑁄𑀓𑀦𑀸𑀣𑀪𑀸𑀯𑁄, 𑀧𑀜𑁆𑀜𑀸𑀕𑀳𑀡𑁂𑀦 𑀅𑀢𑁆𑀢𑀦𑀸𑀣𑀪𑀸𑀯𑁄. 𑀢𑀣𑀸 𑀓𑀭𑀼𑀡𑀸𑀕𑀳𑀡𑁂𑀦 𑀧𑀼𑀩𑁆𑀩𑀓𑀸𑀭𑀺𑀪𑀸𑀯𑁄, 𑀧𑀜𑁆𑀜𑀸𑀕𑀳𑀡𑁂𑀦 𑀓𑀢𑀜𑁆𑀜𑀼𑀢𑀸. 𑀢𑀣𑀸 𑀓𑀭𑀼𑀡𑀸𑀕𑀳𑀡𑁂𑀦 𑀅𑀧𑀭𑀦𑁆𑀢𑀧𑀢𑀸, 𑀧𑀜𑁆𑀜𑀸𑀕𑀳𑀡𑁂𑀦 𑀅𑀦𑀢𑁆𑀢𑀦𑁆𑀢𑀧𑀢𑀸. 𑀓𑀭𑀼𑀡𑀸𑀕𑀳𑀡𑁂𑀦 𑀯𑀸 𑀩𑀼𑀤𑁆𑀥𑀓𑀭𑀥𑀫𑁆𑀫𑀲𑀺𑀤𑁆𑀥𑀺, 𑀧𑀜𑁆𑀜𑀸𑀕𑀳𑀡𑁂𑀦 𑀩𑀼𑀤𑁆𑀥𑀪𑀸𑀯𑀲𑀺𑀤𑁆𑀥𑀺. 𑀢𑀣𑀸 𑀓𑀭𑀼𑀡𑀸𑀕𑀳𑀡𑁂𑀦 𑀧𑀭𑁂𑀲𑀁 𑀢𑀸𑀭𑀡𑀁, 𑀧𑀜𑁆𑀜𑀸𑀕𑀳𑀡𑁂𑀦 𑀲𑀬𑀁𑀢𑀭𑀡𑀁. 𑀢𑀣𑀸 𑀓𑀭𑀼𑀡𑀸𑀕𑀳𑀡𑁂𑀦 𑀲𑀩𑁆𑀩𑀲𑀢𑁆𑀢𑁂𑀲𑀼 𑀅𑀦𑀼𑀕𑁆𑀕𑀳𑀘𑀺𑀢𑁆𑀢𑀢𑀸, 𑀧𑀜𑁆𑀜𑀸𑀕𑀳𑀡𑁂𑀦 𑀲𑀩𑁆𑀩𑀥𑀫𑁆𑀫𑁂𑀲𑀼 𑀯𑀺𑀭𑀢𑁆𑀢𑀘𑀺𑀢𑁆𑀢𑀢𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺.

𑀲𑀩𑁆𑀩𑁂𑀲𑀜𑁆𑀘 𑀩𑀼𑀤𑁆𑀥𑀕𑀼𑀡𑀸𑀦𑀁 𑀓𑀭𑀼𑀡𑀸 𑀆𑀤𑀺 𑀢𑀦𑁆𑀦𑀺𑀤𑀸𑀦𑀪𑀸𑀯𑀢𑁄, 𑀧𑀜𑁆𑀜𑀸 𑀧𑀭𑀺𑀬𑁄𑀲𑀸𑀦𑀁 𑀢𑀢𑁄 𑀉𑀢𑁆𑀢𑀭𑀺𑀓𑀭𑀡𑀻𑀬𑀸𑀪𑀸𑀯𑀢𑁄. 𑀇𑀢𑀺 𑀆𑀤𑀺𑀧𑀭𑀺𑀬𑁄𑀲𑀸𑀦𑀤𑀲𑁆𑀲𑀦𑁂𑀦 ¶ 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀢𑀣𑀸 𑀓𑀭𑀼𑀡𑀸𑀕𑀳𑀡𑁂𑀦 𑀲𑀻𑀮𑀓𑁆𑀔𑀦𑁆𑀥𑀧𑀼𑀩𑁆𑀩𑀗𑁆𑀕𑀫𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀓𑀭𑀼𑀡𑀸𑀦𑀺𑀤𑀸𑀦𑀜𑁆𑀳𑀺 𑀲𑀻𑀮𑀁 𑀢𑀢𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀺𑀭𑀢𑀺𑀧𑁆𑀧𑀯𑀢𑁆𑀢𑀺𑀢𑁄, 𑀲𑀸 𑀘 𑀛𑀸𑀦𑀢𑁆𑀢𑀬𑀲𑀫𑁆𑀧𑀬𑁄𑀕𑀺𑀦𑀻𑀢𑀺. 𑀧𑀜𑁆𑀜𑀸𑀯𑀘𑀦𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁄. 𑀲𑀻𑀮𑀜𑁆𑀘 𑀲𑀩𑁆𑀩𑁂𑀲𑀁 𑀩𑀼𑀤𑁆𑀥𑀕𑀼𑀡𑀸𑀦𑀁 𑀆𑀤𑀺, 𑀲𑀫𑀸𑀥𑀺 𑀫𑀚𑁆𑀛𑁂, 𑀧𑀜𑁆𑀜𑀸 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀏𑀯𑀫𑁆𑀧𑀺 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺 𑀦𑀬𑀢𑁄 𑀤𑀲𑁆𑀲𑀺𑀢𑀢𑁆𑀢𑀸. 𑀏𑀲𑁄 𑀏𑀯 𑀳𑀺 𑀦𑀺𑀭𑀯𑀲𑁂𑀲𑀢𑁄 𑀩𑀼𑀤𑁆𑀥𑀕𑀼𑀡𑀸𑀦𑀁 𑀤𑀲𑁆𑀲𑀦𑀼𑀧𑀸𑀬𑁄, 𑀬𑀤𑀺𑀤𑀁 𑀦𑀬𑀕𑁆𑀕𑀳𑀡𑀁, 𑀅𑀜𑁆𑀜𑀣𑀸 𑀓𑁄 𑀦𑀸𑀫 𑀲𑀫𑀢𑁆𑀣𑁄 𑀪𑀕𑀯𑀢𑁄 𑀕𑀼𑀡𑁂 𑀅𑀦𑀼𑀧𑀤𑀁 𑀦𑀺𑀭𑀯𑀲𑁂𑀲𑀢𑁄 𑀤𑀲𑁆𑀲𑁂𑀢𑀼𑀁? 𑀢𑁂𑀦𑁂𑀯𑀸𑀳 𑁋

‘‘𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁,

𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄;

𑀔𑀻𑀬𑁂𑀣 ¶ 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂,

𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁦𑁪; 𑁩.𑁧𑁪𑁧; 𑀫. 𑀦𑀺. 𑀅𑀝𑁆𑀞. 𑁨.𑁪𑁨𑁫; 𑀉𑀤𑀸. 𑀅𑀝𑁆𑀞. 𑁫𑁩; 𑀩𑀼. 𑀯𑀁. 𑀅𑀝𑁆𑀞. 𑁪.𑁪; 𑀅𑀧. 𑀅𑀝𑁆𑀞. 𑁨.𑁭.𑀧𑀭𑀧𑁆𑀧𑀲𑀸𑀤𑀓𑀢𑁆𑀣𑁂𑀭𑀅𑀧𑀤𑀸𑀦𑀯𑀡𑁆𑀡𑀦𑀸);

𑀢𑁂𑀦𑁂𑀯 𑀘 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁂𑀦𑀧𑀺 𑀩𑀼𑀤𑁆𑀥𑀕𑀼𑀡𑀧𑀭𑀺𑀘𑁆𑀙𑁂𑀤𑀦𑀁 𑀧𑀢𑀺 𑀅𑀦𑀼𑀬𑀼𑀢𑁆𑀢𑁂𑀦 ‘‘𑀦𑁄 𑀳𑁂𑀢𑀁, 𑀪𑀦𑁆𑀢𑁂’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀅𑀧𑀺𑀘 𑀫𑁂, 𑀪𑀦𑁆𑀢𑁂, 𑀥𑀫𑁆𑀫𑀦𑁆𑀯𑀬𑁄 𑀯𑀺𑀤𑀺𑀢𑁄’’𑀢𑀺 𑀯𑀼𑀢𑁆𑀢𑀁.

𑁨. 𑀏𑀯𑀁 𑀲𑀗𑁆𑀔𑁂𑀧𑁂𑀦 𑀲𑀓𑀮𑀲𑀩𑁆𑀩𑀜𑁆𑀜𑀼𑀕𑀼𑀡𑁂𑀳𑀺 𑀪𑀕𑀯𑀦𑁆𑀢𑀁 𑀅𑀪𑀺𑀢𑁆𑀣𑀯𑀺𑀢𑁆𑀯𑀸 𑀇𑀤𑀸𑀦𑀺 𑀲𑀤𑁆𑀥𑀫𑁆𑀫𑀁 𑀣𑁄𑀫𑁂𑀢𑀼𑀁 ‘‘𑀩𑀼𑀤𑁆𑀥𑁄𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀩𑀼𑀤𑁆𑀥𑁄𑀢𑀺 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄. 𑀩𑀼𑀤𑁆𑀥𑀪𑀸𑀯𑀦𑁆𑀢𑀺 𑀓𑀫𑁆𑀫𑀦𑀺𑀤𑁆𑀤𑁂𑀲𑁄. 𑀪𑀸𑀯𑁂𑀢𑁆𑀯𑀸 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀘 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄. 𑀬𑀦𑁆𑀢𑀺 𑀅𑀦𑀺𑀬𑀫𑀢𑁄 𑀓𑀫𑁆𑀫𑀦𑀺𑀤𑁆𑀤𑁂𑀲𑁄. 𑀉𑀧𑀕𑀢𑁄𑀢𑀺 𑀅𑀧𑀭𑀓𑀸𑀮𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄. 𑀯𑀦𑁆𑀤𑁂𑀢𑀺 𑀓𑀺𑀭𑀺𑀬𑀸𑀦𑀺𑀤𑁆𑀤𑁂𑀲𑁄. 𑀢𑀦𑁆𑀢𑀺 𑀦𑀺𑀬𑀫𑀦𑀁. 𑀥𑀫𑁆𑀫𑀦𑁆𑀢𑀺 𑀯𑀦𑁆𑀤𑀦𑀓𑀺𑀭𑀺𑀬𑀸𑀬 𑀓𑀫𑁆𑀫𑀦𑀺𑀤𑁆𑀤𑁂𑀲𑁄. 𑀕𑀢𑀫𑀮𑀁 𑀅𑀦𑀼𑀢𑁆𑀢𑀭𑀦𑁆𑀢𑀺 𑀘 𑀢𑀩𑁆𑀩𑀺𑀲𑁂𑀲𑀦𑀁.

𑀢𑀢𑁆𑀣 𑀩𑀼𑀤𑁆𑀥𑀲𑀤𑁆𑀤𑀲𑁆𑀲 𑀢𑀸𑀯 ‘‘𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄, 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲𑁄 𑁯𑁭; 𑀧𑀝𑀺. 𑀫. 𑁧.𑁧𑁬𑁨) 𑀦𑀺𑀤𑁆𑀤𑁂𑀲𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀣 𑀯𑀸 𑀲𑀯𑀸𑀲𑀦𑀸𑀬 𑀅𑀜𑁆𑀜𑀸𑀡𑀦𑀺𑀤𑁆𑀤𑀸𑀬 𑀅𑀘𑁆𑀘𑀦𑁆𑀢𑀯𑀺𑀕𑀫𑀢𑁄, 𑀩𑀼𑀤𑁆𑀥𑀺𑀬𑀸 𑀯𑀸 𑀯𑀺𑀓𑀲𑀺𑀢𑀪𑀸𑀯𑀢𑁄 𑀩𑀼𑀤𑁆𑀥𑀯𑀸𑀢𑀺 𑀩𑀼𑀤𑁆𑀥𑁄 𑀚𑀸𑀕𑀭𑀡𑀯𑀺𑀓𑀲𑀦𑀢𑁆𑀣𑀯𑀲𑁂𑀦. 𑀅𑀣 𑀯𑀸 𑀓𑀲𑁆𑀲𑀘𑀺𑀧𑀺 𑀜𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀦𑀯𑀩𑀼𑀤𑁆𑀥𑀲𑁆𑀲 𑀅𑀪𑀸𑀯𑁂𑀦 𑀜𑁂𑀬𑁆𑀬𑀯𑀺𑀲𑁂𑀲𑀲𑁆𑀲 𑀓𑀫𑁆𑀫𑀪𑀸𑀯𑁂𑀦 𑀅𑀕𑁆𑀕𑀳𑀡𑀢𑁄 𑀓𑀫𑁆𑀫𑀯𑀘𑀦𑀺𑀘𑁆𑀙𑀸𑀬 𑀅𑀪𑀸𑀯𑁂𑀦 𑀅𑀯𑀕𑀫𑀦𑀢𑁆𑀣𑀯𑀲𑁂𑀦𑁂𑀯 ¶ 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄 𑀮𑀩𑁆𑀪𑀢𑀻𑀢𑀺 𑀩𑀼𑀤𑁆𑀥𑀯𑀸𑀢𑀺 𑀩𑀼𑀤𑁆𑀥𑁄 𑀬𑀣𑀸 ‘‘𑀤𑀺𑀓𑁆𑀔𑀺𑀢𑁄 𑀦 𑀤𑀤𑀸𑀢𑀻’’𑀢𑀺. 𑀅𑀢𑁆𑀣𑀢𑁄 𑀧𑀦 𑀧𑀸𑀭𑀫𑀺𑀢𑀸𑀧𑀭𑀺𑀪𑀸𑀯𑀺𑀢𑁄 𑀲𑀬𑀫𑁆𑀪𑀼𑀜𑀸𑀡𑁂𑀦 𑀲𑀳 𑀯𑀸𑀲𑀦𑀸𑀬 𑀯𑀺𑀳𑀢𑀯𑀺𑀤𑁆𑀥𑀁𑀲𑀺𑀢𑀦𑀺𑀭𑀯𑀲𑁂𑀲𑀓𑀺𑀮𑁂𑀲𑁄 𑀫𑀳𑀸𑀓𑀭𑀼𑀡𑀸𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀤𑀺𑀅𑀧𑀭𑀺𑀫𑁂𑀬𑁆𑀬𑀕𑀼𑀡𑀕𑀡𑀸𑀥𑀸𑀭𑁄 𑀔𑀦𑁆𑀥𑀲𑀦𑁆𑀢𑀸𑀦𑁄 𑀩𑀼𑀤𑁆𑀥𑁄. 𑀬𑀣𑀸𑀳 𑁋

‘‘𑀩𑀼𑀤𑁆𑀥𑁄𑀢𑀺 𑀬𑁄 𑀲𑁄 𑀪𑀕𑀯𑀸 𑀲𑀬𑀫𑁆𑀪𑀽 𑀅𑀦𑀸𑀘𑀭𑀺𑀬𑀓𑁄 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀲𑀸𑀫𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀺, 𑀢𑀢𑁆𑀣 𑀘 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁄 𑀩𑀮𑁂𑀲𑀼 𑀘 𑀯𑀲𑀻𑀪𑀸𑀯’’𑀦𑁆𑀢𑀺 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲𑁄 𑁯𑁭; 𑀧𑀝𑀺. 𑀫. 𑁧.𑁧𑁬𑁧).

𑀅𑀧𑀺-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂. 𑀢𑁂𑀦 ‘‘𑀏𑀯𑀁 𑀕𑀼𑀡𑀯𑀺𑀲𑁂𑀲𑀬𑀼𑀢𑁆𑀢𑁄 𑀲𑁄𑀧𑀺 𑀦𑀸𑀫 𑀪𑀕𑀯𑀸’’𑀢𑀺 𑀯𑀓𑁆𑀔𑀫𑀸𑀦𑀕𑀼𑀡𑀥𑀫𑁆𑀫𑁂 ¶ 𑀲𑀫𑁆𑀪𑀸𑀯𑀦𑀁 𑀤𑀻𑀧𑁂𑀢𑀺. 𑀩𑀼𑀤𑁆𑀥𑀪𑀸𑀯𑀦𑁆𑀢𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁. 𑀪𑀸𑀯𑁂𑀢𑁆𑀯𑀸𑀢𑀺 𑀉𑀧𑁆𑀧𑀸𑀤𑁂𑀢𑁆𑀯𑀸 𑀯𑀟𑁆𑀠𑁂𑀢𑁆𑀯𑀸 𑀘. 𑀲𑀘𑁆𑀙𑀺𑀓𑀢𑁆𑀯𑀸𑀢𑀺 𑀧𑀘𑁆𑀘𑀓𑁆𑀔𑀁 𑀓𑀢𑁆𑀯𑀸. 𑀉𑀧𑀕𑀢𑁄𑀢𑀺 𑀧𑀢𑁆𑀢𑁄, 𑀅𑀥𑀺𑀕𑀢𑁄𑀢𑀺 𑀅𑀢𑁆𑀣𑁄. 𑀏𑀢𑀲𑁆𑀲 𑀩𑀼𑀤𑁆𑀥𑀪𑀸𑀯𑀦𑁆𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀕𑀢𑀫𑀮𑀦𑁆𑀢𑀺 𑀯𑀺𑀕𑀢𑀫𑀮𑀁, 𑀦𑀺𑀤𑁆𑀤𑁄𑀲𑀦𑁆𑀢𑀺 𑀅𑀢𑁆𑀣𑁄. 𑀯𑀦𑁆𑀤𑁂𑀢𑀺 𑀧𑀡𑀫𑀸𑀫𑀺, 𑀣𑁄𑀫𑁂𑀫𑀺 𑀯𑀸. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀉𑀢𑁆𑀢𑀭𑀭𑀳𑀺𑀢𑀁, 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀅𑀢𑁆𑀣𑁄. 𑀥𑀫𑁆𑀫𑀦𑁆𑀢𑀺 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀅𑀧𑀸𑀬𑀢𑁄 𑀘 𑀲𑀁𑀲𑀸𑀭𑀢𑁄 𑀘 𑀅𑀧𑀢𑀫𑀸𑀦𑁂 𑀓𑀢𑁆𑀯𑀸 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀏𑀯𑀁 𑀯𑀺𑀯𑀺𑀥𑀕𑀼𑀡𑀕𑀡𑀲𑀫𑀦𑁆𑀦𑀸𑀕𑀢𑁄 𑀩𑀼𑀤𑁆𑀥𑁄𑀧𑀺 𑀪𑀕𑀯𑀸 𑀬𑀁 𑀅𑀭𑀺𑀬𑀫𑀕𑁆𑀕𑀲𑀗𑁆𑀔𑀸𑀢𑀁 𑀥𑀫𑁆𑀫𑀁 𑀪𑀸𑀯𑁂𑀢𑁆𑀯𑀸, 𑀨𑀮𑀦𑀺𑀩𑁆𑀩𑀸𑀦𑀁 𑀧𑀦 𑀲𑀘𑁆𑀙𑀺𑀓𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀥𑀺𑀕𑀢𑁄, 𑀢𑀫𑁂𑀯𑀁 𑀩𑀼𑀤𑁆𑀥𑀸𑀦𑀫𑁆𑀧𑀺 𑀩𑀼𑀤𑁆𑀥𑀪𑀸𑀯𑀳𑁂𑀢𑀼𑀪𑀽𑀢𑀁 𑀲𑀩𑁆𑀩𑀤𑁄𑀲𑀫𑀮𑀭𑀳𑀺𑀢𑀁 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀢𑀭𑀸𑀪𑀸𑀯𑁂𑀦 𑀅𑀦𑀼𑀢𑁆𑀢𑀭𑀁 𑀧𑀝𑀺𑀯𑁂𑀥𑀲𑀤𑁆𑀥𑀫𑁆𑀫𑀁 𑀦𑀫𑀸𑀫𑀻𑀢𑀺. 𑀧𑀭𑀺𑀬𑀢𑁆𑀢𑀺𑀲𑀤𑁆𑀥𑀫𑁆𑀫𑀲𑁆𑀲𑀧𑀺 𑀢𑀧𑁆𑀧𑀓𑀸𑀲𑀦𑀢𑁆𑀢𑀸 𑀇𑀥 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀅𑀣 𑀯𑀸 ‘‘𑀅𑀪𑀺𑀥𑀫𑁆𑀫𑀦𑀬𑀲𑀫𑀼𑀤𑁆𑀤𑀁 𑀅𑀥𑀺𑀕𑀜𑁆𑀙𑀺, 𑀢𑀻𑀡𑀺 𑀧𑀺𑀝𑀓𑀸𑀦𑀺 𑀲𑀫𑁆𑀫𑀲𑀻’’𑀢𑀺 𑀘 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲𑀧𑀺 𑀲𑀘𑁆𑀙𑀺𑀓𑀺𑀭𑀺𑀬𑀸𑀲𑀫𑁆𑀫𑀲𑀦𑀧𑀭𑀺𑀬𑀸𑀬𑁄 𑀮𑀩𑁆𑀪𑀢𑀻𑀢𑀺 𑀲𑁄𑀧𑀺 𑀇𑀥 𑀯𑀼𑀢𑁆𑀢𑁄 𑀏𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 ‘‘𑀬𑀁 𑀥𑀫𑁆𑀫𑀁 𑀪𑀸𑀯𑁂𑀢𑁆𑀯𑀸 𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀩𑀼𑀤𑁆𑀥𑀓𑀭𑀥𑀫𑁆𑀫𑀪𑀽𑀢𑀸𑀳𑀺 𑀧𑀸𑀭𑀫𑀺𑀢𑀸𑀳𑀺 𑀲𑀳 𑀧𑀼𑀩𑁆𑀩𑀪𑀸𑀕𑁂 𑀅𑀥𑀺𑀲𑀻𑀮𑀲𑀺𑀓𑁆𑀔𑀸𑀤𑀬𑁄𑀧𑀺 𑀇𑀥 𑀥𑀫𑁆𑀫𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀸𑀧𑀺 𑀳𑀺 𑀯𑀺𑀕𑀢𑀧𑁆𑀧𑀝𑀺𑀧𑀓𑁆𑀔𑀢𑀸𑀬 𑀕𑀢𑀫𑀮𑀸, 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀅𑀦𑀼𑀢𑁆𑀢𑀭𑀸 𑀘𑀸𑀢𑀺. 𑀢𑀣𑀸 𑀳𑀺 𑀲𑀢𑁆𑀢𑀸𑀦𑀁 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀦𑀺𑀲𑁆𑀲𑀭𑀡𑀸𑀬 𑀓𑀢𑀫𑀳𑀸𑀪𑀺𑀦𑀻𑀳𑀸𑀭𑁄 𑀫𑀳𑀸𑀓𑀭𑀼𑀡𑀸𑀥𑀺𑀯𑀸𑀲𑀦𑀧𑁂𑀲𑀮𑀚𑁆𑀛𑀸𑀲𑀬𑁄 ¶ 𑀧𑀜𑁆𑀜𑀸𑀯𑀺𑀲𑁂𑀲𑀧𑀭𑀺𑀬𑁄𑀤𑀸𑀢𑀦𑀺𑀫𑁆𑀫𑀮𑀸𑀦𑀁 𑀤𑀸𑀦𑀤𑀫𑀲𑀜𑁆𑀜𑀫𑀸𑀤𑀻𑀦𑀁 𑀉𑀢𑁆𑀢𑀫𑀥𑀫𑁆𑀫𑀸𑀦𑀁 𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀓𑀧𑁆𑀧𑀸𑀦𑀁 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀲𑀓𑁆𑀓𑀘𑁆𑀘𑀁 𑀦𑀺𑀭𑀦𑁆𑀢𑀭𑀁 𑀦𑀺𑀭𑀯𑀲𑁂𑀲𑀸𑀦𑀁 𑀪𑀸𑀯𑀦𑀸𑀧𑀘𑁆𑀘𑀓𑁆𑀔𑀓𑀭𑀡𑁂𑀳𑀺 𑀓𑀫𑁆𑀫𑀸𑀤𑀻𑀲𑀼 𑀅𑀥𑀺𑀕𑀢𑀯𑀲𑀻𑀪𑀸𑀯𑁄 𑀅𑀘𑁆𑀙𑀭𑀺𑀬𑀸𑀘𑀺𑀦𑁆𑀢𑁂𑀬𑁆𑀬𑀫𑀳𑀸𑀦𑀼𑀪𑀸𑀯𑁄 𑀅𑀥𑀺𑀲𑀻𑀮𑀅𑀥𑀺𑀘𑀺𑀢𑁆𑀢𑀸𑀦𑀁 𑀧𑀭𑀫𑀼𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀪𑀕𑀯𑀸 𑀧𑀘𑁆𑀘𑀬𑀸𑀓𑀸𑀭𑁂 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀫𑀼𑀔𑁂𑀦 𑀫𑀳𑀸𑀯𑀚𑀺𑀭𑀜𑀸𑀡𑀁 𑀧𑁂𑀲𑁂𑀢𑁆𑀯𑀸 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺.

𑀏𑀢𑁆𑀣 𑀘 ‘‘𑀪𑀸𑀯𑁂𑀢𑁆𑀯𑀸’’𑀢𑀺 𑀏𑀢𑁂𑀦 𑀯𑀺𑀚𑁆𑀚𑀸𑀲𑀫𑁆𑀧𑀤𑀸𑀬 𑀥𑀫𑁆𑀫𑀁 𑀣𑁄𑀫𑁂𑀢𑀺, ‘‘𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺 𑀏𑀢𑁂𑀦 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀤𑀸𑀬. 𑀢𑀣𑀸 𑀧𑀞𑀫𑁂𑀦 𑀛𑀸𑀦𑀲𑀫𑁆𑀧𑀤𑀸𑀬, 𑀤𑀼𑀢𑀺𑀬𑁂𑀦 𑀯𑀺𑀫𑁄𑀓𑁆𑀔𑀲𑀫𑁆𑀧𑀤𑀸𑀬. 𑀧𑀞𑀫𑁂𑀦 𑀯𑀸 𑀲𑀫𑀸𑀥𑀺𑀲𑀫𑁆𑀧𑀤𑀸𑀬, 𑀤𑀼𑀢𑀺𑀬𑁂𑀦 𑀲𑀫𑀸𑀧𑀢𑁆𑀢𑀺𑀲𑀫𑁆𑀧𑀤𑀸𑀬. 𑀅𑀣 𑀯𑀸 𑀧𑀞𑀫𑁂𑀦 𑀔𑀬𑀜𑀸𑀡𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀅𑀦𑀼𑀧𑁆𑀧𑀸𑀤𑀜𑀸𑀡𑀪𑀸𑀯𑁂𑀦. 𑀧𑀞𑀫𑁂𑀦 𑀯𑀸 𑀯𑀺𑀚𑁆𑀚𑀽𑀧𑀫𑀢𑀸𑀬, 𑀤𑀼𑀢𑀺𑀬𑁂𑀦 𑀯𑀚𑀺𑀭𑀽𑀧𑀫𑀢𑀸𑀬. 𑀧𑀼𑀭𑀺𑀫𑁂𑀦 𑀯𑀸 𑀯𑀺𑀭𑀸𑀕𑀲𑀫𑁆𑀧𑀢𑁆𑀢𑀺𑀬𑀸, 𑀤𑀼𑀢𑀺𑀬𑁂𑀦 𑀦𑀺𑀭𑁄𑀥𑀲𑀫𑁆𑀧𑀢𑁆𑀢𑀺𑀬𑀸. 𑀢𑀣𑀸 𑀧𑀞𑀫𑁂𑀦 𑀦𑀺𑀬𑁆𑀬𑀸𑀦𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀦𑀺𑀲𑁆𑀲𑀭𑀡𑀪𑀸𑀯𑁂𑀦. 𑀧𑀞𑀫𑁂𑀦 𑀯𑀸 𑀳𑁂𑀢𑀼𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀅𑀲𑀗𑁆𑀔𑀢𑀪𑀸𑀯𑁂𑀦. 𑀧𑀞𑀫𑁂𑀦 𑀯𑀸 𑀤𑀲𑁆𑀲𑀦𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀯𑀺𑀯𑁂𑀓𑀪𑀸𑀯𑁂𑀦. 𑀧𑀞𑀫𑁂𑀦 𑀯𑀸 𑀅𑀥𑀺𑀧𑀢𑀺𑀪𑀸𑀯𑁂𑀦, 𑀤𑀼𑀢𑀺𑀬𑁂𑀦 𑀅𑀫𑀢𑀪𑀸𑀯𑁂𑀦 𑀥𑀫𑁆𑀫𑀁 𑀣𑁄𑀫𑁂𑀢𑀺. 𑀅𑀣 𑀯𑀸 ‘‘𑀬𑀁 𑀥𑀫𑁆𑀫𑀁 𑀪𑀸𑀯𑁂𑀢𑁆𑀯𑀸 𑀩𑀼𑀤𑁆𑀥𑀪𑀸𑀯𑀁 𑀉𑀧𑀕𑀢𑁄’’𑀢𑀺 𑀏𑀢𑁂𑀦 𑀲𑁆𑀯𑀸𑀓𑁆𑀔𑀸𑀢𑀢𑀸𑀬 𑀥𑀫𑁆𑀫𑀁 𑀣𑁄𑀫𑁂𑀢𑀺, ‘‘𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺 ¶ 𑀏𑀢𑁂𑀦 𑀲𑀦𑁆𑀤𑀺𑀝𑁆𑀞𑀺𑀓𑀢𑀸𑀬. 𑀢𑀣𑀸 𑀧𑀼𑀭𑀺𑀫𑁂𑀦 𑀅𑀓𑀸𑀮𑀺𑀓𑀢𑀸𑀬, 𑀧𑀘𑁆𑀙𑀺𑀫𑁂𑀦 𑀏𑀳𑀺𑀧𑀲𑁆𑀲𑀺𑀓𑀢𑀸𑀬. 𑀧𑀼𑀭𑀺𑀫𑁂𑀦 𑀯𑀸 𑀑𑀧𑀦𑁂𑀬𑁆𑀬𑀺𑀓𑀢𑀸𑀬, 𑀧𑀘𑁆𑀙𑀺𑀫𑁂𑀦 𑀧𑀘𑁆𑀘𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀢𑀸𑀬 𑀥𑀫𑁆𑀫𑀁 𑀣𑁄𑀫𑁂𑀢𑀺. ‘‘𑀕𑀢𑀫𑀮’’𑀦𑁆𑀢𑀺 𑀇𑀫𑀺𑀦𑀸 𑀲𑀁𑀓𑀺𑀮𑁂𑀲𑀸𑀪𑀸𑀯𑀤𑀻𑀧𑀦𑁂𑀦 𑀥𑀫𑁆𑀫𑀲𑁆𑀲 𑀧𑀭𑀺𑀲𑀼𑀤𑁆𑀥𑀢𑀁 𑀤𑀲𑁆𑀲𑁂𑀢𑀺, ‘‘𑀅𑀦𑀼𑀢𑁆𑀢𑀭’’𑀦𑁆𑀢𑀺 𑀏𑀢𑁂𑀦 𑀅𑀜𑁆𑀜𑀲𑁆𑀲 𑀯𑀺𑀲𑀺𑀝𑁆𑀞𑀲𑁆𑀲 𑀅𑀪𑀸𑀯𑀤𑀻𑀧𑀦𑁂𑀦 𑀯𑀺𑀧𑀼𑀮𑀧𑀭𑀺𑀧𑀼𑀡𑁆𑀡𑀢𑀁. 𑀧𑀞𑀫𑁂𑀦 𑀯𑀸 𑀧𑀳𑀸𑀦𑀲𑀫𑁆𑀧𑀤𑀁 𑀥𑀫𑁆𑀫𑀲𑁆𑀲 𑀤𑀲𑁆𑀲𑁂𑀢𑀺, 𑀤𑀼𑀢𑀺𑀬𑁂𑀦 𑀧𑀪𑀯𑀲𑀫𑁆𑀧𑀤𑀁. 𑀪𑀸𑀯𑁂𑀢𑀩𑁆𑀩𑀢𑀸𑀬 𑀯𑀸 𑀥𑀫𑁆𑀫𑀲𑁆𑀲 𑀕𑀢𑀫𑀮𑀪𑀸𑀯𑁄 𑀬𑁄𑀚𑁂𑀢𑀩𑁆𑀩𑁄. 𑀪𑀸𑀯𑀦𑀸𑀕𑀼𑀡𑁂𑀦 𑀳𑀺 𑀲𑁄 𑀤𑁄𑀲𑀸𑀦𑀁 𑀲𑀫𑀼𑀕𑁆𑀖𑀸𑀢𑀓𑁄 𑀳𑁄𑀢𑀻𑀢𑀺. 𑀲𑀘𑁆𑀙𑀺𑀓𑀸𑀢𑀩𑁆𑀩𑀪𑀸𑀯𑁂𑀦 𑀅𑀦𑀼𑀢𑁆𑀢𑀭𑀪𑀸𑀯𑁄 𑀬𑁄𑀚𑁂𑀢𑀩𑁆𑀩𑁄. 𑀲𑀘𑁆𑀙𑀺𑀓𑀺𑀭𑀺𑀬𑀸𑀦𑀺𑀩𑁆𑀩𑀢𑁆𑀢𑀺𑀢𑁄 𑀳𑀺 𑀢𑀤𑀼𑀢𑁆𑀢𑀭𑀺𑀓𑀭𑀡𑀻𑀬𑀸𑀪𑀸𑀯𑀢𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀅𑀦𑀼𑀢𑁆𑀢𑀭𑁄𑀢𑀺. 𑀢𑀣𑀸 ‘‘𑀪𑀸𑀯𑁂𑀢𑁆𑀯𑀸’’𑀢𑀺 𑀏𑀢𑁂𑀦 𑀲𑀳 𑀧𑀼𑀩𑁆𑀩𑀪𑀸𑀕𑀲𑀻𑀮𑀸𑀤𑀻𑀳𑀺 𑀲𑁂𑀓𑁆𑀔𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀓𑁆𑀔𑀦𑁆𑀥𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. ‘‘𑀲𑀘𑁆𑀙𑀺𑀓𑀢𑁆𑀯𑀸’’𑀢𑀺 𑀏𑀢𑁂𑀦 𑀲𑀳 𑀅𑀲𑀗𑁆𑀔𑀢𑀸𑀬 𑀥𑀸𑀢𑀼𑀬𑀸 𑀅𑀲𑁂𑀓𑁆𑀔𑀸 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀓𑁆𑀔𑀦𑁆𑀥𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀻𑀢𑀺.

𑁩. 𑀏𑀯𑀁 ¶ 𑀲𑀗𑁆𑀔𑁂𑀧𑁂𑀦𑁂𑀯 𑀲𑀩𑁆𑀩𑀥𑀫𑁆𑀫𑀕𑀼𑀡𑁂𑀳𑀺 𑀲𑀤𑁆𑀥𑀫𑁆𑀫𑀁 𑀅𑀪𑀺𑀢𑁆𑀣𑀯𑀺𑀢𑁆𑀯𑀸 𑀇𑀤𑀸𑀦𑀺 𑀅𑀭𑀺𑀬𑀲𑀗𑁆𑀖𑀁 𑀣𑁄𑀫𑁂𑀢𑀼𑀁 ‘‘𑀲𑀼𑀕𑀢𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀕𑀢𑀲𑁆𑀲𑀸𑀢𑀺 𑀲𑀫𑁆𑀩𑀦𑁆𑀥𑀦𑀺𑀤𑁆𑀤𑁂𑀲𑁄. ‘‘𑀢𑀲𑁆𑀲 𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀑𑀭𑀲𑀸𑀦𑀦𑁆𑀢𑀺 𑀧𑀼𑀢𑁆𑀢𑀯𑀺𑀲𑁂𑀲𑀦𑀁. 𑀫𑀸𑀭𑀲𑁂𑀦𑀫𑀣𑀦𑀸𑀦𑀦𑁆𑀢𑀺 𑀑𑀭𑀲𑀧𑀼𑀢𑁆𑀢𑀪𑀸𑀯𑁂 𑀓𑀸𑀭𑀡𑀦𑀺𑀤𑁆𑀤𑁂𑀲𑁄 𑀢𑁂𑀦 𑀓𑀺𑀮𑁂𑀲𑀧𑁆𑀧𑀳𑀸𑀦𑀫𑁂𑀯 𑀪𑀕𑀯𑀢𑁄 𑀑𑀭𑀲𑀧𑀼𑀢𑁆𑀢𑀪𑀸𑀯𑁂 𑀓𑀸𑀭𑀡𑀁 𑀅𑀦𑀼𑀚𑀸𑀦𑀸𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀝𑁆𑀞𑀦𑁆𑀦𑀦𑁆𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑀦𑀺𑀤𑁆𑀤𑁂𑀲𑁄. 𑀢𑁂𑀦 𑀘 𑀲𑀢𑀺𑀧𑀺 𑀢𑁂𑀲𑀁 𑀲𑀢𑁆𑀢𑀯𑀺𑀲𑁂𑀲𑀪𑀸𑀯𑁂𑀦 𑀅𑀦𑁂𑀓𑀲𑀢𑀲𑀳𑀲𑁆𑀲𑀪𑀸𑀯𑁂 𑀇𑀫𑀁 𑀕𑀡𑀦𑀧𑀭𑀺𑀘𑁆𑀙𑁂𑀤𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺 𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄. 𑀲𑀫𑀽𑀳𑀦𑁆𑀢𑀺 𑀲𑀫𑀼𑀤𑀸𑀬𑀦𑀺𑀤𑁆𑀤𑁂𑀲𑁄. 𑀅𑀭𑀺𑀬𑀲𑀗𑁆𑀖𑀦𑁆𑀢𑀺 𑀕𑀼𑀡𑀯𑀺𑀲𑀺𑀝𑁆𑀞𑀲𑀁𑀳𑀢𑀪𑀸𑀯𑀦𑀺𑀤𑁆𑀤𑁂𑀲𑁄. 𑀢𑁂𑀦 𑀅𑀲𑀢𑀺𑀧𑀺 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀓𑀸𑀬𑀲𑀸𑀫𑀕𑁆𑀕𑀺𑀬𑀁 𑀅𑀭𑀺𑀬𑀲𑀗𑁆𑀖𑀪𑀸𑀯𑀁 𑀤𑀲𑁆𑀲𑁂𑀢𑀺 𑀤𑀺𑀝𑁆𑀞𑀺𑀲𑀻𑀮𑀲𑀸𑀫𑀜𑁆𑀜𑁂𑀦 𑀲𑀁𑀳𑀢𑀪𑀸𑀯𑀢𑁄.

𑀢𑀢𑁆𑀣 𑀉𑀭𑀲𑀺 𑀪𑀯𑀸 𑀚𑀸𑀢𑀸 𑀲𑀁𑀩𑀤𑁆𑀥𑀸 𑀘 𑀑𑀭𑀲𑀸. 𑀬𑀣𑀸 𑀳𑀺 𑀲𑀢𑁆𑀢𑀸𑀦𑀁 𑀑𑀭𑀲𑀧𑀼𑀢𑁆𑀢𑀸 𑀅𑀢𑁆𑀢𑀚𑀢𑀸𑀬 𑀧𑀺𑀢𑀼 𑀲𑀦𑁆𑀢𑀓𑀲𑁆𑀲 𑀤𑀸𑀬𑀚𑁆𑀚𑀲𑁆𑀲 𑀯𑀺𑀲𑁂𑀲𑁂𑀦 𑀪𑀸𑀕𑀺𑀦𑁄 𑀳𑁄𑀦𑁆𑀢𑀺, 𑀏𑀯𑀫𑁂𑀢𑁂𑀧𑀺 𑀅𑀭𑀺𑀬𑀧𑀼𑀕𑁆𑀕𑀮𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀯𑀦𑀦𑁆𑀢𑁂 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑀢𑀸𑀬 𑀪𑀕𑀯𑀢𑁄 𑀲𑀦𑁆𑀢𑀓𑀲𑁆𑀲 𑀯𑀺𑀫𑀼𑀢𑁆𑀢𑀺𑀲𑀼𑀔𑀲𑁆𑀲 𑀅𑀭𑀺𑀬𑀥𑀫𑁆𑀫𑀭𑀢𑀦𑀲𑁆𑀲 𑀏𑀓𑀦𑁆𑀢𑁂𑀦 𑀪𑀸𑀕𑀺𑀦𑁄𑀢𑀺 𑀑𑀭𑀲𑀸 𑀯𑀺𑀬 𑀑𑀭𑀲𑀸. 𑀅𑀣 𑀯𑀸 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸𑀦𑀼𑀪𑀸𑀯𑁂𑀦 𑀅𑀭𑀺𑀬𑀪𑀽𑀫𑀺𑀁 𑀑𑀓𑁆𑀓𑀫𑀫𑀸𑀦𑀸 𑀑𑀓𑁆𑀓𑀦𑁆𑀢𑀸 𑀘 𑀅𑀭𑀺𑀬𑀲𑀸𑀯𑀓𑀸 𑀪𑀕𑀯𑀢𑁄 𑀉𑀭𑁂 𑀯𑀸𑀬𑀸𑀫𑀚𑀦𑀺𑀢𑀸𑀪𑀺𑀚𑀸𑀢𑀺𑀢𑀸𑀬 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀑𑀭𑀲𑀧𑀼𑀢𑁆𑀢𑀸𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀦𑁆𑀢𑀺. 𑀲𑀸𑀯𑀓𑁂𑀳𑀺 𑀧𑀯𑀢𑁆𑀢𑀺𑀬𑀫𑀸𑀦𑀸𑀧𑀺 𑀳𑀺 𑀥𑀫𑁆𑀫𑀤𑁂𑀲𑀦𑀸 ‘‘𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸’’𑀇𑀘𑁆𑀘𑁂𑀯 𑀯𑀼𑀘𑁆𑀘𑀢𑀺 𑀢𑀁𑀫𑀽𑀮𑀓𑀢𑁆𑀢𑀸 𑀮𑀓𑁆𑀔𑀡𑀸𑀤𑀺𑀯𑀺𑀲𑁂𑀲𑀸𑀪𑀸𑀯𑀢𑁄 𑀘.

𑀬𑀤𑀺𑀧𑀺 𑀅𑀭𑀺𑀬𑀲𑀸𑀯𑀓𑀸𑀦𑀁 𑀅𑀭𑀺𑀬𑀫𑀕𑁆𑀕𑀸𑀥𑀺𑀕𑀫𑀲𑀫𑀬𑁂 𑀪𑀕𑀯𑀢𑁄 𑀯𑀺𑀬 𑀢𑀤𑀦𑁆𑀢𑀭𑀸𑀬𑀓𑀭𑀡𑀢𑁆𑀣𑀁 𑀤𑁂𑀯𑀧𑀼𑀢𑁆𑀢𑀫𑀸𑀭𑁄 ¶ , 𑀫𑀸𑀭𑀯𑀸𑀳𑀺𑀦𑀻 𑀯𑀸 𑀦 𑀏𑀓𑀦𑁆𑀢𑁂𑀦 𑀅𑀧𑀲𑀸𑀤𑁂𑀢𑀺, 𑀢𑁂𑀳𑀺 𑀧𑀦 𑀅𑀧𑀲𑀸𑀤𑁂𑀢𑀩𑁆𑀩𑀢𑀸𑀬 𑀓𑀸𑀭𑀡𑁂 𑀯𑀺𑀫𑀣𑀺𑀢𑁂 𑀢𑁂𑀧𑀺 𑀯𑀺𑀫𑀣𑀺𑀢𑀸 𑀏𑀯 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀆𑀳 𑁋 ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂 ‘‘𑀫𑀸𑀭𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺 𑀏𑀓𑀤𑁂𑀲𑀲𑀭𑀽𑀧𑁂𑀓𑀲𑁂𑀲𑁄 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀔𑀦𑁆𑀥𑀸𑀪𑀺𑀲𑀗𑁆𑀔𑀸𑀭𑀫𑀸𑀭𑀸𑀦𑀁 𑀯𑀺𑀬 𑀤𑁂𑀯𑀧𑀼𑀢𑁆𑀢𑀫𑀸𑀭𑀲𑁆𑀲𑀧𑀺 𑀕𑀼𑀡𑀫𑀸𑀭𑀡𑁂 𑀲𑀳𑀸𑀬𑀪𑀸𑀯𑀽𑀧𑀕𑀫𑀦𑀢𑁄 𑀓𑀺𑀮𑁂𑀲𑀩𑀮𑀓𑀸𑀬𑁄 ‘‘𑀲𑁂𑀦𑀸’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 𑁋 ‘‘𑀓𑀸𑀫𑀸 𑀢𑁂 𑀧𑀞𑀫𑀸 𑀲𑁂𑀦𑀸’’𑀢𑀺𑀆𑀤𑀺 ¶ (𑀲𑀼. 𑀦𑀺. 𑁪𑁩𑁮; 𑀫𑀳𑀸𑀦𑀺. 𑁨𑁮, 𑁬𑁮, 𑁧𑁪𑁯). 𑀲𑀸 𑀘 𑀢𑁂𑀳𑀺 𑀤𑀺𑀬𑀟𑁆𑀠𑀲𑀳𑀲𑁆𑀲𑀪𑁂𑀤𑀸, 𑀅𑀦𑀦𑁆𑀢𑀪𑁂𑀤𑀸 𑀯𑀸 𑀓𑀺𑀮𑁂𑀲𑀯𑀸𑀳𑀺𑀦𑀻 𑀲𑀢𑀺𑀥𑀫𑁆𑀫𑀯𑀺𑀘𑀬𑀯𑀻𑀭𑀺𑀬𑀲𑀫𑀣𑀸𑀤𑀺𑀕𑀼𑀡𑀧𑁆𑀧𑀳𑀭𑀡𑁂𑀳𑀺 𑀑𑀥𑀺𑀲𑁄 𑀯𑀺𑀫𑀣𑀺𑀢𑀸 𑀯𑀺𑀳𑀢𑀸 𑀯𑀺𑀤𑁆𑀥𑀲𑁆𑀢𑀸 𑀘𑀸𑀢𑀺 𑀫𑀸𑀭𑀲𑁂𑀦𑀫𑀣𑀦𑀸, 𑀅𑀭𑀺𑀬𑀲𑀸𑀯𑀓𑀸. 𑀏𑀢𑁂𑀦 𑀢𑁂𑀲𑀁 𑀪𑀕𑀯𑀢𑁄 𑀅𑀦𑀼𑀚𑀸𑀢𑀧𑀼𑀢𑁆𑀢𑀢𑀁 𑀤𑀲𑁆𑀲𑁂𑀢𑀺.

𑀆𑀭𑀓𑀢𑁆𑀢𑀸 𑀓𑀺𑀮𑁂𑀲𑁂𑀳𑀺, 𑀅𑀦𑀬𑁂 𑀦 𑀇𑀭𑀺𑀬𑀦𑀢𑁄, 𑀅𑀬𑁂 𑀘 𑀇𑀭𑀺𑀬𑀦𑀢𑁄 𑀅𑀭𑀺𑀬𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦. 𑀅𑀣 𑀯𑀸 𑀲𑀤𑁂𑀯𑀓𑁂𑀦 𑀮𑁄𑀓𑁂𑀦 𑀲𑀭𑀡𑀦𑁆𑀢𑀺 𑀅𑀭𑀡𑀻𑀬𑀢𑁄 𑀉𑀧𑀕𑀦𑁆𑀢𑀩𑁆𑀩𑀢𑁄, 𑀉𑀧𑀕𑀢𑀸𑀦𑀜𑁆𑀘 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄 𑀅𑀭𑀺𑀬𑀸, 𑀅𑀭𑀺𑀬𑀸𑀦𑀁 𑀲𑀗𑁆𑀖𑁄𑀢𑀺 𑀅𑀭𑀺𑀬𑀲𑀗𑁆𑀖𑁄, 𑀅𑀭𑀺𑀬𑁄 𑀘 𑀲𑁄 𑀲𑀗𑁆𑀖𑁄 𑀘𑀸𑀢𑀺 𑀯𑀸 𑀅𑀭𑀺𑀬𑀲𑀗𑁆𑀖𑁄, 𑀢𑀁 𑀅𑀭𑀺𑀬𑀲𑀗𑁆𑀖𑀁. 𑀪𑀕𑀯𑀢𑁄 𑀅𑀧𑀭𑀪𑀸𑀕𑁂 𑀩𑀼𑀤𑁆𑀥𑀥𑀫𑁆𑀫𑀭𑀢𑀦𑀸𑀦𑀫𑁆𑀧𑀺 𑀲𑀫𑀥𑀺𑀕𑀫𑁄 𑀲𑀗𑁆𑀖𑀭𑀢𑀦𑀸𑀥𑀻𑀦𑁄𑀢𑀺 𑀅𑀲𑁆𑀲 𑀅𑀭𑀺𑀬𑀲𑀗𑁆𑀖𑀲𑁆𑀲 𑀩𑀳𑀽𑀧𑀓𑀸𑀭𑀢𑀁 𑀤𑀲𑁆𑀲𑁂𑀢𑀼𑀁 𑀇𑀥𑁂𑀯 ‘‘𑀲𑀺𑀭𑀲𑀸 𑀯𑀦𑁆𑀤𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀢𑁆𑀣 𑀘 ‘‘𑀲𑀼𑀕𑀢𑀲𑁆𑀲 𑀑𑀭𑀲𑀸𑀦𑀁 𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀏𑀢𑁂𑀦 𑀅𑀭𑀺𑀬𑀲𑀗𑁆𑀖𑀲𑁆𑀲 𑀧𑀪𑀯𑀲𑀫𑁆𑀧𑀤𑀁 𑀤𑀲𑁆𑀲𑁂𑀢𑀺, ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺 𑀏𑀢𑁂𑀦 𑀧𑀳𑀸𑀦𑀲𑀫𑁆𑀧𑀤𑀁 𑀲𑀓𑀮𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀤𑀻𑀧𑀦𑀢𑁄. ‘‘𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀽𑀳’’𑀦𑁆𑀢𑀺 𑀏𑀢𑁂𑀦 𑀜𑀸𑀡𑀲𑀫𑁆𑀧𑀤𑀁 𑀫𑀕𑁆𑀕𑀝𑁆𑀞𑀨𑀮𑀝𑁆𑀞𑀪𑀸𑀯𑀤𑀻𑀧𑀦𑀢𑁄. ‘‘𑀅𑀭𑀺𑀬𑀲𑀗𑁆𑀖’’𑀦𑁆𑀢𑀺 𑀏𑀢𑁂𑀦 𑀧𑀪𑀯𑀲𑀫𑁆𑀧𑀤𑀁 𑀤𑀲𑁆𑀲𑁂𑀢𑀺 𑀲𑀩𑁆𑀩𑀲𑀗𑁆𑀖𑀸𑀦𑀁 𑀅𑀕𑁆𑀕𑀪𑀸𑀯𑀤𑀻𑀧𑀦𑀢𑁄. 𑀅𑀣 𑀯𑀸 ‘‘𑀲𑀼𑀕𑀢𑀲𑁆𑀲 𑀑𑀭𑀲𑀸𑀦𑀁 𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀅𑀭𑀺𑀬𑀲𑀗𑁆𑀖𑀲𑁆𑀲 𑀯𑀺𑀲𑀼𑀤𑁆𑀥𑀦𑀺𑀲𑁆𑀲𑀬𑀪𑀸𑀯𑀤𑀻𑀧𑀦𑀁, ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺 𑀲𑀫𑁆𑀫𑀸𑀉𑀚𑀼𑀜𑀸𑀬𑀲𑀸𑀫𑀻𑀘𑀺𑀧𑁆𑀧𑀝𑀺𑀧𑀦𑁆𑀦𑀪𑀸𑀯𑀤𑀻𑀧𑀦𑀁, ‘‘𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀽𑀳’’𑀦𑁆𑀢𑀺 𑀆𑀳𑀼𑀦𑁂𑀬𑁆𑀬𑀸𑀤𑀺𑀪𑀸𑀯𑀤𑀻𑀧𑀦𑀁, ‘‘𑀅𑀭𑀺𑀬𑀲𑀗𑁆𑀖’’𑀦𑁆𑀢𑀺 𑀅𑀦𑀼𑀢𑁆𑀢𑀭𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀪𑀸𑀯𑀤𑀻𑀧𑀦𑀁. 𑀢𑀣𑀸 ‘‘𑀲𑀼𑀕𑀢𑀲𑁆𑀲 𑀑𑀭𑀲𑀸𑀦𑀁 𑀧𑀼𑀢𑁆𑀢𑀸𑀦’’𑀦𑁆𑀢𑀺 𑀏𑀢𑁂𑀦 𑀅𑀭𑀺𑀬𑀲𑀗𑁆𑀖𑀲𑁆𑀲 𑀮𑁄𑀓𑀼𑀢𑁆𑀢𑀭𑀲𑀭𑀡𑀕𑀫𑀦𑀲𑀩𑁆𑀪𑀸𑀯𑀁 𑀤𑀻𑀧𑁂𑀢𑀺. 𑀮𑁄𑀓𑀼𑀢𑁆𑀢𑀭𑀲𑀭𑀡𑀕𑀫𑀦𑁂𑀦 𑀳𑀺 𑀢𑁂 𑀪𑀕𑀯𑀢𑁄 𑀑𑀭𑀲𑀧𑀼𑀢𑁆𑀢𑀸 𑀚𑀸𑀢𑀸. ‘‘𑀫𑀸𑀭𑀲𑁂𑀦𑀫𑀣𑀦𑀸𑀦’’𑀦𑁆𑀢𑀺 𑀏𑀢𑁂𑀦 𑀅𑀪𑀺𑀦𑀻𑀳𑀸𑀭𑀲𑀫𑁆𑀧𑀤𑀸𑀲𑀺𑀤𑁆𑀥𑀁 𑀧𑀼𑀩𑁆𑀩𑀪𑀸𑀕𑁂 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀓𑀢𑀸𑀪𑀺𑀦𑀻𑀳𑀸𑀭𑀸 𑀳𑀺 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀸 𑀫𑀸𑀭𑀁 𑀫𑀸𑀭𑀧𑀭𑀺𑀲𑀁 𑀯𑀸 𑀅𑀪𑀺𑀯𑀺𑀚𑀺𑀦𑀦𑁆𑀢𑀺. ‘‘𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀫𑀽𑀳’’𑀦𑁆𑀢𑀺 𑀏𑀢𑁂𑀦 𑀯𑀺𑀤𑁆𑀥𑀲𑁆𑀢𑀯𑀺𑀧𑀓𑁆𑀔𑁂 𑀲𑁂𑀓𑁆𑀔𑀸𑀲𑁂𑀓𑁆𑀔𑀥𑀫𑁆𑀫𑁂 𑀤𑀲𑁆𑀲𑁂𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀫𑀕𑁆𑀕𑀨𑀮𑀥𑀫𑁆𑀫𑀸𑀦𑀁 𑀧𑀓𑀸𑀲𑀺𑀢𑀢𑁆𑀢𑀸. ‘‘𑀅𑀭𑀺𑀬𑀲𑀗𑁆𑀖’’𑀦𑁆𑀢𑀺 𑀅𑀕𑁆𑀕𑀤𑀓𑁆𑀔𑀺𑀡𑁂𑀬𑁆𑀬𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀭𑀡𑀕𑀫𑀦𑀜𑁆𑀘 𑀲𑀸𑀯𑀓𑀸𑀦𑀁 𑀲𑀩𑁆𑀩𑀕𑀼𑀡𑀸𑀦𑀁 𑀆𑀤𑀺, 𑀲𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀸 𑀲𑁂𑀓𑁆𑀔𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀫𑀚𑁆𑀛𑁂, 𑀅𑀲𑁂𑀓𑁆𑀔𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 ¶ 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀗𑁆𑀔𑁂𑀧𑀢𑁄 𑀲𑀩𑁆𑀩𑁂 𑀅𑀭𑀺𑀬𑀲𑀗𑁆𑀖𑀕𑀼𑀡𑀸 𑀧𑀓𑀸𑀲𑀺𑀢𑀸 𑀳𑁄𑀦𑁆𑀢𑀺.

𑁪. 𑀏𑀯𑀁 ¶ 𑀕𑀸𑀣𑀸𑀢𑁆𑀢𑀬𑁂𑀦 𑀲𑀗𑁆𑀔𑁂𑀧𑀢𑁄 𑀲𑀓𑀮𑀕𑀼𑀡𑀲𑀁𑀓𑀺𑀢𑁆𑀢𑀦𑀫𑀼𑀔𑁂𑀦 𑀭𑀢𑀦𑀢𑁆𑀢𑀬𑀲𑁆𑀲 𑀧𑀡𑀸𑀫𑀁 𑀓𑀢𑁆𑀯𑀸 𑀇𑀤𑀸𑀦𑀺 𑀢𑀁𑀦𑀺𑀧𑀘𑁆𑀘𑀓𑀸𑀭𑀁 𑀬𑀣𑀸𑀥𑀺𑀧𑁆𑀧𑁂𑀢𑁂 𑀧𑀬𑁄𑀚𑀦𑁂 𑀧𑀭𑀺𑀡𑀸𑀫𑁂𑀦𑁆𑀢𑁄 ‘‘𑀇𑀢𑀺 𑀫𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀭𑀢𑀺𑀚𑀦𑀦𑀝𑁆𑀞𑁂𑀦 𑀭𑀢𑀦𑀁, 𑀩𑀼𑀤𑁆𑀥𑀥𑀫𑁆𑀫𑀲𑀗𑁆𑀖𑀸. 𑀢𑁂𑀲𑀜𑁆𑀳𑀺 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀬𑀣𑀸𑀪𑀽𑀢𑀕𑀼𑀡𑁂 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀅𑀫𑀢𑀸𑀥𑀺𑀕𑀫𑀳𑁂𑀢𑀼𑀪𑀽𑀢𑀁 𑀅𑀦𑀧𑁆𑀧𑀓𑀁 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀢𑀺. 𑀬𑀣𑀸𑀳 𑁋

‘‘𑀬𑀲𑁆𑀫𑀺𑀁, 𑀫𑀳𑀸𑀦𑀸𑀫, 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀢𑀣𑀸𑀕𑀢𑀁 𑀅𑀦𑀼𑀲𑁆𑀲𑀭𑀢𑀺, 𑀦𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀭𑀸𑀕𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀦 𑀤𑁄𑀲…𑀧𑁂… 𑀦 𑀫𑁄𑀳𑀧𑀭𑀺𑀬𑀼𑀝𑁆𑀞𑀺𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀉𑀚𑀼𑀕𑀢𑀫𑁂𑀯𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀁 𑀳𑁄𑀢𑀺 𑀢𑀣𑀸𑀕𑀢𑀁 𑀆𑀭𑀩𑁆𑀪. 𑀉𑀚𑀼𑀕𑀢𑀘𑀺𑀢𑁆𑀢𑁄 𑀔𑁄 𑀧𑀦, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄 𑀮𑀪𑀢𑀺 𑀅𑀢𑁆𑀣𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀯𑁂𑀤𑀁, 𑀮𑀪𑀢𑀺 𑀥𑀫𑁆𑀫𑀽𑀧𑀲𑀁𑀳𑀺𑀢𑀁 𑀧𑀸𑀫𑁄𑀚𑁆𑀚𑀁, 𑀧𑀫𑀼𑀤𑀺𑀢𑀲𑁆𑀲 𑀧𑀻𑀢𑀺 𑀚𑀸𑀬𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁬.𑁧𑁦; 𑁧𑁧.𑁧𑁧).

𑀘𑀺𑀢𑁆𑀢𑀻𑀓𑀢𑀸𑀤𑀺𑀪𑀸𑀯𑁄 𑀯𑀸 𑀭𑀢𑀦𑀝𑁆𑀞𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀘𑀺𑀢𑁆𑀢𑀻𑀓𑀢𑀁 𑀫𑀳𑀕𑁆𑀖𑀜𑁆𑀘, 𑀅𑀢𑀼𑀮𑀁 𑀤𑀼𑀮𑁆𑀮𑀪𑀤𑀲𑁆𑀲𑀦𑀁;

𑀅𑀦𑁄𑀫𑀲𑀢𑁆𑀢𑀧𑀭𑀺𑀪𑁄𑀕𑀁, 𑀭𑀢𑀦𑀁 𑀢𑁂𑀦 𑀯𑀼𑀘𑁆𑀘𑀢𑀻’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁩; 𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁨𑁨𑁩; 𑀔𑀼. 𑀧𑀸. 𑀅𑀝𑁆𑀞. 𑁬.𑁩; 𑀲𑀼. 𑀦𑀺. 𑀅𑀝𑁆𑀞. 𑁧.𑁨𑁨𑁬);

𑀘𑀺𑀢𑁆𑀢𑀻𑀓𑀢𑀪𑀸𑀯𑀸𑀤𑀬𑁄 𑀘 𑀅𑀦𑀜𑁆𑀜𑀲𑀸𑀥𑀸𑀭𑀡𑀸 𑀩𑀼𑀤𑁆𑀥𑀸𑀤𑀻𑀲𑀼 𑀏𑀯 𑀮𑀩𑁆𑀪𑀦𑁆𑀢𑀻𑀢𑀺.

𑀯𑀦𑁆𑀤𑀦𑀸𑀯 𑀯𑀦𑁆𑀤𑀦𑀸𑀫𑀬𑀁 𑀬𑀣𑀸 ‘‘𑀤𑀸𑀦𑀫𑀬𑀁, 𑀲𑀻𑀮𑀫𑀬’’𑀦𑁆𑀢𑀺 (𑀤𑀻. 𑀦𑀺. 𑁩.𑁩𑁦𑁫; 𑀇𑀢𑀺𑀯𑀼. 𑁬𑁦). 𑀯𑀦𑁆𑀤𑀦𑀸 𑀘𑁂𑀢𑁆𑀣 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀢𑀺𑀡𑁆𑀡𑀁 𑀭𑀢𑀦𑀸𑀦𑀁 𑀕𑀼𑀡𑀦𑀺𑀦𑁆𑀦𑀢𑀸, 𑀣𑁄𑀫𑀦𑀸 𑀯𑀸. 𑀧𑀼𑀚𑁆𑀚𑀪𑀸𑀯𑀨𑀮𑀦𑀺𑀩𑁆𑀩𑀢𑁆𑀢𑀦𑀢𑁄 𑀧𑀼𑀜𑁆𑀜𑀁, 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀁 𑀧𑀼𑀦𑀸𑀢𑀻𑀢𑀺 𑀯𑀸. 𑀲𑀼𑀯𑀺𑀳𑀢𑀦𑁆𑀢𑀭𑀸𑀬𑁄𑀢𑀺 𑀲𑀼𑀝𑁆𑀞𑀼 𑀯𑀺𑀳𑀢𑀦𑁆𑀢𑀭𑀸𑀬𑁄. 𑀏𑀢𑁂𑀦 𑀅𑀢𑁆𑀢𑀦𑁄 𑀧𑀲𑀸𑀤𑀲𑀫𑁆𑀧𑀢𑁆𑀢𑀺𑀬𑀸, 𑀭𑀢𑀦𑀢𑁆𑀢𑀬𑀲𑁆𑀲 𑀘 𑀔𑁂𑀢𑁆𑀢𑀪𑀸𑀯𑀲𑀫𑁆𑀧𑀢𑁆𑀢𑀺𑀬𑀸 𑀢𑀁 𑀧𑀼𑀜𑁆𑀜𑀁 𑀅𑀢𑁆𑀣𑀧𑁆𑀧𑀓𑀸𑀲𑀦𑀲𑁆𑀲 𑀉𑀧𑀖𑀸𑀢𑀓𑀉𑀧𑀤𑁆𑀤𑀯𑀸𑀦𑀁 𑀯𑀺𑀳𑀦𑀦𑁂 𑀲𑀫𑀢𑁆𑀣𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀳𑀼𑀢𑁆𑀯𑀸𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸. 𑀢𑀲𑁆𑀲 ‘‘𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀢𑀲𑁆𑀲𑀸𑀢𑀺 𑀬𑀁 𑀭𑀢𑀦𑀢𑁆𑀢𑀬𑀯𑀦𑁆𑀤𑀦𑀸𑀫𑀬𑀁 𑀧𑀼𑀜𑁆𑀜𑀁, 𑀢𑀲𑁆𑀲. 𑀆𑀦𑀼𑀪𑀸𑀯𑁂𑀦𑀸𑀢𑀺 𑀩𑀮𑁂𑀦.

𑁫. 𑀏𑀯𑀁 ¶ ¶ 𑀭𑀢𑀦𑀢𑁆𑀢𑀬𑀲𑁆𑀲 𑀦𑀺𑀧𑀘𑁆𑀘𑀓𑀸𑀭𑀓𑀭𑀡𑁂 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀲𑁆𑀲𑀸 𑀥𑀫𑁆𑀫𑀤𑁂𑀲𑀦𑀸𑀬 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀢𑀼𑀓𑀸𑀫𑁄, 𑀢𑀲𑁆𑀲𑀸 𑀢𑀸𑀯 𑀕𑀼𑀡𑀸𑀪𑀺𑀢𑁆𑀣𑀯𑀦𑀯𑀲𑁂𑀦 𑀉𑀧𑀜𑁆𑀜𑀸𑀧𑀦𑀢𑁆𑀣𑀁 ‘‘𑀏𑀓𑀓𑀤𑀼𑀓𑀸𑀤𑀺𑀧𑀝𑀺𑀫𑀡𑁆𑀟𑀺𑀢𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳, 𑀏𑀓𑀓𑀸𑀤𑀻𑀦𑀺 𑀅𑀗𑁆𑀕𑀸𑀦𑀺 𑀉𑀧𑀭𑀽𑀧𑀭𑀺 𑀯𑀟𑁆𑀠𑁂𑀢𑁆𑀯𑀸 𑀤𑁂𑀲𑀺𑀢𑁂𑀳𑀺 𑀲𑀼𑀢𑁆𑀢𑀦𑁆𑀢𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑀲𑁆𑀲 𑀯𑀺𑀲𑀺𑀝𑁆𑀞𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀏𑀢𑁂𑀦 ‘‘𑀅𑀗𑁆𑀕𑀼𑀢𑁆𑀢𑀭𑁄’’𑀢𑀺 𑀅𑀬𑀁 𑀇𑀫𑀲𑁆𑀲 𑀆𑀕𑀫𑀲𑁆𑀲 𑀅𑀢𑁆𑀣𑀸𑀦𑀼𑀕𑀢𑀸 𑀲𑀫𑀜𑁆𑀜𑀸𑀢𑀺 𑀤𑀲𑁆𑀲𑁂𑀢𑀺. 𑀦𑀦𑀼 𑀘 𑀏𑀓𑀓𑀸𑀤𑀺𑀯𑀲𑁂𑀦 𑀤𑁂𑀲𑀺𑀢𑀸𑀦𑀺 𑀲𑀼𑀢𑁆𑀢𑀸𑀦𑀺𑀬𑁂𑀯 𑀆𑀕𑀫𑁄. 𑀓𑀲𑁆𑀲 𑀧𑀦 𑀏𑀓𑀓𑀤𑀼𑀓𑀸𑀤𑀻𑀳𑀺 𑀧𑀝𑀺𑀫𑀡𑁆𑀟𑀺𑀢𑀪𑀸𑀯𑁄𑀢𑀺? 𑀲𑀘𑁆𑀘𑀫𑁂𑀢𑀁 𑀧𑀭𑀫𑀢𑁆𑀣𑀢𑁄, 𑀲𑀼𑀢𑁆𑀢𑀸𑀦𑀺 𑀧𑀦 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑁄 𑀆𑀕𑀫𑁄. 𑀬𑀣𑁂𑀯 𑀳𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑀼𑀤𑀸𑀬𑁂 𑀲𑀼𑀢𑁆𑀢𑀦𑁆𑀢𑀺 𑀯𑁄𑀳𑀸𑀭𑁄, 𑀏𑀯𑀁 𑀲𑀼𑀢𑁆𑀢𑀲𑀫𑀼𑀤𑀸𑀬𑁂 𑀆𑀕𑀫𑁄𑀢𑀺 𑀯𑁄𑀳𑀸𑀭𑁄. 𑀏𑀓𑀓𑀸𑀤𑀻𑀳𑀺 𑀅𑀗𑁆𑀕𑁂𑀳𑀺 𑀉𑀧𑀭𑀽𑀧𑀭𑀺 𑀉𑀢𑁆𑀢𑀭𑁄 𑀅𑀥𑀺𑀓𑁄𑀢𑀺 𑀅𑀗𑁆𑀕𑀼𑀢𑁆𑀢𑀭𑁄, 𑀆𑀕𑀫𑀺𑀲𑁆𑀲𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦, 𑀏𑀢𑀲𑁆𑀫𑀸 𑀯𑀸 𑀅𑀢𑁆𑀢𑀢𑁆𑀣𑀧𑀭𑀢𑁆𑀣𑀸𑀤𑀬𑁄𑀢𑀺 𑀆𑀕𑀫𑁄, 𑀆𑀤𑀺𑀓𑀮𑁆𑀬𑀸𑀡𑀸𑀤𑀺𑀕𑀼𑀡𑀲𑀫𑁆𑀧𑀢𑁆𑀢𑀺𑀬𑀸 𑀉𑀢𑁆𑀢𑀫𑀝𑁆𑀞𑁂𑀦 𑀢𑀁𑀢𑀁𑀅𑀪𑀺𑀧𑀢𑁆𑀣𑀺𑀢𑀲𑀫𑀺𑀤𑁆𑀥𑀺𑀳𑁂𑀢𑀼𑀢𑀸𑀬 𑀧𑀡𑁆𑀟𑀺𑀢𑁂𑀳𑀺 𑀯𑀭𑀺𑀢𑀩𑁆𑀩𑀢𑁄 𑀯𑀭𑁄, 𑀆𑀕𑀫𑁄 𑀘 𑀲𑁄 𑀯𑀭𑁄 𑀘 𑀲𑁂𑀝𑁆𑀞𑀝𑁆𑀞𑁂𑀦𑀸𑀢𑀺 𑀆𑀕𑀫𑀯𑀭𑁄, 𑀆𑀕𑀫𑀲𑀫𑁆𑀫𑀢𑁂𑀳𑀺 𑀯𑀸 𑀯𑀭𑁄𑀢𑀺 𑀆𑀕𑀫𑀯𑀭𑁄. 𑀅𑀗𑁆𑀕𑀼𑀢𑁆𑀢𑀭𑁄 𑀘 𑀲𑁄 𑀆𑀕𑀫𑀯𑀭𑁄 𑀘𑀸𑀢𑀺 𑀅𑀗𑁆𑀕𑀼𑀢𑁆𑀢𑀭𑀸𑀕𑀫𑀯𑀭𑁄, 𑀢𑀲𑁆𑀲.

𑀧𑀼𑀗𑁆𑀕𑀯𑀸 𑀯𑀼𑀘𑁆𑀘𑀦𑁆𑀢𑀺 𑀉𑀲𑀪𑀸, 𑀅𑀲𑀦𑁆𑀢𑀲𑀦𑀧𑀭𑀺𑀲𑁆𑀲𑀬𑀲𑀳𑀦𑀲𑁆𑀲 𑀧𑀭𑀺𑀧𑀸𑀮𑀦𑀸𑀤𑀺𑀕𑀼𑀡𑁂𑀳𑀺 𑀢𑀁𑀲𑀤𑀺𑀲𑀢𑀸𑀬 𑀥𑀫𑁆𑀫𑀓𑀣𑀺𑀓𑀸 𑀏𑀯 𑀧𑀼𑀗𑁆𑀕𑀯𑀸𑀢𑀺 𑀥𑀫𑁆𑀫𑀓𑀣𑀺𑀓𑀧𑀼𑀗𑁆𑀕𑀯𑀸, 𑀢𑁂𑀲𑀁. 𑀳𑁂𑀢𑀽𑀧𑀫𑀸𑀤𑀺𑀧𑁆𑀧𑀝𑀺𑀫𑀡𑁆𑀟𑀺𑀢𑀦𑀸𑀦𑀸𑀯𑀺𑀥𑀤𑁂𑀲𑀦𑀸𑀦𑀬𑀯𑀺𑀘𑀺𑀢𑁆𑀢𑀢𑀸𑀬 𑀯𑀺𑀘𑀺𑀢𑁆𑀢𑀧𑀝𑀺𑀪𑀸𑀦𑀚𑀦𑀦𑀲𑁆𑀲. 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀻𑀆𑀤𑀻𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸; 𑀫. 𑀦𑀺. 𑀅𑀝𑁆𑀞. 𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸; 𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑀕𑀦𑁆𑀣𑀸𑀭𑀫𑁆𑀪𑀓𑀣𑀸) 𑀧𑀦 ‘‘𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀲𑀁𑀯𑀡𑁆𑀡𑀺𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑀁 𑀅𑀦𑀼𑀕𑀫𑁆𑀫 𑀧𑀝𑀺𑀯𑀺𑀤𑁆𑀥𑀲𑀘𑁆𑀘𑀸 𑀅𑀕𑁆𑀕𑀲𑀸𑀯𑀓𑀸𑀤𑀬𑁄 𑀅𑀭𑀺𑀬𑀸 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀸. 𑀅𑀬𑀫𑁆𑀧𑀺 𑀆𑀕𑀫𑁄 𑀢𑁂𑀳𑀺 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀕𑀼𑀡𑀲𑀁𑀯𑀡𑁆𑀡𑀦𑀸𑀯𑀲𑁂𑀦 𑀘 𑀲𑀁𑀯𑀡𑁆𑀡𑀺𑀢𑁄 𑀏𑀯. 𑀅𑀣 𑀯𑀸 𑀩𑀼𑀤𑁆𑀥𑀸 𑀘 𑀅𑀦𑀼𑀩𑀼𑀤𑁆𑀥𑀸 𑀘 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦𑁂𑀯 𑀳𑀺 𑀢𑀺𑀡𑁆𑀡𑀁 𑀧𑀺𑀝𑀓𑀸𑀦𑀁 𑀅𑀢𑁆𑀣𑀯𑀡𑁆𑀡𑀦𑀸𑀓𑁆𑀓𑀫𑁄 𑀪𑀸𑀲𑀺𑀢𑁄, 𑀬𑀸 ‘‘𑀧𑀓𑀺𑀡𑁆𑀡𑀓𑀤𑁂𑀲𑀦𑀸’’𑀢𑀺 𑀯𑀼𑀘𑁆𑀘𑀢𑀺. 𑀢𑀢𑁄 𑀲𑀗𑁆𑀕𑀸𑀬𑀦𑀸𑀤𑀺𑀯𑀲𑁂𑀦𑁂𑀯 𑀲𑀸𑀯𑀓𑁂𑀳𑀻𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺. 𑀇𑀥 𑀧𑀦 ‘‘𑀥𑀫𑁆𑀫𑀓𑀣𑀺𑀓𑀧𑀼𑀗𑁆𑀕𑀯𑀸𑀦𑀁 𑀯𑀺𑀘𑀺𑀢𑁆𑀢𑀧𑀝𑀺𑀪𑀸𑀦𑀚𑀦𑀦𑀲𑁆𑀲’’𑀇𑀘𑁆𑀘𑁂𑀯 𑀣𑁄𑀫𑀦𑀸 𑀓𑀢𑀸. 𑀲𑀁𑀯𑀡𑁆𑀡𑀦𑀸𑀲𑀼 𑀘𑀸𑀬𑀁 𑀆𑀘𑀭𑀺𑀬𑀲𑁆𑀲 𑀧𑀓𑀢𑀺, 𑀬𑀸 𑀢𑀁𑀢𑀁𑀲𑀁𑀯𑀡𑁆𑀡𑀦𑀸𑀲𑀼 𑀆𑀤𑀺𑀢𑁄 𑀢𑀲𑁆𑀲 𑀢𑀲𑁆𑀲 𑀲𑀁𑀯𑀡𑁆𑀡𑁂𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀯𑀺𑀲𑁂𑀲𑀕𑀼𑀡𑀓𑀺𑀢𑁆𑀢𑀦𑁂𑀦 𑀣𑁄𑀫𑀦𑀸. 𑀢𑀣𑀸 𑀳𑀺 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀻𑀧𑀧𑀜𑁆𑀘𑀲𑀽𑀤𑀦𑀻𑀲𑀸𑀭𑀢𑁆𑀣𑀧𑁆𑀧𑀓𑀸𑀲𑀦𑀻𑀲𑀼 𑀅𑀝𑁆𑀞𑀲𑀸𑀮𑀺𑀦𑀻𑀆𑀤𑀻𑀲𑀼 ¶ 𑀘 𑀬𑀣𑀸𑀓𑁆𑀓𑀫𑀁 ‘‘𑀲𑀤𑁆𑀥𑀸𑀯𑀳𑀕𑀼𑀡𑀲𑁆𑀲, 𑀧𑀭𑀯𑀸𑀤𑀫𑀣𑀦𑀲𑁆𑀲, 𑀜𑀸𑀡𑀧𑁆𑀧𑀪𑁂𑀤𑀚𑀦𑀦𑀲𑁆𑀲, 𑀢𑀲𑁆𑀲 𑀕𑀫𑁆𑀪𑀻𑀭𑀜𑀸𑀡𑁂𑀳𑀺 𑀑𑀕𑀸𑀴𑁆𑀳𑀲𑁆𑀲 𑀅𑀪𑀺𑀡𑁆𑀳𑀲𑁄 𑀦𑀸𑀦𑀸𑀦𑀬𑀯𑀺𑀘𑀺𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀣𑁄𑀫𑀦𑀸 𑀓𑀢𑀸.

𑁬. 𑀅𑀢𑁆𑀣𑁄 𑀓𑀣𑀻𑀬𑀢𑀺 𑀏𑀢𑀸𑀬𑀸𑀢𑀺 𑀅𑀢𑁆𑀣𑀓𑀣𑀸, 𑀲𑀸 𑀏𑀯 𑀅𑀝𑁆𑀞𑀓𑀣𑀸, 𑀢𑁆𑀣-𑀓𑀸𑀭𑀲𑁆𑀲 𑀝𑁆𑀞-𑀓𑀸𑀭𑀁 𑀓𑀢𑁆𑀯𑀸 𑀬𑀣𑀸 ‘‘𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄’’𑀢𑀺 (𑀧𑀝𑀺. 𑀫. 𑁧.𑁧𑁭; 𑁨.𑁮). 𑀆𑀤𑀺𑀢𑁄𑀢𑀺𑀆𑀤𑀺𑀫𑁆𑀳𑀺 𑀧𑀞𑀫𑀲𑀗𑁆𑀕𑀻𑀢𑀺𑀬𑀁 ¶ . 𑀙𑀴𑀪𑀺𑀜𑁆𑀜𑀢𑀸𑀬 𑀧𑀭𑀫𑁂𑀦 𑀘𑀺𑀢𑁆𑀢𑀯𑀲𑀻𑀪𑀸𑀯𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀛𑀸𑀦𑀸𑀤𑀻𑀲𑀼 𑀧𑀜𑁆𑀘𑀯𑀺𑀥𑀯𑀲𑀺𑀢𑀸𑀲𑀩𑁆𑀪𑀸𑀯𑀢𑁄 𑀘 𑀯𑀲𑀺𑀦𑁄, 𑀣𑁂𑀭𑀸 𑀫𑀳𑀸𑀓𑀲𑁆𑀲𑀧𑀸𑀤𑀬𑁄, 𑀢𑁂𑀲𑀁 𑀲𑀢𑁂𑀳𑀺 𑀧𑀜𑁆𑀘𑀳𑀺. 𑀬𑀸𑀢𑀺 𑀬𑀸 𑀅𑀝𑁆𑀞𑀓𑀣𑀸. 𑀲𑀗𑁆𑀕𑀻𑀢𑀸𑀢𑀺 𑀅𑀢𑁆𑀣𑀁 𑀧𑀓𑀸𑀲𑁂𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 ‘‘𑀅𑀬𑀁 𑀏𑀢𑀲𑁆𑀲 𑀅𑀢𑁆𑀣𑁄, 𑀅𑀬𑀁 𑀏𑀢𑀲𑁆𑀲 𑀅𑀢𑁆𑀣𑁄’’𑀢𑀺 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀸. 𑀅𑀦𑀼𑀲𑀗𑁆𑀕𑀻𑀢𑀸 𑀘 𑀬𑀲𑀢𑁆𑀣𑁂𑀭𑀸𑀤𑀻𑀳𑀺 𑀧𑀘𑁆𑀙𑀸𑀧𑀺 𑀤𑀼𑀢𑀺𑀬𑀢𑀢𑀺𑀬𑀲𑀗𑁆𑀕𑀻𑀢𑀻𑀲𑀼. 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀲𑀁𑀯𑀡𑁆𑀡𑀦𑀸𑀬 𑀆𑀕𑀫𑀦𑀯𑀺𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀺.

𑁭. 𑀲𑀻𑀳𑀲𑁆𑀲 𑀮𑀸𑀦𑀢𑁄 𑀕𑀳𑀡𑀢𑁄 𑀲𑀻𑀳𑀴𑁄, 𑀲𑀻𑀳𑀓𑀼𑀫𑀸𑀭𑁄. 𑀢𑀁𑀯𑀁𑀲𑀚𑀸𑀢𑀢𑀸𑀬 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑁂 𑀔𑀢𑁆𑀢𑀺𑀬𑀸𑀦𑀁, 𑀢𑁂𑀲𑀁 𑀦𑀺𑀯𑀸𑀲𑀢𑀸𑀬 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀲𑁆𑀲 𑀘 𑀲𑀻𑀳𑀴𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀆𑀪𑀢𑀸𑀢𑀺 𑀚𑀫𑁆𑀩𑀼𑀤𑀻𑀧𑀢𑁄 𑀆𑀦𑀻𑀢𑀸. 𑀅𑀣𑀸𑀢𑀺 𑀧𑀘𑁆𑀙𑀸. 𑀅𑀧𑀭𑀪𑀸𑀕𑁂 𑀳𑀺 𑀅𑀲𑀗𑁆𑀓𑀭𑀢𑁆𑀣𑀁 𑀲𑀻𑀳𑀴𑀪𑀸𑀲𑀸𑀬 𑀅𑀝𑁆𑀞𑀓𑀣𑀸 𑀞𑀧𑀺𑀢𑀸𑀢𑀺. 𑀢𑁂𑀦 𑀲𑀸 𑀫𑀽𑀮𑀝𑁆𑀞𑀓𑀣𑀸 𑀲𑀩𑁆𑀩𑀲𑀸𑀥𑀸𑀭𑀡𑀸 𑀦 𑀳𑁄𑀢𑀻𑀢𑀺 𑀇𑀤𑀁 𑀅𑀢𑁆𑀣𑀧𑁆𑀧𑀓𑀸𑀲𑀦𑀁 𑀏𑀓𑀦𑁆𑀢𑁂𑀦 𑀓𑀭𑀡𑀻𑀬𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀤𑀻𑀧𑀯𑀸𑀲𑀻𑀦𑀫𑀢𑁆𑀣𑀸𑀬𑀸’’𑀢𑀺. 𑀢𑀢𑁆𑀣 𑀤𑀻𑀧𑀯𑀸𑀲𑀻𑀦𑀦𑁆𑀢𑀺 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀁, 𑀤𑀻𑀧𑀯𑀸𑀲𑀻𑀦𑀦𑁆𑀢𑀺 𑀯𑀸 𑀲𑀻𑀳𑀴𑀤𑀻𑀧𑀯𑀸𑀲𑀻𑀦𑀁 𑀅𑀢𑁆𑀣𑀸𑀬 𑀲𑀻𑀳𑀴𑀪𑀸𑀲𑀸𑀬 𑀞𑀧𑀺𑀢𑀸𑀢𑀺 𑀬𑁄𑀚𑀦𑀸.

𑁮. 𑀅𑀧𑀦𑁂𑀢𑁆𑀯𑀸𑀦𑀸𑀢𑀺 𑀓𑀜𑁆𑀘𑀼𑀓𑀲𑀤𑀺𑀲𑀁 𑀲𑀻𑀳𑀴𑀪𑀸𑀲𑀁𑀅𑀧𑀦𑁂𑀢𑁆𑀯𑀸𑀦. 𑀢𑀢𑁄𑀢𑀺 𑀅𑀝𑁆𑀞𑀓𑀣𑀸𑀢𑁄. 𑀅𑀳𑀦𑁆𑀢𑀺 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑀺𑀲𑀢𑀺. 𑀫𑀦𑁄𑀭𑀫𑀁 𑀪𑀸𑀲𑀦𑁆𑀢𑀺 𑀫𑀸𑀕𑀥𑀪𑀸𑀲𑀁. 𑀲𑀸 𑀳𑀺 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀽𑀢𑀸 𑀧𑀡𑁆𑀟𑀺𑀢𑀸𑀦𑀁 𑀫𑀦𑀁 𑀭𑀫𑀬𑀢𑀻𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀢𑀦𑁆𑀢𑀺𑀦𑀬𑀸𑀦𑀼𑀘𑁆𑀙𑀯𑀺𑀓’’𑀦𑁆𑀢𑀺, 𑀧𑀸𑀴𑀺𑀕𑀢𑀺𑀬𑀸 𑀅𑀦𑀼𑀮𑁄𑀫𑀺𑀓𑀁 𑀧𑀸𑀴𑀺𑀘𑁆𑀙𑀸𑀬𑀸𑀦𑀼𑀯𑀺𑀥𑀸𑀬𑀺𑀦𑀺𑀦𑁆𑀢𑀺 𑀅𑀢𑁆𑀣𑁄. 𑀯𑀺𑀕𑀢𑀤𑁄𑀲𑀦𑁆𑀢𑀺 𑀅𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀪𑀸𑀲𑀦𑁆𑀢𑀭𑀭𑀳𑀺𑀢𑀁.

𑁯. 𑀲𑀫𑀬𑀁 𑀅𑀯𑀺𑀮𑁄𑀫𑁂𑀦𑁆𑀢𑁄𑀢𑀺 𑀲𑀺𑀤𑁆𑀥𑀦𑁆𑀢𑀁 𑀅𑀯𑀺𑀭𑁄𑀥𑁂𑀦𑁆𑀢𑁄. 𑀏𑀢𑁂𑀦 𑀅𑀢𑁆𑀣𑀤𑁄𑀲𑀸𑀪𑀸𑀯𑀫𑀸𑀳. 𑀅𑀯𑀺𑀭𑀼𑀤𑁆𑀥𑀢𑁆𑀢𑀸 𑀏𑀯 𑀳𑀺 𑀣𑁂𑀭𑀯𑀸𑀤𑀸𑀧𑀺 𑀇𑀥 𑀧𑀓𑀸𑀲𑀻𑀬𑀺𑀲𑁆𑀲𑀦𑁆𑀢𑀺. 𑀣𑁂𑀭𑀯𑀁𑀲𑀤𑀻𑀧𑀸𑀦𑀦𑁆𑀢𑀺 𑀣𑀺𑀭𑁂𑀳𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀣𑁂𑀭𑀸 ¶ , 𑀫𑀳𑀸𑀓𑀲𑁆𑀲𑀧𑀸𑀤𑀬𑁄, 𑀢𑁂𑀳𑀺 𑀆𑀕𑀢𑀸 𑀆𑀘𑀭𑀺𑀬𑀧𑀭𑀫𑁆𑀧𑀭𑀸 𑀣𑁂𑀭𑀯𑀁𑀲𑁄. 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀸 𑀳𑀼𑀢𑁆𑀯𑀸 𑀆𑀕𑀫𑀸𑀥𑀺𑀕𑀫𑀲𑀫𑁆𑀧𑀦𑁆𑀦𑀢𑁆𑀢𑀸 𑀧𑀜𑁆𑀜𑀸𑀧𑀚𑁆𑀚𑁄𑀢𑁂𑀦 𑀢𑀲𑁆𑀲 𑀲𑀫𑀼𑀚𑁆𑀚𑀮𑀦𑀢𑁄 𑀣𑁂𑀭𑀯𑀁𑀲𑀤𑀻𑀧𑀸, 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄 𑀣𑁂𑀭𑀸, 𑀢𑁂𑀲𑀁. 𑀯𑀺𑀯𑀺𑀥𑁂𑀳𑀺 𑀆𑀓𑀸𑀭𑁂𑀳𑀺 𑀦𑀺𑀘𑁆𑀙𑀻𑀬𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑁄, 𑀕𑀡𑁆𑀞𑀺𑀝𑁆𑀞𑀸𑀦𑁂𑀲𑀼 𑀔𑀻𑀮𑀫𑀤𑁆𑀤𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀯𑀺𑀫𑀢𑀺𑀘𑁆𑀙𑁂𑀤𑀓𑀣𑀸. 𑀲𑀼𑀝𑁆𑀞𑀼 𑀦𑀺𑀧𑀼𑀡𑁄 𑀲𑀡𑁆𑀳𑁄 𑀯𑀺𑀦𑀺𑀘𑁆𑀙𑀬𑁄 𑀏𑀢𑁂𑀲𑀦𑁆𑀢𑀺 𑀲𑀼𑀦𑀺𑀧𑀼𑀡𑀯𑀺𑀦𑀺𑀘𑁆𑀙𑀬𑀸. 𑀅𑀣 𑀯𑀸 𑀯𑀺𑀦𑀺𑀘𑁆𑀙𑀺𑀦𑁄𑀢𑀻𑀢𑀺 𑀯𑀺𑀦𑀺𑀘𑁆𑀙𑀬𑁄, 𑀬𑀣𑀸𑀯𑀼𑀢𑁆𑀢𑀢𑁆𑀣𑀯𑀺𑀲𑀬𑀁 𑀜𑀸𑀡𑀁. 𑀲𑀼𑀝𑁆𑀞𑀼 𑀦𑀺𑀧𑀼𑀡𑁄 𑀙𑁂𑀓𑁄 𑀯𑀺𑀦𑀺𑀘𑁆𑀙𑀬𑁄 𑀏𑀢𑁂𑀲𑀦𑁆𑀢𑀺 𑀲𑀼𑀦𑀺𑀧𑀼𑀡𑀯𑀺𑀦𑀺𑀘𑁆𑀙𑀬𑀸. 𑀏𑀢𑁂𑀦 𑀫𑀳𑀸𑀓𑀲𑁆𑀲𑀧𑀸𑀤𑀺𑀢𑁆𑀣𑁂𑀭𑀧𑀭𑀫𑁆𑀧𑀭𑀸𑀪𑀢𑁄, 𑀢𑀢𑁄𑀬𑁂𑀯 𑀘 𑀅𑀯𑀺𑀧𑀭𑀻𑀢𑁄 𑀲𑀡𑁆𑀳𑀲𑀼𑀔𑀼𑀫𑁄 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀯𑀺𑀦𑀺𑀘𑁆𑀙𑀬𑁄𑀢𑀺 𑀢𑀲𑁆𑀲 𑀧𑀫𑀸𑀡𑀪𑀽𑀢𑀢𑀁 𑀤𑀲𑁆𑀲𑁂𑀢𑀺.

𑁧𑁦. 𑀲𑀼𑀚𑀦𑀲𑁆𑀲 ¶ 𑀘𑀸𑀢𑀺 𑀘-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑁂𑀦 ‘‘𑀦 𑀓𑁂𑀯𑀮𑀁 𑀚𑀫𑁆𑀩𑀼𑀤𑀻𑀧𑀯𑀸𑀲𑀻𑀦𑀁𑀬𑁂𑀯 𑀅𑀢𑁆𑀣𑀸𑀬, 𑀅𑀣 𑀔𑁄 𑀲𑀸𑀥𑀼𑀚𑀦𑀸𑀦𑀁 𑀢𑁄𑀲𑀦𑀢𑁆𑀣𑀜𑁆𑀘𑀸’’𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦 𑀘 ‘‘𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀯𑀸𑀲𑀻𑀦𑀫𑁆𑀧𑀺 𑀅𑀢𑁆𑀣𑀸𑀬𑀸’’𑀢𑀺 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄 𑀳𑁄𑀢𑀺 𑀉𑀕𑁆𑀕𑀳𑀡𑀸𑀤𑀺𑀲𑀼𑀓𑀭𑀢𑀸𑀬 𑀢𑁂𑀲𑀫𑁆𑀧𑀺 𑀩𑀳𑀽𑀧𑀓𑀸𑀭𑀢𑁆𑀢𑀸. 𑀘𑀺𑀭𑀝𑁆𑀞𑀺𑀢𑀢𑁆𑀣𑀦𑁆𑀢𑀺 𑀘𑀺𑀭𑀝𑁆𑀞𑀺𑀢𑀺𑀅𑀢𑁆𑀣𑀁, 𑀘𑀺𑀭𑀓𑀸𑀮𑀸𑀯𑀝𑁆𑀞𑀸𑀦𑀸𑀬𑀸𑀢𑀺 𑀅𑀢𑁆𑀣𑁄. 𑀇𑀤𑀜𑁆𑀳𑀺 𑀅𑀢𑁆𑀣𑀧𑁆𑀧𑀓𑀸𑀲𑀦𑀁 𑀅𑀯𑀺𑀧𑀭𑀻𑀢𑀩𑁆𑀬𑀜𑁆𑀚𑀦𑀲𑀼𑀦𑀺𑀓𑁆𑀔𑁂𑀧𑀲𑁆𑀲 𑀅𑀢𑁆𑀣𑀲𑀼𑀦𑀻𑀢𑀲𑁆𑀲 𑀘 𑀉𑀧𑀸𑀬𑀪𑀸𑀯𑀢𑁄 𑀲𑀤𑁆𑀥𑀫𑁆𑀫𑀲𑁆𑀲 𑀘𑀺𑀭𑀝𑁆𑀞𑀺𑀢𑀺𑀬𑀸 𑀲𑀁𑀯𑀢𑁆𑀢𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀤𑁆𑀯𑁂𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀤𑁆𑀥𑀫𑁆𑀫𑀲𑁆𑀲 𑀞𑀺𑀢𑀺𑀬𑀸 𑀅𑀲𑀫𑁆𑀫𑁄𑀲𑀸𑀬 𑀅𑀦𑀦𑁆𑀢𑀭𑀥𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀤𑁆𑀯𑁂? 𑀲𑀼𑀦𑀺𑀓𑁆𑀔𑀺𑀢𑁆𑀢𑀜𑁆𑀘 𑀧𑀤𑀩𑁆𑀬𑀜𑁆𑀚𑀦𑀁, 𑀅𑀢𑁆𑀣𑁄 𑀘 𑀲𑀼𑀦𑀻𑀢𑁄’’𑀢𑀺 (𑀅. 𑀦𑀺. 𑁨.𑁨𑁧).

𑁧𑁧-𑁧𑁨. 𑀬𑀁 𑀅𑀢𑁆𑀣𑀯𑀡𑁆𑀡𑀦𑀁 𑀓𑀢𑁆𑀣𑀼𑀓𑀸𑀫𑁄, 𑀢𑀲𑁆𑀲𑀸 𑀫𑀳𑀦𑁆𑀢𑀢𑁆𑀢𑀁 𑀧𑀭𑀺𑀳𑀭𑀺𑀢𑀼𑀁 ‘‘𑀲𑀸𑀯𑀢𑁆𑀣𑀺𑀧𑀪𑀽𑀢𑀻𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑁂𑀦𑀸𑀳 𑁋 ‘‘𑀦 𑀇𑀥 𑀯𑀺𑀢𑁆𑀣𑀸𑀭𑀓𑀣𑀁 𑀓𑀭𑀺𑀲𑁆𑀲𑀸𑀫𑀺, 𑀦 𑀢𑀁 𑀇𑀥 𑀯𑀺𑀘𑀸𑀭𑀬𑀺𑀲𑁆𑀲𑀸𑀫𑀻’’𑀢𑀺 𑀘. 𑀢𑀢𑁆𑀣 𑀤𑀻𑀖𑀲𑁆𑀲𑀸𑀢𑀺 𑀤𑀻𑀖𑀦𑀺𑀓𑀸𑀬𑀲𑁆𑀲. 𑀫𑀚𑁆𑀛𑀺𑀫𑀲𑁆𑀲𑀸𑀢𑀺 𑀫𑀚𑁆𑀛𑀺𑀫𑀦𑀺𑀓𑀸𑀬𑀲𑁆𑀲. ‘‘𑀲𑀗𑁆𑀕𑀻𑀢𑀻𑀦𑀁 𑀤𑁆𑀯𑀺𑀦𑁆𑀦𑀁 𑀬𑀸 𑀫𑁂 𑀅𑀢𑁆𑀣𑀁 𑀯𑀤𑀦𑁆𑀢𑁂𑀦𑀸’’𑀢𑀺𑀧𑀺 𑀧𑀸𑀞𑁄. 𑀢𑀢𑁆𑀣𑀧𑀺 𑀲𑀗𑁆𑀕𑀻𑀢𑀻𑀦𑀁 𑀤𑁆𑀯𑀺𑀦𑁆𑀦𑀦𑁆𑀢𑀺 𑀤𑀻𑀖𑀫𑀚𑁆𑀛𑀺𑀫𑀦𑀺𑀓𑀸𑀬𑀸𑀦𑀦𑁆𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀫𑁂𑀢𑀺 𑀓𑀭𑀡𑀢𑁆𑀣𑁂 𑀲𑀸𑀫𑀺𑀯𑀘𑀦𑀁, 𑀫𑀬𑀸𑀢𑀺 𑀅𑀢𑁆𑀣𑁄. 𑀲𑀼𑀤𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀳𑁂𑀝𑁆𑀞𑀸 𑀤𑀻𑀖𑀲𑁆𑀲 𑀫𑀚𑁆𑀛𑀺𑀫𑀲𑁆𑀲 𑀘 𑀅𑀢𑁆𑀣𑀁 𑀯𑀤𑀦𑁆𑀢𑁂𑀦 𑀲𑀸𑀯𑀢𑁆𑀣𑀺𑀧𑀪𑀼𑀢𑀻𑀦𑀁 𑀦𑀕𑀭𑀸𑀦𑀁 𑀬𑀸 𑀯𑀡𑁆𑀡𑀦𑀸 𑀓𑀢𑀸, 𑀢𑀲𑁆𑀲𑀸 𑀯𑀺𑀢𑁆𑀣𑀸𑀭𑀓𑀣𑀁 𑀦 𑀇𑀥 𑀪𑀺𑀬𑁆𑀬𑁄 𑀓𑀭𑀺𑀲𑁆𑀲𑀸𑀫𑀻𑀢𑀺 ¶ 𑀬𑁄𑀚𑁂𑀢𑀩𑁆𑀩𑀁. 𑀬𑀸𑀦𑀺 𑀘 𑀢𑀢𑁆𑀣 𑀯𑀢𑁆𑀣𑀽𑀦𑀺 𑀯𑀺𑀢𑁆𑀣𑀸𑀭𑀯𑀲𑁂𑀦 𑀯𑀼𑀢𑁆𑀢𑀸𑀦𑀺, 𑀢𑁂𑀲𑀫𑁆𑀧𑀺 𑀯𑀺𑀢𑁆𑀣𑀸𑀭𑀓𑀣𑀁 𑀦 𑀇𑀥 𑀪𑀺𑀬𑁆𑀬𑁄 𑀓𑀭𑀺𑀲𑁆𑀲𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄.

𑁧𑁩. 𑀇𑀤𑀸𑀦𑀺 ‘‘𑀦 𑀇𑀥 𑀯𑀺𑀢𑁆𑀣𑀸𑀭𑀓𑀣𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀯𑀭𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀲𑀼𑀢𑁆𑀢𑀸𑀦𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀼𑀢𑁆𑀢𑀸𑀦𑀁 𑀬𑁂 𑀅𑀢𑁆𑀣𑀸 𑀯𑀢𑁆𑀣𑀽𑀳𑀺 𑀯𑀺𑀦𑀸 𑀦 𑀧𑀓𑀸𑀲𑀦𑁆𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁.

𑁧𑁪. 𑀬𑀁 𑀅𑀝𑁆𑀞𑀓𑀣𑀁 𑀓𑀢𑁆𑀢𑀼𑀓𑀸𑀫𑁄, 𑀢𑀤𑁂𑀓𑀤𑁂𑀲𑀪𑀸𑀯𑁂𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀘 𑀕𑀳𑁂𑀢𑀩𑁆𑀩𑁄𑀢𑀺 𑀓𑀣𑀺𑀓𑀸𑀦𑀁 𑀉𑀧𑀤𑁂𑀲𑀁 𑀓𑀭𑁄𑀦𑁆𑀢𑁄 𑀢𑀢𑁆𑀣 𑀯𑀺𑀘𑀸𑀭𑀺𑀢𑀥𑀫𑁆𑀫𑁂 𑀉𑀤𑁆𑀤𑁂𑀲𑀯𑀲𑁂𑀦 𑀤𑀲𑁆𑀲𑁂𑀢𑀺 𑁋 ‘‘𑀲𑀻𑀮𑀓𑀣𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀲𑀻𑀮𑀓𑀣𑀸𑀢𑀺 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀸𑀤𑀺𑀯𑀲𑁂𑀦 𑀲𑀻𑀮𑀲𑁆𑀲 𑀯𑀺𑀢𑁆𑀣𑀸𑀭𑀓𑀣𑀸. 𑀥𑀼𑀢𑀥𑀫𑁆𑀫𑀸𑀢𑀺 𑀧𑀺𑀡𑁆𑀟𑀧𑀸𑀢𑀺𑀓𑀗𑁆𑀕𑀸𑀤𑀬𑁄 𑀢𑁂𑀭𑀲 𑀓𑀺𑀮𑁂𑀲𑀥𑀼𑀦𑀦𑀓𑀥𑀫𑁆𑀫𑀸. 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀲𑀩𑁆𑀩𑀸𑀦𑀻𑀢𑀺 𑀧𑀸𑀴𑀺𑀬𑀁 𑀆𑀕𑀢𑀸𑀦𑀺 𑀅𑀝𑁆𑀞𑀢𑀺𑀁𑀲, 𑀅𑀝𑁆𑀞𑀓𑀣𑀸𑀬𑀁 𑀤𑁆𑀯𑁂𑀢𑀺 𑀦𑀺𑀭𑀯𑀲𑁂𑀲𑀸𑀦𑀺 𑀬𑁄𑀕𑀓𑀫𑁆𑀫𑀲𑁆𑀲 𑀪𑀸𑀯𑀦𑀸𑀬 𑀧𑀯𑀢𑁆𑀢𑀺𑀝𑁆𑀞𑀸𑀦𑀸𑀦𑀺. 𑀘𑀭𑀺𑀬𑀸𑀯𑀺𑀥𑀸𑀦𑀲𑀳𑀺𑀢𑁄𑀢𑀺 𑀭𑀸𑀕𑀘𑀭𑀺𑀢𑀸𑀤𑀻𑀦𑀁 𑀲𑀪𑀸𑀯𑀸𑀤𑀺𑀯𑀺𑀥𑀸𑀦𑁂𑀦 𑀲𑀳𑀺𑀢𑁄. 𑀛𑀸𑀦𑀸𑀦𑀺 𑀘𑀢𑁆𑀢𑀸𑀭𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺, 𑀲𑀫𑀸𑀧𑀢𑁆𑀢𑀺𑀬𑁄 𑀘𑀢𑀲𑁆𑀲𑁄 𑀆𑀭𑀼𑀧𑁆𑀧𑀲𑀫𑀸𑀧𑀢𑁆𑀢𑀺𑀬𑁄 ¶ . 𑀅𑀝𑁆𑀞𑀧𑀺 𑀯𑀸 𑀧𑀝𑀺𑀮𑀤𑁆𑀥𑀫𑀢𑁆𑀢𑀸𑀦𑀺 𑀛𑀸𑀦𑀸𑀦𑀺 𑀲𑀫𑀸𑀧𑀚𑁆𑀚𑀦𑀯𑀲𑀻𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀲𑀫𑀸𑀧𑀢𑁆𑀢𑀺𑀬𑁄. 𑀛𑀸𑀦𑀸𑀦𑀺 𑀯𑀸 𑀭𑀽𑀧𑀸𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺, 𑀲𑀫𑀸𑀧𑀢𑁆𑀢𑀺𑀬𑁄 𑀨𑀮𑀲𑀫𑀸𑀧𑀢𑁆𑀢𑀺𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀬𑁄.

𑁧𑁫. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀪𑁂𑀤𑀸 𑀙 𑀅𑀪𑀺𑀜𑁆𑀜𑀸𑀬𑁄 𑀲𑀩𑁆𑀩𑀸 𑀅𑀪𑀺𑀜𑁆𑀜𑀸𑀬𑁄. 𑀜𑀸𑀡𑀯𑀺𑀪𑀗𑁆𑀕𑀸𑀤𑀻𑀲𑀼 𑀆𑀕𑀢𑀦𑀬𑁂𑀦 𑀏𑀓𑀯𑀺𑀥𑀸𑀤𑀺𑀦𑀸 𑀧𑀜𑁆𑀜𑀸𑀬 𑀲𑀁𑀓𑀮𑁂𑀢𑁆𑀯𑀸 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀦𑀺𑀘𑁆𑀙𑀬𑁄 𑀧𑀜𑁆𑀜𑀸𑀲𑀗𑁆𑀓𑀮𑀦𑀦𑀺𑀘𑁆𑀙𑀬𑁄.

𑁧𑁬. 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀳𑁂𑀢𑀼𑀆𑀤𑀻𑀦𑀁 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀪𑀸𑀯𑁄 𑀧𑀘𑁆𑀘𑀬𑀸𑀓𑀸𑀭𑁄, 𑀢𑀲𑁆𑀲 𑀤𑁂𑀲𑀦𑀸 𑀧𑀘𑁆𑀘𑀬𑀸𑀓𑀸𑀭𑀤𑁂𑀲𑀦𑀸, 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀣𑀸𑀢𑀺 𑀅𑀢𑁆𑀣𑁄. 𑀲𑀸 𑀧𑀦 𑀖𑀦𑀯𑀺𑀦𑀺𑀩𑁆𑀪𑁄𑀕𑀲𑁆𑀲 𑀲𑀼𑀤𑀼𑀓𑁆𑀓𑀭𑀢𑀸𑀬 𑀲𑀡𑁆𑀳𑀲𑀼𑀔𑀼𑀫𑀸, 𑀦𑀺𑀓𑀸𑀬𑀦𑁆𑀢𑀭𑀮𑀤𑁆𑀥𑀺𑀲𑀗𑁆𑀓𑀭𑀭𑀳𑀺𑀢𑀸, 𑀏𑀓𑀢𑁆𑀢𑀦𑀬𑀸𑀤𑀺𑀲𑀳𑀺𑀢𑀸 𑀘 𑀢𑀢𑁆𑀣 𑀯𑀺𑀘𑀸𑀭𑀺𑀢𑀸𑀢𑀺 𑀆𑀳 𑁋 ‘‘𑀲𑀼𑀧𑀭𑀺𑀲𑀼𑀤𑁆𑀥𑀦𑀺𑀧𑀼𑀡𑀦𑀬𑀸’’𑀢𑀺. 𑀧𑀝𑀺𑀲𑀫𑁆𑀪𑀺𑀤𑀸𑀤𑀻𑀲𑀼 𑀆𑀕𑀢𑀦𑀬𑀁 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀯 𑀯𑀺𑀘𑀸𑀭𑀺𑀢𑀢𑁆𑀢𑀸 𑀅𑀯𑀺𑀫𑀼𑀢𑁆𑀢𑀢𑀦𑁆𑀢𑀺𑀫𑀕𑁆𑀕𑀸.

𑁧𑁭. 𑀇𑀢𑀺 𑀧𑀦 𑀲𑀩𑁆𑀩𑀦𑁆𑀢𑀺 𑀇𑀢𑀺-𑀲𑀤𑁆𑀤𑁄 𑀧𑀭𑀺𑀲𑀫𑀸𑀧𑀦𑁂, 𑀧𑀦-𑀲𑀤𑁆𑀤𑁄 𑀯𑀘𑀦𑀸𑀮𑀗𑁆𑀓𑀸𑀭𑁂, 𑀏𑀢𑀁 𑀲𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀇𑀥𑀸𑀢𑀺 𑀇𑀫𑀺𑀲𑁆𑀲𑀸 𑀅𑀝𑁆𑀞𑀓𑀣𑀸𑀬 𑀦 𑀯𑀺𑀘𑀸𑀭𑀬𑀺𑀲𑁆𑀲𑀸𑀫𑀺 𑀧𑀼𑀦𑀭𑀼𑀢𑁆𑀢𑀺𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁮. 𑀇𑀤𑀸𑀦𑀺 ¶ 𑀢𑀲𑁆𑀲𑁂𑀯 𑀅𑀯𑀺𑀘𑀸𑀭𑀡𑀲𑁆𑀲 𑀏𑀓𑀦𑁆𑀢𑀓𑀸𑀭𑀡𑀁 𑀦𑀺𑀤𑁆𑀥𑀸𑀭𑁂𑀦𑁆𑀢𑁄 ‘‘𑀫𑀚𑁆𑀛𑁂 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀫𑀚𑁆𑀛𑁂 𑀞𑀢𑁆𑀯𑀸’’𑀢𑀺 𑀏𑀢𑁂𑀦 𑀫𑀚𑁆𑀛𑀪𑀸𑀯𑀤𑀻𑀧𑀦𑁂𑀦 𑀯𑀺𑀲𑁂𑀲𑀢𑁄 𑀘𑀢𑀼𑀦𑁆𑀦𑀁 𑀆𑀕𑀫𑀸𑀦𑀁 𑀲𑀸𑀥𑀸𑀭𑀡𑀝𑁆𑀞𑀓𑀣𑀸 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄, 𑀦 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀻𑀆𑀤𑀬𑁄 𑀯𑀺𑀬 𑀅𑀲𑀸𑀥𑀸𑀭𑀡𑀝𑁆𑀞𑀓𑀣𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀯𑀺𑀲𑁂𑀲𑀢𑁄’’𑀢𑀺 𑀘 𑀇𑀤𑀁 𑀯𑀺𑀦𑀬𑀸𑀪𑀺𑀥𑀫𑁆𑀫𑀸𑀦𑀫𑁆𑀧𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄 𑀬𑀣𑀸𑀭𑀳𑀁 𑀅𑀢𑁆𑀣𑀯𑀡𑁆𑀡𑀦𑀸 𑀳𑁄𑀢𑀺 𑀏𑀯𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑁧𑁯. 𑀇𑀘𑁆𑀘𑁂𑀯𑀸𑀢𑀺 𑀇𑀢𑀺 𑀏𑀯. 𑀢𑀫𑁆𑀧𑀻𑀢𑀺 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀫𑁆𑀧𑀺. 𑀏𑀢𑀸𑀬𑀸𑀢𑀺 𑀫𑀦𑁄𑀭𑀣𑀧𑀽𑀭𑀡𑀺𑀬𑀸. 𑀏𑀢𑁆𑀣 𑀘 ‘‘𑀲𑀻𑀳𑀴𑀤𑀻𑀧𑀁 𑀆𑀪𑀢𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀣𑀧𑁆𑀧𑀓𑀸𑀲𑀦𑀲𑁆𑀲 𑀦𑀺𑀫𑀺𑀢𑁆𑀢𑀁 𑀤𑀲𑁆𑀲𑁂𑀢𑀺, ‘‘𑀤𑀻𑀧𑀯𑀸𑀲𑀻𑀦𑀫𑀢𑁆𑀣𑀸𑀬 𑀲𑀼𑀚𑀦𑀲𑁆𑀲 𑀘 𑀢𑀼𑀝𑁆𑀞𑀢𑁆𑀣𑀁 𑀘𑀺𑀭𑀝𑁆𑀞𑀺𑀢𑀢𑁆𑀣𑀜𑁆𑀘 𑀥𑀫𑁆𑀫𑀲𑁆𑀲𑀸’’𑀢𑀺 𑀏𑀢𑁂𑀦 𑀧𑀬𑁄𑀚𑀦𑀁, 𑀅𑀧𑀦𑁂𑀢𑁆𑀯𑀸𑀦 𑀢𑀢𑁄𑀳𑀁, 𑀲𑀻𑀳𑀴𑀪𑀸𑀲’’𑀦𑁆𑀢𑀺𑀆𑀤𑀺𑀦𑀸. ‘‘𑀲𑀸𑀯𑀢𑁆𑀣𑀺𑀧𑀪𑀼𑀢𑀻𑀦’’𑀦𑁆𑀢𑀺𑀆𑀤𑀺𑀦𑀸 𑀘 𑀓𑀭𑀡𑀧𑁆𑀧𑀓𑀸𑀭𑀁. 𑀳𑁂𑀝𑁆𑀞𑀺𑀫𑀦𑀺𑀓𑀸𑀬𑁂𑀲𑀼 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 𑀘 𑀯𑀺𑀘𑀸𑀭𑀺𑀢𑀸𑀦𑀁 𑀅𑀢𑁆𑀣𑀸𑀦𑀁 𑀅𑀯𑀺𑀘𑀸𑀭𑀡𑀫𑁆𑀧𑀺 𑀳𑀺 𑀇𑀥 𑀓𑀭𑀡𑀧𑁆𑀧𑀓𑀸𑀭𑁄 𑀏𑀯𑀸𑀢𑀺.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀭𑀽𑀧𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸

𑀦𑀺𑀤𑀸𑀦𑀯𑀡𑁆𑀡𑀦𑀸

𑀯𑀺𑀪𑀸𑀕𑀯𑀦𑁆𑀢𑀸𑀦𑀁 ¶ 𑀲𑀪𑀸𑀯𑀯𑀺𑀪𑀸𑀯𑀦𑀁 𑀯𑀺𑀪𑀸𑀕𑀤𑀲𑁆𑀲𑀦𑀯𑀲𑁂𑀦𑁂𑀯 𑀳𑁄𑀢𑀻𑀢𑀺 𑀧𑀞𑀫𑀁 𑀢𑀸𑀯 𑀦𑀺𑀧𑀸𑀢𑀲𑀼𑀢𑁆𑀢𑀯𑀲𑁂𑀦 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀢𑁆𑀣 𑀅𑀗𑁆𑀕𑀼𑀢𑁆𑀢𑀭𑀸𑀕𑀫𑁄 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀢𑀢𑁆𑀣𑀸𑀢𑀺 ‘‘𑀅𑀗𑁆𑀕𑀼𑀢𑁆𑀢𑀭𑀸𑀕𑀫𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀬𑀤𑀺𑀤𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀺𑀁 𑀯𑀘𑀦𑁂, ‘‘𑀬𑀲𑁆𑀲 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀧𑀝𑀺𑀜𑁆𑀜𑀸𑀢𑀁, 𑀲𑁄 𑀅𑀗𑁆𑀕𑀼𑀢𑁆𑀢𑀭𑀸𑀕𑀫𑁄 𑀦𑀸𑀫 𑀦𑀺𑀧𑀸𑀢𑀲𑀼𑀢𑁆𑀢𑀯𑀲𑁂𑀦 𑀏𑀯𑀁 𑀯𑀺𑀪𑀸𑀕𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀢𑀢𑁆𑀣𑀸𑀢𑀺 ‘‘𑀅𑀗𑁆𑀕𑀼𑀢𑁆𑀢𑀭𑀦𑀺𑀲𑁆𑀲𑀺𑀢𑀁 𑀅𑀢𑁆𑀣’’𑀦𑁆𑀢𑀺 𑀏𑀢𑀲𑁆𑀫𑀺𑀁 𑀯𑀘𑀦𑁂 𑀬𑁄 𑀅𑀗𑁆𑀕𑀼𑀢𑁆𑀢𑀭𑀸𑀕𑀫𑁄 𑀯𑀼𑀢𑁆𑀢𑁄, 𑀲𑁄 𑀦𑀺𑀧𑀸𑀢𑀲𑀼𑀢𑁆𑀢𑀸𑀤𑀺𑀯𑀲𑁂𑀦 𑀏𑀤𑀺𑀲𑁄𑀢𑀺 𑀅𑀢𑁆𑀣𑁄.

𑀇𑀤𑀸𑀦𑀺 𑀢𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀁𑀯𑀡𑁆𑀡𑀺𑀢𑀼𑀓𑀸𑀫𑁄 𑀅𑀢𑁆𑀢𑀦𑁄 𑀲𑀁𑀯𑀡𑁆𑀡𑀦𑀸𑀬 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀬𑀁 𑀦𑀺𑀓𑁆𑀔𑀺𑀢𑁆𑀢𑀸𑀦𑀼𑀓𑁆𑀓𑀫𑁂𑀦 𑀧𑀯𑀢𑁆𑀢𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀢𑀲𑁆𑀲 𑀦𑀺𑀧𑀸𑀢𑁂𑀲𑀼…𑀧𑁂… 𑀯𑀼𑀢𑁆𑀢𑀁 𑀦𑀺𑀤𑀸𑀦𑀫𑀸𑀤𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸𑀧𑀘𑁆𑀘𑀬𑀁 𑀢𑀢𑁆𑀣 𑀢𑀢𑁆𑀣 𑀤𑁂𑀲𑀺𑀢𑀢𑁆𑀢𑀸 𑀧𑀜𑁆𑀜𑀢𑁆𑀢𑀢𑁆𑀢𑀸 𑀘 𑀯𑀺𑀧𑁆𑀧𑀓𑀺𑀡𑁆𑀡𑀸𑀦𑀁 𑀥𑀫𑁆𑀫𑀯𑀺𑀦𑀬𑀸𑀦𑀁 𑀲𑀗𑁆𑀕𑀳𑁂𑀢𑁆𑀯𑀸 𑀕𑀸𑀬𑀦𑀁 𑀓𑀣𑀦𑀁 𑀲𑀗𑁆𑀕𑀻𑀢𑀺. 𑀏𑀢𑁂𑀦 𑀢𑀁𑀢𑀁𑀲𑀺𑀓𑁆𑀔𑀸𑀧𑀤𑀸𑀦𑀁 𑀲𑀼𑀢𑁆𑀢𑀸𑀦𑀜𑁆𑀘 𑀆𑀤𑀺𑀧𑀭𑀺𑀬𑁄𑀲𑀸𑀦𑁂𑀲𑀼 ¶ 𑀅𑀦𑁆𑀢𑀭𑀦𑁆𑀢𑀭𑀸 𑀘 𑀲𑀫𑁆𑀩𑀦𑁆𑀥𑀯𑀲𑁂𑀦 𑀞𑀧𑀺𑀢𑀁 𑀲𑀗𑁆𑀕𑀻𑀢𑀺𑀓𑀸𑀭𑀯𑀘𑀦𑀁 𑀲𑀗𑁆𑀕𑀳𑀺𑀢𑀁 𑀳𑁄𑀢𑀺. 𑀲𑀗𑁆𑀕𑀻𑀬𑀫𑀸𑀦𑀲𑁆𑀲 𑀅𑀢𑁆𑀣𑀲𑁆𑀲 𑀫𑀳𑀦𑁆𑀢𑀢𑀸𑀬 𑀧𑀽𑀚𑀦𑀻𑀬𑀢𑀸𑀬 𑀘 𑀫𑀳𑀢𑀻 𑀲𑀗𑁆𑀕𑀻𑀢𑀺 𑀫𑀳𑀸𑀲𑀗𑁆𑀕𑀻𑀢𑀺, 𑀧𑀞𑀫𑀸 𑀫𑀳𑀸𑀲𑀗𑁆𑀕𑀻𑀢𑀺 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺, 𑀢𑀲𑁆𑀲𑀸 𑀧𑀯𑀢𑁆𑀢𑀺𑀓𑀸𑀮𑁄 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁄, 𑀢𑀲𑁆𑀫𑀺𑀁 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂. 𑀦𑀺𑀤𑀤𑀸𑀢𑀺 𑀤𑁂𑀲𑀦𑀁 𑀤𑁂𑀲𑀓𑀸𑀮𑀸𑀤𑀺𑀯𑀲𑁂𑀦 𑀅𑀯𑀺𑀤𑀺𑀢𑀁 𑀯𑀺𑀤𑀺𑀢𑀁 𑀓𑀢𑁆𑀯𑀸 𑀦𑀺𑀤𑀲𑁆𑀲𑁂𑀢𑀻𑀢𑀺 𑀦𑀺𑀤𑀸𑀦𑀁. 𑀬𑁄 𑀮𑁄𑀓𑀺𑀬𑁂𑀳𑀺 𑀉𑀧𑁄𑀕𑁆𑀖𑀸𑀢𑁄𑀢𑀺 𑀯𑀼𑀘𑁆𑀘𑀢𑀺, 𑀲𑁆𑀯𑀸𑀬𑀫𑁂𑀢𑁆𑀣 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀺𑀓𑁄 𑀕𑀦𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀦 ‘‘𑀲𑀦𑀺𑀤𑀸𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀁 𑀤𑁂𑀲𑁂𑀫𑀻’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁧𑁨𑁬) 𑀯𑀺𑀬 𑀅𑀚𑁆𑀛𑀸𑀲𑀬𑀸𑀤𑀺𑀤𑁂𑀲𑀦𑀼𑀧𑁆𑀧𑀢𑁆𑀢𑀺𑀳𑁂𑀢𑀼. 𑀢𑁂𑀦𑁂𑀯𑀸𑀳 𑁋 ‘‘𑀏𑀯𑀁 𑀫𑁂 𑀲𑀼𑀢𑀦𑁆𑀢𑀺𑀆𑀤𑀺𑀓𑀁 𑀆𑀬𑀲𑁆𑀫𑀢𑀸 𑀆𑀦𑀦𑁆𑀤𑁂𑀦 𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀸𑀮𑁂 𑀯𑀼𑀢𑁆𑀢𑀁 𑀦𑀺𑀤𑀸𑀦𑀫𑀸𑀤𑀻’’𑀢𑀺.

𑁧. ‘‘𑀲𑀸 𑀧𑀦𑁂𑀲𑀸’’𑀢𑀺𑀆𑀤𑀺𑀦𑀸 𑀩𑀸𑀳𑀺𑀭𑀦𑀺𑀤𑀸𑀦𑁂 𑀯𑀢𑁆𑀢𑀩𑁆𑀩𑀁 𑀅𑀢𑀺𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀅𑀩𑁆𑀪𑀦𑁆𑀢𑀭𑀦𑀺𑀤𑀸𑀦𑀁 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀲𑀁𑀯𑀡𑁆𑀡𑀺𑀢𑀼𑀁 ‘‘𑀬𑀁 𑀧𑀦𑁂𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀲𑁆𑀫𑀸 𑀲𑀁𑀯𑀡𑁆𑀡𑀦𑀁 𑀓𑀭𑁄𑀦𑁆𑀢𑁂𑀦 𑀲𑀁𑀯𑀡𑁆𑀡𑁂𑀢𑀩𑁆𑀩𑁂 𑀥𑀫𑁆𑀫𑁂 𑀧𑀤𑀸𑀦𑀺 𑀧𑀤𑀯𑀺𑀪𑀸𑀕𑀁 𑀢𑀤𑀢𑁆𑀣𑀜𑁆𑀘 𑀤𑀲𑁆𑀲𑁂𑀢𑁆𑀯𑀸 𑀢𑀢𑁄 𑀧𑀭𑀁 𑀧𑀺𑀡𑁆𑀟𑀢𑁆𑀣𑀸𑀤𑀺𑀦𑀺𑀤𑀲𑁆𑀲𑀦𑀯𑀲𑁂𑀦 𑀘 𑀲𑀁𑀯𑀡𑁆𑀡𑀦𑀸 𑀓𑀸𑀢𑀩𑁆𑀩𑀸, 𑀢𑀲𑁆𑀫𑀸 𑀧𑀤𑀸𑀦𑀺 𑀢𑀸𑀯 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀦𑁆𑀢𑀺 𑀦𑀺𑀧𑀸𑀢𑀧𑀤’’𑀦𑁆𑀢𑀺𑀆𑀤𑀺𑀫𑀸𑀳 ¶ . 𑀢𑀢𑁆𑀣 𑀧𑀤𑀯𑀺𑀪𑀸𑀕𑁄𑀢𑀺 𑀧𑀤𑀸𑀦𑀁 𑀯𑀺𑀲𑁂𑀲𑁄, 𑀦 𑀧𑀤𑀯𑀺𑀕𑁆𑀕𑀳𑁄. 𑀅𑀣 𑀯𑀸 𑀧𑀤𑀸𑀦𑀺 𑀘 𑀧𑀤𑀯𑀺𑀪𑀸𑀕𑁄 𑀘 𑀧𑀤𑀯𑀺𑀪𑀸𑀕𑁄, 𑀧𑀤𑀯𑀺𑀕𑁆𑀕𑀳𑁄 𑀘 𑀧𑀤𑀯𑀺𑀪𑀸𑀕𑁄 𑀘 𑀧𑀤𑀯𑀺𑀪𑀸𑀕𑁄𑀢𑀺 𑀯𑀸 𑀏𑀓𑀲𑁂𑀲𑀯𑀲𑁂𑀦 𑀧𑀤𑀧𑀤𑀯𑀺𑀕𑁆𑀕𑀳𑀸 𑀧𑀤𑀯𑀺𑀪𑀸𑀕𑀲𑀤𑁆𑀤𑁂𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀧𑀤𑀯𑀺𑀕𑁆𑀕𑀳𑁄 ‘‘𑀚𑁂𑀢𑀲𑁆𑀲 𑀯𑀦𑀁 𑀚𑁂𑀢𑀯𑀦’’𑀦𑁆𑀢𑀺𑀆𑀤𑀺𑀦𑀸 𑀲𑀫𑀸𑀲𑀧𑀤𑁂𑀲𑀼 𑀤𑀝𑁆𑀞𑀩𑁆𑀩𑁄.

𑀅𑀢𑁆𑀣𑀢𑁄𑀢𑀺 𑀧𑀤𑀢𑁆𑀣𑀢𑁄. 𑀢𑀁 𑀧𑀦 𑀧𑀤𑀢𑁆𑀣𑀁 𑀅𑀢𑁆𑀣𑀼𑀤𑁆𑀥𑀸𑀭𑀓𑁆𑀓𑀫𑁂𑀦 𑀧𑀞𑀫𑀁 𑀏𑀯𑀁-𑀲𑀤𑁆𑀤𑀲𑁆𑀲 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀯𑀁-𑀲𑀤𑁆𑀤𑁄 𑀢𑀸𑀯𑀸’’𑀢𑀺𑀆𑀤𑀺𑀫𑀸𑀳. 𑀅𑀯𑀥𑀸𑀭𑀡𑀸𑀤𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀇𑀤𑀫𑀢𑁆𑀣𑀧𑀼𑀘𑁆𑀙𑀸𑀧𑀭𑀺𑀫𑀸𑀡𑀸𑀤𑀺𑀅𑀢𑁆𑀣𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 ‘‘𑀏𑀯𑀁𑀕𑀢𑀸𑀦𑀺 𑀧𑀼𑀣𑀼𑀲𑀺𑀧𑁆𑀧𑀸𑀬𑀢𑀦𑀸𑀦𑀺, 𑀏𑀯𑀫𑀸𑀤𑀻𑀦𑀻’’𑀢𑀺𑀆𑀤𑀻𑀲𑀼 𑀇𑀤𑀁-𑀲𑀤𑁆𑀤𑀲𑁆𑀲 𑀅𑀢𑁆𑀣𑁂 𑀏𑀯𑀁-𑀲𑀤𑁆𑀤𑁄. 𑀕𑀢-𑀲𑀤𑁆𑀤𑁄 𑀳𑀺 𑀧𑀓𑀸𑀭𑀧𑀭𑀺𑀬𑀸𑀬𑁄, 𑀢𑀣𑀸 𑀯𑀺𑀥𑀸𑀓𑀸𑀭-𑀲𑀤𑁆𑀤𑀸 𑀘. 𑀢𑀣𑀸 𑀳𑀺 𑀯𑀺𑀥𑀬𑀼𑀢𑁆𑀢𑀕𑀢𑀲𑀤𑁆𑀤𑁂 𑀮𑁄𑀓𑀺𑀬𑀸 𑀧𑀓𑀸𑀭𑀢𑁆𑀣𑁂 𑀯𑀤𑀦𑁆𑀢𑀺. ‘‘𑀏𑀯𑀁 𑀲𑀼 𑀢𑁂 𑀲𑀼𑀦𑁆𑀳𑀸𑀢𑀸 𑀲𑀼𑀯𑀺𑀮𑀺𑀢𑁆𑀢𑀸 𑀓𑀧𑁆𑀧𑀺𑀢𑀓𑁂𑀲𑀫𑀲𑁆𑀲𑀽 𑀆𑀫𑀼𑀓𑁆𑀓𑀫𑀡𑀺𑀓𑀼𑀡𑁆𑀟𑀮𑀸𑀪𑀭𑀡𑀸 𑀑𑀤𑀸𑀢𑀯𑀢𑁆𑀣𑀯𑀲𑀦𑀸 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀸 𑀲𑀫𑀗𑁆𑀕𑀻𑀪𑀽𑀢𑀸 𑀧𑀭𑀺𑀘𑀸𑀭𑁂𑀦𑁆𑀢𑀺 𑀲𑁂𑀬𑁆𑀬𑀣𑀸𑀧𑀺 𑀢𑁆𑀯𑀁 𑀏𑀢𑀭𑀳𑀺 ¶ 𑀲𑀸𑀘𑀭𑀺𑀬𑀓𑁄𑀢𑀺. 𑀦𑁄 𑀳𑀺𑀤𑀁, 𑀪𑁄 𑀕𑁄𑀢𑀫𑀸’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁮𑁬) 𑀧𑀼𑀘𑁆𑀙𑀸𑀬𑀁. ‘‘𑀏𑀯𑀁 𑀮𑀳𑀼𑀧𑀭𑀺𑀯𑀢𑁆𑀢𑀁 (𑀅. 𑀦𑀺. 𑁧.𑁪𑁮), 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄’’𑀢𑀺 (𑀤𑀻. 𑀦𑀺. 𑁧.𑁨𑁪𑁪; 𑀧𑀸𑀭𑀸. 𑁧𑁨) 𑀘 𑀆𑀤𑀻𑀲𑀼 𑀧𑀭𑀺𑀫𑀸𑀡𑁂.

𑀦𑀦𑀼 𑀘 ‘‘𑀏𑀯𑀁 𑀲𑀼 𑀢𑁂 𑀲𑀼𑀦𑁆𑀳𑀸𑀢𑀸 𑀲𑀼𑀯𑀺𑀮𑀺𑀢𑁆𑀢𑀸 𑀏𑀯𑀫𑀸𑀬𑀼𑀧𑀭𑀺𑀬𑀦𑁆𑀢𑁄’’𑀢𑀺 𑀏𑀢𑁆𑀣 𑀏𑀯𑀁-𑀲𑀤𑁆𑀤𑁂𑀦 𑀧𑀼𑀘𑁆𑀙𑀦𑀸𑀓𑀸𑀭𑀧𑀭𑀺𑀫𑀸𑀡𑀸𑀓𑀸𑀭𑀸𑀦𑀁 𑀯𑀼𑀢𑁆𑀢𑀢𑁆𑀢𑀸 𑀆𑀓𑀸𑀭𑀢𑁆𑀣𑁄 𑀏𑀯 𑀏𑀯𑀁-𑀲𑀤𑁆𑀤𑁄𑀢𑀺? 𑀦, 𑀯𑀺𑀲𑁂𑀲𑀲𑀩𑁆𑀪𑀸𑀯𑀢𑁄. 𑀆𑀓𑀸𑀭𑀫𑀢𑁆𑀢𑀯𑀸𑀘𑀓𑁄 𑀳𑀺 𑀏𑀯𑀁-𑀲𑀤𑁆𑀤𑁄 𑀆𑀓𑀸𑀭𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑁂𑀢𑁄 𑀬𑀣𑀸 ‘‘𑀏𑀯𑀁 𑀩𑁆𑀬𑀸𑀔𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁨𑁩𑁪; 𑀧𑀸𑀘𑀺. 𑁪𑁧𑁭; 𑀘𑀽𑀴𑀯. 𑁬𑁫), 𑀦 𑀧𑀦 𑀆𑀓𑀸𑀭𑀯𑀺𑀲𑁂𑀲𑀯𑀸𑀘𑀓𑁄. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀏𑀯𑀁 𑀚𑀸𑀢𑁂𑀦 𑀫𑀘𑁆𑀘𑁂𑀦𑀸’’𑀢𑀺𑀆𑀤𑀻𑀦𑀺 (𑀥. 𑀧. 𑁫𑁩) 𑀉𑀧𑀫𑀸𑀤𑀺𑀉𑀤𑀸𑀳𑀭𑀡𑀸𑀦𑀺 𑀉𑀧𑀧𑀦𑁆𑀦𑀸𑀦𑀺 𑀳𑁄𑀦𑁆𑀢𑀺. 𑀢𑀣𑀸 𑀳𑀺 ‘‘𑀬𑀣𑀸 𑀳𑀺…𑀧𑁂… 𑀩𑀳𑀼’’𑀦𑁆𑀢𑀺 (𑀥. 𑀧. 𑁫𑁩) 𑀏𑀢𑁆𑀣 𑀧𑀼𑀧𑁆𑀨𑀭𑀸𑀲𑀺𑀝𑁆𑀞𑀸𑀦𑀺𑀬𑀢𑁄 𑀫𑀦𑀼𑀲𑁆𑀲𑀽𑀧𑀧𑀢𑁆𑀢𑀺𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀪𑁄𑀕𑀲𑀫𑁆𑀧𑀢𑁆𑀢𑀺- 𑀆𑀤𑀺𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀺𑀭𑀺𑀬𑀸𑀳𑁂𑀢𑀼𑀲𑀫𑀼𑀤𑀸𑀬𑀢𑁄 𑀲𑁄𑀪𑀸𑀲𑀼𑀕𑀦𑁆𑀥𑀢𑀸𑀤𑀺𑀕𑀼𑀡𑀬𑁄𑀕𑀢𑁄 𑀫𑀸𑀮𑀸𑀕𑀼𑀡𑀲𑀤𑀺𑀲𑀺𑀬𑁄 𑀧𑀳𑀽𑀢𑀸 𑀧𑀼𑀜𑁆𑀜𑀓𑀺𑀭𑀺𑀬𑀸 𑀫𑀭𑀺𑀢𑀩𑁆𑀩𑀲𑀪𑀸𑀯𑀢𑀸𑀬 𑀫𑀘𑁆𑀘𑁂𑀦 𑀲𑀢𑁆𑀢𑁂𑀦 𑀓𑀢𑁆𑀢𑀩𑁆𑀩𑀸𑀢𑀺 𑀚𑁄𑀢𑀺𑀢𑀢𑁆𑀢𑀸 𑀧𑀼𑀧𑁆𑀨𑀭𑀸𑀲𑀺𑀫𑀸𑀮𑀸𑀕𑀼𑀡𑀸𑀯 𑀉𑀧𑀫𑀸. 𑀢𑁂𑀲𑀁 𑀉𑀧𑀫𑀸𑀓𑀸𑀭𑁄 𑀬𑀣𑀸-𑀲𑀤𑁆𑀤𑁂𑀦 𑀅𑀦𑀺𑀬𑀫𑀢𑁄 𑀯𑀼𑀢𑁆𑀢𑁄𑀢𑀺 ‘‘𑀏𑀯𑀁-𑀲𑀤𑁆𑀤𑁄 𑀉𑀧𑀫𑀸𑀓𑀸𑀭𑀦𑀺𑀕𑀫𑀦𑀢𑁆𑀣𑁄’’𑀢𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁, 𑀲𑁄 𑀧𑀦 𑀉𑀧𑀫𑀸𑀓𑀸𑀭𑁄 𑀦𑀺𑀬𑀫𑀺𑀬𑀫𑀸𑀦𑁄 𑀅𑀢𑁆𑀣𑀢𑁄 𑀉𑀧𑀫𑀸𑀯 𑀳𑁄𑀢𑀻𑀢𑀺 𑀆𑀳 𑁋 ‘‘𑀉𑀧𑀫𑀸𑀬𑀁 𑀆𑀕𑀢𑁄’’𑀢𑀺. 𑀢𑀣𑀸 ‘‘𑀏𑀯𑀁 𑀇𑀫𑀺𑀦𑀸 𑀆𑀓𑀸𑀭𑁂𑀦 𑀅𑀪𑀺𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀉𑀧𑀤𑀺𑀲𑀺𑀬𑀫𑀸𑀦𑀸𑀬 𑀲𑀫𑀡𑀲𑀸𑀭𑀼𑀧𑁆𑀧𑀸𑀬 𑀆𑀓𑀧𑁆𑀧𑀲𑀫𑁆𑀧𑀢𑁆𑀢𑀺𑀬𑀸 𑀬𑁄 𑀢𑀢𑁆𑀣 𑀉𑀧𑀤𑀺𑀲𑀦𑀸𑀓𑀸𑀭𑁄, 𑀲𑁄 𑀅𑀢𑁆𑀣𑀢𑁄 𑀉𑀧𑀤𑁂𑀲𑁄 𑀏𑀯𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀏𑀯𑀁 𑀢𑁂…𑀧𑁂… 𑀉𑀧𑀤𑁂𑀲𑁂’’𑀢𑀺. 𑀢𑀣𑀸 𑀏𑀯𑀫𑁂𑀢𑀁 ¶ 𑀪𑀕𑀯𑀸, 𑀏𑀯𑀫𑁂𑀢𑀁 𑀲𑀼𑀕𑀢𑀸𑀢𑀺 𑀏𑀢𑁆𑀣 𑀪𑀕𑀯𑀢𑀸 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀅𑀯𑀺𑀧𑀭𑀻𑀢𑀢𑁄 𑀚𑀸𑀦𑀦𑁆𑀢𑁂𑀳𑀺 𑀓𑀢𑀁 𑀢𑀢𑁆𑀣 𑀲𑀁𑀯𑀺𑀚𑁆𑀚𑀫𑀸𑀦𑀕𑀼𑀡𑀸𑀦𑀁 𑀧𑀓𑀸𑀭𑁂𑀳𑀺 𑀳𑀁𑀲𑀦𑀁 𑀉𑀤𑀕𑁆𑀕𑀢𑀸𑀓𑀭𑀡𑀁 𑀲𑀫𑁆𑀧𑀳𑀁𑀲𑀦𑀁, 𑀬𑁄 𑀢𑀢𑁆𑀣 𑀲𑀫𑁆𑀧𑀳𑀁𑀲𑀦𑀸𑀓𑀸𑀭𑁄𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀏𑀯𑀫𑁂𑀯𑀁 𑀧𑀦𑀸𑀬𑀦𑁆𑀢𑀺 𑀏𑀢𑁆𑀣 𑀕𑀭𑀳𑀡𑀸𑀓𑀸𑀭𑁄𑀢𑀺 𑀬𑁄𑀚𑁂𑀢𑀩𑁆𑀩𑀁, 𑀲𑁄 𑀘 𑀕𑀭𑀳𑀡𑀸𑀓𑀸𑀭𑁄 ‘‘𑀯𑀲𑀮𑀻’’𑀢𑀺𑀆𑀤𑀺𑀔𑀼𑀁𑀲𑀦𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀢𑁄 𑀇𑀥 𑀏𑀯𑀁-𑀲𑀤𑁆𑀤𑁂𑀦 𑀧𑀓𑀸𑀲𑀺𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀉𑀧𑀫𑀸𑀓𑀸𑀭𑀸𑀤𑀬𑁄𑀧𑀺 𑀉𑀧𑀫𑀸𑀤𑀺𑀯𑀲𑁂𑀦 𑀯𑀼𑀢𑁆𑀢𑀸𑀦𑀁 𑀧𑀼𑀧𑁆𑀨𑀭𑀸𑀲𑀺𑀆𑀤𑀺𑀲𑀤𑁆𑀤𑀸𑀦𑀁 𑀲𑀦𑁆𑀦𑀺𑀥𑀸𑀦𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁, 𑀪𑀦𑁆𑀢𑁂𑀢𑀺 𑀔𑁄𑀢𑀺𑀆𑀤𑀻𑀲𑀼 𑀧𑀦 𑀥𑀫𑁆𑀫𑀲𑁆𑀲 𑀲𑀸𑀥𑀼𑀓𑀁 𑀲𑀯𑀦𑀫𑀦𑀲𑀺𑀓𑀸𑀭𑁂𑀦 𑀦𑀺𑀬𑁄𑀚𑀺𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀅𑀢𑁆𑀢𑀦𑁄 𑀢𑀢𑁆𑀣 𑀞𑀺𑀢𑀪𑀸𑀯𑀲𑁆𑀲 𑀧𑀝𑀺𑀚𑀸𑀦𑀦𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 ¶ 𑀏𑀢𑁆𑀣 𑀏𑀯𑀁-𑀲𑀤𑁆𑀤𑁄 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑁄 𑀯𑀼𑀢𑁆𑀢𑁄, 𑀢𑁂𑀦 ‘‘𑀏𑀯𑀁, 𑀪𑀦𑁆𑀢𑁂, 𑀲𑀸𑀥𑀼 𑀪𑀦𑁆𑀢𑁂, 𑀲𑀼𑀝𑁆𑀞𑀼 𑀪𑀦𑁆𑀢𑁂’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀜𑁆𑀘 𑀯𑀤𑁂𑀳𑀻𑀢𑀺 ‘‘𑀬𑀣𑀸𑀳𑀁 𑀯𑀤𑀸𑀫𑀺, 𑀏𑀯𑀁 𑀲𑀫𑀡𑀁 𑀆𑀦𑀦𑁆𑀤𑀁 𑀯𑀤𑁂𑀳𑀻’’𑀢𑀺 𑀯𑀤𑀦𑀸𑀓𑀸𑀭𑁄 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑁄 𑀏𑀯𑀁-𑀲𑀤𑁆𑀤𑁂𑀦 𑀦𑀺𑀤𑀲𑁆𑀲𑀻𑀬𑀢𑀻𑀢𑀺 𑀦𑀺𑀤𑀲𑁆𑀲𑀦𑀢𑁆𑀣𑁄 𑀯𑀼𑀢𑁆𑀢𑁄. 𑀏𑀯𑀁 𑀦𑁄𑀢𑀺 𑀏𑀢𑁆𑀣𑀸𑀧𑀺 𑀢𑁂𑀲𑀁 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀳𑀺𑀢𑀤𑀼𑀓𑁆𑀔𑀸𑀯𑀳𑀪𑀸𑀯𑁂 𑀲𑀦𑁆𑀦𑀺𑀝𑁆𑀞𑀸𑀦𑀚𑀦𑀦𑀢𑁆𑀣𑀁 𑀅𑀦𑀼𑀫𑀢𑀺𑀕𑁆𑀕𑀳𑀡𑀯𑀲𑁂𑀦 ‘‘𑀦𑁄 𑀯𑀸, 𑀓𑀣𑀁 𑀯𑁄 𑀏𑀢𑁆𑀣 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀸𑀬 𑀓𑀢𑀸𑀬 ‘‘𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀤𑀸𑀓𑀸𑀭𑀲𑀦𑁆𑀦𑀺𑀝𑁆𑀞𑀸𑀦𑀁 𑀏𑀯𑀁-𑀲𑀤𑁆𑀤𑁂𑀦 𑀯𑀺𑀪𑀸𑀯𑀺𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀲𑁄 𑀧𑀦 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀳𑀺𑀢𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑀸𑀓𑀸𑀭𑁄 𑀦𑀺𑀬𑀫𑀺𑀬𑀫𑀸𑀦𑁄 𑀅𑀯𑀥𑀸𑀭𑀡𑀢𑁆𑀣𑁄 𑀳𑁄𑀢𑀻𑀢𑀺 𑀆𑀳 𑁋 ‘‘𑀏𑀯𑀁 𑀦𑁄 𑀏𑀢𑁆𑀣 𑀳𑁄𑀢𑀻𑀢𑀺𑀆𑀤𑀻𑀲𑀼 𑀅𑀯𑀥𑀸𑀭𑀡𑁂’’𑀢𑀺.

𑀦𑀸𑀦𑀸𑀦𑀬𑀦𑀺𑀧𑀼𑀡𑀦𑁆𑀢𑀺 𑀏𑀓𑀢𑁆𑀢𑀦𑀸𑀦𑀢𑁆𑀢𑀅𑀩𑁆𑀬𑀸𑀧𑀸𑀭𑀏𑀯𑀁𑀥𑀫𑁆𑀫𑀢𑀸𑀲𑀗𑁆𑀔𑀸𑀢𑀸, 𑀦𑀦𑁆𑀤𑀺𑀬𑀸𑀯𑀝𑁆𑀝𑀢𑀺𑀧𑀼𑀓𑁆𑀔𑀮𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀅𑀗𑁆𑀓𑀼𑀲𑀤𑀺𑀲𑀸𑀮𑁄𑀘𑀦𑀲𑀗𑁆𑀔𑀸𑀢𑀸 𑀯𑀸 𑀆𑀥𑀸𑀭𑀸𑀤𑀺𑀪𑁂𑀤𑀯𑀲𑁂𑀦 𑀦𑀸𑀦𑀸𑀯𑀺𑀥𑀸 𑀦𑀬𑀸 𑀦𑀸𑀦𑀸𑀦𑀬𑀸. 𑀦𑀬𑀸 𑀯𑀸 𑀧𑀸𑀴𑀺𑀕𑀢𑀺𑀬𑁄, 𑀢𑀸 𑀘 𑀧𑀜𑁆𑀜𑀢𑁆𑀢𑀺𑀆𑀤𑀺𑀯𑀲𑁂𑀦 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀮𑁄𑀓𑀺𑀬𑀸𑀤𑀺𑀢𑀤𑀼𑀪𑀬𑀯𑁄𑀫𑀺𑀲𑁆𑀲𑀓𑀢𑀸𑀤𑀺𑀯𑀲𑁂𑀦 𑀓𑀼𑀲𑀮𑀸𑀤𑀺𑀯𑀲𑁂𑀦 𑀔𑀦𑁆𑀥𑀸𑀤𑀺𑀯𑀲𑁂𑀦 𑀲𑀗𑁆𑀕𑀳𑀸𑀤𑀺𑀯𑀲𑁂𑀦 𑀲𑀫𑀬𑀯𑀺𑀫𑀼𑀢𑁆𑀢𑀸𑀤𑀺𑀯𑀲𑁂𑀦 𑀧𑀥𑀸𑀦𑀸𑀤𑀺𑀯𑀲𑁂𑀦 𑀓𑀼𑀲𑀮𑀫𑀽𑀮𑀸𑀤𑀺𑀯𑀲𑁂𑀦 𑀢𑀺𑀓𑀧𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀘 𑀦𑀸𑀦𑀧𑁆𑀧𑀓𑀸𑀭𑀸𑀢𑀺 𑀦𑀸𑀦𑀸𑀦𑀬𑀸, 𑀢𑁂𑀳𑀺 𑀦𑀺𑀧𑀼𑀡𑀁 𑀲𑀡𑁆𑀳𑀁 𑀲𑀼𑀔𑀼𑀫𑀦𑁆𑀢𑀺 𑀦𑀸𑀦𑀸𑀦𑀬𑀦𑀺𑀧𑀼𑀡𑀁. 𑀆𑀲𑀬𑁄𑀯 𑀅𑀚𑁆𑀛𑀸𑀲𑀬𑁄, 𑀢𑁂 𑀘 𑀲𑀲𑁆𑀲𑀢𑀸𑀤𑀺𑀪𑁂𑀤𑁂𑀦 𑀢𑀢𑁆𑀣 𑀘 𑀅𑀧𑁆𑀧𑀭𑀚𑀓𑁆𑀔𑀢𑀸𑀤𑀺𑀪𑁂𑀤𑁂𑀦 𑀘 𑀅𑀦𑁂𑀓𑁂, 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀬𑁄 𑀏𑀯 𑀯𑀸 𑀲𑀫𑀼𑀝𑁆𑀞𑀸𑀦𑀁 𑀉𑀧𑁆𑀧𑀢𑁆𑀢𑀺𑀳𑁂𑀢𑀼 𑀏𑀢𑀲𑁆𑀲𑀸𑀢𑀺 𑀅𑀦𑁂𑀓𑀚𑁆𑀛𑀸𑀲𑀬𑀲𑀫𑀼𑀝𑁆𑀞𑀸𑀦𑀁. 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀦𑁆𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀭𑀺𑀧𑀼𑀡𑁆𑀡𑀁 𑀉𑀧𑀦𑁂𑀢𑀩𑁆𑀩𑀸𑀪𑀸𑀯𑀢𑁄. 𑀲𑀗𑁆𑀓𑀸𑀲𑀦𑀧𑀓𑀸𑀲𑀦𑀯𑀺𑀯𑀭𑀡𑀯𑀺𑀪𑀚𑀦𑀉𑀢𑁆𑀢𑀸𑀦𑀻𑀓𑀭𑀡𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀙𑀳𑀺 𑀅𑀢𑁆𑀣𑀧𑀤𑁂𑀳𑀺 𑀅𑀓𑁆𑀔𑀭𑀧𑀤𑀩𑁆𑀬𑀜𑁆𑀚𑀦𑀸𑀓𑀸𑀭𑀦𑀺𑀭𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀙𑀳𑀺 𑀩𑁆𑀬𑀜𑁆𑀚𑀦𑀧𑀤𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑀦𑁆𑀢𑀺 𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀯𑀺𑀯𑀺𑀥𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀏𑀢𑁆𑀣 𑀧𑀸𑀝𑀺𑀳𑀸𑀭𑀺𑀬𑀧𑀤𑀲𑁆𑀲 𑀯𑀘𑀦𑀢𑁆𑀣𑀁 ‘‘𑀧𑀝𑀺𑀧𑀓𑁆𑀔𑀳𑀭𑀡𑀢𑁄 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀧𑀦𑀬𑀦𑀢𑁄 𑀘 𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀤𑀦𑁆𑀢𑀺. 𑀪𑀕𑀯𑀢𑁄 𑀧𑀦 𑀧𑀝𑀺𑀧𑀓𑁆𑀔𑀸 𑀭𑀸𑀕𑀸𑀤𑀬𑁄 𑀦 𑀲𑀦𑁆𑀢𑀺 ¶ , 𑀬𑁂 𑀳𑀭𑀺𑀢𑀩𑁆𑀩𑀸. 𑀧𑀼𑀣𑀼𑀚𑁆𑀚𑀦𑀸𑀦𑀫𑁆𑀧𑀺 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀅𑀝𑁆𑀞𑀕𑀼𑀡𑀲𑀫𑀦𑁆𑀦𑀸𑀕𑀢𑁂 𑀘𑀺𑀢𑁆𑀢𑁂 𑀳𑀢𑀧𑀝𑀺𑀧𑀓𑁆𑀔𑁂 𑀇𑀤𑁆𑀥𑀺𑀯𑀺𑀥𑀁 𑀧𑀯𑀢𑁆𑀢𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀧𑀯𑀢𑁆𑀢𑀯𑁄𑀳𑀸𑀭𑁂𑀦 𑀘 𑀦 𑀲𑀓𑁆𑀓𑀸 𑀇𑀥 ‘‘𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀢𑁆𑀣𑀼𑀁. 𑀲𑀘𑁂 𑀧𑀦 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀪𑀕𑀯𑀢𑁄 𑀯𑁂𑀦𑁂𑀬𑁆𑀬𑀕𑀢𑀸 𑀘 𑀓𑀺𑀮𑁂𑀲𑀸 ¶ 𑀧𑀝𑀺𑀧𑀓𑁆𑀔𑀸, 𑀢𑁂𑀲𑀁 𑀳𑀭𑀡𑀢𑁄 ‘‘𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀲𑀢𑀺 𑀬𑀼𑀢𑁆𑀢𑀫𑁂𑀢𑀁. 𑀅𑀣 𑀯𑀸 𑀪𑀕𑀯𑀢𑁄 𑀘 𑀲𑀸𑀲𑀦𑀲𑁆𑀲 𑀘 𑀧𑀝𑀺𑀧𑀓𑁆𑀔𑀸 𑀢𑀺𑀢𑁆𑀣𑀺𑀬𑀸, 𑀢𑁂𑀲𑀁 𑀳𑀭𑀡𑀢𑁄 𑀧𑀸𑀝𑀺𑀳𑀸𑀭𑀺𑀬𑀁. 𑀢𑁂 𑀳𑀺 𑀤𑀺𑀝𑁆𑀞𑀺𑀳𑀭𑀡𑀯𑀲𑁂𑀦 𑀘 𑀤𑀺𑀝𑁆𑀞𑀺𑀧𑁆𑀧𑀓𑀸𑀲𑀦𑁂 𑀅𑀲𑀫𑀢𑁆𑀣𑀪𑀸𑀯𑁂𑀦 𑀘 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀻𑀳𑀺 𑀳𑀭𑀺𑀢𑀸 𑀅𑀧𑀦𑀻𑀢𑀸 𑀳𑁄𑀦𑁆𑀢𑀻𑀢𑀺. ‘‘𑀧𑀝𑀻’’𑀢𑀺 𑀯𑀸 𑀅𑀬𑀁 𑀲𑀤𑁆𑀤𑁄 ‘‘𑀧𑀘𑁆𑀙𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀩𑁄𑀥𑁂𑀢𑀺 ‘‘𑀢𑀲𑁆𑀫𑀺𑀁 𑀧𑀝𑀺𑀧𑀯𑀺𑀝𑁆𑀞𑀫𑁆𑀳𑀺, 𑀅𑀜𑁆𑀜𑁄 𑀆𑀕𑀜𑁆𑀙𑀺 𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀻𑀲𑀼 (𑀲𑀼. 𑀦𑀺. 𑁯𑁮𑁫; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀯𑀕𑁆𑀕𑁄, 𑀯𑀢𑁆𑀣𑀼𑀕𑀸𑀣𑀸 𑁪) 𑀯𑀺𑀬, 𑀢𑀲𑁆𑀫𑀸 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂 𑀓𑀢𑀓𑀺𑀘𑁆𑀘𑁂𑀦 𑀧𑀘𑁆𑀙𑀸 𑀳𑀭𑀺𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀧𑀝𑀺𑀳𑀸𑀭𑀺𑀬𑀁, 𑀅𑀢𑁆𑀢𑀦𑁄 𑀯𑀸 𑀉𑀧𑀓𑁆𑀓𑀺𑀮𑁂𑀲𑁂𑀲𑀼 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑀕𑁆𑀕𑁂𑀳𑀺 𑀳𑀭𑀺𑀢𑁂𑀲𑀼 𑀧𑀘𑁆𑀙𑀸 𑀳𑀭𑀡𑀁 𑀧𑀝𑀺𑀳𑀸𑀭𑀺𑀬𑀁, 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀺𑀬𑁄 𑀘 𑀯𑀺𑀕𑀢𑀽𑀧𑀓𑁆𑀓𑀺𑀮𑁂𑀲𑁂𑀦 𑀓𑀢𑀓𑀺𑀘𑁆𑀘𑁂𑀦 𑀘 𑀲𑀢𑁆𑀢𑀳𑀺𑀢𑀢𑁆𑀣𑀁 𑀧𑀼𑀦 𑀧𑀯𑀢𑁆𑀢𑁂𑀢𑀩𑁆𑀩𑀸, 𑀳𑀭𑀺𑀢𑁂𑀲𑀼 𑀘 𑀅𑀢𑁆𑀢𑀦𑁄 𑀉𑀧𑀓𑁆𑀓𑀺𑀮𑁂𑀲𑁂𑀲𑀼 𑀧𑀭𑀲𑀢𑁆𑀢𑀸𑀦𑀁 𑀉𑀧𑀓𑁆𑀓𑀺𑀮𑁂𑀲𑀳𑀭𑀡𑀸𑀦𑀺 𑀳𑁄𑀦𑁆𑀢𑀻𑀢𑀺 𑀧𑀝𑀺𑀳𑀸𑀭𑀺𑀬𑀸𑀦𑀺 𑀪𑀯𑀦𑁆𑀢𑀺. 𑀧𑀝𑀺𑀳𑀸𑀭𑀺𑀬𑀫𑁂𑀯 𑀧𑀸𑀝𑀺𑀳𑀸𑀭𑀺𑀬𑀁, 𑀧𑀝𑀺𑀳𑀸𑀭𑀺𑀬𑁂 𑀯𑀸 𑀇𑀤𑁆𑀥𑀺𑀆𑀤𑁂𑀲𑀦𑀸𑀦𑀼𑀲𑀸𑀲𑀦𑀺𑀲𑀫𑀼𑀤𑀸𑀬𑁂 𑀪𑀯𑀁 𑀏𑀓𑀫𑁂𑀓𑀁 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀧𑀝𑀺𑀳𑀸𑀭𑀺𑀬𑀁 𑀯𑀸 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀫𑀕𑁆𑀕𑁄 𑀘 𑀧𑀝𑀺𑀧𑀓𑁆𑀔𑀳𑀭𑀡𑀢𑁄, 𑀢𑀢𑁆𑀣 𑀚𑀸𑀢𑀁, 𑀢𑀲𑁆𑀫𑀺𑀁 𑀯𑀸 𑀦𑀺𑀫𑀺𑀢𑁆𑀢𑀪𑀽𑀢𑁂, 𑀢𑀢𑁄 𑀯𑀸 𑀆𑀕𑀢𑀦𑁆𑀢𑀺 𑀧𑀸𑀝𑀺𑀳𑀸𑀭𑀺𑀬𑀁. 𑀢𑀲𑁆𑀲 𑀧𑀦 𑀇𑀤𑁆𑀥𑀺𑀆𑀤𑀺𑀪𑁂𑀤𑁂𑀦 𑀯𑀺𑀲𑀬𑀪𑁂𑀤𑁂𑀦 𑀘 𑀩𑀳𑀼𑀯𑀺𑀥𑀲𑁆𑀲 𑀪𑀕𑀯𑀢𑁄 𑀤𑁂𑀲𑀦𑀸𑀬𑀁 𑀮𑀩𑁆𑀪𑀫𑀸𑀦𑀢𑁆𑀢𑀸 𑀆𑀳 𑁋 ‘‘𑀯𑀺𑀯𑀺𑀥𑀧𑀸𑀝𑀺𑀳𑀸𑀭𑀺𑀬’’𑀦𑁆𑀢𑀺.

𑀦 𑀅𑀜𑁆𑀜𑀣𑀸𑀢𑀺 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀸𑀓𑀸𑀭𑀢𑁄 𑀦 𑀅𑀜𑁆𑀜𑀣𑀸𑀢𑀺 𑀅𑀢𑁆𑀣𑁄, 𑀦 𑀧𑀦 𑀪𑀕𑀯𑀢𑁄 𑀤𑁂𑀲𑀺𑀢𑀸𑀓𑀸𑀭𑀢𑁄. 𑀅𑀘𑀺𑀦𑁆𑀢𑁂𑀬𑁆𑀬𑀸𑀦𑀼𑀪𑀸𑀯𑀸 𑀳𑀺 𑀪𑀕𑀯𑀢𑁄 𑀤𑁂𑀲𑀦𑀸. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀓𑁄 𑀲𑀫𑀢𑁆𑀣𑁄 𑀯𑀺𑀜𑁆𑀜𑀸𑀢𑀼’’𑀦𑁆𑀢𑀺 𑀇𑀤𑀁 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀪𑀯𑀢𑀺, 𑀥𑀸𑀭𑀡𑀩𑀮𑀤𑀲𑁆𑀲𑀦𑀜𑁆𑀘 𑀦 𑀯𑀺𑀭𑀼𑀚𑁆𑀛𑀢𑀺 𑀲𑀼𑀢𑀸𑀓𑀸𑀭𑀸𑀯𑀺𑀭𑀼𑀚𑁆𑀛𑀦𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀦 𑀳𑁂𑀢𑁆𑀣 𑀅𑀢𑁆𑀣𑀦𑁆𑀢𑀭𑀢𑀸𑀧𑀭𑀺𑀳𑀸𑀭𑁄 𑀤𑁆𑀯𑀺𑀦𑁆𑀦𑀁 𑀅𑀢𑁆𑀣𑀸𑀦𑀁 𑀏𑀓𑀯𑀺𑀲𑀬𑀢𑁆𑀢𑀸, 𑀇𑀢𑀭𑀣𑀸 𑀣𑁂𑀭𑁄 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀲𑀩𑁆𑀩𑀣𑀸 𑀧𑀝𑀺𑀕𑁆𑀕𑀳𑀡𑁂 𑀲𑀫𑀢𑁆𑀣𑁄 𑀅𑀲𑀫𑀢𑁆𑀣𑁄 𑀘𑀸𑀢𑀺 𑀆𑀧𑀚𑁆𑀚𑁂𑀬𑁆𑀬𑀸𑀢𑀺.

‘‘𑀬𑁄 𑀧𑀭𑁄 𑀦 𑀳𑁄𑀢𑀺, 𑀲𑁄 𑀅𑀢𑁆𑀢𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀸𑀬 𑀦𑀺𑀬𑀓𑀚𑁆𑀛𑀢𑁆𑀢𑀲𑀗𑁆𑀔𑀸𑀢𑀸𑀬 𑀲𑀲𑀦𑁆𑀢𑀢𑀺𑀬𑀁 𑀯𑀢𑁆𑀢𑀦𑀢𑁄 𑀢𑀺𑀯𑀺𑀥𑁄𑀧𑀺 𑀫𑁂-𑀲𑀤𑁆𑀤𑁄 𑀓𑀺𑀜𑁆𑀘𑀸𑀧𑀺 𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀣𑁂 𑀤𑀺𑀲𑁆𑀲𑀢𑀺, 𑀓𑀭𑀡𑀲𑀫𑁆𑀧𑀤𑀸𑀦𑀲𑀸𑀫𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀧𑀦 𑀯𑀺𑀚𑁆𑀚𑀫𑀸𑀦𑀪𑁂𑀤𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀫𑁂-𑀲𑀤𑁆𑀤𑁄 𑀢𑀻𑀲𑀼 𑀅𑀢𑁆𑀣𑁂𑀲𑀼 𑀤𑀺𑀲𑁆𑀲𑀢𑀻’’𑀢𑀺.

𑀓𑀺𑀜𑁆𑀘𑀸𑀧𑀺 ¶ 𑀉𑀧𑀲𑀕𑁆𑀕𑁄 𑀓𑀺𑀭𑀺𑀬𑀁 𑀯𑀺𑀲𑁂𑀲𑁂𑀢𑀺, 𑀚𑁄𑀢𑀓𑀪𑀸𑀯𑀢𑁄 𑀧𑀦 𑀲𑀢𑀺𑀧𑀺 𑀢𑀲𑁆𑀫𑀺𑀁 𑀲𑀼𑀢-𑀲𑀤𑁆𑀤𑁄 𑀏𑀯 𑀢𑀁 𑀢𑀫𑀢𑁆𑀣𑀁 𑀯𑀤𑀢𑀻𑀢𑀺 𑀅𑀦𑀼𑀧𑀲𑀕𑁆𑀕𑀲𑁆𑀲 𑀲𑀼𑀢-𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂 𑀲𑀉𑀧𑀲𑀕𑁆𑀕𑀲𑁆𑀲 𑀕𑀳𑀡𑀁 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 ¶ 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀉𑀧𑀲𑀕𑁆𑀕𑁄 𑀘 𑀅𑀦𑀼𑀧𑀲𑀕𑁆𑀕𑁄 𑀘𑀸’’𑀢𑀺 𑀆𑀳. 𑀅𑀲𑁆𑀲𑀸𑀢𑀺 𑀲𑀼𑀢𑀲𑀤𑁆𑀤𑀲𑁆𑀲. 𑀓𑀫𑁆𑀫𑀪𑀸𑀯𑀲𑀸𑀥𑀦𑀸𑀦𑀺 𑀇𑀥 𑀲𑀼𑀢𑀲𑀤𑁆𑀤𑁂 𑀲𑀫𑁆𑀪𑀯𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑁋 ‘‘𑀉𑀧𑀥𑀸𑀭𑀺𑀢𑀦𑁆𑀢𑀺 𑀯𑀸 𑀉𑀧𑀥𑀸𑀭𑀡𑀦𑁆𑀢𑀺 𑀯𑀸 𑀅𑀢𑁆𑀣𑁄’’𑀢𑀺. 𑀫𑀬𑀸𑀢𑀺 𑀅𑀢𑁆𑀣𑁂 𑀲𑀢𑀻𑀢𑀺 𑀬𑀤𑀸 𑀫𑁂-𑀲𑀤𑁆𑀤𑀲𑁆𑀲 𑀓𑀢𑁆𑀢𑀼𑀯𑀲𑁂𑀦 𑀓𑀭𑀡𑀦𑀺𑀤𑁆𑀤𑁂𑀲𑁄, 𑀢𑀤𑀸𑀢𑀺 𑀅𑀢𑁆𑀣𑁄. 𑀫𑀫𑀸𑀢𑀺 𑀅𑀢𑁆𑀣𑁂 𑀲𑀢𑀻𑀢𑀺 𑀬𑀤𑀸 𑀲𑀫𑁆𑀩𑀦𑁆𑀥𑀯𑀲𑁂𑀦 𑀲𑀸𑀫𑀺𑀦𑀺𑀤𑁆𑀤𑁂𑀲𑁄, 𑀢𑀤𑀸.

𑀲𑀼𑀢𑀲𑀤𑁆𑀤𑀲𑀦𑁆𑀦𑀺𑀝𑁆𑀞𑀸𑀦𑁂 𑀧𑀬𑀼𑀢𑁆𑀢𑁂𑀦 𑀏𑀯𑀁-𑀲𑀤𑁆𑀤𑁂𑀦 𑀲𑀯𑀦𑀓𑀺𑀭𑀺𑀬𑀸𑀚𑁄𑀢𑀓𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑁋 ‘‘𑀏𑀯𑀦𑁆𑀢𑀺 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀺𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀁 𑀲𑁄𑀢𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀸𑀦𑀁 𑀢𑀤𑀪𑀺𑀦𑀻𑀳𑀝𑀸𑀦𑀜𑁆𑀘 𑀫𑀦𑁄𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀸𑀦𑀁 𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀩𑁆𑀩𑁂𑀲𑀫𑁆𑀧𑀺 𑀯𑀸𑀓𑁆𑀬𑀸𑀦𑀁 𑀏𑀯𑀓𑀸𑀭𑀢𑁆𑀣𑀲𑀳𑀺𑀢𑀢𑁆𑀢𑀸 ‘‘𑀲𑀼𑀢’’𑀦𑁆𑀢𑀺 𑀏𑀢𑀲𑁆𑀲 𑀲𑀼𑀢𑀫𑁂𑀯𑀸𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺 𑀆𑀳 𑁋 ‘‘𑀅𑀲𑁆𑀲𑀯𑀦𑀪𑀸𑀯𑀧𑁆𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺. 𑀏𑀢𑁂𑀦 𑀅𑀯𑀥𑀸𑀭𑀡𑁂𑀦 𑀦𑀺𑀬𑀸𑀫𑀢𑀁 𑀤𑀲𑁆𑀲𑁂𑀢𑀺. 𑀬𑀣𑀸 𑀘 𑀲𑀼𑀢𑀁 𑀲𑀼𑀢𑀫𑁂𑀯𑀸𑀢𑀺 𑀦𑀺𑀬𑀸𑀫𑁂𑀢𑀩𑁆𑀩𑀁, 𑀢𑀁 𑀲𑀫𑁆𑀫𑀸 𑀲𑀼𑀢𑀁 𑀳𑁄𑀢𑀻𑀢𑀺 𑀆𑀳 𑁋 ‘‘𑀅𑀦𑀽𑀦𑀸𑀥𑀺𑀓𑀸𑀯𑀺𑀧𑀭𑀻𑀢𑀕𑁆𑀕𑀳𑀡𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀅𑀣 𑀯𑀸 𑀲𑀤𑁆𑀤𑀦𑁆𑀢𑀭𑀢𑁆𑀣𑀸𑀧𑁄𑀳𑀦𑀯𑀲𑁂𑀦 𑀲𑀤𑁆𑀤𑁄 𑀅𑀢𑁆𑀣𑀁 𑀯𑀤𑀢𑀻𑀢𑀺 𑀲𑀼𑀢𑀦𑁆𑀢𑀺 𑀅𑀲𑁆𑀲𑀼𑀢𑀁 𑀦 𑀳𑁄𑀢𑀻𑀢𑀺 𑀅𑀬𑀫𑁂𑀢𑀲𑁆𑀲 𑀅𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑁋 ‘‘𑀅𑀲𑁆𑀲𑀯𑀦𑀪𑀸𑀯𑀧𑁆𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺. 𑀇𑀫𑀺𑀦𑀸 𑀤𑀺𑀝𑁆𑀞𑀸𑀤𑀺𑀯𑀺𑀦𑀺𑀯𑀢𑁆𑀢𑀦𑀁 𑀓𑀭𑁄𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀦 𑀇𑀤𑀁 𑀫𑀬𑀸 𑀤𑀺𑀝𑁆𑀞𑀁, 𑀦 𑀲𑀬𑀫𑁆𑀪𑀼𑀜𑀸𑀡𑁂𑀦 𑀲𑀘𑁆𑀙𑀺𑀓𑀢𑀁, 𑀅𑀣 𑀔𑁄 𑀲𑀼𑀢𑀁, 𑀢𑀜𑁆𑀘 𑀲𑀫𑁆𑀫𑀤𑁂𑀯𑀸𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀅𑀦𑀽𑀦𑀸𑀥𑀺𑀓𑀸𑀯𑀺𑀧𑀭𑀻𑀢𑀕𑁆𑀕𑀳𑀡𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀅𑀯𑀥𑀸𑀭𑀡𑀢𑁆𑀣𑁂 𑀯𑀸 𑀏𑀯𑀁-𑀲𑀤𑁆𑀤𑁂 𑀅𑀬𑀫𑀢𑁆𑀣𑀬𑁄𑀚𑀦𑀸 𑁋 ‘‘𑀓𑀭𑀻𑀬𑀢𑀻’’𑀢𑀺 𑀢𑀤𑀧𑁂𑀓𑁆𑀔𑀲𑁆𑀲 𑀲𑀼𑀢-𑀲𑀤𑁆𑀤𑀲𑁆𑀲 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 ‘‘𑀅𑀲𑁆𑀲𑀯𑀦𑀪𑀸𑀯𑀧𑁆𑀧𑀝𑀺𑀓𑁆𑀔𑁂𑀧𑀢𑁄’’𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀅𑀦𑀽𑀦𑀸𑀥𑀺𑀓𑀸𑀯𑀺𑀧𑀭𑀻𑀢𑀕𑁆𑀕𑀳𑀡𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀲𑀯𑀦-𑀲𑀤𑁆𑀤𑁄 𑀘𑁂𑀢𑁆𑀣 𑀓𑀫𑁆𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄 ‘‘𑀲𑀼𑀬𑁆𑀬𑀢𑀻’’𑀢𑀺.

𑀏𑀯𑀁 𑀲𑀯𑀦𑀳𑁂𑀢𑀼𑀲𑀯𑀦𑀯𑀺𑀲𑁂𑀲𑀯𑀲𑁂𑀦 𑀧𑀤𑀢𑁆𑀢𑀬𑀲𑁆𑀲 𑀏𑀓𑁂𑀦 𑀧𑀓𑀸𑀭𑁂𑀦 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀓𑀸𑀭𑀦𑁆𑀢𑀭𑁂𑀳𑀺 𑀢𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀢𑀣𑀸 𑀏𑀯’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀢𑀲𑁆𑀲𑀸𑀢𑀺 𑀬𑀸 𑀲𑀸 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀥𑀫𑁆𑀫𑀲𑁆𑀲𑀯𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀫𑀦𑁄𑀤𑁆𑀯𑀸𑀭𑀯𑀺𑀜𑁆𑀜𑀸𑀡𑀯𑀻𑀣𑀺, 𑀢𑀲𑁆𑀲𑀸. 𑀲𑀸 𑀳𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀺𑀢𑀼𑀁 𑀲𑀫𑀢𑁆𑀣𑀸. 𑀢𑀣𑀸 𑀘 𑀯𑀼𑀢𑁆𑀢𑀁 𑁋 ‘‘𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦𑀸’’𑀢𑀺. 𑀦𑀸𑀦𑀧𑁆𑀧𑀓𑀸𑀭𑁂𑀦𑀸𑀢𑀺 𑀯𑀓𑁆𑀔𑀫𑀸𑀦𑀸𑀦𑀁 𑀅𑀦𑁂𑀓𑀯𑀺𑀳𑀺𑀢𑀸𑀦𑀁 ¶ 𑀩𑁆𑀬𑀜𑁆𑀚𑀦𑀢𑁆𑀣𑀕𑁆𑀕𑀳𑀡𑀸𑀦𑀁 𑀦𑀸𑀦𑀸𑀓𑀸𑀭𑁂𑀦. 𑀏𑀢𑁂𑀦 𑀇𑀫𑀺𑀲𑁆𑀲𑀸 𑀬𑁄𑀚𑀦𑀸𑀬 𑀆𑀓𑀸𑀭𑀢𑁆𑀣𑁄 𑀏𑀯𑀁-𑀲𑀤𑁆𑀤𑁄 𑀕𑀳𑀺𑀢𑁄𑀢𑀺 𑀤𑀻𑀧𑁂𑀢𑀺. 𑀧𑀯𑀢𑁆𑀢𑀺𑀪𑀸𑀯𑀧𑁆𑀧𑀓𑀸𑀲𑀦𑀦𑁆𑀢𑀺 𑀧𑀯𑀢𑁆𑀢𑀺𑀬𑀸 𑀅𑀢𑁆𑀣𑀺𑀪𑀸𑀯𑀧𑁆𑀧𑀓𑀸𑀲𑀦𑀁. 𑀲𑀼𑀢𑀦𑁆𑀢𑀺 𑀥𑀫𑁆𑀫𑀧𑁆𑀧𑀓𑀸𑀲𑀦𑀦𑁆𑀢𑀺 𑀬𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀯𑀺𑀜𑁆𑀜𑀸𑀡𑀯𑀻𑀣𑀺 𑀦𑀸𑀦𑀧𑁆𑀧𑀓𑀸𑀭𑁂𑀦 𑀧𑀯𑀢𑁆𑀢𑀸, 𑀢𑀲𑁆𑀲 𑀥𑀫𑁆𑀫𑀢𑁆𑀢𑀸 𑀯𑀼𑀢𑁆𑀢𑀁, 𑀦 𑀲𑀼𑀢𑀲𑀤𑁆𑀤𑀲𑁆𑀲 𑀥𑀫𑁆𑀫𑀢𑁆𑀣𑀢𑁆𑀢𑀸. 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀸𑀓𑀝𑀻𑀓𑀭𑀡𑀁 ‘‘𑀅𑀬𑀜𑁆𑀳𑁂𑀢𑁆𑀣𑀸’’𑀢𑀺𑀆𑀤𑀺. 𑀢𑀢𑁆𑀣 𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸𑀢𑀺 𑀓𑀭𑀡𑀢𑁆𑀣𑁂 𑀓𑀭𑀡𑀯𑀘𑀦𑀁, 𑀫𑀬𑀸𑀢𑀺 𑀓𑀢𑁆𑀢𑀼𑀅𑀢𑁆𑀣𑁂.

𑀏𑀯𑀦𑁆𑀢𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀧𑁆𑀧𑀓𑀸𑀲𑀦𑀦𑁆𑀢𑀺 𑀦𑀺𑀤𑀲𑁆𑀲𑀦𑀢𑁆𑀣𑀁 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁 𑀦𑀺𑀤𑀲𑁆𑀲𑁂𑀢𑀩𑁆𑀩𑀲𑁆𑀲 𑀦𑀺𑀤𑀲𑁆𑀲𑀺𑀢𑀩𑁆𑀩𑀢𑁆𑀢𑀸𑀪𑀸𑀯𑀸𑀪𑀸𑀯𑀢𑁄 ¶ . 𑀢𑁂𑀦 𑀏𑀯𑀁-𑀲𑀤𑁆𑀤𑁂𑀦 𑀲𑀓𑀮𑀫𑁆𑀧𑀺 𑀲𑀼𑀢𑁆𑀢𑀁 𑀧𑀘𑁆𑀘𑀸𑀫𑀝𑁆𑀞𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀼𑀢𑀲𑀤𑁆𑀤𑀲𑁆𑀲 𑀓𑀺𑀭𑀺𑀬𑀸𑀲𑀤𑁆𑀤𑀢𑁆𑀢𑀸 𑀲𑀯𑀦𑀓𑀺𑀭𑀺𑀬𑀸𑀬 𑀘 𑀲𑀸𑀥𑀸𑀭𑀡𑀯𑀺𑀜𑁆𑀜𑀸𑀡𑀧𑁆𑀧𑀩𑀦𑁆𑀥𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸 𑀢𑀢𑁆𑀣 𑀘 𑀧𑀼𑀕𑁆𑀕𑀮𑀯𑁄𑀳𑀸𑀭𑁄𑀢𑀺 𑀯𑀼𑀢𑁆𑀢𑀁 𑁋 ‘‘𑀲𑀼𑀢𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀧𑁆𑀧𑀓𑀸𑀲𑀦’’𑀦𑁆𑀢𑀺. 𑀦 𑀳𑀺 𑀧𑀼𑀕𑁆𑀕𑀮𑀯𑁄𑀳𑀸𑀭𑀭𑀳𑀺𑀢𑁂 𑀥𑀫𑁆𑀫𑀧𑁆𑀧𑀩𑀦𑁆𑀥𑁂 𑀲𑀯𑀦𑀓𑀺𑀭𑀺𑀬𑀸 𑀮𑀩𑁆𑀪𑀢𑀻𑀢𑀺.

𑀬𑀲𑁆𑀲 𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲𑀸𑀢𑀺𑀆𑀤𑀺𑀧𑀺 𑀆𑀓𑀸𑀭𑀢𑁆𑀣𑀫𑁂𑀯 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀧𑀼𑀭𑀺𑀫𑀬𑁄𑀚𑀦𑀸𑀬 𑀅𑀜𑁆𑀜𑀣𑀸 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀆𑀓𑀸𑀭𑀧𑀜𑁆𑀜𑀢𑁆𑀢𑀻𑀢𑀺 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀏𑀯 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀆𑀓𑀸𑀭𑀼𑀧𑀸𑀤𑀸𑀦𑀯𑀲𑁂𑀦 𑀢𑀣𑀸 𑀯𑀼𑀢𑁆𑀢𑀸. 𑀲𑀼𑀢𑀦𑁆𑀢𑀺 𑀯𑀺𑀲𑀬𑀦𑀺𑀤𑁆𑀤𑁂𑀲𑁄𑀢𑀺 𑀲𑁄𑀢𑀩𑁆𑀩𑀪𑀽𑀢𑁄 𑀥𑀫𑁆𑀫𑁄 𑀲𑀯𑀦𑀓𑀺𑀭𑀺𑀬𑀸𑀓𑀢𑁆𑀢𑀼𑀧𑀼𑀕𑁆𑀕𑀮𑀲𑁆𑀲 𑀲𑀯𑀦𑀓𑀺𑀭𑀺𑀬𑀸𑀯𑀲𑁂𑀦 𑀧𑀯𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀲𑀦𑁆𑀢𑀸𑀦𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀧𑀭𑀫𑀢𑁆𑀣𑀢𑁄 𑀓𑀲𑁆𑀲𑀘𑀺 𑀓𑀢𑁆𑀢𑀼𑀅𑀪𑀸𑀯𑁂𑀧𑀺 𑀲𑀤𑁆𑀤𑀯𑁄𑀳𑀸𑀭𑁂𑀦 𑀩𑀼𑀤𑁆𑀥𑀺𑀧𑀭𑀺𑀓𑀧𑁆𑀧𑀺𑀢𑀪𑁂𑀤𑀯𑀘𑀦𑀺𑀘𑁆𑀙𑀸𑀬 𑀘𑀺𑀢𑁆𑀢𑀲𑀦𑁆𑀢𑀸𑀦𑀢𑁄 𑀅𑀜𑁆𑀜𑀁 𑀯𑀺𑀬 𑀢𑀁𑀲𑀫𑀗𑁆𑀕𑀺𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁 𑁋 ‘‘𑀘𑀺𑀢𑁆𑀢𑀲𑀦𑁆𑀢𑀸𑀦𑁂𑀦 𑀢𑀁𑀲𑀫𑀗𑁆𑀕𑀻𑀦𑁄’’𑀢𑀺. 𑀲𑀯𑀦𑀓𑀺𑀭𑀺𑀬𑀸𑀯𑀺𑀲𑀬𑁄𑀧𑀺 𑀲𑁄𑀢𑀩𑁆𑀩𑀥𑀫𑁆𑀫𑁄 𑀲𑀯𑀦𑀓𑀺𑀭𑀺𑀬𑀸𑀯𑀲𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑀲𑁆𑀲 𑀇𑀥 𑀧𑀭𑀫𑀢𑁆𑀣𑀢𑁄 𑀓𑀢𑁆𑀢𑀼𑀪𑀸𑀯𑀢𑁄, 𑀲𑀯𑀦𑀯𑀲𑁂𑀦 𑀘𑀺𑀢𑁆𑀢𑀧𑀯𑀢𑁆𑀢𑀺𑀬𑀸 𑀏𑀯 𑀯𑀸 𑀲𑀯𑀦𑀓𑀺𑀭𑀺𑀬𑀸𑀪𑀸𑀯𑀢𑁄 𑀢𑀁𑀓𑀺𑀭𑀺𑀬𑀸𑀓𑀢𑁆𑀢𑀼 𑀘 𑀯𑀺𑀲𑀬𑁄 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 𑁋 ‘‘𑀢𑀁𑀲𑀫𑀗𑁆𑀕𑀻𑀦𑁄 𑀓𑀢𑁆𑀢𑀼𑀯𑀺𑀲𑀬𑁂’’𑀢𑀺. 𑀲𑀼𑀢𑀸𑀓𑀸𑀭𑀲𑁆𑀲 𑀘 𑀣𑁂𑀭𑀲𑁆𑀲 𑀲𑀫𑁆𑀫𑀸𑀦𑀺𑀘𑁆𑀙𑀺𑀢𑀪𑀸𑀯𑀢𑁄 𑀆𑀳 𑁋 ‘‘𑀕𑀳𑀡𑀲𑀦𑁆𑀦𑀺𑀝𑁆𑀞𑀸𑀦’’𑀦𑁆𑀢𑀺. 𑀏𑀢𑁂𑀦 𑀯𑀸 𑀅𑀯𑀥𑀸𑀭𑀡𑀢𑁆𑀣𑀁 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀅𑀬𑀫𑀢𑁆𑀣𑀬𑁄𑀚𑀦𑀸 𑀓𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀼𑀩𑁆𑀩𑁂 𑀲𑀼𑀢𑀸𑀦𑀁 𑀦𑀸𑀦𑀸𑀯𑀺𑀳𑀺𑀢𑀸𑀦𑀁 𑀲𑀼𑀢𑁆𑀢𑀲𑀗𑁆𑀔𑀸𑀢𑀸𑀦𑀁 𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀦𑀁 𑀉𑀧𑀥𑀸𑀭𑀺𑀢𑀭𑀽𑀧𑀲𑁆𑀲 𑀆𑀓𑀸𑀭𑀲𑁆𑀲 𑀦𑀺𑀤𑀲𑁆𑀲𑀦𑀲𑁆𑀲, 𑀅𑀯𑀥𑀸𑀭𑀡𑀲𑁆𑀲 𑀯𑀸 𑀧𑀓𑀸𑀲𑀦𑀲𑀪𑀸𑀯𑁄 ¶ 𑀏𑀯𑀁-𑀲𑀤𑁆𑀤𑁄𑀢𑀺 𑀢𑀤𑀸𑀓𑀸𑀭𑀸𑀤𑀺𑀉𑀧𑀥𑀸𑀭𑀡𑀲𑁆𑀲 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀦𑀪𑀽𑀢𑀥𑀫𑁆𑀫𑀧𑁆𑀧𑀩𑀦𑁆𑀥𑀩𑁆𑀬𑀸𑀧𑀸𑀭𑀢𑀸𑀬 𑀯𑀼𑀢𑁆𑀢𑀁 𑁋 ‘‘𑀏𑀯𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄’’𑀢𑀺. 𑀲𑀯𑀦𑀓𑀺𑀭𑀺𑀬𑀸 𑀧𑀦 𑀧𑀼𑀕𑁆𑀕𑀮𑀯𑀸𑀤𑀺𑀦𑁄𑀧𑀺 𑀯𑀺𑀜𑁆𑀜𑀸𑀡𑀦𑀺𑀭𑀧𑁂𑀓𑁆𑀔𑀸 𑀦𑀢𑁆𑀣𑀻𑀢𑀺 𑀯𑀺𑀲𑁂𑀲𑀢𑁄 𑀯𑀺𑀜𑁆𑀜𑀸𑀡𑀩𑁆𑀬𑀸𑀧𑀸𑀭𑁄𑀢𑀺 𑀆𑀳 𑁋 ‘‘𑀲𑀼𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄’’𑀢𑀺. 𑀫𑁂𑀢𑀺 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀬𑀸 𑀏𑀓𑀦𑁆𑀢𑁂𑀦𑁂𑀯 𑀲𑀢𑁆𑀢𑀯𑀺𑀲𑀬𑀢𑁆𑀢𑀸 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀲𑁆𑀲 𑀘 𑀢𑀢𑁆𑀣𑁂𑀯 𑀲𑀫𑁄𑀤𑀳𑀺𑀢𑀩𑁆𑀩𑀢𑁄 ‘‘𑀫𑁂𑀢𑀺 𑀉𑀪𑀬𑀓𑀺𑀘𑁆𑀘𑀬𑀼𑀢𑁆𑀢𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑁄’’𑀢𑀺 𑀯𑀼𑀢𑁆𑀢𑀁. 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀲𑀪𑀸𑀯𑀸 𑀬𑀣𑀸𑀓𑁆𑀓𑀫𑀁 𑀏𑀯𑀁𑀲𑀤𑁆𑀤𑀲𑀼𑀢𑀲𑀤𑁆𑀤𑀸𑀦𑀁 𑀅𑀢𑁆𑀣𑀸𑀢𑀺 𑀢𑁂 𑀢𑀣𑀸𑀭𑀽𑀧𑀧𑀜𑁆𑀜𑀢𑁆𑀢𑀺𑀉𑀧𑀸𑀤𑀸𑀦𑀩𑁆𑀬𑀸𑀧𑀸𑀭𑀪𑀸𑀯𑁂𑀦 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀏𑀯𑀦𑁆𑀢𑀺 𑀧𑀼𑀕𑁆𑀕𑀮𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄, 𑀲𑀼𑀢𑀦𑁆𑀢𑀺 𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀦𑀺𑀤𑁆𑀤𑁂𑀲𑁄’’𑀢𑀺. 𑀏𑀢𑁆𑀣 𑀘 𑀓𑀭𑀡𑀓𑀺𑀭𑀺𑀬𑀸𑀓𑀢𑁆𑀢𑀼𑀓𑀫𑁆𑀫𑀯𑀺𑀲𑁂𑀲𑀧𑁆𑀧𑀓𑀸𑀲𑀦𑀯𑀲𑁂𑀦 𑀧𑀼𑀕𑁆𑀕𑀮𑀩𑁆𑀬𑀸𑀧𑀸𑀭𑀯𑀺𑀲𑀬𑀧𑀼𑀕𑁆𑀕𑀮𑀩𑁆𑀬𑀸𑀧𑀸𑀭𑀦𑀺𑀤𑀲𑁆𑀲𑀦𑀯𑀲𑁂𑀦 𑀕𑀳𑀡𑀸𑀓𑀸𑀭𑀕𑁆𑀕𑀸𑀳𑀓𑀢𑀩𑁆𑀩𑀺𑀲𑀬𑀯𑀺𑀲𑁂𑀲𑀦𑀺𑀤𑁆𑀤𑁂𑀲𑀯𑀲𑁂𑀦 𑀓𑀢𑁆𑀢𑀼𑀓𑀭𑀡𑀩𑁆𑀬𑀸𑀧𑀸𑀭𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑀯𑀲𑁂𑀦 𑀘 𑀤𑀼𑀢𑀺𑀬𑀸𑀤𑀬𑁄 𑀘𑀢𑀲𑁆𑀲𑁄 𑀅𑀢𑁆𑀣𑀬𑁄𑀚𑀦𑀸 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀩𑁆𑀩𑀲𑁆𑀲𑀧𑀺 𑀲𑀤𑁆𑀤𑀸𑀥𑀺𑀕𑀫𑀦𑀻𑀬𑀲𑁆𑀲 𑀅𑀢𑁆𑀣𑀲𑁆𑀲 𑀧𑀜𑁆𑀜𑀢𑁆𑀢𑀺𑀫𑀼𑀔𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁆𑀢𑀸 𑀲𑀩𑁆𑀩𑀧𑀜𑁆𑀜𑀢𑁆𑀢𑀻𑀦𑀜𑁆𑀘 ¶ 𑀯𑀺𑀚𑁆𑀚𑀫𑀸𑀦𑀸𑀤𑀺𑀯𑀲𑁂𑀦 𑀙𑀲𑀼 𑀧𑀜𑁆𑀜𑀢𑁆𑀢𑀺𑀪𑁂𑀤𑁂𑀲𑀼 𑀅𑀦𑁆𑀢𑁄𑀕𑀥𑀢𑁆𑀢𑀸 𑀢𑁂𑀲𑀼 ‘‘𑀏𑀯’’𑀦𑁆𑀢𑀺𑀆𑀤𑀻𑀦𑀁 𑀧𑀜𑁆𑀜𑀢𑁆𑀢𑀻𑀦𑀁 𑀲𑀭𑀽𑀧𑀁 𑀦𑀺𑀤𑁆𑀥𑀸𑀭𑁂𑀦𑁆𑀢𑁄 𑀆𑀳 𑁋 ‘‘𑀏𑀯𑀦𑁆𑀢𑀺 𑀘 𑀫𑁂𑀢𑀺 𑀘𑀸’’𑀢𑀺𑀆𑀤𑀺. 𑀢𑀢𑁆𑀣 𑀏𑀯𑀦𑁆𑀢𑀺 𑀘 𑀫𑁂𑀢𑀺 𑀘 𑀯𑀼𑀘𑁆𑀘𑀫𑀸𑀦𑀲𑁆𑀲𑀢𑁆𑀣𑀲𑁆𑀲 𑀆𑀓𑀸𑀭𑀸𑀤𑀺𑀦𑁄 𑀥𑀫𑁆𑀫𑀸𑀦𑀁 𑀅𑀲𑀮𑁆𑀮𑀓𑁆𑀔𑀡𑀪𑀸𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑁄𑀢𑀺 𑀆𑀳 𑁋 ‘‘𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺. 𑀢𑀢𑁆𑀣 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀯𑀲𑁂𑀦𑀸𑀢𑀺 𑀪𑀽𑀢𑀢𑁆𑀣𑀉𑀢𑁆𑀢𑀫𑀢𑁆𑀣𑀯𑀲𑁂𑀦. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑁄 𑀫𑀸𑀬𑀸𑀫𑀭𑀻𑀘𑀺𑀆𑀤𑀬𑁄 𑀯𑀺𑀬 𑀅𑀪𑀽𑀢𑀢𑁆𑀣𑁄, 𑀅𑀦𑀼𑀲𑁆𑀲𑀯𑀸𑀤𑀻𑀳𑀺 𑀕𑀳𑁂𑀢𑀩𑁆𑀩𑁄 𑀯𑀺𑀬 𑀅𑀦𑀼𑀢𑁆𑀢𑀫𑀢𑁆𑀣𑁄 𑀘 𑀦 𑀳𑁄𑀢𑀺, 𑀲𑁄 𑀭𑀽𑀧𑀲𑀤𑁆𑀤𑀸𑀤𑀺𑀲𑀪𑀸𑀯𑁄, 𑀭𑀼𑀧𑁆𑀧𑀦𑀸𑀦𑀼𑀪𑀯𑀦𑀸𑀤𑀺𑀲𑀪𑀸𑀯𑁄 𑀯𑀸 𑀅𑀢𑁆𑀣𑁄 𑀲𑀘𑁆𑀘𑀺𑀓𑀝𑁆𑀞𑁄 𑀧𑀭𑀫𑀢𑁆𑀣𑁄 𑀘𑀸𑀢𑀺 𑀯𑀼𑀘𑁆𑀘𑀢𑀺, 𑀦 𑀢𑀣𑀸 ‘‘𑀏𑀯𑀁 𑀫𑁂’’𑀢𑀺𑀧𑀤𑀸𑀦𑀁 𑀅𑀢𑁆𑀣𑁄𑀢𑀺. 𑀏𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀓𑀺𑀜𑁆𑀳𑁂𑀢𑁆𑀣 𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀼𑀢𑀦𑁆𑀢𑀺 𑀧𑀦 𑀲𑀤𑁆𑀤𑀸𑀬𑀢𑀦𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺. 𑀢𑁂𑀦𑁂𑀯 𑀳𑀺 ‘‘𑀬𑀜𑁆𑀳𑀺 𑀢𑀁 𑀏𑀢𑁆𑀣 𑀲𑁄𑀢𑁂𑀦 𑀉𑀧𑀮𑀤𑁆𑀥’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀉𑀧𑀮𑀤𑁆𑀥’’𑀦𑁆𑀢𑀺 𑀧𑀦 𑀯𑀼𑀢𑁆𑀢𑁂 𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀤𑀺 𑀲𑀩𑁆𑀩𑀁 𑀮𑀩𑁆𑀪𑀢𑀺. 𑀢𑀁 𑀢𑀁 𑀉𑀧𑀸𑀤𑀸𑀬 𑀯𑀢𑁆𑀢𑀩𑁆𑀩𑀢𑁄𑀢𑀺 𑀲𑁄𑀢𑀧𑀣𑀫𑀸𑀕𑀢𑁂 𑀥𑀫𑁆𑀫𑁂 𑀉𑀧𑀸𑀤𑀸𑀬 𑀢𑁂𑀲𑀁 𑀉𑀧𑀥𑀸𑀭𑀺𑀢𑀸𑀓𑀸𑀭𑀸𑀤𑀺𑀦𑁄 𑀧𑀘𑁆𑀘𑀸𑀫𑀲𑀦𑀯𑀲𑁂𑀦 𑀏𑀯𑀦𑁆𑀢𑀺, 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁂 𑀔𑀦𑁆𑀥𑁂 𑀉𑀧𑀸𑀤𑀸𑀬 𑀫𑁂𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀤𑀺𑀝𑁆𑀞𑀸𑀤𑀺𑀲𑀪𑀸𑀯𑀭𑀳𑀺𑀢𑁂 𑀲𑀤𑁆𑀤𑀸𑀬𑀢𑀦𑁂 𑀧𑀯𑀢𑁆𑀢𑀫𑀸𑀦𑁄𑀧𑀺 ¶ 𑀲𑀼𑀢𑀯𑁄𑀳𑀸𑀭𑁄 ‘‘𑀤𑀼𑀢𑀺𑀬𑀁 𑀢𑀢𑀺𑀬’’𑀦𑁆𑀢𑀺𑀆𑀤𑀺𑀓𑁄 𑀯𑀺𑀬 𑀧𑀞𑀫𑀸𑀤𑀻𑀦𑀺 𑀤𑀺𑀝𑁆𑀞𑀫𑀼𑀢𑀯𑀺𑀜𑁆𑀜𑀸𑀢𑁂 𑀅𑀧𑁂𑀓𑁆𑀔𑀺𑀢𑁆𑀯𑀸 𑀧𑀯𑀢𑁆𑀢𑁄𑀢𑀺 𑀆𑀳 𑁋 ‘‘𑀤𑀺𑀝𑁆𑀞𑀸𑀤𑀻𑀦𑀺 𑀉𑀧𑀦𑀺𑀥𑀸𑀬 𑀯𑀢𑁆𑀢𑀩𑁆𑀩𑀢𑁄’’𑀢𑀺. 𑀅𑀲𑁆𑀲𑀼𑀢𑀁 𑀦 𑀳𑁄𑀢𑀻𑀢𑀺 𑀳𑀺 𑀲𑀼𑀢𑀦𑁆𑀢𑀺 𑀧𑀓𑀸𑀲𑀺𑀢𑁄 𑀅𑀬𑀫𑀢𑁆𑀣𑁄𑀢𑀺.

𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀸 𑀲𑀼𑀢𑁆𑀢𑀲𑁆𑀲 𑀧𑀓𑀸𑀭𑀯𑀺𑀲𑁂𑀲𑀸 𑀏𑀯𑀦𑁆𑀢𑀺 𑀣𑁂𑀭𑁂𑀦 𑀧𑀘𑁆𑀘𑀸𑀫𑀝𑁆𑀞𑀸𑀢𑀺 𑀆𑀳 𑁋 ‘‘𑀅𑀲𑀫𑁆𑀫𑁄𑀳𑀁 𑀤𑀻𑀧𑁂𑀢𑀻’’𑀢𑀺. 𑀦𑀸𑀦𑀧𑁆𑀧𑀓𑀸𑀭𑀧𑁆𑀧𑀝𑀺𑀯𑁂𑀥𑀲𑀫𑀢𑁆𑀣𑁄 𑀳𑁄𑀢𑀻𑀢𑀺 𑀏𑀢𑁂𑀦 𑀯𑀓𑁆𑀔𑀫𑀸𑀦𑀲𑁆𑀲 𑀲𑀼𑀢𑁆𑀢𑀲𑁆𑀲 𑀦𑀸𑀦𑀧𑁆𑀧𑀓𑀸𑀭𑀢𑀁 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀢𑀜𑁆𑀘 𑀤𑀲𑁆𑀲𑁂𑀢𑀺. 𑀲𑀼𑀢𑀲𑁆𑀲 𑀅𑀲𑀫𑁆𑀫𑁄𑀲𑀁 𑀤𑀻𑀧𑁂𑀢𑀻𑀢𑀺 𑀲𑀼𑀢𑀸𑀓𑀸𑀭𑀲𑁆𑀲 𑀬𑀸𑀣𑀸𑀯𑀢𑁄 𑀤𑀲𑁆𑀲𑀺𑀬𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀅𑀲𑀫𑁆𑀫𑁄𑀳𑁂𑀦𑀸𑀢𑀺 𑀲𑀫𑁆𑀫𑁄𑀳𑀸𑀪𑀸𑀯𑁂𑀦, 𑀧𑀜𑁆𑀜𑀸𑀬 𑀏𑀯 𑀯𑀸 𑀲𑀯𑀦𑀓𑀸𑀮𑀲𑀫𑁆𑀪𑀽𑀢𑀸𑀬 𑀢𑀤𑀼𑀢𑁆𑀢𑀭𑀺𑀓𑀸𑀮𑀧𑀜𑁆𑀜𑀸𑀲𑀺𑀤𑁆𑀥𑀺. 𑀏𑀯𑀁 𑀅𑀲𑀫𑁆𑀫𑁄𑀲𑁂𑀦𑀸𑀢𑀺 𑀏𑀢𑁆𑀣𑀸𑀧𑀺 𑀯𑀢𑁆𑀢𑀩𑁆𑀩𑀁. 𑀩𑁆𑀬𑀜𑁆𑀚𑀦𑀸𑀦𑀁 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄 𑀆𑀓𑀸𑀭𑁄 𑀦𑀸𑀢𑀺𑀕𑀫𑁆𑀪𑀻𑀭𑁄, 𑀬𑀣𑀸𑀲𑀼𑀢𑀥𑀸𑀭𑀡𑀫𑁂𑀯 𑀢𑀢𑁆𑀣 𑀓𑀭𑀡𑀻𑀬𑀦𑁆𑀢𑀺 𑀲𑀢𑀺𑀬𑀸 𑀩𑁆𑀬𑀸𑀧𑀸𑀭𑁄 𑀅𑀥𑀺𑀓𑁄, 𑀧𑀜𑁆𑀜𑀸 𑀢𑀢𑁆𑀣 𑀕𑀼𑀡𑀻𑀪𑀽𑀢𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑀸𑀬𑀸’’𑀢𑀺𑀆𑀤𑀺 ‘‘𑀧𑀜𑁆𑀜𑀸𑀬 𑀧𑀼𑀩𑁆𑀩𑀗𑁆𑀕𑀫𑀸’’𑀢𑀺 𑀓𑀢𑁆𑀯𑀸. 𑀧𑀼𑀩𑁆𑀩𑀗𑁆𑀕𑀫𑀢𑀸 𑀘𑁂𑀢𑁆𑀣 𑀧𑀥𑀸𑀦𑀪𑀸𑀯𑁄 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁧, 𑁨) 𑀯𑀺𑀬, 𑀧𑀼𑀩𑁆𑀩𑀗𑁆𑀕𑀫𑀢𑀸𑀬 𑀯𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀆𑀯𑀚𑁆𑀚𑀦𑀸𑀤𑀻𑀦𑀁 𑀯𑀺𑀬 𑀅𑀧𑁆𑀧𑀥𑀸𑀦𑀢𑁆𑀢𑁂 𑀧𑀜𑁆𑀜𑀸 𑀧𑀼𑀩𑁆𑀩𑀗𑁆𑀕𑀫𑀸 𑀏𑀢𑀺𑀲𑁆𑀲𑀸𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺, 𑀏𑀯𑀁 𑀲𑀢𑀺𑀧𑀼𑀩𑁆𑀩𑀗𑁆𑀕𑀫𑀸𑀬𑀸𑀢𑀺 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀬𑀣𑀸𑀲𑀫𑁆𑀪𑀯𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀲𑁆𑀲𑀸𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑀭𑀺𑀧𑀼𑀡𑁆𑀡𑀲𑁆𑀲, 𑀲𑀗𑁆𑀓𑀸𑀲𑀦𑀧𑁆𑀧𑀓𑀸𑀲𑀦𑀯𑀺𑀯𑀭𑀡𑀯𑀺𑀪𑀚𑀦𑀉𑀢𑁆𑀢𑀸𑀦𑀻𑀓𑀭𑀡𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀙𑀳𑀺 𑀅𑀢𑁆𑀣𑀧𑀤𑁂𑀳𑀺 𑀅𑀓𑁆𑀔𑀭𑀧𑀤𑀩𑁆𑀬𑀜𑁆𑀚𑀦𑀸𑀓𑀸𑀭𑀦𑀺𑀭𑀼𑀢𑁆𑀢𑀺𑀦𑀺𑀤𑁆𑀤𑁂𑀲𑀯𑀲𑁂𑀦 𑀙𑀳𑀺 𑀩𑁆𑀬𑀜𑁆𑀚𑀦𑀧𑀤𑁂𑀳𑀺 𑀘 𑀲𑀫𑀦𑁆𑀦𑀸𑀕𑀢𑀲𑁆𑀲𑀸𑀢𑀺 𑀯𑀸 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 ¶ 𑀤𑀻𑀧𑁂𑀢𑀺 𑀏𑀯𑀁-𑀲𑀤𑁆𑀤𑁂𑀦 𑀯𑀼𑀘𑁆𑀘𑀫𑀸𑀦𑀸𑀦𑀁 𑀆𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑀢𑁆𑀣𑀸𑀦𑀁 𑀅𑀯𑀺𑀧𑀭𑀻𑀢𑀲𑀤𑁆𑀥𑀫𑁆𑀫𑀯𑀺𑀲𑀬𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀯𑀺𑀓𑁆𑀔𑁂𑀧𑀁 𑀤𑀻𑀧𑁂𑀢𑀻𑀢𑀺 ‘‘𑀘𑀺𑀢𑁆𑀢𑀧𑀭𑀺𑀬𑀸𑀤𑀸𑀦𑀁 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺𑀆𑀤𑀺𑀧𑀼𑀘𑁆𑀙𑀸𑀯𑀲𑁂 𑀧𑀓𑀭𑀡𑀧𑁆𑀧𑀢𑁆𑀢𑀲𑁆𑀲 𑀯𑀓𑁆𑀔𑀫𑀸𑀦𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀯𑀦𑀁 𑀲𑀫𑀸𑀥𑀸𑀦𑀫𑀦𑁆𑀢𑀭𑁂𑀦 𑀦 𑀲𑀫𑁆𑀪𑀯𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀲𑁆𑀲𑀸𑀢𑀺𑀆𑀤𑀺 𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀲𑀫𑀢𑁆𑀣𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑀩𑁆𑀬𑀜𑁆𑀚𑀦𑀤𑁂𑀲𑀓𑀧𑁆𑀧𑀬𑁄𑀚𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸. 𑀅𑀯𑀺𑀧𑀭𑀻𑀢𑀲𑀤𑁆𑀥𑀫𑁆𑀫𑀯𑀺𑀲𑀬𑁂𑀳𑀺 𑀯𑀺𑀬 𑀆𑀓𑀸𑀭𑀦𑀺𑀤𑀲𑁆𑀲𑀦𑀸𑀯𑀥𑀸𑀭𑀡𑀢𑁆𑀣𑁂𑀳𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑁂𑀦 𑀯𑀺𑀬 𑀘 𑀅𑀯𑀺𑀓𑁆𑀔𑁂𑀧𑀲𑁆𑀲 𑀬𑀣𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀦 𑀨𑀮𑀪𑀽𑀢𑁂𑀦 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸𑀦𑀁 𑀲𑀺𑀤𑁆𑀥𑀺 𑀯𑀼𑀢𑁆𑀢𑀸 ¶ 𑀢𑀤𑀯𑀺𑀦𑀸𑀪𑀸𑀯𑀢𑁄. 𑀏𑀯𑀁 𑀅𑀯𑀺𑀓𑁆𑀔𑁂𑀧𑁂𑀦 𑀨𑀮𑀪𑀽𑀢𑁂𑀦 𑀓𑀸𑀭𑀡𑀪𑀽𑀢𑀸𑀦𑀁 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸𑀦𑀁 𑀲𑀺𑀤𑁆𑀥𑀺 𑀤𑀲𑁆𑀲𑁂𑀢𑀩𑁆𑀩𑀸 𑀲𑀺𑀬𑀸 𑀅𑀲𑁆𑀲𑀼𑀢𑀯𑀢𑁄 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀭𑀳𑀺𑀢𑀲𑁆𑀲 𑀘 𑀢𑀤𑀪𑀸𑀯𑀢𑁄. 𑀦 𑀳𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄𑀢𑀺𑀆𑀤𑀺𑀦𑀸 𑀲𑀫𑀢𑁆𑀣𑀦𑀯𑀘𑀦𑁂𑀦 𑀧𑀦 𑀅𑀯𑀺𑀓𑁆𑀔𑁂𑀧𑁂𑀦 𑀓𑀸𑀭𑀡𑀪𑀽𑀢𑁂𑀦 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁂𑀦 𑀘 𑀨𑀮𑀪𑀽𑀢𑀲𑁆𑀲 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀲𑀺𑀤𑁆𑀥𑀺 𑀤𑀲𑁆𑀲𑀺𑀢𑀸. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀬𑀼𑀢𑁆𑀢𑁄 𑀲𑀺𑀬𑀸, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀸 𑀦 𑀏𑀓𑀦𑁆𑀢𑁂𑀦 𑀅𑀯𑀺𑀓𑁆𑀔𑁂𑀧𑀲𑁆𑀲 𑀓𑀸𑀭𑀡𑀁 𑀩𑀸𑀳𑀺𑀭𑀗𑁆𑀕𑀢𑁆𑀢𑀸, 𑀅𑀯𑀺𑀓𑁆𑀔𑁂𑀧𑁄 𑀧𑀦 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑁄 𑀯𑀺𑀬 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑁆𑀲 𑀏𑀓𑀦𑁆𑀢𑀓𑀸𑀭𑀡𑀦𑁆𑀢𑀺. 𑀏𑀯𑀫𑁆𑀧𑀺 𑀅𑀯𑀺𑀓𑁆𑀔𑁂𑀧𑁂𑀦 𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀲𑀺𑀤𑁆𑀥𑀺𑀚𑁄𑀢𑀦𑀸 𑀦 𑀲𑀫𑀢𑁆𑀣𑀺𑀢𑀸𑀯. 𑀦𑁄 𑀦 𑀲𑀫𑀢𑁆𑀣𑀺𑀢𑀸 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸𑀦𑀁 𑀲𑀧𑁆𑀧𑀼𑀭𑀺𑀲𑀧𑀬𑀺𑀭𑀼𑀧𑀸𑀲𑀦𑀸𑀪𑀸𑀯𑀲𑁆𑀲 𑀅𑀢𑁆𑀣𑀲𑀺𑀤𑁆𑀥𑀢𑁆𑀢𑀸. 𑀏𑀢𑁆𑀣 𑀘 𑀧𑀼𑀭𑀺𑀫𑀁 𑀨𑀮𑁂𑀦 𑀓𑀸𑀭𑀡𑀲𑁆𑀲 𑀲𑀺𑀤𑁆𑀥𑀺𑀤𑀲𑁆𑀲𑀦𑀁 𑀦𑀤𑀻𑀧𑀽𑀭𑁂𑀦 𑀯𑀺𑀬 𑀉𑀧𑀭𑀺 𑀯𑀼𑀝𑁆𑀞𑀺𑀲𑀩𑁆𑀪𑀸𑀯𑀲𑁆𑀲, 𑀤𑀼𑀢𑀺𑀬𑀁 𑀓𑀸𑀭𑀡𑁂𑀦 𑀨𑀮𑀲𑁆𑀲 𑀲𑀺𑀤𑁆𑀥𑀺𑀤𑀲𑁆𑀲𑀦𑀁 𑀤𑀝𑁆𑀞𑀩𑁆𑀩𑀁 𑀏𑀓𑀦𑁆𑀢𑀯𑀲𑁆𑀲𑀺𑀦𑀸 𑀯𑀺𑀬 𑀫𑁂𑀖𑀯𑀼𑀝𑁆𑀞𑀸𑀦𑁂𑀦 𑀯𑀼𑀝𑁆𑀞𑀺𑀧𑁆𑀧𑀯𑀢𑁆𑀢𑀺𑀬𑀸.

𑀪𑀕𑀯𑀢𑁄 𑀯𑀘𑀦𑀲𑁆𑀲 𑀅𑀢𑁆𑀣𑀩𑁆𑀬𑀜𑁆𑀚𑀦𑀧𑁆𑀧𑀪𑁂𑀤𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀲𑀓𑀮𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀑𑀕𑀸𑀳𑀦𑀸𑀓𑀸𑀭𑁄 𑀦𑀺𑀭𑀯𑀲𑁂𑀲𑀧𑀭𑀳𑀺𑀢𑀧𑀸𑀭𑀺𑀧𑀽𑀭𑀺𑀢𑀸𑀓𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑁋 ‘‘𑀏𑀯𑀁 𑀪𑀤𑁆𑀤𑀓𑁄 𑀆𑀓𑀸𑀭𑁄’’𑀢𑀺. 𑀬𑀲𑁆𑀫𑀸 𑀦 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑀫𑁆𑀧𑀢𑁆𑀢𑀺𑀦𑁆𑀢𑀺 𑀅𑀢𑁆𑀢𑀲𑀫𑁆𑀫𑀸𑀧𑀡𑀺𑀥𑀺𑀧𑀼𑀩𑁆𑀩𑁂𑀓𑀢𑀧𑀼𑀜𑁆𑀜𑀢𑀸𑀲𑀗𑁆𑀔𑀸𑀢𑀕𑀼𑀡𑀤𑁆𑀯𑀬𑀁. 𑀅𑀧𑀭𑀸𑀧𑀭𑀁 𑀯𑀼𑀢𑁆𑀢𑀺𑀬𑀸 𑀘𑁂𑀢𑁆𑀣 𑀘𑀓𑁆𑀓𑀪𑀸𑀯𑁄, 𑀘𑀭𑀦𑁆𑀢𑀺 𑀏𑀢𑁂𑀳𑀺 𑀲𑀢𑁆𑀢𑀸 𑀲𑀫𑁆𑀧𑀢𑁆𑀢𑀺𑀪𑀯𑁂𑀲𑀽𑀢𑀺 𑀯𑀸. 𑀬𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀘𑀓𑁆𑀓𑀸𑀦𑀺, 𑀬𑁂𑀳𑀺 𑀲𑀫𑀦𑁆𑀦𑀸𑀕𑀢𑀸𑀦𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀘𑀢𑀼𑀘𑀓𑁆𑀓𑀁 𑀯𑀢𑁆𑀢𑀢𑀻’’𑀢𑀺𑀆𑀤𑀺 (𑀅. 𑀦𑀺. 𑁪.𑁩𑁧). 𑀧𑀼𑀭𑀺𑀫𑀧𑀘𑁆𑀙𑀺𑀫𑀪𑀸𑀯𑁄 𑀘𑁂𑀢𑁆𑀣 𑀤𑁂𑀲𑀦𑀸𑀓𑁆𑀓𑀫𑀯𑀲𑁂𑀦 𑀤𑀝𑁆𑀞𑀩𑁆𑀩𑁄. 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑀺𑀤𑁆𑀥𑀺𑀬𑀸𑀢𑀺 𑀧𑀘𑁆𑀙𑀺𑀫𑀘𑀓𑁆𑀓𑀤𑁆𑀯𑀬𑀲𑁆𑀲 𑀅𑀢𑁆𑀣𑀺𑀢𑀸𑀬. 𑀲𑀫𑁆𑀫𑀸𑀧𑀡𑀺𑀳𑀺𑀢𑀢𑁆𑀢𑁄 𑀧𑀼𑀩𑁆𑀩𑁂 𑀘 𑀓𑀢𑀧𑀼𑀜𑁆𑀜𑁄 𑀲𑀼𑀤𑁆𑀥𑀸𑀲𑀬𑁄 𑀳𑁄𑀢𑀺 𑀢𑀤𑀲𑀺𑀤𑁆𑀥𑀺𑀳𑁂𑀢𑀽𑀦𑀁 𑀓𑀺𑀮𑁂𑀲𑀸𑀦𑀁 𑀤𑀽𑀭𑀻𑀪𑀸𑀯𑀢𑁄𑀢𑀺 𑀆𑀳 𑁋 ‘‘𑀆𑀲𑀬𑀲𑀼𑀤𑁆𑀥𑀺 𑀲𑀺𑀤𑁆𑀥𑀸 𑀳𑁄𑀢𑀻’’𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋 ‘‘𑀲𑀫𑁆𑀫𑀸𑀧𑀡𑀺𑀳𑀺𑀢𑀁 𑀘𑀺𑀢𑁆𑀢𑀁, 𑀲𑁂𑀬𑁆𑀬𑀲𑁄 𑀦𑀁 𑀢𑀢𑁄 𑀓𑀭𑁂’’𑀢𑀺 (𑀥. 𑀧. 𑁪𑁩), ‘‘𑀓𑀢𑀧𑀼𑀜𑁆𑀜𑁄𑀲𑀺 𑀢𑁆𑀯𑀁, 𑀆𑀦𑀦𑁆𑀤, 𑀧𑀥𑀸𑀦𑀫𑀦𑀼𑀬𑀼𑀜𑁆𑀚, 𑀔𑀺𑀧𑁆𑀧𑀁 𑀳𑁄𑀳𑀺𑀲𑀺 𑀅𑀦𑀸𑀲𑀯𑁄’’𑀢𑀺 (𑀤𑀻. 𑀦𑀺. 𑁨.𑁨𑁦𑁭) 𑀘. 𑀢𑁂𑀦𑁂𑀯𑀸𑀳 𑁋 ‘‘𑀆𑀲𑀬𑀲𑀼𑀤𑁆𑀥𑀺𑀬𑀸 𑀅𑀥𑀺𑀕𑀫𑀩𑁆𑀬𑀢𑁆𑀢𑀺𑀲𑀺𑀤𑁆𑀥𑀻’’𑀢𑀺. 𑀧𑀬𑁄𑀕𑀲𑀼𑀤𑁆𑀥𑀺𑀬𑀸𑀢𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀼𑀩𑁆𑀩𑀗𑁆𑀕𑀫𑀲𑁆𑀲 𑀥𑀫𑁆𑀫𑀲𑁆𑀲𑀯𑀦𑀧𑁆𑀧𑀬𑁄𑀕𑀲𑁆𑀲 𑀯𑀺𑀲𑀤𑀪𑀸𑀯𑁂𑀦. 𑀢𑀣𑀸 𑀘𑀸𑀳 𑁋 ‘‘𑀆𑀕𑀫𑀩𑁆𑀬𑀢𑁆𑀢𑀺𑀲𑀺𑀤𑁆𑀥𑀻’’𑀢𑀺 ¶ , 𑀲𑀩𑁆𑀩𑀲𑁆𑀲 𑀯𑀸 𑀓𑀸𑀬𑀯𑀘𑀻𑀧𑀬𑁄𑀕𑀲𑁆𑀲 𑀦𑀺𑀤𑁆𑀤𑁄𑀲𑀪𑀸𑀯𑁂𑀦. 𑀧𑀭𑀺𑀲𑀼𑀤𑁆𑀥𑀓𑀸𑀬𑀯𑀘𑀻𑀧𑀬𑁄𑀕𑁄 𑀳𑀺 𑀯𑀺𑀧𑁆𑀧𑀝𑀺𑀲𑀸𑀭𑀸𑀪𑀸𑀯𑀢𑁄 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀧𑀭𑀺𑀬𑀢𑁆𑀢𑀺𑀬𑀁 𑀯𑀺𑀲𑀸𑀭𑀤𑁄 𑀳𑁄𑀢𑀻𑀢𑀺.

𑀦𑀸𑀦𑀧𑁆𑀧𑀓𑀸𑀭𑀧𑀝𑀺𑀯𑁂𑀥𑀤𑀻𑀧𑀓𑁂𑀦𑀸𑀢𑀺𑀆𑀤𑀺𑀦𑀸 ¶ 𑀅𑀢𑁆𑀣𑀩𑁆𑀬𑀜𑁆𑀚𑀦𑁂𑀲𑀼 𑀣𑁂𑀭𑀲𑁆𑀲 𑀏𑀯𑀁-𑀲𑀤𑁆𑀤𑀲𑀼𑀢-𑀲𑀤𑁆𑀤𑀸𑀦𑀁 𑀅𑀲𑀫𑁆𑀫𑁄𑀳𑀤𑀻𑀧𑀦𑀢𑁄 𑀘𑀢𑀼𑀧𑁆𑀧𑀝𑀺𑀲𑀫𑁆𑀪𑀺𑀤𑀸𑀯𑀲𑁂𑀦 𑀅𑀢𑁆𑀣𑀬𑁄𑀚𑀦𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀲𑁄𑀢𑀧𑁆𑀧𑀪𑁂𑀤𑀧𑀝𑀺𑀯𑁂𑀥𑀤𑀻𑀧𑀓𑁂𑀦𑀸𑀢𑀺 𑀏𑀢𑁂𑀦 𑀅𑀬𑀁 𑀲𑀼𑀢-𑀲𑀤𑁆𑀤𑁄 𑀏𑀯𑀁-𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑀢𑁄, 𑀯𑀓𑁆𑀔𑀫𑀸𑀦𑀸𑀧𑁂𑀓𑁆𑀔𑀸𑀬 𑀯𑀸 𑀲𑀸𑀫𑀜𑁆𑀜𑁂𑀦𑁂𑀯 𑀲𑁄𑀢𑀩𑁆𑀩𑀥𑀫𑁆𑀫𑀯𑀺𑀲𑁂𑀲𑀁 𑀆𑀫𑀲𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀫𑀦𑁄𑀤𑀺𑀝𑁆𑀞𑀺𑀓𑀭𑀡𑀸𑀦𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸𑀦𑀁 𑀅𑀦𑀼𑀧𑁂𑀓𑁆𑀔𑀦𑀲𑀼𑀧𑁆𑀧𑀝𑀺𑀯𑁂𑀥𑀸 𑀯𑀺𑀲𑁂𑀲𑀢𑁄 𑀫𑀦𑀲𑀺𑀓𑀸𑀭𑀧𑁆𑀧𑀝𑀺𑀩𑀤𑁆𑀥𑀸𑀢𑀺 𑀢𑁂 𑀯𑀼𑀢𑁆𑀢𑀦𑀬𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀤𑀻𑀧𑀓𑁂𑀦 𑀏𑀯𑀁-𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸, 𑀲𑀯𑀦𑀥𑀸𑀭𑀡𑀯𑀘𑀻𑀧𑀭𑀺𑀘𑀬𑀸 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸 𑀯𑀺𑀲𑁂𑀲𑁂𑀦 𑀲𑁄𑀢𑀸𑀯𑀥𑀸𑀦𑀧𑁆𑀧𑀝𑀺𑀩𑀤𑁆𑀥𑀸𑀢𑀺 𑀢𑁂 𑀅𑀯𑀺𑀓𑁆𑀔𑁂𑀧𑀤𑀻𑀧𑀓𑁂𑀦 𑀲𑀼𑀢-𑀲𑀤𑁆𑀤𑁂𑀦 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀬𑀸 𑀥𑀫𑁆𑀫𑀲𑁆𑀲𑀯𑀦𑁂 𑀉𑀲𑁆𑀲𑀸𑀳𑀁 𑀚𑀦𑁂𑀢𑀺. 𑀢𑀢𑁆𑀣 𑀥𑀫𑁆𑀫𑀸𑀢𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀸. 𑀫𑀦𑀲𑀸 𑀅𑀦𑀼𑀧𑁂𑀓𑁆𑀔𑀺𑀢𑀸𑀢𑀺 ‘‘𑀇𑀥 𑀲𑀻𑀮𑀁 𑀓𑀣𑀺𑀢𑀁, 𑀇𑀥 𑀲𑀫𑀸𑀥𑀺, 𑀇𑀥 𑀧𑀜𑁆𑀜𑀸, 𑀏𑀢𑁆𑀢𑀓𑀸 𑀏𑀢𑁆𑀣 𑀅𑀦𑀼𑀲𑀦𑁆𑀥𑀬𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀫𑀦𑀲𑀸 𑀅𑀦𑀼 𑀅𑀦𑀼 𑀧𑁂𑀓𑁆𑀔𑀺𑀢𑀸. 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸𑀢𑀺 𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺 𑀪𑀽𑀢𑀸𑀬, 𑀜𑀸𑀢𑀧𑀭𑀺𑀜𑁆𑀜𑀸𑀲𑀗𑁆𑀔𑀸𑀢𑀸𑀬 𑀯𑀸 𑀤𑀺𑀝𑁆𑀞𑀺𑀬𑀸 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀭𑀽𑀧𑀸𑀭𑀽𑀧𑀥𑀫𑁆𑀫𑁂 ‘‘𑀇𑀢𑀺 𑀭𑀽𑀧𑀁, 𑀏𑀢𑁆𑀢𑀓𑀁 𑀭𑀽𑀧’’𑀦𑁆𑀢𑀺𑀆𑀤𑀺𑀦𑀸 𑀲𑀼𑀝𑁆𑀞𑀼 𑀯𑀯𑀢𑁆𑀣𑀧𑁂𑀢𑁆𑀯𑀸 𑀧𑀝𑀺𑀯𑀺𑀤𑁆𑀥𑀸.

𑀲𑀓𑀮𑁂𑀦 𑀯𑀘𑀦𑁂𑀦𑀸𑀢𑀺 𑀧𑀼𑀩𑁆𑀩𑁂 𑀢𑀻𑀳𑀺 𑀧𑀤𑁂𑀳𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀦𑁆𑀢𑀺 𑀅𑀓𑀢𑀜𑁆𑀜𑀼𑀢𑀁, ‘‘𑀇𑀥𑁂𑀓𑀘𑁆𑀘𑁄 𑀧𑀸𑀧𑀪𑀺𑀓𑁆𑀔𑀼 𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀅𑀢𑁆𑀢𑀦𑁄 𑀤𑀳𑀢𑀻’’𑀢𑀺 (𑀧𑀸𑀭𑀸. 𑁧𑁯𑁫) 𑀏𑀯𑀁 𑀯𑀼𑀢𑁆𑀢𑀁 𑀅𑀦𑀭𑀺𑀬𑀯𑁄𑀳𑀸𑀭𑀸𑀯𑀢𑁆𑀣𑀁. 𑀲𑀸 𑀏𑀯 𑀅𑀦𑀭𑀺𑀬𑀯𑁄𑀳𑀸𑀭𑀸𑀯𑀢𑁆𑀣𑀸 𑀅𑀲𑀤𑁆𑀥𑀫𑁆𑀫𑁄. 𑀦𑀦𑀼 𑀘 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 ‘‘𑀫𑀫𑁂𑀤𑀁 𑀯𑀘𑀦’’𑀦𑁆𑀢𑀺 𑀅𑀥𑀺𑀫𑀸𑀦𑀲𑁆𑀲, 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀸𑀤𑀻𑀦𑀜𑁆𑀘 𑀢𑀤𑀸𑀲𑀗𑁆𑀓𑀸𑀬 𑀅𑀪𑀸𑀯𑀢𑁄 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀲𑀫𑀢𑀺𑀓𑁆𑀓𑀫𑀸𑀤𑀺𑀯𑀘𑀦𑀁 𑀦𑀺𑀭𑀢𑁆𑀣𑀓𑀦𑁆𑀢𑀺? 𑀦𑀬𑀺𑀤𑀫𑁂𑀯𑀁, ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺 𑀯𑀤𑀦𑁆𑀢𑁂𑀦 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀺𑀪𑀸𑀯𑀺𑀢𑁄𑀢𑀺 𑀤𑀲𑁆𑀲𑀦𑀢𑁄. 𑀓𑁂𑀘𑀺 𑀧𑀦 ‘‘𑀤𑁂𑀯𑀢𑀸𑀦𑀁 𑀧𑀭𑀺𑀯𑀺𑀢𑀓𑁆𑀓𑀸𑀧𑁂𑀓𑁆𑀔𑀁 𑀢𑀣𑀸𑀯𑀘𑀦𑀦𑁆𑀢𑀺 𑀏𑀤𑀺𑀲𑀻 𑀘𑁄𑀤𑀦𑀸 𑀅𑀦𑀯𑀓𑀸𑀲𑀸’’𑀢𑀺 𑀯𑀤𑀦𑁆𑀢𑀺. 𑀢𑀲𑁆𑀫𑀺𑀁 𑀓𑀺𑀭 𑀔𑀡𑁂 𑀏𑀓𑀘𑁆𑀘𑀸𑀦𑀁 𑀤𑁂𑀯𑀢𑀸𑀦𑀁 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 ‘‘𑀪𑀕𑀯𑀸 𑀧𑀭𑀺𑀦𑀺𑀩𑁆𑀩𑀼𑀢𑁄, 𑀅𑀬𑀜𑁆𑀘 𑀆𑀬𑀲𑁆𑀫𑀸 𑀤𑁂𑀲𑀦𑀸𑀓𑀼𑀲𑀮𑁄 𑀇𑀤𑀸𑀦𑀺 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀲𑀓𑁆𑀬𑀓𑀼𑀮𑀧𑁆𑀧𑀲𑀼𑀢𑁄 𑀢𑀣𑀸𑀕𑀢𑀲𑁆𑀲 𑀪𑀸𑀢𑀸 𑀘𑀽𑀴𑀧𑀺𑀢𑀼𑀧𑀼𑀢𑁆𑀢𑁄, 𑀓𑀺𑀁 𑀦𑀼 𑀔𑁄 𑀲𑀬𑀁 𑀲𑀘𑁆𑀙𑀺𑀓𑀢𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀉𑀤𑀸𑀳𑀼 𑀪𑀕𑀯𑀢𑁄 𑀏𑀯 𑀯𑀘𑀦𑀁 𑀬𑀣𑀸𑀲𑀼𑀢’’𑀦𑁆𑀢𑀺, 𑀏𑀯𑀁 𑀢𑀤𑀸𑀲𑀗𑁆𑀓𑀺𑀢𑀧𑁆𑀧𑀓𑀸𑀭𑀢𑁄 𑀅𑀲𑀧𑁆𑀧𑀼𑀭𑀺𑀲𑀪𑀽𑀫𑀺𑀲𑀫𑁄𑀓𑁆𑀓𑀫𑀸𑀤𑀺𑀢𑁄 𑀅𑀢𑀺𑀓𑁆𑀓𑀫𑀸𑀤𑀺 𑀯𑀺𑀪𑀸𑀯𑀺𑀢𑀦𑁆𑀢𑀺. 𑀅𑀢𑁆𑀢𑀦𑁄 𑀅𑀤𑀳𑀦𑁆𑀢𑁄𑀢𑀺 ‘‘𑀫𑀫𑁂𑀤’’𑀦𑁆𑀢𑀺 𑀅𑀢𑁆𑀢𑀦𑀺 𑀅𑀝𑁆𑀞𑀧𑁂𑀦𑁆𑀢𑁄. 𑀅𑀧𑁆𑀧𑁂𑀢𑀻𑀢𑀺 ¶ 𑀦𑀺𑀤𑀲𑁆𑀲𑁂𑀢𑀺. 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀲𑀼 𑀬𑀣𑀸𑀭𑀳𑀁 𑀲𑀢𑁆𑀢𑁂 𑀦𑁂𑀢𑀻𑀢𑀺 𑀦𑁂𑀢𑁆𑀢𑀺, 𑀥𑀫𑁆𑀫𑁄𑀬𑁂𑀯 𑀦𑁂𑀢𑁆𑀢𑀺 𑀥𑀫𑁆𑀫𑀦𑁂𑀢𑁆𑀢𑀺.

𑀤𑀴𑁆𑀳𑀢𑀭𑀦𑀺𑀯𑀺𑀝𑁆𑀞𑀸 ¶ 𑀯𑀺𑀘𑀺𑀓𑀺𑀘𑁆𑀙𑀸 𑀓𑀗𑁆𑀔𑀸. 𑀦𑀸𑀢𑀺𑀲𑀁𑀲𑀧𑁆𑀧𑀦𑀁 𑀫𑀢𑀺𑀪𑁂𑀤𑀫𑀢𑁆𑀢𑀁 𑀯𑀺𑀫𑀢𑀺. 𑀅𑀲𑁆𑀲𑀤𑁆𑀥𑀺𑀬𑀁 𑀯𑀺𑀦𑀸𑀲𑁂𑀢𑀺 𑀪𑀕𑀯𑀢𑀸 𑀪𑀸𑀲𑀺𑀢𑀢𑁆𑀢𑀸 𑀲𑀫𑁆𑀫𑀼𑀔𑀸 𑀘𑀲𑁆𑀲 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀔𑀮𑀺𑀢𑀤𑀼𑀭𑀼𑀢𑁆𑀢𑀸𑀤𑀺𑀕𑁆𑀕𑀳𑀡𑀤𑁄𑀲𑀸𑀪𑀸𑀯𑀢𑁄 𑀘. 𑀏𑀢𑁆𑀣 𑀘 𑀧𑀜𑁆𑀘𑀫𑀸𑀤𑀬𑁄 𑀢𑀺𑀲𑁆𑀲𑁄 𑀅𑀢𑁆𑀣𑀬𑁄𑀚𑀦𑀸 𑀆𑀓𑀸𑀭𑀸𑀤𑀺𑀅𑀢𑁆𑀣𑁂𑀲𑀼 𑀅𑀕𑁆𑀕𑀳𑀺𑀢𑀯𑀺𑀲𑁂𑀲𑀫𑁂𑀯 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀤𑀲𑁆𑀲𑀺𑀢𑀸, 𑀢𑀢𑁄 𑀧𑀭𑀸 𑀘𑀢𑀲𑁆𑀲𑁄 𑀆𑀓𑀸𑀭𑀢𑁆𑀣𑀫𑁂𑀯 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀯𑀺𑀪𑀸𑀯𑀺𑀢𑀸, 𑀧𑀘𑁆𑀙𑀺𑀫𑀸 𑀧𑀦 𑀢𑀺𑀲𑁆𑀲𑁄 𑀬𑀣𑀸𑀓𑁆𑀓𑀫𑀁 𑀆𑀓𑀸𑀭𑀢𑁆𑀣𑀁 𑀦𑀺𑀤𑀲𑁆𑀲𑀦𑀢𑁆𑀣𑀁 𑀅𑀯𑀥𑀸𑀭𑀡𑀢𑁆𑀣𑀜𑁆𑀘 𑀏𑀯𑀁-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀬𑁄𑀚𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀏𑀓-𑀲𑀤𑁆𑀤𑁄 𑀅𑀜𑁆𑀜𑀲𑁂𑀝𑁆𑀞𑀅𑀲𑀳𑀸𑀬𑀲𑀗𑁆𑀔𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑁂𑀲 ‘‘𑀲𑀲𑁆𑀲𑀢𑁄 𑀅𑀢𑁆𑀢𑀸 𑀘 𑀮𑁄𑀓𑁄 𑀘, 𑀇𑀤𑀫𑁂𑀯 𑀲𑀘𑁆𑀘𑀁 𑀫𑁄𑀖𑀫𑀜𑁆𑀜𑀦𑁆𑀢𑀺 𑀇𑀢𑁆𑀣𑁂𑀓𑁂 𑀅𑀪𑀺𑀯𑀤𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁨𑁭) 𑀅𑀜𑁆𑀜𑀢𑁆𑀣𑁂 𑀤𑀺𑀲𑁆𑀲𑀢𑀺, ‘‘𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁨𑁮; 𑀧𑀸𑀭𑀸. 𑁧𑁧) 𑀲𑁂𑀝𑁆𑀞𑁂, ‘‘𑀏𑀓𑁄 𑀯𑀽𑀧𑀓𑀝𑁆𑀞𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁪𑁦𑁫; 𑁨.𑁨𑁧𑁫; 𑀫. 𑀦𑀺. 𑁧.𑁮𑁦; 𑀲𑀁. 𑀦𑀺. 𑁩.𑁬𑁩; 𑀘𑀽𑀴𑀯. 𑁪𑁪𑁫) 𑀅𑀲𑀳𑀸𑀬𑁂 ‘‘𑀏𑀓𑁄𑀯 𑀔𑁄, 𑀪𑀺𑀓𑁆𑀔𑀯𑁂, 𑀔𑀡𑁄 𑀘 𑀲𑀫𑀬𑁄 𑀘 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀸𑀬𑀸’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁮.𑁨𑁯) 𑀲𑀗𑁆𑀔𑀸𑀬𑀁. 𑀇𑀥𑀸𑀧𑀺 𑀲𑀗𑁆𑀔𑀸𑀬𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀏𑀓𑀦𑁆𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑀦𑀺𑀤𑁆𑀤𑁂𑀲𑁄’’𑀢𑀺. 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘𑀸𑀢𑀺 𑀬𑀼𑀢𑁆𑀢𑀓𑀸𑀮𑀜𑁆𑀘 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀜𑁆𑀘. 𑀔𑀡𑁄𑀢𑀺 𑀑𑀓𑀸𑀲𑁄. 𑀢𑀣𑀸𑀕𑀢𑀼𑀧𑁆𑀧𑀸𑀤𑀸𑀤𑀺𑀓𑁄 𑀳𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀑𑀓𑀸𑀲𑁄 𑀢𑀧𑁆𑀧𑀘𑁆𑀘𑀬𑀧𑁆𑀧𑀝𑀺𑀮𑀸𑀪𑀳𑁂𑀢𑀼𑀢𑁆𑀢𑀸. 𑀔𑀡𑁄 𑀏𑀯 𑀘 𑀲𑀫𑀬𑁄. 𑀬𑁄 𑀔𑀡𑁄𑀢𑀺 𑀘 𑀲𑀫𑀬𑁄𑀢𑀺 𑀘 𑀯𑀼𑀘𑁆𑀘𑀢𑀺, 𑀲𑁄 𑀏𑀓𑁄 𑀏𑀯𑀸𑀢𑀺 𑀳𑀺 𑀅𑀢𑁆𑀣𑁄. 𑀫𑀳𑀸𑀲𑀫𑀬𑁄𑀢𑀺 𑀫𑀳𑀸𑀲𑀫𑀽𑀳𑁄. 𑀲𑀫𑀬𑁄𑀧𑀺 𑀔𑁄𑀢𑀺 𑀲𑀺𑀓𑁆𑀔𑀸𑀧𑀤𑀧𑀽𑀭𑀡𑀲𑁆𑀲 𑀳𑁂𑀢𑀼𑀧𑀺. 𑀲𑀫𑀬𑀧𑁆𑀧𑀯𑀸𑀤𑀓𑁂𑀢𑀺 𑀤𑀺𑀝𑁆𑀞𑀺𑀧𑁆𑀧𑀯𑀸𑀤𑀓𑁂. 𑀢𑀢𑁆𑀣 𑀳𑀺 𑀦𑀺𑀲𑀺𑀦𑁆𑀦𑀸 𑀢𑀺𑀢𑁆𑀣𑀺𑀬𑀸 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀫𑀬𑀁 𑀧𑀯𑀤𑀦𑁆𑀢𑀻𑀢𑀺. 𑀅𑀢𑁆𑀣𑀸𑀪𑀺𑀲𑀫𑀬𑀸𑀢𑀺 𑀳𑀺𑀢𑀧𑁆𑀧𑀝𑀺𑀮𑀸𑀪𑀸. 𑀅𑀪𑀺𑀲𑀫𑁂𑀢𑀩𑁆𑀩𑁄𑀢𑀺 𑀅𑀪𑀺𑀲𑀫𑀬𑁄, 𑀅𑀪𑀺𑀲𑀫𑀬𑁄 𑀅𑀢𑁆𑀣𑁄 𑀅𑀪𑀺𑀲𑀫𑀬𑀝𑁆𑀞𑁄𑀢𑀺 𑀧𑀻𑀴𑀦𑀸𑀤𑀻𑀦𑀺 𑀅𑀪𑀺𑀲𑀫𑁂𑀢𑀩𑁆𑀩𑀪𑀸𑀯𑁂𑀦 𑀏𑀓𑀻𑀪𑀸𑀯𑀁 𑀉𑀧𑀦𑁂𑀢𑁆𑀯𑀸 𑀯𑀼𑀢𑁆𑀢𑀸𑀦𑀺. 𑀅𑀪𑀺𑀲𑀫𑀬𑀲𑁆𑀲 𑀯𑀸 𑀧𑀝𑀺𑀯𑁂𑀥𑀲𑁆𑀲 𑀯𑀺𑀲𑀬𑀪𑀽𑀢𑁄 𑀅𑀢𑁆𑀣𑁄 𑀅𑀪𑀺𑀲𑀫𑀬𑀝𑁆𑀞𑁄𑀢𑀺 𑀢𑀸𑀦𑁂𑀯 𑀢𑀣𑀸 𑀏𑀓𑀢𑁆𑀢𑁂𑀦 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 ¶ 𑀧𑀻𑀴𑀦𑀁 𑀤𑀼𑀓𑁆𑀔𑀲𑀘𑁆𑀘𑀲𑁆𑀲 𑀢𑀁𑀲𑀫𑀗𑁆𑀕𑀺𑀦𑁄 𑀳𑀺𑀁𑀲𑀦𑀁 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀓𑀭𑀡𑀁. 𑀲𑀦𑁆𑀢𑀸𑀧𑁄 𑀤𑀼𑀓𑁆𑀔𑀤𑀼𑀓𑁆𑀔𑀢𑀸𑀤𑀺𑀯𑀲𑁂𑀦 𑀲𑀦𑁆𑀢𑀧𑀦𑀁 𑀧𑀭𑀺𑀤𑀳𑀦𑀁.

𑀢𑀢𑁆𑀣 𑀲𑀳𑀓𑀸𑀭𑀺𑀓𑀸𑀭𑀡𑁂 𑀲𑀦𑀺𑀚𑁆𑀛𑀁 𑀲𑀫𑁂𑀢𑀺 𑀲𑀫𑀯𑁂𑀢𑀻𑀢𑀺 𑀲𑀫𑀬𑁄, 𑀲𑀫𑀯𑀸𑀬𑁄. 𑀲𑀫𑁂𑀢𑀺 𑀲𑀫𑀸𑀕𑀘𑁆𑀙𑀢𑀺 𑀏𑀢𑁆𑀣 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀢𑀤𑀸𑀥𑀸𑀭𑀧𑀼𑀕𑁆𑀕𑀮𑁂𑀳𑀻𑀢𑀺 𑀲𑀫𑀬𑁄, 𑀔𑀡𑁄. 𑀲𑀫𑁂𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸 𑀲𑀁𑀕𑀘𑁆𑀙𑀢𑀺 𑀲𑀢𑁆𑀢𑁄, 𑀲𑀪𑀸𑀯𑀥𑀫𑁆𑀫𑁄 𑀯𑀸 𑀲𑀳𑀚𑀸𑀢𑀸𑀤𑀻𑀳𑀺, 𑀉𑀧𑁆𑀧𑀸𑀤𑀸𑀤𑀻𑀳𑀺 𑀯𑀸𑀢𑀺 𑀲𑀫𑀬𑁄, 𑀓𑀸𑀮𑁄. 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀢𑀸𑀬 𑀅𑀢𑁆𑀣𑀢𑁄 𑀅𑀪𑀽𑀢𑁄𑀧𑀺 𑀳𑀺 𑀓𑀸𑀮𑁄 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀅𑀥𑀺𑀓𑀭𑀡𑀁 𑀓𑀭𑀡𑀁 𑀯𑀺𑀬 𑀘 𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑁂𑀦 𑀭𑀽𑀧𑁂𑀦 𑀯𑁄𑀳𑀭𑀻𑀬𑀢𑀻𑀢𑀺. 𑀲𑀫𑀁, 𑀲𑀳 𑀯𑀸 𑀅𑀯𑀬𑀯𑀸𑀦𑀁 𑀅𑀬𑀦𑀁 𑀧𑀯𑀢𑁆𑀢𑀺 𑀅𑀯𑀝𑁆𑀞𑀸𑀦𑀦𑁆𑀢𑀺 𑀲𑀫𑀬𑁄, 𑀲𑀫𑀽𑀳𑁄 𑀬𑀣𑀸 ‘‘𑀲𑀫𑀼𑀤𑀸𑀬𑁄’’𑀢𑀺. 𑀅𑀯𑀬𑀯𑀲𑀳𑀸𑀯𑀝𑁆𑀞𑀸𑀦𑀫𑁂𑀯 𑀳𑀺 𑀲𑀫𑀽𑀳𑁄𑀢𑀺. 𑀅𑀯𑀲𑁂𑀲𑀧𑀘𑁆𑀘𑀬𑀸𑀦𑀁 ¶ 𑀲𑀫𑀸𑀕𑀫𑁂 𑀏𑀢𑀺 𑀨𑀮𑀁 𑀏𑀢𑀲𑁆𑀫𑀸 𑀉𑀧𑁆𑀧𑀚𑁆𑀚𑀢𑀺 𑀧𑀯𑀢𑁆𑀢𑀢𑀺 𑀘𑀸𑀢𑀺 𑀲𑀫𑀬𑁄, 𑀳𑁂𑀢𑀼 𑀬𑀣𑀸 ‘‘𑀲𑀫𑀼𑀤𑀬𑁄’’𑀢𑀺. 𑀲𑀫𑁂𑀢𑀺 𑀲𑀁𑀬𑁄𑀚𑀦𑀪𑀸𑀯𑀢𑁄 𑀲𑀫𑁆𑀩𑀤𑁆𑀥𑁄 𑀏𑀢𑀺 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀧𑀯𑀢𑁆𑀢𑀢𑀺, 𑀤𑀴𑁆𑀳𑀕𑁆𑀕𑀳𑀡𑀪𑀸𑀯𑀢𑁄 𑀯𑀸 𑀲𑀁𑀬𑀼𑀢𑁆𑀢𑀸 𑀅𑀬𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀺 𑀲𑀢𑁆𑀢𑀸 𑀬𑀣𑀸𑀪𑀺𑀦𑀺𑀯𑁂𑀲𑀁 𑀏𑀢𑁂𑀦𑀸𑀢𑀺 𑀲𑀫𑀬𑁄, 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑁂𑀦 𑀳𑀺 𑀲𑀢𑁆𑀢𑀸 𑀅𑀢𑀺𑀯𑀺𑀬 𑀩𑀚𑁆𑀛𑀦𑁆𑀢𑀻𑀢𑀺. 𑀲𑀫𑀺𑀢𑀺 𑀲𑀗𑁆𑀕𑀢𑀺 𑀲𑀫𑁄𑀥𑀸𑀦𑀦𑁆𑀢𑀺 𑀲𑀫𑀬𑁄, 𑀧𑀝𑀺𑀮𑀸𑀪𑁄. 𑀲𑀫𑀲𑁆𑀲 𑀬𑀸𑀦𑀁, 𑀲𑀫𑁆𑀫𑀸 𑀯𑀸 𑀬𑀸𑀦𑀁 𑀅𑀧𑀕𑀫𑁄𑀢𑀺 𑀲𑀫𑀬𑁄, 𑀧𑀳𑀸𑀦𑀁. 𑀅𑀪𑀺𑀫𑀼𑀔𑀁 𑀜𑀸𑀡𑁂𑀦 𑀲𑀫𑁆𑀫𑀸 𑀏𑀢𑀩𑁆𑀩𑁄 𑀅𑀪𑀺𑀲𑀫𑁂𑀢𑀩𑁆𑀩𑁄𑀢𑀺 𑀅𑀪𑀺𑀲𑀫𑀬𑁄, 𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑁄 𑀲𑀪𑀸𑀯𑁄. 𑀅𑀪𑀺𑀫𑀼𑀔𑀪𑀸𑀯𑁂𑀦 𑀲𑀫𑁆𑀫𑀸 𑀏𑀢𑀺 𑀕𑀘𑁆𑀙𑀢𑀺 𑀩𑀼𑀚𑁆𑀛𑀢𑀻𑀢𑀺 𑀅𑀪𑀺𑀲𑀫𑀬𑁄, 𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑀲𑀪𑀸𑀯𑀸𑀯𑀩𑁄𑀥𑁄. 𑀏𑀯𑀁 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀫𑀬𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀫𑀬𑀲𑀤𑁆𑀤𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑁂 𑀅𑀪𑀺𑀲𑀫𑀬𑀲𑀤𑁆𑀤𑀲𑁆𑀲 𑀉𑀤𑀸𑀳𑀭𑀡𑀁 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀲𑁆𑀲𑀸𑀢𑀺 𑀲𑀫𑀬𑀲𑀤𑁆𑀤𑀲𑁆𑀲. 𑀓𑀸𑀮𑁄 𑀅𑀢𑁆𑀣𑁄 𑀲𑀫𑀯𑀸𑀬𑀸𑀤𑀻𑀦𑀁 𑀅𑀢𑁆𑀣𑀸𑀦𑀁 𑀇𑀥 𑀅𑀲𑀫𑁆𑀪𑀯𑀢𑁄, 𑀤𑁂𑀲𑀤𑁂𑀲𑀓𑀧𑀭𑀺𑀲𑀸𑀦𑀁 𑀯𑀺𑀬 𑀲𑀼𑀢𑁆𑀢𑀲𑁆𑀲 𑀦𑀺𑀤𑀸𑀦𑀪𑀸𑀯𑁂𑀦 𑀓𑀸𑀮𑀲𑁆𑀲 𑀅𑀧𑀤𑀺𑀲𑀺𑀢𑀩𑁆𑀩𑀢𑁄 𑀘.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀅𑀦𑀺𑀬𑀫𑀺𑀢𑀯𑀲𑁂𑀦𑁂𑀯 𑀓𑀸𑀮𑁄 𑀦𑀺𑀤𑁆𑀤𑀺𑀝𑁆𑀞𑁄, 𑀦 𑀉𑀢𑀼𑀲𑀁𑀯𑀘𑁆𑀙𑀭𑀸𑀤𑀺𑀯𑀲𑁂𑀦 𑀦𑀺𑀬𑀫𑁂𑀢𑁆𑀯𑀸𑀢𑀺 𑀆𑀳 𑁋 ‘‘𑀢𑀢𑁆𑀣 𑀓𑀺𑀜𑁆𑀘𑀸𑀧𑀻’’𑀢𑀺𑀆𑀤𑀺. 𑀉𑀢𑀼𑀲𑀁𑀯𑀘𑁆𑀙𑀭𑀸𑀤𑀺𑀯𑀲𑁂𑀦 𑀦𑀺𑀬𑀫𑀁 𑀅𑀓𑀢𑁆𑀯𑀸 𑀲𑀫𑀬𑀲𑀤𑁆𑀤𑀲𑁆𑀲 𑀯𑀘𑀦𑁂 𑀅𑀬𑀫𑁆𑀧𑀺 𑀕𑀼𑀡𑁄 𑀮𑀤𑁆𑀥𑁄 𑀳𑁄𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁂 𑀯𑀸 𑀇𑀫𑁂’’𑀢𑀺𑀆𑀤𑀺𑀫𑀸𑀳. 𑀲𑀸𑀫𑀜𑁆𑀜𑀚𑁄𑀢𑀦𑀸 𑀳𑀺 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀻𑀢𑀺. 𑀢𑀢𑁆𑀣 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑀫𑀬𑁄 𑀤𑁂𑀯𑀲𑀺𑀓𑀁 𑀛𑀸𑀦𑀲𑀫𑀸𑀧𑀢𑁆𑀢𑀻𑀳𑀺 𑀯𑀻𑀢𑀺𑀦𑀸𑀫𑀦𑀓𑀸𑀮𑁄, 𑀯𑀺𑀲𑁂𑀲𑀢𑁄 𑀲𑀢𑁆𑀢𑀲𑀢𑁆𑀢𑀸𑀳𑀸𑀦𑀺. 𑀲𑀼𑀧𑁆𑀧𑀓𑀸𑀲𑀸𑀢𑀺 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀬𑀸 𑀧𑀓𑀫𑁆𑀧𑀦𑀑𑀪𑀸𑀲𑀧𑀸𑀢𑀼𑀪𑀸𑀯𑀸𑀤𑀻𑀳𑀺 ¶ 𑀧𑀸𑀓𑀝𑀸. 𑀬𑀣𑀸𑀯𑀼𑀢𑁆𑀢𑀪𑁂𑀤𑁂𑀲𑀼 𑀏𑀯 𑀲𑀫𑀬𑁂𑀲𑀼 𑀏𑀓𑀤𑁂𑀲𑀁 𑀧𑀓𑀸𑀭𑀦𑁆𑀢𑀭𑁂𑀳𑀺 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀬𑁄 𑀘𑀸𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀣𑀸 𑀳𑀺 𑀜𑀸𑀡𑀓𑀺𑀘𑁆𑀘𑀲𑀫𑀬𑁄 𑀅𑀢𑁆𑀢𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺𑀲𑀫𑀬𑁄 𑀘 𑀅𑀪𑀺𑀲𑀫𑁆𑀩𑁄𑀥𑀺𑀲𑀫𑀬𑁄, 𑀅𑀭𑀺𑀬𑀢𑀼𑀡𑁆𑀳𑀻𑀪𑀸𑀯𑀲𑀫𑀬𑁄 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑀫𑀬𑁄, 𑀓𑀭𑀼𑀡𑀸𑀓𑀺𑀘𑁆𑀘𑀧𑀭𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺𑀥𑀫𑁆𑀫𑀺𑀓𑀣𑀸𑀲𑀫𑀬𑁄 𑀤𑁂𑀲𑀦𑀸𑀲𑀫𑀬𑁄𑀬𑁂𑀯.

𑀓𑀭𑀡𑀯𑀘𑀦𑁂𑀦 𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀅𑀪𑀺𑀥𑀫𑁆𑀫𑀯𑀺𑀦𑀬𑁂𑀲𑀼. 𑀢𑀣𑀸𑀢𑀺 𑀪𑀼𑀫𑁆𑀫𑀓𑀭𑀡𑁂𑀳𑀺. 𑀅𑀥𑀺𑀓𑀭𑀡𑀢𑁆𑀣𑁄 𑀆𑀥𑀸𑀭𑀢𑁆𑀣𑁄. 𑀪𑀸𑀯𑁄 𑀦𑀸𑀫 𑀓𑀺𑀭𑀺𑀬𑀸, 𑀓𑀺𑀭𑀺𑀬𑀸𑀬 𑀓𑀺𑀭𑀺𑀬𑀦𑁆𑀢𑀭𑀮𑀓𑁆𑀔𑀡𑀁 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀁. 𑀢𑀢𑁆𑀣 𑀬𑀣𑀸 𑀓𑀸𑀮𑁄 𑀲𑀪𑀸𑀯𑀥𑀫𑁆𑀫𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀬𑀁 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀆𑀥𑀸𑀭𑀪𑀸𑀯𑁂𑀦 𑀧𑀜𑁆𑀜𑀸𑀢𑁄 𑀢𑀗𑁆𑀔𑀡𑀧𑁆𑀧𑀯𑀢𑁆𑀢𑀸𑀦𑀁 𑀢𑀢𑁄 𑀧𑀼𑀩𑁆𑀩𑁂 𑀧𑀭𑀢𑁄 𑀘 𑀅𑀪𑀸𑀯𑀢𑁄 ‘‘𑀧𑀼𑀩𑁆𑀩𑀡𑁆𑀳𑁂 𑀚𑀸𑀢𑁄, 𑀲𑀸𑀬𑀦𑁆𑀳𑁂 𑀕𑀘𑁆𑀙𑀢𑀻’’𑀢𑀺 𑀘 𑀆𑀤𑀻𑀲𑀼, 𑀲𑀫𑀽𑀳𑁄 𑀘 𑀅𑀯𑀬𑀯𑀯𑀺𑀦𑀺𑀫𑀼𑀢𑁆𑀢𑁄 𑀅𑀯𑀺𑀚𑁆𑀚𑀫𑀸𑀦𑁄𑀧𑀺 𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑁄 𑀅𑀯𑀬𑀯𑀸𑀦𑀁 𑀆𑀥𑀸𑀭𑀪𑀸𑀯𑁂𑀦 𑀧𑀜𑁆𑀜𑀸𑀧𑀻𑀬𑀢𑀺 ‘‘𑀭𑀼𑀓𑁆𑀔𑁂 𑀲𑀸𑀔𑀸, 𑀬𑀯𑀭𑀸𑀲𑀺𑀬𑀁 𑀲𑀫𑁆𑀪𑀽𑀢𑁄’’𑀢𑀺𑀆𑀤𑀻𑀲𑀼, 𑀏𑀯𑀁 𑀇𑀥𑀸𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀅𑀥𑀺𑀓𑀭𑀡𑀁…𑀧𑁂… 𑀥𑀫𑁆𑀫𑀸𑀦’’𑀦𑁆𑀢𑀺. 𑀬𑀲𑁆𑀫𑀺𑀁 𑀓𑀸𑀮𑁂, 𑀥𑀫𑁆𑀫𑀧𑀼𑀜𑁆𑀚𑁂 𑀯𑀸 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀏𑀯 𑀓𑀸𑀮𑁂, 𑀥𑀫𑁆𑀫𑀧𑀼𑀜𑁆𑀚𑁂 ¶ 𑀘 𑀨𑀲𑁆𑀲𑀸𑀤𑀬𑁄𑀧𑀺 𑀳𑁄𑀦𑁆𑀢𑀻𑀢𑀺 𑀅𑀬𑀜𑁆𑀳𑀺 𑀢𑀢𑁆𑀣 𑀅𑀢𑁆𑀣𑁄. 𑀬𑀣𑀸 ‘‘𑀕𑀸𑀯𑀻𑀲𑀼 𑀤𑀼𑀬𑁆𑀳𑀫𑀸𑀦𑀸𑀲𑀼 𑀕𑀢𑁄, 𑀤𑀼𑀤𑁆𑀥𑀸𑀲𑀼 𑀆𑀕𑀢𑁄’’𑀢𑀺 𑀤𑁄𑀳𑀦𑀓𑀺𑀭𑀺𑀬𑀸𑀬 𑀕𑀫𑀦𑀓𑀺𑀭𑀺𑀬𑀸 𑀮𑀓𑁆𑀔𑀻𑀬𑀢𑀺, 𑀏𑀯𑀁 𑀇𑀥𑀸𑀧𑀺 ‘‘𑀬𑀲𑁆𑀫𑀺𑀁 𑀲𑀫𑀬𑁂, 𑀢𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀘 𑀯𑀼𑀢𑁆𑀢𑁂 ‘‘𑀲𑀢𑀻’’𑀢𑀺 𑀅𑀬𑀫𑀢𑁆𑀣𑁄 𑀯𑀺𑀜𑁆𑀜𑀸𑀬𑀫𑀸𑀦𑁄 𑀏𑀯 𑀳𑁄𑀢𑀺 𑀧𑀤𑀢𑁆𑀣𑀲𑁆𑀲 𑀲𑀢𑁆𑀢𑀸𑀯𑀺𑀭𑀳𑀸𑀪𑀸𑀯𑀢𑁄𑀢𑀺 𑀲𑀫𑀬𑀲𑁆𑀲 𑀲𑀢𑁆𑀢𑀸𑀓𑀺𑀭𑀺𑀬𑀸𑀬 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑀺𑀭𑀺𑀬𑀸, 𑀨𑀲𑁆𑀲𑀸𑀤𑀻𑀦𑀁 𑀪𑀯𑀦𑀓𑀺𑀭𑀺𑀬𑀸 𑀘 𑀮𑀓𑁆𑀔𑀻𑀬𑀢𑀻𑀢𑀺. 𑀬𑀲𑁆𑀫𑀺𑀁 𑀲𑀫𑀬𑁂𑀢𑀺 𑀬𑀲𑁆𑀫𑀺𑀁 𑀦𑀯𑀫𑁂 𑀔𑀡𑁂, 𑀬𑀲𑁆𑀫𑀺𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀳𑁂𑀢𑀼𑀫𑁆𑀳𑀺, 𑀧𑀘𑁆𑀘𑀬𑀲𑀫𑀯𑀸𑀬𑁂 𑀯𑀸 𑀲𑀢𑀺 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂 𑀳𑁂𑀢𑀼𑀫𑁆𑀳𑀺 𑀧𑀘𑁆𑀘𑀬𑀲𑀫𑀯𑀸𑀬𑁂 𑀘 𑀨𑀲𑁆𑀲𑀸𑀤𑀬𑁄𑀧𑀺 𑀳𑁄𑀦𑁆𑀢𑀻𑀢𑀺 𑀉𑀪𑀬𑀢𑁆𑀣 𑀲𑀫𑀬𑀲𑀤𑁆𑀤𑁂 𑀪𑀼𑀫𑁆𑀫𑀦𑀺𑀤𑁆𑀤𑁂𑀲𑁄 𑀓𑀢𑁄 𑀮𑀓𑁆𑀔𑀡𑀪𑀽𑀢𑀪𑀸𑀯𑀬𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀔𑀡…𑀧𑁂… 𑀮𑀓𑁆𑀔𑀻𑀬𑀢𑀻’’𑀢𑀺.

𑀳𑁂𑀢𑀼𑀅𑀢𑁆𑀣𑁄 𑀓𑀭𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀺 ‘‘𑀅𑀦𑁆𑀦𑁂𑀦 𑀯𑀲𑀢𑀺, 𑀅𑀚𑁆𑀛𑁂𑀦𑁂𑀦 𑀯𑀲𑀢𑀺, 𑀨𑀭𑀲𑀼𑀦𑀸 𑀙𑀺𑀦𑁆𑀤𑀢𑀺, 𑀓𑀼𑀤𑀸𑀮𑁂𑀦 𑀔𑀡𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀯𑀻𑀢𑀺𑀓𑁆𑀓𑀫𑀜𑁆𑀳𑀺 𑀲𑀼𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸 𑀑𑀢𑀺𑀡𑁆𑀡𑁂 𑀯𑀢𑁆𑀣𑀼𑀲𑁆𑀫𑀺𑀁 𑀢𑀁 𑀧𑀼𑀕𑁆𑀕𑀮𑀁 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 ¶ 𑀯𑀺𑀕𑀭𑀳𑀺𑀢𑁆𑀯𑀸 𑀘 𑀢𑀁 𑀢𑀁 𑀯𑀢𑁆𑀣𑀼𑀁 𑀑𑀢𑀺𑀡𑁆𑀡𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑁂𑀦𑁂𑀯 𑀓𑀸𑀮𑁂𑀦 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀸𑀧𑁂𑀦𑁆𑀢𑁄 𑀪𑀕𑀯𑀸 𑀯𑀺𑀳𑀭𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀜𑁆𑀘 𑀅𑀧𑁂𑀓𑁆𑀔𑀫𑀸𑀦𑁄 𑀢𑀢𑀺𑀬𑀧𑀸𑀭𑀸𑀚𑀺𑀓𑀸𑀤𑀻𑀲𑀼 𑀯𑀺𑀬.

𑀅𑀘𑁆𑀘𑀦𑁆𑀢𑀫𑁂𑀯 𑀆𑀭𑀫𑁆𑀪𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀤𑁂𑀲𑀦𑀸𑀦𑀺𑀝𑁆𑀞𑀸𑀦𑀁 𑀧𑀭𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀓𑀭𑀼𑀡𑀸𑀯𑀺𑀳𑀸𑀭𑁂𑀦. 𑀢𑀤𑀢𑁆𑀣𑀚𑁄𑀢𑀦𑀢𑁆𑀣𑀦𑁆𑀢𑀺 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑀚𑁄𑀢𑀦𑀢𑁆𑀣𑀁. 𑀉𑀧𑀬𑁄𑀕𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄 𑀬𑀣𑀸 ‘‘𑀫𑀸𑀲𑀁 𑀅𑀚𑁆𑀛𑁂𑀢𑀻’’𑀢𑀺. 𑀧𑁄𑀭𑀸𑀡𑀸𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑀸. 𑀅𑀪𑀺𑀮𑀸𑀧𑀫𑀢𑁆𑀢𑀪𑁂𑀤𑁄𑀢𑀺 𑀯𑀘𑀦𑀫𑀢𑁆𑀢𑁂𑀦 𑀯𑀺𑀲𑁂𑀲𑁄. 𑀢𑁂𑀦 𑀲𑀼𑀢𑁆𑀢𑀯𑀺𑀦𑀬𑁂𑀲𑀼 𑀯𑀺𑀪𑀢𑁆𑀢𑀺𑀩𑁆𑀬𑀢𑁆𑀢𑀬𑁄 𑀓𑀢𑁄𑀢𑀺 𑀤𑀲𑁆𑀲𑁂𑀢𑀺.

𑀇𑀤𑀸𑀦𑀺 ‘‘𑀪𑀕𑀯𑀸’’𑀢𑀺 𑀇𑀫𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀪𑀕𑀯𑀸𑀢𑀺 𑀕𑀭𑀽’’𑀢𑀺𑀆𑀤𑀺. 𑀪𑀕𑀯𑀸𑀢𑀺 𑀯𑀘𑀦𑀁 𑀲𑁂𑀝𑁆𑀞𑀦𑁆𑀢𑀺 𑀲𑁂𑀝𑁆𑀞𑀯𑀸𑀘𑀓𑀁 𑀯𑀘𑀦𑀁, 𑀲𑁂𑀝𑁆𑀞𑀕𑀼𑀡𑀲𑀳𑀘𑀭𑀡𑀁 𑀲𑁂𑀝𑁆𑀞𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀯𑀼𑀘𑁆𑀘𑀢𑀻𑀢𑀺 𑀯𑀘𑀦𑀁, 𑀅𑀢𑁆𑀣𑁄. 𑀬𑀲𑁆𑀫𑀸 𑀬𑁄 ‘‘𑀪𑀕𑀯𑀸’’𑀢𑀺 𑀯𑀘𑀦𑁂𑀦 𑀯𑀘𑀦𑀻𑀬𑁄 𑀅𑀢𑁆𑀣𑁄, 𑀲𑁄 𑀲𑁂𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀪𑀕𑀯𑀸𑀢𑀺 𑀯𑀘𑀦𑀫𑀼𑀢𑁆𑀢𑀫𑀦𑁆𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀕𑀸𑀭𑀯𑀬𑀼𑀢𑁆𑀢𑁄𑀢𑀺 𑀕𑀭𑀼𑀪𑀸𑀯𑀬𑀼𑀢𑁆𑀢𑁄 𑀕𑀭𑀼𑀕𑀼𑀡𑀬𑁄𑀕𑀢𑁄. 𑀕𑀭𑀼𑀓𑀭𑀡𑀁 𑀯𑀸 𑀲𑀸𑀢𑀺𑀲𑀬𑀁 𑀅𑀭𑀳𑀢𑀻𑀢𑀺 𑀕𑀸𑀭𑀯𑀬𑀼𑀢𑁆𑀢𑁄, 𑀕𑀸𑀭𑀯𑀸𑀭𑀳𑁄𑀢𑀺 𑀅𑀢𑁆𑀣𑁄. 𑀲𑀺𑀧𑁆𑀧𑀸𑀤𑀺𑀲𑀺𑀓𑁆𑀔𑀸𑀧𑀓𑀸 𑀕𑀭𑀽 𑀳𑁄𑀦𑁆𑀢𑀺, 𑀦 𑀘 𑀕𑀸𑀭𑀯𑀬𑀼𑀢𑁆𑀢𑀸, 𑀅𑀬𑀁 𑀧𑀦 𑀢𑀸𑀤𑀺𑀲𑁄 𑀦 𑀳𑁄𑀢𑀺, 𑀢𑀲𑁆𑀫𑀸 𑀕𑀭𑀽𑀢𑀺 𑀯𑀢𑁆𑀯𑀸 𑀕𑀸𑀭𑀯𑀬𑀼𑀢𑁆𑀢𑁄𑀢𑀺 𑀯𑀼𑀢𑁆𑀢𑀦𑁆𑀢𑀺 𑀓𑁂𑀘𑀺. 𑀯𑀼𑀢𑁆𑀢𑁄𑀬𑁂𑀯, 𑀦 𑀇𑀥 𑀯𑀢𑁆𑀢𑀩𑁆𑀩𑁄 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑁆𑀲 𑀇𑀫𑀺𑀲𑁆𑀲𑀸 𑀅𑀝𑁆𑀞𑀓𑀣𑀸𑀬 𑀏𑀓𑀤𑁂𑀲𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀥𑀫𑁆𑀫𑀲𑀭𑀻𑀭𑀁 𑀧𑀘𑁆𑀘𑀓𑁆𑀔𑀁 𑀓𑀭𑁄𑀢𑀻𑀢𑀺 ‘‘𑀬𑁄 𑀯𑁄, 𑀆𑀦𑀦𑁆𑀤, 𑀫𑀬𑀸 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄 ¶ , 𑀲𑁄 𑀯𑁄 𑀫𑀫𑀘𑁆𑀘𑀬𑁂𑀦 𑀲𑀢𑁆𑀣𑀸’’𑀢𑀺 (𑀤𑀻. 𑀦𑀺. 𑁨.𑁨𑁧𑁬) 𑀯𑀘𑀦𑀢𑁄 𑀥𑀫𑁆𑀫𑀲𑁆𑀲 𑀲𑀢𑁆𑀣𑀼𑀪𑀸𑀯𑀧𑀭𑀺𑀬𑀸𑀬𑁄 𑀯𑀺𑀚𑁆𑀚𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀯𑀚𑀺𑀭𑀲𑀗𑁆𑀖𑀸𑀢𑀲𑀫𑀸𑀦𑀓𑀸𑀬𑁄 𑀧𑀭𑁂𑀳𑀺 𑀅𑀪𑁂𑀚𑁆𑀚𑀲𑀭𑀻𑀭𑀢𑁆𑀢𑀸. 𑀦 𑀳𑀺 𑀪𑀕𑀯𑀢𑁄 𑀭𑀽𑀧𑀓𑀸𑀬𑁂 𑀓𑁂𑀦𑀘𑀺 𑀲𑀓𑁆𑀓𑀸 𑀅𑀦𑁆𑀢𑀭𑀸𑀬𑁄 𑀓𑀸𑀢𑀼𑀦𑁆𑀢𑀺. 𑀤𑁂𑀲𑀦𑀸𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀯𑀓𑁆𑀔𑀫𑀸𑀦𑀲𑁆𑀲 𑀲𑀓𑀮𑀲𑀼𑀢𑁆𑀢𑀲𑁆𑀲 𑀏𑀯𑀦𑁆𑀢𑀺 𑀦𑀺𑀤𑁆𑀤𑀺𑀲𑀦𑀢𑁄. 𑀲𑀸𑀯𑀓𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁂𑀦 𑀧𑀜𑁆𑀘𑀲𑀼 𑀞𑀸𑀦𑁂𑀲𑀼 𑀪𑀕𑀯𑀢𑀸 𑀏𑀢𑀤𑀕𑁆𑀕𑁂 𑀞𑀧𑀺𑀢𑁂𑀦 𑀫𑀬𑀸 𑀫𑀳𑀸𑀲𑀸𑀯𑀓𑁂𑀦 𑀲𑀼𑀢𑀁, 𑀢𑀜𑁆𑀘 𑀔𑁄 𑀫𑀬𑀸 𑀲𑀼𑀢𑀁, 𑀦 𑀅𑀦𑀼𑀲𑁆𑀲𑀼𑀢𑀺𑀓𑀁, 𑀦 𑀧𑀭𑀫𑁆𑀧𑀭𑀸𑀪𑀢𑀦𑁆𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀤𑀻𑀧𑀦𑀢𑁄. 𑀓𑀸𑀮𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 ‘‘𑀪𑀕𑀯𑀸’’𑀢𑀺 𑀧𑀤𑀲𑁆𑀲 𑀲𑀦𑁆𑀦𑀺𑀥𑀸𑀦𑁂 𑀧𑀬𑀼𑀢𑁆𑀢𑀲𑁆𑀲 𑀲𑀫𑀬𑀲𑀤𑁆𑀤𑀲𑁆𑀲 𑀓𑀸𑀮𑀲𑁆𑀲 𑀩𑀼𑀤𑁆𑀥𑀼𑀧𑁆𑀧𑀸𑀤𑀧𑁆𑀧𑀝𑀺𑀫𑀡𑁆𑀟𑀺𑀢𑀪𑀸𑀯𑀤𑀻𑀧𑀦𑀢𑁄 ¶ . 𑀩𑀼𑀤𑁆𑀥𑀼𑀧𑁆𑀧𑀸𑀤𑀧𑀭𑀫𑀸 𑀳𑀺 𑀓𑀸𑀮𑀲𑀫𑁆𑀧𑀤𑀸. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀓𑀧𑁆𑀧𑀓𑀲𑀸𑀬𑁂 𑀓𑀮𑀺𑀬𑀼𑀕𑁂, 𑀩𑀼𑀤𑁆𑀥𑀼𑀧𑁆𑀧𑀸𑀤𑁄 𑀅𑀳𑁄 𑀫𑀳𑀘𑁆𑀙𑀭𑀺𑀬𑀁;

𑀳𑀼𑀢𑀸𑀯𑀳𑀫𑀚𑁆𑀛𑁂 𑀚𑀸𑀢𑀁, 𑀲𑀫𑀼𑀤𑀺𑀢𑀫𑀓𑀭𑀦𑁆𑀤𑀫𑀭𑀯𑀺𑀦𑁆𑀤’’𑀦𑁆𑀢𑀺. (𑀤𑀻. 𑀦𑀺. 𑀝𑀻. 𑁧.𑁧; 𑀲𑀁. 𑀦𑀺. 𑀝𑀻. 𑁧.𑁧.𑁧 𑀤𑁂𑀯𑀢𑀸𑀲𑀁𑀬𑀼𑀢𑁆𑀢);

𑀪𑀕𑀯𑀸𑀢𑀺 𑀤𑁂𑀲𑀓𑀲𑀫𑁆𑀧𑀢𑁆𑀢𑀺𑀁 𑀦𑀺𑀤𑁆𑀤𑀺𑀲𑀢𑀺 𑀕𑀼𑀡𑀯𑀺𑀲𑀺𑀝𑁆𑀞𑀲𑀢𑁆𑀢𑀼𑀢𑁆𑀢𑀫𑀕𑀭𑀼𑀕𑀸𑀭𑀯𑀸𑀥𑀺𑀯𑀘𑀦𑀪𑀸𑀯𑀢𑁄.

𑀏𑀯𑀁𑀦𑀸𑀫𑀓𑁂 𑀦𑀕𑀭𑁂𑀢𑀺 𑀓𑀣𑀁 𑀧𑀦𑁂𑀢𑀁 𑀦𑀕𑀭𑀁 𑀏𑀯𑀁𑀦𑀸𑀫𑀓𑀁 𑀚𑀸𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂, 𑀬𑀣𑀸 𑀓𑀸𑀓𑀦𑁆𑀤𑀲𑁆𑀲 𑀇𑀲𑀺𑀦𑁄 𑀦𑀺𑀯𑀸𑀲𑀝𑁆𑀞𑀸𑀦𑁂 𑀫𑀸𑀧𑀺𑀢𑀸 𑀦𑀕𑀭𑀻 𑀓𑀸𑀓𑀦𑁆𑀤𑀻, 𑀫𑀸𑀓𑀦𑁆𑀤𑀲𑁆𑀲 𑀦𑀺𑀯𑀸𑀲𑀝𑁆𑀞𑀸𑀦𑁂 𑀫𑀸𑀧𑀺𑀢𑀸 𑀫𑀸𑀓𑀦𑁆𑀤𑀻, 𑀓𑀼𑀲𑀫𑁆𑀩𑀲𑁆𑀲 𑀦𑀺𑀯𑀸𑀲𑀝𑁆𑀞𑀸𑀦𑁂 𑀫𑀸𑀧𑀺𑀢𑀸 𑀓𑁄𑀲𑀫𑁆𑀩𑀻𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀲𑀯𑀢𑁆𑀣𑀲𑁆𑀲 𑀇𑀲𑀺𑀦𑁄 𑀦𑀺𑀯𑀸𑀲𑀝𑁆𑀞𑀸𑀦𑁂 𑀫𑀸𑀧𑀺𑀢𑀸 𑀦𑀕𑀭𑀻 𑀲𑀸𑀯𑀢𑁆𑀣𑀻𑀢𑀺 𑀯𑀼𑀘𑁆𑀘𑀢𑀺. 𑀏𑀯𑀁 𑀢𑀸𑀯 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀯𑀤𑀦𑁆𑀢𑀺. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀧𑀦 𑀪𑀡𑀦𑁆𑀢𑀺 𑁋 ‘‘𑀬𑀁 𑀓𑀺𑀜𑁆𑀘𑀺 𑀫𑀦𑀼𑀲𑁆𑀲𑀸𑀦𑀁 𑀉𑀧𑀪𑁄𑀕𑀧𑀭𑀺𑀪𑁄𑀕𑀁, 𑀲𑀩𑁆𑀩𑀫𑁂𑀢𑁆𑀣 𑀅𑀢𑁆𑀣𑀻’’𑀢𑀺 𑀲𑀸𑀯𑀢𑁆𑀣𑀺. 𑀲𑀢𑁆𑀣𑀲𑀫𑀸𑀬𑁄𑀕𑁂 𑀘 ‘𑀓𑀺𑀁 𑀪𑀡𑁆𑀟𑀫𑀢𑁆𑀣𑀻’𑀢𑀺 𑀧𑀼𑀘𑁆𑀙𑀺𑀢𑁂 ‘𑀲𑀩𑁆𑀩𑀫𑀢𑁆𑀣𑀻’𑀢𑀺 𑀯𑀘𑀦𑀫𑀼𑀧𑀸𑀤𑀸𑀬 𑀲𑀸𑀯𑀢𑁆𑀣𑀺.

‘‘𑀲𑀩𑁆𑀩𑀤𑀸 𑀲𑀩𑁆𑀩𑀽𑀧𑀓𑀭𑀡𑀁, 𑀲𑀸𑀯𑀢𑁆𑀣𑀺𑀬𑀁 𑀲𑀫𑁄𑀳𑀺𑀢𑀁;

𑀢𑀲𑁆𑀫𑀸 𑀲𑀩𑁆𑀩𑀫𑀼𑀧𑀸𑀤𑀸𑀬, 𑀲𑀸𑀯𑀢𑁆𑀣𑀻𑀢𑀺 𑀧𑀯𑀼𑀘𑁆𑀘𑀢𑀺. (𑀫. 𑀦𑀺. 𑀅𑀝𑁆𑀞. 𑁧.𑁧𑁪; 𑀔𑀼. 𑀧𑀸. 𑀅𑀝𑁆𑀞. 𑁫.𑀫𑀗𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸; 𑀉𑀤𑀸. 𑀅𑀝𑁆𑀞. 𑁫; 𑀧𑀝𑀺. 𑀫. 𑁨.𑁧.𑁧𑁮𑁪);

‘‘𑀓𑁄𑀲𑀮𑀸𑀦𑀁 𑀧𑀼𑀭𑀁 𑀭𑀫𑁆𑀫𑀁, 𑀤𑀲𑁆𑀲𑀦𑁂𑀬𑁆𑀬𑀁 𑀫𑀦𑁄𑀭𑀫𑀁;

𑀤𑀲𑀳𑀺 𑀲𑀤𑁆𑀤𑁂𑀳𑀺 𑀅𑀯𑀺𑀯𑀺𑀢𑁆𑀢𑀁, 𑀅𑀦𑁆𑀦𑀧𑀸𑀦𑀲𑀫𑀸𑀬𑀼𑀢𑀁.

‘‘𑀯𑀼𑀤𑁆𑀥𑀺𑀁 ¶ 𑀯𑁂𑀧𑀼𑀮𑁆𑀮𑀢𑀁 𑀧𑀢𑁆𑀢𑀁, 𑀇𑀤𑁆𑀥𑀁 𑀨𑀻𑀢𑀁 𑀫𑀦𑁄𑀭𑀫𑀁;

𑀆𑀴𑀓𑀫𑀦𑁆𑀤𑀸𑀯 𑀤𑁂𑀯𑀸𑀦𑀁, 𑀲𑀸𑀯𑀢𑁆𑀣𑀺𑀧𑀼𑀭𑀫𑀼𑀢𑁆𑀢𑀫’’𑀦𑁆𑀢𑀺. (𑀫. 𑀦𑀺. 𑀅𑀝𑁆𑀞. 𑁧.𑁧𑁪; 𑀔𑀼. 𑀧𑀸. 𑀅𑀝𑁆𑀞. 𑁫.𑀫𑀗𑁆𑀕𑀮𑀲𑀼𑀢𑁆𑀢𑀯𑀡𑁆𑀡𑀦𑀸);

𑀅𑀯𑀺𑀲𑁂𑀲𑁂𑀦𑀸𑀢𑀺 𑀦 𑀯𑀺𑀲𑁂𑀲𑁂𑀦, 𑀯𑀺𑀳𑀸𑀭𑀪𑀸𑀯𑀲𑀸𑀫𑀜𑁆𑀜𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁄…𑀧𑁂… 𑀯𑀺𑀳𑀸𑀭𑁂𑀲𑀽𑀢𑀺 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁄 𑀤𑀺𑀩𑁆𑀩𑀯𑀺𑀳𑀸𑀭𑁄 𑀩𑁆𑀭𑀳𑁆𑀫𑀯𑀺𑀳𑀸𑀭𑁄 𑀅𑀭𑀺𑀬𑀯𑀺𑀳𑀸𑀭𑁄𑀢𑀺 𑀏𑀢𑁂𑀲𑀼 𑀘𑀢𑀽𑀲𑀼 𑀯𑀺𑀳𑀸𑀭𑁂𑀲𑀼. 𑀲𑀫𑀗𑁆𑀕𑀺𑀧𑀭𑀺𑀤𑀻𑀧𑀦𑀦𑁆𑀢𑀺 𑀲𑀫𑀗𑁆𑀕𑀺𑀪𑀸𑀯𑀧𑀭𑀺𑀤𑀻𑀧𑀦𑀁. 𑀏𑀢𑀦𑁆𑀢𑀺 𑀯𑀺𑀳𑀭𑀢𑀻𑀢𑀺 𑀏𑀢𑀁 𑀧𑀤𑀁. 𑀢𑀣𑀸 𑀳𑀺 𑀢𑀁 ‘‘𑀇𑀥𑁂𑀓𑀘𑁆𑀘𑁄 𑀕𑀺𑀳𑀺𑀲𑀁𑀲𑀝𑁆𑀞𑁄 𑀯𑀺𑀳𑀭𑀢𑀺 𑀲𑀳𑀦𑀦𑁆𑀤𑀻 𑀲𑀳𑀲𑁄𑀓𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁪.𑁨𑁪𑁧) 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂 𑀆𑀕𑀢𑀁, ‘‘𑀬𑀲𑁆𑀫𑀺𑀁 𑀲𑀫𑀬𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 ¶ … 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 (𑀥. 𑀲. 𑁪𑁯𑁯; 𑀯𑀺𑀪. 𑁬𑁨𑁪) 𑀤𑀺𑀩𑁆𑀩𑀯𑀺𑀳𑀸𑀭𑁂, ‘‘𑀲𑁄 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁫𑁫𑁬; 𑁩.𑁩𑁦𑁮; 𑀫. 𑀦𑀺. 𑁧.𑁭𑁭, 𑁪𑁫𑁯, 𑁫𑁦𑁯; 𑁨.𑁩𑁦𑁯, 𑁩𑁧𑁫, 𑁪𑁫𑁧, 𑁪𑁭𑁧; 𑁩.𑁨𑁩𑁦, 𑀯𑀺𑀪. 𑁬𑁪𑁨, 𑁬𑁪𑁩) 𑀩𑁆𑀭𑀳𑁆𑀫𑀯𑀺𑀳𑀸𑀭𑁂, ‘‘𑀲𑁄 𑀔𑁄𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀲𑁆𑀲𑀸𑀬𑁂𑀯 𑀓𑀣𑀸𑀬 𑀧𑀭𑀺𑀬𑁄𑀲𑀸𑀦𑁂 𑀢𑀲𑁆𑀫𑀺𑀁𑀬𑁂𑀯 𑀧𑀼𑀭𑀺𑀫𑀲𑁆𑀫𑀺𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁂 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀫𑀺 𑀲𑀦𑁆𑀦𑀺𑀲𑀸𑀤𑁂𑀫𑀺 𑀏𑀓𑁄𑀤𑀺𑀁 𑀓𑀭𑁄𑀫𑀺, 𑀲𑀫𑀸𑀤𑀳𑀸𑀫𑀺, 𑀬𑁂𑀦 𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁮𑁭) 𑀅𑀭𑀺𑀬𑀯𑀺𑀳𑀸𑀭𑁂.

𑀢𑀢𑁆𑀣 𑀇𑀭𑀺𑀬𑀦𑀁 𑀧𑀯𑀢𑁆𑀢𑀦𑀁 𑀇𑀭𑀺𑀬𑀸, 𑀓𑀸𑀬𑀧𑁆𑀧𑀬𑁄𑀕𑁄. 𑀢𑀲𑁆𑀲𑀸 𑀧𑀯𑀢𑁆𑀢𑀦𑀽𑀧𑀸𑀬𑀪𑀸𑀯𑀢𑁄 𑀞𑀸𑀦𑀸𑀤𑀺 𑀇𑀭𑀺𑀬𑀸𑀧𑀣𑁄. 𑀞𑀸𑀦𑀲𑀫𑀗𑁆𑀕𑀻 𑀯𑀸 𑀳𑀺 𑀓𑀸𑀬𑁂𑀦 𑀓𑀺𑀜𑁆𑀘𑀺 𑀓𑀭𑁂𑀬𑁆𑀬 𑀕𑀫𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑀫𑀗𑁆𑀕𑀻 𑀯𑀸. 𑀅𑀣 𑀯𑀸 𑀇𑀭𑀺𑀬𑀢𑀺 𑀧𑀯𑀢𑁆𑀢𑀢𑀺 𑀏𑀢𑁂𑀦 𑀅𑀢𑁆𑀢𑀪𑀸𑀯𑁄, 𑀓𑀸𑀬𑀓𑀺𑀘𑁆𑀘𑀁 𑀯𑀸𑀢𑀺 𑀇𑀭𑀺𑀬𑀸, 𑀢𑀲𑁆𑀲𑀸 𑀧𑀯𑀢𑁆𑀢𑀺𑀬𑀸 𑀉𑀧𑀸𑀬𑀪𑀸𑀯𑀢𑁄 𑀧𑀣𑁄𑀢𑀺 𑀇𑀭𑀺𑀬𑀸𑀧𑀣𑁄, 𑀞𑀸𑀦𑀸𑀤𑀺 𑀏𑀯. 𑀲𑁄 𑀘 𑀅𑀢𑁆𑀣𑀢𑁄 𑀕𑀢𑀺𑀦𑀺𑀯𑀢𑁆𑀢𑀺𑀆𑀤𑀺𑀆𑀓𑀸𑀭𑁂𑀦 𑀧𑀯𑀢𑁆𑀢𑁄 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀧𑁆𑀧𑀩𑀦𑁆𑀥𑁄 𑀏𑀯. 𑀯𑀺𑀳𑀭𑀡𑀁, 𑀯𑀺𑀳𑀭𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀯𑀺𑀳𑀸𑀭𑁄. 𑀤𑀺𑀯𑀺 𑀪𑀯𑁄 𑀤𑀺𑀩𑁆𑀩𑁄, 𑀢𑀢𑁆𑀣 𑀩𑀳𑀼𑀮𑀧𑁆𑀧𑀯𑀢𑁆𑀢𑀺𑀬𑀸 𑀩𑁆𑀭𑀳𑁆𑀫𑀧𑀸𑀭𑀺𑀲𑀚𑁆𑀚𑀸𑀤𑀺𑀤𑁂𑀯𑀮𑁄𑀓𑁂 𑀪𑀯𑁄𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀬𑁄 𑀤𑀺𑀩𑁆𑀩𑀸𑀦𑀼𑀪𑀸𑀯𑁄, 𑀢𑀤𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀯𑀸 𑀤𑀺𑀩𑁆𑀩𑁄, 𑀅𑀪𑀺𑀜𑁆𑀜𑀸𑀪𑀺𑀦𑀻𑀳𑀸𑀭𑀯𑀲𑁂𑀦 𑀫𑀳𑀸𑀕𑀢𑀺𑀓𑀢𑁆𑀢𑀸 𑀯𑀸 𑀤𑀺𑀩𑁆𑀩𑁄, 𑀤𑀺𑀩𑁆𑀩𑁄 𑀘 𑀲𑁄 𑀯𑀺𑀳𑀸𑀭𑁄 𑀘𑀸𑀢𑀺 𑀤𑀺𑀩𑁆𑀩𑀯𑀺𑀳𑀸𑀭𑁄, 𑀘𑀢𑀲𑁆𑀲𑁄 𑀭𑀽𑀧𑀸𑀯𑀘𑀭𑀲𑀫𑀸𑀧𑀢𑁆𑀢𑀺𑀬𑁄. 𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑁄𑀧𑀺 𑀏𑀢𑁆𑀣𑁂𑀯 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀩𑁆𑀭𑀳𑁆𑀫𑀸𑀦𑀁, 𑀩𑁆𑀭𑀳𑁆𑀫𑀸𑀦𑁄 𑀯𑀸 𑀯𑀺𑀳𑀸𑀭𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀸, 𑀘𑀢𑀲𑁆𑀲𑁄 𑀅𑀧𑁆𑀧𑀫𑀜𑁆𑀜𑀸𑀬𑁄. 𑀅𑀭𑀺𑀬𑁄, 𑀅𑀭𑀺𑀬𑀸𑀦𑀁 𑀯𑀸 𑀯𑀺𑀳𑀸𑀭𑁄 𑀅𑀭𑀺𑀬𑀯𑀺𑀳𑀸𑀭𑁄, 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺. 𑀲𑁄 𑀳𑀺 𑀏𑀓𑀁 𑀇𑀭𑀺𑀬𑀸𑀧𑀣𑀩𑀸𑀥𑀦𑀦𑁆𑀢𑀺𑀆𑀤𑀺 𑀬𑀤𑀺𑀧𑀺 𑀪𑀕𑀯𑀸 𑀏𑀓𑁂𑀦𑀧𑀺 𑀇𑀭𑀺𑀬𑀸𑀧𑀣𑁂𑀦 𑀘𑀺𑀭𑀢𑀭𑀁 𑀓𑀸𑀮𑀁 𑀅𑀢𑁆𑀢𑀪𑀸𑀯𑀁 𑀧𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀢𑀣𑀸𑀧𑀺 𑀉𑀧𑀸𑀤𑀺𑀦𑁆𑀦𑀓𑀲𑀭𑀻𑀭𑀲𑁆𑀲 𑀅𑀬𑀁 𑀲𑀪𑀸𑀯𑁄𑀢𑀺 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀯𑀸 𑀪𑀕𑀯𑀸 𑀬𑀢𑁆𑀣 𑀓𑀢𑁆𑀣𑀘𑀺 𑀯𑀲𑀦𑁆𑀢𑁄 𑀯𑁂𑀦𑁂𑀬𑁆𑀬𑀸𑀦𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀦𑀸𑀦𑀸𑀲𑀫𑀸𑀧𑀢𑁆𑀢𑀻𑀳𑀺 ¶ 𑀘 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀦𑁆𑀢𑁄 𑀯𑀲𑀢𑀻𑀢𑀺 𑀲𑀢𑁆𑀢𑀸𑀦𑀁 𑀅𑀢𑁆𑀢𑀦𑁄 𑀘 𑀯𑀺𑀯𑀺𑀥𑀳𑀺𑀢𑀲𑀼𑀔𑀁 𑀳𑀭𑀢𑀺 𑀉𑀧𑀦𑁂𑀢𑀺 𑀉𑀧𑁆𑀧𑀸𑀤𑁂𑀢𑀺, 𑀢𑀲𑁆𑀫𑀸 𑀯𑀺𑀯𑀺𑀥𑀁 𑀳𑀭𑀢𑀻𑀢𑀺 𑀯𑀺𑀳𑀭𑀢𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀚𑁂𑀢𑀲𑁆𑀲 ¶ 𑀭𑀸𑀚𑀓𑀼𑀫𑀸𑀭𑀲𑁆𑀲𑀸𑀢𑀺 𑀏𑀢𑁆𑀣 𑀅𑀢𑁆𑀢𑀦𑁄 𑀧𑀘𑁆𑀘𑀢𑁆𑀣𑀺𑀓𑀚𑀦𑀁 𑀚𑀺𑀦𑀸𑀢𑀻𑀢𑀺 𑀚𑁂𑀢𑁄. 𑀲𑁄𑀢𑀲𑀤𑁆𑀤𑁄 𑀯𑀺𑀬 𑀳𑀺 𑀓𑀢𑁆𑀢𑀼𑀲𑀸𑀥𑀦𑁄 𑀚𑁂𑀢𑀲𑀤𑁆𑀤𑁄. 𑀅𑀣 𑀯𑀸 𑀭𑀜𑁆𑀜𑀸 𑀧𑀲𑁂𑀦𑀤𑀺𑀓𑁄𑀲𑀮𑁂𑀦 𑀅𑀢𑁆𑀢𑀦𑁄 𑀧𑀘𑁆𑀘𑀢𑁆𑀣𑀺𑀓𑀚𑀦𑁂 𑀚𑀺𑀢𑁂 𑀚𑀸𑀢𑁄𑀢𑀺 𑀚𑁂𑀢𑁄. 𑀭𑀜𑁆𑀜𑁄 𑀳𑀺 𑀚𑀬𑀁 𑀆𑀭𑁄𑀧𑁂𑀢𑁆𑀯𑀸 𑀓𑀼𑀫𑀸𑀭𑁄 𑀚𑀺𑀢𑀯𑀸𑀢𑀺 𑀚𑁂𑀢𑁄𑀢𑀺 𑀯𑀼𑀢𑁆𑀢𑁄. 𑀫𑀗𑁆𑀕𑀮𑀓𑀸𑀫𑀢𑀸𑀬 𑀯𑀸 𑀢𑀲𑁆𑀲 𑀏𑀯𑀁𑀦𑀸𑀫𑀫𑁂𑀯 𑀓𑀢𑀦𑁆𑀢𑀺 𑀚𑁂𑀢𑁄. 𑀫𑀗𑁆𑀕𑀮𑀓𑀸𑀫𑀢𑀸𑀬 𑀳𑀺 𑀚𑁂𑀬𑁆𑀬𑁄𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑁂 𑀚𑁂𑀢𑁄𑀢𑀺 𑀯𑀼𑀢𑁆𑀢𑀁. 𑀯𑀺𑀢𑁆𑀣𑀸𑀭𑁄 𑀧𑀦𑀸𑀢𑀺𑀆𑀤𑀺𑀦𑀸 ‘‘𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂’’𑀢𑀺 𑀏𑀢𑁆𑀣 𑀲𑀼𑀤𑀢𑁆𑀢𑁄 𑀦𑀸𑀫 𑀲𑁄, 𑀕𑀳𑀧𑀢𑀺, 𑀫𑀸𑀢𑀸𑀧𑀺𑀢𑀽𑀳𑀺 𑀓𑀢𑀦𑀸𑀫𑀯𑀲𑁂𑀦, 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀢𑀸𑀬 𑀧𑀦 𑀯𑀺𑀕𑀢𑀫𑀘𑁆𑀙𑁂𑀭𑀢𑀸𑀬 𑀓𑀭𑀼𑀡𑀸𑀤𑀺𑀕𑀼𑀡𑀲𑀫𑀗𑁆𑀕𑀺𑀢𑀸𑀬 𑀘 𑀦𑀺𑀘𑁆𑀘𑀓𑀸𑀮𑀁 𑀅𑀦𑀸𑀣𑀸𑀦𑀁 𑀧𑀺𑀡𑁆𑀟𑀫𑀤𑀸𑀲𑀺. 𑀢𑁂𑀦 𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑀢𑀺 𑀲𑀗𑁆𑀔𑀁 𑀕𑀢𑁄. 𑀆𑀭𑀫𑀦𑁆𑀢𑀺 𑀏𑀢𑁆𑀣 𑀧𑀸𑀡𑀺𑀦𑁄, 𑀯𑀺𑀲𑁂𑀲𑁂𑀦 𑀯𑀸 𑀧𑀩𑁆𑀩𑀚𑀺𑀢𑀸𑀢𑀺 𑀆𑀭𑀸𑀫𑁄, 𑀢𑀲𑁆𑀲 𑀧𑀼𑀧𑁆𑀨𑀨𑀮𑀸𑀤𑀺𑀲𑁄𑀪𑀸𑀬 𑀦𑀸𑀢𑀺𑀤𑀽𑀭𑀦𑀘𑁆𑀘𑀸𑀲𑀦𑁆𑀦𑀢𑀸𑀤𑀺𑀧𑀜𑁆𑀘𑀯𑀺𑀥𑀲𑁂𑀦𑀸𑀲𑀦𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀘 𑀢𑀢𑁄 𑀢𑀢𑁄 𑀆𑀕𑀫𑁆𑀫 𑀭𑀫𑀦𑁆𑀢𑀺 𑀅𑀪𑀺𑀭𑀫𑀦𑁆𑀢𑀺, 𑀅𑀦𑀼𑀓𑁆𑀓𑀡𑁆𑀞𑀺𑀢𑀸 𑀳𑀼𑀢𑁆𑀯𑀸 𑀦𑀺𑀯𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀯𑀸 𑀲𑀫𑁆𑀧𑀢𑁆𑀢𑀺𑀬𑀸 𑀢𑀢𑁆𑀣 𑀢𑀢𑁆𑀣 𑀕𑀢𑁂𑀧𑀺 𑀅𑀢𑁆𑀢𑀦𑁄 𑀅𑀩𑁆𑀪𑀦𑁆𑀢𑀭𑀁𑀬𑁂𑀯 𑀆𑀦𑁂𑀢𑁆𑀯𑀸 𑀭𑀫𑁂𑀢𑀻𑀢𑀺 𑀆𑀭𑀸𑀫𑁄. 𑀲𑁄 𑀳𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁂𑀦 𑀕𑀳𑀧𑀢𑀺𑀦𑀸 𑀚𑁂𑀢𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀳𑀢𑁆𑀣𑀢𑁄 𑀅𑀝𑁆𑀞𑀸𑀭𑀲𑀳𑀺𑀭𑀜𑁆𑀜𑀓𑁄𑀝𑀻𑀳𑀺 𑀲𑀦𑁆𑀣𑀸𑀭𑁂𑀦 𑀓𑀺𑀡𑀺𑀢𑁆𑀯𑀸 𑀅𑀝𑁆𑀞𑀸𑀭𑀲𑀳𑀺𑀭𑀜𑁆𑀜𑀓𑁄𑀝𑀻𑀳𑀺 𑀲𑁂𑀦𑀸𑀲𑀦𑀸𑀦𑀺 𑀓𑀸𑀭𑀸𑀧𑁂𑀢𑁆𑀯𑀸 𑀅𑀝𑁆𑀞𑀸𑀭𑀲𑀳𑀺𑀭𑀜𑁆𑀜𑀓𑁄𑀝𑀻𑀳𑀺 𑀯𑀺𑀳𑀸𑀭𑀫𑀳𑀁 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀏𑀯𑀁 𑀘𑀢𑀼𑀧𑀜𑁆𑀜𑀸𑀲𑀳𑀺𑀭𑀜𑁆𑀜𑀓𑁄𑀝𑀺𑀧𑀭𑀺𑀘𑁆𑀘𑀸𑀕𑁂𑀦 𑀩𑀼𑀤𑁆𑀥𑀧𑁆𑀧𑀫𑀼𑀔𑀲𑁆𑀲 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀦𑀺𑀬𑁆𑀬𑀸𑀢𑀺𑀢𑁄, 𑀢𑀲𑁆𑀫𑀸 ‘‘𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺 𑀇𑀫𑀫𑀢𑁆𑀣𑀁 𑀦𑀺𑀤𑀲𑁆𑀲𑁂𑀢𑀺.

𑀢𑀢𑁆𑀣𑀸𑀢𑀺 ‘‘𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂’’𑀢𑀺 𑀬𑀁 𑀯𑀼𑀢𑁆𑀢𑀁 𑀯𑀸𑀓𑁆𑀬𑀁, 𑀢𑀢𑁆𑀣. 𑀲𑀺𑀬𑀸𑀢𑀺 𑀓𑀲𑁆𑀲𑀘𑀺 𑀏𑀯𑀁 𑀧𑀭𑀺𑀯𑀺𑀢𑀓𑁆𑀓𑁄 𑀲𑀺𑀬𑀸, 𑀯𑀓𑁆𑀔𑀫𑀸𑀦𑀸𑀓𑀸𑀭𑁂𑀦 𑀓𑀤𑀸𑀘𑀺 𑀘𑁄𑀤𑁂𑀬𑁆𑀬 𑀯𑀸𑀢𑀺 𑀅𑀢𑁆𑀣𑁄. 𑀅𑀣 𑀢𑀢𑁆𑀣 𑀯𑀺𑀳𑀭𑀢𑀻𑀢𑀺 𑀬𑀤𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂 𑀯𑀺𑀳𑀭𑀢𑀺. 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀦𑀸𑀦𑀸𑀞𑀸𑀦𑀪𑀽𑀢𑀢𑁆𑀢𑀸 𑀲𑀸𑀯𑀢𑁆𑀣𑀺𑀚𑁂𑀢𑀯𑀦𑀸𑀦𑀁, ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀸𑀦𑀺 𑀘𑁄𑀤𑀓𑁄 𑀢𑀫𑁂𑀯 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 ‘‘𑀦 𑀳𑀺 𑀲𑀓𑁆𑀓𑀸’’𑀢𑀺𑀆𑀤𑀺𑀦𑀸 𑀯𑀺𑀯𑀭𑀢𑀺. 𑀇𑀢𑀭𑁄 𑀲𑀩𑁆𑀩𑀫𑁂𑀢𑀁 𑀅𑀯𑀺𑀧𑀭𑀻𑀢𑀁 𑀅𑀢𑁆𑀣𑀁 𑀅𑀚𑀸𑀦𑀦𑁆𑀢𑁂𑀦 𑀢𑀬𑀸 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀢𑀦𑁆𑀢𑀺 ‘‘𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂’’𑀢𑀺 𑀏𑀢𑀁 𑀯𑀘𑀦𑀁. 𑀏𑀯𑀦𑁆𑀢𑀺 ‘‘𑀬𑀤𑀺 𑀢𑀸𑀯 𑀪𑀕𑀯𑀸’’𑀢𑀺𑀆𑀤𑀺𑀦𑀸 ¶ 𑀬𑀁 𑀢𑀁 𑀪𑀯𑀢𑀸 𑀘𑁄𑀤𑀺𑀢𑀁, 𑀢𑀁 𑀅𑀢𑁆𑀣𑀢𑁄 𑀏𑀯𑀁 𑀦 𑀔𑁄 𑀧𑀦 𑀤𑀝𑁆𑀞𑀩𑁆𑀩𑀁, 𑀦 𑀉𑀪𑀬𑀢𑁆𑀣 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀯𑀺𑀳𑀸𑀭𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀅𑀢𑁆𑀢𑀦𑀸 𑀬𑀣𑀸𑀥𑀺𑀧𑁆𑀧𑁂𑀢𑀁 𑀅𑀯𑀺𑀧𑀭𑀻𑀢𑀫𑀢𑁆𑀣𑀁, 𑀢𑀲𑁆𑀲 𑀘 𑀧𑀝𑀺𑀓𑀘𑁆𑀘𑁂𑀯 𑀯𑀼𑀢𑁆𑀢𑀪𑀸𑀯𑀁, 𑀢𑁂𑀦 𑀘 𑀅𑀧𑁆𑀧𑀝𑀺𑀯𑀺𑀤𑁆𑀥𑀢𑀁 𑀧𑀓𑀸𑀲𑁂𑀦𑁆𑀢𑁄 ‘‘𑀦𑀦𑀼 𑀅𑀯𑁄𑀘𑀼𑀫𑁆𑀳…𑀧𑁂… 𑀚𑁂𑀢𑀯𑀦𑁂’’𑀢𑀺 𑀆𑀳. 𑀏𑀯𑀫𑁆𑀧𑀺 ¶ ‘‘𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂 𑀯𑀺𑀳𑀭𑀢𑀺’’𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀁, 𑀦 ‘‘𑀲𑀸𑀯𑀢𑁆𑀣𑀺𑀬’’𑀦𑁆𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 𑁋 ‘‘𑀕𑁄𑀘𑀭𑀕𑀸𑀫𑀦𑀺𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺𑀆𑀤𑀺.

𑀅𑀯𑀲𑁆𑀲𑀜𑁆𑀘𑁂𑀢𑁆𑀣 𑀕𑁄𑀘𑀭𑀕𑀸𑀫𑀓𑀺𑀢𑁆𑀢𑀦𑀁 𑀓𑀢𑁆𑀢𑀩𑁆𑀩𑀁. 𑀢𑀣𑀸 𑀳𑀺 𑀢𑀁 𑀬𑀣𑀸 𑀚𑁂𑀢𑀯𑀦𑀸𑀤𑀺𑀓𑀺𑀢𑁆𑀢𑀦𑀁 𑀧𑀩𑁆𑀩𑀚𑀺𑀢𑀸𑀦𑀼𑀕𑁆𑀕𑀳𑀓𑀭𑀡𑀸𑀤𑀺𑀅𑀦𑁂𑀓𑀧𑁆𑀧𑀬𑁄𑀚𑀦𑀁, 𑀏𑀯𑀁 𑀕𑁄𑀘𑀭𑀕𑀸𑀫𑀓𑀺𑀢𑁆𑀢𑀦𑀫𑁆𑀧𑀺 𑀕𑀳𑀝𑁆𑀞𑀸𑀦𑀼𑀕𑁆𑀕𑀳𑀓𑀭𑀡𑀸𑀤𑀺𑀯𑀺𑀯𑀺𑀥𑀧𑀬𑁄𑀚𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀸𑀯𑀢𑁆𑀣𑀺𑀯𑀘𑀦𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀘𑁆𑀘𑀬𑀕𑁆𑀕𑀳𑀡𑁂𑀦 𑀉𑀧𑀲𑀗𑁆𑀓𑀫𑀧𑀬𑀺𑀭𑀼𑀧𑀸𑀲𑀦𑀸𑀦𑀁 𑀑𑀓𑀸𑀲𑀤𑀸𑀦𑁂𑀦 𑀥𑀫𑁆𑀫𑀤𑁂𑀲𑀦𑀸𑀬 𑀲𑀭𑀡𑁂𑀲𑀼 𑀲𑀻𑀮𑁂𑀲𑀼 𑀘 𑀧𑀢𑀺𑀝𑁆𑀞𑀸𑀧𑀦𑁂𑀦 𑀬𑀣𑀽𑀧𑀦𑀺𑀲𑁆𑀲𑀬𑀁 𑀉𑀧𑀭𑀺𑀯𑀺𑀲𑁂𑀲𑀸𑀥𑀺𑀕𑀫𑀸𑀯𑀳𑀦𑁂𑀦 𑀘 𑀕𑀳𑀝𑁆𑀞𑀸𑀦𑀼𑀕𑁆𑀕𑀳𑀓𑀭𑀡𑀁, 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀦𑀁 𑀓𑀫𑁆𑀫𑀝𑁆𑀞𑀸𑀦𑀸𑀦𑀼𑀬𑁄𑀕𑀲𑁆𑀲 𑀘 𑀅𑀦𑀼𑀭𑀽𑀧𑀯𑀲𑀦𑀝𑁆𑀞𑀸𑀦𑀧𑀭𑀺𑀕𑁆𑀕𑀳𑁂𑀦𑁂𑀢𑁆𑀣 𑀧𑀩𑁆𑀩𑀚𑀺𑀢𑀸𑀦𑀼𑀕𑁆𑀕𑀳𑀓𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀭𑀼𑀡𑀸𑀬 𑀉𑀧𑀕𑀫𑀦𑀁, 𑀦 𑀮𑀸𑀪𑀸𑀤𑀺𑀦𑀺𑀫𑀺𑀢𑁆𑀢𑀁. 𑀧𑀜𑁆𑀜𑀸𑀬 𑀅𑀧𑀕𑀫𑀦𑀁, 𑀦 𑀯𑀺𑀭𑁄𑀥𑀸𑀤𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀉𑀧𑀕𑀫𑀦𑀸𑀧𑀕𑀫𑀦𑀸𑀦𑀁 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑀁 𑀯𑀺𑀪𑀸𑀯𑁂𑀢𑀺. 𑀥𑀫𑁆𑀫𑀺𑀓𑀲𑀼𑀔𑀁 𑀦𑀸𑀫 𑀅𑀦𑀯𑀚𑁆𑀚𑀲𑀼𑀔𑀁. 𑀤𑁂𑀯𑀢𑀸𑀦𑀁 𑀉𑀧𑀓𑀸𑀭𑀩𑀳𑀼𑀮𑀢𑀸 𑀚𑀦𑀯𑀺𑀯𑀺𑀢𑁆𑀢𑀢𑀸𑀬. 𑀧𑀘𑀼𑀭𑀚𑀦𑀯𑀺𑀯𑀺𑀢𑁆𑀢𑀜𑁆𑀳𑀺 𑀞𑀸𑀦𑀁 𑀤𑁂𑀯𑀸 𑀉𑀧𑀲𑀗𑁆𑀓𑀫𑀺𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺. 𑀢𑀤𑀢𑁆𑀣𑀧𑀭𑀺𑀦𑀺𑀧𑁆𑀨𑀸𑀤𑀦𑀦𑁆𑀢𑀺 𑀮𑁄𑀓𑀢𑁆𑀣𑀦𑀺𑀧𑁆𑀨𑀸𑀤𑀦𑀁, 𑀩𑀼𑀤𑁆𑀥𑀓𑀺𑀘𑁆𑀘𑀲𑀫𑁆𑀧𑀸𑀤𑀦𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀫𑀸𑀤𑀺𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀸𑀯𑀢𑁆𑀣𑀺𑀓𑀺𑀢𑁆𑀢𑀦𑁂𑀦 𑀭𑀽𑀧𑀓𑀸𑀬𑀲𑁆𑀲 𑀅𑀦𑀼𑀕𑁆𑀕𑀡𑁆𑀳𑀦𑀁 𑀤𑀲𑁆𑀲𑁂𑀢𑀺, 𑀚𑁂𑀢𑀯𑀦𑀸𑀤𑀺𑀓𑀺𑀢𑁆𑀢𑀦𑁂𑀦 𑀥𑀫𑁆𑀫𑀓𑀸𑀬𑀲𑁆𑀲. 𑀢𑀣𑀸 𑀧𑀼𑀭𑀺𑀫𑁂𑀦 𑀧𑀭𑀸𑀥𑀻𑀦𑀓𑀺𑀭𑀺𑀬𑀸𑀓𑀭𑀡𑀁, 𑀤𑀼𑀢𑀺𑀬𑁂𑀦 𑀅𑀢𑁆𑀢𑀸𑀥𑀻𑀦𑀓𑀺𑀭𑀺𑀬𑀸𑀓𑀭𑀡𑀁. 𑀧𑀼𑀭𑀺𑀫𑁂𑀦 𑀯𑀸 𑀓𑀭𑀼𑀡𑀸𑀓𑀺𑀘𑁆𑀘𑀁, 𑀇𑀢𑀭𑁂𑀦 𑀧𑀜𑁆𑀜𑀸𑀓𑀺𑀘𑁆𑀘𑀁. 𑀧𑀼𑀭𑀺𑀫𑁂𑀦 𑀘𑀲𑁆𑀲 𑀧𑀭𑀫𑀸𑀬 𑀅𑀦𑀼𑀓𑀫𑁆𑀧𑀸𑀬 𑀲𑀫𑀦𑁆𑀦𑀸𑀕𑀫𑀁, 𑀧𑀘𑁆𑀙𑀺𑀫𑁂𑀦 𑀧𑀭𑀫𑀸𑀬 𑀉𑀧𑁂𑀓𑁆𑀔𑀸𑀬 𑀲𑀫𑀦𑁆𑀦𑀸𑀕𑀫𑀁 𑀤𑀻𑀧𑁂𑀢𑀺. 𑀪𑀕𑀯𑀸 𑀳𑀺 𑀲𑀩𑁆𑀩𑀲𑀢𑁆𑀢𑁂 𑀧𑀭𑀫𑀸𑀬 𑀅𑀦𑀼𑀓𑀫𑁆𑀧𑀸𑀬 𑀅𑀦𑀼𑀓𑀫𑁆𑀧𑀢𑀺, 𑀦 𑀘 𑀢𑀢𑁆𑀣 𑀲𑀺𑀦𑁂𑀳𑀤𑁄𑀲𑀸𑀦𑀼𑀧𑀢𑀺𑀢𑁄 𑀧𑀭𑀫𑀼𑀧𑁂𑀓𑁆𑀔𑀓𑀪𑀸𑀯𑀢𑁄. 𑀉𑀧𑁂𑀓𑁆𑀔𑀓𑁄 𑀘 𑀦 𑀧𑀭𑀳𑀺𑀢𑀲𑀼𑀔𑀓𑀭𑀡𑁂 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀫𑀳𑀸𑀓𑀸𑀭𑀼𑀡𑀺𑀓𑀪𑀸𑀯𑀢𑁄. 𑀢𑀲𑁆𑀲 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀮𑁄𑀓𑀦𑀸𑀣𑀢𑀸, 𑀉𑀧𑁂𑀓𑁆𑀔𑀓𑀢𑀸𑀬 𑀅𑀢𑁆𑀢𑀦𑀸𑀣𑀢𑀸.

𑀢𑀣𑀸 𑀳𑁂𑀲 𑀩𑁄𑀥𑀺𑀲𑀢𑁆𑀢𑀪𑀽𑀢𑁄 𑀫𑀳𑀸𑀓𑀭𑀼𑀡𑀸𑀬 𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀲𑀓𑀮𑀮𑁄𑀓𑀳𑀺𑀢𑀸𑀬 𑀉𑀲𑁆𑀲𑀼𑀓𑁆𑀓𑀫𑀸𑀧𑀦𑁆𑀦𑁄 𑀫𑀳𑀸𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 ¶ 𑀢𑀤𑀢𑁆𑀣𑀦𑀺𑀧𑁆𑀨𑀸𑀤𑀦𑀢𑁆𑀣𑀁 𑀧𑀼𑀜𑁆𑀜𑀜𑀸𑀡𑀲𑀫𑁆𑀪𑀸𑀭𑁂 𑀲𑀫𑁆𑀧𑀸𑀤𑁂𑀦𑁆𑀢𑁄 𑀅𑀧𑀭𑀺𑀫𑀺𑀢𑀁 𑀓𑀸𑀮𑀁 𑀅𑀦𑀧𑁆𑀧𑀓𑀁 𑀤𑀼𑀓𑁆𑀔𑀫𑀦𑀼𑀪𑁄𑀲𑀺, 𑀉𑀧𑁂𑀓𑁆𑀔𑀓𑀢𑀸𑀬 𑀲𑀫𑁆𑀫𑀸 𑀧𑀢𑀺𑀢𑁂𑀳𑀺 𑀤𑀼𑀓𑁆𑀔𑁂𑀳𑀺 𑀦 𑀯𑀺𑀓𑀫𑁆𑀧𑀺𑀢𑀢𑀸. 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀲𑀁𑀲𑀸𑀭𑀸𑀪𑀺𑀫𑀼𑀔𑀢𑀸, 𑀉𑀧𑁂𑀓𑁆𑀔𑀓𑀢𑀸𑀬 𑀢𑀢𑁄 𑀦𑀺𑀩𑁆𑀩𑀺𑀦𑁆𑀤𑀦𑀸. 𑀢𑀣𑀸 𑀉𑀧𑁂𑀓𑁆𑀔𑀓𑀢𑀸𑀬 𑀦𑀺𑀩𑁆𑀩𑀸𑀦𑀸𑀪𑀺𑀫𑀼𑀔𑀢𑀸, 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀢𑀤𑀥𑀺𑀕𑀫𑁄. 𑀢𑀣𑀸 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀧𑀭𑁂𑀲𑀁 𑀅𑀳𑀺𑀁𑀲𑀸𑀧𑀦𑀁, 𑀉𑀧𑁂𑀓𑁆𑀔𑀓𑀢𑀸𑀬 𑀲𑀬𑀁 𑀧𑀭𑁂𑀳𑀺 𑀅𑀪𑀸𑀬𑀦𑀁. 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀧𑀭𑀁 𑀭𑀓𑁆𑀔𑀢𑁄 𑀅𑀢𑁆𑀢𑀦𑁄 𑀭𑀓𑁆𑀔𑀡𑀁, 𑀉𑀧𑁂𑀓𑁆𑀔𑀓𑀢𑀸𑀬 𑀅𑀢𑁆𑀢𑀸𑀦𑀁 𑀭𑀓𑁆𑀔𑀢𑁄 𑀧𑀭𑁂𑀲𑀁 𑀭𑀓𑁆𑀔𑀡𑀁. 𑀢𑁂𑀦𑀲𑁆𑀲 𑀅𑀢𑁆𑀢𑀳𑀺𑀢𑀸𑀬 𑀧𑀝𑀺𑀧𑀦𑁆𑀦𑀸𑀤𑀻𑀲𑀼 𑀘𑀢𑀼𑀢𑁆𑀣𑀧𑀼𑀕𑁆𑀕𑀮𑀪𑀸𑀯𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀢𑀣𑀸 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀲𑀘𑁆𑀘𑀸𑀥𑀺𑀝𑁆𑀞𑀸𑀦𑀲𑁆𑀲 𑀘 𑀘𑀸𑀕𑀸𑀥𑀺𑀝𑁆𑀞𑀸𑀦𑀲𑁆𑀲 𑀘 𑀧𑀸𑀭𑀺𑀧𑀽𑀭𑀻, 𑀉𑀧𑁂𑀓𑁆𑀔𑀓𑀢𑀸𑀬 𑀉𑀧𑀲𑀫𑀸𑀥𑀺𑀝𑁆𑀞𑀸𑀦𑀲𑁆𑀲 𑀘 𑀧𑀜𑁆𑀜𑀸𑀥𑀺𑀝𑁆𑀞𑀸𑀦𑀲𑁆𑀲 𑀘 𑀧𑀸𑀭𑀺𑀧𑀽𑀭𑀻 ¶ . 𑀏𑀯𑀁 𑀧𑀼𑀭𑀺𑀲𑀼𑀤𑁆𑀥𑀸𑀲𑀬𑀧𑁆𑀧𑀬𑁄𑀕𑀲𑁆𑀲 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀮𑁄𑀓𑀳𑀺𑀢𑀢𑁆𑀣𑀫𑁂𑀯 𑀭𑀚𑁆𑀚𑀲𑀫𑁆𑀧𑀤𑀸𑀤𑀺𑀪𑀯𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑀕𑀫𑀦𑀁, 𑀉𑀧𑁂𑀓𑁆𑀔𑀓𑀢𑀸𑀬 𑀢𑀺𑀡𑀸𑀬𑀧𑀺 𑀅𑀫𑀜𑁆𑀜𑀫𑀸𑀦𑀲𑁆𑀲 𑀢𑀢𑁄 𑀅𑀧𑀕𑀫𑀦𑀁. 𑀇𑀢𑀺 𑀲𑀼𑀯𑀺𑀲𑀼𑀤𑁆𑀥𑀉𑀧𑀕𑀫𑀸𑀧𑀕𑀫𑀲𑁆𑀲 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀮𑁄𑀓𑀳𑀺𑀢𑀢𑁆𑀣𑀫𑁂𑀯 𑀤𑀸𑀦𑀯𑀲𑁂𑀦 𑀲𑀫𑁆𑀧𑀢𑁆𑀢𑀻𑀦𑀁 𑀧𑀭𑀺𑀘𑁆𑀘𑀚𑀦𑀸, 𑀉𑀧𑁂𑀓𑁆𑀔𑀓𑀢𑀸𑀬 𑀘𑀲𑁆𑀲 𑀨𑀮𑀲𑁆𑀲 𑀅𑀢𑁆𑀢𑀦𑁄 𑀅𑀧𑀘𑁆𑀘𑀸𑀲𑀻𑀲𑀦𑀸. 𑀏𑀯𑀁 𑀲𑀫𑀼𑀤𑀸𑀕𑀫𑀦𑀢𑁄 𑀧𑀝𑁆𑀞𑀸𑀬 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀕𑀼𑀡𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀧𑀭𑁂𑀲𑀁 𑀳𑀺𑀢𑀲𑀼𑀔𑀢𑁆𑀣𑀁 𑀅𑀢𑀺𑀤𑀼𑀓𑁆𑀓𑀭𑀓𑀸𑀭𑀺𑀢𑀸, 𑀉𑀧𑁂𑀓𑁆𑀔𑀓𑀢𑀸𑀬 𑀓𑀸𑀬𑀫𑁆𑀧𑀺 𑀅𑀦𑀮𑀗𑁆𑀓𑀸𑀭𑀺𑀢𑀸.

𑀢𑀣𑀸 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀘𑀭𑀺𑀫𑀢𑁆𑀢𑀪𑀸𑀯𑁂 𑀚𑀺𑀡𑁆𑀡𑀸𑀢𑀼𑀭𑀫𑀢𑀤𑀲𑁆𑀲𑀦𑁂𑀦 𑀲𑀜𑁆𑀚𑀸𑀢𑀲𑀁𑀯𑁂𑀕𑁄, 𑀉𑀧𑁂𑀓𑁆𑀔𑀓𑀢𑀸𑀬 𑀉𑀴𑀸𑀭𑁂𑀲𑀼 𑀤𑁂𑀯𑀪𑁄𑀕𑀲𑀤𑀺𑀲𑁂𑀲𑀼 𑀪𑁄𑀕𑁂𑀲𑀼 𑀦𑀺𑀭𑀧𑁂𑀓𑁆𑀔𑁄 𑀫𑀳𑀸𑀪𑀺𑀦𑀺𑀓𑁆𑀔𑀫𑀦𑀁 𑀦𑀺𑀓𑁆𑀔𑀫𑀺. 𑀢𑀣𑀸 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 ‘‘𑀓𑀺𑀘𑁆𑀙𑀁 𑀯𑀢𑀸𑀬𑀁 𑀮𑁄𑀓𑁄 𑀆𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁨.𑁫𑁭; 𑀲𑀁. 𑀦𑀺. 𑁨.𑁪, 𑁧𑁦) 𑀓𑀭𑀼𑀡𑀸𑀫𑀼𑀔𑁂𑀦𑁂𑀯 𑀯𑀺𑀧𑀲𑁆𑀲𑀦𑀸𑀭𑀫𑁆𑀪𑁄, 𑀉𑀧𑁂𑀓𑁆𑀔𑀓𑀢𑀸𑀬 𑀩𑀼𑀤𑁆𑀥𑀪𑀽𑀢𑀲𑁆𑀲 𑀲𑀢𑁆𑀢 𑀲𑀢𑁆𑀢𑀸𑀳𑀸𑀦𑀺 𑀯𑀺𑀯𑁂𑀓𑀲𑀼𑀔𑁂𑀦𑁂𑀯 𑀯𑀻𑀢𑀺𑀦𑀸𑀫𑀦𑀁. 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀥𑀫𑁆𑀫𑀕𑀫𑁆𑀪𑀻𑀭𑀢𑀁 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 𑀥𑀫𑁆𑀫𑀤𑁂𑀲𑀦𑀸𑀬 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀦𑀁 𑀆𑀧𑀚𑁆𑀚𑀺𑀢𑁆𑀯𑀸𑀧𑀺 𑀫𑀳𑀸𑀩𑁆𑀭𑀳𑁆𑀫𑀼𑀦𑁄 𑀅𑀚𑁆𑀛𑁂𑀲𑀦𑀸𑀧𑀤𑁂𑀲𑁂𑀦 𑀑𑀓𑀸𑀲𑀓𑀭𑀡𑀁, 𑀉𑀧𑁂𑀓𑁆𑀔𑀓𑀢𑀸𑀬 𑀧𑀜𑁆𑀘𑀯𑀕𑁆𑀕𑀺𑀬𑀸𑀤𑀺𑀯𑁂𑀦𑁂𑀬𑁆𑀬𑀸𑀦𑀁 𑀅𑀦𑀦𑀼𑀭𑀽𑀧𑀲𑀫𑀼𑀤𑀸𑀘𑀸𑀭𑁂𑀧𑀺 𑀅𑀦𑀜𑁆𑀜𑀣𑀸𑀪𑀸𑀯𑁄. 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀓𑀢𑁆𑀣𑀘𑀺 𑀧𑀝𑀺𑀖𑀸𑀢𑀸𑀪𑀸𑀯𑁂𑀦𑀲𑁆𑀲 𑀲𑀩𑁆𑀩𑀢𑁆𑀣 𑀅𑀫𑀺𑀢𑁆𑀢𑀲𑀜𑁆𑀜𑀸𑀪𑀸𑀯𑁄, 𑀉𑀧𑁂𑀓𑁆𑀔𑀓𑀢𑀸𑀬 𑀓𑀢𑁆𑀣𑀘𑀺𑀧𑀺 𑀅𑀦𑀼𑀭𑁄𑀥𑀸𑀪𑀸𑀯𑁂𑀦 𑀲𑀩𑁆𑀩𑀢𑁆𑀣 𑀲𑀺𑀦𑁂𑀳𑀲𑀦𑁆𑀣𑀯𑀸𑀪𑀸𑀯𑁄. 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀧𑀭𑁂𑀲𑀁 𑀧𑀲𑀸𑀤𑀦𑀸, 𑀉𑀧𑁂𑀓𑁆𑀔𑀓𑀢𑀸𑀬 ¶ 𑀧𑀲𑀦𑁆𑀦𑀸𑀓𑀸𑀭𑁂𑀳𑀺 𑀦 𑀯𑀺𑀓𑀫𑁆𑀧𑀦𑀸. 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀥𑀫𑁆𑀫𑀸𑀦𑀼𑀭𑀸𑀕𑀸𑀪𑀸𑀯𑁂𑀦 𑀢𑀢𑁆𑀣 𑀆𑀘𑀭𑀺𑀬𑀫𑀼𑀝𑁆𑀞𑀺𑀅𑀪𑀸𑀯𑁄, 𑀉𑀧𑁂𑀓𑁆𑀔𑀓𑀢𑀸𑀬 𑀲𑀸𑀯𑀓𑀸𑀦𑀼𑀭𑀸𑀕𑀸𑀪𑀸𑀯𑁂𑀦 𑀧𑀭𑀺𑀯𑀸𑀭𑀧𑀭𑀺𑀓𑀫𑁆𑀫𑀢𑀸𑀪𑀸𑀯𑁄. 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀧𑀭𑁂𑀳𑀺 𑀲𑀁𑀲𑀕𑁆𑀕𑀫𑀼𑀧𑀕𑀘𑁆𑀙𑀢𑁄𑀧𑀺 𑀉𑀧𑁂𑀓𑁆𑀔𑀓𑀢𑀸𑀬 𑀦 𑀢𑀢𑁆𑀣 𑀅𑀪𑀺𑀭𑀢𑀺. 𑀫𑀳𑀸𑀓𑀸𑀭𑀼𑀡𑀺𑀓𑀢𑀸𑀬 𑀕𑀸𑀫𑀸𑀤𑀻𑀦𑀁 𑀆𑀲𑀦𑁆𑀦𑀝𑁆𑀞𑀸𑀦𑁂 𑀯𑀲𑀢𑁄𑀧𑀺 𑀉𑀧𑁂𑀓𑁆𑀔𑀓𑀢𑀸𑀬 𑀅𑀭𑀜𑁆𑀜𑀝𑁆𑀞𑀸𑀦𑁂 𑀏𑀯 𑀯𑀺𑀳𑀭𑀡𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀼𑀭𑀺𑀫𑁂𑀦𑀲𑁆𑀲 𑀧𑀭𑀫𑀸𑀬 𑀅𑀦𑀼𑀓𑀫𑁆𑀧𑀸𑀬 𑀲𑀫𑀦𑁆𑀦𑀸𑀕𑀫𑀁 𑀤𑀻𑀧𑁂𑀢𑀻’’𑀢𑀺.

𑀢𑀦𑁆𑀢𑀺 𑀢𑀢𑁆𑀭𑀸𑀢𑀺 𑀧𑀤𑀁. ‘‘𑀤𑁂𑀲𑀓𑀸𑀮𑀧𑀭𑀺𑀤𑀻𑀧𑀦’’𑀦𑁆𑀢𑀺 𑀬𑁂 𑀤𑁂𑀲𑀓𑀸𑀮𑀸 𑀇𑀥 𑀯𑀺𑀳𑀭𑀡𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀢𑁂𑀲𑀁 𑀧𑀭𑀺𑀤𑀻𑀧𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀁 𑀲𑀫𑀬𑀁…𑀧𑁂… 𑀤𑀻𑀧𑁂𑀢𑀻’’𑀢𑀺 𑀆𑀳. 𑀢𑀁-𑀲𑀤𑁆𑀤𑁄 𑀳𑀺 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀝𑀺𑀦𑀺𑀤𑁆𑀤𑁂𑀲𑁄, 𑀢𑀲𑁆𑀫𑀸 𑀇𑀥 𑀓𑀸𑀮𑀲𑁆𑀲 𑀤𑁂𑀲𑀲𑁆𑀲 𑀯𑀸 𑀧𑀝𑀺𑀦𑀺𑀤𑁆𑀤𑁂𑀲𑁄 𑀪𑀯𑀺𑀢𑀼𑀫𑀭𑀳𑀢𑀺, 𑀦 𑀅𑀜𑁆𑀜𑀲𑁆𑀲. 𑀅𑀬𑀁 𑀢𑀸𑀯 𑀢𑀢𑁆𑀭-𑀲𑀤𑁆𑀤𑀲𑁆𑀲 𑀧𑀝𑀺𑀦𑀺𑀤𑁆𑀤𑁂𑀲𑀪𑀸𑀯𑁂 𑀅𑀢𑁆𑀣𑀯𑀺𑀪𑀸𑀯𑀦𑀸. 𑀬𑀲𑁆𑀫𑀸 𑀧𑀦 𑀈𑀤𑀺𑀲𑁂𑀲𑀼 𑀞𑀸𑀦𑁂𑀲𑀼 𑀢𑀢𑁆𑀭-𑀲𑀤𑁆𑀤𑁄 𑀥𑀫𑁆𑀫𑀤𑁂𑀲𑀦𑀸𑀯𑀺𑀲𑀺𑀝𑁆𑀞𑀁 𑀤𑁂𑀲𑀓𑀸𑀮𑀜𑁆𑀘 𑀯𑀺𑀪𑀸𑀯𑁂𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀪𑀸𑀲𑀺𑀢𑀩𑁆𑀩𑀬𑀼𑀢𑁆𑀢𑁂 𑀯𑀸 𑀤𑁂𑀲𑀓𑀸𑀮𑁂 𑀤𑀻𑀧𑁂𑀢𑀻’’𑀢𑀺. 𑀢𑁂𑀦 𑀢𑀢𑁆𑀭𑀸𑀢𑀺 𑀬𑀢𑁆𑀭 𑀪𑀕𑀯𑀸 𑀥𑀫𑁆𑀫𑀤𑁂𑀲𑀦𑀢𑁆𑀣𑀁 𑀪𑀺𑀓𑁆𑀔𑀽 𑀆𑀮𑀧𑀢𑀺 𑀪𑀸𑀲𑀢𑀺, 𑀢𑀸𑀤𑀺𑀲𑁂 𑀤𑁂𑀲𑁂, 𑀓𑀸𑀮𑁂 𑀯𑀸𑀢𑀺 𑀅𑀢𑁆𑀣𑁄. 𑀦 𑀳𑀻𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀺. 𑀦𑀦𑀼 𑀘 𑀬𑀢𑁆𑀣 𑀞𑀺𑀢𑁄 𑀪𑀕𑀯𑀸 ‘‘𑀅𑀓𑀸𑀮𑁄 𑀔𑁄 𑀢𑀸𑀯𑀸’’𑀢𑀺𑀆𑀤𑀺𑀦𑀸 ¶ 𑀩𑀸𑀳𑀺𑀬𑀲𑁆𑀲 𑀥𑀫𑁆𑀫𑀤𑁂𑀲𑀦𑀁 𑀧𑀝𑀺𑀓𑁆𑀔𑀺𑀧𑀺, 𑀢𑀢𑁆𑀣𑁂𑀯 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀺𑀢𑁄 𑀢𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀅𑀤𑁂𑀲𑁂𑀢𑀩𑁆𑀩𑀓𑀸𑀮𑁂 𑀅𑀤𑁂𑀲𑀦𑀸𑀬 𑀇𑀤𑀁 𑀉𑀤𑀸𑀳𑀭𑀡𑀁. 𑀢𑁂𑀦𑁂𑀯𑀸𑀳 𑁋 ‘‘𑀅𑀓𑀸𑀮𑁄 𑀔𑁄 𑀢𑀸𑀯𑀸’’𑀢𑀺.

𑀬𑀁 𑀧𑀦 𑀢𑀢𑁆𑀣 𑀯𑀼𑀢𑁆𑀢𑀁 𑁋 ‘‘𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑀫𑁆𑀳𑀸’’𑀢𑀺, 𑀢𑀫𑁆𑀧𑀺 𑀢𑀲𑁆𑀲 𑀅𑀓𑀸𑀮𑀪𑀸𑀯𑀲𑁆𑀲𑁂𑀯 𑀧𑀭𑀺𑀬𑀸𑀬𑁂𑀦 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀲𑁆𑀲 𑀳𑀺 𑀢𑀤𑀸 𑀅𑀤𑁆𑀥𑀸𑀦𑀧𑀭𑀺𑀲𑁆𑀲𑀫𑁂𑀦 𑀭𑀽𑀧𑀓𑀸𑀬𑁂 𑀅𑀓𑀫𑁆𑀫𑀜𑁆𑀜𑀢𑀸 𑀅𑀳𑁄𑀲𑀺, 𑀩𑀮𑀯𑀧𑀻𑀢𑀺𑀯𑁂𑀕𑁂𑀦 𑀦𑀸𑀫𑀓𑀸𑀬𑁂. 𑀢𑀤𑀼𑀪𑀬𑀲𑁆𑀲 𑀯𑀽𑀧𑀲𑀫𑀁 𑀆𑀕𑀫𑁂𑀦𑁆𑀢𑁄 𑀧𑀧𑀜𑁆𑀘𑀧𑀭𑀺𑀳𑀸𑀭𑀢𑁆𑀣𑀁 𑀪𑀕𑀯𑀸 ‘‘𑀅𑀓𑀸𑀮𑁄 𑀔𑁄’’𑀢𑀺 𑀧𑀭𑀺𑀬𑀸𑀬𑁂𑀦 𑀧𑀝𑀺𑀓𑁆𑀔𑀺𑀧𑀺. 𑀅𑀤𑁂𑀲𑁂𑀢𑀩𑁆𑀩𑀤𑁂𑀲𑁂 𑀅𑀤𑁂𑀲𑀦𑀸𑀬 𑀧𑀦 𑀉𑀤𑀸𑀳𑀭𑀡𑀁 ‘‘𑀅𑀣 𑀔𑁄 𑀪𑀕𑀯𑀸 𑀫𑀕𑁆𑀕𑀸 𑀑𑀓𑁆𑀓𑀫𑁆𑀫 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀦𑀺𑀲𑀻𑀤𑀺 (𑀲𑀁. 𑀦𑀺. 𑁨.𑁧𑁫𑁪), 𑀯𑀺𑀳𑀸𑀭𑀧𑀘𑁆𑀙𑀸𑀬𑀸𑀬𑀁 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀻’’𑀢𑀺 (𑀤𑀻. 𑀦𑀺. 𑁧.𑁩𑁬𑁩) 𑀘 𑀏𑀯𑀫𑀸𑀤𑀺𑀓𑀁 𑀇𑀥 𑀆𑀤𑀺𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀁. ‘‘𑀅𑀣 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀩𑀸𑀮𑁄 𑀇𑀥 𑀧𑀼𑀩𑁆𑀩𑁂 𑀦𑁂𑀲𑀸𑀤𑁄 𑀇𑀥 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀭𑀺𑀢𑁆𑀯𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁨𑁫𑁧) 𑀧𑀤𑀧𑀽𑀭𑀡𑀫𑀢𑁆𑀢𑁂 𑀔𑁄-𑀲𑀤𑁆𑀤𑁄, ‘‘𑀤𑀼𑀓𑁆𑀔𑀁 𑀔𑁄 𑀅𑀕𑀸𑀭𑀯𑁄 𑀯𑀺𑀳𑀭𑀢𑀺 ¶ 𑀅𑀧𑁆𑀧𑀢𑀺𑀲𑁆𑀲𑁄’’𑀢𑀺𑀆𑀤𑀻𑀲𑀼 (𑀅. 𑀦𑀺. 𑁪.𑁨𑁧) 𑀅𑀯𑀥𑀸𑀭𑀡𑁂, ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀆𑀯𑀼𑀲𑁄, 𑀲𑀢𑁆𑀣𑀼 𑀧𑀯𑀺𑀯𑀺𑀢𑁆𑀢𑀲𑁆𑀲 𑀯𑀺𑀳𑀭𑀢𑁄 𑀲𑀸𑀯𑀓𑀸 𑀯𑀺𑀯𑁂𑀓𑀁 𑀦𑀸𑀦𑀼𑀲𑀺𑀓𑁆𑀔𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁩𑁧) 𑀆𑀤𑀺𑀓𑀸𑀮𑀢𑁆𑀣𑁂, 𑀯𑀸𑀓𑁆𑀬𑀸𑀭𑀫𑁆𑀪𑁂𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀧𑀤𑀧𑀽𑀭𑀡𑁂𑀦 𑀯𑀘𑀦𑀸𑀮𑀗𑁆𑀓𑀸𑀭𑀫𑀢𑁆𑀢𑀁 𑀓𑀢𑀁 𑀳𑁄𑀢𑀺, 𑀆𑀤𑀺𑀓𑀸𑀮𑀢𑁆𑀣𑁂𑀦 𑀯𑀸𑀓𑁆𑀬𑀲𑁆𑀲 𑀉𑀧𑀜𑁆𑀜𑀸𑀲𑀫𑀢𑁆𑀢𑀁. 𑀅𑀯𑀥𑀸𑀭𑀡𑀢𑁆𑀣𑁂𑀦 𑀧𑀦 𑀦𑀺𑀬𑀫𑀤𑀲𑁆𑀲𑀦𑀁, 𑀢𑀲𑁆𑀫𑀸 𑀆𑀫𑀦𑁆𑀢𑁂𑀲𑀺 𑀏𑀯𑀸𑀢𑀺 𑀆𑀫𑀦𑁆𑀢𑀦𑁂 𑀦𑀺𑀬𑀫𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺.

𑀪𑀕𑀯𑀸𑀢𑀺 𑀮𑁄𑀓𑀕𑀭𑀼𑀤𑀻𑀧𑀦𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀧𑀼𑀩𑁆𑀩𑁂𑀧𑀺 𑀪𑀕𑀯𑀸𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺? 𑀬𑀤𑀺𑀧𑀺 𑀯𑀼𑀢𑁆𑀢𑁄, 𑀢𑀁 𑀧𑀦𑀲𑁆𑀲 𑀬𑀣𑀸𑀯𑀼𑀢𑁆𑀢𑁂 𑀞𑀸𑀦𑁂 𑀯𑀺𑀳𑀭𑀡𑀓𑀺𑀭𑀺𑀬𑀸𑀬 𑀓𑀢𑁆𑀢𑀼 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀓𑀢𑀁, 𑀦 𑀆𑀫𑀦𑁆𑀢𑀦𑀓𑀺𑀭𑀺𑀬𑀸𑀬, 𑀇𑀥 𑀧𑀦 𑀆𑀫𑀦𑁆𑀢𑀦𑀓𑀺𑀭𑀺𑀬𑀸𑀬, 𑀢𑀲𑁆𑀫𑀸 𑀢𑀤𑀢𑁆𑀣𑀁 𑀧𑀼𑀦 ‘‘𑀪𑀕𑀯𑀸’’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑀦𑁆𑀢𑀺 𑀢𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀪𑀕𑀯𑀸𑀢𑀺 𑀮𑁄𑀓𑀕𑀭𑀼𑀤𑀻𑀧𑀦’’𑀦𑁆𑀢𑀺 𑀆𑀳. 𑀢𑁂𑀦 𑀮𑁄𑀓𑀕𑀭𑀼𑀪𑀸𑀯𑀢𑁄 𑀢𑀤𑀦𑀼𑀭𑀽𑀧𑀁 𑀧𑀝𑀺𑀧𑀢𑁆𑀢𑀺𑀁 𑀧𑀢𑁆𑀣𑁂𑀦𑁆𑀢𑁄 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀉𑀧𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼𑀁 𑀢𑁂 𑀆𑀫𑀦𑁆𑀢𑁂𑀲𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀣𑀸𑀲𑀯𑀦𑀬𑀼𑀢𑁆𑀢𑀧𑀼𑀕𑁆𑀕𑀮𑀯𑀘𑀦𑀦𑁆𑀢𑀺 𑀯𑀓𑁆𑀔𑀫𑀸𑀦𑀸𑀬 𑀘𑀺𑀢𑁆𑀢𑀧𑀭𑀺𑀬𑀸𑀤𑀸𑀦𑀤𑁂𑀲𑀦𑀸𑀬 𑀲𑀯𑀦𑀬𑁄𑀕𑁆𑀕𑀧𑀼𑀕𑁆𑀕𑀮𑀯𑀘𑀦𑀁. 𑀘𑀢𑀽𑀲𑀼𑀧𑀺 𑀧𑀭𑀺𑀲𑀸𑀲𑀼 𑀪𑀺𑀓𑁆𑀔𑀽 𑀏𑀯 𑀏𑀤𑀺𑀲𑀸𑀦𑀁 𑀤𑁂𑀲𑀦𑀸𑀦𑀁 𑀯𑀺𑀲𑁂𑀲𑁂𑀦 𑀪𑀸𑀚𑀦𑀪𑀽𑀢𑀸𑀢𑀺 𑀲𑀸𑀢𑀺𑀲𑀬𑀁 𑀲𑀸𑀲𑀦𑀲𑀫𑁆𑀧𑀝𑀺𑀕𑁆𑀕𑀸𑀳𑀓𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀇𑀥 𑀪𑀺𑀓𑁆𑀔𑀼𑀕𑁆𑀕𑀳𑀡𑀦𑁆𑀢𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀤𑁆𑀤𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀺𑀓𑁆𑀔𑀓𑁄𑀢𑀺 𑀪𑀺𑀓𑁆𑀔𑀽𑀢𑀺 𑀪𑀺𑀓𑁆𑀔𑀦𑀥𑀫𑁆𑀫𑀢𑀸𑀬 𑀪𑀺𑀓𑁆𑀔𑀽𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄𑀢𑀺 𑀩𑀼𑀤𑁆𑀥𑀸𑀤𑀻𑀳𑀺 𑀅𑀚𑁆𑀛𑀼𑀧𑀕𑀢𑀁 𑀪𑀺𑀓𑁆𑀔𑀸𑀘𑀭𑀺𑀬𑀁, 𑀉𑀜𑁆𑀙𑀸𑀘𑀭𑀺𑀬𑀁, 𑀅𑀚𑁆𑀛𑀼𑀧𑀕𑀢𑀢𑁆𑀢𑀸 𑀅𑀦𑀼𑀝𑁆𑀞𑀺𑀢𑀢𑁆𑀢𑀸 𑀪𑀺𑀓𑁆𑀔𑀼. 𑀬𑁄 𑀳𑀺 𑀅𑀧𑁆𑀧𑀁 𑀯𑀸 𑀫𑀳𑀦𑁆𑀢𑀁 𑀯𑀸 𑀪𑁄𑀕𑀓𑁆𑀔𑀦𑁆𑀥𑀁 𑀧𑀳𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄, 𑀲𑁄 𑀓𑀲𑀺𑀕𑁄𑀭𑀓𑁆𑀔𑀸𑀤𑀺𑀚𑀻𑀯𑀺𑀓𑀸𑀓𑀧𑁆𑀧𑀦𑀁 𑀳𑀺𑀢𑁆𑀯𑀸 𑀮𑀺𑀗𑁆𑀕𑀲𑀫𑁆𑀧𑀝𑀺𑀘𑁆𑀙𑀦𑁂𑀦𑁂𑀯 ¶ 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑀢𑁆𑀢𑀸 𑀪𑀺𑀓𑁆𑀔𑀼, 𑀧𑀭𑀧𑁆𑀧𑀝𑀺𑀩𑀤𑁆𑀥𑀚𑀻𑀯𑀺𑀓𑀢𑁆𑀢𑀸 𑀯𑀸 𑀯𑀺𑀳𑀸𑀭𑀫𑀚𑁆𑀛𑁂 𑀓𑀸𑀚𑀪𑀢𑁆𑀢𑀁 𑀪𑀼𑀜𑁆𑀚𑀫𑀸𑀦𑁄𑀧𑀺 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄𑀢𑀺 𑀪𑀺𑀓𑁆𑀔𑀼, 𑀧𑀺𑀡𑁆𑀟𑀺𑀬𑀸𑀮𑁄𑀧𑀪𑁄𑀚𑀦𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸𑀬 𑀉𑀲𑁆𑀲𑀸𑀳𑀚𑀸𑀢𑀢𑁆𑀢𑀸 𑀯𑀸 𑀪𑀺𑀓𑁆𑀔𑀸𑀘𑀭𑀺𑀬𑀁 𑀅𑀚𑁆𑀛𑀼𑀧𑀕𑀢𑁄𑀢𑀺 𑀪𑀺𑀓𑁆𑀔𑀽𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀆𑀤𑀺𑀦𑀸 𑀦𑀬𑁂𑀦𑀸𑀢𑀺 ‘‘𑀙𑀺𑀦𑁆𑀦𑀪𑀺𑀦𑁆𑀦𑀧𑀝𑀥𑀭𑁄𑀢𑀺 𑀪𑀺𑀓𑁆𑀔𑀼, 𑀪𑀺𑀦𑁆𑀤𑀢𑀺 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂𑀢𑀺 𑀪𑀺𑀓𑁆𑀔𑀼, 𑀪𑀺𑀦𑁆𑀦𑀢𑁆𑀢𑀸 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀪𑀺𑀓𑁆𑀔𑀽’’𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁧𑁦) 𑀯𑀺𑀪𑀗𑁆𑀕𑁂 𑀆𑀕𑀢𑀦𑀬𑁂𑀦. 𑀜𑀸𑀧𑀦𑁂𑀢𑀺 𑀅𑀯𑀩𑁄𑀥𑀦𑁂, 𑀧𑀝𑀺𑀯𑁂𑀤𑀦𑁂𑀢𑀺 𑀅𑀢𑁆𑀣𑁄.

𑀪𑀺𑀓𑁆𑀔𑀦𑀲𑀻𑀮𑀢𑀸𑀢𑀺 ¶ 𑀪𑀺𑀓𑁆𑀔𑀦𑁂𑀦 𑀚𑀻𑀯𑀦𑀲𑀻𑀮𑀢𑀸, 𑀦 𑀓𑀲𑀺𑀯𑀸𑀡𑀺𑀚𑁆𑀚𑀸𑀤𑀺𑀦𑀸 𑀚𑀻𑀯𑀦𑀲𑀻𑀮𑀢𑀸. 𑀪𑀺𑀓𑁆𑀔𑀦𑀥𑀫𑁆𑀫𑀢𑀸𑀢𑀺 ‘‘𑀉𑀤𑁆𑀤𑀺𑀲𑁆𑀲 𑀅𑀭𑀺𑀬𑀸 𑀢𑀺𑀝𑁆𑀞𑀦𑁆𑀢𑀻’’𑀢𑀺 (𑀚𑀸. 𑁧.𑁭.𑁫𑁯) 𑀏𑀯𑀁 𑀯𑀼𑀢𑁆𑀢𑀸 𑀪𑀺𑀓𑁆𑀔𑀦𑀲𑀪𑀸𑀯𑀢𑀸, 𑀦 𑀬𑀸𑀘𑀦𑀓𑁄𑀳𑀜𑁆𑀜𑀲𑀪𑀸𑀯𑀢𑀸. 𑀪𑀺𑀓𑁆𑀔𑀦𑁂 𑀲𑀸𑀥𑀼𑀓𑀸𑀭𑀺𑀢𑀸𑀢𑀺 ‘‘𑀉𑀢𑁆𑀢𑀺𑀝𑁆𑀞𑁂 𑀦𑀧𑁆𑀧𑀫𑀚𑁆𑀚𑁂𑀬𑁆𑀬𑀸’’𑀢𑀺 (𑀥. 𑀧. 𑁧𑁬𑁮) 𑀯𑀘𑀦𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀢𑀢𑁆𑀣 𑀅𑀧𑁆𑀧𑀫𑀚𑁆𑀚𑀦𑀸. 𑀅𑀣 𑀯𑀸 𑀲𑀻𑀮𑀁 𑀦𑀸𑀫 𑀧𑀓𑀢𑀺𑀲𑀪𑀸𑀯𑁄, 𑀇𑀥 𑀧𑀦 𑀢𑀤𑀥𑀺𑀝𑁆𑀞𑀸𑀦𑀁. 𑀥𑀫𑁆𑀫𑁄𑀢𑀺 𑀯𑀢𑀁. 𑀲𑀸𑀥𑀼𑀓𑀸𑀭𑀺𑀢𑀸𑀢𑀺 𑀲𑀓𑁆𑀓𑀘𑁆𑀘𑀓𑀸𑀭𑀺𑀢𑀸 𑀆𑀤𑀭𑀓𑀺𑀭𑀺𑀬𑀸. 𑀳𑀻𑀦𑀸𑀥𑀺𑀓𑀚𑀦𑀲𑁂𑀯𑀺𑀢𑀦𑁆𑀢𑀺 𑀬𑁂 𑀪𑀺𑀓𑁆𑀔𑀼𑀪𑀸𑀯𑁂 𑀞𑀺𑀢𑀸𑀧𑀺 𑀚𑀸𑀢𑀺𑀫𑀤𑀸𑀤𑀺𑀯𑀲𑁂𑀦 𑀉𑀤𑁆𑀥𑀢𑀸 𑀉𑀦𑁆𑀦𑀴𑀸, 𑀬𑁂 𑀘 𑀕𑀺𑀳𑀺𑀪𑀸𑀯𑁂 𑀧𑀭𑁂𑀲𑀁 𑀅𑀥𑀺𑀓𑀪𑀸𑀯𑀫𑁆𑀧𑀺 𑀅𑀦𑀼𑀧𑀕𑀢𑀢𑁆𑀢𑀸 𑀪𑀺𑀓𑁆𑀔𑀸𑀘𑀭𑀺𑀬𑀁 𑀧𑀭𑀫𑀓𑀸𑀭𑀼𑀜𑁆𑀜𑀢𑀁 𑀫𑀜𑁆𑀜𑀦𑁆𑀢𑀺, 𑀢𑁂𑀲𑀁 𑀉𑀪𑀬𑁂𑀲𑀫𑁆𑀧𑀺 𑀬𑀣𑀸𑀓𑁆𑀓𑀫𑀁 ‘‘𑀪𑀺𑀓𑁆𑀔𑀯𑁄’’𑀢𑀺 𑀯𑀘𑀦𑁂𑀦 𑀳𑀻𑀦𑀚𑀦𑁂𑀳𑀺 𑀤𑀮𑀺𑀤𑁆𑀤𑁂𑀳𑀺 𑀧𑀭𑀫𑀓𑀸𑀭𑀼𑀜𑁆𑀜𑀢𑀁 𑀧𑀢𑁆𑀢𑁂𑀳𑀺 𑀧𑀭𑀓𑀼𑀮𑁂𑀲𑀼 𑀪𑀺𑀓𑁆𑀔𑀸𑀘𑀭𑀺𑀬𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑁂𑀳𑀺 𑀲𑁂𑀯𑀺𑀢𑀁 𑀯𑀼𑀢𑁆𑀢𑀺𑀁 𑀧𑀓𑀸𑀲𑁂𑀦𑁆𑀢𑁄 𑀉𑀤𑁆𑀥𑀢𑀪𑀸𑀯𑀦𑀺𑀕𑁆𑀕𑀳𑀁 𑀓𑀭𑁄𑀢𑀺. 𑀅𑀥𑀺𑀓𑀚𑀦𑁂𑀳𑀺 𑀉𑀴𑀸𑀭𑀪𑁄𑀕𑀔𑀢𑁆𑀢𑀺𑀬𑀓𑀼𑀮𑀸𑀤𑀺𑀢𑁄 𑀧𑀩𑁆𑀩𑀚𑀺𑀢𑁂𑀳𑀺 𑀩𑀼𑀤𑁆𑀥𑀸𑀤𑀻𑀳𑀺 𑀆𑀚𑀻𑀯𑀯𑀺𑀲𑁄𑀥𑀦𑀢𑁆𑀣𑀁 𑀲𑁂𑀯𑀺𑀢𑀁 𑀯𑀼𑀢𑁆𑀢𑀺𑀁 𑀧𑀓𑀸𑀲𑁂𑀦𑁆𑀢𑁄 𑀤𑀻𑀦𑀪𑀸𑀯𑀦𑀺𑀕𑁆𑀕𑀳𑀁 𑀓𑀭𑁄𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀬𑀲𑁆𑀫𑀸 ‘‘𑀪𑀺𑀓𑁆𑀔𑀯𑁄’’𑀢𑀺 𑀯𑀘𑀦𑀁 𑀆𑀫𑀦𑁆𑀢𑀦𑀪𑀸𑀯𑀢𑁄 𑀅𑀪𑀺𑀫𑀼𑀔𑀻𑀓𑀭𑀡𑀁, 𑀧𑀓𑀭𑀡𑀢𑁄 𑀲𑀸𑀫𑀢𑁆𑀣𑀺𑀬𑀢𑁄 𑀘 𑀲𑀼𑀲𑁆𑀲𑀼𑀲𑀸𑀚𑀦𑀦𑀁 𑀲𑀓𑁆𑀓𑀘𑁆𑀘𑀲𑀯𑀦𑀫𑀦𑀲𑀺𑀓𑀸𑀭𑀦𑀺𑀬𑁄𑀚𑀦𑀜𑁆𑀘 𑀳𑁄𑀢𑀺, 𑀢𑀲𑁆𑀫𑀸 𑀢𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀺𑀓𑁆𑀔𑀯𑁄𑀢𑀺 𑀇𑀫𑀺𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀸𑀥𑀼𑀓𑀁 𑀲𑀯𑀦𑀫𑀦𑀲𑀺𑀓𑀸𑀭𑁂𑀢𑀺 𑀲𑀸𑀥𑀼𑀓𑀲𑀯𑀦𑁂 𑀲𑀸𑀥𑀼𑀓𑀫𑀦𑀲𑀺𑀓𑀸𑀭𑁂 𑀘. 𑀓𑀣𑀁 𑀧𑀦 𑀧𑀯𑀢𑁆𑀢𑀺𑀢𑀸 𑀲𑀯𑀦𑀸𑀤𑀬𑁄 𑀲𑀸𑀥𑀼𑀓𑀁 𑀧𑀯𑀢𑁆𑀢𑀺𑀢𑀸 𑀳𑁄𑀦𑁆𑀢𑀻𑀢𑀺? ‘‘𑀅𑀤𑁆𑀥𑀸 𑀇𑀫𑀸𑀬 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀲𑀓𑀮𑀲𑀸𑀲𑀦𑀲𑀫𑁆𑀧𑀢𑁆𑀢𑀺 𑀳𑀢𑁆𑀣𑀕𑀢𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀆𑀤𑀭𑀕𑀸𑀭𑀯𑀬𑁄𑀕𑁂𑀦 𑀓𑀣𑀸𑀤𑀻𑀲𑀼 𑀅𑀧𑀭𑀺𑀪𑀯𑀸𑀤𑀺𑀦𑀸 𑀘. 𑀯𑀼𑀢𑁆𑀢𑀜𑁆𑀳𑀺 ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀼𑀡𑀦𑁆𑀢𑁄 𑀲𑀤𑁆𑀥𑀫𑁆𑀫𑀁 𑀪𑀩𑁆𑀩𑁄 𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀁. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀓𑀣𑀁 𑀦 𑀧𑀭𑀺𑀪𑁄𑀢𑀺, 𑀓𑀣𑀺𑀢𑀁 𑀦 𑀧𑀭𑀺𑀪𑁄𑀢𑀺, 𑀦 𑀅𑀢𑁆𑀢𑀸𑀦𑀁 𑀧𑀭𑀺𑀪𑁄𑀢𑀺, 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺 𑀏𑀓𑀕𑁆𑀕𑀘𑀺𑀢𑁆𑀢𑁄, 𑀬𑁄𑀦𑀺𑀲𑁄 𑀘 𑀫𑀦𑀲𑀺𑀓𑀭𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀼𑀡𑀦𑁆𑀢𑁄 𑀲𑀤𑁆𑀥𑀫𑁆𑀫𑀁 𑀪𑀩𑁆𑀩𑁄 𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢’’𑀦𑁆𑀢𑀺 (𑀅. 𑀦𑀺. 𑁫.𑁧𑁫𑁧). 𑀢𑁂𑀦𑁂𑀯𑀸𑀳 𑁋 ‘‘𑀲𑀸𑀥𑀼𑀓𑀁 𑀲𑀯𑀦𑀫𑀦𑀲𑀺𑀓𑀸𑀭𑀸𑀬𑀢𑁆𑀢𑀸 𑀳𑀺 𑀲𑀸𑀲𑀦𑀲𑀫𑁆𑀧𑀢𑁆𑀢𑀻’’𑀢𑀺.

𑀧𑀼𑀩𑁆𑀩𑁂 ¶ 𑀲𑀩𑁆𑀩𑀧𑀭𑀺𑀲𑀸𑀲𑀸𑀥𑀸𑀭𑀡𑀢𑁆𑀢𑁂𑀧𑀺 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸𑀬 ‘‘𑀚𑁂𑀝𑁆𑀞𑀲𑁂𑀝𑁆𑀞𑀸’’𑀢𑀺𑀆𑀤𑀺𑀦𑀸 𑀪𑀺𑀓𑁆𑀔𑀽𑀦𑀁 𑀏𑀯 𑀆𑀫𑀦𑁆𑀢𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀪𑀺𑀓𑁆𑀔𑀽 ¶ 𑀆𑀫𑀦𑁆𑀢𑁂𑀢𑁆𑀯𑀸𑀯 𑀥𑀫𑁆𑀫𑀤𑁂𑀲𑀦𑀸𑀬 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀫𑀢𑁆𑀣𑀁 𑀧𑀦 𑀪𑀕𑀯𑀸’’𑀢𑀺 𑀘𑁄𑀤𑀦𑀁 𑀲𑀫𑀼𑀝𑁆𑀞𑀸𑀧𑁂𑀢𑀺. 𑀢𑀢𑁆𑀣 𑀅𑀜𑁆𑀜𑀁 𑀘𑀺𑀦𑁆𑀢𑁂𑀦𑁆𑀢𑀸𑀢𑀺 𑀅𑀜𑁆𑀜𑀯𑀺𑀳𑀺𑀢𑀸. 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑀸𑀢𑀺 𑀅𑀲𑀫𑀸𑀳𑀺𑀢𑀘𑀺𑀢𑁆𑀢𑀸. 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀸𑀢𑀺 𑀳𑀺𑀬𑁆𑀬𑁄 𑀢𑀢𑁄 𑀧𑀭𑀁 𑀤𑀺𑀯𑀲𑁂𑀲𑀼 𑀯𑀸 𑀲𑀼𑀢𑀥𑀫𑁆𑀫𑀁 𑀧𑀢𑀺 𑀧𑀢𑀺 𑀫𑀦𑀲𑀸 𑀅𑀯𑁂𑀓𑁆𑀔𑀦𑁆𑀢𑀸. 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀢𑁆𑀯𑀸 𑀥𑀫𑁆𑀫𑁂 𑀤𑁂𑀲𑀺𑀬𑀫𑀸𑀦𑁂 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀤𑁂𑀲𑀦𑀁 𑀲𑀮𑁆𑀮𑀓𑁆𑀔𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀻𑀢𑀺 𑀇𑀫𑀫𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀢𑁂 𑀅𑀦𑀸𑀫𑀦𑁆𑀢𑁂𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀪𑀺𑀓𑁆𑀔𑀯𑁄𑀢𑀺 𑀘𑁂𑀢𑁆𑀣 𑀲𑀦𑁆𑀥𑀺𑀯𑀲𑁂𑀦 𑀇-𑀓𑀸𑀭𑀮𑁄𑀧𑁄 𑀤𑀝𑁆𑀞𑀩𑁆𑀩𑁄. 𑀪𑀺𑀓𑁆𑀔𑀯𑁄 𑀇𑀢𑀻𑀢𑀺 𑀅𑀬𑀁 𑀇𑀢𑀺-𑀲𑀤𑁆𑀤𑁄 𑀳𑁂𑀢𑀼𑀧𑀭𑀺𑀲𑀫𑀸𑀧𑀦𑀸𑀤𑀺𑀅𑀢𑁆𑀣𑀧𑀤𑀢𑁆𑀣𑀯𑀺𑀧𑀭𑀺𑀬𑀸𑀬𑀧𑀓𑀸𑀭𑀸𑀯𑀥𑀸𑀭𑀡𑀦𑀺𑀤𑀲𑁆𑀲𑀦𑀸𑀤𑀺𑀅𑀦𑁂𑀓𑀢𑁆𑀣𑀧𑁆𑀧𑀪𑁂𑀤𑁄. 𑀢𑀣𑀸 𑀳𑁂𑀲 ‘‘𑀭𑀼𑀧𑁆𑀧𑀢𑀻𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀫𑀸 𑀭𑀽𑀧𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁭𑁯) 𑀳𑁂𑀢𑁆𑀯𑀢𑁆𑀣𑁂 𑀤𑀺𑀲𑁆𑀲𑀢𑀺. ‘‘𑀢𑀲𑁆𑀫𑀸𑀢𑀺𑀳 𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀤𑀸𑀬𑀸𑀤𑀸 𑀪𑀯𑀣, 𑀫𑀸 𑀆𑀫𑀺𑀲𑀤𑀸𑀬𑀸𑀤𑀸. 𑀅𑀢𑁆𑀣𑀺 𑀫𑁂 𑀢𑀼𑀫𑁆𑀳𑁂𑀲𑀼 𑀅𑀦𑀼𑀓𑀫𑁆𑀧𑀸. 𑀓𑀺𑀦𑁆𑀢𑀺 𑀫𑁂 𑀲𑀸𑀯𑀓𑀸 𑀥𑀫𑁆𑀫𑀤𑀸𑀬𑀸𑀤𑀸 𑀪𑀯𑁂𑀬𑁆𑀬𑀼𑀁, 𑀦𑁄 𑀆𑀫𑀺𑀲𑀤𑀸𑀬𑀸𑀤𑀸’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁧.𑁧𑁯) 𑀧𑀭𑀺𑀲𑀫𑀸𑀧𑀦𑁂. ‘‘𑀇𑀢𑀺 𑀯𑀸 𑀇𑀢𑀺 𑀏𑀯𑀭𑀽𑀧𑀸 𑀦𑀘𑁆𑀘𑀕𑀻𑀢𑀯𑀸𑀤𑀺𑀢𑀯𑀺𑀲𑀽𑀓𑀤𑀲𑁆𑀲𑀦𑀸 𑀧𑀝𑀺𑀯𑀺𑀭𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁧𑁩) 𑀆𑀤𑀺𑀅𑀢𑁆𑀣𑁂. ‘‘𑀫𑀸𑀕𑀡𑁆𑀟𑀺𑀬𑁄𑀢𑀺 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀗𑁆𑀔𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑁄𑀳𑀸𑀭𑁄 𑀦𑀸𑀫𑀁 𑀦𑀸𑀫𑀓𑀫𑁆𑀫𑀁 𑀦𑀸𑀫𑀥𑁂𑀬𑁆𑀬𑀁 𑀦𑀺𑀭𑀼𑀢𑁆𑀢𑀺 𑀩𑁆𑀬𑀜𑁆𑀚𑀦𑀫𑀪𑀺𑀮𑀸𑀧𑁄’’𑀢𑀺𑀆𑀤𑀻𑀲𑀼 (𑀫𑀳𑀸𑀦𑀺. 𑁭𑁩, 𑁭𑁫) 𑀧𑀤𑀢𑁆𑀣𑀯𑀺𑀧𑀭𑀺𑀬𑀸𑀬𑁂. ‘‘𑀇𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀧𑁆𑀧𑀝𑀺𑀪𑀬𑁄 𑀩𑀸𑀮𑁄, 𑀅𑀧𑁆𑀧𑀝𑀺𑀪𑀬𑁄 𑀧𑀡𑁆𑀟𑀺𑀢𑁄, 𑀲𑀉𑀧𑀤𑁆𑀤𑀯𑁄 𑀩𑀸𑀮𑁄, 𑀅𑀦𑀼𑀧𑀤𑁆𑀤𑀯𑁄 𑀧𑀡𑁆𑀟𑀺𑀢𑁄, 𑀲𑀉𑀧𑀲𑀕𑁆𑀕𑁄 𑀩𑀸𑀮𑁄, 𑀅𑀦𑀼𑀧𑀲𑀕𑁆𑀕𑁄 𑀧𑀡𑁆𑀟𑀺𑀢𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁧𑁨𑁪) 𑀧𑀓𑀸𑀭𑁂. ‘‘𑀅𑀢𑁆𑀣𑀺 𑀇𑀤𑀧𑁆𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀧𑀼𑀝𑁆𑀞𑁂𑀦 𑀲𑀢𑀸, ‘𑀆𑀦𑀦𑁆𑀤, 𑀅𑀢𑁆𑀣𑀻’𑀢𑀺𑀲𑁆𑀲 𑀯𑀘𑀦𑀻𑀬𑀁. ‘𑀓𑀺𑀁 𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’𑀦𑁆𑀢𑀺 𑀇𑀢𑀺 𑀘𑁂 𑀯𑀤𑁂𑀬𑁆𑀬. 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀁 𑀇𑀘𑁆𑀘𑀲𑁆𑀲 𑀯𑀘𑀦𑀻𑀬’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁯𑁬) 𑀅𑀯𑀥𑀸𑀭𑀡𑁂. ‘‘𑀅𑀢𑁆𑀣𑀻𑀢𑀺 𑀔𑁄, 𑀓𑀘𑁆𑀘𑀸𑀦, 𑀅𑀬𑀫𑁂𑀓𑁄 𑀅𑀦𑁆𑀢𑁄, 𑀦𑀢𑁆𑀣𑀻𑀢𑀺 𑀔𑁄, 𑀓𑀘𑁆𑀘𑀸𑀦, 𑀅𑀬𑀁 𑀤𑀼𑀢𑀺𑀬𑁄 𑀅𑀦𑁆𑀢𑁄’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁧𑁫; 𑀲𑀁. 𑀦𑀺. 𑁩.𑁯𑁦) 𑀦𑀺𑀤𑀲𑁆𑀲𑀦𑁂. 𑀇𑀥𑀸𑀧𑀺 𑀦𑀺𑀤𑀲𑁆𑀲𑀦𑁂 𑀏𑀯 𑀤𑀝𑁆𑀞𑀩𑁆𑀩𑁄. 𑀪𑀺𑀓𑁆𑀔𑀯𑁄𑀢𑀺 𑀳𑀺 𑀆𑀫𑀦𑁆𑀢𑀦𑀸𑀓𑀸𑀭𑁄. 𑀢𑀫𑁂𑀲 𑀇𑀢𑀺-𑀲𑀤𑁆𑀤𑁄 𑀦𑀺𑀤𑀲𑁆𑀲𑁂𑀢𑀺 ‘‘𑀪𑀺𑀓𑁆𑀔𑀯𑁄𑀢𑀺 𑀆𑀫𑀦𑁆𑀢𑁂𑀲𑀻’’𑀢𑀺. 𑀇𑀫𑀺𑀦𑀸 𑀦𑀬𑁂𑀦 ‘‘𑀪𑀤𑁆𑀤𑀦𑁆𑀢𑁂’’𑀢𑀺𑀆𑀤𑀻𑀲𑀼𑀧𑀺 𑀬𑀣𑀸𑀭𑀳𑀁 𑀇𑀢𑀺-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀩𑁆𑀩𑁂 ‘‘𑀪𑀕𑀯𑀸 𑀆𑀫𑀦𑁆𑀢𑁂𑀲𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼’’𑀦𑁆𑀢𑀺 ¶ 𑀇𑀥 ‘‘𑀪𑀕𑀯𑀢𑁄’’𑀢𑀺 𑀲𑀸𑀫𑀺𑀯𑀘𑀦𑀁 𑀆𑀫𑀦𑁆𑀢𑀦𑀫𑁂𑀯 𑀲𑀫𑁆𑀩𑀦𑁆𑀥𑀺𑀅𑀦𑁆𑀢𑀭𑀁 𑀅𑀧𑁂𑀓𑁆𑀔𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀪𑀕𑀯𑀢𑁄 𑀆𑀫𑀦𑁆𑀢𑀦𑀁 𑀧𑀝𑀺𑀅𑀲𑁆𑀲𑁄𑀲𑀼’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀪𑀕𑀯𑀢𑁄’’𑀢𑀺 𑀧𑀦 𑀇𑀤𑀁 𑀧𑀝𑀺𑀲𑁆𑀲𑀯𑀲𑀫𑁆𑀩𑀦𑁆𑀥𑁂𑀦 𑀲𑀫𑁆𑀧𑀤𑀸𑀦𑀯𑀘𑀦𑀁 𑀬𑀣𑀸 ‘‘𑀤𑁂𑀯𑀤𑀢𑁆𑀢𑀸𑀬 𑀧𑀝𑀺𑀲𑁆𑀲𑀼𑀡𑁄𑀢𑀻’’𑀢𑀺. 𑀬𑀁 𑀦𑀺𑀤𑀸𑀦𑀁 𑀪𑀸𑀲𑀺𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀼𑀔𑀸𑀯𑀕𑀸𑀳𑀡𑀢𑁆𑀣𑀦𑁆𑀢𑀺 𑀓𑀫𑀮𑀓𑀼𑀯𑀮𑀬𑀼𑀚𑁆𑀚𑀮𑀯𑀺𑀫𑀮𑀲𑀸𑀤𑀼𑀭𑀲𑀲𑀮𑀺𑀮𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 ¶ 𑀲𑀼𑀔𑀸𑀯𑀢𑀭𑀡𑀢𑁆𑀣𑀁 𑀦𑀺𑀫𑁆𑀫𑀮𑀲𑀺𑀮𑀸𑀢𑀮𑀭𑀘𑀦𑀸𑀯𑀺𑀮𑀸𑀲𑀲𑁄𑀪𑀺𑀢𑀭𑀢𑀦𑀲𑁄𑀧𑀸𑀦𑀁 𑀯𑀺𑀧𑁆𑀧𑀓𑀺𑀡𑁆𑀡𑀫𑀼𑀢𑁆𑀢𑀸𑀢𑀮𑀲𑀤𑀺𑀲𑀯𑀸𑀮𑀼𑀓𑀸𑀘𑀼𑀡𑁆𑀡𑀧𑀡𑁆𑀟𑀭𑀪𑀽𑀫𑀺𑀪𑀸𑀕𑀁 𑀢𑀺𑀢𑁆𑀣𑀁 𑀯𑀺𑀬 𑀲𑀼𑀯𑀺𑀪𑀢𑁆𑀢𑀪𑀺𑀢𑁆𑀢𑀺𑀯𑀺𑀘𑀺𑀢𑁆𑀭𑀯𑁂𑀤𑀺𑀓𑀸𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀦𑀓𑁆𑀔𑀢𑁆𑀢𑀧𑀣𑀁 𑀨𑀼𑀲𑀺𑀢𑀼𑀓𑀸𑀫𑀢𑀸𑀬 𑀯𑀺𑀬 𑀧𑀝𑀺𑀯𑀺𑀚𑀫𑁆𑀪𑀺𑀢𑀲𑀫𑀼𑀲𑁆𑀲𑀬𑀲𑁆𑀲 𑀧𑀸𑀲𑀸𑀤𑀯𑀭𑀲𑁆𑀲 𑀲𑀼𑀔𑀸𑀭𑁄𑀳𑀦𑀢𑁆𑀣𑀁 𑀤𑀦𑁆𑀢𑀫𑀬𑀲𑀡𑁆𑀳𑀫𑀼𑀤𑀼𑀨𑀮𑀓𑀜𑁆𑀘𑀦𑀮𑀢𑀸𑀯𑀺𑀦𑀤𑁆𑀥𑀫𑀡𑀺𑀕𑀡𑀧𑁆𑀧𑀪𑀸𑀲𑀫𑀼𑀤𑀬𑀼𑀚𑁆𑀚𑀮𑀲𑁄𑀪𑀁 𑀲𑁄𑀧𑀸𑀦𑀁 𑀯𑀺𑀬 𑀲𑀼𑀯𑀡𑁆𑀡𑀯𑀮𑀬𑀦𑀽𑀧𑀼𑀭𑀸𑀤𑀺𑀲𑀗𑁆𑀖𑀝𑁆𑀝𑀦𑀲𑀤𑁆𑀤𑀲𑀫𑁆𑀫𑀺𑀲𑁆𑀲𑀺𑀢𑀲𑁆𑀲 𑀓𑀣𑀺𑀢𑀳𑀲𑀺𑀢𑀫𑀥𑀼𑀭𑀲𑁆𑀲𑀭𑀕𑁂𑀳𑀚𑀦𑀯𑀺𑀚𑀫𑁆𑀪𑀺𑀢𑀯𑀺𑀘𑀭𑀺𑀢𑀲𑁆𑀲 𑀉𑀴𑀸𑀭𑀇𑀲𑁆𑀲𑀭𑀺𑀬𑀯𑀺𑀪𑀯𑀲𑁄𑀪𑀺𑀢𑀲𑁆𑀲 𑀫𑀳𑀸𑀖𑀭𑀲𑁆𑀲 𑀲𑀼𑀔𑀧𑁆𑀧𑀯𑁂𑀲𑀦𑀢𑁆𑀣𑀁 𑀲𑀼𑀯𑀡𑁆𑀡𑀭𑀚𑀢𑀫𑀡𑀺𑀫𑀼𑀢𑁆𑀢𑀸𑀧𑀯𑀸𑀴𑀸𑀤𑀺𑀚𑀼𑀢𑀺𑀯𑀺𑀲𑁆𑀲𑀭𑀯𑀺𑀚𑁆𑀚𑁄𑀢𑀺𑀢𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀯𑀺𑀲𑀸𑀮𑀤𑁆𑀯𑀸𑀭𑀩𑀸𑀳𑀁 𑀫𑀳𑀸𑀤𑁆𑀯𑀸𑀭𑀁 𑀯𑀺𑀬 𑀘 𑀅𑀢𑁆𑀣𑀩𑁆𑀬𑀜𑁆𑀚𑀦𑀲𑀫𑁆𑀧𑀦𑁆𑀦𑀲𑁆𑀲 𑀩𑀼𑀤𑁆𑀥𑀸𑀦𑀁 𑀤𑁂𑀲𑀦𑀸𑀜𑀸𑀡𑀕𑀫𑁆𑀪𑀻𑀭𑀪𑀸𑀯𑀲𑀁𑀲𑀽𑀘𑀓𑀲𑁆𑀲 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀼𑀔𑀸𑀯𑀕𑀸𑀳𑀢𑁆𑀣𑀁.

𑀏𑀢𑁆𑀣𑀸𑀳 𑁋 ‘‘𑀓𑀺𑀫𑀢𑁆𑀣𑀁 𑀧𑀦 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑁂 𑀓𑀬𑀺𑀭𑀫𑀸𑀦𑁂 𑀦𑀺𑀤𑀸𑀦𑀯𑀘𑀦𑀁, 𑀦𑀦𑀼 𑀪𑀕𑀯𑀢𑀸 𑀪𑀸𑀲𑀺𑀢𑀯𑀘𑀦𑀲𑁆𑀲𑁂𑀯 𑀲𑀗𑁆𑀕𑀳𑁄 𑀓𑀸𑀢𑀩𑁆𑀩𑁄’’𑀢𑀺? 𑀯𑀼𑀘𑁆𑀘𑀢𑁂, 𑀤𑁂𑀲𑀦𑀸𑀬 𑀞𑀺𑀢𑀺𑀅𑀲𑀫𑁆𑀫𑁄𑀲𑀲𑀤𑁆𑀥𑁂𑀬𑁆𑀬𑀪𑀸𑀯𑀲𑀫𑁆𑀧𑀸𑀤𑀦𑀢𑁆𑀣𑀁. 𑀓𑀸𑀮𑀤𑁂𑀲𑀤𑁂𑀲𑀓𑀦𑀺𑀫𑀺𑀢𑁆𑀢𑀧𑀭𑀺𑀲𑀸𑀧𑀤𑁂𑀲𑁂𑀳𑀺 𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸 𑀞𑀧𑀺𑀢𑀸 𑀳𑀺 𑀤𑁂𑀲𑀦𑀸 𑀘𑀺𑀭𑀝𑁆𑀞𑀺𑀢𑀺𑀓𑀸 𑀳𑁄𑀢𑀺 𑀅𑀲𑀫𑁆𑀫𑁄𑀲𑀥𑀫𑁆𑀫𑀸 𑀲𑀤𑁆𑀥𑁂𑀬𑁆𑀬𑀸 𑀘. 𑀤𑁂𑀲𑀓𑀸𑀮𑀓𑀢𑁆𑀢𑀼𑀳𑁂𑀢𑀼𑀦𑀺𑀫𑀺𑀢𑁆𑀢𑁂𑀳𑀺 𑀉𑀧𑀦𑀺𑀩𑀤𑁆𑀥𑁄 𑀯𑀺𑀬 𑀯𑁄𑀳𑀸𑀭𑀯𑀺𑀦𑀺𑀘𑁆𑀙𑀬𑁄. 𑀢𑁂𑀦𑁂𑀯 𑀘 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 ‘‘𑀘𑀺𑀢𑁆𑀢𑀧𑀭𑀺𑀬𑀸𑀤𑀸𑀦𑀲𑀼𑀢𑁆𑀢𑀁, 𑀆𑀯𑀼𑀲𑁄 𑀆𑀦𑀦𑁆𑀤, 𑀓𑀢𑁆𑀣 𑀪𑀸𑀲𑀺𑀢’’𑀦𑁆𑀢𑀺𑀆𑀤𑀺𑀦𑀸 𑀤𑁂𑀲𑀸𑀤𑀺𑀧𑀼𑀘𑁆𑀙𑀸𑀲𑀼 𑀓𑀢𑀸𑀲𑀼 𑀢𑀸𑀲𑀁 𑀯𑀺𑀲𑁆𑀲𑀚𑁆𑀚𑀦𑀁 𑀓𑀭𑁄𑀦𑁆𑀢𑁂𑀦 𑀥𑀫𑁆𑀫𑀪𑀡𑁆𑀟𑀸𑀕𑀸𑀭𑀺𑀓𑁂𑀦 ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀺𑀦𑀸 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀦𑀺𑀤𑀸𑀦𑀁 𑀪𑀸𑀲𑀺𑀢𑀁. 𑀅𑀧𑀺𑀘 𑀲𑀢𑁆𑀣𑀼𑀲𑀫𑁆𑀧𑀢𑁆𑀢𑀺𑀧𑁆𑀧𑀓𑀸𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦𑀁. 𑀢𑀣𑀸𑀕𑀢𑀲𑁆𑀲 𑀳𑀺 𑀪𑀕𑀯𑀢𑁄 𑀧𑀼𑀩𑁆𑀩𑀘𑀭𑀡𑀸𑀦𑀼𑀫𑀸𑀦𑀸𑀕𑀫𑀢𑀓𑁆𑀓𑀸𑀪𑀸𑀯𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑀲𑀺𑀤𑁆𑀥𑀺. 𑀦 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀲𑁆𑀲 𑀧𑀼𑀩𑁆𑀩𑀘𑀭𑀡𑀸𑀤𑀻𑀳𑀺 𑀅𑀢𑁆𑀣𑁄 𑀅𑀢𑁆𑀣𑀺 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀜𑀸𑀡𑀘𑀸𑀭𑀢𑀸𑀬 𑀏𑀓𑀧𑁆𑀧𑀫𑀸𑀡𑀢𑁆𑀢𑀸 𑀘 𑀜𑁂𑀬𑁆𑀬𑀥𑀫𑁆𑀫𑁂𑀲𑀼. 𑀢𑀣𑀸 𑀆𑀘𑀭𑀺𑀬𑀫𑀼𑀝𑁆𑀞𑀺𑀥𑀫𑁆𑀫𑀫𑀘𑁆𑀙𑀭𑀺𑀬𑀲𑀸𑀲𑀦𑀲𑀸𑀯𑀓𑀸𑀦𑀸𑀦𑀼𑀭𑀸𑀕𑀸𑀪𑀸𑀯𑀢𑁄 𑀔𑀻𑀡𑀸𑀲𑀯𑀪𑀸𑀯𑀲𑀺𑀤𑁆𑀥𑀺. 𑀦 𑀳𑀺 𑀲𑀩𑁆𑀩𑀲𑁄 𑀔𑀻𑀡𑀸𑀲𑀯𑀲𑁆𑀲 𑀢𑁂 𑀲𑀫𑁆𑀪𑀯𑀦𑁆𑀢𑀻𑀢𑀺 𑀲𑀼𑀯𑀺𑀲𑀼𑀤𑁆𑀥𑀲𑁆𑀲 𑀧𑀭𑀸𑀦𑀼𑀕𑁆𑀕𑀳𑀧𑁆𑀧𑀯𑀢𑁆𑀢𑀺. 𑀏𑀯𑀁 ¶ 𑀤𑁂𑀲𑀓𑀲𑀁𑀓𑀺𑀮𑁂𑀲𑀪𑀽𑀢𑀸𑀦𑀁 𑀤𑀺𑀝𑁆𑀞𑀺𑀲𑀻𑀮𑀲𑀫𑁆𑀧𑀤𑀸𑀤𑀽𑀲𑀓𑀸𑀦𑀁 𑀅𑀯𑀺𑀚𑁆𑀚𑀸𑀢𑀡𑁆𑀳𑀸𑀦𑀁 𑀅𑀘𑁆𑀘𑀦𑁆𑀢𑀸𑀪𑀸𑀯𑀲𑀁𑀲𑀽𑀘𑀓𑁂𑀳𑀺 𑀜𑀸𑀡𑀧𑁆𑀧𑀳𑀸𑀦𑀲𑀫𑁆𑀧𑀤𑀸𑀪𑀺𑀩𑁆𑀬𑀜𑁆𑀚𑀦𑀓𑁂𑀳𑀺 𑀘 𑀲𑀫𑁆𑀩𑀼𑀤𑁆𑀥𑀯𑀺𑀲𑀼𑀤𑁆𑀥𑀪𑀸𑀯𑁂𑀳𑀺 𑀧𑀼𑀭𑀺𑀫𑀯𑁂𑀲𑀸𑀭𑀚𑁆𑀚𑀤𑁆𑀯𑀬𑀲𑀺𑀤𑁆𑀥𑀺, 𑀢𑀢𑁄 𑀘 𑀅𑀦𑁆𑀢𑀭𑀸𑀬𑀺𑀓𑀦𑀺𑀬𑁆𑀬𑀸𑀦𑀺𑀓𑀥𑀫𑁆𑀫𑁂𑀲𑀼 𑀲𑀫𑁆𑀫𑁄𑀳𑀸𑀪𑀸𑀯𑀲𑀺𑀤𑁆𑀥𑀺𑀢𑁄 𑀧𑀘𑁆𑀙𑀺𑀫𑀯𑁂𑀲𑀸𑀭𑀚𑁆𑀚𑀤𑁆𑀯𑀬𑀲𑀺𑀤𑁆𑀥𑀻𑀢𑀺 𑀪𑀕𑀯𑀢𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀲𑀫𑀦𑁆𑀦𑀸𑀕𑀫𑁄 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺 𑀘 𑀦𑀺𑀤𑀸𑀦𑀯𑀘𑀦𑁂𑀦 𑀧𑀓𑀸𑀲𑀺𑀢𑀸 𑀳𑁄𑀢𑀺. 𑀢𑀢𑁆𑀣 𑀢𑀢𑁆𑀣 𑀲𑀫𑁆𑀧𑀢𑁆𑀢𑀧𑀭𑀺𑀲𑀸𑀬 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑁆𑀧𑀝𑀺𑀪𑀸𑀦𑁂𑀦 𑀥𑀫𑁆𑀫𑀤𑁂𑀲𑀦𑀸𑀤𑀻𑀧𑀦𑀢𑁄, 𑀇𑀥 𑀧𑀦 𑀭𑀽𑀧𑀕𑀭𑀼𑀓𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑁆𑀧𑀝𑀺𑀪𑀸𑀦𑁂𑀦 𑀥𑀫𑁆𑀫𑀤𑁂𑀲𑀦𑀸𑀤𑀻𑀧𑀦𑀢𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀢𑁆𑀣𑀼𑀲𑀫𑁆𑀧𑀢𑁆𑀢𑀺𑀧𑁆𑀧𑀓𑀸𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦’’𑀦𑁆𑀢𑀺.

𑀢𑀣𑀸 𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀧𑁆𑀧𑀓𑀸𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦𑀁. 𑀜𑀸𑀡𑀓𑀭𑀼𑀡𑀸𑀧𑀭𑀺𑀕𑁆𑀕𑀳𑀺𑀢𑀲𑀩𑁆𑀩𑀓𑀺𑀭𑀺𑀬𑀲𑁆𑀲 𑀳𑀺 𑀪𑀕𑀯𑀢𑁄 ¶ 𑀦𑀢𑁆𑀣𑀺 𑀦𑀺𑀭𑀢𑁆𑀣𑀓𑀸 𑀧𑀝𑀺𑀧𑀢𑁆𑀢𑀺, 𑀅𑀢𑁆𑀢𑀳𑀺𑀢𑀢𑁆𑀣𑀸 𑀯𑀸. 𑀢𑀲𑁆𑀫𑀸 𑀧𑀭𑁂𑀲𑀁 𑀏𑀯 𑀅𑀢𑁆𑀣𑀸𑀬 𑀧𑀯𑀢𑁆𑀢𑀲𑀩𑁆𑀩𑀓𑀺𑀭𑀺𑀬𑀲𑁆𑀲 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀓𑀮𑀫𑁆𑀧𑀺 𑀓𑀸𑀬𑀯𑀘𑀻𑀫𑀦𑁄𑀓𑀫𑁆𑀫𑀁 𑀬𑀣𑀸𑀧𑀯𑀢𑁆𑀢𑀁 𑀯𑀼𑀘𑁆𑀘𑀫𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀧𑀭𑀫𑀢𑁆𑀣𑁂𑀳𑀺 𑀬𑀣𑀸𑀭𑀳𑀁 𑀲𑀢𑁆𑀢𑀸𑀦𑀁 𑀅𑀦𑀼𑀲𑀸𑀲𑀦𑀝𑁆𑀞𑁂𑀦 𑀲𑀸𑀲𑀦𑀁, 𑀦 𑀓𑀧𑁆𑀧𑀭𑀘𑀦𑀸. 𑀢𑀬𑀺𑀤𑀁 𑀲𑀢𑁆𑀣𑀼𑀘𑀭𑀺𑀢𑀁 𑀓𑀸𑀮𑀤𑁂𑀲𑀤𑁂𑀲𑀓𑀧𑀭𑀺𑀲𑀸𑀧𑀤𑁂𑀲𑁂𑀳𑀺 𑀲𑀤𑁆𑀥𑀺𑀁 𑀢𑀢𑁆𑀣 𑀢𑀢𑁆𑀣 𑀦𑀺𑀤𑀸𑀦𑀯𑀘𑀦𑁂𑀳𑀺 𑀬𑀣𑀸𑀭𑀳𑀁 𑀧𑀓𑀸𑀲𑀻𑀬𑀢𑀺. ‘‘𑀇𑀥 𑀧𑀦 𑀭𑀽𑀧𑀕𑀭𑀼𑀓𑀸𑀦𑀁 𑀧𑀼𑀕𑁆𑀕𑀮𑀸𑀦’’𑀦𑁆𑀢𑀺𑀆𑀤𑀺 𑀲𑀩𑁆𑀩𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑀸𑀲𑀦𑀲𑀫𑁆𑀧𑀢𑁆𑀢𑀺𑀧𑁆𑀧𑀓𑀸𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦’’𑀦𑁆𑀢𑀺. 𑀅𑀧𑀺𑀘 𑀲𑀢𑁆𑀣𑀼𑀦𑁄 𑀧𑀫𑀸𑀡𑀪𑀸𑀯𑀧𑁆𑀧𑀓𑀸𑀲𑀦𑁂𑀦 𑀯𑀘𑀦𑁂𑀦 𑀲𑀸𑀲𑀦𑀲𑁆𑀲 𑀧𑀫𑀸𑀡𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀦𑀺𑀤𑀸𑀦𑀯𑀘𑀦𑀁, 𑀢𑀜𑁆𑀘 𑀤𑁂𑀲𑀓𑀧𑁆𑀧𑀫𑀸𑀡𑀪𑀸𑀯𑀤𑀲𑁆𑀲𑀦𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 ‘‘𑀪𑀕𑀯𑀸’’𑀢𑀺 𑀘 𑀇𑀫𑀺𑀦𑀸 𑀧𑀤𑁂𑀦 𑀯𑀺𑀪𑀸𑀯𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀪𑀕𑀯𑀸𑀢𑀺 𑀳𑀺 𑀢𑀣𑀸𑀕𑀢𑀲𑁆𑀲 𑀭𑀸𑀕𑀤𑁄𑀲𑀫𑁄𑀳𑀸𑀤𑀺𑀲𑀩𑁆𑀩𑀓𑀺𑀮𑁂𑀲𑀫𑀮𑀤𑀼𑀘𑁆𑀘𑀭𑀺𑀢𑀤𑁄𑀲𑀧𑁆𑀧𑀳𑀸𑀦𑀤𑀻𑀧𑀦𑁂𑀦 𑀯𑀘𑀦𑁂𑀦 𑀅𑀦𑀜𑁆𑀜𑀲𑀸𑀥𑀸𑀭𑀡𑀲𑀼𑀧𑀭𑀺𑀲𑀼𑀤𑁆𑀥𑀜𑀸𑀡𑀓𑀭𑀼𑀡𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑁄𑀕𑀧𑀭𑀺𑀤𑀻𑀧𑀦𑁂𑀦 𑀢𑀢𑁄 𑀏𑀯 𑀲𑀩𑁆𑀩𑀲𑀢𑁆𑀢𑀼𑀢𑁆𑀢𑀫𑀪𑀸𑀯𑀤𑀻𑀧𑀦𑁂𑀦 𑀅𑀬𑀫𑀢𑁆𑀣𑁄 𑀲𑀩𑁆𑀩𑀣𑀸 𑀧𑀓𑀸𑀲𑀺𑀢𑁄 𑀳𑁄𑀢𑀻𑀢𑀺. 𑀇𑀤𑀫𑁂𑀢𑁆𑀣 𑀦𑀺𑀤𑀸𑀦𑀯𑀘𑀦𑀧𑁆𑀧𑀬𑁄𑀚𑀦𑀲𑁆𑀲 𑀫𑀼𑀔𑀫𑀢𑁆𑀢𑀦𑀺𑀤𑀲𑁆𑀲𑀦𑀁.

𑀦𑀺𑀓𑁆𑀔𑀺𑀢𑁆𑀢𑀲𑁆𑀲𑀸𑀢𑀺 𑀤𑁂𑀲𑀺𑀢𑀲𑁆𑀲. 𑀤𑁂𑀲𑀦𑀸 𑀳𑀺 𑀤𑁂𑀲𑁂𑀢𑀩𑁆𑀩𑀲𑁆𑀲 𑀲𑀻𑀮𑀸𑀤𑀺𑀅𑀢𑁆𑀣𑀲𑁆𑀲 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑁂𑀲𑀼 𑀦𑀺𑀓𑁆𑀔𑀺𑀧𑀦𑀢𑁄 ‘‘𑀦𑀺𑀓𑁆𑀔𑁂𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀁 𑀯𑀺𑀘𑀸𑀭𑁂𑀢𑁆𑀯𑀸𑀯 𑀯𑀼𑀘𑁆𑀘𑀫𑀸𑀦𑀸 𑀧𑀸𑀓𑀝𑀸 𑀳𑁄𑀢𑀻𑀢𑀺 𑀲𑀸𑀫𑀜𑁆𑀜𑀢𑁄 𑀪𑀕𑀯𑀢𑁄 𑀤𑁂𑀲𑀦𑀸𑀬 𑀲𑀫𑀼𑀝𑁆𑀞𑀸𑀦𑀲𑁆𑀲 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀏𑀢𑁆𑀣𑀸𑀬𑀁 𑀤𑁂𑀲𑀦𑀸 𑀏𑀯𑀁𑀲𑀫𑀼𑀝𑁆𑀞𑀸𑀦𑀸’’𑀢𑀺 𑀤𑁂𑀲𑀦𑀸𑀬 𑀲𑀫𑀼𑀝𑁆𑀞𑀸𑀦𑁂 𑀤𑀲𑁆𑀲𑀺𑀢𑁂 𑀲𑀼𑀢𑁆𑀢𑀲𑁆𑀲 𑀲𑀫𑁆𑀫𑀤𑁂𑀯 𑀦𑀺𑀤𑀸𑀦𑀧𑀭𑀺𑀚𑀸𑀦𑀦𑁂𑀦 𑀯𑀡𑁆𑀡𑀦𑀸𑀬 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸 ¶ 𑀅𑀦𑁂𑀓𑀲𑀢𑀅𑀦𑁂𑀓𑀲𑀳𑀲𑁆𑀲𑀪𑁂𑀤𑀸𑀦𑀺𑀧𑀺 𑀲𑀼𑀢𑁆𑀢𑀦𑁆𑀢𑀸𑀦𑀺 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀸𑀤𑀺𑀧𑀝𑁆𑀞𑀸𑀦𑀦𑀬𑀯𑀲𑁂𑀦 𑀲𑁄𑀴𑀲𑀯𑀺𑀥𑀢𑀁 𑀦𑀸𑀢𑀺𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀺𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀯𑀲𑁂𑀦 𑀘𑀢𑀼𑀩𑁆𑀩𑀺𑀥𑀪𑀸𑀯𑀦𑁆𑀢𑀺 𑀆𑀳 𑁋 ‘‘𑀘𑀢𑁆𑀢𑀸𑀭𑁄 𑀳𑀺 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸’’𑀢𑀺. 𑀏𑀢𑁆𑀣 𑀘 𑀬𑀣𑀸 𑀅𑀢𑁆𑀢𑀚𑁆𑀛𑀸𑀲𑀬𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀘 𑀧𑀭𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀳𑀺 𑀲𑀤𑁆𑀥𑀺𑀁 𑀲𑀁𑀲𑀕𑁆𑀕𑀪𑁂𑀤𑁄 𑀲𑀫𑁆𑀪𑀯𑀢𑀺 ‘‘𑀅𑀢𑁆𑀢𑀚𑁆𑀛𑀸𑀲𑀬𑁄 𑀘 𑀧𑀭𑀚𑁆𑀛𑀸𑀲𑀬𑁄 𑀘, 𑀅𑀢𑁆𑀢𑀚𑁆𑀛𑀸𑀲𑀬𑁄 𑀘 𑀧𑀼𑀘𑁆𑀙𑀸𑀯𑀲𑀺𑀓𑁄 𑀘, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄 𑀘 𑀧𑀭𑀚𑁆𑀛𑀸𑀲𑀬𑁄 𑀘, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄 𑀘 𑀧𑀼𑀘𑁆𑀙𑀸𑀯𑀲𑀺𑀓𑁄 𑀘𑀸’’𑀢𑀺 𑀅𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀲𑀩𑁆𑀪𑀸𑀯𑀢𑁄, 𑀏𑀯𑀁 𑀬𑀤𑀺𑀧𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀅𑀢𑁆𑀢𑀚𑁆𑀛𑀸𑀲𑀬𑁂𑀦𑀧𑀺 𑀲𑀁𑀲𑀕𑁆𑀕𑀪𑁂𑀤𑁄 𑀲𑀫𑁆𑀪𑀯𑀢𑀺, 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀻𑀳𑀺 𑀧𑀦 𑀧𑀼𑀭𑀢𑁄 𑀞𑀺𑀢𑁂𑀳𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀲𑀁𑀲𑀕𑁆𑀕𑁄 𑀦𑀢𑁆𑀣𑀻𑀢𑀺 𑀦 𑀇𑀥 𑀦𑀺𑀭𑀯𑀲𑁂𑀲𑁄 𑀯𑀺𑀢𑁆𑀣𑀸𑀭𑀦𑀬𑁄 𑀲𑀫𑁆𑀪𑀯𑀢𑀻𑀢𑀺 ‘‘𑀘𑀢𑁆𑀢𑀸𑀭𑁄 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸’’𑀢𑀺 𑀯𑀼𑀢𑁆𑀢𑀁. 𑀢𑀤𑀦𑁆𑀢𑁄𑀕𑀥𑀢𑁆𑀢𑀸 𑀯𑀸 𑀲𑁂𑀲𑀦𑀺𑀓𑁆𑀔𑁂𑀧𑀸𑀦𑀁 𑀫𑀽𑀮𑀦𑀺𑀓𑁆𑀔𑁂𑀧𑀯𑀲𑁂𑀦 𑀘𑀢𑁆𑀢𑀸𑀭𑁄𑀯 𑀤𑀲𑁆𑀲𑀺𑀢𑀸. 𑀬𑀣𑀸𑀤𑀲𑁆𑀲𑀦𑀜𑁆𑀳𑁂𑀢𑁆𑀣 𑀅𑀬𑀁 𑀲𑀁𑀲𑀕𑁆𑀕𑀪𑁂𑀤𑁄 𑀕𑀳𑁂𑀢𑀩𑁆𑀩𑁄𑀢𑀺.

𑀢𑀢𑁆𑀭𑀸𑀬𑀁 𑀯𑀘𑀦𑀢𑁆𑀣𑁄 𑁋 𑀦𑀺𑀓𑁆𑀔𑀺𑀧𑀻𑀬𑀢𑀻𑀢𑀺 𑀦𑀺𑀓𑁆𑀔𑁂𑀧𑁄, 𑀲𑀼𑀢𑁆𑀢𑀁 𑀏𑀯 𑀦𑀺𑀓𑁆𑀔𑁂𑀧𑁄 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄. 𑀅𑀣 𑀯𑀸 𑀦𑀺𑀓𑁆𑀔𑀺𑀧𑀦𑀁 𑀦𑀺𑀓𑁆𑀔𑁂𑀧𑁄, 𑀲𑀼𑀢𑁆𑀢𑀲𑁆𑀲 𑀦𑀺𑀓𑁆𑀔𑁂𑀧𑁄 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄, 𑀲𑀼𑀢𑁆𑀢𑀤𑁂𑀲𑀦𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁄 𑀅𑀢𑁆𑀢𑀚𑁆𑀛𑀸𑀲𑀬𑁄, 𑀲𑁄 𑀅𑀲𑁆𑀲 𑀅𑀢𑁆𑀣𑀺 𑀓𑀸𑀭𑀡𑀪𑀽𑀢𑁄𑀢𑀺 𑀅𑀢𑁆𑀢𑀚𑁆𑀛𑀸𑀲𑀬𑁄. 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁄 𑀏𑀢𑀲𑁆𑀲𑀸𑀢𑀺 ¶ 𑀯𑀸 𑀅𑀢𑁆𑀢𑀚𑁆𑀛𑀸𑀲𑀬𑁄. 𑀧𑀭𑀚𑁆𑀛𑀸𑀲𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀧𑀼𑀘𑁆𑀙𑀸𑀬 𑀯𑀲𑁄 𑀧𑀼𑀘𑁆𑀙𑀸𑀯𑀲𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀧𑀼𑀘𑁆𑀙𑀸𑀯𑀲𑀺𑀓𑁄. 𑀲𑀼𑀢𑁆𑀢𑀤𑁂𑀲𑀦𑀸𑀯𑀢𑁆𑀣𑀼𑀪𑀽𑀢𑀲𑁆𑀲 𑀅𑀢𑁆𑀣𑀲𑁆𑀲 𑀉𑀧𑁆𑀧𑀢𑁆𑀢𑀺 𑀅𑀢𑁆𑀣𑀼𑀧𑁆𑀧𑀢𑁆𑀢𑀺, 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑁂𑀯 𑀅𑀝𑁆𑀞𑀼𑀧𑁆𑀧𑀢𑁆𑀢𑀺 𑀢𑁆𑀣-𑀓𑀸𑀭𑀲𑁆𑀲 𑀝𑁆𑀞-𑀓𑀸𑀭𑀁 𑀓𑀢𑁆𑀯𑀸. 𑀲𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄. 𑀅𑀣 𑀯𑀸 𑀦𑀺𑀓𑁆𑀔𑀺𑀧𑀻𑀬𑀢𑀺 𑀲𑀼𑀢𑁆𑀢𑀁 𑀏𑀢𑁂𑀦𑀸𑀢𑀺 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑁄, 𑀅𑀢𑁆𑀢𑀚𑁆𑀛𑀸𑀲𑀬𑀸𑀤𑀺 𑀏𑀯. 𑀏𑀢𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁄 𑀅𑀢𑁆𑀢𑀚𑁆𑀛𑀸𑀲𑀬𑁄. 𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑁄 𑀧𑀭𑀚𑁆𑀛𑀸𑀲𑀬𑁄. 𑀧𑀼𑀘𑁆𑀙𑀻𑀬𑀢𑀻𑀢𑀺 𑀧𑀼𑀘𑁆𑀙𑀸, 𑀧𑀼𑀘𑁆𑀙𑀺𑀢𑀩𑁆𑀩𑁄 𑀅𑀢𑁆𑀣𑁄. 𑀧𑀼𑀘𑁆𑀙𑀸𑀯𑀲𑁂𑀦 𑀧𑀯𑀢𑁆𑀢𑀁 𑀥𑀫𑁆𑀫𑀧𑁆𑀧𑀝𑀺𑀕𑁆𑀕𑀸𑀳𑀓𑀸𑀦𑀁 𑀯𑀘𑀦𑀁 𑀧𑀼𑀘𑁆𑀙𑀸𑀯𑀲𑀺𑀓𑀁, 𑀢𑀤𑁂𑀯 𑀦𑀺𑀓𑁆𑀔𑁂𑀧𑀲𑀤𑁆𑀤𑀸𑀧𑁂𑀓𑁆𑀔𑀸𑀬 𑀧𑀼𑀮𑁆𑀮𑀺𑀗𑁆𑀕𑀯𑀲𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀼𑀘𑁆𑀙𑀸𑀯𑀲𑀺𑀓𑁄’’𑀢𑀺. 𑀢𑀣𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺 𑀏𑀯 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀅𑀧𑀺𑀘𑁂𑀢𑁆𑀣 𑀧𑀭𑁂𑀲𑀁 𑀇𑀦𑁆𑀤𑁆𑀭𑀺𑀬𑀧𑀭𑀺𑀧𑀸𑀓𑀸𑀤𑀺𑀓𑀸𑀭𑀡𑀦𑀺𑀭𑀧𑁂𑀓𑁆𑀔𑀢𑁆𑀢𑀸 𑀅𑀢𑁆𑀢𑀚𑁆𑀛𑀸𑀲𑀬𑀲𑁆𑀲 𑀯𑀺𑀲𑀼𑀁 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀪𑀸𑀯𑁄 𑀬𑀼𑀢𑁆𑀢𑁄 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂𑀦𑁂𑀯 𑀥𑀫𑁆𑀫𑀢𑀦𑁆𑀢𑀺𑀝𑁆𑀞𑀧𑀦𑀢𑁆𑀣𑀁 𑀧𑀯𑀢𑁆𑀢𑀺𑀢𑀤𑁂𑀲𑀦𑀢𑁆𑀢𑀸. 𑀧𑀭𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀯𑀲𑀺𑀓𑀸𑀦𑀁 𑀧𑀦 𑀧𑀭𑁂𑀲𑀁 𑀅𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀦𑀁 𑀤𑁂𑀲𑀦𑀸𑀧𑀯𑀢𑁆𑀢𑀺𑀳𑁂𑀢𑀼𑀪𑀽𑀢𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀁 𑀧𑀯𑀢𑁆𑀢𑀺𑀢𑀸𑀦𑀁 ¶ 𑀓𑀣𑀫𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀅𑀦𑀯𑀭𑁄𑀥𑁄, 𑀧𑀼𑀘𑁆𑀙𑀸𑀯𑀲𑀺𑀓𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀓𑀸𑀦𑀁 𑀯𑀸 𑀧𑀭𑀚𑁆𑀛𑀸𑀲𑀬𑀸𑀦𑀼𑀭𑁄𑀥𑁂𑀦 𑀧𑀯𑀢𑁆𑀢𑀺𑀢𑀸𑀦𑀁 𑀓𑀣𑀁 𑀧𑀭𑀚𑁆𑀛𑀸𑀲𑀬𑁂 𑀅𑀦𑀯𑀭𑁄𑀥𑁄𑀢𑀺? 𑀦 𑀘𑁄𑀤𑁂𑀢𑀩𑁆𑀩𑀫𑁂𑀢𑀁. 𑀧𑀭𑁂𑀲𑀜𑁆𑀳𑀺 𑀅𑀪𑀺𑀦𑀻𑀳𑀸𑀭𑀧𑀭𑀺𑀧𑀼𑀘𑁆𑀙𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀲𑁆𑀲𑁂𑀯 𑀲𑀼𑀢𑁆𑀢𑀤𑁂𑀲𑀦𑀸𑀓𑀸𑀭𑀡𑀼𑀧𑁆𑀧𑀸𑀤𑀲𑁆𑀲 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀪𑀸𑀯𑁂𑀦 𑀕𑀳𑀺𑀢𑀢𑁆𑀢𑀸 𑀧𑀭𑀚𑁆𑀛𑀸𑀲𑀬𑀧𑀼𑀘𑁆𑀙𑀸𑀯𑀲𑀺𑀓𑀸𑀦𑀁 𑀯𑀺𑀲𑀼𑀁 𑀕𑀳𑀡𑀁. 𑀢𑀣𑀸 𑀳𑀺 𑀩𑁆𑀭𑀳𑁆𑀫𑀚𑀸𑀮𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀸𑀤𑀻𑀦𑀁 𑀯𑀡𑁆𑀡𑀸𑀯𑀡𑁆𑀡𑀆𑀫𑀺𑀲𑀼𑀧𑁆𑀧𑀸𑀤𑀸𑀤𑀺𑀤𑁂𑀲𑀦𑀸𑀦𑀺𑀫𑀺𑀢𑁆𑀢𑀁 ‘‘𑀅𑀝𑁆𑀞𑀼𑀧𑁆𑀧𑀢𑁆𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀧𑀭𑁂𑀲𑀁 𑀧𑀼𑀘𑁆𑀙𑀁 𑀯𑀺𑀦𑀸 𑀅𑀚𑁆𑀛𑀸𑀲𑀬𑀁 𑀏𑀯 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀤𑁂𑀲𑀺𑀢𑁄 𑀧𑀭𑀚𑁆𑀛𑀸𑀲𑀬𑁄, 𑀧𑀼𑀘𑁆𑀙𑀸𑀯𑀲𑁂𑀦 𑀤𑁂𑀲𑀺𑀢𑁄 𑀧𑀼𑀘𑁆𑀙𑀸𑀯𑀲𑀺𑀓𑁄𑀢𑀺 𑀧𑀸𑀓𑀝𑁄𑀬𑀫𑀢𑁆𑀣𑁄𑀢𑀺. 𑀅𑀢𑁆𑀢𑀦𑁄 𑀅𑀚𑁆𑀛𑀸𑀲𑀬𑁂𑀦𑁂𑀯 𑀓𑀣𑁂𑀲𑀻𑀢𑀺 𑀥𑀫𑁆𑀫𑀢𑀦𑁆𑀢𑀺𑀝𑁆𑀞𑀧𑀦𑀢𑁆𑀣𑀁 𑀓𑀣𑁂𑀲𑀺. 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀥𑀫𑁆𑀫𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀬𑁄. 𑀅𑀚𑁆𑀛𑀸𑀲𑀬𑀦𑁆𑀢𑀺 𑀅𑀥𑀺𑀫𑀼𑀢𑁆𑀢𑀺𑀁. 𑀔𑀦𑁆𑀢𑀺𑀦𑁆𑀢𑀺 𑀤𑀺𑀝𑁆𑀞𑀺𑀦𑀺𑀚𑁆𑀛𑀸𑀦𑀓𑁆𑀔𑀦𑁆𑀢𑀺𑀁. 𑀫𑀦𑀦𑁆𑀢𑀺 𑀧𑀜𑁆𑀜𑀢𑁆𑀢𑀺𑀘𑀺𑀢𑁆𑀢𑀁. 𑀅𑀪𑀺𑀦𑀻𑀳𑀸𑀭𑀦𑁆𑀢𑀺 𑀧𑀡𑀺𑀥𑀸𑀦𑀁. 𑀩𑀼𑀚𑁆𑀛𑀦𑀪𑀸𑀯𑀦𑁆𑀢𑀺 𑀩𑀼𑀚𑁆𑀛𑀦𑀲𑀪𑀸𑀯𑀁, 𑀧𑀝𑀺𑀯𑀺𑀚𑁆𑀛𑀦𑀸𑀓𑀸𑀭𑀁 𑀯𑀸. 𑀭𑀽𑀧𑀕𑀭𑀼𑀓𑀸𑀦𑀦𑁆𑀢𑀺 𑀧𑀜𑁆𑀘𑀲𑀼 𑀆𑀭𑀫𑁆𑀫𑀡𑁂𑀲𑀼 𑀭𑀽𑀧𑀸𑀭𑀫𑁆𑀫𑀡𑀕𑀭𑀼𑀓𑀸 𑀭𑀽𑀧𑀕𑀭𑀼𑀓𑀸. 𑀘𑀺𑀢𑁆𑀢𑁂𑀦 𑀭𑀽𑀧𑀦𑀺𑀦𑁆𑀦𑀸 𑀭𑀽𑀧𑀧𑁄𑀡𑀸 𑀭𑀽𑀧𑀧𑀩𑁆𑀪𑀸𑀭𑀸 𑀭𑀽𑀧𑀤𑀲𑁆𑀲𑀦𑀧𑁆𑀧𑀲𑀼𑀢𑀸 𑀭𑀽𑀧𑁂𑀦 𑀆𑀓𑀟𑁆𑀠𑀺𑀢𑀳𑀤𑀬𑀸, 𑀢𑁂𑀲𑀁 𑀭𑀽𑀧𑀕𑀭𑀼𑀓𑀸𑀦𑀁.

𑀧𑀝𑀺𑀲𑁂𑀥𑀢𑁆𑀣𑁄𑀢𑀺 𑀧𑀝𑀺𑀓𑁆𑀔𑁂𑀧𑀢𑁆𑀣𑁄. 𑀓𑀲𑁆𑀲 𑀧𑀦 𑀧𑀝𑀺𑀓𑁆𑀔𑁂𑀧𑀢𑁆𑀣𑁄𑀢𑀺? 𑀓𑀺𑀭𑀺𑀬𑀸𑀧𑀥𑀸𑀦𑀜𑁆𑀳𑀺 𑀯𑀸𑀓𑁆𑀬𑀁, 𑀢𑀲𑁆𑀫𑀸 ‘‘𑀦 𑀲𑀫𑀦𑀼𑀧𑀲𑁆𑀲𑀸𑀫𑀻’’𑀢𑀺 𑀲𑀫𑀦𑀼𑀧𑀲𑁆𑀲𑀦𑀸𑀓𑀺𑀭𑀺𑀬𑀸𑀧𑀝𑀺𑀲𑁂𑀥𑀢𑁆𑀣𑁄. 𑀢𑁂𑀦𑀸𑀳 𑁋 ‘‘𑀇𑀫𑀲𑁆𑀲 𑀧𑀦 𑀧𑀤𑀲𑁆𑀲𑀸’’𑀢𑀺𑀆𑀤𑀺. 𑀬𑁄 𑀧𑀭𑁄 𑀦 𑀳𑁄𑀢𑀺, 𑀲𑁄 𑀅𑀢𑁆𑀢𑀸𑀢𑀺 𑀮𑁄𑀓𑀲𑀫𑀜𑁆𑀜𑀸𑀫𑀢𑁆𑀢𑀲𑀺𑀤𑁆𑀥𑀁 𑀲𑀢𑁆𑀢𑀲𑀦𑁆𑀢𑀸𑀦𑀁 𑀲𑀦𑁆𑀥𑀸𑀬 𑁋 ‘‘𑀅𑀳’’𑀦𑁆𑀢𑀺 𑀲𑀢𑁆𑀣𑀸 𑀯𑀤𑀢𑀺, 𑀦 𑀩𑀸𑀳𑀺𑀭𑀓𑀧𑀭𑀺𑀓𑀧𑁆𑀧𑀺𑀢𑀁 𑀅𑀳𑀁𑀓𑀸𑀭𑀯𑀺𑀲𑀬𑀁 𑀅𑀳𑀁𑀓𑀸𑀭𑀲𑁆𑀲 𑀩𑁄𑀥𑀺𑀫𑀽𑀮𑁂𑀬𑁂𑀯 𑀲𑀫𑀼𑀘𑁆𑀙𑀺𑀦𑁆𑀦𑀢𑁆𑀢𑀸. 𑀮𑁄𑀓𑀲𑀫𑀜𑁆𑀜𑀸𑀦𑀢𑀺𑀓𑁆𑀓𑀫𑀦𑁆𑀢𑀸 𑀏𑀯 𑀳𑀺 𑀩𑀼𑀤𑁆𑀥𑀸𑀦𑀁 𑀮𑁄𑀓𑀺𑀬𑁂 𑀯𑀺𑀲𑀬𑁂 𑀤𑁂𑀲𑀦𑀸𑀧𑀯𑀢𑁆𑀢𑀺. 𑀪𑀺𑀓𑁆𑀔𑀯𑁂𑀢𑀺 𑀆𑀮𑀧𑀦𑁂 𑀓𑀸𑀭𑀡𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀅𑀜𑁆𑀜𑀦𑁆𑀢𑀺 𑀅𑀧𑁂𑀓𑁆𑀔𑀸𑀲𑀺𑀤𑁆𑀥𑀢𑁆𑀢𑀸 𑀅𑀜𑁆𑀜𑀢𑁆𑀣𑀲𑁆𑀲 ¶ ‘‘𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀇𑀢𑁆𑀣𑀺𑀭𑀽𑀧𑀢𑁄 𑀅𑀜𑁆𑀜’’𑀦𑁆𑀢𑀺 𑀆𑀳. 𑀏𑀓𑀫𑁆𑀧𑀺 𑀭𑀽𑀧𑀦𑁆𑀢𑀺 𑀏𑀓𑀁 𑀯𑀡𑁆𑀡𑀸𑀬𑀢𑀦𑀁. 𑀲𑀫𑀁 𑀯𑀺𑀲𑀫𑀁 𑀲𑀫𑁆𑀫𑀸 𑀬𑀸𑀣𑀸𑀯𑀢𑁄 𑀅𑀦𑀼 𑀅𑀦𑀼 𑀧𑀲𑁆𑀲𑀢𑀻𑀢𑀺 𑀲𑀫𑀦𑀼𑀧𑀲𑁆𑀲𑀦𑀸, 𑀜𑀸𑀡𑀁. 𑀲𑀁𑀓𑀺𑀮𑀺𑀲𑁆𑀲𑀦𑀯𑀲𑁂𑀦 𑀅𑀦𑀼 𑀅𑀦𑀼 𑀧𑀲𑁆𑀲𑀢𑀻𑀢𑀺 𑀲𑀫𑀦𑀼𑀧𑀲𑁆𑀲𑀦𑀸, 𑀤𑀺𑀝𑁆𑀞𑀺. 𑀦𑁄 𑀦𑀺𑀘𑁆𑀘𑀢𑁄𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑀺𑀅𑀢𑁆𑀣𑁄, 𑀏𑀯𑀫𑀸𑀤𑀺𑀓𑁄𑀢𑀺 𑀅𑀢𑁆𑀣𑁄. 𑀢𑁂𑀦 ‘‘𑀤𑀼𑀓𑁆𑀔𑀢𑁄 𑀲𑀫𑀦𑀼𑀧𑀲𑁆𑀲𑀢𑀻’’𑀢𑀺 𑀏𑀯𑀫𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀑𑀮𑁄𑀓𑁂𑀦𑁆𑀢𑁄𑀧𑀻𑀢𑀺 𑀤𑁂𑀯𑀫𑀦𑀼𑀲𑁆𑀲𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑀫𑀡𑀺𑀓𑀦𑀓𑀸𑀤𑀺𑀕𑀢𑀸𑀦𑀺 𑀭𑀽𑀧𑀸𑀦𑀺 𑀅𑀦𑀯𑀲𑁂𑀲𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀑𑀮𑁄𑀓𑁂𑀦𑁆𑀢𑁄𑀧𑀺. 𑀲𑀸𑀫𑀜𑁆𑀜𑀯𑀘𑀦𑁄𑀧𑀺 𑀬𑀁-𑀲𑀤𑁆𑀤𑁄 ‘‘𑀏𑀓𑀭𑀽𑀧𑀫𑁆𑀧𑀻’’𑀢𑀺 𑀭𑀽𑀧𑀲𑁆𑀲 ¶ 𑀅𑀥𑀺𑀕𑀢𑀢𑁆𑀢𑀸 𑀭𑀽𑀧𑀯𑀺𑀲𑀬𑁄 𑀇𑀘𑁆𑀙𑀺𑀢𑁄𑀢𑀺 ‘‘𑀬𑀁 𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀧𑀼𑀭𑀺𑀲𑀲𑀤𑁆𑀤𑁄 𑀧𑀭𑀺𑀬𑀸𑀤𑀺𑀬𑀺𑀢𑀩𑁆𑀩𑀘𑀺𑀢𑁆𑀢𑀧𑀼𑀕𑁆𑀕𑀮𑀯𑀺𑀲𑀬𑁄𑀢𑀺 𑀭𑀽𑀧𑀕𑀭𑀼𑀓𑀲𑁆𑀲𑀸𑀢𑀺 𑀯𑀺𑀲𑁂𑀲𑀺𑀢𑀁. 𑀕𑀳𑀡𑀁 ‘‘𑀔𑁂𑀧𑀦’’𑀦𑁆𑀢𑀺 𑀘 𑀅𑀥𑀺𑀧𑁆𑀧𑁂𑀢𑀁, 𑀧𑀭𑀺𑀬𑀸𑀤𑀸𑀦𑀜𑁆𑀘 𑀉𑀧𑁆𑀧𑀢𑁆𑀢𑀺𑀦𑀺𑀯𑀸𑀭𑀡𑀦𑁆𑀢𑀺 𑀆𑀳 𑁋 ‘‘𑀘𑀢𑀼𑀪𑀽𑀫𑀓𑀓𑀼𑀲𑀮𑀘𑀺𑀢𑁆𑀢’’𑀦𑁆𑀢𑀺. 𑀢𑀜𑁆𑀳𑀺 𑀭𑀽𑀧𑀁 𑀢𑀸𑀤𑀺𑀲𑀲𑁆𑀲 𑀧𑀭𑀺𑀢𑁆𑀢𑀓𑀼𑀲𑀮𑀲𑁆𑀲𑀧𑀺 𑀉𑀧𑁆𑀧𑀢𑁆𑀢𑀺𑀁 𑀦𑀺𑀯𑀸𑀭𑁂𑀢𑀺, 𑀓𑀺𑀫𑀗𑁆𑀕𑀁 𑀧𑀦 𑀫𑀳𑀕𑁆𑀕𑀢𑀸𑀦𑀼𑀢𑁆𑀢𑀭𑀘𑀺𑀢𑁆𑀢𑀲𑁆𑀲𑀸𑀢𑀺 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀘𑀺𑀢𑁆𑀢𑀲𑁆𑀲𑀧𑀺 𑀉𑀧𑁆𑀧𑀢𑁆𑀢𑀺𑀬𑀸 𑀦𑀺𑀯𑀸𑀭𑀡𑀁 𑀳𑁄𑀢𑀼𑀁 𑀲𑀫𑀢𑁆𑀣𑀁, 𑀮𑁄𑀓𑀺𑀬𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀦𑀺𑀯𑀸𑀭𑀓𑀢𑁆𑀢𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 ‘‘𑀘𑀢𑀼𑀪𑀽𑀫𑀓𑀓𑀼𑀲𑀮𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀓𑀸𑀫𑀕𑀼𑀡𑀲𑁆𑀲𑀸𑀤𑀧𑁆𑀧𑀲𑀼𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀤𑀸𑀦𑀸𑀤𑀺𑀯𑀲𑁂𑀦 𑀲𑀯𑀺𑀧𑁆𑀨𑀸𑀭𑀺𑀓𑀸 𑀓𑀼𑀲𑀮𑀼𑀧𑁆𑀧𑀢𑁆𑀢𑀺 𑀲𑀫𑁆𑀪𑀯𑀢𑀺. 𑀕𑀡𑁆𑀳𑀺𑀢𑁆𑀯𑀸 𑀔𑁂𑀧𑁂𑀢𑁆𑀯𑀸𑀢𑀺 𑀅𑀢𑁆𑀢𑀸𑀦𑀁 𑀅𑀲𑁆𑀲𑀸𑀤𑁂𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀲𑁆𑀲 𑀅𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀧𑀘𑁆𑀘𑀬𑁄 𑀳𑁄𑀦𑁆𑀢𑀁 𑀧𑀯𑀢𑁆𑀢𑀺𑀦𑀺𑀯𑀸𑀭𑀡𑁂𑀦 𑀫𑀼𑀝𑁆𑀞𑀺𑀕𑀢𑀁 𑀯𑀺𑀬 𑀕𑀳𑁂𑀢𑁆𑀯𑀸 𑀅𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑁂𑀦 𑀔𑁂𑀧𑁂𑀢𑁆𑀯𑀸 𑀯𑀺𑀬 𑀢𑀺𑀝𑁆𑀞𑀢𑀺. 𑀢𑀸𑀯 𑀫𑀳𑀢𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑁂 𑀢𑀲𑁆𑀲 𑀧𑀭𑀺𑀬𑀸𑀤𑀺𑀬𑀝𑁆𑀞𑀸𑀦𑀁 𑀅𑀯𑀺𑀘𑁆𑀙𑁂𑀤𑀢𑁄 𑀮𑀩𑁆𑀪𑀢𑀻𑀢𑀺 𑀆𑀳 𑁋 ‘‘𑀢𑀺𑀝𑁆𑀞𑀢𑀻’’𑀢𑀺 𑀬𑀣𑀸 ‘‘𑀧𑀩𑁆𑀩𑀢𑀸 𑀢𑀺𑀝𑁆𑀞𑀦𑁆𑀢𑀺, 𑀦𑀚𑁆𑀚𑁄 𑀲𑀦𑁆𑀤𑀦𑁆𑀢𑀻’’𑀢𑀺. 𑀢𑁂𑀦𑀸𑀳 𑁋 ‘‘𑀇𑀥 𑀉𑀪𑀬𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺𑀆𑀤𑀺.

𑀬𑀣𑀬𑀺𑀤𑀦𑁆𑀢𑀺 𑀲𑀦𑁆𑀥𑀺𑀯𑀲𑁂𑀦 𑀆𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀬𑀓𑀸𑀭𑀸𑀕𑀫𑁄 𑀘𑀸𑀢𑀺 𑀆𑀳 𑁋 ‘‘𑀬𑀣𑀸 𑀇𑀤’’𑀦𑁆𑀢𑀺. 𑀇𑀢𑁆𑀣𑀺𑀬𑀸 𑀭𑀽𑀧𑀦𑁆𑀢𑀺 𑀇𑀢𑁆𑀣𑀺𑀲𑀭𑀻𑀭𑀕𑀢𑀁 𑀢𑀧𑁆𑀧𑀝𑀺𑀩𑀤𑁆𑀥𑀜𑁆𑀘 𑀭𑀽𑀧𑀸𑀬𑀢𑀦𑀁. 𑀧𑀭𑀫𑀢𑁆𑀣𑀲𑁆𑀲 𑀦𑀺𑀭𑀼𑀴𑁆𑀳𑁄, 𑀧𑀞𑀫𑀁 𑀲𑀸𑀥𑀸𑀭𑀡𑀢𑁄 𑀲𑀤𑁆𑀤𑀲𑀢𑁆𑀣𑀮𑀓𑁆𑀔𑀡𑀸𑀦𑀺 𑀯𑀺𑀪𑀸𑀯𑁂𑀢𑀩𑁆𑀩𑀸𑀦𑀺, 𑀧𑀘𑁆𑀙𑀸 𑀅𑀲𑀸𑀥𑀸𑀭𑀡𑀢𑁄𑀢𑀺 𑀢𑀸𑀦𑀺 𑀧𑀸𑀴𑀺𑀯𑀲𑁂𑀦 𑀯𑀺𑀪𑀸𑀯𑁂𑀢𑀼𑀁 𑁋 ‘‘𑀭𑀼𑀧𑁆𑀧𑀢𑀻𑀢𑀺 𑀔𑁄…𑀧𑁂… 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀆𑀳. 𑀢𑀢𑁆𑀣 𑀭𑀼𑀧𑁆𑀧𑀢𑀻𑀢𑀺 𑀲𑀻𑀢𑀸𑀤𑀺𑀯𑀺𑀭𑁄𑀥𑀺𑀧𑀘𑁆𑀘𑀬𑁂𑀳𑀺 𑀯𑀺𑀓𑀸𑀭𑀁 𑀆𑀧𑀸𑀤𑀻𑀬𑀢𑀺, 𑀆𑀧𑀚𑁆𑀚𑀢𑀻𑀢𑀺 𑀯𑀸 𑀅𑀢𑁆𑀣𑁄. 𑀯𑀺𑀓𑀸𑀭𑀼𑀧𑁆𑀧𑀢𑁆𑀢𑀺 𑀘 𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀦𑁆𑀦𑀺𑀧𑀸𑀢𑁂 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺 𑀯𑀺𑀪𑀽𑀢𑀢𑀭𑀸, 𑀓𑀼𑀢𑁄 𑀧𑀦𑀸𑀬𑀁 𑀯𑀺𑀲𑁂𑀲𑁄𑀢𑀺 𑀘𑁂? ‘‘𑀲𑀻𑀢𑁂𑀦𑀸’’𑀢𑀺𑀆𑀤𑀺𑀯𑀘𑀦𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀯𑁂𑀤𑀦𑀸𑀤𑀻𑀲𑀼 𑀅𑀦𑀯𑀲𑁂𑀲𑀭𑀽𑀧𑀲𑀫𑀜𑁆𑀜𑀸 𑀲𑀸𑀫𑀜𑁆𑀜𑀮𑀓𑁆𑀔𑀡𑀦𑁆𑀢𑀺 𑀲𑀩𑁆𑀩𑀭𑀽𑀧𑀥𑀫𑁆𑀫𑀲𑀸𑀥𑀸𑀭𑀡𑀁 𑀭𑀽𑀧𑁆𑀧𑀦𑀁. 𑀇𑀤𑀸𑀦𑀺 𑀅𑀢𑁆𑀣𑀼𑀤𑁆𑀥𑀸𑀭𑀦𑀬𑁂𑀦 𑀭𑀽𑀧𑀲𑀤𑁆𑀤𑀁 𑀲𑀁𑀯𑀡𑁆𑀡𑁂𑀦𑁆𑀢𑁄 ‘‘𑀅𑀬𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀭𑀽𑀧𑀓𑁆𑀔𑀦𑁆𑀥𑁂 𑀯𑀢𑁆𑀢𑀢𑀻𑀢𑀺 ‘‘𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀫. 𑀦𑀺. 𑁧.𑁩𑁬𑁧; 𑁨.𑁧𑁧𑁩; 𑁩.𑁮𑁬, 𑁮𑁯; 𑀯𑀺𑀪. 𑁨). 𑀭𑀽𑀧𑀽𑀧𑀧𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀭𑀽𑀧𑀪𑀯𑁄 𑀭𑀽𑀧𑀁 𑀉𑀢𑁆𑀢𑀭𑀧𑀤𑀮𑁄𑀧𑁂𑀦. 𑀭𑀽𑀧𑀪𑀯𑀽𑀧𑀧𑀢𑁆𑀢𑀺𑀬𑀸𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄. 𑀓𑀲𑀺𑀡𑀦𑀺𑀫𑀺𑀢𑁆𑀢𑁂𑀢𑀺 𑀧𑀣𑀯𑀻𑀓𑀲𑀺𑀡𑀸𑀤𑀺𑀲𑀜𑁆𑀜𑀺𑀢𑁂 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂. 𑀭𑀽𑀧𑁆𑀧𑀢𑀺 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀲𑀪𑀸𑀯𑀁 𑀓𑀭𑁄𑀢𑀻𑀢𑀺 𑀭𑀽𑀧𑀁, 𑀲𑀪𑀸𑀯𑀳𑁂𑀢𑀽𑀢𑀺 ¶ ¶ 𑀆𑀳 𑁋 ‘‘𑀲𑀭𑀽𑀧𑀸…𑀧𑁂… 𑀏𑀢𑁆𑀣 𑀧𑀘𑁆𑀘𑀬𑁂’’𑀢𑀺. 𑀓𑀭𑀘𑀭𑀡𑀸𑀤𑀺𑀅𑀯𑀬𑀯𑀲𑀗𑁆𑀖𑀸𑀢𑀪𑀸𑀯𑁂𑀦 𑀭𑀽𑀧𑀻𑀬𑀢𑀺 𑀦𑀺𑀭𑀽𑀧𑀻𑀬𑀢𑀻𑀢𑀺 𑀭𑀽𑀧𑀁, 𑀭𑀽𑀧𑀓𑀸𑀬𑁄𑀢𑀺 𑀆𑀳 𑁋 ‘‘𑀆𑀓𑀸𑀲𑁄…𑀧𑁂… 𑀏𑀢𑁆𑀣 𑀲𑀭𑀻𑀭𑁂’’𑀢𑀺.

𑀭𑀽𑀧𑀬𑀢𑀺 𑀯𑀡𑁆𑀡𑀯𑀺𑀓𑀸𑀭𑀁 𑀆𑀧𑀚𑁆𑀚𑀫𑀸𑀦𑀁 𑀳𑀤𑀬𑀗𑁆𑀕𑀢𑀪𑀸𑀯𑀁 𑀧𑀓𑀸𑀲𑁂𑀢𑀻𑀢𑀺 𑀭𑀽𑀧𑀁, 𑀯𑀡𑁆𑀡𑀸𑀬𑀢𑀦𑀁. 𑀆𑀭𑁄𑀳𑀧𑀭𑀺𑀡𑀸𑀳𑀸𑀤𑀺𑀪𑁂𑀤𑀭𑀽𑀧𑀕𑀢𑀁 𑀲𑀡𑁆𑀞𑀸𑀦𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀧𑀲𑀸𑀤𑀁 𑀆𑀧𑀚𑁆𑀚𑀫𑀸𑀦𑁄 𑀭𑀽𑀧𑀧𑁆𑀧𑀫𑀸𑀡𑁄𑀢𑀺 𑀯𑀼𑀢𑁆𑀢𑁄𑀢𑀺 𑀆𑀳 𑁋 ‘‘𑀏𑀢𑁆𑀣 𑀲𑀡𑁆𑀞𑀸𑀦𑁂’’𑀢𑀺. 𑀧𑀺𑀬𑀭𑀽𑀧𑀦𑁆𑀢𑀺𑀆𑀤𑀻𑀲𑀼 𑀲𑀪𑀸𑀯𑀢𑁆𑀣𑁄 𑀭𑀽𑀧𑀲𑀤𑁆𑀤𑁄. 𑀆𑀤𑀺𑀲𑀤𑁆𑀤𑁂𑀦 𑀭𑀽𑀧𑀚𑁆𑀛𑀸𑀦𑀸𑀤𑀻𑀦𑀁 𑀲𑀗𑁆𑀕𑀳𑁄. ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀅𑀚𑁆𑀛𑀢𑁆𑀢𑀁 𑀓𑁂𑀲𑀸𑀤𑀻𑀲𑀼 𑀧𑀭𑀺𑀓𑀫𑁆𑀫𑀲𑀜𑁆𑀜𑀸𑀯𑀲𑁂𑀦 𑀧𑀝𑀺𑀮𑀤𑁆𑀥𑀭𑀽𑀧𑀚𑁆𑀛𑀸𑀦𑀁 𑀭𑀽𑀧𑀁, 𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀭𑀽𑀧𑀻𑀢𑀺 𑀯𑀼𑀢𑁆𑀢𑁄. 𑀇𑀢𑁆𑀣𑀺𑀬𑀸 𑀘𑀢𑀼𑀲𑀫𑀼𑀝𑁆𑀞𑀸𑀦𑁂 𑀯𑀡𑁆𑀡𑁂𑀢𑀺 𑀇𑀢𑁆𑀣𑀺𑀲𑀭𑀻𑀭𑀧𑀭𑀺𑀬𑀸𑀧𑀦𑁆𑀦𑀫𑁂𑀯 𑀭𑀽𑀧𑀁 𑀕𑀳𑀺𑀢𑀁, 𑀢𑀧𑁆𑀧𑀝𑀺𑀩𑀤𑁆𑀥𑀯𑀢𑁆𑀣𑀸𑀮𑀗𑁆𑀓𑀸𑀭𑀸𑀤𑀺𑀭𑀽𑀧𑀫𑁆𑀧𑀺 𑀧𑀦 𑀧𑀼𑀭𑀺𑀲𑀘𑀺𑀢𑁆𑀢𑀲𑁆𑀲 𑀧𑀭𑀺𑀬𑀸𑀤𑀸𑀬𑀓𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑁋 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑀦𑁆𑀥𑀯𑀡𑁆𑀡𑀕𑁆𑀕𑀳𑀡𑁂𑀦 𑀯𑀺𑀮𑁂𑀧𑀦𑀁 𑀯𑀼𑀢𑁆𑀢𑀁. 𑀓𑀸𑀫𑀁 ‘‘𑀅𑀲𑀼𑀓𑀸𑀬 𑀇𑀢𑁆𑀣𑀺𑀬𑀸 𑀧𑀲𑀸𑀥𑀦’’𑀦𑁆𑀢𑀺 𑀲𑀮𑁆𑀮𑀓𑁆𑀔𑀺𑀢𑀲𑁆𑀲 𑀅𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀲𑁆𑀲𑀧𑀺 𑀯𑀡𑁆𑀡𑁄 𑀧𑀝𑀺𑀩𑀤𑁆𑀥𑀘𑀺𑀢𑁆𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑁂𑀬𑁆𑀬, 𑀢𑀁 𑀧𑀦 𑀦 𑀏𑀓𑀦𑁆𑀢𑀺𑀓𑀦𑁆𑀢𑀺 𑀏𑀓𑀦𑁆𑀢𑀺𑀓𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑁄’’𑀢𑀺𑀆𑀳. 𑀉𑀧𑀓𑀧𑁆𑀧𑀢𑀻𑀢𑀺 𑀘𑀺𑀢𑁆𑀢𑀲𑁆𑀲 𑀧𑀭𑀺𑀬𑀸𑀤𑀸𑀦𑀸𑀬 𑀉𑀧𑀓𑀧𑁆𑀧𑀢𑀺. 𑀧𑀼𑀭𑀺𑀫𑀲𑁆𑀲𑁂𑀯𑀸𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀅𑀢𑁆𑀣𑀲𑁆𑀲𑁂𑀯 𑀤𑀴𑁆𑀳𑀻𑀓𑀭𑀡𑀢𑁆𑀣𑀁 𑀯𑀼𑀢𑁆𑀢𑀁 𑀬𑀣𑀸 ‘‘𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀩𑀦𑁆𑀥𑀁 𑀲𑀼𑀩𑀦𑁆𑀥’’𑀦𑁆𑀢𑀺. 𑀦𑀺𑀕𑀫𑀦𑀯𑀲𑁂𑀦 𑀯𑀸 𑀏𑀢𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀑𑀧𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 ‘‘𑀬𑀁 𑀏𑀯𑀁 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻’’𑀢𑀺 𑀲𑀓𑀮𑀫𑁂𑀯𑀺𑀤𑀁 𑀧𑀼𑀭𑀺𑀫𑀯𑀘𑀦𑀁 𑀉𑀧𑀫𑀸𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀢𑁆𑀣 𑀧𑀦 𑀉𑀧𑀫𑀸𑀪𑀽𑀢𑀁 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀬𑀣𑀬𑀺𑀤𑀁…𑀧𑁂… 𑀇𑀢𑁆𑀣𑀺𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀬𑀸𑀤𑀸𑀦𑁂 𑀆𑀦𑀼𑀪𑀸𑀯𑁄 𑀲𑀫𑁆𑀪𑀯𑁄 𑀧𑀭𑀺𑀬𑀸𑀤𑀸𑀦𑀸𑀦𑀼𑀪𑀸𑀯𑁄, 𑀢𑀲𑁆𑀲 𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑀁.

𑀇𑀤𑀁 𑀧𑀦 ‘‘𑀇𑀢𑁆𑀣𑀺𑀭𑀽𑀧’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀧𑀭𑀺𑀬𑀸𑀤𑀸𑀦𑀸𑀦𑀼𑀪𑀸𑀯𑁂 𑀲𑀸𑀥𑁂𑀢𑀩𑁆𑀩𑁂 𑀤𑀻𑀧𑁂𑀢𑀩𑁆𑀩𑁂 𑀯𑀢𑁆𑀣𑀼 𑀓𑀸𑀭𑀡𑀁. 𑀦𑀸𑀕𑁄 𑀦𑀸𑀫 𑀲𑁄 𑀭𑀸𑀚𑀸, 𑀤𑀻𑀖𑀤𑀸𑀞𑀺𑀓𑀢𑁆𑀢𑀸 𑀧𑀦 ‘‘𑀫𑀳𑀸𑀤𑀸𑀞𑀺𑀓𑀦𑀸𑀕𑀭𑀸𑀚𑀸’’𑀢𑀺 𑀯𑀼𑀢𑁆𑀢𑁄. 𑀅𑀲𑀁𑀯𑀭𑀦𑀺𑀬𑀸𑀫𑁂𑀦𑀸𑀢𑀺 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑁂𑀦 𑀅𑀲𑀁𑀯𑀭𑀦𑀻𑀳𑀸𑀭𑁂𑀦. 𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸𑀢𑀺 𑀭𑀸𑀕𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀽𑀢𑀁 𑀭𑀽𑀧𑀁 𑀲𑀼𑀪𑀦𑀺𑀫𑀺𑀢𑁆𑀢𑀁 𑀕𑀳𑁂𑀢𑁆𑀯𑀸. 𑀯𑀺𑀲𑀺𑀓𑀸𑀤𑀲𑁆𑀲𑀦𑀁 𑀕𑀦𑁆𑀢𑁆𑀯𑀸𑀢𑀺 𑀲𑀺𑀯𑀣𑀺𑀓𑀤𑀲𑁆𑀲𑀦𑀁 𑀕𑀦𑁆𑀢𑁆𑀯𑀸. 𑀢𑀢𑁆𑀣 𑀳𑀺 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸 𑀇𑀚𑁆𑀛𑀢𑀺. 𑀯𑀢𑁆𑀣𑀼𑀮𑁄𑀪𑁂𑀦 𑀓𑀼𑀢𑁄 𑀢𑀸𑀤𑀺𑀲𑀸𑀬 𑀫𑀭𑀡𑀦𑁆𑀢𑀺 𑀅𑀲𑀤𑁆𑀤𑀳𑀦𑁆𑀢𑁄 ‘‘𑀫𑀼𑀔𑀁 𑀢𑀼𑀫𑁆𑀳𑀸𑀓𑀁 𑀥𑀽𑀫𑀯𑀡𑁆𑀡’’𑀦𑁆𑀢𑀺 𑀢𑁂 𑀤𑀳𑀭𑀲𑀸𑀫𑀡𑁂𑀭𑁂 𑀉𑀧𑁆𑀧𑀡𑁆𑀟𑁂𑀦𑁆𑀢𑁄 𑀯𑀤𑀢𑀺.

𑀭𑀢𑀦𑀢𑁆𑀢𑀬𑁂 𑀲𑀼𑀧𑁆𑀧𑀲𑀦𑁆𑀦𑀢𑁆𑀢𑀸 𑀓𑀸𑀓𑀯𑀡𑁆𑀡𑀢𑀺𑀲𑁆𑀲𑀸𑀤𑀻𑀳𑀺 𑀯𑀺𑀲𑁂𑀲𑀦𑀢𑁆𑀣𑀜𑁆𑀘 𑀲𑁄 𑀢𑀺𑀲𑁆𑀲𑀫𑀳𑀸𑀭𑀸𑀚𑀸 𑀲𑀤𑁆𑀥𑀸𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀘𑁆𑀘𑀢𑀺. 𑀤𑀳𑀭𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 ¶ 𑀢𑀺𑀝𑁆𑀞𑀢𑀻𑀢𑀺 𑀅𑀥𑀺𑀓𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀦𑀺𑀝𑁆𑀞𑀺𑀢𑀼𑀤𑁆𑀤𑁂𑀲𑀓𑀺𑀘𑁆𑀘𑁄𑀢𑀺 𑀕𑀸𑀫𑁂 𑀅𑀲𑀧𑁆𑀧𑀸𑀬𑀭𑀽𑀧𑀤𑀲𑁆𑀲𑀦𑀁 𑀇𑀫𑀲𑁆𑀲 𑀅𑀦𑀢𑁆𑀣𑀸𑀬 𑀲𑀺𑀬𑀸𑀢𑀺 𑀆𑀘𑀭𑀺𑀬𑁂𑀦 𑀦𑀺𑀯𑀸𑀭𑀺𑀢𑀕𑀸𑀫𑀧𑁆𑀧𑀯𑁂𑀲𑁄 𑀧𑀘𑁆𑀙𑀸 𑀦𑀺𑀝𑁆𑀞𑀺𑀢𑀼𑀤𑁆𑀤𑁂𑀲𑀓𑀺𑀘𑁆𑀘𑁄 𑀳𑀼𑀢𑁆𑀯𑀸 𑀞𑀺𑀢𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀢𑁆𑀣𑀓𑀸𑀫𑀸𑀦𑀁 𑀯𑀘𑀦𑀁 𑀅𑀕𑁆𑀕𑀳𑁂𑀢𑁆𑀯𑀸’’𑀢𑀺 ¶ . 𑀦𑀺𑀯𑀢𑁆𑀣𑀯𑀢𑁆𑀣𑀁 𑀲𑀜𑁆𑀚𑀸𑀦𑀺𑀢𑁆𑀯𑀸𑀢𑀺 𑀅𑀢𑁆𑀢𑀦𑀸 𑀤𑀺𑀝𑁆𑀞𑀤𑀺𑀯𑀲𑁂 𑀦𑀺𑀯𑀢𑁆𑀣𑀯𑀢𑁆𑀣𑀁 𑀢𑀲𑁆𑀲𑀸 𑀫𑀢𑀤𑀺𑀯𑀲𑁂 𑀲𑀺𑀯𑀣𑀺𑀓𑀤𑀲𑁆𑀲𑀦𑀢𑁆𑀣𑀁 𑀕𑀢𑁂𑀦 𑀮𑀤𑁆𑀥𑀁 𑀲𑀜𑁆𑀚𑀸𑀦𑀺𑀢𑁆𑀯𑀸. 𑀏𑀯𑀫𑁆𑀧𑀻𑀢𑀺 𑀏𑀯𑀁 𑀫𑀭𑀡𑀲𑀫𑁆𑀧𑀸𑀧𑀦𑀯𑀲𑁂𑀦𑀧𑀺. 𑀅𑀬𑀁 𑀢𑀸𑀯𑁂𑀢𑁆𑀣 𑀅𑀝𑁆𑀞𑀓𑀣𑀸𑀬 𑀅𑀦𑀼𑀢𑁆𑀢𑀸𑀦𑀢𑁆𑀣𑀤𑀻𑀧𑀦𑀸.

𑀦𑁂𑀢𑁆𑀢𑀺𑀦𑀬𑀯𑀡𑁆𑀡𑀦𑀸

𑀇𑀤𑀸𑀦𑀺 𑀧𑀓𑀭𑀡𑀦𑀬𑁂𑀦 𑀧𑀸𑀴𑀺𑀬𑀸 𑀅𑀢𑁆𑀣𑀯𑀡𑁆𑀡𑀦𑀁 𑀓𑀭𑀺𑀲𑁆𑀲𑀸𑀫. 𑀲𑀸 𑀧𑀦 𑀅𑀢𑁆𑀣𑀲𑀁𑀯𑀡𑁆𑀡𑀦𑀸 𑀬𑀲𑁆𑀫𑀸 𑀤𑁂𑀲𑀦𑀸𑀬 𑀲𑀫𑀼𑀝𑁆𑀞𑀸𑀦𑀧𑁆𑀧𑀬𑁄𑀚𑀦𑀪𑀸𑀚𑀦𑁂𑀲𑀼 𑀧𑀺𑀡𑁆𑀟𑀢𑁆𑀣𑁂𑀲𑀼 𑀘 𑀦𑀺𑀤𑁆𑀥𑀸𑀭𑀺𑀢𑁂𑀲𑀼 𑀲𑀼𑀓𑀭𑀸 𑀳𑁄𑀢𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀸 𑀘, 𑀢𑀲𑁆𑀫𑀸 𑀲𑀼𑀢𑁆𑀢𑀤𑁂𑀲𑀦𑀸𑀬 𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀞𑀫𑀁 𑀦𑀺𑀤𑁆𑀥𑀸𑀭𑀬𑀺𑀲𑁆𑀲𑀸𑀫. 𑀢𑀢𑁆𑀣 𑀲𑀫𑀼𑀝𑁆𑀞𑀸𑀦𑀁 𑀦𑀸𑀫 𑀤𑁂𑀲𑀦𑀸𑀦𑀺𑀤𑀸𑀦𑀁, 𑀢𑀁 𑀲𑀸𑀥𑀸𑀭𑀡𑀫𑀲𑀸𑀥𑀸𑀭𑀡𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀢𑁆𑀣 𑀲𑀸𑀥𑀸𑀭𑀡𑀫𑁆𑀧𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀪𑁂𑀤𑀢𑁄 𑀤𑀼𑀯𑀺𑀥𑀁. 𑀢𑀢𑁆𑀣 𑀲𑀸𑀥𑀸𑀭𑀡𑀁 𑀅𑀚𑁆𑀛𑀢𑁆𑀢𑀺𑀓𑀲𑀫𑀼𑀝𑁆𑀞𑀸𑀦𑀁 𑀦𑀸𑀫 𑀮𑁄𑀓𑀦𑀸𑀣𑀲𑁆𑀲 𑀫𑀳𑀸𑀓𑀭𑀼𑀡𑀸. 𑀢𑀸𑀬 𑀳𑀺 𑀲𑀫𑀼𑀲𑁆𑀲𑀸𑀳𑀺𑀢𑀲𑁆𑀲 𑀪𑀕𑀯𑀢𑁄 𑀯𑁂𑀦𑁂𑀬𑁆𑀬𑀸𑀦𑀁 𑀥𑀫𑁆𑀫𑀤𑁂𑀲𑀦𑀸𑀬 𑀘𑀺𑀢𑁆𑀢𑀁 𑀉𑀤𑀧𑀸𑀤𑀺, 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀲𑀢𑁆𑀢𑁂𑀲𑀼 𑀘 𑀓𑀸𑀭𑀼𑀜𑁆𑀜𑀢𑀁 𑀧𑀝𑀺𑀘𑁆𑀘 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀲𑀻’’𑀢𑀺𑀆𑀤𑀺 (𑀫. 𑀦𑀺. 𑁧.𑁨𑁮𑁩; 𑀫𑀳𑀸𑀯. 𑁯; 𑀲𑀁. 𑀦𑀺. 𑁧.𑁧𑁭𑁩). 𑀏𑀢𑁆𑀣 𑀘 𑀳𑁂𑀢𑀸𑀯𑀢𑁆𑀣𑀸𑀬𑀧𑀺 𑀫𑀳𑀸𑀓𑀭𑀼𑀡𑀸𑀬 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄 𑀬𑀸𑀯𑀤𑁂𑀯 𑀲𑀁𑀲𑀸𑀭𑀫𑀳𑁄𑀖𑀢𑁄 𑀲𑀤𑁆𑀥𑀫𑁆𑀫𑀤𑁂𑀲𑀦𑀸𑀳𑀢𑁆𑀣𑀤𑀸𑀦𑁂𑀳𑀺 𑀲𑀢𑁆𑀢𑀲𑀦𑁆𑀢𑀸𑀭𑀡𑀢𑁆𑀣𑀁 𑀢𑀤𑀼𑀧𑁆𑀧𑀢𑁆𑀢𑀺𑀢𑁄. 𑀬𑀣𑀸 𑀘 𑀫𑀳𑀸𑀓𑀭𑀼𑀡𑀸, 𑀏𑀯𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀤𑀲𑀩𑀮𑀜𑀸𑀡𑀸𑀤𑀬𑁄 𑀘 𑀤𑁂𑀲𑀦𑀸𑀬 𑀅𑀩𑁆𑀪𑀦𑁆𑀢𑀭𑀲𑀫𑀼𑀝𑁆𑀞𑀸𑀦𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀸. 𑀲𑀩𑁆𑀩𑀜𑁆𑀳𑀺 𑀜𑁂𑀬𑁆𑀬𑀥𑀫𑁆𑀫𑀁 𑀢𑁂𑀲𑀁 𑀤𑁂𑀲𑁂𑀢𑀩𑁆𑀩𑀸𑀓𑀸𑀭𑀁 𑀲𑀢𑁆𑀢𑀸𑀦𑀜𑁆𑀘 𑀆𑀲𑀬𑀸𑀦𑀼𑀲𑀬𑀸𑀤𑀺𑀁 𑀬𑀸𑀣𑀸𑀯𑀢𑁄 𑀚𑀸𑀦𑀦𑁆𑀢𑁄 𑀪𑀕𑀯𑀸 𑀞𑀸𑀦𑀸𑀝𑁆𑀞𑀸𑀦𑀸𑀤𑀻𑀲𑀼 𑀓𑁄𑀲𑀮𑁆𑀮𑁂𑀦 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀯𑀺𑀘𑀺𑀢𑁆𑀢𑀦𑀬𑀤𑁂𑀲𑀦𑀁 𑀧𑀯𑀢𑁆𑀢𑁂𑀲𑀻𑀢𑀺. 𑀩𑀸𑀳𑀺𑀭𑀁 𑀧𑀦 𑀲𑀸𑀥𑀸𑀭𑀡𑀁 𑀲𑀫𑀼𑀝𑁆𑀞𑀸𑀦𑀁 𑀤𑀲𑀲𑀳𑀲𑁆𑀲𑀫𑀳𑀸𑀩𑁆𑀭𑀳𑁆𑀫𑀧𑀭𑀺𑀯𑀸𑀭𑀲𑁆𑀲 𑀲𑀳𑀫𑁆𑀧𑀢𑀺𑀩𑁆𑀭𑀳𑁆𑀫𑀼𑀦𑁄 𑀅𑀚𑁆𑀛𑁂𑀲𑀦𑀁. 𑀢𑀤𑀚𑁆𑀛𑁂𑀲𑀦𑀼𑀢𑁆𑀢𑀭𑀓𑀸𑀮𑀜𑁆𑀳𑀺 𑀥𑀫𑁆𑀫𑀕𑀫𑁆𑀪𑀻𑀭𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀸𑀚𑀦𑀺𑀢𑀁 𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑀢𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑁆𑀯𑀸 𑀥𑀫𑁆𑀫𑀲𑁆𑀲𑀸𑀫𑀻 𑀥𑀫𑁆𑀫𑀤𑁂𑀲𑀦𑀸𑀬 𑀉𑀲𑁆𑀲𑀸𑀳𑀚𑀸𑀢𑁄 𑀅𑀳𑁄𑀲𑀺. 𑀅𑀲𑀸𑀥𑀸𑀭𑀡𑀫𑁆𑀧𑀺 𑀅𑀩𑁆𑀪𑀦𑁆𑀢𑀭𑀩𑀸𑀳𑀺𑀭𑀪𑁂𑀤𑀢𑁄 𑀤𑀼𑀯𑀺𑀥𑀫𑁂𑀯. 𑀢𑀢𑁆𑀣 𑀅𑀩𑁆𑀪𑀦𑁆𑀢𑀭𑀁 𑀬𑀸𑀬 𑀫𑀳𑀸𑀓𑀭𑀼𑀡𑀸𑀬 𑀬𑁂𑀦 𑀘 𑀤𑁂𑀲𑀦𑀸𑀜𑀸𑀡𑁂𑀦 ¶ 𑀇𑀤𑀁 𑀲𑀼𑀢𑁆𑀢𑀁 𑀧𑀯𑀢𑁆𑀢𑀺𑀢𑀁, 𑀢𑀤𑀼𑀪𑀬𑀁 𑀯𑁂𑀤𑀺𑀢𑀩𑁆𑀩𑀁. 𑀩𑀸𑀳𑀺𑀭𑀁 𑀧𑀦 𑀭𑀽𑀧𑀕𑀭𑀼𑀓𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀚𑁆𑀛𑀸𑀲𑀬𑁄. 𑀲𑁆𑀯𑀸𑀬𑀫𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄 𑀏𑀯.

𑀧𑀬𑁄𑀚𑀦𑀫𑁆𑀧𑀺 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀢𑁄 𑀤𑀼𑀯𑀺𑀥𑀁. 𑀢𑀢𑁆𑀣 𑀲𑀸𑀥𑀸𑀭𑀡𑀁 𑀬𑀸𑀯 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀯𑀺𑀫𑀼𑀢𑁆𑀢𑀺𑀭𑀲𑀢𑁆𑀢𑀸 𑀪𑀕𑀯𑀢𑁄 𑀤𑁂𑀲𑀦𑀸𑀬. 𑀢𑁂𑀦𑁂𑀯𑀸𑀳 𑁋 ‘‘𑀏𑀢𑀤𑀢𑁆𑀣𑀸 𑀓𑀣𑀸, 𑀏𑀢𑀤𑀢𑁆𑀣𑀸 𑀫𑀦𑁆𑀢𑀦𑀸’’𑀢𑀺𑀆𑀤𑀺. 𑀅𑀲𑀸𑀥𑀸𑀭𑀡𑀁 𑀧𑀦 𑀢𑁂𑀲𑀁 𑀭𑀽𑀧𑀕𑀭𑀼𑀓𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀭𑀽𑀧𑁂 𑀙𑀦𑁆𑀤𑀭𑀸𑀕𑀲𑁆𑀲 𑀚𑀳𑀸𑀧𑀦𑀁, 𑀉𑀪𑀬𑀫𑁆𑀧𑁂𑀢𑀁 𑀩𑀸𑀳𑀺𑀭𑀫𑁂𑀯. 𑀲𑀘𑁂 𑀧𑀦 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑀕𑀢𑀫𑁆𑀧𑀺 𑀤𑁂𑀲𑀦𑀸𑀩𑀮𑀲𑀺𑀤𑁆𑀥𑀺𑀲𑀗𑁆𑀔𑀸𑀢𑀁 𑀧𑀬𑁄𑀚𑀦𑀁 𑀅𑀥𑀺𑀧𑁆𑀧𑀸𑀬𑀲𑀫𑀺𑀚𑁆𑀛𑀦𑀪𑀸𑀯𑀢𑁄 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀲𑀺𑀤𑁆𑀥𑀺𑀬𑀸 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀪𑀕𑀯𑀢𑁄𑀧𑀺 𑀧𑀬𑁄𑀚𑀦𑀫𑁂𑀯𑀸𑀢𑀺 𑀕𑀡𑁆𑀳𑁂𑀬𑁆𑀬, 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦𑀲𑁆𑀲 𑀅𑀩𑁆𑀪𑀦𑁆𑀢𑀭𑀢𑀸𑀧𑀺 𑀲𑀺𑀬𑀸.

𑀅𑀧𑀺𑀘 ¶ 𑀢𑁂𑀲𑀁 𑀭𑀽𑀧𑀕𑀭𑀼𑀓𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀭𑀽𑀧𑀲𑁆𑀫𑀺𑀁 𑀯𑀺𑀚𑁆𑀚𑀫𑀸𑀦𑀲𑁆𑀲 𑀆𑀤𑀻𑀦𑀯𑀲𑁆𑀲 𑀬𑀸𑀣𑀸𑀯𑀢𑁄 𑀅𑀦𑀯𑀩𑁄𑀥𑁄 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀲𑀫𑀼𑀝𑁆𑀞𑀸𑀦𑀁, 𑀢𑀤𑀯𑀩𑁄𑀥𑁄 𑀧𑀬𑁄𑀚𑀦𑀁. 𑀲𑁄 𑀳𑀺 𑀇𑀫𑀸𑀬 𑀤𑁂𑀲𑀦𑀸𑀬 𑀪𑀕𑀯𑀦𑁆𑀢𑀁 𑀧𑀬𑁄𑀚𑁂𑀢𑀺 𑀢𑀦𑁆𑀦𑀺𑀧𑁆𑀨𑀸𑀤𑀦𑀧𑀭𑀸𑀬𑀁 𑀤𑁂𑀲𑀦𑀸𑀢𑀺 𑀓𑀢𑁆𑀯𑀸. 𑀬𑀜𑁆𑀳𑀺 𑀤𑁂𑀲𑀦𑀸𑀬 𑀲𑀸𑀥𑁂𑀢𑀩𑁆𑀩𑀁 𑀨𑀮𑀁, 𑀢𑀁 𑀆𑀓𑀗𑁆𑀔𑀺𑀢𑀩𑁆𑀩𑀢𑁆𑀢𑀸 𑀤𑁂𑀲𑀓𑀁 𑀤𑁂𑀲𑀦𑀸𑀬 𑀧𑀬𑁄𑀚𑁂𑀢𑀻𑀢𑀺 𑀧𑀬𑁄𑀚𑀦𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑀣𑀸 𑀢𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀢𑀤𑀜𑁆𑀜𑁂𑀲𑀜𑁆𑀘 𑀯𑁂𑀦𑁂𑀬𑁆𑀬𑀸𑀦𑀁 𑀭𑀽𑀧𑀫𑀼𑀔𑁂𑀦 𑀧𑀜𑁆𑀘𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼 𑀆𑀤𑀻𑀦𑀯𑀤𑀲𑁆𑀲𑀦𑀜𑁆𑀘𑁂𑀢𑁆𑀣 𑀧𑀬𑁄𑀚𑀦𑀁. 𑀢𑀣𑀸 𑀲𑀁𑀲𑀸𑀭𑀘𑀓𑁆𑀓𑀦𑀺𑀯𑀢𑁆𑀢𑀺𑀲𑀤𑁆𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀺𑀲𑀲𑁆𑀲𑀢𑀸𑀤𑀺𑀫𑀺𑀘𑁆𑀙𑀸𑀯𑀸𑀤𑀦𑀺𑀭𑀸𑀓𑀭𑀡𑀁 𑀲𑀫𑁆𑀫𑀸𑀯𑀸𑀤𑀧𑀼𑀭𑁂𑀓𑁆𑀔𑀸𑀭𑁄 𑀅𑀓𑀼𑀲𑀮𑀫𑀽𑀮𑀲𑀫𑀽𑀳𑀦𑀦𑀁 𑀓𑀼𑀲𑀮𑀫𑀽𑀮𑀲𑀫𑀸𑀭𑁄𑀧𑀦𑀁 𑀅𑀧𑀸𑀬𑀤𑁆𑀯𑀸𑀭𑀧𑀺𑀤𑀳𑀦𑀁 𑀲𑀕𑁆𑀕𑀫𑀕𑁆𑀕𑀤𑁆𑀯𑀸𑀭𑀯𑀺𑀯𑀭𑀡𑀁 𑀧𑀭𑀺𑀬𑀼𑀝𑁆𑀞𑀸𑀦𑀯𑀽𑀧𑀲𑀫𑀦𑀁 𑀅𑀦𑀼𑀲𑀬𑀲𑀫𑀼𑀕𑁆𑀖𑀸𑀢𑀦𑀁 ‘‘𑀫𑀼𑀢𑁆𑀢𑁄 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀧𑀼𑀭𑀺𑀫𑀧𑀝𑀺𑀜𑁆𑀜𑀸𑀯𑀺𑀲𑀁𑀯𑀸𑀤𑀦𑀁 𑀢𑀧𑁆𑀧𑀝𑀺𑀧𑀓𑁆𑀔𑀫𑀸𑀭𑀫𑀦𑁄𑀭𑀣𑀯𑀺𑀲𑀁𑀯𑀸𑀤𑀦𑀁 𑀢𑀺𑀢𑁆𑀣𑀺𑀬𑀥𑀫𑁆𑀫𑀦𑀺𑀫𑁆𑀫𑀣𑀦𑀁 𑀩𑀼𑀤𑁆𑀥𑀥𑀫𑁆𑀫𑀧𑀢𑀺𑀝𑁆𑀞𑀸𑀧𑀦𑀦𑁆𑀢𑀺 𑀏𑀯𑀫𑀸𑀤𑀻𑀦𑀺𑀧𑀺 𑀧𑀬𑁄𑀚𑀦𑀸𑀦𑀺 𑀇𑀥 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀬𑀣𑀸 𑀢𑁂 𑀧𑀼𑀕𑁆𑀕𑀮𑀸 𑀭𑀽𑀧𑀕𑀭𑀼𑀓𑀸, 𑀏𑀯𑀁 𑀢𑀤𑀜𑁆𑀜𑁂 𑀘 𑀲𑀓𑁆𑀓𑀸𑀬𑀕𑀭𑀼𑀓𑀸 𑀲𑀓𑁆𑀓𑀸𑀬𑀲𑁆𑀫𑀺𑀁 𑀅𑀮𑁆𑀮𑀻𑀦𑀸 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀘 𑀧𑀝𑀺𑀧𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑀸 𑀅𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀲𑀸𑀥𑀸𑀭𑀡𑀧𑀭𑀺𑀘𑀭𑀺𑀬𑀫𑀦𑀲𑀺𑀓𑀸𑀭𑀧𑀭𑀸 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀥𑀸𑀭𑀡𑀧𑀭𑀺𑀘𑀬𑀧𑁆𑀧𑀝𑀺𑀯𑁂𑀥𑀯𑀺𑀫𑀼𑀔𑀸 𑀘 𑀪𑀯𑀯𑀺𑀧𑁆𑀧𑀫𑁄𑀓𑁆𑀔𑁂𑀲𑀺𑀦𑁄 𑀯𑁂𑀦𑁂𑀬𑁆𑀬𑀸 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀪𑀸𑀚𑀦𑀁.

𑀧𑀺𑀡𑁆𑀟𑀢𑁆𑀢𑀸 ¶ 𑀘𑁂𑀢𑁆𑀣 𑀭𑀽𑀧𑀕𑁆𑀕𑀳𑀡𑁂𑀦 𑀭𑀽𑀧𑀥𑀸𑀢𑀼𑀭𑀽𑀧𑀸𑀬𑀢𑀦𑀭𑀽𑀧𑀓𑁆𑀔𑀦𑁆𑀥𑀧𑀭𑀺𑀕𑁆𑀕𑀡𑁆𑀳𑀦𑀁 𑀭𑀽𑀧𑀫𑀼𑀔𑁂𑀦 𑀘𑀢𑀼𑀥𑀫𑁆𑀫𑀸𑀦𑀁 𑀯𑀝𑁆𑀝𑀢𑁆𑀢𑀬𑀯𑀺𑀘𑁆𑀙𑁂𑀤𑀦𑀽𑀧𑀸𑀬𑁄 𑀆𑀲𑀯𑁄𑀖𑀸𑀤𑀺𑀯𑀺𑀯𑁂𑀘𑀦𑀁 𑀅𑀪𑀺𑀦𑀦𑁆𑀤𑀦𑀦𑀺𑀯𑀸𑀭𑀡𑀲𑀗𑁆𑀕𑀢𑀺𑀓𑁆𑀓𑀫𑁄 𑀯𑀺𑀯𑀸𑀤𑀫𑀽𑀮𑀧𑀭𑀺𑀘𑁆𑀘𑀸𑀕𑁄 𑀲𑀺𑀓𑁆𑀔𑀢𑁆𑀢𑀬𑀸𑀦𑀼𑀬𑁄𑀕𑁄 𑀧𑀳𑀸𑀦𑀢𑁆𑀢𑀬𑀤𑀻𑀧𑀦𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀦𑀼𑀝𑁆𑀞𑀸𑀦𑀁 𑀪𑀸𑀯𑀦𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀲𑀺𑀤𑁆𑀥𑀻𑀢𑀺 𑀏𑀯𑀫𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸.

𑀇𑀢𑁄 𑀧𑀭𑀁 𑀧𑀦 𑀲𑁄𑀴𑀲 𑀳𑀸𑀭𑀸 𑀤𑀲𑁆𑀲𑁂𑀢𑀩𑁆𑀩𑀸. 𑀢𑀢𑁆𑀣 ‘‘𑀭𑀽𑀧’’𑀦𑁆𑀢𑀺 𑀲𑀳𑀚𑀸𑀢𑀸 𑀢𑀲𑁆𑀲 𑀦𑀺𑀲𑁆𑀲𑀬𑀪𑀽𑀢𑀸 𑀢𑀧𑁆𑀧𑀝𑀺𑀩𑀤𑁆𑀥𑀸 𑀘 𑀲𑀩𑁆𑀩𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀢𑀡𑁆𑀳𑀸𑀯𑀚𑁆𑀚𑀸 𑀤𑀼𑀓𑁆𑀔𑀲𑀘𑁆𑀘𑀁. 𑀢𑀁𑀲𑀫𑀼𑀝𑁆𑀞𑀸𑀧𑀺𑀓𑀸 𑀢𑀤𑀸𑀭𑀫𑁆𑀫𑀡𑀸 𑀘 𑀢𑀡𑁆𑀳𑀸 𑀲𑀫𑀼𑀤𑀬𑀲𑀘𑁆𑀘𑀁. 𑀢𑀤𑀼𑀪𑀬𑁂𑀲𑀁 𑀅𑀧𑁆𑀧𑀯𑀢𑁆𑀢𑀺 𑀦𑀺𑀭𑁄𑀥𑀲𑀘𑁆𑀘𑀁. 𑀦𑀺𑀭𑁄𑀥𑀧𑁆𑀧𑀚𑀸𑀦𑀦𑀸 𑀧𑀝𑀺𑀧𑀤𑀸 𑀫𑀕𑁆𑀕𑀲𑀘𑁆𑀘𑀁. 𑀢𑀢𑁆𑀣 𑀲𑀫𑀼𑀤𑀬𑁂𑀦 𑀅𑀲𑁆𑀲𑀸𑀤𑁄, 𑀤𑀼𑀓𑁆𑀔𑁂𑀦 𑀆𑀤𑀻𑀦𑀯𑁄, 𑀫𑀕𑁆𑀕𑀦𑀺𑀭𑁄𑀥𑁂𑀳𑀺 𑀦𑀺𑀲𑁆𑀲𑀭𑀡𑀁, 𑀭𑀽𑀧𑀸𑀭𑀫𑁆𑀫𑀡𑀲𑁆𑀲 𑀅𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀘 𑀧𑀭𑀺𑀬𑀸𑀤𑀸𑀦𑀁 𑀨𑀮𑀁. 𑀬𑀜𑁆𑀳𑀺 𑀤𑁂𑀲𑀦𑀸𑀬 𑀲𑀸𑀥𑁂𑀢𑀩𑁆𑀩𑀁 𑀧𑀬𑁄𑀚𑀦𑀁, 𑀢𑀁 𑀨𑀮𑀦𑁆𑀢𑀺 𑀯𑀼𑀢𑁆𑀢𑁄𑀯𑀸𑀬𑀫𑀢𑁆𑀣𑁄. 𑀢𑀤𑀢𑁆𑀣𑀁 𑀳𑀺𑀤𑀁 𑀲𑀼𑀢𑁆𑀢𑀁 𑀪𑀕𑀯𑀢𑀸 𑀤𑁂𑀲𑀺𑀢𑀦𑁆𑀢𑀺. 𑀬𑀣𑀸 𑀢𑀁 𑀓𑀼𑀲𑀮𑀘𑀺𑀢𑁆𑀢𑀁 𑀦 𑀧𑀭𑀺𑀬𑀸𑀤𑀺𑀬𑀢𑀺, 𑀏𑀯𑀁 𑀧𑀝𑀺𑀲𑀗𑁆𑀔𑀸𑀦𑀪𑀸𑀯𑀦𑀸𑀩𑀮𑀧𑀭𑀺𑀕𑁆𑀕𑀳𑀺𑀢𑀸 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸 𑀉𑀧𑀸𑀬𑁄. 𑀧𑀼𑀭𑀺𑀲𑀲𑁆𑀲 𑀓𑀼𑀲𑀮𑀘𑀺𑀢𑁆𑀢𑀧𑀭𑀺𑀬𑀸𑀤𑀸𑀦𑁂𑀦𑀲𑁆𑀲 𑀭𑀽𑀧𑀲𑁆𑀲 𑀅𑀜𑁆𑀜𑀭𑀽𑀧𑀸𑀲𑀸𑀥𑀸𑀭𑀡𑀢𑀸𑀤𑀲𑁆𑀲𑀦𑀸𑀧𑀤𑁂𑀲𑁂𑀦 𑀅𑀢𑁆𑀣𑀓𑀸𑀫𑁂𑀳𑀺 ¶ 𑀢𑀢𑁄 𑀘𑀺𑀢𑁆𑀢𑀁 𑀲𑀸𑀥𑀼𑀓𑀁 𑀭𑀓𑁆𑀔𑀺𑀢𑀩𑁆𑀩𑀁. 𑀅𑀬𑀫𑁂𑀢𑁆𑀣 𑀪𑀕𑀯𑀢𑁄 𑀆𑀡𑀢𑁆𑀢𑀻𑀢𑀺 𑀅𑀬𑀁 𑀤𑁂𑀲𑀦𑀸𑀳𑀸𑀭𑁄. 𑀅𑀲𑁆𑀲𑀸𑀤𑀸𑀤𑀺𑀲𑀦𑁆𑀤𑀲𑁆𑀲𑀦𑀯𑀺𑀪𑀸𑀯𑀦𑀮𑀓𑁆𑀔𑀡𑁄 𑀳𑀺 𑀤𑁂𑀲𑀦𑀸𑀳𑀸𑀭𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀦𑁂𑀢𑁆𑀢𑀺𑀧𑁆𑀧𑀓𑀭𑀡𑁂 𑁋

‘‘𑀅𑀲𑁆𑀲𑀸𑀤𑀸𑀤𑀻𑀦𑀯𑀢𑀸, 𑀦𑀺𑀲𑁆𑀲𑀭𑀡𑀫𑁆𑀧𑀺 𑀘 𑀨𑀮𑀁 𑀉𑀧𑀸𑀬𑁄 𑀘;

𑀆𑀡𑀢𑁆𑀢𑀻 𑀘 𑀪𑀕𑀯𑀢𑁄, 𑀬𑁄𑀕𑀻𑀦𑀁 𑀤𑁂𑀲𑀦𑀸𑀳𑀸𑀭𑁄’’𑀢𑀺. (𑀦𑁂𑀢𑁆𑀢𑀺. 𑁪 𑀦𑀺𑀤𑁆𑀤𑁂𑀲𑀯𑀸𑀭);

𑀤𑁂𑀲𑀻𑀬𑀢𑀺 𑀲𑀁𑀯𑀡𑁆𑀡𑀻𑀬𑀢𑀺 𑀏𑀢𑀸𑀬 𑀲𑀼𑀢𑁆𑀢𑀢𑁆𑀣𑁄𑀢𑀺 𑀤𑁂𑀲𑀦𑀸, 𑀤𑁂𑀲𑀦𑀸𑀬 𑀲𑀳𑀘𑀭𑀡𑀢𑁄 𑀯𑀸 𑀤𑁂𑀲𑀦𑀸. 𑀦𑀦𑀼 𑀘 𑀅𑀜𑁆𑀜𑁂𑀧𑀺 𑀳𑀸𑀭𑀸 𑀤𑁂𑀲𑀦𑀸𑀲𑀗𑁆𑀔𑀸𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑀁𑀯𑀡𑁆𑀡𑀦𑀸𑀢𑁄 𑀤𑁂𑀲𑀦𑀸𑀬 𑀲𑀳𑀘𑀸𑀭𑀺𑀦𑁄 𑀯𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀅𑀬𑀁 𑀧𑀦 𑀳𑀸𑀭𑁄 𑀬𑁂𑀪𑀼𑀬𑁆𑀬𑁂𑀦 𑀬𑀣𑀸𑀭𑀼𑀢𑀯𑀲𑁂𑀦𑁂𑀯 𑀯𑀺𑀜𑁆𑀜𑀸𑀬𑀫𑀸𑀦𑁄 𑀤𑁂𑀲𑀦𑀸𑀬 𑀲𑀳 𑀘𑀭𑀢𑀻𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺, 𑀦 𑀢𑀣𑀸𑀧𑀭𑁂. 𑀦 𑀳𑀺 𑀅𑀲𑁆𑀲𑀸𑀤𑀸𑀤𑀻𑀦𑀯𑀦𑀺𑀲𑁆𑀲𑀭𑀡𑀸𑀤𑀺𑀲𑀦𑁆𑀤𑀲𑁆𑀲𑀦𑀭𑀳𑀺𑀢𑀸 𑀲𑀼𑀢𑁆𑀢𑀤𑁂𑀲𑀦𑀸 𑀅𑀢𑁆𑀣𑀺. 𑀓𑀺𑀁 𑀧𑀦 𑀢𑁂𑀲𑀁 𑀅𑀲𑁆𑀲𑀸𑀤𑀸𑀤𑀻𑀦𑀁 𑀅𑀦𑀯𑀲𑁂𑀲𑀸𑀦𑀁 𑀯𑀘𑀦𑀁 𑀤𑁂𑀲𑀦𑀸𑀳𑀸𑀭𑁄, 𑀉𑀤𑀸𑀳𑀼 ¶ 𑀏𑀓𑀘𑁆𑀘𑀸𑀦𑀦𑁆𑀢𑀺? 𑀦𑀺𑀭𑀯𑀲𑁂𑀲𑀸𑀦𑀁𑀬𑁂𑀯. 𑀬𑀲𑁆𑀫𑀺𑀜𑁆𑀳𑀺 𑀲𑀼𑀢𑁆𑀢𑁂 𑀅𑀲𑁆𑀲𑀸𑀤𑀸𑀤𑀻𑀦𑀯𑀦𑀺𑀲𑁆𑀲𑀭𑀡𑀸𑀦𑀺 𑀲𑀭𑀽𑀧𑀢𑁄 𑀆𑀕𑀢𑀸𑀦𑀺, 𑀢𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀬𑀢𑁆𑀣 𑀧𑀦 𑀏𑀓𑀤𑁂𑀲𑁂𑀦 𑀆𑀕𑀢𑀸𑀦𑀺, 𑀦 𑀘 𑀲𑀭𑀽𑀧𑁂𑀦, 𑀢𑀢𑁆𑀣 𑀅𑀦𑀸𑀕𑀢𑀁 𑀅𑀢𑁆𑀣𑀯𑀲𑁂𑀦 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀳𑀸𑀭𑁄 𑀬𑁄𑀚𑁂𑀢𑀩𑁆𑀩𑁄.

𑀲𑀬𑀁 𑀲𑀫𑀦𑁆𑀢𑀘𑀓𑁆𑀔𑀼𑀪𑀸𑀯𑀢𑁄 𑀢𑀁𑀤𑀲𑁆𑀲𑀦𑁂𑀦 𑀲𑀪𑀸𑀯𑀢𑁄 𑀘 ‘‘𑀅𑀳’’𑀦𑁆𑀢𑀺 𑀯𑀼𑀢𑁆𑀢𑀁. 𑀪𑀺𑀓𑁆𑀔𑀦𑀲𑀻𑀮𑀢𑀸𑀤𑀺𑀕𑀼𑀡𑀬𑁄𑀕𑀢𑁄 𑀅𑀪𑀺𑀫𑀼𑀔𑀻𑀓𑀭𑀡𑀢𑁆𑀣𑀜𑁆𑀘, ‘‘𑀪𑀺𑀓𑁆𑀔𑀯𑁂’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀸𑀪𑀸𑀯𑀢𑁄 𑀅𑀧𑀭𑀢𑀸𑀤𑀲𑁆𑀲𑀦𑀢𑁆𑀣𑀜𑁆𑀘 ‘‘𑀅𑀜𑁆𑀜’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀓𑀲𑁆𑀲 𑀅𑀦𑀼𑀧𑀮𑀩𑁆𑀪𑀤𑀲𑁆𑀲𑀦𑀢𑁆𑀣𑀁 𑀅𑀦𑁂𑀓𑀪𑀸𑀯𑀧𑁆𑀧𑀝𑀺𑀲𑁂𑀥𑀦𑀢𑁆𑀣𑀜𑁆𑀘 ‘‘𑀏𑀓𑀭𑀽𑀧𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀁. 𑀢𑀸𑀤𑀺𑀲𑀲𑁆𑀲 𑀭𑀽𑀧𑀲𑁆𑀲 𑀅𑀪𑀸𑀯𑀢𑁄 𑀅𑀤𑀲𑁆𑀲𑀦𑀢𑁄 𑀘 ‘‘𑀦 𑀲𑀫𑀦𑀼𑀧𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲 𑀧𑀘𑁆𑀘𑀸𑀫𑀲𑀦𑀢𑁄 𑀅𑀦𑀺𑀬𑀫𑀢𑁄 𑀘 ‘‘𑀬’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀯𑀼𑀘𑁆𑀘𑀫𑀸𑀦𑀸𑀓𑀸𑀭𑀧𑀭𑀸𑀫𑀲𑀦𑀢𑁄 𑀢𑀤𑀜𑁆𑀜𑀸𑀓𑀸𑀭𑀦𑀺𑀲𑁂𑀥𑀦𑀢𑁄 𑀘 ‘‘𑀏𑀯’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀺𑀲𑀪𑀸𑀕𑀺𑀦𑁆𑀤𑁆𑀭𑀺𑀬𑀯𑀢𑁆𑀣𑀼𑀢𑁄 𑀲𑀪𑀸𑀕𑀯𑀢𑁆𑀣𑀼𑀲𑁆𑀫𑀺𑀁 𑀢𑀤𑀪𑀸𑀯𑀢𑁄 𑀘 ‘‘𑀧𑀼𑀭𑀺𑀲𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀲𑁆𑀲 𑀯𑀢𑁆𑀣𑀼𑀪𑀸𑀯𑀢𑁄 𑀢𑀣𑀸 𑀧𑀭𑀺𑀓𑀧𑁆𑀧𑀺𑀢𑀢𑁆𑀢𑀸 𑀘 ‘‘𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀯𑀦𑁆𑀢𑀺 𑀯𑀼𑀢𑁆𑀢𑀸𑀓𑀸𑀭𑀧𑀭𑀸𑀫𑀲𑀦𑀢𑁆𑀣𑀜𑁆𑀘𑁂𑀯 𑀦𑀺𑀤𑀲𑁆𑀲𑀦𑀢𑁆𑀣𑀜𑁆𑀘 ‘‘𑀬𑀣𑀸’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀧𑀘𑁆𑀘𑀓𑁆𑀔𑀪𑀸𑀯𑀢𑁄 𑀪𑀺𑀓𑁆𑀔𑀽𑀦𑀁 𑀧𑀘𑁆𑀘𑀓𑁆𑀔𑀓𑀭𑀡𑀢𑁆𑀣𑀜𑁆𑀘 ‘‘𑀇𑀤’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀢𑁆𑀣𑀺𑀲𑀦𑁆𑀢𑀸𑀦𑀧𑀭𑀺𑀬𑀸𑀧𑀦𑁆𑀦𑀢𑁄 𑀢𑀧𑁆𑀧𑀝𑀺𑀩𑀤𑁆𑀥𑀪𑀸𑀯𑀢𑁄 𑀘 ‘‘𑀇𑀢𑁆𑀣𑀺𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀏𑀯𑀁 𑀅𑀦𑀼𑀧𑀤𑀯𑀺𑀘𑀬𑀢𑁄 𑀯𑀺𑀘𑀬𑁄 𑀳𑀸𑀭𑁄. 𑀯𑀺𑀘𑀻𑀬𑀦𑁆𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸 𑀧𑀤𑀧𑀜𑁆𑀳𑀸𑀤𑀬𑁄𑀢𑀺 𑀯𑀺𑀘𑀬𑁄, 𑀯𑀺𑀘𑀺𑀢𑀺 𑀏𑀯 𑀯𑀸 𑀢𑁂𑀲𑀦𑁆𑀢𑀺 𑀯𑀺𑀘𑀬𑁄. 𑀧𑀤𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀧𑀼𑀩𑁆𑀩𑀸𑀧𑀭𑀸𑀦𑀼𑀕𑁆𑀕𑀳𑀦𑀁 𑀅𑀲𑁆𑀲𑀸𑀤𑀸𑀤𑀻𑀦𑀜𑁆𑀘 𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀧𑀯𑀺𑀘𑀬𑀮𑀓𑁆𑀔𑀡𑁄 𑀳𑀺 𑀯𑀺𑀘𑀬𑁄 𑀳𑀸𑀭𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀬𑀁 ¶ 𑀧𑀼𑀘𑁆𑀙𑀺𑀢𑀜𑁆𑀘 𑀯𑀺𑀲𑁆𑀲𑀚𑁆𑀚𑀺𑀢𑀜𑁆𑀘, 𑀲𑀼𑀢𑁆𑀢𑀲𑁆𑀲 𑀬𑀸 𑀘 𑀅𑀦𑀼𑀕𑀻𑀢𑀺;

𑀲𑀼𑀢𑁆𑀢𑀲𑁆𑀲 𑀬𑁄 𑀧𑀯𑀺𑀘𑀬𑁄, 𑀳𑀸𑀭𑁄 𑀯𑀺𑀘𑀬𑁄𑀢𑀺 𑀦𑀺𑀤𑁆𑀤𑀺𑀝𑁆𑀞𑁄’’𑀢𑀺. (𑀦𑁂𑀢𑁆𑀢𑀺. 𑁪 𑀦𑀺𑀤𑁆𑀤𑁂𑀲𑀯𑀸𑀭);

𑀅𑀦𑀸𑀤𑀺𑀫𑀢𑀺 𑀲𑀁𑀲𑀸𑀭𑁂 𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀁 𑀅𑀜𑁆𑀜𑀫𑀜𑁆𑀜𑀭𑀽𑀧𑀸𑀪𑀺𑀭𑀸𑀫𑀢𑀸𑀬 ‘‘𑀇𑀢𑁆𑀣𑀺𑀭𑀽𑀧𑀁 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻’’𑀢𑀺 𑀬𑀼𑀚𑁆𑀚𑀢𑀻𑀢𑀺 𑀅𑀬𑀁 𑀬𑀼𑀢𑁆𑀢𑀺𑀳𑀸𑀭𑁄. 𑀩𑁆𑀬𑀜𑁆𑀚𑀦𑀢𑁆𑀣𑀸𑀦𑀁 𑀬𑀼𑀢𑁆𑀢𑀸𑀬𑀼𑀢𑁆𑀢𑀯𑀺𑀪𑀸𑀕𑀯𑀺𑀪𑀸𑀯𑀦𑀮𑀓𑁆𑀔𑀡𑁄 𑀳𑀺 𑀬𑀼𑀢𑁆𑀢𑀺𑀳𑀸𑀭𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀲𑀩𑁆𑀩𑁂𑀲𑀁 𑀳𑀸𑀭𑀸𑀦𑀁, 𑀬𑀸 𑀪𑀽𑀫𑀻 𑀬𑁄 𑀘 𑀕𑁄𑀘𑀭𑁄 𑀢𑁂𑀲𑀁;

𑀬𑀼𑀢𑁆𑀢𑀸𑀬𑀼𑀢𑁆𑀢𑀺𑀧𑀭𑀺𑀓𑁆𑀔𑀸, 𑀳𑀸𑀭𑁄 𑀬𑀼𑀢𑁆𑀢𑀻𑀢𑀺 𑀦𑀺𑀤𑁆𑀤𑀺𑀝𑁆𑀞𑁄’’𑀢𑀺. (𑀦𑁂𑀢𑁆𑀢𑀺. 𑁪 𑀦𑀺𑀤𑁆𑀤𑁂𑀲𑀯𑀸𑀭);

𑀬𑀼𑀢𑁆𑀢𑀻𑀢𑀺 ¶ 𑀘 𑀉𑀧𑀧𑀢𑁆𑀢𑀺 𑀲𑀸𑀥𑀦𑀬𑀼𑀢𑁆𑀢𑀺, 𑀇𑀥 𑀧𑀦 𑀬𑀼𑀢𑁆𑀢𑀺𑀯𑀺𑀘𑀸𑀭𑀡𑀸 𑀬𑀼𑀢𑁆𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀭𑀽𑀧𑀪𑀯𑁄 𑀭𑀽𑀧’’𑀦𑁆𑀢𑀺 𑀬𑀣𑀸. 𑀬𑀼𑀢𑁆𑀢𑀺𑀲𑀳𑀘𑀭𑀡𑀢𑁄 𑀯𑀸 𑀬𑀼𑀢𑁆𑀢𑀺.

𑀇𑀢𑁆𑀣𑀺𑀭𑀽𑀧𑀁 𑀅𑀬𑁄𑀦𑀺𑀲𑁄 𑀑𑀮𑁄𑀓𑀺𑀬𑀫𑀸𑀦𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀸𑀬 𑀧𑀤𑀝𑁆𑀞𑀸𑀦𑀁, 𑀲𑀸 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀅𑀪𑀸𑀯𑀦𑀸𑀬 𑀧𑀤𑀝𑁆𑀞𑀸𑀦𑀁, 𑀲𑀸 𑀲𑀩𑁆𑀩𑀲𑁆𑀲𑀧𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑀲𑁆𑀲 𑀧𑀭𑀺𑀯𑀼𑀤𑁆𑀥𑀺𑀬𑀸 𑀧𑀤𑀝𑁆𑀞𑀸𑀦𑀁. 𑀩𑁆𑀬𑀢𑀺𑀭𑁂𑀓𑀢𑁄 𑀧𑀦 𑀇𑀢𑁆𑀣𑀺𑀭𑀽𑀧𑀁 𑀬𑁄𑀦𑀺𑀲𑁄 𑀑𑀮𑁄𑀓𑀺𑀬𑀫𑀸𑀦𑀁 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸𑀬 𑀧𑀤𑀝𑁆𑀞𑀸𑀦𑀁, 𑀲𑀸 𑀩𑁄𑀚𑁆𑀛𑀗𑁆𑀕𑀸𑀦𑀁 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸 𑀧𑀤𑀝𑁆𑀞𑀸𑀦𑀁, 𑀲𑀸 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀻𑀦𑀁 𑀧𑀸𑀭𑀺𑀧𑀽𑀭𑀺𑀬𑀸 𑀧𑀤𑀝𑁆𑀞𑀸𑀦𑀁, 𑀓𑀼𑀲𑀮𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀭𑀺𑀬𑀸𑀤𑀸𑀦𑀁 𑀲𑀫𑁆𑀫𑁄𑀳𑀸𑀪𑀺𑀦𑀺𑀯𑁂𑀲𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀲𑁄 𑀲𑀗𑁆𑀔𑀸𑀭𑀸𑀦𑀁 𑀧𑀤𑀝𑁆𑀞𑀸𑀦𑀁, 𑀲𑀗𑁆𑀔𑀸𑀭𑀸 𑀯𑀺𑀜𑁆𑀜𑀸𑀡𑀲𑁆𑀲𑀸𑀢𑀺 𑀲𑀩𑁆𑀩𑀁 𑀆𑀯𑀢𑁆𑀢𑀢𑀺 𑀪𑀯𑀘𑀓𑁆𑀓𑀁. 𑀩𑁆𑀬𑀢𑀺𑀭𑁂𑀓𑀢𑁄 𑀧𑀦 𑀓𑀼𑀲𑀮𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀧𑀭𑀺𑀬𑀸𑀤𑀸𑀦𑀁 𑀢𑁂𑀲𑀁 𑀢𑁂𑀲𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀸𑀬 𑀧𑀸𑀭𑀺𑀧𑀽𑀭𑀺𑀬𑀸 𑀧𑀤𑀝𑁆𑀞𑀸𑀦𑀦𑁆𑀢𑀺 𑀅𑀬𑀁 𑀢𑀸𑀯 𑀅𑀯𑀺𑀲𑁂𑀲𑀢𑁄 𑀦𑀬𑁄. 𑀯𑀺𑀲𑁂𑀲𑀢𑁄 𑀧𑀦 𑀲𑀻𑀮𑀲𑁆𑀲 𑀅𑀧𑀭𑀺𑀬𑀸𑀤𑀸𑀦𑀁 𑀅𑀯𑀺𑀧𑁆𑀧𑀝𑀺𑀲𑀸𑀭𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀅𑀯𑀺𑀧𑁆𑀧𑀝𑀺𑀲𑀸𑀭𑁄 𑀧𑀸𑀫𑁄𑀚𑁆𑀚𑀲𑁆𑀲𑀸𑀢𑀺𑀆𑀤𑀺𑀦𑀸 𑀬𑀸𑀯 𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀁 𑀦𑁂𑀢𑀩𑁆𑀩𑀁. 𑀅𑀬𑀁 𑀧𑀤𑀝𑁆𑀞𑀸𑀦𑁄 𑀳𑀸𑀭𑁄. 𑀲𑀼𑀢𑁆𑀢𑁂 𑀆𑀕𑀢𑀥𑀫𑁆𑀫𑀸𑀦𑀁 𑀧𑀤𑀝𑁆𑀞𑀸𑀦𑀪𑀽𑀢𑁂 𑀥𑀫𑁆𑀫𑁂 𑀢𑁂𑀲𑀜𑁆𑀘 𑀧𑀤𑀝𑁆𑀞𑀸𑀦𑀪𑀽𑀢𑁂𑀢𑀺 𑀲𑀫𑁆𑀪𑀯𑀢𑁄 𑀧𑀤𑀝𑁆𑀞𑀸𑀦𑀪𑀽𑀢𑀥𑀫𑁆𑀫𑀦𑀺𑀤𑁆𑀥𑀸𑀭𑀡𑀮𑀓𑁆𑀔𑀡𑁄 𑀳𑀺 𑀧𑀤𑀝𑁆𑀞𑀸𑀦𑁄 𑀳𑀸𑀭𑁄. 𑀯𑀼𑀢𑁆𑀢𑀜𑁆𑀘𑁂𑀢𑀁 𑁋

‘‘𑀥𑀫𑁆𑀫𑀁 𑀤𑁂𑀲𑁂𑀢𑀺 𑀚𑀺𑀦𑁄, 𑀢𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀬𑀁 𑀧𑀤𑀝𑁆𑀞𑀸𑀦𑀁;

𑀇𑀢𑀺 𑀬𑀸𑀯 𑀲𑀩𑁆𑀩𑀥𑀫𑁆𑀫𑀸, 𑀏𑀲𑁄 𑀳𑀸𑀭𑁄 𑀧𑀤𑀝𑁆𑀞𑀸𑀦𑁄’’𑀢𑀺. (𑀦𑁂𑀢𑁆𑀢𑀺. 𑁪 𑀦𑀺𑀤𑁆𑀤𑁂𑀲𑀯𑀸𑀭);

𑀧𑀤𑀝𑁆𑀞𑀸𑀦𑀦𑁆𑀢𑀺 ¶ 𑀆𑀲𑀦𑁆𑀦𑀓𑀸𑀭𑀡𑀁. 𑀇𑀥 𑀧𑀦 𑀧𑀤𑀝𑁆𑀞𑀸𑀦𑀯𑀺𑀘𑀸𑀭𑀡𑀸 𑀧𑀤𑀝𑁆𑀞𑀸𑀦𑁄𑀢𑀺𑀆𑀤𑀺 𑀬𑀼𑀢𑁆𑀢𑀺𑀳𑀸𑀭𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀏𑀓𑀭𑀽𑀧𑀦𑁆𑀢𑀺 𑀘 𑀭𑀽𑀧𑀸𑀬𑀢𑀦𑀕𑁆𑀕𑀳𑀡𑁂𑀦 𑀙𑀦𑁆𑀦𑀫𑁆𑀧𑀺 𑀩𑀸𑀳𑀺𑀭𑀸𑀦𑀁 𑀆𑀬𑀢𑀦𑀸𑀦𑀁 𑀕𑀳𑀡𑀁 𑀩𑀸𑀳𑀺𑀭𑀸𑀬𑀢𑀦𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀘𑀺𑀢𑁆𑀢𑀦𑁆𑀢𑀺 𑀫𑀦𑀸𑀬𑀢𑀦𑀕𑁆𑀕𑀳𑀡𑁂𑀦 𑀙𑀦𑁆𑀦𑀫𑁆𑀧𑀺 𑀅𑀚𑁆𑀛𑀢𑁆𑀢𑀺𑀓𑀸𑀦𑀁 𑀆𑀬𑀢𑀦𑀸𑀦𑀁 𑀕𑀳𑀡𑀁 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀪𑀸𑀯𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀏𑀯𑀁 𑀔𑀦𑁆𑀥𑀥𑀸𑀢𑀸𑀤𑀺𑀯𑀲𑁂𑀦𑀧𑀺 𑀏𑀓𑀮𑀓𑁆𑀔𑀡𑀢𑀸 𑀯𑀢𑁆𑀢𑀩𑁆𑀩𑀸. 𑀅𑀬𑀁 𑀮𑀓𑁆𑀔𑀡𑁄 𑀳𑀸𑀭𑁄. 𑀮𑀓𑁆𑀔𑀻𑀬𑀦𑁆𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸 𑀏𑀓𑀮𑀓𑁆𑀔𑀡𑀥𑀫𑁆𑀫𑀸 𑀅𑀯𑀼𑀢𑁆𑀢𑀸𑀧𑀺 𑀏𑀓𑀘𑁆𑀘𑀯𑀘𑀦𑁂𑀦𑀸𑀢𑀺 𑀮𑀓𑁆𑀔𑀡𑁄. 𑀲𑀼𑀢𑁆𑀢𑁂 𑀅𑀦𑀸𑀕𑀢𑁂𑀧𑀺 𑀥𑀫𑁆𑀫𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂 𑀆𑀕𑀢𑁂 𑀯𑀺𑀬 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀬𑀸 𑀲𑀁𑀯𑀡𑁆𑀡𑀦𑀸, 𑀲𑁄 𑀮𑀓𑁆𑀔𑀡𑁄 𑀳𑀸𑀭𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀯𑀼𑀢𑁆𑀢𑀫𑁆𑀳𑀺 ¶ 𑀏𑀓𑀥𑀫𑁆𑀫𑁂, 𑀬𑁂 𑀥𑀫𑁆𑀫𑀸 𑀏𑀓𑀮𑀓𑁆𑀔𑀡𑀸 𑀓𑁂𑀘𑀺;

𑀯𑀼𑀢𑁆𑀢𑀸 𑀪𑀯𑀦𑁆𑀢𑀺 𑀲𑀩𑁆𑀩𑁂, 𑀲𑁄 𑀳𑀸𑀭𑁄 𑀮𑀓𑁆𑀔𑀡𑁄 𑀦𑀸𑀫𑀸’’𑀢𑀺. (𑀦𑁂𑀢𑁆𑀢𑀺. 𑁪 𑀦𑀺𑀤𑁆𑀤𑁂𑀲𑀯𑀸𑀭);

𑀦𑀺𑀤𑀸𑀦𑁂 𑀇𑀫𑀺𑀲𑁆𑀲𑀸 𑀤𑁂𑀲𑀦𑀸𑀬 𑀭𑀽𑀧𑀕𑀭𑀼𑀓𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀭𑀽𑀧𑀲𑁆𑀫𑀺𑀁 𑀅𑀦𑀸𑀤𑀻𑀦𑀯𑀤𑀲𑁆𑀲𑀺𑀢𑀸 𑀯𑀼𑀢𑁆𑀢𑀸, ‘‘𑀓𑀣𑀁 𑀦𑀼 𑀔𑁄 𑀇𑀫𑁂 𑀇𑀫𑀁 𑀤𑁂𑀲𑀦𑀁 𑀲𑀼𑀢𑁆𑀯𑀸 𑀭𑀽𑀧𑁂 𑀆𑀤𑀻𑀦𑀯𑀤𑀲𑁆𑀲𑀦𑀫𑀼𑀔𑁂𑀦 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀔𑀦𑁆𑀥𑀧𑀜𑁆𑀘𑀓𑁂 𑀲𑀩𑁆𑀩𑀲𑁄 𑀙𑀦𑁆𑀤𑀭𑀸𑀕𑀁 𑀧𑀳𑀸𑀬 𑀲𑀓𑀮𑀯𑀝𑁆𑀝𑀤𑀼𑀓𑁆𑀔𑀢𑁄 𑀫𑀼𑀘𑁆𑀘𑁂𑀬𑁆𑀬𑀼𑀁, 𑀧𑀭𑁂 𑀘 𑀢𑀢𑁆𑀣 𑀧𑀢𑀺𑀝𑁆𑀞𑀸𑀧𑁂𑀬𑁆𑀬𑀼’’𑀦𑁆𑀢𑀺 𑀅𑀬𑀫𑁂𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄. 𑀧𑀤𑀦𑀺𑀩𑁆𑀩𑀘𑀦𑀁 𑀦𑀺𑀭𑀼𑀢𑁆𑀢𑀁, 𑀢𑀁 ‘‘𑀏𑀯’’𑀦𑁆𑀢𑀺𑀆𑀤𑀺𑀦𑀺𑀤𑀸𑀦𑀧𑀤𑀸𑀦𑀁 ‘‘𑀦𑀸𑀳’’𑀦𑁆𑀢𑀺𑀆𑀤𑀺𑀧𑀸𑀴𑀺𑀧𑀤𑀸𑀦𑀜𑁆𑀘 𑀅𑀝𑁆𑀞𑀓𑀣𑀸𑀬𑀁 𑀢𑀲𑁆𑀲𑀸 𑀮𑀻𑀦𑀢𑁆𑀣𑀯𑀡𑁆𑀡𑀦𑀸𑀬 𑀘 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑀼𑀓𑀭𑀢𑁆𑀢𑀸 𑀦 𑀯𑀺𑀢𑁆𑀣𑀸𑀭𑀬𑀺𑀫𑁆𑀳.

𑀧𑀤𑀧𑀤𑀢𑁆𑀣𑀤𑁂𑀲𑀦𑀸𑀤𑁂𑀲𑀦𑀸𑀦𑀺𑀓𑁆𑀔𑁂𑀧𑀲𑀼𑀢𑁆𑀢𑀲𑀦𑁆𑀥𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑀸 𑀲𑀦𑁆𑀥𑀺. 𑀢𑀢𑁆𑀣 𑀧𑀤𑀲𑁆𑀲 𑀧𑀤𑀦𑁆𑀢𑀭𑁂𑀦 𑀲𑀫𑁆𑀩𑀦𑁆𑀥𑁄 𑀧𑀤𑀲𑀦𑁆𑀥𑀺. 𑀧𑀤𑀢𑁆𑀣𑀲𑁆𑀲 𑀧𑀤𑀢𑁆𑀣𑀦𑁆𑀢𑀭𑁂𑀦 𑀲𑀫𑁆𑀩𑀦𑁆𑀥𑁄 𑀧𑀤𑀢𑁆𑀣𑀲𑀦𑁆𑀥𑀺, 𑀬𑁄 ‘‘𑀓𑀺𑀭𑀺𑀬𑀸𑀓𑀸𑀭𑀓𑀲𑀫𑁆𑀩𑀦𑁆𑀥𑁄’’𑀢𑀺 𑀯𑀼𑀘𑁆𑀘𑀢𑀺. 𑀦𑀸𑀦𑀸𑀦𑀼𑀲𑀦𑁆𑀥𑀺𑀓𑀲𑁆𑀲 𑀲𑀼𑀢𑁆𑀢𑀲𑁆𑀲 𑀢𑀁𑀢𑀁𑀅𑀦𑀼𑀲𑀦𑁆𑀥𑀻𑀳𑀺 𑀲𑀫𑁆𑀩𑀦𑁆𑀥𑁄, 𑀏𑀓𑀸𑀦𑀼𑀲𑀦𑁆𑀥𑀺𑀓𑀲𑁆𑀲 𑀘 𑀧𑀼𑀩𑁆𑀩𑀸𑀧𑀭𑀲𑀫𑁆𑀩𑀦𑁆𑀥𑁄 𑀤𑁂𑀲𑀦𑀸𑀲𑀦𑁆𑀥𑀺, 𑀬𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺, 𑀅𑀚𑁆𑀛𑀸𑀲𑀬𑀸𑀦𑀼𑀲𑀦𑁆𑀥𑀺, 𑀬𑀣𑀸𑀦𑀼𑀲𑀦𑁆𑀥𑀻’’𑀢𑀺 𑀢𑀺𑀥𑀸 𑀯𑀺𑀪𑀢𑁆𑀢𑀸. 𑀅𑀚𑁆𑀛𑀸𑀲𑀬𑁄 𑀘𑁂𑀢𑁆𑀣 𑀅𑀢𑁆𑀢𑀚𑁆𑀛𑀸𑀲𑀬𑁄 𑀧𑀭𑀚𑁆𑀛𑀸𑀲𑀬𑁄𑀢𑀺 𑀤𑁆𑀯𑀺𑀥𑀸 𑀯𑁂𑀤𑀺𑀢𑀩𑁆𑀩𑁄. 𑀤𑁂𑀲𑀦𑀸𑀦𑀺𑀓𑁆𑀔𑁂𑀧𑀲𑀦𑁆𑀥𑀺 𑀘𑀢𑀼𑀦𑁆𑀦𑀁 𑀲𑀼𑀢𑁆𑀢𑀦𑀺𑀓𑁆𑀔𑁂𑀧𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀢𑁆𑀢𑀲𑀦𑁆𑀥𑀺 𑀇𑀥 𑀧𑀞𑀫𑀦𑀺𑀓𑁆𑀔𑁂𑀧𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. ‘‘𑀓𑀲𑁆𑀫𑀸 𑀧𑀦𑁂𑀢𑁆𑀣 𑀇𑀤𑀫𑁂𑀯 𑀘𑀺𑀢𑁆𑀢𑀧𑀭𑀺𑀬𑀸𑀤𑀸𑀦𑀲𑀼𑀢𑁆𑀢𑀁 𑀧𑀞𑀫𑀁 𑀦𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺 𑀦𑀸𑀬𑀫𑀦𑀼𑀬𑁄𑀕𑁄 𑀓𑀢𑁆𑀣𑀘𑀺 𑀦 𑀧𑀯𑀢𑁆𑀢𑀢𑀺. 𑀅𑀧𑀺𑀘 𑀇𑀫𑁂 𑀲𑀢𑁆𑀢𑀸 𑀅𑀦𑀸𑀤𑀺𑀫𑀢𑀺 𑀲𑀁𑀲𑀸𑀭𑁂 𑀧𑀭𑀺𑀩𑁆𑀪𑀫𑀦𑁆𑀢𑀸 𑀇𑀢𑁆𑀣𑀺𑀧𑀼𑀭𑀺𑀲𑀸 𑀅𑀜𑁆𑀜𑀫𑀜𑁆𑀜𑁂𑀲𑀁 𑀧𑀜𑁆𑀘𑀓𑀸𑀫𑀕𑀼𑀡𑀲𑀗𑁆𑀔𑀸𑀢𑀭𑀽𑀧𑀸𑀪𑀺𑀭𑀸𑀫𑀸, 𑀢𑀢𑁆𑀣 𑀇𑀢𑁆𑀣𑀻 𑀧𑀼𑀭𑀺𑀲𑀲𑁆𑀲 𑀭𑀽𑀧𑁂 𑀲𑀢𑁆𑀢𑀸 𑀕𑀺𑀤𑁆𑀥𑀸 𑀕𑀥𑀺𑀢𑀸 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀆𑀲𑀢𑁆𑀢𑀸, 𑀲𑀸 𑀘𑀲𑁆𑀲𑀸 𑀢𑀢𑁆𑀣 𑀆𑀲𑀢𑁆𑀢𑀺 𑀤𑀼𑀩𑁆𑀩𑀺𑀯𑁂𑀘𑀦𑀻𑀬𑀸 ¶ . 𑀢𑀣𑀸 𑀧𑀼𑀭𑀺𑀲𑁄 𑀇𑀢𑁆𑀣𑀺𑀬𑀸 𑀭𑀽𑀧𑁂, 𑀢𑀢𑁆𑀣 𑀘 𑀤𑀲𑁆𑀲𑀦𑀲𑀁𑀲𑀕𑁆𑀕𑁄 𑀕𑀭𑀼𑀢𑀭𑁄 𑀇𑀢𑀭𑁂𑀲𑀜𑁆𑀘 𑀫𑀽𑀮𑀪𑀽𑀢𑁄. 𑀢𑁂𑀦𑁂𑀯 𑀳𑀺 𑀪𑀕𑀯𑀸 ‘‘𑀓𑀣𑀁 𑀦𑀼 𑀔𑁄 𑀫𑀸𑀢𑀼𑀕𑀸𑀫𑁂 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 (𑀤𑀻. 𑀦𑀺. 𑁨.𑁨𑁦𑁩) 𑀧𑀼𑀝𑁆𑀞𑁄 ‘‘𑀅𑀤𑀲𑁆𑀲𑀦𑀫𑁂𑀯𑀸’’𑀢𑀺 𑀅𑀯𑁄𑀘. 𑀢𑀲𑁆𑀫𑀸 𑀪𑀕𑀯𑀸 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀭𑀽𑀧𑁂 𑀙𑀦𑁆𑀤𑀭𑀸𑀕𑀳𑀸𑀧𑀦𑀢𑁆𑀣𑀁 𑀇𑀤𑀫𑁂𑀯 𑀲𑀼𑀢𑁆𑀢𑀁 𑀧𑀞𑀫𑀁 𑀤𑁂𑀲𑁂𑀲𑀺. 𑀦𑀺𑀩𑁆𑀩𑀸𑀦𑀸𑀥𑀺𑀕𑀫𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀆𑀤𑀺 𑀭𑁂𑀲𑀸 𑀧𑀝𑀺𑀧𑀢𑁆𑀢𑀻𑀢𑀺. 𑀬𑀁 𑀧𑀦 𑀏𑀓𑀺𑀲𑁆𑀲𑀸 𑀤𑁂𑀲𑀦𑀸𑀬 𑀤𑁂𑀲𑀦𑀦𑁆𑀢𑀭𑁂𑀦 𑀲𑀁𑀲𑀦𑁆𑀤𑀦𑀁, 𑀅𑀬𑀫𑁆𑀧𑀺 𑀤𑁂𑀲𑀦𑀸𑀲𑀦𑁆𑀥𑀺. 𑀲𑀸 𑀇𑀥 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸. ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂…𑀧𑁂… 𑀢𑀺𑀝𑁆𑀞𑀢𑀻’’𑀢𑀺 𑀅𑀬𑀁 𑀤𑁂𑀲𑀦𑀸. ‘‘𑀬𑁂 𑀔𑁄, 𑀪𑀺𑀓𑁆𑀔𑀯𑁂, 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸 ¶ , 𑀢𑀜𑁆𑀘𑁂 𑀪𑀺𑀓𑁆𑀔𑀼 𑀅𑀪𑀺𑀦𑀦𑁆𑀤𑀢𑀺 𑀅𑀪𑀺𑀯𑀤𑀢𑀺 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑀺, 𑀢𑀲𑁆𑀲 𑀢𑀁 𑀅𑀪𑀺𑀦𑀦𑁆𑀤𑀢𑁄 𑀅𑀪𑀺𑀯𑀤𑀢𑁄 𑀅𑀚𑁆𑀛𑁄𑀲𑀸𑀬 𑀢𑀺𑀝𑁆𑀞𑀢𑁄 𑀉𑀧𑁆𑀧𑀚𑁆𑀚𑀦𑁆𑀢𑀺 𑀅𑀦𑁂𑀓𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 (𑀲𑀁. 𑀦𑀺. 𑁪.𑁧𑁧𑁮) 𑀇𑀫𑀸𑀬 𑀤𑁂𑀲𑀦𑀸𑀬 𑀲𑀁𑀲𑀦𑁆𑀤𑀢𑀺. 𑀢𑀣𑀸 ‘‘𑀭𑀽𑀧𑁂 𑀫𑀜𑁆𑀜𑀢𑀺, 𑀭𑀽𑀧𑁂𑀲𑀼 𑀫𑀜𑁆𑀜𑀢𑀺, 𑀭𑀽𑀧𑀢𑁄 𑀫𑀜𑁆𑀜𑀢𑀺, 𑀭𑀽𑀧𑀁 ‘𑀫𑁂’𑀢𑀺 𑀫𑀜𑁆𑀜𑀢𑀺. 𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀅𑀦𑀪𑀺𑀚𑀸𑀦𑀁 𑀅𑀧𑀭𑀺𑀚𑀸𑀦𑀁 𑀅𑀯𑀺𑀭𑀸𑀚𑀬𑀁 𑀅𑀧𑁆𑀧𑀚𑀳𑀁 𑀅𑀪𑀩𑁆𑀩𑁄 𑀤𑀼𑀓𑁆𑀔𑀓𑁆𑀔𑀬𑀸𑀬𑀸’’𑀢𑀺 (𑀲𑀁. 𑀦𑀺. 𑁪.𑁧𑁧𑁨) 𑀏𑀯𑀫𑀸𑀤𑀻𑀳𑀺 𑀤𑁂𑀲𑀦𑀸𑀳𑀺 𑀲𑀁𑀲𑀦𑁆𑀤𑀢𑀻𑀢𑀺 𑀅𑀬𑀁 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄. 𑀯𑀺𑀬𑀽𑀳𑀻𑀬𑀦𑁆𑀢𑀺 𑀯𑀺𑀪𑀸𑀕𑁂𑀦 𑀧𑀺𑀡𑁆𑀟𑀻𑀬𑀦𑁆𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸𑀢𑀺 𑀩𑁆𑀬𑀽𑀳𑁄, 𑀦𑀺𑀩𑁆𑀩𑀘𑀦𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀩𑁆𑀬𑀽𑀳𑁄𑀢𑀺 𑀘𑀢𑀼𑀩𑁆𑀬𑀽𑀳𑁄, 𑀘𑀢𑀼𑀦𑁆𑀦𑀁 𑀯𑀸 𑀩𑁆𑀬𑀽𑀳𑁄 𑀏𑀢𑁆𑀣𑀸𑀢𑀺 𑀘𑀢𑀼𑀩𑁆𑀬𑀽𑀳𑁄. 𑀦𑀺𑀩𑁆𑀩𑀘𑀦𑀸𑀥𑀺𑀧𑁆𑀧𑀸𑀬𑀸𑀤𑀻𑀦𑀁 𑀘𑀢𑀼𑀦𑁆𑀦𑀁 𑀯𑀺𑀪𑀸𑀕𑀮𑀓𑁆𑀔𑀡𑁄 𑀳𑀺 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀦𑁂𑀭𑀼𑀢𑁆𑀢𑀫𑀥𑀺𑀧𑁆𑀧𑀸𑀬𑁄, 𑀩𑁆𑀬𑀜𑁆𑀚𑀦𑀫𑀣 𑀤𑁂𑀲𑀦𑀸𑀦𑀺𑀤𑀸𑀦𑀜𑁆𑀘;

𑀧𑀼𑀩𑁆𑀩𑀸𑀧𑀭𑀸𑀦𑀼𑀲𑀦𑁆𑀥𑀻, 𑀏𑀲𑁄 𑀳𑀸𑀭𑁄 𑀘𑀢𑀼𑀩𑁆𑀬𑀽𑀳𑁄’’𑀢𑀺. (𑀦𑁂𑀢𑁆𑀢𑀺. 𑁪 𑀦𑀺𑀤𑁆𑀤𑁂𑀲𑀯𑀸𑀭);

‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁…𑀧𑁂… 𑀇𑀢𑁆𑀣𑀺𑀭𑀽𑀧’’𑀦𑁆𑀢𑀺 𑀏𑀢𑁂𑀦 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀤𑀻𑀧𑀺𑀢𑁄. 𑀬𑀁 𑀢𑀢𑁆𑀣 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀺𑀬𑀢𑀺, 𑀢𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄. 𑀢𑀢𑁆𑀣 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀭𑁄𑀢𑁄 𑀢𑀡𑁆𑀳𑀸𑀯𑀺𑀚𑁆𑀚𑀸 𑀧𑀭𑀺𑀯𑀟𑁆𑀠𑀦𑁆𑀢𑀺, 𑀢𑀸𑀲𑀼 𑀢𑀡𑁆𑀳𑀸𑀕𑀳𑀡𑁂𑀦 𑀦𑀯 𑀢𑀡𑁆𑀳𑀸𑀫𑀽𑀮𑀓𑀸 𑀥𑀫𑁆𑀫𑀸 𑀆𑀯𑀝𑁆𑀝𑀦𑁆𑀢𑀺, 𑀅𑀯𑀺𑀚𑁆𑀚𑀸𑀕𑀳𑀡𑁂𑀦 𑀅𑀯𑀺𑀚𑁆𑀚𑀸𑀫𑀽𑀮𑀓𑀁 𑀲𑀩𑁆𑀩𑀁 𑀪𑀯𑀘𑀓𑁆𑀓𑀁 𑀆𑀯𑀝𑁆𑀝𑀢𑀺, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀕𑁆𑀕𑀳𑀡𑁂𑀦 𑀘 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀫𑀽𑀮𑀓𑀸 𑀥𑀫𑁆𑀫𑀸 𑀆𑀯𑀝𑁆𑀝𑀦𑁆𑀢𑀺, 𑀘𑀢𑀼𑀩𑁆𑀩𑀺𑀥𑀜𑁆𑀘 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀦𑁆𑀢𑀺. 𑀅𑀬𑀁 𑀆𑀯𑀝𑁆𑀝𑁄 𑀳𑀸𑀭𑁄. 𑀆𑀯𑀝𑁆𑀝𑀬𑀦𑁆𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸 𑀲𑀪𑀸𑀕𑀯𑀺𑀲𑀪𑀸𑀕𑀸 𑀘 𑀥𑀫𑁆𑀫𑀸, 𑀢𑁂𑀲𑀁 𑀯𑀸 𑀆𑀯𑀝𑁆𑀝𑀦𑀦𑁆𑀢𑀺 𑀆𑀯𑀝𑁆𑀝𑁄. 𑀤𑁂𑀲𑀦𑀸𑀬 𑀕𑀳𑀺𑀢𑀥𑀫𑁆𑀫𑀸𑀦𑀁 𑀲𑀪𑀸𑀕𑀸𑀲𑀪𑀸𑀕𑀥𑀫𑁆𑀫𑀯𑀲𑁂𑀦 𑀆𑀯𑀝𑁆𑀝𑀦𑀮𑀓𑁆𑀔𑀡𑁄 𑀳𑀺 𑀆𑀯𑀝𑁆𑀝𑁄 𑀳𑀸𑀭𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀏𑀓𑀫𑁆𑀳𑀺 𑀧𑀤𑀝𑁆𑀞𑀸𑀦𑁂, 𑀧𑀭𑀺𑀬𑁂𑀲𑀢𑀺 𑀲𑁂𑀲𑀓𑀁 𑀧𑀤𑀝𑁆𑀞𑀸𑀦𑀁;

𑀆𑀯𑀝𑁆𑀝𑀢𑀺 𑀧𑀝𑀺𑀧𑀓𑁆𑀔𑁂, 𑀆𑀯𑀝𑁆𑀝𑁄 𑀦𑀸𑀫 𑀲𑁄 𑀳𑀸𑀭𑁄’’𑀢𑀺. (𑀦𑁂𑀢𑁆𑀢𑀺. 𑁪 𑀦𑀺𑀤𑁆𑀤𑁂𑀲𑀯𑀸𑀭);

𑀭𑀽𑀧𑀁 ¶ 𑀘𑀢𑀼𑀩𑁆𑀩𑀺𑀥𑀁 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀁, 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁, 𑀉𑀢𑀼𑀲𑀫𑀼𑀝𑁆𑀞𑀸𑀦𑀁, 𑀆𑀳𑀸𑀭𑀲𑀫𑀼𑀝𑁆𑀞𑀸𑀦𑀁, 𑀢𑀣𑀸 𑀇𑀝𑁆𑀞𑀁 𑀇𑀝𑁆𑀞𑀫𑀚𑁆𑀛𑀢𑁆𑀢𑀁 𑀅𑀦𑀺𑀝𑁆𑀞𑀁 𑀅𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑀦𑁆𑀢𑀺. 𑀇𑀥 𑀧𑀦 𑀇𑀝𑁆𑀞𑀁 𑀅𑀥𑀺𑀧𑁆𑀧𑁂𑀢𑀁. 𑀘𑀺𑀢𑁆𑀢𑀁 𑀓𑀼𑀲𑀮𑀘𑀺𑀢𑁆𑀢𑀫𑁂𑀢𑁆𑀣 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀓𑀸𑀫𑀸𑀯𑀘𑀭𑀁, 𑀭𑀽𑀧𑀸𑀯𑀘𑀭𑀁, 𑀅𑀭𑀽𑀧𑀸𑀯𑀘𑀭𑀁, 𑀮𑁄𑀓𑀼𑀢𑁆𑀢𑀭𑀦𑁆𑀢𑀺 𑀘𑀢𑀼𑀩𑁆𑀩𑀺𑀥𑀁. 𑀯𑁂𑀤𑀦𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀪𑁂𑀤𑀢𑁄 𑀅𑀦𑁂𑀓𑀯𑀺𑀥𑀦𑁆𑀢𑀺 ¶ 𑀅𑀬𑀁 𑀯𑀺𑀪𑀢𑁆𑀢𑀺𑀳𑀸𑀭𑁄. 𑀯𑀺𑀪𑀚𑀻𑀬𑀦𑁆𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀸𑀦𑀁 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀥𑀫𑁆𑀫𑀸𑀦𑀁 𑀪𑀽𑀫𑀺𑀬𑁄𑀢𑀺 𑀯𑀺𑀪𑀢𑁆𑀢𑀺. 𑀯𑀺𑀪𑀚𑀦𑀁 𑀯𑀸 𑀏𑀢𑁂𑀲𑀁 𑀪𑀽𑀫𑀺𑀬𑁄𑀢𑀺 𑀯𑀺𑀪𑀢𑁆𑀢𑀺. 𑀲𑀁𑀓𑀺𑀮𑁂𑀲𑀥𑀫𑁆𑀫𑁂 𑀯𑁄𑀤𑀸𑀦𑀥𑀫𑁆𑀫𑁂 𑀘 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀢𑁄 𑀧𑀤𑀝𑁆𑀞𑀸𑀦𑀢𑁄 𑀪𑀽𑀫𑀺𑀢𑁄 𑀯𑀺𑀪𑀚𑀦𑀮𑀓𑁆𑀔𑀡𑁄 𑀳𑀺 𑀯𑀺𑀪𑀢𑁆𑀢𑀺𑀳𑀸𑀭𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀥𑀫𑁆𑀫𑀜𑁆𑀘 𑀧𑀤𑀝𑁆𑀞𑀸𑀦𑀁, 𑀪𑀽𑀫𑀺𑀜𑁆𑀘 𑀯𑀺𑀪𑀚𑁆𑀚𑀢𑁂 𑀅𑀬𑀁 𑀳𑀸𑀭𑁄;

𑀲𑀸𑀥𑀸𑀭𑀡𑁂 𑀅𑀲𑀸𑀥𑀸𑀭𑀡𑁂 𑀘 𑀦𑁂𑀬𑁆𑀬𑁄 𑀯𑀺𑀪𑀢𑁆𑀢𑀻’’𑀢𑀺. (𑀦𑁂𑀢𑁆𑀢𑀺. 𑁪 𑀦𑀺𑀤𑁆𑀤𑁂𑀲𑀯𑀸𑀭);

𑀇𑀢𑁆𑀣𑀺𑀭𑀽𑀧𑀁 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀺 𑀅𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄, 𑀬𑁄𑀦𑀺𑀲𑁄 𑀫𑀦𑀲𑀺𑀓𑀭𑁄𑀢𑁄 𑀦 𑀧𑀭𑀺𑀬𑀸𑀤𑀺𑀬𑀢𑀺 𑀲𑀼𑀲𑀁𑀯𑀼𑀢𑀺𑀦𑁆𑀤𑁆𑀭𑀺𑀬𑀢𑁆𑀢𑀸 𑀲𑀻𑀮𑁂𑀲𑀼 𑀲𑀫𑀸𑀳𑀺𑀢𑀲𑁆𑀲𑀸𑀢𑀺 𑀅𑀬𑀁 𑀧𑀭𑀺𑀯𑀢𑁆𑀢𑁄 𑀳𑀸𑀭𑁄. 𑀧𑀝𑀺𑀧𑀓𑁆𑀔𑀯𑀲𑁂𑀦 𑀧𑀭𑀺𑀯𑀢𑁆𑀢𑀻𑀬𑀦𑁆𑀢𑀺 𑀇𑀫𑀺𑀦𑀸, 𑀏𑀢𑁆𑀣 𑀯𑀸 𑀲𑀼𑀢𑁆𑀢𑁂 𑀯𑀼𑀢𑁆𑀢𑀥𑀫𑁆𑀫𑀸, 𑀧𑀭𑀺𑀯𑀢𑁆𑀢𑀦𑀁 𑀯𑀸 𑀢𑁂𑀲𑀦𑁆𑀢𑀺 𑀧𑀭𑀺𑀯𑀢𑁆𑀢𑁄. 𑀦𑀺𑀤𑁆𑀤𑀺𑀝𑁆𑀞𑀸𑀦𑀁 𑀥𑀫𑁆𑀫𑀸𑀦𑀁 𑀧𑀝𑀺𑀧𑀓𑁆𑀔𑀢𑁄 𑀧𑀭𑀺𑀯𑀢𑁆𑀢𑀦𑀮𑀓𑁆𑀔𑀡𑁄 𑀳𑀺 𑀧𑀭𑀺𑀯𑀢𑁆𑀢𑁄 𑀳𑀸𑀭𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀓𑀼𑀲𑀮𑀸𑀓𑀼𑀲𑀮𑁂 𑀥𑀫𑁆𑀫𑁂, 𑀦𑀺𑀤𑁆𑀤𑀺𑀝𑁆𑀞𑁂 𑀪𑀸𑀯𑀺𑀢𑁂 𑀧𑀳𑀻𑀦𑁂 𑀘;

𑀧𑀭𑀺𑀯𑀢𑁆𑀢𑀢𑀺 𑀧𑀝𑀺𑀧𑀓𑁆𑀔𑁂, 𑀳𑀸𑀭𑁄 𑀧𑀭𑀺𑀯𑀢𑁆𑀢𑀦𑁄 𑀦𑀸𑀫𑀸’’𑀢𑀺. (𑀦𑁂𑀢𑁆𑀢𑀺. 𑁪 𑀦𑀺𑀤𑁆𑀤𑁂𑀲𑀯𑀸𑀭);

𑀪𑀺𑀓𑁆𑀔𑀯𑁂, 𑀲𑀫𑀡𑀸 𑀧𑀩𑁆𑀩𑀚𑀺𑀢𑀸𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀅𑀜𑁆𑀜𑀁 𑀧𑀭𑀁 𑀓𑀺𑀜𑁆𑀘𑀻𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀭𑀽𑀧𑀁 𑀯𑀡𑁆𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀦𑁆𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀲𑀫𑀦𑀼𑀧𑀲𑁆𑀲𑀸𑀫𑀺 𑀑𑀮𑁄𑀓𑁂𑀲𑁆𑀲𑀸𑀫𑀺 𑀚𑀸𑀦𑀸𑀫𑀻𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀏𑀯𑀁 𑀇𑀢𑁆𑀣𑀁 𑀇𑀫𑀁 𑀧𑀓𑀸𑀭𑀦𑁆𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀧𑀼𑀭𑀺𑀲𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀘𑀺𑀢𑁆𑀢𑀁 𑀯𑀺𑀜𑁆𑀜𑀸𑀡𑀁 𑀫𑀦𑁄𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀧𑀭𑀺𑀬𑀸𑀤𑀸𑀬 𑀕𑀳𑁂𑀢𑁆𑀯𑀸 𑀔𑁂𑀧𑁂𑀢𑁆𑀯𑀸𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀢𑀺𑀝𑁆𑀞𑀢𑀺 𑀥𑀭𑀢𑀺 𑀞𑀸𑀢𑀻𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀬𑀣𑀸 𑀬𑁂𑀦 𑀧𑀓𑀸𑀭𑁂𑀦 𑀬𑁂𑀦𑀸𑀓𑀸𑀭𑁂𑀦𑀸𑀢𑀺 𑀧𑀭𑀺𑀬𑀸𑀬𑀯𑀘𑀦𑀁. 𑀇𑀢𑁆𑀣𑀻 𑀦𑀸𑀭𑀻 𑀫𑀸𑀢𑀼𑀕𑀸𑀫𑁄𑀢𑀺 𑀧𑀭𑀺𑀬𑀸𑀬𑀯𑀘𑀦𑀦𑁆𑀢𑀺 𑀅𑀬𑀁 𑀯𑁂𑀯𑀘𑀦𑁄 𑀳𑀸𑀭𑁄. 𑀯𑀺𑀯𑀺𑀥𑀁 𑀯𑀘𑀦𑀁 𑀏𑀓𑀲𑁆𑀲𑁂𑀯𑀢𑁆𑀣𑀲𑁆𑀲 𑀯𑀸𑀘𑀓𑀫𑁂𑀢𑁆𑀣𑀸𑀢𑀺 𑀯𑀺𑀯𑀘𑀦𑀁, 𑀯𑀺𑀯𑀘𑀦𑀫𑁂𑀯 𑀯𑁂𑀯𑀘𑀦𑀁. 𑀯𑀺𑀯𑀺𑀥𑀁 𑀯𑀼𑀘𑁆𑀘𑀢𑀺 𑀏𑀢𑁂𑀦 𑀅𑀢𑁆𑀣𑁄𑀢𑀺 𑀯𑀸 𑀯𑀺𑀯𑀘𑀦𑀁, 𑀯𑀺𑀯𑀘𑀦𑀫𑁂𑀯 𑀯𑁂𑀯𑀘𑀦𑀁. 𑀏𑀓𑀲𑁆𑀫𑀺𑀁 𑀅𑀢𑁆𑀣𑁂 𑀅𑀦𑁂𑀓𑀧𑀭𑀺𑀬𑀸𑀬𑀲𑀤𑁆𑀤𑀧𑁆𑀧𑀬𑁄𑀚𑀦𑀮𑀓𑁆𑀔𑀡𑁄 𑀳𑀺 𑀯𑁂𑀯𑀘𑀦𑁄 𑀳𑀸𑀭𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀯𑁂𑀯𑀘𑀦𑀸𑀦𑀺 ¶ 𑀩𑀳𑀽𑀦𑀺 𑀢𑀼, 𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀦𑀺 𑀏𑀓𑀥𑀫𑁆𑀫𑀲𑁆𑀲;

𑀬𑁄 𑀚𑀸𑀦𑀸𑀢𑀺 𑀲𑀼𑀢𑁆𑀢𑀯𑀺𑀤𑀽, 𑀯𑁂𑀯𑀘𑀦𑁄 𑀦𑀸𑀫 𑀲𑁄 𑀳𑀸𑀭𑁄’’𑀢𑀺. (𑀦𑁂𑀢𑁆𑀢𑀺. 𑁪 𑀦𑀺𑀤𑁆𑀤𑁂𑀲𑀯𑀸𑀭);

𑀭𑀽𑀧𑀁 ¶ 𑀓𑀸𑀴𑀲𑀸𑀫𑀸𑀤𑀺𑀯𑀲𑁂𑀦 𑀅𑀦𑁂𑀓𑀥𑀸 𑀧𑀜𑁆𑀜𑀢𑁆𑀢𑀁. 𑀧𑀼𑀭𑀺𑀲𑁄 𑀔𑀢𑁆𑀢𑀺𑀬𑀸𑀤𑀺𑀯𑀲𑁂𑀦 𑀅𑀦𑁂𑀓𑀥𑀸 𑀧𑀜𑁆𑀜𑀢𑁆𑀢𑁄. 𑀘𑀺𑀢𑁆𑀢𑀁 𑀧𑀭𑀺𑀢𑁆𑀢𑀫𑀳𑀕𑁆𑀕𑀢𑀸𑀤𑀺𑀯𑀲𑁂𑀦 𑀅𑀦𑁂𑀓𑀥𑀸 𑀧𑀜𑁆𑀜𑀢𑁆𑀢𑀁. ‘‘𑀧𑀭𑀺𑀬𑀸𑀤𑀸𑀬𑀸’’𑀢𑀺 𑀏𑀢𑁆𑀣 𑀧𑀭𑀺𑀬𑀸𑀤𑀸𑀦𑀁 𑀧𑀭𑀺𑀬𑀸𑀤𑀸𑀬𑀓𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀯𑀲𑁂𑀦 𑀯𑀻𑀢𑀺𑀓𑁆𑀓𑀫𑀧𑀭𑀺𑀬𑀼𑀝𑁆𑀞𑀸𑀦𑀸𑀤𑀺𑀦𑀸 𑀘 𑀅𑀦𑁂𑀓𑀥𑀸 𑀧𑀜𑁆𑀜𑀢𑁆𑀢𑀁. 𑀅𑀬𑀁 𑀧𑀜𑁆𑀜𑀢𑁆𑀢𑀺𑀳𑀸𑀭𑁄. 𑀧𑀓𑀸𑀭𑁂𑀳𑀺, 𑀧𑀪𑁂𑀤𑀢𑁄 𑀯𑀸 𑀜𑀸𑀧𑀻𑀬𑀦𑁆𑀢𑀺 𑀇𑀫𑀺𑀦𑀸, 𑀏𑀢𑁆𑀣 𑀯𑀸 𑀅𑀢𑁆𑀣𑀸𑀢𑀺 𑀧𑀜𑁆𑀜𑀢𑁆𑀢𑀺. 𑀏𑀓𑁂𑀓𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑁂𑀓𑀸𑀳𑀺 𑀧𑀜𑁆𑀜𑀢𑁆𑀢𑀻𑀳𑀺 𑀧𑀜𑁆𑀜𑀸𑀧𑁂𑀢𑀩𑁆𑀩𑀸𑀓𑀸𑀭𑀯𑀺𑀪𑀸𑀯𑀦𑀮𑀓𑁆𑀔𑀡𑁄 𑀳𑀺 𑀧𑀜𑁆𑀜𑀢𑁆𑀢𑀺𑀳𑀸𑀭𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀏𑀓𑀁 𑀪𑀕𑀯𑀸 𑀥𑀫𑁆𑀫𑀁, 𑀧𑀜𑁆𑀜𑀢𑁆𑀢𑀻𑀳𑀺 𑀯𑀺𑀯𑀺𑀥𑀸𑀳𑀺 𑀤𑁂𑀲𑁂𑀢𑀺;

𑀲𑁄 𑀆𑀓𑀸𑀭𑁄 𑀜𑁂𑀬𑁆𑀬𑁄, 𑀧𑀜𑁆𑀜𑀢𑁆𑀢𑀻 𑀦𑀸𑀫 𑀲𑁄 𑀳𑀸𑀭𑁄’’𑀢𑀺. (𑀦𑁂𑀢𑁆𑀢𑀺. 𑁪 𑀦𑀺𑀤𑁆𑀤𑁂𑀲𑀯𑀸𑀭);

𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀫𑀯𑀸𑀬𑁂 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺𑀭𑀼𑀧𑁆𑀧𑀦𑀯𑀡𑁆𑀡𑀯𑀺𑀓𑀸𑀭𑀸𑀧𑀢𑁆𑀢𑀺𑀬𑀸 𑀢𑀁𑀲𑀫𑀗𑁆𑀕𑀺𑀦𑁄 𑀳𑀤𑀬𑀗𑁆𑀕𑀢𑀪𑀸𑀯𑀧𑁆𑀧𑀓𑀸𑀲𑀦𑀁 𑀭𑀽𑀧𑀝𑁆𑀞𑁄𑀢𑀺 𑀅𑀦𑀺𑀘𑁆𑀘𑀢𑀸𑀫𑀼𑀔𑁂𑀦 𑀑𑀢𑀭𑀡𑀁, 𑀅𑀦𑀺𑀘𑁆𑀘𑀲𑁆𑀲 𑀧𑀦 𑀤𑀼𑀓𑁆𑀔𑀢𑁆𑀢𑀸 𑀤𑀼𑀓𑁆𑀔𑀢𑀸𑀫𑀼𑀔𑁂𑀦, 𑀤𑀼𑀓𑁆𑀔𑀲𑁆𑀲 𑀘 𑀅𑀦𑀢𑁆𑀢𑀓𑀢𑁆𑀢𑀸 𑀲𑀼𑀜𑁆𑀜𑀢𑀸𑀫𑀼𑀔𑁂𑀦 𑀑𑀢𑀭𑀡𑀁. 𑀘𑀺𑀢𑁆𑀢𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼, 𑀢𑀲𑁆𑀲𑀸 𑀧𑀭𑀺𑀬𑀸𑀤𑀸𑀬𑀺𑀓𑀸 𑀢𑀡𑁆𑀳𑀸 𑀢𑀤𑁂𑀓𑀝𑁆𑀞𑀸 𑀘 𑀧𑀸𑀧𑀥𑀫𑁆𑀫𑀸 𑀥𑀫𑁆𑀫𑀥𑀸𑀢𑀽𑀢𑀺 𑀥𑀸𑀢𑀼𑀫𑀼𑀔𑁂𑀦 𑀑𑀢𑀭𑀡𑀁. 𑀏𑀯𑀁 𑀔𑀦𑁆𑀥𑀸𑀬𑀢𑀦𑀸𑀤𑀺𑀫𑀼𑀔𑁂𑀳𑀺𑀧𑀺 𑀑𑀢𑀭𑀡𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀬𑀁 𑀑𑀢𑀭𑀡𑁄 𑀳𑀸𑀭𑁄. 𑀑𑀢𑀸𑀭𑀻𑀬𑀦𑁆𑀢𑀺 𑀅𑀦𑀼𑀧𑁆𑀧𑀯𑁂𑀲𑀻𑀬𑀦𑁆𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸 𑀲𑀼𑀢𑁆𑀢𑀸𑀕𑀢𑀸 𑀥𑀫𑁆𑀫𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀻𑀲𑀽𑀢𑀺 𑀑𑀢𑀭𑀡𑁄. 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸𑀤𑀺𑀫𑀼𑀔𑁂𑀦 𑀲𑀼𑀢𑁆𑀢𑀢𑁆𑀣𑀲𑁆𑀲 𑀑𑀢𑀭𑀡𑀮𑀓𑁆𑀔𑀡𑁄 𑀳𑀺 𑀑𑀢𑀭𑀡𑁄 𑀳𑀸𑀭𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑁄 𑀘 𑀧𑀝𑀺𑀘𑁆𑀘𑀼𑀧𑁆𑀧𑀸𑀤𑁄, 𑀇𑀦𑁆𑀤𑁆𑀭𑀺𑀬𑀔𑀦𑁆𑀥𑀸 𑀘 𑀥𑀸𑀢𑀼𑀆𑀬𑀢𑀦𑀸;

𑀏𑀢𑁂𑀳𑀺 𑀑𑀢𑀭𑀢𑀺 𑀬𑁄, 𑀑𑀢𑀭𑀡𑁄 𑀦𑀸𑀫 𑀲𑁄 𑀳𑀸𑀭𑁄’’𑀢𑀺. (𑀦𑁂𑀢𑁆𑀢𑀺. 𑁪 𑀦𑀺𑀤𑁆𑀤𑁂𑀲𑀯𑀸𑀭);

𑀦𑀸𑀳𑀁, 𑀪𑀺𑀓𑁆𑀔𑀯𑁂…𑀧𑁂… 𑀲𑀫𑀦𑀼𑀧𑀲𑁆𑀲𑀸𑀫𑀻𑀢𑀺 𑀆𑀭𑀫𑁆𑀪𑁄. 𑀏𑀯𑀁 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻𑀢𑀺 𑀧𑀤𑀲𑀼𑀤𑁆𑀥𑀺, 𑀦 𑀧𑀦 𑀆𑀭𑀫𑁆𑀪𑀲𑀼𑀤𑁆𑀥𑀺. 𑀬𑀣𑀬𑀺𑀤𑀦𑁆𑀢𑀺𑀆𑀤𑀺 𑀧𑀤𑀲𑀼𑀤𑁆𑀥𑀺 𑀘𑁂𑀯 𑀆𑀭𑀫𑁆𑀪𑀲𑀼𑀤𑁆𑀥𑀺 𑀘𑀸𑀢𑀺 𑀅𑀬𑀁 𑀲𑁄𑀥𑀦𑁄 𑀳𑀸𑀭𑁄. 𑀲𑁄𑀥𑀻𑀬𑀦𑁆𑀢𑀺 𑀲𑀫𑀸𑀥𑀻𑀬𑀦𑁆𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸 𑀲𑀼𑀢𑁆𑀢𑁂 𑀧𑀤𑀧𑀤𑀢𑁆𑀣𑀧𑀜𑁆𑀳𑀸𑀭𑀫𑁆𑀪𑀸𑀢𑀺 𑀲𑁄𑀥𑀦𑁄. 𑀲𑀼𑀢𑁆𑀢𑁂 𑀧𑀤𑀧𑀤𑀢𑁆𑀣𑀧𑀜𑁆𑀳𑀸𑀭𑀫𑁆𑀪𑀸𑀦𑀁 𑀲𑁄𑀥𑀦𑀮𑀓𑁆𑀔𑀡𑁄 𑀳𑀺 𑀲𑁄𑀥𑀦𑁄 𑀳𑀸𑀭𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀯𑀺𑀲𑁆𑀲𑀚𑁆𑀚𑀺𑀢𑀫𑁆𑀳𑀺 ¶ 𑀧𑀜𑁆𑀳𑁂, 𑀕𑀸𑀣𑀸𑀬𑀁 𑀧𑀼𑀘𑁆𑀙𑀺𑀢𑀸𑀬𑀫𑀸𑀭𑀩𑁆𑀪;

𑀲𑀼𑀤𑁆𑀥𑀸𑀲𑀼𑀤𑁆𑀥𑀧𑀭𑀺𑀓𑁆𑀔𑀸, 𑀳𑀸𑀭𑁄 𑀲𑁄 𑀲𑁄𑀥𑀦𑁄 𑀦𑀸𑀫𑀸’’𑀢𑀺. (𑀦𑁂𑀢𑁆𑀢𑀺. 𑁪 𑀦𑀺𑀤𑁆𑀤𑁂𑀲𑀯𑀸𑀭);

𑀅𑀜𑁆𑀜𑀦𑁆𑀢𑀺 ¶ 𑀲𑀸𑀫𑀜𑁆𑀜𑀢𑁄 𑀅𑀥𑀺𑀝𑁆𑀞𑀸𑀦𑀁 𑀓𑀲𑁆𑀲𑀘𑀺 𑀯𑀺𑀲𑁂𑀲𑀲𑁆𑀲 𑀅𑀦𑀸𑀫𑀝𑁆𑀞𑀢𑁆𑀢𑀸. 𑀏𑀓𑀭𑀽𑀧𑀫𑁆𑀧𑀻𑀢𑀺 𑀢𑀁 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀺𑀲𑁂𑀲𑀯𑀘𑀦𑀁. 𑀬𑀣𑀬𑀺𑀤𑀦𑁆𑀢𑀺 𑀲𑀸𑀫𑀜𑁆𑀜𑀢𑁄 𑀅𑀥𑀺𑀝𑁆𑀞𑀸𑀦𑀁 𑀅𑀦𑀺𑀬𑀫𑀯𑀘𑀦𑀪𑀸𑀯𑀢𑁄. 𑀇𑀢𑁆𑀣𑀺𑀭𑀽𑀧𑀦𑁆𑀢𑀺 𑀢𑀁 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀺𑀲𑁂𑀲𑀯𑀘𑀦𑀦𑁆𑀢𑀺 𑀅𑀬𑀁 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑁄. 𑀅𑀥𑀺𑀝𑁆𑀞𑀻𑀬𑀦𑁆𑀢𑀺 𑀅𑀦𑀼𑀧𑁆𑀧𑀯𑀢𑁆𑀢𑀻𑀬𑀦𑁆𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸 𑀲𑀸𑀫𑀜𑁆𑀜𑀯𑀺𑀲𑁂𑀲𑀪𑀽𑀢𑀸 𑀥𑀫𑁆𑀫𑀸 𑀯𑀺𑀦𑀸 𑀯𑀺𑀓𑀧𑁆𑀧𑁂𑀦𑀸𑀢𑀺 𑀅𑀥𑀺𑀝𑁆𑀞𑀸𑀦𑁄. 𑀲𑀼𑀢𑁆𑀢𑀸𑀕𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀯𑀺𑀓𑀧𑁆𑀧𑀦𑀯𑀲𑁂𑀦𑁂𑀯 𑀲𑀸𑀫𑀜𑁆𑀜𑀯𑀺𑀲𑁂𑀲𑀦𑀺𑀤𑁆𑀥𑀸𑀭𑀡𑀮𑀓𑁆𑀔𑀡𑁄 𑀳𑀺 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑁄. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀏𑀓𑀢𑁆𑀢𑀢𑀸𑀬 𑀥𑀫𑁆𑀫𑀸, 𑀬𑁂𑀧𑀺 𑀘 𑀯𑁂𑀫𑀢𑁆𑀢𑀢𑀸𑀬 𑀦𑀺𑀤𑁆𑀤𑀺𑀝𑁆𑀞𑀸;

𑀢𑁂𑀦 𑀯𑀺𑀓𑀧𑁆𑀧𑀬𑀺𑀢𑀩𑁆𑀩𑀸, 𑀏𑀲𑁄 𑀳𑀸𑀭𑁄 𑀅𑀥𑀺𑀝𑁆𑀞𑀸𑀦𑁄’’𑀢𑀺. (𑀦𑁂𑀢𑁆𑀢𑀺. 𑁪 𑀦𑀺𑀤𑁆𑀤𑁂𑀲𑀯𑀸𑀭);

𑀭𑀽𑀧𑀲𑁆𑀲 𑀓𑀫𑁆𑀫𑀸𑀯𑀺𑀚𑁆𑀚𑀸𑀤𑀬𑁄 𑀓𑀫𑁆𑀫𑀘𑀺𑀢𑁆𑀢𑀸𑀤𑀬𑁄 𑀘 𑀳𑁂𑀢𑀼. 𑀲𑀫𑀦𑀼𑀧𑀲𑁆𑀲𑀦𑀸𑀬 𑀆𑀯𑀚𑁆𑀚𑀦𑀸𑀤𑀬𑁄. 𑀓𑀼𑀲𑀮𑀲𑁆𑀲 𑀘𑀺𑀢𑁆𑀢𑀲𑁆𑀲 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑀸𑀤𑀬𑁄. 𑀧𑀭𑀺𑀬𑀸𑀤𑀸𑀬𑀸𑀢𑀺 𑀏𑀢𑁆𑀣 𑀧𑀭𑀺𑀬𑀸𑀤𑀸𑀦𑀲𑁆𑀲 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀬𑁄𑀢𑀺 𑀅𑀬𑀁 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑁄. 𑀧𑀭𑀺𑀓𑀭𑁄𑀢𑀺 𑀅𑀪𑀺𑀲𑀗𑁆𑀔𑀭𑁄𑀢𑀺 𑀨𑀮𑀦𑁆𑀢𑀺 𑀧𑀭𑀺𑀓𑁆𑀔𑀸𑀭𑁄, 𑀳𑁂𑀢𑀼 𑀧𑀘𑁆𑀘𑀬𑁄 𑀘. 𑀧𑀭𑀺𑀓𑁆𑀔𑀸𑀭𑀁 𑀆𑀘𑀺𑀓𑁆𑀔𑀢𑀻𑀢𑀺 𑀧𑀭𑀺𑀓𑁆𑀔𑀸𑀭𑁄, 𑀳𑀸𑀭𑁄. 𑀧𑀭𑀺𑀓𑁆𑀔𑀸𑀭𑀯𑀺𑀲𑀬𑀢𑁆𑀢𑀸, 𑀧𑀭𑀺𑀓𑁆𑀔𑀸𑀭𑀲𑀳𑀘𑀭𑀡𑀢𑁄 𑀯𑀸 𑀧𑀭𑀺𑀓𑁆𑀔𑀸𑀭𑁄. 𑀲𑀼𑀢𑁆𑀢𑁂 𑀆𑀕𑀢𑀥𑀫𑁆𑀫𑀸𑀦𑀁 𑀧𑀭𑀺𑀓𑁆𑀔𑀸𑀭𑀲𑀗𑁆𑀔𑀸𑀢𑀳𑁂𑀢𑀼𑀧𑀘𑁆𑀘𑀬𑁂 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀲𑀁𑀯𑀡𑁆𑀡𑀦𑀸𑀮𑀓𑁆𑀔𑀡𑁄 𑀳𑀺 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑁂 𑀥𑀫𑁆𑀫𑀸 𑀬𑀁 𑀥𑀫𑁆𑀫𑀁, 𑀚𑀦𑀬𑀦𑁆𑀢𑀺𑀧𑁆𑀧𑀘𑁆𑀘𑀬𑀸 𑀧𑀭𑀫𑁆𑀧𑀭𑀢𑁄;

𑀳𑁂𑀢𑀼𑀫𑀯𑀓𑀟𑁆𑀠𑀬𑀺𑀢𑁆𑀯𑀸, 𑀏𑀲𑁄 𑀳𑀸𑀭𑁄 𑀧𑀭𑀺𑀓𑁆𑀔𑀸𑀭𑁄’’𑀢𑀺. (𑀦𑁂𑀢𑁆𑀢𑀺. 𑁪 𑀦𑀺𑀤𑁆𑀤𑁂𑀲𑀯𑀸𑀭);

𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀢𑀻𑀢𑀺 𑀏𑀢𑁆𑀣 𑀧𑀭𑀺𑀬𑀸𑀤𑀸𑀬𑀺𑀓𑀸 𑀯𑀺𑀲𑁂𑀲𑀢𑁄 𑀢𑀡𑁆𑀳𑀸𑀯𑀺𑀚𑁆𑀚𑀸 𑀯𑁂𑀤𑀺𑀢𑀩𑁆𑀩𑀸 𑀢𑀸𑀲𑀁 𑀯𑀲𑁂𑀦 𑀧𑀭𑀺𑀬𑀸𑀤𑀸𑀦𑀲𑀫𑁆𑀪𑀯𑀢𑁄. 𑀢𑀸𑀲𑀼 𑀢𑀡𑁆𑀳𑀸𑀬 𑀭𑀽𑀧𑀫𑀥𑀺𑀝𑁆𑀞𑀸𑀦𑀁, 𑀅𑀯𑀺𑀚𑁆𑀚𑀸𑀬 𑀅𑀭𑀽𑀧𑀁. 𑀯𑀺𑀲𑁂𑀲𑀢𑁄 𑀢𑀡𑁆𑀳𑀸𑀬 𑀲𑀫𑀣𑁄 𑀧𑀝𑀺𑀧𑀓𑁆𑀔𑁄, 𑀅𑀯𑀺𑀚𑁆𑀚𑀸𑀬 𑀯𑀺𑀧𑀲𑁆𑀲𑀦𑀸. 𑀲𑀫𑀣𑀲𑁆𑀲 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀨𑀮𑀯𑀺𑀧𑀲𑁆𑀲𑀦𑀸𑀬 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺. 𑀢𑀣𑀸 𑀳𑀺 𑀢𑀸 𑀭𑀸𑀕𑀯𑀺𑀭𑀸𑀕𑀸 𑀅𑀯𑀺𑀚𑁆𑀚𑀸𑀯𑀺𑀭𑀸𑀕𑀸𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀘𑁆𑀘𑀦𑁆𑀢𑀻𑀢𑀺 𑀅𑀬𑀁 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄. 𑀲𑀫𑀸𑀭𑁄𑀧𑀻𑀬𑀦𑁆𑀢𑀺 𑀏𑀢𑁂𑀦, 𑀏𑀢𑁆𑀣 𑀯𑀸 𑀧𑀤𑀝𑁆𑀞𑀸𑀦𑀸𑀤𑀺𑀫𑀼𑀔𑁂𑀦 𑀥𑀫𑁆𑀫𑀸𑀢𑀺 𑀲𑀫𑀸𑀭𑁄𑀧𑀦𑁄. 𑀲𑀼𑀢𑁆𑀢𑁂 𑀆𑀕𑀢𑀥𑀫𑁆𑀫𑀸𑀦𑀁 𑀧𑀤𑀝𑁆𑀞𑀸𑀦𑀯𑁂𑀯𑀘𑀦𑀪𑀸𑀯𑀦𑀸𑀧𑀳𑀸𑀦𑀲𑀫𑀸𑀭𑁄𑀧𑀦𑀯𑀺𑀘𑀸𑀭𑀡𑀮𑀓𑁆𑀔𑀡𑁄 𑀳𑀺 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑁂 ¶ ¶ 𑀥𑀫𑁆𑀫𑀸 𑀬𑀁 𑀫𑀽𑀮𑀸, 𑀬𑁂 𑀘𑁂𑀓𑀢𑁆𑀣𑀸 𑀧𑀓𑀸𑀲𑀺𑀢𑀸 𑀫𑀼𑀦𑀺𑀦𑀸;

𑀢𑁂 𑀲𑀫𑀸𑀭𑁄𑀧𑀬𑀺𑀢𑀩𑁆𑀩𑀸, 𑀏𑀲 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄’’𑀢𑀺. (𑀦𑁂𑀢𑁆𑀢𑀺. 𑁪 𑀦𑀺𑀤𑁆𑀤𑁂𑀲𑀯𑀸𑀭);

𑀏𑀢𑁆𑀢𑀸𑀯𑀢𑀸 𑀘 𑁋

‘‘𑀤𑁂𑀲𑀦𑀸 𑀯𑀺𑀘𑀬𑁄 𑀬𑀼𑀢𑁆𑀢𑀺, 𑀧𑀤𑀝𑁆𑀞𑀸𑀦𑁄 𑀘 𑀮𑀓𑁆𑀔𑀡𑁄;

𑀘𑀢𑀼𑀩𑁆𑀬𑀽𑀳𑁄 𑀘 𑀆𑀯𑀝𑁆𑀝𑁄, 𑀯𑀺𑀪𑀢𑁆𑀢𑀺 𑀧𑀭𑀺𑀯𑀢𑁆𑀢𑀦𑁄.

𑀯𑁂𑀯𑀘𑀦𑁄 𑀘 𑀧𑀜𑁆𑀜𑀢𑁆𑀢𑀺, 𑀑𑀢𑀭𑀡𑁄 𑀘 𑀲𑁄𑀥𑀦𑁄;

𑀅𑀥𑀺𑀝𑁆𑀞𑀸𑀦𑁄 𑀧𑀭𑀺𑀓𑁆𑀔𑀸𑀭𑁄, 𑀲𑀫𑀸𑀭𑁄𑀧𑀦𑁄 𑀲𑁄𑀴𑀲𑁄’’𑀢𑀺. (𑀦𑁂𑀢𑁆𑀢𑀺. 𑁧 𑀉𑀤𑁆𑀤𑁂𑀲𑀯𑀸𑀭) 𑁋

𑀏𑀯𑀁 𑀯𑀼𑀢𑁆𑀢𑀸 𑀲𑁄𑀴𑀲 𑀳𑀸𑀭𑀸 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀳𑀭𑀻𑀬𑀦𑁆𑀢𑀺 𑀏𑀢𑁂𑀳𑀺, 𑀏𑀢𑁆𑀣 𑀯𑀸 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀯𑀺𑀲𑀬𑀸 𑀅𑀜𑁆𑀜𑀸𑀡𑀲𑀁𑀲𑀬𑀯𑀺𑀧𑀮𑁆𑀮𑀸𑀲𑀸𑀢𑀺 𑀳𑀸𑀭𑀸. 𑀳𑀭𑀦𑁆𑀢𑀺 𑀯𑀸 𑀲𑀬𑀁 𑀢𑀸𑀦𑀺, 𑀳𑀭𑀡𑀫𑀢𑁆𑀢𑀫𑁂𑀯 𑀯𑀸𑀢𑀺 𑀳𑀸𑀭𑀸 𑀨𑀮𑀽𑀧𑀘𑀸𑀭𑁂𑀦. 𑀅𑀣 𑀯𑀸 𑀳𑀭𑀻𑀬𑀦𑁆𑀢𑀺 𑀯𑁄𑀳𑀭𑀻𑀬𑀦𑁆𑀢𑀺 𑀥𑀫𑁆𑀫𑀲𑀁𑀯𑀡𑁆𑀡𑀓𑀥𑀫𑁆𑀫𑀧𑁆𑀧𑀝𑀺𑀕𑁆𑀕𑀸𑀳𑀓𑁂𑀳𑀺 𑀥𑀫𑁆𑀫𑀲𑁆𑀲 𑀤𑀸𑀦𑀕𑁆𑀕𑀳𑀡𑀯𑀲𑁂𑀦𑀸𑀢𑀺 𑀳𑀸𑀭𑀸. 𑀅𑀣 𑀯𑀸 𑀳𑀸𑀭𑀸 𑀯𑀺𑀬𑀸𑀢𑀺 𑀳𑀸𑀭𑀸. 𑀬𑀣𑀸 𑀳𑀺 𑀅𑀦𑁂𑀓𑀭𑀢𑀦𑀸𑀯𑀮𑀺𑀲𑀫𑀽𑀳𑁄 𑀳𑀸𑀭𑀲𑀗𑁆𑀔𑀸𑀢𑁄 𑀅𑀢𑁆𑀢𑀦𑁄 𑀅𑀯𑀬𑀯𑀪𑀽𑀢𑀭𑀢𑀦𑀲𑀫𑁆𑀨𑀲𑁆𑀲𑁂𑀳𑀺 𑀲𑀫𑀼𑀧𑀚𑀦𑀺𑀬𑀫𑀸𑀦𑀳𑀺𑀮𑀸𑀤𑀲𑀼𑀔𑁄 𑀳𑀼𑀢𑁆𑀯𑀸 𑀢𑀤𑀼𑀧𑀪𑁄𑀕𑀺𑀚𑀦𑀲𑀭𑀻𑀭𑀲𑀦𑁆𑀢𑀸𑀧𑀁 𑀦𑀺𑀤𑀸𑀖𑀧𑀭𑀺𑀴𑀸𑀳𑀽𑀧𑀚𑀦𑀺𑀢𑀁 𑀯𑀽𑀧𑀲𑀫𑁂𑀢𑀺, 𑀏𑀯𑀫𑁂𑀯 𑀢𑁂𑀧𑀺 𑀦𑀸𑀦𑀸𑀯𑀺𑀥𑀧𑀭𑀫𑀢𑁆𑀣𑀭𑀢𑀦𑀧𑁆𑀧𑀩𑀦𑁆𑀥𑀸 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑀸 𑀅𑀢𑁆𑀢𑀦𑁄 𑀅𑀯𑀬𑀯𑀪𑀽𑀢𑀧𑀭𑀫𑀢𑁆𑀣𑀭𑀢𑀦𑀸𑀥𑀺𑀕𑀫𑁂𑀦 𑀲𑀫𑀼𑀧𑁆𑀧𑀸𑀤𑀺𑀬𑀫𑀸𑀦𑀦𑀺𑀩𑁆𑀩𑀼𑀢𑀺𑀲𑀼𑀔𑀸 𑀥𑀫𑁆𑀫𑀧𑁆𑀧𑀝𑀺𑀕𑁆𑀕𑀸𑀳𑀓𑀚𑀦𑀳𑀤𑀬𑀧𑀭𑀺𑀢𑀸𑀧𑀁 𑀓𑀸𑀫𑀭𑀸𑀕𑀸𑀤𑀺𑀓𑀺𑀮𑁂𑀲𑀳𑁂𑀢𑀼𑀓𑀁 𑀯𑀽𑀧𑀲𑀫𑁂𑀦𑁆𑀢𑀻𑀢𑀺. 𑀅𑀣 𑀯𑀸 𑀳𑀸𑀭𑀬𑀦𑁆𑀢𑀺 𑀅𑀜𑁆𑀜𑀸𑀡𑀸𑀤𑀺𑀦𑀻𑀳𑀸𑀭𑀁 𑀅𑀧𑀕𑀫𑀁 𑀓𑀭𑁄𑀦𑁆𑀢𑀺 𑀆𑀘𑀺𑀓𑁆𑀔𑀦𑁆𑀢𑀻𑀢𑀺 𑀯𑀸 𑀳𑀸𑀭𑀸. 𑀅𑀣 𑀯𑀸 𑀲𑁄𑀢𑀼𑀚𑀦𑀘𑀺𑀢𑁆𑀢𑀲𑁆𑀲 𑀳𑀭𑀡𑀢𑁄 𑀭𑀫𑀡𑀢𑁄 𑀘 𑀳𑀸𑀭𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀬𑀣𑀸 ‘‘𑀪𑀯𑁂𑀲𑀼 𑀯𑀦𑁆𑀢𑀕𑀫𑀦𑁄 𑀪𑀕𑀯𑀸’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁧𑁪𑁪; 𑀧𑀸𑀭𑀸. 𑀅𑀝𑁆𑀞. 𑁧.𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸).

𑀇𑀢𑁄 𑀧𑀭𑀁 𑀧𑀦 𑀦𑀦𑁆𑀤𑀺𑀬𑀸𑀯𑀝𑁆𑀝𑀸𑀤𑀺𑀧𑀜𑁆𑀘𑀯𑀺𑀥𑀦𑀬𑀸 𑀯𑁂𑀤𑀺𑀢𑀩𑁆𑀩𑀸 𑁋 𑀢𑀢𑁆𑀣 𑀢𑀡𑁆𑀳𑀸𑀯𑀺𑀚𑁆𑀚𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀢𑀸𑀲𑀁 𑀅𑀥𑀺𑀝𑁆𑀞𑀸𑀦𑀸𑀤𑀺𑀪𑀽𑀢𑀸 𑀭𑀽𑀧𑀥𑀫𑁆𑀫𑀸 𑀤𑀼𑀓𑁆𑀔𑀲𑀘𑁆𑀘𑀁, 𑀢𑁂𑀲𑀁 𑀅𑀧𑁆𑀧𑀯𑀢𑁆𑀢𑀺 𑀦𑀺𑀭𑁄𑀥𑀲𑀘𑁆𑀘𑀁, 𑀦𑀺𑀭𑁄𑀥𑀧𑁆𑀧𑀚𑀸𑀦𑀦𑀸 𑀧𑀝𑀺𑀧𑀤𑀸 𑀫𑀕𑁆𑀕𑀲𑀘𑁆𑀘𑀁. 𑀢𑀡𑁆𑀳𑀸𑀕𑀳𑀡𑁂𑀦 𑀘𑁂𑀢𑁆𑀣 𑀫𑀸𑀬𑀸𑀲𑀸𑀞𑁂𑀬𑁆𑀬𑀫𑀸𑀦𑀸𑀢𑀺𑀫𑀸𑀦𑀫𑀤𑀧𑁆𑀧𑀫𑀸𑀤𑀧𑀸𑀧𑀺𑀘𑁆𑀙𑀢𑀸𑀧𑀸𑀧𑀫𑀺𑀢𑁆𑀢𑀢𑀸𑀅𑀳𑀺𑀭𑀺𑀓𑀅𑀦𑁄𑀢𑁆𑀢𑀧𑁆𑀧𑀸𑀤𑀺𑀯𑀲𑁂𑀦 𑀅𑀓𑀼𑀲𑀮𑀧𑀓𑁆𑀔𑁄 𑀦𑁂𑀢𑀩𑁆𑀩𑁄. 𑀅𑀯𑀺𑀚𑁆𑀚𑀸𑀕𑀳𑀡𑁂𑀦 𑀯𑀺𑀧𑀭𑀻𑀢𑀫𑀦𑀲𑀺𑀓𑀸𑀭𑀓𑁄𑀥𑀽𑀧𑀦𑀸𑀳𑀫𑀓𑁆𑀔𑀧𑀴𑀸𑀲𑀇𑀲𑁆𑀲𑀸𑀫𑀘𑁆𑀙𑀭𑀺𑀬- 𑀲𑀸𑀭𑀫𑁆𑀪𑀤𑁄𑀯𑀘𑀲𑁆𑀲𑀢𑀸𑀪𑀯𑀤𑀺𑀝𑁆𑀞𑀺𑀯𑀺𑀪𑀯𑀤𑀺𑀝𑁆𑀞𑀺𑀆𑀤𑀺𑀯𑀲𑁂𑀦 𑀅𑀓𑀼𑀲𑀮𑀧𑀓𑁆𑀔𑁄 𑀦𑁂𑀢𑀩𑁆𑀩𑁄. 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑀢𑁄 ¶ 𑀓𑀼𑀲𑀮𑀧𑀓𑁆𑀔𑁄 𑀦𑁂𑀢𑀩𑁆𑀩𑁄. 𑀓𑀣𑀁? 𑀅𑀫𑀸𑀬𑀸𑀅𑀲𑀸𑀞𑁂𑀬𑁆𑀬𑀸𑀤𑀺𑀯𑀲𑁂𑀦 𑀅𑀯𑀺𑀧𑀭𑀻𑀢𑀫𑀦𑀲𑀺𑀓𑀸𑀭𑀸𑀤𑀺𑀯𑀲𑁂𑀦 𑀘. 𑀢𑀣𑀸 𑀲𑀫𑀣𑀧𑀓𑁆𑀔𑀺𑀬𑀸𑀦𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 ¶ , 𑀯𑀺𑀧𑀲𑁆𑀲𑀦𑀸𑀧𑀓𑁆𑀔𑀺𑀬𑀸𑀦𑀁 𑀅𑀦𑀺𑀘𑁆𑀘𑀲𑀜𑁆𑀜𑀸𑀤𑀻𑀦𑀜𑁆𑀘 𑀯𑀲𑁂𑀦 𑀯𑁄𑀤𑀸𑀦𑀧𑀓𑁆𑀔𑁄 𑀦𑁂𑀢𑀩𑁆𑀩𑁄𑀢𑀺 𑀅𑀬𑀁 𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺. 𑀬𑁄 𑀳𑀺 𑀢𑀡𑁆𑀳𑀸𑀅𑀯𑀺𑀚𑁆𑀚𑀸𑀳𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑀲𑁆𑀲 𑀲𑀼𑀢𑁆𑀢𑀢𑁆𑀣𑀲𑁆𑀲 𑀲𑀫𑀣𑀯𑀺𑀧𑀲𑁆𑀲𑀦𑀸𑀳𑀺 𑀯𑁄𑀤𑀸𑀦𑀧𑀓𑁆𑀔𑀲𑁆𑀲 𑀘 𑀘𑀢𑀼𑀲𑀘𑁆𑀘𑀬𑁄𑀚𑀦𑀫𑀼𑀔𑁂𑀦 𑀦𑀬𑀦𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄, 𑀅𑀬𑀁 𑀦𑀦𑁆𑀤𑀺𑀬𑀸𑀯𑀝𑁆𑀝𑀦𑀬𑁄 𑀦𑀸𑀫. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀢𑀡𑁆𑀳𑀜𑁆𑀘 𑀅𑀯𑀺𑀚𑁆𑀚𑀫𑁆𑀧𑀺 𑀘, 𑀲𑀫𑀣𑁂𑀦 𑀯𑀺𑀧𑀲𑁆𑀲𑀦𑀸𑀬 𑀬𑁄 𑀦𑁂𑀢𑀺;

𑀲𑀘𑁆𑀘𑁂𑀳𑀺 𑀬𑁄𑀚𑀬𑀺𑀢𑁆𑀯𑀸, 𑀅𑀬𑀁 𑀦𑀬𑁄 𑀦𑀦𑁆𑀤𑀺𑀬𑀸𑀯𑀝𑁆𑀝𑁄’’𑀢𑀺. (𑀦𑁂𑀢𑁆𑀢𑀺. 𑁪 𑀦𑀺𑀤𑁆𑀤𑁂𑀲𑀯𑀸𑀭);

𑀦𑀦𑁆𑀤𑀺𑀬𑀸𑀯𑀝𑁆𑀝𑀲𑁆𑀲 𑀯𑀺𑀬 𑀆𑀯𑀝𑁆𑀝𑁄 𑀏𑀢𑀲𑁆𑀲𑀸𑀢𑀺 𑀦𑀦𑁆𑀤𑀺𑀬𑀸𑀯𑀝𑁆𑀝𑁄. 𑀬𑀣𑀸 𑀳𑀺 𑀦𑀦𑁆𑀤𑀺𑀬𑀸𑀯𑀝𑁆𑀝𑁄 𑀅𑀦𑁆𑀢𑁄 𑀞𑀺𑀢𑁂𑀦 𑀧𑀥𑀸𑀦𑀸𑀯𑀬𑀯𑁂𑀦 𑀩𑀳𑀺𑀤𑁆𑀥𑀸 𑀆𑀯𑀝𑁆𑀝𑀢𑀺, 𑀏𑀯𑀫𑀬𑀫𑁆𑀧𑀺 𑀦𑀬𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀦𑀦𑁆𑀤𑀺𑀬𑀸 𑀢𑀡𑁆𑀳𑀸𑀬 𑀧𑀫𑁄𑀤𑀲𑁆𑀲 𑀯𑀸 𑀆𑀯𑀝𑁆𑀝𑁄 𑀏𑀢𑁆𑀣𑀸𑀢𑀺 𑀦𑀦𑁆𑀤𑀺𑀬𑀸𑀯𑀝𑁆𑀝𑁄.

𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀕𑀳𑀺𑀢𑁂𑀲𑀼 𑀢𑀡𑁆𑀳𑀸𑀯𑀺𑀚𑁆𑀚𑀸𑀢𑀧𑁆𑀧𑀓𑁆𑀔𑀺𑀬𑀥𑀫𑁆𑀫𑁂𑀲𑀼 𑀢𑀡𑁆𑀳𑀸 𑀮𑁄𑀪𑁄, 𑀅𑀯𑀺𑀚𑁆𑀚𑀸 𑀫𑁄𑀳𑁄, 𑀅𑀯𑀺𑀚𑁆𑀚𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀮𑁄𑀳𑀺𑀢𑁂 𑀲𑀢𑀺 𑀧𑀼𑀩𑁆𑀩𑁄 𑀯𑀺𑀬 𑀢𑀡𑁆𑀳𑀸𑀬 𑀲𑀢𑀺 𑀲𑀺𑀚𑁆𑀛𑀫𑀸𑀦𑁄 𑀆𑀖𑀸𑀢𑁄 𑀤𑁄𑀲𑁄 𑀇𑀢𑀺 𑀢𑀻𑀳𑀺 𑀅𑀓𑀼𑀲𑀮𑀫𑀽𑀮𑁂𑀳𑀺 𑀕𑀳𑀺𑀢𑁂𑀳𑀺, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀓𑀼𑀲𑀮𑀘𑀺𑀢𑁆𑀢𑀕𑁆𑀕𑀳𑀡𑁂𑀦 𑀘 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺 𑀕𑀳𑀺𑀢𑀸𑀦𑀺 𑀏𑀯 𑀳𑁄𑀦𑁆𑀢𑀺. 𑀇𑀥𑀸𑀧𑀺 𑀮𑁄𑀪𑁄 𑀲𑀩𑁆𑀩𑀸𑀦𑀺 𑀯𑀸 𑀲𑀸𑀲𑀯𑀓𑀼𑀲𑀮𑀫𑀽𑀮𑀸𑀦𑀺 𑀲𑀫𑀼𑀤𑀬𑀲𑀘𑁆𑀘𑀁, 𑀢𑀦𑁆𑀦𑀺𑀩𑁆𑀩𑀢𑁆𑀢𑀸 𑀢𑁂𑀲𑀁 𑀅𑀥𑀺𑀝𑁆𑀞𑀸𑀦𑀕𑁄𑀘𑀭𑀪𑀽𑀢𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀲𑀘𑁆𑀘𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀨𑀮𑀁 𑀧𑀦𑁂𑀢𑁆𑀣 𑀯𑀺𑀫𑁄𑀓𑁆𑀔𑀢𑁆𑀢𑀬𑀯𑀲𑁂𑀦 𑀦𑀺𑀤𑁆𑀥𑀸𑀭𑁂𑀢𑀩𑁆𑀩𑀁, 𑀢𑀻𑀳𑀺 𑀅𑀓𑀼𑀲𑀮𑀫𑀽𑀮𑁂𑀳𑀺 𑀢𑀺𑀯𑀺𑀥𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀫𑀮𑀯𑀺𑀲𑀫𑀅𑀓𑀼𑀲𑀮𑀲𑀜𑁆𑀜𑀸𑀯𑀺𑀢𑀓𑁆𑀓𑀸𑀤𑀺𑀯𑀲𑁂𑀦 𑀅𑀓𑀼𑀲𑀮𑀧𑀓𑁆𑀔𑁄 𑀦𑁂𑀢𑀩𑁆𑀩𑁄, 𑀢𑀣𑀸 𑀢𑀻𑀳𑀺 𑀓𑀼𑀲𑀮𑀫𑀽𑀮𑁂𑀳𑀺 𑀢𑀺𑀯𑀺𑀥𑀲𑀼𑀘𑀭𑀺𑀢𑀲𑀫𑀓𑀼𑀲𑀮𑀲𑀜𑁆𑀜𑀸𑀯𑀺𑀢𑀓𑁆𑀓𑀲𑀤𑁆𑀥𑀫𑁆𑀫𑀲𑀫𑀸𑀥𑀺𑀯𑀺𑀫𑁄𑀓𑁆𑀔𑀫𑀼𑀔𑀸𑀤𑀺𑀯𑀲𑁂𑀦 𑀯𑁄𑀤𑀸𑀦𑀧𑀓𑁆𑀔𑁄 𑀦𑁂𑀢𑀩𑁆𑀩𑁄𑀢𑀺 𑀅𑀬𑀁 𑀢𑀺𑀧𑀼𑀓𑁆𑀔𑀮𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺. 𑀬𑁄 𑀳𑀺 𑀅𑀓𑀼𑀲𑀮𑀫𑀽𑀮𑁂𑀳𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑀲𑁆𑀲 𑀓𑀼𑀲𑀮𑀫𑀽𑀮𑁂𑀳𑀺 𑀯𑁄𑀤𑀸𑀦𑀧𑀓𑁆𑀔𑀲𑁆𑀲 𑀲𑀼𑀢𑁆𑀢𑀢𑁆𑀣𑀲𑁆𑀲 𑀘 𑀘𑀢𑀼𑀲𑀘𑁆𑀘𑀬𑁄𑀚𑀦𑀸𑀫𑀼𑀔𑁂𑀦 𑀦𑀬𑀦𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄, 𑀅𑀬𑀁 𑀢𑀺𑀧𑀼𑀓𑁆𑀔𑀮𑀦𑀬𑁄 𑀦𑀸𑀫. 𑀢𑀻𑀳𑀺 𑀅𑀯𑀬𑀯𑁂𑀳𑀺 ¶ 𑀮𑁄𑀪𑀸𑀤𑀻𑀳𑀺 𑀲𑀁𑀓𑀺𑀮𑁂𑀲𑀧𑀓𑁆𑀔𑁂, 𑀅𑀮𑁄𑀪𑀸𑀤𑀻𑀳𑀺 𑀘 𑀯𑁄𑀤𑀸𑀦𑀧𑀓𑁆𑀔𑁂 𑀧𑀼𑀓𑁆𑀔𑀮𑁄 𑀲𑁄𑀪𑀦𑁄𑀢𑀺 𑀢𑀺𑀧𑀼𑀓𑁆𑀔𑀮𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑁄 𑀅𑀓𑀼𑀲𑀮𑁂 𑀲𑀫𑀽𑀮𑁂𑀳𑀺,

𑀦𑁂𑀢𑀺 𑀓𑀼𑀲𑀮𑁂 𑀘 𑀓𑀼𑀲𑀮𑀫𑀽𑀮𑁂𑀳𑀺;

𑀪𑀽𑀢𑀁 𑀢𑀣𑀁 𑀅𑀯𑀺𑀢𑀣𑀁,

𑀢𑀺𑀧𑀼𑀓𑁆𑀔𑀮𑀁 𑀢𑀁 𑀦𑀬𑀁 𑀆𑀳𑀽’’𑀢𑀺. (𑀦𑁂𑀢𑁆𑀢𑀺. 𑁪 𑀦𑀺𑀤𑁆𑀤𑁂𑀲𑀯𑀸𑀭);

𑀯𑀼𑀢𑁆𑀢𑀦𑀬𑁂𑀦 ¶ 𑀕𑀳𑀺𑀢𑁂𑀲𑀼 𑀢𑀡𑁆𑀳𑀸𑀯𑀺𑀚𑁆𑀚𑀸𑀢𑀧𑁆𑀧𑀓𑁆𑀔𑀺𑀬𑀥𑀫𑁆𑀫𑁂𑀲𑀼 𑀯𑀺𑀲𑁂𑀲𑀢𑁄 𑀢𑀡𑁆𑀳𑀸𑀤𑀺𑀝𑁆𑀞𑀻𑀦𑀁 𑀯𑀲𑁂𑀦 𑀅𑀲𑀼𑀪𑁂 ‘‘𑀲𑀼𑀪’’𑀦𑁆𑀢𑀺, 𑀤𑀼𑀓𑁆𑀔𑁂 ‘‘𑀲𑀼𑀔’’𑀦𑁆𑀢𑀺 𑀘 𑀯𑀺𑀧𑀮𑁆𑀮𑀸𑀲𑀸, 𑀅𑀯𑀺𑀚𑁆𑀚𑀸𑀤𑀺𑀝𑁆𑀞𑀻𑀦𑀁 𑀯𑀲𑁂𑀦 𑀅𑀦𑀺𑀘𑁆𑀘𑁂 ‘‘𑀦𑀺𑀘𑁆𑀘’’𑀦𑁆𑀢𑀺, 𑀅𑀦𑀢𑁆𑀢𑀦𑀺 ‘‘𑀅𑀢𑁆𑀢𑀸’’𑀢𑀺 𑀯𑀺𑀧𑀮𑁆𑀮𑀸𑀲𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀲𑀁 𑀧𑀝𑀺𑀧𑀓𑁆𑀔𑀢𑁄 𑀓𑀼𑀲𑀮𑀘𑀺𑀢𑁆𑀢𑀕𑁆𑀕𑀳𑀡𑁂𑀦 𑀲𑀺𑀤𑁆𑀥𑁂𑀳𑀺 𑀲𑀢𑀺𑀯𑀻𑀭𑀺𑀬𑀲𑀫𑀸𑀥𑀺𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂𑀳𑀺 𑀘𑀢𑁆𑀢𑀸𑀭𑀺 𑀲𑀢𑀺𑀧𑀝𑁆𑀞𑀸𑀦𑀸𑀦𑀺 𑀲𑀺𑀤𑁆𑀥𑀸𑀦𑀺𑀬𑁂𑀯 𑀳𑁄𑀦𑁆𑀢𑀺.

𑀢𑀢𑁆𑀣 𑀘𑀢𑀽𑀳𑀺 𑀇𑀦𑁆𑀤𑁆𑀭𑀺𑀬𑁂𑀳𑀺 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸. 𑀓𑀣𑀁? 𑀤𑀼𑀯𑀺𑀥𑁄 𑀳𑀺 𑀢𑀡𑁆𑀳𑀸𑀘𑀭𑀺𑀢𑁄 𑀫𑀼𑀤𑀺𑀦𑁆𑀤𑁆𑀭𑀺𑀬𑁄 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁄𑀢𑀺, 𑀢𑀣𑀸 𑀤𑀺𑀝𑁆𑀞𑀺𑀘𑀭𑀺𑀢𑁄. 𑀢𑁂𑀲𑀼 𑀧𑀞𑀫𑁄 𑀅𑀲𑀼𑀪𑁂 ‘‘𑀲𑀼𑀪’’𑀦𑁆𑀢𑀺 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑀻 𑀲𑀢𑀺𑀩𑀮𑁂𑀦 𑀬𑀣𑀸𑀪𑀽𑀢𑀁 𑀓𑀸𑀬𑀲𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀪𑀸𑀯𑀦𑀸𑀩𑀮𑁂𑀦 𑀢𑀁 𑀯𑀺𑀧𑀮𑁆𑀮𑀸𑀲𑀁 𑀲𑀫𑀼𑀕𑁆𑀖𑀸𑀢𑁂𑀢𑁆𑀯𑀸 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀤𑀼𑀢𑀺𑀬𑁄 𑀅𑀲𑀼𑀔𑁂 ‘‘𑀲𑀼𑀔’’𑀦𑁆𑀢𑀺 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑀻 ‘‘𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁬; 𑀅. 𑀦𑀺. 𑁪.𑁧𑁪; 𑁬.𑁫𑁮) 𑀯𑀼𑀢𑁆𑀢𑁂𑀦 𑀯𑀻𑀭𑀺𑀬𑀲𑀁𑀯𑀭𑀪𑀽𑀢𑁂𑀦 𑀯𑀻𑀭𑀺𑀬𑀩𑀮𑁂𑀦 𑀧𑀝𑀺𑀧𑀓𑁆𑀔𑀁 𑀯𑀺𑀦𑁄𑀤𑁂𑀦𑁆𑀢𑁄 𑀪𑀸𑀯𑀦𑀸𑀩𑀮𑁂𑀦 𑀢𑀁 𑀯𑀺𑀧𑀮𑁆𑀮𑀸𑀲𑀁 𑀯𑀺𑀥𑀫𑁂𑀢𑁆𑀯𑀸 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀢𑀢𑀺𑀬𑁄 𑀅𑀦𑀺𑀘𑁆𑀘𑁂 ‘‘𑀦𑀺𑀘𑁆𑀘’’𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑀕𑁆𑀕𑀸𑀳𑀻 𑀲𑀫𑀣𑀩𑀮𑁂𑀦 𑀲𑀫𑀸𑀳𑀺𑀢𑀘𑀺𑀢𑁆𑀢𑁄 𑀲𑀗𑁆𑀔𑀸𑀭𑀸𑀦𑀁 𑀔𑀡𑀺𑀓𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀪𑀸𑀯𑀦𑀸𑀩𑀮𑁂𑀦 𑀢𑀁 𑀯𑀺𑀧𑀮𑁆𑀮𑀸𑀲𑀁 𑀲𑀫𑀼𑀕𑁆𑀖𑀸𑀢𑁂𑀢𑁆𑀯𑀸 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑀁 𑀑𑀓𑁆𑀓𑀫𑀢𑀺. 𑀘𑀢𑀼𑀢𑁆𑀣𑁄 𑀲𑀦𑁆𑀢𑀢𑀺𑀲𑀫𑀽𑀳𑀓𑀺𑀘𑁆𑀘𑀸𑀭𑀫𑁆𑀫𑀡𑀖𑀦𑀯𑀜𑁆𑀘𑀺𑀢𑀢𑀸𑀬 𑀨𑀲𑁆𑀲𑀸𑀤𑀺𑀥𑀫𑁆𑀫𑀧𑀼𑀜𑁆𑀚𑀫𑀢𑁆𑀢𑁂 𑀅𑀦𑀢𑁆𑀢𑀦𑀺 ‘‘𑀅𑀢𑁆𑀢𑀸’’𑀢𑀺 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀻 𑀘𑀢𑀼𑀓𑁄𑀝𑀺𑀓𑀲𑀼𑀜𑁆𑀜𑀢𑀸𑀫𑀦𑀲𑀺𑀓𑀸𑀭𑁂𑀦 𑀢𑀁 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀁 𑀯𑀺𑀤𑁆𑀥𑀁𑀲𑁂𑀦𑁆𑀢𑁄 𑀲𑀸𑀫𑀜𑁆𑀜𑀨𑀮𑀁 𑀲𑀘𑁆𑀙𑀺𑀓𑀭𑁄𑀢𑀺. 𑀲𑀼𑀪𑀲𑀜𑁆𑀜𑀸𑀤𑀻𑀳𑀺 𑀘𑀢𑀽𑀳𑀺𑀧𑀺 𑀯𑀸 𑀯𑀺𑀧𑀮𑁆𑀮𑀸𑀲𑁂𑀳𑀺 𑀲𑀫𑀼𑀤𑀬𑀲𑀘𑁆𑀘𑀁, 𑀢𑁂𑀲𑀫𑀥𑀺𑀝𑁆𑀞𑀸𑀦𑀸𑀭𑀫𑁆𑀫𑀡𑀪𑀽𑀢𑀸 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀲𑀘𑁆𑀘𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀨𑀮𑀁 𑀧𑀦𑁂𑀢𑁆𑀣 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺, 𑀘𑀢𑀽𑀳𑀺 𑀘𑁂𑀢𑁆𑀣 𑀯𑀺𑀧𑀮𑁆𑀮𑀸𑀲𑁂𑀳𑀺 𑀘𑀢𑀼𑀭𑀸𑀲𑀯𑁄𑀖𑀬𑁄𑀕𑀕𑀦𑁆𑀣𑀅𑀕𑀢𑀺𑀢𑀡𑁆𑀳𑀼𑀧𑀸𑀤𑀸𑀦𑀲𑀮𑁆𑀮𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀅𑀧𑀭𑀺𑀜𑁆𑀜𑀸𑀤𑀺𑀯𑀲𑁂𑀦 𑀅𑀓𑀼𑀲𑀮𑀧𑀓𑁆𑀔𑁄 𑀦𑁂𑀢𑀩𑁆𑀩𑁄, 𑀢𑀣𑀸 𑀘𑀢𑀽𑀳𑀺 𑀲𑀢𑀺𑀧𑀝𑁆𑀞𑀸𑀦𑁂𑀳𑀺 ¶ 𑀘𑀢𑀼𑀩𑁆𑀩𑀺𑀥𑀚𑁆𑀛𑀸𑀦𑀯𑀺𑀳𑀸𑀭𑀸𑀥𑀺𑀝𑁆𑀞𑀸𑀦𑀲𑀼𑀔𑀪𑀸𑀕𑀺𑀬𑀥𑀫𑁆𑀫𑀅𑀧𑁆𑀧𑀫𑀜𑁆𑀜𑀸𑀲𑀫𑁆𑀫𑀧𑁆𑀧𑀥𑀸𑀦𑀇𑀤𑁆𑀥𑀺𑀧𑀸𑀤𑀸𑀤𑀺𑀯𑀲𑁂𑀦 𑀯𑁄𑀤𑀸𑀦𑀧𑀓𑁆𑀔𑁄 𑀦𑁂𑀢𑀩𑁆𑀩𑁄𑀢𑀺 𑀅𑀬𑀁 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺. 𑀬𑁄 𑀳𑀺 𑀲𑀼𑀪𑀲𑀜𑁆𑀜𑀸𑀤𑀻𑀳𑀺 𑀯𑀺𑀧𑀮𑁆𑀮𑀸𑀲𑁂𑀳𑀺 𑀲𑀓𑀮𑀲𑁆𑀲 𑀲𑀁𑀓𑀺𑀮𑁂𑀲𑀧𑀓𑁆𑀔𑀲𑁆𑀲 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀳𑀺 𑀘 𑀯𑁄𑀤𑀸𑀦𑀧𑀓𑁆𑀔𑀲𑁆𑀲 𑀘𑀢𑀼𑀲𑀘𑁆𑀘𑀬𑁄𑀚𑀦𑀸𑀯𑀲𑁂𑀦 𑀦𑀬𑀦𑀮𑀓𑁆𑀔𑀡𑁄 𑀲𑀁𑀯𑀡𑁆𑀡𑀦𑀸𑀯𑀺𑀲𑁂𑀲𑁄, 𑀅𑀬𑀁 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁄 𑀦𑀸𑀫. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀬𑁄 𑀦𑁂𑀢𑀺 𑀯𑀺𑀧𑀮𑁆𑀮𑀸𑀲𑁂𑀳𑀺,

𑀓𑀺𑀮𑁂𑀲𑁂 𑀇𑀦𑁆𑀤𑁆𑀭𑀺𑀬𑁂𑀳𑀺 𑀲𑀤𑁆𑀥𑀫𑁆𑀫𑁂;

𑀏𑀢𑀁 𑀦𑀬𑀁 𑀦𑀬𑀯𑀺𑀤𑀽,

𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀁 𑀆𑀳𑀽’’𑀢𑀺. (𑀦𑁂𑀢𑁆𑀢𑀺. 𑁪 𑀦𑀺𑀤𑁆𑀤𑁂𑀲𑀯𑀸𑀭);

𑀅𑀲𑀦𑁆𑀢𑀸𑀲𑀦𑀚𑀯𑀧𑀭𑀓𑁆𑀓𑀫𑀸𑀤𑀺𑀯𑀺𑀲𑁂𑀲𑀬𑁄𑀕𑁂𑀦 ¶ 𑀲𑀻𑀳𑁄 𑀪𑀕𑀯𑀸, 𑀢𑀲𑁆𑀲 𑀯𑀺𑀓𑁆𑀓𑀻𑀴𑀺𑀢𑀁 𑀤𑁂𑀲𑀦𑀸 𑀯𑀘𑀻𑀓𑀫𑁆𑀫𑀪𑀽𑀢𑁄 𑀯𑀺𑀳𑀸𑀭𑁄𑀢𑀺 𑀓𑀢𑁆𑀯𑀸 𑀯𑀺𑀧𑀮𑁆𑀮𑀸𑀲𑀢𑀧𑁆𑀧𑀝𑀺𑀧𑀓𑁆𑀔𑀧𑀭𑀺𑀤𑀻𑀧𑀦𑀢𑁄 𑀲𑀻𑀳𑀲𑁆𑀲 𑀯𑀺𑀓𑁆𑀓𑀻𑀴𑀺𑀢𑀁 𑀏𑀢𑁆𑀣𑀸𑀢𑀺 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁄, 𑀦𑀬𑁄. 𑀩𑀮𑀯𑀺𑀲𑁂𑀲𑀬𑁄𑀕𑀤𑀻𑀧𑀦𑀢𑁄 𑀯𑀸 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀲𑀤𑀺𑀲𑀢𑁆𑀢𑀸 𑀦𑀬𑁄 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁄. 𑀩𑀮𑀯𑀺𑀲𑁂𑀲𑁄 𑀘𑁂𑀢𑁆𑀣 𑀲𑀤𑁆𑀥𑀸𑀤𑀺𑀩𑀮𑀁, 𑀤𑀲𑀩𑀮𑀸𑀦𑀺 𑀏𑀯 𑀯𑀸.

𑀇𑀫𑁂𑀲𑀁 𑀧𑀦 𑀢𑀺𑀡𑁆𑀡𑀁 𑀅𑀢𑁆𑀣𑀦𑀬𑀸𑀦𑀁 𑀲𑀺𑀤𑁆𑀥𑀺𑀬𑀸 𑀯𑁄𑀳𑀸𑀭𑀦𑀬𑀤𑁆𑀯𑀬𑀁 𑀲𑀺𑀤𑁆𑀥𑀫𑁂𑀯 𑀳𑁄𑀢𑀺. 𑀢𑀣𑀸 𑀳𑀺 𑀅𑀢𑁆𑀣𑀦𑀬𑀢𑁆𑀢𑀬𑀤𑀺𑀲𑀸𑀪𑀸𑀯𑁂𑀦 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀆𑀮𑁄𑀘𑀦𑀁 𑀤𑀺𑀲𑀸𑀮𑁄𑀘𑀦𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀯𑁂𑀬𑁆𑀬𑀸𑀓𑀭𑀡𑁂𑀲𑀼 𑀳𑀺 𑀬𑁂,

𑀓𑀼𑀲𑀮𑀸𑀓𑀼𑀲𑀮𑀸 𑀢𑀳𑀺𑀁 𑀢𑀳𑀺𑀁 𑀯𑀼𑀢𑁆𑀢𑀸;

𑀫𑀦𑀲𑀸 𑀑𑀮𑁄𑀓𑀬𑀢𑁂,

𑀢𑀁 𑀔𑀼 𑀤𑀺𑀲𑀸𑀮𑁄𑀘𑀦𑀁 𑀆𑀳𑀽’’𑀢𑀺. (𑀦𑁂𑀢𑁆𑀢𑀺. 𑁪 𑀦𑀺𑀤𑁆𑀤𑁂𑀲𑀯𑀸𑀭);

𑀢𑀣𑀸 𑀆𑀮𑁄𑀘𑀺𑀢𑀸𑀦𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀦𑀬𑀢𑁆𑀢𑀬𑀬𑁄𑀚𑀦𑁂 𑀲𑀫𑀸𑀦𑀬𑀦𑀢𑁄 𑀅𑀗𑁆𑀓𑀼𑀲𑁄 𑀯𑀺𑀬 𑀅𑀗𑁆𑀓𑀼𑀲𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀑𑀮𑁄𑀓𑁂𑀢𑁆𑀯𑀸 𑀤𑀺𑀲𑀮𑁄𑀘𑀦𑁂𑀦, 𑀉𑀓𑁆𑀔𑀺𑀧𑀺𑀬 𑀬𑀁 𑀲𑀫𑀸𑀦𑁂𑀢𑀺;

𑀲𑀩𑁆𑀩𑁂 𑀓𑀼𑀲𑀮𑀸𑀓𑀼𑀲𑀮𑁂, 𑀅𑀬𑀁 𑀦𑀬𑁄 𑀅𑀗𑁆𑀓𑀼𑀲𑁄 𑀦𑀸𑀫𑀸’’𑀢𑀺. (𑀦𑁂𑀢𑁆𑀢𑀺. 𑁪 𑀦𑀺𑀤𑁆𑀤𑁂𑀲𑀯𑀸𑀭);

𑀢𑀲𑁆𑀫𑀸 𑀫𑀦𑀲𑀸𑀯 𑀅𑀢𑁆𑀣𑀦𑀬𑀸𑀦𑀁 𑀤𑀺𑀲𑀸𑀪𑀽𑀢𑀥𑀫𑁆𑀫𑀸𑀦𑀁 𑀮𑁄𑀘𑀦𑀁 𑀤𑀺𑀲𑀸𑀮𑁄𑀘𑀦𑀁, 𑀢𑁂𑀲𑀁 𑀲𑀫𑀸𑀦𑀬𑀦𑀁 𑀅𑀗𑁆𑀓𑀼𑀲𑁄𑀢𑀺 𑀧𑀜𑁆𑀘𑀧𑀺 𑀦𑀬𑀸𑀦𑀺 𑀬𑀼𑀢𑁆𑀢𑀸𑀦𑀺 𑀳𑁄𑀦𑁆𑀢𑀺.

𑀏𑀢𑁆𑀢𑀸𑀯𑀢𑀸 ¶ 𑀘 𑁋

‘‘𑀧𑀞𑀫𑁄 𑀦𑀦𑁆𑀤𑀺𑀬𑀸𑀯𑀝𑁆𑀝𑁄, 𑀤𑀼𑀢𑀺𑀬𑁄 𑀘 𑀢𑀺𑀧𑀼𑀓𑁆𑀔𑀮𑁄;

𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑁄 𑀦𑀸𑀫, 𑀢𑀢𑀺𑀬𑁄 𑀦𑀬𑀮𑀜𑁆𑀚𑀓𑁄.

𑀤𑀺𑀲𑀸𑀮𑁄𑀘𑀦𑀫𑀸𑀳𑀁𑀲𑀼, 𑀘𑀢𑀼𑀢𑁆𑀣𑀁 𑀦𑀬𑀫𑀼𑀢𑁆𑀢𑀫𑀁;

𑀧𑀜𑁆𑀘𑀫𑁄 𑀅𑀗𑁆𑀓𑀼𑀲𑁄 𑀦𑀸𑀫, 𑀲𑀩𑁆𑀩𑁂 𑀧𑀜𑁆𑀘 𑀦𑀬𑀸 𑀕𑀢𑀸’’𑀢𑀺. (𑀦𑁂𑀢𑁆𑀢𑀺. 𑁧 𑀉𑀤𑁆𑀤𑁂𑀲𑀯𑀸𑀭) 𑁋

𑀏𑀯𑀁 ¶ 𑀯𑀼𑀢𑁆𑀢𑀧𑀜𑁆𑀘𑀦𑀬𑀸𑀧𑀺 𑀏𑀢𑁆𑀣 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀦𑀬𑀢𑀺 𑀲𑀁𑀓𑀺𑀮𑁂𑀲𑀁 𑀯𑁄𑀤𑀸𑀦𑀜𑁆𑀘 𑀯𑀺𑀪𑀸𑀕𑀢𑁄 𑀜𑀸𑀧𑁂𑀢𑀻𑀢𑀺 𑀦𑀬𑁄, 𑀮𑀜𑁆𑀚𑁂𑀢𑀺 𑀧𑀓𑀸𑀲𑁂𑀢𑀺 𑀲𑀼𑀢𑁆𑀢𑀢𑁆𑀣𑀦𑁆𑀢𑀺 𑀮𑀜𑁆𑀚𑀓𑁄, 𑀦𑀬𑁄 𑀘 𑀲𑁄 𑀮𑀜𑁆𑀚𑀓𑁄 𑀘𑀸𑀢𑀺 𑀦𑀬𑀮𑀜𑁆𑀚𑀓𑁄. 𑀇𑀤𑀜𑁆𑀘 𑀲𑀼𑀢𑁆𑀢𑀁 𑀲𑁄𑀴𑀲𑀯𑀺𑀥𑁂 𑀲𑀼𑀢𑁆𑀢𑀦𑁆𑀢𑀧𑀝𑁆𑀞𑀸𑀦𑁂 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀦𑀺𑀩𑁆𑀩𑁂𑀥𑀸𑀲𑁂𑀓𑁆𑀔𑀪𑀸𑀕𑀺𑀬𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑁂 𑀧𑀦 𑀲𑀼𑀢𑁆𑀢𑀦𑁆𑀢𑀧𑀝𑁆𑀞𑀸𑀦𑁂 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀁 𑀲𑀢𑁆𑀢𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁 𑀜𑀸𑀡𑀜𑁆𑀜𑁂𑀬𑁆𑀬𑀁 𑀤𑀲𑁆𑀲𑀦𑀪𑀸𑀯𑀦𑀁 𑀲𑀓𑀯𑀘𑀦𑀁 𑀯𑀺𑀲𑁆𑀲𑀚𑁆𑀚𑀦𑀻𑀬𑀁 𑀓𑀼𑀲𑀮𑀸𑀓𑀼𑀲𑀮𑀁 𑀅𑀦𑀼𑀜𑁆𑀜𑀸𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀜𑁆𑀘𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀢𑀢𑁆𑀣 𑀲𑁄𑀴𑀲𑀯𑀺𑀥𑀲𑀼𑀢𑁆𑀢𑀦𑁆𑀢𑀁 𑀧𑀝𑁆𑀞𑀸𑀦𑀁 𑀦𑀸𑀫 ‘‘𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀯𑀸𑀲𑀦𑀸𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢𑀁, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁, 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁, 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁, 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁, 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁, 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀜𑁆𑀘 𑀯𑀸𑀲𑀦𑀸𑀪𑀸𑀕𑀺𑀬𑀜𑁆𑀘 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀜𑁆𑀘 𑀅𑀲𑁂𑀓𑁆𑀔𑀪𑀸𑀕𑀺𑀬𑀜𑁆𑀘 𑀲𑀼𑀢𑁆𑀢𑀁, 𑀦𑁂𑀯 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁 𑀦 𑀯𑀸𑀲𑀦𑀸𑀪𑀸𑀕𑀺𑀬𑀁 𑀦 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁 𑀦 𑀅𑀲𑁂𑀓𑁆𑀔𑀪𑀸𑀕𑀺𑀬𑀁 𑀲𑀼𑀢𑁆𑀢’’𑀦𑁆𑀢𑀺 (𑀦𑁂𑀢𑁆𑀢𑀺. 𑁮𑁯) 𑀏𑀯𑀁 𑀯𑀼𑀢𑁆𑀢𑀲𑁄𑀴𑀲𑀲𑀸𑀲𑀦𑀧𑀝𑁆𑀞𑀸𑀦𑀸𑀦𑀺.

𑀢𑀢𑁆𑀣 𑀲𑀁𑀓𑀺𑀮𑀺𑀲𑁆𑀲𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀁𑀓𑀺𑀮𑁂𑀲𑁄, 𑀲𑀁𑀓𑀺𑀮𑁂𑀲𑀪𑀸𑀕𑁂 𑀲𑀁𑀓𑀺𑀮𑁂𑀲𑀓𑁄𑀝𑁆𑀞𑀸𑀲𑁂 𑀧𑀯𑀢𑁆𑀢𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁. 𑀯𑀸𑀲𑀦𑀸 𑀧𑀼𑀜𑁆𑀜𑀪𑀸𑀯𑀦𑀸, 𑀯𑀸𑀲𑀦𑀸𑀪𑀸𑀕𑁂 𑀧𑀯𑀢𑁆𑀢𑀁 𑀯𑀸𑀲𑀦𑀸𑀪𑀸𑀕𑀺𑀬𑀁, 𑀯𑀸𑀲𑀦𑀁 𑀪𑀚𑀸𑀧𑁂𑀢𑀻𑀢𑀺 𑀯𑀸 𑀯𑀸𑀲𑀦𑀸𑀪𑀸𑀕𑀺𑀬𑀁. 𑀦𑀺𑀩𑁆𑀩𑀺𑀚𑁆𑀛𑀦𑀁 𑀮𑁄𑀪𑀓𑁆𑀔𑀦𑁆𑀥𑀸𑀤𑀻𑀦𑀁 𑀧𑀤𑀸𑀮𑀦𑀁 𑀦𑀺𑀩𑁆𑀩𑁂𑀥𑁄, 𑀦𑀺𑀩𑁆𑀩𑁂𑀥𑀪𑀸𑀕𑁂 ¶ 𑀧𑀯𑀢𑁆𑀢𑀁, 𑀦𑀺𑀩𑁆𑀩𑁂𑀥𑀁 𑀪𑀚𑀸𑀧𑁂𑀢𑀻𑀢𑀺 𑀯𑀸 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁. 𑀧𑀭𑀺𑀦𑀺𑀝𑁆𑀞𑀺𑀢𑀲𑀺𑀓𑁆𑀔𑀸 𑀥𑀫𑁆𑀫𑀸 𑀅𑀲𑁂𑀓𑁆𑀔𑀸, 𑀅𑀲𑁂𑀓𑁆𑀔𑀪𑀸𑀕𑁂 𑀧𑀯𑀢𑁆𑀢𑀁, 𑀅𑀲𑁂𑀓𑁆𑀔𑁂 𑀪𑀚𑀸𑀧𑁂𑀢𑀻𑀢𑀺 𑀯𑀸 𑀅𑀲𑁂𑀓𑁆𑀔𑀪𑀸𑀕𑀺𑀬𑀁. 𑀢𑁂𑀲𑀼 𑀬𑀢𑁆𑀣 𑀢𑀡𑁆𑀳𑀸𑀤𑀺𑀲𑀁𑀓𑀺𑀮𑁂𑀲𑁄 𑀯𑀺𑀪𑀢𑁆𑀢𑁄, 𑀇𑀤𑀁 𑀲𑀁𑀓𑀺𑀮𑁂𑀲𑀪𑀸𑀕𑀺𑀬𑀁. 𑀬𑀢𑁆𑀣 𑀤𑀸𑀦𑀸𑀤𑀺𑀧𑀼𑀜𑁆𑀜𑀓𑀺𑀭𑀺𑀬𑀯𑀢𑁆𑀣𑀼 𑀯𑀺𑀪𑀢𑁆𑀢𑀁, 𑀇𑀤𑀁 𑀯𑀸𑀲𑀦𑀸𑀪𑀸𑀕𑀺𑀬𑀁. 𑀬𑀢𑁆𑀣 𑀲𑁂𑀓𑁆𑀔𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀯𑀺𑀪𑀢𑁆𑀢𑀸, 𑀇𑀤𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀁. 𑀬𑀢𑁆𑀣 𑀧𑀦 𑀅𑀲𑁂𑀓𑁆𑀔𑀸 𑀲𑀻𑀮𑀓𑁆𑀔𑀦𑁆𑀥𑀸𑀤𑀬𑁄 𑀯𑀺𑀪𑀢𑁆𑀢𑀸, 𑀇𑀤𑀁 𑀅𑀲𑁂𑀓𑁆𑀔𑀪𑀸𑀕𑀺𑀬𑀁. 𑀇𑀢𑀭𑀸𑀦𑀺 𑀢𑁂𑀲𑀁 𑀯𑁄𑀫𑀺𑀲𑁆𑀲𑀓𑀦𑀬𑀯𑀲𑁂𑀦 𑀯𑀼𑀢𑁆𑀢𑀸𑀦𑀺. 𑀲𑀩𑁆𑀩𑀸𑀲𑀯𑀲𑀁𑀯𑀭𑀧𑀭𑀺𑀬𑀸𑀬𑀸𑀤𑀻𑀦𑀁 𑀯𑀲𑁂𑀦 𑀲𑀩𑁆𑀩𑀪𑀸𑀕𑀺𑀬𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀳𑀺 𑀲𑀁𑀓𑀺𑀮𑁂𑀲𑀥𑀫𑁆𑀫𑀸 𑀮𑁄𑀓𑀺𑀬𑀲𑀼𑀘𑀭𑀺𑀢𑀥𑀫𑁆𑀫𑀸 𑀲𑁂𑀓𑁆𑀔𑀸 𑀥𑀫𑁆𑀫𑀸 𑀅𑀲𑁂𑀓𑁆𑀔𑀸 𑀥𑀫𑁆𑀫𑀸 𑀘 𑀯𑀺𑀪𑀢𑁆𑀢𑀸. 𑀲𑀩𑁆𑀩𑀪𑀸𑀕𑀺𑀬𑀁 𑀧𑀦 ‘‘𑀧𑀲𑁆𑀲𑀁 𑀦 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀓𑀁 𑀉𑀤𑀓𑀸𑀤𑀺𑀅𑀦𑀼𑀯𑀸𑀤𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀁 ¶ 𑀲𑀼𑀢𑁆𑀢𑀦𑁆𑀢𑀧𑀝𑁆𑀞𑀸𑀦𑀁 𑀧𑀦 ‘‘𑀮𑁄𑀓𑀺𑀬𑀁, 𑀮𑁄𑀓𑀼𑀢𑁆𑀢𑀭𑀁, 𑀮𑁄𑀓𑀺𑀬𑀜𑁆𑀘 𑀮𑁄𑀓𑀼𑀢𑁆𑀢𑀭𑀜𑁆𑀘, 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁, 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁, 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀜𑁆𑀘 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀜𑁆𑀘, 𑀜𑀸𑀡𑀁, 𑀜𑁂𑀬𑁆𑀬𑀁, 𑀜𑀸𑀡𑀜𑁆𑀘 𑀜𑁂𑀬𑁆𑀬𑀜𑁆𑀘, 𑀤𑀲𑁆𑀲𑀦𑀁, 𑀪𑀸𑀯𑀦𑀸, 𑀤𑀲𑁆𑀲𑀦𑀜𑁆𑀘 𑀪𑀸𑀯𑀦𑀸 𑀘, 𑀲𑀓𑀯𑀘𑀦𑀁, 𑀧𑀭𑀯𑀘𑀦𑀁, 𑀲𑀓𑀯𑀘𑀦𑀜𑁆𑀘 𑀧𑀭𑀯𑀘𑀦𑀜𑁆𑀘, 𑀯𑀺𑀲𑁆𑀲𑀚𑁆𑀚𑀦𑀻𑀬𑀁, 𑀅𑀯𑀺𑀲𑁆𑀲𑀚𑁆𑀚𑀦𑀻𑀬𑀁, 𑀯𑀺𑀲𑁆𑀲𑀚𑁆𑀚𑀦𑀻𑀬𑀜𑁆𑀘 𑀅𑀯𑀺𑀲𑁆𑀲𑀚𑁆𑀚𑀦𑀻𑀬𑀜𑁆𑀘, 𑀓𑀫𑁆𑀫𑀁, 𑀯𑀺𑀧𑀸𑀓𑁄, 𑀓𑀫𑁆𑀫𑀜𑁆𑀘 𑀯𑀺𑀧𑀸𑀓𑁄 𑀘 𑀓𑀼𑀲𑀮𑀁, 𑀅𑀓𑀼𑀲𑀮𑀁, 𑀓𑀼𑀲𑀮𑀜𑁆𑀘 𑀅𑀓𑀼𑀲𑀮𑀜𑁆𑀘 𑀅𑀦𑀼𑀜𑁆𑀜𑀸𑀢𑀁, 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀅𑀦𑀼𑀜𑁆𑀜𑀸𑀢𑀜𑁆𑀘 𑀧𑀝𑀺𑀓𑁆𑀔𑀺𑀢𑁆𑀢𑀜𑁆𑀘, 𑀣𑀯𑁄’’𑀢𑀺 (𑀦𑁂𑀢𑁆𑀢𑀺. 𑁧𑁧𑁨) 𑀏𑀯𑀫𑀸𑀕𑀢𑀸𑀦𑀺 𑀅𑀝𑁆𑀞𑀯𑀻𑀲𑀢𑀺 𑀲𑀸𑀲𑀦𑀧𑀝𑁆𑀞𑀸𑀦𑀸𑀦𑀺. 𑀢𑀢𑁆𑀣 𑀮𑁄𑀓𑀺𑀬𑀦𑁆𑀢𑀺 𑀮𑁄𑀓𑁂 𑀦𑀺𑀬𑀼𑀢𑁆𑀢𑁄, 𑀮𑁄𑀓𑁂 𑀯𑀸 𑀯𑀺𑀤𑀺𑀢𑁄 𑀮𑁄𑀓𑀺𑀬𑁄. 𑀇𑀥 𑀧𑀦 𑀮𑁄𑀓𑀺𑀬𑁄 𑀅𑀢𑁆𑀣𑁄 𑀬𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀼𑀢𑁆𑀢𑁄, 𑀢𑀁 𑀲𑀼𑀢𑁆𑀢𑀁 𑀮𑁄𑀓𑀺𑀬𑀁. 𑀢𑀣𑀸 𑀮𑁄𑀓𑀼𑀢𑁆𑀢𑀭𑀁. 𑀬𑀲𑁆𑀫𑀺𑀁 𑀧𑀦 𑀲𑀼𑀢𑁆𑀢𑁂 𑀧𑀤𑁂𑀲𑁂𑀦 𑀮𑁄𑀓𑀺𑀬𑀁, 𑀧𑀤𑁂𑀲𑁂𑀦 𑀮𑁄𑀓𑀼𑀢𑁆𑀢𑀭𑀁 𑀯𑀼𑀢𑁆𑀢𑀁, 𑀢𑀁 𑀮𑁄𑀓𑀺𑀬𑀜𑁆𑀘 𑀮𑁄𑀓𑀼𑀢𑁆𑀢𑀭𑀜𑁆𑀘. 𑀲𑀢𑁆𑀢𑀅𑀥𑀺𑀧𑁆𑀧𑀸𑀬𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀫𑀼𑀔𑁂𑀦 𑀤𑁂𑀲𑀺𑀢𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀁. 𑀥𑀫𑁆𑀫𑀯𑀲𑁂𑀦 𑀤𑁂𑀲𑀺𑀢𑀁 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀁. 𑀉𑀪𑀬𑀯𑀲𑁂𑀦 𑀤𑁂𑀲𑀺𑀢𑀁 𑀲𑀢𑁆𑀢𑀸𑀥𑀺𑀝𑁆𑀞𑀸𑀦𑀜𑁆𑀘 𑀥𑀫𑁆𑀫𑀸𑀥𑀺𑀝𑁆𑀞𑀸𑀦𑀜𑁆𑀘. 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀧𑀤𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀩𑀼𑀤𑁆𑀥𑀸𑀤𑀻𑀦𑀁 𑀧𑀦 𑀕𑀼𑀡𑀸𑀪𑀺𑀢𑁆𑀣𑀯𑀦𑀯𑀲𑁂𑀦 𑀧𑀯𑀢𑁆𑀢𑀁 𑀲𑀼𑀢𑁆𑀢𑀁 𑀣𑀯𑁄 𑀦𑀸𑀫 𑁋

‘‘𑀫𑀕𑁆𑀕𑀸𑀦𑀝𑁆𑀞𑀗𑁆𑀕𑀺𑀓𑁄 𑀲𑁂𑀝𑁆𑀞𑁄, 𑀲𑀘𑁆𑀘𑀸𑀦𑀁 𑀘𑀢𑀼𑀭𑁄 𑀧𑀤𑀸;

𑀯𑀺𑀭𑀸𑀕𑁄 𑀲𑁂𑀝𑁆𑀞𑁄 𑀥𑀫𑁆𑀫𑀸𑀦𑀁, 𑀤𑁆𑀯𑀺𑀧𑀤𑀸𑀦𑀜𑁆𑀘 𑀘𑀓𑁆𑀔𑀼𑀫𑀸’’𑀢𑀺. (𑀥. 𑀧. 𑁨𑁭𑁩; 𑀦𑁂𑀢𑁆𑀢𑀺. 𑁧𑁭𑁦; 𑀧𑁂𑀝𑀓𑁄. 𑁩𑁦) 𑀆𑀤𑀺𑀓𑀁 𑀯𑀺𑀬 𑁋

𑀦𑁂𑀢𑁆𑀢𑀺𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀤𑁆𑀤𑀕𑀭𑀼𑀓𑀸𑀤𑀻𑀦𑀦𑁆𑀢𑀺 ¶ 𑀆𑀤𑀺𑀲𑀤𑁆𑀤𑁂𑀦 𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀕𑀭𑀼𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀆𑀲𑀬𑀯𑀲𑁂𑀦𑀸𑀢𑀺 𑀅𑀚𑁆𑀛𑀸𑀲𑀬𑀯𑀲𑁂𑀦. 𑀉𑀢𑀼𑀲𑀫𑀼𑀝𑁆𑀞𑀸𑀦𑁄𑀧𑀺 𑀇𑀢𑁆𑀣𑀺𑀲𑀦𑁆𑀢𑀸𑀦𑀕𑀢𑁄 𑀲𑀤𑁆𑀤𑁄 𑀮𑀩𑁆𑀪𑀢𑀺, 𑀲𑁄 𑀇𑀥 𑀦𑀸𑀥𑀺𑀧𑁆𑀧𑁂𑀢𑁄𑀢𑀺 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁄’’𑀢𑀺 𑀯𑀼𑀢𑁆𑀢𑀁. 𑀓𑀣𑀺𑀢𑀲𑀤𑁆𑀤𑁄 𑀆𑀮𑀸𑀧𑀸𑀤𑀺𑀲𑀤𑁆𑀤𑁄. 𑀕𑀻𑀢𑀲𑀤𑁆𑀤𑁄 𑀲𑀭𑁂𑀦 𑀕𑀸𑀬𑀦𑀲𑀤𑁆𑀤𑁄. 𑀇𑀢𑁆𑀣𑀺𑀬𑀸 𑀳𑀲𑀦𑀲𑀤𑁆𑀤𑁄𑀧𑁂𑀢𑁆𑀣 𑀲𑀗𑁆𑀕𑀳𑁂𑀢𑀩𑁆𑀩𑁄 𑀢𑀲𑁆𑀲𑀧𑀺 𑀧𑀼𑀭𑀺𑀲𑁂𑀦 𑀅𑀲𑁆𑀲𑀸𑀤𑁂𑀢𑀩𑁆𑀩𑀢𑁄. 𑀢𑁂𑀦𑀸𑀳 𑁋 ‘‘𑀅𑀧𑀺𑀘 𑀔𑁄 𑀫𑀸𑀢𑀼𑀕𑀸𑀫𑀲𑁆𑀲 𑀲𑀤𑁆𑀤𑀁 𑀲𑀼𑀡𑀸𑀢𑀺 𑀢𑀺𑀭𑁄𑀓𑀼𑀝𑁆𑀝𑀸 𑀯𑀸 𑀢𑀺𑀭𑁄𑀧𑀸𑀓𑀸𑀭𑀸 𑀯𑀸 𑀳𑀲𑀦𑁆𑀢𑀺𑀬𑀸 𑀯𑀸 𑀪𑀡𑀦𑁆𑀢𑀺𑀬𑀸 𑀯𑀸 𑀕𑀸𑀬𑀦𑁆𑀢𑀺𑀬𑀸 𑀯𑀸, 𑀲𑁄 𑀢𑀤𑀲𑁆𑀲𑀸𑀤𑁂𑀢𑀻’’𑀢𑀺𑀆𑀤𑀺. 𑀦𑀺𑀯𑀢𑁆𑀣𑀦𑀺𑀯𑀸𑀲𑀦𑀲𑁆𑀲𑀸𑀢𑀺 𑀔𑀮𑀺𑀢𑁆𑀣𑀤𑁆𑀥𑀲𑁆𑀲 𑀦𑀺𑀯𑀸𑀲𑀦𑀲𑁆𑀲. 𑀅𑀮𑀗𑁆𑀓𑀸𑀭𑀲𑁆𑀲𑀸𑀢𑀺 𑀦𑀽𑀧𑀼𑀭𑀸𑀤𑀺𑀓𑀲𑁆𑀲 𑀅𑀮𑀗𑁆𑀓𑀸𑀭𑀲𑁆𑀲. 𑀇𑀢𑁆𑀣𑀺𑀲𑀤𑁆𑀤𑁄𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀇𑀢𑁆𑀣𑀺𑀧𑀝𑀺𑀩𑀤𑁆𑀥𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑁋 ‘‘𑀲𑀩𑁆𑀩𑁄𑀧𑀻’’𑀢𑀺𑀆𑀤𑀺. 𑀅𑀯𑀺𑀤𑀽𑀭𑀝𑁆𑀞𑀸𑀦𑁂𑀢𑀺 𑀢𑀲𑁆𑀲 𑀳𑀢𑁆𑀣𑀺𑀓𑀼𑀮𑀲𑁆𑀲 𑀯𑀲𑀦𑀝𑁆𑀞𑀸𑀦𑀢𑁄 𑀅𑀯𑀺𑀤𑀽𑀭𑀝𑁆𑀞𑀸𑀦𑁂. 𑀓𑀸𑀬𑀽𑀧𑀧𑀦𑁆𑀦𑁄𑀢𑀺 𑀲𑀫𑁆𑀧𑀦𑁆𑀦𑀓𑀸𑀬𑁄 𑀣𑀺𑀭𑀓𑀣𑀺𑀦𑀫𑀳𑀸𑀓𑀸𑀬𑁄. 𑀫𑀳𑀸𑀳𑀢𑁆𑀣𑀻𑀢𑀺 𑀫𑀳𑀸𑀦𑀼𑀪𑀸𑀯𑁄 𑀳𑀢𑁆𑀣𑀻. 𑀚𑁂𑀝𑁆𑀞𑀓𑀁 𑀓𑀢𑁆𑀯𑀸𑀢𑀺 𑀬𑀽𑀣𑀧𑀢𑀺𑀁 𑀓𑀢𑁆𑀯𑀸.

𑀓𑀣𑀺𑀦𑀢𑀺𑀓𑁆𑀔𑀪𑀸𑀯𑁂𑀦 ¶ 𑀲𑀺𑀗𑁆𑀕𑀲𑀤𑀺𑀲𑀢𑁆𑀢𑀸 𑀅𑀴𑀲𑀗𑁆𑀔𑀸𑀢𑀸𑀦𑀺 𑀲𑀺𑀗𑁆𑀕𑀸𑀦𑀺 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀺𑀗𑁆𑀕𑀻, 𑀲𑀼𑀯𑀡𑁆𑀡𑀯𑀡𑁆𑀡𑀢𑀸𑀬 𑀫𑀳𑀸𑀩𑀮𑀢𑀸𑀬 𑀘 𑀲𑀻𑀳𑀳𑀢𑁆𑀣𑀺𑀆𑀤𑀺𑀫𑀺𑀕𑀲𑀤𑀺𑀲𑀢𑁆𑀢𑀸 𑀫𑀺𑀕𑁄 𑀯𑀺𑀬𑀸𑀢𑀺 𑀫𑀺𑀕𑁄. 𑀢𑀢𑁆𑀣 𑀢𑀢𑁆𑀣 𑀓𑀺𑀘𑁆𑀘𑀁 𑀦𑁂𑀢𑀼𑀪𑀸𑀯𑁂𑀦 𑀘𑀓𑁆𑀔𑀼𑀬𑁂𑀯 𑀦𑁂𑀢𑁆𑀢𑀁, 𑀢𑀁 𑀉𑀕𑁆𑀕𑀢𑀝𑁆𑀞𑁂𑀦 𑀆𑀬𑀢𑀁 𑀏𑀢𑀲𑁆𑀲𑀸𑀢𑀺 𑀆𑀬𑀢𑀘𑀓𑁆𑀔𑀼𑀦𑁂𑀢𑁆𑀢𑁄. 𑀅𑀝𑁆𑀞𑀺 𑀏𑀯 𑀢𑀘𑁄 𑀏𑀢𑀲𑁆𑀲𑀸𑀢𑀺 𑀅𑀝𑁆𑀞𑀺𑀢𑁆𑀢𑀘𑁄. 𑀢𑁂𑀦𑀸𑀪𑀺𑀪𑀽𑀢𑁄𑀢𑀺 𑀢𑁂𑀦 𑀫𑀺𑀕𑁂𑀦 𑀅𑀪𑀺𑀪𑀽𑀢𑁄 𑀅𑀚𑁆𑀛𑁄𑀢𑁆𑀣𑀝𑁄 𑀦𑀺𑀘𑁆𑀘𑀮𑀕𑁆𑀕𑀳𑀺𑀢𑁄 𑀳𑀼𑀢𑁆𑀯𑀸. 𑀓𑀭𑀼𑀡𑀁 𑀭𑀼𑀤𑀸𑀫𑀻𑀢𑀺 𑀓𑀸𑀭𑀼𑀜𑁆𑀜𑀧𑀢𑁆𑀢𑁄 𑀳𑀼𑀢𑁆𑀯𑀸 𑀭𑁄𑀤𑀸𑀫𑀺 𑀯𑀺𑀭𑀯𑀸𑀫𑀺. 𑀧𑀘𑁆𑀘𑀢𑁆𑀣𑀺𑀓𑀪𑀬𑀢𑁄 𑀫𑀼𑀢𑁆𑀢𑀺 𑀦𑀸𑀫 𑀬𑀣𑀸 𑀢𑀣𑀸 𑀲𑀳𑀸𑀬𑀯𑀢𑁄 𑀳𑁄𑀢𑀺, 𑀦 𑀏𑀓𑀸𑀓𑀺𑀦𑁄𑀢𑀺 𑀆𑀳 𑁋 ‘‘𑀫𑀸 𑀳𑁂𑀯 𑀫𑀁 𑀧𑀸𑀡𑀲𑀫𑀁 𑀚𑀳𑁂𑀬𑁆𑀬𑀸’’𑀢𑀺. 𑀢𑀢𑁆𑀣 𑀫𑀸 𑀳𑁂𑀯 𑀫𑀦𑁆𑀢𑀺 𑀫𑀁 𑀏𑀯𑀭𑀽𑀧𑀁 𑀩𑁆𑀬𑀲𑀦𑀁 𑀧𑀢𑁆𑀢𑀁 𑀅𑀢𑁆𑀢𑀦𑁄 𑀧𑀸𑀡𑀲𑀫𑀁 𑀧𑀺𑀬𑀲𑀸𑀫𑀺𑀓𑀁 𑀢𑁆𑀯𑀁 𑀫𑀸𑀳𑁂𑀯 𑀚𑀳𑀺.

𑀓𑀼𑀜𑁆𑀘𑁂 𑀕𑀺𑀭𑀺𑀓𑀽𑀝𑁂 𑀭𑀫𑀢𑀺 𑀅𑀪𑀺𑀭𑀫𑀢𑀺, 𑀢𑀢𑁆𑀣 𑀯𑀸 𑀯𑀺𑀘𑀭𑀢𑀺, 𑀓𑁄𑀜𑁆𑀚𑀦𑀸𑀤𑀁 𑀦𑀤𑀦𑁆𑀢𑁄 𑀯𑀸 𑀯𑀺𑀘𑀭𑀢𑀺, 𑀓𑀼 𑀯𑀸 𑀧𑀣𑀯𑀻, 𑀢𑀤𑀪𑀺𑀖𑀸𑀢𑁂𑀦 𑀚𑀻𑀭𑀢𑀻𑀢𑀺 𑀓𑀼𑀜𑁆𑀚𑀭𑁄. 𑀲𑀝𑁆𑀞𑀺𑀳𑀸𑀬𑀦𑀦𑁆𑀢𑀺 𑀚𑀸𑀢𑀺𑀬𑀸 𑀲𑀝𑁆𑀞𑀺𑀯𑀲𑁆𑀲𑀓𑀸𑀮𑀲𑁆𑀫𑀺𑀁 𑀓𑀼𑀜𑁆𑀚𑀭𑀸 𑀣𑀸𑀫𑁂𑀦 𑀧𑀭𑀺𑀳𑀸𑀬𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬 𑀏𑀯𑀫𑀸𑀳. 𑀧𑀣𑀩𑁆𑀬𑀸 𑀘𑀸𑀢𑀼𑀭𑀦𑁆𑀢𑀸𑀬𑀸𑀢𑀺 𑀘𑀢𑀽𑀲𑀼 𑀤𑀺𑀲𑀸𑀲𑀼 𑀲𑀫𑀼𑀤𑁆𑀤𑀁 𑀧𑀢𑁆𑀯𑀸 𑀞𑀺𑀢𑀸𑀬 𑀘𑀸𑀢𑀼𑀭𑀦𑁆𑀢𑀸𑀬 𑀧𑀣𑀯𑀺𑀬𑀸. 𑀲𑀼𑀧𑁆𑀧𑀺𑀬𑁄𑀢𑀺 𑀲𑀼𑀝𑁆𑀞𑀼 𑀧𑀺𑀬𑁄. 𑀢𑁂𑀲𑀁 𑀢𑁆𑀯𑀁 𑀯𑀸𑀭𑀺𑀚𑁄 𑀲𑁂𑀝𑁆𑀞𑁄𑀢𑀺 𑀬𑁂 𑀲𑀫𑀼𑀤𑁆𑀤𑁂 𑀯𑀸 𑀕𑀗𑁆𑀕𑀸𑀬 𑀯𑀸 𑀬𑀫𑀼𑀦𑀸𑀬 𑀯𑀸 𑀦𑀫𑁆𑀫𑀤𑀸𑀦𑀤𑀺𑀬𑀸 𑀯𑀸 𑀓𑀼𑀴𑀻𑀭𑀸, 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀯𑀡𑁆𑀡𑀲𑀫𑁆𑀧𑀢𑁆𑀢𑀺𑀬𑀸 𑀫𑀳𑀦𑁆𑀢𑀢𑁆𑀢𑁂𑀦 𑀘 𑀯𑀸𑀭𑀺𑀫𑁆𑀳𑀺 ¶ 𑀚𑀸𑀢𑀢𑁆𑀢𑀸 𑀯𑀸𑀭𑀺𑀚𑁄 𑀢𑁆𑀯𑀫𑁂𑀯 𑀲𑁂𑀝𑁆𑀞𑁄 𑀧𑀲𑀢𑁆𑀣𑀢𑀭𑁄. 𑀫𑀼𑀜𑁆𑀘 𑀭𑁄𑀤𑀦𑁆𑀢𑀺𑀬𑀸 𑀧𑀢𑀺𑀦𑁆𑀢𑀺 𑀲𑀩𑁆𑀩𑁂𑀲𑀁 𑀲𑁂𑀝𑁆𑀞𑀢𑁆𑀢𑀸 𑀢𑀫𑁂𑀯 𑀬𑀸𑀘𑀸𑀫𑀺, 𑀭𑁄𑀤𑀫𑀸𑀦𑀸𑀬 𑀫𑀬𑁆𑀳𑀁 𑀲𑀸𑀫𑀺𑀓𑀁 𑀫𑀼𑀜𑁆𑀘. 𑀅𑀣𑀸𑀢𑀺 𑀕𑀳𑀡𑀲𑁆𑀲 𑀲𑀺𑀣𑀺𑀮𑀓𑀭𑀡𑀲𑀫𑀦𑀦𑁆𑀢𑀭𑀫𑁂𑀯. 𑀏𑀢𑀲𑁆𑀲𑀸𑀢𑀺 𑀧𑀝𑀺𑀲𑀢𑁆𑀢𑀼𑀫𑀤𑁆𑀤𑀦𑀲𑁆𑀲.

𑀧𑀩𑁆𑀩𑀢𑀕𑀳𑀦𑀁 𑀦𑀺𑀲𑁆𑀲𑀸𑀬𑀸𑀢𑀺 𑀢𑀺𑀲𑁆𑀲𑁄 𑀧𑀩𑁆𑀩𑀢𑀭𑀸𑀚𑀺𑀬𑁄 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀘𑀢𑀼𑀢𑁆𑀣𑀸𑀬 𑀧𑀩𑁆𑀩𑀢𑀭𑀸𑀚𑀺𑀬𑀁 𑀧𑀩𑁆𑀩𑀢𑀕𑀳𑀦𑀁 𑀉𑀧𑀦𑀺𑀲𑁆𑀲𑀸𑀬. 𑀏𑀯𑀁 𑀯𑀤𑀢𑀻𑀢𑀺 ‘‘𑀉𑀤𑁂𑀢𑀬𑀁 𑀘𑀓𑁆𑀔𑀼𑀫𑀸’’𑀢𑀺𑀆𑀤𑀺𑀦𑀸 (𑀚𑀸. 𑁧.𑁨.𑁧𑁭) 𑀇𑀫𑀁 𑀩𑀼𑀤𑁆𑀥𑀫𑀦𑁆𑀢𑀁 𑀫𑀦𑁆𑀢𑁂𑀦𑁆𑀢𑁄 𑀯𑀤𑀢𑀺.

𑀢𑀢𑁆𑀣 𑀉𑀤𑁂𑀢𑀻𑀢𑀺 𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀢𑁄 𑀉𑀕𑁆𑀕𑀘𑁆𑀙𑀢𑀺. 𑀘𑀓𑁆𑀔𑀼𑀫𑀸𑀢𑀺 𑀲𑀓𑀮𑀘𑀓𑁆𑀓𑀯𑀸𑀴𑀯𑀸𑀲𑀻𑀦𑀁 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀺𑀢𑁆𑀯𑀸 𑀘𑀓𑁆𑀔𑀼𑀧𑁆𑀧𑀝𑀺𑀮𑀸𑀪𑀓𑀭𑀡𑁂𑀦 𑀬𑀦𑁆𑀢𑁂𑀦 𑀢𑁂𑀲𑀁 𑀤𑀺𑀦𑁆𑀦𑀁 𑀘𑀓𑁆𑀔𑀼, 𑀢𑁂𑀦 𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀫𑀸. 𑀏𑀓𑀭𑀸𑀚𑀸𑀢𑀺 𑀲𑀓𑀮𑀘𑀓𑁆𑀓𑀯𑀸𑀴𑁂 𑀆𑀮𑁄𑀓𑀓𑀭𑀸𑀦𑀁 𑀅𑀦𑁆𑀢𑀭𑁂 𑀲𑁂𑀝𑁆𑀞𑀝𑁆𑀞𑁂𑀦 𑀭𑀜𑁆𑀚𑀦𑀝𑁆𑀞𑁂𑀦 𑀘 𑀏𑀓𑀭𑀸𑀚𑀸. 𑀳𑀭𑀺𑀲𑁆𑀲𑀯𑀡𑁆𑀡𑁄𑀢𑀺 𑀳𑀭𑀺𑀲𑀫𑀸𑀦𑀯𑀡𑁆𑀡𑁄, 𑀲𑀼𑀯𑀡𑁆𑀡𑀯𑀡𑁆𑀡𑁄𑀢𑀺 𑀅𑀢𑁆𑀣𑁄. 𑀧𑀣𑀯𑀺𑀁 𑀧𑀪𑀸𑀲𑁂𑀢𑀻𑀢𑀺 𑀧𑀣𑀯𑀺𑀧𑁆𑀧𑀪𑀸𑀲𑁄. 𑀢𑀁 𑀢𑀁 𑀦𑀫𑀲𑁆𑀲𑀸𑀫𑀻𑀢𑀺 𑀢𑀲𑁆𑀫𑀸 𑀢𑀁 𑀏𑀯𑀭𑀽𑀧𑀁 𑀪𑀯𑀦𑁆𑀢𑀁 𑀦𑀫𑀲𑁆𑀲𑀸𑀫𑀺 𑀯𑀦𑁆𑀤𑀸𑀫𑀺. 𑀢𑀬𑀸𑀚𑁆𑀚 𑀕𑀼𑀢𑁆𑀢𑀸 𑀯𑀺𑀳𑀭𑁂𑀫𑁆𑀳 𑀤𑀺𑀯𑀲𑀦𑁆𑀢𑀺 𑀢𑀬𑀸 𑀅𑀚𑁆𑀚 𑀭𑀓𑁆𑀔𑀺𑀢𑀸 𑀳𑀼𑀢𑁆𑀯𑀸 𑀇𑀫𑀁 𑀤𑀺𑀯𑀲𑀁 𑀘𑀢𑀼𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁂𑀦 𑀲𑀼𑀔𑀁 𑀯𑀺𑀳𑀭𑁂𑀬𑁆𑀬𑀸𑀫.

𑀏𑀯𑀁 ¶ 𑀩𑁄𑀥𑀺𑀲𑀢𑁆𑀢𑁄 𑀇𑀫𑀸𑀬 𑀕𑀸𑀣𑀸𑀬 𑀲𑀽𑀭𑀺𑀬𑀁 𑀦𑀫𑀲𑁆𑀲𑀺𑀢𑁆𑀯𑀸 𑀤𑀼𑀢𑀺𑀬𑀕𑀸𑀣𑀸𑀬 𑀅𑀢𑀻𑀢𑁂 𑀧𑀭𑀺𑀦𑀺𑀩𑁆𑀩𑀼𑀢𑁂 𑀩𑀼𑀤𑁆𑀥𑁂 𑀘𑁂𑀯 𑀩𑀼𑀤𑁆𑀥𑀕𑀼𑀡𑁂 𑀘 𑀦𑀫𑀲𑁆𑀲𑀢𑀺 ‘‘𑀬𑁂 𑀩𑁆𑀭𑀸𑀳𑁆𑀫𑀡𑀸’’𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀬𑁂 𑀩𑁆𑀭𑀸𑀳𑁆𑀫𑀡𑀸𑀢𑀺 𑀬𑁂 𑀩𑀸𑀳𑀺𑀢𑀧𑀸𑀧𑀸 𑀧𑀭𑀺𑀲𑀼𑀤𑁆𑀥𑀸 𑀩𑁆𑀭𑀸𑀳𑁆𑀫𑀡𑀸. 𑀯𑁂𑀤𑀕𑀽𑀢𑀺 𑀯𑁂𑀤𑀸𑀦𑀁 𑀧𑀸𑀭𑀁 𑀕𑀢𑀸, 𑀯𑁂𑀤𑁂𑀳𑀺 𑀧𑀸𑀭𑀁 𑀕𑀢𑀸𑀢𑀺 𑀯𑀸 𑀯𑁂𑀤𑀕𑀽. 𑀇𑀥 𑀧𑀦 𑀲𑀩𑁆𑀩𑁂 𑀲𑀗𑁆𑀔𑀢𑀥𑀫𑁆𑀫𑁂 𑀯𑀺𑀤𑀺𑀢𑁂 𑀧𑀸𑀓𑀝𑁂 𑀓𑀢𑁆𑀯𑀸 𑀓𑀢𑀸𑀢𑀺 𑀯𑁂𑀤𑀕𑀽. 𑀢𑁂𑀦𑁂𑀯𑀸𑀳 𑁋 ‘‘𑀲𑀩𑁆𑀩𑀥𑀫𑁆𑀫𑁂’’𑀢𑀺. 𑀲𑀩𑁆𑀩𑁂 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀥𑀫𑁆𑀫𑁂 𑀲𑀮𑀓𑁆𑀔𑀡𑀲𑀸𑀫𑀜𑁆𑀜𑀮𑀓𑁆𑀔𑀡𑀯𑀲𑁂𑀦 𑀅𑀢𑁆𑀢𑀦𑁄 𑀜𑀸𑀡𑀲𑁆𑀲 𑀯𑀺𑀤𑀺𑀢𑁂 𑀧𑀸𑀓𑀝𑁂 𑀓𑀢𑁆𑀯𑀸 𑀢𑀺𑀡𑁆𑀡𑀁 𑀫𑀸𑀭𑀸𑀦𑀁 𑀫𑀢𑁆𑀣𑀓𑀁 𑀫𑀤𑁆𑀤𑀺𑀢𑁆𑀯𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀢𑁆𑀢𑀸, 𑀲𑀁𑀲𑀸𑀭𑀁 𑀯𑀸 𑀅𑀢𑀺𑀓𑁆𑀓𑀦𑁆𑀢𑀸𑀢𑀺 𑀅𑀢𑁆𑀣𑁄. 𑀢𑁂 𑀫𑁂 𑀦𑀫𑁄𑀢𑀺 𑀢𑁂 𑀫𑀫 𑀇𑀫𑀁 𑀦𑀫𑀓𑁆𑀓𑀸𑀭𑀁 𑀧𑀝𑀺𑀘𑁆𑀙𑀦𑁆𑀢𑀼. 𑀢𑁂 𑀘 𑀫𑀁 𑀧𑀸𑀮𑀬𑀦𑁆𑀢𑀽𑀢𑀺 𑀏𑀯𑀁 𑀫𑀬𑀸 𑀦𑀫𑀲𑁆𑀲𑀺𑀢𑀸 𑀘 𑀢𑁂 𑀪𑀕𑀯𑀦𑁆𑀢𑁄 𑀫𑀁 𑀧𑀸𑀮𑀬𑀦𑁆𑀢𑀼 𑀭𑀓𑁆𑀔𑀦𑁆𑀢𑀼. 𑀦𑀫𑀢𑁆𑀢𑀼 𑀩𑀼𑀤𑁆𑀥𑀸𑀦𑀁…𑀧𑁂… 𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀅𑀬𑀁 𑀫𑀫 𑀦𑀫𑀓𑁆𑀓𑀸𑀭𑁄 𑀅𑀢𑀻𑀢𑀸𑀦𑀁 𑀧𑀭𑀺𑀦𑀺𑀩𑁆𑀩𑀼𑀢𑀸𑀦𑀁 𑀩𑀼𑀤𑁆𑀥𑀸𑀦𑀁 𑀅𑀢𑁆𑀣𑀼, 𑀢𑁂𑀲𑀁𑀬𑁂𑀯 𑀘𑀢𑀽𑀲𑀼 𑀨𑀮𑁂𑀲𑀼 𑀜𑀸𑀡𑀲𑀗𑁆𑀔𑀸𑀢𑀸𑀬 𑀩𑁄𑀥𑀺𑀬𑀸 𑀅𑀢𑁆𑀣𑀼, 𑀢𑀣𑀸 𑀢𑁂𑀲𑀜𑁆𑀜𑁂𑀯 𑀅𑀭𑀳𑀢𑁆𑀢𑀨𑀮𑀯𑀺𑀫𑀼𑀢𑁆𑀢𑀺𑀬𑀸 ¶ 𑀯𑀺𑀫𑀼𑀢𑁆𑀢𑀸𑀦𑀁 𑀅𑀢𑁆𑀣𑀼, 𑀬𑀸 𑀘 𑀦𑁂𑀲𑀁 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀲𑀫𑀼𑀘𑁆𑀙𑁂𑀤𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀲𑀗𑁆𑀔𑀸𑀢𑀸 𑀧𑀜𑁆𑀘𑀯𑀺𑀥𑀸 𑀯𑀺𑀫𑀼𑀢𑁆𑀢𑀺, 𑀢𑀸𑀬 𑀯𑀺𑀫𑀼𑀢𑁆𑀢𑀺𑀬𑀸𑀧𑀺 𑀅𑀬𑀁 𑀫𑀬𑁆𑀳𑀁 𑀦𑀫𑀓𑁆𑀓𑀸𑀭𑁄 𑀅𑀢𑁆𑀣𑀽𑀢𑀺 𑀅𑀢𑁆𑀣𑁄. 𑀇𑀫𑀁 𑀲𑁄 𑀧𑀭𑀺𑀢𑁆𑀢𑀁 𑀓𑀢𑁆𑀯𑀸, 𑀫𑁄𑀭𑁄 𑀘𑀭𑀢𑀺 𑀏𑀲𑀦𑀸𑀢𑀺 𑀇𑀤𑀁 𑀧𑀦 𑀧𑀤𑀤𑁆𑀯𑀬𑀁 𑀲𑀢𑁆𑀣𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀆𑀳. 𑀢𑀲𑁆𑀲𑀢𑁆𑀣𑁄 𑁋 𑀪𑀺𑀓𑁆𑀔𑀯𑁂, 𑀲𑁄 𑀫𑁄𑀭𑁄 𑀇𑀫𑀁 𑀧𑀭𑀺𑀢𑁆𑀢𑀁 𑀇𑀫𑀁 𑀭𑀓𑁆𑀔𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀕𑁄𑀘𑀭𑀪𑀽𑀫𑀺𑀬𑀁 𑀧𑀼𑀧𑁆𑀨𑀨𑀮𑀸𑀤𑀻𑀦𑀁 𑀅𑀢𑁆𑀣𑀸𑀬 𑀦𑀸𑀦𑀧𑁆𑀧𑀓𑀸𑀭𑀸𑀬 𑀏𑀲𑀦𑀸𑀬 𑀘𑀭𑀢𑀻𑀢𑀺.

𑀏𑀯𑀁 𑀤𑀺𑀯𑀲𑀁 𑀘𑀭𑀺𑀢𑁆𑀯𑀸 𑀲𑀸𑀬𑀁 𑀧𑀩𑁆𑀩𑀢𑀫𑀢𑁆𑀣𑀓𑁂 𑀦𑀺𑀲𑀻𑀤𑀺𑀢𑁆𑀯𑀸 𑀅𑀢𑁆𑀣𑀁 𑀕𑀘𑁆𑀙𑀦𑁆𑀢𑀁 𑀲𑀽𑀭𑀺𑀬𑀁 𑀑𑀮𑁄𑀓𑁂𑀦𑁆𑀢𑁄 𑀩𑀼𑀤𑁆𑀥𑀕𑀼𑀡𑁂 𑀆𑀯𑀚𑁆𑀚𑁂𑀢𑁆𑀯𑀸 𑀦𑀺𑀯𑀸𑀲𑀝𑁆𑀞𑀸𑀦𑁂 𑀭𑀓𑁆𑀔𑀸𑀯𑀭𑀡𑀢𑁆𑀣𑀸𑀬 𑀧𑀼𑀦 𑀩𑁆𑀭𑀳𑁆𑀫𑀫𑀦𑁆𑀢𑀁 𑀯𑀤𑀦𑁆𑀢𑁄 ‘‘𑀅𑀧𑁂𑀢𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑁂𑀦𑁂𑀯𑀸𑀳 𑁋 ‘‘𑀤𑀺𑀯𑀲𑀁 𑀕𑁄𑀘𑀭𑀁 𑀕𑀳𑁂𑀢𑁆𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀅𑀧𑁂𑀢𑀻𑀢𑀺 𑀅𑀧𑀬𑀸𑀢𑀺 𑀅𑀢𑁆𑀣𑀁 𑀕𑀘𑁆𑀙𑀢𑀺. 𑀇𑀫𑀁 𑀲𑁄 𑀧𑀭𑀺𑀢𑁆𑀢𑀁 𑀓𑀢𑁆𑀯𑀸 𑀫𑁄𑀭𑁄 𑀯𑀸𑀲𑀫𑀓𑀧𑁆𑀧𑀬𑀻𑀢𑀺 𑀇𑀤𑀫𑁆𑀧𑀺 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀆𑀳. 𑀢𑀲𑁆𑀲𑀢𑁆𑀣𑁄 𑁋 𑀪𑀺𑀓𑁆𑀔𑀯𑁂, 𑀲𑁄 𑀫𑁄𑀭𑁄 𑀇𑀫𑀁 𑀧𑀭𑀺𑀢𑁆𑀢𑀁 𑀇𑀫𑀁 𑀭𑀓𑁆𑀔𑀁 𑀓𑀢𑁆𑀯𑀸 𑀅𑀢𑁆𑀢𑀦𑁄 𑀦𑀺𑀯𑀸𑀲𑀝𑁆𑀞𑀸𑀦𑁂 𑀯𑀸𑀲𑀁 𑀲𑀁𑀓𑀧𑁆𑀧𑀬𑀺𑀢𑁆𑀣𑀸𑀢𑀺. 𑀧𑀭𑀺𑀢𑁆𑀢𑀓𑀫𑁆𑀫𑀢𑁄 𑀧𑀼𑀭𑁂𑀢𑀭𑀫𑁂𑀯𑀸𑀢𑀺 𑀧𑀭𑀺𑀢𑁆𑀢𑀓𑀫𑁆𑀫𑀓𑀭𑀡𑀢𑁄 𑀧𑀼𑀭𑁂𑀢𑀭𑀫𑁂𑀯. 𑀫𑁄𑀭𑀓𑀼𑀓𑁆𑀓𑀼𑀝𑀺𑀓𑀸𑀬𑀸𑀢𑀺 𑀓𑀼𑀓𑁆𑀓𑀼𑀝𑀺𑀓𑀸𑀲𑀤𑀺𑀲𑀸𑀬 𑀫𑁄𑀭𑀘𑁆𑀙𑀸𑀧𑀺𑀓𑀸𑀬.

𑁩. 𑀢𑀢𑀺𑀬𑁂 𑀭𑀽𑀧𑀸𑀬𑀢𑀦𑀲𑁆𑀲 𑀯𑀺𑀬 𑀕𑀦𑁆𑀥𑀸𑀬𑀢𑀦𑀲𑁆𑀲𑀧𑀺 𑀲𑀫𑀼𑀝𑁆𑀞𑀸𑀧𑀓𑀧𑀘𑁆𑀘𑀬𑀯𑀲𑁂𑀦 𑀯𑀺𑀲𑁂𑀲𑁄 𑀦𑀢𑁆𑀣𑀻𑀢𑀺 𑀆𑀳 𑁋 ‘‘𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓’’𑀦𑁆𑀢𑀺. 𑀇𑀢𑁆𑀣𑀺𑀬𑀸 𑀲𑀭𑀻𑀭𑀕𑀦𑁆𑀥𑀲𑁆𑀲 𑀓𑀸𑀬𑀸𑀭𑀼𑀴𑁆𑀳𑀅𑀦𑀼𑀮𑁂𑀧𑀦𑀸𑀤𑀺𑀕𑀦𑁆𑀥𑀲𑁆𑀲 𑀘 𑀢𑀧𑁆𑀧𑀝𑀺𑀩𑀤𑁆𑀥𑀪𑀸𑀯𑀢𑁄 𑀅𑀯𑀺𑀲𑁂𑀲𑁂𑀦 𑀕𑀳𑀡𑀧𑁆𑀧𑀲𑀗𑁆𑀕𑁂 𑀇𑀥𑀸𑀥𑀺𑀧𑁆𑀧𑁂𑀢𑀕𑀦𑁆𑀥𑀁 𑀦𑀺𑀤𑁆𑀥𑀸𑀭𑁂𑀦𑁆𑀢𑁄 ‘‘𑀲𑁆𑀯𑀸𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀢𑁆𑀣𑀺𑀬𑀸𑀢𑀺 𑀧𑀸𑀓𑀢𑀺𑀓𑀸𑀬 𑀇𑀢𑁆𑀣𑀺𑀬𑀸. 𑀤𑀼𑀕𑁆𑀕𑀦𑁆𑀥𑁄𑀢𑀺 𑀧𑀸𑀓𑀢𑀺𑀓𑀸𑀬 𑀇𑀢𑁆𑀣𑀺𑀬𑀸 𑀲𑀭𑀻𑀭𑀕𑀦𑁆𑀥𑀪𑀸𑀯𑀢𑁄 𑀤𑀼𑀕𑁆𑀕𑀦𑁆𑀥𑁄 𑀳𑁄𑀢𑀺. 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀇𑀝𑁆𑀞𑀪𑀸𑀯𑀢𑁄 𑀅𑀲𑁆𑀲𑀸𑀤𑁂𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁. 𑀓𑀣𑀁 𑀧𑀦 𑀇𑀢𑁆𑀣𑀺𑀬𑀸 𑀲𑀭𑀻𑀭𑀕𑀦𑁆𑀥𑀲𑁆𑀲 𑀤𑀼𑀕𑁆𑀕𑀦𑁆𑀥𑀪𑀸𑀯𑁄𑀢𑀺 𑀆𑀳 𑁋 ‘‘𑀏𑀓𑀘𑁆𑀘𑀸 𑀳𑀻’’𑀢𑀺𑀆𑀤𑀺. 𑀢𑀢𑁆𑀣 𑀅𑀲𑁆𑀲𑀲𑁆𑀲 𑀯𑀺𑀬 𑀕𑀦𑁆𑀥𑁄 ¶ 𑀅𑀲𑁆𑀲𑀸 𑀅𑀢𑁆𑀣𑀻𑀢𑀺 𑀅𑀲𑁆𑀲𑀕𑀦𑁆𑀥𑀺𑀦𑀻. 𑀫𑁂𑀡𑁆𑀟𑀓𑀲𑁆𑀲 𑀯𑀺𑀬 𑀕𑀦𑁆𑀥𑁄 𑀅𑀲𑁆𑀲𑀸 𑀅𑀢𑁆𑀣𑀻𑀢𑀺 𑀫𑁂𑀡𑁆𑀟𑀓𑀕𑀦𑁆𑀥𑀺𑀦𑀻. 𑀲𑁂𑀤𑀲𑁆𑀲 𑀯𑀺𑀬 𑀕𑀦𑁆𑀥𑁄 𑀅𑀲𑁆𑀲𑀸 𑀅𑀢𑁆𑀣𑀻𑀢𑀺 𑀲𑁂𑀤𑀕𑀦𑁆𑀥𑀺𑀦𑀻. 𑀲𑁄𑀡𑀺𑀢𑀲𑁆𑀲 𑀯𑀺𑀬 𑀕𑀦𑁆𑀥𑁄 𑀅𑀲𑁆𑀲𑀸 𑀅𑀢𑁆𑀣𑀻𑀢𑀺 𑀲𑁄𑀡𑀺𑀢𑀕𑀦𑁆𑀥𑀺𑀦𑀻. 𑀭𑀚𑁆𑀚𑀢𑁂𑀯𑀸𑀢𑀺 𑀅𑀦𑀸𑀤𑀺𑀫𑀢𑀺 𑀲𑀁𑀲𑀸𑀭𑁂 𑀅𑀯𑀺𑀚𑁆𑀚𑀸𑀤𑀺𑀓𑀺𑀮𑁂𑀲𑀯𑀸𑀲𑀦𑀸𑀬 𑀧𑀭𑀺𑀓𑀟𑁆𑀠𑀺𑀢𑀳𑀤𑀬𑀢𑁆𑀢𑀸 𑀨𑁄𑀝𑁆𑀞𑀩𑁆𑀩𑀲𑁆𑀲𑀸𑀤𑀕𑀥𑀺𑀢𑀘𑀺𑀢𑁆𑀢𑀢𑀸𑀬 𑀘 𑀅𑀦𑁆𑀥𑀩𑀸𑀮𑁄 𑀏𑀯𑀭𑀽𑀧𑀸𑀬𑀧𑀺 𑀤𑀼𑀕𑁆𑀕𑀦𑁆𑀥𑀲𑀭𑀻𑀭𑀸𑀬 𑀇𑀢𑁆𑀣𑀺𑀬𑀸 𑀭𑀚𑁆𑀚𑀢𑀺𑀬𑁂𑀯. 𑀧𑀸𑀓𑀢𑀺𑀓𑀸𑀬 𑀇𑀢𑁆𑀣𑀺𑀬𑀸 𑀲𑀭𑀻𑀭𑀕𑀦𑁆𑀥𑀲𑁆𑀲 𑀤𑀼𑀕𑁆𑀕𑀦𑁆𑀥𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀯𑀺𑀲𑀺𑀝𑁆𑀞𑀸𑀬 𑀏𑀓𑀘𑁆𑀘𑀸𑀬 𑀇𑀢𑁆𑀣𑀺𑀬𑀸 𑀢𑀤𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀘𑀓𑁆𑀓𑀯𑀢𑁆𑀢𑀺𑀦𑁄 ¶ 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀬𑀤𑀺 𑀏𑀯𑀁 𑀈𑀤𑀺𑀲𑀸𑀬 𑀇𑀢𑁆𑀣𑀺𑀬𑀸 𑀲𑀭𑀻𑀭𑀕𑀦𑁆𑀥𑁄𑀧𑀺 𑀇𑀥 𑀓𑀲𑁆𑀫𑀸 𑀦𑀸𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 𑁋 ‘‘𑀅𑀬𑀁 𑀦 𑀲𑀩𑁆𑀩𑀸𑀲𑀁 𑀳𑁄𑀢𑀻’’𑀢𑀺𑀆𑀤𑀺. 𑀢𑀺𑀭𑀘𑁆𑀙𑀸𑀦𑀕𑀢𑀸𑀬 𑀇𑀢𑁆𑀣𑀺𑀬𑀸 𑀏𑀓𑀘𑁆𑀘𑀸𑀬 𑀘 𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀲𑀭𑀻𑀭𑀕𑀦𑁆𑀥𑀲𑁆𑀲 𑀅𑀢𑀺𑀯𑀺𑀬 𑀅𑀲𑁆𑀲𑀸𑀤𑁂𑀢𑀩𑁆𑀩𑀪𑀸𑀯𑀤𑀲𑁆𑀲𑀦𑀢𑁄 𑀧𑀼𑀦 𑀢𑀫𑁆𑀧𑀺 𑀅𑀯𑀺𑀲𑁂𑀲𑁂𑀦 𑀅𑀦𑀼𑀚𑀸𑀦𑀦𑁆𑀢𑁄 ‘‘𑀇𑀢𑁆𑀣𑀺𑀓𑀸𑀬𑁂 𑀕𑀦𑁆𑀥𑁄 𑀯𑀸 𑀳𑁄𑀢𑀽’’𑀢𑀺𑀆𑀤𑀺𑀫𑀸𑀳. 𑀇𑀢𑁆𑀣𑀺𑀕𑀦𑁆𑀥𑁄𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀢𑀧𑁆𑀧𑀝𑀺𑀩𑀤𑁆𑀥𑀪𑀸𑀯𑀢𑁄 𑀯𑀼𑀢𑁆𑀢𑀁.

𑁪. 𑀘𑀢𑀼𑀢𑁆𑀣𑀸𑀤𑀻𑀲𑀼 𑀓𑀺𑀁 𑀢𑁂𑀦𑀸𑀢𑀺 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀭𑀲𑁂 𑀇𑀥𑀸𑀥𑀺𑀧𑁆𑀧𑁂𑀢𑁂 𑀓𑀺𑀁 𑀢𑁂𑀦 𑀅𑀯𑀬𑀯𑀭𑀲𑀸𑀤𑀺𑀦𑀸 𑀯𑀼𑀢𑁆𑀢𑁂𑀦 𑀧𑀬𑁄𑀚𑀦𑀁. 𑀑𑀝𑁆𑀞𑀫𑀁𑀲𑀁 𑀲𑀫𑁆𑀫𑀓𑁆𑀔𑁂𑀢𑀻𑀢𑀺 𑀑𑀝𑁆𑀞𑀫𑀁𑀲𑀲𑀫𑁆𑀫𑀓𑁆𑀔𑀦𑁄, 𑀔𑁂𑀴𑀸𑀤𑀻𑀦𑀺. 𑀆𑀤𑀺𑀲𑀤𑁆𑀤𑁂𑀦 𑀑𑀝𑁆𑀞𑀫𑀁𑀲𑀫𑀓𑁆𑀔𑀦𑁄 𑀢𑀫𑁆𑀩𑀼𑀮𑀫𑀼𑀔𑀯𑀸𑀲𑀸𑀤𑀺𑀭𑀲𑁄 𑀕𑀬𑁆𑀳𑀢𑀺. 𑀲𑀩𑁆𑀩𑁄 𑀲𑁄 𑀇𑀢𑁆𑀣𑀺𑀭𑀲𑁄𑀢𑀺 𑀇𑀢𑁆𑀣𑀺𑀬𑀸𑀯𑀲𑁆𑀲 𑀕𑀳𑁂𑀢𑀩𑁆𑀩𑀢𑁆𑀢𑀸.

𑁫. 𑀇𑀢𑁆𑀣𑀺𑀨𑁄𑀝𑁆𑀞𑀩𑁆𑀩𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀬𑀤𑀺 𑀧𑀦𑁂𑀢𑁆𑀣 𑀇𑀢𑁆𑀣𑀺𑀕𑀢𑀸𑀦𑀺 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀦𑀺 𑀅𑀯𑀺𑀲𑁂𑀲𑀢𑁄 𑀧𑀼𑀭𑀺𑀲𑀲𑁆𑀲 𑀘𑀺𑀢𑁆𑀢𑀁 𑀧𑀭𑀺𑀬𑀸𑀤𑀸𑀬 𑀢𑀺𑀝𑁆𑀞𑀦𑁆𑀢𑀺, 𑀅𑀣 𑀓𑀲𑁆𑀫𑀸 𑀪𑀕𑀯𑀢𑀸 𑀢𑀸𑀦𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀕𑀳𑁂𑀢𑁆𑀯𑀸 𑀤𑁂𑀲𑀺𑀢𑀸𑀦𑀻𑀢𑀺 𑀆𑀳 𑁋 ‘‘𑀇𑀢𑀺 𑀲𑀢𑁆𑀣𑀸’’𑀢𑀺𑀆𑀤𑀺. 𑀬𑀣𑀸 𑀳𑀻𑀢𑀺𑀆𑀤𑀺𑀦𑀸 𑀢𑀫𑁂𑀯𑀢𑁆𑀣𑀁 𑀲𑀫𑀢𑁆𑀣𑁂𑀢𑀺. 𑀕𑀫𑁂𑀢𑀻𑀢𑀺 𑀯𑀺𑀓𑁆𑀔𑁂𑀧𑀁 𑀕𑀫𑁂𑀢𑀺, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀕𑀫𑁂𑀢𑀻𑀢𑀺 𑀘 𑀲𑀗𑁆𑀕𑀫𑁂𑀢𑀺. 𑀦 𑀢𑀣𑀸 𑀲𑁂𑀲𑀸 𑀲𑀤𑁆𑀤𑀸𑀤𑀬𑁄, 𑀦 𑀢𑀣𑀸 𑀭𑀽𑀧𑀸𑀤𑀻𑀦𑀺 𑀆𑀭𑀫𑁆𑀫𑀡𑀸𑀦𑀻𑀢𑀺 𑀏𑀢𑁂𑀦 𑀲𑀢𑁆𑀢𑁂𑀲𑀼 𑀭𑀽𑀧𑀸𑀤𑀺𑀕𑀭𑀼𑀓𑀢𑀸 𑀅𑀲𑀁𑀓𑀺𑀡𑁆𑀡𑀸 𑀯𑀺𑀬 𑀤𑀲𑁆𑀲𑀺𑀢𑀸, 𑀦 𑀔𑁄 𑀧𑀦𑁂𑀢𑀁 𑀏𑀯𑀁 𑀤𑀝𑁆𑀞𑀩𑁆𑀩𑀁 𑀅𑀦𑁂𑀓𑀯𑀺𑀥𑀢𑁆𑀢𑀸 𑀲𑀢𑁆𑀢𑀸𑀦𑀁 𑀅𑀚𑁆𑀛𑀸𑀲𑀬𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀼𑀁 𑁋 ‘‘𑀏𑀓𑀘𑁆𑀘𑀲𑁆𑀲 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀜𑁆𑀘𑀕𑀭𑀼𑀓𑀯𑀲𑁂𑀦𑀸𑀢𑀺 𑀧𑀜𑁆𑀘𑀸𑀭𑀫𑁆𑀫𑀡𑀕𑀭𑀼𑀓𑀯𑀲𑁂𑀦. 𑀏𑀓𑀘𑁆𑀘𑀲𑁆𑀲 𑀳𑀺 𑀧𑀼𑀭𑀺𑀲𑀲𑁆𑀲 𑀬𑀣𑀸𑀯𑀼𑀢𑁆𑀢𑁂𑀲𑀼 𑀧𑀜𑁆𑀘𑀲𑀼𑀧𑀺 𑀆𑀭𑀫𑁆𑀫𑀡𑁂𑀲𑀼 𑀕𑀭𑀼𑀓𑀢𑀸 𑀳𑁄𑀢𑀺, 𑀏𑀓𑀘𑁆𑀘𑀲𑁆𑀲 𑀢𑀢𑁆𑀣 𑀓𑀢𑀺𑀧𑀬𑁂𑀲𑀼, 𑀏𑀓𑀲𑁆𑀫𑀺𑀁 𑀏𑀯 𑀯𑀸, 𑀢𑁂 𑀲𑀩𑁆𑀩𑁂𑀧𑀺 𑀧𑀜𑁆𑀘𑀕𑀭𑀼𑀓𑀸𑀢𑁆𑀯𑁂𑀯 𑀯𑁂𑀤𑀺𑀢𑀩𑁆𑀩𑀸 𑀬𑀣𑀸 ‘‘𑀲𑀢𑁆𑀢𑀺𑀲𑀬𑁄 𑀅𑀝𑁆𑀞𑀯𑀺𑀫𑁄𑀓𑁆𑀔𑀸’’𑀢𑀺. 𑀦 𑀧𑀜𑁆𑀘𑀕𑀭𑀼𑀓𑀚𑀸𑀢𑀓𑀯𑀲𑁂𑀦 𑀏𑀓𑁂𑀓𑀸𑀭𑀫𑁆𑀫𑀡𑁂 𑀕𑀭𑀼𑀓𑀲𑁆𑀲𑁂𑀯 𑀦𑀸𑀥𑀺𑀧𑁆𑀧𑁂𑀢𑀢𑁆𑀢𑀸. 𑀏𑀓𑁂𑀓𑀸𑀭𑀫𑁆𑀫𑀡𑀕𑀭𑀼𑀓𑀸𑀦𑀜𑁆𑀳𑀺 𑀧𑀜𑁆𑀘𑀦𑁆𑀦𑀁 𑀧𑀼𑀕𑁆𑀕𑀮𑀸𑀦𑀁 𑀢𑀢𑁆𑀣 𑀆𑀕𑀢𑀢𑁆𑀢𑀸 𑀢𑀁 𑀚𑀸𑀢𑀓𑀁 ‘‘𑀧𑀜𑁆𑀘𑀕𑀭𑀼𑀓𑀚𑀸𑀢𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 𑀢𑁂𑀦 𑀇𑀥 𑀧𑀬𑁄𑀚𑀦𑀁 𑀦𑀢𑁆𑀣𑀻𑀢𑀺 𑀆𑀳 𑁋 ‘‘𑀲𑀓𑁆𑀔𑀺𑀪𑀸𑀯𑀢𑁆𑀣𑀸𑀬𑀸’’𑀢𑀺. 𑀆𑀳𑀭𑀺𑀢𑁆𑀯𑀸 𑀓𑀣𑁂𑀢𑀩𑁆𑀩𑀦𑁆𑀢𑀺 𑀭𑀽𑀧𑀸𑀤𑀺𑀕𑀭𑀼𑀓𑀢𑀸𑀬 𑀏𑀢𑁂 𑀅𑀦𑀬𑀩𑁆𑀬𑀲𑀦𑀁 𑀧𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 𑀓𑀣𑁂𑀢𑀩𑁆𑀩𑀁.

𑁬-𑁮. 𑀢𑁂𑀲𑀦𑁆𑀢𑀺 ¶ ¶ 𑀲𑀼𑀢𑁆𑀢𑀸𑀦𑀁. 𑀉𑀧𑁆𑀧𑀡𑁆𑀟𑁂𑀢𑁆𑀯𑀸 𑀕𑀡𑁆𑀳𑀺𑀢𑀼𑀁 𑀦 𑀇𑀘𑁆𑀙𑀻𑀢𑀺 𑀢𑀲𑁆𑀲 𑀣𑁄𑀓𑀁 𑀯𑀺𑀭𑀽𑀧𑀥𑀸𑀢𑀼𑀓𑀢𑁆𑀢𑀸 𑀦 𑀇𑀘𑁆𑀙𑀺. 𑀅𑀦𑀢𑀺𑀓𑁆𑀓𑀫𑀦𑁆𑀢𑁄𑀢𑀺 𑀲𑀁𑀲𑀦𑁆𑀤𑁂𑀦𑁆𑀢𑁄. 𑀤𑁆𑀯𑁂 𑀳𑀢𑁆𑀣𑀁 𑀧𑀢𑁆𑀢𑀸𑀦𑀻𑀢𑀺 𑀤𑁆𑀯𑁂 𑀉𑀧𑁆𑀧𑀮𑀸𑀦𑀺 𑀳𑀢𑁆𑀣𑀁 𑀕𑀢𑀸𑀦𑀺. 𑀧𑀳𑀝𑁆𑀞𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀅𑀧𑀭𑀸𑀳𑀺 𑀇𑀢𑁆𑀣𑀻𑀳𑀺 𑀏𑀓𑁂𑀓𑀁 𑀮𑀤𑁆𑀥𑀁, 𑀫𑀬𑀸 𑀤𑁆𑀯𑁂 𑀮𑀤𑁆𑀥𑀸𑀦𑀻𑀢𑀺 𑀲𑀦𑁆𑀢𑀼𑀝𑁆𑀞𑀸𑀓𑀸𑀭𑀁 𑀤𑀲𑁆𑀲𑁂𑀢𑁆𑀯𑀸. 𑀧𑀭𑁄𑀤𑀻𑀢𑀺 𑀢𑀲𑁆𑀲𑀸 𑀧𑀼𑀩𑁆𑀩𑀲𑀸𑀫𑀺𑀓𑀲𑁆𑀲 𑀫𑀼𑀔𑀕𑀦𑁆𑀥𑀁 𑀲𑀭𑀺𑀢𑁆𑀯𑀸. 𑀢𑀲𑁆𑀲 𑀳𑀺 𑀫𑀼𑀔𑀢𑁄 𑀉𑀧𑁆𑀧𑀮𑀕𑀦𑁆𑀥𑁄 𑀯𑀸𑀬𑀢𑀺. 𑀳𑀸𑀭𑁂𑀢𑁆𑀯𑀸𑀢𑀺 𑀢𑀲𑁆𑀫𑀸 𑀞𑀸𑀦𑀸 𑀅𑀧𑀦𑁂𑀢𑁆𑀯𑀸, ‘‘𑀳𑀭𑀸𑀧𑁂𑀢𑁆𑀯𑀸’’𑀢𑀺 𑀯𑀸 𑀧𑀸𑀞𑁄, 𑀅𑀬𑀫𑁂𑀯𑀢𑁆𑀣𑁄.

𑀲𑀸𑀥𑀼 𑀲𑀸𑀥𑀽𑀢𑀺 𑀪𑀸𑀲𑀢𑁄𑀢𑀺 𑀥𑀫𑁆𑀫𑀓𑀣𑀸𑀬 𑀅𑀦𑀼𑀫𑁄𑀤𑀦𑀯𑀲𑁂𑀦 ‘‘𑀲𑀸𑀥𑀼 𑀲𑀸𑀥𑀽’’𑀢𑀺 𑀪𑀸𑀲𑀢𑁄. 𑀉𑀧𑁆𑀧𑀮𑀁𑀯 𑀬𑀣𑁄𑀤𑀓𑁂𑀢𑀺 𑀬𑀣𑀸 𑀉𑀧𑁆𑀧𑀮𑀁 𑀉𑀧𑁆𑀧𑀮𑀕𑀦𑁆𑀥𑁄 𑀫𑀼𑀔𑀢𑁄 𑀦𑀺𑀩𑁆𑀩𑀢𑁆𑀢𑁄𑀢𑀺. 𑀯𑀝𑁆𑀝𑀫𑁂𑀯 𑀓𑀣𑀺𑀢𑀦𑁆𑀢𑀺 𑀬𑀣𑀸𑀭𑀼𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀬𑀤𑀺𑀧𑀺 𑀏𑀯𑀁 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀬𑀣𑀸𑀭𑀼𑀢𑀫𑀢𑁆𑀣𑁂 𑀅𑀯𑀢𑁆𑀯𑀸 𑀯𑀺𑀯𑀝𑁆𑀝𑀁 𑀦𑀻𑀳𑀭𑀺𑀢𑁆𑀯𑀸 𑀓𑀣𑁂𑀢𑀩𑁆𑀩𑀁 𑀯𑀺𑀫𑀼𑀢𑁆𑀢𑀺𑀭𑀲𑀢𑁆𑀢𑀸 𑀪𑀕𑀯𑀢𑁄 𑀤𑁂𑀲𑀦𑀸𑀬.

𑀭𑀽𑀧𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀫𑀦𑁄𑀭𑀣𑀧𑀽𑀭𑀡𑀺𑀬𑀸 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸𑀬 𑀅𑀦𑀼𑀢𑁆𑀢𑀸𑀦𑀢𑁆𑀣𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀦𑀻𑀯𑀭𑀡𑀧𑁆𑀧𑀳𑀸𑀦𑀯𑀕𑁆𑀕𑀯𑀡𑁆𑀡𑀦𑀸

𑁧𑁧. 𑀤𑀼𑀢𑀺𑀬𑀲𑁆𑀲𑀸𑀢𑀺 ¶ 𑀤𑀼𑀢𑀺𑀬𑀯𑀕𑁆𑀕𑀲𑁆𑀲. 𑀏𑀓𑀥𑀫𑁆𑀫𑀫𑁆𑀧𑀻𑀢𑀺 𑀏𑀢𑁆𑀣 ‘‘𑀏𑀓𑀲𑀪𑀸𑀯𑀫𑁆𑀧𑀻’’𑀢𑀺 𑀇𑀫𑀺𑀦𑀸 𑀲𑀪𑀸𑀯𑀢𑁆𑀣𑁄𑀬𑀁 𑀥𑀫𑁆𑀫𑀲𑀤𑁆𑀤𑁄 ‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀯𑀺𑀬𑀸𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀬𑀤𑀕𑁆𑀕𑁂𑀦 𑀘 𑀲𑀪𑀸𑀯𑀢𑁆𑀣𑁄, 𑀢𑀤𑀕𑁆𑀕𑁂𑀦 𑀦𑀺𑀲𑁆𑀲𑀢𑁆𑀢𑀢𑁆𑀣𑁄 𑀲𑀺𑀤𑁆𑀥𑁄 𑀏𑀯𑀸𑀢𑀺 ‘‘𑀦𑀺𑀲𑁆𑀲𑀢𑁆𑀢𑀝𑁆𑀞𑁂𑀦 𑀥𑀫𑁆𑀫𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀲𑀼𑀪𑀦𑀺𑀫𑀺𑀢𑁆𑀢𑀦𑁆𑀢𑀺 𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀅𑀢𑁆𑀣𑀢𑁄 𑀓𑀸𑀫𑀘𑁆𑀙𑀦𑁆𑀤𑁄 𑀯𑀸 𑀲𑀺𑀬𑀸. 𑀲𑁄 𑀳𑀺 𑀅𑀢𑁆𑀢𑀦𑁄 𑀕𑀳𑀡𑀸𑀓𑀸𑀭𑁂𑀦 𑀲𑀼𑀪𑀦𑁆𑀢𑀺, 𑀢𑁂𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀦𑀓𑀲𑁆𑀲 𑀅𑀜𑁆𑀜𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀦𑀺𑀫𑀺𑀢𑁆𑀢𑀢𑁆𑀢𑀸 ‘‘𑀲𑀼𑀪𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀆𑀭𑀫𑁆𑀫𑀡𑀁 𑀯𑀸 𑀲𑀼𑀪𑀦𑀺𑀫𑀺𑀢𑁆𑀢𑀁. 𑀇𑀝𑁆𑀞𑀜𑁆𑀳𑀺 𑀇𑀝𑁆𑀞𑀸𑀓𑀸𑀭𑁂𑀦 𑀯𑀸 𑀕𑀬𑁆𑀳𑀫𑀸𑀦𑀁 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁 ‘‘𑀲𑀼𑀪𑀦𑀺𑀫𑀺𑀢𑁆𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀆𑀭𑀫𑁆𑀫𑀡𑀫𑁂𑀯 𑀘𑁂𑀢𑁆𑀣 𑀦𑀺𑀫𑀺𑀢𑁆𑀢𑀁. 𑀢𑀣𑀸 𑀳𑀺 𑀯𑀓𑁆𑀔𑀢𑀺 𑁋 ‘‘𑀲𑀼𑀪𑀦𑀺𑀫𑀺𑀢𑁆𑀢𑀦𑁆𑀢𑀺 𑀭𑀸𑀕𑀝𑁆𑀞𑀸𑀦𑀺𑀬𑀁 𑀆𑀭𑀫𑁆𑀫𑀡’’𑀦𑁆𑀢𑀺. 𑀲𑀫𑀼𑀘𑁆𑀘𑀬𑀢𑁆𑀣𑁄 𑀯𑀸-𑀲𑀤𑁆𑀤𑁄 𑀅𑀦𑁂𑀓𑀢𑁆𑀣𑀢𑁆𑀢𑀸 𑀦𑀺𑀧𑀸𑀢𑀸𑀦𑀁. 𑀪𑀺𑀬𑁆𑀬𑁄𑀪𑀸𑀯𑀸𑀬𑀸𑀢𑀺 𑀧𑀼𑀦𑀧𑁆𑀧𑀼𑀦𑀁 𑀪𑀸𑀯𑀸𑀬. 𑀯𑁂𑀧𑀼𑀮𑁆𑀮𑀸𑀬𑀸𑀢𑀺 𑀯𑀺𑀧𑀼𑀮𑀪𑀸𑀯𑀸𑀬, 𑀯𑀟𑁆𑀠𑀺𑀬𑀸𑀢𑀺 𑀅𑀢𑁆𑀣𑁄. 𑀅𑀚𑀸𑀢𑁄 𑀦𑀺𑀚𑁆𑀚𑀸𑀢𑁄. 𑀲𑁂𑀲𑀧𑀤𑀸𑀦𑀺 𑀢𑀲𑁆𑀲𑁂𑀯 ¶ 𑀯𑁂𑀯𑀘𑀦𑀸𑀦𑀺. 𑀓𑀸𑀫𑁂𑀲𑀽𑀢𑀺 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼. 𑀓𑀸𑀫𑀘𑁆𑀙𑀦𑁆𑀤𑁄𑀢𑀺 𑀓𑀸𑀫𑀲𑀗𑁆𑀔𑀸𑀢𑁄 𑀙𑀦𑁆𑀤𑁄, 𑀦 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑁄 𑀦 𑀥𑀫𑁆𑀫𑀘𑁆𑀙𑀦𑁆𑀤𑁄. 𑀓𑀸𑀫𑀦𑀯𑀲𑁂𑀦 𑀭𑀚𑁆𑀚𑀦𑀯𑀲𑁂𑀦 𑀘 𑀓𑀸𑀫𑁄 𑀏𑀯 𑀭𑀸𑀕𑁄 𑀓𑀸𑀫𑀭𑀸𑀕𑁄. 𑀓𑀸𑀫𑀦𑀯𑀲𑁂𑀦 𑀦𑀦𑁆𑀤𑀦𑀯𑀲𑁂𑀦 𑀘 𑀓𑀸𑀫𑁄 𑀏𑀯 𑀦𑀦𑁆𑀤𑀻𑀢𑀺 𑀓𑀸𑀫𑀦𑀦𑁆𑀤𑀻. 𑀓𑀸𑀫𑀦𑀯𑀲𑁂𑀦 𑀢𑀡𑁆𑀳𑀸𑀬𑀦𑀯𑀲𑁂𑀦 𑀘 𑀓𑀸𑀫𑀢𑀡𑁆𑀳𑀸. 𑀆𑀤𑀺𑀲𑀤𑁆𑀤𑁂𑀦 ‘‘𑀓𑀸𑀫𑀲𑁆𑀦𑁂𑀳𑁄 𑀓𑀸𑀫𑀧𑀭𑀺𑀴𑀸𑀳𑁄 𑀓𑀸𑀫𑀫𑀼𑀘𑁆𑀙𑀸 𑀓𑀸𑀫𑀚𑁆𑀛𑁄𑀲𑀸𑀦’’𑀦𑁆𑀢𑀺 𑀏𑀢𑁂𑀲𑀁 𑀧𑀤𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀓𑀸𑀫𑀢𑁆𑀣𑀁 𑀯𑀺𑀤𑀺𑀢𑁆𑀯𑀸 𑀲𑀺𑀦𑁂𑀳𑀦𑀝𑁆𑀞𑁂𑀦 𑀓𑀸𑀫𑀲𑁆𑀦𑁂𑀳𑁄, 𑀧𑀭𑀺𑀴𑀸𑀳𑀦𑀝𑁆𑀞𑁂𑀦 𑀓𑀸𑀫𑀧𑀭𑀺𑀴𑀸𑀳𑁄, 𑀫𑀼𑀘𑁆𑀙𑀦𑀝𑁆𑀞𑁂𑀦 𑀓𑀸𑀫𑀫𑀼𑀘𑁆𑀙𑀸, 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀸𑀧𑀦𑀝𑁆𑀞𑁂𑀦 𑀓𑀸𑀫𑀚𑁆𑀛𑁄𑀲𑀸𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀸𑀫𑀘𑁆𑀙𑀦𑁆𑀤𑁄 𑀏𑀯 𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀢𑁄 𑀘𑀺𑀢𑁆𑀢𑀲𑁆𑀲 𑀦𑀻𑀯𑀭𑀡𑀝𑁆𑀞𑁂𑀦 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁, 𑀲𑁄𑀢𑀺 𑀓𑀸𑀫𑀘𑁆𑀙𑀦𑁆𑀤𑁄. 𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦𑀸𑀢𑀺 𑀅𑀲𑀫𑀼𑀤𑀸𑀘𑀸𑀭𑀪𑀸𑀯𑁂𑀦. 𑀅𑀦𑀦𑀼𑀪𑀽𑀢𑀸𑀭𑀫𑁆𑀫𑀡𑀯𑀲𑁂𑀦𑀸𑀢𑀺 ‘‘𑀇𑀤𑀁 𑀦𑀸𑀫𑁂𑀢’’𑀦𑁆𑀢𑀺 𑀯𑀢𑁆𑀣𑀼𑀯𑀲𑁂𑀦 𑀉𑀢𑁆𑀯𑀸 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀅𑀦𑀦𑀼𑀪𑀽𑀢𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀯𑀲𑁂𑀦. 𑀭𑀽𑀧𑀲𑀤𑁆𑀤𑀸𑀤𑀺𑀪𑁂𑀤𑀁 𑀧𑀦 𑀆𑀭𑀫𑁆𑀫𑀡𑀁 𑀏𑀓𑀲𑁆𑀫𑀺𑀫𑁆𑀧𑀺 𑀅𑀢𑁆𑀢𑀪𑀸𑀯𑁂 𑀅𑀦𑀦𑀼𑀪𑀽𑀢𑀁 𑀦𑀸𑀫 𑀦𑀢𑁆𑀣𑁂𑀯, 𑀓𑀺𑀫𑀗𑁆𑀕𑀁 𑀧𑀦 𑀅𑀦𑀸𑀤𑀺𑀫𑀢𑀺 𑀲𑀁𑀲𑀸𑀭𑁂.

𑀬𑀁 𑀯𑀼𑀢𑁆𑀢𑀁 𑁋 ‘‘𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀘𑀸’’𑀢𑀺𑀆𑀤𑀺, 𑀢𑀁 𑀅𑀢𑀺𑀲𑀁𑀔𑀺𑀢𑁆𑀢𑀦𑁆𑀢𑀺 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 𑁋 ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀪𑀯𑀕𑁆𑀕𑀳𑀡𑁂𑀦 𑀫𑀳𑀕𑁆𑀕𑀢𑀪𑀯𑁄 𑀕𑀳𑀺𑀢𑁄. 𑀲𑁄 𑀳𑀺 𑀑𑀴𑀸𑀭𑀺𑀓𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑀭𑀳𑀺𑀢𑁄. 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑀸𑀤𑀺𑀓𑀸𑀮𑁂 𑀧𑀸𑀭𑀺𑀯𑀸𑀲𑀺𑀓𑀓𑀸𑀮𑁂 𑀘 𑀘𑀭𑀺𑀢𑀩𑁆𑀩𑀸𑀦𑀺 𑀤𑁆𑀯𑁂𑀅𑀲𑀻𑀢𑀺 𑀔𑀼𑀤𑁆𑀤𑀓𑀯𑀢𑁆𑀢𑀸𑀦𑀺 𑀦𑀸𑀫. 𑀦 𑀳𑀺 𑀢𑀸𑀦𑀺 𑀲𑀩𑁆𑀩𑀸𑀲𑀼 𑀅𑀯𑀢𑁆𑀣𑀸𑀲𑀼 𑀘𑀭𑀺𑀢𑀩𑁆𑀩𑀸𑀦𑀺, 𑀢𑀲𑁆𑀫𑀸 𑀢𑀸𑀦𑀺 𑀦 𑀫𑀳𑀸𑀯𑀢𑁆𑀢𑁂𑀲𑀼 𑀅𑀦𑁆𑀢𑁄𑀕𑀥𑀸𑀦𑀻𑀢𑀺 ‘‘𑀘𑀼𑀤𑁆𑀤𑀲 𑀫𑀳𑀸𑀯𑀢𑁆𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀆𑀕𑀦𑁆𑀢𑀼𑀓𑀯𑀢𑁆𑀢𑀆𑀯𑀸𑀲𑀺𑀓𑀕𑀫𑀺𑀓-𑀅𑀦𑀼𑀫𑁄𑀤𑀦𑀪𑀢𑁆𑀢𑀕𑁆𑀕- 𑀧𑀺𑀡𑁆𑀟𑀘𑀸𑀭𑀺𑀓𑀆𑀭𑀜𑁆𑀜𑀓𑀲𑁂𑀦𑀸𑀲𑀦𑀚𑀦𑁆𑀢𑀸𑀖𑀭𑀯𑀘𑁆𑀘𑀓𑀼𑀝𑀺𑀉𑀧𑀚𑁆𑀛𑀸𑀬- 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀆𑀘𑀭𑀺𑀬-𑀅𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀸𑀦𑀻𑀢𑀺 ¶ 𑀏𑀢𑀸𑀦𑀺 𑀘𑀼𑀤𑁆𑀤𑀲 𑀫𑀳𑀸𑀯𑀢𑁆𑀢𑀸𑀦𑀺 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁. 𑀇𑀢𑀭𑀸𑀦𑀺 𑀧𑀦 ‘‘𑀧𑀸𑀭𑀺𑀯𑀸𑀲𑀺𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀯𑀢𑁆𑀢𑀁 𑀧𑀜𑁆𑀜𑀸𑀧𑁂𑀲𑁆𑀲𑀸𑀫𑀻’’𑀢𑀺 (𑀘𑀽𑀴𑀯. 𑁭𑁫) 𑀆𑀭𑀪𑀺𑀢𑁆𑀯𑀸 ‘‘𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁, 𑀦 𑀙𑀫𑀸𑀬𑀁 𑀘𑀗𑁆𑀓𑀫𑀦𑁆𑀢𑁂 𑀘𑀗𑁆𑀓𑀫𑁂 𑀘𑀗𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺 (𑀘𑀽𑀴𑀯. 𑁮𑁧) 𑀯𑀼𑀢𑁆𑀢𑀸𑀦𑀺 𑀧𑀓𑀢𑀢𑁆𑀢𑁂 𑀘𑀭𑀺𑀢𑀩𑁆𑀩𑀯𑀢𑁆𑀢𑀸𑀦𑀺 𑀙𑀲𑀝𑁆𑀞𑀺, 𑀢𑀢𑁄 𑀧𑀭𑀁 ‘‘𑀦, 𑀪𑀺𑀓𑁆𑀔𑀯𑁂, 𑀧𑀸𑀭𑀺𑀯𑀸𑀲𑀺𑀓𑁂𑀦 𑀪𑀺𑀓𑁆𑀔𑀼𑀦𑀸 𑀧𑀸𑀭𑀺𑀯𑀸𑀲𑀺𑀓𑀯𑀼𑀟𑁆𑀠𑀢𑀭𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁, 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑁂𑀦, 𑀫𑀸𑀦𑀢𑁆𑀢𑀸𑀭𑀳𑁂𑀦, 𑀫𑀸𑀦𑀢𑁆𑀢𑀘𑀸𑀭𑀺𑀓𑁂𑀦, 𑀅𑀩𑁆𑀪𑀸𑀦𑀸𑀭𑀳𑁂𑀦 𑀪𑀺𑀓𑁆𑀔𑀼𑀦𑀸 𑀲𑀤𑁆𑀤𑀺𑀁 𑀏𑀓𑀘𑁆𑀙𑀦𑁆𑀦𑁂 𑀆𑀯𑀸𑀲𑁂 𑀯𑀢𑁆𑀣𑀩𑁆𑀩’’𑀦𑁆𑀢𑀺𑀆𑀤𑀻𑀦𑀺 𑀧𑀓𑀢𑀢𑁆𑀢𑁂 𑀘𑀭𑀺𑀢𑀩𑁆𑀩𑁂𑀳𑀺 𑀅𑀦𑀜𑁆𑀜𑀢𑁆𑀢𑀸 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀕𑀡𑁂𑀢𑁆𑀯𑀸 𑀧𑀸𑀭𑀺𑀯𑀸𑀲𑀺𑀓𑀯𑀼𑀟𑁆𑀠𑀢𑀭𑀸𑀤𑀻𑀲𑀼 𑀧𑀼𑀕𑁆𑀕𑀮𑀦𑁆𑀢𑀭𑁂𑀲𑀼 𑀘𑀭𑀺𑀢𑀩𑁆𑀩𑀢𑁆𑀢𑀸 ¶ 𑀢𑁂𑀲𑀁 𑀯𑀲𑁂𑀦 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀏𑀓𑁂𑀓𑀁 𑀓𑀢𑁆𑀯𑀸 𑀕𑀡𑀺𑀢𑀸𑀦𑀺 𑀧𑀜𑁆𑀘𑀸𑀢𑀺 𑀏𑀓𑀲𑀢𑁆𑀢𑀢𑀺𑀯𑀢𑁆𑀢𑀸𑀦𑀺. 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑀯𑀢𑁆𑀢𑁂𑀲𑀼 𑀯𑀢𑁆𑀢𑀧𑀜𑁆𑀜𑀸𑀧𑀦𑀯𑀲𑁂𑀦 𑀯𑀼𑀢𑁆𑀢𑀁 𑁋 ‘‘𑀦 𑀧𑀓𑀢𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀪𑀺𑀯𑀸𑀤𑀦𑀁 𑀧𑀘𑁆𑀘𑀼𑀝𑁆𑀞𑀸𑀦𑀁…𑀧𑁂… 𑀧𑀺𑀝𑁆𑀞𑀺𑀧𑀭𑀺𑀓𑀫𑁆𑀫𑀁 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 𑀇𑀤𑀁 𑀅𑀪𑀺𑀯𑀸𑀤𑀦𑀸𑀤𑀻𑀦𑀁 𑀅𑀲𑁆𑀲𑀸𑀤𑀺𑀬𑀦𑀁 𑀏𑀓𑀁, ‘‘𑀦 𑀧𑀓𑀢𑀢𑁆𑀢𑁄 𑀪𑀺𑀓𑁆𑀔𑀼 𑀲𑀻𑀮𑀯𑀺𑀧𑀢𑁆𑀢𑀺𑀬𑀸 𑀅𑀦𑀼𑀤𑁆𑀥𑀁𑀲𑁂𑀢𑀩𑁆𑀩𑁄’’𑀢𑀺𑀆𑀤𑀻𑀦𑀺 (𑀘𑀽𑀴𑀯. 𑁫𑁧) 𑀘 𑀤𑀲𑀸𑀢𑀺 𑀏𑀯𑀁 𑀤𑁆𑀯𑀸𑀲𑀻𑀢𑀺 𑀳𑁄𑀦𑁆𑀢𑀺. 𑀏𑀢𑁂𑀲𑁆𑀯𑁂𑀯 𑀧𑀦 𑀓𑀸𑀦𑀺𑀘𑀺 𑀢𑀚𑁆𑀚𑀦𑀻𑀬𑀓𑀫𑁆𑀫𑀓𑀢𑀸𑀤𑀺𑀯𑀢𑁆𑀢𑀸𑀦𑀺 𑀓𑀸𑀦𑀺𑀘𑀺 𑀧𑀸𑀭𑀺𑀯𑀸𑀲𑀺𑀓𑀸𑀤𑀺𑀯𑀢𑁆𑀢𑀸𑀦𑀻𑀢𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀤𑁆𑀯𑀸𑀯𑀻𑀲𑀢𑀺𑀯𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀘𑀼𑀤𑁆𑀤𑀲 𑀫𑀳𑀸𑀯𑀢𑁆𑀢𑀸𑀦𑀻’’𑀢𑀺 𑀯𑀢𑁆𑀯𑀸𑀧𑀺 ‘‘𑀆𑀕𑀦𑁆𑀢𑀼𑀓𑀕𑀫𑀺𑀓𑀯𑀢𑁆𑀢𑀸𑀦𑀺 𑀘𑀸’’𑀢𑀺 𑀇𑀫𑁂𑀲𑀁 𑀯𑀺𑀲𑀼𑀁 𑀕𑀳𑀡𑀁 𑀇𑀫𑀸𑀦𑀺 𑀅𑀪𑀺𑀡𑁆𑀳𑀁 𑀲𑀫𑁆𑀪𑀯𑀦𑁆𑀢𑀻𑀢𑀺 𑀓𑀢𑁆𑀯𑀸. 𑀓𑀺𑀮𑁂𑀲𑁄 𑀑𑀓𑀸𑀲𑀁 𑀦 𑀮𑀪𑀢𑀺 𑀲𑀩𑁆𑀩𑀤𑀸 𑀯𑀢𑁆𑀢𑀧𑁆𑀧𑀝𑀺𑀧𑀢𑁆𑀢𑀺𑀬𑀁𑀬𑁂𑀯 𑀩𑁆𑀬𑀸𑀯𑀝𑀘𑀺𑀢𑁆𑀢𑀢𑀸𑀬. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀦𑁆𑀢𑀺 𑀅𑀦𑀺𑀘𑁆𑀘𑀸𑀤𑀻𑀲𑀼 ‘‘𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀁 𑀅𑀦𑀼𑀧𑀸𑀬𑀫𑀦𑀲𑀺𑀓𑀸𑀭𑀁. 𑀲𑀢𑀺𑀯𑁄𑀲𑁆𑀲𑀕𑁆𑀕𑀦𑁆𑀢𑀺 𑀲𑀢𑀺𑀬𑀸 𑀯𑀺𑀲𑁆𑀲𑀚𑁆𑀚𑀦𑀁, 𑀲𑀢𑀺𑀯𑀺𑀭𑀳𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀫𑁆𑀧𑀻𑀢𑀺 𑀯𑀓𑁆𑀔𑀫𑀸𑀦𑀸𑀧𑁂𑀓𑁆𑀔𑀸𑀬 𑀅𑀯𑀼𑀢𑁆𑀢𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 𑀧𑀺-𑀲𑀤𑁆𑀤𑁄.

𑀅𑀦𑀼𑀲𑀦𑁆𑀥𑀺𑀯𑀲𑁂𑀦𑀸𑀢𑀺 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀆𑀤𑀺𑀅𑀦𑀼𑀲𑀦𑁆𑀥𑀺𑀯𑀲𑁂𑀦. 𑀧𑀼𑀩𑁆𑀩𑀸𑀧𑀭𑀯𑀲𑁂𑀦𑀸𑀢𑀺 𑀧𑀼𑀩𑁆𑀩𑀸𑀧𑀭𑀕𑀦𑁆𑀣𑀲𑀮𑁆𑀮𑀓𑁆𑀔𑀡𑀯𑀲𑁂𑀦. 𑀕𑀡𑁆𑀳𑀦𑁆𑀢𑀲𑁆𑀲𑀸𑀢𑀺 𑀆𑀘𑀭𑀺𑀬𑀫𑀼𑀔𑀢𑁄 𑀕𑀡𑁆𑀳𑀦𑁆𑀢𑀲𑁆𑀲. 𑀲𑀚𑁆𑀛𑀸𑀬𑀦𑁆𑀢𑀲𑁆𑀲𑀸𑀢𑀺 𑀆𑀘𑀭𑀺𑀬𑀫𑀼𑀔𑀢𑁄 𑀉𑀕𑁆𑀕𑀳𑀺𑀢𑀕𑀦𑁆𑀣𑀁 𑀲𑀚𑁆𑀛𑀸𑀬𑀦𑁆𑀢𑀲𑁆𑀲. 𑀯𑀸𑀘𑁂𑀦𑁆𑀢𑀲𑁆𑀲𑀸𑀢𑀺 𑀧𑀸𑀴𑀺𑀁 𑀢𑀤𑀢𑁆𑀣𑀜𑁆𑀘 𑀉𑀕𑁆𑀕𑀡𑁆𑀳𑀸𑀧𑀦𑀯𑀲𑁂𑀦 𑀧𑀭𑁂𑀲𑀁 𑀯𑀸𑀘𑁂𑀦𑁆𑀢𑀲𑁆𑀲. 𑀤𑁂𑀲𑁂𑀦𑁆𑀢𑀲𑁆𑀲𑀸𑀢𑀺 𑀤𑁂𑀲𑀦𑀸𑀯𑀲𑁂𑀦 𑀧𑀭𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲. 𑀧𑀓𑀸𑀲𑁂𑀦𑁆𑀢𑀲𑁆𑀲𑀸𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀲𑀁𑀲𑀬𑀝𑁆𑀞𑀸𑀦𑁂 𑀧𑀼𑀘𑁆𑀙𑀦𑁆𑀢𑀸𑀦𑀁 𑀬𑀸𑀣𑀸𑀯𑀢𑁄 𑀅𑀢𑁆𑀣𑀁 𑀧𑀓𑀸𑀲𑁂𑀦𑁆𑀢𑀲𑁆𑀲. 𑀓𑀺𑀮𑁂𑀲𑁄 𑀑𑀓𑀸𑀲𑀁 𑀦 𑀮𑀪𑀢𑀺 𑀭𑀢𑁆𑀢𑀺𑀦𑁆𑀤𑀺𑀯𑀁 𑀕𑀦𑁆𑀣𑀓𑀫𑁆𑀫𑁂𑀲𑀼𑀬𑁂𑀯 𑀩𑁆𑀬𑀸𑀯𑀝𑀘𑀺𑀢𑁆𑀢𑀢𑀸𑀬. 𑀏𑀯𑀫𑁆𑀧𑀻𑀢𑀺 𑀯𑀼𑀢𑁆𑀢𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 𑀧𑀺-𑀲𑀤𑁆𑀤𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺.

𑀥𑀼𑀢𑀗𑁆𑀕𑀥𑀭𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀓𑀸𑀲𑁂𑀢𑀺 ‘‘𑀢𑁂𑀭𑀲 𑀥𑀼𑀢𑀗𑁆𑀕𑀕𑀼𑀡𑁂 𑀲𑀫𑀸𑀤𑀸𑀬 𑀯𑀢𑁆𑀢𑀢𑀻’’𑀢𑀺. 𑀩𑀸𑀳𑀼𑀮𑁆𑀮𑀸𑀬𑀸𑀢𑀺 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀩𑀸𑀳𑀼𑀮𑁆𑀮𑀸𑀬. 𑀬𑀣𑀸 𑀘𑀻𑀯𑀭𑀸𑀤𑀬𑁄 𑀧𑀘𑁆𑀘𑀬𑀸 𑀩𑀳𑀼𑀮𑀁 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀣𑀸 𑀆𑀯𑀢𑁆𑀢𑀲𑁆𑀲 ¶ 𑀧𑀯𑀢𑁆𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀳𑀻𑀦𑀚𑁆𑀛𑀸𑀦𑀲𑁆𑀲𑀸𑀢𑀺 𑀛𑀸𑀦𑀦𑁆𑀢𑀭𑀸𑀬𑀓𑀭𑁂𑀦 𑀯𑀺𑀲𑀪𑀸𑀕𑀭𑀽𑀧𑀤𑀲𑁆𑀲𑀦𑀸𑀤𑀺𑀦𑀸 𑀓𑁂𑀦𑀘𑀺 𑀦𑀺𑀫𑀺𑀢𑁆𑀢𑁂𑀦 𑀧𑀭𑀺𑀳𑀻𑀦𑀚𑁆𑀛𑀸𑀦𑀲𑁆𑀲. 𑀯𑀺𑀲𑁆𑀲𑀝𑁆𑀞𑀚𑁆𑀛𑀸𑀦𑀲𑁆𑀲𑀸𑀢𑀺 𑀅𑀲𑀫𑀸𑀧𑀚𑁆𑀚𑀦𑀯𑀲𑁂𑀦 𑀧𑀭𑀺𑀘𑁆𑀘𑀢𑁆𑀢𑀚𑁆𑀛𑀸𑀦𑀲𑁆𑀲. 𑀪𑀲𑁆𑀲𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀕𑀡𑀲𑀗𑁆𑀕𑀡𑀺𑀓𑀦𑀺𑀤𑁆𑀤𑀸𑀦𑀯𑀓𑀫𑁆𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀢𑁆𑀢𑀲𑀼 𑀯𑀸 𑀅𑀦𑀼𑀧𑀲𑁆𑀲𑀦𑀸𑀲𑀽𑀢𑀺 𑀏𑀢𑁆𑀣 𑀲𑀢𑁆𑀢 𑀅𑀦𑀼𑀧𑀲𑁆𑀲𑀦𑀸 𑀦𑀸𑀫 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀦𑀸 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸 ¶ 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸 𑀔𑀬𑀸𑀦𑀼𑀧𑀲𑁆𑀲𑀦𑀸 𑀯𑀬𑀸𑀦𑀼𑀧𑀲𑁆𑀲𑀦𑀸 𑀯𑀺𑀧𑀭𑀺𑀡𑀸𑀫𑀸𑀦𑀼𑀧𑀲𑁆𑀲𑀦𑀸 𑀅𑀦𑀺𑀫𑀺𑀢𑁆𑀢𑀸𑀦𑀼𑀧𑀲𑁆𑀲𑀦𑀸 𑀅𑀧𑁆𑀧𑀡𑀺𑀳𑀺𑀢𑀸𑀦𑀼𑀧𑀲𑁆𑀲𑀦𑀸 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸 𑀬𑀣𑀸𑀪𑀽𑀢𑀜𑀸𑀡𑀤𑀲𑁆𑀲𑀦𑀁 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀸 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸 𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀸𑀢𑀺 𑀇𑀫𑀸𑀲𑀼 𑀅𑀝𑁆𑀞𑀸𑀭𑀲𑀲𑀼 𑀫𑀳𑀸𑀯𑀺𑀧𑀲𑁆𑀲𑀦𑀸𑀲𑀼 𑀆𑀤𑀺𑀢𑁄 𑀯𑀼𑀢𑁆𑀢𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀤𑀺-𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸𑀧𑀭𑀺𑀬𑀦𑁆𑀢𑀸 𑀲𑀢𑁆𑀢. 𑀏𑀢𑁆𑀣 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀲𑀁𑀯𑀡𑁆𑀡𑀦𑀸𑀢𑁄 (𑀯𑀺𑀲𑀼𑀤𑁆𑀥𑀺. 𑀫𑀳𑀸𑀝𑀻. 𑁨.𑁭𑁪𑁧) 𑀕𑀳𑁂𑀢𑀩𑁆𑀩𑀁.

𑀅𑀦𑀸𑀲𑁂𑀯𑀦𑀢𑀸𑀬𑀸𑀢𑀺 𑀧𑀼𑀭𑀺𑀫𑀢𑁆𑀢𑀪𑀸𑀯𑁂 𑀛𑀸𑀦𑁂𑀦 𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀆𑀲𑁂𑀯𑀦𑀸𑀬 𑀅𑀪𑀸𑀯𑀢𑁄. 𑀅𑀦𑀦𑀼𑀪𑀽𑀢𑀧𑀼𑀩𑁆𑀩𑀦𑁆𑀢𑀺 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀅𑀦𑀦𑀼𑀪𑀽𑀢𑀧𑀼𑀩𑁆𑀩𑀁. 𑀚𑀸𑀢𑁄𑀢𑀺 𑀏𑀢𑀲𑁆𑀲𑁂𑀯 𑀯𑁂𑀯𑀘𑀦𑀁 𑀲𑀜𑁆𑀚𑀸𑀢𑁄𑀢𑀺𑀆𑀤𑀺. 𑀦𑀦𑀼 𑀘 𑀔𑀡𑀺𑀓𑀢𑁆𑀢𑀸 𑀲𑀩𑁆𑀩𑀥𑀫𑁆𑀫𑀸𑀦𑀁 𑀉𑀧𑁆𑀧𑀦𑁆𑀦𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀢𑀗𑁆𑀔𑀡𑀁𑀬𑁂𑀯 𑀅𑀯𑀲𑁆𑀲𑀁 𑀦𑀺𑀭𑁄𑀥𑀲𑀫𑁆𑀪𑀯𑀢𑁄 𑀦𑀺𑀭𑀼𑀤𑁆𑀥𑁂 𑀘 𑀢𑀲𑁆𑀫𑀺𑀁 𑀧𑀼𑀦 𑀅𑀜𑁆𑀜𑀲𑁆𑀲𑁂𑀯 𑀉𑀧𑁆𑀧𑀚𑁆𑀚𑀦𑀢𑁄 𑀘 𑀓𑀣𑀁 𑀢𑀲𑁆𑀲 𑀧𑀼𑀦𑀧𑁆𑀧𑀼𑀦𑀪𑀸𑀯𑁄 𑀭𑀸𑀲𑀺𑀪𑀸𑀯𑁄 𑀘𑀸𑀢𑀺 𑀆𑀳 𑁋 ‘‘𑀢𑀢𑁆𑀣 𑀲𑀓𑀺𑀁 𑀉𑀧𑁆𑀧𑀦𑁆𑀦𑁄 𑀓𑀸𑀫𑀘𑁆𑀙𑀦𑁆𑀤𑁄’’𑀢𑀺𑀆𑀤𑀺. 𑀅𑀝𑁆𑀞𑀸𑀦𑀫𑁂𑀢𑀦𑁆𑀢𑀺 𑀅𑀓𑀸𑀭𑀡𑀫𑁂𑀢𑀁. 𑀬𑁂𑀦 𑀓𑀸𑀭𑀡𑁂𑀦 𑀉𑀧𑁆𑀧𑀦𑁆𑀦𑁄 𑀓𑀸𑀫𑀘𑁆𑀙𑀦𑁆𑀤𑁄 𑀦 𑀦𑀺𑀭𑀼𑀚𑁆𑀛𑀢𑀺, 𑀦𑀺𑀭𑀼𑀤𑁆𑀥𑁄 𑀘 𑀲𑁆𑀯𑁂𑀯 𑀧𑀼𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀢𑀸𑀤𑀺𑀲𑀁 𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀅𑀢𑁆𑀣𑁄.

𑀭𑀸𑀕𑀝𑁆𑀞𑀸𑀦𑀺𑀬𑀦𑁆𑀢𑀺 𑀭𑀸𑀕𑀚𑀦𑀓𑀁. 𑀅𑀦𑀺𑀘𑁆𑀘𑀸𑀤𑀻𑀲𑀼 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀧𑀭𑀻𑀢𑀫𑀦𑀲𑀺𑀓𑀸𑀭𑁄, 𑀇𑀥 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄𑀢𑀺 𑀆𑀳 𑁋 ‘‘𑀅𑀦𑀺𑀘𑁆𑀘𑁂 𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺. 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄𑀢𑀺 𑀅𑀦𑀼𑀧𑀸𑀬𑀫𑀦𑀲𑀺𑀓𑀸𑀭𑁄, 𑀓𑀼𑀲𑀮𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀅𑀓𑀸𑀭𑀡𑀪𑀽𑀢𑁄 𑀫𑀦𑀲𑀺𑀓𑀸𑀭𑁄𑀢𑀺 𑀅𑀢𑁆𑀣𑁄. 𑀉𑀧𑁆𑀧𑀣𑀫𑀦𑀲𑀺𑀓𑀸𑀭𑁄𑀢𑀺 𑀓𑀼𑀲𑀮𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀅𑀫𑀕𑁆𑀕𑀪𑀽𑀢𑁄 𑀫𑀦𑀲𑀺𑀓𑀸𑀭𑁄. 𑀲𑀘𑁆𑀘𑀯𑀺𑀧𑁆𑀧𑀝𑀺𑀓𑀽𑀮𑁂𑀦𑀸𑀢𑀺 𑀲𑀘𑁆𑀘𑀸𑀪𑀺𑀲𑀫𑀬𑀲𑁆𑀲 𑀅𑀦𑀼𑀦𑀼𑀮𑁄𑀫𑀯𑀲𑁂𑀦. 𑀆𑀯𑀚𑁆𑀚𑀦𑀸𑀢𑀺𑀆𑀤𑀺𑀦𑀸 𑀆𑀯𑀚𑁆𑀚𑀦𑀸𑀬 𑀧𑀘𑁆𑀘𑀬𑀪𑀽𑀢𑀸 𑀢𑀢𑁄 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀸 𑀫𑀦𑁄𑀤𑁆𑀯𑀸𑀭𑀺𑀓𑀸 𑀅𑀓𑀼𑀲𑀮𑀚𑀯𑀦𑀧𑁆𑀧𑀯𑀢𑁆𑀢𑀺 𑀨𑀮𑀯𑁄𑀳𑀸𑀭𑁂𑀦 𑀢𑀣𑀸 𑀯𑀼𑀢𑁆𑀢𑀸. 𑀢𑀲𑁆𑀲 𑀳𑀺 𑀯𑀲𑁂𑀦 𑀲𑀸 𑀅𑀓𑀼𑀲𑀮𑀧𑁆𑀧𑀯𑀢𑁆𑀢𑀺𑀬𑀸 𑀉𑀧𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀆𑀯𑀚𑁆𑀚𑀦𑀸𑀢𑀺 𑀪𑀯𑀗𑁆𑀕𑀘𑀺𑀢𑁆𑀢𑀁 𑀆𑀯𑀚𑁆𑀚𑀬𑀢𑀻𑀢𑀺 𑀆𑀯𑀚𑁆𑀚𑀦𑀸. 𑀅𑀦𑀼 𑀅𑀦𑀼 𑀆𑀯𑀚𑁆𑀚𑁂𑀢𑀻𑀢𑀺 𑀅𑀦𑁆𑀯𑀸𑀯𑀚𑁆𑀚𑀦𑀸. 𑀪𑀯𑀗𑁆𑀕𑀸𑀭𑀫𑁆𑀫𑀡𑀢𑁄 𑀅𑀜𑁆𑀜𑀁 𑀆𑀪𑀼𑀚𑀢𑀻𑀢𑀺 𑀆𑀪𑁄𑀕𑁄. 𑀲𑀫𑀦𑁆𑀦𑀸𑀳𑀭𑀢𑀻𑀢𑀺 𑀲𑀫𑀦𑁆𑀦𑀸𑀳𑀸𑀭𑁄. 𑀢𑀤𑁂𑀯𑀸𑀭𑀫𑁆𑀫𑀡𑀁 𑀅𑀢𑁆𑀢𑀸𑀦𑀁 𑀅𑀦𑀼𑀩𑀦𑁆𑀥𑀺𑀢𑁆𑀯𑀸 𑀉𑀧𑁆𑀧𑀚𑁆𑀚𑀫𑀸𑀦𑁄 𑀫𑀦𑀲𑀺 𑀓𑀭𑁄𑀢𑀺 𑀞𑀧𑁂𑀢𑀻𑀢𑀺 𑀫𑀦𑀲𑀺𑀓𑀸𑀭𑁄. 𑀅𑀬𑀁 𑀯𑀼𑀘𑁆𑀘𑀢𑀺 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄𑀢𑀺 𑀅𑀬𑀁 𑀅𑀦𑀼𑀧𑀸𑀬𑀉𑀧𑁆𑀧𑀣𑀫𑀦𑀲𑀺𑀓𑀸𑀭𑀮𑀓𑁆𑀔𑀡𑁄 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀦𑀸𑀫 𑀯𑀼𑀘𑁆𑀘𑀢𑀺.

𑁧𑁨. 𑀤𑀼𑀢𑀺𑀬𑁂 ¶ ¶ 𑀪𑀢𑁆𑀢𑀩𑁆𑀬𑀸𑀧𑀢𑁆𑀢𑀺 𑀯𑀺𑀬𑀸𑀢𑀺 𑀪𑀢𑁆𑀢𑀲𑁆𑀲 𑀧𑀽𑀢𑀺𑀪𑀸𑀯𑁂𑀦 𑀯𑀺𑀧𑁆𑀧𑀓𑀸𑀭𑀧𑁆𑀧𑀢𑁆𑀢𑀺 𑀯𑀺𑀬, 𑀘𑀺𑀢𑁆𑀢𑀲𑁆𑀲 𑀩𑁆𑀬𑀸𑀧𑀚𑁆𑀚𑀦𑀦𑁆𑀢𑀺 𑀘𑀺𑀢𑁆𑀢𑀲𑁆𑀲 𑀯𑀺𑀓𑀸𑀭𑀪𑀸𑀯𑀸𑀧𑀸𑀤𑀦𑀁. 𑀢𑁂𑀦𑁂𑀯𑀸𑀳 𑁋 ‘‘𑀧𑀓𑀢𑀺𑀯𑀺𑀚𑀳𑀦𑀪𑀸𑀯𑁄’’𑀢𑀺. 𑀩𑁆𑀬𑀸𑀧𑀚𑁆𑀚𑀢𑀺 𑀢𑁂𑀦 𑀘𑀺𑀢𑁆𑀢𑀁 𑀧𑀽𑀢𑀺𑀓𑀼𑀫𑁆𑀫𑀸𑀲𑀸𑀤𑀬𑁄 𑀯𑀺𑀬 𑀧𑀼𑀭𑀺𑀫𑀧𑀓𑀢𑀺𑀁 𑀚𑀳𑀢𑀻𑀢𑀺 𑀩𑁆𑀬𑀸𑀧𑀸𑀤𑁄. 𑀧𑀝𑀺𑀖𑁄𑀬𑁂𑀯 𑀉𑀧𑀭𑀽𑀧𑀭𑀺 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀧𑀝𑀺𑀖𑀲𑁆𑀲 𑀦𑀺𑀫𑀺𑀢𑁆𑀢𑀪𑀸𑀯𑀢𑁄 𑀧𑀝𑀺𑀖𑀦𑀺𑀫𑀺𑀢𑁆𑀢𑀁, 𑀧𑀝𑀺𑀖𑀲𑁆𑀲 𑀘 𑀓𑀸𑀭𑀡𑀪𑀽𑀢𑀁 𑀆𑀭𑀫𑁆𑀫𑀡𑀁 𑀧𑀝𑀺𑀖𑀦𑀺𑀫𑀺𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀧𑀝𑀺𑀖𑀲𑁆𑀲𑀧𑀺 𑀧𑀝𑀺𑀖𑀸𑀭𑀫𑁆𑀫𑀡𑀲𑁆𑀲𑀧𑀺 𑀏𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀁.

𑁧𑁩. 𑀢𑀢𑀺𑀬𑁂 𑀣𑀺𑀦𑀢𑀸 𑀣𑀺𑀦𑀁, 𑀲𑀧𑁆𑀧𑀺𑀧𑀺𑀡𑁆𑀟𑁄 𑀯𑀺𑀬 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀬 𑀘𑀺𑀢𑁆𑀢𑀲𑁆𑀲 𑀖𑀦𑀪𑀸𑀯𑁄 𑀩𑀤𑁆𑀥𑀢𑀸𑀢𑀺 𑀅𑀢𑁆𑀣𑁄. 𑀫𑁂𑀥𑀢𑀻𑀢𑀺 𑀫𑀺𑀤𑁆𑀥𑀁, 𑀅𑀓𑀫𑁆𑀫𑀜𑁆𑀜𑀪𑀸𑀯𑁂𑀦 𑀳𑀺𑀁𑀲𑀢𑀻𑀢𑀺 𑀅𑀢𑁆𑀣𑁄. ‘‘𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀬𑀢𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁧𑁬𑁨) 𑀣𑀺𑀦𑀲𑁆𑀲, ‘‘𑀬𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀓𑀸𑀬𑀲𑁆𑀲 𑀅𑀓𑀮𑁆𑀬𑀢𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁧𑁬𑁩) 𑀘 𑀫𑀺𑀤𑁆𑀥𑀲𑁆𑀲 𑀅𑀪𑀺𑀥𑀫𑁆𑀫𑁂 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀯𑀼𑀢𑁆𑀢𑀁 𑁋 ‘‘𑀘𑀺𑀢𑁆𑀢𑀲𑁆𑀲 𑀅𑀓𑀫𑁆𑀫𑀜𑁆𑀜𑀢𑀸 𑀣𑀺𑀦𑀁, 𑀢𑀺𑀡𑁆𑀡𑀁 𑀔𑀦𑁆𑀥𑀸𑀦𑀁 𑀅𑀓𑀫𑁆𑀫𑀜𑁆𑀜𑀢𑀸 𑀫𑀺𑀤𑁆𑀥’’𑀦𑁆𑀢𑀺. 𑀲𑀢𑀺𑀧𑀺 𑀅𑀜𑁆𑀜𑀫𑀜𑁆𑀜𑀸𑀯𑀺𑀧𑁆𑀧𑀬𑁄𑀕𑁂 𑀘𑀺𑀢𑁆𑀢𑀓𑀸𑀬𑀮𑀳𑀼𑀢𑀸𑀤𑀻𑀦𑀁 𑀯𑀺𑀬 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀬𑀣𑀸𑀓𑁆𑀓𑀫𑀁 𑀢𑀁𑀢𑀁𑀯𑀺𑀲𑁂𑀲𑁄 𑀲𑀺𑀬𑀸, 𑀬𑀸 𑀢𑁂𑀲𑀁 𑀅𑀓𑀮𑁆𑀬𑀢𑀸𑀤𑀻𑀦𑀁 𑀯𑀺𑀲𑁂𑀲𑀧𑀘𑁆𑀘𑀬𑀢𑀸, 𑀅𑀬𑀫𑁂𑀢𑁂𑀲𑀁 𑀲𑀪𑀸𑀯𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀧𑀺𑀫𑀺𑀤𑁆𑀥𑀲𑁆𑀲𑀸𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀺 ‘‘𑀧𑀘𑀮𑀸𑀬𑀺𑀓𑀪𑀸𑀯𑀲𑁆𑀲𑀸’’𑀢𑀺. 𑀅𑀓𑁆𑀔𑀺𑀤𑀮𑀸𑀦𑀁 𑀧𑀘𑀮𑀪𑀸𑀯𑀁 𑀓𑀭𑁄𑀢𑀻𑀢𑀺 𑀧𑀘𑀮𑀸𑀬𑀺𑀓𑁄, 𑀧𑀘𑀮𑀸𑀬𑀺𑀓𑀲𑁆𑀲 𑀪𑀸𑀯𑁄 𑀧𑀘𑀮𑀸𑀬𑀺𑀓𑀪𑀸𑀯𑁄, 𑀧𑀘𑀮𑀸𑀬𑀺𑀓𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀪𑀺𑀦𑁆𑀦𑀦𑁆𑀢𑀺 𑀣𑀺𑀦𑀫𑀺𑀤𑁆𑀥𑀸𑀦𑀁. ‘‘𑀯𑀺𑀢𑁆𑀣𑀸𑀭𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀘𑀺𑀢𑁆𑀢𑀲𑁆𑀲 𑀅𑀓𑀮𑁆𑀬𑀢𑀸𑀢𑀺 𑀘𑀺𑀢𑁆𑀢𑀲𑁆𑀲 𑀕𑀺𑀮𑀸𑀦𑀪𑀸𑀯𑁄. 𑀕𑀺𑀮𑀸𑀦𑁄 𑀳𑀺 𑀅𑀓𑀮𑁆𑀬𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀦𑀬𑁂𑀧𑀺 𑀯𑀼𑀢𑁆𑀢𑀁 𑁋 ‘‘𑀦𑀸𑀳𑀁, 𑀪𑀦𑁆𑀢𑁂, 𑀅𑀓𑀮𑁆𑀬𑀓𑁄’’𑀢𑀺 (𑀧𑀸𑀭𑀸. 𑁧𑁫𑁧). 𑀓𑀸𑀮𑀁 𑀔𑀫𑀢𑀻𑀢𑀺 𑀳𑀺 𑀓𑀮𑁆𑀬𑀁, 𑀅𑀭𑁄𑀕𑀢𑀸, 𑀢𑀲𑁆𑀲𑀁 𑀦𑀺𑀬𑀼𑀢𑁆𑀢𑁄 𑀓𑀮𑁆𑀬𑀓𑁄, 𑀦 𑀓𑀮𑁆𑀬𑀓𑁄 𑀅𑀓𑀮𑁆𑀬𑀓𑁄. 𑀅𑀓𑀫𑁆𑀫𑀜𑁆𑀜𑀢𑀸𑀢𑀺 𑀘𑀺𑀢𑁆𑀢𑀕𑁂𑀮𑀜𑁆𑀜𑀲𑀗𑁆𑀔𑀸𑀢𑁄𑀯 𑀅𑀓𑀫𑁆𑀫𑀜𑁆𑀜𑀢𑀸𑀓𑀸𑀭𑁄. 𑀑𑀮𑀻𑀬𑀦𑀸𑀢𑀺 𑀑𑀮𑀻𑀬𑀦𑀸𑀓𑀸𑀭𑁄. 𑀇𑀭𑀺𑀬𑀸𑀧𑀣𑀽𑀧𑀢𑁆𑀣𑀫𑁆𑀪𑀺𑀢𑀜𑁆𑀳𑀺 𑀘𑀺𑀢𑁆𑀢𑀁 𑀇𑀭𑀺𑀬𑀸𑀧𑀣𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀁 𑀭𑀼𑀓𑁆𑀔𑁂 𑀯𑀕𑁆𑀕𑀼𑀮𑀺 𑀯𑀺𑀬 𑀔𑀻𑀮𑁂 𑀮𑀕𑁆𑀕𑀺𑀢𑀨𑀸𑀡𑀺𑀢𑀯𑀸𑀭𑀓𑁄 𑀯𑀺𑀬 𑀘 𑀑𑀮𑀻𑀬𑀢𑀺 𑀮𑀫𑁆𑀩𑀢𑀺, 𑀢𑀲𑁆𑀲 𑀢𑀁 𑀆𑀓𑀸𑀭𑀁 𑀲𑀦𑁆𑀥𑀸𑀬 𑁋 ‘‘𑀑𑀮𑀻𑀬𑀦𑀸’’𑀢𑀺 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀧𑀤𑀁 𑀉𑀧𑀲𑀕𑁆𑀕𑁂𑀦 𑀯𑀟𑁆𑀠𑀺𑀢𑀁. 𑀓𑀸𑀬𑀲𑁆𑀲𑀸𑀢𑀺 𑀯𑁂𑀤𑀦𑀸𑀤𑀺𑀓𑁆𑀔𑀦𑁆𑀥𑀢𑁆𑀢𑀬𑀲𑀗𑁆𑀔𑀸𑀢𑀲𑁆𑀲 𑀦𑀸𑀫𑀓𑀸𑀬𑀲𑁆𑀲. 𑀅𑀓𑀮𑁆𑀬𑀢𑀸 𑀅𑀓𑀫𑁆𑀫𑀜𑁆𑀜𑀢𑀸𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀫𑁂𑀖𑁄 𑀯𑀺𑀬 𑀆𑀓𑀸𑀲𑀁 𑀑𑀦𑀬𑁆𑀳𑀢𑀻𑀢𑀺 𑀑𑀦𑀸𑀳𑁄. 𑀑𑀦𑀬𑁆𑀳𑀢𑀻𑀢𑀺 𑀘 𑀙𑀸𑀤𑁂𑀢𑀺 𑀅𑀯𑀢𑁆𑀣𑀭𑀢𑀺 𑀯𑀸𑀢𑀺 𑀅𑀢𑁆𑀣𑁄 ¶ . 𑀲𑀩𑁆𑀩𑀢𑁄𑀪𑀸𑀕𑁂𑀦 𑀑𑀦𑀸𑀳𑁄𑀢𑀺 𑀧𑀭𑀺𑀬𑁄𑀦𑀸𑀳𑁄. 𑀅𑀭𑀢𑀺𑀆𑀤𑀻𑀦𑀁 𑀅𑀢𑁆𑀣𑁄 𑀯𑀺𑀪𑀗𑁆𑀕𑁂 (𑀯𑀺𑀪. 𑁮𑁫𑁬) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄𑀢𑀺 𑀢𑀢𑁆𑀣 𑀯𑀼𑀢𑁆𑀢𑀧𑀸𑀴𑀺𑀬𑀸 𑀤𑀲𑁆𑀲𑁂𑀢𑀼𑀁 𑁋 ‘‘𑀯𑀼𑀢𑁆𑀢𑀁 𑀳𑁂𑀢’’𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀧𑀦𑁆𑀢𑁂𑀲𑀽𑀢𑀺 𑀤𑀽𑀭𑁂𑀲𑀼, 𑀯𑀺𑀯𑀺𑀢𑁆𑀢𑁂𑀲𑀼 𑀯𑀸. 𑀅𑀥𑀺𑀓𑀼𑀲𑀮𑁂𑀲𑀽𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀥𑀫𑁆𑀫𑁂𑀲𑀼. 𑀅𑀭𑀢𑀻𑀢𑀺 𑀭𑀢𑀺𑀧𑁆𑀧𑀝𑀺𑀓𑁆𑀔𑁂𑀧𑁄. 𑀅𑀭𑀢𑀺𑀢𑀸𑀢𑀺 𑀅𑀭𑀫𑀦𑀸𑀓𑀸𑀭𑁄. 𑀅𑀦𑀪𑀺𑀭𑀢𑀻𑀢𑀺 𑀅𑀦𑀪𑀺𑀭𑀢𑀪𑀸𑀯𑁄. 𑀅𑀦𑀪𑀺𑀭𑀫𑀦𑀸𑀢𑀺 𑀅𑀦𑀪𑀺𑀭𑀫𑀦𑀸𑀓𑀸𑀭𑁄 ¶ . 𑀉𑀓𑁆𑀓𑀡𑁆𑀞𑀺𑀢𑀸𑀢𑀺 𑀉𑀓𑁆𑀓𑀡𑁆𑀞𑀦𑀸𑀓𑀸𑀭𑁄. 𑀧𑀭𑀺𑀢𑀲𑁆𑀲𑀺𑀢𑀸𑀢𑀺 𑀉𑀓𑁆𑀓𑀡𑁆𑀞𑀦𑀯𑀲𑁂𑀦𑁂𑀯 𑀧𑀭𑀺𑀢𑀲𑁆𑀲𑀦𑀸, 𑀉𑀓𑁆𑀓𑀡𑁆𑀞𑀺𑀢𑀲𑁆𑀲𑁂𑀯 𑀢𑀢𑁆𑀣 𑀢𑀢𑁆𑀣 𑀢𑀡𑁆𑀳𑀸𑀬𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀭𑀺𑀢𑀲𑁆𑀲𑀺𑀢𑀸𑀢𑀺 𑀯𑀸 𑀓𑀫𑁆𑀧𑀦𑀸. 𑀢𑀦𑁆𑀤𑀻𑀢𑀺 𑀚𑀸𑀢𑀺𑀆𑀮𑀲𑀺𑀬𑀁, 𑀧𑀓𑀢𑀺𑀆𑀮𑀲𑀺𑀬𑀦𑁆𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 𑀓𑀼𑀲𑀮𑀓𑀭𑀡𑁂 𑀓𑀸𑀬𑀲𑁆𑀲 𑀅𑀯𑀺𑀧𑁆𑀨𑀸𑀭𑀺𑀓𑀢𑀸 𑀮𑀻𑀦𑀢𑀸 𑀚𑀸𑀢𑀺𑀆𑀮𑀲𑀺𑀬𑀁 𑀢𑀦𑁆𑀤𑀻 𑀦𑀸𑀫, 𑀦 𑀭𑁄𑀕𑀉𑀢𑀼𑀚𑀸𑀤𑀻𑀳𑀺 𑀓𑀸𑀬𑀕𑁂𑀮𑀜𑁆𑀜𑀁. 𑀢𑀦𑁆𑀤𑀺𑀬𑀦𑀸𑀢𑀺 𑀢𑀦𑁆𑀤𑀺𑀬𑀦𑀸𑀓𑀸𑀭𑁄. 𑀢𑀦𑁆𑀤𑀺𑀫𑀦𑀢𑀸𑀢𑀺 𑀢𑀦𑁆𑀤𑀺𑀬𑀸 𑀅𑀪𑀺𑀪𑀽𑀢𑀘𑀺𑀢𑁆𑀢𑀢𑀸. 𑀅𑀮𑀲𑀲𑁆𑀲 𑀪𑀸𑀯𑁄 𑀆𑀮𑀲𑁆𑀬𑀁, 𑀆𑀮𑀲𑁆𑀬𑀸𑀬𑀦𑀸𑀓𑀸𑀭𑁄 𑀆𑀮𑀲𑁆𑀬𑀸𑀬𑀦𑀸. 𑀆𑀮𑀲𑁆𑀬𑀸𑀬𑀺𑀢𑀲𑁆𑀲 𑀪𑀸𑀯𑁄 𑀆𑀮𑀲𑁆𑀬𑀸𑀬𑀺𑀢𑀢𑁆𑀢𑀁. 𑀇𑀢𑀺 𑀲𑀩𑁆𑀩𑁂𑀳𑀺𑀧𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀓𑀺𑀮𑁂𑀲𑀯𑀲𑁂𑀦 𑀓𑀸𑀬𑀸𑀮𑀲𑀺𑀬𑀁 𑀓𑀣𑀺𑀢𑀁. 𑀣𑀺𑀦𑀫𑀺𑀤𑁆𑀥𑀓𑀸𑀭𑀡𑀸𑀦𑀜𑁆𑀳𑀺 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀦𑀁 𑀯𑀲𑁂𑀦 𑀦𑀸𑀫𑀓𑀸𑀬𑀲𑁆𑀲 𑀆𑀮𑀲𑀺𑀬𑀁, 𑀢𑀤𑁂𑀯 𑀭𑀽𑀧𑀓𑀸𑀬𑀲𑁆𑀲𑀸𑀧𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀚𑀫𑁆𑀪𑀦𑀸𑀢𑀺 𑀨𑀦𑁆𑀤𑀦𑀸. 𑀧𑀼𑀦𑀧𑁆𑀧𑀼𑀦𑀁 𑀚𑀫𑁆𑀪𑀦𑀸 𑀯𑀺𑀚𑀫𑁆𑀪𑀦𑀸. 𑀆𑀦𑀫𑀦𑀸𑀢𑀺 𑀧𑀼𑀭𑀢𑁄 𑀦𑀫𑀦𑀸. 𑀯𑀺𑀦𑀫𑀦𑀸𑀢𑀺 𑀧𑀘𑁆𑀙𑀢𑁄 𑀦𑀫𑀦𑀸. 𑀲𑀦𑁆𑀦𑀫𑀦𑀸𑀢𑀺 𑀲𑀫𑀦𑁆𑀢𑀢𑁄 𑀦𑀫𑀦𑀸. 𑀧𑀡𑀫𑀦𑀸𑀢𑀺 𑀬𑀣𑀸 𑀢𑀦𑁆𑀢𑀢𑁄 𑀉𑀝𑁆𑀞𑀺𑀢𑀧𑁂𑀲𑀓𑀸𑀭𑁄 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀕𑀳𑁂𑀢𑁆𑀯𑀸 𑀉𑀚𑀼𑀁 𑀓𑀸𑀬𑀁 𑀉𑀲𑁆𑀲𑀸𑀧𑁂𑀢𑀺, 𑀏𑀯𑀁 𑀓𑀸𑀬𑀲𑁆𑀲 𑀉𑀤𑁆𑀥𑀁 𑀞𑀧𑀦𑀸. 𑀩𑁆𑀬𑀸𑀥𑀺𑀬𑀓𑀦𑁆𑀢𑀺 𑀉𑀧𑁆𑀧𑀦𑁆𑀦𑀩𑁆𑀬𑀸𑀥𑀺𑀢𑀸. 𑀇𑀢𑀺 𑀲𑀩𑁆𑀩𑁂𑀳𑀺𑀧𑀺 𑀇𑀫𑁂𑀳𑀺 𑀧𑀤𑁂𑀳𑀺 𑀣𑀺𑀦𑀫𑀺𑀤𑁆𑀥𑀓𑀸𑀭𑀡𑀸𑀦𑀁 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀦𑀁 𑀯𑀲𑁂𑀦 𑀓𑀸𑀬𑀩𑀤𑁆𑀥𑀦𑀫𑁂𑀯 𑀓𑀣𑀺𑀢𑀁. 𑀪𑀼𑀢𑁆𑀢𑀸𑀯𑀺𑀲𑁆𑀲𑀸𑀢𑀺 𑀪𑀼𑀢𑁆𑀢𑀯𑀢𑁄. 𑀪𑀢𑁆𑀢𑀫𑀼𑀘𑁆𑀙𑀸𑀢𑀺 𑀪𑀢𑁆𑀢𑀕𑁂𑀮𑀜𑁆𑀜𑀁. 𑀩𑀮𑀯𑀪𑀢𑁆𑀢𑁂𑀦 𑀳𑀺 𑀫𑀼𑀘𑁆𑀙𑀸𑀧𑀢𑁆𑀢𑁄 𑀯𑀺𑀬 𑀳𑁄𑀢𑀺. 𑀪𑀢𑁆𑀢𑀓𑀺𑀮𑀫𑀣𑁄𑀢𑀺 𑀪𑀢𑁆𑀢𑁂𑀦 𑀓𑀺𑀮𑀦𑁆𑀢𑀪𑀸𑀯𑁄. 𑀪𑀢𑁆𑀢𑀧𑀭𑀺𑀴𑀸𑀳𑁄𑀢𑀺 𑀪𑀢𑁆𑀢𑀤𑀭𑀣𑁄. 𑀢𑀲𑁆𑀫𑀺𑀜𑁆𑀳𑀺 𑀲𑀫𑀬𑁂 𑀧𑀭𑀺𑀴𑀸𑀳𑀼𑀧𑁆𑀧𑀢𑁆𑀢𑀺𑀬𑀸 𑀉𑀧𑀳𑀢𑀺𑀦𑁆𑀤𑁆𑀭𑀺𑀬𑁄 𑀳𑁄𑀢𑀺, 𑀓𑀸𑀬𑁄 𑀚𑀻𑀭𑀢𑀻𑀢𑀺. 𑀓𑀸𑀬𑀤𑀼𑀝𑁆𑀞𑀼𑀮𑁆𑀮𑀦𑁆𑀢𑀺 𑀪𑀢𑁆𑀢𑀁 𑀦𑀺𑀲𑁆𑀲𑀸𑀬 𑀓𑀸𑀬𑀲𑁆𑀲 𑀅𑀓𑀫𑁆𑀫𑀜𑁆𑀜𑀢𑀁. 𑀅𑀓𑀮𑁆𑀬𑀢𑀸𑀢𑀺𑀆𑀤𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑀫𑁂𑀯. 𑀮𑀻𑀦𑀦𑁆𑀢𑀺 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀬 𑀧𑀝𑀺𑀓𑀼𑀝𑀺𑀢𑀁. 𑀇𑀢𑀭𑁂 𑀤𑁆𑀯𑁂 𑀆𑀓𑀸𑀭𑀪𑀸𑀯𑀦𑀺𑀤𑁆𑀤𑁂𑀲𑀸. 𑀣𑀺𑀦𑀦𑁆𑀢𑀺 𑀲𑀧𑁆𑀧𑀺𑀧𑀺𑀡𑁆𑀟𑁄 𑀯𑀺𑀬 𑀅𑀯𑀺𑀧𑁆𑀨𑀸𑀭𑀺𑀓𑀢𑀸𑀬 𑀖𑀦𑀪𑀸𑀯𑁂𑀦 𑀞𑀺𑀢𑀁. 𑀣𑀺𑀬𑀦𑀸𑀢𑀺 𑀆𑀓𑀸𑀭𑀦𑀺𑀤𑁆𑀤𑁂𑀲𑁄. 𑀣𑀺𑀬𑀺𑀪𑀸𑀯𑁄 𑀣𑀺𑀬𑀺𑀢𑀢𑁆𑀢𑀁 ¶ , 𑀅𑀯𑀺𑀧𑁆𑀨𑀸𑀭𑀯𑀲𑁂𑀦𑁂𑀯 𑀩𑀤𑁆𑀥𑀢𑀸𑀢𑀺 𑀅𑀢𑁆𑀣𑁄. 𑀇𑀫𑁂𑀳𑀺 𑀧𑀦 𑀲𑀩𑁆𑀩𑁂𑀳𑀺𑀧𑀺 𑀧𑀤𑁂𑀳𑀺 𑀣𑀺𑀦𑀫𑀺𑀤𑁆𑀥𑀓𑀸𑀭𑀡𑀸𑀦𑀁 𑀭𑀸𑀕𑀸𑀤𑀺𑀓𑀺𑀮𑁂𑀲𑀸𑀦𑀁 𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀕𑀺𑀮𑀸𑀦𑀸𑀓𑀸𑀭𑁄 𑀓𑀣𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀼𑀭𑀺𑀫𑀸 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸𑀢𑀺 𑀅𑀭𑀢𑀺, 𑀢𑀦𑁆𑀤𑀻, 𑀯𑀺𑀚𑀫𑁆𑀪𑀺𑀢𑀸, 𑀪𑀢𑁆𑀢𑀲𑀫𑁆𑀫𑀤𑁄𑀢𑀺 𑀏𑀢𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸. 𑀬𑀤𑀸 𑀣𑀺𑀦𑀫𑀺𑀤𑁆𑀥𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀢𑀤𑀸 𑀅𑀭𑀢𑀺𑀆𑀤𑀻𑀦𑀫𑁆𑀧𑀺 𑀲𑀫𑁆𑀪𑀯𑀢𑁄 ‘‘𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀧𑀦 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁧𑁪. 𑀘𑀢𑀼𑀢𑁆𑀣𑁂 𑀉𑀤𑁆𑀤𑀢𑀲𑁆𑀲 𑀪𑀸𑀯𑁄 𑀉𑀤𑁆𑀥𑀘𑁆𑀘𑀁. 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀯𑀲𑁂𑀦 𑀉𑀤𑁆𑀥𑀢𑀁 𑀳𑁄𑀢𑀺 𑀘𑀺𑀢𑁆𑀢𑀁, 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀯𑀸 𑀥𑀫𑁆𑀫𑀸, 𑀲𑁄 𑀥𑀫𑁆𑀫𑁄 𑀉𑀤𑁆𑀤𑀘𑁆𑀘𑀁. 𑀓𑀼𑀘𑁆𑀙𑀺𑀢𑀁 𑀓𑀢𑀁 𑀓𑀼𑀓𑀢𑀁, 𑀤𑀼𑀘𑁆𑀘𑀭𑀺𑀢𑀁 𑀲𑀼𑀘𑀭𑀺𑀢𑀜𑁆𑀘. 𑀅𑀓𑀢𑀫𑁆𑀧𑀺 𑀳𑀺 𑀓𑀼𑀓𑀢𑀫𑁂𑀯. 𑀏𑀯𑀜𑁆𑀳𑀺 𑀯𑀢𑁆𑀢𑀸𑀭𑁄 𑀳𑁄𑀦𑁆𑀢𑀺 ‘‘𑀬𑀁 𑀫𑀬𑀸 𑀦 𑀓𑀢𑀁, 𑀢𑀁 𑀓𑀼𑀓𑀢’’𑀦𑁆𑀢𑀺. 𑀏𑀯𑀁 𑀓𑀢𑀸𑀓𑀢𑀁 𑀤𑀼𑀘𑁆𑀘𑀭𑀺𑀢𑀁 𑀲𑀼𑀘𑀭𑀺𑀢𑀜𑁆𑀘 𑀓𑀼𑀓𑀢𑀁, 𑀢𑀁 𑀆𑀭𑀩𑁆𑀪 𑀯𑀺𑀧𑁆𑀧𑀝𑀺𑀲𑀸𑀭𑀯𑀲𑁂𑀦 𑀧𑀯𑀢𑁆𑀢𑀁 𑀧𑀦 𑀘𑀺𑀢𑁆𑀢𑀁 𑀇𑀥 𑀓𑀼𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀲 𑀪𑀸𑀯𑁄 𑀓𑀼𑀓𑁆𑀓𑀼𑀘𑁆𑀘𑀁. 𑀘𑀺𑀢𑁆𑀢𑀲𑁆𑀲 𑀉𑀤𑁆𑀥𑀢𑀸𑀓𑀸𑀭𑁄𑀢𑀺 𑀘𑀺𑀢𑁆𑀢𑀲𑁆𑀲 𑀅𑀯𑀽𑀧𑀲𑀫𑀸𑀓𑀸𑀭𑁄𑀯 𑀯𑀼𑀢𑁆𑀢𑁄. 𑀅𑀯𑀽𑀧𑀲𑀫𑀮𑀓𑁆𑀔𑀡𑀜𑁆𑀳𑀺 𑀉𑀤𑁆𑀥𑀘𑁆𑀘𑀁. 𑀬𑀣𑀸𑀧𑀯𑀢𑁆𑀢𑀲𑁆𑀲 𑀓𑀢𑀸𑀓𑀢𑀸𑀓𑀸𑀭𑀯𑀺𑀲𑀺𑀝𑁆𑀞𑀲𑁆𑀲 𑀤𑀼𑀘𑁆𑀘𑀭𑀺𑀢𑀲𑀼𑀘𑀭𑀺𑀢𑀲𑁆𑀲 ¶ 𑀅𑀦𑀼𑀲𑁄𑀘𑀦𑀯𑀲𑁂𑀦 𑀯𑀺𑀭𑀽𑀧𑀁 𑀧𑀝𑀺𑀲𑀭𑀡𑀁 𑀯𑀺𑀧𑁆𑀧𑀝𑀺𑀲𑀸𑀭𑁄. 𑀓𑀼𑀓𑁆𑀓𑀼𑀘𑁆𑀘𑀲𑁆𑀲𑀧𑀺 𑀓𑀢𑀸𑀓𑀢𑀸𑀦𑀼𑀲𑁄𑀘𑀦𑀯𑀲𑁂𑀦 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀪𑀸𑀯𑀢𑁄 𑀅𑀯𑀽𑀧𑀲𑀫𑀸𑀓𑀸𑀭𑁄 𑀲𑀫𑁆𑀪𑀯𑀢𑀻𑀢𑀺 𑀆𑀳 𑁋 ‘‘𑀘𑁂𑀢𑀲𑁄 𑀅𑀯𑀽𑀧𑀲𑀫𑁄𑀢𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀲𑁆𑀲𑁂𑀯𑀢𑀁 𑀦𑀸𑀫’’𑀦𑁆𑀢𑀺. 𑀲𑁆𑀯𑁂𑀯 𑀘 𑀘𑁂𑀢𑀲𑁄 𑀅𑀯𑀽𑀧𑀲𑀫𑁄𑀢𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀫𑁂𑀯 𑀦𑀺𑀤𑁆𑀤𑀺𑀝𑁆𑀞𑀁. 𑀢𑀜𑁆𑀘 𑀅𑀢𑁆𑀢𑀦𑁄𑀯 𑀅𑀢𑁆𑀢𑀦𑀸 𑀲𑀳𑀚𑀸𑀢𑀁 𑀦 𑀳𑁄𑀢𑀻𑀢𑀺 𑀆𑀳 𑁋 ‘‘𑀅𑀬𑀁 𑀧𑀦 𑀉𑀧𑀦𑀺𑀲𑁆𑀲𑀬𑀓𑁄𑀝𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺. 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑀸 𑀘 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸.

𑁧𑁫. 𑀧𑀜𑁆𑀘𑀫𑁂 𑀯𑀺𑀕𑀢𑀸 𑀘𑀺𑀓𑀺𑀘𑁆𑀙𑀸 𑀅𑀲𑁆𑀲𑀸𑀢𑀺 𑀯𑀺𑀘𑀺𑀓𑀺𑀘𑁆𑀙𑀸. 𑀲𑀪𑀸𑀯𑀁 𑀯𑀺𑀘𑀺𑀦𑀦𑁆𑀢𑁄 𑀢𑀸𑀬 𑀓𑀺𑀘𑁆𑀙𑀢𑀻𑀢𑀺 𑀯𑀸 𑀯𑀺𑀘𑀺𑀓𑀺𑀘𑁆𑀙𑀸.

𑁧𑁬. 𑀙𑀝𑁆𑀞𑁂 𑀳𑁂𑀢𑀼𑀁 𑀯𑀸 𑀧𑀘𑁆𑀘𑀬𑀁 𑀯𑀸 𑀦 𑀮𑀪𑀢𑀻𑀢𑀺 𑀏𑀢𑁆𑀣 𑀳𑁂𑀢𑀼𑀕𑁆𑀕𑀳𑀡𑁂𑀦 𑀚𑀦𑀓𑀁 𑀓𑀸𑀭𑀡𑀫𑀸𑀳, 𑀧𑀘𑁆𑀘𑀬𑀕𑁆𑀕𑀳𑀡𑁂𑀦 𑀅𑀦𑀼𑀧𑀸𑀮𑀦𑀓𑀁 𑀓𑀸𑀭𑀡𑀁. 𑀳𑁂𑀢𑀼𑀦𑁆𑀢𑀺 𑀯𑀸 𑀉𑀧𑀸𑀤𑀸𑀦𑀓𑀸𑀭𑀡𑀁. 𑀧𑀘𑁆𑀘𑀬𑀦𑁆𑀢𑀺 𑀲𑀳𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀢𑀦𑁆𑀢𑀺 𑀓𑀺𑀮𑁂𑀲𑀁. 𑀯𑀺𑀯𑀝𑁆𑀝𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀻𑀢𑀺 𑀯𑀺𑀯𑀝𑁆𑀝𑀸𑀪𑀺𑀫𑀼𑀔𑀁 𑀘𑀺𑀢𑁆𑀢𑀁 𑀧𑁂𑀲𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀅𑀭𑀳𑀢𑁆𑀢𑀨𑀮𑀁 𑀕𑀡𑁆𑀳𑀸𑀢𑀺. 𑀪𑀺𑀓𑁆𑀔𑀸𑀬 𑀘𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀪𑀺𑀓𑁆𑀔𑀸𑀘𑀸𑀭𑁄, 𑀕𑁄𑀘𑀭𑀕𑀸𑀫𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀲𑁆𑀫𑀺𑀁 𑀪𑀺𑀓𑁆𑀔𑀸𑀘𑀸𑀭𑁂. 𑀯𑀬𑀁 𑀆𑀕𑀫𑁆𑀫𑀸𑀢𑀺 𑀤𑀸𑀭𑀪𑀭𑀡𑀸𑀦𑀼𑀭𑀽𑀧𑀁 𑀯𑀬𑀁 𑀆𑀕𑀫𑁆𑀫. 𑀆𑀬𑀽𑀳𑀦𑁆𑀢𑁄𑀢𑀺 𑀉𑀧𑀘𑀺𑀦𑀦𑁆𑀢𑁄. 𑀅𑀗𑁆𑀕𑀸𑀭𑀧𑀓𑁆𑀓𑀦𑁆𑀢𑀺 𑀯𑀻𑀢𑀘𑁆𑀘𑀺𑀓𑀗𑁆𑀕𑀸𑀭𑁂𑀲𑀼 𑀧𑀓𑁆𑀓𑀁. 𑀓𑀺𑀁 𑀦𑀸𑀫𑁂𑀢𑀦𑁆𑀢𑀺 𑀪𑀺𑀓𑁆𑀔𑀽 𑀕𑀭𑀳𑀦𑁆𑀢𑁄 𑀆𑀳. 𑀚𑀻𑀯𑀫𑀸𑀦𑀧𑁂𑀢𑀓𑀲𑀢𑁆𑀢𑁄𑀢𑀺 ¶ 𑀚𑀻𑀯𑀫𑀸𑀦𑁄 𑀳𑀼𑀢𑁆𑀯𑀸 ‘‘𑀢𑁂𑀦𑁂𑀯 𑀅𑀢𑁆𑀢𑀪𑀸𑀯𑁂𑀦 𑀧𑁂𑀢𑀪𑀸𑀯𑀁 𑀧𑀢𑁆𑀢𑀲𑀢𑁆𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀧𑀭𑀺𑀓𑀧𑁆𑀧𑀯𑀲𑁂𑀦 𑀯𑀼𑀢𑁆𑀢𑀁. 𑀓𑀼𑀝𑀦𑁆𑀢𑀺 𑀧𑀸𑀦𑀻𑀬𑀖𑀝𑀁. 𑀬𑀸𑀯 𑀤𑀸𑀭𑀼𑀡𑀦𑁆𑀢𑀺 𑀅𑀢𑀺𑀯𑀺𑀬 𑀤𑀸𑀭𑀼𑀡𑀁. 𑀯𑀺𑀧𑀸𑀓𑁄 𑀓𑀻𑀤𑀺𑀲𑁄 𑀪𑀯𑀺𑀲𑁆𑀲𑀢𑀻𑀢𑀺 𑀢𑀬𑀸 𑀓𑀢𑀓𑀫𑁆𑀫𑀲𑁆𑀲 𑀆𑀬𑀢𑀺𑀁 𑀅𑀦𑀼𑀪𑀯𑀺𑀢𑀩𑁆𑀩𑀯𑀺𑀧𑀸𑀓𑁄 𑀓𑀻𑀤𑀺𑀲𑁄 𑀪𑀯𑀺𑀲𑁆𑀲𑀢𑀺.

𑀯𑀺𑀲𑀗𑁆𑀔𑀭𑀺𑀢𑁆𑀯𑀸𑀢𑀺 𑀙𑁂𑀤𑀦𑀪𑁂𑀤𑀦𑀸𑀤𑀻𑀳𑀺 𑀯𑀺𑀦𑀸𑀲𑁂𑀢𑁆𑀯𑀸. 𑀤𑀻𑀧𑀓𑀫𑀺𑀕𑀧𑀓𑁆𑀔𑀺𑀦𑁄𑀢𑀺 𑀅𑀢𑁆𑀢𑀦𑁄 𑀦𑀺𑀲𑀺𑀦𑁆𑀦𑀪𑀸𑀯𑀲𑁆𑀲 𑀤𑀻𑀧𑀦𑀢𑁄 𑀏𑀯𑀁𑀮𑀤𑁆𑀥𑀦𑀸𑀫𑀸 𑀫𑀺𑀕𑀧𑀓𑁆𑀔𑀺𑀦𑁄, 𑀬𑁂𑀦 𑀅𑀭𑀜𑁆𑀜𑀁 𑀦𑁂𑀢𑁆𑀯𑀸 𑀦𑁂𑀲𑀸𑀤𑁄 𑀢𑁂𑀲𑀁 𑀲𑀤𑁆𑀤𑁂𑀦 𑀆𑀕𑀢𑀸𑀕𑀢𑁂 𑀫𑀺𑀕𑀧𑀓𑁆𑀔𑀺𑀦𑁄 𑀯𑀥𑀺𑀢𑁆𑀯𑀸 𑀕𑀡𑁆𑀳𑀸𑀢𑀺. 𑀣𑁂𑀭𑀦𑁆𑀢𑀺 𑀘𑀽𑀴𑀧𑀺𑀡𑁆𑀟𑀧𑀸𑀢𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑀁. 𑀇𑀤𑁆𑀥𑀺𑀬𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸𑀢𑀺 𑀅𑀥𑀺𑀝𑁆𑀞𑀸𑀦𑀸𑀤𑀺𑀯𑀲𑁂𑀦 𑀇𑀤𑁆𑀥𑀺𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸. 𑀉𑀧𑀬𑁄𑀕𑀢𑁆𑀣𑁂 𑀘𑁂𑀢𑀁 𑀓𑀭𑀡𑀯𑀘𑀦𑀁. 𑀅𑀕𑁆𑀕𑀺𑀧𑀧𑀝𑀺𑀓𑀦𑁆𑀢𑀺 𑀅𑀘𑁆𑀘𑀺𑀓𑀭𑀡𑀁, 𑀯𑀺𑀧𑁆𑀨𑀼𑀮𑀺𑀗𑁆𑀕𑀦𑁆𑀢𑀺 𑀅𑀢𑁆𑀣𑁄. 𑀧𑀲𑁆𑀲𑀦𑁆𑀢𑀲𑁆𑀲𑁂𑀯𑀸𑀢𑀺 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁. 𑀢𑀲𑁆𑀲 𑀣𑁂𑀭𑀲𑁆𑀲𑀸𑀢𑀺 𑀢𑀲𑁆𑀲 𑀫𑀺𑀮𑀓𑁆𑀔𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲. 𑀢𑀲𑁆𑀲𑀸𑀢𑀺 𑀢𑀲𑁆𑀲𑀸 𑀅𑀕𑁆𑀕𑀺𑀧𑀧𑀝𑀺𑀓𑀸𑀬. 𑀧𑀝𑀺𑀩𑀮𑀲𑁆𑀲𑀸𑀢𑀺 𑀉𑀕𑁆𑀕𑀳𑀡𑀲𑀚𑁆𑀛𑀸𑀬𑀸𑀤𑀻𑀲𑀼 𑀧𑀝𑀺𑀩𑀮𑀲𑁆𑀲. 𑀤𑀼𑀓𑁆𑀔𑀁 𑀉𑀧𑀦𑀺𑀲𑀸 𑀓𑀸𑀭𑀡𑀫𑁂𑀢𑀺𑀲𑁆𑀲𑀸𑀢𑀺 𑀤𑀼𑀓𑁆𑀔𑀽𑀧𑀦𑀺𑀲𑀸, 𑀤𑀼𑀓𑁆𑀔𑀦𑀺𑀩𑀦𑁆𑀥𑀦𑀸 𑀤𑀼𑀓𑁆𑀔𑀳𑁂𑀢𑀼𑀓𑀸 𑀲𑀤𑁆𑀥𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀯𑀢𑁆𑀢𑀫𑀼𑀔𑁂𑀦 𑀓𑀫𑁆𑀫𑀝𑁆𑀞𑀸𑀦𑀲𑁆𑀲 𑀓𑀣𑀺𑀢𑀢𑁆𑀢𑀸 ‘‘𑀯𑀢𑁆𑀢𑀲𑀻𑀲𑁂 𑀞𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀧𑀮𑀸𑀮𑀯𑀭𑀡𑀓𑀦𑁆𑀢𑀺 𑀧𑀮𑀸𑀮𑀧𑀼𑀜𑁆𑀚𑀁.

𑀆𑀭𑀫𑁆𑀪𑀣𑀸𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀤𑀻𑀲𑀼 𑀯𑀻𑀭𑀺𑀬𑀁 𑀓𑀭𑁄𑀣. 𑀦𑀺𑀓𑁆𑀓𑀫𑀣𑀸𑀢𑀺 𑀓𑁄𑀲𑀚𑁆𑀚𑀢𑁄 𑀦𑀺𑀓𑁆𑀔𑀫𑀣, 𑀓𑀸𑀫𑀸𑀦𑀁 ¶ 𑀯𑀸 𑀧𑀦𑀽𑀤𑀦𑀸𑀬 𑀦𑀺𑀓𑁆𑀔𑀫𑀣, 𑀉𑀪𑀬𑁂𑀦𑀧𑀺 𑀯𑀻𑀭𑀺𑀬𑀫𑁂𑀯 𑀯𑀼𑀢𑁆𑀢𑀁. 𑀯𑀻𑀭𑀺𑀬𑀜𑁆𑀳𑀺 𑀆𑀭𑀫𑁆𑀪𑀦𑀓𑀯𑀲𑁂𑀦 𑀆𑀭𑀫𑁆𑀪𑁄, 𑀓𑁄𑀲𑀚𑁆𑀚𑀢𑁄 𑀦𑀺𑀓𑁆𑀔𑀫𑀦𑀯𑀲𑁂𑀦 ‘‘𑀦𑀺𑀓𑁆𑀓𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀼𑀜𑁆𑀚𑀣 𑀩𑀼𑀤𑁆𑀥𑀲𑀸𑀲𑀦𑁂𑀢𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀭𑀺𑀬𑀢𑁆𑀢𑀺𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀲𑀗𑁆𑀔𑀸𑀢𑁂 𑀢𑀺𑀯𑀺𑀥𑀲𑀸𑀲𑀦𑁂 𑀬𑀼𑀜𑁆𑀚𑀣 𑀬𑁄𑀕𑀁 𑀓𑀭𑁄𑀣. 𑀏𑀯𑀫𑀦𑀼𑀬𑀼𑀜𑁆𑀚𑀦𑁆𑀢𑀸 𑀫𑀘𑁆𑀘𑀼𑀦𑁄 𑀲𑁂𑀦𑀁 𑀥𑀼𑀦𑀸𑀣 𑀯𑀺𑀤𑁆𑀥𑀁𑀲𑁂𑀣. 𑀢𑀢𑁆𑀣 𑀫𑀘𑁆𑀘𑀼𑀦𑁄 𑀲𑁂𑀦𑀦𑁆𑀢𑀺 𑁋

‘‘𑀓𑀸𑀫𑀸 𑀢𑁂 𑀧𑀞𑀫𑀸 𑀲𑁂𑀦𑀸, 𑀤𑀼𑀢𑀺𑀬𑀸 𑀅𑀭𑀢𑀺 𑀯𑀼𑀘𑁆𑀘𑀢𑀺;

𑀢𑀢𑀺𑀬𑀸 𑀔𑀼𑀧𑁆𑀧𑀺𑀧𑀸𑀲𑀸 𑀢𑁂, 𑀘𑀢𑀼𑀢𑁆𑀣𑀻 𑀢𑀡𑁆𑀳𑀸 𑀧𑀯𑀼𑀘𑁆𑀘𑀢𑀺.

‘‘𑀧𑀜𑁆𑀘𑀫𑀁 𑀣𑀺𑀦𑀫𑀺𑀤𑁆𑀥𑀁 𑀢𑁂, 𑀙𑀝𑁆𑀞𑀸 𑀪𑀻𑀭𑀽 𑀧𑀯𑀼𑀘𑁆𑀘𑀢𑀺;

𑀲𑀢𑁆𑀢𑀫𑀻 𑀯𑀺𑀘𑀺𑀓𑀺𑀘𑁆𑀙𑀸 𑀢𑁂, 𑀫𑀓𑁆𑀔𑁄 𑀣𑀫𑁆𑀪𑁄 𑀢𑁂 𑀅𑀝𑁆𑀞𑀫𑁄.

‘‘𑀮𑀸𑀪𑁄 ¶ 𑀲𑀺𑀮𑁄𑀓𑁄 𑀲𑀓𑁆𑀓𑀸𑀭𑁄,

𑀫𑀺𑀘𑁆𑀙𑀸𑀮𑀤𑁆𑀥𑁄 𑀘 𑀬𑁄 𑀬𑀲𑁄;

𑀬𑁄 𑀘𑀢𑁆𑀢𑀸𑀦𑀁 𑀲𑀫𑀼𑀓𑁆𑀓𑀁𑀲𑁂,

𑀧𑀭𑁂 𑀘 𑀅𑀯𑀚𑀸𑀦𑀸𑀢𑀺.

‘‘𑀏𑀲𑀸 𑀦𑀫𑀼𑀘𑀺 𑀢𑁂 𑀲𑁂𑀦𑀸, 𑀓𑀡𑁆𑀳𑀲𑁆𑀲𑀸𑀪𑀺𑀧𑁆𑀧𑀳𑀸𑀭𑀺𑀦𑀻;

𑀦 𑀦𑀁 𑀅𑀲𑀽𑀭𑁄 𑀚𑀺𑀦𑀸𑀢𑀺, 𑀚𑁂𑀢𑁆𑀯𑀸 𑀘 𑀮𑀪𑀢𑁂 𑀲𑀼𑀔’’𑀦𑁆𑀢𑀺. (𑀲𑀼. 𑀦𑀺. 𑁪𑁩𑁮-𑁪𑁪𑁧) 𑁋

𑀏𑀯𑀫𑀸𑀕𑀢𑀁 𑀓𑀸𑀫𑀸𑀤𑀺𑀪𑁂𑀤𑀁 𑀫𑀘𑁆𑀘𑀼𑀦𑁄 𑀲𑁂𑀦𑀁. 𑀏𑀢𑁆𑀣 𑀘 𑀬𑀲𑁆𑀫𑀸 𑀆𑀤𑀺𑀢𑁄𑀯 𑀅𑀕𑀸𑀭𑀺𑀬𑀪𑀽𑀢𑁂 𑀲𑀢𑁆𑀢𑁂 𑀯𑀢𑁆𑀣𑀼𑀓𑀸𑀫𑁂𑀲𑀼 𑀓𑀺𑀮𑁂𑀲𑀓𑀸𑀫𑀸 𑀫𑁄𑀲𑀬𑀦𑁆𑀢𑀺, 𑀢𑁂 𑀅𑀪𑀺𑀪𑀼𑀬𑁆𑀬 𑀅𑀦𑀕𑀸𑀭𑀺𑀬𑀪𑀸𑀯𑀁 𑀉𑀧𑀕𑀢𑀸𑀦𑀁 𑀧𑀦𑁆𑀢𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀅𑀜𑁆𑀜𑀢𑀭𑀜𑁆𑀜𑀢𑀭𑁂𑀲𑀼 𑀯𑀸 𑀅𑀥𑀺𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀅𑀭𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀧𑀩𑁆𑀩𑀚𑀺𑀢𑁂𑀦 𑀔𑁄, 𑀆𑀯𑀼𑀲𑁄, 𑀅𑀪𑀺𑀭𑀢𑀺 𑀤𑀼𑀓𑁆𑀓𑀭𑀸’’𑀢𑀺 (𑀲𑀁. 𑀦𑀺. 𑁪.𑁩𑁩𑁧). 𑀢𑀢𑁄 𑀢𑁂 𑀧𑀭𑀧𑁆𑀧𑀝𑀺𑀩𑀤𑁆𑀥𑀚𑀻𑀯𑀺𑀓𑀢𑁆𑀢𑀸 𑀔𑀼𑀧𑁆𑀧𑀺𑀧𑀸𑀲𑀸 𑀩𑀸𑀥𑀢𑀺, 𑀢𑀸𑀬 𑀩𑀸𑀥𑀺𑀢𑀸𑀦𑀁 𑀧𑀭𑀺𑀬𑁂𑀲𑀦𑀢𑀡𑁆𑀳𑀸 𑀘𑀺𑀢𑁆𑀢𑀁 𑀓𑀺𑀮𑀫𑀬𑀢𑀺. 𑀅𑀣 𑀦𑁂𑀲𑀁 𑀓𑀺𑀮𑀦𑁆𑀢𑀘𑀺𑀢𑁆𑀢𑀸𑀦𑀁 𑀣𑀺𑀦𑀫𑀺𑀤𑁆𑀥𑀁 𑀑𑀓𑁆𑀓𑀫𑀢𑀺, 𑀢𑀢𑁄 𑀯𑀺𑀲𑁂𑀲𑀫𑀦𑀥𑀺𑀕𑀘𑁆𑀙𑀦𑁆𑀢𑀸𑀦𑀁 𑀤𑀼𑀭𑀪𑀺𑀲𑀫𑁆𑀪𑀯𑁂𑀲𑀼 𑀅𑀭𑀜𑁆𑀜𑀯𑀦𑀧𑀢𑁆𑀣𑁂𑀲𑀼 𑀧𑀦𑁆𑀢𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀯𑀺𑀳𑀭𑀢𑀁 𑀉𑀢𑁆𑀭𑀸𑀲𑀲𑀜𑁆𑀜𑀺𑀢𑀸 𑀪𑀻𑀭𑀼 𑀚𑀸𑀬𑀢𑀺. 𑀢𑁂𑀲𑀁 𑀉𑀲𑁆𑀲𑀗𑁆𑀓𑀺𑀢𑀧𑀭𑀺𑀲𑀗𑁆𑀓𑀺𑀢𑀸𑀦𑀁 𑀤𑀻𑀖𑀭𑀢𑁆𑀢𑀁 𑀯𑀺𑀯𑁂𑀓𑀭𑀲𑀫𑀦𑀲𑁆𑀲𑀸𑀤𑀬𑀫𑀸𑀦𑀸𑀦𑀁 𑀯𑀺𑀳𑀭𑀢𑀁 ‘‘𑀦 𑀲𑀺𑀬𑀸 𑀦𑀼 𑀔𑁄 𑀏𑀲 𑀫𑀕𑁆𑀕𑁄’’𑀢𑀺 𑀧𑀝𑀺𑀧𑀢𑁆𑀢𑀺𑀬𑀁 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀁 𑀯𑀺𑀦𑁄𑀤𑁂𑀢𑁆𑀯𑀸 𑀯𑀺𑀳𑀭𑀢𑀁 𑀅𑀧𑁆𑀧𑀫𑀢𑁆𑀢𑀓𑁂𑀦 𑀯𑀺𑀲𑁂𑀲𑀸𑀥𑀺𑀕𑀫𑁂𑀦 𑀫𑀸𑀦𑀫𑀓𑁆𑀔𑀣𑀫𑁆𑀪𑀸 𑀚𑀸𑀬𑀦𑁆𑀢𑀺. 𑀢𑁂𑀧𑀺 𑀯𑀺𑀦𑁄𑀤𑁂𑀢𑁆𑀯𑀸 𑀯𑀺𑀳𑀭𑀢𑀁 𑀢𑀢𑁄 𑀅𑀥𑀺𑀓𑀢𑀭𑀁 𑀯𑀺𑀲𑁂𑀲𑀸𑀥𑀺𑀕𑀫𑀦𑀁 ¶ 𑀦𑀺𑀲𑁆𑀲𑀸𑀬 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀮𑀸𑀪𑀸𑀤𑀻𑀳𑀺 𑀫𑀼𑀘𑁆𑀙𑀺𑀢𑁆𑀯𑀸 𑀥𑀫𑁆𑀫𑀧𑁆𑀧𑀢𑀺𑀭𑀽𑀧𑀓𑀸𑀦𑀺 𑀧𑀓𑀸𑀲𑁂𑀦𑁆𑀢𑁄 𑀫𑀺𑀘𑁆𑀙𑀸𑀬𑀲𑀁 𑀅𑀥𑀺𑀕𑀦𑁆𑀢𑁆𑀯𑀸 𑀢𑀢𑁆𑀣 𑀞𑀺𑀢𑀸 𑀚𑀸𑀢𑀺𑀆𑀤𑀻𑀳𑀺 𑀅𑀢𑁆𑀢𑀸𑀦𑀁 𑀉𑀓𑁆𑀓𑀁𑀲𑁂𑀦𑁆𑀢𑀺, 𑀧𑀭𑀁 𑀯𑀫𑁆𑀪𑁂𑀦𑁆𑀢𑀺, 𑀢𑀲𑁆𑀫𑀸 𑀓𑀸𑀫𑀸𑀤𑀻𑀦𑀁 𑀧𑀞𑀫𑀲𑁂𑀦𑀸𑀤𑀺𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀦𑀴𑀸𑀕𑀸𑀭𑀦𑁆𑀢𑀺 𑀦𑀴𑁂𑀳𑀺 𑀯𑀺𑀦𑀤𑁆𑀥𑀢𑀺𑀡𑀘𑁆𑀙𑀦𑁆𑀦𑀕𑁂𑀳𑀁.

𑀯𑀺𑀳𑀲𑁆𑀲𑀢𑀻𑀢𑀺 𑀉𑀕𑁆𑀕𑀳𑀡𑀲𑀚𑁆𑀛𑀸𑀬𑀦𑀫𑀦𑀲𑀺𑀓𑀸𑀭𑀸𑀤𑀻𑀳𑀺 𑀯𑀺𑀳𑀭𑀺𑀲𑁆𑀲𑀢𑀺. 𑀚𑀸𑀢𑀺𑀲𑀁𑀲𑀸𑀭𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀚𑀸𑀢𑀺𑀲𑀗𑁆𑀔𑀸𑀢𑀲𑀁𑀲𑀸𑀭𑀯𑀝𑁆𑀝𑀁. 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑀺𑀲𑁆𑀲𑀢𑀻𑀢𑀺 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀲𑀗𑁆𑀔𑀸𑀢𑀁 𑀦𑀺𑀩𑁆𑀩𑀸𑀦𑀁 𑀲𑀘𑁆𑀙𑀺𑀓𑀭𑀺𑀲𑁆𑀲𑀢𑀺. 𑀧𑀮𑀸𑀮𑀧𑀼𑀜𑁆𑀚𑀸𑀳𑀦𑁆𑀢𑀺 𑀧𑀮𑀸𑀮𑀧𑀼𑀜𑁆𑀚𑀁 𑀅𑀳𑀦𑁆𑀢𑀺 𑀧𑀤𑀘𑁆𑀙𑁂𑀤𑁄. 𑀢𑀢𑀺𑀬𑀁 𑀞𑀸𑀦𑀦𑁆𑀢𑀺 𑀅𑀦𑀸𑀕𑀸𑀫𑀺𑀨𑀮𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑀢𑀺𑀯𑀲𑁆𑀲𑀪𑀺𑀓𑁆𑀔𑀼𑀓𑀸𑀮𑁂𑀢𑀺 𑀉𑀧𑀲𑀫𑁆𑀧𑀤𑀢𑁄 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀅𑀲𑁆𑀲𑀸𑀢𑀺 𑀢𑀺𑀯𑀲𑁆𑀲𑁄, 𑀢𑀺𑀯𑀲𑁆𑀲𑁄 𑀘 𑀲𑁄 𑀪𑀺𑀓𑁆𑀔𑀼 𑀘𑀸𑀢𑀺 𑀢𑀺𑀯𑀲𑁆𑀲𑀪𑀺𑀓𑁆𑀔𑀼, 𑀢𑀲𑁆𑀲, 𑀢𑁂𑀦 𑀯𑀸 ¶ 𑀉𑀧𑀮𑀓𑁆𑀔𑀺𑀢𑁄 𑀓𑀸𑀮𑁄 𑀢𑀺𑀯𑀲𑁆𑀲𑀪𑀺𑀓𑁆𑀔𑀼𑀓𑀸𑀮𑁄, 𑀢𑀲𑁆𑀫𑀺𑀁. 𑀬𑀤𑀸 𑀲𑁄 𑀢𑀺𑀯𑀲𑁆𑀲𑁄 𑀪𑀺𑀓𑁆𑀔𑀼 𑀦𑀸𑀫 𑀳𑁄𑀢𑀺, 𑀢𑀤𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀪𑀸𑀯𑀦𑀸𑀓𑀫𑁆𑀫𑀁 𑀓𑀭𑁄𑀢𑀺. 𑀕𑀦𑁆𑀣𑀓𑀫𑁆𑀫𑀦𑁆𑀢𑀺 𑀕𑀦𑁆𑀣𑀯𑀺𑀲𑀬𑀁 𑀉𑀕𑁆𑀕𑀳𑀡𑀸𑀤𑀺𑀓𑀫𑁆𑀫𑀁. 𑀧𑀺𑀡𑁆𑀟𑀸𑀧𑀘𑀺𑀢𑀺𑀁 𑀓𑀢𑁆𑀯𑀸𑀢𑀺 𑀅𑀦𑁆𑀢𑁄𑀯𑀲𑁆𑀲𑁂 𑀢𑁂𑀫𑀸𑀲𑀁 𑀤𑀺𑀦𑁆𑀦𑀧𑀺𑀡𑁆𑀟𑀲𑁆𑀲 𑀓𑀺𑀮𑁂𑀲𑀓𑁆𑀔𑀬𑀓𑀭𑀡𑁂𑀦 𑀅𑀧𑀘𑀺𑀢𑀺𑀁 𑀧𑀽𑀚𑀁 𑀓𑀢𑁆𑀯𑀸. 𑀧𑀺𑀡𑁆𑀟𑀸𑀧𑀘𑀺𑀢𑀺𑀁 𑀓𑀭𑁄𑀦𑁆𑀢𑁄 𑀳𑀺 𑀪𑀺𑀓𑁆𑀔𑀼 𑀬𑁂𑀳𑀺 𑀅𑀢𑁆𑀢𑀦𑁄 𑀬𑁄 𑀧𑀺𑀡𑁆𑀟𑀧𑀸𑀢𑁄 𑀤𑀺𑀦𑁆𑀦𑁄, 𑀢𑁂𑀲𑀁 𑀢𑀲𑁆𑀲 𑀫𑀳𑀧𑁆𑀨𑀮𑀪𑀸𑀯𑀁 𑀇𑀘𑁆𑀙𑀦𑁆𑀢𑁄 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑀫𑁂𑀯 𑀓𑀺𑀮𑁂𑀲𑀓𑁆𑀔𑀬𑀓𑀭𑀡𑁂𑀦 𑀯𑀺𑀲𑁄𑀥𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀺.

𑀫𑀳𑀸𑀪𑀽𑀢𑀻𑀢𑀺 𑀏𑀢𑁆𑀣 𑀧𑀽𑀚𑀸𑀯𑀘𑀦𑁄 𑀫𑀳𑀦𑁆𑀢𑀲𑀤𑁆𑀤𑁄, 𑀪𑀽𑀢𑀻𑀢𑀺 𑀘 𑀦𑀸𑀫𑁂𑀓𑀤𑁂𑀲𑁂𑀦 𑀢𑀺𑀲𑁆𑀲𑀪𑀽𑀢𑀺𑀢𑁆𑀣𑁂𑀭𑀁 𑀆𑀮𑀧𑀢𑀺. 𑀪𑀯𑀢𑀺 𑀳𑀺 𑀦𑀸𑀫𑁂𑀓𑀤𑁂𑀲𑁂𑀦𑀧𑀺 𑀯𑁄𑀳𑀸𑀭𑁄 𑀬𑀣𑀸 ‘‘𑀤𑁂𑀯𑀤𑀢𑁆𑀢𑁄 𑀤𑀢𑁆𑀢𑁄’’𑀢𑀺. 𑀫𑀳𑀸𑀪𑀽𑀢𑀻𑀢𑀺 𑀯𑀸 𑀧𑀺𑀬𑀲𑀫𑀼𑀤𑀸𑀳𑀸𑀭𑁄, 𑀲𑁄 𑀫𑀳𑀢𑀺 𑀪𑀽𑀢𑀺 𑀯𑀺𑀪𑀽𑀢𑀺 𑀧𑀼𑀜𑁆𑀜𑀜𑀸𑀡𑀸𑀤𑀺𑀲𑀫𑁆𑀧𑀤𑀸 𑀅𑀲𑁆𑀲𑀸𑀢𑀺 𑀫𑀳𑀸𑀪𑀽𑀢𑀺. 𑀙𑀦𑁆𑀦𑀁 𑀲𑁂𑀧𑀡𑁆𑀡𑀺𑀕𑀘𑁆𑀙𑀫𑀽𑀮𑀦𑁆𑀢𑀺 𑀲𑀸𑀔𑀸𑀧𑀮𑀸𑀲𑀸𑀤𑀻𑀳𑀺 𑀙𑀦𑁆𑀦𑀁 𑀖𑀦𑀘𑁆𑀙𑀸𑀬𑀁 𑀲𑁂𑀧𑀡𑁆𑀡𑀺𑀕𑀘𑁆𑀙𑀫𑀽𑀮𑀁. 𑀅𑀲𑀼𑀪𑀓𑀫𑁆𑀫𑀝𑁆𑀞𑀸𑀦𑀁 𑀧𑀸𑀤𑀓𑀁 𑀓𑀢𑁆𑀯𑀸𑀢𑀺 𑀓𑁂𑀲𑀸𑀤𑀺𑀅𑀲𑀼𑀪𑀓𑁄𑀝𑁆𑀞𑀸𑀲𑀪𑀸𑀯𑀦𑀸𑀬 𑀧𑀝𑀺𑀮𑀤𑁆𑀥𑀁 𑀉𑀧𑀘𑀸𑀭𑀲𑀫𑀸𑀥𑀺𑀁 𑀅𑀧𑁆𑀧𑀦𑀸𑀲𑀫𑀸𑀥𑀺𑀁 𑀯𑀸 𑀧𑀸𑀤𑀓𑀁 𑀓𑀢𑁆𑀯𑀸. 𑀅𑀲𑀼𑀪𑀯𑀺𑀲𑀬𑀁 𑀉𑀧𑀘𑀸𑀭𑀚𑁆𑀛𑀸𑀦𑀸𑀤𑀺𑀓𑀫𑁆𑀫𑀫𑁂𑀯𑁂𑀢𑁆𑀣 𑀉𑀧𑀭𑀺 𑀧𑀯𑀢𑁆𑀢𑁂𑀢𑀩𑁆𑀩𑀪𑀸𑀯𑀦𑀸𑀓𑀫𑁆𑀫𑀲𑁆𑀲 𑀓𑀸𑀭𑀡𑀪𑀸𑀯𑀢𑁄 𑀞𑀸𑀦𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑀁.

𑀲𑀳𑀲𑁆𑀲𑀤𑁆𑀯𑀺𑀲𑀳𑀲𑁆𑀲𑀲𑀗𑁆𑀔𑀸𑀫𑀢𑁆𑀢𑀢𑁆𑀢𑀸 ‘‘𑀫𑀳𑀸𑀕𑀡𑁂’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀢𑁄 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀢𑁄 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀯𑀺𑀳𑀸𑀭𑀲𑀫𑀻𑀧𑁂 𑀑𑀢𑀭𑀺𑀢𑁆𑀯𑀸 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸. 𑀓𑀺𑀁 𑀆𑀕𑀢𑁄𑀲𑀻𑀢𑀺 𑀓𑀺𑀁𑀓𑀸𑀭𑀡𑀸 𑀆𑀕𑀢𑁄𑀲𑀺. 𑀲𑀩𑁆𑀩𑁂𑀲𑀼 𑀭𑀢𑁆𑀢𑀺𑀤𑀺𑀯𑀲𑀪𑀸𑀕𑁂𑀲𑀼 𑀑𑀓𑀸𑀲𑀁 𑀅𑀮𑀪𑀦𑁆𑀢𑁄𑀢𑀺 𑀲𑁄 𑀓𑀺𑀭 𑀣𑁂𑀭𑁄 ‘‘𑀢𑀼𑀬𑁆𑀳𑀁 𑀑𑀓𑀸𑀲𑁄 𑀦 𑀪𑀯𑀺𑀲𑁆𑀲𑀢𑀺, 𑀆𑀯𑀼𑀲𑁄’’𑀢𑀺 ¶ 𑀯𑀼𑀢𑁆𑀢𑁂𑀧𑀺 ‘‘𑀯𑀺𑀢𑀓𑁆𑀓𑀫𑀸𑀴𑀓𑁂 𑀞𑀺𑀢𑀓𑀸𑀮𑁂 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 ‘‘𑀢𑀲𑁆𑀫𑀺𑀁 𑀞𑀸𑀦𑁂 𑀅𑀜𑁆𑀜𑁂 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 ‘‘𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑁂, 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 ‘‘𑀢𑀢𑁆𑀭𑀸𑀧𑀺 𑀅𑀜𑁆𑀜𑁂 𑀧𑀼𑀘𑁆𑀙𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 𑀤𑀼𑀧𑀝𑁆𑀝𑀦𑀺𑀯𑀸𑀲𑀦𑀝𑁆𑀞𑀸𑀦𑁂, 𑀲𑀗𑁆𑀖𑀸𑀝𑀺𑀧𑀸𑀭𑀼𑀧𑀦𑀝𑁆𑀞𑀸𑀦𑁂, 𑀧𑀢𑁆𑀢𑀦𑀻𑀳𑀭𑀡𑀝𑁆𑀞𑀸𑀦𑁂, 𑀕𑀸𑀫𑁂 𑀘𑀭𑀺𑀢𑁆𑀯𑀸 𑀆𑀲𑀦𑀲𑀸𑀮𑀸𑀬 𑀬𑀸𑀕𑀼𑀧𑀻𑀢𑀓𑀸𑀮𑁂, 𑀪𑀦𑁆𑀢𑁂𑀢𑀺. 𑀢𑀢𑁆𑀣𑀸𑀧𑀺 𑀣𑁂𑀭𑀸 𑀅𑀢𑁆𑀢𑀦𑁄 𑀓𑀗𑁆𑀔𑀁 𑀯𑀺𑀦𑁄𑀤𑁂𑀦𑁆𑀢𑀺, 𑀆𑀯𑀼𑀲𑁄𑀢𑀺. 𑀅𑀦𑁆𑀢𑁄𑀕𑀸𑀫𑀢𑁄 𑀦𑀺𑀓𑁆𑀔𑀫𑀦𑀓𑀸𑀮𑁂 𑀧𑀼𑀘𑁆𑀙𑀺𑀲𑁆𑀲𑀸𑀫𑀺, 𑀪𑀦𑁆𑀢𑁂𑀢𑀺. 𑀢𑀢𑁆𑀭𑀸𑀧𑀺 𑀅𑀜𑁆𑀜𑁂 𑀧𑀼𑀘𑁆𑀙𑀦𑁆𑀢𑀺, 𑀆𑀯𑀼𑀲𑁄𑀢𑀺. 𑀅𑀦𑁆𑀢𑀭𑀸𑀫𑀕𑁆𑀕𑁂, 𑀪𑀦𑁆𑀢𑁂𑀢𑀺. 𑀪𑁄𑀚𑀦𑀲𑀸𑀮𑀸𑀬 𑀪𑀢𑁆𑀢𑀓𑀺𑀘𑁆𑀘𑀧𑀭𑀺𑀬𑁄𑀲𑀸𑀦𑁂, 𑀪𑀦𑁆𑀢𑁂. 𑀤𑀺𑀯𑀸𑀝𑁆𑀞𑀸𑀦𑁂 𑀧𑀸𑀤𑀥𑁄𑀯𑀦𑀓𑀸𑀮𑁂, 𑀪𑀦𑁆𑀢𑁂𑀢𑀺. 𑀢𑀢𑁄 𑀧𑀝𑁆𑀞𑀸𑀬 ¶ 𑀬𑀸𑀯 𑀅𑀭𑀼𑀡𑀸 𑀅𑀧𑀭𑁂 𑀧𑀼𑀘𑁆𑀙𑀦𑁆𑀢𑀺, 𑀆𑀯𑀼𑀲𑁄𑀢𑀺. 𑀤𑀦𑁆𑀢𑀓𑀝𑁆𑀞𑀁 𑀕𑀳𑁂𑀢𑁆𑀯𑀸 𑀫𑀼𑀔𑀥𑁄𑀯𑀦𑀢𑁆𑀣𑀁 𑀕𑀫𑀦𑀓𑀸𑀮𑁂, 𑀪𑀦𑁆𑀢𑁂𑀢𑀺. 𑀢𑀤𑀸𑀧𑀺 𑀅𑀜𑁆𑀜𑁂 𑀧𑀼𑀘𑁆𑀙𑀦𑁆𑀢𑀻𑀢𑀺. 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀆𑀕𑀫𑀦𑀓𑀸𑀮𑁂, 𑀪𑀦𑁆𑀢𑁂𑀢𑀺. 𑀢𑀢𑁆𑀭𑀸𑀧𑀺 𑀅𑀜𑁆𑀜𑁂 𑀧𑀼𑀘𑁆𑀙𑀺𑀲𑁆𑀲𑀦𑁆𑀢𑀻𑀢𑀺. 𑀲𑁂𑀦𑀸𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑀓𑀸𑀮𑁂, 𑀪𑀦𑁆𑀢𑁂𑀢𑀺. 𑀢𑀢𑁆𑀭𑀸𑀧𑀺 𑀅𑀜𑁆𑀜𑁂 𑀧𑀼𑀘𑁆𑀙𑀦𑁆𑀢𑀺, 𑀆𑀯𑀼𑀲𑁄𑀢𑀺. 𑀏𑀯𑀁 𑀲𑀩𑁆𑀩𑁂𑀲𑀼 𑀭𑀢𑁆𑀢𑀺𑀤𑀺𑀯𑀲𑀪𑀸𑀕𑁂𑀲𑀼 𑀬𑀸𑀘𑀫𑀸𑀦𑁄 𑀑𑀓𑀸𑀲𑀁 𑀦 𑀮𑀪𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀏𑀯𑀁 𑀑𑀓𑀸𑀲𑁂 𑀅𑀲𑀢𑀺 𑀫𑀭𑀡𑀲𑁆𑀲 𑀓𑀣𑀁 𑀑𑀓𑀸𑀲𑀁 𑀮𑀪𑀺𑀲𑁆𑀲𑀣𑀸’’𑀢𑀺. 𑀪𑀦𑁆𑀢𑁂, 𑀦𑀦𑀼 𑀫𑀼𑀔𑀁 𑀥𑁄𑀯𑀺𑀢𑁆𑀯𑀸 𑀲𑁂𑀦𑀸𑀲𑀦𑀁 𑀧𑀯𑀺𑀲𑀺𑀢𑁆𑀯𑀸 𑀢𑀬𑁄 𑀘𑀢𑁆𑀢𑀸𑀭𑁄 𑀧𑀮𑁆𑀮𑀗𑁆𑀓𑁂 𑀉𑀡𑁆𑀳𑀸𑀧𑁂𑀢𑁆𑀯𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀓𑀫𑁆𑀫𑀁 𑀓𑀭𑁄𑀦𑁆𑀢𑀸𑀦𑀁 𑀑𑀓𑀸𑀲𑀮𑀸𑀪𑁂𑀦 𑀪𑀯𑀺𑀢𑀩𑁆𑀩𑀁 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺. 𑀫𑀡𑀺𑀯𑀡𑁆𑀡𑁂𑀢𑀺 𑀇𑀦𑁆𑀤𑀦𑀻𑀮𑀫𑀡𑀺𑀯𑀡𑁆𑀡𑁂.

𑀖𑀝𑁂𑀦𑁆𑀢𑀲𑁆𑀲𑁂𑀯𑀸𑀢𑀺 𑀯𑀸𑀬𑀸𑀫𑀦𑁆𑀢𑀲𑁆𑀲𑁂𑀯. 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀦𑁆𑀢𑀺 ‘‘𑀧𑀭𑀺𑀲𑀼𑀤𑁆𑀥𑁄 𑀅𑀳’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀁 𑀯𑀺𑀲𑀼𑀤𑁆𑀥𑀺𑀧𑀯𑀸𑀭𑀡𑀁. 𑀅𑀭𑀳𑀦𑁆𑀢𑀸𑀦𑀫𑁂𑀯 𑀳𑁂𑀲𑀸 𑀧𑀯𑀸𑀭𑀡𑀸. 𑀓𑀸𑀴𑀓𑀁 𑀯𑀸𑀢𑀺 𑀫𑀳𑀦𑁆𑀢𑀁 𑀓𑀸𑀴𑀓𑀁 𑀲𑀦𑁆𑀥𑀸𑀬 𑀯𑀤𑀢𑀺, 𑀢𑀺𑀮𑀓𑁄 𑀯𑀸𑀢𑀺 𑀔𑀼𑀤𑁆𑀤𑀓𑀁 𑀲𑀦𑁆𑀥𑀸𑀬. 𑀉𑀪𑀬𑁂𑀦𑀧𑀺 𑀲𑀻𑀮𑀲𑁆𑀲 𑀧𑀭𑀺𑀲𑀼𑀤𑁆𑀥𑀪𑀸𑀯𑀫𑁂𑀯 𑀯𑀺𑀪𑀸𑀯𑁂𑀢𑀺.

𑀧𑀥𑀸𑀦𑀓𑀫𑁆𑀫𑀺𑀓𑀸𑀢𑀺 𑀧𑀥𑀸𑀦𑀓𑀫𑁆𑀫𑁂 𑀦𑀺𑀬𑀼𑀢𑁆𑀢𑀸. 𑀮𑀤𑁆𑀥𑀫𑀕𑁆𑀕𑀦𑁆𑀢𑀺 𑀮𑀤𑁆𑀥𑀽𑀧𑀸𑀬𑀁, 𑀧𑀞𑀫𑀫𑁂𑀯 𑀮𑀤𑁆𑀥𑀽𑀧𑀤𑁂𑀲𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀧𑀢𑁆𑀢𑀸𑀦𑀻𑀢𑀺 𑀙𑀟𑁆𑀟𑀺𑀢𑀸𑀦𑀺. 𑀅𑀮𑀸𑀩𑀽𑀦𑁂𑀯 𑀲𑀸𑀭𑀤𑁂𑀢𑀺 𑀲𑀭𑀤𑀓𑀸𑀮𑁂 𑀯𑀸𑀢𑀸𑀢𑀧𑀳𑀢𑀸𑀦𑀺 𑀢𑀢𑁆𑀣 𑀢𑀢𑁆𑀣 𑀯𑀺𑀧𑁆𑀧𑀓𑀺𑀡𑁆𑀡𑀅𑀮𑀸𑀩𑀽𑀦𑀺 𑀯𑀺𑀬. 𑀓𑀸𑀧𑁄𑀢𑀓𑀸𑀦𑀻𑀢𑀺 𑀓𑀧𑁄𑀢𑀓𑀯𑀡𑁆𑀡𑀸𑀦𑀺. 𑀢𑀸𑀦𑀺 𑀤𑀺𑀲𑁆𑀯𑀸𑀦 𑀓𑀸 𑀭𑀢𑀻𑀢𑀺 𑀢𑀸𑀦𑀺 𑀏𑀯𑀭𑀽𑀧𑀸𑀦𑀺 𑀅𑀝𑁆𑀞𑀻𑀦𑀺 𑀤𑀺𑀲𑁆𑀯𑀸 𑀢𑀼𑀫𑁆𑀳𑀸𑀓𑀁 𑀓𑀸 𑀦𑀸𑀫 𑀭𑀢𑀺, 𑀦𑀦𑀼 𑀅𑀧𑁆𑀧𑀫𑀢𑁆𑀢𑀓𑀸𑀧𑀺 𑀭𑀢𑀺 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑀓𑀣𑀁 𑀅𑀓𑀣𑀺𑀢𑀧𑀼𑀩𑁆𑀩𑁄𑀢𑀺 𑀅𑀢𑁆𑀢𑀦𑁄 𑀯𑀼𑀟𑁆𑀠𑀢𑀭𑁂𑀦 𑀲𑀤𑁆𑀥𑀺𑀁 𑀯𑀼𑀢𑁆𑀢𑀯𑀘𑀦𑀲𑁆𑀲 𑀧𑀘𑁆𑀘𑀦𑀻𑀓𑀁 𑀤𑀼𑀢𑀺𑀬𑀓𑀣𑀁 𑀅𑀓𑀣𑀺𑀢𑀧𑀼𑀩𑁆𑀩𑁄.

𑀢𑀤𑀗𑁆𑀕𑁂𑀦, 𑀢𑀤𑀗𑁆𑀕𑀲𑁆𑀲 𑀧𑀳𑀸𑀦𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑀁. 𑀬𑀜𑁆𑀳𑀺 𑀭𑀢𑁆𑀢𑀺𑀪𑀸𑀕𑁂 𑀲𑀫𑀼𑀚𑁆𑀚𑀮𑀺𑀢𑁂𑀦 𑀤𑀻𑀧𑁂𑀦 𑀅𑀦𑁆𑀥𑀓𑀸𑀭𑀲𑁆𑀲 𑀯𑀺𑀬 𑀢𑁂𑀦 𑀢𑁂𑀦 𑀯𑀺𑀧𑀲𑁆𑀲𑀦𑀸𑀬 𑀅𑀯𑀬𑀯𑀪𑀽𑀢𑁂𑀦 𑀜𑀸𑀡𑀗𑁆𑀕𑁂𑀦 𑀧𑀝𑀺𑀧𑀓𑁆𑀔𑀯𑀲𑁂𑀦𑁂𑀯 𑀢𑀲𑁆𑀲 𑀢𑀲𑁆𑀲 𑀧𑀳𑀸𑀢𑀩𑁆𑀩𑀥𑀫𑁆𑀫𑀲𑁆𑀲 𑀧𑀳𑀸𑀦𑀫𑀺𑀤𑀁 𑀢𑀤𑀗𑁆𑀕𑀧𑁆𑀧𑀳𑀸𑀦𑀁 𑀦𑀸𑀫. 𑀬𑀣𑀸 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄 𑀦 𑀘𑀺𑀢𑁆𑀢𑀁 𑀧𑀭𑀺𑀬𑀼𑀝𑁆𑀞𑀸𑀬 𑀢𑀺𑀝𑁆𑀞𑀦𑁆𑀢𑀺, 𑀏𑀯𑀁 𑀧𑀭𑀺𑀬𑀼𑀝𑁆𑀞𑀸𑀦𑀲𑁆𑀲 𑀦𑀺𑀲𑁂𑀥𑀦𑀁 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀁 𑀯𑀺𑀓𑁆𑀔𑀫𑁆𑀪𑀦𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁. 𑀬𑀜𑁆𑀳𑀺 ¶ 𑀲𑀲𑁂𑀯𑀸𑀮𑁂 𑀉𑀤𑀓𑁂 𑀧𑀓𑁆𑀔𑀺𑀢𑁆𑀢𑁂𑀦 𑀖𑀝𑁂𑀦 𑀲𑁂𑀯𑀸𑀮𑀲𑁆𑀲 𑀯𑀺𑀬 𑀢𑁂𑀦 𑀢𑁂𑀦 𑀮𑁄𑀓𑀺𑀬𑀲𑀫𑀸𑀥𑀺𑀦𑀸 𑀦𑀻𑀯𑀭𑀡𑀸𑀤𑀻𑀦𑀁 𑀧𑀘𑁆𑀘𑀦𑀻𑀓𑀥𑀫𑁆𑀫𑀸𑀦𑀁 𑀯𑀺𑀓𑁆𑀔𑀫𑁆𑀪𑀦𑀫𑀺𑀤𑀁 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀁 𑀦𑀸𑀫. 𑀲𑀫𑁆𑀫𑀸 𑀉𑀧𑀘𑁆𑀙𑀺𑀚𑁆𑀚𑀦𑁆𑀢𑀺 𑀏𑀢𑁂𑀦 𑀓𑀺𑀮𑁂𑀲𑀸𑀢𑀺 𑀲𑀫𑀼𑀘𑁆𑀙𑁂𑀤𑁄, 𑀧𑀳𑀻𑀬𑀦𑁆𑀢𑀺 𑀏𑀢𑁂𑀦 𑀓𑀺𑀮𑁂𑀲𑀸𑀢𑀺 𑀧𑀳𑀸𑀦𑀁, 𑀲𑀫𑀼𑀘𑁆𑀙𑁂𑀤𑀲𑀗𑁆𑀔𑀸𑀢𑀁 ¶ 𑀧𑀳𑀸𑀦𑀁 𑀦𑀺𑀭𑀯𑀲𑁂𑀲𑀧𑁆𑀧𑀳𑀸𑀦𑀦𑁆𑀢𑀺 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁. 𑀬𑀜𑁆𑀳𑀺 𑀅𑀲𑀦𑀺𑀯𑀺𑀘𑀓𑁆𑀓𑀸𑀪𑀺𑀳𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀯𑀺𑀬 𑀅𑀭𑀺𑀬𑀫𑀕𑁆𑀕𑀜𑀸𑀡𑁂𑀦 𑀲𑀁𑀬𑁄𑀚𑀦𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀬𑀣𑀸 𑀦 𑀧𑀼𑀦 𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀧𑀳𑀸𑀦𑀫𑀺𑀤𑀁 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀁 𑀦𑀸𑀫. 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀺 𑀯𑀽𑀧𑀲𑀫𑁆𑀫𑀢𑀺 𑀓𑀺𑀮𑁂𑀲𑀤𑀭𑀣𑁄 𑀏𑀢𑀸𑀬𑀸𑀢𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺, 𑀨𑀮𑀁, 𑀲𑀸𑀬𑁂𑀯 𑀧𑀳𑀸𑀦𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀁. 𑀲𑀩𑁆𑀩𑁂 𑀓𑀺𑀮𑁂𑀲𑀸 𑀲𑀩𑁆𑀩𑀲𑀗𑁆𑀔𑀢𑀸 𑀯𑀸 𑀦𑀺𑀲𑁆𑀲𑀭𑀦𑁆𑀢𑀺 𑀅𑀧𑀕𑀘𑁆𑀙𑀦𑁆𑀢𑀺 𑀏𑀢𑁂𑀦𑀸𑀢𑀺 𑀦𑀺𑀲𑁆𑀲𑀭𑀡𑀁, 𑀦𑀺𑀩𑁆𑀩𑀸𑀦𑀁, 𑀢𑀤𑁂𑀯 𑀧𑀳𑀸𑀦𑀦𑁆𑀢𑀺 𑀦𑀺𑀲𑁆𑀲𑀭𑀡𑀧𑁆𑀧𑀳𑀸𑀦𑀁. 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀬𑀫𑀸𑀦𑀦𑁆𑀢𑀺 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀁 𑀓𑀺𑀮𑁂𑀲𑀯𑀽𑀧𑀲𑀫𑀁 𑀓𑀼𑀭𑀼𑀫𑀸𑀦𑀁. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑁂𑀳𑀻𑀢𑀺 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀸𑀦𑀁 𑀮𑁄𑀓𑀺𑀬𑀢𑁆𑀢𑀸, 𑀇𑀢𑀭𑁂𑀲𑀁 𑀮𑁄𑀓𑀼𑀢𑁆𑀢𑀭𑀢𑁆𑀢𑀸 𑀯𑀼𑀢𑁆𑀢𑀁.

𑀦𑀺𑀫𑀻𑀬𑀢𑀺 𑀨𑀮𑀁 𑀏𑀢𑁂𑀦 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑁂 𑀧𑀓𑁆𑀔𑀺𑀧𑀫𑀸𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀦𑀺𑀫𑀺𑀢𑁆𑀢𑀁, 𑀓𑀸𑀭𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀲𑀼𑀪𑀲𑁆𑀲 𑀦𑀺𑀫𑀺𑀢𑁆𑀢𑀁, 𑀅𑀲𑀼𑀪𑀫𑁂𑀯 𑀯𑀸 𑀦𑀺𑀫𑀺𑀢𑁆𑀢𑀦𑁆𑀢𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀁. 𑀅𑀲𑀼𑀪𑀦𑀺𑀲𑁆𑀲𑀺𑀢𑀫𑁆𑀧𑀺 𑀳𑀺 𑀛𑀸𑀦𑀁 𑀦𑀺𑀲𑁆𑀲𑀺𑀢𑁂 𑀦𑀺𑀲𑁆𑀲𑀬𑀯𑁄𑀳𑀸𑀭𑁂𑀦 𑀅𑀲𑀼𑀪𑀦𑁆𑀢𑀺 𑀯𑁄𑀳𑀭𑀻𑀬𑀢𑀺 𑀬𑀣𑀸 ‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻’’𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀤𑀲𑀲𑀼 𑀅𑀲𑀼𑀪𑁂𑀲𑀼 𑀉𑀧𑁆𑀧𑀦𑁆𑀦𑀁 𑀲𑀸𑀭𑀫𑁆𑀫𑀡𑀁 𑀧𑀞𑀫𑀚𑁆𑀛𑀸𑀦’’𑀦𑁆𑀢𑀺. 𑀅𑀦𑀺𑀘𑁆𑀘𑁂 𑀅𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀲𑁆𑀲𑀸𑀢𑀺 𑀇𑀫𑀺𑀦𑀸 𑀘𑀢𑀼𑀩𑁆𑀩𑀺𑀥𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀤𑀲𑁆𑀲𑁂𑀢𑀺. 𑀳𑁂𑀝𑁆𑀞𑀸 𑀘𑁂𑀢𑁆𑀣 𑀇𑀥 𑀘 𑀘𑀢𑀼𑀩𑁆𑀩𑀺𑀥𑀲𑁆𑀲 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀲𑁆𑀲 𑀘 𑀕𑀳𑀡𑀁 𑀦𑀺𑀭𑀯𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀲𑀼 𑀧𑀦 𑀅𑀲𑀼𑀪𑁂 ‘‘𑀅𑀲𑀼𑀪’’𑀦𑁆𑀢𑀺 𑀫𑀦𑀲𑀺𑀓𑀸𑀭𑁄 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀢𑀤𑀦𑀼𑀓𑀽𑀮𑀢𑁆𑀢𑀸 𑀯𑀸 𑀇𑀢𑀭𑁂𑀲𑀫𑁆𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁.

𑀏𑀓𑀸𑀤𑀲𑀲𑀼 𑀅𑀲𑀼𑀪𑁂𑀲𑀼 𑀧𑀝𑀺𑀓𑀽𑀮𑀸𑀓𑀸𑀭𑀲𑁆𑀲 𑀉𑀕𑁆𑀕𑀡𑁆𑀳𑀦𑀁, 𑀬𑀣𑀸 𑀯𑀸 𑀢𑀢𑁆𑀣 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀣𑀸 𑀧𑀝𑀺𑀧𑀢𑁆𑀢𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑁄. 𑀉𑀧𑀘𑀸𑀭𑀧𑁆𑀧𑀦𑀸𑀯𑀳𑀸𑀬 𑀅𑀲𑀼𑀪𑀪𑀸𑀯𑀦𑀸𑀬 𑀅𑀦𑀼𑀬𑀼𑀜𑁆𑀚𑀦𑀁 𑀅𑀲𑀼𑀪𑀪𑀸𑀯𑀦𑀸𑀦𑀼𑀬𑁄𑀕𑁄. 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀦𑁄 𑀣𑀺𑀦𑀫𑀺𑀤𑁆𑀥𑀸𑀪𑀺𑀪𑀯𑀸𑀪𑀸𑀯𑀸 𑀑𑀢𑀸𑀭𑀁 𑀅𑀮𑀪𑀫𑀸𑀦𑁄 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑀻𑀢𑀺 𑀯𑀤𑀦𑁆𑀢𑀺. 𑀪𑁄𑀚𑀦𑀦𑀺𑀲𑁆𑀲𑀺𑀢𑀁 𑀧𑀦 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀁, 𑀢𑀩𑁆𑀩𑀺𑀧𑀭𑀺𑀡𑀸𑀫𑀲𑁆𑀲 𑀢𑀤𑀸𑀥𑀸𑀭𑀲𑁆𑀲 𑀢𑀲𑁆𑀲 𑀘 𑀉𑀤𑀭𑀺𑀬𑀪𑀽𑀢𑀲𑁆𑀲 𑀅𑀲𑀼𑀪𑀢𑀸𑀤𑀲𑁆𑀲𑀦𑀁, 𑀓𑀸𑀬𑀲𑁆𑀲 𑀘 𑀆𑀳𑀸𑀭𑀝𑁆𑀞𑀺𑀢𑀺𑀓𑀢𑀸𑀤𑀲𑁆𑀲𑀦𑀁 𑀬𑁄 𑀉𑀧𑁆𑀧𑀸𑀤𑁂𑀢𑀺, 𑀲𑁄 𑀯𑀺𑀲𑁂𑀲𑀢𑁄 𑀪𑁄𑀚𑀦𑁂 𑀧𑀫𑀸𑀡𑀜𑁆𑀜𑀽 𑀦𑀸𑀫, 𑀢𑀲𑁆𑀲 𑀘 𑀓𑀸𑀫𑀘𑁆𑀙𑀦𑁆𑀤𑁄 𑀧𑀳𑀻𑀬𑀢𑁂𑀯. 𑀤𑀲𑀯𑀺𑀥𑀜𑁆𑀳𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀦𑁆𑀢𑀺 𑀧𑀸𑀓𑀝𑀯𑀲𑁂𑀦 𑀯𑀼𑀢𑁆𑀢𑀁. 𑀓𑀸𑀬𑀕𑀢𑀸𑀲𑀢𑀺𑀁 𑀧𑀦 𑀕𑀳𑁂𑀢𑁆𑀯𑀸 𑀏𑀓𑀸𑀤𑀲𑀯𑀺𑀥𑀫𑁆𑀧𑀺 𑀅𑀲𑀼𑀪𑀦𑀺𑀫𑀺𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀁.

𑀅𑀪𑀼𑀢𑁆𑀯𑀸 𑀉𑀤𑀓𑀁 𑀧𑀺𑀯𑁂𑀢𑀺 𑀧𑀸𑀦𑀻𑀬𑀲𑁆𑀲 𑀑𑀓𑀸𑀲𑀤𑀸𑀦𑀢𑁆𑀣𑀁 𑀘𑀢𑁆𑀢𑀸𑀭𑁄 𑀧𑀜𑁆𑀘 𑀆𑀮𑁄𑀧𑁂 𑀅𑀪𑀼𑀢𑁆𑀯𑀸 𑀧𑀸𑀦𑀻𑀬𑀁 ¶ 𑀧𑀺𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀘𑀢𑀼𑀦𑁆𑀦𑀁 ¶ 𑀧𑀜𑁆𑀘𑀦𑁆𑀦𑀁 𑀆𑀮𑁄𑀧𑀸𑀦𑀁 𑀑𑀓𑀸𑀲𑁂 𑀲𑀢𑀻’’𑀢𑀺. 𑀅𑀪𑀺𑀥𑀫𑁆𑀫𑀝𑀻𑀓𑀸𑀓𑀸𑀭𑁂𑀦 𑀧𑀦𑁂𑀢𑁆𑀣 ‘‘𑀘𑀢𑁆𑀢𑀸𑀭𑁄 𑀧𑀜𑁆𑀘 𑀆𑀮𑁄𑀧𑁂, 𑀪𑀼𑀢𑁆𑀯𑀸𑀦 𑀉𑀤𑀓𑀁 𑀧𑀺𑀯𑁂’’𑀢𑀺 𑀧𑀸𑀞𑀁 𑀧𑀭𑀺𑀓𑀧𑁆𑀧𑁂𑀢𑁆𑀯𑀸 𑀅𑀜𑁆𑀜𑀣𑀸 𑀅𑀢𑁆𑀣𑁄 𑀯𑀡𑁆𑀡𑀺𑀢𑁄, 𑀲𑁄 𑀅𑀝𑁆𑀞𑀓𑀣𑀸𑀬 𑀦 𑀲𑀫𑁂𑀢𑀺. 𑀅𑀲𑀼𑀪𑀓𑀫𑁆𑀫𑀺𑀓𑀢𑀺𑀲𑁆𑀲𑀢𑁆𑀣𑁂𑀭𑁄 𑀤𑀦𑁆𑀢𑀝𑁆𑀞𑀺𑀤𑀲𑁆𑀲𑀸𑀯𑀻.

𑁧𑁭. 𑀲𑀢𑁆𑀢𑀫𑁂 𑀫𑀺𑀚𑁆𑀚𑀢𑀺 𑀳𑀺𑀢𑀨𑀭𑀡𑀯𑀲𑁂𑀦 𑀲𑀺𑀦𑀺𑀬𑁆𑀳𑀢𑀻𑀢𑀺 𑀫𑀺𑀢𑁆𑀢𑁄, 𑀳𑀺𑀢𑁂𑀲𑀻 𑀧𑀼𑀕𑁆𑀕𑀮𑁄, 𑀢𑀲𑁆𑀫𑀺𑀁 𑀫𑀺𑀢𑁆𑀢𑁂 𑀪𑀯𑀸, 𑀫𑀺𑀢𑁆𑀢𑀲𑁆𑀲 𑀯𑀸 𑀏𑀲𑀸𑀢𑀺 𑀫𑁂𑀢𑁆𑀢𑀸, 𑀳𑀺𑀢𑁂𑀲𑀺𑀢𑀸. 𑀢𑀢𑁆𑀣 ‘‘𑀫𑁂𑀢𑁆𑀢𑀸’’𑀢𑀺 𑀯𑀼𑀢𑁆𑀢𑁂 𑀅𑀧𑁆𑀧𑀦𑀸𑀧𑀺 𑀉𑀧𑀘𑀸𑀭𑁄𑀧𑀺 𑀯𑀝𑁆𑀝𑀢𑀺 𑀲𑀸𑀥𑀸𑀭𑀡𑀯𑀘𑀦𑀪𑀸𑀯𑀢𑁄𑀢𑀺 𑀆𑀳 𑁋 ‘‘𑀫𑁂𑀢𑁆𑀢𑀸𑀢𑀺 𑀏𑀢𑁆𑀢𑀸𑀯𑀢𑀸 𑀧𑀼𑀩𑁆𑀩𑀪𑀸𑀕𑁄𑀧𑀺 𑀯𑀝𑁆𑀝𑀢𑀻’’𑀢𑀺. 𑀅𑀧𑀺-𑀲𑀤𑁆𑀤𑁄 𑀅𑀧𑁆𑀧𑀦𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀅𑀧𑁆𑀧𑀦𑀁 𑀅𑀧𑁆𑀧𑀢𑁆𑀢𑀸𑀬 𑀫𑁂𑀢𑁆𑀢𑀸𑀬 𑀲𑀼𑀝𑁆𑀞𑀼 𑀫𑀼𑀘𑁆𑀘𑀦𑀲𑁆𑀲 𑀅𑀪𑀸𑀯𑀢𑁄 𑀘𑁂𑀢𑁄𑀯𑀺𑀫𑀼𑀢𑁆𑀢𑀻𑀢𑀺 ‘‘𑀅𑀧𑁆𑀧𑀦𑀸𑀯 𑀅𑀥𑀺𑀧𑁆𑀧𑁂𑀢𑀸’’𑀢𑀺 𑀯𑀼𑀢𑁆𑀢𑀁.

𑀲𑀢𑁆𑀢𑁂𑀲𑀼 𑀫𑁂𑀢𑁆𑀢𑀸𑀬𑀦𑀲𑁆𑀲 𑀳𑀺𑀢𑀽𑀧𑀲𑀁𑀳𑀸𑀭𑀲𑁆𑀲 𑀉𑀧𑁆𑀧𑀸𑀤𑀦𑀁 𑀧𑀯𑀢𑁆𑀢𑀦𑀁 𑀫𑁂𑀢𑁆𑀢𑀸𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑁄. 𑀧𑀞𑀫𑀼𑀧𑁆𑀧𑀦𑁆𑀦𑁄 𑀫𑁂𑀢𑁆𑀢𑀸𑀫𑀦𑀲𑀺𑀓𑀸𑀭𑁄 𑀧𑀭𑀢𑁄 𑀉𑀧𑁆𑀧𑀚𑁆𑀚𑀦𑀓𑀲𑁆𑀲 𑀓𑀸𑀭𑀡𑀪𑀸𑀯𑀢𑁄 𑀫𑁂𑀢𑁆𑀢𑀸𑀫𑀦𑀲𑀺𑀓𑀸𑀭𑁄𑀯 𑀫𑁂𑀢𑁆𑀢𑀸𑀦𑀺𑀫𑀺𑀢𑁆𑀢𑀁. 𑀓𑀫𑁆𑀫𑀁𑀬𑁂𑀯 𑀲𑀓𑀁 𑀏𑀢𑁂𑀲𑀦𑁆𑀢𑀺 𑀓𑀫𑁆𑀫𑀲𑁆𑀲𑀓𑀸, 𑀲𑀢𑁆𑀢𑀸, 𑀢𑀩𑁆𑀪𑀸𑀯𑁄 𑀓𑀫𑁆𑀫𑀲𑁆𑀲𑀓𑀢𑀸, 𑀓𑀫𑁆𑀫𑀤𑀸𑀬𑀸𑀤𑀢𑀸. 𑀤𑁄𑀲𑀫𑁂𑀢𑁆𑀢𑀸𑀲𑀼 𑀬𑀸𑀣𑀸𑀯𑀢𑁄 𑀆𑀤𑀻𑀦𑀯𑀸𑀦𑀺𑀲𑀁𑀲𑀸𑀦𑀁 𑀧𑀝𑀺𑀲𑀗𑁆𑀔𑀸𑀦𑀯𑀻𑀫𑀁𑀲𑀸 𑀇𑀥 𑀧𑀝𑀺𑀲𑀗𑁆𑀔𑀸𑀦𑀁. 𑀫𑁂𑀢𑁆𑀢𑀸𑀯𑀺𑀳𑀸𑀭𑀻𑀓𑀮𑁆𑀬𑀸𑀡𑀫𑀺𑀢𑁆𑀢𑀯𑀦𑁆𑀢𑀢𑀸 𑀇𑀥 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸. 𑀑𑀤𑀺𑀲𑁆𑀲𑀓𑀅𑀦𑁄𑀤𑀺𑀲𑁆𑀲𑀓𑀤𑀺𑀲𑀸𑀨𑀭𑀡𑀸𑀦𑀦𑁆𑀢𑀺 𑀅𑀢𑁆𑀢𑀅𑀢𑀺𑀧𑀺𑀬𑀫𑀚𑁆𑀛𑀢𑁆𑀢𑀯𑁂𑀭𑀺𑀯𑀲𑁂𑀦 𑀑𑀤𑀺𑀲𑁆𑀲𑀓𑀢𑀸, 𑀲𑀻𑀫𑀸𑀲𑀫𑁆𑀪𑁂𑀤𑁂 𑀓𑀢𑁂 𑀅𑀦𑁄𑀤𑀺𑀲𑁆𑀲𑀓𑀢𑀸, 𑀏𑀓𑀸𑀤𑀺𑀤𑀺𑀲𑀸𑀨𑀭𑀡𑀯𑀲𑁂𑀦 𑀤𑀺𑀲𑀸𑀨𑀭𑀡𑀢𑀸 𑀫𑁂𑀢𑁆𑀢𑀸𑀬 𑀉𑀕𑁆𑀕𑀳𑀡𑁂 𑀯𑁂𑀤𑀺𑀢𑀩𑁆𑀩𑀸. 𑀯𑀺𑀳𑀸𑀭𑀭𑀘𑁆𑀙𑀕𑀸𑀫𑀸𑀤𑀺𑀯𑀲𑁂𑀦 𑀯𑀸 𑀑𑀤𑀺𑀲𑁆𑀲𑀓𑀤𑀺𑀲𑀸𑀨𑀭𑀡𑀁. 𑀯𑀺𑀳𑀸𑀭𑀸𑀤𑀺𑀉𑀤𑁆𑀤𑁂𑀲𑀭𑀳𑀺𑀢𑀁 𑀧𑀼𑀭𑀢𑁆𑀣𑀺𑀫𑀸𑀤𑀺𑀤𑀺𑀲𑀸𑀯𑀲𑁂𑀦 𑀅𑀦𑁄𑀤𑀺𑀲𑁆𑀲𑀓𑀤𑀺𑀲𑀸𑀨𑀭𑀡𑀁. 𑀏𑀯𑀁 𑀯𑀸 𑀤𑁆𑀯𑀺𑀥𑀸 𑀉𑀕𑁆𑀕𑀳𑀡𑀁 𑀲𑀦𑁆𑀥𑀸𑀬 𑁋 ‘‘𑀑𑀤𑀺𑀲𑁆𑀲𑀓𑀅𑀦𑁄𑀤𑀺𑀲𑁆𑀲𑀓𑀤𑀺𑀲𑀸𑀨𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀕𑁆𑀕𑀳𑁄 𑀘 𑀬𑀸𑀯 𑀉𑀧𑀘𑀸𑀭𑀸 𑀤𑀝𑁆𑀞𑀩𑁆𑀩𑁄. 𑀉𑀕𑁆𑀕𑀳𑀺𑀢𑀸𑀬 𑀆𑀲𑁂𑀯𑀦𑀸 𑀪𑀸𑀯𑀦𑀸. 𑀢𑀢𑁆𑀣 𑀲𑀩𑁆𑀩𑁂 𑀲𑀢𑁆𑀢𑀸, 𑀧𑀸𑀡𑀸, 𑀪𑀽𑀢𑀸, 𑀧𑀼𑀕𑁆𑀕𑀮𑀸, 𑀅𑀢𑁆𑀢𑀪𑀸𑀯𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀏𑀢𑁂𑀲𑀁 𑀯𑀲𑁂𑀦 𑀧𑀜𑁆𑀘𑀯𑀺𑀥𑀸. 𑀏𑀓𑁂𑀓𑀲𑁆𑀫𑀺𑀁 𑀅𑀯𑁂𑀭𑀸 𑀳𑁄𑀦𑁆𑀢𑀼, 𑀅𑀩𑁆𑀬𑀸𑀧𑀚𑁆𑀛𑀸, 𑀅𑀦𑀻𑀖𑀸, 𑀲𑀼𑀔𑀻 𑀅𑀢𑁆𑀢𑀸𑀦𑀁 𑀧𑀭𑀺𑀳𑀭𑀦𑁆𑀢𑀽𑀢𑀺 𑀘𑀢𑀼𑀥𑀸 𑀧𑀯𑀢𑁆𑀢𑀺𑀢𑁄 𑀯𑀻𑀲𑀢𑀺𑀯𑀺𑀥𑀸 𑀅𑀦𑁄𑀥𑀺𑀲𑁄𑀨𑀭𑀡𑀸 𑀫𑁂𑀢𑁆𑀢𑀸. 𑀲𑀩𑁆𑀩𑀸 𑀇𑀢𑁆𑀣𑀺𑀬𑁄, 𑀧𑀼𑀭𑀺𑀲𑀸, 𑀅𑀭𑀺𑀬𑀸, 𑀅𑀦𑀭𑀺𑀬𑀸, 𑀤𑁂𑀯𑀸, 𑀫𑀦𑀼𑀲𑁆𑀲𑀸, 𑀯𑀺𑀦𑀺𑀧𑀸𑀢𑀺𑀓𑀸𑀢𑀺 𑀲𑀢𑁆𑀢𑀸𑀥𑀺𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀸 𑀲𑀢𑁆𑀢𑀯𑀺𑀥𑀸 𑀅𑀝𑁆𑀞𑀯𑀻𑀲𑀢𑀺𑀯𑀺𑀥𑀸 𑀯𑀸, 𑀤𑀲𑀳𑀺 𑀤𑀺𑀲𑀸𑀳𑀺 𑀤𑀺𑀲𑀸𑀥𑀺𑀓𑀭𑀡𑀯𑀲𑁂𑀦 𑀧𑀯𑀢𑁆𑀢𑀸 𑀤𑀲𑀯𑀺𑀥𑀸 𑀘, 𑀏𑀓𑁂𑀓𑀸𑀬 ¶ 𑀯𑀸 𑀤𑀺𑀲𑀸𑀬 𑀲𑀢𑁆𑀢𑀸𑀤𑀺𑀇𑀢𑁆𑀣𑀸𑀤𑀺𑀅𑀯𑁂𑀭𑀸𑀤𑀺𑀪𑁂𑀤𑁂𑀦 𑀅𑀲𑀻𑀢𑀸𑀥𑀺𑀓𑀘𑀢𑀼𑀲𑀢𑀧𑁆𑀧𑀪𑁂𑀤𑀸 𑀘 𑀑𑀥𑀺𑀲𑁄𑀨𑀭𑀡𑀸 𑀯𑁂𑀤𑀺𑀢𑀩𑁆𑀩𑀸. 𑀫𑁂𑀢𑁆𑀢𑀁 𑀪𑀸𑀯𑁂𑀦𑁆𑀢𑀲𑁆𑀲𑀸𑀢𑀺 𑀫𑁂𑀢𑁆𑀢𑀸𑀛𑀸𑀦𑀁 𑀪𑀸𑀯𑁂𑀦𑁆𑀢𑀲𑁆𑀲. 𑀢𑁆𑀯𑀁 𑀏𑀢𑀲𑁆𑀲 𑀓𑀼𑀤𑁆𑀥𑁄𑀢𑀺𑀆𑀤𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀯𑀺𑀥𑀺𑀤𑀲𑁆𑀲𑀦𑀁. 𑀅𑀧𑁆𑀧𑀝𑀺𑀘𑁆𑀙𑀺𑀢𑀧𑀳𑁂𑀡𑀓𑀁 𑀯𑀺𑀬𑀸𑀢𑀺 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑀧𑀡𑁆𑀡𑀸𑀓𑀸𑀭𑀁 𑀯𑀺𑀬. 𑀧𑀝𑀺𑀲𑀗𑁆𑀔𑀸𑀦𑁂𑀢𑀺 𑀯𑀻𑀫𑀁𑀲𑀸𑀬𑀁. 𑀯𑀢𑁆𑀢𑀦𑀺𑀅𑀝𑀯𑀺𑀬𑀁 𑀅𑀢𑁆𑀢𑀕𑀼𑀢𑁆𑀢𑀢𑁆𑀣𑁂𑀭𑀲𑀤𑀺𑀲𑁂.

𑁧𑁮. 𑀅𑀝𑁆𑀞𑀫𑁂 ¶ 𑀓𑀼𑀲𑀮𑀥𑀫𑁆𑀫𑀲𑀫𑁆𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑁆𑀞𑀧𑀦𑀲𑀪𑀸𑀯𑀢𑀸𑀬 𑀢𑀧𑁆𑀧𑀝𑀺𑀧𑀓𑁆𑀔𑀸𑀦𑀁 𑀯𑀺𑀲𑁄𑀲𑀦𑀲𑀪𑀸𑀯𑀢𑀸𑀬 𑀘 𑀆𑀭𑀫𑁆𑀪𑀥𑀸𑀢𑀼𑀆𑀤𑀺𑀢𑁄 𑀧𑀯𑀢𑁆𑀢𑀯𑀻𑀭𑀺𑀬𑀦𑁆𑀢𑀺 𑀆𑀳 𑁋 ‘‘𑀧𑀞𑀫𑀸𑀭𑀫𑁆𑀪𑀯𑀻𑀭𑀺𑀬’’𑀦𑁆𑀢𑀺. 𑀬𑀲𑁆𑀫𑀸 𑀧𑀞𑀫𑀸𑀭𑀫𑁆𑀪𑀫𑀢𑁆𑀢𑀲𑁆𑀲 𑀓𑁄𑀲𑀚𑁆𑀚𑀯𑀺𑀥𑀫𑀦𑀁 𑀣𑀸𑀫𑀕𑀫𑀦𑀜𑁆𑀘 𑀦𑀢𑁆𑀣𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀓𑁄𑀲𑀚𑁆𑀚𑀢𑁄 𑀦𑀺𑀓𑁆𑀔𑀦𑁆𑀢𑀢𑁆𑀢𑀸 𑀢𑀢𑁄 𑀩𑀮𑀯𑀢𑀭’’𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀅𑀧𑀭𑀸𑀧𑀭𑀼𑀧𑁆𑀧𑀢𑁆𑀢𑀺𑀬𑀸 𑀮𑀤𑁆𑀥𑀸𑀲𑁂𑀯𑀦𑀁 𑀉𑀧𑀭𑀽𑀧𑀭𑀺 𑀯𑀺𑀲𑁂𑀲𑀁 𑀆𑀯𑀳𑀦𑁆𑀢𑀁 𑀅𑀢𑀺𑀯𑀺𑀬 𑀣𑀸𑀫𑀕𑀢𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀧𑀭𑀁 𑀧𑀭𑀁 𑀞𑀸𑀦𑀁 𑀅𑀓𑁆𑀓𑀫𑀦𑀢𑁄 𑀢𑀢𑁄𑀧𑀺 𑀩𑀮𑀯𑀢𑀭’’𑀦𑁆𑀢𑀺. 𑀧𑀦𑀽𑀤𑀦𑀸𑀬𑀸𑀢𑀺 𑀦𑀻𑀳𑀭𑀡𑀸𑀬. 𑀬𑀣𑀸 𑀫𑀳𑀢𑁄 𑀧𑀮𑀺𑀖𑀲𑁆𑀲 𑀉𑀕𑁆𑀖𑀸𑀝𑀓𑀚𑀦𑀲𑁆𑀲 𑀫𑀳𑀦𑁆𑀢𑁄 𑀉𑀲𑁆𑀲𑀸𑀳𑁄 𑀇𑀘𑁆𑀙𑀺𑀢𑀩𑁆𑀩𑁄, 𑀏𑀯𑀫𑀺𑀥𑀸𑀧𑀻𑀢𑀺 ‘‘𑀦𑀺𑀓𑁆𑀓𑀫𑁄 𑀘𑁂𑀢𑀲𑁄 𑀧𑀮𑀺𑀖𑀼𑀕𑁆𑀖𑀸𑀝𑀦𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀧𑀭𑀓𑁆𑀓𑀫𑁄 𑀏𑀯 𑀧𑀭𑁂𑀦 𑀓𑀢𑀁 𑀩𑀦𑁆𑀥𑀦𑀁 𑀙𑀺𑀦𑁆𑀤𑁂𑀬𑁆𑀬, 𑀏𑀯𑀫𑀺𑀥𑀸𑀧𑀻𑀢𑀺 𑀯𑀼𑀢𑁆𑀢𑀁 𑁋 ‘‘𑀧𑀭𑀓𑁆𑀓𑀫𑁄 𑀘𑁂𑀢𑀲𑁄 𑀩𑀦𑁆𑀥𑀦𑀘𑁆𑀙𑁂𑀤𑀦𑀸𑀬𑀸’’𑀢𑀺.

𑀆𑀭𑀤𑁆𑀥𑀁 𑀲𑀁𑀲𑀸𑀥𑀺𑀢𑀁 𑀧𑀭𑀺𑀧𑀽𑀭𑀺𑀢𑀁 𑀯𑀻𑀭𑀺𑀬𑀁 𑀏𑀢𑀲𑁆𑀲𑀸𑀢𑀺 𑀆𑀭𑀤𑁆𑀥𑀯𑀻𑀭𑀺𑀬𑁄, 𑀦𑀺𑀧𑁆𑀨𑀦𑁆𑀦𑀯𑀻𑀭𑀺𑀬𑁄, 𑀆𑀭𑀤𑁆𑀥𑀁 𑀧𑀝𑁆𑀞𑀧𑀺𑀢𑀁 𑀯𑀻𑀭𑀺𑀬𑀁 𑀏𑀢𑀲𑁆𑀲𑀸𑀢𑀺 𑀆𑀭𑀤𑁆𑀥𑀯𑀻𑀭𑀺𑀬𑁄. 𑀯𑀻𑀭𑀺𑀬𑀸𑀭𑀫𑁆𑀪𑀧𑁆𑀧𑀲𑀼𑀢𑁄𑀢𑀺 𑀆𑀳 𑁋 ‘‘𑀆𑀭𑀤𑁆𑀥𑀯𑀻𑀭𑀺𑀬𑀲𑁆𑀲𑀸𑀢𑀺 𑀧𑀭𑀺𑀧𑀼𑀡𑁆𑀡𑀯𑀻𑀭𑀺𑀬𑀲𑁆𑀲𑀘𑁂𑀯 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑀲𑁆𑀲 𑀘𑀸’’𑀢𑀺. 𑀘𑀢𑀼𑀤𑁄𑀲𑀸𑀧𑀕𑀢𑀦𑁆𑀢𑀺 𑀅𑀢𑀺𑀮𑀻𑀦𑀢𑀸𑀤𑀻𑀳𑀺 𑀘𑀢𑀽𑀳𑀺 𑀤𑁄𑀲𑁂𑀳𑀺 𑀅𑀧𑀕𑀢𑀁. 𑀘𑀢𑀼𑀤𑁄𑀲𑀸𑀧𑀕𑀢𑀢𑁆𑀢𑀫𑁂𑀯 𑀯𑀺𑀪𑀸𑀯𑁂𑀢𑀺 ‘‘𑀦 𑀘 𑀅𑀢𑀺𑀮𑀻𑀦’’𑀦𑁆𑀢𑀺𑀆𑀤𑀺𑀦𑀸. 𑀅𑀢𑀺𑀮𑀻𑀦𑀜𑁆𑀳𑀺 𑀪𑀸𑀯𑀦𑀸𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑀧𑀓𑁆𑀔𑀺𑀓𑀁 𑀲𑀺𑀬𑀸, 𑀅𑀢𑀺𑀧𑀕𑁆𑀕𑀳𑀺𑀢𑀜𑁆𑀘 𑀉𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀁. 𑀪𑀸𑀯𑀦𑀸𑀯𑀻𑀣𑀺𑀁 𑀅𑀦𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀲𑀗𑁆𑀓𑁄𑀘𑀸𑀧𑀢𑁆𑀢𑀺 𑀅𑀢𑀺𑀮𑀻𑀦𑀢𑀸. 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀅𑀦𑁆𑀢𑁄𑀲𑀗𑁆𑀓𑁄𑀘𑁄 𑀅𑀚𑁆𑀛𑀢𑁆𑀢𑀁 𑀲𑀁𑀔𑀺𑀢𑁆𑀢𑀢𑀸. 𑀅𑀢𑀺𑀧𑀕𑁆𑀕𑀳𑀺𑀢𑀢𑀸 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑀸. 𑀩𑀳𑀺𑀤𑁆𑀥𑀸 𑀯𑀺𑀓𑁆𑀔𑀺𑀢𑁆𑀢𑀢𑀸 𑀩𑀳𑀺𑀯𑀺𑀲𑀝𑀯𑀺𑀢𑀓𑁆𑀓𑀸𑀦𑀼𑀥𑀸𑀯𑀦𑀸. 𑀢𑀤𑁂𑀢𑀁 𑀯𑀻𑀭𑀺𑀬𑀁 𑀘𑀗𑁆𑀓𑀫𑀸𑀤𑀺𑀓𑀸𑀬𑀺𑀓𑀧𑁆𑀧𑀬𑁄𑀕𑀸𑀯𑀳𑀁 𑀓𑀸𑀬𑀺𑀓𑀁, 𑀢𑀤𑀜𑁆𑀜𑀁 𑀘𑁂𑀢𑀲𑀺𑀓𑀁. 𑀭𑀢𑁆𑀢𑀺𑀤𑀺𑀯𑀲𑁆𑀲 𑀧𑀜𑁆𑀘 𑀓𑁄𑀝𑁆𑀞𑀸𑀲𑁂𑀢𑀺 𑀧𑀼𑀩𑁆𑀩𑀡𑁆𑀳𑀲𑀸𑀬𑀦𑁆𑀳𑀧𑀞𑀫𑀫𑀚𑁆𑀛𑀺𑀫𑀧𑀘𑁆𑀙𑀺𑀫𑀬𑀸𑀫𑀲𑀗𑁆𑀔𑀸𑀢𑁂 𑀧𑀜𑁆𑀘 𑀓𑁄𑀝𑁆𑀞𑀸𑀲𑁂. 𑀢𑀤𑀼𑀪𑀬𑀫𑁆𑀧𑀻𑀢𑀺 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀜𑁆𑀘 𑀯𑀻𑀭𑀺𑀬𑀁. 𑀫𑀺𑀮𑀓𑁆𑀔𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲 𑀫𑀳𑀸𑀲𑀻𑀯𑀢𑁆𑀣𑁂𑀭𑀲𑁆𑀲 𑀘 𑀯𑀢𑁆𑀣𑀼 𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀫𑁂𑀯.

𑀧𑀻𑀢𑀺𑀫𑀮𑁆𑀮𑀓𑀢𑁆𑀣𑁂𑀭𑀲𑁆𑀲 ¶ 𑀯𑀢𑁆𑀣𑀼 𑀧𑀦 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁. 𑀲𑁄 𑀓𑀺𑀭 𑀕𑀺𑀳𑀺𑀓𑀸𑀮𑁂 𑀫𑀮𑁆𑀮𑀬𑀼𑀤𑁆𑀥𑀸𑀬 𑀆𑀳𑀺𑀡𑁆𑀟𑀦𑁆𑀢𑁄 𑀢𑀻𑀲𑀼 𑀭𑀚𑁆𑀚𑁂𑀲𑀼 𑀧𑀝𑀸𑀓𑀁 𑀕𑀳𑁂𑀢𑁆𑀯𑀸 𑀢𑀫𑁆𑀩𑀧𑀡𑁆𑀡𑀺𑀤𑀻𑀧𑀁 𑀆𑀕𑀫𑁆𑀫 𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀭𑀜𑁆𑀜𑀸 𑀓𑀢𑀸𑀦𑀼𑀕𑁆𑀕𑀳𑁄 𑀏𑀓𑀤𑀺𑀯𑀲𑀁 𑀓𑀺𑀮𑀜𑁆𑀘𑀓𑀸𑀲𑀦𑀲𑀸𑀮𑀸𑀤𑁆𑀯𑀸𑀭𑁂𑀦 𑀕𑀘𑁆𑀙𑀦𑁆𑀢𑁄 ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁, 𑀢𑀁 𑀧𑀚𑀳𑀣, 𑀢𑀁 𑀯𑁄 𑀧𑀳𑀻𑀦𑀁 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬 𑀪𑀯𑀺𑀲𑁆𑀲𑀢𑀻’’𑀢𑀺 (𑀲𑀁. 𑀦𑀺. 𑁩.𑁩𑁩-𑁩𑁪; 𑁪.𑁧𑁦𑁨; 𑀫. 𑀦𑀺. 𑁧.𑁨𑁪𑁭) 𑀦𑀢𑀼𑀫𑁆𑀳𑀸𑀓𑀯𑀕𑁆𑀕𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀦𑁂𑀯 𑀓𑀺𑀭 𑀭𑀽𑀧𑀁 𑀅𑀢𑁆𑀢𑀦𑁄, 𑀦 𑀯𑁂𑀤𑀦𑀸’’𑀢𑀺. 𑀲𑁄 𑀢𑀁𑀬𑁂𑀯 𑀅𑀗𑁆𑀓𑀼𑀲𑀁 𑀓𑀢𑁆𑀯𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀳𑀸𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑁄 𑀉𑀧𑀲𑀫𑁆𑀧𑀦𑁆𑀦𑁄 𑀤𑁆𑀯𑁂𑀫𑀸𑀢𑀺𑀓𑀸 𑀧𑀕𑀼𑀡𑀁 𑀓𑀢𑁆𑀯𑀸 𑀢𑀺𑀁𑀲 𑀪𑀺𑀓𑁆𑀔𑀽 𑀕𑀳𑁂𑀢𑁆𑀯𑀸 𑀅𑀯𑀭𑀯𑀸𑀮𑀺𑀬𑀅𑀗𑁆𑀕𑀡𑀁 𑀕𑀦𑁆𑀢𑁆𑀯𑀸 𑀲𑀫𑀡𑀥𑀫𑁆𑀫𑀁 𑀅𑀓𑀸𑀲𑀺. 𑀧𑀸𑀤𑁂𑀲𑀼 𑀅𑀯𑀳𑀦𑁆𑀢𑁂𑀲𑀼 𑀚𑀡𑁆𑀡𑀼𑀓𑁂𑀳𑀺 𑀘𑀗𑁆𑀓𑀫𑀢𑀺. 𑀢𑀫𑁂𑀦𑀁 ¶ 𑀭𑀢𑁆𑀢𑀺𑀁 𑀏𑀓𑁄 𑀫𑀺𑀕𑀮𑀼𑀤𑁆𑀤𑀓𑁄 ‘‘𑀫𑀺𑀕𑁄’’𑀢𑀺 𑀫𑀜𑁆𑀜𑀫𑀸𑀦𑁄 𑀧𑀳𑀭𑀺, 𑀲𑀢𑁆𑀢𑀺 𑀯𑀺𑀦𑀺𑀯𑀺𑀚𑁆𑀛𑀺𑀢𑁆𑀯𑀸 𑀕𑀢𑀸. 𑀲𑁄 𑀢𑀁 𑀲𑀢𑁆𑀢𑀺𑀁 𑀳𑀭𑀸𑀧𑁂𑀢𑁆𑀯𑀸 𑀧𑀳𑀸𑀭𑀫𑀼𑀔𑀸𑀦𑀺 𑀢𑀺𑀡𑀯𑀝𑁆𑀝𑀺𑀬𑀸 𑀧𑀽𑀭𑀸𑀧𑁂𑀢𑁆𑀯𑀸 𑀧𑀸𑀲𑀸𑀡𑀧𑀺𑀝𑁆𑀞𑀺𑀬𑀁 𑀅𑀢𑁆𑀢𑀸𑀦𑀁 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀉𑀓𑁆𑀓𑀸𑀲𑀺𑀢𑀲𑀤𑁆𑀤𑁂𑀦 𑀆𑀕𑀢𑀸𑀦𑀁 𑀪𑀺𑀓𑁆𑀔𑀽𑀦𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀪𑀸𑀲𑀺𑀢𑀁 𑀩𑀼𑀤𑁆𑀥𑀲𑁂𑀝𑁆𑀞𑀲𑁆𑀲, 𑀲𑀩𑁆𑀩𑀮𑁄𑀓𑀕𑁆𑀕𑀯𑀸𑀤𑀺𑀦𑁄;

𑀦 𑀢𑀼𑀫𑁆𑀳𑀸𑀓𑀁 𑀇𑀤𑀁 𑀭𑀽𑀧𑀁, 𑀢𑀁 𑀚𑀳𑁂𑀬𑁆𑀬𑀸𑀣 𑀪𑀺𑀓𑁆𑀔𑀯𑁄. (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁭𑁩; 𑀫. 𑀦𑀺. 𑀅𑀝𑁆𑀞. 𑁧.𑁧𑁦𑁬);

‘‘𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸, 𑀉𑀧𑁆𑀧𑀸𑀤𑀯𑀬𑀥𑀫𑁆𑀫𑀺𑀦𑁄;

𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄’’𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁭𑁩; 𑀫. 𑀦𑀺. 𑀅𑀝𑁆𑀞. 𑁧.𑁧𑁦𑁬; 𑀣𑁂𑀭𑀕𑀸. 𑁧𑁧𑁬𑁮);

𑀓𑀼𑀝𑀼𑀫𑁆𑀩𑀺𑀬𑀧𑀼𑀢𑁆𑀢𑀢𑀺𑀲𑁆𑀲𑀢𑁆𑀣𑁂𑀭𑀲𑁆𑀲𑀧𑀺 𑀯𑀢𑁆𑀣𑀼 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀸𑀯𑀢𑁆𑀣𑀺𑀬𑀁 𑀓𑀺𑀭 𑀢𑀺𑀲𑁆𑀲𑁄 𑀦𑀸𑀫 𑀓𑀼𑀝𑀼𑀫𑁆𑀩𑀺𑀬𑀧𑀼𑀢𑁆𑀢𑁄 𑀘𑀢𑁆𑀢𑀸𑀮𑀻𑀲 𑀳𑀺𑀭𑀜𑁆𑀜𑀓𑁄𑀝𑀺𑀬𑁄 𑀧𑀳𑀸𑀬 𑀧𑀩𑁆𑀩𑀚𑀺𑀢𑁆𑀯𑀸 𑀅𑀕𑀸𑀫𑀓𑁂 𑀅𑀭𑀜𑁆𑀜𑁂 𑀯𑀺𑀳𑀭𑀢𑀺, 𑀢𑀲𑁆𑀲 𑀓𑀦𑀺𑀝𑁆𑀞𑀪𑀸𑀢𑀼𑀪𑀭𑀺𑀬𑀸 ‘‘𑀕𑀘𑁆𑀙𑀣, 𑀦𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀣𑀸’’𑀢𑀺 𑀧𑀜𑁆𑀘𑀲𑀢𑁂 𑀘𑁄𑀭𑁂 𑀧𑁂𑀲𑁂𑀲𑀺, 𑀢𑁂 𑀕𑀦𑁆𑀢𑁆𑀯𑀸 𑀣𑁂𑀭𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀦𑀺𑀲𑀻𑀤𑀺𑀁𑀲𑀼. 𑀣𑁂𑀭𑁄 𑀆𑀳 𑁋 ‘‘𑀓𑀲𑁆𑀫𑀸 𑀆𑀕𑀢𑀢𑁆𑀣 𑀉𑀧𑀸𑀲𑀓𑀸’’𑀢𑀺? 𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑁆𑀲𑀸𑀫𑀸𑀢𑀺. 𑀧𑀸𑀝𑀺𑀪𑁄𑀕𑀁 𑀫𑁂 𑀉𑀧𑀸𑀲𑀓𑀸 𑀕𑀳𑁂𑀢𑁆𑀯𑀸 𑀅𑀚𑁆𑀚𑁂𑀓𑀭𑀢𑁆𑀢𑀺𑀁 𑀚𑀻𑀯𑀺𑀢𑀁 𑀤𑁂𑀣𑀸𑀢𑀺. 𑀓𑁄 𑀢𑁂, 𑀲𑀫𑀡, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀧𑀸𑀝𑀺𑀪𑁄𑀕𑁄 𑀪𑀯𑀺𑀲𑁆𑀲𑀢𑀻𑀢𑀺? 𑀣𑁂𑀭𑁄 𑀫𑀳𑀦𑁆𑀢𑀁 𑀧𑀸𑀲𑀸𑀡𑀁 𑀕𑀳𑁂𑀢𑁆𑀯𑀸 𑀊𑀭𑀼𑀝𑁆𑀞𑀻𑀦𑀺 𑀪𑀺𑀦𑁆𑀤𑀺𑀢𑁆𑀯𑀸 ‘‘𑀯𑀝𑁆𑀝𑀢𑀺 𑀉𑀧𑀸𑀲𑀓𑀸 𑀧𑀸𑀝𑀺𑀪𑁄𑀕𑁄’’𑀢𑀺 𑀆𑀳. 𑀢𑁂 𑀅𑀧𑀓𑁆𑀓𑀫𑀺𑀢𑁆𑀯𑀸 𑀘𑀗𑁆𑀓𑀫𑀦𑀲𑀻𑀲𑁂 𑀅𑀕𑁆𑀕𑀺𑀁 𑀓𑀢𑁆𑀯𑀸 𑀦𑀺𑀧𑀚𑁆𑀚𑀺𑀁𑀲𑀼. 𑀣𑁂𑀭𑀲𑁆𑀲 𑀯𑁂𑀤𑀦𑀁 𑀯𑀺𑀓𑁆𑀔𑀫𑁆𑀪𑁂𑀢𑁆𑀯𑀸 ¶ 𑀲𑀻𑀮𑀁 𑀧𑀘𑁆𑀘𑀯𑁂𑀓𑁆𑀔𑀢𑁄 𑀧𑀭𑀺𑀲𑀼𑀤𑁆𑀥𑀲𑀻𑀮𑀁 𑀦𑀺𑀲𑁆𑀲𑀸𑀬 𑀧𑀻𑀢𑀺𑀧𑀸𑀫𑁄𑀚𑁆𑀚𑀁 𑀉𑀧𑁆𑀧𑀚𑁆𑀚𑀺. 𑀢𑀢𑁄 𑀅𑀦𑀼𑀓𑁆𑀓𑀫𑁂𑀦 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 𑀢𑀺𑀬𑀸𑀫𑀭𑀢𑁆𑀢𑀺𑀁 𑀲𑀫𑀡𑀥𑀫𑁆𑀫𑀁 𑀓𑀢𑁆𑀯𑀸 𑀅𑀭𑀼𑀡𑀼𑀕𑁆𑀕𑀫𑀦𑁂 𑀅𑀭𑀳𑀢𑁆𑀢𑀁 𑀧𑀢𑁆𑀢𑁄 𑀇𑀫𑀁 𑀉𑀤𑀸𑀦𑀁 𑀉𑀤𑀸𑀦𑁂𑀲𑀺 𑁋

‘‘𑀉𑀪𑁄 𑀧𑀸𑀤𑀸𑀦𑀺 𑀪𑀺𑀦𑁆𑀤𑀺𑀢𑁆𑀯𑀸, 𑀲𑀜𑁆𑀜𑀧𑁂𑀲𑁆𑀲𑀸𑀫𑀺 𑀯𑁄 𑀅𑀳𑀁;

𑀅𑀝𑁆𑀝𑀺𑀬𑀸𑀫𑀺 𑀳𑀭𑀸𑀬𑀸𑀫𑀺, 𑀲𑀭𑀸𑀕𑀫𑀭𑀡𑀁 𑀅𑀳𑀁.

‘‘𑀏𑀯𑀸𑀳𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦, 𑀬𑀣𑀸𑀪𑀽𑀢𑀁 𑀯𑀺𑀧𑀲𑁆𑀲𑀺𑀲𑀁;

𑀲𑀫𑁆𑀧𑀢𑁆𑀢𑁂 𑀅𑀭𑀼𑀡𑀼𑀕𑁆𑀕𑀫𑁆𑀳𑀺, 𑀅𑀭𑀳𑀢𑁆𑀢𑀁 𑀅𑀧𑀸𑀧𑀼𑀡𑀺’’𑀦𑁆𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁨𑁦; 𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁭𑁩; 𑀫. 𑀦𑀺. 𑀅𑀝𑁆𑀞. 𑁧.𑁧𑁦𑁬);

𑀅𑀢𑀺𑀪𑁄𑀚𑀦𑁂 ¶ 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄𑀢𑀺 𑀅𑀢𑀺𑀪𑁄𑀚𑀦𑁂 𑀣𑀺𑀦𑀫𑀺𑀤𑁆𑀥𑀲𑁆𑀲 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑁄, ‘‘𑀏𑀢𑁆𑀢𑀓𑁂 𑀪𑀼𑀢𑁆𑀢𑁂 𑀢𑀁 𑀪𑁄𑀚𑀦𑀁 𑀣𑀺𑀦𑀫𑀺𑀤𑁆𑀥𑀲𑁆𑀲 𑀓𑀸𑀭𑀡𑀁 𑀳𑁄𑀢𑀺, 𑀏𑀢𑁆𑀢𑀓𑁂 𑀦 𑀳𑁄𑀢𑀻’’𑀢𑀺 𑀣𑀺𑀦𑀫𑀺𑀤𑁆𑀥𑀲𑁆𑀲 𑀓𑀸𑀭𑀡𑀸𑀓𑀸𑀭𑀡𑀕𑁆𑀕𑀸𑀳𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀩𑁆𑀬𑀢𑀺𑀭𑁂𑀓𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀏𑀢𑁆𑀢𑀓𑁂 𑀪𑀼𑀢𑁆𑀢𑁂 𑀢𑀁 𑀪𑁄𑀚𑀦𑀁 𑀣𑀺𑀦𑀫𑀺𑀤𑁆𑀥𑀲𑁆𑀲 𑀓𑀸𑀭𑀡𑀁 𑀦 𑀳𑁄𑀢𑀻𑀢𑀺 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸𑀯 𑀅𑀢𑁆𑀣𑀢𑁄 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 𑁋 ‘‘𑀘𑀢𑀼𑀧𑀜𑁆𑀘…𑀧𑁂… 𑀢𑀁 𑀦 𑀳𑁄𑀢𑀻’’𑀢𑀺. 𑀤𑀺𑀯𑀸 𑀲𑀽𑀭𑀺𑀬𑀸𑀮𑁄𑀓𑀦𑁆𑀢𑀺 𑀤𑀺𑀯𑀸 𑀕𑀳𑀺𑀢𑀦𑀺𑀫𑀺𑀢𑁆𑀢𑀁 𑀲𑀽𑀭𑀺𑀬𑀸𑀮𑁄𑀓𑀁 𑀭𑀢𑁆𑀢𑀺𑀬𑀁 𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲𑀧𑀻𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀥𑀼𑀢𑀗𑁆𑀕𑀸𑀦𑀁 𑀯𑀻𑀭𑀺𑀬𑀦𑀺𑀲𑁆𑀲𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 𑁋 ‘‘𑀥𑀼𑀢𑀗𑁆𑀕𑀦𑀺𑀲𑁆𑀲𑀺𑀢𑀲𑀧𑁆𑀧𑀸𑀬𑀓𑀣𑀸𑀬𑀧𑀻’’𑀢𑀺.

𑁧𑁯. 𑀦𑀯𑀫𑁂 𑀛𑀸𑀦𑁂𑀦 𑀯𑀸 𑀯𑀺𑀧𑀲𑁆𑀲𑀦𑀸𑀬 𑀯𑀸 𑀯𑀽𑀧𑀲𑀫𑀺𑀢𑀘𑀺𑀢𑁆𑀢𑀲𑁆𑀲𑀸𑀢𑀺 𑀛𑀸𑀦𑁂𑀦 𑀯𑀸 𑀯𑀺𑀧𑀲𑁆𑀲𑀦𑀸𑀬 𑀯𑀸 𑀅𑀯𑀽𑀧𑀲𑀫𑀓𑀭𑀓𑀺𑀮𑁂𑀲𑀯𑀺𑀕𑀫𑀦𑁂𑀦 𑀯𑀽𑀧𑀲𑀫𑀺𑀢𑀘𑀺𑀢𑁆𑀢𑀲𑁆𑀲. 𑀓𑀼𑀓𑁆𑀓𑀼𑀘𑁆𑀘𑀫𑁆𑀧𑀺 𑀓𑀢𑀸𑀓𑀢𑀸𑀦𑀼𑀲𑁄𑀘𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀘𑁂𑀢𑀲𑁄 𑀅𑀯𑀽𑀧𑀲𑀫𑀸𑀯𑀳𑀢𑀸𑀬 𑀉𑀤𑁆𑀥𑀘𑁆𑀘𑁂𑀦 𑀲𑀫𑀸𑀦𑀮𑀓𑁆𑀔𑀡𑀦𑁆𑀢𑀺 𑀉𑀪𑀬𑀲𑁆𑀲 𑀧𑀳𑀸𑀦𑀓𑀸𑀭𑀡𑀁 𑀅𑀪𑀺𑀦𑁆𑀦𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀩𑀳𑀼𑀲𑁆𑀲𑀼𑀢𑀲𑁆𑀲 𑀕𑀦𑁆𑀣𑀢𑁄 𑀅𑀢𑁆𑀣𑀢𑁄 𑀘 𑀲𑀼𑀢𑁆𑀢𑀸𑀤𑀻𑀦𑀺 𑀯𑀺𑀘𑀸𑀭𑁂𑀦𑁆𑀢𑀲𑁆𑀲 𑀢𑀩𑁆𑀩𑀳𑀼𑀮𑀯𑀺𑀳𑀸𑀭𑀺𑀦𑁄 𑀅𑀢𑁆𑀣𑀯𑁂𑀤𑀸𑀤𑀺𑀧𑁆𑀧𑀝𑀺𑀮𑀸𑀪𑀲𑀫𑁆𑀪𑀯𑀢𑁄 𑀯𑀺𑀓𑁆𑀔𑁂𑀧𑁄 𑀦 𑀳𑁄𑀢𑀺. 𑀬𑀣𑀸 𑀯𑀺𑀥𑀺𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀬𑀣𑀸𑀦𑀼𑀭𑀽𑀧𑀧𑀢𑁆𑀢𑀺𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀘 𑀯𑀺𑀓𑁆𑀔𑁂𑀧𑁄 𑀘 𑀓𑀢𑀸𑀓𑀢𑀸𑀦𑀼𑀲𑁄𑀘𑀦𑀜𑁆𑀘 𑀦 𑀳𑁄𑀢𑀻𑀢𑀺 ‘‘𑀩𑀸𑀳𑀼𑀲𑀘𑁆𑀘𑁂𑀦𑀧𑀺 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀬𑀢𑀻’’𑀢𑀺 𑀆𑀳. 𑀬𑀤𑀕𑁆𑀕𑁂𑀦 𑀩𑀸𑀳𑀼𑀲𑀘𑁆𑀘𑁂𑀦 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀁 𑀧𑀳𑀻𑀬𑀢𑀺, 𑀢𑀤𑀕𑁆𑀕𑁂𑀦 𑀧𑀭𑀺𑀧𑀼𑀘𑁆𑀙𑀓𑀢𑀸𑀯𑀺𑀦𑀬𑀧𑁆𑀧𑀓𑀢𑀜𑁆𑀜𑀼𑀢𑀸𑀳𑀺𑀧𑀺 𑀢𑀁 𑀧𑀳𑀻𑀬𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀼𑀤𑁆𑀥𑀲𑁂𑀯𑀺𑀢𑀸 𑀘 𑀯𑀼𑀤𑁆𑀥𑀲𑀻𑀮𑀺𑀢𑀁 𑀆𑀯𑀳𑀢𑀻𑀢𑀺 𑀘𑁂𑀢𑀲𑁄 𑀯𑀽𑀧𑀲𑀫𑀓𑀭𑀢𑁆𑀢𑀸 ‘‘𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀧𑁆𑀧𑀳𑀸𑀦𑀓𑀸𑀭𑀻’’𑀢𑀺 𑀯𑀼𑀢𑁆𑀢𑀁, 𑀯𑀼𑀤𑁆𑀥𑀢𑀁 𑀧𑀦 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀓𑀼𑀓𑁆𑀓𑀼𑀘𑁆𑀘𑀯𑀺𑀦𑁄𑀤𑀓𑀸 𑀯𑀺𑀦𑀬𑀥𑀭𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀢𑀺 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀓𑁆𑀔𑁂𑀧𑁄 𑀘 𑀧𑀩𑁆𑀩𑀚𑀺𑀢𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 ¶ 𑀓𑀼𑀓𑁆𑀓𑀼𑀘𑁆𑀘𑀳𑁂𑀢𑀼𑀓𑁄 𑀳𑁄𑀢𑀻𑀢𑀺 ‘‘𑀓𑀧𑁆𑀧𑀺𑀬𑀸𑀓𑀧𑁆𑀧𑀺𑀬𑀧𑀭𑀺𑀧𑀼𑀘𑁆𑀙𑀸𑀩𑀳𑀼𑀮𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀯𑀺𑀦𑀬𑀦𑀬𑁂𑀦𑁂𑀯 𑀧𑀭𑀺𑀧𑀼𑀘𑁆𑀙𑀓𑀢𑀸𑀤𑀬𑁄 𑀦𑀺𑀤𑁆𑀤𑀺𑀝𑁆𑀞𑀸.

𑁨𑁦. 𑀤𑀲𑀫𑁂 𑀩𑀳𑀼𑀲𑁆𑀲𑀼𑀢𑀸𑀦𑀁 𑀥𑀫𑁆𑀫𑀲𑀪𑀸𑀯𑀸𑀯𑀩𑁄𑀥𑀲𑀫𑁆𑀪𑀯𑀢𑁄 𑀯𑀺𑀘𑀺𑀓𑀺𑀘𑁆𑀙𑀸 𑀅𑀦𑀯𑀓𑀸𑀲𑀸 𑀏𑀯𑀸𑀢𑀺 𑀆𑀳 𑁋 ‘‘𑀩𑀸𑀳𑀼𑀲𑀘𑁆𑀘𑁂𑀦𑀧𑀺…𑀧𑁂… 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀢𑀻’’𑀢𑀺. 𑀓𑀸𑀫𑀁 𑀩𑀸𑀳𑀼𑀲𑀘𑁆𑀘𑀧𑀭𑀺𑀧𑀼𑀘𑁆𑀙𑀓𑀢𑀸𑀳𑀺 𑀲𑀩𑁆𑀩𑀸𑀧𑀺 𑀅𑀝𑁆𑀞𑀯𑀢𑁆𑀣𑀼𑀓𑀸 𑀯𑀺𑀘𑀺𑀓𑀺𑀘𑁆𑀙𑀸 𑀧𑀳𑀻𑀬𑀢𑀺, 𑀢𑀣𑀸𑀧𑀺 𑀭𑀢𑀦𑀢𑁆𑀢𑀬𑀯𑀺𑀘𑀺𑀓𑀺𑀘𑁆𑀙𑀸𑀫𑀽𑀮𑀺𑀓𑀸 𑀲𑁂𑀲𑀯𑀺𑀘𑀺𑀓𑀺𑀘𑁆𑀙𑀸𑀢𑀺 𑀆𑀳 𑁋 ‘‘𑀢𑀻𑀡𑀺 𑀭𑀢𑀦𑀸𑀦𑀺 𑀆𑀭𑀩𑁆𑀪 𑀧𑀭𑀺𑀧𑀼𑀘𑁆𑀙𑀸𑀩𑀳𑀼𑀮𑀲𑁆𑀲𑀧𑀻’’𑀢𑀺. 𑀭𑀢𑀦𑀢𑁆𑀢𑀬𑀕𑀼𑀡𑀸𑀯𑀩𑁄𑀥𑁂𑀳𑀺 ‘‘𑀲𑀢𑁆𑀣𑀭𑀺 𑀓𑀗𑁆𑀔𑀢𑀻’’𑀢𑀺𑀆𑀤𑀺𑀯𑀺𑀘𑀺𑀓𑀺𑀘𑁆𑀙𑀸𑀬 𑀅𑀲𑀫𑁆𑀪𑀯𑁄𑀢𑀺. 𑀯𑀺𑀦𑀬𑁂 𑀧𑀓𑀢𑀜𑁆𑀜𑀼𑀢𑀸 ‘‘𑀲𑀺𑀓𑁆𑀔𑀸𑀬 𑀓𑀗𑁆𑀔𑀢𑀻’’𑀢𑀺 (𑀥. 𑀲. 𑁧𑁦𑁦𑁮; 𑀯𑀺𑀪. 𑁯𑁧𑁫) 𑀯𑀼𑀢𑁆𑀢𑀸𑀬 𑀯𑀺𑀘𑀺𑀓𑀺𑀘𑁆𑀙𑀸𑀬 𑀧𑀳𑀸𑀦𑀁 𑀓𑀭𑁄𑀢𑀻𑀢𑀺 𑀆𑀳 𑁋 ‘‘𑀯𑀺𑀦𑀬𑁂 𑀘𑀺𑀡𑁆𑀡𑀯𑀲𑀻𑀪𑀸𑀯𑀲𑁆𑀲𑀧𑀻’’𑀢𑀺. 𑀑𑀓𑀧𑁆𑀧𑀦𑀺𑀬𑀲𑀤𑁆𑀥𑀸𑀲𑀗𑁆𑀔𑀸𑀢𑀅𑀥𑀺𑀫𑁄𑀓𑁆𑀔𑀩𑀳𑀼𑀮𑀲𑁆𑀲𑀸𑀢𑀺 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀦𑁄 𑀅𑀦𑀼𑀧𑁆𑀧𑀯𑀺𑀲𑀦𑀲𑀤𑁆𑀥𑀸𑀲𑀗𑁆𑀔𑀸𑀢𑀅𑀥𑀺𑀫𑁄𑀓𑁆𑀔𑁂𑀦 𑀅𑀥𑀺𑀫𑀼𑀘𑁆𑀘𑀦𑀩𑀳𑀼𑀮𑀲𑁆𑀲. 𑀅𑀥𑀺𑀫𑀼𑀘𑁆𑀘𑀦𑀜𑁆𑀘 𑀅𑀥𑀺𑀫𑁄𑀓𑁆𑀔𑀼𑀧𑁆𑀧𑀸𑀤𑀦𑀫𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀤𑁆𑀥𑀸𑀬 𑀯𑀸 𑀢𑀁𑀦𑀺𑀦𑁆𑀦𑀧𑁄𑀡𑀢𑀸 𑀅𑀥𑀺𑀫𑀼𑀢𑁆𑀢𑀺 𑀅𑀥𑀺𑀫𑁄𑀓𑁆𑀔𑁄 ¶ . 𑀦𑀻𑀯𑀭𑀡𑀸𑀦𑀁 𑀧𑀘𑁆𑀘𑀬𑀲𑁆𑀲 𑀘𑁂𑀯 𑀧𑀘𑁆𑀘𑀬𑀖𑀸𑀢𑀲𑁆𑀲 𑀘 𑀯𑀺𑀪𑀸𑀯𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 𑁋 ‘‘𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢’’𑀦𑁆𑀢𑀺.

𑀦𑀻𑀯𑀭𑀡𑀧𑁆𑀧𑀳𑀸𑀦𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀅𑀓𑀫𑁆𑀫𑀦𑀺𑀬𑀯𑀕𑁆𑀕𑀯𑀡𑁆𑀡𑀦𑀸

𑁨𑁧. 𑀢𑀢𑀺𑀬𑀲𑁆𑀲 ¶ 𑀧𑀞𑀫𑁂 𑀅𑀪𑀸𑀯𑀺𑀢𑀦𑁆𑀢𑀺 𑀲𑀫𑀣𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀯𑀲𑁂𑀦 𑀦 𑀪𑀸𑀯𑀺𑀢𑀁 𑀢𑀣𑀸 𑀅𑀪𑀸𑀯𑀺𑀢𑀢𑁆𑀢𑀸. 𑀢𑀜𑁆𑀳𑀺 ‘‘𑀅𑀯𑀟𑁆𑀠𑀺𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀧𑀝𑀺𑀧𑀓𑁆𑀔𑀸𑀪𑀺𑀪𑀯𑁂𑀦 𑀧𑀭𑀺𑀩𑁆𑀭𑀽𑀳𑀦𑀸𑀪𑀸𑀯𑀢𑁄. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀅𑀓𑀫𑁆𑀫𑀦𑀺𑀬𑀁 𑀳𑁄𑀢𑀻’’𑀢𑀺.

𑁨𑁨. 𑀤𑀼𑀢𑀺𑀬𑁂 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀞𑀫𑁂𑀢𑀺 𑀢𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑀲𑀼𑀢𑁆𑀢𑁂. 𑀯𑀝𑁆𑀝𑀯𑀲𑁂𑀦𑀸𑀢𑀺 𑀯𑀺𑀧𑀸𑀓𑀯𑀝𑁆𑀝𑀯𑀲𑁂𑀦. 𑀢𑁂𑀪𑀽𑀫𑀓𑀯𑀝𑁆𑀝𑀦𑁆𑀢𑀺 𑀢𑁂𑀪𑀽𑀫𑀓𑀯𑀺𑀧𑀸𑀓𑀯𑀝𑁆𑀝𑀁. 𑀯𑀝𑁆𑀝𑀧𑀝𑀺𑀮𑀸𑀪𑀸𑀬 𑀓𑀫𑁆𑀫𑀦𑁆𑀢𑀺 𑀯𑀺𑀧𑀸𑀓𑀯𑀝𑁆𑀝𑀲𑁆𑀲 𑀧𑀝𑀺𑀮𑀸𑀪𑀸𑀬 𑀉𑀧𑀦𑀺𑀲𑁆𑀲𑀬𑀪𑀽𑀢𑀁 𑀓𑀫𑁆𑀫𑀁, 𑀢𑀲𑁆𑀲 𑀲𑀳𑀸𑀬𑀪𑀽𑀢𑀁 𑀓𑀺𑀮𑁂𑀲𑀯𑀝𑁆𑀝𑀫𑁆𑀧𑀺 𑀓𑀫𑁆𑀫𑀕𑁆𑀕𑀳𑀡𑁂𑀦𑁂𑀯 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀯𑀝𑁆𑀝𑀧𑀝𑀺𑀮𑀸𑀪𑀸𑀬 𑀓𑀫𑁆𑀫𑀦𑁆𑀢𑀺 𑀯𑀺𑀯𑀝𑁆𑀝𑀸𑀥𑀺𑀕𑀫𑀲𑁆𑀲 𑀉𑀧𑀦𑀺𑀲𑁆𑀲𑀬𑀪𑀽𑀢𑀁 𑀓𑀫𑁆𑀫𑀁. 𑀬𑀁 𑀧𑀦 𑀘𑀭𑀺𑀫𑀪𑀯𑀦𑀺𑀩𑁆𑀩𑀢𑁆𑀢𑀓𑀁 𑀓𑀫𑁆𑀫𑀁, 𑀢𑀁 𑀯𑀺𑀯𑀝𑁆𑀝𑀧𑁆𑀧𑀝𑀺𑀮𑀸𑀪𑀸𑀬 𑀓𑀫𑁆𑀫𑀁 𑀳𑁄𑀢𑀺, 𑀦 𑀳𑁄𑀢𑀻𑀢𑀺? 𑀦 𑀳𑁄𑀢𑀺 𑀯𑀝𑁆𑀝𑀧𑀸𑀤𑀓𑀪𑀸𑀯𑀢𑁄. 𑀘𑀭𑀺𑀫𑀪𑀯𑀧𑀝𑀺𑀲𑀦𑁆𑀥𑀺 ¶ 𑀯𑀺𑀬 𑀧𑀦 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑁄𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀦 𑀳𑀺 𑀓𑀤𑀸𑀘𑀺 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀬𑀸 𑀯𑀺𑀦𑀸 𑀯𑀺𑀲𑁂𑀲𑀸𑀥𑀺𑀕𑀫𑁄 𑀲𑀫𑁆𑀪𑀯𑀢𑀺. 𑀇𑀫𑁂𑀲𑀼 𑀲𑀼𑀢𑁆𑀢𑁂𑀲𑀽𑀢𑀺 𑀇𑀫𑁂𑀲𑀼 𑀧𑀦 𑀧𑀞𑀫𑀤𑀼𑀢𑀺𑀬𑀲𑀼𑀢𑁆𑀢𑁂𑀲𑀼 𑀬𑀣𑀸𑀓𑁆𑀓𑀫𑀁 𑀯𑀝𑁆𑀝𑀯𑀺𑀯𑀝𑁆𑀝𑀫𑁂𑀯 𑀓𑀣𑀺𑀢𑀁.

𑁨𑁩. 𑀢𑀢𑀺𑀬𑁂 𑀅𑀪𑀸𑀯𑀺𑀢𑀦𑁆𑀢𑀺 𑀏𑀢𑁆𑀣 𑀪𑀸𑀯𑀦𑀸 𑀦𑀸𑀫 𑀲𑀫𑀸𑀥𑀺𑀪𑀸𑀯𑀦𑀸. 𑀲𑀸 𑀬𑀢𑁆𑀣 𑀆𑀲𑀗𑁆𑀓𑀺𑀢𑀩𑁆𑀩𑀸, 𑀢𑀁 𑀓𑀸𑀫𑀸𑀯𑀘𑀭𑀧𑀞𑀫𑀫𑀳𑀸𑀓𑀼𑀲𑀮𑀘𑀺𑀢𑁆𑀢𑀸𑀤𑀺𑀅𑀪𑀸𑀯𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀆𑀳 𑁋 ‘‘𑀤𑁂𑀯𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺𑀬𑁄’’𑀢𑀺𑀆𑀤𑀺.

𑁨𑁪. 𑀘𑀢𑀼𑀢𑁆𑀣𑁂 𑀬𑀲𑁆𑀫𑀸 𑀘𑀺𑀢𑁆𑀢𑀦𑁆𑀢𑀺 𑀯𑀺𑀯𑀝𑁆𑀝𑀯𑀲𑁂𑀦𑁂𑀯 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀢𑀲𑁆𑀫𑀸 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀲𑁄𑀓𑀸𑀤𑀺𑀤𑀼𑀓𑁆𑀔𑀲𑁆𑀲 𑀅𑀦𑀺𑀩𑁆𑀩𑀢𑁆𑀢𑀦𑀢𑁄 𑀫𑀳𑀢𑁄 𑀅𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸.

𑁨𑁫-𑁨𑁬. 𑀧𑀜𑁆𑀘𑀫𑀙𑀝𑁆𑀞𑁂𑀲𑀼 𑀉𑀧𑁆𑀧𑀦𑁆𑀦𑀦𑁆𑀢𑀺 𑀅𑀯𑀺𑀕𑀢𑀼𑀧𑁆𑀧𑀸𑀤𑀸𑀤𑀺𑀔𑀡𑀢𑁆𑀢𑀬𑀫𑁆𑀧𑀺 𑀅𑀪𑀸𑀯𑀺𑀢𑀁 𑀪𑀸𑀯𑀦𑀸𑀭𑀳𑀺𑀢𑀁 𑀅𑀧𑀸𑀢𑀼𑀪𑀽𑀢𑀫𑁂𑀯 𑀧𑀡𑁆𑀟𑀺𑀢𑀲𑀫𑁆𑀫𑀢𑀲𑁆𑀲 𑀉𑀧𑁆𑀧𑀦𑁆𑀦𑀓𑀺𑀘𑁆𑀘𑀲𑁆𑀲 𑀅𑀲𑀸𑀥𑀦𑀢𑁄 𑀬𑀣𑀸 ‘‘𑀅𑀧𑀼𑀢𑁆𑀢𑁄’’𑀢𑀺. 𑀲𑁄 𑀳𑀺 𑀲𑀫𑀢𑁆𑀣𑁄 𑀳𑀼𑀢𑁆𑀯𑀸 𑀧𑀺𑀢𑀼 𑀧𑀼𑀢𑁆𑀢𑀓𑀺𑀘𑁆𑀘𑀁 𑀅𑀲𑀸𑀥𑁂𑀦𑁆𑀢𑁄 𑀅𑀧𑀼𑀢𑁆𑀢𑁄𑀢𑀺 𑀮𑁄𑀓𑁂 𑀯𑀼𑀘𑁆𑀘𑀢𑀺, 𑀏𑀯𑀁 𑀲𑀫𑁆𑀧𑀤𑀫𑀺𑀤𑀁. 𑀢𑁂𑀦𑀸𑀳 𑁋 ‘‘𑀓𑀲𑁆𑀫𑀸’’𑀢𑀺𑀆𑀤𑀺. 𑀢𑁂𑀲𑀼 𑀥𑀫𑁆𑀫𑁂𑀲𑀽𑀢𑀺 𑀮𑁄𑀓𑀼𑀢𑁆𑀢𑀭𑀧𑀸𑀤𑀓𑀚𑁆𑀛𑀸𑀦𑀸𑀤𑀻𑀲𑀼. 𑀣𑁂𑀭𑁄 𑀧𑀦 𑀫𑀢𑁆𑀣𑀓𑀧𑁆𑀧𑀢𑁆𑀢𑀫𑁂𑀯 𑀪𑀸𑀯𑀺𑀢𑀁 𑀘𑀺𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀕𑁆𑀕𑀘𑀺𑀢𑁆𑀢𑀫𑁂𑀯𑀸’’𑀢𑀺 𑀆𑀳.

𑁨𑁭-𑁨𑁮. 𑀲𑀢𑁆𑀢𑀫𑀝𑁆𑀞𑀫𑁂𑀲𑀼 ¶ 𑀧𑀼𑀦𑀧𑁆𑀧𑀼𑀦𑀁 𑀅𑀓𑀢𑀦𑁆𑀢𑀺 𑀪𑀸𑀯𑀦𑀸𑀩𑀳𑀼𑀮𑀻𑀓𑀸𑀭𑀯𑀲𑁂𑀦 𑀧𑀼𑀦𑀧𑁆𑀧𑀼𑀦𑀁 𑀦 𑀓𑀢𑀁. 𑀇𑀫𑀸𑀦𑀺𑀧𑀺 𑀤𑁆𑀯𑁂𑀢𑀺 𑀇𑀫𑁂𑀲𑀼 𑀤𑁆𑀯𑀻𑀲𑀼 𑀲𑀼𑀢𑁆𑀢𑁂𑀲𑀼 𑀆𑀕𑀢𑀸𑀦𑀺 𑀇𑀫𑀸𑀦𑀺𑀧𑀺 𑀤𑁆𑀯𑁂 𑀘𑀺𑀢𑁆𑀢𑀸𑀦𑀺.

𑁨𑁯-𑁩𑁦. 𑀦𑀯𑀫𑁂 𑀅𑀥𑀺𑀯𑀳𑀢𑀻𑀢𑀺 𑀆𑀦𑁂𑀢𑀺. 𑀤𑀼𑀓𑁆𑀔𑁂𑀦𑀸𑀢𑀺 𑀓𑀺𑀘𑁆𑀙𑁂𑀦. 𑀤𑀼𑀧𑁆𑀧𑁂𑀲𑀦𑀢𑁄𑀢𑀺 𑀤𑀼𑀓𑁆𑀔𑁂𑀦 𑀧𑁂𑀲𑁂𑀢𑀩𑁆𑀩𑀢𑁄. 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀲𑀼𑀔𑀁 𑀧𑀸𑀓𑀢𑀺𑀓𑀚𑁆𑀛𑀸𑀦𑀲𑀼𑀔𑀢𑁄 𑀲𑀦𑁆𑀢𑀢𑀭𑀧𑀡𑀻𑀢𑀢𑀭𑀫𑁂𑀯𑀸𑀢𑀺 𑀆𑀳 𑁋 ‘‘𑀛𑀸𑀦𑀲𑀼𑀔𑀢𑁄 𑀯𑀺𑀧𑀲𑁆𑀲𑀦𑀸𑀲𑀼𑀔’’𑀦𑁆𑀢𑀺. 𑀢𑁂𑀦𑀸𑀳 𑀪𑀕𑀯𑀸 𑁋

‘‘𑀲𑀼𑀜𑁆𑀜𑀸𑀕𑀸𑀭𑀁 𑀧𑀯𑀺𑀝𑁆𑀞𑀲𑁆𑀲, 𑀲𑀦𑁆𑀢𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄;

𑀅𑀫𑀸𑀦𑀼𑀲𑀻 𑀭𑀢𑀺 𑀳𑁄𑀢𑀺, 𑀲𑀫𑁆𑀫𑀸 𑀥𑀫𑁆𑀫𑀁 𑀯𑀺𑀧𑀲𑁆𑀲𑀢𑁄.

‘‘𑀬𑀢𑁄 ¶ 𑀬𑀢𑁄 𑀲𑀫𑁆𑀫𑀲𑀢𑀺, 𑀔𑀦𑁆𑀥𑀸𑀦𑀁 𑀉𑀤𑀬𑀩𑁆𑀩𑀬𑀁;

𑀮𑀪𑀢𑀻 𑀧𑀻𑀢𑀺𑀧𑀸𑀫𑁄𑀚𑁆𑀚𑀁, 𑀅𑀫𑀢𑀁 𑀢𑀁 𑀯𑀺𑀚𑀸𑀦𑀢’’𑀦𑁆𑀢𑀺. (𑀥. 𑀧. 𑁩𑁭𑁪);

𑀢𑀜𑁆𑀳𑀺 𑀘𑀺𑀢𑁆𑀢𑀁 𑀯𑀺𑀲𑁆𑀲𑀝𑁆𑀞𑀇𑀦𑁆𑀤𑀯𑀚𑀺𑀭𑀲𑀤𑀺𑀲𑀁 𑀅𑀫𑁄𑀖𑀪𑀸𑀯𑀢𑁄.

𑀅𑀓𑀫𑁆𑀫𑀦𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀤𑀦𑁆𑀢𑀯𑀕𑁆𑀕𑀯𑀡𑁆𑀡𑀦𑀸

𑁩𑁧-𑁩𑁬. 𑀘𑀢𑀼𑀢𑁆𑀣𑀲𑁆𑀲 ¶ 𑀧𑀞𑀫𑁂 𑀅𑀤𑀦𑁆𑀢𑀦𑁆𑀢𑀺 𑀘𑀺𑀢𑁆𑀢𑀪𑀸𑀯𑀦𑀸𑀬 𑀯𑀺𑀦𑀸 𑀦 𑀤𑀦𑁆𑀢𑀁. 𑀢𑁂𑀦𑀸𑀳 𑁋 ‘‘𑀲𑀢𑀺𑀲𑀁𑀯𑀭𑀭𑀳𑀺𑀢’’𑀦𑁆𑀢𑀺. 𑀘𑀢𑀼𑀢𑁆𑀣𑁂 𑀢𑀢𑀺𑀬𑁂 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀜𑁆𑀘𑀫𑀙𑀝𑁆𑀞𑁂𑀲𑀼 𑀧𑀼𑀭𑀺𑀫𑀲𑀤𑀺𑀲𑁄𑀬𑁂𑀯𑀸𑀢𑀺 𑀢𑀢𑀺𑀬𑀘𑀢𑀼𑀢𑁆𑀣𑀲𑀤𑀺𑀲𑁄 𑀏𑀯.

𑁩𑁭-𑁩𑁮. 𑀲𑀢𑁆𑀢𑀫𑀝𑁆𑀞𑀫𑁂𑀲𑀼 𑀉𑀧𑀫𑀸 𑀧𑀦𑁂𑀢𑁆𑀣𑀸𑀢𑀺 𑀬𑀣𑀸 𑀧𑀞𑀫𑀸𑀤𑀻𑀲𑀼 𑀅𑀤𑀦𑁆𑀢𑀳𑀢𑁆𑀣𑀺𑀅𑀲𑁆𑀲𑀸𑀤𑀬𑁄 𑀉𑀧𑀫𑀸𑀪𑀸𑀯𑁂𑀦 𑀕𑀳𑀺𑀢𑀸, 𑀏𑀯𑀫𑁂𑀢𑁆𑀣 𑀲𑀢𑁆𑀣𑀫𑀝𑁆𑀞𑀫𑁂𑀲𑀼 ‘‘𑀅𑀲𑀁𑀯𑀼𑀢𑀖𑀭𑀤𑁆𑀯𑀸𑀭𑀸𑀤𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁.

𑁩𑁯-𑁪𑁦. 𑀦𑀯𑀫𑀤𑀲𑀫𑁂𑀲𑀼 𑀘𑀢𑀽𑀳𑀺𑀧𑀺 𑀧𑀤𑁂𑀳𑀻𑀢𑀺 𑀅𑀤𑀦𑁆𑀢𑀸𑀤𑀻𑀳𑀺 𑀘𑀢𑀽𑀳𑀺 𑀧𑀤𑁂𑀳𑀺 𑀬𑁄𑀚𑁂𑀢𑁆𑀯𑀸 𑀦𑀯𑀫𑀤𑀲𑀫𑀸𑀦𑀺 𑀲𑀼𑀢𑁆𑀢𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀬𑁄𑀚𑀦𑀸.

𑀅𑀤𑀦𑁆𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀡𑀺𑀳𑀺𑀢𑀅𑀘𑁆𑀙𑀯𑀕𑁆𑀕𑀯𑀡𑁆𑀡𑀦𑀸

𑁪𑁧. 𑀧𑀜𑁆𑀘𑀫𑀲𑁆𑀲 ¶ 𑀧𑀞𑀫𑁂 𑀉𑀧𑀫𑀸𑀯 𑀑𑀧𑀫𑁆𑀫𑀁, 𑀲𑁄 𑀏𑀯 𑀅𑀢𑁆𑀣𑁄, 𑀢𑀲𑁆𑀫𑀺𑀁 𑀑𑀧𑀫𑁆𑀫𑀢𑁆𑀣𑁂 𑀩𑁄𑀥𑁂𑀢𑀩𑁆𑀩𑁂 𑀦𑀺𑀧𑀸𑀢𑁄. 𑀲𑁂𑀬𑁆𑀬𑀣𑀸𑀧𑀻𑀢𑀺 𑀬𑀣𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀢𑀢𑁆𑀭 𑀪𑀕𑀯𑀸 𑀓𑀢𑁆𑀣𑀘𑀺 𑀅𑀢𑁆𑀣𑁂𑀦 𑀉𑀧𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀺 𑀯𑀢𑁆𑀣𑀲𑀼𑀢𑁆𑀢𑁂 𑀯𑀺𑀬, 𑀧𑀸𑀭𑀺𑀘𑁆𑀙𑀢𑁆𑀢𑀓𑁄𑀧𑀫 (𑀅. 𑀦𑀺. 𑁭.𑁬𑁯) 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀸𑀤𑀺 (𑀅. 𑀦𑀺. 𑁭.𑁭𑁨) 𑀲𑀼𑀢𑁆𑀢𑁂𑀲𑀼 𑀯𑀺𑀬 𑀘. 𑀓𑀢𑁆𑀣𑀘𑀺 𑀉𑀧𑀫𑀸𑀬 𑀅𑀢𑁆𑀣𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀺 𑀮𑁄𑀡𑀫𑁆𑀩𑀺𑀮𑀲𑀼𑀢𑁆𑀢𑁂 (𑀅. 𑀦𑀺. 𑁩.𑁧𑁦𑁧) 𑀯𑀺𑀬, 𑀲𑀼𑀯𑀡𑁆𑀡𑀓𑀸𑀭𑀲𑀢𑁆𑀢𑀲𑀽𑀭𑀺𑀬𑁄𑀧𑀫𑀸𑀤𑀺𑀲𑀼𑀢𑁆𑀢𑁂𑀲𑀼 ¶ (𑀅. 𑀦𑀺. 𑁭.𑁬𑁬) 𑀯𑀺𑀬 𑀘. 𑀇𑀫𑀲𑁆𑀫𑀺𑀁 𑀧𑀦 𑀲𑀸𑀮𑀺𑀲𑀽𑀓𑁄𑀧𑀫𑁂 𑀉𑀧𑀫𑀸𑀬 𑀅𑀢𑁆𑀣𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀫𑀸𑀳𑀸𑀢𑀺 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀦𑁆𑀢𑀺, 𑀢𑀁 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬 𑀯𑀢𑁆𑀣𑀲𑀼𑀢𑁆𑀢𑀯𑀡𑁆𑀡𑀦𑀸𑀬 (𑀫. 𑀦𑀺. 𑀅𑀝𑁆𑀞. 𑁧.𑁭𑁦) 𑀦 𑀲𑀫𑁂𑀢𑀺. 𑀢𑀢𑁆𑀣 𑀳𑀺 𑀇𑀤𑀁 𑀯𑀼𑀢𑁆𑀢𑀁 𑁋

𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀯𑀢𑁆𑀣𑀦𑁆𑀢𑀺 𑀉𑀧𑀫𑀸𑀯𑀘𑀦𑀫𑁂𑀯𑁂𑀢𑀁. 𑀉𑀧𑀫𑀁 𑀓𑀭𑁄𑀦𑁆𑀢𑁄 𑀘 𑀪𑀕𑀯𑀸 𑀓𑀢𑁆𑀣𑀘𑀺 𑀧𑀞𑀫𑀁𑀬𑁂𑀯 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺, 𑀓𑀢𑁆𑀣𑀘𑀺 𑀧𑀞𑀫𑀁 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀉𑀧𑀫𑀁, 𑀓𑀢𑁆𑀣𑀘𑀺 𑀉𑀧𑀫𑀸𑀬 𑀅𑀢𑁆𑀣𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀺, 𑀓𑀢𑁆𑀣𑀘𑀺 𑀅𑀢𑁆𑀣𑁂𑀦 𑀉𑀧𑀫𑀁. 𑀢𑀣𑀸 𑀳𑁂𑀲 ‘‘𑀲𑁂𑀬𑁆𑀬𑀣𑀸𑀧𑀺𑀲𑁆𑀲𑀼, 𑀪𑀺𑀓𑁆𑀔𑀯𑁂, 𑀤𑁆𑀯𑁂 𑀅𑀕𑀸𑀭𑀸 𑀲𑀤𑁆𑀯𑀸𑀭𑀸, 𑀢𑀢𑁆𑀣 𑀘𑀓𑁆𑀔𑀼𑀫𑀸 𑀧𑀼𑀭𑀺𑀲𑁄 𑀫𑀚𑁆𑀛𑁂 𑀞𑀺𑀢𑁄 𑀧𑀲𑁆𑀲𑁂𑀬𑁆𑀬𑀸’’𑀢𑀺 𑀲𑀓𑀮𑀫𑁆𑀧𑀺 𑀤𑁂𑀯𑀤𑀽𑀢𑀲𑀼𑀢𑁆𑀢𑀁 (𑀫. 𑀦𑀺. 𑁩.𑁨𑁬𑁧 𑀆𑀤𑀬𑁄) 𑀉𑀧𑀫𑀁 𑀧𑀞𑀫𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳. ‘‘𑀢𑀺𑀭𑁄𑀓𑀼𑀝𑁆𑀝𑀁 𑀢𑀺𑀭𑁄𑀧𑀸𑀓𑀸𑀭𑀁 𑀢𑀺𑀭𑁄𑀧𑀩𑁆𑀩𑀢𑀁 𑀅𑀲𑀚𑁆𑀚𑀫𑀸𑀦𑁄 𑀕𑀘𑁆𑀙𑀢𑀺, 𑀲𑁂𑀬𑁆𑀬𑀣𑀸𑀧𑀺, 𑀆𑀓𑀸𑀲𑁂’’𑀢𑀺𑀆𑀤𑀺𑀦𑀸 𑀧𑀦 𑀦𑀬𑁂𑀦 𑀲𑀓𑀮𑀫𑁆𑀧𑀺 𑀇𑀤𑁆𑀥𑀺𑀯𑀺𑀥𑀁 𑀅𑀢𑁆𑀣𑀁 𑀧𑀞𑀫𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀉𑀧𑀫𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳. ‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡𑀧𑀼𑀭𑀺𑀲𑁄 𑀲𑀸𑀭𑀢𑁆𑀣𑀺𑀓𑁄 𑀲𑀸𑀭𑀕𑀯𑁂𑀲𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁩𑁧𑁪) 𑀦𑀬𑁂𑀦 𑀲𑀓𑀮𑀫𑁆𑀧𑀺 𑀘𑀽𑀴𑀲𑀸𑀭𑁄𑀧𑀫𑀲𑀼𑀢𑁆𑀢𑀁 𑀉𑀧𑀫𑀸𑀬 𑀅𑀢𑁆𑀣𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳. ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁂 𑀓𑀼𑀮𑀧𑀼𑀢𑁆𑀢𑀸 𑀥𑀫𑁆𑀫𑀁 𑀧𑀭𑀺𑀬𑀸𑀧𑀼𑀡𑀦𑁆𑀢𑀺 𑀲𑀼𑀢𑁆𑀢𑀁…𑀧𑁂… 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀅𑀮𑀕𑀤𑁆𑀤𑀢𑁆𑀣𑀺𑀓𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀓𑀮𑀫𑁆𑀧𑀺 𑀅𑀮𑀕𑀤𑁆𑀤𑀲𑀼𑀢𑁆𑀢𑀁 (𑀫. 𑀦𑀺. 𑁧.𑁨𑁩𑁮) 𑀫𑀳𑀸𑀲𑀸𑀭𑁄𑀧𑀫𑀲𑀼𑀢𑁆𑀢𑀦𑁆𑀢𑀺 𑀏𑀯𑀫𑀸𑀤𑀻𑀦𑀺 𑀲𑀼𑀢𑁆𑀢𑀸𑀦𑀺 𑀅𑀢𑁆𑀣𑁂𑀦 𑀉𑀧𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀆𑀳. 𑀲𑁆𑀯𑀸𑀬𑀁 𑀇𑀥 𑀧𑀞𑀫𑀁 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑀻𑀢𑀺.

𑀏𑀢𑁆𑀣 𑀳𑀺 𑀘𑀽𑀴𑀲𑀸𑀭𑁄𑀧𑀫𑀸𑀤𑀻𑀲𑀼 (𑀫. 𑀦𑀺. 𑁧.𑁩𑁧𑁨) 𑀧𑀞𑀫𑀁 𑀉𑀧𑀫𑀁 𑀯𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀉𑀧𑀫𑁂𑀬𑁆𑀬𑀢𑁆𑀣𑀁 𑀯𑀢𑁆𑀯𑀸 𑀧𑀼𑀦 𑀉𑀧𑀫𑀁 𑀯𑀤𑀦𑁆𑀢𑁄 𑀉𑀧𑀫𑀸𑀬 𑀅𑀢𑁆𑀣𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀻𑀢𑀺 𑀯𑀼𑀢𑁆𑀢𑁄. 𑀅𑀮𑀕𑀤𑁆𑀤𑀽𑀧𑀫𑀲𑀼𑀢𑁆𑀢𑀸𑀤𑀻𑀲𑀼 ¶ 𑀧𑀦 𑀅𑀢𑁆𑀣𑀁 𑀧𑀞𑀫𑀁 𑀯𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀉𑀧𑀫𑀁 𑀯𑀢𑁆𑀯𑀸 𑀧𑀼𑀦 𑀅𑀢𑁆𑀣𑀁 𑀯𑀤𑀦𑁆𑀢𑁄 𑀅𑀢𑁆𑀣𑁂𑀦 𑀉𑀧𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀻𑀢𑀺 𑀯𑀼𑀢𑁆𑀢𑁄. 𑀢𑁂𑀦𑁂𑀯𑁂𑀢𑁆𑀣 𑀮𑀻𑀦𑀢𑁆𑀣𑀧𑁆𑀧𑀓𑀸𑀲𑀺𑀦𑀺𑀬𑀁 𑀯𑀼𑀢𑁆𑀢𑀁 𑁋 ‘‘𑀉𑀧𑀫𑁂𑀬𑁆𑀬𑀢𑁆𑀣𑀁 𑀧𑀞𑀫𑀁 𑀯𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀅𑀢𑁆𑀣𑀁 𑀯𑀢𑁆𑀯𑀸 𑀧𑀼𑀦 𑀉𑀧𑀫𑀁 𑀯𑀤𑀦𑁆𑀢𑁄 𑀉𑀧𑀫𑀸𑀬 𑀅𑀢𑁆𑀣𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 ¶ 𑀤𑀲𑁆𑀲𑁂𑀢𑀻’’𑀢𑀺 𑀯𑀼𑀢𑁆𑀢𑁄. 𑀅𑀢𑁆𑀣𑁂𑀦 𑀉𑀧𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄𑀢𑀺. 𑀇𑀥 𑀧𑀦 𑀓𑀢𑁆𑀣𑀘𑀺 𑀅𑀢𑁆𑀣𑁂𑀦 𑀉𑀧𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀺. ‘‘𑀯𑀢𑁆𑀣𑀲𑀼𑀢𑁆𑀢𑁂 𑀯𑀺𑀬 𑀧𑀸𑀭𑀺𑀘𑁆𑀙𑀢𑁆𑀢𑀓𑁄𑀧𑀫𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀸𑀤𑀺𑀲𑀼𑀢𑁆𑀢𑁂𑀲𑀼 𑀯𑀺𑀬 𑀘𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀢𑁆𑀣𑀲𑀼𑀢𑁆𑀢𑁂 𑀢𑀸𑀯 ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀯𑀢𑁆𑀣𑀁 𑀲𑀁𑀓𑀺𑀮𑀺𑀝𑁆𑀞𑀁 𑀫𑀮𑀕𑁆𑀕𑀳𑀺𑀢𑀁, 𑀢𑀫𑁂𑀦𑀁 𑀭𑀚𑀓𑁄 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀭𑀗𑁆𑀕𑀚𑀸𑀢𑁂 𑀉𑀧𑀲𑀁𑀳𑀭𑁂𑀬𑁆𑀬. 𑀬𑀤𑀺 𑀦𑀻𑀮𑀓𑀸𑀬, 𑀬𑀤𑀺 𑀧𑀻𑀢𑀓𑀸𑀬, 𑀬𑀤𑀺 𑀮𑁄𑀳𑀺𑀢𑀓𑀸𑀬, 𑀬𑀤𑀺 𑀫𑀜𑁆𑀚𑀺𑀝𑁆𑀞𑀓𑀸𑀬, 𑀤𑀼𑀭𑀢𑁆𑀢𑀯𑀡𑁆𑀡𑀫𑁂𑀯𑀲𑁆𑀲 𑀅𑀧𑀭𑀺𑀲𑀼𑀤𑁆𑀥𑀯𑀡𑁆𑀡𑀫𑁂𑀯𑀲𑁆𑀲. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀧𑀭𑀺𑀲𑀼𑀤𑁆𑀥𑀢𑁆𑀢𑀸, 𑀪𑀺𑀓𑁆𑀔𑀯𑁂, 𑀯𑀢𑁆𑀣𑀲𑁆𑀲. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑁂 𑀲𑀁𑀓𑀺𑀮𑀺𑀝𑁆𑀞𑁂 𑀤𑀼𑀕𑁆𑀕𑀢𑀺 𑀧𑀸𑀝𑀺𑀓𑀗𑁆𑀔𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁭𑁦) 𑀧𑀞𑀫𑀁 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀉𑀧𑀫𑁂𑀬𑁆𑀬𑀢𑁆𑀣𑁄 𑀯𑀼𑀢𑁆𑀢𑁄, 𑀦 𑀧𑀦 𑀧𑀞𑀫𑀁 𑀅𑀢𑁆𑀣𑀁 𑀯𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀬𑁂𑀦 𑀓𑀢𑁆𑀣𑀘𑀺 𑀅𑀢𑁆𑀣𑁂𑀦 𑀉𑀧𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀯𑀢𑁆𑀣𑀲𑀼𑀢𑁆𑀢𑁂 𑀯𑀺𑀬𑀸𑀢𑀺 𑀯𑀤𑁂𑀬𑁆𑀬.

𑀢𑀣𑀸 𑀧𑀸𑀭𑀺𑀘𑁆𑀙𑀢𑁆𑀢𑀓𑁄𑀧𑀫𑁂𑀧𑀺 ‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀤𑁂𑀯𑀸𑀦𑀁 𑀢𑀸𑀯𑀢𑀺𑀁𑀲𑀸𑀦𑀁 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄 𑀧𑀡𑁆𑀟𑀼𑀧𑀮𑀸𑀲𑁄 𑀳𑁄𑀢𑀺, 𑀅𑀢𑁆𑀢𑀫𑀦𑀸, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀢𑀸𑀯𑀢𑀺𑀁𑀲𑀸, 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀦𑁆𑀢𑀺 𑀧𑀡𑁆𑀟𑀼𑀧𑀮𑀸𑀲𑁄 𑀤𑀸𑀦𑀺 𑀧𑀸𑀭𑀺𑀘𑁆𑀙𑀢𑁆𑀢𑀓𑁄 𑀓𑁄𑀯𑀺𑀴𑀸𑀭𑁄, 𑀦 𑀘𑀺𑀭𑀲𑁆𑀲𑁂𑀯 𑀤𑀸𑀦𑀺 𑀧𑀦𑁆𑀦𑀧𑀮𑀸𑀲𑁄 𑀪𑀯𑀺𑀲𑁆𑀲𑀢𑀺…𑀧𑁂… 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀬𑀲𑁆𑀫𑀺𑀁 𑀲𑀫𑀬𑁂 𑀅𑀭𑀺𑀬𑀲𑀸𑀯𑀓𑁄 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑁆𑀚𑀸𑀬 𑀘𑁂𑀢𑁂𑀢𑀺. 𑀧𑀡𑁆𑀟𑀼𑀧𑀮𑀸𑀲𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁭.𑁬𑁯) 𑀧𑀞𑀫𑀁 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑁂 ‘‘𑀧𑀲𑁆𑀲𑀣 𑀦𑁄 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀅𑀫𑀼𑀁 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀦𑁆𑀢𑀺. 𑀏𑀯𑀁, 𑀪𑀦𑁆𑀢𑁂𑀢𑀺. 𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂, 𑀓𑀢𑀫𑀁 𑀦𑀼 𑀔𑁄 𑀯𑀭𑀁 𑀬𑀁 𑀅𑀫𑀼𑀁 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀆𑀤𑀺𑀢𑁆𑀢𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀲𑀚𑁄𑀢𑀺𑀪𑀽𑀢𑀁 𑀆𑀮𑀺𑀗𑁆𑀕𑁂𑀢𑁆𑀯𑀸 𑀉𑀧𑀦𑀺𑀲𑀻𑀤𑁂𑀬𑁆𑀬 𑀯𑀸 𑀉𑀧𑀦𑀺𑀧𑀚𑁆𑀚𑁂𑀬𑁆𑀬 𑀯𑀸, 𑀬𑀁 𑀔𑀢𑁆𑀢𑀺𑀬𑀓𑀜𑁆𑀜𑀁 𑀯𑀸 𑀩𑁆𑀭𑀸𑀳𑁆𑀫𑀡𑀓𑀜𑁆𑀜𑀁 𑀯𑀸 𑀕𑀳𑀧𑀢𑀺𑀓𑀜𑁆𑀜𑀁 𑀯𑀸 𑀫𑀼𑀤𑀼𑀢𑀮𑀼𑀦𑀳𑀢𑁆𑀣𑀧𑀸𑀤𑀁 𑀆𑀮𑀺𑀗𑁆𑀕𑁂𑀢𑁆𑀯𑀸 𑀉𑀧𑀦𑀺𑀲𑀻𑀤𑁂𑀬𑁆𑀬 𑀯𑀸 𑀉𑀧𑀦𑀺𑀧𑀚𑁆𑀚𑁂𑀬𑁆𑀬 𑀯𑀸’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁭.𑁭𑁨) 𑀧𑀞𑀫𑀁 𑀉𑀧𑀫𑀁𑀬𑁂𑀯 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀦 𑀧𑀦 𑀧𑀞𑀫𑀁 𑀅𑀢𑁆𑀣𑀁 𑀯𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 ‘‘𑀓𑀢𑁆𑀣𑀘𑀺 𑀅𑀢𑁆𑀣𑁂𑀦 𑀉𑀧𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀺 𑀯𑀢𑁆𑀣𑀲𑀼𑀢𑁆𑀢𑁂 𑀯𑀺𑀬 𑀧𑀸𑀭𑀺𑀘𑁆𑀙𑀢𑁆𑀢𑀓𑁄𑀧𑀫𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀸𑀤𑀺𑀲𑀼𑀢𑁆𑀢𑁂𑀲𑀼 𑀯𑀺𑀬 𑀘𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁.

𑀓𑁂𑀘𑀺 ¶ 𑀧𑀦𑁂𑀢𑁆𑀣 𑀏𑀯𑀁 𑀯𑀡𑁆𑀡𑀬𑀦𑁆𑀢𑀺 ‘‘𑀅𑀢𑁆𑀣𑀁 𑀧𑀞𑀫𑀁 𑀯𑀢𑁆𑀯𑀸 𑀧𑀘𑁆𑀙𑀸 𑀘 𑀉𑀧𑀫𑀁 𑀤𑀲𑁆𑀲𑁂𑀦𑁆𑀢𑁄 𑀅𑀢𑁆𑀣𑁂𑀦 𑀉𑀧𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀺 𑀦𑀸𑀫, 𑀉𑀧𑀫𑀁 𑀧𑀦 𑀧𑀞𑀫𑀁 𑀯𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀉𑀧𑀫𑀸𑀬 𑀅𑀢𑁆𑀣𑀁 ¶ 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀺 𑀦𑀸𑀫, 𑀢𑀤𑀼𑀪𑀬𑀲𑁆𑀲𑀧𑀺 𑀆𑀕𑀢𑀝𑁆𑀞𑀸𑀦𑀁 𑀦𑀺𑀤𑀲𑁆𑀲𑁂𑀦𑁆𑀢𑁄 ‘𑀯𑀢𑁆𑀣𑀲𑀼𑀢𑁆𑀢𑁂 𑀯𑀺𑀬𑀸’𑀢𑀺𑀆𑀤𑀺𑀫𑀸𑀳𑀸’’𑀢𑀺. 𑀢𑀫𑁆𑀧𑀺 ‘‘𑀓𑀢𑁆𑀣𑀘𑀺 𑀅𑀢𑁆𑀣𑁂𑀦 𑀉𑀧𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀺 𑀯𑀢𑁆𑀣𑀲𑀼𑀢𑁆𑀢𑁂 𑀯𑀺𑀬 𑀧𑀸𑀭𑀺𑀘𑁆𑀙𑀢𑁆𑀢𑀓𑁄𑀧𑀫𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀸𑀤𑀺𑀲𑀼𑀢𑁆𑀢𑁂𑀲𑀼 𑀯𑀺𑀬 𑀘𑀸’’𑀢𑀺 𑀯𑀢𑁆𑀢𑀩𑁆𑀩𑀁, 𑀏𑀯𑀜𑁆𑀘 𑀯𑀼𑀘𑁆𑀘𑀫𑀸𑀦𑁂 ‘‘𑀓𑀢𑁆𑀣𑀘𑀺 𑀉𑀧𑀫𑀸𑀬 𑀅𑀢𑁆𑀣𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀺 𑀮𑁄𑀡𑀫𑁆𑀩𑀺𑀮𑀲𑀼𑀢𑁆𑀢𑁂 𑀯𑀺𑀬𑀸’’𑀢𑀺 𑀯𑀺𑀲𑀼𑀁 𑀦 𑀯𑀢𑁆𑀢𑀩𑁆𑀩𑀁 ‘‘𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀸𑀤𑀺𑀲𑀼𑀢𑁆𑀢𑁂 𑀯𑀺𑀬𑀸’’𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦𑁂𑀯 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀮𑁄𑀡𑀫𑁆𑀩𑀺𑀮𑀲𑀼𑀢𑁆𑀢𑁂𑀧𑀺 𑀳𑀺 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀓𑀼𑀲𑀮𑁄 𑀲𑀽𑀤𑁄 𑀭𑀸𑀚𑀸𑀦𑀁 𑀯𑀸 𑀭𑀸𑀚𑀫𑀳𑀸𑀫𑀢𑁆𑀢𑀁 𑀯𑀸 𑀦𑀸𑀦𑀘𑁆𑀘𑀬𑁂𑀳𑀺 𑀲𑀽𑀧𑁂𑀳𑀺 𑀧𑀘𑁆𑀘𑀼𑀧𑀝𑁆𑀞𑀺𑀢𑁄 𑀅𑀲𑁆𑀲 𑀅𑀫𑁆𑀩𑀺𑀮𑀕𑁆𑀕𑁂𑀳𑀺𑀧𑀺 𑀢𑀺𑀢𑁆𑀢𑀓𑀕𑁆𑀕𑁂𑀳𑀺𑀧𑀺 𑀓𑀝𑀼𑀓𑀕𑁆𑀕𑁂𑀳𑀺𑀧𑀺 𑀫𑀥𑀼𑀭𑀕𑁆𑀕𑁂𑀳𑀺𑀧𑀺 𑀔𑀸𑀭𑀺𑀓𑁂𑀳𑀺𑀧𑀺 𑀅𑀔𑀸𑀭𑀺𑀓𑁂𑀳𑀺𑀧𑀺 𑀮𑁄𑀡𑀺𑀓𑁂𑀳𑀺𑀧𑀺 𑀅𑀮𑁄𑀡𑀺𑀓𑁂𑀳𑀺𑀧𑀺.

‘‘𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀓𑀼𑀲𑀮𑁄 𑀲𑀽𑀤𑁄 𑀲𑀓𑀲𑁆𑀲 𑀪𑀢𑁆𑀢𑀲𑁆𑀲 𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀸𑀢𑀺 ‘𑀇𑀤𑀁 𑀯𑀸 𑀫𑁂 𑀅𑀚𑁆𑀚 𑀪𑀢𑁆𑀢𑀲𑀽𑀧𑁂𑀬𑁆𑀬𑀁 𑀭𑀼𑀘𑁆𑀘𑀢𑀺, 𑀇𑀫𑀲𑁆𑀲 𑀯𑀸 𑀅𑀪𑀺𑀳𑀭𑀢𑀺, 𑀇𑀫𑀲𑁆𑀲 𑀯𑀸 𑀩𑀳𑀼𑀁 𑀕𑀡𑁆𑀳𑀸𑀢𑀺, 𑀇𑀫𑀲𑁆𑀲 𑀯𑀸 𑀯𑀡𑁆𑀡𑀁 𑀪𑀸𑀲𑀢𑀺. 𑀅𑀫𑁆𑀩𑀺𑀮𑀕𑁆𑀕𑀁 𑀯𑀸 𑀫𑁂 𑀅𑀚𑁆𑀚 𑀪𑀢𑁆𑀢𑀲𑀽𑀧𑁂𑀬𑁆𑀬𑀁 𑀭𑀼𑀘𑁆𑀘𑀢𑀺, 𑀅𑀫𑁆𑀩𑀺𑀮𑀕𑁆𑀕𑀲𑁆𑀲 𑀯𑀸 𑀅𑀪𑀺𑀳𑀭𑀢𑀺, 𑀅𑀫𑁆𑀩𑀺𑀮𑀕𑁆𑀕𑀲𑁆𑀲 𑀯𑀸 𑀩𑀳𑀼𑀁 𑀕𑀡𑁆𑀳𑀸𑀢𑀺, 𑀅𑀫𑁆𑀩𑀺𑀮𑀕𑁆𑀕𑀲𑁆𑀲 𑀯𑀸 𑀯𑀡𑁆𑀡𑀁 𑀪𑀸𑀲𑀢𑀺…𑀧𑁂… 𑀅𑀮𑁄𑀡𑀺𑀓𑀲𑁆𑀲 𑀯𑀸 𑀯𑀡𑁆𑀡𑀁 𑀪𑀸𑀲𑀢𑀻’𑀢𑀺. 𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀓𑀼𑀲𑀮𑁄 𑀲𑀽𑀤𑁄 𑀮𑀸𑀪𑀻 𑀘𑁂𑀯 𑀳𑁄𑀢𑀺 𑀅𑀘𑁆𑀙𑀸𑀤𑀦𑀲𑁆𑀲, 𑀮𑀸𑀪𑀻 𑀯𑁂𑀢𑀦𑀲𑁆𑀲, 𑀮𑀸𑀪𑀻 𑀅𑀪𑀺𑀳𑀸𑀭𑀸𑀦𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀓𑀼𑀲𑀮𑁄 𑀲𑀽𑀤𑁄 𑀲𑀓𑀲𑁆𑀲 𑀪𑀢𑁆𑀢𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀸𑀢𑀺. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀓𑀼𑀲𑀮𑁄 𑀪𑀺𑀓𑁆𑀔𑀼 𑀓𑀸𑀬𑁂 𑀓𑀸𑀬𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺…𑀧𑁂… 𑀯𑁂𑀤𑀦𑀸𑀲𑀼…𑀧𑁂… 𑀘𑀺𑀢𑁆𑀢𑁂…𑀧𑁂… 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀆𑀢𑀸𑀧𑀻 𑀲𑀫𑁆𑀧𑀚𑀸𑀦𑁄 𑀲𑀢𑀺𑀫𑀸 𑀯𑀺𑀦𑁂𑀬𑁆𑀬 𑀮𑁄𑀓𑁂 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀁. 𑀢𑀲𑁆𑀲 𑀥𑀫𑁆𑀫𑁂𑀲𑀼 𑀥𑀫𑁆𑀫𑀸𑀦𑀼𑀧𑀲𑁆𑀲𑀺𑀦𑁄 𑀯𑀺𑀳𑀭𑀢𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀺, 𑀉𑀧𑀓𑁆𑀓𑀺𑀮𑁂𑀲𑀸 𑀧𑀳𑀻𑀬𑀦𑁆𑀢𑀺, 𑀲𑁄 𑀢𑀁 𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀸𑀢𑀺.

‘‘𑀲 ¶ 𑀔𑁄, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀓𑀼𑀲𑀮𑁄 𑀪𑀺𑀓𑁆𑀔𑀼 𑀮𑀸𑀪𑀻 𑀘𑁂𑀯 𑀳𑁄𑀢𑀺 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀼𑀔𑀯𑀺𑀳𑀸𑀭𑀸𑀦𑀁, 𑀮𑀸𑀪𑀻 𑀳𑁄𑀢𑀺 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑁆𑀲. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀢𑀣𑀸 𑀳𑀺 𑀲𑁄, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑁄 𑀩𑁆𑀬𑀢𑁆𑀢𑁄 𑀓𑀼𑀲𑀮𑁄 𑀪𑀺𑀓𑁆𑀔𑀼 𑀲𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀦𑀺𑀫𑀺𑀢𑁆𑀢𑀁 𑀉𑀕𑁆𑀕𑀡𑁆𑀳𑀸𑀢𑀻’’𑀢𑀺 (𑀲𑀁. 𑀦𑀺. 𑁫.𑁩𑁭𑁪) 𑁋

𑀏𑀯𑀁 𑀧𑀞𑀫𑀁 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀣𑁄 𑀯𑀼𑀢𑁆𑀢𑁄. ‘‘𑀲𑀼𑀯𑀡𑁆𑀡𑀓𑀸𑀭𑀲𑀽𑀭𑀺𑀬𑁄𑀧𑀫𑀸𑀤𑀺𑀲𑀼𑀢𑁆𑀢𑁂𑀲𑀼 𑀯𑀺𑀬 𑀘𑀸’’𑀢𑀺 ¶ 𑀇𑀤𑀜𑁆𑀘 𑀉𑀤𑀸𑀳𑀭𑀡𑀫𑀢𑁆𑀢𑁂𑀦 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺 𑀲𑀼𑀯𑀡𑁆𑀡𑀓𑀸𑀭𑀲𑀼𑀢𑁆𑀢𑀸𑀤𑀻𑀲𑀼 𑀧𑀞𑀫𑀁 𑀉𑀧𑀫𑀸𑀬 𑀅𑀤𑀲𑁆𑀲𑀺𑀢𑀢𑁆𑀢𑀸. 𑀏𑀢𑁂𑀲𑀼 𑀳𑀺 𑀲𑀼𑀯𑀡𑁆𑀡𑀓𑀸𑀭𑁄𑀧𑀫𑀲𑀼𑀢𑁆𑀢𑁂 (𑀅. 𑀦𑀺. 𑁩.𑁧𑁦𑁩) 𑀢𑀸𑀯 𑁋

‘‘𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀢𑀻𑀡𑀺 𑀦𑀺𑀫𑀺𑀢𑁆𑀢𑀸𑀦𑀺 𑀓𑀸𑀮𑁂𑀦 𑀓𑀸𑀮𑀁 𑀫𑀦𑀲𑀺 𑀓𑀸𑀢𑀩𑁆𑀩𑀸𑀦𑀺, 𑀓𑀸𑀮𑁂𑀦 𑀓𑀸𑀮𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁, 𑀓𑀸𑀮𑁂𑀦 𑀓𑀸𑀮𑀁 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁, 𑀓𑀸𑀮𑁂𑀦 𑀓𑀸𑀮𑀁 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁. 𑀲𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀏𑀓𑀦𑁆𑀢𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁𑀬𑁂𑀯 𑀫𑀦𑀲𑀺 𑀓𑀭𑁂𑀬𑁆𑀬, 𑀞𑀸𑀦𑀁 𑀢𑀁 𑀘𑀺𑀢𑁆𑀢𑀁 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀲𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀏𑀓𑀦𑁆𑀢𑀁 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀁𑀬𑁂𑀯 𑀫𑀦𑀲𑀺 𑀓𑀭𑁂𑀬𑁆𑀬, 𑀞𑀸𑀦𑀁 𑀢𑀁 𑀘𑀺𑀢𑁆𑀢𑀁 𑀉𑀤𑁆𑀥𑀘𑁆𑀘𑀸𑀬 𑀲𑀁𑀯𑀢𑁆𑀢𑁂𑀬𑁆𑀬. 𑀲𑀘𑁂, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀏𑀓𑀦𑁆𑀢𑀁 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁𑀬𑁂𑀯 𑀫𑀦𑀲𑀺 𑀓𑀭𑁂𑀬𑁆𑀬, 𑀞𑀸𑀦𑀁 𑀢𑀁 𑀘𑀺𑀢𑁆𑀢𑀁 𑀦 𑀲𑀫𑁆𑀫𑀸 𑀲𑀫𑀸𑀥𑀺𑀬𑁂𑀬𑁆𑀬 𑀆𑀲𑀯𑀸𑀦𑀁 𑀔𑀬𑀸𑀬. 𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁄 𑀪𑀺𑀓𑁆𑀔𑀼 𑀓𑀸𑀮𑁂𑀦 𑀓𑀸𑀮𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑀁…𑀧𑁂… 𑀧𑀕𑁆𑀕𑀳𑀦𑀺𑀫𑀺𑀢𑁆𑀢𑀁…𑀧𑁂… 𑀉𑀧𑁂𑀓𑁆𑀔𑀸𑀦𑀺𑀫𑀺𑀢𑁆𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀢𑀁 𑀳𑁄𑀢𑀺 𑀘𑀺𑀢𑁆𑀢𑀁 𑀫𑀼𑀤𑀼𑀜𑁆𑀘 𑀓𑀫𑁆𑀫𑀦𑀺𑀬𑀜𑁆𑀘 𑀧𑀪𑀲𑁆𑀲𑀭𑀜𑁆𑀘, 𑀦 𑀘 𑀧𑀪𑀗𑁆𑀕𑀼, 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀲𑀼𑀯𑀡𑁆𑀡𑀓𑀸𑀭𑁄 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀉𑀓𑁆𑀓𑀁 𑀩𑀦𑁆𑀥𑁂𑀬𑁆𑀬, 𑀉𑀓𑁆𑀓𑀁 𑀩𑀦𑁆𑀥𑀺𑀢𑁆𑀯𑀸 𑀉𑀓𑁆𑀓𑀸𑀫𑀼𑀔𑀁 𑀆𑀮𑀺𑀫𑁆𑀧𑁂𑀬𑁆𑀬, 𑀉𑀓𑁆𑀓𑀸𑀫𑀼𑀔𑀁 𑀆𑀮𑀺𑀫𑁆𑀧𑀺𑀢𑁆𑀯𑀸 𑀲𑀡𑁆𑀟𑀸𑀲𑁂𑀦 𑀚𑀸𑀢𑀭𑀽𑀧𑀁 𑀕𑀳𑁂𑀢𑁆𑀯𑀸 𑀉𑀓𑁆𑀓𑀸𑀫𑀼𑀔𑁂 𑀧𑀓𑁆𑀔𑀺𑀧𑁂𑀬𑁆𑀬, 𑀉𑀓𑁆𑀓𑀸𑀫𑀼𑀔𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀓𑀸𑀮𑁂𑀦 𑀓𑀸𑀮𑀁 𑀅𑀪𑀺𑀥𑀫𑀢𑀺, 𑀓𑀸𑀮𑁂𑀦 𑀓𑀸𑀮𑀁 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑁂𑀢𑀺, 𑀓𑀸𑀮𑁂𑀦 𑀓𑀸𑀮𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺. 𑀲𑀘𑁂, 𑀪𑀺𑀓𑁆𑀔𑀯𑁂, 𑀲𑀼𑀯𑀡𑁆𑀡𑀓𑀸𑀭𑁄 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀢𑀁 𑀚𑀸𑀢𑀭𑀽𑀧𑀁 𑀏𑀓𑀦𑁆𑀢𑀁 𑀅𑀪𑀺𑀥𑀫𑁂𑀬𑁆𑀬, 𑀞𑀸𑀦𑀁 𑀢𑀁 𑀚𑀸𑀢𑀭𑀽𑀧𑀁 ¶ 𑀤𑀳𑁂𑀬𑁆𑀬. 𑀲𑀘𑁂, 𑀪𑀺𑀓𑁆𑀔𑀯𑁂, 𑀲𑀼𑀯𑀡𑁆𑀡𑀓𑀸𑀭𑁄 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀢𑀁 𑀚𑀸𑀢𑀭𑀽𑀧𑀁 𑀏𑀓𑀦𑁆𑀢𑀁 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑁂𑀬𑁆𑀬, 𑀞𑀸𑀦𑀁 𑀢𑀁 𑀚𑀸𑀢𑀭𑀽𑀧𑀁 𑀦𑀺𑀩𑁆𑀩𑀸𑀧𑁂𑀬𑁆𑀬. 𑀲𑀘𑁂, 𑀪𑀺𑀓𑁆𑀔𑀯𑁂, 𑀲𑀼𑀯𑀡𑁆𑀡𑀓𑀸𑀭𑁄 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀢𑀁 𑀚𑀸𑀢𑀭𑀽𑀧𑀁 𑀏𑀓𑀦𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑁂𑀬𑁆𑀬, 𑀞𑀸𑀦𑀁 𑀢𑀁 𑀚𑀸𑀢𑀭𑀽𑀧𑀁 𑀦 𑀲𑀫𑁆𑀫𑀸 𑀧𑀭𑀺𑀧𑀸𑀓𑀁 𑀕𑀘𑁆𑀙𑁂𑀬𑁆𑀬. 𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀼𑀯𑀡𑁆𑀡𑀓𑀸𑀭𑁄 𑀯𑀸 𑀲𑀼𑀯𑀡𑁆𑀡𑀓𑀸𑀭𑀦𑁆𑀢𑁂𑀯𑀸𑀲𑀻 𑀯𑀸 𑀢𑀁 𑀚𑀸𑀢𑀭𑀽𑀧𑀁 𑀓𑀸𑀮𑁂𑀦 𑀓𑀸𑀮𑀁 𑀅𑀪𑀺𑀥𑀫𑀢𑀺, 𑀓𑀸𑀮𑁂𑀦 𑀓𑀸𑀮𑀁 𑀉𑀤𑀓𑁂𑀦 𑀧𑀭𑀺𑀧𑁆𑀨𑁄𑀲𑁂𑀢𑀺, 𑀓𑀸𑀮𑁂𑀦 𑀓𑀸𑀮𑀁 𑀅𑀚𑁆𑀛𑀼𑀧𑁂𑀓𑁆𑀔𑀢𑀺, 𑀢𑀁 𑀳𑁄𑀢𑀺 𑀚𑀸𑀢𑀭𑀽𑀧𑀁 𑀫𑀼𑀤𑀼𑀜𑁆𑀘 𑀓𑀫𑁆𑀫𑀦𑀺𑀬𑀜𑁆𑀘 𑀧𑀪𑀲𑁆𑀲𑀭𑀜𑁆𑀘, 𑀦 𑀘 𑀧𑀪𑀗𑁆𑀕𑀼, 𑀲𑀫𑁆𑀫𑀸 𑀉𑀧𑁂𑀢𑀺 𑀓𑀫𑁆𑀫𑀸𑀬. 𑀬𑀲𑁆𑀲𑀸 𑀬𑀲𑁆𑀲𑀸 𑀘 𑀧𑀺𑀴𑀦𑁆𑀥𑀦𑀯𑀺𑀓𑀢𑀺𑀬𑀸 𑀆𑀓𑀗𑁆𑀔𑀢𑀺, 𑀬𑀤𑀺 𑀧𑀝𑁆𑀝𑀺𑀓𑀸𑀬 𑀬𑀤𑀺 𑀓𑀼𑀡𑁆𑀟𑀮𑀸𑀬 𑀬𑀤𑀺 𑀕𑀻𑀯𑁂𑀬𑁆𑀬𑀓𑁂𑀦 𑀬𑀤𑀺 𑀲𑀼𑀯𑀡𑁆𑀡𑀫𑀸𑀮𑀸𑀬, 𑀢𑀜𑁆𑀘𑀲𑁆𑀲 𑀅𑀢𑁆𑀣𑀁 𑀅𑀦𑀼𑀪𑁄𑀢𑀺.

‘‘𑀏𑀯𑀫𑁂𑀯 ¶ 𑀔𑁄, 𑀪𑀺𑀓𑁆𑀔𑀯𑁂, 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁂𑀦 𑀪𑀺𑀓𑁆𑀔𑀼…𑀧𑁂… 𑀲𑀫𑁆𑀫𑀸 𑀲𑀫𑀸𑀥𑀺𑀬𑀢𑀺 𑀆𑀲𑀯𑀸𑀦𑀁 𑀔𑀬𑀸𑀬. 𑀬𑀲𑁆𑀲 𑀬𑀲𑁆𑀲 𑀘 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀭𑀡𑀻𑀬𑀲𑁆𑀲 𑀥𑀫𑁆𑀫𑀲𑁆𑀲 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀢𑀺 𑀅𑀪𑀺𑀜𑁆𑀜𑀸𑀲𑀘𑁆𑀙𑀺𑀓𑀺𑀭𑀺𑀬𑀸𑀬, 𑀢𑀢𑁆𑀭 𑀢𑀢𑁆𑀭𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀺 𑀲𑀢𑀺 𑀲𑀢𑀺𑀆𑀬𑀢𑀦𑁂’’𑀢𑀺 (𑀅. 𑀦𑀺. 𑁩.𑁧𑁦𑁩) 𑁋

𑀏𑀯𑀁 𑀧𑀞𑀫𑀁 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀢𑀤𑀢𑀦𑁆𑀢𑀭𑀁 𑀉𑀧𑀫𑀁 𑀯𑀢𑁆𑀯𑀸 𑀧𑀼𑀦𑀧𑀺 𑀅𑀢𑁆𑀣𑁄 𑀏𑀯𑀁 𑀧𑀞𑀫𑀁 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀉𑀧𑀫𑀁 𑀯𑀢𑁆𑀯𑀸 𑀧𑀼𑀦𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄.

𑀲𑀢𑁆𑀢𑀲𑀽𑀭𑀺𑀬𑁄𑀧𑀫𑁂 𑀘 𑁋

‘‘𑀅𑀦𑀺𑀘𑁆𑀘𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸, 𑀅𑀥𑀼𑀯𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸, 𑀅𑀦𑀲𑁆𑀲𑀸𑀲𑀺𑀓𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸, 𑀬𑀸𑀯𑀜𑁆𑀘𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀮𑀫𑁂𑀯 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀦𑁆𑀤𑀺𑀢𑀼𑀁 𑀅𑀮𑀁 𑀯𑀺𑀭𑀚𑁆𑀚𑀺𑀢𑀼𑀁 𑀅𑀮𑀁 𑀯𑀺𑀫𑀼𑀘𑁆𑀘𑀺𑀢𑀼𑀁. 𑀲𑀺𑀦𑁂𑀭𑀼, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀢𑀭𑀸𑀚𑀸 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀆𑀬𑀸𑀫𑁂𑀦, 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀯𑀺𑀢𑁆𑀣𑀸𑀭𑁂𑀦, 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀫𑀳𑀸𑀲𑀫𑀼𑀤𑁆𑀤𑁂 𑀅𑀚𑁆𑀛𑁄𑀕𑀸𑀴𑁆𑀳𑁄, 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀫𑀳𑀸𑀲𑀫𑀼𑀤𑁆𑀤𑀸 𑀅𑀘𑁆𑀘𑀼𑀕𑁆𑀕𑀢𑁄. 𑀳𑁄𑀢𑀺 𑀲𑁄 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁄, 𑀬𑀁 𑀓𑀤𑀸𑀘𑀺 𑀓𑀭𑀳𑀘𑀺 𑀤𑀻𑀖𑀲𑁆𑀲 𑀅𑀤𑁆𑀥𑀼𑀦𑁄 𑀅𑀘𑁆𑀘𑀬𑁂𑀦 𑀩𑀳𑀽𑀦𑀺 𑀯𑀲𑁆𑀲𑀸𑀦𑀺 𑀩𑀳𑀽𑀦𑀺 𑀯𑀲𑁆𑀲𑀲𑀢𑀸𑀦𑀺 𑀩𑀳𑀽𑀦𑀺 𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀩𑀳𑀽𑀦𑀺 𑀯𑀲𑁆𑀲𑀲𑀢𑀲𑀳𑀲𑁆𑀲𑀸𑀦𑀺 𑀤𑁂𑀯𑁄 𑀦 𑀯𑀲𑁆𑀲𑀢𑀺, 𑀤𑁂𑀯𑁂 ¶ 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀅𑀯𑀲𑁆𑀲𑀦𑁆𑀢𑁂 𑀬𑁂 𑀓𑁂𑀘𑀺𑀫𑁂 𑀩𑀻𑀚𑀕𑀸𑀫𑀪𑀽𑀢𑀕𑀸𑀫𑀸 𑀑𑀲𑀥𑀺𑀢𑀺𑀡𑀯𑀦𑀧𑁆𑀧𑀢𑀬𑁄, 𑀢𑁂 𑀉𑀲𑁆𑀲𑀼𑀲𑁆𑀲𑀦𑁆𑀢𑀺 𑀯𑀺𑀲𑀼𑀲𑁆𑀲𑀦𑁆𑀢𑀺 𑀦 𑀪𑀯𑀦𑁆𑀢𑀺. 𑀏𑀯𑀁 𑀅𑀦𑀺𑀘𑁆𑀘𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸, 𑀏𑀯𑀁 𑀅𑀥𑀼𑀯𑀸, 𑀪𑀺𑀓𑁆𑀔𑀯𑁂, 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁭.𑁬𑁬) 𑁋

𑀧𑀞𑀫𑀁 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀉𑀧𑀫𑀁 𑀯𑀢𑁆𑀯𑀸 𑀧𑀼𑀦𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀅𑀣 𑀯𑀸 ‘‘𑀲𑀽𑀭𑀺𑀬𑀲𑁆𑀲, 𑀪𑀺𑀓𑁆𑀔𑀯𑁂, 𑀉𑀤𑀬𑀢𑁄 𑀏𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀏𑀢𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀬𑀤𑀺𑀤𑀁 𑀅𑀭𑀼𑀡𑀼𑀕𑁆𑀕𑀁. 𑀏𑀯𑀫𑁂𑀯 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀭𑀺𑀬𑀲𑁆𑀲 𑀅𑀝𑁆𑀞𑀗𑁆𑀕𑀺𑀓𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀏𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀏𑀢𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀁, 𑀬𑀤𑀺𑀤𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸’’𑀢𑀺 𑀬𑀤𑁂𑀢𑀁 𑀲𑀁𑀬𑀼𑀢𑁆𑀢𑀦𑀺𑀓𑀸𑀬𑁂 (𑀲𑀁. 𑀦𑀺. 𑁫.𑁪𑁯) 𑀆𑀕𑀢𑀁, 𑀢𑀁 𑀇𑀥 𑀲𑀽𑀭𑀺𑀬𑁄𑀧𑀫𑀲𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁 𑀲𑀺𑀬𑀸. 𑀢𑀫𑁆𑀧𑀺 ‘‘𑀓𑀢𑁆𑀣𑀘𑀺 𑀉𑀧𑀫𑀸𑀬 𑀅𑀢𑁆𑀣𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀻’’𑀢𑀺 𑀇𑀫𑀺𑀦𑀸 𑀦 𑀲𑀫𑁂𑀢𑀺 𑀧𑀞𑀫𑀁 𑀉𑀧𑀫𑀁 𑀯𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀉𑀧𑀫𑀸𑀬 𑀅𑀯𑀼𑀢𑁆𑀢𑀢𑁆𑀢𑀸. 𑀧𑀞𑀫𑀫𑁂𑀯 𑀳𑀺 𑀢𑀢𑁆𑀣 𑀉𑀧𑀫𑀸 𑀤𑀲𑁆𑀲𑀺𑀢𑀸, ‘‘𑀇𑀫𑀲𑁆𑀫𑀺𑀁 𑀧𑀦 𑀲𑀸𑀮𑀺𑀲𑀽𑀓𑁄𑀧𑀫𑁂 𑀉𑀧𑀫𑀸𑀬 𑀅𑀢𑁆𑀣𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂𑀢𑀺 𑀆𑀤𑀺𑀫𑀸𑀳𑀸’’𑀢𑀺. 𑀇𑀤𑀫𑁆𑀧𑀺 𑀯𑀘𑀦𑀫𑀲𑀗𑁆𑀕𑀳𑀺𑀢𑀁 𑀯𑀢𑁆𑀣𑀲𑀼𑀢𑁆𑀢𑀲𑁆𑀲 𑀇𑀫𑀲𑁆𑀲 𑀘 𑀯𑀺𑀲𑁂𑀲𑀸𑀪𑀸𑀯𑀢𑁄. 𑀉𑀪𑀬𑀢𑁆𑀣𑀸𑀧𑀺 𑀳𑀺 𑀧𑀞𑀫𑀁 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀣𑁄 𑀯𑀼𑀢𑁆𑀢𑁄 ¶ , 𑀢𑀲𑁆𑀫𑀸 𑀏𑀯𑀫𑁂𑀢𑁆𑀣 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁 ‘‘𑀢𑀢𑁆𑀭 𑀪𑀕𑀯𑀸 𑀓𑀢𑁆𑀣𑀘𑀺 𑀧𑀞𑀫𑀁𑀬𑁂𑀯 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀣𑀁 𑀤𑀲𑁆𑀲𑁂𑀢𑀺 𑀯𑀢𑁆𑀣𑀲𑀼𑀢𑁆𑀢𑁂 𑀯𑀺𑀬 𑀧𑀸𑀭𑀺𑀘𑁆𑀙𑀢𑁆𑀢𑀓𑁄𑀧𑀫- (𑀅. 𑀦𑀺. 𑁭.𑁬𑁯) 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀸𑀤𑀺𑀲𑀼𑀢𑁆𑀢𑁂𑀲𑀼 (𑀅. 𑀦𑀺. 𑁭.𑁭𑁨) 𑀯𑀺𑀬 𑀘, 𑀓𑀢𑁆𑀣𑀘𑀺 𑀅𑀢𑁆𑀣𑁂𑀦 𑀉𑀧𑀫𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀤𑀲𑁆𑀲𑁂𑀢𑀺 𑀲𑀼𑀯𑀡𑁆𑀡𑀓𑀸𑀭𑀲𑀢𑁆𑀢𑀲𑀽𑀭𑀺𑀬𑁄𑀧𑀫𑀸𑀤𑀺𑀲𑀼𑀢𑁆𑀢𑁂𑀲𑀼 (𑀅. 𑀦𑀺. 𑁭.𑁬𑁬) 𑀯𑀺𑀬, 𑀇𑀫𑀲𑁆𑀫𑀺𑀁 𑀧𑀦 𑀲𑀸𑀮𑀺𑀲𑀽𑀓𑁄𑀧𑀫𑁂 𑀧𑀞𑀫𑀁 𑀉𑀧𑀫𑀁 𑀤𑀲𑁆𑀲𑁂𑀢𑁆𑀯𑀸 𑀧𑀘𑁆𑀙𑀸 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂𑀢𑀺 𑀆𑀤𑀺𑀫𑀸𑀳𑀸’’𑀢𑀺. 𑀅𑀜𑁆𑀜𑀣𑀸 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬 𑀯𑀺𑀭𑀼𑀚𑁆𑀛𑀢𑀺. 𑀇𑀥𑀸𑀧𑀺 𑀘 𑀧𑀼𑀩𑁆𑀩𑁂𑀦𑀸𑀧𑀭𑀁 𑀦 𑀲𑀫𑁂𑀢𑀺. 𑀫𑀚𑁆𑀛𑀺𑀫𑀝𑁆𑀞𑀓𑀣𑀸𑀬 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀸 𑀇𑀥𑀸𑀧𑀺 𑀧𑀸𑀞𑁄 𑀕𑀳𑁂𑀢𑀩𑁆𑀩𑁄.

𑀓𑀡𑀲𑀤𑀺𑀲𑁄 𑀲𑀸𑀮𑀺𑀨𑀮𑀲𑁆𑀲 𑀢𑀼𑀡𑁆𑀟𑁂 𑀉𑀧𑁆𑀧𑀚𑁆𑀚𑀦𑀓𑀯𑀸𑀮𑁄 𑀲𑀸𑀮𑀺𑀲𑀽𑀓𑀁, 𑀢𑀣𑀸 𑀬𑀯𑀲𑀽𑀓𑀁. 𑀲𑀽𑀓𑀲𑁆𑀲 𑀢𑀦𑀼𑀓𑀪𑀸𑀯𑀢𑁄 𑀪𑁂𑀤𑀯𑀢𑁄 𑀪𑁂𑀤𑁄 𑀦𑀸𑀢𑀺𑀫𑀳𑀸 𑀳𑁄𑀢𑀻𑀢𑀺 𑀆𑀳 𑁋 ‘‘𑀪𑀺𑀦𑁆𑀤𑀺𑀲𑁆𑀲𑀢𑀺, 𑀙𑀯𑀺𑀁 𑀙𑀺𑀦𑁆𑀤𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄’’𑀢𑀺. 𑀬𑀣𑀸 𑀫𑀺𑀘𑁆𑀙𑀸𑀞𑀧𑀺𑀢𑀲𑀸𑀮𑀺𑀲𑀽𑀓𑀸𑀤𑀺 𑀅𑀓𑁆𑀓𑀦𑁆𑀢𑀫𑁆𑀧𑀺 𑀳𑀢𑁆𑀣𑀸𑀤𑀺𑀁 𑀦 𑀪𑀺𑀦𑁆𑀤𑀢𑀺 𑀪𑀺𑀦𑁆𑀤𑀺𑀢𑀼𑀁 𑀅𑀬𑁄𑀕𑁆𑀕𑀪𑀸𑀯𑁂𑀦 𑀞𑀺𑀢𑀢𑁆𑀢𑀸, 𑀏𑀯𑀁 𑀆𑀘𑀬𑀕𑀸𑀫𑀺𑀘𑀺𑀢𑁆𑀢𑀁 𑀅𑀯𑀺𑀚𑁆𑀚𑀁 𑀦 𑀪𑀺𑀦𑁆𑀤𑀢𑀺 𑀪𑀺𑀦𑁆𑀤𑀺𑀢𑀼𑀁 ¶ 𑀅𑀬𑁄𑀕𑁆𑀕𑀪𑀸𑀯𑁂𑀦 𑀉𑀧𑁆𑀧𑀦𑁆𑀦𑀢𑁆𑀢𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀫𑀺𑀘𑁆𑀙𑀸𑀞𑀧𑀺𑀢𑁂𑀦𑀸’’𑀢𑀺𑀆𑀤𑀺𑀦𑀸. 𑀅𑀝𑁆𑀞𑀲𑀼 𑀞𑀸𑀦𑁂𑀲𑀽𑀢𑀺 ‘‘𑀤𑀼𑀓𑁆𑀔𑁂 𑀅𑀜𑁆𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀲𑀼 𑀤𑀼𑀓𑁆𑀔𑀸𑀤𑀻𑀲𑀼 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀧𑀼𑀩𑁆𑀩𑀦𑁆𑀢𑀸𑀤𑀻𑀲𑀼 𑀘𑀢𑀽𑀲𑀼 𑀘𑀸𑀢𑀺 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼. 𑀖𑀦𑀩𑀳𑀮𑀦𑁆𑀢𑀺 𑀘𑀺𑀭𑀓𑀸𑀮𑀧𑀭𑀺𑀪𑀸𑀯𑀦𑀸𑀬 𑀅𑀢𑀺𑀯𑀺𑀬 𑀩𑀳𑀮𑀁. 𑀫𑀳𑀸𑀯𑀺𑀲𑀬𑀢𑀸𑀬 𑀫𑀳𑀸𑀧𑀝𑀺𑀧𑀓𑁆𑀔𑀢𑀸𑀬 𑀩𑀳𑀼𑀧𑀭𑀺𑀯𑀸𑀭𑀢𑀸𑀬 𑀩𑀳𑀼𑀤𑀼𑀓𑁆𑀔𑀢𑀸𑀬 𑀘 𑀫𑀳𑀢𑀻 𑀅𑀯𑀺𑀚𑁆𑀚𑀸𑀢𑀺 𑀫𑀳𑀸𑀅𑀯𑀺𑀚𑁆𑀚𑀸. 𑀢𑀁 𑀫𑀳𑀸𑀅𑀯𑀺𑀚𑁆𑀚𑀁. 𑀫𑀳𑀸𑀲𑀤𑁆𑀤𑁄 𑀳𑀺 𑀩𑀳𑀼𑀪𑀸𑀯𑀢𑁆𑀣𑁄𑀧𑀺 𑀳𑁄𑀢𑀺 ‘‘𑀫𑀳𑀸𑀚𑀦𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀢𑀡𑁆𑀳𑀸𑀯𑀸𑀦𑀢𑁄 𑀦𑀺𑀓𑁆𑀔𑀦𑁆𑀢𑀪𑀸𑀯𑁂𑀦𑀸𑀢𑀺 𑀢𑀢𑁆𑀣 𑀢𑀡𑁆𑀳𑀸𑀬 𑀅𑀪𑀸𑀯𑀫𑁂𑀯 𑀯𑀤𑀢𑀺.

𑁪𑁨. 𑀤𑀼𑀢𑀺𑀬𑁂 𑀧𑀸𑀤𑁂𑀦𑁂𑀯 𑀅𑀯𑀫𑀤𑁆𑀤𑀺𑀢𑁂 𑀅𑀓𑁆𑀓𑀦𑁆𑀢𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁂 𑀳𑀢𑁆𑀣𑁂𑀦 𑀅𑀯𑀫𑀤𑁆𑀤𑀺𑀢𑀁 𑀅𑀓𑁆𑀓𑀦𑁆𑀢𑀁 𑀯𑀺𑀬 𑀅𑀓𑁆𑀓𑀦𑁆𑀢𑀦𑁆𑀢𑀺 𑀭𑀼𑀴𑁆𑀳𑀻 𑀳𑁂𑀲𑀸𑀢𑀺 𑀆𑀳 𑁋 ‘‘𑀅𑀓𑁆𑀓𑀦𑁆𑀢𑀦𑁆𑀢𑁂𑀯 𑀯𑀼𑀢𑁆𑀢’’𑀦𑁆𑀢𑀺. 𑀅𑀭𑀺𑀬𑀯𑁄𑀳𑀸𑀭𑁄𑀢𑀺 𑀅𑀭𑀺𑀬𑀤𑁂𑀲𑀯𑀸𑀲𑀻𑀦𑀁 𑀯𑁄𑀳𑀸𑀭𑁄. 𑀫𑀳𑀦𑁆𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀧𑁆𑀧𑀫𑀢𑁆𑀢𑀓𑀲𑁆𑀲𑁂𑀯 𑀕𑀳𑀡𑁂 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀓𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑁂𑀦 ‘‘𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀓𑀼𑀲𑀮𑀁 𑀦𑀸𑀫 𑀬𑁄𑀦𑀺𑀲𑁄 𑀉𑀧𑁆𑀧𑀸𑀤𑀺𑀢𑀁 𑀅𑀧𑁆𑀧𑀓’’𑀦𑁆𑀢𑀺 𑀦 𑀘𑀺𑀦𑁆𑀢𑁂𑀢𑀩𑁆𑀩𑀁, 𑀅𑀦𑀼𑀓𑁆𑀓𑀫𑁂𑀦 𑀮𑀤𑁆𑀥𑀧𑀘𑁆𑀘𑀬𑀁 𑀳𑀼𑀢𑁆𑀯𑀸 𑀯𑀟𑁆𑀠𑀫𑀸𑀦𑀁 𑀔𑀼𑀤𑁆𑀤𑀓𑀦𑀤𑀻 𑀯𑀺𑀬 𑀧𑀓𑁆𑀔𑀦𑁆𑀤𑀫𑀳𑁄𑀖𑀸 𑀲𑀫𑀼𑀤𑁆𑀤𑀁, 𑀅𑀦𑀼𑀓𑁆𑀓𑀫𑁂𑀦 𑀦𑀺𑀩𑁆𑀩𑀸𑀦𑀫𑀳𑀸𑀲𑀫𑀼𑀤𑁆𑀤𑀫𑁂𑀯 𑀧𑀼𑀭𑀺𑀲𑀁 𑀧𑀸𑀧𑁂𑀢𑀻𑀢𑀺 𑀤𑀻𑀧𑁂𑀢𑀺. 𑀧𑀘𑁆𑀘𑁂𑀓𑀩𑁄𑀥𑀺𑀁 𑀩𑀼𑀤𑁆𑀥𑀪𑀽𑀫𑀺𑀦𑁆𑀢𑀺 𑀘 𑀧𑀘𑁆𑀘𑀢𑁆𑀢𑁂 𑀉𑀧𑀬𑁄𑀕𑀯𑀘𑀦𑀁. 𑀯𑀝𑁆𑀝𑀯𑀺𑀯𑀝𑁆𑀝𑀁 𑀓𑀣𑀺𑀢𑀦𑁆𑀢𑀺 𑀬𑀣𑀸𑀓𑁆𑀓𑀫𑁂𑀦 𑀯𑀼𑀢𑁆𑀢𑀁.

𑁪𑁩. 𑀢𑀢𑀺𑀬𑁂 𑀤𑁄𑀲𑁂𑀦 𑀧𑀤𑀼𑀝𑁆𑀞𑀘𑀺𑀢𑁆𑀢𑀦𑁆𑀢𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁, 𑀬𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀘 𑀤𑀽𑀲𑀦𑁂𑀦 𑀯𑀺𑀲𑀲𑀁𑀲𑀝𑁆𑀞𑀧𑀽𑀢𑀺𑀫𑀼𑀢𑁆𑀢𑀲𑀤𑀺𑀲𑁂𑀦 𑀤𑁄𑀲𑁂𑀦 𑀧𑀤𑀽𑀲𑀺𑀢𑀘𑀺𑀢𑁆𑀢𑀁. 𑀅𑀢𑁆𑀢𑀦𑁄 𑀘𑀺𑀢𑁆𑀢𑁂𑀦𑀸𑀢𑀺 𑀅𑀢𑁆𑀢𑀦𑁄 𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀯𑀸 𑀲𑀳𑀺𑀢𑁂𑀦 𑀘𑀺𑀢𑁆𑀢𑁂𑀦. 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀜𑀸𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 ¶ . 𑀇𑀝𑁆𑀞𑀸𑀓𑀸𑀭𑁂𑀦 𑀏𑀢𑀻𑀢𑀺 𑀅𑀬𑁄, 𑀲𑀼𑀔𑀁. 𑀲𑀩𑁆𑀩𑀲𑁄 𑀅𑀧𑁂𑀢𑁄 𑀅𑀬𑁄 𑀏𑀢𑀲𑁆𑀲, 𑀏𑀢𑀲𑁆𑀫𑀸𑀢𑀺 𑀯𑀸 𑀅𑀧𑀸𑀬𑁄, 𑀓𑀸𑀬𑀺𑀓𑀲𑁆𑀲 𑀘𑁂𑀢𑀲𑀺𑀓𑀲𑁆𑀲 𑀘 𑀤𑀼𑀓𑁆𑀔𑀲𑁆𑀲 𑀕𑀢𑀺 𑀧𑀯𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀤𑀼𑀕𑁆𑀕𑀢𑀺, 𑀓𑀸𑀭𑀡𑀸𑀯𑀲𑁂𑀦 𑀯𑀺𑀯𑀺𑀥𑀁 𑀯𑀺𑀓𑀸𑀭𑁂𑀦 𑀘 𑀦𑀺𑀧𑀸𑀢𑀺𑀬𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀺𑀦𑀺𑀧𑀸𑀢𑁄, 𑀅𑀧𑁆𑀧𑀓𑁄𑀧𑀺 𑀦𑀢𑁆𑀣𑀺 𑀅𑀬𑁄 𑀲𑀼𑀔𑀁 𑀏𑀢𑁆𑀣𑀸𑀢𑀺 𑀦𑀺𑀭𑀬𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑁪𑁪. 𑀘𑀢𑀼𑀢𑁆𑀣𑁂 𑀲𑀤𑁆𑀥𑀸𑀧𑀲𑀸𑀤𑁂𑀦 𑀧𑀲𑀦𑁆𑀦𑀦𑁆𑀢𑀺 𑀲𑀤𑁆𑀥𑀸𑀲𑀗𑁆𑀔𑀸𑀢𑁂𑀦 𑀧𑀲𑀸𑀤𑁂𑀦 𑀧𑀲𑀦𑁆𑀦𑀁, 𑀦 𑀇𑀦𑁆𑀤𑁆𑀭𑀺𑀬𑀸𑀦𑀁 𑀅𑀯𑀺𑀧𑁆𑀧𑀲𑀦𑁆𑀦𑀢𑀸𑀬. 𑀲𑀼𑀔𑀲𑁆𑀲 𑀕𑀢𑀺𑀦𑁆𑀢𑀺 𑀲𑀼𑀔𑀲𑁆𑀲 𑀧𑀯𑀢𑁆𑀢𑀺𑀝𑁆𑀞𑀸𑀦𑀁. 𑀲𑀼𑀔𑀫𑁂𑀯𑁂𑀢𑁆𑀣 𑀕𑀘𑁆𑀙𑀦𑁆𑀢𑀺, 𑀦 𑀤𑀼𑀓𑁆𑀔𑀦𑁆𑀢𑀺 𑀯𑀸 𑀲𑀼𑀕𑀢𑀺. 𑀫𑀦𑀸𑀧𑀺𑀬𑀭𑀽𑀧𑀸𑀤𑀺𑀢𑀸𑀬 𑀲𑀳 𑀅𑀕𑁆𑀕𑁂𑀳𑀻𑀢𑀺 𑀲𑀕𑁆𑀕𑀁, 𑀮𑁄𑀓𑀁.

𑁪𑁫. 𑀧𑀜𑁆𑀘𑀫𑁂 ¶ 𑀧𑀭𑀺𑀴𑀸𑀳𑀯𑀽𑀧𑀲𑀫𑀓𑀭𑁄 𑀭𑀳𑀤𑁄 𑀏𑀢𑁆𑀣𑀸𑀢𑀺 𑀭𑀳𑀤𑁄, 𑀉𑀤𑀓𑀧𑀼𑀡𑁆𑀡𑁄 𑀭𑀳𑀤𑁄 𑀉𑀤𑀓𑀭𑀳𑀤𑁄. 𑀉𑀤𑀓𑀁 𑀤𑀳𑀢𑀺 𑀥𑀸𑀭𑁂𑀢𑀻𑀢𑀺 𑀉𑀤𑀓𑀤𑀳𑁄. 𑀆𑀯𑀺𑀮𑁄𑀢𑀺 𑀓𑀮𑀮𑀩𑀳𑀼𑀮𑀢𑀸𑀬 𑀆𑀓𑀼𑀮𑁄. 𑀢𑁂𑀦𑀸𑀳 𑁋 ‘‘𑀅𑀯𑀺𑀧𑁆𑀧𑀲𑀦𑁆𑀦𑁄’’𑀢𑀺. 𑀮𑀼𑀴𑀺𑀢𑁄𑀢𑀺 𑀯𑀸𑀢𑁂𑀦 𑀆𑀮𑁄𑀴𑀺𑀢𑁄. 𑀢𑁂𑀦𑀸𑀳 𑁋 ‘‘𑀅𑀧𑀭𑀺𑀲𑀡𑁆𑀞𑀺𑀢𑁄’’𑀢𑀺. 𑀯𑀸𑀢𑀸𑀪𑀺𑀖𑀸𑀢𑁂𑀦 𑀯𑀻𑀘𑀺𑀢𑀭𑀗𑁆𑀕𑀫𑀮𑀲𑀫𑀸𑀓𑀼𑀮𑀢𑀸𑀬 𑀳𑀺 𑀧𑀭𑀺𑀢𑁄 𑀦 𑀲𑀡𑁆𑀞𑀺𑀢𑁄 𑀯𑀸 𑀅𑀧𑀭𑀺𑀲𑀡𑁆𑀞𑀺𑀢𑁄. 𑀯𑀸𑀢𑀸𑀪𑀺𑀖𑀸𑀢𑁂𑀦 𑀉𑀤𑀓𑀲𑁆𑀲 𑀘 𑀅𑀧𑁆𑀧𑀪𑀸𑀯𑁂𑀦 𑀓𑀮𑀮𑀻𑀪𑀽𑀢𑁄 𑀓𑀤𑁆𑀤𑀫𑀪𑀸𑀯𑀧𑁆𑀧𑀢𑁆𑀢𑁄𑀢𑀺 𑀆𑀳 𑁋 ‘‘𑀓𑀤𑁆𑀤𑀫𑀻𑀪𑀽𑀢𑁄’’𑀢𑀺. 𑀲𑀺𑀧𑁆𑀧𑀺𑀬𑁄 𑀫𑀼𑀢𑁆𑀢𑀲𑀺𑀧𑁆𑀧𑀺𑀆𑀤𑀬𑁄. 𑀲𑀫𑁆𑀩𑀼𑀓𑀸 𑀲𑀗𑁆𑀔𑀲𑀮𑀸𑀓𑀯𑀺𑀲𑁂𑀲𑀸. 𑀘𑀭𑀦𑁆𑀢𑀫𑁆𑀧𑀺 𑀢𑀺𑀝𑁆𑀞𑀦𑁆𑀢𑀫𑁆𑀧𑀻𑀢𑀺 𑀬𑀣𑀸𑀮𑀸𑀪𑀯𑀘𑀦𑀫𑁂𑀢𑀁 𑀤𑀝𑁆𑀞𑀩𑁆𑀩𑀁. 𑀢𑀫𑁂𑀯 𑀳𑀺 𑀬𑀣𑀸𑀮𑀸𑀪𑀯𑀘𑀦𑀢𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀏𑀢𑁆𑀣𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁.

𑀧𑀭𑀺𑀬𑁄𑀦𑀤𑁆𑀥𑁂𑀦𑀸𑀢𑀺 𑀧𑀝𑀺𑀘𑁆𑀙𑀸𑀤𑀺𑀢𑁂𑀦. 𑀢𑀬𑀺𑀤𑀁 𑀓𑀸𑀭𑀡𑁂𑀦 𑀆𑀯𑀺𑀮𑀪𑀸𑀯𑀲𑁆𑀲 𑀤𑀲𑁆𑀲𑀦𑀁. 𑀤𑀺𑀝𑁆𑀞𑀥𑀫𑁆𑀫𑁂 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀪𑀯𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑁄, 𑀲𑁄 𑀧𑀦 𑀮𑁄𑀓𑀺𑀬𑁄𑀧𑀺 𑀳𑁄𑀢𑀺 𑀮𑁄𑀓𑀼𑀢𑁆𑀢𑀭𑁄𑀧𑀻𑀢𑀺 𑀆𑀳 𑁋 ‘‘𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑁄’’𑀢𑀺. 𑀧𑁂𑀘𑁆𑀘 𑀲𑀫𑁆𑀧𑀭𑁂𑀢𑀩𑁆𑀩𑀢𑁄 𑀲𑀫𑁆𑀧𑀭𑀸𑀬𑁄, 𑀧𑀭𑀮𑁄𑀓𑁄. 𑀢𑁂𑀦𑀸𑀳 𑁋 ‘‘𑀲𑁄 𑀳𑀺 𑀧𑀭𑀢𑁆𑀣 𑀅𑀢𑁆𑀣𑁄𑀢𑀺 𑀧𑀭𑀢𑁆𑀣𑁄’’𑀢𑀺. 𑀇𑀢𑀺 𑀤𑁆𑀯𑀺𑀥𑀸𑀧𑀺 𑀲𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁄 𑀏𑀯 𑀕𑀳𑀺𑀢𑁄𑀢𑀺 𑀇𑀢𑀭𑀫𑁆𑀧𑀺 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑁋 ‘‘𑀅𑀧𑀺𑀘𑀸’’𑀢𑀺𑀆𑀤𑀺𑀫𑀸𑀳. 𑀅𑀬𑀦𑁆𑀢𑀺 𑀓𑀼𑀲𑀮𑀓𑀫𑁆𑀫𑀧𑀣𑀲𑀗𑁆𑀔𑀸𑀢𑁄 𑀤𑀲𑀯𑀺𑀥𑁄 𑀥𑀫𑁆𑀫𑁄. 𑀲𑀢𑁆𑀣𑀦𑁆𑀢𑀭𑀓𑀧𑁆𑀧𑀸𑀯𑀲𑀸𑀦𑁂𑀢𑀺 𑀇𑀤𑀁 𑀢𑀲𑁆𑀲 𑀆𑀲𑀦𑁆𑀦𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀲𑁆𑀲 𑀓𑀲𑁆𑀲𑀘𑀺 𑀅𑀦𑁆𑀢𑀭𑀓𑀧𑁆𑀧𑀲𑁆𑀲𑀸𑀯𑀲𑀸𑀦𑁂𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀭𑀺𑀬𑀸𑀦𑀁 𑀬𑀼𑀢𑁆𑀢𑀦𑁆𑀢𑀺 𑀅𑀭𑀺𑀬𑀸𑀦𑀁 𑀅𑀭𑀺𑀬𑀪𑀸𑀯𑀸𑀬 𑀬𑀼𑀢𑁆𑀢𑀁, 𑀢𑀢𑁄 𑀏𑀯 𑀅𑀭𑀺𑀬𑀪𑀸𑀯𑀁 𑀓𑀸𑀢𑀼𑀁 𑀲𑀫𑀢𑁆𑀣𑀁. 𑀜𑀸𑀡𑀫𑁂𑀯 𑀜𑁂𑀬𑁆𑀬𑀲𑁆𑀲 𑀧𑀘𑁆𑀘𑀓𑁆𑀔𑀓𑀭𑀡𑀝𑁆𑀞𑁂𑀦 𑀤𑀲𑁆𑀲𑀦𑀦𑁆𑀢𑀺 𑀆𑀳 𑁋 ‘‘𑀜𑀸𑀡𑀫𑁂𑀯 𑀳𑀻’’𑀢𑀺𑀆𑀤𑀺. 𑀓𑀺𑀁 𑀧𑀦 𑀢𑀦𑁆𑀢𑀺 𑀆𑀳 𑁋 ‘‘𑀤𑀺𑀩𑁆𑀩𑀘𑀓𑁆𑀔𑀽’’𑀢𑀺𑀆𑀤𑀺.

𑁪𑁬. 𑀙𑀝𑁆𑀞𑁂 𑀅𑀘𑁆𑀙𑁄𑀢𑀺 𑀢𑀦𑀼𑀓𑁄. 𑀢𑀦𑀼𑀪𑀸𑀯𑀫𑁂𑀯 𑀳𑀺 𑀲𑀦𑁆𑀥𑀸𑀬 ‘‘𑀅𑀩𑀳𑀮𑁄’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀲𑀦𑁆𑀦𑁄 𑀦𑀸𑀫 𑀅𑀘𑁆𑀙𑁄 𑀦 𑀩𑀳𑀮𑁄, 𑀢𑀲𑁆𑀫𑀸 ‘‘𑀧𑀲𑀦𑁆𑀦𑁄𑀢𑀺𑀧𑀺 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀯𑀺𑀧𑁆𑀧𑀲𑀦𑁆𑀦𑁄𑀢𑀺 𑀯𑀺𑀲𑁂𑀲𑁂𑀦 𑀧𑀲𑀦𑁆𑀦𑁄 ¶ . 𑀲𑁄 𑀧𑀦 𑀲𑀫𑁆𑀫𑀸 𑀧𑀲𑀦𑁆𑀦𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 𑁋 ‘‘𑀲𑀼𑀝𑁆𑀞𑀼 𑀧𑀲𑀦𑁆𑀦𑁄’’𑀢𑀺. 𑀅𑀦𑀸𑀯𑀺𑀮𑁄𑀢𑀺 𑀅𑀓𑀮𑀼𑀲𑁄. 𑀢𑁂𑀦𑀸𑀳 𑁋 ‘‘𑀧𑀭𑀺𑀲𑀼𑀤𑁆𑀥𑁄’’𑀢𑀺𑀆𑀤𑀺. 𑀲𑀗𑁆𑀔𑀦𑁆𑀢𑀺 𑀔𑀼𑀤𑁆𑀤𑀓𑀲𑁂𑀯𑀸𑀮𑀁, 𑀬𑀁 ‘‘𑀢𑀺𑀮𑀩𑀻𑀚𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀲𑁂𑀯𑀸𑀮𑀦𑁆𑀢𑀺 𑀓𑀡𑁆𑀡𑀺𑀓𑀲𑁂𑀯𑀸𑀮𑀁. 𑀧𑀡𑀓𑀦𑁆𑀢𑀺 𑀉𑀤𑀓𑀫𑀮𑀁. 𑀘𑀺𑀢𑁆𑀢𑀲𑁆𑀲 𑀆𑀯𑀺𑀮𑀪𑀸𑀯𑁄 𑀦𑀻𑀯𑀭𑀡𑀳𑁂𑀢𑀼𑀓𑁄𑀢𑀺 𑀆𑀳 𑁋 ‘‘𑀅𑀦𑀸𑀯𑀺𑀮𑁂𑀦𑀸𑀢𑀺 𑀧𑀜𑁆𑀘𑀦𑀻𑀯𑀭𑀡𑀯𑀺𑀫𑀼𑀢𑁆𑀢𑁂𑀦𑀸’’𑀢𑀺.

𑁪𑁭. 𑀲𑀢𑁆𑀢𑀫𑁂 ¶ 𑀭𑀼𑀓𑁆𑀔𑀚𑀸𑀢𑀸𑀦𑀻𑀢𑀺 𑀏𑀢𑁆𑀣 𑀚𑀸𑀢𑀲𑀤𑁆𑀤𑁂𑀦 𑀧𑀤𑀯𑀟𑁆𑀠𑀦𑀫𑁂𑀯 𑀓𑀢𑀁 𑀬𑀣𑀸 ‘‘𑀓𑁄𑀲𑀚𑀸𑀢’’𑀦𑁆𑀢𑀺 𑀆𑀳 𑁋 ‘‘𑀭𑀼𑀓𑁆𑀔𑀸𑀦𑀫𑁂𑀯𑁂𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀓𑁄𑀘𑀺 𑀳𑀺 𑀭𑀼𑀓𑁆𑀔𑁄 𑀯𑀡𑁆𑀡𑁂𑀦 𑀅𑀕𑁆𑀕𑁄 𑀳𑁄𑀢𑀺 𑀬𑀣𑀸 𑀢𑀁 𑀭𑀢𑁆𑀢𑀘𑀦𑁆𑀤𑀦𑀸𑀤𑀺. 𑀓𑁄𑀘𑀺 𑀕𑀦𑁆𑀥𑁂𑀦 𑀬𑀣𑀸 𑀢𑀁 𑀕𑁄𑀲𑀻𑀢𑀘𑀦𑁆𑀤𑀦𑀁. 𑀓𑁄𑀘𑀺 𑀭𑀲𑁂𑀦 𑀔𑀤𑀺𑀭𑀸𑀤𑀺. 𑀓𑁄𑀘𑀺 𑀣𑀤𑁆𑀥𑀢𑀸𑀬 𑀘𑀫𑁆𑀧𑀓𑀸𑀤𑀺. 𑀫𑀕𑁆𑀕𑀨𑀮𑀸𑀯𑀳𑀢𑀸𑀬 𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀪𑀸𑀯𑀺𑀢𑀫𑁆𑀧𑀺 𑀕𑀳𑀺𑀢𑀁. ‘‘𑀢𑀢𑁆𑀣 𑀢𑀢𑁆𑀣𑁂𑀯 𑀲𑀓𑁆𑀔𑀺𑀪𑀩𑁆𑀩𑀢𑀁 𑀧𑀸𑀧𑀼𑀡𑀸𑀢𑀻’’𑀢𑀺 (𑀅. 𑀦𑀺. 𑁩.𑁧𑁦𑁩) 𑀯𑀘𑀦𑀢𑁄 ‘‘𑀅𑀪𑀺𑀜𑁆𑀜𑀸𑀧𑀸𑀤𑀓𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀫𑁂𑀯, 𑀆𑀯𑀼𑀲𑁄’’𑀢𑀺 𑀨𑀼𑀲𑁆𑀲𑀫𑀺𑀢𑁆𑀢𑀢𑁆𑀣𑁂𑀭𑁄 𑀯𑀤𑀢𑀺.

𑁪𑁮. 𑀅𑀝𑁆𑀞𑀫𑁂 𑀘𑀺𑀢𑁆𑀢𑀲𑁆𑀲 𑀧𑀭𑀺𑀯𑀢𑁆𑀢𑀦𑀁 𑀉𑀧𑁆𑀧𑀸𑀤𑀦𑀺𑀭𑁄𑀥𑀸 𑀏𑀯𑀸𑀢𑀺 𑀆𑀳 𑁋 ‘‘𑀏𑀯𑀁 𑀮𑀳𑀼𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀮𑀳𑀼𑀁 𑀦𑀺𑀭𑀼𑀚𑁆𑀛𑀦𑀓’’𑀦𑁆𑀢𑀺. 𑀅𑀥𑀺𑀫𑀢𑁆𑀢𑀧𑀫𑀸𑀡𑀢𑁆𑀣𑁂𑀢𑀺 𑀅𑀢𑀺𑀓𑁆𑀓𑀦𑁆𑀢𑀧𑀫𑀸𑀡𑀢𑁆𑀣𑁂, 𑀧𑀫𑀸𑀡𑀸𑀢𑀻𑀢𑀢𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑀸𑀳 𑁋 ‘‘𑀅𑀢𑀺𑀯𑀺𑀬 𑀦 𑀲𑀼𑀓𑀭𑀸’’𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀫𑁆𑀧𑀺 𑀅𑀥𑀺𑀧𑁆𑀧𑁂𑀢𑀫𑁂𑀯𑀸𑀢𑀺 𑀲𑀩𑁆𑀩𑀲𑁆𑀲𑀧𑀺 𑀘𑀺𑀢𑁆𑀢𑀲𑁆𑀲 𑀲𑀫𑀸𑀦𑀔𑀡𑀢𑁆𑀢𑀸 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀲𑁆𑀲 𑀅𑀢𑀺𑀯𑀺𑀬 𑀮𑀳𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑀁 𑀣𑁂𑀭𑀯𑀸𑀤𑁂𑀦 𑀤𑀻𑀧𑁂𑀢𑀼𑀁 𑁋 ‘‘𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀲𑀗𑁆𑀔𑀸𑀭𑀸𑀢𑀺 𑀲𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀯𑀤𑀢𑀺. 𑀯𑀸𑀳𑀲𑀢𑀸𑀦𑀁 𑀔𑁄, 𑀫𑀳𑀸𑀭𑀸𑀚, 𑀯𑀻𑀳𑀻𑀦𑀦𑁆𑀢𑀺 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀦𑁆𑀢𑀺, ‘‘𑀯𑀸𑀳𑀲𑀢𑀁 𑀔𑁄, 𑀫𑀳𑀸𑀭𑀸𑀚, 𑀯𑀻𑀳𑀻𑀦’’𑀦𑁆𑀢𑀺 𑀧𑀦 𑀧𑀸𑀞𑁂𑀦 𑀪𑀯𑀺𑀢𑀩𑁆𑀩𑀁. 𑀫𑀺𑀮𑀺𑀦𑁆𑀤𑀧𑀜𑁆𑀳𑁂𑀧𑀺 (𑀫𑀺. 𑀧. 𑁪.𑁧.𑁨) 𑀳𑀺 𑀓𑀢𑁆𑀣𑀘𑀺 𑀅𑀬𑀫𑁂𑀯 𑀧𑀸𑀞𑁄 𑀤𑀺𑀲𑁆𑀲𑀢𑀺. ‘‘𑀯𑀸𑀳𑀲𑀢𑀸𑀦’’𑀦𑁆𑀢𑀺 𑀯𑀸 𑀧𑀘𑁆𑀘𑀢𑁆𑀢𑁂 𑀲𑀸𑀫𑀺𑀯𑀘𑀦𑀁 𑀩𑁆𑀬𑀢𑁆𑀢𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀟𑁆𑀠𑀘𑀽𑀴𑀦𑁆𑀢𑀺 𑀣𑁄𑀓𑁂𑀦 𑀊𑀦𑀁 𑀉𑀧𑀟𑁆𑀠𑀁. 𑀓𑀲𑁆𑀲 𑀧𑀦 𑀉𑀧𑀟𑁆𑀠𑀦𑁆𑀢𑀺? 𑀅𑀥𑀺𑀓𑀸𑀭𑀢𑁄 𑀯𑀸𑀳𑀲𑁆𑀲𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀅𑀟𑁆𑀠𑀘𑀼𑀤𑁆𑀤𑀲’’𑀦𑁆𑀢𑀺 𑀓𑁂𑀘𑀺. ‘‘𑀅𑀟𑁆𑀠𑀘𑀢𑀼𑀢𑁆𑀣’’𑀦𑁆𑀢𑀺 𑀅𑀧𑀭𑁂. 𑀲𑀸𑀥𑀺𑀓𑀁 𑀤𑀺𑀬𑀟𑁆𑀠𑀲𑀢𑀁 𑀯𑀸𑀳𑀸𑀢𑀺 𑀤𑀴𑁆𑀳𑀁 𑀓𑀢𑁆𑀯𑀸 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀘𑀢𑀼𑀦𑀸𑀴𑀺𑀓𑁄 𑀢𑀼𑀫𑁆𑀩𑁄. 𑀧𑀼𑀘𑁆𑀙𑀸𑀬 𑀅𑀪𑀸𑀯𑁂𑀦𑀸𑀢𑀺 ‘‘𑀲𑀓𑁆𑀓𑀸 𑀧𑀦, 𑀪𑀦𑁆𑀢𑁂, 𑀉𑀧𑀫𑀁 𑀓𑀸𑀢𑀼’’𑀦𑁆𑀢𑀺 𑀏𑀯𑀁 𑀧𑀯𑀢𑁆𑀢𑀸𑀬 𑀧𑀼𑀘𑁆𑀙𑀸𑀬 𑀅𑀪𑀸𑀯𑁂𑀦 𑀦 𑀓𑀢𑀸 𑀉𑀧𑀫𑀸. 𑀥𑀫𑁆𑀫𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂𑀢𑀺 𑀲𑀦𑁆𑀦𑀺𑀧𑀢𑀺𑀢𑀧𑀭𑀺𑀲𑀸𑀬 𑀬𑀣𑀸𑀭𑀤𑁆𑀥𑀥𑀫𑁆𑀫𑀤𑁂𑀲𑀦𑀸𑀬 𑀧𑀭𑀺𑀬𑁄𑀲𑀸𑀦𑁂.

𑁪𑁯. 𑀦𑀯𑀫𑁂 𑀧𑀪𑀲𑁆𑀲𑀭𑀦𑁆𑀢𑀺 𑀧𑀭𑀺𑀬𑁄𑀤𑀸𑀢𑀁 𑀲𑀪𑀸𑀯𑀧𑀭𑀺𑀲𑀼𑀤𑁆𑀥𑀝𑁆𑀞𑁂𑀦. 𑀢𑁂𑀦𑀸𑀳 𑁋 ‘‘𑀧𑀡𑁆𑀟𑀭𑀁 𑀧𑀭𑀺𑀲𑀼𑀤𑁆𑀥’’𑀦𑁆𑀢𑀺. 𑀧𑀪𑀲𑁆𑀲𑀭𑀢𑀸𑀤𑀬𑁄 𑀦𑀸𑀫 𑀯𑀡𑁆𑀡𑀥𑀸𑀢𑀼𑀬𑀁 𑀮𑀩𑁆𑀪𑀦𑀓𑀯𑀺𑀲𑁂𑀲𑀸𑀢𑀺 𑀆𑀳 𑁋 ‘‘𑀓𑀺𑀁 𑀧𑀦 𑀘𑀺𑀢𑁆𑀢𑀲𑁆𑀲 𑀯𑀡𑁆𑀡𑁄 𑀦𑀸𑀫 𑀅𑀢𑁆𑀣𑀻’’𑀢𑀺? 𑀇𑀢𑀭𑁄 𑀅𑀭𑀽𑀧𑀢𑀸𑀬 ‘‘𑀦𑀢𑁆𑀣𑀻’’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀬𑀸𑀬𑀓𑀣𑀸 𑀅𑀬𑀁 𑀢𑀸𑀤𑀺𑀲𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀭𑀺𑀲𑀼𑀤𑁆𑀥𑀪𑀸𑀯𑀦𑀸𑀤𑀻𑀧𑀦𑀸𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀻𑀮𑀸𑀤𑀻𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀣𑀸 ¶ 𑀳𑀺 ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂 𑀧𑀭𑀺𑀲𑀼𑀤𑁆𑀥𑁂 𑀧𑀭𑀺𑀬𑁄𑀤𑀸𑀢𑁂’’𑀢𑀺 (𑀤𑀻. 𑀦𑀺. 𑁧.𑁨𑁪𑁩-𑁨𑁪𑁪; 𑀫. 𑀦𑀺. 𑁧.𑁩𑁮𑁪-𑁩𑁮𑁬, 𑁪𑁩𑁧-𑁪𑁩𑁩; 𑀧𑀸𑀭𑀸. 𑁧𑁨-𑁧𑁩) 𑀯𑀼𑀢𑁆𑀢𑀁 ¶ . 𑀢𑁂𑀦𑁂𑀯𑀸𑀳 𑁋 ‘‘𑀇𑀤𑀫𑁆𑀧𑀺 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀢𑀸𑀬 𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀧𑀪𑀲𑁆𑀲𑀭’’𑀦𑁆𑀢𑀺. 𑀓𑀺𑀁 𑀧𑀦 𑀪𑀯𑀗𑁆𑀕𑀘𑀺𑀢𑁆𑀢𑀁 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀦𑁆𑀢𑀺? 𑀆𑀫 𑀲𑀪𑀸𑀯𑀢𑁄 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀁, 𑀆𑀕𑀦𑁆𑀢𑀼𑀓𑀉𑀧𑀓𑁆𑀓𑀺𑀮𑁂𑀲𑀯𑀲𑁂𑀦 𑀧𑀦 𑀲𑀺𑀬𑀸 𑀉𑀧𑀓𑁆𑀓𑀺𑀮𑀺𑀝𑁆𑀞𑀁. 𑀢𑁂𑀦𑀸𑀳 𑁋 ‘‘𑀢𑀜𑁆𑀘 𑀔𑁄’’𑀢𑀺𑀆𑀤𑀺. 𑀢𑀢𑁆𑀣 𑀅𑀢𑁆𑀢𑀦𑁄 𑀢𑁂𑀲𑀜𑁆𑀘 𑀪𑀺𑀓𑁆𑀔𑀽𑀦𑀁 𑀧𑀘𑁆𑀘𑀓𑁆𑀔𑀪𑀸𑀯𑀢𑁄 𑀧𑀼𑀩𑁆𑀩𑁂 ‘‘𑀇𑀤’’𑀦𑁆𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀧𑀘𑁆𑀘𑀸𑀫𑀲𑀦𑀯𑀲𑁂𑀦 ‘‘𑀢’’𑀦𑁆𑀢𑀺 𑀆𑀳. 𑀘-𑀲𑀤𑁆𑀤𑁄 𑀅𑀢𑁆𑀣𑀽𑀧𑀦𑀬𑀦𑁂. 𑀔𑁄-𑀲𑀤𑁆𑀤𑁄 𑀯𑀘𑀦𑀸𑀮𑀗𑁆𑀓𑀸𑀭𑁂, 𑀅𑀯𑀥𑀸𑀭𑀡𑁂 𑀯𑀸. 𑀯𑀓𑁆𑀔𑀫𑀸𑀦𑀲𑁆𑀲 𑀅𑀢𑁆𑀣𑀲𑁆𑀲 𑀦𑀺𑀘𑁆𑀙𑀺𑀢𑀪𑀸𑀯𑀢𑁄 𑀪𑀯𑀗𑁆𑀕𑀘𑀺𑀢𑁆𑀢𑁂𑀦 𑀲𑀳𑀸𑀯𑀝𑁆𑀞𑀸𑀦𑀸𑀪𑀸𑀯𑀢𑁄 𑀉𑀧𑀓𑁆𑀓𑀺𑀮𑁂𑀲𑀸𑀦𑀁 𑀆𑀕𑀦𑁆𑀢𑀼𑀓𑀢𑀸𑀢𑀺 𑀆𑀳 𑁋 ‘‘𑀅𑀲𑀳𑀚𑀸𑀢𑁂𑀳𑀻’’𑀢𑀺𑀆𑀤𑀺. 𑀭𑀸𑀕𑀸𑀤𑀬𑁄 𑀉𑀧𑁂𑀘𑁆𑀘 𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀓𑀺𑀮𑀺𑀲𑁆𑀲𑀦𑁆𑀢𑀺 𑀯𑀺𑀩𑀸𑀥𑁂𑀦𑁆𑀢𑀺 𑀉𑀧𑀢𑀸𑀧𑁂𑀦𑁆𑀢𑀺 𑀘𑀸𑀢𑀺 𑀆𑀳 𑁋 ‘‘𑀉𑀧𑀓𑁆𑀓𑀺𑀮𑁂𑀲𑁂𑀳𑀻𑀢𑀺 𑀭𑀸𑀕𑀸𑀤𑀻𑀳𑀻’’𑀢𑀺. 𑀪𑀯𑀗𑁆𑀕𑀘𑀺𑀢𑁆𑀢𑀲𑁆𑀲 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞𑀢𑀸 𑀦𑀸𑀫 𑀦𑀢𑁆𑀣𑀺 𑀅𑀲𑀁𑀲𑀝𑁆𑀞𑀪𑀸𑀯𑀢𑁄, 𑀏𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑀸𑀬 𑀧𑀦 𑀲𑀺𑀬𑀸 𑀉𑀧𑀓𑁆𑀓𑀺𑀮𑀺𑀝𑁆𑀞𑀢𑀸𑀧𑀭𑀺𑀬𑀸𑀬𑁄𑀢𑀺 𑀆𑀳 𑁋 ‘‘𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀦𑀸𑀫𑀸𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀉𑀧𑀫𑀸𑀬 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀪𑀺𑀦𑁆𑀦𑀲𑀦𑁆𑀢𑀸𑀦𑀕𑀢𑀸𑀬𑀧𑀺 𑀦𑀸𑀫 𑀇𑀭𑀺𑀬𑀸𑀬 𑀮𑁄𑀓𑁂 𑀕𑀸𑀭𑀬𑁆𑀳𑀢𑀸 𑀤𑀺𑀲𑁆𑀲𑀢𑀺, 𑀧𑀕𑁂𑀯 𑀏𑀓𑀲𑀦𑁆𑀢𑀸𑀦𑀕𑀢𑀸𑀬 𑀇𑀭𑀺𑀬𑀸𑀬𑀸𑀢𑀺 𑀇𑀫𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺. 𑀢𑁂𑀦𑀸𑀳 𑁋 ‘‘𑀚𑀯𑀦𑀓𑁆𑀔𑀡𑁂…𑀧𑁂… 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀦𑀸𑀫 𑀳𑁄𑀢𑀻’’𑀢𑀺.

𑁫𑁦. 𑀤𑀲𑀫𑁂 𑀪𑀯𑀗𑁆𑀕𑀘𑀺𑀢𑁆𑀢𑀫𑁂𑀯 𑀘𑀺𑀢𑁆𑀢𑀦𑁆𑀢𑀺 ‘‘𑀧𑀪𑀲𑁆𑀲𑀭𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁 𑀪𑀯𑀗𑁆𑀕𑀘𑀺𑀢𑁆𑀢𑀫𑁂𑀯. 𑀬𑀤𑀕𑁆𑀕𑁂𑀦 𑀪𑀯𑀗𑁆𑀕𑀘𑀺𑀢𑁆𑀢𑀁 𑀢𑀸𑀤𑀺𑀲𑀧𑀘𑁆𑀘𑀬𑀲𑀫𑀯𑀸𑀬𑁂 𑀉𑀧𑀓𑁆𑀓𑀺𑀮𑀺𑀝𑁆𑀞𑀁 𑀦𑀸𑀫 𑀯𑀼𑀘𑁆𑀘𑀢𑀺, 𑀢𑀤𑀕𑁆𑀕𑁂𑀦 𑀢𑀩𑁆𑀩𑀺𑀥𑀼𑀭𑀧𑀘𑁆𑀘𑀬𑀲𑀫𑀯𑀸𑀬𑁂 𑀉𑀧𑀓𑁆𑀓𑀺𑀮𑁂𑀲𑀢𑁄 𑀯𑀺𑀫𑀼𑀢𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 𑁋 ‘‘𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑀁 𑀦𑀸𑀫 𑀳𑁄𑀢𑀻’’𑀢𑀺. 𑀲𑁂𑀲𑀫𑁂𑀢𑁆𑀣 𑀦𑀯𑀫𑀲𑀼𑀢𑁆𑀢𑁂 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀧𑀡𑀺𑀳𑀺𑀢𑀅𑀘𑁆𑀙𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀯𑀕𑁆𑀕𑀯𑀡𑁆𑀡𑀦𑀸

𑁫𑁧. 𑀙𑀝𑁆𑀞𑀲𑁆𑀲 ¶ 𑀧𑀞𑀫𑁂 𑀅𑀲𑁆𑀲𑀼𑀢𑀯𑀸𑀢𑀺 𑀏𑀢𑁆𑀣 ‘‘𑀲𑀸𑀥𑀼 𑀧𑀜𑁆𑀜𑀸𑀡𑀯𑀸 𑀦𑀭𑁄’’𑀢𑀺𑀆𑀤𑀻𑀲𑀼 (𑀚𑀸. 𑁨.𑁧𑁮.𑁧𑁦𑁧) 𑀅𑀢𑁆𑀣𑀺𑀢𑀸𑀫𑀢𑁆𑀢𑀲𑁆𑀲 𑀩𑁄𑀥𑀓𑁄 𑀯𑀸-𑀲𑀤𑁆𑀤𑁄. ‘‘𑀲𑀻𑀮𑀯𑀸 𑀳𑁄𑀢𑀺 𑀓𑀮𑁆𑀬𑀸𑀡𑀥𑀫𑁆𑀫𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁩.𑁩𑁮𑁧) 𑀧𑀲𑀁𑀲𑀸𑀯𑀺𑀲𑀺𑀝𑁆𑀞𑀸𑀬 𑀅𑀢𑁆𑀣𑀺𑀢𑀸𑀬. ‘‘𑀧𑀜𑁆𑀜𑀯𑀸 𑀳𑁄𑀢𑀺 ¶ 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁧𑁭; 𑀫. 𑀦𑀺. 𑁨.𑁨𑁫) 𑀅𑀢𑀺𑀲𑀬𑀢𑁆𑀣𑀯𑀺𑀲𑀺𑀝𑁆𑀞𑀸𑀬 𑀅𑀢𑁆𑀣𑀺𑀢𑀸𑀬, 𑀢𑀲𑁆𑀫𑀸 𑀬𑀲𑁆𑀲 𑀧𑀲𑀢𑁆𑀣𑀁 𑀅𑀢𑀺𑀲𑀬𑁂𑀦 𑀯𑀸 𑀲𑀼𑀢𑀁 𑀅𑀢𑁆𑀣𑀺, 𑀲𑁄 𑀲𑀼𑀢𑀯𑀸, 𑀲𑀁𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀲𑀫𑀢𑁆𑀣𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀲𑁆𑀲𑀯𑀦𑀁, 𑀢𑀁 𑀲𑀼𑀢𑁆𑀯𑀸 𑀢𑀣𑀢𑁆𑀢𑀸𑀬 𑀧𑀝𑀺𑀧𑀢𑁆𑀢𑀺 𑀘 ‘‘𑀲𑀼𑀢𑀯𑀸’’𑀢𑀺 𑀇𑀫𑀺𑀦𑀸 𑀧𑀤𑁂𑀦 𑀧𑀓𑀸𑀲𑀺𑀢𑀸. 𑀲𑁄𑀢𑀩𑁆𑀩𑀬𑀼𑀢𑁆𑀢𑀁 𑀲𑀼𑀢𑁆𑀯𑀸 𑀓𑀢𑁆𑀢𑀩𑁆𑀩𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦 𑀲𑀼𑀡𑀻𑀢𑀺 𑀯𑀸 𑀲𑀼𑀢𑀯𑀸, 𑀢𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀦 𑀲𑀼𑀢𑀯𑀸𑀢𑀺 𑀅𑀲𑁆𑀲𑀼𑀢𑀯𑀸.

𑀅𑀬𑀜𑁆𑀳𑀺 𑀅𑀓𑀸𑀭𑁄 ‘‘𑀅𑀳𑁂𑀢𑀼𑀓𑀸 𑀥𑀫𑁆𑀫𑀸 (𑀥. 𑀲. 𑁨 𑀤𑀼𑀓𑀫𑀸𑀢𑀺𑀓𑀸), 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄’’𑀢𑀺𑀆𑀤𑀻𑀲𑀼 (𑀧𑀸𑀘𑀺. 𑁧𑁦𑁪𑁭) 𑀢𑀁𑀲𑀫𑀸𑀬𑁄𑀕𑀦𑀺𑀯𑀢𑁆𑀢𑀺𑀬𑀁 𑀤𑀺𑀝𑁆𑀞𑁄. ‘‘𑀅𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑁭 𑀤𑀼𑀓𑀫𑀸𑀢𑀺𑀓𑀸) 𑀢𑀁𑀲𑀫𑁆𑀩𑀦𑁆𑀥𑀺𑀪𑀸𑀯𑀦𑀺𑀯𑀢𑁆𑀢𑀺𑀬𑀁. 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀜𑁆𑀳𑀺 𑀧𑀘𑁆𑀘𑀬𑀲𑀫𑁆𑀩𑀦𑁆𑀥𑀻𑀢𑀺 𑀅𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁆𑀢𑀸 𑀅𑀢𑀁𑀲𑀫𑁆𑀩𑀦𑁆𑀥𑀺𑀢𑀸 𑀏𑀢𑁆𑀣 𑀚𑁄𑀢𑀺𑀢𑀸. ‘‘𑀅𑀦𑀺𑀤𑀲𑁆𑀲𑀦𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑁯 𑀤𑀼𑀓𑀫𑀸𑀢𑀺𑀓𑀸) 𑀢𑀁𑀲𑀪𑀸𑀯𑀦𑀺𑀯𑀢𑁆𑀢𑀺𑀬𑀁. 𑀦𑀺𑀤𑀲𑁆𑀲𑀦𑀜𑁆𑀳𑀺 𑀏𑀢𑁆𑀣 𑀤𑀝𑁆𑀞𑀩𑁆𑀩𑀢𑀸. 𑀅𑀣 𑀯𑀸 𑀧𑀲𑁆𑀲𑀢𑀻𑀢𑀺 𑀦𑀺𑀤𑀲𑁆𑀲𑀦𑀁, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁. 𑀢𑀕𑁆𑀕𑀳𑁂𑀢𑀩𑁆𑀩𑀢𑀸𑀦𑀺𑀯𑀢𑁆𑀢𑀺𑀬𑀁, 𑀢𑀣𑀸 ‘‘𑀅𑀦𑀸𑀲𑀯𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑁧𑁫 𑀤𑀼𑀓𑀫𑀸𑀢𑀺𑀓𑀸). ‘‘𑀅𑀧𑁆𑀧𑀝𑀺𑀖𑀸 𑀥𑀫𑁆𑀫𑀸 (𑀥. 𑀲. 𑁧𑁦 𑀤𑀼𑀓𑀫𑀸𑀢𑀺𑀓𑀸) 𑀅𑀦𑀸𑀭𑀫𑁆𑀫𑀡𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑁫𑁫 𑀤𑀼𑀓𑀫𑀸𑀢𑀺𑀓𑀸) 𑀢𑀁𑀓𑀺𑀘𑁆𑀘𑀦𑀺𑀯𑀢𑁆𑀢𑀺𑀬𑀁. ‘‘𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀘𑁂𑀢𑀲𑀺𑀓𑀸𑀥𑀫𑁆𑀫𑀸’’𑀢𑀺 𑀢𑀁𑀲𑀪𑀸𑀯𑀦𑀺𑀯𑀢𑁆𑀢𑀺𑀬𑀁. 𑀢𑀤𑀜𑁆𑀜𑀢𑀸 𑀳𑀺 𑀇𑀥 𑀧𑀓𑀸𑀲𑀺𑀢𑀸. ‘‘𑀅𑀫𑀦𑀼𑀲𑁆𑀲𑁄’’𑀢𑀺 𑀢𑀩𑁆𑀪𑀸𑀯𑀫𑀢𑁆𑀢𑀦𑀺𑀯𑀢𑁆𑀢𑀺𑀬𑀁. 𑀫𑀦𑀼𑀲𑁆𑀲𑀢𑁆𑀢𑀫𑀢𑁆𑀢𑀁 𑀦𑀢𑁆𑀣𑀺, 𑀅𑀜𑁆𑀜𑀁 𑀢𑀁𑀲𑀤𑀺𑀲𑀦𑁆𑀢𑀺. 𑀲𑀤𑀺𑀲𑀢𑀸 𑀳𑀺 𑀏𑀢𑁆𑀣 𑀲𑀽𑀘𑀺𑀢𑀸. ‘‘𑀅𑀲𑁆𑀲𑀫𑀡𑁄 𑀲𑀫𑀡𑀧𑀝𑀺𑀜𑁆𑀜𑁄 𑀅𑀩𑁆𑀭𑀳𑁆𑀫𑀘𑀸𑀭𑀻 𑀩𑁆𑀭𑀳𑁆𑀫𑀘𑀸𑀭𑀺𑀧𑀝𑀺𑀜𑁆𑀜𑁄’’𑀢𑀺 (𑀅. 𑀦𑀺. 𑁩.𑁧𑁩) 𑀘 𑀢𑀁𑀲𑀫𑁆𑀪𑀸𑀯𑀦𑀻𑀬𑀕𑀼𑀡𑀦𑀺𑀯𑀢𑁆𑀢𑀺𑀬𑀁. 𑀕𑀭𑀳𑀸 𑀳𑀺 𑀇𑀥 𑀜𑀸𑀬𑀢𑀺. ‘‘𑀓𑀘𑁆𑀘𑀺 𑀪𑁄𑀢𑁄 𑀅𑀦𑀸𑀫𑀬𑀁 (𑀚𑀸. 𑁧.𑁧𑁫.𑁧𑁪𑁬; 𑁨.𑁨𑁦.𑁧𑁨𑁯) 𑀅𑀦𑀼𑀤𑀭𑀸 𑀓𑀜𑁆𑀜𑀸’’𑀢𑀺 𑀘 𑀢𑀤𑀦𑀧𑁆𑀧𑀪𑀸𑀯𑀦𑀺𑀯𑀢𑁆𑀢𑀺𑀬𑀁. ‘‘𑀅𑀦𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑁧𑁭 𑀢𑀺𑀓𑀫𑀸𑀢𑀺𑀓𑀸) 𑀢𑀁𑀲𑀤𑀺𑀲𑀪𑀸𑀯𑀦𑀺𑀯𑀢𑁆𑀢𑀺𑀬𑀁. 𑀅𑀢𑀻𑀢𑀸𑀦𑀜𑁆𑀳𑀺 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀢𑁆𑀢𑀸 𑀉𑀧𑁆𑀧𑀸𑀤𑀺𑀥𑀫𑁆𑀫𑀸𑀦𑀜𑁆𑀘 𑀧𑀘𑁆𑀘𑀬𑁂𑀓𑀤𑁂𑀲𑀲𑀺𑀤𑁆𑀥𑀺𑀬𑀸 𑀆𑀭𑀤𑁆𑀥𑀼𑀧𑁆𑀧𑀸𑀤𑀪𑀸𑀯𑀢𑁄 𑀓𑀸𑀮𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀘 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀉𑀧𑁆𑀧𑀦𑁆𑀦𑀸𑀦𑀼𑀓𑀽𑀮𑀢𑀸, 𑀧𑀕𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀢𑀩𑁆𑀩𑀺𑀥𑀼𑀭𑀢𑀸 𑀳𑁂𑀢𑁆𑀣 𑀯𑀺𑀜𑁆𑀜𑀸𑀬𑀢𑀺. ‘‘𑀅𑀲𑁂𑀓𑁆𑀔𑀸 𑀥𑀫𑁆𑀫𑀸’’𑀢𑀺 (𑀥. 𑀲. 𑁧𑁧 𑀢𑀺𑀓𑀫𑀸𑀢𑀺𑀓𑀸) 𑀢𑀤𑀧𑀭𑀺𑀬𑁄𑀲𑀸𑀦𑀦𑀺𑀯𑀢𑁆𑀢𑀺𑀬𑀁. 𑀢𑀦𑁆𑀦𑀺𑀝𑁆𑀞𑀸𑀦𑀜𑁆𑀳𑁂𑀢𑁆𑀣 𑀧𑀓𑀸𑀲𑀺𑀢𑀦𑁆𑀢𑀺 𑀏𑀯𑀁 𑀅𑀦𑁂𑀓𑁂𑀲𑀁 ¶ 𑀅𑀢𑁆𑀣𑀸𑀦𑀁 𑀚𑁄𑀢𑀓𑁄. 𑀇𑀥 𑀧𑀦 ‘‘𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 (𑀥. 𑀲. 𑁧𑁧 𑀤𑀼𑀓𑀫𑀸𑀢𑀺𑀓𑀸), 𑀅𑀘𑁂𑀢𑀲𑀺𑀓𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁫𑁭 𑀤𑀼𑀓𑀫𑀸𑀢𑀺𑀓𑀸) 𑀯𑀺𑀬 𑀢𑀁𑀲𑀪𑀸𑀯𑀦𑀺𑀯𑀢𑁆𑀢𑀺𑀬𑀁 𑀤𑀝𑁆𑀞𑀩𑁆𑀩𑁄, 𑀅𑀜𑁆𑀜𑀢𑁆𑀣𑁂𑀢𑀺 𑀅𑀢𑁆𑀣𑁄. 𑀏𑀢𑁂𑀦𑀲𑁆𑀲 𑀲𑀼𑀢𑀸𑀤𑀺𑀜𑀸𑀡𑀯𑀺𑀭𑀳𑀁 𑀤𑀲𑁆𑀲𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀆𑀕𑀫𑀸𑀥𑀺𑀕𑀫𑀸𑀪𑀸𑀯𑀸 𑀜𑁂𑀬𑁆𑀬𑁄 𑀅𑀲𑁆𑀲𑀼𑀢𑀯𑀸 𑀇𑀢𑀻’’𑀢𑀺.

𑀇𑀤𑀸𑀦𑀺 ¶ 𑀢𑀲𑁆𑀲𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀬𑁄 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀲𑁆𑀫𑀸 𑀔𑀦𑁆𑀥𑀥𑀸𑀢𑀸𑀤𑀺𑀓𑁄𑀲𑀮𑁆𑀮𑁂𑀦𑀧𑀺 𑀉𑀧𑀓𑁆𑀓𑀺𑀮𑁂𑀲𑀉𑀧𑀓𑁆𑀓𑀺𑀮𑀺𑀝𑁆𑀞𑀸𑀦𑀁 𑀚𑀸𑀦𑀦𑀳𑁂𑀢𑀼𑀪𑀽𑀢𑀁 𑀩𑀸𑀳𑀼𑀲𑀘𑁆𑀘𑀁 𑀳𑁄𑀢𑀺. 𑀬𑀣𑀸𑀳 𑁋 ‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺? 𑀬𑀢𑁄 𑀔𑁄, 𑀪𑀺𑀓𑁆𑀔𑀼, 𑀔𑀦𑁆𑀥𑀓𑀼𑀲𑀮𑁄 𑀳𑁄𑀢𑀺. 𑀥𑀸𑀢𑀼…𑀧𑁂… 𑀆𑀬𑀢𑀦…𑀧𑁂… 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑁄 𑀳𑁄𑀢𑀺. 𑀏𑀢𑁆𑀢𑀸𑀯𑀢𑀸 𑀔𑁄, 𑀪𑀺𑀓𑁆𑀔𑀼, 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀻’’𑀢𑀺. 𑀢𑀲𑁆𑀫𑀸 ‘‘𑀬𑀲𑁆𑀲 𑀘 𑀔𑀦𑁆𑀥𑀥𑀸𑀢𑀼𑀆𑀬𑀢𑀦𑀧𑀘𑁆𑀘𑀬𑀸𑀓𑀸𑀭𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀯𑀸𑀘𑀼𑀕𑁆𑀕𑀢𑀓𑀭𑀡𑀁 𑀉𑀕𑁆𑀕𑀳𑁄. 𑀅𑀢𑁆𑀣𑀧𑀭𑀺𑀧𑀼𑀘𑁆𑀙𑀦𑀁 𑀧𑀼𑀭𑀺𑀧𑀼𑀘𑁆𑀙𑀸. 𑀓𑀼𑀲𑀮𑁂𑀳𑀺 𑀲𑀳 𑀘𑁄𑀤𑀦𑀸𑀧𑀭𑀺𑀳𑀭𑀡𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑀓𑀭𑀡𑀁 𑀯𑀺𑀦𑀺𑀘𑁆𑀙𑀬𑁄. 𑀆𑀘𑀭𑀺𑀬𑁂 𑀧𑀦 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀅𑀢𑁆𑀣𑀥𑀫𑁆𑀫𑀸𑀦𑀁 𑀆𑀕𑀫𑀦𑀁 𑀲𑀼𑀢𑀫𑀬𑀜𑀸𑀡𑀯𑀲𑁂𑀦 𑀅𑀯𑀩𑀼𑀚𑁆𑀛𑀦𑀁 𑀆𑀕𑀫𑁄. 𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀸𑀦𑀁 𑀲𑀘𑁆𑀙𑀺𑀓𑀺𑀭𑀺𑀬𑀸 𑀅𑀥𑀺𑀕𑀫𑁄.

𑀩𑀳𑀽𑀦𑀁 𑀦𑀸𑀦𑀧𑁆𑀧𑀓𑀸𑀭𑀸𑀦𑀁 𑀲𑀓𑁆𑀓𑀸𑀬𑀤𑀺𑀝𑁆𑀞𑀸𑀤𑀻𑀦𑀁 𑀅𑀯𑀺𑀳𑀢𑀢𑁆𑀢𑀸 𑀢𑀸 𑀚𑀦𑁂𑀦𑁆𑀢𑀺, 𑀢𑀸𑀳𑀺 𑀯𑀸 𑀚𑀦𑀺𑀢𑀸𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀅𑀯𑀺𑀖𑀸𑀢𑀫𑁂𑀯 𑀯𑀸 𑀚𑀦-𑀲𑀤𑁆𑀤𑁄 𑀯𑀤𑀢𑀺. 𑀧𑀼𑀣𑀼 𑀲𑀢𑁆𑀣𑀸𑀭𑀸𑀦𑀁 𑀫𑀼𑀔𑀼𑀮𑁆𑀮𑁄𑀓𑀺𑀓𑀸𑀢𑀺 𑀏𑀢𑁆𑀣 𑀧𑀼𑀣𑀽 𑀚𑀦𑀸 𑀲𑀢𑁆𑀣𑀼𑀧𑀝𑀺𑀜𑁆𑀜𑀸 𑀏𑀢𑁂𑀲𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀲𑀩𑁆𑀩𑀕𑀢𑀻𑀳𑀺 𑀅𑀯𑀼𑀝𑁆𑀞𑀺𑀢𑀸𑀢𑀺 𑀏𑀢𑁆𑀣 𑀚𑀦𑁂𑀢𑀩𑁆𑀩𑀸, 𑀚𑀸𑀬𑀦𑁆𑀢𑀺 𑀯𑀸 𑀏𑀢𑁆𑀣 𑀲𑀢𑁆𑀢𑀸𑀢𑀺 𑀚𑀦𑀸, 𑀕𑀢𑀺𑀬𑁄, 𑀢𑀸 𑀧𑀼𑀣𑀽 𑀏𑀢𑁂𑀲𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀇𑀢𑁄 𑀧𑀭𑁂 𑀚𑀸𑀬𑀦𑁆𑀢𑀺 𑀏𑀢𑁂𑀳𑀻𑀢𑀺 𑀚𑀦𑀸, 𑀅𑀪𑀺𑀲𑀗𑁆𑀔𑀸𑀭𑀸𑀤𑀬𑁄, 𑀢𑁂 𑀏𑀢𑁂𑀲𑀁 𑀧𑀼𑀣𑀽 𑀯𑀺𑀚𑁆𑀚𑀦𑁆𑀢𑀻𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀅𑀪𑀺𑀲𑀗𑁆𑀔𑀸𑀭𑀸𑀤𑀺𑀅𑀢𑁆𑀣𑁄 𑀏𑀯 𑀯𑀸 𑀚𑀦-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀑𑀖𑀸 𑀓𑀸𑀫𑁄𑀖𑀸𑀤𑀬𑁄. 𑀭𑀸𑀕𑀕𑁆𑀕𑀺𑀆𑀤𑀬𑁄 𑀲𑀦𑁆𑀢𑀸𑀧𑀸. 𑀢𑁂 𑀏𑀯 𑀲𑀩𑁆𑀩𑁂𑀧𑀺 𑀯𑀸 𑀓𑀺𑀮𑁂𑀲𑀸 𑀧𑀭𑀺𑀴𑀸𑀳𑀸. 𑀧𑀼𑀣𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀭𑀢𑁆𑀢𑀸𑀢𑀺 𑀏𑀢𑁆𑀣 𑀚𑀸𑀬𑀢𑀻𑀢𑀺 𑀚𑀦𑁄, 𑀭𑀸𑀕𑁄 𑀕𑁂𑀥𑁄𑀢𑀺 𑀏𑀯𑀫𑀸𑀤𑀺𑀓𑁄, 𑀧𑀼𑀣𑀼 𑀚𑀦𑁄 𑀏𑀢𑁂𑀲𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸. 𑀧𑀼𑀣𑀽𑀲𑀼 𑀚𑀦𑀸 𑀚𑀸𑀢𑀸 𑀭𑀢𑁆𑀢𑀸𑀢𑀺 𑀏𑀯𑀁 𑀭𑀸𑀕𑀸𑀤𑀺𑀅𑀢𑁆𑀣𑁄 𑀏𑀯 𑀯𑀸 𑀚𑀦-𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄.

𑀭𑀢𑁆𑀢𑀸𑀢𑀺 𑀯𑀢𑁆𑀣𑀁 𑀯𑀺𑀬 𑀭𑀗𑁆𑀕𑀚𑀸𑀢𑁂𑀦 𑀘𑀺𑀢𑁆𑀢𑀲𑁆𑀲 𑀯𑀺𑀧𑀭𑀺𑀡𑀸𑀫𑀓𑀭𑁂𑀦 𑀙𑀦𑁆𑀤𑀭𑀸𑀕𑁂𑀦 𑀭𑀢𑁆𑀢𑀸 𑀲𑀸𑀭𑀢𑁆𑀢𑀸. 𑀕𑀺𑀤𑁆𑀥𑀸𑀢𑀺 𑀅𑀪𑀺𑀓𑀗𑁆𑀔𑀦𑀲𑀪𑀸𑀯𑁂𑀦 𑀅𑀪𑀺𑀕𑀺𑀚𑁆𑀛𑀦𑁂𑀦 𑀕𑀺𑀤𑁆𑀥𑀸 𑀕𑁂𑀥𑀁 𑀆𑀧𑀦𑁆𑀦𑀸. 𑀕𑀥𑀺𑀢𑀸𑀢𑀺 𑀕𑀦𑁆𑀣𑀺𑀢𑀸 𑀯𑀺𑀬 𑀤𑀼𑀫𑁆𑀫𑁄𑀘𑀦𑀻𑀬𑀪𑀸𑀯𑁂𑀦 𑀢𑀢𑁆𑀣 𑀧𑀝𑀺𑀩𑀤𑁆𑀥𑀸. 𑀫𑀼𑀘𑁆𑀙𑀺𑀢𑀸𑀢𑀺 𑀓𑀺𑀮𑁂𑀲𑀯𑀲𑁂𑀦 𑀯𑀺𑀲𑀜𑁆𑀜𑀺𑀪𑀽𑀢𑀸 𑀯𑀺𑀬 𑀅𑀦𑀜𑁆𑀜𑀓𑀺𑀘𑁆𑀘𑀸 𑀫𑁄𑀳𑀫𑀸𑀧𑀦𑁆𑀦𑀸. 𑀅𑀚𑁆𑀛𑁄𑀧𑀦𑁆𑀦𑀸𑀢𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑁂 𑀯𑀺𑀬 𑀓𑀢𑁆𑀯𑀸 𑀕𑀺𑀮𑀺𑀢𑁆𑀯𑀸 𑀧𑀭𑀺𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀞𑀺𑀢𑀸. 𑀮𑀕𑁆𑀕𑀸𑀢𑀺 𑀯𑀗𑁆𑀓𑀓𑀡𑁆𑀝𑀓𑁂 𑀯𑀺𑀬 𑀆𑀲𑀢𑁆𑀢𑀸, 𑀫𑀳𑀸𑀧𑀮𑀺𑀧𑁂 𑀬𑀸𑀯 𑀦𑀸𑀲𑀺𑀓𑀕𑁆𑀕𑀸 𑀧𑀮𑀺𑀧𑀦𑁆𑀦𑀧𑀼𑀭𑀺𑀲𑁄 𑀯𑀺𑀬 𑀉𑀤𑁆𑀥𑀭𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑁂𑀦 𑀦𑀺𑀫𑀼𑀕𑁆𑀕𑀸 ¶ . 𑀮𑀕𑁆𑀕𑀺𑀢𑀸𑀢𑀺 𑀫𑀓𑁆𑀓𑀝𑀸𑀮𑁂𑀧𑁂 𑀆𑀮𑀕𑁆𑀕𑀪𑀸𑀯𑁂𑀦 ¶ 𑀲𑀫𑁆𑀫𑀲𑀺𑀢𑁄 𑀯𑀺𑀬 𑀫𑀓𑁆𑀓𑀝𑁄 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀆𑀮𑀕𑁆𑀕𑀺𑀢𑀸. 𑀧𑀮𑀺𑀩𑀼𑀤𑁆𑀥𑀸𑀢𑀺 𑀲𑀫𑁆𑀩𑀤𑁆𑀥𑀸, 𑀉𑀧𑀤𑁆𑀤𑀼𑀢𑀸 𑀯𑀸. 𑀆𑀯𑀼𑀢𑀸𑀢𑀺 𑀆𑀯𑀭𑀺𑀢𑀸. 𑀦𑀺𑀯𑀼𑀢𑀸𑀢𑀺 𑀦𑀺𑀯𑀸𑀭𑀺𑀢𑀸. 𑀑𑀯𑀼𑀢𑀸𑀢𑀺 𑀧𑀮𑀺𑀕𑀼𑀡𑁆𑀞𑀺𑀢𑀸, 𑀧𑀭𑀺𑀬𑁄𑀦𑀤𑁆𑀥𑀸 𑀯𑀸. 𑀧𑀺𑀳𑀺𑀢𑀸𑀢𑀺 𑀧𑀺𑀤𑀳𑀺𑀢𑀸. 𑀧𑀝𑀺𑀘𑁆𑀙𑀦𑁆𑀦𑀸𑀢𑀺 𑀙𑀸𑀤𑀺𑀢𑀸. 𑀧𑀝𑀺𑀓𑀼𑀚𑁆𑀚𑀺𑀢𑀸𑀢𑀺 𑀳𑁂𑀝𑁆𑀞𑀸𑀫𑀼𑀔𑀚𑀸𑀢𑀸.

‘‘𑀅𑀲𑁆𑀲𑀼𑀢𑀯𑀸’’𑀢𑀺 𑀏𑀢𑁂𑀦 𑀅𑀯𑀺𑀚𑁆𑀚𑀦𑁆𑀥𑀢𑀸 𑀯𑀼𑀢𑁆𑀢𑀸𑀢𑀺 𑀆𑀳 𑁋 ‘‘𑀅𑀦𑁆𑀥𑀧𑀼𑀣𑀼𑀚𑁆𑀚𑀦𑁄 𑀯𑀼𑀢𑁆𑀢𑁄’’𑀢𑀺. 𑀘𑀺𑀢𑁆𑀢𑀝𑁆𑀞𑀺𑀢𑀺 𑀘𑀺𑀢𑁆𑀢𑀧𑀭𑀺𑀕𑁆𑀕𑀳𑁄 𑀦𑀢𑁆𑀣𑀻𑀢𑀺 𑀬𑀸𑀬 𑀧𑀝𑀺𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑀁 𑀢𑀢𑁄 𑀯𑀺𑀧𑁆𑀧𑀫𑀼𑀢𑁆𑀢𑀺𑀜𑁆𑀘 𑀬𑀣𑀸𑀲𑀪𑀸𑀯𑀢𑁄 𑀚𑀸𑀦𑁂𑀬𑁆𑀬, 𑀲𑀸 𑀘𑀺𑀢𑁆𑀢𑀪𑀸𑀯𑀦𑀸 𑀘𑀺𑀢𑁆𑀢𑀝𑁆𑀞𑀺𑀢𑀺. 𑀏𑀓𑀸𑀭𑀫𑁆𑀫𑀡𑁂 𑀲𑀼𑀝𑁆𑀞𑀼 𑀲𑀫𑀸𑀥𑀸𑀦𑀯𑀲𑁂𑀦 𑀅𑀯𑀝𑁆𑀞𑀺𑀢𑀺𑀁 𑀧𑀸𑀤𑀓𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀢𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀳𑀺 𑀦𑀺𑀲𑁆𑀲𑀬𑀸𑀭𑀫𑁆𑀫𑀡𑁂𑀳𑀺 𑀘 𑀲𑀤𑁆𑀥𑀺𑀁 𑀘𑀺𑀢𑁆𑀢𑀲𑁆𑀲 𑀧𑀭𑀺𑀕𑁆𑀕𑀳𑀲𑀜𑁆𑀜𑀺𑀢𑀸 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀧𑀺 𑀦𑀢𑁆𑀣𑀺, 𑀬𑀸𑀬 𑀯𑀼𑀢𑁆𑀢𑀫𑀢𑁆𑀣𑀁 𑀬𑀣𑀸𑀲𑀪𑀸𑀯𑀢𑁄 𑀚𑀸𑀦𑁂𑀬𑁆𑀬.

𑁫𑁨. 𑀤𑀼𑀢𑀺𑀬𑁂 𑀲𑀼𑀢𑀯𑀸𑀢𑀺 𑀧𑀤𑀲𑁆𑀲 𑀅𑀢𑁆𑀣𑁄 𑀅𑀦𑀦𑁆𑀢𑀭𑀲𑀼𑀢𑁆𑀢𑁂 𑀯𑀼𑀢𑁆𑀢𑁄𑀬𑁂𑀯. 𑀅𑀭𑀺𑀬𑀲𑀸𑀯𑀓𑁄𑀢𑀺 𑀏𑀢𑁆𑀣 𑀘𑀢𑀼𑀓𑁆𑀓𑀁 𑀲𑀫𑁆𑀪𑀯𑀢𑀻𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀅𑀢𑁆𑀣𑀺 𑀅𑀭𑀺𑀬𑁄’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀧𑀘𑁆𑀘𑁂𑀓𑀁 𑀲𑀘𑁆𑀘𑀸𑀦𑀺 𑀩𑀼𑀤𑁆𑀥𑀯𑀦𑁆𑀢𑁄𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸. 𑀦𑀦𑀼 𑀲𑀩𑁆𑀩𑁂𑀧𑀺 𑀅𑀭𑀺𑀬𑀸 𑀧𑀘𑁆𑀘𑁂𑀓𑀫𑁂𑀯 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀺 𑀥𑀫𑁆𑀫𑀲𑁆𑀲 𑀧𑀘𑁆𑀘𑀢𑁆𑀢𑀯𑁂𑀤𑀦𑀻𑀬𑀪𑀸𑀯𑀢𑁄? 𑀦𑀬𑀺𑀤𑀫𑀻𑀤𑀺𑀲𑀁 𑀧𑀝𑀺𑀯𑁂𑀥𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀣𑀸 𑀧𑀦 𑀲𑀸𑀯𑀓𑀸 𑀅𑀜𑁆𑀜𑁂𑀲𑀁 𑀦𑀺𑀲𑁆𑀲𑀬𑁂𑀦 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀺 𑀧𑀭𑀢𑁄𑀖𑁄𑀲𑁂𑀦 𑀯𑀺𑀦𑀸 𑀢𑁂𑀲𑀁 𑀤𑀲𑁆𑀲𑀦𑀫𑀕𑁆𑀕𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑀢𑁄. 𑀬𑀣𑀸 𑀘 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀅𑀜𑁆𑀜𑁂𑀲𑀁 𑀦𑀺𑀲𑁆𑀲𑀬𑀪𑀸𑀯𑁂𑀦 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀦𑁆𑀢𑀺, 𑀦 𑀏𑀯𑀫𑁂𑀢𑁂, 𑀏𑀢𑁂 𑀧𑀦 𑀅𑀧𑀭𑀦𑁂𑀬𑁆𑀬𑀸 𑀳𑀼𑀢𑁆𑀯𑀸 𑀅𑀧𑀭𑀦𑀸𑀬𑀓𑀪𑀸𑀯𑁂𑀦 𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀘𑁆𑀘𑁂𑀓𑀁 𑀲𑀘𑁆𑀘𑀸𑀦𑀺 𑀩𑀼𑀤𑁆𑀥𑀯𑀦𑁆𑀢𑁄𑀢𑀺 𑀧𑀘𑁆𑀘𑁂𑀓𑀩𑀼𑀤𑁆𑀥𑀸’’𑀢𑀺.

𑀅𑀢𑁆𑀣𑀺 𑀲𑀸𑀯𑀓𑁄 𑀦 𑀅𑀭𑀺𑀬𑁄𑀢𑀺 𑀏𑀢𑁆𑀣 𑀧𑁄𑀣𑀼𑀚𑁆𑀚𑀦𑀺𑀓𑀸𑀬 𑀲𑀤𑁆𑀥𑀸𑀬 𑀭𑀢𑀦𑀢𑁆𑀢𑀬𑁂 𑀅𑀪𑀺𑀧𑁆𑀧𑀲𑀦𑁆𑀦𑁄 𑀲𑀤𑁆𑀥𑁄𑀧𑀺 𑀕𑀳𑀺𑀢𑁄 𑀏𑀯. 𑀕𑀺𑀳𑀻 𑀅𑀦𑀸𑀕𑀢𑀨𑀮𑁄𑀢𑀺 𑀇𑀤𑀁 𑀧𑀦 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀬𑀣𑀸𑀯𑀼𑀢𑁆𑀢𑀧𑀼𑀕𑁆𑀕𑀮𑁄 𑀳𑀺 𑀲𑀭𑀡𑀕𑀫𑀦𑀢𑁄 𑀧𑀝𑁆𑀞𑀸𑀬 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄𑀇𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀢𑀁 𑀮𑀪𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀲𑀼𑀢𑁆𑀢𑁂𑀦 (𑀫. 𑀦𑀺. 𑁩.𑁩𑁭𑁬 𑀆𑀤𑀬𑁄) 𑀤𑀻𑀧𑁂𑀢𑀩𑁆𑀩𑁄. 𑀲𑀼𑀢𑀯𑀸𑀢𑀺 𑀏𑀢𑁆𑀣 𑀯𑀼𑀢𑁆𑀢𑀅𑀢𑁆𑀣𑁄 𑀦𑀸𑀫 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺, 𑀢𑀲𑁆𑀲 𑀯𑀲𑁂𑀦 𑀲𑀼𑀢𑀲𑀫𑁆𑀧𑀦𑁆𑀦𑁄. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀲𑁄 𑀘 𑀳𑁄𑀢𑀺 𑀲𑀼𑀢𑁂𑀦 𑀉𑀧𑀧𑀦𑁆𑀦𑁄, 𑀅𑀧𑁆𑀧𑀫𑁆𑀧𑀺 ¶ 𑀘𑁂 𑀲𑀳𑀺𑀢𑀁 𑀪𑀸𑀲𑀫𑀸𑀦𑁄’’𑀢𑀺 𑀘 𑀆𑀤𑀺. 𑀅𑀭𑀺𑀬𑀲𑀸𑀯𑀓𑁄𑀢𑀺 𑀯𑁂𑀤𑀺𑀢𑀩𑁆𑀩𑁄𑀢𑀺 𑀅𑀭𑀺𑀬𑀲𑁆𑀲 𑀪𑀕𑀯𑀢𑁄 𑀥𑀫𑁆𑀫𑀲𑁆𑀲𑀯𑀦𑀓𑀺𑀘𑁆𑀘𑁂 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀯𑀺𑀧𑁆𑀧𑀫𑀼𑀢𑁆𑀢𑀺 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑀢𑀸, 𑀢𑀲𑁆𑀲𑀸 𑀬𑀣𑀸𑀲𑀪𑀸𑀯𑀚𑀸𑀦𑀦𑀁 𑀤𑀴𑁆𑀳𑀢𑀭𑀸𑀬 𑀏𑀯 𑀘𑀺𑀢𑁆𑀢𑀪𑀸𑀯𑀦𑀸𑀬 𑀲𑀢𑀺 𑀳𑁄𑀢𑀺, 𑀦 𑀅𑀜𑁆𑀜𑀣𑀸𑀢𑀺 ‘‘𑀩𑀮𑀯𑀯𑀺𑀧𑀲𑁆𑀲𑀦𑀸 𑀓𑀣𑀺𑀢𑀸’’𑀢𑀺 𑀯𑀼𑀢𑁆𑀢𑀁.

𑁫𑁩. 𑀢𑀢𑀺𑀬𑁂 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑀦𑁆𑀢𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀦𑁆𑀢𑀺 𑀅𑀕𑁆𑀕𑀺𑀓𑁆𑀔𑀦𑁆𑀥𑁄𑀧𑀫𑀲𑀼𑀢𑁆𑀢𑁂 (𑀅. 𑀦𑀺. 𑁭.𑁭𑁨) 𑀤𑁂𑀲𑀦𑀸𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 ¶ . 𑀢𑀁𑀤𑁂𑀲𑀦𑀸𑀳𑁂𑀢𑀼𑀓𑀜𑁆𑀳𑀺 𑀏𑀓𑀘𑁆𑀘𑀸𑀦𑀁 𑀪𑀺𑀓𑁆𑀔𑀽𑀦𑀁 𑀫𑀺𑀘𑁆𑀙𑀸𑀧𑀝𑀺𑀧𑀢𑁆𑀢𑀺𑀁 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀪𑀕𑀯𑀸 𑀇𑀫𑀁 𑀲𑀼𑀢𑁆𑀢𑀁 𑀤𑁂𑀲𑁂𑀲𑀺. 𑀅𑀯𑀺𑀚𑀳𑀺𑀢𑀫𑁂𑀯 𑀳𑁄𑀢𑀺 𑀲𑀩𑁆𑀩𑀓𑀸𑀮𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀲𑀢𑀺𑀲𑀫𑁆𑀧𑀚𑀜𑁆𑀜𑀢𑁆𑀢𑀸. 𑀬𑀲𑁆𑀫𑀸 𑀩𑀼𑀤𑁆𑀥𑀸𑀦𑀁 𑀭𑀽𑀧𑀓𑀸𑀬𑁄 𑀩𑀸𑀳𑀺𑀭𑀩𑁆𑀪𑀦𑁆𑀢𑀭𑁂𑀳𑀺 𑀫𑀮𑁂𑀳𑀺 𑀅𑀦𑀼𑀧𑀓𑁆𑀓𑀺𑀮𑀺𑀝𑁆𑀞𑁄 𑀲𑀼𑀥𑁄𑀢𑀚𑀸𑀢𑀺𑀫𑀡𑀺𑀲𑀤𑀺𑀲𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀉𑀧𑀝𑁆𑀞𑀸𑀓𑀸𑀦𑀼𑀕𑁆𑀕𑀳𑀢𑁆𑀣𑀁 𑀲𑀭𑀻𑀭𑀨𑀸𑀲𑀼𑀓𑀢𑁆𑀣𑀜𑁆𑀘𑀸’’𑀢𑀺. 𑀯𑀻𑀢𑀺𑀦𑀸𑀫𑁂𑀢𑁆𑀯𑀸𑀢𑀺 𑀨𑀮𑀲𑀫𑀸𑀧𑀢𑁆𑀢𑀻𑀳𑀺 𑀯𑀻𑀢𑀺𑀦𑀸𑀫𑁂𑀢𑁆𑀯𑀸. 𑀓𑀸𑀮𑀧𑀭𑀺𑀘𑁆𑀙𑁂𑀤𑀯𑀲𑁂𑀦 𑀯𑀺𑀯𑀺𑀢𑁆𑀢𑀸𑀲𑀦𑁂 𑀯𑀻𑀢𑀺𑀦𑀸𑀫𑀦𑀁 𑀯𑀺𑀯𑁂𑀓𑀦𑀺𑀦𑁆𑀦𑀢𑀸𑀬 𑀘𑁂𑀯 𑀧𑀭𑁂𑀲𑀁 𑀤𑀺𑀝𑁆𑀞𑀸𑀦𑀼𑀕𑀢𑀺𑀆𑀧𑀚𑁆𑀚𑀦𑀢𑁆𑀣𑀜𑁆𑀘. 𑀦𑀺𑀯𑀸𑀲𑁂𑀢𑁆𑀯𑀸𑀢𑀺 𑀯𑀺𑀳𑀸𑀭𑀦𑀺𑀯𑀸𑀲𑀦𑀧𑀭𑀺𑀯𑀢𑁆𑀢𑀦𑀯𑀲𑁂𑀦 𑀦𑀺𑀯𑀸𑀲𑁂𑀢𑁆𑀯𑀸. 𑀓𑀤𑀸𑀘𑀺 𑀏𑀓𑀓𑀲𑁆𑀲, 𑀓𑀤𑀸𑀘𑀺 𑀪𑀺𑀓𑁆𑀔𑀼𑀲𑀗𑁆𑀖𑀧𑀭𑀺𑀯𑀼𑀢𑀲𑁆𑀲, 𑀓𑀤𑀸𑀘𑀺 𑀧𑀓𑀢𑀺𑀬𑀸, 𑀓𑀤𑀸𑀘𑀺 𑀧𑀸𑀝𑀺𑀳𑀸𑀭𑀺𑀬𑁂𑀳𑀺 𑀯𑀢𑁆𑀢𑀫𑀸𑀦𑁂𑀳𑀺 𑀘 𑀕𑀸𑀫𑀧𑁆𑀧𑀯𑁂𑀲𑁄 𑀢𑀣𑀸 𑀢𑀣𑀸 𑀯𑀺𑀦𑁂𑀢𑀩𑁆𑀩𑀧𑀼𑀕𑁆𑀕𑀮𑀯𑀲𑁂𑀦. 𑀉𑀧𑀲𑀁𑀳𑀭𑀺𑀢𑁆𑀯𑀸𑀢𑀺 𑀳𑀺𑀫𑀯𑀦𑁆𑀢𑀸𑀤𑀻𑀲𑀼 𑀧𑀼𑀧𑁆𑀨𑀺𑀢𑀭𑀼𑀓𑁆𑀔𑀸𑀤𑀺𑀢𑁄 𑀆𑀦𑁂𑀢𑁆𑀯𑀸. 𑀑𑀡𑀢𑀼𑀡𑁆𑀡𑀢𑀸𑀬 𑀪𑀽𑀫𑀺𑀬𑀸 𑀲𑀢𑁆𑀣𑀼 𑀧𑀤𑀦𑀺𑀓𑁆𑀔𑁂𑀧𑀲𑀫𑀬𑁂 𑀲𑀫𑀪𑀸𑀯𑀸𑀧𑀢𑁆𑀢𑀺, 𑀲𑀼𑀔𑀲𑀫𑁆𑀨𑀲𑁆𑀲𑀯𑀺𑀓𑀲𑀺𑀢𑀧𑀤𑀼𑀫𑀲𑀫𑁆𑀧𑀝𑀺𑀘𑁆𑀙𑀦𑀜𑁆𑀘 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀧𑀸𑀤𑀢𑀸𑀬 𑀦𑀺𑀲𑁆𑀲𑀦𑁆𑀤𑀨𑀮𑀁, 𑀦 𑀇𑀤𑁆𑀥𑀺𑀦𑀺𑀫𑁆𑀫𑀸𑀦𑀁. 𑀦𑀺𑀤𑀲𑁆𑀲𑀦𑀫𑀢𑁆𑀢𑀜𑁆𑀘𑁂𑀢𑀁 𑀲𑀓𑁆𑀔𑀭𑀸𑀓𑀞𑀮𑀓𑀡𑁆𑀝𑀓𑀲𑀗𑁆𑀓𑀼𑀓𑀮𑀮𑀸𑀤𑀺𑀅𑀧𑀕𑀫𑁄 𑀲𑀼𑀘𑀺𑀪𑀸𑀯𑀸𑀧𑀢𑁆𑀢𑀻𑀢𑀺 𑀏𑀯𑀫𑀸𑀤𑀻𑀦𑀫𑁆𑀧𑀺 𑀢𑀤𑀸 𑀮𑀩𑁆𑀪𑀦𑀢𑁄.

𑀇𑀦𑁆𑀤𑀔𑀻𑀮𑀲𑁆𑀲 𑀅𑀦𑁆𑀢𑁄 𑀞𑀧𑀺𑀢𑀫𑀢𑁆𑀢𑁂𑀢𑀺 𑀇𑀤𑀁 𑀬𑀸𑀯𑀤𑁂𑀯 𑀯𑁂𑀦𑁂𑀬𑁆𑀬𑀚𑀦𑀯𑀺𑀦𑀬𑀢𑁆𑀣𑀸𑀬 𑀲𑀢𑁆𑀣𑀼 𑀧𑀸𑀝𑀺𑀳𑀸𑀭𑀺𑀬𑀁 𑀧𑀯𑀢𑁆𑀢𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀤𑀓𑁆𑀔𑀺𑀡𑀧𑀸𑀤𑁂𑀢𑀺 𑀇𑀤𑀁 𑀩𑀼𑀤𑁆𑀥𑀸𑀦𑀁 𑀲𑀩𑁆𑀩𑀧𑀤𑀓𑁆𑀔𑀺𑀡𑀢𑀸𑀬. ‘‘𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄’’𑀢𑀺 𑀯𑀢𑁆𑀯𑀸𑀧𑀺 ‘‘𑀲𑀼𑀯𑀡𑁆𑀡𑀭𑀲𑀧𑀺𑀜𑁆𑀚𑀭𑀸𑀦𑀺 𑀯𑀺𑀬𑀸’’𑀢𑀺 𑀇𑀤𑀁 𑀩𑀼𑀤𑁆𑀥𑀸𑀦𑀁 𑀲𑀭𑀻𑀭𑁂 𑀧𑀻𑀢𑀸𑀪𑀸𑀬 𑀬𑁂𑀪𑀼𑀬𑁆𑀬𑀢𑀸𑀬 𑀯𑀼𑀢𑁆𑀢𑀁. 𑀫𑀥𑀼𑀭𑁂𑀦𑀸𑀓𑀸𑀭𑁂𑀦 𑀲𑀤𑁆𑀤𑀁 𑀓𑀭𑁄𑀦𑁆𑀢𑀺 𑀤𑀝𑁆𑀞𑀩𑁆𑀩𑀲𑀸𑀭𑀲𑁆𑀲 𑀤𑀺𑀝𑁆𑀞𑀢𑀸𑀬. 𑀪𑁂𑀭𑀺𑀆𑀤𑀻𑀦𑀁 𑀧𑀦 𑀲𑀤𑁆𑀤𑀸𑀬𑀦𑀁 𑀥𑀫𑁆𑀫𑀢𑀸𑀯. 𑀧𑀝𑀺𑀫𑀸𑀦𑁂𑀦𑁆𑀢𑀻𑀢𑀺 ‘‘𑀲𑀼𑀤𑀼𑀮𑁆𑀮𑀪𑀁 𑀇𑀤𑀁 𑀅𑀚𑁆𑀚 𑀅𑀫𑁆𑀳𑁂𑀳𑀺 𑀮𑀩𑁆𑀪𑀢𑀺, 𑀬𑁂 𑀫𑀬𑀁 𑀈𑀤𑀺𑀲𑁂𑀦 𑀧𑀡𑀻𑀢𑁂𑀦 𑀆𑀳𑀸𑀭𑁂𑀦 𑀪𑀕𑀯𑀦𑁆𑀢𑀁 𑀉𑀧𑀝𑁆𑀞𑀳𑀸𑀫𑀸’’𑀢𑀺 𑀧𑀢𑀻𑀢𑀫𑀸𑀦𑀲𑀸 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺. 𑀢𑁂𑀲𑀁 𑀲𑀦𑁆𑀢𑀸𑀦𑀸𑀦𑀺 𑀑𑀮𑁄𑀓𑁂𑀢𑁆𑀯𑀸𑀢𑀺 ¶ 𑀢𑁂𑀲𑀁 𑀢𑀣𑀸 𑀉𑀧𑀝𑁆𑀞𑀸𑀓𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀅𑀢𑀻𑀢𑁂 𑀏𑀢𑀭𑀳𑀺 𑀘 𑀧𑀯𑀢𑁆𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑀸𑀦𑀺 𑀑𑀮𑁄𑀓𑁂𑀢𑁆𑀯𑀸. 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀳𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣𑀸𑀢𑀺 𑀯𑀺𑀳𑀸𑀭𑁂. 𑀕𑀦𑁆𑀥𑀫𑀡𑁆𑀟𑀮𑀫𑀸𑀴𑁂𑀢𑀺 𑀘𑀢𑀼𑀚𑁆𑀚𑀸𑀢𑀺𑀬𑀕𑀦𑁆𑀥𑁂𑀦 𑀓𑀢𑀧𑀭𑀺𑀪𑀡𑁆𑀟𑁂 𑀫𑀡𑁆𑀟𑀮𑀫𑀸𑀴𑁂.

𑀤𑀼𑀮𑁆𑀮𑀪𑀸 𑀔𑀡𑀲𑀫𑁆𑀧𑀢𑁆𑀢𑀻𑀢𑀺 𑀲𑀢𑀺𑀧𑀺 𑀫𑀦𑀼𑀲𑁆𑀲𑀢𑁆𑀢𑀧𑁆𑀧𑀝𑀺𑀮𑀸𑀪𑁂 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀇𑀦𑁆𑀤𑁆𑀭𑀺𑀬𑀸𑀯𑁂𑀓𑀮𑁆𑀮𑀲𑀤𑁆𑀥𑀸𑀧𑀝𑀺𑀮𑀸𑀪𑀸𑀤𑀬𑁄 𑀕𑀼𑀡𑀸 𑀤𑀼𑀮𑁆𑀮𑀪𑀸𑀢𑀺 𑀅𑀢𑁆𑀣𑁄. 𑀘𑀸𑀢𑀼𑀫𑀳𑀸𑀭𑀸𑀚𑀺𑀓…𑀧𑁂… 𑀯𑀲𑀯𑀢𑁆𑀢𑀺𑀪𑀯𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀇𑀤𑀁 𑀢𑀢𑁆𑀣 𑀲𑀼𑀜𑁆𑀜𑀯𑀺𑀫𑀸𑀦𑀸𑀦𑀺 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀪𑀕𑀯𑀸 𑀕𑀦𑁆𑀥𑀓𑀼𑀝𑀺𑀁 𑀧𑀯𑀺𑀲𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀢𑀬𑁄 𑀪𑀸𑀕𑁂 𑀓𑀢𑁆𑀯𑀸 𑀧𑀞𑀫𑀪𑀸𑀕𑁂 𑀲𑀘𑁂 𑀆𑀓𑀗𑁆𑀔𑀢𑀺, 𑀤𑀓𑁆𑀔𑀺𑀡𑁂𑀦 𑀧𑀲𑁆𑀲𑁂𑀦 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺. 𑀲𑀘𑁂 𑀆𑀓𑀗𑁆𑀔𑀢𑀺, 𑀩𑀼𑀤𑁆𑀥𑀸𑀘𑀺𑀡𑁆𑀡𑀨𑀮𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺. 𑀅𑀣 𑀬𑀣𑀸𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀢𑀢𑁄 𑀯𑀼𑀝𑁆𑀞𑀳𑀺𑀢𑁆𑀯𑀸 𑀤𑀼𑀢𑀺𑀬𑀪𑀸𑀕𑁂 𑀧𑀘𑁆𑀙𑀺𑀫𑀬𑀸𑀫𑁂 𑀢𑀢𑀺𑀬𑀓𑁄𑀝𑁆𑀞𑀸𑀲𑁂 𑀯𑀺𑀬 𑀮𑁄𑀓𑀁 𑀯𑁄𑀮𑁄𑀓𑁂𑀢𑀺 𑀯𑁂𑀦𑁂𑀬𑁆𑀬𑀸𑀦𑀁 𑀜𑀸𑀡𑀧𑀭𑀺𑀧𑀸𑀓𑀁 𑀧𑀲𑁆𑀲𑀺𑀢𑀼𑀁. 𑀢𑁂𑀦𑀸𑀳 𑁋 ‘‘𑀲𑀘𑁂 𑀆𑀓𑀗𑁆𑀔𑀢𑀻’’𑀢𑀺𑀆𑀤𑀺.

𑀓𑀸𑀮𑀬𑀼𑀢𑁆𑀢𑀦𑁆𑀢𑀺 ¶ 𑀧𑀢𑁆𑀢𑀓𑀮𑁆𑀮𑀁, ‘‘𑀇𑀫𑀺𑀲𑁆𑀲𑀸 𑀯𑁂𑀮𑀸𑀬 𑀇𑀫𑀲𑁆𑀲 𑀏𑀯𑀁 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀢𑀁𑀓𑀸𑀮𑀸𑀦𑀼𑀭𑀽𑀧𑀁. 𑀲𑀫𑀬𑀬𑀼𑀢𑁆𑀢𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀅𑀦𑀼𑀭𑀽𑀧𑀁 𑀯𑀸. 𑀲𑀫𑀬𑀬𑀼𑀢𑁆𑀢𑀦𑁆𑀢𑀺 𑀯𑀸 𑀅𑀭𑀺𑀬𑀲𑀫𑀬𑀲𑀁𑀬𑀼𑀢𑁆𑀢𑀁. 𑀤𑁂𑀲𑀓𑀸𑀮𑀸𑀦𑀼𑀭𑀽𑀧𑀫𑁂𑀯 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀺, 𑀤𑁂𑀲𑁂𑀦𑁆𑀢𑀸 𑀘 𑀅𑀭𑀺𑀬𑀲𑀫𑁆𑀫𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀦𑀬𑀁 𑀤𑀻𑀧𑁂𑀦𑁆𑀢𑀸𑀯 𑀤𑁂𑀲𑁂𑀦𑁆𑀢𑀺. 𑀅𑀣 𑀯𑀸 𑀲𑀫𑀬𑀬𑀼𑀢𑁆𑀢𑀦𑁆𑀢𑀺 𑀳𑁂𑀢𑀽𑀤𑀸𑀳𑀭𑀡𑀲𑀳𑀺𑀢𑀁. 𑀓𑀸𑀮𑁂𑀦 𑀲𑀸𑀧𑀤𑁂𑀲𑀜𑁆𑀳𑀺 𑀪𑀕𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺, 𑀓𑀸𑀮𑀁 𑀯𑀺𑀤𑀺𑀢𑁆𑀯𑀸 𑀧𑀭𑀺𑀲𑀁 𑀉𑀬𑁆𑀬𑁄𑀚𑁂𑀢𑀺, 𑀦 𑀬𑀸𑀯 𑀲𑀫𑀦𑁆𑀥𑀓𑀸𑀭𑀸 𑀥𑀫𑁆𑀫𑀁 𑀤𑁂𑀲𑁂𑀢𑀺.

𑀉𑀢𑀼𑀁 𑀕𑀡𑁆𑀳𑀸𑀧𑁂𑀢𑀺, 𑀦 𑀧𑀦 𑀫𑀮𑀁 𑀧𑀓𑁆𑀔𑀸𑀮𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀪𑀕𑀯𑀢𑁄 𑀓𑀸𑀬𑁂 𑀭𑀚𑁄𑀚𑀮𑁆𑀮𑀁 𑀉𑀧𑀮𑀺𑀫𑁆𑀧𑀢𑀻𑀢𑀺. 𑀢𑀢𑁄 𑀢𑀢𑁄𑀢𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀤𑀺𑀯𑀸𑀝𑁆𑀞𑀸𑀦𑀸𑀤𑀺𑀢𑁄. 𑀑𑀓𑀸𑀲𑀁 𑀮𑀪𑀫𑀸𑀦𑀸𑀢𑀺 𑀧𑀼𑀭𑁂𑀪𑀢𑁆𑀢𑀧𑀘𑁆𑀙𑀸𑀪𑀢𑁆𑀢𑀧𑀼𑀭𑀺𑀫𑀬𑀸𑀫𑁂𑀲𑀼 𑀑𑀓𑀸𑀲𑀁 𑀅𑀮𑀪𑀺𑀢𑁆𑀯𑀸 𑀇𑀤𑀸𑀦𑀺 𑀫𑀚𑁆𑀛𑀺𑀫𑀬𑀸𑀫𑁂 𑀑𑀓𑀸𑀲𑀁 𑀮𑀪𑀫𑀸𑀦𑀸, 𑀪𑀕𑀯𑀢𑀸 𑀯𑀸 𑀓𑀢𑁄𑀓𑀸𑀲𑀢𑀸𑀬 𑀑𑀓𑀸𑀲𑀁 𑀮𑀪𑀫𑀸𑀦𑀸. 𑀧𑀘𑁆𑀙𑀸𑀪𑀢𑁆𑀢𑀲𑁆𑀲 𑀢𑀻𑀲𑀼 𑀪𑀸𑀕𑁂𑀲𑀼 𑀧𑀞𑀫𑀪𑀸𑀕𑁂 𑀲𑀻𑀳𑀲𑁂𑀬𑁆𑀬𑀓𑀧𑁆𑀧𑀦𑀁 𑀏𑀓𑀦𑁆𑀢𑀺𑀓𑀁 𑀦 𑀳𑁄𑀢𑀻𑀢𑀺 𑀆𑀳 𑁋 ‘‘𑀧𑀼𑀭𑁂𑀪𑀢𑁆𑀢𑀢𑁄 𑀧𑀝𑁆𑀞𑀸𑀬 𑀦𑀺𑀲𑀚𑁆𑀚𑀸𑀧𑀻𑀴𑀺𑀢𑀲𑁆𑀲 𑀲𑀭𑀻𑀭𑀲𑁆𑀲𑀸’’𑀢𑀺. 𑀢𑁂𑀦𑁂𑀯 𑀳𑀺 𑀢𑀢𑁆𑀣 ‘‘𑀲𑀘𑁂 𑀆𑀓𑀗𑁆𑀔𑀢𑀻’’𑀢𑀺 𑀢𑀤𑀸 𑀲𑀻𑀳𑀲𑁂𑀬𑁆𑀬𑀓𑀧𑁆𑀧𑀦𑀲𑁆𑀲 𑀅𑀦𑀺𑀩𑀤𑁆𑀥𑀢𑀸 𑀯𑀺𑀪𑀸𑀯𑀺𑀢𑀸. 𑀓𑀺𑀮𑀸𑀲𑀼𑀪𑀸𑀯𑁄 𑀧𑀭𑀺𑀲𑁆𑀲𑀫𑁄 ¶ . 𑀲𑀻𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺 𑀲𑀭𑀻𑀭𑀲𑁆𑀲 𑀓𑀺𑀮𑀸𑀲𑀼𑀪𑀸𑀯𑀫𑁄𑀘𑀦𑀢𑁆𑀣𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀩𑀼𑀤𑁆𑀥𑀘𑀓𑁆𑀔𑀼𑀦𑀸 𑀮𑁄𑀓𑀁 𑀯𑁄𑀮𑁄𑀓𑁂𑀢𑀻𑀢𑀺 𑀇𑀤𑀁 𑀧𑀘𑁆𑀙𑀺𑀫𑀬𑀸𑀫𑁂 𑀪𑀕𑀯𑀢𑁄 𑀩𑀳𑀼𑀮𑀁 𑀆𑀘𑀺𑀡𑁆𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀧𑁆𑀧𑁂𑀓𑀤𑀸 𑀅𑀯𑀲𑀺𑀝𑁆𑀞𑀩𑀮𑀜𑀸𑀡𑁂𑀳𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦𑁂𑀯 𑀘 𑀪𑀕𑀯𑀸 𑀢𑀫𑀢𑁆𑀣𑀁 𑀲𑀸𑀥𑁂𑀢𑀻𑀢𑀺.

𑀇𑀫𑀲𑁆𑀫𑀺𑀁𑀬𑁂𑀯 𑀓𑀺𑀘𑁆𑀘𑁂𑀢𑀺 𑀧𑀘𑁆𑀙𑀺𑀫𑀬𑀸𑀫𑀓𑀺𑀘𑁆𑀘𑁂. 𑀩𑀮𑀯𑀢𑀸 𑀧𑀘𑁆𑀘𑀦𑀼𑀢𑀸𑀧𑁂𑀦 𑀲𑀁𑀯𑀟𑁆𑀠𑀫𑀸𑀦𑁂𑀦 𑀓𑀭𑀚𑀓𑀸𑀬𑁂 𑀫𑀳𑀸𑀧𑀭𑀺𑀴𑀸𑀳𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀆𑀳 𑁋 ‘‘𑀦𑀸𑀫𑀓𑀸𑀬𑁂 𑀲𑀦𑁆𑀢𑀢𑁆𑀢𑁂 𑀓𑀭𑀚𑀓𑀸𑀬𑁄 𑀲𑀦𑁆𑀢𑀢𑁆𑀢𑁄’’𑀢𑀺. 𑀦𑀺𑀥𑀸𑀦𑀕𑀢𑀦𑁆𑀢𑀺 𑀲𑀦𑁆𑀦𑀺𑀘𑀺𑀢𑀮𑁄𑀳𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀉𑀡𑁆𑀳𑀁 𑀮𑁄𑀳𑀺𑀢𑀁 𑀫𑀼𑀔𑀢𑁄 𑀉𑀕𑁆𑀕𑀜𑁆𑀙𑀻𑀢𑀺 𑀮𑁄𑀳𑀺𑀢𑀁 𑀉𑀡𑁆𑀳𑀁 𑀳𑀼𑀢𑁆𑀯𑀸 𑀫𑀼𑀔𑀢𑁄 𑀉𑀕𑁆𑀕𑀜𑁆𑀙𑀺. 𑀞𑀸𑀦𑀦𑁆𑀢𑀺 𑀪𑀺𑀓𑁆𑀔𑀼𑀧𑀝𑀺𑀜𑁆𑀜𑀁. 𑀢𑀁 𑀧𑀸𑀧𑀁 𑀯𑀟𑁆𑀠𑀫𑀸𑀦𑀦𑁆𑀢𑀺 𑀪𑀺𑀓𑁆𑀔𑀼𑀧𑀝𑀺𑀜𑁆𑀜𑀸𑀬 𑀅𑀯𑀺𑀚𑀳𑀺𑀢𑀢𑁆𑀢𑀸 𑀢𑀣𑀸 𑀧𑀯𑀟𑁆𑀠𑀫𑀸𑀦𑀧𑀸𑀧𑀁. 𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀚𑁆𑀛𑀸𑀧𑀦𑁆𑀦𑀸𑀦𑀫𑁆𑀧𑀺 𑀉𑀧𑀸𑀬𑁂𑀦 𑀧𑀯𑀢𑁆𑀢𑀺𑀬𑀫𑀸𑀦𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀲𑀸𑀢𑁆𑀣𑀓𑁄 𑀳𑁄𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀚𑀸𑀢𑀲𑀁𑀯𑁂𑀕𑀸’’𑀢𑀺𑀆𑀤𑀺𑀫𑀸𑀳. 𑀅𑀳𑁄 𑀲𑀮𑁆𑀮𑁂𑀔𑀺𑀢𑀦𑁆𑀢𑀺 𑀅𑀳𑁄 𑀅𑀢𑀺𑀯𑀺𑀬 𑀲𑀮𑁆𑀮𑁂𑀔𑁂𑀦 𑀇𑀢𑀁 𑀧𑀯𑀢𑁆𑀢𑀁. 𑀓𑀸𑀲𑀸𑀯𑀧𑀚𑁆𑀚𑁄𑀢𑁄𑀢𑀺 𑀪𑀺𑀓𑁆𑀔𑀽𑀦𑀁 𑀩𑀳𑀼𑀪𑀸𑀯𑀢𑁄 𑀇𑀢𑁄 𑀘𑀺𑀢𑁄 𑀘 𑀯𑀺𑀘𑀭𑀦𑁆𑀢𑀸𑀦𑀁 𑀢𑁂𑀲𑀁 𑀓𑀸𑀲𑀸𑀯𑀚𑀼𑀢𑀺𑀬𑀸 𑀧𑀚𑁆𑀚𑁄𑀢𑀺𑀢𑁄. 𑀇𑀲𑀺𑀯𑀸𑀢𑀧𑀭𑀺𑀯𑀸𑀢𑁄𑀢𑀺 𑀲𑀻𑀮𑀓𑁆𑀔𑀦𑁆𑀥𑀸𑀤𑀻𑀦𑀁 𑀦𑀺𑀩𑁆𑀩𑀸𑀦𑀲𑁆𑀲 𑀘 𑀏𑀲𑀦𑀢𑁄 𑀇𑀲𑀻𑀦𑀁 𑀪𑀺𑀓𑁆𑀔𑀽𑀦𑀁 𑀕𑀼𑀡𑀕𑀦𑁆𑀥𑁂𑀦 𑀘𑁂𑀯 𑀕𑀼𑀡𑀕𑀦𑁆𑀥𑀯𑀸𑀲𑀺𑀢𑁂𑀦 𑀲𑀭𑀻𑀭𑀕𑀦𑁆𑀥𑁂𑀦 𑀘 𑀧𑀭𑀺𑀢𑁄 𑀲𑀫𑀦𑁆𑀢𑀢𑁄 𑀯𑀸𑀬𑀺𑀢𑁄.

𑀥𑀫𑁆𑀫𑀲𑀁𑀯𑁂𑀕𑁄 𑀉𑀧𑁆𑀧𑀚𑁆𑀚𑀺 𑀅𑀦𑀸𑀯𑀚𑁆𑀚𑀦𑁂𑀦 𑀧𑀼𑀩𑁆𑀩𑁂 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀅𑀲𑀁𑀯𑀺𑀤𑀺𑀢𑀢𑁆𑀢𑀸. 𑀥𑀫𑁆𑀫𑀲𑀁𑀯𑁂𑀕𑁄𑀢𑀺 𑀘 ¶ 𑀢𑀸𑀤𑀺𑀲𑁂 𑀅𑀢𑁆𑀣𑁂 𑀥𑀫𑁆𑀫𑀢𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀁 𑀲𑀳𑁄𑀢𑁆𑀢𑀧𑁆𑀧𑀜𑀸𑀡𑀁. 𑀅𑀲𑁆𑀲𑀸𑀲𑀝𑁆𑀞𑀸𑀦𑀦𑁆𑀢𑀺 𑀘𑀺𑀢𑁆𑀢𑀲𑁆𑀲𑀸𑀲𑀓𑀸𑀭𑀡𑀁 𑀓𑀫𑁆𑀫𑀝𑁆𑀞𑀸𑀦𑀁. 𑀲𑀩𑁆𑀩𑁂𑀲𑀁 𑀓𑀺𑀘𑁆𑀘𑀸𑀦𑀁 𑀧𑀼𑀩𑁆𑀩𑀪𑀸𑀕𑁄 𑀲𑀩𑁆𑀩𑀧𑀼𑀩𑁆𑀩𑀪𑀸𑀕𑁄. ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀅𑀯𑁂𑀭𑀸 𑀳𑁄𑀦𑁆𑀢𑀽’’𑀢𑀺𑀆𑀤𑀺𑀦𑀸 𑀳𑀺 𑀘𑀺𑀢𑁆𑀢𑀲𑁆𑀲 𑀧𑀝𑁆𑀞𑀸𑀦𑀁 𑀉𑀧𑀝𑁆𑀞𑀸𑀦𑀁 𑀳𑀺𑀢𑀨𑀭𑀡𑀁. 𑀇𑀢𑀭𑀁 𑀇𑀢𑁄 𑀣𑁄𑀓𑀁 𑀫𑀳𑀦𑁆𑀢𑀦𑁆𑀢𑀺 𑀓𑀢𑁆𑀯𑀸 𑀇𑀤𑀁 ‘‘𑀘𑀽𑀴𑀘𑁆𑀙𑀭𑀸𑀲𑀗𑁆𑀖𑀸𑀢𑀲𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑁄 𑀯𑀼𑀘𑁆𑀘𑀢𑀺 𑀅𑀗𑁆𑀕𑀼𑀮𑀺𑀨𑁄𑀝𑀦𑀓𑁆𑀔𑀡𑁄 𑀅𑀓𑁆𑀔𑀺𑀦𑀺𑀫𑀺𑀲𑀓𑀸𑀮𑁄, 𑀬𑁄 𑀏𑀓𑀲𑁆𑀲 𑀅𑀓𑁆𑀔𑀭𑀲𑁆𑀲 𑀉𑀘𑁆𑀘𑀸𑀭𑀡𑀓𑁆𑀔𑀡𑁄. 𑀢𑁂𑀦𑀸𑀳 𑁋 ‘‘𑀤𑁆𑀯𑁂 𑀅𑀗𑁆𑀕𑀼𑀮𑀺𑀬𑁄 𑀧𑀳𑀭𑀺𑀢𑁆𑀯𑀸 𑀲𑀤𑁆𑀤𑀓𑀭𑀡𑀫𑀢𑁆𑀢’’𑀦𑁆𑀢𑀺. 𑀲𑀩𑁆𑀩𑀲𑀢𑁆𑀢𑀸𑀦𑀁 𑀳𑀺𑀢𑀨𑀭𑀡𑀘𑀺𑀢𑁆𑀢𑀦𑁆𑀢𑀺 𑀲𑀩𑁆𑀩𑁂𑀲𑀫𑁆𑀧𑀺 𑀲𑀢𑁆𑀢𑀸𑀦𑀁 𑀲𑀫𑁆𑀫𑀤𑁂𑀯 𑀳𑀺𑀢𑁂𑀲𑀺𑀢𑀯𑀲𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑀁. 𑀆𑀯𑀚𑁆𑀚𑁂𑀦𑁆𑀢𑁄 𑀆𑀲𑁂𑀯𑀢𑀻𑀢𑀺 𑀳𑀺𑀢𑁂𑀲𑀺𑀢𑀯𑀲𑁂𑀦 𑀆𑀯𑀚𑁆𑀚𑁂𑀦𑁆𑀢𑁄. 𑀆𑀯𑀚𑁆𑀚𑀦𑁂𑀦 𑀆𑀪𑀼𑀚𑀦𑁆𑀢𑁄𑀧𑀺 𑀆𑀲𑁂𑀯𑀢𑀺 𑀦𑀸𑀫 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑁂𑀦. 𑀚𑀸𑀦𑀦𑁆𑀢𑁄𑀢𑀺 𑀢𑀣𑀸 𑀜𑀸𑀡𑀫𑀢𑁆𑀢𑀁 𑀉𑀧𑁆𑀧𑀸𑀤𑁂𑀦𑁆𑀢𑁄𑀧𑀺. 𑀧𑀲𑁆𑀲𑀦𑁆𑀢𑁄𑀢𑀺 𑀢𑀣𑀸 𑀜𑀸𑀡𑀘𑀓𑁆𑀔𑀼𑀦𑀸 𑀧𑀘𑁆𑀘𑀓𑁆𑀔𑀢𑁄 𑀯𑀺𑀬 𑀯𑀺𑀧𑀲𑁆𑀲𑀦𑁆𑀢𑁄𑀧𑀺. 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄𑀢𑀺 𑀢𑀫𑀢𑁆𑀣𑀁 𑀧𑀢𑀺 ¶ 𑀧𑀢𑀺 𑀅𑀯𑁂𑀓𑁆𑀔𑀦𑁆𑀢𑁄𑀧𑀺. 𑀲𑀤𑁆𑀥𑀸𑀬 𑀅𑀥𑀺𑀫𑀼𑀘𑁆𑀘𑀦𑁆𑀢𑁄𑀢𑀺𑀆𑀤𑀺 𑀧𑀜𑁆𑀘𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀪𑀺𑀜𑁆𑀜𑁂𑀬𑁆𑀬𑀦𑁆𑀢𑀺𑀆𑀤𑀺 𑀘𑀢𑀼𑀲𑀘𑁆𑀘𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀩𑁆𑀩𑀫𑁂𑀯 𑀘𑁂𑀢𑀁 𑀯𑀺𑀢𑁆𑀣𑀸𑀭𑀢𑁄, 𑀲𑀸𑀫𑀜𑁆𑀜𑁂𑀦 𑀆𑀲𑁂𑀯𑀦𑀤𑀲𑁆𑀲𑀦𑀫𑁂𑀯𑀸𑀢𑀺 𑀇𑀥𑀸𑀥𑀺𑀧𑁆𑀧𑁂𑀢𑀫𑁂𑀯 𑀆𑀲𑁂𑀯𑀦𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀇𑀥 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀭𑀺𑀢𑁆𑀢𑀚𑁆𑀛𑀸𑀦𑁄𑀢𑀺 𑀅𑀯𑀺𑀭𑀳𑀺𑀢𑀚𑁆𑀛𑀸𑀦𑁄. 𑀅𑀢𑀼𑀘𑁆𑀙𑀚𑁆𑀛𑀸𑀦𑁄𑀢𑀺 𑀛𑀸𑀦𑁂𑀦 𑀅𑀢𑀼𑀘𑁆𑀙𑁄. 𑀘𑀸𑀕𑁄 𑀯𑀸 𑀯𑁂𑀯𑀘𑀦𑀦𑁆𑀢𑀺 𑀆𑀳 𑁋 ‘‘𑀅𑀧𑀭𑀺𑀘𑁆𑀘𑀢𑁆𑀢𑀚𑁆𑀛𑀸𑀦𑁄’’𑀢𑀺. 𑀯𑀺𑀳𑀭𑀢𑀻𑀢𑀺 𑀧𑀤𑀲𑁆𑀲 𑀯𑀺𑀪𑀗𑁆𑀕𑁂 (𑀯𑀺𑀪. 𑁫𑁪𑁦) 𑀆𑀕𑀢𑀦𑀬𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀳𑀭𑀢𑀻𑀢𑀺 𑀇𑀭𑀺𑀬𑀢𑀻’’𑀢𑀺𑀆𑀤𑀺𑀫𑀸𑀳. 𑀅𑀬𑀁 𑀧𑀦𑁂𑀢𑁆𑀣 𑀲𑀤𑁆𑀤𑀢𑁆𑀣𑁄 𑁋 𑀯𑀺𑀳𑀭𑀢𑀻𑀢𑀺 𑀏𑀢𑁆𑀣 𑀯𑀺-𑀲𑀤𑁆𑀤𑁄 𑀯𑀺𑀘𑁆𑀙𑁂𑀤𑀢𑁆𑀣𑀚𑁄𑀢𑀦𑁄. 𑀳𑀭𑀢𑀻𑀢𑀺 𑀦𑁂𑀢𑀺, 𑀧𑀯𑀢𑁆𑀢𑁂𑀢𑀻𑀢𑀺 𑀅𑀢𑁆𑀣𑁄, 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀳𑀭𑀢𑀺 𑀯𑀺𑀳𑀭𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀳𑀺 𑀏𑀓𑀁 𑀇𑀭𑀺𑀬𑀸𑀧𑀣𑀩𑀸𑀥𑀦𑀁 𑀅𑀜𑁆𑀜𑁂𑀦 𑀇𑀭𑀺𑀬𑀸𑀧𑀣𑁂𑀦 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑀭𑀺𑀧𑀢𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀳𑀭𑀢𑀺 𑀧𑀯𑀢𑁆𑀢𑁂𑀢𑀺, 𑀢𑀲𑁆𑀫𑀸 ‘‘𑀯𑀺𑀳𑀭𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀇𑀭𑀺𑀬𑀢𑀻𑀢𑀺 𑀞𑀸𑀦𑀦𑀺𑀲𑀚𑁆𑀚𑀸𑀤𑀺𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑁄 𑀧𑀯𑀢𑁆𑀢𑀢𑀺. 𑀧𑀯𑀢𑁆𑀢𑀢𑀻𑀢𑀺 𑀞𑀸𑀦𑀸𑀤𑀺𑀲𑀫𑀗𑁆𑀕𑀻 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀧𑀸𑀮𑁂𑀢𑀻𑀢𑀺 𑀏𑀓𑀁 𑀇𑀭𑀺𑀬𑀸𑀧𑀣𑀩𑀸𑀥𑀦𑀁 𑀇𑀭𑀺𑀬𑀸𑀧𑀣𑀦𑁆𑀢𑀭𑁂𑀳𑀺 𑀭𑀓𑁆𑀔𑀦𑁆𑀢𑁄 𑀧𑀸𑀮𑁂𑀢𑀺. 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀏𑀓𑀜𑁆𑀳𑀺 𑀇𑀭𑀺𑀬𑀸𑀧𑀣𑀩𑀸𑀥𑀦𑀁 𑀅𑀜𑁆𑀜𑁂𑀦 𑀇𑀭𑀺𑀬𑀸𑀧𑀣𑁂𑀦 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀅𑀧𑀭𑀺𑀧𑀢𑀦𑁆𑀢𑀁 𑀅𑀢𑁆𑀢𑀪𑀸𑀯𑀁 𑀧𑀸𑀮𑁂𑀦𑁆𑀢𑁄 𑀬𑀧𑁂𑀢𑀺 𑀬𑀸𑀧𑁂𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀘𑀭𑀢𑀻𑀢𑀺 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑀫𑀗𑁆𑀕𑀻 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺. 𑀇𑀫𑀺𑀦𑀸 𑀧𑀤𑁂𑀦𑀸𑀢𑀺 ‘‘𑀯𑀺𑀳𑀭𑀢𑀻’’𑀢𑀺 𑀇𑀫𑀺𑀦𑀸 𑀧𑀤𑁂𑀦.

𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁄𑀢𑀺 𑀏𑀢𑁆𑀣 𑀇𑀭𑀺𑀬𑀦𑀁 𑀧𑀯𑀢𑁆𑀢𑀦𑀁 𑀇𑀭𑀺𑀬𑀸, 𑀓𑀸𑀬𑀧𑁆𑀧𑀬𑁄𑀕𑁄 𑀓𑀸𑀬𑀺𑀓𑀓𑀺𑀭𑀺𑀬𑀸. 𑀢𑀲𑁆𑀲𑀸 𑀧𑀯𑀢𑁆𑀢𑀦𑀽𑀧𑀸𑀬𑀪𑀸𑀯𑀢𑁄 𑀇𑀭𑀺𑀬𑀸𑀬 𑀧𑀣𑁄 𑀇𑀭𑀺𑀬𑀸𑀧𑀣𑁄, 𑀞𑀸𑀦𑀦𑀺𑀲𑀚𑁆𑀚𑀸𑀤𑀺. 𑀦 𑀳𑀺 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀳𑀺 𑀅𑀯𑀢𑁆𑀣𑀸𑀳𑀺 𑀯𑀺𑀦𑀸 𑀓𑀺𑀜𑁆𑀘𑀺 𑀓𑀸𑀬𑀺𑀓𑀓𑀺𑀭𑀺𑀬𑀁 𑀧𑀯𑀢𑁆𑀢𑁂𑀢𑀼𑀁 𑀲𑀓𑁆𑀓𑀸. 𑀞𑀸𑀦𑀲𑀫𑀗𑁆𑀕𑀻 𑀯𑀸 𑀳𑀺 𑀓𑀸𑀬𑁂𑀦 𑀓𑀺𑀜𑁆𑀘𑀺 𑀓𑀭𑁂𑀬𑁆𑀬, 𑀕𑀫𑀦𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑀫𑀗𑁆𑀕𑀻 𑀯𑀸. 𑀯𑀺𑀳𑀭𑀡𑀁, 𑀯𑀺𑀳𑀭𑀢𑀺 𑀏𑀢𑁂𑀦𑀸𑀢𑀺 𑀯𑀸 𑀯𑀺𑀳𑀸𑀭𑁄, 𑀇𑀭𑀺𑀬𑀸𑀧𑀣𑁄𑀯 𑀯𑀺𑀳𑀸𑀭𑁄 𑀇𑀭𑀺𑀬𑀸𑀧𑀣𑀯𑀺𑀳𑀸𑀭𑁄, 𑀲𑁄 𑀘 𑀅𑀢𑁆𑀣𑀢𑁄 𑀞𑀸𑀦𑀦𑀺𑀲𑀚𑁆𑀚𑀸𑀤𑀺𑀆𑀓𑀸𑀭𑀧𑁆𑀧𑀯𑀢𑁆𑀢𑁄 𑀘𑀢𑀼𑀲𑀦𑁆𑀢𑀢𑀺𑀭𑀽𑀧𑀧𑁆𑀧𑀩𑀦𑁆𑀥𑁄 ¶ 𑀏𑀯. 𑀑𑀯𑀸𑀤𑀸𑀦𑀼𑀲𑀸𑀲𑀦𑀻𑀦𑀁 𑀏𑀓𑀸𑀦𑁂𑀓𑀯𑀸𑀭𑀸𑀤𑀺𑀯𑀺𑀲𑀺𑀝𑁆𑀞𑁄𑀬𑁂𑀯 𑀪𑁂𑀤𑁄, 𑀦 𑀧𑀦 𑀧𑀭𑀫𑀢𑁆𑀣𑀢𑁄 𑀢𑁂𑀲𑀁 𑀦𑀸𑀦𑀸𑀓𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑁋 ‘‘𑀧𑀭𑀫𑀢𑁆𑀣𑀢𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀲𑁂 𑀏𑀓𑁂 𑀏𑀓𑀝𑁆𑀞𑁂𑀢𑀺𑀆𑀤𑀻𑀲𑀼 𑀏𑀲𑁄 𑀏𑀓𑁄 𑀏𑀓𑀢𑁆𑀣𑁄𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀭𑀝𑁆𑀞𑀲𑁆𑀲 ¶ , 𑀭𑀝𑁆𑀞𑀢𑁄 𑀯𑀸 𑀮𑀤𑁆𑀥𑁄 𑀧𑀺𑀡𑁆𑀟𑁄 𑀭𑀝𑁆𑀞𑀧𑀺𑀡𑁆𑀟𑁄. 𑀢𑁂𑀦𑀸𑀳 𑁋 ‘‘𑀜𑀸𑀢𑀺𑀧𑀭𑀺𑀯𑀝𑁆𑀝𑀁 𑀧𑀳𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 ‘‘𑀅𑀫𑁆𑀳𑀸𑀓𑀫𑁂𑀢𑁂’’𑀢𑀺 𑀯𑀺𑀜𑁆𑀜𑀸𑀬𑀦𑁆𑀢𑀻𑀢𑀺 𑀜𑀸𑀢𑀻, 𑀧𑀺𑀢𑀸𑀫𑀳𑀧𑀺𑀢𑀼𑀧𑀼𑀢𑁆𑀢𑀸𑀤𑀺𑀯𑀲𑁂𑀦 𑀧𑀭𑀺𑀯𑀝𑁆𑀝𑀦𑀝𑁆𑀞𑁂𑀦 𑀧𑀭𑀺𑀯𑀝𑁆𑀝𑁄, 𑀜𑀸𑀢𑀺𑀬𑁂𑀯 𑀧𑀭𑀺𑀯𑀝𑁆𑀝𑁄 𑀜𑀸𑀢𑀺𑀧𑀭𑀺𑀯𑀝𑁆𑀝𑁄. 𑀣𑁂𑀬𑁆𑀬𑀧𑀭𑀺𑀪𑁄𑀕𑁄 𑀦𑀸𑀫 𑀅𑀦𑀭𑀳𑀲𑁆𑀲 𑀧𑀭𑀺𑀪𑁄𑀕𑁄. 𑀪𑀕𑀯𑀢𑀸 𑀳𑀺 𑀅𑀢𑁆𑀢𑀦𑁄 𑀲𑀸𑀲𑀦𑁂 𑀲𑀻𑀮𑀯𑀢𑁄 𑀧𑀘𑁆𑀘𑀬𑀸 𑀅𑀦𑀼𑀜𑁆𑀜𑀸𑀢𑀸, 𑀦 𑀤𑀼𑀲𑁆𑀲𑀻𑀮𑀲𑁆𑀲. 𑀤𑀸𑀬𑀓𑀸𑀦𑀫𑁆𑀧𑀺 𑀲𑀻𑀮𑀯𑀢𑁄 𑀏𑀯 𑀧𑀭𑀺𑀘𑁆𑀘𑀸𑀕𑁄, 𑀦 𑀤𑀼𑀲𑁆𑀲𑀻𑀮𑀲𑁆𑀲 𑀅𑀢𑁆𑀢𑀦𑁄 𑀓𑀸𑀭𑀸𑀦𑀁 𑀫𑀳𑀧𑁆𑀨𑀮𑀪𑀸𑀯𑀲𑁆𑀲 𑀧𑀘𑁆𑀘𑀸𑀲𑀻𑀲𑀦𑀢𑁄. 𑀇𑀢𑀺 𑀲𑀢𑁆𑀣𑀸𑀭𑀸 𑀅𑀦𑀦𑀼𑀜𑁆𑀜𑀸𑀢𑀢𑁆𑀢𑀸 𑀤𑀸𑀬𑀓𑁂𑀳𑀺 𑀘 𑀅𑀧𑀭𑀺𑀘𑁆𑀘𑀢𑁆𑀢𑀢𑁆𑀢𑀸 𑀲𑀗𑁆𑀖𑀫𑀚𑁆𑀛𑁂𑀧𑀺 𑀦𑀺𑀲𑀻𑀤𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀲𑁆𑀲 𑀤𑀼𑀲𑁆𑀲𑀻𑀮𑀲𑁆𑀲 𑀧𑀭𑀺𑀪𑁄𑀕𑁄 𑀣𑁂𑀬𑁆𑀬𑀸𑀬 𑀧𑀭𑀺𑀪𑁄𑀕𑁄 𑀣𑁂𑀬𑁆𑀬𑀧𑀭𑀺𑀪𑁄𑀕𑁄. 𑀇𑀡𑀯𑀲𑁂𑀦 𑀧𑀭𑀺𑀪𑁄𑀕𑁄 𑀇𑀡𑀧𑀭𑀺𑀪𑁄𑀕𑁄 𑀧𑀝𑀺𑀕𑁆𑀕𑀸𑀳𑀓𑀢𑁄 𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀬𑀸 𑀅𑀪𑀸𑀯𑀢𑁄 𑀇𑀡𑀁 𑀕𑀳𑁂𑀢𑁆𑀯𑀸 𑀧𑀭𑀺𑀪𑁄𑀕𑁄 𑀯𑀺𑀬𑀸𑀢𑀺 𑀅𑀢𑁆𑀣𑁄.

𑀤𑀸𑀢𑀩𑁆𑀩𑀝𑁆𑀞𑁂𑀦 𑀤𑀸𑀬𑀁, 𑀢𑀁 𑀆𑀤𑀺𑀬𑀦𑁆𑀢𑀻𑀢𑀺 𑀤𑀸𑀬𑀸𑀤𑀸, 𑀧𑀼𑀢𑁆𑀢𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁, 𑀢𑁂𑀲𑀁 𑀪𑀸𑀯𑁄 𑀤𑀸𑀬𑀚𑁆𑀚𑀁, 𑀤𑀸𑀬𑀚𑁆𑀚𑀯𑀲𑁂𑀦 𑀧𑀭𑀺𑀪𑁄𑀕𑁄 𑀤𑀸𑀬𑀚𑁆𑀚𑀧𑀭𑀺𑀪𑁄𑀕𑁄, 𑀧𑀼𑀢𑁆𑀢𑀪𑀸𑀯𑁂𑀦 𑀧𑀭𑀺𑀪𑁄𑀕𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁂𑀓𑁆𑀔𑀸 𑀳𑀺 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀑𑀭𑀲𑀧𑀼𑀢𑁆𑀢𑀸, 𑀢𑁂 𑀧𑀺𑀢𑀼 𑀲𑀦𑁆𑀢𑀓𑀸𑀦𑀁 𑀤𑀸𑀬𑀸𑀤𑀸 𑀳𑀼𑀢𑁆𑀯𑀸 𑀢𑁂 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺. 𑀓𑀺𑀁 𑀧𑀦 𑀢𑁂 𑀪𑀕𑀯𑀢𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀉𑀤𑀸𑀳𑀼 𑀕𑀺𑀳𑀻𑀦𑀦𑁆𑀢𑀺? 𑀕𑀺𑀳𑀻𑀳𑀺 𑀤𑀺𑀦𑁆𑀦𑀸𑀧𑀺 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀪𑀕𑀯𑀢𑁄 𑀲𑀦𑁆𑀢𑀓𑀸 𑀅𑀦𑀦𑀼𑀜𑁆𑀜𑀸𑀢𑁂𑀲𑀼 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀭𑀺𑀪𑁄𑀕𑀸𑀪𑀸𑀯𑀢𑁄, 𑀅𑀦𑀼𑀜𑁆𑀜𑀸𑀢𑁂𑀲𑀼𑀬𑁂𑀯 𑀘 𑀧𑀭𑀺𑀪𑁄𑀕𑀲𑀫𑁆𑀪𑀯𑀢𑁄. 𑀥𑀫𑁆𑀫𑀤𑀸𑀬𑀸𑀤𑀲𑀼𑀢𑁆𑀢𑀜𑁆𑀘𑁂𑀢𑁆𑀣 𑀲𑀸𑀥𑀓𑀁.

𑀯𑀻𑀢𑀭𑀸𑀕𑀸 𑀏𑀯 𑀢𑀡𑁆𑀳𑀸𑀬 𑀤𑀸𑀲𑀩𑁆𑀬𑀁 𑀅𑀢𑀻𑀢𑀢𑁆𑀢𑀸 𑀲𑀸𑀫𑀺𑀦𑁄 𑀳𑀼𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺 𑀆𑀳 𑁋 ‘‘𑀔𑀻𑀡𑀸𑀲𑀯𑀲𑁆𑀲 𑀧𑀭𑀺𑀪𑁄𑀕𑁄 𑀲𑀸𑀫𑀺𑀧𑀭𑀺𑀪𑁄𑀕𑁄 𑀦𑀸𑀫𑀸’’𑀢𑀺. 𑀅𑀯𑀻𑀢𑀭𑀸𑀕𑀸𑀦𑀜𑁆𑀳𑀺 𑀢𑀡𑁆𑀳𑀸𑀧𑀭𑀯𑀲𑀢𑀸𑀬 𑀧𑀘𑁆𑀘𑀬𑀧𑀭𑀺𑀪𑁄𑀕𑁂 𑀲𑀸𑀫𑀺𑀪𑀸𑀯𑁄 𑀦𑀢𑁆𑀣𑀺, 𑀢𑀤𑀪𑀸𑀯𑁂𑀦 𑀯𑀻𑀢𑀭𑀸𑀕𑀸𑀦𑀁 𑀢𑀢𑁆𑀣 𑀲𑀸𑀫𑀺𑀪𑀸𑀯𑁄 𑀬𑀣𑀸𑀭𑀼𑀘𑀺𑀧𑀭𑀺𑀪𑁄𑀕𑀲𑀫𑁆𑀪𑀯𑀢𑁄. 𑀢𑀣𑀸 𑀳𑀺 𑀢𑁂 𑀧𑀝𑀺𑀓𑀽𑀮𑀫𑁆𑀧𑀺 𑀅𑀧𑁆𑀧𑀝𑀺𑀓𑀽𑀮𑀸𑀓𑀸𑀭𑁂𑀦, 𑀅𑀧𑁆𑀧𑀝𑀺𑀓𑀽𑀮𑀫𑁆𑀧𑀺 𑀧𑀝𑀺𑀓𑀽𑀮𑀸𑀓𑀸𑀭𑁂𑀦, 𑀢𑀤𑀼𑀪𑀬𑀫𑁆𑀧𑀺 𑀯𑀚𑁆𑀚𑁂𑀢𑁆𑀯𑀸 𑀅𑀚𑁆𑀛𑀼𑀧𑁂𑀓𑁆𑀔𑀦𑀸𑀓𑀸𑀭𑁂𑀦 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀤𑀸𑀬𑀓𑀸𑀦𑀜𑁆𑀘 𑀫𑀦𑁄𑀭𑀣𑀁 𑀧𑀽𑀭𑁂𑀦𑁆𑀢𑀺. 𑀬𑁄 𑀧𑀦𑀸𑀬𑀁 𑀲𑀻𑀮𑀯𑀢𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁄, 𑀲𑁄 𑀇𑀡𑀧𑀭𑀺𑀪𑁄𑀕𑀲𑁆𑀲 𑀧𑀘𑁆𑀘𑀦𑀻𑀓𑀢𑁆𑀢𑀸 𑀆𑀡𑀡𑁆𑀬𑀧𑀭𑀺𑀪𑁄𑀕𑁄 𑀦𑀸𑀫 𑀳𑁄𑀢𑀺. 𑀬𑀣𑀸 𑀳𑀺 𑀇𑀡𑀸𑀬𑀺𑀓𑁄 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀇𑀘𑁆𑀙𑀺𑀢𑀁 𑀤𑁂𑀲𑀁 𑀕𑀦𑁆𑀢𑀼𑀁 𑀦 𑀮𑀪𑀢𑀺, 𑀏𑀯𑀁 𑀇𑀡𑀧𑀭𑀺𑀪𑁄𑀕𑀬𑀼𑀢𑁆𑀢𑁄 𑀮𑁄𑀓𑀢𑁄 ¶ 𑀦𑀺𑀲𑁆𑀲𑀭𑀺𑀢𑀼𑀁 𑀦 𑀮𑀪𑀢𑀻𑀢𑀺 𑀢𑀧𑁆𑀧𑀝𑀺𑀧𑀓𑁆𑀔𑀢𑁆𑀢𑀸 𑀲𑀻𑀮𑀯𑀢𑁄 𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁄 ‘‘𑀆𑀡𑀡𑁆𑀬𑀧𑀭𑀺𑀪𑁄𑀕𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀘𑀢𑀼𑀧𑀭𑀺𑀪𑁄𑀕𑀯𑀺𑀦𑀺𑀫𑀼𑀢𑁆𑀢𑁄 ¶ 𑀯𑀺𑀲𑀼𑀁𑀬𑁂𑀯𑀸𑀬𑀁 𑀧𑀭𑀺𑀪𑁄𑀕𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀇𑀥 𑀯𑀺𑀲𑀼𑀁 𑀦 𑀯𑀼𑀢𑁆𑀢𑁄, 𑀤𑀸𑀬𑀚𑁆𑀚𑀧𑀭𑀺𑀪𑁄𑀕𑁂𑀬𑁂𑀯 𑀯𑀸 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. 𑀲𑀻𑀮𑀯𑀸𑀧𑀺 𑀳𑀺 𑀇𑀫𑀸𑀬 𑀲𑀺𑀓𑁆𑀔𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 ‘‘𑀲𑁂𑀔𑁄’’𑀢𑁆𑀯𑁂𑀯 𑀯𑀼𑀘𑁆𑀘𑀢𑀺. 𑀇𑀫𑁂𑀲𑀼 𑀧𑀭𑀺𑀪𑁄𑀕𑁂𑀲𑀼 𑀲𑀸𑀫𑀺𑀧𑀭𑀺𑀪𑁄𑀕𑁄 𑀤𑀸𑀬𑀚𑁆𑀚𑀧𑀭𑀺𑀪𑁄𑀕𑁄 𑀘 𑀅𑀭𑀺𑀬𑀸𑀦𑀁 𑀧𑀼𑀣𑀼𑀚𑁆𑀚𑀦𑀸𑀦𑀜𑁆𑀘 𑀯𑀝𑁆𑀝𑀢𑀺, 𑀇𑀡𑀧𑀭𑀺𑀪𑁄𑀕𑁄 𑀦 𑀯𑀝𑁆𑀝𑀢𑀺. 𑀣𑁂𑀬𑁆𑀬𑀧𑀭𑀺𑀪𑁄𑀕𑁂 𑀓𑀣𑀸𑀬𑁂𑀯 𑀦𑀢𑁆𑀣𑀺. 𑀓𑀣𑀁 𑀧𑀦𑁂𑀢𑁆𑀣 𑀲𑀸𑀫𑀺𑀧𑀭𑀺𑀪𑁄𑀕𑁄 𑀤𑀸𑀬𑀚𑁆𑀚𑀧𑀭𑀺𑀪𑁄𑀕𑁄 𑀘 𑀧𑀼𑀣𑀼𑀚𑁆𑀚𑀦𑀸𑀦𑀁 𑀲𑀫𑁆𑀪𑀯𑀢𑀺? 𑀉𑀧𑀘𑀸𑀭𑀯𑀲𑁂𑀦. 𑀬𑁄 𑀳𑀺 𑀧𑀼𑀣𑀼𑀚𑁆𑀚𑀦𑀲𑁆𑀲𑀧𑀺 𑀲𑀮𑁆𑀮𑁂𑀔𑀧𑁆𑀧𑀝𑀺𑀧𑀢𑁆𑀢𑀺𑀬𑀁 𑀞𑀺𑀢𑀲𑁆𑀲 𑀧𑀘𑁆𑀘𑀬𑀕𑁂𑀥𑀁 𑀧𑀳𑀸𑀬 𑀢𑀢𑁆𑀣 𑀅𑀦𑀼𑀧𑀮𑀺𑀢𑁆𑀢𑁂𑀦 𑀘𑀺𑀢𑁆𑀢𑁂𑀦 𑀧𑀭𑀺𑀪𑁄𑀕𑁄, 𑀲𑁄 𑀲𑀸𑀫𑀺𑀧𑀭𑀺𑀪𑁄𑀕𑁄 𑀯𑀺𑀬 𑀳𑁄𑀢𑀺. 𑀲𑀻𑀮𑀯𑀢𑁄 𑀧𑀦 𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑁄 𑀤𑀸𑀬𑀚𑁆𑀚𑀧𑀭𑀺𑀪𑁄𑀕𑁄 𑀯𑀺𑀬 𑀳𑁄𑀢𑀺 𑀤𑀸𑀬𑀓𑀸𑀦𑀁 𑀫𑀦𑁄𑀭𑀣𑀲𑁆𑀲 𑀅𑀯𑀺𑀭𑀸𑀥𑀦𑀢𑁄. 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀲𑁆𑀲 𑀧𑀭𑀺𑀪𑁄𑀕𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺 𑀢𑀲𑁆𑀲 𑀲𑁂𑀓𑁆𑀔𑀲𑀗𑁆𑀕𑀳𑀢𑁄. 𑀲𑁂𑀓𑁆𑀔𑀲𑀼𑀢𑁆𑀢𑀁 (𑀲𑀁. 𑀦𑀺. 𑁫.𑁧𑁩) 𑀳𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀓𑀁.

𑀇𑀫𑀲𑁆𑀲 𑀪𑀺𑀓𑁆𑀔𑀼𑀦𑁄𑀢𑀺 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁆𑀧𑀺 𑀓𑀸𑀮𑀁 𑀫𑁂𑀢𑁆𑀢𑀘𑀺𑀢𑁆𑀢𑀁 𑀆𑀲𑁂𑀯𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄. 𑀅𑀫𑁄𑀖𑁄 𑀭𑀝𑁆𑀞𑀧𑀺𑀡𑁆𑀟𑀧𑀭𑀺𑀪𑁄𑀕𑁄𑀢𑀺 ‘‘𑀅𑀬𑀁 𑀧𑀩𑁆𑀩𑀚𑀺𑀢𑁄 𑀲𑀫𑀡𑁄 𑀪𑀺𑀓𑁆𑀔𑀽𑀢𑀺 𑀆𑀫𑀺𑀲𑀁 𑀤𑁂𑀦𑁆𑀢𑀸𑀦𑀁 𑀢𑀸𑀬 𑀫𑁂𑀢𑁆𑀢𑀸𑀲𑁂𑀯𑀦𑀸𑀬 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀤𑁄𑀲𑀫𑀮𑀲𑁆𑀲 𑀯𑀸 𑀢𑀤𑁂𑀓𑀝𑁆𑀞𑀸𑀦𑀜𑁆𑀘 𑀧𑀸𑀧𑀥𑀫𑁆𑀫𑀸𑀦𑀁 𑀧𑀩𑁆𑀩𑀸𑀚𑀦𑀢𑁄 𑀯𑀽𑀧𑀲𑀫𑀦𑀢𑁄 𑀲𑀁𑀲𑀸𑀭𑁂 𑀘 𑀪𑀬𑀲𑁆𑀲 𑀲𑀫𑁆𑀫𑀸𑀯 𑀇𑀓𑁆𑀔𑀡𑀢𑁄 𑀅𑀚𑁆𑀛𑀸𑀲𑀬𑀲𑁆𑀲 𑀅𑀯𑀺𑀲𑀁𑀯𑀸𑀤𑀦𑁂𑀦𑀲𑁆𑀲 𑀅𑀫𑁄𑀖𑁄 𑀭𑀝𑁆𑀞𑀧𑀺𑀡𑁆𑀟𑀧𑀭𑀺𑀪𑁄𑀕𑁄. 𑀫𑀳𑀝𑁆𑀞𑀺𑀬𑀦𑁆𑀢𑀺 𑀫𑀳𑀢𑁆𑀣𑀺𑀓𑀁 𑀫𑀳𑀸𑀧𑀬𑁄𑀚𑀦𑀁. 𑀫𑀳𑀧𑁆𑀨𑀮𑀦𑁆𑀢𑀺 𑀯𑀺𑀧𑀼𑀮𑀧𑁆𑀨𑀮𑀁. 𑀫𑀳𑀸𑀦𑀺𑀲𑀁𑀲𑀦𑁆𑀢𑀺 𑀫𑀳𑀸𑀦𑀺𑀲𑁆𑀲𑀦𑁆𑀤𑀧𑁆𑀨𑀮𑀁. 𑀫𑀳𑀸𑀚𑀼𑀢𑀺𑀓𑀦𑁆𑀢𑀺 𑀫𑀳𑀸𑀦𑀼𑀪𑀸𑀯𑀁. 𑀫𑀳𑀸𑀯𑀺𑀧𑁆𑀨𑀸𑀭𑀦𑁆𑀢𑀺 𑀫𑀳𑀸𑀯𑀺𑀢𑁆𑀣𑀸𑀭𑀁. 𑀏𑀢𑁆𑀣 𑀘 𑀧𑀞𑀫𑀁 𑀓𑀸𑀭𑀡𑀁 𑀫𑁂𑀢𑁆𑀢𑀸𑀲𑁂𑀯𑀦𑀸𑀬 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀸𑀫𑀺𑀆𑀤𑀺𑀪𑀸𑀯𑁂𑀦 𑀭𑀝𑁆𑀞𑀧𑀺𑀡𑁆𑀟𑀧𑀭𑀺𑀪𑁄𑀕𑀸𑀭𑀳𑀢𑀸, 𑀤𑀼𑀢𑀺𑀬𑀁 𑀧𑀭𑁂𑀳𑀺 𑀤𑀺𑀦𑁆𑀦𑀲𑁆𑀲 𑀤𑀸𑀦𑀲𑁆𑀲 𑀫𑀳𑀝𑁆𑀞𑀺𑀬𑀪𑀸𑀯𑀓𑀭𑀡𑀁. 𑀓𑁄 𑀧𑀦 𑀯𑀸𑀤𑁄𑀢𑀺 𑀫𑁂𑀢𑁆𑀢𑀸𑀬 𑀆𑀲𑁂𑀯𑀦𑀫𑀢𑁆𑀢𑀫𑁆𑀧𑀺 𑀏𑀯𑀁𑀫𑀳𑀸𑀦𑀼𑀪𑀸𑀯𑀁, 𑀓𑁄 𑀧𑀦 𑀯𑀸𑀤𑁄 𑀩𑀳𑀼𑀮𑀻𑀓𑀸𑀭𑁂, 𑀏𑀢𑁆𑀣 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻’’𑀢𑀺 𑀅𑀢𑁆𑀣𑁄.

𑁫𑁪. 𑀘𑀢𑀼𑀢𑁆𑀣𑁂 𑀉𑀧𑁆𑀧𑀸𑀤𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀏𑀢𑁆𑀣 𑀪𑀸𑀯𑀦𑀸𑀲𑀤𑁆𑀤𑀲𑁆𑀲 𑀉𑀧𑁆𑀧𑀸𑀤𑀦𑀯𑀟𑁆𑀠𑀦𑀢𑁆𑀣𑀢𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸 𑀏𑀯.

𑁫𑁫. 𑀧𑀜𑁆𑀘𑀫𑁂 ¶ 𑀇𑀫𑁂𑀲𑀼 𑀤𑁆𑀯𑀻𑀲𑀽𑀢𑀺 𑀘𑀢𑀼𑀢𑁆𑀣𑀧𑀜𑁆𑀘𑀫𑁂𑀲𑀼. ‘‘𑀢𑀢𑀺𑀬𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀢𑀣𑀸 𑀯𑁂𑀤𑀺𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀬𑁄 𑀳𑀺 𑀆𑀲𑁂𑀯𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀆𑀲𑁂𑀯𑀦𑀸𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑀸𑀦𑀁 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑀫𑀸𑀳. 𑀬𑀤𑀺 𑀏𑀯𑀁 𑀲𑀼𑀢𑁆𑀢𑀦𑁆𑀢𑀲𑁆𑀲 𑀤𑁂𑀲𑀦𑀸 𑀓𑀣𑀦𑁆𑀢𑀺 𑀆𑀳 𑁋 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀧𑀦𑀸’’𑀢𑀺𑀆𑀤𑀺. 𑀬𑀸𑀬 𑀥𑀫𑁆𑀫𑀥𑀸𑀢𑀼𑀬𑀸𑀢𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑀸𑀳. 𑀢𑁂𑀦 𑀳𑀺 𑀥𑀫𑁆𑀫𑀸𑀦𑀁 𑀆𑀓𑀸𑀭𑀪𑁂𑀤𑀁 𑀜𑀢𑁆𑀯𑀸 𑀢𑀤𑀦𑀼𑀭𑀽𑀧𑀁 𑀏𑀓𑀫𑁆𑀧𑀺 𑀥𑀫𑁆𑀫𑀁 𑀢𑀣𑀸 𑀯𑀺𑀪𑀚𑀺𑀢𑁆𑀯𑀸 𑀪𑀕𑀯𑀸 𑀤𑀲𑁆𑀲𑁂𑀢𑀺. 𑀢𑀻𑀳𑀺 𑀓𑁄𑀝𑁆𑀞𑀸𑀲𑁂𑀳𑀻𑀢𑀺 ¶ 𑀆𑀲𑁂𑀯𑀦𑀸𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑀪𑀸𑀕𑁂𑀳𑀺. 𑀫𑁂𑀢𑁆𑀢𑀸 𑀳𑀺 𑀲𑀩𑁆𑀩𑀯𑀢𑁆𑀣𑀼𑀦𑁄 𑀫𑁂𑀢𑁆𑀢𑀸𑀬𑀦𑀯𑀲𑁂𑀦 𑀆𑀦𑀻𑀢𑀸 𑀲𑁂𑀯𑀦𑀸 𑀆𑀲𑁂𑀯𑀦𑀸, 𑀢𑀲𑁆𑀲𑀸 𑀯𑀟𑁆𑀠𑀦𑀸 𑀪𑀸𑀯𑀦𑀸, 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀫𑀦𑀲𑀺 𑀞𑀧𑀦𑀁 𑀫𑀦𑀲𑀺𑀓𑀸𑀭𑁄.

𑁫𑁬. 𑀙𑀝𑁆𑀞𑁂 𑀅𑀦𑀺𑀬𑀫𑀺𑀢𑀯𑀘𑀦𑀁 ‘‘𑀇𑀫𑁂 𑀦𑀸𑀫𑀸’’𑀢𑀺 𑀦𑀺𑀬𑀫𑁂𑀢𑁆𑀯𑀸 𑀅𑀯𑀼𑀢𑁆𑀢𑀢𑁆𑀢𑀸. 𑀦𑀺𑀬𑀫𑀺𑀢𑀯𑀘𑀦𑀁 ‘‘𑀅𑀓𑀼𑀲𑀮𑀸’’𑀢𑀺 𑀲𑀭𑀽𑀧𑁂𑀦𑁂𑀯 𑀯𑀼𑀢𑁆𑀢𑀢𑁆𑀢𑀸. 𑀅𑀲𑁂𑀲𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀸 𑀳𑁄𑀦𑁆𑀢𑀺 𑀅𑀧𑁆𑀧𑀓𑀲𑁆𑀲𑀧𑀺 𑀅𑀓𑀼𑀲𑀮𑀪𑀸𑀕𑀲𑁆𑀲 𑀅𑀕𑁆𑀕𑀳𑀺𑀢𑀲𑁆𑀲 𑀅𑀪𑀸𑀯𑀢𑁄. 𑀅𑀓𑀼𑀲𑀮𑀁 𑀪𑀚𑀦𑁆𑀢𑀻𑀢𑀺 𑀅𑀓𑀼𑀲𑀮𑀪𑀸𑀕𑀺𑀬𑀸. 𑀅𑀓𑀼𑀲𑀮𑀧𑀓𑁆𑀔𑁂 𑀪𑀯𑀸𑀢𑀺 𑀅𑀓𑀼𑀲𑀮𑀧𑀓𑁆𑀔𑀺𑀓𑀸. 𑀢𑁂𑀦𑀸𑀳 𑁋 ‘‘𑀅𑀓𑀼𑀲𑀮𑀸𑀬𑁂𑀯𑀸’’𑀢𑀺𑀆𑀤𑀺. 𑀧𑀞𑀫𑀢𑀭𑀁 𑀕𑀘𑁆𑀙𑀢𑀻𑀢𑀺 𑀧𑀞𑀫𑀢𑀭𑀁 𑀧𑀯𑀢𑁆𑀢𑀢𑀺, 𑀧𑀞𑀫𑁄 𑀧𑀥𑀸𑀦𑁄 𑀳𑀼𑀢𑁆𑀯𑀸 𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀏𑀓𑀼𑀧𑁆𑀧𑀸𑀤𑀸𑀤𑀺𑀯𑀲𑁂𑀦 𑀳𑀺 𑀏𑀓𑀚𑁆𑀛𑀁 𑀧𑀯𑀢𑁆𑀢𑀫𑀸𑀦𑁂𑀲𑀼 𑀘𑀢𑀽𑀲𑀼 𑀅𑀭𑀽𑀧𑀓𑁆𑀔𑀦𑁆𑀥𑁂𑀲𑀼 𑀅𑀬𑀫𑁂𑀯 𑀧𑀞𑀫𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀤𑀁 𑀦𑀢𑁆𑀣𑀺, 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑁂𑀲𑀼 𑀯𑀺𑀬 𑀧𑀦 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀲𑁆𑀲, 𑀮𑁄𑀓𑀺𑀬𑀥𑀫𑁆𑀫𑁂𑀲𑀼 𑀫𑀦𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀼𑀭𑁂𑀢𑀭𑀲𑁆𑀲 𑀪𑀸𑀯𑁄 𑀲𑀸𑀢𑀺𑀲𑀬𑁄𑀢𑀺 ‘‘𑀲𑀩𑁆𑀩𑁂𑀢𑁂 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀅𑀪𑀺𑀥𑀫𑁆𑀫𑁂𑀧𑀺 (𑀥. 𑀲. 𑁧) ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺 𑀘𑀺𑀢𑁆𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀚𑁂𑀝𑁆𑀞𑀁 𑀓𑀢𑁆𑀯𑀸 𑀤𑁂𑀲𑀦𑀸 𑀧𑀯𑀢𑁆𑀢𑀸. 𑀲𑀼𑀢𑁆𑀢𑁂𑀲𑀼𑀧𑀺 𑀯𑀼𑀢𑁆𑀢𑀁 𑁋 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸 (𑀥. 𑀧. 𑁧, 𑁨), 𑀙𑀤𑁆𑀯𑀸𑀭𑀸𑀥𑀺𑀧𑀢𑀺 𑀭𑀸𑀚𑀸’’𑀢𑀺 (𑀥. 𑀧. 𑀅𑀝𑁆𑀞. 𑁨.𑀩𑀼𑀤𑁆𑀥𑀯𑀕𑁆𑀕𑁄, 𑀏𑀭𑀓𑀧𑀢𑁆𑀢𑀦𑀸𑀕𑀭𑀸𑀚𑀯𑀢𑁆𑀣𑀼). 𑀢𑁂𑀦𑀸𑀳 𑁋 ‘‘𑀏𑀢𑁂 𑀳𑀻’’𑀢𑀺𑀆𑀤𑀺. 𑀢𑁂𑀲𑀁 𑀫𑀦𑁄 𑀉𑀧𑁆𑀧𑀸𑀤𑀓𑁄𑀢𑀺 𑀘 𑀬𑀤𑀕𑁆𑀕𑁂𑀦 𑀫𑀦𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀚𑁂𑀝𑁆𑀞𑀓𑁄 𑀳𑀼𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀢𑀤𑀕𑁆𑀕𑁂𑀦 𑀢𑁂 𑀅𑀢𑁆𑀢𑀸𑀦𑀁 𑀅𑀦𑀼𑀯𑀢𑁆𑀢𑀸𑀧𑁂𑀦𑁆𑀢𑁄 𑀢𑁂 𑀢𑀣𑀸 𑀉𑀧𑁆𑀧𑀸𑀤𑁂𑀦𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀘𑀺𑀢𑁆𑀢𑀲𑁆𑀲 𑀚𑁂𑀝𑁆𑀞𑀓𑀪𑀸𑀯𑀫𑁂𑀯 𑀲𑀦𑁆𑀥𑀸𑀬 𑀭𑀸𑀚𑀕𑀫𑀦𑀜𑁆𑀜𑀸𑀬𑁂𑀦 𑀲𑀳𑀼𑀧𑁆𑀧𑀢𑁆𑀢𑀺𑀧𑀺 𑀧𑀞𑀫𑀼𑀧𑁆𑀧𑀢𑁆𑀢𑀺 𑀯𑀺𑀬 𑀓𑀢𑁆𑀯𑀸 𑀯𑀼𑀢𑁆𑀢𑀸𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄. 𑀅𑀦𑁆𑀯𑀤𑁂𑀯𑀸𑀢𑀺 𑀏𑀢𑁂𑀦𑁂𑀯 𑀘𑀺𑀢𑁆𑀢𑀲𑁆𑀲 𑀔𑀡𑀯𑀲𑁂𑀦 𑀧𑀞𑀫𑀼𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑁄 𑀤𑀻𑀧𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀢𑁂𑀦𑁂𑀯𑀸𑀳 𑁋 ‘‘𑀏𑀓𑀢𑁄𑀬𑁂𑀯𑀸𑀢𑀺 𑀅𑀢𑁆𑀣𑁄’’𑀢𑀺.

𑁫𑁭. 𑀲𑀢𑁆𑀢𑀫𑁂 ¶ 𑀘𑀢𑀼𑀪𑀽𑀫𑀓𑀸𑀧𑀺 𑀓𑀼𑀲𑀮𑀸 𑀥𑀫𑁆𑀫𑀸 𑀓𑀣𑀺𑀢𑀸𑀢𑀺 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀢𑁄 𑀯𑀼𑀢𑁆𑀢𑀁.

𑁫𑁮. 𑀅𑀝𑁆𑀞𑀫𑁂 𑀇𑀤𑀦𑁆𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀦𑀺𑀤𑁆𑀤𑁂𑀲𑁄, 𑀦𑀺𑀧𑀸𑀢𑀧𑀤𑀁 𑀯𑀸 𑀏𑀢𑀁 ‘‘𑀬𑀤𑀺𑀤’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬𑀸𑀢𑀺 𑀆𑀳 𑁋 ‘‘𑀅𑀬𑀁 𑀧𑀫𑀸𑀤𑁄𑀢𑀺 𑀅𑀢𑁆𑀣𑁄’’𑀢𑀺. 𑀧𑀫𑀚𑁆𑀚𑀦𑀸𑀓𑀸𑀭𑁄𑀢𑀺 𑀧𑀫𑀸𑀤𑀸𑀧𑀢𑁆𑀢𑀺. 𑀘𑀺𑀢𑁆𑀢𑀲𑁆𑀲 𑀯𑁄𑀲𑁆𑀲𑀕𑁆𑀕𑁄𑀢𑀺 𑀇𑀫𑁂𑀲𑀼 𑀏𑀢𑁆𑀢𑀓𑁂𑀲𑀼 𑀞𑀸𑀦𑁂𑀲𑀼 𑀲𑀢𑀺𑀬𑀸 𑀅𑀦𑀺𑀕𑁆𑀕𑀡𑁆𑀳𑀺𑀢𑁆𑀯𑀸 𑀘𑀺𑀢𑁆𑀢𑀲𑁆𑀲 𑀯𑁄𑀲𑁆𑀲𑀚𑁆𑀚𑀦𑀁 𑀲𑀢𑀺𑀯𑀺𑀭𑀳𑁄. 𑀯𑁄𑀲𑁆𑀲𑀕𑁆𑀕𑀸𑀦𑀼𑀧𑁆𑀧𑀤𑀸𑀦𑀦𑁆𑀢𑀺 𑀯𑁄𑀲𑁆𑀲𑀕𑁆𑀕𑀲𑁆𑀲 𑀅𑀦𑀼 𑀅𑀦𑀼 𑀧𑀤𑀸𑀦𑀁 𑀧𑀼𑀦𑀧𑁆𑀧𑀼𑀦𑀁 𑀯𑀺𑀲𑁆𑀲𑀚𑁆𑀚𑀦𑀁. 𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀢𑀸𑀢𑀺 𑀏𑀢𑁂𑀲𑀁 𑀤𑀸𑀦𑀸𑀤𑀻𑀦𑀁 𑀓𑀼𑀲𑀮𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀦𑁂 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀯𑀸 𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸. 𑀲𑀢𑀢𑀪𑀸𑀯𑁄 𑀲𑀸𑀢𑀘𑁆𑀘𑀁, 𑀲𑀸𑀢𑀘𑁆𑀘𑁂𑀦 𑀓𑀺𑀭𑀺𑀬𑀸 𑀲𑀸𑀢𑀘𑁆𑀘𑀓𑀺𑀭𑀺𑀬𑀸, 𑀲𑀸𑀬𑁂𑀯 𑀲𑀸𑀢𑀘𑁆𑀘𑀓𑀺𑀭𑀺𑀬𑀢𑀸, 𑀦 𑀲𑀸𑀢𑀘𑁆𑀘𑀓𑀺𑀭𑀺𑀬𑀢𑀸 𑀅𑀲𑀸𑀢𑀘𑁆𑀘𑀓𑀺𑀭𑀺𑀬𑀢𑀸. 𑀅𑀦𑀝𑁆𑀞𑀺𑀢𑀓𑀺𑀭𑀺𑀬𑀢𑀸𑀢𑀺 ¶ 𑀅𑀦𑀺𑀝𑁆𑀞𑀺𑀢𑀓𑀺𑀭𑀺𑀬𑀢𑀸 𑀦𑀺𑀭𑀦𑁆𑀢𑀭𑀁 𑀦 𑀅𑀦𑀼𑀝𑁆𑀞𑀺𑀢𑀓𑀺𑀭𑀺𑀬𑀢𑀸 𑀘. 𑀑𑀮𑀻𑀦𑀯𑀼𑀢𑁆𑀢𑀺𑀢𑀸𑀢𑀺 𑀦𑀺𑀭𑀦𑁆𑀢𑀭𑀓𑀭𑀡𑀲𑀗𑁆𑀔𑀸𑀢𑀲𑁆𑀲 𑀯𑀺𑀧𑁆𑀨𑀸𑀭𑀲𑁆𑀲 𑀅𑀪𑀸𑀯𑁂𑀦 𑀑𑀮𑀻𑀦𑀯𑀼𑀢𑁆𑀢𑀺𑀢𑀸. 𑀦𑀺𑀓𑁆𑀔𑀺𑀢𑁆𑀢𑀙𑀦𑁆𑀤𑀢𑀸𑀢𑀺 𑀓𑀼𑀲𑀮𑀓𑀺𑀭𑀺𑀬𑀸𑀬 𑀯𑀻𑀭𑀺𑀬𑀙𑀦𑁆𑀤𑀲𑁆𑀲 𑀦𑀺𑀓𑁆𑀔𑀺𑀢𑁆𑀢𑀪𑀸𑀯𑁄. 𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑀢𑀸𑀢𑀺 𑀯𑀻𑀭𑀺𑀬𑀥𑀼𑀭𑀲𑁆𑀲 𑀑𑀭𑁄𑀧𑀦𑀁, 𑀑𑀲𑀓𑁆𑀓𑀺𑀢𑀫𑀸𑀦𑀲𑀢𑀸𑀢𑀺 𑀅𑀢𑁆𑀣𑁄. 𑀅𑀦𑀥𑀺𑀝𑁆𑀞𑀸𑀦𑀦𑁆𑀢𑀺 𑀓𑀼𑀲𑀮𑀓𑀭𑀡𑁂 𑀅𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑁄. 𑀅𑀦𑀦𑀼𑀬𑁄𑀕𑁄𑀢𑀺 𑀅𑀦𑀦𑀼𑀬𑀼𑀜𑁆𑀚𑀦𑀁. 𑀓𑀼𑀲𑀮𑀥𑀫𑁆𑀫𑁂𑀲𑀼 𑀆𑀲𑁂𑀯𑀦𑀸𑀤𑀻𑀦𑀁 𑀅𑀪𑀸𑀯𑁄 𑀅𑀦𑀸𑀲𑁂𑀯𑀦𑀸𑀤𑀬𑁄. 𑀧𑀫𑀸𑀤𑁄𑀢𑀺 𑀲𑀭𑀽𑀧𑀦𑀺𑀤𑁆𑀤𑁂𑀲𑁄. 𑀧𑀫𑀚𑁆𑀚𑀦𑀸𑀢𑀺 𑀆𑀓𑀸𑀭𑀦𑀺𑀤𑁆𑀤𑁂𑀲𑁄. 𑀧𑀫𑀚𑁆𑀚𑀺𑀢𑀢𑁆𑀢𑀦𑁆𑀢𑀺 𑀪𑀸𑀯𑀦𑀺𑀤𑁆𑀤𑁂𑀲𑁄. 𑀧𑀭𑀺𑀳𑀸𑀬𑀦𑁆𑀢𑀻𑀢𑀺 𑀇𑀫𑀺𑀦𑀸 𑀧𑀫𑀸𑀤𑀲𑁆𑀲 𑀲𑀸𑀯𑀚𑁆𑀚𑀢𑀁 𑀤𑀲𑁆𑀲𑁂𑀢𑀺. 𑀢𑀬𑀺𑀤𑀁 𑀮𑁄𑀓𑀺𑀬𑀸𑀦𑀁 𑀯𑀲𑁂𑀦, 𑀦 𑀮𑁄𑀓𑀼𑀢𑁆𑀢𑀭𑀸𑀦𑀦𑁆𑀢𑀺 𑀆𑀳 𑁋 ‘‘𑀉𑀧𑁆𑀧𑀦𑁆𑀦𑀸…𑀧𑁂… 𑀇𑀤’’𑀦𑁆𑀢𑀺𑀆𑀤𑀺.

𑁫𑁯. 𑀦𑀯𑀫𑁂 𑀦 𑀧𑀫𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀅𑀧𑁆𑀧𑀫𑀸𑀤𑁄, 𑀧𑀫𑀸𑀤𑀲𑁆𑀲 𑀧𑀝𑀺𑀧𑀓𑁆𑀔𑁄 𑀲𑀢𑀺𑀬𑀸 𑀅𑀯𑀺𑀧𑁆𑀧𑀯𑀸𑀲𑁄. 𑀅𑀢𑁆𑀣𑀢𑁄 𑀦𑀺𑀘𑁆𑀘𑀁 𑀉𑀧𑀝𑁆𑀞𑀺𑀢𑀸𑀬 𑀲𑀢𑀺𑀬𑀸 𑀏𑀢𑀁 𑀦𑀸𑀫𑀁. 𑀧𑀫𑀸𑀤𑁄 𑀧𑀦 𑀲𑀢𑀺𑀬𑀸 𑀲𑀢𑀺𑀲𑀫𑁆𑀧𑀚𑀜𑁆𑀜𑀲𑁆𑀲 𑀯𑀸 𑀧𑀝𑀺𑀧𑀓𑁆𑀔𑀪𑀽𑀢𑁄 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦𑀸𑀳 𑁋 ‘‘𑀧𑀫𑀸𑀤𑀲𑁆𑀲 𑀧𑀝𑀺𑀧𑀓𑁆𑀔𑀯𑀲𑁂𑀦 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺.

𑁬𑁦. 𑀤𑀲𑀫𑁂 𑀓𑀼𑀘𑁆𑀙𑀺𑀢𑀁 𑀲𑀻𑀤𑀢𑀻𑀢𑀺 𑀓𑀼𑀲𑀻𑀢𑁄 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸, 𑀢𑀲𑁆𑀲 𑀪𑀸𑀯𑁄 𑀓𑁄𑀲𑀚𑁆𑀚𑀁, 𑀆𑀮𑀲𑀺𑀬𑀦𑁆𑀢𑀺 𑀅𑀢𑁆𑀣𑁄.

𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀯𑀻𑀭𑀺𑀬𑀸𑀭𑀫𑁆𑀪𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸

𑁬𑁧. 𑀲𑀢𑁆𑀢𑀫𑀲𑁆𑀲 ¶ ¶ 𑀧𑀞𑀫𑁂 𑀯𑀻𑀭𑀸𑀦𑀁 𑀓𑀫𑁆𑀫𑀦𑁆𑀢𑀺 𑀯𑀻𑀭𑀺𑀬𑀁, 𑀯𑀺𑀥𑀺𑀦𑀸 𑀯𑀸 𑀈𑀭𑀬𑀺𑀢𑀩𑁆𑀩𑀁 𑀧𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀯𑀻𑀭𑀺𑀬𑀁, 𑀢𑀤𑁂𑀯 𑀓𑀼𑀲𑀮𑀓𑀺𑀭𑀺𑀬𑀸𑀬 𑀧𑀥𑀸𑀦𑀝𑁆𑀞𑁂𑀦 𑀆𑀭𑀫𑁆𑀪𑁄 𑀯𑀻𑀭𑀺𑀬𑀸𑀭𑀫𑁆𑀪𑁄. 𑀆𑀭𑀤𑁆𑀥𑀯𑀻𑀭𑀺𑀬𑀢𑀸 𑀧𑀕𑁆𑀕𑀳𑀺𑀢𑀯𑀻𑀭𑀺𑀬𑀢𑀸 𑀧𑀭𑀺𑀧𑀼𑀡𑁆𑀡𑀯𑀻𑀭𑀺𑀬𑀢𑀸𑀢𑀺 𑀧𑀘𑁆𑀘𑁂𑀓𑀁 𑀯𑀻𑀭𑀺𑀬𑀢𑀸𑀲𑀤𑁆𑀤𑁄 𑀬𑁄𑀚𑁂𑀢𑀩𑁆𑀩𑁄.

𑁬𑁨. 𑀤𑀼𑀢𑀺𑀬𑁂 𑀫𑀳𑀢𑀻 𑀇𑀘𑁆𑀙𑀸 𑀏𑀢𑀲𑁆𑀲𑀸𑀢𑀺 𑀫𑀳𑀺𑀘𑁆𑀙𑁄, 𑀢𑀲𑁆𑀲 𑀪𑀸𑀯𑁄 𑀫𑀳𑀺𑀘𑁆𑀙𑀢𑀸. 𑀫𑀳𑀸𑀯𑀺𑀲𑀬𑁄 𑀮𑁄𑀪𑁄 𑀫𑀳𑀸𑀮𑁄𑀪𑁄 𑀫𑀳𑀦𑁆𑀢𑀸𑀦𑀁 𑀯𑀢𑁆𑀣𑀽𑀦𑀁 𑀩𑀳𑀽𑀦𑀜𑁆𑀘 𑀅𑀪𑀺𑀕𑀺𑀚𑁆𑀛𑀦𑀢𑁄. 𑀇𑀢𑀭𑀻𑀢𑀭𑀸𑀢𑀺𑀆𑀤𑀺𑀦𑀸 𑀧𑀩𑁆𑀩𑀚𑀺𑀢𑀸𑀦𑀁 𑀉𑀧𑁆𑀧𑀚𑁆𑀚𑀦𑀫𑀳𑀺𑀘𑁆𑀙𑀢𑀸 𑀯𑀼𑀢𑁆𑀢𑀸. 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀻𑀢𑀺𑀆𑀤𑀺 𑀕𑀳𑀝𑁆𑀞𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀇𑀘𑁆𑀙𑀸𑀢𑀺 𑀲𑀪𑀸𑀯𑀦𑀺𑀤𑁆𑀤𑁂𑀲𑁄. 𑀇𑀘𑁆𑀙𑀸𑀕𑀢𑀸𑀢𑀺 𑀇𑀘𑁆𑀙𑀸𑀧𑀯𑀢𑁆𑀢𑀸. 𑀫𑀳𑀺𑀘𑁆𑀙𑀢𑀸𑀢𑀺 𑀫𑀳𑀸𑀇𑀘𑁆𑀙𑀢𑀸. 𑀅𑀢𑁆𑀣𑀢𑁄 𑀧𑀦𑀸𑀬𑀁 𑀭𑀸𑀕𑁄 𑀏𑀯𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀭𑀸𑀕𑁄 𑀲𑀸𑀭𑀸𑀕𑁄’’𑀢𑀺𑀆𑀤𑀺.

𑁬𑁩. 𑀢𑀢𑀺𑀬𑁂 𑀅𑀧𑁆𑀧𑀺𑀘𑁆𑀙𑀲𑁆𑀲𑀸𑀢𑀺 𑀏𑀢𑁆𑀣 𑀅𑀧𑁆𑀧-𑀲𑀤𑁆𑀤𑁄 𑀅𑀪𑀸𑀯𑀢𑁆𑀣𑁄 ‘‘𑀅𑀧𑁆𑀧𑀸𑀩𑀸𑀥𑁄 𑀳𑁄𑀢𑀺 𑀅𑀧𑁆𑀧𑀸𑀢𑀗𑁆𑀓𑁄’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁩𑁦𑁪) 𑀯𑀺𑀬𑀸𑀢𑀺 𑀆𑀳 𑁋 ‘‘𑀅𑀦𑀺𑀘𑁆𑀙𑀲𑁆𑀲𑀸’’𑀢𑀺. 𑀮𑁄𑀓𑁂 𑀧𑀸𑀓𑀝𑀲𑁆𑀲 𑀳𑀺 𑀅𑀓𑁆𑀔𑀺𑀭𑁄𑀕𑀓𑀼𑀘𑁆𑀙𑀺𑀭𑁄𑀕𑀸𑀤𑀺𑀪𑁂𑀤𑀲𑁆𑀲 𑀆𑀩𑀸𑀥𑀲𑁆𑀲 𑀅𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀅𑀧𑁆𑀧𑀸𑀩𑀸𑀥𑁄’’𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀢𑀭𑀁 𑀓𑀸𑀢𑀼𑀁 ‘‘𑀏𑀢𑁆𑀣 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀩𑁆𑀬𑀜𑁆𑀚𑀦𑀁 𑀲𑀸𑀯𑀲𑁂𑀲𑀁 𑀯𑀺𑀬 𑀧𑀭𑀺𑀢𑁆𑀢𑀓𑁂𑀧𑀺 𑀅𑀧𑁆𑀧𑀲𑀤𑁆𑀤𑀲𑁆𑀲 𑀤𑀺𑀲𑁆𑀲𑀫𑀸𑀦𑀢𑁆𑀢𑀸. 𑀅𑀢𑁆𑀣𑁄 𑀧𑀦 𑀦𑀺𑀭𑀯𑀲𑁂𑀲𑁄 𑀲𑀩𑁆𑀩𑀲𑁄 𑀧𑀘𑁆𑀘𑀬𑀺𑀘𑁆𑀙𑀸𑀬 𑀅𑀪𑀸𑀯𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑁂𑀦𑀸𑀳 𑁋 ‘‘𑀦 𑀳𑀻’’𑀢𑀺𑀆𑀤𑀺.

𑀇𑀘𑁆𑀙𑀸𑀬 𑀅𑀪𑀸𑀯𑁂𑀦𑁂𑀯 𑀅𑀧𑁆𑀧𑀺𑀘𑁆𑀙𑁄 𑀦𑀸𑀫 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀧𑀓𑀸𑀭𑀦𑁆𑀢𑀭𑁂𑀦 𑀤𑀻𑀧𑁂𑀢𑀼𑀁 𑁋 ‘‘𑀅𑀧𑀺𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀢𑁆𑀭𑀺𑀘𑁆𑀙𑀢𑀸 𑀦𑀸𑀫 𑀅𑀢𑁆𑀭 𑀅𑀢𑁆𑀭 𑀇𑀘𑁆𑀙𑀸. 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀢𑀸𑀬 𑀧𑀸𑀧𑀸 𑀮𑀸𑀫𑀺𑀓𑀸 𑀦𑀺𑀳𑀻𑀦𑀸 𑀇𑀘𑁆𑀙𑀸 𑀧𑀸𑀧𑀺𑀘𑁆𑀙𑀢𑀸. 𑀬𑀸𑀬 𑀧𑀘𑁆𑀘𑀬𑀼𑀧𑁆𑀧𑀸𑀤𑀦𑀢𑁆𑀣𑀁 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀕𑀼𑀡𑁂 𑀲𑀫𑁆𑀪𑀸𑀯𑁂𑀢𑀺, 𑀧𑀘𑁆𑀘𑀬𑀸𑀦𑀁 𑀧𑀝𑀺𑀕𑁆𑀕𑀳𑀡𑁂 𑀘 𑀦 𑀫𑀢𑁆𑀢𑀁 𑀚𑀸𑀦𑀸𑀢𑀺, 𑀅𑀬𑀁 𑀫𑀳𑀺𑀘𑁆𑀙𑀢𑀸. 𑀅𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀢𑀸𑀢𑀺 𑀅𑀢𑁆𑀢𑀦𑀺 𑀅𑀯𑀺𑀚𑁆𑀚𑀫𑀸𑀦𑀸𑀦𑀁 𑀕𑀼𑀡𑀸𑀦𑀁 𑀯𑀺𑀚𑁆𑀚𑀫𑀸𑀦𑀸𑀦𑀁 𑀯𑀺𑀬 𑀧𑀭𑁂𑀲𑀁 𑀧𑀓𑀸𑀲𑀦𑀸. 𑀲𑀦𑁆𑀢𑀕𑀼𑀡𑀲𑀫𑁆𑀪𑀸𑀯𑀦𑀢𑀸𑀢𑀺 𑀇𑀘𑁆𑀙𑀸𑀘𑀸𑀭𑁂 𑀞𑀢𑁆𑀯𑀸 𑀅𑀢𑁆𑀢𑀦𑀺 𑀯𑀺𑀚𑁆𑀚𑀫𑀸𑀦𑀲𑀻𑀮𑀥𑀼𑀢𑀥𑀫𑁆𑀫𑀸𑀤𑀺𑀕𑀼𑀡𑀯𑀺𑀪𑀸𑀯𑀦𑀸. 𑀢𑀸𑀤𑀺𑀲𑀲𑁆𑀲𑀧𑀺 𑀧𑀝𑀺𑀕𑁆𑀕𑀳𑀡𑁂 𑀅𑀫𑀢𑁆𑀢𑀜𑁆𑀜𑀼𑀢𑀸𑀧𑀺 𑀳𑁄𑀢𑀺, 𑀲𑀸𑀧𑀺 𑀅𑀪𑀺𑀥𑀫𑁆𑀫𑁂 𑀆𑀕𑀢𑀸𑀬𑁂𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀤𑀼𑀲𑁆𑀲𑀦𑁆𑀢𑀧𑁆𑀧𑀬𑁄𑀢𑀺 𑀤𑀼𑀢𑁆𑀢𑀧𑁆𑀧𑀬𑁄.

𑀅𑀢𑀺𑀮𑀽𑀔𑀪𑀸𑀯𑀦𑁆𑀢𑀺 ¶ 𑀧𑀢𑁆𑀢𑀘𑀻𑀯𑀭𑀯𑀲𑁂𑀦 𑀅𑀢𑀺𑀯𑀺𑀬 𑀮𑀽𑀔𑀪𑀸𑀯𑀁. 𑀢𑀤𑀲𑁆𑀲 𑀤𑀺𑀲𑁆𑀯𑀸 𑀫𑀦𑀼𑀲𑁆𑀲𑀸 ‘‘𑀅𑀬𑀁 𑀅𑀫𑀗𑁆𑀕𑀮𑀤𑀺𑀯𑀲𑁄 ¶ , 𑀲𑀼𑀫𑁆𑀪𑀓𑀲𑀺𑀦𑀺𑀤𑁆𑀥𑀧𑀢𑁆𑀢𑀘𑀻𑀯𑀭𑁄 𑀅𑀬𑁆𑀬𑁄 𑀧𑀼𑀩𑁆𑀩𑀗𑁆𑀕𑀫𑁄 𑀓𑀸𑀢𑀩𑁆𑀩𑁄’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, ‘‘𑀪𑀦𑁆𑀢𑁂, 𑀣𑁄𑀓𑀁 𑀩𑀳𑀺 𑀳𑁄𑀣𑀸’’𑀢𑀺 𑀆𑀳𑀁𑀲𑀼. 𑀉𑀫𑁆𑀫𑀼𑀚𑁆𑀚𑀻𑀢𑀺 𑀫𑀦𑀼𑀲𑁆𑀲𑀸𑀦𑀁 𑀅𑀚𑀸𑀦𑀦𑁆𑀢𑀸𑀦𑀁𑀬𑁂𑀯 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁄𑀬𑁂𑀯 𑀉𑀫𑁆𑀫𑀼𑀚𑁆𑀚𑀺. 𑀬𑀤𑀺 𑀣𑁂𑀭𑁄 ‘‘𑀔𑀻𑀡𑀸𑀲𑀯𑀪𑀸𑀯𑀁 𑀚𑀸𑀦𑀦𑁆𑀢𑀽’’𑀢𑀺 𑀇𑀘𑁆𑀙𑁂𑀬𑁆𑀬, 𑀦 𑀦𑀁 𑀫𑀦𑀼𑀲𑁆𑀲𑀸 ‘‘𑀩𑀳𑀺 𑀳𑁄𑀣𑀸’’𑀢𑀺 𑀯𑀤𑁂𑀬𑁆𑀬𑀼𑀁, 𑀔𑀻𑀡𑀸𑀲𑀯𑀸𑀦𑀁 𑀧𑀦 𑀢𑀣𑀸𑀘𑀺𑀢𑁆𑀢𑀫𑁂𑀯 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬.

𑀅𑀧𑁆𑀧𑀺𑀘𑁆𑀙𑀢𑀸𑀧𑀥𑀸𑀦𑀁 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀁 𑀘𑀢𑀼𑀩𑁆𑀩𑀺𑀥𑀇𑀘𑁆𑀙𑀸𑀧𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦𑀧𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑁂𑀦 𑀘𑀢𑀼𑀩𑁆𑀩𑀺𑀥𑀁 𑀇𑀘𑁆𑀙𑀸𑀪𑁂𑀤𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀧𑀭𑁄𑀧𑀺 𑀘𑀢𑀼𑀩𑁆𑀩𑀺𑀥𑁄 𑀅𑀧𑁆𑀧𑀺𑀘𑁆𑀙𑁄’’𑀢𑀺𑀆𑀤𑀺𑀫𑀸𑀳. 𑀧𑀘𑁆𑀘𑀬𑀅𑀧𑁆𑀧𑀺𑀘𑁆𑀙𑁄𑀢𑀺 𑀧𑀘𑁆𑀘𑀬𑁂𑀲𑀼 𑀇𑀘𑁆𑀙𑀸𑀭𑀳𑀺𑀢𑁄. 𑀥𑀼𑀢𑀗𑁆𑀕𑀅𑀧𑁆𑀧𑀺𑀘𑁆𑀙𑁄𑀢𑀺 𑀥𑀼𑀢𑀕𑀼𑀡𑀲𑀫𑁆𑀪𑀸𑀯𑀦𑀸𑀬 𑀇𑀘𑁆𑀙𑀸𑀭𑀳𑀺𑀢𑁄. 𑀧𑀭𑀺𑀬𑀢𑁆𑀢𑀺𑀅𑀧𑁆𑀧𑀺𑀘𑁆𑀙𑁄𑀢𑀺 𑀩𑀳𑀼𑀲𑁆𑀲𑀼𑀢𑀲𑀫𑁆𑀪𑀸𑀯𑀦𑀸𑀬 𑀇𑀘𑁆𑀙𑀸𑀭𑀳𑀺𑀢𑁄. 𑀅𑀥𑀺𑀕𑀫𑀅𑀧𑁆𑀧𑀺𑀘𑁆𑀙𑁄𑀢𑀺 ‘‘𑀅𑀭𑀺𑀬𑁄’’𑀢𑀺 𑀲𑀫𑁆𑀪𑀸𑀯𑀦𑀸𑀬 𑀇𑀘𑁆𑀙𑀸𑀭𑀳𑀺𑀢𑁄. 𑀤𑀸𑀬𑀓𑀲𑁆𑀲 𑀯𑀲𑀦𑁆𑀢𑀺 𑀅𑀧𑁆𑀧𑀁 𑀯𑀸 𑀬𑀁 𑀤𑀸𑀢𑀼𑀓𑀸𑀫𑁄 𑀩𑀳𑀼𑀁 𑀯𑀸𑀢𑀺 𑀤𑀸𑀬𑀓𑀲𑁆𑀲 𑀘𑀺𑀢𑁆𑀢𑀲𑁆𑀲 𑀯𑀲𑀁, 𑀅𑀚𑁆𑀛𑀸𑀲𑀬𑀦𑁆𑀢𑀺 𑀅𑀢𑁆𑀣𑁄. 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀯𑀲𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀅𑀩𑀳𑀼𑀪𑀸𑀯𑀁. 𑀅𑀢𑁆𑀢𑀦𑁄 𑀣𑀸𑀫𑀦𑁆𑀢𑀺 𑀅𑀢𑁆𑀢𑀦𑁄 𑀧𑀫𑀸𑀡𑀁. 𑀬𑀢𑁆𑀢𑀓𑁂𑀦 𑀅𑀢𑁆𑀢𑀸 𑀬𑀸𑀧𑁂𑀢𑀺, 𑀢𑀢𑁆𑀢𑀓𑀲𑁆𑀲𑁂𑀯 𑀕𑀳𑀡𑀁. 𑀬𑀤𑀺 𑀳𑀻𑀢𑀺𑀆𑀤𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀯𑀭𑀡𑀁. 𑀧𑀫𑀸𑀡𑁂𑀦𑁂𑀯𑀸𑀢𑀺 𑀬𑀸𑀧𑀦𑀧𑁆𑀧𑀫𑀸𑀡𑁂𑀦𑁂𑀯.

𑀏𑀓𑀪𑀺𑀓𑁆𑀔𑀼𑀧𑀺 𑀦𑀸𑀜𑁆𑀜𑀸𑀲𑀻𑀢𑀺 𑀲𑁄𑀲𑀸𑀦𑀺𑀓𑀯𑀢𑁆𑀢𑁂 𑀲𑀫𑁆𑀫𑀤𑁂𑀯 𑀯𑀢𑁆𑀢𑀺𑀢𑀢𑁆𑀢𑀸 𑀏𑀓𑁄𑀧𑀺 𑀪𑀺𑀓𑁆𑀔𑀼 𑀦 𑀅𑀜𑁆𑀜𑀸𑀲𑀺. 𑀅𑀩𑁆𑀩𑁄𑀓𑀺𑀡𑁆𑀡𑀦𑁆𑀢𑀺 𑀅𑀯𑀺𑀘𑁆𑀙𑁂𑀤𑀁. 𑀤𑀼𑀢𑀺𑀬𑁄 𑀫𑀁 𑀚𑀸𑀦𑁂𑀬𑁆𑀬𑀸𑀢𑀺 𑀤𑀼𑀢𑀺𑀬𑁄 𑀲𑀳𑀸𑀬𑀪𑀽𑀢𑁄𑀧𑀺 𑀬𑀣𑀸 𑀫𑀁 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀼𑀡𑁂𑀬𑁆𑀬, 𑀢𑀣𑀸 𑀲𑀝𑁆𑀞𑀺 𑀯𑀲𑁆𑀲𑀸𑀦𑀺 𑀦𑀺𑀭𑀦𑁆𑀢𑀭𑀁 𑀲𑀼𑀲𑀸𑀦𑁂 𑀯𑀲𑀸𑀫𑀺, 𑀢𑀲𑁆𑀫𑀸 𑀅𑀳𑀁 𑀅𑀳𑁄 𑀲𑁄𑀲𑀸𑀦𑀺𑀓𑀼𑀢𑁆𑀢𑀫𑁄. 𑀉𑀧𑀓𑀸𑀭𑁄 𑀳𑀼𑀢𑁆𑀯𑀸𑀢𑀺 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀤𑀻𑀳𑀺 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑀯𑀲𑁂𑀦 𑀉𑀧𑀓𑀸𑀭𑁄 𑀳𑀼𑀢𑁆𑀯𑀸. 𑀥𑀫𑁆𑀫𑀓𑀣𑀸𑀬 𑀚𑀦𑀧𑀤𑀁 𑀔𑁄𑀪𑁂𑀢𑁆𑀯𑀸𑀢𑀺 𑀮𑁄𑀫𑀳𑀁𑀲𑀦𑀲𑀸𑀥𑀼𑀓𑀸𑀭𑀤𑀸𑀦𑀘𑁂𑀮𑀼𑀓𑁆𑀔𑁂𑀧𑀸𑀤𑀺𑀯𑀲𑁂𑀦 𑀲𑀦𑁆𑀦𑀺𑀧𑀢𑀺𑀢𑀁 𑀇𑀢𑀭𑀜𑁆𑀘 ‘‘𑀓𑀣𑀁 𑀦𑀼 𑀔𑁄 𑀅𑀧𑁆𑀧𑀁 𑀅𑀬𑁆𑀬𑀲𑁆𑀲 𑀲𑀦𑁆𑀢𑀺𑀓𑁂 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀸’’𑀢𑀺 𑀓𑁄𑀮𑀸𑀳𑀮𑀯𑀲𑁂𑀦 𑀫𑀳𑀸𑀚𑀦𑀁 𑀔𑁄𑀪𑁂𑀢𑁆𑀯𑀸? 𑀬𑀤𑀺 𑀣𑁂𑀭𑁄 𑀩𑀳𑀼𑀲𑁆𑀲𑀼𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑀼𑀁 𑀇𑀘𑁆𑀙𑁂𑀬𑁆𑀬, 𑀧𑀼𑀩𑁆𑀩𑁂𑀯 𑀚𑀦𑀧𑀤𑀁 𑀔𑁄𑀪𑁂𑀦𑁆𑀢𑁄 𑀥𑀫𑁆𑀫𑀁 𑀓𑀣𑁂𑀬𑁆𑀬. 𑀕𑀢𑁄𑀢𑀺 ‘‘𑀅𑀬𑀁 𑀲𑁄, 𑀬𑁂𑀦 𑀭𑀢𑁆𑀢𑀺𑀬𑀁 𑀥𑀫𑁆𑀫𑀓𑀣𑀸 𑀓𑀢𑀸’’𑀢𑀺 𑀚𑀸𑀦𑀦𑀪𑀸𑀯𑁂𑀦 𑀧𑀭𑀺𑀬𑀢𑁆𑀢𑀺𑀅𑀧𑁆𑀧𑀺𑀘𑁆𑀙𑀢𑀸𑀬 𑀧𑀼𑀭𑀸𑀭𑀼𑀡𑀸𑀯 𑀕𑀢𑁄.

𑀢𑀬𑁄 ¶ 𑀓𑀼𑀮𑀧𑀼𑀢𑁆𑀢𑀸 𑀯𑀺𑀬𑀸𑀢𑀺 𑀧𑀸𑀘𑀻𑀦𑀯𑀁𑀲𑀤𑀸𑀬𑁂 𑀲𑀸𑀫𑀕𑁆𑀕𑀺𑀯𑀸𑀲𑀁𑀯𑀼𑀝𑁆𑀞𑀸 𑀅𑀦𑀼𑀭𑀼𑀤𑁆𑀥𑁄, 𑀦𑀦𑁆𑀤𑀺𑀬𑁄, 𑀓𑀺𑀫𑀺𑀮𑁄𑀢𑀺 𑀇𑀫𑁂 𑀢𑀬𑁄 𑀓𑀼𑀮𑀧𑀼𑀢𑁆𑀢𑀸 𑀯𑀺𑀬. 𑀏𑀢𑁂𑀲𑀼𑀧𑀺 𑀳𑀺 𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑁂𑀦 𑀪𑀕𑀯𑀢𑀸 ‘‘𑀅𑀢𑁆𑀣𑀺 𑀧𑀦 𑀯𑁄 𑀅𑀦𑀼𑀭𑀼𑀤𑁆𑀥𑀸 𑀏𑀯𑀁 𑀅𑀧𑁆𑀧𑀫𑀢𑁆𑀢𑀸𑀦𑀁 𑀆𑀢𑀸𑀧𑀻𑀦𑀁 𑀧𑀳𑀺𑀢𑀢𑁆𑀢𑀸𑀦𑀁 𑀯𑀺𑀳𑀭𑀦𑁆𑀢𑀸𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁄 𑀅𑀮𑀫𑀭𑀺𑀬𑀜𑀸𑀡𑀤𑀲𑁆𑀲𑀦𑀯𑀺𑀲𑁂𑀲𑁄 𑀅𑀥𑀺𑀕𑀢𑁄 𑀨𑀸𑀲𑀼𑀯𑀺𑀳𑀸𑀭𑁄’’𑀢𑀺 (𑀫. 𑀦𑀺. 𑁧.𑁩𑁨𑁮) 𑀧𑀼𑀝𑁆𑀞𑁂𑀦 ‘‘𑀇𑀥 𑀧𑀦 𑀫𑀬𑀁, 𑀪𑀦𑁆𑀢𑁂, 𑀬𑀸𑀯𑀤𑁂𑀯 𑀆𑀓𑀗𑁆𑀔𑀸𑀫, 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁩𑁨𑁮) 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀲𑀼 ¶ 𑀆𑀭𑁄𑀘𑀺𑀢𑀸𑀲𑀼 𑀇𑀢𑀭𑁂 𑀣𑁂𑀭𑀸 𑀦 𑀇𑀘𑁆𑀙𑀺𑀁𑀲𑀼. 𑀢𑀣𑀸 𑀳𑀺 𑀢𑁂 𑀧𑀓𑁆𑀓𑀦𑁆𑀢𑁂 𑀪𑀕𑀯𑀢𑀺 𑀆𑀬𑀲𑁆𑀫𑀦𑁆𑀢𑀁 𑀅𑀦𑀼𑀭𑀼𑀤𑁆𑀥𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀓𑀺𑀦𑁆𑀦𑀼 𑀫𑀬𑀁 𑀆𑀬𑀲𑁆𑀫𑀢𑁄 𑀅𑀦𑀼𑀭𑀼𑀤𑁆𑀥𑀲𑁆𑀲 𑀏𑀯𑀫𑀸𑀭𑁄𑀘𑀺𑀫𑁆𑀳 ‘𑀇𑀫𑀸𑀲𑀜𑁆𑀘 𑀇𑀫𑀸𑀲𑀜𑁆𑀘 𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁 𑀫𑀬𑀁 𑀮𑀸𑀪𑀺𑀦𑁄’𑀢𑀺? 𑀬𑀁 𑀦𑁄 𑀆𑀬𑀲𑁆𑀫𑀸 𑀅𑀦𑀼𑀭𑀼𑀤𑁆𑀥𑁄 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸𑀧𑀺 𑀆𑀲𑀯𑀸𑀦𑀁 𑀔𑀬𑀁 𑀧𑀓𑀸𑀲𑁂𑀢𑀻’’𑀢𑀺? 𑀖𑀝𑀻𑀓𑀸𑀭𑁄𑀧𑀺 𑀅𑀢𑁆𑀢𑀦𑁄 𑀅𑀭𑀺𑀬𑀪𑀸𑀯𑁂 𑀓𑀺𑀓𑀺𑀲𑁆𑀲 𑀭𑀜𑁆𑀜𑁄 𑀪𑀕𑀯𑀢𑀸 𑀆𑀭𑁄𑀘𑀺𑀢𑁂 𑀦 𑀅𑀢𑁆𑀢𑀫𑀦𑁄 𑀅𑀳𑁄𑀲𑀺? 𑀢𑁂𑀦𑀸𑀳 𑁋 ‘‘𑀖𑀝𑀻𑀓𑀸𑀭𑀓𑀼𑀫𑁆𑀪𑀓𑀸𑀭𑁄 𑀯𑀺𑀬𑀸’’𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂𑀢𑀺 ‘‘𑀬𑀣𑀬𑀺𑀤𑀁, 𑀪𑀺𑀓𑁆𑀔𑀯𑁂, 𑀅𑀧𑁆𑀧𑀺𑀘𑁆𑀙𑀢𑀸’’𑀢𑀺 𑀯𑀼𑀢𑁆𑀢𑁂 𑀅𑀧𑁆𑀧𑀺𑀘𑁆𑀙𑀢𑀸𑀲𑀗𑁆𑀔𑀸𑀢𑁂 𑀅𑀢𑁆𑀣𑁂. 𑀩𑀮𑀯𑀅𑀮𑁄𑀪𑁂𑀦𑀸𑀢𑀺 𑀤𑀴𑁆𑀳𑀢𑀭𑀧𑁆𑀧𑀯𑀢𑁆𑀢𑀺𑀓𑁂𑀦 𑀅𑀮𑁄𑀪𑁂𑀦.

𑁬𑁪. 𑀘𑀢𑀼𑀢𑁆𑀣𑁂 𑀦𑀢𑁆𑀣𑀺 𑀏𑀢𑀲𑁆𑀲 𑀲𑀦𑁆𑀢𑀼𑀝𑁆𑀞𑀻𑀢𑀺 𑀅𑀲𑀦𑁆𑀢𑀼𑀝𑁆𑀞𑀺, 𑀢𑀲𑁆𑀲 𑀪𑀸𑀯𑁄 𑀅𑀲𑀦𑁆𑀢𑀼𑀝𑁆𑀞𑀺𑀢𑀸. 𑀢𑀁 𑀧𑀦 𑀲𑀭𑀽𑀧𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀲𑀦𑁆𑀢𑀼𑀝𑁆𑀞𑁂 𑀧𑀼𑀕𑁆𑀕𑀮𑁂…𑀧𑁂… 𑀮𑁄𑀪𑁄’’𑀢𑀺 𑀆𑀳. 𑀲𑁂𑀯𑀦𑁆𑀢𑀲𑁆𑀲𑀸𑀢𑀺𑀆𑀤𑀻𑀦𑀺 𑀅𑀜𑁆𑀜𑀫𑀜𑁆𑀜𑀯𑁂𑀯𑀘𑀦𑀸𑀦𑀺.

𑁬𑁫-𑁬𑁭. 𑀧𑀜𑁆𑀘𑀫𑁂 𑀢𑀼𑀲𑁆𑀲𑀦𑀁 𑀢𑀼𑀝𑁆𑀞𑀺, 𑀲𑀫𑀁, 𑀲𑀓𑁂𑀦, 𑀲𑀦𑁆𑀢𑁂𑀦 𑀯𑀸 𑀢𑀼𑀝𑁆𑀞𑀺 𑀏𑀢𑀲𑁆𑀲𑀸𑀢𑀺 𑀲𑀦𑁆𑀢𑀼𑀝𑁆𑀞𑀺, 𑀢𑀲𑁆𑀲 𑀪𑀸𑀯𑁄 𑀲𑀦𑁆𑀢𑀼𑀝𑁆𑀞𑀺𑀢𑀸. 𑀬𑀲𑁆𑀲 𑀲𑀦𑁆𑀢𑁄𑀲𑀲𑁆𑀲 𑀅𑀢𑁆𑀣𑀺𑀢𑀸𑀬 𑀪𑀺𑀓𑁆𑀔𑀼 ‘‘𑀲𑀦𑁆𑀢𑀼𑀝𑁆𑀞𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀇𑀢𑀭𑀻𑀢𑀭𑀧𑀘𑁆𑀘𑀬𑀲𑀦𑁆𑀢𑁄𑀲𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲𑀸’’𑀢𑀺 𑀆𑀳 𑁋 𑀘𑀻𑀯𑀭𑀸𑀤𑀺𑀓𑁂 𑀬𑀢𑁆𑀣 𑀓𑀢𑁆𑀣𑀘𑀺 𑀓𑀧𑁆𑀧𑀺𑀬𑁂 𑀧𑀘𑁆𑀘𑀬𑁂 𑀲𑀦𑁆𑀢𑀼𑀲𑁆𑀲𑀦𑁂𑀦 𑀲𑀫𑀗𑁆𑀕𑀻𑀪𑀽𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀇𑀢𑀭𑀁 𑀯𑀼𑀘𑁆𑀘𑀢𑀺 𑀳𑀻𑀦𑀁 𑀧𑀡𑀻𑀢𑀢𑁄 𑀅𑀜𑁆𑀜𑀢𑁆𑀢𑀸, 𑀢𑀣𑀸 𑀧𑀡𑀻𑀢𑀫𑁆𑀧𑀺 𑀇𑀢𑀭𑀁 𑀳𑀻𑀦𑀢𑁄 𑀅𑀜𑁆𑀜𑀢𑁆𑀢𑀸. 𑀅𑀧𑁂𑀓𑁆𑀔𑀸𑀲𑀺𑀤𑁆𑀥𑀸 𑀳𑀺 𑀇𑀢𑀭𑀢𑀸. 𑀇𑀢𑀺 𑀬𑁂𑀦 𑀥𑀫𑁆𑀫𑁂𑀦 𑀳𑀻𑀦𑁂𑀦 𑀯𑀸 𑀧𑀡𑀻𑀢𑁂𑀦 𑀯𑀸 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑁂𑀦 𑀲𑀦𑁆𑀢𑀼𑀲𑁆𑀲𑀢𑀺, 𑀲𑁄 𑀢𑀣𑀸 𑀧𑀯𑀢𑁆𑀢𑁄 𑀅𑀮𑁄𑀪𑁄 𑀇𑀢𑀭𑀻𑀢𑀭𑀧𑀘𑁆𑀘𑀬𑀲𑀦𑁆𑀢𑁄𑀲𑁄, 𑀢𑁂𑀦 𑀲𑀫𑀦𑁆𑀦𑀸𑀕𑀢𑀲𑁆𑀲 ¶ . 𑀬𑀣𑀸𑀮𑀸𑀪𑀁 𑀅𑀢𑁆𑀢𑀦𑁄 𑀮𑀸𑀪𑀸𑀦𑀼𑀭𑀽𑀧𑀁 𑀲𑀦𑁆𑀢𑁄𑀲𑁄 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀲𑁂𑀲𑀧𑀤𑀤𑁆𑀯𑀬𑁂𑀧𑀺 𑀏𑀲𑁂𑀯 𑀦𑀬𑁄. 𑀮𑀩𑁆𑀪𑀢𑀻𑀢𑀺 𑀯𑀸 𑀮𑀸𑀪𑁄, 𑀬𑁄 𑀬𑁄 𑀮𑀸𑀪𑁄 𑀬𑀣𑀸𑀮𑀸𑀪𑁄, 𑀢𑁂𑀦 𑀲𑀦𑁆𑀢𑁄𑀲𑁄 𑀬𑀣𑀸𑀮𑀸𑀪𑀲𑀦𑁆𑀢𑁄𑀲𑁄. 𑀩𑀮𑀦𑁆𑀢𑀺 𑀓𑀸𑀬𑀩𑀮𑀁. 𑀲𑀸𑀭𑀼𑀧𑁆𑀧𑀦𑁆𑀢𑀺 𑀪𑀺𑀓𑁆𑀔𑀼𑀦𑁄 𑀅𑀦𑀼𑀘𑁆𑀙𑀯𑀺𑀓𑀢𑀸.

𑀬𑀣𑀸𑀮𑀤𑁆𑀥𑀢𑁄 𑀅𑀜𑁆𑀜𑀲𑁆𑀲 𑀅𑀧𑀢𑁆𑀣𑀦𑀸 𑀦𑀸𑀫 𑀲𑀺𑀬𑀸 𑀅𑀧𑁆𑀧𑀺𑀘𑁆𑀙𑀢𑀸𑀧𑀺 𑀧𑀯𑀢𑁆𑀢𑀺𑀆𑀓𑀸𑀭𑁄𑀢𑀺 𑀢𑀢𑁄 𑀯𑀺𑀦𑀺𑀯𑁂𑀘𑀺𑀢𑀫𑁂𑀯 𑀲𑀦𑁆𑀢𑁄𑀲𑀲𑁆𑀲 𑀲𑀭𑀽𑀧𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀮𑀪𑀦𑁆𑀢𑁄𑀧𑀺 𑀦 𑀕𑀡𑁆𑀳𑀸𑀢𑀻’’𑀢𑀺 𑀆𑀳. 𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀧𑀓𑀢𑀺𑀤𑀼𑀩𑁆𑀩𑀮𑀸𑀤𑀻𑀦𑀁 𑀕𑀭𑀼𑀘𑀻𑀯𑀭𑀁 𑀅𑀨𑀸𑀲𑀼𑀪𑀸𑀯𑀸𑀯𑀳𑀁 𑀲𑀭𑀻𑀭𑀔𑁂𑀤𑀸𑀯𑀳𑀜𑁆𑀘 𑀳𑁄𑀢𑀻𑀢𑀺 𑀧𑀬𑁄𑀚𑀦𑀯𑀲𑁂𑀦 𑀦 𑀅𑀢𑁆𑀭𑀺𑀘𑁆𑀙𑀢𑀸𑀤𑀺𑀯𑀲𑁂𑀦 𑀢𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀮𑀳𑀼𑀓𑀘𑀻𑀯𑀭𑀧𑀭𑀺𑀪𑁄𑀕𑁄 𑀲𑀦𑁆𑀢𑁄𑀲𑀯𑀺𑀭𑁄𑀥𑀺 𑀦 𑀳𑁄𑀢𑀻𑀢𑀺 𑀆𑀳 𑁋 ‘‘𑀮𑀳𑀼𑀓𑁂𑀦 𑀬𑀸𑀧𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀻’’𑀢𑀺. 𑀫𑀳𑀕𑁆𑀖𑀘𑀻𑀯𑀭𑀁 𑀩𑀳𑀽𑀦𑀺 𑀯𑀸 𑀘𑀻𑀯𑀭𑀸𑀦𑀺 𑀮𑀪𑀺𑀢𑁆𑀯𑀸 𑀢𑀸𑀦𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀢𑀤𑀜𑁆𑀜𑀲𑁆𑀲 𑀕𑀳𑀡𑀁 𑀬𑀣𑀸𑀲𑀸𑀭𑀼𑀧𑁆𑀧𑀦𑀬𑁂 𑀞𑀺𑀢𑀢𑁆𑀢𑀸 𑀦 𑀲𑀦𑁆𑀢𑁄𑀲𑀯𑀺𑀭𑁄𑀥𑀻𑀢𑀺 𑀆𑀳 𑁋 ‘‘𑀢𑁂𑀲𑀁…𑀧𑁂… 𑀥𑀸𑀭𑁂𑀦𑁆𑀢𑁄𑀧𑀺 𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀻’’𑀢𑀺. 𑀏𑀯𑀁 𑀲𑁂𑀲𑀧𑀘𑁆𑀘𑀬𑁂𑀲𑀼𑀧𑀺 𑀬𑀣𑀸𑀲𑀸𑀭𑀼𑀧𑁆𑀧𑀦𑀺𑀤𑁆𑀤𑁂𑀲𑁂 ¶ 𑀅𑀧𑀺-𑀲𑀤𑁆𑀤𑀕𑁆𑀕𑀳𑀡𑁂 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀫𑀼𑀢𑁆𑀢𑀳𑀭𑀻𑀢𑀓𑀦𑁆𑀢𑀺 𑀕𑁄𑀫𑀼𑀢𑁆𑀢𑀧𑀭𑀺𑀪𑀸𑀯𑀺𑀢𑀁, 𑀧𑀽𑀢𑀺𑀪𑀸𑀯𑁂𑀦 𑀯𑀸 𑀙𑀟𑁆𑀟𑀺𑀢𑀁 𑀳𑀭𑀻𑀢𑀓𑀁. 𑀩𑀼𑀤𑁆𑀥𑀸𑀤𑀻𑀳𑀺 𑀯𑀡𑁆𑀡𑀺𑀢𑀦𑁆𑀢𑀺 𑀅𑀧𑁆𑀧𑀺𑀘𑁆𑀙𑀢𑀸𑀲𑀦𑁆𑀢𑀼𑀝𑁆𑀞𑀻𑀲𑀼 𑀪𑀺𑀓𑁆𑀔𑀽 𑀦𑀺𑀬𑁄𑀚𑁂𑀢𑀼𑀁 ‘‘𑀧𑀽𑀢𑀺𑀫𑀼𑀢𑁆𑀢𑀪𑁂𑀲𑀚𑁆𑀚𑀁 𑀦𑀺𑀲𑁆𑀲𑀸𑀬 𑀧𑀩𑁆𑀩𑀚𑁆𑀚𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁭𑁩, 𑁧𑁨𑁮) 𑀩𑀼𑀤𑁆𑀥𑀸𑀤𑀻𑀳𑀺 𑀧𑀲𑀢𑁆𑀣𑀁. 𑀧𑀭𑀫𑀲𑀦𑁆𑀢𑀼𑀝𑁆𑀞𑁄𑀯 𑀳𑁄𑀢𑀺 𑀧𑀭𑀫𑁂𑀦 𑀉𑀓𑁆𑀓𑀁𑀲𑀕𑀢𑁂𑀦 𑀲𑀦𑁆𑀢𑁄𑀲𑁂𑀦 𑀲𑀫𑀦𑁆𑀦𑀸𑀕𑀢𑀢𑁆𑀢𑀸. 𑀬𑀣𑀸𑀲𑀸𑀭𑀼𑀧𑁆𑀧𑀲𑀦𑁆𑀢𑁄𑀲𑁄𑀯 𑀅𑀕𑁆𑀕𑁄𑀢𑀺 𑀢𑀢𑁆𑀣 𑀢𑀢𑁆𑀣 𑀪𑀺𑀓𑁆𑀔𑀼 𑀲𑀸𑀭𑀼𑀧𑁆𑀧𑀁𑀬𑁂𑀯 𑀦𑀺𑀲𑁆𑀲𑀸𑀬 𑀲𑀦𑁆𑀢𑀼𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀅𑀕𑁆𑀕𑁄. 𑀙𑀝𑁆𑀞𑀲𑀢𑁆𑀢𑀫𑁂𑀲𑀼 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑁬𑁮-𑁬𑁯. 𑀅𑀝𑁆𑀞𑀫𑀦𑀯𑀫𑁂𑀲𑀼 𑀦 𑀲𑀫𑁆𑀧𑀚𑀸𑀦𑀸𑀢𑀻𑀢𑀺 𑀅𑀲𑀫𑁆𑀧𑀚𑀸𑀦𑁄, 𑀢𑀲𑁆𑀲 𑀪𑀸𑀯𑁄 𑀅𑀲𑀫𑁆𑀧𑀚𑀜𑁆𑀜𑀁. 𑀯𑀼𑀢𑁆𑀢𑀧𑁆𑀧𑀝𑀺𑀧𑀓𑁆𑀔𑁂𑀦 𑀲𑀫𑁆𑀧𑀚𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁.

𑁭𑁦. 𑀤𑀲𑀫𑁂 𑀧𑀸𑀧𑀫𑀺𑀢𑁆𑀢𑀸 𑀤𑁂𑀯𑀤𑀢𑁆𑀢𑀲𑀤𑀺𑀲𑀸. 𑀢𑁂 𑀳𑀺 𑀳𑀻𑀦𑀸𑀘𑀸𑀭𑀢𑀸𑀬, 𑀤𑀼𑀓𑁆𑀔𑀲𑁆𑀲 𑀯𑀸 𑀲𑀫𑁆𑀧𑀸𑀧𑀓𑀢𑀸𑀬 ‘‘𑀧𑀸𑀧𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑁂𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸𑀦𑀦𑁆𑀢𑀺 𑀬𑁄 𑀧𑀸𑀧𑀫𑀺𑀢𑁆𑀢𑀲𑁆𑀲 𑀔𑀦𑁆𑀢𑀺 𑀭𑀼𑀘𑀺 𑀅𑀥𑀺𑀫𑀼𑀢𑁆𑀢𑀺 𑀢𑀦𑁆𑀦𑀺𑀦𑁆𑀦𑀢𑀸𑀢𑀁𑀲𑀫𑁆𑀧𑀯𑀗𑁆𑀓𑀢𑀸𑀤𑀺𑀆𑀓𑀸𑀭𑁄, 𑀢𑁂𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸𑀦𑀁. 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀫𑁂𑀯𑁂𑀢𑀁 𑀦𑀸𑀫𑀦𑁆𑀢𑀺 𑀘𑀢𑀼𑀦𑁆𑀦𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁 ¶ ‘‘𑀧𑀸𑀧𑀫𑀺𑀢𑁆𑀢𑀢𑀸’’𑀢𑀺 𑀏𑀢𑀁 𑀦𑀸𑀫𑀁. 𑀬𑀲𑁆𑀫𑀸 𑀅𑀲𑁆𑀲𑀤𑁆𑀥𑀺𑀬𑀸𑀤𑀺𑀧𑀸𑀧𑀥𑀫𑁆𑀫𑀲𑀫𑀦𑁆𑀦𑀸𑀕𑀢𑀸 𑀧𑀼𑀕𑁆𑀕𑀮𑀸 𑀯𑀺𑀲𑁂𑀲𑀢𑁄 𑀧𑀸𑀧𑀸 𑀧𑀼𑀜𑁆𑀜𑀥𑀫𑁆𑀫𑀯𑀺𑀫𑁄𑀓𑁆𑀔𑀢𑀸𑀬, 𑀢𑁂 𑀬𑀲𑁆𑀲 𑀫𑀺𑀢𑁆𑀢𑀸 𑀲𑀳𑀸𑀬𑀸, 𑀲𑁄 𑀧𑀸𑀧𑀫𑀺𑀢𑁆𑀢𑁄, 𑀢𑀲𑁆𑀲 𑀪𑀸𑀯𑁄 𑀧𑀸𑀧𑀫𑀺𑀢𑁆𑀢𑀢𑀸. 𑀢𑁂𑀦𑀸𑀳 𑁋 ‘‘𑀬𑁂 𑀢𑁂 𑀧𑀼𑀕𑁆𑀕𑀮𑀸 𑀅𑀲𑁆𑀲𑀤𑁆𑀥𑀸’’𑀢𑀺𑀆𑀤𑀺.

𑀯𑀻𑀭𑀺𑀬𑀸𑀭𑀫𑁆𑀪𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸

𑁭𑁧. 𑀅𑀝𑁆𑀞𑀫𑀲𑁆𑀲 ¶ 𑀧𑀞𑀫𑁂 𑀩𑀼𑀤𑁆𑀥𑀸, 𑀲𑀸𑀭𑀺𑀧𑀼𑀢𑁆𑀢𑀸𑀤𑀬𑁄 𑀯𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀸. 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦𑀸𑀢𑀺 ‘‘𑀧𑀸𑀧𑀫𑀺𑀢𑁆𑀢𑀢𑀸’’𑀢𑀺 𑀧𑀤𑁂 𑀯𑀼𑀢𑁆𑀢𑀲𑁆𑀲 𑀧𑀝𑀺𑀧𑀓𑁆𑀔𑀦𑀬𑁂𑀦.

𑁭𑁨-𑁭𑁩. 𑀤𑀼𑀢𑀺𑀬𑁂 𑀬𑁄𑀕𑁄𑀢𑀺 𑀲𑀫𑀗𑁆𑀕𑀻𑀪𑀸𑀯𑁄. 𑀧𑀬𑁄𑀕𑁄𑀢𑀺 𑀧𑀬𑀼𑀜𑁆𑀚𑀦𑀁 𑀧𑀝𑀺𑀧𑀢𑁆𑀢𑀺. 𑀅𑀬𑁄𑀕𑁄𑀢𑀺 𑀅𑀲𑀫𑀗𑁆𑀕𑀻𑀪𑀸𑀯𑁄. 𑀅𑀧𑁆𑀧𑀬𑁄𑀕𑁄𑀢𑀺 𑀅𑀧𑁆𑀧𑀬𑀼𑀜𑁆𑀚𑀦𑀁 𑀅𑀧𑁆𑀧𑀝𑀺𑀧𑀢𑁆𑀢𑀺. 𑀅𑀦𑀼𑀬𑁄𑀕𑁂𑀦𑀸𑀢𑀺 𑀅𑀦𑀼𑀬𑁄𑀕𑀳𑁂𑀢𑀼.

𑁭𑁪. 𑀘𑀢𑀼𑀢𑁆𑀣𑁂 𑀩𑀼𑀚𑁆𑀛𑀦𑀓𑀲𑀢𑁆𑀢𑀲𑁆𑀲𑀸𑀢𑀺 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀧𑀝𑀺𑀯𑀺𑀚𑁆𑀛𑀦𑀓𑀧𑀼𑀕𑁆𑀕𑀮𑀲𑁆𑀲. 𑀅𑀗𑁆𑀕𑀪𑀽𑀢𑀸𑀢𑀺 𑀢𑀲𑁆𑀲𑁂𑀯 𑀧𑀝𑀺𑀯𑁂𑀥𑀲𑁆𑀲 𑀓𑀸𑀭𑀡𑀪𑀽𑀢𑀸. 𑀏𑀢𑁆𑀣 𑀘 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀩𑀼𑀚𑁆𑀛𑀢𑀺, 𑀅𑀜𑁆𑀜𑀸𑀡𑀦𑀺𑀤𑁆𑀤𑀸𑀬 𑀯𑀸𑀧𑀺 𑀩𑀼𑀚𑁆𑀛𑀢𑀻𑀢𑀺 𑀩𑁄𑀥𑀻𑀢𑀺 𑀮𑀤𑁆𑀥𑀦𑀸𑀫𑁄 𑀅𑀭𑀺𑀬𑀲𑀸𑀯𑀓𑁄 𑀩𑀼𑀚𑁆𑀛𑀦𑀓𑀲𑀢𑁆𑀢𑁄, 𑀢𑀲𑁆𑀲 𑀩𑀼𑀚𑁆𑀛𑀦𑀓𑀲𑀢𑁆𑀢𑀲𑁆𑀲. 𑀩𑁄𑀥𑀺𑀬𑀸𑀢𑀺 𑀢𑀲𑁆𑀲𑀸 𑀥𑀫𑁆𑀫𑀲𑀸𑀫𑀕𑁆𑀕𑀺𑀲𑀗𑁆𑀔𑀸𑀢𑀸𑀬 𑀩𑁄𑀥𑀺𑀬𑀸. 𑀩𑀼𑀚𑁆𑀛𑀦𑀝𑁆𑀞𑁂𑀦 𑀩𑁄𑀥𑀺𑀬𑁄, 𑀩𑁄𑀥𑀺𑀬𑁄 𑀏𑀯 𑀲𑀘𑁆𑀘𑀲𑀫𑁆𑀧𑀝𑀺𑀩𑁄𑀥𑀲𑁆𑀲 𑀅𑀗𑁆𑀕𑀸𑀢𑀺 𑀯𑀼𑀢𑁆𑀢𑀁. ‘‘𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸’’𑀢𑀺. 𑀯𑀺𑀧𑀲𑁆𑀲𑀦𑀸𑀤𑀻𑀦𑀁 𑀓𑀸𑀭𑀡𑀸𑀦𑀁 𑀩𑀼𑀚𑁆𑀛𑀺𑀢𑀩𑁆𑀩𑀸𑀦𑀜𑁆𑀘 𑀲𑀘𑁆𑀘𑀸𑀦𑀁 𑀅𑀦𑀼𑀭𑀽𑀧𑀁 𑀩𑀼𑀚𑁆𑀛𑀦𑀢𑁄 𑀅𑀦𑀼𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀧𑀝𑀺𑀫𑀼𑀔𑀁 𑀧𑀘𑁆𑀘𑀓𑁆𑀔𑀪𑀸𑀯𑁂𑀦 𑀅𑀪𑀺𑀫𑀼𑀔𑀁 𑀩𑀼𑀚𑁆𑀛𑀦𑀢𑁄 𑀧𑀝𑀺𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸, 𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑀢𑁄 𑀩𑀼𑀚𑁆𑀛𑀦𑀢𑁄 𑀲𑀫𑁆𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸𑀢𑀺 𑀏𑀯𑀁 𑀅𑀢𑁆𑀣𑀯𑀺𑀲𑁂𑀲𑀤𑀻𑀧𑀓𑁂𑀳𑀺 𑀉𑀧𑀲𑀕𑁆𑀕𑁂𑀳𑀺 𑀅𑀦𑀼𑀩𑀼𑀚𑁆𑀛𑀦𑁆𑀢𑀻𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀩𑁄𑀥𑀺𑀲𑀤𑁆𑀤𑁄 𑀲𑀩𑁆𑀩𑀯𑀺𑀲𑁂𑀲𑀬𑀼𑀢𑁆𑀢𑀁 𑀩𑀼𑀚𑁆𑀛𑀦𑀲𑀸𑀫𑀜𑁆𑀜𑁂𑀦 𑀲𑀗𑁆𑀕𑀡𑁆𑀳𑀸𑀢𑀺. 𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀇𑀫𑀺𑀦𑀸 𑀢𑀲𑁆𑀲𑀸 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀩𑀼𑀚𑁆𑀛𑀦𑀲𑁆𑀲 𑀏𑀓𑀦𑁆𑀢𑀓𑀸𑀭𑀡𑀢𑀁 𑀤𑀲𑁆𑀲𑁂𑀢𑀺. 𑀏𑀯𑀁 𑀧𑀦𑁂𑀢𑀁 𑀧𑀤𑀁 𑀯𑀺𑀪𑀢𑁆𑀢𑀫𑁂𑀯𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀏𑀢𑀁 ‘‘𑀩𑁄𑀚𑁆𑀛𑀗𑁆𑀕𑀸’’𑀢𑀺 (𑀧𑀝𑀺. 𑀫. 𑁨.𑁧𑁭) 𑀧𑀤𑀁 𑀦𑀺𑀤𑁆𑀤𑁂𑀲𑁂 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀯𑀺𑀪𑀢𑁆𑀢𑀫𑁂𑀯.

𑁭𑁫. 𑀧𑀜𑁆𑀘𑀫𑁂 ¶ 𑀬𑀸𑀣𑀸𑀯𑀲𑀭𑀲𑀪𑀽𑀫𑀻𑀢𑀺 𑀬𑀸𑀣𑀸𑀯𑀢𑁄 𑀲𑀓𑀺𑀘𑁆𑀘𑀓𑀭𑀡𑀪𑀽𑀫𑀺. 𑀲𑀸𑀢𑀺 𑀬𑀸𑀣𑀸𑀯𑀲𑀭𑀲𑀪𑀽𑀫𑀺. 𑀯𑀺𑀧𑀲𑁆𑀲𑀦𑀸𑀢𑀺 𑀩𑀮𑀯𑀯𑀺𑀧𑀲𑁆𑀲𑀦𑀸. 𑀓𑁂𑀘𑀺 ‘‘𑀪𑀗𑁆𑀕𑀜𑀸𑀡𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀯𑀤𑀦𑁆𑀢𑀺. 𑀯𑀺𑀧𑀲𑁆𑀲𑀦𑀸𑀬 𑀧𑀸𑀤𑀓𑀚𑁆𑀛𑀸𑀦𑁂 𑀘 𑀲𑀢𑀺𑀆𑀤𑀬𑁄 𑀩𑁄𑀚𑁆𑀛𑀗𑁆𑀕𑀧𑀓𑁆𑀔𑀺𑀓𑀸 𑀏𑀯 𑀧𑀭𑀺𑀬𑀸𑀬𑀩𑁄𑀥𑀺𑀧𑀓𑁆𑀔𑀺𑀬𑀪𑀸𑀯𑀢𑁄. 𑀢𑀢𑁆𑀣𑀸𑀢𑀺𑀆𑀤𑀺 𑀘𑀢𑀼𑀩𑁆𑀩𑀺𑀥𑀸𑀦𑀁 𑀩𑁄𑀚𑁆𑀛𑀗𑁆𑀕𑀸𑀦𑀁 𑀪𑀽𑀫𑀺𑀯𑀺𑀪𑀸𑀕𑀤𑀲𑁆𑀲𑀦𑀁.

𑁭𑁬. 𑀙𑀝𑁆𑀞𑁂 𑀢𑁂𑀲𑀁 𑀅𑀦𑁆𑀢𑀭𑁂𑀢𑀺 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑀭𑁂. 𑀓𑀸𑀫𑀁 𑀲𑀗𑁆𑀕𑀻𑀢𑀺𑀆𑀭𑀼𑀴𑁆𑀳𑀯𑀲𑁂𑀦 𑀅𑀧𑁆𑀧𑀓𑀫𑀺𑀤𑀁 𑀲𑀼𑀢𑁆𑀢𑀧𑀤𑀁, 𑀪𑀕𑀯𑀸 𑀧𑀦𑁂𑀢𑁆𑀣 𑀲𑀦𑁆𑀦𑀺𑀧𑀢𑀺𑀢𑀧𑀭𑀺𑀲𑀸𑀬 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀯𑀺𑀢𑁆𑀣𑀸𑀭𑀺𑀓𑀁 𑀓𑀭𑁄𑀢𑀻𑀢𑀺 𑀓𑀢𑁆𑀯𑀸 𑀇𑀤𑀁 𑀯𑀼𑀢𑁆𑀢𑀁 𑁋 ‘‘𑀫𑀳𑀢𑀻 𑀤𑁂𑀲𑀦𑀸 𑀪𑀯𑀺𑀲𑁆𑀲𑀢𑀻’’𑀢𑀺. 𑀕𑀸𑀫𑀦𑀺𑀕𑀫𑀸𑀤𑀺𑀓𑀣𑀸 𑀦𑀢𑁆𑀣𑀻𑀢𑀺 𑀢𑀲𑁆𑀲𑀸 𑀓𑀣𑀸𑀬 𑀅𑀢𑀺𑀭𑀘𑁆𑀙𑀸𑀦𑀓𑀣𑀸𑀪𑀸𑀯𑀫𑀸𑀳𑀼 ¶ . 𑀢𑀣𑀸 𑀳𑀺 𑀲𑀸 𑀧𑀼𑀩𑁆𑀩𑁂 𑀩𑀳𑀼𑀜𑀸𑀢𑀺𑀓𑀁 𑀅𑀳𑁄𑀲𑀺 𑀩𑀳𑀼𑀧𑀓𑁆𑀔𑀁, 𑀇𑀤𑀸𑀦𑀺 𑀅𑀧𑁆𑀧𑀜𑀸𑀢𑀺𑀓𑀁 𑀅𑀧𑁆𑀧𑀧𑀓𑁆𑀔𑀦𑁆𑀢𑀺 𑀅𑀦𑀺𑀘𑁆𑀘𑀢𑀸𑀫𑀼𑀔𑁂𑀦 𑀦𑀺𑀬𑁆𑀬𑀸𑀦𑀺𑀓𑀧𑀓𑁆𑀔𑀺𑀓𑀸 𑀚𑀸𑀢𑀸. 𑀏𑀢𑀸𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀬 𑀧𑀭𑀺𑀳𑀸𑀦𑀺𑀬𑀸. 𑀧𑀢𑀺𑀓𑀺𑀝𑁆𑀞𑀦𑁆𑀢𑀺 𑀦𑀺𑀳𑀻𑀦𑀁. 𑀫𑀫 𑀲𑀸𑀲𑀦𑁂𑀢𑀺 𑀇𑀤𑀁 𑀓𑀫𑁆𑀫𑀲𑁆𑀲𑀓𑀢𑀚𑁆𑀛𑀸𑀦𑀧𑀜𑁆𑀜𑀸𑀦𑀫𑁆𑀧𑀺 𑀯𑀺𑀲𑁂𑀲𑀦𑀫𑁂𑀯. 𑀢𑀤𑀼𑀪𑀬𑀫𑁆𑀧𑀺 𑀳𑀺 𑀩𑀸𑀳𑀺𑀭𑀓𑀸𑀦𑀁 𑀢𑀧𑁆𑀧𑀜𑁆𑀜𑀸𑀤𑁆𑀯𑀬𑀢𑁄 𑀲𑀸𑀢𑀺𑀲𑀬𑀫𑁂𑀯 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁 𑀤𑁂𑀲𑀦𑀸𑀬 𑀮𑀤𑁆𑀥𑀯𑀺𑀲𑁂𑀲𑀢𑁄 𑀯𑀺𑀯𑀝𑁆𑀝𑀽𑀧𑀦𑀺𑀲𑁆𑀲𑀬𑀢𑁄 𑀘.

𑁭𑁭. 𑀲𑀢𑁆𑀢𑀫𑁂 𑀢𑁂𑀲𑀁 𑀘𑀺𑀢𑁆𑀢𑀸𑀘𑀸𑀭𑀁 𑀜𑀢𑁆𑀯𑀸𑀢𑀺 𑀢𑀣𑀸 𑀓𑀣𑁂𑀦𑁆𑀢𑀸𑀦𑀁 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀢𑀢𑁆𑀣 𑀉𑀧𑀕𑀫𑀦𑁂𑀦 𑀅𑀢𑁆𑀢𑀦𑁄 𑀤𑁂𑀲𑀦𑀸𑀬 𑀪𑀸𑀚𑀦𑀪𑀽𑀢𑀁 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀁 𑀜𑀢𑁆𑀯𑀸. 𑀓𑀫𑁆𑀫𑀲𑁆𑀲𑀓𑀢𑀸𑀤𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀛𑀸𑀦𑀧𑀜𑁆𑀜𑀸𑀤𑀻𑀦𑀁 𑀘𑀢𑀼𑀦𑁆𑀦𑀫𑁆𑀧𑀺 𑀧𑀜𑁆𑀜𑀸𑀦𑀁 𑀕𑀳𑀡𑀁.

𑁭𑁮-𑁮𑁦. 𑀅𑀝𑁆𑀞𑀫𑀸𑀤𑀻𑀲𑀼 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀬𑀸 𑀏𑀲 𑀫𑀫 𑀲𑀸𑀲𑀦𑁂’’𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀓𑀮𑁆𑀬𑀸𑀡𑀫𑀺𑀢𑁆𑀢𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮𑁧-𑁮𑁨. 𑀦𑀯𑀫𑁂 𑀯𑀕𑁆𑀕𑁂 𑀦𑀢𑁆𑀣𑀺 𑀯𑀢𑁆𑀢𑀩𑁆𑀩𑀁.

𑁧𑁦. 𑀤𑀼𑀢𑀺𑀬𑀧𑀫𑀸𑀤𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸

𑁯𑁮-𑁧𑁧𑁫. 𑀤𑀲𑀫𑁂 ¶ 𑀯𑀕𑁆𑀕𑁂 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑁂 𑀪𑀯𑀁 𑀅𑀚𑁆𑀛𑀢𑁆𑀢𑀺𑀓𑀁. 𑀅𑀚𑁆𑀛𑀢𑁆𑀢𑀲𑀦𑁆𑀢𑀸𑀦𑀢𑁄 𑀩𑀳𑀺𑀤𑁆𑀥𑀸 𑀪𑀯𑀁 𑀩𑀸𑀳𑀺𑀭𑀁. 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀦𑀬𑁂𑀦𑀸𑀢𑀺 ‘‘𑀅𑀯𑀺𑀦𑀸𑀲𑀸𑀬𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀘𑀢𑀼𑀓𑁆𑀓𑁄𑀝𑀺𑀓𑁂𑀢𑀺 ‘‘𑀅𑀦𑀼𑀬𑁄𑀕𑁄 𑀅𑀓𑀼𑀲𑀮𑀸𑀦𑀁 ¶ , 𑀅𑀦𑀦𑀼𑀬𑁄𑀕𑁄 𑀓𑀼𑀲𑀮𑀸𑀦𑀁, 𑀅𑀦𑀼𑀬𑁄𑀕𑁄 𑀓𑀼𑀲𑀮𑀸𑀦𑀁, 𑀅𑀦𑀦𑀼𑀬𑁄𑀕𑁄 𑀅𑀓𑀼𑀲𑀮𑀸𑀦’’𑀦𑁆𑀢𑀺 (𑀅. 𑀦𑀺. 𑁧.𑁯𑁬) 𑀏𑀯𑀁 𑀧𑀭𑀺𑀬𑁄𑀲𑀸𑀦𑀲𑀼𑀢𑁆𑀢𑁂 𑀆𑀕𑀢𑀦𑀬𑀁 𑀕𑀳𑁂𑀢𑁆𑀯𑀸 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁧.𑁧𑁧) 𑀆𑀕𑀢𑀲𑀼𑀢𑁆𑀢𑀸𑀦𑀁 𑀲𑀫𑀜𑁆𑀜𑀸 𑀚𑀸𑀢𑀸.

𑁧𑁩𑁦. 𑀲𑀼𑀢𑁆𑀢𑀦𑁆𑀢𑀦𑀬𑁂 𑀬𑀣𑀸𑀘𑁄𑀤𑀦𑀸 𑀲𑀁𑀓𑀺𑀮𑁂𑀲𑀥𑀫𑁆𑀫𑀸𑀦𑀁 𑀯𑀺𑀧𑀭𑀺𑀬𑁂𑀲𑀦𑀁, 𑀢𑀁𑀢𑀁𑀥𑀫𑁆𑀫𑀓𑁄𑀝𑁆𑀞𑀸𑀲𑀸𑀦𑀜𑁆𑀘 𑀊𑀦𑀢𑁄 𑀅𑀥𑀺𑀓𑀢𑁄 𑀘 𑀧𑀯𑁂𑀤𑀦𑀁 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑀦𑀁. 𑀢𑁂𑀲𑀁𑀬𑁂𑀯 𑀧𑀦 𑀅𑀯𑀺𑀧𑀭𑀻𑀢𑀢𑁄 𑀅𑀦𑀽𑀦𑀸𑀥𑀺𑀓𑀢𑁄 𑀘 𑀧𑀯𑁂𑀤𑀦𑀁 𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑀦𑀁. 𑀏𑀯𑀁 𑀯𑀺𑀦𑀬𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀅𑀬𑀣𑀸𑀯𑀺𑀥𑀺𑀧𑁆𑀧𑀯𑁂𑀤𑀦𑀁 𑀅𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑀦𑀁. 𑀬𑀣𑀸𑀯𑀺𑀥𑀺𑀧𑁆𑀧𑀯𑁂𑀤𑀦𑀁 𑀥𑀫𑁆𑀫𑀁 𑀥𑀫𑁆𑀫𑁄𑀢𑀺 𑀤𑀻𑀧𑀦𑀁. 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀧𑀜𑁆𑀘𑀯𑀺𑀥𑁄 𑀲𑀁𑀯𑀭𑀯𑀺𑀦𑀬𑁄 𑀧𑀳𑀸𑀦𑀯𑀺𑀦𑀬𑁄 𑀘 𑀯𑀺𑀦𑀬𑁄, 𑀢𑀧𑁆𑀧𑀝𑀺𑀧𑀓𑁆𑀔𑁂𑀦 𑀅𑀯𑀺𑀦𑀬𑁄. 𑀯𑀺𑀦𑀬𑀦𑀬𑁂𑀦 𑀯𑀢𑁆𑀣𑀼𑀲𑀫𑁆𑀧𑀤𑀸𑀤𑀺𑀦𑀸 𑀬𑀣𑀸𑀯𑀺𑀥𑀺𑀧𑁆𑀧𑀝𑀺𑀧𑀢𑁆𑀢𑀺 𑀏𑀯 𑀯𑀺𑀦𑀬𑁄, 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀅𑀯𑀺𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀺𑀁𑀲 𑀦𑀺𑀲𑁆𑀲𑀕𑁆𑀕𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀸𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀆𑀤𑁆𑀬𑀢𑁆𑀣𑁄. 𑀢𑁂𑀦 𑀤𑁆𑀯𑁂𑀦𑀯𑀼𑀢𑀺 𑀧𑀸𑀘𑀺𑀢𑁆𑀢𑀺𑀬𑀸, 𑀘𑀢𑁆𑀢𑀸𑀭𑁄 𑀧𑀸𑀝𑀺𑀤𑁂𑀲𑀦𑀺𑀬𑀸, 𑀲𑀢𑁆𑀢 𑀅𑀥𑀺𑀓𑀭𑀡𑀲𑀫𑀣𑀸𑀢𑀺 𑀇𑀫𑁂𑀲𑀁 𑀲𑀗𑁆𑀕𑀳𑁄. 𑀏𑀓𑀢𑀺𑀁𑀲 𑀦𑀺𑀲𑁆𑀲𑀕𑁆𑀕𑀺𑀬𑀸𑀢𑀺 𑀏𑀢𑁆𑀣 ‘‘𑀢𑁂𑀦𑀯𑀼𑀢𑀺 𑀧𑀸𑀘𑀺𑀢𑁆𑀢𑀺𑀬𑀸’’𑀢𑀺𑀆𑀤𑀺𑀦𑀸 𑀯𑀢𑁆𑀢𑀩𑁆𑀩𑀁. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀅𑀥𑀺𑀕𑀦𑁆𑀢𑀩𑁆𑀩𑀢𑁄 𑀅𑀥𑀺𑀕𑀫𑁄, 𑀫𑀕𑁆𑀕𑀨𑀮𑀸𑀦𑀺. 𑀦𑀺𑀩𑁆𑀩𑀸𑀦𑀁 𑀧𑀦 𑀅𑀦𑁆𑀢𑀭𑀥𑀸𑀦𑀸𑀪𑀸𑀯𑀢𑁄 𑀇𑀥 𑀦 𑀕𑀬𑁆𑀳𑀢𑀺. 𑀧𑀝𑀺𑀧𑀚𑁆𑀚𑀦𑀁 𑀧𑀝𑀺𑀧𑀢𑁆𑀢𑀺, 𑀲𑀺𑀓𑁆𑀔𑀢𑁆𑀢𑀬𑀲𑀫𑀸𑀬𑁄𑀕𑁄. 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀢𑁄 𑀯𑀸 𑀧𑀝𑀺𑀧𑀢𑁆𑀢𑀺. 𑀧𑀭𑀺𑀬𑀸𑀧𑀼𑀡𑀺𑀢𑀩𑁆𑀩𑀢𑁄 𑀧𑀭𑀺𑀬𑀢𑁆𑀢𑀺, 𑀧𑀺𑀝𑀓𑀢𑁆𑀢𑀬𑀁. 𑀫𑀕𑁆𑀕𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀧𑀺 𑀢𑀢𑀺𑀬𑀯𑀺𑀚𑁆𑀚𑀸𑀙𑀝𑁆𑀞𑀸𑀪𑀺𑀜𑁆𑀜𑀸 𑀯𑀺𑀚𑁆𑀚𑀸𑀪𑀺𑀜𑁆𑀜𑀸𑀲𑀸𑀫𑀜𑁆𑀜𑀢𑁄 ‘‘𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀙 𑀅𑀪𑀺𑀜𑁆𑀜𑀸’’𑀢𑀺 𑀧𑀼𑀦𑀧𑀺 𑀕𑀳𑀺𑀢𑀸. 𑀢𑀢𑁄 𑀧𑀭𑀁 𑀙 𑀅𑀪𑀺𑀜𑁆𑀜𑀸𑀢𑀺 𑀯𑀲𑁆𑀲𑀲𑀳𑀲𑁆𑀲𑀢𑁄 𑀧𑀭𑀁 𑀙 𑀅𑀪𑀺𑀜𑁆𑀜𑀸 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺, 𑀦 𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀢𑁄𑀢𑀺 𑀅𑀪𑀺𑀜𑁆𑀜𑀸𑀓𑀸𑀮𑀢𑁄 𑀧𑀘𑁆𑀙𑀸. 𑀢𑀸𑀢𑀺 𑀅𑀪𑀺𑀜𑁆𑀜𑀸𑀬𑁄. 𑀧𑀼𑀩𑁆𑀩𑀪𑀸𑀕𑁂 𑀛𑀸𑀦𑀲𑀺𑀦𑁂𑀳𑀸𑀪𑀸𑀯𑁂𑀦 𑀓𑁂𑀯𑀮𑀸𑀬 𑀯𑀺𑀧𑀲𑁆𑀲𑀦𑀸𑀬 𑀞𑀢𑁆𑀯𑀸 𑀅𑀕𑁆𑀕𑀨𑀮𑀧𑁆𑀧𑀢𑁆𑀢𑀸 𑀲𑀼𑀓𑁆𑀔𑀯𑀺𑀧𑀲𑁆𑀲𑀓𑀸 𑀦𑀸𑀫, 𑀫𑀕𑁆𑀕𑀓𑁆𑀔𑀡𑁂 𑀧𑀦 ‘‘𑀛𑀸𑀦𑀲𑀺𑀦𑁂𑀳𑁄 𑀦𑀢𑁆𑀣𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑁄 ‘‘𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻’’𑀢𑀺 (𑀅. 𑀦𑀺. 𑁪.𑁧𑁭𑁦) 𑀯𑀘𑀦𑀢𑁄. 𑀧𑀘𑁆𑀙𑀺𑀫𑀓𑀲𑁆𑀲𑀸𑀢𑀺 𑀲𑀩𑁆𑀩𑀧𑀘𑁆𑀙𑀺𑀫𑀲𑁆𑀲. 𑀓𑀺𑀜𑁆𑀘𑀸𑀧𑀺 𑀅𑀭𑀺𑀬𑁄 𑀅𑀧𑀭𑀺𑀳𑀸𑀦𑀥𑀫𑁆𑀫𑁄 ¶ ¶ , 𑀲𑁄𑀢𑀸𑀧𑀦𑁆𑀦𑀲𑁆𑀲 𑀧𑀦 𑀉𑀤𑁆𑀥𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸 𑀅𑀥𑀺𑀕𑀢𑀥𑀫𑁆𑀫𑁄 𑀉𑀧𑁆𑀧𑀦𑁆𑀦𑁄 𑀦𑀸𑀫 𑀦𑀢𑁆𑀣𑀺, 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸 𑀅𑀲𑀢𑀺 𑀬𑀸𑀯 𑀉𑀧𑀭𑀺𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀸𑀯 𑀅𑀥𑀺𑀕𑀫𑀲𑁆𑀲 𑀅𑀲𑀫𑁆𑀪𑀯𑁄 𑀏𑀯𑀸𑀢𑀺 𑀆𑀳 𑁋 ‘‘𑀲𑁄𑀢𑀸𑀧𑀦𑁆𑀦𑀲𑁆𑀲…𑀧𑁂… 𑀦𑀸𑀫 𑀳𑁄𑀢𑀻’’𑀢𑀺. 𑀢𑀲𑁆𑀲𑀺𑀤𑀁 𑀫𑀦𑀼𑀲𑁆𑀲𑀮𑁄𑀓𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀦 𑀘𑁄𑀤𑁂𑀦𑁆𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀲𑁆𑀫𑀺𑀁 𑀯𑀺𑀚𑁆𑀚𑀫𑀸𑀦𑀁 𑀤𑁄𑀲𑀁 𑀚𑀸𑀦𑀦𑁆𑀢𑀸𑀧𑀺 𑀦 𑀘𑁄𑀤𑁂𑀦𑁆𑀢𑀺 𑀦 𑀲𑀸𑀭𑁂𑀦𑁆𑀢𑀺. 𑀅𑀓𑀼𑀓𑁆𑀓𑀼𑀘𑁆𑀘𑀓𑀸 𑀳𑁄𑀦𑁆𑀢𑀻𑀢𑀺 𑀓𑀼𑀓𑁆𑀓𑀼𑀘𑁆𑀘𑀁 𑀦 𑀉𑀧𑁆𑀧𑀸𑀤𑁂𑀦𑁆𑀢𑀺. ‘‘𑀅𑀲𑀓𑁆𑀓𑀘𑁆𑀘𑀓𑀸𑀭𑀺𑀦𑁄 𑀳𑁄𑀦𑁆𑀢𑀻’’𑀢𑀺 𑀘 𑀧𑀞𑀦𑁆𑀢𑀺, 𑀲𑀸𑀣𑀮𑀺𑀓𑀢𑀸𑀬 𑀲𑀺𑀓𑁆𑀔𑀸𑀲𑀼 𑀅𑀲𑀓𑁆𑀓𑀘𑁆𑀘𑀓𑀸𑀭𑀺𑀦𑁄 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀪𑀺𑀓𑁆𑀔𑀽𑀦𑀁 𑀲𑀢𑁂𑀧𑀺 𑀲𑀳𑀲𑁆𑀲𑁂𑀧𑀺 𑀥𑀭𑀫𑀸𑀦𑁂𑀢𑀺 𑀇𑀤𑀁 𑀩𑀸𑀳𑀼𑀮𑁆𑀮𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀦𑁆𑀢𑀺𑀫𑀯𑀢𑁆𑀣𑀼𑀅𑀦𑀚𑁆𑀛𑀸𑀧𑀦𑁆𑀦𑁂𑀲𑀼 𑀓𑀢𑀺𑀧𑀬𑀫𑀢𑁆𑀢𑁂𑀲𑀼𑀧𑀺 𑀪𑀺𑀓𑁆𑀔𑀽𑀲𑀼 𑀥𑀭𑀦𑁆𑀢𑁂𑀲𑀼, 𑀏𑀓𑀲𑁆𑀫𑀺𑀁 𑀯𑀸 𑀥𑀭𑀦𑁆𑀢𑁂 𑀧𑀝𑀺𑀧𑀢𑁆𑀢𑀺 𑀅𑀦𑀦𑁆𑀢𑀭𑀳𑀺𑀢𑀸 𑀏𑀯 𑀦𑀸𑀫 𑀳𑁄𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀧𑀘𑁆𑀙𑀺𑀫𑀓𑀲𑁆𑀲…𑀧𑁂… 𑀅𑀦𑁆𑀢𑀭𑀳𑀺𑀢𑀸 𑀳𑁄𑀢𑀻’’𑀢𑀺.

𑀅𑀦𑁆𑀢𑁂𑀯𑀸𑀲𑀺𑀓𑁂 𑀕𑀳𑁂𑀢𑀼𑀦𑁆𑀢𑀺 𑀅𑀦𑁆𑀢𑁂𑀯𑀸𑀲𑀺𑀓𑁂 𑀲𑀗𑁆𑀕𑀳𑁂𑀢𑀼𑀁. 𑀅𑀢𑁆𑀣𑀯𑀲𑁂𑀦𑀸𑀢𑀺 𑀅𑀝𑁆𑀞𑀓𑀣𑀸𑀯𑀲𑁂𑀦. 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬𑀸𑀢𑀺 𑀉𑀧𑀭𑀺𑀢𑁄 𑀧𑀝𑁆𑀞𑀸𑀬. 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑀫𑀢𑁆𑀢𑀦𑁆𑀢𑀺 𑀯𑀺𑀦𑀬𑀫𑀸𑀢𑀺𑀓𑀸𑀧𑀸𑀴𑀺𑀫𑀸𑀳. 𑀆𑀴𑀯𑀓𑀧𑀜𑁆𑀳𑀸𑀤𑀻𑀦𑀁 𑀯𑀺𑀬 𑀤𑁂𑀯𑁂𑀲𑀼 𑀧𑀭𑀺𑀬𑀢𑁆𑀢𑀺𑀬𑀸 𑀧𑀯𑀢𑁆𑀢𑀺 𑀅𑀧𑁆𑀧𑀫𑀸𑀡𑀦𑁆𑀢𑀺 𑀆𑀳 𑁋 ‘‘𑀫𑀦𑀼𑀲𑁆𑀲𑁂𑀲𑀽’’𑀢𑀺.

𑀑𑀝𑁆𑀞𑀝𑁆𑀞𑀺𑀯𑀡𑁆𑀡𑀦𑁆𑀢𑀺 𑀑𑀝𑁆𑀞𑀸𑀦𑀁 𑀅𑀝𑁆𑀞𑀺𑀯𑀡𑁆𑀡𑀁, 𑀤𑀦𑁆𑀢𑀓𑀲𑀸𑀯𑀁 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀯𑀸𑀭𑁂 𑀭𑀚𑀺𑀢𑁆𑀯𑀸 𑀤𑀦𑁆𑀢𑀯𑀡𑁆𑀡𑀁 𑀓𑀢𑁆𑀯𑀸 𑀥𑀸𑀭𑁂𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑁂𑀲𑁂𑀲𑀼 𑀯𑀸 𑀅𑀮𑁆𑀮𑀻𑀬𑀸𑀧𑁂𑀦𑁆𑀢𑀻𑀢𑀺 𑀢𑁂𑀦 𑀓𑀸𑀲𑀸𑀯𑀔𑀡𑁆𑀟𑁂𑀦 𑀓𑁂𑀲𑁂 𑀩𑀦𑁆𑀥𑀦𑁆𑀢𑀸 𑀅𑀮𑁆𑀮𑀻𑀬𑀸𑀧𑁂𑀦𑁆𑀢𑀺. 𑀪𑀺𑀓𑁆𑀔𑀼𑀕𑁄𑀢𑁆𑀢𑀲𑁆𑀲 𑀅𑀪𑀺𑀪𑀯𑀦𑀢𑁄 𑀯𑀺𑀦𑀸𑀲𑀦𑀢𑁄 𑀕𑁄𑀢𑁆𑀭𑀪𑀼𑀦𑁄. 𑀅𑀣 𑀯𑀸 𑀕𑁄𑀢𑁆𑀢𑀁 𑀯𑀼𑀘𑁆𑀘𑀢𑀺 𑀲𑀸𑀥𑀸𑀭𑀡𑀁 𑀦𑀸𑀫𑀁, 𑀫𑀢𑁆𑀢𑀲𑀤𑁆𑀤𑁄 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑁄, 𑀢𑀲𑁆𑀫𑀸 ‘‘𑀲𑀫𑀡𑀸’’𑀢𑀺 𑀕𑁄𑀢𑁆𑀢𑀫𑀢𑁆𑀢𑀁 𑀅𑀦𑀼𑀪𑀯𑀦𑁆𑀢𑀺 𑀥𑀸𑀭𑁂𑀦𑁆𑀢𑀻𑀢𑀺 𑀕𑁄𑀢𑁆𑀭𑀪𑀼𑀦𑁄, 𑀦𑀸𑀫𑀫𑀢𑁆𑀢𑀲𑀫𑀡𑀸𑀢𑀺 𑀅𑀢𑁆𑀣𑁄. 𑀓𑀸𑀲𑀸𑀯𑀕𑀢𑀓𑀡𑁆𑀞𑀢𑀸𑀬, 𑀓𑀸𑀲𑀸𑀯𑀕𑁆𑀕𑀳𑀡𑀳𑁂𑀢𑀼𑀉𑀧𑁆𑀧𑀚𑁆𑀚𑀦𑀓𑀲𑁄𑀓𑀢𑀸𑀬 𑀯𑀸 𑀓𑀸𑀲𑀸𑀯𑀓𑀡𑁆𑀞𑀸. 𑀲𑀗𑁆𑀖𑀕𑀢𑀦𑁆𑀢𑀺 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑀢𑁆𑀢𑀸 𑀲𑀗𑁆𑀖𑀕𑀢𑀁. 𑀢𑀁 𑀲𑀭𑀻𑀭𑀦𑁆𑀢𑀺 𑀢𑀁 𑀥𑀸𑀢𑀼𑀲𑀭𑀻𑀭𑀁.

𑀢𑁂𑀦𑁂𑀯𑀸𑀢𑀺 𑀧𑀭𑀺𑀬𑀢𑁆𑀢𑀺𑀅𑀦𑁆𑀢𑀭𑀥𑀸𑀦𑀫𑀽𑀮𑀓𑀢𑁆𑀢𑀸 𑀏𑀯 𑀇𑀢𑀭𑀅𑀦𑁆𑀢𑀭𑀥𑀸𑀦𑀲𑁆𑀲. 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸 𑀙𑀸𑀢𑀓𑀪𑀬𑁂 𑀧𑀭𑀢𑀻𑀭𑀕𑀫𑀦𑀸𑀬 𑀪𑀺𑀓𑁆𑀔𑀽 𑀉𑀲𑁆𑀲𑀼𑀓𑁆𑀓𑀫𑀓𑀸𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑁂𑀢𑀺 𑀉𑀪𑀬𑁂𑀧𑀺 𑀧𑀁𑀲𑀼𑀓𑀽𑀮𑀺𑀓𑀢𑁆𑀣𑁂𑀭𑁂 𑀥𑀫𑁆𑀫𑀓𑀣𑀺𑀓𑀢𑁆𑀣𑁂𑀭𑁂 𑀘. 𑀣𑁂𑀭𑀸𑀢𑀺 𑀢𑀢𑁆𑀣 𑀞𑀺𑀢𑀸 𑀲𑀓𑁆𑀔𑀺𑀪𑀽𑀢𑀸 𑀣𑁂𑀭𑀸. 𑀥𑀫𑁆𑀫𑀓𑀣𑀺𑀓𑀢𑁆𑀣𑁂𑀭𑀸 ‘‘𑀬𑀸𑀯 𑀢𑀺𑀝𑁆𑀞𑀦𑁆𑀢𑀺 ¶ 𑀲𑀼𑀢𑁆𑀢𑀦𑁆𑀢𑀸…𑀧𑁂… 𑀬𑁄𑀕𑀓𑁆𑀔𑁂𑀫𑀸 𑀦 𑀥𑀁𑀲𑀢𑀻’’𑀢𑀺 𑀇𑀤𑀁 𑀲𑀼𑀢𑁆𑀢𑀁 𑀆𑀳𑀭𑀺𑀢𑁆𑀯𑀸 ‘‘𑀲𑀼𑀢𑁆𑀢𑀦𑁆𑀢𑁂 𑀭𑀓𑁆𑀔𑀺𑀢𑁂 𑀲𑀦𑁆𑀢𑁂, 𑀧𑀝𑀺𑀧𑀢𑁆𑀢𑀺 𑀳𑁄𑀢𑀺 𑀭𑀓𑁆𑀔𑀺𑀢𑀸’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀧𑀁𑀲𑀼𑀓𑀽𑀮𑀺𑀓𑀢𑁆𑀣𑁂𑀭𑁂 𑀅𑀧𑁆𑀧𑀝𑀺𑀪𑀸𑀦𑁂 𑀅𑀓𑀁𑀲𑀼 ¶ . 𑀇𑀤𑀸𑀦𑀺 𑀧𑀭𑀺𑀬𑀢𑁆𑀢𑀺𑀬𑀸 𑀅𑀦𑀦𑁆𑀢𑀭𑀥𑀸𑀦𑀫𑁂𑀯 𑀇𑀢𑀭𑁂𑀲𑀁 𑀅𑀦𑀦𑁆𑀢𑀭𑀥𑀸𑀦𑀳𑁂𑀢𑀽𑀢𑀺 𑀇𑀫𑀫𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑀢𑁄 𑀅𑀦𑁆𑀯𑀬𑀢𑁄 𑀘 𑀉𑀧𑀫𑀸𑀳𑀺 𑀯𑀺𑀪𑀸𑀯𑁂𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀤𑀼𑀢𑀺𑀬𑀧𑀫𑀸𑀤𑀸𑀤𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪𑁦-𑁧𑁫𑁦. 𑀏𑀓𑀸𑀤𑀲𑀫𑀤𑁆𑀯𑀸𑀤𑀲𑀫𑀯𑀕𑁆𑀕𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸 𑀏𑀯.

𑁧𑁩. 𑀏𑀓𑀧𑀼𑀕𑁆𑀕𑀮𑀯𑀕𑁆𑀕𑀯𑀡𑁆𑀡𑀦𑀸

𑁧𑁭𑁦. 𑀏𑀓𑀧𑀼𑀕𑁆𑀕𑀮𑀲𑁆𑀲𑀸𑀢𑀺 ¶ 𑀏𑀓𑀧𑀼𑀕𑁆𑀕𑀮𑀯𑀕𑁆𑀕𑀲𑁆𑀲. 𑀢𑁂𑀦𑀸𑀳 𑁋 ‘‘𑀧𑀞𑀫𑁂’’𑀢𑀺. 𑀏𑀓𑁄𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄, 𑀢𑀢𑁄 𑀏𑀯 𑀤𑀼𑀢𑀺𑀬𑀸𑀤𑀺𑀧𑀝𑀺𑀓𑁆𑀔𑁂𑀧𑀢𑁆𑀣𑁄. 𑀧𑀥𑀸𑀦𑀸𑀲𑀳𑀸𑀬𑀢𑁆𑀣𑁄𑀧𑀺 𑀏𑀓𑀲𑀤𑁆𑀤𑁄 𑀳𑁄𑀢𑀻𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀕𑀡𑀦𑀧𑀭𑀺𑀘𑁆𑀙𑁂𑀤𑁄’’𑀢𑀺 𑀆𑀳. 𑀲𑀫𑁆𑀫𑀼𑀢𑀺𑀬𑀸 𑀤𑁂𑀲𑀦𑀸 𑀲𑀫𑁆𑀫𑀼𑀢𑀺𑀤𑁂𑀲𑀦𑀸. 𑀧𑀭𑀫𑀢𑁆𑀣𑀲𑁆𑀲 𑀤𑁂𑀲𑀦𑀸 𑀧𑀭𑀫𑀢𑁆𑀣𑀤𑁂𑀲𑀦𑀸. 𑀢𑀢𑁆𑀣𑀸𑀢𑀺 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀤𑁂𑀲𑀦𑀸𑀲𑀼, 𑀦 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑁂𑀲𑀼. 𑀢𑁂𑀦𑀸𑀳 𑁋 ‘‘𑀏𑀯𑀭𑀽𑀧𑀸 𑀲𑀫𑁆𑀫𑀼𑀢𑀺𑀤𑁂𑀲𑀦𑀸, 𑀏𑀯𑀭𑀽𑀧𑀸 𑀧𑀭𑀫𑀢𑁆𑀣𑀤𑁂𑀲𑀦𑀸’’𑀢𑀺. 𑀢𑀢𑁆𑀭𑀺𑀤𑀁 𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀸𑀦𑀁 𑀮𑀓𑁆𑀔𑀡𑀁 𑁋 𑀬𑀲𑁆𑀫𑀺𑀁 𑀪𑀺𑀦𑁆𑀦𑁂, 𑀩𑀼𑀤𑁆𑀥𑀺𑀬𑀸 𑀯𑀸 𑀅𑀯𑀬𑀯𑀯𑀺𑀦𑀺𑀩𑁆𑀪𑁄𑀕𑁂 𑀓𑀢𑁂 𑀦 𑀢𑀁𑀲𑀫𑀜𑁆𑀜𑀸, 𑀲𑀸 𑀖𑀝𑀧𑀝𑀸𑀤𑀺𑀧𑁆𑀧𑀪𑁂𑀤𑀸 𑀲𑀫𑁆𑀫𑀼𑀢𑀺, 𑀢𑀩𑁆𑀩𑀺𑀧𑀭𑀺𑀬𑀸𑀬𑁂𑀦 𑀧𑀭𑀫𑀢𑁆𑀣𑀸. 𑀦 𑀳𑀺 𑀓𑀓𑁆𑀔𑀴𑀨𑀼𑀲𑀦𑀸𑀤𑀺𑀲𑀪𑀸𑀯𑁂 𑀲𑁄 𑀦𑀬𑁄 𑀮𑀩𑁆𑀪𑀢𑀺. 𑀢𑀢𑁆𑀣 𑀭𑀽𑀧𑀸𑀤𑀺𑀥𑀫𑁆𑀫𑀲𑀫𑀽𑀳𑀁 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀉𑀧𑀸𑀤𑀸𑀬 𑀧𑀼𑀕𑁆𑀕𑀮𑀯𑁄𑀳𑀸𑀭𑁄𑀢𑀺 𑀧𑀼𑀕𑁆𑀕𑀮𑁄𑀢𑀺 𑀲𑀫𑁆𑀫𑀼𑀢𑀺𑀤𑁂𑀲𑀦𑀸. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀉𑀧𑁆𑀧𑀸𑀤𑀯𑀬𑀯𑀦𑁆𑀢𑁄 𑀲𑀪𑀸𑀯𑀥𑀫𑁆𑀫𑀸 𑀦 𑀦𑀺𑀘𑁆𑀘𑀸𑀢𑀺 𑀅𑀦𑀺𑀘𑁆𑀘𑀸𑀢𑀺 𑀆𑀳 𑁋 ‘‘𑀅𑀦𑀺𑀘𑁆𑀘𑀦𑁆𑀢𑀺 𑀧𑀭𑀫𑀢𑁆𑀣𑀤𑁂𑀲𑀦𑀸’’𑀢𑀺. 𑀏𑀲 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺. 𑀦𑀦𑀼 𑀔𑀦𑁆𑀥𑀤𑁂𑀲𑀦𑀸𑀧𑀺 𑀲𑀫𑁆𑀫𑀼𑀢𑀺𑀤𑁂𑀲𑀦𑀸𑀯. 𑀭𑀸𑀲𑀝𑁆𑀞𑁄 𑀯𑀸 𑀳𑀺 𑀔𑀦𑁆𑀥𑀝𑁆𑀞𑁄 𑀓𑁄𑀝𑁆𑀞𑀸𑀲𑀝𑁆𑀞𑁄 𑀯𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀅𑀬𑀁 𑀧𑀦 𑀔𑀦𑁆𑀥𑀲𑀫𑀜𑁆𑀜𑀸 𑀨𑀲𑁆𑀲𑀸𑀤𑀻𑀲𑀼 𑀧𑀯𑀢𑁆𑀢𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺 𑀯𑀺𑀬 𑀧𑀭𑀫𑀢𑁆𑀣𑀲𑀦𑁆𑀦𑀺𑀲𑁆𑀲𑀬𑀸 𑀢𑀲𑁆𑀲 𑀆𑀲𑀦𑁆𑀦𑀢𑀭𑀸, 𑀧𑀼𑀕𑁆𑀕𑀮𑀲𑀫𑀜𑁆𑀜𑀸𑀤𑀬𑁄 𑀯𑀺𑀬 𑀦 𑀤𑀽𑀭𑁂𑀢𑀺 𑀧𑀭𑀫𑀢𑁆𑀣𑀲𑀗𑁆𑀕𑀳𑀸 𑀯𑀼𑀢𑁆𑀢𑀸. 𑀔𑀦𑁆𑀥𑀲𑀻𑀲𑁂𑀦 𑀯𑀸 𑀢𑀤𑀼𑀧𑀸𑀤𑀸𑀦𑀲𑀪𑀸𑀯𑀥𑀫𑁆𑀫𑀸 𑀏𑀯 𑀕𑀳𑀺𑀢𑀸. 𑀦𑀦𑀼 𑀘 𑀲𑀪𑀸𑀯𑀥𑀫𑁆𑀫𑀸 𑀲𑀩𑁆𑀩𑁂𑀧𑀺 𑀲𑀫𑁆𑀫𑀼𑀢𑀺𑀫𑀼𑀔𑁂𑀦𑁂𑀯 𑀤𑁂𑀲𑀦𑀁 𑀆𑀭𑁄𑀳𑀦𑁆𑀢𑀺, 𑀦 𑀲𑀫𑀼𑀔𑁂𑀦𑀸𑀢𑀺 𑀲𑀩𑁆𑀩𑀸𑀧𑀺 𑀤𑁂𑀲𑀦𑀸 𑀲𑀫𑁆𑀫𑀼𑀢𑀺𑀤𑁂𑀲𑀦𑀸𑀯 𑀲𑀺𑀬𑀸𑀢𑀺? 𑀦𑀬𑀺𑀤𑀫𑁂𑀯𑀁, 𑀤𑁂𑀲𑁂𑀢𑀩𑁆𑀩𑀥𑀫𑁆𑀫𑀯𑀺𑀪𑀸𑀕𑁂𑀦 𑀤𑁂𑀲𑀦𑀸𑀯𑀺𑀪𑀸𑀕𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀦 𑀳𑀺 𑀲𑀤𑁆𑀤𑁄 𑀓𑁂𑀦𑀘𑀺 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑁂𑀦 𑀯𑀺𑀦𑀸 𑀅𑀢𑁆𑀣𑀁 𑀧𑀓𑀸𑀲𑁂𑀢𑀻𑀢𑀺.

𑀲𑀫𑁆𑀫𑀼𑀢𑀺𑀯𑀲𑁂𑀦 ¶ 𑀤𑁂𑀲𑀦𑀁 𑀲𑀼𑀢𑁆𑀯𑀸𑀢𑀺 ‘‘𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀅𑀢𑁆𑀢𑀦𑁆𑀢𑀧𑁄 𑀳𑁄𑀢𑀺 𑀅𑀢𑁆𑀢𑀧𑀭𑀺𑀢𑀸𑀧𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 (𑀧𑀼. 𑀧. 𑁧𑁭𑁪) 𑀲𑀫𑁆𑀫𑀼𑀢𑀺𑀫𑀼𑀔𑁂𑀦 𑀧𑀯𑀢𑁆𑀢𑀺𑀢𑀤𑁂𑀲𑀦𑀁 𑀲𑀼𑀢𑀫𑀬𑀜𑀸𑀡𑀼𑀧𑁆𑀧𑀸𑀤𑀯𑀲𑁂𑀦 𑀲𑀼𑀢𑁆𑀯𑀸. 𑀅𑀢𑁆𑀣𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸𑀢𑀺 𑀢𑀤𑀦𑀼𑀲𑀸𑀭𑁂𑀦 𑀘𑀢𑀼𑀲𑀘𑁆𑀘𑀲𑀗𑁆𑀔𑀸𑀢𑀁 𑀅𑀢𑁆𑀣𑀁 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀫𑀕𑁆𑀕𑀧𑀜𑁆𑀜𑀸𑀬 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸. 𑀫𑁄𑀳𑀁 𑀧𑀳𑀸𑀬𑀸𑀢𑀺 𑀢𑀤𑁂𑀓𑀝𑁆𑀞𑀓𑀺𑀮𑁂𑀲𑁂𑀳𑀺 𑀲𑀤𑁆𑀥𑀺𑀁 𑀅𑀦𑀯𑀲𑁂𑀲𑀁 𑀫𑁄𑀳𑀁 𑀧𑀚𑀳𑀺𑀢𑁆𑀯𑀸. 𑀯𑀺𑀲𑁂𑀲𑀦𑁆𑀢𑀺 𑀅𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀁 𑀯𑀺𑀲𑁂𑀲𑀁. 𑀢𑁂𑀲𑀦𑁆𑀢𑀺 𑀢𑀸𑀤𑀺𑀲𑀸𑀦𑀁 𑀯𑁂𑀦𑁂𑀬𑁆𑀬𑀸𑀦𑀁. 𑀧𑀭𑀫𑀢𑁆𑀣𑀯𑀲𑁂𑀦𑀸𑀢𑀺 ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁪𑁭𑁧-𑁪𑁭𑁬 𑀆𑀤𑀬𑁄) 𑀧𑀭𑀫𑀢𑁆𑀣𑀥𑀫𑁆𑀫𑀯𑀲𑁂𑀦. 𑀲𑁂𑀲𑀁 𑀅𑀦𑀦𑁆𑀢𑀭𑀦𑀬𑁂 𑀯𑀼𑀢𑁆𑀢𑀲𑀤𑀺𑀲𑀫𑁂𑀯.

𑀢𑀢𑁆𑀭𑀸𑀢𑀺 𑀢𑀲𑁆𑀲𑀁 𑀲𑀫𑁆𑀫𑀼𑀢𑀺𑀯𑀲𑁂𑀦 𑀧𑀭𑀫𑀢𑁆𑀣𑀯𑀲𑁂𑀦 𑀘 𑀤𑁂𑀲𑀦𑀸𑀬𑀁. 𑀤𑁂𑀲𑀪𑀸𑀲𑀸𑀓𑀼𑀲𑀮𑁄𑀢𑀺 𑀦𑀸𑀦𑀸𑀤𑁂𑀲𑀪𑀸𑀲𑀸𑀲𑀼 ¶ 𑀓𑀼𑀲𑀮𑁄. 𑀢𑀺𑀡𑁆𑀡𑀁 𑀯𑁂𑀤𑀸𑀦𑀦𑁆𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁, 𑀢𑀺𑀡𑁆𑀡𑀁 𑀯𑁂𑀤𑀸𑀦𑀁 𑀲𑀺𑀧𑁆𑀧𑀼𑀕𑁆𑀕𑀳𑀡𑀝𑁆𑀞𑀸𑀦𑀸𑀦𑀫𑁆𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯 𑀲𑀺𑀧𑁆𑀧𑀼𑀕𑁆𑀕𑀳𑀡𑀁 𑀧𑀭𑀢𑁄 𑀯𑀓𑁆𑀔𑀢𑀺. 𑀲𑀺𑀧𑁆𑀧𑀸𑀦𑀺 𑀯𑀸 𑀯𑀺𑀚𑁆𑀚𑀸𑀝𑁆𑀞𑀸𑀦𑀪𑀸𑀯𑁂𑀦 𑀯𑁂𑀤𑀦𑁆𑀢𑁄𑀕𑀥𑀸𑀦𑀺 𑀓𑀢𑁆𑀯𑀸 ‘‘𑀢𑀺𑀡𑁆𑀡𑀁 𑀯𑁂𑀤𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀣𑁂𑀢𑀩𑁆𑀩𑀪𑀸𑀯𑁂𑀦 𑀞𑀺𑀢𑀸𑀦𑀺, 𑀦 𑀓𑀢𑁆𑀣𑀘𑀺 𑀲𑀦𑁆𑀦𑀺𑀘𑀺𑀢𑀪𑀸𑀯𑁂𑀦𑀸𑀢𑀺 𑀯𑁂𑀤𑀸𑀦𑀫𑁆𑀧𑀺 𑀓𑀣𑁂𑀢𑀩𑁆𑀩𑀪𑀸𑀯𑁂𑀦𑁂𑀯 𑀞𑀸𑀦𑀁 𑀤𑀻𑀧𑁂𑀦𑁆𑀢𑁄 ‘‘𑀕𑀼𑀳𑀸 𑀢𑀻𑀡𑀺 𑀦𑀺𑀳𑀺𑀢𑀸 𑀦 𑀕𑀬𑁆𑀳𑀦𑁆𑀢𑀻’’𑀢𑀺𑀆𑀤𑀺𑀫𑀺𑀘𑁆𑀙𑀸𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀢𑀺. 𑀦𑀸𑀦𑀸𑀯𑀺𑀥𑀸 𑀤𑁂𑀲𑀪𑀸𑀲𑀸 𑀏𑀢𑁂𑀲𑀦𑁆𑀢𑀺 𑀦𑀸𑀦𑀸𑀤𑁂𑀲𑀪𑀸𑀲𑀸.

𑀧𑀭𑀫𑁄 𑀉𑀢𑁆𑀢𑀫𑁄 𑀅𑀢𑁆𑀣𑁄 𑀧𑀭𑀫𑀢𑁆𑀣𑁄, 𑀥𑀫𑁆𑀫𑀸𑀦𑀁 𑀬𑀣𑀸𑀪𑀽𑀢𑀲𑀪𑀸𑀯𑁄. 𑀮𑁄𑀓𑀲𑀗𑁆𑀓𑁂𑀢𑀫𑀢𑁆𑀢𑀲𑀺𑀤𑁆𑀥𑀸 𑀲𑀫𑁆𑀫𑀼𑀢𑀺. 𑀬𑀤𑀺 𑀏𑀯𑀁 𑀓𑀣𑀁 𑀲𑀫𑁆𑀫𑀼𑀢𑀺𑀓𑀣𑀸𑀬 𑀲𑀘𑁆𑀘𑀢𑀸𑀢𑀺 𑀆𑀳 𑁋 ‘‘𑀮𑁄𑀓𑀲𑀫𑁆𑀫𑀼𑀢𑀺𑀓𑀸𑀭𑀡𑀸’’𑀢𑀺, 𑀮𑁄𑀓𑀲𑀫𑀜𑁆𑀜𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀦𑀢𑁄𑀢𑀺 𑀅𑀢𑁆𑀣𑁄. 𑀮𑁄𑀓𑀲𑀫𑀜𑁆𑀜𑀸 𑀳𑀺 𑀅𑀪𑀺𑀦𑀺𑀯𑁂𑀲𑁂𑀦 𑀯𑀺𑀜𑁆𑀜𑁂𑀬𑁆𑀬𑀸, 𑀦𑀸𑀜𑁆𑀜𑀸𑀧𑀦𑀸 𑀏𑀓𑀘𑁆𑀘𑀲𑁆𑀲 𑀲𑀼𑀢𑀲𑁆𑀲 𑀲𑀸𑀯𑀦𑀸 𑀯𑀺𑀬 𑀦 𑀫𑀼𑀲𑀸 𑀅𑀦𑀢𑀺𑀥𑀸𑀯𑀺𑀢𑀩𑁆𑀩𑀢𑁄 𑀢𑀲𑁆𑀲𑀸. 𑀢𑁂𑀦𑀸𑀳 𑀪𑀕𑀯𑀸 𑁋 ‘‘𑀚𑀦𑀧𑀤𑀦𑀺𑀭𑀼𑀢𑁆𑀢𑀺𑀁 𑀦𑀸𑀪𑀺𑀦𑀺𑀯𑁂𑀲𑁂𑀬𑁆𑀬, 𑀲𑀫𑀜𑁆𑀜𑀁 𑀦𑀸𑀢𑀺𑀥𑀸𑀯𑀬𑁂’’𑀢𑀺. 𑀥𑀫𑁆𑀫𑀸𑀦𑀦𑁆𑀢𑀺 𑀲𑀪𑀸𑀯𑀥𑀫𑁆𑀫𑀸𑀦𑀁. 𑀪𑀽𑀢𑀓𑀸𑀭𑀡𑀸𑀢𑀺 𑀬𑀣𑀸𑀪𑀽𑀢𑀓𑀸𑀭𑀡𑀸 𑀬𑀣𑀸𑀪𑀽𑀢𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀦𑀢𑁄. 𑀲𑀫𑁆𑀫𑀼𑀢𑀺𑀁 𑀯𑁄𑀳𑀭𑀦𑁆𑀢𑀲𑁆𑀲𑀸𑀢𑀺 ‘‘𑀧𑀼𑀕𑁆𑀕𑀮𑁄, 𑀲𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀮𑁄𑀓𑀲𑀫𑀜𑁆𑀜𑀁 𑀓𑀣𑁂𑀦𑁆𑀢𑀲𑁆𑀲.

𑀳𑀺𑀭𑁄𑀢𑁆𑀢𑀧𑁆𑀧𑀤𑀻𑀧𑀦𑀢𑁆𑀣𑀦𑁆𑀢𑀺 𑀮𑁄𑀓𑀧𑀸𑀮𑀦𑀓𑀺𑀘𑁆𑀘𑁂 𑀳𑀺𑀭𑁄𑀢𑁆𑀢𑀧𑁆𑀧𑀥𑀫𑁆𑀫𑁂 𑀓𑀺𑀘𑁆𑀘𑀢𑁄 𑀧𑀓𑀸𑀲𑁂𑀢𑀼𑀁. 𑀢𑁂𑀲𑀜𑁆𑀳𑀺 𑀓𑀺𑀘𑁆𑀘𑀁 𑀲𑀢𑁆𑀢𑀲𑀦𑁆𑀢𑀸𑀦𑁂 𑀏𑀯 𑀧𑀸𑀓𑀝𑀁 𑀳𑁄𑀢𑀻𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀓𑀣𑀸𑀬 𑀢𑀁 𑀯𑀢𑁆𑀢𑀩𑁆𑀩𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀬𑀲𑁆𑀫𑀺𑀜𑁆𑀳𑀺 ¶ 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀓𑀫𑁆𑀫𑀁 𑀉𑀧𑁆𑀧𑀦𑁆𑀦𑀁, 𑀢𑀁𑀲𑀦𑁆𑀢𑀸𑀦𑁂 𑀏𑀯 𑀢𑀲𑁆𑀲 𑀨𑀮𑀲𑁆𑀲 𑀉𑀧𑁆𑀧𑀢𑁆𑀢𑀺 𑀓𑀫𑁆𑀫𑀲𑁆𑀲𑀓𑀢𑀸. 𑀏𑀯𑀜𑁆𑀳𑀺 𑀓𑀢𑀯𑀺𑀜𑁆𑀜𑀸𑀡𑀦𑀸𑀲𑁄 𑀅𑀓𑀢𑀸𑀕𑀫𑁄 𑀘 𑀦𑀢𑁆𑀣𑀻𑀢𑀺 𑀲𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀏𑀯 𑀤𑁂𑀲𑀦𑀸𑀬 𑀤𑀻𑀧𑁂𑀢𑀩𑁆𑀩𑀸. 𑀢𑁂𑀳𑀺 𑀲𑀢𑁆𑀢𑁂𑀳𑀺 𑀓𑀸𑀢𑀩𑁆𑀩𑀧𑀼𑀜𑁆𑀜𑀓𑀺𑀭𑀺𑀬𑀸 𑀧𑀘𑁆𑀘𑀢𑁆𑀢𑀧𑀼𑀭𑀺𑀲𑀓𑀸𑀭𑁄. 𑀲𑁄𑀧𑀺 𑀲𑀦𑁆𑀢𑀸𑀦𑀯𑀲𑁂𑀦 𑀦𑀺𑀝𑁆𑀞𑀧𑁂𑀢𑀩𑁆𑀩𑀢𑁄 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀏𑀯 𑀓𑀣𑀸𑀬 𑀤𑀻𑀧𑁂𑀢𑀩𑁆𑀩𑁄. 𑀆𑀦𑀦𑁆𑀢𑀭𑀺𑀬𑀤𑀻𑀧𑀦𑀢𑁆𑀣𑀦𑁆𑀢𑀺 𑀘𑀼𑀢𑀺𑀅𑀦𑀦𑁆𑀢𑀭𑀁 𑀨𑀮𑀁 𑀅𑀦𑀦𑁆𑀢𑀭𑀁 𑀦𑀸𑀫, 𑀢𑀲𑁆𑀫𑀺𑀁 𑀅𑀦𑀦𑁆𑀢𑀭𑁂 𑀦𑀺𑀬𑀼𑀢𑁆𑀢𑀸𑀦𑀺 𑀢𑀁𑀦𑀺𑀩𑁆𑀩𑀢𑁆𑀢𑀦𑁂𑀦 𑀅𑀦𑀦𑁆𑀢𑀭𑀓𑀭𑀡𑀲𑀻𑀮𑀸𑀦𑀺, 𑀅𑀦𑀦𑁆𑀢𑀭𑀓𑀭𑀡𑀧𑀬𑁄𑀚𑀦𑀸𑀦𑀺 𑀯𑀸𑀢𑀺 𑀆𑀦𑀦𑁆𑀢𑀭𑀺𑀬𑀸𑀦𑀺, 𑀫𑀸𑀢𑀼𑀖𑀸𑀢𑀸𑀤𑀻𑀦𑀺, 𑀢𑁂𑀲𑀁 𑀤𑀻𑀧𑀦𑀢𑁆𑀣𑀁. 𑀢𑀸𑀦𑀺𑀧𑀺 𑀳𑀺 𑀲𑀦𑁆𑀢𑀸𑀦𑀯𑀲𑁂𑀦 𑀦𑀺𑀝𑁆𑀞𑀧𑁂𑀢𑀩𑁆𑀩𑀢𑁄 ‘‘𑀫𑀸𑀢𑀭𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀻’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁪𑁨𑁩) 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸𑀬 𑀏𑀯 𑀓𑀣𑀸𑀬 𑀤𑀻𑀧𑁂𑀢𑀩𑁆𑀩𑀸𑀦𑀺, 𑀢𑀣𑀸 ‘‘𑀲𑁄 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀻’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁫𑁫𑁬; 𑁩.𑁩𑁦𑁮; 𑀫. 𑀦𑀺. 𑁧.𑁭𑁭; 𑁨.𑁩𑁦𑁯; 𑁩.𑁨𑁩𑁦; 𑀯𑀺𑀪. 𑁬𑁪𑁨-𑁬𑁪𑁩) ‘‘𑀲𑁄 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺 𑀏𑀓𑀫𑁆𑀧𑀺 𑀚𑀸𑀢𑀺’’𑀦𑁆𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁪𑁪-𑁨𑁪𑁫; 𑀫. 𑀦𑀺. 𑁧.𑁧𑁪𑁮, 𑁩𑁮𑁪, 𑁪𑁩𑁧; 𑀧𑀸𑀭𑀸. 𑁧𑁨), ‘‘𑀅𑀢𑁆𑀣𑀺 𑀤𑀓𑁆𑀔𑀺𑀡𑀸 𑀤𑀸𑀬𑀓𑀢𑁄 𑀯𑀺𑀲𑀼𑀚𑁆𑀛𑀢𑀺, 𑀦𑁄 𑀧𑀝𑀺𑀕𑁆𑀕𑀸𑀳𑀓𑀢𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁩𑁮𑁧) 𑀘 𑀧𑀯𑀢𑁆𑀢𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀓𑁆𑀔𑀺𑀡𑀸𑀯𑀺𑀲𑀼𑀤𑁆𑀥𑀺𑀓𑀣𑀸 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀸 ¶ 𑀏𑀯 𑀓𑀢𑁆𑀯𑀸 𑀤𑀻𑀧𑁂𑀢𑀩𑁆𑀩𑀸 𑀲𑀢𑁆𑀢𑀲𑀦𑁆𑀢𑀸𑀦𑀯𑀺𑀲𑀬𑀢𑁆𑀢𑀸. ‘‘𑀅𑀝𑁆𑀞 𑀧𑀼𑀭𑀺𑀲𑀧𑀼𑀕𑁆𑀕𑀮𑀸 (𑀲𑀁. 𑀦𑀺. 𑁧.𑁨𑁪𑁯) 𑀦 𑀲𑀫𑀬𑀯𑀺𑀫𑀼𑀢𑁆𑀢𑁄 𑀧𑀼𑀕𑁆𑀕𑀮𑁄’’𑀢𑀺𑀆𑀤𑀺𑀦𑀸 (𑀧𑀼. 𑀧. 𑁨) 𑀘 𑀧𑀭𑀫𑀢𑁆𑀣𑀓𑀣𑀁 𑀓𑀣𑁂𑀦𑁆𑀢𑁄𑀧𑀺 𑀮𑁄𑀓𑀲𑀫𑁆𑀫𑀼𑀢𑀺𑀬𑀸 𑀅𑀧𑁆𑀧𑀳𑀸𑀦𑀢𑁆𑀣𑀁 𑀧𑀼𑀕𑁆𑀕𑀮𑀓𑀣𑀁 𑀓𑀣𑁂𑀢𑀺. 𑀏𑀢𑁂𑀦 𑀯𑀼𑀢𑁆𑀢𑀸𑀯𑀲𑁂𑀲𑀸𑀬 𑀓𑀣𑀸𑀬 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀪𑀸𑀯𑁂 𑀧𑀬𑁄𑀚𑀦𑀁 𑀲𑀸𑀫𑀜𑁆𑀜𑀯𑀲𑁂𑀦 𑀲𑀗𑁆𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀸𑀫𑀜𑁆𑀘𑁂𑀢𑀁 𑀲𑀩𑁆𑀩𑀁 𑀅𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁, 𑀧𑀭𑀺𑀜𑁆𑀜𑀸𑀢𑀯𑀢𑁆𑀣𑀼𑀓𑀸𑀦𑀫𑁆𑀧𑀺 𑀧𑀦 𑀏𑀯𑀁 𑀤𑁂𑀲𑀦𑀸 𑀲𑀼𑀔𑀸𑀯𑀳𑀸 𑀳𑁄𑀢𑀺.

𑀏𑀓𑀧𑀼𑀕𑁆𑀕𑀮𑁄𑀢𑀺 𑀯𑀺𑀲𑀺𑀝𑁆𑀞𑀲𑀫𑀸𑀘𑀸𑀭𑀸𑀧𑀲𑁆𑀲𑀬𑀯𑀺𑀭𑀳𑀺𑀢𑁄 𑀏𑀓𑀧𑀼𑀕𑁆𑀕𑀮𑁄. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀲𑀻𑀮𑀸𑀤𑀺𑀕𑀼𑀡𑁂𑀦 𑀲𑀤𑁂𑀯𑀓𑁂 𑀮𑁄𑀓𑁂 𑀯𑀺𑀲𑀺𑀝𑁆𑀞𑁄 𑀦𑀸𑀫 𑀓𑁄𑀘𑀺 𑀦𑀢𑁆𑀣𑀺, 𑀢𑀣𑀸 𑀲𑀤𑀺𑀲𑁄𑀧𑀺 𑀲𑀫𑀸𑀦𑀓𑀸𑀮𑁂. 𑀢𑁂𑀦𑀸𑀳 𑁋 ‘‘𑀦 𑀇𑀫𑀲𑁆𑀫𑀺𑀁 𑀮𑁄𑀓𑁂 𑀧𑀭𑀲𑁆𑀫𑀺𑀁 𑀯𑀸 𑀧𑀦 𑀩𑀼𑀤𑁆𑀥𑁂𑀦 𑀲𑁂𑀝𑁆𑀞𑁄 𑀲𑀤𑀺𑀲𑁄 𑀘 𑀯𑀺𑀚𑁆𑀚𑀢𑀻’’𑀢𑀺 (𑀯𑀺. 𑀯. 𑁧𑁦𑁪𑁭; 𑀓𑀣𑀸. 𑁭𑁯𑁯), 𑀢𑀲𑁆𑀫𑀸 𑀲𑀤𑀺𑀲𑁄𑀧𑀺 𑀓𑁄𑀘𑀺 𑀦𑀢𑁆𑀣𑀺. 𑀳𑀻𑀦𑁄𑀧𑀺 𑀅𑀧𑀲𑁆𑀲𑀬𑀪𑀽𑀢𑁄 𑀦𑀢𑁆𑀣𑁂𑀯. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀺𑀲𑀺𑀝𑁆𑀞𑀲𑀫𑀸𑀘𑀸𑀭𑀸𑀧𑀲𑁆𑀲𑀬𑀯𑀺𑀭𑀳𑀺𑀢𑁄 𑀏𑀓𑀧𑀼𑀕𑁆𑀕𑀮𑁄’’𑀢𑀺. 𑀬𑁂 ¶ 𑀘 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀦𑀢𑁆𑀣𑀺 𑀏𑀢𑁂𑀲𑀁 𑀲𑀫𑀸𑀢𑀺 𑀅𑀲𑀫𑀸, 𑀧𑀼𑀭𑀺𑀫𑀓𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸. 𑀢𑁂𑀳𑀺 𑀲𑀫𑁄 𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡𑀦𑁂𑀓𑁆𑀔𑀁 𑀯𑀺𑀬 𑀦𑀺𑀩𑁆𑀩𑀺𑀲𑀺𑀝𑁆𑀞𑁄𑀢𑀺 𑀅𑀲𑀫𑀲𑀫𑀝𑁆𑀞𑁂𑀦𑀧𑀺 𑀏𑀓𑀧𑀼𑀕𑁆𑀕𑀮𑁄 𑀅𑀜𑁆𑀜𑀲𑁆𑀲 𑀢𑀸𑀤𑀺𑀲𑀲𑁆𑀲 𑀅𑀪𑀸𑀯𑀸. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀲𑀤𑀺𑀲𑀝𑁆𑀞𑁂𑀦𑀸’’𑀢𑀺𑀆𑀤𑀺.

𑀲𑀢𑁆𑀢𑀮𑁄𑀓𑁄 𑀅𑀥𑀺𑀧𑁆𑀧𑁂𑀢𑁄 𑀲𑀢𑁆𑀢𑀦𑀺𑀓𑀸𑀬𑁂 𑀉𑀧𑁆𑀧𑀚𑁆𑀚𑀦𑀢𑁄. 𑀫𑀦𑀼𑀲𑁆𑀲𑀮𑁄𑀓𑁂 𑀏𑀯 𑀉𑀧𑁆𑀧𑀚𑁆𑀚𑀢𑀺 𑀤𑁂𑀯𑀩𑁆𑀭𑀳𑁆𑀫𑀮𑁄𑀓𑀸𑀦𑀁 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀅𑀦𑁄𑀓𑀸𑀲𑀪𑀸𑀯𑀢𑁄. 𑀓𑀸𑀫𑀤𑁂𑀯𑀮𑁄𑀓𑁂 𑀢𑀸𑀯 𑀦𑀼𑀧𑁆𑀧𑀚𑁆𑀚𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀲𑁆𑀲 𑀅𑀝𑁆𑀞𑀸𑀦𑀪𑀸𑀯𑀢𑁄 𑀢𑀣𑀸 𑀅𑀦𑀘𑁆𑀙𑀭𑀺𑀬𑀪𑀸𑀯𑀢𑁄. 𑀅𑀘𑁆𑀙𑀭𑀺𑀬𑀥𑀫𑁆𑀫𑀸 𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄. 𑀢𑁂𑀲𑀁 𑀲𑀸 𑀅𑀘𑁆𑀙𑀭𑀺𑀬𑀥𑀫𑁆𑀫𑀢𑀸 𑀤𑁂𑀯𑀢𑁆𑀢𑀪𑀸𑀯𑁂 𑀞𑀺𑀢𑀸𑀦𑀁 𑀮𑁄𑀓𑁂 𑀦 𑀧𑀸𑀓𑀝𑀸 𑀳𑁄𑀢𑀺 𑀬𑀣𑀸 𑀫𑀦𑀼𑀲𑁆𑀲𑀪𑀽𑀢𑀸𑀦𑀁. 𑀤𑁂𑀯𑀪𑀽𑀢𑁂 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀤𑀺𑀲𑁆𑀲𑀫𑀸𑀦𑀁 𑀩𑀼𑀤𑁆𑀥𑀸𑀦𑀼𑀪𑀸𑀯𑀁 𑀤𑁂𑀯𑀸𑀦𑀼𑀪𑀸𑀯𑀢𑁄𑀯 𑀮𑁄𑀓𑁂 𑀤𑀳𑀢𑀺, 𑀦 𑀩𑀼𑀤𑁆𑀥𑀸𑀦𑀼𑀪𑀸𑀯𑀢𑁄. 𑀢𑀣𑀸 𑀲𑀢𑀺 ‘‘𑀅𑀬𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀦𑀸𑀥𑀺𑀫𑀼𑀘𑁆𑀘𑀢𑀺 𑀦 𑀲𑀫𑁆𑀧𑀲𑀻𑀤𑀢𑀺, 𑀇𑀲𑁆𑀲𑀭𑀓𑀼𑀢𑁆𑀢𑀕𑁆𑀕𑀸𑀳𑀁 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀤𑁂𑀯𑀢𑁆𑀢𑀪𑀸𑀯𑀲𑁆𑀲 𑀘 𑀘𑀺𑀭𑀓𑀸𑀮𑀸𑀯𑀝𑁆𑀞𑀸𑀦𑀢𑁄 𑀏𑀓𑀘𑁆𑀘𑀲𑀲𑁆𑀲𑀢𑀯𑀸𑀤𑀢𑁄 𑀦 𑀧𑀭𑀺𑀫𑀼𑀘𑁆𑀘𑀢𑀺. 𑀩𑁆𑀭𑀳𑁆𑀫𑀮𑁄𑀓𑁂 𑀦𑀼𑀧𑁆𑀧𑀚𑁆𑀚𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀲𑀢𑁆𑀢𑀸𑀦𑀁 𑀢𑀸𑀤𑀺𑀲𑀕𑁆𑀕𑀸𑀳𑀯𑀺𑀦𑀺𑀫𑁄𑀘𑀦𑀢𑁆𑀣𑀜𑁆𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀫𑀦𑀼𑀲𑁆𑀲𑀲𑀼𑀕𑀢𑀺𑀬𑀁𑀬𑁂𑀯 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀦 𑀤𑁂𑀯𑀲𑀼𑀕𑀢𑀺𑀬𑀁. 𑀬𑀲𑁆𑀫𑀸 𑀇𑀫𑀁 𑀘𑀓𑁆𑀓𑀯𑀸𑀴𑀁 𑀫𑀚𑁆𑀛𑁂 𑀓𑀢𑁆𑀯𑀸 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀘𑀓𑁆𑀓𑀯𑀸𑀴𑀸𑀦𑀁 𑀤𑀲𑀲𑀳𑀲𑁆𑀲𑀲𑁆𑀲𑁂𑀯 𑀚𑀸𑀢𑀺𑀓𑁆𑀔𑁂𑀢𑁆𑀢𑀪𑀸𑀯𑁄 𑀤𑀻𑀧𑀺𑀢𑁄 𑀇𑀢𑁄 𑀅𑀜𑁆𑀜𑀲𑁆𑀲 𑀩𑀼𑀤𑁆𑀥𑀸𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀲𑁆𑀲 𑀢𑁂𑀧𑀺𑀝𑀓𑁂 𑀩𑀼𑀤𑁆𑀥𑀯𑀘𑀦𑁂 𑀆𑀕𑀢𑀝𑁆𑀞𑀸𑀦𑀲𑁆𑀲 𑀅𑀪𑀸𑀯𑀢𑁄. 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀇𑀫𑀲𑁆𑀫𑀺𑀁𑀬𑁂𑀯 𑀘𑀓𑁆𑀓𑀯𑀸𑀴𑁂 𑀉𑀧𑁆𑀧𑀚𑁆𑀚𑀢𑀻’’𑀢𑀺.

𑀇𑀥 𑀉𑀧𑁆𑀧𑀚𑁆𑀚𑀦𑁆𑀢𑁄𑀧𑀺 𑀓𑀲𑁆𑀫𑀸 𑀚𑀫𑁆𑀩𑀼𑀤𑀻𑀧𑁂 𑀏𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀲𑁂𑀲𑀤𑀻𑀧𑁂𑀲𑀽𑀢𑀺? 𑀓𑁂𑀘𑀺 𑀢𑀸𑀯 𑀆𑀳𑀼 𑁋 ‘‘𑀬𑀲𑁆𑀫𑀸 𑀧𑀣𑀯𑀺𑀬𑀸 𑀦𑀸𑀪𑀺𑀪𑀽𑀢𑀸 𑀩𑀼𑀤𑁆𑀥𑀪𑀸𑀯𑀲𑀳𑀸 𑀅𑀘𑀮𑀝𑁆𑀞𑀸𑀦𑀪𑀽𑀢𑀸 𑀩𑁄𑀥𑀺𑀫𑀡𑁆𑀟𑀪𑀽𑀫𑀺 𑀚𑀫𑁆𑀩𑀼𑀤𑀻𑀧𑁂 𑀏𑀯 ¶ , 𑀢𑀲𑁆𑀫𑀸 𑀚𑀫𑁆𑀩𑀼𑀤𑀻𑀧𑁂 𑀏𑀯 𑀉𑀧𑁆𑀧𑀚𑁆𑀚𑀢𑀻’’𑀢𑀺. 𑀏𑀢𑁂𑀦𑁂𑀯 ‘‘𑀢𑀢𑁆𑀣 𑀫𑀚𑁆𑀛𑀺𑀫𑀤𑁂𑀲𑁂 𑀏𑀯 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀢𑀫𑁆𑀧𑀺 𑀲𑀁𑀯𑀡𑁆𑀡𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁 𑀢𑀣𑀸 𑀇𑀢𑀭𑁂𑀲𑀫𑁆𑀧𑀺 𑀅𑀯𑀺𑀚𑀳𑀺𑀢𑀝𑁆𑀞𑀸𑀦𑀸𑀦𑀁 𑀢𑀢𑁆𑀣𑁂𑀯 𑀮𑀩𑁆𑀪𑀦𑀢𑁄. 𑀬𑀲𑁆𑀫𑀸 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀜𑁆𑀘 𑀦𑀺𑀩𑁆𑀩𑀢𑁆𑀢𑀺𑀬𑀸 𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑀸𑀦𑀁 𑀲𑀸𑀯𑀓𑀩𑁄𑀥𑀺𑀬𑀸 𑀅𑀪𑀺𑀦𑀻𑀳𑀸𑀭𑁄 𑀲𑀸𑀯𑀓𑀧𑀸𑀭𑀫𑀺𑀬𑀸 𑀲𑀫𑁆𑀪𑀭𑀡𑀧𑀭𑀺𑀧𑀸𑀘𑀦𑀜𑁆𑀘 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑀪𑀽𑀢𑁂 𑀇𑀫𑀲𑁆𑀫𑀺𑀁𑀬𑁂𑀯 𑀘𑀓𑁆𑀓𑀯𑀸𑀴𑁂 𑀚𑀫𑁆𑀩𑀼𑀤𑀻𑀧𑁂 𑀏𑀯 𑀇𑀚𑁆𑀛𑀢𑀺, 𑀦 𑀅𑀜𑁆𑀜𑀢𑁆𑀣. 𑀯𑁂𑀦𑁂𑀬𑁆𑀬𑀚𑀦𑀯𑀺𑀦𑀬𑀦𑀢𑁆𑀣𑁄 𑀘 𑀩𑀼𑀤𑁆𑀥𑀼𑀧𑁆𑀧𑀸𑀤𑁄, 𑀢𑀲𑁆𑀫𑀸 𑀅𑀕𑁆𑀕𑀲𑀸𑀯𑀓𑀫𑀳𑀸𑀲𑀸𑀯𑀓𑀸𑀤𑀺𑀯𑁂𑀦𑁂𑀬𑁆𑀬𑀯𑀺𑀲𑁂𑀲𑀸𑀧𑁂𑀓𑁆𑀔𑀸𑀬 𑀇𑀫𑀲𑁆𑀫𑀺𑀁 𑀚𑀫𑁆𑀩𑀼𑀤𑀻𑀧𑁂 𑀏𑀯 𑀩𑀼𑀤𑁆𑀥𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀦 𑀲𑁂𑀲𑀤𑀻𑀧𑁂𑀲𑀼. 𑀅𑀬𑀜𑁆𑀘 𑀦𑀬𑁄 𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑀲𑀫𑀸𑀘𑀺𑀡𑁆𑀡𑁄𑀢𑀺 𑀢𑁂𑀲𑀁 𑀉𑀢𑁆𑀢𑀫𑀧𑀼𑀭𑀺𑀲𑀸𑀦𑀁 ¶ 𑀢𑀢𑁆𑀣𑁂𑀯 𑀉𑀧𑁆𑀧𑀢𑁆𑀢𑀺 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀸𑀦𑀁 𑀯𑀺𑀬 𑀅𑀜𑁆𑀜𑀫𑀜𑁆𑀜𑀽𑀧𑀦𑀺𑀲𑁆𑀲𑀬𑀢𑀸𑀬 𑀤𑀝𑁆𑀞𑀩𑁆𑀩𑀸. 𑀢𑁂𑀦 𑀯𑀼𑀢𑁆𑀢𑀁 𑁋 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀻𑀲𑀼 𑀤𑀻𑀧𑁂𑀲𑀼 𑀩𑀼𑀤𑁆𑀥𑀸 𑀦 𑀦𑀺𑀩𑁆𑀩𑀢𑁆𑀢𑀦𑁆𑀢𑀺, 𑀚𑀫𑁆𑀩𑀼𑀤𑀻𑀧𑁂 𑀏𑀯 𑀦𑀺𑀩𑁆𑀩𑀢𑁆𑀢𑀦𑁆𑀢𑀻𑀢𑀺 𑀤𑀻𑀧𑀁 𑀧𑀲𑁆𑀲𑀻’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁨.𑁧𑁭; 𑀩𑀼. 𑀯𑀁. 𑀅𑀝𑁆𑀞. 𑁨𑁭 𑀅𑀯𑀺𑀤𑀽𑀭𑁂𑀦𑀺𑀤𑀸𑀦𑀓𑀣𑀸).

𑀉𑀪𑀬𑀫𑁆𑀧𑀺𑀤𑀁 𑀯𑀺𑀧𑁆𑀧𑀓𑀢𑀯𑀘𑀦𑀫𑁂𑀯 𑀉𑀧𑁆𑀧𑀸𑀤𑀓𑀺𑀭𑀺𑀬𑀸𑀬 𑀯𑀢𑁆𑀢𑀫𑀸𑀦𑀓𑀸𑀮𑀺𑀓𑀢𑁆𑀢𑀸. 𑀉𑀧𑁆𑀧𑀚𑁆𑀚𑀫𑀸𑀦𑁄𑀢𑀺 𑀯𑀸 𑀉𑀧𑁆𑀧𑀚𑁆𑀚𑀺𑀢𑀼𑀁 𑀲𑀫𑀢𑁆𑀣𑁄. 𑀲𑀢𑁆𑀢𑀺𑀅𑀢𑁆𑀣𑁄 𑀘𑀸𑀬𑀁 𑀫𑀸𑀦-𑀲𑀤𑁆𑀤𑁄. 𑀬𑀸𑀯𑀢𑀸 𑀳𑀺 𑀲𑀸𑀫𑀢𑁆𑀣𑀺𑀬𑁂𑀦 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀘𑀭𑀺𑀫𑀪𑀯𑁂 𑀉𑀧𑁆𑀧𑀢𑁆𑀢𑀺 𑀇𑀘𑁆𑀙𑀺𑀢𑀩𑁆𑀩𑀸, 𑀢𑀢𑁆𑀣𑀓𑁂𑀦 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀽𑀢𑁂𑀦 𑀧𑀭𑀺𑀧𑀼𑀡𑁆𑀡𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀪𑁂𑀤𑁄𑀢𑀺 𑀯𑀺𑀲𑁂𑀲𑁄. 𑀢𑀫𑁂𑀯 𑀳𑀺 𑀢𑀺𑀯𑀺𑀥𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀏𑀲 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑀲𑁆𑀲 𑀫𑀳𑀸𑀪𑀺𑀦𑀻𑀳𑀸𑀭𑀲𑁆𑀲 𑀲𑀺𑀤𑁆𑀥𑀓𑀸𑀮𑀢𑁄 𑀧𑀝𑁆𑀞𑀸𑀬 𑀫𑀳𑀸𑀩𑁄𑀥𑀺𑀲𑀢𑁆𑀢𑁄 𑀩𑀼𑀤𑁆𑀥𑀪𑀸𑀯𑀸𑀬 𑀦𑀺𑀬𑀢𑀪𑀸𑀯𑀧𑁆𑀧𑀢𑁆𑀢𑀢𑀸𑀬 𑀩𑁄𑀥𑀺𑀲𑀫𑁆𑀪𑀸𑀭𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀫𑀸𑀦𑁄 𑀬𑀣𑀸𑀯𑀼𑀢𑁆𑀢𑀲𑀸𑀫𑀢𑁆𑀣𑀺𑀬𑀬𑁄𑀕𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁄 𑀦𑀸𑀫𑀸𑀢𑀺 𑀅𑀢𑁆𑀣𑁄 𑀉𑀧𑁆𑀧𑀸𑀤𑀲𑁆𑀲 𑀏𑀓𑀦𑁆𑀢𑀺𑀓𑀢𑁆𑀢𑀸. 𑀧𑀭𑀺𑀬𑁂𑀲𑀦𑁆𑀢𑁄𑀢𑀺 𑀯𑀺𑀘𑀺𑀦𑀦𑁆𑀢𑁄. 𑀧𑀭𑀺𑀧𑀓𑁆𑀓𑀕𑀢𑁂 𑀜𑀸𑀡𑁂𑀢𑀺 𑀇𑀫𑀺𑀦𑀸 𑀢𑀢𑁄 𑀧𑀼𑀩𑁆𑀩𑁂 𑀜𑀸𑀡𑀲𑁆𑀲 𑀅𑀧𑀭𑀺𑀧𑀓𑁆𑀓𑀢𑀸𑀬 𑀏𑀯 𑀮𑀤𑁆𑀥𑀸𑀯𑀲𑀭𑀸𑀬 𑀓𑀫𑁆𑀫𑀧𑀺𑀮𑁄𑀢𑀺𑀬𑀸 𑀯𑀲𑁂𑀦 𑀩𑁄𑀥𑀺𑀲𑀢𑁆𑀢𑁄 𑀢𑀣𑀸 𑀫𑀳𑀸𑀧𑀥𑀸𑀦𑀁 𑀧𑀤𑀳𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀉𑀧𑁆𑀧𑀦𑁆𑀦𑁄 𑀦𑀸𑀫 ‘‘𑀉𑀧𑁆𑀧𑀦𑁆𑀦𑁄 𑀳𑁄𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑁆𑀢𑀸. 𑀆𑀕𑀢𑁄𑀯 𑀦𑀸𑀫 𑀳𑁂𑀢𑀼𑀲𑀫𑁆𑀧𑀤𑀸𑀬 𑀲𑀫𑁆𑀫𑀤𑁂𑀯 𑀦𑀺𑀧𑁆𑀨𑀦𑁆𑀦𑀢𑁆𑀢𑀸.

𑀳𑀺𑀢𑀢𑁆𑀣𑀸𑀬𑀸𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀲𑁆𑀲 𑀳𑀺𑀢𑀲𑁆𑀲 𑀲𑀺𑀤𑁆𑀥𑀺𑀬𑀸. 𑀲𑀼𑀔𑀢𑁆𑀣𑀸𑀬𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀲𑀸𑀢𑀺 𑀢𑀲𑁆𑀲 𑀲𑀢𑁆𑀢𑀮𑁄𑀓𑀲𑁆𑀲. 𑀲𑁄 𑀧𑀦𑀸𑀬𑀁 𑀲𑀢𑁆𑀢𑀮𑁄𑀓𑁄 𑀬𑁂𑀦 𑀅𑀦𑀼𑀓𑁆𑀓𑀫𑁂𑀦 𑀥𑀫𑁆𑀫𑀸𑀪𑀺𑀲𑀫𑀬𑀁 𑀧𑀸𑀧𑀼𑀡𑀺, 𑀢𑀁 𑀢𑁂𑀦𑁂𑀯 𑀅𑀦𑀼𑀓𑁆𑀓𑀫𑁂𑀦 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀳𑀸𑀩𑁄𑀥𑀺𑀫𑀡𑁆𑀟𑁂’’𑀢𑀺𑀆𑀤𑀺𑀫𑀸𑀳. 𑀬𑀸𑀯𑀚𑁆𑀚𑀤𑀺𑀯𑀲𑀸𑀢𑀺 𑀏𑀢𑁆𑀣 𑀅𑀚𑁆𑀚-𑀲𑀤𑁆𑀤𑁂𑀦 𑀲𑀸𑀲𑀦𑀲𑁆𑀲 𑀅𑀯𑀝𑁆𑀞𑀸𑀦𑀓𑀸𑀮𑀁 𑀯𑀤𑀢𑀺. 𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁄𑀢𑀺 𑀤𑀲𑁆𑀲𑁂𑀢𑀼𑀁 𑁋 ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁂𑀲𑀫𑁆𑀧𑀻𑀢𑀺 𑀦𑀸𑀕𑀲𑀼𑀧𑀡𑁆𑀡𑀸𑀤𑀻𑀦𑀫𑁆𑀧𑀺.

𑀅𑀬𑀁 𑀧𑀼𑀘𑁆𑀙𑀸𑀢𑀺 𑀇𑀫𑀺𑀦𑀸 ‘‘𑀓𑀢𑀫𑁄’’𑀢𑀺 𑀧𑀤𑀲𑁆𑀲 𑀲𑀸𑀫𑀜𑁆𑀜𑀢𑁄 𑀧𑀼𑀘𑁆𑀙𑀸𑀪𑀸𑀯𑁄 𑀤𑀲𑁆𑀲𑀺𑀢𑁄, 𑀦 𑀯𑀺𑀲𑁂𑀲𑀢𑁄𑀢𑀺 𑀢𑀲𑁆𑀲 𑀧𑀼𑀘𑁆𑀙𑀸𑀯𑀺𑀲𑁂𑀲𑀪𑀸𑀯𑀜𑀸𑀧𑀦𑀢𑁆𑀣𑀁 𑀫𑀳𑀸𑀦𑀺𑀤𑁆𑀤𑁂𑀲𑁂 (𑀫𑀳𑀸𑀦𑀺. 𑁧𑁫𑁦) 𑀆𑀕𑀢𑀸 𑀲𑀩𑁆𑀩𑀸𑀧𑀺 𑀧𑀼𑀘𑁆𑀙𑀸 ¶ 𑀅𑀢𑁆𑀣𑀼𑀤𑁆𑀥𑀸𑀭𑀦𑀬𑁂𑀦 𑀤𑀲𑁆𑀲𑁂𑀢𑀺 ‘‘𑀧𑀼𑀘𑁆𑀙𑀸 𑀘 𑀦𑀸𑀫𑁂𑀲𑀸’’𑀢𑀺𑀆𑀤𑀺𑀦𑀸. 𑀅𑀤𑀺𑀝𑁆𑀞𑀁 𑀚𑁄𑀢𑀻𑀬𑀢𑀺 𑀏𑀢𑀸𑀬𑀸𑀢𑀺 𑀅𑀤𑀺𑀝𑁆𑀞𑀚𑁄𑀢𑀦𑀸. 𑀤𑀺𑀝𑁆𑀞𑀁 𑀲𑀁𑀲𑀦𑁆𑀤𑀻𑀬𑀢𑀺 𑀏𑀢𑀸𑀬𑀸𑀢𑀺 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸. 𑀲𑀁𑀲𑀦𑁆𑀤𑀦𑀜𑁆𑀘 𑀲𑀸𑀓𑀘𑁆𑀙𑀸𑀯𑀲𑁂𑀦 ¶ 𑀯𑀺𑀦𑀺𑀘𑁆𑀙𑀬𑀓𑀭𑀡𑀁. 𑀯𑀺𑀫𑀢𑀺𑀁 𑀙𑀺𑀦𑁆𑀤𑀢𑀺 𑀏𑀢𑀸𑀬𑀸𑀢𑀺 𑀯𑀺𑀫𑀢𑀺𑀘𑁆𑀙𑁂𑀤𑀦𑀸. 𑀅𑀦𑀼𑀫𑀢𑀺𑀬𑀸 𑀧𑀼𑀘𑁆𑀙𑀸 𑀅𑀦𑀼𑀫𑀢𑀺𑀧𑀼𑀘𑁆𑀙𑀸. ‘‘𑀢𑀁 𑀓𑀺𑀁 𑀫𑀜𑁆𑀜𑀣, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺 𑀧𑀼𑀘𑁆𑀙𑀸𑀬 ‘‘𑀓𑀸 𑀢𑀼𑀫𑁆𑀳𑀸𑀓𑀁 𑀅𑀦𑀼𑀫𑀢𑀻’’𑀢𑀺 𑀅𑀦𑀼𑀫𑀢𑀺 𑀧𑀼𑀘𑁆𑀙𑀺𑀢𑀸 𑀳𑁄𑀢𑀺. 𑀓𑀣𑁂𑀢𑀼𑀓𑀫𑁆𑀬𑀢𑀸𑀧𑀼𑀘𑁆𑀙𑀸𑀢𑀺 𑀓𑀣𑁂𑀢𑀼𑀓𑀫𑁆𑀬𑀢𑀸𑀬 𑀧𑀼𑀘𑁆𑀙𑀸. 𑀮𑀓𑁆𑀔𑀡𑀦𑁆𑀢𑀺 𑀜𑀸𑀢𑀼𑀁 𑀇𑀘𑁆𑀙𑀺𑀢𑁄 𑀬𑁄 𑀓𑁄𑀘𑀺 𑀲𑀪𑀸𑀯𑁄. 𑀅𑀜𑁆𑀜𑀸𑀢𑀦𑁆𑀢𑀺 𑀬𑁂𑀦 𑀓𑁂𑀦𑀘𑀺 𑀜𑀸𑀡𑁂𑀦 𑀅𑀜𑁆𑀜𑀸𑀢𑀪𑀸𑀯𑀫𑀸𑀳. 𑀅𑀤𑀺𑀝𑁆𑀞𑀦𑁆𑀢𑀺 𑀤𑀲𑁆𑀲𑀦𑀪𑀽𑀢𑁂𑀦 𑀜𑀸𑀡𑁂𑀦 𑀧𑀘𑁆𑀘𑀓𑁆𑀔𑀁 𑀯𑀺𑀬 𑀅𑀤𑀺𑀝𑁆𑀞𑀢𑀁. 𑀅𑀢𑀼𑀮𑀺𑀢𑀦𑁆𑀢𑀺 ‘‘𑀏𑀢𑁆𑀢𑀓𑀁 𑀏𑀢’’𑀦𑁆𑀢𑀺 𑀢𑀼𑀮𑀸𑀪𑀽𑀢𑁂𑀦 𑀅𑀢𑀼𑀮𑀺𑀢𑀢𑀁. 𑀅𑀢𑀻𑀭𑀺𑀢𑀦𑁆𑀢𑀺 𑀢𑀻𑀭𑀡𑀪𑀽𑀢𑁂𑀦 𑀅𑀓𑀢𑀜𑀸𑀡𑀓𑀺𑀭𑀺𑀬𑀸𑀲𑀫𑀸𑀧𑀦𑀢𑀁. 𑀅𑀯𑀺𑀪𑀽𑀢𑀦𑁆𑀢𑀺 𑀜𑀸𑀡𑀲𑁆𑀲 𑀅𑀧𑀸𑀓𑀝𑀪𑀸𑀯𑀁. 𑀅𑀯𑀺𑀪𑀸𑀯𑀺𑀢𑀦𑁆𑀢𑀺 𑀜𑀸𑀡𑁂𑀦 𑀅𑀧𑀸𑀓𑀝𑀓𑀢𑀪𑀸𑀯𑀁.

𑀬𑁂𑀳𑀺 𑀕𑀼𑀡𑀯𑀺𑀲𑁂𑀲𑁂𑀳𑀺 𑀦𑀺𑀫𑀺𑀢𑁆𑀢𑀪𑀽𑀢𑁂𑀳𑀺 𑀪𑀕𑀯𑀢𑀺 ‘‘𑀢𑀣𑀸𑀕𑀢𑁄’’𑀢𑀺 𑀅𑀬𑀁 𑀲𑀫𑀜𑁆𑀜𑀸 𑀧𑀯𑀢𑁆𑀢𑀸, 𑀢𑀁𑀤𑀲𑁆𑀲𑀦𑀢𑁆𑀣𑀁 ‘‘𑀅𑀝𑁆𑀞𑀳𑀺 𑀓𑀸𑀭𑀡𑁂𑀳𑀺 𑀪𑀕𑀯𑀸 𑀢𑀣𑀸𑀕𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑀼𑀡𑀯𑀺𑀲𑁂𑀲𑀦𑁂𑀫𑀺𑀢𑁆𑀢𑀺𑀓𑀸𑀦𑁂𑀯 𑀳𑀺 𑀪𑀕𑀯𑀢𑁄 𑀲𑀩𑁆𑀩𑀸𑀦𑀺 𑀦𑀸𑀫𑀸𑀦𑀺. 𑀬𑀣𑀸𑀳 𑁋

‘‘𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀦𑀸𑀫𑀸𑀦𑀺, 𑀲𑀕𑀼𑀡𑁂𑀦 𑀫𑀳𑁂𑀲𑀺𑀦𑁄;

𑀕𑀼𑀡𑁂𑀦 𑀦𑀸𑀫𑀫𑀼𑀤𑁆𑀥𑁂𑀬𑁆𑀬𑀁, 𑀅𑀧𑀺 𑀦𑀸𑀫𑀲𑀳𑀲𑁆𑀲𑀢𑁄’’𑀢𑀺. (𑀥. 𑀲. 𑀅𑀝𑁆𑀞. 𑁧𑁩𑁧𑁩; 𑀉𑀤𑀸. 𑀅𑀝𑁆𑀞. 𑁫𑁩; 𑀧𑀝𑀺. 𑀫. 𑀅𑀝𑁆𑀞. 𑁧.𑁧.𑁭𑁬);

𑀢𑀣𑀸 𑀆𑀕𑀢𑁄𑀢𑀺 𑀏𑀢𑁆𑀣 𑀆𑀓𑀸𑀭𑀦𑀺𑀬𑀫𑀦𑀯𑀲𑁂𑀦 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀢𑁆𑀣𑁄 𑀢𑀣𑀸-𑀲𑀤𑁆𑀤𑁄. 𑀲𑀸𑀫𑀜𑁆𑀜𑀚𑁄𑀢𑀦𑀸𑀧𑀺 𑀳𑀺 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀻𑀢𑀺. 𑀧𑀝𑀺𑀧𑀤𑀸𑀕𑀫𑀦𑀢𑁆𑀣𑁄 𑀆𑀕𑀢-𑀲𑀤𑁆𑀤𑁄, 𑀦 𑀜𑀸𑀡𑀕𑀫𑀦𑀢𑁆𑀣𑁄 ‘‘𑀢𑀣𑀮𑀓𑁆𑀔𑀡𑀁 𑀆𑀕𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑀅𑀝𑁆𑀞. 𑁧.𑁭; 𑀫. 𑀦𑀺. 𑀅𑀝𑁆𑀞. 𑁧.𑁧𑁨; 𑀲𑀁. 𑀦𑀺. 𑀅𑀝𑁆𑀞. 𑁨.𑁩.𑁭𑁮; 𑀅. 𑀦𑀺. 𑀅𑀝𑁆𑀞. 𑁧.𑁧.𑁧𑁭𑁦; 𑀉𑀤𑀸. 𑀅𑀝𑁆𑀞. 𑁧𑁮) 𑀯𑀺𑀬, 𑀦𑀸𑀧𑀺 𑀓𑀸𑀬𑀕𑀫𑀦𑀢𑁆𑀣𑁄 ‘‘𑀆𑀕𑀢𑁄 𑀔𑁄 𑀫𑀳𑀸𑀲𑀫𑀡𑁄, 𑀫𑀕𑀥𑀸𑀦𑀁 𑀕𑀺𑀭𑀺𑀩𑁆𑀩𑀚’’𑀦𑁆𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁬𑁩) 𑀯𑀺𑀬. 𑀢𑀢𑁆𑀣 𑀬𑀤𑀸𑀓𑀸𑀭𑀦𑀺𑀬𑀫𑀦𑀯𑀲𑁂𑀦 𑀑𑀧𑀫𑁆𑀫𑀲𑀫𑁆𑀧𑀝𑀺𑀧𑀸𑀤𑀦𑀢𑁆𑀣𑁄 𑀢𑀣𑀸-𑀲𑀤𑁆𑀤𑁄, 𑀢𑀁𑀓𑀭𑀼𑀡𑀸𑀧𑀥𑀸𑀦𑀢𑁆𑀢𑀸 𑀫𑀳𑀸𑀓𑀭𑀼𑀡𑀸𑀫𑀼𑀔𑁂𑀦 𑀧𑀼𑀭𑀺𑀫𑀩𑀼𑀤𑁆𑀥𑀸𑀦𑀁 𑀆𑀕𑀫𑀦𑀧𑁆𑀧𑀝𑀺𑀧𑀤𑀁 𑀉𑀤𑀸𑀳𑀭𑀡𑀯𑀲𑁂𑀦 𑀲𑀸𑀫𑀜𑁆𑀜𑀢𑁄 𑀤𑀲𑁆𑀲𑁂𑀦𑁆𑀢𑁄 𑀬𑀁-𑀢𑀁-𑀲𑀤𑁆𑀤𑀸𑀦𑀁 𑀏𑀓𑀦𑁆𑀢𑀲𑀫𑁆𑀩𑀦𑁆𑀥𑀪𑀸𑀯𑀢𑁄 ‘‘𑀬𑀣𑀸 𑀲𑀩𑁆𑀩𑀮𑁄𑀓…𑀧𑁂… 𑀆𑀕𑀢𑀸’’𑀢𑀺 𑀲𑀸𑀥𑀸𑀭𑀡𑀢𑁄 𑀯𑀢𑁆𑀯𑀸 𑀧𑀼𑀦 𑀢𑀁 𑀧𑀝𑀺𑀧𑀤𑀁 𑀫𑀳𑀸𑀧𑀥𑀸𑀦𑀲𑀼𑀢𑁆𑀢𑀸𑀤𑀻𑀲𑀼 (𑀤𑀻. 𑀦𑀺. 𑁨.𑁧 𑀆𑀤𑀬𑁄) 𑀲𑀫𑁆𑀩𑀳𑀼𑀮𑀦𑀺𑀤𑁆𑀤𑁂𑀲𑁂𑀦 𑀲𑀼𑀧𑀸𑀓𑀝𑀸𑀦𑀁 𑀆𑀲𑀦𑁆𑀦𑀸𑀦𑀜𑁆𑀘 𑀯𑀺𑀧𑀲𑁆𑀲𑀺𑀆𑀤𑀻𑀦𑀁 𑀙𑀦𑁆𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸𑀦𑀁 𑀯𑀲𑁂𑀦 𑀦𑀺𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀯𑀺𑀧𑀲𑁆𑀲𑀻 𑀪𑀕𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑁂𑀦 𑀅𑀪𑀺𑀦𑀻𑀳𑀸𑀭𑁂𑀦𑀸𑀢𑀺 𑀫𑀦𑀼𑀲𑁆𑀲𑀢𑁆𑀢𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀺𑀳𑁂𑀢𑀼𑀲𑀢𑁆𑀣𑀼𑀤𑀲𑁆𑀲𑀦𑀧𑀩𑁆𑀩𑀚𑁆𑀚𑀸𑀅𑀪𑀺𑀜𑁆𑀜𑀸𑀤𑀺𑀕𑀼𑀡𑀲𑀫𑁆𑀧𑀢𑁆𑀢𑀺𑀅𑀥𑀺𑀓𑀸𑀭𑀘𑁆𑀙𑀦𑁆𑀤𑀸𑀦𑀁 𑀯𑀲𑁂𑀦 𑀅𑀝𑁆𑀞𑀗𑁆𑀕𑀲𑀫𑀦𑁆𑀦𑀸𑀕𑀢𑁂𑀦 ¶ 𑀫𑀳𑀸𑀧𑀡𑀺𑀥𑀸𑀦𑁂𑀦. 𑀲𑀩𑁆𑀩𑁂𑀲𑀜𑁆𑀳𑀺 ¶ 𑀩𑀼𑀤𑁆𑀥𑀸𑀦𑀁 𑀓𑀸𑀬𑀧𑁆𑀧𑀡𑀺𑀥𑀸𑀦𑀁 𑀇𑀫𑀺𑀦𑀸𑀯 𑀅𑀪𑀺𑀦𑀻𑀳𑀸𑀭𑁂𑀦 𑀲𑀫𑀺𑀚𑁆𑀛𑀢𑀻𑀢𑀺. 𑀏𑀯𑀁 𑀫𑀳𑀸𑀪𑀺𑀦𑀻𑀳𑀸𑀭𑀯𑀺𑀲𑁂𑀲𑁂𑀦 ‘‘𑀢𑀣𑀸𑀕𑀢𑁄’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀸𑀭𑀫𑀺𑀧𑀽𑀭𑀡𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑁋 ‘‘𑀬𑀣𑀸 𑀯𑀺𑀧𑀲𑁆𑀲𑀻 𑀪𑀕𑀯𑀸…𑀧𑁂… 𑀓𑀲𑁆𑀲𑀧𑁄 𑀪𑀕𑀯𑀸 𑀤𑀸𑀦𑀧𑀸𑀭𑀫𑀺𑀁 𑀧𑀽𑀭𑁂𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳.

𑀏𑀢𑁆𑀣 𑀘 𑀲𑀼𑀢𑁆𑀢𑀦𑁆𑀢𑀺𑀓𑀸𑀦𑀁 𑀫𑀳𑀸𑀩𑁄𑀥𑀺𑀧𑁆𑀧𑀝𑀺𑀧𑀤𑀸𑀬 𑀓𑁄𑀲𑀮𑁆𑀮𑀚𑀦𑀦𑀢𑁆𑀣𑀁 𑀓𑀸 𑀧𑀦𑁂𑀢𑀸 𑀧𑀸𑀭𑀫𑀺𑀬𑁄, 𑀓𑁂𑀦𑀝𑁆𑀞𑁂𑀦 𑀧𑀸𑀭𑀫𑀺𑀬𑁄, 𑀓𑀢𑀺𑀯𑀺𑀥𑀸 𑀘𑁂𑀢𑀸, 𑀓𑁄 𑀢𑀸𑀲𑀁 𑀓𑀫𑁄, 𑀓𑀸𑀦𑀺 𑀮𑀓𑁆𑀔𑀡𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀸𑀦𑀺, 𑀓𑁄 𑀧𑀘𑁆𑀘𑀬𑁄, 𑀓𑁄 𑀲𑀁𑀓𑀺𑀮𑁂𑀲𑁄, 𑀓𑀺𑀁 𑀯𑁄𑀤𑀸𑀦𑀁, 𑀓𑁄 𑀧𑀝𑀺𑀧𑀓𑁆𑀔𑁄, 𑀓𑀸 𑀧𑀝𑀺𑀧𑀢𑁆𑀢𑀺, 𑀓𑁄 𑀯𑀺𑀪𑀸𑀕𑁄, 𑀓𑁄 𑀲𑀗𑁆𑀕𑀳𑁄, 𑀓𑁄 𑀲𑀫𑁆𑀧𑀸𑀤𑀦𑀽𑀧𑀸𑀬𑁄, 𑀓𑀺𑀢𑁆𑀢𑀓𑁂𑀦 𑀓𑀸𑀮𑁂𑀦 𑀲𑀫𑁆𑀧𑀸𑀤𑀦𑀁, 𑀓𑁄 𑀆𑀦𑀺𑀲𑀁𑀲𑁄, 𑀓𑀺𑀜𑁆𑀘𑁂𑀢𑀸𑀲𑀁 𑀨𑀮𑀦𑁆𑀢𑀺 𑀧𑀸𑀭𑀫𑀻𑀲𑀼 𑀅𑀬𑀁 𑀯𑀺𑀢𑁆𑀣𑀸𑀭𑀓𑀣𑀸 𑀯𑁂𑀤𑀺𑀢𑀩𑁆𑀩𑀸. 𑀲𑀸 𑀧𑀦𑁂𑀲𑀸 𑀇𑀘𑁆𑀙𑀦𑁆𑀢𑁂𑀦 𑀤𑀻𑀖𑀸𑀕𑀫𑀝𑀻𑀓𑀸𑀬𑀁 (𑀤𑀻. 𑀦𑀺. 𑀝𑀻. 𑁧.𑁭) 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸, 𑀦 𑀇𑀥 𑀤𑀲𑁆𑀲𑀺𑀢𑀸. 𑀬𑀣𑀸𑀯𑀼𑀢𑁆𑀢𑀸𑀬 𑀧𑀝𑀺𑀧𑀤𑀸𑀬 𑀬𑀣𑀸𑀯𑀼𑀢𑁆𑀢𑀯𑀺𑀪𑀸𑀕𑀸𑀦𑀁 𑀧𑀸𑀭𑀫𑀻𑀦𑀁 𑀧𑀽𑀭𑀺𑀢𑀪𑀸𑀯𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀲𑀫𑀢𑀺𑀁𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸’’𑀢𑀺.

𑀲𑀢𑀺𑀧𑀺 𑀫𑀳𑀸𑀧𑀭𑀺𑀘𑁆𑀘𑀸𑀕𑀸𑀦𑀁 𑀤𑀸𑀦𑀧𑀸𑀭𑀫𑀺𑀪𑀸𑀯𑁂 𑀧𑀭𑀺𑀘𑁆𑀘𑀸𑀕𑀯𑀺𑀲𑁂𑀲𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘𑁂𑀯 𑀲𑀼𑀤𑀼𑀓𑁆𑀓𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑀜𑁆𑀘 𑀫𑀳𑀸𑀧𑀭𑀺𑀘𑁆𑀘𑀸𑀕𑁂𑀳𑀺 𑀯𑀺𑀲𑀼𑀁 𑀕𑀳𑀡𑀁. 𑀢𑀢𑁄𑀬𑁂𑀯 𑀘 𑀅𑀗𑁆𑀕𑀧𑀭𑀺𑀘𑁆𑀘𑀸𑀕𑀢𑁄 𑀯𑀺𑀲𑀼𑀁 𑀦𑀬𑀦𑀧𑀭𑀺𑀘𑁆𑀘𑀸𑀕𑀕𑁆𑀕𑀳𑀡𑀁, 𑀧𑀭𑀺𑀘𑁆𑀘𑀸𑀕𑀪𑀸𑀯𑀲𑀸𑀫𑀜𑁆𑀜𑁂𑀧𑀺 𑀥𑀦𑀭𑀚𑁆𑀚𑀧𑀭𑀺𑀘𑁆𑀘𑀸𑀕𑀢𑁄 𑀧𑀼𑀢𑁆𑀢𑀤𑀸𑀭𑀧𑀭𑀺𑀘𑁆𑀘𑀸𑀕𑀕𑁆𑀕𑀳𑀡𑀜𑁆𑀘 𑀓𑀢𑀁. 𑀕𑀢𑀧𑀘𑁆𑀘𑀸𑀕𑀢𑀺𑀓𑀯𑀢𑁆𑀢𑀲𑀗𑁆𑀔𑀸𑀢𑀸𑀬 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀸𑀬 𑀲𑀤𑁆𑀥𑀺𑀁 𑀅𑀪𑀺𑀜𑁆𑀜𑀸𑀲𑀫𑀸𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀁 𑀧𑀼𑀩𑁆𑀩𑀬𑁄𑀕𑁄. 𑀤𑀸𑀦𑀸𑀤𑀻𑀲𑀼𑀬𑁂𑀯 𑀲𑀸𑀢𑀺𑀲𑀬𑀧𑁆𑀧𑀝𑀺𑀧𑀢𑁆𑀢𑀺𑀦𑀺𑀧𑁆𑀨𑀸𑀤𑀦𑀁 𑀧𑀼𑀩𑁆𑀩𑀘𑀭𑀺𑀬𑀸, 𑀬𑀸 𑀯𑀸 𑀘𑀭𑀺𑀬𑀸𑀧𑀺𑀝𑀓𑀲𑀗𑁆𑀕𑀳𑀺𑀢𑀸. ‘‘𑀅𑀪𑀺𑀦𑀻𑀳𑀸𑀭𑁄 𑀧𑀼𑀩𑁆𑀩𑀬𑁄𑀕𑁄, 𑀤𑀸𑀦𑀸𑀤𑀺𑀧𑁆𑀧𑀝𑀺𑀧𑀢𑁆𑀢𑀺 𑀯𑀸 𑀓𑀸𑀬𑀯𑀺𑀯𑁂𑀓𑀯𑀲𑁂𑀦 𑀏𑀓𑀘𑀭𑀺𑀬𑀸 𑀯𑀸 𑀧𑀼𑀩𑁆𑀩𑀘𑀭𑀺𑀬𑀸’’𑀢𑀺 𑀓𑁂𑀘𑀺. 𑀤𑀸𑀦𑀸𑀤𑀻𑀦𑀜𑁆𑀘𑁂𑀯 𑀅𑀧𑁆𑀧𑀺𑀘𑁆𑀙𑀢𑀸𑀤𑀻𑀦𑀜𑁆𑀘 𑀲𑀁𑀲𑀸𑀭𑀦𑀺𑀩𑁆𑀩𑀸𑀦𑁂𑀲𑀼 𑀆𑀤𑀻𑀦𑀯𑀸𑀦𑀺𑀲𑀁𑀲𑀸𑀦𑀜𑁆𑀘 𑀯𑀺𑀪𑀸𑀯𑀦𑀯𑀲𑁂𑀦 𑀲𑀢𑁆𑀢𑀸𑀦𑀁 𑀩𑁄𑀥𑀺𑀢𑁆𑀢𑀬𑁂 𑀧𑀢𑀺𑀝𑁆𑀞𑀸𑀧𑀦𑀧𑀭𑀺𑀧𑀸𑀘𑀦𑀯𑀲𑁂𑀦 𑀘 𑀧𑀯𑀢𑁆𑀢𑀸 𑀓𑀣𑀸 𑀥𑀫𑁆𑀫𑀓𑁆𑀔𑀸𑀦𑀁. 𑀜𑀸𑀢𑀻𑀦𑀁 𑀅𑀢𑁆𑀣𑀘𑀭𑀺𑀬𑀸 𑀜𑀸𑀢𑀢𑁆𑀣𑀘𑀭𑀺𑀬𑀸. 𑀲𑀸𑀧𑀺 𑀓𑀭𑀼𑀡𑀸𑀬𑀦𑀯𑀲𑁂𑀦𑁂𑀯. 𑀆𑀤𑀺-𑀲𑀤𑁆𑀤𑁂𑀦 𑀮𑁄𑀓𑀢𑁆𑀣𑀘𑀭𑀺𑀬𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀫𑁆𑀫𑀲𑁆𑀲𑀓𑀢𑀜𑀸𑀡𑀯𑀲𑁂𑀦 𑀅𑀦𑀯𑀚𑁆𑀚𑀓𑀫𑁆𑀫𑀸𑀬𑀢𑀦𑀲𑀺𑀧𑁆𑀧𑀸𑀬𑀢𑀦𑀯𑀺𑀚𑁆𑀚𑀸𑀝𑁆𑀞𑀸𑀦𑀧𑀭𑀺𑀘𑀬𑀯𑀲𑁂𑀦 𑀔𑀦𑁆𑀥𑀸𑀬𑀢𑀦𑀸𑀤𑀺𑀧𑀭𑀺𑀘𑀬𑀯𑀲𑁂𑀦 𑀮𑀓𑁆𑀔𑀡𑀢𑁆𑀢𑀬𑀢𑀻𑀭𑀡𑀯𑀲𑁂𑀦 𑀘 𑀜𑀸𑀡𑀘𑀸𑀭𑁄 𑀩𑀼𑀤𑁆𑀥𑀺𑀘𑀭𑀺𑀬𑀸. 𑀲𑀸 𑀧𑀦 𑀅𑀢𑁆𑀣𑀢𑁄 𑀧𑀜𑁆𑀜𑀸𑀧𑀸𑀭𑀫𑀻𑀬𑁂𑀯, 𑀜𑀸𑀡𑀲𑀫𑁆𑀪𑀸𑀭𑀤𑀲𑁆𑀲𑀦𑀢𑁆𑀣𑀁 𑀯𑀺𑀲𑀼𑀁 ¶ 𑀕𑀳𑀡𑀁. 𑀓𑁄𑀝𑀻𑀢𑀺 𑀧𑀭𑀺𑀬𑀦𑁆𑀢𑁄, 𑀉𑀓𑁆𑀓𑀁𑀲𑁄𑀢𑀺 𑀅𑀢𑁆𑀣𑁄. 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂 𑀪𑀸𑀯𑁂𑀢𑁆𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀪𑀸𑀯𑁂𑀢𑁆𑀯𑀸𑀢𑀺 𑀉𑀧𑁆𑀧𑀸𑀤𑁂𑀢𑁆𑀯𑀸. 𑀩𑁆𑀭𑀽𑀳𑁂𑀢𑁆𑀯𑀸𑀢𑀺 𑀯𑀟𑁆𑀠𑁂𑀢𑁆𑀯𑀸. 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀕𑁆𑀕𑀳𑀡𑁂𑀦 𑀆𑀕𑀫𑀦𑀧𑁆𑀧𑀝𑀺𑀧𑀤𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑁆𑀯𑀸 𑀤𑀲𑁆𑀲𑁂𑀢𑀺. 𑀯𑀺𑀧𑀲𑁆𑀲𑀦𑀸𑀲𑀳𑀕𑀢𑀸 𑀏𑀯 𑀯𑀸 𑀲𑀢𑀺𑀧𑀝𑁆𑀞𑀸𑀦𑀸𑀤𑀬𑁄 𑀤𑀝𑁆𑀞𑀩𑁆𑀩𑀸. 𑀏𑀢𑁆𑀣 𑀘 ‘‘𑀬𑁂𑀦 𑀅𑀪𑀺𑀦𑀻𑀳𑀸𑀭𑁂𑀦𑀸’’𑀢𑀺𑀆𑀤𑀺𑀦𑀸 𑀆𑀕𑀫𑀦𑀧𑁆𑀧𑀝𑀺𑀧𑀤𑀸𑀬 𑀆𑀤𑀺𑀁 𑀤𑀲𑁆𑀲𑁂𑀢𑀺, ‘‘𑀤𑀸𑀦𑀧𑀸𑀭𑀫𑀺’’𑀦𑁆𑀢𑀺𑀆𑀤𑀺𑀦𑀸 𑀫𑀚𑁆𑀛𑀁, ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑁂’’𑀢𑀺𑀆𑀤𑀺𑀦𑀸 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀫𑁆𑀧𑀢𑀺𑀚𑀸𑀢𑁄𑀢𑀺 ¶ 𑀫𑀼𑀳𑀼𑀢𑁆𑀢𑀚𑀸𑀢𑁄 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑁄. 𑀦𑀺𑀓𑁆𑀔𑀦𑁆𑀢𑀫𑀢𑁆𑀢𑀜𑁆𑀳𑀺 𑀫𑀳𑀸𑀲𑀢𑁆𑀢𑀁 𑀧𑀞𑀫𑀁 𑀩𑁆𑀭𑀳𑁆𑀫𑀸𑀦𑁄 𑀲𑀼𑀯𑀡𑁆𑀡𑀚𑀸𑀮𑁂𑀦 𑀧𑀝𑀺𑀕𑁆𑀕𑀡𑁆𑀳𑀺𑀁𑀲𑀼, 𑀢𑁂𑀲𑀁 𑀳𑀢𑁆𑀣𑀢𑁄 𑀘𑀢𑁆𑀢𑀸𑀭𑁄 𑀫𑀳𑀸𑀭𑀸𑀚𑀸𑀦𑁄 𑀅𑀚𑀺𑀦𑀧𑁆𑀧𑀯𑁂𑀡𑀺𑀬𑀸, 𑀢𑁂𑀲𑀁 𑀳𑀢𑁆𑀣𑀢𑁄 𑀫𑀦𑀼𑀲𑁆𑀲𑀸 𑀤𑀼𑀓𑀽𑀮𑀘𑀼𑀫𑁆𑀩𑀝𑀓𑁂𑀦 𑀧𑀝𑀺𑀕𑁆𑀕𑀡𑁆𑀳𑀺𑀁𑀲𑀼, 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀧𑀣𑀯𑀺𑀬𑀁 𑀧𑀢𑀺𑀝𑁆𑀞𑀺𑀢𑁄. 𑀬𑀣𑀸𑀳𑀸𑀢𑀺𑀆𑀤𑀺𑀦𑀸 𑀫𑀳𑀸𑀧𑀤𑀸𑀦𑀤𑁂𑀲𑀦𑀸𑀬 𑀯𑀼𑀢𑁆𑀢𑀯𑀘𑀦𑀁 𑀦𑀺𑀤𑀲𑁆𑀲𑁂𑀢𑀺. 𑀲𑁂𑀢𑀫𑁆𑀳𑀺 𑀙𑀢𑁆𑀢𑁂𑀢𑀺 𑀤𑀺𑀩𑁆𑀩𑀲𑁂𑀢𑀘𑁆𑀙𑀢𑁆𑀢𑁂. 𑀅𑀦𑀼𑀥𑀸𑀭𑀺𑀬𑀫𑀸𑀦𑁂𑀢𑀺 𑀥𑀸𑀭𑀺𑀬𑀫𑀸𑀦𑁂. 𑀏𑀢𑁆𑀣 𑀘 𑀙𑀢𑁆𑀢𑀕𑁆𑀕𑀳𑀡𑁂𑀦𑁂𑀯 𑀔𑀕𑁆𑀕𑀸𑀤𑀻𑀦𑀺 𑀧𑀜𑁆𑀘 𑀓𑀓𑀼𑀥𑀪𑀡𑁆𑀟𑀸𑀦𑀺 𑀯𑀼𑀢𑁆𑀢𑀸𑀦𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀔𑀕𑁆𑀕𑀢𑀸𑀮𑀯𑀡𑁆𑀝𑀫𑁄𑀭𑀳𑀢𑁆𑀣𑀓𑀯𑀸𑀮𑀩𑀻𑀚𑀦𑀺𑀉𑀡𑁆𑀳𑀻𑀲𑀧𑀝𑁆𑀝𑀸𑀧𑀺 𑀳𑀺 𑀙𑀢𑁆𑀢𑁂𑀦 𑀲𑀳 𑀢𑀤𑀸 𑀉𑀧𑀝𑁆𑀞𑀺𑀢𑀸 𑀅𑀳𑁂𑀲𑀼𑀁. 𑀙𑀢𑁆𑀢𑀸𑀤𑀻𑀦𑀺𑀬𑁂𑀯 𑀘 𑀢𑀤𑀸 𑀧𑀜𑁆𑀜𑀸𑀬𑀺𑀁𑀲𑀼, 𑀦 𑀙𑀢𑁆𑀢𑀸𑀤𑀺𑀕𑁆𑀕𑀸𑀳𑀓𑀸. 𑀲𑀩𑁆𑀩𑀸 𑀘 𑀤𑀺𑀲𑀸𑀢𑀺 𑀤𑀲 𑀤𑀺𑀲𑀸, 𑀦𑀬𑀺𑀤𑀁 𑀲𑀩𑁆𑀩𑀤𑀺𑀲𑀸𑀯𑀺𑀮𑁄𑀓𑀦𑀁 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑀼𑀢𑁆𑀢𑀭𑀓𑀸𑀮𑀁. 𑀫𑀳𑀸𑀲𑀢𑁆𑀢𑁄 𑀳𑀺 𑀫𑀦𑀼𑀲𑁆𑀲𑀸𑀦𑀁 𑀳𑀢𑁆𑀣𑀢𑁄 𑀫𑀼𑀘𑁆𑀘𑀺𑀢𑁆𑀯𑀸 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀑𑀮𑁄𑀓𑁂𑀲𑀺, 𑀢𑀢𑁆𑀣 𑀤𑁂𑀯𑀫𑀦𑀼𑀲𑁆𑀲𑀸 𑀕𑀦𑁆𑀥𑀫𑀸𑀮𑀸𑀤𑀻𑀳𑀺 𑀧𑀽𑀚𑀬𑀫𑀸𑀦𑀸, ‘‘𑀫𑀳𑀸𑀧𑀼𑀭𑀺𑀲, 𑀇𑀥 𑀢𑀼𑀫𑁆𑀳𑁂𑀳𑀺 𑀲𑀤𑀺𑀲𑁄𑀧𑀺 𑀦𑀢𑁆𑀣𑀺, 𑀓𑀼𑀢𑁄 𑀉𑀢𑁆𑀢𑀭𑀺𑀢𑀭𑁄’’𑀢𑀺 𑀆𑀳𑀁𑀲𑀼. 𑀏𑀯𑀁 𑀘𑀢𑀲𑁆𑀲𑁄 𑀤𑀺𑀲𑀸 𑀘𑀢𑀲𑁆𑀲𑁄 𑀅𑀦𑀼𑀤𑀺𑀲𑀸 𑀳𑁂𑀝𑁆𑀞𑀸 𑀉𑀧𑀭𑀻𑀢𑀺 𑀲𑀩𑁆𑀩𑀸 𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀢𑁆𑀯𑀸 𑀲𑀩𑁆𑀩𑀢𑁆𑀣 𑀅𑀢𑁆𑀢𑀦𑀸 𑀲𑀤𑀺𑀲𑀁 𑀅𑀤𑀺𑀲𑁆𑀯𑀸 ‘‘𑀅𑀬𑀁 𑀉𑀢𑁆𑀢𑀭𑀸 𑀤𑀺𑀲𑀸’’𑀢𑀺 𑀲𑀢𑁆𑀢𑀧𑀤𑀯𑀻𑀢𑀺𑀳𑀸𑀭𑁂𑀦 𑀅𑀕𑀫𑀸𑀲𑀺. 𑀆𑀲𑀪𑀺𑀦𑁆𑀢𑀺 𑀉𑀢𑁆𑀢𑀫𑀁. 𑀅𑀕𑁆𑀕𑁄𑀢𑀺 𑀲𑀩𑁆𑀩𑀧𑀞𑀫𑁄. 𑀚𑁂𑀝𑁆𑀞𑁄𑀢𑀺 𑀲𑁂𑀝𑁆𑀞𑁄𑀢𑀺 𑀘 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀧𑀢𑁆𑀢𑀩𑁆𑀩𑀁 𑀅𑀭𑀳𑀢𑁆𑀢𑀁 𑀩𑁆𑀬𑀸𑀓𑀸𑀲𑀺. ‘‘𑀅𑀦𑁂𑀓𑁂𑀲𑀁 𑀯𑀺𑀲𑁂𑀲𑀸𑀥𑀺𑀕𑀫𑀸𑀦𑀁 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀸𑀯𑁂𑀦𑀸’’𑀢𑀺 𑀲𑀁𑀔𑀺𑀢𑁆𑀢𑁂𑀦 𑀯𑀼𑀢𑁆𑀢𑀫𑀢𑁆𑀣𑀁 ‘‘𑀬𑀜𑁆𑀳𑀻’’𑀢𑀺𑀆𑀤𑀺𑀦𑀸 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀏𑀢𑁆𑀣𑀸𑀢𑀺 𑁋

‘‘𑀅𑀦𑁂𑀓𑀲𑀸𑀔𑀜𑁆𑀘 ¶ 𑀲𑀳𑀲𑁆𑀲𑀫𑀡𑁆𑀟𑀮𑀁,

𑀙𑀢𑁆𑀢𑀁 𑀫𑀭𑀽 𑀥𑀸𑀭𑀬𑀼𑀫𑀦𑁆𑀢𑀮𑀺𑀓𑁆𑀔𑁂;

𑀲𑀼𑀯𑀡𑁆𑀡𑀤𑀡𑁆𑀟𑀸 𑀯𑀻𑀢𑀺𑀧𑀢𑀦𑁆𑀢𑀺 𑀘𑀸𑀫𑀭𑀸,

𑀦 𑀤𑀺𑀲𑁆𑀲𑀭𑁂 𑀘𑀸𑀫𑀭𑀙𑀢𑁆𑀢𑀕𑀸𑀳𑀓𑀸’’𑀢𑀺. (𑀲𑀼. 𑀦𑀺. 𑁬𑁯𑁩) 𑁋

𑀇𑀫𑀺𑀲𑁆𑀲𑀸 𑀕𑀸𑀣𑀸𑀬. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀘𑀸𑀭𑀢𑀸𑀬 𑀅𑀦𑀸𑀯𑀭𑀡𑀜𑀸𑀡𑀦𑁆𑀢𑀺 𑀆𑀳 𑁋 ‘‘𑀲𑀩𑁆𑀩𑀜𑁆𑀜𑀼𑀢𑀸𑀦𑀸𑀯𑀭𑀡𑀜𑀸𑀡𑀧𑀝𑀺𑀮𑀸𑀪𑀲𑁆𑀲𑀸’’𑀢𑀺. 𑀢𑀣𑀸 𑀅𑀬𑀁 𑀪𑀕𑀯𑀸𑀧𑀺 𑀕𑀢𑁄…𑀧𑁂… 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀸𑀯𑁂𑀦𑀸𑀢𑀺 𑀏𑀢𑁂𑀦 𑀅𑀪𑀺𑀚𑀸𑀢𑀺𑀬𑀁 𑀥𑀫𑁆𑀫𑀢𑀸𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀯𑀺𑀲𑁂𑀲𑀸 𑀲𑀩𑁆𑀩𑀩𑁄𑀥𑀺𑀲𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀸𑀭𑀫𑀺𑀢𑀸𑀦𑀺𑀲𑁆𑀲𑀦𑁆𑀤𑀸 𑀳𑀺 𑀢𑁂𑀢𑀺.

𑀯𑀺𑀓𑁆𑀓𑀫𑀻𑀢𑀺 𑀅𑀕𑀫𑀸𑀲𑀺. 𑀫𑀭𑀽𑀢𑀺 𑀤𑁂𑀯𑀸. 𑀲𑀫𑀸𑀢𑀺 𑀯𑀺𑀮𑁄𑀓𑀦𑀲𑀫𑀢𑀸𑀬 𑀲𑀫𑀸 𑀲𑀤𑀺𑀲𑀺𑀬𑁄. 𑀫𑀳𑀸𑀧𑀼𑀭𑀺𑀲𑁄 𑀳𑀺 𑀬𑀣𑀸 𑀏𑀓𑀁 𑀤𑀺𑀲𑀁 𑀯𑀺𑀮𑁄𑀓𑁂𑀲𑀺, 𑀏𑀯𑀁 𑀲𑁂𑀲𑀤𑀺𑀲𑀸𑀧𑀺, 𑀦 𑀓𑀢𑁆𑀣𑀘𑀺 𑀯𑀺𑀮𑁄𑀓𑀦𑁂 𑀯𑀺𑀩𑀦𑁆𑀥𑁄 𑀢𑀲𑁆𑀲 ¶ 𑀅𑀳𑁄𑀲𑀻𑀢𑀺. 𑀲𑀫𑀸𑀢𑀺 𑀯𑀸 𑀯𑀺𑀮𑁄𑀓𑁂𑀢𑀼𑀁 𑀬𑀼𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀦 𑀳𑀺 𑀢𑀤𑀸 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀺𑀭𑀽𑀧𑀩𑀻𑀪𑀘𑁆𑀙𑀯𑀺𑀲𑀫𑀭𑀽𑀧𑀸𑀦𑀺 𑀯𑀺𑀮𑁄𑀓𑁂𑀢𑀼𑀁 𑀅𑀬𑀼𑀢𑁆𑀢𑀸𑀦𑀺 𑀤𑀺𑀲𑀸𑀲𑀼 𑀉𑀧𑀝𑁆𑀞𑀳𑀦𑁆𑀢𑀻𑀢𑀺.

‘‘𑀏𑀯𑀁 𑀢𑀣𑀸 𑀕𑀢𑁄’’𑀢𑀺 𑀓𑀸𑀬𑀕𑀫𑀦𑀝𑁆𑀞𑁂𑀦 𑀕𑀢𑀲𑀤𑁆𑀤𑁂𑀦 𑀢𑀣𑀸𑀕𑀢𑀲𑀤𑁆𑀤𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀇𑀤𑀸𑀦𑀺 𑀜𑀸𑀡𑀕𑀫𑀦𑀝𑁆𑀞𑁂𑀦 𑀢𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀦𑁂𑀓𑁆𑀔𑀫𑁆𑀫𑁂𑀦𑀸𑀢𑀺 𑀅𑀮𑁄𑀪𑀧𑁆𑀧𑀥𑀸𑀦𑁂𑀦 𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦. 𑀓𑀼𑀲𑀮𑀸 𑀳𑀺 𑀥𑀫𑁆𑀫𑀸 𑀇𑀥 𑀦𑁂𑀓𑁆𑀔𑀫𑁆𑀫𑀁, 𑀦 𑀧𑀩𑁆𑀩𑀚𑁆𑀚𑀸𑀤𑀬𑁄. ‘‘𑀧𑀞𑀫𑀚𑁆𑀛𑀸𑀦𑁂𑀦𑀸’’𑀢𑀺 𑀘 𑀯𑀤𑀦𑁆𑀢𑀺. 𑀧𑀳𑀸𑀬𑀸𑀢𑀺 𑀧𑀚𑀳𑀺𑀢𑁆𑀯𑀸. 𑀕𑀢𑁄 𑀅𑀥𑀺𑀕𑀢𑁄, 𑀧𑀝𑀺𑀧𑀦𑁆𑀦𑁄 𑀉𑀢𑁆𑀢𑀭𑀺𑀯𑀺𑀲𑁂𑀲𑀦𑁆𑀢𑀺 𑀅𑀢𑁆𑀣𑁄. 𑀧𑀳𑀸𑀬𑀸𑀢𑀺 𑀯𑀸 𑀧𑀳𑀸𑀦𑀳𑁂𑀢𑀼, 𑀧𑀳𑀸𑀦𑀮𑀓𑁆𑀔𑀡𑀁 𑀯𑀸. 𑀳𑁂𑀢𑀼𑀮𑀓𑁆𑀔𑀡𑀢𑁆𑀣𑁄 𑀳𑀺 𑀅𑀬𑀁 𑀧𑀳𑀸𑀬𑀲𑀤𑁆𑀤𑁄. 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀧𑁆𑀧𑀳𑀸𑀦𑀳𑁂𑀢𑀼𑀓𑀜𑁆𑀳𑀺 ‘‘𑀕𑀢𑁄’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀁 𑀕𑀫𑀦𑀁 𑀅𑀯𑀩𑁄𑀥𑁄, 𑀧𑀝𑀺𑀧𑀢𑁆𑀢𑀺 𑀏𑀯 𑀯𑀸 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀧𑁆𑀧𑀳𑀸𑀦𑁂𑀦 𑀘 𑀮𑀓𑁆𑀔𑀻𑀬𑀢𑀺. 𑀏𑀲 𑀦𑀬𑁄 𑀧𑀤𑀸𑀮𑁂𑀢𑁆𑀯𑀸𑀢𑀺𑀆𑀤𑀻𑀲𑀼𑀧𑀺. 𑀅𑀩𑁆𑀬𑀸𑀧𑀸𑀤𑁂𑀦𑀸𑀢𑀺 𑀫𑁂𑀢𑁆𑀢𑀸𑀬. 𑀆𑀮𑁄𑀓𑀲𑀜𑁆𑀜𑀸𑀬𑀸𑀢𑀺 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀫𑀦𑀲𑀺𑀓𑀭𑀡𑁂𑀦 𑀉𑀧𑀝𑁆𑀞𑀺𑀢𑀆𑀮𑁄𑀓𑀲𑀜𑁆𑀚𑀸𑀦𑀦𑁂𑀦. 𑀅𑀯𑀺𑀓𑁆𑀔𑁂𑀧𑁂𑀦𑀸𑀢𑀺 𑀲𑀫𑀸𑀥𑀺𑀦𑀸. 𑀥𑀫𑁆𑀫𑀯𑀯𑀢𑁆𑀣𑀸𑀦𑁂𑀦𑀸𑀢𑀺 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀬𑀸𑀣𑀸𑀯𑀦𑀺𑀘𑁆𑀙𑀬𑁂𑀦. ‘‘𑀲𑀧𑁆𑀧𑀘𑁆𑀘𑀬𑀦𑀸𑀫𑀭𑀽𑀧𑀯𑀯𑀢𑁆𑀣𑀸𑀦𑁂𑀦𑀸’’𑀢𑀺𑀧𑀺 𑀯𑀤𑀦𑁆𑀢𑀺. 𑀏𑀯𑀁 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀦𑀻𑀯𑀭𑀡𑀧𑁆𑀧𑀳𑀸𑀦𑁂𑀦 ‘‘𑀅𑀪𑀺𑀚𑁆𑀛𑀁 𑀮𑁄𑀓𑁂 𑀧𑀳𑀸𑀬𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁫𑁦𑁮) 𑀯𑀼𑀢𑁆𑀢𑀸𑀬 𑀧𑀞𑀫𑀚𑁆𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑀧𑁆𑀧𑀝𑀺𑀧𑀤𑀸𑀬 𑀪𑀕𑀯𑀢𑁄 𑀢𑀣𑀸𑀕𑀢𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀳 𑀉𑀧𑀸𑀬𑁂𑀦 𑀅𑀝𑁆𑀞𑀳𑀺 ¶ 𑀲𑀫𑀸𑀧𑀢𑁆𑀢𑀻𑀳𑀺 𑀅𑀝𑁆𑀞𑀸𑀭𑀲𑀳𑀺 𑀘 𑀫𑀳𑀸𑀯𑀺𑀧𑀲𑁆𑀲𑀦𑀸𑀳𑀺 𑀢𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀜𑀸𑀡𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑀓𑀗𑁆𑀔𑀸𑀯𑀺𑀢𑀭𑀡𑀸𑀦𑀜𑁆𑀳𑀺 𑀯𑀺𑀩𑀦𑁆𑀥𑀪𑀽𑀢𑀲𑁆𑀲 𑀫𑁄𑀳𑀲𑁆𑀲 𑀤𑀽𑀭𑀻𑀓𑀭𑀡𑁂𑀦 𑀜𑀸𑀢𑀧𑀭𑀺𑀜𑁆𑀜𑀸𑀬𑀁 𑀞𑀺𑀢𑀲𑁆𑀲 𑀅𑀦𑀺𑀘𑁆𑀘𑀲𑀜𑁆𑀜𑀸𑀤𑀬𑁄 𑀲𑀺𑀚𑁆𑀛𑀦𑁆𑀢𑀺, 𑀢𑀣𑀸 𑀛𑀸𑀦𑀲𑀫𑀸𑀧𑀢𑁆𑀢𑀻𑀲𑀼 𑀅𑀪𑀺𑀭𑀢𑀺𑀦𑀺𑀫𑀺𑀢𑁆𑀢𑁂𑀦 𑀧𑀸𑀫𑁄𑀚𑁆𑀚𑁂𑀦 𑀢𑀢𑁆𑀣 𑀅𑀦𑀪𑀺𑀭𑀢𑀺𑀬𑀸 𑀯𑀺𑀦𑁄𑀤𑀺𑀢𑀸𑀬 𑀛𑀸𑀦𑀸𑀤𑀻𑀦𑀁 𑀲𑀫𑀥𑀺𑀕𑀫𑁄𑀢𑀺 𑀲𑀫𑀸𑀧𑀢𑁆𑀢𑀺𑀯𑀺𑀧𑀲𑁆𑀲𑀦𑀸𑀦𑀁 𑀅𑀭𑀢𑀺𑀯𑀺𑀦𑁄𑀤𑀦𑀅𑀯𑀺𑀚𑁆𑀚𑀸𑀧𑀤𑀸𑀮𑀦𑀸𑀤𑀺𑀉𑀧𑀸𑀬𑁄, 𑀉𑀧𑁆𑀧𑀝𑀺𑀧𑀸𑀝𑀺𑀦𑀺𑀤𑁆𑀤𑁂𑀲𑁄 𑀧𑀦 𑀦𑀻𑀯𑀭𑀡𑀲𑀪𑀸𑀯𑀸𑀬 𑀅𑀯𑀺𑀚𑁆𑀚𑀸𑀬 𑀳𑁂𑀝𑁆𑀞𑀸 𑀦𑀻𑀯𑀭𑀡𑁂𑀲𑀼𑀧𑀺 𑀲𑀗𑁆𑀕𑀳𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑁄. 𑀲𑀫𑀸𑀧𑀢𑁆𑀢𑀺𑀯𑀺𑀳𑀸𑀭𑀧𑁆𑀧𑀯𑁂𑀲𑀯𑀺𑀩𑀦𑁆𑀥𑀦𑁂𑀦 𑀦𑀻𑀯𑀭𑀡𑀸𑀦𑀺 𑀓𑀯𑀸𑀝𑀲𑀤𑀺𑀲𑀸𑀦𑀻𑀢𑀺 𑀆𑀳 𑁋 ‘‘𑀦𑀻𑀯𑀭𑀡𑀓𑀯𑀸𑀝𑀁 𑀉𑀕𑁆𑀖𑀸𑀝𑁂𑀢𑁆𑀯𑀸’’𑀢𑀺.

‘‘𑀭𑀢𑁆𑀢𑀺𑀁 𑀯𑀺𑀢𑀓𑁆𑀓𑁂𑀢𑁆𑀯𑀸 𑀯𑀺𑀘𑀸𑀭𑁂𑀢𑁆𑀯𑀸 𑀤𑀺𑀯𑀸 𑀓𑀫𑁆𑀫𑀦𑁆𑀢𑁂 𑀧𑀬𑁄𑀚𑁂𑀢𑀻’’𑀢𑀺 (𑀫. 𑀦𑀺. 𑁧.𑁨𑁫𑁧) 𑀯𑀼𑀢𑁆𑀢𑀝𑁆𑀞𑀸𑀦𑁂 𑀯𑀺𑀢𑀓𑁆𑀓𑀯𑀺𑀘𑀸𑀭𑀸 𑀥𑀽𑀫𑀸𑀬𑀦𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 𑁋 ‘‘𑀯𑀺𑀢𑀓𑁆𑀓𑀯𑀺𑀘𑀸𑀭𑀥𑀽𑀫’’𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 𑀧𑀞𑀫𑀚𑁆𑀛𑀸𑀦𑀽𑀧𑀘𑀸𑀭𑁂𑀬𑁂𑀯 𑀤𑀼𑀓𑁆𑀔𑀁, 𑀘𑀢𑀼𑀢𑁆𑀣𑀚𑁆𑀛𑀸𑀦𑁄𑀧𑀘𑀸𑀭𑁂𑀬𑁂𑀯 𑀘 𑀲𑀼𑀔𑀁 𑀧𑀳𑀻𑀬𑀢𑀺, 𑀅𑀢𑀺𑀲𑀬𑀧𑁆𑀧𑀳𑀸𑀦𑀁 𑀧𑀦 𑀲𑀦𑁆𑀥𑀸𑀬𑀸𑀳 𑁋 ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑁂𑀦 𑀲𑀼𑀔𑀤𑀼𑀓𑁆𑀔𑀁 𑀧𑀳𑀸𑀬𑀸’’𑀢𑀺. 𑀭𑀽𑀧𑀲𑀜𑁆𑀜𑀸𑀢𑀺 𑀲𑀜𑁆𑀜𑀸𑀲𑀻𑀲𑁂𑀦 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀘𑁂𑀯 𑀢𑀤𑀸𑀭𑀫𑁆𑀫𑀡𑀸𑀦𑀺 𑀘 𑀯𑀼𑀢𑁆𑀢𑀸𑀦𑀺. 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀫𑁆𑀧𑀺 𑀳𑀺 ‘‘𑀭𑀽𑀧’’𑀦𑁆𑀢𑀺 𑀯𑀼𑀘𑁆𑀘𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁨𑁪𑁮; 𑁩.𑁩𑁧𑁨; 𑀥. 𑀲. 𑁨𑁪𑁮; 𑀧𑀝𑀺. 𑀫. 𑁧.𑁨𑁦𑁯). 𑀢𑀲𑁆𑀲 𑀆𑀭𑀫𑁆𑀫𑀡𑀫𑁆𑀧𑀺 𑀓𑀲𑀺𑀡𑀭𑀽𑀧𑀁 ‘‘𑀭𑀽𑀧’’𑀦𑁆𑀢𑀺 𑀯𑀼𑀘𑁆𑀘𑀢𑀺 ¶ 𑀧𑀼𑀭𑀺𑀫𑀧𑀤𑀮𑁄𑀧𑁂𑀦 ‘‘𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁧𑁭𑁩-𑁧𑁭𑁪; 𑀫. 𑀦𑀺. 𑁨.𑁨𑁪𑁯; 𑀥. 𑀲. 𑁨𑁪𑁪-𑁨𑁪𑁫). 𑀢𑀲𑁆𑀫𑀸 𑀇𑀥 𑀭𑀽𑀧𑁂 𑀭𑀽𑀧𑀚𑁆𑀛𑀸𑀦𑁂 𑀢𑀁𑀲𑀳𑀕𑀢𑀲𑀜𑁆𑀜𑀸 𑀭𑀽𑀧𑀲𑀜𑁆𑀜𑀸𑀢𑀺 𑀏𑀯𑀁 𑀲𑀜𑁆𑀜𑀸𑀲𑀻𑀲𑁂𑀦 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀭𑀽𑀧𑀁 𑀲𑀜𑁆𑀜𑀸 𑀅𑀲𑁆𑀲𑀸𑀢𑀺 𑀭𑀽𑀧𑀲𑀜𑁆𑀜𑀁, 𑀭𑀽𑀧𑀲𑁆𑀲 𑀦𑀸𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀧𑀣𑀯𑀻𑀓𑀲𑀺𑀡𑀸𑀤𑀺𑀪𑁂𑀤𑀲𑁆𑀲 𑀢𑀤𑀸𑀭𑀫𑁆𑀫𑀡𑀲𑁆𑀲 𑀘𑁂𑀢𑀁 𑀅𑀥𑀺𑀯𑀘𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀝𑀺𑀖𑀲𑀜𑁆𑀜𑀸𑀢𑀺 𑀘𑀓𑁆𑀔𑀸𑀤𑀻𑀦𑀁 𑀯𑀢𑁆𑀣𑀽𑀦𑀁 𑀭𑀽𑀧𑀸𑀤𑀻𑀦𑀁 𑀆𑀭𑀫𑁆𑀫𑀡𑀸𑀦𑀜𑁆𑀘 𑀧𑀝𑀺𑀖𑀸𑀢𑁂𑀦 𑀧𑀝𑀺𑀳𑀦𑀦𑁂𑀦 𑀯𑀺𑀲𑀬𑀺𑀯𑀺𑀲𑀬𑀲𑀫𑁄𑀥𑀸𑀦𑁂 𑀲𑀫𑀼𑀧𑁆𑀧𑀦𑁆𑀦𑀸 𑀤𑁆𑀯𑀺𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀳𑀕𑀢𑀸 𑀲𑀜𑁆𑀜𑀸 𑀧𑀝𑀺𑀖𑀲𑀜𑁆𑀜𑀸. 𑀦𑀸𑀦𑀢𑁆𑀢𑀲𑀜𑁆𑀜𑀸𑀬𑁄𑀢𑀺 𑀦𑀸𑀦𑀢𑁆𑀢𑁂 𑀕𑁄𑀘𑀭𑁂 𑀧𑀯𑀢𑁆𑀢𑀸 𑀲𑀜𑁆𑀜𑀸, 𑀦𑀸𑀦𑀢𑁆𑀢𑀸 𑀯𑀸 𑀲𑀜𑁆𑀜𑀸 𑀦𑀸𑀦𑀢𑁆𑀢𑀲𑀜𑁆𑀜𑀸, 𑀅𑀝𑁆𑀞 𑀓𑀸𑀫𑀸𑀯𑀘𑀭𑀓𑀼𑀲𑀮𑀲𑀜𑁆𑀜𑀸, 𑀤𑁆𑀯𑀸𑀤𑀲 𑀅𑀓𑀼𑀲𑀮𑀲𑀜𑁆𑀜𑀸, 𑀏𑀓𑀸𑀤𑀲 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀲𑀜𑁆𑀜𑀸, 𑀤𑁆𑀯𑁂 𑀅𑀓𑀼𑀲𑀮𑀯𑀺𑀧𑀸𑀓𑀲𑀜𑁆𑀜𑀸, 𑀏𑀓𑀸𑀤𑀲 𑀓𑀸𑀫𑀸𑀯𑀘𑀭𑀓𑀺𑀭𑀺𑀬𑀲𑀜𑁆𑀜𑀸𑀢𑀺 𑀏𑀢𑀸𑀲𑀁 𑀘𑀢𑀼𑀘𑀢𑁆𑀢𑀸𑀮𑀻𑀲𑀲𑀜𑁆𑀜𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀏𑀢𑀸 𑀳𑀺 𑀬𑀲𑁆𑀫𑀸 𑀭𑀽𑀧𑀲𑀜𑁆𑀜𑀸𑀤𑀺𑀪𑁂𑀤𑁂 𑀦𑀸𑀦𑀢𑁆𑀢𑁂 ¶ 𑀦𑀸𑀦𑀸𑀲𑀪𑀸𑀯𑁂 𑀕𑁄𑀘𑀭𑁂 𑀧𑀯𑀢𑁆𑀢𑀦𑁆𑀢𑀺, 𑀬𑀲𑁆𑀫𑀸 𑀘 𑀦𑀸𑀦𑀢𑁆𑀢𑀸 𑀦𑀸𑀦𑀸𑀲𑀪𑀸𑀯𑀸 𑀅𑀜𑁆𑀜𑀫𑀜𑁆𑀜𑀁 𑀅𑀲𑀤𑀺𑀲𑀸, 𑀢𑀲𑁆𑀫𑀸 ‘‘𑀦𑀸𑀦𑀢𑁆𑀢𑀲𑀜𑁆𑀜𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀅𑀦𑀺𑀘𑁆𑀘𑀲𑁆𑀲, 𑀅𑀦𑀺𑀘𑁆𑀘𑀦𑁆𑀢𑀺 𑀯𑀸 𑀅𑀦𑀼𑀧𑀲𑁆𑀲𑀦𑀸 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸, 𑀢𑁂𑀪𑀽𑀫𑀓𑀥𑀫𑁆𑀫𑀸𑀦𑀁 𑀅𑀦𑀺𑀘𑁆𑀘𑀢𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀸𑀬 𑀅𑀦𑀼𑀧𑀲𑁆𑀲𑀦𑀸𑀬𑁂𑀢𑀁 𑀦𑀸𑀫𑀁. 𑀦𑀺𑀘𑁆𑀘𑀲𑀜𑁆𑀜𑀦𑁆𑀢𑀺 𑀲𑀗𑁆𑀔𑀢𑀥𑀫𑁆𑀫𑁂 ‘‘𑀦𑀺𑀘𑁆𑀘𑀸 𑀲𑀲𑁆𑀲𑀢𑀸’’𑀢𑀺 𑀧𑀯𑀢𑁆𑀢𑀁 𑀫𑀺𑀘𑁆𑀙𑀸𑀲𑀜𑁆𑀜𑀁. 𑀲𑀜𑁆𑀜𑀸𑀲𑀻𑀲𑁂𑀦 𑀤𑀺𑀝𑁆𑀞𑀺𑀘𑀺𑀢𑁆𑀢𑀸𑀦𑀫𑁆𑀧𑀺 𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺. 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀲𑀗𑁆𑀔𑀸𑀭𑁂𑀲𑀼 𑀦𑀺𑀩𑁆𑀩𑀺𑀚𑁆𑀚𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸𑀬 𑀅𑀦𑀼𑀧𑀲𑁆𑀲𑀦𑀸𑀬. 𑀦𑀦𑁆𑀤𑀺𑀦𑁆𑀢𑀺 𑀲𑀧𑁆𑀧𑀻𑀢𑀺𑀓𑀢𑀡𑁆𑀳𑀁. 𑀯𑀺𑀭𑀸𑀕𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀲𑀗𑁆𑀔𑀸𑀭𑁂𑀲𑀼 𑀯𑀺𑀭𑀚𑁆𑀚𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸𑀬 𑀅𑀦𑀼𑀧𑀲𑁆𑀲𑀦𑀸𑀬. 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀬𑀸𑀢𑀺 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑁄𑀥𑀲𑁆𑀲 𑀅𑀦𑀼𑀧𑀲𑁆𑀲𑀦𑀸𑀬. ‘‘𑀢𑁂 𑀲𑀗𑁆𑀔𑀸𑀭𑀸 𑀦𑀺𑀭𑀼𑀚𑁆𑀛𑀦𑁆𑀢𑀺𑀬𑁂𑀯, 𑀆𑀬𑀢𑀺𑀁 𑀲𑀫𑀼𑀤𑀬𑀯𑀲𑁂𑀦 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀏𑀯𑀁 𑀯𑀸 𑀅𑀦𑀼𑀧𑀲𑁆𑀲𑀦𑀸 𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸. 𑀢𑁂𑀦𑁂𑀯𑀸𑀳 𑁋 ‘‘𑀦𑀺𑀭𑁄𑀥𑀸𑀦𑀼𑀧𑀲𑁆𑀲𑀦𑀸𑀬 𑀦𑀺𑀭𑁄𑀥𑁂𑀢𑀺, 𑀦𑁄 𑀲𑀫𑀼𑀤𑁂𑀢𑀻’’𑀢𑀺. 𑀫𑀼𑀘𑁆𑀘𑀺𑀢𑀼𑀓𑀫𑁆𑀬𑀢𑀸 𑀳𑀺 𑀅𑀬𑀁 𑀩𑀮𑀧𑁆𑀧𑀢𑁆𑀢𑀸𑀢𑀺. 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸 𑀅𑀦𑀼𑀧𑀲𑁆𑀲𑀦𑀸 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀦𑀼𑀧𑀲𑁆𑀲𑀦𑀸. 𑀧𑀝𑀺𑀲𑀗𑁆𑀔𑀸 𑀲𑀦𑁆𑀢𑀺𑀝𑁆𑀞𑀦𑀸 𑀳𑀺 𑀅𑀬𑀁. 𑀆𑀤𑀸𑀦𑀦𑁆𑀢𑀺 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀳𑀡𑀁. 𑀲𑀦𑁆𑀢𑀢𑀺𑀲𑀫𑀽𑀳𑀓𑀺𑀘𑁆𑀘𑀸𑀭𑀫𑁆𑀫𑀡𑀸𑀦𑀁 𑀯𑀲𑁂𑀦 𑀏𑀓𑀢𑁆𑀢𑀕𑁆𑀕𑀳𑀡𑀁 𑀖𑀦𑀲𑀜𑁆𑀜𑀸. 𑀆𑀬𑀽𑀳𑀦𑀁 𑀅𑀪𑀺𑀲𑀗𑁆𑀔𑀭𑀡𑀁. 𑀅𑀯𑀢𑁆𑀣𑀸𑀯𑀺𑀲𑁂𑀲𑀸𑀧𑀢𑁆𑀢𑀺 𑀯𑀺𑀧𑀭𑀺𑀡𑀸𑀫𑁄. 𑀥𑀼𑀯𑀲𑀜𑁆𑀜𑀦𑁆𑀢𑀺 𑀣𑀺𑀭𑀪𑀸𑀯𑀕𑁆𑀕𑀳𑀡𑀁. 𑀦𑀺𑀫𑀺𑀢𑁆𑀢𑀦𑁆𑀢𑀺 𑀲𑀫𑀽𑀳𑀸𑀤𑀺𑀖𑀦𑀯𑀲𑁂𑀦 𑀲𑀓𑀺𑀘𑁆𑀘𑀧𑀭𑀺𑀘𑁆𑀙𑁂𑀤𑀢𑀸𑀬 𑀘 𑀲𑀗𑁆𑀔𑀸𑀭𑀸𑀦𑀁 𑀲𑀯𑀺𑀕𑁆𑀕𑀳𑀕𑁆𑀕𑀳𑀡𑀁. 𑀧𑀡𑀺𑀥𑀺𑀦𑁆𑀢𑀺 𑀭𑀸𑀕𑀸𑀤𑀺𑀧𑀡𑀺𑀥𑀺𑀁. 𑀲𑀸 𑀧𑀦𑀢𑁆𑀣𑀢𑁄 𑀢𑀡𑁆𑀳𑀸𑀯𑀲𑁂𑀦 𑀲𑀗𑁆𑀔𑀸𑀭𑁂𑀲𑀼 𑀦𑀦𑁆𑀤𑀺𑀢𑀸. 𑀅𑀪𑀺𑀦𑀺𑀯𑁂𑀲𑀦𑁆𑀢𑀺 𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁.

𑀅𑀦𑀺𑀘𑁆𑀘𑀤𑀼𑀓𑁆𑀔𑀸𑀤𑀺𑀯𑀲𑁂𑀦 𑀲𑀩𑁆𑀩𑀥𑀫𑁆𑀫𑀢𑀻𑀭𑀡𑀁 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸. 𑀲𑀸𑀭𑀸𑀤𑀸𑀦𑀸𑀪𑀺𑀦𑀺𑀯𑁂𑀲𑀦𑁆𑀢𑀺 𑀅𑀲𑀸𑀭𑁂 𑀲𑀸𑀭𑀕𑁆𑀕𑀳𑀡𑀯𑀺𑀧𑀮𑁆𑀮𑀸𑀲𑀁. 𑀇𑀲𑁆𑀲𑀭𑀓𑀼𑀢𑁆𑀢𑀸𑀤𑀺𑀯𑀲𑁂𑀦 𑀮𑁄𑀓𑁄 𑀲𑀫𑀼𑀧𑁆𑀧𑀦𑁆𑀦𑁄𑀢𑀺 𑀅𑀪𑀺𑀦𑀺𑀯𑁂𑀲𑁄 𑀲𑀫𑁆𑀫𑁄𑀳𑀸𑀪𑀺𑀦𑀺𑀯𑁂𑀲𑁄 ¶ . 𑀓𑁂𑀘𑀺 𑀧𑀦 ‘‘𑀅𑀳𑁄𑀲𑀺𑀁 𑀦𑀼 𑀔𑁄 𑀅𑀳𑀫𑀢𑀻𑀢𑀫𑀤𑁆𑀥𑀸𑀦𑀦𑁆𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀲𑀁𑀲𑀬𑀸𑀧𑀢𑁆𑀢𑀺 𑀲𑀫𑁆𑀫𑁄𑀳𑀸𑀪𑀺𑀦𑀺𑀯𑁂𑀲𑁄’’𑀢𑀺 𑀯𑀤𑀦𑁆𑀢𑀺. 𑀲𑀗𑁆𑀔𑀸𑀭𑁂𑀲𑀼 𑀮𑁂𑀡𑀢𑀸𑀡𑀪𑀸𑀯𑀕𑁆𑀕𑀳𑀡𑀁 𑀆𑀮𑀬𑀸𑀪𑀺𑀦𑀺𑀯𑁂𑀲𑁄. ‘‘𑀆𑀮𑀬𑀭𑀢𑀸 𑀆𑀮𑀬𑀲𑀫𑁆𑀫𑀼𑀤𑀺𑀢𑀸’’𑀢𑀺 (𑀤𑀻. 𑀦𑀺. 𑁨.𑁬𑁪; 𑀫. 𑀦𑀺. 𑁧.𑁨𑁮𑁧; 𑁨.𑁩𑁩𑁭; 𑀲𑀁. 𑀦𑀺. 𑁧.𑁧𑁭𑁨; 𑀫𑀳𑀸𑀯. 𑁭) 𑀯𑀘𑀦𑀢𑁄 𑀆𑀮𑀬𑁄 𑀢𑀡𑁆𑀳𑀸, 𑀲𑀸𑀬𑁂𑀯 𑀘𑀓𑁆𑀔𑀸𑀤𑀻𑀲𑀼 𑀭𑀽𑀧𑀸𑀤𑀻𑀲𑀼 𑀘 𑀅𑀪𑀺𑀦𑀺𑀯𑁂𑀲𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀆𑀮𑀬𑀸𑀪𑀺𑀦𑀺𑀯𑁂𑀲𑁄𑀢𑀺 𑀓𑁂𑀘𑀺. ‘‘𑀏𑀯𑀁𑀯𑀺𑀥𑀸 𑀲𑀗𑁆𑀔𑀸𑀭𑀸 𑀧𑀝𑀺𑀦𑀺𑀲𑁆𑀲𑀚𑁆𑀚𑀻𑀬𑀦𑁆𑀢𑀻’’𑀢𑀺 𑀧𑀯𑀢𑁆𑀢𑀁 𑀜𑀸𑀡𑀁 𑀧𑀝𑀺𑀲𑀗𑁆𑀔𑀸𑀦𑀼𑀧𑀲𑁆𑀲𑀦𑀸. 𑀯𑀝𑁆𑀝𑀢𑁄 𑀯𑀺𑀕𑀢𑀢𑁆𑀢𑀸 𑀯𑀺𑀯𑀝𑁆𑀝𑀁, 𑀦𑀺𑀩𑁆𑀩𑀸𑀦𑀁. 𑀢𑀢𑁆𑀣 𑀆𑀭𑀫𑁆𑀫𑀡𑀓𑀭𑀡𑀲𑀗𑁆𑀔𑀸𑀢𑁂𑀦 𑀅𑀦𑀼𑀧𑀲𑁆𑀲𑀦𑁂𑀦 𑀧𑀯𑀢𑁆𑀢𑀺𑀬𑀸 𑀯𑀺𑀯𑀝𑁆𑀝𑀸𑀦𑀼𑀧𑀲𑁆𑀲𑀦𑀸, 𑀕𑁄𑀢𑁆𑀭𑀪𑀽. 𑀲𑀁𑀬𑁄𑀕𑀸𑀪𑀺𑀦𑀺𑀯𑁂𑀲𑀦𑁆𑀢𑀺 𑀲𑀁𑀬𑀼𑀚𑁆𑀚𑀦𑀯𑀲𑁂𑀦 𑀲𑀗𑁆𑀔𑀸𑀭𑁂𑀲𑀼 ¶ 𑀅𑀪𑀺𑀦𑀺𑀯𑀺𑀲𑀦𑀁. 𑀤𑀺𑀝𑁆𑀞𑁂𑀓𑀝𑁆𑀞𑁂𑀢𑀺 𑀤𑀺𑀝𑁆𑀞𑀺𑀬𑀸 𑀲𑀳𑀚𑀸𑀢𑁂𑀓𑀝𑁆𑀞𑁂 𑀧𑀳𑀸𑀦𑁂𑀓𑀝𑁆𑀞𑁂 𑀘. 𑀑𑀴𑀸𑀭𑀺𑀓𑁂𑀢𑀺 𑀉𑀧𑀭𑀺𑀫𑀕𑁆𑀕𑀯𑀚𑁆𑀛𑁂 𑀓𑀺𑀮𑁂𑀲𑁂 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀼𑀢𑁆𑀢𑀁, 𑀅𑀜𑁆𑀜𑀣𑀸 𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑀸𑀧𑀺 𑀤𑀼𑀢𑀺𑀬𑀫𑀕𑁆𑀕𑀯𑀚𑁆𑀛𑁂𑀳𑀺 𑀑𑀴𑀸𑀭𑀺𑀓𑀸𑀢𑀺. 𑀅𑀡𑀼𑀲𑀳𑀕𑀢𑁂𑀢𑀺 𑀅𑀡𑀼𑀪𑀽𑀢𑁂. 𑀇𑀤𑀁 𑀳𑁂𑀝𑁆𑀞𑀺𑀫𑀫𑀕𑁆𑀕𑀯𑀚𑁆𑀛𑁂 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀲𑀩𑁆𑀩𑀓𑀺𑀮𑁂𑀲𑁂𑀢𑀺 𑀅𑀯𑀲𑀺𑀝𑁆𑀞𑀲𑀩𑁆𑀩𑀓𑀺𑀮𑁂𑀲𑁂. 𑀦 𑀳𑀺 𑀧𑀞𑀫𑀸𑀤𑀺𑀫𑀕𑁆𑀕𑁂𑀳𑀺𑀧𑀺 𑀧𑀳𑀻𑀦𑀸 𑀓𑀺𑀮𑁂𑀲𑀸 𑀧𑀼𑀦 𑀧𑀳𑀻𑀬𑀦𑁆𑀢𑀻𑀢𑀺.

𑀓𑀓𑁆𑀔𑀴𑀢𑁆𑀢𑀁 𑀓𑀣𑀺𑀦𑀪𑀸𑀯𑁄. 𑀧𑀕𑁆𑀖𑀭𑀡𑀁 𑀤𑁆𑀭𑀯𑀪𑀸𑀯𑁄. 𑀮𑁄𑀓𑀺𑀬𑀯𑀸𑀬𑀼𑀦𑀸 𑀪𑀲𑁆𑀢𑀸𑀬 𑀯𑀺𑀬 𑀬𑁂𑀦 𑀢𑀁𑀢𑀁𑀓𑀮𑀸𑀧𑀲𑁆𑀲 𑀉𑀤𑁆𑀥𑀼𑀫𑀸𑀬𑀦𑀁, 𑀣𑀤𑁆𑀥𑀪𑀸𑀯𑁄 𑀯𑀸, 𑀢𑀁 𑀯𑀺𑀢𑁆𑀣𑀫𑁆𑀪𑀦𑀁. 𑀯𑀺𑀚𑁆𑀚𑀫𑀸𑀦𑁂𑀧𑀺 𑀓𑀮𑀸𑀧𑀦𑁆𑀢𑀭𑀪𑀽𑀢𑀸𑀦𑀁 𑀓𑀮𑀸𑀧𑀦𑁆𑀢𑀭𑀪𑀽𑀢𑁂𑀳𑀺 𑀨𑀼𑀝𑁆𑀞𑀪𑀸𑀯𑁂 𑀢𑀁𑀢𑀁𑀪𑀽𑀢𑀯𑀺𑀯𑀺𑀢𑁆𑀢𑀢𑀸 𑀭𑀽𑀧𑀧𑀭𑀺𑀬𑀦𑁆𑀢𑁄 𑀆𑀓𑀸𑀲𑁄𑀢𑀺 𑀬𑁂𑀲𑀁 𑀬𑁄 𑀧𑀭𑀺𑀘𑁆𑀙𑁂𑀤𑁄, 𑀢𑁂𑀳𑀺 𑀲𑁄 𑀅𑀲𑀫𑁆𑀨𑀼𑀝𑁆𑀞𑁄𑀯, 𑀅𑀜𑁆𑀜𑀣𑀸 𑀪𑀽𑀢𑀸𑀦𑀁 𑀧𑀭𑀺𑀘𑁆𑀙𑁂𑀤𑀪𑀸𑀯𑁄 𑀦 𑀲𑀺𑀬𑀸 𑀩𑁆𑀬𑀸𑀧𑀺𑀢𑀪𑀸𑀯𑀸𑀧𑀢𑁆𑀢𑀺𑀢𑁄. 𑀬𑀲𑁆𑀫𑀺𑀁 𑀓𑀮𑀸𑀧𑁂 𑀪𑀽𑀢𑀸𑀦𑀁 𑀧𑀭𑀺𑀘𑁆𑀙𑁂𑀤𑁄, 𑀢𑁂𑀳𑀺 𑀅𑀲𑀫𑁆𑀨𑀼𑀝𑁆𑀞𑀪𑀸𑀯𑁄 𑀅𑀲𑀫𑁆𑀨𑀼𑀝𑁆𑀞𑀮𑀓𑁆𑀔𑀡𑀁. 𑀢𑁂𑀦𑀸𑀳 𑁋 𑀪𑀕𑀯𑀸 𑀆𑀓𑀸𑀲𑀥𑀸𑀢𑀼𑀦𑀺𑀤𑁆𑀤𑁂𑀲𑁂 (𑀥. 𑀲. 𑁬𑁩𑁭) ‘‘𑀅𑀲𑀫𑁆𑀨𑀼𑀝𑁆𑀞𑁄 𑀘𑀢𑀽𑀳𑀺 𑀫𑀳𑀸𑀪𑀽𑀢𑁂𑀳𑀻’’𑀢𑀺.

𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀦𑁆𑀦𑀺𑀧𑀸𑀢𑁂 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺 𑀭𑀼𑀧𑁆𑀧𑀦𑀁. 𑀘𑁂𑀢𑀦𑀸𑀧𑀥𑀸𑀦𑀢𑁆𑀢𑀸 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀥𑀫𑁆𑀫𑀸𑀦𑀁 𑀘𑁂𑀢𑀦𑀸𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀲𑀗𑁆𑀔𑀸𑀭𑀸𑀦𑀁 𑀅𑀪𑀺𑀲𑀗𑁆𑀔𑀭𑀡𑀮𑀓𑁆𑀔𑀡’’𑀦𑁆𑀢𑀺. 𑀢𑀣𑀸 𑀳𑀺 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑁂 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀯𑀺𑀪𑀗𑁆𑀕𑁂 (𑀯𑀺𑀪. 𑁯𑁨) ‘‘𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀚𑀸 𑀘𑁂𑀢𑀦𑀸’’𑀢𑀺𑀆𑀤𑀺𑀦𑀸 𑀘𑁂𑀢𑀦𑀸𑀯 𑀯𑀺𑀪𑀢𑁆𑀢𑀸. 𑀅𑀪𑀺𑀲𑀗𑁆𑀔𑀭𑀮𑀓𑁆𑀔𑀡𑀸 𑀘 𑀘𑁂𑀢𑀦𑀸. 𑀬𑀣𑀸𑀳 𑁋 ‘‘𑀢𑀢𑁆𑀣 𑀓𑀢𑀫𑁄 𑀧𑀼𑀜𑁆𑀜𑀸𑀪𑀺𑀲𑀗𑁆𑀔𑀸𑀭𑁄, 𑀓𑀼𑀲𑀮𑀸 𑀘𑁂𑀢𑀦𑀸 𑀓𑀸𑀫𑀸𑀯𑀘𑀭𑀸’’𑀢𑀺𑀆𑀤𑀺. 𑀨𑀭𑀡𑀁 𑀲𑀯𑀺𑀧𑁆𑀨𑀸𑀭𑀺𑀓𑀢𑀸. 𑀅𑀲𑁆𑀲𑀤𑁆𑀥𑀺𑀬𑁂𑀢𑀺 𑀅𑀲𑁆𑀲𑀤𑁆𑀥𑀺𑀬𑀳𑁂𑀢𑀼. 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀁. 𑀏𑀲 𑀦𑀬𑁄 𑀓𑁄𑀲𑀚𑁆𑀚𑁂𑀢𑀺𑀆𑀤𑀻𑀲𑀼. 𑀯𑀽𑀧𑀲𑀫𑀮𑀓𑁆𑀔𑀡𑀦𑁆𑀢𑀺 𑀓𑀸𑀬𑀘𑀺𑀢𑁆𑀢𑀧𑀭𑀺𑀴𑀸𑀳𑀽𑀧𑀲𑀫𑀮𑀓𑁆𑀔𑀡𑀁. 𑀮𑀻𑀦𑀼𑀤𑁆𑀥𑀘𑁆𑀘𑀭𑀳𑀺𑀢𑁂 𑀅𑀥𑀺𑀘𑀺𑀢𑁆𑀢𑁂 𑀧𑀯𑀢𑁆𑀢𑀫𑀸𑀦𑁂 𑀧𑀕𑁆𑀕𑀳𑀦𑀺𑀕𑁆𑀕𑀳𑀲𑀫𑁆𑀧𑀳𑀁𑀲𑀦𑁂𑀲𑀼 𑀅𑀩𑁆𑀬𑀸𑀯𑀝𑀢𑀸𑀬 𑀅𑀚𑁆𑀛𑀼𑀧𑁂𑀓𑁆𑀔𑀦𑀁 𑀧𑀝𑀺𑀲𑀗𑁆𑀔𑀸𑀦𑀁 𑀧𑀓𑁆𑀔𑀧𑀸𑀢𑀼𑀧𑀘𑁆𑀙𑁂𑀤𑀢𑁄.

𑀫𑀼𑀲𑀸𑀯𑀸𑀤𑀸𑀤𑀻𑀦𑀁 𑀯𑀺𑀲𑀁𑀯𑀸𑀤𑀦𑀸𑀤𑀺𑀓𑀺𑀘𑁆𑀘𑀢𑀸𑀬 𑀮𑀽𑀔𑀸𑀦𑀁 𑀅𑀧𑀭𑀺𑀕𑁆𑀕𑀸𑀳𑀓𑀸𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑀢𑁄 𑀧𑀭𑀺𑀕𑁆𑀕𑀸𑀳𑀓𑀲𑀪𑀸𑀯𑀸 ¶ 𑀲𑀫𑁆𑀫𑀸𑀯𑀸𑀘𑀸, 𑀲𑀺𑀦𑀺𑀤𑁆𑀥𑀪𑀸𑀯𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀲𑀫𑁆𑀫𑀸𑀯𑀸𑀘𑀸𑀧𑀘𑁆𑀘𑀬𑀲𑀼𑀪𑀸𑀲𑀺𑀢𑀸𑀦𑀁 𑀲𑁄𑀢𑀸𑀭𑀜𑁆𑀘 𑀧𑀼𑀕𑁆𑀕𑀮𑀁 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀲𑀸 𑀧𑀭𑀺𑀕𑁆𑀕𑀳𑀮𑀓𑁆𑀔𑀡𑀸. 𑀓𑀸𑀬𑀺𑀓𑀓𑀺𑀭𑀺𑀬𑀸 𑀓𑀺𑀜𑁆𑀘𑀺 𑀓𑀢𑁆𑀢𑀩𑁆𑀩𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀲𑀬𑀜𑁆𑀘 𑀲𑀫𑀼𑀝𑁆𑀞𑀳𑀦𑀁 𑀖𑀝𑀦𑀁 𑀳𑁄𑀢𑀻𑀢𑀺 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑀗𑁆𑀔𑀸𑀢𑀸 𑀯𑀺𑀭𑀢𑀻𑀧𑀺 ¶ 𑀲𑀫𑀼𑀝𑁆𑀞𑀸𑀦𑀮𑀓𑁆𑀔𑀡𑀸 𑀤𑀝𑁆𑀞𑀩𑁆𑀩𑀸, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀸 𑀉𑀓𑁆𑀔𑀺𑀧𑀦𑀁 𑀲𑀫𑀼𑀝𑁆𑀞𑀸𑀧𑀦𑀁 𑀓𑀸𑀬𑀺𑀓𑀓𑀺𑀭𑀺𑀬𑀸𑀬 𑀪𑀸𑀭𑀼𑀓𑁆𑀔𑀺𑀧𑀦𑀁 𑀯𑀺𑀬. 𑀚𑀻𑀯𑀫𑀸𑀦𑀲𑁆𑀲 𑀲𑀢𑁆𑀢𑀲𑁆𑀲, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀯𑀢𑁆𑀢𑀺𑀬𑀸, 𑀆𑀚𑀻𑀯𑀲𑁆𑀲𑁂𑀯 𑀯𑀸 𑀲𑀼𑀤𑁆𑀥𑀺 𑀯𑁄𑀤𑀸𑀦𑀁. ‘‘𑀲𑀗𑁆𑀔𑀸𑀭𑀸’’𑀢𑀺 𑀇𑀥 𑀘𑁂𑀢𑀦𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀲𑀗𑁆𑀔𑀸𑀭𑀸𑀦𑀁 𑀘𑁂𑀢𑀦𑀸𑀮𑀓𑁆𑀔𑀡’’𑀦𑁆𑀢𑀺. 𑀦𑀫𑀦𑀁 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀪𑀸𑀯𑁄. 𑀆𑀬𑀢𑀦𑀁 𑀧𑀯𑀢𑁆𑀢𑀦𑀁. 𑀆𑀬𑀢𑀦𑀯𑀲𑁂𑀦 𑀳𑀺 𑀆𑀬𑀲𑀗𑁆𑀔𑀸𑀢𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀯𑀢𑁆𑀢𑀺. 𑀢𑀡𑁆𑀳𑀸𑀬 𑀳𑁂𑀢𑀼𑀮𑀓𑁆𑀔𑀡𑀦𑁆𑀢𑀺 𑀯𑀝𑁆𑀝𑀲𑁆𑀲 𑀚𑀦𑀓𑀳𑁂𑀢𑀼𑀪𑀸𑀯𑁄, 𑀫𑀕𑁆𑀕𑀲𑁆𑀲 𑀧𑀦 𑀦𑀺𑀩𑁆𑀩𑀸𑀦𑀲𑀫𑁆𑀧𑀸𑀧𑀓𑀢𑁆𑀢𑀦𑁆𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄.

𑀢𑀣𑀮𑀓𑁆𑀔𑀡𑀁 𑀅𑀯𑀺𑀧𑀭𑀻𑀢𑀲𑀪𑀸𑀯𑁄. 𑀏𑀓𑀭𑀲𑁄 𑀅𑀜𑁆𑀜𑀫𑀜𑁆𑀜𑀦𑀸𑀢𑀺𑀯𑀢𑁆𑀢𑀦𑀁 𑀅𑀦𑀽𑀦𑀸𑀥𑀺𑀓𑀪𑀸𑀯𑁄. 𑀬𑀼𑀕𑀦𑀤𑁆𑀥𑀸 𑀲𑀫𑀣𑀯𑀺𑀧𑀲𑁆𑀲𑀦𑀸𑀯. ‘‘𑀲𑀤𑁆𑀥𑀸𑀧𑀜𑁆𑀜𑀸 𑀧𑀕𑁆𑀕𑀳𑀸𑀯𑀺𑀓𑁆𑀔𑁂𑀧𑀸’’𑀢𑀺𑀧𑀺 𑀯𑀤𑀦𑁆𑀢𑀺. 𑀔𑀬𑁄𑀢𑀺 𑀓𑀺𑀮𑁂𑀲𑀓𑁆𑀔𑀬𑁄 𑀫𑀕𑁆𑀕𑁄. 𑀅𑀦𑀼𑀧𑁆𑀧𑀸𑀤𑀧𑀭𑀺𑀬𑁄𑀲𑀸𑀦𑀢𑀸𑀬 𑀅𑀦𑀼𑀧𑁆𑀧𑀸𑀤𑁄 𑀨𑀮𑀁. 𑀧𑀲𑁆𑀲𑀤𑁆𑀥𑀺 𑀓𑀺𑀮𑁂𑀲𑀯𑀽𑀧𑀲𑀫𑁄. 𑀙𑀦𑁆𑀤𑀲𑁆𑀲𑀸𑀢𑀺 𑀓𑀢𑁆𑀢𑀼𑀓𑀸𑀫𑀢𑀸𑀙𑀦𑁆𑀤𑀲𑁆𑀲. 𑀫𑀽𑀮𑀮𑀓𑁆𑀔𑀡𑀁 𑀧𑀢𑀺𑀝𑁆𑀞𑀸𑀪𑀸𑀯𑁄. 𑀲𑀫𑀼𑀝𑁆𑀞𑀸𑀦𑀮𑀓𑁆𑀔𑀡𑀁 𑀆𑀭𑀫𑁆𑀫𑀡𑀧𑁆𑀧𑀝𑀺𑀧𑀸𑀤𑀓𑀢𑀸𑀬 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀳𑁂𑀢𑀼𑀢𑀸. 𑀲𑀫𑁄𑀥𑀸𑀦𑀁 𑀯𑀺𑀲𑀬𑀸𑀤𑀺𑀲𑀦𑁆𑀦𑀺𑀧𑀸𑀢𑁂𑀦 𑀕𑀳𑁂𑀢𑀩𑁆𑀩𑀸𑀓𑀸𑀭𑁄, 𑀬𑀸 𑀲𑀗𑁆𑀕𑀢𑀻𑀢𑀺 𑀯𑀼𑀘𑁆𑀘𑀢𑀺. 𑀲𑀫𑀁, 𑀲𑀳 𑀑𑀤𑀳𑀦𑁆𑀢𑀺 𑀅𑀦𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀢𑀺 𑀯𑀸 𑀲𑀫𑁄𑀥𑀸𑀦𑀁, 𑀨𑀲𑁆𑀲𑁄. 𑀲𑀫𑁄𑀲𑀭𑀦𑁆𑀢𑀺 𑀲𑀦𑁆𑀦𑀺𑀧𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀫𑁄𑀲𑀭𑀡𑀁. 𑀯𑁂𑀤𑀦𑀸𑀬 𑀯𑀺𑀦𑀸 𑀅𑀧𑁆𑀧𑀯𑀢𑁆𑀢𑀫𑀸𑀦𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀯𑁂𑀤𑀦𑀸𑀦𑀼𑀪𑀯𑀦𑀦𑀺𑀫𑀺𑀢𑁆𑀢𑀁 𑀲𑀫𑁄𑀲𑀝𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀏𑀯𑀁 𑀯𑀼𑀢𑁆𑀢𑀁. 𑀕𑁄𑀧𑀸𑀦𑀲𑀻𑀦𑀁 𑀓𑀽𑀝𑀁 𑀯𑀺𑀬 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀧𑀸𑀫𑁄𑀓𑁆𑀔𑀪𑀸𑀯𑁄 𑀧𑀫𑀼𑀔𑀮𑀓𑁆𑀔𑀡𑀁. 𑀢𑀢𑁄, 𑀢𑁂𑀲𑀁 𑀯𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀉𑀢𑁆𑀢𑀭𑀺 𑀧𑀥𑀸𑀦𑀦𑁆𑀢𑀺 𑀢𑀢𑀼𑀢𑁆𑀢𑀭𑀺. 𑀧𑀜𑁆𑀜𑀼𑀢𑁆𑀢𑀭𑀸 𑀳𑀺 𑀓𑀼𑀲𑀮𑀸 𑀥𑀫𑁆𑀫𑀸. 𑀯𑀺𑀫𑀼𑀢𑁆𑀢𑀺𑀬𑀸𑀢𑀺 𑀨𑀮𑀲𑁆𑀲. 𑀢𑀜𑁆𑀳𑀺 𑀲𑀻𑀮𑀸𑀤𑀺𑀕𑀼𑀡𑀲𑀸𑀭𑀲𑁆𑀲 𑀧𑀭𑀫𑀼𑀓𑁆𑀓𑀁𑀲𑀪𑀸𑀯𑁂𑀦 𑀲𑀸𑀭𑀁. 𑀅𑀬𑀜𑁆𑀘 𑀮𑀓𑁆𑀔𑀡𑀯𑀺𑀪𑀸𑀕𑁄 𑀙𑀥𑀸𑀢𑀼𑀧𑀜𑁆𑀘𑀛𑀸𑀦𑀗𑁆𑀕𑀸𑀤𑀺𑀯𑀲𑁂𑀦 𑀢𑀁𑀢𑀁𑀲𑀼𑀢𑁆𑀢𑀧𑀤𑀸𑀦𑀼𑀲𑀸𑀭𑁂𑀦 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀁 𑀆𑀕𑀢𑀦𑀬𑁂𑀦 𑀘 𑀓𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀳𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑁄𑀧𑀺 𑀓𑁄𑀘𑀺 𑀥𑀫𑁆𑀫𑁄 𑀧𑀭𑀺𑀬𑀸𑀬𑀦𑁆𑀢𑀭𑀧𑁆𑀧𑀓𑀸𑀲𑀦𑀢𑁆𑀣𑀁 𑀧𑀼𑀦 𑀤𑀲𑁆𑀲𑀺𑀢𑁄, 𑀢𑀢𑁄 𑀏𑀯 𑀘 ‘‘𑀙𑀦𑁆𑀤𑀫𑀽𑀮𑀓𑀸 𑀓𑀼𑀲𑀮𑀸 𑀥𑀫𑁆𑀫𑀸 𑀫𑀦𑀲𑀺𑀓𑀸𑀭𑀲𑀫𑀼𑀝𑁆𑀞𑀸𑀦𑀸 𑀨𑀲𑁆𑀲𑀲𑀫𑁄𑀥𑀸𑀦𑀸 𑀯𑁂𑀤𑀦𑀸𑀲𑀫𑁄𑀲𑀭𑀡𑀸’’𑀢𑀺, ‘‘𑀧𑀜𑁆𑀜𑀼𑀢𑁆𑀢𑀭𑀸 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺, ‘‘𑀯𑀺𑀫𑀼𑀢𑁆𑀢𑀺𑀲𑀸𑀭𑀫𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺, ‘‘𑀦𑀺𑀩𑁆𑀩𑀸𑀦𑁄𑀕𑀥𑀜𑁆𑀳𑀺, 𑀆𑀯𑀼𑀲𑁄, 𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦’’𑀦𑁆𑀢𑀺 (𑀲𑀁. 𑀦𑀺. 𑁫.𑁫𑁧𑁨) 𑀘 𑀲𑀼𑀢𑁆𑀢𑀧𑀤𑀸𑀦𑀁 𑀯𑀲𑁂𑀦 ‘‘𑀙𑀦𑁆𑀤𑀲𑁆𑀲 𑀫𑀽𑀮𑀮𑀓𑁆𑀔𑀡’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀢𑀣𑀥𑀫𑁆𑀫𑀸 ¶ 𑀦𑀸𑀫 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀅𑀯𑀺𑀧𑀭𑀻𑀢𑀲𑀪𑀸𑀯𑀢𑁆𑀢𑀸. 𑀢𑀣𑀸𑀦𑀺 𑀢𑀁𑀲𑀪𑀸𑀯𑀢𑁆𑀢𑀸, 𑀅𑀯𑀺𑀢𑀣𑀸𑀦𑀺 𑀅𑀫𑀼𑀲𑀸𑀲𑀪𑀸𑀯𑀢𑁆𑀢𑀸, 𑀅𑀦𑀜𑁆𑀜𑀣𑀸𑀦𑀺 𑀅𑀜𑁆𑀜𑀸𑀓𑀸𑀭𑀭𑀳𑀺𑀢𑀢𑁆𑀢𑀸. 𑀚𑀸𑀢𑀺𑀧𑀘𑁆𑀘𑀬𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄𑀢𑀺 ¶ 𑀚𑀸𑀢𑀺𑀧𑀘𑁆𑀘𑀬𑀸 𑀲𑀫𑁆𑀪𑀽𑀢𑀁 𑀳𑀼𑀢𑁆𑀯𑀸 𑀲𑀳𑀺𑀢𑀲𑁆𑀲 𑀅𑀢𑁆𑀢𑀦𑁄 𑀧𑀘𑁆𑀘𑀬𑀸𑀦𑀼𑀭𑀽𑀧𑀲𑁆𑀲 𑀉𑀤𑁆𑀥𑀁 𑀉𑀤𑁆𑀥𑀁 𑀆𑀕𑀢𑀪𑀸𑀯𑁄, 𑀅𑀦𑀼𑀧𑀯𑀢𑁆𑀢𑀢𑁆𑀣𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀲𑀫𑁆𑀪𑀽𑀢𑀝𑁆𑀞𑁄 𑀘 𑀲𑀫𑀼𑀤𑀸𑀕𑀢𑀝𑁆𑀞𑁄 𑀘 𑀲𑀫𑁆𑀪𑀽𑀢𑀲𑀫𑀼𑀤𑀸𑀕𑀢𑀝𑁆𑀞𑁄, 𑀦 𑀚𑀸𑀢𑀺𑀢𑁄 𑀚𑀭𑀸𑀫𑀭𑀡𑀁 𑀦 𑀳𑁄𑀢𑀺, 𑀦 𑀘 𑀚𑀸𑀢𑀺𑀁 𑀯𑀺𑀦𑀸 𑀅𑀜𑁆𑀜𑀢𑁄 𑀳𑁄𑀢𑀻𑀢𑀺 𑀚𑀸𑀢𑀺𑀧𑀘𑁆𑀘𑀬𑀲𑀫𑁆𑀪𑀽𑀢𑀝𑁆𑀞𑁄, 𑀇𑀢𑁆𑀣𑀜𑁆𑀘 𑀚𑀸𑀢𑀺𑀢𑁄 𑀲𑀫𑀼𑀤𑀸𑀕𑀘𑁆𑀙𑀢𑀻𑀢𑀺 𑀚𑀸𑀢𑀺𑀧𑀘𑁆𑀘𑀬𑀲𑀫𑀼𑀤𑀸𑀕𑀢𑀝𑁆𑀞𑁄. 𑀬𑀸 𑀬𑀸 𑀚𑀸𑀢𑀺 𑀬𑀣𑀸 𑀬𑀣𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀢𑀤𑀦𑀼𑀭𑀽𑀧𑀁 𑀧𑀸𑀢𑀼𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀝𑁆𑀞𑁄𑀢𑀺 𑀏𑀢𑁆𑀣𑀸𑀧𑀺 𑀦 𑀅𑀯𑀺𑀚𑁆𑀚𑀸 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀦 𑀘 𑀅𑀯𑀺𑀚𑁆𑀚𑀁 𑀯𑀺𑀦𑀸 𑀲𑀗𑁆𑀔𑀸𑀭𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀬𑀸 𑀬𑀸 𑀅𑀯𑀺𑀚𑁆𑀚𑀸 𑀬𑁂𑀲𑀁 𑀬𑁂𑀲𑀁 𑀲𑀗𑁆𑀔𑀸𑀭𑀸𑀦𑀁 𑀬𑀣𑀸 𑀬𑀣𑀸 𑀧𑀘𑁆𑀘𑀬𑁄 𑀳𑁄𑀢𑀺, 𑀅𑀬𑀁 𑀅𑀯𑀺𑀚𑁆𑀚𑀸𑀬 𑀲𑀗𑁆𑀔𑀸𑀭𑀸𑀦𑀁 𑀧𑀘𑁆𑀘𑀬𑀝𑁆𑀞𑁄, 𑀧𑀘𑁆𑀘𑀬𑀪𑀸𑀯𑁄𑀢𑀺 𑀅𑀢𑁆𑀣𑁄.

𑀪𑀕𑀯𑀸 𑀢𑀁 𑀚𑀸𑀦𑀸𑀢𑀺 𑀧𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦𑀸𑀢𑀺 𑀪𑀕𑀯𑀢𑀸. 𑀢𑀁 𑀯𑀺𑀪𑀚𑁆𑀚𑀫𑀸𑀦𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀦𑁆𑀢𑀺 𑀭𑀽𑀧𑀸𑀬𑀢𑀦𑀁. 𑀇𑀝𑁆𑀞𑀸𑀦𑀺𑀝𑁆𑀞𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀫𑀚𑁆𑀛𑀢𑁆𑀢𑀁 𑀲𑀗𑁆𑀕𑀡𑁆𑀳𑀸𑀢𑀺, 𑀢𑀣𑀸 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀭𑀺𑀢𑁆𑀢𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀢𑀤𑀼𑀪𑀬𑀸𑀤𑀺𑀪𑁂𑀤𑀁. 𑀮𑀩𑁆𑀪𑀫𑀸𑀦𑀓𑀧𑀤𑀯𑀲𑁂𑀦𑀸𑀢𑀺 ‘‘𑀭𑀽𑀧𑀸𑀬𑀢𑀦𑀁 𑀤𑀺𑀝𑁆𑀞𑀁, 𑀲𑀤𑁆𑀤𑀸𑀬𑀢𑀦𑀁 𑀲𑀼𑀢𑀁, 𑀕𑀦𑁆𑀥𑀸𑀬𑀢𑀦𑀁 𑀭𑀲𑀸𑀬𑀢𑀦𑀁 𑀨𑁄𑀝𑁆𑀞𑀩𑁆𑀩𑀸𑀬𑀢𑀦𑀁 𑀫𑀼𑀢𑀁, 𑀲𑀩𑁆𑀩𑀁 𑀭𑀽𑀧𑀁 𑀫𑀦𑀲𑀸 𑀯𑀺𑀜𑁆𑀜𑀸𑀢’’𑀦𑁆𑀢𑀺 (𑀥. 𑀲. 𑁯𑁬𑁬) 𑀯𑀘𑀦𑀢𑁄 𑀤𑀺𑀝𑁆𑀞𑀧𑀤𑀜𑁆𑀘 𑀯𑀺𑀜𑁆𑀜𑀸𑀢𑀧𑀤𑀜𑁆𑀘 𑀭𑀽𑀧𑀸𑀭𑀫𑁆𑀫𑀡𑁂 𑀮𑀩𑁆𑀪𑀢𑀺. 𑀅𑀦𑁂𑀓𑁂𑀳𑀺 𑀦𑀸𑀫𑁂𑀳𑀻𑀢𑀺 ‘‘𑀭𑀽𑀧𑀸𑀭𑀫𑁆𑀫𑀡𑀁 𑀇𑀝𑁆𑀞𑀁 𑀅𑀦𑀺𑀝𑁆𑀞𑀁 𑀫𑀚𑁆𑀛𑀢𑁆𑀢𑀁 𑀧𑀭𑀺𑀢𑁆𑀢𑀁 𑀅𑀢𑀻𑀢𑀁 𑀅𑀦𑀸𑀕𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀤𑀺𑀝𑁆𑀞𑀁 𑀯𑀺𑀜𑁆𑀜𑀸𑀢𑀁 𑀭𑀽𑀧𑀁 𑀭𑀽𑀧𑀸𑀬𑀢𑀦𑀁 𑀭𑀽𑀧𑀥𑀸𑀢𑀼 𑀯𑀡𑁆𑀡𑀦𑀺𑀪𑀸 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀦𑀻𑀮𑀁 𑀧𑀻𑀢𑀓’’𑀦𑁆𑀢𑀺 𑀏𑀯𑀫𑀸𑀤𑀻𑀳𑀺 𑀅𑀦𑁂𑀓𑁂𑀳𑀺 𑀦𑀸𑀫𑁂𑀳𑀺. 𑀢𑁂𑀭𑀲𑀳𑀺 𑀯𑀸𑀭𑁂𑀳𑀻𑀢𑀺 𑀭𑀽𑀧𑀓𑀡𑁆𑀟𑁂 𑀆𑀕𑀢𑁂 𑀢𑁂𑀭𑀲 𑀦𑀺𑀤𑁆𑀤𑁂𑀲𑀯𑀸𑀭𑁂 𑀲𑀦𑁆𑀥𑀸𑀬𑀸𑀳. 𑀤𑁆𑀯𑁂𑀧𑀜𑁆𑀜𑀸𑀲𑀸𑀬 𑀦𑀬𑁂𑀳𑀻𑀢𑀺 𑀏𑀓𑁂𑀓𑀲𑁆𑀫𑀺𑀁 𑀯𑀸𑀭𑁂 𑀘𑀢𑀼𑀦𑁆𑀦𑀁 𑀘𑀢𑀼𑀦𑁆𑀦𑀁 𑀯𑀯𑀢𑁆𑀣𑀸𑀧𑀦𑀦𑀬𑀸𑀦𑀁 𑀯𑀲𑁂𑀦 𑀤𑁆𑀯𑀺𑀧𑀜𑁆𑀜𑀸𑀲𑀸𑀬 𑀦𑀬𑁂𑀳𑀺. 𑀢𑀣𑀫𑁂𑀯𑀸𑀢𑀺 𑀅𑀯𑀺𑀧𑀭𑀻𑀢𑀤𑀲𑁆𑀲𑀺𑀢𑀸𑀬 𑀅𑀧𑁆𑀧𑀝𑀺𑀯𑀢𑁆𑀢𑀺𑀬𑀤𑁂𑀲𑀦𑀢𑀸𑀬 𑀘 𑀢𑀣𑀫𑁂𑀯 𑀳𑁄𑀢𑀺. 𑀚𑀸𑀦𑀸𑀫𑀺 𑀅𑀩𑁆𑀪𑀜𑁆𑀜𑀸𑀲𑀺𑀦𑁆𑀢𑀺 𑀯𑀢𑁆𑀢𑀫𑀸𑀦𑀸𑀢𑀻𑀢𑀓𑀸𑀮𑁂𑀲𑀼 𑀜𑀸𑀡𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑁂𑀦 𑀅𑀦𑀸𑀕𑀢𑁂𑀧𑀺 𑀜𑀸𑀡𑀧𑁆𑀧𑀯𑀢𑁆𑀢𑀺 𑀯𑀼𑀢𑁆𑀢𑀸𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀺𑀤𑀺𑀢-𑀲𑀤𑁆𑀤𑁄 𑀅𑀦𑀸𑀫𑀝𑁆𑀞𑀓𑀸𑀮𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄 ‘‘𑀤𑀺𑀝𑁆𑀞𑀁 𑀲𑀼𑀢𑀁 𑀫𑀼𑀢’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁧𑁮𑁮; 𑀫. 𑀦𑀺. 𑁧.𑁭-𑁮; 𑀲𑀁. 𑀦𑀺. 𑁩.𑁨𑁦𑁮; 𑀅. 𑀦𑀺. 𑁪.𑁨𑁩) 𑀯𑀺𑀬. 𑀦 𑀉𑀧𑀝𑁆𑀞𑀸𑀲𑀻𑀢𑀺 𑀅𑀢𑁆𑀢𑀢𑁆𑀢𑀦𑀺𑀬𑀯𑀲𑁂𑀦 𑀦 𑀉𑀧𑀕𑀜𑁆𑀙𑀺 ¶ . 𑀬𑀣𑀸 𑀭𑀽𑀧𑀸𑀭𑀫𑁆𑀫𑀡𑀸𑀤𑀬𑁄 𑀥𑀫𑁆𑀫𑀸 𑀬𑀁𑀲𑀪𑀸𑀯𑀸 𑀬𑀁𑀧𑀓𑀸𑀭𑀸 𑀘, 𑀢𑀣𑀸 𑀦𑁂 𑀧𑀲𑁆𑀲𑀢𑀺 𑀚𑀸𑀦𑀸𑀢𑀺 𑀕𑀘𑁆𑀙𑀢𑀻𑀢𑀺 𑀢𑀣𑀸𑀕𑀢𑁄𑀢𑀺 𑀏𑀯𑀁 𑀧𑀤𑀲𑀫𑁆𑀪𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀘𑀺 𑀧𑀦 ‘‘𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀧𑀺𑀲𑁄𑀤𑀭𑀸𑀤𑀺𑀧𑀓𑁆𑀔𑁂𑀧𑁂𑀦 𑀯𑀸 𑀤𑀲𑁆𑀲𑀻𑀲𑀤𑁆𑀤𑀲𑁆𑀲 𑀮𑁄𑀧𑀁, 𑀆𑀕𑀢-𑀲𑀤𑁆𑀤𑀲𑁆𑀲 𑀘𑀸𑀕𑀫𑀁 𑀓𑀢𑁆𑀯𑀸 𑀢𑀣𑀸𑀕𑀢𑁄’’𑀢𑀺 𑀯𑀡𑁆𑀡𑁂𑀦𑁆𑀢𑀺.

𑀬𑀁 𑀭𑀢𑁆𑀢𑀺𑀦𑁆𑀢𑀺 𑀬𑀲𑁆𑀲𑀁 𑀭𑀢𑁆𑀢𑀺𑀬𑀁. 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀘𑁂𑀢𑀁 𑀉𑀧𑀬𑁄𑀕𑀯𑀘𑀦𑀁. 𑀢𑀺𑀡𑁆𑀡𑀁 𑀫𑀸𑀭𑀸𑀦𑀦𑁆𑀢𑀺 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀤𑁂𑀯𑀧𑀼𑀢𑁆𑀢𑀲𑀗𑁆𑀔𑀸𑀢𑀸𑀦𑀁 𑀢𑀺𑀡𑁆𑀡𑀁 𑀫𑀸𑀭𑀸𑀦𑀁. 𑀅𑀦𑀼𑀧𑀯𑀚𑁆𑀚𑀦𑁆𑀢𑀺 𑀦𑀺𑀤𑁆𑀤𑁄𑀲𑀢𑀸𑀬 𑀦 𑀉𑀧𑀯𑀚𑁆𑀚𑀁. 𑀅𑀦𑀽𑀦𑀦𑁆𑀢𑀺 𑀧𑀓𑁆𑀔𑀺𑀧𑀺𑀢𑀩𑁆𑀩𑀸𑀪𑀸𑀯𑁂𑀦 𑀦 𑀊𑀦𑀁. 𑀅𑀦𑀥𑀺𑀓𑀦𑁆𑀢𑀺 𑀅𑀧𑀦𑁂𑀢𑀩𑁆𑀩𑀸𑀪𑀸𑀯𑁂𑀦 𑀦 𑀅𑀥𑀺𑀓𑀁. 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀼𑀡𑁆𑀡𑀦𑁆𑀢𑀺 ¶ 𑀅𑀢𑁆𑀣𑀩𑁆𑀬𑀜𑁆𑀚𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀩𑀸𑀓𑀸𑀭𑁂𑀦 𑀧𑀭𑀺𑀧𑀼𑀡𑁆𑀡𑀁. 𑀦𑁄 𑀅𑀜𑁆𑀜𑀣𑀸𑀢𑀺 ‘‘𑀢𑀣𑁂𑀯𑀸’’𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀩𑁆𑀬𑀢𑀺𑀭𑁂𑀓𑁂𑀦 𑀲𑀫𑁆𑀧𑀸𑀤𑁂𑀢𑀺. 𑀢𑁂𑀦 𑀬𑀤𑀢𑁆𑀣𑀁 𑀪𑀸𑀲𑀺𑀢𑀁, 𑀢𑀤𑀢𑁆𑀣𑀦𑀺𑀧𑁆𑀨𑀸𑀤𑀦𑀢𑁄 𑀬𑀣𑀸 𑀪𑀸𑀲𑀺𑀢𑀁 𑀪𑀕𑀯𑀢𑀸, 𑀢𑀣𑁂𑀯𑀸𑀢𑀺 𑀅𑀯𑀺𑀧𑀭𑀻𑀢𑀤𑁂𑀲𑀦𑀢𑀁 𑀤𑀲𑁆𑀲𑁂𑀢𑀺. 𑀕𑀤𑀢𑁆𑀣𑁄𑀢𑀺 𑀏𑀢𑁂𑀦 𑀢𑀣𑀁 𑀕𑀤𑀢𑀻𑀢𑀺 𑀢𑀣𑀸𑀕𑀢𑁄𑀢𑀺 𑀤-𑀓𑀸𑀭𑀲𑁆𑀲 𑀢-𑀓𑀸𑀭𑀁 𑀓𑀢𑁆𑀯𑀸 𑀦𑀺𑀭𑀼𑀢𑁆𑀢𑀺𑀦𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀕𑀢𑀫𑀲𑁆𑀲𑀸𑀢𑀺 𑀢𑀣𑀸𑀕𑀢𑁄. 𑀕𑀢𑀦𑁆𑀢𑀺 𑀘 𑀓𑀸𑀬𑀲𑁆𑀲 𑀯𑀸𑀘𑀸𑀬 𑀯𑀸 𑀧𑀯𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀣𑀸𑀢𑀺 𑀘 𑀯𑀼𑀢𑁆𑀢𑁂 𑀬𑀁-𑀢𑀁-𑀲𑀤𑁆𑀤𑀸𑀦𑀁 𑀅𑀩𑁆𑀬𑀪𑀺𑀘𑀸𑀭𑀺𑀢𑀲𑀫𑁆𑀩𑀦𑁆𑀥𑀢𑀸𑀬 𑀬𑀣𑀸𑀢𑀺 𑀅𑀬𑀫𑀢𑁆𑀣𑁄 𑀉𑀧𑀝𑁆𑀞𑀺𑀢𑁄𑀬𑁂𑀯 𑀳𑁄𑀢𑀺. 𑀓𑀸𑀬𑀯𑀸𑀘𑀸𑀓𑀺𑀭𑀺𑀬𑀸𑀦𑀜𑁆𑀘 𑀅𑀜𑁆𑀜𑀫𑀜𑁆𑀜𑀸𑀦𑀼𑀮𑁄𑀫𑁂𑀦 𑀯𑀘𑀦𑀺𑀘𑁆𑀙𑀸𑀬𑀁 𑀓𑀸𑀬𑀲𑁆𑀲 𑀯𑀸𑀘𑀸, 𑀯𑀸𑀘𑀸𑀬 𑀘 𑀓𑀸𑀬𑁄 𑀲𑀫𑁆𑀩𑀦𑁆𑀥𑀪𑀸𑀯𑁂𑀦 𑀉𑀧𑀢𑀺𑀝𑁆𑀞𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀪𑀕𑀯𑀢𑁄 𑀳𑀻’’𑀢𑀺𑀆𑀤𑀺. 𑀇𑀫𑀲𑁆𑀫𑀺𑀁 𑀧𑀦 𑀅𑀢𑁆𑀣𑁂 𑀢𑀣𑀸𑀯𑀸𑀤𑀺𑀢𑀸𑀬 𑀢𑀣𑀸𑀕𑀢𑁄𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀲𑁄 𑀧𑀦 𑀧𑀼𑀩𑁆𑀩𑁂 𑀧𑀓𑀸𑀭𑀦𑁆𑀢𑀭𑁂𑀦 𑀤𑀲𑁆𑀲𑀺𑀢𑁄𑀢𑀺 𑀆𑀳 𑁋 ‘‘𑀏𑀯𑀁 𑀢𑀣𑀸𑀓𑀸𑀭𑀺𑀢𑀸𑀬 𑀢𑀣𑀸𑀕𑀢𑁄’’𑀢𑀺.

𑀢𑀺𑀭𑀺𑀬𑀁 𑀅𑀧𑀭𑀺𑀫𑀸𑀡𑀸𑀲𑀼 𑀮𑁄𑀓𑀥𑀸𑀢𑀽𑀲𑀽𑀢𑀺 𑀏𑀢𑁂𑀦 𑀬𑀤𑁂𑀓𑁂 ‘‘𑀢𑀺𑀭𑀺𑀬𑀁 𑀯𑀺𑀬 𑀉𑀧𑀭𑀺 𑀅𑀥𑁄 𑀘 𑀲𑀦𑁆𑀢𑀺 𑀮𑁄𑀓𑀥𑀸𑀢𑀼𑀬𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀧𑀝𑀺𑀲𑁂𑀥𑁂𑀢𑀺. 𑀤𑁂𑀲𑀦𑀸𑀯𑀺𑀮𑀸𑀲𑁄𑀬𑁂𑀯 𑀤𑁂𑀲𑀦𑀸𑀯𑀺𑀮𑀸𑀲𑀫𑀬𑁄 𑀬𑀣𑀸 ‘‘𑀧𑀼𑀜𑁆𑀜𑀫𑀬𑀁 𑀤𑀸𑀦𑀫𑀬’’𑀦𑁆𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁩.𑁩𑁦𑁫; 𑀇𑀢𑀺𑀯𑀼. 𑁬𑁦; 𑀦𑁂𑀢𑁆𑀢𑀺. 𑁩𑁩). 𑀦𑀺𑀧𑀸𑀢𑀸𑀦𑀁 𑀯𑀸𑀘𑀓𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂 𑀢𑀤𑀢𑁆𑀣𑀚𑁄𑀢𑀦𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄 𑀕𑀢-𑀲𑀤𑁆𑀤𑁄𑀬𑁂𑀯 𑀅𑀯𑀕𑀢𑀢𑁆𑀣𑀁 𑀅𑀢𑀻𑀢𑀢𑁆𑀣𑀜𑁆𑀘 𑀯𑀤𑀢𑀻𑀢𑀺 𑀆𑀳 𑁋 ‘‘𑀕𑀢𑁄𑀢𑀺 𑀅𑀯𑀕𑀢𑁄 𑀅𑀢𑀻𑀢𑁄’’𑀢𑀺. 𑀅𑀣 𑀯𑀸 𑀅𑀪𑀺𑀦𑀻𑀳𑀸𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 ¶ 𑀲𑀫𑁆𑀩𑁄𑀥𑀺, 𑀏𑀢𑁆𑀣𑀦𑁆𑀢𑀭𑁂 𑀫𑀳𑀸𑀩𑁄𑀥𑀺𑀬𑀸𑀦𑀧𑀝𑀺𑀧𑀢𑁆𑀢𑀺𑀬𑀸 𑀳𑀸𑀦𑀝𑁆𑀞𑀸𑀦𑀲𑀁𑀓𑀺𑀮𑁂𑀲𑀦𑀺𑀯𑀢𑁆𑀢𑀻𑀦𑀁 𑀅𑀪𑀸𑀯𑀢𑁄 𑀬𑀣𑀸 𑀧𑀡𑀺𑀥𑀸𑀦𑀁, 𑀢𑀣𑀸 𑀕𑀢𑁄 𑀅𑀪𑀺𑀦𑀻𑀳𑀸𑀭𑀸𑀦𑀼𑀭𑀽𑀧𑀁 𑀧𑀝𑀺𑀧𑀦𑁆𑀦𑁄𑀢𑀺 𑀢𑀣𑀸𑀕𑀢𑁄. 𑀅𑀣 𑀯𑀸 𑀫𑀳𑀺𑀤𑁆𑀥𑀺𑀓𑀢𑀸𑀬 𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀉𑀓𑁆𑀓𑀁𑀲𑀸𑀥𑀺𑀕𑀫𑁂𑀦 𑀅𑀦𑀸𑀯𑀭𑀡𑀜𑀸𑀡𑀢𑀸𑀬 𑀘 𑀓𑀢𑁆𑀣𑀘𑀺𑀧𑀺 𑀧𑀝𑀺𑀖𑀸𑀢𑀸𑀪𑀸𑀯𑀢𑁄 𑀬𑀣𑀸 𑀭𑀼𑀘𑀺, 𑀢𑀣𑀸 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑀸𑀦𑀁 𑀕𑀢𑀸𑀦𑀺 𑀕𑀫𑀦𑀸𑀦𑀺 𑀧𑀯𑀢𑁆𑀢𑀺𑀬𑁄 𑀏𑀢𑀲𑁆𑀲𑀸𑀢𑀺 𑀢𑀣𑀸𑀕𑀢𑁄. 𑀬𑀲𑁆𑀫𑀸 𑀘 𑀮𑁄𑀓𑁂 𑀯𑀺𑀥𑀬𑀼𑀢𑁆𑀢𑀕𑀢𑀧𑀓𑀸𑀭𑀲𑀤𑁆𑀤𑀸 𑀲𑀫𑀸𑀦𑀢𑁆𑀣𑀸 𑀤𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀬𑀣𑀸𑀯𑀺𑀥𑀸 𑀯𑀺𑀧𑀲𑁆𑀲𑀺𑀆𑀤𑀬𑁄 𑀪𑀕𑀯𑀦𑁆𑀢𑁄, 𑀅𑀬𑀫𑁆𑀧𑀺 𑀪𑀕𑀯𑀸 𑀢𑀣𑀸𑀯𑀺𑀥𑁄𑀢𑀺 𑀢𑀣𑀸𑀕𑀢𑁄. 𑀬𑀣𑀸 𑀬𑀼𑀢𑁆𑀢𑀸 𑀘 𑀢𑁂 𑀪𑀕𑀯𑀦𑁆𑀢𑁄, 𑀅𑀬𑀫𑁆𑀧𑀺 𑀪𑀕𑀯𑀸 𑀢𑀣𑀸 𑀬𑀼𑀢𑁆𑀢𑁄𑀢𑀺 𑀢𑀣𑀸𑀕𑀢𑁄. 𑀅𑀣 𑀯𑀸 𑀬𑀲𑁆𑀫𑀸 𑀲𑀘𑁆𑀘𑀁 𑀢𑀢𑁆𑀯𑀁 𑀢𑀘𑁆𑀙𑀁 𑀢𑀣𑀦𑁆𑀢𑀺 𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀲𑁆𑀫𑀸 𑀢𑀣𑁂𑀦 𑀜𑀸𑀡𑁂𑀦 𑀆𑀕𑀢𑁄𑀢𑀺 𑀢𑀣𑀸𑀕𑀢𑁄𑀢𑀺 𑀏𑀯𑀫𑁆𑀧𑀺 𑀢𑀣𑀸𑀕𑀢𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

‘‘𑀧𑀳𑀸𑀬 𑀓𑀸𑀫𑀸𑀤𑀺𑀫𑀮𑁂 𑀬𑀣𑀸 𑀕𑀢𑀸,

𑀲𑀫𑀸𑀥𑀺𑀜𑀸𑀡𑁂𑀳𑀺 𑀯𑀺𑀧𑀲𑁆𑀲𑀺𑀆𑀤𑀬𑁄;

𑀫𑀳𑁂𑀲𑀺𑀦𑁄 𑀲𑀓𑁆𑀬𑀫𑀼𑀦𑀻 𑀚𑀼𑀢𑀺𑀦𑁆𑀥𑀭𑁄,

𑀢𑀣𑀸𑀕𑀢𑁄 𑀢𑁂𑀦 𑀢𑀣𑀸𑀕𑀢𑁄 𑀫𑀢𑁄.

‘‘𑀢𑀣𑀜𑁆𑀘 ¶ 𑀥𑀸𑀢𑀸𑀬𑀢𑀦𑀸𑀤𑀺𑀮𑀓𑁆𑀔𑀡𑀁,

𑀲𑀪𑀸𑀯𑀲𑀸𑀫𑀜𑁆𑀜𑀯𑀺𑀪𑀸𑀕𑀪𑁂𑀤𑀢𑁄;

𑀲𑀬𑀫𑁆𑀪𑀼𑀜𑀸𑀡𑁂𑀦 𑀚𑀺𑀦𑁄𑀬𑀫𑀸𑀕𑀢𑁄,

𑀢𑀣𑀸𑀕𑀢𑁄 𑀯𑀼𑀘𑁆𑀘𑀢𑀺 𑀲𑀓𑁆𑀬𑀧𑀼𑀗𑁆𑀕𑀯𑁄.

‘‘𑀢𑀣𑀸𑀦𑀺 𑀲𑀘𑁆𑀘𑀸𑀦𑀺 𑀲𑀫𑀦𑁆𑀢𑀘𑀓𑁆𑀔𑀼𑀦𑀸,

𑀢𑀣𑀸 𑀇𑀤𑀧𑁆𑀧𑀘𑁆𑀘𑀬𑀢𑀸 𑀘 𑀲𑀩𑁆𑀩𑀲𑁄;

𑀅𑀦𑀜𑁆𑀜𑀦𑁂𑀬𑁆𑀬𑁂𑀦 𑀬𑀢𑁄 𑀯𑀺𑀪𑀸𑀯𑀺𑀢𑀸,

𑀬𑀸𑀣𑀸𑀯𑀢𑁄 𑀢𑁂𑀦 𑀚𑀺𑀦𑁄 𑀢𑀣𑀸𑀕𑀢𑁄.

‘‘𑀅𑀦𑁂𑀓𑀪𑁂𑀤𑀸𑀲𑀼𑀧𑀺 𑀮𑁄𑀓𑀥𑀸𑀢𑀼𑀲𑀼,

𑀚𑀺𑀦𑀲𑁆𑀲 𑀭𑀼𑀧𑀸𑀬𑀢𑀦𑀸𑀤𑀺𑀕𑁄𑀘𑀭𑁂;

𑀯𑀺𑀘𑀺𑀢𑁆𑀢𑀪𑁂𑀤𑁂 𑀢𑀣𑀫𑁂𑀯 𑀤𑀲𑁆𑀲𑀦𑀁,

𑀢𑀣𑀸𑀕𑀢𑁄 𑀢𑁂𑀦 𑀲𑀫𑀦𑁆𑀢𑀮𑁄𑀘𑀦𑁄.

‘‘𑀬𑀢𑁄 ¶ 𑀘 𑀥𑀫𑁆𑀫𑀁 𑀢𑀣𑀫𑁂𑀯 𑀪𑀸𑀲𑀢𑀺,

𑀓𑀭𑁄𑀢𑀺 𑀯𑀸𑀘𑀸𑀬𑀦𑀼𑀮𑁄𑀫𑀫𑀢𑁆𑀢𑀦𑁄;

𑀕𑀼𑀡𑁂𑀳𑀺 𑀮𑁄𑀓𑀁 𑀅𑀪𑀺𑀪𑀼𑀬𑁆𑀬𑀺𑀭𑀻𑀬𑀢𑀺,

𑀢𑀣𑀸𑀕𑀢𑁄 𑀢𑁂𑀦𑀧𑀺 𑀮𑁄𑀓𑀦𑀸𑀬𑀓𑁄.

‘‘𑀬𑀣𑀸𑀪𑀺𑀦𑀻𑀳𑀸𑀭𑀫𑀢𑁄 𑀬𑀣𑀸𑀭𑀼𑀘𑀺,

𑀧𑀯𑀢𑁆𑀢𑀯𑀸𑀘𑀸 𑀢𑀦𑀼𑀘𑀺𑀢𑁆𑀢𑀪𑀸𑀯𑀢𑁄;

𑀬𑀣𑀸𑀯𑀺𑀥𑀸 𑀬𑁂𑀦 𑀧𑀼𑀭𑀸 𑀫𑀳𑁂𑀲𑀺𑀦𑁄,

𑀢𑀣𑀸𑀯𑀺𑀥𑁄 𑀢𑁂𑀦 𑀚𑀺𑀦𑁄 𑀢𑀣𑀸𑀕𑀢𑁄’’𑀢𑀺. (𑀤𑀻. 𑀦𑀺. 𑀝𑀻. 𑁧.𑁭) 𑁋

𑀲𑀗𑁆𑀕𑀳𑀕𑀸𑀣𑀸 𑀫𑀼𑀔𑀫𑀢𑁆𑀢𑀫𑁂𑀯, 𑀓𑀲𑁆𑀫𑀸? 𑀅𑀧𑁆𑀧𑀫𑀸𑀤𑀧𑀤𑀁 𑀯𑀺𑀬 𑀲𑀓𑀮𑀓𑀼𑀲𑀮𑀥𑀫𑁆𑀫𑀲𑀫𑁆𑀧𑀝𑀺𑀧𑀢𑁆𑀢𑀺𑀬𑀸 𑀲𑀩𑁆𑀩𑀩𑀼𑀤𑁆𑀥𑀕𑀼𑀡𑀸𑀦𑀁 𑀲𑀗𑁆𑀕𑀸𑀳𑀓𑀢𑁆𑀢𑀸. 𑀢𑁂𑀦𑁂𑀯𑀸𑀳 𑁋 ‘‘𑀲𑀩𑁆𑀩𑀸𑀓𑀸𑀭𑁂𑀦𑀸’’𑀢𑀺𑀆𑀤𑀺. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁧𑁭𑁧. 𑀤𑀼𑀢𑀺𑀬𑁂 𑀉𑀧𑁆𑀧𑀢𑁆𑀢𑀻𑀢𑀺 𑀧𑀞𑀫𑀸𑀬 𑀚𑀸𑀢𑀺𑀬𑀸 𑀦𑀺𑀩𑁆𑀩𑀢𑁆𑀢𑀺𑀁 𑀯𑀢𑁆𑀯𑀸 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀦𑀺𑀩𑁆𑀩𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀦𑀺𑀧𑁆𑀨𑀢𑁆𑀢𑀻’’𑀢𑀺 𑀆𑀳. 𑀢𑀤𑀸 𑀳𑀺𑀲𑁆𑀲 𑀩𑀼𑀤𑁆𑀥𑀪𑀸𑀯𑀦𑀺𑀧𑁆𑀨𑀢𑁆𑀢𑀻𑀢𑀺. ‘‘𑀤𑀼𑀮𑁆𑀮𑀪𑁄’’𑀢𑀺𑀆𑀤𑀺𑀁 ¶ 𑀯𑀢𑁆𑀯𑀸 𑀓𑀸𑀭𑀡𑀲𑁆𑀲 𑀤𑀽𑀭𑀲𑀫𑁆𑀪𑀸𑀭𑀪𑀸𑀯𑀢𑁄 𑀢𑀢𑁆𑀣 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑀯𑀸𑀭’’𑀦𑁆𑀢𑀺𑀆𑀤𑀺𑀫𑀸𑀳. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑀢𑁆𑀣 𑀯𑀸𑀭𑀕𑀡𑀦𑀸 𑀦𑀸𑀫 𑀫𑀸𑀲𑀲𑀁𑀯𑀘𑁆𑀙𑀭𑀓𑀧𑁆𑀧𑀕𑀡𑀦𑀸𑀤𑀺𑀓𑀸, 𑀓𑀧𑁆𑀧𑀸𑀦𑀁 𑀏𑀓𑀁 𑀅𑀲𑀗𑁆𑀔𑁆𑀬𑁂𑀬𑁆𑀬𑀁 𑀤𑁆𑀯𑁂 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀢𑀻𑀡𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺𑀧𑀺 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸𑀧𑀺 𑀩𑀼𑀤𑁆𑀥𑁂𑀦 𑀪𑀯𑀺𑀢𑀼𑀁 𑀦 𑀲𑀓𑁆𑀓𑀸, 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀧𑀦 𑀘𑀢𑁆𑀢𑀸𑀭𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀓𑀧𑁆𑀧𑀲𑀢𑀲𑀳𑀲𑁆𑀲𑀜𑁆𑀘 𑀦𑀺𑀭𑀦𑁆𑀢𑀭𑀁 𑀤𑀲 𑀧𑀸𑀭𑀫𑀺𑀬𑁄 𑀧𑀽𑀭𑁂𑀢𑁆𑀯𑀸 𑀩𑀼𑀤𑁆𑀥𑀪𑀸𑀯𑀁 𑀧𑀢𑁆𑀢𑀼𑀁 𑀲𑀓𑁆𑀓𑀸, 𑀦 𑀇𑀢𑁄 𑀅𑀜𑁆𑀜𑀣𑀸𑀢𑀺 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀤𑀼𑀮𑁆𑀮𑀪𑁄 𑀧𑀸𑀢𑀼𑀪𑀸𑀯𑁄 𑀩𑀼𑀤𑁆𑀥𑀸𑀦𑀦𑁆𑀢𑀺.

𑁧𑁭𑁨. 𑀢𑀢𑀺𑀬𑁂 𑀦𑀺𑀘𑁆𑀘𑀁 𑀦 𑀳𑁄𑀢𑀻𑀢𑀺 𑀅𑀪𑀺𑀡𑁆𑀳𑀧𑁆𑀧𑀯𑀢𑁆𑀢𑀺𑀓𑀁 𑀦 𑀳𑁄𑀢𑀺 𑀓𑀤𑀸𑀘𑀺𑀤𑁂𑀯 𑀲𑀫𑁆𑀪𑀯𑀢𑁄. 𑀬𑁂𑀪𑀼𑀬𑁆𑀬𑁂𑀦 𑀫𑀦𑀼𑀲𑁆𑀲𑀸 𑀅𑀘𑁆𑀙𑀭𑀺𑀬𑀁 𑀤𑀺𑀲𑁆𑀯𑀸 𑀅𑀘𑁆𑀙𑀭𑀁 𑀧𑀳𑀭𑀦𑁆𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 ‘‘𑀅𑀘𑁆𑀙𑀭𑀁 𑀧𑀳𑀭𑀺𑀢𑁆𑀯𑀸 𑀧𑀲𑁆𑀲𑀺𑀢𑀩𑁆𑀩𑁄’’𑀢𑀺. 𑀲𑀫𑀦𑁆𑀦𑀸𑀕𑀢𑀢𑁆𑀢𑀸𑀢𑀺 𑀏𑀢𑁂𑀦 𑀅𑀘𑁆𑀙𑀭𑀺𑀬𑀸 𑀕𑀼𑀡𑀥𑀫𑁆𑀫𑀸 𑀏𑀢𑀲𑁆𑀫𑀺𑀁 𑀲𑀦𑁆𑀢𑀻𑀢𑀺 𑀅𑀘𑁆𑀙𑀭𑀺𑀬𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀧𑀺𑀘 𑀆𑀤𑀺𑀢𑁄 𑀧𑀪𑀼𑀢𑀺 𑀅𑀪𑀺𑀦𑀻𑀳𑀸𑀭𑀸𑀯𑀳𑁄, 𑀢𑀢𑁄 𑀧𑀭𑀫𑁆𑀧𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑁂 𑀕𑀼𑀡𑀥𑀫𑁆𑀫𑁂 𑀆𑀘𑀺𑀡𑁆𑀡𑀯𑀸𑀢𑀺 𑀅𑀘𑁆𑀙𑀭𑀺𑀬𑁄𑀢𑀺 𑀆𑀳 𑁋 ‘‘𑀆𑀘𑀺𑀡𑁆𑀡𑀫𑀦𑀼𑀲𑁆𑀲𑁄𑀢𑀺𑀧𑀺 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑁄’’𑀢𑀺𑀆𑀤𑀺. 𑀫𑀳𑀸𑀩𑁄𑀥𑀺𑀜𑀸𑀡𑀫𑁂𑀯 𑀫𑀡𑁆𑀟𑀪𑀽𑀢𑀁 𑀫𑀳𑀸𑀩𑁄𑀥𑀺𑀫𑀡𑁆𑀟𑁄. 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀳𑀺 𑀫𑀕𑁆𑀕𑀜𑀸𑀡𑀁, 𑀫𑀕𑁆𑀕𑀜𑀸𑀡𑀧𑀤𑀝𑁆𑀞𑀸𑀦𑀜𑁆𑀘 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 ¶ ‘‘𑀫𑀳𑀸𑀩𑁄𑀥𑀻’’𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀺𑀯𑀢𑁆𑀢𑀓𑁂𑀦𑀸𑀢𑀺 𑀩𑁄𑀥𑀺𑀬𑀸 𑀦𑀺𑀬𑀢𑀪𑀸𑀯𑀸𑀧𑀢𑁆𑀢𑀺𑀬𑀸 𑀫𑀳𑀸𑀩𑁄𑀥𑀺𑀲𑀢𑁆𑀢𑀪𑀸𑀯𑀢𑁄 𑀅𑀦𑀺𑀯𑀢𑁆𑀢𑀦𑀲𑀪𑀸𑀯𑁂𑀦. 𑀩𑀼𑀤𑁆𑀥𑀓𑀸𑀭𑀓𑀥𑀫𑁆𑀫𑀸𑀦𑀁 𑀧𑀽𑀭𑀡𑀫𑁆𑀧𑀺 𑀦 𑀅𑀜𑁆𑀜𑀲𑁆𑀲 𑀓𑀲𑁆𑀲𑀘𑀺 𑀆𑀘𑀺𑀡𑁆𑀡𑀦𑁆𑀢𑀺𑀆𑀤𑀺𑀦𑀸 𑀳𑁂𑀢𑀼𑀅𑀯𑀢𑁆𑀣𑀸𑀬 𑀨𑀮𑀸𑀯𑀢𑁆𑀣𑀸𑀬 𑀲𑀢𑁆𑀢𑀸𑀦𑀁 𑀉𑀧𑀓𑀸𑀭𑀸𑀯𑀢𑁆𑀣𑀸𑀬 𑀘𑀸𑀢𑀺 𑀢𑀻𑀲𑀼𑀧𑀺 𑀅𑀯𑀢𑁆𑀣𑀸𑀲𑀼 𑀮𑁄𑀓𑀦𑀸𑀣𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑀸𑀦𑀁 𑀕𑀼𑀡𑀥𑀫𑁆𑀫𑀸𑀦𑀁 𑀆𑀘𑀺𑀡𑁆𑀡𑀢𑀸𑀬 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑁄 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺.

𑁧𑁭𑁩. 𑀘𑀢𑀼𑀢𑁆𑀣𑁂 𑀓𑀸𑀮𑁂 𑀓𑀺𑀭𑀺𑀬𑀸𑀢𑀺 𑀓𑀸𑀮𑀓𑀺𑀭𑀺𑀬𑀸. 𑀓𑀢𑀭𑀲𑁆𑀫𑀺𑀁 𑀓𑀸𑀮𑁂 𑀓𑀻𑀤𑀺𑀲𑀻 𑀓𑀺𑀭𑀺𑀬𑀸. 𑀲𑀸𑀫𑀜𑁆𑀜𑀚𑁄𑀢𑀦𑀸 𑀳𑀺 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀺, 𑀯𑀺𑀲𑁂𑀲𑀢𑁆𑀣𑀺𑀦𑀸 𑀘 𑀯𑀺𑀲𑁂𑀲𑁄 𑀅𑀦𑀼𑀧𑁆𑀧𑀬𑁄𑀚𑀺𑀢𑀩𑁆𑀩𑁄𑀢𑀺 𑀆𑀳 𑁋 ‘‘𑀏𑀓𑀲𑁆𑀫𑀺𑀁 𑀓𑀸𑀮𑁂 𑀧𑀸𑀓𑀝𑀸 𑀓𑀺𑀭𑀺𑀬𑀸’’𑀢𑀺. 𑀓𑀢𑀭𑀲𑁆𑀫𑀺𑀁 𑀧𑀦 𑀏𑀓𑀲𑁆𑀫𑀺𑀁 𑀓𑀸𑀮𑁂, 𑀓𑀣𑀜𑁆𑀘 𑀧𑀸𑀓𑀝𑀸𑀢𑀺? 𑀓𑀧𑁆𑀧𑀸𑀦𑀁 𑀲𑀢𑀲𑀳𑀲𑁆𑀲𑀸𑀥𑀺𑀓𑀸𑀦𑀺 𑀅𑀦𑁂𑀓𑀸𑀦𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀅𑀪𑀺𑀓𑁆𑀓𑀫𑀺𑀢𑁆𑀯𑀸 𑀬𑀣𑀸𑀥𑀺𑀧𑁆𑀧𑁂𑀢𑀫𑀦𑁄𑀭𑀣𑀧𑀸𑀭𑀺𑀧𑀽𑀭𑀺𑀯𑀲𑁂𑀦 𑀲𑀫𑀼𑀧𑀮𑀤𑁆𑀥𑁂 𑀏𑀓𑀲𑁆𑀫𑀺𑀁 𑀓𑀸𑀮𑁂, 𑀲𑀤𑁂𑀯𑀮𑁄𑀓𑁂 𑀅𑀢𑀺𑀯𑀺𑀬 𑀅𑀘𑁆𑀙𑀭𑀺𑀬𑀫𑀦𑀼𑀲𑁆𑀲𑀲𑁆𑀲 𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀘𑁆𑀘𑀦𑁆𑀢𑀧𑀸𑀓𑀝𑀸. 𑀅𑀦𑀼𑀢𑀸𑀧𑀓𑀭𑀸𑀢𑀺 𑀘𑁂𑀢𑁄𑀤𑀼𑀓𑁆𑀔𑀸𑀯𑀳𑀸. 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀲𑀽𑀢𑀺 𑀯𑀼𑀢𑁆𑀢𑀁 𑀢𑀲𑁆𑀲 𑀩𑀼𑀤𑁆𑀥𑀓𑁆𑀔𑁂𑀢𑁆𑀢𑀪𑀸𑀯𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸, 𑀢𑀤𑀜𑁆𑀜𑁂𑀲𑀜𑁆𑀘 𑀅𑀯𑀺𑀲𑀬𑀢𑁆𑀢𑀸.

𑁧𑁭𑁪. 𑀧𑀜𑁆𑀘𑀫𑁂 𑀤𑀼𑀢𑀺𑀬𑀲𑁆𑀲 𑀩𑀼𑀤𑁆𑀥𑀲𑁆𑀲𑀸𑀢𑀺 𑀤𑀼𑀢𑀺𑀬𑀲𑁆𑀲 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀲𑁆𑀲 𑀅𑀪𑀸𑀯𑀸. 𑀲𑀼𑀢𑀩𑀼𑀤𑁆𑀥𑁄 𑀦𑀸𑀫 𑀲𑀼𑀢𑀫𑀬𑁂𑀦 𑀜𑀸𑀡𑁂𑀦 𑀩𑀼𑀚𑁆𑀛𑀺𑀢𑀩𑁆𑀩𑀲𑁆𑀲 𑀩𑀼𑀤𑁆𑀥𑀢𑁆𑀢𑀸. 𑀘𑀢𑀼𑀲𑀘𑁆𑀘𑀩𑀼𑀤𑁆𑀥𑁄 𑀦𑀸𑀫 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀅𑀦𑀯𑀲𑁂𑀲𑀢𑁄 𑀩𑀼𑀤𑁆𑀥𑀢𑁆𑀢𑀸. 𑀧𑀘𑁆𑀘𑁂𑀓𑀩𑀼𑀤𑁆𑀥𑁄 𑀦𑀸𑀫 𑀧𑀘𑁆𑀘𑁂𑀓𑀁 𑀅𑀢𑁆𑀢𑀦𑁄𑀬𑁂𑀯 𑀬𑀣𑀸 𑀘𑀢𑀼𑀲𑀘𑁆𑀘𑀲𑀫𑁆𑀩𑁄𑀥𑁄 𑀳𑁄𑀢𑀺, 𑀏𑀯𑀁 ¶ 𑀩𑀼𑀤𑁆𑀥𑀢𑁆𑀢𑀸. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀏𑀯 𑀳𑀺 𑀬𑀣𑀸 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀘𑀢𑀼𑀲𑀘𑁆𑀘𑀲𑀫𑁆𑀩𑁄𑀥𑁄 𑀳𑁄𑀢𑀺, 𑀏𑀯𑀁 𑀲𑀘𑁆𑀘𑀸𑀦𑀺 𑀅𑀪𑀺𑀲𑀫𑁆𑀩𑀼𑀚𑁆𑀛𑀢𑀺. 𑀘𑀢𑁆𑀢𑀸𑀭𑀺 𑀯𑀸 𑀅𑀝𑁆𑀞 𑀯𑀸 𑀲𑁄𑀴𑀲 𑀯𑀸𑀢𑀺 𑀇𑀤𑀁 𑀓𑀢𑀫𑀳𑀸𑀪𑀺𑀦𑀻𑀳𑀸𑀭𑀸𑀦𑀁 𑀫𑀳𑀸𑀩𑁄𑀥𑀺𑀲𑀢𑁆𑀢𑀸𑀦𑀁 𑀧𑀜𑁆𑀜𑀸𑀥𑀺𑀓𑀲𑀤𑁆𑀥𑀸𑀥𑀺𑀓𑀯𑀻𑀭𑀺𑀬𑀸𑀥𑀺𑀓𑀯𑀺𑀪𑀸𑀕𑀯𑀲𑁂𑀦 𑀯𑀼𑀢𑁆𑀢𑀁. ‘‘𑀧𑀜𑁆𑀜𑀸𑀥𑀺𑀓𑀸𑀦𑀜𑁆𑀳𑀺 𑀲𑀤𑁆𑀥𑀸 𑀫𑀦𑁆𑀤𑀸 𑀳𑁄𑀢𑀺, 𑀧𑀜𑁆𑀜𑀸 𑀢𑀺𑀓𑁆𑀔𑀸. 𑀲𑀤𑁆𑀥𑀸𑀥𑀺𑀓𑀸𑀦𑀁 𑀧𑀜𑁆𑀜𑀸 𑀫𑀚𑁆𑀛𑀺𑀫𑀸 𑀳𑁄𑀢𑀺. 𑀯𑀻𑀭𑀺𑀬𑀸𑀥𑀺𑀓𑀸𑀦𑀁 𑀧𑀜𑁆𑀜𑀸 𑀫𑀦𑁆𑀤𑀸, 𑀧𑀜𑁆𑀜𑀸𑀦𑀼𑀪𑀸𑀯𑁂𑀦 𑀘 𑀲𑀫𑁆𑀫𑀸𑀲𑀫𑁆𑀩𑁄𑀥𑀺 𑀅𑀥𑀺𑀕𑀦𑁆𑀢𑀩𑁆𑀩𑀸’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀅𑀯𑀺𑀲𑁂𑀲𑁂𑀦 𑀧𑀦 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀥𑀫𑁆𑀫𑀸𑀦𑀁 𑀢𑀺𑀓𑁆𑀔𑀫𑀚𑁆𑀛𑀺𑀫𑀫𑀼𑀤𑀼𑀪𑀸𑀯𑁂𑀦 𑀢𑀬𑁄𑀧𑁂𑀢𑁂 𑀪𑁂𑀤𑀸 𑀬𑀼𑀢𑁆𑀢𑀸𑀢𑀺 𑀯𑀤𑀦𑁆𑀢𑀺. 𑀢𑀺𑀯𑀺𑀥𑀸 𑀳𑀺 𑀩𑁄𑀥𑀺𑀲𑀢𑁆𑀢𑀸 𑀅𑀪𑀺𑀦𑀻𑀳𑀸𑀭𑀓𑁆𑀔𑀡𑁂 𑀪𑀯𑀦𑁆𑀢𑀺 𑀉𑀕𑁆𑀖𑀝𑀺𑀢𑀜𑁆𑀜𑀼𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀦𑁂𑀬𑁆𑀬𑀪𑁂𑀤𑁂𑀦. 𑀢𑁂𑀲𑀼 ¶ 𑀉𑀕𑁆𑀖𑀝𑀺𑀢𑀜𑁆𑀜𑀽 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀲𑀫𑁆𑀫𑀼𑀔𑀸 𑀘𑀸𑀢𑀼𑀧𑁆𑀧𑀤𑀺𑀓𑀁 𑀕𑀸𑀣𑀁 𑀲𑀼𑀡𑀦𑁆𑀢𑁄 𑀢𑀢𑀺𑀬𑀧𑀤𑁂 𑀅𑀧𑀭𑀺𑀬𑁄𑀲𑀺𑀢𑁂𑀬𑁂𑀯 𑀙𑀳𑀺 𑀅𑀪𑀺𑀜𑁆𑀜𑀸𑀳𑀺 𑀲𑀳 𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀲𑀫𑀢𑁆𑀣𑀽𑀧𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀤𑀼𑀢𑀺𑀬𑁄 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀏𑀓𑀁 𑀕𑀸𑀣𑀁 𑀲𑀼𑀡𑀦𑁆𑀢𑁄 𑀅𑀧𑀭𑀺𑀬𑁄𑀲𑀺𑀢𑁂𑀬𑁂𑀯 𑀘𑀢𑀼𑀢𑁆𑀣𑀧𑀤𑁂 𑀙𑀳𑀺 𑀅𑀪𑀺𑀜𑁆𑀜𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀲𑀫𑀢𑁆𑀣𑀽𑀧𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀇𑀢𑀭𑁄 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀘𑀸𑀢𑀼𑀧𑁆𑀧𑀤𑀺𑀓𑀕𑀸𑀣𑀁 𑀲𑀼𑀢𑁆𑀯𑀸 𑀧𑀭𑀺𑀬𑁄𑀲𑀺𑀢𑀸𑀬 𑀕𑀸𑀣𑀸𑀬 𑀙𑀳𑀺 𑀅𑀪𑀺𑀜𑁆𑀜𑀸𑀳𑀺 𑀅𑀭𑀳𑀢𑁆𑀢𑀁 𑀧𑀢𑁆𑀢𑀼𑀁 𑀲𑀫𑀢𑁆𑀣𑀽𑀧𑀦𑀺𑀲𑁆𑀲𑀬𑁄 𑀳𑁄𑀢𑀺. 𑀢𑀬𑁄𑀧𑁂𑀢𑁂 𑀯𑀺𑀦𑀸 𑀓𑀸𑀮𑀪𑁂𑀤𑁂𑀦 𑀓𑀢𑀸𑀪𑀺𑀦𑀻𑀳𑀸𑀭𑀸 𑀮𑀤𑁆𑀥𑀩𑁆𑀬𑀸𑀓𑀭𑀡𑀸 𑀧𑀸𑀭𑀫𑀺𑀬𑁄 𑀧𑀽𑀭𑁂𑀦𑁆𑀢𑁄 𑀬𑀣𑀸𑀓𑁆𑀓𑀫𑀁 𑀬𑀣𑀸𑀯𑀼𑀢𑁆𑀢𑀪𑁂𑀤𑁂𑀦 𑀓𑀸𑀮𑁂𑀦 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀧𑀸𑀧𑀼𑀡𑀦𑁆𑀢𑀺, 𑀢𑁂𑀲𑀼 𑀢𑁂𑀲𑀼 𑀧𑀦 𑀓𑀸𑀮𑀪𑁂𑀤𑁂𑀲𑀼 𑀅𑀧𑀭𑀺𑀧𑀼𑀡𑁆𑀡𑁂𑀲𑀼 𑀢𑁂 𑀢𑁂 𑀫𑀳𑀸𑀲𑀢𑁆𑀢𑀸 𑀤𑀺𑀯𑀲𑁂 𑀤𑀺𑀯𑀲𑁂 𑀯𑁂𑀲𑁆𑀲𑀦𑁆𑀢𑀭𑀤𑀸𑀦𑀲𑀤𑀺𑀲𑀁 𑀤𑀸𑀦𑀁 𑀤𑁂𑀦𑁆𑀢𑀸𑀧𑀺 𑀢𑀤𑀦𑀼𑀭𑀽𑀧𑀁 𑀲𑀻𑀮𑀸𑀤𑀺𑀲𑁂𑀲𑀧𑀸𑀭𑀫𑀺𑀥𑀫𑁆𑀫𑁂 𑀆𑀘𑀺𑀦𑀦𑁆𑀢𑀸𑀧𑀺 𑀅𑀦𑁆𑀢𑀭𑀸 𑀩𑀼𑀤𑁆𑀥𑀸 𑀪𑀯𑀺𑀲𑁆𑀲𑀦𑁆𑀢𑀻𑀢𑀺 𑀅𑀓𑀸𑀭𑀡𑀫𑁂𑀢𑀁. 𑀓𑀲𑁆𑀫𑀸? 𑀜𑀸𑀡𑀲𑁆𑀲 𑀅𑀧𑀭𑀺𑀧𑀘𑁆𑀘𑀦𑀢𑁄. 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑀦𑀺𑀧𑁆𑀨𑀸𑀤𑀺𑀢𑀁 𑀯𑀺𑀬 𑀳𑀺 𑀲𑀲𑁆𑀲𑀁 𑀧𑀭𑀺𑀘𑁆𑀙𑀺𑀦𑁆𑀦𑀓𑀸𑀮𑁂 𑀦𑀺𑀧𑁆𑀨𑀸𑀤𑀺𑀢𑀸 𑀲𑀫𑁆𑀫𑀸𑀲𑀫𑁆𑀩𑁄𑀥𑀺 𑀢𑀤𑀦𑁆𑀢𑀭𑀸 𑀲𑀩𑁆𑀩𑀼𑀲𑁆𑀲𑀸𑀳𑁂𑀦 𑀯𑀸𑀬𑀫𑀦𑁆𑀢𑁂𑀦𑀧𑀺 𑀦 𑀲𑀓𑁆𑀓𑀸 𑀧𑀸𑀧𑀼𑀡𑀺𑀢𑀼𑀦𑁆𑀢𑀺 𑀧𑀸𑀭𑀫𑀺𑀧𑀽𑀭𑀻 𑀬𑀣𑀸𑀯𑀼𑀢𑁆𑀢𑀓𑀸𑀮𑀯𑀺𑀲𑁂𑀲𑁂𑀦 𑀲𑀫𑁆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀤𑁆𑀥𑀺𑀦𑁆𑀢𑀺 𑀲𑀫𑀸𑀦𑀓𑀸𑀮𑁂.

𑀅𑀲𑀳𑀸𑀬𑁄𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀯𑀼𑀢𑁆𑀢𑀁. 𑀲𑀳𑀅𑀬𑀦𑀝𑁆𑀞𑁄 𑀳𑀺 𑀲𑀳𑀸𑀬𑀝𑁆𑀞𑁄. 𑀧𑀝𑀺𑀧𑀢𑁆𑀢𑀺𑀯𑀲𑁂𑀦 𑀪𑀕𑀯𑀢𑀸 𑀲𑀳 𑀲𑀫𑀁 𑀅𑀬𑀦𑀁 𑀦𑀸𑀫 𑀓𑀲𑁆𑀲𑀘𑀺𑀧𑀺 𑀦𑀢𑁆𑀣𑁂𑀯. 𑀳𑀢𑁆𑀣𑀸𑀤𑀺𑀅𑀯𑀬𑀯𑀢𑁄 𑀧𑀝𑀺 𑀧𑀝𑀺 𑀫𑀺𑀦𑀺𑀢𑀩𑁆𑀩𑀢𑁄 𑀧𑀝𑀺𑀫𑀸 𑀯𑀼𑀘𑁆𑀘𑀢𑀺 𑀅𑀢𑁆𑀢𑀪𑀸𑀯𑁄. 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀤𑁂𑀯𑁄 𑀯𑀸 𑀫𑀸𑀭𑁄 𑀯𑀸 𑀩𑁆𑀭𑀳𑁆𑀫𑀸 𑀯𑀸 𑀓𑁄𑀘𑀺 𑀦𑀢𑁆𑀣𑀺. 𑀧𑀝𑀺𑀲𑀫𑁄𑀢𑀺 𑀧𑀝𑀺𑀦𑀺𑀥𑀺𑀪𑀸𑀯𑁂𑀦 𑀲𑀫𑁄. 𑀧𑀝𑀺𑀪𑀸𑀕𑀁 𑀤𑀸𑀢𑀼𑀦𑁆𑀢𑀺 ‘‘𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲 𑀥𑀫𑁆𑀫𑀪𑀸𑀕𑀲𑁆𑀲 𑀥𑀫𑁆𑀫𑀓𑁄𑀝𑁆𑀞𑀸𑀲𑀲𑁆𑀲 𑀧𑀝𑀺𑀧𑀓𑁆𑀔𑀪𑀽𑀢𑀁 𑀓𑀢𑁆𑀯𑀸 𑀪𑀸𑀕𑀁 𑀓𑁄𑀝𑁆𑀞𑀸𑀲𑀁 𑀧𑀝𑀺𑀯𑀘𑀦𑀁 𑀤𑀸𑀢𑀼𑀁 𑀲𑀫𑀢𑁆𑀣𑁄 𑀦𑀸𑀫 𑀦𑀢𑁆𑀣𑀺. 𑀦𑀢𑁆𑀣𑀺 𑀏𑀢𑀲𑁆𑀲 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀧𑀝𑀺𑀩𑀺𑀫𑁆𑀩𑀪𑀽𑀢𑁄 𑀧𑀼𑀕𑁆𑀕𑀮𑁄𑀢𑀺 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄. 𑀢𑁂𑀦𑀸𑀳 𑁋 ‘‘𑀅𑀜𑁆𑀜𑁄 𑀓𑁄𑀘𑀻’’𑀢𑀺𑀆𑀤𑀺. 𑀢𑀺𑀲𑀳𑀲𑁆𑀲𑀺𑀫𑀳𑀸𑀲𑀳𑀲𑁆𑀲𑀻𑀦𑀁 𑀯𑀺𑀪𑀸𑀕𑁄 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑁧𑁭𑁫. 𑀙𑀝𑁆𑀞𑀸𑀤𑀻𑀲𑀼 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂. 𑀢𑀦𑁆𑀢𑀺 𑀧𑀜𑁆𑀜𑀸𑀘𑀓𑁆𑀔𑀼. 𑀧𑀸𑀢𑀼𑀪𑀽𑀢𑀫𑁂𑀯 𑀳𑁄𑀢𑀺 𑀢𑀲𑁆𑀲 ¶ 𑀲𑀳𑀲𑁆𑀲 𑀉𑀧𑁆𑀧𑀚𑁆𑀚𑀦𑀢𑁄. 𑀉𑀧𑁆𑀧𑀢𑁆𑀢𑀻𑀢𑀺 𑀉𑀧𑁆𑀧𑀚𑁆𑀚𑀦𑀁. 𑀦𑀺𑀧𑁆𑀨𑀢𑁆𑀢𑀻𑀢𑀺 𑀧𑀭𑀺𑀯𑀼𑀤𑁆𑀥𑀺. 𑀓𑀻𑀯𑀭𑀽𑀧𑀲𑁆𑀲𑀸𑀢𑀺 𑀓𑀻𑀤𑀺𑀲𑀲𑁆𑀲. 𑀲𑀸𑀯𑀓𑀯𑀺𑀲𑀬𑁂𑀯 𑀳𑀢𑁆𑀣𑀕𑀢𑀁 𑀧𑀜𑁆𑀜𑀸𑀘𑀓𑁆𑀔𑀼 𑀦𑀸𑀫 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁𑀬𑁂𑀯𑀸𑀢𑀺 𑀆𑀳 𑁋 ‘‘𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲𑀸’’𑀢𑀺𑀆𑀤𑀺. 𑀲𑀫𑀸𑀥𑀺𑀧𑀜𑁆𑀜𑀸𑀢𑀺 𑀲𑀫𑀸𑀥𑀺𑀲𑀳𑀕𑀢𑀸 𑀧𑀜𑁆𑀜𑀸. ‘‘𑀲𑀫𑀸𑀥𑀺𑀲𑀁𑀯𑀢𑁆𑀢𑀦𑀺𑀓𑀸 ¶ 𑀔𑀺𑀧𑁆𑀧𑀦𑀺𑀲𑀦𑁆𑀢𑀺𑀆𑀤𑀺𑀯𑀺𑀲𑁂𑀲𑀸𑀯𑀳𑀸 𑀧𑀜𑁆𑀜𑀸’’𑀢𑀺 𑀓𑁂𑀘𑀺. 𑀆𑀮𑁄𑀓𑁄𑀢𑀺 𑀧𑀜𑁆𑀜𑀸𑀆𑀮𑁄𑀓𑁄 𑀏𑀯. 𑀢𑀣𑀸 𑀑𑀪𑀸𑀲𑁄. 𑀢𑀻𑀡𑀺𑀧𑀻𑀢𑀺 𑀢𑀻𑀡𑀺𑀧𑀺 𑀲𑀼𑀢𑁆𑀢𑀸𑀦𑀺. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀦𑀻𑀢𑀺 𑀧𑀼𑀩𑁆𑀩𑀪𑀸𑀕𑀧𑀜𑁆𑀜𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀯𑀼𑀢𑁆𑀢𑀁.

𑀉𑀢𑁆𑀢𑀫𑀥𑀫𑁆𑀫𑀸𑀦𑀦𑁆𑀢𑀺 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀢𑀭𑀲𑁆𑀲 𑀅𑀪𑀸𑀯𑁂𑀦 𑀲𑁂𑀝𑁆𑀞𑀥𑀫𑁆𑀫𑀸𑀦𑀁. 𑀤𑀝𑁆𑀞𑀩𑁆𑀩𑀢𑁄 𑀤𑀲𑁆𑀲𑀦𑀁, 𑀪𑀕𑀯𑀢𑁄 𑀭𑀽𑀧𑀓𑀸𑀬𑁄. 𑀢𑀢𑁆𑀣𑀧𑀺 𑀯𑀺𑀲𑁂𑀲𑀢𑁄 𑀭𑀽𑀧𑀸𑀬𑀢𑀦𑀁. 𑀢𑁂𑀦𑀸𑀳 𑁋 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂𑀦 𑀤𑀝𑁆𑀞𑀼𑀁 𑀮𑀪𑀢𑀻’’𑀢𑀺. 𑀦𑀢𑁆𑀣𑀺 𑀇𑀢𑁄 𑀉𑀢𑁆𑀢𑀭𑀦𑁆𑀢𑀺 𑀅𑀦𑀼𑀢𑁆𑀢𑀭𑀁, 𑀢𑀤𑁂𑀯 𑀅𑀦𑀼𑀢𑁆𑀢𑀭𑀺𑀬𑀁, 𑀤𑀲𑁆𑀲𑀦𑀜𑁆𑀘 𑀢𑀁 𑀅𑀦𑀼𑀢𑁆𑀢𑀭𑀺𑀬𑀜𑁆𑀘𑀸𑀢𑀺 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀁. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦 𑀧𑀤𑀯𑀺𑀲𑁂𑀲𑁄 𑁋 𑀲𑀼𑀬𑁆𑀬𑀢𑀻𑀢𑀺 𑀲𑀯𑀦𑀁, 𑀪𑀕𑀯𑀢𑁄 𑀯𑀘𑀦𑀁. 𑀮𑀩𑁆𑀪𑀢𑀻𑀢𑀺 𑀮𑀸𑀪𑁄, 𑀪𑀕𑀯𑀢𑀺 𑀲𑀤𑁆𑀥𑀸. 𑀲𑀺𑀓𑁆𑀔𑀺𑀢𑀩𑁆𑀩𑀢𑁄 𑀲𑀺𑀓𑁆𑀔𑀸. 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀧𑀭𑀺𑀘𑀭𑀡𑀁 𑀧𑀸𑀭𑀺𑀘𑀭𑀺𑀬𑀸, 𑀉𑀧𑀝𑁆𑀞𑀸𑀦𑀁. 𑀅𑀦𑀼𑀲𑁆𑀲𑀭𑀡𑀁 𑀅𑀦𑀼𑀲𑁆𑀲𑀢𑀺, 𑀲𑀢𑁆𑀣𑀼 𑀕𑀼𑀡𑀸𑀦𑀼𑀲𑁆𑀲𑀭𑀡𑀁. 𑀇𑀫𑁂𑀲𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀁 𑀙𑀦𑁆𑀦𑀁 𑀅𑀦𑀼𑀢𑁆𑀢𑀭𑀺𑀬𑀸𑀦𑀁. 𑀧𑀸𑀢𑀼𑀪𑀸𑀯𑁄 𑀳𑁄𑀢𑀻𑀢𑀺 𑀢𑀣𑀸𑀕𑀢𑀲𑁆𑀲 𑀧𑀸𑀢𑀼𑀪𑀸𑀯𑀸 𑀢𑀧𑁆𑀧𑀝𑀺𑀩𑀤𑁆𑀥𑀢𑁆𑀢𑀸 𑀢𑀩𑁆𑀩𑀺𑀲𑀬𑀢𑁆𑀢𑀸 𑀘 𑀧𑀸𑀢𑀼𑀪𑀸𑀯𑁄 𑀳𑁄𑀢𑀺. ‘‘𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬’’𑀦𑁆𑀢𑀺 𑀘 𑀲𑀤𑁂𑀯𑀓𑁂 𑀮𑁄𑀓𑁂 𑀉𑀢𑁆𑀢𑀭𑀺𑀢𑀭𑀲𑁆𑀲 𑀪𑀕𑀯𑀢𑁄 𑀭𑀽𑀧𑀲𑁆𑀲 𑀦 𑀤𑀲𑁆𑀲𑀦𑀫𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀅𑀣 𑀔𑁄 𑀢𑀲𑁆𑀲 𑀭𑀽𑀧𑀤𑀲𑁆𑀲𑀦𑀫𑀼𑀔𑁂𑀦 𑀅𑀯𑁂𑀘𑁆𑀘𑀧𑁆𑀧𑀲𑀸𑀤𑁂𑀦 𑀩𑀼𑀤𑁆𑀥𑀕𑀼𑀡𑁂 𑀑𑀓𑀧𑁆𑀧𑁂𑀢𑁆𑀯𑀸 𑀑𑀕𑀸𑀳𑁂𑀢𑁆𑀯𑀸 𑀤𑀲𑁆𑀲𑀦𑀁 𑀤𑀝𑁆𑀞𑀩𑁆𑀩𑀁. 𑀢𑁂𑀦𑀸𑀳 𑁋 ‘‘𑀆𑀬𑀲𑁆𑀫𑀸 𑀳𑀻’’𑀢𑀺𑀆𑀤𑀺. 𑀇𑀤𑀫𑁆𑀧𑀺 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀦𑁆𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀢𑁄 𑀦𑀺𑀩𑁆𑀩𑀺𑀲𑁂𑀲𑀢𑁆𑀢𑀸 𑀯𑀼𑀢𑁆𑀢𑀁. 𑀤𑀲𑀩𑀮𑀁 𑀤𑀲𑁆𑀲𑀦𑀸𑀬 𑀮𑀪𑀺𑀢𑁆𑀯𑀸𑀢𑀺 𑀆𑀦𑀦𑁆𑀤𑀢𑁆𑀣𑁂𑀭𑁄 𑀯𑀺𑀬 𑀧𑀲𑀸𑀤𑀪𑀢𑁆𑀢𑀺𑀫𑁂𑀢𑁆𑀢𑀸𑀧𑀼𑀩𑁆𑀩𑀓𑀁 𑀤𑀲𑀩𑀮𑀁 𑀤𑀲𑁆𑀲𑀦𑀸𑀬 𑀮𑀪𑀺𑀢𑁆𑀯𑀸. 𑀤𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸𑀢𑀺 𑀤𑀲𑁆𑀲𑀦𑀫𑀼𑀔𑁂𑀦 𑀧𑀯𑀢𑁆𑀢𑀁 𑀯𑀺𑀧𑀲𑁆𑀲𑀦𑀸𑀘𑀸𑀭𑀁 𑀯𑀟𑁆𑀠𑁂𑀢𑁆𑀯𑀸. 𑀤𑀲𑁆𑀲𑀦𑀫𑀼𑀔𑁂𑀦 𑀬𑀸𑀯 𑀅𑀦𑀼𑀮𑁄𑀫𑀜𑀸𑀡𑀁 𑀯𑀺𑀧𑀲𑁆𑀲𑀦𑀸𑀘𑀸𑀭𑀁 𑀯𑀟𑁆𑀠𑁂𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀅𑀝𑁆𑀞𑀫𑀓𑀫𑀳𑀸𑀪𑀽𑀫𑀺𑀁 𑀑𑀓𑁆𑀓𑀫𑀦𑁆𑀢𑁄 𑀤𑀲𑁆𑀲𑀦𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀁 𑀧𑀸𑀧𑁂𑀢𑀺 𑀦𑀸𑀫. 𑀇𑀥 𑀧𑀭𑀢𑁄 𑀧𑀯𑀢𑁆𑀢𑀁 𑀤𑀲𑁆𑀲𑀦𑀁 𑀤𑀲𑁆𑀲𑀦𑀫𑁂𑀯 𑀦𑀸𑀫, 𑀫𑀽𑀮𑀤𑀲𑁆𑀲𑀦𑀁 𑀧𑀦 𑀲𑀘𑁆𑀘𑀤𑀲𑁆𑀲𑀦𑀲𑁆𑀲𑀧𑀺 𑀓𑀸𑀭𑀡𑀪𑀸𑀯𑀢𑁄 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀁 𑀦𑀸𑀫. 𑀏𑀲 𑀦𑀬𑁄 𑀲𑁂𑀲𑀸𑀦𑀼𑀢𑁆𑀢𑀭𑀺𑀬𑁂𑀲𑀼𑀧𑀺.

𑀤𑀲𑀩𑀮𑁂 𑀲𑀤𑁆𑀥𑀁 𑀧𑀝𑀺𑀮𑀪𑀢𑀻𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀪𑀕𑀯𑀢𑀺 𑀲𑀤𑁆𑀥𑀁 𑀧𑀝𑀺𑀮𑀪𑀢𑀺. 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑀺𑀢𑁆𑀯𑀸𑀢𑀺 𑀢𑀺𑀲𑁆𑀲𑁄 𑀧𑀼𑀩𑁆𑀩𑀪𑀸𑀕𑀲𑀺𑀓𑁆𑀔𑀸 𑀲𑀺𑀓𑁆𑀔𑀺𑀢𑁆𑀯𑀸. 𑀧𑀭𑀺𑀘𑀭𑀢𑀻𑀢𑀺 𑀉𑀧𑀝𑁆𑀞𑀸𑀦𑀁 𑀓𑀭𑁄𑀢𑀺. ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀯𑀲𑁂𑀦 𑀅𑀦𑀼𑀲𑁆𑀲𑀢𑀺𑀚𑁆𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀁 𑀧𑀤𑀝𑁆𑀞𑀸𑀦𑀁 𑀓𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀦𑁆𑀢𑁄 ‘‘𑀅𑀦𑀼𑀲𑁆𑀲𑀢𑀺𑀁 𑀯𑀟𑁆𑀠𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑁄.

𑀲𑀘𑁆𑀙𑀺𑀓𑀺𑀭𑀺𑀬𑀸 ¶ 𑀳𑁄𑀢𑀻𑀢𑀺 𑀧𑀘𑁆𑀘𑀓𑁆𑀔𑀓𑀭𑀡𑀁 𑀳𑁄𑀢𑀺. 𑀫𑀕𑁆𑀕𑀓𑁆𑀔𑀡𑁂 𑀳𑀺 𑀮𑀩𑁆𑀪𑀫𑀸𑀦𑀸 𑀧𑀝𑀺𑀲𑀫𑁆𑀪𑀺𑀤𑀸 𑀨𑀮𑀓𑁆𑀔𑀡𑁂 ¶ 𑀲𑀘𑁆𑀙𑀺𑀓𑀢𑀸 𑀦𑀸𑀫 𑀳𑁄𑀢𑀺 𑀢𑀢𑁄 𑀧𑀭𑀁 𑀅𑀢𑁆𑀣𑀸𑀤𑀻𑀲𑀼 𑀬𑀣𑀺𑀘𑁆𑀙𑀺𑀢𑀁 𑀯𑀺𑀦𑀺𑀬𑁄𑀕𑀓𑁆𑀔𑀫𑀪𑀸𑀯𑀢𑁄. 𑀘𑀢𑀲𑁆𑀲𑁄𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑁄. 𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀧𑀪𑁂𑀤𑀸. 𑀓𑀲𑁆𑀲 𑀧𑀦 𑀧𑀪𑁂𑀤𑀸𑀢𑀺? ‘‘𑀅𑀢𑁆𑀣𑁂 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀯𑀺𑀪. 𑁭𑁧𑁮-𑁭𑁨𑁧) 𑀜𑀸𑀡𑀲𑁆𑀲𑁂𑀢𑀸 𑀧𑀪𑁂𑀤𑀸. 𑀢𑀲𑁆𑀫𑀸 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀘𑀢𑁆𑀢𑀸𑀭𑁄 𑀜𑀸𑀡𑀧𑁆𑀧𑀪𑁂𑀤𑀸𑀢𑀺 𑀅𑀢𑁆𑀣𑁄. 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀅𑀢𑁆𑀣𑁂 𑀧𑀝𑀺𑀲𑀫𑁆𑀪𑀺𑀤𑀸, 𑀅𑀢𑁆𑀣𑀧𑀪𑁂𑀤𑀲𑁆𑀲 𑀲𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀁 𑀅𑀢𑁆𑀣𑁂 𑀧𑀪𑁂𑀤𑀕𑀢𑀁 𑀜𑀸𑀡𑀦𑁆𑀢𑀺 𑀅𑀢𑁆𑀣𑁄. 𑀢𑀣𑀸 𑀥𑀫𑁆𑀫𑀧𑀪𑁂𑀤𑀲𑁆𑀲 𑀲𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀁 𑀥𑀫𑁆𑀫𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸. 𑀦𑀺𑀭𑀼𑀢𑁆𑀢𑀺𑀧𑀪𑁂𑀤𑀲𑁆𑀲 𑀲𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀁 𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸. 𑀧𑀝𑀺𑀪𑀸𑀦𑀧𑀪𑁂𑀤𑀲𑁆𑀲 𑀲𑀮𑀓𑁆𑀔𑀡𑀯𑀺𑀪𑀸𑀯𑀦𑀯𑀯𑀢𑁆𑀣𑀸𑀦𑀓𑀭𑀡𑀲𑀫𑀢𑁆𑀣𑀁 𑀧𑀝𑀺𑀪𑀸𑀦𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀧𑀝𑀺𑀪𑀸𑀦𑀧𑀝𑀺𑀲𑀫𑁆𑀪𑀺𑀤𑀸.

𑀅𑀢𑁆𑀣𑁂𑀲𑀼 𑀜𑀸𑀡𑀦𑁆𑀢𑀺𑀆𑀤𑀻𑀲𑀼 𑀅𑀢𑁆𑀣𑁄𑀢𑀺 𑀲𑀗𑁆𑀔𑁂𑀧𑀢𑁄 𑀳𑁂𑀢𑀼𑀨𑀮𑀁. 𑀢𑀜𑁆𑀳𑀺 𑀳𑁂𑀢𑀼𑀯𑀲𑁂𑀦 𑀅𑀭𑀡𑀻𑀬𑀁 𑀕𑀦𑁆𑀢𑀩𑁆𑀩𑀁 𑀧𑀢𑁆𑀢𑀩𑁆𑀩𑀁, 𑀢𑀲𑁆𑀫𑀸 ‘‘𑀅𑀢𑁆𑀣𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀪𑁂𑀤𑀢𑁄 𑀧𑀦 𑀬𑀁 𑀓𑀺𑀜𑁆𑀘𑀺 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀁, 𑀦𑀺𑀩𑁆𑀩𑀸𑀦𑀁, 𑀪𑀸𑀲𑀺𑀢𑀢𑁆𑀣𑁄, 𑀯𑀺𑀧𑀸𑀓𑁄, 𑀓𑀺𑀭𑀺𑀬𑀸𑀢𑀺 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 ‘‘𑀅𑀢𑁆𑀣𑁄’’𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀁 𑀅𑀢𑁆𑀣𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸. 𑀥𑀫𑁆𑀫𑁄𑀢𑀺 𑀲𑀗𑁆𑀔𑁂𑀧𑀢𑁄 𑀧𑀘𑁆𑀘𑀬𑁄. 𑀲𑁄 𑀳𑀺 𑀬𑀲𑁆𑀫𑀸 𑀢𑀦𑁆𑀢𑀺 𑀤𑀳𑀢𑀺 𑀯𑀺𑀤𑀳𑀢𑀺 𑀧𑀯𑀢𑁆𑀢𑁂𑀢𑀺 𑀘𑁂𑀯 𑀧𑀸𑀧𑁂𑀢𑀺 𑀘 𑀞𑀧𑁂𑀢𑀺 𑀘, 𑀢𑀲𑁆𑀫𑀸 ‘‘𑀥𑀫𑁆𑀫𑁄’’𑀢𑀺 𑀯𑀼𑀘𑁆𑀘𑀢𑀺. 𑀧𑀪𑁂𑀤𑀢𑁄 𑀧𑀦 𑀬𑁄 𑀓𑁄𑀘𑀺 𑀨𑀮𑀦𑀺𑀩𑁆𑀩𑀢𑁆𑀢𑀓𑁄 𑀳𑁂𑀢𑀼 𑀅𑀭𑀺𑀬𑀫𑀕𑁆𑀕𑁄 𑀪𑀸𑀲𑀺𑀢𑀁 𑀓𑀼𑀲𑀮𑀁 𑀅𑀓𑀼𑀲𑀮𑀦𑁆𑀢𑀺 𑀧𑀜𑁆𑀘𑀯𑀺𑀥𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀢𑀁 𑀥𑀫𑁆𑀫𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸.

𑀅𑀢𑁆𑀣𑀥𑀫𑁆𑀫𑀦𑀺𑀭𑀼𑀢𑁆𑀢𑀸𑀪𑀺𑀮𑀸𑀧𑁂 𑀜𑀸𑀡𑀦𑁆𑀢𑀺 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀘 𑀥𑀫𑁆𑀫𑁂 𑀘 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀅𑀪𑀺𑀮𑀸𑀧𑁂 𑀧𑀪𑁂𑀤𑀕𑀢𑀁 𑀜𑀸𑀡𑀁. 𑀏𑀯𑀫𑀬𑀁 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀲𑀤𑁆𑀤𑀸𑀭𑀫𑁆𑀫𑀡𑀸 𑀦𑀸𑀫 𑀚𑀸𑀢𑀸, 𑀦 𑀧𑀜𑁆𑀜𑀢𑁆𑀢𑀺𑀆𑀭𑀫𑁆𑀫𑀡𑀸. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑀤𑁆𑀤𑀁 𑀲𑀼𑀢𑁆𑀯𑀸 ‘‘𑀅𑀬𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀺, 𑀅𑀬𑀁 𑀦 𑀲𑀪𑀸𑀯𑀦𑀺𑀭𑀼𑀢𑁆𑀢𑀻’’𑀢𑀺 𑀧𑀚𑀸𑀦𑀸𑀢𑀺. 𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑁄 𑀳𑀺 ‘‘𑀨𑀲𑁆𑀲𑁄’’𑀢𑀺 𑀯𑀼𑀢𑁆𑀢𑁂 ‘‘𑀅𑀬𑀁 𑀲𑀪𑀸𑀯𑀦𑀺𑀭𑀼𑀢𑁆𑀢𑀻’’𑀢𑀺 𑀚𑀸𑀦𑀸𑀢𑀺, ‘‘𑀨𑀲𑁆𑀲𑀸’’𑀢𑀺 𑀯𑀸 ‘‘𑀨𑀲𑁆𑀲’’𑀦𑁆𑀢𑀺 𑀯𑀸 𑀯𑀼𑀢𑁆𑀢𑁂 ‘‘𑀅𑀬𑀁 𑀦 𑀲𑀪𑀸𑀯𑀦𑀺𑀭𑀼𑀢𑁆𑀢𑀻’’𑀢𑀺 𑀚𑀸𑀦𑀸𑀢𑀺. 𑀯𑁂𑀤𑀦𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀬𑀁 𑀧𑀦𑁂𑀲 ¶ 𑀦𑀸𑀫𑀸𑀔𑁆𑀬𑀸𑀢𑁄𑀧𑀲𑀕𑁆𑀕𑀸𑀩𑁆𑀬𑀬𑀧𑀤𑀫𑁆𑀧𑀺 𑀚𑀸𑀦𑀸𑀢𑀺𑀬𑁂𑀯 𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀬𑀸 𑀬𑀸𑀣𑀸𑀯𑀢𑁄 𑀚𑀸𑀦𑀦𑀢𑁄. 𑀜𑀸𑀡𑁂𑀲𑀼 𑀜𑀸𑀡𑀦𑁆𑀢𑀺 𑀲𑀩𑁆𑀩𑀢𑁆𑀣𑀓𑀜𑀸𑀡𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀧𑀪𑁂𑀤𑀕𑀢𑀁 𑀜𑀸𑀡𑀁.

𑀇𑀫𑀸 𑀧𑀦 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀲𑁂𑀓𑁆𑀔𑀪𑀽𑀫𑀺𑀬𑀁 𑀅𑀲𑁂𑀓𑁆𑀔𑀪𑀽𑀫𑀺𑀬𑀦𑁆𑀢𑀺 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀧𑀪𑁂𑀤𑀁 𑀕𑀘𑁆𑀙𑀦𑁆𑀢𑀺. 𑀅𑀥𑀺𑀕𑀫𑁄 𑀧𑀭𑀺𑀬𑀢𑁆𑀢𑀺 𑀲𑀯𑀦𑀁 𑀧𑀭𑀺𑀧𑀼𑀘𑁆𑀙𑀸 𑀧𑀼𑀩𑁆𑀩𑀬𑁄𑀕𑁄𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀺 𑀯𑀺𑀲𑀤𑀸 ¶ 𑀳𑁄𑀦𑁆𑀢𑀺. 𑀅𑀥𑀺𑀕𑀫𑁄 𑀦𑀸𑀫 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄. 𑀧𑀭𑀺𑀬𑀢𑁆𑀢𑀺 𑀦𑀸𑀫 𑀩𑀼𑀤𑁆𑀥𑀯𑀘𑀦𑀁. 𑀢𑀜𑁆𑀳𑀺 𑀕𑀡𑁆𑀳𑀦𑁆𑀢𑀲𑁆𑀲 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀲𑀤𑀸 𑀳𑁄𑀦𑁆𑀢𑀺. 𑀲𑀯𑀦𑀁 𑀦𑀸𑀫 𑀥𑀫𑁆𑀫𑀲𑁆𑀲𑀯𑀦𑀁. 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑀁 𑀲𑀼𑀡𑀦𑁆𑀢𑀲𑁆𑀲𑀧𑀺 𑀳𑀺 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀲𑀤𑀸 𑀳𑁄𑀦𑁆𑀢𑀺. 𑀧𑀭𑀺𑀧𑀼𑀘𑁆𑀙𑀸 𑀦𑀸𑀫 𑀅𑀝𑁆𑀞𑀓𑀣𑀸. 𑀉𑀕𑁆𑀕𑀳𑀺𑀢𑀧𑀸𑀴𑀺𑀬𑀸 𑀅𑀢𑁆𑀣𑀁 𑀓𑀣𑁂𑀦𑁆𑀢𑀲𑁆𑀲𑀧𑀺 𑀳𑀺 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀲𑀤𑀸 𑀳𑁄𑀦𑁆𑀢𑀺. 𑀧𑀼𑀩𑁆𑀩𑀬𑁄𑀕𑁄 𑀦𑀸𑀫 𑀧𑀼𑀩𑁆𑀩𑀬𑁄𑀕𑀸𑀯𑀘𑀭𑀢𑀸. 𑀳𑀭𑀡𑀧𑀘𑁆𑀘𑀸𑀳𑀭𑀡𑀦𑀬𑁂𑀦 𑀧𑀝𑀺𑀧𑀸𑀓𑀝𑀓𑀫𑁆𑀫𑀝𑁆𑀞𑀸𑀦𑀲𑁆𑀲𑀧𑀺 𑀧𑀝𑀺𑀲𑀫𑁆𑀪𑀺𑀤𑀸 𑀯𑀺𑀲𑀤𑀸 𑀳𑁄𑀦𑁆𑀢𑀻𑀢𑀺. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀯𑀸𑀢𑀺 𑀏𑀢𑁆𑀣 𑀢𑀺𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀮𑁄𑀓𑀺𑀬𑀸, 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸 𑀲𑀺𑀬𑀸 𑀮𑁄𑀓𑀺𑀬𑀸, 𑀲𑀺𑀬𑀸 𑀮𑁄𑀓𑀼𑀢𑁆𑀢𑀭𑀸𑀢𑀺 𑀏𑀯𑀁 𑀯𑀺𑀪𑀚𑀺𑀢𑁆𑀯𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄.

𑀩𑀼𑀤𑁆𑀥𑀼𑀧𑁆𑀧𑀸𑀤𑁂𑀬𑁂𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀏𑀯 𑀮𑀩𑁆𑀪𑀦𑀢𑁄, 𑀅𑀩𑀼𑀤𑁆𑀥𑀼𑀧𑁆𑀧𑀸𑀤𑁂 𑀅𑀮𑀩𑁆𑀪𑀦𑀢𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑁄 𑀧𑀝𑀺𑀯𑁂𑀥𑁄 𑀅𑀥𑀺𑀧𑁆𑀧𑁂𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀫𑀳𑀢𑁄 𑀘𑀓𑁆𑀔𑀼𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀧𑀜𑁆𑀜𑀸𑀫𑀳𑀢𑁆𑀢𑀸𑀤𑀺𑀓𑀫𑁆𑀧𑀺 𑀅𑀦𑀜𑁆𑀜𑀲𑀸𑀥𑀸𑀭𑀡𑀫𑁂𑀯 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀣𑀸 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀤𑀬𑁄𑀧𑀺 𑀧𑀭𑁂𑀲𑀁 𑀢𑀩𑁆𑀪𑀸𑀯𑀸𑀯𑀳𑀸 𑀤𑀝𑁆𑀞𑀩𑁆𑀩𑀸. 𑀬𑀸 𑀓𑀸𑀘𑀺 𑀥𑀸𑀢𑀼𑀬𑁄 𑀮𑁄𑀓𑀺𑀬𑀸 𑀮𑁄𑀓𑀼𑀢𑁆𑀢𑀭𑀸 𑀯𑀸, 𑀲𑀩𑁆𑀩𑀸 𑀢𑀸 𑀇𑀫𑀸𑀳𑁂𑀯 𑀲𑀗𑁆𑀕𑀳𑀺𑀢𑀸, 𑀏𑀢𑁆𑀣𑁂𑀯 𑀅𑀦𑁆𑀢𑁄𑀕𑀥𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀇𑀫𑀸𑀯 𑀅𑀝𑁆𑀞𑀸𑀭𑀲 𑀥𑀸𑀢𑀼𑀬𑁄 𑀦𑀸𑀦𑀸𑀲𑀪𑀸𑀯𑀢𑁄 𑀦𑀸𑀦𑀸𑀥𑀸𑀢𑀼𑀬𑁄’’𑀢𑀺. 𑀲𑁆𑀯𑀸𑀬𑀫𑀢𑁆𑀣𑁄 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀜𑀸𑀡𑀯𑀺𑀪𑀗𑁆𑀕𑁂𑀦 (𑀯𑀺𑀪. 𑁭𑁫𑁧) 𑀤𑀻𑀧𑁂𑀢𑀩𑁆𑀩𑁄. ‘‘𑀲𑀘𑁆𑀙𑀺𑀓𑀺𑀭𑀺𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀯𑀺𑀚𑁆𑀚𑀸𑀢𑀺 𑀨𑀮𑁂 𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁.

𑁧𑁮𑁭. 𑀬𑀲𑁆𑀫𑀸 𑀘𑀓𑁆𑀓𑀢𑀺 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑀢𑀻𑀢𑀺 𑀘𑀓𑁆𑀓𑀁, 𑀢𑀲𑁆𑀫𑀸 𑀇𑀭𑀺𑀬𑀸𑀧𑀣𑀸𑀧𑀺 𑀅𑀧𑀭𑀸𑀧𑀭𑀁 𑀧𑀭𑀺𑀯𑀢𑁆𑀢𑀦𑀝𑁆𑀞𑁂𑀦 𑀘𑀓𑁆𑀓𑀲𑀤𑀺𑀲𑀢𑁆𑀢𑀸 𑀘𑀓𑁆𑀓𑀦𑁆𑀢𑀺 𑀯𑀼𑀢𑁆𑀢𑀸, 𑀢𑀣𑀸 𑀧𑀢𑀺𑀭𑀽𑀧𑀤𑁂𑀲𑀯𑀸𑀲𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑁄. 𑀢𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑀘𑀓𑁆𑀓𑀁 𑀅𑀪𑀺𑀦𑀻𑀳𑀭𑀢𑀺 𑀦𑀸𑀫𑀸𑀢𑀺 𑀏𑀢𑁆𑀣 𑀢𑀤𑀸 𑀫𑀳𑀸𑀲𑀢𑁆𑀢𑁄 𑀅𑀢𑁆𑀢𑀸𑀦𑀁 𑀅𑀪𑀺𑀦𑀻𑀳𑀸𑀭𑀬𑁄𑀕𑀁 𑀓𑀭𑁄𑀦𑁆𑀢𑁄 ‘‘𑀥𑀫𑁆𑀫𑀘𑀓𑁆𑀓𑀁 𑀅𑀪𑀺𑀦𑀻𑀳𑀭𑀢𑀺 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑁄 𑀢𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑀘𑀓𑁆𑀓𑀸𑀪𑀺𑀦𑀻𑀳𑀸𑀭𑀯𑀺𑀩𑀦𑁆𑀥𑀓𑀭𑀥𑀫𑁆𑀫𑀸𑀦𑀼𑀧𑁆𑀧𑀚𑁆𑀚𑀦𑀢𑁄. 𑀅𑀪𑀺𑀦𑀻𑀳𑀝𑀁 𑀦𑀸𑀫𑀸𑀢𑀺 𑀏𑀢𑁆𑀣𑀧𑀺 𑀅𑀬𑀫𑁂𑀯 ¶ 𑀦𑀬𑁄. 𑀅𑀭𑀳𑀢𑁆𑀢𑀫𑀕𑁆𑀕𑀁 𑀧𑀝𑀺𑀯𑀺𑀚𑁆𑀛𑀦𑁆𑀢𑁄𑀧𑀺 𑀥𑀫𑁆𑀫𑀘𑀓𑁆𑀓𑀁 𑀉𑀧𑁆𑀧𑀸𑀤𑁂𑀢𑀺𑀬𑁂𑀯 𑀦𑀸𑀫 𑀢𑀤𑀢𑁆𑀣𑀁 𑀜𑀸𑀡𑀁 𑀧𑀭𑀺𑀧𑀸𑀘𑁂𑀢𑀻𑀢𑀺 𑀓𑀢𑁆𑀯𑀸. 𑀅𑀭𑀳𑀢𑁆𑀢𑀨𑀮𑀓𑁆𑀔𑀡𑁂 𑀥𑀫𑁆𑀫𑀘𑀓𑁆𑀓𑀁 𑀉𑀧𑁆𑀧𑀸𑀤𑀺𑀢𑀁 𑀦𑀸𑀫 𑀢𑀲𑁆𑀫𑀺𑀁 𑀔𑀡𑁂 𑀥𑀫𑁆𑀫𑀘𑀓𑁆𑀓𑀲𑁆𑀲 𑀉𑀧𑁆𑀧𑀸𑀤𑀦𑀸𑀬 𑀓𑀸𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀓𑀲𑁆𑀲𑀘𑀺 𑀅𑀪𑀸𑀯𑀸. 𑀧𑀝𑀺𑀯𑁂𑀥𑀜𑀸𑀡𑀜𑁆𑀳𑀺 𑀇𑀥 ‘‘𑀥𑀫𑁆𑀫𑀘𑀓𑁆𑀓’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀇𑀤𑀸𑀦𑀺 𑀤𑁂𑀲𑀦𑀸𑀜𑀸𑀡𑀯𑀲𑁂𑀦 𑀥𑀫𑁆𑀫𑀘𑀓𑁆𑀓𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀓𑀤𑀸 𑀧𑀯𑀢𑁆𑀢𑁂𑀢𑀺 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀦 𑀓𑁂𑀯𑀮𑀁 𑀣𑁂𑀭𑀲𑁆𑀲𑁂𑀯, 𑀅𑀣 𑀔𑁄 𑀲𑀩𑁆𑀩𑁂𑀲𑀫𑁆𑀧𑀺 𑀲𑀸𑀲𑀦𑀺𑀓𑀸𑀦𑀁 𑀥𑀫𑁆𑀫𑀓𑀣𑀸 𑀪𑀕𑀯𑀢𑁄 𑀥𑀫𑁆𑀫𑀤𑁂𑀲𑀦𑀸 𑀘𑀢𑀼𑀦𑁆𑀦𑀁 𑀅𑀭𑀺𑀬𑀲𑀘𑁆𑀘𑀸𑀦𑀁 𑀘𑀢𑀼𑀦𑁆𑀦𑀜𑁆𑀘 𑀏𑀓𑀢𑁆𑀢𑀸𑀤𑀺𑀦𑀬𑀸𑀦𑀁 𑀅𑀯𑀺𑀭𑀸𑀥𑀦𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 𑁋 ‘‘𑀬𑁄 𑀳𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀯𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀏𑀓𑀧𑀼𑀕𑁆𑀕𑀮𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀏𑀢𑀤𑀕𑁆𑀕𑀯𑀕𑁆𑀕𑁄

(𑁧𑁪) 𑁧. 𑀧𑀞𑀫𑀏𑀢𑀤𑀕𑁆𑀕𑀯𑀕𑁆𑀕𑁄

𑀏𑀢𑀤𑀕𑁆𑀕𑀧𑀤𑀯𑀡𑁆𑀡𑀦𑀸

𑁧𑁮𑁮. 𑀏𑀢𑀤𑀕𑁆𑀕𑁂𑀲𑀼 ¶ 𑀧𑀞𑀫𑀯𑀕𑁆𑀕𑀲𑁆𑀲 𑀧𑀞𑀫𑁂 𑀆𑀤𑀺𑀫𑁆𑀳𑀺 𑀤𑀺𑀲𑁆𑀲𑀢𑀻𑀢𑀺 𑀏𑀢𑁆𑀣 𑀅𑀕𑁆𑀕𑀲𑀤𑁆𑀤𑁄𑀢𑀺 𑀆𑀦𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀁. 𑀅𑀚𑁆𑀚𑀢𑀕𑁆𑀕𑁂𑀢𑀺 𑀅𑀚𑁆𑀚𑀤𑀺𑀯𑀲𑀁 𑀆𑀤𑀺𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀅𑀗𑁆𑀕𑀼𑀮𑀕𑁆𑀕𑁂𑀦𑀸𑀢𑀺 𑀅𑀗𑁆𑀕𑀼𑀮𑀺𑀓𑁄𑀝𑀺𑀬𑀸. 𑀅𑀫𑁆𑀩𑀺𑀮𑀕𑁆𑀕𑀦𑁆𑀢𑀺 𑀅𑀫𑁆𑀩𑀺𑀮𑀓𑁄𑀝𑁆𑀞𑀸𑀲𑁄. 𑀓𑁄𑀝𑀺𑀪𑀽𑀢𑀸𑀢𑀺 𑀧𑀭𑀫𑀓𑁄𑀝𑀺𑀪𑀽𑀢𑀸 𑀢𑀲𑁆𑀫𑀺𑀁 𑀞𑀸𑀦𑁂 𑀢𑀸𑀤𑀺𑀲𑀸𑀦𑀁 𑀅𑀜𑁆𑀜𑁂𑀲𑀁 𑀅𑀪𑀸𑀯𑀢𑁄. 𑀢𑀢𑁄 𑀏𑀯 𑀲𑁂𑀝𑁆𑀞𑀪𑀽𑀢𑀸𑀢𑀺𑀧𑀺 𑀅𑀕𑁆𑀕𑀸. 𑀏𑀢𑀤𑀕𑁆𑀕𑀲𑀦𑁆𑀦𑀺𑀓𑁆𑀔𑁂𑀧𑁄𑀢𑀺 𑀏𑀢𑀤𑀕𑁆𑀕𑁂 𑀞𑀧𑀦𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀆𑀤𑀻𑀳𑀺 𑀘𑀢𑀽𑀳𑀺𑀧𑀺 𑀓𑀸𑀭𑀡𑁂𑀳𑀺. 𑀫𑀳𑀸𑀧𑀜𑁆𑀜𑀢𑀸𑀬 𑀣𑁂𑀭𑁂𑀦 𑀏𑀢𑀤𑀕𑁆𑀕𑀝𑁆𑀞𑀸𑀦𑀲𑁆𑀲 𑀮𑀤𑁆𑀥𑀪𑀸𑀯𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 𑁋 ‘‘𑀓𑀣’’𑀦𑁆𑀢𑀺𑀆𑀤𑀺𑀫𑀸𑀳. 𑀤𑁆𑀯𑁂 𑀧𑀤𑀦𑁆𑀢𑀭𑀸𑀦𑀻𑀢𑀺 𑀓𑀡𑁆𑀟𑀫𑁆𑀩𑀫𑀽𑀮𑁂 𑀬𑀼𑀕𑀦𑁆𑀥𑀭𑀧𑀩𑁆𑀩𑀢𑁂𑀢𑀺 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀤𑁆𑀯𑁂 𑀧𑀤𑀸𑀦𑀺 𑀤𑀲𑁆𑀲𑁂𑀢𑁆𑀯𑀸. 𑀫𑀼𑀡𑁆𑀟𑀧𑀻𑀞𑀓𑀦𑁆𑀢𑀺 𑀬𑀁 𑀲𑀢𑁆𑀢𑀗𑁆𑀕𑀁 𑀧𑀜𑁆𑀘𑀗𑁆𑀕𑀁 𑀯𑀸 𑀦 𑀳𑁄𑀢𑀺, 𑀓𑁂𑀯𑀮𑀁 𑀫𑀼𑀡𑁆𑀟𑀓𑀧𑀻𑀞𑀁, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀅𑀯𑀢𑁆𑀣𑀭𑀺𑀢𑁆𑀯𑀸 𑀦𑀺𑀲𑀻𑀤𑀻𑀢𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀦𑀺𑀲𑀻𑀤𑀺. 𑀢𑁂𑀦𑀸𑀳 𑁋 ‘‘𑀏𑀯𑀁 𑀦𑀺𑀲𑀻𑀤𑀦𑁆𑀢𑁄’’𑀢𑀺𑀆𑀤𑀺. 𑀓𑀸𑀬𑀲𑀓𑁆𑀔𑀺𑀁 𑀓𑀢𑁆𑀯𑀸𑀢𑀺 𑀦𑀸𑀫𑀓𑀸𑀬𑁂𑀦 𑀤𑁂𑀲𑀦𑀸𑀬 𑀲𑀫𑁆𑀧𑀝𑀺𑀘𑁆𑀙𑀦𑀯𑀲𑁂𑀦 𑀲𑀓𑁆𑀔𑀺𑀪𑀽𑀢𑀁 𑀓𑀢𑁆𑀯𑀸. 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸 𑀥𑀫𑁆𑀫𑀸𑀢𑀺 𑀇𑀢𑀺-𑀲𑀤𑁆𑀤𑁄 𑀆𑀤𑁆𑀬𑀢𑁆𑀣𑁄, 𑀢𑁂𑀦 𑀲𑀩𑁆𑀩𑀁 𑀅𑀪𑀺𑀥𑀫𑁆𑀫𑀤𑁂𑀲𑀦𑀁 𑀲𑀗𑁆𑀕𑀡𑁆𑀳𑀸𑀢𑀺.

𑀧𑀸𑀝𑀺𑀳𑀸𑀭𑀺𑀬𑀝𑁆𑀞𑀸𑀦𑁂𑀢𑀺 𑀬𑀫𑀓𑀧𑀸𑀝𑀺𑀳𑀸𑀭𑀺𑀬𑀲𑁆𑀲 𑀓𑀢𑀝𑁆𑀞𑀸𑀦𑁂. 𑀧𑀲𑁆𑀲𑀣𑀸𑀢𑀺 𑀢𑁂𑀲𑀁 𑀩𑀳𑀼𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀲𑁆𑀲𑀸𑀢𑀺 𑀫𑀦𑀼𑀲𑁆𑀲𑀲𑀫𑀽𑀳𑀲𑁆𑀲 𑀏𑀓𑀪𑀸𑀯𑀁. 𑀆𑀓𑀧𑁆𑀧𑀦𑁆𑀢𑀺 ¶ 𑀆𑀓𑀸𑀭𑀁. 𑀫𑀳𑀸𑀚𑀦𑁄𑀢𑀺 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀩𑁆𑀩𑁄 𑀫𑀳𑀸𑀚𑀦𑁄. 𑀬𑀣𑀸 𑀦𑀺𑀭𑀬𑀤𑀲𑁆𑀲𑀦𑀁 𑀲𑀁𑀯𑁂𑀕𑀚𑀦𑀦𑀢𑁆𑀣𑀁, 𑀏𑀯𑀁 𑀤𑁂𑀯𑀮𑁄𑀓𑀤𑀲𑁆𑀲𑀦𑀫𑁆𑀧𑀺 𑀲𑀁𑀯𑁂𑀕𑀚𑀦𑀦𑀢𑁆𑀣𑀫𑁂𑀯 ‘‘𑀅𑀦𑀼𑀧𑀼𑀩𑁆𑀩𑀺𑀓𑀣𑀸𑀬𑀁 𑀲𑀕𑁆𑀕𑀓𑀣𑀸 𑀯𑀺𑀬 𑀏𑀯𑀁 𑀲𑀩𑁆𑀩𑀲𑀫𑁆𑀧𑀢𑁆𑀢𑀺𑀲𑀫𑀼𑀧𑁂𑀢𑁄𑀧𑀺 𑀲𑀕𑁆𑀕𑁄 𑀅𑀦𑀺𑀘𑁆𑀘𑁄 𑀅𑀤𑁆𑀥𑀼𑀯𑁄 𑀘𑀯𑀦𑀥𑀫𑁆𑀫𑁄’’𑀢𑀺. 𑀲𑀚𑁆𑀚𑁂𑀢𑁆𑀯𑀸𑀢𑀺 𑀲𑀫𑀧𑀡𑁆𑀡𑀸𑀲𑀸𑀬 𑀫𑀼𑀘𑁆𑀙𑀦𑀸𑀳𑀺 𑀬𑀣𑀸 𑀓𑀸𑀫𑁂𑀦 𑀦𑀺𑀯𑀸𑀤𑁂𑀢𑀼𑀁 𑀲𑀓𑁆𑀓𑀸, 𑀏𑀯𑀁 𑀲𑀚𑁆𑀚𑁂𑀢𑁆𑀯𑀸.

𑀧𑀼𑀣𑀼𑀚𑁆𑀚𑀦𑀧𑀜𑁆𑀘𑀓𑀁 𑀧𑀜𑁆𑀳𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀧𑀜𑁆𑀳𑀁 𑀆𑀤𑀺𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀢𑀁 𑀔𑀻𑀡𑀸𑀲𑀯𑀧𑀜𑁆𑀳𑀧𑀭𑀺𑀬𑀦𑁆𑀢𑀁 𑀧𑀜𑁆𑀳𑀧𑀜𑁆𑀘𑀓𑀁. 𑀧𑀞𑀫𑀁…𑀧𑁂… 𑀧𑀼𑀘𑁆𑀙𑀻𑀢𑀺 𑀧𑀼𑀣𑀼𑀚𑁆𑀚𑀦𑀯𑀺𑀲𑀬𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀧𑀝𑀺𑀲𑀫𑁆𑀪𑀺𑀤𑀸 𑀬𑀣𑀸𑀪𑀺𑀦𑀻𑀳𑀸𑀭𑀁 ¶ 𑀬𑀣𑀸𑀲𑀓𑀁 𑀯𑀺𑀧𑀲𑁆𑀲𑀦𑀸𑀪𑀺𑀦𑀻𑀳𑀸𑀭𑁂𑀦 𑀧𑀞𑀫𑀪𑀽𑀫𑀺𑀬𑀸𑀤𑀬𑁄 𑀯𑀺𑀬 𑀧𑀯𑀢𑁆𑀢𑀺𑀢𑀯𑀺𑀲𑀬𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀢𑁂 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑁂 𑀞𑀢𑁆𑀯𑀸 𑀓𑀣𑀬𑀺𑀁𑀲𑀽’’𑀢𑀺. 𑀩𑀼𑀤𑁆𑀥𑀯𑀺𑀲𑀬𑁂 𑀧𑀜𑁆𑀳𑀁 𑀧𑀼𑀘𑁆𑀙𑀻𑀢𑀺 𑁋

‘‘𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸𑀲𑁂, 𑀬𑁂 𑀘 𑀲𑁂𑀔𑀸 𑀧𑀼𑀣𑀽 𑀇𑀥;

𑀢𑁂𑀲𑀁 𑀫𑁂 𑀦𑀺𑀧𑀓𑁄 𑀇𑀭𑀺𑀬𑀁, 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀫𑀸𑀭𑀺𑀲𑀸’’𑀢𑀺. (𑀲𑀼. 𑀦𑀺. 𑁧𑁦𑁪𑁪) 𑁋

𑀇𑀤𑀁 𑀧𑀜𑁆𑀳𑀁 𑀧𑀼𑀘𑁆𑀙𑀺. 𑀢𑀢𑁆𑀣 𑀲𑀗𑁆𑀔𑀸𑀢𑀥𑀫𑁆𑀫𑀸𑀢𑀺 𑀲𑀗𑁆𑀔𑀸𑀢𑀸 𑀜𑀸𑀢𑀸 𑀘𑀢𑀼𑀲𑀘𑁆𑀘𑀥𑀫𑁆𑀫𑀸, 𑀬𑁂 𑀘 𑀲𑀗𑁆𑀔𑀸𑀢𑀥𑀫𑁆𑀫𑀸 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀝𑀺𑀯𑀺𑀤𑁆𑀥𑀘𑀢𑀼𑀲𑀘𑁆𑀘𑀥𑀫𑁆𑀫𑀸𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀅𑀲𑁂𑀓𑁆𑀔𑀸 𑀓𑀣𑀺𑀢𑀸. 𑀧𑀼𑀣𑀼-𑀲𑀤𑁆𑀤𑁄 𑀉𑀪𑀬𑀢𑁆𑀣𑀧𑀺 𑀬𑁄𑀚𑁂𑀢𑀩𑁆𑀩𑁄 ‘‘𑀬𑁂 𑀧𑀼𑀣𑀽 𑀲𑀗𑁆𑀔𑀸𑀢𑀥𑀫𑁆𑀫𑀸, 𑀬𑁂 𑀘 𑀧𑀼𑀣𑀽 𑀲𑁂𑀔𑀸’’𑀢𑀺. 𑀢𑁂𑀲𑀦𑁆𑀢𑀺 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑁂𑀓𑁆𑀔𑀸𑀲𑁂𑀓𑁆𑀔𑀧𑀼𑀕𑁆𑀕𑀮𑀸𑀦𑀁 𑀫𑁂 𑀧𑀼𑀝𑁆𑀞𑁄𑀢𑀺 𑀬𑁄𑀚𑁂𑀢𑀩𑁆𑀩𑀁, 𑀫𑀬𑀸 𑀧𑀼𑀝𑁆𑀞𑁄𑀢𑀺 𑀅𑀢𑁆𑀣𑁄. 𑀇𑀭𑀺𑀬𑀦𑁆𑀢𑀺 𑀲𑁂𑀓𑁆𑀔𑀸𑀲𑁂𑀓𑁆𑀔𑀪𑀽𑀫𑀺𑀬𑀸 𑀆𑀕𑀫𑀦𑀧𑁆𑀧𑀝𑀺𑀧𑀤𑀁. 𑀇𑀭𑀺𑀬𑀢𑀺 𑀕𑀘𑁆𑀙𑀢𑀺 𑀲𑁂𑀓𑁆𑀔𑀪𑀽𑀫𑀺𑀁 𑀅𑀲𑁂𑀓𑁆𑀔𑀪𑀽𑀫𑀺𑀜𑁆𑀘 𑀏𑀢𑀸𑀬𑀸𑀢𑀺 𑀇𑀭𑀺𑀬𑀸, 𑀢𑀁 𑀢𑁂𑀲𑀁 𑀇𑀭𑀺𑀬𑀁 𑀆𑀕𑀫𑀦𑀧𑁆𑀧𑀝𑀺𑀧𑀤𑀁 𑀫𑀬𑀸 𑀧𑀼𑀝𑁆𑀞𑁄 𑀧𑀩𑁆𑀭𑀽𑀳𑀺 𑀓𑀣𑁂𑀳𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀪𑀕𑀯𑀸 𑀩𑀼𑀤𑁆𑀥𑀯𑀺𑀲𑀬𑁂 𑀧𑀜𑁆𑀳𑀁 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀇𑀫𑀲𑁆𑀲 𑀦𑀼 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀲𑀁𑀔𑀺𑀢𑁆𑀢𑁂𑀦 𑀪𑀸𑀲𑀺𑀢𑀲𑁆𑀲 𑀓𑀣𑀁 𑀯𑀺𑀢𑁆𑀣𑀸𑀭𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄’’𑀢𑀺 𑀆𑀳. 𑀣𑁂𑀭𑁄 𑀧𑀜𑁆𑀳𑀁 𑀑𑀮𑁄𑀓𑁂𑀢𑁆𑀯𑀸 ‘‘𑀲𑀢𑁆𑀣𑀸 𑀫𑀁 𑀲𑁂𑀓𑁆𑀔𑀸𑀲𑁂𑀓𑁆𑀔𑀸𑀦𑀁 𑀪𑀺𑀓𑁆𑀔𑀽𑀦𑀁 𑀆𑀕𑀫𑀦𑀧𑁆𑀧𑀝𑀺𑀧𑀤𑀁 𑀧𑀼𑀘𑁆𑀙𑀢𑀻’’𑀢𑀺 𑀧𑀜𑁆𑀳𑁂 𑀦𑀺𑀓𑁆𑀓𑀗𑁆𑀔𑁄 𑀳𑀼𑀢𑁆𑀯𑀸 ‘‘𑀆𑀕𑀫𑀦𑀧𑁆𑀧𑀝𑀺𑀧𑀤𑀸 𑀦𑀸𑀫 𑀔𑀦𑁆𑀥𑀸𑀤𑀺𑀯𑀲𑁂𑀦 𑀩𑀳𑀽𑀳𑀺𑀧𑀺 𑀫𑀼𑀔𑁂𑀳𑀺 𑀲𑀓𑁆𑀓𑀸 𑀓𑀣𑁂𑀢𑀼𑀁, 𑀓𑀢𑀭𑀸𑀓𑀸𑀭𑁂𑀦 𑀦𑀼 𑀔𑁄 𑀓𑀣𑁂𑀦𑁆𑀢𑁄 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀁 𑀕𑀡𑁆𑀳𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀸𑀫𑀻’’𑀢𑀺 𑀅𑀚𑁆𑀛𑀸𑀲𑀬𑁂 𑀓𑀗𑁆𑀔𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀥𑀫𑁆𑀫𑀲𑁂𑀦𑀸𑀧𑀢𑀺…𑀧𑁂… 𑀦 𑀲𑀓𑁆𑀓𑁄𑀢𑀻’’𑀢𑀺. 𑀧𑀼𑀘𑁆𑀙𑀺𑀢𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀧𑀝𑀺𑀪𑀸𑀦𑁂 𑀅𑀲𑀢𑀺 𑀤𑀺𑀲𑀸𑀯𑀺𑀮𑁄𑀓𑀦𑀁 𑀲𑀢𑁆𑀢𑀸𑀦𑀁 𑀲𑀪𑀸𑀯𑁄𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀧𑀼𑀭𑀢𑁆𑀣𑀺𑀫…𑀧𑁂... 𑀦𑀸𑀲𑀓𑁆𑀔𑀻’’𑀢𑀺 𑀆𑀳. 𑀢𑀢𑁆𑀣 𑀧𑀜𑁆𑀳𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀦𑁆𑀢𑀺 𑀧𑀜𑁆𑀳𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑀁.

𑀣𑁂𑀭𑀲𑁆𑀲 ¶ 𑀓𑀺𑀮𑀫𑀦𑀪𑀸𑀯𑀁 𑀚𑀸𑀦𑀺𑀢𑁆𑀯𑀸𑀢𑀺 ‘‘𑀲𑀸𑀭𑀺𑀧𑀼𑀢𑁆𑀢𑁄 𑀧𑀜𑁆𑀳𑁂 𑀦𑀺𑀓𑁆𑀓𑀗𑁆𑀔𑁄, 𑀅𑀚𑁆𑀛𑀸𑀲𑀬𑁂 𑀫𑁂 𑀓𑀗𑁆𑀔𑀫𑀸𑀦𑁄 𑀓𑀺𑀮𑀫𑀢𑀻’’𑀢𑀺 𑀣𑁂𑀭𑀲𑁆𑀲 𑀓𑀺𑀮𑀫𑀦𑀪𑀸𑀯𑀁 𑀜𑀢𑁆𑀯𑀸. 𑀘𑀢𑀼𑀫𑀳𑀸𑀪𑀽𑀢𑀺𑀓𑀓𑀸𑀬𑀧𑀭𑀺𑀕𑁆𑀕𑀳𑀦𑁆𑀢𑀺 𑀏𑀢𑁂𑀦 𑀔𑀦𑁆𑀥𑀫𑀼𑀔𑁂𑀦 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑁄 𑀯𑀼𑀢𑁆𑀢𑁄. ‘‘𑀪𑀽𑀢𑀫𑀺𑀤𑀦𑁆𑀢𑀺, 𑀲𑀸𑀭𑀺𑀧𑀼𑀢𑁆𑀢, 𑀲𑀫𑀦𑀼𑀧𑀲𑁆𑀲𑀲𑀻’’𑀢𑀺 𑀳𑀺 𑀯𑀤𑀦𑁆𑀢𑁂𑀦 𑀪𑀕𑀯𑀢𑀸 𑀔𑀦𑁆𑀥𑀯𑀲𑁂𑀦 𑀦𑀸𑀫𑀭𑀽𑀧𑀧𑀭𑀺𑀕𑁆𑀕𑀳𑁄 𑀤𑀲𑁆𑀲𑀺𑀢𑁄. 𑀏𑀯𑀁 𑀓𑀺𑀭𑀲𑁆𑀲 𑀪𑀕𑀯𑀢𑁄 𑀅𑀳𑁄𑀲𑀺 ‘‘𑀲𑀸𑀭𑀺𑀧𑀼𑀢𑁆𑀢𑁄 𑀫𑀬𑀸 𑀦𑀬𑁂 𑀅𑀤𑀺𑀦𑁆𑀦𑁂 𑀓𑀣𑁂𑀢𑀼𑀁 𑀦 𑀲𑀓𑁆𑀔𑀺𑀲𑁆𑀲𑀢𑀺, 𑀤𑀺𑀦𑁆𑀦𑁂 𑀧𑀦 𑀦𑀬𑁂 𑀫𑀫𑀚𑁆𑀛𑀸𑀲𑀬𑀁 𑀕𑀳𑁂𑀢𑁆𑀯𑀸 𑀔𑀦𑁆𑀥𑀯𑀲𑁂𑀦 𑀓𑀣𑁂𑀲𑁆𑀲𑀢𑀻’’𑀢𑀺. 𑀣𑁂𑀭𑀲𑁆𑀲 𑀲𑀳 𑀦𑀬𑀤𑀸𑀦𑁂𑀦 𑀲𑁄 𑀧𑀜𑁆𑀳𑁄 𑀦𑀬𑀲𑀢𑁂𑀦 𑀦𑀬𑀲𑀳𑀲𑁆𑀲𑁂𑀦 𑀉𑀧𑀝𑁆𑀞𑀸𑀲𑀺. 𑀢𑁂𑀦𑀸𑀳 𑁋 ‘‘𑀅𑀜𑁆𑀜𑀸𑀢𑀁 𑀪𑀕𑀯𑀸, 𑀅𑀜𑁆𑀜𑀸𑀢𑀁 𑀲𑀼𑀕𑀢𑀸’’𑀢𑀺.

𑀅𑀭𑀽𑀧𑀸𑀯𑀘𑀭𑁂 𑀧𑀝𑀺𑀲𑀦𑁆𑀥𑀺 𑀦𑀸𑀫 𑀦 𑀳𑁄𑀢𑀻𑀢𑀺 𑀩𑁄𑀥𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀲𑁆𑀲 𑀅𑀦𑁄𑀓𑀸𑀲𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑁋 ‘‘𑀅𑀪𑀩𑁆𑀩𑀝𑁆𑀞𑀸𑀦𑀢𑁆𑀢𑀸’’𑀢𑀺, 𑀮𑀤𑁆𑀥𑀩𑁆𑀬𑀸𑀓𑀭𑀡𑀸𑀦𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀉𑀧𑁆𑀧𑀢𑁆𑀢𑀺𑀬𑀸 𑀅𑀪𑀩𑁆𑀩𑀤𑁂𑀲𑀢𑁆𑀢𑀸𑀢𑀺 𑀅𑀢𑁆𑀣𑁄 ¶ . 𑀭𑀽𑀧𑀸𑀯𑀘𑀭𑁂 𑀦𑀺𑀩𑁆𑀩𑀢𑁆𑀢𑀻𑀢𑀺 𑀓𑀫𑁆𑀫𑀯𑀲𑀺𑀢𑀸𑀲𑀫𑁆𑀪𑀯𑀢𑁄 𑀅𑀭𑀽𑀧𑀸𑀯𑀘𑀭𑁂 𑀅𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀭𑀽𑀧𑀸𑀯𑀘𑀭𑁂 𑀦𑀺𑀩𑁆𑀩𑀢𑁆𑀢𑀺.

𑀧𑀭𑁄𑀲𑀳𑀲𑁆𑀲𑀦𑁆𑀢𑀺𑀆𑀤𑀺𑀦𑀸 𑀧𑀭𑁄𑀲𑀳𑀲𑁆𑀲𑀚𑀸𑀢𑀓𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀧𑀭𑁄𑀲𑀳𑀲𑁆𑀲𑀫𑁆𑀧𑀻𑀢𑀺 𑀅𑀢𑀺𑀭𑁂𑀓𑀲𑀳𑀲𑁆𑀲𑀫𑁆𑀧𑀺. 𑀲𑀫𑀸𑀕𑀢𑀸𑀦𑀦𑁆𑀢𑀺 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀚𑀸𑀦𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀸𑀦𑀁 𑀩𑀸𑀮𑀸𑀦𑀁. 𑀓𑀦𑁆𑀤𑁂𑀬𑁆𑀬𑀼𑀁 𑀢𑁂 𑀯𑀲𑁆𑀲𑀲𑀢𑀁 𑀅𑀧𑀜𑁆𑀜𑀸𑀢𑀺 𑀢𑁂 𑀏𑀯𑀁 𑀲𑀫𑀸𑀕𑀢𑀸 𑀅𑀧𑀜𑁆𑀜𑀸 𑀇𑀫𑁂 𑀩𑀸𑀮𑀢𑁆𑀢𑀸 𑀲𑀲𑀸 𑀯𑀺𑀬 𑀯𑀲𑁆𑀲𑀲𑀢𑀫𑁆𑀧𑀺 𑀯𑀲𑁆𑀲𑀲𑀳𑀲𑁆𑀲𑀫𑁆𑀧𑀺 𑀭𑁄𑀤𑁂𑀬𑁆𑀬𑀼𑀁 𑀧𑀭𑀺𑀤𑁂𑀯𑁂𑀬𑁆𑀬𑀼𑀁. 𑀭𑁄𑀤𑀫𑀸𑀦𑀸𑀧𑀺 𑀧𑀦 𑀅𑀢𑁆𑀣𑀁 𑀯𑀸 𑀓𑀸𑀭𑀡𑀁 𑀯𑀸 𑀦𑁂𑀯 𑀚𑀸𑀦𑁂𑀬𑁆𑀬𑀼𑀦𑁆𑀢𑀺 𑀤𑀻𑀧𑁂𑀢𑀺. 𑀏𑀓𑁄𑀯 𑀲𑁂𑀬𑁆𑀬𑁄 𑀧𑀼𑀭𑀺𑀲𑁄 𑀲𑀧𑀜𑁆𑀜𑁄𑀢𑀺 𑀏𑀯𑀭𑀽𑀧𑀸𑀦𑀁 𑀩𑀸𑀮𑀸𑀦𑀁 𑀧𑀭𑁄𑀲𑀳𑀲𑁆𑀲𑀢𑁄𑀧𑀺 𑀏𑀓𑁄 𑀧𑀡𑁆𑀟𑀺𑀢𑀧𑀼𑀭𑀺𑀲𑁄𑀯 𑀲𑁂𑀬𑁆𑀬𑁄 𑀯𑀭𑀢𑀭𑁄𑀢𑀺 𑀅𑀢𑁆𑀣𑁄. 𑀓𑀻𑀤𑀺𑀲𑁄 𑀲𑀧𑀜𑁆𑀜𑁄𑀢𑀺 𑀆𑀳 𑁋 ‘‘𑀬𑁄 𑀪𑀸𑀲𑀺𑀢𑀲𑁆𑀲 𑀯𑀺𑀚𑀸𑀦𑀸𑀢𑀺 𑀅𑀢𑁆𑀣’’𑀦𑁆𑀢𑀺, 𑀅𑀬𑀁 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑁄 𑀯𑀺𑀬 𑀬𑁄 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀚𑀸𑀦𑀸𑀢𑀺, 𑀲𑁄 𑀢𑀸𑀤𑀺𑀲𑁄 𑀲𑀧𑀜𑁆𑀜𑁄 𑀯𑀭𑀢𑀭𑁄𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑁂 𑀧𑀭𑁄𑀲𑀢𑀚𑀸𑀢𑀓𑁂 𑀛𑀸𑀬𑁂𑀬𑁆𑀬𑀼𑀦𑁆𑀢𑀺 𑀬𑀸𑀣𑀸𑀯𑀢𑁄 𑀅𑀢𑁆𑀣𑀁 𑀚𑀸𑀦𑀺𑀢𑀼𑀁 𑀲𑀫𑀸𑀳𑀺𑀢𑀸 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀬𑁆𑀬𑀼𑀁. 𑀲𑁂𑀲𑀫𑁂𑀢𑁆𑀣 𑀯𑀼𑀢𑁆𑀢𑀦𑀬𑀫𑁂𑀯.

𑀢𑀢𑀺𑀬𑀚𑀸𑀢𑀓𑁂 𑀬𑁂 𑀲𑀜𑁆𑀜𑀺𑀦𑁄𑀢𑀺 𑀞𑀧𑁂𑀢𑁆𑀯𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀮𑀸𑀪𑀺𑀦𑁄 𑀅𑀯𑀲𑁂𑀲𑀘𑀺𑀢𑁆𑀢𑀓𑀲𑀢𑁆𑀢𑁂 𑀤𑀲𑁆𑀲𑁂𑀢𑀺. 𑀢𑁂𑀧𑀺 𑀤𑀼𑀕𑁆𑀕𑀢𑀸𑀢𑀺 𑀢𑀲𑁆𑀲𑀸 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀫𑀸𑀧𑀢𑁆𑀢𑀺𑀬𑀸 𑀅𑀮𑀸𑀪𑀢𑁄 𑀢𑁂𑀧𑀺 𑀤𑀼𑀕𑁆𑀕𑀢𑀸 𑀤𑀼𑀓𑁆𑀔𑀁 𑀉𑀧𑀕𑀢𑀸 𑀲𑀜𑁆𑀜𑀻𑀪𑀯𑁂. ‘‘𑀲𑀜𑁆𑀜𑀸 𑀭𑁄𑀕𑁄 𑀲𑀜𑁆𑀜𑀸 𑀕𑀡𑁆𑀟𑁄 𑀲𑀜𑁆𑀜𑀸 𑀲𑀮𑁆𑀮’’𑀦𑁆𑀢𑀺 ¶ (𑀫. 𑀦𑀺. 𑁩.𑁨𑁪) 𑀳𑀺 𑀢𑁂 𑀲𑀜𑁆𑀜𑀸𑀬 𑀆𑀤𑀻𑀦𑀯𑀤𑀲𑁆𑀲𑀺𑀦𑁄. 𑀬𑁂𑀧𑀺 𑀅𑀲𑀜𑁆𑀜𑀺𑀦𑁄𑀢𑀺 𑀅𑀲𑀜𑁆𑀜𑀻𑀪𑀯𑁂 𑀦𑀺𑀩𑁆𑀩𑀢𑁆𑀢𑁂 𑀅𑀘𑀺𑀢𑁆𑀢𑀓𑀲𑀢𑁆𑀢𑁂 𑀤𑀲𑁆𑀲𑁂𑀢𑀺. 𑀢𑁂𑀧𑀺 𑀇𑀫𑀺𑀲𑁆𑀲𑀸𑀬𑁂𑀯 𑀲𑀫𑀸𑀧𑀢𑁆𑀢𑀺𑀬𑀸 𑀅𑀮𑀸𑀪𑀢𑁄 𑀤𑀼𑀕𑁆𑀕𑀢𑀸𑀬𑁂𑀯. 𑀛𑀸𑀦𑀲𑀼𑀔𑀁 𑀅𑀦𑀗𑁆𑀕𑀡𑀁 𑀦𑀺𑀤𑁆𑀤𑁄𑀲𑀁 𑀬𑀣𑀸𑀯𑀼𑀢𑁆𑀢𑀤𑁄𑀲𑀸𑀪𑀸𑀯𑀢𑁄. 𑀩𑀮𑀯𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀪𑀸𑀯𑁂𑀦𑀧𑀺 𑀢𑀁 𑀅𑀦𑀗𑁆𑀕𑀡𑀁 𑀦𑀸𑀫 𑀚𑀸𑀢𑀁. 𑀦𑁂𑀯𑀲𑀜𑁆𑀜𑀻 𑀦𑀸𑀲𑀜𑁆𑀜𑀻𑀢𑀺 𑀆𑀳𑀸𑀢𑀺 𑀅𑀢𑀻𑀢𑁂 𑀓𑀺𑀭 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀭𑀜𑁆𑀜𑀸𑀬𑀢𑀦𑁂 𑀓𑀸𑀮𑀁 𑀓𑀭𑁄𑀦𑁆𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀧𑀼𑀝𑁆𑀞𑁄 ‘‘𑀦𑁂𑀯𑀲𑀜𑁆𑀜𑀻 𑀦𑀸𑀲𑀜𑁆𑀜𑀻’’𑀢𑀺 𑀆𑀳. 𑀧𑀼𑀭𑀺𑀫𑀚𑀸𑀢𑀓𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑀸𑀧𑀲𑀸 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀓𑀣𑀁 𑀦 𑀕𑀡𑁆𑀳𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀆𑀪𑀲𑁆𑀲𑀭𑀢𑁄 𑀆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀞𑀢𑁆𑀯𑀸 𑀇𑀫𑀁 𑀕𑀸𑀣𑀫𑀸𑀳. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑁂𑀲𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺.

𑀘𑀢𑀼𑀢𑁆𑀣𑀚𑀸𑀢𑀓𑁂 (𑀚𑀸. 𑁧.𑁧.𑁧𑁩𑁫) 𑀘𑀦𑁆𑀤𑀲𑁆𑀲 𑀯𑀺𑀬 𑀆𑀪𑀸 𑀏𑀢𑀲𑁆𑀲𑀸𑀢𑀺 𑀘𑀦𑁆𑀤𑀸𑀪𑀁, 𑀑𑀤𑀸𑀢𑀓𑀲𑀺𑀡𑀁. 𑀲𑀽𑀭𑀺𑀬𑀸𑀪𑀦𑁆𑀢𑀺 𑀲𑀽𑀭𑀺𑀬𑀲𑁆𑀲 𑀯𑀺𑀬 𑀆𑀪𑀸 𑀏𑀢𑀲𑁆𑀲𑀸𑀢𑀺 𑀲𑀽𑀭𑀺𑀬𑀸𑀪𑀁, 𑀧𑀻𑀢𑀓𑀲𑀺𑀡𑀁. 𑀬𑁄𑀥 𑀧𑀜𑁆𑀜𑀸𑀬 𑀕𑀸𑀥𑀢𑀻𑀢𑀺 𑀬𑁄 𑀧𑀼𑀕𑁆𑀕𑀮𑁄 𑀇𑀥 𑀲𑀢𑁆𑀢𑀮𑁄𑀓𑁂 𑀇𑀤𑀁 𑀓𑀲𑀺𑀡𑀤𑁆𑀯𑀬𑀁 𑀧𑀜𑁆𑀜𑀸𑀬 𑀕𑀸𑀥𑀢𑀺, 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀅𑀦𑀼𑀧𑁆𑀧𑀯𑀺𑀲𑀢𑀺, 𑀢𑀢𑁆𑀣 𑀯𑀸 𑀧𑀢𑀺𑀝𑁆𑀞𑀳𑀢𑀺. 𑀅𑀯𑀺𑀢𑀓𑁆𑀓𑁂𑀦 𑀤𑀼𑀢𑀺𑀬𑀚𑁆𑀛𑀸𑀦𑁂𑀦 𑀆𑀪𑀲𑁆𑀲𑀭𑀽𑀧𑀕𑁄 𑀳𑁄𑀢𑀻𑀢𑀺 𑀲𑁄 𑀧𑀼𑀕𑁆𑀕𑀮𑁄 𑀢𑀣𑀸 𑀓𑀢𑁆𑀯𑀸 𑀧𑀝𑀺𑀮𑀤𑁆𑀥𑁂𑀦 𑀤𑀼𑀢𑀺𑀬𑁂𑀦 𑀛𑀸𑀦𑁂𑀦 𑀆𑀪𑀲𑁆𑀲𑀭𑀩𑁆𑀭𑀳𑁆𑀫𑀮𑁄𑀓𑀽𑀧𑀕𑁄 𑀳𑁄𑀢𑀺. 𑀲𑁂𑀲𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 ¶ 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀇𑀫𑀺𑀦𑀸 𑀇𑀫𑀁 𑀤𑀲𑁆𑀲𑁂𑀢𑀺 (𑀚𑀸. 𑀅𑀝𑁆𑀞. 𑁧.𑁧.𑁧𑁩𑁫 𑀘𑀦𑁆𑀤𑀸𑀪𑀚𑀸𑀢𑀓𑀯𑀡𑁆𑀡𑀦𑀸) 𑁋 𑀅𑀢𑀻𑀢𑁂 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀅𑀭𑀜𑁆𑀜𑀸𑀬𑀢𑀦𑁂 𑀓𑀸𑀮𑀁 𑀓𑀭𑁄𑀦𑁆𑀢𑁄 𑀅𑀦𑁆𑀢𑁂𑀯𑀸𑀲𑀺𑀓𑁂𑀳𑀺 𑀧𑀼𑀘𑁆𑀙𑀺𑀢𑁄 ‘‘𑀘𑀦𑁆𑀤𑀸𑀪𑀁 𑀲𑀽𑀭𑀺𑀬𑀸𑀪’’𑀦𑁆𑀢𑀺 𑀯𑀢𑁆𑀯𑀸 𑀆𑀪𑀲𑁆𑀲𑀭𑁂 𑀦𑀺𑀩𑁆𑀩𑀢𑁆𑀢𑁄. 𑀢𑀸𑀧𑀲𑀸 𑀚𑁂𑀝𑁆𑀞𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀦 𑀲𑀤𑁆𑀤𑀳𑀺𑀁𑀲𑀼. 𑀩𑁄𑀥𑀺𑀲𑀢𑁆𑀢𑁄 𑀆𑀕𑀦𑁆𑀢𑁆𑀯𑀸 𑀆𑀓𑀸𑀲𑁂 𑀞𑀺𑀢𑁄 𑀇𑀫𑀁 𑀕𑀸𑀣𑀁 𑀅𑀪𑀸𑀲𑀺.

𑀧𑀜𑁆𑀘𑀫𑀚𑀸𑀢𑀓𑁂 𑀆𑀲𑀻𑀲𑁂𑀣𑁂𑀯𑀸𑀢𑀺 𑀆𑀲𑀸𑀘𑁆𑀙𑁂𑀤𑀁 𑀅𑀓𑀢𑁆𑀯𑀸 𑀅𑀢𑁆𑀢𑀦𑁄 𑀓𑀫𑁆𑀫𑁂𑀲𑀼 𑀆𑀲𑀁 𑀓𑀭𑁂𑀬𑁆𑀬𑁂𑀯. 𑀦 𑀦𑀺𑀩𑁆𑀩𑀺𑀦𑁆𑀤𑁂𑀬𑁆𑀬𑀸𑀢𑀺 𑀦 𑀦𑀺𑀩𑁆𑀩𑁂𑀤𑀁 𑀉𑀧𑁆𑀧𑀸𑀤𑁂𑀬𑁆𑀬, 𑀦 𑀉𑀓𑁆𑀓𑀡𑁆𑀞𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀯𑁄𑀢𑀺 𑀦𑀺𑀧𑀸𑀢𑀫𑀢𑁆𑀢𑀁. 𑀬𑀣𑀸 𑀇𑀘𑁆𑀙𑀺𑀦𑁆𑀢𑀺 𑀅𑀳𑀜𑁆𑀳𑀺 𑀲𑀝𑁆𑀞𑀺𑀳𑀢𑁆𑀣𑀸 𑀦𑀭𑀓𑀸 𑀉𑀝𑁆𑀞𑀸𑀦𑀁 𑀇𑀘𑁆𑀙𑀺𑀁, 𑀲𑁄𑀫𑁆𑀳𑀺 𑀢𑀣𑁂𑀯 𑀚𑀸𑀢𑁄, 𑀢𑀢𑁄 𑀉𑀝𑁆𑀞𑀺𑀢𑁄𑀬𑁂𑀯𑀸𑀢𑀺 𑀤𑀻𑀧𑁂𑀢𑀺.

𑀅𑀢𑀻𑀢𑁂 (𑀚𑀸. 𑀅𑀝𑁆𑀞. 𑁪.𑁧𑁩.𑀲𑀭𑀪𑀫𑀺𑀕𑀚𑀸𑀢𑀓𑀯𑀡𑁆𑀡𑀦𑀸) 𑀓𑀺𑀭 𑀩𑀸𑀭𑀸𑀡𑀲𑀺𑀬𑀁 𑀩𑁆𑀭𑀳𑁆𑀫𑀤𑀢𑁆𑀢𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁂 𑀩𑁄𑀥𑀺𑀲𑀢𑁆𑀢𑁄 𑀲𑀭𑀪𑀫𑀺𑀕𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀅𑀭𑀜𑁆𑀜𑁂 𑀧𑀝𑀺𑀯𑀲𑀢𑀺. 𑀭𑀸𑀚𑀸 𑀫𑀺𑀕𑀯𑀺𑀢𑁆𑀢𑀓𑁄 𑀅𑀳𑁄𑀲𑀺 ¶ 𑀣𑀸𑀫𑀲𑀫𑁆𑀧𑀦𑁆𑀦𑁄. 𑀏𑀓𑀤𑀺𑀯𑀲𑀁 𑀕𑀦𑁆𑀢𑁆𑀯𑀸 𑀅𑀫𑀘𑁆𑀘𑁂 𑀆𑀳 𑁋 ‘‘𑀬𑀲𑁆𑀲 𑀧𑀲𑁆𑀲𑁂𑀦 𑀫𑀺𑀕𑁄 𑀧𑀮𑀸𑀬𑀢𑀺, 𑀢𑁂𑀦𑁂𑀯 𑀲𑁄 𑀤𑀸𑀢𑀩𑁆𑀩𑁄’’𑀢𑀺. 𑀅𑀣𑁂𑀓𑀤𑀺𑀯𑀲𑀁 𑀲𑀭𑀪𑀫𑀺𑀕𑁄 𑀉𑀝𑁆𑀞𑀸𑀬 𑀭𑀜𑁆𑀜𑁄 𑀞𑀺𑀢𑀝𑁆𑀞𑀸𑀦𑁂𑀦 𑀧𑀮𑀸𑀬𑀺. 𑀅𑀣 𑀦𑀁 𑀅𑀫𑀘𑁆𑀘𑀸 𑀉𑀧𑁆𑀧𑀡𑁆𑀟𑁂𑀲𑀼𑀁. 𑀭𑀸𑀚𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀇𑀫𑁂 𑀫𑀁 𑀧𑀭𑀺𑀳𑀸𑀲𑀦𑁆𑀢𑀺, 𑀫𑀫 𑀧𑀫𑀸𑀡𑀁 𑀦 𑀚𑀸𑀦𑀦𑁆𑀢𑀻’’𑀢𑀺 𑀕𑀸𑀴𑁆𑀳𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀺𑀓𑁄𑀯 𑀔𑀕𑁆𑀕𑀁 𑀆𑀤𑀸𑀬 ‘‘𑀲𑀭𑀪𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑁂𑀕𑁂𑀦 𑀧𑀓𑁆𑀔𑀦𑁆𑀤𑀺. 𑀅𑀣 𑀦𑀁 𑀤𑀺𑀲𑁆𑀯𑀸 𑀢𑀻𑀡𑀺 𑀬𑁄𑀚𑀦𑀸𑀦𑀺 𑀅𑀦𑀼𑀩𑀦𑁆𑀥𑀺. 𑀲𑀭𑀪𑁄 𑀅𑀭𑀜𑁆𑀜𑀁 𑀧𑀸𑀯𑀺𑀲𑀺. 𑀭𑀸𑀚𑀸𑀧𑀺 𑀧𑀸𑀯𑀺𑀲𑀺𑀬𑁂𑀯. 𑀢𑀢𑁆𑀣 𑀲𑀭𑀪𑀫𑀺𑀕𑀲𑁆𑀲 𑀕𑀫𑀦𑀫𑀕𑁆𑀕𑁂 𑀲𑀝𑁆𑀞𑀺𑀳𑀢𑁆𑀣𑀫𑀢𑁆𑀢𑁄 𑀫𑀳𑀸𑀧𑀽𑀢𑀺𑀧𑀸𑀢𑀦𑀭𑀓𑀆𑀯𑀸𑀝𑁄 𑀅𑀢𑁆𑀣𑀺, 𑀲𑁄 𑀢𑀺𑀁𑀲𑀳𑀢𑁆𑀣𑀫𑀢𑁆𑀢𑀁 𑀉𑀤𑀓𑁂𑀦 𑀧𑀼𑀡𑁆𑀡𑁄 𑀢𑀺𑀡𑁂𑀳𑀺 𑀘 𑀧𑀝𑀺𑀘𑁆𑀙𑀦𑁆𑀦𑁄. 𑀲𑀭𑀪𑁄 𑀉𑀤𑀓𑀕𑀦𑁆𑀥𑀁 𑀖𑀸𑀬𑀺𑀢𑁆𑀯𑀸𑀯 𑀆𑀯𑀸𑀝𑀪𑀸𑀯𑀁 𑀜𑀢𑁆𑀯𑀸 𑀣𑁄𑀓𑀁 𑀑𑀲𑀓𑁆𑀓𑀺𑀢𑁆𑀯𑀸 𑀕𑀢𑁄. 𑀭𑀸𑀚𑀸 𑀧𑀦 𑀉𑀚𑀼𑀓𑀫𑁂𑀯 𑀆𑀕𑀘𑁆𑀙𑀦𑁆𑀢𑁄 𑀢𑀲𑁆𑀫𑀺𑀁 𑀧𑀢𑀺.

𑀲𑀭𑀪𑁄 𑀢𑀲𑁆𑀲 𑀧𑀤𑀲𑀤𑁆𑀤𑀁 𑀅𑀲𑀼𑀡𑀦𑁆𑀢𑁄 𑀦𑀺𑀯𑀢𑁆𑀢𑀺𑀢𑁆𑀯𑀸 𑀢𑀁 𑀅𑀧𑀲𑁆𑀲𑀦𑁆𑀢𑁄 ‘‘𑀦𑀭𑀓𑀆𑀯𑀸𑀝𑁂 𑀧𑀢𑀺𑀢𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀆𑀕𑀦𑁆𑀢𑁆𑀯𑀸 𑀑𑀮𑁄𑀓𑁂𑀦𑁆𑀢𑁄 𑀢𑀁 𑀕𑀫𑁆𑀪𑀻𑀭𑁂 𑀉𑀤𑀓𑁂 𑀅𑀧𑁆𑀧𑀢𑀺𑀝𑁆𑀞𑁂 𑀓𑀺𑀮𑀫𑀦𑁆𑀢𑀁 𑀤𑀺𑀲𑁆𑀯𑀸 𑀢𑁂𑀦 𑀓𑀢𑀸𑀧𑀭𑀸𑀥𑀁 𑀳𑀤𑀬𑁂 𑀅𑀓𑀢𑁆𑀯𑀸 𑀲𑀜𑁆𑀚𑀸𑀢𑀓𑀸𑀭𑀼𑀜𑁆𑀜𑁄 ‘‘𑀫𑀸 𑀫𑀬𑀺 𑀧𑀲𑁆𑀲𑀦𑁆𑀢𑁂 𑀯𑀭𑀸𑀓𑁄 𑀦𑀲𑁆𑀲𑀢𑀼, 𑀇𑀫𑀫𑁆𑀳𑀸 𑀢𑀁 𑀤𑀼𑀓𑁆𑀔𑀸 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀆𑀯𑀸𑀝𑀢𑀻𑀭𑁂 𑀞𑀺𑀢𑁄 ‘‘𑀫𑀸 𑀪𑀸𑀬𑀺, 𑀫𑀳𑀸𑀭𑀸𑀚, 𑀅𑀳𑀁 𑀢𑀁 𑀤𑀼𑀓𑁆𑀔𑀸 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀯𑀸 𑀅𑀢𑁆𑀢𑀦𑁄 𑀧𑀺𑀬𑀧𑀼𑀢𑁆𑀢𑀁 𑀉𑀤𑁆𑀥𑀭𑀺𑀢𑀼𑀁 𑀉𑀲𑁆𑀲𑀸𑀳𑀁 𑀓𑀭𑁄𑀦𑁆𑀢𑁄 𑀯𑀺𑀬 𑀢𑀲𑁆𑀲𑀼𑀤𑁆𑀥𑀭𑀡𑀢𑁆𑀣𑀸𑀬 𑀲𑀺𑀮𑀸𑀬 𑀬𑁄𑀕𑁆𑀕𑀁 𑀓𑀢𑁆𑀯𑀸 ‘‘𑀯𑀺𑀚𑁆𑀛𑀺𑀲𑁆𑀲𑀸𑀫𑀻’’𑀢𑀺 𑀆𑀕𑀢𑀁 𑀭𑀸𑀚𑀸𑀦𑀁 𑀲𑀝𑁆𑀞𑀺𑀳𑀢𑁆𑀣𑀸 𑀦𑀭𑀓𑀸 𑀉𑀤𑁆𑀥𑀭𑀺𑀢𑁆𑀯𑀸 𑀅𑀲𑁆𑀲𑀸𑀲𑁂𑀢𑁆𑀯𑀸 𑀧𑀺𑀝𑁆𑀞𑀺𑀁 𑀆𑀭𑁄𑀧𑁂𑀢𑁆𑀯𑀸 𑀅𑀭𑀜𑁆𑀜𑀸 𑀦𑀻𑀳𑀭𑀺𑀢𑁆𑀯𑀸 𑀲𑁂𑀦𑀸𑀬 𑀅𑀯𑀺𑀤𑀽𑀭𑁂 𑀑𑀢𑀸𑀭𑁂𑀢𑁆𑀯𑀸 𑀑𑀯𑀸𑀤𑀫𑀲𑁆𑀲 𑀤𑀢𑁆𑀯𑀸 ¶ 𑀧𑀜𑁆𑀘𑀲𑀼 𑀲𑀻𑀮𑁂𑀲𑀼 𑀧𑀢𑀺𑀝𑁆𑀞𑀸𑀧𑁂𑀲𑀺. 𑀭𑀸𑀚𑀸 𑀲𑁂𑀦𑀗𑁆𑀕𑀧𑀭𑀺𑀯𑀼𑀢𑁄 𑀦𑀕𑀭𑀁 𑀕𑀦𑁆𑀢𑁆𑀯𑀸 ‘‘𑀇𑀢𑁄 𑀧𑀝𑁆𑀞𑀸𑀬 𑀲𑀓𑀮𑀭𑀝𑁆𑀞𑀯𑀸𑀲𑀺𑀦𑁄 𑀧𑀜𑁆𑀘 𑀲𑀻𑀮𑀸𑀦𑀺 𑀭𑀓𑁆𑀔𑀦𑁆𑀢𑀽’’𑀢𑀺 𑀥𑀫𑁆𑀫𑀪𑁂𑀭𑀺𑀁 𑀘𑀭𑀸𑀧𑁂𑀲𑀺. 𑀫𑀳𑀸𑀲𑀢𑁆𑀢𑁂𑀦 𑀧𑀦 𑀅𑀢𑁆𑀢𑀦𑁄 𑀓𑀢𑀕𑀼𑀡𑀁 𑀓𑀲𑁆𑀲𑀘𑀺 𑀅𑀓𑀣𑁂𑀢𑁆𑀯𑀸 𑀲𑀸𑀬𑀁 𑀦𑀸𑀦𑀕𑁆𑀕𑀭𑀲𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀅𑀮𑀗𑁆𑀓𑀢𑀲𑀬𑀦𑁂 𑀲𑀬𑀺𑀢𑁆𑀯𑀸 𑀧𑀘𑁆𑀘𑀽𑀲𑀓𑀸𑀮𑁂 𑀫𑀳𑀸𑀲𑀢𑁆𑀢𑀲𑁆𑀲 𑀕𑀼𑀡𑀁 𑀲𑀭𑀺𑀢𑁆𑀯𑀸 𑀉𑀝𑁆𑀞𑀸𑀬 𑀲𑀬𑀦𑀧𑀺𑀝𑁆𑀞𑁂 𑀧𑀮𑁆𑀮𑀗𑁆𑀓𑁂𑀦 𑀦𑀺𑀲𑀻𑀤𑀺𑀢𑁆𑀯𑀸 𑀧𑀻𑀢𑀺𑀧𑀼𑀡𑁆𑀡𑁂𑀦 𑀳𑀤𑀬𑁂𑀦 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑁄 ‘‘𑀆𑀲𑀻𑀲𑁂𑀣𑁂𑀯 𑀧𑀼𑀭𑀺𑀲𑁄’’𑀢𑀺𑀆𑀤𑀺𑀦𑀸 𑀇𑀫𑀸 𑀙 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀅𑀳𑀺𑀢𑀸 𑀳𑀺𑀢𑀸 𑀘𑀸𑀢𑀺 𑀤𑀼𑀓𑁆𑀔𑀨𑀲𑁆𑀲𑀸 𑀲𑀼𑀔𑀨𑀲𑁆𑀲𑀸 𑀘, 𑀫𑀭𑀡𑀨𑀲𑁆𑀲𑀸, 𑀚𑀻𑀯𑀺𑀢𑀨𑀲𑁆𑀲𑀸𑀢𑀺𑀧𑀺 𑀅𑀢𑁆𑀣𑁄. 𑀲𑀢𑁆𑀢𑀸𑀦𑀜𑁆𑀳𑀺 𑀫𑀭𑀡𑀨𑀲𑁆𑀲𑁄 𑀅𑀳𑀺𑀢𑁄, 𑀚𑀻𑀯𑀺𑀢𑀨𑀲𑁆𑀲𑁄 𑀳𑀺𑀢𑁄. 𑀢𑁂𑀲𑀁 𑀅𑀘𑀺𑀦𑁆𑀢𑀺𑀢𑁄 𑀫𑀭𑀡𑀨𑀲𑁆𑀲𑁄 𑀆𑀕𑀘𑁆𑀙𑀢𑀻𑀢𑀺 𑀤𑀲𑁆𑀲𑁂𑀢𑀺 ¶ . 𑀅𑀘𑀺𑀦𑁆𑀢𑀺𑀢𑀫𑁆𑀧𑀻𑀢𑀺 𑀫𑀬𑀸 ‘‘𑀆𑀯𑀸𑀝𑁂 𑀧𑀢𑀺𑀲𑁆𑀲𑀸𑀫𑀻’’𑀢𑀺 𑀦 𑀘𑀺𑀦𑁆𑀢𑀺𑀢𑀁, ‘‘𑀲𑀭𑀪𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑀺𑀢𑀁. 𑀇𑀤𑀸𑀦𑀺 𑀧𑀦 𑀫𑁂 𑀘𑀺𑀦𑁆𑀢𑀺𑀢𑀁 𑀦𑀝𑁆𑀞𑀁, 𑀅𑀘𑀺𑀦𑁆𑀢𑀺𑀢𑀫𑁂𑀯 𑀚𑀸𑀢𑀦𑁆𑀢𑀺 𑀉𑀤𑀸𑀦𑀯𑀲𑁂𑀦 𑀯𑀤𑀢𑀺. 𑀪𑁄𑀕𑀸𑀢𑀺 𑀬𑀲𑀧𑀭𑀺𑀯𑀸𑀭𑀸, 𑀏𑀢𑁂 𑀘𑀺𑀦𑁆𑀢𑀸𑀫𑀬𑀸 𑀦 𑀳𑁄𑀦𑁆𑀢𑀺. 𑀢𑀲𑁆𑀫𑀸 𑀜𑀸𑀡𑀯𑀢𑀸 𑀯𑀻𑀭𑀺𑀬𑀫𑁂𑀯 𑀓𑀸𑀢𑀩𑁆𑀩𑀦𑁆𑀢𑀺 𑀯𑀤𑀢𑀺. 𑀯𑀻𑀭𑀺𑀬𑀯𑀢𑁄 𑀳𑀺 𑀅𑀘𑀺𑀦𑁆𑀢𑀺𑀢𑀫𑁆𑀧𑀺 𑀳𑁄𑀢𑀺𑀬𑁂𑀯.

𑀢𑀲𑁆𑀲𑁂𑀢𑀁 𑀉𑀤𑀸𑀦𑀁 𑀉𑀤𑀸𑀦𑁂𑀦𑁆𑀢𑀲𑁆𑀲𑁂𑀯 𑀅𑀭𑀼𑀡𑀁 𑀉𑀝𑁆𑀞𑀳𑀺. 𑀧𑀼𑀭𑁄𑀳𑀺𑀢𑁄 𑀧𑀸𑀢𑁄𑀯 𑀲𑀼𑀔𑀲𑁂𑀬𑁆𑀬𑀧𑀼𑀘𑁆𑀙𑀦𑀢𑁆𑀣𑀁 𑀆𑀕𑀦𑁆𑀢𑁆𑀯𑀸 𑀤𑁆𑀯𑀸𑀭𑁂 𑀞𑀺𑀢𑁄 𑀢𑀲𑁆𑀲 𑀉𑀤𑀸𑀦𑀕𑀻𑀢𑀲𑀤𑁆𑀤𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺 𑁋 ‘‘𑀭𑀸𑀚𑀸 𑀳𑀺𑀬𑁆𑀬𑁄 𑀫𑀺𑀕𑀯𑀁 𑀅𑀕𑀫𑀸𑀲𑀺, 𑀢𑀢𑁆𑀣 𑀲𑀭𑀪𑀫𑀺𑀕𑀁 𑀯𑀺𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀢𑁂𑀦 𑀫𑀜𑁆𑀜𑁂 𑀉𑀤𑀸𑀦𑀁 𑀉𑀤𑀸𑀦𑁂𑀢𑀻’’𑀢𑀺. 𑀏𑀯𑀁 𑀩𑁆𑀭𑀸𑀳𑁆𑀫𑀡𑀲𑁆𑀲 𑀭𑀜𑁆𑀜𑁄 𑀧𑀭𑀺𑀧𑀼𑀡𑁆𑀡𑀩𑁆𑀬𑀜𑁆𑀚𑀦𑀁 𑀉𑀤𑀸𑀦𑀁 𑀲𑀼𑀢𑁆𑀯𑀸 𑀲𑀼𑀫𑀚𑁆𑀚𑀺𑀢𑁂 𑀆𑀤𑀸𑀲𑁂 𑀫𑀼𑀔𑀁 𑀑𑀮𑁄𑀓𑁂𑀦𑁆𑀢𑀲𑁆𑀲 𑀙𑀸𑀬𑀸 𑀯𑀺𑀬 𑀭𑀜𑁆𑀜𑀸 𑀘 𑀲𑀭𑀪𑁂𑀦 𑀘 𑀓𑀢𑀓𑀸𑀭𑀡𑀁 𑀧𑀸𑀓𑀝𑀁 𑀅𑀳𑁄𑀲𑀺, 𑀲𑁄 𑀦𑀔𑀕𑁆𑀕𑁂𑀦 𑀤𑁆𑀯𑀸𑀭𑀁 𑀆𑀓𑁄𑀝𑁂𑀲𑀺. 𑀭𑀸𑀚𑀸 ‘‘𑀓𑁄 𑀏𑀲𑁄’’𑀢𑀺 𑀧𑀼𑀘𑁆𑀙𑀺. 𑀅𑀳𑀁, 𑀤𑁂𑀯, 𑀧𑀼𑀭𑁄𑀳𑀺𑀢𑁄𑀢𑀺. 𑀅𑀣𑀲𑁆𑀲 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 ‘‘𑀇𑀢𑁄 𑀏𑀳𑀸𑀘𑀭𑀺𑀬𑀸’’𑀢𑀺 𑀆𑀳. 𑀲𑁄 𑀧𑀯𑀺𑀲𑀺𑀢𑁆𑀯𑀸 𑀭𑀸𑀚𑀸𑀦𑀁 𑀚𑀬𑀸𑀧𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑁄 ‘‘𑀅𑀳𑀁, 𑀫𑀳𑀸𑀭𑀸𑀚, 𑀢𑀬𑀸 𑀅𑀭𑀜𑁆𑀜𑁂 𑀓𑀢𑀓𑀸𑀭𑀡𑀁 𑀚𑀸𑀦𑀸𑀫𑀺, 𑀢𑁆𑀯𑀁 𑀏𑀓𑀁 𑀲𑀭𑀪𑀫𑀺𑀕𑀁 𑀅𑀦𑀼𑀩𑀦𑁆𑀥𑀦𑁆𑀢𑁄 𑀦𑀭𑀓𑁂 𑀧𑀢𑀺𑀢𑁄, 𑀅𑀣 𑀦𑀁 𑀲𑁄 𑀲𑀭𑀪𑁄 𑀲𑀺𑀮𑀸𑀬 𑀬𑁄𑀕𑁆𑀕𑀁 𑀓𑀢𑁆𑀯𑀸 𑀦𑀭𑀓𑀢𑁄 𑀉𑀤𑁆𑀥𑀭𑀺, 𑀲𑁄 𑀢𑁆𑀯𑀁 𑀢𑀲𑁆𑀲 𑀕𑀼𑀡𑀁 𑀲𑀭𑀺𑀢𑁆𑀯𑀸 𑀉𑀤𑀸𑀦𑀁 𑀉𑀤𑀸𑀦𑁂𑀲𑀻’’𑀢𑀺 𑀯𑀢𑁆𑀯𑀸 ‘‘𑀲𑀭𑀪𑀁 𑀕𑀺𑀭𑀺𑀤𑀼𑀕𑁆𑀕𑀲𑁆𑀫𑀺’’𑀦𑁆𑀢𑀺𑀆𑀤𑀺𑀦𑀸 𑀤𑁆𑀯𑁂 𑀕𑀸𑀣𑀸 𑀅𑀪𑀸𑀲𑀺.

𑀢𑀢𑁆𑀣 𑀅𑀦𑀼𑀲𑀭𑀻𑀢𑀺 𑀅𑀦𑀼𑀩𑀦𑁆𑀥𑀺. 𑀯𑀺𑀓𑁆𑀓𑀦𑁆𑀢𑀦𑁆𑀢𑀺 𑀉𑀤𑁆𑀥𑀭𑀡𑀢𑁆𑀣𑀸𑀬 𑀓𑀢𑀧𑀭𑀓𑁆𑀓𑀫𑀁. 𑀅𑀦𑀼𑀚𑀻𑀯𑀲𑀻𑀢𑀺 𑀉𑀧𑀚𑀻𑀯𑀲𑀺, 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀢𑀬𑀸 𑀚𑀻𑀯𑀺𑀢𑀁 𑀮𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀲𑀫𑀼𑀤𑁆𑀥𑀭𑀻𑀢𑀺 𑀉𑀤𑁆𑀥𑀭𑀡𑀁 𑀅𑀓𑀸𑀲𑀺. 𑀲𑀺𑀮𑀸𑀬 𑀬𑁄𑀕𑁆𑀕𑀁 𑀲𑀭𑀪𑁄 𑀓𑀭𑀺𑀢𑁆𑀯𑀸𑀢𑀺 𑀲𑀺𑀮𑀸𑀬 𑀲𑁄𑀧𑀸𑀦𑀲𑀤𑀺𑀲𑀸𑀬 𑀦𑀭𑀓𑀢𑁄 𑀉𑀤𑁆𑀥𑀭𑀡𑀬𑁄𑀕𑁆𑀕𑀢𑀁 𑀓𑀭𑀺𑀢𑁆𑀯𑀸. 𑀅𑀮𑀻𑀦𑀘𑀺𑀢𑁆𑀢𑀦𑁆𑀢𑀺 𑀲𑀗𑁆𑀓𑁄𑀘𑀁 𑀅𑀧𑁆𑀧𑀢𑁆𑀢𑀘𑀺𑀢𑁆𑀢𑀁. 𑀢 𑀫𑀺𑀕𑀁 𑀯𑀤𑁂𑀲𑀻𑀢𑀺 𑀲𑀼𑀯𑀡𑁆𑀡𑀲𑀭𑀪𑀫𑀺𑀕𑀁 𑀇𑀥 𑀲𑀺𑀭𑀺𑀲𑀬𑀦𑁂 𑀦𑀺𑀧𑀦𑁆𑀦𑁄 𑀯𑀡𑁆𑀡𑁂𑀲𑀺. 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸, ‘‘𑀅𑀬𑀁 𑀫𑀬𑀸 𑀲𑀤𑁆𑀥𑀺𑀁 𑀦 𑀫𑀺𑀕𑀯𑀁 𑀆𑀕𑀢𑁄, 𑀲𑀩𑁆𑀩𑀜𑁆𑀘 𑀧𑀯𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀓𑀣𑀁 𑀦𑀼 𑀔𑁄 𑀚𑀸𑀦𑀸𑀢𑀺, 𑀧𑀼𑀘𑁆𑀙𑀺𑀲𑁆𑀲𑀸𑀫𑀺 𑀦’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑁋 ‘‘𑀓𑀺𑀁 𑀢𑁆𑀯𑀁 𑀦𑀼 𑀢𑀢𑁆𑀣𑁂𑀯𑀸’’𑀢𑀺 𑀦𑀯𑀫𑀕𑀸𑀣𑀫𑀸𑀳 ¶ . 𑀢𑀢𑁆𑀣 𑀪𑀺𑀁𑀲𑀭𑀽𑀧𑀦𑁆𑀢𑀺 𑀓𑀺𑀁 𑀦𑀼 𑀢𑁂 𑀜𑀸𑀡𑀁 𑀩𑀮𑀯𑀚𑀸𑀢𑀺𑀓𑀁, 𑀢𑁂𑀦𑁂𑀢𑀁 𑀚𑀸𑀦𑀸𑀲𑀻𑀢𑀺 𑀯𑀤𑀢𑀺. 𑀩𑁆𑀭𑀸𑀳𑁆𑀫𑀡𑁄 ‘‘𑀦𑀸𑀳𑀁 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑁄, 𑀩𑁆𑀬𑀜𑁆𑀚𑀦𑀁 𑀅𑀫𑀓𑁆𑀔𑁂𑀢𑁆𑀯𑀸 𑀢𑀬𑀸 𑀓𑀣𑀺𑀢𑀕𑀸𑀣𑀸𑀬 𑀧𑀦 𑀫𑀬𑁆𑀳𑀁 𑀅𑀢𑁆𑀣𑁄 𑀉𑀧𑀝𑁆𑀞𑀸𑀢𑀻’’𑀢𑀺 𑀤𑀻𑀧𑁂𑀦𑁆𑀢𑁄 ‘‘𑀦 𑀘𑁂𑀯𑀳’’𑀦𑁆𑀢𑀺 𑀤𑀲𑀫𑀕𑀸𑀣𑀫𑀸𑀳 ¶ . 𑀢𑀢𑁆𑀣 𑀲𑀼𑀪𑀸𑀲𑀺𑀢𑀸𑀦𑀦𑁆𑀢𑀺 𑀩𑁆𑀬𑀜𑁆𑀚𑀦𑀁 𑀅𑀫𑀓𑁆𑀔𑁂𑀢𑁆𑀯𑀸 𑀲𑀼𑀝𑁆𑀞𑀼 𑀪𑀸𑀲𑀺𑀢𑀸𑀦𑀁. 𑀅𑀢𑁆𑀣𑀁 𑀢𑀤𑀸𑀦𑁂𑀦𑁆𑀢𑀻𑀢𑀺 𑀬𑁄 𑀢𑁂𑀲𑀁 𑀅𑀢𑁆𑀣𑁄, 𑀢𑀁 𑀆𑀦𑁂𑀦𑁆𑀢𑀺 𑀉𑀧𑀥𑀸𑀭𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀤𑀸 𑀧𑀼𑀭𑁄𑀳𑀺𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺 𑀅𑀳𑁄𑀲𑀺. 𑀢𑁂𑀦𑁂𑀯𑀸𑀳 𑁋 ‘‘𑀅𑀢𑀻𑀢𑁂𑀧𑀻’’𑀢𑀺𑀆𑀤𑀺. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀯𑀢𑁆𑀣𑀼

𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀸𑀤𑀬𑁄𑀢𑀺𑀆𑀤𑀻𑀲𑀼 𑀧𑀦 𑀬𑀸𑀣𑀸𑀯𑀲𑀭𑀲𑀕𑀼𑀡𑀯𑀲𑁂𑀦𑀸𑀢𑀺 𑀬𑀣𑀸𑀲𑀪𑀸𑀯𑀕𑀼𑀡𑀯𑀲𑁂𑀦. 𑀧𑀩𑁆𑀩𑀚𑁆𑀚𑀸𑀯𑀲𑁂𑀦 𑀧𑀝𑀺𑀯𑁂𑀥𑀯𑀲𑁂𑀦 𑀲𑀼𑀘𑀺𑀭𑀁 𑀲𑀼𑀦𑀺𑀧𑀼𑀡𑀁 𑀭𑀢𑁆𑀢𑀺𑀦𑁆𑀤𑀺𑀯𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑀯𑀲𑁂𑀦 𑀘 𑀭𑀢𑁆𑀢𑀜𑁆𑀜𑀼𑀢𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀞𑀧𑁂𑀢𑁆𑀯𑀸 𑀳𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥’’𑀦𑁆𑀢𑀺𑀆𑀤𑀺𑀫𑀸𑀳. 𑀧𑀸𑀓𑀝𑁄𑀯 𑀳𑁄𑀢𑀻𑀢𑀺 𑀲𑀢𑀺𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀺𑀓𑁄 𑀧𑀸𑀓𑀝𑁄 𑀯𑀺𑀪𑀽𑀢𑁄 𑀳𑁄𑀢𑀺. 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄𑀢𑀺 𑀲𑀸𑀯𑀓𑁂𑀲𑀼 𑀲𑀩𑁆𑀩𑀧𑀞𑀫𑀁 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀜𑀸𑀢𑀓𑁄𑀡𑁆𑀟𑀜𑁆𑀜𑁄. 𑀲𑀩𑁆𑀩𑁂𑀲𑀼𑀧𑀺 𑀏𑀢𑀤𑀕𑁆𑀕𑁂𑀲𑀽𑀢𑀺 𑀲𑀩𑁆𑀩𑁂𑀲𑀼𑀧𑀺 𑀏𑀢𑀤𑀕𑁆𑀕𑀲𑀼𑀢𑁆𑀢𑁂𑀲𑀼, 𑀲𑀩𑁆𑀩𑁂𑀲𑀼 𑀯𑀸 𑀏𑀢𑀤𑀕𑁆𑀕𑀝𑁆𑀞𑀧𑀦𑁂𑀲𑀼.

𑀥𑀼𑀭𑀧𑀢𑁆𑀢𑀸𑀦𑀻𑀢𑀺 𑀧𑀢𑁆𑀢𑀸𑀦𑀁 𑀧𑀫𑀼𑀔𑀪𑀽𑀢𑀸𑀦𑀺 𑀩𑀸𑀳𑀺𑀭𑀧𑀢𑁆𑀢𑀸𑀦𑀺. 𑀦𑀯𑀼𑀢𑀺𑀳𑀢𑁆𑀣𑀸𑀦𑀻𑀢𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑁂𑀦 𑀦𑀯𑀼𑀢𑀺𑀭𑀢𑀦𑀸𑀦𑀺. 𑀧𑀤𑀼𑀫𑁂𑀦𑁂𑀯 𑀢𑀁 𑀢𑀁 𑀧𑀤𑁂𑀲𑀁 𑀉𑀢𑁆𑀢𑀭𑀢𑀺 𑀅𑀢𑀺𑀓𑁆𑀓𑀫𑀢𑀻𑀢𑀺 𑀧𑀤𑀼𑀫𑀼𑀢𑁆𑀢𑀭𑁄, 𑀪𑀕𑀯𑀸. 𑀕𑀦𑁆𑀥𑀤𑀸𑀫𑀫𑀸𑀮𑀸𑀤𑀸𑀫𑀸𑀤𑀻𑀳𑀻𑀢𑀺 𑀆𑀤𑀺𑀲𑀤𑁆𑀤𑁂𑀦 𑀧𑀢𑁆𑀢𑀤𑀸𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣 𑀕𑀦𑁆𑀥𑀤𑀸𑀫𑁂𑀳𑀺 𑀓𑀢𑀫𑀸𑀮𑀸 𑀕𑀦𑁆𑀥𑀤𑀸𑀫𑀁. 𑀮𑀯𑀗𑁆𑀕𑀢𑀓𑁆𑀓𑁄𑀮𑀚𑀸𑀢𑀺𑀧𑀼𑀧𑁆𑀨𑀸𑀤𑀻𑀳𑀺 𑀓𑀢𑀫𑀸𑀮𑀸 𑀫𑀸𑀮𑀸𑀤𑀸𑀫𑀁. 𑀢𑀫𑀸𑀮𑀧𑀢𑁆𑀢𑀸𑀤𑀻𑀳𑀺 𑀓𑀢𑀫𑀸𑀮𑀸 𑀧𑀢𑁆𑀢𑀤𑀸𑀫𑀁. 𑀯𑀗𑁆𑀕𑀧𑀝𑁆𑀝𑁂𑀢𑀺 𑀯𑀗𑁆𑀕𑀤𑁂𑀲𑁂 𑀉𑀧𑁆𑀧𑀦𑁆𑀦𑀖𑀦𑀲𑀼𑀔𑀼𑀫𑀯𑀢𑁆𑀣𑁂. 𑀉𑀢𑁆𑀢𑀫𑀲𑀼𑀔𑀼𑀫𑀯𑀢𑁆𑀣𑀦𑁆𑀢𑀺 𑀓𑀸𑀲𑀺𑀓𑀯𑀢𑁆𑀣𑀫𑀸𑀳.

𑀢𑁂𑀧𑀭𑀺𑀯𑀝𑁆𑀝𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑁄𑀲𑀸𑀦𑁂𑀢𑀺 𑀏𑀢𑁆𑀣 ‘‘𑀇𑀤𑀁 𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀲𑀘𑁆𑀘𑀯𑀲𑁂𑀦, ‘‘𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀧𑀭𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 𑀓𑀺𑀘𑁆𑀘𑀯𑀲𑁂𑀦, ‘‘𑀤𑀼𑀓𑁆𑀔𑀁 𑀅𑀭𑀺𑀬𑀲𑀘𑁆𑀘𑀁 𑀧𑀭𑀺𑀜𑁆𑀜𑀸𑀢’’𑀦𑁆𑀢𑀺𑀆𑀤𑀺𑀦𑀸 𑀓𑀢𑀯𑀲𑁂𑀦 𑀘 𑀢𑀻𑀳𑀺 𑀆𑀓𑀸𑀭𑁂𑀳𑀺 𑀧𑀭𑀺𑀯𑀝𑁆𑀝𑁂𑀢𑁆𑀯𑀸 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀤𑁂𑀲𑀺𑀢𑀢𑁆𑀢𑀸 𑀢𑀬𑁄 𑀧𑀭𑀺𑀯𑀝𑁆𑀝𑀸 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀢𑀺𑀧𑀭𑀺𑀯𑀝𑁆𑀝𑀁, 𑀢𑀺𑀧𑀭𑀺𑀯𑀝𑁆𑀝𑀫𑁂𑀯 𑀢𑁂𑀧𑀭𑀺𑀯𑀝𑁆𑀝𑀁, 𑀢𑁂𑀧𑀭𑀺𑀯𑀝𑁆𑀝𑀜𑁆𑀘 𑀢𑀁 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀜𑁆𑀘𑀸𑀢𑀺 𑀢𑁂𑀧𑀭𑀺𑀯𑀝𑁆𑀝𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀁, 𑀢𑀤𑁂𑀯 𑀲𑀼𑀢𑁆𑀢𑀦𑁆𑀢𑀁, 𑀢𑀲𑁆𑀲 𑀧𑀭𑀺𑀬𑁄𑀲𑀸𑀦𑁂𑀢𑀺 𑀅𑀢𑁆𑀣𑁄.

𑀲𑀸𑀮𑀺𑀕𑀩𑁆𑀪𑀁 𑀨𑀸𑀮𑁂𑀢𑁆𑀯𑀸 𑀆𑀤𑀸𑀬𑀸𑀢𑀺 𑀲𑀸𑀮𑀺𑀕𑀩𑁆𑀪𑀁 𑀨𑀸𑀮𑁂𑀢𑁆𑀯𑀸 𑀢𑀢𑁆𑀣 𑀮𑀩𑁆𑀪𑀫𑀸𑀦𑀁 𑀲𑀸𑀮𑀺𑀔𑀻𑀭𑀭𑀲𑀁 𑀆𑀤𑀸𑀬. 𑀅𑀦𑀼𑀘𑁆𑀙𑀯𑀺𑀓𑀦𑁆𑀢𑀺 𑀩𑀼𑀤𑁆𑀥𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀁 𑀔𑀻𑀭𑀧𑀸𑀬𑀲𑀁 𑀧𑀘𑀸𑀧𑁂𑀫. 𑀯𑁂𑀡𑀺𑀬𑁄 𑀧𑀼𑀭𑀺𑀲𑀪𑀸𑀯𑀯𑀲𑁂𑀦 𑀩𑀦𑁆𑀥𑀺𑀢𑁆𑀯𑀸 ¶ 𑀓𑀮𑀸𑀧𑀓𑀭𑀡𑁂 ¶ 𑀓𑀮𑀸𑀧𑀕𑁆𑀕𑀁. 𑀔𑀮𑁂 𑀓𑀮𑀸𑀧𑀸𑀦𑀁 𑀞𑀧𑀦𑀤𑀺𑀯𑀲𑁂 𑀔𑀮𑀕𑁆𑀕𑀁. 𑀫𑀤𑁆𑀤𑀺𑀢𑁆𑀯𑀸 𑀯𑀻𑀳𑀻𑀦𑀁 𑀭𑀸𑀲𑀺𑀓𑀭𑀡𑀤𑀺𑀯𑀲𑁂 𑀔𑀮𑀪𑀡𑁆𑀟𑀕𑁆𑀕𑀁. 𑀓𑁄𑀝𑁆𑀞𑁂𑀲𑀼 𑀳𑀺 𑀥𑀜𑁆𑀜𑀲𑁆𑀲 𑀧𑀓𑁆𑀔𑀺𑀧𑀦𑀤𑀺𑀯𑀲𑁂 𑀓𑁄𑀝𑁆𑀞𑀕𑁆𑀕𑀁.

𑀤𑁆𑀯𑁂 𑀕𑀢𑀺𑀬𑁄𑀢𑀺 𑀤𑁆𑀯𑁂 𑀏𑀯 𑀦𑀺𑀧𑁆𑀨𑀢𑁆𑀢𑀺𑀬𑁄, 𑀤𑁆𑀯𑁂 𑀦𑀺𑀝𑁆𑀞𑀸𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀺𑀁 𑀓𑀼𑀫𑀸𑀭𑁂 𑀲𑀩𑁆𑀩𑀜𑁆𑀜𑀼𑀢𑀁 𑀧𑀢𑁆𑀢𑁂𑀢𑀺 𑀓𑁄𑀡𑁆𑀟𑀜𑁆𑀜𑀫𑀸𑀡𑀯𑀲𑁆𑀲𑁂𑀯 𑀮𑀤𑁆𑀥𑀺𑀬𑀁 𑀞𑀢𑁆𑀯𑀸 𑀇𑀢𑀭𑁂𑀧𑀺 𑀙 𑀚𑀦𑀸 𑀧𑀼𑀢𑁆𑀢𑁂 𑀅𑀦𑀼𑀲𑀸𑀲𑀺𑀁𑀲𑀼. 𑀩𑁄𑀥𑀺𑀭𑀼𑀓𑁆𑀔𑀫𑀽𑀮𑁂 𑀧𑀸𑀘𑀻𑀦𑀧𑀲𑁆𑀲𑀁 𑀅𑀘𑀮𑀝𑁆𑀞𑀸𑀦𑀁 𑀦𑀸𑀫, 𑀬𑀁 ‘‘𑀯𑀚𑀺𑀭𑀸𑀲𑀦’’𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀫𑀳𑀢𑀁 𑀫𑀳𑀢𑀺𑀬𑁄 𑀯𑀳𑀢𑀻𑀢𑀺 ‘‘𑀧𑀸𑀘𑀻𑀦𑀫𑀼𑀔𑁄’’𑀢𑀺 𑀅𑀯𑀢𑁆𑀯𑀸 ‘‘𑀧𑀸𑀘𑀻𑀦𑀮𑁄𑀓𑀥𑀸𑀢𑀼𑀅𑀪𑀺𑀫𑀼𑀔𑁄’’𑀢𑀺 𑀯𑀼𑀢𑁆𑀢𑀁. 𑀫𑀁𑀲𑀘𑀓𑁆𑀔𑀼𑀧𑀺 𑀮𑁄𑀓𑀦𑀸𑀣𑀲𑁆𑀲 𑀅𑀧𑁆𑀧𑀝𑀺𑀖𑀸𑀢𑀁 𑀫𑀳𑀸𑀯𑀺𑀲𑀬𑀜𑁆𑀘𑀸𑀢𑀺. 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀦𑁆𑀢𑀺 ‘‘𑀓𑀸𑀫𑀁 𑀢𑀘𑁄 𑀘 𑀦𑁆𑀳𑀸𑀭𑀼 𑀘, 𑀅𑀝𑁆𑀞𑀺 𑀘 𑀅𑀯𑀲𑀺𑀲𑁆𑀲𑀢𑀽’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁨.𑁧𑁮𑁪; 𑀲𑀁. 𑀦𑀺. 𑁨.𑁨𑁨, 𑁨𑁩𑁭; 𑀅. 𑀦𑀺. 𑁨.𑁫; 𑀫𑀳𑀸𑀦𑀺. 𑁧𑁯𑁬) 𑀯𑀼𑀢𑁆𑀢𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁.

𑀇𑀤𑀁 𑀧𑀦 𑀲𑀩𑁆𑀩𑀫𑁂𑀯𑀸𑀢𑀺 ‘‘𑀓𑀲𑁆𑀲 𑀦𑀼 𑀔𑁄 𑀅𑀳𑀁 𑀧𑀞𑀫𑀁 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑀁 (𑀫. 𑀦𑀺. 𑁧.𑁨𑁮𑁪; 𑁨.𑁩𑁪𑁧; 𑀫𑀳𑀸𑀯. 𑁧𑁦) 𑀲𑀩𑁆𑀩𑀫𑁂𑀯. 𑀧𑀭𑀺𑀯𑀺𑀢𑀓𑁆𑀓𑀫𑀢𑁆𑀢𑀫𑁂𑀯 𑀢𑀣𑀸 𑀅𑀢𑁆𑀣𑀲𑀺𑀤𑁆𑀥𑀺𑀬𑀸 𑀅𑀪𑀸𑀯𑀢𑁄. 𑀧𑀼𑀧𑁆𑀨𑀺𑀢𑀨𑀮𑀺𑀢𑀁 𑀓𑀢𑁆𑀯𑀸𑀢𑀺 𑀅𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀳𑀺 𑀲𑀩𑁆𑀩𑀧𑀸𑀮𑀺𑀨𑀼𑀮𑁆𑀮𑀁, 𑀫𑀕𑁆𑀕𑀨𑀮𑁂𑀳𑀺 𑀲𑀩𑁆𑀩𑀲𑁄 𑀨𑀮𑀪𑀸𑀭𑀪𑀭𑀺𑀢𑀜𑁆𑀘 𑀓𑀭𑁄𑀦𑁆𑀢𑁄 𑀧𑀼𑀧𑁆𑀨𑀺𑀢𑀁 𑀨𑀮𑀺𑀢𑀁 𑀓𑀢𑁆𑀯𑀸. 𑀅𑀧𑀓𑁆𑀓𑀫𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸𑀢𑀺 𑀤𑁆𑀯𑁂𑀧𑀺 𑀅𑀕𑁆𑀕𑀲𑀸𑀯𑀓𑁂 𑀅𑀢𑁆𑀢𑀦𑁄 𑀦𑀺𑀧𑀘𑁆𑀘𑀓𑀸𑀭𑀁 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 𑀢𑁂𑀲𑀁 𑀕𑀼𑀡𑀸𑀢𑀺𑀭𑁂𑀓𑀢𑀁 𑀩𑀳𑀼 𑀫𑀜𑁆𑀜𑀦𑁆𑀢𑁄 𑀩𑀼𑀤𑁆𑀥𑀸𑀦𑀁 𑀲𑀦𑁆𑀢𑀺𑀓𑀸 𑀅𑀧𑀓𑁆𑀓𑀫𑀺𑀢𑀼𑀓𑀸𑀫𑁄 𑀳𑀼𑀢𑁆𑀯𑀸. 𑀢𑀢𑁆𑀣𑁂𑀯𑀸𑀢𑀺 𑀙𑀤𑁆𑀤𑀦𑁆𑀢𑀤𑀳𑀢𑀻𑀭𑁂𑀬𑁂𑀯.

𑀲𑀸𑀭𑀺𑀧𑀼𑀢𑁆𑀢-𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀯𑀢𑁆𑀣𑀼

𑁧𑁮𑁯-𑁧𑁯𑁦. 𑀤𑀼𑀢𑀺𑀬𑀢𑀢𑀺𑀬𑁂𑀲𑀼 𑀇𑀤𑁆𑀥𑀺𑀫𑀦𑁆𑀢𑀸𑀦𑀦𑁆𑀢𑀺 𑀏𑀢𑁆𑀣 𑀫𑀦𑁆𑀢-𑀲𑀤𑁆𑀤𑁄 𑀅𑀢𑀺𑀲𑀬𑀢𑁆𑀣𑀯𑀺𑀲𑀬𑁄𑀢𑀺 𑀣𑁂𑀭𑀲𑁆𑀲 𑀅𑀢𑀺𑀲𑀬𑀺𑀓𑀇𑀤𑁆𑀥𑀺𑀢𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀇𑀤𑁆𑀥𑀺𑀬𑀸 𑀲𑀫𑁆𑀧𑀦𑁆𑀦𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀳 𑀧𑀁𑀲𑀽𑀳𑀺 𑀓𑀻𑀴𑀺𑀁𑀲𑀽𑀢𑀺 𑀲𑀳𑀧𑀁𑀲𑀼𑀓𑀻𑀴𑀺𑀢𑀸. 𑀇𑀥𑀮𑁄𑀓𑀢𑁆𑀢𑀪𑀸𑀯𑀫𑁂𑀯𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀅𑀢𑁆𑀢𑀪𑀸𑀯𑀫𑁂𑀯. 𑀲𑁄𑀴𑀲 𑀧𑀜𑁆𑀜𑀸 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀞𑀺𑀢𑁄𑀢𑀺 𑀫𑀚𑁆𑀛𑀺𑀫𑀦𑀺𑀓𑀸𑀬𑁂 𑀅𑀦𑀼𑀧𑀤𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 ‘‘𑀫𑀳𑀸𑀧𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄, 𑀧𑀼𑀣𑀼𑀧𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄, 𑀳𑀸𑀲𑀧𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄, 𑀚𑀯𑀦𑀧𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄, 𑀢𑀺𑀓𑁆𑀔𑀧𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄, 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑁄, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄’’𑀢𑀺 (𑀫. 𑀦𑀺. 𑁩.𑁯𑁩) 𑀏𑀯𑀫𑀸𑀕𑀢𑀸 ¶ 𑀫𑀳𑀸𑀧𑀜𑁆𑀜𑀸𑀤𑀺𑀓𑀸 𑀙, 𑀢𑀲𑁆𑀫𑀺𑀁𑀬𑁂𑀯 𑀲𑀼𑀢𑁆𑀢𑁂 𑀆𑀕𑀢𑀸 𑀦𑀯𑀸𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀺𑀧𑀜𑁆𑀜𑀸, 𑀅𑀭𑀳𑀢𑁆𑀢𑀫𑀕𑁆𑀕𑀧𑀜𑁆𑀜𑀸𑀢𑀺 𑀇𑀫𑀸 𑀲𑁄𑀴𑀲𑀯𑀺𑀥𑀸 𑀧𑀜𑁆𑀜𑀸 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀲𑀘𑁆𑀙𑀺𑀓𑀢𑁆𑀯𑀸 𑀞𑀺𑀢𑁄.

𑀧𑀜𑁆𑀳𑀲𑀸𑀓𑀘𑁆𑀙𑀦𑁆𑀢𑀺 ¶ 𑀧𑀜𑁆𑀳𑀲𑁆𑀲 𑀧𑀼𑀘𑁆𑀙𑀦𑀯𑀲𑁂𑀦 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀘 𑀲𑀸𑀓𑀘𑁆𑀙𑀁 𑀓𑀭𑁄𑀢𑀺. 𑀅𑀢𑁆𑀣𑀺𑀓𑁂𑀳𑀺 𑀉𑀧𑀜𑁆𑀜𑀸𑀢𑀁 𑀫𑀕𑁆𑀕𑀦𑁆𑀢𑀺 𑀏𑀢𑀁 𑀅𑀦𑀼𑀩𑀦𑁆𑀥𑀦𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀇𑀤𑀜𑁆𑀳𑀺 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁𑀦𑀽𑀦𑀸𑀳𑀁 𑀇𑀫𑀁 𑀪𑀺𑀓𑁆𑀔𑀼𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑁂𑀬𑁆𑀬𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀇𑀤𑀁 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀦𑀁 𑀦𑀸𑀫 𑀅𑀢𑁆𑀣𑀺𑀓𑁂𑀳𑀺 𑀉𑀧𑀜𑁆𑀜𑀸𑀢𑀁 𑀫𑀕𑁆𑀕𑀁, 𑀜𑀸𑀢𑁄 𑀘𑁂𑀯 𑀉𑀧𑀕𑀢𑁄 𑀘 𑀫𑀕𑁆𑀕𑁄𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀅𑀢𑁆𑀣𑀺𑀓𑁂𑀳𑀺 𑀅𑀫𑁆𑀳𑁂𑀳𑀺 𑀫𑀭𑀡𑁂 𑀲𑀢𑀺 𑀅𑀫𑀢𑁂𑀦𑀧𑀺 𑀪𑀯𑀺𑀢𑀩𑁆𑀩𑀦𑁆𑀢𑀺 𑀏𑀯𑀁 𑀓𑁂𑀯𑀮𑀁 𑀅𑀢𑁆𑀣𑀻𑀢𑀺 𑀉𑀧𑀜𑁆𑀜𑀸𑀢𑀁, 𑀅𑀦𑀼𑀫𑀸𑀦𑀜𑀸𑀡𑁂𑀦 𑀉𑀧𑀕𑀦𑁆𑀢𑁆𑀯𑀸 𑀜𑀸𑀢𑀁 𑀦𑀺𑀩𑁆𑀩𑀸𑀦𑀁 𑀦𑀸𑀫 𑀅𑀢𑁆𑀣𑀺, 𑀢𑀁 𑀫𑀕𑁆𑀕𑀦𑁆𑀢𑁄 𑀧𑀭𑀺𑀬𑁂𑀲𑀦𑁆𑀢𑁄𑀢𑀺 𑀏𑀯𑀫𑁆𑀧𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄.

𑀦𑁂𑀲𑀁 𑀧𑀭𑀺𑀲𑀸𑀬𑀸𑀢𑀺 𑀤𑁆𑀯𑀺𑀦𑁆𑀦𑀁 𑀅𑀕𑁆𑀕𑀲𑀸𑀯𑀓𑀸𑀦𑀁 𑀧𑀭𑀺𑀯𑀸𑀭𑀪𑀽𑀢𑀧𑀭𑀺𑀲𑀸𑀬. 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑁂𑀢𑀺 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑁂 𑀤𑁆𑀯𑁂 𑀫𑀳𑀸𑀦𑀼𑀪𑀸𑀯𑁂 𑀲𑀸𑀯𑀓𑁂. 𑀞𑀸𑀦𑀦𑁆𑀢𑀭𑁂𑀢𑀺 𑀅𑀕𑁆𑀕𑀲𑀸𑀯𑀓𑀢𑁆𑀢𑀲𑀜𑁆𑀜𑀺𑀢𑁂 𑀞𑀸𑀦𑀦𑁆𑀢𑀭𑁂 𑀞𑀧𑁂𑀲𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 ‘‘𑀅𑀕𑁆𑀕𑀲𑀸𑀯𑀓𑁂’’𑀢𑀺 𑀅𑀯𑀢𑁆𑀯𑀸 ‘‘𑀫𑀳𑀸𑀲𑀸𑀯𑀓𑁂’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀅𑀜𑁆𑀜𑁂𑀧𑀺 𑀫𑀳𑀸𑀣𑁂𑀭𑀸 𑀅𑀪𑀺𑀜𑁆𑀜𑀸𑀢𑀸𑀤𑀺𑀕𑀼𑀡𑀯𑀺𑀲𑁂𑀲𑀬𑁄𑀕𑁂𑀦 ‘‘𑀫𑀳𑀸𑀲𑀸𑀯𑀓𑀸’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀮𑀪𑀦𑁆𑀢𑀺, 𑀇𑀫𑁂𑀬𑁂𑀯 𑀧𑀦 𑀲𑀸𑀯𑀓𑁂𑀲𑀼 𑀅𑀦𑀜𑁆𑀜𑀲𑀸𑀥𑀸𑀭𑀡𑀪𑀽𑀢𑀸 𑀯𑀺𑀲𑁂𑀲𑀢𑁄 ‘‘𑀫𑀳𑀸𑀲𑀸𑀯𑀓𑀸’’𑀢𑀺 𑀯𑀢𑁆𑀢𑀩𑁆𑀩𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀤𑁆𑀯𑁂𑀧𑀺 𑀫𑀳𑀸𑀲𑀸𑀯𑀓𑁂’’𑀢𑀺 𑀯𑀼𑀢𑁆𑀢𑀁.

𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑀯𑀢𑁆𑀣𑀼

𑁧𑁯𑁧. 𑀘𑀢𑀼𑀢𑁆𑀣𑁂 𑀬𑀲𑁆𑀫𑀸 𑀥𑀼𑀢𑀯𑀸𑀤𑀥𑀼𑀢𑀥𑀫𑁆𑀫𑀥𑀼𑀢𑀗𑁆𑀕𑀸𑀦𑀺 𑀥𑀼𑀢𑀫𑀽𑀮𑀓𑀸𑀦𑀺, 𑀢𑀲𑁆𑀫𑀸 ‘‘𑀥𑀼𑀢𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀆𑀭𑀤𑁆𑀥𑀁, 𑀢𑀢𑁆𑀣 𑀓𑀺𑀮𑁂𑀲𑁂 𑀥𑀼𑀦𑀺 𑀥𑀼𑀢𑀯𑀸𑀢𑀺 𑀥𑀼𑀢𑁄, 𑀥𑀼𑀢𑀓𑀺𑀮𑁂𑀲𑁄 𑀧𑀼𑀕𑁆𑀕𑀮𑁄, 𑀓𑀺𑀮𑁂𑀲𑀥𑀼𑀦𑀦𑁄 𑀯𑀸 𑀥𑀫𑁆𑀫𑁄, 𑀓𑀺𑀮𑁂𑀲𑀥𑀼𑀦𑀦𑁄 𑀥𑀫𑁆𑀫𑁄𑀢𑀺 𑀘 𑀲𑀧𑀼𑀩𑁆𑀩𑀪𑀸𑀕𑁄 𑀅𑀭𑀺𑀬𑀫𑀕𑁆𑀕𑁄 𑀤𑀝𑁆𑀞𑀩𑁆𑀩𑁄. 𑀢𑀁 𑀥𑀼𑀢𑀲𑀜𑁆𑀜𑀺𑀢𑀁 𑀓𑀺𑀮𑁂𑀲𑀥𑀼𑀦𑀦𑀥𑀫𑁆𑀫𑀁 𑀯𑀤𑀢𑀺, 𑀧𑀭𑁂 𑀢𑀢𑁆𑀣 𑀧𑀢𑀺𑀝𑁆𑀞𑀸𑀧𑁂𑀢𑀻𑀢𑀺 𑀥𑀼𑀢𑀯𑀸𑀤𑁄. 𑀘𑀢𑀼𑀓𑁆𑀓𑀜𑁆𑀘𑁂𑀢𑁆𑀣 𑀲𑀫𑁆𑀪𑀯𑀢𑀻𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀏𑀢𑁆𑀣 𑀧𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀢𑀬𑀺𑀤𑀦𑁆𑀢𑀺 𑀦𑀺𑀧𑀸𑀢𑁄, 𑀢𑀲𑁆𑀲 𑀲𑁄 𑀅𑀬𑀦𑁆𑀢𑀺 𑀅𑀢𑁆𑀣𑁄. 𑀥𑀼𑀢𑀪𑀽𑀢𑀲𑁆𑀲 𑀥𑀼𑀢𑀪𑀽𑀢𑀸 𑀥𑀫𑁆𑀫𑀸 𑀥𑀼𑀢𑀥𑀫𑁆𑀫𑀸. 𑀅𑀧𑁆𑀧𑀺𑀘𑁆𑀙𑀢𑀸 𑀲𑀦𑁆𑀢𑀼𑀝𑁆𑀞𑀺𑀢𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀸 𑀏𑀯 ¶ . 𑀓𑀺𑀮𑁂𑀲𑁂 𑀲𑀫𑁆𑀫𑀸 𑀮𑀺𑀔𑀢𑀺 𑀢𑀘𑁆𑀙𑀢𑀻𑀢𑀺 𑀲𑀮𑁆𑀮𑁂𑀔𑁄, 𑀓𑀺𑀮𑁂𑀲𑀚𑁂𑀕𑀼𑀘𑁆𑀙𑀻, 𑀢𑀲𑁆𑀲 𑀪𑀸𑀯𑁄 𑀲𑀮𑁆𑀮𑁂𑀔𑀢𑀸. 𑀤𑁆𑀯𑀻𑀳𑀺𑀧𑀺 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘𑀢𑀻𑀢𑀺 𑀧𑀯𑀺𑀯𑁂𑀓𑁄, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀩𑀳𑀼𑀮𑁄 𑀧𑀼𑀕𑁆𑀕𑀮𑁄, 𑀢𑀲𑁆𑀲 𑀪𑀸𑀯𑁄 𑀧𑀯𑀺𑀯𑁂𑀓𑀢𑀸. 𑀇𑀫𑀺𑀦𑀸 𑀲𑀭𑀻𑀭𑀝𑁆𑀞𑀧𑀦𑀫𑀢𑁆𑀢𑁂𑀦 𑀅𑀢𑁆𑀣𑀻𑀢𑀺 𑀇𑀤𑀫𑀝𑁆𑀞𑀺 𑀢𑁆𑀣-𑀓𑀸𑀭𑀲𑁆𑀲 𑀝𑁆𑀞-𑀓𑀸𑀭𑀁 𑀓𑀢𑁆𑀯𑀸, 𑀢𑀲𑁆𑀲 𑀪𑀸𑀯𑁄 𑀇𑀤𑀫𑀝𑁆𑀞𑀺𑀢𑀸, 𑀇𑀫𑁂𑀳𑀺 𑀯𑀸 𑀓𑀼𑀲𑀮𑀥𑀫𑁆𑀫𑁂𑀳𑀺 𑀅𑀢𑁆𑀣𑀺 𑀇𑀤𑀫𑀝𑁆𑀞𑀺, 𑀬𑁂𑀦 𑀜𑀸𑀡𑁂𑀦 ‘‘𑀧𑀩𑁆𑀩𑀚𑀺𑀢𑁂𑀦 𑀦𑀸𑀫 𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀸𑀤𑀻𑀲𑀼 𑀧𑀢𑀺𑀝𑁆𑀞𑀺𑀢𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀬𑀣𑀸𑀦𑀼𑀲𑀺𑀝𑁆𑀞𑀁 𑀥𑀼𑀢𑀕𑀼𑀡𑁂 𑀲𑀫𑀸𑀤𑀺𑀬𑀢𑀺 𑀘𑁂𑀯 𑀧𑀭𑀺𑀳𑀭𑀢𑀺 𑀘, 𑀢𑀁 𑀜𑀸𑀡𑀁 𑀇𑀤𑀫𑀝𑁆𑀞𑀺𑀢𑀸. 𑀢𑁂𑀦𑀸𑀳 𑁋 ‘‘𑀇𑀤𑀫𑀝𑁆𑀞𑀺𑀢𑀸 𑀜𑀸𑀡𑀫𑁂𑀯𑀸’’𑀢𑀺. 𑀥𑀼𑀢𑀥𑀫𑁆𑀫𑀸 𑀦𑀸𑀫𑀸𑀢𑀺 𑀥𑀼𑀢𑀗𑁆𑀕𑀲𑁂𑀯𑀦𑀸𑀬 𑀧𑀝𑀺𑀧𑀓𑁆𑀔𑀪𑀽𑀢𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀥𑀼𑀦𑀦𑀯𑀲𑁂𑀦 𑀧𑀯𑀢𑁆𑀢𑀺𑀬𑀸 𑀥𑀼𑀢𑁄𑀢𑀺 𑀮𑀤𑁆𑀥𑀦𑀸𑀫𑀸𑀬 𑀥𑀼𑀢𑀗𑁆𑀕𑀘𑁂𑀢𑀦𑀸𑀬 𑀉𑀧𑀓𑀸𑀭𑀓𑀸 𑀥𑀫𑁆𑀫𑀸𑀢𑀺 𑀓𑀢𑁆𑀯𑀸 𑀥𑀼𑀢𑀥𑀫𑁆𑀫𑀸 𑀦𑀸𑀫 ¶ . 𑀅𑀦𑀼𑀧𑀢𑀦𑁆𑀢𑀻𑀢𑀺 𑀢𑀤𑀦𑁆𑀢𑁄𑀕𑀥𑀸 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀸 𑀳𑁄𑀦𑁆𑀢𑀺 𑀢𑀤𑀼𑀪𑀬𑀲𑁆𑀲𑁂𑀯 𑀧𑀯𑀢𑁆𑀢𑀺𑀯𑀺𑀲𑁂𑀲𑀪𑀸𑀯𑀢𑁄. 𑀧𑀝𑀺𑀓𑁆𑀔𑁂𑀧𑀯𑀢𑁆𑀣𑀽𑀲𑀽𑀢𑀺 𑀥𑀼𑀢𑀗𑁆𑀕𑀲𑁂𑀯𑀦𑀸𑀬 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀯𑀢𑁆𑀣𑀽𑀲𑀼 𑀧𑀳𑀸𑀢𑀩𑁆𑀩𑀯𑀢𑁆𑀣𑀽𑀲𑀼.

𑀧𑀁𑀲𑀼𑀓𑀽𑀮𑀺𑀓𑀗𑁆𑀕𑀁…𑀧𑁂… 𑀦𑁂𑀲𑀚𑁆𑀚𑀺𑀓𑀗𑁆𑀕𑀦𑁆𑀢𑀺 𑀉𑀤𑁆𑀤𑁂𑀲𑁄𑀧𑀺 𑀧𑁂𑀬𑁆𑀬𑀸𑀮𑀦𑀬𑁂𑀦 𑀤𑀲𑁆𑀲𑀺𑀢𑁄. 𑀬𑀤𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀲𑀩𑁆𑀩𑀁 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁨𑁨 𑀆𑀤𑀬𑁄) 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀁. 𑀥𑀼𑀢𑀯𑀸𑀤𑀕𑁆𑀕𑀳𑀡𑁂𑀦𑁂𑀯 𑀣𑁂𑀭𑀲𑁆𑀲 𑀥𑀼𑀢𑀪𑀸𑀯𑁄𑀧𑀺 𑀕𑀳𑀺𑀢𑁄 𑀳𑁄𑀢𑀻𑀢𑀺 ‘‘𑀥𑀼𑀢𑀯𑀸𑀤𑀸𑀦’’𑀦𑁆𑀢𑁂𑀯 𑀯𑀼𑀢𑁆𑀢𑀁. 𑀅𑀬𑀁 𑀫𑀳𑀸𑀢𑀺 𑀅𑀪𑀺𑀦𑀻𑀳𑀸𑀭𑀸𑀤𑀺𑀫𑀳𑀦𑁆𑀢𑀢𑀸𑀬𑀧𑀺 𑀲𑀸𑀲𑀦𑀲𑁆𑀲 𑀉𑀧𑀓𑀸𑀭𑀺𑀢𑀸𑀬𑀧𑀺 𑀅𑀬𑀁 𑀣𑁂𑀭𑁄 𑀫𑀳𑀸, 𑀕𑀼𑀡𑀫𑀳𑀦𑁆𑀢𑀢𑀸𑀬 𑀧𑀲𑀁𑀲𑀸𑀯𑀘𑀦𑀫𑁂𑀯 𑀯𑀸 𑀏𑀢𑀁 𑀣𑁂𑀭𑀲𑁆𑀲 𑀬𑀤𑀺𑀤𑀁 𑀫𑀳𑀸𑀓𑀲𑁆𑀲𑀧𑁄𑀢𑀺 𑀬𑀣𑀸 ‘‘𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄’’𑀢𑀺.

𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀸𑀬 𑀯𑀢𑁆𑀣𑀼𑀢𑁆𑀢𑀬𑁂 𑀲𑀜𑁆𑀚𑀸𑀢𑀧𑁆𑀧𑀲𑀸𑀤𑀢𑀸𑀬 𑀉𑀧𑀸𑀲𑀓𑀪𑀸𑀯𑁂 𑀞𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 𑁋 ‘‘𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬𑀸’’𑀢𑀺𑀆𑀤𑀺. 𑀏𑀢𑀲𑁆𑀲 𑀅𑀕𑁆𑀕𑀪𑀸𑀯𑀲𑁆𑀲𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀲𑀘𑁆𑀘𑀓𑀸𑀭𑁄𑀢𑀺 𑀲𑀘𑁆𑀘𑀪𑀸𑀯𑀸𑀯𑀳𑁄 𑀓𑀸𑀭𑁄, 𑀅𑀯𑀺𑀲𑀁𑀯𑀸𑀤𑀦𑀯𑀲𑁂𑀦 𑀯𑀸 𑀢𑀤𑀢𑁆𑀣𑀲𑀸𑀥𑀦𑁄𑀢𑀺 𑀅𑀢𑁆𑀣𑁄. 𑀓𑁄𑀮𑀸𑀳𑀮𑀦𑁆𑀢𑀺 𑀓𑀼𑀢𑀽𑀳𑀮𑀯𑀺𑀧𑁆𑀨𑀸𑀭𑁄. 𑀲𑀢𑁆𑀣𑀸 𑀲𑀢𑁆𑀢𑀫𑁂 𑀲𑀢𑁆𑀢𑀫𑁂 𑀲𑀁𑀯𑀘𑁆𑀙𑀭𑁂 𑀥𑀫𑁆𑀫𑀁 𑀓𑀣𑁂𑀦𑁆𑀢𑁄 𑀲𑀢𑁆𑀢𑀸𑀦𑀁 𑀲𑀯𑀦𑀬𑁄𑀕𑁆𑀕𑀁 𑀓𑀸𑀮𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀤𑀺𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀓𑀣𑁂𑀢𑀺, 𑀭𑀢𑁆𑀢𑀺𑀬𑀁 𑀲𑀓𑀮𑀬𑀸𑀫𑀁. 𑀢𑁂𑀦𑀸𑀳 𑁋 ‘‘𑀩𑁆𑀭𑀸𑀳𑁆𑀫𑀡𑁄 𑀩𑁆𑀭𑀸𑀳𑁆𑀫𑀡𑁂 𑀆𑀳 𑁋 ‘𑀪𑁄𑀢𑀺 𑀓𑀺𑀁 𑀭𑀢𑁆𑀢𑀺𑀁 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀲𑀺 𑀤𑀺𑀯𑀸’’’𑀢𑀺. 𑀯𑀺𑀲𑁆𑀲𑀸𑀲𑀺𑀓𑁄𑀢𑀺 𑀯𑀺𑀲𑁆𑀲𑀸𑀲𑀺𑀓𑀪𑀸𑀯𑁄. ‘‘𑀢𑀢𑁄 𑀧𑀝𑁆𑀞𑀸𑀬 𑀲𑁄’’𑀢𑀺 𑀯𑀸 𑀧𑀸𑀞𑁄.

𑀤𑁆𑀯𑁂 ¶ 𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀦𑀺 𑀧𑀽𑀭𑀺𑀢𑀧𑀸𑀭𑀫𑀺𑀲𑁆𑀲𑀸𑀢𑀺 𑀇𑀤𑀁 𑀲𑀸 𑀧𑀭𑀫𑁆𑀧𑀭𑀸𑀬 𑀲𑁄𑀢𑀧𑀢𑀺𑀢𑀁 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀆𑀳. 𑀅𑀤𑀺𑀦𑁆𑀦𑀯𑀺𑀧𑀸𑀓𑀲𑁆𑀲𑀸𑀢𑀺 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀲𑁆𑀲. 𑀪𑀤𑁆𑀤𑀓𑁂 𑀓𑀸𑀮𑁂𑀢𑀺 𑀬𑀼𑀢𑁆𑀢𑁂 𑀓𑀸𑀮𑁂. 𑀦𑀓𑁆𑀔𑀢𑁆𑀢𑀦𑁆𑀢𑀺 𑀦𑀓𑁆𑀔𑀢𑁆𑀢𑁂𑀦 𑀮𑀓𑁆𑀔𑀺𑀢𑀁 𑀙𑀡𑀁. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀜𑁆𑀳𑀺 𑀦𑀓𑁆𑀔𑀢𑁆𑀢𑁂 𑀅𑀦𑀼𑀪𑀯𑀺𑀢𑀩𑁆𑀩𑀙𑀡𑀸𑀦𑀺 𑀦𑀓𑁆𑀔𑀢𑁆𑀢𑀸𑀦𑀺 𑀦𑀸𑀫, 𑀇𑀢𑀭𑀸𑀦𑀺 𑀧𑀦 𑀙𑀡𑀸𑀦𑀺 𑀦𑀸𑀫. 𑀲𑀫𑁆𑀫𑀸𑀧𑀢𑀺𑀢𑀤𑀼𑀓𑁆𑀔𑀢𑁄 𑀯𑀺𑀫𑁄𑀘𑀦𑁂𑀦 𑀢𑀢𑁄 𑀦𑀺𑀬𑁆𑀬𑀸𑀦𑀸𑀯𑀳𑀢𑀸𑀬 𑀇𑀘𑁆𑀙𑀺𑀢𑀢𑁆𑀣𑀲𑁆𑀲 𑀮𑀪𑀸𑀧𑀦𑀢𑁄 𑀘 𑀦𑀺𑀬𑁆𑀬𑀸𑀦𑀺𑀓𑀁. 𑀢𑁂𑀲𑀦𑁆𑀢𑀺 𑀲𑀼𑀯𑀡𑁆𑀡𑀧𑀤𑀼𑀫𑀸𑀦𑀁. 𑀑𑀮𑀫𑁆𑀩𑀓𑀸𑀢𑀺 𑀲𑀼𑀯𑀡𑁆𑀡𑀭𑀢𑀦𑀯𑀺𑀘𑀺𑀢𑁆𑀢𑀸 𑀭𑀢𑀦𑀤𑀸𑀫𑀸. 𑀧𑀼𑀜𑁆𑀜𑀦𑀺𑀬𑀸𑀫𑁂𑀦𑀸𑀢𑀺 𑀧𑀼𑀜𑁆𑀜𑀸𑀦𑀼𑀪𑀸𑀯𑀲𑀺𑀤𑁆𑀥𑁂𑀦 𑀦𑀺𑀬𑀸𑀫𑁂𑀦. 𑀲𑁆𑀯𑀲𑁆𑀲 𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀤𑀸𑀢𑀼𑀁 𑀓𑀢𑁄𑀓𑀸𑀲𑁄. 𑀨𑀼𑀲𑁆𑀲𑀭𑀣𑀦𑁆𑀢𑀺 𑀫𑀗𑁆𑀕𑀮𑀭𑀣𑀁. 𑀲𑁂𑀢𑀘𑁆𑀙𑀢𑁆𑀢𑀉𑀡𑁆𑀳𑀻𑀲𑀯𑀸𑀮𑀩𑀻𑀚𑀦𑀺𑀔𑀕𑁆𑀕𑀫𑀡𑀺𑀧𑀸𑀤𑀼𑀓𑀸𑀦𑀺 𑀧𑀜𑁆𑀘𑀯𑀺𑀥𑀁 𑀭𑀸𑀚𑀓𑀓𑀼𑀥𑀪𑀡𑁆𑀟𑀦𑁆𑀢𑀺 𑀯𑀤𑀦𑁆𑀢𑀺. 𑀇𑀥 𑀧𑀦 𑀲𑁂𑀢𑀘𑁆𑀙𑀢𑁆𑀢𑀁 𑀯𑀺𑀲𑀼𑀁 𑀕𑀳𑀺𑀢𑀦𑁆𑀢𑀺 𑀲𑀻𑀳𑀸𑀲𑀦𑀁 𑀧𑀜𑁆𑀘𑀫𑀁 𑀓𑀢𑁆𑀯𑀸 𑀯𑀤𑀦𑁆𑀢𑀺. 𑀧𑀸𑀭𑀼𑀧𑀦𑀓𑀡𑁆𑀡𑀦𑁆𑀢𑀺 𑀧𑀸𑀭𑀼𑀧𑀦𑀯𑀢𑁆𑀣𑀲𑁆𑀲 𑀤𑀲𑀦𑁆𑀢𑀁. 𑀤𑀺𑀩𑁆𑀩𑀯𑀢𑁆𑀣𑀤𑀸𑀬𑀺𑀧𑀼𑀜𑁆𑀜𑀸𑀦𑀼𑀪𑀸𑀯𑀘𑁄𑀤𑀺𑀢𑁄 ‘‘𑀦𑀦𑀼 𑀢𑀸𑀢𑀸 𑀣𑀽𑀮’’𑀦𑁆𑀢𑀺 𑀆𑀳. 𑀅𑀳𑁄 𑀢𑀧𑀲𑁆𑀲𑀻𑀢𑀺 𑀅𑀳𑁄 𑀓𑀧𑀡𑁄 𑀅𑀳𑀁 𑀭𑀸𑀚𑀸𑀢𑀺 𑀅𑀢𑁆𑀣𑁄. 𑀩𑀼𑀤𑁆𑀥𑀸𑀦𑀁 𑀲𑀤𑁆𑀤𑀳𑀺𑀢𑁆𑀯𑀸𑀢𑀺 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀲𑀤𑁆𑀤𑀳𑀺𑀢𑁆𑀯𑀸. 𑀘𑀗𑁆𑀓𑀫𑀦𑀲𑀢𑀸𑀦𑀻𑀢𑀺 𑀇𑀢𑀺-𑀲𑀤𑁆𑀤𑁄 𑀆𑀤𑁆𑀬𑀢𑁆𑀣𑁄. 𑀢𑁂𑀦 𑀳𑀺 𑀅𑀕𑁆𑀕𑀺𑀲𑀸𑀮𑀸𑀤𑀻𑀦𑀺 𑀧𑀩𑁆𑀩𑀚𑀺𑀢𑀲𑀸𑀭𑀼𑀧𑁆𑀧𑀸𑀦𑀺 𑀞𑀸𑀦𑀸𑀦𑀺 𑀲𑀗𑁆𑀕𑀡𑁆𑀳𑀸𑀢𑀺.

𑀲𑀸𑀥𑀼𑀓𑀻𑀴𑀺𑀢𑀦𑁆𑀢𑀺 ¶ 𑀅𑀭𑀺𑀬𑀸𑀦𑀁 𑀧𑀭𑀺𑀦𑀺𑀩𑁆𑀩𑀼𑀢𑀝𑁆𑀞𑀸𑀦𑁂 𑀓𑀸𑀢𑀩𑁆𑀩𑀲𑀓𑁆𑀓𑀸𑀭𑀁 𑀯𑀤𑀢𑀺. 𑀦𑀧𑁆𑀧𑀫𑀚𑁆𑀚𑀺, 𑀦𑀺𑀭𑁄𑀕𑀸 𑀅𑀬𑁆𑀬𑀸𑀢𑀺 𑀧𑀼𑀘𑁆𑀙𑀺𑀢𑀸𑀓𑀸𑀭𑀤𑀲𑁆𑀲𑀦𑀁. 𑀧𑀭𑀺𑀦𑀺𑀩𑁆𑀩𑀼𑀢𑀸 𑀤𑁂𑀯𑀸𑀢𑀺 𑀤𑁂𑀯𑀻 𑀧𑀝𑀺𑀯𑀘𑀦𑀁 𑀅𑀤𑀸𑀲𑀺. 𑀧𑀝𑀺𑀬𑀸𑀤𑁂𑀢𑁆𑀯𑀸𑀢𑀺 𑀦𑀺𑀬𑁆𑀬𑀸𑀢𑁂𑀢𑁆𑀯𑀸. 𑀲𑀫𑀡𑀓𑀧𑀩𑁆𑀩𑀚𑁆𑀚𑀦𑁆𑀢𑀺 𑀲𑀫𑀺𑀢𑀧𑀸𑀧𑁂𑀳𑀺 𑀅𑀭𑀺𑀬𑁂𑀳𑀺 𑀅𑀦𑀼𑀝𑁆𑀞𑀸𑀢𑀩𑁆𑀩𑀧𑀩𑁆𑀩𑀚𑁆𑀚𑀁. 𑀲𑁄 𑀳𑀺 𑀭𑀸𑀚𑀸 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀯𑁂𑀲𑀲𑁆𑀲 𑀤𑀺𑀝𑁆𑀞𑀢𑁆𑀢𑀸 ‘‘𑀇𑀤𑀫𑁂𑀯 𑀪𑀤𑁆𑀤𑀓’’𑀦𑁆𑀢𑀺 𑀢𑀸𑀤𑀺𑀲𑀁𑀬𑁂𑀯 𑀮𑀺𑀗𑁆𑀕𑀁 𑀕𑀡𑁆𑀳𑀺. 𑀢𑀢𑁆𑀣𑁂𑀯𑀸𑀢𑀺 𑀩𑁆𑀭𑀳𑁆𑀫𑀮𑁄𑀓𑁂 𑀏𑀯. 𑀯𑀻𑀲𑀢𑀺𑀫𑁂 𑀯𑀲𑁆𑀲𑁂 𑀲𑀫𑁆𑀧𑀢𑁆𑀢𑁂𑀢𑀺 𑀆𑀳𑀭𑀺𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀩𑁆𑀭𑀳𑁆𑀫𑀮𑁄𑀓𑀢𑁄 𑀘𑀯𑀺𑀢𑁆𑀯𑀸 𑀦𑀺𑀩𑁆𑀩𑀢𑁆𑀢𑀢𑁆𑀢𑀸, 𑀩𑁆𑀭𑀳𑁆𑀫𑀘𑀭𑀺𑀬𑀸𑀥𑀺𑀓𑀸𑀭𑀲𑁆𑀲 𑀘 𑀘𑀺𑀭𑀓𑀸𑀮𑀲𑀫𑁆𑀪𑀽𑀢𑀢𑁆𑀢𑀸 ‘‘𑀏𑀯𑀭𑀽𑀧𑀁 𑀓𑀣𑀁 𑀫𑀸 𑀓𑀣𑁂𑀣𑀸’’𑀢𑀺 𑀆𑀳. 𑀯𑀻𑀲𑀢𑀺 𑀥𑀭𑀡𑀸𑀦𑀺 𑀦𑀺𑀓𑁆𑀔𑀦𑁆𑀢𑀺 𑀯𑀤𑀦𑁆𑀢𑀺, 𑀧𑀜𑁆𑀘𑀧𑀮𑀁 𑀦𑀺𑀓𑁆𑀔𑀦𑁆𑀢𑀺 𑀅𑀧𑀭𑁂. 𑀇𑀢𑁆𑀣𑀸𑀓𑀭𑁄𑀢𑀺 𑀇𑀢𑁆𑀣𑀺𑀭𑀢𑀦𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁. 𑀅𑀬𑁆𑀬𑀥𑀻𑀢𑀸𑀢𑀺 𑀅𑀫𑁆𑀳𑀸𑀓𑀁 𑀅𑀬𑁆𑀬𑀲𑁆𑀲 𑀥𑀻𑀢𑀸, 𑀪𑀤𑁆𑀤𑀓𑀸𑀧𑀺𑀮𑀸𑀦𑀻𑀢𑀺 𑀅𑀢𑁆𑀣𑁄. 𑀲𑀫𑀸𑀦𑀧𑀡𑁆𑀡𑀦𑁆𑀢𑀺 𑀲𑀤𑀺𑀲𑀧𑀡𑁆𑀡𑀁 𑀲𑀤𑀺𑀲𑀮𑁂𑀔𑀁 𑀓𑀼𑀫𑀸𑀭𑀲𑁆𑀲 𑀓𑀼𑀫𑀸𑀭𑀺𑀓𑀸𑀬 𑀘 𑀬𑀼𑀢𑁆𑀢𑀁 𑀧𑀡𑁆𑀡𑀮𑁂𑀔𑀁. 𑀢𑁂 𑀧𑀼𑀭𑀺𑀲𑀸 𑀲𑀫𑀸𑀕𑀢𑀝𑁆𑀞𑀸𑀦𑀢𑁄 𑀫𑀕𑀥𑀭𑀝𑁆𑀞𑁂 𑀫𑀳𑀸𑀢𑀺𑀢𑁆𑀣𑀕𑀸𑀫𑀁 𑀫𑀤𑁆𑀤𑀭𑀝𑁆𑀞𑁂 𑀲𑀸𑀕𑀮𑀦𑀕𑀭𑀜𑁆𑀘 𑀉𑀤𑁆𑀤𑀺𑀲𑁆𑀲 𑀅𑀧𑀓𑁆𑀓𑀫𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀁 𑀯𑀺𑀲𑁆𑀲𑀚𑁆𑀚𑀦𑁆𑀢𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 ‘‘𑀇𑀢𑁄 𑀘 𑀏𑀢𑁆𑀢𑁄 𑀘 𑀧𑁂𑀲𑁂𑀲𑀼’’𑀦𑁆𑀢𑀺 𑀯𑀼𑀢𑁆𑀢𑀸.

𑀧𑀼𑀧𑁆𑀨𑀤𑀸𑀫𑀦𑁆𑀢𑀺 𑀳𑀢𑁆𑀣𑀺𑀳𑀢𑁆𑀣𑀧𑁆𑀧𑀫𑀸𑀡𑀁 𑀧𑀼𑀧𑁆𑀨𑀤𑀸𑀫𑀁. 𑀢𑀸𑀦𑀻𑀢𑀺 𑀢𑀸𑀦𑀺 𑀉𑀪𑁄𑀳𑀺 𑀕𑀦𑁆𑀣𑀸𑀧𑀺𑀢𑀸𑀦𑀺 𑀤𑁆𑀯𑁂 𑀧𑀼𑀧𑁆𑀨𑀤𑀸𑀫𑀸𑀦𑀺. 𑀢𑁂𑀢𑀺 𑀉𑀪𑁄 𑀪𑀤𑁆𑀤𑀸 𑀘𑁂𑀯 𑀧𑀺𑀧𑁆𑀧𑀮𑀺𑀓𑀼𑀫𑀸𑀭𑁄 𑀘 ¶ . 𑀮𑁄𑀓𑀸𑀫𑀺𑀲𑁂𑀦𑀸𑀢𑀺 𑀓𑀸𑀫𑀲𑁆𑀲𑀸𑀤𑁂𑀦. 𑀅𑀲𑀁𑀲𑀝𑁆𑀞𑀸𑀢𑀺 𑀦 𑀲𑀁𑀬𑀼𑀢𑁆𑀢𑀸 𑀖𑀝𑁂 𑀚𑀮𑀦𑁆𑀢𑁂𑀦 𑀯𑀺𑀬 𑀧𑀤𑀻𑀧𑁂𑀦 𑀅𑀚𑁆𑀛𑀸𑀲𑀬𑁂 𑀲𑀫𑀼𑀚𑁆𑀚𑀮𑀦𑁆𑀢𑁂𑀦 𑀯𑀺𑀫𑁄𑀓𑁆𑀔𑀩𑀻𑀚𑁂𑀦 𑀲𑀫𑀼𑀲𑁆𑀲𑀸𑀳𑀺𑀢𑀘𑀺𑀢𑁆𑀢𑀢𑁆𑀢𑀸. 𑀬𑀦𑁆𑀢𑀩𑀤𑁆𑀥𑀸𑀦𑀻𑀢𑀺 𑀲𑀲𑁆𑀲𑀲𑀫𑁆𑀧𑀸𑀤𑀦𑀢𑁆𑀣𑀁 𑀢𑀢𑁆𑀣 𑀢𑀢𑁆𑀣 𑀤𑁆𑀯𑀸𑀭𑀓𑀯𑀸𑀝𑀬𑁄𑀚𑀦𑀯𑀲𑁂𑀦 𑀩𑀤𑁆𑀥𑀸𑀦𑀺 𑀦𑀺𑀓𑁆𑀔𑀫𑀦𑀢𑀼𑀫𑁆𑀩𑀸𑀦𑀺. 𑀓𑀫𑁆𑀫𑀦𑁆𑀢𑁄𑀢𑀺 𑀓𑀲𑀺𑀓𑀫𑁆𑀫𑀓𑀭𑀡𑀝𑁆𑀞𑀸𑀦𑀁. 𑀤𑀸𑀲𑀺𑀓𑀕𑀸𑀫𑀸𑀢𑀺 𑀤𑀸𑀲𑀸𑀦𑀁 𑀯𑀲𑀦𑀕𑀸𑀫𑀸. 𑀑𑀲𑀸𑀭𑁂𑀢𑁆𑀯𑀸𑀢𑀺 𑀧𑀓𑁆𑀔𑀺𑀧𑀺𑀢𑁆𑀯𑀸. 𑀆𑀓𑀧𑁆𑀧𑀓𑀼𑀢𑁆𑀢𑀯𑀲𑁂𑀦𑀸𑀢𑀺 𑀆𑀓𑀸𑀭𑀯𑀲𑁂𑀦 𑀓𑀺𑀭𑀺𑀬𑀸𑀯𑀲𑁂𑀦. 𑀅𑀦𑀦𑀼𑀘𑁆𑀙𑀯𑀺𑀓𑀦𑁆𑀢𑀺 𑀧𑀩𑁆𑀩𑀚𑀺𑀢𑀪𑀸𑀯𑀲𑁆𑀲 𑀅𑀦𑀦𑀼𑀭𑀽𑀧𑀁. 𑀢𑀲𑁆𑀲 𑀫𑀢𑁆𑀣𑀓𑁂𑀢𑀺 𑀤𑁆𑀯𑁂𑀥𑀸𑀧𑀣𑀲𑁆𑀲 𑀤𑁆𑀯𑀺𑀥𑀸𑀪𑀽𑀢𑀝𑁆𑀞𑀸𑀦𑁂. 𑀏𑀢𑁂𑀲𑀁 𑀲𑀗𑁆𑀕𑀳𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀦𑀺𑀲𑀻𑀤𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀸 𑀧𑀦 𑀢𑀢𑁆𑀣 𑀲𑀢𑁆𑀣𑀼 𑀦𑀺𑀲𑀚𑁆𑀚𑀸 𑀏𑀤𑀺𑀲𑀻𑀢𑀺 𑀤𑀲𑁆𑀲𑁂𑀢𑀼𑀁 𑁋 ‘‘𑀦𑀺𑀲𑀻𑀤𑀦𑁆𑀢𑁄 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀸 𑀩𑀼𑀤𑁆𑀥𑀸𑀦𑀁 𑀅𑀧𑀭𑀺𑀫𑀺𑀢𑀓𑀸𑀮𑀲𑀫𑁆𑀪𑀽𑀢𑀸𑀘𑀺𑀦𑁆𑀢𑁂𑀬𑁆𑀬𑀸𑀧𑀭𑀺𑀜𑁆𑀜𑁂𑀬𑁆𑀬𑀧𑀼𑀜𑁆𑀜𑀲𑀫𑁆𑀪𑀸𑀭𑀽𑀧𑀘𑀬𑀦𑀺𑀩𑁆𑀩𑀢𑁆𑀢𑀸 𑀭𑀽𑀧𑀧𑁆𑀧𑀪𑀸𑀯𑀩𑀼𑀤𑁆𑀥𑀕𑀼𑀡𑀯𑀺𑀚𑁆𑀚𑁄𑀢𑀺𑀢𑀸 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀅𑀲𑀻𑀢𑀺𑀅𑀦𑀼𑀩𑁆𑀬𑀜𑁆𑀚𑀦𑀲𑀫𑀼𑀚𑁆𑀚𑀮𑀺𑀢𑀸 𑀩𑁆𑀬𑀸𑀫𑀧𑁆𑀧𑀪𑀸𑀓𑁂𑀢𑀼𑀫𑀸𑀮𑀸𑀮𑀗𑁆𑀓𑀢𑀸 𑀲𑀪𑀸𑀯𑀲𑀺𑀤𑁆𑀥𑀺𑀢𑀸𑀬 𑀅𑀓𑀺𑀢𑁆𑀢𑀺𑀫𑀸 𑀭𑀽𑀧𑀓𑀸𑀬𑀲𑀺𑀭𑀻, 𑀢𑀁𑀬𑁂𑀯 𑀫𑀳𑀸𑀓𑀲𑁆𑀲𑀧𑀲𑁆𑀲 𑀅𑀤𑀺𑀝𑁆𑀞𑀧𑀼𑀩𑁆𑀩𑀧𑁆𑀧𑀲𑀸𑀤𑀲𑀁𑀯𑀤𑁆𑀥𑀦𑀢𑁆𑀣𑀁 𑀅𑀦𑀺𑀕𑁆𑀕𑀽𑀳𑀺𑀢𑁆𑀯𑀸 𑀦𑀺𑀲𑀺𑀦𑁆𑀦𑁄 𑀪𑀕𑀯𑀸 ‘‘𑀩𑀼𑀤𑁆𑀥𑀯𑁂𑀲𑀁 𑀕𑀳𑁂𑀢𑁆𑀯𑀸…𑀧𑁂… 𑀦𑀺𑀲𑀻𑀤𑀻’’𑀢𑀺 𑀯𑀼𑀢𑁆𑀢𑁄. 𑀅𑀲𑀻𑀢𑀺𑀳𑀢𑁆𑀣𑀧𑁆𑀧𑀤𑁂𑀲𑀁 𑀩𑁆𑀬𑀸𑀧𑁂𑀢𑁆𑀯𑀸 𑀧𑀯𑀢𑁆𑀢𑀺𑀬𑀸 𑀅𑀲𑀻𑀢𑀺𑀳𑀢𑁆𑀣𑀸𑀢𑀺 𑀯𑀼𑀢𑁆𑀢𑀸. 𑀲𑀢𑀲𑀸𑀔𑁄𑀢𑀺 𑀩𑀳𑀼𑀲𑀸𑀔𑁄 𑀅𑀦𑁂𑀓𑀲𑀸𑀔𑁄. 𑀲𑀼𑀯𑀡𑁆𑀡𑀯𑀡𑁆𑀡𑁄𑀯 𑀅𑀳𑁄𑀲𑀺 𑀦𑀺𑀭𑀦𑁆𑀢𑀭𑀁 𑀩𑀼𑀤𑁆𑀥𑀭𑀲𑁆𑀫𑀻𑀳𑀺 𑀲𑀫𑀦𑁆𑀢𑀢𑁄 𑀲𑀫𑁄𑀓𑀺𑀡𑁆𑀡𑀪𑀸𑀯𑀢𑁄.

𑀢𑀻𑀲𑀼 𑀞𑀸𑀦𑁂𑀲𑀽𑀢𑀺 𑀤𑀽𑀭𑀢𑁄 𑀦𑀸𑀢𑀺𑀤𑀽𑀭𑁂 𑀆𑀲𑀦𑁆𑀦𑁂𑀢𑀺 𑀢𑀻𑀲𑀼 𑀞𑀸𑀦𑁂𑀲𑀼. 𑀢𑀻𑀳𑀺 𑀑𑀯𑀸𑀤𑁂𑀳𑀻𑀢𑀺 ‘‘𑀢𑀲𑁆𑀫𑀸𑀢𑀺𑀳 𑀢𑁂, 𑀓𑀲𑁆𑀲𑀧, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘𑀢𑀺𑀩𑁆𑀩𑀁 𑀫𑁂 𑀳𑀺𑀭𑁄𑀢𑁆𑀢𑀧𑁆𑀧𑀁 𑀧𑀘𑁆𑀘𑀼𑀧𑀝𑁆𑀞𑀺𑀢𑀁 𑀪𑀯𑀺𑀲𑁆𑀲𑀢𑀺 𑀣𑁂𑀭𑁂𑀲𑀼 𑀦𑀯𑁂𑀲𑀼 ¶ 𑀫𑀚𑁆𑀛𑀺𑀫𑁂𑀲𑀽’𑀢𑀺. 𑀏𑀯𑀜𑁆𑀳𑀺 𑀢𑁂, 𑀓𑀲𑁆𑀲𑀧, 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀢𑀲𑁆𑀫𑀸𑀢𑀺𑀳 𑀢𑁂, 𑀓𑀲𑁆𑀲𑀧, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘𑀬𑀁 𑀓𑀺𑀜𑁆𑀘𑀺 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀺 𑀓𑀼𑀲𑀮𑀽𑀧𑀲𑀁𑀳𑀺𑀢𑀁, 𑀲𑀩𑁆𑀩𑀁 𑀢𑀁 𑀅𑀝𑁆𑀞𑀺𑀁 𑀓𑀢𑁆𑀯𑀸 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀲𑀩𑁆𑀩𑀁 𑀘𑁂𑀢𑀲𑀸 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀑𑀳𑀺𑀢𑀲𑁄𑀢𑁄 𑀥𑀫𑁆𑀫𑀁 𑀲𑀼𑀡𑀺𑀲𑁆𑀲𑀸𑀫𑀻’𑀢𑀺, 𑀏𑀯𑀜𑁆𑀳𑀺 𑀢𑁂, 𑀓𑀲𑁆𑀲𑀧, 𑀲𑀺𑀓𑁆𑀔𑀺𑀢𑀩𑁆𑀩𑀁. 𑀢𑀲𑁆𑀫𑀸𑀢𑀺𑀳 𑀢𑁂, 𑀓𑀲𑁆𑀲𑀧, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 ‘𑀲𑀸𑀢𑀲𑀳𑀕𑀢𑀸 𑀘 𑀫𑁂 𑀓𑀸𑀬𑀕𑀢𑀸𑀲𑀢𑀺 𑀦 𑀯𑀺𑀚𑀳𑀺𑀲𑁆𑀲𑀢𑀻’𑀢𑀺, 𑀏𑀯𑀜𑁆𑀳𑀺 𑀢𑁂, 𑀓𑀲𑁆𑀲𑀧, 𑀲𑀺𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 (𑀲𑀁. 𑀦𑀺. 𑁨.𑁧𑁫𑁪) 𑀇𑀫𑁂𑀳𑀺 𑀢𑀻𑀳𑀺 𑀑𑀯𑀸𑀤𑁂𑀳𑀺. 𑀏𑀢𑁆𑀣 𑀳𑀺 𑀪𑀕𑀯𑀸 𑀧𑀞𑀫𑀁 𑀑𑀯𑀸𑀤𑀁 𑀣𑁂𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀚𑀸𑀢𑀺𑀓𑀢𑁆𑀢𑀸 𑀚𑀸𑀢𑀺𑀫𑀸𑀦𑀧𑁆𑀧𑀳𑀸𑀦𑀢𑁆𑀣𑀫𑀪𑀸𑀲𑀺, 𑀤𑀼𑀢𑀺𑀬𑀁 𑀩𑀸𑀳𑀼𑀲𑀘𑁆𑀘𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀅𑀳𑀁𑀓𑀸𑀭𑀧𑁆𑀧𑀳𑀸𑀦𑀢𑁆𑀣𑀁, 𑀢𑀢𑀺𑀬𑀁 𑀉𑀧𑀥𑀺𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀅𑀢𑁆𑀢𑀲𑀺𑀦𑁂𑀳𑀧𑁆𑀧𑀳𑀸𑀦𑀢𑁆𑀣𑀁 ¶ . 𑀫𑀼𑀤𑀼𑀓𑀸 𑀔𑁄 𑀢𑁆𑀬𑀸𑀬𑀦𑁆𑀢𑀺 𑀫𑀼𑀤𑀼𑀓𑀸 𑀔𑁄 𑀢𑁂 𑀅𑀬𑀁. 𑀓𑀲𑁆𑀫𑀸 𑀧𑀦 𑀪𑀕𑀯𑀸 𑀏𑀯𑀫𑀸𑀳? 𑀣𑁂𑀭𑁂𑀦 𑀲𑀳 𑀘𑀻𑀯𑀭𑀁 𑀧𑀭𑀺𑀯𑀢𑁆𑀢𑁂𑀢𑀼𑀓𑀸𑀫𑀢𑀸𑀬. 𑀓𑀲𑁆𑀫𑀸 𑀧𑀭𑀺𑀯𑀢𑁆𑀢𑁂𑀢𑀼𑀓𑀸𑀫𑁄 𑀚𑀸𑀢𑁄𑀢𑀺? 𑀣𑁂𑀭𑀁 𑀅𑀢𑁆𑀢𑀦𑁄 𑀞𑀸𑀦𑁂 𑀞𑀧𑁂𑀢𑀼𑀓𑀸𑀫𑀢𑀸𑀬. 𑀓𑀺𑀁 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀦𑀢𑁆𑀣𑀻𑀢𑀺? 𑀅𑀢𑁆𑀣𑀺, 𑀏𑀯𑀁 𑀧𑀦𑀲𑁆𑀲 𑀅𑀳𑁄𑀲𑀺 ‘‘𑀇𑀫𑁂𑀦 𑀘𑀺𑀭𑀁 𑀞𑀲𑁆𑀲𑀦𑁆𑀢𑀺, 𑀓𑀲𑁆𑀲𑀧𑁄 𑀧𑀦 𑀯𑀻𑀲𑀢𑀺𑀯𑀲𑁆𑀲𑀲𑀢𑀸𑀬𑀼𑀓𑁄, 𑀲𑁄 𑀫𑀬𑀺 𑀧𑀭𑀺𑀦𑀺𑀩𑁆𑀩𑀼𑀢𑁂 𑀲𑀢𑁆𑀢𑀧𑀡𑁆𑀡𑀺𑀕𑀼𑀳𑀸𑀬𑀁 𑀯𑀲𑀺𑀢𑁆𑀯𑀸 𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀳𑀁 𑀓𑀢𑁆𑀯𑀸 𑀫𑀫 𑀲𑀸𑀲𑀦𑀁 𑀧𑀜𑁆𑀘𑀯𑀲𑁆𑀲𑀲𑀳𑀲𑁆𑀲𑀧𑀭𑀺𑀫𑀸𑀡𑀓𑀸𑀮𑀧𑁆𑀧𑀯𑀢𑁆𑀢𑀦𑀓𑀁 𑀓𑀭𑀺𑀲𑁆𑀲𑀢𑀻𑀢𑀺 𑀅𑀢𑁆𑀢𑀦𑁄 𑀞𑀸𑀦𑁂 𑀞𑀧𑁂𑀲𑀺. 𑀏𑀯𑀁 𑀪𑀺𑀓𑁆𑀔𑀽 𑀓𑀲𑁆𑀲𑀧𑀲𑁆𑀲 𑀲𑀼𑀲𑁆𑀲𑀽𑀲𑀺𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀻’’𑀢𑀺. 𑀢𑀲𑁆𑀫𑀸 𑀏𑀯𑀫𑀸𑀳.

𑀘𑀦𑁆𑀤𑀽𑀧𑀫𑁄𑀢𑀺 𑀘𑀦𑁆𑀤𑀲𑀤𑀺𑀲𑁄 𑀳𑀼𑀢𑁆𑀯𑀸. 𑀓𑀺𑀁 𑀧𑀭𑀺𑀫𑀡𑁆𑀟𑀮𑀢𑀸𑀬? 𑀦𑁄, 𑀅𑀧𑀺𑀘 𑀔𑁄 𑀬𑀣𑀸 𑀘𑀦𑁆𑀤𑁄 𑀕𑀕𑀦𑀢𑀮𑀁 𑀧𑀓𑁆𑀔𑀦𑁆𑀤𑀫𑀸𑀦𑁄 𑀦 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀲𑀦𑁆𑀣𑀯𑀁 𑀯𑀸 𑀲𑀺𑀦𑁂𑀳𑀁 𑀯𑀸 𑀆𑀮𑀬𑀁 𑀯𑀸 𑀓𑀭𑁄𑀢𑀺, 𑀦 𑀘 𑀦 𑀳𑁄𑀢𑀺 𑀫𑀳𑀸𑀚𑀦𑀲𑁆𑀲 𑀧𑀺𑀬𑁄 𑀫𑀦𑀸𑀧𑁄, 𑀅𑀬𑀫𑁆𑀧𑀺 𑀏𑀯𑀁 𑀓𑁂𑀦𑀘𑀺 𑀲𑀤𑁆𑀥𑀺𑀁 𑀲𑀦𑁆𑀣𑀯𑀸𑀤𑀻𑀦𑀁 𑀅𑀓𑀭𑀡𑁂𑀦 𑀩𑀳𑀼𑀚𑀦𑀲𑁆𑀲 𑀧𑀺𑀬𑁄 𑀫𑀦𑀸𑀧𑁄 𑀘𑀦𑁆𑀤𑀽𑀧𑀫𑁄 𑀳𑀼𑀢𑁆𑀯𑀸 𑀔𑀢𑁆𑀢𑀺𑀬𑀓𑀼𑀮𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀓𑀲𑁆𑀲𑁂𑀯 𑀓𑀸𑀬𑀁 𑀅𑀧𑀓𑀲𑁆𑀲 𑀘𑀺𑀢𑁆𑀢𑀦𑁆𑀢𑀺 𑀢𑁂𑀦𑁂𑀯 𑀲𑀦𑁆𑀣𑀯𑀸𑀤𑀻𑀦𑀁 𑀅𑀓𑀭𑀡𑁂𑀦 𑀓𑀸𑀬𑀜𑁆𑀘 𑀘𑀺𑀢𑁆𑀢𑀜𑁆𑀘 𑀅𑀧𑀓𑀟𑁆𑀠𑀺𑀢𑁆𑀯𑀸, 𑀅𑀧𑀦𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀦𑀺𑀘𑁆𑀘𑀁 𑀦𑀯𑁄𑀢𑀺 𑀦𑀺𑀘𑁆𑀘𑀦𑀯𑀓𑁄𑀯, 𑀆𑀕𑀦𑁆𑀢𑀼𑀓𑀲𑀤𑀺𑀲𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀆𑀕𑀦𑁆𑀢𑀼𑀓𑁄 𑀳𑀺 𑀧𑀝𑀺𑀧𑀸𑀝𑀺𑀬𑀸 𑀲𑀫𑁆𑀧𑀢𑁆𑀢𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀲𑀘𑁂 𑀦𑀁 𑀖𑀭𑀲𑀸𑀫𑀺𑀓𑀸 𑀤𑀺𑀲𑁆𑀯𑀸 ‘‘𑀅𑀫𑁆𑀳𑀸𑀓𑀫𑁆𑀧𑀺 𑀧𑀼𑀢𑁆𑀢𑀪𑀸𑀢𑀭𑁄 𑀯𑀺𑀧𑁆𑀧𑀯𑀸𑀲𑀁 𑀕𑀦𑁆𑀢𑁆𑀯𑀸 𑀏𑀯𑀁 𑀯𑀺𑀘𑀭𑀺𑀁𑀲𑀽’’𑀢𑀺 𑀅𑀦𑀼𑀓𑀫𑁆𑀧𑀫𑀸𑀦𑀸 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑁄𑀚𑁂𑀦𑁆𑀢𑀺, 𑀪𑀼𑀢𑁆𑀢𑀫𑀢𑁆𑀢𑁄𑀬𑁂𑀯 ‘‘𑀢𑀼𑀫𑁆𑀳𑀸𑀓𑀁 𑀪𑀸𑀚𑀦𑀁 𑀕𑀡𑁆𑀳𑀣𑀸’’𑀢𑀺 𑀉𑀝𑁆𑀞𑀸𑀬 𑀧𑀓𑁆𑀓𑀫𑀢𑀺, 𑀦 𑀢𑁂𑀳𑀺 𑀲𑀤𑁆𑀥𑀺𑀁 𑀲𑀦𑁆𑀣𑀯𑀁 𑀯𑀸 𑀓𑀭𑁄𑀢𑀺, 𑀓𑀺𑀘𑁆𑀘𑀓𑀭𑀡𑀻𑀬𑀸𑀦𑀺 𑀯𑀸 𑀲𑀁𑀯𑀺𑀤𑀳𑀢𑀺, 𑀏𑀯𑀫𑀬𑀫𑁆𑀧𑀺 𑀧𑀝𑀺𑀧𑀸𑀝𑀺𑀬𑀸 𑀲𑀫𑁆𑀧𑀢𑁆𑀢𑀁 𑀖𑀭𑀁 𑀧𑀯𑀺𑀲𑀺𑀢𑁆𑀯𑀸 𑀬𑀁 𑀇𑀭𑀺𑀬𑀸𑀧𑀣𑁂 𑀧𑀲𑀦𑁆𑀦𑀸 𑀫𑀦𑀼𑀲𑁆𑀲𑀸 𑀤𑁂𑀦𑁆𑀢𑀺, 𑀢𑀁 𑀕𑀳𑁂𑀢𑁆𑀯𑀸 𑀙𑀺𑀦𑁆𑀦𑀲𑀦𑁆𑀣𑀯𑁄 𑀢𑁂𑀲𑀁 𑀓𑀺𑀘𑁆𑀘𑀓𑀭𑀡𑀻𑀬𑁂 𑀅𑀩𑁆𑀬𑀸𑀯𑀝𑁄 𑀳𑀼𑀢𑁆𑀯𑀸 𑀦𑀺𑀓𑁆𑀔𑀫𑀢𑀻𑀢𑀺 𑀤𑀻𑀧𑁂𑀢𑀺.

𑀅𑀧𑁆𑀧𑀕𑀩𑁆𑀪𑁄𑀢𑀺 𑀦𑀧𑁆𑀧𑀕𑀩𑁆𑀪𑁄, 𑀅𑀝𑁆𑀞𑀝𑁆𑀞𑀸𑀦𑁂𑀦 𑀓𑀸𑀬𑀧𑀸𑀕𑀩𑁆𑀪𑀺𑀬𑁂𑀦, 𑀘𑀢𑀼𑀝𑁆𑀞𑀸𑀦𑁂𑀦 𑀯𑀘𑀻𑀧𑀸𑀕𑀩𑁆𑀪𑀺𑀬𑁂𑀦, 𑀅𑀦𑁂𑀓𑀝𑁆𑀞𑀸𑀦𑁂𑀦 𑀫𑀦𑁄𑀧𑀸𑀕𑀩𑁆𑀪𑀺𑀬𑁂𑀦 𑀘 𑀯𑀺𑀭𑀳𑀺𑀢𑁄𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀝𑁆𑀞𑀸𑀦𑀁 𑀓𑀸𑀬𑀧𑀸𑀕𑀩𑁆𑀪𑀺𑀬𑀁 𑀦𑀸𑀫 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀪𑁄𑀚𑀦𑀲𑀸𑀮𑀚𑀦𑁆𑀢𑀸𑀖𑀭𑀦𑀳𑀸𑀦𑀢𑀺𑀢𑁆𑀣𑀪𑀺𑀓𑁆𑀔𑀸𑀘𑀸𑀭𑀫𑀕𑁆𑀕𑁂𑀲𑀼 ¶ 𑀅𑀦𑁆𑀢𑀭𑀖𑀭𑀧𑀯𑁂𑀲𑀦𑁂 𑀘 𑀓𑀸𑀬𑁂𑀦 𑀅𑀧𑁆𑀧𑀢𑀺𑀭𑀽𑀧𑀓𑀭𑀡𑀁. 𑀘𑀢𑀼𑀝𑁆𑀞𑀸𑀦𑀁 𑀯𑀘𑀻𑀧𑀸𑀕𑀩𑁆𑀪𑀺𑀬𑀁 𑀦𑀸𑀫 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀅𑀦𑁆𑀢𑀭𑀖𑀭𑁂𑀲𑀼 𑀅𑀧𑁆𑀧𑀢𑀺𑀭𑀽𑀧𑀯𑀸𑀘𑀸𑀦𑀺𑀘𑁆𑀙𑀸𑀭𑀡𑀁. 𑀅𑀦𑁂𑀓𑀝𑁆𑀞𑀸𑀦𑀁 𑀫𑀦𑁄𑀧𑀸𑀕𑀩𑁆𑀪𑀺𑀬𑀁 𑀦𑀸𑀫 𑀢𑁂𑀲𑀼 𑀢𑁂𑀲𑀼 ¶ 𑀞𑀸𑀦𑁂𑀲𑀼 𑀓𑀸𑀬𑀯𑀸𑀘𑀸𑀳𑀺 𑀅𑀚𑁆𑀛𑀸𑀘𑀸𑀭𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸𑀧𑀺 𑀫𑀦𑀲𑀸 𑀓𑀸𑀫𑀯𑀺𑀢𑀓𑁆𑀓𑀸𑀤𑀻𑀦𑀁 𑀯𑀺𑀢𑀓𑁆𑀓𑀦𑀁. 𑀲𑀩𑁆𑀩𑁂𑀲𑀫𑁆𑀧𑀺 𑀇𑀫𑁂𑀲𑀁 𑀧𑀸𑀕𑀩𑁆𑀪𑀺𑀬𑀸𑀦𑀁 𑀅𑀪𑀸𑀯𑁂𑀦 𑀅𑀧𑁆𑀧𑀕𑀩𑁆𑀪𑁄 𑀳𑀼𑀢𑁆𑀯𑀸 𑀓𑀼𑀮𑀸𑀦𑀺 𑀉𑀧𑀲𑀗𑁆𑀓𑀫𑀢𑀻𑀢𑀺 𑀅𑀢𑁆𑀣𑁄. 𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑁂𑀦 𑀘 𑀘𑀦𑁆𑀤𑀽𑀧𑀫𑀧𑁆𑀧𑀝𑀺𑀧𑀤𑀸𑀤𑀺𑀣𑁂𑀭𑀲𑁆𑀲 𑀥𑀼𑀢𑀯𑀸𑀤𑁂𑀲𑀼 𑀅𑀕𑁆𑀕𑀪𑀸𑀯𑀲𑁆𑀲 𑀩𑁄𑀥𑀺𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀏𑀢𑀤𑁂𑀯 𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀓𑀢𑁆𑀯𑀸’’𑀢𑀺.

𑀅𑀦𑀼𑀭𑀼𑀤𑁆𑀥𑀢𑁆𑀣𑁂𑀭𑀯𑀢𑁆𑀣𑀼

𑁧𑁯𑁨. 𑀧𑀜𑁆𑀘𑀫𑁂 𑀪𑁄𑀚𑀦𑀧𑀧𑀜𑁆𑀘𑀫𑀢𑁆𑀢𑀦𑁆𑀢𑀺 𑀕𑁄𑀘𑀭𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀡𑀸𑀳𑀸𑀭𑀧𑀭𑀺𑀪𑁄𑀕𑀲𑀜𑁆𑀜𑀺𑀢𑀁 𑀪𑁄𑀚𑀦𑀧𑀧𑀜𑁆𑀘𑀫𑀢𑁆𑀢𑀁. 𑀤𑀻𑀧𑀭𑀼𑀓𑁆𑀔𑀸𑀦𑀦𑁆𑀢𑀺 𑀮𑁄𑀳𑀤𑀦𑁆𑀢𑀓𑀝𑁆𑀞𑀫𑀬𑀸𑀦𑀁 𑀫𑀳𑀦𑁆𑀢𑀸𑀦𑀁 𑀤𑀻𑀧𑀭𑀼𑀓𑁆𑀔𑀸𑀦𑀁. 𑀮𑁄𑀳𑀫𑀬𑁂𑀲𑀼𑀧𑀺 𑀳𑀺 𑀢𑁂𑀲𑀼 𑀤𑀻𑀧𑀸𑀥𑀸𑀭𑁂𑀲𑀼 𑀤𑀻𑀧𑀭𑀼𑀓𑁆𑀔𑀓𑀸𑀢𑀺 𑀭𑀼𑀴𑁆𑀳𑀺𑀭𑁂𑀲𑀸 𑀤𑀝𑁆𑀞𑀩𑁆𑀩𑀸. 𑀑𑀮𑀫𑁆𑀩𑀓𑀤𑀻𑀧𑀫𑀡𑁆𑀟𑀮𑀤𑀻𑀧𑀲𑀜𑁆𑀘𑀭𑀡𑀤𑀻𑀧𑀸𑀤𑀺𑀓𑀸 𑀲𑁂𑀲𑀤𑀻𑀧𑀸.

𑀅𑀦𑀼𑀧𑀭𑀺𑀬𑀸𑀬𑀺 𑀧𑀤𑀓𑁆𑀔𑀺𑀡𑀓𑀭𑀡𑀯𑀲𑁂𑀦. 𑀅𑀳𑀁 𑀢𑁂𑀦𑀸𑀢𑀺 𑀬𑁂𑀦 𑀢𑀼𑀬𑁆𑀳𑀁 𑀅𑀢𑁆𑀣𑁄, 𑀅𑀳𑀁 𑀢𑁂𑀦 𑀧𑀯𑀸𑀭𑁂𑀫𑀺, 𑀢𑀲𑁆𑀫𑀸 𑀢𑀁 𑀆𑀳𑀭𑀸𑀧𑁂𑀢𑁆𑀯𑀸 𑀕𑀡𑁆𑀳𑀸𑀢𑀺 𑀅𑀢𑁆𑀣𑁄. 𑀲𑀼𑀯𑀡𑁆𑀡𑀧𑀸𑀢𑀺𑀬𑀁𑀬𑁂𑀯𑀲𑁆𑀲 𑀪𑀢𑁆𑀢𑀁 𑀉𑀧𑁆𑀧𑀚𑁆𑀚𑀻𑀢𑀺 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀉𑀧𑁆𑀧𑀚𑁆𑀚𑀺, 𑀦 𑀓𑀺𑀜𑁆𑀘𑀺 𑀧𑀘𑀦𑀓𑀺𑀘𑁆𑀘𑀁 𑀅𑀢𑁆𑀣𑀺. 𑀲𑀢𑁆𑀢 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀲𑀻𑀢𑀺 ‘‘𑀅𑀧𑁆𑀧𑀺𑀘𑁆𑀙𑀲𑁆𑀲𑀸𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀫𑀳𑀺𑀘𑁆𑀙𑀲𑁆𑀲𑀸’’𑀢𑀺𑀆𑀤𑀺𑀓𑁂 𑀲𑀢𑁆𑀢 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑁂 𑀯𑀺𑀢𑀓𑁆𑀓𑁂𑀲𑀺. 𑀅𑀝𑁆𑀞𑀫𑁂𑀢𑀺 ‘‘𑀦𑀺𑀧𑁆𑀧𑀧𑀜𑁆𑀘𑀸𑀭𑀸𑀫𑀲𑁆𑀲𑀸𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀧𑀧𑀜𑁆𑀘𑀸𑀭𑀸𑀫𑀲𑁆𑀲𑀸’’𑀢𑀺 𑀏𑀢𑀲𑁆𑀫𑀺𑀁 𑀧𑀼𑀭𑀺𑀲𑀯𑀺𑀢𑀓𑁆𑀓𑁂.

𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬𑀸𑀢𑀺 ‘‘𑀅𑀧𑁆𑀧𑀺𑀘𑁆𑀙𑀲𑁆𑀲𑀸𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀫𑀳𑀺𑀘𑁆𑀙𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁩.𑁩𑁫𑁮; 𑀅. 𑀦𑀺. 𑁮.𑁩𑁦) 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑀯𑀲𑁂𑀦 𑀆𑀭𑀤𑁆𑀥𑀫𑀢𑁆𑀢𑀁 𑀫𑀢𑁆𑀣𑀓𑀁 𑀧𑀸𑀧𑁂𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑁂𑀦 𑀞𑀺𑀢𑀁 𑀫𑀫 𑀲𑀗𑁆𑀓𑀧𑁆𑀧𑀁 𑀚𑀸𑀦𑀺𑀢𑁆𑀯𑀸. 𑀫𑀦𑁄𑀫𑀬𑁂𑀦𑀸𑀢𑀺 𑀫𑀦𑁄𑀫𑀬𑁂𑀦 𑀯𑀺𑀬 𑀫𑀦𑀲𑀸 𑀦𑀺𑀫𑁆𑀫𑀺𑀢𑀲𑀤𑀺𑀲𑁂𑀦, 𑀧𑀭𑀺𑀡𑀸𑀫𑀺𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀇𑀤𑁆𑀥𑀺𑀬𑀸𑀢𑀺 ‘‘𑀅𑀬𑀁 𑀓𑀸𑀬𑁄 𑀇𑀤𑀁 𑀘𑀺𑀢𑁆𑀢𑀁 𑀯𑀺𑀬 𑀳𑁄𑀢𑀽’’𑀢𑀺 𑀏𑀯𑀁 𑀧𑀯𑀢𑁆𑀢𑀸𑀬 𑀅𑀥𑀺𑀝𑁆𑀞𑀸𑀦𑀺𑀤𑁆𑀥𑀺𑀬𑀸.

𑀬𑀤𑀸 𑀫𑁂 𑀅𑀳𑀼 𑀲𑀗𑁆𑀓𑀧𑁆𑀧𑁄𑀢𑀺 𑀬𑀲𑁆𑀫𑀺𑀁 𑀓𑀸𑀮𑁂 𑀫𑀬𑁆𑀳𑀁 ‘‘𑀓𑀻𑀤𑀺𑀲𑁄 𑀦𑀼 𑀔𑁄 𑀅𑀝𑁆𑀞𑀫𑁄 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑁄’’𑀢𑀺 𑀧𑀭𑀺𑀯𑀺𑀢𑀓𑁆𑀓𑁄 𑀅𑀳𑁄𑀲𑀺, 𑀬𑀤𑀸 𑀫𑁂 𑀅𑀳𑀼 𑀲𑀗𑁆𑀓𑀧𑁆𑀧𑁄, 𑀢𑀢𑁄 𑀫𑀫 𑀲𑀗𑁆𑀓𑀧𑁆𑀧𑀫𑀜𑁆𑀜𑀸𑀬 ¶ 𑀇𑀤𑁆𑀥𑀺𑀬𑀸 𑀉𑀧𑀲𑀗𑁆𑀓𑀫𑀺, 𑀉𑀢𑁆𑀢𑀭𑀺 𑀤𑁂𑀲𑀬𑀻𑀢𑀺 𑀬𑁄𑀚𑀦𑀸. 𑀉𑀢𑁆𑀢𑀭𑀺 𑀤𑁂𑀲𑀬𑀻𑀢𑀺 ‘‘𑀦𑀺𑀧𑁆𑀧𑀧𑀜𑁆𑀘𑀸𑀭𑀸𑀫𑀲𑁆𑀲𑀸𑀬𑀁 𑀥𑀫𑁆𑀫𑁄 𑀦𑀺𑀧𑁆𑀧𑀧𑀜𑁆𑀘𑀭𑀢𑀺𑀦𑁄 ¶ , 𑀦𑀸𑀬𑀁 𑀥𑀫𑁆𑀫𑁄 𑀧𑀧𑀜𑁆𑀘𑀸𑀭𑀸𑀫𑀲𑁆𑀲 𑀧𑀧𑀜𑁆𑀘𑀭𑀢𑀺𑀦𑁄’’𑀢𑀺 (𑀤𑀻. 𑀦𑀺. 𑁩.𑁩𑁫𑁮; 𑀅. 𑀦𑀺. 𑁮.𑁩𑁦) 𑀇𑀫𑀁 𑀅𑀝𑁆𑀞𑀫𑀁 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓𑀁 𑀧𑀽𑀭𑁂𑀦𑁆𑀢𑁄 𑀉𑀧𑀭𑀺 𑀤𑁂𑀲𑀬𑀺. 𑀢𑀁 𑀧𑀦 𑀤𑁂𑀲𑀺𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀦𑀺𑀧𑁆𑀧𑀧𑀜𑁆𑀘𑀭𑀢𑁄 𑀩𑀼𑀤𑁆𑀥𑁄, 𑀦𑀺𑀧𑁆𑀧𑀧𑀜𑁆𑀘𑀫𑀤𑁂𑀲𑀬𑀻’’𑀢𑀺, 𑀧𑀧𑀜𑁆𑀘𑀸 𑀦𑀸𑀫 𑀭𑀸𑀕𑀸𑀤𑀬𑁄 𑀓𑀺𑀮𑁂𑀲𑀸, 𑀢𑁂𑀲𑀁 𑀯𑀽𑀧𑀲𑀫𑀦𑀢𑀸𑀬 𑀢𑀤𑀪𑀸𑀯𑀢𑁄 𑀘 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀦𑀺𑀧𑁆𑀧𑀧𑀜𑁆𑀘𑀸 𑀦𑀸𑀫. 𑀬𑀣𑀸 𑀢𑀁 𑀧𑀸𑀧𑀼𑀡𑀸𑀢𑀺, 𑀢𑀣𑀸 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀲𑀸𑀫𑀼𑀓𑁆𑀓𑀁𑀲𑀺𑀓𑀁 𑀘𑀢𑀼𑀲𑀘𑁆𑀘𑀤𑁂𑀲𑀦𑀁 𑀅𑀤𑁂𑀲𑀬𑀻𑀢𑀺 𑀅𑀢𑁆𑀣𑁄.

𑀢𑀲𑁆𑀲𑀸𑀳𑀁 𑀥𑀫𑁆𑀫𑀫𑀜𑁆𑀜𑀸𑀬𑀸𑀢𑀺 𑀢𑀲𑁆𑀲 𑀲𑀢𑁆𑀣𑀼 𑀤𑁂𑀲𑀦𑀸𑀥𑀫𑁆𑀫𑀁 𑀚𑀸𑀦𑀺𑀢𑁆𑀯𑀸. 𑀯𑀺𑀳𑀸𑀲𑀺𑀦𑁆𑀢𑀺 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀦𑁆𑀢𑁄 𑀯𑀺𑀳𑀭𑀺𑀁. 𑀲𑀸𑀲𑀦𑁂 𑀭𑀢𑁄𑀢𑀺 𑀲𑀺𑀓𑁆𑀔𑀢𑁆𑀢𑀬𑀲𑀗𑁆𑀕𑀳𑁂 𑀲𑀸𑀲𑀦𑁂 𑀅𑀪𑀺𑀭𑀢𑁄. 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀅𑀦𑀼𑀧𑁆𑀧𑀢𑁆𑀢𑀸𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁, 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁, 𑀆𑀲𑀯𑀓𑁆𑀔𑀬𑀜𑀸𑀡𑀦𑁆𑀢𑀺 𑀇𑀫𑀸 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀫𑀬𑀸 𑀅𑀦𑀼𑀧𑁆𑀧𑀢𑁆𑀢𑀸 𑀲𑀘𑁆𑀙𑀺𑀓𑀢𑀸. 𑀢𑀢𑁄 𑀏𑀯 𑀓𑀢𑀁 𑀩𑀼𑀤𑁆𑀥𑀲𑁆𑀲 𑀲𑀸𑀲𑀦𑀁, 𑀅𑀦𑀼𑀲𑀺𑀝𑁆𑀞𑀺 𑀑𑀯𑀸𑀤𑁄 𑀅𑀦𑀼𑀝𑁆𑀞𑀺𑀢𑁄𑀢𑀺 𑀅𑀢𑁆𑀣𑁄.

𑀪𑀤𑁆𑀤𑀺𑀬𑀢𑁆𑀣𑁂𑀭𑀯𑀢𑁆𑀣𑀼

𑁧𑁯𑁩. 𑀙𑀝𑁆𑀞𑁂 𑀉𑀘𑁆𑀘-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑁄 𑀉𑀘𑁆𑀘𑀸-𑀲𑀤𑁆𑀤𑁄𑀢𑀺 𑀆𑀳 𑁋 ‘‘𑀉𑀘𑁆𑀘𑀸𑀓𑀼𑀮𑀺𑀓𑀸𑀦𑀦𑁆𑀢𑀺 𑀉𑀘𑁆𑀘𑁂 𑀓𑀼𑀮𑁂 𑀚𑀸𑀢𑀸𑀦’’𑀦𑁆𑀢𑀺. 𑀓𑀸𑀴𑀻 𑀲𑀸 𑀤𑁂𑀯𑀻𑀢𑀺 𑀓𑀸𑀴𑀯𑀡𑁆𑀡𑀢𑀸𑀬 𑀓𑀸𑀴𑀻 𑀲𑀸 𑀤𑁂𑀯𑀻. 𑀓𑀼𑀮𑀸𑀦𑀼𑀓𑁆𑀓𑀫𑁂𑀦 𑀭𑀚𑁆𑀚𑀸𑀦𑀼𑀧𑁆𑀧𑀢𑁆𑀢𑀺 𑀫𑀳𑀸𑀓𑀼𑀮𑀺𑀦𑀲𑁆𑀲𑁂𑀯𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀲𑁄𑀬𑁂𑀯 𑀘𑀸’’𑀢𑀺𑀆𑀤𑀺.

𑀮𑀓𑀼𑀡𑁆𑀟𑀓𑀪𑀤𑁆𑀤𑀺𑀬𑀢𑁆𑀣𑁂𑀭𑀯𑀢𑁆𑀣𑀼

𑁧𑁯𑁪. 𑀲𑀢𑁆𑀢𑀫𑁂 𑀭𑀺𑀢𑁆𑀢𑀓𑁄𑀢𑀺 𑀤𑁂𑀬𑁆𑀬𑀯𑀢𑁆𑀣𑀼𑀭𑀳𑀺𑀢𑁄. 𑀕𑀼𑀡𑁂 𑀆𑀯𑀚𑁆𑀚𑁂𑀢𑁆𑀯𑀸𑀢𑀺 𑀪𑀕𑀯𑀢𑁄 𑀭𑀽𑀧𑀕𑀼𑀡𑁂 𑀘𑁂𑀯 𑀆𑀓𑀧𑁆𑀧𑀲𑀫𑁆𑀧𑀤𑀸𑀤𑀺𑀕𑀼𑀡𑁂 𑀘 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸 𑀅𑀫𑁆𑀩𑀧𑀓𑁆𑀓𑀲𑁆𑀲 𑀧𑀝𑀺𑀕𑁆𑀕𑀳𑀡𑀁 𑀧𑀭𑀺𑀪𑀼𑀜𑁆𑀚𑀦𑀦𑁆𑀢𑀺 𑀏𑀯𑀫𑀸𑀤𑀺𑀓𑁂 𑀬𑀣𑀸𑀉𑀧𑀝𑁆𑀞𑀺𑀢𑁂 𑀕𑀼𑀡𑁂 𑀆𑀯𑀚𑁆𑀚𑁂𑀢𑁆𑀯𑀸.

𑀧𑀺𑀡𑁆𑀟𑁄𑀮𑀪𑀸𑀭𑀤𑁆𑀯𑀸𑀚𑀢𑁆𑀣𑁂𑀭𑀯𑀢𑁆𑀣𑀼

𑁧𑁯𑁫. 𑀅𑀝𑁆𑀞𑀫𑁂 𑀅𑀪𑀻𑀢𑀦𑀸𑀤𑀪𑀸𑀯𑁂𑀦 𑀲𑀻𑀳𑀲𑁆𑀲 𑀯𑀺𑀬 𑀦𑀸𑀤𑁄 𑀲𑀻𑀳𑀦𑀸𑀤𑁄, 𑀲𑁄 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀲𑀻𑀳𑀦𑀸𑀤𑀺𑀓𑀸, 𑀢𑁂𑀲𑀁 𑀲𑀻𑀳𑀦𑀸𑀤𑀺𑀓𑀸𑀦𑀁. 𑀕𑀭𑀳𑀺𑀢𑀩𑁆𑀩𑀧𑀲𑀁𑀲𑀺𑀢𑀩𑁆𑀩𑀥𑀫𑁆𑀫𑁂 𑀬𑀸𑀣𑀸𑀯𑀢𑁄 𑀚𑀸𑀦𑀦𑁆𑀢𑀲𑁆𑀲𑁂𑀯 𑀕𑀭𑀳𑀸 𑀧𑀲𑀁𑀲𑀸 ¶ ¶ 𑀘 𑀬𑀼𑀢𑁆𑀢𑀭𑀽𑀧𑀸𑀢𑀺 𑀆𑀳 𑁋 ‘‘𑀩𑀼𑀤𑁆𑀥𑀸 𑀘 𑀦𑀸𑀫𑀸’’𑀢𑀺𑀆𑀤𑀺. 𑀔𑀻𑀡𑀸 𑀚𑀸𑀢𑀻𑀢𑀺𑀆𑀤𑀻𑀳𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲 𑀪𑀽𑀫𑀺𑀁 𑀤𑀲𑁆𑀲𑁂𑀢𑀺. 𑀢𑁂𑀦 𑀳𑀺 𑀜𑀸𑀡𑁂𑀦 𑀅𑀭𑀺𑀬𑀲𑀸𑀯𑀓𑁄 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 ‘‘𑀔𑀻𑀡𑀸 𑀚𑀸𑀢𑀻’’𑀢𑀺𑀆𑀤𑀺𑀁 𑀧𑀚𑀸𑀦𑀸𑀢𑀺. 𑀓𑀢𑀫𑀸 𑀧𑀦𑀲𑁆𑀲 𑀚𑀸𑀢𑀺 𑀔𑀻𑀡𑀸, 𑀓𑀣𑀜𑁆𑀘 𑀧𑀚𑀸𑀦𑀸𑀢𑀻𑀢𑀺? 𑀦 𑀢𑀸𑀯𑀲𑁆𑀲 𑀅𑀢𑀻𑀢𑀸 𑀔𑀻𑀡𑀸 𑀧𑀼𑀩𑁆𑀩𑁂𑀯 𑀔𑀻𑀡𑀢𑁆𑀢𑀸, 𑀦 𑀅𑀦𑀸𑀕𑀢𑀸 𑀅𑀦𑀸𑀕𑀢𑁂 𑀯𑀸𑀬𑀸𑀫𑀸𑀪𑀸𑀯𑀢𑁄, 𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀬𑀸 𑀧𑀦 𑀫𑀕𑁆𑀕𑀲𑁆𑀲 𑀅𑀪𑀸𑀯𑀺𑀢𑀢𑁆𑀢𑀸 𑀉𑀧𑁆𑀧𑀚𑁆𑀚𑁂𑀬𑁆𑀬 𑀏𑀓𑀘𑀢𑀼𑀧𑀜𑁆𑀘𑀯𑁄𑀓𑀸𑀭𑀪𑀯𑁂𑀲𑀼 𑀏𑀓𑀘𑀢𑀼𑀧𑀜𑁆𑀘𑀓𑁆𑀔𑀦𑁆𑀥𑀧𑁆𑀧𑀪𑁂𑀤𑀸 𑀚𑀸𑀢𑀺, 𑀲𑀸 𑀫𑀕𑁆𑀕𑀲𑁆𑀲 𑀪𑀸𑀯𑀺𑀢𑀢𑁆𑀢𑀸 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀢𑀁 𑀆𑀧𑀚𑁆𑀚𑀦𑁂𑀦 𑀔𑀻𑀡𑀸. 𑀢𑀁 𑀲𑁄 𑀫𑀕𑁆𑀕𑀪𑀸𑀯𑀦𑀸𑀬 𑀧𑀳𑀻𑀦𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸 ‘‘𑀓𑀺𑀮𑁂𑀲𑀸𑀪𑀸𑀯𑁂 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑀫𑁆𑀫𑀁 𑀆𑀬𑀢𑀺𑀁 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀁 𑀳𑁄𑀢𑀻’’𑀢𑀺 𑀚𑀸𑀦𑀦𑁆𑀢𑁄 𑀧𑀚𑀸𑀦𑀸𑀢𑀺.

𑀯𑀼𑀲𑀺𑀢𑀦𑁆𑀢𑀺 𑀯𑀼𑀝𑁆𑀞𑀁 𑀧𑀭𑀺𑀯𑀼𑀝𑁆𑀞𑀁, 𑀓𑀢𑀁 𑀘𑀭𑀺𑀢𑀁 𑀦𑀺𑀝𑁆𑀞𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀺 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁. 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁂𑀦 𑀳𑀺 𑀲𑀤𑁆𑀥𑀺𑀁 𑀲𑀢𑁆𑀢 𑀲𑁂𑀓𑁆𑀔𑀸 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀲𑀦𑁆𑀢𑀺 𑀦𑀸𑀫, 𑀔𑀻𑀡𑀸𑀲𑀯𑁄 𑀯𑀼𑀝𑁆𑀞𑀯𑀸𑀲𑁄. 𑀢𑀲𑁆𑀫𑀸 𑀅𑀭𑀺𑀬𑀲𑀸𑀯𑀓𑁄 𑀅𑀢𑁆𑀢𑀦𑁄 𑀩𑁆𑀭𑀳𑁆𑀫𑀘𑀭𑀺𑀬𑀯𑀸𑀲𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 ‘‘𑀯𑀼𑀲𑀺𑀢𑀁 𑀩𑁆𑀭𑀳𑁆𑀫𑀘𑀭𑀺𑀬’’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀓𑀢𑀁 𑀓𑀭𑀡𑀻𑀬𑀦𑁆𑀢𑀺 𑀘𑀢𑀽𑀲𑀼 𑀲𑀘𑁆𑀘𑁂𑀲𑀼 𑀘𑀢𑀽𑀳𑀺 𑀫𑀕𑁆𑀕𑁂𑀳𑀺 𑀧𑀭𑀺𑀜𑁆𑀜𑀸𑀧𑀳𑀸𑀦𑀲𑀘𑁆𑀙𑀺𑀓𑀺𑀭𑀺𑀬𑀸𑀪𑀸𑀯𑀦𑀸𑀪𑀺𑀲𑀫𑀬𑀯𑀲𑁂𑀦 𑀲𑁄𑀴𑀲𑀯𑀺𑀥𑀁 𑀓𑀺𑀘𑁆𑀘𑀁 𑀦𑀺𑀝𑁆𑀞𑀸𑀧𑀺𑀢𑀦𑁆𑀢𑀺 𑀅𑀢𑁆𑀣𑁄. 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀸𑀤𑀬𑁄 𑀳𑀺 𑀢𑀁 𑀓𑀺𑀘𑁆𑀘𑀁 𑀓𑀭𑁄𑀦𑁆𑀢𑀺, 𑀔𑀻𑀡𑀸𑀲𑀯𑁄 𑀓𑀢𑀓𑀭𑀡𑀻𑀬𑁄. 𑀢𑀲𑁆𑀫𑀸 𑀅𑀭𑀺𑀬𑀲𑀸𑀯𑀓𑁄 𑀅𑀢𑁆𑀢𑀦𑁄 𑀓𑀭𑀡𑀻𑀬𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄 ‘‘𑀓𑀢𑀁 𑀓𑀭𑀡𑀻𑀬’’𑀦𑁆𑀢𑀺 𑀧𑀚𑀸𑀦𑀸𑀢𑀺. 𑀦𑀸𑀧𑀭𑀁 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀇𑀤𑀸𑀦𑀺 𑀧𑀼𑀦 𑀇𑀢𑁆𑀣𑀪𑀸𑀯𑀸𑀬 𑀏𑀯𑀁 𑀲𑁄𑀴𑀲𑀯𑀺𑀥𑀓𑀺𑀘𑁆𑀘𑀪𑀸𑀯𑀸𑀬, 𑀓𑀺𑀮𑁂𑀲𑀓𑁆𑀔𑀬𑀸𑀬 𑀯𑀸 𑀫𑀕𑁆𑀕𑀪𑀸𑀯𑀦𑀸𑀬 𑀓𑀺𑀘𑁆𑀘𑀁 𑀫𑁂 𑀦𑀢𑁆𑀣𑀻𑀢𑀺 𑀧𑀚𑀸𑀦𑀸𑀢𑀺. 𑀅𑀣 𑀯𑀸 𑀇𑀢𑁆𑀣𑀢𑁆𑀢𑀸𑀬𑀸𑀢𑀺 𑀇𑀢𑁆𑀣𑀪𑀸𑀯𑀢𑁄 𑀇𑀫𑀲𑁆𑀫𑀸 𑀏𑀯𑀁𑀧𑀓𑀸𑀭𑀸 𑀇𑀤𑀸𑀦𑀺 𑀯𑀢𑁆𑀢𑀫𑀸𑀦𑀓𑁆𑀔𑀦𑁆𑀥𑀲𑀦𑁆𑀢𑀸𑀦𑀸 𑀅𑀧𑀭𑀁 𑀔𑀦𑁆𑀥𑀲𑀦𑁆𑀢𑀸𑀦𑀁 𑀫𑀬𑁆𑀳𑀁 𑀦𑀢𑁆𑀣𑀺, 𑀇𑀫𑁂 𑀧𑀦 𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀭𑀺𑀜𑁆𑀜𑀸𑀢𑀸 𑀢𑀺𑀝𑁆𑀞𑀦𑁆𑀢𑀺 𑀙𑀺𑀦𑁆𑀦𑀫𑀽𑀮𑀓𑀸 𑀭𑀼𑀓𑁆𑀔𑀸 𑀯𑀺𑀬, 𑀢𑁂 𑀘𑀭𑀺𑀫𑀓𑀯𑀺𑀜𑁆𑀜𑀸𑀡𑀦𑀺𑀭𑁄𑀥𑁂𑀦 𑀅𑀦𑀼𑀧𑀸𑀤𑀸𑀦𑁄 𑀯𑀺𑀬 𑀚𑀸𑀢𑀯𑁂𑀤𑁄 𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀻𑀢𑀺 𑀧𑀚𑀸𑀦𑀸𑀢𑀺.

𑀫𑀦𑁆𑀢𑀸𑀡𑀺𑀧𑀼𑀢𑁆𑀢𑀧𑀼𑀡𑁆𑀡𑀢𑁆𑀣𑁂𑀭𑀯𑀢𑁆𑀣𑀼

𑁧𑁯𑁬. 𑀦𑀯𑀫𑁂 𑀅𑀝𑁆𑀞𑀸𑀭𑀲𑀲𑀼𑀧𑀺 𑀯𑀺𑀚𑁆𑀚𑀸𑀝𑁆𑀞𑀸𑀦𑁂𑀲𑀼 𑀦𑀺𑀧𑁆𑀨𑀢𑁆𑀢𑀺𑀁 𑀕𑀢𑀢𑁆𑀢𑀸 ‘‘𑀲𑀩𑁆𑀩𑀲𑀺𑀧𑁆𑀧𑁂𑀲𑀼 𑀓𑁄𑀯𑀺𑀤𑁄 𑀳𑀼𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀅𑀪𑀺𑀤𑀬𑀸𑀅𑀩𑁆𑀪𑀜𑁆𑀜𑀸𑀯𑀳𑀲𑁆𑀲𑁂𑀯 𑀥𑀫𑁆𑀫𑀲𑁆𑀲 𑀢𑀢𑁆𑀣 𑀉𑀧𑀮𑀩𑁆𑀪𑀦𑀢𑁄 ‘‘𑀫𑁄𑀓𑁆𑀔𑀥𑀫𑁆𑀫𑀁 𑀅𑀤𑀺𑀲𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑁋 ‘‘𑀇𑀤𑀁 𑀯𑁂𑀤𑀢𑁆𑀢𑀬𑀁 𑀦𑀸𑀫𑀸’’𑀢𑀺𑀆𑀤𑀺 ¶ . 𑀢𑀣𑀸 𑀳𑀺 𑀅𑀦𑁂𑀦 𑀤𑀼𑀕𑁆𑀕𑀢𑀺𑀧𑀭𑀺𑀫𑀼𑀘𑁆𑀘𑀦𑀫𑁆𑀧𑀺 𑀤𑀼𑀮𑁆𑀮𑀪𑀁, 𑀅𑀪𑀺𑀜𑁆𑀜𑀸𑀧𑀭𑀺𑀯𑀸𑀭𑀸𑀦𑀁 𑀅𑀝𑁆𑀞𑀦𑁆𑀦𑀁 𑀲𑀫𑀸𑀧𑀢𑁆𑀢𑀻𑀦𑀁 𑀮𑀸𑀪𑀺𑀢𑀸𑀬 𑀲𑀬𑀁 𑀏𑀓𑀤𑁂𑀲𑁂𑀦 𑀉𑀧𑀲𑀦𑁆𑀢𑁄 𑀧𑀭𑀫𑀼𑀓𑁆𑀓𑀁𑀲𑀕𑀢𑀁 𑀉𑀢𑁆𑀢𑀫𑀤𑀫𑀣𑀲𑀫𑀣𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀪𑀕𑀯𑀦𑁆𑀢𑀁 𑀲𑀫𑁆𑀪𑀸𑀯𑁂𑀦𑁆𑀢𑁄 ‘‘𑀅𑀬𑀁 𑀧𑀼𑀭𑀺𑀲𑁄’’𑀢𑀺𑀆𑀤𑀺𑀫𑀸𑀳. 𑀧𑀺𑀝𑀓𑀸𑀦𑀺 𑀕𑀳𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑀻𑀢𑀺 𑀨𑀮𑀪𑀸𑀚𑀦𑀸𑀦𑀺 𑀕𑀳𑁂𑀢𑁆𑀯𑀸 𑀅𑀲𑁆𑀲𑀸𑀫𑀺𑀓𑀸𑀬 ¶ 𑀆𑀕𑀘𑁆𑀙𑀦𑁆𑀢𑀺. 𑀩𑀼𑀤𑁆𑀥𑀸𑀦𑀦𑁆𑀢𑀺 𑀕𑀸𑀭𑀯𑀯𑀲𑁂𑀦 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀧𑀭𑀺𑀪𑀼𑀜𑁆𑀚𑀻𑀢𑀺 𑀤𑁂𑀯𑀢𑀸𑀳𑀺 𑀧𑀓𑁆𑀔𑀺𑀢𑁆𑀢𑀤𑀺𑀩𑁆𑀩𑁄𑀚𑀁 𑀯𑀦𑀫𑀽𑀮𑀨𑀮𑀸𑀨𑀮𑀁 𑀧𑀭𑀺𑀪𑀼𑀜𑁆𑀚𑀺. 𑀧𑀢𑁆𑀢𑁂 𑀧𑀢𑀺𑀝𑁆𑀞𑀸𑀧𑀺𑀢𑀲𑀫𑀦𑀦𑁆𑀢𑀭𑀫𑁂𑀯 𑀳𑀺 𑀤𑁂𑀯𑀢𑀸 𑀢𑀢𑁆𑀣 𑀤𑀺𑀩𑁆𑀩𑁄𑀚𑀁 𑀧𑀓𑁆𑀔𑀺𑀧𑀺𑀁𑀲𑀼. 𑀲𑀫𑁆𑀫𑀲𑀺𑀢𑁆𑀯𑀸𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑁆𑀯𑀸, 𑀧𑀭𑀺𑀯𑀢𑁆𑀢𑁂𑀢𑁆𑀯𑀸𑀢𑀺 𑀘 𑀯𑀤𑀦𑁆𑀢𑀺. 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀽𑀢𑀺 𑀫𑀳𑀸𑀤𑁂𑀯𑀢𑁆𑀣𑁂𑀭𑀲𑁆𑀲 𑀅𑀦𑀼𑀫𑁄𑀤𑀦𑀓𑀣𑀸𑀬 𑀅𑀦𑀼𑀧𑀼𑀩𑁆𑀩𑀺𑀓𑀣𑀸𑀲𑀓𑁆𑀔𑀺𑀓𑀸𑀬 𑀲𑀼𑀯𑀺𑀲𑁄𑀥𑀺𑀢𑀘𑀺𑀢𑁆𑀢𑀲𑀦𑁆𑀢𑀸𑀦𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀼.

𑀤𑀲𑀳𑀺 𑀓𑀣𑀸𑀯𑀢𑁆𑀣𑀽𑀳𑀻𑀢𑀺 𑀅𑀧𑁆𑀧𑀺𑀘𑁆𑀙𑀓𑀣𑀸 𑀲𑀦𑁆𑀢𑀼𑀝𑁆𑀞𑀺𑀓𑀣𑀸 𑀧𑀯𑀺𑀯𑁂𑀓𑀓𑀣𑀸 𑀅𑀲𑀁𑀲𑀕𑁆𑀕𑀓𑀣𑀸 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀸 𑀲𑀻𑀮𑀲𑀫𑁆𑀧𑀤𑀸𑀓𑀣𑀸 𑀲𑀫𑀸𑀥𑀺𑀲𑀫𑁆𑀧𑀤𑀸𑀓𑀣𑀸 𑀧𑀜𑁆𑀜𑀸𑀲𑀫𑁆𑀧𑀤𑀸𑀓𑀣𑀸 𑀯𑀺𑀫𑀼𑀢𑁆𑀢𑀺𑀲𑀫𑁆𑀧𑀤𑀸𑀓𑀣𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀫𑁆𑀧𑀤𑀸𑀓𑀣𑀸𑀢𑀺 𑀇𑀫𑁂𑀳𑀺 𑀤𑀲𑀳𑀺 𑀓𑀣𑀸𑀯𑀢𑁆𑀣𑀽𑀳𑀺. 𑀚𑀸𑀢𑀺𑀪𑀽𑀫𑀺𑀭𑀝𑁆𑀞𑀯𑀸𑀲𑀺𑀦𑁄𑀢𑀺 𑀚𑀸𑀢𑀺𑀪𑀽𑀫𑀺𑀯𑀦𑁆𑀢𑀤𑁂𑀲𑀯𑀸𑀲𑀺𑀦𑁄, 𑀲𑀢𑁆𑀣𑀼 𑀚𑀸𑀢𑀤𑁂𑀲𑀯𑀸𑀲𑀺𑀦𑁄𑀢𑀺 𑀅𑀢𑁆𑀣𑁄. 𑀲𑀻𑀲𑀸𑀦𑀼𑀮𑁄𑀓𑀺𑀓𑁄𑀢𑀺 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀲𑁆𑀲 𑀲𑀻𑀲𑀁 𑀅𑀦𑀼 𑀅𑀦𑀼 𑀧𑀲𑁆𑀲𑀦𑁆𑀢𑁄. 𑀑𑀓𑀸𑀲𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 𑀲𑀸𑀓𑀘𑁆𑀙𑀸𑀬 𑀅𑀯𑀲𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸. 𑀲𑀢𑁆𑀢𑀯𑀺𑀲𑀼𑀤𑁆𑀥𑀺𑀓𑁆𑀓𑀫𑀁 𑀧𑀼𑀘𑁆𑀙𑀻𑀢𑀺 ‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄, 𑀲𑀻𑀮𑀯𑀺𑀲𑀼𑀤𑁆𑀥𑀢𑁆𑀣𑀁 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁫𑁭) 𑀲𑀢𑁆𑀢 𑀯𑀺𑀲𑀼𑀤𑁆𑀥𑀺𑀬𑁄 𑀧𑀼𑀘𑁆𑀙𑀺. 𑀥𑀫𑁆𑀫𑀓𑀣𑀺𑀓𑀸𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀺 𑀲𑀯𑀺𑀲𑁂𑀲𑁂𑀦 𑀤𑀲𑀓𑀣𑀸𑀯𑀢𑁆𑀣𑀼𑀮𑀸𑀪𑀺𑀢𑀸𑀬.

𑀫𑀳𑀸𑀓𑀘𑁆𑀘𑀸𑀦𑀢𑁆𑀣𑁂𑀭𑀯𑀢𑁆𑀣𑀼

𑁧𑁯𑁭. 𑀤𑀲𑀫𑁂 𑀲𑀁𑀔𑀺𑀢𑁆𑀢𑁂𑀦 𑀓𑀣𑀺𑀢𑀥𑀫𑁆𑀫𑀲𑁆𑀲𑀸𑀢𑀺 𑀫𑀥𑀼𑀧𑀺𑀡𑁆𑀟𑀺𑀓𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀲𑀼 𑀯𑀺𑀬 𑀲𑀗𑁆𑀔𑁂𑀧𑁂𑀦 𑀤𑁂𑀲𑀺𑀢𑀥𑀫𑁆𑀫𑀲𑁆𑀲. 𑀢𑀁 𑀤𑁂𑀲𑀦𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸𑀢𑀺 𑀢𑀁 𑀲𑀗𑁆𑀔𑁂𑀧𑀤𑁂𑀲𑀦𑀁 𑀆𑀬𑀢𑀦𑀸𑀤𑀺𑀯𑀲𑁂𑀦 𑀯𑀺𑀢𑁆𑀣𑀸𑀭𑁂𑀢𑁆𑀯𑀸. 𑀅𑀢𑁆𑀣𑀁 𑀯𑀺𑀪𑀚𑀫𑀸𑀦𑀸𑀦𑀦𑁆𑀢𑀺 𑀢𑀲𑁆𑀲𑀸 𑀲𑀗𑁆𑀔𑁂𑀧𑀤𑁂𑀲𑀦𑀸𑀬 𑀅𑀢𑁆𑀣𑀁 𑀯𑀺𑀪𑀚𑀺𑀢𑁆𑀯𑀸 𑀓𑀣𑁂𑀦𑁆𑀢𑀸𑀦𑀁. 𑀅𑀢𑁆𑀣𑀯𑀲𑁂𑀦 𑀯𑀸𑀢𑀺 ‘‘𑀏𑀢𑁆𑀢𑀓𑀸 𑀏𑀢𑀲𑁆𑀲 𑀅𑀢𑁆𑀣𑀸’’𑀢𑀺 𑀅𑀢𑁆𑀣𑀯𑀲𑁂𑀦 𑀯𑀸 𑀤𑁂𑀲𑀦𑀁 𑀧𑀽𑀭𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀩𑁆𑀬𑀜𑁆𑀚𑀦𑀯𑀲𑁂𑀦 𑀯𑀸𑀢𑀺 ‘‘𑀏𑀢𑁆𑀢𑀓𑀸𑀦𑀺 𑀏𑀢𑁆𑀣 𑀩𑁆𑀬𑀜𑁆𑀚𑀦𑀸𑀦𑀺 𑀤𑁂𑀲𑀦𑀸𑀯𑀲𑁂𑀦 𑀯𑀢𑁆𑀢𑀩𑁆𑀩𑀸𑀦𑀻’’𑀢𑀺 𑀩𑁆𑀬𑀜𑁆𑀚𑀦𑀯𑀲𑁂𑀦 𑀯𑀸 𑀧𑀽𑀭𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀺. 𑀅𑀬𑀁 𑀧𑀦 𑀫𑀳𑀸𑀓𑀘𑁆𑀘𑀸𑀦𑀢𑁆𑀣𑁂𑀭𑁄 𑀉𑀪𑀬𑀯𑀲𑁂𑀦𑀧𑀺 𑀲𑀓𑁆𑀓𑁄𑀢𑀺 𑀢𑀲𑁆𑀲 𑀲𑀗𑁆𑀔𑁂𑀧𑁂𑀦 𑀉𑀤𑁆𑀤𑀺𑀝𑁆𑀞𑀲𑁆𑀲 𑀯𑀺𑀢𑁆𑀣𑀸𑀭𑁂𑀦 𑀲𑀢𑁆𑀣𑀼 𑀅𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 ¶ 𑀤𑁂𑀲𑀦𑀢𑁄, 𑀢𑀲𑁆𑀫𑀸 𑀢𑀢𑁆𑀣 𑀅𑀕𑁆𑀕𑁄𑀢𑀺 𑀯𑀼𑀢𑁆𑀢𑁄. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀧𑀸𑀢𑁄𑀯 𑀲𑀼𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑁆𑀯𑀸 𑀉𑀧𑁄𑀲𑀣𑀗𑁆𑀕𑀸𑀦𑀺 𑀅𑀥𑀺𑀝𑁆𑀞𑀸𑀬𑀸’’𑀢𑀺𑀆𑀤𑀺𑀦𑀸 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀅𑀜𑁆𑀜𑁂𑀳𑀻𑀢𑀺 𑀅𑀜𑁆𑀜𑀸𑀲𑀁 𑀇𑀢𑁆𑀣𑀻𑀦𑀁 𑀓𑁂𑀲𑁂𑀳𑀺 𑀅𑀢𑀺𑀯𑀺𑀬 𑀤𑀻𑀖𑀸. 𑀦 𑀓𑁂𑀯𑀮𑀜𑁆𑀘 𑀤𑀻𑀖𑀸 𑀏𑀯, 𑀅𑀣 𑀔𑁄 𑀲𑀺𑀦𑀺𑀤𑁆𑀥𑀦𑀻𑀮𑀫𑀼𑀤𑀼𑀓𑀜𑁆𑀘𑀺𑀓𑀸 𑀘. 𑀦𑀺𑀓𑁆𑀓𑁂𑀲𑀻𑀢𑀺 𑀅𑀧𑁆𑀧𑀓𑁂𑀲𑀻 𑀬𑀣𑀸 ‘‘𑀅𑀦𑀼𑀤𑀭𑀸 𑀓𑀜𑁆𑀜𑀸’’𑀢𑀺.

𑀧𑀡𑀺𑀬𑀦𑁆𑀢𑀺 𑀯𑀺𑀓𑁆𑀓𑁂𑀢𑀩𑁆𑀩𑀪𑀡𑁆𑀟𑀁. 𑀆𑀯𑀚𑁆𑀚𑁂𑀢𑁆𑀯𑀸𑀢𑀺 𑀉𑀧𑀦𑀺𑀲𑁆𑀲𑀬𑀁 𑀓𑁂𑀲𑀸𑀦𑀁 𑀧𑀓𑀢𑀺𑀪𑀸𑀯𑀸𑀧𑀢𑁆𑀢𑀺𑀜𑁆𑀘 𑀆𑀯𑀚𑁆𑀚𑁂𑀢𑁆𑀯𑀸. 𑀕𑀸𑀭𑀯𑁂𑀦𑀸𑀢𑀺 𑀫𑀼𑀡𑁆𑀟𑀲𑀻𑀲𑀸𑀧𑀺 𑀣𑁂𑀭𑁂 𑀕𑀸𑀭𑀯𑁂𑀦 𑀏𑀓𑀯𑀘𑀦𑁂𑀦𑁂𑀯 𑀆𑀕𑀦𑁆𑀢𑁆𑀯𑀸. 𑀦𑀺𑀫𑀦𑁆𑀢𑁂𑀢𑁆𑀯𑀸𑀢𑀺 𑀲𑁆𑀯𑀸𑀢𑀦𑀸𑀬 ¶ 𑀦𑀺𑀫𑀦𑁆𑀢𑁂𑀢𑁆𑀯𑀸. 𑀇𑀫𑀺𑀲𑁆𑀲𑀸 𑀇𑀢𑁆𑀣𑀺𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑁂𑀝𑁆𑀞𑀺𑀥𑀻𑀢𑀭𑀫𑀸𑀳. 𑀤𑀺𑀝𑁆𑀞𑀥𑀫𑁆𑀫𑀺𑀓𑁄𑀯𑀸𑀢𑀺 𑀅𑀯𑀥𑀸𑀭𑀡𑀁 𑀅𑀝𑁆𑀞𑀸𑀦𑀧𑀬𑀼𑀢𑁆𑀢𑀁, 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀬𑀲𑀧𑀝𑀺𑀮𑀸𑀪𑁄𑀯 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀬𑀲𑀧𑀝𑀺𑀮𑀸𑀪𑁄𑀢𑀺 𑀘 𑀪𑀯𑀲𑀫𑁆𑀧𑀢𑁆𑀢𑀺𑀧𑀝𑀺𑀮𑀸𑀪𑁄. 𑀲𑀢𑁆𑀢𑀲𑀼 𑀳𑀺 𑀚𑀯𑀦𑀘𑁂𑀢𑀦𑀸𑀲𑀼 𑀧𑀞𑀫𑀸 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀨𑀮𑀸, 𑀧𑀘𑁆𑀙𑀺𑀫𑀸 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀨𑀮𑀸, 𑀫𑀚𑁆𑀛𑁂 𑀧𑀜𑁆𑀘 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀨𑀮𑀸, 𑀢𑀲𑁆𑀫𑀸 𑀧𑀞𑀫𑀁 𑀏𑀓𑀁 𑀘𑁂𑀢𑀦𑀁 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀬𑀣𑀸𑀲𑀓𑀁 𑀧𑀭𑀺𑀧𑀼𑀡𑁆𑀡𑀨𑀮𑀤𑀸𑀬𑀺𑀦𑁄 𑀳𑁄𑀦𑁆𑀢𑀺, 𑀧𑀞𑀫𑀘𑁂𑀢𑀦𑀸𑀬 𑀧𑀦 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀬𑀲𑀧𑀝𑀺𑀮𑀸𑀪𑁄𑀯 𑀅𑀳𑁄𑀲𑀺.

𑀧𑀞𑀫𑀏𑀢𑀤𑀕𑁆𑀕𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀏𑀢𑀤𑀕𑁆𑀕𑀯𑀕𑁆𑀕𑁄

(𑁧𑁪) 𑁨. 𑀤𑀼𑀢𑀺𑀬𑀏𑀢𑀤𑀕𑁆𑀕𑀯𑀕𑁆𑀕𑀯𑀡𑁆𑀡𑀦𑀸

𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑀯𑀢𑁆𑀣𑀼

𑁧𑁯𑁮-𑁨𑁦𑁦. 𑀤𑀼𑀢𑀺𑀬𑀲𑁆𑀲 ¶ 𑀧𑀞𑀫𑁂 𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀦𑁆𑀢𑀺 𑀅𑀪𑀺𑀜𑁆𑀜𑀸𑀫𑀦𑁂𑀦 𑀉𑀧𑁆𑀧𑀸𑀤𑀺𑀢𑀁. 𑀫𑀦𑁂𑀦 𑀓𑀢𑀓𑀸𑀬𑁄𑀢𑀺 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑁂𑀦 𑀤𑁂𑀲𑀦𑁆𑀢𑀭𑀁 𑀧𑀢𑁆𑀢𑀓𑀸𑀬𑁄. 𑀫𑀦𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑀓𑀸𑀬𑁄𑀢𑀺 𑀅𑀪𑀺𑀜𑁆𑀜𑀸𑀫𑀦𑀲𑀸 𑀦𑀺𑀫𑁆𑀫𑀺𑀢𑀓𑀸𑀬𑁄 ‘‘𑀅𑀜𑁆𑀜𑀁 𑀓𑀸𑀬𑀁 𑀅𑀪𑀺𑀦𑀺𑀫𑁆𑀫𑀺𑀦𑀸𑀢𑀻’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁩𑁬-𑁨𑁩𑁭; 𑀧𑀝𑀺. 𑀫. 𑁩.𑁧𑁪) 𑀯𑀺𑀬. 𑀏𑀓𑀲𑀤𑀺𑀲𑁂𑀬𑁂𑀯𑀸𑀢𑀺 𑀅𑀢𑁆𑀢𑀲𑀤𑀺𑀲𑁂𑀬𑁂𑀯. 𑀏𑀓𑀯𑀺𑀥𑀫𑁂𑀯𑀸𑀢𑀺 𑀅𑀢𑁆𑀢𑀦𑀸 𑀓𑀢𑀧𑁆𑀧𑀓𑀸𑀭𑀫𑁂𑀯. 𑀏𑀢𑀧𑁆𑀧𑀭𑀫𑁄 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀲𑀸𑀯𑀓𑀸𑀦𑀁 𑀇𑀤𑁆𑀥𑀺𑀦𑀺𑀫𑁆𑀫𑀸𑀦𑀯𑀺𑀥𑀺. 𑀅𑀕𑁆𑀕𑁄 𑀦𑀸𑀫 𑀚𑀸𑀢𑁄 𑀏𑀓𑀤𑁂𑀲𑁂𑀦 𑀲𑀢𑁆𑀣𑀼 𑀇𑀤𑁆𑀥𑀺𑀦𑀺𑀫𑁆𑀫𑀸𑀦𑀸𑀦𑀼𑀯𑀺𑀥𑀸𑀦𑀢𑁄.

𑀮𑀸𑀪𑀺𑀢𑀸𑀬𑀸𑀢𑀺 ¶ 𑀏𑀢𑁆𑀣 𑀮𑀸𑀪𑀻𑀢𑀺 𑀈𑀓𑀸𑀭𑁄 𑀅𑀢𑀺𑀲𑀬𑀢𑁆𑀣𑁄. 𑀢𑁂𑀦 𑀣𑁂𑀭𑀲𑁆𑀲 𑀘𑀢𑀼𑀦𑁆𑀦𑀁 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁 𑀅𑀢𑀺𑀲𑀬𑁂𑀦 𑀲𑀯𑀺𑀲𑁂𑀲𑀮𑀸𑀪𑀺𑀢𑀁 𑀤𑀲𑁆𑀲𑁂𑀢𑀺. 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀁 𑀮𑀸𑀪𑀺𑀢𑀸𑀬𑀸𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀦 𑀓𑁂𑀯𑀮𑀜𑁆𑀘𑁂𑀢𑀸 𑀘𑁂𑀢𑁄𑀲𑀜𑁆𑀜𑀸𑀯𑀺𑀯𑀝𑁆𑀝𑀓𑀼𑀲𑀮𑀢𑀸 𑀭𑀽𑀧𑀸𑀭𑀽𑀧𑀚𑁆𑀛𑀸𑀦𑀮𑀸𑀪𑀺𑀢𑀸𑀬 𑀏𑀯, 𑀅𑀣 𑀔𑁄 𑀇𑀫𑁂𑀳𑀺𑀧𑀺 𑀓𑀸𑀭𑀡𑁂𑀳𑀻𑀢𑀺 𑀤𑀲𑁆𑀲𑁂𑀢𑀼𑀁 𑁋 ‘‘𑀘𑀽𑀴𑀧𑀦𑁆𑀣𑀓𑁄 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑁂𑀢𑁄𑀢𑀺 𑀘𑁂𑀢𑁆𑀣 𑀘𑀺𑀢𑁆𑀢𑀲𑀻𑀲𑁂𑀦 𑀲𑀫𑀸𑀥𑀺 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀘𑁂𑀢𑀲𑁄 𑀲𑀫𑀸𑀥𑀺𑀲𑁆𑀲 𑀯𑀺𑀯𑀝𑁆𑀝𑀦𑀁 𑀘𑁂𑀢𑁄𑀯𑀺𑀯𑀝𑁆𑀝𑁄, 𑀏𑀓𑀲𑁆𑀫𑀺𑀁𑀬𑁂𑀯𑀸𑀭𑀫𑁆𑀫𑀡𑁂 𑀲𑀫𑀸𑀥𑀺𑀘𑀺𑀢𑁆𑀢𑀁 𑀯𑀺𑀯𑀝𑁆𑀝𑁂𑀢𑁆𑀯𑀸 𑀳𑁂𑀝𑁆𑀞𑀺𑀫𑀲𑁆𑀲 𑀳𑁂𑀝𑁆𑀞𑀺𑀫𑀲𑁆𑀲 𑀉𑀧𑀭𑀽𑀧𑀭𑀺 𑀳𑀸𑀧𑀦𑀢𑁄 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀮𑀸𑀪𑀻 𑀘𑁂𑀢𑁄𑀯𑀺𑀯𑀝𑁆𑀝𑀓𑀼𑀲𑀮𑁄 𑀦𑀸𑀫. ‘‘𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦’’𑀦𑁆𑀢𑀺𑀆𑀤𑀺𑀦𑀸 (𑀥. 𑀲. 𑁨𑁬𑁫) 𑀯𑀼𑀢𑁆𑀢𑀲𑀜𑁆𑀜𑀸 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 ‘‘𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢𑀁…𑀧𑁂… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑀜𑁆𑀜𑀸𑀲𑀳𑀕𑀢’’𑀦𑁆𑀢𑀺 (𑀥. 𑀲. 𑁨𑁬𑁫-𑁨𑁬𑁮) 𑀲𑀜𑁆𑀜𑀸𑀲𑀻𑀲𑁂𑀦 𑀯𑀼𑀢𑁆𑀢𑀚𑁆𑀛𑀸𑀦𑀸𑀦𑀁 𑀯𑀺𑀯𑀝𑁆𑀝𑀓𑀼𑀲𑀮𑁄, 𑀢𑀣𑀸 𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀲𑀜𑁆𑀜𑀸 𑀦𑀺𑀘𑁆𑀘𑀲𑀜𑁆𑀜𑀸𑀤𑀺𑀢𑁄 𑀘𑀺𑀢𑁆𑀢𑀁 𑀯𑀺𑀯𑀝𑁆𑀝𑁂𑀢𑁆𑀯𑀸 𑀓𑁂𑀯𑀮𑁂 𑀭𑀽𑀧𑀸𑀭𑀽𑀧𑀥𑀫𑁆𑀫𑀫𑀢𑁆𑀢𑁂 𑀅𑀲𑀗𑁆𑀔𑀢𑁂 𑀦𑀺𑀩𑁆𑀩𑀸𑀦𑁂 𑀘 𑀯𑀺𑀲𑁂𑀲𑀢𑁄 𑀯𑀝𑁆𑀝𑀦𑀢𑁄 𑀘 𑀲𑀼𑀜𑁆𑀜𑀢𑀸𑀦𑀼𑀧𑀲𑁆𑀲𑀦𑀸𑀩𑀳𑀼𑀮𑁄 𑀲𑀜𑁆𑀜𑀸𑀯𑀺𑀯𑀝𑁆𑀝𑀓𑀼𑀲𑀮𑁄. 𑀲𑀫𑀸𑀥𑀺𑀓𑀼𑀲𑀮𑀢𑀸𑀬 𑀘𑁂𑀢𑁄𑀯𑀺𑀯𑀝𑁆𑀝𑀓𑀼𑀲𑀮𑀢𑀸 𑀢𑀩𑁆𑀩𑀳𑀼𑀮𑀯𑀺𑀳𑀸𑀭𑀺𑀢𑀸𑀬. 𑀢𑀣𑀸 𑀯𑀺𑀧𑀲𑁆𑀲𑀦𑀸𑀓𑀼𑀲𑀮𑀢𑀸𑀬 𑀲𑀜𑁆𑀜𑀸𑀯𑀺𑀯𑀝𑁆𑀝𑀓𑀼𑀲𑀮𑀢𑀸. 𑀏𑀓𑁄𑀢𑀺 𑀘𑀽𑀴𑀧𑀦𑁆𑀣𑀓𑀢𑁆𑀣𑁂𑀭𑀁 𑀯𑀤𑀢𑀺. 𑀲𑀫𑀸𑀥𑀺𑀮𑀓𑁆𑀔𑀡𑁂𑀢𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸𑀤𑀺𑀲𑀫𑀸𑀥𑀺𑀲𑀪𑀸𑀯𑁂. 𑀧𑀼𑀦 𑀏𑀓𑁄𑀢𑀺 𑀫𑀳𑀸𑀧𑀦𑁆𑀣𑀓𑀢𑁆𑀣𑁂𑀭𑀫𑀸𑀳. 𑀯𑀺𑀧𑀲𑁆𑀲𑀦𑀸𑀮𑀓𑁆𑀔𑀡𑁂𑀢𑀺 𑀲𑀢𑁆𑀢𑀅𑀦𑀼𑀧𑀲𑁆𑀲𑀦𑀸 𑀅𑀝𑁆𑀞𑀸𑀭𑀲𑀫𑀳𑀸𑀯𑀺𑀧𑀲𑁆𑀲𑀦𑀸𑀤𑀺𑀯𑀺𑀧𑀲𑁆𑀲𑀦𑀸𑀲𑀪𑀸𑀯𑁂. 𑀲𑀫𑀸𑀥𑀺𑀕𑀸𑀴𑁆𑀳𑁄𑀢𑀺 𑀲𑀫𑀸𑀥𑀺𑀲𑁆𑀫𑀺𑀁 𑀑𑀕𑀸𑀴𑁆𑀳𑀘𑀺𑀢𑁆𑀢𑁄 𑀲𑀼𑀪𑀸𑀯𑀺𑀢𑀪𑀸𑀯𑀦𑀢𑀸. 𑀅𑀗𑁆𑀕𑀲𑀁𑀔𑀺𑀢𑁆𑀢𑁂𑀢𑀺 ¶ 𑀘𑀢𑀼𑀭𑀗𑁆𑀕𑀺𑀓𑀢𑀺𑀯𑀗𑁆𑀕𑀺𑀓𑀸𑀤𑀺𑀯𑀲𑁂𑀦 𑀛𑀸𑀦𑀗𑁆𑀕𑀸𑀦𑀁 𑀲𑀗𑁆𑀔𑀺𑀧𑀦𑁂. 𑀆𑀭𑀫𑁆𑀫𑀡𑀲𑀁𑀔𑀺𑀢𑁆𑀢𑁂𑀢𑀺 𑀓𑀲𑀺𑀡𑀼𑀕𑁆𑀖𑀸𑀝𑀺𑀫𑀸𑀓𑀸𑀲𑀸𑀤𑀺𑀦𑀺𑀩𑁆𑀩𑀢𑁆𑀢𑀦𑁂𑀦 𑀓𑀲𑀺𑀡𑀸𑀤𑀺𑀆𑀭𑀫𑁆𑀫𑀡𑀸𑀦𑀁 𑀲𑀁𑀔𑀺𑀧𑀦𑁂. 𑀅𑀗𑁆𑀕𑀯𑀯𑀢𑁆𑀣𑀸𑀧𑀦𑁂𑀢𑀺 𑀯𑀺𑀢𑀓𑁆𑀓𑀸𑀤𑀻𑀦𑀁 𑀛𑀸𑀦𑀗𑁆𑀕𑀸𑀦𑀁 𑀯𑀯𑀢𑁆𑀣𑀸𑀧𑀦𑁂. 𑀆𑀭𑀫𑁆𑀫𑀡𑀯𑀯𑀢𑁆𑀣𑀸𑀧𑀦𑁂𑀢𑀺 𑀧𑀣𑀯𑀻𑀓𑀲𑀺𑀡𑀸𑀤𑀺𑀚𑁆𑀛𑀸𑀦𑀸𑀭𑀫𑁆𑀫𑀡𑀸𑀦𑀁 𑀯𑀯𑀢𑁆𑀣𑀸𑀧𑀦𑁂.

𑀛𑀸𑀦𑀗𑁆𑀕𑁂𑀳𑀻𑀢𑀺 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀗𑁆𑀕𑁂𑀳𑀺, 𑀛𑀸𑀦𑀗𑁆𑀕𑀸𑀦𑁂𑀯 𑀛𑀸𑀦𑀁. 𑀧𑀼𑀦 𑀛𑀸𑀦𑀗𑁆𑀕𑁂𑀳𑀻𑀢𑀺 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀗𑁆𑀕𑁂𑀳𑀺. 𑀪𑀸𑀢𑀸𑀢𑀺 𑀚𑁂𑀝𑁆𑀞𑀪𑀸𑀢𑀸. 𑀅𑀲𑁆𑀲𑀸𑀢𑀺 𑀓𑀼𑀝𑀼𑀫𑁆𑀩𑀺𑀬𑀲𑁆𑀲. 𑀲𑀼𑀯𑀡𑁆𑀡𑀧𑀽𑀚𑀦𑁆𑀢𑀺 𑀲𑁄𑀯𑀡𑁆𑀡𑀫𑀬𑀁 𑀧𑀼𑀧𑁆𑀨𑀧𑀽𑀚𑀁 𑀓𑀢𑁆𑀯𑀸. 𑀤𑁂𑀯𑀧𑀼𑀭𑁂𑀢𑀺 𑀢𑀸𑀯𑀢𑀺𑀁𑀲𑀪𑀯𑀦𑁂 𑀲𑀼𑀤𑀲𑁆𑀲𑀦𑀫𑀳𑀸𑀦𑀕𑀭𑁂. 𑀅𑀕𑁆𑀕𑀤𑁆𑀯𑀸𑀭𑁂𑀦𑀸𑀢𑀺 𑀢𑀲𑁆𑀫𑀺𑀁 𑀤𑀺𑀯𑀲𑁂 𑀅𑀕𑁆𑀕𑀁 𑀲𑀩𑁆𑀩𑀧𑀞𑀫𑀁 𑀯𑀺𑀯𑀝𑁂𑀦 𑀦𑀕𑀭𑀤𑁆𑀯𑀸𑀭𑁂𑀦 𑀦𑀺𑀓𑁆𑀔𑀫𑀺𑀢𑁆𑀯𑀸.

𑀓𑁄𑀓𑀦𑀤𑀦𑁆𑀢𑀺 ¶ 𑀧𑀤𑀼𑀫𑀯𑀺𑀲𑁂𑀲𑀦𑀁 𑀬𑀣𑀸 ‘‘𑀓𑁄𑀓𑀸𑀲𑀓’’𑀦𑁆𑀢𑀺. 𑀢𑀁 𑀓𑀺𑀭 𑀩𑀳𑀼𑀧𑀢𑁆𑀢𑀁 𑀯𑀡𑁆𑀡𑀲𑀫𑁆𑀧𑀦𑁆𑀦𑀁 𑀅𑀢𑀺𑀲𑀼𑀕𑀦𑁆𑀥𑀜𑁆𑀘 𑀳𑁄𑀢𑀺. ‘‘𑀓𑁄𑀓𑀦𑀤𑀁 𑀦𑀸𑀫 𑀲𑁂𑀢𑀧𑀤𑀼𑀫’’𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. 𑀧𑀸𑀢𑁄𑀢𑀺 𑀧𑀕𑁂𑀯. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀬𑀣𑀸 𑀓𑁄𑀓𑀦𑀤𑀲𑀗𑁆𑀔𑀸𑀢𑀁 𑀧𑀤𑀼𑀫𑀁 𑀧𑀸𑀢𑁄 𑀲𑀽𑀭𑀺𑀬𑀼𑀕𑁆𑀕𑀫𑀦𑀯𑁂𑀮𑀸𑀬𑀁 𑀨𑀼𑀮𑁆𑀮𑀁 𑀯𑀺𑀓𑀲𑀺𑀢𑀁 𑀅𑀯𑀻𑀢𑀕𑀦𑁆𑀥𑀁 𑀲𑀺𑀬𑀸 𑀯𑀺𑀭𑁄𑀘𑀫𑀸𑀦𑀁, 𑀏𑀯𑀁 𑀲𑀭𑀻𑀭𑀕𑀦𑁆𑀥𑁂𑀦 𑀕𑀼𑀡𑀕𑀦𑁆𑀥𑁂𑀦 𑀘 𑀲𑀼𑀕𑀦𑁆𑀥𑀁 𑀲𑀭𑀤𑀓𑀸𑀮𑁂 𑀅𑀦𑁆𑀢𑀮𑀺𑀓𑁆𑀔𑁂 𑀆𑀤𑀺𑀘𑁆𑀘𑀫𑀺𑀯 𑀅𑀢𑁆𑀢𑀦𑁄 𑀢𑁂𑀚𑀲𑀸 𑀢𑀧𑀦𑁆𑀢𑀁 𑀅𑀗𑁆𑀕𑁂𑀳𑀺 𑀦𑀺𑀘𑁆𑀙𑀭𑀡𑀓𑀚𑀼𑀢𑀺𑀬𑀸 𑀅𑀗𑁆𑀕𑀻𑀭𑀲𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀧𑀲𑁆𑀲𑀸𑀢𑀺.

𑀘𑀽𑀴𑀧𑀦𑁆𑀣𑀓𑁄 𑀓𑀺𑀭 𑀓𑀲𑁆𑀲𑀧𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀓𑀸𑀮𑁂 𑀧𑀩𑁆𑀩𑀚𑀺𑀢𑁆𑀯𑀸 𑀧𑀜𑁆𑀜𑀯𑀸 𑀳𑀼𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀲 𑀤𑀦𑁆𑀥𑀪𑀺𑀓𑁆𑀔𑀼𑀦𑁄 𑀉𑀤𑁆𑀤𑁂𑀲𑀕𑀳𑀡𑀓𑀸𑀮𑁂 𑀧𑀭𑀺𑀳𑀸𑀲𑀓𑁂𑀴𑀺𑀁 𑀅𑀓𑀸𑀲𑀺. 𑀲𑁄 𑀪𑀺𑀓𑁆𑀔𑀼 𑀢𑁂𑀦 𑀧𑀭𑀺𑀳𑀸𑀲𑁂𑀦 𑀮𑀚𑁆𑀚𑀺𑀢𑁄 𑀦𑁂𑀯 𑀉𑀤𑁆𑀤𑁂𑀲𑀁 𑀕𑀡𑁆𑀳𑀺, 𑀦 𑀲𑀚𑁆𑀛𑀸𑀬𑀫𑀓𑀸𑀲𑀺. 𑀢𑁂𑀦 𑀓𑀫𑁆𑀫𑁂𑀦𑀸𑀬𑀁 𑀧𑀩𑁆𑀩𑀚𑀺𑀢𑁆𑀯𑀸𑀯 𑀤𑀦𑁆𑀥𑁄 𑀚𑀸𑀢𑁄, 𑀢𑀲𑁆𑀫𑀸 𑀕𑀳𑀺𑀢𑀕𑀳𑀺𑀢𑀧𑀤𑀁 𑀉𑀧𑀭𑀺𑀉𑀧𑀭𑀺𑀧𑀤𑀁 𑀕𑀡𑁆𑀳𑀦𑁆𑀢𑀲𑁆𑀲 𑀦𑀲𑁆𑀲𑀢𑀺. 𑀇𑀤𑁆𑀥𑀺𑀬𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀲𑀼𑀤𑁆𑀥𑀁 𑀘𑁄𑀴𑀔𑀡𑁆𑀟𑀁 𑀅𑀤𑀸𑀲𑀻𑀢𑀺 𑀢𑀲𑁆𑀲 𑀧𑀼𑀩𑁆𑀩𑀳𑁂𑀢𑀼𑀁 𑀤𑀺𑀲𑁆𑀯𑀸 𑀢𑀤𑀦𑀼𑀭𑀽𑀧𑁂 𑀓𑀫𑁆𑀫𑀝𑁆𑀞𑀸𑀦𑁂 𑀦𑀺𑀬𑁄𑀚𑁂𑀦𑁆𑀢𑁄 𑀲𑀼𑀤𑁆𑀥𑀁 𑀘𑁄𑀴𑀔𑀡𑁆𑀟𑀁 𑀅𑀤𑀸𑀲𑀺. 𑀲𑁄 𑀓𑀺𑀭 𑀧𑀼𑀩𑁆𑀩𑁂 𑀭𑀸𑀚𑀸 𑀳𑀼𑀢𑁆𑀯𑀸 𑀦𑀕𑀭𑀁 𑀧𑀤𑀓𑁆𑀔𑀺𑀡𑀁 𑀓𑀭𑁄𑀦𑁆𑀢𑁄 𑀦𑀮𑀸𑀝𑀢𑁄 𑀲𑁂𑀤𑁂 𑀫𑀼𑀘𑁆𑀘𑀦𑁆𑀢𑁂 𑀧𑀭𑀺𑀲𑀼𑀤𑁆𑀥𑁂𑀦 𑀲𑀸𑀝𑀓𑁂𑀦 𑀦𑀮𑀸𑀝𑀁 𑀧𑀼𑀜𑁆𑀙𑀺, 𑀲𑀸𑀝𑀓𑁄 𑀓𑀺𑀮𑀺𑀝𑁆𑀞𑁄 𑀅𑀳𑁄𑀲𑀺. 𑀲𑁄 ‘‘𑀇𑀫𑀁 𑀲𑀭𑀻𑀭𑀁 𑀦𑀺𑀲𑁆𑀲𑀸𑀬 𑀏𑀯𑀭𑀽𑀧𑁄 𑀧𑀭𑀺𑀲𑀼𑀤𑁆𑀥𑀲𑀸𑀝𑀓𑁄 𑀧𑀓𑀢𑀺𑀁 𑀚𑀳𑀺𑀢𑁆𑀯𑀸 𑀓𑀺𑀮𑀺𑀝𑁆𑀞𑁄 𑀚𑀸𑀢𑁄, 𑀅𑀦𑀺𑀘𑁆𑀘𑀸 𑀯𑀢 𑀲𑀗𑁆𑀔𑀸𑀭𑀸’’𑀢𑀺 𑀅𑀦𑀺𑀘𑁆𑀘𑀲𑀜𑁆𑀜𑀁 𑀧𑀝𑀺𑀮𑀪𑀺. 𑀢𑁂𑀦 𑀓𑀸𑀭𑀡𑁂𑀦𑀲𑁆𑀲 𑀭𑀚𑁄𑀳𑀭𑀡𑀫𑁂𑀯 𑀧𑀘𑁆𑀘𑀬𑁄 𑀚𑀸𑀢𑁄.

𑀮𑁄𑀫𑀸𑀦𑀻𑀢𑀺 𑀘𑁄𑀴𑀔𑀡𑁆𑀟𑀢𑀦𑁆𑀢𑀕𑀢𑀅𑀁𑀲𑀼𑀓𑁂 𑀯𑀤𑀢𑀺. ‘‘𑀓𑀺𑀮𑀺𑀝𑁆𑀞𑀥𑀸𑀢𑀼𑀓𑀸𑀦𑀻’’𑀢𑀺 𑀓𑀺𑀮𑀺𑀝𑁆𑀞𑀲𑀪𑀸𑀯𑀸𑀦𑀺. 𑀏𑀯𑀁𑀕𑀢𑀺𑀓𑀫𑁂𑀯𑀸𑀢𑀺 𑀇𑀤𑀁 𑀘𑀺𑀢𑁆𑀢𑀫𑁆𑀧𑀺 𑀪𑀯𑀗𑁆𑀕𑀯𑀲𑁂𑀦 𑀧𑀓𑀢𑀺𑀬𑀸 𑀧𑀡𑁆𑀟𑀭𑀁 𑀧𑀭𑀺𑀲𑀼𑀤𑁆𑀥𑀁 𑀭𑀸𑀕𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀯𑀲𑁂𑀦 𑀲𑀁𑀓𑀺𑀮𑀺𑀝𑁆𑀞𑀁 𑀚𑀸𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀦𑀓𑁆𑀔𑀢𑁆𑀢𑀁 𑀲𑀫𑀸𑀦𑁂𑀢𑁆𑀯𑀸𑀢𑀺 𑀦𑀓𑁆𑀔𑀢𑁆𑀢𑀁 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸, 𑀆𑀯𑀚𑁆𑀚𑁂𑀢𑁆𑀯𑀸𑀢𑀺 𑀅𑀢𑁆𑀣𑁄 ¶ . 𑀩𑀺𑀴𑀸𑀭𑀲𑁆𑀲𑀢𑁆𑀣𑀸𑀬𑀸𑀢𑀺 𑀩𑀺𑀴𑀸𑀭𑀲𑁆𑀲 𑀕𑁄𑀘𑀭𑀢𑁆𑀣𑀸𑀬. 𑀚𑀮𑀧𑀣𑀓𑀫𑁆𑀫𑀺𑀓𑁂𑀦𑀸𑀢𑀺 𑀲𑀫𑀼𑀤𑁆𑀤𑀓𑀫𑁆𑀫𑀺𑀓𑁂𑀦. 𑀘𑀸𑀭𑀺𑀦𑁆𑀢𑀺 𑀔𑀸𑀤𑀺𑀢𑀩𑁆𑀩𑀢𑀺𑀡𑀁. 𑀲𑀘𑁆𑀘𑀓𑀸𑀭𑀦𑁆𑀢𑀺 𑀲𑀘𑁆𑀘𑀪𑀸𑀯𑀸𑀯𑀳𑀁 𑀓𑀸𑀭𑀁, ‘‘𑀅𑀢𑁆𑀢𑀦𑀸 𑀕𑀳𑀺𑀢𑁂 𑀪𑀡𑁆𑀟𑁂 𑀅𑀜𑁆𑀜𑁂𑀲𑀁 𑀦 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀤𑀸𑀢𑀩𑁆𑀩𑀮𑀜𑁆𑀚𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑀺𑀬𑁂𑀦 𑀧𑀝𑀺𑀳𑀸𑀭𑁂𑀦𑀸𑀢𑀺 𑀢𑀢𑀺𑀬𑁂𑀦 𑀲𑀸𑀲𑀦𑁂𑀦. 𑀧𑀢𑁆𑀢𑀺𑀓𑀸 𑀳𑀼𑀢𑁆𑀯𑀸𑀢𑀺 𑀲𑀸𑀫𑀺𑀦𑁄 𑀳𑀼𑀢𑁆𑀯𑀸.

𑀅𑀧𑁆𑀧𑀓𑁂𑀦𑀧𑀻𑀢𑀺 𑀣𑁄𑀓𑁂𑀦𑀧𑀺 𑀧𑀭𑀺𑀢𑁆𑀢𑁂𑀦𑀧𑀺. 𑀫𑁂𑀥𑀸𑀯𑀻𑀢𑀺 𑀧𑀜𑁆𑀜𑀯𑀸. 𑀧𑀸𑀪𑀢𑁂𑀦𑀸𑀢𑀺 𑀪𑀡𑁆𑀟𑀫𑀽𑀮𑁂𑀦. 𑀯𑀺𑀘𑀓𑁆𑀔𑀡𑁄𑀢𑀺 𑀯𑁄𑀳𑀸𑀭𑀓𑀼𑀲𑀮𑁄. 𑀲𑀫𑀼𑀝𑁆𑀞𑀸𑀧𑁂𑀢𑀺 𑀅𑀢𑁆𑀢𑀸𑀦𑀦𑁆𑀢𑀺 𑀫𑀳𑀦𑁆𑀢𑀁 𑀥𑀦𑀁 𑀬𑀲𑀜𑁆𑀘 𑀉𑀧𑁆𑀧𑀸𑀤𑁂𑀢𑁆𑀯𑀸 𑀢𑀢𑁆𑀣 𑀅𑀢𑁆𑀢𑀸𑀦𑀁 𑀲𑀡𑁆𑀞𑀧𑁂𑀢𑀺 𑀧𑀢𑀺𑀝𑁆𑀞𑀸𑀧𑁂𑀢𑀺 ¶ . 𑀬𑀣𑀸 𑀓𑀺𑀁? 𑀅𑀡𑀼𑀁 𑀅𑀕𑁆𑀕𑀺𑀁𑀯 𑀲𑀦𑁆𑀥𑀫𑀁, 𑀬𑀣𑀸 𑀧𑀡𑁆𑀟𑀺𑀢𑁄 𑀧𑀼𑀭𑀺𑀲𑁄 𑀧𑀭𑀺𑀢𑁆𑀢𑀓𑀁 𑀅𑀕𑁆𑀕𑀺𑀁 𑀅𑀦𑀼𑀓𑁆𑀓𑀫𑁂𑀦 𑀕𑁄𑀫𑀬𑀘𑀼𑀡𑁆𑀡𑀸𑀤𑀻𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀫𑀼𑀔𑀯𑀸𑀢𑁂𑀦 𑀥𑀫𑁂𑀦𑁆𑀢𑁄 𑀲𑀫𑀼𑀝𑁆𑀞𑀸𑀧𑁂𑀢𑀺 𑀯𑀟𑁆𑀠𑁂𑀢𑀺, 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀓𑀭𑁄𑀢𑀺, 𑀏𑀯𑀫𑁂𑀯 𑀧𑀡𑁆𑀟𑀺𑀢𑁄 𑀣𑁄𑀓𑀫𑁆𑀧𑀺 𑀧𑀸𑀪𑀢𑀁 𑀮𑀪𑀺𑀢𑁆𑀯𑀸 𑀦𑀸𑀦𑀸𑀉𑀧𑀸𑀬𑁂𑀳𑀺 𑀧𑀬𑁄𑀚𑁂𑀢𑁆𑀯𑀸 𑀥𑀦𑀜𑁆𑀘 𑀬𑀲𑀜𑁆𑀘 𑀯𑀟𑁆𑀠𑁂𑀢𑀺, 𑀯𑀟𑁆𑀠𑁂𑀢𑁆𑀯𑀸 𑀧𑀼𑀦 𑀢𑀢𑁆𑀣 𑀅𑀢𑁆𑀢𑀸𑀦𑀁 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀢𑀸𑀬 𑀏𑀯 𑀯𑀸 𑀧𑀦 𑀥𑀦𑀲𑁆𑀲 𑀫𑀳𑀦𑁆𑀢𑀢𑀸𑀬 𑀅𑀢𑁆𑀢𑀸𑀦𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀅𑀪𑀺𑀜𑁆𑀜𑀸𑀢𑀁 𑀧𑀸𑀓𑀝𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄.

𑀲𑀼𑀪𑀽𑀢𑀺𑀢𑁆𑀣𑁂𑀭𑀯𑀢𑁆𑀣𑀼

𑁨𑁦𑁧-𑁨𑁦𑁨. 𑀢𑀢𑀺𑀬𑁂 𑀭𑀡𑀸𑀢𑀺 𑀳𑀺 𑀭𑀸𑀕𑀸𑀤𑀬𑁄 𑀓𑀺𑀮𑁂𑀲𑀸 𑀯𑀼𑀘𑁆𑀘𑀦𑁆𑀢𑀻𑀢𑀺 ‘‘𑀲𑀭𑀡𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁦𑁦 𑀤𑀼𑀓𑀫𑀸𑀢𑀺𑀓𑀸) 𑀭𑀸𑀕𑀸𑀤𑀬𑁄 𑀓𑀺𑀮𑁂𑀲𑀸 ‘‘𑀭𑀡𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀭𑀡𑀦𑁆𑀢𑀺 𑀏𑀢𑁂𑀳𑀻𑀢𑀺 𑀭𑀡𑀸. 𑀬𑁂𑀳𑀺 𑀅𑀪𑀺𑀪𑀽𑀢𑀸 𑀲𑀢𑁆𑀢𑀸 𑀦𑀸𑀦𑀧𑁆𑀧𑀓𑀸𑀭𑁂𑀦 𑀓𑀦𑁆𑀤𑀦𑁆𑀢𑀺 𑀧𑀭𑀺𑀤𑁂𑀯𑀦𑁆𑀢𑀺, 𑀢𑀲𑁆𑀫𑀸 𑀢𑁂 𑀭𑀸𑀕𑀸𑀤𑀬𑁄 ‘‘𑀭𑀡𑀸’’𑀢𑀺 𑀯𑀼𑀢𑁆𑀢𑀸. 𑀤𑁂𑀲𑀺𑀢𑀦𑀺𑀬𑀸𑀫𑀢𑁄 𑀅𑀦𑁄𑀓𑁆𑀓𑀫𑀺𑀢𑁆𑀯𑀸𑀢𑀺 𑀤𑁂𑀲𑀺𑀢𑀸𑀦𑁄𑀓𑁆𑀓𑀫𑀦𑀢𑁄 𑀅𑀦𑀼𑀧𑀕𑀦𑁆𑀢𑁆𑀯𑀸 𑀤𑁂𑀲𑁂𑀢𑀺, 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑀦𑀺𑀬𑀸𑀫𑁂𑀦𑁂𑀯 𑀅𑀦𑁄𑀤𑀺𑀲𑁆𑀲𑀓𑀁 𑀓𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀦𑁆𑀢𑀺 𑀏𑀯𑀁 𑀫𑁂𑀢𑁆𑀢𑀸𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 𑀪𑀺𑀓𑁆𑀔𑀸𑀕𑀳𑀡𑁂 𑀲𑀢𑀺. 𑀪𑀺𑀓𑁆𑀔𑀸𑀤𑀸𑀬𑀓𑀸𑀦𑀁 𑀫𑀳𑀧𑁆𑀨𑀮𑀁 𑀪𑀯𑀺𑀲𑁆𑀲𑀢𑀻𑀢𑀺 𑀇𑀤𑀁 𑀘𑀽𑀴𑀘𑁆𑀙𑀭𑀸𑀲𑀗𑁆𑀖𑀸𑀢𑀲𑀼𑀢𑁆𑀢𑁂𑀦 (𑀅. 𑀦𑀺. 𑁧.𑁫𑁧 𑀆𑀤𑀬𑁄) 𑀤𑀻𑀧𑁂𑀢𑀩𑁆𑀩𑀁. 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁆𑀧𑀺 𑀳𑀺 𑀓𑀸𑀮𑀁 𑀫𑁂𑀢𑁆𑀢𑀘𑀺𑀢𑁆𑀢𑀁 𑀆𑀲𑁂𑀯𑀦𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀺𑀦𑁆𑀦𑀤𑀸𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀁, 𑀢𑁂𑀦 𑀘 𑀲𑁄 𑀅𑀫𑁄𑀖𑀁 𑀭𑀝𑁆𑀞𑀧𑀺𑀡𑁆𑀟𑀁 𑀪𑀼𑀜𑁆𑀚𑀢𑀻𑀢𑀺 𑀅𑀬𑀫𑀢𑁆𑀣𑁄 𑀢𑀢𑁆𑀣 𑀆𑀕𑀢𑁄𑀬𑁂𑀯. 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀺𑀢𑁆𑀯𑀸𑀢𑀺 𑀆𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸.

𑀔𑀤𑀺𑀭𑀯𑀦𑀺𑀬𑀭𑁂𑀯𑀢𑀢𑁆𑀣𑁂𑀭𑀯𑀢𑁆𑀣𑀼

𑁨𑁦𑁩. 𑀧𑀜𑁆𑀘𑀫𑁂 𑀯𑀦𑀲𑀪𑀸𑀕𑀦𑁆𑀢𑀺 𑀲𑀪𑀸𑀕𑀁 𑀯𑀦𑀁, 𑀲𑀪𑀸𑀕𑀦𑁆𑀢𑀺 𑀘 𑀲𑀧𑁆𑀧𑀸𑀬𑀦𑁆𑀢𑀺 𑀅𑀢𑁆𑀣𑁄. 𑀬𑀜𑁆𑀳𑀺 𑀧𑀓𑀢𑀺𑀯𑀺𑀭𑀼𑀤𑁆𑀥𑀁 ¶ 𑀩𑁆𑀬𑀸𑀥𑀺𑀯𑀺𑀭𑀼𑀤𑁆𑀥𑀜𑁆𑀘 𑀦 𑀳𑁄𑀢𑀺, 𑀢𑀁 ‘‘𑀲𑀪𑀸𑀕’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀉𑀤𑀓𑀲𑀪𑀸𑀕𑀦𑁆𑀢𑀺𑀆𑀤𑀻𑀲𑀼𑀧𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀮𑁆𑀬𑀸𑀡𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁄𑀢𑀺 𑀓𑀮𑁆𑀬𑀸𑀡𑀓𑀫𑁆𑀫𑀽𑀧𑀘𑀬𑀲𑁆𑀲 𑀑𑀓𑀸𑀲𑁄. 𑀢𑀺𑀡𑁆𑀡𑀁 𑀪𑀸𑀢𑀺𑀓𑀸𑀦𑀦𑁆𑀢𑀺 𑀉𑀧𑀢𑀺𑀲𑁆𑀲𑁄, 𑀘𑀼𑀦𑁆𑀤𑁄, 𑀉𑀧𑀲𑁂𑀦𑁄𑀢𑀺 𑀇𑀫𑁂𑀲𑀁 𑀢𑀺𑀡𑁆𑀡𑀁 𑀚𑁂𑀝𑁆𑀞𑀪𑀸𑀢𑀺𑀓𑀸𑀦𑀁. 𑀢𑀺𑀲𑁆𑀲𑀦𑁆𑀦𑀜𑁆𑀘 𑀪𑀕𑀺𑀦𑀻𑀦𑀦𑁆𑀢𑀺 𑀘𑀸𑀮𑀸, 𑀉𑀧𑀘𑀸𑀮𑀸, 𑀲𑀻𑀲𑀼𑀧𑀘𑀸𑀮𑀸𑀢𑀺 𑀇𑀫𑁂𑀲𑀁 𑀢𑀺𑀲𑁆𑀲𑀦𑁆𑀦𑀁 𑀚𑁂𑀝𑁆𑀞𑀪𑀕𑀺𑀦𑀻𑀦𑀁. 𑀏𑀢𑁆𑀣 𑀘 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄 𑀲𑀬𑀁 𑀧𑀩𑁆𑀩𑀚𑀺𑀢𑁆𑀯𑀸 ¶ 𑀘𑀸𑀮𑀸, 𑀉𑀧𑀘𑀸𑀮𑀸, 𑀲𑀻𑀲𑀼𑀧𑀘𑀸𑀮𑀸𑀢𑀺 𑀢𑀺𑀲𑁆𑀲𑁄 𑀪𑀕𑀺𑀦𑀺𑀬𑁄, 𑀘𑀼𑀦𑁆𑀤𑁄 𑀉𑀧𑀲𑁂𑀦𑁄𑀢𑀺 𑀇𑀫𑁂 𑀪𑀸𑀢𑀭𑁄 𑀧𑀩𑁆𑀩𑀸𑀚𑁂𑀲𑀺, 𑀭𑁂𑀯𑀢𑀓𑀼𑀫𑀸𑀭𑁄 𑀏𑀓𑁄𑀯 𑀕𑁂𑀳𑁂 𑀅𑀯𑀲𑀺𑀲𑁆𑀲𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀫𑁆𑀳𑀸𑀓𑀁…𑀧𑁂… 𑀧𑀩𑁆𑀩𑀸𑀚𑁂𑀦𑁆𑀢𑀻’’𑀢𑀺. 𑀫𑀳𑀮𑁆𑀮𑀓𑀢𑀭𑀸𑀢𑀺 𑀯𑀼𑀤𑁆𑀥𑀢𑀭𑀸. 𑀇𑀤𑀜𑁆𑀘 𑀓𑀼𑀫𑀸𑀭𑀺𑀓𑀸𑀬 𑀘𑀺𑀭𑀚𑀻𑀯𑀺𑀢𑀁 𑀅𑀪𑀺𑀓𑀗𑁆𑀔𑀫𑀸𑀦𑀸 𑀆𑀳𑀁𑀲𑀼. 𑀲𑀸 𑀓𑀺𑀭 𑀢𑀲𑁆𑀲 𑀅𑀬𑁆𑀬𑀺𑀓𑀸 𑀯𑀻𑀲𑀢𑀺𑀯𑀲𑁆𑀲𑀲𑀢𑀺𑀓𑀸 𑀔𑀡𑁆𑀟𑀤𑀦𑁆𑀢𑀸 𑀧𑀮𑀺𑀢𑀓𑁂𑀲𑀸 𑀯𑀮𑀺𑀢𑁆𑀢𑀘𑀸 𑀢𑀺𑀮𑀓𑀸𑀳𑀢𑀕𑀢𑁆𑀢𑀸 𑀕𑁄𑀧𑀸𑀦𑀲𑀺𑀯𑀗𑁆𑀓𑀸 𑀅𑀳𑁄𑀲𑀺. 𑀯𑀺𑀥𑀸𑀯𑀦𑀺𑀓𑀦𑁆𑀢𑀺 𑀯𑀺𑀥𑀸𑀯𑀦𑀓𑀻𑀴𑀺𑀓𑀁. 𑀢𑀺𑀲𑁆𑀲𑀦𑁆𑀦𑀁 𑀲𑀫𑁆𑀧𑀢𑁆𑀢𑀻𑀦𑀦𑁆𑀢𑀺 𑀅𑀦𑀼𑀲𑁆𑀲𑀯𑀯𑀲𑁂𑀦 𑀫𑀦𑀼𑀲𑁆𑀲𑀤𑁂𑀯𑀫𑁄𑀓𑁆𑀔𑀲𑀫𑁆𑀧𑀢𑁆𑀢𑀺𑀬𑁄 𑀲𑀦𑁆𑀥𑀸𑀬 𑀯𑀤𑀢𑀺, 𑀫𑀦𑀼𑀲𑁆𑀲𑀤𑁂𑀯𑀩𑁆𑀭𑀳𑁆𑀫𑀲𑀫𑁆𑀧𑀢𑁆𑀢𑀺𑀬𑁄 𑀯𑀸. 𑀲𑀻𑀯𑀮𑀺𑀲𑁆𑀲 𑀧𑀼𑀜𑁆𑀜𑀁 𑀯𑀻𑀫𑀁𑀲𑀺𑀲𑁆𑀲𑀸𑀫𑀸𑀢𑀺 ‘‘𑀲𑀻𑀯𑀮𑀺𑀦𑀸 𑀓𑀢𑀧𑀼𑀜𑁆𑀜𑀲𑁆𑀲 𑀯𑀺𑀧𑀸𑀓𑀤𑀸𑀦𑀝𑁆𑀞𑀸𑀦𑀫𑀺𑀤’’𑀦𑁆𑀢𑀺 𑀜𑀢𑁆𑀯𑀸 𑀏𑀯𑀫𑀸𑀳. 𑀲𑀪𑀸𑀕𑀝𑁆𑀞𑀸𑀦𑀦𑁆𑀢𑀺 𑀲𑀫𑀁 𑀤𑁂𑀲𑀁.

𑀢𑀁 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓𑀦𑁆𑀢𑀺 𑀓𑀺𑀜𑁆𑀘𑀸𑀧𑀺 𑀅𑀭𑀳𑀦𑁆𑀢𑁄 𑀕𑀸𑀫𑀦𑁆𑀢𑁂 𑀓𑀸𑀬𑀯𑀺𑀯𑁂𑀓𑀁 𑀦 𑀮𑀪𑀦𑁆𑀢𑀺, 𑀘𑀺𑀢𑁆𑀢𑀯𑀺𑀯𑁂𑀓𑀁 𑀧𑀦 𑀮𑀪𑀦𑁆𑀢𑁂𑀯. 𑀢𑁂𑀲𑀜𑁆𑀳𑀺 𑀤𑀺𑀩𑁆𑀩𑀧𑁆𑀧𑀝𑀺𑀪𑀸𑀕𑀸𑀦𑀺𑀧𑀺 𑀆𑀭𑀫𑁆𑀫𑀡𑀸𑀦𑀺 𑀘𑀺𑀢𑁆𑀢𑀁 𑀘𑀸𑀮𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀢𑀲𑁆𑀫𑀸 𑀕𑀸𑀫𑁄 𑀯𑀸 𑀳𑁄𑀢𑀼 𑀅𑀭𑀜𑁆𑀜𑀸𑀤𑀻𑀦𑀁 𑀯𑀸 𑀅𑀜𑁆𑀜𑀢𑀭𑀁, ‘𑀬𑀢𑁆𑀣 𑀅𑀭𑀳𑀦𑁆𑀢𑁄 𑀯𑀺𑀳𑀭𑀦𑁆𑀢𑀺, 𑀢𑀁 𑀪𑀽𑀫𑀺𑀭𑀸𑀫𑀡𑁂𑀬𑁆𑀬𑀓𑀁’, 𑀲𑁄 𑀪𑀽𑀫𑀺𑀧𑁆𑀧𑀤𑁂𑀲𑁄 𑀭𑀫𑀡𑀻𑀬𑁄 𑀏𑀯𑀸𑀢𑀺 𑀅𑀢𑁆𑀣𑁄.

𑀓𑀗𑁆𑀔𑀸𑀭𑁂𑀯𑀢𑀢𑁆𑀣𑁂𑀭𑀯𑀢𑁆𑀣𑀼

𑁨𑁦𑁪. 𑀙𑀝𑁆𑀞𑁂 𑀅𑀓𑀧𑁆𑀧𑀺𑀬𑁄, 𑀆𑀯𑀼𑀲𑁄, 𑀕𑀼𑀴𑁄𑀢𑀺 𑀏𑀓𑀤𑀺𑀯𑀲𑀁 𑀣𑁂𑀭𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀕𑀼𑀴𑀓𑀭𑀡𑀁 𑀑𑀓𑁆𑀓𑀫𑀺𑀢𑁆𑀯𑀸 𑀕𑀼𑀴𑁂 𑀧𑀺𑀝𑁆𑀞𑀫𑁆𑀧𑀺 𑀙𑀸𑀭𑀺𑀓𑀫𑁆𑀧𑀺 𑀧𑀓𑁆𑀔𑀺𑀢𑁆𑀢𑁂 𑀤𑀺𑀲𑁆𑀯𑀸𑀦 ‘‘𑀅𑀓𑀧𑁆𑀧𑀺𑀬𑁄 𑀕𑀼𑀴𑁄, 𑀲𑀸𑀫𑀺𑀲𑁄 𑀦 𑀓𑀧𑁆𑀧𑀢𑀺 𑀕𑀼𑀴𑁄 𑀯𑀺𑀓𑀸𑀮𑁂 𑀧𑀭𑀺𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑁄 𑀏𑀯𑀫𑀸𑀳. 𑀅𑀓𑀧𑁆𑀧𑀺𑀬𑀸 𑀫𑀼𑀕𑁆𑀕𑀸𑀢𑀺 𑀏𑀓𑀤𑀺𑀯𑀲𑀁 𑀅𑀦𑁆𑀢𑀭𑀸𑀫𑀕𑁆𑀕𑁂 𑀯𑀘𑁆𑀘𑁂 𑀫𑀼𑀕𑁆𑀕𑀁 𑀚𑀸𑀢𑀁 𑀤𑀺𑀲𑁆𑀯𑀸 ‘‘𑀅𑀓𑀧𑁆𑀧𑀺𑀬𑀸 𑀫𑀼𑀕𑁆𑀕𑀸, 𑀧𑀓𑁆𑀓𑀸𑀧𑀺 𑀫𑀼𑀕𑁆𑀕𑀸 𑀚𑀸𑀬𑀦𑁆𑀢𑀻’’𑀢𑀺 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑁄 𑀏𑀯𑀫𑀸𑀳. 𑀲𑁂𑀲𑀫𑁂𑀢𑁆𑀣 𑀲𑀩𑁆𑀩𑀁 𑀉𑀢𑁆𑀢𑀸𑀦𑀫𑁂𑀯.

𑀲𑁄𑀡𑀓𑁄𑀴𑀺𑀯𑀺𑀲𑀢𑁆𑀣𑁂𑀭𑀯𑀢𑁆𑀣𑀼

𑁨𑁦𑁫. 𑀲𑀢𑁆𑀢𑀫𑁂 𑀳𑀸𑀧𑁂𑀢𑀩𑁆𑀩𑀫𑁂𑀯 𑀅𑀳𑁄𑀲𑀺 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑁆𑀢𑀸. 𑀉𑀤𑀓𑁂𑀦 𑀲𑀫𑀼𑀧𑀩𑁆𑀬𑀽𑀴𑁆𑀳𑁂𑀢𑀺 𑀉𑀤𑀓𑁂𑀦 𑀣𑀮𑀁 𑀉𑀲𑁆𑀲𑀸𑀭𑁂𑀢𑁆𑀯𑀸 𑀢𑀢𑁆𑀣 𑀢𑀢𑁆𑀣 𑀭𑀸𑀲𑀺𑀓𑀢𑁂. 𑀳𑀭𑀺𑀢𑀽𑀧𑀮𑀺𑀢𑁆𑀢𑀸𑀬𑀸𑀢𑀺 𑀕𑁄𑀫𑀬𑀧𑀭𑀺𑀪𑀡𑁆𑀟𑀓𑀢𑀸𑀬. 𑀢𑀺𑀯𑀺𑀥𑁂𑀦 𑀉𑀤𑀓𑁂𑀦 ¶ 𑀧𑁄𑀲𑁂𑀦𑁆𑀢𑀻𑀢𑀺 𑀔𑀻𑀭𑁄𑀤𑀓𑀁 𑀕𑀦𑁆𑀥𑁄𑀤𑀓𑀁 𑀓𑁂𑀯𑀮𑁄𑀤𑀓𑀦𑁆𑀢𑀺 𑀏𑀯𑀁 𑀢𑀺𑀯𑀺𑀥𑁂𑀦 𑀉𑀤𑀓𑁂𑀦 𑀧𑁄𑀲𑁂𑀦𑁆𑀢𑀺 𑀧𑀭𑀺𑀧𑀸𑀮𑁂𑀦𑁆𑀢𑀺. 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸𑀢𑀺 𑀧𑀭𑀺𑀲𑁄𑀥𑁂𑀢𑁆𑀯𑀸 𑀕𑀳𑀺𑀢𑁂 𑀢𑀡𑁆𑀟𑀼𑀮𑁂𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀤𑁂𑀯𑁄 𑀫𑀜𑁆𑀜𑁂𑀢𑀺 𑀤𑁂𑀯𑁄 𑀯𑀺𑀬 ¶ . 𑀯𑀻𑀡𑁄𑀯𑀸𑀤𑁂𑀦𑀸𑀢𑀺 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑁄𑀡, 𑀬𑀤𑀸 𑀢𑁂 𑀯𑀻𑀡𑀸𑀬 𑀢𑀦𑁆𑀢𑀺𑀬𑁄 𑀅𑀘𑁆𑀘𑀸𑀬𑀢𑀸 𑀳𑁄𑀦𑁆𑀢𑀺, 𑀅𑀧𑀺 𑀦𑀼 𑀢𑁂 𑀯𑀻𑀡𑀸 𑀢𑀲𑁆𑀫𑀺𑀁 𑀲𑀫𑀬𑁂 𑀲𑀭𑀯𑀢𑀻 𑀯𑀸 𑀳𑁄𑀢𑀺 𑀓𑀫𑁆𑀫𑀜𑁆𑀜𑀸 𑀯𑀸𑀢𑀺? 𑀦𑁄 𑀳𑁂𑀢𑀁, 𑀪𑀦𑁆𑀢𑁂𑀢𑀺. 𑀏𑀯𑀫𑁂𑀯 𑀔𑁄, 𑀲𑁄𑀡, 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁 𑀉𑀤𑁆𑀥𑀘𑁆𑀘𑀸𑀬 𑀲𑀁𑀯𑀢𑁆𑀢𑀢𑀺, 𑀅𑀢𑀺𑀲𑀺𑀣𑀺𑀮𑀯𑀻𑀭𑀺𑀬𑀁 𑀓𑁄𑀲𑀚𑁆𑀚𑀸𑀬 𑀲𑀁𑀯𑀢𑁆𑀢𑀢𑀺. 𑀢𑀲𑁆𑀫𑀸𑀢𑀺𑀳 𑀢𑁆𑀯𑀁, 𑀲𑁄𑀡, 𑀯𑀻𑀭𑀺𑀬𑀲𑀫𑀢𑀁 𑀅𑀥𑀺𑀝𑁆𑀞𑀳, 𑀇𑀦𑁆𑀤𑁆𑀭𑀺𑀬𑀸𑀦𑀜𑁆𑀘 𑀲𑀫𑀢𑀁 𑀧𑀝𑀺𑀯𑀺𑀚𑁆𑀛𑀸’’𑀢𑀺 (𑀫𑀳𑀸𑀯. 𑁨𑁪𑁩) 𑀏𑀯𑀁 𑀯𑀻𑀡𑀁 𑀉𑀧𑀫𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀢𑁂𑀦 𑀯𑀻𑀡𑁄𑀧𑀫𑁄𑀯𑀸𑀤𑁂𑀦. 𑀯𑀻𑀭𑀺𑀬𑀲𑀫𑀣𑀬𑁄𑀚𑀦𑀢𑁆𑀣𑀸𑀬𑀸𑀢𑀺 𑀯𑀻𑀭𑀺𑀬𑀲𑁆𑀲 𑀲𑀫𑀣𑁂𑀦 𑀬𑁄𑀚𑀦𑀢𑁆𑀣𑀸𑀬.

𑀲𑁄𑀡𑀓𑀼𑀝𑀺𑀓𑀡𑁆𑀡𑀢𑁆𑀣𑁂𑀭𑀯𑀢𑁆𑀣𑀼

𑁨𑁦𑁬. 𑀅𑀝𑁆𑀞𑀫𑁂 𑀓𑀼𑀝𑀺𑀓𑀡𑁆𑀡𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 ‘‘𑀓𑁄𑀝𑀺𑀓𑀡𑁆𑀡𑁄’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀓𑀼𑀝𑀺𑀓𑀡𑁆𑀡𑁄’’𑀢𑀺 𑀯𑁄𑀳𑀭𑀻𑀬𑀢𑀺. 𑀓𑀼𑀮𑀖𑀭𑁂 𑀪𑀯𑀸 𑀓𑀼𑀮𑀖𑀭𑀺𑀓𑀸. 𑀲𑀸 𑀓𑀺𑀭 𑀅𑀯𑀦𑁆𑀢𑀺𑀭𑀝𑁆𑀞𑁂 𑀓𑀼𑀮𑀖𑀭𑁂 𑀫𑀳𑀸𑀯𑀺𑀪𑀯𑀲𑁆𑀲 𑀲𑁂𑀝𑁆𑀞𑀺𑀲𑁆𑀲 𑀪𑀭𑀺𑀬𑀸. 𑀤𑀲𑀩𑀮𑀲𑁆𑀲 𑀥𑀫𑁆𑀫𑀓𑀣𑀁 𑀲𑀼𑀢𑁆𑀯𑀸 𑀲𑁄𑀢𑀸𑀧𑀢𑁆𑀢𑀺𑀨𑀮𑁂 𑀧𑀢𑀺𑀝𑁆𑀞𑀸𑀬 𑀘𑀺𑀦𑁆𑀢𑁂𑀲𑀻𑀢𑀺 𑀇𑀤𑀁 𑀅𑀗𑁆𑀕𑀼𑀢𑁆𑀢𑀭𑀪𑀸𑀡𑀓𑀸𑀦𑀁 𑀫𑀢𑁂𑀦 𑀯𑀼𑀢𑁆𑀢𑀁. 𑀲𑀼𑀢𑁆𑀢𑀦𑀺𑀧𑀸𑀢𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀧𑀭𑀺𑀲𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑁆𑀫 𑀥𑀫𑁆𑀫𑀤𑁂𑀲𑀦𑀁 𑀅𑀲𑁆𑀲𑁄𑀲𑀺, 𑀦 𑀘 𑀓𑀜𑁆𑀘𑀺 𑀯𑀺𑀲𑁂𑀲𑀁 𑀅𑀥𑀺𑀕𑀜𑁆𑀙𑀺. 𑀓𑀲𑁆𑀫𑀸? 𑀲𑁄 𑀳𑀺 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄 𑀳𑁂𑀫𑀯𑀢𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 ‘𑀆𑀕𑀢𑁄 𑀦𑀼 𑀔𑁄 𑀫𑁂 𑀲𑀳𑀸𑀬𑀓𑁄, 𑀦𑁄’𑀢𑀺 𑀤𑀺𑀲𑀸𑀤𑀺𑀲𑀁 𑀑𑀮𑁄𑀓𑁂𑀢𑁆𑀯𑀸 𑀢𑀁 𑀅𑀧𑀲𑁆𑀲𑀦𑁆𑀢𑁄 ‘𑀯𑀜𑁆𑀘𑀺𑀢𑁄 𑀫𑁂 𑀲𑀳𑀸𑀬𑁄, 𑀬𑁄 𑀏𑀯𑀁 𑀯𑀺𑀘𑀺𑀢𑁆𑀢𑀧𑁆𑀧𑀝𑀺𑀪𑀸𑀦𑀁 𑀪𑀕𑀯𑀢𑁄 𑀤𑁂𑀲𑀦𑀁 𑀦 𑀲𑀼𑀡𑀸𑀢𑀻’𑀢𑀺 𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀅𑀳𑁄𑀲𑀻’’𑀢𑀺 𑀯𑀼𑀢𑁆𑀢𑀁.

𑀬𑀲𑁆𑀫𑀸 𑀧𑀝𑀺𑀲𑀦𑁆𑀥𑀺𑀚𑀸𑀢𑀺𑀅𑀪𑀺𑀦𑀺𑀓𑁆𑀔𑀫𑀦𑀩𑁄𑀥𑀺𑀧𑀭𑀺𑀦𑀺𑀩𑁆𑀩𑀸𑀦𑁂𑀲𑁆𑀯𑁂𑀯 𑀤𑁆𑀯𑀢𑁆𑀢𑀺𑀁𑀲 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀺 𑀳𑀼𑀢𑁆𑀯𑀸𑀯 𑀧𑀝𑀺𑀯𑀺𑀕𑀘𑁆𑀙𑀦𑁆𑀢𑀺, 𑀦 𑀘𑀺𑀭𑀝𑁆𑀞𑀺𑀢𑀺𑀓𑀸𑀦𑀺 𑀳𑁄𑀦𑁆𑀢𑀺, 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑁂 (𑀲𑀁. 𑀦𑀺. 𑁫.𑁧𑁦𑁮𑁧; 𑀧𑀝𑀺. 𑀫. 𑁨.𑁩𑁦) 𑀧𑀦 𑀢𑀸𑀦𑀺 𑀲𑀯𑀺𑀲𑁂𑀲𑀸𑀦𑀺 𑀳𑀼𑀢𑁆𑀯𑀸 𑀘𑀺𑀭𑀢𑀭𑀁 𑀞𑀢𑁆𑀯𑀸 𑀦𑀺𑀭𑀼𑀚𑁆𑀛𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀢𑀺𑀬𑁄𑀚𑀦𑀲𑀳𑀲𑁆𑀲𑀁 𑀳𑀺𑀫𑀯𑀦𑁆𑀢𑀁 𑀅𑀓𑀸𑀮𑀧𑀼𑀧𑁆𑀨𑀺𑀢𑀁 𑀤𑀺𑀲𑁆𑀯𑀸’’𑀢𑀺𑀆𑀤𑀺. 𑀅𑀕𑁆𑀕𑀩𑀮𑀓𑀸𑀬𑀸𑀢𑀺 𑀲𑀩𑁆𑀩𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑀸 𑀩𑀮𑀓𑀸𑀬𑀸. 𑀓𑁂𑀦 𑀧𑀼𑀧𑁆𑀨𑀺𑀢𑀪𑀸𑀯𑀁 𑀚𑀸𑀦𑀸𑀲𑀻𑀢𑀺 𑀓𑁂𑀦 𑀓𑀸𑀭𑀡𑁂𑀦 𑀳𑀺𑀫𑀯𑀦𑁆𑀢𑀲𑁆𑀲 𑀧𑀼𑀧𑁆𑀨𑀺𑀢𑀪𑀸𑀯𑀁 𑀚𑀸𑀦𑀸𑀲𑀻𑀢𑀺, 𑀬𑁂𑀦 𑀓𑀸𑀭𑀡𑁂𑀦 𑀇𑀫𑀁 𑀅𑀓𑀸𑀮𑀧𑀼𑀧𑁆𑀨𑀧𑀸𑀝𑀺𑀳𑀸𑀭𑀺𑀬𑀁 𑀚𑀸𑀢𑀁, 𑀢𑀁 𑀚𑀸𑀦𑀸𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀲𑁆𑀲 𑀧𑀯𑀢𑁆𑀢𑀺𑀢𑀪𑀸𑀯𑀦𑁆𑀢𑀺 𑀢𑀲𑁆𑀲 𑀥𑀫𑁆𑀫𑀘𑀓𑁆𑀓𑀲𑁆𑀲 𑀪𑀕𑀯𑀢𑀸 𑀧𑀯𑀢𑁆𑀢𑀺𑀢𑀪𑀸𑀯𑀁. 𑀲𑀤𑁆𑀤𑁂 𑀦𑀺𑀫𑀺𑀢𑁆𑀢𑀁 𑀕𑀡𑁆𑀳𑀻𑀢𑀺 𑀲𑀤𑁆𑀤𑁂 𑀆𑀓𑀸𑀭𑀁 𑀲𑀮𑁆𑀮𑀓𑁆𑀔𑁂𑀲𑀺. 𑀢𑀢𑁄𑀢𑀺 ‘‘𑀅𑀳𑀁 ‘𑀏𑀢𑀁 𑀅𑀫𑀢𑀥𑀫𑁆𑀫𑀁 𑀢𑀫𑁆𑀧𑀺 ¶ 𑀚𑀸𑀦𑀸𑀧𑁂𑀲𑁆𑀲𑀸𑀫𑀻’𑀢𑀺 𑀢𑀯 𑀲𑀦𑁆𑀢𑀺𑀓𑀁 𑀆𑀕𑀢𑁄𑀲𑁆𑀫𑀻’’𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀤𑀦𑀦𑁆𑀢𑀭𑀦𑁆𑀢𑀺 𑀅𑀢𑁆𑀣𑁄.

𑀲𑀸𑀢𑀸𑀕𑀺𑀭𑁄 ¶ 𑀳𑁂𑀫𑀯𑀢𑀲𑁆𑀲 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀓𑀣𑁂𑀢𑁆𑀯𑀸 𑀢𑀁 𑀪𑀕𑀯𑀢𑁄 𑀲𑀦𑁆𑀢𑀺𑀓𑀁 𑀆𑀦𑁂𑀢𑀼𑀓𑀸𑀫𑁄 ‘‘𑀅𑀚𑁆𑀚 𑀧𑀦𑁆𑀦𑀭𑀲𑁄’’𑀢𑀺𑀆𑀤𑀺𑀕𑀸𑀣𑀫𑀸𑀳. 𑀢𑀢𑁆𑀣 (𑀲𑀼. 𑀦𑀺. 𑀅𑀝𑁆𑀞. 𑁧.𑁧𑁫𑁩) 𑀅𑀚𑁆𑀚𑀸𑀢𑀺 𑀅𑀬𑀁 𑀭𑀢𑁆𑀢𑀺𑀦𑁆𑀤𑀺𑀯𑁄 𑀧𑀓𑁆𑀔𑀕𑀡𑀦𑀢𑁄 𑀧𑀦𑁆𑀦𑀭𑀲𑁄, 𑀉𑀧𑀯𑀲𑀺𑀢𑀩𑁆𑀩𑀢𑁄 𑀉𑀧𑁄𑀲𑀣𑁄. 𑀢𑀻𑀲𑀼 𑀯𑀸 𑀉𑀧𑁄𑀲𑀣𑁂𑀲𑀼 𑀅𑀚𑁆𑀚 𑀧𑀦𑁆𑀦𑀭𑀲𑁄 𑀉𑀧𑁄𑀲𑀣𑁄, 𑀦 𑀘𑀸𑀢𑀼𑀤𑁆𑀤𑀲𑀺𑀉𑀧𑁄𑀲𑀣𑁄, 𑀦 𑀲𑀸𑀫𑀕𑁆𑀕𑀻𑀉𑀧𑁄𑀲𑀣𑁄. 𑀤𑀺𑀯𑀺 𑀪𑀯𑀸𑀦𑀺 𑀤𑀺𑀩𑁆𑀩𑀸𑀦𑀺, 𑀤𑀺𑀩𑁆𑀩𑀸𑀦𑀺 𑀏𑀢𑁆𑀣 𑀅𑀢𑁆𑀣𑀻𑀢𑀺 𑀤𑀺𑀩𑁆𑀩𑀸𑀦𑀺. 𑀓𑀸𑀦𑀺 𑀢𑀸𑀦𑀺? 𑀭𑀽𑀧𑀸𑀦𑀺. 𑀢𑀜𑁆𑀳𑀺 𑀭𑀢𑁆𑀢𑀺𑀁 𑀤𑁂𑀯𑀸𑀦𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀢𑁄 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀲𑀭𑀻𑀭𑀯𑀢𑁆𑀣𑀸𑀪𑀭𑀡𑀯𑀺𑀫𑀸𑀦𑀧𑁆𑀧𑀪𑀸𑀳𑀺 𑀅𑀩𑁆𑀪𑀸𑀤𑀺𑀉𑀧𑀓𑁆𑀓𑀺𑀮𑁂𑀲𑀯𑀺𑀭𑀳𑀺𑀢𑀸𑀬 𑀘𑀦𑁆𑀤𑀧𑁆𑀧𑀪𑀸𑀬 𑀘 𑀲𑀓𑀮𑀚𑀫𑁆𑀩𑀼𑀤𑀻𑀧𑁄 𑀅𑀮𑀗𑁆𑀓𑀢𑁄 𑀅𑀳𑁄𑀲𑀻𑀢𑀺 𑀅𑀢𑀺𑀯𑀺𑀬 𑀅𑀮𑀗𑁆𑀓𑀢𑁄 𑀘 𑀧𑀭𑀺𑀯𑀺𑀲𑀼𑀤𑁆𑀥𑀺𑀤𑁂𑀯𑀲𑁆𑀲 𑀪𑀕𑀯𑀢𑁄 𑀲𑀭𑀻𑀭𑀧𑁆𑀧𑀪𑀸𑀬. 𑀢𑁂𑀦𑀸𑀳 𑁋 ‘‘𑀤𑀺𑀩𑁆𑀩𑀸 𑀭𑀢𑁆𑀢𑀺 𑀉𑀧𑀝𑁆𑀞𑀺𑀢𑀸’’𑀢𑀺.

𑀏𑀯𑀁 𑀭𑀢𑁆𑀢𑀺𑀕𑀼𑀡𑀯𑀡𑁆𑀡𑀦𑀸𑀧𑀤𑁂𑀲𑁂𑀦𑀧𑀺 𑀲𑀳𑀸𑀬𑀲𑁆𑀲 𑀘𑀺𑀢𑁆𑀢𑀁 𑀧𑀲𑀸𑀤𑀁 𑀚𑀦𑁂𑀦𑁆𑀢𑁄 𑀩𑀼𑀤𑁆𑀥𑀼𑀧𑁆𑀧𑀸𑀤𑀁 𑀓𑀣𑁂𑀢𑁆𑀯𑀸 𑀆𑀳 𑁋 ‘‘𑀅𑀦𑁄𑀫𑀦𑀸𑀫𑀁 𑀲𑀢𑁆𑀣𑀸𑀭𑀁, 𑀳𑀦𑁆𑀤 𑀧𑀲𑁆𑀲𑀸𑀫 𑀕𑁄𑀢𑀫’’𑀦𑁆𑀢𑀺. 𑀢𑀢𑁆𑀣 𑀅𑀦𑁄𑀫𑁂𑀳𑀺 𑀅𑀮𑀸𑀫𑀓𑁂𑀳𑀺 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑁂𑀳𑀺 𑀕𑀼𑀡𑁂𑀳𑀺 𑀦𑀸𑀫𑀁 𑀅𑀲𑁆𑀲𑀸𑀢𑀺 𑀅𑀦𑁄𑀫𑀦𑀸𑀫𑁄. 𑀢𑀣𑀸 𑀳𑀺𑀲𑁆𑀲 ‘‘𑀩𑀼𑀚𑁆𑀛𑀺𑀢𑀸 𑀲𑀘𑁆𑀘𑀸𑀦𑀻𑀢𑀺 𑀩𑀼𑀤𑁆𑀥𑁄, 𑀩𑁄𑀥𑁂𑀢𑀸 𑀧𑀚𑀸𑀬𑀸𑀢𑀺 𑀩𑀼𑀤𑁆𑀥𑁄’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁧𑁯𑁨; 𑀘𑀽𑀴𑀦𑀺. 𑀧𑀸𑀭𑀸𑀬𑀦𑀢𑁆𑀣𑀼𑀢𑀺𑀕𑀸𑀣𑀸𑀦𑀺𑀤𑁆𑀤𑁂𑀲𑁄 𑁯𑁭; 𑀧𑀝𑀺. 𑀫. 𑁧.𑁧𑁬𑁨) 𑀦𑀬𑁂𑀦 𑀩𑀼𑀤𑁆𑀥𑁄𑀢𑀺 𑀅𑀦𑁄𑀫𑁂𑀳𑀺 𑀕𑀼𑀡𑁂𑀳𑀺 𑀦𑀸𑀫𑀁. ‘‘𑀪𑀕𑁆𑀕𑀭𑀸𑀕𑁄𑀢𑀺 𑀪𑀕𑀯𑀸, 𑀪𑀕𑁆𑀕𑀤𑁄𑀲𑁄𑀢𑀺 𑀪𑀕𑀯𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁮𑁪) 𑀦𑀬𑁂𑀦 𑀪𑀕𑀯𑀸𑀢𑀺 𑀅𑀦𑁄𑀫𑁂𑀳𑀺 𑀕𑀼𑀡𑁂𑀳𑀺 𑀦𑀸𑀫𑀁. 𑀏𑀲 𑀦𑀬𑁄 ‘‘𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀺𑀚𑁆𑀚𑀸𑀘𑀭𑀡𑀲𑀫𑁆𑀧𑀦𑁆𑀦𑁄’’𑀢𑀺𑀆𑀤𑀻𑀲𑀼. 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀢𑁆𑀣𑁂𑀳𑀺 𑀤𑁂𑀯𑀫𑀦𑀼𑀲𑁆𑀲𑁂 𑀅𑀦𑀼𑀲𑀸𑀲𑀢𑀺 ‘‘𑀇𑀫𑀁 𑀧𑀚𑀳𑀣, 𑀇𑀫𑀁 𑀲𑀫𑀸𑀤𑀸𑀬 𑀯𑀢𑁆𑀢𑀣𑀸’’𑀢𑀺 𑀲𑀢𑁆𑀣𑀸. 𑀢𑀁 𑀅𑀦𑁄𑀫𑀦𑀸𑀫𑀁 𑀲𑀢𑁆𑀣𑀸𑀭𑀁. 𑀳𑀦𑁆𑀤𑀸𑀢𑀺 𑀯𑀘𑀲𑀸𑀬𑀢𑁆𑀣𑁂 𑀦𑀺𑀧𑀸𑀢𑁄. 𑀧𑀲𑁆𑀲𑀸𑀫𑀸𑀢𑀺 𑀢𑁂𑀦 𑀅𑀢𑁆𑀢𑀸𑀦𑀁 𑀲𑀳 𑀲𑀗𑁆𑀕𑀳𑁂𑀢𑁆𑀯𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀩𑀳𑀼𑀯𑀘𑀦𑀁. 𑀕𑁄𑀢𑀫𑀦𑁆𑀢𑀺 𑀕𑁄𑀢𑀫𑀕𑁄𑀢𑁆𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀲𑀢𑁆𑀣𑀸, 𑀦 𑀲𑀢𑁆𑀣𑀸’’𑀢𑀺 𑀫𑀸 𑀯𑀺𑀫𑀢𑀺𑀁 𑀅𑀓𑀸𑀲𑀺, 𑀏𑀓𑀦𑁆𑀢𑀩𑁆𑀬𑀯𑀲𑀺𑀢𑁄 𑀳𑀼𑀢𑁆𑀯𑀸𑀯 𑀏𑀳𑀺 𑀧𑀲𑁆𑀲𑀸𑀫 𑀕𑁄𑀢𑀫𑀦𑁆𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀳𑁂𑀫𑀯𑀢𑁄 ‘‘𑀅𑀬𑀁 𑀲𑀸𑀢𑀸𑀕𑀺𑀭𑁄 ‘𑀅𑀦𑁄𑀫𑀦𑀸𑀫𑀁 𑀲𑀢𑁆𑀣𑀸𑀭’𑀦𑁆𑀢𑀺 𑀪𑀡𑀦𑁆𑀢𑁄 𑀢𑀲𑁆𑀲 𑀲𑀩𑁆𑀩𑀜𑁆𑀜𑀼𑀢𑀁 𑀧𑀓𑀸𑀲𑁂𑀢𑀺, 𑀲𑀩𑁆𑀩𑀜𑁆𑀜𑀼𑀦𑁄 𑀘 𑀤𑀼𑀮𑁆𑀮𑀪𑀸 𑀮𑁄𑀓𑁂, 𑀲𑀩𑁆𑀩𑀜𑁆𑀜𑀼𑀧𑀝𑀺𑀜𑁆𑀜𑁂𑀳𑀺 𑀧𑀽𑀭𑀡𑀸𑀤𑀺𑀲𑀤𑀺𑀲𑁂𑀳𑁂𑀯 𑀮𑁄𑀓𑁄 𑀉𑀧𑀤𑁆𑀤𑀼𑀢𑁄. 𑀲𑁄 𑀧𑀦 𑀬𑀤𑀺 𑀲𑀩𑁆𑀩𑀜𑁆𑀜𑀽, 𑀅𑀤𑁆𑀥𑀸 𑀢𑀸𑀤𑀺𑀮𑀓𑁆𑀔𑀡𑀁 𑀧𑀢𑁆𑀢𑁄 𑀪𑀯𑀺𑀲𑁆𑀲𑀢𑀺, 𑀢𑁂𑀦 𑀏𑀯𑀁 𑀕𑀳𑁂𑀲𑁆𑀲𑀸𑀫𑀻’’𑀢𑀺 ¶ 𑀘𑀺𑀦𑁆𑀢𑁂𑀢𑁆𑀯𑀸 𑀢𑀸𑀤𑀺𑀮𑀓𑁆𑀔𑀡𑀁 𑀧𑀼𑀘𑁆𑀙𑀦𑁆𑀢𑁄 𑀆𑀳 𑁋 ‘‘𑀓𑀘𑁆𑀘𑀺 𑀫𑀦𑁄’’𑀢𑀺𑀆𑀤𑀺. 𑀢𑀢𑁆𑀣 𑀓𑀘𑁆𑀘𑀻𑀢𑀺 𑀧𑀼𑀘𑁆𑀙𑀸. 𑀫𑀦𑁄𑀢𑀺 𑀘𑀺𑀢𑁆𑀢𑀁. 𑀲𑀼𑀧𑀡𑀺𑀳𑀺𑀢𑁄𑀢𑀺 𑀲𑀼𑀝𑁆𑀞𑀼 𑀞𑀧𑀺𑀢𑁄 𑀅𑀘𑀮𑁄 𑀅𑀲𑀫𑁆𑀧𑀯𑁂𑀥𑀻. 𑀲𑀩𑁆𑀩𑁂𑀲𑀼 𑀪𑀽𑀢𑁂𑀲𑀼 𑀲𑀩𑁆𑀩𑀪𑀽𑀢𑁂𑀲𑀼. 𑀢𑀸𑀤𑀺𑀦𑁄𑀢𑀺 𑀢𑀸𑀤𑀺𑀮𑀓𑁆𑀔𑀡𑀁 𑀧𑀢𑁆𑀢𑀲𑁆𑀲𑁂𑀯 𑀲𑀢𑁄. 𑀧𑀼𑀘𑁆𑀙𑀸 𑀏𑀯 𑀯𑀸 𑀅𑀬𑀁 ‘‘𑀲𑁄 𑀢𑀯 𑀲𑀢𑁆𑀣𑀸 𑀲𑀩𑁆𑀩𑀪𑀽𑀢𑁂𑀲𑀼 𑀢𑀸𑀤𑀻, 𑀉𑀤𑀸𑀳𑀼 𑀦𑁄’’𑀢𑀺. 𑀇𑀝𑁆𑀞𑁂 𑀅𑀦𑀺𑀝𑁆𑀞𑁂𑀘𑀸𑀢𑀺 𑀏𑀯𑀭𑀽𑀧𑁂 𑀆𑀭𑀫𑁆𑀫𑀡𑁂. 𑀲𑀗𑁆𑀓𑀧𑁆𑀧𑀸𑀢𑀺 𑀯𑀺𑀢𑀓𑁆𑀓𑀸. 𑀯𑀲𑀻𑀓𑀢𑀸𑀢𑀺 𑀯𑀲𑀁 𑀕𑀫𑀺𑀢𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀁 𑀢𑀁 𑀲𑀢𑁆𑀣𑀸𑀭𑀁 𑀯𑀤𑀲𑀺, 𑀢𑀲𑁆𑀲 𑀢𑁂 𑀲𑀢𑁆𑀣𑀼𑀦𑁄 ¶ 𑀓𑀘𑁆𑀘𑀺 𑀢𑀸𑀤𑀺𑀮𑀓𑁆𑀔𑀡𑀁 𑀲𑀫𑁆𑀧𑀢𑁆𑀢𑀲𑁆𑀲 𑀲𑀢𑁄 𑀲𑀩𑁆𑀩𑀪𑀽𑀢𑁂𑀲𑀼 𑀫𑀦𑁄 𑀲𑀼𑀧𑀡𑀺𑀳𑀺𑀢𑁄, 𑀉𑀤𑀸𑀳𑀼 𑀬𑀸𑀯 𑀧𑀘𑁆𑀘𑀬𑀁 𑀦 𑀮𑀪𑀢𑀺, 𑀢𑀸𑀯 𑀲𑀼𑀧𑀡𑀺𑀳𑀺𑀢𑁄 𑀯𑀺𑀬 𑀔𑀸𑀬𑀢𑀺. 𑀲𑁄 𑀯𑀸 𑀢𑁂 𑀲𑀢𑁆𑀣𑀸 𑀓𑀘𑁆𑀘𑀺 𑀲𑀩𑁆𑀩𑀪𑀽𑀢𑁂𑀲𑀼 𑀲𑀢𑁆𑀢𑁂𑀲𑀼 𑀢𑀸𑀤𑀻, 𑀉𑀤𑀸𑀳𑀼 𑀦𑁄, 𑀬𑁂 𑀘 𑀇𑀝𑁆𑀞𑀸𑀦𑀺𑀝𑁆𑀞𑁂𑀲𑀼 𑀆𑀭𑀫𑁆𑀫𑀡𑁂𑀲𑀼 𑀭𑀸𑀕𑀤𑁄𑀲𑀯𑀲𑁂𑀦 𑀲𑀗𑁆𑀓𑀧𑁆𑀧𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, 𑀢𑁆𑀬𑀸𑀲𑁆𑀲 𑀓𑀘𑁆𑀘𑀺 𑀯𑀲𑀻𑀓𑀢𑀸, 𑀉𑀤𑀸𑀳𑀼 𑀓𑀤𑀸𑀘𑀺 𑀢𑁂𑀲𑀫𑁆𑀧𑀺 𑀯𑀲𑁂𑀦 𑀯𑀢𑁆𑀢𑀢𑀻𑀢𑀺.

𑀢𑀻𑀡𑀺 𑀯𑀲𑁆𑀲𑀸𑀦𑀻𑀢𑀺 𑀲𑁄𑀡𑀲𑁆𑀲 𑀧𑀩𑁆𑀩𑀚𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀢𑀻𑀡𑀺 𑀯𑀲𑁆𑀲𑀸𑀦𑀺. 𑀢𑀤𑀸 𑀓𑀺𑀭 𑀪𑀺𑀓𑁆𑀔𑀽 𑀬𑁂𑀪𑀼𑀬𑁆𑀬𑁂𑀦 𑀫𑀚𑁆𑀛𑀺𑀫𑀤𑁂𑀲𑁂𑀬𑁂𑀯 𑀯𑀲𑀺𑀁𑀲𑀼, 𑀢𑀲𑁆𑀫𑀸 𑀢𑀢𑁆𑀣 𑀓𑀢𑀺𑀧𑀬𑀸 𑀏𑀯 𑀅𑀳𑁂𑀲𑀼𑀁. 𑀢𑁂 𑀘 𑀏𑀓𑀲𑁆𑀫𑀺𑀁 𑀦𑀺𑀕𑀫𑁂 𑀏𑀓𑁄 𑀤𑁆𑀯𑁂𑀢𑀺 𑀏𑀯𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀲𑀺𑀁𑀲𑀼, 𑀣𑁂𑀭𑀸𑀦𑀜𑁆𑀘 𑀓𑀢𑀺𑀧𑀬𑁂 𑀪𑀺𑀓𑁆𑀔𑀽 𑀆𑀦𑁂𑀢𑁆𑀯𑀸 𑀅𑀜𑁆𑀜𑁂𑀲𑀼 𑀆𑀦𑀻𑀬𑀫𑀸𑀦𑁂𑀲𑀼 𑀧𑀼𑀩𑁆𑀩𑀁 𑀆𑀦𑀻𑀢𑀸 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦 𑀧𑀓𑁆𑀓𑀫𑀺𑀁𑀲𑀼, 𑀓𑀜𑁆𑀘𑀺 𑀓𑀸𑀮𑀁 𑀆𑀕𑀫𑁂𑀢𑁆𑀯𑀸 𑀧𑀼𑀦 𑀢𑁂𑀲𑀼 𑀆𑀦𑀻𑀬𑀫𑀸𑀦𑁂𑀲𑀼 𑀇𑀢𑀭𑁂 𑀧𑀓𑁆𑀓𑀫𑀺𑀁𑀲𑀼, 𑀏𑀯𑀁 𑀧𑀼𑀦𑀧𑁆𑀧𑀼𑀦𑀁 𑀆𑀦𑀬𑀦𑁂𑀦 𑀲𑀦𑁆𑀦𑀺𑀧𑀸𑀢𑁄 𑀘𑀺𑀭𑁂𑀦𑁂𑀯 𑀅𑀳𑁄𑀲𑀺, 𑀣𑁂𑀭𑁄 𑀘 𑀢𑀤𑀸 𑀏𑀓𑀯𑀺𑀳𑀸𑀭𑀻 𑀅𑀳𑁄𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀻𑀡𑀺 𑀯𑀲𑁆𑀲𑀸𑀦𑀺 𑀕𑀡𑀁 𑀧𑀭𑀺𑀬𑁂𑀲𑀺𑀢𑁆𑀯𑀸’’𑀢𑀺. 𑀢𑀻𑀡𑀺 𑀯𑀲𑁆𑀲𑀸𑀦𑀻𑀢𑀺 𑀘 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀁. 𑀲𑀢𑁆𑀣𑀼 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸𑀢𑀺 𑀅𑀢𑁆𑀢𑀦𑁄 𑀆𑀡𑀸𑀧𑀦𑁂𑀦𑁂𑀯 ‘‘𑀇𑀫𑀺𑀦𑀸 𑀲𑀤𑁆𑀥𑀺𑀁 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀲𑀺𑀢𑀼𑀓𑀸𑀫𑁄 𑀪𑀕𑀯𑀸’’𑀢𑀺 𑀲𑀢𑁆𑀣𑀼 𑀅𑀥𑀺𑀧𑁆𑀧𑀸𑀬𑀁 𑀚𑀸𑀦𑀺𑀢𑁆𑀯𑀸. 𑀪𑀕𑀯𑀸 𑀓𑀺𑀭 𑀬𑁂𑀦 𑀲𑀤𑁆𑀥𑀺𑀁 𑀏𑀓𑀕𑀦𑁆𑀥𑀓𑀼𑀝𑀺𑀬𑀁 𑀯𑀲𑀺𑀢𑀼𑀓𑀸𑀫𑁄, 𑀢𑀲𑁆𑀲 𑀲𑁂𑀦𑀸𑀲𑀦𑀧𑀜𑁆𑀜𑀢𑁆𑀢𑀺𑀬𑀁 𑀆𑀦𑀦𑁆𑀤𑀢𑁆𑀣𑁂𑀭𑀁 𑀆𑀡𑀸𑀧𑁂𑀢𑀺.

𑀅𑀚𑁆𑀛𑁄𑀓𑀸𑀲𑁂 𑀯𑀻𑀢𑀺𑀦𑀸𑀫𑁂𑀢𑁆𑀯𑀸𑀢𑀺 𑀅𑀚𑁆𑀛𑁄𑀓𑀸𑀲𑁂 𑀦𑀺𑀲𑀚𑁆𑀚𑀸𑀬 𑀯𑀻𑀢𑀺𑀦𑀸𑀫𑁂𑀢𑁆𑀯𑀸. 𑀬𑀲𑁆𑀫𑀸 𑀪𑀕𑀯𑀸 𑀆𑀬𑀲𑁆𑀫𑀢𑁄 𑀲𑁄𑀡𑀲𑁆𑀲 𑀲𑀫𑀸𑀧𑀢𑁆𑀢𑀺𑀲𑀫𑀸𑀧𑀚𑁆𑀚𑀦𑁂𑀦 𑀧𑀝𑀺𑀲𑀦𑁆𑀣𑀸𑀭𑀁 𑀓𑀭𑁄𑀦𑁆𑀢𑁄 𑀲𑀸𑀯𑀓𑀲𑀸𑀥𑀸𑀭𑀡𑀸 𑀲𑀩𑁆𑀩𑀸 𑀲𑀫𑀸𑀧𑀢𑁆𑀢𑀺𑀬𑁄 𑀅𑀦𑀼𑀮𑁄𑀫𑀧𑁆𑀧𑀝𑀺𑀮𑁄𑀫𑀁 𑀲𑀫𑀸𑀧𑀚𑁆𑀚𑀦𑁆𑀢𑁄 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀅𑀚𑁆𑀛𑁄𑀓𑀸𑀲𑁂 𑀦𑀺𑀲𑀚𑁆𑀚𑀸𑀬 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺, 𑀢𑀲𑁆𑀫𑀸 𑀆𑀬𑀲𑁆𑀫𑀸𑀧𑀺 𑀲𑁄𑀡𑁄 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸 𑀢𑀤𑀦𑀼𑀭𑀽𑀧𑀁 𑀲𑀩𑁆𑀩𑀸 𑀢𑀸 𑀲𑀫𑀸𑀧𑀢𑁆𑀢𑀺𑀬𑁄 ¶ 𑀲𑀫𑀸𑀧𑀚𑁆𑀚𑀦𑁆𑀢𑁄 𑀩𑀳𑀼𑀤𑁂𑀯 𑀭𑀢𑁆𑀢𑀺𑀁 𑀅𑀚𑁆𑀛𑁄𑀓𑀸𑀲𑁂 𑀦𑀺𑀲𑀚𑁆𑀚𑀸𑀬 𑀯𑀻𑀢𑀺𑀦𑀸𑀫𑁂𑀢𑁆𑀯𑀸 𑀧𑀸𑀤𑁂 𑀧𑀓𑁆𑀔𑀸𑀮𑁂𑀢𑁆𑀯𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀻𑀢𑀺 𑀯𑀤𑀦𑁆𑀢𑀺. 𑀧𑀯𑀺𑀲𑀺𑀢𑁆𑀯𑀸 𑀘 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑁄 𑀘𑀻𑀯𑀭𑀢𑀺𑀭𑁄𑀓𑀭𑀡𑀺𑀬𑀁 𑀓𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑀧𑀲𑁆𑀲𑁂 𑀦𑀺𑀲𑀚𑁆𑀚𑀸𑀬 𑀯𑀻𑀢𑀺𑀦𑀸𑀫𑁂𑀲𑀺. 𑀅𑀚𑁆𑀛𑁂𑀲𑀻𑀢𑀺 𑀆𑀡𑀸𑀧𑁂𑀲𑀺. 𑀧𑀝𑀺𑀪𑀸𑀢𑀼 𑀢𑀁 𑀪𑀺𑀓𑁆𑀔𑀼 𑀥𑀫𑁆𑀫𑁄 𑀪𑀸𑀲𑀺𑀢𑀼𑀦𑁆𑀢𑀺 𑀪𑀺𑀓𑁆𑀔𑀼 𑀢𑀼𑀬𑁆𑀳𑀁 𑀥𑀫𑁆𑀫𑁄 𑀪𑀸𑀲𑀺𑀢𑀼𑀁 𑀉𑀧𑀝𑁆𑀞𑀸𑀢𑀼, 𑀜𑀸𑀡𑀫𑀼𑀔𑀁 𑀆𑀕𑀘𑁆𑀙𑀢𑀼, 𑀬𑀣𑀸𑀲𑀼𑀢𑀁 𑀬𑀣𑀸𑀧𑀭𑀺𑀬𑀢𑁆𑀢𑀁 𑀥𑀫𑁆𑀫𑀁 𑀪𑀡𑀸𑀳𑀻𑀢𑀺 𑀅𑀢𑁆𑀣𑁄. 𑀅𑀝𑁆𑀞𑀓𑀯𑀕𑁆𑀕𑀺𑀬𑀸𑀦𑀻𑀢𑀺 𑀅𑀝𑁆𑀞𑀓𑀯𑀕𑁆𑀕𑀪𑀽𑀢𑀸𑀦𑀺 𑀓𑀸𑀫𑀲𑀼𑀢𑁆𑀢𑀸𑀤𑀺𑀲𑁄𑀴𑀲𑀲𑀼𑀢𑁆𑀢𑀸𑀦𑀺 (𑀫𑀳𑀸𑀦𑀺. 𑁧). 𑀲𑀼𑀕𑁆𑀕𑀳𑀺𑀢𑁄𑀢𑀺 𑀲𑀫𑁆𑀫𑀸 𑀉𑀕𑁆𑀕𑀳𑀺𑀢𑁄. 𑀲𑀩𑁆𑀩𑁂 𑀯𑀭𑁂 𑀬𑀸𑀘𑀻𑀢𑀺 𑀯𑀺𑀦𑀬𑀥𑀭𑀧𑀜𑁆𑀘𑀫𑁂𑀦 𑀕𑀡𑁂𑀦 𑀉𑀧𑀲𑀫𑁆𑀧𑀤𑀸 𑀥𑀼𑀯𑀦𑁆𑀳𑀸𑀦𑀁 𑀘𑀫𑁆𑀫𑀢𑁆𑀣𑀭𑀡𑀁 𑀕𑀡𑀗𑁆𑀕𑀡𑀽𑀧𑀸𑀳𑀦𑀁 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑁄𑀢𑀺 𑀇𑀫𑁂 𑀧𑀜𑁆𑀘 𑀯𑀭𑁂 𑀬𑀸𑀘𑀺. 𑀲𑀼𑀢𑁆𑀢𑁂 𑀆𑀕𑀢𑀫𑁂𑀯𑀸𑀢𑀺 𑀉𑀤𑀸𑀦𑀧𑀸𑀴𑀺𑀬𑀁 𑀆𑀕𑀢𑀲𑀼𑀢𑁆𑀢𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑀲𑀻𑀯𑀮𑀺𑀢𑁆𑀣𑁂𑀭𑀯𑀢𑁆𑀣𑀼

𑁨𑁦𑁭. 𑀦𑀯𑀫𑁂 ¶ 𑀲𑀸𑀓𑀘𑁆𑀙𑀺𑀢𑁆𑀯𑀸 𑀲𑀸𑀓𑀘𑁆𑀙𑀺𑀢𑁆𑀯𑀸𑀢𑀺 𑀭𑀜𑁆𑀜𑀸 𑀲𑀤𑁆𑀥𑀺𑀁 𑀧𑀝𑀺𑀯𑀺𑀭𑀼𑀚𑁆𑀛𑀦𑀯𑀲𑁂𑀦 𑀧𑀼𑀦𑀧𑁆𑀧𑀼𑀦𑀁 𑀲𑀸𑀓𑀘𑁆𑀙𑀁 𑀓𑀢𑁆𑀯𑀸. 𑀕𑀼𑀴𑀤𑀥𑀺𑀦𑁆𑀢𑀺 𑀧𑀢𑁆𑀣𑀺𑀦𑁆𑀦𑀁 𑀕𑀼𑀴𑀲𑀤𑀺𑀲𑀁 𑀓𑀞𑀺𑀦𑀤𑀥𑀺𑀁. 𑀅𑀢𑀺𑀅𑀜𑁆𑀙𑀺𑀢𑀼𑀦𑁆𑀢𑀺 𑀅𑀢𑀺𑀯𑀺𑀬 𑀆𑀓𑀟𑁆𑀠𑀺𑀢𑀼𑀁. 𑀓𑀜𑁆𑀚𑀺𑀬𑀁 𑀯𑀸𑀳𑁂𑀢𑁆𑀯𑀸𑀢𑀺 𑀤𑀥𑀺𑀫𑀢𑁆𑀣𑀼𑀁 𑀧𑀯𑀸𑀳𑁂𑀢𑁆𑀯𑀸, 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀤𑀥𑀺𑀢𑁄 𑀓𑀜𑁆𑀚𑀺𑀬𑀁 𑀕𑀳𑁂𑀢𑁆𑀯𑀸’’𑀢𑀺𑀧𑀺 𑀧𑀸𑀞𑁄. 𑀦𑀦𑁆𑀢𑀺 𑀲𑀼𑀧𑁆𑀧𑀯𑀸𑀲𑀁. 𑀩𑀻𑀚𑀧𑀘𑁆𑀙𑀺𑀁 𑀨𑀼𑀲𑀸𑀧𑁂𑀦𑁆𑀢𑀻𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀬𑀸𑀯 𑀦 𑀉𑀓𑁆𑀓𑀟𑁆𑀠𑀦𑁆𑀢𑀻𑀢𑀺 𑀬𑀸𑀯 𑀤𑀸𑀦𑁂 𑀦 𑀉𑀓𑁆𑀓𑀟𑁆𑀠𑀦𑁆𑀢𑀺, 𑀤𑀸𑀢𑀼𑀓𑀸𑀫𑀸𑀯 𑀳𑁄𑀦𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄 𑀫𑀳𑀸𑀤𑀼𑀓𑁆𑀔𑀁 𑀅𑀦𑀼𑀪𑁄𑀲𑀻𑀢𑀺 𑀧𑀲𑀯𑀦𑀺𑀩𑀦𑁆𑀥𑀦𑀁 𑀫𑀳𑀦𑁆𑀢𑀁 𑀤𑀼𑀓𑁆𑀔𑀁 𑀅𑀦𑀼𑀪𑁄𑀲𑀺. 𑀲𑀸𑀫𑀺𑀓𑀁 𑀆𑀫𑀦𑁆𑀢𑁂𑀢𑁆𑀯𑀸𑀢𑀺 𑀲𑀢𑁆𑀢𑀸𑀳𑀁 𑀫𑀽𑀴𑁆𑀳𑀕𑀩𑁆𑀪𑀸 𑀢𑀺𑀩𑁆𑀩𑀸𑀳𑀺 𑀔𑀭𑀸𑀳𑀺 𑀤𑀼𑀓𑁆𑀔𑀯𑁂𑀤𑀦𑀸𑀳𑀺 𑀨𑀼𑀝𑁆𑀞𑀸 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀯𑀢 𑀲𑁄 𑀪𑀕𑀯𑀸, 𑀬𑁄 𑀇𑀫𑀲𑁆𑀲 𑀏𑀯𑀭𑀽𑀧𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀳𑀸𑀦𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀯𑀢 𑀢𑀲𑁆𑀲 𑀪𑀕𑀯𑀢𑁄 𑀲𑀸𑀯𑀓𑀲𑀗𑁆𑀖𑁄, 𑀬𑁄 𑀇𑀫𑀲𑁆𑀲 𑀏𑀯𑀭𑀽𑀧𑀲𑁆𑀲 𑀤𑀼𑀓𑁆𑀔𑀲𑁆𑀲 𑀧𑀳𑀸𑀦𑀸𑀬 𑀧𑀝𑀺𑀧𑀦𑁆𑀦𑁄. 𑀲𑀼𑀲𑀼𑀔𑀁 𑀯𑀢 𑀦𑀺𑀩𑁆𑀩𑀸𑀦𑀁, 𑀬𑀢𑁆𑀣𑀺𑀤𑀁 𑀏𑀯𑀭𑀽𑀧𑀁 𑀤𑀼𑀓𑁆𑀔𑀁 𑀦 𑀲𑀁𑀯𑀺𑀚𑁆𑀚𑀢𑀻’’𑀢𑀺 (𑀉𑀤𑀸. 𑁧𑁮) 𑀇𑀫𑁂𑀳𑀺 𑀢𑀻𑀳𑀺 𑀯𑀺𑀢𑀓𑁆𑀓𑁂𑀳𑀺 𑀢𑀁 𑀤𑀼𑀓𑁆𑀔𑀁 𑀅𑀥𑀺𑀯𑀸𑀲𑁂𑀦𑁆𑀢𑀻 𑀲𑀢𑁆𑀣𑀼 𑀲𑀦𑁆𑀢𑀺𑀓𑀁 𑀧𑁂𑀲𑁂𑀢𑀼𑀓𑀸𑀫𑀢𑀸𑀬 𑀲𑀸𑀫𑀺𑀓𑀁 𑀆𑀫𑀦𑁆𑀢𑁂𑀢𑁆𑀯𑀸. 𑀧𑀼𑀭𑁂 𑀫𑀭𑀡𑀸𑀢𑀺 𑀫𑀭𑀡𑀢𑁄 𑀧𑀼𑀭𑁂𑀢𑀭𑀫𑁂𑀯. 𑀇𑀗𑁆𑀕𑀺𑀢𑀦𑁆𑀢𑀺 𑀆𑀓𑀸𑀭𑀁. 𑀚𑀻𑀯𑀺𑀢𑀪𑀢𑁆𑀢𑀦𑁆𑀢𑀺 𑀚𑀻𑀯𑀺𑀢𑀲𑀁𑀲𑀬𑁂 𑀤𑀸𑀢𑀩𑁆𑀩𑀪𑀢𑁆𑀢𑀁. 𑀲𑀩𑁆𑀩𑀓𑀫𑁆𑀫𑀓𑁆𑀔𑀫𑁄 𑀅𑀳𑁄𑀲𑀻𑀢𑀺 𑀲𑀢𑁆𑀢𑀯𑀲𑁆𑀲𑀺𑀓𑁂𑀳𑀺 𑀤𑀸𑀭𑀓𑁂𑀳𑀺 𑀓𑀸𑀢𑀩𑁆𑀩𑀁 𑀬𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀸𑀢𑀼𑀁 𑀲𑀫𑀢𑁆𑀣𑀢𑀸𑀬 𑀲𑀩𑁆𑀩𑀲𑁆𑀲 𑀓𑀫𑁆𑀫𑀲𑁆𑀲 𑀔𑀫𑁄 𑀅𑀳𑁄𑀲𑀺. 𑀢𑁂𑀦𑁂𑀯 𑀲𑁄 𑀲𑀢𑁆𑀢𑀸𑀳𑀁 𑀫𑀳𑀸𑀤𑀸𑀦𑁂 ¶ 𑀤𑀻𑀬𑀫𑀸𑀦𑁂 𑀚𑀸𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀥𑀫𑁆𑀫𑀓𑀭𑀡𑀁 𑀆𑀤𑀸𑀬 𑀲𑀗𑁆𑀖𑀲𑁆𑀲 𑀉𑀤𑀓𑀁 𑀧𑀭𑀺𑀲𑁆𑀲𑀸𑀯𑁂𑀢𑁆𑀯𑀸 𑀅𑀤𑀸𑀲𑀺.

𑀬𑁄𑀫𑀦𑁆𑀢𑀺𑀆𑀤𑀺𑀕𑀸𑀣𑀸𑀬 ‘‘𑀬𑁄 𑀪𑀺𑀓𑁆𑀔𑀼 𑀇𑀫𑀁 𑀭𑀸𑀕𑀧𑀮𑀺𑀧𑀣𑀜𑁆𑀘𑁂𑀯 𑀓𑀺𑀮𑁂𑀲𑀤𑀼𑀕𑁆𑀕𑀜𑁆𑀘 𑀲𑀁𑀲𑀸𑀭𑀯𑀝𑁆𑀝𑀜𑁆𑀘 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀅𑀧𑁆𑀧𑀝𑀺𑀯𑀺𑀚𑁆𑀛𑀦𑀓𑀫𑁄𑀳𑀜𑁆𑀘 𑀅𑀢𑀻𑀢𑁄 𑀘𑀢𑁆𑀢𑀸𑀭𑁄 𑀑𑀖𑁂 𑀢𑀺𑀡𑁆𑀡𑁄 𑀳𑀼𑀢𑁆𑀯𑀸 𑀧𑀸𑀭𑀁 𑀅𑀦𑀼𑀧𑁆𑀧𑀢𑁆𑀢𑁄, 𑀤𑀼𑀯𑀺𑀥𑁂𑀦 𑀛𑀸𑀦𑁂𑀦 𑀛𑀸𑀬𑀻, 𑀢𑀡𑁆𑀳𑀸𑀬 𑀅𑀪𑀸𑀯𑁂𑀦 𑀅𑀦𑁂𑀚𑁄, 𑀓𑀣𑀁𑀓𑀣𑀸𑀬 𑀅𑀪𑀸𑀯𑁂𑀦 𑀅𑀓𑀣𑀁𑀓𑀣𑀻, 𑀉𑀧𑀸𑀤𑀸𑀦𑀸𑀦𑀁 𑀅𑀪𑀸𑀯𑁂𑀦 𑀅𑀦𑀼𑀧𑀸𑀤𑀺𑀬𑀺𑀢𑁆𑀯𑀸 𑀓𑀺𑀮𑁂𑀲𑀦𑀺𑀩𑁆𑀩𑀸𑀦𑁂𑀦 𑀦𑀺𑀩𑁆𑀩𑀼𑀢𑁄, 𑀢𑀫𑀳𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻’’𑀢𑀺 𑀅𑀢𑁆𑀣𑁄.

𑀲𑀩𑁆𑀩𑁂𑀲𑀁𑀬𑁂𑀯 𑀧𑀦 𑀓𑁂𑀲𑀸𑀦𑀁 𑀑𑀭𑁄𑀧𑀦𑀜𑁆𑀘 𑀅𑀭𑀳𑀢𑁆𑀢𑀲𑀘𑁆𑀙𑀺𑀓𑀺𑀭𑀺𑀬𑀸 𑀘 𑀅𑀧𑀘𑁆𑀙𑀸𑀅𑀧𑀼𑀭𑀺𑀫𑀸 𑀅𑀳𑁄𑀲𑀻𑀢𑀺 𑀇𑀫𑀺𑀦𑀸 𑀣𑁂𑀭𑀲𑁆𑀲 𑀔𑀼𑀭𑀕𑁆𑀕𑁂𑀬𑁂𑀯 𑀅𑀭𑀳𑀢𑁆𑀢𑀼𑀧𑁆𑀧𑀢𑁆𑀢𑀺 𑀤𑀻𑀧𑀺𑀢𑀸. 𑀏𑀓𑀘𑁆𑀘𑁂 𑀧𑀦 𑀆𑀘𑀭𑀺𑀬𑀸 𑀏𑀯𑀁 𑀯𑀤𑀦𑁆𑀢𑀺 ‘‘𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀑𑀯𑀸𑀤𑁂 𑀤𑀺𑀦𑁆𑀦𑁂 ‘𑀬𑀁 𑀫𑀬𑀸 𑀓𑀸𑀢𑀼𑀁 𑀲𑀓𑁆𑀓𑀸, 𑀢𑀫𑀳𑀁 𑀚𑀸𑀦𑀺𑀲𑁆𑀲𑀸𑀫𑀻’𑀢𑀺 𑀧𑀩𑁆𑀩𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀦𑀸𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀢𑀁 𑀤𑀺𑀯𑀲𑀁𑀬𑁂𑀯 𑀅𑀜𑁆𑀜𑀢𑀭𑀁 𑀯𑀺𑀘𑀺𑀢𑁆𑀢𑀁 𑀓𑀼𑀝𑀺𑀓𑀁 𑀤𑀺𑀲𑁆𑀯𑀸 𑀧𑀯𑀺𑀲𑀺𑀢𑁆𑀯𑀸 𑀫𑀸𑀢𑀼𑀓𑀼𑀘𑁆𑀙𑀺𑀬𑀁 𑀲𑀢𑁆𑀢 𑀯𑀲𑁆𑀲𑀸𑀦𑀺 𑀅𑀢𑁆𑀢𑀦𑀸 𑀅𑀦𑀼𑀪𑀽𑀢𑀤𑀼𑀓𑁆𑀔𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀢𑀤𑀦𑀼𑀲𑀸𑀭𑁂𑀦 𑀅𑀢𑀻𑀢𑀸𑀦𑀸𑀕𑀢𑁂 𑀜𑀸𑀡𑀁 𑀦𑁂𑀦𑁆𑀢𑀲𑁆𑀲 𑀆𑀤𑀺𑀢𑁆𑀢𑀸 𑀯𑀺𑀬 𑀢𑀬𑁄 𑀪𑀯𑀸 𑀉𑀧𑀝𑁆𑀞𑀳𑀺𑀁𑀲𑀼. 𑀜𑀸𑀡𑀲𑁆𑀲 𑀧𑀭𑀺𑀧𑀸𑀓𑀁 𑀕𑀢𑀢𑁆𑀢𑀸 ¶ 𑀯𑀺𑀧𑀲𑁆𑀲𑀦𑀸𑀯𑀻𑀣𑀺𑀁 𑀑𑀢𑀭𑀺𑀢𑁆𑀯𑀸 𑀢𑀸𑀯𑀤𑁂𑀯 𑀫𑀕𑁆𑀕𑀧𑁆𑀧𑀝𑀺𑀧𑀸𑀝𑀺𑀬𑀸 𑀲𑀩𑁆𑀩𑁂𑀧𑀺 𑀆𑀲𑀯𑁂 𑀔𑁂𑀧𑁂𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀻’’𑀢𑀺. 𑀉𑀪𑀬𑀣𑀸𑀧𑀺 𑀣𑁂𑀭𑀲𑁆𑀲 𑀅𑀭𑀳𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑁂𑀯 𑀧𑀓𑀸𑀲𑀺𑀢𑀸, 𑀣𑁂𑀭𑁄 𑀧𑀦 𑀧𑀪𑀺𑀦𑁆𑀦𑀧𑁆𑀧𑀝𑀺𑀲𑀫𑁆𑀪𑀺𑀤𑁄 𑀙𑀴𑀪𑀺𑀜𑁆𑀜𑁄 𑀅𑀳𑁄𑀲𑀺.

𑀯𑀓𑁆𑀓𑀮𑀺𑀢𑁆𑀣𑁂𑀭𑀯𑀢𑁆𑀣𑀼

𑁨𑁦𑁮. 𑀤𑀲𑀫𑁂 𑀆𑀳𑀸𑀭𑀓𑀭𑀡𑀯𑁂𑀮𑀦𑁆𑀢𑀺 𑀪𑁄𑀚𑀦𑀓𑀺𑀘𑁆𑀘𑀯𑁂𑀮𑀁. 𑀅𑀥𑀺𑀕𑀘𑁆𑀙𑁂 𑀧𑀤𑀁 𑀲𑀦𑁆𑀢𑀦𑁆𑀢𑀺 𑀲𑀗𑁆𑀔𑀸𑀭𑀽𑀧𑀲𑀫𑀁 𑀲𑀼𑀔𑀦𑁆𑀢𑀺 𑀮𑀤𑁆𑀥𑀦𑀸𑀫𑀁 𑀲𑀦𑁆𑀢𑀁 𑀧𑀤𑀁 𑀦𑀺𑀩𑁆𑀩𑀸𑀦𑀁 𑀅𑀥𑀺𑀕𑀘𑁆𑀙𑁂𑀬𑁆𑀬. 𑀧𑀞𑀫𑀧𑀸𑀤𑁂𑀦 𑀧𑀩𑁆𑀩𑀢𑁂 𑀞𑀺𑀢𑁄𑀬𑁂𑀯𑀸𑀢𑀺 𑀧𑀞𑀫𑁂𑀦 𑀧𑀸𑀤𑁂𑀦 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂 𑀞𑀺𑀢𑁄𑀬𑁂𑀯. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀤𑀼𑀢𑀺𑀬𑀏𑀢𑀤𑀕𑁆𑀕𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀏𑀢𑀤𑀕𑁆𑀕𑀯𑀕𑁆𑀕𑁄

(𑁧𑁪) 𑁩. 𑀢𑀢𑀺𑀬𑀏𑀢𑀤𑀕𑁆𑀕𑀯𑀕𑁆𑀕𑀯𑀡𑁆𑀡𑀦𑀸

𑀭𑀸𑀳𑀼𑀮-𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑀯𑀢𑁆𑀣𑀼

𑁨𑁦𑁯-𑁨𑁧𑁦. 𑀢𑀢𑀺𑀬𑀲𑁆𑀲 ¶ ¶ 𑀧𑀞𑀫𑀤𑀼𑀢𑀺𑀬𑁂𑀲𑀼 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸𑀢𑀺 𑀅𑀥𑀺𑀲𑀻𑀮𑀅𑀥𑀺𑀘𑀺𑀢𑁆𑀢𑀅𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀸 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸. 𑀘𑀼𑀤𑁆𑀤𑀲 𑀪𑀢𑁆𑀢𑀘𑁆𑀙𑁂𑀤𑁂 𑀓𑀢𑁆𑀯𑀸𑀢𑀺 𑀲𑀢𑁆𑀢𑀸𑀳𑀁 𑀦𑀺𑀭𑀸𑀳𑀸𑀭𑀢𑀸𑀬 𑀏𑀓𑁂𑀓𑀲𑁆𑀫𑀺𑀁 𑀤𑀺𑀯𑀲𑁂 𑀤𑁆𑀯𑀺𑀦𑁆𑀦𑀁 𑀪𑀢𑁆𑀢𑀘𑁆𑀙𑁂𑀤𑀸𑀦𑀁 𑀯𑀲𑁂𑀦 𑀘𑀼𑀤𑁆𑀤𑀲 𑀪𑀢𑁆𑀢𑀘𑁆𑀙𑁂𑀤𑁂 𑀓𑀢𑁆𑀯𑀸.

𑀢𑁂𑀲𑀦𑁆𑀢𑀺 𑀢𑁂𑀲𑀁 𑀢𑀸𑀧𑀲𑀸𑀦𑀁. 𑀮𑀸𑀩𑀼𑀪𑀸𑀚𑀦𑀸𑀤𑀺𑀧𑀭𑀺𑀓𑁆𑀔𑀸𑀭𑀁 𑀲𑀁𑀯𑀺𑀥𑀸𑀬𑀸𑀢𑀺 𑀮𑀸𑀩𑀼𑀪𑀸𑀚𑀦𑀸𑀤𑀺𑀢𑀸𑀧𑀲𑀧𑀭𑀺𑀓𑁆𑀔𑀸𑀭𑀁 𑀲𑀁𑀯𑀺𑀤𑀳𑀺𑀢𑁆𑀯𑀸. 𑀲𑀧𑀭𑀺𑀴𑀸𑀳𑀓𑀸𑀬𑀥𑀸𑀢𑀼𑀓𑁄𑀢𑀺 𑀉𑀲𑁆𑀲𑀦𑁆𑀦𑀧𑀺𑀢𑁆𑀢𑀢𑀸𑀬 𑀲𑀧𑀭𑀺𑀴𑀸𑀳𑀓𑀸𑀬𑀲𑀪𑀸𑀯𑁄. 𑀲𑀢𑀲𑀳𑀲𑁆𑀲𑀸𑀢𑀺 𑀲𑀢𑀲𑀳𑀲𑁆𑀲𑀧𑀭𑀺𑀫𑀸𑀡𑀸. 𑀲𑀢𑀲𑀳𑀲𑁆𑀲𑀁 𑀧𑀭𑀺𑀫𑀸𑀡𑀁 𑀏𑀢𑁂𑀲𑀦𑁆𑀢𑀺 𑀲𑀢𑀲𑀳𑀲𑁆𑀲𑀸 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀬𑀣𑀸 ‘‘𑀭𑀽𑀧𑀪𑀯𑁄 𑀭𑀽𑀧’’𑀦𑁆𑀢𑀺, 𑀅𑀢𑁆𑀣𑀺𑀅𑀢𑁆𑀣𑁂 𑀯𑀸 𑀅𑀓𑀸𑀭𑀧𑀘𑁆𑀘𑀬𑁄 𑀤𑀝𑁆𑀞𑀩𑁆𑀩𑁄. 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀅𑀓𑀼𑀲𑀮𑀥𑀫𑁆𑀫𑀲𑀫𑀼𑀤𑀸𑀘𑀸𑀭𑀲𑀗𑁆𑀔𑀸𑀢𑁄 𑀆𑀫𑀕𑀦𑁆𑀥𑁄 𑀓𑀼𑀡𑀧𑀕𑀦𑁆𑀥𑁄 𑀦𑀢𑁆𑀣𑀺 𑀏𑀢𑁂𑀲𑀦𑁆𑀢𑀺 𑀦𑀺𑀭𑀸𑀫𑀕𑀦𑁆𑀥𑀸, 𑀬𑀣𑀸𑀯𑀼𑀢𑁆𑀢𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑀭𑀳𑀺𑀢𑀸𑀢𑀺 𑀅𑀢𑁆𑀣𑁄. 𑀓𑀺𑀮𑁂𑀲𑀲𑀫𑀼𑀤𑀸𑀘𑀸𑀭𑁄 𑀳𑁂𑀢𑁆𑀣 ‘‘𑀆𑀫𑀕𑀦𑁆𑀥𑁄’’𑀢𑀺 𑀯𑀼𑀢𑁆𑀢𑁄. 𑀓𑀺𑀁𑀓𑀸𑀭𑀡𑀸? 𑀅𑀫𑀦𑀼𑀜𑁆𑀜𑀢𑁆𑀢𑀸, 𑀓𑀺𑀮𑁂𑀲𑀅𑀲𑀼𑀘𑀺𑀫𑀺𑀲𑁆𑀲𑀢𑁆𑀢𑀸, 𑀲𑀩𑁆𑀪𑀺 𑀚𑀺𑀕𑀼𑀘𑁆𑀙𑀺𑀢𑀢𑁆𑀢𑀸, 𑀧𑀭𑀫𑀤𑀼𑀕𑁆𑀕𑀦𑁆𑀥𑀪𑀸𑀯𑀯𑀳𑀢𑁆𑀢𑀸 𑀘. 𑀢𑀣𑀸 𑀳𑀺 𑀬𑁂 𑀬𑁂 𑀉𑀲𑁆𑀲𑀦𑁆𑀦𑀓𑀺𑀮𑁂𑀲𑀸 𑀲𑀢𑁆𑀢𑀸, 𑀢𑁂 𑀢𑁂 𑀅𑀢𑀺𑀤𑀼𑀕𑁆𑀕𑀦𑁆𑀥𑀸 𑀳𑁄𑀦𑁆𑀢𑀺. 𑀢𑁂𑀦𑁂𑀯 𑀦𑀺𑀓𑁆𑀓𑀺𑀮𑁂𑀲𑀸𑀦𑀁 𑀫𑀢𑀲𑀭𑀻𑀭𑀫𑁆𑀧𑀺 𑀤𑀼𑀕𑁆𑀕𑀦𑁆𑀥𑀁 𑀦 𑀳𑁄𑀢𑀺. 𑀤𑀸𑀦𑀕𑁆𑀕𑀧𑀭𑀺𑀯𑀳𑀦𑀓𑁂𑀢𑀺 𑀤𑀸𑀦𑀕𑁆𑀕𑀥𑀼𑀭𑀯𑀳𑀦𑀓𑁂. 𑀫𑀸𑀧𑀓𑁄𑀢𑀺 𑀤𑀺𑀯𑀲𑁂 𑀤𑀺𑀯𑀲𑁂 𑀧𑀭𑀺𑀫𑀺𑀢𑀧𑀭𑀺𑀩𑁆𑀩𑀬𑀤𑀸𑀦𑀯𑀲𑁂𑀦 𑀥𑀜𑁆𑀜𑀫𑀸𑀧𑀓𑁄.

𑀧𑀸𑀴𑀺𑀬𑀦𑁆𑀢𑀺 𑀯𑀺𑀦𑀬𑀧𑀸𑀴𑀺𑀬𑀁. 𑀫𑀺𑀕𑀚𑀸𑀢𑀓𑀁 𑀆𑀳𑀭𑀺𑀢𑁆𑀯𑀸 𑀓𑀣𑁂𑀲𑀻𑀢𑀺 𑀅𑀢𑀻𑀢𑁂 𑀓𑀺𑀭 𑀩𑁄𑀥𑀺𑀲𑀢𑁆𑀢𑁄 𑀫𑀺𑀕𑀬𑁄𑀦𑀺𑀬𑀁 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀫𑀺𑀕𑀕𑀡𑀧𑀭𑀺𑀯𑀼𑀢𑁄 𑀅𑀭𑀜𑁆𑀜𑁂 𑀯𑀲𑀢𑀺. 𑀅𑀣𑀲𑁆𑀲 𑀪𑀕𑀺𑀦𑀻 𑀅𑀢𑁆𑀢𑀦𑁄 𑀧𑀼𑀢𑁆𑀢𑀓𑀁 𑀉𑀧𑀦𑁂𑀢𑁆𑀯𑀸 ‘‘𑀪𑀸𑀢𑀺𑀓 𑀇𑀫𑀁 𑀪𑀸𑀕𑀺𑀦𑁂𑀬𑁆𑀬𑀁 𑀫𑀺𑀕𑀫𑀸𑀬𑀁 𑀲𑀺𑀓𑁆𑀔𑀸𑀧𑁂𑀳𑀻’’𑀢𑀺 𑀆𑀳. 𑀩𑁄𑀥𑀺𑀲𑀢𑁆𑀢𑁄 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 ‘‘𑀕𑀘𑁆𑀙 𑀢𑀸𑀢, 𑀅𑀲𑀼𑀓𑀯𑁂𑀮𑀸𑀬𑀁 𑀦𑀸𑀫 𑀆𑀕𑀦𑁆𑀢𑁆𑀯𑀸 𑀲𑀺𑀓𑁆𑀔𑁂𑀬𑁆𑀬𑀸𑀲𑀻’’𑀢𑀺 𑀆𑀳. 𑀲𑁄 𑀫𑀸𑀢𑀼𑀮𑁂𑀦 𑀯𑀼𑀢𑁆𑀢𑀯𑁂𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀺𑀕𑀫𑀸𑀬𑀁 𑀲𑀺𑀓𑁆𑀔𑀺. 𑀲𑁄 𑀏𑀓𑀤𑀺𑀯𑀲𑀁 𑀯𑀦𑁂 𑀯𑀺𑀘𑀭𑀦𑁆𑀢𑁄 𑀧𑀸𑀲𑁂𑀦 𑀩𑀤𑁆𑀥𑁄 𑀩𑀤𑁆𑀥𑀭𑀯𑀁 𑀯𑀺𑀭𑀯𑀺. 𑀫𑀺𑀕𑀕𑀡𑁄 𑀧𑀮𑀸𑀬𑀺𑀢𑁆𑀯𑀸 ‘‘𑀧𑀼𑀢𑁆𑀢𑁄 𑀢𑁂 𑀧𑀸𑀲𑁂𑀦 𑀩𑀤𑁆𑀥𑁄’’𑀢𑀺 𑀢𑀲𑁆𑀲 𑀫𑀸𑀢𑀼𑀬𑀸 𑀆𑀭𑁄𑀘𑁂𑀲𑀺. 𑀲𑀸 𑀪𑀸𑀢𑀼 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀪𑀸𑀢𑀺𑀓 𑀪𑀸𑀕𑀺𑀦𑁂𑀬𑁆𑀬𑁄 ¶ 𑀢𑁂 𑀫𑀺𑀕𑀫𑀸𑀬𑀁 𑀲𑀺𑀓𑁆𑀔𑀸𑀧𑀺𑀢𑁄’’𑀢𑀺 ¶ 𑀧𑀼𑀘𑁆𑀙𑀺. 𑀩𑁄𑀥𑀺𑀲𑀢𑁆𑀢𑁄 ‘‘𑀫𑀸 𑀢𑁆𑀯𑀁 𑀧𑀼𑀢𑁆𑀢𑀲𑁆𑀲 𑀓𑀺𑀜𑁆𑀘𑀺 𑀧𑀸𑀧𑀓𑀁 𑀆𑀲𑀗𑁆𑀓𑀺, 𑀲𑀼𑀕𑁆𑀕𑀳𑀺𑀢𑀸 𑀢𑁂𑀦 𑀫𑀺𑀕𑀫𑀸𑀬𑀸, 𑀇𑀤𑀸𑀦𑀺 𑀢𑀁 𑀳𑀸𑀲𑀬𑀫𑀸𑀦𑁄 𑀆𑀕𑀘𑁆𑀙𑀺𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸 ‘‘𑀫𑀺𑀕𑀁 𑀢𑀺𑀧𑀮𑁆𑀮𑀢𑁆𑀣’’𑀦𑁆𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀫𑀺𑀕𑀦𑁆𑀢𑀺 𑀪𑀸𑀕𑀺𑀦𑁂𑀬𑁆𑀬𑀫𑀺𑀕𑀁. 𑀢𑀺𑀧𑀮𑁆𑀮𑀢𑁆𑀣𑀁 𑀯𑀼𑀘𑁆𑀘𑀢𑀺 𑀲𑀬𑀦𑀁, 𑀉𑀪𑁄𑀳𑀺 𑀧𑀲𑁆𑀲𑁂𑀳𑀺 𑀉𑀚𑀼𑀓𑀫𑁂𑀯 𑀘 𑀦𑀺𑀧𑀦𑁆𑀦𑀓𑀯𑀲𑁂𑀦 𑀢𑀻𑀳𑀸𑀓𑀸𑀭𑁂𑀳𑀺 𑀧𑀮𑁆𑀮𑀢𑁆𑀣𑀁 𑀅𑀲𑁆𑀲, 𑀢𑀻𑀡𑀺 𑀯𑀸 𑀧𑀮𑁆𑀮𑀢𑁆𑀣𑀸𑀦𑀺 𑀅𑀲𑁆𑀲𑀸𑀢𑀺 𑀢𑀺𑀧𑀮𑁆𑀮𑀢𑁆𑀣𑁄, 𑀢𑀁 𑀢𑀺𑀧𑀮𑁆𑀮𑀢𑁆𑀣𑀁. 𑀅𑀦𑁂𑀓𑀫𑀸𑀬𑀦𑁆𑀢𑀺 𑀩𑀳𑀼𑀫𑀸𑀬𑀁 𑀩𑀳𑀼𑀯𑀜𑁆𑀘𑀦𑀁. 𑀅𑀝𑁆𑀞𑀓𑁆𑀔𑀼𑀭𑀦𑁆𑀢𑀺 𑀏𑀓𑁂𑀓𑀲𑁆𑀫𑀺𑀁 𑀧𑀸𑀤𑁂 𑀤𑁆𑀯𑀺𑀦𑁆𑀦𑀁 𑀤𑁆𑀯𑀺𑀦𑁆𑀦𑀁 𑀯𑀲𑁂𑀦 𑀅𑀝𑁆𑀞𑀳𑀺 𑀔𑀼𑀭𑁂𑀳𑀺 𑀲𑀫𑀦𑁆𑀦𑀸𑀕𑀢𑀁. 𑀅𑀟𑁆𑀠𑀭𑀢𑁆𑀢𑀸𑀧𑀧𑀸𑀬𑀺𑀦𑁆𑀢𑀺 𑀧𑀼𑀭𑀺𑀫𑀬𑀸𑀫𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀫𑀚𑁆𑀛𑀺𑀫𑀬𑀸𑀫𑁂 𑀅𑀭𑀜𑁆𑀜𑀢𑁄 𑀆𑀕𑀫𑁆𑀫 𑀧𑀸𑀦𑀻𑀬𑀲𑁆𑀲 𑀧𑀺𑀯𑀦𑀢𑁄 𑀅𑀟𑁆𑀠𑀭𑀢𑁆𑀢𑁂 𑀆𑀧𑀁 𑀧𑀺𑀯𑀢𑀻𑀢𑀺 𑀅𑀟𑁆𑀠𑀭𑀢𑁆𑀢𑀸𑀧𑀧𑀸𑀬𑀻. ‘‘𑀅𑀟𑁆𑀠𑀭𑀢𑁆𑀢𑁂 𑀆𑀧𑀧𑀸𑀬𑀺’’𑀦𑁆𑀢𑀺𑀧𑀺 𑀧𑀸𑀞𑁄. 𑀫𑀫 𑀪𑀸𑀕𑀺𑀦𑁂𑀬𑁆𑀬𑀁 𑀫𑀺𑀕𑀁 𑀅𑀳𑀁 𑀲𑀸𑀥𑀼𑀓𑀁 𑀫𑀺𑀕𑀫𑀸𑀬𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺𑀁. 𑀓𑀣𑀁? 𑀬𑀣𑀸 𑀏𑀓𑁂𑀦 𑀲𑁄𑀢𑁂𑀦 𑀙𑀫𑀸𑀬𑀁 𑀅𑀲𑁆𑀲𑀲𑀦𑁆𑀢𑁄 𑀙𑀳𑀺 𑀓𑀮𑀸𑀳𑀺 𑀅𑀢𑀺𑀪𑁄𑀢𑀺 𑀪𑀸𑀕𑀺𑀦𑁂𑀬𑁆𑀬𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀬𑀜𑁆𑀳𑀺 𑀢𑀯 𑀧𑀼𑀢𑁆𑀢𑀁 𑀢𑀣𑀸 𑀉𑀕𑁆𑀕𑀡𑁆𑀳𑀸𑀧𑁂𑀲𑀺𑀁, 𑀬𑀣𑀸 𑀏𑀓𑀲𑁆𑀫𑀺𑀁 𑀉𑀧𑀭𑀺𑀫𑀦𑀸𑀲𑀺𑀓𑀸𑀲𑁄𑀢𑁂 𑀯𑀸𑀢𑀁 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀧𑀣𑀯𑀺𑀬𑀁 𑀅𑀮𑁆𑀮𑀻𑀦𑁂𑀦 𑀏𑀓𑁂𑀦 𑀳𑁂𑀝𑁆𑀞𑀺𑀫𑀦𑀸𑀲𑀺𑀓𑀸𑀲𑁄𑀢𑁂𑀦 𑀢𑀣𑁂𑀯 𑀙𑀫𑀸𑀬𑀁 𑀅𑀲𑁆𑀲𑀲𑀦𑁆𑀢𑁄 𑀙𑀳𑀺 𑀓𑀮𑀸𑀳𑀺 𑀮𑀼𑀤𑁆𑀤𑀓𑀁 𑀅𑀢𑀺𑀪𑁄𑀢𑀺, 𑀙𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀅𑀚𑁆𑀛𑁄𑀢𑁆𑀣𑀭𑀢𑀺 𑀯𑀜𑁆𑀘𑁂𑀢𑀻𑀢𑀺 𑀅𑀢𑁆𑀣𑁄. 𑀓𑀢𑀫𑁂𑀳𑀺 𑀙𑀳𑀺? 𑀘𑀢𑁆𑀢𑀸𑀭𑁄 𑀧𑀸𑀤𑁂 𑀧𑀲𑀸𑀭𑁂𑀢𑁆𑀯𑀸 𑀏𑀓𑁂𑀦 𑀧𑀲𑁆𑀲𑁂𑀦 𑀲𑁂𑀬𑁆𑀬𑀸𑀬, 𑀔𑀼𑀭𑁂𑀳𑀺 𑀢𑀺𑀡𑀧𑀁𑀲𑀼𑀔𑀡𑀦𑁂𑀦, 𑀚𑀺𑀯𑁆𑀳𑀸𑀦𑀺𑀦𑁆𑀦𑀸𑀫𑀦𑁂𑀦, 𑀉𑀤𑀭𑀲𑁆𑀲 𑀉𑀤𑁆𑀥𑀼𑀫𑀸𑀢𑀪𑀸𑀯𑀓𑀭𑀡𑁂𑀦, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀯𑀺𑀲𑁆𑀲𑀚𑁆𑀚𑀦𑁂𑀦, 𑀯𑀸𑀢𑀲𑁆𑀲 𑀦𑀺𑀭𑀼𑀫𑁆𑀪𑀦𑁂𑀦𑀸𑀢𑀺. 𑀅𑀣 𑀯𑀸 𑀢𑀣𑀸 𑀦𑀁 𑀉𑀕𑁆𑀕𑀡𑁆𑀳𑀸𑀧𑁂𑀲𑀺𑀁, 𑀬𑀣𑀸 𑀏𑀓𑁂𑀦 𑀲𑁄𑀢𑁂𑀦 𑀙𑀫𑀸𑀬𑀁 𑀅𑀲𑁆𑀲𑀲𑀦𑁆𑀢𑁄. 𑀙𑀳𑀻𑀢𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑁂𑀳𑀺 𑀙𑀳𑀺 𑀓𑀸𑀭𑀡𑁂𑀳𑀺. 𑀓𑀮𑀸𑀳𑀻𑀢𑀺 𑀓𑀮𑀸𑀬𑀺𑀲𑁆𑀲𑀢𑀺, 𑀮𑀼𑀤𑁆𑀤𑀓𑀁 𑀯𑀜𑁆𑀘𑁂𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀪𑁄𑀢𑀻𑀢𑀺 𑀪𑀕𑀺𑀦𑀺𑀁 𑀆𑀮𑀧𑀢𑀺. 𑀪𑀸𑀕𑀺𑀦𑁂𑀬𑁆𑀬𑁄𑀢𑀺 𑀏𑀯𑀁 𑀙𑀳𑀺 𑀓𑀸𑀭𑀡𑁂𑀳𑀺 𑀯𑀜𑁆𑀘𑀓𑀁 𑀪𑀸𑀕𑀺𑀦𑁂𑀬𑁆𑀬𑀁 𑀦𑀺𑀤𑁆𑀤𑀺𑀲𑀢𑀺.

𑀏𑀯𑀁 𑀩𑁄𑀥𑀺𑀲𑀢𑁆𑀢𑁄 𑀪𑀸𑀕𑀺𑀦𑁂𑀬𑁆𑀬𑀲𑁆𑀲 𑀫𑀺𑀕𑀫𑀸𑀬𑀁 𑀲𑀸𑀥𑀼𑀓𑀁 𑀉𑀕𑁆𑀕𑀳𑀺𑀢𑀪𑀸𑀯𑀁 𑀯𑀤𑀦𑁆𑀢𑁄 𑀪𑀕𑀺𑀦𑀺𑀁 𑀲𑀫𑀲𑁆𑀲𑀸𑀲𑁂𑀲𑀺. 𑀲𑁄𑀧𑀺 𑀫𑀺𑀕𑀧𑁄𑀢𑀓𑁄 𑀧𑀸𑀲𑁂 𑀩𑀤𑁆𑀥𑁄 𑀅𑀦𑀺𑀩𑀦𑁆𑀥𑀺𑀢𑁆𑀯𑀸𑀬𑁂𑀯 𑀪𑀽𑀫𑀺𑀬𑀁 𑀫𑀳𑀸𑀨𑀸𑀲𑀼𑀓𑀧𑀲𑁆𑀲𑁂𑀦 𑀧𑀸𑀤𑁂 𑀧𑀲𑀸𑀭𑁂𑀢𑁆𑀯𑀸 𑀦𑀺𑀧𑀦𑁆𑀦𑁄 𑀧𑀸𑀤𑀸𑀦𑀁 𑀆𑀲𑀦𑁆𑀦𑀝𑁆𑀞𑀸𑀦𑁂 𑀔𑀼𑀭𑁂𑀳𑀺 𑀏𑀯 𑀧𑀳𑀭𑀺𑀢𑁆𑀯𑀸 𑀧𑀁𑀲𑀼𑀜𑁆𑀘 𑀢𑀺𑀡𑀸𑀦𑀺 𑀘 𑀉𑀧𑁆𑀧𑀸𑀝𑁂𑀢𑁆𑀯𑀸 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀲𑀻𑀲𑀁 𑀧𑀸𑀢𑁂𑀢𑁆𑀯𑀸 𑀚𑀺𑀯𑁆𑀳𑀁 𑀦𑀺𑀦𑁆𑀦𑀸𑀫𑁂𑀢𑁆𑀯𑀸 𑀲𑀭𑀻𑀭𑀁 𑀔𑁂𑀴𑀓𑀺𑀮𑀺𑀦𑁆𑀦𑀁 𑀓𑀢𑁆𑀯𑀸 𑀯𑀸𑀢𑀕𑁆𑀕𑀳𑀡𑁂𑀦 𑀉𑀤𑀭𑀁 𑀉𑀤𑁆𑀥𑀼𑀫𑀸𑀢𑀓𑀁 𑀓𑀢𑁆𑀯𑀸 𑀅𑀓𑁆𑀔𑀻𑀦𑀺 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀳𑁂𑀝𑁆𑀞𑀸𑀦𑀸𑀲𑀺𑀓𑀸𑀲𑁄𑀢𑁂𑀦 𑀯𑀸𑀢𑀁 𑀲𑀜𑁆𑀘𑀭𑀸𑀧𑁂𑀦𑁆𑀢𑁄 𑀉𑀧𑀭𑀺𑀫𑀦𑀸𑀲𑀺𑀓𑀸𑀲𑁄𑀢𑁂𑀦 ¶ 𑀯𑀸𑀢𑀁 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸 𑀲𑀓𑀮𑀲𑀭𑀻𑀭𑀁 𑀣𑀤𑁆𑀥𑀪𑀸𑀯𑀁 𑀕𑀸𑀳𑀸𑀧𑁂𑀢𑁆𑀯𑀸 𑀫𑀢𑀓𑀸𑀓𑀸𑀭𑀁 𑀤𑀲𑁆𑀲𑁂𑀲𑀺, 𑀦𑀻𑀮𑀫𑀓𑁆𑀔𑀺𑀓𑀸𑀧𑀺 𑀦𑀁 𑀲𑀫𑁆𑀧𑀭𑀺𑀯𑀸𑀭𑁂𑀲𑀼𑀁, 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀞𑀸𑀦𑁂 𑀓𑀸𑀓𑀸 𑀦𑀺𑀮𑀻𑀬𑀺𑀁𑀲𑀼. 𑀮𑀼𑀤𑁆𑀤𑁄 𑀆𑀕𑀦𑁆𑀢𑁆𑀯𑀸 𑀉𑀤𑀭𑁂 𑀳𑀢𑁆𑀣𑁂𑀦 𑀧𑀳𑀭𑀺𑀢𑁆𑀯𑀸 ‘‘𑀧𑀸𑀢𑁄𑀯 𑀩𑀤𑁆𑀥𑁄 𑀪𑀯𑀺𑀲𑁆𑀲𑀢𑀺, 𑀧𑀽𑀢𑀺𑀓𑁄 𑀚𑀸𑀢𑁄’’𑀢𑀺 𑀢𑀲𑁆𑀲 𑀩𑀦𑁆𑀥𑀦𑀭𑀚𑁆𑀚𑀼𑀁 𑀫𑁄𑀘𑁂𑀢𑁆𑀯𑀸 ‘‘𑀏𑀢𑁆𑀣𑁂𑀯 𑀤𑀸𑀦𑀺 𑀦𑀁 𑀉𑀓𑁆𑀓𑀦𑁆𑀢𑀺𑀢𑁆𑀯𑀸 𑀫𑀁𑀲𑀁 𑀆𑀤𑀸𑀬 𑀕𑀫𑀺𑀲𑁆𑀲𑀸𑀫𑀻’’𑀢𑀺 ¶ 𑀦𑀺𑀭𑀸𑀲𑀗𑁆𑀓𑁄 𑀳𑀼𑀢𑁆𑀯𑀸 𑀲𑀸𑀔𑀸𑀧𑀮𑀸𑀲𑀁 𑀕𑀳𑁂𑀢𑀼𑀁 𑀆𑀭𑀤𑁆𑀥𑁄. 𑀫𑀺𑀕𑀧𑁄𑀢𑀓𑁄𑀧𑀺 𑀉𑀝𑁆𑀞𑀸𑀬 𑀘𑀢𑀽𑀳𑀺 𑀧𑀸𑀤𑁂𑀳𑀺 𑀞𑀢𑁆𑀯𑀸 𑀓𑀸𑀬𑀁 𑀯𑀺𑀥𑀼𑀦𑀺𑀢𑁆𑀯𑀸 𑀕𑀻𑀯𑀁 𑀧𑀲𑀸𑀭𑁂𑀢𑁆𑀯𑀸 𑀫𑀳𑀸𑀯𑀸𑀢𑁂𑀦 𑀙𑀺𑀦𑁆𑀦𑀯𑀮𑀸𑀳𑀓𑁄 𑀯𑀺𑀬 𑀯𑁂𑀕𑁂𑀦 𑀫𑀸𑀢𑀼 𑀲𑀦𑁆𑀢𑀺𑀓𑀁 𑀅𑀕𑀫𑀸𑀲𑀺. 𑀲𑀢𑁆𑀣𑀸 ‘‘𑀦, 𑀪𑀺𑀓𑁆𑀔𑀯𑁂, 𑀭𑀸𑀳𑀼𑀮𑁄 𑀇𑀤𑀸𑀦𑁂𑀯 𑀲𑀺𑀓𑁆𑀔𑀸𑀓𑀸𑀫𑁄, 𑀧𑀼𑀩𑁆𑀩𑁂𑀧𑀺 𑀲𑀺𑀓𑁆𑀔𑀸𑀓𑀸𑀫𑁄𑀬𑁂𑀯𑀸’’𑀢𑀺 𑀏𑀯𑀁 𑀫𑀺𑀕𑀚𑀸𑀢𑀓𑀁 𑀆𑀳𑀭𑀺𑀢𑁆𑀯𑀸 𑀓𑀣𑁂𑀲𑀺.

𑀅𑀫𑁆𑀩𑀮𑀝𑁆𑀞𑀺𑀬𑀭𑀸𑀳𑀼𑀮𑁄𑀯𑀸𑀤𑀁 𑀤𑁂𑀲𑁂𑀲𑀻𑀢𑀺 ‘‘𑀧𑀲𑁆𑀲𑀲𑀺 𑀦𑁄 𑀢𑁆𑀯𑀁, 𑀭𑀸𑀳𑀼𑀮, 𑀇𑀫𑀁 𑀧𑀭𑀺𑀢𑁆𑀢𑀁 𑀉𑀤𑀓𑀸𑀯𑀲𑁂𑀲𑀁 𑀉𑀤𑀓𑀸𑀤𑀸𑀦𑁂 𑀞𑀧𑀺𑀢𑀦𑁆𑀢𑀺? 𑀏𑀯𑀁, 𑀪𑀦𑁆𑀢𑁂. 𑀏𑀯𑀁 𑀧𑀭𑀺𑀢𑁆𑀢𑀓𑀁 𑀔𑁄, 𑀭𑀸𑀳𑀼𑀮, 𑀢𑁂𑀲𑀁 𑀲𑀸𑀫𑀜𑁆𑀜𑀁, 𑀬𑁂𑀲𑀁 𑀦𑀢𑁆𑀣𑀺 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁂 𑀮𑀚𑁆𑀚𑀸’’𑀢𑀺 𑀏𑀯𑀫𑀸𑀤𑀺𑀦𑀸 𑀅𑀫𑁆𑀩𑀮𑀝𑁆𑀞𑀺𑀬𑀭𑀸𑀳𑀼𑀮𑁄𑀯𑀸𑀤𑀁 (𑀫. 𑀦𑀺. 𑁨.𑁧𑁦𑁭 𑀆𑀤𑀬𑁄) 𑀓𑀣𑁂𑀲𑀺. 𑀕𑁂𑀳𑀲𑀺𑀢𑀁 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀦𑁆𑀢𑀲𑁆𑀲𑀸𑀢𑀺 𑀆𑀬𑀲𑁆𑀫𑀸 𑀓𑀺𑀭 𑀭𑀸𑀳𑀼𑀮𑁄 𑀪𑀕𑀯𑀢𑁄 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀕𑀘𑁆𑀙𑀦𑁆𑀢𑁄𑀯 𑀧𑀸𑀤𑀢𑀮𑀢𑁄 𑀬𑀸𑀯 𑀉𑀧𑀭𑀺 𑀓𑁂𑀲𑀦𑁆𑀢𑀸 𑀢𑀣𑀸𑀕𑀢𑀁 𑀑𑀮𑁄𑀓𑁂𑀲𑀺, 𑀲𑁄 𑀪𑀕𑀯𑀢𑁄 𑀩𑀼𑀤𑁆𑀥𑀯𑁂𑀲𑀯𑀺𑀮𑀸𑀲𑀁 𑀤𑀺𑀲𑁆𑀯𑀸 ‘‘𑀲𑁄𑀪𑀢𑀺 𑀪𑀕𑀯𑀸 𑀤𑁆𑀯𑀢𑁆𑀢𑀺𑀁𑀲𑀫𑀳𑀸𑀧𑀼𑀭𑀺𑀲𑀮𑀓𑁆𑀔𑀡𑀯𑀺𑀘𑀺𑀢𑁆𑀢𑀲𑀭𑀻𑀭𑁄 𑀩𑁆𑀬𑀸𑀫𑀧𑁆𑀧𑀪𑀸𑀧𑀭𑀺𑀓𑁆𑀔𑀺𑀢𑁆𑀢𑀢𑀸𑀬 𑀯𑀺𑀧𑁆𑀧𑀓𑀺𑀡𑁆𑀡𑀲𑀼𑀯𑀡𑁆𑀡𑀘𑀼𑀡𑁆𑀡𑀫𑀚𑁆𑀛𑀕𑀢𑁄 𑀯𑀺𑀬 𑀯𑀺𑀚𑁆𑀚𑀼𑀮𑀢𑀸𑀧𑀭𑀺𑀓𑁆𑀔𑀺𑀢𑁆𑀢𑁄 𑀓𑀦𑀓𑀧𑀩𑁆𑀩𑀢𑁄 𑀯𑀺𑀬 𑀬𑀦𑁆𑀢𑀲𑀫𑀸𑀓𑀟𑁆𑀠𑀺𑀢𑀭𑀢𑀦𑀯𑀺𑀘𑀺𑀢𑁆𑀢𑀲𑀼𑀯𑀡𑁆𑀡𑀅𑀕𑁆𑀖𑀺𑀓𑀁 𑀯𑀺𑀬 𑀧𑀁𑀲𑀼𑀓𑀽𑀮𑀘𑀻𑀯𑀭𑀧𑁆𑀧𑀝𑀺𑀘𑁆𑀙𑀦𑁆𑀦𑁄𑀧𑀺 𑀭𑀢𑁆𑀢𑀓𑀫𑁆𑀩𑀮𑀧𑀭𑀺𑀓𑁆𑀔𑀺𑀢𑁆𑀢𑀓𑀦𑀓𑀧𑀩𑁆𑀩𑀢𑁄 𑀯𑀺𑀬 𑀧𑀯𑀸𑀴𑀮𑀢𑀸𑀧𑀝𑀺𑀫𑀡𑁆𑀟𑀺𑀢𑀲𑀼𑀯𑀡𑁆𑀡𑀖𑀝𑀺𑀓𑀁 𑀯𑀺𑀬 𑀘𑀻𑀦𑀧𑀺𑀝𑁆𑀞𑀘𑀼𑀡𑁆𑀡𑀧𑀽𑀚𑀺𑀢𑀲𑀼𑀯𑀡𑁆𑀡𑀘𑁂𑀢𑀺𑀬𑀁 𑀯𑀺𑀬 𑀮𑀸𑀔𑀸𑀭𑀲𑀸𑀦𑀼𑀮𑀺𑀢𑁆𑀢𑁄 𑀓𑀦𑀓𑀣𑀽𑀧𑁄 𑀯𑀺𑀬 𑀭𑀢𑁆𑀢𑀯𑀮𑀸𑀳𑀓𑀦𑁆𑀢𑀭𑀕𑀢𑁄 𑀢𑀗𑁆𑀔𑀡𑀫𑀼𑀕𑁆𑀕𑀢𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬 𑀅𑀳𑁄 𑀲𑀫𑀢𑀺𑀁𑀲𑀧𑀸𑀭𑀫𑀺𑀢𑀸𑀦𑀼𑀪𑀸𑀯𑁂𑀦 𑀲𑀚𑁆𑀚𑀺𑀢𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀲𑀺𑀭𑀺𑀲𑀫𑁆𑀧𑀢𑁆𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀢𑀢𑁄 𑀅𑀢𑁆𑀢𑀸𑀦𑀫𑁆𑀧𑀺 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀳𑀫𑁆𑀧𑀺 𑀲𑁄𑀪𑀸𑀫𑀺, 𑀲𑀘𑁂 𑀪𑀕𑀯𑀸 𑀘𑀢𑀽𑀲𑀼 𑀫𑀳𑀸𑀤𑀻𑀧𑁂𑀲𑀼 𑀘𑀓𑁆𑀓𑀯𑀢𑁆𑀢𑀺𑀭𑀚𑁆𑀚𑀁 𑀅𑀓𑀭𑀺𑀲𑁆𑀲, 𑀫𑀬𑁆𑀳𑀁 𑀧𑀭𑀺𑀡𑀸𑀬𑀓𑀝𑁆𑀞𑀸𑀦𑀦𑁆𑀢𑀭𑀫𑀤𑀲𑁆𑀲, 𑀏𑀯𑀁 𑀲𑀦𑁆𑀢𑁂 𑀅𑀢𑀺𑀯𑀺𑀬 𑀚𑀫𑁆𑀩𑀼𑀤𑀻𑀧𑀢𑀮𑀁 𑀅𑀢𑀺𑀲𑁄𑀪𑀺𑀲𑁆𑀲𑀸’’𑀢𑀺 𑀅𑀢𑁆𑀢𑀪𑀸𑀯𑀁 𑀦𑀺𑀲𑁆𑀲𑀸𑀬 𑀕𑁂𑀳𑀲𑀺𑀢𑀁 𑀙𑀦𑁆𑀤𑀭𑀸𑀕𑀁 𑀉𑀧𑁆𑀧𑀸𑀤𑁂𑀲𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀲𑀢𑁆𑀣𑀼 𑀘𑁂𑀯 𑀅𑀢𑁆𑀢𑀦𑁄 𑀘 𑀭𑀽𑀧𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀕𑁂𑀳𑀲𑀺𑀢𑀁 𑀯𑀺𑀢𑀓𑁆𑀓𑀁 𑀯𑀺𑀢𑀓𑁆𑀓𑁂𑀦𑁆𑀢𑀲𑁆𑀲𑀸’’𑀢𑀺.

𑀪𑀕𑀯𑀸𑀧𑀺 ¶ 𑀧𑀼𑀭𑀢𑁄 𑀕𑀘𑁆𑀙𑀦𑁆𑀢𑁄𑀯 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀭𑀺𑀧𑀼𑀡𑁆𑀡𑀘𑁆𑀙𑀯𑀺𑀫𑀁𑀲𑀮𑁄𑀳𑀺𑀢𑁄 𑀤𑀸𑀦𑀺 𑀭𑀸𑀳𑀼𑀮𑀲𑁆𑀲 𑀅𑀢𑁆𑀢𑀪𑀸𑀯𑁄, 𑀭𑀚𑀦𑀻𑀬𑁂𑀲𑀼 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀲𑀼 𑀘𑀺𑀢𑁆𑀢𑀲𑁆𑀲 𑀧𑀓𑁆𑀔𑀦𑁆𑀤𑀦𑀓𑀸𑀮𑁄 𑀚𑀸𑀢𑁄, 𑀦𑀺𑀧𑁆𑀨𑀮𑀢𑀸𑀬 𑀦𑀼 𑀔𑁄 𑀭𑀸𑀳𑀼𑀮𑁄 𑀯𑀻𑀢𑀺𑀦𑀸𑀫𑁂𑀢𑀻’’𑀢𑀺. 𑀅𑀣 𑀲𑀳𑀸𑀯𑀚𑁆𑀚𑀦𑁂𑀦𑁂𑀯 𑀧𑀲𑀦𑁆𑀦𑁂 𑀉𑀤𑀓𑁂 𑀫𑀘𑁆𑀙𑀁 𑀯𑀺𑀬 𑀧𑀭𑀺𑀲𑀼𑀤𑁆𑀥𑁂 𑀆𑀤𑀸𑀲𑀫𑀡𑁆𑀟𑀮𑁂 𑀫𑀼𑀔𑀦𑀺𑀫𑀺𑀢𑁆𑀢𑀁 𑀯𑀺𑀬 𑀘 𑀢𑀲𑁆𑀲 𑀢𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀁 𑀅𑀤𑁆𑀤𑀲, 𑀤𑀺𑀲𑁆𑀯𑀸 𑀘 ‘‘𑀅𑀬𑀁 𑀭𑀸𑀳𑀼𑀮𑁄 𑀫𑀬𑁆𑀳𑀁 𑀅𑀢𑁆𑀭𑀚𑁄 𑀳𑀼𑀢𑁆𑀯𑀸 𑀫𑀫 𑀧𑀘𑁆𑀙𑀢𑁄 𑀆𑀕𑀘𑁆𑀙𑀦𑁆𑀢𑁄 ‘𑀅𑀳𑀁 𑀲𑁄𑀪𑀸𑀫𑀺, 𑀫𑀬𑁆𑀳𑀁 𑀯𑀡𑁆𑀡𑀸𑀬𑀢𑀦𑀁 𑀧𑀲𑀦𑁆𑀦’𑀦𑁆𑀢𑀺 𑀅𑀢𑁆𑀢𑀪𑀸𑀯𑀁 𑀦𑀺𑀲𑁆𑀲𑀸𑀬 𑀕𑁂𑀳𑀲𑀺𑀢𑀁 𑀙𑀦𑁆𑀤𑀭𑀸𑀕𑀁 𑀉𑀧𑁆𑀧𑀸𑀤𑁂𑀢𑀺, 𑀅𑀢𑀺𑀢𑁆𑀣𑁂 𑀧𑀓𑁆𑀔𑀦𑁆𑀤𑁄, 𑀉𑀧𑁆𑀧𑀣𑀁 𑀧𑀝𑀺𑀧𑀦𑁆𑀦𑁄, 𑀅𑀕𑁄𑀘𑀭𑁂 𑀘𑀭𑀢𑀺, 𑀤𑀺𑀲𑀸𑀫𑀽𑀴𑁆𑀳𑀅𑀤𑁆𑀥𑀺𑀓𑁄 𑀯𑀺𑀬 𑀅𑀕𑀦𑁆𑀢𑀩𑁆𑀩𑀁 𑀤𑀺𑀲𑀁 𑀕𑀘𑁆𑀙𑀢𑀺, 𑀅𑀬𑀁 𑀔𑁄 𑀧𑀦𑀲𑁆𑀲 𑀓𑀺𑀮𑁂𑀲𑁄 𑀅𑀩𑁆𑀪𑀦𑁆𑀢𑀭𑁂 𑀯𑀟𑁆𑀠𑀦𑁆𑀢𑁄 𑀅𑀢𑁆𑀢𑀢𑁆𑀣𑀫𑁆𑀧𑀺 𑀬𑀣𑀸𑀪𑀽𑀢𑀁 𑀧𑀲𑁆𑀲𑀺𑀢𑀼𑀁 𑀦 𑀤𑀲𑁆𑀲𑀺𑀲𑁆𑀲𑀢𑀺 𑀧𑀭𑀢𑁆𑀣𑀫𑁆𑀧𑀺 𑀉𑀪𑀬𑀢𑁆𑀣𑀫𑁆𑀧𑀺, 𑀢𑀢𑁄 ¶ 𑀦𑀺𑀭𑀬𑁂𑀧𑀺 𑀧𑀝𑀺𑀲𑀦𑁆𑀥𑀺𑀁 𑀕𑀡𑁆𑀳𑀸𑀧𑁂𑀲𑁆𑀲𑀢𑀺, 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀫𑁆𑀧𑀺 𑀧𑁂𑀢𑁆𑀢𑀺𑀯𑀺𑀲𑀬𑁂𑀧𑀺 𑀅𑀲𑀼𑀭𑀓𑀸𑀬𑁂𑀧𑀺 𑀲𑀫𑁆𑀩𑀸𑀥𑁂𑀧𑀺 𑀫𑀸𑀢𑀼𑀓𑀼𑀘𑁆𑀙𑀺𑀲𑁆𑀫𑀺𑀦𑁆𑀢𑀺 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑀯𑀝𑁆𑀝𑁂 𑀧𑀭𑀺𑀧𑀸𑀢𑁂𑀲𑁆𑀲𑀢𑀺. 𑀬𑀣𑀸 𑀔𑁄 𑀧𑀦 𑀅𑀦𑁂𑀓𑀭𑀢𑀦𑀧𑀽𑀭𑀸 𑀫𑀳𑀸𑀦𑀸𑀯𑀸 𑀪𑀺𑀦𑁆𑀦𑀨𑀮𑀓𑀦𑁆𑀢𑀭𑁂𑀦 𑀉𑀤𑀓𑀁 𑀆𑀤𑀺𑀬𑀫𑀸𑀦𑀸 𑀫𑀼𑀳𑀼𑀢𑁆𑀢𑀫𑁆𑀧𑀺 𑀦 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑀸 𑀳𑁄𑀢𑀺, 𑀯𑁂𑀕𑁂𑀦 𑀯𑁂𑀕𑁂𑀦𑀲𑁆𑀲𑀸 𑀯𑀺𑀯𑀭𑀁 𑀧𑀺𑀤𑀳𑀺𑀢𑀼𑀁 𑀯𑀝𑁆𑀝𑀢𑀺, 𑀏𑀯𑀫𑁂𑀯 𑀅𑀬𑀫𑁆𑀧𑀺 𑀦 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑁄. 𑀬𑀸𑀯𑀲𑁆𑀲 𑀅𑀬𑀁 𑀓𑀺𑀮𑁂𑀲𑁄 𑀅𑀩𑁆𑀪𑀦𑁆𑀢𑀭𑁂 𑀲𑀻𑀮𑀭𑀢𑀦𑀸𑀤𑀻𑀦𑀺 𑀦 𑀯𑀺𑀦𑀸𑀲𑁂𑀢𑀺, 𑀢𑀸𑀯𑀤𑁂𑀯 𑀦𑀁 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀅𑀚𑁆𑀛𑀸𑀲𑀬𑀁 𑀅𑀓𑀸𑀲𑀺. 𑀢𑀢𑁄 𑀭𑀸𑀳𑀼𑀮𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀬𑀁 𑀓𑀺𑀜𑁆𑀘𑀺, 𑀭𑀸𑀳𑀼𑀮, 𑀭𑀽𑀧𑀁 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀅𑀚𑁆𑀛𑀢𑁆𑀢𑀁 𑀯𑀸 𑀩𑀳𑀺𑀤𑁆𑀥𑀸 𑀯𑀸 𑀑𑀴𑀸𑀭𑀺𑀓𑀁 𑀯𑀸 𑀲𑀼𑀔𑀼𑀫𑀁 𑀯𑀸 𑀳𑀻𑀦𑀁 𑀯𑀸 𑀧𑀡𑀻𑀢𑀁 𑀯𑀸 𑀬𑀁 𑀤𑀽𑀭𑁂 𑀲𑀦𑁆𑀢𑀺𑀓𑁂 𑀯𑀸, 𑀲𑀩𑁆𑀩𑀁 𑀭𑀽𑀧𑀁 ‘𑀦𑁂𑀢𑀁 𑀫𑀫, 𑀦𑁂𑀲𑁄𑀳𑀫𑀲𑁆𑀫𑀺, 𑀦 𑀫𑁂𑀲𑁄 𑀅𑀢𑁆𑀢𑀸’𑀢𑀺 𑀏𑀯𑀫𑁂𑀢𑀁 𑀬𑀣𑀸𑀪𑀽𑀢𑀁 𑀲𑀫𑁆𑀫𑀧𑁆𑀧𑀜𑁆𑀜𑀸𑀬 𑀤𑀝𑁆𑀞𑀩𑁆𑀩𑀦𑁆𑀢𑀺. 𑀭𑀽𑀧𑀫𑁂𑀯 𑀦𑀼 𑀔𑁄 𑀪𑀕𑀯𑀸 𑀭𑀽𑀧𑀫𑁂𑀯 𑀦𑀼 𑀔𑁄 𑀲𑀼𑀕𑀢𑀸𑀢𑀺. 𑀭𑀽𑀧𑀫𑁆𑀧𑀺 𑀭𑀸𑀳𑀼𑀮, 𑀯𑁂𑀤𑀦𑀸𑀧𑀺 𑀭𑀸𑀳𑀼𑀮, 𑀲𑀜𑁆𑀜𑀸𑀧𑀺 𑀭𑀸𑀳𑀼𑀮, 𑀲𑀗𑁆𑀔𑀸𑀭𑀸𑀧𑀺 𑀭𑀸𑀳𑀼𑀮, 𑀯𑀺𑀜𑁆𑀜𑀸𑀡𑀫𑁆𑀧𑀺 𑀭𑀸𑀳𑀼𑀮𑀸’’𑀢𑀺 𑀫𑀳𑀸𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀁 (𑀫. 𑀦𑀺. 𑁨.𑁧𑁧𑁩 𑀆𑀤𑀬𑁄) 𑀅𑀪𑀸𑀲𑀺. 𑀢𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀬𑀁 𑀓𑀺𑀜𑁆𑀘𑀺 𑀭𑀸𑀳𑀼𑀮…𑀧𑁂… 𑀓𑀣𑁂𑀲𑀻’’𑀢𑀺 𑀯𑀼𑀢𑁆𑀢𑀁.

𑀲𑀁𑀬𑀼𑀢𑁆𑀢𑀓𑁂 𑀧𑀦 𑀭𑀸𑀳𑀼𑀮𑁄𑀯𑀸𑀤𑁄𑀢𑀺 𑀭𑀸𑀳𑀼𑀮𑀲𑀁𑀬𑀼𑀢𑁆𑀢𑁂 𑀯𑀼𑀢𑁆𑀢𑀭𑀸𑀳𑀼𑀮𑁄𑀯𑀸𑀤𑀁 𑀲𑀦𑁆𑀥𑀸𑀬 𑀯𑀤𑀦𑁆𑀢𑀺. 𑀢𑀢𑁆𑀣 ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀲𑀁𑀔𑀺𑀢𑁆𑀢𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀼, 𑀬𑀫𑀳𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀏𑀓𑁄 𑀯𑀽𑀧𑀓𑀝𑁆𑀞𑁄 𑀅𑀧𑁆𑀧𑀫𑀢𑁆𑀢𑁄 𑀆𑀢𑀸𑀧𑀻 𑀧𑀳𑀺𑀢𑀢𑁆𑀢𑁄 𑀯𑀺𑀳𑀭𑁂𑀬𑁆𑀬’’𑀦𑁆𑀢𑀺 𑀣𑁂𑀭𑁂𑀦 𑀬𑀸𑀘𑀺𑀢𑁄 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀭𑀸𑀳𑀼𑀮, 𑀘𑀓𑁆𑀔𑀼 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸𑀢𑀺? 𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁 ¶ , 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸𑀢𑀺? 𑀤𑀼𑀓𑁆𑀔𑀁, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺𑀆𑀤𑀺𑀦𑀸 𑀭𑀸𑀳𑀼𑀮𑁄𑀯𑀸𑀤𑀁 (𑀲𑀁. 𑀦𑀺. 𑁨.𑁧𑁮𑁮 𑀆𑀤𑀬𑁄) 𑀆𑀭𑀪𑀺. 𑀣𑁂𑀭𑀲𑁆𑀲 𑀯𑀺𑀧𑀲𑁆𑀲𑀦𑀸𑀘𑀸𑀭𑁄𑀬𑁂𑀯, 𑀦 𑀧𑀦 𑀫𑀳𑀸𑀭𑀸𑀳𑀼𑀮𑁄𑀯𑀸𑀤𑁄 𑀯𑀺𑀬 𑀯𑀺𑀢𑀓𑁆𑀓𑀽𑀧𑀘𑁆𑀙𑁂𑀤𑀸𑀬 𑀯𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀣𑀲𑁆𑀲 𑀲𑀢𑁆𑀣𑀸 𑀜𑀸𑀡𑀧𑀭𑀺𑀧𑀸𑀓𑀁 𑀜𑀢𑁆𑀯𑀸𑀢𑀺𑀆𑀤𑀻𑀲𑀼 𑀪𑀕𑀯𑀢𑁄 𑀓𑀺𑀭 𑀭𑀳𑁄𑀕𑀢𑀲𑁆𑀲 𑀧𑀝𑀺𑀲𑀮𑁆𑀮𑀻𑀦𑀲𑁆𑀲 𑀏𑀯𑀁 𑀘𑁂𑀢𑀲𑁄 𑀧𑀭𑀺𑀯𑀺𑀢𑀓𑁆𑀓𑁄 𑀉𑀤𑀧𑀸𑀤𑀺 ‘‘𑀧𑀭𑀺𑀧𑀓𑁆𑀓𑀸 𑀔𑁄 𑀭𑀸𑀳𑀼𑀮𑀲𑁆𑀲 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀸 𑀥𑀫𑁆𑀫𑀸, 𑀬𑀦𑁆𑀦𑀽𑀦𑀸𑀳𑀁 𑀭𑀸𑀳𑀼𑀮𑀁 𑀉𑀢𑁆𑀢𑀭𑀺 𑀆𑀲𑀯𑀸𑀦𑀁 𑀔𑀬𑁂 𑀯𑀺𑀦𑁂𑀬𑁆𑀬’’𑀦𑁆𑀢𑀺? 𑀅𑀣𑀲𑁆𑀲 𑀪𑀕𑀯𑀸 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀭𑀸𑀳𑀼𑀮𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀕𑀡𑁆𑀳𑀸𑀳𑀺, 𑀭𑀸𑀳𑀼𑀮, 𑀦𑀺𑀲𑀻𑀤𑀦𑀁, 𑀬𑁂𑀦 𑀅𑀦𑁆𑀥𑀯𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀲𑁆𑀲𑀸𑀫 𑀤𑀺𑀯𑀸𑀯𑀺𑀳𑀸𑀭𑀸𑀬𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀆𑀬𑀲𑁆𑀫𑀸 𑀭𑀸𑀳𑀼𑀮𑁄 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀦𑀺𑀲𑀻𑀤𑀦𑀁 𑀆𑀤𑀸𑀬 𑀪𑀕𑀯𑀢𑁄 𑀧𑀺𑀝𑁆𑀞𑀺𑀢𑁄 𑀧𑀺𑀝𑁆𑀞𑀺𑀢𑁄 𑀅𑀦𑀼𑀩𑀦𑁆𑀥𑀺. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀅𑀦𑁂𑀓𑀸𑀦𑀺 𑀤𑁂𑀯𑀢𑀸𑀲𑀳𑀲𑁆𑀲𑀸𑀦𑀺 𑀪𑀕𑀯𑀦𑁆𑀢𑀁 𑀅𑀪𑀺𑀯𑀦𑁆𑀤𑀺𑀢𑁆𑀯𑀸 𑀅𑀦𑀼𑀩𑀦𑁆𑀥𑀺𑀢𑀸 𑀳𑁄𑀦𑁆𑀢𑀺 ‘‘𑀅𑀚𑁆𑀚 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀭𑀸𑀳𑀼𑀮𑀁 ¶ 𑀉𑀢𑁆𑀢𑀭𑀺 𑀆𑀲𑀯𑀸𑀦𑀁 𑀔𑀬𑁂 𑀯𑀺𑀦𑁂𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀅𑀦𑁆𑀥𑀯𑀦𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀆𑀬𑀲𑁆𑀫𑀸𑀧𑀺 𑀭𑀸𑀳𑀼𑀮𑁄 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀅𑀣 𑀆𑀬𑀲𑁆𑀫𑀦𑁆𑀢𑀁 𑀭𑀸𑀳𑀼𑀮𑀁 𑀆𑀫𑀦𑁆𑀢𑁂𑀢𑁆𑀯𑀸 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀭𑀸𑀳𑀼𑀮, 𑀘𑀓𑁆𑀔𑀼 𑀦𑀺𑀘𑁆𑀘𑀁 𑀯𑀸 𑀅𑀦𑀺𑀘𑁆𑀘𑀁 𑀯𑀸𑀢𑀺? 𑀅𑀦𑀺𑀘𑁆𑀘𑀁, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁, 𑀤𑀼𑀓𑁆𑀔𑀁 𑀯𑀸 𑀢𑀁 𑀲𑀼𑀔𑀁 𑀯𑀸𑀢𑀺? 𑀤𑀼𑀓𑁆𑀔𑀁, 𑀪𑀦𑁆𑀢𑁂. 𑀬𑀁 𑀧𑀦𑀸𑀦𑀺𑀘𑁆𑀘𑀁 𑀤𑀼𑀓𑁆𑀔𑀁 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀁, 𑀓𑀮𑁆𑀮𑀁 𑀦𑀼 𑀢𑀁 𑀲𑀫𑀦𑀼𑀧𑀲𑁆𑀲𑀺𑀢𑀼𑀁 ‘𑀏𑀢𑀁 𑀫𑀫, 𑀏𑀲𑁄𑀳𑀫𑀲𑁆𑀫𑀺, 𑀏𑀲𑁄 𑀫𑁂 𑀅𑀢𑁆𑀢𑀸’’’𑀢𑀺𑀆𑀤𑀺𑀦𑀸 𑀭𑀸𑀳𑀼𑀮𑁄𑀯𑀸𑀤𑀁 (𑀲𑀁. 𑀦𑀺. 𑁪.𑁧𑁨𑁧) 𑀅𑀤𑀸𑀲𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀅𑀦𑁆𑀥𑀯𑀦𑁂 𑀦𑀺𑀲𑀺𑀦𑁆𑀦𑁄 𑀘𑀽𑀴𑀭𑀸𑀳𑀼𑀮𑁄𑀯𑀸𑀤𑀁 𑀓𑀣𑁂𑀲𑀻’’𑀢𑀺.

𑀓𑁄𑀝𑀺𑀲𑀢𑀲𑀳𑀲𑁆𑀲𑀤𑁂𑀯𑀢𑀸𑀳𑀻𑀢𑀺 𑀆𑀬𑀲𑁆𑀫𑀢𑀸 𑀭𑀸𑀳𑀼𑀮𑁂𑀦 𑀧𑀤𑀼𑀫𑀼𑀢𑁆𑀢𑀭𑀲𑁆𑀲 𑀪𑀕𑀯𑀢𑁄 𑀧𑀸𑀤𑀫𑀽𑀮𑁂 𑀧𑀣𑀯𑀺𑀦𑁆𑀥𑀭𑀭𑀸𑀚𑀓𑀸𑀮𑁂 𑀧𑀢𑁆𑀣𑀦𑀁 𑀞𑀧𑁂𑀦𑁆𑀢𑁂𑀦 𑀲𑀤𑁆𑀥𑀺𑀁 𑀧𑀢𑁆𑀣𑀦𑀁 𑀞𑀧𑀺𑀢𑀤𑁂𑀯𑀢𑀸𑀬𑁂𑀯𑁂𑀢𑀸. 𑀢𑀸𑀲𑀼 𑀧𑀦 𑀓𑀸𑀘𑀺 𑀪𑀽𑀫𑀝𑁆𑀞𑀤𑁂𑀯𑀢𑀸, 𑀓𑀸𑀘𑀺 𑀅𑀦𑁆𑀢𑀮𑀺𑀓𑁆𑀔𑀝𑁆𑀞𑀓𑀸, 𑀓𑀸𑀘𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀺𑀤𑁂𑀯𑀮𑁄𑀓𑁂, 𑀓𑀸𑀘𑀺 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀸, 𑀇𑀫𑀲𑁆𑀫𑀺𑀁 𑀧𑀦 𑀤𑀺𑀯𑀲𑁂 𑀲𑀩𑁆𑀩𑀸 𑀏𑀓𑀝𑁆𑀞𑀸𑀦𑁂 𑀅𑀦𑁆𑀥𑀯𑀦𑀲𑁆𑀫𑀺𑀁𑀬𑁂𑀯 𑀲𑀦𑁆𑀦𑀺𑀧𑀢𑀺𑀢𑀸.

𑀆𑀪𑀺𑀤𑁄𑀲𑀺𑀓𑀦𑁆𑀢𑀺 ¶ 𑀧𑀸𑀭𑀺𑀯𑀸𑀲𑀺𑀓𑀁 𑀏𑀓𑀭𑀢𑁆𑀢𑀸𑀢𑀺𑀓𑁆𑀓𑀦𑁆𑀢𑀁 𑀧𑀽𑀢𑀺𑀪𑀽𑀢𑀁. 𑀏𑀓𑀭𑀢𑁆𑀢𑀸𑀢𑀺𑀓𑁆𑀓𑀦𑁆𑀢𑀲𑁆𑀲𑁂𑀯 𑀳𑀺 𑀦𑀸𑀫𑀲𑀜𑁆𑀜𑀸 𑀏𑀲𑀸, 𑀬𑀤𑀺𑀤𑀁 𑀆𑀪𑀺𑀤𑁄𑀲𑀺𑀓𑁄𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄 𑁋 𑀧𑀽𑀢𑀺𑀪𑀸𑀯𑀤𑁄𑀲𑁂𑀦 𑀅𑀪𑀺𑀪𑀽𑀢𑁄𑀢𑀺 𑀅𑀪𑀺𑀤𑁄𑀲𑁄, 𑀅𑀪𑀺𑀤𑁄𑀲𑁄𑀬𑁂𑀯 𑀆𑀪𑀺𑀤𑁄𑀲𑀺𑀓𑁄. 𑀓𑀼𑀫𑁆𑀫𑀸𑀲𑀦𑁆𑀢𑀺 𑀬𑀯𑀓𑀼𑀫𑁆𑀫𑀸𑀲𑀁. 𑀅𑀥𑀺𑀯𑀸𑀲𑁂𑀢𑁆𑀯𑀸𑀢𑀺 ‘‘𑀢𑁂𑀦 𑀳𑀺, 𑀢𑀸𑀢 𑀭𑀝𑁆𑀞𑀧𑀸𑀮, 𑀅𑀥𑀺𑀯𑀸𑀲𑁂𑀳𑀺 𑀲𑁆𑀯𑀸𑀢𑀦𑀸𑀬 𑀪𑀢𑁆𑀢’’𑀦𑁆𑀢𑀺 𑀧𑀺𑀢𑀭𑀸 𑀦𑀺𑀫𑀦𑁆𑀢𑀺𑀢𑁄 𑀲𑁆𑀯𑀸𑀢𑀦𑀸𑀬 𑀪𑀺𑀓𑁆𑀔𑀁 𑀅𑀥𑀺𑀯𑀸𑀲𑁂𑀢𑁆𑀯𑀸. 𑀏𑀢𑁆𑀣 𑀘 𑀣𑁂𑀭𑁄 𑀧𑀓𑀢𑀺𑀬𑀸 𑀉𑀓𑁆𑀓𑀝𑁆𑀞𑀲𑀧𑀤𑀸𑀦𑀘𑀸𑀭𑀺𑀓𑁄 𑀲𑁆𑀯𑀸𑀢𑀦𑀸𑀬 𑀪𑀺𑀓𑁆𑀔𑀁 𑀦𑀸𑀫 𑀦𑀸𑀥𑀺𑀯𑀸𑀲𑁂𑀢𑀺, 𑀫𑀸𑀢𑀼 𑀅𑀦𑀼𑀕𑁆𑀕𑀳𑁂𑀦 𑀧𑀦 𑀅𑀥𑀺𑀯𑀸𑀲𑁂𑀢𑀺. 𑀫𑀸𑀢𑀼 𑀓𑀺𑀭𑀲𑁆𑀲 𑀣𑁂𑀭𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀫𑀳𑀸𑀲𑁄𑀓𑁄 𑀉𑀧𑁆𑀧𑀚𑁆𑀚𑀢𑀺, 𑀭𑁄𑀤𑀦𑁂𑀦𑁂𑀯 𑀤𑀼𑀓𑁆𑀔𑀻 𑀯𑀺𑀬 𑀚𑀸𑀢𑀸, 𑀢𑀲𑁆𑀫𑀸 𑀣𑁂𑀭𑁄 ‘‘𑀲𑀘𑀸𑀳𑀁 𑀢𑀁 𑀅𑀧𑀲𑁆𑀲𑀺𑀢𑁆𑀯𑀸 𑀕𑀫𑀺𑀲𑁆𑀲𑀸𑀫𑀺, 𑀳𑀤𑀬𑀫𑁆𑀧𑀺𑀲𑁆𑀲𑀸 𑀨𑀮𑁂𑀬𑁆𑀬𑀸’’𑀢𑀺 𑀅𑀦𑀼𑀕𑁆𑀕𑀳𑁂𑀦 𑀅𑀥𑀺𑀯𑀸𑀲𑁂𑀲𑀺. 𑀧𑀡𑁆𑀟𑀺𑀢𑀸 𑀳𑀺 𑀪𑀺𑀓𑁆𑀔𑀽 𑀫𑀸𑀢𑀸𑀧𑀺𑀢𑀽𑀦𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀦𑀁 𑀯𑀸 𑀓𑀸𑀢𑀩𑁆𑀩𑀁 𑀅𑀦𑀼𑀕𑁆𑀕𑀳𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀥𑀼𑀢𑀗𑁆𑀕𑀲𑀼𑀤𑁆𑀥𑀺𑀓𑀸 𑀦 𑀪𑀯𑀦𑁆𑀢𑀺.

𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁂 𑀇𑀢𑁆𑀣𑀺𑀚𑀦𑁂𑀢𑀺 𑀧𑀺𑀢𑀭𑀸 𑀉𑀬𑁆𑀬𑁄𑀚𑀺𑀢𑁂 𑀇𑀢𑁆𑀣𑀺𑀚𑀦𑁂. 𑀧𑀺𑀢𑀸 𑀓𑀺𑀭𑀲𑁆𑀲 𑀤𑀼𑀢𑀺𑀬𑀤𑀺𑀯𑀲𑁂 𑀲𑀓𑀦𑀺𑀯𑁂𑀲𑀦𑁂 𑀫𑀳𑀦𑁆𑀢𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀲𑁆𑀲 𑀧𑀼𑀜𑁆𑀚𑀁 𑀓𑀸𑀭𑀸𑀧𑁂𑀢𑁆𑀯𑀸 𑀓𑀺𑀮𑀜𑁆𑀚𑁂𑀳𑀺 𑀧𑀝𑀺𑀘𑁆𑀙𑀸𑀤𑀸𑀧𑁂𑀢𑁆𑀯𑀸 𑀆𑀬𑀲𑁆𑀫𑀢𑁄 𑀭𑀝𑁆𑀞𑀧𑀸𑀮𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬𑁄 ‘‘𑀏𑀣 𑀢𑀼𑀫𑁆𑀳𑁂 𑀯𑀥𑀽, 𑀬𑁂𑀦 𑀅𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀢𑀸 𑀧𑀼𑀩𑁆𑀩𑁂 𑀭𑀝𑁆𑀞𑀧𑀸𑀮𑀲𑁆𑀲 𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀺𑀬𑀸 𑀳𑁄𑀣 𑀫𑀦𑀸𑀧𑀸, 𑀢𑁂𑀦 𑀅𑀮𑀗𑁆𑀓𑀸𑀭𑁂𑀦 𑀅𑀮𑀗𑁆𑀓𑀭𑁄𑀣𑀸’’𑀢𑀺 𑀆𑀡𑀸𑀧𑁂𑀢𑁆𑀯𑀸 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀢𑁆𑀯𑀸 𑀓𑀸𑀮𑁂 𑀆𑀭𑁄𑀘𑀺𑀢𑁂 𑀆𑀕𑀦𑁆𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑀁 ‘‘𑀇𑀤𑀁 𑀢𑁂, 𑀭𑀝𑁆𑀞𑀧𑀸𑀮, 𑀫𑀢𑁆𑀢𑀺𑀓𑀁 𑀥𑀦𑀁, 𑀅𑀜𑁆𑀜𑀁 𑀧𑁂𑀢𑁆𑀢𑀺𑀓𑀁, 𑀅𑀜𑁆𑀜𑀁 𑀧𑀺𑀢𑀸𑀫𑀳𑀁; 𑀲𑀓𑁆𑀓𑀸, 𑀢𑀸𑀢 𑀭𑀝𑁆𑀞𑀧𑀸𑀮, 𑀪𑁄𑀕𑁂 ¶ 𑀘 𑀪𑀼𑀜𑁆𑀚𑀺𑀢𑀼𑀁, 𑀧𑀼𑀜𑁆𑀜𑀸𑀦𑀺 𑀘 𑀓𑀸𑀢𑀼𑀁? 𑀏𑀳𑀺 𑀢𑁆𑀯𑀁, 𑀢𑀸𑀢 𑀭𑀝𑁆𑀞𑀧𑀸𑀮, 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀳𑀻𑀦𑀸𑀬𑀸𑀯𑀢𑁆𑀢𑀺𑀢𑁆𑀯𑀸 𑀪𑁄𑀕𑁂 𑀘 𑀪𑀼𑀜𑁆𑀚𑀲𑁆𑀲𑀼, 𑀧𑀼𑀜𑁆𑀜𑀸𑀦𑀺 𑀘 𑀓𑀭𑁄𑀳𑀻’’𑀢𑀺 𑀬𑀸𑀘𑀺𑀢𑁆𑀯𑀸 𑀢𑁂𑀦 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀥𑀫𑁆𑀫𑁂 𑀤𑁂𑀲𑀺𑀢𑁂 ‘‘𑀅𑀳𑀁 𑀇𑀫𑀁 𑀉𑀧𑁆𑀧𑀩𑁆𑀩𑀸𑀚𑁂𑀲𑁆𑀲𑀸𑀫𑀻’’𑀢𑀺 𑀆𑀦𑀬𑀺𑀁, 𑀲𑁄 ‘‘𑀤𑀸𑀦𑀺 𑀫𑁂 𑀥𑀫𑁆𑀫𑀓𑀣𑀁 𑀓𑀸𑀢𑀼𑀁 𑀆𑀭𑀤𑁆𑀥𑁄, 𑀅𑀮𑀁 𑀫𑁂 𑀯𑀘𑀦𑀁 𑀦 𑀓𑀭𑀺𑀲𑁆𑀲𑀢𑀻’’𑀢𑀺 𑀉𑀝𑁆𑀞𑀸𑀬 𑀕𑀦𑁆𑀢𑁆𑀯𑀸 𑀢𑀲𑁆𑀲 𑀑𑀭𑁄𑀥𑀸𑀦𑀁 𑀤𑁆𑀯𑀸𑀭𑀁 𑀯𑀺𑀯𑀭𑀸𑀧𑁂𑀢𑁆𑀯𑀸 ‘‘𑀅𑀬𑀁 𑀯𑁄 𑀲𑀸𑀫𑀺𑀓𑁄, 𑀕𑀘𑁆𑀙𑀣, 𑀬𑀁 𑀓𑀺𑀜𑁆𑀘𑀺 𑀓𑀢𑁆𑀯𑀸𑀦 𑀕𑀡𑁆𑀳𑀺𑀢𑀼𑀁 𑀯𑀸𑀬𑀫𑀣𑀸’’𑀢𑀺 𑀉𑀬𑁆𑀬𑁄𑀚𑁂𑀲𑀺. 𑀢𑀻𑀲𑀼 𑀯𑀬𑁂𑀲𑀼 𑀞𑀺𑀢𑀸 𑀦𑀸𑀝𑀓𑀺𑀢𑁆𑀣𑀺𑀬𑁄 𑀣𑁂𑀭𑀁 𑀧𑀭𑀺𑀯𑀸𑀭𑀬𑀺𑀁𑀲𑀼. 𑀢𑀸𑀲𑀼 𑀅𑀬𑀁 𑀅𑀲𑀼𑀪𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀅𑀮𑀗𑁆𑀓𑀢𑀧𑀝𑀺𑀬𑀢𑁆𑀢𑁂 𑀇𑀢𑁆𑀣𑀺𑀚𑀦𑁂 𑀅𑀲𑀼𑀪𑀲𑀜𑁆𑀜𑀁 𑀉𑀧𑁆𑀧𑀸𑀤𑁂𑀢𑁆𑀯𑀸’’𑀢𑀺.

𑀞𑀺𑀢𑀓𑁄𑀯 ¶ 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸𑀢𑀺 𑁋

‘‘𑀧𑀲𑁆𑀲 𑀘𑀺𑀢𑁆𑀢𑀓𑀢𑀁 𑀩𑀺𑀫𑁆𑀩𑀁, 𑀅𑀭𑀼𑀓𑀸𑀬𑀁 𑀲𑀫𑀼𑀲𑁆𑀲𑀺𑀢𑀁;

𑀆𑀢𑀼𑀭𑀁 𑀩𑀳𑀼𑀲𑀗𑁆𑀓𑀧𑁆𑀧𑀁, 𑀬𑀲𑁆𑀲 𑀦𑀢𑁆𑀣𑀺 𑀥𑀼𑀯𑀁 𑀞𑀺𑀢𑀺.

‘‘𑀧𑀲𑁆𑀲 𑀘𑀺𑀢𑁆𑀢𑀓𑀢𑀁 𑀭𑀽𑀧𑀁, 𑀫𑀡𑀺𑀦𑀸 𑀓𑀼𑀡𑁆𑀟𑀮𑁂𑀦 𑀘;

𑀅𑀝𑁆𑀞𑀺𑀁 𑀢𑀘𑁂𑀦 𑀑𑀦𑀤𑁆𑀥𑀁, 𑀲𑀳 𑀯𑀢𑁆𑀣𑁂𑀳𑀺 𑀲𑁄𑀪𑀢𑀺.

‘‘𑀅𑀮𑀢𑁆𑀢𑀓𑀓𑀢𑀸 𑀧𑀸𑀤𑀸, 𑀫𑀼𑀔𑀁 𑀘𑀼𑀡𑁆𑀡𑀓𑀫𑀓𑁆𑀔𑀺𑀢𑀁;

𑀅𑀮𑀁 𑀩𑀸𑀮𑀲𑁆𑀲 𑀫𑁄𑀳𑀸𑀬, 𑀦𑁄 𑀘 𑀧𑀸𑀭𑀕𑀯𑁂𑀲𑀺𑀦𑁄.

‘‘𑀅𑀝𑁆𑀞𑀸𑀧𑀤𑀓𑀢𑀸 𑀓𑁂𑀲𑀸, 𑀦𑁂𑀢𑁆𑀢𑀸 𑀅𑀜𑁆𑀚𑀦𑀫𑀓𑁆𑀔𑀺𑀢𑀸;

𑀅𑀮𑀁 𑀩𑀸𑀮𑀲𑁆𑀲 𑀫𑁄𑀳𑀸𑀬, 𑀦𑁄 𑀘 𑀧𑀸𑀭𑀕𑀯𑁂𑀲𑀺𑀦𑁄.

‘‘𑀅𑀜𑁆𑀚𑀦𑀻𑀯𑀡𑁆𑀡𑀯𑀸 𑀘𑀺𑀢𑁆𑀢𑀸, 𑀧𑀽𑀢𑀺𑀓𑀸𑀬𑁄 𑀅𑀮𑀗𑁆𑀓𑀢𑁄;

𑀅𑀮𑀁 𑀩𑀸𑀮𑀲𑁆𑀲 𑀫𑁄𑀳𑀸𑀬, 𑀦𑁄 𑀘 𑀧𑀸𑀭𑀕𑀯𑁂𑀲𑀺𑀦𑁄.

‘‘𑀑𑀤𑀳𑀺 𑀫𑀺𑀕𑀯𑁄 𑀧𑀸𑀲𑀁, 𑀦𑀸𑀲𑀤𑀸 𑀯𑀸𑀕𑀼𑀭𑀁 𑀫𑀺𑀕𑁄;

𑀪𑀼𑀢𑁆𑀯𑀸 𑀦𑀺𑀯𑀸𑀧𑀁 𑀕𑀘𑁆𑀙𑀸𑀫𑀺, 𑀓𑀦𑁆𑀤𑀦𑁆𑀢𑁂 𑀫𑀺𑀕𑀩𑀦𑁆𑀥𑀓𑁂’’𑀢𑀺. (𑀫. 𑀦𑀺. 𑁨.𑁩𑁦𑁨; 𑀣𑁂𑀭𑀕𑀸. 𑁭𑁬𑁯-𑁭𑁭𑁪) 𑁋

𑀇𑀫𑀸𑀳𑀺 𑀕𑀸𑀣𑀸𑀳𑀺 𑀥𑀫𑁆𑀫𑀁 𑀤𑁂𑀲𑁂𑀢𑁆𑀯𑀸.

𑀆𑀓𑀸𑀲𑀁 ¶ 𑀉𑀧𑁆𑀧𑀢𑀺𑀢𑁆𑀯𑀸𑀢𑀺 𑀆𑀓𑀸𑀲𑀁 𑀧𑀓𑁆𑀔𑀦𑁆𑀤𑀺𑀢𑁆𑀯𑀸. 𑀓𑀲𑁆𑀫𑀸 𑀧𑀦 𑀣𑁂𑀭𑁄 𑀆𑀓𑀸𑀲𑁂𑀦 𑀕𑀢𑁄? 𑀧𑀺𑀢𑀸 𑀓𑀺𑀭𑀲𑁆𑀲 𑀲𑁂𑀝𑁆𑀞𑀺 𑀲𑀢𑁆𑀢𑀲𑀼 𑀤𑁆𑀯𑀸𑀭𑀓𑁄𑀝𑁆𑀞𑀓𑁂𑀲𑀼 𑀅𑀕𑁆𑀕𑀴𑀸𑀦𑀺 𑀤𑀸𑀧𑁂𑀢𑁆𑀯𑀸 𑀫𑀮𑁆𑀮𑁂 𑀆𑀡𑀸𑀧𑁂𑀲𑀺 ‘‘𑀲𑀘𑁂 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀳𑀢𑁆𑀣𑀧𑀸𑀤𑁂𑀲𑀼 𑀦𑀁 𑀕𑀳𑁂𑀢𑁆𑀯𑀸 𑀓𑀸𑀲𑀸𑀬𑀸𑀦𑀺 𑀳𑀭𑀺𑀢𑁆𑀯𑀸 𑀕𑀺𑀳𑀺𑀯𑁂𑀲𑀁 𑀕𑀡𑁆𑀳𑀸𑀧𑁂𑀣𑀸’’𑀢𑀺. 𑀢𑀲𑁆𑀫𑀸 𑀣𑁂𑀭𑁄 ‘‘𑀏𑀢𑁂 𑀫𑀸𑀤𑀺𑀲𑀁 𑀫𑀳𑀸𑀔𑀻𑀡𑀸𑀲𑀯𑀁 𑀳𑀢𑁆𑀣𑁂 𑀯𑀸 𑀧𑀸𑀤𑁂 𑀯𑀸 𑀕𑀳𑁂𑀢𑁆𑀯𑀸 𑀅𑀧𑀼𑀜𑁆𑀜𑀁 𑀧𑀲𑀯𑁂𑀬𑁆𑀬𑀼𑀁, 𑀢𑀁 𑀦𑁂𑀲𑀁 𑀫𑀸 𑀅𑀳𑁄𑀲𑀻’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀆𑀓𑀸𑀲𑁂𑀦 𑀅𑀕𑀫𑀸𑀲𑀺. 𑀫𑀺𑀕𑀘𑀻𑀭𑀦𑁆𑀢𑀺 𑀏𑀯𑀁𑀦𑀸𑀫𑀓𑀁 𑀉𑀬𑁆𑀬𑀸𑀦𑀁. 𑀘𑀢𑀼𑀧𑀸𑀭𑀺𑀚𑀼𑀜𑁆𑀜𑀧𑀝𑀺𑀫𑀡𑁆𑀟𑀺𑀢𑀦𑁆𑀢𑀺 𑀚𑀭𑀸𑀧𑀸𑀭𑀺𑀚𑀼𑀜𑁆𑀜𑀁, 𑀩𑁆𑀬𑀸𑀥𑀺𑀧𑀸𑀭𑀺𑀚𑀼𑀜𑁆𑀜𑀁, 𑀪𑁄𑀕𑀧𑀸𑀭𑀺𑀚𑀼𑀜𑁆𑀜𑀁, 𑀜𑀸𑀢𑀺𑀧𑀸𑀭𑀺𑀚𑀼𑀜𑁆𑀜𑀦𑁆𑀢𑀺 𑀇𑀫𑁂𑀳𑀺 𑀘𑀢𑀽𑀳𑀺 𑀧𑀸𑀭𑀺𑀚𑀼𑀜𑁆𑀜𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑀁. 𑀧𑀸𑀭𑀺𑀚𑀼𑀜𑁆𑀜𑀦𑁆𑀢𑀺 𑀘 𑀧𑀭𑀺𑀳𑀸𑀦𑀻𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀓𑀼𑀡𑁆𑀟𑀥𑀸𑀦𑀢𑁆𑀣𑁂𑀭𑀯𑀢𑁆𑀣𑀼

𑁨𑁧𑁧. 𑀢𑀢𑀺𑀬𑁂 𑀲𑀮𑀸𑀓𑀁 𑀕𑀡𑁆𑀳𑀦𑁆𑀢𑀻𑀢𑀺 𑀲𑀮𑀸𑀓𑀕𑀸𑀳𑀓𑀸. 𑀲𑀼𑀦𑀸𑀧𑀭𑀦𑁆𑀢𑀚𑀦𑀧𑀤𑀁 𑀕𑀘𑁆𑀙𑀦𑁆𑀢𑁂𑀧𑀺 𑀧𑀞𑀫𑀫𑁂𑀯 𑀲𑀮𑀸𑀓𑀁 𑀕𑀡𑁆𑀳𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀙𑀩𑁆𑀩𑀲𑁆𑀲𑀦𑁆𑀢𑀭𑁂𑀢𑀺 𑀙𑀦𑁆𑀦𑀁 ¶ 𑀯𑀲𑁆𑀲𑀸𑀦𑀁 𑀅𑀩𑁆𑀪𑀦𑁆𑀢𑀭𑁂. 𑀫𑁂𑀢𑁆𑀢𑀻𑀢𑀺 𑀫𑀺𑀢𑁆𑀢𑀪𑀸𑀯𑁄. 𑀪𑁂𑀤𑀓𑁂 𑀲𑀢𑀻𑀢𑀺 𑀪𑁂𑀤𑀓𑀭𑀡𑁂 𑀲𑀢𑀺. 𑀕𑀼𑀫𑁆𑀩𑀲𑀪𑀸𑀕𑀢𑁄𑀢𑀺 𑀕𑀼𑀫𑁆𑀩𑀲𑀫𑀻𑀧𑀢𑁄, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀇𑀢𑁆𑀣𑀻 𑀳𑀼𑀢𑁆𑀯𑀸𑀢𑀺 𑀇𑀢𑁆𑀣𑀻 𑀯𑀺𑀬 𑀳𑀼𑀢𑁆𑀯𑀸, 𑀫𑀦𑀼𑀲𑁆𑀲𑀺𑀢𑁆𑀣𑀺𑀯𑀡𑁆𑀡𑀁 𑀫𑀸𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀤𑀻𑀖𑀭𑀢𑁆𑀢𑀸𑀦𑀼𑀕𑀢𑁄𑀢𑀺 𑀤𑀻𑀖𑀓𑀸𑀮𑀁 𑀅𑀦𑀼𑀩𑀦𑁆𑀥𑁄. 𑀏𑀢𑁆𑀢𑀓𑀁 𑀅𑀤𑁆𑀥𑀸𑀦𑀦𑁆𑀢𑀺 𑀏𑀢𑁆𑀢𑀓𑀁 𑀓𑀸𑀮𑀁. 𑀳𑀦𑁆𑀤𑀸𑀯𑀼𑀲𑁄𑀢𑀺 𑀕𑀡𑁆𑀳𑀸𑀯𑀼𑀲𑁄. 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸𑀢𑀺 𑀪𑀽𑀢𑀢𑁆𑀣𑀁 𑀕𑀳𑁂𑀢𑁆𑀯𑀸, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀓𑁄𑀡𑁆𑀟𑁄 𑀚𑀸𑀢𑁄𑀢𑀺 𑀥𑀼𑀢𑁆𑀢𑁄 𑀚𑀸𑀢𑁄.

𑀫𑀸𑀯𑁄𑀘 𑀨𑀭𑀼𑀲𑀁 𑀓𑀜𑁆𑀘𑀻𑀢𑀺 𑀓𑀜𑁆𑀘𑀺 𑀏𑀓𑀧𑀼𑀕𑁆𑀕𑀮𑀁 𑀨𑀭𑀼𑀲𑀁 𑀫𑀸 𑀅𑀯𑁄𑀘. 𑀯𑀼𑀢𑁆𑀢𑀸 𑀧𑀝𑀺𑀯𑀤𑁂𑀬𑁆𑀬𑀼 𑀢𑀦𑁆𑀢𑀺 𑀢𑀬𑀸 𑀧𑀭𑁂 𑀤𑀼𑀲𑁆𑀲𑀻𑀮𑀸𑀢𑀺 𑀯𑀼𑀢𑁆𑀢𑀸 𑀢𑀫𑁆𑀧𑀺 𑀢𑀣𑁂𑀯 𑀧𑀝𑀺𑀯𑀤𑁂𑀬𑁆𑀬𑀼𑀁. 𑀤𑀼𑀓𑁆𑀔𑀸 𑀳𑀺 𑀲𑀸𑀭𑀫𑁆𑀪𑀓𑀣𑀸𑀢𑀺 𑀏𑀲𑀸 𑀓𑀸𑀭𑀡𑀼𑀢𑁆𑀢𑀭𑀸 𑀬𑀼𑀕𑀕𑁆𑀕𑀸𑀳𑀓𑀣𑀸 𑀦𑀸𑀫 𑀤𑀼𑀓𑁆𑀔𑀸. 𑀧𑀝𑀺𑀤𑀡𑁆𑀟𑀸 𑀨𑀼𑀲𑁂𑀬𑁆𑀬𑀼 𑀢𑀦𑁆𑀢𑀺 𑀓𑀸𑀬𑀤𑀡𑁆𑀟𑀸𑀤𑀻𑀳𑀺 𑀧𑀭𑀁 𑀧𑀳𑀭𑀦𑁆𑀢𑀲𑁆𑀲 𑀢𑀸𑀤𑀺𑀲𑀸𑀯 𑀧𑀝𑀺𑀤𑀡𑁆𑀟𑀸 𑀢𑀯 𑀫𑀢𑁆𑀣𑀓𑁂 𑀧𑀢𑁂𑀬𑁆𑀬𑀼𑀁.

𑀲𑀘𑁂 𑀦𑁂𑀭𑁂𑀲𑀺 𑀅𑀢𑁆𑀢𑀸𑀦𑀦𑁆𑀢𑀺 𑀲𑀘𑁂 𑀅𑀢𑁆𑀢𑀸𑀦𑀁 𑀦𑀺𑀘𑁆𑀘𑀮𑀁 𑀓𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺. 𑀓𑀁𑀲𑁄 𑀉𑀧𑀳𑀢𑁄 𑀬𑀣𑀸𑀢𑀺 𑀫𑀼𑀔𑀯𑀝𑁆𑀝𑀺𑀬𑀁 𑀙𑀺𑀦𑁆𑀤𑀺𑀢𑁆𑀯𑀸 𑀢𑀮𑀫𑀢𑁆𑀢𑀁 𑀓𑀢𑁆𑀯𑀸 𑀞𑀧𑀺𑀢𑀁 𑀓𑀁𑀲𑀢𑀸𑀮𑀁 𑀯𑀺𑀬. 𑀢𑀸𑀤𑀺𑀲𑀜𑁆𑀳𑀺 𑀳𑀢𑁆𑀣𑁂𑀳𑀺 𑀧𑀸𑀤𑁂𑀳𑀺 𑀤𑀡𑁆𑀟𑁂𑀦 𑀯𑀸 𑀧𑀳𑀢𑀫𑁆𑀧𑀺 𑀲𑀤𑁆𑀤𑀁 𑀦 𑀓𑀭𑁄𑀢𑀺. 𑀏𑀲 𑀧𑀢𑁆𑀢𑁄𑀲𑀺 𑀦𑀺𑀩𑁆𑀩𑀸𑀦𑀦𑁆𑀢𑀺 𑀲𑀘𑁂 𑀏𑀯𑀭𑀽𑀧𑁄 𑀪𑀯𑀺𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀺, 𑀇𑀫𑀁 𑀧𑀝𑀺𑀧𑀤𑀁 𑀧𑀽𑀭𑀬𑀫𑀸𑀦𑁄 𑀏𑀲𑁄 𑀢𑁆𑀯𑀁 𑀇𑀤𑀸𑀦𑀺 𑀅𑀧𑁆𑀧𑀢𑁆𑀢𑁄𑀧𑀺 𑀦𑀺𑀩𑁆𑀩𑀸𑀦𑀁 𑀧𑀢𑁆𑀢𑁄𑀲𑀺 𑀦𑀸𑀫. 𑀲𑀸𑀭𑀫𑁆𑀪𑁄 𑀢𑁂 𑀦 𑀯𑀺𑀚𑁆𑀚𑀢𑀻𑀢𑀺 ‘‘𑀏𑀯𑀜𑁆𑀘 𑀲𑀢𑀺 𑀢𑁆𑀯𑀁 𑀤𑀼𑀲𑁆𑀲𑀻𑀮𑁄, 𑀅𑀳𑀁 𑀲𑀼𑀲𑀻𑀮𑁄’’𑀢𑀺 𑀏𑀯𑀫𑀸𑀤𑀺𑀓𑁄 𑀉𑀢𑁆𑀢𑀭𑀺𑀓𑀭𑀡𑀯𑀸𑀘𑀸𑀮𑀓𑁆𑀔𑀡𑁄 𑀲𑀸𑀭𑀫𑁆𑀪𑁄 𑀢𑁂 𑀦 𑀯𑀺𑀚𑁆𑀚𑀢𑀺, 𑀦 𑀪𑀯𑀺𑀲𑁆𑀲𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄. 𑀧𑀭𑀺𑀓𑁆𑀓𑀺𑀮𑁂𑀲𑁂𑀦𑀸𑀢𑀺 𑀲𑀁𑀓𑀺𑀮𑁂𑀲𑀳𑁂𑀢𑀼𑀦𑀸.

𑀯𑀗𑁆𑀕𑀻𑀲𑀢𑁆𑀣𑁂𑀭𑀯𑀢𑁆𑀣𑀼

𑁨𑁧𑁨. 𑀘𑀢𑀼𑀢𑁆𑀣𑁂 ¶ 𑀲𑀫𑁆𑀧𑀦𑁆𑀦𑀧𑀝𑀺𑀪𑀸𑀦𑀸𑀦𑀦𑁆𑀢𑀺 𑀧𑀭𑀺𑀧𑀼𑀡𑁆𑀡𑀧𑀝𑀺𑀪𑀸𑀦𑀸𑀦𑀁. 𑀘𑀼𑀢𑀺𑀁 𑀬𑁄 𑀯𑁂𑀤𑀺…𑀧𑁂… 𑀲𑀩𑁆𑀩𑀲𑁄𑀢𑀺 𑀬𑁄 𑀲𑀢𑁆𑀢𑀸𑀦𑀁 𑀘𑀼𑀢𑀺𑀜𑁆𑀘 𑀧𑀝𑀺𑀲𑀦𑁆𑀥𑀺𑀜𑁆𑀘 𑀲𑀩𑁆𑀩𑀸𑀓𑀸𑀭𑁂𑀦 𑀧𑀸𑀓𑀝𑀁 𑀓𑀢𑁆𑀯𑀸 𑀚𑀸𑀦𑀸𑀢𑀺, 𑀢𑀁 𑀅𑀳𑀁 𑀅𑀮𑀕𑁆𑀕𑀦𑀢𑀸𑀬 𑀅𑀲𑀢𑁆𑀢𑀁, 𑀧𑀝𑀺𑀧𑀢𑁆𑀢𑀺𑀬𑀸 𑀲𑀼𑀝𑁆𑀞𑀼 𑀕𑀢𑀢𑁆𑀢𑀸 𑀲𑀼𑀕𑀢𑀁, 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀲𑀫𑁆𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀬𑀲𑁆𑀲 𑀕𑀢𑀺𑀦𑁆𑀢𑀺 𑀬𑀲𑁆𑀲𑁂𑀢𑁂 𑀤𑁂𑀯𑀸𑀤𑀬𑁄 𑀕𑀢𑀺𑀁 𑀦 𑀚𑀸𑀦𑀦𑁆𑀢𑀺, 𑀢𑀫𑀳𑀁 𑀆𑀲𑀯𑀸𑀦𑀁 𑀔𑀻𑀡𑀢𑀸𑀬 𑀔𑀻𑀡𑀸𑀲𑀯𑀁, 𑀓𑀺𑀮𑁂𑀲𑁂𑀳𑀺 𑀆𑀭𑀓𑀢𑁆𑀢𑀸 𑀅𑀭𑀳𑀦𑁆𑀢𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀉𑀧𑀲𑁂𑀦𑀯𑀗𑁆𑀕𑀦𑁆𑀢𑀧𑀼𑀢𑁆𑀢𑀢𑁆𑀣𑁂𑀭𑀯𑀢𑁆𑀣𑀼

𑁨𑁧𑁩. 𑀧𑀜𑁆𑀘𑀫𑁂 ¶ 𑀲𑀩𑁆𑀩𑀧𑀸𑀲𑀸𑀤𑀺𑀓𑀸𑀦𑀦𑁆𑀢𑀺 𑀲𑀩𑁆𑀩𑀲𑁄 𑀧𑀲𑀸𑀤𑀁 𑀚𑀦𑁂𑀦𑁆𑀢𑀸𑀦𑀁. 𑀓𑀺𑀦𑁆𑀢𑀸𑀬𑀦𑁆𑀢𑀺 𑀓𑀺𑀁 𑀢𑁂 𑀅𑀬𑀁. 𑀅𑀢𑀺𑀮𑀳𑀼𑀦𑁆𑀢𑀺 𑀅𑀢𑀺𑀲𑀻𑀖𑀁. 𑀬𑀲𑁆𑀲 𑀢𑀲𑁆𑀫𑀺𑀁 𑀅𑀢𑁆𑀢𑀪𑀸𑀯𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀸𑀦𑀁 𑀫𑀕𑁆𑀕𑀨𑀮𑀸𑀦𑀁 𑀉𑀧𑀦𑀺𑀲𑁆𑀲𑀬𑁄 𑀦𑀢𑁆𑀣𑀺, 𑀢𑀁 𑀩𑀼𑀤𑁆𑀥𑀸 ‘‘𑀫𑁄𑀖𑀧𑀼𑀭𑀺𑀲𑁄’’𑀢𑀺 𑀯𑀤𑀦𑁆𑀢𑀺 𑀅𑀭𑀺𑀝𑁆𑀞𑀮𑀸𑀴𑀼𑀤𑀸𑀬𑀺𑀆𑀤𑀺𑀓𑁂 𑀯𑀺𑀬. 𑀉𑀧𑀦𑀺𑀲𑁆𑀲𑀬𑁂 𑀲𑀢𑀺𑀧𑀺 𑀢𑀲𑁆𑀫𑀺𑀁 𑀔𑀡𑁂 𑀫𑀕𑁆𑀕𑁂 𑀯𑀸 𑀨𑀮𑁂 𑀯𑀸 𑀅𑀲𑀢𑀺 ‘‘𑀫𑁄𑀖𑀧𑀼𑀭𑀺𑀲𑀸’’𑀢𑀺 𑀯𑀤𑀦𑁆𑀢𑀺𑀬𑁂𑀯 𑀥𑀦𑀺𑀬𑀢𑁆𑀣𑁂𑀭𑀸𑀤𑀺𑀓𑁂 𑀯𑀺𑀬. 𑀇𑀫𑀲𑁆𑀲𑀧𑀺 𑀢𑀲𑁆𑀫𑀺𑀁 𑀔𑀡𑁂 𑀫𑀕𑁆𑀕𑀨𑀮𑀸𑀦𑀁 𑀅𑀪𑀸𑀯𑀢𑁄 ‘‘𑀫𑁄𑀖𑀧𑀼𑀭𑀺𑀲𑀸’’𑀢𑀺 𑀆𑀳, 𑀢𑀼𑀘𑁆𑀙𑀫𑀦𑀼𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀩𑀸𑀳𑀼𑀮𑁆𑀮𑀸𑀬𑀸𑀢𑀺 𑀧𑀭𑀺𑀲𑀩𑀸𑀳𑀼𑀮𑁆𑀮𑀸𑀬. 𑀅𑀦𑁂𑀓𑀧𑀭𑀺𑀬𑀸𑀬𑁂𑀦𑀸𑀢𑀺 𑀅𑀦𑁂𑀓𑀓𑀸𑀭𑀡𑁂𑀦.

𑀇𑀘𑁆𑀙𑀸𑀫𑀳𑀁, 𑀪𑀺𑀓𑁆𑀔𑀯𑁂𑀢𑀺 𑀪𑀕𑀯𑀸 𑀓𑀺𑀭 𑀢𑀁 𑀅𑀤𑁆𑀥𑀫𑀸𑀲𑀁 𑀦 𑀓𑀜𑁆𑀘𑀺 𑀩𑁄𑀥𑀦𑁂𑀬𑁆𑀬𑀲𑀢𑁆𑀢𑀁 𑀅𑀤𑁆𑀤𑀲, 𑀢𑀲𑁆𑀫𑀸 𑀏𑀯𑀫𑀸𑀳, 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀦𑁆𑀢𑀺𑀯𑀲𑁂𑀦 𑀥𑀫𑁆𑀫𑀤𑁂𑀲𑀦𑀸 𑀓𑀢𑁆𑀢𑀩𑁆𑀩𑀸 𑀲𑀺𑀬𑀸. 𑀬𑀲𑁆𑀫𑀸 𑀧𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀫𑀬𑀺 𑀑𑀓𑀸𑀲𑀁 𑀓𑀸𑀭𑁂𑀢𑁆𑀯𑀸 𑀧𑀝𑀺𑀲𑀮𑁆𑀮𑀻𑀦𑁂 𑀪𑀺𑀓𑁆𑀔𑀽 𑀅𑀥𑀫𑁆𑀫𑀺𑀓𑀁 𑀓𑀢𑀺𑀓𑀯𑀢𑁆𑀢𑀁 𑀓𑀭𑀺𑀲𑁆𑀲𑀦𑁆𑀢𑀺, 𑀢𑀁 𑀉𑀧𑀲𑁂𑀦𑁄 𑀪𑀺𑀦𑁆𑀤𑀺𑀲𑁆𑀲𑀢𑀺, 𑀅𑀳𑀁 𑀢𑀲𑁆𑀲 𑀧𑀲𑀻𑀤𑀺𑀢𑁆𑀯𑀸 𑀪𑀺𑀓𑁆𑀔𑀽𑀦𑀁 𑀤𑀲𑁆𑀲𑀦𑀁 𑀅𑀦𑀼𑀚𑀸𑀦𑀺𑀲𑁆𑀲𑀸𑀫𑀺. 𑀢𑀢𑁄 𑀫𑀁 𑀧𑀲𑁆𑀲𑀺𑀢𑀼𑀓𑀸𑀫𑀸 𑀩𑀳𑀽 𑀪𑀺𑀓𑁆𑀔𑀽 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀺𑀲𑁆𑀲𑀦𑁆𑀢𑀺, 𑀅𑀳𑀜𑁆𑀘 𑀢𑁂𑀳𑀺 𑀉𑀚𑁆𑀛𑀺𑀢𑀲𑀦𑁆𑀣𑀢𑀧𑀘𑁆𑀘𑀬𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’’𑀢𑀺, 𑀢𑀲𑁆𑀫𑀸 𑀏𑀯𑀫𑀸𑀳. 𑀣𑁂𑀭𑀲𑁆𑀲𑀸𑀢𑀺 𑀉𑀧𑀲𑁂𑀦𑀢𑁆𑀣𑁂𑀭𑀲𑁆𑀲. 𑀫𑀦𑀸𑀧𑀸𑀦𑀺 𑀢𑁂 𑀪𑀺𑀓𑁆𑀔𑀼 𑀧𑀁𑀲𑀼𑀓𑀽𑀮𑀸𑀦𑀻𑀢𑀺 ‘‘𑀪𑀺𑀓𑁆𑀔𑀼 𑀢𑀯 𑀇𑀫𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀺 𑀫𑀦𑀸𑀧𑀸𑀦𑀺 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀔𑀦𑁆𑀢𑀺𑀬𑀸 𑀕𑀳𑀺𑀢𑀸𑀦𑀻’’𑀢𑀺 𑀧𑀼𑀘𑁆𑀙𑀢𑀺. 𑀦 𑀔𑁄 𑀫𑁂, 𑀪𑀦𑁆𑀢𑁂, 𑀫𑀦𑀸𑀧𑀸𑀦𑀺 𑀧𑀁𑀲𑀼𑀓𑀽𑀮𑀸𑀦𑀻𑀢𑀺, 𑀪𑀦𑁆𑀢𑁂, 𑀦 𑀫𑀬𑀸 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀔𑀦𑁆𑀢𑀺𑀬𑀸 𑀕𑀳𑀺𑀢𑀸𑀦𑀺, 𑀕𑀮𑀕𑁆𑀕𑀸𑀳𑁂𑀦 𑀯𑀺𑀬 𑀫𑀢𑁆𑀣𑀓𑀢𑀸𑀴𑀦𑁂𑀦 𑀯𑀺𑀬 𑀘 𑀕𑀸𑀳𑀺𑀢𑁄 𑀫𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀧𑀸𑀴𑀺𑀬𑀁 𑀆𑀕𑀢𑀫𑁂𑀯𑀸𑀢𑀺 𑀯𑀺𑀦𑀬𑀧𑀸𑀴𑀺𑀁 𑀲𑀦𑁆𑀥𑀸𑀬 𑀯𑀤𑀢𑀺.

𑀤𑀩𑁆𑀩𑀢𑁆𑀣𑁂𑀭𑀯𑀢𑁆𑀣𑀼

𑁨𑁧𑁪. 𑀙𑀝𑁆𑀞𑁂 ¶ 𑀅𑀝𑁆𑀞𑀸𑀭𑀲𑀲𑀼 𑀫𑀳𑀸𑀯𑀺𑀳𑀸𑀭𑁂𑀲𑀽𑀢𑀺 𑀭𑀸𑀚𑀕𑀳𑀲𑁆𑀲 𑀲𑀫𑀦𑁆𑀢𑀢𑁄 𑀞𑀺𑀢𑁂𑀲𑀼 𑀅𑀝𑁆𑀞𑀸𑀭𑀲𑀲𑀼 𑀫𑀳𑀸𑀯𑀺𑀳𑀸𑀭𑁂𑀲𑀼. 𑀉𑀧𑀯𑀺𑀚𑀜𑁆𑀜𑀸𑀢𑀺 𑀆𑀲𑀦𑁆𑀦𑀧𑀲𑀽𑀢𑀺𑀓𑀸𑀮𑀸. 𑀭𑀳𑁄𑀕𑀢𑁄𑀢𑀺 𑀭𑀳𑀲𑀺 𑀕𑀢𑁄. 𑀲𑀗𑁆𑀖𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀡𑁂 𑀓𑀸𑀬𑀁 𑀬𑁄𑀚𑁂𑀢𑀼𑀓𑀸𑀫𑁄 𑀘𑀺𑀦𑁆𑀢𑁂𑀲𑀻𑀢𑀺 𑀣𑁂𑀭𑁄 𑀓𑀺𑀭 𑀅𑀢𑁆𑀢𑀦𑁄 𑀓𑀢𑀓𑀺𑀘𑁆𑀘𑀪𑀸𑀯𑀁 𑀤𑀺𑀲𑁆𑀯𑀸 ‘‘𑀅𑀳𑀁 𑀇𑀫𑀁 𑀲𑀭𑀻𑀭𑀁 𑀥𑀸𑀭𑁂𑀫𑀺, 𑀢𑀜𑁆𑀘 𑀔𑁄 𑀯𑀸𑀢𑀫𑀼𑀔𑁂 𑀞𑀺𑀢𑀧𑀤𑀻𑀧𑁄 𑀯𑀺𑀬 𑀅𑀦𑀺𑀘𑁆𑀘𑀢𑀸𑀫𑀼𑀔𑁂 𑀞𑀺𑀢𑀁 𑀦𑀘𑀺𑀭𑀲𑁆𑀲𑁂𑀯 𑀦𑀺𑀩𑁆𑀩𑀸𑀬𑀦𑀥𑀫𑁆𑀫𑀁 𑀬𑀸𑀯 ¶ 𑀦 𑀦𑀺𑀩𑁆𑀩𑀸𑀬𑀢𑀺, 𑀢𑀸𑀯 𑀓𑀺𑀁 𑀦𑀼 𑀔𑁄 𑀅𑀳𑀁 𑀲𑀗𑁆𑀖𑀲𑁆𑀲 𑀯𑁂𑀬𑁆𑀬𑀸𑀯𑀘𑁆𑀘𑀁 𑀓𑀭𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 ‘‘𑀢𑀺𑀭𑁄𑀭𑀝𑁆𑀞𑁂𑀲𑀼 𑀩𑀳𑀽 𑀓𑀼𑀮𑀧𑀼𑀢𑁆𑀢𑀸 𑀪𑀕𑀯𑀦𑁆𑀢𑀁 𑀅𑀤𑀺𑀲𑁆𑀯𑀸𑀯 𑀧𑀩𑁆𑀩𑀚𑀦𑁆𑀢𑀺, 𑀢𑁂 ‘𑀪𑀕𑀯𑀦𑁆𑀢𑀁 𑀧𑀲𑁆𑀲𑀺𑀲𑁆𑀲𑀸𑀫 𑀘𑁂𑀯 𑀯𑀦𑁆𑀤𑀺𑀲𑁆𑀲𑀸𑀫𑀸’𑀢𑀺 𑀘 𑀤𑀽𑀭𑀢𑁄𑀧𑀺 𑀆𑀕𑀘𑁆𑀙𑀦𑁆𑀢𑀺, 𑀢𑀢𑁆𑀭 𑀬𑁂𑀲𑀁 𑀲𑁂𑀦𑀸𑀲𑀦𑀁 𑀦𑀧𑁆𑀧𑀳𑁄𑀢𑀺, 𑀢𑁂 𑀲𑀺𑀮𑀸𑀧𑀢𑁆𑀢𑀓𑁂𑀧𑀺 𑀲𑁂𑀬𑁆𑀬𑀁 𑀓𑀧𑁆𑀧𑁂𑀦𑁆𑀢𑀺. 𑀧𑀳𑁄𑀫𑀺 𑀔𑁄 𑀧𑀦𑀸𑀳𑀁 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀢𑁂𑀲𑀁 𑀢𑁂𑀲𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀇𑀘𑁆𑀙𑀸𑀯𑀲𑁂𑀦 𑀧𑀸𑀲𑀸𑀤𑀯𑀺𑀳𑀸𑀭𑀅𑀟𑁆𑀠𑀬𑁄𑀕𑀸𑀤𑀻𑀦𑀺 𑀫𑀜𑁆𑀘𑀧𑀻𑀞𑀢𑁆𑀣𑀭𑀡𑀸𑀦𑀺 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀤𑀸𑀢𑀼𑀁? 𑀧𑀼𑀦𑀤𑀺𑀯𑀲𑁂 𑀘𑁂𑀢𑁆𑀣 𑀏𑀓𑀘𑁆𑀘𑁂 𑀅𑀢𑀺𑀯𑀺𑀬 𑀓𑀺𑀮𑀦𑁆𑀢𑀭𑀽𑀧𑀸 𑀳𑁄𑀦𑁆𑀢𑀺, 𑀢𑁂 𑀕𑀸𑀭𑀯𑁂𑀦 𑀪𑀺𑀓𑁆𑀔𑀽𑀦𑀁 𑀧𑀼𑀭𑀢𑁄 𑀞𑀢𑁆𑀯𑀸 𑀪𑀢𑁆𑀢𑀸𑀦𑀺𑀧𑀺 𑀦 𑀉𑀤𑁆𑀤𑀺𑀲𑀸𑀧𑁂𑀦𑁆𑀢𑀺, 𑀅𑀳𑀁 𑀔𑁄 𑀧𑀦 𑀢𑁂𑀲𑀁 𑀪𑀢𑁆𑀢𑀸𑀦𑀺𑀧𑀺 𑀉𑀤𑁆𑀤𑀺𑀲𑀺𑀢𑀼𑀁 𑀧𑀳𑁄𑀫𑀻’’𑀢𑀺. 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀦𑁆𑀢𑁄 ‘‘𑀬𑀁𑀦𑀽𑀦𑀸𑀳𑀁 𑀲𑀗𑁆𑀖𑀲𑁆𑀲 𑀲𑁂𑀦𑀸𑀲𑀦𑀜𑁆𑀘 𑀧𑀜𑁆𑀜𑀧𑁂𑀬𑁆𑀬𑀁, 𑀪𑀢𑁆𑀢𑀸𑀦𑀺 𑀘 𑀉𑀤𑁆𑀤𑀺𑀲𑁂𑀬𑁆𑀬’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀪𑀸𑀕𑀲𑀪𑀸𑀕𑀸𑀦𑀦𑁆𑀢𑀺 𑀲𑀼𑀢𑁆𑀢𑀦𑁆𑀢𑀺𑀓𑀸𑀤𑀺𑀕𑀼𑀡𑀯𑀲𑁂𑀦 𑀲𑀪𑀸𑀕𑀸𑀦𑀁, 𑀦 𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦. 𑀣𑁂𑀭𑁄 𑀳𑀺 𑀬𑀸𑀯𑀢𑀺𑀓𑀸 𑀲𑀼𑀢𑁆𑀢𑀦𑁆𑀢𑀺𑀓𑀸 𑀳𑁄𑀦𑁆𑀢𑀺, 𑀢𑁂 𑀉𑀘𑁆𑀘𑀺𑀦𑀺𑀢𑁆𑀯𑀸 𑀉𑀘𑁆𑀘𑀺𑀦𑀺𑀢𑁆𑀯𑀸 𑀏𑀓𑀢𑁄 𑀢𑁂𑀲𑀁 𑀅𑀦𑀼𑀭𑀽𑀧𑀫𑁂𑀯 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀺. 𑀯𑁂𑀦𑀬𑀺𑀓𑀸𑀪𑀺𑀥𑀫𑁆𑀫𑀺𑀓𑀓𑀫𑁆𑀫𑀝𑁆𑀞𑀸𑀦𑀺𑀓𑀓𑀸𑀬𑀤𑀴𑁆𑀳𑀺𑀩𑀳𑀼𑀮𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀢𑁂𑀦𑁂𑀯 𑀧𑀸𑀴𑀺𑀬𑀁 (𑀧𑀸𑀭𑀸. 𑁩𑁮𑁦) 𑀯𑀼𑀢𑁆𑀢𑀁 𑁋 ‘‘𑀬𑁂𑀢𑁂 𑀪𑀺𑀓𑁆𑀔𑀽 𑀲𑀼𑀢𑁆𑀢𑀦𑁆𑀢𑀺𑀓𑀸, 𑀢𑁂𑀲𑀁 𑀏𑀓𑀚𑁆𑀛𑀁 𑀲𑁂𑀦𑀸𑀲𑀦𑀁 𑀧𑀜𑁆𑀜𑀧𑁂𑀢𑀻’’𑀢𑀺𑀆𑀤𑀺.

𑀅𑀗𑁆𑀕𑀼𑀮𑀺𑀬𑀸 𑀚𑀮𑀫𑀸𑀦𑀸𑀬𑀸𑀢𑀺 𑀢𑁂𑀚𑁄𑀓𑀲𑀺𑀡𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀅𑀪𑀺𑀜𑁆𑀜𑀸𑀜𑀸𑀡𑁂𑀦 𑀅𑀗𑁆𑀕𑀼𑀮𑀺𑀚𑀮𑀦𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀢𑁂𑀦𑁂𑀯 𑀢𑁂𑀚𑁄𑀥𑀸𑀢𑀼𑀲𑀫𑀸𑀧𑀢𑁆𑀢𑀺𑀚𑀦𑀺𑀢𑁂𑀦 𑀅𑀕𑁆𑀕𑀺𑀚𑀸𑀮𑁂𑀦 𑀅𑀗𑁆𑀕𑀼𑀮𑀺𑀬𑀸 𑀚𑀮𑀫𑀸𑀦𑀸𑀬. 𑀅𑀬𑀁 𑀫𑀜𑁆𑀘𑁄𑀢𑀺𑀆𑀤𑀻𑀲𑀼 𑀧𑀦 𑀣𑁂𑀭𑁂 ‘‘𑀅𑀬𑀁 𑀫𑀜𑁆𑀘𑁄’’𑀢𑀺𑀆𑀤𑀺𑀁 𑀯𑀤𑀦𑁆𑀢𑁂 𑀦𑀺𑀫𑁆𑀫𑀺𑀢𑀸𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀕𑀢𑀝𑁆𑀞𑀸𑀦𑁂 ‘‘𑀅𑀬𑀁 𑀫𑀜𑁆𑀘𑁄’’𑀢𑀺𑀆𑀤𑀺𑀁 𑀯𑀤𑀦𑁆𑀢𑀺. 𑀅𑀬𑀜𑁆𑀳𑀺 𑀦𑀺𑀫𑁆𑀫𑀺𑀢𑀸𑀦𑀁 𑀥𑀫𑁆𑀫𑀢𑀸.

‘‘𑀏𑀓𑀲𑁆𑀫𑀺𑀁 𑀪𑀸𑀲𑀫𑀸𑀦𑀲𑁆𑀫𑀺𑀁, 𑀲𑀩𑁆𑀩𑁂 𑀪𑀸𑀲𑀦𑁆𑀢𑀺 𑀦𑀺𑀫𑁆𑀫𑀺𑀢𑀸;

𑀏𑀓𑀲𑁆𑀫𑀺𑀁 𑀢𑀼𑀡𑁆𑀳𑀺𑀫𑀸𑀲𑀺𑀦𑁂, 𑀲𑀩𑁆𑀩𑁂 𑀢𑀼𑀡𑁆𑀳𑀻 𑀪𑀯𑀦𑁆𑀢𑀺 𑀢𑁂’’𑀢𑀺. (𑀤𑀻. 𑀦𑀺. 𑁨.𑁨𑁮𑁬);

𑀬𑀲𑁆𑀫𑀺𑀁 𑀧𑀦 𑀯𑀺𑀳𑀸𑀭𑁂 𑀫𑀜𑁆𑀘𑀧𑀻𑀞𑀸𑀤𑀻𑀦𑀺 𑀦 𑀧𑀭𑀺𑀧𑀽𑀭𑁂𑀦𑁆𑀢𑀺, 𑀢𑀢𑁆𑀣 𑀅𑀢𑁆𑀢𑀦𑁄 𑀆𑀦𑀼𑀪𑀸𑀯𑁂𑀦 𑀧𑀽𑀭𑁂𑀦𑁆𑀢𑀺, 𑀢𑁂𑀦 𑀦𑀺𑀫𑁆𑀫𑀺𑀢𑀸𑀦𑀁 𑀅𑀯𑀢𑁆𑀣𑀼𑀓𑀁 𑀯𑀘𑀦𑀁 𑀦 𑀳𑁄𑀢𑀺 𑀲𑀩𑁆𑀩𑀢𑁆𑀣 𑀫𑀜𑁆𑀘𑀧𑀻𑀞𑀸𑀤𑀻𑀦𑀁 𑀲𑀩𑁆𑀪𑀸𑀯𑀢𑁄. 𑀲𑀩𑁆𑀩𑀯𑀺𑀳𑀸𑀭𑁂𑀲𑀼 𑀘 ¶ 𑀕𑀫𑀦𑀫𑀕𑁆𑀕𑁂 𑀲𑀫𑀧𑁆𑀧𑀫𑀸𑀡𑁂 𑀓𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀺. 𑀓𑀢𑀺𑀓𑀲𑀡𑁆𑀞𑀸𑀦𑀸𑀤𑀻𑀦𑀁 𑀧𑀦 𑀦𑀸𑀦𑀧𑁆𑀧𑀓𑀸𑀭𑀢𑁆𑀢𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀺𑀳𑀸𑀭𑁂 𑀓𑀢𑀺𑀓𑀯𑀢𑁆𑀢𑀸𑀦𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀣𑀸𑀧𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀦𑀺𑀬𑀫𑁂𑀢𑁆𑀯𑀸 ¶ 𑀦𑀺𑀫𑁆𑀫𑀺𑀢𑀸𑀦𑀜𑁆𑀳𑀺 ‘‘𑀏𑀓𑀲𑁆𑀫𑀺𑀁 𑀪𑀸𑀲𑀫𑀸𑀦𑀲𑁆𑀫𑀺’’𑀦𑁆𑀢𑀺𑀆𑀤𑀺𑀥𑀫𑁆𑀫𑀢𑀸 𑀯𑀼𑀢𑁆𑀢𑀸. 𑀢𑀣𑀸 𑀳𑀺 𑀬𑁂 𑀯𑀡𑁆𑀡𑀯𑀬𑀲𑀭𑀻𑀭𑀸𑀯𑀬𑀯𑀧𑀭𑀺𑀓𑁆𑀔𑀸𑀭𑀓𑀺𑀭𑀺𑀬𑀸𑀯𑀺𑀲𑁂𑀲𑀸𑀤𑀻𑀳𑀺 𑀦𑀺𑀬𑀫𑀁 𑀅𑀓𑀢𑁆𑀯𑀸 𑀦𑀺𑀫𑁆𑀫𑀺𑀢𑀸 𑀳𑁄𑀦𑁆𑀢𑀺, 𑀢𑁂 𑀅𑀦𑀺𑀬𑀫𑁂𑀢𑁆𑀯𑀸 𑀦𑀺𑀫𑁆𑀫𑀺𑀢𑀢𑁆𑀢𑀸 𑀇𑀤𑁆𑀥𑀺𑀫𑀢𑀸 𑀲𑀤𑀺𑀲𑀸𑀯 𑀳𑁄𑀦𑁆𑀢𑀺. 𑀞𑀸𑀦𑀦𑀺𑀲𑀚𑁆𑀚𑀸𑀤𑀻𑀲𑀼 𑀪𑀸𑀲𑀺𑀢𑀢𑀼𑀡𑁆𑀳𑀻𑀪𑀸𑀯𑀸𑀤𑀻𑀲𑀼 𑀯𑀸 𑀬𑀁 𑀬𑀁 𑀇𑀤𑁆𑀥𑀺𑀫𑀸 𑀓𑀭𑁄𑀢𑀺, 𑀢𑀁 𑀢𑀤𑁂𑀯 𑀓𑀭𑁄𑀦𑁆𑀢𑀺. 𑀲𑀘𑁂 𑀧𑀦 𑀦𑀸𑀦𑀧𑁆𑀧𑀓𑀸𑀭𑁂 𑀓𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀓𑁂𑀘𑀺 𑀧𑀞𑀫𑀯𑀬𑁂, 𑀓𑁂𑀘𑀺 𑀫𑀚𑁆𑀛𑀺𑀫𑀯𑀬𑁂, 𑀓𑁂𑀘𑀺 𑀧𑀘𑁆𑀙𑀺𑀫𑀯𑀬𑁂, 𑀢𑀣𑀸 𑀤𑀻𑀖𑀓𑁂𑀲𑁂 𑀉𑀧𑀟𑁆𑀠𑀫𑀼𑀡𑁆𑀟𑁂 𑀫𑀺𑀲𑁆𑀲𑀓𑀓𑁂𑀲𑁂 𑀉𑀧𑀟𑁆𑀠𑀭𑀢𑁆𑀢𑀘𑀻𑀯𑀭𑁂 𑀧𑀡𑁆𑀟𑀼𑀓𑀘𑀻𑀯𑀭𑁂, 𑀧𑀤𑀪𑀸𑀡𑀥𑀫𑁆𑀫𑀓𑀣𑀸𑀲𑀭𑀪𑀜𑁆𑀜𑀧𑀜𑁆𑀳𑀧𑀼𑀘𑁆𑀙𑀦𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀭𑀚𑀦𑀧𑀘𑀦𑀘𑀻𑀯𑀭𑀲𑀺𑀩𑁆𑀩𑀦𑀥𑁄𑀯𑀦𑀸𑀤𑀻𑀦𑀺 𑀓𑀭𑁄𑀦𑁆𑀢𑁂, 𑀅𑀧𑀭𑁂𑀧𑀺 𑀯𑀸 𑀦𑀸𑀦𑀧𑁆𑀧𑀓𑀸𑀭𑁂 𑀓𑀸𑀢𑀼𑀓𑀸𑀫𑁄 𑀳𑁄𑀢𑀺, 𑀢𑁂𑀦 𑀧𑀸𑀤𑀓𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀸𑀬 ‘‘𑀏𑀢𑁆𑀢𑀓𑀸 𑀪𑀺𑀓𑁆𑀔𑀽 𑀧𑀞𑀫𑀯𑀬𑀸 𑀳𑁄𑀦𑁆𑀢𑀽’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀧𑀼𑀦 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀅𑀥𑀺𑀝𑁆𑀞𑀺𑀢𑁂 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀧𑁆𑀧𑀓𑀸𑀭𑀸𑀬𑁂𑀯 𑀳𑁄𑀦𑁆𑀢𑀺. 𑀧𑀼𑀦 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀫𑁂𑀯 𑀆𑀕𑀘𑁆𑀙𑀢𑀻𑀢𑀺 𑀢𑁂𑀳𑀺 𑀲𑀤𑁆𑀥𑀺𑀁 𑀚𑀦𑀧𑀤𑀓𑀣𑀁 𑀓𑀣𑁂𑀦𑁆𑀢𑁄 𑀅𑀦𑀺𑀲𑀻𑀤𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀁 𑀯𑁂𑀴𑀼𑀯𑀦𑀫𑁂𑀯 𑀧𑀘𑁆𑀘𑀸𑀕𑀘𑁆𑀙𑀢𑀺. 𑀧𑀸𑀴𑀺𑀬𑀦𑁆𑀢𑀺 𑀯𑀺𑀦𑀬𑀧𑀸𑀴𑀺𑀬𑀁.

𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑀯𑀢𑁆𑀣𑀼

𑁨𑁧𑁫. 𑀲𑀢𑁆𑀢𑀫𑁂 𑀧𑀺𑀬𑀸𑀦𑀦𑁆𑀢𑀺 𑀧𑀺𑀬𑀸𑀬𑀺𑀢𑀩𑁆𑀩𑀸𑀦𑀁. 𑀫𑀦𑀸𑀧𑀸𑀦𑀦𑁆𑀢𑀺 𑀫𑀦𑀯𑀟𑁆𑀠𑀦𑀓𑀸𑀦𑀁. 𑀧𑀺𑀮𑀺𑀦𑁆𑀤𑁄𑀢𑀺 𑀧𑀦𑀲𑁆𑀲 𑀕𑁄𑀢𑁆𑀢𑀁, 𑀯𑀘𑁆𑀙𑁄𑀢𑀺 𑀦𑀸𑀫𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦𑀧𑀺 𑀯𑀤𑀦𑁆𑀢𑀺 ‘‘𑀧𑀺𑀮𑀺𑀦𑁆𑀤𑁄𑀢𑀺 𑀦𑀸𑀫𑀁, 𑀯𑀘𑁆𑀙𑁄𑀢𑀺 𑀕𑁄𑀢𑁆𑀢’’𑀦𑁆𑀢𑀺. 𑀢𑁂𑀦𑁂𑀯 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦 𑀣𑁂𑀭𑀕𑀸𑀣𑀸𑀲𑀁𑀯𑀡𑁆𑀡𑀦𑀸𑀬 (𑀣𑁂𑀭𑀕𑀸. 𑀅𑀝𑁆𑀞. 𑁧.𑁮 𑀧𑀺𑀮𑀺𑀦𑁆𑀤𑀯𑀘𑁆𑀙𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁 𑁋 ‘‘𑀧𑀺𑀮𑀺𑀦𑁆𑀤𑁄𑀢𑀺𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼, 𑀯𑀘𑁆𑀙𑁄𑀢𑀺 𑀧𑀦 𑀕𑁄𑀢𑁆𑀢𑀁. 𑀢𑁂𑀦 𑀲𑁄 𑀅𑀧𑀭𑀪𑀸𑀕𑁂 𑀧𑀺𑀮𑀺𑀦𑁆𑀤𑀯𑀘𑁆𑀙𑁄𑀢𑀺 𑀧𑀜𑁆𑀜𑀸𑀬𑀺𑀢𑁆𑀣𑀸’’𑀢𑀺. 𑀲𑀁𑀲𑀦𑁆𑀤𑁂𑀢𑁆𑀯𑀸𑀢𑀺 𑀏𑀓𑀢𑁄 𑀓𑀢𑁆𑀯𑀸.

𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀤𑁆𑀥𑁄 𑀧𑀩𑁆𑀩𑀚𑀺𑀢𑁆𑀯𑀸𑀢𑀺 𑀇𑀤𑀁 𑀅𑀗𑁆𑀕𑀼𑀢𑁆𑀢𑀭𑀪𑀸𑀡𑀓𑀸𑀦𑀁 𑀓𑀣𑀸𑀫𑀕𑁆𑀕𑁂𑀦 𑀯𑀼𑀢𑁆𑀢𑀁. 𑀅𑀧𑀭𑁂 𑀧𑀦 𑀪𑀡𑀦𑁆𑀢𑀺 𑁋 𑀅𑀦𑀼𑀧𑁆𑀧𑀦𑁆𑀦𑁂𑀬𑁂𑀯 𑀅𑀫𑁆𑀳𑀸𑀓𑀁 𑀪𑀕𑀯𑀢𑀺 𑀲𑀸𑀯𑀢𑁆𑀣𑀺𑀬𑀁 𑀩𑁆𑀭𑀸𑀳𑁆𑀫𑀡𑀕𑁂𑀳𑁂 𑀦𑀺𑀩𑁆𑀩𑀢𑁆𑀢𑀺𑀢𑁆𑀯𑀸 𑀧𑀺𑀮𑀺𑀦𑁆𑀤𑀯𑀘𑁆𑀙𑁄𑀢𑀺 𑀧𑀜𑁆𑀜𑀸𑀢𑁄 𑀲𑀁𑀲𑀸𑀭𑁂 𑀲𑀁𑀯𑁂𑀕𑀩𑀳𑀼𑀮𑀢𑀸𑀬 𑀧𑀭𑀺𑀩𑁆𑀩𑀸𑀚𑀓𑀧𑀩𑁆𑀩𑀚𑁆𑀚𑀁 𑀧𑀩𑁆𑀩𑀚𑀺𑀢𑁆𑀯𑀸 𑀘𑀽𑀴𑀕𑀦𑁆𑀥𑀸𑀭𑀁 𑀦𑀸𑀫 𑀯𑀺𑀚𑁆𑀚𑀁 𑀲𑀸𑀥𑁂𑀢𑁆𑀯𑀸 𑀆𑀓𑀸𑀲𑀘𑀸𑀭𑀻 𑀧𑀭𑀘𑀺𑀢𑁆𑀢𑀯𑀺𑀤𑀽 𑀘 𑀳𑀼𑀢𑁆𑀯𑀸 𑀭𑀸𑀚𑀕𑀳𑁂 𑀮𑀸𑀪𑀕𑁆𑀕𑀬𑀲𑀕𑁆𑀕𑀧𑁆𑀧𑀢𑁆𑀢𑁄 𑀧𑀝𑀺𑀯𑀲𑀢𑀺. 𑀅𑀣 𑀬𑀤𑀸 𑀅𑀫𑁆𑀳𑀸𑀓𑀁 𑀪𑀕𑀯𑀸 𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀭𑀸𑀚𑀕𑀳𑀁 𑀉𑀧𑀕𑀢𑁄, 𑀢𑀢𑁄 𑀧𑀝𑁆𑀞𑀸𑀬 𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦 ¶ 𑀢𑀲𑁆𑀲 𑀲𑀸 𑀯𑀺𑀚𑁆𑀚𑀸 𑀦 𑀲𑀫𑁆𑀧𑀚𑁆𑀚𑀢𑀺, 𑀅𑀢𑁆𑀣𑀓𑀺𑀘𑁆𑀘𑀁 𑀦 𑀲𑀸𑀥𑁂𑀢𑀺. 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑀼𑀢𑀁 𑀔𑁄 𑀧𑀦 𑀫𑁂𑀢𑀁 ‘𑀆𑀘𑀭𑀺𑀬𑀧𑀸𑀘𑀭𑀺𑀬𑀸𑀦𑀁 𑀪𑀸𑀲𑀫𑀸𑀦𑀸𑀦𑀁 𑀬𑀢𑁆𑀣 𑀫𑀳𑀸𑀕𑀦𑁆𑀥𑀸𑀭𑀯𑀺𑀚𑁆𑀚𑀸 𑀥𑀭𑀢𑀺, 𑀢𑀢𑁆𑀣 𑀘𑀽𑀴𑀕𑀦𑁆𑀥𑀸𑀭𑀯𑀺𑀚𑁆𑀚𑀸 𑀦 𑀲𑀫𑁆𑀧𑀚𑁆𑀚𑀢𑀻’𑀢𑀺. 𑀲𑀫𑀡𑀲𑁆𑀲 𑀧𑀦 𑀕𑁄𑀢𑀫𑀲𑁆𑀲 𑀆𑀕𑀢𑀓𑀸𑀮𑀢𑁄 ¶ 𑀧𑀝𑁆𑀞𑀸𑀬 𑀦𑀸𑀬𑀁 𑀫𑀫 𑀯𑀺𑀚𑁆𑀚𑀸 𑀲𑀫𑁆𑀧𑀚𑁆𑀚𑀢𑀺, 𑀦𑀺𑀲𑁆𑀲𑀁𑀲𑀬𑀁 𑀲𑀫𑀡𑁄 𑀕𑁄𑀢𑀫𑁄 𑀫𑀳𑀸𑀕𑀦𑁆𑀥𑀸𑀭𑀯𑀺𑀚𑁆𑀚𑀁 𑀚𑀸𑀦𑀸𑀢𑀺, 𑀬𑀦𑁆𑀦𑀽𑀦𑀸𑀳𑀁 𑀢𑀁 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀯𑀺𑀚𑁆𑀚𑀁 𑀧𑀭𑀺𑀬𑀸𑀧𑀼𑀡𑁂𑀬𑁆𑀬’’𑀦𑁆𑀢𑀺. 𑀲𑁄 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘 𑁋 ‘‘𑀅𑀳𑀁, 𑀫𑀳𑀸𑀲𑀫𑀡, 𑀢𑀯 𑀲𑀦𑁆𑀢𑀺𑀓𑁂 𑀏𑀓𑀁 𑀯𑀺𑀚𑁆𑀚𑀁 𑀧𑀭𑀺𑀬𑀸𑀧𑀼𑀡𑀺𑀢𑀼𑀓𑀸𑀫𑁄, 𑀑𑀓𑀸𑀲𑀁 𑀫𑁂 𑀓𑀭𑁄𑀳𑀻’’𑀢𑀺. 𑀪𑀕𑀯𑀸 ‘‘𑀢𑁂𑀦 𑀳𑀺 𑀧𑀩𑁆𑀩𑀚𑀸’’𑀢𑀺 𑀆𑀳. 𑀲𑁄 ‘‘𑀯𑀺𑀚𑁆𑀚𑀸𑀬 𑀧𑀭𑀺𑀓𑀫𑁆𑀫𑀁 𑀧𑀩𑁆𑀩𑀚𑁆𑀚𑀸’’𑀢𑀺 𑀫𑀜𑁆𑀜𑀫𑀸𑀦𑁄 𑀧𑀩𑁆𑀩𑀚𑀻𑀢𑀺. 𑀧𑀭𑀯𑀫𑁆𑀪𑀦𑀯𑀲𑁂𑀦𑀸𑀢𑀺 𑀧𑀭𑁂𑀲𑀁 𑀕𑀭𑀳𑀦𑀯𑀲𑁂𑀦.

𑀅𑀓𑀓𑁆𑀓𑀲𑀦𑁆𑀢𑀺 𑀅𑀨𑀭𑀼𑀲𑀁. 𑀯𑀺𑀜𑁆𑀜𑀸𑀧𑀦𑀺𑀦𑁆𑀢𑀺 𑀅𑀢𑁆𑀣𑀯𑀺𑀜𑁆𑀜𑀸𑀧𑀦𑀺𑀁. 𑀲𑀘𑁆𑀘𑀦𑁆𑀢𑀺 𑀪𑀽𑀢𑀢𑁆𑀣𑀁. 𑀦𑀸𑀪𑀺𑀲𑀚𑁂𑀢𑀺 𑀬𑀸𑀬 𑀕𑀺𑀭𑀸𑀬 𑀅𑀜𑁆𑀜𑀁 𑀓𑀼𑀚𑁆𑀛𑀸𑀧𑀦𑀯𑀲𑁂𑀦 𑀦 𑀮𑀕𑀸𑀧𑁂𑀬𑁆𑀬, 𑀔𑀻𑀡𑀸𑀲𑀯𑁄 𑀦𑀸𑀫 𑀏𑀯𑀭𑀽𑀧𑀫𑁂𑀯 𑀕𑀺𑀭𑀁 𑀦 𑀪𑀸𑀲𑁂𑀬𑁆𑀬, 𑀢𑀲𑁆𑀫𑀸 𑀢𑀫𑀳𑀁 𑀩𑁆𑀭𑀽𑀫𑀺 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀅𑀦𑀼𑀯𑀺𑀘𑀺𑀦𑀺𑀢𑁆𑀯𑀸𑀢𑀺 𑀅𑀦𑀼𑀯𑀺𑀘𑀸𑀭𑁂𑀢𑁆𑀯𑀸. 𑀘𑀡𑁆𑀟𑀺𑀓𑀢𑀁 𑀕𑀘𑁆𑀙𑀦𑁆𑀢𑀦𑁆𑀢𑀺 𑀲𑀻𑀖𑀕𑀢𑀺𑀬𑀸 𑀕𑀘𑁆𑀙𑀦𑁆𑀢𑀁.

𑀩𑀸𑀳𑀺𑀬𑀤𑀸𑀭𑀼𑀘𑀻𑀭𑀺𑀬𑀢𑁆𑀣𑁂𑀭𑀯𑀢𑁆𑀣𑀼

𑁨𑁧𑁬. 𑀅𑀝𑁆𑀞𑀫𑁂 𑀏𑀓𑀭𑀢𑁆𑀢𑀺𑀯𑀸𑀲𑁂𑀦 𑀕𑀦𑁆𑀢𑁆𑀯𑀸𑀢𑀺 𑀤𑁂𑀯𑀢𑀸𑀦𑀼𑀪𑀸𑀯𑁂𑀦 𑀕𑀦𑁆𑀢𑁆𑀯𑀸. ‘‘𑀩𑀼𑀤𑁆𑀥𑀸𑀦𑀼𑀪𑀸𑀯𑁂𑀦𑀸’’𑀢𑀺𑀧𑀺 𑀯𑀤𑀦𑁆𑀢𑀺. 𑀏𑀯𑀁 𑀕𑀢𑁄 𑀘 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀪𑀼𑀢𑁆𑀢𑀧𑀸𑀢𑀭𑀸𑀲𑁂 𑀓𑀸𑀬𑀸𑀮𑀲𑀺𑀬𑀯𑀺𑀫𑁄𑀘𑀦𑀢𑁆𑀣𑀸𑀬 𑀅𑀩𑁆𑀪𑁄𑀓𑀸𑀲𑁂 𑀘𑀗𑁆𑀓𑀫𑀦𑁆𑀢𑁂 𑀤𑀺𑀲𑁆𑀯𑀸 ‘‘𑀓𑀳𑀁 𑀏𑀢𑀭𑀳𑀺 𑀲𑀢𑁆𑀣𑀸’’𑀢𑀺 𑀧𑀼𑀘𑁆𑀙𑀺. 𑀪𑀺𑀓𑁆𑀔𑀽 ‘‘𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄’’𑀢𑀺 𑀯𑀢𑁆𑀯𑀸 𑀢𑀁 𑀧𑀼𑀘𑁆𑀙𑀺𑀁𑀲𑀼 𑁋 ‘‘𑀢𑁆𑀯𑀁 𑀧𑀦 𑀓𑀼𑀢𑁄 𑀆𑀕𑀢𑁄’’𑀢𑀺? 𑀲𑀼𑀧𑁆𑀧𑀸𑀭𑀓𑀸 𑀆𑀕𑀢𑁄𑀫𑁆𑀳𑀻𑀢𑀺. 𑀓𑀤𑀸 𑀦𑀺𑀓𑁆𑀔𑀦𑁆𑀢𑁄𑀲𑀻𑀢𑀺? 𑀳𑀺𑀬𑁆𑀬𑁄 𑀲𑀸𑀬𑀁 𑀦𑀺𑀓𑁆𑀔𑀦𑁆𑀢𑁄𑀫𑁆𑀳𑀻𑀢𑀺. 𑀤𑀽𑀭𑀢𑁄 𑀆𑀕𑀢𑁄, 𑀢𑀯 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀢𑁂𑀮𑁂𑀦 𑀫𑀓𑁆𑀔𑁂𑀢𑁆𑀯𑀸 𑀣𑁄𑀓𑀁 𑀯𑀺𑀲𑁆𑀲𑀫𑀸𑀳𑀺, 𑀆𑀕𑀢𑀓𑀸𑀮𑁂 𑀲𑀢𑁆𑀣𑀸𑀭𑀁 𑀤𑀓𑁆𑀔𑀺𑀲𑁆𑀲𑀢𑀻𑀢𑀺. 𑀅𑀳𑀁, 𑀪𑀦𑁆𑀢𑁂, 𑀲𑀢𑁆𑀣𑀼 𑀯𑀸 𑀅𑀢𑁆𑀢𑀦𑁄 𑀯𑀸 𑀚𑀻𑀯𑀺𑀢𑀦𑁆𑀢𑀭𑀸𑀬𑀁 𑀦 𑀚𑀸𑀦𑀸𑀫𑀺, 𑀏𑀓𑀭𑀢𑁆𑀢𑁂𑀦𑁂𑀯𑀫𑁆𑀳𑀺 𑀓𑀢𑁆𑀣𑀘𑀺 𑀅𑀝𑁆𑀞𑀢𑁆𑀯𑀸 𑀅𑀦𑀺𑀲𑀻𑀤𑀺𑀢𑁆𑀯𑀸 𑀯𑀻𑀲𑀬𑁄𑀚𑀦𑀲𑀢𑀺𑀓𑀁 𑀫𑀕𑁆𑀕𑀁 𑀆𑀕𑀢𑁄, 𑀲𑀢𑁆𑀣𑀸𑀭𑀁 𑀧𑀲𑁆𑀲𑀺𑀢𑁆𑀯𑀸𑀯 𑀯𑀺𑀲𑁆𑀲𑀫𑀺𑀲𑁆𑀲𑀸𑀫𑀻𑀢𑀺. 𑀲𑁄 𑀏𑀯𑀁 𑀯𑀢𑁆𑀯𑀸 𑀢𑀭𑀫𑀸𑀦𑀭𑀽𑀧𑁄 𑀲𑀸𑀯𑀢𑁆𑀣𑀺𑀁 𑀧𑀯𑀺𑀲𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀦𑁄𑀧𑀫𑀸𑀬 𑀩𑀼𑀤𑁆𑀥𑀲𑀺𑀭𑀺𑀬𑀸 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 ¶ ‘‘𑀘𑀺𑀭𑀲𑁆𑀲𑀁 𑀯𑀢 𑀫𑁂 𑀤𑀺𑀝𑁆𑀞𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀤𑀺𑀝𑁆𑀞𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀑𑀡𑀢𑀲𑀭𑀻𑀭𑁄 𑀕𑀦𑁆𑀢𑁆𑀯𑀸 𑀅𑀦𑁆𑀢𑀭𑀯𑀻𑀣𑀺𑀬𑀫𑁂𑀯 𑀧𑀜𑁆𑀘𑀧𑀢𑀺𑀝𑁆𑀞𑀺𑀢𑁂𑀦 𑀯𑀦𑁆𑀤𑀺𑀢𑁆𑀯𑀸 𑀕𑁄𑀧𑁆𑀨𑀓𑁂𑀲𑀼 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀏𑀯𑀫𑀸𑀳 𑁋 ‘‘𑀤𑁂𑀲𑁂𑀢𑀼 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀥𑀫𑁆𑀫𑀁, 𑀤𑁂𑀲𑁂𑀢𑀼 𑀫𑁂 𑀲𑀼𑀕𑀢𑁄 𑀥𑀫𑁆𑀫𑀁, 𑀬𑀁 𑀫𑀫𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺.

𑀅𑀣 𑀦𑀁 𑀲𑀢𑁆𑀣𑀸 ‘‘𑀅𑀓𑀸𑀮𑁄 𑀔𑁄 𑀢𑀸𑀯, 𑀩𑀸𑀳𑀺𑀬, 𑀅𑀦𑁆𑀢𑀭𑀖𑀭𑀁 𑀧𑀯𑀺𑀝𑁆𑀞𑁄𑀫𑁆𑀳𑀺 𑀧𑀺𑀡𑁆𑀟𑀸𑀬𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀺 ¶ . 𑀢𑀁 𑀲𑀼𑀢𑁆𑀯𑀸 𑀩𑀸𑀳𑀺𑀬𑁄, ‘‘𑀪𑀦𑁆𑀢𑁂, 𑀲𑀁𑀲𑀸𑀭𑁂 𑀲𑀁𑀲𑀭𑀦𑁆𑀢𑁂𑀦 𑀓𑀩𑀴𑀻𑀓𑀸𑀭𑀸𑀳𑀸𑀭𑁄 𑀦 𑀦𑁄 𑀮𑀤𑁆𑀥𑀧𑀼𑀩𑁆𑀩𑁄, 𑀢𑀼𑀫𑁆𑀳𑀸𑀓𑀁 𑀯𑀸 𑀫𑀬𑁆𑀳𑀁 𑀯𑀸 𑀚𑀻𑀯𑀺𑀢𑀦𑁆𑀢𑀭𑀸𑀬𑀁 𑀦 𑀚𑀸𑀦𑀸𑀫𑀺, 𑀤𑁂𑀲𑁂𑀣 𑀫𑁂 𑀥𑀫𑁆𑀫’’𑀦𑁆𑀢𑀺. 𑀲𑀢𑁆𑀣𑀸 𑀤𑀼𑀢𑀺𑀬𑀫𑁆𑀧𑀺 𑀧𑀝𑀺𑀓𑁆𑀔𑀺𑀧𑀺𑀬𑁂𑀯. 𑀏𑀯𑀁 𑀓𑀺𑀭𑀲𑁆𑀲 𑀅𑀳𑁄𑀲𑀺 ‘‘𑀇𑀫𑀲𑁆𑀲 𑀫𑀁 𑀤𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀓𑀮𑀲𑀭𑀻𑀭𑀁 𑀧𑀻𑀢𑀺𑀬𑀸 𑀦𑀺𑀭𑀦𑁆𑀢𑀭𑀁 𑀅𑀚𑁆𑀛𑁄𑀢𑁆𑀣𑀝𑀁 𑀳𑁄𑀢𑀺, 𑀩𑀮𑀯𑀧𑀻𑀢𑀺𑀯𑁂𑀕𑁂𑀦 𑀥𑀫𑁆𑀫𑀁 𑀲𑀼𑀢𑁆𑀯𑀸𑀧𑀺 𑀦 𑀲𑀓𑁆𑀔𑀺𑀲𑁆𑀲𑀢𑀺 𑀧𑀝𑀺𑀯𑀺𑀚𑁆𑀛𑀺𑀢𑀼𑀁, 𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸 𑀢𑀸𑀯 𑀢𑀺𑀝𑁆𑀞𑀢𑀼, 𑀏𑀓𑀭𑀢𑁆𑀢𑁂𑀦𑁂𑀯 𑀯𑀻𑀲𑀬𑁄𑀚𑀦𑀲𑀢𑀁 𑀫𑀕𑁆𑀕𑀁 𑀆𑀕𑀢𑀢𑁆𑀢𑀸 𑀤𑀭𑀣𑁄𑀧𑀺𑀲𑁆𑀲 𑀩𑀮𑀯𑀸, 𑀲𑁄𑀧𑀺 𑀢𑀸𑀯 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀽’’𑀢𑀺. 𑀢𑀲𑁆𑀫𑀸 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀢𑀢𑀺𑀬𑀁 𑀬𑀸𑀘𑀺𑀢𑁄 𑀅𑀦𑁆𑀢𑀭𑀯𑀻𑀣𑀺𑀬𑀁 𑀞𑀺𑀢𑁄𑀯 ‘‘𑀢𑀲𑁆𑀫𑀸𑀢𑀺𑀳 𑀢𑁂, 𑀩𑀸𑀳𑀺𑀬, 𑀏𑀯𑀁 𑀲𑀺𑀓𑁆𑀔𑀺𑀢𑀩𑁆𑀩𑀁 𑀤𑀺𑀝𑁆𑀞𑁂 𑀤𑀺𑀝𑁆𑀞𑀫𑀢𑁆𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 (𑀉𑀤𑀸. 𑁧𑁦) 𑀦𑀬𑁂𑀦 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀇𑀫𑀫𑀢𑁆𑀣𑀁 𑀲𑀁𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀢𑁆𑀣𑀸𑀭𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀦𑁆𑀢𑀭𑀖𑀭𑁂𑀢𑀺 𑀅𑀦𑁆𑀢𑀭𑀯𑀻𑀣𑀺𑀬𑀁.

𑀅𑀧𑀭𑀺𑀧𑀼𑀡𑁆𑀡𑀧𑀢𑁆𑀢𑀘𑀻𑀯𑀭𑀢𑀸𑀬 𑀧𑀢𑁆𑀢𑀘𑀻𑀯𑀭𑀁 𑀧𑀭𑀺𑀬𑁂𑀲𑀦𑁆𑀢𑁄𑀢𑀺 𑀲𑁄 𑀓𑀺𑀭 𑀯𑀻𑀲𑀢𑀺𑀯𑀲𑁆𑀲𑀲𑀳𑀲𑁆𑀲𑀸𑀦𑀺 𑀲𑀫𑀡𑀥𑀫𑁆𑀫𑀁 𑀓𑀭𑁄𑀦𑁆𑀢𑁄 ‘‘𑀪𑀺𑀓𑁆𑀔𑀼𑀦𑀸 𑀦𑀸𑀫 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂 𑀮𑀪𑀺𑀢𑁆𑀯𑀸 𑀅𑀜𑁆𑀜𑀁 𑀅𑀦𑁄𑀮𑁄𑀓𑁂𑀢𑁆𑀯𑀸 𑀲𑀬𑀫𑁂𑀯 𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀏𑀓𑀪𑀺𑀓𑁆𑀔𑀼𑀲𑁆𑀲𑀧𑀺 𑀧𑀢𑁆𑀢𑁂𑀦 𑀯𑀸 𑀘𑀻𑀯𑀭𑁂𑀦 𑀯𑀸 𑀲𑀗𑁆𑀕𑀳𑀁 𑀦𑀸𑀓𑀸𑀲𑀺. 𑀢𑁂𑀦𑀲𑁆𑀲 ‘‘𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀜𑀢𑁆𑀯𑀸 𑀏𑀳𑀺𑀪𑀺𑀓𑁆𑀔𑀼𑀪𑀸𑀯𑁂𑀦 𑀧𑀩𑁆𑀩𑀚𑁆𑀚𑀁 𑀦 𑀅𑀤𑀸𑀲𑀺. 𑀢𑀸𑀯𑀤𑁂𑀯 𑀘 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀢𑁄 ‘‘𑀧𑀭𑀺𑀧𑀼𑀡𑁆𑀡𑀁 𑀢𑁂 𑀧𑀢𑁆𑀢𑀘𑀻𑀯𑀭’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀅𑀧𑀭𑀺𑀧𑀼𑀡𑁆𑀡’’𑀦𑁆𑀢𑀺 𑀯𑀼𑀢𑁆𑀢𑁂 ‘‘𑀢𑁂𑀦 𑀳𑀺 𑀧𑀢𑁆𑀢𑀘𑀻𑀯𑀭𑀁 𑀧𑀭𑀺𑀬𑁂𑀲𑀸𑀳𑀻’’𑀢𑀺 𑀯𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀢𑀲𑁆𑀫𑀸 𑀲𑁄 𑀧𑀢𑁆𑀢𑀘𑀻𑀯𑀭𑀁 𑀧𑀭𑀺𑀬𑁂𑀲𑀦𑁆𑀢𑁄 𑀲𑀗𑁆𑀓𑀸𑀭𑀝𑁆𑀞𑀸𑀦𑀢𑁄 𑀘𑁄𑀴𑀔𑀡𑁆𑀟𑀸𑀦𑀺 𑀲𑀁𑀓𑀟𑁆𑀠𑀢𑀺.

𑀲𑀳𑀲𑁆𑀲𑀫𑀧𑀻𑀢𑀺 𑀧𑀭𑀺𑀘𑁆𑀙𑁂𑀤𑀯𑀘𑀦𑀁. 𑀏𑀓𑀲𑀳𑀲𑁆𑀲𑀁 𑀤𑁆𑀯𑁂𑀲𑀳𑀲𑁆𑀲𑀸𑀦𑀻𑀢𑀺 𑀏𑀯𑀁 𑀲𑀳𑀲𑁆𑀲𑁂𑀦 𑀘𑁂 𑀧𑀭𑀺𑀘𑁆𑀙𑀺𑀦𑁆𑀦𑀸 𑀕𑀸𑀣𑀸 𑀳𑁄𑀦𑁆𑀢𑀺, 𑀢𑀸 𑀘 𑀅𑀦𑀢𑁆𑀣𑀧𑀤𑀲𑀁𑀳𑀺𑀢𑀸 𑀆𑀓𑀸𑀲𑀯𑀡𑁆𑀡𑀧𑀩𑁆𑀩𑀢𑀯𑀡𑁆𑀡𑀸𑀤𑀻𑀦𑀺 𑀧𑀓𑀸𑀲𑀓𑁂𑀳𑀺 𑀅𑀦𑀺𑀩𑁆𑀩𑀸𑀦𑀤𑀻𑀧𑀓𑁂𑀳𑀺 𑀅𑀦𑀢𑁆𑀣𑀓𑁂𑀳𑀺 𑀧𑀤𑁂𑀳𑀺 𑀲𑀁𑀳𑀺𑀢𑀸 𑀬𑀸𑀯 𑀩𑀳𑀼𑀓𑀸 𑀳𑁄𑀦𑁆𑀢𑀺, 𑀢𑀸𑀯 𑀧𑀸𑀧𑀺𑀓𑀸 𑀏𑀯𑀸𑀢𑀺 𑀅𑀢𑁆𑀣𑁄 ¶ . 𑀏𑀓𑀁 𑀕𑀸𑀣𑀸𑀧𑀤𑀁 𑀲𑁂𑀬𑁆𑀬𑁄𑀢𑀺 ‘‘𑀅𑀧𑁆𑀧𑀫𑀸𑀤𑁄 𑀅𑀫𑀢𑀧𑀤𑀁…𑀧𑁂… 𑀬𑀣𑀸 𑀫𑀢𑀸’’𑀢𑀺 (𑀥. 𑀧. 𑁨𑁧) 𑀏𑀯𑀭𑀽𑀧𑀸 𑀏𑀓𑀕𑀸𑀣𑀸𑀧𑀺 𑀲𑁂𑀬𑁆𑀬𑁄𑀢𑀺 𑀅𑀢𑁆𑀣𑁄.

𑀓𑀼𑀫𑀸𑀭𑀓𑀲𑁆𑀲𑀧𑀢𑁆𑀣𑁂𑀭𑀯𑀢𑁆𑀣𑀼

𑁨𑁧𑁭. 𑀦𑀯𑀫𑁂 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁄𑀢𑀺 𑀲𑀸𑀯𑀓𑀩𑁄𑀥𑀺𑀬𑀸 𑀦𑀺𑀬𑀢𑀢𑀸𑀬 𑀧𑀼𑀜𑁆𑀜𑀲𑀫𑁆𑀪𑀸𑀭𑀲𑁆𑀲 𑀘 𑀲𑀸𑀢𑀺𑀲𑀬𑀢𑁆𑀢𑀸 𑀯𑀺𑀦𑀺𑀧𑀸𑀢𑀁 𑀅𑀕𑀦𑁆𑀢𑁆𑀯𑀸 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀁 𑀤𑁂𑀯𑁂𑀲𑀼 𑀘 𑀫𑀦𑀼𑀲𑁆𑀲𑁂𑀲𑀼 𑀘 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀫𑀸𑀦𑁄. ‘‘𑀏𑀓𑀺𑀲𑁆𑀲𑀸 𑀓𑀼𑀮𑀤𑀸𑀭𑀺𑀓𑀸𑀬 𑀓𑀼𑀘𑁆𑀙𑀺𑀫𑁆𑀳𑀺 𑀉𑀧𑁆𑀧𑀦𑁆𑀦𑁄’’𑀢𑀺 𑀯𑀢𑁆𑀯𑀸 𑀢𑀫𑁂𑀯𑀲𑁆𑀲 𑀉𑀧𑁆𑀧𑀦𑁆𑀦𑀪𑀸𑀯𑀁 ¶ 𑀫𑀽𑀮𑀢𑁄 𑀧𑀝𑁆𑀞𑀸𑀬 𑀤𑀲𑁆𑀲𑁂𑀢𑀼𑀁 𑁋 ‘‘𑀲𑀸 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀲𑀸𑀢𑀺 𑀓𑀼𑀮𑀤𑀸𑀭𑀺𑀓𑀸. 𑀘-𑀲𑀤𑁆𑀤𑁄 𑀩𑁆𑀬𑀢𑀺𑀭𑁂𑀓𑀢𑁆𑀣𑁄. 𑀢𑁂𑀦 𑀯𑀼𑀘𑁆𑀘𑀫𑀸𑀦𑀁 𑀯𑀺𑀲𑁂𑀲𑀁 𑀚𑁄𑀢𑀬𑀢𑀺. 𑀓𑀼𑀮𑀖𑀭𑀦𑁆𑀢𑀺 𑀧𑀢𑀺𑀓𑀼𑀮𑀕𑁂𑀳𑀁. 𑀕𑀩𑁆𑀪𑀦𑀺𑀫𑀺𑀢𑁆𑀢𑀦𑁆𑀢𑀺 𑀕𑀩𑁆𑀪𑀲𑁆𑀲 𑀲𑀡𑁆𑀞𑀺𑀢𑀪𑀸𑀯𑀯𑀺𑀕𑁆𑀕𑀳𑀁. 𑀲𑀢𑀺𑀧𑀺 𑀯𑀺𑀲𑀸𑀔𑀸𑀬 𑀲𑀸𑀯𑀢𑁆𑀣𑀺𑀯𑀸𑀲𑀺𑀓𑀼𑀮𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑁂 𑀢𑀲𑁆𑀲𑀸 𑀢𑀢𑁆𑀣 𑀧𑀥𑀸𑀦𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀯𑀺𑀲𑀸𑀔𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁 𑀬𑀣𑀸 ‘‘𑀩𑁆𑀭𑀸𑀳𑁆𑀫𑀡𑀸 𑀆𑀕𑀢𑀸, 𑀯𑀸𑀲𑀺𑀝𑁆𑀞𑁄𑀧𑀺 𑀆𑀕𑀢𑁄’’𑀢𑀺. 𑀪𑀕𑀯𑀢𑀸 𑀏𑀯𑀁 𑀕𑀳𑀺𑀢𑀦𑀸𑀫𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀬𑀲𑁆𑀫𑀸 𑀭𑀸𑀚𑀧𑀼𑀢𑁆𑀢𑀸 𑀮𑁄𑀓𑁂 ‘‘𑀓𑀼𑀫𑀸𑀭𑀸’’𑀢𑀺 𑀯𑁄𑀳𑀭𑀻𑀬𑀦𑁆𑀢𑀺, 𑀅𑀬𑀜𑁆𑀘 𑀭𑀜𑁆𑀜𑁄 𑀓𑀺𑀢𑁆𑀢𑀺𑀫𑀧𑀼𑀢𑁆𑀢𑁄, 𑀢𑀲𑁆𑀫𑀸 𑀆𑀳 𑁋 ‘‘𑀭𑀜𑁆𑀜𑁄…𑀧𑁂… 𑀲𑀜𑁆𑀚𑀸𑀦𑀺𑀁𑀲𑀽’’𑀢𑀺.

𑀧𑀜𑁆𑀘𑀤𑀲 𑀧𑀜𑁆𑀳𑁂 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸𑀢𑀺 ‘‘𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼, 𑀅𑀬𑀁 𑀯𑀫𑁆𑀫𑀺𑀓𑁄 𑀭𑀢𑁆𑀢𑀺𑀁 𑀥𑀽𑀧𑀸𑀬𑀢𑀺, 𑀤𑀺𑀯𑀸 𑀧𑀚𑁆𑀚𑀮𑀢𑀻’’𑀢𑀺𑀆𑀤𑀺𑀦𑀸 𑀯𑀫𑁆𑀫𑀺𑀓𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁨𑁪𑁯) 𑀆𑀕𑀢𑀦𑀬𑁂𑀦 𑀧𑀜𑁆𑀘𑀤𑀲 𑀧𑀜𑁆𑀳𑁂 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸. 𑀧𑀸𑀬𑀸𑀲𑀺𑀭𑀜𑁆𑀜𑁄𑀢𑀺 ‘‘𑀦𑀢𑁆𑀣𑀺 𑀧𑀭𑀮𑁄𑀓𑁄, 𑀦𑀢𑁆𑀣𑀺 𑀲𑀢𑁆𑀢𑀸 𑀑𑀧𑀧𑀸𑀢𑀺𑀓𑀸, 𑀦𑀢𑁆𑀣𑀺 𑀲𑀼𑀓𑀢𑀤𑀼𑀓𑁆𑀓𑀝𑀸𑀦𑀁 𑀓𑀫𑁆𑀫𑀸𑀦𑀁 𑀨𑀮𑀁 𑀯𑀺𑀧𑀸𑀓𑁄’’𑀢𑀺 (𑀤𑀻. 𑀦𑀺. 𑁨.𑁪𑁧𑁦, 𑁪𑁧𑁨) 𑀏𑀯𑀁𑀮𑀤𑁆𑀥𑀺𑀓𑀲𑁆𑀲 𑀧𑀸𑀬𑀸𑀲𑀺𑀭𑀸𑀚𑀲𑁆𑀲. 𑀭𑀸𑀚𑀸 𑀳𑀺 𑀢𑀤𑀸 𑀅𑀦𑀪𑀺𑀲𑀺𑀢𑁆𑀢𑁄 𑀳𑀼𑀢𑁆𑀯𑀸 𑀧𑀲𑁂𑀦𑀤𑀺𑀦𑀸 𑀓𑁄𑀲𑀮𑁂𑀦 𑀤𑀺𑀦𑁆𑀦𑀲𑁂𑀢𑀩𑁆𑀬𑀦𑀕𑀭𑀁 𑀅𑀚𑁆𑀛𑀸𑀯𑀲𑀦𑁆𑀢𑁄 𑀇𑀫𑀁 𑀤𑀺𑀝𑁆𑀞𑀺𑀁 𑀕𑀡𑁆𑀳𑀺. 𑀧𑀜𑁆𑀘𑀤𑀲𑀳𑀺 𑀧𑀜𑁆𑀳𑁂𑀳𑀺 𑀧𑀝𑀺𑀫𑀡𑁆𑀟𑁂𑀢𑁆𑀯𑀸𑀢𑀺 ‘‘𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀭𑀸𑀚𑀜𑁆𑀜, 𑀇𑀫𑁂 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀇𑀫𑀲𑁆𑀫𑀺𑀁 𑀯𑀸 𑀮𑁄𑀓𑁂 𑀧𑀭𑀲𑁆𑀫𑀺𑀁 𑀯𑀸 𑀤𑁂𑀯𑀸 𑀯𑀸 𑀢𑁂 𑀫𑀦𑀼𑀲𑁆𑀲𑀸’’𑀢𑀺 𑀏𑀯𑀫𑀸𑀤𑀻𑀳𑀺 (𑀤𑀻. 𑀦𑀺. 𑁨.𑁪𑁧𑁧) 𑀧𑀜𑁆𑀘𑀤𑀲𑀳𑀺 𑀧𑀜𑁆𑀳𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑀁 𑀓𑀢𑁆𑀯𑀸. 𑀲𑀼𑀢𑁆𑀢𑀦𑁆𑀢𑁂𑀢𑀺 𑀧𑀸𑀬𑀸𑀲𑀺𑀲𑀼𑀢𑁆𑀢𑀦𑁆𑀢𑁂 (𑀤𑀻. 𑀦𑀺. 𑁨.𑁪𑁦𑁬 𑀆𑀤𑀬𑁄).

𑀫𑀳𑀸𑀓𑁄𑀝𑁆𑀞𑀺𑀓𑀢𑁆𑀣𑁂𑀭𑀯𑀢𑁆𑀣𑀼

𑁨𑁧𑁮. 𑀤𑀲𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀢𑀢𑀺𑀬𑀏𑀢𑀤𑀕𑁆𑀕𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀏𑀢𑀤𑀕𑁆𑀕𑀯𑀕𑁆𑀕𑁄

(𑁧𑁪) 𑁪. 𑀘𑀢𑀼𑀢𑁆𑀣𑀏𑀢𑀤𑀕𑁆𑀕𑀯𑀕𑁆𑀕𑀯𑀡𑁆𑀡𑀦𑀸

𑀆𑀦𑀦𑁆𑀤𑀢𑁆𑀣𑁂𑀭𑀯𑀢𑁆𑀣𑀼

𑁨𑁧𑁯-𑁨𑁨𑁩. 𑀘𑀢𑀼𑀢𑁆𑀣𑀯𑀕𑁆𑀕𑀲𑁆𑀲 ¶ ¶ 𑀧𑀞𑀫𑁂 𑀳𑁂𑀝𑁆𑀞𑀸 𑀯𑀼𑀢𑁆𑀢𑀧𑁆𑀧𑀫𑀸𑀡𑀦𑁆𑀢𑀺 𑀳𑁂𑀝𑁆𑀞𑀸 𑀓𑁄𑀡𑁆𑀟𑀜𑁆𑀜𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼𑀫𑁆𑀳𑀺 ‘‘𑀢𑀲𑁆𑀲 𑀥𑀼𑀭𑀧𑀢𑁆𑀢𑀸𑀦𑀺 𑀦𑀯𑀼𑀢𑀺𑀳𑀢𑁆𑀣𑀸𑀦𑀺 𑀳𑁄𑀦𑁆𑀢𑀺, 𑀓𑁂𑀲𑀭𑀁 𑀢𑀺𑀁𑀲𑀳𑀢𑁆𑀣𑀁, 𑀓𑀡𑁆𑀡𑀺𑀓𑀸 𑀤𑁆𑀯𑀸𑀤𑀲𑀳𑀢𑁆𑀣𑀸, 𑀧𑀸𑀤𑁂𑀦 𑀧𑀢𑀺𑀝𑁆𑀞𑀺𑀢𑀝𑁆𑀞𑀸𑀦𑀁 𑀏𑀓𑀸𑀤𑀲𑀳𑀢𑁆𑀣’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑀧𑁆𑀧𑀫𑀸𑀡𑀁. 𑀭𑀜𑁆𑀜𑁄 𑀧𑁂𑀲𑁂𑀲𑀻𑀢𑀺 𑀧𑀘𑁆𑀘𑀦𑁆𑀢𑀲𑁆𑀲 𑀓𑀼𑀧𑀺𑀢𑀪𑀸𑀯𑀁 𑀆𑀭𑁄𑀘𑁂𑀢𑁆𑀯𑀸 𑀧𑁂𑀲𑁂𑀲𑀺. 𑀣𑁂𑀭𑀕𑀸𑀣𑀸𑀲𑀁𑀯𑀡𑁆𑀡𑀦𑀸𑀬𑀁 (𑀣𑁂𑀭𑀕𑀸. 𑀅𑀝𑁆𑀞. 𑁨.𑁧𑁦𑁧𑁬 𑀆𑀦𑀦𑁆𑀤𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸) 𑀧𑀦 ‘‘𑀧𑀘𑁆𑀘𑀦𑁆𑀢𑀲𑁆𑀲 𑀓𑀼𑀧𑀺𑀢𑀪𑀸𑀯𑀁 𑀭𑀜𑁆𑀜𑁄 𑀅𑀦𑀸𑀭𑁄𑀘𑁂𑀢𑁆𑀯𑀸 𑀲𑀬𑀫𑁂𑀯 𑀢𑀁 𑀯𑀽𑀧𑀲𑀫𑁂𑀲𑀺, 𑀢𑀁 𑀲𑀼𑀢𑁆𑀯𑀸 𑀭𑀸𑀚𑀸 𑀢𑀼𑀝𑁆𑀞𑀫𑀸𑀦𑀲𑁄 𑀧𑀼𑀢𑁆𑀢𑀁 𑀧𑀓𑁆𑀓𑁄𑀲𑀸𑀧𑁂𑀢𑁆𑀯𑀸 ‘𑀯𑀭𑀁 𑀢𑁂, 𑀲𑀼𑀫𑀦, 𑀤𑀫𑁆𑀫𑀺, 𑀕𑀡𑁆𑀳𑀸𑀳𑀻’𑀢𑀺 𑀆𑀳𑀸’’𑀢𑀺 𑀯𑀼𑀢𑁆𑀢𑀁. 𑀦 𑀫𑁂𑀢𑀁 𑀘𑀺𑀢𑁆𑀢𑀁 𑀅𑀢𑁆𑀣𑀻𑀢𑀺 𑀫𑀫 𑀏𑀯𑀭𑀽𑀧𑀁 𑀘𑀺𑀢𑁆𑀢𑀁 𑀦𑀢𑁆𑀣𑀺. 𑀅𑀯𑀜𑁆𑀛𑀦𑁆𑀢𑀺 𑀅𑀢𑀼𑀘𑁆𑀙𑀁. 𑀅𑀜𑁆𑀜𑀁 𑀯𑀭𑁂𑀳𑀻𑀢𑀺 𑀅𑀜𑁆𑀜𑀁 𑀧𑀢𑁆𑀣𑁂𑀳𑀺, 𑀅𑀜𑁆𑀜𑀁 𑀕𑀡𑁆𑀳𑀸𑀳𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀉𑀤𑀓𑀁 𑀅𑀥𑀺𑀝𑁆𑀞𑀸𑀬𑀸𑀢𑀺 ‘‘𑀉𑀤𑀓𑀁 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸. 𑀕𑀢𑁂𑀦𑀸𑀢𑀺 𑀕𑀫𑀦𑁂𑀦. 𑀦 𑀆𑀫𑀺𑀲𑀘𑀓𑁆𑀔𑀼𑀓𑀸𑀢𑀺 𑀘𑀻𑀯𑀭𑀸𑀤𑀺𑀧𑀘𑁆𑀘𑀬𑀲𑀗𑁆𑀔𑀸𑀢𑀁 𑀆𑀫𑀺𑀲𑀁 𑀦 𑀑𑀮𑁄𑀓𑁂𑀦𑁆𑀢𑀺.

𑀯𑀲𑀦𑀝𑁆𑀞𑀸𑀦𑀲𑀪𑀸𑀕𑁂𑀬𑁂𑀯𑀸𑀢𑀺 𑀯𑀲𑀦𑀝𑁆𑀞𑀸𑀦𑀲𑀫𑀻𑀧𑁂𑀬𑁂𑀯. 𑀏𑀓𑀦𑁆𑀢𑀯𑀮𑁆𑀮𑀪𑁄𑀢𑀺 𑀉𑀧𑀝𑁆𑀞𑀸𑀓𑀝𑁆𑀞𑀸𑀦𑁂 𑀏𑀓𑀦𑁆𑀢𑁂𑀦 𑀯𑀮𑁆𑀮𑀪𑁄. 𑀏𑀢𑀲𑁆𑀲𑁂𑀯𑀸𑀢𑀺 𑀏𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀲𑁆𑀲. 𑀤𑁆𑀯𑁂𑀚𑁆𑀛𑀓𑀣𑀸 𑀦 𑀳𑁄𑀦𑁆𑀢𑀻𑀢𑀺 𑀤𑁆𑀯𑀺𑀥𑀸𑀪𑀽𑀢𑀓𑀣𑀸 𑀦 𑀳𑁄𑀦𑁆𑀢𑀺, 𑀅𑀦𑁂𑀓𑀦𑁆𑀢𑀺𑀓𑀓𑀣𑀸 𑀦 𑀳𑁄𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀺𑀩𑀤𑁆𑀥𑀸𑀢𑀺 𑀅𑀦𑀺𑀬𑀢𑀸. 𑀮𑁄𑀳𑀺𑀢𑁂𑀦 𑀕𑀮𑀦𑁆𑀢𑁂𑀦𑀸𑀢𑀺 𑀇𑀢𑁆𑀣𑀫𑁆𑀪𑀽𑀢𑀓𑁆𑀔𑀸𑀦𑁂 𑀓𑀭𑀡𑀯𑀘𑀦𑀁, 𑀕𑀮𑀦𑁆𑀢𑁂𑀦 𑀮𑁄𑀳𑀺𑀢𑁂𑀦 𑀬𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀦𑁆𑀯𑀸𑀲𑀢𑁆𑀢𑁄𑀢𑀺 𑀅𑀦𑀼𑀕𑀢𑁄. 𑀉𑀝𑁆𑀞𑁂𑀳𑀺, 𑀆𑀯𑀼𑀲𑁄 𑀆𑀦𑀦𑁆𑀤, 𑀉𑀝𑁆𑀞𑁂𑀳𑀺, 𑀆𑀯𑀼𑀲𑁄 𑀆𑀦𑀦𑁆𑀤𑀸𑀢𑀺 𑀢𑀼𑀭𑀺𑀢𑁂 𑀇𑀤𑀫𑀸𑀫𑁂𑀟𑀺𑀢𑀯𑀘𑀦𑀁. 𑀤𑀼𑀯𑀺𑀥𑁂𑀦 𑀉𑀤𑀓𑁂𑀦𑀸𑀢𑀺 𑀲𑀻𑀢𑀼𑀤𑀓𑁂𑀦 𑀉𑀡𑁆𑀳𑀼𑀤𑀓𑁂𑀦 𑀘. 𑀢𑀺𑀯𑀺𑀥𑁂𑀦 𑀤𑀦𑁆𑀢𑀓𑀝𑁆𑀞𑁂𑀦𑀸𑀢𑀺 𑀔𑀼𑀤𑁆𑀤𑀓𑀁 𑀫𑀳𑀦𑁆𑀢𑀁 𑀫𑀚𑁆𑀛𑀺𑀫𑀦𑁆𑀢𑀺 𑀏𑀯𑀁 𑀢𑀺𑀧𑁆𑀧𑀓𑀸𑀭𑁂𑀦 𑀤𑀦𑁆𑀢𑀓𑀝𑁆𑀞𑁂𑀦. 𑀦𑀯 𑀯𑀸𑀭𑁂 𑀅𑀦𑀼𑀧𑀭𑀺𑀬𑀸𑀬𑀢𑀻𑀢𑀺 𑀲𑀢𑁆𑀣𑀭𑀺 𑀧𑀓𑁆𑀓𑁄𑀲𑀦𑁆𑀢𑁂 𑀧𑀝𑀺𑀯𑀘𑀦𑀤𑀸𑀦𑀸𑀬 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀢𑁆𑀣𑀁 𑀦𑀯𑀓𑁆𑀔𑀢𑁆𑀢𑀼𑀁 𑀅𑀦𑀼𑀧𑀭𑀺𑀬𑀸𑀬𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀏𑀯𑀜𑁆𑀳𑀺𑀲𑁆𑀲 𑀅𑀳𑁄𑀲𑀻’’𑀢𑀺𑀆𑀤𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀉𑀭𑀼𑀯𑁂𑀮𑀓𑀲𑁆𑀲𑀧𑀢𑁆𑀣𑁂𑀭𑀯𑀢𑁆𑀣𑀼

𑁨𑁨𑁪. 𑀤𑀼𑀢𑀺𑀬𑁂 ¶ 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀺𑀢𑁆𑀣𑀸𑀭𑀢𑁄 𑀯𑀺𑀦𑀬𑀧𑀸𑀴𑀺𑀬𑀁 𑀆𑀕𑀢𑀫𑁂𑀯.

𑀓𑀸𑀴𑀼𑀤𑀸𑀬𑀺𑀢𑁆𑀣𑁂𑀭𑀯𑀢𑁆𑀣𑀼

𑁨𑁨𑁫. 𑀢𑀢𑀺𑀬𑁂 ¶ 𑀕𑀫𑀦𑀸𑀓𑀧𑁆𑀧𑀦𑁆𑀢𑀺 𑀕𑀫𑀦𑀸𑀓𑀸𑀭𑀁. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀩𑀸𑀓𑀼𑀮𑀢𑁆𑀣𑁂𑀭𑀯𑀢𑁆𑀣𑀼

𑁨𑁨𑁬. 𑀘𑀢𑀼𑀢𑁆𑀣𑁂 𑀦𑀺𑀭𑀸𑀩𑀸𑀥𑀸𑀦𑀦𑁆𑀢𑀺 𑀆𑀩𑀸𑀥𑀭𑀳𑀺𑀢𑀸𑀦𑀁. 𑀬𑀣𑀸 ‘‘𑀤𑁆𑀯𑀸𑀯𑀻𑀲𑀢𑀺 𑀤𑁆𑀯𑀢𑁆𑀢𑀺𑀁𑀲𑀸’’𑀢𑀺𑀆𑀤𑀺𑀫𑁆𑀳𑀺 𑀯𑀢𑁆𑀢𑀩𑁆𑀩𑁂 ‘‘𑀩𑀸𑀯𑀻𑀲𑀢𑀺 𑀩𑀸𑀢𑁆𑀢𑀺𑀁𑀲𑀸’’𑀢𑀺𑀆𑀤𑀻𑀦𑀺 𑀯𑀼𑀘𑁆𑀘𑀦𑁆𑀢𑀺, 𑀏𑀯𑀫𑁂𑀯𑀁 𑀤𑁆𑀯𑁂 𑀓𑀼𑀮𑀸𑀦𑀺 𑀅𑀲𑁆𑀲𑀸𑀢𑀺 𑀤𑁆𑀯𑀺𑀓𑀼𑀮𑁄, 𑀤𑁆𑀯𑁂𑀓𑀼𑀮𑁄𑀢𑀺 𑀯𑀸 𑀯𑀢𑁆𑀢𑀩𑁆𑀩𑁂 𑀩𑀸𑀓𑀼𑀮𑁄𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀩𑀸𑀓𑀼𑀮𑁄𑀢𑀺 𑀤𑁆𑀯𑀻𑀲𑀼 𑀓𑀼𑀮𑁂𑀲𑀼 𑀯𑀟𑁆𑀠𑀺𑀢𑀢𑁆𑀢𑀸 𑀏𑀯𑀁𑀮𑀤𑁆𑀥𑀦𑀸𑀫𑁄’’𑀢𑀺. 𑀉𑀧𑀬𑁄𑀕𑁂𑀦𑀸𑀢𑀺 𑀆𑀦𑀼𑀪𑀸𑀯𑁂𑀦. 𑀨𑀸𑀲𑀼𑀓𑀓𑀸𑀮𑁂𑀢𑀺 𑀅𑀭𑁄𑀕𑀓𑀸𑀮𑁂. 𑀕𑀤𑁆𑀤𑀼𑀳𑀦𑀫𑀢𑁆𑀢𑀫𑁆𑀧𑀻𑀢𑀺 𑀕𑁄𑀤𑀼𑀳𑀦𑀫𑀢𑁆𑀢𑀫𑁆𑀧𑀺 𑀓𑀸𑀮𑀁. 𑀇𑀥 𑀧𑀦 𑀦 𑀲𑀓𑀮𑁄 𑀕𑁄𑀤𑀼𑀳𑀦𑀓𑁆𑀔𑀡𑁄 𑀅𑀥𑀺𑀧𑁆𑀧𑁂𑀢𑁄, 𑀅𑀣 𑀔𑁄 𑀕𑀸𑀯𑀺𑀁 𑀣𑀦𑁂 𑀕𑀳𑁂𑀢𑁆𑀯𑀸 𑀏𑀓𑀔𑀻𑀭𑀩𑀺𑀦𑁆𑀤𑀼𑀤𑀼𑀳𑀦𑀓𑀸𑀮𑀫𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁. 𑀆𑀭𑁄𑀕𑁆𑀬𑀲𑀸𑀮𑀦𑁆𑀢𑀺 𑀆𑀢𑀼𑀭𑀸𑀦𑀁 𑀅𑀭𑁄𑀕𑀪𑀸𑀯𑀓𑀭𑀡𑀢𑁆𑀣𑀸𑀬 𑀓𑀢𑀲𑀸𑀮𑀁.

𑀦𑀺𑀫𑀼𑀚𑁆𑀚𑀦𑀼𑀫𑁆𑀫𑀼𑀚𑁆𑀚𑀦𑀯𑀲𑁂𑀦𑀸𑀢𑀺 𑀚𑀸𑀡𑀼𑀧𑁆𑀧𑀫𑀸𑀡𑁂 𑀉𑀤𑀓𑁂 𑀣𑁄𑀓𑀁𑀬𑁂𑀯 𑀦𑀺𑀫𑀼𑀚𑁆𑀚𑀦𑀼𑀫𑁆𑀫𑀼𑀚𑁆𑀚𑀦𑀯𑀲𑁂𑀦. 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀻𑀢𑀺 𑀫𑀘𑁆𑀙𑀲𑁆𑀲 𑀫𑀼𑀔𑀲𑀫𑀻𑀧𑁂𑀬𑁂𑀯 𑀙𑀟𑁆𑀟𑁂𑀢𑁆𑀯𑀸 𑀧𑀮𑀸𑀬𑀺. 𑀤𑀸𑀭𑀓𑀲𑁆𑀲 𑀢𑁂𑀚𑁂𑀦𑀸𑀢𑀺 𑀤𑀸𑀭𑀓𑀲𑁆𑀲 𑀧𑀼𑀜𑁆𑀜𑀢𑁂𑀚𑁂𑀦. 𑀫𑀸𑀭𑀺𑀬𑀫𑀸𑀦𑀸𑀯 𑀫𑀭𑀦𑁆𑀢𑀻𑀢𑀺 𑀤𑀡𑁆𑀟𑀸𑀤𑀻𑀳𑀺 𑀧𑁄𑀣𑁂𑀢𑁆𑀯𑀸 𑀫𑀸𑀭𑀺𑀬𑀫𑀸𑀦𑀸𑀯 𑀫𑀭𑀦𑁆𑀢𑀺, 𑀦 𑀚𑀸𑀮𑁂𑀦 𑀩𑀤𑁆𑀥𑀢𑀸𑀫𑀢𑁆𑀢𑁂𑀦 𑀅𑀫𑀸𑀭𑀺𑀬𑀫𑀸𑀦𑀸. 𑀦𑀻𑀳𑀝𑀫𑀢𑁆𑀢𑁄𑀯 𑀫𑀢𑁄𑀢𑀺 𑀦𑀻𑀳𑀝𑀓𑁆𑀔𑀡𑁂𑀬𑁂𑀯 𑀫𑀢𑁄. 𑀢𑁂𑀦𑀲𑁆𑀲 𑀫𑀸𑀭𑀡𑀢𑁆𑀣𑀁 𑀉𑀧𑀓𑁆𑀓𑀫𑁄 𑀦 𑀓𑀢𑁄, 𑀬𑁂𑀦 𑀉𑀧𑀓𑁆𑀓𑀫𑁂𑀦 𑀤𑀸𑀭𑀓𑀲𑁆𑀲 𑀆𑀩𑀸𑀥𑁄 𑀲𑀺𑀬𑀸. 𑀢𑀦𑁆𑀢𑀺 𑀫𑀘𑁆𑀙𑀁. 𑀲𑀓𑀮𑀫𑁂𑀯𑀸𑀢𑀺 𑀅𑀯𑀺𑀓𑀮𑀫𑁂𑀯 𑀧𑀭𑀺𑀧𑀼𑀡𑁆𑀡𑀸𑀯𑀬𑀯𑀫𑁂𑀯. 𑀦 𑀓𑁂𑀴𑀸𑀬𑀢𑀻𑀢𑀺 𑀦 𑀦𑀦𑁆𑀤𑀢𑀺, 𑀓𑀺𑀲𑁆𑀫𑀺𑀜𑁆𑀘𑀺 𑀦 𑀫𑀜𑁆𑀜𑀢𑀺. 𑀧𑀺𑀝𑁆𑀞𑀺𑀢𑁄 𑀨𑀸𑀮𑁂𑀦𑁆𑀢𑀻𑀢𑀺 𑀤𑀸𑀭𑀓𑀲𑁆𑀲 𑀧𑀼𑀜𑁆𑀜𑀢𑁂𑀚𑁂𑀦 𑀧𑀺𑀝𑁆𑀞𑀺𑀢𑁄 𑀨𑀸𑀮𑁂𑀦𑁆𑀢𑀻. 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸𑀢𑀺 ‘‘𑀧𑀼𑀢𑁆𑀢𑀁 𑀮𑀪𑀺’’𑀦𑁆𑀢𑀺 𑀉𑀕𑁆𑀖𑁄𑀲𑀦𑀯𑀲𑁂𑀦 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸. 𑀧𑀓𑀢𑀺𑀁 𑀆𑀘𑀺𑀓𑁆𑀔𑀻𑀢𑀺 𑀅𑀢𑁆𑀢𑀦𑁄 𑀧𑀼𑀢𑁆𑀢𑀪𑀸𑀯𑀁 𑀓𑀣𑁂𑀲𑀺. 𑀓𑀼𑀘𑁆𑀙𑀺𑀬𑀸 𑀥𑀸𑀭𑀺𑀢𑀢𑁆𑀢𑀸 𑀅𑀫𑀸𑀢𑀸 𑀓𑀸𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀚𑀦𑀦𑀻𑀪𑀸𑀯𑀢𑁄 𑀅𑀫𑀸𑀢𑀸 𑀓𑀸𑀢𑀼𑀁 𑀦 𑀲𑀓𑁆𑀓𑀸. 𑀫𑀘𑁆𑀙𑀁 𑀕𑀡𑁆𑀳𑀦𑁆𑀢𑀸𑀧𑀻𑀢𑀺 𑀫𑀘𑁆𑀙𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑀸𑀧𑀺. 𑀢𑀣𑀸 𑀕𑀡𑁆𑀳𑀦𑁆𑀢𑀸 𑀘 𑀢𑀧𑁆𑀧𑀭𑀺𑀬𑀸𑀧𑀦𑁆𑀦𑀁 𑀲𑀩𑁆𑀩𑀁 𑀕𑀡𑁆𑀳𑀦𑁆𑀢𑀺 𑀦𑀸𑀫𑀸𑀢𑀺 𑀆𑀳 𑁋 ‘‘𑀯𑀓𑁆𑀓𑀬𑀓𑀦𑀸𑀤𑀻𑀦𑀺 𑀩𑀳𑀺 𑀓𑀢𑁆𑀯𑀸 𑀕𑀡𑁆𑀳𑀦𑁆𑀢𑀸 𑀦𑀸𑀫 𑀦𑀢𑁆𑀣𑀻’’𑀢𑀺. 𑀅𑀬𑀫𑁆𑀧𑀺 𑀅𑀫𑀸𑀢𑀸 𑀓𑀸𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀤𑀺𑀦𑁆𑀦𑀧𑀼𑀢𑁆𑀢𑀪𑀸𑀯𑀢𑁄 𑀦 𑀲𑀓𑁆𑀓𑀸.

𑀲𑁄𑀪𑀺𑀢𑀢𑁆𑀣𑁂𑀭𑀯𑀢𑁆𑀣𑀼

𑁨𑁨𑁭. 𑀧𑀜𑁆𑀘𑀫𑀁 ¶ ¶ 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀉𑀧𑀸𑀮𑀺𑀢𑁆𑀣𑁂𑀭𑀯𑀢𑁆𑀣𑀼

𑁨𑁨𑁮. 𑀙𑀝𑁆𑀞𑁂 𑀪𑀸𑀭𑀼𑀓𑀘𑁆𑀙𑀓𑀯𑀢𑁆𑀣𑀼𑀦𑁆𑀢𑀺 𑀅𑀜𑁆𑀜𑀢𑀭𑁄 𑀓𑀺𑀭 𑀪𑀸𑀭𑀼𑀓𑀘𑁆𑀙𑀤𑁂𑀲𑀯𑀸𑀲𑀻 𑀪𑀺𑀓𑁆𑀔𑀼 𑀲𑀼𑀧𑀺𑀦𑀦𑁆𑀢𑁂 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑁆𑀯𑀸 ‘‘𑀅𑀲𑁆𑀲𑀫𑀡𑁄 𑀅𑀳𑀁 𑀯𑀺𑀩𑁆𑀪𑀫𑀺𑀲𑁆𑀲𑀸𑀫𑀻’’𑀢𑀺 𑀪𑀸𑀭𑀼𑀓𑀘𑁆𑀙𑀁 𑀕𑀘𑁆𑀙𑀦𑁆𑀢𑁄 𑀅𑀦𑁆𑀢𑀭𑀸𑀫𑀕𑁆𑀕𑁂 𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺𑀁 𑀧𑀲𑁆𑀲𑀺𑀢𑁆𑀯𑀸 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀺. 𑀆𑀬𑀲𑁆𑀫𑀸 𑀉𑀧𑀸𑀮𑀺, 𑀏𑀯𑀫𑀸𑀳 𑁋 ‘‘𑀅𑀦𑀸𑀧𑀢𑁆𑀢𑀺, 𑀆𑀯𑀼𑀲𑁄, 𑀲𑀼𑀧𑀺𑀦𑀦𑁆𑀢𑁂𑀦𑀸’’𑀢𑀺. 𑀬𑀲𑁆𑀫𑀸 𑀲𑀼𑀧𑀺𑀦𑀦𑁆𑀢𑁂 𑀅𑀯𑀺𑀲𑀬𑀢𑁆𑀢𑀸 𑀏𑀯𑀁 𑀳𑁄𑀢𑀺. 𑀢𑀲𑁆𑀫𑀸 𑀉𑀧𑀸𑀮𑀺𑀢𑁆𑀣𑁂𑀭𑁄 𑀪𑀕𑀯𑀢𑀸 𑀅𑀯𑀺𑀦𑀺𑀘𑁆𑀙𑀺𑀢𑀧𑀼𑀩𑁆𑀩𑀫𑁆𑀧𑀺 𑀇𑀫𑀁 𑀯𑀢𑁆𑀣𑀼𑀁 𑀦𑀬𑀕𑁆𑀕𑀸𑀳𑁂𑀦 𑀏𑀯𑀁 𑀯𑀺𑀦𑀺𑀘𑁆𑀙𑀺𑀦𑀺. 𑀕𑀳𑀧𑀢𑀺𑀦𑁄 𑀤𑁆𑀯𑁂 𑀤𑀸𑀭𑀓𑀸 𑀳𑁄𑀦𑁆𑀢𑀺 𑀧𑀼𑀢𑁆𑀢𑁄 𑀘 𑀪𑀸𑀕𑀺𑀦𑁂𑀬𑁆𑀬𑁄 𑀘. 𑀅𑀣 𑀲𑁄 𑀕𑀳𑀧𑀢𑀺 𑀕𑀺𑀮𑀸𑀦𑁄 𑀳𑀼𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀅𑀚𑁆𑀚𑀼𑀓𑀁 𑀏𑀢𑀤𑀯𑁄𑀘 𑁋 ‘‘𑀇𑀫𑀁, 𑀪𑀦𑁆𑀢𑁂, 𑀑𑀓𑀸𑀲𑀁 𑀬𑁄 𑀇𑀫𑁂𑀲𑀁 𑀤𑀸𑀭𑀓𑀸𑀦𑀁 𑀲𑀤𑁆𑀥𑁄 𑀳𑁄𑀢𑀺 𑀧𑀲𑀦𑁆𑀦𑁄, 𑀢𑀲𑁆𑀲 𑀆𑀘𑀺𑀓𑁆𑀔𑁂𑀬𑁆𑀬𑀸𑀲𑀻’’𑀢𑀺. 𑀢𑁂𑀦 𑀘 𑀲𑀫𑀬𑁂𑀦 𑀢𑀲𑁆𑀲 𑀘 𑀕𑀳𑀧𑀢𑀺𑀦𑁄 𑀪𑀸𑀕𑀺𑀦𑁂𑀬𑁆𑀬𑁄 𑀲𑀤𑁆𑀥𑁄 𑀳𑁄𑀢𑀺 𑀧𑀲𑀦𑁆𑀦𑁄. 𑀅𑀣𑀸𑀬𑀲𑁆𑀫𑀸 𑀅𑀚𑁆𑀚𑀼𑀓𑁄 𑀢𑀁 𑀑𑀓𑀸𑀲𑀁 𑀢𑀲𑁆𑀲 𑀤𑀸𑀭𑀓𑀲𑁆𑀲 𑀆𑀘𑀺𑀓𑁆𑀔𑀺. 𑀲𑁄 𑀢𑁂𑀦 𑀲𑀸𑀧𑀢𑁂𑀬𑁆𑀬𑁂𑀦 𑀓𑀼𑀝𑀼𑀫𑁆𑀩𑀜𑁆𑀘 𑀲𑀡𑁆𑀞𑀧𑁂𑀲𑀺, 𑀤𑀸𑀦𑀜𑁆𑀘 𑀧𑀝𑁆𑀞𑀧𑁂𑀲𑀺. 𑀅𑀣 𑀢𑀲𑁆𑀲 𑀕𑀳𑀧𑀢𑀺𑀦𑁄 𑀧𑀼𑀢𑁆𑀢𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂 𑀆𑀦𑀦𑁆𑀤, 𑀧𑀺𑀢𑀼𑀦𑁄 𑀤𑀸𑀬𑀚𑁆𑀚𑁄 𑀧𑀼𑀢𑁆𑀢𑁄 𑀯𑀸 𑀪𑀸𑀕𑀺𑀦𑁂𑀬𑁆𑀬𑁄 𑀯𑀸’’𑀢𑀺. 𑀧𑀼𑀢𑁆𑀢𑁄 𑀔𑁄, 𑀆𑀯𑀼𑀲𑁄, 𑀧𑀺𑀢𑀼𑀦𑁄 𑀤𑀸𑀬𑀚𑁆𑀚𑁄𑀢𑀺. 𑀆𑀬𑀲𑁆𑀫𑀸, 𑀪𑀦𑁆𑀢𑁂, 𑀅𑀬𑁆𑀬𑁄 𑀅𑀚𑁆𑀚𑀼𑀓𑁄 𑀅𑀫𑁆𑀳𑀸𑀓𑀁 𑀲𑀸𑀧𑀢𑁂𑀬𑁆𑀬𑀁 𑀅𑀫𑁆𑀳𑀸𑀓𑀁 𑀫𑁂𑀣𑀼𑀦𑀓𑀲𑁆𑀲 𑀆𑀘𑀺𑀓𑁆𑀔𑀻𑀢𑀺. 𑀅𑀲𑁆𑀲𑀫𑀡𑁄, 𑀆𑀯𑀼𑀲𑁄, 𑀲𑁄 𑀅𑀚𑁆𑀚𑀼𑀓𑁄𑀢𑀺. 𑀅𑀣𑀸𑀬𑀲𑁆𑀫𑀸 𑀅𑀚𑁆𑀚𑀼𑀓𑁄 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀤𑁂𑀳𑀺 𑀫𑁂, 𑀆𑀯𑀼𑀲𑁄 𑀆𑀦𑀦𑁆𑀤, 𑀯𑀺𑀦𑀺𑀘𑁆𑀙𑀬’’𑀦𑁆𑀢𑀺. 𑀢𑁂 𑀉𑀪𑁄𑀧𑀺 𑀉𑀧𑀸𑀮𑀺𑀢𑁆𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀅𑀕𑀫𑀁𑀲𑀼. 𑀅𑀣𑀸𑀬𑀲𑁆𑀫𑀸 𑀉𑀧𑀸𑀮𑀺, 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀏𑀢𑀤𑀯𑁄𑀘 𑁋 ‘‘𑀬𑁄 𑀦𑀼 𑀔𑁄, 𑀆𑀯𑀼𑀲𑁄 𑀆𑀦𑀦𑁆𑀤, 𑀲𑀸𑀫𑀺𑀓𑁂𑀦 ‘𑀇𑀫𑀁 𑀑𑀓𑀸𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀘𑀺𑀓𑁆𑀔𑀸’𑀢𑀺 𑀯𑀼𑀢𑁆𑀢𑁄, 𑀢𑀲𑁆𑀲 𑀆𑀘𑀺𑀓𑁆𑀔𑀢𑀺, 𑀓𑀺𑀁 𑀲𑁄 𑀆𑀧𑀚𑁆𑀚𑀢𑀻’’𑀢𑀺? 𑀦, 𑀪𑀦𑁆𑀢𑁂, 𑀓𑀺𑀜𑁆𑀘𑀺 𑀆𑀧𑀚𑁆𑀚𑀢𑀺 𑀅𑀦𑁆𑀢𑀫𑀲𑁄 𑀤𑀼𑀓𑁆𑀓𑀝𑀫𑀢𑁆𑀣𑀫𑁆𑀧𑀻𑀢𑀺. 𑀅𑀬𑀁, 𑀆𑀯𑀼𑀲𑁄, 𑀆𑀬𑀲𑁆𑀫𑀸 𑀅𑀚𑁆𑀚𑀼𑀓𑁄 𑀲𑀸𑀫𑀺𑀓𑁂𑀦 ‘‘𑀇𑀫𑀁 𑀑𑀓𑀸𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀆𑀘𑀺𑀓𑁆𑀔𑀸’’𑀢𑀺 𑀯𑀼𑀢𑁆𑀢𑁄 𑀢𑀲𑁆𑀲 𑀆𑀘𑀺𑀓𑁆𑀔𑀢𑀺, 𑀅𑀦𑀸𑀧𑀢𑁆𑀢𑀺, 𑀆𑀯𑀼𑀲𑁄, 𑀆𑀬𑀲𑁆𑀫𑀢𑁄 𑀅𑀚𑁆𑀚𑀼𑀓𑀲𑁆𑀲𑀸𑀢𑀺. 𑀪𑀕𑀯𑀸 𑀢𑀁 𑀲𑀼𑀢𑁆𑀯𑀸 ‘‘𑀲𑀼𑀓𑀣𑀺𑀢𑀁, 𑀪𑀺𑀓𑁆𑀔𑀯𑁂, 𑀉𑀧𑀸𑀮𑀺𑀦𑀸’’𑀢𑀺 𑀯𑀢𑁆𑀯𑀸 ¶ 𑀲𑀸𑀥𑀼𑀓𑀸𑀭𑀫𑀤𑀸𑀲𑀺, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀓𑀼𑀫𑀸𑀭𑀓𑀲𑁆𑀲𑀧𑀯𑀢𑁆𑀣𑀼 (𑀅. 𑀦𑀺. 𑀅𑀝𑁆𑀞. 𑁧.𑁧.𑁨𑁧𑁭) 𑀧𑀦 𑀳𑁂𑀝𑁆𑀞𑀸 𑀆𑀕𑀢𑀫𑁂𑀯.

𑀙𑀦𑁆𑀦𑀁 𑀔𑀢𑁆𑀢𑀺𑀬𑀸𑀦𑀦𑁆𑀢𑀺 𑀪𑀤𑁆𑀤𑀺𑀬𑁄 𑀲𑀓𑁆𑀬𑀭𑀸𑀚𑀸 𑀅𑀦𑀼𑀭𑀼𑀤𑁆𑀥𑁄 𑀆𑀦𑀦𑁆𑀤𑁄 𑀪𑀕𑀼 𑀓𑀺𑀫𑀺𑀮𑁄 𑀤𑁂𑀯𑀤𑀢𑁆𑀢𑁄𑀢𑀺 𑀇𑀫𑁂𑀲𑀁 ¶ 𑀙𑀦𑁆𑀦𑀁 𑀔𑀢𑁆𑀢𑀺𑀬𑀸𑀦𑀁. 𑀧𑀲𑀸𑀥𑀓𑁄𑀢𑀺 𑀫𑀡𑁆𑀟𑀬𑀺𑀢𑀸. 𑀧𑀸𑀴𑀺𑀬𑀦𑁆𑀢𑀺 𑀲𑀗𑁆𑀖𑀪𑁂𑀤𑀓𑁆𑀔𑀦𑁆𑀥𑀓𑀧𑀸𑀴𑀺𑀬𑀦𑁆𑀢𑀺 (𑀘𑀽𑀴𑀯. 𑁩𑁩𑁦 𑀆𑀤𑀬𑁄).

𑀦𑀦𑁆𑀤𑀓𑀢𑁆𑀣𑁂𑀭𑀯𑀢𑁆𑀣𑀼

𑁨𑁨𑁯. 𑀲𑀢𑁆𑀢𑀫𑁂 𑀏𑀓𑀲𑀫𑁄𑀥𑀸𑀦𑁂𑀢𑀺 𑀏𑀓𑀲𑁆𑀫𑀺𑀁 𑀲𑀫𑁄𑀥𑀸𑀦𑁂, 𑀏𑀓𑀲𑁆𑀫𑀺𑀁 𑀲𑀦𑁆𑀦𑀺𑀧𑀸𑀢𑁂𑀢𑀺 𑀅𑀢𑁆𑀣𑁄. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀦𑀦𑁆𑀤𑀢𑁆𑀣𑁂𑀭𑀯𑀢𑁆𑀣𑀼

𑁨𑁩𑁦. 𑀅𑀝𑁆𑀞𑀫𑁂 𑀦 𑀢𑀁 𑀘𑀢𑀼𑀲𑀫𑁆𑀧𑀚𑀜𑁆𑀜𑀯𑀲𑁂𑀦 𑀅𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀑𑀮𑁄𑀓𑁂𑀢𑀻𑀢𑀺 𑀲𑀸𑀢𑁆𑀣𑀓𑀲𑀧𑁆𑀧𑀸𑀬𑀕𑁄𑀘𑀭𑀅𑀲𑀫𑁆𑀫𑁄𑀳𑀲𑀫𑁆𑀧𑀚𑀜𑁆𑀜𑀲𑀗𑁆𑀔𑀸𑀢𑀸𑀦𑀁 𑀘𑀢𑀼𑀦𑁆𑀦𑀁 𑀲𑀫𑁆𑀧𑀚𑀜𑁆𑀜𑀸𑀦𑀁 𑀯𑀲𑁂𑀦 𑀅𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀁 𑀤𑀺𑀲𑀁 𑀦 𑀑𑀮𑁄𑀓𑁂𑀢𑀺. 𑀲𑁄 𑀳𑀺 𑀆𑀬𑀲𑁆𑀫𑀸 ‘‘𑀬𑀫𑁂𑀯𑀸𑀳𑀁 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀁 𑀦𑀺𑀲𑁆𑀲𑀸𑀬 𑀲𑀸𑀲𑀦𑁂 𑀅𑀦𑀪𑀺𑀭𑀢𑀺𑀆𑀤𑀺𑀯𑀺𑀧𑁆𑀧𑀓𑀸𑀭𑀧𑁆𑀧𑀢𑁆𑀢𑁄, 𑀢𑀫𑁂𑀯 𑀲𑀼𑀝𑁆𑀞𑀼 𑀦𑀺𑀕𑁆𑀕𑀳𑁂𑀲𑁆𑀲𑀸𑀫𑀻’’𑀢𑀺 𑀉𑀲𑁆𑀲𑀸𑀳𑀚𑀸𑀢𑁄 𑀩𑀮𑀯𑀳𑀺𑀭𑁄𑀢𑁆𑀢𑀧𑁆𑀧𑁄, 𑀢𑀢𑁆𑀣 𑀘 𑀓𑀢𑀸𑀥𑀺𑀓𑀸𑀭𑀢𑁆𑀢𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄 𑀉𑀓𑁆𑀓𑀁𑀲𑀧𑀸𑀭𑀫𑀺𑀧𑁆𑀧𑀢𑁆𑀢𑁄 𑀘𑀢𑀼𑀲𑀫𑁆𑀧𑀚𑀜𑁆𑀜𑀁 𑀅𑀫𑀼𑀜𑁆𑀘𑀺𑀢𑁆𑀯𑀸𑀯 𑀲𑀩𑁆𑀩𑀤𑀺𑀲𑀁 𑀆𑀮𑁄𑀓𑁂𑀢𑀺. 𑀯𑀼𑀢𑁆𑀢𑀜𑁆𑀘𑁂𑀢𑀁 𑀪𑀕𑀯𑀢𑀸 𑁋

‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀦𑀦𑁆𑀤𑀲𑁆𑀲 𑀧𑀼𑀭𑀢𑁆𑀣𑀺𑀫𑀸 𑀤𑀺𑀲𑀸 𑀆𑀮𑁄𑀓𑁂𑀢𑀩𑁆𑀩𑀸 𑀳𑁄𑀢𑀺, 𑀲𑀩𑁆𑀩𑀁 𑀘𑁂𑀢𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀦𑀦𑁆𑀤𑁄 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀆𑀮𑁄𑀓𑁂𑀢𑀺 ‘𑀏𑀯𑀁 𑀫𑁂 𑀧𑀼𑀭𑀢𑁆𑀣𑀺𑀫𑀁 𑀤𑀺𑀲𑀁 𑀆𑀮𑁄𑀓𑀬𑀢𑁄 𑀦𑀸𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑀯𑀺𑀲𑁆𑀲𑀦𑁆𑀢𑀻’𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀲𑀘𑁂, 𑀪𑀺𑀓𑁆𑀔𑀯𑁂, 𑀦𑀦𑁆𑀤𑀲𑁆𑀲 𑀧𑀘𑁆𑀙𑀺𑀫𑀸 𑀤𑀺𑀲𑀸, 𑀉𑀢𑁆𑀢𑀭𑀸 𑀤𑀺𑀲𑀸, 𑀤𑀓𑁆𑀔𑀺𑀡𑀸 𑀤𑀺𑀲𑀸, 𑀉𑀤𑁆𑀥𑀁, 𑀅𑀥𑁄, 𑀅𑀦𑀼𑀤𑀺𑀲𑀸 𑀅𑀦𑀼𑀯𑀺𑀮𑁄𑀓𑁂𑀢𑀩𑁆𑀩𑀸 𑀳𑁄𑀢𑀺, 𑀲𑀩𑁆𑀩𑀁 𑀘𑁂𑀢𑀲𑁄 𑀲𑀫𑀦𑁆𑀦𑀸𑀳𑀭𑀺𑀢𑁆𑀯𑀸 𑀦𑀦𑁆𑀤𑁄 𑀅𑀦𑀼𑀤𑀺𑀲𑀁 𑀅𑀦𑀼𑀯𑀺𑀮𑁄𑀓𑁂𑀢𑀺 ‘𑀏𑀯𑀁 𑀫𑁂 𑀅𑀦𑀼𑀤𑀺𑀲𑀁 𑀅𑀦𑀼𑀯𑀺𑀮𑁄𑀓𑀬𑀢𑁄…𑀧𑁂… 𑀲𑀫𑁆𑀧𑀚𑀸𑀦𑁄 𑀳𑁄𑀢𑀻’’’𑀢𑀺 (𑀅. 𑀦𑀺. 𑁮.𑁯).

𑀅𑀪𑀺𑀲𑁂𑀓𑀕𑁂𑀳𑀧𑀯𑁂𑀲𑀦𑀆𑀯𑀸𑀳𑀫𑀗𑁆𑀕𑀮𑁂𑀲𑀼 ¶ 𑀯𑀢𑁆𑀢𑀫𑀸𑀦𑁂𑀲𑀽𑀢𑀺 𑀇𑀥 𑀢𑀻𑀡𑀺 𑀫𑀗𑁆𑀕𑀮𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀯𑀺𑀦𑀬𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀢𑀁 𑀤𑀺𑀯𑀲𑀫𑁂𑀯 𑀦𑀦𑁆𑀤𑀓𑀼𑀫𑀸𑀭𑀲𑁆𑀲 𑀓𑁂𑀲𑀯𑀺𑀲𑁆𑀲𑀚𑁆𑀚𑀦𑀁, 𑀧𑀝𑁆𑀝𑀩𑀦𑁆𑀥𑁄, 𑀖𑀭𑀫𑀗𑁆𑀕𑀮𑀁, 𑀙𑀢𑁆𑀢𑀫𑀗𑁆𑀕𑀮𑀁, 𑀆𑀯𑀸𑀳𑀫𑀗𑁆𑀕𑀮𑀦𑁆𑀢𑀺 𑀧𑀜𑁆𑀘 𑀫𑀗𑁆𑀕𑀮𑀸𑀦𑀺 𑀳𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀼𑀮𑀫𑀭𑀺𑀬𑀸𑀤𑀯𑀲𑁂𑀦 𑀓𑁂𑀲𑁄𑀭𑁄𑀧𑀦𑀁 𑀓𑁂𑀲𑀯𑀺𑀲𑁆𑀲𑀚𑁆𑀚𑀦𑀁. 𑀬𑀼𑀯𑀭𑀸𑀚𑀧𑀝𑁆𑀝𑀩𑀦𑁆𑀥𑀦𑀁 𑀧𑀝𑁆𑀝𑀩𑀦𑁆𑀥𑁄. 𑀅𑀪𑀺𑀦𑀯𑀖𑀭𑀧𑁆𑀧𑀯𑁂𑀲𑀦𑀫𑀳𑁄 𑀖𑀭𑀫𑀗𑁆𑀕𑀮𑀁. 𑀯𑀺𑀯𑀸𑀳𑀓𑀭𑀡𑀫𑀳𑁄 𑀆𑀯𑀸𑀳𑀫𑀗𑁆𑀕𑀮𑀁. 𑀬𑀼𑀯𑀭𑀸𑀚𑀙𑀢𑁆𑀢𑀫𑀳𑁄 𑀙𑀢𑁆𑀢𑀫𑀗𑁆𑀕𑀮𑀁.

𑀦𑀦𑁆𑀤𑀓𑀼𑀫𑀸𑀭𑀁 ¶ 𑀅𑀪𑀺𑀲𑁂𑀓𑀫𑀗𑁆𑀕𑀮𑀁 𑀦 𑀢𑀣𑀸 𑀧𑀻𑀴𑁂𑀲𑀺, 𑀬𑀣𑀸 𑀚𑀦𑀧𑀤𑀓𑀮𑁆𑀬𑀸𑀡𑀺𑀬𑀸 𑀯𑀼𑀢𑁆𑀢𑀯𑀘𑀦𑀦𑁆𑀢𑀺 𑀅𑀚𑁆𑀛𑀸𑀳𑀭𑀺𑀢𑀩𑁆𑀩𑀁. 𑀢𑀤𑁂𑀯 𑀧𑀦 𑀯𑀘𑀦𑀁 𑀲𑀭𑀽𑀧𑀢𑁄 𑀤𑀲𑁆𑀲𑁂𑀢𑀼𑀁 𑁋 ‘‘𑀧𑀢𑁆𑀢𑀁 𑀆𑀤𑀸𑀬 𑀕𑀫𑀦𑀓𑀸𑀮𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀚𑀦𑀧𑀤𑀓𑀮𑁆𑀬𑀸𑀡𑀻𑀢𑀺 𑀚𑀦𑀧𑀤𑀫𑁆𑀳𑀺 𑀓𑀮𑁆𑀬𑀸𑀡𑀻 𑀉𑀢𑁆𑀢𑀫𑀸 𑀙 𑀲𑀭𑀻𑀭𑀤𑁄𑀲𑀭𑀳𑀺𑀢𑀸 𑀧𑀜𑁆𑀘 𑀓𑀮𑁆𑀬𑀸𑀡𑀲𑀫𑀦𑁆𑀦𑀸𑀕𑀢𑀸. 𑀲𑀸 𑀳𑀺 𑀬𑀲𑁆𑀫𑀸 𑀦𑀸𑀢𑀺𑀤𑀻𑀖𑀸 𑀦𑀸𑀢𑀺𑀭𑀲𑁆𑀲𑀸 𑀦𑀸𑀢𑀺𑀓𑀺𑀲𑀸 𑀦𑀸𑀢𑀺𑀣𑀽𑀮𑀸 𑀦𑀸𑀢𑀺𑀓𑀸𑀴𑀻 𑀦𑀸𑀘𑁆𑀘𑁄𑀤𑀸𑀢𑀸𑀢𑀺 𑀅𑀢𑀺𑀓𑁆𑀓𑀦𑁆𑀢𑀸 𑀫𑀸𑀦𑀼𑀲𑀯𑀡𑁆𑀡𑀁, 𑀅𑀲𑀫𑁆𑀧𑀢𑁆𑀢𑀸 𑀤𑀺𑀩𑁆𑀩𑀯𑀡𑁆𑀡𑀁, 𑀢𑀲𑁆𑀫𑀸 𑀙 𑀲𑀭𑀻𑀭𑀤𑁄𑀲𑀭𑀳𑀺𑀢𑀸. 𑀙𑀯𑀺𑀓𑀮𑁆𑀬𑀸𑀡𑀁 𑀫𑀁𑀲𑀓𑀮𑁆𑀬𑀸𑀡𑀁 𑀦𑁆𑀳𑀸𑀭𑀼𑀓𑀮𑁆𑀬𑀸𑀡𑀁 𑀅𑀝𑁆𑀞𑀺𑀓𑀮𑁆𑀬𑀸𑀡𑀁 𑀯𑀬𑀓𑀮𑁆𑀬𑀸𑀡𑀦𑁆𑀢𑀺 𑀇𑀫𑁂𑀳𑀺 𑀧𑀦 𑀓𑀮𑁆𑀬𑀸𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀧𑀜𑁆𑀘 𑀓𑀮𑁆𑀬𑀸𑀡𑀲𑀫𑀦𑁆𑀦𑀸𑀕𑀢𑀸 𑀦𑀸𑀫. 𑀢𑀲𑁆𑀲𑀸 𑀳𑀺 𑀆𑀕𑀦𑁆𑀢𑀼𑀓𑁄𑀪𑀸𑀲𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀅𑀢𑁆𑀢𑀦𑁄 𑀲𑀭𑀻𑀭𑁄𑀪𑀸𑀲𑁂𑀦𑁂𑀯 𑀤𑁆𑀯𑀸𑀤𑀲𑀳𑀢𑁆𑀣𑁂 𑀞𑀸𑀦𑁂 𑀆𑀮𑁄𑀓𑀁 𑀓𑀭𑁄𑀢𑀺, 𑀧𑀺𑀬𑀗𑁆𑀕𑀼𑀲𑀸𑀫𑀸 𑀯𑀸 𑀳𑁄𑀢𑀺 𑀲𑀼𑀯𑀡𑁆𑀡𑀲𑀸𑀫𑀸 𑀯𑀸, 𑀅𑀬𑀫𑀲𑁆𑀲𑀸 𑀙𑀯𑀺𑀓𑀮𑁆𑀬𑀸𑀡𑀢𑀸. 𑀘𑀢𑁆𑀢𑀸𑀭𑁄 𑀧𑀦𑀲𑁆𑀲𑀸 𑀳𑀢𑁆𑀣𑀧𑀸𑀤𑀸 𑀫𑀼𑀔𑀧𑀭𑀺𑀬𑁄𑀲𑀸𑀦𑀜𑁆𑀘 𑀮𑀸𑀔𑀸𑀭𑀲𑀧𑀭𑀺𑀓𑀫𑁆𑀫𑀓𑀢𑀁 𑀯𑀺𑀬 𑀭𑀢𑁆𑀢𑀧𑀯𑀸𑀴𑀭𑀢𑁆𑀢𑀓𑀫𑁆𑀩𑀮𑀲𑀤𑀺𑀲𑀁 𑀳𑁄𑀢𑀺, 𑀅𑀬𑀫𑀲𑁆𑀲𑀸 𑀫𑀁𑀲𑀓𑀮𑁆𑀬𑀸𑀡𑀢𑀸. 𑀯𑀻𑀲𑀢𑀺 𑀧𑀦 𑀦𑀔𑀧𑀢𑁆𑀢𑀸𑀦𑀺 𑀫𑀁𑀲𑀢𑁄 𑀅𑀫𑀼𑀢𑁆𑀢𑀝𑁆𑀞𑀸𑀦𑁂 𑀮𑀸𑀔𑀸𑀭𑀲𑀧𑀽𑀭𑀺𑀢𑀸𑀦𑀺 𑀯𑀺𑀬, 𑀫𑀼𑀢𑁆𑀢𑀝𑁆𑀞𑀸𑀦𑁂 𑀔𑀻𑀭𑀥𑀸𑀭𑀸𑀲𑀤𑀺𑀲𑀸𑀦𑀺 𑀳𑁄𑀦𑁆𑀢𑀺, 𑀅𑀬𑀫𑀲𑁆𑀲𑀸 𑀦𑁆𑀳𑀸𑀭𑀼𑀓𑀮𑁆𑀬𑀸𑀡𑀢𑀸. 𑀤𑁆𑀯𑀢𑁆𑀢𑀺𑀁𑀲 𑀤𑀦𑁆𑀢𑀸 𑀲𑀼𑀨𑀼𑀲𑀺𑀢𑀸 𑀲𑀼𑀥𑁄𑀢𑀯𑀚𑀺𑀭𑀧𑀦𑁆𑀢𑀺 𑀯𑀺𑀬 𑀔𑀸𑀬𑀦𑁆𑀢𑀺, 𑀅𑀬𑀫𑀲𑁆𑀲𑀸 𑀅𑀝𑁆𑀞𑀺𑀓𑀮𑁆𑀬𑀸𑀡𑀢𑀸. 𑀯𑀻𑀲𑀁𑀯𑀲𑁆𑀲𑀲𑀢𑀺𑀓𑀸𑀧𑀺 𑀲𑀫𑀸𑀦𑀸 𑀲𑁄𑀴𑀲𑀯𑀲𑁆𑀲𑀼𑀤𑁆𑀤𑁂𑀲𑀺𑀓𑀸 𑀯𑀺𑀬 𑀳𑁄𑀢𑀺 𑀦𑀺𑀧𑁆𑀧𑀮𑀺𑀢𑁂𑀦, 𑀅𑀬𑀫𑀲𑁆𑀲𑀸 𑀯𑀬𑀓𑀮𑁆𑀬𑀸𑀡𑀢𑀸. 𑀇𑀢𑀺 𑀇𑀫𑁂𑀳𑀺 𑀧𑀜𑁆𑀘𑀳𑀺 𑀓𑀮𑁆𑀬𑀸𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 ‘‘𑀚𑀦𑀧𑀤𑀓𑀮𑁆𑀬𑀸𑀡𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑀼𑀯𑀝𑀦𑁆𑀢𑀺 𑀲𑀻𑀖𑀁.

𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦𑀺𑀯𑀢𑁆𑀢𑁂𑀲𑁆𑀲𑀢𑀺, 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀦𑀺𑀯𑀢𑁆𑀢𑁂𑀲𑁆𑀲𑀢𑀻𑀢𑀺 𑀘𑀺𑀦𑁆𑀢𑁂𑀦𑁆𑀢𑀫𑁂𑀯𑀸𑀢𑀺 𑀲𑁄 𑀓𑀺𑀭 𑀢𑀣𑀸𑀕𑀢𑁂 𑀕𑀸𑀭𑀯𑀯𑀲𑁂𑀦 ‘‘𑀧𑀢𑁆𑀢𑀁 𑀯𑁄, 𑀪𑀦𑁆𑀢𑁂, 𑀕𑀡𑁆𑀳𑀣𑀸’’𑀢𑀺 𑀯𑀢𑁆𑀢𑀼𑀁 𑀅𑀯𑀺𑀲𑀳𑀦𑁆𑀢𑁄 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀲𑁄𑀧𑀸𑀦𑀲𑀻𑀲𑁂 𑀧𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 ¶ . 𑀲𑀢𑁆𑀣𑀸 𑀢𑀲𑁆𑀫𑀺𑀫𑁆𑀧𑀺 𑀞𑀸𑀦𑁂 𑀦 𑀕𑀡𑁆𑀳𑀺. 𑀇𑀢𑀭𑁄 ‘‘𑀲𑁄𑀧𑀸𑀦𑀧𑀸𑀤𑀫𑀽𑀮𑁂 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀢𑁆𑀣𑀸 𑀢𑀢𑁆𑀣𑀸𑀧𑀺 𑀦 𑀕𑀡𑁆𑀳𑀺. 𑀇𑀢𑀭𑁄 ‘‘𑀭𑀸𑀚𑀗𑁆𑀕𑀡𑁂 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀲𑀢𑁆𑀣𑀸 𑀢𑀢𑁆𑀣𑀸𑀧𑀺 𑀦 𑀕𑀡𑁆𑀳𑀺. 𑀏𑀯𑀁 ‘‘𑀇𑀥 𑀕𑀡𑁆𑀳𑀺𑀲𑁆𑀲𑀢𑀺, 𑀏𑀢𑁆𑀣 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺 𑀘𑀺𑀦𑁆𑀢𑁂𑀦𑁆𑀢𑀫𑁂𑀯 𑀲𑀢𑁆𑀣𑀸 𑀯𑀺𑀳𑀸𑀭𑀁 𑀦𑁂𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺.

𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑀯𑀢𑁆𑀣𑀼

𑁨𑁩𑁧. 𑀦𑀯𑀫𑁂 𑀲𑀼𑀢𑀯𑀺𑀢𑁆𑀢𑀓𑁄𑀢𑀺 𑀥𑀫𑁆𑀫𑀲𑁆𑀲𑀯𑀦𑀧𑀺𑀬𑁄. 𑀧𑀝𑀺𑀳𑀸𑀭𑀓𑀲𑁆𑀲𑀸𑀢𑀺 𑀤𑁄𑀯𑀸𑀭𑀺𑀓𑀲𑁆𑀲. 𑀲𑀘𑁆𑀘𑀓𑀸𑀭𑁂𑀦𑀸𑀢𑀺 𑀲𑀘𑁆𑀘𑀓𑀺𑀭𑀺𑀬𑀸𑀬. 𑀲𑀢𑁆𑀣𑀸 ‘‘𑀉𑀧𑁆𑀧𑀮𑀯𑀡𑁆𑀡𑀸 𑀆𑀕𑀘𑁆𑀙𑀢𑀽’’𑀢𑀺 𑀘𑀺𑀦𑁆𑀢𑁂𑀲𑀺. 𑀣𑁂𑀭𑀻 𑀆𑀕𑀦𑁆𑀢𑁆𑀯𑀸 𑀲𑀩𑁆𑀩𑀸 𑀧𑀩𑁆𑀩𑀸𑀚𑁂𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀉𑀧𑀲𑁆𑀲𑀬𑀁 𑀕𑀢𑀸𑀢𑀺 𑀇𑀤𑀁 𑀅𑀗𑁆𑀕𑀼𑀢𑁆𑀢𑀭𑀪𑀸𑀡𑀓𑀸𑀦𑀁 𑀓𑀣𑀸𑀫𑀕𑁆𑀕𑀁 𑀤𑀲𑁆𑀲𑁂𑀦𑁆𑀢𑁂𑀦 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀥𑀫𑁆𑀫𑀧𑀤𑀝𑁆𑀞𑀓𑀣𑀸𑀬𑀁 (𑀥. 𑀧. 𑀅𑀝𑁆𑀞. 𑁧.𑀫𑀳𑀸𑀓𑀧𑁆𑀧𑀺𑀦𑀢𑁆𑀣𑁂𑀭𑀯𑀢𑁆𑀣𑀼) 𑀯𑀼𑀢𑁆𑀢𑀁 𑁋

‘‘𑀢𑀸 ¶ 𑀲𑀢𑁆𑀣𑀸𑀭𑀁 𑀯𑀦𑁆𑀤𑀺𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺𑀁𑀲𑀼. 𑀏𑀯𑀁 𑀓𑀺𑀭 𑀯𑀼𑀢𑁆𑀢𑁂 𑀲𑀢𑁆𑀣𑀸 𑀉𑀧𑁆𑀧𑀮𑀯𑀡𑁆𑀡𑀸𑀬 𑀆𑀕𑀫𑀦𑀁 𑀘𑀺𑀦𑁆𑀢𑁂𑀲𑀻𑀢𑀺 𑀏𑀓𑀘𑁆𑀘𑁂 𑀯𑀤𑀦𑁆𑀢𑀺. 𑀲𑀢𑁆𑀣𑀸 𑀧𑀦 𑀢𑀸 𑀉𑀧𑀸𑀲𑀺𑀓𑀸𑀬𑁄 𑀆𑀳 𑁋 ‘𑀲𑀸𑀯𑀢𑁆𑀣𑀺𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀉𑀧𑀲𑁆𑀲𑀬𑁂 𑀧𑀩𑁆𑀩𑀸𑀚𑁂𑀣𑀸’𑀢𑀺. 𑀢𑀸 𑀅𑀦𑀼𑀧𑀼𑀩𑁆𑀩𑁂𑀦 𑀚𑀦𑀧𑀤𑀘𑀸𑀭𑀺𑀓𑀁 𑀘𑀭𑀫𑀸𑀦𑀸 𑀅𑀦𑁆𑀢𑀭𑀸𑀫𑀕𑁆𑀕𑁂 𑀫𑀳𑀸𑀚𑀦𑁂𑀦 𑀅𑀪𑀺𑀳𑀝𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀸 𑀧𑀤𑀲𑀸𑀯 𑀯𑀻𑀲𑀬𑁄𑀚𑀦𑀲𑀢𑀺𑀓𑀁 𑀫𑀕𑁆𑀕𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀉𑀧𑀲𑁆𑀲𑀬𑁂 𑀧𑀩𑁆𑀩𑀚𑀺𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺𑀁𑀲𑀽’’𑀢𑀺.

𑀥𑀫𑁆𑀫𑀧𑀻𑀢𑀻𑀢𑀺 𑀥𑀫𑁆𑀫𑀧𑀸𑀬𑀓𑁄, 𑀥𑀫𑁆𑀫𑀁 𑀧𑀺𑀯𑀦𑁆𑀢𑁄𑀢𑀺 𑀅𑀢𑁆𑀣𑁄. 𑀥𑀫𑁆𑀫𑁄 𑀘 𑀦𑀸𑀫𑁂𑀲 𑀦 𑀲𑀓𑁆𑀓𑀸 𑀪𑀸𑀚𑀦𑁂𑀦 𑀬𑀸𑀕𑀼𑀆𑀤𑀻𑀦𑀺 𑀯𑀺𑀬 𑀧𑀸𑀢𑀼𑀁, 𑀦𑀯𑀯𑀺𑀥𑀁 𑀧𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀸𑀫𑀓𑀸𑀬𑁂𑀦 𑀨𑀼𑀲𑀦𑁆𑀢𑁄 𑀆𑀭𑀫𑁆𑀫𑀡𑀢𑁄 𑀲𑀘𑁆𑀙𑀺𑀓𑀭𑁄𑀦𑁆𑀢𑁄 𑀧𑀭𑀺𑀜𑁆𑀜𑀸𑀪𑀺𑀲𑀫𑀬𑀸𑀤𑀻𑀳𑀺 𑀤𑀼𑀓𑁆𑀔𑀸𑀤𑀻𑀦𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀧𑀝𑀺𑀯𑀺𑀚𑁆𑀛𑀦𑁆𑀢𑁄 𑀥𑀫𑁆𑀫𑀁 𑀧𑀺𑀯𑀢𑀺 𑀦𑀸𑀫. 𑀲𑀼𑀔𑀁 𑀲𑁂𑀢𑀻𑀢𑀺 𑀤𑁂𑀲𑀦𑀸𑀫𑀢𑁆𑀢𑀫𑁂𑀢𑀁, 𑀘𑀢𑀽𑀳𑀺𑀧𑀺 𑀇𑀭𑀺𑀬𑀸𑀧𑀣𑁂𑀳𑀺 𑀲𑀼𑀔𑀁 𑀯𑀺𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀯𑀺𑀧𑁆𑀧𑀲𑀦𑁆𑀦𑁂𑀦𑀸𑀢𑀺 𑀅𑀦𑀸𑀯𑀺𑀮𑁂𑀦 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑁂𑀦. 𑀅𑀭𑀺𑀬𑀧𑁆𑀧𑀯𑁂𑀤𑀺𑀢𑁂𑀢𑀺 𑀩𑀼𑀤𑁆𑀥𑀸𑀤𑀻𑀳𑀺 𑀅𑀭𑀺𑀬𑁂𑀳𑀺 𑀧𑀯𑁂𑀤𑀺𑀢𑁂 𑀲𑀢𑀺𑀧𑀝𑁆𑀞𑀸𑀦𑀸𑀤𑀺𑀪𑁂𑀤𑁂 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂. 𑀲𑀤𑀸 𑀭𑀫𑀢𑀻𑀢𑀺 𑀏𑀯𑀭𑀽𑀧𑁄 𑀥𑀫𑁆𑀫𑀧𑀻𑀢𑀺 𑀯𑀺𑀧𑁆𑀧𑀲𑀦𑁆𑀦𑁂𑀦 𑀘𑁂𑀢𑀲𑀸 𑀯𑀺𑀳𑀭𑀦𑁆𑀢𑁄 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑁄 𑀲𑀤𑀸 𑀭𑀫𑀢𑀺 𑀅𑀪𑀺𑀭𑀫𑀢𑀺. 𑀩𑀸𑀳𑀺𑀢𑀧𑀸𑀧𑀢𑁆𑀢𑀸 ‘‘𑀩𑁆𑀭𑀸𑀳𑁆𑀫𑀡𑀸’’𑀢𑀺 𑀣𑁂𑀭𑀁 𑀆𑀮𑀧𑀢𑀺.

𑀲𑀸𑀕𑀢𑀢𑁆𑀣𑁂𑀭𑀯𑀢𑁆𑀣𑀼

𑁨𑁩𑁨. 𑀤𑀲𑀫𑁂 ¶ 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀯𑀘𑀦𑁂𑀦𑀸𑀢𑀺 𑀓𑁄𑀲𑀫𑁆𑀩𑀺𑀓𑀸 𑀓𑀺𑀭 𑀉𑀧𑀸𑀲𑀓𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀕𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀏𑀯𑀫𑀸𑀳𑀁𑀲𑀼 𑁋 ‘‘𑀓𑀺𑀁, 𑀪𑀦𑁆𑀢𑁂, 𑀅𑀬𑁆𑀬𑀸𑀦𑀁 𑀤𑀼𑀮𑁆𑀮𑀪𑀜𑁆𑀘 𑀫𑀦𑀸𑀧𑀜𑁆𑀘, 𑀓𑀺𑀁 𑀧𑀝𑀺𑀬𑀸𑀤𑁂𑀫𑀸’’𑀢𑀺? 𑀏𑀯𑀁 𑀯𑀼𑀢𑁆𑀢𑁂 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀓𑁄𑀲𑀫𑁆𑀩𑀺𑀓𑁂 𑀉𑀧𑀸𑀲𑀓𑁂 𑀏𑀢𑀤𑀯𑁄𑀘𑀼𑀁 𑁋 ‘‘𑀅𑀢𑁆𑀣𑀸𑀯𑀼𑀲𑁄 𑀓𑀸𑀧𑁄𑀢𑀺𑀓𑀸, 𑀦𑀸𑀫 𑀧𑀲𑀦𑁆𑀦𑀸 𑀪𑀺𑀓𑁆𑀔𑀽𑀦𑀁 𑀤𑀼𑀮𑁆𑀮𑀪𑀸 𑀘 𑀫𑀦𑀸𑀧𑀸 𑀘, 𑀢𑀁 𑀧𑀝𑀺𑀬𑀸𑀤𑁂𑀣𑀸’’𑀢𑀺. 𑀅𑀣 𑀓𑁄𑀲𑀫𑁆𑀩𑀺𑀓𑀸 𑀉𑀧𑀸𑀲𑀓𑀸 𑀖𑀭𑁂 𑀖𑀭𑁂 𑀓𑀸𑀧𑁄𑀢𑀺𑀓𑀁 𑀧𑀲𑀦𑁆𑀦𑀁 𑀧𑀝𑀺𑀬𑀸𑀤𑁂𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀕𑀢𑀁 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀏𑀢𑀤𑀯𑁄𑀘𑀼𑀁 𑁋 ‘‘𑀧𑀺𑀯𑀢𑀼, 𑀪𑀦𑁆𑀢𑁂, 𑀅𑀬𑁆𑀬𑁄 𑀲𑀸𑀕𑀢𑁄 𑀓𑀸𑀧𑁄𑀢𑀺𑀓𑀁 𑀧𑀲𑀦𑁆𑀦𑀁, 𑀧𑀺𑀯𑀢𑀼, 𑀪𑀦𑁆𑀢𑁂, 𑀅𑀬𑁆𑀬𑁄 𑀲𑀸𑀕𑀢𑁄 𑀓𑀸𑀧𑁄𑀢𑀺𑀓𑀁 𑀧𑀲𑀦𑁆𑀦’’𑀦𑁆𑀢𑀺. 𑀅𑀣𑀸𑀬𑀲𑁆𑀫𑀸 𑀲𑀸𑀕𑀢𑁄 𑀖𑀭𑁂 𑀖𑀭𑁂 𑀓𑀸𑀧𑁄𑀢𑀺𑀓𑀁 𑀧𑀲𑀦𑁆𑀦𑀁 𑀧𑀺𑀯𑀺𑀢𑁆𑀯𑀸 𑀦𑀕𑀭𑀫𑁆𑀳𑀸 𑀦𑀺𑀓𑁆𑀔𑀫𑀦𑁆𑀢𑁄 𑀦𑀕𑀭𑀤𑁆𑀯𑀸𑀭𑁂 𑀧𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀯𑀘𑀦𑁂𑀦 𑀲𑀩𑁆𑀩𑀕𑁂𑀳𑁂𑀲𑀼 𑀓𑀸𑀧𑁄𑀢𑀺𑀓𑀁 𑀧𑀲𑀦𑁆𑀦𑀁 𑀧𑀝𑀺𑀬𑀸𑀤𑁂𑀢𑁆𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀓𑀸𑀧𑁄𑀢𑀺𑀓𑀸 𑀦𑀸𑀫 𑀓𑀧𑁄𑀢𑀧𑀸𑀤𑀲𑀫𑀸𑀦𑀯𑀡𑁆𑀡𑀸 𑀭𑀢𑁆𑀢𑁄𑀪𑀸𑀲𑀸. 𑀧𑀲𑀦𑁆𑀦𑀸𑀢𑀺 𑀲𑀼𑀭𑀸𑀫𑀡𑁆𑀟𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀺𑀦𑀬𑁂 𑀲𑀫𑀼𑀝𑁆𑀞𑀺𑀢𑀦𑁆𑀢𑀺 𑀲𑀼𑀭𑀸𑀧𑀸𑀦𑀲𑀺𑀓𑁆𑀔𑀸𑀧𑀤𑁂 (𑀧𑀸𑀘𑀺. 𑁩𑁨𑁬 𑀆𑀤𑀬𑁄) 𑀆𑀕𑀢𑀁.

𑀭𑀸𑀥𑀢𑁆𑀣𑁂𑀭𑀯𑀢𑁆𑀣𑀼

𑁨𑁩𑁩. 𑀏𑀓𑀸𑀤𑀲𑀫𑁂 ¶ 𑀲𑀢𑁆𑀣𑀸 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀲𑀜𑁆𑀜𑀁 𑀅𑀤𑀸𑀲𑀻𑀢𑀺 𑀩𑁆𑀭𑀸𑀳𑁆𑀫𑀡𑀁 𑀧𑀩𑁆𑀩𑀸𑀚𑁂𑀢𑀼𑀁 𑀲𑀜𑁆𑀜𑀁 𑀅𑀤𑀸𑀲𑀺, 𑀆𑀡𑀸𑀧𑁂𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀪𑀕𑀯𑀸 𑀓𑀺𑀭 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀧𑀩𑁆𑀩𑀚𑁆𑀚𑀁 𑀅𑀮𑀪𑀺𑀢𑁆𑀯𑀸 𑀓𑀺𑀲𑀁 𑀮𑀽𑀔𑀁 𑀤𑀼𑀩𑁆𑀩𑀡𑁆𑀡𑀁 𑀉𑀧𑁆𑀧𑀡𑁆𑀟𑀼𑀧𑁆𑀧𑀡𑁆𑀟𑀼𑀓𑀚𑀸𑀢𑀁 𑀤𑀺𑀲𑁆𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑁄, 𑀪𑀺𑀓𑁆𑀔𑀯𑁂, 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀥𑀺𑀓𑀸𑀭𑀁 𑀲𑀭𑀢𑀻’’𑀢𑀺. 𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀁 𑀔𑁄, 𑀪𑀦𑁆𑀢𑁂, 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀥𑀺𑀓𑀸𑀭𑀁 𑀲𑀭𑀸𑀫𑀻’’𑀢𑀺. 𑀓𑀺𑀁 𑀧𑀦 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀥𑀺𑀓𑀸𑀭𑀁 𑀲𑀭𑀲𑀻𑀢𑀺. 𑀇𑀥 𑀫𑁂, 𑀪𑀦𑁆𑀢𑁂, 𑀲𑁄 𑀩𑁆𑀭𑀸𑀳𑁆𑀫𑀡𑁄 𑀭𑀸𑀚𑀕𑀳𑁂 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀲𑁆𑀲 𑀓𑀝𑀘𑁆𑀙𑀼𑀪𑀺𑀓𑁆𑀔𑀁 𑀤𑀸𑀧𑁂𑀲𑀺, 𑀇𑀫𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀢𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀥𑀺𑀓𑀸𑀭𑀁 𑀲𑀭𑀸𑀫𑀻’’𑀢𑀺. 𑀲𑀸𑀥𑀼 𑀲𑀸𑀥𑀼, 𑀲𑀸𑀭𑀺𑀧𑀼𑀢𑁆𑀢. 𑀓𑀢𑀜𑁆𑀜𑀼𑀦𑁄 𑀳𑀺, 𑀲𑀸𑀭𑀺𑀧𑀼𑀢𑁆𑀢, 𑀲𑀧𑁆𑀧𑀼𑀭𑀺𑀲𑀸 𑀓𑀢𑀯𑁂𑀤𑀺𑀦𑁄, 𑀢𑁂𑀦 𑀳𑀺 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀢𑀁 𑀩𑁆𑀭𑀸𑀳𑁆𑀫𑀡𑀁 𑀧𑀩𑁆𑀩𑀸𑀚𑁂𑀳𑀺 𑀉𑀧𑀲𑀫𑁆𑀧𑀸𑀤𑁂𑀳𑀻𑀢𑀺. 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 𑀆𑀕𑀢𑁄𑀢𑀺 𑀅𑀮𑀻𑀦𑀘𑀺𑀢𑁆𑀢𑀚𑀸𑀢𑀓𑀲𑁆𑀲 (𑀚𑀸. 𑁧.𑁨.𑁧𑁧-𑁧𑁨) 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁 (𑀚𑀸. 𑀅𑀝𑁆𑀞. 𑁨.𑁨.𑀅𑀮𑀻𑀦𑀘𑀺𑀢𑁆𑀢𑀚𑀸𑀢𑀓𑀯𑀡𑁆𑀡𑀦𑀸) 𑀆𑀕𑀢𑁄.

𑀦𑀺𑀥𑀻𑀦𑀦𑁆𑀢𑀺 ¶ 𑀢𑀢𑁆𑀣 𑀢𑀢𑁆𑀣 𑀦𑀺𑀤𑀳𑀺𑀢𑁆𑀯𑀸 𑀞𑀧𑀺𑀢𑀸𑀦𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀺𑀧𑀽𑀭𑀸𑀦𑀁 𑀦𑀺𑀥𑀺𑀓𑀼𑀫𑁆𑀪𑀻𑀦𑀁. 𑀧𑀯𑀢𑁆𑀢𑀸𑀭𑀦𑁆𑀢𑀺 𑀓𑀺𑀘𑁆𑀙𑀚𑀻𑀯𑀺𑀓𑁂 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑁂 𑀅𑀦𑀼𑀓𑀫𑁆𑀧𑀁 𑀓𑀢𑁆𑀯𑀸 ‘‘𑀏𑀳𑀺, 𑀢𑁂 𑀲𑀼𑀔𑁂𑀦 𑀚𑀻𑀯𑀦𑀼𑀧𑀸𑀬𑀁 𑀤𑀲𑁆𑀲𑁂𑀲𑁆𑀲𑀸𑀫𑀻’’𑀢𑀺 𑀦𑀺𑀥𑀺𑀝𑁆𑀞𑀸𑀦𑀁 𑀦𑁂𑀢𑁆𑀯𑀸 𑀳𑀢𑁆𑀣𑀁 𑀧𑀲𑀸𑀭𑁂𑀢𑁆𑀯𑀸 ‘‘𑀇𑀫𑀁 𑀕𑀳𑁂𑀢𑁆𑀯𑀸 𑀲𑀼𑀔𑀁 𑀚𑀻𑀯𑀸’’𑀢𑀺 𑀆𑀘𑀺𑀓𑁆𑀔𑀺𑀢𑀸𑀭𑀁 𑀯𑀺𑀬. 𑀯𑀚𑁆𑀚𑀤𑀲𑁆𑀲𑀺𑀦𑀦𑁆𑀢𑀺 𑀤𑁆𑀯𑁂 𑀯𑀚𑁆𑀚𑀤𑀲𑁆𑀲𑀺𑀦𑁄 ‘‘𑀇𑀫𑀺𑀦𑀸 𑀦𑀁 𑀅𑀲𑀸𑀭𑀼𑀧𑁆𑀧𑁂𑀦 𑀯𑀸 𑀔𑀮𑀺𑀢𑁂𑀦 𑀯𑀸 𑀲𑀗𑁆𑀖𑀫𑀚𑁆𑀛𑁂 𑀦𑀺𑀕𑁆𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀭𑀦𑁆𑀥𑀕𑀯𑁂𑀲𑀓𑁄 𑀘, 𑀅𑀦𑀜𑁆𑀜𑀸𑀢𑀁 𑀜𑀸𑀧𑀦𑀢𑁆𑀣𑀸𑀬 𑀜𑀸𑀢𑀁 𑀅𑀦𑀼𑀕𑁆𑀕𑀡𑁆𑀳𑀦𑀢𑁆𑀣𑀸𑀬 𑀲𑀻𑀮𑀸𑀤𑀻𑀦𑀫𑀲𑁆𑀲 𑀯𑀼𑀤𑁆𑀥𑀺𑀓𑀸𑀫𑀢𑀸𑀬 𑀢𑀁 𑀢𑀁 𑀯𑀚𑁆𑀚𑀁 𑀑𑀮𑁄𑀓𑀦𑁂𑀦 𑀉𑀮𑁆𑀮𑀼𑀫𑁆𑀧𑀦𑀲𑀪𑀸𑀯𑀲𑀡𑁆𑀞𑀺𑀢𑁄 𑀘. 𑀅𑀬𑀁 𑀇𑀥 𑀅𑀥𑀺𑀧𑁆𑀧𑁂𑀢𑁄. 𑀬𑀣𑀸 𑀳𑀺 𑀤𑀼𑀕𑁆𑀕𑀢𑀫𑀦𑀼𑀲𑁆𑀲𑁄 ‘‘𑀇𑀫𑀁 𑀕𑀡𑁆𑀳𑀸𑀳𑀻’’𑀢𑀺 𑀢𑀚𑁆𑀚𑁂𑀢𑁆𑀯𑀸𑀧𑀺 𑀧𑁄𑀣𑁂𑀢𑁆𑀯𑀸𑀧𑀺 𑀦𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁂 𑀓𑁄𑀧𑀁 𑀦 𑀓𑀭𑁄𑀢𑀺, 𑀧𑀫𑀼𑀤𑀺𑀢𑁄𑀯 𑀳𑁄𑀢𑀺, 𑀏𑀯𑀫𑁂𑀯𑀁 𑀏𑀯𑀭𑀽𑀧𑁂 𑀧𑀼𑀕𑁆𑀕𑀮𑁂 𑀅𑀲𑀸𑀭𑀼𑀧𑁆𑀧𑀁 𑀯𑀸 𑀔𑀮𑀺𑀢𑀁 𑀯𑀸 𑀤𑀺𑀲𑁆𑀯𑀸 𑀆𑀘𑀺𑀓𑁆𑀔𑀦𑁆𑀢𑁂 𑀓𑁄𑀧𑁄 𑀦 𑀓𑀸𑀢𑀩𑁆𑀩𑁄, 𑀢𑀼𑀝𑁆𑀞𑁂𑀦𑁂𑀯 𑀪𑀯𑀺𑀢𑀩𑁆𑀩𑀁. ‘‘𑀪𑀦𑁆𑀢𑁂, 𑀫𑀳𑀦𑁆𑀢𑀁 𑀯𑁄 𑀓𑀫𑁆𑀫𑀁 𑀓𑀢𑀁 𑀫𑀬𑁆𑀳𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀝𑁆𑀞𑀸𑀦𑁂 𑀞𑀢𑁆𑀯𑀸 𑀑𑀯𑀤𑀦𑁆𑀢𑁂𑀳𑀺, 𑀧𑀼𑀦𑀧𑀺 𑀫𑀁 𑀯𑀤𑁂𑀬𑁆𑀬𑀸𑀣𑀸’’𑀢𑀺 𑀧𑀯𑀸𑀭𑁂𑀢𑀩𑁆𑀩𑀫𑁂𑀯.

𑀦𑀺𑀕𑁆𑀕𑀬𑁆𑀳𑀯𑀸𑀤𑀺𑀦𑁆𑀢𑀺 𑀏𑀓𑀘𑁆𑀘𑁄 𑀳𑀺 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀦𑀁 𑀅𑀲𑀸𑀭𑀼𑀧𑁆𑀧𑀁 𑀯𑀸 𑀔𑀮𑀺𑀢𑀁 𑀯𑀸 𑀤𑀺𑀲𑁆𑀯𑀸 ‘‘𑀅𑀬𑀁 𑀫𑁂 𑀫𑀼𑀔𑁄𑀤𑀓𑀤𑀸𑀦𑀸𑀤𑀻𑀳𑀺 𑀲𑀓𑁆𑀓𑀘𑁆𑀘𑀁 𑀉𑀧𑀝𑁆𑀞𑀳𑀢𑀺, 𑀲𑀘𑁂 𑀦𑀁 𑀯𑀓𑁆𑀔𑀸𑀫𑀺, 𑀦 𑀫𑀁 𑀉𑀧𑀝𑁆𑀞𑀳𑀺𑀲𑁆𑀲𑀢𑀺, 𑀏𑀯𑀁 𑀫𑁂 𑀧𑀭𑀺𑀳𑀸𑀦𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀢𑀁 𑀯𑀢𑁆𑀢𑀼𑀁 𑀅𑀯𑀺𑀲𑀳𑀦𑁆𑀢𑁄 𑀦 𑀦𑀺𑀕𑁆𑀕𑀬𑁆𑀳𑀯𑀸𑀤𑀻 𑀦𑀸𑀫 𑀳𑁄𑀢𑀺, 𑀲𑁄 𑀇𑀫𑀲𑁆𑀫𑀺𑀁 𑀲𑀸𑀲𑀦𑁂 𑀓𑀘𑀯𑀭𑀁 𑀆𑀓𑀺𑀭𑀢𑀺. 𑀬𑁄 𑀧𑀦 𑀢𑀣𑀸𑀭𑀽𑀧𑀁 𑀯𑀚𑁆𑀚𑀁 𑀤𑀺𑀲𑁆𑀯𑀸 𑀯𑀚𑁆𑀚𑀸𑀦𑀼𑀭𑀽𑀧𑀁 𑀢𑀚𑁆𑀚𑁂𑀦𑁆𑀢𑁄 𑀧𑀡𑀸𑀫𑁂𑀦𑁆𑀢𑁄 𑀤𑀡𑁆𑀟𑀓𑀫𑁆𑀫𑀁 𑀓𑀭𑁄𑀦𑁆𑀢𑁄 𑀯𑀺𑀳𑀸𑀭𑀸 𑀦𑀻𑀳𑀭𑀦𑁆𑀢𑁄 𑀲𑀺𑀓𑁆𑀔𑀸𑀧𑁂𑀢𑀺, 𑀅𑀬𑀁 𑀦𑀺𑀕𑁆𑀕𑀬𑁆𑀳𑀯𑀸𑀤𑀻 𑀦𑀸𑀫 𑀲𑁂𑀬𑁆𑀬𑀣𑀸𑀧𑀺, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋 ‘‘𑀦𑀺𑀕𑁆𑀕𑀬𑁆𑀳 𑀦𑀺𑀕𑁆𑀕𑀬𑁆𑀳𑀸𑀳𑀁, 𑀆𑀦𑀦𑁆𑀤, 𑀯𑀓𑁆𑀔𑀸𑀫𑀺, 𑀧𑀯𑀬𑁆𑀳 𑀧𑀯𑀬𑁆𑀳 ¶ , 𑀆𑀦𑀦𑁆𑀤, 𑀯𑀓𑁆𑀔𑀸𑀫𑀺, 𑀬𑁄 𑀲𑀸𑀭𑁄, 𑀲𑁄 𑀞𑀲𑁆𑀲𑀢𑀻’’𑀢𑀺 (𑀫. 𑀦𑀺. 𑁩.𑁧𑁯𑁬). 𑀫𑁂𑀥𑀸𑀯𑀺𑀦𑁆𑀢𑀺 𑀥𑀫𑁆𑀫𑁄𑀚𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀁. 𑀢𑀸𑀤𑀺𑀲𑀦𑁆𑀢𑀺 𑀏𑀯𑀭𑀽𑀧𑀁 𑀧𑀡𑁆𑀟𑀺𑀢𑀁 𑀪𑀚𑁂𑀬𑁆𑀬 𑀧𑀬𑀺𑀭𑀼𑀧𑀸𑀲𑁂𑀬𑁆𑀬. 𑀢𑀸𑀤𑀺𑀲𑀜𑁆𑀳𑀺 𑀆𑀘𑀭𑀺𑀬𑀁 𑀪𑀚𑀫𑀸𑀦𑀲𑁆𑀲 𑀅𑀦𑁆𑀢𑁂𑀯𑀸𑀲𑀺𑀓𑀲𑁆𑀲 𑀲𑁂𑀬𑁆𑀬𑁄 𑀳𑁄𑀢𑀺 𑀦 𑀧𑀸𑀧𑀺𑀬𑁄, 𑀯𑀟𑁆𑀠𑀺𑀬𑁂𑀯 𑀳𑁄𑀢𑀺, 𑀦𑁄 𑀧𑀭𑀺𑀳𑀸𑀦𑀻𑀢𑀺.

𑀫𑁄𑀖𑀭𑀸𑀚𑀢𑁆𑀣𑁂𑀭𑀯𑀢𑁆𑀣𑀼

𑁨𑁩𑁪. 𑀤𑁆𑀯𑀸𑀤𑀲𑀫𑁂 𑀓𑀝𑁆𑀞𑀯𑀸𑀳𑀦𑀦𑀕𑀭𑁂𑀢𑀺 𑀓𑀝𑁆𑀞𑀯𑀸𑀳𑀦𑁂𑀦 𑀕𑀳𑀺𑀢𑀢𑁆𑀢𑀸 𑀏𑀯𑀁𑀮𑀤𑁆𑀥𑀦𑀸𑀫𑀓𑁂 𑀦𑀕𑀭𑁂. 𑀅𑀢𑀻𑀢𑁂 𑀓𑀺𑀭 𑀩𑀸𑀭𑀸𑀡𑀲𑀺𑀯𑀸𑀲𑀻 𑀏𑀓𑁄 𑀭𑀼𑀓𑁆𑀔𑀯𑀟𑁆𑀠𑀓𑀻 𑀲𑀓𑁂 𑀆𑀘𑀭𑀺𑀬𑀓𑁂 𑀅𑀤𑀼𑀢𑀺𑀬𑁄. 𑀢𑀲𑁆𑀲 𑀲𑁄𑀴𑀲 𑀲𑀺𑀲𑁆𑀲𑀸 𑀏𑀓𑀫𑁂𑀓𑀲𑁆𑀲 𑀲𑀳𑀲𑁆𑀲𑀁 𑀅𑀦𑁆𑀢𑁂𑀯𑀸𑀲𑀺𑀓𑀸. 𑀏𑀯𑀁 𑀢𑁂 𑀲𑀢𑁆𑀢𑀭𑀲𑀸𑀥𑀺𑀓𑀸 𑀲𑁄𑀴𑀲 𑀲𑀳𑀲𑁆𑀲𑀸 𑀆𑀘𑀭𑀺𑀬𑀦𑁆𑀢𑁂𑀯𑀸𑀲𑀺𑀓𑀸 ¶ 𑀲𑀩𑁆𑀩𑁂𑀧𑀺 𑀩𑀸𑀭𑀸𑀡𑀲𑀺𑀁 𑀉𑀧𑀦𑀺𑀲𑁆𑀲𑀸𑀬 𑀚𑀻𑀯𑀺𑀓𑀁 𑀓𑀧𑁆𑀧𑁂𑀦𑁆𑀢𑀸 𑀧𑀩𑁆𑀩𑀢𑀲𑀫𑀻𑀧𑀁 𑀕𑀦𑁆𑀢𑁆𑀯𑀸 𑀭𑀼𑀓𑁆𑀔𑁂 𑀕𑀳𑁂𑀢𑁆𑀯𑀸 𑀢𑀢𑁆𑀣𑁂𑀯 𑀦𑀸𑀦𑀸𑀧𑀸𑀲𑀸𑀤𑀯𑀺𑀓𑀢𑀺𑀬𑁄 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀓𑀼𑀮𑁆𑀮𑀁 𑀩𑀦𑁆𑀥𑀺𑀢𑁆𑀯𑀸 𑀕𑀗𑁆𑀕𑀸𑀬 𑀩𑀸𑀭𑀸𑀡𑀲𑀺𑀁 𑀆𑀦𑁂𑀢𑁆𑀯𑀸 𑀲𑀘𑁂 𑀭𑀸𑀚𑀸 𑀅𑀢𑁆𑀣𑀺𑀓𑁄 𑀳𑁄𑀢𑀺, 𑀭𑀜𑁆𑀜𑁄 𑀏𑀓𑀪𑀽𑀫𑀓𑀁 𑀯𑀸 𑀲𑀢𑁆𑀢𑀪𑀽𑀫𑀓𑀁 𑀯𑀸 𑀧𑀸𑀲𑀸𑀤𑀁 𑀬𑁄𑀚𑁂𑀢𑁆𑀯𑀸 𑀤𑁂𑀦𑁆𑀢𑀺. 𑀦𑁄 𑀘𑁂, 𑀅𑀜𑁆𑀜𑁂𑀲𑀫𑁆𑀧𑀺 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀧𑀼𑀢𑁆𑀢𑀤𑀸𑀭𑀁 𑀧𑁄𑀲𑁂𑀦𑁆𑀢𑀺. 𑀅𑀣 𑀦𑁂𑀲𑀁 𑀏𑀓𑀤𑀺𑀯𑀲𑀁 𑀆𑀘𑀭𑀺𑀬𑁄 ‘‘𑀦 𑀲𑀓𑁆𑀓𑀸 𑀯𑀟𑁆𑀠𑀓𑀺𑀓𑀫𑁆𑀫𑁂𑀦 𑀦𑀺𑀘𑁆𑀘𑀁 𑀚𑀻𑀯𑀺𑀢𑀼𑀁, 𑀤𑀼𑀓𑁆𑀓𑀭𑀜𑁆𑀳𑀺 𑀚𑀭𑀸𑀓𑀸𑀮𑁂 𑀏𑀢𑀁 𑀓𑀫𑁆𑀫’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀺𑀓𑁂 𑀆𑀫𑀦𑁆𑀢𑁂𑀲𑀺 𑁋 ‘‘𑀢𑀸𑀢𑀸, 𑀉𑀤𑀼𑀫𑁆𑀩𑀭𑀸𑀤𑀬𑁄 𑀅𑀧𑁆𑀧𑀲𑀸𑀭𑀭𑀼𑀓𑁆𑀔𑁂 𑀆𑀦𑁂𑀣𑀸’’𑀢𑀺. 𑀢𑁂 ‘‘𑀲𑀸𑀥𑀽’’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀆𑀦𑀬𑀺𑀁𑀲𑀼. 𑀲𑁄 𑀢𑁂𑀳𑀺 𑀓𑀝𑁆𑀞𑀲𑀓𑀼𑀡𑀁 𑀓𑀢𑁆𑀯𑀸 𑀢𑀲𑁆𑀲𑀩𑁆𑀪𑀦𑁆𑀢𑀭𑀁 𑀧𑀯𑀺𑀲𑀺𑀢𑁆𑀯𑀸 𑀯𑀸𑀢𑁂𑀦 𑀬𑀦𑁆𑀢𑀁 𑀧𑀽𑀭𑁂𑀲𑀺. 𑀓𑀝𑁆𑀞𑀲𑀓𑀼𑀡𑁄 𑀲𑀼𑀯𑀡𑁆𑀡𑀳𑀁𑀲𑀭𑀸𑀚𑀸 𑀯𑀺𑀬 𑀆𑀓𑀸𑀲𑁂 𑀮𑀗𑁆𑀖𑀺𑀢𑁆𑀯𑀸 𑀯𑀦𑀲𑁆𑀲 𑀉𑀧𑀭𑀺 𑀘𑀭𑀺𑀢𑁆𑀯𑀸 𑀅𑀦𑁆𑀢𑁂𑀯𑀸𑀲𑀻𑀦𑀁 𑀧𑀼𑀭𑀢𑁄 𑀑𑀭𑀼𑀳𑀺.

𑀅𑀣𑀸𑀘𑀭𑀺𑀬𑁄 𑀲𑀺𑀲𑁆𑀲𑁂 𑀆𑀳 𑁋 ‘‘𑀢𑀸𑀢𑀸 𑀈𑀤𑀺𑀲𑀸𑀦𑀺 𑀓𑀝𑁆𑀞𑀯𑀸𑀳𑀦𑀸𑀦𑀺 𑀓𑀢𑁆𑀯𑀸 𑀲𑀓𑁆𑀓𑀸 𑀲𑀓𑀮𑀚𑀫𑁆𑀩𑀼𑀤𑀻𑀧𑁂 𑀭𑀚𑁆𑀚𑁂 𑀕𑀳𑁂𑀢𑀼𑀁, 𑀢𑀼𑀫𑁆𑀳𑁂𑀧𑀺 𑀢𑀸𑀢𑀸 𑀏𑀢𑀸𑀦𑀺 𑀓𑀭𑁄𑀣, 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀚𑀻𑀯𑀺𑀲𑁆𑀲𑀸𑀫, 𑀤𑀼𑀓𑁆𑀓𑀭𑀁 𑀯𑀟𑁆𑀠𑀓𑀺𑀲𑀺𑀧𑁆𑀧𑁂𑀦 𑀚𑀻𑀯𑀺𑀢𑀼’’𑀦𑁆𑀢𑀺. 𑀢𑁂 𑀢𑀣𑀸 𑀓𑀢𑁆𑀯𑀸 𑀆𑀘𑀭𑀺𑀬𑀲𑁆𑀲 𑀧𑀝𑀺𑀯𑁂𑀤𑁂𑀲𑀼𑀁. 𑀢𑀢𑁄 𑀦𑁂 𑀆𑀘𑀭𑀺𑀬𑁄 𑀆𑀳 𑁋 ‘‘𑀓𑀢𑀫𑀁 𑀢𑀸𑀢𑀸 𑀭𑀚𑁆𑀚𑀁 𑀕𑀡𑁆𑀳𑀸𑀫𑀸’’𑀢𑀺? 𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀆𑀘𑀭𑀺𑀬𑀸𑀢𑀺. 𑀅𑀮𑀁 𑀢𑀸𑀢𑀸, 𑀫𑀸 𑀏𑀢𑀁 𑀭𑀼𑀘𑀺𑀢𑁆𑀣, 𑀫𑀬𑀜𑁆𑀳𑀺 𑀢𑀁 𑀕𑀳𑁂𑀢𑁆𑀯𑀸𑀧𑀺 ‘‘𑀯𑀟𑁆𑀠𑀓𑀺𑀭𑀸𑀚𑀸, 𑀯𑀟𑁆𑀠𑀓𑀺𑀬𑀼𑀯𑀭𑀸𑀚𑀸’’𑀢𑀺 𑀯𑀟𑁆𑀠𑀓𑀺𑀯𑀸𑀤𑀸 𑀦 𑀫𑀼𑀘𑁆𑀘𑀺𑀲𑁆𑀲𑀸𑀫, 𑀫𑀳𑀦𑁆𑀢𑁄 𑀚𑀫𑁆𑀩𑀼𑀤𑀻𑀧𑁄, 𑀅𑀜𑁆𑀜𑀢𑁆𑀣 𑀕𑀘𑁆𑀙𑀸𑀫𑀸𑀢𑀺. 𑀢𑀢𑁄 𑀲𑀧𑀼𑀢𑁆𑀢𑀤𑀸𑀭𑀓𑀸 𑀓𑀝𑁆𑀞𑀯𑀸𑀳𑀦𑀸𑀦𑀺 𑀅𑀪𑀺𑀭𑀼𑀳𑀺𑀢𑁆𑀯𑀸 𑀲𑀚𑁆𑀚𑀸𑀯𑀼𑀥𑀸 𑀳𑀼𑀢𑁆𑀯𑀸 𑀳𑀺𑀫𑀯𑀦𑁆𑀢𑀸𑀪𑀺𑀫𑀼𑀔𑀸 𑀕𑀦𑁆𑀢𑁆𑀯𑀸 𑀳𑀺𑀫𑀯𑀢𑀺 𑀅𑀜𑁆𑀜𑀢𑀭𑀁 𑀦𑀕𑀭𑀁 𑀧𑀯𑀺𑀲𑀺𑀢𑁆𑀯𑀸 𑀭𑀜𑁆𑀜𑁄 𑀦𑀺𑀯𑁂𑀲𑀦𑁂𑀬𑁂𑀯 𑀧𑀘𑁆𑀘𑀼𑀝𑁆𑀞𑀁𑀲𑀼. 𑀢𑁂 𑀢𑀢𑁆𑀣 𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀆𑀘𑀭𑀺𑀬𑀁 𑀭𑀚𑁆𑀚𑁂 𑀅𑀪𑀺𑀲𑀺𑀜𑁆𑀘𑀺𑀁𑀲𑀼. 𑀲𑁄 ‘‘𑀓𑀝𑁆𑀞𑀯𑀸𑀳𑀦𑁄 𑀭𑀸𑀚𑀸’’𑀢𑀺 𑀧𑀸𑀓𑀝𑁄 𑀅𑀳𑁄𑀲𑀺, 𑀢𑀁 𑀦𑀕𑀭𑀁 𑀢𑁂𑀦 𑀕𑀳𑀺𑀢𑀢𑁆𑀢𑀸 ‘‘𑀓𑀝𑁆𑀞𑀯𑀸𑀳𑀦𑀦𑀕𑀭’’𑀦𑁆𑀢𑁂𑀯 𑀦𑀸𑀫𑀁 𑀮𑀪𑀺.

𑀢𑀧𑀘𑀸𑀭𑀦𑁆𑀢𑀺 ¶ 𑀢𑀧𑀘𑀭𑀡𑀁. 𑀧𑀸𑀲𑀸𑀡𑀘𑁂𑀢𑀺𑀬𑁂 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀦𑀺𑀲𑀻𑀤𑀻𑀢𑀺 𑀧𑀸𑀲𑀸𑀡𑀓𑀘𑁂𑀢𑀺𑀬𑀦𑁆𑀢𑀺 𑀮𑀤𑁆𑀥𑀯𑁄𑀳𑀸𑀭𑁂 𑀧𑀺𑀝𑁆𑀞𑀺𑀧𑀸𑀲𑀸𑀡𑁂 𑀲𑀓𑁆𑀓𑁂𑀦 𑀫𑀸𑀧𑀺𑀢𑁂 𑀫𑀳𑀸𑀫𑀡𑁆𑀟𑀧𑁂 𑀦𑀺𑀲𑀻𑀤𑀺. 𑀢𑀢𑁆𑀣 𑀓𑀺𑀭 𑀫𑀳𑀢𑁄 𑀧𑀸𑀲𑀸𑀡𑀲𑁆𑀲 𑀉𑀧𑀭𑀺 𑀧𑀼𑀩𑁆𑀩𑁂 𑀤𑁂𑀯𑀝𑁆𑀞𑀸𑀦𑀁 𑀅𑀳𑁄𑀲𑀺, 𑀉𑀧𑁆𑀧𑀦𑁆𑀦𑁂 𑀧𑀦 𑀪𑀕𑀯𑀢𑀺 𑀯𑀺𑀳𑀸𑀭𑁄 𑀚𑀸𑀢𑁄, 𑀲𑁄 𑀢𑁂𑀦𑁂𑀯 𑀧𑀼𑀭𑀺𑀫𑀯𑁄𑀳𑀸𑀭𑁂𑀦 ‘‘𑀧𑀸𑀲𑀸𑀡𑀘𑁂𑀢𑀺𑀬’’𑀦𑁆𑀢𑀺 𑀯𑀼𑀘𑁆𑀘𑀢𑀺.

𑀢𑁂𑀦 ¶ 𑀧𑀼𑀘𑁆𑀙𑀺𑀢𑁂 𑀤𑀼𑀢𑀺𑀬𑁄 𑀳𑀼𑀢𑁆𑀯𑀸 𑀲𑀢𑁆𑀣𑀸𑀭𑀁 𑀧𑀜𑁆𑀳𑀁 𑀧𑀼𑀘𑁆𑀙𑀻𑀢𑀺 𑁋

‘‘𑀫𑀼𑀤𑁆𑀥𑀁 𑀫𑀼𑀤𑁆𑀥𑀸𑀥𑀺𑀧𑀸𑀢𑀜𑁆𑀘, 𑀩𑀸𑀯𑀭𑀻 𑀧𑀭𑀺𑀧𑀼𑀘𑁆𑀙𑀢𑀺;

𑀢𑀁 𑀩𑁆𑀬𑀸𑀓𑀭𑁄𑀳𑀺 𑀪𑀕𑀯𑀸, 𑀓𑀗𑁆𑀔𑀁 𑀯𑀺𑀦𑀬 𑀦𑁄 𑀇𑀲𑁂’’𑀢𑀺. (𑀲𑀼. 𑀦𑀺. 𑁧𑁦𑁩𑁧) 𑁋

𑀏𑀯𑀁 𑀢𑁂𑀦 𑀧𑀜𑁆𑀳𑁂 𑀧𑀼𑀘𑁆𑀙𑀺𑀢𑁂 𑀪𑀕𑀯𑀢𑀸 𑀘 𑁋

‘‘𑀅𑀯𑀺𑀚𑁆𑀚𑀸 𑀫𑀼𑀤𑁆𑀥𑀸𑀢𑀺 𑀚𑀸𑀦𑀸𑀳𑀺, 𑀯𑀺𑀚𑁆𑀚𑀸 𑀫𑀼𑀤𑁆𑀥𑀸𑀥𑀺𑀧𑀸𑀢𑀺𑀦𑀻;

𑀲𑀤𑁆𑀥𑀸𑀲𑀢𑀺𑀲𑀫𑀸𑀥𑀻𑀳𑀺, 𑀙𑀦𑁆𑀤𑀯𑀻𑀭𑀺𑀬𑁂𑀦 𑀲𑀁𑀬𑀼𑀢𑀸’’𑀢𑀺. (𑀲𑀼. 𑀦𑀺. 𑁧𑁦𑁩𑁨) 𑁋

𑀧𑀜𑁆𑀳𑁂 𑀯𑀺𑀲𑁆𑀲𑀚𑁆𑀚𑀺𑀢𑁂 𑀤𑀼𑀢𑀺𑀬𑁄 𑀳𑀼𑀢𑁆𑀯𑀸 𑀧𑀜𑁆𑀳𑀁 𑀧𑀼𑀘𑁆𑀙𑀺.

𑀅𑀣𑀲𑁆𑀲…𑀧𑁂… 𑀧𑀜𑁆𑀳𑀁 𑀓𑀣𑁂𑀲𑀻𑀢𑀺 𑁋

‘‘𑀓𑀣𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁, 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀻’’𑀢𑀺. (𑀲𑀼. 𑀦𑀺. 𑁧𑁧𑁨𑁪) 𑁋

𑀢𑁂𑀦 𑀧𑀜𑁆𑀳𑁂 𑀧𑀼𑀘𑁆𑀙𑀺𑀢𑁂 𑁋

‘‘𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀼, 𑀫𑁄𑀖𑀭𑀸𑀚 𑀲𑀤𑀸 𑀲𑀢𑁄;

𑀅𑀢𑁆𑀢𑀸𑀦𑀼𑀤𑀺𑀝𑁆𑀞𑀺𑀁 𑀊𑀳𑀘𑁆𑀘, 𑀏𑀯𑀁 𑀫𑀘𑁆𑀘𑀼𑀢𑀭𑁄 𑀲𑀺𑀬𑀸;

𑀏𑀯𑀁 𑀮𑁄𑀓𑀁 𑀅𑀯𑁂𑀓𑁆𑀔𑀦𑁆𑀢𑀁, 𑀫𑀘𑁆𑀘𑀼𑀭𑀸𑀚𑀸 𑀦 𑀧𑀲𑁆𑀲𑀢𑀻’’𑀢𑀺. (𑀲𑀼. 𑀦𑀺. 𑁧𑁧𑁨𑁫) 𑁋

𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀲𑀺.

𑀲𑁂𑀲𑀚𑀦𑀸𑀢𑀺 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀲𑀦𑁆𑀦𑀺𑀧𑀢𑀺𑀢𑀸 𑀲𑁂𑀲𑀚𑀦𑀸. 𑀦 𑀓𑀣𑀻𑀬𑀦𑁆𑀢𑀻𑀢𑀺 ‘‘𑀏𑀢𑁆𑀢𑀓𑀸 𑀲𑁄𑀢𑀸𑀧𑀦𑁆𑀦𑀸’’𑀢𑀺𑀆𑀤𑀺𑀦𑀸 ¶ 𑀦 𑀯𑀼𑀘𑁆𑀘𑀦𑁆𑀢𑀺. 𑀏𑀯𑀁 𑀧𑀸𑀭𑀸𑀬𑀦𑁂 𑀯𑀢𑁆𑀣𑀼 𑀲𑀫𑀼𑀝𑁆𑀞𑀺𑀢𑀦𑁆𑀢𑀺 𑀧𑀸𑀭𑀸𑀬𑀦𑀯𑀕𑁆𑀕𑁂 𑀇𑀤𑀁 𑀯𑀢𑁆𑀣𑀼 𑀲𑀫𑀼𑀝𑁆𑀞𑀺𑀢𑀁.

𑀘𑀢𑀼𑀢𑁆𑀣𑀏𑀢𑀤𑀕𑁆𑀕𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀣𑁂𑀭𑀧𑀸𑀴𑀺𑀲𑀁𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀏𑀢𑀤𑀕𑁆𑀕𑀯𑀕𑁆𑀕𑁄

(𑁧𑁪) 𑁫. 𑀧𑀜𑁆𑀘𑀫𑀏𑀢𑀤𑀕𑁆𑀕𑀯𑀕𑁆𑀕𑀯𑀡𑁆𑀡𑀦𑀸

𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀣𑁂𑀭𑀻𑀯𑀢𑁆𑀣𑀼

𑁨𑁩𑁫. 𑀣𑁂𑀭𑀺𑀧𑀸𑀴𑀺𑀲𑀁𑀯𑀡𑁆𑀡𑀦𑀸𑀬 ¶ 𑀧𑀞𑀫𑁂 𑀬𑀤𑀺𑀤𑀁 𑀫𑀳𑀸𑀕𑁄𑀢𑀫𑀻𑀢𑀺 𑀏𑀢𑁆𑀣 ‘‘𑀬𑀤𑀺𑀤𑀁 𑀫𑀳𑀸𑀧𑀚𑀸𑀧𑀢𑀺 𑀕𑁄𑀢𑀫𑀻’’𑀢𑀺 𑀘 𑀧𑀞𑀦𑁆𑀢𑀺. 𑀢𑀢𑁆𑀣 𑀕𑁄𑀢𑀫𑀻𑀢𑀺 𑀕𑁄𑀢𑁆𑀢𑀁. 𑀦𑀸𑀫𑀓𑀭𑀡𑀤𑀺𑀯𑀲𑁂 ¶ 𑀧𑀦𑀲𑁆𑀲𑀸 𑀮𑀤𑁆𑀥𑀲𑀓𑁆𑀓𑀸𑀭𑀸 𑀩𑁆𑀭𑀸𑀳𑁆𑀫𑀡𑀸 𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀲𑀘𑁂 𑀅𑀬𑀁 𑀥𑀻𑀢𑀭𑀁 𑀮𑀪𑀺𑀲𑁆𑀲𑀢𑀺, 𑀘𑀓𑁆𑀓𑀯𑀢𑁆𑀢𑀺𑀭𑀜𑁆𑀜𑁄 𑀫𑀳𑁂𑀲𑀻 𑀪𑀯𑀺𑀲𑁆𑀲𑀢𑀺. 𑀲𑀘𑁂 𑀧𑀼𑀢𑁆𑀢𑀁 𑀮𑀪𑀺𑀲𑁆𑀲𑀢𑀺, 𑀘𑀓𑁆𑀓𑀯𑀢𑁆𑀢𑀺𑀭𑀸𑀚𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀉𑀪𑀬𑀣𑀸𑀧𑀺 ‘‘𑀫𑀳𑀢𑀻𑀬𑁂𑀯𑀲𑁆𑀲𑀸 𑀧𑀚𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀩𑁆𑀬𑀸𑀓𑀭𑀺𑀁𑀲𑀼, 𑀢𑀲𑁆𑀫𑀸 𑀧𑀼𑀢𑁆𑀢𑀧𑀚𑀸𑀬 𑀘𑁂𑀯 𑀥𑀻𑀢𑀼𑀧𑀚𑀸𑀬 𑀘 𑀫𑀳𑀦𑁆𑀢𑀢𑀸𑀬 ‘‘𑀫𑀳𑀸𑀧𑀚𑀸𑀧𑀢𑀻’’𑀢𑀺 𑀯𑁄𑀳𑀭𑀺𑀁𑀲𑀼. 𑀢𑀤𑀼𑀪𑀬𑀁 𑀧𑀦 𑀲𑀁𑀲𑀦𑁆𑀤𑁂𑀢𑁆𑀯𑀸 ‘‘𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻’’𑀢𑀺 𑀯𑀼𑀢𑁆𑀢𑀁. 𑀯𑀸𑀭𑀪𑀺𑀓𑁆𑀔𑀦𑁆𑀢𑀺 𑀯𑀸𑀭𑁂𑀦 𑀤𑀸𑀢𑀩𑁆𑀩𑀁 𑀪𑀺𑀓𑁆𑀔𑀁. 𑀦𑀸𑀫𑀁 𑀅𑀓𑀁𑀲𑀽𑀢𑀺 𑀕𑁄𑀢𑁆𑀢𑀁𑀬𑁂𑀯 𑀦𑀸𑀫𑀁 𑀅𑀓𑀁𑀲𑀼. 𑀫𑀸𑀢𑀼𑀘𑁆𑀙𑀦𑁆𑀢𑀺 𑀘𑀽𑀴𑀫𑀸𑀢𑀭𑀁. 𑀫𑀸𑀢𑀼𑀪𑀕𑀺𑀦𑀻 𑀳𑀺 𑀫𑀸𑀢𑀼𑀘𑁆𑀙𑀸𑀢𑀺 𑀯𑀼𑀘𑁆𑀘𑀢𑀺. 𑀓𑀮𑀳𑀯𑀺𑀯𑀸𑀤𑀲𑀼𑀢𑁆𑀢𑀧𑀭𑀺𑀬𑁄𑀲𑀸𑀦𑁂𑀢𑀺 ‘‘𑀓𑀼𑀢𑁄𑀧𑀳𑀽𑀢𑀸 𑀓𑀮𑀳𑀸 𑀯𑀺𑀯𑀸𑀤𑀸’’𑀢𑀺𑀆𑀤𑀺𑀦𑀸 𑀲𑀼𑀢𑁆𑀢𑀦𑀺𑀧𑀸𑀢𑁂 𑀆𑀕𑀢𑀲𑁆𑀲 𑀓𑀮𑀳𑀯𑀺𑀯𑀸𑀤𑀲𑀼𑀢𑁆𑀢𑀲𑁆𑀲 (𑀲𑀼. 𑀦𑀺. 𑁮𑁬𑁮 𑀆𑀤𑀬𑁄) 𑀧𑀭𑀺𑀬𑁄𑀲𑀸𑀦𑁂. 𑀇𑀤𑀜𑁆𑀘 𑀅𑀗𑁆𑀕𑀼𑀢𑁆𑀢𑀭𑀪𑀸𑀡𑀓𑀸𑀦𑀁 𑀓𑀣𑀸𑀫𑀕𑁆𑀕𑀸𑀦𑀼𑀲𑀸𑀭𑁂𑀦 𑀯𑀼𑀢𑁆𑀢𑀁. 𑀅𑀧𑀭𑁂 𑀧𑀦 ‘‘𑀢𑀲𑁆𑀫𑀺𑀁𑀬𑁂𑀯 𑀲𑀼𑀢𑁆𑀢𑀦𑀺𑀧𑀸𑀢𑁂 ‘𑀅𑀢𑁆𑀢𑀤𑀡𑁆𑀟𑀸𑀪𑀬𑀁 𑀚𑀸𑀢’𑀦𑁆𑀢𑀺𑀆𑀤𑀺𑀦𑀸 𑀆𑀕𑀢𑀲𑁆𑀲 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀲𑁆𑀲 (𑀲𑀼. 𑀦𑀺. 𑁯𑁪𑁧 𑀆𑀤𑀬𑁄) 𑀧𑀭𑀺𑀬𑁄𑀲𑀸𑀦𑁂’’𑀢𑀺 𑀯𑀤𑀦𑁆𑀢𑀺. 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀸𑀦𑀦𑁆𑀢𑀺 𑀏𑀢𑁆𑀣 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀏𑀢𑁂 𑀧𑀩𑁆𑀩𑀚𑀺𑀢𑀸𑀢𑀺 𑀯𑀤𑀦𑁆𑀢𑀺. 𑀢𑁂𑀦𑁂𑀯 𑀲𑀼𑀢𑁆𑀢𑀦𑀺𑀧𑀸𑀢𑁂 𑀅𑀢𑁆𑀢𑀤𑀡𑁆𑀟𑀲𑀼𑀢𑁆𑀢𑀲𑀁𑀯𑀡𑁆𑀡𑀦𑀸𑀬 (𑀲𑀼. 𑀦𑀺. 𑀅𑀝𑁆𑀞. 𑁨.𑁯𑁪𑁨 𑀆𑀤𑀬𑁄) 𑀯𑀼𑀢𑁆𑀢𑀁 𑁋 ‘‘𑀤𑁂𑀲𑀦𑀸𑀧𑀭𑀺𑀬𑁄𑀲𑀸𑀦𑁂 𑀧𑀜𑁆𑀘𑀲𑀢𑀸 𑀲𑀸𑀓𑀺𑀬𑀓𑀼𑀫𑀸𑀭𑀸 𑀓𑁄𑀴𑀺𑀬𑀓𑀼𑀫𑀸𑀭𑀸 𑀘 𑀏𑀳𑀺𑀪𑀺𑀓𑁆𑀔𑀼𑀧𑀩𑁆𑀩𑀚𑁆𑀚𑀸𑀬 𑀧𑀩𑁆𑀩𑀚𑀺𑀢𑀸. 𑀢𑁂 𑀕𑀳𑁂𑀢𑁆𑀯𑀸 𑀪𑀕𑀯𑀸 𑀫𑀳𑀸𑀯𑀦𑀁 𑀧𑀸𑀯𑀺𑀲𑀻’’𑀢𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀔𑁂𑀫𑀸𑀣𑁂𑀭𑀻𑀯𑀢𑁆𑀣𑀼

𑁨𑁩𑁬. 𑀤𑀼𑀢𑀺𑀬𑁂 𑀧𑀭𑀧𑀭𑀺𑀬𑀸𑀧𑀦𑁆𑀦𑀸 𑀳𑀼𑀢𑁆𑀯𑀸𑀢𑀺 𑀧𑀭𑁂𑀲𑀁 𑀤𑀸𑀲𑀻 𑀳𑀼𑀢𑁆𑀯𑀸. 𑀲𑀼𑀯𑀡𑁆𑀡𑀭𑀲𑀧𑀺𑀜𑁆𑀚𑀭𑁄 𑀅𑀳𑁄𑀲𑀻𑀢𑀺 𑀲𑀼𑀯𑀡𑁆𑀡𑀭𑀲𑀧𑀺𑀜𑁆𑀚𑀭𑁄 𑀯𑀺𑀬 𑀅𑀳𑁄𑀲𑀺.

𑀫𑀓𑁆𑀓𑀝𑀓𑁄𑀯 ¶ 𑀚𑀸𑀮𑀦𑁆𑀢𑀺 𑀬𑀣𑀸 𑀦𑀸𑀫 𑀫𑀓𑁆𑀓𑀝𑀓𑁄 𑀲𑀼𑀢𑁆𑀢𑀚𑀸𑀮𑀁 𑀓𑀢𑁆𑀯𑀸 𑀫𑀚𑁆𑀛𑀝𑁆𑀞𑀸𑀦𑁂 𑀦𑀸𑀪𑀺𑀫𑀡𑁆𑀟𑀮𑁂 𑀦𑀺𑀧𑀦𑁆𑀦𑁄 𑀧𑀭𑀺𑀬𑀦𑁆𑀢𑁂 𑀧𑀢𑀺𑀢𑀁 𑀧𑀝𑀗𑁆𑀕𑀁 𑀯𑀸 𑀫𑀓𑁆𑀔𑀺𑀓𑀁 𑀯𑀸 𑀯𑁂𑀕𑁂𑀦 𑀕𑀦𑁆𑀢𑁆𑀯𑀸 𑀯𑀺𑀚𑁆𑀛𑀺𑀢𑁆𑀯𑀸 𑀢𑀲𑁆𑀲 𑀭𑀲𑀁 𑀧𑀺𑀯𑀺𑀢𑁆𑀯𑀸 𑀧𑀼𑀦𑀸𑀕𑀦𑁆𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀞𑀸𑀦𑁂 𑀦𑀺𑀧𑀚𑁆𑀚𑀢𑀺, 𑀏𑀯𑀫𑁂𑀯 𑀬𑁂 𑀲𑀢𑁆𑀢𑀸 𑀭𑀸𑀕𑀭𑀢𑁆𑀢𑀸 𑀤𑁄𑀲𑀧𑀤𑀼𑀝𑁆𑀞𑀸 𑀫𑁄𑀳𑀫𑀽𑀴𑁆𑀳𑀸 𑀲𑀬𑀁𑀓𑀢𑀁 𑀢𑀡𑁆𑀳𑀸𑀲𑁄𑀢𑀁 𑀅𑀦𑀼𑀧𑀢𑀦𑁆𑀢𑀺, 𑀢𑁂 𑀢𑀁 𑀲𑀫𑀢𑀺𑀓𑁆𑀓𑀫𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀏𑀯𑀁 𑀤𑀼𑀭𑀢𑀺𑀓𑁆𑀓𑀫𑀁. 𑀏𑀢𑀫𑁆𑀧𑀺 𑀙𑁂𑀢𑁆𑀯𑀸𑀦 𑀯𑀚𑀦𑁆𑀢𑀺 𑀥𑀻𑀭𑀸𑀢𑀺 𑀧𑀡𑁆𑀟𑀺𑀢𑀸 𑀏𑀢𑀁 𑀩𑀦𑁆𑀥𑀦𑀁 𑀙𑀺𑀦𑁆𑀤𑀺𑀢𑁆𑀯𑀸 𑀅𑀦𑀧𑁂𑀓𑁆𑀔𑀺𑀦𑁄 𑀦𑀺𑀭𑀸𑀮𑀬𑀸 𑀳𑀼𑀢𑁆𑀯𑀸 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀩𑁆𑀩𑀁 𑀤𑀼𑀓𑁆𑀔𑀁 𑀧𑀳𑀸𑀬 𑀯𑀚𑀦𑁆𑀢𑀺 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀉𑀧𑁆𑀧𑀮𑀯𑀡𑁆𑀡𑀸𑀣𑁂𑀭𑀻𑀯𑀢𑁆𑀣𑀼

𑁨𑁩𑁭. 𑀢𑀢𑀺𑀬𑀁 ¶ 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀧𑀝𑀸𑀘𑀸𑀭𑀸𑀣𑁂𑀭𑀻𑀯𑀢𑁆𑀣𑀼

𑁨𑁩𑁮. 𑀘𑀢𑀼𑀢𑁆𑀣𑁂 𑀧𑀝𑀺𑀳𑀸𑀭𑀲𑀢𑁂𑀦𑀧𑀻𑀢𑀺 𑀤𑁆𑀯𑀸𑀭𑀲𑀢𑁂𑀦𑀧𑀺. 𑀧𑀝𑀺𑀳𑀸𑀭𑀲𑀤𑁆𑀤𑁄 𑀳𑀺 𑀤𑁆𑀯𑀸𑀭𑁂 𑀤𑁄𑀯𑀸𑀭𑀺𑀓𑁂 𑀘 𑀤𑀺𑀲𑁆𑀲𑀢𑀺. 𑀓𑀼𑀮𑀲𑀪𑀸𑀕𑀦𑁆𑀢𑀺 𑀅𑀢𑁆𑀢𑀦𑁄 𑀕𑁂𑀳𑀲𑀫𑀻𑀧𑀁.

𑀢𑀸𑀡𑀸𑀬𑀸𑀢𑀺 𑀢𑀸𑀡𑀪𑀸𑀯𑀸𑀬 𑀧𑀢𑀺𑀝𑁆𑀞𑀸𑀦𑀢𑁆𑀣𑀸𑀬. 𑀩𑀦𑁆𑀥𑀯𑀸𑀢𑀺 𑀧𑀼𑀢𑁆𑀢𑁂 𑀘 𑀧𑀺𑀢𑀭𑁄 𑀘 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀜𑀸𑀢𑀺𑀲𑀼𑀳𑀚𑁆𑀚𑀸. 𑀅𑀦𑁆𑀢𑀓𑁂𑀦𑀸𑀥𑀺𑀧𑀦𑁆𑀦𑀲𑁆𑀲𑀸𑀢𑀺 𑀫𑀭𑀡𑁂𑀦 𑀅𑀪𑀺𑀪𑀽𑀢𑀲𑁆𑀲. 𑀧𑀯𑀢𑁆𑀢𑀺𑀬𑀜𑁆𑀳𑀺 𑀧𑀼𑀢𑁆𑀢𑀸𑀤𑀬𑁄 𑀅𑀦𑁆𑀦𑀧𑀸𑀦𑀸𑀤𑀺𑀤𑀸𑀦𑁂𑀦 𑀘𑁂𑀯 𑀉𑀧𑁆𑀧𑀦𑁆𑀦𑀓𑀺𑀘𑁆𑀘𑀦𑀺𑀢𑁆𑀣𑀭𑀡𑁂𑀦 𑀘 𑀢𑀸𑀡𑀸 𑀳𑀼𑀢𑁆𑀯𑀸𑀧𑀺 𑀫𑀭𑀡𑀓𑀸𑀮𑁂 𑀓𑁂𑀦𑀘𑀺 𑀉𑀧𑀸𑀬𑁂𑀦 𑀫𑀭𑀡𑀁 𑀧𑀝𑀺𑀩𑀸𑀳𑀺𑀢𑀼𑀁 𑀅𑀲𑀫𑀢𑁆𑀣𑀢𑀸𑀬 𑀢𑀸𑀡𑀢𑁆𑀣𑀸𑀬 𑀮𑁂𑀡𑀢𑁆𑀣𑀸𑀬 𑀦 𑀲𑀦𑁆𑀢𑀺 𑀦𑀸𑀫. 𑀢𑁂𑀦𑁂𑀯 𑀯𑀼𑀢𑁆𑀢𑀁 𑁋 ‘‘𑀦𑀢𑁆𑀣𑀺 𑀜𑀸𑀢𑀻𑀲𑀼 𑀢𑀸𑀡𑀢𑀸’’𑀢𑀺.

𑀏𑀢𑀫𑀢𑁆𑀣𑀯𑀲𑀦𑁆𑀢𑀺 𑀏𑀢𑀁 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀢𑀸𑀡𑀁 𑀪𑀯𑀺𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑀲𑀗𑁆𑀔𑀸𑀢𑀁 𑀓𑀸𑀭𑀡𑀁 𑀚𑀸𑀦𑀺𑀢𑁆𑀯𑀸 𑀧𑀡𑁆𑀟𑀺𑀢𑁄 𑀘𑀢𑀼𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑁂𑀦 𑀲𑀁𑀯𑀼𑀢𑁄 𑀭𑀓𑁆𑀔𑀺𑀢𑀕𑁄𑀧𑀺𑀢𑁄 𑀳𑀼𑀢𑁆𑀯𑀸 𑀦𑀺𑀩𑁆𑀩𑀸𑀦𑀕𑀫𑀦𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀲𑀻𑀖𑀁 𑀲𑁄𑀥𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀥𑀫𑁆𑀫𑀤𑀺𑀦𑁆𑀦𑀸𑀣𑁂𑀭𑀻𑀯𑀢𑁆𑀣𑀼

𑁨𑁩𑁯. 𑀧𑀜𑁆𑀘𑀫𑁂 𑀧𑀭𑀸𑀬𑀢𑁆𑀢𑀝𑁆𑀞𑀸𑀦𑁂𑀢𑀺 𑀧𑀭𑁂𑀲𑀁 𑀤𑀸𑀲𑀺𑀝𑁆𑀞𑀸𑀦𑁂. 𑀲𑀼𑀚𑀸𑀢𑀢𑁆𑀣𑁂𑀭𑀲𑁆𑀲 𑀅𑀥𑀺𑀓𑀸𑀭𑀓𑀫𑁆𑀫𑀁 𑀓𑀢𑁆𑀯𑀸𑀢𑀺 𑀲𑀸 𑀓𑀺𑀭 𑀅𑀢𑁆𑀢𑀦𑁄 𑀓𑁂𑀲𑁂 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀲𑀼𑀚𑀸𑀢𑀢𑁆𑀣𑁂𑀭𑀲𑁆𑀲 𑀦𑀸𑀫 𑀅𑀕𑁆𑀕𑀲𑀸𑀯𑀓𑀲𑁆𑀲 𑀤𑀸𑀦𑀁 𑀤𑀢𑁆𑀯𑀸 𑀧𑀢𑁆𑀣𑀦𑀁 𑀅𑀓𑀸𑀲𑀺 ¶ . 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁. 𑀳𑀢𑁆𑀣𑁂 𑀧𑀲𑀸𑀭𑀺𑀢𑁂𑀢𑀺 𑀢𑀲𑁆𑀲 𑀳𑀢𑁆𑀣𑀸𑀯𑀮𑀫𑁆𑀩𑀦𑀢𑁆𑀣𑀁 𑀧𑀼𑀩𑁆𑀩𑀸𑀘𑀺𑀡𑁆𑀡𑀯𑀲𑁂𑀦 𑀳𑀢𑁆𑀣𑁂 𑀧𑀲𑀸𑀭𑀺𑀢𑁂. 𑀲𑁄 𑀓𑀺𑀭 𑀅𑀦𑀸𑀕𑀸𑀫𑀻 𑀳𑀼𑀢𑁆𑀯𑀸 𑀕𑁂𑀳𑀁 𑀆𑀕𑀘𑁆𑀙𑀦𑁆𑀢𑁄 𑀬𑀣𑀸 𑀅𑀜𑁆𑀜𑁂𑀲𑀼 𑀤𑀺𑀯𑀲𑁂𑀲𑀼 𑀇𑀢𑁄 𑀘𑀺𑀢𑁄 𑀘 𑀑𑀮𑁄𑀓𑁂𑀦𑁆𑀢𑁄 𑀲𑀺𑀢𑀁 𑀓𑀼𑀭𑀼𑀫𑀸𑀦𑁄 𑀳𑀲𑀫𑀸𑀦𑁄 𑀆𑀕𑀘𑁆𑀙𑀢𑀺, 𑀏𑀯𑀁 𑀅𑀦𑀸𑀕𑀦𑁆𑀢𑁆𑀯𑀸 𑀲𑀦𑁆𑀢𑀺𑀦𑁆𑀤𑁆𑀭𑀺𑀬𑁄 𑀲𑀦𑁆𑀢𑀫𑀸𑀦𑀲𑁄 𑀳𑀼𑀢𑁆𑀯𑀸 𑀅𑀕𑀫𑀸𑀲𑀺. 𑀥𑀫𑁆𑀫𑀤𑀺𑀦𑁆𑀦𑀸 𑀲𑀻𑀳𑀧𑀜𑁆𑀚𑀭𑀁 𑀉𑀕𑁆𑀖𑀸𑀝𑁂𑀢𑁆𑀯𑀸 𑀯𑀻𑀣𑀺𑀁 𑀑𑀮𑁄𑀓𑀬𑀫𑀸𑀦𑀸 𑀢𑀲𑁆𑀲 𑀆𑀕𑀫𑀦𑀸𑀓𑀸𑀭𑀁 𑀤𑀺𑀲𑁆𑀯𑀸 ‘‘𑀓𑀺𑀁 𑀦𑀼 𑀔𑁄 𑀏𑀢’’𑀦𑁆𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀲 𑀧𑀘𑁆𑀘𑀼𑀕𑁆𑀕𑀫𑀦𑀁 𑀓𑀼𑀭𑀼𑀫𑀸𑀦𑀸 𑀲𑁄𑀧𑀸𑀦𑀲𑀻𑀲𑁂 𑀞𑀢𑁆𑀯𑀸 𑀑𑀮𑀫𑁆𑀩𑀦𑀢𑁆𑀣𑀁 𑀳𑀢𑁆𑀣𑀁 𑀧𑀲𑀸𑀭𑁂𑀲𑀺. 𑀉𑀧𑀸𑀲𑀓𑁄 𑀅𑀢𑁆𑀢𑀦𑁄 𑀳𑀢𑁆𑀣𑀁 𑀲𑀫𑀺𑀜𑁆𑀚𑁂𑀲𑀺. 𑀲𑀸 ¶ ‘‘𑀧𑀸𑀢𑀭𑀸𑀲𑀪𑁄𑀚𑀦𑀓𑀸𑀮𑁂 𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑁂𑀲𑀺. 𑀉𑀧𑀸𑀲𑀓𑁄 𑀧𑀼𑀩𑁆𑀩𑁂 𑀢𑀸𑀬 𑀲𑀤𑁆𑀥𑀺𑀁 𑀏𑀓𑀢𑁄 𑀪𑀼𑀜𑁆𑀚𑀢𑀺. 𑀢𑀁 𑀤𑀺𑀯𑀲𑀁 𑀧𑀦 𑀢𑀁 𑀅𑀦𑀧𑀮𑁄𑀓𑁂𑀢𑁆𑀯𑀸 𑀬𑁄𑀕𑀸𑀯𑀘𑀭𑀪𑀺𑀓𑁆𑀔𑀼 𑀯𑀺𑀬 𑀏𑀓𑀓𑁄𑀯 𑀪𑀼𑀜𑁆𑀚𑀺. 𑀢𑁂𑀦𑀸𑀳 𑁋 ‘‘𑀪𑀼𑀜𑁆𑀚𑀫𑀸𑀦𑁄𑀧𑀺 𑀇𑀫𑀁 𑀤𑁂𑀣, 𑀇𑀫𑀁 𑀳𑀭𑀣𑀸𑀢𑀺 𑀦 𑀩𑁆𑀬𑀸𑀳𑀭𑀻’’𑀢𑀺. 𑀢𑀢𑁆𑀣 𑀇𑀫𑀁 𑀤𑁂𑀣𑀸𑀢𑀺 𑀇𑀫𑀁 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀤𑁂𑀣. 𑀇𑀫𑀁 𑀳𑀭𑀣𑀸𑀢𑀺 𑀇𑀫𑀁 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸 𑀅𑀧𑀳𑀭𑀣. 𑀲𑀦𑁆𑀣𑀯𑀯𑀲𑁂𑀦𑀸𑀢𑀺 𑀓𑀺𑀮𑁂𑀲𑀲𑀦𑁆𑀣𑀯𑀯𑀲𑁂𑀦. 𑀘𑀺𑀭𑀓𑀸𑀮𑀧𑀭𑀺𑀪𑀸𑀯𑀺𑀢𑀸𑀬 𑀖𑀝𑀤𑀻𑀧𑀚𑀸𑀮𑀸𑀬 𑀯𑀺𑀬 𑀅𑀩𑁆𑀪𑀦𑁆𑀢𑀭𑁂 𑀤𑀺𑀩𑁆𑀩𑀫𑀸𑀦𑀸𑀬 𑀳𑁂𑀢𑀼𑀲𑀫𑁆𑀧𑀢𑁆𑀢𑀺𑀬𑀸 𑀘𑁄𑀤𑀺𑀬𑀫𑀸𑀦𑀸 𑀆𑀳 𑁋 ‘‘𑀏𑀯𑀁 𑀲𑀦𑁆𑀢𑁂…𑀧𑁂… 𑀫𑀬𑁆𑀳𑀁 𑀧𑀩𑁆𑀩𑀚𑁆𑀚𑀁 𑀅𑀦𑀼𑀚𑀸𑀦𑀸𑀣𑀸’’𑀢𑀺.

𑀅𑀬𑀁 𑀢𑀸𑀯 𑀲𑁂𑀝𑁆𑀞𑀺 𑀖𑀭𑀫𑀚𑁆𑀛𑁂 𑀞𑀺𑀢𑁄𑀯 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀅𑀓𑀸𑀲𑀻𑀢𑀺 𑀲𑀸 𑀓𑀺𑀭 ‘‘𑀥𑀫𑁆𑀫𑀤𑀺𑀦𑁆𑀦𑁂 𑀢𑀼𑀬𑁆𑀳𑀁 𑀤𑁄𑀲𑁄 𑀦𑀢𑁆𑀣𑀺, 𑀅𑀳𑀁 𑀧𑀦 𑀅𑀚𑁆𑀚 𑀧𑀝𑁆𑀞𑀸𑀬 𑀲𑀦𑁆𑀣𑀯𑀯𑀲𑁂𑀦…𑀧𑁂… 𑀓𑀼𑀮𑀖𑀭𑀁 𑀕𑀘𑁆𑀙𑀸’’𑀢𑀺 𑀯𑀼𑀢𑁆𑀢𑁂 𑀏𑀯𑀁 𑀘𑀺𑀦𑁆𑀢𑁂𑀲𑀺 𑁋 ‘‘𑀧𑀓𑀢𑀺𑀧𑀼𑀭𑀺𑀲𑁄 𑀏𑀯𑀁 𑀯𑀢𑁆𑀢𑀸 𑀦𑀸𑀫 𑀦𑀢𑁆𑀣𑀺, 𑀅𑀤𑁆𑀥𑀸 𑀏𑀢𑁂𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀦𑀸𑀫 𑀧𑀝𑀺𑀯𑀺𑀤𑁆𑀥𑁄’’𑀢𑀺. 𑀢𑁂𑀦𑀲𑁆𑀲𑀸 𑀅𑀬𑀁 𑀲𑀗𑁆𑀓𑀧𑁆𑀧𑁄 𑀅𑀳𑁄𑀲𑀺 ‘‘𑀅𑀬𑀁 𑀢𑀸𑀯 𑀲𑁂𑀝𑁆𑀞𑀺 𑀖𑀭𑀫𑀚𑁆𑀛𑁂 𑀞𑀺𑀢𑁄𑀯 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀅𑀓𑀸𑀲𑀻’’𑀢𑀺. 𑀫𑀚𑁆𑀛𑀺𑀫𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁧.𑁪𑁬𑁦) 𑀧𑀦 ‘‘𑀅𑀣 𑀓𑀲𑁆𑀫𑀸 𑀫𑀬𑀸 𑀲𑀤𑁆𑀥𑀺𑀁 𑀬𑀣𑀸𑀧𑀓𑀢𑀺𑀬𑀸 𑀆𑀮𑀸𑀧𑀲𑀮𑁆𑀮𑀸𑀧𑀫𑀢𑁆𑀢𑀫𑁆𑀧𑀺 𑀦 𑀓𑀭𑁄𑀣𑀸𑀢𑀺 𑀲𑁄 𑀘𑀺𑀦𑁆𑀢𑁂𑀲𑀺 𑁋 ‘𑀅𑀬𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄 𑀦𑀸𑀫 𑀕𑀭𑀼 𑀪𑀸𑀭𑀺𑀬𑁄 𑀦 𑀧𑀓𑀸𑀲𑁂𑀢𑀩𑁆𑀩𑁄; 𑀲𑀘𑁂 𑀔𑁄 𑀧𑀦𑀸𑀳𑀁 𑀦 𑀓𑀣𑁂𑀲𑁆𑀲𑀸𑀫𑀺, 𑀅𑀬𑀁 𑀳𑀤𑀬𑀁 𑀨𑀸𑀮𑁂𑀢𑁆𑀯𑀸 𑀏𑀢𑁆𑀣𑁂𑀯 𑀓𑀸𑀮𑀁 𑀓𑀭𑁂𑀬𑁆𑀬𑀸’𑀢𑀺 𑀢𑀲𑁆𑀲𑀸 𑀅𑀦𑀼𑀕𑁆𑀕𑀳𑀢𑁆𑀣𑀸𑀬 𑀓𑀣𑁂𑀲𑀺 𑁋 ‘𑀥𑀫𑁆𑀫𑀤𑀺𑀦𑁆𑀦𑁂 𑀅𑀳𑀁 𑀲𑀢𑁆𑀣𑀼 𑀥𑀫𑁆𑀫𑀤𑁂𑀲𑀦𑀁 𑀲𑀼𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀸𑀫 𑀅𑀥𑀺𑀕𑀢𑁄, 𑀢𑀁 𑀅𑀥𑀺𑀕𑀢𑀲𑁆𑀲 𑀏𑀯𑀭𑀽𑀧𑀸 𑀮𑁄𑀓𑀺𑀬𑀓𑀺𑀭𑀺𑀬𑀸 𑀦 𑀯𑀝𑁆𑀝𑀢𑀻’’’𑀢𑀺 𑀯𑀼𑀢𑁆𑀢𑀁.

𑀧𑀜𑁆𑀘𑀓𑁆𑀔𑀦𑁆𑀥𑀸𑀤𑀺𑀯𑀲𑁂𑀦 𑀧𑀜𑁆𑀳𑁂 𑀧𑀼𑀘𑁆𑀙𑀻𑀢𑀺 ‘‘𑀲𑀓𑁆𑀓𑀸𑀬𑁄 𑀲𑀓𑁆𑀓𑀸𑀬𑁄𑀢𑀺 𑀅𑀬𑁆𑀬𑁂 𑀯𑀼𑀘𑁆𑀘𑀢𑀺, 𑀓𑀢𑀫𑁄 𑀦𑀼 𑀔𑁄 𑀅𑀬𑁆𑀬𑁂 𑀲𑀓𑁆𑀓𑀸𑀬𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸’’𑀢𑀺𑀆𑀤𑀺𑀦𑀸 𑀘𑀽𑀴𑀯𑁂𑀤𑀮𑁆𑀮𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁪𑁬𑁦 𑀆𑀤𑀬𑁄) 𑀆𑀕𑀢𑀦𑀬𑁂𑀦 𑀧𑀼𑀘𑁆𑀙𑀺. 𑀧𑀼𑀘𑁆𑀙𑀺𑀢𑀁 𑀧𑀼𑀘𑁆𑀙𑀺𑀢𑀁 𑀯𑀺𑀲𑁆𑀲𑀚𑁆𑀚𑁂𑀲𑀻𑀢𑀺 ‘‘𑀧𑀜𑁆𑀘 𑀔𑁄 𑀇𑀫𑁂, 𑀆𑀯𑀼𑀲𑁄 𑀯𑀺𑀲𑀸𑀔, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀲𑀓𑁆𑀓𑀸𑀬𑁄 𑀯𑀼𑀢𑁆𑀢𑁄 𑀪𑀕𑀯𑀢𑀸’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁪𑁬𑁦 𑀆𑀤𑀬𑁄) 𑀢𑀢𑁆𑀣𑁂𑀯 𑀆𑀕𑀢𑀦𑀬𑁂𑀦 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀲𑀽𑀭𑀪𑀸𑀯𑀦𑁆𑀢𑀺 𑀢𑀺𑀓𑁆𑀔𑀪𑀸𑀯𑀁. 𑀅𑀦𑀥𑀺𑀕𑀢𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀉𑀕𑁆𑀕𑀳𑁂𑀦 ¶ 𑀯𑀺𑀦𑀸 𑀢𑀢𑁆𑀣 𑀧𑀜𑁆𑀳𑁄 𑀦 𑀉𑀧𑀝𑁆𑀞𑀸𑀢𑀻𑀢𑀺 𑀆𑀳 𑁋 ‘‘𑀉𑀕𑁆𑀕𑀳𑀯𑀲𑁂𑀦 𑀅𑀭𑀳𑀢𑁆𑀢𑀫𑀕𑁆𑀕𑁂𑀧𑀺 𑀧𑀼𑀘𑁆𑀙𑀻’’𑀢𑀺. 𑀢𑀁 𑀦𑀺𑀯𑀢𑁆𑀢𑁂𑀦𑁆𑀢𑀻𑀢𑀺 ‘‘𑀯𑀺𑀫𑀼𑀢𑁆𑀢𑀺𑀬𑀸 𑀧𑀦𑀸𑀬𑁆𑀬𑁂 𑀓𑀺𑀁 𑀧𑀝𑀺𑀪𑀸𑀕𑁄’’𑀢𑀺 𑀧𑀼𑀘𑁆𑀙𑀺𑀢𑁂 ‘‘𑀯𑀺𑀫𑀼𑀢𑁆𑀢𑀺𑀬𑀸 𑀔𑁄, 𑀆𑀯𑀼𑀲𑁄 𑀯𑀺𑀲𑀸𑀔, 𑀦𑀺𑀩𑁆𑀩𑀸𑀦𑀁 𑀧𑀝𑀺𑀪𑀸𑀕𑁄’’𑀢𑀺 (𑀫. 𑀦𑀺. 𑁧.𑁪𑁬𑁬) 𑀯𑀼𑀢𑁆𑀢𑁂 ‘‘𑀦𑀺𑀩𑁆𑀩𑀸𑀦𑀲𑁆𑀲, 𑀧𑀦𑀸𑀬𑁆𑀬𑁂, 𑀓𑀺𑀁 𑀧𑀝𑀺𑀪𑀸𑀕𑁄’’𑀢𑀺 𑀧𑀼𑀦 𑀧𑀼𑀘𑁆𑀙𑀺𑀢𑁂 𑀢𑀁 𑀦𑀺𑀯𑀢𑁆𑀢𑁂𑀦𑁆𑀢𑀻 ‘‘𑀅𑀘𑁆𑀘𑀲𑀭𑀸𑀯𑀼𑀲𑁄 ¶ 𑀯𑀺𑀲𑀸𑀔𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀘𑁆𑀘𑀲𑀭𑀸𑀢𑀺 𑀅𑀧𑀼𑀘𑁆𑀙𑀺𑀢𑀩𑁆𑀩𑀁 𑀧𑀼𑀘𑁆𑀙𑀦𑁆𑀢𑁄 𑀧𑀜𑁆𑀳𑀁 𑀅𑀢𑀺𑀓𑁆𑀓𑀸𑀫𑀺𑀢𑀸 𑀅𑀳𑁄𑀲𑀻𑀢𑀺 𑀅𑀢𑁆𑀣𑁄. 𑀦𑀸𑀲𑀓𑁆𑀔𑀺 𑀧𑀜𑁆𑀳𑀸𑀦𑀁 𑀧𑀭𑀺𑀬𑀦𑁆𑀢𑀁 𑀕𑀳𑁂𑀢𑀼𑀦𑁆𑀢𑀺 𑀧𑀜𑁆𑀳𑀸𑀦𑀁 𑀧𑀭𑀺𑀘𑁆𑀙𑁂𑀤𑀧𑁆𑀧𑀫𑀸𑀡𑀁 𑀕𑀳𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀧𑀜𑁆𑀳𑀸𑀦𑀜𑁆𑀳𑀺 𑀧𑀭𑀺𑀘𑁆𑀙𑁂𑀤𑀁 𑀕𑀳𑁂𑀢𑀼𑀁 𑀬𑀼𑀢𑁆𑀢𑀝𑁆𑀞𑀸𑀦𑁂 𑀅𑀝𑁆𑀞𑀢𑁆𑀯𑀸 𑀢𑀢𑁄 𑀧𑀭𑀁 𑀧𑀼𑀘𑁆𑀙𑀦𑁆𑀢𑁄 𑀦𑀸𑀲𑀓𑁆𑀔𑀺 𑀧𑀜𑁆𑀳𑀸𑀦𑀁 𑀧𑀭𑀺𑀬𑀦𑁆𑀢𑀁 𑀕𑀳𑁂𑀢𑀼𑀁. 𑀅𑀧𑁆𑀧𑀝𑀺𑀪𑀸𑀕𑀥𑀫𑁆𑀫𑀲𑁆𑀲 𑀘 𑀧𑀝𑀺𑀪𑀸𑀕𑀁 𑀧𑀼𑀘𑁆𑀙𑀺. 𑀦𑀺𑀩𑁆𑀩𑀸𑀦𑀁 𑀦𑀸𑀫𑁂𑀢𑀁 𑀅𑀧𑁆𑀧𑀝𑀺𑀪𑀸𑀕𑀁, 𑀦 𑀲𑀓𑁆𑀓𑀸 𑀦𑀻𑀮𑀁 𑀯𑀸 𑀧𑀻𑀢𑀓𑀁 𑀯𑀸𑀢𑀺 𑀓𑁂𑀦𑀘𑀺 𑀥𑀫𑁆𑀫𑁂𑀦 𑀲𑀤𑁆𑀥𑀺𑀁 𑀧𑀝𑀺𑀪𑀸𑀕𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁, 𑀢𑀜𑁆𑀘 𑀢𑁆𑀯𑀁 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀧𑀼𑀘𑁆𑀙𑀲𑀻𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀸𑀦𑁄𑀕𑀥𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀑𑀕𑀸𑀳𑁂𑀢𑁆𑀯𑀸 𑀞𑀺𑀢𑀁, 𑀦𑀺𑀩𑁆𑀩𑀸𑀦𑀦𑁆𑀢𑁄𑀕𑀥𑀁 𑀦𑀺𑀩𑁆𑀩𑀸𑀦𑀁 𑀅𑀦𑀼𑀧𑁆𑀧𑀯𑀺𑀝𑁆𑀞𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀸𑀦𑀧𑀭𑀸𑀬𑀡𑀦𑁆𑀢𑀺 𑀦𑀺𑀩𑁆𑀩𑀸𑀦𑀁 𑀧𑀭𑀁 𑀅𑀬𑀦𑀫𑀲𑁆𑀲 𑀧𑀭𑀸𑀕𑀢𑀺, 𑀦 𑀢𑀢𑁄 𑀧𑀭𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀦𑀺𑀩𑁆𑀩𑀸𑀦𑀁 𑀧𑀭𑀺𑀬𑁄𑀲𑀸𑀦𑀁 𑀅𑀯𑀲𑀸𑀦𑀁 𑀅𑀲𑁆𑀲𑀸𑀢𑀺 𑀦𑀺𑀩𑁆𑀩𑀸𑀦𑀧𑀭𑀺𑀬𑁄𑀲𑀸𑀦𑀁.

𑀧𑀼𑀭𑁂𑀢𑀺 𑀅𑀢𑀻𑀢𑁂𑀲𑀼 𑀔𑀦𑁆𑀥𑁂𑀲𑀼. 𑀧𑀘𑁆𑀙𑀸𑀢𑀺 𑀅𑀦𑀸𑀕𑀢𑁂𑀲𑀼 𑀔𑀦𑁆𑀥𑁂𑀲𑀼. 𑀫𑀚𑁆𑀛𑁂𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀔𑀦𑁆𑀥𑁂𑀲𑀼. 𑀅𑀓𑀺𑀜𑁆𑀘𑀦𑀦𑁆𑀢𑀺 𑀬𑀲𑁆𑀲 𑀏𑀢𑁂𑀲𑀼 𑀢𑀻𑀲𑀼 𑀢𑀡𑁆𑀳𑀸𑀕𑀸𑀳𑀲𑀗𑁆𑀔𑀸𑀢𑀁 𑀓𑀺𑀜𑁆𑀘𑀦𑀁 𑀦𑀢𑁆𑀣𑀺, 𑀢𑀫𑀳𑀁 𑀭𑀸𑀕𑀓𑀺𑀜𑁆𑀘𑀦𑀸𑀤𑀻𑀳𑀺 𑀅𑀓𑀺𑀜𑁆𑀘𑀦𑀁 𑀓𑀲𑁆𑀲𑀘𑀺 𑀕𑀳𑀡𑀲𑁆𑀲 𑀅𑀪𑀸𑀯𑁂𑀦 𑀅𑀦𑀸𑀤𑀸𑀦𑀁 𑀩𑁆𑀭𑀸𑀳𑁆𑀫𑀡𑀁 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄.

𑀧𑀡𑁆𑀟𑀺𑀢𑀸𑀢𑀺 𑀥𑀸𑀢𑀼𑀆𑀬𑀢𑀦𑀸𑀤𑀺𑀓𑀼𑀲𑀮𑀢𑀸𑀲𑀗𑁆𑀔𑀸𑀢𑁂𑀦 𑀧𑀡𑁆𑀟𑀺𑀘𑁆𑀘𑁂𑀦 𑀲𑀫𑀦𑁆𑀦𑀸𑀕𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀧𑀡𑁆𑀟𑀺𑀢𑁄 𑀳𑁄𑀢𑀺? 𑀬𑀢𑁄 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀥𑀸𑀢𑀼𑀓𑀼𑀲𑀮𑁄 𑀘 𑀳𑁄𑀢𑀺 𑀆𑀬𑀢𑀦𑀓𑀼𑀲𑀮𑁄 𑀘 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀓𑀼𑀲𑀮𑁄 𑀘 𑀞𑀸𑀦𑀸𑀝𑁆𑀞𑀸𑀦𑀓𑀼𑀲𑀮𑁄 𑀘, 𑀏𑀢𑁆𑀢𑀸𑀯𑀢𑀸 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀧𑀡𑁆𑀟𑀺𑀢𑁄 𑀳𑁄𑀢𑀻’’𑀢𑀺.

𑀫𑀳𑀸𑀧𑀜𑁆𑀜𑀸𑀢𑀺 𑀫𑀳𑀦𑁆𑀢𑁂 𑀅𑀢𑁆𑀣𑁂 𑀫𑀳𑀦𑁆𑀢𑁂 𑀥𑀫𑁆𑀫𑁂 𑀫𑀳𑀦𑁆𑀢𑀸 𑀦𑀺𑀭𑀼𑀢𑁆𑀢𑀺𑀬𑁄 𑀫𑀳𑀦𑁆𑀢𑀸𑀦𑀺 𑀧𑀝𑀺𑀪𑀸𑀦𑀸𑀦𑀺 𑀧𑀭𑀺𑀕𑁆𑀕𑀳𑀡𑁂 𑀲𑀫𑀢𑁆𑀣𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸. 𑀇𑀫𑀺𑀲𑁆𑀲𑀸 𑀳𑀺 𑀣𑁂𑀭𑀺𑀬𑀸 𑀅𑀲𑁂𑀓𑁆𑀔𑀧𑁆𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀢𑁆𑀢𑀢𑀸𑀬 𑀧𑀝𑀺𑀲𑀫𑁆𑀪𑀺𑀤𑀸𑀬𑁄 𑀧𑀽𑀭𑁂𑀢𑁆𑀯𑀸 𑀞𑀺𑀢𑀢𑀸𑀬 𑀧𑀜𑁆𑀜𑀸𑀫𑀳𑀢𑁆𑀢𑀁. 𑀬𑀣𑀸 𑀢𑀁 𑀥𑀫𑁆𑀫𑀤𑀺𑀦𑁆𑀦𑀸𑀬𑀸𑀢𑀺 𑀬𑀣𑀸 𑀥𑀫𑁆𑀫𑀤𑀺𑀦𑁆𑀦𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀩𑁆𑀬𑀸𑀓𑀢𑀁, 𑀅𑀳𑀁 𑀏𑀯𑀫𑁂𑀯 𑀩𑁆𑀬𑀸𑀓𑀭𑁂𑀬𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀢𑀦𑁆𑀢𑀺 𑀦𑀺𑀧𑀸𑀢𑀫𑀢𑁆𑀣𑀁.

𑀦𑀦𑁆𑀤𑀸𑀣𑁂𑀭𑀻𑀯𑀢𑁆𑀣𑀼

𑁨𑁪𑁦. 𑀙𑀝𑁆𑀞𑁂 ¶ ¶ 𑀅𑀜𑁆𑀜𑀁 𑀫𑀕𑁆𑀕𑀁 𑀅𑀧𑀲𑁆𑀲𑀦𑁆𑀢𑀻𑀢𑀺 𑀅𑀜𑁆𑀜𑀁 𑀉𑀧𑀸𑀬𑀁 𑀅𑀧𑀲𑁆𑀲𑀦𑁆𑀢𑀻. 𑀯𑀺𑀲𑁆𑀲𑀢𑁆𑀣𑀸𑀢𑀺 𑀦𑀺𑀭𑀸𑀲𑀗𑁆𑀓𑀸. 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀦𑁆𑀢𑀺 𑀇𑀢𑁆𑀣𑀺𑀬𑀸 𑀲𑀼𑀪𑀦𑀺𑀫𑀺𑀢𑁆𑀢𑀁, 𑀲𑀼𑀪𑀸𑀓𑀸𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀥𑀫𑁆𑀫𑀧𑀤𑁂 𑀕𑀸𑀣𑀁 𑀯𑀢𑁆𑀯𑀸𑀢𑀺 𑁋

‘‘𑀅𑀝𑁆𑀞𑀻𑀦𑀁 𑀦𑀕𑀭𑀁 𑀓𑀢𑀁, 𑀫𑀁𑀲𑀮𑁄𑀳𑀺𑀢𑀮𑁂𑀧𑀦𑀁;

𑀬𑀢𑁆𑀣 𑀚𑀭𑀸 𑀘 𑀫𑀘𑁆𑀘𑀼 𑀘, 𑀫𑀸𑀦𑁄 𑀫𑀓𑁆𑀔𑁄 𑀘 𑀑𑀳𑀺𑀢𑁄’’𑀢𑀺. (𑀥. 𑀧. 𑁧𑁫𑁦) 𑁋

𑀇𑀫𑀁 𑀕𑀸𑀣𑀁 𑀯𑀢𑁆𑀯𑀸. 𑀢𑀢𑁆𑀭𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀣𑁂𑀯 𑀳𑀺 𑀧𑀼𑀩𑁆𑀩𑀡𑁆𑀡𑀸𑀧𑀭𑀡𑁆𑀡𑀸𑀤𑀻𑀦𑀁 𑀑𑀤𑀳𑀦𑀢𑁆𑀣𑀸𑀬 𑀓𑀝𑁆𑀞𑀸𑀦𑀺 𑀉𑀲𑁆𑀲𑀸𑀧𑁂𑀢𑁆𑀯𑀸 𑀯𑀮𑁆𑀮𑀻𑀳𑀺 𑀩𑀦𑁆𑀥𑀺𑀢𑁆𑀯𑀸 𑀫𑀢𑁆𑀢𑀺𑀓𑀸𑀬 𑀯𑀺𑀮𑀺𑀫𑁆𑀧𑀺𑀢𑁆𑀯𑀸 𑀦𑀕𑀭𑀲𑀗𑁆𑀔𑀸𑀢𑀁 𑀩𑀳𑀺𑀤𑁆𑀥𑀸 𑀕𑁂𑀳𑀁 𑀓𑀭𑁄𑀦𑁆𑀢𑀺, 𑀏𑀯𑀫𑀺𑀤𑀁 𑀅𑀚𑁆𑀛𑀢𑁆𑀢𑀺𑀓𑀫𑁆𑀧𑀺 𑀢𑀻𑀡𑀺 𑀅𑀝𑁆𑀞𑀺𑀲𑀢𑀸𑀦𑀺 𑀉𑀲𑁆𑀲𑀸𑀧𑁂𑀢𑁆𑀯𑀸 𑀦𑁆𑀳𑀸𑀭𑀼𑀯𑀺𑀦𑀤𑁆𑀥𑀁 𑀫𑀁𑀲𑀮𑁄𑀳𑀺𑀢𑀮𑁂𑀧𑀦𑀁 𑀢𑀘𑀧𑀝𑀺𑀘𑁆𑀙𑀦𑁆𑀦𑀁 𑀚𑀻𑀭𑀡𑀮𑀓𑁆𑀔𑀡𑀸𑀬 𑀚𑀭𑀸𑀬 𑀫𑀭𑀡𑀮𑀓𑁆𑀔𑀡𑀲𑁆𑀲 𑀫𑀘𑁆𑀘𑀼𑀦𑁄 𑀆𑀭𑁄𑀕𑁆𑀬𑀲𑀫𑁆𑀧𑀤𑀸𑀤𑀻𑀦𑀺 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀦𑀮𑀓𑁆𑀔𑀡𑀲𑁆𑀲 𑀫𑀸𑀦𑀲𑁆𑀲 𑀲𑀼𑀓𑀢𑀓𑀸𑀭𑀡𑀯𑀺𑀦𑀸𑀲𑀦𑀮𑀓𑁆𑀔𑀡𑀲𑁆𑀲 𑀫𑀓𑁆𑀔𑀲𑁆𑀲 𑀘 𑀑𑀤𑀳𑀦𑀢𑁆𑀣𑀸𑀬 𑀦𑀕𑀭𑀁 𑀓𑀢𑀁. 𑀏𑀯𑀭𑀽𑀧𑁄 𑀏𑀯 𑀳𑀺 𑀏𑀢𑁆𑀣 𑀓𑀸𑀬𑀺𑀓𑀘𑁂𑀢𑀲𑀺𑀓𑁄 𑀆𑀩𑀸𑀥𑁄 𑀑𑀳𑀺𑀢𑁄, 𑀇𑀢𑁄 𑀉𑀤𑁆𑀥𑀁 𑀓𑀺𑀜𑁆𑀘𑀺 𑀕𑀬𑁆𑀳𑀽𑀧𑀕𑀁 𑀦𑀢𑁆𑀣𑀻𑀢𑀺.

𑀲𑀼𑀢𑁆𑀢𑀁 𑀅𑀪𑀸𑀲𑀻𑀢𑀺 𑁋

‘‘𑀘𑀭𑀁 𑀯𑀸 𑀬𑀤𑀺 𑀯𑀸 𑀢𑀺𑀝𑁆𑀞𑀁, 𑀦𑀺𑀲𑀺𑀦𑁆𑀦𑁄 𑀉𑀤 𑀯𑀸 𑀲𑀬𑀁;

𑀲𑀫𑀺𑀜𑁆𑀚𑁂𑀢𑀺 𑀧𑀲𑀸𑀭𑁂𑀢𑀺, 𑀏𑀲𑀸 𑀓𑀸𑀬𑀲𑁆𑀲 𑀇𑀜𑁆𑀚𑀦𑀸.

‘‘𑀅𑀝𑁆𑀞𑀺𑀦𑀳𑀸𑀭𑀼𑀲𑀁𑀬𑀼𑀢𑁆𑀢𑁄, 𑀢𑀘𑀫𑀁𑀲𑀸𑀯𑀮𑁂𑀧𑀦𑁄;

𑀙𑀯𑀺𑀬𑀸 𑀓𑀸𑀬𑁄 𑀧𑀝𑀺𑀘𑁆𑀙𑀦𑁆𑀦𑁄, 𑀬𑀣𑀸𑀪𑀽𑀢𑀁 𑀦 𑀤𑀺𑀲𑁆𑀲𑀢𑀻’’𑀢𑀺. (𑀲𑀼. 𑀦𑀺. 𑁧𑁯𑁫-𑁧𑁯𑁬) 𑁋

𑀆𑀤𑀺𑀦𑀸 𑀲𑀼𑀢𑁆𑀢𑀫𑀪𑀸𑀲𑀺.

𑀲𑁄𑀡𑀸𑀣𑁂𑀭𑀻𑀯𑀢𑁆𑀣𑀼

𑁨𑁪𑁧. 𑀲𑀢𑁆𑀢𑀫𑁂 ¶ 𑀲𑀩𑁆𑀩𑁂𑀧𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀖𑀭𑀸𑀯𑀸𑀲𑁂 𑀧𑀢𑀺𑀝𑁆𑀞𑀸𑀧𑁂𑀲𑀻𑀢𑀺 𑀏𑀢𑁆𑀣 𑀲𑀩𑁆𑀩𑁂𑀧𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀖𑀭𑀸𑀯𑀸𑀲𑁂 𑀧𑀢𑀺𑀝𑁆𑀞𑀸𑀧𑁂𑀢𑁆𑀯𑀸 ‘‘𑀧𑀼𑀢𑁆𑀢𑀸𑀯 𑀫𑀁 𑀧𑀝𑀺𑀚𑀕𑁆𑀕𑀺𑀲𑁆𑀲𑀦𑁆𑀢𑀺, 𑀓𑀺𑀁 𑀫𑁂 𑀯𑀺𑀲𑀼𑀁 𑀓𑀼𑀝𑀼𑀫𑁆𑀩𑁂𑀦𑀸’’𑀢𑀺 𑀲𑀩𑁆𑀩𑀁 𑀲𑀸𑀧𑀢𑁂𑀬𑁆𑀬𑀫𑁆𑀧𑀺 𑀯𑀺𑀪𑀚𑀺𑀢𑁆𑀯𑀸 𑀅𑀤𑀸𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯 𑀳𑀺 𑀢𑀢𑁄 𑀧𑀝𑁆𑀞𑀸𑀬 ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀓𑀺𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀺𑀓𑀁 𑀆𑀕𑀢𑀁 ‘‘𑀫𑀸𑀢𑀸’’𑀢𑀺 𑀲𑀜𑁆𑀜𑀫𑁆𑀧𑀺 𑀦 𑀓𑀭𑀺𑀁𑀲𑀼. 𑀢𑀣𑀸 𑀳𑀺 𑀦𑀁 𑀓𑀢𑀺𑀧𑀸𑀳𑀘𑁆𑀘𑀬𑁂𑀦 𑀚𑁂𑀝𑁆𑀞𑀧𑀼𑀢𑁆𑀢𑀲𑁆𑀲 𑀪𑀭𑀺𑀬𑀸 ‘‘𑀅𑀳𑁄 𑀅𑀫𑁆𑀳𑀸𑀓𑀁 𑀅𑀬𑀁 𑀚𑁂𑀝𑁆𑀞𑁂𑀧𑀼𑀢𑁆𑀢𑁄 ¶ 𑀫𑁂𑀢𑀺 𑀤𑁆𑀯𑁂 𑀓𑁄𑀝𑁆𑀞𑀸𑀲𑁂 𑀤𑀢𑁆𑀯𑀸 𑀯𑀺𑀬 𑀇𑀫𑀫𑁂𑀯 𑀕𑁂𑀳𑀁 𑀆𑀕𑀘𑁆𑀙𑀢𑀻’’𑀢𑀺 𑀆𑀳. 𑀲𑁂𑀲𑀧𑀼𑀢𑁆𑀢𑀸𑀦𑀁 𑀪𑀭𑀺𑀬𑀸𑀬𑁄𑀧𑀺 𑀏𑀯𑀫𑁂𑀯𑀁 𑀯𑀤𑀺𑀁𑀲𑀼. 𑀚𑁂𑀝𑁆𑀞𑀥𑀻𑀢𑀭𑀁 𑀆𑀤𑀺𑀁 𑀓𑀢𑁆𑀯𑀸 𑀢𑀸𑀲𑀁 𑀕𑁂𑀳𑀁 𑀕𑀢𑀓𑀸𑀮𑁂 𑀢𑀸𑀧𑀺 𑀦𑀁 𑀏𑀯𑀫𑁂𑀯 𑀯𑀤𑀺𑀁𑀲𑀼. 𑀲𑀸 𑀅𑀯𑀫𑀸𑀦𑀧𑁆𑀧𑀢𑁆𑀢𑀸 𑀳𑀼𑀢𑁆𑀯𑀸 ‘‘𑀓𑀺𑀁 𑀫𑁂 𑀇𑀫𑁂𑀲𑀁 𑀲𑀦𑁆𑀢𑀺𑀓𑁂 𑀯𑀼𑀢𑁆𑀣𑁂𑀦, 𑀪𑀺𑀓𑁆𑀔𑀼𑀦𑀻 𑀳𑀼𑀢𑁆𑀯𑀸 𑀚𑀻𑀯𑀺𑀲𑁆𑀲𑀸𑀫𑀻’’𑀢𑀺 𑀪𑀺𑀓𑁆𑀔𑀼𑀦𑀻𑀉𑀧𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑁆𑀚𑀁 𑀬𑀸𑀘𑀺, 𑀢𑀸 𑀦𑀁 𑀧𑀩𑁆𑀩𑀸𑀚𑁂𑀲𑀼𑀁. 𑀇𑀫𑀫𑁂𑀯 𑀯𑀢𑁆𑀣𑀼𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀩𑀳𑀼𑀧𑀼𑀢𑁆𑀢𑀺𑀓𑀲𑁄𑀡𑀸 𑀢𑁂𑀲𑀁 𑀅𑀢𑁆𑀢𑀦𑀺 𑀅𑀕𑀸𑀭𑀯𑀪𑀸𑀯𑀁 𑀜𑀢𑁆𑀯𑀸 ‘𑀖𑀭𑀸𑀯𑀸𑀲𑁂𑀦 𑀓𑀺𑀁 𑀓𑀭𑀺𑀲𑁆𑀲𑀸𑀫𑀻’𑀢𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀩𑁆𑀩𑀚𑀻’’𑀢𑀺 𑀆𑀳.

𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀺𑀬𑁄𑀢𑀺 𑀪𑀺𑀓𑁆𑀔𑀼𑀯𑀺𑀳𑀸𑀭𑀁 𑀕𑀘𑁆𑀙𑀦𑁆𑀢𑀺𑀬𑁄. 𑀥𑀫𑁆𑀫𑀫𑀼𑀢𑁆𑀢𑀫𑀦𑁆𑀢𑀺 𑀦𑀯𑀯𑀺𑀥𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁. 𑀲𑁄 𑀳𑀺 𑀉𑀢𑁆𑀢𑀫𑀥𑀫𑁆𑀫𑁄 𑀦𑀸𑀫 𑀬𑁄 𑀳𑀺 𑀢𑀁 𑀦 𑀧𑀲𑁆𑀲𑀢𑀺, 𑀢𑀲𑁆𑀲 𑀯𑀲𑁆𑀲𑀲𑀢𑀫𑁆𑀧𑀺 𑀚𑀻𑀯𑀦𑀢𑁄 𑀢𑀁 𑀥𑀫𑁆𑀫𑀁 𑀧𑀲𑁆𑀲𑀦𑁆𑀢𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑁆𑀢𑀲𑁆𑀲 𑀏𑀓𑀸𑀳𑀫𑁆𑀧𑀺 𑀏𑀓𑀓𑁆𑀔𑀡𑀫𑁆𑀧𑀺 𑀚𑀻𑀯𑀺𑀢𑀁 𑀲𑁂𑀬𑁆𑀬𑁄. 𑀆𑀕𑀦𑁆𑀢𑀼𑀓𑀚𑀦𑁄𑀢𑀺 𑀯𑀺𑀳𑀸𑀭𑀕𑀢𑀁 𑀪𑀺𑀓𑁆𑀔𑀼𑀦𑀻𑀚𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀅𑀦𑀼𑀧𑀥𑀸𑀭𑁂𑀢𑁆𑀯𑀸𑀢𑀺 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸.

𑀩𑀓𑀼𑀮𑀸𑀣𑁂𑀭𑀻𑀯𑀢𑁆𑀣𑀼

𑁨𑁪𑁨. 𑀅𑀝𑁆𑀞𑀫𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀓𑀼𑀡𑁆𑀟𑀮𑀓𑁂𑀲𑀸𑀣𑁂𑀭𑀻𑀯𑀢𑁆𑀣𑀼

𑁨𑁪𑁩. 𑀦𑀯𑀫𑁂 𑀘𑀢𑀼𑀓𑁆𑀓𑁂𑀢𑀺 𑀯𑀻𑀣𑀺𑀘𑀢𑀼𑀓𑁆𑀓𑁂. 𑀘𑀢𑀼𑀦𑁆𑀦𑀁 𑀲𑀫𑀸𑀳𑀸𑀭𑁄 𑀘𑀢𑀼𑀓𑁆𑀓𑀁. 𑀘𑀸𑀭𑀓𑀢𑁄𑀢𑀺 𑀩𑀦𑁆𑀥𑀦𑀸𑀕𑀸𑀭𑀢𑁄. 𑀉𑀩𑁆𑀩𑀝𑁆𑀝𑁂𑀢𑁆𑀯𑀸𑀢𑀺 𑀉𑀤𑁆𑀥𑀭𑀺𑀢𑁆𑀯𑀸.

𑀫𑀼𑀳𑀼𑀢𑁆𑀢𑀫𑀧𑀺 𑀘𑀺𑀦𑁆𑀢𑀬𑁂𑀢𑀺 𑀫𑀼𑀳𑀼𑀢𑁆𑀢𑀁 𑀢𑀗𑁆𑀔𑀡𑀫𑁆𑀧𑀺 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀜𑁆𑀜𑀸𑀬 𑀢𑀗𑁆𑀔𑀡𑀸𑀦𑀼𑀭𑀽𑀧𑀁 𑀅𑀢𑁆𑀣𑀁 𑀘𑀺𑀦𑁆𑀢𑀺𑀢𑀼𑀁 𑀲𑀓𑁆𑀓𑀼𑀡𑁂𑀬𑁆𑀬. 𑀲𑀳𑀲𑁆𑀲𑀫𑀧𑀺 𑀘𑁂 𑀕𑀸𑀣𑀸, 𑀅𑀦𑀢𑁆𑀣𑀧𑀤𑀲𑀁𑀳𑀺𑀢𑀸𑀢𑀺 𑀅𑀬𑀁 𑀕𑀸𑀣𑀸 𑀤𑀸𑀭𑀼𑀘𑀻𑀭𑀺𑀬𑀢𑁆𑀣𑁂𑀭𑀲𑁆𑀲 𑀪𑀕𑀯𑀢𑀸 𑀪𑀸𑀲𑀺𑀢𑀸, 𑀇𑀥𑀸𑀧𑀺 𑀘 𑀲𑀸𑀬𑁂𑀯 𑀕𑀸𑀣𑀸 𑀤𑀲𑁆𑀲𑀺𑀢𑀸. 𑀣𑁂𑀭𑀺𑀕𑀸𑀣𑀸𑀲𑀁𑀯𑀡𑁆𑀡𑀦𑀸𑀬𑀁 𑀆𑀘𑀭𑀺𑀬𑀥𑀫𑁆𑀫𑀧𑀸𑀮𑀢𑁆𑀣𑁂𑀭𑁂𑀦𑀧𑀺 𑀓𑀼𑀡𑁆𑀟𑀮𑀓𑁂𑀲𑀺𑀢𑁆𑀣𑁂𑀭𑀺𑀬𑀸 ¶ 𑀯𑀢𑁆𑀣𑀼𑀫𑁆𑀳𑀺 𑀅𑀬𑀫𑁂𑀯 𑀕𑀸𑀣𑀸 𑀯𑀼𑀢𑁆𑀢𑀸. 𑀥𑀫𑁆𑀫𑀧𑀤𑀝𑁆𑀞𑀓𑀣𑀸𑀬𑀁 𑀧𑀦 𑀓𑀼𑀡𑁆𑀟𑀮𑀓𑁂𑀲𑀺𑀢𑁆𑀣𑁂𑀭𑀺𑀬𑀸 𑀯𑀢𑁆𑀣𑀼𑀫𑁆𑀳𑀺 𑁋

‘‘𑀬𑁄 𑀘 𑀕𑀸𑀣𑀸𑀲𑀢𑀁 𑀪𑀸𑀲𑁂, 𑀅𑀦𑀢𑁆𑀣𑀧𑀤𑀲𑀁𑀳𑀺𑀢𑀸;

𑀏𑀓𑀁 𑀥𑀫𑁆𑀫𑀧𑀤𑀁 𑀲𑁂𑀬𑁆𑀬𑁄, 𑀬𑀁 𑀲𑀼𑀢𑁆𑀯𑀸 𑀉𑀧𑀲𑀫𑁆𑀫𑀢𑀻’’𑀢𑀺. (𑀥. 𑀧. 𑀅𑀝𑁆𑀞. 𑁧.𑁧𑁦𑁨) 𑁋

𑀅𑀬𑀁 𑀕𑀸𑀣𑀸 𑀆𑀕𑀢𑀸. 𑀢𑀁𑀢𑀁𑀪𑀸𑀡𑀓𑀸𑀦𑀁 𑀓𑀣𑀸𑀫𑀕𑁆𑀕𑀸𑀦𑀼𑀲𑀸𑀭𑁂𑀦 𑀢𑀢𑁆𑀣 𑀢𑀢𑁆𑀣 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀦 𑀇𑀥 𑀆𑀘𑀭𑀺𑀬𑀲𑁆𑀲 𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑁄 𑀲𑀗𑁆𑀓𑀺𑀢𑀩𑁆𑀩𑁄.

𑀪𑀤𑁆𑀤𑀸𑀓𑀸𑀧𑀺𑀮𑀸𑀦𑀻𑀣𑁂𑀭𑀻-𑀪𑀤𑁆𑀤𑀸𑀓𑀘𑁆𑀘𑀸𑀦𑀸𑀣𑁂𑀭𑀻𑀯𑀢𑁆𑀣𑀼

𑁨𑁪𑁪-𑁨𑁪𑁫. 𑀤𑀲𑀫𑀁 ¶ 𑀏𑀓𑀸𑀤𑀲𑀫𑀜𑁆𑀘 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀓𑀺𑀲𑀸𑀕𑁄𑀢𑀫𑀻𑀣𑁂𑀭𑀻𑀯𑀢𑁆𑀣𑀼

𑁨𑁪𑁬. 𑀤𑁆𑀯𑀸𑀤𑀲𑀫𑁂 𑀢𑀻𑀳𑀺 𑀮𑀽𑀔𑁂𑀳𑀻𑀢𑀺 𑀯𑀢𑁆𑀣𑀮𑀽𑀔𑀲𑀼𑀢𑁆𑀢𑀮𑀽𑀔𑀭𑀚𑀦𑀮𑀽𑀔𑀲𑀗𑁆𑀔𑀸𑀢𑁂𑀳𑀺 𑀢𑀻𑀳𑀺 𑀮𑀽𑀔𑁂𑀳𑀺. 𑀲𑀺𑀤𑁆𑀥𑀢𑁆𑀣𑀓𑀦𑁆𑀢𑀺 𑀲𑀸𑀲𑀧𑀩𑀻𑀚𑀁.

𑀢𑀁 𑀧𑀼𑀢𑁆𑀢𑀧𑀲𑀼𑀲𑀫𑁆𑀫𑀢𑁆𑀢𑀦𑁆𑀢𑀺 𑀢𑀁 𑀭𑀽𑀧𑀩𑀮𑀸𑀤𑀺𑀲𑀫𑁆𑀧𑀦𑁆𑀦𑁂 𑀧𑀼𑀢𑁆𑀢𑁂 𑀘 𑀧𑀲𑀽 𑀘 𑀮𑀪𑀺𑀢𑁆𑀯𑀸 ‘‘𑀫𑀫 𑀧𑀼𑀢𑁆𑀢𑀸 𑀅𑀪𑀺𑀭𑀽𑀧𑀸 𑀩𑀮𑀲𑀫𑁆𑀧𑀦𑁆𑀦𑀸 𑀧𑀡𑁆𑀟𑀺𑀢𑀸 𑀲𑀩𑁆𑀩𑀓𑀺𑀘𑁆𑀘𑀲𑀫𑀢𑁆𑀣𑀸, 𑀫𑀫 𑀕𑁄𑀡𑁄 𑀅𑀭𑁄𑀕𑁄 𑀅𑀪𑀺𑀭𑀽𑀧𑁄 𑀫𑀳𑀸𑀪𑀸𑀭𑀯𑀳𑁄, 𑀫𑀫 𑀕𑀸𑀯𑀻 𑀩𑀳𑀼𑀔𑀻𑀭𑀸’’𑀢𑀺 𑀏𑀯𑀁 𑀧𑀼𑀢𑁆𑀢𑁂𑀳𑀺 𑀘 𑀧𑀲𑀽𑀳𑀺 𑀘 𑀲𑀫𑁆𑀫𑀢𑁆𑀢𑀁 𑀦𑀭𑀁. 𑀩𑁆𑀬𑀸𑀲𑀢𑁆𑀢𑀫𑀦𑀲𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀤𑀻𑀲𑀼 𑀧𑀢𑁆𑀢𑀘𑀻𑀯𑀭𑀸𑀤𑀻𑀲𑀼 𑀯𑀸 𑀬𑀁 𑀬𑀁 𑀮𑀤𑁆𑀥𑀁 𑀳𑁄𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀮𑀕𑁆𑀕𑀦𑀸𑀬 𑀲𑀢𑁆𑀢𑀫𑀸𑀦𑀲𑀁. 𑀲𑀼𑀢𑁆𑀢𑀁 𑀕𑀸𑀫𑀦𑁆𑀢𑀺 𑀦𑀺𑀤𑁆𑀤𑀁 𑀉𑀧𑀕𑀢𑀁 𑀲𑀢𑁆𑀢𑀓𑀸𑀬𑀁. 𑀫𑀳𑁄𑀖𑁄𑀯𑀸𑀢𑀺 𑀬𑀣𑀸 𑀏𑀯𑀭𑀽𑀧𑀁 𑀕𑀸𑀫𑀁 𑀕𑀫𑁆𑀪𑀻𑀭𑀢𑁄 𑀯𑀺𑀢𑁆𑀣𑀸𑀭𑀢𑁄 𑀘 𑀫𑀳𑀦𑁆𑀢𑁄 𑀫𑀳𑀸𑀦𑀤𑀺𑀑𑀖𑁄 𑀅𑀦𑁆𑀢𑀫𑀲𑁄 𑀲𑀼𑀦𑀔𑀫𑁆𑀧𑀺 𑀅𑀲𑁂𑀲𑁂𑀢𑁆𑀯𑀸 𑀲𑀩𑁆𑀩𑀁 𑀆𑀤𑀸𑀬 𑀕𑀘𑁆𑀙𑀢𑀺, 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀦𑀭𑀁 𑀫𑀘𑁆𑀘𑀼 𑀆𑀤𑀸𑀬 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀅𑀫𑀢𑀁 𑀧𑀤𑀦𑁆𑀢𑀺 𑀫𑀭𑀡𑀭𑀳𑀺𑀢𑀁 𑀓𑁄𑀝𑁆𑀞𑀸𑀲𑀁, 𑀅𑀫𑀢𑀁 𑀫𑀳𑀸𑀦𑀺𑀩𑁆𑀩𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀲𑁂𑀲𑀫𑁂𑀢𑁆𑀣 𑀉𑀢𑁆𑀢𑀸𑀦𑀫𑁂𑀯.

𑀲𑀺𑀗𑁆𑀕𑀸𑀮𑀓𑀫𑀸𑀢𑀸𑀣𑁂𑀭𑀻𑀯𑀢𑁆𑀣𑀼

𑁨𑁪𑁭. 𑀢𑁂𑀭𑀲𑀫𑀁 ¶ 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

(𑀧𑀜𑁆𑀘𑀫𑀏𑀢𑀤𑀕𑁆𑀕𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.)

𑀣𑁂𑀭𑀺𑀧𑀸𑀴𑀺𑀲𑀁𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀏𑀢𑀤𑀕𑁆𑀕𑀯𑀕𑁆𑀕𑁄

(𑁧𑁪) 𑁬. 𑀙𑀝𑁆𑀞𑀏𑀢𑀤𑀕𑁆𑀕𑀯𑀕𑁆𑀕𑀯𑀡𑁆𑀡𑀦𑀸

𑀢𑀧𑀼𑀲𑁆𑀲-𑀪𑀮𑁆𑀮𑀺𑀓𑀯𑀢𑁆𑀣𑀼

𑁨𑁪𑁮. 𑀉𑀧𑀸𑀲𑀓𑀧𑀸𑀴𑀺𑀲𑀁𑀯𑀡𑁆𑀡𑀦𑀸𑀬 ¶ ¶ 𑀧𑀞𑀫𑁂 𑀲𑀩𑁆𑀩𑀧𑀞𑀫𑀁 𑀲𑀭𑀡𑀁 𑀕𑀘𑁆𑀙𑀦𑁆𑀢𑀸𑀦𑀦𑁆𑀢𑀺 𑀲𑀩𑁆𑀩𑁂𑀲𑀁 𑀧𑀞𑀫𑀁 𑀳𑀼𑀢𑁆𑀯𑀸 𑀲𑀭𑀡𑀁 𑀕𑀘𑁆𑀙𑀦𑁆𑀢𑀸𑀦𑀁. 𑀇𑀢𑁄 𑀧𑀭𑀦𑁆𑀢𑀺 𑀲𑀢𑁆𑀢𑀲𑀢𑁆𑀢𑀸𑀳𑀢𑁄 𑀧𑀭𑀁. 𑀕𑀫𑀦𑀽𑀧𑀘𑁆𑀙𑁂𑀤𑀁 𑀅𑀓𑀸𑀲𑀻𑀢𑀺 𑀕𑀫𑀦𑀯𑀺𑀘𑁆𑀙𑁂𑀤𑀁 𑀅𑀓𑀸𑀲𑀺. 𑀬𑀣𑀸 𑀢𑁂 𑀕𑁄𑀡𑀸 𑀥𑀼𑀭𑀁 𑀙𑀟𑁆𑀟𑁂𑀢𑁆𑀯𑀸 𑀧𑁄𑀣𑀺𑀬𑀫𑀸𑀦𑀸𑀧𑀺 𑀦 𑀕𑀘𑁆𑀙𑀦𑁆𑀢𑀺, 𑀢𑀣𑀸 𑀅𑀓𑀸𑀲𑀻𑀢𑀺 𑀅𑀢𑁆𑀣𑁄. 𑀢𑁂𑀲𑀦𑁆𑀢𑀺 𑀢𑀧𑀼𑀲𑁆𑀲𑀪𑀮𑁆𑀮𑀺𑀓𑀸𑀦𑀁. 𑀅𑀥𑀺𑀫𑀼𑀘𑁆𑀘𑀺𑀢𑁆𑀯𑀸𑀢𑀺 𑀆𑀯𑀺𑀲𑀺𑀢𑁆𑀯𑀸. 𑀬𑀓𑁆𑀔𑀲𑁆𑀲 𑀆𑀯𑀝𑁆𑀝𑁄 𑀬𑀓𑁆𑀔𑀸𑀯𑀝𑁆𑀝𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀅𑀢𑀻𑀢𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑀁 𑀑𑀮𑁄𑀓𑁂𑀲𑀻𑀢𑀺 𑀅𑀢𑀻𑀢𑀩𑀼𑀤𑁆𑀥𑀸 𑀓𑁂𑀦 𑀪𑀸𑀚𑀦𑁂𑀦 𑀧𑀝𑀺𑀕𑁆𑀕𑀡𑁆𑀳𑀺𑀁𑀲𑀽𑀢𑀺 𑀩𑀼𑀤𑁆𑀥𑀸𑀘𑀺𑀡𑁆𑀡𑀁 𑀑𑀮𑁄𑀓𑁂𑀲𑀺. 𑀤𑁆𑀯𑁂𑀯𑀸𑀘𑀺𑀓𑁂 𑀲𑀭𑀡𑁂 𑀧𑀢𑀺𑀝𑁆𑀞𑀸𑀬𑀸𑀢𑀺 𑀲𑀗𑁆𑀖𑀲𑁆𑀲 𑀅𑀦𑀼𑀧𑁆𑀧𑀦𑁆𑀦𑀢𑁆𑀢𑀸 𑀩𑀼𑀤𑁆𑀥𑀥𑀫𑁆𑀫𑀯𑀲𑁂𑀦 𑀤𑁆𑀯𑁂𑀯𑀸𑀘𑀺𑀓𑁂 𑀲𑀭𑀡𑁂 𑀧𑀢𑀺𑀝𑁆𑀞𑀳𑀺𑀢𑁆𑀯𑀸. 𑀘𑁂𑀢𑀺𑀬𑀦𑁆𑀢𑀺 𑀧𑀽𑀚𑀦𑀻𑀬𑀯𑀢𑁆𑀣𑀼𑀁. 𑀚𑀻𑀯𑀓𑁂𑀲𑀥𑀸𑀢𑀼𑀬𑀸𑀢𑀺 𑀚𑀻𑀯𑀫𑀸𑀦𑀲𑁆𑀲 𑀪𑀕𑀯𑀢𑁄 𑀓𑁂𑀲𑀥𑀸𑀢𑀼𑀬𑀸.

𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁂𑀝𑁆𑀞𑀺𑀯𑀢𑁆𑀣𑀼

𑁨𑁪𑁯. 𑀤𑀼𑀢𑀺𑀬𑁂 𑀢𑁂𑀦𑁂𑀯 𑀕𑀼𑀡𑁂𑀦𑀸𑀢𑀺 𑀢𑁂𑀦𑁂𑀯 𑀤𑀸𑀬𑀓𑀪𑀸𑀯𑀲𑀗𑁆𑀔𑀸𑀢𑁂𑀦 𑀕𑀼𑀡𑁂𑀦. 𑀲𑁄 𑀳𑀺 𑀲𑀩𑁆𑀩𑀓𑀸𑀫𑀲𑀫𑀺𑀤𑁆𑀥𑀢𑀸𑀬 𑀯𑀺𑀕𑀢𑀫𑀘𑁆𑀙𑁂𑀭𑀢𑀸𑀬 𑀓𑀭𑀼𑀡𑀸𑀤𑀺𑀕𑀼𑀡𑀲𑀫𑀗𑁆𑀕𑀺𑀢𑀸𑀬 𑀘 𑀦𑀺𑀘𑁆𑀘𑀓𑀸𑀮𑀁 𑀅𑀦𑀸𑀣𑀸𑀦𑀁 𑀧𑀺𑀡𑁆𑀟𑀫𑀤𑀸𑀲𑀺. 𑀢𑁂𑀦 𑀲𑀩𑁆𑀩𑀓𑀸𑀮𑀁 𑀉𑀧𑀝𑁆𑀞𑀺𑀢𑁄 𑀅𑀦𑀸𑀣𑀸𑀦𑀁 𑀧𑀺𑀡𑁆𑀟𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀅𑀦𑀸𑀣𑀧𑀺𑀡𑁆𑀟𑀺𑀓𑁄𑀢𑀺 𑀲𑀗𑁆𑀔𑀁 𑀕𑀢𑁄. 𑀬𑁄𑀚𑀦𑀺𑀓𑀯𑀺𑀳𑀸𑀭𑁂 𑀓𑀸𑀭𑁂𑀢𑁆𑀯𑀸𑀢𑀺 𑀬𑁄𑀚𑀦𑁂 𑀬𑁄𑀚𑀦𑁂 𑀏𑀓𑀫𑁂𑀓𑀁 𑀯𑀺𑀳𑀸𑀭𑀁 𑀓𑀸𑀭𑁂𑀢𑁆𑀯𑀸. ‘‘𑀏𑀯𑀭𑀽𑀧𑀁 𑀤𑀸𑀦𑀁 𑀧𑀯𑀢𑁆𑀢𑁂𑀲𑀻’’𑀢𑀺 𑀯𑀢𑁆𑀯𑀸 𑀢𑀫𑁂𑀯 𑀤𑀸𑀦𑀁 𑀯𑀺𑀪𑀚𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀤𑁂𑀯𑀲𑀺𑀓𑀁 𑀧𑀜𑁆𑀘 𑀲𑀮𑀸𑀓𑀪𑀢𑁆𑀢𑀸𑀦𑀺 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀮𑀸𑀓𑀸𑀬 𑀕𑀸𑀳𑁂𑀢𑀩𑁆𑀩𑀁 𑀪𑀢𑁆𑀢𑀁 𑀲𑀮𑀸𑀓𑀪𑀢𑁆𑀢𑀁. 𑀏𑀓𑀲𑁆𑀫𑀺𑀁 𑀧𑀓𑁆𑀔𑁂 𑀏𑀓𑀤𑀺𑀯𑀲𑀁 𑀤𑀸𑀢𑀩𑁆𑀩𑀁 𑀪𑀢𑁆𑀢𑀁 𑀧𑀓𑁆𑀔𑀺𑀓𑀪𑀢𑁆𑀢𑀁. 𑀥𑀼𑀭𑀕𑁂𑀳𑁂 𑀞𑀧𑁂𑀢𑁆𑀯𑀸 𑀤𑀸𑀢𑀩𑁆𑀩𑀁 𑀪𑀢𑁆𑀢𑀁 𑀥𑀼𑀭𑀪𑀢𑁆𑀢𑀁. 𑀆𑀕𑀦𑁆𑀢𑀼𑀓𑀸𑀦𑀁 𑀤𑀸𑀢𑀩𑁆𑀩𑀁 𑀪𑀢𑁆𑀢𑀁 𑀆𑀕𑀦𑁆𑀢𑀼𑀓𑀪𑀢𑁆𑀢𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀧𑀜𑁆𑀘 𑀆𑀲𑀦𑀲𑀢𑀸𑀦𑀺 𑀕𑁂𑀳𑁂 𑀦𑀺𑀘𑁆𑀘𑀧𑀜𑁆𑀜𑀢𑁆𑀢𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀕𑁂𑀳𑁂 𑀦𑀺𑀲𑀻𑀤𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀸𑀦𑀁 𑀧𑀜𑁆𑀘𑀦𑁆𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀧𑀜𑁆𑀘 𑀆𑀲𑀦𑀲𑀢𑀸𑀦𑀺 𑀦𑀺𑀘𑁆𑀘𑀧𑀜𑁆𑀜𑀢𑁆𑀢𑀸𑀦𑀺 𑀳𑁄𑀦𑁆𑀢𑀺.

𑀘𑀺𑀢𑁆𑀢𑀕𑀳𑀧𑀢𑀺𑀯𑀢𑁆𑀣𑀼

𑁨𑁫𑁦. 𑀢𑀢𑀺𑀬𑁂 ¶ 𑀫𑀺𑀕𑀸 𑀏𑀯 𑀫𑀺𑀕𑀭𑀽𑀧𑀸𑀦𑀺. 𑀪𑀺𑀓𑁆𑀔𑀁 𑀲𑀫𑀸𑀤𑀸𑀧𑁂𑀢𑁆𑀯𑀸𑀢𑀺, ‘‘𑀪𑀦𑁆𑀢𑁂, 𑀫𑀬𑁆𑀳𑀁 𑀅𑀦𑀼𑀕𑁆𑀕𑀳𑀁 𑀓𑀭𑁄𑀣, 𑀇𑀥 𑀦𑀺𑀲𑀻𑀤𑀺𑀢𑁆𑀯𑀸 𑀪𑀺𑀓𑁆𑀔𑀁 𑀕𑀡𑁆𑀳𑀣𑀸’’𑀢𑀺 𑀪𑀺𑀓𑁆𑀔𑀸𑀕𑀳𑀡𑀢𑁆𑀣𑀁 𑀲𑀫𑀸𑀤𑀸𑀧𑁂𑀢𑁆𑀯𑀸 ¶ . 𑀯𑀺𑀯𑀝𑁆𑀝𑀁 𑀉𑀤𑁆𑀤𑀺𑀲𑁆𑀲 𑀉𑀧𑀘𑀺𑀢𑀁 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀓𑀼𑀲𑀮𑀁 𑀉𑀧𑀦𑀺𑀲𑁆𑀲𑀬𑁄. 𑀲𑀴𑀸𑀬𑀢𑀦𑀯𑀺𑀪𑀢𑁆𑀢𑀺𑀫𑁂𑀯 𑀤𑁂𑀲𑁂𑀲𑀻𑀢𑀺 𑀲𑀴𑀸𑀬𑀢𑀦𑀯𑀺𑀪𑀸𑀕𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑀫𑁂𑀯 𑀥𑀫𑁆𑀫𑀓𑀣𑀁 𑀓𑀣𑁂𑀲𑀺. 𑀣𑁂𑀭𑁂𑀦𑀸𑀢𑀺 𑀢𑀢𑁆𑀣 𑀲𑀦𑁆𑀦𑀺𑀳𑀺𑀢𑀸𑀦𑀁 𑀲𑀩𑁆𑀩𑁂𑀲𑀁 𑀚𑁂𑀝𑁆𑀞𑁂𑀦 𑀫𑀳𑀸𑀣𑁂𑀭𑁂𑀦. 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦𑀸𑀢𑀺 𑀘𑀺𑀢𑁆𑀢𑁂𑀦 𑀕𑀳𑀧𑀢𑀺𑀦𑀸 ‘‘𑀬𑀸 𑀇𑀫𑀸, 𑀪𑀦𑁆𑀢𑁂 𑀣𑁂𑀭, 𑀅𑀦𑁂𑀓𑀯𑀺𑀳𑀺𑀢𑀸 𑀤𑀺𑀝𑁆𑀞𑀺𑀬𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, ‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺 𑀯𑀸, ‘𑀅𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺 𑀯𑀸, ‘𑀅𑀦𑁆𑀢𑀯𑀸 𑀮𑁄𑀓𑁄’𑀢𑀺 𑀯𑀸, ‘𑀅𑀦𑀦𑁆𑀢𑀯𑀸 𑀮𑁄𑀓𑁄’𑀢𑀺 𑀯𑀸, ‘𑀢𑀁 𑀚𑀻𑀯𑀁 𑀢𑀁 𑀲𑀭𑀻𑀭’𑀦𑁆𑀢𑀺 𑀯𑀸, ‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’𑀦𑁆𑀢𑀺 𑀯𑀸, ‘𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸, ‘𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸, ‘𑀳𑁄𑀢𑀺 𑀘 𑀦 𑀳𑁄𑀢𑀺 𑀘 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸, ‘𑀦𑁂𑀯 𑀳𑁄𑀢𑀺 𑀦 𑀦 𑀳𑁄𑀢𑀺 𑀢𑀣𑀸𑀕𑀢𑁄 𑀧𑀭𑀁 𑀫𑀭𑀡𑀸’𑀢𑀺 𑀯𑀸 𑀬𑀸𑀦𑀺 𑀘𑀺𑀫𑀸𑀦𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀩𑁆𑀭𑀳𑁆𑀫𑀚𑀸𑀮𑁂 𑀕𑀡𑀺𑀢𑀸𑀦𑀺, 𑀇𑀫𑀸 𑀦𑀼 𑀔𑁄, 𑀪𑀦𑁆𑀢𑁂, 𑀤𑀺𑀝𑁆𑀞𑀺𑀬𑁄 𑀓𑀺𑀲𑁆𑀫𑀺𑀁 𑀲𑀢𑀺 𑀳𑁄𑀦𑁆𑀢𑀺, 𑀓𑀺𑀲𑁆𑀫𑀺𑀁 𑀅𑀲𑀢𑀺 𑀦 𑀳𑁄𑀦𑁆𑀢𑀻’’𑀢𑀺 𑀏𑀯𑀫𑀸𑀤𑀺𑀦𑀸 (𑀲𑀁. 𑀦𑀺. 𑁪.𑁩𑁪𑁫) 𑀧𑀜𑁆𑀳𑁂 𑀧𑀼𑀝𑁆𑀞𑁂 𑀢𑀁 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦. 𑀇𑀫𑀁 𑀓𑀺𑀭 𑀧𑀜𑁆𑀳𑀁 𑀬𑀸𑀯𑀢𑀢𑀺𑀬𑀁 𑀧𑀼𑀝𑁆𑀞𑁄 𑀫𑀳𑀸𑀣𑁂𑀭𑁄 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀅𑀣 𑀇𑀲𑀺𑀤𑀢𑁆𑀢𑀢𑁆𑀣𑁂𑀭𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀅𑀬𑀁 𑀣𑁂𑀭𑁄 𑀦𑁂𑀯 𑀅𑀢𑁆𑀢𑀦𑀸 𑀩𑁆𑀬𑀸𑀓𑀭𑁄𑀢𑀺, 𑀦 𑀅𑀜𑁆𑀜𑀁 𑀅𑀚𑁆𑀛𑁂𑀲𑀢𑀺, 𑀉𑀧𑀸𑀲𑀓𑁄 𑀘 𑀪𑀺𑀓𑁆𑀔𑀼𑀲𑀗𑁆𑀖𑀁 𑀯𑀺𑀳𑁂𑀲𑀢𑀺, 𑀅𑀳𑀫𑁂𑀢𑀁 𑀩𑁆𑀬𑀸𑀓𑀭𑀺𑀢𑁆𑀯𑀸 𑀨𑀸𑀲𑀼𑀯𑀺𑀳𑀸𑀭𑀁 𑀓𑀢𑁆𑀯𑀸 𑀤𑀲𑁆𑀲𑀸𑀫𑀻’’𑀢𑀺. 𑀏𑀯𑀁 𑀘𑀺𑀦𑁆𑀢𑁂𑀢𑁆𑀯𑀸 𑀘 𑀆𑀲𑀦𑀢𑁄 𑀯𑀼𑀝𑁆𑀞𑀸𑀬 𑀣𑁂𑀭𑀲𑁆𑀲 𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸 ‘‘𑀩𑁆𑀬𑀸𑀓𑀭𑁄𑀫𑀳𑀁, 𑀪𑀦𑁆𑀢𑁂, 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀦𑁄 𑀏𑀢𑀁 𑀧𑀜𑁆𑀳’’𑀦𑁆𑀢𑀺 (𑀲𑀁. 𑀦𑀺. 𑁪.𑁩𑁪𑁫) 𑀆𑀳. 𑀏𑀯𑀁 𑀯𑀼𑀢𑁆𑀢𑁂 𑀣𑁂𑀭𑁄 ‘‘𑀩𑁆𑀬𑀸𑀓𑀭𑁄𑀳𑀺 𑀢𑁆𑀯𑀁, 𑀆𑀯𑀼𑀲𑁄 𑀇𑀲𑀺𑀤𑀢𑁆𑀢, 𑀘𑀺𑀢𑁆𑀢𑀲𑁆𑀲 𑀕𑀳𑀧𑀢𑀺𑀦𑁄 𑀏𑀢𑀁 𑀧𑀜𑁆𑀳’’𑀦𑁆𑀢𑀺 𑀇𑀲𑀺𑀤𑀢𑁆𑀢𑀁 𑀅𑀚𑁆𑀛𑁂𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀅𑀚𑁆𑀛𑀺𑀝𑁆𑀞𑁄’’𑀢𑀺.

𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸𑀢𑀺 ‘‘𑀬𑀸 𑀇𑀫𑀸, 𑀕𑀳𑀧𑀢𑀺, 𑀅𑀦𑁂𑀓𑀯𑀺𑀳𑀺𑀢𑀸 𑀤𑀺𑀝𑁆𑀞𑀺𑀬𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀦𑁆𑀢𑀺 ‘𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺 𑀯𑀸, ‘𑀅𑀲𑀲𑁆𑀲𑀢𑁄 𑀮𑁄𑀓𑁄’𑀢𑀺 𑀯𑀸…𑀧𑁂… 𑀬𑀸𑀦𑀺 𑀘𑀺𑀫𑀸𑀦𑀺 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀕𑀢𑀸𑀦𑀺 𑀩𑁆𑀭𑀳𑁆𑀫𑀚𑀸𑀮𑁂 𑀕𑀡𑀺𑀢𑀸𑀦𑀺, 𑀇𑀫𑀸 𑀔𑁄, 𑀕𑀳𑀧𑀢𑀺, 𑀤𑀺𑀝𑁆𑀞𑀺𑀬𑁄 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀲𑀢𑀺 𑀳𑁄𑀦𑁆𑀢𑀺, 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀅𑀲𑀢𑀺 𑀦 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸. 𑀕𑀺𑀳𑀺𑀲𑀳𑀸𑀬𑀓𑀪𑀸𑀯𑁂 𑀜𑀸𑀢𑁂𑀢𑀺 𑀣𑁂𑀭𑀲𑁆𑀲 𑀕𑀺𑀳𑀺𑀲𑀳𑀸𑀬𑀓𑀪𑀸𑀯𑁂 𑀘𑀺𑀢𑁆𑀢𑁂𑀦 𑀕𑀳𑀧𑀢𑀺𑀦𑀸 𑀜𑀸𑀢𑁂. 𑀘𑀺𑀢𑁆𑀢𑁄 𑀓𑀺𑀭, 𑀕𑀳𑀧𑀢𑀺, 𑀢𑀲𑁆𑀲 𑀧𑀜𑁆𑀳𑀯𑁂𑀬𑁆𑀬𑀸𑀓𑀭𑀡𑁂 𑀢𑀼𑀝𑁆𑀞𑁄 ‘‘𑀓𑀼𑀢𑁄, 𑀪𑀦𑁆𑀢𑁂, 𑀅𑀬𑁆𑀬𑁄 𑀇𑀲𑀺𑀤𑀢𑁆𑀢𑁄 𑀆𑀕𑀘𑁆𑀙𑀢𑀻’’𑀢𑀺 𑀯𑀢𑁆𑀯𑀸 ‘‘𑀅𑀯𑀦𑁆𑀢𑀺𑀬𑀸 𑀔𑁄 𑀅𑀳𑀁, 𑀕𑀳𑀧𑀢𑀺, 𑀆𑀕𑀘𑁆𑀙𑀸𑀫𑀻’’𑀢𑀺 𑀯𑀼𑀢𑁆𑀢𑁄 ‘‘𑀅𑀢𑁆𑀣𑀺, 𑀪𑀦𑁆𑀢𑁂, 𑀅𑀯𑀦𑁆𑀢𑀺𑀬𑀸 ¶ 𑀇𑀲𑀺𑀤𑀢𑁆𑀢𑁄 𑀦𑀸𑀫 𑀓𑀼𑀮𑀧𑀼𑀢𑁆𑀢𑁄 𑀅𑀫𑁆𑀳𑀸𑀓𑀁 𑀅𑀤𑀺𑀝𑁆𑀞𑀲𑀳𑀸𑀬𑁄 𑀧𑀩𑁆𑀩𑀚𑀺𑀢𑁄, 𑀤𑀺𑀝𑁆𑀞𑁄 𑀲𑁄 𑀆𑀬𑀲𑁆𑀫𑀢𑀸’’𑀢𑀺 𑀧𑀼𑀘𑁆𑀙𑀺. 𑀣𑁂𑀭𑁄 𑀘 ‘‘𑀏𑀯𑀁, 𑀕𑀳𑀧𑀢𑀻’’𑀢𑀺 𑀯𑀢𑁆𑀯𑀸 ‘‘𑀓𑀳𑀁 𑀦𑀼 𑀔𑁄, 𑀪𑀦𑁆𑀢𑁂, 𑀲𑁄 𑀆𑀬𑀲𑁆𑀫𑀸 𑀏𑀢𑀭𑀳𑀺 𑀯𑀺𑀳𑀭𑀢𑀻’’𑀢𑀺 𑀧𑀼𑀦 𑀧𑀼𑀝𑁆𑀞𑁄 ¶ 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀅𑀣 𑀘𑀺𑀢𑁆𑀢𑁄 𑀕𑀳𑀧𑀢𑀺 ‘‘𑀅𑀬𑁆𑀬𑁄 𑀦𑁄, 𑀪𑀦𑁆𑀢𑁂, 𑀇𑀲𑀺𑀤𑀢𑁆𑀢𑁄’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 ‘‘𑀏𑀯𑀁, 𑀕𑀳𑀧𑀢𑀻’’𑀢𑀺 𑀯𑀼𑀢𑁆𑀢𑁂 𑀅𑀢𑁆𑀢𑀦𑁄 𑀕𑀺𑀳𑀺𑀲𑀳𑀸𑀬𑀪𑀸𑀯𑀁 𑀅𑀜𑁆𑀜𑀸𑀲𑀺.

𑀢𑁂𑀚𑁄𑀲𑀫𑀸𑀧𑀢𑁆𑀢𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑁆𑀯𑀸𑀢𑀺 𑀏𑀓𑀲𑁆𑀫𑀺𑀁 𑀓𑀺𑀭 𑀤𑀺𑀯𑀲𑁂 𑀘𑀺𑀢𑁆𑀢𑁄 𑀕𑀳𑀧𑀢𑀺 ‘‘𑀲𑀸𑀥𑀼 𑀫𑁂, 𑀪𑀦𑁆𑀢𑁂, 𑀅𑀬𑁆𑀬𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑀽’’𑀢𑀺 𑀫𑀳𑀸𑀣𑁂𑀭𑀁 𑀬𑀸𑀘𑀺. 𑀣𑁂𑀭𑁄 ‘‘𑀢𑁂𑀦 𑀳𑀺 𑀢𑁆𑀯𑀁, 𑀕𑀳𑀧𑀢𑀺, 𑀆𑀴𑀺𑀦𑁆𑀤𑁂 𑀉𑀢𑁆𑀢𑀭𑀸𑀲𑀗𑁆𑀕𑀁 𑀧𑀜𑁆𑀜𑀸𑀧𑁂𑀢𑁆𑀯𑀸 𑀢𑀢𑁆𑀣 𑀢𑀺𑀡𑀓𑀮𑀸𑀧𑀁 𑀑𑀓𑀺𑀭𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀘 𑀢𑀣𑀸 𑀓𑀢𑁂 𑀲𑀬𑀁 𑀯𑀺𑀳𑀸𑀭𑀁 𑀧𑀯𑀺𑀲𑀺𑀢𑁆𑀯𑀸 𑀘 𑀖𑀝𑀺𑀓𑀁 𑀤𑀢𑁆𑀯𑀸 𑀢𑀣𑀸𑀭𑀽𑀧𑀁 𑀇𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑀁 𑀅𑀪𑀺𑀲𑀗𑁆𑀔𑀸𑀭𑁂𑀲𑀺, 𑀬𑀣𑀸 𑀢𑀸𑀴𑀘𑁆𑀙𑀺𑀕𑁆𑀕𑀴𑁂𑀦 𑀘 𑀅𑀕𑁆𑀕𑀴𑀦𑁆𑀢𑀭𑀺𑀓𑀸𑀬 𑀘 𑀅𑀘𑁆𑀘𑀺 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀺𑀡𑀸𑀦𑀺 𑀛𑀸𑀧𑁂𑀢𑀺, 𑀉𑀢𑁆𑀢𑀭𑀸𑀲𑀗𑁆𑀕𑀁 𑀦 𑀛𑀸𑀧𑁂𑀢𑀺. 𑀅𑀣 𑀘𑀺𑀢𑁆𑀢𑁄 𑀕𑀳𑀧𑀢𑀺 𑀉𑀢𑁆𑀢𑀭𑀸𑀲𑀗𑁆𑀕𑀁 𑀧𑀧𑁆𑀨𑁄𑀝𑁂𑀢𑁆𑀯𑀸 𑀲𑀁𑀯𑀺𑀕𑁆𑀕𑁄 𑀮𑁄𑀫𑀳𑀝𑁆𑀞𑀚𑀸𑀢𑁄 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀣𑁂𑀭𑀁 𑀩𑀳𑀺 𑀦𑀺𑀓𑁆𑀔𑀫𑀦𑁆𑀢𑀁 𑀤𑀺𑀲𑁆𑀯𑀸 ‘‘𑀅𑀪𑀺𑀭𑀫𑀢𑀼, 𑀪𑀦𑁆𑀢𑁂, 𑀅𑀬𑁆𑀬𑁄 𑀫𑀘𑁆𑀙𑀺𑀓𑀸𑀲𑀡𑁆𑀟𑁂, 𑀭𑀫𑀡𑀻𑀬𑀁 𑀅𑀫𑁆𑀩𑀸𑀝𑀓𑀯𑀦𑀁, 𑀅𑀳𑀁 𑀅𑀬𑁆𑀬𑀲𑁆𑀲 𑀉𑀲𑁆𑀲𑀼𑀓𑁆𑀓𑀁 𑀓𑀭𑀺𑀲𑁆𑀲𑀸𑀫𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦’’𑀦𑁆𑀢𑀺 𑀆𑀳. 𑀢𑀢𑁄 𑀣𑁂𑀭𑁄 ‘‘𑀦 𑀤𑀸𑀦𑀺 𑀇𑀥 𑀯𑀲𑀺𑀢𑀼𑀁 𑀲𑀓𑁆𑀓𑀸’’𑀢𑀺 𑀢𑀫𑁆𑀳𑀸 𑀯𑀺𑀳𑀸𑀭𑀸 𑀧𑀓𑁆𑀓𑀸𑀫𑀺. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀢𑁂𑀚𑁄𑀲𑀫𑀸𑀧𑀢𑁆𑀢𑀺 𑀧𑀸𑀝𑀺𑀳𑀸𑀭𑀺𑀬𑀁 𑀤𑀲𑁆𑀲𑁂𑀢𑁆𑀯𑀸 ‘𑀇𑀤𑀸𑀦𑀺 𑀇𑀥 𑀯𑀲𑀺𑀢𑀼𑀁 𑀦 𑀬𑀼𑀢𑁆𑀢’𑀦𑁆𑀢𑀺 𑀬𑀣𑀸𑀲𑀼𑀔𑀁 𑀧𑀓𑁆𑀓𑀸𑀫𑀻’’𑀢𑀺. 𑀤𑁆𑀯𑁂 𑀅𑀕𑁆𑀕𑀲𑀸𑀯𑀓𑀸𑀢𑀺𑀆𑀤𑀻𑀲𑀼 𑀬𑀁 𑀯𑀢𑁆𑀢𑀩𑁆𑀩𑀁, 𑀢𑀁 𑀯𑀺𑀢𑁆𑀣𑀸𑀭𑀢𑁄 𑀯𑀺𑀦𑀬𑀧𑀸𑀴𑀺𑀬𑀁 𑀆𑀕𑀢𑀫𑁂𑀯.

𑀲𑀤𑁆𑀥𑁄𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸𑀬 𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑁄. 𑀲𑀻𑀮𑁂𑀦𑀸𑀢𑀺 𑀅𑀕𑀸𑀭𑀺𑀬𑀲𑀻𑀮𑀁 𑀅𑀦𑀕𑀸𑀭𑀺𑀬𑀲𑀻𑀮𑀦𑁆𑀢𑀺 𑀤𑀼𑀯𑀺𑀥𑀁 𑀲𑀻𑀮𑀁, 𑀢𑁂𑀲𑀼 𑀇𑀥 𑀅𑀕𑀸𑀭𑀺𑀬𑀁 𑀲𑀻𑀮𑀁 𑀅𑀥𑀺𑀧𑁆𑀧𑁂𑀢𑀁, 𑀢𑁂𑀦 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀬𑀲𑁄𑀪𑁄𑀕𑀲𑀫𑀧𑁆𑀧𑀺𑀢𑁄𑀢𑀺 𑀬𑀸𑀤𑀺𑀲𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀸𑀤𑀻𑀦𑀁 𑀧𑀜𑁆𑀘𑀉𑀧𑀸𑀲𑀓𑀲𑀢𑀧𑀭𑀺𑀯𑀸𑀭𑀲𑀗𑁆𑀔𑀸𑀢𑁄 𑀅𑀕𑀸𑀭𑀺𑀬𑁄 𑀬𑀲𑁄, 𑀢𑀸𑀤𑀺𑀲𑁂𑀦𑁂𑀯 𑀬𑀲𑁂𑀦, 𑀬𑁄 𑀘 𑀥𑀦𑀥𑀜𑁆𑀜𑀸𑀤𑀺𑀓𑁄 𑀘𑁂𑀯 𑀲𑀢𑁆𑀢𑀯𑀺𑀥𑀅𑀭𑀺𑀬𑀥𑀦𑀲𑀗𑁆𑀔𑀸𑀢𑁄 𑀘𑀸𑀢𑀺 𑀤𑀼𑀯𑀺𑀥𑁄 𑀪𑁄𑀕𑁄, 𑀢𑁂𑀦 𑀘 𑀲𑀫𑀦𑁆𑀦𑀸𑀕𑀢𑁄𑀢𑀺 𑀅𑀢𑁆𑀣𑁄. 𑀬𑀁 𑀬𑀁 𑀧𑀤𑁂𑀲𑀦𑁆𑀢𑀺 𑀧𑀼𑀭𑀢𑁆𑀣𑀺𑀫𑀸𑀤𑀻𑀲𑀼 𑀤𑀺𑀲𑀸𑀲𑀼 𑀏𑀯𑀭𑀽𑀧𑁄 𑀓𑀼𑀮𑀧𑀼𑀢𑁆𑀢𑁄 𑀬𑀁 𑀬𑀁 𑀧𑀤𑁂𑀲𑀁 𑀪𑀚𑀢𑀺, 𑀢𑀢𑁆𑀣 𑀢𑀢𑁆𑀣 𑀏𑀯𑀭𑀽𑀧𑁂𑀦 𑀮𑀸𑀪𑀲𑀓𑁆𑀓𑀸𑀭𑁂𑀦 𑀧𑀽𑀚𑀺𑀢𑁄𑀯 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀳𑀢𑁆𑀣𑀓𑀆𑀴𑀯𑀓𑀯𑀢𑁆𑀣𑀼

𑁨𑁫𑁧. 𑀘𑀢𑀼𑀢𑁆𑀣𑁂 ¶ 𑀘𑀢𑀼𑀩𑁆𑀩𑀺𑀥𑁂𑀦 𑀲𑀗𑁆𑀕𑀳𑀯𑀢𑁆𑀣𑀼𑀦𑀸𑀢𑀺 𑀤𑀸𑀦𑀧𑀺𑀬𑀯𑀘𑀦𑀅𑀢𑁆𑀣𑀘𑀭𑀺𑀬𑀸𑀲𑀫𑀸𑀦𑀢𑁆𑀢𑀢𑀸𑀲𑀗𑁆𑀔𑀸𑀢𑁂𑀦 𑀘𑀢𑀼𑀩𑁆𑀩𑀺𑀥𑁂𑀦 𑀲𑀗𑁆𑀕𑀳𑀯𑀢𑁆𑀣𑀼𑀦𑀸. ‘‘𑀲𑁆𑀯𑁂 𑀪𑀢𑁆𑀢𑀘𑀸𑀝𑀺𑀬𑀸 𑀲𑀤𑁆𑀥𑀺𑀁 𑀆𑀴𑀯𑀓𑀲𑁆𑀲 𑀧𑁂𑀲𑁂𑀢𑀩𑁆𑀩𑁄 𑀅𑀳𑁄𑀲𑀻’’𑀢𑀺 𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀓𑀝𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑁋 ‘‘𑀢𑀢𑁆𑀭𑀸𑀬𑀁 𑀅𑀦𑀼𑀧𑀼𑀩𑁆𑀩𑀺𑀓𑀣𑀸’’𑀢𑀺𑀆𑀤𑀺𑀫𑀸𑀳. 𑀫𑀺𑀕𑀯𑀢𑁆𑀣𑀸𑀬 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸𑀢𑀺 𑀆𑀴𑀯𑀓𑁄 𑀭𑀸𑀚𑀸 𑀯𑀺𑀯𑀺𑀥𑀦𑀸𑀝𑀓𑀽𑀧𑀪𑁄𑀕𑀁 𑀙𑀟𑁆𑀟𑁂𑀢𑁆𑀯𑀸 𑀘𑁄𑀭𑀧𑁆𑀧𑀝𑀺𑀩𑀸𑀳𑀦𑀢𑁆𑀣𑀜𑁆𑀘 𑀧𑀝𑀺𑀭𑀸𑀚𑀦𑀺𑀲𑁂𑀥𑀦𑀢𑁆𑀣𑀜𑁆𑀘 𑀩𑁆𑀬𑀸𑀬𑀸𑀫𑀓𑀭𑀡𑀢𑁆𑀣𑀜𑁆𑀘 𑀲𑀢𑁆𑀢𑀫𑁂 𑀲𑀢𑁆𑀢𑀫𑁂 𑀤𑀺𑀯𑀲𑁂 𑀫𑀺𑀕𑀯𑀁 𑀕𑀘𑁆𑀙𑀦𑁆𑀢𑁄 𑀏𑀓𑀤𑀺𑀯𑀲𑀁 𑀩𑀮𑀓𑀸𑀬𑁂𑀦 𑀲𑀤𑁆𑀥𑀺𑀁 ‘‘𑀬𑀲𑁆𑀲 𑀧𑀲𑁆𑀲𑁂𑀦 ¶ 𑀫𑀺𑀕𑁄 𑀧𑀮𑀸𑀬𑀢𑀺, 𑀢𑀲𑁆𑀲𑁂𑀯 𑀲𑁄 𑀪𑀸𑀭𑁄’’𑀢𑀺 𑀓𑀢𑀓𑀢𑀺𑀓𑀯𑀢𑁆𑀢𑁄 𑀫𑀺𑀕𑀯𑀢𑁆𑀣𑀸𑀬 𑀅𑀭𑀜𑁆𑀜𑀁 𑀕𑀦𑁆𑀢𑁆𑀯𑀸. 𑀏𑀓𑀁 𑀫𑀺𑀕𑀦𑁆𑀢𑀺 𑀅𑀢𑁆𑀢𑀦𑁄 𑀞𑀺𑀢𑀝𑁆𑀞𑀸𑀦𑁂𑀦 𑀧𑀮𑀸𑀢𑀁 𑀏𑀡𑀺𑀫𑀺𑀕𑀁. 𑀅𑀦𑀼𑀩𑀦𑁆𑀥𑀺𑀢𑁆𑀯𑀸𑀢𑀺 𑀢𑀺𑀬𑁄𑀚𑀦𑀫𑀕𑁆𑀕𑀁 𑀏𑀓𑀓𑁄𑀯 𑀅𑀦𑀼𑀩𑀦𑁆𑀥𑀺𑀢𑁆𑀯𑀸. 𑀚𑀯𑀲𑀫𑁆𑀧𑀦𑁆𑀦𑁄 𑀳𑀺 𑀭𑀸𑀚𑀸 𑀥𑀦𑀼𑀁 𑀕𑀳𑁂𑀢𑁆𑀯𑀸 𑀧𑀢𑁆𑀢𑀺𑀓𑁄𑀯 𑀢𑀺𑀬𑁄𑀚𑀦𑀁 𑀢𑀁 𑀫𑀺𑀕𑀫𑀦𑀼𑀩𑀦𑁆𑀥𑀺. 𑀖𑀸𑀢𑁂𑀢𑁆𑀯𑀸𑀢𑀺 𑀬𑀲𑁆𑀫𑀸 𑀏𑀡𑀺𑀫𑀺𑀕𑀸 𑀢𑀺𑀬𑁄𑀚𑀦𑀯𑁂𑀕𑀸 𑀏𑀯 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀧𑀭𑀺𑀓𑁆𑀔𑀺𑀡𑀚𑀯𑀁 𑀢𑀁 𑀫𑀺𑀕𑀁 𑀉𑀤𑀓𑀁 𑀧𑀯𑀺𑀲𑀺𑀢𑁆𑀯𑀸 𑀞𑀺𑀢𑀁 𑀖𑀸𑀢𑁂𑀢𑁆𑀯𑀸. 𑀤𑁆𑀯𑀺𑀥𑀸 𑀙𑁂𑀢𑁆𑀯𑀸 𑀥𑀦𑀼𑀓𑁄𑀝𑀺𑀬𑀁 𑀮𑀕𑁂𑀢𑁆𑀯𑀸 𑀦𑀺𑀯𑀢𑁆𑀢𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄𑀢𑀺 𑀅𑀦𑀢𑁆𑀣𑀺𑀓𑁄𑀧𑀺 𑀫𑀁𑀲𑁂𑀦 ‘‘𑀦𑀸𑀲𑀓𑁆𑀔𑀺 𑀫𑀺𑀕𑀁 𑀕𑀳𑁂𑀢𑀼’’𑀦𑁆𑀢𑀺 𑀅𑀧𑀯𑀸𑀤𑀫𑁄𑀘𑀦𑀢𑁆𑀣𑀁 𑀤𑁆𑀯𑀺𑀥𑀸 𑀙𑀺𑀦𑁆𑀦𑀁 𑀥𑀦𑀼𑀓𑁄𑀝𑀺𑀬𑀁 𑀮𑀕𑁂𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁄. 𑀲𑀦𑁆𑀤𑀘𑁆𑀙𑀸𑀬𑀦𑁆𑀢𑀺 𑀖𑀦𑀘𑁆𑀙𑀸𑀬𑀁 𑀩𑀳𑀮𑀧𑀢𑁆𑀢𑀧𑀮𑀸𑀲𑀁.

𑀭𑀼𑀓𑁆𑀔𑁂 𑀅𑀥𑀺𑀯𑀢𑁆𑀣𑀸 𑀤𑁂𑀯𑀢𑀸𑀢𑀺 𑀆𑀴𑀯𑀓𑀁 𑀬𑀓𑁆𑀔𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀲𑁄 𑀳𑀺 𑀫𑀳𑀸𑀭𑀸𑀚𑀽𑀦𑀁 𑀲𑀦𑁆𑀢𑀺𑀓𑀸 𑀯𑀭𑀁 𑀮𑀪𑀺𑀢𑁆𑀯𑀸 𑀫𑀚𑁆𑀛𑀦𑁆𑀳𑀺𑀓𑀲𑀫𑀬𑁂 𑀢𑀲𑁆𑀲 𑀭𑀼𑀓𑁆𑀔𑀲𑁆𑀲 𑀙𑀸𑀬𑀸𑀬 𑀨𑀼𑀝𑁆𑀞𑁄𑀓𑀸𑀲𑀁 𑀧𑀯𑀺𑀝𑁆𑀞𑁂 𑀧𑀸𑀡𑀺𑀦𑁄 𑀔𑀸𑀤𑀦𑁆𑀢𑁄 𑀢𑀢𑁆𑀣 𑀧𑀝𑀺𑀯𑀲𑀢𑀺. 𑀆𑀴𑀯𑀓𑀲𑁆𑀲 𑀦𑀺𑀲𑀻𑀤𑀦𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀻𑀢𑀺 𑀬𑀢𑁆𑀣 𑀅𑀪𑀺𑀮𑀓𑁆𑀔𑀺𑀢𑁂𑀲𑀼 𑀫𑀗𑁆𑀕𑀮𑀤𑀺𑀯𑀲𑀸𑀤𑀻𑀲𑀼 𑀆𑀴𑀯𑀓𑁄 𑀦𑀺𑀲𑀻𑀤𑀺𑀢𑁆𑀯𑀸 𑀲𑀺𑀭𑀺𑀁 𑀅𑀦𑀼𑀪𑁄𑀢𑀺, 𑀢𑀲𑁆𑀫𑀺𑀁𑀬𑁂𑀯 𑀤𑀺𑀩𑁆𑀩𑀭𑀢𑀦𑀧𑀮𑁆𑀮𑀗𑁆𑀓𑁂 𑀦𑀺𑀲𑀻𑀤𑀺. 𑀅𑀢𑁆𑀢𑀦𑁄 𑀕𑀫𑀦𑁂 𑀅𑀲𑀫𑁆𑀧𑀚𑁆𑀚𑀫𑀸𑀦𑁂 ‘‘𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀆𑀯𑀚𑁆𑀚𑁂𑀦𑁆𑀢𑀸𑀢𑀺 𑀢𑀤𑀸 𑀓𑀺𑀭 𑀲𑀸𑀢𑀸𑀕𑀺𑀭𑀳𑁂𑀫𑀯𑀢𑀸 𑀪𑀕𑀯𑀦𑁆𑀢𑀁 𑀚𑁂𑀢𑀯𑀦𑁂𑀬𑁂𑀯 𑀯𑀦𑁆𑀤𑀺𑀢𑁆𑀯𑀸 ‘‘𑀬𑀓𑁆𑀔𑀲𑀫𑀸𑀕𑀫𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀲𑀧𑀭𑀺𑀯𑀸𑀭𑀸 𑀦𑀸𑀦𑀸𑀬𑀸𑀦𑁂𑀳𑀺 𑀆𑀓𑀸𑀲𑁂𑀦 𑀕𑀘𑁆𑀙𑀦𑁆𑀢𑀺, 𑀆𑀓𑀸𑀲𑁂 𑀘 𑀬𑀓𑁆𑀔𑀸𑀦𑀁 𑀦 𑀲𑀩𑁆𑀩𑀢𑁆𑀣 𑀫𑀕𑁆𑀕𑁄 𑀅𑀢𑁆𑀣𑀺, 𑀆𑀓𑀸𑀲𑀝𑁆𑀞𑀸𑀦𑀺 𑀯𑀺𑀫𑀸𑀦𑀸𑀦𑀺 𑀧𑀭𑀺𑀳𑀭𑀺𑀢𑁆𑀯𑀸 𑀫𑀕𑁆𑀕𑀝𑁆𑀞𑀸𑀦𑁂𑀦𑁂𑀯 𑀫𑀕𑁆𑀕𑁄 𑀳𑁄𑀢𑀺, 𑀆𑀴𑀯𑀓𑀲𑁆𑀲 𑀧𑀦 𑀯𑀺𑀫𑀸𑀦𑀁 𑀪𑀽𑀫𑀝𑁆𑀞𑀁 𑀲𑀼𑀕𑀼𑀢𑁆𑀢𑀁 𑀧𑀸𑀓𑀸𑀭𑀧𑀭𑀺𑀓𑁆𑀔𑀺𑀢𑁆𑀢𑀁 𑀲𑀼𑀲𑀁𑀯𑀺𑀳𑀺𑀢𑀤𑁆𑀯𑀸𑀭𑀝𑁆𑀝𑀸𑀮𑀓𑀕𑁄𑀧𑀼𑀭𑀁 𑀉𑀧𑀭𑀺 𑀓𑀁𑀲𑀚𑀸𑀮𑀲𑀜𑁆𑀙𑀦𑁆𑀦𑀫𑀜𑁆𑀚𑀽𑀲𑀸𑀲𑀤𑀺𑀲𑀁 𑀢𑀺𑀬𑁄𑀚𑀦𑀁 𑀉𑀩𑁆𑀩𑁂𑀥𑁂𑀦, 𑀢𑀲𑁆𑀲 𑀉𑀧𑀭𑀺 𑀫𑀕𑁆𑀕𑁄 𑀳𑁄𑀢𑀺, 𑀢𑁂 𑀢𑀁 𑀧𑀤𑁂𑀲𑀫𑀸𑀕𑀫𑁆𑀫 𑀕𑀦𑁆𑀢𑀼𑀫𑀲𑀫𑀢𑁆𑀣𑀸 ¶ 𑀅𑀳𑁂𑀲𑀼𑀁. 𑀩𑀼𑀤𑁆𑀥𑀸𑀦𑀜𑁆𑀳𑀺 𑀦𑀺𑀲𑀺𑀦𑁆𑀦𑁄𑀓𑀸𑀲𑀲𑁆𑀲 𑀉𑀧𑀭𑀺𑀪𑀸𑀕𑁂𑀦 𑀬𑀸𑀯 𑀪𑀯𑀕𑁆𑀕𑀸 𑀓𑁄𑀘𑀺 𑀕𑀦𑁆𑀢𑀼𑀫𑀲𑀫𑀢𑁆𑀣𑁄, 𑀢𑀲𑁆𑀫𑀸 𑀅𑀢𑁆𑀢𑀦𑁄 𑀕𑀫𑀦𑁂 𑀅𑀲𑀫𑁆𑀧𑀚𑁆𑀚𑀫𑀸𑀦𑁂 ‘‘𑀓𑀺𑀁 𑀦𑀼 𑀔𑁄 𑀓𑀸𑀭𑀡’’𑀦𑁆𑀢𑀺 𑀆𑀯𑀚𑁆𑀚𑁂𑀲𑀼𑀁. 𑀢𑁂𑀲𑀁 𑀓𑀣𑀁 𑀲𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀻𑀢𑀺 𑀬𑀲𑁆𑀫𑀸 𑀅𑀲𑁆𑀲𑀤𑁆𑀥𑀲𑁆𑀲 𑀲𑀤𑁆𑀥𑀸𑀓𑀣𑀸 𑀤𑀼𑀓𑁆𑀓𑀣𑀸 𑀳𑁄𑀢𑀺 𑀤𑀼𑀲𑁆𑀲𑀻𑀮𑀸𑀤𑀻𑀦𑀁 𑀲𑀻𑀮𑀓𑀣𑀸𑀤𑀬𑁄 𑀯𑀺𑀬, 𑀢𑀲𑁆𑀫𑀸 𑀢𑁂𑀲𑀁 𑀬𑀓𑁆𑀔𑀸𑀦𑀁 𑀲𑀦𑁆𑀢𑀺𑀓𑀸 𑀪𑀕𑀯𑀢𑁄 𑀧𑀲𑀁𑀲𑀁 𑀲𑀼𑀢𑁆𑀯𑀸 𑀏𑀯 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀮𑁄𑀡𑀲𑀓𑁆𑀔𑀭𑀸 𑀯𑀺𑀬 𑀅𑀩𑁆𑀪𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑀓𑁄𑀧𑁂𑀦 𑀧𑀝𑀧𑀝𑀸𑀬𑀫𑀸𑀦𑀳𑀤𑀬𑁄 𑀳𑀼𑀢𑁆𑀯𑀸 𑀘𑀺𑀦𑁆𑀢𑁂𑀲𑀺. 𑀧𑀩𑁆𑀩𑀢𑀓𑀽𑀝𑀦𑁆𑀢𑀺 𑀓𑁂𑀮𑀸𑀲𑀧𑀩𑁆𑀩𑀢𑀓𑀽𑀝𑀁.

𑀇𑀢𑁄 𑀧𑀝𑁆𑀞𑀸𑀬 𑀆𑀴𑀯𑀓𑀬𑀼𑀤𑁆𑀥𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀦𑁆𑀢𑀺 𑀲𑁄 𑀓𑀺𑀭 𑀫𑀦𑁄𑀲𑀺𑀮𑀸𑀢𑀮𑁂 𑀯𑀸𑀫𑀧𑀸𑀤𑁂𑀦 𑀞𑀢𑁆𑀯𑀸 ‘‘𑀧𑀲𑁆𑀲𑀣 𑀤𑀸𑀦𑀺 𑀢𑀼𑀫𑁆𑀳𑀸𑀓𑀁 𑀯𑀸 𑀲𑀢𑁆𑀣𑀸 𑀫𑀳𑀸𑀦𑀼𑀪𑀸𑀯𑁄, 𑀅𑀳𑀁 𑀯𑀸’’𑀢𑀺 𑀤𑀓𑁆𑀔𑀺𑀡𑀧𑀸𑀤𑁂𑀦 𑀲𑀝𑁆𑀞𑀺𑀬𑁄𑀚𑀦𑀫𑀢𑁆𑀢𑀁 𑀓𑁂𑀮𑀸𑀲𑀓𑀽𑀝𑀧𑀩𑁆𑀩𑀢𑀁 𑀅𑀓𑁆𑀓𑀫𑀺, 𑀢𑀁 𑀅𑀬𑁄𑀓𑀽𑀝𑀧𑁆𑀧𑀳𑀢𑁄 𑀯𑀺𑀬 𑀦𑀺𑀤𑁆𑀥𑀦𑁆𑀢𑀅𑀬𑀧𑀺𑀡𑁆𑀟𑁄 𑀧𑀧𑀝𑀺𑀓𑀸𑀬𑁄 𑀫𑀼𑀜𑁆𑀘𑀺. 𑀲𑁄 𑀢𑀢𑁆𑀭 𑀞𑀢𑁆𑀯𑀸 ‘‘𑀅𑀳𑀁 𑀆𑀴𑀯𑀓𑁄’’𑀢𑀺 𑀉𑀕𑁆𑀖𑁄𑀲𑁂𑀲𑀺, 𑀲𑀓𑀮𑀚𑀫𑁆𑀩𑀼𑀤𑀻𑀧𑀁 𑀲𑀤𑁆𑀤𑁄 𑀨𑀭𑀺. 𑀢𑀺𑀬𑁄𑀚𑀦𑀲𑀳𑀲𑁆𑀲𑀯𑀺𑀢𑁆𑀣𑀢𑀳𑀺𑀫𑀯𑀸𑀧𑀺 𑀲𑀫𑁆𑀧𑀓𑀫𑁆𑀧𑀺 𑀬𑀓𑁆𑀔𑀲𑁆𑀲𑀸𑀦𑀼𑀪𑀸𑀯𑁂𑀦. 𑀲𑁄 𑀯𑀸𑀢𑀫𑀡𑁆𑀟𑀮𑀁 𑀲𑀫𑀼𑀝𑁆𑀞𑀸𑀧𑁂𑀲𑀺 ‘‘𑀏𑀢𑁂𑀦𑁂𑀯 𑀲𑀫𑀡𑀁 ¶ 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀢𑁂 𑀧𑀼𑀭𑀢𑁆𑀣𑀺𑀫𑀸𑀤𑀺𑀪𑁂𑀤𑀸 𑀯𑀸𑀢𑀸 𑀲𑀫𑀼𑀝𑁆𑀞𑀳𑀺𑀢𑁆𑀯𑀸 𑀅𑀟𑁆𑀠𑀬𑁄𑀚𑀦𑀬𑁄𑀚𑀦𑀤𑁆𑀯𑀺𑀬𑁄𑀚𑀦𑀢𑀺𑀬𑁄𑀚𑀦𑀧𑁆𑀧𑀫𑀸𑀡𑀸𑀦𑀺 𑀧𑀩𑁆𑀩𑀢𑀓𑀽𑀝𑀸𑀦𑀺 𑀧𑀤𑀸𑀮𑁂𑀢𑁆𑀯𑀸 𑀯𑀦𑀕𑀘𑁆𑀙𑀭𑀼𑀓𑁆𑀔𑀸𑀤𑀻𑀦𑀺 𑀉𑀫𑁆𑀫𑀽𑀮𑁂𑀢𑁆𑀯𑀸 𑀆𑀴𑀯𑀺𑀦𑀕𑀭𑀁 𑀧𑀓𑁆𑀔𑀦𑁆𑀤𑀸 𑀚𑀺𑀡𑁆𑀡𑀳𑀢𑁆𑀣𑀺𑀲𑀸𑀮𑀸𑀤𑀻𑀦𑀺 𑀘𑀼𑀡𑁆𑀡𑁂𑀦𑁆𑀢𑀸 𑀙𑀤𑀦𑀺𑀝𑁆𑀞𑀓𑀸 𑀆𑀓𑀸𑀲𑁂 𑀪𑀫𑁂𑀦𑁆𑀢𑀸. 𑀪𑀕𑀯𑀸 ‘‘𑀫𑀸 𑀓𑀲𑁆𑀲𑀘𑀺 𑀉𑀧𑀭𑁄𑀥𑁄 𑀳𑁄𑀢𑀽’’𑀢𑀺 𑀅𑀥𑀺𑀝𑁆𑀞𑀸𑀲𑀺. 𑀢𑁂 𑀯𑀸𑀢𑀸 𑀤𑀲𑀩𑀮𑀁 𑀧𑀢𑁆𑀯𑀸 𑀘𑀻𑀯𑀭𑀓𑀡𑁆𑀡𑀫𑀢𑁆𑀢𑀫𑁆𑀧𑀺 𑀘𑀸𑀮𑁂𑀢𑀼𑀁 𑀦𑀸𑀲𑀓𑁆𑀔𑀺𑀁𑀲𑀼. 𑀢𑀢𑁄 𑀫𑀳𑀸𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺 ‘‘𑀉𑀤𑀓𑁂𑀦 𑀅𑀚𑁆𑀛𑁄𑀢𑁆𑀣𑀭𑀺𑀢𑁆𑀯𑀸 𑀲𑀫𑀡𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺. 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀉𑀧𑀭𑀽𑀧𑀭𑀺 𑀲𑀢𑀧𑀝𑀮𑀲𑀳𑀲𑁆𑀲𑀧𑀝𑀮𑀸𑀤𑀺𑀪𑁂𑀤𑀸 𑀯𑀮𑀸𑀳𑀓𑀸 𑀉𑀝𑁆𑀞𑀳𑀺𑀢𑁆𑀯𑀸 𑀧𑀯𑀲𑁆𑀲𑀺𑀁𑀲𑀼. 𑀯𑀼𑀝𑁆𑀞𑀺𑀥𑀸𑀭𑀸𑀯𑁂𑀕𑁂𑀦 𑀧𑀣𑀯𑀻 𑀙𑀺𑀤𑁆𑀤𑀸 𑀅𑀳𑁄𑀲𑀺. 𑀯𑀦𑀭𑀼𑀓𑁆𑀔𑀸𑀤𑀻𑀦𑀁 𑀉𑀧𑀭𑀺 𑀫𑀳𑁄𑀖𑁄 𑀆𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀘𑀻𑀯𑀭𑁂 𑀉𑀲𑁆𑀲𑀸𑀯𑀩𑀺𑀦𑁆𑀤𑀼𑀫𑀢𑁆𑀢𑀫𑁆𑀧𑀺 𑀢𑁂𑀫𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀢𑁄 𑀧𑀸𑀲𑀸𑀡𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀫𑀳𑀦𑁆𑀢𑀸𑀦𑀺 𑀫𑀳𑀦𑁆𑀢𑀸𑀦𑀺 𑀧𑀩𑁆𑀩𑀢𑀓𑀽𑀝𑀸𑀦𑀺 𑀥𑀽𑀫𑀸𑀬𑀦𑁆𑀢𑀸𑀦𑀺 𑀧𑀚𑁆𑀚𑀮𑀦𑁆𑀢𑀸𑀦𑀺 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀤𑀲𑀩𑀮𑀁 𑀧𑀢𑁆𑀯𑀸 𑀤𑀺𑀩𑁆𑀩𑀫𑀸𑀮𑀸𑀕𑀼𑀴𑀸𑀦𑀺 𑀲𑀫𑁆𑀧𑀚𑁆𑀚𑀺𑀁𑀲𑀼. 𑀢𑀢𑁄 𑀧𑀳𑀭𑀡𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀏𑀓𑀢𑁄𑀥𑀸𑀭𑀸 𑀉𑀪𑀢𑁄𑀥𑀸𑀭𑀸 𑀅𑀲𑀺𑀲𑀢𑁆𑀢𑀺𑀔𑀼𑀭𑀧𑁆𑀧𑀸𑀤𑀬𑁄 𑀥𑀽𑀫𑀸𑀬𑀦𑁆𑀢𑀸 𑀧𑀚𑁆𑀚𑀮𑀦𑁆𑀢𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀧𑀸𑀤𑀫𑀽𑀮𑁂 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀅𑀳𑁂𑀲𑀼𑀁.

𑀢𑀢𑁄 ¶ 𑀅𑀗𑁆𑀕𑀸𑀭𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀓𑀺𑀁𑀲𑀼𑀓𑀯𑀡𑁆𑀡𑀸 𑀅𑀗𑁆𑀕𑀸𑀭𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀧𑀸𑀤𑀫𑀽𑀮𑁂 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀳𑀼𑀢𑁆𑀯𑀸 𑀯𑀺𑀓𑀺𑀭𑀺𑀁𑀲𑀼. 𑀢𑀢𑁄 𑀓𑀼𑀓𑁆𑀓𑀼𑀴𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀅𑀘𑁆𑀘𑀼𑀡𑁆𑀳𑁄 𑀓𑀼𑀓𑁆𑀓𑀼𑀴𑁄 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀧𑀸𑀤𑀫𑀽𑀮𑁂 𑀘𑀦𑁆𑀤𑀦𑀘𑀼𑀡𑁆𑀡𑀁 𑀳𑀼𑀢𑁆𑀯𑀸 𑀦𑀺𑀧𑀢𑀺. 𑀢𑀢𑁄 𑀯𑀸𑀮𑀺𑀓𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀅𑀢𑀺𑀲𑀼𑀔𑀼𑀫𑀸 𑀯𑀸𑀮𑀺𑀓𑀸 𑀥𑀽𑀫𑀸𑀬𑀦𑁆𑀢𑀸 𑀧𑀚𑁆𑀚𑀮𑀦𑁆𑀢𑀸 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀧𑀸𑀤𑀫𑀽𑀮𑁂 𑀤𑀺𑀩𑁆𑀩𑀧𑀼𑀧𑁆𑀨𑀸𑀦𑀺 𑀳𑀼𑀢𑁆𑀯𑀸 𑀦𑀺𑀧𑀢𑀺𑀁𑀲𑀼. 𑀢𑀢𑁄 𑀓𑀮𑀮𑀯𑀲𑁆𑀲𑀁 𑀲𑀫𑀼𑀝𑁆𑀞𑀸𑀧𑁂𑀲𑀺. 𑀢𑀁 𑀥𑀽𑀫𑀸𑀬𑀦𑁆𑀢𑀁 𑀧𑀚𑁆𑀚𑀮𑀦𑁆𑀢𑀁 𑀆𑀓𑀸𑀲𑁂𑀦𑀸𑀕𑀦𑁆𑀢𑁆𑀯𑀸 𑀤𑀲𑀩𑀮𑀲𑁆𑀲 𑀧𑀸𑀤𑀫𑀽𑀮𑁂 𑀤𑀺𑀩𑁆𑀩𑀕𑀦𑁆𑀥𑀁 𑀳𑀼𑀢𑁆𑀯𑀸 𑀦𑀺𑀧𑀢𑀺. 𑀢𑀢𑁄 𑀅𑀦𑁆𑀥𑀓𑀸𑀭𑀁 𑀲𑀫𑀼𑀝𑁆𑀞𑀸𑀧𑁂𑀲𑀺 ‘‘𑀪𑀺𑀁𑀲𑁂𑀢𑁆𑀯𑀸 𑀲𑀫𑀡𑀁 𑀧𑀮𑀸𑀧𑁂𑀲𑁆𑀲𑀸𑀫𑀻’’𑀢𑀺. 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀅𑀦𑁆𑀥𑀓𑀸𑀭𑀲𑀤𑀺𑀲𑀁 𑀳𑀼𑀢𑁆𑀯𑀸 𑀤𑀲𑀩𑀮𑀁 𑀧𑀢𑁆𑀯𑀸 𑀲𑀽𑀭𑀺𑀬𑀧𑁆𑀧𑀪𑀸𑀯𑀺𑀳𑀢𑀫𑀺𑀯𑀦𑁆𑀥𑀓𑀸𑀭𑀁 𑀅𑀦𑁆𑀢𑀭𑀥𑀸𑀬𑀺. 𑀏𑀯𑀁 𑀬𑀓𑁆𑀔𑁄 𑀇𑀫𑀸𑀳𑀺 𑀦𑀯𑀳𑀺 𑀯𑀸𑀢𑀯𑀲𑁆𑀲𑀧𑀸𑀲𑀸𑀡𑀧𑀳𑀭𑀡𑀗𑁆𑀕𑀸𑀭𑀓𑀼𑀓𑁆𑀓𑀼𑀴𑀯𑀸𑀮𑀺𑀓𑀓𑀮𑀮𑀦𑁆𑀥𑀓𑀸𑀭𑀯𑀼𑀝𑁆𑀞𑀻𑀳𑀺 𑀪𑀕𑀯𑀦𑁆𑀢𑀁 𑀧𑀮𑀸𑀧𑁂𑀢𑀼𑀫𑀲𑀓𑁆𑀓𑁄𑀦𑁆𑀢𑁄 𑀦𑀸𑀦𑀸𑀯𑀺𑀥𑀧𑁆𑀧𑀳𑀭𑀡𑀳𑀢𑁆𑀣𑀅𑀦𑁂𑀓𑀧𑁆𑀧𑀓𑀸𑀭𑀭𑀽𑀧𑀪𑀽𑀢𑀕𑀡𑀲𑀫𑀸𑀓𑀼𑀮𑀸𑀬 𑀘𑀢𑀼𑀭𑀗𑁆𑀕𑀺𑀦𑀺𑀬𑀸 𑀲𑁂𑀦𑀸𑀬 𑀲𑀬𑀫𑁂𑀯 𑀪𑀕𑀯𑀦𑁆𑀢𑀁 𑀅𑀪𑀺𑀕𑀢𑁄. 𑀢𑁂 𑀪𑀽𑀢𑀕𑀡𑀸 𑀅𑀦𑁂𑀓𑀧𑁆𑀧𑀓𑀸𑀭𑀯𑀺𑀓𑀸𑀭𑁂 𑀓𑀢𑁆𑀯𑀸 ‘‘𑀕𑀡𑁆𑀳𑀣 𑀳𑀦𑀣𑀸’’𑀢𑀺 𑀪𑀕𑀯𑀢𑁄 𑀉𑀧𑀭𑀺 𑀆𑀕𑀘𑁆𑀙𑀦𑁆𑀢𑀸 𑀯𑀺𑀬 𑀘 𑀳𑁄𑀦𑁆𑀢𑀺. 𑀅𑀧𑀺𑀘 𑀔𑁄 𑀦𑀺𑀤𑁆𑀥𑀦𑁆𑀢𑀮𑁄𑀳𑀧𑀺𑀡𑁆𑀟𑀁 𑀯𑀺𑀬 𑀫𑀓𑁆𑀔𑀺𑀓𑀸 𑀪𑀕𑀯𑀦𑁆𑀢𑀁 𑀅𑀮𑁆𑀮𑀻𑀬𑀺𑀢𑀼𑀫𑀲𑀫𑀢𑁆𑀣𑀸 𑀏𑀯 𑀅𑀳𑁂𑀲𑀼𑀁.

𑀏𑀯𑀁 𑀲𑀩𑁆𑀩𑀭𑀢𑁆𑀢𑀺𑀁 𑀅𑀦𑁂𑀓𑀧𑁆𑀧𑀓𑀸𑀭𑀯𑀺𑀪𑀺𑀁𑀲𑀸𑀓𑀸𑀭𑀤𑀲𑁆𑀲𑀦𑁂𑀦𑀧𑀺 𑀪𑀕𑀯𑀦𑁆𑀢𑀁 𑀘𑀸𑀮𑁂𑀢𑀼𑀫𑀲𑀓𑁆𑀓𑁄𑀦𑁆𑀢𑁄 𑀆𑀴𑀯𑀓𑁄 𑀘𑀺𑀦𑁆𑀢𑁂𑀲𑀺 𑁋 ‘‘𑀬𑀁𑀦𑀽𑀦𑀸𑀳𑀁 𑀓𑁂𑀦𑀘𑀺 𑀅𑀚𑁂𑀬𑁆𑀬𑀁 𑀤𑀼𑀲𑁆𑀲𑀸𑀯𑀼𑀥𑀁 𑀫𑀼𑀜𑁆𑀘𑁂𑀬𑁆𑀬’’𑀦𑁆𑀢𑀺. 𑀲𑀘𑁂 𑀳𑀺 𑀲𑁄 𑀤𑀼𑀝𑁆𑀞𑁄 𑀆𑀓𑀸𑀲𑁂 𑀢𑀁 𑀤𑀼𑀲𑁆𑀲𑀸𑀯𑀼𑀥𑀁 𑀫𑀼𑀜𑁆𑀘𑁂𑀬𑁆𑀬, 𑀤𑁆𑀯𑀸𑀤𑀲 𑀯𑀲𑁆𑀲𑀸𑀦𑀺 𑀤𑁂𑀯𑁄 𑀦 𑀯𑀲𑁆𑀲𑁂𑀬𑁆𑀬. 𑀲𑀘𑁂 𑀧𑀣𑀯𑀺𑀬𑀁 𑀫𑀼𑀜𑁆𑀘𑁂𑀬𑁆𑀬 ¶ , 𑀲𑀩𑁆𑀩𑀭𑀼𑀓𑁆𑀔𑀢𑀺𑀡𑀸𑀤𑀻𑀦𑀺 𑀲𑀼𑀲𑁆𑀲𑀺𑀢𑁆𑀯𑀸 𑀤𑁆𑀯𑀸𑀤𑀲𑀯𑀲𑁆𑀲𑀦𑁆𑀢𑀭𑀁 𑀦 𑀧𑀼𑀦 𑀭𑀼𑀳𑁂𑀬𑁆𑀬𑀼𑀁. 𑀲𑀘𑁂 𑀲𑀫𑀼𑀤𑁆𑀤𑁂 𑀫𑀼𑀜𑁆𑀘𑁂𑀬𑁆𑀬, 𑀢𑀢𑁆𑀢𑀓𑀧𑀸𑀮𑁂 𑀉𑀤𑀓𑀩𑀺𑀦𑁆𑀤𑀼 𑀯𑀺𑀬 𑀲𑀩𑁆𑀩𑀁 𑀲𑀼𑀲𑁆𑀲𑁂𑀬𑁆𑀬. 𑀲𑀘𑁂 𑀲𑀺𑀦𑁂𑀭𑀼𑀧𑀩𑁆𑀩𑀢𑁂 𑀫𑀼𑀜𑁆𑀘𑁂𑀬𑁆𑀬, 𑀔𑀡𑁆𑀟𑀸𑀔𑀡𑁆𑀟𑀁 𑀳𑀼𑀢𑁆𑀯𑀸 𑀯𑀺𑀓𑀺𑀭𑁂𑀬𑁆𑀬. 𑀲𑁄 𑀏𑀯𑀁𑀫𑀳𑀸𑀦𑀼𑀪𑀸𑀯𑀁 𑀤𑀼𑀲𑁆𑀲𑀸𑀯𑀼𑀥𑀁 𑀉𑀢𑁆𑀢𑀭𑀺𑀲𑀸𑀝𑀓𑀁 𑀫𑀼𑀜𑁆𑀘𑀺𑀢𑁆𑀯𑀸 𑀅𑀕𑁆𑀕𑀳𑁂𑀲𑀺. 𑀬𑁂𑀪𑀼𑀬𑁆𑀬𑁂𑀦 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀤𑁂𑀯𑀢𑀸 𑀯𑁂𑀕𑁂𑀦 𑀲𑀦𑁆𑀦𑀺𑀧𑀢𑀺𑀁𑀲𑀼 ‘‘𑀅𑀚𑁆𑀚 𑀪𑀕𑀯𑀸 𑀆𑀴𑀯𑀓𑀁 𑀤𑀫𑁂𑀲𑁆𑀲𑀢𑀺, 𑀢𑀢𑁆𑀣 𑀥𑀫𑁆𑀫𑀁 𑀲𑁄𑀲𑁆𑀲𑀸𑀫𑀸’’𑀢𑀺. 𑀬𑀼𑀤𑁆𑀥𑀤𑀲𑁆𑀲𑀦𑀓𑀸𑀫𑀸𑀧𑀺 𑀤𑁂𑀯𑀢𑀸 𑀲𑀦𑁆𑀦𑀺𑀧𑀢𑀺𑀁𑀲𑀼. 𑀏𑀯𑀁 𑀲𑀓𑀮𑀫𑁆𑀧𑀺 𑀆𑀓𑀸𑀲𑀁 𑀤𑁂𑀯𑀢𑀸𑀳𑀺 𑀧𑀭𑀺𑀧𑀼𑀡𑁆𑀡𑀁 𑀅𑀳𑁄𑀲𑀺. 𑀅𑀣𑀸𑀴𑀯𑀓𑁄 𑀪𑀕𑀯𑀢𑁄 𑀲𑀫𑀻𑀧𑁂 𑀉𑀧𑀭𑀽𑀧𑀭𑀺 𑀯𑀺𑀘𑀭𑀺𑀢𑁆𑀯𑀸 𑀯𑀢𑁆𑀣𑀸𑀯𑀼𑀥𑀁 𑀫𑀼𑀜𑁆𑀘𑀺 ¶ . 𑀢𑀁 𑀅𑀲𑀦𑀺𑀘𑀓𑁆𑀓𑀁 𑀯𑀺𑀬 𑀆𑀓𑀸𑀲𑁂 𑀪𑁂𑀭𑀯𑀲𑀤𑁆𑀤𑀁 𑀓𑀭𑁄𑀦𑁆𑀢𑀁 𑀥𑀽𑀫𑀸𑀬𑀦𑁆𑀢𑀁 𑀧𑀚𑁆𑀚𑀮𑀦𑁆𑀢𑀁 𑀪𑀕𑀯𑀦𑁆𑀢𑀁 𑀧𑀢𑁆𑀯𑀸 𑀬𑀓𑁆𑀔𑀲𑁆𑀲 𑀫𑀸𑀦𑀫𑀤𑁆𑀤𑀦𑀢𑁆𑀣𑀁 𑀧𑀸𑀤𑀧𑀼𑀜𑁆𑀙𑀦𑀘𑁄𑀴𑀁 𑀳𑀼𑀢𑁆𑀯𑀸 𑀧𑀸𑀤𑀫𑀽𑀮𑁂 𑀦𑀺𑀧𑀢𑀺. 𑀆𑀴𑀯𑀓𑁄 𑀢𑀁 𑀤𑀺𑀲𑁆𑀯𑀸 𑀙𑀺𑀦𑁆𑀦𑀯𑀺𑀲𑀸𑀡𑁄 𑀯𑀺𑀬 𑀉𑀲𑀪𑁄, 𑀉𑀤𑁆𑀥𑀝𑀤𑀸𑀞𑁄 𑀯𑀺𑀬 𑀲𑀧𑁆𑀧𑁄 𑀦𑀺𑀢𑁆𑀢𑁂𑀚𑁄 𑀦𑀺𑀫𑁆𑀫𑀤𑁄 𑀦𑀺𑀧𑀸𑀢𑀺𑀢𑀫𑀸𑀦𑀤𑁆𑀥𑀚𑁄 𑀅𑀳𑁄𑀲𑀺. 𑀏𑀯𑀫𑀺𑀤𑀁 𑀆𑀴𑀯𑀓𑀬𑀼𑀤𑁆𑀥𑀁 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀅𑀝𑁆𑀞 𑀧𑀜𑁆𑀳𑁂 𑀧𑀼𑀘𑁆𑀙𑀻𑀢𑀺 𑁋

‘‘𑀓𑀺𑀁 𑀲𑀽𑀥 𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞𑀁,

𑀓𑀺𑀁 𑀲𑀼 𑀲𑀼𑀘𑀺𑀡𑁆𑀡𑀁 𑀲𑀼𑀔𑀫𑀸𑀯𑀳𑀸𑀢𑀺;

𑀓𑀺𑀁 𑀲𑀼 𑀳𑀯𑁂 𑀲𑀸𑀤𑀼𑀢𑀭𑀁 𑀭𑀲𑀸𑀦𑀁,

𑀓𑀣𑀁 𑀚𑀻𑀯𑀺𑀁 𑀚𑀻𑀯𑀺𑀢𑀫𑀸𑀳𑀼 𑀲𑁂𑀝𑁆𑀞’’𑀦𑁆𑀢𑀺. (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁮𑁩) 𑁋

𑀆𑀤𑀺𑀦𑀸 𑀅𑀝𑁆𑀞 𑀧𑀜𑁆𑀳𑁂 𑀧𑀼𑀘𑁆𑀙𑀺. 𑀲𑀢𑁆𑀣𑀸 𑀯𑀺𑀲𑁆𑀲𑀚𑁆𑀚𑁂𑀲𑀻𑀢𑀺 𑁋

‘‘𑀲𑀤𑁆𑀥𑀻𑀥 𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞𑀁,

𑀥𑀫𑁆𑀫𑁄 𑀲𑀼𑀘𑀺𑀡𑁆𑀡𑁄 𑀲𑀼𑀔𑀫𑀸𑀯𑀳𑀸𑀢𑀺;

𑀲𑀘𑁆𑀘𑀁 𑀳𑀯𑁂 𑀲𑀸𑀤𑀼𑀢𑀭𑀁 𑀭𑀲𑀸𑀦𑀁,

𑀧𑀜𑁆𑀜𑀸𑀚𑀻𑀯𑀺𑀁 𑀚𑀻𑀯𑀺𑀢𑀫𑀸𑀳𑀼 𑀲𑁂𑀝𑁆𑀞’’𑀦𑁆𑀢𑀺. (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁮𑁪) 𑁋

𑀆𑀤𑀺𑀦𑀸 𑀯𑀺𑀲𑁆𑀲𑀚𑁆𑀚𑁂𑀲𑀺. 𑀯𑀺𑀓𑁆𑀓𑀦𑁆𑀤𑀫𑀸𑀦𑀸𑀬𑀸𑀢𑀺 𑀅𑀘𑁆𑀘𑀦𑁆𑀢𑀁 𑀧𑀭𑀺𑀤𑁂𑀯𑀫𑀸𑀦𑀸𑀬.

𑀫𑀳𑀸𑀦𑀸𑀫𑀲𑀓𑁆𑀓𑀯𑀢𑁆𑀣𑀼

𑁨𑁫𑁨. 𑀧𑀜𑁆𑀘𑀫𑁂 ¶ 𑀲𑀢𑁆𑀣𑀸 𑀢𑀢𑁄 𑀧𑀭𑀁 𑀧𑀝𑀺𑀜𑁆𑀜𑀁 𑀦𑀸𑀤𑀸𑀲𑀻𑀢𑀺 𑀲𑀁𑀯𑀘𑁆𑀙𑀭𑀢𑁄 𑀧𑀭𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀧𑀘𑁆𑀘𑀬𑀧𑁆𑀧𑀯𑀸𑀭𑀡𑀸𑀲𑀸𑀤𑀺𑀬𑀦𑀲𑁆𑀲 𑀯𑀸𑀭𑀺𑀢𑀢𑁆𑀢𑀸 ‘‘𑀧𑀝𑀺𑀜𑁆𑀜𑀁 𑀦𑀸𑀤𑀸𑀲𑀻’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀪𑀕𑀯𑀸 𑀢𑀢𑀺𑀬𑀯𑀸𑀭𑁂𑀧𑀺 𑀫𑀳𑀸𑀦𑀸𑀫𑁂𑀦 𑀲𑀓𑁆𑀓𑁂𑀦 ‘‘𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀲𑀗𑁆𑀖𑀁 𑀬𑀸𑀯𑀚𑀻𑀯𑀁 𑀪𑁂𑀲𑀚𑁆𑀚𑁂𑀦 𑀧𑀯𑀸𑀭𑁂𑀢𑀼’’𑀦𑁆𑀢𑀺 (𑀧𑀸𑀘𑀺. 𑁩𑁦𑁪-𑁩𑁦𑁫) 𑀯𑀼𑀢𑁆𑀢𑁂 ‘‘𑀲𑀸𑀥𑀼 𑀲𑀸𑀥𑀼, 𑀫𑀳𑀸𑀦𑀸𑀫, 𑀢𑁂𑀦 𑀳𑀺 𑀢𑁆𑀯𑀁, 𑀫𑀳𑀸𑀦𑀸𑀫, 𑀲𑀗𑁆𑀖𑀁 𑀬𑀸𑀯𑀚𑀻𑀯𑀁 𑀪𑁂𑀲𑀚𑁆𑀚𑁂𑀦 𑀧𑀯𑀸𑀭𑁂𑀳𑀻’’𑀢𑀺 𑀧𑀝𑀺𑀜𑁆𑀜𑀁 𑀅𑀤𑀸𑀲𑀺𑀬𑁂𑀯. 𑀏𑀯𑀁 𑀧𑀝𑀺𑀜𑁆𑀜𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀙𑀩𑁆𑀩𑀕𑁆𑀕𑀺𑀬𑁂𑀳𑀺 𑀪𑀺𑀓𑁆𑀔𑀽𑀳𑀺 𑀫𑀳𑀸𑀦𑀸𑀫𑀲𑁆𑀲 𑀲𑀓𑁆𑀓𑀲𑁆𑀲 𑀯𑀺𑀳𑁂𑀞𑀺𑀢𑀪𑀸𑀯𑀁 𑀲𑀼𑀢𑁆𑀯𑀸 𑀙𑀩𑁆𑀩𑀕𑁆𑀕𑀺𑀬𑁂 𑀪𑀺𑀓𑁆𑀔𑀽 𑀯𑀺𑀕𑀭𑀳𑀺𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀺 ‘‘𑀅𑀕𑀺𑀮𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀘𑀸𑀢𑀼𑀫𑀸𑀲𑀧𑁆𑀧𑀘𑁆𑀘𑀬𑀧𑀯𑀸𑀭𑀡𑀸 𑀲𑀸𑀤𑀺𑀢𑀩𑁆𑀩𑀸 𑀅𑀜𑁆𑀜𑀢𑁆𑀭 𑀧𑀼𑀦𑀧𑁆𑀧𑀯𑀸𑀭𑀡𑀸𑀬 𑀅𑀜𑁆𑀜𑀢𑁆𑀭 𑀦𑀺𑀘𑁆𑀘𑀧𑁆𑀧𑀯𑀸𑀭𑀡𑀸𑀬. 𑀢𑀢𑁄 𑀘𑁂 𑀉𑀢𑁆𑀢𑀭𑀺 𑀲𑀸𑀤𑀺𑀬𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺. 𑀢𑀲𑁆𑀫𑀸 𑀧𑀞𑀫𑀁 𑀅𑀦𑀼𑀚𑀸𑀦𑀺𑀢𑁆𑀯𑀸𑀧𑀺 𑀧𑀘𑁆𑀙𑀸 𑀲𑀺𑀓𑁆𑀔𑀸𑀧𑀤𑀩𑀦𑁆𑀥𑀦𑁂𑀦 𑀯𑀸𑀭𑀺𑀢𑀢𑁆𑀢𑀸 ‘‘𑀧𑀝𑀺𑀜𑁆𑀜𑀁 𑀦𑀸𑀤𑀸𑀲𑀻’’𑀢𑀺 𑀯𑀼𑀢𑁆𑀢𑀁.

𑀉𑀕𑁆𑀕𑀕𑀳𑀧𑀢𑁆𑀬𑀸𑀤𑀺𑀯𑀢𑁆𑀣𑀼

𑁨𑁫𑁩-𑁨𑁫𑁬. 𑀙𑀝𑁆𑀞𑀲𑀢𑁆𑀢𑀫𑀅𑀝𑁆𑀞𑀫𑀦𑀯𑀫𑀸𑀦𑀺 ¶ 𑀲𑀼𑀯𑀺𑀜𑁆𑀜𑁂𑀬𑁆𑀬𑀸𑀦𑁂𑀯.

𑀦𑀓𑀼𑀮𑀧𑀺𑀢𑀼𑀕𑀳𑀧𑀢𑀺𑀯𑀢𑁆𑀣𑀼

𑁨𑁫𑁭. 𑀤𑀲𑀫𑁂 𑀲𑀼𑀲𑀼𑀫𑀸𑀭𑀕𑀺𑀭𑀺𑀦𑀕𑀭𑁂𑀢𑀺 𑀏𑀯𑀁𑀦𑀸𑀫𑀓𑁂 𑀦𑀕𑀭𑁂. 𑀢𑀲𑁆𑀲 𑀓𑀺𑀭 𑀦𑀕𑀭𑀲𑁆𑀲 𑀯𑀢𑁆𑀣𑀼𑀧𑀭𑀺𑀕𑁆𑀕𑀳𑀤𑀺𑀯𑀲𑁂 𑀅𑀯𑀺𑀤𑀽𑀭𑁂 𑀉𑀤𑀓𑀭𑀳𑀤𑁂 𑀲𑀼𑀲𑀼𑀫𑀸𑀭𑁄 𑀲𑀤𑁆𑀤𑀫𑀓𑀸𑀲𑀺, 𑀕𑀺𑀭𑀁 𑀦𑀺𑀘𑁆𑀙𑀸𑀭𑁂𑀲𑀺. 𑀅𑀣 𑀦𑀕𑀭𑁂 𑀅𑀦𑀦𑁆𑀢𑀭𑀸𑀬𑁂𑀦 𑀫𑀸𑀧𑀺𑀢𑁂 𑀢𑀫𑁂𑀯 𑀲𑀼𑀲𑀼𑀫𑀸𑀭𑀕𑀺𑀭𑀓𑀭𑀡𑀁 𑀲𑀼𑀪𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 ‘‘𑀲𑀼𑀲𑀼𑀫𑀸𑀭𑀕𑀺𑀭𑀻’’𑀢𑁆𑀯𑁂𑀯𑀲𑁆𑀲 𑀦𑀸𑀫𑀁 𑀅𑀓𑀁𑀲𑀼. 𑀓𑁂𑀘𑀺 𑀧𑀦 ‘‘𑀲𑀼𑀲𑀼𑀫𑀸𑀭𑀲𑀡𑁆𑀞𑀸𑀦𑀢𑁆𑀢𑀸 𑀲𑀼𑀲𑀼𑀫𑀸𑀭𑁄 𑀦𑀸𑀫 𑀏𑀓𑁄 𑀕𑀺𑀭𑀺, 𑀲𑁄 𑀢𑀲𑁆𑀲 𑀦𑀕𑀭𑀲𑁆𑀲 𑀲𑀫𑀻𑀧𑁂, 𑀢𑀲𑁆𑀫𑀸 𑀢𑀁 𑀲𑀼𑀲𑀼𑀫𑀸𑀭𑀕𑀺𑀭𑀺 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀼𑀲𑀼𑀫𑀸𑀭𑀕𑀺𑀭𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀯𑀤𑀦𑁆𑀢𑀺. 𑀪𑁂𑀲𑀓𑀴𑀸𑀯𑀦𑁂𑀢𑀺 𑀪𑁂𑀲𑀓𑀴𑀸𑀦𑀸𑀫𑀓𑁂 𑀯𑀦𑁂. ‘‘𑀪𑁂𑀲𑀓𑀮𑀸𑀯𑀦𑁂’’𑀢𑀺𑀧𑀺 𑀧𑀸𑀞𑁄. 𑀓𑀣𑀁 𑀧𑀦 𑀪𑀕𑀯𑀢𑀺 𑀦𑁂𑀲𑀁 𑀧𑀼𑀢𑁆𑀢𑀲𑀜𑁆𑀜𑀸 𑀧𑀢𑀺𑀝𑁆𑀞𑀸𑀲𑀻𑀢𑀺 𑀆𑀳 𑁋 ‘‘𑀅𑀬𑀁 𑀓𑀺𑀭𑀸’’𑀢𑀺𑀆𑀤𑀺. 𑀤𑀳𑀭𑀲𑁆𑀲𑁂𑀯 𑀤𑀳𑀭𑀸 𑀆𑀦𑀻𑀢𑀸𑀢𑀺 𑀫𑁂 𑀤𑀳𑀭𑀲𑁆𑀲𑁂𑀯 𑀲𑀢𑁄 𑀤𑀳𑀭𑀸 𑀆𑀦𑀻𑀢𑀸𑀢𑀺 𑀅𑀢𑁆𑀣𑁄. 𑀅𑀢𑀺𑀘𑀭𑀺𑀢𑀸𑀢𑀺 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀘𑀭𑀦𑁆𑀢𑁄.

(𑀙𑀝𑁆𑀞𑀏𑀢𑀤𑀕𑁆𑀕𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.)

𑀉𑀧𑀸𑀲𑀓𑀧𑀸𑀴𑀺𑀲𑀁𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁪. 𑀏𑀢𑀤𑀕𑁆𑀕𑀯𑀕𑁆𑀕𑁄

(𑁧𑁪) 𑁭. 𑀲𑀢𑁆𑀢𑀫𑀏𑀢𑀤𑀕𑁆𑀕𑀯𑀕𑁆𑀕𑀯𑀡𑁆𑀡𑀦𑀸

𑀲𑀼𑀚𑀸𑀢𑀸𑀯𑀢𑁆𑀣𑀼

𑁨𑁫𑁮. 𑀉𑀧𑀸𑀲𑀺𑀓𑀸𑀧𑀸𑀴𑀺𑀲𑀁𑀯𑀡𑁆𑀡𑀦𑀸𑀬 ¶ 𑀧𑀞𑀫𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀯𑀺𑀲𑀸𑀔𑀸𑀯𑀢𑁆𑀣𑀼

𑁨𑁫𑁯. 𑀤𑀼𑀢𑀺𑀬𑁂 𑀫𑀳𑀸𑀮𑀢𑀸𑀧𑀲𑀸𑀥𑀦𑀲𑁆𑀲𑀸𑀢𑀺 𑀫𑀳𑀸𑀮𑀢𑀸𑀧𑀺𑀴𑀦𑁆𑀥𑀦𑀲𑁆𑀲. 𑀢𑀲𑁆𑀫𑀺𑀜𑁆𑀘 𑀧𑀺𑀴𑀦𑁆𑀥𑀦𑁂 𑀘𑀢𑀲𑁆𑀲𑁄 𑀯𑀚𑀺𑀭𑀦𑀸𑀴𑀺𑀬𑁄 𑀉𑀧𑀬𑁄𑀕𑀁 𑀅𑀕𑀫𑀁𑀲𑀼. 𑀫𑀼𑀢𑁆𑀢𑀸𑀦𑀁 𑀏𑀓𑀸𑀤𑀲 𑀦𑀸𑀴𑀺𑀬𑁄, 𑀧𑀯𑀸𑀴𑀲𑁆𑀲 𑀤𑁆𑀯𑀸𑀯𑀻𑀲𑀢𑀺 𑀦𑀸𑀴𑀺𑀬𑁄, 𑀧𑀤𑀼𑀫𑀭𑀸𑀕𑀫𑀡𑀻𑀦𑀁 𑀢𑁂𑀢𑁆𑀢𑀺𑀁𑀲 𑀦𑀸𑀴𑀺𑀬𑁄. 𑀇𑀢𑀺 𑀏𑀢𑁂𑀳𑀺 𑀘 𑀅𑀜𑁆𑀜𑁂𑀳𑀺 𑀘 𑀇𑀦𑁆𑀤𑀦𑀻𑀮𑀸𑀤𑀻𑀳𑀺 𑀦𑀻𑀮𑀧𑀻𑀢𑀮𑁄𑀳𑀺𑀢𑁄𑀤𑀸𑀢𑀫𑀜𑁆𑀚𑀺𑀝𑁆𑀞𑀲𑀸𑀫𑀓𑀩𑀭𑀯𑀡𑁆𑀡𑀯𑀲𑁂𑀦 𑀲𑀢𑁆𑀢𑀯𑀡𑁆𑀡𑁂𑀳𑀺 𑀯𑀭𑀭𑀢𑀦𑁂𑀳𑀺 𑀦𑀺𑀝𑁆𑀞𑀸𑀦𑀁 𑀅𑀕𑀫𑀸𑀲𑀺, 𑀢𑀁 𑀲𑀻𑀲𑁂 𑀧𑀝𑀺𑀫𑀼𑀓𑁆𑀓𑀁 𑀬𑀸𑀯 𑀧𑀸𑀤𑀧𑀺𑀝𑁆𑀞𑀺𑀬𑀸 𑀪𑀲𑁆𑀲𑀢𑀺, 𑀧𑀜𑁆𑀘𑀦𑁆𑀦𑀁 ¶ 𑀳𑀢𑁆𑀣𑀻𑀦𑀁 𑀩𑀮𑀁 𑀥𑀸𑀭𑀬𑀫𑀸𑀦𑀸𑀯 𑀦𑀁 𑀇𑀢𑁆𑀣𑀻 𑀥𑀸𑀭𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀅𑀦𑁆𑀢𑁄𑀅𑀕𑁆𑀕𑀺 𑀩𑀳𑀺 𑀦 𑀦𑀻𑀳𑀭𑀺𑀢𑀩𑁆𑀩𑁄𑀢𑀺𑀆𑀤𑀻𑀦𑀁 𑀅𑀢𑁆𑀣𑁄 𑀉𑀧𑀭𑀺 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀲𑁂𑀲𑀫𑁂𑀢𑁆𑀣 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀔𑀼𑀚𑁆𑀚𑀼𑀢𑁆𑀢𑀭𑀸-𑀲𑀸𑀫𑀸𑀯𑀢𑀻𑀯𑀢𑁆𑀣𑀼

𑁨𑁬𑁦-𑁨𑁬𑁧. 𑀢𑀢𑀺𑀬𑀘𑀢𑀼𑀢𑁆𑀣𑁂𑀲𑀼 𑀧𑀸𑀬𑀸𑀲𑀲𑁆𑀲𑀸𑀢𑀺 𑀩𑀳𑀮𑀢𑀭𑀲𑁆𑀲 𑀧𑀸𑀬𑀸𑀲𑀲𑁆𑀲. 𑀢𑀁 𑀧𑀸𑀬𑀸𑀲𑀁 𑀪𑀼𑀜𑁆𑀚𑀦𑁆𑀢𑁂𑀲𑀽𑀢𑀺 𑀢𑀁 𑀩𑀳𑀮𑀢𑀭𑀁 𑀕𑀭𑀼𑀲𑀺𑀦𑀺𑀤𑁆𑀥𑀁 𑀧𑀸𑀬𑀸𑀲𑀁 𑀪𑀼𑀜𑁆𑀚𑀦𑁆𑀢𑁂𑀲𑀼. 𑀚𑀻𑀭𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄𑀢𑀺 𑀅𑀦𑁆𑀢𑀭𑀸𑀫𑀕𑁆𑀕𑁂 𑀅𑀧𑁆𑀧𑀸𑀳𑀸𑀭𑀢𑀸𑀬 𑀫𑀦𑁆𑀤𑀕𑀳𑀡𑀺𑀓𑀢𑁆𑀢𑀸 𑀚𑀻𑀭𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄. 𑀯𑀸𑀴𑀫𑀺𑀕𑀝𑁆𑀞𑀸𑀦𑁂𑀢𑀺 𑀯𑀸𑀴𑀫𑀺𑀕𑁂𑀳𑀺 𑀅𑀥𑀺𑀝𑁆𑀞𑀺𑀢𑀝𑁆𑀞𑀸𑀦𑁂. 𑀅𑀦𑀼𑀯𑀺𑀚𑁆𑀚𑀦𑁆𑀢𑁄𑀢𑀺 𑀯𑀺𑀘𑀸𑀭𑁂𑀦𑁆𑀢𑁄. 𑀲𑀸𑀮𑀸𑀢𑀺 𑀦𑀴𑀓𑀸𑀭𑀲𑀸𑀮𑀸. 𑀫𑀼𑀥𑀸 𑀦 𑀓𑀭𑀺𑀲𑁆𑀲𑀢𑀻𑀢𑀺 𑀫𑀽𑀮𑁆𑀬𑀁 𑀯𑀺𑀦𑀸 𑀦 𑀓𑀭𑀺𑀲𑁆𑀲𑀢𑀺. 𑀆𑀮𑀺𑀫𑁆𑀧𑁂𑀲𑀻𑀢𑀺 𑀅𑀕𑁆𑀕𑀺𑀁 𑀅𑀤𑀸𑀲𑀺, 𑀅𑀕𑁆𑀕𑀺𑀁 𑀚𑀸𑀮𑁂𑀲𑀻𑀢𑀺 𑀅𑀢𑁆𑀣𑁄. 𑀧𑁂𑀓𑁆𑀔𑀸𑀢𑀺 𑀆𑀕𑀫𑁂𑀳𑀺. 𑀉𑀧𑀥𑀺𑀲𑀫𑁆𑀧𑀤𑀸𑀢𑀺 𑀲𑀭𑀻𑀭𑀲𑀫𑁆𑀧𑀢𑁆𑀢𑀺. 𑀯𑀝𑀭𑀼𑀓𑁆𑀔𑀁 𑀧𑀢𑁆𑀯𑀸𑀢𑀺 𑀦𑀺𑀕𑁆𑀭𑁄𑀥𑀭𑀼𑀓𑁆𑀔𑀁 𑀧𑀢𑁆𑀯𑀸. 𑀲𑀼𑀯𑀡𑁆𑀡𑀓𑀝𑀓𑁂𑀢𑀺 𑀲𑀼𑀯𑀡𑁆𑀡𑀯𑀮𑀬𑁂. 𑀅𑀩𑁆𑀪𑀼𑀁 𑀫𑁂𑀢𑀺 𑀫𑁂 𑀅𑀯𑀟𑁆𑀠𑀻𑀢𑀺 𑀅𑀢𑁆𑀣𑁄. 𑀅𑀦𑁆𑀢𑁄 𑀅𑀲𑁄𑀥𑁂𑀢𑁆𑀯𑀸𑀢𑀺 𑀧𑀡𑁆𑀡𑀲𑀸𑀮𑀸𑀬 ¶ 𑀅𑀦𑁆𑀢𑁄 𑀓𑀲𑁆𑀲𑀘𑀺 𑀅𑀢𑁆𑀣𑀺𑀪𑀸𑀯𑀁 𑀯𑀸 𑀦𑀢𑁆𑀣𑀺𑀪𑀸𑀯𑀁 𑀯𑀸 𑀅𑀦𑀼𑀧𑀥𑀸𑀭𑁂𑀢𑁆𑀯𑀸. 𑀲𑁂𑀲𑀁 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯.

𑀉𑀢𑁆𑀢𑀭𑀸𑀦𑀦𑁆𑀤𑀫𑀸𑀢𑀸𑀯𑀢𑁆𑀣𑀼

𑁨𑁬𑁨. 𑀧𑀜𑁆𑀘𑀫𑁂 𑀉𑀧𑀦𑀺𑀲𑁆𑀲𑀬𑀁 𑀤𑀺𑀲𑁆𑀯𑀸𑀢𑀺 𑀇𑀫𑀺𑀦𑀸 𑀬𑀣𑀸 𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀲𑀢𑀺𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀘𑁆𑀘𑀬𑀲𑀫𑀯𑀸𑀬𑁂 𑀅𑀯𑀲𑁆𑀲𑀁 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀤𑀸 𑀇𑀘𑁆𑀙𑀺𑀢𑀩𑁆𑀩𑀸, 𑀏𑀯𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀪𑀸𑀯𑁂𑀦 𑀯𑀺𑀧𑀘𑁆𑀘𑀦𑀓𑀲𑁆𑀲 𑀓𑀫𑁆𑀫𑀲𑁆𑀲𑀧𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀫𑀯𑀸𑀬𑁄 𑀯𑀺𑀬 𑀉𑀧𑀦𑀺𑀲𑁆𑀲𑀬𑀲𑀫𑁆𑀧𑀤𑀸𑀧𑀺 𑀲𑀯𑀺𑀲𑁂𑀲𑀸 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺 𑀉𑀓𑁆𑀓𑀁𑀲𑀕𑀢𑀲𑀧𑁆𑀧𑀼𑀭𑀺𑀲𑀽𑀧𑀦𑀺𑀲𑁆𑀲𑀬𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁂𑀲𑀼 𑀮𑀩𑁆𑀪𑀫𑀸𑀦𑁂𑀲𑀼𑀧𑀺 𑀉𑀧𑀦𑀺𑀲𑁆𑀲𑀬𑀭𑀳𑀺𑀢𑀲𑁆𑀲 𑀯𑀺𑀲𑁂𑀲𑀸𑀥𑀺𑀕𑀫𑁄 𑀦 𑀲𑀫𑁆𑀧𑀚𑁆𑀚𑀢𑁂𑀯𑀸𑀢𑀺. 𑀓𑀧𑁆𑀧𑀺𑀬𑀁 𑀓𑀢𑁆𑀯𑀸𑀢𑀺 𑀬𑀣𑀸 𑀓𑀧𑁆𑀧𑀺𑀬𑀁 𑀳𑁄𑀢𑀺, 𑀢𑀣𑀸 𑀓𑀢𑁆𑀯𑀸. 𑀧𑀢𑁆𑀢𑁂 𑀧𑀢𑀺𑀝𑁆𑀞𑀧𑁂𑀬𑁆𑀬𑀸𑀢𑀺 𑀆𑀳𑀸𑀭𑀁 𑀤𑀸𑀦𑀫𑀼𑀔𑁂 𑀯𑀺𑀲𑁆𑀲𑀚𑁆𑀚𑁂𑀬𑁆𑀬. 𑀢𑀻𑀳𑀺 𑀘𑁂𑀢𑀦𑀸𑀳𑀻𑀢𑀺 𑀧𑀼𑀩𑁆𑀩𑀪𑀸𑀕𑀫𑀼𑀜𑁆𑀘𑀅𑀦𑀼𑀫𑁄𑀤𑀦𑀸𑀘𑁂𑀢𑀦𑀸𑀳𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀧𑀼𑀩𑁆𑀩𑁂𑀯 𑀤𑀸𑀦𑀸 𑀲𑀼𑀫𑀦𑁄, 𑀤𑀤𑀁 𑀘𑀺𑀢𑁆𑀢𑀁 𑀧𑀲𑀸𑀤𑀬𑁂;

𑀤𑀢𑁆𑀯𑀸 𑀅𑀢𑁆𑀢𑀫𑀦𑁄 𑀳𑁄𑀢𑀺, 𑀏𑀲𑀸 𑀧𑀼𑀜𑁆𑀜𑀲𑁆𑀲 𑀲𑀫𑁆𑀧𑀤𑀸’’𑀢𑀺. (𑀅. 𑀦𑀺. 𑁬.𑁩𑁭; 𑀧𑁂. 𑀯. 𑁩𑁦𑁫);

𑀢𑀯 ¶ 𑀫𑀦𑀁 𑀲𑀦𑁆𑀥𑀸𑀭𑁂𑀳𑀻𑀢𑀺 ‘‘𑀅𑀚𑁆𑀚 𑀪𑀢𑁆𑀢𑀁 𑀘𑀺𑀭𑀸𑀬𑀺𑀢’’𑀦𑁆𑀢𑀺 𑀓𑁄𑀥𑀢𑁄 𑀢𑀯 𑀘𑀺𑀢𑁆𑀢𑀁 𑀲𑀦𑁆𑀥𑀸𑀭𑁂𑀳𑀺, 𑀫𑀸 𑀓𑀼𑀚𑁆𑀛𑀻𑀢𑀺 𑀅𑀢𑁆𑀣𑁄. 𑀑𑀮𑁄𑀓𑀺𑀢𑁄𑀮𑁄𑀓𑀺𑀢𑀝𑁆𑀞𑀸𑀦𑀁…𑀧𑁂… 𑀲𑀫𑁆𑀧𑀭𑀺𑀓𑀺𑀡𑁆𑀡𑀁 𑀯𑀺𑀬 𑀅𑀳𑁄𑀲𑀻𑀢𑀺 𑀢𑁂𑀦 𑀓𑀲𑀺𑀢𑀝𑁆𑀞𑀸𑀦𑀁 𑀲𑀩𑁆𑀩𑀁 𑀲𑀼𑀯𑀡𑁆𑀡𑀪𑀸𑀯𑀸𑀧𑀢𑁆𑀢𑀺𑀬𑀸 𑀫𑀳𑀸𑀓𑁄𑀲𑀸𑀢𑀓𑀺𑀧𑀼𑀧𑁆𑀨𑁂𑀳𑀺 𑀲𑀜𑁆𑀙𑀦𑁆𑀦𑀁 𑀯𑀺𑀬 𑀅𑀳𑁄𑀲𑀺. 𑀢𑀸𑀤𑀺𑀲𑁂𑀢𑀺 𑀢𑀬𑀸 𑀲𑀤𑀺𑀲𑁂. 𑀦 𑀓𑁄𑀧𑁂𑀫𑀻𑀢𑀺 𑀦 𑀯𑀺𑀦𑀸𑀲𑁂𑀫𑀺, 𑀚𑀸𑀢𑀺𑀬𑀸 𑀦 𑀳𑀻𑀴𑁂𑀫𑀺. 𑀧𑀽𑀚𑀁 𑀓𑀭𑁄𑀢𑀻𑀢𑀺 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲 𑀧𑀽𑀚𑀁 𑀓𑀭𑁄𑀢𑀺. 𑀅𑀦𑁆𑀢𑀭𑀯𑀢𑁆𑀣𑀼𑀦𑁆𑀢𑀺 𑀕𑁂𑀳𑀗𑁆𑀕𑀡𑀁. 𑀪𑁄𑀢𑀺 𑀲𑀫𑁆𑀩𑁄𑀥𑀦𑁂 𑀦𑀺𑀧𑀸𑀢𑁄. 𑀚𑁂𑀢𑀺 𑀅𑀯𑀜𑁆𑀜𑀸𑀮𑀧𑀦𑀁. 𑀲𑀬𑀁 𑀅𑀭𑀺𑀬𑀲𑀸𑀯𑀺𑀓𑀸𑀪𑀸𑀯𑀢𑁄 𑀲𑀢𑁆𑀣𑀼𑀯𑀲𑁂𑀦 ‘‘𑀲𑀧𑀺𑀢𑀺𑀓𑀸 𑀥𑀻𑀢𑀸’’𑀢𑀺 𑀯𑀢𑁆𑀯𑀸 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀥𑀫𑁆𑀫𑀲𑁆𑀲𑀯𑀦𑁂𑀦 𑀢𑀲𑁆𑀲𑀸 𑀯𑀺𑀲𑁂𑀲𑀸𑀥𑀺𑀕𑀫𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀻 ‘‘𑀤𑀲𑀩𑀮𑁂 𑀔𑀫𑀦𑁆𑀢𑁂𑀬𑁂𑀯 𑀔𑀫𑀺𑀲𑁆𑀲𑀸𑀫𑀻’’𑀢𑀺 𑀆𑀳. 𑀓𑀤𑀭𑀺𑀬𑀦𑁆𑀢𑀺 𑀣𑀤𑁆𑀥𑀫𑀘𑁆𑀙𑀭𑀺𑀁.

𑀲𑀼𑀧𑁆𑀧𑀯𑀸𑀲𑀸𑀯𑀢𑁆𑀣𑀼

𑁨𑁬𑁩. 𑀙𑀝𑁆𑀞𑁂 𑀧𑀡𑀻𑀢𑀤𑀸𑀬𑀺𑀓𑀸𑀦𑀦𑁆𑀢𑀺 𑀧𑀡𑀻𑀢𑀭𑀲𑀯𑀢𑁆𑀣𑀽𑀦𑀁 𑀤𑀸𑀬𑀺𑀓𑀸𑀦𑀁. 𑀆𑀬𑀼𑀦𑁄 𑀞𑀺𑀢𑀺𑀳𑁂𑀢𑀼𑀁 𑀪𑁄𑀚𑀦𑀁 𑀤𑁂𑀦𑁆𑀢𑀻 𑀆𑀬𑀼𑀁 𑀤𑁂𑀢𑀺 𑀦𑀸𑀫. 𑀏𑀲 𑀦𑀬𑁄 𑀯𑀡𑁆𑀡𑀁 𑀤𑁂𑀢𑀻𑀢𑀺𑀆𑀤𑀻𑀲𑀼. 𑀢𑁂𑀦𑀸𑀳 𑁋 ‘‘𑀧𑀜𑁆𑀘 𑀞𑀸𑀦𑀸𑀦𑀻’’𑀢𑀺. 𑀓𑀫𑁆𑀫𑀲𑀭𑀺𑀓𑁆𑀔𑀓𑀜𑁆𑀘𑁂𑀢𑀁 ¶ 𑀨𑀮𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀆𑀬𑀼𑀁 𑀔𑁄 𑀧𑀦 𑀤𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀤𑀢𑁆𑀯𑀸𑀢𑀺 𑀤𑀸𑀦𑀳𑁂𑀢𑀼. 𑀪𑀸𑀕𑀺𑀦𑀻𑀢𑀺 𑀪𑀸𑀕𑀯𑀢𑀻 𑀮𑀤𑁆𑀥𑀼𑀁 𑀪𑀩𑁆𑀩𑀸.

𑀲𑀼𑀧𑁆𑀧𑀺𑀬𑀸𑀯𑀢𑁆𑀣𑀼

𑁨𑁬𑁪. 𑀲𑀢𑁆𑀢𑀫𑁂 𑀊𑀭𑀼𑀫𑀁𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀤𑀸𑀲𑀺𑀬𑀸 𑀅𑀤𑀸𑀲𑀻𑀢𑀺 𑀆𑀕𑀢𑀨𑀮𑀸 𑀯𑀺𑀜𑁆𑀜𑀸𑀢𑀲𑀸𑀲𑀦𑀸 𑀅𑀭𑀺𑀬𑀲𑀸𑀯𑀺𑀓𑀸 𑀅𑀢𑁆𑀢𑀦𑁄 𑀲𑀭𑀻𑀭𑀤𑀼𑀓𑁆𑀔𑀁 𑀅𑀘𑀺𑀦𑁆𑀢𑁂𑀢𑁆𑀯𑀸 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀭𑁄𑀕𑀯𑀽𑀧𑀲𑀫𑀫𑁂𑀯 𑀧𑀘𑁆𑀘𑀸𑀲𑀻𑀲𑀦𑁆𑀢𑀻 𑀅𑀢𑁆𑀢𑀦𑁄 𑀊𑀭𑀼𑀫𑀁𑀲𑀁 𑀙𑀺𑀦𑁆𑀤𑀺𑀢𑁆𑀯𑀸 𑀤𑀸𑀲𑀺𑀬𑀸 𑀅𑀤𑀸𑀲𑀺. 𑀲𑀢𑁆𑀣𑀸𑀧𑀺 𑀢𑀲𑁆𑀲𑀸 𑀢𑀣𑀸𑀧𑀯𑀢𑁆𑀢𑀁 𑀅𑀚𑁆𑀛𑀸𑀲𑀬𑀲𑀫𑁆𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 ‘‘𑀫𑀫 𑀲𑀫𑁆𑀫𑀼𑀔𑀻𑀪𑀸𑀯𑀽𑀧𑀕𑀫𑀦𑁂𑀦𑁂𑀯𑀲𑁆𑀲𑀸 𑀯𑀡𑁄 𑀭𑀼𑀳𑀺𑀢𑁆𑀯𑀸 𑀲𑀜𑁆𑀙𑀯𑀺 𑀚𑀸𑀬𑀢𑀺, 𑀨𑀸𑀲𑀼𑀪𑀸𑀯𑁄 𑀳𑁄𑀢𑀻’’𑀢𑀺 𑀘 𑀤𑀺𑀲𑁆𑀯𑀸 ‘‘𑀧𑀓𑁆𑀓𑁄𑀲𑀣 𑀦’’𑀦𑁆𑀢𑀺 𑀆𑀳. 𑀲𑀸 𑀘𑀺𑀦𑁆𑀢𑁂𑀲𑀻𑀢𑀺 ‘‘𑀲𑀩𑁆𑀩𑀮𑁄𑀓𑀲𑁆𑀲 𑀳𑀺𑀢𑀸𑀦𑀼𑀓𑀫𑁆𑀧𑀓𑁄 𑀲𑀢𑁆𑀣𑀸 𑀦 𑀫𑀁 𑀤𑀼𑀓𑁆𑀔𑀸𑀧𑁂𑀢𑀼𑀁 𑀧𑀓𑁆𑀓𑁄𑀲𑀢𑀺, 𑀅𑀢𑁆𑀣𑁂𑀢𑁆𑀣 𑀓𑀸𑀭𑀡’’𑀦𑁆𑀢𑀺 𑀘𑀺𑀦𑁆𑀢𑁂𑀲𑀺. 𑀅𑀢𑁆𑀢𑀦𑀸 𑀓𑀢𑀓𑀸𑀭𑀡𑀁 𑀲𑀩𑁆𑀩𑀁 𑀓𑀣𑁂𑀲𑀻𑀢𑀺 𑀩𑀼𑀤𑁆𑀥𑀸𑀦𑀼𑀪𑀸𑀯𑀯𑀺𑀪𑀸𑀯𑀦𑀢𑁆𑀣𑀁 𑀓𑀣𑁂𑀲𑀺, 𑀦 𑀅𑀢𑁆𑀢𑀦𑁄 𑀤𑀴𑁆𑀳𑀚𑁆𑀛𑀸𑀲𑀬𑀢𑀸𑀬 𑀯𑀺𑀪𑀸𑀯𑀦𑀢𑁆𑀣𑀁. 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺 𑀅𑀕𑀡𑀺𑀢𑀢𑁆𑀢𑀤𑀼𑀓𑁆𑀔𑀸 𑀕𑀺𑀮𑀸𑀦𑀸𑀦𑀁 𑀪𑀺𑀓𑁆𑀔𑀽𑀦𑀁 𑀕𑁂𑀮𑀜𑁆𑀜𑀯𑀽𑀧𑀲𑀫𑀦𑁂 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀸𑀢𑀺 𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑀻𑀦𑀁 𑀅𑀕𑁆𑀕𑀝𑁆𑀞𑀸𑀦𑁂 𑀞𑀧𑁂𑀲𑀻𑀢𑀺.

𑀓𑀸𑀢𑀺𑀬𑀸𑀦𑀻𑀯𑀢𑁆𑀣𑀼

𑁨𑁬𑁫. 𑀅𑀝𑁆𑀞𑀫𑁂 ¶ 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑀸𑀦𑀦𑁆𑀢𑀺 𑀭𑀢𑀦𑀢𑁆𑀢𑀬𑀕𑀼𑀡𑁂 𑀬𑀸𑀣𑀸𑀯𑀢𑁄 𑀜𑀢𑁆𑀯𑀸 𑀧𑀲𑀦𑁆𑀦𑀸𑀦𑀁, 𑀲𑁄 𑀧𑀦𑀲𑁆𑀲 𑀧𑀲𑀸𑀤𑁄 𑀫𑀕𑁆𑀕𑁂𑀦𑀸𑀕𑀢𑀢𑁆𑀢𑀸 𑀓𑁂𑀦𑀘𑀺 𑀅𑀓𑀫𑁆𑀧𑀦𑀻𑀬𑁄. 𑀅𑀥𑀺𑀕𑀢𑁂𑀦𑀸𑀢𑀺 𑀫𑀕𑁆𑀕𑀸𑀥𑀺𑀕𑀫𑁂𑀦𑁂𑀯 𑀅𑀥𑀺𑀕𑀢𑁂𑀦. ‘‘𑀅𑀯𑀺𑀕𑀢𑁂𑀦𑀸’’𑀢𑀺 𑀯𑀸 𑀧𑀸𑀞𑁄, 𑀢𑀲𑁆𑀲𑀢𑁆𑀣𑁄 ‘‘𑀓𑀤𑀸𑀘𑀺 𑀅𑀯𑀺𑀕𑀘𑁆𑀙𑀦𑁆𑀢𑁂𑀦𑀸’’𑀢𑀺. 𑀲𑁄 𑀅𑀧𑁆𑀧𑀥𑀁𑀲𑀺𑀬𑁄 𑀘 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑁋 ‘‘𑀅𑀥𑀺𑀕𑀢𑁂𑀦 𑀅𑀘𑀮𑀧𑁆𑀧𑀲𑀸𑀤𑁂𑀦𑀸’’𑀢𑀺. 𑀢𑀢𑁆𑀣 𑀓𑀸𑀬𑀲𑀓𑁆𑀔𑀺𑀁 𑀓𑀢𑁆𑀯𑀸𑀢𑀺 𑀧𑀫𑀼𑀔𑀁 𑀓𑀢𑁆𑀯𑀸, 𑀯𑀘𑀦𑀢𑁆𑀣𑀢𑁄 𑀧𑀦 𑀦𑀸𑀫𑀓𑀸𑀬𑁂𑀦 𑀤𑁂𑀲𑀦𑀸𑀬 𑀲𑀫𑁆𑀧𑀝𑀺𑀘𑁆𑀙𑀦𑀯𑀲𑁂𑀦 𑀲𑀓𑁆𑀔𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀉𑀫𑁆𑀫𑀕𑁆𑀕𑀁 𑀔𑀦𑀺𑀢𑁆𑀯𑀸𑀢𑀺 𑀖𑀭𑀲𑀦𑁆𑀥𑀺𑀘𑁆𑀙𑁂𑀤𑀦𑁂𑀦 𑀅𑀦𑁆𑀢𑁄𑀧𑀯𑀺𑀲𑀦𑀫𑀕𑁆𑀕𑀁 𑀔𑀦𑀺𑀢𑁆𑀯𑀸. 𑀤𑀼𑀮𑁆𑀮𑀪𑀲𑁆𑀲𑀯𑀦𑀦𑁆𑀢𑀺 𑀤𑀼𑀮𑁆𑀮𑀪𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁. 𑀫𑀳𑀸𑀧𑀣𑀯𑀻 𑀧𑀯𑀺𑀲𑀺𑀢𑀩𑁆𑀩𑀸 𑀪𑀯𑁂𑀬𑁆𑀬𑀸𑀢𑀺 𑀅𑀯𑀻𑀘𑀺𑀧𑁆𑀧𑀯𑁂𑀲𑀦𑀁 𑀯𑀤𑀢𑀺.

𑀦𑀓𑀼𑀮𑀫𑀸𑀢𑀸𑀯𑀢𑁆𑀣𑀼

𑁨𑁬𑁬. 𑀦𑀯𑀫𑁂 𑀯𑀺𑀲𑁆𑀲𑀸𑀲𑀓𑀣𑀦𑁂𑀦𑁂𑀯 𑀦𑀓𑀼𑀮𑀫𑀸𑀢𑀸 𑀦𑀓𑀼𑀮𑀧𑀺𑀢𑀸 𑀘 𑀲𑀢𑁆𑀣𑀼𑀯𑀺𑀲𑁆𑀲𑀸𑀲𑀺𑀓𑀸 𑀦𑀸𑀫 𑀚𑀸𑀢𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀯𑀺𑀲𑁆𑀲𑀸𑀲𑀺𑀓𑀸𑀦𑀦𑁆𑀢𑀺 𑀯𑀺𑀲𑁆𑀲𑀸𑀲𑀓𑀣𑀁 𑀓𑀣𑁂𑀦𑁆𑀢𑀻𑀦𑀁 𑀉𑀧𑀸𑀲𑀺𑀓𑀸𑀦’’𑀦𑁆𑀢𑀺. 𑀕𑀳𑀧𑀢𑀸𑀦𑀻𑀢𑀺 𑀕𑁂𑀳𑀲𑀸𑀫𑀺𑀦𑀻. 𑀯𑀼𑀢𑁆𑀢𑀫𑁂𑀯𑀸𑀢𑀺 𑀉𑀧𑀸𑀲𑀓𑀧𑀸𑀴𑀺𑀬𑀁 𑀦𑀓𑀼𑀮𑀧𑀺𑀢𑀼𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑀫𑁂𑀯.

𑀓𑀸𑀴𑀻𑀓𑀼𑀭𑀭𑀖𑀭𑀺𑀓𑀸𑀯𑀢𑁆𑀣𑀼

𑁨𑁬𑁭. 𑀤𑀲𑀫𑁂 ¶ 𑀅𑀦𑀼𑀲𑁆𑀲𑀯𑁂𑀦𑁂𑀯𑀸𑀢𑀺 𑀧𑀘𑁆𑀘𑀓𑁆𑀔𑀢𑁄 𑀭𑀽𑀧𑀤𑀲𑁆𑀲𑀦𑁂𑀦 𑀲𑀢𑁆𑀣𑀼 𑀲𑀫𑁆𑀫𑀼𑀔𑀸 𑀥𑀫𑁆𑀫𑀲𑁆𑀲𑀯𑀦𑁂𑀦 𑀘 𑀯𑀺𑀦𑀸 𑀓𑁂𑀯𑀮𑀁 𑀅𑀦𑀼𑀲𑁆𑀲𑀯𑀦𑁂𑀦𑁂𑀯 𑀧𑀭𑀲𑁆𑀲 𑀯𑀘𑀦𑀁 𑀅𑀦𑀼𑀕𑀢𑀲𑁆𑀲𑀯𑀦𑁂𑀦𑁂𑀯 𑀉𑀧𑁆𑀧𑀦𑁆𑀦𑁂𑀦 𑀧𑀲𑀸𑀤𑁂𑀦. 𑀅𑀦𑀼𑀲𑁆𑀲𑀯𑀺𑀓𑀧𑁆𑀧𑀲𑀸𑀤𑀦𑁆𑀢𑀺 𑀅𑀦𑀼𑀲𑁆𑀲𑀯𑀢𑁄 𑀆𑀕𑀢𑀧𑁆𑀧𑀲𑀸𑀤𑀁.

(𑀲𑀢𑁆𑀢𑀫𑀏𑀢𑀤𑀕𑁆𑀕𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.)

𑀉𑀧𑀸𑀲𑀺𑀓𑀸𑀧𑀸𑀴𑀺𑀲𑀁𑀯𑀡𑁆𑀡𑀦𑀸 𑀲𑀫𑀢𑁆𑀢𑀸.

𑀦𑀺𑀝𑁆𑀞𑀺𑀢𑀸 𑀘 𑀫𑀦𑁄𑀭𑀣𑀧𑀽𑀭𑀡𑀺𑀬𑀸

𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀏𑀢𑀤𑀕𑁆𑀕𑀯𑀕𑁆𑀕𑀯𑀡𑁆𑀡𑀦𑀸𑀬 𑀅𑀦𑀼𑀢𑁆𑀢𑀸𑀦𑀢𑁆𑀣𑀤𑀻𑀧𑀦𑀸.

𑁧𑁫. 𑀅𑀝𑁆𑀞𑀸𑀦𑀧𑀸𑀴𑀺 (𑀧𑀞𑀫𑀯𑀕𑁆𑀕)

(𑁧𑁫) 𑁧. 𑀅𑀝𑁆𑀞𑀸𑀦𑀧𑀸𑀴𑀺-𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸

𑁨𑁬𑁮. 𑀅𑀝𑁆𑀞𑀸𑀦𑀧𑀸𑀴𑀺𑀯𑀡𑁆𑀡𑀦𑀸𑀬𑀁 ¶ ¶ 𑀅𑀯𑀺𑀚𑁆𑀚𑀫𑀸𑀦𑀁 𑀞𑀸𑀦𑀁 𑀅𑀝𑁆𑀞𑀸𑀦𑀁, 𑀦𑀢𑁆𑀣𑀺 𑀞𑀸𑀦𑀦𑁆𑀢𑀺 𑀯𑀸 𑀅𑀝𑁆𑀞𑀸𑀦𑀁. 𑀅𑀦𑀯𑀓𑀸𑀲𑁄𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀤𑀢𑁆𑀣𑀦𑀺𑀕𑀫𑀦𑀫𑁂𑀯 𑀳𑀺 ‘‘𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 𑀯𑀘𑀦𑀦𑁆𑀢𑀺. 𑀢𑁂𑀦𑀸𑀳 𑁋 ‘‘𑀉𑀪𑀬𑁂𑀦𑀧𑀻’’𑀢𑀺𑀆𑀤𑀺. 𑀬𑀦𑁆𑀢𑀺 𑀓𑀸𑀭𑀡𑀢𑁆𑀣𑁂 𑀧𑀘𑁆𑀘𑀢𑁆𑀢𑀯𑀘𑀦𑀁. 𑀳𑁂𑀢𑀼𑀅𑀢𑁆𑀣𑁄 𑀘𑁂𑀢𑁆𑀣 𑀓𑀸𑀭𑀡𑀢𑁆𑀣𑁄𑀢𑀺 𑀆𑀳 𑁋 ‘‘𑀬𑀦𑁆𑀢𑀺 𑀬𑁂𑀦 𑀓𑀸𑀭𑀡𑁂𑀦𑀸’’𑀢𑀺. 𑀉𑀓𑁆𑀓𑀝𑁆𑀞𑀦𑀺𑀤𑁆𑀤𑁂𑀲𑁂𑀦𑁂𑀢𑁆𑀣 𑀤𑀺𑀝𑁆𑀞𑀺𑀲𑀫𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀫𑀕𑁆𑀕𑀤𑀺𑀝𑁆𑀞𑀺𑀬𑀸 𑀲𑀫𑁆𑀧𑀦𑁆𑀦𑁄’’𑀢𑀺. 𑀓𑀼𑀢𑁄 𑀧𑀦𑀸𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺? 𑀮𑀺𑀗𑁆𑀕𑀢𑁄, 𑀮𑀺𑀗𑁆𑀕𑀁 𑀘𑁂𑀢𑀲𑁆𑀲 𑀦𑀺𑀘𑁆𑀘𑀢𑁄 𑀉𑀧𑀕𑀫𑀦𑀧𑁆𑀧𑀝𑀺𑀓𑁆𑀔𑁂𑀧𑁄. 𑀘𑀢𑀼𑀪𑀽𑀫𑀓𑁂𑀲𑀽𑀢𑀺 𑀇𑀤𑀁 𑀘𑀢𑀼𑀢𑁆𑀣𑀪𑀽𑀫𑀓𑀲𑀗𑁆𑀔𑀸𑀭𑀸𑀦𑀁 𑀅𑀭𑀺𑀬𑀲𑀸𑀯𑀓𑀲𑁆𑀲 𑀯𑀺𑀲𑀬𑀪𑀸𑀯𑀽𑀧𑀕𑀫𑀦𑀢𑁄 𑀯𑀼𑀢𑁆𑀢𑀁, 𑀦 𑀧𑀦 𑀢𑁂 𑀆𑀭𑀩𑁆𑀪 𑀦𑀺𑀘𑁆𑀘𑀢𑁄 𑀉𑀧𑀕𑀫𑀦𑀲𑀩𑁆𑀪𑀸𑀯𑀢𑁄. 𑀯𑀓𑁆𑀔𑀢𑀺 𑀳𑀺 ‘‘𑀢𑀤𑀪𑀸𑀯𑁂 𑀘𑀢𑀼𑀢𑁆𑀣𑀪𑀽𑀫𑀓𑀲𑀗𑁆𑀔𑀸𑀭𑀸 𑀧𑀦𑀸’’𑀢𑀺𑀆𑀤𑀺𑀦𑀸. 𑀅𑀪𑀺𑀲𑀗𑁆𑀔𑀢𑀲𑀗𑁆𑀔𑀸𑀭𑀅𑀪𑀺𑀲𑀗𑁆𑀔𑀭𑀡𑀓𑀲𑀗𑁆𑀔𑀸𑀭𑀸𑀦𑀁 𑀲𑀧𑁆𑀧𑀤𑁂𑀲𑀢𑁆𑀢𑀸 𑀦𑀺𑀧𑁆𑀧𑀤𑁂𑀲𑀲𑀗𑁆𑀔𑀸𑀭𑀕𑁆𑀕𑀳𑀡𑀢𑁆𑀣𑀁 ‘‘𑀲𑀗𑁆𑀔𑀢𑀲𑀗𑁆𑀔𑀸𑀭𑁂𑀲𑀽’’𑀢𑀺 𑀯𑀼𑀢𑁆𑀢𑀁, 𑀮𑁄𑀓𑀼𑀢𑁆𑀢𑀭𑀲𑀗𑁆𑀔𑀸𑀭𑀸𑀦𑀁 𑀧𑀦 𑀦𑀺𑀯𑀢𑁆𑀢𑀦𑁂 𑀓𑀸𑀭𑀡𑀁 𑀲𑀬𑀫𑁂𑀯 𑀯𑀓𑁆𑀔𑀢𑀺. 𑀏𑀢𑀁 𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀢𑀣𑀸 𑀉𑀧𑀕𑀫𑀦𑁂 𑀲𑁂𑀢𑀼𑀖𑀸𑀢𑁄 𑀦𑀢𑁆𑀣𑀺. 𑀢𑁂𑀚𑀼𑀲𑁆𑀲𑀤𑀢𑁆𑀢𑀸𑀢𑀺 𑀲𑀁𑀓𑀺𑀮𑁂𑀲𑀯𑀺𑀥𑀫𑀦𑀢𑁂𑀚𑀲𑁆𑀲 𑀅𑀥𑀺𑀓𑀪𑀸𑀯𑀢𑁄. 𑀢𑀣𑀸 𑀳𑀺 𑀢𑁂 𑀕𑀫𑁆𑀪𑀻𑀭𑀪𑀸𑀯𑁂𑀦 𑀤𑀼𑀤𑁆𑀤𑀲𑀸 𑀅𑀓𑀼𑀲𑀮𑀸𑀦𑀁 𑀆𑀭𑀫𑁆𑀫𑀡𑀁 𑀦 𑀳𑁄𑀦𑁆𑀢𑀻𑀢𑀺. 𑀇𑀤𑀁 𑀧𑀦 𑀧𑀓𑀭𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀧𑁆𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀸𑀦𑀜𑁆𑀳𑀺 𑀲𑀦𑁆𑀢𑀸𑀦𑁂𑀲𑀼 𑀓𑀼𑀲𑀮𑀥𑀫𑁆𑀫𑀸𑀦𑀫𑁆𑀧𑀺 𑀢𑁂 𑀆𑀭𑀫𑁆𑀫𑀡𑀁 𑀦 𑀳𑁄𑀦𑁆𑀢𑀺.

𑁨𑁬𑁯. 𑀅𑀲𑀼𑀔𑁂 𑀲𑀼𑀔𑀦𑁆𑀢𑀺 𑀯𑀺𑀧𑀮𑁆𑀮𑀸𑀲𑁄 𑀘 𑀇𑀥 𑀲𑀼𑀔𑀢𑁄 𑀉𑀧𑀕𑀫𑀦𑀲𑁆𑀲 𑀞𑀸𑀦𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀏𑀓𑀦𑁆𑀢…𑀧𑁂… 𑀅𑀢𑁆𑀢𑀤𑀺𑀝𑁆𑀞𑀺𑀯𑀲𑁂𑀦𑀸’’𑀢𑀺 𑀧𑀥𑀸𑀦𑀤𑀺𑀝𑁆𑀞𑀺𑀫𑀸𑀳. 𑀕𑀽𑀣𑀦𑁆𑀢𑀺 𑀕𑀽𑀣𑀝𑁆𑀞𑀸𑀦𑀁, 𑀤𑀺𑀝𑁆𑀞𑀺𑀬𑀸 𑀦𑀺𑀩𑁆𑀩𑀸𑀦𑀲𑁆𑀲 𑀅𑀯𑀺𑀲𑀬𑀪𑀸𑀯𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑁄 𑀏𑀯𑀸𑀢𑀺 𑀓𑀲𑀺𑀡𑀸𑀤𑀺𑀧𑀡𑁆𑀡𑀢𑁆𑀢𑀺𑀲𑀗𑁆𑀕𑀳𑀢𑁆𑀣𑀦𑁆𑀢𑀺 𑀯𑀼𑀢𑁆𑀢𑀁.

𑁨𑁭𑁦. 𑀧𑀭𑀺𑀘𑁆𑀙𑁂𑀤𑁄𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀦𑀁 𑀧𑀭𑀺𑀘𑁆𑀙𑀺𑀚𑁆𑀚 𑀢𑀲𑁆𑀲 𑀕𑀳𑀡𑀁. 𑀲𑁆𑀯𑀸𑀬𑀁 𑀬𑁂𑀲𑀼 𑀦𑀺𑀘𑁆𑀘𑀸𑀤𑀺𑀢𑁄 𑀉𑀧𑀕𑀫𑀦𑀁 𑀲𑀫𑁆𑀪𑀯𑀢𑀺, 𑀢𑁂𑀲𑀁 𑀯𑀲𑁂𑀦𑀬𑁂𑀯 𑀓𑀸𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀩𑁆𑀩𑀯𑀸𑀭𑁂𑀲𑀼 𑀯𑀸’’𑀢𑀺𑀆𑀤𑀺𑀫𑀸𑀳. 𑀲𑀩𑁆𑀩𑀯𑀸𑀭𑁂𑀲𑀽𑀢𑀺 ‘‘𑀦𑀺𑀘𑁆𑀘𑀢𑁄 𑀉𑀧𑀕𑀘𑁆𑀙𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 𑀆𑀕𑀢𑁂𑀲𑀼 𑀲𑀩𑁆𑀩𑁂𑀲𑀼 𑀲𑀼𑀢𑁆𑀢𑀧𑀤𑁂𑀲𑀼. 𑀧𑀼𑀣𑀼𑀚𑁆𑀚𑀦𑁄 𑀳𑀻𑀢𑀺 𑀳𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀬𑀲𑁆𑀫𑀸 𑀬𑀁 𑀬𑀁 𑀲𑀗𑁆𑀔𑀸𑀭𑀁 𑀧𑀼𑀣𑀼𑀚𑁆𑀚𑀦𑁄 𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀡𑁆𑀳𑀸𑀢𑀺, 𑀢𑀁 𑀢𑀁 𑀅𑀭𑀺𑀬𑀲𑀸𑀯𑀓𑁄 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀕𑀡𑁆𑀳𑀦𑁆𑀢𑁄 𑀬𑀸𑀣𑀸𑀯𑀢𑁄 ¶ 𑀚𑀸𑀦𑀦𑁆𑀢𑁄 𑀢𑀁 𑀕𑀸𑀳𑀁 𑀢𑀁 𑀤𑀺𑀝𑁆𑀞𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀢𑀲𑁆𑀫𑀸 𑀬𑀢𑁆𑀣 ¶ 𑀕𑀸𑀳𑁄, 𑀢𑀢𑁆𑀣 𑀯𑀺𑀲𑁆𑀲𑀚𑁆𑀚𑀦𑀸𑀢𑀺 𑀘𑀢𑀼𑀪𑀽𑀫𑀓𑀲𑀗𑁆𑀔𑀸𑀭𑀸 𑀇𑀥 𑀲𑀗𑁆𑀔𑀸𑀭𑀕𑁆𑀕𑀳𑀡𑁂𑀦 𑀦 𑀕𑀬𑁆𑀳𑀦𑁆𑀢𑀻𑀢𑀺 𑀅𑀢𑁆𑀣𑁄.

𑁨𑁭𑁧. 𑀧𑀼𑀢𑁆𑀢𑀲𑀫𑁆𑀩𑀦𑁆𑀥𑁂𑀦 𑀫𑀸𑀢𑀼𑀧𑀺𑀢𑀼𑀲𑀫𑀜𑁆𑀜𑀸 𑀤𑀢𑁆𑀢𑀓𑀺𑀢𑁆𑀢𑀺𑀫𑀸𑀤𑀺𑀯𑀲𑁂𑀦𑀧𑀺 𑀧𑀼𑀢𑁆𑀢𑀯𑁄𑀳𑀸𑀭𑁄 𑀮𑁄𑀓𑁂 𑀤𑀺𑀲𑁆𑀲𑀢𑀺, 𑀲𑁄 𑀘 𑀔𑁄 𑀧𑀭𑀺𑀬𑀸𑀬𑁂𑀦𑀸𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀲𑀺𑀤𑁆𑀥𑀁 𑀢𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀚𑀦𑀺𑀓𑀸𑀯 𑀫𑀸𑀢𑀸, 𑀚𑀦𑀓𑁄𑀯 𑀧𑀺𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 ‘‘𑀫𑀦𑀼𑀲𑁆𑀲𑀪𑀽𑀢𑁄𑀯 𑀔𑀻𑀡𑀸𑀲𑀯𑁄 𑀅𑀭𑀳𑀸𑀢𑀺 𑀅𑀥𑀺𑀧𑁆𑀧𑁂𑀢𑁄’’𑀢𑀺 𑀯𑀼𑀢𑁆𑀢𑀁. ‘‘𑀅𑀝𑁆𑀞𑀸𑀦𑀫𑁂𑀢’’𑀦𑁆𑀢𑀺𑀆𑀤𑀺𑀦𑀸 ‘‘𑀫𑀸𑀢𑀼𑀆𑀤𑀻𑀦𑀁𑀬𑁂𑀯 𑀚𑀻𑀯𑀺𑀢𑀸 𑀯𑁄𑀭𑁄𑀧𑀦𑁂 𑀅𑀭𑀺𑀬𑀲𑀸𑀯𑀓𑀲𑁆𑀲 𑀅𑀪𑀩𑁆𑀩𑀪𑀸𑀯𑀤𑀲𑁆𑀲𑀦𑀢𑁄 𑀢𑀤𑀜𑁆𑀜𑀁 𑀅𑀭𑀺𑀬𑀲𑀸𑀯𑀓𑁄 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀻𑀢𑀺 𑀇𑀤𑀁 𑀅𑀢𑁆𑀣𑀢𑁄 𑀆𑀧𑀦𑁆𑀦𑀫𑁂𑀯𑀸’’𑀢𑀺 𑀫𑀜𑁆𑀜𑀫𑀸𑀦𑁄 𑀯𑀤𑀢𑀺 𑁋 ‘‘𑀓𑀺𑀁 𑀧𑀦 𑀅𑀭𑀺𑀬𑀲𑀸𑀯𑀓𑁄 𑀅𑀜𑁆𑀜𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸’’𑀢𑀺? ‘‘𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄, 𑀬𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑁄 𑀧𑀼𑀕𑁆𑀕𑀮𑁄 𑀲𑀜𑁆𑀘𑀺𑀘𑁆𑀘 𑀧𑀸𑀡𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻’’𑀢𑀺 𑀯𑀘𑀦𑀢𑁄 ‘‘𑀏𑀢𑀫𑁆𑀧𑀺 𑀅𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 𑁋 ‘‘𑀲𑀘𑁂 𑀳𑀻’’𑀢𑀺𑀆𑀤𑀺. 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 ‘‘𑀫𑀸𑀢𑀭’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀧𑀼𑀣𑀼𑀚𑁆𑀚𑀦𑀪𑀸𑀯𑀲𑁆𑀲 𑀧𑀦𑀸’’𑀢𑀺𑀆𑀤𑀺. 𑀢𑀢𑁆𑀣 𑀩𑀮𑀤𑀻𑀧𑀦𑀢𑁆𑀣𑀦𑁆𑀢𑀺 𑀲𑀤𑁆𑀥𑀸𑀤𑀺𑀩𑀮𑀲𑀫𑀦𑁆𑀦𑀸𑀕𑀫𑀤𑀻𑀧𑀦𑀢𑁆𑀣𑀁. 𑀅𑀭𑀺𑀬𑀫𑀕𑁆𑀕𑁂𑀦𑀸𑀕𑀢𑀲𑀤𑁆𑀥𑀸𑀥𑀺𑀩𑀮𑀯𑀲𑁂𑀦 𑀳𑀺 𑀅𑀭𑀺𑀬𑀲𑀸𑀯𑀓𑁄 𑀢𑀸𑀤𑀺𑀲𑀁 𑀲𑀸𑀯𑀚𑁆𑀚𑀁 𑀦 𑀓𑀭𑁄𑀢𑀺.

𑁨𑁭𑁫. 𑀧𑀜𑁆𑀘𑀳𑀺 𑀓𑀸𑀭𑀡𑁂𑀳𑀻𑀢𑀺 𑀇𑀤𑀫𑁂𑀢𑁆𑀣 𑀦𑀺𑀧𑁆𑀨𑀸𑀤𑀓𑀸𑀦𑀺 𑀢𑁂𑀲𑀁 𑀧𑀼𑀩𑁆𑀩𑀪𑀸𑀕𑀺𑀬𑀸𑀦𑀺 𑀘 𑀓𑀸𑀭𑀡𑀸𑀦𑀺 𑀓𑀸𑀭𑀡𑀪𑀸𑀯𑀲𑀸𑀫𑀜𑁆𑀜𑁂𑀦 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀦 𑀧𑀦 𑀲𑀩𑁆𑀩𑁂𑀲𑀁 𑀲𑀫𑀸𑀦𑀬𑁄𑀕𑀓𑁆𑀔𑀫𑀢𑁆𑀢𑀸. 𑀆𑀓𑀸𑀭𑁂𑀳𑀻𑀢𑀺 𑀓𑀸𑀭𑀡𑁂𑀳𑀺. 𑀅𑀦𑀼𑀲𑁆𑀲𑀸𑀯𑀦𑁂𑀦𑀸𑀢𑀺 𑀅𑀦𑀼𑀭𑀽𑀧𑀁 𑀲𑀸𑀯𑀦𑁂𑀦. 𑀪𑁂𑀤𑀲𑁆𑀲 𑀅𑀦𑀼𑀭𑀽𑀧𑀁 𑀬𑀣𑀸 𑀪𑁂𑀤𑁄 𑀳𑁄𑀢𑀺, 𑀏𑀯𑀁 𑀪𑀺𑀦𑁆𑀤𑀺𑀢𑀩𑁆𑀩𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀢𑁆𑀢𑀦𑁄 𑀯𑀘𑀦𑀲𑁆𑀲 𑀲𑀸𑀯𑀦𑁂𑀦 𑀯𑀺𑀜𑁆𑀜𑀸𑀧𑀦𑁂𑀦. 𑀢𑁂𑀦𑀸𑀳 𑁋 ‘‘𑀦𑀦𑀼 𑀢𑀼𑀫𑁆𑀳𑁂’’𑀢𑀺𑀆𑀤𑀺. 𑀓𑀡𑁆𑀡𑀫𑀽𑀮𑁂 𑀯𑀘𑀻𑀪𑁂𑀤𑀁 𑀓𑀢𑁆𑀯𑀸𑀢𑀺 𑀏𑀢𑁂𑀦 𑀧𑀸𑀓𑀝𑀁 𑀓𑀢𑁆𑀯𑀸 𑀪𑁂𑀤𑀓𑀭𑀯𑀢𑁆𑀣𑀼𑀤𑀻𑀧𑀦𑀁 𑀯𑁄𑀳𑀸𑀭𑁄, 𑀢𑀢𑁆𑀣 𑀅𑀢𑁆𑀢𑀦𑁄 𑀦𑀺𑀘𑁆𑀙𑀺𑀢𑀫𑀢𑁆𑀣𑀁 𑀭𑀳𑀲𑁆𑀲𑀯𑀲𑁂𑀦 𑀯𑀺𑀜𑁆𑀜𑀸𑀧𑀦𑀁 𑀅𑀦𑀼𑀲𑁆𑀲𑀸𑀯𑀦𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀓𑀫𑁆𑀫𑀫𑁂𑀯 𑀉𑀤𑁆𑀤𑁂𑀲𑁄 𑀯𑀸 𑀧𑀫𑀸𑀡𑀦𑁆𑀢𑀺 𑀢𑁂𑀳𑀺 𑀲𑀗𑁆𑀖𑀪𑁂𑀤𑀲𑀺𑀤𑁆𑀥𑀺𑀢𑁄 𑀯𑀼𑀢𑁆𑀢𑀁, 𑀇𑀢𑀭𑁂 𑀧𑀦 𑀢𑁂𑀲𑀁 𑀲𑀫𑁆𑀪𑀸𑀭𑀪𑀽𑀢𑀸. 𑀢𑁂𑀦𑀸𑀳 𑁋 ‘‘𑀯𑁄𑀳𑀸𑀭𑀸’’𑀢𑀺𑀆𑀤𑀺. 𑀢𑀢𑁆𑀣𑀸𑀢𑀺 𑀯𑁄𑀳𑀭𑀡𑁂. 𑀘𑀼𑀢𑀺𑀅𑀦𑀦𑁆𑀢𑀭𑀁 𑀨𑀮𑀁 𑀅𑀦𑀦𑁆𑀢𑀭𑀁 𑀦𑀸𑀫, 𑀢𑀲𑁆𑀫𑀺𑀁 𑀅𑀦𑀦𑁆𑀢𑀭𑁂 𑀦𑀺𑀬𑀼𑀢𑁆𑀢𑀸𑀦𑀺, 𑀢𑀦𑁆𑀦𑀺𑀩𑁆𑀩𑀢𑁆𑀢𑀦𑁂𑀦 𑀅𑀦𑀦𑁆𑀢𑀭𑀓𑀭𑀡𑀲𑀻𑀮𑀸𑀦𑀺, 𑀅𑀦𑀦𑁆𑀢𑀭𑀧𑁆𑀧𑀬𑁄𑀚𑀦𑀸𑀦𑀺 𑀘𑀸𑀢𑀺 𑀆𑀦𑀦𑁆𑀢𑀭𑀺𑀬𑀸𑀦𑀺, 𑀢𑀸𑀦𑀺 𑀏𑀯 𑀓𑀫𑁆𑀫𑀸𑀦𑀻𑀢𑀺 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀦𑀺.

𑀓𑀫𑁆𑀫𑀢𑁄𑀢𑀺 ¶ ‘‘𑀏𑀯𑀁 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀁 𑀳𑁄𑀢𑀺, 𑀏𑀯𑀁 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀲𑀤𑀺𑀲’’𑀦𑁆𑀢𑀺 𑀏𑀯𑀁 𑀓𑀫𑁆𑀫𑀯𑀺𑀪𑀸𑀕𑀢𑁄. 𑀤𑁆𑀯𑀸𑀭𑀢𑁄𑀢𑀺 𑀓𑀸𑀬𑀤𑁆𑀯𑀸𑀭𑀢𑁄. 𑀓𑀧𑁆𑀧𑀝𑁆𑀞𑀺𑀢𑀺𑀬𑀢𑁄𑀢𑀺 ‘‘𑀇𑀤𑀁 𑀓𑀧𑁆𑀧𑀝𑁆𑀞𑀺𑀢𑀺𑀬𑀯𑀺𑀧𑀸𑀓𑀁, 𑀇𑀤𑀁 𑀦 𑀓𑀧𑁆𑀧𑀝𑁆𑀞𑀺𑀢𑀺𑀬𑀯𑀺𑀧𑀸𑀓’’𑀦𑁆𑀢𑀺 𑀏𑀯𑀁 𑀓𑀧𑁆𑀧𑀝𑁆𑀞𑀺𑀢𑀺𑀬𑀯𑀺𑀪𑀸𑀕𑀢𑁄. 𑀧𑀸𑀓𑀲𑀸𑀥𑀸𑀭𑀡𑀸𑀤𑀻𑀳𑀻𑀢𑀺 ‘‘𑀇𑀤𑀫𑁂𑀢𑁆𑀣 𑀯𑀺𑀧𑀘𑁆𑀘𑀢𑀺, 𑀇𑀤𑀁 ¶ 𑀦 𑀯𑀺𑀧𑀘𑁆𑀘𑀢𑀻’’𑀢𑀺 𑀯𑀺𑀧𑀘𑁆𑀘𑀦𑀯𑀺𑀪𑀸𑀕𑀢𑁄, 𑀕𑀳𑀝𑁆𑀞𑀧𑀩𑁆𑀩𑀚𑀺𑀢𑀸𑀦𑀁 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀢𑁄, 𑀆𑀤𑀺-𑀲𑀤𑁆𑀤𑁂𑀦 𑀯𑁂𑀤𑀦𑀸𑀤𑀺𑀯𑀺𑀪𑀸𑀕𑀢𑁄 𑀘.

𑀓𑀫𑁆𑀫𑀢𑁄 𑀢𑀸𑀯 𑀯𑀺𑀦𑀺𑀘𑁆𑀙𑀬𑁄 𑀯𑀼𑀘𑁆𑀘𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀬𑀲𑁆𑀫𑀸 𑀫𑀦𑀼𑀲𑁆𑀲𑀢𑁆𑀢𑀪𑀸𑀯𑁂 𑀞𑀺𑀢𑀲𑁆𑀲𑁂𑀯 𑀓𑀼𑀲𑀮𑀥𑀫𑁆𑀫𑀸𑀦𑀁 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀸𑀧𑀢𑁆𑀢𑀺, 𑀬𑀣𑀸 𑀢𑀺𑀡𑁆𑀡𑀁 𑀩𑁄𑀥𑀺𑀲𑀢𑁆𑀢𑀸𑀦𑀁 𑀩𑁄𑀥𑀺𑀢𑁆𑀢𑀬𑀦𑀺𑀩𑁆𑀩𑀢𑁆𑀢𑀺𑀬𑀁, 𑀏𑀯𑀁 𑀫𑀦𑀼𑀲𑁆𑀲𑀪𑀸𑀯𑁂 𑀞𑀺𑀢𑀲𑁆𑀲𑁂𑀯 𑀏𑀤𑀺𑀲𑀸𑀦𑀁 𑀅𑀓𑀼𑀲𑀮𑀥𑀫𑁆𑀫𑀸𑀦𑀫𑁆𑀧𑀺 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀸𑀧𑀢𑁆𑀢𑀻𑀢𑀺 𑀆𑀳 𑁋 ‘‘𑀫𑀦𑀼𑀲𑁆𑀲𑀪𑀽𑀢𑀲𑁆𑀲𑁂𑀯𑀸’’𑀢𑀺. 𑀧𑀸𑀓𑀢𑀺𑀓𑀫𑀦𑀼𑀲𑁆𑀲𑀸𑀦𑀫𑁆𑀧𑀺 𑀘 𑀓𑀼𑀲𑀮𑀥𑀫𑁆𑀫𑀸𑀦𑀁 𑀯𑀺𑀲𑁂𑀲𑀧𑁆𑀧𑀢𑁆𑀢𑀺 𑀯𑀺𑀫𑀸𑀦𑀯𑀢𑁆𑀣𑀼𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀸. 𑀬𑀣𑀸𑀯𑀼𑀢𑁆𑀢𑁄 𑀘 𑀅𑀢𑁆𑀣𑁄 𑀲𑀫𑀸𑀦𑀚𑀸𑀢𑀺𑀬𑀲𑁆𑀲 𑀯𑀺𑀓𑁄𑀧𑀦𑁂 𑀕𑀭𑀼𑀢𑀭𑁄, 𑀦 𑀢𑀣𑀸 𑀯𑀺𑀚𑀸𑀢𑀺𑀬𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀫𑀦𑀼𑀲𑁆𑀲𑀪𑀽𑀢𑀁 𑀫𑀸𑀢𑀭𑀁 𑀯𑀸 𑀧𑀺𑀢𑀭𑀁 𑀯𑀸’’𑀢𑀺. 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂 𑀘 𑀲𑁄 𑀏𑀯 𑀏𑀓𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑁄 𑀪𑀯𑀗𑁆𑀕𑀧𑁆𑀧𑀩𑀦𑁆𑀥𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑀩𑀦𑁆𑀥𑁄 𑀘, 𑀦 𑀅𑀜𑁆𑀜𑁄𑀢𑀺 𑀆𑀳 𑁋 ‘‘𑀅𑀧𑀺 𑀧𑀭𑀺𑀯𑀢𑁆𑀢𑀮𑀺𑀗𑁆𑀕’’𑀦𑁆𑀢𑀺. 𑀅𑀭𑀳𑀢𑁆𑀢𑀁 𑀧𑀢𑁆𑀢𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀲 𑀯𑀺𑀧𑀸𑀓𑀦𑁆𑀢𑀺𑀆𑀤𑀺 𑀓𑀫𑁆𑀫𑀲𑁆𑀲 𑀆𑀦𑀦𑁆𑀢𑀭𑀺𑀬𑀪𑀸𑀯𑀲𑀫𑀢𑁆𑀣𑀦𑀁. 𑀘𑀢𑀼𑀓𑁆𑀓𑁄𑀝𑀺𑀬𑀜𑁆𑀘𑁂𑀢𑁆𑀣 𑀲𑀫𑁆𑀪𑀯𑀢𑀺. 𑀢𑀢𑁆𑀣 𑀧𑀞𑀫𑀸 𑀓𑁄𑀝𑀺 𑀤𑀲𑁆𑀲𑀺𑀢𑀸, 𑀇𑀢𑀭𑀸𑀲𑀼 𑀯𑀺𑀲𑀗𑁆𑀓𑁂𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀬𑁄 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀤𑀺𑀧𑀺 𑀢𑀢𑁆𑀣 𑀯𑀺𑀲𑀗𑁆𑀓𑁂𑀢𑁄, 𑀓𑀫𑁆𑀫𑀁 𑀧𑀦 𑀕𑀭𑀼𑀢𑀭𑀁 𑀆𑀦𑀦𑁆𑀢𑀭𑀺𑀬𑀲𑀤𑀺𑀲𑀁 𑀪𑀸𑀬𑀺𑀢𑀩𑁆𑀩𑀦𑁆𑀢𑀺 𑀆𑀳 𑁋 ‘‘𑀪𑀸𑀭𑀺𑀬𑀁…𑀧𑁂… 𑀢𑀺𑀝𑁆𑀞𑀢𑀻’’𑀢𑀺. 𑀅𑀬𑀁 𑀧𑀜𑁆𑀳𑁄𑀢𑀺 𑀜𑀸𑀧𑀦𑀺𑀘𑁆𑀙𑀸𑀦𑀺𑀩𑁆𑀩𑀢𑁆𑀢𑀸 𑀓𑀣𑀸.

𑀅𑀪𑀺𑀲𑀦𑁆𑀥𑀺𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦. 𑀆𑀦𑀦𑁆𑀢𑀭𑀺𑀬𑀁 𑀨𑀼𑀲𑀢𑀻𑀢𑀺 𑀫𑀭𑀡𑀸𑀥𑀺𑀧𑁆𑀧𑀸𑀬𑁂𑀦𑁂𑀯 𑀆𑀦𑀦𑁆𑀢𑀭𑀺𑀬𑀯𑀢𑁆𑀣𑀼𑀦𑁄 𑀯𑀺𑀓𑁄𑀧𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀆𑀦𑀦𑁆𑀢𑀭𑀺𑀬𑀁 𑀦 𑀨𑀼𑀲𑀢𑀻𑀢𑀺 𑀆𑀦𑀦𑁆𑀢𑀭𑀺𑀬𑀯𑀢𑁆𑀣𑀼𑀅𑀪𑀸𑀯𑀢𑁄 𑀆𑀦𑀦𑁆𑀢𑀭𑀺𑀬𑀁 𑀦 𑀳𑁄𑀢𑀺. 𑀲𑀩𑁆𑀩𑀢𑁆𑀣 𑀳𑀺 𑀧𑀼𑀭𑀺𑀫𑀁 𑀅𑀪𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀅𑀧𑁆𑀧𑀫𑀸𑀡𑀁, 𑀯𑀥𑀓𑀘𑀺𑀢𑁆𑀢𑀁 𑀧𑀦 𑀢𑀤𑀸𑀭𑀫𑁆𑀫𑀡𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀜𑁆𑀘 𑀆𑀦𑀦𑁆𑀢𑀭𑀺𑀬𑀪𑀸𑀯𑁂 𑀧𑀫𑀸𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀗𑁆𑀕𑀸𑀫𑀘𑀢𑀼𑀓𑁆𑀓𑀁 𑀲𑀫𑁆𑀧𑀢𑁆𑀢𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀬𑁄 𑀳𑀺 𑀧𑀭𑀲𑁂𑀦𑀸𑀬 𑀅𑀜𑁆𑀜𑀜𑁆𑀘 𑀬𑁄𑀥𑀁 𑀧𑀺𑀢𑀭𑀜𑁆𑀘 𑀓𑀫𑁆𑀫𑀁 𑀓𑀭𑁄𑀦𑁆𑀢𑁂 𑀤𑀺𑀲𑁆𑀯𑀸 𑀬𑁄𑀥𑀲𑁆𑀲 𑀉𑀲𑀼𑀁 𑀔𑀺𑀧𑀢𑀺 ‘‘𑀏𑀢𑀁 𑀯𑀺𑀚𑁆𑀛𑀺𑀢𑁆𑀯𑀸 𑀫𑀫 𑀧𑀺𑀢𑀭𑀁 𑀯𑀺𑀚𑁆𑀛𑀺𑀲𑁆𑀲𑀢𑀻’’𑀢𑀺, 𑀬𑀣𑀸𑀥𑀺𑀧𑁆𑀧𑀸𑀬𑀁 𑀕𑀢𑁂 𑀧𑀺𑀢𑀼𑀖𑀸𑀢𑀓𑁄 𑀳𑁄𑀢𑀺. ‘‘𑀬𑁄𑀥𑁂 𑀯𑀺𑀤𑁆𑀥𑁂 𑀫𑀫 𑀧𑀺𑀢𑀸 𑀧𑀮𑀸𑀬𑀺𑀲𑁆𑀲𑀢𑀻’’𑀢𑀺 𑀔𑀺𑀧𑀢𑀺, 𑀉𑀲𑀼𑀁 𑀅𑀬𑀣𑀸𑀥𑀺𑀧𑁆𑀧𑀸𑀬𑀁 𑀕𑀦𑁆𑀢𑁆𑀯𑀸 𑀧𑀺𑀢𑀭𑀁 𑀫𑀸𑀭𑁂𑀢𑀺, 𑀯𑁄𑀳𑀸𑀭𑀯𑀲𑁂𑀦 𑀧𑀺𑀢𑀼𑀖𑀸𑀢𑀓𑁄𑀢𑀺 𑀯𑀼𑀘𑁆𑀘𑀢𑀺, 𑀆𑀦𑀦𑁆𑀢𑀭𑀺𑀬𑀁 𑀧𑀦 𑀦𑀢𑁆𑀣𑀻𑀢𑀺. 𑀘𑁄𑀭𑀘𑀢𑀼𑀓𑁆𑀓𑀁 𑀧𑀦 𑀬𑁄 ‘‘𑀘𑁄𑀭𑀁 𑀫𑀸𑀭𑁂𑀲𑁆𑀲𑀸𑀫𑀻’’𑀢𑀺 ¶ 𑀘𑁄𑀭𑀯𑁂𑀲𑁂𑀦 𑀕𑀘𑁆𑀙𑀦𑁆𑀢𑀁 𑀧𑀺𑀢𑀭𑀁 𑀫𑀸𑀭𑁂𑀢𑀺, 𑀆𑀦𑀦𑁆𑀢𑀭𑀺𑀬𑀁 𑀨𑀼𑀲𑀢𑀻𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀢𑁂𑀦𑁂𑀯𑀸𑀢𑀺 𑀢𑁂𑀦𑁂𑀯 𑀧𑀬𑁄𑀕𑁂𑀦. 𑀅𑀭𑀳𑀦𑁆𑀢𑀖𑀸𑀢𑀓𑁄 𑀳𑁄𑀢𑀺𑀬𑁂𑀯𑀸𑀢𑀺 𑀅𑀭𑀳𑀢𑁄 𑀫𑀸𑀭𑀺𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀧𑀼𑀣𑀼𑀚𑁆𑀚𑀦𑀲𑁆𑀲𑁂𑀯 𑀢𑀁 𑀤𑀺𑀦𑁆𑀦𑀁 𑀳𑁄𑀢𑀻𑀢𑀺 𑀏𑀢𑁆𑀣𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸 𑀯𑀥𑀓𑀘𑁂𑀢𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀧𑀺 𑀧𑀩𑀦𑁆𑀥𑀯𑀺𑀘𑁆𑀙𑁂𑀤𑀦𑀯𑀲𑁂𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀧𑀯𑀢𑁆𑀢𑀢𑀺, 𑀦 𑀏𑀯𑀁 𑀘𑀸𑀕𑀘𑁂𑀢𑀦𑀸. 𑀲𑀸 𑀳𑀺 𑀘𑀚𑀺𑀢𑀩𑁆𑀩𑀯𑀢𑁆𑀣𑀼𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀘𑀚𑀦𑀫𑀢𑁆𑀢𑀫𑁂𑀯 𑀳𑁄𑀢𑀺, 𑀅𑀜𑁆𑀜𑀲𑀦𑁆𑀢𑀓𑀪𑀸𑀯𑀓𑀭𑀡𑀜𑁆𑀘 𑀢𑀲𑁆𑀲 𑀘𑀚𑀦𑀁, 𑀢𑀲𑁆𑀫𑀸 𑀬𑀲𑁆𑀲 𑀢𑀁 𑀲𑀦𑁆𑀢𑀓𑀁 𑀓𑀢𑀁, 𑀢𑀲𑁆𑀲𑁂𑀯 𑀤𑀺𑀦𑁆𑀦𑀁 𑀳𑁄𑀢𑀻𑀢𑀺.

𑀮𑁄𑀳𑀺𑀢𑀁 ¶ 𑀲𑀫𑁄𑀲𑀭𑀢𑀻𑀢𑀺 𑀅𑀪𑀺𑀖𑀸𑀢𑁂𑀦 𑀧𑀓𑀼𑀧𑁆𑀧𑀫𑀸𑀦𑀁 𑀲𑀜𑁆𑀘𑀺𑀢𑀁 𑀳𑁄𑀢𑀺. 𑀫𑀳𑀦𑁆𑀢𑀢𑀭𑀦𑁆𑀢𑀺 𑀕𑀭𑀼𑀢𑀭𑀁. 𑀲𑀭𑀻𑀭𑀧𑁆𑀧𑀝𑀺𑀚𑀕𑁆𑀕𑀦𑁂 𑀯𑀺𑀬𑀸𑀢𑀺 𑀲𑀢𑁆𑀣𑀼𑀭𑀽𑀧𑀓𑀸𑀬𑀧𑁆𑀧𑀝𑀺𑀚𑀕𑁆𑀕𑀦𑁂 𑀯𑀺𑀬.

𑀅𑀲𑀦𑁆𑀦𑀺𑀧𑀢𑀺𑀢𑁂𑀢𑀺 𑀇𑀤𑀁 𑀲𑀸𑀫𑀕𑁆𑀕𑀺𑀬𑀤𑀻𑀧𑀦𑀁. 𑀪𑁂𑀤𑁄 𑀘 𑀳𑁄𑀢𑀻𑀢𑀺 𑀲𑀗𑁆𑀖𑀲𑁆𑀲 𑀪𑁂𑀤𑁄 𑀘 𑀳𑁄𑀢𑀺. 𑀯𑀝𑁆𑀝𑀢𑀻𑀢𑀺 𑀲𑀜𑁆𑀜𑀸𑀬𑀸𑀢𑀺 ‘‘𑀈𑀤𑀺𑀲𑀁 𑀓𑀭𑀡𑀁 𑀲𑀗𑁆𑀖𑀪𑁂𑀤𑀸𑀬 𑀦 𑀳𑁄𑀢𑀻’’𑀢𑀺 𑀲𑀜𑁆𑀜𑀸𑀬. 𑀢𑀣𑀸 𑀦𑀯𑀢𑁄 𑀊𑀦𑀧𑀭𑀺𑀲𑀸𑀬𑀸𑀢𑀺 𑀦𑀯𑀢𑁄 𑀊𑀦𑀧𑀭𑀺𑀲𑀸𑀬 𑀓𑀭𑁄𑀦𑁆𑀢𑀲𑁆𑀲 𑀢𑀣𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀣𑀸𑀢𑀺 𑀘 𑀇𑀫𑀺𑀦𑀸 ‘‘𑀦 𑀆𑀦𑀦𑁆𑀢𑀭𑀺𑀬𑀓𑀫𑁆𑀫’’𑀦𑁆𑀢𑀺 𑀇𑀫𑀁 𑀆𑀓𑀟𑁆𑀠𑀢𑀺, 𑀦 𑀧𑀦 ‘‘𑀪𑁂𑀤𑁄𑀯 𑀳𑁄𑀢𑀻’’𑀢𑀺 𑀇𑀤𑀁. 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀳𑀺 𑀦𑀯𑀦𑁆𑀦𑀫𑁂𑀯 𑀯𑀲𑁂𑀦 𑀲𑀗𑁆𑀖𑀪𑁂𑀤𑁄. 𑀥𑀫𑁆𑀫𑀯𑀸𑀤𑀺𑀦𑁄 𑀅𑀦𑀯𑀚𑁆𑀚𑀸𑀢𑀺 𑀬𑀣𑀸𑀥𑀫𑁆𑀫𑀁 𑀅𑀦𑀯𑀝𑁆𑀞𑀸𑀦𑀢𑁄. 𑀲𑀗𑁆𑀖𑀪𑁂𑀤𑀲𑁆𑀲 𑀧𑀼𑀩𑁆𑀩𑀪𑀸𑀕𑁄 𑀲𑀗𑁆𑀖𑀭𑀸𑀚𑀺.

𑀓𑀸𑀬𑀤𑁆𑀯𑀸𑀭𑀫𑁂𑀯 𑀧𑀽𑀭𑁂𑀦𑁆𑀢𑀺 𑀓𑀸𑀬𑀓𑀫𑁆𑀫𑀪𑀸𑀯𑁂𑀦𑁂𑀯 𑀮𑀓𑁆𑀔𑀺𑀢𑀩𑁆𑀩𑀢𑁄. 𑀲𑀡𑁆𑀞𑀳𑀦𑁆𑀢𑁂𑀳𑀺 𑀓𑀧𑁆𑀧𑁂…𑀧𑁂… 𑀫𑀼𑀘𑁆𑀘𑀢𑀻𑀢𑀺 𑀇𑀤𑀁 𑀓𑀧𑁆𑀧𑀝𑁆𑀞𑀓𑀣𑀸𑀬 (𑀓𑀣𑀸. 𑁬𑁫𑁪 𑀆𑀤𑀬𑁄) 𑀦 𑀲𑀫𑁂𑀢𑀺. 𑀢𑀢𑁆𑀣 𑀳𑀺 𑀅𑀝𑁆𑀞𑀓𑀣𑀸𑀬 (𑀓𑀣𑀸. 𑀅𑀝𑁆𑀞. 𑁬𑁫𑁪-𑁬𑁫𑁭) 𑀯𑀼𑀢𑁆𑀢𑀁 𑁋 ‘‘𑀆𑀧𑀸𑀬𑀺𑀓𑁄𑀢𑀺 𑀇𑀤𑀁 𑀲𑀼𑀢𑁆𑀢𑀁 𑀬𑀁 𑀲𑁄 𑀏𑀓𑀁 𑀓𑀧𑁆𑀧𑀁 𑀅𑀲𑀻𑀢𑀺𑀪𑀸𑀕𑁂 𑀓𑀢𑁆𑀯𑀸 𑀢𑀢𑁄 𑀏𑀓𑀪𑀸𑀕𑀫𑀢𑁆𑀢𑀁 𑀓𑀸𑀮𑀁 𑀢𑀺𑀝𑁆𑀞𑁂𑀬𑁆𑀬, 𑀢𑀁 𑀆𑀬𑀼𑀓𑀧𑁆𑀧𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺. 𑀓𑀧𑁆𑀧𑀯𑀺𑀦𑀸𑀲𑁂𑀬𑁂𑀯𑀸𑀢𑀺 𑀘 𑀆𑀬𑀼𑀓𑀧𑁆𑀧𑀯𑀺𑀦𑀸𑀲𑁂 𑀏𑀯𑀸𑀢𑀺 𑀅𑀢𑁆𑀣𑁂 𑀲𑀢𑀺 𑀦𑀢𑁆𑀣𑀺 𑀯𑀺𑀭𑁄𑀥𑁄. 𑀏𑀢𑁆𑀣 𑀘 𑀲𑀡𑁆𑀞𑀳𑀦𑁆𑀢𑁂𑀢𑀺 𑀇𑀤𑀫𑁆𑀧𑀺 ‘‘𑀲𑁆𑀯𑁂𑀯 𑀯𑀺𑀦𑀲𑁆𑀲𑀺𑀲𑁆𑀲𑀢𑀻’’𑀢𑀺 𑀯𑀺𑀬 𑀅𑀪𑀽𑀢𑀧𑀭𑀺𑀓𑀧𑁆𑀧𑀯𑀲𑁂𑀦 𑀯𑀼𑀢𑁆𑀢𑀁. 𑀏𑀓𑀤𑀺𑀯𑀲𑀫𑁂𑀯 𑀦𑀺𑀭𑀬𑁂 𑀧𑀘𑁆𑀘𑀢𑀺, 𑀢𑀢𑁄 𑀧𑀭𑀁 𑀓𑀧𑁆𑀧𑀸𑀪𑀸𑀯𑁂 𑀆𑀬𑀼𑀓𑀧𑁆𑀧𑀲𑁆𑀲𑀧𑀺 𑀅𑀪𑀸𑀯𑀢𑁄𑀢𑀺 𑀅𑀯𑀺𑀭𑁄𑀥𑀢𑁄 𑀅𑀢𑁆𑀣𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸. 𑀲𑁂𑀲𑀸𑀦𑀻𑀢𑀺 𑀲𑀗𑁆𑀖𑀪𑁂𑀤𑀢𑁄 𑀅𑀜𑁆𑀜𑀸𑀦𑀺 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀦𑀺.

𑀬𑀤𑀺 𑀢𑀸𑀦𑀺 𑀅𑀳𑁄𑀲𑀺𑀓𑀫𑁆𑀫𑀲𑀗𑁆𑀔𑀁 𑀕𑀘𑁆𑀙𑀦𑁆𑀢𑀺, 𑀏𑀯𑀁 𑀲𑀢𑀺 𑀓𑀣𑀁 𑀦𑁂𑀲𑀁 𑀆𑀦𑀦𑁆𑀢𑀭𑀺𑀬𑀢𑀸 𑀘𑀼𑀢𑀺𑀅𑀦𑀦𑁆𑀢𑀭𑀁 𑀯𑀺𑀧𑀸𑀓𑀤𑀸𑀦𑀸𑀪𑀸𑀯𑀢𑁄. 𑀅𑀣 𑀲𑀢𑀺 𑀨𑀮𑀤𑀸𑀦𑁂 𑀘𑀼𑀢𑀺𑀅𑀦𑀦𑁆𑀢𑀭𑁄 ¶ 𑀏𑀯 𑀏𑀢𑁂𑀲𑀁 𑀨𑀮𑀓𑀸𑀮𑁄, 𑀦 𑀅𑀜𑁆𑀜𑁄𑀢𑀺 𑀨𑀮𑀓𑀸𑀮𑀦𑀺𑀬𑀫𑁂𑀦 𑀦𑀺𑀬𑀢𑀢𑀸 𑀇𑀘𑁆𑀙𑀺𑀢𑀸, 𑀦 𑀨𑀮𑀤𑀸𑀦𑀦𑀺𑀬𑀫𑁂𑀦. 𑀏𑀯𑀫𑁆𑀧𑀺 𑀦𑀺𑀬𑀢𑀨𑀮𑀓𑀸𑀮𑀸𑀦𑀁 𑀅𑀜𑁆𑀜𑁂𑀲𑀫𑁆𑀧𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀸𑀦𑀜𑁆𑀘 𑀦𑀺𑀬𑀢𑀢𑀸 𑀆𑀧𑀚𑁆𑀚𑁂𑀬𑁆𑀬, 𑀢𑀲𑁆𑀫𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀦𑁆𑀢𑀭𑀯𑀺𑀓𑀮𑀢𑀸𑀤𑀻𑀳𑀺 𑀅𑀯𑀺𑀧𑀘𑁆𑀘𑀫𑀸𑀦𑀸𑀦𑀫𑁆𑀧𑀺 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀯𑀺𑀧𑀸𑀓𑀥𑀫𑁆𑀫𑀢𑀸 𑀯𑀺𑀬 𑀩𑀮𑀯𑀢𑀸 𑀆𑀦𑀦𑁆𑀢𑀭𑀺𑀬𑁂𑀦 𑀯𑀺𑀧𑀸𑀓𑁂 𑀤𑀺𑀦𑁆𑀦𑁂 𑀅𑀯𑀺𑀧𑀘𑁆𑀘𑀫𑀸𑀦𑀸𑀦𑀫𑁆𑀧𑀺 𑀆𑀦𑀦𑁆𑀢𑀭𑀺𑀬𑀸𑀦𑀁 𑀨𑀮𑀤𑀸𑀦𑁂 𑀦𑀺𑀬𑀢𑀲𑀪𑀸𑀯𑀸 𑀆𑀦𑀦𑁆𑀢𑀭𑀺𑀬𑀲𑀪𑀸𑀯𑀸 𑀘 𑀧𑀯𑀢𑁆𑀢𑀻𑀢𑀺 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦 𑀨𑀮𑀤𑀸𑀦𑀦𑀺𑀬𑀫𑁂𑀦𑁂𑀯 𑀦𑀺𑀬𑀢𑀸 𑀆𑀦𑀦𑁆𑀢𑀭𑀺𑀬𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸. 𑀅𑀯𑀲𑁆𑀲𑀜𑁆𑀘 𑀆𑀦𑀦𑁆𑀢𑀭𑀺𑀬𑀲𑀪𑀸𑀯𑀸 𑀢𑀢𑁄 𑀏𑀯 𑀦𑀺𑀬𑀢𑀲𑀪𑀸𑀯𑀸 𑀘 𑀢𑁂𑀲𑀁 𑀧𑀯𑀢𑁆𑀢𑀻𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀫𑁂𑀢𑀁, 𑀅𑀜𑁆𑀜𑀲𑁆𑀲 𑀩𑀮𑀯𑀢𑁄 𑀆𑀦𑀦𑁆𑀢𑀭𑀺𑀬𑀲𑁆𑀲 𑀅𑀪𑀸𑀯𑁂 𑀲𑀢𑀺 𑀘𑀼𑀢𑀺𑀅𑀦𑀦𑁆𑀢𑀭𑀁 𑀏𑀓𑀦𑁆𑀢𑁂𑀦 𑀨𑀮𑀤𑀸𑀦𑀢𑁄.

𑀦𑀦𑀼 ¶ 𑀏𑀯𑀁 𑀅𑀜𑁆𑀜𑁂𑀲𑀫𑁆𑀧𑀺 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀸𑀦𑀁 𑀅𑀜𑁆𑀜𑀲𑁆𑀫𑀺𑀁 𑀯𑀺𑀧𑀸𑀓𑀤𑀸𑀬𑀓𑁂 𑀅𑀲𑀢𑀺 𑀘𑀼𑀢𑀺𑀅𑀦𑀦𑁆𑀢𑀭𑀫𑁂𑀯 𑀏𑀓𑀦𑁆𑀢𑁂𑀦 𑀨𑀮𑀤𑀸𑀦𑀢𑁄 𑀦𑀺𑀬𑀢𑀲𑀪𑀸𑀯𑀸 𑀆𑀦𑀦𑁆𑀢𑀭𑀺𑀬𑀲𑀪𑀸𑀯𑀸 𑀘 𑀧𑀯𑀢𑁆𑀢𑀺 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀅𑀲𑀫𑀸𑀦𑀚𑀸𑀢𑀺𑀓𑁂𑀦 𑀘𑁂𑀢𑁄𑀧𑀡𑀺𑀥𑀺𑀯𑀲𑁂𑀦 𑀉𑀧𑀖𑀸𑀢𑀓𑁂𑀦 𑀘 𑀦𑀺𑀯𑀢𑁆𑀢𑁂𑀢𑀩𑁆𑀩𑀯𑀺𑀧𑀸𑀓𑀢𑁆𑀢𑀸 𑀅𑀦𑀦𑁆𑀢𑀭𑁂 𑀏𑀓𑀦𑁆𑀢𑀨𑀮𑀤𑀸𑀬𑀓𑀢𑁆𑀢𑀸𑀪𑀸𑀯𑀸, 𑀦 𑀧𑀦 𑀆𑀦𑀦𑁆𑀢𑀭𑀺𑀬𑀸𑀦𑀁 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀤𑀼𑀢𑀺𑀬𑀚𑁆𑀛𑀸𑀦𑀸𑀤𑀻𑀦𑀺 𑀯𑀺𑀬 𑀅𑀲𑀫𑀸𑀦𑀚𑀸𑀢𑀺𑀓𑀁 𑀨𑀮𑀦𑀺𑀯𑀢𑁆𑀢𑀓𑀁 𑀅𑀢𑁆𑀣𑀺 𑀲𑀩𑁆𑀩𑀸𑀦𑀦𑁆𑀢𑀭𑀺𑀬𑀸𑀦𑀁 𑀅𑀯𑀻𑀘𑀺𑀨𑀮𑀢𑁆𑀢𑀸, 𑀦 𑀘 𑀳𑁂𑀝𑁆𑀞𑀽𑀧𑀧𑀢𑁆𑀢𑀺𑀁 𑀇𑀘𑁆𑀙𑀢𑁄 𑀲𑀻𑀮𑀯𑀢𑁄 𑀘𑁂𑀢𑁄𑀧𑀡𑀺𑀥𑀺 𑀯𑀺𑀬 𑀉𑀧𑀭𑀽𑀧𑀧𑀢𑁆𑀢𑀺𑀚𑀦𑀓𑀓𑀫𑁆𑀫𑀨𑀮𑀁 𑀆𑀦𑀦𑁆𑀢𑀭𑀺𑀬𑀨𑀮𑀁 𑀦𑀺𑀯𑀢𑁆𑀢𑁂𑀢𑀼𑀁 𑀲𑀫𑀢𑁆𑀣𑁄 𑀘𑁂𑀢𑁄𑀧𑀡𑀺𑀥𑀺 𑀅𑀢𑁆𑀣𑀺 𑀅𑀦𑀺𑀘𑁆𑀙𑀦𑁆𑀢𑀲𑁆𑀲𑁂𑀯 𑀅𑀯𑀻𑀘𑀺𑀧𑀸𑀢𑀦𑀢𑁄, 𑀦 𑀘 𑀆𑀦𑀦𑁆𑀢𑀭𑀺𑀬𑁄𑀧𑀖𑀸𑀢𑀓𑀁 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀅𑀢𑁆𑀣𑀺, 𑀢𑀲𑁆𑀫𑀸 𑀢𑁂𑀲𑀁𑀬𑁂𑀯 𑀅𑀦𑀦𑁆𑀢𑀭𑁂 𑀏𑀓𑀦𑁆𑀢𑀯𑀺𑀧𑀸𑀓𑀚𑀦𑀓𑀲𑀪𑀸𑀯𑀸 𑀧𑀯𑀢𑁆𑀢𑀻𑀢𑀺. 𑀅𑀦𑁂𑀓𑀸𑀦𑀺 𑀘 𑀆𑀦𑀦𑁆𑀢𑀭𑀺𑀬𑀸𑀦𑀺 𑀓𑀢𑀸𑀦𑀺 𑀏𑀓𑀦𑁆𑀢𑁂𑀦 𑀯𑀺𑀧𑀸𑀓𑁂 𑀦𑀺𑀬𑀢𑀲𑀪𑀸𑀯𑀢𑁆𑀢𑀸 𑀉𑀧𑀭𑀢𑀸𑀯𑀺𑀧𑀘𑁆𑀘𑀦𑀲𑀪𑀸𑀯𑀸𑀲𑀗𑁆𑀓𑀢𑁆𑀢𑀸 𑀦𑀺𑀘𑁆𑀙𑀺𑀢𑀸𑀦𑀺 𑀲𑀪𑀸𑀯𑀢𑁄 𑀦𑀺𑀬𑀢𑀸𑀦𑁂𑀯. 𑀢𑁂𑀲𑀼 𑀧𑀦 𑀲𑀫𑀸𑀦𑀲𑀪𑀸𑀯𑁂𑀲𑀼 𑀏𑀓𑁂𑀦 𑀯𑀺𑀧𑀸𑀓𑁂 𑀤𑀺𑀦𑁆𑀦𑁂 𑀇𑀢𑀭𑀸𑀦𑀺 𑀅𑀢𑁆𑀢𑀦𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀢𑁂𑀦𑁂𑀯 𑀓𑀢𑀢𑁆𑀢𑀸 𑀦 𑀤𑀼𑀢𑀺𑀬𑀁 𑀢𑀢𑀺𑀬𑀫𑁆𑀧𑀺 𑀘 𑀧𑀝𑀺𑀲𑀦𑁆𑀥𑀺𑀁 𑀓𑀭𑁄𑀦𑁆𑀢𑀺, 𑀦 𑀲𑀫𑀢𑁆𑀣𑀢𑀸𑀯𑀺𑀖𑀸𑀢𑀢𑁆𑀢𑀸𑀢𑀺 𑀦𑀢𑁆𑀣𑀺 𑀢𑁂𑀲𑀁 𑀆𑀦𑀦𑁆𑀢𑀭𑀺𑀬𑀓𑀢𑀸𑀦𑀺𑀯𑀢𑁆𑀢𑀺, 𑀕𑀭𑀼𑀕𑀭𑀼𑀢𑀭𑀪𑀸𑀯𑁄 𑀧𑀦 𑀢𑁂𑀲𑀁 𑀮𑀩𑁆𑀪𑀢𑁂𑀯𑀸𑀢𑀺 𑀲𑀗𑁆𑀖𑀪𑁂𑀤𑀲𑁆𑀲 𑀲𑀺𑀬𑀸 𑀕𑀭𑀼𑀢𑀭𑀪𑀸𑀯𑁄𑀢𑀺 ‘‘𑀬𑁂𑀦…𑀧𑁂… 𑀯𑀺𑀧𑀘𑁆𑀘𑀢𑀻’’𑀢𑀺 𑀆𑀳. 𑀏𑀓𑀲𑁆𑀲 𑀧𑀦 𑀅𑀜𑁆𑀜𑀸𑀦𑀺 𑀉𑀧𑀢𑁆𑀣𑀫𑁆𑀪𑀓𑀸𑀦𑀺 𑀳𑁄𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺. 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀧𑀘𑁆𑀘𑀢𑀻𑀢𑀺 𑀯𑀘𑀦𑁂𑀦 𑀇𑀢𑀭𑁂𑀲𑀁 𑀧𑀯𑀢𑁆𑀢𑀺𑀯𑀺𑀧𑀸𑀓𑀤𑀸𑀬𑀺𑀢𑀸 𑀅𑀦𑀼𑀜𑁆𑀜𑀸𑀢𑀸 𑀯𑀺𑀬 𑀤𑀺𑀲𑁆𑀲𑀢𑀺. 𑀦𑁄 𑀯𑀸 𑀢𑀣𑀸 𑀲𑀻𑀮𑀯𑀢𑀻𑀢𑀺 𑀬𑀣𑀸 𑀧𑀺𑀢𑀸 𑀲𑀻𑀮𑀯𑀸, 𑀢𑀣𑀸 𑀲𑀻𑀮𑀯𑀢𑀻 ¶ 𑀦𑁄 𑀯𑀸 𑀳𑁄𑀢𑀻𑀢𑀺 𑀬𑁄𑀚𑀦𑀸. 𑀲𑀘𑁂 𑀫𑀸𑀢𑀸 𑀲𑀻𑀮𑀯𑀢𑀻, 𑀫𑀸𑀢𑀼𑀖𑀸𑀢𑁄 𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀯𑀺𑀧𑀘𑁆𑀘𑀢𑀻𑀢𑀺 𑀬𑁄𑀚𑀦𑀸.

𑀧𑀓𑀢𑀢𑁆𑀢𑁄𑀢𑀺 𑀅𑀦𑀼𑀓𑁆𑀔𑀺𑀢𑁆𑀢𑁄. 𑀲𑀫𑀸𑀦𑀲𑀁𑀯𑀸𑀲𑀓𑁄𑀢𑀺 𑀅𑀧𑀸𑀭𑀸𑀚𑀺𑀓𑁄. 𑀲𑀫𑀸𑀦𑀲𑀻𑀫𑀸𑀬𑀦𑁆𑀢𑀺 𑀏𑀓𑀲𑀻𑀫𑀸𑀬𑀁.

𑁨𑁭𑁬. 𑀲𑀢𑁆𑀣𑀼 𑀓𑀺𑀘𑁆𑀘𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑁄𑀢𑀺 𑀬𑀁 𑀲𑀢𑁆𑀣𑀸𑀭𑀸 𑀓𑀸𑀢𑀩𑁆𑀩𑀓𑀺𑀘𑁆𑀘𑀁 𑀅𑀦𑀼𑀲𑀸𑀲𑀦𑀸𑀤𑀺, 𑀦𑀁 𑀓𑀸𑀢𑀼𑀁 𑀅𑀲𑀫𑀢𑁆𑀣𑁄𑀢𑀺 𑀪𑀕𑀯𑀦𑁆𑀢𑀁 𑀧𑀘𑁆𑀘𑀓𑁆𑀔𑀸𑀬. 𑀅𑀜𑁆𑀜𑀁 𑀢𑀺𑀢𑁆𑀣𑀓𑀭𑀦𑁆𑀢𑀺 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀢𑀺𑀢𑁆𑀣𑀁 𑀚𑀸𑀦𑀺𑀢𑀩𑁆𑀩𑀁, 𑀢𑀺𑀢𑁆𑀣𑀓𑀭𑁄 𑀚𑀸𑀦𑀺𑀢𑀩𑁆𑀩𑁄, 𑀢𑀺𑀢𑁆𑀣𑀺𑀬𑀸 𑀚𑀸𑀦𑀺𑀢𑀩𑁆𑀩𑀸, 𑀢𑀺𑀢𑁆𑀣𑀺𑀬𑀲𑀸𑀯𑀓𑀸 𑀚𑀸𑀦𑀺𑀢𑀩𑁆𑀩𑀸. 𑀢𑀢𑁆𑀣 𑀢𑀺𑀢𑁆𑀣𑀁 𑀦𑀸𑀫 𑀤𑁆𑀯𑀸𑀲𑀝𑁆𑀞𑀺 𑀤𑀺𑀝𑁆𑀞𑀺𑀬𑁄. 𑀏𑀢𑁆𑀣 𑀳𑀺 𑀲𑀢𑁆𑀣𑀸 𑀢𑀭𑀦𑁆𑀢𑀺 𑀉𑀧𑁆𑀮𑀯𑀦𑁆𑀢𑀺 𑀉𑀫𑁆𑀫𑀼𑀚𑁆𑀚𑀦𑀺𑀫𑀼𑀚𑁆𑀚𑀁 𑀓𑀭𑁄𑀦𑁆𑀢𑀺, 𑀢𑀲𑁆𑀫𑀸 𑀢𑀺𑀢𑁆𑀣𑀦𑁆𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀸𑀤𑀺𑀲𑀸𑀦𑀁 𑀤𑀺𑀝𑁆𑀞𑀻𑀦𑀁 𑀉𑀧𑁆𑀧𑀸𑀤𑁂𑀢𑀸 𑀢𑀺𑀢𑁆𑀣𑀓𑀭𑁄 𑀦𑀸𑀫 𑀧𑀽𑀭𑀡𑀓𑀲𑁆𑀲𑀧𑀸𑀤𑀺𑀓𑁄. 𑀢𑀲𑁆𑀲 𑀮𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑀸 𑀢𑀺𑀢𑁆𑀣𑀺𑀬𑀸 𑀦𑀸𑀫. 𑀢𑁂 𑀳𑀺 𑀢𑀺𑀢𑁆𑀣𑁂 𑀚𑀸𑀢𑀸𑀢𑀺 𑀢𑀺𑀢𑁆𑀣𑀺𑀬𑀸. 𑀬𑀣𑀸𑀯𑀼𑀢𑁆𑀢𑀁 𑀯𑀸 𑀤𑀺𑀝𑁆𑀞𑀺𑀕𑀢𑀲𑀗𑁆𑀔𑀸𑀢𑀁 𑀢𑀺𑀢𑁆𑀣𑀁 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀢𑀺𑀢𑁆𑀣𑀺𑀓𑀸 ¶ , 𑀢𑀺𑀢𑁆𑀣𑀺𑀓𑀸 𑀏𑀯 𑀢𑀺𑀢𑁆𑀣𑀺𑀬𑀸. 𑀢𑁂𑀲𑀁 𑀧𑀘𑁆𑀘𑀬𑀤𑀸𑀬𑀓𑀸 𑀢𑀺𑀢𑁆𑀣𑀺𑀬𑀲𑀸𑀯𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺 (𑀫. 𑀦𑀺. 𑀅𑀝𑁆𑀞. 𑁧.𑁧𑁪𑁦).

𑁨𑁭𑁭. 𑀅𑀪𑀺𑀚𑀸𑀢𑀺𑀆𑀤𑀻𑀲𑀼 𑀧𑀓𑀫𑁆𑀧𑀦𑀤𑁂𑀯𑀢𑀽𑀧𑀲𑀗𑁆𑀓𑀫𑀦𑀸𑀤𑀺𑀦𑀸 𑀚𑀸𑀢𑀘𑀓𑁆𑀓𑀯𑀸𑀴𑁂𑀦 𑀲𑀫𑀸𑀦𑀬𑁄𑀕𑀓𑁆𑀔𑀫𑀁 𑀤𑀲𑀲𑀳𑀲𑁆𑀲𑀧𑀭𑀺𑀫𑀸𑀡𑀁 𑀘𑀓𑁆𑀓𑀯𑀸𑀴𑀁 𑀚𑀸𑀢𑀺𑀔𑁂𑀢𑁆𑀢𑀁. 𑀲𑀭𑀲𑁂𑀦𑁂𑀯 𑀆𑀡𑀸𑀧𑀯𑀢𑁆𑀢𑀦𑀝𑁆𑀞𑀸𑀦𑀁 𑀆𑀡𑀸𑀔𑁂𑀢𑁆𑀢𑀁. 𑀯𑀺𑀲𑀬𑀪𑀽𑀢𑀁 𑀞𑀸𑀦𑀁 𑀯𑀺𑀲𑀬𑀔𑁂𑀢𑁆𑀢𑀁. 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀽𑀢𑀺 𑀇𑀫𑀸𑀬 𑀮𑁄𑀓𑀥𑀸𑀢𑀼𑀬𑀸 𑀲𑀤𑁆𑀥𑀺𑀁 𑀇𑀫𑀁 𑀮𑁄𑀓𑀥𑀸𑀢𑀼𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸 𑀤𑀲𑀲𑀳𑀲𑁆𑀲𑀻 𑀮𑁄𑀓𑀥𑀸𑀢𑀼. 𑀢𑀢𑁆𑀢𑀓𑀸𑀦𑀁𑀬𑁂𑀯 𑀚𑀸𑀢𑀺𑀔𑁂𑀢𑁆𑀢𑀪𑀸𑀯𑁄 𑀥𑀫𑁆𑀫𑀢𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. ‘‘𑀧𑀭𑀺𑀕𑁆𑀕𑀳𑀯𑀲𑁂𑀦𑀸’’𑀢𑀺 𑀓𑁂𑀘𑀺, ‘‘𑀲𑀩𑁆𑀩𑁂𑀲𑀁𑀬𑁂𑀯 𑀩𑀼𑀤𑁆𑀥𑀸𑀦𑀁 𑀢𑀢𑁆𑀢𑀓𑀁𑀬𑁂𑀯 𑀚𑀸𑀢𑀺𑀔𑁂𑀢𑁆𑀢𑀁 𑀢𑀦𑁆𑀦𑀺𑀯𑀸𑀲𑀻𑀦𑀁𑀬𑁂𑀯 𑀤𑁂𑀯𑀢𑀸𑀦𑀁 𑀥𑀫𑁆𑀫𑀸𑀪𑀺𑀲𑀫𑀬𑁄’’𑀢𑀺 𑀘 𑀯𑀤𑀦𑁆𑀢𑀺. 𑀫𑀸𑀢𑀼𑀓𑀼𑀘𑁆𑀙𑀺 𑀑𑀓𑁆𑀓𑀫𑀦𑀓𑀸𑀮𑀸𑀤𑀻𑀦𑀁 𑀙𑀦𑁆𑀦𑀁 𑀏𑀯 𑀕𑀳𑀡𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀫𑀳𑀸𑀪𑀺𑀦𑀻𑀳𑀸𑀭𑀸𑀤𑀺𑀓𑀸𑀮𑁂𑀧𑀺 𑀢𑀲𑁆𑀲 𑀧𑀓𑀫𑁆𑀧𑀦𑀲𑁆𑀲 𑀮𑀩𑁆𑀪𑀦𑀢𑁄. 𑀆𑀡𑀸𑀔𑁂𑀢𑁆𑀢𑀁 𑀦𑀸𑀫 𑀬𑀁 𑀏𑀓𑀚𑁆𑀛𑀁 𑀲𑀁𑀯𑀝𑁆𑀝𑀢𑀺 𑀯𑀺𑀯𑀝𑁆𑀝𑀢𑀺 𑀘, 𑀆𑀡𑀸 𑀧𑀯𑀢𑁆𑀢𑀢𑀺 𑀆𑀡𑀸𑀬 𑀢𑀦𑁆𑀦𑀺𑀯𑀸𑀲𑀺𑀤𑁂𑀯𑀢𑀸𑀦𑀁 𑀲𑀺𑀭𑀲𑀸 𑀲𑀫𑁆𑀧𑀝𑀺𑀘𑁆𑀙𑀦𑁂𑀦, 𑀢𑀜𑁆𑀘 𑀔𑁄 𑀓𑁂𑀯𑀮𑀁 𑀩𑀼𑀤𑁆𑀥𑀸𑀦𑀁 𑀆𑀦𑀼𑀪𑀸𑀯𑁂𑀦𑁂𑀯, 𑀦 𑀅𑀥𑀺𑀧𑁆𑀧𑀸𑀬𑀯𑀲𑁂𑀦. 𑀅𑀥𑀺𑀧𑁆𑀧𑀸𑀬𑀯𑀲𑁂𑀦 ¶ 𑀧𑀦 ‘‘𑀬𑀸𑀯𑀢𑀸 𑀯𑀸 𑀧𑀦 𑀆𑀓𑀗𑁆𑀔𑁂𑀬𑁆𑀬𑀸’’𑀢𑀺 (𑀅. 𑀦𑀺. 𑁩.𑁮𑁧) 𑀯𑀘𑀦𑀢𑁄 𑀢𑀢𑁄 𑀧𑀭𑀫𑁆𑀧𑀺 𑀆𑀡𑀸 𑀯𑀢𑁆𑀢𑁂𑀬𑁆𑀬𑁂𑀯.

𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀧𑀦 𑀅𑀢𑁆𑀣𑀻𑀢𑀺 ‘‘𑀦 𑀫𑁂 𑀆𑀘𑀭𑀺𑀬𑁄 𑀅𑀢𑁆𑀣𑀺, 𑀲𑀤𑀺𑀲𑁄 𑀫𑁂 𑀦 𑀯𑀺𑀚𑁆𑀚𑀢𑀻’’𑀢𑀺𑀆𑀤𑀺𑀁 (𑀫. 𑀦𑀺. 𑁧.𑁨𑁮𑁫; 𑀫𑀳𑀸𑀯. 𑁧𑁧; 𑀓𑀣𑀸. 𑁪𑁦𑁫) 𑀇𑀫𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀞𑀢𑁆𑀯𑀸 𑀯𑀤𑀦𑁆𑀢𑁂𑀦 𑀪𑀕𑀯𑀢𑀸 ‘‘𑀓𑀺𑀁 𑀧𑀦𑀸𑀯𑀼𑀲𑁄, 𑀲𑀸𑀭𑀺𑀧𑀼𑀢𑁆𑀢, 𑀅𑀢𑁆𑀣𑁂𑀢𑀭𑀳𑀺 𑀅𑀜𑁆𑀜𑁂 𑀲𑀫𑀡𑀸 𑀯𑀸 𑀩𑁆𑀭𑀸𑀳𑁆𑀫𑀡𑀸 𑀯𑀸 𑀪𑀕𑀯𑀢𑀸 𑀲𑀫𑀲𑀫𑀸 𑀲𑀫𑁆𑀩𑁄𑀥𑀺𑀬𑀦𑁆𑀢𑀺, 𑀏𑀯𑀁 𑀧𑀼𑀝𑁆𑀞𑁄 𑀅𑀳𑀁, 𑀪𑀦𑁆𑀢𑁂, ‘𑀦𑁄’𑀢𑀺 𑀯𑀤𑁂𑀬𑁆𑀬’’𑀦𑁆𑀢𑀺 (𑀤𑀻. 𑀦𑀺. 𑁩.𑁧𑁬𑁧) 𑀯𑀢𑁆𑀯𑀸 𑀢𑀲𑁆𑀲 𑀓𑀸𑀭𑀡𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀅𑀝𑁆𑀞𑀸𑀦𑀫𑁂𑀢𑀁 𑀅𑀦𑀯𑀓𑀸𑀲𑁄, 𑀬𑀁 𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸 𑀤𑁆𑀯𑁂 𑀅𑀭𑀳𑀦𑁆𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀸 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺 𑀇𑀫𑀁 𑀲𑀼𑀢𑁆𑀢𑀁 (𑀅. 𑀦𑀺. 𑁧.𑁨𑁭𑁭; 𑀯𑀺𑀪. 𑁮𑁦𑁯; 𑀫. 𑀦𑀺. 𑁩.𑁧𑁨𑁯; 𑀫𑀺. 𑀧. 𑁫.𑁧.𑁧) 𑀆𑀳𑀭𑀦𑁆𑀢𑁂𑀦 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀘 𑀩𑀼𑀤𑁆𑀥𑀔𑁂𑀢𑁆𑀢𑀪𑀽𑀢𑀁 𑀇𑀫𑀁 𑀮𑁄𑀓𑀥𑀸𑀢𑀼𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀅𑀦𑀼𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀓𑀢𑁄𑀢𑀺 𑀲𑀳, 𑀏𑀓𑀲𑁆𑀫𑀺𑀁 𑀓𑀸𑀮𑁂𑀢𑀺 𑀅𑀢𑁆𑀣𑁄, 𑀲𑁄 𑀧𑀦 𑀓𑀸𑀮𑁄 𑀓𑀣𑀁 𑀧𑀭𑀺𑀘𑁆𑀙𑀺𑀦𑁆𑀦𑁄𑀢𑀺 𑀘𑀭𑀺𑀫𑀪𑀯𑁂 𑀧𑀝𑀺𑀲𑀦𑁆𑀥𑀺𑀕𑁆𑀕𑀳𑀡𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀥𑀸𑀢𑀼𑀧𑀭𑀺𑀦𑀺𑀩𑁆𑀩𑀸𑀦𑀸𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀢𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀅𑀦𑀘𑁆𑀙𑀭𑀺𑀬𑀢𑁆𑀢𑀸𑀢𑀺 𑀤𑁆𑀯𑀻𑀲𑀼𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼 𑀅𑀘𑁆𑀙𑀭𑀺𑀬𑀢𑁆𑀢𑀸𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀤𑁆𑀯𑀻𑀲𑀼𑀧𑀺 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼 𑀅𑀦𑀘𑁆𑀙𑀭𑀺𑀬𑀢𑀸, 𑀓𑀺𑀫𑀗𑁆𑀕𑀁 𑀧𑀦 𑀩𑀳𑀽𑀲𑀽𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀬𑀤𑀺 𑀘𑀸’’𑀢𑀺𑀆𑀤𑀺𑀫𑀸𑀳. 𑀩𑀼𑀤𑁆𑀥𑀸 𑀦𑀸𑀫 𑀫𑀚𑁆𑀛𑁂 𑀪𑀺𑀦𑁆𑀦𑀲𑀼𑀯𑀡𑁆𑀡𑀁 𑀯𑀺𑀬 𑀏𑀓𑀲𑀤𑀺𑀲𑀸𑀢𑀺 𑀢𑁂𑀲𑀁 𑀤𑁂𑀲𑀦𑀸𑀧𑀺 𑀏𑀓𑀭𑀲𑀸 𑀏𑀓𑀥𑀸𑀢𑀺 𑀆𑀳 𑁋 ‘‘𑀤𑁂𑀲𑀦𑀸𑀬 𑀘 𑀯𑀺𑀲𑁂𑀲𑀸𑀪𑀸𑀯𑀢𑁄’’𑀢𑀺 ¶ . 𑀏𑀢𑁂𑀦𑀧𑀺 𑀅𑀦𑀘𑁆𑀙𑀭𑀺𑀬𑀢𑁆𑀢𑀫𑁂𑀯 𑀲𑀸𑀥𑁂𑀢𑀺. 𑀯𑀺𑀯𑀸𑀤𑀪𑀸𑀯𑀢𑁄𑀢𑀺 𑀏𑀢𑁂𑀦 𑀯𑀺𑀯𑀸𑀤𑀸𑀪𑀸𑀯𑀢𑁆𑀣𑀁 𑀤𑁆𑀯𑁂 𑀩𑀼𑀤𑁆𑀥𑀸 𑀏𑀓𑀢𑁄 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀏𑀢𑀁 𑀓𑀸𑀭𑀡𑀦𑁆𑀢𑀺 𑀏𑀢𑀁 𑀅𑀦𑀘𑁆𑀙𑀭𑀺𑀬𑀢𑀸𑀤𑀺𑀓𑀸𑀭𑀡𑀁. 𑀢𑀢𑁆𑀣𑀸𑀢𑀺 𑀫𑀺𑀮𑀺𑀦𑁆𑀤𑀧𑀜𑁆𑀳𑁂.

𑀏𑀓𑀁 𑀏𑀯 𑀩𑀼𑀤𑁆𑀥𑀁 𑀥𑀸𑀭𑁂𑀢𑀻𑀢𑀺 𑀏𑀓𑀩𑀼𑀤𑁆𑀥𑀥𑀸𑀭𑀡𑀻. 𑀏𑀢𑁂𑀦 𑀏𑀯𑀁𑀲𑀪𑀸𑀯𑀸 𑀏𑀢𑁂 𑀩𑀼𑀤𑁆𑀥𑀕𑀼𑀡𑀸, 𑀬𑁂𑀦 𑀤𑀼𑀢𑀺𑀬𑀩𑀼𑀤𑁆𑀥𑀕𑀼𑀡𑁂 𑀥𑀸𑀭𑁂𑀢𑀼𑀁 𑀅𑀲𑀫𑀢𑁆𑀣𑀸 𑀅𑀬𑀁 𑀮𑁄𑀓𑀥𑀸𑀢𑀽𑀢𑀺 𑀤𑀲𑁆𑀲𑁂𑀢𑀺. 𑀧𑀘𑁆𑀘𑀬𑀯𑀺𑀲𑁂𑀲𑀦𑀺𑀧𑁆𑀨𑀦𑁆𑀦𑀸𑀦𑀜𑁆𑀳𑀺 𑀕𑀼𑀡𑀥𑀫𑁆𑀫𑀸𑀦𑀁 𑀪𑀸𑀭𑀺𑀬𑁄 𑀯𑀺𑀲𑁂𑀲𑁄 𑀫𑀳𑀸𑀧𑀣𑀯𑀺𑀬𑀸𑀧𑀺 𑀤𑀼𑀲𑁆𑀲𑀳𑁄𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁. 𑀢𑀣𑀸 𑀳𑀺 𑀅𑀪𑀺𑀲𑀫𑁆𑀩𑁄𑀥𑀺𑀲𑀫𑀬𑁂 𑀉𑀧𑀕𑀢𑀲𑁆𑀲 𑀮𑁄𑀓𑀦𑀸𑀣𑀲𑁆𑀲 𑀕𑀼𑀡𑀪𑀸𑀭𑀁 𑀩𑁄𑀥𑀺𑀭𑀼𑀓𑁆𑀔𑀲𑁆𑀲 𑀢𑀻𑀲𑀼𑀧𑀺 𑀤𑀺𑀲𑀸𑀲𑀼 𑀫𑀳𑀸𑀧𑀣𑀯𑀻 𑀲𑀦𑁆𑀥𑀸𑀭𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀢𑀲𑁆𑀫𑀸 ‘‘𑀦 𑀥𑀸𑀭𑁂𑀬𑁆𑀬𑀸’’𑀢𑀺 𑀯𑀢𑁆𑀯𑀸 𑀢𑀫𑁂𑀯 𑀅𑀥𑀸𑀭𑀡𑀁 𑀧𑀭𑀺𑀬𑀸𑀬𑀦𑁆𑀢𑀭𑁂𑀳𑀺 𑀧𑀓𑀸𑀲𑁂𑀦𑁆𑀢𑁄 ‘‘𑀘𑀮𑁂𑀬𑁆𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀘𑀮𑁂𑀬𑁆𑀬𑀸𑀢𑀺 𑀧𑀭𑀺𑀧𑁆𑀨𑀦𑁆𑀤𑁂𑀬𑁆𑀬. 𑀓𑀫𑁆𑀧𑁂𑀬𑁆𑀬𑀸𑀢𑀺 𑀧𑀯𑁂𑀥𑁂𑀬𑁆𑀬 ¶ . 𑀦𑀫𑁂𑀬𑁆𑀬𑀸𑀢𑀺 𑀏𑀓𑀧𑀲𑁆𑀲𑁂𑀦 𑀦𑀫𑁂𑀬𑁆𑀬. 𑀑𑀦𑀫𑁂𑀬𑁆𑀬𑀸𑀢𑀺 𑀑𑀲𑀻𑀤𑁂𑀬𑁆𑀬. 𑀯𑀺𑀦𑀫𑁂𑀬𑁆𑀬𑀸𑀢𑀺 𑀯𑀺𑀯𑀺𑀥𑀁 𑀇𑀢𑁄 𑀘𑀺𑀢𑁄 𑀘 𑀦𑀫𑁂𑀬𑁆𑀬. 𑀯𑀺𑀓𑀺𑀭𑁂𑀬𑁆𑀬𑀸𑀢𑀺 𑀯𑀸𑀢𑁂𑀦 𑀣𑀼𑀲𑀫𑀼𑀝𑁆𑀞𑀺 𑀯𑀺𑀬 𑀯𑀺𑀧𑁆𑀧𑀓𑀺𑀭𑁂𑀬𑁆𑀬. 𑀯𑀺𑀥𑀫𑁂𑀬𑁆𑀬𑀸𑀢𑀺 𑀯𑀺𑀦𑀲𑁆𑀲𑁂𑀬𑁆𑀬. 𑀯𑀺𑀤𑁆𑀥𑀁𑀲𑁂𑀬𑁆𑀬𑀸𑀢𑀺 𑀲𑀩𑁆𑀩𑀲𑁄 𑀯𑀺𑀤𑁆𑀥𑀲𑁆𑀢𑀸 𑀪𑀯𑁂𑀬𑁆𑀬. 𑀢𑀣𑀸𑀪𑀽𑀢𑀸 𑀘 𑀦 𑀓𑀢𑁆𑀣𑀘𑀺 𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀆𑀳 𑁋 ‘‘𑀦 𑀞𑀸𑀦𑀫𑀼𑀧𑀕𑀘𑁆𑀙𑁂𑀬𑁆𑀬𑀸’’𑀢𑀺.

𑀇𑀤𑀸𑀦𑀺 𑀢𑀢𑁆𑀣 𑀦𑀺𑀤𑀲𑁆𑀲𑀦𑀁 𑀤𑀲𑁆𑀲𑁂𑀦𑁆𑀢𑁄, ‘‘𑀬𑀣𑀸, 𑀫𑀳𑀸𑀭𑀸𑀚𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀏𑀓𑁂 𑀧𑀼𑀭𑀺𑀲𑁂𑀢𑀺 𑀏𑀓𑀲𑁆𑀫𑀺𑀁 𑀧𑀼𑀭𑀺𑀲𑁂. 𑀲𑀫𑀼𑀧𑀸𑀤𑀺𑀓𑀸𑀢𑀺 𑀲𑀫𑀁 𑀉𑀤𑁆𑀥𑀁 𑀧𑀚𑁆𑀚𑀢𑀺 𑀧𑀯𑀢𑁆𑀢𑀢𑀻𑀢𑀺 𑀲𑀫𑀼𑀧𑀸𑀤𑀺𑀓𑀸, 𑀉𑀤𑀓𑀲𑁆𑀲 𑀉𑀧𑀭𑀺 𑀲𑀫𑀁 𑀕𑀸𑀫𑀺𑀦𑀻𑀢𑀺 𑀅𑀢𑁆𑀣𑁄. ‘‘𑀲𑀫𑀼𑀧𑁆𑀧𑀸𑀤𑀺𑀓𑀸’’𑀢𑀺𑀧𑀺 𑀧𑀞𑀦𑁆𑀢𑀺, 𑀅𑀬𑀫𑁂𑀯𑀢𑁆𑀣𑁄. 𑀯𑀡𑁆𑀡𑁂𑀦𑀸𑀢𑀺 𑀲𑀡𑁆𑀞𑀸𑀦𑁂𑀦. 𑀧𑀫𑀸𑀡𑁂𑀦𑀸𑀢𑀺 𑀆𑀭𑁄𑀳𑁂𑀦. 𑀓𑀺𑀲𑀣𑀽𑀮𑁂𑀦𑀸𑀢𑀺 𑀓𑀺𑀲𑀣𑀽𑀮𑀪𑀸𑀯𑁂𑀦, 𑀧𑀭𑀺𑀡𑀸𑀳𑁂𑀦𑀸𑀢𑀺 𑀅𑀢𑁆𑀣𑁄. 𑀤𑁆𑀯𑀺𑀦𑁆𑀦𑀫𑁆𑀧𑀻𑀢𑀺 𑀤𑁆𑀯𑁂𑀧𑀺, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀸 𑀲𑀭𑀻𑀭𑀪𑀸𑀭𑀁.

𑀙𑀸𑀤𑁂𑀦𑁆𑀢𑀦𑁆𑀢𑀺 𑀭𑁄𑀘𑁂𑀦𑁆𑀢𑀁 𑀭𑀼𑀘𑀺𑀁 𑀉𑀧𑁆𑀧𑀸𑀤𑁂𑀦𑁆𑀢𑀁. 𑀢𑀦𑁆𑀤𑀺𑀓𑀢𑁄𑀢𑀺 𑀢𑁂𑀦 𑀪𑁄𑀚𑀦𑁂𑀦 𑀢𑀦𑁆𑀤𑀺𑀪𑀽𑀢𑁄. 𑀅𑀦𑁄𑀦𑀫𑀺𑀢𑀤𑀡𑁆𑀟𑀚𑀸𑀢𑁄𑀢𑀺 𑀬𑀸𑀯𑀤𑀢𑁆𑀣𑀁 𑀪𑁄𑀚𑀦𑁂𑀦 𑀑𑀦𑀫𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀅𑀦𑁄𑀦𑀫𑀦𑀤𑀡𑁆𑀟𑁄 𑀯𑀺𑀬 𑀚𑀸𑀢𑁄. 𑀲𑀓𑀺𑀁 𑀪𑀼𑀢𑁆𑀢𑁄 𑀯𑀫𑁂𑀬𑁆𑀬𑀸𑀢𑀺 𑀏𑀓𑀫𑁆𑀧𑀺 𑀆𑀮𑁄𑀧𑀁 𑀅𑀚𑁆𑀛𑁄𑀳𑀭𑀺𑀢𑁆𑀯𑀸 𑀯𑀫𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀅𑀢𑀺𑀥𑀫𑁆𑀫𑀪𑀸𑀭𑁂𑀦 𑀧𑀣𑀯𑀻 𑀘𑀮𑀢𑀻𑀢𑀺 𑀥𑀫𑁆𑀫𑁂𑀦 𑀦𑀸𑀫 𑀧𑀣𑀯𑀻 𑀢𑀺𑀝𑁆𑀞𑁂𑀬𑁆𑀬. 𑀲𑀸 𑀓𑀺𑀁 𑀢𑁂𑀦𑁂𑀯 𑀘𑀮𑀢𑀺 𑀯𑀺𑀦𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀧𑀼𑀘𑁆𑀙𑀢𑀺. 𑀧𑀼𑀦 𑀣𑁂𑀭𑁄 ‘‘𑀭𑀢𑀦𑀁 𑀦𑀸𑀫 𑀮𑁄𑀓𑁂 𑀓𑀼𑀝𑀼𑀫𑁆𑀩𑀁 𑀲𑀦𑁆𑀥𑀸𑀭𑁂𑀦𑁆𑀢𑀁 𑀅𑀪𑀺𑀫𑀢𑀜𑁆𑀘 𑀮𑁄𑀓𑁂𑀦 𑀅𑀢𑁆𑀢𑀦𑁄 𑀕𑀭𑀼𑀲𑀪𑀸𑀯𑀢𑀸𑀬 𑀲𑀓𑀝𑀪𑀗𑁆𑀕𑀲𑁆𑀲 𑀓𑀸𑀭𑀡𑀁 𑀅𑀢𑀺𑀪𑀸𑀭𑀪𑀽𑀢𑀁 𑀤𑀺𑀝𑁆𑀞𑀁. 𑀏𑀯𑀁 𑀥𑀫𑁆𑀫𑁄 𑀘 𑀳𑀺𑀢𑀲𑀼𑀔𑀯𑀺𑀲𑁂𑀲𑁂𑀳𑀺 𑀢𑀁𑀲𑀫𑀗𑁆𑀕𑀻𑀦𑀁 𑀥𑀸𑀭𑁂𑀦𑁆𑀢𑁄 𑀅𑀪𑀺𑀫𑀢𑁄 𑀘 𑀯𑀺𑀜𑁆𑀜𑀽𑀦𑀁 𑀕𑀫𑁆𑀪𑀻𑀭𑀧𑁆𑀧𑀫𑁂𑀬𑁆𑀬𑀪𑀸𑀯𑁂𑀦 𑀕𑀭𑀼𑀲𑀪𑀸𑀯𑀢𑁆𑀢𑀸 𑀅𑀢𑀺𑀪𑀸𑀭𑀪𑀽𑀢𑁄 𑀧𑀣𑀯𑀻𑀘𑀮𑀦𑀲𑁆𑀲 𑀓𑀸𑀭𑀡𑀁 𑀳𑁄𑀢𑀻’’𑀢𑀺 𑀤𑀲𑁆𑀲𑁂𑀦𑁆𑀢𑁄, ‘‘𑀇𑀥, 𑀫𑀳𑀸𑀭𑀸𑀚, 𑀤𑁆𑀯𑁂 𑀲𑀓𑀝𑀸’’𑀢𑀺𑀆𑀤𑀺𑀫𑀸𑀳 ¶ . 𑀏𑀢𑁂𑀦𑁂𑀯 𑀢𑀣𑀸𑀕𑀢𑀲𑁆𑀲 𑀫𑀸𑀢𑀼𑀓𑀼𑀘𑁆𑀙𑀺𑀑𑀓𑁆𑀓𑀫𑀦𑀸𑀤𑀺𑀓𑀸𑀮𑁂 𑀧𑀣𑀯𑀻𑀓𑀫𑁆𑀧𑀦𑀓𑀸𑀭𑀡𑀁 𑀲𑀁𑀯𑀡𑁆𑀡𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀓𑀲𑁆𑀲𑀸𑀢𑀺 𑀏𑀓𑀲𑁆𑀫𑀸, 𑀏𑀓𑀲𑁆𑀲 𑀯𑀸 𑀲𑀓𑀝𑀲𑁆𑀲 𑀭𑀢𑀦𑀁, 𑀢𑀲𑁆𑀫𑀸 𑀲𑀓𑀝𑀸 𑀕𑀳𑁂𑀢𑁆𑀯𑀸𑀢𑀺 𑀅𑀢𑁆𑀣𑁄.

𑀑𑀲𑀸𑀭𑀺𑀢𑀦𑁆𑀢𑀺 𑀉𑀘𑁆𑀘𑀸𑀭𑀺𑀢𑀁, 𑀯𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀕𑁆𑀕𑁄𑀢𑀺 𑀲𑀩𑁆𑀩𑀲𑀢𑁆𑀢𑁂𑀳𑀺 𑀅𑀕𑁆𑀕𑁄. 𑀚𑁂𑀝𑁆𑀞𑁄𑀢𑀺 𑀯𑀼𑀤𑁆𑀥𑀢𑀭𑁄. 𑀲𑁂𑀝𑁆𑀞𑁄𑀢𑀺 𑀧𑀲𑀢𑁆𑀣𑀢𑀭𑁄. 𑀯𑀺𑀲𑀺𑀝𑁆𑀞𑁂𑀳𑀺 𑀲𑀻𑀮𑀸𑀤𑀻𑀳𑀺 𑀕𑀼𑀡𑁂𑀳𑀺 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀯𑀺𑀲𑀺𑀝𑁆𑀞𑁄. 𑀉𑀕𑁆𑀕𑀢𑀢𑀫𑁄𑀢𑀺 𑀉𑀢𑁆𑀢𑀫𑁄. 𑀧𑀯𑀭𑁄𑀢𑀺 ¶ 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀦𑀢𑁆𑀣𑀺 𑀏𑀢𑀲𑁆𑀲 𑀲𑀫𑁄𑀢𑀺 𑀅𑀲𑀫𑁄. 𑀅𑀲𑀫𑀸 𑀧𑀼𑀩𑁆𑀩𑀩𑀼𑀤𑁆𑀥𑀸, 𑀢𑁂𑀳𑀺 𑀲𑀫𑁄𑀢𑀺 𑀅𑀲𑀫𑀲𑀫𑁄. 𑀦𑀢𑁆𑀣𑀺 𑀏𑀢𑀲𑁆𑀲 𑀧𑀝𑀺𑀲𑀫𑁄 𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀅𑀧𑁆𑀧𑀝𑀺𑀲𑀫𑁄. 𑀦𑀢𑁆𑀣𑀺 𑀏𑀢𑀲𑁆𑀲 𑀧𑀝𑀺𑀪𑀸𑀕𑁄𑀢𑀺 𑀅𑀧𑁆𑀧𑀝𑀺𑀪𑀸𑀕𑁄. 𑀦𑀢𑁆𑀣𑀺 𑀏𑀢𑀲𑁆𑀲 𑀧𑀝𑀺𑀧𑀼𑀕𑁆𑀕𑀮𑁄𑀢𑀺 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑁄.

𑀲𑀪𑀸𑀯𑀧𑀓𑀢𑀺𑀓𑀸𑀢𑀺 𑀲𑀪𑀸𑀯𑀪𑀽𑀢𑀸 𑀅𑀓𑀺𑀢𑁆𑀢𑀺𑀫𑀸 𑀧𑀓𑀢𑀺. 𑀓𑀸𑀭𑀡𑀫𑀳𑀦𑁆𑀢𑀢𑁆𑀢𑀸𑀢𑀺 𑀓𑀸𑀭𑀡𑀸𑀦𑀁 𑀫𑀳𑀦𑁆𑀢𑀢𑀸𑀬, 𑀫𑀳𑀦𑁆𑀢𑁂𑀳𑀺 𑀩𑀼𑀤𑁆𑀥𑀓𑀭𑀥𑀫𑁆𑀫𑁂𑀳𑀺 𑀧𑀸𑀭𑀫𑀺𑀲𑀗𑁆𑀔𑀸𑀢𑁂𑀳𑀺 𑀓𑀸𑀭𑀡𑁂𑀳𑀺 𑀩𑀼𑀤𑁆𑀥𑀕𑀼𑀡𑀸𑀦𑀁 𑀦𑀺𑀩𑁆𑀩𑀢𑁆𑀢𑀺𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀧𑀣𑀯𑀻𑀆𑀤𑀻𑀦𑀺 𑀫𑀳𑀦𑁆𑀢𑀸𑀦𑀺 𑀯𑀢𑁆𑀣𑀽𑀦𑀺, 𑀫𑀳𑀦𑁆𑀢𑀸 𑀘𑀓𑁆𑀓𑀯𑀸𑀴𑀸𑀤𑀬𑁄 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀏𑀓𑁂𑀓𑀸𑀯, 𑀏𑀯𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄𑀧𑀺 𑀫𑀳𑀦𑁆𑀢𑁄 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀏𑀓𑁄 𑀏𑀯. 𑀓𑁄 𑀘 𑀢𑀲𑁆𑀲 𑀯𑀺𑀲𑀬𑁄? 𑀩𑀼𑀤𑁆𑀥𑀪𑀽𑀫𑀺, 𑀬𑀸𑀯𑀢𑀓𑀁 𑀯𑀸 𑀜𑁂𑀬𑁆𑀬𑀁. ‘‘𑀆𑀓𑀸𑀲𑁄 𑀯𑀺𑀬 𑀅𑀦𑀦𑁆𑀢𑀯𑀺𑀲𑀬𑁄 𑀪𑀕𑀯𑀸 𑀏𑀓𑁄 𑀏𑀯 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑁄 𑀧𑀭𑀘𑀓𑁆𑀓𑀯𑀸𑀴𑁂𑀲𑀼𑀧𑀺 𑀤𑀼𑀢𑀺𑀬𑀲𑁆𑀲 𑀩𑀼𑀤𑁆𑀥𑀲𑁆𑀲 𑀅𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀇𑀫𑀺𑀦𑀸𑀯 𑀧𑀤𑁂𑀦𑀸𑀢𑀺 ‘‘𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸’’𑀢𑀺 𑀇𑀫𑀺𑀦𑀸 𑀏𑀯 𑀧𑀤𑁂𑀦. 𑀤𑀲 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑀸𑀦𑀺 𑀕𑀳𑀺𑀢𑀸𑀦𑀻𑀢𑀺 𑀚𑀸𑀢𑀺𑀔𑁂𑀢𑁆𑀢𑀸𑀧𑁂𑀓𑁆𑀔𑀸𑀬 𑀕𑀳𑀺𑀢𑀸𑀦𑀺. 𑀏𑀓𑀘𑀓𑁆𑀓𑀯𑀸𑀴𑁂𑀦𑁂𑀯𑀸𑀢𑀺 𑀇𑀫𑀺𑀦𑀸 𑀏𑀯 𑀏𑀓𑀘𑀓𑁆𑀓𑀯𑀸𑀴𑁂𑀦, 𑀦 𑀬𑁂𑀦 𑀓𑁂𑀦𑀘𑀺. 𑀬𑀣𑀸 ‘‘𑀇𑀫𑀲𑁆𑀫𑀺𑀁𑀬𑁂𑀯 𑀘𑀓𑁆𑀓𑀯𑀸𑀴𑁂 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂 𑀇𑀫𑀲𑁆𑀫𑀺𑀫𑁆𑀧𑀺 𑀘𑀓𑁆𑀓𑀯𑀸𑀴𑁂 𑀚𑀫𑁆𑀩𑀼𑀤𑀻𑀧𑁂 𑀏𑀯, 𑀢𑀢𑁆𑀣𑀸𑀧𑀺 𑀫𑀚𑁆𑀛𑀺𑀫𑀤𑁂𑀲𑁂 𑀏𑀯𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺, 𑀏𑀯𑀁 ‘‘𑀏𑀓𑀺𑀲𑁆𑀲𑀸 𑀮𑁄𑀓𑀥𑀸𑀢𑀼𑀬𑀸’’𑀢𑀺 𑀚𑀸𑀢𑀺𑀔𑁂𑀢𑁆𑀢𑁂 𑀅𑀥𑀺𑀧𑁆𑀧𑁂𑀢𑁂𑀧𑀺 𑀇𑀫𑀺𑀦𑀸𑀯 𑀘𑀓𑁆𑀓𑀯𑀸𑀴𑁂𑀦 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀼𑀁 𑀯𑀝𑁆𑀝𑀢𑀺.

𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁫. 𑀅𑀝𑁆𑀞𑀸𑀦𑀧𑀸𑀴𑀺 (𑀤𑀼𑀢𑀺𑀬𑀯𑀕𑁆𑀕)

(𑁧𑁫) 𑁨. 𑀅𑀝𑁆𑀞𑀸𑀦𑀧𑀸𑀴𑀺-𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸

𑁨𑁭𑁮. 𑀯𑀺𑀯𑀸𑀤𑀼𑀧𑀘𑁆𑀙𑁂𑀤𑀢𑁄𑀢𑀺 ¶ 𑀯𑀺𑀯𑀸𑀤𑀼𑀧𑀘𑁆𑀙𑁂𑀤𑀓𑀸𑀭𑀡𑀸. 𑀤𑁆𑀯𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀬𑁄 𑀯𑀺𑀯𑀸𑀤𑁄 𑀪𑀯𑁂𑀬𑁆𑀬, 𑀢𑀲𑁆𑀲 𑀅𑀦𑀼𑀧𑁆𑀧𑀸𑀤𑁄𑀬𑁂𑀯𑁂𑀢𑁆𑀣 𑀯𑀺𑀯𑀸𑀤𑀼𑀧𑀘𑁆𑀙𑁂𑀤𑁄. 𑀏𑀓𑀲𑁆𑀫𑀺𑀁 𑀤𑀻𑀧𑁂𑀢𑀺𑀆𑀤𑀺𑀦𑀸 𑀤𑀻𑀧𑀦𑁆𑀢𑀭𑁂𑀧𑀺 𑀏𑀓𑀚𑁆𑀛𑀁 𑀦 𑀉𑀧𑁆𑀧𑀚𑁆𑀚𑀢𑀺, 𑀧𑀕𑁂𑀯 𑀏𑀓𑀤𑀻𑀧𑁂𑀢𑀺 𑀤𑀲𑁆𑀲𑁂𑀢𑀺. 𑀲𑁄𑀧𑀺 𑀧𑀭𑀺𑀳𑀸𑀬𑁂𑀣𑀸𑀢𑀺 𑀘𑀓𑁆𑀓𑀯𑀸𑀴𑀲𑁆𑀲 𑀧𑀤𑁂𑀲𑁂 𑀏𑀯 𑀧𑀯𑀢𑁆𑀢𑀺𑀢𑀩𑁆𑀩𑀢𑁆𑀢𑀸 𑀧𑀭𑀺𑀳𑀸𑀬𑁂𑀬𑁆𑀬.

𑁨𑁭𑁯-𑁨𑁮𑁦. 𑀫𑀦𑀼𑀲𑁆𑀲𑀢𑁆𑀢𑀦𑁆𑀢𑀺 ¶ 𑀫𑀦𑀼𑀲𑁆𑀲𑀪𑀸𑀯𑁄 𑀢𑀲𑁆𑀲𑁂𑀯 𑀧𑀩𑁆𑀩𑀚𑁆𑀚𑀸𑀤𑀺𑀕𑀼𑀡𑀸𑀦𑀁 𑀬𑁄𑀕𑁆𑀕𑀪𑀸𑀯𑀢𑁄. 𑀮𑀺𑀗𑁆𑀕𑀲𑀫𑁆𑀧𑀢𑁆𑀢𑀻𑀢𑀺 𑀧𑀼𑀭𑀺𑀲𑀪𑀸𑀯𑁄. 𑀳𑁂𑀢𑀽𑀢𑀺 𑀫𑀦𑁄𑀯𑀘𑀻𑀧𑀡𑀺𑀥𑀸𑀦𑀧𑀼𑀩𑁆𑀩𑀺𑀓𑀸 𑀳𑁂𑀢𑀼𑀲𑀫𑁆𑀧𑀤𑀸. 𑀲𑀢𑁆𑀣𑀸𑀭𑀤𑀲𑁆𑀲𑀦𑀦𑁆𑀢𑀺 𑀲𑀢𑁆𑀣𑀼𑀲𑀫𑁆𑀫𑀼𑀔𑀻𑀪𑀸𑀯𑁄. 𑀧𑀩𑁆𑀩𑀚𑁆𑀚𑀸𑀢𑀺 𑀓𑀫𑁆𑀫𑀓𑀺𑀭𑀺𑀬𑀯𑀸𑀤𑀻𑀲𑀼 𑀢𑀸𑀧𑀲𑁂𑀲𑀼, 𑀪𑀺𑀓𑁆𑀔𑀽𑀲𑀼 𑀯𑀸 𑀧𑀩𑁆𑀩𑀚𑁆𑀚𑀸. 𑀕𑀼𑀡𑀲𑀫𑁆𑀧𑀢𑁆𑀢𑀻𑀢𑀺 𑀅𑀪𑀺𑀜𑁆𑀜𑀸𑀤𑀺𑀕𑀼𑀡𑀲𑀫𑁆𑀧𑀤𑀸. 𑀅𑀥𑀺𑀓𑀸𑀭𑁄𑀢𑀺 𑀩𑀼𑀤𑁆𑀥𑁂 𑀉𑀤𑁆𑀤𑀺𑀲𑁆𑀲 𑀅𑀥𑀺𑀓𑁄 𑀓𑀸𑀭𑁄, 𑀲𑀯𑀺𑀲𑁂𑀲𑀸 𑀉𑀧𑀓𑀸𑀭𑀓𑀺𑀭𑀺𑀬𑀸 𑀅𑀥𑀺𑀓𑁄 𑀲𑀓𑁆𑀓𑀸𑀭𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀙𑀦𑁆𑀤𑁄𑀯 𑀙𑀦𑁆𑀤𑀢𑀸, 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀉𑀤𑁆𑀤𑀺𑀲𑁆𑀲 𑀲𑀸𑀢𑀺𑀲𑀬𑁄 𑀓𑀢𑁆𑀢𑀼𑀓𑀫𑁆𑀬𑀢𑀸𑀓𑀼𑀲𑀮𑀘𑁆𑀙𑀦𑁆𑀤𑁄. 𑀅𑀝𑁆𑀞𑀥𑀫𑁆𑀫𑀲𑀫𑁄𑀥𑀸𑀦𑀸𑀢𑀺 𑀏𑀢𑁂𑀲𑀁 𑀅𑀝𑁆𑀞𑀦𑁆𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀬𑁄𑀕𑁂𑀦. 𑀅𑀪𑀺𑀦𑀻𑀳𑀸𑀭𑁄𑀢𑀺 𑀓𑀸𑀬𑀧𑀡𑀺𑀥𑀸𑀦𑀁. 𑀲𑀫𑀺𑀚𑁆𑀛𑀢𑀻𑀢𑀺 𑀦𑀺𑀧𑁆𑀨𑀚𑁆𑀚𑀢𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀧𑀭𑀫𑀢𑁆𑀣𑀤𑀻𑀧𑀦𑀺𑀬𑀸 𑀘𑀭𑀺𑀬𑀸𑀧𑀺𑀝𑀓𑀯𑀡𑁆𑀡𑀦𑀸𑀬 (𑀘𑀭𑀺𑀬𑀸. 𑀅𑀝𑁆𑀞. 𑀧𑀓𑀺𑀡𑁆𑀡𑀓𑀓𑀣𑀸) 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀲𑀩𑁆𑀩𑀸𑀓𑀸𑀭𑀧𑀭𑀺𑀧𑀽𑀭𑀫𑁂𑀯𑀸𑀢𑀺 𑀧𑀭𑀺𑀧𑀼𑀡𑁆𑀡𑀮𑀓𑁆𑀔𑀡𑀢𑀸𑀬 𑀲𑀢𑁆𑀢𑀼𑀢𑁆𑀢𑀫𑀸𑀤𑀻𑀳𑀺 𑀲𑀩𑁆𑀩𑀸𑀓𑀸𑀭𑁂𑀦 𑀲𑀫𑁆𑀧𑀦𑁆𑀦𑀫𑁂𑀯. 𑀦 𑀳𑀺 𑀇𑀢𑁆𑀣𑀺𑀬𑀸 𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑀢𑀸𑀤𑀺 𑀲𑀫𑁆𑀪𑀯𑀢𑀺. 𑀤𑀼𑀢𑀺𑀬𑀧𑀓𑀢𑀺 𑀘 𑀦𑀸𑀫 𑀧𑀞𑀫𑀧𑀓𑀢𑀺𑀢𑁄 𑀦𑀺𑀳𑀻𑀦𑀸 𑀏𑀯. 𑀢𑁂𑀦𑁂𑀯𑀸𑀳 𑁋 𑀅𑀦𑀦𑁆𑀢𑀭𑀯𑀸𑀭𑁂 ‘‘𑀬𑀲𑁆𑀫𑀸’’𑀢𑀺𑀆𑀤𑀺.

𑁨𑁮𑁧. 𑀇𑀥 𑀧𑀼𑀭𑀺𑀲𑀲𑁆𑀲 𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀦𑀢𑁄𑀢𑀺 𑀇𑀫𑀲𑁆𑀫𑀺𑀁 𑀫𑀦𑀼𑀲𑁆𑀲𑀮𑁄𑀓𑁂 𑀧𑀼𑀭𑀺𑀲𑀪𑀽𑀢𑀲𑁆𑀲 𑀢𑀢𑁆𑀣 𑀩𑁆𑀭𑀳𑁆𑀫𑀮𑁄𑀓𑁂 𑀩𑁆𑀭𑀳𑁆𑀫𑀢𑁆𑀢𑀪𑀸𑀯𑁂𑀦 𑀦𑀺𑀩𑁆𑀩𑀢𑁆𑀢𑀦𑀢𑁄. 𑀢𑁂𑀦 𑀅𑀲𑀢𑀺𑀧𑀺 𑀧𑀼𑀭𑀺𑀲𑀮𑀺𑀗𑁆𑀕𑁂 𑀧𑀼𑀭𑀺𑀲𑀸𑀓𑀸𑀭𑀸 𑀩𑁆𑀭𑀳𑁆𑀫𑀸𑀦𑁄 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀁𑀬𑁂𑀯 𑀘 𑀧𑀼𑀭𑀺𑀲𑀸𑀓𑀸𑀭𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀪𑀕𑀯𑀢𑀸 ‘‘𑀬𑀁 𑀧𑀼𑀭𑀺𑀲𑁄 𑀩𑁆𑀭𑀳𑁆𑀫𑀢𑁆𑀢𑀁 𑀓𑀸𑀭𑁂𑀬𑁆𑀬𑀸’’𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀲𑀫𑀸𑀦𑁂𑀧𑀻’’𑀢𑀺𑀆𑀤𑀺. 𑀬𑀤𑀺 𑀏𑀯𑀁 𑀇𑀢𑁆𑀣𑀺𑀬𑁄 𑀩𑁆𑀭𑀳𑁆𑀫𑀮𑁄𑀓𑁂 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀆𑀳 𑁋 ‘‘𑀩𑁆𑀭𑀳𑁆𑀫𑀢𑁆𑀢’’𑀦𑁆𑀢𑀺𑀆𑀤𑀺.

𑁨𑁯𑁦-𑁨𑁯𑁫. ‘‘𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑁆𑀲𑀸’’𑀢𑀺𑀆𑀤𑀺𑀧𑀸𑀴𑀺𑀬𑀸 ¶ 𑀓𑀫𑁆𑀫𑀦𑀺𑀬𑀸𑀫𑁄 𑀦𑀸𑀫 𑀓𑀣𑀺𑀢𑁄. 𑀲𑀫𑀜𑁆𑀚𑀦𑀁 𑀲𑀫𑀗𑁆𑀕𑁄, 𑀲𑀫𑀦𑁆𑀦𑀸𑀕𑀫𑁄, 𑀲𑁄 𑀏𑀢𑀲𑁆𑀲 𑀅𑀢𑁆𑀣𑀻𑀢𑀺 𑀲𑀫𑀗𑁆𑀕𑀻, 𑀲𑀫𑀦𑁆𑀦𑀸𑀕𑀢𑁄, 𑀲𑀫𑀜𑁆𑀚𑀦𑀲𑀻𑀮𑁄 𑀯𑀸 𑀲𑀫𑀗𑁆𑀕𑀻, 𑀧𑀼𑀩𑁆𑀩𑀪𑀸𑀕𑁂 𑀉𑀧𑀓𑀭𑀡𑀲𑀫𑀼𑀤𑀸𑀬𑀢𑁄 𑀧𑀪𑀼𑀢𑀺 𑀆𑀬𑀽𑀳𑀦𑀯𑀲𑁂𑀦 𑀆𑀬𑀽𑀳𑀦𑀲𑀫𑀗𑁆𑀕𑀻𑀢𑀸, 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀯𑀲𑁂𑀦 𑀘𑁂𑀢𑀦𑀸𑀲𑀫𑀗𑁆𑀕𑀺𑀢𑀸. 𑀘𑁂𑀢𑀦𑀸𑀲𑀦𑁆𑀢𑀢𑀺𑀯𑀲𑁂𑀦 𑀯𑀸 𑀆𑀬𑀽𑀳𑀦𑀲𑀫𑀗𑁆𑀕𑀺𑀢𑀸, 𑀢𑀁𑀢𑀁𑀘𑁂𑀢𑀦𑀸𑀓𑁆𑀔𑀡𑀯𑀲𑁂𑀦 𑀘𑁂𑀢𑀦𑀸𑀲𑀫𑀗𑁆𑀕𑀻𑀢𑀸. 𑀓𑀢𑀽𑀧𑀘𑀺𑀢𑀲𑁆𑀲 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀲𑁆𑀲 𑀓𑀫𑁆𑀫𑀲𑁆𑀲 𑀯𑀲𑁂𑀦 𑀓𑀫𑁆𑀫𑀲𑀫𑀗𑁆𑀕𑀺𑀢𑀸. 𑀓𑀫𑁆𑀫𑁂 𑀧𑀦 𑀯𑀺𑀧𑀘𑁆𑀘𑀺𑀢𑀼𑀁 𑀆𑀭𑀤𑁆𑀥𑁂 𑀯𑀺𑀧𑀸𑀓𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀯𑀺𑀧𑀸𑀓𑀲𑀫𑀗𑁆𑀕𑀺𑀢𑀸. 𑀓𑀫𑁆𑀫𑀸𑀤𑀻𑀦𑀁 𑀉𑀧𑀝𑁆𑀞𑀸𑀦𑀓𑀸𑀮𑀯𑀲𑁂𑀦 𑀉𑀧𑀝𑁆𑀞𑀸𑀦𑀲𑀫𑀗𑁆𑀕𑀺𑀢𑀸. 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑁂𑀢𑀺 𑀓𑀼𑀲𑀮𑀓𑀫𑁆𑀫𑀲𑁆𑀲 𑀅𑀓𑀼𑀲𑀮𑀓𑀫𑁆𑀫𑀲𑁆𑀲 ¶ 𑀘 𑀲𑀫𑀻𑀳𑀦𑀓𑁆𑀔𑀡𑁂. 𑀢𑀣𑀸𑀢𑀺 𑀇𑀫𑀺𑀦𑀸 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑀧𑀤𑀁 𑀆𑀓𑀟𑁆𑀠𑀢𑀺. 𑀬𑀣𑀸 𑀓𑀢𑀁 𑀓𑀫𑁆𑀫𑀁 𑀨𑀮𑀤𑀸𑀦𑀲𑀫𑀢𑁆𑀣𑀁 𑀳𑁄𑀢𑀺, 𑀢𑀣𑀸 𑀓𑀢𑀁 𑀉𑀧𑀘𑀺𑀢𑀁. 𑀯𑀺𑀧𑀸𑀓𑀸𑀭𑀳𑀦𑁆𑀢𑀺 𑀤𑀼𑀢𑀺𑀬𑀪𑀯𑀸𑀤𑀻𑀲𑀼 𑀯𑀺𑀧𑀘𑁆𑀘𑀦𑀸𑀭𑀳𑀁. 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀉𑀧𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀉𑀧𑀝𑁆𑀞𑀸𑀢𑀻𑀢𑀺 𑀬𑁄𑀚𑀦𑀸. 𑀉𑀧𑀧𑀢𑁆𑀢𑀺𑀬𑀸 𑀉𑀧𑁆𑀧𑀚𑁆𑀚𑀦𑀲𑁆𑀲 𑀦𑀺𑀫𑀺𑀢𑁆𑀢𑀁 𑀓𑀸𑀭𑀡𑀦𑁆𑀢𑀺 𑀉𑀧𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀁, 𑀓𑀫𑁆𑀫𑀁, 𑀓𑀫𑁆𑀫𑀦𑀺𑀫𑀺𑀢𑁆𑀢𑀁, 𑀕𑀢𑀺𑀦𑀺𑀫𑀺𑀢𑁆𑀢𑀜𑁆𑀘. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀕𑀢𑀺𑀦𑀺𑀫𑀺𑀢𑁆𑀢𑀯𑀲𑁂𑀦𑁂𑀯 𑀬𑁄𑀚𑀦𑀸 𑀤𑀲𑁆𑀲𑀺𑀢𑀸. 𑀓𑀫𑁆𑀫𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀦𑀫𑁆𑀧𑀺 𑀉𑀧𑀝𑁆𑀞𑀸𑀦𑀁 𑀬𑀣𑀸𑀭𑀳𑀁 𑀤𑀝𑁆𑀞𑀩𑁆𑀩𑀁. ‘‘𑀬𑀸𑀦𑀺𑀲𑁆𑀲 𑀢𑀸𑀦𑀺 𑀧𑀼𑀩𑁆𑀩𑁂 𑀓𑀢𑀸𑀦𑀺 𑀓𑀫𑁆𑀫𑀸𑀦𑀺, 𑀢𑀸𑀦𑀺𑀲𑁆𑀲 𑀢𑀲𑁆𑀫𑀺𑀁 𑀲𑀫𑀬𑁂 𑀑𑀮𑀫𑁆𑀩𑀦𑁆𑀢𑀺 𑀅𑀚𑁆𑀛𑁄𑀮𑀫𑁆𑀩𑀦𑁆𑀢𑀺 𑀅𑀪𑀺𑀮𑀫𑁆𑀩𑀦𑁆𑀢𑀺’’𑀢𑀺 (𑀫. 𑀦𑀺. 𑁩.𑁨𑁪𑁮) 𑀯𑀘𑀦𑀢𑁄 𑀲𑀸𑀬𑀦𑁆𑀳𑁂 𑀫𑀳𑀦𑁆𑀢𑀸𑀦𑀁 𑀧𑀩𑁆𑀩𑀢𑀓𑀽𑀝𑀸𑀦𑀁 𑀙𑀸𑀬𑀸 𑀯𑀺𑀬 𑀆𑀲𑀦𑁆𑀦𑀫𑀭𑀡𑀲𑁆𑀲 𑀲𑀢𑁆𑀢𑀲𑁆𑀲 𑀘𑀺𑀢𑁆𑀢𑁂 𑀲𑀼𑀧𑀺𑀦𑁂 𑀯𑀺𑀬 𑀯𑀺𑀧𑀘𑁆𑀘𑀺𑀢𑀼𑀁 𑀓𑀢𑁄𑀓𑀸𑀲𑀁 𑀓𑀫𑁆𑀫𑀁, 𑀢𑀲𑁆𑀲 𑀦𑀺𑀫𑀺𑀢𑁆𑀢𑀁 𑀕𑀢𑀺𑀦𑀺𑀫𑀺𑀢𑁆𑀢𑀁 𑀉𑀧𑀢𑀺𑀝𑁆𑀞𑀢𑁂𑀯. 𑀘𑀮𑀢𑀻𑀢𑀺 𑀧𑀭𑀺𑀯𑀢𑁆𑀢𑀢𑀺. 𑀏𑀓𑁂𑀦 𑀳𑀺 𑀓𑀫𑁆𑀫𑀼𑀦𑀸 𑀢𑀚𑁆𑀚𑁂 𑀦𑀺𑀫𑀺𑀢𑁆𑀢𑁂 𑀉𑀧𑀝𑁆𑀞𑀺𑀢𑁂 𑀧𑀘𑁆𑀘𑀬𑀯𑀺𑀲𑁂𑀲𑀯𑀲𑁂𑀦 𑀢𑀢𑁄 𑀅𑀜𑁆𑀜𑁂𑀦 𑀓𑀫𑁆𑀫𑀼𑀦𑀸 𑀢𑀤𑀜𑁆𑀜𑀲𑁆𑀲 𑀦𑀺𑀫𑀺𑀢𑁆𑀢𑀲𑁆𑀲 𑀉𑀧𑀝𑁆𑀞𑀸𑀦𑀁 𑀧𑀭𑀺𑀯𑀢𑁆𑀢𑀦𑀁. 𑀲𑁂𑀲𑀸 𑀦𑀺𑀘𑁆𑀘𑀮𑀸 𑀅𑀯𑀲𑁂𑀲𑀸 𑀘𑀢𑀼𑀩𑁆𑀩𑀺𑀥𑀸𑀧𑀺 𑀲𑀫𑀗𑁆𑀕𑀺𑀢𑀸 𑀦𑀺𑀘𑁆𑀘𑀮𑀸 𑀅𑀧𑀭𑀺𑀯𑀢𑁆𑀢𑀦𑀢𑁄.

𑀲𑀼𑀦𑀔𑀯𑀸𑀚𑀺𑀓𑁄𑀢𑀺 𑀲𑀼𑀦𑀔𑁂𑀳𑀺 𑀫𑀺𑀕𑀯𑀸𑀚𑀯𑀲𑁂𑀦 𑀯𑀚𑀦𑀲𑀻𑀮𑁄, 𑀲𑀼𑀦𑀔𑀮𑀼𑀤𑁆𑀤𑀓𑁄𑀢𑀺 𑀅𑀢𑁆𑀣𑁄. 𑀢𑀮𑀲𑀦𑁆𑀣𑀭𑀡𑀧𑀽𑀚𑀦𑁆𑀢𑀺 𑀪𑀽𑀫𑀺𑀢𑀮𑀲𑁆𑀲 𑀧𑀼𑀧𑁆𑀨𑁂𑀳𑀺 𑀲𑀦𑁆𑀣𑀭𑀡𑀧𑀽𑀚𑀁. 𑀆𑀬𑀽𑀳𑀦𑀘𑁂𑀢𑀦𑀸 𑀓𑀫𑁆𑀫𑀲𑀫𑀗𑁆𑀕𑀺𑀢𑀸𑀯𑀲𑁂𑀦𑀸𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑁆𑀲 𑀅𑀧𑀭𑀸𑀧𑀭𑀁 𑀆𑀬𑀽𑀳𑀦𑁂𑀦 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀬 𑀢𑀲𑁆𑀲𑁂𑀯 𑀧𑀓𑀧𑁆𑀧𑀦𑁂 𑀓𑀫𑁆𑀫𑀓𑁆𑀔𑀬𑀓𑀭𑀜𑀸𑀡𑁂𑀦 𑀅𑀔𑁂𑀧𑀺𑀢𑀢𑁆𑀢𑀸 𑀬𑀣𑀽𑀧𑀘𑀺𑀢𑀓𑀫𑁆𑀫𑀼𑀦𑀸 𑀘 𑀲𑀫𑀗𑁆𑀕𑀺𑀪𑀸𑀯𑀲𑁆𑀲 𑀯𑀲𑁂𑀦.

𑀓𑀫𑁆𑀫𑀦𑁆𑀢𑀺 𑀅𑀓𑀼𑀲𑀮𑀓𑀫𑁆𑀫𑀁. 𑀢𑀲𑁆𑀫𑀺𑀁𑀬𑁂𑀯 𑀔𑀡𑁂𑀢𑀺 𑀆𑀬𑀽𑀳𑀦𑀓𑁆𑀔𑀡𑁂𑀬𑁂𑀯. 𑀢𑀲𑁆𑀲𑀸𑀢𑀺 𑀓𑀫𑁆𑀫𑀲𑀫𑀗𑁆𑀕𑀺𑀦𑁄 𑀧𑀼𑀕𑁆𑀕𑀮𑀲𑁆𑀲 𑀲𑀕𑁆𑀕𑁄 𑀯𑀸𑀭𑀺𑀢𑁄, 𑀢𑀜𑁆𑀘𑁂 𑀓𑀫𑁆𑀫𑀁 𑀯𑀺𑀧𑀸𑀓𑀯𑀸𑀭𑀁 𑀮𑀪𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀕𑁆𑀕𑁄 𑀯𑀸𑀭𑀺𑀢𑁄𑀢𑀺 𑀘 𑀦𑀺𑀤𑀲𑁆𑀲𑀦𑀫𑀢𑁆𑀢𑀁. 𑀫𑀦𑀼𑀲𑁆𑀲𑀮𑁄𑀓𑁄𑀧𑀺𑀲𑁆𑀲 𑀯𑀸𑀭𑀺𑀢𑁄𑀯𑀸𑀢𑀺. 𑀅𑀧𑀭𑁂 𑀧𑀦 𑀧𑀼𑀭𑀺𑀫𑁂𑀳𑀺 𑀯𑀺𑀧𑀸𑀓𑀸𑀯𑀭𑀡𑀲𑁆𑀲 𑀅𑀦𑀼𑀤𑁆𑀥𑀝𑀢𑁆𑀢𑀸 ‘‘𑀢𑀲𑁆𑀫𑀺𑀁𑀬𑁂𑀯 𑀔𑀡𑁂’’𑀢𑀺 𑀘 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀢𑀁 𑀤𑁄𑀲𑀁 𑀧𑀭𑀺𑀳𑀭𑀺𑀢𑀼𑀁 ‘‘𑀆𑀬𑀽𑀳𑀺𑀢𑀓𑀫𑁆𑀫𑀁 𑀦𑀸𑀫𑀸’’𑀢𑀺𑀆𑀤𑀺𑀫𑀸𑀳. 𑀬𑀤𑀸 𑀓𑀫𑁆𑀫𑀁 𑀯𑀺𑀧𑀸𑀓𑀯𑀸𑀭𑀁 𑀮𑀪𑀢𑀻𑀢𑀺 𑀇𑀤𑀁 𑀓𑀢𑁄𑀓𑀸𑀲𑀲𑁆𑀲 𑀅𑀧𑁆𑀧𑀝𑀺𑀩𑀸𑀳𑀺𑀬𑀢𑁆𑀢𑀸 𑀯𑀼𑀢𑁆𑀢𑀁 ¶ . 𑀢𑀣𑀸 𑀳𑀺 𑀪𑀕𑀯𑀸 𑀢𑀢𑀺𑀬𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀲𑁆𑀫𑀺𑀁 (𑀧𑀸𑀭𑀸. 𑁧𑁬𑁨 𑀆𑀤𑀬𑁄) 𑀧𑀝𑀺𑀲𑀮𑁆𑀮𑀻𑀬𑀺, 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 ‘‘𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑀫𑀗𑁆𑀕𑀻’’𑀢𑀺 𑀆𑀕𑀢𑀢𑁆𑀢𑀸 𑀯𑀺𑀧𑀸𑀓𑀽𑀧𑀝𑁆𑀞𑀸𑀦𑀲𑀫𑀗𑁆𑀕𑀺𑀢𑀸 𑀦 𑀮𑀩𑁆𑀪𑀦𑁆𑀢𑀺.

(𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.)

𑀅𑀝𑁆𑀞𑀸𑀦𑀧𑀸𑀴𑀺𑀯𑀡𑁆𑀡𑀦𑀸𑀬𑀁 𑀅𑀦𑀼𑀢𑁆𑀢𑀸𑀦𑀢𑁆𑀣𑀤𑀻𑀧𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬. 𑀏𑀓𑀥𑀫𑁆𑀫𑀧𑀸𑀴𑀺

(𑁧𑁬) 𑁧. 𑀏𑀓𑀥𑀫𑁆𑀫𑀧𑀸𑀴𑀺-𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸

𑁨𑁯𑁬. 𑀏𑀓𑀥𑀫𑁆𑀫𑀧𑀸𑀴𑀺𑀯𑀡𑁆𑀡𑀦𑀸𑀬𑀁 ¶ ¶ 𑀇𑀥 𑀥𑀫𑁆𑀫-𑀲𑀤𑁆𑀤𑁄 𑀲𑀪𑀸𑀯𑀢𑁆𑀣𑁄 ‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀯𑀺𑀬𑀸𑀢𑀺 𑀆𑀳 𑁋 ‘‘𑀏𑀓𑀲𑀪𑀸𑀯𑁄’’𑀢𑀺. 𑀏𑀓𑀦𑁆𑀢𑁂𑀦𑀸𑀢𑀺 𑀏𑀓𑀁𑀲𑁂𑀦, 𑀅𑀯𑀲𑁆𑀲𑀦𑁆𑀢𑀺 𑀅𑀢𑁆𑀣𑁄. 𑀯𑀝𑁆𑀝𑁂𑀢𑀺 𑀲𑀁𑀲𑀸𑀭𑀯𑀝𑁆𑀝𑁂. 𑀦𑀺𑀩𑁆𑀩𑀺𑀦𑁆𑀤𑀦𑀢𑁆𑀣𑀸𑀬𑀸𑀢𑀺 𑀅𑀦𑀪𑀺𑀭𑀫𑀦𑀢𑁆𑀣𑀸𑀬. 𑀯𑀺𑀭𑀚𑁆𑀚𑀦𑀢𑁆𑀣𑀸𑀬𑀸𑀢𑀺 𑀅𑀭𑀚𑁆𑀚𑀦𑀢𑁆𑀣𑀸𑀬. 𑀯𑀺𑀭𑀚𑁆𑀚𑀦𑀸𑀬𑀸𑀢𑀺 𑀧𑀮𑀼𑀚𑁆𑀚𑀦𑀸𑀬. 𑀢𑁂𑀦𑁂𑀯𑀸𑀳 𑁋 ‘‘𑀯𑀺𑀕𑀫𑀸𑀬𑀸’’𑀢𑀺. 𑀭𑀸𑀕𑀸𑀤𑀻𑀦𑀁 𑀦𑀺𑀭𑁄𑀥𑀸𑀬𑀸𑀢𑀺 𑀫𑀕𑁆𑀕𑀜𑀸𑀡𑁂𑀦 𑀭𑀸𑀕𑀸𑀤𑀻𑀦𑀁 𑀦𑀺𑀭𑁄𑀥𑀦𑀢𑁆𑀣𑀸𑀬. 𑀫𑀕𑁆𑀕𑀜𑀸𑀡𑁂𑀦 𑀦𑀺𑀭𑁄𑀥𑀦𑀁 𑀦𑀸𑀫 𑀅𑀘𑁆𑀘𑀦𑁆𑀢𑀁 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀦𑁆𑀢𑀺 𑀆𑀳 𑁋 ‘‘𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀢𑁆𑀣𑀸𑀬𑀸’’𑀢𑀺. 𑀬𑀣𑀸 𑀔𑀸𑀤𑀦𑀻𑀬𑀲𑁆𑀲 𑀫𑀼𑀔𑁂 𑀓𑀢𑁆𑀯𑀸 𑀔𑀸𑀤𑀦𑀁 𑀦𑀸𑀫 𑀬𑀸𑀯𑀤𑁂𑀯 𑀅𑀚𑁆𑀛𑁄𑀳𑀭𑀡𑀢𑁆𑀣𑀁, 𑀏𑀯𑀁 𑀭𑀸𑀕𑀸𑀤𑀻𑀦𑀁 𑀦𑀺𑀭𑁄𑀥𑀦𑀁 𑀯𑀝𑁆𑀝𑀦𑀺𑀭𑁄𑀥𑀦𑀢𑁆𑀣𑀫𑁂𑀯𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀯𑀝𑁆𑀝𑀲𑁆𑀲𑁂𑀯 𑀯𑀸 𑀦𑀺𑀭𑀼𑀚𑁆𑀛𑀦𑀢𑁆𑀣𑀸𑀬𑀸’’𑀢𑀺. 𑀬𑀲𑁆𑀫𑀸 𑀓𑀺𑀮𑁂𑀲𑁂𑀲𑀼 𑀔𑀻𑀡𑁂𑀲𑀼 𑀇𑀢𑀭𑀁 𑀯𑀝𑁆𑀝𑀤𑁆𑀯𑀬𑀫𑁆𑀧𑀺 𑀔𑀻𑀡𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀫𑀽𑀮𑀫𑁂𑀯 𑀕𑀡𑁆𑀳𑀦𑁆𑀢𑁄 ‘‘𑀉𑀧𑀲𑀫𑀸𑀬𑀸𑀢𑀺 𑀓𑀺𑀮𑁂𑀲𑀯𑀽𑀧𑀲𑀫𑀦𑀢𑁆𑀣𑀸𑀬𑀸’’𑀢𑀺 𑀆𑀳. 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀅𑀪𑀺𑀚𑀸𑀦𑀦𑀁 𑀦𑀸𑀫 𑀢𑀢𑁆𑀣 𑀮𑀓𑁆𑀔𑀡𑀢𑁆𑀢𑀬𑀸𑀭𑁄𑀧𑀦𑀫𑀼𑀔𑁂𑀦𑁂𑀯𑀸𑀢𑀺 𑀆𑀳 𑁋 ‘‘𑀅𑀦𑀺𑀘𑁆𑀘𑀸𑀤𑀺…𑀧𑁂… 𑀅𑀪𑀺𑀚𑀸𑀦𑀦𑀢𑁆𑀣𑀸𑀬𑀸’’𑀢𑀺. 𑀲𑀫𑁆𑀩𑀼𑀚𑁆𑀛𑀺𑀢𑀩𑁆𑀩𑀸𑀦𑀺 𑀦𑀸𑀫 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀜𑁂𑀬𑁆𑀬𑀲𑁆𑀲 𑀅𑀪𑀸𑀯𑀢𑁄. ‘‘𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀩𑀼𑀚𑁆𑀛𑀦𑀢𑁆𑀣𑀸𑀬𑀸’’𑀢𑀺 𑀯𑀢𑁆𑀯𑀸 𑀢𑀬𑀺𑀤𑀁 𑀩𑀼𑀚𑁆𑀛𑀦𑀁 𑀬𑀲𑁆𑀲 𑀜𑀸𑀡𑀲𑁆𑀲 𑀯𑀲𑁂𑀦 𑀇𑀚𑁆𑀛𑀢𑀺, 𑀢𑀲𑁆𑀲 𑀜𑀸𑀡𑀲𑁆𑀲 𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑁋 ‘‘𑀩𑁄𑀥𑀺 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀘𑁆𑀘𑀬𑀦𑀺𑀩𑁆𑀩𑀸𑀦𑀲𑁆𑀲𑀸𑀢𑀺 𑀅𑀫𑀢𑀥𑀸𑀢𑀼𑀬𑀸.

𑀉𑀲𑁆𑀲𑀸𑀳𑀚𑀦𑀦𑀢𑁆𑀣𑀦𑁆𑀢𑀺 𑀓𑀫𑁆𑀫𑀝𑁆𑀞𑀸𑀦𑁂 𑀅𑀪𑀺𑀭𑀼𑀘𑀺𑀉𑀧𑁆𑀧𑀸𑀤𑀦𑀸𑀬. 𑀯𑀺𑀲𑀓𑀡𑁆𑀝𑀓𑁄𑀢𑀺 𑀕𑀼𑀴𑀲𑁆𑀲 𑀯𑀸𑀡𑀺𑀚𑀲𑀫𑀜𑁆𑀜𑀸. ‘‘𑀓𑀺𑀲𑁆𑀫𑀺𑀜𑁆𑀘𑀺 𑀤𑁂𑀲𑁂 𑀤𑁂𑀲𑀪𑀸𑀲𑀸’’𑀢𑀺 𑀓𑁂𑀘𑀺. 𑀉𑀘𑁆𑀙𑀼𑀭𑀲𑁄 𑀲𑀫𑀧𑀸𑀓𑀧𑀓𑁆𑀓𑁄 𑀘𑀼𑀡𑁆𑀡𑀸𑀤𑀻𑀳𑀺 𑀫𑀺𑀲𑁆𑀲𑁂𑀢𑁆𑀯𑀸 𑀧𑀺𑀡𑁆𑀟𑀻𑀓𑀢𑁄 𑀕𑀼𑀴𑁄, 𑀅𑀧𑀺𑀡𑁆𑀟𑀻𑀓𑀢𑁄 𑀨𑀸𑀡𑀺𑀢𑀁. 𑀧𑀸𑀓𑀯𑀺𑀲𑁂𑀲𑁂𑀦 𑀔𑀡𑁆𑀟𑀔𑀡𑁆𑀟𑀲𑁂𑀤𑀺𑀢𑁄 𑀔𑀡𑁆𑀟𑁄, 𑀫𑀮𑀸𑀪𑀸𑀯𑀁 𑀆𑀧𑀦𑁆𑀦𑁄 𑀲𑀓𑁆𑀓𑀭𑀸.

𑀲𑀭𑀢𑀻𑀢𑀺 𑀲𑀢𑀺. 𑀅𑀦𑀼 𑀅𑀦𑀼 𑀲𑀭𑀢𑀻𑀢𑀺 𑀅𑀦𑀼𑀲𑁆𑀲𑀢𑀺, 𑀅𑀦𑀼 𑀅𑀦𑀼𑀭𑀽𑀧𑀸 𑀲𑀢𑀻𑀢𑀺𑀧𑀺 𑀅𑀦𑀼𑀲𑁆𑀲𑀢𑀺. 𑀤𑀼𑀯𑀺𑀥𑀁 𑀳𑁄𑀢𑀻𑀢𑀺 𑀧𑀬𑁄𑀚𑀦𑀯𑀲𑁂𑀦 𑀤𑀼𑀯𑀺𑀥𑀁 𑀳𑁄𑀢𑀺. 𑀘𑀺𑀢𑁆𑀢𑀲𑀫𑁆𑀧𑀳𑀁𑀲𑀦𑀢𑁆𑀣𑀦𑁆𑀢𑀺 𑀧𑀲𑀸𑀤𑀦𑀻𑀬𑀯𑀢𑁆𑀣𑀼𑀲𑁆𑀫𑀺𑀁 𑀧𑀲𑀸𑀤𑀼𑀧𑁆𑀧𑀸𑀤𑀦𑁂𑀦 𑀪𑀸𑀯𑀦𑀸𑀘𑀺𑀢𑁆𑀢𑀲𑁆𑀲 𑀧𑀭𑀺𑀢𑁄𑀲𑀦𑀢𑁆𑀣𑀁. 𑀯𑀺𑀧𑀲𑁆𑀲𑀦𑀢𑁆𑀣𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀲𑀼𑀔𑀢𑁆𑀣𑀁. 𑀉𑀧𑀘𑀸𑀭𑀲𑀫𑀸𑀥𑀺𑀦𑀸 𑀳𑀺 𑀘𑀺𑀢𑁆𑀢𑁂 𑀲𑀫𑀸𑀳𑀺𑀢𑁂 𑀯𑀺𑀧𑀲𑁆𑀲𑀦𑀸𑀲𑀼𑀔𑁂𑀦 𑀇𑀚𑁆𑀛𑀢𑀺. 𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀢𑀺 𑀪𑀸𑀯𑀦𑀸𑀯𑀲𑁂𑀦 𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 ¶ . 𑀉𑀧𑀳𑀜𑁆𑀜𑀢𑀺 𑀧𑀢𑀺𑀳𑀜𑁆𑀜𑀢𑀺 𑀧𑀝𑀺𑀓𑀽𑀮𑀢𑁆𑀢𑀸 𑀆𑀭𑀫𑁆𑀫𑀡𑀲𑁆𑀲. 𑀢𑀢𑁄 ¶ 𑀏𑀯 𑀉𑀓𑁆𑀓𑀡𑁆𑀞𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀭𑀺𑀜𑁆𑀘𑀢𑀺, 𑀦𑀺𑀭𑀲𑁆𑀲𑀸𑀤𑁄 𑀳𑁄𑀢𑀺 𑀪𑀸𑀯𑀦𑀲𑁆𑀲𑀸𑀤𑀲𑁆𑀲 𑀅𑀮𑀩𑁆𑀪𑀦𑀢𑁄. 𑀧𑀲𑀻𑀤𑀢𑀺 𑀩𑀼𑀤𑁆𑀥𑀕𑀼𑀡𑀸𑀦𑀁 𑀧𑀲𑀸𑀤𑀦𑀻𑀬𑀢𑁆𑀢𑀸. 𑀢𑀣𑀸 𑀘 𑀓𑀗𑁆𑀔𑀸𑀤𑀺𑀘𑁂𑀢𑁄𑀔𑀺𑀮𑀸𑀪𑀸𑀯𑁂𑀦 𑀯𑀺𑀦𑀻𑀯𑀭𑀡𑁄 𑀳𑁄𑀢𑀺. 𑀤𑀫𑁂𑀢𑁆𑀯𑀸𑀢𑀺 𑀦𑀻𑀯𑀭𑀡𑀦𑀺𑀭𑀸𑀓𑀭𑀡𑁂𑀦 𑀦𑀺𑀩𑁆𑀩𑀺𑀲𑁂𑀯𑀦𑀁 𑀓𑀢𑁆𑀯𑀸. 𑀏𑀯𑀁 𑀓𑀫𑁆𑀫𑀝𑁆𑀞𑀸𑀦𑀦𑁆𑀢𑀭𑀸𑀦𑀼𑀬𑀼𑀜𑁆𑀚𑀦𑁂𑀦 𑀘𑀺𑀢𑁆𑀢𑀧𑀭𑀺𑀤𑀫𑀦𑀲𑁆𑀲 𑀉𑀧𑀫𑀁 𑀤𑀲𑁆𑀲𑁂𑀦𑁆𑀢𑁄, ‘‘𑀓𑀣’’𑀦𑁆𑀢𑀺𑀆𑀤𑀺𑀫𑀸𑀳.

𑀓𑁄 𑀅𑀬𑀁…𑀧𑁂… 𑀅𑀦𑀼𑀲𑁆𑀲𑀭𑀻𑀢𑀺 𑀓𑁄 𑀅𑀬𑀁 𑀫𑀫 𑀅𑀩𑁆𑀪𑀦𑁆𑀢𑀭𑁂 𑀞𑀢𑁆𑀯𑀸 𑀅𑀦𑀼𑀲𑁆𑀲𑀭𑀺. 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑁄𑀢𑀺 𑀩𑀸𑀳𑀺𑀭𑀓𑀧𑀭𑀺𑀓𑀧𑁆𑀧𑀺𑀢𑀲𑁆𑀲 𑀅𑀦𑀼𑀲𑁆𑀲𑀭𑀓𑀲𑁆𑀲 𑀲𑀩𑁆𑀩𑀲𑁄 𑀅𑀪𑀸𑀯𑀤𑀲𑁆𑀲𑀦𑀫𑁂𑀢𑀁. 𑀢𑁂𑀦𑀸𑀳 𑁋 ‘‘𑀦 𑀅𑀜𑁆𑀜𑁄 𑀓𑁄𑀘𑀻’’𑀢𑀺. 𑀤𑀺𑀲𑁆𑀯𑀸𑀢𑀺 𑀧𑀭𑀺𑀬𑁂𑀲𑀦𑀦𑀬𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀘𑀺𑀢𑁆𑀢𑀫𑁂𑀯 𑀅𑀦𑀼𑀲𑁆𑀲𑀭𑀻𑀢𑀺 𑀤𑀺𑀲𑁆𑀯𑀸 𑀲𑀩𑁆𑀩𑀫𑁆𑀧𑁂𑀢𑀦𑁆𑀢𑀺 𑀏𑀢𑀁 𑀳𑀤𑀬𑀯𑀢𑁆𑀣𑀼𑀆𑀤𑀺𑀧𑁆𑀧𑀪𑁂𑀤𑀁 𑀲𑀩𑁆𑀩𑀫𑁆𑀧𑀺. 𑀇𑀤𑀜𑁆𑀘 𑀭𑀽𑀧𑀁 𑀧𑀼𑀭𑀺𑀫𑀜𑁆𑀘 𑀅𑀭𑀽𑀧𑀦𑁆𑀢𑀺 𑀇𑀤𑀁 𑀭𑀼𑀧𑁆𑀧𑀦𑀲𑀪𑀸𑀯𑀢𑁆𑀢𑀸 𑀭𑀽𑀧𑀁, 𑀧𑀼𑀭𑀺𑀫𑀁 𑀅𑀢𑀁𑀲𑀪𑀸𑀯𑀢𑁆𑀢𑀸 𑀅𑀭𑀽𑀧𑀦𑁆𑀢𑀺 𑀲𑀗𑁆𑀔𑁂𑀧𑀢𑁄 𑀭𑀽𑀧𑀸𑀭𑀽𑀧𑀁 𑀯𑀯𑀢𑁆𑀣𑀧𑁂𑀢𑁆𑀯𑀸. 𑀧𑀜𑁆𑀘𑀓𑁆𑀔𑀦𑁆𑀥𑁂 𑀯𑀯𑀢𑁆𑀣𑀧𑁂𑀢𑁆𑀯𑀸𑀢𑀺 𑀬𑁄𑀚𑀦𑀸. 𑀲𑀫𑁆𑀪𑀸𑀯𑀺𑀓𑀸𑀢𑀺 𑀲𑀫𑀼𑀝𑁆𑀞𑀸𑀧𑀺𑀓𑀸. 𑀢𑀲𑁆𑀲𑀸𑀢𑀺 𑀲𑀫𑀼𑀤𑀬𑀲𑀘𑁆𑀘𑀲𑁆𑀲. 𑀦𑀺𑀭𑁄𑀥𑁄𑀢𑀺 𑀦𑀺𑀭𑁄𑀥𑀦𑀺𑀫𑀺𑀢𑁆𑀢𑀁. 𑀅𑀧𑁆𑀧𑀦𑀸𑀯𑀸𑀭𑁄𑀢𑀺 𑀬𑀣𑀸𑀭𑀤𑁆𑀥𑀸𑀬 𑀤𑁂𑀲𑀦𑀸𑀬 𑀦𑀺𑀕𑀫𑀦𑀯𑀸𑀭𑁄.

𑁨𑁯𑁭. 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 𑀬𑁆𑀯𑀸𑀬𑀁 ‘‘𑀢𑀁 𑀧𑀦𑁂𑀢’’𑀦𑁆𑀢𑀺𑀆𑀤𑀺𑀦𑀸 𑀅𑀢𑁆𑀣𑀦𑀬𑁄 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀁 𑀯𑀺𑀪𑀸𑀯𑀺𑀢𑁄𑀢𑀺 𑀅𑀢𑀺𑀤𑀺𑀲𑀢𑀺, 𑀲𑁆𑀯𑀸𑀬𑀁 𑀅𑀢𑀺𑀤𑁂𑀲𑁄 𑀧𑀬𑁄𑀚𑀦𑀯𑀲𑁂𑀦 𑀦𑀯𑀲𑀼𑀧𑀺 𑀅𑀦𑀼𑀲𑁆𑀲𑀢𑀻𑀲𑀼 𑀲𑀸𑀥𑀸𑀭𑀡𑀯𑀲𑁂𑀦 𑀯𑀼𑀢𑁆𑀢𑁄𑀧𑀺 𑀆𑀦𑀸𑀧𑀸𑀦𑀲𑁆𑀲𑀢𑀺𑀆𑀤𑀻𑀲𑀼 𑀢𑀻𑀲𑀼 𑀯𑀺𑀧𑀲𑁆𑀲𑀦𑀢𑁆𑀣𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀇𑀫𑀺𑀦𑀸 𑀅𑀧𑀯𑀸𑀤𑁂𑀦 𑀦𑀺𑀯𑀢𑁆𑀢𑀺𑀢𑁄𑀢𑀺 𑀢𑀸𑀲𑀁 𑀏𑀓𑀧𑁆𑀧𑀬𑁄𑀚𑀦𑀢𑀸𑀯 𑀤𑀝𑁆𑀞𑀩𑁆𑀩𑀸. 𑀥𑀫𑁆𑀫𑁂 𑀅𑀦𑀼𑀲𑁆𑀲𑀢𑀺 𑀥𑀫𑁆𑀫𑀸𑀦𑀼𑀲𑁆𑀲𑀢𑀻𑀢𑀺 𑀲𑀫𑀸𑀲𑀧𑀤𑀯𑀺𑀪𑀸𑀕𑀤𑀲𑁆𑀲𑀦𑀫𑁆𑀧𑀺 𑀯𑀘𑀦𑀢𑁆𑀣𑀤𑀲𑁆𑀲𑀦𑀧𑀓𑁆𑀔𑀺𑀓𑀫𑁂𑀯𑀸𑀢𑀺 𑀆𑀳 𑁋 ‘‘𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄’’𑀢𑀺. 𑀥𑀫𑁆𑀫𑀁 𑀆𑀭𑀩𑁆𑀪𑀸𑀢𑀺 𑀳𑀺 𑀥𑀫𑁆𑀫𑀲𑁆𑀲 𑀅𑀦𑀼𑀲𑁆𑀲𑀢𑀺𑀬𑀸 𑀯𑀺𑀲𑀬𑀪𑀸𑀯𑀤𑀲𑁆𑀲𑀦𑀫𑁂𑀢𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀲𑀻𑀮𑀁 𑀆𑀭𑀩𑁆𑀪𑀸𑀢𑀺 𑀅𑀢𑁆𑀢𑀦𑁄 𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀆𑀭𑀩𑁆𑀪. 𑀘𑀸𑀕𑀁 𑀆𑀭𑀩𑁆𑀪𑀸𑀢𑀺 𑀅𑀢𑁆𑀢𑀦𑁄 𑀘𑀸𑀕𑀕𑀼𑀡𑀁 𑀆𑀭𑀩𑁆𑀪. 𑀤𑁂𑀯𑀢𑀸 𑀆𑀭𑀩𑁆𑀪𑀸𑀢𑀺 𑀏𑀢𑁆𑀣 𑀤𑁂𑀯𑀢𑀸𑀕𑀼𑀡𑀲𑀤𑀺𑀲𑀢𑀸𑀬 𑀅𑀢𑁆𑀢𑀦𑁄 𑀲𑀤𑁆𑀥𑀸𑀲𑀻𑀮𑀲𑀼𑀢𑀘𑀸𑀕𑀧𑀜𑁆𑀜𑀸𑀲𑀼 𑀤𑁂𑀯𑀢𑀸𑀲𑀫𑀜𑁆𑀜𑀸. 𑀪𑀯𑀢𑀺 𑀳𑀺 𑀢𑀁𑀲𑀤𑀺𑀲𑁂𑀧𑀺 𑀢𑀩𑁆𑀩𑁄𑀳𑀸𑀭𑁄 𑀬𑀣𑀸 ‘‘𑀢𑀸𑀦𑀺 𑀑𑀲𑀥𑀸𑀦𑀺, 𑀏𑀲 𑀩𑁆𑀭𑀳𑁆𑀫𑀤𑀢𑁆𑀢𑁄’’𑀢𑀺 𑀘. 𑀢𑁂𑀦𑀸𑀳 𑁋 ‘‘𑀤𑁂𑀯𑀢𑀸 𑀲𑀓𑁆𑀔𑀺𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀤𑁂𑀯𑀢𑀸 𑀲𑀓𑁆𑀔𑀺𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸𑀢𑀺 ‘‘𑀬𑀣𑀸𑀭𑀽𑀧𑀸𑀬 𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑀸 𑀢𑀸 𑀤𑁂𑀯𑀢𑀸 𑀇𑀢𑁄 𑀘𑀼𑀢𑀸 𑀢𑀢𑁆𑀣 𑀉𑀧𑀧𑀦𑁆𑀦𑀸, 𑀫𑀬𑁆𑀳𑀫𑁆𑀧𑀺 𑀢𑀣𑀸𑀭𑀽𑀧𑀸 𑀲𑀤𑁆𑀥𑀸 𑀲𑀁𑀯𑀺𑀚𑁆𑀚𑀢𑀺. 𑀬𑀣𑀸𑀭𑀽𑀧𑁂𑀦 𑀲𑀻𑀮𑁂𑀦, 𑀬𑀣𑀸𑀭𑀽𑀧𑁂𑀦 ¶ 𑀲𑀼𑀢𑁂𑀦, 𑀬𑀣𑀸𑀭𑀽𑀧𑁂𑀦 𑀘𑀸𑀕𑁂𑀦, 𑀬𑀣𑀸𑀭𑀽𑀧𑀸𑀬 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀸 𑀢𑀸 𑀤𑁂𑀯𑀢𑀸 𑀇𑀢𑁄 𑀘𑀼𑀢𑀸 𑀢𑀢𑁆𑀣 𑀉𑀧𑀧𑀦𑁆𑀦𑀸, 𑀫𑀬𑁆𑀳𑀫𑁆𑀧𑀺 𑀢𑀣𑀸𑀭𑀽𑀧𑀸 𑀧𑀜𑁆𑀜𑀸 𑀲𑀁𑀯𑀺𑀚𑁆𑀚𑀢𑀻’’𑀢𑀺 𑀏𑀯𑀁 𑀤𑁂𑀯𑀢𑀸 𑀲𑀓𑁆𑀔𑀺𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸. 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀦𑀺𑀫𑀺𑀢𑁆𑀢𑀁 𑀦𑀸𑀫 𑀢𑀢𑁆𑀣 𑀮𑀤𑁆𑀥𑀩𑁆𑀩𑀧𑁆𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁. 𑀕𑀢𑀸𑀢𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀉𑀧𑀕𑀢𑀸 𑀧𑀯𑀢𑁆𑀢𑀸.

𑀉𑀧𑀲𑀫𑁆𑀫𑀢𑀺 ¶ 𑀏𑀢𑁆𑀣 𑀤𑀼𑀓𑁆𑀔𑀦𑁆𑀢𑀺 𑀉𑀧𑀲𑀫𑁄, 𑀦𑀺𑀩𑁆𑀩𑀸𑀦𑀁. 𑀅𑀘𑁆𑀘𑀦𑁆𑀢𑀫𑁂𑀯 𑀏𑀢𑁆𑀣 𑀉𑀧𑀲𑀫𑁆𑀫𑀢𑀺 𑀯𑀝𑁆𑀝𑀢𑁆𑀢𑀬𑀦𑁆𑀢𑀺 𑀅𑀘𑁆𑀘𑀦𑁆𑀢𑀽𑀧𑀲𑀫𑁄, 𑀦𑀺𑀩𑁆𑀩𑀸𑀦𑀫𑁂𑀯. 𑀔𑀺𑀡𑁄𑀢𑀺 𑀔𑁂𑀧𑁂𑀢𑀺 𑀓𑀺𑀮𑁂𑀲𑁂𑀢𑀺 𑀔𑀬𑁄, 𑀅𑀭𑀺𑀬𑀫𑀕𑁆𑀕𑁄. 𑀢𑁂 𑀏𑀯 𑀉𑀧𑀲𑀫𑁂𑀢𑀻𑀢𑀺 𑀉𑀧𑀲𑀫𑁄, 𑀅𑀭𑀺𑀬𑀫𑀕𑁆𑀕𑁄 𑀏𑀯. 𑀔𑀬𑁄 𑀘 𑀲𑁄 𑀉𑀧𑀲𑀫𑁄 𑀘𑀸𑀢𑀺 𑀔𑀬𑀽𑀧𑀲𑀫𑁄. 𑀢𑀢𑁆𑀭𑀘𑀸𑀬𑀁 𑀉𑀧𑀲𑀫𑁄 𑀥𑀫𑁆𑀫𑁄 𑀏𑀯𑀸𑀢𑀺 𑀥𑀫𑁆𑀫𑀸𑀦𑀼𑀲𑁆𑀲𑀢𑀺𑀬𑀸 𑀉𑀧𑀲𑀫𑀸𑀦𑀼𑀲𑁆𑀲𑀢𑀺 𑀏𑀓𑀲𑀗𑁆𑀕𑀳𑁄𑀢𑀺? 𑀲𑀘𑁆𑀘𑀁 𑀏𑀓𑀲𑀗𑁆𑀕𑀳𑁄 𑀥𑀫𑁆𑀫𑀪𑀸𑀯𑀲𑀸𑀫𑀜𑁆𑀜𑁂 𑀅𑀥𑀺𑀧𑁆𑀧𑁂𑀢𑁂, 𑀲𑀗𑁆𑀔𑀢𑀥𑀫𑁆𑀫𑀢𑁄 𑀧𑀦 𑀅𑀲𑀗𑁆𑀔𑀢𑀥𑀫𑁆𑀫𑁄 𑀲𑀸𑀢𑀺𑀲𑀬𑁄 𑀉𑀴𑀸𑀭𑀢𑀫𑀧𑀡𑀻𑀢𑀢𑀫𑀪𑀸𑀯𑀢𑁄𑀢𑀺 𑀤𑀻𑀧𑁂𑀢𑀼𑀁 𑀯𑀺𑀲𑀼𑀁 𑀦𑀻𑀳𑀭𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀇𑀫𑀫𑁂𑀯 𑀳𑀺 𑀯𑀺𑀲𑁂𑀲𑀁 𑀲𑀦𑁆𑀥𑀸𑀬 𑀪𑀕𑀯𑀸 𑁋 ‘‘𑀥𑀫𑁆𑀫𑀸𑀦𑀼𑀲𑁆𑀲𑀢𑀻’’𑀢𑀺 𑀯𑀢𑁆𑀯𑀸𑀧𑀺 𑀉𑀧𑀲𑀫𑀸𑀦𑀼𑀲𑁆𑀲𑀢𑀺𑀁 𑀅𑀯𑁄𑀘 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲 𑀲𑀯𑀺𑀲𑁂𑀲𑀁 𑀲𑀦𑁆𑀢𑀧𑀡𑀻𑀢𑀪𑀸𑀯𑁂𑀦 𑀉𑀧𑀝𑁆𑀞𑀸𑀦𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀇𑀥 𑀔𑀬𑀽𑀧𑀲𑀫𑀕𑁆𑀕𑀳𑀡𑀫𑁆𑀧𑀺 𑀲𑀫𑀢𑁆𑀣𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀣𑁂𑀯 𑀳𑀺 𑀲𑀫𑀸𑀦𑁂𑀧𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀪𑀸𑀯𑁂 ‘‘𑀬𑀸𑀯𑀢𑀸, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑀗𑁆𑀔𑀢𑀸 𑀯𑀸 𑀅𑀲𑀗𑁆𑀔𑀢𑀸 𑀯𑀸, 𑀯𑀺𑀭𑀸𑀕𑁄 𑀢𑁂𑀲𑀁 𑀅𑀕𑁆𑀕𑀫𑀓𑁆𑀔𑀸𑀬𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀇𑀢𑀺𑀯𑀼. 𑁯𑁦) 𑀫𑀕𑁆𑀕𑀨𑀮𑀥𑀫𑁆𑀫𑁂𑀳𑀺 𑀦𑀺𑀩𑁆𑀩𑀸𑀦𑀥𑀫𑁆𑀫𑁄 𑀲𑀸𑀢𑀺𑀲𑀬𑁄, 𑀏𑀯𑀁 𑀨𑀮𑀥𑀫𑁆𑀫𑀢𑁄 𑀫𑀕𑁆𑀕𑀥𑀫𑁆𑀫𑁄 𑀓𑀺𑀮𑁂𑀲𑀧𑁆𑀧𑀳𑀸𑀦𑁂𑀦 𑀅𑀘𑁆𑀙𑀭𑀺𑀬𑀥𑀫𑁆𑀫𑀪𑀸𑀯𑀢𑁄, 𑀢𑀲𑁆𑀫𑀸 𑀅𑀘𑁆𑀘𑀦𑁆𑀢𑀽𑀧𑀲𑀫𑁂𑀦 𑀲𑀤𑁆𑀥𑀺𑀁 𑀔𑀬𑀽𑀧𑀲𑀫𑁄𑀧𑀺 𑀕𑀳𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀯𑀺𑀧𑀲𑁆𑀲𑀦𑀢𑁆𑀣𑀸𑀦𑁂𑀯 𑀳𑁄𑀦𑁆𑀢𑀻𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺? ‘‘𑀏𑀓𑀦𑁆𑀢𑀦𑀺𑀩𑁆𑀩𑀺𑀤𑀸𑀬𑀸𑀢𑀺𑀆𑀤𑀺𑀯𑀘𑀦𑀢𑁄’’𑀢𑀺 𑀓𑁂𑀘𑀺, 𑀢𑀁 𑀅𑀓𑀸𑀭𑀡𑀁 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀻𑀲𑀼𑀧𑀺 𑀢𑀣𑀸 𑀤𑁂𑀲𑀦𑀸𑀬 𑀆𑀕𑀢𑀢𑁆𑀢𑀸. 𑀬𑀣𑀸 𑀧𑀦 𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀆𑀤𑀻𑀦𑀺 𑀓𑀫𑁆𑀫𑀝𑁆𑀞𑀸𑀦𑀸𑀦𑀺 𑀯𑀺𑀧𑀲𑁆𑀲𑀦𑀢𑁆𑀣𑀸𑀦𑀺 𑀳𑁄𑀦𑁆𑀢𑀺, 𑀦𑀺𑀫𑀺𑀢𑁆𑀢𑀲𑀫𑁆𑀧𑀳𑀁𑀲𑀦𑀢𑁆𑀣𑀸𑀦𑀺𑀧𑀺 𑀳𑁄𑀦𑁆𑀢𑀺, 𑀦 𑀏𑀯𑀫𑁂𑀢𑀸𑀦𑀺, 𑀏𑀢𑀸𑀦𑀺 𑀧𑀦 𑀯𑀺𑀧𑀲𑁆𑀲𑀦𑀢𑁆𑀣𑀸𑀦𑁂𑀯𑀸𑀢𑀺 𑀢𑀣𑀸 𑀯𑀼𑀢𑁆𑀢𑀁.

𑀧𑀞𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬. 𑀏𑀓𑀥𑀫𑁆𑀫𑀧𑀸𑀴𑀺

(𑁧𑁬) 𑁨. 𑀏𑀓𑀥𑀫𑁆𑀫𑀧𑀸𑀴𑀺-𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸

𑁨𑁯𑁮. 𑀫𑀺𑀘𑁆𑀙𑀸 ¶ 𑀧𑀲𑁆𑀲𑀢𑀺 𑀢𑀸𑀬, 𑀲𑀬𑀁 𑀯𑀸 𑀫𑀺𑀘𑁆𑀙𑀸 𑀧𑀲𑁆𑀲𑀢𑀺, 𑀫𑀺𑀘𑁆𑀙𑀸𑀤𑀲𑁆𑀲𑀦𑀫𑁂𑀯 𑀯𑀸 𑀢𑀦𑁆𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺, 𑀬𑀁 𑀓𑀺𑀜𑁆𑀘𑀺 𑀯𑀺𑀧𑀭𑀻𑀢𑀤𑀲𑁆𑀲𑀦𑀁. 𑀢𑁂𑀦𑀸𑀳 𑁋 ‘‘𑀤𑁆𑀯𑀸𑀲𑀝𑁆𑀞𑀺𑀯𑀺𑀥𑀸𑀬𑀸’’𑀢𑀺𑀆𑀤𑀺 ¶ . 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀏𑀢𑀲𑁆𑀲𑀸𑀢𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄. 𑀢𑀲𑁆𑀲 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲.

𑁨𑁯𑁯. 𑀲𑀫𑁆𑀫𑀸 𑀧𑀲𑁆𑀲𑀢𑀺 𑀢𑀸𑀬, 𑀲𑀬𑀁 𑀯𑀸 𑀲𑀫𑁆𑀫𑀸 𑀧𑀲𑁆𑀲𑀢𑀺, 𑀲𑀫𑁆𑀫𑀸𑀤𑀲𑁆𑀲𑀦𑀫𑀢𑁆𑀢𑀫𑁂𑀯 𑀯𑀸 𑀢𑀦𑁆𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀧𑀜𑁆𑀘𑀯𑀺𑀥𑀸𑀬𑀸𑀢𑀺 𑀓𑀫𑁆𑀫𑀲𑁆𑀲𑀓𑀢𑀸𑀛𑀸𑀦𑀯𑀺𑀧𑀲𑁆𑀲𑀦𑀸𑀫𑀕𑁆𑀕𑀨𑀮𑀯𑀲𑁂𑀦 𑀧𑀜𑁆𑀘𑀯𑀺𑀥𑀸𑀬. 𑀢𑀢𑁆𑀣 𑀛𑀸𑀦𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀁 𑀜𑀸𑀡𑀁 𑀛𑀸𑀦𑀲𑀫𑁆𑀫𑀸𑀤𑀺𑀝𑁆𑀞𑀺, 𑀯𑀺𑀧𑀲𑁆𑀲𑀦𑀸𑀜𑀸𑀡𑀁 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺.

𑁩𑁦𑁨. 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 ‘‘𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑁄 𑀅𑀦𑀼𑀧𑀸𑀬𑀫𑀦𑀲𑀺𑀓𑀸𑀭𑁄.

𑁩𑁦𑁩. ‘‘𑀅𑀦𑀺𑀘𑁆𑀘’’𑀦𑁆𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑁄 𑀉𑀧𑀸𑀬𑀫𑀦𑀲𑀺𑀓𑀸𑀭𑁄. 𑀬𑀸𑀯 𑀦𑀺𑀬𑀸𑀫𑁄𑀓𑁆𑀓𑀫𑀦𑀸𑀢𑀺 𑀬𑀸𑀯 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑁄𑀓𑁆𑀓𑀫𑀦𑀸. 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑁄𑀓𑁆𑀓𑀫𑀦𑀦𑀬𑁄 𑀧𑀦 𑀲𑀸𑀫𑀜𑁆𑀜𑀨𑀮𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 𑀢𑀝𑁆𑀝𑀻𑀓𑀸𑀬 𑀘 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄.

𑁩𑁦𑁪. 𑀅𑀬𑀁 𑀢𑀺𑀯𑀺𑀥𑀸 𑀲𑀕𑁆𑀕𑀸𑀯𑀭𑀡𑀸 𑀘𑁂𑀯 𑀳𑁄𑀢𑀻𑀢𑀺 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀺𑀬𑀸 𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀲𑀕𑁆𑀕𑀸𑀯𑀭𑀡𑀸𑀬 𑀳𑁄𑀦𑁆𑀢𑀺𑀬𑀸 𑀫𑀕𑁆𑀕𑀯𑀺𑀩𑀦𑁆𑀥𑀓𑀪𑀸𑀯𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑁋 ‘‘𑀫𑀕𑁆𑀕𑀸𑀯𑀭𑀡𑀸 𑀘𑀸’’𑀢𑀺. ‘‘𑀲𑀲𑁆𑀲𑀢𑁄 𑀮𑁄𑀓𑁄’’𑀢𑀺𑀆𑀤𑀺𑀓𑀸 𑀤𑀲𑀯𑀢𑁆𑀣𑀼𑀓𑀸 𑀅𑀦𑁆𑀢𑀕𑁆𑀕𑀸𑀳𑀺𑀓𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺. 𑀫𑀕𑁆𑀕𑀸𑀯𑀭𑀡𑀸𑀯 𑀳𑁄𑀢𑀺 𑀯𑀺𑀧𑀭𑀻𑀢𑀤𑀲𑁆𑀲𑀦𑀪𑀸𑀯𑀢𑁄, 𑀦 𑀲𑀕𑁆𑀕𑀸𑀯𑀭𑀡𑀸 𑀅𑀓𑀫𑁆𑀫𑀧𑀣𑀧𑀢𑁆𑀢𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀁 𑀧𑀦 𑀯𑀺𑀥𑀸𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀯𑀺𑀧𑀭𑀻𑀢𑀤𑀲𑁆𑀲𑀦𑀜𑁆𑀘 𑀦 𑀫𑀕𑁆𑀕𑀸𑀯𑀭𑀡𑀜𑁆𑀘𑀸𑀢𑀺 𑀯𑀺𑀭𑀼𑀤𑁆𑀥𑀫𑁂𑀢𑀁 𑀉𑀤𑁆𑀥𑀫𑁆𑀫𑀪𑀸𑀯𑀢𑁄. 𑀢𑀣𑀸 𑀳𑀺 𑀲𑀢𑀺 𑀅𑀧𑁆𑀧𑀳𑀻𑀦𑀸𑀬 𑀏𑀯 𑀲𑀓𑁆𑀓𑀸𑀬𑀤𑀺𑀝𑁆𑀞𑀺𑀬𑀸 𑀫𑀕𑁆𑀕𑀸𑀥𑀺𑀕𑀫𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀬𑀣𑀸𑀯𑀼𑀢𑁆𑀢𑀯𑀺𑀥𑀸𑀦𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸. ‘‘𑀦 𑀲𑀕𑁆𑀕𑀸𑀯𑀭𑀡𑀸’’𑀢𑀺 𑀲𑀕𑁆𑀕𑀽𑀧𑀧𑀢𑁆𑀢𑀺𑀬𑀸 𑀅𑀯𑀺𑀩𑀦𑁆𑀥𑀓𑀢𑁆𑀢𑀁 𑀯𑀤𑀦𑁆𑀢𑁂𑀳𑀺 𑀤𑀺𑀝𑁆𑀞𑀺𑀬𑀸 𑀲𑀕𑁆𑀕𑀸𑀯𑀳𑀢𑀸𑀧𑀺 𑀦𑀸𑀫 𑀅𑀦𑀼𑀜𑁆𑀜𑀸𑀢𑀸 𑀳𑁄𑀢𑀻𑀢𑀺 𑀢𑀁 𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀦𑁆𑀢𑁂𑀦 ‘‘𑀤𑀺𑀝𑁆𑀞𑀺 𑀦𑀸𑀫 𑀲𑀕𑁆𑀕𑀁 𑀉𑀧𑀦𑁂𑀢𑀼𑀁 𑀲𑀫𑀢𑁆𑀣𑀸 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸? 𑀏𑀓𑀦𑁆𑀢𑀕𑀭𑀼𑀢𑀭𑀲𑀸𑀯𑀚𑁆𑀚𑀪𑀸𑀯𑀢𑁄. 𑀢𑁂𑀦𑀸𑀳 𑁋 ‘‘𑀏𑀓𑀦𑁆𑀢𑀁 𑀦𑀺𑀭𑀬𑀲𑁆𑀫𑀺𑀁𑀬𑁂𑀯 𑀦𑀺𑀫𑀼𑀚𑁆𑀚𑀸𑀧𑁂𑀢𑀻’’𑀢𑀺𑀆𑀤𑀺.

𑁩𑁦𑁫. 𑀯𑀝𑁆𑀝𑀁 ¶ 𑀯𑀺𑀤𑁆𑀥𑀁𑀲𑁂𑀢𑀻𑀢𑀺 𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺 𑀓𑀺𑀮𑁂𑀲𑀯𑀝𑁆𑀝𑀁 𑀓𑀫𑁆𑀫𑀯𑀝𑁆𑀝𑀜𑁆𑀘 𑀯𑀺𑀤𑁆𑀥𑀁𑀲𑁂𑀢𑀺. 𑀯𑀺𑀧𑀸𑀓𑀯𑀝𑁆𑀝𑀁 𑀓𑀸 𑀦𑀼 𑀯𑀺𑀤𑁆𑀥𑀁𑀲𑁂𑀢𑀺 𑀦𑀸𑀫. 𑀏𑀯𑀁 𑀧𑀦 𑀅𑀢𑁆𑀢𑀦𑁄 𑀓𑀸𑀭𑀡𑁂𑀦 𑀯𑀺𑀤𑁆𑀥𑀲𑁆𑀢𑀪𑀯𑀁 𑀨𑀮𑀲𑀫𑁆𑀫𑀸𑀤𑀺𑀝𑁆𑀞𑀺 𑀧𑀝𑀺𑀩𑀸𑀳𑀢𑀻𑀢𑀺 𑀯𑀼𑀢𑁆𑀢𑀁 𑀅𑀯𑀲𑀭𑀤𑀸𑀦𑀢𑁄. 𑀇𑀘𑁆𑀘𑁂𑀢𑀁 𑀓𑀼𑀲𑀮𑀦𑁆𑀢𑀺 𑀅𑀭𑀳𑀢𑁆𑀢𑀁 𑀧𑀸𑀧𑁂𑀢𑀼𑀁 𑀲𑀘𑁂 𑀲𑀓𑁆𑀓𑁄𑀢𑀺, 𑀏𑀯𑀫𑁂𑀢𑀁 𑀯𑀺𑀧𑀲𑁆𑀲𑀦𑀸𑀬 𑀧𑀝𑀺𑀲𑀦𑁆𑀥𑀺𑀅𑀦𑀸𑀓𑀟𑁆𑀠𑀦𑀁 ¶ 𑀓𑀼𑀲𑀮𑀁 𑀅𑀦𑀯𑀚𑁆𑀚𑀁. 𑀲𑀢𑁆𑀢 𑀪𑀯𑁂 𑀤𑁂𑀢𑀻𑀢𑀺 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀧𑀘𑁆𑀘𑀬𑀪𑀽𑀢𑀸 𑀯𑀺𑀧𑀲𑁆𑀲𑀦𑀸𑀲𑀫𑁆𑀫𑀸𑀤𑀺𑀝𑁆𑀞𑀺 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀢𑁆𑀢 𑀪𑀯𑁂 𑀤𑁂𑀢𑀺. 𑀏𑀯𑀫𑀬𑀦𑁆𑀢𑀺 𑀧𑀜𑁆𑀘𑀯𑀺𑀥𑀫𑁆𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑁋 ‘‘𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀓𑀣𑀺𑀢𑀸’’𑀢𑀺. 𑀇𑀫𑀲𑁆𑀫𑀺𑀁 𑀧𑀦𑀢𑁆𑀣𑁂𑀢𑀺 ‘‘𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀁 𑀏𑀓𑀥𑀫𑁆𑀫𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂 𑀕𑀢𑀺𑀫𑀕𑁆𑀕𑀲𑀗𑁆𑀔𑀸𑀢𑁂 𑀅𑀢𑁆𑀣𑁂. ‘‘𑀲𑀼𑀕𑀢𑀺𑀁 𑀲𑀕𑁆𑀕𑀁 𑀮𑁄𑀓𑀁 𑀉𑀧𑀧𑀚𑁆𑀚𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀮𑁄𑀓𑀺𑀓𑀸 𑀪𑀯𑀦𑀺𑀧𑁆𑀨𑀸𑀤𑀺𑀓𑀸𑀯 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁.

𑁩𑁦𑁬. 𑀬𑀣𑀸𑀤𑀺𑀝𑁆𑀞𑀻𑀢𑀺 𑀅𑀢𑁆𑀣𑀩𑁆𑀬𑀸𑀧𑀦𑀺𑀘𑁆𑀙𑀸𑀬𑀁 𑀬𑀣𑀸-𑀲𑀤𑁆𑀤𑁄, 𑀢𑁂𑀦 𑀉𑀢𑁆𑀢𑀭𑀧𑀤𑀢𑁆𑀣𑀧𑁆𑀧𑀥𑀸𑀦𑁄 𑀲𑀫𑀸𑀲𑁄𑀢𑀺 𑀆𑀳 𑁋 ‘‘𑀬𑀸 𑀬𑀸 𑀤𑀺𑀝𑁆𑀞𑀻’’𑀢𑀺. 𑀢𑀲𑁆𑀲𑀸 𑀢𑀲𑁆𑀲𑀸 𑀅𑀦𑀼𑀭𑀽𑀧𑀦𑁆𑀢𑀺 𑀢𑀁𑀢𑀁𑀤𑀺𑀝𑁆𑀞𑀺𑀅𑀦𑀼𑀭𑀽𑀧𑀦𑁆𑀢𑀺 𑀅𑀢𑁆𑀣𑁄. 𑀲𑀫𑀢𑁆𑀢𑀦𑁆𑀢𑀺 𑀅𑀦𑀯𑀲𑁂𑀲𑀁. 𑀢𑁂𑀦𑀸𑀳 𑁋 ‘‘𑀧𑀭𑀺𑀧𑀼𑀡𑁆𑀡’’𑀦𑁆𑀢𑀺. 𑀲𑀫𑀸𑀤𑀺𑀦𑁆𑀦𑀦𑁆𑀢𑀺 𑀆𑀤𑀺𑀫𑀚𑁆𑀛𑀧𑀭𑀺𑀬𑁄𑀲𑀸𑀦𑁂𑀲𑀼 𑀲𑀫𑀁 𑀏𑀓𑀲𑀤𑀺𑀲𑀁 𑀓𑀢𑁆𑀯𑀸 𑀆𑀤𑀺𑀦𑁆𑀦𑀁 𑀕𑀳𑀺𑀢𑀁 𑀅𑀦𑀺𑀲𑁆𑀲𑀝𑁆𑀞𑀁. 𑀢𑀤𑁂𑀢𑀦𑁆𑀢𑀺 𑀬𑀤𑁂𑀢𑀁 ‘‘𑀬𑀜𑁆𑀘𑁂𑀯 𑀓𑀸𑀬𑀓𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀁, 𑀢𑀤𑁂𑀢𑀁 𑀓𑀸𑀬𑀓𑀫𑁆𑀫𑀁. 𑀬𑀣𑀸𑀤𑀺𑀝𑁆𑀞𑀺𑀬𑀁 𑀞𑀺𑀢𑀓𑀸𑀬𑀓𑀫𑁆𑀫𑀦𑁆𑀢𑀺 𑀬𑀸 𑀧𑀦 𑀤𑀺𑀝𑁆𑀞𑀺 ‘‘𑀦𑀢𑁆𑀣𑀺 𑀢𑀢𑁄𑀦𑀺𑀤𑀸𑀦𑀁 𑀧𑀸𑀧’’𑀦𑁆𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀸, 𑀢𑀲𑁆𑀲𑀁 𑀤𑀺𑀝𑁆𑀞𑀺𑀬𑀁 𑀞𑀺𑀢𑀓𑀲𑁆𑀲 𑀞𑀺𑀢𑀫𑀢𑁆𑀢𑀲𑁆𑀲 𑀅𑀦𑀺𑀲𑁆𑀲𑀝𑁆𑀞𑀲𑁆𑀲 𑀢𑀁𑀤𑀺𑀝𑁆𑀞𑀺𑀓𑀲𑁆𑀲 𑀓𑀸𑀬𑀓𑀫𑁆𑀫𑀁. 𑀤𑀺𑀝𑁆𑀞𑀺𑀲𑀳𑀚𑀸𑀢𑀁 𑀓𑀸𑀬𑀓𑀫𑁆𑀫𑀦𑁆𑀢𑀺 𑀢𑀲𑁆𑀲 𑀬𑀣𑀸𑀤𑀺𑀝𑁆𑀞𑀺𑀓𑀲𑁆𑀲 𑀧𑀭𑁂𑀲𑀁 𑀳𑀢𑁆𑀣𑀫𑀼𑀤𑁆𑀤𑀸𑀤𑀺𑀦𑀸 𑀯𑀺𑀜𑁆𑀜𑀸𑀧𑀦𑀓𑀸𑀮𑁂 𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑀳𑀚𑀸𑀢𑀁 𑀓𑀸𑀬𑀓𑀫𑁆𑀫𑀁. 𑀦 𑀘𑁂𑀢𑁆𑀣 𑀯𑀘𑀻𑀓𑀫𑁆𑀫𑀸𑀲𑀗𑁆𑀓𑀸 𑀉𑀧𑁆𑀧𑀸𑀤𑁂𑀢𑀩𑁆𑀩𑀸 𑀧𑀸𑀡𑀖𑀸𑀢𑀸𑀤𑀻𑀦𑀁𑀬𑁂𑀯 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀤𑀺𑀝𑁆𑀞𑀸𑀦𑀼𑀮𑁄𑀫𑀺𑀓𑀁 𑀓𑀸𑀬𑀓𑀫𑁆𑀫𑀦𑁆𑀢𑀺 𑀬𑀣𑀸 𑀧𑀭𑁂𑀲𑀁 𑀧𑀸𑀓𑀝𑀁 𑀳𑁄𑀢𑀺, 𑀏𑀯𑀁 𑀤𑀺𑀝𑁆𑀞𑀺𑀬𑀸 𑀅𑀦𑀼𑀮𑁄𑀫𑀺𑀓𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀢𑀁 𑀓𑀸𑀬𑀓𑀫𑁆𑀫𑀁. 𑀢𑁂𑀦𑀸𑀳 𑁋 ‘‘𑀲𑀫𑀸𑀤𑀺𑀦𑁆𑀦𑀁 𑀕𑀳𑀺𑀢𑀁 𑀧𑀭𑀸𑀫𑀝𑁆𑀞’’𑀦𑁆𑀢𑀺. 𑀢𑀢𑁆𑀣𑀸𑀢𑀺𑀆𑀤𑀺 𑀲𑀼𑀯𑀺𑀜𑁆𑀜𑁂𑀬𑁆𑀬𑀫𑁂𑀯. 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑀸𑀬 𑀤𑀺𑀝𑁆𑀞𑀺𑀬𑀸 𑀞𑀺𑀢𑀯𑀘𑀻𑀓𑀫𑁆𑀫𑀁, 𑀤𑀺𑀝𑁆𑀞𑀺𑀲𑀳𑀚𑀸𑀢𑀁 𑀯𑀘𑀻𑀓𑀫𑁆𑀫𑀁, 𑀤𑀺𑀝𑁆𑀞𑀸𑀦𑀼𑀮𑁄𑀫𑀺𑀓𑀁 𑀯𑀘𑀻𑀓𑀫𑁆𑀫𑀦𑁆𑀢𑀺 𑀢𑀺𑀯𑀺𑀥𑀁 𑀳𑁄𑀢𑀻𑀢𑀺 𑀏𑀯𑀫𑀸𑀤𑀺 𑀅𑀢𑀺𑀤𑀺𑀲𑀢𑀺. 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲𑀸𑀢𑀺 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲. ‘‘𑀬𑀸𑀬 𑀓𑀸𑀬𑀘𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑀲𑁆𑀲 𑀲𑀢𑁄’’𑀢𑀺 𑀅𑀧𑀭𑁂.

𑀤𑀺𑀝𑁆𑀞𑀺𑀲𑀳𑀚𑀸𑀢𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀬 𑀤𑀺𑀝𑁆𑀞𑀺𑀬𑀸 𑀲𑀳𑀚𑀸𑀢𑀸 𑀘𑁂𑀢𑀦𑀸. 𑀏𑀲 𑀦𑀬𑁄 𑀲𑁂𑀲𑀧𑀤𑁂𑀲𑀼𑀧𑀺. 𑀧𑀢𑁆𑀣𑀦𑀸𑀢𑀺 ‘‘𑀇𑀤𑀁 𑀦𑀸𑀫 𑀓𑀭𑁂𑀬𑁆𑀬’’𑀦𑁆𑀢𑀺 𑀢𑀡𑁆𑀳𑀸𑀧𑀢𑁆𑀣𑀦𑀸. 𑀘𑁂𑀢𑀦𑀸𑀧𑀢𑁆𑀣𑀦𑀸𑀦𑀁 𑀯𑀲𑁂𑀦𑀸𑀢𑀺 𑀬𑀣𑀸𑀯𑀼𑀢𑁆𑀢𑀤𑀺𑀝𑁆𑀞𑀺𑀕𑀢𑀦𑀺𑀲𑁆𑀲𑀺𑀢𑀘𑁂𑀢𑀲𑀺𑀓𑀦𑀺𑀓𑀸𑀫𑀦𑀸𑀦𑀁 𑀯𑀲𑁂𑀦. 𑀘𑀺𑀢𑁆𑀢𑀝𑁆𑀞𑀧𑀦𑀸𑀢𑀺 𑀘𑀺𑀢𑁆𑀢𑀲𑁆𑀲 𑀧𑀡𑀺𑀤𑀳𑀦𑀸. 𑀨𑀲𑁆𑀲𑀸𑀤𑀬𑁄𑀢𑀺 𑀘𑁂𑀢𑀦𑀸𑀤𑀺𑀝𑁆𑀞𑀺𑀢𑀡𑁆𑀳𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀸 𑀨𑀲𑁆𑀲𑀸𑀤𑀺𑀥𑀫𑁆𑀫𑀸. 𑀬𑀲𑁆𑀫𑀸 𑀤𑀺𑀝𑁆𑀞𑀺 𑀧𑀸𑀧𑀺𑀓𑀸, 𑀢𑀲𑁆𑀫𑀸 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀅𑀦𑀺𑀝𑁆𑀞𑀸𑀬…𑀧𑁂… 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀬𑁄𑀚𑀦𑀸. 𑀧𑀼𑀭𑀺𑀫𑀲𑁆𑀲𑁂𑀯𑀸𑀢𑀺 ¶ 𑀢𑀺𑀢𑁆𑀢𑀓𑀧𑀤𑀲𑁆𑀲𑁂𑀯 ¶ . 𑀢𑀺𑀢𑁆𑀢𑀓𑀁 𑀓𑀝𑀼𑀓𑀦𑁆𑀢𑀺 𑀘 𑀉𑀪𑀬𑀁 𑀇𑀥 𑀅𑀦𑀺𑀝𑁆𑀞𑀧𑀭𑀺𑀬𑀸𑀬𑀁 𑀤𑀝𑁆𑀞𑀩𑁆𑀩𑀁 ‘‘𑀧𑀘𑁆𑀙𑀸 𑀢𑁂 𑀓𑀝𑀼𑀓𑀁 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬.

𑀅𑀫𑁆𑀩𑁄𑀬𑀦𑁆𑀢𑀺 𑀅𑀫𑁆𑀩𑁄 𑀅𑀬𑀁. 𑀢𑀫𑁂𑀯 𑀧𑀽𑀚𑀦𑁆𑀢𑀺 𑀢𑀫𑁂𑀯 𑀧𑀼𑀩𑁆𑀩𑁂 𑀮𑀤𑁆𑀥𑀧𑀭𑀺𑀲𑀺𑀜𑁆𑀘𑀦𑀤𑀸𑀦𑀸𑀤𑀺𑀧𑀽𑀚𑀁. 𑀦𑀺𑀯𑁂𑀲𑀭𑁂𑀢𑀺 𑀧𑀯𑀺𑀲𑀺𑀁𑀲𑀼. 𑀅𑀲𑀸𑀢𑀲𑀦𑁆𑀦𑀺𑀯𑀸𑀲𑁂𑀦𑀸𑀢𑀺 𑀅𑀫𑀥𑀼𑀭𑀦𑀺𑀫𑁆𑀩𑀫𑀽𑀮𑀲𑀁𑀲𑀕𑁆𑀕𑁂𑀦.

𑀢𑀁 𑀧𑀦 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸…𑀧𑁂… 𑀯𑀼𑀢𑁆𑀢𑀦𑁆𑀢𑀺 𑀲𑀩𑁆𑀩𑀸𑀧𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀏𑀓𑀦𑁆𑀢𑀲𑀸𑀯𑀚𑁆𑀚𑀢𑁆𑀢𑀸 𑀅𑀦𑀺𑀝𑁆𑀞𑀸𑀬 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁. 𑀅𑀦𑀦𑁆𑀢𑀭𑀲𑀼𑀢𑁆𑀢𑁂𑀢𑀺 𑀤𑀲𑀫𑀲𑀼𑀢𑁆𑀢𑁂. 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸𑀦𑀻𑀢𑀺 𑀦𑀯𑀫𑀲𑀼𑀢𑁆𑀢𑁂 𑀯𑀺𑀬 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀘𑀺𑀢𑁆𑀢𑀝𑁆𑀞𑀧𑀦𑀸𑀯 𑀧𑀢𑁆𑀣𑀦𑀸𑀢𑀺 𑀏𑀢𑁆𑀣 𑀧𑀡𑀺𑀥𑀺 𑀘𑀸𑀢𑀺 𑀯𑀢𑁆𑀢𑀩𑁆𑀩𑀁.

𑀤𑀼𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬. 𑀏𑀓𑀥𑀫𑁆𑀫𑀧𑀸𑀴𑀺

(𑁧𑁬) 𑁩. 𑀏𑀓𑀥𑀫𑁆𑀫𑀧𑀸𑀴𑀺-𑀢𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸

𑁩𑁦𑁮. 𑀢𑀢𑀺𑀬𑀲𑁆𑀲 ¶ 𑀧𑀞𑀫𑁂 𑀅𑀬𑀸𑀣𑀸𑀯𑀤𑀺𑀝𑁆𑀞𑀺𑀓𑁄𑀢𑀺 𑀅𑀦𑀺𑀘𑁆𑀘𑀸𑀤𑀺𑀪𑀸𑀯𑁂𑀲𑀼 𑀥𑀫𑁆𑀫𑁂𑀲𑀼 𑀦𑀺𑀘𑁆𑀘𑀸𑀢𑀺𑀆𑀤𑀺𑀦𑀸 𑀉𑀧𑁆𑀧𑀦𑁆𑀦𑀤𑀺𑀝𑁆𑀞𑀺𑀓𑁄. 𑀢𑁂𑀦𑀸𑀳 𑁋 ‘‘𑀢𑀸𑀬𑁂𑀯 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸 𑀯𑀺𑀧𑀭𑀻𑀢𑀤𑀲𑁆𑀲𑀦𑁄’’𑀢𑀺 𑀲𑀤𑁆𑀥𑀫𑁆𑀫𑀸𑀢𑀺 𑀏𑀢𑁆𑀣 𑀲𑀦𑁆𑀢𑁄 𑀧𑀲𑀢𑁆𑀣𑁄 𑀲𑀼𑀦𑁆𑀤𑀭𑁄 𑀥𑀫𑁆𑀫𑁄, 𑀬𑁄 𑀫𑀦𑀼𑀲𑁆𑀲𑀥𑀫𑁆𑀫𑁄𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀢𑀢𑁄 𑀳𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄 𑀧𑀭𑀁 𑀯𑀼𑀝𑁆𑀞𑀸𑀧𑁂𑀬𑁆𑀬, 𑀦 𑀅𑀭𑀺𑀬𑀥𑀫𑁆𑀫𑀢𑁄. 𑀢𑁂𑀦𑀸𑀳 𑁋 ‘‘𑀤𑀲𑀓𑀼𑀲𑀮𑀓𑀫𑁆𑀫𑀧𑀣𑀥𑀫𑁆𑀫𑀢𑁄’’𑀢𑀺. 𑀏𑀯𑀭𑀽𑀧𑀸𑀢𑀺 𑀇𑀫𑀺𑀦𑀸 𑀧𑀸𑀣𑀺𑀓𑀧𑀼𑀢𑁆𑀢𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺.

𑁩𑁦𑁯. 𑀲𑀩𑁆𑀩𑀜𑁆𑀜𑀼𑀩𑁄𑀥𑀺𑀲𑀢𑁆𑀢𑁄𑀢𑀺 𑀲𑀩𑁆𑀩𑀜𑁆𑀜𑀼𑀪𑀸𑀕𑀻 𑀩𑁄𑀥𑀺𑀲𑀢𑁆𑀢𑁄. 𑀆𑀤𑀺-𑀲𑀤𑁆𑀤𑁂𑀦 𑀧𑀽𑀭𑀺𑀢𑀧𑀸𑀭𑀫𑀺𑀓𑀸 𑀧𑀘𑁆𑀘𑁂𑀓𑀩𑁄𑀥𑀺𑀲𑀢𑁆𑀢𑀸 𑀏𑀓𑀘𑁆𑀘𑀲𑀸𑀯𑀓𑀩𑁄𑀥𑀺𑀲𑀢𑁆𑀢𑀸 𑀘 𑀲𑀗𑁆𑀕𑀬𑁆𑀳𑀦𑁆𑀢𑀺.

𑁩𑁧𑁦. 𑀧𑀭𑀫𑀸𑀢𑀺 𑀫𑀳𑀸𑀲𑀸𑀯𑀚𑁆𑀚𑀪𑀸𑀯𑁂𑀦 𑀧𑀭𑀫𑀸, 𑀉𑀓𑁆𑀓𑀁𑀲𑀕𑀢𑀸𑀢𑀺 𑀅𑀢𑁆𑀣𑁄. 𑀢𑁂𑀲𑀦𑁆𑀢𑀺 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀦𑀁. 𑀧𑀭𑀺𑀘𑁆𑀙𑁂𑀤𑁄𑀢𑀺 𑀯𑀺𑀧𑀸𑀓𑀯𑀲𑁂𑀦 𑀧𑀭𑀺𑀬𑁄𑀲𑀸𑀦𑀁. 𑀯𑀝𑁆𑀝𑀲𑁆𑀲 𑀫𑀽𑀮𑀁, 𑀢𑀢𑁄 𑀢𑀁𑀲𑀫𑀗𑁆𑀕𑀻𑀧𑀼𑀕𑁆𑀕𑀮𑁄 𑀯𑀝𑁆𑀝𑀲𑁆𑀲 𑀔𑀸𑀡𑀽𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 𑁋 ‘‘𑀢𑀸𑀬𑀸’’𑀢𑀺𑀆𑀤𑀺. 𑀢𑀜𑁆𑀘𑁂 𑀕𑀸𑀳𑀁 𑀦 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀢𑀲𑁆𑀲 𑀧𑀼𑀦𑀧𑀺 𑀢𑀩𑁆𑀪𑀸𑀯𑀸𑀯𑀳𑀢𑁆𑀢𑀸 𑀯𑀼𑀢𑁆𑀢𑀁 𑁋 ‘‘𑀪𑀯𑀢𑁄 𑀯𑀼𑀝𑁆𑀞𑀸𑀦𑀁 𑀦𑀢𑁆𑀣𑀻’’𑀢𑀺, 𑀦 𑀧𑀦 𑀲𑀩𑁆𑀩𑀲𑁄 𑀯𑀼𑀝𑁆𑀞𑀸𑀦𑀲𑁆𑀲 𑀅𑀪𑀸𑀯𑀢𑁄. 𑀬𑀸𑀤𑀺𑀲𑁂 𑀳𑀺 𑀧𑀘𑁆𑀘𑀬𑁂 𑀧𑀝𑀺𑀘𑁆𑀘 𑀅𑀬𑀁 𑀢𑀁 𑀤𑀲𑁆𑀲𑀦𑀁 𑀑𑀓𑁆𑀓𑀦𑁆𑀢𑁄 𑀧𑀼𑀦 𑀓𑀤𑀸𑀘𑀺 𑀢𑀧𑁆𑀧𑀝𑀺𑀧𑀓𑁆𑀔𑁂 𑀧𑀘𑁆𑀘𑀬𑁂 𑀧𑀝𑀺𑀘𑁆𑀘 𑀢𑀢𑁄 𑀲𑀻𑀲𑀼𑀓𑁆𑀔𑀺𑀧𑀦𑀫𑀲𑁆𑀲 𑀦 𑀳𑁄𑀢𑀻𑀢𑀺 𑀦 ¶ 𑀯𑀢𑁆𑀢𑀩𑁆𑀩𑀁. 𑀅𑀓𑀼𑀲𑀮𑀜𑁆𑀳𑀺 𑀦𑀸𑀫𑁂𑀢𑀁 𑀅𑀩𑀮𑀁 𑀤𑀼𑀩𑁆𑀩𑀮𑀁, 𑀦 𑀓𑀼𑀲𑀮𑀁 𑀯𑀺𑀬 𑀫𑀳𑀸𑀩𑀮𑀁. 𑀅𑀜𑁆𑀜𑀣𑀸 𑀲𑀫𑁆𑀫𑀢𑁆𑀢𑀦𑀺𑀬𑀸𑀫𑁄 𑀯𑀺𑀬 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑁄𑀧𑀺 𑀅𑀘𑁆𑀘𑀦𑁆𑀢𑀺𑀓𑁄 𑀲𑀺𑀬𑀸, 𑀦 𑀘 𑀫𑀺𑀘𑁆𑀙𑀢𑁆𑀢𑀦𑀺𑀬𑀸𑀫𑁄 𑀅𑀘𑁆𑀘𑀦𑁆𑀢𑀺𑀓𑁄. 𑀢𑁂𑀦𑁂𑀯 𑀧𑀧𑀜𑁆𑀘𑀲𑀽𑀤𑀦𑀺𑀬𑀁 (𑀫. 𑀦𑀺. 𑀅𑀝𑁆𑀞. 𑁨.𑁧𑁦𑁦) 𑁋

‘‘𑀓𑀺𑀁 𑀧𑀦𑁂𑀲 𑀏𑀓𑀲𑁆𑀫𑀺𑀁𑀬𑁂𑀯 𑀅𑀢𑁆𑀢𑀪𑀸𑀯𑁂 𑀦𑀺𑀬𑀢𑁄 𑀳𑁄𑀢𑀺, 𑀉𑀤𑀸𑀳𑀼 𑀅𑀜𑁆𑀜𑀲𑁆𑀫𑀺𑀫𑁆𑀧𑀻𑀢𑀺? 𑀏𑀓𑀲𑁆𑀫𑀺𑀁𑀬𑁂𑀯 𑀦𑀺𑀬𑀢𑁄, 𑀆𑀲𑁂𑀯𑀦𑀯𑀲𑁂𑀦 𑀪𑀯𑀦𑁆𑀢𑀭𑁂𑀧𑀺 𑀢𑀁 𑀤𑀺𑀝𑁆𑀞𑀺𑀁 𑀭𑁄𑀘𑁂𑀢𑀺 𑀏𑀯𑀸’’𑀢𑀺 𑁋

𑀯𑀼𑀢𑁆𑀢𑀁. 𑀢𑀢𑁄𑀬𑁂𑀯 𑀘 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀫𑁆𑀧𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁭𑁦-𑁧𑁭𑁨) 𑀯𑀼𑀢𑁆𑀢𑀁 𑁋

‘‘𑀬𑁂 ¶ 𑀯𑀸 𑀧𑀦 𑀢𑁂𑀲𑀁 𑀮𑀤𑁆𑀥𑀺𑀁 𑀕𑀳𑁂𑀢𑁆𑀯𑀸 𑀭𑀢𑁆𑀢𑀺𑀝𑁆𑀞𑀸𑀦𑁂 𑀤𑀺𑀯𑀸𑀝𑁆𑀞𑀸𑀦𑁂 𑀦𑀺𑀲𑀺𑀦𑁆𑀦𑀸 𑀲𑀚𑁆𑀛𑀸𑀬𑀦𑁆𑀢𑀺 𑀯𑀻𑀫𑀁𑀲𑀦𑁆𑀢𑀺, 𑀢𑁂𑀲𑀁 ‘𑀓𑀭𑁄𑀢𑁄 𑀦 𑀓𑀭𑀻𑀬𑀢𑀺 𑀧𑀸𑀧𑀁, 𑀦𑀢𑁆𑀣𑀺 𑀳𑁂𑀢𑀼, 𑀦𑀢𑁆𑀣𑀺 𑀧𑀘𑁆𑀘𑀬𑁄, 𑀫𑀢𑁄 𑀉𑀘𑁆𑀙𑀺𑀚𑁆𑀚𑀢𑀻’𑀢𑀺 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀫𑀺𑀘𑁆𑀙𑀸𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀺, 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺, 𑀚𑀯𑀦𑀸𑀦𑀺 𑀚𑀯𑀦𑁆𑀢𑀺. 𑀧𑀞𑀫𑀚𑀯𑀦𑁂 𑀲𑀢𑁂𑀓𑀺𑀘𑁆𑀙𑀸 𑀳𑁄𑀦𑁆𑀢𑀺, 𑀢𑀣𑀸 𑀤𑀼𑀢𑀺𑀬𑀸𑀤𑀻𑀲𑀼. 𑀲𑀢𑁆𑀢𑀫𑁂 𑀩𑀼𑀤𑁆𑀥𑀸𑀦𑀫𑁆𑀧𑀺 𑀅𑀢𑁂𑀓𑀺𑀘𑁆𑀙𑀸 𑀅𑀦𑀺𑀯𑀢𑁆𑀢𑀺𑀦𑁄 𑀅𑀭𑀺𑀝𑁆𑀞𑀓𑀡𑁆𑀝𑀓𑀲𑀤𑀺𑀲𑀸, 𑀢𑀢𑁆𑀣 𑀓𑁄𑀘𑀺 𑀏𑀓𑀁 𑀤𑀲𑁆𑀲𑀦𑀁 𑀑𑀓𑁆𑀓𑀫𑀢𑀺, 𑀓𑁄𑀘𑀺 𑀤𑁆𑀯𑁂, 𑀓𑁄𑀘𑀺 𑀢𑀻𑀡𑀺𑀧𑀺, 𑀏𑀓𑀲𑁆𑀫𑀺𑀁 𑀑𑀓𑁆𑀓𑀦𑁆𑀢𑁂𑀧𑀺 𑀤𑁆𑀯𑀻𑀲𑀼 𑀢𑀻𑀲𑀼 𑀑𑀓𑁆𑀓𑀦𑁆𑀢𑁂𑀲𑀼𑀧𑀺 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀓𑁄𑀯 𑀳𑁄𑀢𑀺. 𑀧𑀢𑁆𑀢𑁄 𑀲𑀕𑁆𑀕𑀫𑀕𑁆𑀕𑀸𑀯𑀭𑀡𑀜𑁆𑀘𑁂𑀯 𑀫𑁄𑀓𑁆𑀔𑀫𑀕𑁆𑀕𑀸𑀯𑀭𑀡𑀜𑁆𑀘, 𑀅𑀪𑀩𑁆𑀩𑁄 𑀢𑀲𑁆𑀲𑀢𑁆𑀢𑀪𑀸𑀯𑀲𑁆𑀲 𑀅𑀦𑀦𑁆𑀢𑀭𑀁 𑀲𑀕𑁆𑀕𑀫𑁆𑀧𑀺 𑀕𑀦𑁆𑀢𑀼𑀁, 𑀧𑀕𑁂𑀯 𑀫𑁄𑀓𑁆𑀔𑀁, 𑀯𑀝𑁆𑀝𑀔𑀸𑀡𑀼 𑀦𑀸𑀫𑁂𑀲 𑀲𑀢𑁆𑀢𑁄 𑀧𑀣𑀯𑀺𑀕𑁄𑀧𑀓𑁄, 𑀬𑁂𑀪𑀼𑀬𑁆𑀬𑁂𑀦 𑀏𑀯𑀭𑀽𑀧𑀲𑁆𑀲 𑀪𑀯𑀢𑁄 𑀯𑀼𑀝𑁆𑀞𑀸𑀦𑀁 𑀦𑀢𑁆𑀣𑀻’’𑀢𑀺.

𑀧𑀺𑀝𑁆𑀞𑀺𑀘𑀓𑁆𑀓𑀯𑀸𑀴𑁂𑀢𑀺 𑀛𑀸𑀬𑀫𑀸𑀦𑀘𑀓𑁆𑀓𑀯𑀸𑀴𑀲𑁆𑀲 𑀧𑀭𑀢𑁄 𑀏𑀓𑀲𑁆𑀫𑀺𑀁 𑀑𑀓𑀸𑀲𑁂. 𑀬𑀁 𑀛𑀸𑀬𑀫𑀸𑀦𑀸𑀦𑀁 𑀅𑀚𑁆𑀛𑀸𑀬𑀫𑀸𑀦𑀸𑀦𑀜𑁆𑀘 𑀘𑀓𑁆𑀓𑀯𑀸𑀴𑀸𑀦𑀫𑀦𑁆𑀢𑀭𑀁, 𑀬𑀢𑁆𑀣 𑀮𑁄𑀓𑀦𑁆𑀢𑀭𑀺𑀓𑀦𑀺𑀭𑀬𑀲𑀫𑀜𑁆𑀜𑀸, 𑀢𑀸𑀤𑀺𑀲𑁂 𑀏𑀓𑀲𑁆𑀫𑀺𑀁 𑀑𑀓𑀸𑀲𑁂. 𑀧𑀘𑁆𑀘𑀢𑀺𑀬𑁂𑀯𑀸𑀢𑀺 𑀘𑀓𑁆𑀓𑀯𑀸𑀴𑁂 𑀛𑀸𑀬𑀫𑀸𑀦𑁂 𑀅𑀚𑁆𑀛𑀸𑀬𑀫𑀸𑀦𑁂𑀧𑀺 𑀅𑀢𑁆𑀢𑀦𑁄 𑀓𑀫𑁆𑀫𑀩𑀮𑁂𑀦 𑀧𑀘𑁆𑀘𑀢𑀺𑀬𑁂𑀯.

𑁩𑁧𑁧. 𑀘𑀢𑀼𑀢𑁆𑀣𑁂 ‘‘𑀫𑀸 𑀔𑀮𑀻’’𑀢𑀺 𑀯𑀘𑀦𑀁 𑀉𑀧𑀸𑀤𑀸𑀬 𑀏𑀯𑀁𑀮𑀤𑁆𑀥𑀦𑀸𑀫𑁄𑀢𑀺 𑀢𑀁 𑀓𑀺𑀭 𑀲𑀓𑀤𑁆𑀤𑀫𑀸𑀬 𑀪𑀽𑀫𑀺𑀬𑀸 𑀢𑁂𑀮𑀖𑀝𑀁 𑀕𑀳𑁂𑀢𑁆𑀯𑀸 𑀕𑀘𑁆𑀙𑀦𑁆𑀢𑀁, ‘‘𑀢𑀸𑀢, 𑀫𑀸 𑀔𑀮𑀻’’𑀢𑀺 𑀲𑀸𑀫𑀺𑀓𑁄 𑀆𑀳. 𑀲𑁄 𑀧𑀫𑀸𑀤𑁂𑀦 𑀔𑀮𑀺𑀢𑁆𑀯𑀸 𑀧𑀢𑀺𑀢𑁆𑀯𑀸 𑀲𑀸𑀫𑀺𑀓𑀲𑁆𑀲 𑀪𑀬𑁂𑀦 𑀧𑀮𑀸𑀬𑀺𑀢𑀼𑀁 𑀆𑀭𑀤𑁆𑀥𑁄. 𑀲𑀸𑀫𑀺𑀓𑁄 𑀉𑀧𑀥𑀸𑀯𑀺𑀢𑁆𑀯𑀸 𑀲𑀸𑀝𑀓𑀓𑀡𑁆𑀡𑁂 𑀅𑀕𑁆𑀕𑀳𑁂𑀲𑀺. 𑀲𑁄 𑀲𑀸𑀝𑀓𑀁 𑀙𑀟𑁆𑀟𑁂𑀢𑁆𑀯𑀸 𑀅𑀘𑁂𑀮𑀓𑁄 𑀳𑀼𑀢𑁆𑀯𑀸 𑀧𑀮𑀸𑀢𑁄 𑀧𑀡𑁆𑀡𑁂𑀦 𑀯𑀸 𑀢𑀺𑀡𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑀼𑀫𑁆𑀧𑀺 𑀅𑀚𑀸𑀦𑀦𑁆𑀢𑁄 𑀚𑀸𑀢𑀭𑀽𑀧𑁂𑀦𑁂𑀯 𑀏𑀓𑀁 𑀕𑀸𑀫𑀁 ¶ 𑀧𑀸𑀯𑀺𑀲𑀺. 𑀫𑀦𑀼𑀲𑁆𑀲𑀸 𑀢𑀁 𑀤𑀺𑀲𑁆𑀯𑀸 ‘‘𑀅𑀬𑀁 𑀲𑀫𑀡𑁄 𑀅𑀭𑀳𑀸 𑀅𑀧𑁆𑀧𑀺𑀘𑁆𑀙𑁄, 𑀦𑀢𑁆𑀣𑀺 𑀇𑀫𑀺𑀦𑀸 𑀲𑀤𑀺𑀲𑁄’’𑀢𑀺 𑀧𑀽𑀯𑀪𑀢𑁆𑀢𑀸𑀤𑀻𑀦𑀺 𑀕𑀳𑁂𑀢𑁆𑀯𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 ‘‘𑀫𑀬𑁆𑀳𑀁 𑀲𑀸𑀝𑀓𑀁 𑀅𑀦𑀺𑀯𑀢𑁆𑀣𑀪𑀸𑀯𑁂𑀦 𑀇𑀤𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀢𑀢𑁄 𑀧𑀝𑁆𑀞𑀸𑀬 𑀲𑀸𑀝𑀓𑀁 𑀮𑀪𑀺𑀢𑁆𑀯𑀸𑀧𑀺 𑀦 𑀦𑀺𑀯𑀸𑀲𑁂𑀲𑀺, 𑀢𑀤𑁂𑀯 𑀘 𑀧𑀩𑁆𑀩𑀚𑁆𑀚𑀁 𑀅𑀕𑁆𑀕𑀳𑁂𑀲𑀺. 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀅𑀜𑁆𑀜𑁂𑀧𑀺 𑀅𑀜𑁆𑀜𑁂𑀧𑀻𑀢𑀺 𑀧𑀜𑁆𑀘𑀲𑀢𑀸 𑀫𑀦𑀼𑀲𑁆𑀲𑀸 𑀧𑀩𑁆𑀩𑀚𑀺𑀁𑀲𑀼. 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 𑁋 ‘‘𑀫𑀸 𑀔𑀮𑀻𑀢𑀺 𑀯𑀘𑀦𑀁 𑀉𑀧𑀸𑀤𑀸𑀬 𑀏𑀯𑀁𑀮𑀤𑁆𑀥𑀦𑀸𑀫𑁄 𑀢𑀺𑀢𑁆𑀣𑀓𑀭𑁄’’𑀢𑀺.

𑀲𑀫𑀸𑀕𑀢𑀝𑁆𑀞𑀸𑀦𑁂𑀢𑀺 𑀤𑁆𑀯𑀺𑀦𑁆𑀦𑀁 𑀦𑀤𑀻𑀦𑀁 𑀉𑀤𑀓𑀧𑁆𑀧𑀯𑀸𑀳𑀲𑁆𑀲 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑁂. 𑀤𑁆𑀯𑀺𑀦𑁆𑀦𑀁 𑀉𑀤𑀓𑀸𑀦𑀦𑁆𑀢𑀺 𑀤𑁆𑀯𑀺𑀦𑁆𑀦𑀁 𑀉𑀤𑀓𑀧𑁆𑀧𑀯𑀸𑀳𑀸𑀦𑀁. 𑀬𑀣𑀸𑀯𑀼𑀢𑁆𑀢𑀝𑁆𑀞𑀸𑀦𑁂 𑀫𑀘𑁆𑀙𑀕𑁆𑀕𑀳𑀡𑀢𑁆𑀣𑀁 𑀔𑀺𑀧𑀺𑀢𑀩𑁆𑀩𑀢𑁄 𑀔𑀺𑀧𑁆𑀧𑀁, 𑀓𑀼𑀫𑀺𑀦𑀁, 𑀢𑀤𑁂𑀯 𑀇𑀥 𑀔𑀺𑀧𑁆𑀧𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑁋 ‘‘𑀓𑀼𑀫𑀺𑀦’’𑀦𑁆𑀢𑀺. 𑀉𑀘𑁆𑀙𑀽𑀳𑀻𑀢𑀺 𑀉𑀤𑀓𑀉𑀘𑁆𑀙𑀽𑀳𑀺. 𑀢𑀼𑀘𑁆𑀙𑀧𑀼𑀭𑀺𑀲𑁄 𑀅𑀭𑀺𑀬𑀥𑀫𑁆𑀫𑀸𑀪𑀸𑀯𑀢𑁄. 𑀛𑀸𑀦𑀫𑀢𑁆𑀢𑀫𑁆𑀧𑀺 ¶ 𑀳𑀺 𑀢𑀲𑁆𑀲 𑀦𑀢𑁆𑀣𑁂𑀯, 𑀓𑀼𑀢𑁄 𑀅𑀭𑀺𑀬𑀫𑀕𑁆𑀕𑁄. 𑀫𑀦𑀼𑀲𑁆𑀲𑀔𑀺𑀧𑁆𑀧𑀁 𑀫𑀜𑁆𑀜𑁂𑀢𑀺 𑀫𑀦𑀼𑀲𑁆𑀲𑀸 𑀧𑀢𑀺𑀢𑁆𑀯𑀸 𑀩𑁆𑀬𑀲𑀦𑀧𑁆𑀧𑀢𑁆𑀢𑀺𑀅𑀢𑁆𑀣𑀁 𑀑𑀝𑁆𑀝𑀺𑀢𑀁 𑀓𑀼𑀫𑀺𑀦𑀁 𑀯𑀺𑀬. 𑀢𑁂𑀦𑀸𑀳 𑁋 ‘‘𑀫𑀳𑀸𑀚𑀦𑀲𑁆𑀲𑀸’’𑀢𑀺𑀆𑀤𑀺.

𑁩𑁧𑁨. 𑀧𑀜𑁆𑀘𑀫𑀸𑀤𑀻𑀲𑀼 𑀩𑀸𑀳𑀺𑀭𑀓𑀲𑀸𑀲𑀦𑀦𑁆𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁 𑁋 𑀢𑀲𑁆𑀲 𑀲𑀩𑁆𑀩𑀲𑁆𑀲𑀧𑀺 𑀅𑀦𑀺𑀬𑁆𑀬𑀸𑀦𑀺𑀓𑀢𑁆𑀢𑀸 𑀲𑀢𑁆𑀣𑀼𑀧𑀝𑀺𑀜𑁆𑀜𑀲𑁆𑀲𑀧𑀺 𑀅𑀲𑀩𑁆𑀩𑀜𑁆𑀜𑀼𑀪𑀸𑀯𑀢𑁄. 𑀢𑁂𑀦𑀸𑀳 𑁋 ‘‘𑀢𑀢𑁆𑀣 𑀳𑀻’’𑀢𑀺𑀆𑀤𑀺. 𑀕𑀡𑁄𑀢𑀺 𑀲𑀸𑀯𑀓𑀕𑀡𑁄. 𑀢𑀣𑀸𑀪𑀸𑀯𑀸𑀬𑀸𑀢𑀺 𑀆𑀘𑀭𑀺𑀬𑁂𑀦 𑀯𑀼𑀢𑁆𑀢𑀸𑀓𑀸𑀭𑀢𑀸𑀬 𑀲𑀫𑀗𑁆𑀕𑀺𑀪𑀸𑀯𑀢𑁆𑀣𑀁. 𑀚𑀗𑁆𑀖𑀲𑀢𑀦𑁆𑀢𑀺 𑀩𑀳𑀽 𑀅𑀦𑁂𑀓𑁂 𑀲𑀢𑁆𑀢𑁂. 𑀲𑀫𑀓𑀫𑁂𑀯 𑀅𑀓𑀼𑀲𑀮𑀁 𑀧𑀸𑀧𑀼𑀡𑀸𑀢𑀻𑀢𑀺 𑀢𑁂𑀲𑀁 𑀲𑀩𑁆𑀩𑁂𑀲𑀁 𑀏𑀓𑀚𑁆𑀛𑀁 𑀲𑀫𑀸𑀤𑀧𑀦𑁂𑀧𑀺 𑀢𑁂𑀲𑀁 𑀅𑀓𑀼𑀲𑀮𑁂𑀦 𑀲𑀫𑀓𑀫𑁂𑀯 𑀅𑀓𑀼𑀲𑀮𑀁 𑀧𑀸𑀧𑀼𑀡𑀸𑀢𑀺 𑀏𑀓𑀚𑁆𑀛𑀁 𑀩𑀳𑀽𑀦𑀁 𑀲𑀫𑀸𑀤𑀧𑀦𑁂𑀧𑀺 𑀢𑀣𑀸 𑀉𑀲𑁆𑀲𑀳𑀦𑀲𑁆𑀲 𑀩𑀮𑀯𑀪𑀸𑀯𑀢𑁄. 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀫𑀸𑀤𑀧𑀦𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀬𑀣𑀸 𑀳𑀺 𑀥𑀫𑁆𑀫𑀘𑀭𑀺𑀬𑀸𑀬𑀁 𑀲𑀫𑀓𑀫𑁂𑀯𑀸𑀢𑀺 𑀯𑀢𑁆𑀢𑀩𑁆𑀩𑀸 𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸, 𑀏𑀯𑀁 𑀅𑀥𑀫𑁆𑀫𑀘𑀭𑀺𑀬𑀸𑀬𑀁 𑀅𑀓𑀮𑁆𑀬𑀸𑀡𑀫𑀺𑀢𑁆𑀢𑀢𑀸𑀢𑀺.

𑁩𑁧𑁩. 𑀲𑀼𑀝𑁆𑀞𑀼 𑀅𑀓𑁆𑀔𑀸𑀢𑁂𑀢𑀺 𑀏𑀓𑀦𑁆𑀢𑀢𑁄 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑁂𑀦 𑀅𑀓𑁆𑀔𑀸𑀢𑁂. 𑀲𑀢𑁆𑀣𑀸 𑀘 𑀲𑀩𑁆𑀩𑀜𑁆𑀜𑀽 𑀳𑁄𑀢𑀻𑀢𑀺 𑀅𑀲𑀩𑁆𑀩𑀜𑁆𑀜𑀼𑀦𑁄 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑁂𑀦 𑀓𑀣𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸. 𑀥𑀫𑁆𑀫𑁄 𑀘 𑀲𑁆𑀯𑀸𑀓𑁆𑀔𑀸𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀧𑁆𑀧𑀯𑁂𑀤𑀺𑀢𑀢𑁆𑀢𑀸. 𑀕𑀡𑁄 𑀘 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀲𑀢𑁆𑀣𑀸𑀭𑀸 𑀲𑀼𑀯𑀺𑀦𑀻𑀢𑀢𑁆𑀢𑀸. 𑀲𑀫𑀸𑀤𑀧𑀓𑁄 𑀳𑀻𑀢𑀺𑀆𑀤𑀺 𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀬𑀸 𑀦𑀺𑀤𑀲𑁆𑀲𑀦𑀁 𑀤𑀝𑁆𑀞𑀩𑁆𑀩𑀁.

𑁩𑁧𑁪. 𑀧𑀫𑀸𑀡𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 ‘‘𑀅𑀬𑀁 𑀏𑀢𑁆𑀢𑀓𑁂𑀦 𑀬𑀸𑀧𑁂𑀢𑀺, 𑀇𑀫𑀲𑁆𑀲 𑀏𑀢𑁆𑀢𑀓𑀁 𑀤𑀸𑀢𑀼𑀁 𑀬𑀼𑀢𑁆𑀢’’𑀦𑁆𑀢𑀺 𑀏𑀯𑀁 𑀧𑀫𑀸𑀡𑀁 𑀚𑀸𑀦𑀺𑀢𑀩𑁆𑀩𑀁. 𑀅𑀢𑀺𑀭𑁂𑀓𑁂…𑀧𑁂… 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺 𑀯𑀸 𑀦𑀢𑁆𑀣𑀺 𑀤𑀼𑀭𑀓𑁆𑀔𑀸𑀢𑀢𑁆𑀢𑀸 𑀥𑀫𑁆𑀫𑀲𑁆𑀲. 𑀢𑀲𑁆𑀲𑀸𑀢𑀺 𑀧𑀝𑀺𑀕𑁆𑀕𑀸𑀳𑀓𑀲𑁆𑀲. 𑀅𑀧𑁆𑀧𑀺𑀘𑁆𑀙𑀧𑀝𑀺𑀧𑀤𑀸 𑀦𑀸𑀫 𑀦𑀢𑁆𑀣𑀺 𑀤𑀼𑀭𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁩𑁧𑁫. 𑀤𑀸𑀬𑀓𑀲𑁆𑀲 ¶ 𑀯𑀲𑁄 𑀦𑀸𑀫 𑀉𑀴𑀸𑀭𑀼𑀴𑀸𑀭𑀢𑀸𑀪𑁂𑀤𑁄 𑀅𑀚𑁆𑀛𑀸𑀲𑀬𑁄. 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀧𑀦 𑀣𑁄𑀓𑀩𑀳𑀼𑀢𑀸𑀯 𑀤𑁂𑀬𑁆𑀬𑀥𑀫𑁆𑀫𑀲𑁆𑀲 𑀯𑀲𑁄 𑀦𑀸𑀫. 𑀅𑀢𑁆𑀢𑀦𑁄 𑀣𑀸𑀫𑁄𑀢𑀺 𑀬𑀸𑀧𑀦𑀧𑁆𑀧𑀫𑀸𑀡𑀁. 𑀬𑀤𑀺 𑀳𑀻𑀢𑀺𑀆𑀤𑀺 ‘‘𑀓𑀣’’𑀦𑁆𑀢𑀺𑀆𑀤𑀺𑀦𑀸 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀯𑀭𑀡𑀁. 𑀅𑀦𑀼𑀧𑁆𑀧𑀦𑁆𑀦𑀲𑁆𑀲𑀸𑀢𑀺 𑀅𑀦𑀼𑀧𑁆𑀧𑀦𑁆𑀦𑁄 𑀅𑀲𑁆𑀲 𑀧𑀼𑀕𑁆𑀕𑀮𑀲𑁆𑀲. 𑀘𑀓𑁆𑀔𑀼𑀪𑀽𑀢𑁄 𑀳𑁄𑀢𑀻𑀢𑀺 𑀫𑀳𑀸𑀚𑀦𑀲𑁆𑀲 𑀘𑀓𑁆𑀔𑀼 𑀯𑀺𑀬 𑀳𑁄𑀢𑀺. 𑀲𑀸𑀲𑀦𑀁 𑀘𑀺𑀭𑀝𑁆𑀞𑀺𑀢𑀺𑀢𑀁 𑀓𑀭𑁄𑀢𑀻𑀢𑀺 𑀅𑀦𑀼𑀧𑁆𑀧𑀦𑁆𑀦𑀮𑀸𑀪𑀼𑀧𑁆𑀧𑀸𑀤𑀦𑁂𑀦 𑀫𑀳𑀸𑀚𑀦𑀲𑁆𑀲 𑀧𑀲𑀸𑀤𑀼𑀧𑁆𑀧𑀸𑀤𑀦𑁂𑀦 𑀘 𑀘𑀺𑀭𑀝𑁆𑀞𑀺𑀢𑀺𑀓𑀁 𑀓𑀭𑁄𑀢𑀺.

𑀓𑀼𑀝𑀼𑀫𑁆𑀩𑀭𑀺𑀬𑀯𑀺𑀳𑀸𑀭𑁂𑀢𑀺 𑀓𑀼𑀝𑀼𑀫𑁆𑀩𑀭𑀺𑀬𑀕𑀸𑀫𑀲𑀦𑁆𑀦𑀺𑀲𑁆𑀲𑀺𑀢𑀯𑀺𑀳𑀸𑀭𑁂. 𑀪𑀼𑀜𑁆𑀚𑀦𑀢𑁆𑀣𑀸𑀬𑀸𑀢𑀺 𑀢𑀲𑁆𑀫𑀺𑀁𑀬𑁂𑀯 𑀕𑁂𑀳𑁂 𑀦𑀺𑀲𑀻𑀤𑀺𑀢𑁆𑀯𑀸 𑀪𑀼𑀜𑁆𑀚𑀦𑀢𑁆𑀣𑀸𑀬. 𑀕𑀳𑁂𑀢𑁆𑀯𑀸 𑀕𑀫𑀦𑀢𑁆𑀣𑀸𑀬𑀸𑀢𑀺 𑀕𑁂𑀳𑀢𑁄 𑀩𑀳𑀺 𑀕𑀳𑁂𑀢𑁆𑀯𑀸 𑀕𑀫𑀦𑀢𑁆𑀣𑀸𑀬. 𑀥𑀼𑀭𑀪𑀢𑁆𑀢𑀸𑀦𑀻𑀢𑀺 𑀦𑀺𑀘𑁆𑀘𑀪𑀢𑁆𑀢𑀸𑀦𑀺. 𑀘𑀽𑀴𑀼𑀧𑀝𑁆𑀞𑀸𑀓𑀦𑁆𑀢𑀺 𑀯𑁂𑀬𑁆𑀬𑀸𑀯𑀘𑁆𑀘𑀓𑀭𑀁. 𑀯𑀻𑀫𑀁𑀲𑀺𑀢𑁆𑀯𑀸𑀢𑀺 𑀬𑀣𑀸 𑀉𑀤𑁆𑀤𑀺𑀲𑁆𑀲 𑀓𑀢𑀁 𑀦 𑀳𑁄𑀢𑀺, 𑀏𑀯𑀁 𑀯𑀻𑀫𑀁𑀲𑀺𑀢𑁆𑀯𑀸 ¶ . 𑀫𑀳𑀸𑀚𑀦𑁄 𑀅𑀧𑁆𑀧𑀺𑀘𑁆𑀙𑁄 𑀪𑀯𑀺𑀢𑀼𑀁 𑀫𑀜𑁆𑀜𑀢𑀻𑀢𑀺 𑀫𑀳𑀸𑀚𑀦𑁄 𑀲𑀬𑀁 𑀅𑀧𑁆𑀧𑀺𑀘𑁆𑀙𑁄 𑀪𑀯𑀺𑀢𑀼𑀁 𑀫𑀜𑁆𑀜𑀢𑀺 𑀤𑀺𑀝𑁆𑀞𑀸𑀦𑀼𑀕𑀢𑀺𑀁 𑀆𑀧𑀚𑁆𑀚𑀦𑁂𑀦. 𑀫𑀳𑀸𑀚𑀦𑀲𑁆𑀲𑀸𑀢𑀺 𑀩𑀳𑀼𑀚𑀦𑀲𑁆𑀲. 𑀅𑀯𑀢𑁆𑀣𑀭𑀺𑀢𑁆𑀯𑀸𑀢𑀺 𑀯𑀺𑀢𑁆𑀣𑀸𑀭𑀺𑀓𑀁 𑀓𑀢𑁆𑀯𑀸.

𑁩𑁧𑁬. 𑀧𑀜𑁆𑀘𑀸𑀢𑀧𑀢𑀧𑁆𑀧𑀦𑀁 𑀘𑀢𑀽𑀲𑀼 𑀧𑀲𑁆𑀲𑁂𑀲𑀼 𑀅𑀕𑁆𑀕𑀺𑀲𑀦𑁆𑀢𑀸𑀧𑀲𑁆𑀲 𑀉𑀧𑀭𑀺 𑀲𑀽𑀭𑀺𑀬𑀲𑀦𑁆𑀢𑀸𑀧𑀲𑁆𑀲 𑀘 𑀢𑀧𑁆𑀧𑀦𑀁, 𑀢𑀜𑁆𑀘 𑀔𑁄 𑀕𑀺𑀫𑁆𑀳𑀓𑀸𑀮𑁂. 𑀙𑀺𑀦𑁆𑀦𑀧𑁆𑀧𑀧𑀸𑀢𑀧𑀩𑁆𑀩𑀢𑀲𑀺𑀔𑀭𑀢𑁄 𑀧𑀢𑀦𑀁 𑀫𑀭𑀼𑀧𑁆𑀧𑀧𑀸𑀢𑀧𑀢𑀦𑀁. 𑀧𑀼𑀩𑁆𑀩𑀡𑁆𑀳𑀸𑀤𑀻𑀲𑀼 𑀆𑀤𑀺𑀘𑁆𑀘𑀸𑀪𑀺𑀫𑀼𑀔𑀸𑀯𑀝𑁆𑀝𑀦𑀁 𑀆𑀤𑀺𑀘𑁆𑀘𑀸𑀦𑀼𑀧𑀭𑀺𑀯𑀢𑁆𑀢𑀦𑀁.

𑁩𑁧𑁭. 𑀅𑀬𑀫𑁆𑀧𑀻𑀢𑀺 𑀲𑁆𑀯𑀸𑀓𑁆𑀔𑀸𑀢𑁂 𑀥𑀫𑁆𑀫𑀯𑀺𑀦𑀬𑁂 𑀓𑀼𑀲𑀻𑀢𑁄𑀧𑀺. 𑀲𑀸𑀫𑀜𑁆𑀜𑀦𑁆𑀢𑀺 𑀢𑀧𑀘𑀭𑀡𑀁. 𑀤𑀼𑀧𑁆𑀧𑀭𑀸𑀫𑀝𑁆𑀞𑀦𑁆𑀢𑀺 𑀫𑀺𑀘𑁆𑀙𑀸𑀘𑀭𑀺𑀢𑀁 𑀲𑀁𑀓𑀺𑀮𑀺𑀝𑁆𑀞𑀁. 𑀦𑀺𑀭𑀬𑀸𑀬𑀼𑀧𑀓𑀟𑁆𑀠𑀢𑀻𑀢𑀺 𑀦𑀺𑀭𑀬𑀤𑀼𑀓𑁆𑀔𑀸𑀬 𑀦𑀁 𑀓𑀟𑁆𑀠𑀢𑀺.

𑁩𑁧𑁮. 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀢𑀺 𑀧𑀜𑁆𑀘𑀸𑀢𑀧𑀢𑀧𑁆𑀧𑀦𑀸𑀤𑀺𑀓𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂.

𑁩𑁧𑁯. 𑀏𑀯𑀦𑁆𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀬 𑀘𑀺𑀢𑁆𑀢𑀧𑁆𑀧𑀲𑀸𑀤𑀯𑁆𑀳𑀬𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀬𑀸. 𑀢𑁂𑀦 𑀲𑀫𑀡𑀥𑀫𑁆𑀫𑀓𑀭𑀡𑀲𑀼𑀔𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺.

𑁩𑁨𑁦. 𑀦𑀯𑀓𑀦𑀺𑀧𑀸𑀢𑁂𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬𑁂 𑀯𑀓𑁆𑀔𑀫𑀸𑀦𑀁 𑀦𑀯𑀓𑀦𑀺𑀧𑀸𑀢𑀁 𑀲𑀦𑁆𑀥𑀸𑀬𑀸𑀳. 𑀦𑀯 𑀧𑀼𑀕𑁆𑀕𑀮𑀸𑀢𑀺 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀓𑁄𑀮𑀁𑀓𑁄𑀮𑀸𑀤𑀬𑁄 𑀦𑀯 𑀧𑀼𑀕𑁆𑀕𑀮𑀸. 𑀲𑀩𑁆𑀩𑀢𑁆𑀣𑀸𑀢𑀺 𑀇𑀫𑀲𑁆𑀫𑀺𑀁 𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀯𑀲𑀺𑀝𑁆𑀞𑁂𑀲𑀼 𑀲𑀩𑁆𑀩𑁂𑀲𑀼 𑀲𑀼𑀢𑁆𑀢𑁂𑀲𑀼.

𑀢𑀢𑀺𑀬𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁬. 𑀏𑀓𑀥𑀫𑁆𑀫𑀧𑀸𑀴𑀺

(𑁧𑁬) 𑁪. 𑀏𑀓𑀥𑀫𑁆𑀫𑀧𑀸𑀴𑀺-𑀘𑀢𑀼𑀢𑁆𑀣𑀯𑀕𑁆𑀕𑀯𑀡𑁆𑀡𑀦𑀸

𑁩𑁨𑁨. 𑀘𑀢𑀼𑀢𑁆𑀣𑀲𑁆𑀲 ¶ ¶ 𑀧𑀞𑀫𑁂 𑀲𑀜𑁆𑀜𑀸𑀡𑀪𑀽𑀢𑀸𑀢𑀺 𑀉𑀧𑀮𑀓𑁆𑀔𑀡𑀪𑀽𑀢𑀸. 𑀧𑀜𑁆𑀘𑀤𑀲𑀬𑁄𑀚𑀦𑀸𑀯𑀝𑁆𑀝𑀓𑁆𑀔𑀦𑁆𑀥𑀸𑀢𑀺 𑀧𑀜𑁆𑀘𑀤𑀲𑀬𑁄𑀚𑀦𑀓𑁆𑀔𑀦𑁆𑀥𑀧𑀭𑀺𑀓𑁆𑀔𑁂𑀧𑀸. 𑀬𑀣𑀸 𑀘𑀸𑀢𑀺 𑀘-𑀲𑀤𑁆𑀤𑁂𑀦 𑀓𑀤𑀫𑁆𑀩𑀭𑀼𑀓𑁆𑀔𑀸𑀤𑀻𑀦𑀁 𑀓𑀧𑁆𑀧𑀝𑁆𑀞𑀸𑀬𑀺𑀪𑀸𑀯𑀁 𑀯𑀺𑀬 𑀬𑁄𑀚𑀦𑀲𑀢𑀼𑀩𑁆𑀩𑁂𑀥𑀸𑀤𑀺𑀪𑀸𑀯𑀁 𑀲𑀫𑀼𑀘𑁆𑀘𑀺𑀦𑁄𑀢𑀺, 𑀦 𑀧𑀦 𑀚𑀫𑁆𑀩𑀼𑀬𑀸 𑀚𑀫𑁆𑀩𑀼𑀤𑀻𑀧𑀲𑁆𑀲 𑀯𑀺𑀬 𑀢𑁂𑀳𑀺 𑀅𑀧𑀭𑀕𑁄𑀬𑀸𑀦𑀸𑀤𑀻𑀦𑀁 𑀲𑀜𑁆𑀜𑀸𑀡𑀪𑀸𑀯𑀁. 𑀭𑀸𑀫𑀡𑁂𑀬𑁆𑀬𑀓𑀦𑁆𑀢𑀺 𑀭𑀫𑀡𑀻𑀬𑀪𑀸𑀯𑀁. 𑀲𑁂𑀲𑀧𑀤𑁂𑀲𑀽𑀢𑀺 𑀯𑀦𑀭𑀸𑀫𑀡𑁂𑀬𑁆𑀬𑀓𑀸𑀤𑀺𑀧𑀤𑁂𑀲𑀼. 𑀉𑀕𑁆𑀕𑀢𑀁 𑀓𑀽𑀮𑀁 𑀉𑀲𑁆𑀲𑀺𑀢𑀪𑀸𑀯𑁄 𑀏𑀢𑀲𑁆𑀲𑀸𑀢𑀺 𑀉𑀓𑁆𑀓𑀽𑀮𑀁, 𑀯𑀺𑀕𑀢𑀁 𑀅𑀧𑀕𑀢𑀁 𑀓𑀽𑀮𑀁 𑀏𑀢𑀲𑁆𑀲𑀸𑀢𑀺 𑀯𑀺𑀓𑀽𑀮𑀦𑁆𑀢𑀺 𑀆𑀳 𑁋 ‘‘𑀉𑀦𑁆𑀦𑀢𑀝𑁆𑀞𑀸𑀦𑀁 𑀦𑀺𑀦𑁆𑀦𑀝𑁆𑀞𑀸𑀦’’𑀦𑁆𑀢𑀺 𑀘. 𑀦𑀦𑁆𑀤𑀺𑀬𑀸𑀯𑀝𑁆𑀝𑀫𑀘𑁆𑀙𑀧𑀺𑀝𑁆𑀞𑁂𑀦𑁂𑀯𑀸𑀢𑀺 𑀓𑀼𑀚𑁆𑀚𑀓𑀓𑀼𑀮𑀺𑀲𑀓𑀫𑀘𑁆𑀙𑀲𑀗𑁆𑀖𑀸𑀢𑀧𑀺𑀝𑁆𑀞𑁂𑀦𑁂𑀯.

𑁩𑁨𑁩. 𑀤𑀼𑀢𑀺𑀬𑀸𑀤𑀻𑀲𑀼 𑀘𑀢𑁆𑀢𑀸𑀭𑁄 𑀅𑀧𑀸𑀬𑀸 𑀅𑀜𑁆𑀜𑀢𑁆𑀭 𑀫𑀦𑀼𑀲𑁆𑀲𑁂𑀳𑀻𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀦 𑀤𑁂𑀯𑀸 𑀅𑀜𑁆𑀜𑀢𑁆𑀭 𑀫𑀦𑀼𑀲𑁆𑀲𑁂𑀳𑀻𑀢𑀺 𑀳𑀻𑀦𑀸𑀬 𑀚𑀸𑀢𑀺𑀬𑀸 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀉𑀧𑀸𑀤𑀸𑀬𑀼𑀧𑀸𑀤𑀸𑀬𑀸𑀧𑀺 𑀫𑀚𑁆𑀛𑀺𑀫𑀤𑁂𑀲𑁄 𑀮𑀩𑁆𑀪𑀢𑀺, 𑀬𑀢𑁆𑀣 𑀕𑀢𑀺 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁 𑀅𑀜𑁆𑀜𑁂𑀲𑀫𑁆𑀧𑀺 𑀓𑀫𑁆𑀫𑀯𑀸𑀤𑀺𑀓𑀺𑀭𑀺𑀬𑀯𑀸𑀤𑀺𑀯𑀺𑀜𑁆𑀜𑀼𑀚𑀸𑀢𑀺𑀓𑀸𑀦𑀁, 𑀬𑁄 𑀧𑀢𑀺𑀭𑀽𑀧𑀤𑁂𑀲𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 𑁋 ‘‘𑀲𑀓𑀮𑁄𑀧𑀺 𑀳𑀻’’𑀢𑀺𑀆𑀤𑀺.

𑁩𑁨𑁪. 𑀏𑀴𑀸𑀢𑀺 𑀤𑁄𑀲𑁄. 𑀢𑁂𑀦𑀸𑀳 𑁋 ‘‘𑀦𑀺𑀤𑁆𑀤𑁄𑀲𑀫𑀼𑀔𑀸𑀢𑀺 𑀅𑀢𑁆𑀣𑁄’’𑀢𑀺.

𑁩𑁨𑁬. 𑀢𑀣𑀸𑀕𑀢𑀲𑁆𑀲 𑀕𑀼𑀡𑁂 𑀚𑀸𑀦𑀺𑀢𑁆𑀯𑀸 𑀘𑀓𑁆𑀔𑀼𑀦𑀸𑀧𑀺 𑀤𑀲𑁆𑀲𑀦𑀁 𑀤𑀲𑁆𑀲𑀦𑀫𑁂𑀯, 𑀅𑀚𑀸𑀦𑀺𑀢𑁆𑀯𑀸 𑀧𑀦 𑀤𑀲𑁆𑀲𑀦𑀁 𑀢𑀺𑀭𑀘𑁆𑀙𑀸𑀦𑀕𑀢𑀸𑀦𑀫𑁆𑀧𑀺 𑀳𑁄𑀢𑀺𑀬𑁂𑀯𑀸𑀢𑀺 𑀆𑀳 𑁋 ‘‘𑀬𑁂 𑀢𑀣𑀸𑀕𑀢𑀲𑁆𑀲 𑀕𑀼𑀡𑁂 𑀚𑀸𑀦𑀺𑀢𑁆𑀯𑀸’’𑀢𑀺𑀆𑀤𑀺.

𑁩𑁨𑁭. 𑀧𑀓𑀸𑀲𑁂𑀢𑁆𑀯𑀸 𑀓𑀣𑀺𑀢𑀦𑁆𑀢𑀺 𑀲𑀘𑁆𑀘𑀸𑀦𑀺 𑀧𑀓𑀸𑀲𑁂𑀢𑁆𑀯𑀸 𑀓𑀣𑀺𑀢𑀁.

𑁩𑁨𑁮. 𑀲𑀼𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀲𑀫𑁆𑀫𑁄𑀲𑁄 𑀥𑀸𑀭𑀡𑀦𑁆𑀢𑀺 𑀆𑀳 𑁋 ‘‘𑀥𑀸𑀭𑁂𑀦𑁆𑀢𑀻𑀢𑀺 𑀦 𑀧𑀫𑁆𑀫𑀼𑀲𑁆𑀲𑀦𑁆𑀢𑀻’’𑀢𑀺.

𑁩𑁨𑁯. 𑀅𑀢𑁆𑀣𑀸𑀦𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀦𑁆𑀢𑀻𑀢𑀺 ‘‘𑀅𑀬𑀁 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀅𑀢𑁆𑀣𑁄, 𑀅𑀬𑀁 𑀦 𑀅𑀢𑁆𑀣𑁄’’𑀢𑀺 ¶ 𑀅𑀢𑁆𑀣𑀸𑀦𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀦𑁆𑀢𑀺. 𑀅𑀦𑀢𑁆𑀣𑀧𑀭𑀺𑀳𑀸𑀭𑁂𑀦 𑀳𑀺 𑀅𑀢𑁆𑀣𑀕𑁆𑀕𑀳𑀡𑀁 𑀬𑀣𑀸 𑀅𑀥𑀫𑁆𑀫𑀧𑀭𑀺𑀯𑀚𑁆𑀚𑀦𑁂𑀦 𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀺.

𑁩𑁩𑁦. 𑀅𑀦𑀼𑀮𑁄𑀫𑀧𑀝𑀺𑀧𑀤𑀦𑁆𑀢𑀺 𑀦𑀺𑀩𑁆𑀩𑀸𑀦𑀲𑁆𑀲 𑀅𑀦𑀼𑀮𑁄𑀫𑀺𑀓𑀁 𑀧𑀝𑀺𑀧𑀤𑀁.

𑁩𑁩𑁧. 𑀲𑀁𑀯𑁂𑀕𑀚𑀦𑀓𑁂𑀲𑀼 ¶ 𑀓𑀸𑀭𑀡𑁂𑀲𑀽𑀢𑀺 𑀲𑀁𑀯𑁂𑀕𑀚𑀦𑀓𑁂𑀲𑀼 𑀚𑀸𑀢𑀺𑀆𑀤𑀻𑀲𑀼 𑀓𑀸𑀭𑀡𑁂𑀲𑀼. 𑀲𑀁𑀯𑁂𑀚𑀦𑀻𑀬𑁂𑀲𑀼 𑀞𑀸𑀦𑁂𑀲𑀼 𑀲𑀳𑁄𑀢𑁆𑀢𑀧𑁆𑀧𑀜𑀸𑀡𑀁 𑀲𑀁𑀯𑁂𑀕𑁄.

𑁩𑁩𑁨. 𑀉𑀧𑀸𑀬𑁂𑀦𑀸𑀢𑀺 𑀬𑁂𑀦 𑀉𑀧𑀸𑀬𑁂𑀦 𑀯𑀝𑁆𑀝𑀽𑀧𑀘𑁆𑀙𑁂𑀤𑁄, 𑀢𑁂𑀦 𑀉𑀧𑀸𑀬𑁂𑀦. 𑀧𑀥𑀸𑀦𑀯𑀻𑀭𑀺𑀬𑀁 𑀓𑀭𑁄𑀦𑁆𑀢𑀻𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑀲𑀗𑁆𑀔𑀸𑀢𑀁 𑀯𑀻𑀭𑀺𑀬𑀁 𑀓𑀭𑁄𑀦𑁆𑀢𑀺 𑀉𑀧𑁆𑀧𑀸𑀤𑁂𑀦𑁆𑀢𑀺.

𑁩𑁩𑁩. 𑀯𑀯𑀲𑁆𑀲𑀚𑀻𑀬𑀦𑁆𑀢𑀺 𑀯𑀺𑀲𑁆𑀲𑀚𑁆𑀚𑀻𑀬𑀦𑁆𑀢𑀺 𑀏𑀢𑁆𑀣 𑀲𑀗𑁆𑀔𑀸𑀭𑀸𑀢𑀺 𑀯𑀯𑀲𑁆𑀲𑀕𑁆𑀕𑁄, 𑀅𑀲𑀗𑁆𑀔𑀢𑀸 𑀥𑀸𑀢𑀽𑀢𑀺 𑀆𑀳 𑁋 ‘‘𑀯𑀯𑀲𑁆𑀲𑀕𑁆𑀕𑁄 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦’’𑀦𑁆𑀢𑀺.

𑁩𑁩𑁪. 𑀉𑀢𑁆𑀢𑀫𑀦𑁆𑀦𑀸𑀦𑀦𑁆𑀢𑀺 𑀉𑀢𑁆𑀢𑀫𑀸𑀦𑀁 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀁. 𑀉𑀢𑁆𑀢𑀫𑀭𑀲𑀸𑀦𑀦𑁆𑀢𑀺 𑀉𑀢𑁆𑀢𑀫𑀸𑀦𑀁 𑀭𑀲𑀸𑀦𑀁. 𑀉𑀜𑁆𑀙𑀸𑀘𑀸𑀭𑁂𑀦𑀸𑀢𑀺 𑀉𑀜𑁆𑀙𑀸𑀘𑀭𑀺𑀬𑀸𑀬 𑀓𑀲𑁆𑀲𑀘𑀺 𑀅𑀧𑀭𑀺𑀕𑁆𑀕𑀳𑀪𑀽𑀢𑀲𑁆𑀲 𑀓𑀺𑀜𑁆𑀘𑀺 𑀅𑀬𑀸𑀘𑀺𑀢𑁆𑀯𑀸 𑀕𑀳𑀡𑀁 𑀉𑀜𑁆𑀙𑀸𑀘𑀸𑀭𑁄. 𑀏𑀢𑁆𑀣 𑀘𑀸𑀢𑀺𑀆𑀤𑀺𑀦𑀸 𑀅𑀦𑁆𑀦𑀸𑀤𑀻𑀦𑀁 𑀅𑀕𑁆𑀕𑀪𑀸𑀯𑁄 𑀦𑀸𑀫 𑀫𑀦𑀸𑀧𑀧𑀭𑀫𑁄 𑀇𑀘𑁆𑀙𑀺𑀢𑀓𑁆𑀔𑀡𑀮𑀸𑀪𑁄, 𑀦 𑀢𑁂𑀲𑀁 𑀮𑀸𑀪𑀺𑀢𑀸𑀫𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀧𑀝𑀺𑀮𑀪𑀦𑁆𑀢𑀻𑀢𑀺 𑀤𑁂𑀦𑁆𑀢𑀺 𑀧𑀡𑀻𑀢𑀪𑀸𑀯𑁂𑀦. 𑀪𑀢𑁆𑀢𑀲𑁆𑀲 𑀏𑀓𑀧𑀸𑀢𑀻𑀢𑀺 𑀏𑀓𑀧𑀸𑀢𑀺𑀧𑀽𑀭𑀁 𑀪𑀢𑁆𑀢𑀁. 𑀇𑀤𑀁 𑀓𑀺𑀁 𑀦𑀸𑀫𑀸𑀢𑀺 ‘‘𑀇𑀤𑀁 𑀅𑀦𑁆𑀦𑀕𑁆𑀕𑀭𑀲𑀕𑁆𑀕𑀁 𑀦𑀸𑀫 𑀳𑁄𑀢𑀺, 𑀦 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀢𑀺. 𑀉𑀜𑁆𑀙𑁂𑀦 𑀓𑀧𑀸𑀮𑀸𑀪𑀢𑁂𑀦𑀸𑀢𑀺 𑀫𑀺𑀲𑁆𑀲𑀓𑀪𑀢𑁆𑀢𑁂𑀦. 𑀬𑀸𑀧𑁂𑀦𑁆𑀢𑁂𑀢𑀺 𑀬𑀸𑀧𑀦𑀲𑀻𑀲𑁂𑀦 𑀬𑀸𑀧𑀦𑀳𑁂𑀢𑀼𑀁 𑀪𑀢𑁆𑀢𑀁 𑀯𑀤𑀢𑀺. 𑀉𑀧𑀸𑀤𑀸𑀬 𑀅𑀕𑁆𑀕𑀭𑀲𑀁 𑀦𑀸𑀫𑀸𑀢𑀺 𑀢𑀁 𑀢𑀁 𑀉𑀧𑀸𑀤𑀸𑀬𑀼𑀧𑀸𑀤𑀸𑀬 𑀅𑀦𑁆𑀦𑀕𑁆𑀕𑀭𑀲𑀕𑁆𑀕𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀘𑀓𑁆𑀓𑀯𑀢𑁆𑀢𑀺𑀆𑀳𑀸𑀭𑀢𑁄 𑀳𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀆𑀳𑀸𑀭𑁄 𑀅𑀕𑁆𑀕𑁄𑀢𑀺 𑀏𑀯𑀁 𑀬𑀸𑀯 𑀧𑀭𑀦𑀺𑀫𑁆𑀫𑀺𑀢𑀯𑀲𑀯𑀢𑁆𑀢𑀺𑀤𑁂𑀯𑀸 𑀦𑁂𑀢𑀩𑁆𑀩𑀁.

𑁩𑁩𑁫. 𑀅𑀢𑁆𑀣𑀭𑀲𑁄 𑀦𑀸𑀫 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 ‘‘𑀅𑀭𑀺𑀬𑀫𑀕𑁆𑀕𑀸𑀦𑀁 𑀨𑀮𑀪𑀽𑀢𑁄 𑀭𑀲𑁄’’𑀢𑀺 𑀓𑀢𑁆𑀯𑀸. 𑀥𑀫𑁆𑀫𑀭𑀲𑁄 𑀦𑀸𑀫 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 ‘‘𑀲𑀸𑀫𑀜𑁆𑀜𑀨𑀮𑀲𑁆𑀲 𑀳𑁂𑀢𑀼𑀪𑀽𑀢𑁄 𑀭𑀲𑁄’’𑀢𑀺 𑀓𑀢𑁆𑀯𑀸 𑀯𑀺𑀫𑀼𑀢𑁆𑀢𑀺𑀭𑀲𑁄 𑀦𑀸𑀫 𑀅𑀫𑀢𑀁 𑀦𑀺𑀩𑁆𑀩𑀸𑀦𑀁 ‘‘𑀲𑀩𑁆𑀩𑀲𑀗𑁆𑀔𑀸𑀭𑀲𑀫𑀣𑁄’’𑀢𑀺 𑀓𑀢𑁆𑀯𑀸.

𑀘𑀢𑀼𑀢𑁆𑀣𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀚𑀫𑁆𑀩𑀼𑀤𑀻𑀧𑀧𑁂𑀬𑁆𑀬𑀸𑀮𑁄 𑀦𑀺𑀝𑁆𑀞𑀺𑀢𑁄.

𑁧𑁭. 𑀧𑀲𑀸𑀤𑀓𑀭𑀥𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸

𑁩𑁬𑁬. 𑀅𑀤𑁆𑀥𑀫𑀺𑀤𑀦𑁆𑀢𑀺 ¶ 𑀲𑀦𑁆𑀥𑀺𑀯𑀲𑁂𑀦 𑀧𑀸𑀴𑀺𑀬𑀁 𑀭𑀲𑁆𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁, 𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄𑀢𑀺 𑀆𑀳 𑁋 ‘‘𑀅𑀤𑁆𑀥𑀸 𑀇𑀤’’𑀦𑁆𑀢𑀺. 𑀏𑀓𑀁𑀲𑁄 𑀏𑀲𑀸𑀢𑀺 𑀏𑀓𑀁𑀲𑁄 𑀳𑁂𑀢𑀼 ¶ 𑀏𑀲 𑀮𑀸𑀪𑀸𑀦𑀁. 𑀧𑀸𑀧𑀓𑀁 𑀦𑀸𑀫𑀸𑀢𑀺 𑀅𑀧𑁆𑀧𑀓𑀫𑁆𑀧𑀺 𑀧𑀸𑀧𑀁 𑀦𑀸𑀫 𑀩𑁆𑀬𑀢𑁆𑀢𑀁 𑀏𑀓𑀁𑀲𑁂𑀦 𑀦 𑀓𑀭𑁄𑀢𑀺. 𑀢𑀣𑀲𑁆𑀲𑀸𑀢𑀺 𑀢𑀣𑀸 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀫𑀸𑀦𑀲𑁆𑀲 𑀅𑀲𑁆𑀲. 𑀆𑀭𑀜𑁆𑀜𑀺𑀓𑀢𑁆𑀢𑀁…𑀧𑁂… 𑀢𑁂𑀘𑀻𑀯𑀭𑀺𑀓𑀢𑁆𑀢𑀦𑁆𑀢𑀺 𑀇𑀫𑁂𑀲𑀁 𑀥𑀼𑀢𑀥𑀫𑁆𑀫𑀸𑀦𑀁 𑀕𑀳𑀡𑁂𑀦𑁂𑀯 𑀇𑀢𑀭𑁂𑀲𑀫𑁆𑀧𑀺 𑀢𑀁𑀲𑀪𑀸𑀕𑀸𑀦𑀁 𑀕𑀳𑀺𑀢𑀪𑀸𑀯𑁄 𑀤𑀝𑁆𑀞𑀩𑁆𑀩𑁄. 𑀣𑀸𑀯𑀭𑀧𑁆𑀧𑀢𑁆𑀢𑀪𑀸𑀯𑁄𑀢𑀺 𑀲𑀸𑀲𑀦𑁂 𑀣𑀺𑀭𑀪𑀸𑀯𑀧𑁆𑀧𑀢𑁆𑀢𑀺 𑀣𑁂𑀭𑀪𑀸𑀯𑁄. 𑀆𑀓𑀧𑁆𑀧𑀲𑁆𑀲 𑀲𑀫𑁆𑀧𑀢𑁆𑀢𑀻𑀢𑀺 ‘‘𑀅𑀜𑁆𑀜𑁄 𑀫𑁂 𑀆𑀓𑀧𑁆𑀧𑁄 𑀓𑀭𑀡𑀻𑀬𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑀲𑁆𑀲 𑀆𑀓𑀧𑁆𑀧𑀲𑁆𑀲 𑀲𑀫𑁆𑀧𑀢𑁆𑀢𑀺. 𑀓𑁄𑀮𑀧𑀼𑀢𑁆𑀢𑀻𑀢𑀺 𑀓𑁄𑀮𑀧𑀼𑀢𑁆𑀢𑀺𑀬𑀦𑁆𑀢𑀺 𑀆𑀳 𑁋 ‘‘𑀓𑀼𑀮𑀧𑀼𑀢𑁆𑀢𑀪𑀸𑀯𑁄’’𑀢𑀺. 𑀲𑀫𑁆𑀧𑀦𑁆𑀦𑀭𑀽𑀧𑀢𑀸𑀢𑀺 𑀉𑀧𑀥𑀺𑀲𑀫𑁆𑀧𑀤𑀸. 𑀯𑀘𑀦𑀓𑀺𑀭𑀺𑀬𑀸𑀬𑀸𑀢𑀺 𑀯𑀘𑀦𑀧𑁆𑀧𑀬𑁄𑀕𑀲𑁆𑀲 𑀫𑀥𑀼𑀭𑀪𑀸𑀯𑁄 𑀫𑀜𑁆𑀚𑀼𑀲𑁆𑀲𑀭𑀢𑀸. 𑀢𑁂𑀦𑀲𑁆𑀲 𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀤𑀁 𑀦 𑀮𑀸𑀪𑀼𑀧𑁆𑀧𑀸𑀤𑀦𑀽𑀧𑀸𑀬𑀤𑀲𑁆𑀲𑀦𑀧𑀭𑀁, 𑀅𑀣 𑀔𑁄 𑀏𑀯𑀁 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀫𑀸𑀦𑀲𑁆𑀲 𑀅𑀦𑀺𑀘𑁆𑀙𑀦𑁆𑀢𑀲𑁆𑀲𑁂𑀯 𑀮𑀸𑀪𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀮𑀸𑀪𑀲𑁆𑀲 𑀅𑀩𑁆𑀬𑀪𑀺𑀘𑀸𑀭𑀳𑁂𑀢𑀼𑀤𑀲𑁆𑀲𑀦𑀧𑀭𑀁 𑀤𑀝𑁆𑀞𑀩𑁆𑀩𑀁. 𑀬𑀣𑀸𑀳 𑁋

‘‘𑀆𑀓𑀗𑁆𑀔𑁂𑀬𑁆𑀬 𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀮𑀸𑀪𑀻 𑀅𑀲𑁆𑀲𑀁 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑁆𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀦𑁆𑀢𑀺, 𑀲𑀻𑀮𑁂𑀲𑁆𑀯𑁂𑀯𑀲𑁆𑀲 𑀧𑀭𑀺𑀧𑀽𑀭𑀓𑀸𑀭𑀻’’𑀢𑀺 (𑀫. 𑀦𑀺. 𑁧.𑁬𑁫).

𑀧𑀲𑀸𑀤𑀓𑀭𑀥𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁮. 𑀅𑀧𑀭𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀯𑀕𑁆𑀕𑀯𑀡𑁆𑀡𑀦𑀸

𑁩𑁮𑁨. 𑀇𑀤𑀫𑁆𑀧𑀺 ¶ 𑀲𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀧𑀺-𑀲𑀤𑁆𑀤𑁄 𑀳𑁂𑀝𑁆𑀞𑀸 𑀯𑀼𑀢𑁆𑀢𑀘𑀽𑀴𑀘𑁆𑀙𑀭𑀸𑀲𑀗𑁆𑀖𑀸𑀢𑀲𑀼𑀢𑁆𑀢𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀘𑀽𑀴𑀘𑁆𑀙𑀭𑀸𑀲𑀗𑁆𑀖𑀸𑀢𑀲𑀼𑀢𑁆𑀢𑁂 𑀅𑀧𑁆𑀧𑀦𑀁 𑀅𑀧𑁆𑀧𑀢𑁆𑀢𑀸𑀬 𑀫𑁂𑀢𑁆𑀢𑀸𑀬 𑀢𑀸𑀯𑀫𑀳𑀦𑁆𑀢𑁄 𑀯𑀺𑀧𑀸𑀓𑁄 𑀤𑀲𑁆𑀲𑀺𑀢𑁄, 𑀓𑀺𑀫𑀗𑁆𑀕𑀁 𑀧𑀦 𑀇𑀫𑀺𑀲𑁆𑀲𑀸 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀬 𑀫𑁂𑀢𑁆𑀢𑀸𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 𑁋 ‘‘𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸𑀬 𑀳𑀻’’𑀢𑀺𑀆𑀤𑀺𑀫𑀸𑀳. 𑀯𑀺𑀧𑀸𑀓𑀓𑀣𑀸𑀬𑁂𑀯 𑀦𑀢𑁆𑀣𑀻𑀢𑀺 𑀯𑀺𑀧𑀸𑀓𑁂 𑀓𑀣𑀸𑀬𑁂𑀯 𑀦𑀢𑁆𑀣𑀺, 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸𑀢𑀺 𑀕𑀡𑀦𑀸𑀦𑀼𑀧𑀼𑀩𑁆𑀩𑀢𑀸𑀬. 𑀧𑀞𑀫𑀁 𑀉𑀧𑁆𑀧𑀦𑁆𑀦𑀦𑁆𑀢𑀺𑀧𑀺 𑀧𑀞𑀫𑀁, 𑀧𑀞𑀫𑀁 𑀲𑀫𑀸𑀧𑀚𑁆𑀚𑀢𑀻𑀢𑀺 𑀇𑀤𑀁 𑀧𑀦 𑀦 𑀏𑀓𑀦𑁆𑀢𑀮𑀓𑁆𑀔𑀡𑀁. 𑀘𑀺𑀡𑁆𑀡𑀯𑀲𑀻𑀪𑀸𑀯𑁄 𑀳𑀺 𑀅𑀝𑁆𑀞𑀲𑀫𑀸𑀧𑀢𑁆𑀢𑀺𑀮𑀸𑀪𑀻 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀫𑀢𑁆𑀣𑀓𑀁 𑀧𑀸𑀧𑁂𑀦𑁆𑀢𑁄𑀧𑀺 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀓𑁆𑀓𑁄𑀢𑀺, 𑀫𑀢𑁆𑀣𑀓𑀢𑁄 𑀧𑀝𑁆𑀞𑀸𑀬 𑀆𑀤𑀺𑀁 𑀧𑀸𑀧𑁂𑀦𑁆𑀢𑁄𑀧𑀺, 𑀅𑀦𑁆𑀢𑀭𑀦𑁆𑀢𑀭𑀸 𑀑𑀓𑁆𑀓𑀦𑁆𑀢𑁄𑀧𑀺 𑀲𑀫𑀸𑀧𑀚𑁆𑀚𑀺𑀢𑀼𑀁 𑀲𑀓𑁆𑀓𑁄𑀢𑀺 𑀏𑀯. 𑀧𑀼𑀩𑁆𑀩𑀼𑀧𑁆𑀧𑀢𑁆𑀢𑀺𑀬𑀝𑁆𑀞𑁂𑀦 𑀧𑀦 𑀧𑀞𑀫𑀁 𑀦𑀸𑀫 𑀳𑁄𑀢𑀺. 𑀯𑀺𑀪𑀗𑁆𑀕𑁂𑀢𑀺 𑀛𑀸𑀦𑀯𑀺𑀪𑀗𑁆𑀕𑁂. 𑀯𑀺𑀧𑀲𑁆𑀲𑀦𑀁 𑀓𑀬𑀺𑀭𑀫𑀸𑀦𑀁 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀓𑀺𑀘𑁆𑀘𑀁 𑀫𑀕𑁆𑀕𑁂𑀦 𑀲𑀺𑀚𑁆𑀛𑀢𑀺 𑀢𑀕𑁆𑀕𑀢𑀲𑀫𑁆𑀫𑁄𑀳𑀯𑀺𑀤𑁆𑀥𑀁𑀲𑀦𑀢𑁄 ¶ . 𑀅𑀧𑀺𑀘 𑀯𑀺𑀧𑀲𑁆𑀲𑀦𑀸𑀬 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁 𑀫𑀕𑁆𑀕𑁂𑀦 𑀉𑀧𑁆𑀧𑀦𑁆𑀦𑁂𑀦 𑀲𑀺𑀚𑁆𑀛𑀢𑀺 𑀇𑀢𑀭𑀣𑀸 𑀧𑀭𑀺𑀯𑀢𑁆𑀢𑀦𑀢𑁄, 𑀢𑀲𑁆𑀫𑀸 𑀫𑀕𑁆𑀕𑁄 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀁, 𑀦 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀸𑀦𑀁 𑀆𑀭𑀫𑁆𑀫𑀡𑀓𑀭𑀡𑀢𑁄. 𑀬𑀣𑀸 𑀨𑀮𑀁 𑀦𑀺𑀩𑁆𑀩𑀸𑀦𑀲𑁆𑀲 𑀅𑀲𑀗𑁆𑀔𑀢𑀮𑀓𑁆𑀔𑀡𑀁 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀉𑀧𑀦𑀺𑀚𑁆𑀛𑀸𑀬𑀢𑀺, 𑀏𑀯𑀁 𑀫𑀕𑁆𑀕𑁄𑀧𑀺. 𑀏𑀯𑀫𑁆𑀧𑀺𑀲𑁆𑀲 𑀮𑀓𑁆𑀔𑀡𑀽𑀧𑀦𑀺𑀚𑁆𑀛𑀸𑀦𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺 𑀅𑀭𑀺𑀢𑁆𑀢𑀚𑁆𑀛𑀸𑀦𑀢𑀸𑀬. 𑀲𑁂𑀲𑀁 𑀯𑀺𑀲𑁂𑀲𑀁, 𑀅𑀭𑀺𑀢𑁆𑀢𑀚𑁆𑀛𑀸𑀦𑀸 𑀏𑀯𑀸𑀢𑀺 𑀅𑀢𑁆𑀣𑁄.

𑁩𑁮𑁬-𑁩𑁮𑁭. 𑀳𑀺𑀢𑀨𑀭𑀡𑀦𑁆𑀢𑀺 𑀲𑀢𑁆𑀢𑁂𑀲𑀼 𑀳𑀺𑀢𑀸𑀦𑀼𑀭𑀽𑀧𑀁 𑀛𑀸𑀦𑀲𑁆𑀲 𑀨𑀭𑀺𑀢𑁆𑀯𑀸 𑀧𑀯𑀢𑁆𑀢𑀦𑀁. 𑀘𑁂𑀢𑁄𑀧𑀝𑀺𑀧𑀓𑁆𑀔𑀢𑁄 𑀯𑀺𑀫𑀼𑀘𑁆𑀘𑀢𑀺 𑀏𑀢𑀸𑀬𑀸𑀢𑀺 𑀘𑁂𑀢𑁄𑀯𑀺𑀫𑀼𑀢𑁆𑀢𑀺, 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀸 𑀫𑁂𑀢𑁆𑀢𑀸. 𑀢𑁂𑀦𑀸𑀳 𑁋 ‘‘𑀇𑀥𑀸’’𑀢𑀺𑀆𑀤𑀺. 𑀏𑀲𑁂𑀯 𑀦𑀬𑁄𑀢𑀺 𑀇𑀫𑀺𑀦𑀸 𑀓𑀭𑀼𑀡𑀸𑀤𑀻𑀦𑀫𑁆𑀧𑀺 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀢𑀁 𑀅𑀢𑀺𑀤𑀺𑀲𑀢𑀺. 𑀯𑀝𑁆𑀝𑀁 𑀳𑁄𑀦𑁆𑀢𑀺 𑀓𑀫𑁆𑀫𑀯𑀝𑁆𑀝𑀪𑀸𑀯𑀢𑁄. 𑀯𑀝𑁆𑀝𑀧𑀸𑀤𑀸 𑀳𑁄𑀦𑁆𑀢𑀻𑀢𑀺 𑀯𑀺𑀧𑀸𑀓𑀯𑀝𑁆𑀝𑀲𑁆𑀲 𑀓𑀸𑀭𑀡𑀁 𑀳𑁄𑀦𑁆𑀢𑀺.

𑁩𑁯𑁦. 𑀅𑀚𑁆𑀛𑀢𑁆𑀢𑀧𑀭𑀺𑀓𑀫𑁆𑀫𑀯𑀲𑁂𑀦𑀸𑀢𑀺 𑀅𑀢𑁆𑀢𑀦𑁄 𑀓𑁂𑀲𑀸𑀤𑀻𑀲𑀼 𑀧𑀭𑀺𑀓𑀫𑁆𑀫𑀓𑀭𑀡𑀯𑀲𑁂𑀦. 𑀅𑀝𑁆𑀞𑀸𑀭𑀲𑀯𑀺𑀥𑁂𑀢𑀺 𑀅𑀝𑁆𑀞𑀸𑀭𑀲𑀧𑁆𑀧𑀪𑁂𑀤𑁂. 𑀓𑀸𑀬𑁂𑀢𑀺 𑀭𑀽𑀧𑀓𑀸𑀬𑁂. 𑀭𑀽𑀧𑀓𑀸𑀬𑁄 𑀳𑀺 𑀇𑀥 𑀅𑀗𑁆𑀕𑀧𑀘𑁆𑀘𑀗𑁆𑀕𑀸𑀦𑀁 𑀓𑁂𑀲𑀸𑀤𑀻𑀦𑀜𑁆𑀘 𑀥𑀫𑁆𑀫𑀸𑀦𑀁 𑀲𑀫𑀽𑀳𑀝𑁆𑀞𑁂𑀦 𑀳𑀢𑁆𑀣𑀺𑀓𑀸𑀬𑀭𑀣𑀓𑀸𑀬𑀸𑀤𑀬𑁄 𑀯𑀺𑀬 𑀓𑀸𑀬𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀲𑀫𑀽𑀳𑀯𑀺𑀲𑀬𑀢𑀸𑀬 𑀘𑀲𑁆𑀲 𑀓𑀸𑀬𑀲𑀤𑁆𑀤𑀲𑁆𑀲 𑀲𑀫𑀼𑀤𑀸𑀬𑀽𑀧𑀸𑀤𑀦𑀢𑀸𑀬 𑀘 𑀅𑀲𑀼𑀪𑀸𑀓𑀸𑀭𑀲𑁆𑀲 ‘‘𑀓𑀸𑀬𑁂’’𑀢𑀺 𑀏𑀓𑀯𑀘𑀦𑀁. 𑀢𑀣𑀸 𑀆𑀭𑀫𑁆𑀫𑀡𑀸𑀤𑀺𑀯𑀺𑀪𑀸𑀕𑁂𑀦 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀫𑁆𑀧𑀺 𑀘𑀺𑀢𑁆𑀢𑀁 𑀘𑀺𑀢𑁆𑀢𑀪𑀸𑀯𑀲𑀸𑀫𑀜𑁆𑀜𑁂𑀦 𑀏𑀓𑀚𑁆𑀛𑀁 𑀕𑀳𑁂𑀢𑁆𑀯𑀸 ‘‘𑀘𑀺𑀢𑁆𑀢𑁂’’𑀢𑀺 𑀏𑀓𑀯𑀘𑀦𑀁 𑀓𑀢𑀁. 𑀓𑀸𑀬𑀸𑀦𑀼𑀧𑀲𑁆𑀲𑀻𑀢𑀺 𑀇𑀫𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀢𑀫𑁂𑀯 𑀓𑀸𑀬𑀁 𑀧𑀜𑁆𑀜𑀸𑀬 𑀅𑀦𑀼𑀧𑀲𑁆𑀲𑀦𑁆𑀢𑁄’’𑀢𑀺 𑀆𑀳. 𑀢𑀫𑁂𑀯 𑀓𑀸𑀬𑀦𑁆𑀢𑀺 𑀘 ¶ 𑀅𑀯𑀥𑀸𑀭𑀡𑁂𑀦 𑀯𑁂𑀤𑀦𑀸𑀤𑀺𑀅𑀦𑀼𑀧𑀲𑁆𑀲𑀦𑀁 𑀦𑀺𑀯𑀢𑁆𑀢𑁂𑀢𑀺. 𑀢𑁂𑀦 𑀘 𑀧𑀼𑀦 𑀓𑀸𑀬𑀕𑁆𑀕𑀳𑀡𑀲𑁆𑀲 𑀧𑀬𑁄𑀚𑀦𑀁 𑀲𑀽𑀘𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀓𑀸𑀬𑁂’’𑀢𑀺 𑀳𑀺 𑀯𑀢𑁆𑀯𑀸𑀧𑀺 𑀧𑀼𑀦 ‘‘𑀓𑀸𑀬𑀸𑀦𑀼𑀧𑀲𑁆𑀲𑀻’’𑀢𑀺 𑀤𑀼𑀢𑀺𑀬𑀁 𑀓𑀸𑀬𑀕𑁆𑀕𑀳𑀡𑀁 𑀅𑀲𑀫𑁆𑀫𑀺𑀲𑁆𑀲𑀢𑁄 𑀯𑀯𑀢𑁆𑀣𑀸𑀦𑀖𑀦𑀯𑀺𑀦𑀺𑀩𑁆𑀪𑁄𑀕𑀸𑀤𑀺𑀤𑀲𑁆𑀲𑀦𑀢𑁆𑀣𑀁 𑀓𑀢𑀁. 𑀢𑁂𑀦 𑀯𑁂𑀤𑀦𑀸𑀤𑀬𑁄𑀧𑀺 𑀏𑀢𑁆𑀣 𑀲𑀺𑀢𑀸, 𑀏𑀢𑁆𑀣 𑀧𑀝𑀺𑀩𑀤𑁆𑀥𑀸𑀢𑀺 𑀓𑀸𑀬𑀯𑁂𑀤𑀦𑀸𑀤𑀺𑀅𑀦𑀼𑀧𑀲𑁆𑀲𑀦𑀧𑁆𑀧𑀲𑀗𑁆𑀕𑁂𑀧𑀺 𑀆𑀧𑀦𑁆𑀦𑁂 𑀦 𑀓𑀸𑀬𑁂 𑀯𑁂𑀤𑀦𑀸𑀦𑀼𑀧𑀲𑁆𑀲𑀻 𑀘𑀺𑀢𑁆𑀢𑀸𑀦𑀼𑀧𑀲𑁆𑀲𑀻 𑀥𑀫𑁆𑀫𑀸𑀦𑀼𑀧𑀲𑁆𑀲𑀻 𑀯𑀸. 𑀅𑀣 𑀔𑁄 𑀓𑀸𑀬𑀸𑀦𑀼𑀧𑀲𑁆𑀲𑀻𑀬𑁂𑀯𑀸𑀢𑀺 𑀓𑀸𑀬𑀲𑀗𑁆𑀔𑀸𑀢𑀯𑀢𑁆𑀣𑀼𑀲𑁆𑀫𑀺𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀓𑀸𑀭𑀲𑁆𑀲𑁂𑀯 𑀤𑀲𑁆𑀲𑀦𑁂𑀦 𑀅𑀲𑀫𑁆𑀫𑀺𑀲𑁆𑀲𑀢𑁄 𑀯𑀯𑀢𑁆𑀣𑀸𑀦𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑀣𑀸 𑀦 𑀓𑀸𑀬𑁂 𑀅𑀗𑁆𑀕𑀧𑀘𑁆𑀘𑀗𑁆𑀕𑀯𑀺𑀦𑀺𑀫𑀼𑀢𑁆𑀢𑀏𑀓𑀥𑀫𑁆𑀫𑀸𑀦𑀼𑀧𑀲𑁆𑀲𑀻, 𑀦𑀸𑀧𑀺 𑀓𑁂𑀲𑀮𑁄𑀫𑀸𑀤𑀺𑀯𑀺𑀦𑀺𑀫𑀼𑀢𑁆𑀢𑀇𑀢𑁆𑀣𑀺𑀧𑀼𑀭𑀺𑀲𑀸𑀦𑀼𑀧𑀲𑁆𑀲𑀻. 𑀬𑁄𑀧𑀺 𑀘𑁂𑀢𑁆𑀣 𑀓𑁂𑀲𑀮𑁄𑀫𑀸𑀤𑀺𑀓𑁄 𑀪𑀽𑀢𑀼𑀧𑀸𑀤𑀸𑀬𑀲𑀫𑀽𑀳𑀲𑀗𑁆𑀔𑀸𑀢𑁄 𑀓𑀸𑀬𑁄, 𑀓𑀢𑁆𑀣𑀧𑀺 𑀦 𑀪𑀽𑀢𑀼𑀧𑀸𑀤𑀸𑀬𑀯𑀺𑀦𑀺𑀫𑀼𑀢𑁆𑀢𑀏𑀓𑀥𑀫𑁆𑀫𑀸𑀦𑀼𑀧𑀲𑁆𑀲𑀻, 𑀅𑀣 𑀔𑁄 𑀭𑀣𑀲𑀫𑁆𑀪𑀸𑀭𑀸𑀦𑀼𑀧𑀲𑁆𑀲𑀓𑁄 𑀯𑀺𑀬 𑀅𑀗𑁆𑀕𑀧𑀘𑁆𑀘𑀗𑁆𑀕𑀲𑀫𑀽𑀳𑀸𑀦𑀼𑀧𑀲𑁆𑀲𑀻 ¶ , 𑀦𑀸𑀕𑀭𑀸𑀯𑀬𑀯𑀸𑀦𑀼𑀧𑀲𑁆𑀲𑀓𑁄 𑀯𑀺𑀬 𑀓𑁂𑀲𑀮𑁄𑀫𑀸𑀤𑀺𑀲𑀫𑀽𑀳𑀸𑀦𑀼𑀧𑀲𑁆𑀲𑀻, 𑀓𑀤𑀮𑀺𑀓𑁆𑀔𑀦𑁆𑀥𑀧𑀢𑁆𑀢𑀯𑀝𑁆𑀝𑀺𑀯𑀺𑀦𑀺𑀩𑁆𑀪𑀼𑀚𑁆𑀚𑀓𑁄 𑀭𑀺𑀢𑁆𑀢𑀫𑀼𑀝𑁆𑀞𑀺𑀯𑀺𑀦𑀺𑀯𑁂𑀞𑀓𑁄 𑀯𑀺𑀬 𑀘 𑀪𑀽𑀢𑀼𑀧𑀸𑀤𑀸𑀬𑀲𑀫𑀽𑀳𑀸𑀦𑀼𑀧𑀲𑁆𑀲𑀻𑀬𑁂𑀯𑀸𑀢𑀺 𑀦𑀸𑀦𑀧𑁆𑀧𑀓𑀸𑀭𑀢𑁄 𑀲𑀫𑀽𑀳𑀯𑀲𑁂𑀦𑁂𑀯 𑀓𑀸𑀬𑀲𑀗𑁆𑀔𑀸𑀢𑀲𑁆𑀲 𑀯𑀢𑁆𑀣𑀼𑀦𑁄 𑀤𑀲𑁆𑀲𑀦𑁂𑀦 𑀖𑀦𑀯𑀺𑀦𑀺𑀩𑁆𑀪𑁄𑀕𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀦 𑀳𑁂𑀢𑁆𑀣 𑀬𑀣𑀸𑀯𑀼𑀢𑁆𑀢𑀲𑀫𑀽𑀳𑀯𑀺𑀦𑀺𑀫𑀼𑀢𑁆𑀢𑁄 𑀓𑀸𑀬𑁄 𑀯𑀸 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀅𑀜𑁆𑀜𑁄 𑀯𑀸 𑀓𑁄𑀘𑀺 𑀥𑀫𑁆𑀫𑁄 𑀤𑀺𑀲𑁆𑀲𑀢𑀺, 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀲𑀫𑀽𑀳𑀫𑀢𑁆𑀢𑁂𑀬𑁂𑀯 𑀧𑀦 𑀢𑀣𑀸 𑀢𑀣𑀸 𑀲𑀢𑁆𑀢𑀸 𑀫𑀺𑀘𑁆𑀙𑀸𑀪𑀺𑀦𑀺𑀯𑁂𑀲𑀁 𑀓𑀭𑁄𑀦𑁆𑀢𑀺.

𑀅𑀝𑁆𑀞𑀸𑀭𑀲𑀯𑀺𑀥𑁂𑀦𑀸𑀢𑀺 𑀅𑀝𑁆𑀞𑀸𑀭𑀲𑀯𑀺𑀥𑀸. 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀓𑀲𑁆𑀲𑀸𑀢𑀺 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀁 𑀪𑀸𑀯𑁂𑀦𑁆𑀢𑀲𑁆𑀲. 𑀢𑀻𑀲𑀼 𑀪𑀯𑁂𑀲𑀼 𑀓𑀺𑀮𑁂𑀲𑁂 𑀆𑀢𑀧𑁂𑀢𑀻𑀢𑀺 𑀆𑀢𑀸𑀧𑁄, 𑀯𑀻𑀭𑀺𑀬𑀲𑁆𑀲𑁂𑀢𑀁 𑀦𑀸𑀫𑀁. 𑀬𑀤𑀺𑀧𑀺 𑀳𑀺 𑀓𑀺𑀮𑁂𑀲𑀸𑀦𑀁 𑀧𑀳𑀸𑀦𑀁 𑀆𑀢𑀸𑀧𑀦𑀦𑁆𑀢𑀺, 𑀢𑀁 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀫𑁆𑀧𑀺 𑀅𑀢𑁆𑀣𑁂𑀯. 𑀆𑀢𑀧𑀲𑀤𑁆𑀤𑁄 𑀯𑀺𑀬 𑀧𑀦 𑀆𑀢𑀸𑀧𑀲𑀤𑁆𑀤𑁄𑀧𑀺 𑀯𑀻𑀭𑀺𑀬𑁂𑀯 𑀦𑀺𑀭𑀼𑀴𑁆𑀳𑁄. 𑀅𑀣 𑀯𑀸 𑀧𑀝𑀺𑀧𑀓𑁆𑀔𑀧𑁆𑀧𑀳𑀸𑀦𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀩𑁆𑀪𑀼𑀲𑁆𑀲𑀳𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀲𑁆𑀲 𑀯𑀻𑀭𑀺𑀬𑀲𑁆𑀲 𑀲𑀸𑀢𑀺𑀲𑀬𑀁 𑀢𑀤𑀸𑀢𑀸𑀧𑀦𑀦𑁆𑀢𑀺 𑀯𑀻𑀭𑀺𑀬𑀫𑁂𑀯 𑀢𑀣𑀸 𑀯𑀼𑀘𑁆𑀘𑀢𑀺, 𑀦 𑀅𑀜𑁆𑀜𑀥𑀫𑁆𑀫𑀸, 𑀢𑀲𑁆𑀫𑀸 𑀆𑀢𑀸𑀧𑁄𑀢𑀺 𑀯𑀻𑀭𑀺𑀬𑀲𑁆𑀲 𑀦𑀸𑀫𑀁, 𑀲𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀆𑀢𑀸𑀧𑀻. 𑀅𑀬𑀜𑁆𑀘 𑀈𑀓𑀸𑀭𑁄 𑀧𑀲𑀁𑀲𑀸𑀬 𑀅𑀢𑀺𑀲𑀬𑀲𑁆𑀲 𑀯𑀸 𑀤𑀻𑀧𑀓𑁄𑀢𑀺 𑀆𑀢𑀸𑀧𑀺𑀕𑁆𑀕𑀳𑀡𑁂𑀦 𑀲𑀫𑁆𑀫𑀧𑁆𑀧𑀥𑀸𑀦𑀲𑀫𑀗𑁆𑀕𑀺𑀢𑀁 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑀸𑀳 𑁋 ‘‘𑀆𑀢𑀸𑀧𑀻𑀢𑀺…𑀧𑁂… 𑀯𑀻𑀭𑀺𑀬𑁂𑀦 𑀯𑀻𑀭𑀺𑀬𑀯𑀸’’𑀢𑀺. 𑀲𑀫𑁆𑀧𑀚𑀸𑀦𑁄𑀢𑀺 𑀲𑀫𑁆𑀧𑀚𑀜𑁆𑀜𑀲𑀗𑁆𑀔𑀸𑀢𑁂𑀦 𑀜𑀸𑀡𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀢𑁂𑀦𑀸𑀳 𑁋 ‘‘𑀅𑀝𑁆𑀞𑀸𑀭𑀲𑀯𑀺𑀥𑁂𑀦…𑀧𑁂… 𑀲𑀫𑁆𑀫𑀸 𑀧𑀚𑀸𑀦𑀦𑁆𑀢𑁄’’𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀯𑀘𑀦𑀢𑁆𑀣𑁄 𑁋 𑀲𑀫𑁆𑀫𑀸 𑀲𑀫𑀦𑁆𑀢𑀢𑁄 𑀲𑀸𑀫𑀜𑁆𑀘 𑀧𑀚𑀸𑀦𑀦𑁆𑀢𑁄 𑀲𑀫𑁆𑀧𑀚𑀸𑀦𑁄, 𑀅𑀲𑀫𑁆𑀫𑀺𑀲𑁆𑀲𑀢𑁄 𑀯𑀯𑀢𑁆𑀣𑀸𑀦𑁂 𑀅𑀜𑁆𑀜𑀥𑀫𑁆𑀫𑀸𑀦𑀼𑀧𑀲𑁆𑀲𑀺𑀢𑀸𑀪𑀸𑀯𑁂𑀦 𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑀁 𑀲𑀩𑁆𑀩𑀸𑀓𑀸𑀭𑀧𑁆𑀧𑀚𑀸𑀦𑁂𑀦 𑀲𑀫𑀦𑁆𑀢𑀢𑁄 𑀉𑀧𑀭𑀽𑀧𑀭𑀺𑀯𑀺𑀲𑁂𑀲𑀸𑀯𑀳𑀪𑀸𑀯𑁂𑀦 𑀧𑀯𑀢𑁆𑀢𑀺𑀬𑀸 𑀲𑀫𑁆𑀫𑀸 𑀧𑀚𑀸𑀦𑀦𑁆𑀢𑁄𑀢𑀺 𑀅𑀢𑁆𑀣𑁄.

𑀓𑀸𑀬𑁄 𑀘 𑀇𑀥 𑀮𑀼𑀚𑁆𑀚𑀦𑀧𑁆𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀮𑁄𑀓𑁄𑀢𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀆𑀳 𑁋 ‘‘𑀢𑀲𑁆𑀫𑀺𑀁𑀬𑁂𑀯 𑀓𑀸𑀬𑀲𑀗𑁆𑀔𑀸𑀢𑁂 𑀮𑁄𑀓𑁂’’𑀢𑀺. 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑀢𑀡𑁆𑀳𑀦𑁆𑀢𑀺 𑀭𑀽𑀧𑀸𑀤𑀻𑀲𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀧𑀯𑀢𑁆𑀢𑀫𑀸𑀦𑀁 𑀢𑀡𑁆𑀳𑀁 ¶ . 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀅𑀪𑀺𑀚𑁆𑀛𑀸𑀕𑀳𑀡𑁂𑀦 𑀓𑀸𑀫𑀘𑁆𑀙𑀦𑁆𑀤𑁄, 𑀤𑁄𑀫𑀦𑀲𑁆𑀲𑀕𑁆𑀕𑀳𑀡𑁂𑀦 𑀩𑁆𑀬𑀸𑀧𑀸𑀤𑁄 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀦𑀻𑀯𑀭𑀡𑀧𑀭𑀺𑀬𑀸𑀧𑀦𑁆𑀦𑀩𑀮𑀯𑀥𑀫𑁆𑀫𑀤𑁆𑀯𑀬𑀤𑀲𑁆𑀲𑀦𑁂𑀦 𑀦𑀻𑀯𑀭𑀡𑀧𑁆𑀧𑀳𑀸𑀦𑀁 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀲𑁂𑀲𑁂𑀦 𑀘𑁂𑀢𑁆𑀣 𑀅𑀪𑀺𑀚𑁆𑀛𑀸𑀯𑀺𑀦𑀬𑁂𑀦 𑀓𑀸𑀬𑀲𑀫𑁆𑀧𑀢𑁆𑀢𑀺𑀫𑀽𑀮𑀓𑀲𑁆𑀲 𑀅𑀦𑀼𑀭𑁄𑀥𑀲𑁆𑀲, 𑀤𑁄𑀫𑀦𑀲𑁆𑀲𑀯𑀺𑀦𑀬𑁂𑀦 𑀓𑀸𑀬𑀯𑀺𑀧𑀢𑁆𑀢𑀺𑀫𑀽𑀮𑀓𑀲𑁆𑀲 𑀯𑀺𑀭𑁄𑀥𑀲𑁆𑀲, 𑀅𑀪𑀺𑀚𑁆𑀛𑀸𑀯𑀺𑀦𑀬𑁂𑀦 𑀘 𑀓𑀸𑀬𑁂 𑀅𑀪𑀺𑀭𑀢𑀺𑀬𑀸, 𑀤𑁄𑀫𑀦𑀲𑁆𑀲𑀯𑀺𑀦𑀬𑁂𑀦 𑀓𑀸𑀬𑀪𑀸𑀯𑀦𑀸𑀬 𑀅𑀦𑀪𑀺𑀭𑀢𑀺𑀬𑀸, 𑀅𑀪𑀺𑀚𑁆𑀛𑀸𑀯𑀺𑀦𑀬𑁂𑀦 𑀓𑀸𑀬𑁂 𑀅𑀪𑀽𑀢𑀸𑀦𑀁 ¶ 𑀲𑀼𑀪𑀲𑀼𑀔𑀪𑀸𑀯𑀸𑀤𑀻𑀦𑀁 𑀧𑀓𑁆𑀔𑁂𑀧𑀲𑁆𑀲, 𑀤𑁄𑀫𑀦𑀲𑁆𑀲𑀯𑀺𑀦𑀬𑁂𑀦 𑀓𑀸𑀬𑁂 𑀪𑀽𑀢𑀸𑀦𑀁 𑀅𑀲𑀼𑀪𑀸𑀲𑀼𑀔𑀪𑀸𑀯𑀸𑀤𑀻𑀦𑀁 𑀅𑀧𑀦𑀬𑀦𑀲𑁆𑀲 𑀘 𑀧𑀳𑀸𑀦𑀁 𑀯𑀼𑀢𑁆𑀢𑀁. 𑀢𑁂𑀦 𑀬𑁄𑀕𑀸𑀯𑀘𑀭𑀲𑁆𑀲 𑀬𑁄𑀕𑀸𑀦𑀼𑀪𑀸𑀯𑁄 𑀬𑁄𑀕𑀲𑀫𑀢𑁆𑀣𑀢𑀸 𑀘 𑀤𑀻𑀧𑀺𑀢𑀸 𑀳𑁄𑀢𑀺. 𑀬𑁄𑀕𑀸𑀦𑀼𑀪𑀸𑀯𑁄 𑀳𑀺 𑀏𑀲, 𑀬𑀤𑀺𑀤𑀁 𑀅𑀦𑀼𑀭𑁄𑀥𑀯𑀺𑀭𑁄𑀥𑀯𑀺𑀧𑁆𑀧𑀫𑀼𑀢𑁆𑀢𑁄 𑀅𑀭𑀢𑀺𑀭𑀢𑀺𑀲𑀳𑁄 𑀅𑀪𑀽𑀢𑀧𑀓𑁆𑀔𑁂𑀧𑀪𑀽𑀢𑀸𑀧𑀦𑀬𑀦𑀯𑀺𑀭𑀳𑀺𑀢𑁄 𑀘 𑀳𑁄𑀢𑀺. 𑀅𑀦𑀼𑀭𑁄𑀥𑀯𑀺𑀭𑁄𑀥𑀯𑀺𑀧𑁆𑀧𑀫𑀼𑀢𑁆𑀢𑁄 𑀘𑁂𑀲 𑀅𑀭𑀢𑀺𑀭𑀢𑀺𑀲𑀳𑁄 𑀅𑀪𑀽𑀢𑀁 𑀅𑀧𑀓𑁆𑀔𑀺𑀧𑀦𑁆𑀢𑁄 𑀪𑀽𑀢𑀜𑁆𑀘 𑀅𑀦𑀧𑀦𑁂𑀦𑁆𑀢𑁄 𑀬𑁄𑀕𑀲𑀫𑀢𑁆𑀣𑁄 𑀳𑁄𑀢𑀻𑀢𑀺. 𑀲𑀼𑀤𑁆𑀥𑀭𑀽𑀧𑀲𑀫𑁆𑀫𑀲𑀦𑀫𑁂𑀯 𑀓𑀣𑀺𑀢𑀦𑁆𑀢𑀺 𑀓𑁂𑀯𑀮𑀁 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀪𑀸𑀯𑀢𑁄 𑀯𑀼𑀢𑁆𑀢𑀁.

𑀲𑀼𑀔𑀸𑀤𑀺𑀪𑁂𑀤𑀸𑀲𑀼 𑀯𑁂𑀤𑀦𑀸𑀲𑀽𑀢𑀺 𑀲𑀼𑀔𑀤𑀼𑀓𑁆𑀔𑀅𑀤𑀼𑀓𑁆𑀔𑀫𑀲𑀼𑀔𑀲𑀸𑀫𑀺𑀲𑀦𑀺𑀭𑀸𑀫𑀺𑀲𑀪𑁂𑀤𑀸𑀲𑀼 𑀯𑁂𑀤𑀦𑀸𑀲𑀼. 𑀢𑀢𑁆𑀣 𑀲𑀼𑀔𑀬𑀢𑀻𑀢𑀺 𑀲𑀼𑀔𑀸, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀓𑀸𑀬𑀜𑁆𑀘 𑀮𑀤𑁆𑀥𑀲𑁆𑀲𑀸𑀤𑁂 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀲𑀼𑀝𑁆𑀞𑀼 𑀯𑀸 𑀔𑀸𑀤𑀢𑀺, 𑀔𑀦𑀢𑀺 𑀯𑀸 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀜𑁆𑀘 𑀆𑀩𑀸𑀥𑀦𑁆𑀢𑀺 𑀲𑀼𑀔𑀸, 𑀲𑀼𑀓𑀭𑀁 𑀑𑀓𑀸𑀲𑀤𑀸𑀦𑀁 𑀏𑀢𑀺𑀲𑁆𑀲𑀸𑀢𑀺 𑀯𑀸 𑀲𑀼𑀔𑀸. 𑀤𑀼𑀓𑁆𑀔𑀬𑀢𑀻𑀢𑀺 𑀤𑀼𑀓𑁆𑀔𑀸, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀓𑀸𑀬𑀜𑁆𑀘 𑀧𑀻𑀴𑁂𑀢𑀺 𑀯𑀺𑀩𑀸𑀥𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀝𑁆𑀞𑀼 𑀯𑀸 𑀔𑀸𑀤𑀢𑀺, 𑀔𑀦𑀢𑀺 𑀯𑀸 𑀓𑀸𑀬𑀺𑀓𑀁 𑀘𑁂𑀢𑀲𑀺𑀓𑀜𑁆𑀘 𑀲𑀸𑀢𑀦𑁆𑀢𑀺 𑀤𑀼𑀓𑁆𑀔𑀸, 𑀤𑀼𑀓𑁆𑀓𑀭𑀁 𑀑𑀓𑀸𑀲𑀤𑀸𑀦𑀁 𑀏𑀢𑀺𑀲𑁆𑀲𑀸𑀢𑀺 𑀯𑀸 𑀤𑀼𑀓𑁆𑀔𑀸. 𑀤𑀼𑀓𑁆𑀔𑀲𑀼𑀔𑀧𑁆𑀧𑀝𑀺𑀓𑁆𑀔𑁂𑀧𑁂𑀦 𑀅𑀤𑀼𑀓𑁆𑀔𑀫𑀲𑀼𑀔𑀸𑀢𑀺 𑀉𑀧𑁂𑀓𑁆𑀔𑀸 𑀯𑀼𑀢𑁆𑀢𑀸. 𑀯𑁂𑀤𑀺𑀬𑀢𑀺 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀢𑀻𑀢𑀺 𑀯𑁂𑀤𑀦𑀸. 𑀯𑁂𑀤𑀺𑀬𑀫𑀸𑀦𑁄𑀢𑀺 𑀅𑀦𑀼𑀪𑀯𑀫𑀸𑀦𑁄. 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻𑀢𑀺 𑀧𑀚𑀸𑀦𑀸𑀢𑀻𑀢𑀺 𑀓𑀸𑀬𑀺𑀓𑀁 𑀯𑀸 𑀘𑁂𑀢𑀲𑀺𑀓𑀁 𑀯𑀸 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄 ‘‘𑀅𑀳𑀁 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀓𑀸𑀫𑀁 𑀉𑀢𑁆𑀢𑀸𑀦𑀲𑁂𑀬𑁆𑀬𑀓𑀸𑀧𑀺 𑀤𑀸𑀭𑀓𑀸 𑀣𑀜𑁆𑀜𑀧𑀺𑀯𑀦𑀸𑀤𑀺𑀓𑀸𑀮𑁂 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑀸 ‘‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀸’’𑀢𑀺 𑀧𑀚𑀸𑀦𑀦𑁆𑀢𑀺, 𑀦 𑀧𑀦𑁂𑀢𑀁 𑀏𑀯𑀭𑀽𑀧𑀁 𑀧𑀚𑀸𑀦𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀏𑀯𑀭𑀽𑀧𑀜𑁆𑀳𑀺 𑀚𑀸𑀦𑀦𑀁 𑀲𑀢𑁆𑀢𑀼𑀧𑀮𑀤𑁆𑀥𑀺𑀁 𑀦 𑀚𑀳𑀢𑀺, 𑀅𑀢𑁆𑀢𑀲𑀜𑁆𑀜𑀁 𑀦 𑀉𑀕𑁆𑀖𑀸𑀝𑁂𑀢𑀺, 𑀓𑀫𑁆𑀫𑀝𑁆𑀞𑀸𑀦𑀁 𑀯𑀸 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸 𑀯𑀸 𑀦 𑀳𑁄𑀢𑀺. 𑀇𑀫𑀲𑁆𑀲 𑀧𑀦 𑀪𑀺𑀓𑁆𑀔𑀼𑀦𑁄 𑀚𑀸𑀦𑀦𑀁 𑀲𑀢𑁆𑀢𑀼𑀧𑀮𑀤𑁆𑀥𑀺𑀁 𑀚𑀳𑀢𑀺, 𑀅𑀢𑁆𑀢𑀲𑀜𑁆𑀜𑀁 𑀉𑀕𑁆𑀖𑀸𑀝𑁂𑀢𑀺, 𑀓𑀫𑁆𑀫𑀝𑁆𑀞𑀸𑀦𑀜𑁆𑀘𑁂𑀯 𑀲𑀢𑀺𑀧𑀝𑁆𑀞𑀸𑀦𑀪𑀸𑀯𑀦𑀸 𑀘 𑀳𑁄𑀢𑀺. 𑀇𑀤𑀜𑁆𑀳𑀺 ‘‘𑀓𑁄 𑀯𑁂𑀤𑀺𑀬𑀢𑀺, 𑀢𑀲𑁆𑀲 𑀯𑁂𑀤𑀦𑀸, 𑀓𑀺𑀁 𑀓𑀸𑀭𑀡𑀸 𑀯𑁂𑀤𑀦𑀸’’𑀢𑀺 𑀏𑀯𑀁 𑀲𑀫𑁆𑀧𑀚𑀸𑀦𑀦𑁆𑀢𑀲𑁆𑀲 𑀯𑁂𑀤𑀺𑀬𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀢𑀢𑁆𑀣 𑀓𑁄 𑀯𑁂𑀤𑀺𑀬𑀢𑀻𑀢𑀺? 𑀦 𑀓𑁄𑀘𑀺 𑀲𑀢𑁆𑀢𑁄 𑀯𑀸 𑀧𑀼𑀕𑁆𑀕𑀮𑁄 𑀯𑀸 𑀯𑁂𑀤𑀺𑀬𑀢𑀺. 𑀓𑀲𑁆𑀲 𑀯𑁂𑀤𑀦𑀸𑀢𑀺? 𑀦 𑀓𑀲𑁆𑀲𑀘𑀺 𑀲𑀢𑁆𑀢𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀯𑁂𑀤𑀦𑀸. 𑀓𑀺𑀁 𑀓𑀸𑀭𑀡𑀸 𑀯𑁂𑀤𑀦𑀸𑀢𑀺? 𑀯𑀢𑁆𑀣𑀼𑀆𑀭𑀫𑁆𑀫𑀡𑀸 𑀘 𑀧𑀦𑀲𑁆𑀲 𑀯𑁂𑀤𑀦𑀸𑀢𑀺. 𑀢𑀲𑁆𑀫𑀸 𑀏𑀲 𑀏𑀯𑀁 𑀧𑀚𑀸𑀦𑀸𑀢𑀺 ‘‘𑀢𑀁 𑀢𑀁 𑀲𑀼𑀔𑀸𑀤𑀻𑀦𑀁 𑀯𑀢𑁆𑀣𑀼𑀪𑀽𑀢𑀁 𑀭𑀽𑀧𑀸𑀤𑀺𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑁂𑀤𑀦𑀸𑀯 ¶ 𑀯𑁂𑀤𑀺𑀬𑀢𑀺, 𑀢𑀁 𑀧𑀦 𑀯𑁂𑀤𑀦𑀸𑀧𑀯𑀢𑁆𑀢𑀺𑀁 𑀉𑀧𑀸𑀤𑀸𑀬 ‘𑀅𑀳𑀁 𑀯𑁂𑀤𑀺𑀬𑀸𑀫𑀻’𑀢𑀺 ¶ 𑀯𑁄𑀳𑀸𑀭𑀫𑀢𑁆𑀢𑀁 𑀳𑁄𑀢𑀻’’𑀢𑀺. 𑀏𑀯𑀁 ‘‘𑀲𑀼𑀔𑀸𑀤𑀻𑀦𑀁 𑀯𑀢𑁆𑀣𑀼𑀪𑀽𑀢𑀁 𑀭𑀽𑀧𑀸𑀤𑀺𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀯𑁂𑀤𑀦𑀸𑀯 𑀯𑁂𑀤𑀺𑀬𑀢𑀻’’𑀢𑀺 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀏𑀲 ‘‘𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀅𑀣 𑀯𑀸 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻𑀢𑀺 𑀧𑀚𑀸𑀦𑀸𑀢𑀻𑀢𑀺 𑀲𑀼𑀔𑀯𑁂𑀤𑀦𑀸𑀓𑁆𑀔𑀡𑁂 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀅𑀪𑀸𑀯𑀢𑁄 𑀲𑀼𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀫𑀸𑀦𑁄 ‘‘𑀲𑀼𑀔𑀁 𑀯𑁂𑀤𑀦𑀁𑀬𑁂𑀯 𑀯𑁂𑀤𑀺𑀬𑀸𑀫𑀻’’𑀢𑀺 𑀧𑀚𑀸𑀦𑀸𑀢𑀺. 𑀢𑁂𑀦 𑀬𑀸 𑀧𑀼𑀩𑁆𑀩𑁂 𑀪𑀽𑀢𑀧𑀼𑀩𑁆𑀩𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸, 𑀢𑀲𑁆𑀲𑀸 𑀇𑀤𑀸𑀦𑀺 𑀅𑀪𑀸𑀯𑀢𑁄 𑀇𑀫𑀺𑀲𑁆𑀲𑀸 𑀘 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀇𑀢𑁄 𑀧𑀭𑀁 𑀧𑀞𑀫𑀁 𑀅𑀪𑀸𑀯𑀢𑁄 ‘‘𑀯𑁂𑀤𑀦𑀸 𑀦𑀸𑀫 𑀅𑀦𑀺𑀘𑁆𑀘𑀸 𑀅𑀤𑁆𑀥𑀼𑀯𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸’’𑀢𑀺 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀤𑀼𑀓𑁆𑀔𑀁 𑀯𑁂𑀤𑀦𑀁 𑀯𑁂𑀤𑀺𑀬𑀸𑀫𑀻𑀢𑀺 𑀧𑀚𑀸𑀦𑀸𑀢𑀻𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀲𑀸𑀫𑀺𑀲𑀁 𑀯𑀸 𑀲𑀼𑀔𑀦𑁆𑀢𑀺𑀆𑀤𑀻𑀲𑀼 𑀬𑀲𑁆𑀫𑀸 𑀓𑀺𑀮𑁂𑀲𑁂𑀳𑀺 𑀆𑀫𑀲𑀺𑀢𑀩𑁆𑀩𑀢𑁄 𑀆𑀫𑀺𑀲𑀸 𑀦𑀸𑀫 𑀧𑀜𑁆𑀘 𑀓𑀸𑀫𑀕𑀼𑀡𑀸. 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀲𑀳 𑀆𑀫𑀺𑀲𑁂𑀳𑀻𑀢𑀺 𑀲𑀸𑀫𑀺𑀲𑀸, 𑀢𑀲𑁆𑀫𑀸 𑀲𑀸𑀫𑀺𑀲𑀸 𑀲𑀼𑀔𑀸 𑀦𑀸𑀫 𑀧𑀜𑁆𑀘𑀓𑀸𑀫𑀕𑀼𑀡𑀸𑀫𑀺𑀲𑀦𑀺𑀲𑁆𑀲𑀺𑀢𑀸 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀉𑀧𑁆𑀧𑀦𑁆𑀦𑀸 𑀙𑀕𑁂𑀳𑀲𑁆𑀲𑀺𑀢𑀸 𑀲𑁄𑀫𑀦𑀲𑁆𑀲𑀯𑁂𑀤𑀦𑀸. 𑀲𑀸𑀫𑀺𑀲𑀸 𑀤𑀼𑀓𑁆𑀔𑀸 𑀦𑀸𑀫 𑀙𑀕𑁂𑀳𑀲𑁆𑀲𑀺𑀢𑀸 𑀤𑁄𑀫𑀦𑀲𑁆𑀲𑀯𑁂𑀤𑀦𑀸. 𑀲𑀸 𑀘 𑀙𑀲𑀼 𑀤𑁆𑀯𑀸𑀭𑁂𑀲𑀼 ‘‘𑀇𑀝𑁆𑀞𑀸𑀭𑀫𑁆𑀫𑀡𑀁 𑀦𑀸𑀦𑀼𑀪𑀯𑀺𑀲𑁆𑀲𑀸𑀫𑀺 𑀦𑀸𑀦𑀼𑀪𑀯𑀸𑀫𑀻’’𑀢𑀺 𑀯𑀺𑀢𑀓𑁆𑀓𑀬𑀢𑁄 𑀉𑀧𑁆𑀧𑀦𑁆𑀦𑀸 𑀓𑀸𑀫𑀕𑀼𑀡𑀦𑀺𑀲𑁆𑀲𑀺𑀢𑀸 𑀤𑁄𑀫𑀦𑀲𑁆𑀲𑀯𑁂𑀤𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀦𑀺𑀭𑀸𑀫𑀺𑀲𑀸 𑀲𑀼𑀔𑀸 𑀦𑀸𑀫 𑀙𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀸 𑀲𑁄𑀫𑀦𑀲𑁆𑀲𑀯𑁂𑀤𑀦𑀸. 𑀲𑀸 𑀘 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑀼𑀁 𑀲𑀓𑁆𑀓𑁄𑀦𑁆𑀢𑀲𑁆𑀲 ‘‘𑀉𑀲𑁆𑀲𑀓𑁆𑀓𑀺𑀢𑀸 𑀫𑁂 𑀯𑀺𑀧𑀲𑁆𑀲𑀦𑀸’’𑀢𑀺 𑀲𑁄𑀫𑀦𑀲𑁆𑀲𑀚𑀸𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀲𑁄𑀫𑀦𑀲𑁆𑀲𑀯𑁂𑀤𑀦𑀸 𑀤𑀝𑁆𑀞𑀩𑁆𑀩𑀸.

𑀦𑀺𑀭𑀸𑀫𑀺𑀲𑀸 𑀤𑀼𑀓𑁆𑀔𑀸 𑀦𑀸𑀫 𑀙𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀸 𑀤𑁄𑀫𑀦𑀲𑁆𑀲𑀯𑁂𑀤𑀦𑀸. 𑀲𑀸 𑀧𑀦 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀅𑀦𑀼𑀢𑁆𑀢𑀭𑀯𑀺𑀫𑁄𑀓𑁆𑀔𑀲𑀗𑁆𑀔𑀸𑀢𑀅𑀭𑀺𑀬𑀨𑀮𑀥𑀫𑁆𑀫𑁂𑀲𑀼 𑀧𑀺𑀳𑀁 𑀧𑀝𑁆𑀞𑀧𑁂𑀢𑁆𑀯𑀸 𑀢𑀤𑀥𑀺𑀕𑀫𑀸𑀬 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀢𑁆𑀯𑀸 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 ‘‘𑀇𑀫𑀫𑁆𑀧𑀺 𑀧𑀓𑁆𑀔𑀁 𑀇𑀫𑀫𑁆𑀧𑀺 𑀫𑀸𑀲𑀁 𑀇𑀫𑀫𑁆𑀧𑀺 𑀲𑀁𑀯𑀘𑁆𑀙𑀭𑀁 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀺𑀬𑀪𑀽𑀫𑀺𑀁 𑀧𑀸𑀧𑀼𑀡𑀺𑀢𑀼𑀁 𑀦𑀸𑀲𑀓𑁆𑀔𑀺’’𑀦𑁆𑀢𑀺 𑀅𑀦𑀼𑀲𑁄𑀘𑀢𑁄 𑀉𑀧𑁆𑀧𑀦𑁆𑀦𑀸 𑀤𑁄𑀫𑀦𑀲𑁆𑀲𑀯𑁂𑀤𑀦𑀸.

𑀲𑀸𑀫𑀺𑀲𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀦𑀸𑀫 𑀙𑀕𑁂𑀳𑀲𑁆𑀲𑀺𑀢𑀸 𑀉𑀧𑁂𑀓𑁆𑀔𑀸𑀯𑁂𑀤𑀦𑀸. 𑀲𑀸 𑀘 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀕𑀼𑀴𑀧𑀺𑀡𑁆𑀟𑀓𑁂 𑀦𑀺𑀮𑀻𑀦𑀫𑀓𑁆𑀔𑀺𑀓𑀸 𑀯𑀺𑀬 𑀭𑀽𑀧𑀸𑀤𑀻𑀦𑀺 𑀅𑀦𑀼𑀯𑀢𑁆𑀢𑀫𑀸𑀦𑀸 𑀢𑀢𑁆𑀣𑁂𑀯 𑀮𑀕𑁆𑀕𑀸 𑀮𑀕𑁆𑀕𑀺𑀢𑀸 𑀳𑀼𑀢𑁆𑀯𑀸 𑀉𑀧𑁆𑀧𑀦𑁆𑀦𑀸 𑀓𑀸𑀫𑀕𑀼𑀡𑀦𑀺𑀲𑁆𑀲𑀺𑀢𑀸 ¶ 𑀉𑀧𑁂𑀓𑁆𑀔𑀸𑀯𑁂𑀤𑀦𑀸. 𑀦𑀺𑀭𑀸𑀫𑀺𑀲𑀸 𑀅𑀤𑀼𑀓𑁆𑀔𑀫𑀲𑀼𑀔𑀸 𑀦𑀸𑀫 𑀙𑀦𑁂𑀓𑁆𑀔𑀫𑁆𑀫𑀲𑁆𑀲𑀺𑀢𑀸 𑀉𑀧𑁂𑀓𑁆𑀔𑀸𑀯𑁂𑀤𑀦𑀸. 𑀲𑀸 𑀧𑀦 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀤𑀺𑀆𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀇𑀝𑁆𑀞𑁂 𑀅𑀭𑀚𑁆𑀚𑀦𑁆𑀢𑀲𑁆𑀲, 𑀅𑀦𑀺𑀝𑁆𑀞𑁂 𑀅𑀤𑀼𑀲𑁆𑀲𑀦𑁆𑀢𑀲𑁆𑀲, 𑀅𑀲𑀫𑀧𑁂𑀓𑁆𑀔𑀦𑁂𑀦 𑀅𑀫𑀼𑀬𑁆𑀳𑀦𑁆𑀢𑀲𑁆𑀲 𑀉𑀧𑁆𑀧𑀦𑁆𑀦𑀸 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸 ¶ 𑀉𑀧𑁂𑀓𑁆𑀔𑀸𑀯𑁂𑀤𑀦𑀸. 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀫𑀳𑀸𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑁂 𑀯𑀼𑀢𑁆𑀢𑀁. 𑀲𑀸𑀯 𑀯𑁂𑀤𑀦𑀸 𑀯𑁂𑀤𑀺𑀢𑀩𑁆𑀩𑀸𑀢𑀺 𑀮𑀼𑀚𑁆𑀚𑀦𑀧𑁆𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀲𑀸 𑀯𑁂𑀤𑀦𑀸 ‘‘𑀮𑁄𑀓𑁄’’𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀏𑀯𑀁 𑀯𑀺𑀢𑁆𑀣𑀸𑀭𑀺𑀢𑁂𑀢𑀺 ‘‘𑀲𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁 𑀲𑀭𑀸𑀕𑀁 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀢𑀺, 𑀯𑀻𑀢𑀭𑀸𑀕𑀁 𑀯𑀸 𑀘𑀺𑀢𑁆𑀢𑀁…𑀧𑁂… 𑀲𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁, 𑀯𑀻𑀢𑀤𑁄𑀲𑀁 𑀯𑀸 𑀘𑀺𑀢𑁆𑀢𑀁, 𑀲𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁, 𑀯𑀻𑀢𑀫𑁄𑀳𑀁 𑀯𑀸 𑀘𑀺𑀢𑁆𑀢𑀁, 𑀲𑀁𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁, 𑀯𑀺𑀓𑁆𑀔𑀺𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁, 𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁, 𑀅𑀫𑀳𑀕𑁆𑀕𑀢𑀁 𑀯𑀸 𑀘𑀺𑀢𑁆𑀢𑀁, 𑀲𑀉𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁, 𑀅𑀦𑀼𑀢𑁆𑀢𑀭𑀁 𑀯𑀸 𑀘𑀺𑀢𑁆𑀢𑀁, 𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁, 𑀅𑀲𑀫𑀸𑀳𑀺𑀢𑀁 𑀯𑀸 𑀘𑀺𑀢𑁆𑀢𑀁, 𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀁, 𑀅𑀯𑀺𑀫𑀼𑀢𑁆𑀢𑀁 𑀯𑀸 𑀘𑀺𑀢𑁆𑀢𑀦𑁆𑀢𑀺 𑀧𑀚𑀸𑀦𑀸𑀢𑀻’’𑀢𑀺 𑀏𑀯𑀁 𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑁂 (𑀤𑀻. 𑀦𑀺. 𑁨.𑁩𑁮𑁧; 𑀫. 𑀦𑀺. 𑁧.𑁧𑁧𑁪) 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑀲𑁆𑀲𑀺𑀢𑁂 𑀲𑁄𑀴𑀲𑀯𑀺𑀥𑁂 𑀘𑀺𑀢𑁆𑀢𑁂.

𑀢𑀢𑁆𑀣 𑀲𑀭𑀸𑀕𑀦𑁆𑀢𑀺 𑀅𑀝𑁆𑀞𑀯𑀺𑀥𑀁 𑀮𑁄𑀪𑀲𑀳𑀕𑀢𑀁. 𑀯𑀻𑀢𑀭𑀸𑀕𑀦𑁆𑀢𑀺 𑀮𑁄𑀓𑀺𑀬𑀓𑀼𑀲𑀮𑀸𑀩𑁆𑀬𑀸𑀓𑀢𑀁. 𑀇𑀤𑀁 𑀧𑀦 𑀬𑀲𑁆𑀫𑀸 𑀲𑀫𑁆𑀫𑀲𑀦𑀁 𑀦 𑀥𑀫𑁆𑀫𑀲𑀫𑁄𑀥𑀸𑀦𑀁, 𑀢𑀲𑁆𑀫𑀸 𑀇𑀥 𑀏𑀓𑀧𑀤𑁂𑀧𑀺 𑀮𑁄𑀓𑀼𑀢𑁆𑀢𑀭𑀁 𑀦 𑀮𑀩𑁆𑀪𑀢𑀺. 𑀲𑁂𑀲𑀸𑀦𑀺 𑀘𑀢𑁆𑀢𑀸𑀭𑀺 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀦𑁂𑀯 𑀧𑀼𑀭𑀺𑀫𑀧𑀤𑀁, 𑀦 𑀧𑀘𑁆𑀙𑀺𑀫𑀧𑀤𑀁 𑀪𑀚𑀦𑁆𑀢𑀺. 𑀲𑀤𑁄𑀲𑀦𑁆𑀢𑀺 𑀤𑀼𑀯𑀺𑀥𑀁 𑀤𑁄𑀫𑀦𑀲𑁆𑀲𑀲𑀳𑀕𑀢𑀁. 𑀯𑀻𑀢𑀤𑁄𑀲𑀦𑁆𑀢𑀺 𑀮𑁄𑀓𑀺𑀬𑀓𑀼𑀲𑀮𑀸𑀩𑁆𑀬𑀸𑀓𑀢𑀁. 𑀲𑁂𑀲𑀸𑀦𑀺 𑀤𑀲 𑀅𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀦𑁂𑀯 𑀧𑀼𑀭𑀺𑀫𑀧𑀤𑀁, 𑀦 𑀧𑀘𑁆𑀙𑀺𑀫𑀧𑀤𑀁 𑀪𑀚𑀦𑁆𑀢𑀺. 𑀲𑀫𑁄𑀳𑀦𑁆𑀢𑀺 𑀯𑀺𑀘𑀺𑀓𑀺𑀘𑁆𑀙𑀸𑀲𑀳𑀕𑀢𑀜𑁆𑀘𑁂𑀯 𑀉𑀤𑁆𑀥𑀘𑁆𑀘𑀲𑀳𑀕𑀢𑀜𑁆𑀘𑀸𑀢𑀺 𑀤𑀼𑀯𑀺𑀥𑀁. 𑀬𑀲𑁆𑀫𑀸 𑀧𑀦 𑀫𑁄𑀳𑁄 𑀲𑀩𑁆𑀩𑀸𑀓𑀼𑀲𑀮𑁂𑀲𑀼 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀲𑁂𑀲𑀸𑀦𑀺𑀧𑀺 𑀇𑀥 𑀯𑀢𑁆𑀢𑀦𑁆𑀢𑀺𑀬𑁂𑀯. 𑀇𑀫𑀲𑁆𑀫𑀺𑀜𑁆𑀜𑁂𑀯 𑀳𑀺 𑀤𑀼𑀓𑁂 𑀤𑁆𑀯𑀸𑀤𑀲𑀸𑀓𑀼𑀲𑀮𑀘𑀺𑀢𑁆𑀢𑀸𑀦𑀺 𑀧𑀭𑀺𑀬𑀸𑀤𑀺𑀦𑁆𑀦𑀸𑀦𑀻𑀢𑀺. 𑀯𑀻𑀢𑀫𑁄𑀳𑀦𑁆𑀢𑀺 𑀮𑁄𑀓𑀺𑀬𑀓𑀼𑀲𑀮𑀸𑀩𑁆𑀬𑀸𑀓𑀢𑀁.

𑀲𑀁𑀔𑀺𑀢𑁆𑀢𑀦𑁆𑀢𑀺 𑀣𑀺𑀦𑀫𑀺𑀤𑁆𑀥𑀸𑀦𑀼𑀧𑀢𑀺𑀢𑀁. 𑀏𑀢𑀜𑁆𑀳𑀺 𑀲𑀗𑁆𑀓𑀼𑀘𑀺𑀢𑀘𑀺𑀢𑁆𑀢𑀁 𑀦𑀸𑀫 𑀆𑀭𑀫𑁆𑀫𑀡𑁂 𑀲𑀗𑁆𑀓𑁄𑀘𑀯𑀲𑁂𑀦 𑀧𑀯𑀢𑁆𑀢𑀦𑀢𑁄. 𑀯𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀁. 𑀏𑀢𑀜𑁆𑀳𑀺 𑀧𑀲𑀝𑀘𑀺𑀢𑁆𑀢𑀁 𑀦𑀸𑀫 𑀆𑀭𑀫𑁆𑀫𑀡𑁂 𑀲𑀯𑀺𑀲𑁂𑀲𑀁 𑀯𑀺𑀓𑁆𑀔𑁂𑀧𑀯𑀲𑁂𑀦 𑀯𑀺𑀲𑀝𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄. 𑀫𑀳𑀕𑁆𑀕𑀢𑀦𑁆𑀢𑀺 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀜𑁆𑀘. 𑀅𑀫𑀳𑀕𑁆𑀕𑀢𑀦𑁆𑀢𑀺 𑀓𑀸𑀫𑀸𑀯𑀘𑀭𑀁. 𑀲𑀉𑀢𑁆𑀢𑀭𑀦𑁆𑀢𑀺 𑀓𑀸𑀫𑀸𑀯𑀘𑀭𑀁. 𑀅𑀦𑀼𑀢𑁆𑀢𑀭𑀦𑁆𑀢𑀺 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀜𑁆𑀘. 𑀢𑀢𑁆𑀭𑀸𑀧𑀺 𑀲𑀉𑀢𑁆𑀢𑀭𑀁 𑀭𑀽𑀧𑀸𑀯𑀘𑀭𑀁, 𑀅𑀦𑀼𑀢𑁆𑀢𑀭𑀁 𑀅𑀭𑀽𑀧𑀸𑀯𑀘𑀭𑀫𑁂𑀯. 𑀲𑀫𑀸𑀳𑀺𑀢𑀦𑁆𑀢𑀺 𑀬𑀲𑁆𑀲 𑀅𑀧𑁆𑀧𑀦𑀸𑀲𑀫𑀸𑀥𑀺 𑀯𑀸 𑀉𑀧𑀘𑀸𑀭𑀲𑀫𑀸𑀥𑀺 𑀯𑀸 𑀅𑀢𑁆𑀣𑀺. 𑀅𑀲𑀫𑀸𑀳𑀺𑀢𑀦𑁆𑀢𑀺 𑀉𑀪𑀬𑀲𑀫𑀸𑀥𑀺𑀯𑀺𑀭𑀳𑀺𑀢𑀁. 𑀯𑀺𑀫𑀼𑀢𑁆𑀢𑀦𑁆𑀢𑀺 ¶ 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀯𑀺𑀫𑀼𑀢𑁆𑀢𑀻𑀳𑀺 𑀯𑀺𑀫𑀼𑀢𑁆𑀢𑀁. 𑀅𑀯𑀺𑀫𑀼𑀢𑁆𑀢𑀦𑁆𑀢𑀺 𑀉𑀪𑀬𑀯𑀺𑀫𑀼𑀢𑁆𑀢𑀺𑀭𑀳𑀺𑀢𑀁. 𑀲𑀫𑀼𑀘𑁆𑀙𑁂𑀤𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀦𑀺𑀲𑁆𑀲𑀭𑀡𑀯𑀺𑀫𑀼𑀢𑁆𑀢𑀻𑀦𑀁 𑀧𑀦 𑀇𑀥 𑀑𑀓𑀸𑀲𑁄𑀯 𑀦𑀢𑁆𑀣𑀺, 𑀑𑀓𑀸𑀲𑀸𑀪𑀸𑀯𑁄 𑀘 𑀲𑀫𑁆𑀫𑀲𑀦𑀘𑀸𑀭𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀯𑁂𑀤𑀺𑀢𑀩𑁆𑀩𑁄.

𑀉𑀧𑀸𑀤𑀸𑀦𑀲𑁆𑀲 𑀔𑀦𑁆𑀥𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸, 𑀉𑀧𑀸𑀤𑀸𑀦𑀲𑁆𑀲 𑀧𑀘𑁆𑀘𑀬𑀪𑀽𑀢𑀸 𑀥𑀫𑁆𑀫𑀧𑀼𑀜𑁆𑀚𑀸 𑀥𑀫𑁆𑀫𑀭𑀸𑀲𑀬𑁄𑀢𑀺 𑀅𑀢𑁆𑀣𑁄. 𑀉𑀧𑀸𑀤𑀸𑀦𑁂𑀳𑀺 𑀆𑀭𑀫𑁆𑀫𑀡𑀓𑀭𑀡𑀸𑀤𑀺𑀯𑀲𑁂𑀦 𑀉𑀧𑀸𑀤𑀸𑀢𑀩𑁆𑀩𑀸 𑀯𑀸 𑀔𑀦𑁆𑀥𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀙 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀬𑀢𑀦𑀸𑀦𑀻𑀢𑀺 ¶ 𑀘𑀓𑁆𑀔𑀼 𑀲𑁄𑀢𑀁 𑀖𑀸𑀦𑀁 𑀚𑀺𑀯𑁆𑀳𑀸 𑀓𑀸𑀬𑁄 𑀫𑀦𑁄𑀢𑀺 𑀇𑀫𑀸𑀦𑀺 𑀙 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀦𑀺 𑀘𑁂𑀯, 𑀭𑀽𑀧𑀁 𑀲𑀤𑁆𑀤𑁄 𑀕𑀦𑁆𑀥𑁄 𑀭𑀲𑁄 𑀨𑁄𑀝𑁆𑀞𑀩𑁆𑀩𑁄 𑀥𑀫𑁆𑀫𑀸𑀢𑀺 𑀇𑀫𑀸𑀦𑀺 𑀙 𑀩𑀸𑀳𑀺𑀭𑀸𑀬𑀢𑀦𑀸𑀦𑀺 𑀘. 𑀏𑀢𑁆𑀣 𑀧𑀦 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀦 𑀕𑀳𑁂𑀢𑀩𑁆𑀩𑀸 𑀲𑀫𑁆𑀫𑀲𑀦𑀘𑀸𑀭𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀲𑀢𑁆𑀢 𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀢𑀺 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀬𑁄 𑀲𑀢𑁆𑀢 𑀲𑀫𑁆𑀩𑁄𑀚𑁆𑀛𑀗𑁆𑀕𑀸. 𑀲𑀢𑀺𑀆𑀤𑀬𑁄 𑀳𑀺 𑀲𑀫𑁆𑀩𑁄𑀥𑀺𑀲𑁆𑀲, 𑀲𑀫𑁆𑀩𑁄𑀥𑀺𑀬𑀸 𑀯𑀸 𑀅𑀗𑁆𑀕𑀸𑀢𑀺 𑀲𑀫𑁆𑀩𑁄𑀚𑁆𑀛𑀗𑁆𑀕𑀸. 𑀢𑀣𑀸 𑀳𑀺 𑀲𑀫𑁆𑀩𑀼𑀚𑁆𑀛𑀢𑀺 𑀆𑀭𑀤𑁆𑀥𑀯𑀺𑀧𑀲𑁆𑀲𑀓𑀢𑁄 𑀧𑀝𑁆𑀞𑀸𑀬 𑀬𑁄𑀕𑀸𑀯𑀘𑀭𑁄𑀢𑀺 𑀲𑀫𑁆𑀩𑁄𑀥𑀺, 𑀬𑀸𑀬 𑀯𑀸 𑀲𑁄 𑀲𑀢𑀺𑀆𑀤𑀺𑀓𑀸𑀬 𑀲𑀢𑁆𑀢𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸 𑀲𑀫𑁆𑀩𑀼𑀚𑁆𑀛𑀢𑀺, 𑀓𑀺𑀮𑁂𑀲𑀦𑀺𑀤𑁆𑀤𑀸𑀢𑁄 𑀉𑀝𑁆𑀞𑀸𑀢𑀺, 𑀲𑀘𑁆𑀘𑀸𑀦𑀺 𑀯𑀸 𑀧𑀝𑀺𑀯𑀺𑀚𑁆𑀛𑀢𑀺, 𑀲𑀸 𑀥𑀫𑁆𑀫𑀲𑀸𑀫𑀕𑁆𑀕𑀻 𑀲𑀫𑁆𑀩𑁄𑀥𑀺, 𑀢𑀲𑁆𑀲 𑀲𑀫𑁆𑀩𑁄𑀥𑀺𑀲𑁆𑀲, 𑀢𑀲𑁆𑀲𑀸 𑀯𑀸 𑀲𑀫𑁆𑀩𑁄𑀥𑀺𑀬𑀸 𑀅𑀗𑁆𑀕𑀸𑀢𑀺 𑀲𑀫𑁆𑀩𑁄𑀚𑁆𑀛𑀗𑁆𑀕𑀸.

𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 ‘‘𑀤𑀼𑀓𑁆𑀔𑀁 𑀤𑀼𑀓𑁆𑀔𑀲𑀫𑀼𑀤𑀬𑁄 𑀤𑀼𑀓𑁆𑀔𑀦𑀺𑀭𑁄𑀥𑁄 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀧𑀝𑀺𑀧𑀤𑀸’’𑀢𑀺 (𑀲𑀁. 𑀦𑀺. 𑁫.𑁧𑁦𑁭𑁧-𑁧𑁦𑁭𑁨) 𑀏𑀯𑀁 𑀯𑀼𑀢𑁆𑀢𑀸𑀦𑀺 𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀺. 𑀢𑀢𑁆𑀣 𑀧𑀼𑀭𑀺𑀫𑀸𑀦𑀺 𑀤𑁆𑀯𑁂 𑀲𑀘𑁆𑀘𑀸𑀦𑀺 𑀯𑀝𑁆𑀝𑀁 𑀧𑀯𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄. 𑀧𑀘𑁆𑀙𑀺𑀫𑀸𑀦𑀺 𑀯𑀺𑀯𑀝𑁆𑀝𑀁 𑀦𑀺𑀯𑀝𑁆𑀝𑀢𑀤𑀥𑀺𑀕𑀫𑀽𑀧𑀸𑀬𑀪𑀸𑀯𑀢𑁄. 𑀢𑁂𑀲𑀼 𑀪𑀺𑀓𑁆𑀔𑀼𑀦𑁄 𑀯𑀝𑁆𑀝𑁂 𑀓𑀫𑁆𑀫𑀝𑁆𑀞𑀸𑀦𑀸𑀪𑀺𑀦𑀺𑀯𑁂𑀲𑁄 𑀳𑁄𑀢𑀺 𑀲𑀭𑀽𑀧𑀢𑁄 𑀧𑀭𑀺𑀕𑁆𑀕𑀳𑀲𑀫𑁆𑀪𑀯𑀢𑁄. 𑀯𑀺𑀯𑀝𑁆𑀝𑁂 𑀦𑀢𑁆𑀣𑀺 𑀅𑀪𑀺𑀦𑀺𑀯𑁂𑀲𑁄 𑀅𑀯𑀺𑀲𑀬𑀢𑁆𑀢𑀸 𑀅𑀯𑀺𑀲𑀬𑀢𑁆𑀢𑁂 𑀘 𑀧𑀬𑁄𑀚𑀦𑀸𑀪𑀸𑀯𑀢𑁄. 𑀧𑀜𑁆𑀘𑀥𑀸 𑀯𑀼𑀢𑁆𑀢𑁂𑀲𑀽𑀢𑀺 𑀲𑀢𑀺𑀧𑀝𑁆𑀞𑀸𑀦𑀲𑀼𑀢𑁆𑀢𑁂 𑀯𑀼𑀢𑁆𑀢𑁂𑀲𑀼. 𑀲𑀼𑀤𑁆𑀥𑀅𑀭𑀽𑀧𑀲𑀫𑁆𑀫𑀲𑀦𑀫𑁂𑀯𑀸𑀢𑀺 𑀭𑀽𑀧𑁂𑀦 𑀅𑀫𑀺𑀲𑁆𑀲𑀺𑀢𑀢𑁆𑀢𑀸 𑀓𑁂𑀯𑀮𑀁 𑀅𑀭𑀽𑀧𑀲𑀫𑁆𑀫𑀲𑀦𑀫𑁂𑀯. 𑀔𑀦𑁆𑀥𑀸𑀬𑀢𑀦𑀲𑀘𑁆𑀘𑀓𑁄𑀝𑁆𑀞𑀸𑀲𑀸𑀦𑀁 𑀧𑀜𑁆𑀘𑀓𑁆𑀔𑀦𑁆𑀥𑀲𑀗𑁆𑀕𑀳𑀢𑁄 ‘‘𑀭𑀽𑀧𑀸𑀭𑀽𑀧𑀲𑀫𑁆𑀫𑀲𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩𑀪𑀸𑀕𑀺𑀬𑀸𑀦𑀫𑁆𑀧𑀺 𑀲𑀢𑀺𑀧𑀝𑁆𑀞𑀸𑀦𑀸𑀦𑀁 𑀲𑀗𑁆𑀕𑀳𑀺𑀢𑀢𑁆𑀢𑀸 ‘‘𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀫𑀺𑀲𑁆𑀲𑀓𑀸𑀦𑁂𑀯 𑀓𑀣𑀺𑀢𑀸𑀦𑀻’’𑀢𑀺 𑀆𑀳.

𑁩𑁯𑁪. 𑀅𑀦𑀺𑀩𑁆𑀩𑀢𑁆𑀢𑀸𑀦𑀦𑁆𑀢𑀺 𑀅𑀚𑀸𑀢𑀸𑀦𑀁. 𑀧𑀬𑁄𑀕𑀁 𑀧𑀭𑀓𑁆𑀓𑀫𑀦𑁆𑀢𑀺 𑀏𑀢𑁆𑀣 𑀪𑀼𑀲𑀁 𑀬𑁄𑀕𑁄 𑀧𑀬𑁄𑀕𑁄, 𑀧𑀬𑁄𑀕𑁄𑀯 𑀧𑀭𑀓𑁆𑀓𑀫𑁄, 𑀧𑀬𑁄𑀕𑀲𑀗𑁆𑀔𑀸𑀢𑀁 𑀧𑀭𑀓𑁆𑀓𑀫𑀦𑁆𑀢𑀺 𑀅𑀢𑁆𑀣𑁄. 𑀘𑀺𑀢𑁆𑀢𑀁 𑀉𑀓𑁆𑀔𑀺𑀧𑀢𑀻𑀢𑀺 𑀓𑁄𑀲𑀚𑁆𑀚𑀧𑀓𑁆𑀔𑁂 𑀧𑀢𑀺𑀢𑀼𑀁 𑀅𑀧𑀤𑀸𑀦𑀯𑀲𑁂𑀦 𑀉𑀓𑁆𑀔𑀺𑀧𑀢𑀺. 𑀧𑀥𑀸𑀦𑀯𑀻𑀭𑀺𑀬𑀦𑁆𑀢𑀺 ¶ 𑀲𑀫𑁆𑀫𑀧𑁆𑀧𑀥𑀸𑀦𑀮𑀓𑁆𑀔𑀡𑀧𑁆𑀧𑀢𑁆𑀢𑀯𑀻𑀭𑀺𑀬𑀁. 𑀮𑁄𑀓𑀺𑀬𑀸𑀢𑀺 𑀮𑁄𑀓𑀺𑀬𑀲𑀫𑁆𑀫𑀧𑁆𑀧𑀥𑀸𑀦𑀓𑀣𑀸. 𑀲𑀩𑁆𑀩𑀧𑀼𑀩𑁆𑀩𑀪𑀸𑀕𑁂𑀢𑀺 𑀲𑀩𑁆𑀩𑀫𑀕𑁆𑀕𑀸𑀦𑀁 𑀧𑀼𑀩𑁆𑀩𑀪𑀸𑀕𑁂. 𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑀧𑀭𑀺𑀬𑀸𑀬𑁂𑀦𑀸𑀢𑀺 𑀓𑀲𑁆𑀲𑀧𑀲𑀁𑀬𑀼𑀢𑁆𑀢𑁂 𑀆𑀕𑀢𑀲𑀼𑀢𑁆𑀢𑁂𑀦 ‘‘𑀉𑀧𑁆𑀧𑀦𑁆𑀦𑀸 𑀫𑁂 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀧𑁆𑀧𑀳𑀻𑀬𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’’𑀦𑁆𑀢𑀺 (𑀲𑀁. 𑀦𑀺. 𑁨.𑁧𑁪𑁫) 𑀆𑀕𑀢𑀢𑁆𑀢𑀸. 𑀲𑀸 𑀮𑁄𑀓𑀺𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀲𑀫𑀣𑀯𑀺𑀧𑀲𑁆𑀲𑀦𑀸𑀯𑀸𑀢𑀺 𑀅𑀯𑀥𑀸𑀭𑀡𑁂𑀦 𑀫𑀕𑁆𑀕𑀁 𑀦𑀺𑀯𑀢𑁆𑀢𑁂𑀢𑁆𑀯𑀸 𑀢𑀲𑁆𑀲 𑀦𑀺𑀯𑀢𑁆𑀢𑀦𑁂 𑀓𑀸𑀭𑀡𑀁 𑀤𑀲𑁆𑀲𑁂𑀦𑁆𑀢𑁄, ‘‘𑀫𑀕𑁆𑀕𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀲𑀓𑀺𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀢𑀺 𑀇𑀤𑀁 𑀪𑀽𑀢𑀓𑀣𑀦𑀫𑀢𑁆𑀢𑀁. 𑀦𑀺𑀭𑀼𑀤𑁆𑀥𑀲𑁆𑀲 𑀧𑀼𑀦 𑀅𑀦𑀼𑀧𑁆𑀧𑀚𑁆𑀚𑀦𑀢𑁄 ‘‘𑀦 𑀓𑁄𑀘𑀺 𑀕𑀼𑀡𑁄’’𑀢𑀺 𑀆𑀲𑀗𑁆𑀓𑁂𑀬𑁆𑀬𑀸𑀢𑀺 𑀆𑀳 𑁋 ‘‘𑀲𑁄 𑀳𑀻’’𑀢𑀺𑀆𑀤𑀺. 𑀅𑀦𑀦𑁆𑀢𑀭𑀫𑁂𑀯 𑀬𑀣𑀸 𑀨𑀮𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀣𑀸 𑀧𑀯𑀢𑁆𑀢𑀺𑀬𑁂𑀯𑀲𑁆𑀲 𑀧𑀘𑁆𑀘𑀬𑀤𑀸𑀦𑀁. 𑀧𑀼𑀭𑀺𑀫𑀲𑁆𑀫𑀺𑀫𑁆𑀧𑀻𑀢𑀺 ‘‘𑀅𑀦𑀼𑀧𑁆𑀧𑀦𑁆𑀦𑀸 𑀫𑁂 𑀓𑀼𑀲𑀮𑀸 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀼’’𑀦𑁆𑀢𑀺 𑀏𑀢𑁆𑀣𑀧𑀺. 𑀯𑀼𑀢𑁆𑀢𑀦𑁆𑀢𑀺 𑀧𑁄𑀭𑀸𑀡𑀝𑁆𑀞𑀓𑀣𑀸𑀬𑀁. 𑀢𑀁 𑀧𑀦 𑀢𑀣𑀸𑀯𑀼𑀢𑁆𑀢𑀯𑀘𑀦𑀁 ¶ 𑀦 𑀬𑀼𑀢𑁆𑀢𑀁 𑀤𑀼𑀢𑀺𑀬𑀲𑁆𑀫𑀺𑀁 𑀯𑀺𑀬 𑀧𑀼𑀭𑀺𑀫𑀲𑁆𑀫𑀺𑀁 𑀫𑀕𑁆𑀕𑀲𑁆𑀲 𑀅𑀕𑁆𑀕𑀳𑀡𑁂 𑀓𑀸𑀭𑀡𑀸𑀪𑀸𑀯𑀢𑁄. 𑀧𑀼𑀭𑀺𑀫𑀲𑁆𑀫𑀺𑀁 𑀅𑀕𑁆𑀕𑀳𑀺𑀢𑁂 𑀫𑀕𑁆𑀕𑁂 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑁄 𑀫𑀕𑁆𑀕𑁄 𑀅𑀦𑀢𑁆𑀣𑀸𑀬 𑀲𑀁𑀯𑀢𑁆𑀢𑁂𑀬𑁆𑀬𑀸𑀢𑀺 𑀆𑀧𑀚𑁆𑀚𑁂𑀬𑁆𑀬, 𑀦 𑀘𑁂𑀢𑀁 𑀬𑀼𑀢𑁆𑀢𑀁 𑀆𑀧𑀚𑁆𑀚𑀫𑀸𑀦𑁂 𑀢𑀲𑁆𑀫𑀺𑀁 𑀧𑀥𑀸𑀦𑀢𑁆𑀣𑀲𑀫𑁆𑀪𑀯𑀢𑁄. 𑀘𑀢𑀼𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦𑀸𑀢𑀺 𑀅𑀦𑀼𑀧𑁆𑀧𑀦𑁆𑀦𑀸𑀓𑀼𑀲𑀮𑀸𑀦𑀼𑀧𑁆𑀧𑀸𑀤𑀦𑀸𑀤𑀺𑀘𑀢𑀼𑀓𑀺𑀘𑁆𑀘𑀲𑀸𑀥𑀦𑀯𑀲𑁂𑀦.

𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀅𑀲𑀫𑀼𑀤𑀸𑀘𑀸𑀭𑀯𑀲𑁂𑀦 𑀯𑀸 𑀅𑀦𑀦𑀼𑀪𑀽𑀢𑀸𑀭𑀫𑁆𑀫𑀡𑀯𑀲𑁂𑀦 𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦. 𑀯𑀺𑀚𑁆𑀚𑀫𑀸𑀦𑀸𑀢𑀺 𑀥𑀭𑀫𑀸𑀦𑀲𑀪𑀸𑀯𑀸. 𑀔𑀡𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀉𑀧𑁆𑀧𑀸𑀤𑀸𑀤𑀺𑀲𑀫𑀗𑁆𑀕𑀺𑀦𑁄 𑀯𑀢𑁆𑀢𑀫𑀸𑀦𑀪𑀸𑀯𑁂𑀦 𑀉𑀧𑁆𑀧𑀦𑁆𑀦𑀁 𑀯𑀢𑁆𑀢𑀫𑀸𑀦𑀼𑀧𑁆𑀧𑀦𑁆𑀦𑀁. 𑀢𑀜𑁆𑀳𑀺 𑀉𑀧𑁆𑀧𑀸𑀤𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀪𑀗𑁆𑀕𑀸 𑀉𑀤𑁆𑀥𑀁 𑀧𑀦𑁆𑀦𑀁 𑀧𑀢𑁆𑀢𑀦𑁆𑀢𑀺 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 ‘‘𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀼𑀪𑀯𑀺𑀢𑁆𑀯𑀸 𑀪𑀯𑀺𑀢𑁆𑀯𑀸 𑀘 𑀯𑀺𑀕𑀢𑀁 𑀪𑀼𑀢𑁆𑀯𑀸𑀯𑀺𑀕𑀢𑀁. 𑀅𑀦𑀼𑀪𑀯𑀦𑀪𑀯𑀦𑀸𑀦𑀺 𑀳𑀺 𑀪𑀯𑀦𑀲𑀸𑀫𑀜𑁆𑀜𑁂𑀦 𑀪𑀼𑀢𑁆𑀯𑀸-𑀲𑀤𑁆𑀤𑁂𑀦 𑀯𑀼𑀢𑁆𑀢𑀸𑀦𑀺. 𑀲𑀸𑀫𑀜𑁆𑀜𑀫𑁂𑀯 𑀳𑀺 𑀉𑀧𑀲𑀕𑁆𑀕𑁂𑀦 𑀯𑀺𑀲𑁂𑀲𑀻𑀬𑀢𑀺. 𑀇𑀥 𑀯𑀺𑀧𑀸𑀓𑀸𑀦𑀼𑀪𑀯𑀦𑀯𑀲𑁂𑀦 𑀢𑀤𑀸𑀭𑀫𑁆𑀫𑀡𑀁 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀲𑁆𑀲 𑀲𑀩𑁆𑀩𑀣𑀸 𑀅𑀯𑀺𑀕𑀢𑀢𑁆𑀢𑀸 𑀪𑀯𑀺𑀢𑁆𑀯𑀸𑀯𑀺𑀕𑀢𑀫𑀢𑁆𑀢𑀯𑀲𑁂𑀦 𑀓𑀫𑁆𑀫𑀜𑁆𑀘 ‘‘𑀪𑀼𑀢𑁆𑀯𑀸𑀯𑀺𑀕𑀢𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀦 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 𑀯𑀺𑀬 𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀅𑀦𑀼𑀪𑀽𑀢𑀸𑀧𑀕𑀢𑀁 𑀚𑀯𑀦𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀢𑀸𑀯𑀲𑁂𑀦 𑀪𑀽𑀢𑀸𑀧𑀕𑀢𑀜𑁆𑀘 𑀲𑀗𑁆𑀔𑀢𑀁 𑀪𑀽𑀢𑀸𑀧𑀕𑀢𑀼𑀧𑁆𑀧𑀦𑁆𑀦𑀦𑁆𑀢𑀺. 𑀢𑀲𑁆𑀫𑀸 𑀇𑀥 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀁 𑀯𑀺𑀧𑀸𑀓𑀫𑁂𑀯 𑀯𑀤𑀢𑀺, 𑀦 𑀢𑀢𑁆𑀣 𑀯𑀺𑀬 𑀓𑀫𑁆𑀫𑀫𑁆𑀧𑀺. 𑀅𑀝𑁆𑀞𑀲𑀸𑀮𑀺𑀦𑀺𑀬𑀜𑁆𑀳𑀺 𑀪𑀽𑀢𑀸𑀯𑀺𑀕𑀢𑀼𑀧𑁆𑀧𑀦𑁆𑀦𑀁 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀜𑁆𑀘 𑀅𑀜𑁆𑀜𑀣𑀸 𑀤𑀲𑁆𑀲𑀺𑀢𑀁. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 (𑀥. 𑀲. 𑀅𑀝𑁆𑀞. 𑁧 𑀓𑀸𑀫𑀸𑀯𑀘𑀭𑀓𑀼𑀲𑀮𑀧𑀤𑀪𑀸𑀚𑀦𑀻𑀬) 𑁋

‘‘𑀆𑀭𑀫𑁆𑀫𑀡𑀭𑀲𑀁 ¶ 𑀅𑀦𑀼𑀪𑀯𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀁 𑀅𑀦𑀼𑀪𑀽𑀢𑀸𑀧𑀕𑀢𑀲𑀗𑁆𑀔𑀸𑀢𑀁 𑀓𑀼𑀲𑀮𑀸𑀓𑀼𑀲𑀮𑀁, 𑀉𑀧𑀸𑀤𑀸𑀤𑀺𑀢𑁆𑀢𑀬𑀁 𑀅𑀦𑀼𑀧𑁆𑀧𑀢𑁆𑀯𑀸 𑀦𑀺𑀭𑀼𑀤𑁆𑀥𑀁 𑀪𑀽𑀢𑀸𑀧𑀕𑀢𑀲𑀗𑁆𑀔𑀸𑀢𑀁 𑀲𑁂𑀲𑀲𑀗𑁆𑀔𑀢𑀜𑁆𑀘 𑀪𑀽𑀢𑀸𑀧𑀕𑀢𑀼𑀧𑁆𑀧𑀦𑁆𑀦𑀁 𑀦𑀸𑀫. ‘𑀬𑀸𑀦𑀺𑀲𑁆𑀲 𑀢𑀸𑀦𑀺 𑀧𑀼𑀩𑁆𑀩𑁂 𑀓𑀢𑀸𑀦𑀺 𑀓𑀫𑁆𑀫𑀸𑀦𑀻’𑀢𑀺 𑀏𑀯𑀫𑀸𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀁 𑀓𑀫𑁆𑀫𑀁 𑀅𑀢𑀻𑀢𑀫𑁆𑀧𑀺 𑀲𑀫𑀸𑀦𑀁 𑀅𑀜𑁆𑀜𑀁 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲𑁄𑀓𑀸𑀲𑀁 𑀓𑀢𑁆𑀯𑀸 𑀞𑀺𑀢𑀢𑁆𑀢𑀸, 𑀢𑀣𑀸𑀓𑀢𑁄𑀓𑀸𑀲𑀜𑁆𑀘 𑀯𑀺𑀧𑀸𑀓𑀁 𑀅𑀦𑀼𑀧𑁆𑀧𑀦𑁆𑀦𑀫𑁆𑀧𑀺 𑀲𑀫𑀸𑀦𑀁 𑀏𑀯𑀁 𑀓𑀢𑁂 𑀑𑀓𑀸𑀲𑁂 𑀏𑀓𑀦𑁆𑀢𑁂𑀦 𑀉𑀧𑁆𑀧𑀚𑁆𑀚𑀦𑀢𑁄 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀁 𑀦𑀸𑀫𑀸’’𑀢𑀺.

𑀇𑀥 𑀧𑀦 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀪𑀼𑀢𑁆𑀯𑀸𑀯𑀺𑀕𑀢𑀼𑀧𑁆𑀧𑀦𑁆𑀦𑀁 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀜𑁆𑀘 𑀤𑀲𑁆𑀲𑀺𑀢𑀁. 𑀯𑀼𑀢𑁆𑀢𑀜𑁆𑀳𑀺, 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 (𑀯𑀺𑀪. 𑀅𑀝𑁆𑀞. 𑁪𑁦𑁬) 𑁋

‘‘𑀓𑀫𑁆𑀫𑁂 𑀧𑀦 𑀚𑀳𑀺𑀢𑁂 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑁄 𑀯𑀺𑀧𑀸𑀓𑁄 𑀪𑀼𑀢𑁆𑀯𑀸𑀯𑀺𑀕𑀢𑀁 𑀦𑀸𑀫. 𑀓𑀫𑁆𑀫𑀁 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀁 𑀪𑀼𑀢𑁆𑀯𑀸𑀯𑀺𑀕𑀢𑀁 𑀦𑀸𑀫. 𑀢𑀤𑀼𑀪𑀬𑀫𑁆𑀧𑀺 𑀪𑀼𑀢𑁆𑀯𑀸𑀯𑀺𑀕𑀢𑀼𑀧𑁆𑀧𑀦𑁆𑀦𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 𑀅𑀜𑁆𑀜𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸 𑀅𑀢𑁆𑀢𑀦𑁄 𑀯𑀺𑀧𑀸𑀓𑀲𑁆𑀲 ¶ 𑀑𑀓𑀸𑀲𑀁 𑀓𑀭𑁄𑀢𑀺. 𑀏𑀯𑀁 𑀓𑀢𑁂 𑀑𑀓𑀸𑀲𑁂 𑀯𑀺𑀧𑀸𑀓𑁄 𑀉𑀧𑁆𑀧𑀚𑁆𑀚𑀫𑀸𑀦𑁄 𑀑𑀓𑀸𑀲𑀓𑀭𑀡𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑁄𑀢𑀺 𑀯𑀼𑀘𑁆𑀘𑀢𑀺. 𑀇𑀤𑀁 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀁 𑀦𑀸𑀫𑀸’’𑀢𑀺.

𑀢𑀢𑁆𑀣 𑀅𑀝𑁆𑀞𑀲𑀸𑀮𑀺𑀦𑀺𑀬𑀸 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 ‘‘𑀲𑀢𑀺𑀧𑀺 𑀲𑀩𑁆𑀩𑁂𑀲𑀫𑁆𑀧𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀲𑀁𑀯𑁂𑀤𑀬𑀺𑀢𑀲𑀪𑀸𑀯𑀸 𑀆𑀭𑀫𑁆𑀫𑀡𑀸𑀦𑀼𑀪𑀯𑀦𑁂 𑀲𑀯𑀺𑀧𑀮𑁆𑀮𑀸𑀲𑁂 𑀧𑀦 𑀲𑀦𑁆𑀢𑀸𑀦𑁂 𑀘𑀺𑀢𑁆𑀢𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀧𑀯𑀢𑁆𑀢𑀺𑀢𑁄 𑀅𑀩𑁆𑀬𑀸𑀓𑀢𑁂𑀳𑀺 𑀯𑀺𑀲𑀺𑀝𑁆𑀞𑁄 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀲𑀸𑀢𑀺𑀲𑀬𑁄 𑀯𑀺𑀲𑀬𑀸𑀦𑀼𑀪𑀯𑀦𑀸𑀓𑀸𑀭𑁄. 𑀬𑀣𑀸 𑀯𑀺𑀓𑀧𑁆𑀧𑀕𑁆𑀕𑀸𑀳𑀯𑀲𑁂𑀦 𑀭𑀸𑀕𑀸𑀤𑀻𑀳𑀺 𑀢𑀩𑁆𑀩𑀺𑀧𑀓𑁆𑀔𑁂𑀳𑀺 𑀘 𑀅𑀓𑀼𑀲𑀮𑀁 𑀓𑀼𑀲𑀮𑀜𑁆𑀘 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀆𑀭𑀫𑁆𑀫𑀡𑀭𑀲𑀁 𑀅𑀦𑀼𑀪𑀯𑀢𑀺, 𑀦 𑀢𑀣𑀸 𑀯𑀺𑀧𑀸𑀓𑁄 𑀓𑀫𑁆𑀫𑀯𑁂𑀕𑀓𑁆𑀔𑀺𑀢𑁆𑀢𑀢𑁆𑀢𑀸, 𑀦𑀸𑀧𑀺 𑀓𑀺𑀭𑀺𑀬𑀸 𑀅𑀳𑁂𑀢𑀼𑀓𑀸𑀦𑀁 𑀅𑀢𑀺𑀤𑀼𑀩𑁆𑀩𑀮𑀢𑀸𑀬, 𑀲𑀳𑁂𑀢𑀼𑀓𑀸𑀦𑀜𑁆𑀘 𑀔𑀻𑀡𑀓𑀺𑀮𑁂𑀲𑀲𑁆𑀲 𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀯𑀢𑁄 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀅𑀢𑀺𑀲𑀦𑁆𑀢𑀯𑀼𑀢𑁆𑀢𑀺𑀢𑁆𑀢𑀸, 𑀢𑀲𑁆𑀫𑀸 𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀁 𑀲𑀸𑀢𑀺𑀲𑀬𑀦𑁆𑀢𑀺 𑀅𑀓𑀼𑀲𑀮𑀁 𑀓𑀼𑀲𑀮𑀜𑁆𑀘 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀢𑀸𑀲𑀸𑀫𑀜𑁆𑀜𑁂𑀦 𑀲𑁂𑀲𑀲𑀗𑁆𑀔𑀢𑀜𑁆𑀘 𑀪𑀽𑀢𑀸𑀧𑀕𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀸 𑀧𑀦 𑀯𑀺𑀧𑀸𑀓𑀸𑀦𑀼𑀪𑀯𑀦𑀯𑀲𑁂𑀦 𑀢𑀤𑀸𑀭𑀫𑁆𑀫𑀡𑀁 𑀅𑀯𑀺𑀧𑀓𑁆𑀓𑀧𑀸𑀓𑀲𑁆𑀲 𑀲𑀩𑁆𑀩𑀣𑀸 𑀅𑀯𑀺𑀕𑀢𑀢𑁆𑀢𑀸 𑀪𑀯𑀺𑀢𑁆𑀯𑀸𑀯𑀺𑀕𑀢𑀫𑀢𑁆𑀢𑀯𑀲𑁂𑀦 𑀓𑀫𑁆𑀫𑀜𑁆𑀘 𑀪𑀼𑀢𑁆𑀯𑀸𑀧𑀕𑀢𑀦𑁆𑀢𑀺 ¶ 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀢𑀢𑁆𑀣 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀦𑁆𑀢𑀺 𑀯𑀺𑀧𑀸𑀓𑀫𑁂𑀯𑀸𑀳, 𑀦 𑀓𑀫𑁆𑀫𑀫𑁆𑀧𑀺, 𑀢𑀲𑁆𑀫𑀸 𑀇𑀥𑀸𑀧𑀺 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀪𑀼𑀢𑁆𑀯𑀸𑀧𑀕𑀢𑀼𑀧𑁆𑀧𑀦𑁆𑀦𑀁 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀜𑁆𑀘 𑀯𑀺𑀪𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀧𑀜𑁆𑀘𑀓𑁆𑀔𑀦𑁆𑀥𑀸 𑀧𑀦 𑀯𑀺𑀧𑀲𑁆𑀲𑀦𑀸𑀬 𑀪𑀽𑀫𑀺 𑀦𑀸𑀫𑀸𑀢𑀺 𑀲𑀫𑁆𑀫𑀲𑀦𑀲𑁆𑀲 𑀞𑀸𑀦𑀪𑀸𑀯𑀢𑁄 𑀯𑀼𑀢𑁆𑀢𑀁. 𑀢𑁂𑀲𑀽𑀢𑀺 𑀅𑀢𑀻𑀢𑀸𑀤𑀺𑀪𑁂𑀤𑁂𑀲𑀼. 𑀅𑀦𑀼𑀲𑀬𑀺𑀢𑀓𑀺𑀮𑁂𑀲𑀸𑀢𑀺 𑀅𑀧𑁆𑀧𑀳𑀻𑀦𑀸 𑀫𑀕𑁆𑀕𑁂𑀦 𑀧𑀳𑀸𑀢𑀩𑁆𑀩𑀸 𑀅𑀥𑀺𑀧𑁆𑀧𑁂𑀢𑀸. 𑀢𑁂𑀦𑀸𑀳 𑁋 ‘‘𑀅𑀢𑀻𑀢𑀸 𑀯𑀸…𑀧𑁂… 𑀦 𑀯𑀢𑁆𑀢𑀩𑁆𑀩𑀸’’𑀢𑀺. 𑀳𑁄𑀦𑁆𑀢𑀼 𑀢𑀸𑀯 ‘‘𑀅𑀢𑀻𑀢𑀸’’𑀢𑀺 𑀯𑀸 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸’’𑀢𑀺 𑀯𑀸 𑀦 𑀯𑀢𑁆𑀢𑀩𑁆𑀩𑀸, ‘‘𑀅𑀦𑀸𑀕𑀢𑀸’’𑀢𑀺 𑀧𑀦 𑀓𑀲𑁆𑀫𑀸 𑀦 𑀯𑀢𑁆𑀢𑀩𑁆𑀩𑀸, 𑀦𑀦𑀼 𑀓𑀸𑀭𑀡𑀮𑀸𑀪𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀸 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀣𑀸𑀫𑀕𑀢𑀸 𑀓𑀺𑀮𑁂𑀲𑀸 𑀅𑀦𑀼𑀲𑀬𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀅𑀦𑀸𑀕𑀢𑀪𑀸𑀯𑁄𑀧𑀺 𑀦𑁂𑀲𑀁 𑀦 𑀧𑀭𑀺𑀘𑁆𑀙𑀺𑀦𑁆𑀦𑁄 𑀇𑀢𑀭𑀸𑀦𑀸𑀕𑀢𑀓𑁆𑀔𑀦𑁆𑀥𑀸𑀦𑀁 𑀯𑀺𑀬𑀸𑀢𑀺 ‘‘𑀅𑀦𑀸𑀕𑀢𑀸 𑀯𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀳𑀺 𑀦𑁂𑀲𑀁 𑀧𑀭𑀺𑀘𑁆𑀙𑀺𑀦𑁆𑀦𑁄 𑀅𑀦𑀸𑀕𑀢𑀪𑀸𑀯𑁄 𑀲𑀺𑀬𑀸, 𑀢𑀢𑁄 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀸, 𑀅𑀢𑀻𑀢𑀸’’𑀢𑀺 𑀘 𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀁, 𑀧𑀘𑁆𑀘𑀬𑀲𑀫𑀯𑀸𑀬𑁂 𑀧𑀦 𑀉𑀧𑁆𑀧𑀚𑁆𑀚𑀦𑀸𑀭𑀳𑀢𑀁 𑀉𑀧𑀸𑀤𑀸𑀬 𑀅𑀦𑀸𑀕𑀢𑀯𑁄𑀳𑀸𑀭𑁄 𑀢𑀢𑁆𑀣 𑀯𑁂𑀤𑀺𑀢𑀩𑁆𑀩𑁄.

𑀇𑀤𑀁 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀁 𑀦𑀸𑀫𑀸𑀢𑀺 𑀇𑀤𑀁 𑀬𑀣𑀸𑀯𑀼𑀢𑁆𑀢𑀁 𑀓𑀺𑀮𑁂𑀲𑀚𑀸𑀢𑀁 𑀅𑀧𑁆𑀧𑀳𑀻𑀦𑀝𑁆𑀞𑁂𑀦 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀁 𑀦𑀸𑀫 𑀓𑀸𑀭𑀡𑀮𑀸𑀪𑁂 𑀲𑀢𑀺 𑀯𑀺𑀚𑁆𑀚𑀫𑀸𑀦𑀓𑀺𑀘𑁆𑀘𑀓𑀭𑀡𑀢𑁄. 𑀢𑀸𑀲𑀼 𑀢𑀸𑀲𑀼 𑀪𑀽𑀫𑀺𑀲𑀽𑀢𑀺 𑀫𑀦𑀼𑀲𑁆𑀲𑀤𑁂𑀯𑀸𑀤𑀺𑀅𑀢𑁆𑀢𑀪𑀸𑀯𑀲𑀗𑁆𑀔𑀸𑀢𑁂𑀲𑀼 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑀼. 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀳𑀺 𑀪𑀯𑀦𑁆𑀢𑀺 𑀏𑀢𑁆𑀣 𑀓𑀺𑀮𑁂𑀲𑀸𑀢𑀺 𑀪𑀽𑀫𑀺𑀬𑁄, 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀅𑀲𑀫𑀼𑀕𑁆𑀖𑀸𑀢𑀕𑀢𑀸𑀢𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀅𑀦𑀸𑀧𑀸𑀤𑀺𑀢𑀢𑀸𑀬 𑀲𑀫𑀼𑀕𑁆𑀖𑀸𑀢𑀁 𑀲𑀫𑀼𑀘𑁆𑀙𑁂𑀤𑀁 𑀦 𑀕𑀢𑀸𑀢𑀺 𑀅𑀲𑀫𑀼𑀕𑁆𑀖𑀸𑀢𑀕𑀢𑀸. 𑀪𑀽𑀫𑀺𑀮𑀤𑁆𑀥𑀼𑀧𑁆𑀧𑀦𑁆𑀦𑀁 𑀦𑀸𑀫𑀸𑀢𑀺 𑀏𑀢𑁆𑀣 𑀮𑀤𑁆𑀥𑀪𑀽𑀫𑀺𑀓𑀁 ¶ 𑀪𑀽𑀫𑀺𑀮𑀤𑁆𑀥𑀦𑁆𑀢𑀺 𑀯𑀼𑀢𑁆𑀢𑀁 𑀅𑀕𑁆𑀕𑀺𑀆𑀳𑀺𑀢𑁄 𑀯𑀺𑀬. 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀲𑀤𑁆𑀤𑁂𑀧𑀺 𑀘 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 (𑀥. 𑀲. 𑀅𑀝𑁆𑀞. 𑁧 𑀓𑀸𑀫𑀸𑀯𑀘𑀭𑀓𑀼𑀲𑀮𑀧𑀤𑀪𑀸𑀚𑀦𑀻𑀬) 𑀆𑀕𑀢𑀦𑀬𑁂𑀦 𑀑𑀓𑀸𑀲𑁄 𑀓𑀢𑁄 𑀏𑀢𑁂𑀦 𑀓𑀼𑀲𑀮𑀸𑀓𑀼𑀲𑀮𑀓𑀫𑁆𑀫𑁂𑀦, 𑀑𑀓𑀸𑀲𑁄 𑀓𑀢𑁄 𑀏𑀢𑀲𑁆𑀲 𑀯𑀺𑀧𑀸𑀓𑀲𑁆𑀲𑀸𑀢𑀺 𑀘 𑀤𑀼𑀯𑀺𑀥𑀢𑁆𑀣𑁂𑀧𑀺 𑀏𑀯𑀫𑁂𑀯 𑀓𑀢𑀲𑀤𑁆𑀤𑀲𑁆𑀲 𑀧𑀭𑀦𑀺𑀧𑀸𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀥 𑀧𑀦 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀲𑀤𑁆𑀤𑁂𑀦 𑀯𑀺𑀧𑀸𑀓𑀲𑁆𑀲𑁂𑀯 𑀕𑀳𑀺𑀢𑀢𑁆𑀢𑀸 ‘‘𑀑𑀓𑀸𑀲𑁄 𑀓𑀢𑁄 𑀏𑀢𑀲𑁆𑀲 𑀯𑀺𑀧𑀸𑀓𑀲𑁆𑀲𑀸’’𑀢𑀺 𑀏𑀯𑀁 𑀯𑀺𑀕𑁆𑀕𑀳𑁄 𑀤𑀝𑁆𑀞𑀩𑁆𑀩𑁄.

𑀔𑀡𑀢𑁆𑀢𑀬𑀲𑀫𑀗𑁆𑀕𑀺𑀢𑀸𑀬 𑀲𑀫𑀼𑀤𑀸𑀘𑀸𑀭𑀧𑁆𑀧𑀢𑁆𑀢𑀁 𑀲𑀫𑀼𑀤𑀸𑀘𑀸𑀭𑀼𑀧𑁆𑀧𑀦𑁆𑀦𑀁. 𑀢𑁂𑀦𑀸𑀳 𑁋 ‘‘𑀲𑀫𑁆𑀧𑀢𑀺 𑀯𑀢𑁆𑀢𑀫𑀸𑀦𑀁𑀬𑁂𑀯𑀸’’𑀢𑀺. 𑀆𑀭𑀫𑁆𑀫𑀡𑀁 𑀅𑀥𑀺𑀕𑁆𑀕𑀬𑁆𑀳 𑀤𑀴𑁆𑀳𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀁 𑀆𑀭𑀫𑁆𑀫𑀡𑀸𑀥𑀺𑀕𑁆𑀕𑀳𑀺𑀢𑀼𑀧𑁆𑀧𑀦𑁆𑀦𑀁. 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑀯𑀲𑁂𑀦 𑀅𑀧𑁆𑀧𑀳𑀻𑀦𑀸 𑀅𑀯𑀺𑀓𑁆𑀔𑀫𑁆𑀪𑀺𑀢𑀸. 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑀯𑀲𑁂𑀦 𑀅𑀧𑁆𑀧𑀳𑀻𑀦𑀸 𑀅𑀲𑀫𑀼𑀕𑁆𑀖𑀸𑀢𑀺𑀢𑀸. 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀯𑀲𑁂𑀦 𑀆𑀭𑀫𑁆𑀫𑀡𑀲𑁆𑀲 𑀅𑀥𑀺𑀕𑁆𑀕𑀳𑀺𑀢𑀢𑁆𑀢𑀸 ¶ 𑀢𑀁 𑀆𑀭𑀫𑁆𑀫𑀡𑀁 𑀅𑀦𑀼𑀲𑁆𑀲𑀭𑀺𑀢𑀸𑀦𑀼𑀲𑁆𑀲𑀭𑀺𑀢𑀓𑁆𑀔𑀡𑁂 𑀓𑀺𑀮𑁂𑀲𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁂𑀦 𑀉𑀧𑀢𑀺𑀝𑁆𑀞𑀦𑀢𑁄 𑀅𑀥𑀺𑀕𑁆𑀕𑀳𑀺𑀢𑀫𑁂𑀯 𑀦𑀸𑀫𑀁 𑀳𑁄𑀢𑀻𑀢𑀺 𑀆𑀳 𑁋 ‘‘𑀆𑀭𑀫𑁆𑀫𑀡𑀲𑁆𑀲 𑀅𑀥𑀺𑀕𑁆𑀕𑀳𑀺𑀢𑀢𑁆𑀢𑀸’’𑀢𑀺. 𑀏𑀢𑁆𑀣 𑀘 𑀆𑀳𑀝𑀔𑀻𑀭𑀭𑀼𑀓𑁆𑀔𑁄 𑀯𑀺𑀬 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀯𑀲𑁂𑀦 𑀅𑀥𑀺𑀕𑁆𑀕𑀳𑀺𑀢𑀁 𑀆𑀭𑀫𑁆𑀫𑀡𑀁, 𑀅𑀦𑀸𑀳𑀝𑀔𑀻𑀭𑀭𑀼𑀓𑁆𑀔𑁄 𑀯𑀺𑀬 𑀅𑀯𑀺𑀓𑁆𑀔𑀫𑁆𑀪𑀺𑀢𑀢𑀸𑀬 𑀅𑀦𑁆𑀢𑁄𑀕𑀢𑀓𑀺𑀮𑁂𑀲𑀆𑀭𑀫𑁆𑀫𑀡𑀁 𑀤𑀝𑁆𑀞𑀩𑁆𑀩𑀁. 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀺𑀓𑀸 𑀅𑀯𑀺𑀓𑁆𑀔𑀫𑁆𑀪𑀺𑀢𑀓𑀺𑀮𑁂𑀲𑀸 𑀯𑀸 𑀧𑀼𑀕𑁆𑀕𑀮𑀸 𑀯𑀸 𑀆𑀳𑀝𑀸𑀦𑀸𑀳𑀝𑀔𑀻𑀭𑀭𑀼𑀓𑁆𑀔𑀲𑀤𑀺𑀲𑀸. 𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀅𑀯𑀺𑀓𑁆𑀔𑀫𑁆𑀪𑀺𑀢𑀼𑀧𑁆𑀧𑀦𑁆𑀦𑁂 𑀯𑀼𑀢𑁆𑀢𑀦𑀬𑁂𑀦𑁂𑀯. 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀦𑁆𑀢𑀺 ‘‘𑀇𑀫𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀓𑀲𑁆𑀫𑀸? 𑀅𑀲𑀫𑀼𑀕𑁆𑀖𑀸𑀢𑀺𑀢𑀢𑁆𑀢𑀸. 𑀬𑀣𑀸 𑀓𑀺𑀁? 𑀬𑀣𑀸 𑀲𑀘𑁂 𑀔𑀻𑀭𑀭𑀼𑀓𑁆𑀔𑀁 𑀓𑀼𑀞𑀸𑀭𑀺𑀬𑀸 𑀆𑀳𑀦𑁂𑀬𑁆𑀬𑀼𑀁, 𑀇𑀫𑀲𑁆𑀫𑀺𑀁 𑀦𑀸𑀫 𑀞𑀸𑀦𑁂 𑀔𑀻𑀭𑀁 𑀦 𑀦𑀺𑀓𑁆𑀔𑀫𑁂𑀬𑁆𑀬𑀸𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀏𑀯𑀁. 𑀇𑀤𑀁 𑀅𑀲𑀫𑀼𑀕𑁆𑀖𑀸𑀢𑀺𑀢𑀼𑀧𑁆𑀧𑀦𑁆𑀦𑀁 𑀦𑀸𑀫𑀸𑀢𑀺 𑀏𑀯𑀁 𑀬𑁄𑀚𑁂𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀢𑀩𑁆𑀩𑀁.

𑀇𑀫𑁂𑀲𑀼 𑀉𑀧𑁆𑀧𑀦𑁆𑀦𑁂𑀲𑀽𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀅𑀝𑁆𑀞𑀲𑀼 𑀉𑀧𑁆𑀧𑀦𑁆𑀦𑁂𑀲𑀼. 𑀇𑀤𑀁 𑀦 𑀫𑀕𑁆𑀕𑀯𑀚𑁆𑀛𑀁 𑀅𑀧𑁆𑀧𑀳𑀸𑀢𑀩𑁆𑀩𑀯𑀢𑁆𑀣𑀼𑀢𑁆𑀢𑀸. 𑀫𑀕𑁆𑀕𑀯𑀚𑁆𑀛𑀁 𑀫𑀕𑁆𑀕𑁂𑀦 𑀧𑀳𑁂𑀬𑁆𑀬𑀯𑀢𑁆𑀣𑀼𑀢𑁆𑀢𑀸. 𑀭𑀢𑁆𑀢𑁄𑀢𑀺 𑀭𑀸𑀕𑁂𑀦 𑀲𑀫𑀦𑁆𑀦𑀸𑀕𑀢𑁄. 𑀏𑀲 𑀦𑀬𑁄 𑀤𑀼𑀝𑁆𑀞𑁄 𑀫𑀽𑀴𑁆𑀳𑁄𑀢𑀺 𑀏𑀢𑁆𑀣𑀸𑀧𑀺. 𑀯𑀺𑀦𑀺𑀩𑀤𑁆𑀥𑁄𑀢𑀺 𑀫𑀸𑀦𑀲𑀁𑀬𑁄𑀚𑀦𑁂𑀦 𑀯𑀺𑀭𑀽𑀧𑀁 𑀦𑀺𑀩𑀦𑁆𑀥𑀺𑀢𑁄. 𑀧𑀭𑀸𑀫𑀝𑁆𑀞𑁄𑀢𑀺 𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑁂𑀦 𑀥𑀫𑁆𑀫𑀲𑀪𑀸𑀯𑀁 𑀅𑀢𑀺𑀓𑁆𑀓𑀫𑁆𑀫 𑀧𑀭𑀢𑁄 𑀆𑀫𑀝𑁆𑀞𑁄. 𑀅𑀦𑀺𑀝𑁆𑀞𑀗𑁆𑀕𑀢𑁄𑀢𑀺 𑀦𑀺𑀝𑁆𑀞𑀁 𑀅𑀕𑀢𑁄, 𑀲𑀁𑀲𑀬𑀸𑀧𑀦𑁆𑀦𑁄𑀢𑀺 𑀅𑀢𑁆𑀣𑁄. 𑀣𑀸𑀫𑀕𑀢𑁄𑀢𑀺 𑀅𑀦𑀼𑀲𑀬𑀯𑀲𑁂𑀦 𑀤𑀴𑁆𑀳𑀢𑀁 𑀉𑀧𑀕𑀢𑁄. 𑀬𑀼𑀕𑀦𑀤𑁆𑀥𑀸𑀢𑀺 𑀧𑀳𑀸𑀢𑀩𑁆𑀩𑀧𑁆𑀧𑀳𑀸𑀬𑀓𑀬𑀼𑀕𑁂 𑀦𑀤𑁆𑀥𑀸 𑀯𑀺𑀬 𑀯𑀢𑁆𑀢𑀦𑀓𑀸 𑀏𑀓𑀓𑀸𑀮𑀺𑀓𑀢𑁆𑀢𑀸. 𑀲𑀁𑀓𑀺𑀮𑁂𑀲𑀺𑀓𑀸𑀢𑀺 𑀲𑀁𑀓𑀺𑀮𑁂𑀲𑀥𑀫𑁆𑀫𑀲𑀳𑀺𑀢𑀸.

𑀧𑀸𑀴𑀺𑀬𑀦𑁆𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀴𑀺𑀬𑀁 (𑀧𑀝𑀺. 𑀫. 𑁩.𑁨𑁧). 𑀢𑀺𑀓𑀸𑀮𑀺𑀓𑁂𑀲𑀼𑀧𑀺 𑀓𑀺𑀮𑁂𑀲𑁂𑀲𑀼 𑀯𑀸𑀬𑀸𑀫𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀅𑀚𑀸𑀢𑀨𑀮𑀢𑀭𑀼𑀡𑀭𑀼𑀓𑁆𑀔𑁄 𑀧𑀸𑀴𑀺𑀬𑀁 𑀦𑀺𑀤𑀲𑁆𑀲𑀺𑀢𑁄, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀚𑀸𑀢𑁄 𑀲𑀢𑁆𑀢𑁄 𑀅𑀲𑀫𑀼𑀤𑀸𑀳𑀝𑀓𑀺𑀮𑁂𑀲𑁄 𑀦𑀸𑀫 𑀦𑀢𑁆𑀣𑀻𑀢𑀺 ‘‘𑀚𑀸𑀢𑀨𑀮𑀭𑀼𑀓𑁆𑀔𑁂𑀦 𑀤𑀻𑀧𑁂𑀢𑀩𑁆𑀩’’𑀦𑁆𑀢𑀺 𑀯𑀢𑁆𑀯𑀸 𑀢𑀫𑀢𑁆𑀣𑀁 𑀯𑀺𑀯𑀭𑀺𑀢𑀼𑀁 ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀫𑀕𑁆𑀕𑁂𑀦 𑀧𑀳𑀻𑀦𑀓𑀺𑀮𑁂𑀲𑀸𑀦𑀫𑁂𑀯 𑀅𑀢𑀻𑀢𑀸𑀤𑀺𑀪𑁂𑀤𑁂𑀦 𑀢𑀺𑀥𑀸 ¶ 𑀦𑀯𑀢𑁆𑀢𑀩𑁆𑀩𑀢𑀁 𑀧𑀸𑀓𑀝𑀁 𑀓𑀸𑀢𑀼𑀁 𑀅𑀚𑀸𑀢𑀨𑀮𑀭𑀼𑀓𑁆𑀔𑁄 𑀉𑀧𑀫𑀸𑀯𑀲𑁂𑀦 𑀧𑀸𑀴𑀺𑀬𑀁 𑀆𑀪𑀢𑁄, 𑀅𑀢𑀻𑀢𑀸𑀤𑀻𑀦𑀁 𑀅𑀧𑁆𑀧𑀳𑀻𑀦𑀢𑀸𑀤𑀲𑁆𑀲𑀦𑀢𑁆𑀣𑀫𑁆𑀧𑀺 ‘‘𑀚𑀸𑀢𑀨𑀮𑀭𑀼𑀓𑁆𑀔𑁂𑀦 𑀤𑀻𑀧𑁂𑀢𑀩𑁆𑀩’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀣𑀸 𑀅𑀘𑁆𑀙𑀺𑀦𑁆𑀦𑁂 𑀭𑀼𑀓𑁆𑀔𑁂 𑀦𑀺𑀩𑁆𑀩𑀢𑁆𑀢𑀦𑀸𑀭𑀳𑀸𑀦𑀺 𑀨𑀮𑀸𑀦𑀺 𑀙𑀺𑀦𑁆𑀦𑁂 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀓𑀤𑀸𑀘𑀺 𑀲𑀲𑀪𑀸𑀯𑀸𑀦𑀺 𑀅𑀳𑁂𑀲𑀼𑀁, 𑀳𑁄𑀦𑁆𑀢𑀺, 𑀪𑀯𑀺𑀲𑁆𑀲𑀦𑁆𑀢𑀺 𑀯𑀸𑀢𑀺 𑀅𑀢𑀻𑀢𑀸𑀤𑀺𑀪𑀸𑀯𑁂𑀦 𑀦 𑀯𑀢𑁆𑀢𑀩𑁆𑀩𑀸𑀦𑀺, 𑀏𑀯𑀁 𑀫𑀕𑁆𑀕𑁂𑀦 𑀧𑀳𑀻𑀦𑀓𑀺𑀮𑁂𑀲𑀸 𑀘 𑀤𑀝𑁆𑀞𑀩𑁆𑀩𑀸 𑀫𑀕𑁆𑀕𑁂 𑀅𑀦𑀼𑀧𑁆𑀧𑀦𑁆𑀦𑁂 𑀉𑀧𑁆𑀧𑀢𑁆𑀢𑀺𑀭𑀳𑀸𑀦𑀁 𑀉𑀧𑁆𑀧𑀦𑁆𑀦𑁂 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀅𑀪𑀸𑀯𑀢𑁄 ¶ . 𑀬𑀣𑀸 𑀘 𑀙𑁂𑀤𑁂 𑀅𑀲𑀢𑀺 𑀨𑀮𑀸𑀦𑀺 𑀉𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀻𑀢𑀺 𑀙𑁂𑀤𑀦𑀲𑁆𑀲 𑀲𑀸𑀢𑁆𑀣𑀓𑀢𑀸, 𑀏𑀯𑀁 𑀫𑀕𑁆𑀕𑀪𑀸𑀯𑀦𑀸𑀬 𑀘 𑀲𑀸𑀢𑁆𑀣𑀓𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀦𑀸𑀧𑀺 𑀦 𑀧𑀚𑀳𑀢𑀻𑀢𑀺 𑀉𑀧𑁆𑀧𑀚𑁆𑀚𑀦𑀸𑀭𑀳𑀸𑀦𑀁 𑀧𑀚𑀳𑀦𑀢𑁄 𑀯𑀼𑀢𑁆𑀢𑀁. 𑀉𑀧𑁆𑀧𑀚𑁆𑀚𑀺𑀢𑁆𑀯𑀸𑀢𑀺 𑀮𑀓𑁆𑀔𑀡𑁂 𑀢𑁆𑀯𑀸-𑀲𑀤𑁆𑀤𑁄. 𑀫𑀕𑁆𑀕𑀲𑁆𑀲 𑀉𑀧𑁆𑀧𑀚𑁆𑀚𑀦𑀓𑀺𑀭𑀺𑀬𑀸𑀬 𑀳𑀺 𑀲𑀫𑀼𑀤𑀬𑀧𑁆𑀧𑀳𑀸𑀦𑀦𑀺𑀩𑁆𑀩𑀸𑀦𑀲𑀙𑀺𑀓𑀭𑀡𑀓𑀺𑀭𑀺𑀬𑀸 𑀯𑀺𑀬 𑀔𑀦𑁆𑀥𑀸𑀦𑀁 𑀧𑀭𑀺𑀚𑀸𑀦𑀦𑀓𑀺𑀭𑀺𑀬𑀸 𑀮𑀓𑁆𑀔𑀻𑀬𑀢𑀺.

𑀢𑁂𑀧𑀺 𑀧𑀚𑀳𑀢𑀺𑀬𑁂𑀯𑀸𑀢𑀺 𑀬𑁂 𑀢𑁂𑀳𑀺 𑀓𑀺𑀮𑁂𑀲𑁂𑀳𑀺 𑀚𑀦𑁂𑀢𑀩𑁆𑀩𑀸 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀸, 𑀢𑁂𑀧𑀺 𑀧𑀚𑀳𑀢𑀺𑀬𑁂𑀯 𑀢𑀦𑁆𑀦𑀺𑀫𑀺𑀢𑁆𑀢𑀲𑁆𑀲 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑀦𑀢𑁄. 𑀢𑁂𑀦𑀸𑀳 𑁋 ‘‘𑀯𑀼𑀢𑁆𑀢𑀫𑁆𑀧𑀺 𑀘𑁂𑀢’’𑀦𑁆𑀢𑀺𑀆𑀤𑀺. 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀭𑁄𑀥𑁂𑀦𑀸𑀢𑀺 𑀓𑀫𑁆𑀫𑀯𑀺𑀜𑁆𑀜𑀸𑀡𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀸𑀧𑀸𑀤𑀦𑁂𑀦. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀜𑀸𑀡𑁂 𑀳𑁂𑀢𑀼𑀪𑀽𑀢𑁂. 𑀏𑀢𑁂𑀢𑀺 𑀦𑀸𑀫𑀭𑀽𑀧𑀲𑀜𑁆𑀜𑀺𑀢𑀸 𑀲𑀗𑁆𑀔𑀸𑀭𑀸. 𑀲𑀩𑁆𑀩𑀪𑀯𑁂𑀳𑀺 𑀯𑀼𑀝𑁆𑀞𑀸𑀢𑀺𑀬𑁂𑀯𑀸𑀢𑀺𑀧𑀺 𑀯𑀤𑀦𑁆𑀢𑀻𑀢𑀺 𑀅𑀭𑀳𑀢𑁆𑀢𑀫𑀕𑁆𑀕𑁄 𑀲𑀩𑁆𑀩𑀪𑀯𑁂𑀳𑀺 𑀯𑀼𑀝𑁆𑀞𑀸𑀢𑀺𑀬𑁂𑀯𑀸𑀢𑀺 𑀯𑀤𑀦𑁆𑀢𑀺 𑀢𑀤𑀼𑀧𑁆𑀧𑀢𑁆𑀢𑀺𑀢𑁄 𑀉𑀤𑁆𑀥𑀁 𑀪𑀯𑀽𑀧𑀧𑀢𑁆𑀢𑀺𑀬𑀸 𑀓𑀺𑀮𑁂𑀲𑀲𑁆𑀲𑀧𑀺 𑀅𑀪𑀸𑀯𑀢𑁄.

𑀏𑀓𑀘𑀺𑀢𑁆𑀢𑀓𑁆𑀔𑀡𑀺𑀓𑀢𑁆𑀢𑀸 𑀫𑀕𑁆𑀕𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀓𑀣𑀁 𑀅𑀦𑀼𑀧𑁆𑀧𑀦𑁆𑀦𑀸𑀦𑀁…𑀧𑁂… 𑀞𑀺𑀢𑀺𑀬𑀸 𑀪𑀸𑀯𑀦𑀸 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀢𑀺. 𑀫𑀕𑁆𑀕𑀧𑁆𑀧𑀯𑀢𑁆𑀢𑀺𑀬𑀸𑀬𑁂𑀯 𑀉𑀪𑀬𑀓𑀺𑀘𑁆𑀘𑀲𑀺𑀤𑁆𑀥𑀺𑀢𑁄 𑀆𑀳 𑁋 ‘‘𑀫𑀕𑁆𑀕𑀧𑁆𑀧𑀯𑀢𑁆𑀢𑀺𑀬𑀸𑀬𑁂𑀯𑀸’’𑀢𑀺. 𑀫𑀕𑁆𑀕𑁄 𑀳𑀻𑀢𑀺𑀆𑀤𑀺𑀦𑀸 𑀢𑀫𑀢𑁆𑀣𑀁 𑀯𑀺𑀯𑀭𑀢𑀺. 𑀅𑀦𑀼𑀧𑁆𑀧𑀦𑁆𑀦𑁄 𑀦𑀸𑀫 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀪𑀸𑀯𑀦𑀸 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀉𑀧𑁆𑀧𑀸𑀤𑀸𑀬 𑀪𑀸𑀯𑀦𑀸 𑀯𑀼𑀢𑁆𑀢𑀸𑀢𑀺 𑀬𑁄𑀚𑁂𑀢𑀩𑁆𑀩𑀸. 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑀸𑀯𑀢𑀸 𑀫𑀕𑁆𑀕𑀲𑁆𑀲 𑀧𑀯𑀢𑁆𑀢𑀺𑀬𑁂𑀯 𑀞𑀺𑀢𑀺, 𑀢𑀢𑁆𑀢𑀓𑀸𑀦𑁂𑀯 𑀦𑀺𑀩𑁆𑀩𑀢𑁆𑀢𑀺𑀢𑀮𑁄𑀓𑀼𑀢𑁆𑀢𑀭𑀸𑀦𑀺.

𑁩𑁯𑁮-𑁪𑁦𑁧. 𑀓𑀢𑁆𑀢𑀼𑀓𑀫𑁆𑀬𑀢𑀸𑀙𑀦𑁆𑀤𑀁 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀫𑀸𑀥𑀺 𑀙𑀦𑁆𑀤𑀲𑀫𑀸𑀥𑀻𑀢𑀺 𑀆𑀳 𑁋 ‘‘𑀙𑀦𑁆𑀤𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑁄 𑀲𑀫𑀸𑀥𑀺 𑀙𑀦𑁆𑀤𑀲𑀫𑀸𑀥𑀻’’𑀢𑀺 𑀧𑀥𑀸𑀦𑀲𑀗𑁆𑀔𑀸𑀭𑀸𑀢𑀺 𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑀲𑁆𑀲 𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀢𑁂𑀦𑀸𑀳 𑁋 ‘‘𑀧𑀥𑀸𑀦𑀪𑀽𑀢𑀸 𑀲𑀗𑁆𑀔𑀸𑀭𑀸 𑀧𑀥𑀸𑀦𑀲𑀗𑁆𑀔𑀸𑀭𑀸’’𑀢𑀺. 𑀢𑀢𑁆𑀣 𑀧𑀥𑀸𑀦𑀪𑀽𑀢𑀸𑀢𑀺 𑀯𑀻𑀭𑀺𑀬𑀪𑀽𑀢𑀸. 𑀲𑀗𑁆𑀔𑀢𑀲𑀗𑁆𑀔𑀸𑀭𑀸𑀤𑀺𑀦𑀺𑀯𑀢𑁆𑀢𑀦𑀢𑁆𑀣𑀁 𑀧𑀥𑀸𑀦𑀕𑁆𑀕𑀳𑀡𑀦𑁆𑀢𑀺. 𑀅𑀣 𑀯𑀸 𑀢𑀁 𑀢𑀁 𑀯𑀺𑀲𑁂𑀲𑀁 𑀲𑀗𑁆𑀔𑀭𑁄𑀢𑀻𑀢𑀺 𑀲𑀗𑁆𑀔𑀸𑀭𑁄, 𑀲𑀩𑁆𑀩𑀁 𑀯𑀻𑀭𑀺𑀬𑀁. 𑀢𑀢𑁆𑀣 𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑀢𑁄 𑀲𑁂𑀲𑀦𑀺𑀯𑀢𑁆𑀢𑀦𑀢𑁆𑀣𑀁 𑀧𑀥𑀸𑀦𑀕𑁆𑀕𑀳𑀡𑀦𑁆𑀢𑀺, 𑀧𑀥𑀸𑀦𑀪𑀽𑀢𑀸 𑀲𑁂𑀝𑁆𑀞𑀪𑀽𑀢𑀸𑀢𑀺 𑀅𑀢𑁆𑀣𑁄. 𑀘𑀢𑀼𑀩𑁆𑀩𑀺𑀥𑀲𑁆𑀲 𑀧𑀦 𑀯𑀻𑀭𑀺𑀬𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀩𑀳𑀼𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀢𑁂𑀳𑀺 𑀥𑀫𑁆𑀫𑁂𑀳𑀻𑀢𑀺 𑀙𑀦𑁆𑀤𑀲𑀫𑀸𑀥𑀺𑀦𑀸 𑀧𑀥𑀸𑀦𑀲𑀗𑁆𑀔𑀸𑀭𑁂𑀳𑀺 𑀘. 𑀇𑀤𑁆𑀥𑀺𑀧𑀸𑀤𑀦𑁆𑀢𑀺 𑀏𑀢𑁆𑀣 𑀇𑀚𑁆𑀛𑀢𑀻𑀢𑀺 𑀇𑀤𑁆𑀥𑀺, 𑀲𑀫𑀺𑀚𑁆𑀛𑀢𑀺 ¶ 𑀦𑀺𑀧𑁆𑀨𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀇𑀚𑁆𑀛𑀦𑁆𑀢𑀺 𑀯𑀸 𑀏𑀢𑀸𑀬 𑀲𑀢𑁆𑀢𑀸 𑀇𑀤𑁆𑀥𑀸 𑀯𑀼𑀤𑁆𑀥𑀸 𑀉𑀓𑁆𑀓𑀁𑀲𑀕𑀢𑀸 𑀳𑁄𑀦𑁆𑀢𑀻𑀢𑀺𑀧𑀺 𑀇𑀤𑁆𑀥𑀺. 𑀧𑀞𑀫𑁂𑀦𑀢𑁆𑀣𑁂𑀦 𑀇𑀤𑁆𑀥𑀺 𑀏𑀯 𑀧𑀸𑀤𑁄 ¶ 𑀇𑀤𑁆𑀥𑀺𑀧𑀸𑀤𑁄, 𑀇𑀤𑁆𑀥𑀺𑀓𑁄𑀝𑁆𑀞𑀸𑀲𑁄𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑁂𑀦𑀢𑁆𑀣𑁂𑀦 𑀇𑀤𑁆𑀥𑀺𑀬𑀸 𑀧𑀸𑀤𑁄𑀢𑀺 𑀇𑀤𑁆𑀥𑀺𑀧𑀸𑀤𑁄, 𑀧𑀸𑀤𑁄𑀢𑀺 𑀧𑀢𑀺𑀝𑁆𑀞𑀸, 𑀅𑀥𑀺𑀕𑀫𑀽𑀧𑀸𑀬𑁄𑀢𑀺 𑀅𑀢𑁆𑀣𑁄. 𑀢𑁂𑀦 𑀳𑀺 𑀬𑀲𑁆𑀫𑀸 𑀉𑀧𑀭𑀽𑀧𑀭𑀺𑀯𑀺𑀲𑁂𑀲𑀲𑀗𑁆𑀔𑀸𑀢𑀁 𑀇𑀤𑁆𑀥𑀺𑀁 𑀧𑀚𑁆𑀚𑀦𑁆𑀢𑀺 𑀧𑀸𑀧𑀼𑀡𑀦𑁆𑀢𑀺, 𑀢𑀲𑁆𑀫𑀸 𑀧𑀸𑀤𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑀸𑀳 𑁋 ‘‘𑀇𑀤𑁆𑀥𑀺𑀬𑀸 𑀧𑀸𑀤𑀁, 𑀇𑀤𑁆𑀥𑀺𑀪𑀽𑀢𑀁 𑀯𑀸 𑀧𑀸𑀤𑀁 𑀇𑀤𑁆𑀥𑀺𑀧𑀸𑀤’’𑀦𑁆𑀢𑀺.

𑀅𑀣 𑀯𑀸 𑀇𑀤𑁆𑀥𑀺𑀧𑀸𑀤𑀦𑁆𑀢𑀺 𑀦𑀺𑀧𑁆𑀨𑀢𑁆𑀢𑀺𑀧𑀭𑀺𑀬𑀸𑀬𑁂𑀦 𑀇𑀚𑁆𑀛𑀦𑀝𑁆𑀞𑁂𑀦, 𑀇𑀚𑁆𑀛𑀦𑁆𑀢𑀺 𑀏𑀢𑀸𑀬 𑀲𑀢𑁆𑀢𑀸 𑀇𑀤𑁆𑀥𑀸 𑀯𑀼𑀤𑁆𑀥𑀸 𑀉𑀓𑁆𑀓𑀁𑀲𑀕𑀢𑀸 𑀳𑁄𑀦𑁆𑀢𑀻𑀢𑀺 𑀇𑀫𑀺𑀦𑀸 𑀯𑀸 𑀧𑀭𑀺𑀬𑀸𑀬𑁂𑀦 𑀇𑀤𑁆𑀥𑀻𑀢𑀺 𑀲𑀗𑁆𑀔𑀁 𑀕𑀢𑀸𑀦𑀁 𑀉𑀧𑀘𑀸𑀭𑀚𑁆𑀛𑀸𑀦𑀸𑀤𑀺𑀓𑀼𑀲𑀮𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀙𑀦𑁆𑀤𑀲𑀫𑀸𑀥𑀺𑀧𑀥𑀸𑀦𑀲𑀗𑁆𑀔𑀸𑀭𑀸𑀦𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 𑀧𑀸𑀤𑀪𑀽𑀢𑀁 𑀲𑁂𑀲𑀘𑀺𑀢𑁆𑀢𑀘𑁂𑀢𑀲𑀺𑀓𑀭𑀸𑀲𑀺𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯 𑀇𑀤𑁆𑀥𑀺𑀧𑀸𑀤𑀯𑀺𑀪𑀗𑁆𑀕𑁂 (𑀯𑀺𑀪. 𑁪𑁩𑁪-𑁪𑁩𑁭) ‘‘𑀇𑀤𑁆𑀥𑀺𑀧𑀸𑀤𑁄𑀢𑀺 𑀢𑀣𑀸𑀪𑀽𑀢𑀲𑁆𑀲 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄’’𑀢𑀺 𑀯𑀼𑀢𑁆𑀢𑀁. 𑀲𑀸 𑀏𑀯 𑀘 𑀢𑀣𑀸𑀯𑀼𑀢𑁆𑀢𑀸 𑀇𑀤𑁆𑀥𑀺 𑀬𑀲𑁆𑀫𑀸 𑀳𑁂𑀝𑁆𑀞𑀺𑀫𑀸 𑀳𑁂𑀝𑁆𑀞𑀺𑀫𑀸 𑀉𑀧𑀭𑀺𑀫𑀸𑀬 𑀉𑀧𑀭𑀺𑀫𑀸𑀬 𑀢𑀬𑁄 𑀙𑀦𑁆𑀤𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀸 𑀧𑀸𑀤𑀪𑀽𑀢𑀸 𑀅𑀥𑀺𑀝𑁆𑀞𑀸𑀦𑀪𑀽𑀢𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀇𑀤𑁆𑀥𑀺𑀪𑀽𑀢𑀁 𑀯𑀸 𑀧𑀸𑀤’’𑀦𑁆𑀢𑀺. 𑀢𑀣𑀸 𑀳𑁂𑀝𑁆𑀞𑀸 𑀥𑀫𑁆𑀫𑀸 𑀇𑀤𑁆𑀥𑀺𑀧𑀺 𑀳𑁄𑀦𑁆𑀢𑀺 𑀇𑀤𑁆𑀥𑀺𑀧𑀸𑀤𑀸𑀧𑀺, 𑀲𑁂𑀲𑀸 𑀧𑀦 𑀲𑀫𑁆𑀧𑀬𑀼𑀢𑁆𑀢𑀓𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀇𑀤𑁆𑀥𑀺𑀧𑀸𑀤𑀸𑀬𑁂𑀯. 𑀯𑀻𑀭𑀺𑀬𑀘𑀺𑀢𑁆𑀢𑀯𑀻𑀫𑀁𑀲𑀸𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑀗𑁆𑀔𑀸𑀭𑀲𑀗𑁆𑀔𑀸𑀢𑀸𑀧𑀺 𑀢𑀬𑁄 𑀢𑀬𑁄 𑀥𑀫𑁆𑀫𑀸 𑀇𑀤𑁆𑀥𑀺𑀧𑀺 𑀳𑁄𑀦𑁆𑀢𑀺 𑀇𑀤𑁆𑀥𑀺𑀧𑀸𑀤𑀸𑀧𑀺, 𑀲𑁂𑀲𑀸 𑀧𑀦 𑀲𑀫𑁆𑀧𑀬𑀼𑀢𑁆𑀢𑀓𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀇𑀤𑁆𑀥𑀺𑀧𑀸𑀤𑀸𑀬𑁂𑀯.

𑀅𑀧𑀺𑀘 𑀧𑀼𑀩𑁆𑀩𑀪𑀸𑀕𑁄 𑀧𑀼𑀩𑁆𑀩𑀪𑀸𑀕𑁄 𑀇𑀤𑁆𑀥𑀺𑀧𑀸𑀤𑁄 𑀦𑀸𑀫, 𑀧𑀝𑀺𑀮𑀸𑀪𑁄 𑀧𑀝𑀺𑀮𑀸𑀪𑁄 𑀇𑀤𑁆𑀥𑀺 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀫𑀢𑁆𑀣𑁄 𑀉𑀧𑀘𑀸𑀭𑁂𑀦 𑀯𑀸 𑀯𑀺𑀧𑀲𑁆𑀲𑀦𑀸𑀬 𑀯𑀸 𑀤𑀻𑀧𑁂𑀢𑀩𑁆𑀩𑁄. 𑀧𑀞𑀫𑀚𑁆𑀛𑀸𑀦𑀧𑀭𑀺𑀓𑀫𑁆𑀫𑀜𑁆𑀳𑀺 𑀇𑀤𑁆𑀥𑀺𑀧𑀸𑀤𑁄 𑀦𑀸𑀫, 𑀧𑀞𑀫𑀚𑁆𑀛𑀸𑀦𑀁 𑀇𑀤𑁆𑀥𑀺 𑀦𑀸𑀫. 𑀤𑀼𑀢𑀺𑀬𑀛𑀸𑀦… 𑀢𑀢𑀺𑀬𑀛𑀸𑀦… 𑀘𑀢𑀼𑀢𑁆𑀣𑀛𑀸𑀦… 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦… 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦… 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦… 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀧𑀭𑀺𑀓𑀫𑁆𑀫𑀁 𑀇𑀤𑁆𑀥𑀺𑀧𑀸𑀤𑁄 𑀦𑀸𑀫, 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀇𑀤𑁆𑀥𑀺 𑀦𑀸𑀫. 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀸 𑀇𑀤𑁆𑀥𑀺𑀧𑀸𑀤𑁄 𑀦𑀸𑀫, 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄 𑀇𑀤𑁆𑀥𑀺 𑀦𑀸𑀫. 𑀲𑀓𑀤𑀸𑀕𑀸𑀫𑀺-𑀅𑀦𑀸𑀕𑀸𑀫𑀺-𑀅𑀭𑀳𑀢𑁆𑀢𑀫𑀕𑁆𑀕𑀲𑁆𑀲 𑀯𑀺𑀧𑀲𑁆𑀲𑀦𑀸 𑀇𑀤𑁆𑀥𑀺𑀧𑀸𑀤𑁄 𑀦𑀸𑀫, 𑀅𑀭𑀳𑀢𑁆𑀢𑀫𑀕𑁆𑀕𑁄 𑀇𑀤𑁆𑀥𑀺 𑀦𑀸𑀫. 𑀧𑀝𑀺𑀮𑀸𑀪𑁂𑀦𑀧𑀺 𑀤𑀻𑀧𑁂𑀢𑀼𑀁 𑀯𑀝𑁆𑀝𑀢𑀺𑀬𑁂𑀯. 𑀧𑀞𑀫𑀚𑁆𑀛𑀸𑀦𑀜𑁆𑀳𑀺 𑀇𑀤𑁆𑀥𑀺𑀧𑀸𑀤𑁄 𑀦𑀸𑀫, 𑀤𑀼𑀢𑀺𑀬𑀚𑁆𑀛𑀸𑀦𑀁 𑀇𑀤𑁆𑀥𑀺 𑀦𑀸𑀫. 𑀤𑀼𑀢𑀺𑀬𑀚𑁆𑀛𑀸𑀦𑀁 𑀇𑀤𑁆𑀥𑀺𑀧𑀸𑀤𑁄 𑀦𑀸𑀫, 𑀢𑀢𑀺𑀬𑀚𑁆𑀛𑀸𑀦𑀁 𑀇𑀤𑁆𑀥𑀺 𑀦𑀸𑀫…𑀧𑁂… 𑀅𑀦𑀸𑀕𑀸𑀫𑀺𑀫𑀕𑁆𑀕𑁄 𑀇𑀤𑁆𑀥𑀺𑀧𑀸𑀤𑁄 𑀦𑀸𑀫, 𑀅𑀭𑀳𑀢𑁆𑀢𑀫𑀕𑁆𑀕𑁄 𑀇𑀤𑁆𑀥𑀺 𑀦𑀸𑀫.

𑀲𑁂𑀲𑁂𑀲𑀼𑀧𑀻𑀢𑀺 𑀯𑀻𑀭𑀺𑀬𑀲𑀫𑀸𑀥𑀺𑀆𑀤𑀻𑀲𑀼𑀧𑀺. 𑀢𑀢𑁆𑀣 𑀳𑀺 𑀯𑀻𑀭𑀺𑀬𑀁, 𑀘𑀺𑀢𑁆𑀢𑀁, 𑀯𑀻𑀫𑀁𑀲𑀁 𑀅𑀥𑀺𑀧𑀢𑀺𑀁 𑀓𑀭𑀺𑀢𑁆𑀯𑀸 𑀧𑀝𑀺𑀮𑀤𑁆𑀥𑀲𑀫𑀸𑀥𑀺 𑀯𑀻𑀭𑀺𑀬𑀲𑀫𑀸𑀥𑀺, 𑀘𑀺𑀢𑁆𑀢𑀲𑀫𑀸𑀥𑀺, 𑀯𑀻𑀫𑀁𑀲𑀸𑀲𑀫𑀸𑀥𑀻𑀢𑀺 ¶ 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀙𑀦𑁆𑀤𑀸𑀤𑀻𑀲𑀼 𑀏𑀓𑀦𑁆𑀢𑀺 ¶ 𑀙𑀦𑁆𑀤𑀸𑀤𑀻𑀲𑀼 𑀘𑀢𑀽𑀲𑀼 𑀆𑀤𑀺𑀢𑁄 𑀯𑀼𑀢𑁆𑀢𑀢𑁆𑀢𑀸 𑀆𑀤𑀺𑀪𑀽𑀢𑀁 𑀏𑀓𑀁 𑀧𑀥𑀸𑀦𑀁 𑀙𑀦𑁆𑀤𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯𑀸𑀳 𑁋 ‘‘𑀢𑀤𑀸𑀲𑁆𑀲 𑀧𑀞𑀫𑀺𑀤𑁆𑀥𑀺𑀧𑀸𑀤𑁄’’𑀢𑀺. 𑀏𑀯𑀁 𑀲𑁂𑀲𑀸𑀧𑀻𑀢𑀺 𑀏𑀢𑁂𑀦 𑀯𑀻𑀭𑀺𑀬𑀁 𑀘𑀺𑀢𑁆𑀢𑀁 𑀯𑀻𑀫𑀁𑀲𑀁 𑀦𑀺𑀲𑁆𑀲𑀸𑀬 𑀯𑀺𑀧𑀲𑁆𑀲𑀦𑀁 𑀯𑀟𑁆𑀠𑁂𑀢𑁆𑀯𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀦𑁆𑀢𑀸𑀦𑀁 𑀯𑀲𑁂𑀦 𑀤𑀼𑀢𑀺𑀬𑀯𑀻𑀭𑀺𑀬𑀺𑀤𑁆𑀥𑀺𑀧𑀸𑀤𑀸𑀤𑀬𑁄 𑀬𑁄𑀚𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀢𑀺. 𑀇𑀫𑀺𑀦𑀸 𑀳𑀺 𑀲𑀼𑀢𑁆𑀢𑀦𑁆𑀢𑁂𑀦 𑀘𑀢𑀼𑀦𑁆𑀦𑀁 𑀪𑀺𑀓𑁆𑀔𑀽𑀦𑀁 𑀫𑀢𑁆𑀣𑀓𑀧𑁆𑀧𑀢𑁆𑀢𑀁 𑀓𑀫𑁆𑀫𑀝𑁆𑀞𑀸𑀦𑀁 𑀤𑀲𑁆𑀲𑀺𑀢𑀁. 𑀏𑀓𑁄 𑀳𑀺 𑀪𑀺𑀓𑁆𑀔𑀼 𑀙𑀦𑁆𑀤𑀁 𑀅𑀯𑀲𑁆𑀲𑀬𑀢𑀺, 𑀓𑀢𑁆𑀢𑀼𑀓𑀫𑁆𑀬𑀢𑀸𑀓𑀼𑀲𑀮𑀥𑀫𑁆𑀫𑀘𑁆𑀙𑀦𑁆𑀤𑁂𑀦 𑀅𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀬𑀁 𑀲𑀢𑀺 ‘‘𑀅𑀳𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀺, 𑀦𑀢𑁆𑀣𑀺 𑀫𑀬𑁆𑀳𑀁 𑀏𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑁂 𑀪𑀸𑀭𑁄’’𑀢𑀺 𑀙𑀦𑁆𑀤𑀁 𑀚𑁂𑀝𑁆𑀞𑀓𑀁 𑀙𑀦𑁆𑀤𑀁 𑀥𑀼𑀭𑀁 𑀙𑀦𑁆𑀤𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀏𑀓𑁄 𑀯𑀻𑀭𑀺𑀬𑀁 𑀅𑀯𑀲𑁆𑀲𑀬𑀢𑀺, 𑀏𑀓𑁄 𑀘𑀺𑀢𑁆𑀢𑀁, 𑀏𑀓𑁄 𑀧𑀜𑁆𑀜𑀁 𑀅𑀯𑀲𑁆𑀲𑀬𑀢𑀺, 𑀧𑀜𑁆𑀜𑀸𑀬 𑀅𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀬𑀁 𑀲𑀢𑀺 ‘‘𑀅𑀳𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀺, 𑀦𑀢𑁆𑀣𑀺 𑀫𑀬𑁆𑀳𑀁 𑀏𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑁂 𑀪𑀸𑀭𑁄’’𑀢𑀺 𑀧𑀜𑁆𑀜𑀁 𑀚𑁂𑀝𑁆𑀞𑀓𑀁 𑀧𑀜𑁆𑀜𑀁 𑀥𑀼𑀭𑀁 𑀧𑀜𑁆𑀜𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀢𑀺.

𑀓𑀣𑀁? 𑀬𑀣𑀸 𑀳𑀺 𑀘𑀢𑀽𑀲𑀼 𑀅𑀫𑀘𑁆𑀘𑀧𑀼𑀢𑁆𑀢𑁂𑀲𑀼 𑀞𑀸𑀦𑀦𑁆𑀢𑀭𑀁 𑀧𑀢𑁆𑀣𑁂𑀢𑁆𑀯𑀸 𑀯𑀺𑀘𑀭𑀦𑁆𑀢𑁂𑀲𑀼 𑀏𑀓𑁄 𑀉𑀧𑀝𑁆𑀞𑀸𑀦𑀁 𑀅𑀯𑀲𑁆𑀲𑀬𑀢𑀺, 𑀏𑀓𑁄 𑀲𑀽𑀭𑀪𑀸𑀯𑀁, 𑀏𑀓𑁄 𑀚𑀸𑀢𑀺𑀁, 𑀏𑀓𑁄 𑀫𑀦𑁆𑀢𑀁. 𑀓𑀣𑀁? 𑀢𑁂𑀲𑀼 𑀳𑀺 𑀧𑀞𑀫𑁄 𑀉𑀧𑀝𑁆𑀞𑀸𑀦𑁂 𑀅𑀧𑁆𑀧𑀫𑀸𑀤𑀓𑀸𑀭𑀺𑀢𑀸𑀬 𑀅𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀬𑀸 𑀲𑀢𑀺 𑀮𑀩𑁆𑀪𑀫𑀸𑀦𑀁 ‘‘𑀮𑀘𑁆𑀙𑀸𑀫𑁂𑀢𑀁 𑀞𑀸𑀦𑀦𑁆𑀢𑀭’’𑀦𑁆𑀢𑀺 𑀉𑀧𑀝𑁆𑀞𑀸𑀦𑀁 𑀅𑀯𑀲𑁆𑀲𑀬𑀢𑀺. 𑀤𑀼𑀢𑀺𑀬𑁄 𑀉𑀧𑀝𑁆𑀞𑀸𑀦𑁂 𑀅𑀧𑁆𑀧𑀫𑀢𑁆𑀢𑁄𑀧𑀺 ‘‘𑀏𑀓𑀘𑁆𑀘𑁄 𑀲𑀗𑁆𑀕𑀸𑀫𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂 𑀲𑀡𑁆𑀞𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺, 𑀅𑀯𑀲𑁆𑀲𑀁 𑀧𑀦 𑀭𑀜𑁆𑀜𑁄 𑀧𑀘𑁆𑀘𑀦𑁆𑀢𑁄 𑀓𑀼𑀧𑁆𑀧𑀺𑀲𑁆𑀲𑀢𑀺, 𑀢𑀲𑁆𑀫𑀺𑀁 𑀓𑀼𑀧𑁆𑀧𑀺𑀢𑁂 𑀭𑀣𑀲𑁆𑀲 𑀧𑀼𑀭𑀢𑁄 𑀓𑀫𑁆𑀫𑀁 𑀓𑀢𑁆𑀯𑀸 𑀭𑀸𑀚𑀸𑀦𑀁 𑀆𑀭𑀸𑀥𑁂𑀢𑁆𑀯𑀸 𑀆𑀳𑀭𑀸𑀧𑁂𑀲𑁆𑀲𑀸𑀫𑁂𑀢𑀁 𑀞𑀸𑀦𑀦𑁆𑀢𑀭’’𑀦𑁆𑀢𑀺 𑀲𑀽𑀭𑀪𑀸𑀯𑀁 𑀅𑀯𑀲𑁆𑀲𑀬𑀢𑀺. 𑀢𑀢𑀺𑀬𑁄 ‘‘𑀲𑀽𑀭𑀪𑀸𑀯𑁂𑀧𑀺 𑀲𑀢𑀺 𑀏𑀓𑀘𑁆𑀘𑁄 𑀳𑀻𑀦𑀚𑀸𑀢𑀺𑀓𑁄 𑀳𑁄𑀢𑀺, 𑀚𑀸𑀢𑀺𑀁 𑀲𑁄𑀥𑁂𑀢𑁆𑀯𑀸 𑀞𑀸𑀦𑀦𑁆𑀢𑀭𑀁 𑀤𑁂𑀦𑁆𑀢𑁄 𑀫𑀬𑁆𑀳𑀁 𑀤𑀲𑁆𑀲𑀢𑀻’’𑀢𑀺 𑀚𑀸𑀢𑀺𑀁 𑀅𑀯𑀲𑁆𑀲𑀬𑀢𑀺. 𑀘𑀢𑀼𑀢𑁆𑀣𑁄 ‘‘𑀚𑀸𑀢𑀺𑀫𑀸𑀧𑀺 𑀏𑀓𑁄 𑀅𑀫𑀦𑁆𑀢𑀦𑀻𑀬𑁄 𑀳𑁄𑀢𑀺, 𑀫𑀦𑁆𑀢𑁂𑀦 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑁂 𑀉𑀧𑁆𑀧𑀦𑁆𑀦𑁂 𑀆𑀳𑀭𑀸𑀧𑁂𑀲𑁆𑀲𑀸𑀫𑁂𑀢𑀁 𑀞𑀸𑀦𑀦𑁆𑀢𑀭’’𑀦𑁆𑀢𑀺 𑀫𑀦𑁆𑀢𑀁 𑀅𑀯𑀲𑁆𑀲𑀬𑀢𑀺. 𑀢𑁂 𑀲𑀩𑁆𑀩𑁂𑀧𑀺 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀯𑀲𑁆𑀲𑀬𑀩𑀮𑁂𑀦 𑀞𑀸𑀦𑀦𑁆𑀢𑀭𑀸𑀦𑀺 𑀧𑀸𑀧𑀼𑀡𑀺𑀁𑀲𑀼.

𑀢𑀢𑁆𑀣 𑀉𑀧𑀝𑁆𑀞𑀸𑀦𑁂 𑀅𑀧𑁆𑀧𑀫𑀢𑁆𑀢𑁄 𑀳𑀼𑀢𑁆𑀯𑀸 𑀞𑀸𑀦𑀦𑁆𑀢𑀭𑀁 𑀧𑀢𑁆𑀢𑁄 𑀯𑀺𑀬 𑀙𑀦𑁆𑀤𑀁 𑀅𑀯𑀲𑁆𑀲𑀸𑀬 𑀓𑀢𑁆𑀢𑀼𑀓𑀫𑁆𑀬𑀢𑀸𑀓𑀼𑀲𑀮𑀥𑀫𑁆𑀫𑀘𑁆𑀙𑀦𑁆𑀤𑁂𑀦 ‘‘𑀅𑀢𑁆𑀣𑀦𑀺𑀧𑁆𑀨𑀢𑁆𑀢𑀺𑀬𑀁 𑀲𑀢𑀺 𑀅𑀳𑀁 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑁆𑀲𑀸𑀫𑀺, 𑀦𑀢𑁆𑀣𑀺 𑀫𑀬𑁆𑀳𑀁 𑀏𑀢𑀲𑁆𑀲 𑀦𑀺𑀩𑁆𑀩𑀢𑁆𑀢𑀦𑁂 𑀲𑀸𑀭𑁄’’𑀢𑀺 𑀙𑀦𑁆𑀤𑀁 𑀚𑁂𑀝𑁆𑀞𑀓𑀁 𑀙𑀦𑁆𑀤𑀁 𑀥𑀼𑀭𑀁 𑀙𑀦𑁆𑀤𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁄 ¶ 𑀤𑀝𑁆𑀞𑀩𑁆𑀩𑁄 ¶ 𑀭𑀝𑁆𑀞𑀧𑀸𑀮𑀢𑁆𑀣𑁂𑀭𑁄 (𑀫. 𑀦𑀺. 𑁨.𑁨𑁯𑁩 𑀆𑀤𑀬𑁄) 𑀯𑀺𑀬. 𑀲𑁄 𑀳𑀺 𑀆𑀬𑀲𑁆𑀫𑀸 ‘‘𑀙𑀦𑁆𑀤𑁂 𑀲𑀢𑀺 𑀓𑀣𑀁 𑀦𑀸𑀦𑀼𑀚𑀸𑀦𑀺𑀲𑁆𑀲𑀦𑁆𑀢𑀻’’𑀢𑀺 𑀲𑀢𑁆𑀢𑀸𑀳𑀫𑁆𑀧𑀺 𑀪𑀢𑁆𑀢𑀸𑀦𑀺 𑀅𑀪𑀼𑀜𑁆𑀚𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀭𑁄 𑀅𑀦𑀼𑀚𑀸𑀦𑀸𑀧𑁂𑀢𑁆𑀯𑀸 𑀧𑀩𑁆𑀩𑀚𑀺𑀢𑁆𑀯𑀸 𑀙𑀦𑁆𑀤𑀫𑁂𑀯 𑀅𑀯𑀲𑁆𑀲𑀸𑀬 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀲𑀽𑀭𑀪𑀸𑀯𑁂𑀦 𑀭𑀸𑀚𑀸𑀦𑀁 𑀆𑀭𑀸𑀥𑁂𑀢𑁆𑀯𑀸 𑀞𑀸𑀦𑀦𑁆𑀢𑀭𑀁 𑀧𑀢𑁆𑀢𑁄 𑀯𑀺𑀬 𑀯𑀻𑀭𑀺𑀬𑀁 𑀚𑁂𑀝𑁆𑀞𑀓𑀁 𑀯𑀻𑀭𑀺𑀬𑀁 𑀥𑀼𑀭𑀁 𑀯𑀻𑀭𑀺𑀬𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁄 𑀤𑀝𑁆𑀞𑀩𑁆𑀩𑁄 𑀲𑁄𑀡𑀢𑁆𑀣𑁂𑀭𑁄 (𑀫𑀳𑀸𑀯. 𑁨𑁪𑁩 𑀆𑀤𑀬𑁄) 𑀯𑀺𑀬. 𑀲𑁄 𑀳𑀺 𑀆𑀬𑀲𑁆𑀫𑀸 𑀯𑀻𑀭𑀺𑀬𑀁 𑀥𑀼𑀭𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑀺.

𑀚𑀸𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀞𑀸𑀦𑀦𑁆𑀢𑀭𑀁 𑀧𑀢𑁆𑀢𑁄𑀯𑀺𑀬 𑀘𑀺𑀢𑁆𑀢𑀁 𑀚𑁂𑀝𑁆𑀞𑀓𑀁 𑀘𑀺𑀢𑁆𑀢𑀁 𑀥𑀼𑀭𑀁 𑀘𑀺𑀢𑁆𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁄 𑀤𑀝𑁆𑀞𑀩𑁆𑀩𑁄 𑀲𑀫𑁆𑀪𑀽𑀢𑀢𑁆𑀣𑁂𑀭𑁄 (𑀣𑁂𑀭𑀕𑀸. 𑀅𑀝𑁆𑀞. 𑁨 𑀲𑀫𑁆𑀪𑀽𑀢𑀢𑁆𑀣𑁂𑀭𑀕𑀸𑀣𑀸𑀯𑀡𑁆𑀡𑀦𑀸) 𑀯𑀺𑀬. 𑀲𑁄 𑀳𑀺 𑀆𑀬𑀲𑁆𑀫𑀸 𑀘𑀺𑀢𑁆𑀢𑀁 𑀚𑁂𑀝𑁆𑀞𑀓𑀁 𑀘𑀺𑀢𑁆𑀢𑀁 𑀥𑀼𑀭𑀁 𑀘𑀺𑀢𑁆𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀫𑀦𑁆𑀢𑀁 𑀅𑀯𑀲𑁆𑀲𑀸𑀬 𑀞𑀸𑀦𑀦𑁆𑀢𑀭𑀁 𑀧𑀢𑁆𑀢𑁄 𑀯𑀺𑀬 𑀯𑀻𑀫𑀁𑀲𑀁 𑀚𑁂𑀝𑁆𑀞𑀓𑀁 𑀯𑀻𑀫𑀁𑀲𑀁 𑀥𑀼𑀭𑀁 𑀯𑀻𑀫𑀁𑀲𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀦𑀺𑀩𑁆𑀩𑀢𑁆𑀢𑀓𑁄 𑀤𑀝𑁆𑀞𑀩𑁆𑀩𑁄 𑀣𑁂𑀭𑁄 𑀫𑁄𑀖𑀭𑀸𑀚𑀸 (𑀲𑀼. 𑀦𑀺. 𑁧𑁧𑁨𑁨 𑀆𑀤𑀬𑁄; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑁮𑁫) 𑀯𑀺𑀬. 𑀲𑁄 𑀳𑀺 𑀆𑀬𑀲𑁆𑀫𑀸 𑀯𑀻𑀫𑀁𑀲𑀁 𑀚𑁂𑀝𑁆𑀞𑀓𑀁 𑀯𑀻𑀫𑀁𑀲𑀁 𑀥𑀼𑀭𑀁 𑀯𑀻𑀫𑀁𑀲𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀁 𑀦𑀺𑀩𑁆𑀩𑀢𑁆𑀢𑁂𑀲𑀺. 𑀢𑀲𑁆𑀲 𑀳𑀺 𑀪𑀕𑀯𑀸 ‘‘𑀲𑀼𑀜𑁆𑀜𑀢𑁄 𑀮𑁄𑀓𑀁 𑀅𑀯𑁂𑀓𑁆𑀔𑀲𑁆𑀲𑀽’’𑀢𑀺 (𑀲𑀼. 𑀦𑀺. 𑁧𑁧𑁨𑁫; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲𑁄 𑁮𑁮) 𑀲𑀼𑀜𑁆𑀜𑀢𑀸𑀓𑀣𑀁 𑀓𑀣𑁂𑀲𑀺. 𑀧𑀜𑁆𑀜𑀸𑀦𑀺𑀲𑁆𑀲𑀺𑀢𑀫𑀸𑀦𑀦𑀺𑀕𑁆𑀕𑀳𑀢𑁆𑀣𑀜𑁆𑀘 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀼𑀘𑁆𑀙𑀺𑀢𑁄 𑀧𑀜𑁆𑀳𑀁 𑀦 𑀓𑀣𑁂𑀲𑀺. 𑀏𑀢𑁆𑀣 𑀘 𑀧𑀼𑀦𑀧𑁆𑀧𑀼𑀦𑀁 𑀙𑀦𑁆𑀤𑀼𑀧𑁆𑀧𑀸𑀤𑀦𑀁 𑀢𑁄𑀲𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀙𑀦𑁆𑀤𑀲𑁆𑀲 𑀉𑀧𑀝𑁆𑀞𑀸𑀦𑀲𑀤𑀺𑀲𑀢𑀸 𑀯𑀼𑀢𑁆𑀢𑀸, 𑀣𑀸𑀫𑀪𑀸𑀯𑀢𑁄 𑀯𑀻𑀭𑀺𑀬𑀲𑁆𑀲 𑀲𑀽𑀭𑀢𑁆𑀢𑀲𑀤𑀺𑀲𑀢𑀸, ‘‘𑀙𑀤𑁆𑀯𑀸𑀭𑀸𑀥𑀺𑀧𑀢𑀺 𑀭𑀸𑀚𑀸’’𑀢𑀺 (𑀥. 𑀧. 𑀅𑀝𑁆𑀞. 𑁨.𑀏𑀭𑀓𑀧𑀢𑁆𑀢𑀦𑀸𑀕𑀭𑀸𑀚𑀯𑀢𑁆𑀣𑀼) 𑀯𑀘𑀦𑀢𑁄 𑀧𑀼𑀩𑁆𑀩𑀗𑁆𑀕𑀫𑀢𑀸 𑀘𑀺𑀢𑁆𑀢𑀲𑁆𑀲 𑀯𑀺𑀲𑀺𑀝𑁆𑀞𑀚𑀸𑀢𑀺𑀲𑀤𑀺𑀲𑀢𑀸.

𑁪𑁦𑁨-𑁪𑁦𑁬. 𑀅𑀢𑁆𑀢𑀦𑁄 𑀲𑀤𑁆𑀥𑀸𑀥𑀼𑀭𑁂𑀢𑀺 𑀅𑀢𑁆𑀢𑀦𑁄 𑀲𑀤𑁆𑀥𑀸𑀓𑀺𑀘𑁆𑀘𑁂 𑀲𑀤𑁆𑀤𑀳𑀦𑀓𑀺𑀭𑀺𑀬𑀸𑀬. 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀻𑀢𑀺 𑀅𑀦𑀼𑀯𑀢𑁆𑀢𑀦𑀯𑀲𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀢𑀺, 𑀢𑀲𑁆𑀫𑀸 𑀆𑀥𑀺𑀧𑀢𑁂𑀬𑁆𑀬𑀝𑁆𑀞𑁂𑀦 𑀲𑀤𑁆𑀥𑀸 𑀏𑀯 𑀇𑀦𑁆𑀤𑁆𑀭𑀺𑀬𑀦𑁆𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁. 𑀢𑀣𑀸 𑀯𑀻𑀭𑀺𑀬𑀸𑀤𑀻𑀦𑀁 𑀲𑀓𑀲𑀓𑀓𑀺𑀘𑁆𑀘𑁂𑀲𑀽𑀢𑀺 𑀆𑀳 𑁋 ‘‘𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀸𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄’’𑀢𑀺. 𑀯𑀺𑀲𑁄𑀥𑁂𑀦𑁆𑀢𑁄𑀢𑀺 𑀯𑀺𑀧𑀓𑁆𑀔𑀯𑀺𑀯𑀚𑁆𑀚𑀦𑀲𑀧𑀓𑁆𑀔𑀦𑀺𑀲𑁂𑀯𑀦𑀲𑀭𑀺𑀓𑁆𑀔𑀽𑀧𑀦𑀺𑀲𑁆𑀲𑀬𑀲𑀗𑁆𑀕𑀡𑁆𑀳𑀦𑀮𑀓𑁆𑀔𑀡𑁂𑀳𑀺 𑀢𑀻𑀳𑀺 𑀓𑀸𑀭𑀡𑁂𑀳𑀺 𑀯𑀺𑀲𑁄𑀥𑀦𑀯𑀲𑁂𑀦 𑀲𑁄𑀥𑁂𑀦𑁆𑀢𑁄.

𑀅𑀲𑁆𑀲𑀤𑁆𑀥𑁂 𑀧𑀼𑀕𑁆𑀕𑀮𑁂 𑀧𑀭𑀺𑀯𑀚𑁆𑀚𑀬𑀢𑁄𑀢𑀺 𑀩𑀼𑀤𑁆𑀥𑀸𑀤𑀻𑀲𑀼 𑀧𑀲𑀸𑀤𑀲𑀺𑀦𑁂𑀳𑀸𑀪𑀸𑀯𑁂𑀦 𑀲𑀤𑁆𑀥𑀸𑀭𑀳𑀺𑀢𑁂 𑀮𑀽𑀔𑀧𑀼𑀕𑁆𑀕𑀮𑁂 𑀲𑀩𑁆𑀩𑀲𑁄 𑀯𑀚𑁆𑀚𑀬𑀢𑁄. 𑀲𑀤𑁆𑀥𑁂 𑀧𑀼𑀕𑁆𑀕𑀮𑁂 𑀲𑁂𑀯𑀢𑁄𑀢𑀺 ¶ 𑀩𑀼𑀤𑁆𑀥𑀸𑀤𑀻𑀲𑀼 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑁂 𑀯𑀓𑁆𑀓𑀮𑀺𑀢𑁆𑀣𑁂𑀭𑀲𑀤𑀺𑀲𑁂 𑀲𑁂𑀯𑀢𑁄. 𑀧𑀲𑀸𑀤𑀦𑀻𑀬𑁂𑀢𑀺 𑀧𑀲𑀸𑀤𑀸𑀯𑀳𑁂 𑀲𑀫𑁆𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀸𑀤𑀺𑀓𑁂 (𑀤𑀻. 𑀦𑀺. 𑁩.𑁧𑁪𑁧 𑀆𑀤𑀬𑁄). 𑀧𑀘𑁆𑀘𑀯𑁂𑀓𑁆𑀔𑀢𑁄𑀢𑀺 𑀧𑀸𑀴𑀺𑀢𑁄 𑀅𑀢𑁆𑀣𑀢𑁄 𑀘 𑀧𑀢𑀺 𑀧𑀢𑀺 𑀅𑀯𑁂𑀓𑁆𑀔𑀦𑁆𑀢𑀲𑁆𑀲 𑀘𑀺𑀦𑁆𑀢𑁂𑀦𑁆𑀢𑀲𑁆𑀲. 𑀯𑀺𑀲𑀼𑀚𑁆𑀛𑀢𑀻𑀢𑀺 𑀧𑀝𑀺𑀧𑀓𑁆𑀔𑀫𑀮𑀯𑀺𑀕𑀫𑀢𑁄 𑀧𑀘𑁆𑀘𑀬𑀯𑀲𑁂𑀦 𑀲𑀪𑀸𑀯𑀲𑀁𑀲𑀼𑀤𑁆𑀥𑀺𑀢𑁄 𑀯𑀺𑀲𑀼𑀤𑁆𑀥𑀨𑀮𑀦𑀺𑀩𑁆𑀩𑀢𑁆𑀢𑀺𑀢𑁄 𑀘 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀯𑀺𑀲𑀼𑀚𑁆𑀛𑀢𑀺. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀲𑀫𑁆𑀫𑀧𑁆𑀧𑀥𑀸𑀦𑁂𑀢𑀺 𑀲𑀫𑁆𑀫𑀧𑁆𑀧𑀥𑀸𑀦𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁂 (𑀲𑀁. 𑀦𑀺. 𑁫.𑁬𑁫𑁧-𑁬𑁬𑁨 𑀆𑀤𑀬𑁄) 𑀲𑀼𑀢𑁆𑀢𑀦𑁆𑀢𑁂. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀛𑀸𑀦𑀯𑀺𑀫𑁄𑀓𑁆𑀔𑁂𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀺𑀚𑁆𑀛𑀸𑀦𑀸𑀦𑀺 ¶ 𑀘𑁂𑀯 𑀧𑀞𑀫𑀯𑀺𑀫𑁄𑀓𑁆𑀔𑀸𑀤𑀺𑀯𑀺𑀫𑁄𑀓𑁆𑀔𑁂 𑀘. 𑀓𑀸𑀫𑀜𑁆𑀘𑁂𑀢𑁆𑀣 𑀛𑀸𑀦𑀸𑀦𑀺𑀬𑁂𑀯 𑀯𑀺𑀫𑁄𑀓𑁆𑀔𑀸, 𑀧𑀯𑀢𑁆𑀢𑀺𑀆𑀓𑀸𑀭𑀯𑀲𑁂𑀦 𑀧𑀦 𑀯𑀺𑀲𑀼𑀁 𑀕𑀳𑀡𑀁.

𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀦𑁆𑀢𑀺 𑀕𑀫𑁆𑀪𑀻𑀭𑀸𑀦𑀁 𑀜𑀸𑀡𑀸𑀦𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀁. 𑀢𑁂𑀦𑀸𑀳 𑁋 ‘‘𑀲𑀡𑁆𑀳𑀲𑀼𑀔𑀼𑀫’’𑀦𑁆𑀢𑀺𑀆𑀤𑀺. 𑀔𑀦𑁆𑀥𑀦𑁆𑀢𑀭𑀦𑁆𑀢𑀺 𑀲𑀪𑀸𑀯𑀚𑀸𑀢𑀺𑀪𑀽𑀫𑀺𑀆𑀤𑀺𑀯𑀲𑁂𑀦 𑀔𑀦𑁆𑀥𑀸𑀦𑀁 𑀦𑀸𑀦𑀢𑁆𑀢𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀅𑀓𑀢𑀸𑀪𑀺𑀦𑀺𑀯𑁂𑀲𑁄𑀢𑀺 𑀧𑀼𑀩𑁆𑀩𑁂 𑀅𑀓𑀢𑀪𑀸𑀯𑀦𑀸𑀪𑀺𑀦𑀺𑀯𑁂𑀲𑁄. 𑀲𑀤𑁆𑀥𑀸𑀥𑀼𑀭𑀸𑀤𑀻𑀲𑀽𑀢𑀺 𑀲𑀤𑁆𑀥𑀸𑀥𑀼𑀭𑁂 𑀧𑀜𑁆𑀜𑀸𑀥𑀼𑀭𑁂 𑀘. 𑀅𑀯𑀲𑀸𑀦𑁂𑀢𑀺 𑀪𑀸𑀯𑀦𑀸𑀧𑀭𑀺𑀬𑁄𑀲𑀸𑀦𑁂. 𑀯𑀺𑀯𑀝𑁆𑀝𑁂𑀢𑁆𑀯𑀸𑀢𑀺 𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑀢𑁄 𑀯𑀺𑀯𑀝𑁆𑀝𑁂𑀢𑁆𑀯𑀸 𑀦𑀺𑀩𑁆𑀩𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸. 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀻𑀢𑀺 𑀫𑀕𑁆𑀕𑀧𑀭𑀫𑁆𑀧𑀭𑀸𑀬 𑀅𑀭𑀳𑀢𑁆𑀢𑀁 𑀕𑀡𑁆𑀳𑀸𑀢𑀺. 𑀅𑀓𑀫𑁆𑀧𑀺𑀬𑀝𑁆𑀞𑁂𑀦𑀸𑀢𑀺 𑀧𑀝𑀺𑀧𑀓𑁆𑀔𑁂𑀳𑀺 𑀅𑀓𑀫𑁆𑀧𑀺𑀬𑀪𑀸𑀯𑁂𑀦. 𑀏𑀢𑁂𑀦𑁂𑀯𑀲𑁆𑀲 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀣𑀺𑀭𑀪𑀸𑀯𑁄𑀧𑀺 𑀯𑀺𑀪𑀸𑀯𑀺𑀢𑁄 𑀤𑀝𑁆𑀞𑀩𑁆𑀩𑁄. 𑀦 𑀳𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀣𑀺𑀭𑀪𑀸𑀯𑁂𑀦 𑀯𑀺𑀦𑀸 𑀧𑀝𑀺𑀧𑀓𑁆𑀔𑁂𑀳𑀺 𑀅𑀓𑀫𑁆𑀧𑀺𑀬𑀢𑀸 𑀲𑀫𑁆𑀪𑀯𑀢𑀺. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂𑀲𑀼 𑀣𑀺𑀭𑀪𑀸𑀯𑁂𑀦𑁂𑀯 𑀳𑀺 𑀅𑀓𑀼𑀲𑀮𑀸𑀦𑀁 𑀅𑀩𑁆𑀬𑀸𑀓𑀢𑀸𑀦𑀜𑁆𑀘 𑀦𑁂𑀲𑀁 𑀩𑀮𑀯𑀪𑀸𑀯𑀽𑀧𑀧𑀢𑁆𑀢𑀺. 𑀅𑀲𑁆𑀲𑀤𑁆𑀥𑀺𑀬𑁂𑀢𑀺 𑀅𑀲𑁆𑀲𑀤𑁆𑀥𑀺𑀬𑀳𑁂𑀢𑀼. 𑀦𑀺𑀫𑀺𑀢𑁆𑀢𑀢𑁆𑀣𑁂 𑀳𑁂𑀢𑀁 𑀪𑀼𑀫𑁆𑀫𑀯𑀘𑀦𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺.

𑁪𑁧𑁮. 𑀆𑀤𑀺𑀧𑀤𑀸𑀦𑀦𑁆𑀢𑀺 𑀲𑀢𑀺𑀆𑀤𑀺𑀧𑀤𑀸𑀦𑀁. 𑀲𑀭𑀡𑀝𑁆𑀞𑁂𑀦𑀸𑀢𑀺 𑀘𑀺𑀭𑀓𑀢𑀘𑀺𑀭𑀪𑀸𑀲𑀺𑀢𑀸𑀦𑀁 𑀅𑀦𑀼𑀲𑁆𑀲𑀭𑀡𑀝𑁆𑀞𑁂𑀦. 𑀉𑀧𑀝𑁆𑀞𑀸𑀦𑀮𑀓𑁆𑀔𑀡𑀸𑀢𑀺 𑀓𑀸𑀬𑀸𑀤𑀻𑀲𑀼 𑀅𑀲𑀼𑀪𑀸𑀓𑀸𑀭𑀸𑀤𑀺𑀲𑀮𑁆𑀮𑀓𑁆𑀔𑀡𑀫𑀼𑀔𑁂𑀦 𑀢𑀢𑁆𑀣 𑀉𑀧𑀢𑀺𑀝𑁆𑀞𑀦𑀲𑀪𑀸𑀯𑀸. 𑀉𑀧𑀢𑀺𑀝𑁆𑀞𑀦𑀜𑁆𑀘 𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀞𑀸𑀦𑀁, 𑀅𑀯𑀺𑀲𑁆𑀲𑀚𑁆𑀚𑀦𑀁 𑀯𑀸 𑀆𑀭𑀫𑁆𑀫𑀡𑀲𑁆𑀲. 𑀅𑀧𑀺𑀮𑀸𑀧𑀦𑀮𑀓𑁆𑀔𑀡𑀸𑀢𑀺 𑀅𑀲𑀫𑁆𑀫𑀼𑀲𑁆𑀲𑀦𑀲𑀪𑀸𑀯𑀸, 𑀉𑀤𑀓𑁂 𑀅𑀮𑀸𑀩𑀼 𑀯𑀺𑀬 𑀆𑀭𑀫𑁆𑀫𑀡𑁂 𑀧𑁆𑀮𑀯𑀺𑀢𑁆𑀯𑀸 𑀕𑀦𑁆𑀢𑀼𑀁 𑀅𑀧𑁆𑀧𑀤𑀸𑀦𑀁, 𑀧𑀸𑀲𑀸𑀡𑀲𑁆𑀲 𑀯𑀺𑀬 𑀦𑀺𑀘𑁆𑀘𑀮𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀞𑀧𑀦𑀁 𑀲𑀸𑀭𑀡𑀁 𑀅𑀲𑀫𑁆𑀫𑀼𑀝𑁆𑀞𑀓𑀭𑀡𑀁 𑀅𑀧𑀺𑀮𑀸𑀧𑀦𑀁. 𑀲𑀸𑀧𑀢𑁂𑀬𑁆𑀬𑀦𑁆𑀢𑀺 𑀲𑀦𑁆𑀢𑀓𑀁. 𑀅𑀧𑀺𑀮𑀸𑀧𑀦𑀁 𑀅𑀲𑀫𑁆𑀫𑀼𑀝𑁆𑀞𑀁 𑀓𑀭𑁄𑀢𑀺 𑀅𑀧𑀺𑀮𑀸𑀧𑁂𑀢𑀺, 𑀲𑀸𑀬𑀁 𑀧𑀸𑀢𑀜𑁆𑀘 𑀭𑀸𑀚𑀸𑀦𑀁 𑀇𑀲𑁆𑀲𑀭𑀺𑀬𑀲𑀫𑁆𑀧𑀢𑁆𑀢𑀺𑀁 𑀲𑀮𑁆𑀮𑀓𑁆𑀔𑀸𑀧𑁂𑀢𑀺 𑀲𑀸𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀓𑀡𑁆𑀳𑀲𑀼𑀓𑁆𑀓𑀲𑀧𑁆𑀧𑀝𑀺𑀪𑀸𑀕𑁂 𑀥𑀫𑁆𑀫𑁂𑀢𑀺 𑀓𑀡𑁆𑀳𑀲𑀼𑀓𑁆𑀓𑀲𑀗𑁆𑀔𑀸𑀢𑁂 𑀲𑀧𑁆𑀧𑀝𑀺𑀪𑀸𑀕𑁂 𑀥𑀫𑁆𑀫𑁂. 𑀓𑀡𑁆𑀳𑁄 𑀳𑀺 𑀥𑀫𑁆𑀫𑁄 𑀲𑀼𑀓𑁆𑀓𑁂𑀦, 𑀲𑀼𑀓𑁆𑀓𑁄 ¶ 𑀘 𑀓𑀡𑁆𑀳𑁂𑀦 𑀲𑀧𑁆𑀧𑀝𑀺𑀪𑀸𑀕𑁄. 𑀯𑀺𑀢𑁆𑀣𑀸𑀭-𑀲𑀤𑁆𑀤𑁄 𑀆𑀤𑀺𑀲𑀤𑁆𑀤𑀢𑁆𑀣𑁄. 𑀢𑁂𑀦 ‘‘𑀇𑀫𑁂 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀲𑀫𑁆𑀫𑀧𑁆𑀧𑀥𑀸𑀦𑀸, 𑀇𑀫𑁂 𑀘𑀢𑁆𑀢𑀸𑀭𑁄 𑀇𑀤𑁆𑀥𑀺𑀧𑀸𑀤𑀸, 𑀇𑀫𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀸𑀦𑀺, 𑀇𑀫𑀸𑀦𑀺 𑀧𑀜𑁆𑀘 𑀩𑀮𑀸𑀦𑀺, 𑀇𑀫𑁂 𑀲𑀢𑁆𑀢 𑀩𑁄𑀚𑁆𑀛𑀗𑁆𑀕𑀸, 𑀅𑀬𑀁 𑀅𑀭𑀺𑀬𑁄 𑀅𑀝𑁆𑀞𑀗𑁆𑀕𑀺𑀓𑁄 𑀫𑀕𑁆𑀕𑁄, 𑀅𑀬𑀁 𑀲𑀫𑀣𑁄, 𑀅𑀬𑀁 𑀯𑀺𑀧𑀲𑁆𑀲𑀦𑀸, 𑀅𑀬𑀁 𑀯𑀺𑀚𑁆𑀚𑀸, 𑀅𑀬𑀁 𑀯𑀺𑀫𑀼𑀢𑁆𑀢𑀺, 𑀇𑀫𑁂 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸𑀢𑀺 𑀏𑀯𑀁 𑀔𑁄, 𑀫𑀳𑀸𑀭𑀸𑀚, 𑀅𑀧𑀺𑀮𑀸𑀧𑀦𑀮𑀓𑁆𑀔𑀡𑀸 𑀲𑀢𑀻’’𑀢𑀺 (𑀫𑀺. 𑀧. 𑁨.𑁧.𑁧𑁩) 𑀇𑀫𑀁 𑀧𑀸𑀴𑀺𑀲𑁂𑀲𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀣𑁂𑀭𑁂𑀦𑀸𑀢𑀺 𑀦𑀸𑀕𑀲𑁂𑀦𑀢𑁆𑀣𑁂𑀭𑁂𑀦. 𑀲𑁄 𑀳𑀺 𑀥𑀫𑁆𑀫𑀸𑀦𑀁 𑀓𑀺𑀘𑁆𑀘𑀁 𑀮𑀓𑁆𑀔𑀡𑀁 𑀓𑀢𑁆𑀯𑀸 𑀅𑀲𑁆𑀲𑁂𑀢𑀺 ‘‘𑀅𑀧𑀺𑀮𑀸𑀧𑀦𑀮𑀓𑁆𑀔𑀡𑀸 𑀲𑀢𑀺, 𑀆𑀓𑁄𑀝𑀦𑀮𑀓𑁆𑀔𑀡𑁄 𑀯𑀺𑀢𑀓𑁆𑀓𑁄’’𑀢𑀺𑀆𑀤𑀺𑀦𑀸. 𑀏𑀯𑀜𑁆𑀳𑀺 𑀥𑀫𑁆𑀫𑀸 𑀲𑀼𑀩𑁄𑀥𑀸 𑀳𑁄𑀦𑁆𑀢𑀻𑀢𑀺. 𑀲𑀫𑁆𑀫𑁄𑀲𑀧𑀘𑁆𑀘𑀦𑀻𑀓𑀁 𑀓𑀺𑀘𑁆𑀘𑀁 𑀅𑀲𑀫𑁆𑀫𑁄𑀲𑁄, 𑀦 𑀲𑀫𑁆𑀫𑁄𑀲𑀸𑀪𑀸𑀯𑀫𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀅𑀲𑀫𑁆𑀫𑁄𑀲𑀭𑀲𑀸 𑀯𑀸’’𑀢𑀺. 𑀬𑀲𑁆𑀲 𑀥𑀫𑁆𑀫𑀲𑁆𑀲 𑀩𑀮𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀸 𑀪𑀯𑀦𑁆𑀢𑀺, 𑀲𑀸 𑀲𑀢𑀺. 𑀢𑀲𑁆𑀫𑀸 𑀲𑀸 𑀢𑁂𑀲𑀁 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀪𑀸𑀯𑀁 𑀧𑀘𑁆𑀘𑀼𑀧𑀝𑁆𑀞𑀸𑀧𑁂𑀲𑀺, 𑀲𑀬𑀁 𑀯𑀸 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀪𑀸𑀯𑁂𑀦 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀻𑀢𑀺 ¶ 𑀯𑀼𑀢𑁆𑀢𑀁 𑁋 ‘‘𑀕𑁄𑀘𑀭𑀸𑀪𑀺𑀫𑀼𑀔𑀻𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑀸’’𑀢𑀺. 𑀲𑀫𑁆𑀫𑀸 𑀧𑀲𑀢𑁆𑀣𑁄 𑀩𑁄𑀚𑁆𑀛𑀗𑁆𑀕𑁄𑀢𑀺 𑀲𑀫𑁆𑀩𑁄𑀚𑁆𑀛𑀗𑁆𑀕𑁄. 𑀩𑁄𑀥𑀺𑀬𑀸 𑀯𑀓𑁆𑀔𑀫𑀸𑀦𑀸𑀬 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸, 𑀩𑁄𑀥𑀺𑀲𑁆𑀲 𑀯𑀸 𑀅𑀭𑀺𑀬𑀲𑀸𑀯𑀓𑀲𑁆𑀲 𑀅𑀗𑁆𑀕𑁄𑀢𑀺 𑀩𑁄𑀚𑁆𑀛𑀗𑁆𑀕𑁄. 𑀬𑀸 𑀳𑀻𑀢𑀺𑀆𑀤𑀺𑀦𑀸 𑀢𑀫𑁂𑀯 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀯𑀭𑀢𑀺. ‘‘𑀬𑀸 𑀳𑀺 𑀅𑀬𑀁 𑀥𑀫𑁆𑀫𑀲𑀸𑀫𑀕𑁆𑀕𑀻’’𑀢𑀺 𑀏𑀢𑀲𑁆𑀲 ‘‘𑀩𑁄𑀥𑀻𑀢𑀺 𑀯𑀼𑀘𑁆𑀘𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸𑀢𑀺 𑀥𑀫𑁆𑀫𑀲𑀫𑀽𑀳𑁂𑀦, 𑀬𑀸𑀬 𑀥𑀫𑁆𑀫𑀲𑀸𑀫𑀕𑁆𑀕𑀺𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀢𑀺𑀝𑁆𑀞𑀸𑀦𑀸𑀬𑀽𑀳𑀦𑀸 𑀑𑀖𑀢𑀭𑀡𑀲𑀼𑀢𑁆𑀢𑀯𑀡𑁆𑀡𑀦𑀸𑀬𑀁 (𑀲𑀁. 𑀦𑀺. 𑀅𑀝𑁆𑀞. 𑁧.𑁧.𑁧) ‘‘𑀓𑀺𑀮𑁂𑀲𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁, 𑀅𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀆𑀬𑀽𑀳𑀦𑀸. 𑀢𑀡𑁆𑀳𑀸 𑀤𑀺𑀝𑁆𑀞𑀺𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁, 𑀅𑀯𑀲𑁂𑀲𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑁂𑀳𑀺 𑀆𑀬𑀽𑀳𑀦𑀸. 𑀢𑀡𑁆𑀳𑀸𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁, 𑀤𑀺𑀝𑁆𑀞𑀺𑀯𑀲𑁂𑀦 𑀆𑀬𑀽𑀳𑀦𑀸. 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀸 𑀧𑀢𑀺𑀝𑁆𑀞𑀸𑀦𑀁, 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀆𑀬𑀽𑀳𑀦𑀸. 𑀮𑀻𑀦𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁, 𑀉𑀤𑁆𑀥𑀘𑁆𑀘𑀯𑀲𑁂𑀦 𑀆𑀬𑀽𑀳𑀦𑀸. 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁, 𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀯𑀲𑁂𑀦 𑀆𑀬𑀽𑀳𑀦𑀸. 𑀲𑀩𑁆𑀩𑀸𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀧𑀢𑀺𑀝𑁆𑀞𑀸𑀦𑀁, 𑀲𑀩𑁆𑀩𑀮𑁄𑀓𑀺𑀬𑀓𑀼𑀲𑀮𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀆𑀬𑀽𑀳𑀦𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀲𑀢𑁆𑀢𑀲𑀼 𑀧𑀓𑀸𑀭𑁂𑀲𑀼 𑀇𑀥 𑀅𑀯𑀼𑀢𑁆𑀢𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀧𑀝𑀺𑀧𑀓𑁆𑀔𑀪𑀽𑀢𑀸𑀬𑀸𑀢𑀺 𑀏𑀢𑁆𑀣 𑀮𑀻𑀦𑀧𑁆𑀧𑀢𑀺𑀝𑁆𑀞𑀸𑀦𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀉𑀘𑁆𑀙𑁂𑀤𑀸𑀪𑀺𑀦𑀺𑀯𑁂𑀲𑀸𑀦𑀁 𑀥𑀫𑁆𑀫𑀯𑀺𑀘𑀬𑀯𑀻𑀭𑀺𑀬𑀧𑀻𑀢𑀺𑀧𑁆𑀧𑀥𑀸𑀦𑀸 𑀥𑀫𑁆𑀫𑀲𑀸𑀫𑀕𑁆𑀕𑀻 𑀧𑀝𑀺𑀧𑀓𑁆𑀔𑁄, 𑀉𑀤𑁆𑀥𑀘𑁆𑀘𑀸𑀬𑀽𑀳𑀦𑀅𑀢𑁆𑀢𑀓𑀺𑀮𑀫𑀣𑀸𑀦𑀼𑀬𑁄𑀕𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑀸𑀦𑀁 𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀧𑀥𑀸𑀦𑀸 𑀥𑀫𑁆𑀫𑀲𑀸𑀫𑀕𑁆𑀕𑀻 𑀧𑀝𑀺𑀧𑀓𑁆𑀔𑁄. 𑀲𑀢𑀺 𑀧𑀦 𑀉𑀪𑀬𑀢𑁆𑀣𑀸𑀧𑀺 𑀇𑀘𑁆𑀙𑀺𑀢𑀩𑁆𑀩𑀸. 𑀢𑀣𑀸 𑀳𑀺 𑀲𑀸 ‘‘𑀲𑀩𑁆𑀩𑀢𑁆𑀣𑀺𑀓𑀸’’𑀢𑀺 𑀯𑀼𑀢𑁆𑀢𑀸.

𑀓𑀺𑀮𑁂𑀲𑀲𑀦𑁆𑀢𑀸𑀦𑀦𑀺𑀤𑁆𑀤𑀸𑀬 ¶ 𑀉𑀝𑁆𑀞𑀳𑀢𑀻𑀢𑀺 𑀏𑀢𑁂𑀦 𑀲𑀺𑀔𑀸𑀧𑁆𑀧𑀢𑁆𑀢𑀯𑀺𑀧𑀲𑁆𑀲𑀦𑀸𑀬 𑀲𑀳𑀕𑀢𑀸𑀦𑀫𑁆𑀧𑀺 𑀲𑀢𑀺𑀆𑀤𑀻𑀦𑀁 𑀩𑁄𑀚𑁆𑀛𑀗𑁆𑀕𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀺𑀯𑀺𑀧𑀲𑁆𑀲𑀦𑀸 𑀳𑀺 𑀓𑀺𑀮𑁂𑀲𑁂 𑀦𑀺𑀭𑁄𑀥𑁂𑀦𑁆𑀢𑀻 𑀏𑀯 𑀧𑀯𑀢𑁆𑀢𑀢𑀻𑀢𑀺. 𑀘𑀢𑁆𑀢𑀸𑀭𑀺 𑀯𑀸𑀢𑀺𑀆𑀤𑀺𑀦𑀸 𑀧𑀦 𑀫𑀕𑁆𑀕𑀨𑀮𑀲𑀳𑀕𑀢𑀸𑀦𑀁 𑀩𑁄𑀚𑁆𑀛𑀗𑁆𑀕𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀲𑀢𑁆𑀢𑀳𑀺 𑀩𑁄𑀚𑁆𑀛𑀗𑁆𑀕𑁂𑀳𑀺 𑀪𑀸𑀯𑀺𑀢𑁂𑀳𑀺 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄 𑀳𑁄𑀢𑀻𑀢𑀺 𑀓𑀣𑀫𑀺𑀤𑀁 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 𑁋 ‘‘𑀬𑀣𑀸𑀳𑀸’’𑀢𑀺𑀆𑀤𑀺. 𑀛𑀸𑀦𑀗𑁆𑀕𑀫𑀕𑁆𑀕𑀗𑁆𑀕𑀸𑀤𑀬𑁄 𑀯𑀺𑀬𑀸𑀢𑀺 𑀏𑀢𑁂𑀦 𑀩𑁄𑀥𑀺𑀩𑁄𑀚𑁆𑀛𑀗𑁆𑀕𑀲𑀤𑁆𑀤𑀸𑀦𑀁 𑀲𑀫𑀼𑀤𑀸𑀬𑀸𑀯𑀬𑀯𑀯𑀺𑀲𑀬𑀢𑀁 𑀤𑀲𑁆𑀲𑁂𑀢𑀺. 𑀲𑁂𑀦𑀗𑁆𑀕𑀭𑀣𑀗𑁆𑀕𑀸𑀤𑀬𑁄 𑀯𑀺𑀬𑀸𑀢𑀺 𑀏𑀢𑁂𑀦 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀬𑀸 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀩𑁄𑀥𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸𑀢𑀺 𑀓𑀸𑀭𑀡𑀢𑁆𑀣𑁄 𑀅𑀗𑁆𑀕𑀲𑀤𑁆𑀤𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀥𑀺𑀬𑁄, 𑀩𑁄𑀥𑀺𑀬𑁄 𑀏𑀯 𑀅𑀗𑁆𑀕𑀸𑀦𑀺 𑀩𑁄𑀚𑁆𑀛𑀗𑁆𑀕𑀸𑀦𑀻𑀢𑀺 𑀯𑀼𑀢𑁆𑀢𑀁 𑁋 ‘‘𑀩𑀼𑀚𑁆𑀛𑀦𑁆𑀢𑀻𑀢𑀺 𑀩𑁄𑀚𑁆𑀛𑀗𑁆𑀕𑀸’’𑀢𑀺. 𑀯𑀺𑀧𑀲𑁆𑀲𑀦𑀸𑀤𑀻𑀦𑀁 𑀓𑀸𑀭𑀡𑀸𑀤𑀻𑀦𑀁 𑀩𑀼𑀚𑁆𑀛𑀺𑀢𑀩𑁆𑀩𑀸𑀦𑀜𑁆𑀘 𑀲𑀘𑁆𑀘𑀸𑀦𑀁 𑀅𑀦𑀼𑀭𑀽𑀧𑀁 𑀧𑀘𑁆𑀘𑀓𑁆𑀔𑀪𑀸𑀯𑁂𑀦 𑀧𑀝𑀺𑀫𑀼𑀔𑀁 𑀅𑀯𑀺𑀧𑀭𑀻𑀢𑀢𑀸𑀬 𑀲𑀫𑁆𑀫𑀸 𑀘 𑀩𑀼𑀚𑁆𑀛𑀦𑁆𑀢𑀻𑀢𑀺 𑀏𑀯𑀁 𑀅𑀢𑁆𑀣𑀯𑀺𑀲𑁂𑀲𑀤𑀻𑀧𑀓𑁂𑀳𑀺 𑀉𑀧𑀲𑀕𑁆𑀕𑁂𑀳𑀺 ‘‘𑀅𑀦𑀼𑀩𑀼𑀚𑁆𑀛𑀦𑁆𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀩𑁄𑀥𑀺𑀲𑀤𑁆𑀤𑁄 𑀳𑀺 𑀲𑀩𑁆𑀩𑀯𑀺𑀲𑁂𑀲𑀬𑀼𑀢𑁆𑀢𑀩𑀼𑀚𑁆𑀛𑀦𑀁 𑀲𑀸𑀫𑀜𑁆𑀜𑁂𑀦 𑀲𑀗𑁆𑀕𑀡𑁆𑀳𑀸𑀢𑀺. 𑀲𑀁-𑀲𑀤𑁆𑀤𑁄 𑀧𑀲𑀁𑀲𑀸𑀬𑀁 𑀲𑀼𑀦𑁆𑀤𑀭𑀪𑀸𑀯𑁂 𑀘 𑀤𑀺𑀲𑁆𑀲𑀢𑀻𑀢𑀺 𑀆𑀳 𑁋 ‘‘𑀧𑀲𑀢𑁆𑀣𑁄 𑀲𑀼𑀦𑁆𑀤𑀭𑁄 𑀘 𑀩𑁄𑀚𑁆𑀛𑀗𑁆𑀕𑁄 𑀲𑀫𑁆𑀩𑁄𑀚𑁆𑀛𑀗𑁆𑀕𑁄’’𑀢𑀺.

𑀥𑀫𑁆𑀫𑁂 ¶ 𑀯𑀺𑀘𑀺𑀦𑀢𑀻𑀢𑀺 𑀥𑀫𑁆𑀫𑀯𑀺𑀘𑀬𑁄. 𑀢𑀢𑁆𑀣 𑀥𑀫𑁆𑀫𑁂𑀢𑀺 𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀲𑀪𑀸𑀯𑀥𑀫𑁆𑀫𑀲𑁆𑀲 𑀅𑀪𑀸𑀯𑀢𑁄. 𑀢𑀢𑁄 𑀏𑀯 𑀲𑁄 𑀧𑀯𑀺𑀘𑀬𑀮𑀓𑁆𑀔𑀡𑁄. 𑀑𑀪𑀸𑀲𑀦𑀭𑀲𑁄𑀢𑀺 𑀯𑀺𑀲𑀬𑁄𑀪𑀸𑀲𑀦𑀭𑀲𑁄. 𑀅𑀲𑀫𑁆𑀫𑀼𑀬𑁆𑀳𑀦𑀸𑀓𑀸𑀭𑁂𑀦 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀻𑀢𑀺 𑀅𑀲𑀫𑁆𑀫𑁄𑀳𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀯𑀻𑀭𑀲𑁆𑀲 𑀪𑀸𑀯𑁄, 𑀓𑀫𑁆𑀫𑀁 𑀯𑀸𑀢𑀺 𑀯𑀻𑀭𑀺𑀬𑀁. 𑀈𑀭𑀬𑀺𑀢𑀩𑁆𑀩𑀢𑁄𑀢𑀺 𑀧𑀯𑀢𑁆𑀢𑁂𑀢𑀩𑁆𑀩𑀢𑁄. 𑀧𑀕𑁆𑀕𑀳𑀮𑀓𑁆𑀔𑀡𑀦𑁆𑀢𑀺 𑀓𑁄𑀲𑀚𑁆𑀚𑀧𑀓𑁆𑀔𑁂 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀕𑁆𑀕𑀳𑀮𑀓𑁆𑀔𑀡𑀁. 𑀢𑀢𑁄 𑀏𑀯 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀉𑀧𑀢𑁆𑀣𑀫𑁆𑀪𑀦𑀭𑀲𑀁. 𑀅𑀦𑁄𑀲𑀻𑀤𑀦𑀁 𑀅𑀲𑀁𑀲𑀻𑀤𑀦𑀁.

𑀧𑀻𑀡𑀬𑀢𑀻𑀢𑀺 𑀢𑀧𑁆𑀧𑁂𑀢𑀺. 𑀧𑀻𑀡𑀦𑀓𑀺𑀘𑁆𑀘𑁂𑀦 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀺𑀬 𑀢𑀁𑀲𑀫𑀼𑀝𑁆𑀞𑀸𑀦𑀧𑀡𑀻𑀢𑀭𑀽𑀧𑁂𑀳𑀺 𑀓𑀸𑀬𑀲𑁆𑀲𑀸𑀩𑁆𑀬𑀧𑀦𑀁. 𑀨𑀭𑀡𑀧𑀻𑀢𑀺𑀯𑀲𑁂𑀦 𑀳𑁂𑀢𑀁 𑀮𑀓𑁆𑀔𑀡𑀁 𑀯𑀼𑀢𑁆𑀢𑀁, 𑀢𑀣𑀸 𑀭𑀲𑁄𑀢𑀺. 𑀉𑀤𑀕𑁆𑀕𑀪𑀸𑀯𑁄 𑀑𑀤𑀕𑁆𑀬𑀁, 𑀢𑀁 𑀧𑀘𑁆𑀘𑀼𑀧𑀝𑁆𑀞𑀧𑁂𑀢𑀻𑀢𑀺 𑀑𑀤𑀕𑁆𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀉𑀩𑁆𑀩𑁂𑀕𑀧𑀻𑀢𑀺𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁.

𑀓𑀸𑀬𑀘𑀺𑀢𑁆𑀢𑀤𑀭𑀣𑀧𑁆𑀧𑀲𑁆𑀲𑀫𑁆𑀪𑀦𑀢𑁄𑀢𑀺 𑀓𑀸𑀬𑀤𑀭𑀣𑀲𑁆𑀲 𑀘𑀺𑀢𑁆𑀢𑀤𑀭𑀣𑀲𑁆𑀲 𑀘 𑀧𑀲𑁆𑀲𑀫𑁆𑀪𑀦𑀢𑁄 𑀯𑀽𑀧𑀲𑀫𑀦𑀢𑁄. 𑀢𑁂𑀦𑀸𑀳 𑁋 ‘‘𑀉𑀧𑀲𑀫𑀮𑀓𑁆𑀔𑀡𑀸’’𑀢𑀺, 𑀓𑀸𑀬𑀘𑀺𑀢𑁆𑀢𑀤𑀭𑀣𑀸𑀦𑀁 ¶ 𑀯𑀽𑀧𑀲𑀫𑀦𑀮𑀓𑁆𑀔𑀡𑀸𑀢𑀺 𑀅𑀢𑁆𑀣𑁄. 𑀓𑀸𑀬𑁄𑀢𑀺 𑀘𑁂𑀢𑁆𑀣 𑀯𑁂𑀤𑀦𑀸𑀤𑀬𑁄 𑀢𑀬𑁄 𑀔𑀦𑁆𑀥𑀸. 𑀤𑀭𑀣𑁄 𑀲𑀸𑀭𑀫𑁆𑀪𑁄, 𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀧𑀘𑁆𑀘𑀬𑀸𑀦𑀁 𑀉𑀤𑁆𑀥𑀘𑁆𑀘𑀸𑀤𑀺𑀓𑀸𑀦𑀁 𑀓𑀺𑀮𑁂𑀲𑀸𑀦𑀁, 𑀢𑀣𑀸𑀧𑀯𑀢𑁆𑀢𑀸𑀦𑀁 𑀯𑀸 𑀘𑀢𑀼𑀦𑁆𑀦𑀁 𑀔𑀦𑁆𑀥𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀤𑀭𑀣𑀦𑀺𑀫𑁆𑀫𑀤𑁆𑀤𑀦𑁂𑀦 𑀧𑀭𑀺𑀴𑀸𑀳𑀧𑀭𑀺𑀧𑁆𑀨𑀦𑁆𑀤𑀦𑀯𑀺𑀭𑀳𑀺𑀢𑁄 𑀲𑀻𑀢𑀺𑀪𑀸𑀯𑁄 𑀅𑀧𑀭𑀺𑀧𑁆𑀨𑀦𑁆𑀤𑀦𑀲𑀻𑀢𑀺𑀪𑀸𑀯𑁄.

𑀲𑀫𑁆𑀫𑀸 𑀘𑀺𑀢𑁆𑀢𑀲𑁆𑀲 𑀞𑀧𑀦𑀁 𑀲𑀫𑀸𑀥𑀸𑀦𑀁. 𑀅𑀯𑀺𑀓𑁆𑀔𑁂𑀧𑁄 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀅𑀯𑀺𑀓𑁆𑀔𑀺𑀢𑁆𑀢𑀢𑀸. 𑀬𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀅𑀯𑀺𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀲𑁄 𑀥𑀫𑁆𑀫𑁄 𑀅𑀯𑀺𑀓𑁆𑀔𑁂𑀧𑁄. 𑀅𑀯𑀺𑀲𑀸𑀭𑁄 𑀅𑀢𑁆𑀢𑀦𑁄 𑀏𑀯 𑀅𑀯𑀺𑀲𑀭𑀡𑀪𑀸𑀯𑁄. 𑀅𑀣 𑀯𑀸 𑀯𑀺𑀓𑁆𑀔𑁂𑀧𑀧𑁆𑀧𑀝𑀺𑀧𑀓𑁆𑀔𑀢𑀸𑀬 𑀅𑀯𑀺𑀓𑁆𑀔𑁂𑀧𑀮𑀓𑁆𑀔𑀡𑁄. 𑀦𑁆𑀳𑀸𑀦𑀻𑀬𑀘𑀼𑀡𑁆𑀡𑀲𑁆𑀲 𑀉𑀤𑀓𑀁 𑀯𑀺𑀬 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀲𑀫𑁆𑀧𑀺𑀡𑁆𑀟𑀦𑀓𑀺𑀘𑁆𑀘𑀢𑀸𑀬 𑀅𑀯𑀺𑀲𑀸𑀭𑀪𑀸𑀯𑁂𑀦 𑀮𑀓𑁆𑀔𑀺𑀢𑀩𑁆𑀩𑁄 𑀅𑀯𑀺𑀲𑀸𑀭𑀮𑀓𑁆𑀔𑀡𑁄. 𑀦𑀺𑀯𑀸𑀢𑁂 𑀤𑀻𑀧𑀘𑁆𑀘𑀺𑀝𑁆𑀞𑀺𑀢𑀺 𑀯𑀺𑀬 𑀘𑁂𑀢𑀲𑁄 𑀞𑀺𑀢𑀺𑀪𑀸𑀯𑁂𑀦 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀻𑀢𑀺 𑀘𑀺𑀢𑁆𑀢𑀝𑁆𑀞𑀺𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑁄.

𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑁄𑀢𑀺 𑀲𑀫𑀧𑁆𑀧𑀯𑀢𑁆𑀢𑁂𑀲𑀼 𑀅𑀲𑁆𑀲𑁂𑀲𑀼 𑀲𑀸𑀭𑀣𑀺 𑀯𑀺𑀬 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑁄. 𑀧𑀝𑀺𑀲𑀗𑁆𑀔𑀸𑀦𑀮𑀓𑁆𑀔𑀡𑀸𑀢𑀺 𑀫𑀚𑁆𑀛𑀢𑁆𑀢𑀪𑀸𑀯𑁂 𑀞𑀢𑁆𑀯𑀸 𑀯𑀻𑀫𑀁𑀲𑀦𑀲𑀗𑁆𑀔𑀸𑀢𑀧𑁆𑀧𑀝𑀺𑀲𑀗𑁆𑀔𑀸𑀦𑀮𑀓𑁆𑀔𑀡𑀸. 𑀲𑀫𑀯𑀸𑀳𑀺𑀢𑀮𑀓𑁆𑀔𑀡𑀸𑀢𑀺 𑀲𑀫𑀁 𑀅𑀯𑀺𑀲𑀫𑀁 𑀬𑀣𑀸𑀲𑀓𑀓𑀺𑀘𑁆𑀘𑁂𑀲𑀼 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀦𑀮𑀓𑁆𑀔𑀡𑀸. 𑀉𑀤𑀸𑀲𑀻𑀦𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸𑀧𑀺 𑀲𑁂𑀲𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀬𑀣𑀸𑀲𑀓𑀓𑀺𑀘𑁆𑀘𑁂𑀲𑀼 𑀧𑀯𑀢𑁆𑀢𑁂𑀢𑀺, 𑀬𑀣𑀸 𑀭𑀸𑀚𑀸 𑀢𑀼𑀡𑁆𑀳𑀻 𑀦𑀺𑀲𑀺𑀦𑁆𑀦𑁄𑀧𑀺 𑀅𑀢𑁆𑀣𑀓𑀭𑀡𑁂 𑀥𑀫𑁆𑀫𑀝𑁆𑀞𑁂 𑀬𑀣𑀸𑀲𑀓𑀁 𑀓𑀺𑀘𑁆𑀘𑁂𑀲𑀼 𑀅𑀧𑁆𑀧𑀫𑀢𑁆𑀢𑁄 𑀧𑀯𑀢𑁆𑀢𑁂𑀢𑀺. 𑀅𑀮𑀻𑀦𑀸𑀦𑀼𑀤𑁆𑀥𑀢𑀧𑁆𑀧𑀯𑀢𑁆𑀢𑀺𑀧𑀘𑁆𑀘𑀬𑀢𑁆𑀢𑀸 𑀊𑀦𑀸𑀥𑀺𑀓𑀦𑀺𑀯𑀸𑀭𑀡𑀭𑀲𑀸. 𑀧𑀓𑁆𑀔𑀧𑀸𑀢𑀼𑀧𑀘𑁆𑀙𑁂𑀤𑀦𑀭𑀲𑀸𑀢𑀺 ‘‘𑀇𑀤𑀁 𑀦𑀺𑀳𑀻𑀦𑀓𑀺𑀘𑁆𑀘𑀁 ¶ 𑀳𑁄𑀢𑀼, 𑀇𑀤𑀁 𑀅𑀢𑀺𑀭𑁂𑀓𑀢𑀭𑀓𑀺𑀘𑁆𑀘’’𑀦𑁆𑀢𑀺 𑀏𑀯𑀁 𑀧𑀓𑁆𑀔𑀧𑀸𑀢𑀦𑀯𑀲𑁂𑀦 𑀯𑀺𑀬 𑀧𑀯𑀢𑁆𑀢𑀺 𑀧𑀓𑁆𑀔𑀧𑀸𑀢𑁄, 𑀢𑀁 𑀉𑀧𑀘𑁆𑀙𑀺𑀦𑁆𑀤𑀦𑁆𑀢𑀻 𑀯𑀺𑀬 𑀳𑁄𑀢𑀻𑀢𑀺 𑀧𑀓𑁆𑀔𑀧𑀸𑀢𑀼𑀧𑀘𑁆𑀙𑁂𑀤𑀦𑀭𑀲𑀸. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀲𑀓𑀲𑀓𑀓𑀺𑀘𑁆𑀘𑁂 𑀫𑀚𑁆𑀛𑀢𑁆𑀢𑀪𑀸𑀯𑁂𑀦 𑀧𑀘𑁆𑀘𑀼𑀧𑀢𑀺𑀝𑁆𑀞𑀢𑀻𑀢𑀺 𑀫𑀚𑁆𑀛𑀢𑁆𑀢𑀪𑀸𑀯𑀧𑀘𑁆𑀘𑀼𑀧𑀝𑁆𑀞𑀸𑀦𑁄. 𑀩𑁄𑀚𑁆𑀛𑀗𑁆𑀕𑀸𑀦𑀁 𑀉𑀧𑀭𑀽𑀧𑀭𑀺 𑀉𑀧𑁆𑀧𑀸𑀤𑀦𑀫𑁂𑀯 𑀩𑁆𑀭𑀽𑀳𑀦𑀁 𑀯𑀟𑁆𑀠𑀦𑀜𑁆𑀘𑀸𑀢𑀺 𑀆𑀳 𑁋 ‘‘𑀉𑀧𑁆𑀧𑀸𑀤𑁂𑀢𑀻’’𑀢𑀺.

𑀲𑀢𑀺 𑀘 𑀲𑀫𑁆𑀧𑀚𑀜𑁆𑀜𑀜𑁆𑀘 𑀲𑀢𑀺𑀲𑀫𑁆𑀧𑀚𑀜𑁆𑀜𑀁, 𑀲𑀢𑀺𑀧𑀥𑀸𑀦𑀁 𑀯𑀸 𑀲𑀫𑁆𑀧𑀚𑀜𑁆𑀜𑀁 𑀲𑀢𑀺𑀲𑀫𑁆𑀧𑀚𑀜𑁆𑀜𑀁. 𑀢𑀁 𑀲𑀩𑁆𑀩𑀢𑁆𑀣 𑀲𑀢𑁄𑀓𑀸𑀭𑀺𑀪𑀸𑀯𑀸𑀯𑀳𑀢𑁆𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 𑀳𑁄𑀢𑀺. 𑀬𑀣𑀸 𑀧𑀘𑁆𑀘𑀦𑀻𑀓𑀥𑀫𑁆𑀫𑀧𑁆𑀧𑀳𑀸𑀦𑀁 𑀅𑀦𑀼𑀭𑀽𑀧𑀥𑀫𑁆𑀫𑀲𑁂𑀯𑀦𑀸 𑀘 𑀅𑀦𑀼𑀧𑁆𑀧𑀦𑁆𑀦𑀸𑀦𑀁 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑁆𑀧𑀸𑀤𑀸𑀬 𑀳𑁄𑀢𑀺, 𑀏𑀯𑀁 𑀲𑀢𑀺𑀭𑀳𑀺𑀢𑀧𑀼𑀕𑁆𑀕𑀮𑀯𑀺𑀯𑀚𑁆𑀚𑀦𑀸, 𑀲𑀢𑁄𑀓𑀸𑀭𑀺𑀧𑀼𑀕𑁆𑀕𑀮𑀲𑁂𑀯𑀦𑀸, 𑀢𑀢𑁆𑀣 𑀘 𑀬𑀼𑀢𑁆𑀢𑀢𑀸 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀸𑀬 ¶ 𑀳𑁄𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺, ‘‘𑀲𑀢𑀺𑀲𑀫𑁆𑀧𑀚𑀜𑁆𑀜’’𑀦𑁆𑀢𑀺𑀆𑀤𑀺𑀦𑀸. 𑀲𑀢𑁆𑀢𑀲𑀼 𑀞𑀸𑀦𑁂𑀲𑀽𑀢𑀺 ‘‘𑀅𑀪𑀺𑀓𑁆𑀓𑀦𑁆𑀢𑁂 𑀧𑀝𑀺𑀓𑁆𑀓𑀦𑁆𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀆𑀮𑁄𑀓𑀺𑀢𑁂 𑀯𑀺𑀮𑁄𑀓𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀫𑀺𑀜𑁆𑀚𑀺𑀢𑁂 𑀧𑀲𑀸𑀭𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀲𑀗𑁆𑀖𑀸𑀝𑀺𑀧𑀢𑁆𑀢𑀘𑀻𑀯𑀭𑀥𑀸𑀭𑀡𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀅𑀲𑀺𑀢𑁂 𑀧𑀻𑀢𑁂 𑀔𑀸𑀬𑀺𑀢𑁂 𑀲𑀸𑀬𑀺𑀢𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀺, 𑀕𑀢𑁂 𑀞𑀺𑀢𑁂 𑀦𑀺𑀲𑀺𑀦𑁆𑀦𑁂 𑀲𑀼𑀢𑁆𑀢𑁂 𑀚𑀸𑀕𑀭𑀺𑀢𑁂 𑀪𑀸𑀲𑀺𑀢𑁂 𑀢𑀼𑀡𑁆𑀳𑀻𑀪𑀸𑀯𑁂 𑀲𑀫𑁆𑀧𑀚𑀸𑀦𑀓𑀸𑀭𑀻 𑀳𑁄𑀢𑀻’’𑀢𑀺 (𑀤𑀻. 𑀦𑀺. 𑁨.𑁩𑁭𑁬; 𑀫. 𑀦𑀺. 𑁧.𑁧𑁦𑁯) 𑀏𑀯𑀁 𑀯𑀼𑀢𑁆𑀢𑁂𑀲𑀼 𑀅𑀪𑀺𑀓𑁆𑀓𑀦𑁆𑀢𑀸𑀤𑀻𑀲𑀼 𑀲𑀢𑁆𑀢𑀲𑀼 𑀞𑀸𑀦𑁂𑀲𑀼. 𑀢𑀺𑀲𑁆𑀲𑀤𑀢𑁆𑀢𑀢𑁆𑀣𑁂𑀭𑁄 𑀦𑀸𑀫 𑀬𑁄 𑀩𑁄𑀥𑀺𑀫𑀡𑁆𑀟𑁂 𑀲𑀼𑀯𑀡𑁆𑀡𑀲𑀮𑀸𑀓𑀁 𑀕𑀳𑁂𑀢𑁆𑀯𑀸 ‘‘𑀅𑀝𑁆𑀞𑀸𑀭𑀲𑀲𑀼 𑀪𑀸𑀲𑀸𑀲𑀼 𑀓𑀢𑀭𑀪𑀸𑀲𑀸𑀬 𑀥𑀫𑁆𑀫𑀁 𑀓𑀣𑁂𑀫𑀻’’𑀢𑀺 𑀧𑀭𑀺𑀲𑀁 𑀧𑀥𑀸𑀭𑁂𑀲𑀺. 𑀅𑀪𑀬𑀢𑁆𑀣𑁂𑀭𑁄𑀢𑀺 𑀤𑀢𑁆𑀢𑀸𑀪𑀬𑀢𑁆𑀣𑁂𑀭𑀫𑀸𑀳. 𑀅𑀪𑀺𑀦𑀺𑀯𑁂𑀲𑀦𑁆𑀢𑀺 𑀯𑀺𑀧𑀲𑁆𑀲𑀦𑀸𑀪𑀺𑀦𑀺𑀯𑁂𑀲𑀁.

𑀧𑀭𑀺𑀧𑀼𑀘𑁆𑀙𑀓𑀢𑀸𑀢𑀺 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀧𑀼𑀘𑁆𑀙𑀓𑀪𑀸𑀯𑁄. 𑀆𑀘𑀭𑀺𑀬𑁂 𑀧𑀬𑀺𑀭𑀼𑀧𑀸𑀲𑀺𑀢𑁆𑀯𑀸 𑀧𑀜𑁆𑀘𑀧𑀺 𑀦𑀺𑀓𑀸𑀬𑁂 𑀲𑀳 𑀅𑀝𑁆𑀞𑀓𑀣𑀸𑀬 𑀧𑀭𑀺𑀬𑁄𑀕𑀸𑀳𑁂𑀢𑁆𑀯𑀸 𑀬𑀁 𑀬𑀁 𑀢𑀢𑁆𑀣 𑀕𑀡𑁆𑀞𑀺𑀝𑁆𑀞𑀸𑀦𑀪𑀽𑀢𑀁, 𑀢𑀁 𑀢𑀁 ‘‘𑀇𑀤𑀁, 𑀪𑀦𑁆𑀢𑁂, 𑀓𑀣𑀁, 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄’’𑀢𑀺 𑀔𑀦𑁆𑀥𑀸𑀬𑀢𑀦𑀸𑀤𑀺𑀅𑀢𑁆𑀣𑀁 𑀧𑀼𑀘𑁆𑀙𑀦𑁆𑀢𑀲𑁆𑀲 𑀳𑀺 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀺. 𑀢𑁂𑀦𑀸𑀳 𑁋 ‘‘𑀔𑀦𑁆𑀥𑀥𑀸𑀢𑀼…𑀧𑁂… 𑀩𑀳𑀼𑀮𑀢𑀸’’𑀢𑀺.

𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸𑀢𑀺 𑀏𑀢𑁆𑀣 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑀢𑁄 𑀲𑀭𑀻𑀭𑀁 𑀢𑀧𑁆𑀧𑀝𑀺𑀩𑀤𑁆𑀥𑀸𑀦𑀺 𑀘𑀻𑀯𑀭𑀸𑀤𑀻𑀦𑀺 𑀘 𑀯𑀢𑁆𑀣𑀽𑀦𑀻𑀢𑀺 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀢𑀸𑀦𑀺 𑀬𑀣𑀸 𑀘𑀺𑀢𑁆𑀢𑀲𑁆𑀲 𑀲𑀼𑀔𑀸𑀯𑀳𑀸𑀦𑀺 𑀳𑁄𑀦𑁆𑀢𑀺, 𑀢𑀣𑀸 𑀓𑀭𑀡𑀁 𑀢𑁂𑀲𑀁 𑀯𑀺𑀲𑀤𑀓𑀺𑀭𑀺𑀬𑀸. 𑀢𑁂𑀦𑀸𑀳 𑁋 ‘‘𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸𑀦’’𑀦𑁆𑀢𑀺𑀆𑀤𑀺. 𑀉𑀲𑁆𑀲𑀦𑁆𑀦𑀤𑁄𑀲𑀦𑁆𑀢𑀺 𑀯𑀸𑀢𑀧𑀺𑀢𑁆𑀢𑀸𑀤𑀺𑀯𑀲𑁂𑀦 𑀉𑀧𑀘𑀺𑀢𑀤𑁄𑀲𑀁. 𑀲𑁂𑀤𑀫𑀮𑀫𑀓𑁆𑀔𑀺𑀢𑀦𑁆𑀢𑀺 𑀲𑁂𑀤𑁂𑀦 𑀘𑁂𑀯 𑀚𑀮𑁆𑀮𑀺𑀓𑀸𑀲𑀗𑁆𑀔𑀸𑀢𑁂𑀦 𑀲𑀭𑀻𑀭𑀫𑀮𑁂𑀦 𑀘 𑀫𑀓𑁆𑀔𑀺𑀢𑀁. 𑀘-𑀲𑀤𑁆𑀤𑁂𑀦 𑀅𑀜𑁆𑀜𑀫𑁆𑀧𑀺 𑀲𑀭𑀻𑀭𑀲𑁆𑀲 𑀧𑀻𑀴𑀸𑀯𑀳𑀁 𑀅𑀘𑁆𑀘𑀸𑀲𑀦𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀲𑁂𑀦𑀸𑀲𑀦𑀁 𑀯𑀸𑀢𑀺 𑀯𑀸-𑀲𑀤𑁆𑀤𑁂𑀦 𑀫𑀮𑀕𑁆𑀕𑀳𑀺𑀢𑀧𑀢𑁆𑀢𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀧𑀭𑀺𑀪𑀡𑁆𑀟𑀓𑀭𑀡𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀢𑁆𑀢𑀧𑀘𑀦𑀸𑀤𑀻𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀯𑀺𑀲𑀤𑁂𑀢𑀺 𑀯𑀢𑁆𑀣𑀼𑀫𑁆𑀳𑀺 𑀅𑀯𑀺𑀲𑀤𑁂 𑀲𑀢𑀺, 𑀯𑀺𑀲𑀬𑀪𑀽𑀢𑁂 𑀯𑀸. 𑀓𑀣𑀁 𑀪𑀸𑀯𑀦𑀫𑀦𑀼𑀬𑀼𑀢𑁆𑀢𑀲𑁆𑀲 ¶ 𑀢𑀸𑀦𑀺 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀢𑁆𑀣𑀽𑀦𑀺 𑀯𑀺𑀲𑀬𑁄? 𑀅𑀦𑁆𑀢𑀭𑀦𑁆𑀢𑀭𑀸 𑀧𑀯𑀢𑁆𑀢𑀦𑀓𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀢𑁂 𑀳𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀬 𑀅𑀧𑀭𑀺𑀲𑀼𑀤𑁆𑀥𑀪𑀸𑀯𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑀽𑀢𑀺 𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀪𑀽𑀢𑁂𑀲𑀼 𑀘𑀺𑀢𑁆𑀢𑀘𑁂𑀢𑀲𑀺𑀓𑁂𑀲𑀼. 𑀜𑀸𑀡𑀫𑁆𑀧𑀻𑀢𑀺 𑀅𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑁂𑀦 ‘‘𑀦 𑀓𑁂𑀯𑀮𑀁 𑀯𑀢𑁆𑀣𑀼𑀬𑁂𑀯, 𑀅𑀣 𑀔𑁄 𑀢𑀲𑁆𑀫𑀺𑀁 𑀅𑀧𑀭𑀺𑀲𑀼𑀤𑁆𑀥𑁂 𑀜𑀸𑀡𑀫𑁆𑀧𑀺 𑀅𑀧𑀭𑀺𑀲𑀼𑀤𑁆𑀥𑀁 ¶ 𑀳𑁄𑀢𑀻’’𑀢𑀺 𑀦𑀺𑀲𑁆𑀲𑀬𑀸𑀧𑀭𑀺𑀲𑀼𑀤𑁆𑀥𑀺𑀬𑀸 𑀢𑀁𑀦𑀺𑀲𑁆𑀲𑀺𑀢𑀸𑀧𑀭𑀺𑀲𑀼𑀤𑁆𑀥𑀺 𑀯𑀺𑀬 𑀯𑀺𑀲𑀬𑀲𑁆𑀲 𑀅𑀧𑀭𑀺𑀲𑀼𑀤𑁆𑀥𑀢𑀸𑀬 𑀯𑀺𑀲𑀬𑀺𑀦𑁄 𑀅𑀧𑀭𑀺𑀲𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀺.

𑀲𑀫𑀪𑀸𑀯𑀓𑀭𑀡𑀦𑁆𑀢𑀺 𑀓𑀺𑀘𑁆𑀘𑀢𑁄 𑀅𑀦𑀽𑀦𑀸𑀥𑀺𑀓𑀪𑀸𑀯𑀓𑀭𑀡𑀁. 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀳𑁄𑀢𑀺, 𑀲𑀤𑁆𑀥𑁂𑀬𑁆𑀬𑀯𑀢𑁆𑀣𑀼𑀲𑁆𑀫𑀺𑀁 𑀧𑀘𑁆𑀘𑀬𑀯𑀲𑁂𑀦 𑀅𑀥𑀺𑀫𑁄𑀓𑁆𑀔𑀓𑀺𑀘𑁆𑀘𑀲𑁆𑀲 𑀧𑀝𑀼𑀢𑀭𑀪𑀸𑀯𑁂𑀦 𑀧𑀜𑁆𑀜𑀸𑀬 𑀅𑀯𑀺𑀲𑀤𑀢𑀸𑀬 𑀯𑀻𑀭𑀺𑀬𑀸𑀤𑀻𑀦𑀜𑁆𑀘 𑀲𑀺𑀣𑀺𑀮𑀢𑀸𑀤𑀺𑀦𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀳𑁄𑀢𑀺. 𑀢𑁂𑀦𑀸𑀳 𑁋 ‘‘𑀇𑀢𑀭𑀸𑀦𑀺 𑀫𑀦𑁆𑀤𑀸𑀦𑀻’’𑀢𑀺. 𑀢𑀢𑁄𑀢𑀺 𑀢𑀲𑁆𑀫𑀸, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀩𑀮𑀯𑀪𑀸𑀯𑀢𑁄 𑀇𑀢𑀭𑁂𑀲𑀜𑁆𑀘 𑀫𑀦𑁆𑀤𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀓𑁄𑀲𑀚𑁆𑀚𑀧𑀓𑁆𑀔𑁂 𑀧𑀢𑀺𑀢𑀼𑀁 𑀅𑀤𑀢𑁆𑀯𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀧𑀕𑁆𑀕𑀡𑁆𑀳𑀦𑀁 𑀅𑀦𑀼𑀩𑀮𑀧𑁆𑀧𑀤𑀸𑀦𑀁 𑀧𑀕𑁆𑀕𑀳𑁄. 𑀧𑀕𑁆𑀕𑀳𑁄𑀯 𑀓𑀺𑀘𑁆𑀘𑀁 𑀧𑀕𑁆𑀕𑀳𑀓𑀺𑀘𑁆𑀘𑀁. 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀻𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀺𑀢𑀩𑁆𑀩𑀁. 𑀆𑀭𑀫𑁆𑀫𑀡𑀁 𑀉𑀧𑀕𑀦𑁆𑀢𑁆𑀯𑀸 𑀞𑀸𑀦𑀁, 𑀅𑀦𑀺𑀲𑁆𑀲𑀚𑁆𑀚𑀦𑀁 𑀯𑀸 𑀉𑀧𑀝𑁆𑀞𑀸𑀦𑀁. 𑀯𑀺𑀓𑁆𑀔𑁂𑀧𑀧𑁆𑀧𑀝𑀺𑀧𑀓𑁆𑀔𑁄, 𑀬𑁂𑀦 𑀯𑀸 𑀲𑀫𑁆𑀧𑀬𑀼𑀢𑁆𑀢𑀸 𑀅𑀯𑀺𑀓𑁆𑀔𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀲𑁄 𑀅𑀯𑀺𑀓𑁆𑀔𑁂𑀧𑁄. 𑀭𑀽𑀧𑀕𑀢𑀁 𑀯𑀺𑀬 𑀘𑀓𑁆𑀔𑀼𑀦𑀸 𑀬𑁂𑀦 𑀬𑀸𑀣𑀸𑀯𑀢𑁄 𑀯𑀺𑀲𑀬𑀲𑀪𑀸𑀯𑀁 𑀧𑀲𑁆𑀲𑀢𑀺, 𑀢𑀁 𑀤𑀲𑁆𑀲𑀦𑀓𑀺𑀘𑁆𑀘𑀁 𑀓𑀸𑀢𑀼𑀁 𑀦 𑀲𑀓𑁆𑀓𑁄𑀢𑀺 𑀩𑀮𑀯𑀢𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑁂𑀦 𑀅𑀥𑀺𑀪𑀽𑀢𑀢𑁆𑀢𑀸. 𑀲𑀳𑀚𑀸𑀢𑀥𑀫𑁆𑀫𑁂𑀲𑀼 𑀳𑀺 𑀇𑀦𑁆𑀤𑀝𑁆𑀞𑀁 𑀓𑀸𑀭𑁂𑀦𑁆𑀢𑀸𑀦𑀁 𑀲𑀳𑀧𑀯𑀢𑁆𑀢𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀏𑀓𑀤𑁂𑀲𑀢𑀸𑀯𑀲𑁂𑀦𑁂𑀯 𑀅𑀢𑁆𑀣𑀲𑀺𑀤𑁆𑀥𑀺, 𑀦 𑀅𑀜𑁆𑀜𑀣𑀸. 𑀢𑀲𑁆𑀫𑀸𑀢𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀓𑀸𑀭𑀡𑀪𑀸𑀯𑁂𑀦 𑀧𑀘𑁆𑀘𑀸𑀫𑀲𑀢𑀺. 𑀢𑀦𑁆𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁. 𑀥𑀫𑁆𑀫𑀲𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦𑀸𑀢𑀺 𑀬𑀲𑁆𑀲 𑀲𑀤𑁆𑀥𑁂𑀬𑁆𑀬𑀲𑁆𑀲 𑀯𑀢𑁆𑀣𑀼𑀦𑁄 𑀉𑀴𑀸𑀭𑀢𑀸𑀤𑀺𑀕𑀼𑀡𑁂 𑀅𑀥𑀺𑀫𑀼𑀘𑁆𑀘𑀦𑀲𑁆𑀲 𑀲𑀸𑀢𑀺𑀲𑀬𑀧𑁆𑀧𑀯𑀢𑁆𑀢𑀺𑀬𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀚𑀸𑀢𑀁, 𑀢𑀲𑁆𑀲 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑀸𑀤𑀺𑀯𑀺𑀪𑀸𑀕𑀢𑁄 𑀬𑀸𑀣𑀸𑀯𑀢𑁄 𑀯𑀻𑀫𑀁𑀲𑀦𑁂𑀦. 𑀏𑀯𑀜𑁆𑀳𑀺 𑀏𑀯𑀁𑀥𑀫𑁆𑀫𑀢𑀸𑀦𑀬𑁂𑀦 𑀬𑀸𑀣𑀸𑀯𑀲𑀭𑀲𑀢𑁄 𑀧𑀭𑀺𑀕𑁆𑀕𑀬𑁆𑀳𑀫𑀸𑀦𑁂 𑀲𑀯𑀺𑀧𑁆𑀨𑀸𑀭𑁄 𑀅𑀥𑀺𑀫𑁄𑀓𑁆𑀔𑁄 𑀦 𑀳𑁄𑀢𑀺 ‘‘𑀅𑀬𑀁 𑀇𑀫𑁂𑀲𑀁 𑀥𑀫𑁆𑀫𑀸𑀦𑀁 𑀲𑀪𑀸𑀯𑁄’’𑀢𑀺 𑀧𑀭𑀺𑀚𑀸𑀦𑀦𑀯𑀲𑁂𑀦 𑀧𑀜𑁆𑀜𑀸𑀩𑁆𑀬𑀸𑀧𑀸𑀭𑀲𑁆𑀲 𑀲𑀸𑀢𑀺𑀲𑀬𑀢𑁆𑀢𑀸. 𑀥𑀼𑀭𑀺𑀬𑀥𑀫𑁆𑀫𑁂𑀲𑀼 𑀳𑀺 𑀬𑀣𑀸 𑀲𑀤𑁆𑀥𑀸𑀬 𑀩𑀮𑀯𑀪𑀸𑀯𑁂 𑀧𑀜𑁆𑀜𑀸𑀬 𑀫𑀦𑁆𑀤𑀪𑀸𑀯𑁄 𑀳𑁄𑀢𑀺, 𑀏𑀯𑀁 𑀧𑀜𑁆𑀜𑀸𑀬 𑀩𑀮𑀯𑀪𑀸𑀯𑁂 𑀲𑀤𑁆𑀥𑀸𑀬 𑀫𑀦𑁆𑀤𑀪𑀸𑀯𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀢𑀁 𑀥𑀫𑁆𑀫𑀲𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀳𑀸𑀧𑁂𑀢𑀩𑁆𑀩’’𑀦𑁆𑀢𑀺.

𑀢𑀣𑀸 𑀅𑀫𑀦𑀲𑀺𑀓𑀸𑀭𑁂𑀦𑀸𑀢𑀺 𑀬𑁂𑀦𑀸𑀓𑀸𑀭𑁂𑀦 𑀪𑀸𑀯𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑀲𑁆𑀲 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀚𑀸𑀢𑀁, 𑀢𑁂𑀦𑀸𑀓𑀸𑀭𑁂𑀦 𑀪𑀸𑀯𑀦𑀸𑀬 𑀅𑀦𑀦𑀼𑀬𑀼𑀜𑁆𑀚𑀦𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀥 𑀤𑀼𑀯𑀺𑀥𑁂𑀦 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀩𑀮𑀯𑀪𑀸𑀯𑁄 𑀅𑀢𑁆𑀢𑀦𑁄 𑀯𑀸 𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀓𑀺𑀘𑁆𑀘𑀼𑀢𑁆𑀢𑀭𑀺𑀬𑀢𑁄 𑀯𑀻𑀭𑀺𑀬𑀸𑀤𑀻𑀦𑀁 𑀯𑀸 𑀫𑀦𑁆𑀤𑀓𑀺𑀘𑁆𑀘𑀢𑀸𑀬. 𑀢𑀢𑁆𑀣 𑀧𑀞𑀫𑀯𑀺𑀓𑀧𑁆𑀧𑁂 𑀳𑀸𑀧𑀦𑀯𑀺𑀥𑀺 𑀤𑀲𑁆𑀲𑀺𑀢𑁄, 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀦 𑀬𑀣𑀸 𑀫𑀦𑀲𑀺𑀓𑀭𑁄𑀢𑁄 𑀯𑀻𑀭𑀺𑀬𑀸𑀤𑀻𑀦𑀁 𑀫𑀦𑁆𑀤𑀓𑀺𑀘𑁆𑀘𑀢𑀸𑀬 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀩𑀮𑀯𑀁 𑀚𑀸𑀢𑀁, 𑀢𑀣𑀸 𑀅𑀫𑀦𑀲𑀺𑀓𑀸𑀭𑁂𑀦 𑀯𑀻𑀭𑀺𑀬𑀸𑀤𑀻𑀦𑀁 ¶ 𑀧𑀝𑀼𑀓𑀺𑀘𑁆𑀘𑀪𑀸𑀯𑀸𑀯𑀳𑁂𑀦 𑀫𑀦𑀲𑀺𑀓𑀸𑀭𑁂𑀦 ¶ 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁 𑀢𑁂𑀳𑀺 𑀲𑀫𑀭𑀲𑀁 𑀓𑀭𑁄𑀦𑁆𑀢𑁂𑀦 𑀳𑀸𑀧𑁂𑀢𑀩𑁆𑀩𑀁. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀺𑀦𑁆𑀤𑁆𑀭𑀺𑀬𑁂𑀲𑀼𑀧𑀺 𑀳𑀸𑀧𑀦𑀯𑀺𑀥𑀺 𑀯𑁂𑀤𑀺𑀢𑀩𑁆𑀩𑁄.

𑀯𑀓𑁆𑀓𑀮𑀺𑀢𑁆𑀣𑁂𑀭𑀯𑀢𑁆𑀣𑀽𑀢𑀺 𑀲𑁄 𑀳𑀺 𑀆𑀬𑀲𑁆𑀫𑀸 𑀲𑀤𑁆𑀥𑀸𑀥𑀺𑀫𑀼𑀢𑁆𑀢𑀢𑀸𑀬 𑀓𑀢𑀸𑀥𑀺𑀓𑀸𑀭𑁄 𑀲𑀢𑁆𑀣𑀼 𑀭𑀽𑀧𑀤𑀲𑁆𑀲𑀦𑀧𑁆𑀧𑀲𑀼𑀢𑁄 𑀏𑀯 𑀳𑀼𑀢𑁆𑀯𑀸 𑀯𑀺𑀳𑀭𑀦𑁆𑀢𑁄 𑀲𑀢𑁆𑀣𑀸𑀭𑀸 ‘‘𑀓𑀺𑀁 𑀢𑁂, 𑀯𑀓𑁆𑀓𑀮𑀺, 𑀇𑀫𑀺𑀦𑀸 𑀧𑀽𑀢𑀺𑀓𑀸𑀬𑁂𑀦 𑀤𑀺𑀝𑁆𑀞𑁂𑀦, 𑀬𑁄 𑀔𑁄, 𑀯𑀓𑁆𑀓𑀮𑀺, 𑀥𑀫𑁆𑀫𑀁 𑀧𑀲𑁆𑀲𑀢𑀺, 𑀲𑁄 𑀫𑀁 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁩.𑁮𑁭) 𑀦𑀬𑁂𑀦 𑀑𑀯𑀤𑀺𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑁂 𑀦𑀺𑀬𑁄𑀚𑀺𑀢𑁄𑀧𑀺 𑀢𑀁 𑀅𑀦𑀦𑀼𑀬𑀼𑀜𑁆𑀚𑀦𑁆𑀢𑁄 𑀧𑀡𑀸𑀫𑀺𑀢𑁄 𑀅𑀢𑁆𑀢𑀸𑀦𑀁 𑀯𑀺𑀦𑀺𑀧𑀸𑀢𑁂𑀢𑀼𑀁 𑀧𑀧𑀸𑀢𑀝𑁆𑀞𑀸𑀦𑀁 𑀅𑀪𑀺𑀭𑀼𑀳𑀺. 𑀅𑀣 𑀦𑀁 𑀲𑀢𑁆𑀣𑀸 𑀬𑀣𑀸𑀦𑀺𑀲𑀺𑀦𑁆𑀦𑁄𑀯 𑀑𑀪𑀸𑀲𑀯𑀺𑀲𑁆𑀲𑀚𑁆𑀚𑀦𑁂𑀦 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑁋

‘‘𑀧𑀸𑀫𑁄𑀚𑁆𑀚𑀩𑀳𑀼𑀮𑁄 𑀪𑀺𑀓𑁆𑀔𑀼, 𑀧𑀲𑀦𑁆𑀦𑁄 𑀩𑀼𑀤𑁆𑀥𑀲𑀸𑀲𑀦𑁂;

𑀅𑀥𑀺𑀕𑀘𑁆𑀙𑁂 𑀧𑀤𑀁 𑀲𑀦𑁆𑀢𑀁, 𑀲𑀗𑁆𑀔𑀸𑀭𑀽𑀧𑀲𑀫𑀁 𑀲𑀼𑀔’’𑀦𑁆𑀢𑀺. (𑀥. 𑀧. 𑁩𑁮𑁧) 𑁋

𑀕𑀸𑀣𑀁 𑀯𑀢𑁆𑀯𑀸 ‘‘𑀏𑀳𑀺, 𑀯𑀓𑁆𑀓𑀮𑀻’’𑀢𑀺 𑀆𑀳. 𑀲𑁄 𑀢𑁂𑀦𑁂𑀯 𑀅𑀫𑀢𑁂𑀦 𑀅𑀪𑀺𑀲𑀺𑀢𑁆𑀢𑁄 𑀳𑀝𑁆𑀞𑀢𑀼𑀝𑁆𑀞𑁄 𑀳𑀼𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀧𑀝𑁆𑀞𑀧𑁂𑀲𑀺, 𑀲𑀤𑁆𑀥𑀸𑀬 𑀧𑀦 𑀩𑀮𑀯𑀪𑀸𑀯𑁂𑀦 𑀯𑀺𑀧𑀲𑁆𑀲𑀦𑀸𑀯𑀻𑀣𑀺𑀁 𑀦 𑀑𑀢𑀭𑀺. 𑀢𑀁 𑀜𑀢𑁆𑀯𑀸 𑀪𑀕𑀯𑀸 𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑁆𑀧𑀝𑀺𑀧𑀸𑀤𑀦𑀸𑀬 𑀓𑀫𑁆𑀫𑀝𑁆𑀞𑀸𑀦𑀁 𑀲𑁄𑀥𑁂𑀢𑁆𑀯𑀸 𑀅𑀤𑀸𑀲𑀺. 𑀲𑁄 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀦𑀬𑁂 𑀞𑀢𑁆𑀯𑀸 𑀯𑀺𑀧𑀲𑁆𑀲𑀦𑀁 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀫𑀕𑁆𑀕𑀧𑁆𑀧𑀝𑀺𑀧𑀸𑀝𑀺𑀬𑀸 𑀅𑀭𑀳𑀢𑁆𑀢𑀁 𑀧𑀸𑀧𑀼𑀡𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀯𑀓𑁆𑀓𑀮𑀺𑀢𑁆𑀣𑁂𑀭𑀯𑀢𑁆𑀣𑀼 𑀘𑁂𑀢𑁆𑀣 𑀦𑀺𑀤𑀲𑁆𑀲𑀦’’𑀦𑁆𑀢𑀺. 𑀏𑀢𑁆𑀣𑀸𑀢𑀺 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀪𑀸𑀯𑁂 𑀲𑁂𑀲𑀺𑀦𑁆𑀤𑁆𑀭𑀺𑀬𑀸𑀦𑀁 𑀲𑀓𑀺𑀘𑁆𑀘𑀸𑀓𑀭𑀡𑁂. 𑀇𑀢𑀭𑀓𑀺𑀘𑁆𑀘𑀪𑁂𑀤𑀦𑁆𑀢𑀺 𑀉𑀧𑀝𑁆𑀞𑀸𑀦𑀸𑀤𑀺𑀓𑀺𑀘𑁆𑀘𑀯𑀺𑀲𑁂𑀲𑀁. 𑀧𑀲𑁆𑀲𑀤𑁆𑀥𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀦𑀁 𑀲𑀗𑁆𑀕𑀳𑁄. 𑀳𑀸𑀧𑁂𑀢𑀩𑁆𑀩𑀦𑁆𑀢𑀺 𑀬𑀣𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀩𑀮𑀯𑀪𑀸𑀯𑁄 𑀥𑀫𑁆𑀫𑀲𑀪𑀸𑀯𑀧𑀘𑁆𑀘𑀯𑁂𑀓𑁆𑀔𑀡𑁂𑀦 𑀳𑀸𑀬𑀢𑀺, 𑀏𑀯𑀁 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑀸 𑀧𑀲𑁆𑀲𑀤𑁆𑀥𑀺𑀆𑀤𑀺𑀪𑀸𑀯𑀦𑀸𑀬 𑀳𑀸𑀬𑀢𑀺 𑀲𑀫𑀸𑀥𑀺𑀧𑀓𑁆𑀔𑀺𑀬𑀢𑁆𑀢𑀸 𑀢𑀲𑁆𑀲𑀸. 𑀢𑀣𑀸 𑀳𑀺 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑀁 𑀓𑁄𑀲𑀚𑁆𑀚𑀧𑀸𑀢𑀢𑁄 𑀭𑀓𑁆𑀔𑀦𑁆𑀢𑀻 𑀯𑀻𑀭𑀺𑀬𑀸𑀤𑀺𑀪𑀸𑀯𑀦𑀸 𑀯𑀺𑀬 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀥𑀺𑀫𑀢𑁆𑀢𑀢𑀁 𑀉𑀤𑁆𑀥𑀘𑁆𑀘𑀧𑀸𑀢𑀢𑁄 𑀭𑀓𑁆𑀔𑀦𑁆𑀢𑀻 𑀧𑀲𑁆𑀲𑀤𑁆𑀥𑀸𑀤𑀺𑀪𑀸𑀯𑀦𑀸 𑀏𑀓𑀁𑀲𑀢𑁄 𑀳𑀸𑀧𑁂𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀲𑁆𑀲𑀤𑁆𑀥𑀸𑀤𑀺𑀪𑀸𑀯𑀦𑀸𑀬 𑀳𑀸𑀧𑁂𑀢𑀩𑁆𑀩’’𑀦𑁆𑀢𑀺.

𑀲𑁄𑀡𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀽𑀢𑀺 𑀲𑀼𑀔𑀼𑀫𑀸𑀮𑀲𑁄𑀡𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼. 𑀲𑁄 𑀳𑀺 𑀆𑀬𑀲𑁆𑀫𑀸 𑀲𑀢𑁆𑀣𑀼 𑀲𑀦𑁆𑀢𑀺𑀓𑁂 𑀓𑀫𑁆𑀫𑀝𑁆𑀞𑀸𑀦𑀁 𑀕𑀳𑁂𑀢𑁆𑀯𑀸 𑀲𑀻𑀢𑀯𑀦𑁂 𑀯𑀺𑀳𑀭𑀦𑁆𑀢𑁄 ‘‘𑀫𑀫 𑀲𑀭𑀻𑀭𑀁 𑀲𑀼𑀔𑀼𑀫𑀸𑀮𑀁, 𑀦 𑀘 𑀲𑀓𑁆𑀓𑀸 𑀲𑀼𑀔𑁂𑀦𑁂𑀯 𑀲𑀼𑀔𑀁 𑀅𑀥𑀺𑀕𑀦𑁆𑀢𑀼𑀁, 𑀓𑀺𑀮𑀫𑁂𑀢𑁆𑀯𑀸𑀧𑀺 𑀲𑀫𑀡𑀥𑀫𑁆𑀫𑁄 ¶ 𑀓𑀸𑀢𑀩𑁆𑀩𑁄’’𑀢𑀺 𑀞𑀸𑀦𑀘𑀗𑁆𑀓𑀫𑀫𑁂𑀯 𑀅𑀥𑀺𑀝𑁆𑀞𑀸𑀬 𑀧𑀥𑀸𑀦𑀫𑀦𑀼𑀬𑀼𑀜𑁆𑀚𑀦𑁆𑀢𑁄 𑀧𑀸𑀤𑀢𑀮𑁂𑀲𑀼 𑀨𑁄𑀝𑁂𑀲𑀼 𑀉𑀝𑁆𑀞𑀺𑀢𑁂𑀲𑀼𑀧𑀺 𑀯𑁂𑀤𑀦𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀤𑀴𑁆𑀳𑀯𑀻𑀭𑀺𑀬𑀁 𑀓𑀭𑁄𑀦𑁆𑀢𑁄 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑀸𑀬 𑀯𑀺𑀲𑁂𑀲𑀁 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀲𑀢𑁆𑀣𑀸 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀯𑀻𑀡𑀽𑀧𑀫𑁄𑀯𑀸𑀤𑁂𑀦 𑀑𑀯𑀤𑀺𑀢𑁆𑀯𑀸 ¶ 𑀯𑀻𑀭𑀺𑀬𑀲𑀫𑀢𑀸𑀬𑁄𑀚𑀦𑀯𑀺𑀥𑀺𑀁 𑀤𑀲𑁆𑀲𑁂𑀦𑁆𑀢𑁄 𑀓𑀫𑁆𑀫𑀝𑁆𑀞𑀸𑀦𑀁 𑀯𑀺𑀲𑁄𑀥𑁂𑀢𑁆𑀯𑀸 𑀕𑀺𑀚𑁆𑀛𑀓𑀽𑀝𑀁 𑀕𑀢𑁄. 𑀣𑁂𑀭𑁄𑀧𑀺 𑀲𑀢𑁆𑀣𑀸𑀭𑀸 𑀤𑀺𑀦𑁆𑀦𑀦𑀬𑁂𑀦 𑀯𑀻𑀭𑀺𑀬𑀲𑀫𑀢𑀁 𑀬𑁄𑀚𑁂𑀢𑁆𑀯𑀸 𑀪𑀸𑀯𑁂𑀦𑁆𑀢𑁄 𑀯𑀺𑀧𑀲𑁆𑀲𑀦𑀫𑁆𑀧𑀺 𑀉𑀲𑁆𑀲𑀼𑀓𑁆𑀓𑀸𑀧𑁂𑀢𑁆𑀯𑀸 𑀅𑀭𑀳𑀢𑁆𑀢𑁂 𑀧𑀢𑀺𑀝𑁆𑀞𑀸𑀲𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀲𑁄𑀡𑀢𑁆𑀣𑁂𑀭𑀲𑁆𑀲 𑀯𑀢𑁆𑀣𑀼 𑀤𑀲𑁆𑀲𑁂𑀢𑀩𑁆𑀩’’𑀦𑁆𑀢𑀺. 𑀲𑁂𑀲𑁂𑀲𑀼𑀧𑀻𑀢𑀺 𑀲𑀢𑀺𑀲𑀫𑀸𑀥𑀺𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑁂𑀲𑀼𑀧𑀺.

𑀲𑀫𑀢𑀦𑁆𑀢𑀺 𑀲𑀤𑁆𑀥𑀸𑀧𑀜𑁆𑀜𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀦𑀽𑀦𑀸𑀥𑀺𑀓𑀪𑀸𑀯𑀁, 𑀢𑀣𑀸 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀁. 𑀬𑀣𑀸 𑀳𑀺 𑀲𑀤𑁆𑀥𑀸𑀧𑀜𑁆𑀜𑀸𑀦𑀁 𑀯𑀺𑀲𑀼𑀁 𑀥𑀼𑀭𑀺𑀬𑀥𑀫𑁆𑀫𑀪𑀽𑀢𑀸𑀦𑀁 𑀓𑀺𑀘𑁆𑀘𑀢𑁄 𑀅𑀜𑁆𑀜𑀫𑀜𑁆𑀜𑀸𑀦𑀢𑀺𑀯𑀢𑁆𑀢𑀦𑀁 𑀯𑀺𑀲𑁂𑀲𑀢𑁄 𑀇𑀘𑁆𑀙𑀺𑀢𑀩𑁆𑀩𑀁, 𑀬𑀢𑁄 𑀦𑁂𑀲𑀁 𑀲𑀫𑀥𑀼𑀭𑀢𑀸𑀬 𑀅𑀧𑁆𑀧𑀦𑀸 𑀲𑀫𑁆𑀧𑀚𑁆𑀚𑀢𑀺, 𑀏𑀯𑀁 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀁 𑀓𑁄𑀲𑀚𑁆𑀚𑀼𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀸𑀦𑀁 𑀲𑀫𑀭𑀲𑀢𑀸𑀬 𑀲𑀢𑀺 𑀅𑀜𑁆𑀜𑀫𑀜𑁆𑀜𑀽𑀧𑀢𑁆𑀣𑀫𑁆𑀪𑀦𑀢𑁄 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀅𑀦𑁆𑀢𑀤𑁆𑀯𑀬𑀧𑀸𑀢𑀸𑀪𑀸𑀯𑁂𑀦 𑀲𑀫𑁆𑀫𑀤𑁂𑀯 𑀅𑀧𑁆𑀧𑀦𑀸 𑀇𑀚𑁆𑀛𑀢𑀺. 𑀩𑀮𑀯𑀲𑀤𑁆𑀥𑁄𑀢𑀺𑀆𑀤𑀺 𑀩𑁆𑀬𑀢𑀺𑀭𑁂𑀓𑀫𑀼𑀔𑁂𑀦 𑀯𑀼𑀢𑁆𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀲𑀫𑀢𑁆𑀣𑀦𑀁. 𑀢𑀲𑁆𑀲𑀢𑁆𑀣𑁄 𑁋 𑀬𑁄 𑀩𑀮𑀯𑀢𑀺𑀬𑀸 𑀲𑀤𑁆𑀥𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀯𑀺𑀲𑀤𑀜𑀸𑀡𑁄, 𑀲𑁄 𑀫𑀼𑀥𑀧𑁆𑀧𑀲𑀦𑁆𑀦𑁄 𑀳𑁄𑀢𑀺, 𑀦 𑀅𑀯𑁂𑀘𑁆𑀘𑀧𑁆𑀧𑀲𑀦𑁆𑀦𑁄. 𑀢𑀣𑀸 𑀳𑀺 𑀅𑀯𑀢𑁆𑀣𑀼𑀲𑁆𑀫𑀺𑀁 𑀧𑀲𑀻𑀤𑀢𑀺 𑀲𑁂𑀬𑁆𑀬𑀣𑀸𑀧𑀺 𑀢𑀺𑀢𑁆𑀣𑀺𑀬𑀲𑀸𑀯𑀓𑀸. 𑀓𑁂𑀭𑀸𑀝𑀺𑀓𑀧𑀓𑁆𑀔𑀦𑁆𑀢𑀺 𑀲𑀸𑀞𑁂𑀬𑁆𑀬𑀧𑀓𑁆𑀔𑀁 𑀪𑀚𑀢𑀺. 𑀲𑀤𑁆𑀥𑀸𑀳𑀻𑀦𑀸𑀬 𑀧𑀜𑁆𑀜𑀸𑀬 𑀅𑀢𑀺𑀥𑀸𑀯𑀦𑁆𑀢𑁄 ‘‘𑀤𑁂𑀬𑁆𑀬𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑁂𑀦 𑀯𑀺𑀦𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦𑀧𑀺 𑀤𑀸𑀦𑀫𑀬𑀁 𑀧𑀼𑀜𑁆𑀜𑀁 𑀳𑁄𑀢𑀻’’𑀢𑀺𑀆𑀤𑀻𑀦𑀺 𑀧𑀭𑀺𑀓𑀧𑁆𑀧𑁂𑀢𑀺 𑀳𑁂𑀢𑀼𑀧𑁆𑀧𑀝𑀺𑀭𑀽𑀧𑀓𑁂𑀳𑀺 𑀯𑀜𑁆𑀘𑀺𑀢𑁄, 𑀏𑀯𑀁𑀪𑀽𑀢𑁄 𑀲𑀼𑀓𑁆𑀔𑀢𑀓𑁆𑀓𑀯𑀺𑀮𑀼𑀢𑁆𑀢𑀘𑀺𑀢𑁆𑀢𑁄 𑀧𑀡𑁆𑀟𑀺𑀢𑀸𑀦𑀁 𑀯𑀘𑀦𑀁 𑀦𑀸𑀤𑀺𑀬𑀢𑀺, 𑀲𑀜𑁆𑀜𑀢𑁆𑀢𑀺𑀁 𑀦 𑀕𑀘𑁆𑀙𑀢𑀺. 𑀢𑁂𑀦𑀸𑀳 𑁋 ‘‘𑀪𑁂𑀲𑀚𑁆𑀚𑀲𑀫𑀼𑀝𑁆𑀞𑀺𑀢𑁄 𑀯𑀺𑀬 𑀭𑁄𑀕𑁄 𑀅𑀢𑁂𑀓𑀺𑀘𑁆𑀙𑁄 𑀳𑁄𑀢𑀻’’𑀢𑀺. 𑀬𑀣𑀸 𑀘𑁂𑀢𑁆𑀣 𑀲𑀤𑁆𑀥𑀸𑀧𑀜𑁆𑀜𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀫𑀪𑀸𑀯𑁄 𑀅𑀢𑁆𑀣𑀸𑀯𑀳𑁄, 𑀅𑀦𑀢𑁆𑀣𑀸𑀯𑀳𑁄 𑀯𑀺𑀲𑀫𑀪𑀸𑀯𑁄, 𑀏𑀯𑀁 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀯𑀺𑀓𑁆𑀔𑁂𑀧𑀸𑀯𑀳𑁄 𑀲𑀫𑀪𑀸𑀯𑁄, 𑀇𑀢𑀭𑁄 𑀯𑀺𑀓𑁆𑀔𑁂𑀧𑀸𑀯𑀳𑁄 𑀘𑀸𑀢𑀺 𑀓𑁄𑀲𑀚𑁆𑀚𑀁 𑀅𑀪𑀺𑀪𑀯𑀢𑀺, 𑀢𑁂𑀦 𑀅𑀧𑁆𑀧𑀦𑀁 𑀦 𑀧𑀸𑀧𑀼𑀡𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀤𑁆𑀥𑀘𑁆𑀘𑀁 𑀅𑀪𑀺𑀪𑀯𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀢𑀁 𑀉𑀪𑀬𑀦𑁆𑀢𑀺 𑀲𑀤𑁆𑀥𑀸𑀧𑀜𑁆𑀜𑀸𑀤𑁆𑀯𑀬𑀁 𑀲𑀫𑀸𑀥𑀺𑀯𑀻𑀭𑀺𑀬𑀤𑁆𑀯𑀬𑀜𑁆𑀘. 𑀲𑀫𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀲𑀫𑀭𑀲𑀁 𑀓𑀸𑀢𑀩𑁆𑀩𑀁.

𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲𑀸𑀢𑀺 𑀲𑀫𑀣𑀓𑀫𑁆𑀫𑀝𑁆𑀞𑀸𑀦𑀺𑀓𑀲𑁆𑀲. 𑀏𑀯𑀦𑁆𑀢𑀺 𑀏𑀯𑀁 𑀲𑀦𑁆𑀢𑁂, 𑀲𑀤𑁆𑀥𑀸𑀬 𑀣𑁄𑀓𑀁 𑀩𑀮𑀯𑀪𑀸𑀯𑁂 𑀲𑀢𑀻𑀢𑀺 𑀅𑀢𑁆𑀣𑁄. 𑀲𑀤𑁆𑀤𑀳𑀦𑁆𑀢𑁄𑀢𑀺 ‘‘𑀧𑀣𑀯𑀻 𑀧𑀣𑀯𑀻𑀢𑀺 𑀫𑀦𑀲𑀺𑀓𑀭𑀡𑀫𑀢𑁆𑀢𑁂𑀦 ¶ 𑀓𑀣𑀁 𑀛𑀸𑀦𑀼𑀧𑁆𑀧𑀢𑁆𑀢𑀻’’𑀢𑀺 𑀅𑀘𑀺𑀦𑁆𑀢𑁂𑀢𑁆𑀯𑀸 ‘‘𑀅𑀤𑁆𑀥𑀸 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀯𑀼𑀢𑁆𑀢𑀯𑀺𑀥𑀺 𑀇𑀚𑁆𑀛𑀺𑀲𑁆𑀲𑀢𑀻’’𑀢𑀺 𑀲𑀤𑁆𑀤𑀳𑀦𑁆𑀢𑁄 𑀲𑀤𑁆𑀥𑀁 𑀚𑀦𑁂𑀦𑁆𑀢𑁄. 𑀑𑀓𑀧𑁆𑀧𑁂𑀦𑁆𑀢𑁄𑀢𑀺 𑀆𑀭𑀫𑁆𑀫𑀡𑀁 𑀅𑀦𑀼𑀧𑁆𑀧𑀯𑀺𑀲𑀺𑀢𑁆𑀯𑀸 𑀯𑀺𑀬 𑀅𑀥𑀺𑀫𑀼𑀘𑁆𑀘𑀦𑀯𑀲𑁂𑀦 𑀅𑀯𑀓𑀧𑁆𑀧𑁂𑀦𑁆𑀢𑁄 𑀧𑀓𑁆𑀔𑀦𑁆𑀤𑀦𑁆𑀢𑁄. 𑀏𑀓𑀕𑁆𑀕𑀢𑀸 𑀩𑀮𑀯𑀢𑀻 𑀯𑀝𑁆𑀝𑀢𑀺 𑀲𑀫𑀸𑀥𑀺𑀧𑁆𑀧𑀥𑀸𑀦𑀢𑁆𑀢𑀸 𑀛𑀸𑀦𑀲𑁆𑀲. 𑀉𑀪𑀺𑀦𑁆𑀦𑀦𑁆𑀢𑀺 𑀲𑀫𑀸𑀥𑀺𑀧𑀜𑁆𑀜𑀸𑀦𑀁. 𑀲𑀫𑀸𑀥𑀺𑀓𑀫𑁆𑀫𑀺𑀓𑀲𑁆𑀲 𑀲𑀫𑀸𑀥𑀺𑀦𑁄 𑀅𑀥𑀺𑀫𑀢𑁆𑀢𑀢𑀸 𑀯𑀺𑀬 𑀧𑀜𑁆𑀜𑀸𑀬 𑀅𑀥𑀺𑀫𑀢𑁆𑀢𑀢𑀸𑀧𑀺 𑀇𑀘𑁆𑀙𑀺𑀢𑀩𑁆𑀩𑀸𑀢𑀺 𑀆𑀳 𑁋 ‘‘𑀲𑀫𑀢𑀸𑀬𑀧𑀻’’𑀢𑀺, 𑀲𑀫𑀪𑀸𑀯𑁂𑀦𑀧𑀻𑀢𑀺 𑀅𑀢𑁆𑀣𑁄. 𑀅𑀧𑁆𑀧𑀦𑀸𑀢𑀺 𑀮𑁄𑀓𑀺𑀬𑀅𑀧𑁆𑀧𑀦𑀸. 𑀢𑀣𑀸 𑀳𑀺 ‘‘𑀳𑁄𑀢𑀺𑀬𑁂𑀯𑀸’’𑀢𑀺 𑀲𑀸𑀲𑀗𑁆𑀓𑀁 𑀯𑀤𑀢𑀺. 𑀮𑁄𑀓𑀼𑀢𑁆𑀢𑀭𑀧𑁆𑀧𑀦𑀸 𑀧𑀦 𑀢𑁂𑀲𑀁 𑀲𑀫𑀪𑀸𑀯𑁂𑀦𑁂𑀯 𑀇𑀘𑁆𑀙𑀺𑀢𑀸. 𑀬𑀣𑀸𑀳 𑁋 ‘‘𑀲𑀫𑀣𑀯𑀺𑀧𑀲𑁆𑀲𑀦𑀁 𑀬𑀼𑀕𑀦𑀤𑁆𑀥𑀁 𑀪𑀸𑀯𑁂𑀢𑀻’’𑀢𑀺 (𑀅. 𑀦𑀺. 𑁪.𑁧𑁭𑁦; 𑀧𑀝𑀺. 𑀫. 𑁨.𑁫).

𑀬𑀤𑀺 ¶ 𑀯𑀺𑀲𑁂𑀲𑀢𑁄 𑀲𑀤𑁆𑀥𑀸𑀧𑀜𑁆𑀜𑀸𑀦𑀁 𑀲𑀫𑀸𑀥𑀺𑀯𑀻𑀭𑀺𑀬𑀸𑀦𑀜𑁆𑀘 𑀲𑀫𑀢𑀸𑀯 𑀇𑀘𑁆𑀙𑀺𑀢𑀸, 𑀓𑀣𑀁 𑀲𑀢𑀻𑀢𑀺 𑀆𑀳 𑁋 ‘‘𑀲𑀢𑀺 𑀧𑀦 𑀲𑀩𑁆𑀩𑀢𑁆𑀣 𑀩𑀮𑀯𑀢𑀻 𑀯𑀝𑁆𑀝𑀢𑀻’’𑀢𑀺. 𑀲𑀩𑁆𑀩𑀢𑁆𑀣𑀸𑀢𑀺 𑀮𑀻𑀦𑀼𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑁂𑀲𑀼 𑀧𑀜𑁆𑀘𑀲𑀼 𑀇𑀦𑁆𑀤𑁆𑀭𑀺𑀬𑁂𑀲𑀼. 𑀉𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑁂 𑀕𑀡𑁆𑀳𑀦𑁆𑀢𑁄 ‘‘𑀲𑀤𑁆𑀥𑀸𑀯𑀻𑀭𑀺𑀬𑀧𑀜𑁆𑀜𑀸𑀦’’𑀦𑁆𑀢𑀺 𑀆𑀳. 𑀅𑀜𑁆𑀜𑀣𑀸𑀧𑀻𑀢𑀺 𑀘 𑀕𑀳𑁂𑀢𑀩𑁆𑀩𑀸 𑀲𑀺𑀬𑀸. 𑀢𑀣𑀸 𑀳𑀺 𑀓𑁄𑀲𑀚𑁆𑀚𑀧𑀓𑁆𑀔𑀺𑀓𑁂𑀦 𑀘 𑀲𑀫𑀸𑀥𑀺𑀦𑀸𑀇𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀦 ‘‘𑀧𑀲𑁆𑀲𑀤𑁆𑀥𑀺𑀲𑀫𑀸𑀥𑀺𑀉𑀧𑁂𑀓𑁆𑀔𑀸𑀳𑀻’’𑀢𑀺. 𑀲𑀸𑀢𑀺 𑀲𑀢𑀺. 𑀲𑀩𑁆𑀩𑁂𑀲𑀼 𑀭𑀸𑀚𑀓𑀫𑁆𑀫𑁂𑀲𑀼 𑀦𑀺𑀬𑀼𑀢𑁆𑀢𑁄 𑀲𑀩𑁆𑀩𑀓𑀫𑁆𑀫𑀺𑀓𑁄. 𑀢𑁂𑀦𑀸𑀢𑀺 𑀢𑁂𑀦 𑀲𑀩𑁆𑀩𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑀢𑁆𑀣𑁂𑀦 𑀓𑀸𑀭𑀡𑁂𑀦. 𑀆𑀳 𑀅𑀝𑁆𑀞𑀓𑀣𑀸𑀬𑀁. 𑀲𑀩𑁆𑀩𑀢𑁆𑀣 𑀦𑀺𑀬𑀼𑀢𑁆𑀢𑀸 𑀲𑀩𑁆𑀩𑀢𑁆𑀣𑀺𑀓𑀸 𑀲𑀩𑁆𑀩𑀢𑁆𑀣 𑀮𑀻𑀦𑁂 𑀉𑀤𑁆𑀥𑀢𑁂 𑀘 𑀘𑀺𑀢𑁆𑀢𑁂 𑀇𑀘𑁆𑀙𑀺𑀢𑀩𑁆𑀩𑀢𑁆𑀢𑀸, 𑀲𑀩𑁆𑀩𑁂𑀦 𑀯𑀸 𑀮𑀻𑀦𑀼𑀤𑁆𑀥𑀘𑁆𑀘𑀧𑀓𑁆𑀔𑀺𑀬𑁂𑀦 𑀩𑁄𑀚𑁆𑀛𑀗𑁆𑀕𑀕𑀡𑁂𑀦 𑀅𑀢𑁆𑀣𑁂𑀢𑀩𑁆𑀩𑀸𑀢𑀺 𑀲𑀩𑁆𑀩𑀢𑁆𑀣𑀸, 𑀲𑀸𑀯 𑀲𑀩𑁆𑀩𑀢𑁆𑀣𑀺𑀓𑀸. 𑀘𑀺𑀢𑁆𑀢𑀦𑁆𑀢𑀺 𑀓𑀼𑀲𑀮𑀘𑀺𑀢𑁆𑀢𑀁. 𑀢𑀲𑁆𑀲 𑀳𑀺 𑀲𑀢𑀺𑀧𑀝𑀺𑀲𑀭𑀡𑀁 𑀧𑀭𑀸𑀬𑀡𑀁 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬. 𑀢𑁂𑀦𑀸𑀳 𑁋 ‘‘𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸’’𑀢𑀺𑀆𑀤𑀺.

𑀔𑀦𑁆𑀥𑀸𑀤𑀺𑀪𑁂𑀤𑁂𑀲𑀼 𑀅𑀦𑁄𑀕𑀸𑀴𑁆𑀳𑀧𑀜𑁆𑀜𑀸𑀦𑀦𑁆𑀢𑀺 𑀧𑀭𑀺𑀬𑀢𑁆𑀢𑀺𑀩𑀸𑀳𑀼𑀲𑀘𑁆𑀘𑀯𑀲𑁂𑀦𑀧𑀺 𑀔𑀦𑁆𑀥𑀸𑀬𑀢𑀦𑀸𑀤𑀻𑀲𑀼 𑀅𑀧𑁆𑀧𑀢𑀺𑀝𑁆𑀞𑀺𑀢𑀩𑀼𑀤𑁆𑀥𑀻𑀦𑀁. 𑀩𑀳𑀼𑀲𑁆𑀲𑀼𑀢𑀲𑁂𑀯𑀦𑀸 𑀳𑀺 𑀲𑀼𑀢𑀫𑀬𑀜𑀸𑀡𑀸𑀯𑀳𑀸. 𑀢𑀭𑀼𑀡𑀯𑀺𑀧𑀲𑁆𑀲𑀦𑀸𑀲𑀫𑀗𑁆𑀕𑀻𑀧𑀺 𑀪𑀸𑀯𑀦𑀸𑀫𑀬𑀜𑀸𑀡𑁂 𑀞𑀺𑀢𑀢𑁆𑀢𑀸 𑀏𑀓𑀁𑀲𑀢𑁄 𑀧𑀜𑁆𑀜𑀯𑀸 𑀏𑀯 𑀦𑀸𑀫 𑀳𑁄𑀢𑀻𑀢𑀺 𑀆𑀳 𑁋 ‘‘𑀲𑀫𑀧𑀜𑁆𑀜𑀸𑀲…𑀧𑁂… 𑀧𑀼𑀕𑁆𑀕𑀮𑀲𑁂𑀯𑀦𑀸’’𑀢𑀺. 𑀜𑁂𑀬𑁆𑀬𑀥𑀫𑁆𑀫𑀲𑁆𑀲 𑀕𑀫𑁆𑀪𑀻𑀭𑀪𑀸𑀯𑀯𑀲𑁂𑀦 𑀢𑀧𑁆𑀧𑀭𑀺𑀘𑁆𑀙𑁂𑀤𑀓𑀜𑀸𑀡𑀲𑁆𑀲 𑀕𑀫𑁆𑀪𑀻𑀭𑀪𑀸𑀯𑀕𑁆𑀕𑀳𑀡𑀦𑁆𑀢𑀺 𑀆𑀳 𑁋 ‘‘𑀕𑀫𑁆𑀪𑀻𑀭𑁂𑀲𑀼 𑀔𑀦𑁆𑀥𑀸𑀤𑀻𑀲𑀼 𑀧𑀯𑀢𑁆𑀢𑀸𑀬 𑀕𑀫𑁆𑀪𑀻𑀭𑀧𑀜𑁆𑀜𑀸𑀬𑀸’’𑀢𑀺. 𑀢𑀜𑁆𑀳𑀺 𑀜𑁂𑀬𑁆𑀬𑀁 𑀢𑀸𑀤𑀺𑀲𑀸𑀬 𑀧𑀜𑁆𑀜𑀸𑀬 𑀘𑀭𑀺𑀢𑀩𑁆𑀩𑀢𑁄 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀁. 𑀢𑀲𑁆𑀲𑀸 𑀯𑀸 𑀧𑀜𑁆𑀜𑀸𑀬 𑀢𑀢𑁆𑀣 𑀧𑀪𑁂𑀤𑀢𑁄 𑀧𑀯𑀢𑁆𑀢𑀺 𑀕𑀫𑁆𑀪𑀻𑀭𑀜𑀸𑀡𑀘𑀭𑀺𑀬𑀸, 𑀢𑀲𑁆𑀲𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀢𑀺 𑀆𑀳 𑁋 ‘‘𑀕𑀫𑁆𑀪𑀻𑀭𑀧𑀜𑁆𑀜𑀸𑀬 𑀧𑀪𑁂𑀤𑀧𑀘𑁆𑀘𑀯𑁂𑀓𑁆𑀔𑀡𑀸’’𑀢𑀺.

𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀓𑀫𑁆𑀫𑀓𑀸𑀭𑀡𑀁 ¶ 𑀦𑀺𑀭𑀬𑁂 𑀦𑀺𑀩𑁆𑀩𑀢𑁆𑀢𑀲𑀢𑁆𑀢𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀲𑀩𑁆𑀩𑀧𑀞𑀫𑀁 𑀓𑀭𑁄𑀦𑁆𑀢𑀻𑀢𑀺 𑀤𑁂𑀯𑀤𑀽𑀢𑀲𑀼𑀢𑁆𑀢𑀸𑀤𑀻𑀲𑀼 𑀆𑀤𑀺𑀢𑁄 𑀯𑀼𑀢𑁆𑀢𑀢𑁆𑀢𑀸 𑀘 𑀆𑀳 𑁋 ‘‘𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀓𑀫𑁆𑀫𑀓𑀸𑀭𑀡𑀢𑁄 𑀧𑀝𑁆𑀞𑀸𑀬𑀸’’𑀢𑀺. 𑀲𑀓𑀝𑀯𑀳𑀦𑀸𑀤𑀺𑀓𑀸𑀮𑁂𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀢𑀤𑀜𑁆𑀜𑀁 𑀫𑀦𑀼𑀲𑁆𑀲𑁂𑀳𑀺 𑀢𑀺𑀭𑀘𑁆𑀙𑀸𑀦𑁂𑀳𑀺 𑀘 𑀯𑀺𑀩𑀸𑀥𑀺𑀢𑀩𑁆𑀩𑀓𑀸𑀮𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀓𑀁 𑀩𑀼𑀤𑁆𑀥𑀦𑁆𑀢𑀭𑀦𑁆𑀢𑀺 𑀇𑀤𑀁 𑀅𑀧𑀭𑀸𑀧𑀭𑁂𑀲𑀼 𑀧𑁂𑀢𑁂𑀲𑀼𑀬𑁂𑀯 𑀉𑀧𑁆𑀧𑀚𑁆𑀚𑀦𑀓𑀲𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀁, 𑀏𑀓𑀘𑁆𑀘𑀸𑀦𑀁 𑀯𑀸 𑀧𑁂𑀢𑀸𑀦𑀁 𑀏𑀓𑀘𑁆𑀘𑀢𑀺𑀭𑀘𑁆𑀙𑀸𑀦𑀸𑀦𑀁 𑀯𑀺𑀬 𑀤𑀻𑀖𑀸𑀬𑀼𑀓𑀢𑀸 𑀲𑀺𑀬𑀸𑀢𑀺 𑀢𑀣𑀸 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀓𑀸𑀴𑁄 𑀦𑀸𑀕𑀭𑀸𑀚𑀸 𑀘𑀢𑀼𑀦𑁆𑀦𑀁 𑀩𑀼𑀤𑁆𑀥𑀸𑀦𑀁 𑀲𑀫𑁆𑀫𑀼𑀔𑀻𑀪𑀸𑀯𑀁 𑀮𑀪𑀺𑀢𑁆𑀯𑀸 𑀞𑀺𑀢𑁄𑀧𑀺 𑀫𑁂𑀢𑁆𑀢𑁂𑀬𑁆𑀬𑀲𑁆𑀲𑀧𑀺 𑀪𑀕𑀯𑀢𑁄 𑀲𑀫𑁆𑀫𑀼𑀔𑀻𑀪𑀸𑀯𑀁 𑀮𑀪𑀺𑀲𑁆𑀲𑀢𑀻𑀢𑀺 𑀯𑀤𑀦𑁆𑀢𑀺, 𑀬𑀢𑀲𑁆𑀲 𑀓𑀧𑁆𑀧𑀸𑀬𑀼𑀓𑀢𑀸 𑀯𑀼𑀢𑁆𑀢𑀸.

𑀏𑀯𑀁 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀦𑁄𑀢𑀺 𑀯𑀻𑀭𑀺𑀬𑀸𑀬𑀢𑁆𑀢𑁄 𑀏𑀯 𑀲𑀩𑁆𑀩𑁄 𑀮𑁄𑀓𑀺𑀬𑁄 𑀮𑁄𑀓𑀼𑀢𑁆𑀢𑀭𑁄 𑀘 𑀯𑀺𑀲𑁂𑀲𑀸𑀥𑀺𑀕𑀫𑁄𑀢𑀺 𑀏𑀯𑀁 𑀯𑀻𑀭𑀺𑀬𑁂 𑀆𑀦𑀺𑀲𑀁𑀲𑀤𑀲𑁆𑀲𑀦𑀲𑀻𑀮𑀲𑁆𑀲. 𑀕𑀫𑀦𑀯𑀻𑀣𑀺𑀦𑁆𑀢𑀺 𑀲𑀧𑀼𑀩𑁆𑀩𑀪𑀸𑀕𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀧𑀝𑀺𑀧𑀤𑀁 ¶ , 𑀲𑀳 𑀯𑀺𑀧𑀲𑁆𑀲𑀦𑀸𑀬 𑀅𑀭𑀺𑀬𑀫𑀕𑁆𑀕𑀧𑁆𑀧𑀝𑀺𑀧𑀸𑀝𑀺, 𑀲𑀢𑁆𑀢𑀯𑀺𑀲𑀼𑀤𑁆𑀥𑀺𑀧𑀭𑀫𑁆𑀧𑀭𑀸 𑀯𑀸. 𑀲𑀸 𑀳𑀺 ‘‘𑀪𑀺𑀓𑁆𑀔𑀼𑀦𑁄 𑀯𑀝𑁆𑀝𑀦𑀺𑀬𑁆𑀬𑀸𑀦𑀸𑀬 𑀕𑀦𑁆𑀢𑀩𑁆𑀩𑀸 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀸 𑀧𑀝𑀺𑀧𑀤𑀸’’𑀢𑀺 𑀓𑀢𑁆𑀯𑀸 𑀕𑀫𑀦𑀯𑀻𑀣𑀺 𑀦𑀸𑀫.

𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑁄𑀢𑀺 𑀬𑀣𑀸 𑀢𑀣𑀸 𑀓𑀸𑀬𑀲𑁆𑀲 𑀤𑀴𑁆𑀳𑀻𑀓𑀫𑁆𑀫𑀧𑁆𑀧𑀲𑀼𑀢𑁄. 𑀧𑀺𑀡𑁆𑀟𑀧𑀸𑀢𑀦𑁆𑀢𑀺 𑀭𑀝𑁆𑀞𑀧𑀺𑀡𑁆𑀟𑀁. 𑀧𑀘𑁆𑀘𑀬𑀤𑀸𑀬𑀓𑀸𑀦𑀁 𑀅𑀢𑁆𑀢𑀦𑀺 𑀓𑀸𑀭𑀲𑁆𑀲 𑀅𑀢𑁆𑀢𑀦𑁄 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀫𑀳𑀧𑁆𑀨𑀮𑀪𑀸𑀯𑀲𑁆𑀲 𑀓𑀭𑀡𑁂𑀦 𑀧𑀺𑀡𑁆𑀟𑀲𑁆𑀲 𑀪𑀺𑀓𑁆𑀔𑀸𑀬 𑀧𑀝𑀺𑀧𑀽𑀚𑀦𑀸 𑀧𑀺𑀡𑁆𑀟𑀧𑀸𑀢𑀸𑀧𑀘𑀸𑀬𑀦𑀁.

𑀦𑀻𑀳𑀭𑀦𑁆𑀢𑁄𑀢𑀺 𑀧𑀢𑁆𑀢𑀢𑁆𑀣𑀯𑀺𑀓𑀢𑁄 𑀦𑀻𑀳𑀭𑀦𑁆𑀢𑁄. 𑀢𑀁 𑀲𑀤𑁆𑀤𑀁 𑀲𑀼𑀢𑁆𑀯𑀸𑀢𑀺 𑀢𑀁 𑀉𑀧𑀸𑀲𑀺𑀓𑀸𑀬 𑀯𑀘𑀦𑀁 𑀧𑀡𑁆𑀡𑀲𑀸𑀮𑀸𑀤𑁆𑀯𑀸𑀭𑁂 𑀞𑀺𑀢𑁄𑀯 𑀧𑀜𑁆𑀘𑀸𑀪𑀺𑀜𑁆𑀜𑀢𑀸𑀬 𑀤𑀺𑀩𑁆𑀩𑀲𑁄𑀢𑁂𑀦 𑀲𑀼𑀢𑁆𑀯𑀸. 𑀫𑀦𑀼𑀲𑁆𑀲𑀲𑀫𑁆𑀧𑀢𑁆𑀢𑀺, 𑀤𑀺𑀩𑁆𑀩𑀲𑀫𑁆𑀧𑀢𑁆𑀢𑀺, 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀻𑀢𑀺 𑀇𑀫𑀸 𑀢𑀺𑀲𑁆𑀲𑁄 𑀲𑀫𑁆𑀧𑀢𑁆𑀢𑀺𑀬𑁄. 𑀤𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻𑀢𑀺 𑀢𑀬𑀺 𑀓𑀢𑁂𑀦 𑀤𑀸𑀦𑀫𑀬𑁂𑀦 𑀯𑁂𑀬𑁆𑀬𑀸𑀯𑀘𑁆𑀘𑀫𑀬𑁂𑀦 𑀘 𑀧𑀼𑀜𑁆𑀜𑀓𑀫𑁆𑀫𑁂𑀦 𑀔𑁂𑀢𑁆𑀢𑀯𑀺𑀲𑁂𑀲𑀪𑀸𑀯𑀽𑀧𑀕𑀫𑀦𑁂𑀦 𑀅𑀧𑀭𑀸𑀧𑀭𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀲𑀫𑁆𑀧𑀢𑁆𑀢𑀺𑀬𑁄 𑀅𑀦𑁆𑀢𑁂 𑀦𑀺𑀩𑁆𑀩𑀸𑀦𑀲𑀫𑁆𑀧𑀢𑁆𑀢𑀺𑀜𑁆𑀘 𑀤𑀸𑀢𑀼𑀁 𑀲𑀓𑁆𑀔𑀺𑀲𑁆𑀲𑀲𑀻𑀢𑀺 𑀣𑁂𑀭𑁄 𑀅𑀢𑁆𑀢𑀸𑀦𑀁 𑀧𑀼𑀘𑁆𑀙𑀢𑀺. 𑀲𑀺𑀢𑀁 𑀓𑀭𑁄𑀦𑁆𑀢𑁄𑀢𑀺 ‘‘𑀅𑀓𑀺𑀘𑁆𑀙𑁂𑀦𑁂𑀯 𑀫𑀬𑀸 𑀯𑀝𑁆𑀝𑀤𑀼𑀓𑁆𑀔𑀁 𑀲𑀫𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀸𑀯𑀲𑀸𑀦𑁂 𑀲𑀜𑁆𑀚𑀸𑀢𑀧𑀸𑀫𑁄𑀚𑁆𑀚𑀯𑀲𑁂𑀦 𑀲𑀺𑀢𑀁 𑀓𑀭𑁄𑀦𑁆𑀢𑁄.

𑀦𑀺𑀧𑁆𑀧𑀭𑀺𑀲𑁆𑀲𑀬𑀓𑀸𑀮𑁄𑀢𑀺 𑀦𑀺𑀭𑀼𑀧𑀤𑁆𑀤𑀯𑀓𑀸𑀮𑁄, 𑀢𑀤𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀼𑀮𑀪𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀧𑀘𑁆𑀘𑀬𑀳𑁂𑀢𑀼𑀓𑀸 𑀘𑀺𑀢𑁆𑀢𑀧𑀻𑀴𑀸 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀲𑁆𑀲𑀦𑁆𑀢𑀸𑀦𑀁𑀬𑁂𑀯𑀸𑀢𑀺 𑀅𑀦𑀸𑀤𑀭𑁂 𑀲𑀸𑀫𑀺𑀯𑀘𑀦𑀁. 𑀔𑀻𑀭𑀥𑁂𑀦𑀼𑀦𑁆𑀢𑀺 𑀔𑀻𑀭𑀤𑀸𑀬𑀺𑀓𑀁 𑀥𑁂𑀦𑀼𑀁 ¶ . 𑀓𑀺𑀜𑁆𑀘𑀺𑀤𑁂𑀯 𑀓𑀢𑁆𑀯𑀸𑀢𑀺 𑀓𑀺𑀜𑁆𑀘𑀺𑀤𑁂𑀯 𑀪𑀢𑀺𑀓𑀫𑁆𑀫𑀁 𑀓𑀢𑁆𑀯𑀸. 𑀉𑀘𑁆𑀙𑀼𑀬𑀦𑁆𑀢𑀓𑀫𑁆𑀫𑀦𑁆𑀢𑀺 𑀉𑀘𑁆𑀙𑀼𑀬𑀦𑁆𑀢𑀲𑀸𑀮𑀸𑀬 𑀓𑀸𑀢𑀩𑁆𑀩𑀁 𑀓𑀺𑀘𑁆𑀘𑀁. 𑀢𑀫𑁂𑀯 𑀫𑀕𑁆𑀕𑀦𑁆𑀢𑀺 𑀉𑀧𑀸𑀲𑀓𑁂𑀦 𑀧𑀝𑀺𑀧𑀦𑁆𑀦𑀫𑀕𑁆𑀕𑀁. 𑀉𑀧𑀓𑀝𑁆𑀞𑀸𑀬𑀸𑀢𑀺 𑀆𑀲𑀦𑁆𑀦𑀸𑀬. 𑀯𑀺𑀧𑁆𑀧𑀝𑀺𑀧𑀦𑁆𑀦𑀦𑁆𑀢𑀺 𑀚𑀸𑀢𑀺𑀥𑀫𑁆𑀫𑀓𑀼𑀮𑀥𑀫𑁆𑀫𑀸𑀤𑀺𑀮𑀗𑁆𑀖𑀦𑁂𑀦 𑀅𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑀁. 𑀏𑀯𑀦𑁆𑀢𑀺 𑀬𑀣𑀸 𑀅𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀧𑀼𑀢𑁆𑀢𑁄 𑀢𑀸𑀬 𑀏𑀯 𑀅𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀓𑀼𑀮𑀲𑀦𑁆𑀢𑀸𑀦𑀢𑁄 𑀩𑀸𑀳𑀺𑀭𑁄 𑀳𑀼𑀢𑁆𑀯𑀸 𑀧𑀺𑀢𑀼 𑀲𑀦𑁆𑀢𑀺𑀓𑀸 𑀤𑀸𑀬𑀚𑁆𑀚𑀲𑁆𑀲 𑀦 𑀪𑀸𑀕𑀻, 𑀏𑀯𑀁 𑀓𑀼𑀲𑀻𑀢𑁄𑀧𑀺 𑀢𑁂𑀦𑁂𑀯 𑀓𑀼𑀲𑀻𑀢𑀪𑀸𑀯𑁂𑀦 𑀦 𑀲𑀫𑁆𑀫𑀸𑀧𑀝𑀺𑀧𑀦𑁆𑀦𑁄 𑀲𑀢𑁆𑀣𑀼 𑀲𑀦𑁆𑀢𑀺𑀓𑀸 𑀮𑀤𑁆𑀥𑀩𑁆𑀩𑀅𑀭𑀺𑀬𑀥𑀦𑀤𑀸𑀬𑀚𑁆𑀚𑀲𑁆𑀲 𑀦 𑀪𑀸𑀕𑀻. 𑀆𑀭𑀤𑁆𑀥𑀯𑀻𑀭𑀺𑀬𑁄𑀯 𑀮𑀪𑀢𑀺 𑀲𑀫𑁆𑀫𑀸𑀧𑀝𑀺𑀧𑀚𑁆𑀚𑀦𑀢𑁄. 𑀉𑀧𑁆𑀧𑀚𑁆𑀚𑀢𑀺 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑁄𑀢𑀺 𑀬𑁄𑀚𑀦𑀸, 𑀏𑀯𑀁 𑀲𑀩𑁆𑀩𑀢𑁆𑀣.

𑀫𑀳𑀸𑀢𑀺 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀫𑀳𑀦𑁆𑀢𑁄 𑀯𑀺𑀧𑀼𑀮𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑁄. 𑀢𑀁 𑀧𑀦𑀲𑁆𑀲 𑀕𑀼𑀡𑀫𑀳𑀢𑁆𑀢𑀁 𑀤𑀲𑀲𑀳𑀲𑁆𑀲𑀺𑀮𑁄𑀓𑀥𑀸𑀢𑀼𑀓𑀫𑁆𑀧𑀦𑁂𑀦 𑀮𑁄𑀓𑁂 𑀧𑀸𑀓𑀝𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀢𑁆𑀣𑀼𑀦𑁄 𑀳𑀻’’𑀢𑀺𑀆𑀤𑀺𑀫𑀸𑀳.

𑀬𑀲𑁆𑀫𑀸 ¶ 𑀲𑀢𑁆𑀣𑀼𑀲𑀸𑀲𑀦𑁂 𑀧𑀩𑁆𑀩𑀚𑀺𑀢𑀲𑁆𑀲 𑀧𑀩𑁆𑀩𑀚𑁆𑀚𑀽𑀧𑀕𑀫𑀦𑁂𑀦 𑀲𑀓𑁆𑀬𑀧𑀼𑀢𑁆𑀢𑀺𑀬𑀪𑀸𑀯𑁄 𑀲𑀜𑁆𑀚𑀸𑀬𑀢𑀺, 𑀢𑀲𑁆𑀫𑀸 𑀩𑀼𑀤𑁆𑀥𑀧𑀼𑀢𑁆𑀢𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀲𑀫𑁆𑀪𑀺𑀦𑁆𑀦𑀸𑀬𑀸’’𑀢𑀺𑀆𑀤𑀺𑀫𑀸𑀳.

𑀅𑀮𑀲𑀸𑀦𑀁 𑀪𑀸𑀯𑀦𑀸𑀬 𑀦𑀸𑀫𑀫𑀢𑁆𑀢𑀫𑁆𑀧𑀺 𑀅𑀚𑀸𑀦𑀦𑁆𑀢𑀸𑀦𑀁 𑀓𑀸𑀬𑀤𑀴𑁆𑀳𑀻𑀩𑀳𑀼𑀮𑀸𑀦𑀁 𑀬𑀸𑀯𑀤𑀢𑁆𑀣𑀁 𑀪𑀼𑀜𑁆𑀚𑀺𑀢𑁆𑀯𑀸 𑀲𑁂𑀬𑁆𑀬𑀲𑀼𑀔𑀸𑀤𑀺𑀅𑀦𑀼𑀬𑀼𑀜𑁆𑀚𑀦𑀓𑀸𑀦𑀁 𑀢𑀺𑀭𑀘𑁆𑀙𑀸𑀦𑀕𑀢𑀺𑀓𑀸𑀦𑀁 𑀧𑀼𑀕𑁆𑀕𑀮𑀸𑀦𑀁 𑀤𑀽𑀭𑀢𑁄 𑀯𑀚𑁆𑀚𑀦𑀸 𑀓𑀼𑀲𑀻𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀸𑀢𑀺 𑀆𑀳 𑁋 ‘‘𑀓𑀼𑀘𑁆𑀙𑀺𑀁 𑀧𑀽𑀭𑁂𑀢𑁆𑀯𑀸 𑀞𑀺𑀢𑀅𑀚𑀕𑀭𑀲𑀤𑀺𑀲𑁂’’𑀢𑀺𑀆𑀤𑀺. ‘‘𑀤𑀺𑀯𑀲𑀁 𑀘𑀗𑁆𑀓𑀫𑁂𑀦 𑀦𑀺𑀲𑀚𑁆𑀚𑀸𑀬 𑀆𑀯𑀭𑀡𑀻𑀬𑁂𑀳𑀺 𑀥𑀫𑁆𑀫𑁂𑀳𑀺 𑀘𑀺𑀢𑁆𑀢𑀁 𑀧𑀭𑀺𑀲𑁄𑀥𑁂𑀲𑁆𑀲𑀸𑀫𑀸’’𑀢𑀺𑀆𑀤𑀺𑀦𑀸 𑀪𑀸𑀯𑀦𑀸𑀭𑀫𑁆𑀪𑀯𑀲𑁂𑀦 𑀆𑀭𑀤𑁆𑀥𑀯𑀻𑀭𑀺𑀬𑀸𑀦𑀁 𑀤𑀴𑁆𑀳𑀧𑀭𑀓𑁆𑀓𑀫𑀸𑀦𑀁 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀦𑀸 𑀆𑀭𑀤𑁆𑀥𑀯𑀻𑀭𑀺𑀬𑀧𑀼𑀕𑁆𑀕𑀮𑀲𑁂𑀯𑀦𑀸𑀢𑀺 𑀆𑀳 𑁋 ‘‘𑀆𑀭𑀤𑁆𑀥𑀯𑀻𑀭𑀺𑀬𑁂’’𑀢𑀺𑀆𑀤𑀺. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁬𑁪-𑁬𑁫) 𑀧𑀦 𑀚𑀸𑀢𑀺𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸 𑀲𑀩𑁆𑀭𑀳𑁆𑀫𑀘𑀸𑀭𑀺𑀫𑀳𑀢𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸𑀢𑀺 𑀇𑀤𑀁 𑀤𑁆𑀯𑀬𑀁 𑀦 𑀕𑀳𑀺𑀢𑀁, 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀢𑀸 𑀲𑀫𑁆𑀫𑀧𑁆𑀧𑀥𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀢𑀸𑀢𑀺 𑀇𑀤𑀁 𑀤𑁆𑀯𑀬𑀁 𑀕𑀳𑀺𑀢𑀁. 𑀢𑀢𑁆𑀣 𑀆𑀦𑀺𑀲𑀁𑀲𑀤𑀲𑁆𑀲𑀸𑀯𑀺𑀢𑀸𑀬 𑀏𑀯 𑀲𑀫𑁆𑀫𑀧𑁆𑀧𑀥𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀸 𑀕𑀳𑀺𑀢𑀸 𑀳𑁄𑀢𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀯𑀺𑀲𑁂𑀲𑀸𑀥𑀺𑀕𑀫𑀲𑁆𑀲 𑀯𑀻𑀭𑀺𑀬𑀸𑀬𑀢𑁆𑀢𑀢𑀸𑀤𑀲𑁆𑀲𑀦𑀪𑀸𑀯𑀢𑁄, 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀁 𑀧𑀦 𑀢𑀤𑀥𑀺𑀫𑀼𑀢𑁆𑀢𑀢𑀸𑀬 𑀏𑀯 𑀕𑀳𑀺𑀢𑀁 𑀳𑁄𑀢𑀺. 𑀯𑀻𑀭𑀺𑀬𑀼𑀧𑁆𑀧𑀸𑀤𑀦𑁂 𑀬𑀼𑀢𑁆𑀢𑀧𑁆𑀧𑀬𑀼𑀢𑁆𑀢𑀲𑁆𑀲 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀁 𑀅𑀢𑁆𑀣𑀲𑀺𑀤𑁆𑀥𑀫𑁂𑀯𑀸𑀢𑀺. 𑀢𑀢𑁆𑀣 ¶ 𑀣𑀺𑀦𑀫𑀺𑀤𑁆𑀥𑀯𑀺𑀦𑁄𑀤𑀦𑀓𑀼𑀲𑀻𑀢𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀆𑀭𑀤𑁆𑀥𑀯𑀻𑀭𑀺𑀬𑀧𑀼𑀕𑁆𑀕𑀮𑀲𑁂𑀯𑀦𑀢𑀤𑀥𑀺- 𑀫𑀼𑀢𑁆𑀢𑀢𑀸𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀧𑀘𑁆𑀘𑀬𑀽𑀧𑀲𑀁𑀳𑀸𑀭𑀯𑀲𑁂𑀦 𑀅𑀧𑀸𑀬𑀪𑀬𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀬𑁄 𑀲𑀫𑀼𑀢𑁆𑀢𑁂𑀚𑀦𑀯𑀲𑁂𑀦 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑁆𑀧𑀸𑀤𑀓𑀸 𑀤𑀝𑁆𑀞𑀩𑁆𑀩𑀸.

𑀩𑀼𑀤𑁆𑀥𑀸𑀦𑀼𑀲𑁆𑀲𑀢𑀺𑀬𑀸 𑀉𑀧𑀘𑀸𑀭𑀲𑀫𑀸𑀥𑀺𑀦𑀺𑀝𑁆𑀞𑀢𑁆𑀢𑀸 𑀯𑀼𑀢𑁆𑀢𑀁 𑁋 ‘‘𑀬𑀸𑀯 𑀉𑀧𑀘𑀸𑀭𑀸’’𑀢𑀺. 𑀲𑀓𑀮𑀲𑀭𑀻𑀭𑀁 𑀨𑀭𑀫𑀸𑀦𑁄𑀢𑀺 𑀧𑀻𑀢𑀺𑀲𑀫𑀼𑀝𑁆𑀞𑀸𑀦𑁂𑀳𑀺 𑀧𑀡𑀻𑀢𑀭𑀽𑀧𑁂𑀳𑀺 𑀲𑀓𑀮𑀲𑀭𑀻𑀭𑀁 𑀨𑀭𑀫𑀸𑀦𑁄, 𑀥𑀫𑁆𑀫𑀲𑀗𑁆𑀖𑀕𑀼𑀡𑁂 𑀅𑀦𑀼𑀲𑁆𑀲𑀭𑀦𑁆𑀢𑀲𑁆𑀲𑀧𑀺 𑀬𑀸𑀯 𑀉𑀧𑀘𑀸𑀭𑀸 𑀲𑀓𑀮𑀲𑀭𑀻𑀭𑀁 𑀨𑀭𑀫𑀸𑀦𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀯𑀁 𑀲𑁂𑀲𑀅𑀦𑀼𑀲𑁆𑀲𑀢𑀻𑀲𑀼, 𑀧𑀲𑀸𑀤𑀦𑀻𑀬𑀲𑀼𑀢𑁆𑀢𑀦𑁆𑀢𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀘 𑀬𑁄𑀚𑁂𑀢𑀩𑁆𑀩𑀁 𑀢𑀲𑁆𑀲𑀸𑀧𑀺 𑀯𑀺𑀫𑀼𑀢𑁆𑀢𑀸𑀬𑀢𑀦𑀪𑀸𑀯𑁂𑀦 𑀢𑀕𑁆𑀕𑀢𑀺𑀓𑀢𑁆𑀢𑀸. 𑀏𑀯𑀭𑀽𑀧𑁂 𑀓𑀸𑀮𑁂𑀢𑀺 ‘‘𑀤𑀼𑀩𑁆𑀪𑀺𑀓𑁆𑀔𑀪𑀬𑀸𑀤𑀻𑀲𑀽’’𑀢𑀺 𑀯𑀼𑀢𑁆𑀢𑀓𑀸𑀮𑁂. 𑀲𑀫𑀸𑀧𑀢𑁆𑀢𑀺…𑀧𑁂… 𑀦 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀇𑀤𑀁 𑀉𑀧𑀲𑀫𑀸𑀦𑀼𑀲𑁆𑀲𑀢𑀺𑀬𑀸 𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀗𑁆𑀔𑀸𑀭𑀸𑀦𑀜𑁆𑀳𑀺 𑀯𑀲𑁂𑀦 𑀲𑀧𑁆𑀧𑀤𑁂𑀲𑀯𑀽𑀧𑀲𑀫𑁂𑀧𑀺 𑀦𑀺𑀧𑁆𑀧𑀤𑁂𑀲𑀯𑀽𑀧𑀲𑀫𑁂 𑀯𑀺𑀬 𑀢𑀣𑀸 𑀲𑀜𑁆𑀜𑀸𑀬 𑀧𑀯𑀢𑁆𑀢𑀺𑀢𑁄 𑀪𑀸𑀯𑀦𑀸𑀫𑀦𑀲𑀺𑀓𑀸𑀭𑁄 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀲𑀫𑀢𑁆𑀣𑁄 𑀳𑀼𑀢𑁆𑀯𑀸 𑀉𑀧𑀘𑀸𑀭𑀲𑀫𑀸𑀥𑀺𑀁 𑀆𑀯𑀳𑀦𑁆𑀢𑁄 𑀢𑀣𑀸𑀭𑀽𑀧𑀧𑀻𑀢𑀺𑀲𑁄𑀫𑀦𑀲𑁆𑀲𑀲𑀫𑀦𑁆𑀦𑀸𑀕𑀢𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀉𑀧𑀸𑀤𑀸𑀬 𑀳𑁄𑀢𑀻𑀢𑀺. 𑀢𑀢𑁆𑀣 ‘‘𑀯𑀺𑀓𑁆𑀔𑀫𑁆𑀪𑀺𑀢𑀸 𑀓𑀺𑀮𑁂𑀲𑀸’’𑀢𑀺 𑀧𑀸𑀞𑁄. 𑀦 𑀲𑀫𑀼𑀤𑀸𑀘𑀭𑀦𑁆𑀢𑀻𑀢𑀺 𑀇𑀢𑀺-𑀲𑀤𑁆𑀤𑁄 𑀓𑀸𑀭𑀡𑀢𑁆𑀣𑁄. 𑀬𑀲𑁆𑀫𑀸 𑀦 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀢𑀲𑁆𑀫𑀸 𑀢𑀁 𑀦𑁂𑀲𑀁 𑀅𑀲𑀫𑀼𑀤𑀸𑀘𑀸𑀭𑀁 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸𑀢𑀺 𑀬𑁄𑀚𑀦𑀸. 𑀦 𑀳𑀺 𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲 𑀩𑁄𑀚𑁆𑀛𑀗𑁆𑀕𑀼𑀧𑁆𑀧𑀢𑁆𑀢𑀺 𑀬𑀼𑀢𑁆𑀢𑀸, 𑀧𑀲𑀸𑀤𑀦𑀻𑀬𑁂𑀲𑀼 𑀞𑀸𑀦𑁂𑀲𑀼 𑀧𑀲𑀸𑀤𑀲𑀺𑀦𑁂𑀳𑀸𑀪𑀸𑀯𑁂𑀦 𑀮𑀽𑀔𑀳𑀤𑀬𑀢𑀸𑀬 𑀮𑀽𑀔𑀢𑀸. 𑀲𑀸 𑀢𑀢𑁆𑀣 𑀆𑀤𑀭𑀕𑀸𑀭𑀯𑀸𑀓𑀭𑀡𑁂𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 𑁋 ‘‘𑀅𑀲𑀓𑁆𑀓𑀘𑁆𑀘𑀓𑀺𑀭𑀺𑀬𑀸𑀬 𑀲𑀁𑀲𑀽𑀘𑀺𑀢𑀮𑀽𑀔𑀪𑀸𑀯𑁂’’𑀢𑀺.

𑀧𑀡𑀻𑀢𑀪𑁄𑀚𑀦𑀲𑁂𑀯𑀦𑀢𑀸𑀢𑀺 ¶ 𑀧𑀡𑀻𑀢𑀲𑀧𑁆𑀧𑀸𑀬𑀪𑁄𑀚𑀦𑀲𑁂𑀯𑀦𑀢𑀸. 𑀉𑀢𑀼𑀇𑀭𑀺𑀬𑀸𑀧𑀣𑀲𑀼𑀔𑀕𑁆𑀕𑀳𑀡𑁂𑀦 𑀲𑀧𑁆𑀧𑀸𑀬𑀉𑀢𑀼𑀇𑀭𑀺𑀬𑀸𑀧𑀣𑀕𑁆𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀢𑀜𑁆𑀳𑀺 𑀢𑀺𑀯𑀺𑀥𑀫𑁆𑀧𑀺 𑀲𑀧𑁆𑀧𑀸𑀬𑀁 𑀲𑁂𑀯𑀺𑀬𑀫𑀸𑀦𑀁 𑀓𑀸𑀬𑀲𑁆𑀲 𑀓𑀮𑁆𑀬𑀢𑀸𑀧𑀸𑀤𑀦𑀯𑀲𑁂𑀦 𑀘𑀺𑀢𑁆𑀢𑀲𑁆𑀲 𑀓𑀮𑁆𑀬𑀢𑀁 𑀆𑀯𑀳𑀦𑁆𑀢𑀁 𑀤𑀼𑀯𑀺𑀥𑀸𑀬𑀧𑀺 𑀧𑀲𑁆𑀲𑀤𑁆𑀥𑀺𑀬𑀸 𑀓𑀸𑀭𑀡𑀁 𑀳𑁄𑀢𑀺. 𑀅𑀳𑁂𑀢𑀼𑀓𑀲𑀢𑁆𑀢𑁂𑀲𑀼 𑀮𑀩𑁆𑀪𑀫𑀸𑀦𑀁 𑀲𑀼𑀔𑀤𑀼𑀓𑁆𑀔𑀦𑁆𑀢𑀺 𑀅𑀬𑀫𑁂𑀓𑁄 𑀅𑀦𑁆𑀢𑁄, 𑀇𑀲𑁆𑀲𑀭𑀸𑀤𑀺𑀯𑀺𑀲𑀫𑀳𑁂𑀢𑀼𑀓𑀦𑁆𑀢𑀺 𑀧𑀦 𑀅𑀬𑀁 𑀤𑀼𑀢𑀺𑀬𑁄. 𑀏𑀢𑁂 𑀉𑀪𑁄 𑀅𑀦𑁆𑀢𑁂 𑀅𑀦𑀼𑀧𑀕𑀫𑁆𑀫 𑀬𑀣𑀸𑀲𑀓𑀁 𑀓𑀫𑁆𑀫𑀼𑀦𑀸 𑀳𑁄𑀢𑀻𑀢𑀺 𑀅𑀬𑀁 𑀫𑀚𑁆𑀛𑀺𑀫𑀸 𑀧𑀝𑀺𑀧𑀢𑁆𑀢𑀺. 𑀫𑀚𑁆𑀛𑀢𑁆𑀢𑁄 𑀧𑀬𑁄𑀕𑁄 𑀬𑀲𑁆𑀲 𑀲𑁄 𑀫𑀚𑁆𑀛𑀢𑁆𑀢𑀧𑀬𑁄𑀕𑁄, 𑀢𑀲𑁆𑀲 𑀪𑀸𑀯𑁄 𑀫𑀚𑁆𑀛𑀢𑁆𑀢𑀧𑀬𑁄𑀕𑀢𑀸. 𑀅𑀬𑀜𑁆𑀳𑀺 𑀲𑀪𑀸𑀯𑀸𑀲𑀸𑀭𑀤𑁆𑀥𑀢𑀸𑀬 𑀢𑀁𑀧𑀲𑁆𑀲𑀤𑁆𑀥𑀓𑀸𑀬𑀢𑀸𑀬 𑀓𑀸𑀭𑀡𑀁 𑀳𑁄𑀢𑀺, 𑀧𑀲𑁆𑀲𑀤𑁆𑀥𑀺𑀤𑁆𑀯𑀬𑀁 ¶ 𑀆𑀯𑀳𑀢𑀺. 𑀏𑀢𑁂𑀦𑁂𑀯 𑀲𑀸𑀭𑀤𑁆𑀥𑀓𑀸𑀬𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀧𑀲𑁆𑀲𑀤𑁆𑀥𑀓𑀸𑀬𑀧𑀼𑀕𑁆𑀕𑀮𑀲𑁂𑀯𑀦𑀸𑀦𑀁 𑀢𑀤𑀸𑀯𑀳𑀦𑀢𑀸 𑀲𑀁𑀯𑀡𑁆𑀡𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸 𑀇𑀦𑁆𑀤𑁆𑀭𑀺𑀬𑀲𑀫𑀢𑁆𑀢𑀧𑁆𑀧𑀝𑀺𑀧𑀸𑀤𑀦𑀸 𑀘 𑀧𑀜𑁆𑀜𑀸𑀯𑀳𑀸 𑀯𑀼𑀢𑁆𑀢𑀸, 𑀲𑀫𑀸𑀥𑀸𑀦𑀸𑀯𑀳𑀸𑀧𑀺 𑀢𑀸 𑀳𑁄𑀦𑁆𑀢𑀺. 𑀲𑀫𑀸𑀥𑀸𑀦𑀸𑀯𑀳𑀪𑀸𑀯𑁂𑀦𑁂𑀯 𑀧𑀜𑁆𑀜𑀸𑀯𑀳𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 𑁋 ‘‘𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸…𑀧𑁂… 𑀯𑁂𑀤𑀺𑀢𑀩𑁆𑀩𑀸’’𑀢𑀺.

𑀓𑀸𑀭𑀡𑀓𑁄𑀲𑀮𑁆𑀮𑀪𑀸𑀯𑀦𑀸𑀓𑁄𑀲𑀮𑁆𑀮𑀸𑀦𑀁 𑀦𑀸𑀦𑀦𑁆𑀢𑀭𑀺𑀬𑀪𑀸𑀯𑀢𑁄 𑀭𑀓𑁆𑀔𑀦𑀸𑀓𑁄𑀲𑀮𑁆𑀮𑀲𑁆𑀲 𑀘 𑀢𑀁𑀫𑀽𑀮𑀓𑀢𑁆𑀢𑀸 ‘‘𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑀸 𑀦𑀸𑀫 𑀓𑀲𑀺𑀡𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑀓𑀼𑀲𑀮𑀢𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀓𑀲𑀺𑀡𑀦𑀺𑀫𑀺𑀢𑁆𑀢𑀲𑁆𑀲𑀸𑀢𑀺 𑀘 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀅𑀲𑀼𑀪𑀦𑀺𑀫𑀺𑀢𑁆𑀢𑀸𑀤𑀺𑀓𑀲𑁆𑀲𑀧𑀺 𑀳𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀛𑀸𑀦𑀼𑀧𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀲𑁆𑀲 𑀉𑀕𑁆𑀕𑀳𑀓𑁄𑀲𑀮𑁆𑀮𑀁 𑀦𑀺𑀫𑀺𑀢𑁆𑀢𑀓𑀼𑀲𑀮𑀢𑀸 𑀏𑀯𑀸𑀢𑀺. 𑀅𑀢𑀺𑀲𑀺𑀣𑀺𑀮𑀯𑀻𑀭𑀺𑀬𑀢𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀜𑁆𑀜𑀸𑀧𑀬𑁄𑀕𑀫𑀦𑁆𑀤𑀢𑀁 𑀧𑀬𑁄𑀕𑀯𑁂𑀓𑀮𑁆𑀮𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀲𑁆𑀲 𑀧𑀕𑁆𑀕𑀡𑁆𑀳𑀦𑀦𑁆𑀢𑀺 𑀢𑀲𑁆𑀲 𑀮𑀻𑀦𑀲𑁆𑀲 𑀘𑀺𑀢𑁆𑀢𑀲𑁆𑀲 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀺𑀲𑀫𑀼𑀝𑁆𑀞𑀸𑀧𑀦𑁂𑀦 𑀮𑀬𑀸𑀧𑀢𑁆𑀢𑀺𑀢𑁄 𑀲𑀫𑀼𑀤𑁆𑀥𑀭𑀡𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀬𑀲𑁆𑀫𑀺𑀜𑁆𑀘 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀮𑀻𑀦𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀮𑀻𑀦𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁, 𑀢𑀁 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀼𑀲𑀫𑀼𑀝𑁆𑀞𑀸𑀧𑀬𑀁 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀧𑀭𑀺𑀢𑁆𑀢𑀁 𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑁂𑀢𑀼𑀓𑀸𑀫𑁄 𑀅𑀲𑁆𑀲. 𑀲𑁄 𑀢𑀢𑁆𑀣 𑀲𑀼𑀓𑁆𑀔𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀲𑀼𑀓𑁆𑀔𑀸𑀦𑀺 𑀘 𑀕𑁄𑀫𑀬𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀲𑀼𑀓𑁆𑀔𑀸𑀦𑀺 𑀘 𑀓𑀝𑁆𑀞𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀫𑀼𑀔𑀯𑀸𑀢𑀜𑁆𑀘 𑀤𑀤𑁂𑀬𑁆𑀬, 𑀦 𑀘 𑀧𑀁𑀲𑀼𑀓𑁂𑀦 𑀑𑀓𑀺𑀭𑁂𑀬𑁆𑀬, 𑀪𑀩𑁆𑀩𑁄 𑀦𑀼 𑀔𑁄 𑀲𑁄 𑀧𑀼𑀭𑀺𑀲𑁄 𑀧𑀭𑀺𑀢𑁆𑀢𑀁 𑀅𑀕𑁆𑀕𑀺𑀁 𑀉𑀚𑁆𑀚𑀸𑀮𑁂𑀢𑀼𑀦𑁆𑀢𑀺? 𑀏𑀯𑀁, 𑀪𑀦𑁆𑀢𑁂’’𑀢𑀺 (𑀲𑀁. 𑀦𑀺. 𑁫.𑁨𑁩𑁪).

𑀏𑀢𑁆𑀣 ¶ 𑀘 𑀬𑀣𑀸𑀲𑀓𑀁 𑀆𑀳𑀸𑀭𑀯𑀲𑁂𑀦 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀻𑀦𑀁 𑀪𑀸𑀯𑀦𑀸 𑀲𑀫𑀼𑀝𑁆𑀞𑀸𑀧𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀲𑀸 𑀅𑀦𑀦𑁆𑀢𑀭𑀁 𑀯𑀺𑀪𑀸𑀯𑀺𑀢𑀸 𑀏𑀯.

𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀢𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀧𑀜𑁆𑀜𑀸𑀧𑀬𑁄𑀕𑀩𑀮𑀯𑀢𑀁 𑀧𑀫𑁄𑀤𑀼𑀧𑁆𑀧𑀺𑀮𑀸𑀧𑀦𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀲𑁆𑀲 𑀦𑀺𑀕𑁆𑀕𑀡𑁆𑀳𑀦𑀦𑁆𑀢𑀺 𑀢𑀲𑁆𑀲 𑀉𑀤𑁆𑀥𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀺𑀲𑀫𑀼𑀝𑁆𑀞𑀸𑀧𑀦𑁂𑀦 𑀉𑀤𑁆𑀥𑀢𑀸𑀧𑀢𑁆𑀢𑀺𑀢𑁄 𑀦𑀺𑀲𑁂𑀥𑀦𑀁. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀪𑀕𑀯𑀢𑀸 𑁋

‘‘𑀬𑀲𑁆𑀫𑀺𑀜𑁆𑀘 ¶ 𑀔𑁄, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀉𑀤𑁆𑀥𑀢𑀁 𑀘𑀺𑀢𑁆𑀢𑀁 𑀳𑁄𑀢𑀺, 𑀓𑀸𑀮𑁄 𑀢𑀲𑁆𑀫𑀺𑀁 𑀲𑀫𑀬𑁂 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬, 𑀓𑀸𑀮𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀉𑀤𑁆𑀥𑀢𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁, 𑀢𑀁 𑀏𑀢𑁂𑀳𑀺 𑀥𑀫𑁆𑀫𑁂𑀳𑀺 𑀲𑀼𑀯𑀽𑀧𑀲𑀫𑀁 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀸𑀧𑁂𑀢𑀼𑀓𑀸𑀫𑁄 𑀅𑀲𑁆𑀲, 𑀲𑁄 𑀢𑀢𑁆𑀣 𑀅𑀮𑁆𑀮𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀅𑀮𑁆𑀮𑀸𑀦𑀺 𑀘 𑀕𑁄𑀫𑀬𑀸𑀦𑀺 𑀦𑀺𑀓𑁆𑀔𑀺𑀧𑁂𑀬𑁆𑀬, 𑀅𑀮𑁆𑀮𑀸𑀦𑀺 𑀘 𑀓𑀝𑁆𑀞𑀸𑀦𑀺 𑀧𑀓𑁆𑀔𑀺𑀧𑁂𑀬𑁆𑀬, 𑀫𑀼𑀔𑀯𑀸𑀢𑀜𑁆𑀘 𑀦 𑀤𑀤𑁂𑀬𑁆𑀬, 𑀧𑀁𑀲𑀼𑀓𑁂𑀦 𑀘 𑀑𑀓𑀺𑀭𑁂𑀬𑁆𑀬, 𑀪𑀩𑁆𑀩𑁄 𑀦𑀼 𑀔𑁄 𑀲𑁄 𑀧𑀼𑀭𑀺𑀲𑁄 𑀫𑀳𑀦𑁆𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀁 𑀦𑀺𑀩𑁆𑀩𑀸𑀧𑁂𑀢𑀼𑀦𑁆𑀢𑀺? 𑀏𑀯𑀁, 𑀪𑀦𑁆𑀢𑁂’’𑀢𑀺 (𑀲𑀁. 𑀦𑀺. 𑁫.𑁨𑁩𑁪).

𑀏𑀢𑁆𑀣𑀸𑀧𑀺 𑀬𑀣𑀸𑀲𑀓𑀁 𑀆𑀳𑀸𑀭𑀯𑀲𑁂𑀦 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀸𑀤𑀻𑀦𑀁 𑀪𑀸𑀯𑀦𑀸 𑀲𑀫𑀼𑀝𑁆𑀞𑀸𑀧𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀪𑀸𑀯𑀦𑀸 𑀯𑀼𑀢𑁆𑀢𑀸 𑀏𑀯, 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀯𑀼𑀘𑁆𑀘𑀫𑀸𑀦𑀸, 𑀇𑀢𑀭𑀲𑁆𑀲 𑀅𑀦𑀦𑁆𑀢𑀭𑀁 𑀯𑀓𑁆𑀔𑀢𑀺.

𑀧𑀜𑁆𑀜𑀸𑀧𑀬𑁄𑀕𑀫𑀦𑁆𑀤𑀢𑀸𑀬𑀸𑀢𑀺 𑀧𑀜𑁆𑀜𑀸𑀩𑁆𑀬𑀸𑀧𑀸𑀭𑀲𑁆𑀲 𑀅𑀧𑁆𑀧𑀓𑀪𑀸𑀯𑁂𑀦. 𑀬𑀣𑀸 𑀳𑀺 𑀤𑀸𑀦𑀁 𑀅𑀮𑁄𑀪𑀧𑁆𑀧𑀥𑀸𑀦𑀁, 𑀲𑀻𑀮𑀁 𑀅𑀤𑁄𑀲𑀧𑁆𑀧𑀥𑀸𑀦𑀁, 𑀏𑀯𑀁 𑀪𑀸𑀯𑀦𑀸 𑀅𑀫𑁄𑀳𑀧𑁆𑀧𑀥𑀸𑀦𑀸. 𑀢𑀢𑁆𑀣 𑀬𑀤𑀸 𑀧𑀜𑁆𑀜𑀸 𑀦 𑀩𑀮𑀯𑀢𑀻 𑀳𑁄𑀢𑀺, 𑀢𑀤𑀸 𑀪𑀸𑀯𑀦𑀸 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑀸𑀯𑀳𑀸 𑀦 𑀳𑁄𑀢𑀺. 𑀅𑀦𑀪𑀺𑀲𑀗𑁆𑀕𑀢𑁄 𑀯𑀺𑀬 𑀆𑀳𑀸𑀭𑁄 𑀧𑀼𑀭𑀺𑀲𑀲𑁆𑀲, 𑀬𑁄𑀕𑀺𑀦𑁄 𑀘𑀺𑀢𑁆𑀢𑀲𑁆𑀲 𑀅𑀪𑀺𑀭𑀼𑀘𑀺𑀁 𑀦 𑀚𑀦𑁂𑀢𑀺, 𑀢𑁂𑀦 𑀢𑀁 𑀦𑀺𑀭𑀲𑁆𑀲𑀸𑀤𑀁 𑀳𑁄𑀢𑀺. 𑀢𑀣𑀸 𑀪𑀸𑀯𑀦𑀸𑀬 𑀲𑀫𑁆𑀫𑀤𑁂𑀯 𑀅𑀯𑀻𑀣𑀺𑀧𑀝𑀺𑀧𑀢𑁆𑀢𑀺𑀬𑀸 𑀉𑀧𑀲𑀫𑀲𑀼𑀔𑀁 𑀦 𑀯𑀺𑀦𑁆𑀤𑀢𑀺, 𑀢𑁂𑀦𑀧𑀺 𑀘𑀺𑀢𑁆𑀢𑀁 𑀦𑀺𑀭𑀲𑁆𑀲𑀸𑀤𑀁 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 𑁋 ‘‘𑀧𑀜𑁆𑀜𑀸𑀧𑀬𑁄𑀕𑀫𑀦𑁆𑀤𑀢𑀸𑀬𑀸…𑀧𑁂… 𑀦𑀺𑀭𑀲𑁆𑀲𑀸𑀤𑀁 𑀳𑁄𑀢𑀻’’𑀢𑀺. 𑀢𑀲𑁆𑀲 𑀲𑀁𑀯𑁂𑀕𑀼𑀧𑁆𑀧𑀸𑀤𑀦𑀁 𑀧𑀲𑀸𑀤𑀼𑀧𑁆𑀧𑀸𑀤𑀦𑀜𑁆𑀘 𑀢𑀺𑀓𑀺𑀘𑁆𑀙𑀦𑀦𑁆𑀢𑀺 𑀢𑀁 𑀤𑀲𑁆𑀲𑁂𑀦𑁆𑀢𑁄, ‘‘𑀅𑀝𑁆𑀞 𑀲𑀁𑀯𑁂𑀕𑀯𑀢𑁆𑀣𑀽𑀦𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀚𑀸𑀢𑀺𑀚𑀭𑀸𑀩𑁆𑀬𑀸𑀥𑀺𑀫𑀭𑀡𑀸𑀦𑀺 𑀬𑀣𑀸𑀭𑀳𑀁 𑀲𑀼𑀕𑀢𑀺𑀬𑀁 𑀤𑀼𑀕𑁆𑀕𑀢𑀺𑀬𑀜𑁆𑀘 𑀳𑁄𑀦𑁆𑀢𑀻𑀢𑀺 𑀢𑀤𑀜𑁆𑀜𑀫𑁂𑀯 𑀧𑀜𑁆𑀘𑀯𑀺𑀥𑀩𑀦𑁆𑀥𑀦𑀸𑀤𑀺𑀔𑀼𑀧𑁆𑀧𑀺𑀧𑀸𑀲𑀸𑀤𑀺𑀅𑀜𑁆𑀜𑀫𑀜𑁆𑀜𑀯𑀺𑀳𑁂𑀞𑀦𑀸𑀤𑀺𑀳𑁂𑀢𑀼𑀓𑀁 𑀅𑀧𑀸𑀬𑀤𑀼𑀓𑁆𑀔𑀁 𑀤𑀝𑁆𑀞𑀩𑁆𑀩𑀁. 𑀢𑀬𑀺𑀤𑀁 𑀲𑀩𑁆𑀩𑀁 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀯𑀦𑀺𑀲𑁆𑀲𑀺𑀢𑀁 𑀕𑀳𑀺𑀢𑀦𑁆𑀢𑀺 𑀅𑀢𑀻𑀢𑁂 𑀅𑀦𑀸𑀕𑀢𑁂 𑀘 𑀓𑀸𑀮𑁂 𑀯𑀝𑁆𑀝𑀫𑀽𑀮𑀓𑀤𑀼𑀓𑁆𑀔𑀸𑀦𑀺 𑀯𑀺𑀲𑀼𑀁 𑀕𑀳𑀺𑀢𑀸𑀦𑀺 ¶ . 𑀬𑁂 𑀧𑀦 𑀲𑀢𑁆𑀢𑀸 𑀆𑀳𑀸𑀭𑀽𑀧𑀚𑀻𑀯𑀺𑀦𑁄, 𑀢𑀢𑁆𑀣 𑀘 𑀉𑀝𑁆𑀞𑀸𑀦𑀨𑀮𑀽𑀧𑀚𑀻𑀯𑀺𑀦𑁄, 𑀢𑁂𑀲𑀁 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀚𑀻𑀯𑀺𑀢𑀤𑀼𑀓𑁆𑀔𑀁 𑀅𑀝𑁆𑀞𑀫𑀁 𑀲𑀁𑀯𑁂𑀕𑀯𑀢𑁆𑀣𑀼 𑀕𑀳𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀫𑀬𑁂 𑀲𑀫𑁆𑀧𑀳𑀁𑀲𑀦𑀢𑀸𑀢𑀺 𑀅𑀬𑀁 𑀪𑀸𑀯𑀦𑀸𑀘𑀺𑀢𑁆𑀢𑀲𑁆𑀲 𑀲𑀫𑁆𑀧𑀳𑀁𑀲𑀺𑀢𑀩𑁆𑀩𑀲𑀫𑀬𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀁𑀯𑁂𑀕𑀚𑀦𑀦𑀯𑀲𑁂𑀦 ¶ 𑀘𑁂𑀯 𑀧𑀲𑀸𑀤𑀼𑀧𑁆𑀧𑀸𑀤𑀦𑀯𑀲𑁂𑀦 𑀘 𑀲𑀫𑁆𑀫𑀤𑁂𑀯 𑀧𑀳𑀁𑀲𑀦𑀸, 𑀲𑀁𑀯𑁂𑀕𑀚𑀦𑀦𑀧𑀼𑀩𑁆𑀩𑀓𑀧𑀲𑀸𑀤𑀼𑀧𑁆𑀧𑀸𑀤𑀦𑁂𑀦 𑀢𑁄𑀲𑀦𑀸𑀢𑀺 𑀅𑀢𑁆𑀣𑁄.

𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀁 𑀆𑀕𑀫𑁆𑀫𑀸𑀢𑀺 𑀮𑀻𑀦𑀼𑀤𑁆𑀥𑀘𑁆𑀘𑀯𑀺𑀭𑀳𑁂𑀦 𑀲𑀫𑀣𑀯𑀻𑀣𑀺𑀧𑀝𑀺𑀧𑀢𑁆𑀢𑀺𑀬𑀸 𑀘 𑀲𑀫𑁆𑀫𑀸 𑀅𑀯𑀺𑀲𑀫𑀁 𑀲𑀫𑁆𑀫𑀤𑁂𑀯 𑀪𑀸𑀯𑀦𑀸𑀧𑀝𑀺𑀧𑀢𑁆𑀢𑀺𑀁 𑀆𑀕𑀫𑁆𑀫. 𑀅𑀮𑀻𑀦𑀦𑁆𑀢𑀺𑀆𑀤𑀻𑀲𑀼 𑀓𑁄𑀲𑀚𑁆𑀚𑀧𑀓𑁆𑀔𑀺𑀬𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀥𑀺𑀫𑀢𑁆𑀢𑀢𑀸𑀬 𑀅𑀮𑀻𑀦𑀁, 𑀉𑀤𑁆𑀥𑀘𑁆𑀘𑀧𑀓𑁆𑀔𑀺𑀓𑀸𑀦𑀁 𑀅𑀦𑀥𑀺𑀫𑀢𑁆𑀢𑀢𑀸𑀬 𑀅𑀦𑀼𑀤𑁆𑀥𑀢𑀁, 𑀧𑀜𑁆𑀜𑀸𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑀲𑀫𑀲𑀼𑀔𑀸𑀥𑀺𑀕𑀫𑁂𑀦 𑀘 𑀅𑀦𑀺𑀭𑀲𑁆𑀲𑀸𑀤𑀁, 𑀢𑀢𑁄 𑀏𑀯 𑀆𑀭𑀫𑁆𑀫𑀡𑁂 𑀲𑀫𑀧𑁆𑀧𑀯𑀢𑁆𑀢𑀁 𑀲𑀫𑀣𑀯𑀻𑀣𑀺𑀧𑀝𑀺𑀧𑀦𑁆𑀦𑀁. 𑀅𑀮𑀻𑀦𑀸𑀦𑀼𑀤𑁆𑀥𑀢𑀸𑀳𑀺 𑀯𑀸 𑀆𑀭𑀫𑁆𑀫𑀡𑁂 𑀲𑀫𑀧𑁆𑀧𑀯𑀢𑁆𑀢𑀁, 𑀅𑀦𑀺𑀭𑀲𑁆𑀲𑀸𑀤𑀢𑀸𑀬 𑀲𑀫𑀣𑀯𑀻𑀣𑀺𑀧𑀝𑀺𑀧𑀦𑁆𑀦𑀁. 𑀲𑀫𑀧𑁆𑀧𑀯𑀢𑁆𑀢𑀺𑀬𑀸 𑀯𑀸 𑀅𑀮𑀻𑀦𑀁 𑀅𑀦𑀼𑀤𑁆𑀥𑀢𑀁, 𑀲𑀫𑀣𑀯𑀻𑀣𑀺𑀧𑀝𑀺𑀧𑀢𑁆𑀢𑀺𑀬𑀸 𑀅𑀦𑀺𑀭𑀲𑁆𑀲𑀸𑀤𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀢𑁆𑀣 𑀅𑀮𑀻𑀦𑀢𑀸𑀬 𑀧𑀕𑁆𑀕𑀳𑁂, 𑀅𑀦𑀼𑀤𑁆𑀥𑀢𑀢𑀸𑀬 𑀦𑀺𑀕𑁆𑀕𑀳𑁂, 𑀅𑀦𑀺𑀭𑀲𑁆𑀲𑀸𑀤𑀢𑀸𑀬 𑀲𑀫𑁆𑀧𑀳𑀁𑀲𑀦𑁂 𑀦 𑀩𑁆𑀬𑀸𑀧𑀸𑀭𑀁 𑀆𑀧𑀚𑁆𑀚𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺 𑀲𑀫𑀬𑁂 𑀅𑀚𑁆𑀛𑀼𑀧𑁂𑀓𑁆𑀔𑀦𑀢𑀸𑀢𑀺 𑀅𑀬𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑀲𑀫𑀬𑁂 𑀪𑀸𑀯𑀦𑀸𑀘𑀺𑀢𑁆𑀢𑀲𑁆𑀲 𑀧𑀕𑁆𑀕𑀳𑀦𑀺𑀕𑁆𑀕𑀳𑀲𑀫𑁆𑀧𑀳𑀁𑀲𑀦𑁂𑀲𑀼 𑀩𑁆𑀬𑀸𑀯𑀝𑀢𑀸𑀲𑀗𑁆𑀔𑀸𑀢𑀁 𑀧𑀝𑀺𑀧𑀓𑁆𑀔𑀁 𑀅𑀪𑀺𑀪𑀼𑀬𑁆𑀬 𑀅𑀚𑁆𑀛𑀼𑀧𑁂𑀓𑁆𑀔𑀦𑀸 𑀯𑀼𑀘𑁆𑀘𑀢𑀺. 𑀧𑀝𑀺𑀧𑀓𑁆𑀔𑀯𑀺𑀓𑁆𑀔𑀫𑁆𑀪𑀦𑀢𑁄 𑀯𑀺𑀧𑀲𑁆𑀲𑀦𑀸𑀬 𑀅𑀥𑀺𑀝𑁆𑀞𑀸𑀦𑀪𑀸𑀯𑀽𑀧𑀕𑀫𑀦𑀢𑁄 𑀘 𑀉𑀧𑀘𑀸𑀭𑀚𑁆𑀛𑀸𑀦𑀫𑁆𑀧𑀺 𑀲𑀫𑀸𑀥𑀸𑀦𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀬𑀸 𑀧𑀼𑀕𑁆𑀕𑀮𑀲𑁆𑀲 𑀲𑀫𑀸𑀳𑀺𑀢𑀪𑀸𑀯𑀲𑀸𑀥𑀦𑀫𑁂𑀯𑀸𑀢𑀺 𑀢𑀢𑁆𑀣 𑀲𑀫𑀥𑀼𑀭𑀪𑀸𑀯𑁂𑀦𑀸𑀳 𑁋 ‘‘𑀉𑀧𑀘𑀸𑀭𑀁 𑀯𑀸 𑀅𑀧𑁆𑀧𑀦𑀁 𑀯𑀸’’𑀢𑀺. 𑀏𑀲 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀲 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑁄 𑀅𑀦𑀼𑀧𑁆𑀧𑀦𑁆𑀦𑁄 𑀉𑀧𑁆𑀧𑀚𑁆𑀚𑀢𑀺.

𑀅𑀦𑀼𑀭𑁄𑀥𑀯𑀺𑀭𑁄𑀥𑀧𑁆𑀧𑀳𑀸𑀦𑀯𑀲𑁂𑀦 𑀫𑀚𑁆𑀛𑀢𑁆𑀢𑀪𑀸𑀯𑁄 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀲𑁆𑀲 𑀓𑀸𑀭𑀡𑀁 𑀢𑀲𑁆𑀫𑀺𑀁 𑀲𑀢𑀺 𑀲𑀺𑀚𑁆𑀛𑀦𑀢𑁄, 𑀅𑀲𑀢𑀺 𑀘 𑀅𑀲𑀺𑀚𑁆𑀛𑀦𑀢𑁄, 𑀲𑁄 𑀘 𑀫𑀚𑁆𑀛𑀢𑁆𑀢𑀪𑀸𑀯𑁄 𑀯𑀺𑀲𑀬𑀯𑀲𑁂𑀦 𑀤𑀼𑀯𑀺𑀥𑁄𑀢𑀺 𑀆𑀳 𑁋 ‘‘𑀲𑀢𑁆𑀢𑀫𑀚𑁆𑀛𑀢𑁆𑀢𑀢𑀸 𑀲𑀗𑁆𑀔𑀸𑀭𑀫𑀚𑁆𑀛𑀢𑁆𑀢𑀢𑀸’’𑀢𑀺. 𑀢𑀤𑀼𑀪𑀬𑁂𑀦 𑀘 𑀯𑀺𑀭𑀼𑀚𑁆𑀛𑀦𑀁 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀪𑀸𑀯𑀦𑀸𑀬 𑀏𑀯 𑀤𑀽𑀭𑀻𑀓𑀢𑀦𑁆𑀢𑀺 𑀅𑀦𑀼𑀭𑀼𑀚𑁆𑀛𑀦𑀲𑁆𑀲𑁂𑀯 𑀧𑀳𑀸𑀦𑀯𑀺𑀥𑀺𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀲𑀢𑁆𑀢𑀫𑀚𑁆𑀛𑀢𑁆𑀢𑀢𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦𑀸𑀳 𑁋 ‘‘𑀲𑀢𑁆𑀢𑀲𑀗𑁆𑀔𑀸𑀭𑀓𑁂𑀮𑀸𑀬𑀦𑀧𑀼𑀕𑁆𑀕𑀮𑀧𑀭𑀺𑀯𑀚𑁆𑀚𑀦𑀢𑀸’’𑀢𑀺. 𑀉𑀧𑁂𑀓𑁆𑀔𑀸𑀬 𑀳𑀺 𑀯𑀺𑀲𑁂𑀲𑀢𑁄 𑀭𑀸𑀕𑁄 𑀧𑀝𑀺𑀧𑀓𑁆𑀔𑁄. 𑀢𑀣𑀸 𑀘𑀸𑀳 𑁋 ‘‘𑀉𑀧𑁂𑀓𑁆𑀔𑀸 𑀭𑀸𑀕𑀩𑀳𑀼𑀮𑀲𑁆𑀲 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁄’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁨𑁬𑁯). 𑀤𑁆𑀯𑀻𑀳𑀸𑀓𑀸𑀭𑁂𑀳𑀻𑀢𑀺 𑀓𑀫𑁆𑀫𑀲𑁆𑀲𑀓𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀁, 𑀅𑀢𑁆𑀢𑀲𑀼𑀜𑁆𑀜𑀢𑀸𑀧𑀘𑁆𑀘𑀯𑁂𑀓𑁆𑀔𑀡𑀦𑁆𑀢𑀺, 𑀇𑀫𑁂𑀳𑀺 𑀤𑁆𑀯𑀻𑀳𑀺 𑀓𑀸𑀭𑀡𑁂𑀳𑀺. 𑀤𑁆𑀯𑀻𑀳𑁂𑀯𑀸𑀢𑀺 𑀅𑀯𑀥𑀸𑀭𑀡𑀁 𑀲𑀗𑁆𑀔𑁆𑀬𑀸𑀲𑀫𑀸𑀦𑀢𑀸𑀤𑀲𑁆𑀲𑀦𑀢𑁆𑀣𑀁. 𑀲𑀗𑁆𑀔𑁆𑀬𑀸 𑀏𑀯 𑀳𑁂𑀢𑁆𑀣 𑀲𑀫𑀸𑀦𑀸, 𑀦 𑀲𑀗𑁆𑀔𑁆𑀬𑁂𑀬𑁆𑀬𑀁 𑀲𑀩𑁆𑀩𑀣𑀸 𑀲𑀫𑀸𑀦𑀦𑁆𑀢𑀺. 𑀅𑀲𑁆𑀲𑀸𑀫𑀺𑀓𑀪𑀸𑀯𑁄 𑀅𑀦𑀢𑁆𑀢𑀦𑀺𑀬𑀢𑀸. 𑀲𑀢𑀺 𑀳𑀺 𑀅𑀢𑁆𑀢𑀦𑀺 𑀢𑀲𑁆𑀲 𑀓𑀺𑀜𑁆𑀘𑀦𑀪𑀸𑀯𑁂𑀦 𑀘𑀻𑀯𑀭𑀁 𑀅𑀜𑁆𑀜𑀁 𑀯𑀸 𑀓𑀺𑀜𑁆𑀘𑀺 𑀅𑀢𑁆𑀢𑀦𑀺𑀬𑀁 𑀦𑀸𑀫 𑀲𑀺𑀬𑀸, 𑀲𑁄 ¶ 𑀧𑀦 𑀓𑁄𑀘𑀺 𑀦𑀢𑁆𑀣𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀦𑀤𑁆𑀥𑀦𑀺𑀬𑀦𑁆𑀢𑀺 𑀦 𑀅𑀤𑁆𑀥𑀸𑀦𑀓𑁆𑀔𑀫𑀁, 𑀦 𑀘𑀺𑀭𑀝𑁆𑀞𑀸𑀬𑀻 𑀇𑀢𑁆𑀢𑀭𑀁 𑀅𑀦𑀺𑀘𑁆𑀘𑀦𑁆𑀢𑀺 𑀅𑀢𑁆𑀣𑁄. 𑀢𑀸𑀯𑀓𑀸𑀮𑀺𑀓𑀦𑁆𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁.

𑀫𑀫𑀸𑀬𑀢𑀻𑀢𑀺 ¶ 𑀫𑀫𑀢𑁆𑀢𑀁 𑀓𑀭𑁄𑀢𑀺, 𑀫𑀫𑀸𑀢𑀺 𑀢𑀡𑁆𑀳𑀸𑀬 𑀧𑀭𑀺𑀕𑁆𑀕𑀬𑁆𑀳 𑀢𑀺𑀝𑁆𑀞𑀢𑀺. 𑀥𑀦𑀸𑀬𑀦𑁆𑀢𑀸𑀢𑀺 𑀥𑀦𑀁 𑀤𑀩𑁆𑀩𑀁 𑀓𑀭𑁄𑀦𑁆𑀢𑀸.

𑁪𑁧𑁯. 𑀲𑀫𑁆𑀫𑀸𑀤𑀲𑁆𑀲𑀦𑀮𑀓𑁆𑀔𑀡𑀸𑀢𑀺 𑀲𑀫𑁆𑀫𑀸 𑀅𑀯𑀺𑀧𑀭𑀻𑀢𑀁 𑀅𑀦𑀺𑀘𑁆𑀘𑀸𑀤𑀺𑀯𑀲𑁂𑀦 𑀤𑀲𑁆𑀲𑀦𑀲𑀪𑀸𑀯𑀸. 𑀲𑀫𑁆𑀫𑀸𑀅𑀪𑀺𑀦𑀺𑀭𑁄𑀧𑀦𑀮𑀓𑁆𑀔𑀡𑁄𑀢𑀺 𑀲𑀫𑁆𑀫𑀤𑁂𑀯 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀺𑀭𑁄𑀧𑀦𑀲𑀪𑀸𑀯𑁄. 𑀘𑀢𑀼𑀭𑀗𑁆𑀕𑀲𑀫𑀦𑁆𑀦𑀸𑀕𑀢𑀸 𑀯𑀸𑀘𑀸 𑀚𑀦𑀁 𑀲𑀗𑁆𑀕𑀡𑁆𑀳𑀸𑀢𑀻𑀢𑀺 𑀢𑀩𑁆𑀩𑀺𑀧𑀓𑁆𑀔𑀯𑀺𑀭𑀢𑀺𑀲𑀪𑀸𑀯𑀸 𑀲𑀫𑁆𑀫𑀸𑀯𑀸𑀘𑀸 𑀪𑁂𑀤𑀓𑀭𑀫𑀺𑀘𑁆𑀙𑀸𑀯𑀸𑀘𑀸𑀧𑀳𑀸𑀦𑁂𑀦 𑀚𑀦𑁂 𑀲𑀫𑁆𑀧𑀬𑀼𑀢𑁆𑀢𑁂 𑀘 𑀧𑀭𑀺𑀕𑁆𑀕𑀡𑁆𑀳𑀦𑀓𑀺𑀘𑁆𑀘𑀯𑀢𑀻 𑀳𑁄𑀢𑀻𑀢𑀺 ‘‘𑀧𑀭𑀺𑀕𑁆𑀕𑀳𑀮𑀓𑁆𑀔𑀡𑀸’’𑀢𑀺 𑀯𑀼𑀢𑁆𑀢𑀸. 𑀯𑀺𑀲𑀁𑀯𑀸𑀤𑀦𑀸𑀤𑀺𑀓𑀺𑀘𑁆𑀘𑀢𑀸𑀬 𑀳𑀺 𑀮𑀽𑀔𑀸𑀦𑀁 𑀅𑀧𑀭𑀺𑀕𑁆𑀕𑀸𑀳𑀓𑀸𑀦𑀁 𑀫𑀼𑀲𑀸𑀯𑀸𑀤𑀸𑀤𑀻𑀦𑀁 𑀧𑀝𑀺𑀧𑀓𑁆𑀔𑀪𑀽𑀢𑀸 𑀲𑀺𑀦𑀺𑀤𑁆𑀥𑀪𑀸𑀯𑁂𑀦 𑀧𑀭𑀺𑀕𑁆𑀕𑀳𑀡𑀲𑀪𑀸𑀯𑀸 𑀲𑀫𑁆𑀫𑀸𑀚𑀧𑁆𑀧𑀦𑀓𑀺𑀘𑁆𑀘𑀸 𑀲𑀫𑁆𑀫𑀸𑀯𑀸𑀘𑀸 𑀢𑀧𑁆𑀧𑀘𑁆𑀘𑀬𑀲𑀼𑀪𑀸𑀲𑀺𑀢𑀲𑀫𑁆𑀧𑀝𑀺𑀕𑁆𑀕𑀸𑀳𑀓𑁂 𑀚𑀦𑁂 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀧𑀭𑀺𑀕𑁆𑀕𑀡𑁆𑀳𑀦𑁆𑀢𑀻 𑀧𑀯𑀢𑁆𑀢𑀢𑀻𑀢𑀺 𑀧𑀭𑀺𑀕𑁆𑀕𑀳𑀮𑀓𑁆𑀔𑀡𑀸. 𑀬𑀣𑀸 𑀘𑀻𑀯𑀭𑀓𑀫𑁆𑀫𑀸𑀤𑀺𑀧𑁆𑀧𑀬𑁄𑀕𑀲𑀗𑁆𑀔𑀸𑀢𑁄 𑀓𑀫𑁆𑀫𑀦𑁆𑀢𑁄 𑀓𑀸𑀢𑀩𑁆𑀩𑀁 𑀘𑀻𑀯𑀭𑀭𑀚𑀦𑀸𑀤𑀺𑀓𑀁 𑀲𑀫𑀼𑀝𑁆𑀞𑀸𑀧𑁂𑀢𑀺 𑀦𑀺𑀧𑁆𑀨𑀸𑀤𑁂𑀢𑀺, 𑀢𑀁𑀢𑀁𑀓𑀺𑀭𑀺𑀬𑀸𑀦𑀺𑀧𑁆𑀨𑀸𑀤𑀓𑁄 𑀯𑀸 𑀘𑁂𑀢𑀦𑀸𑀲𑀗𑁆𑀔𑀸𑀢𑁄 𑀓𑀫𑁆𑀫𑀦𑁆𑀢𑁄 𑀳𑀢𑁆𑀣𑀘𑀮𑀦𑀸𑀤𑀺𑀓𑀁 𑀓𑀺𑀭𑀺𑀬𑀁 𑀲𑀫𑀼𑀝𑁆𑀞𑀸𑀧𑁂𑀢𑀺, 𑀏𑀯𑀁 𑀲𑀸𑀯𑀚𑁆𑀚𑀓𑀢𑁆𑀢𑀩𑁆𑀩𑀓𑀺𑀭𑀺𑀬𑀸𑀲𑀫𑀼𑀝𑁆𑀞𑀸𑀧𑀓𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀧𑁆𑀧𑀳𑀸𑀦𑁂𑀦 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄 𑀦𑀺𑀭𑀯𑀚𑁆𑀚𑀲𑁆𑀲 𑀓𑀢𑁆𑀢𑀩𑁆𑀩𑀲𑁆𑀲 𑀦𑀺𑀭𑀯𑀚𑁆𑀚𑀸𑀓𑀸𑀭𑁂𑀦 𑀲𑀫𑀼𑀝𑁆𑀞𑀸𑀧𑀦𑀓𑀺𑀘𑁆𑀘𑀯𑀸 𑀳𑁄𑀢𑀻𑀢𑀺 𑀆𑀳 𑁋 ‘‘𑀲𑀫𑁆𑀫𑀸𑀲𑀫𑀼𑀝𑁆𑀞𑀸𑀧𑀦𑀮𑀓𑁆𑀔𑀡𑁄’’𑀢𑀺. 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀸 𑀉𑀓𑁆𑀔𑀺𑀧𑀦𑀁 𑀲𑀫𑀼𑀝𑁆𑀞𑀸𑀧𑀦𑀁 𑀓𑀸𑀬𑀺𑀓𑀓𑀺𑀭𑀺𑀬𑀸𑀬 𑀪𑀸𑀭𑀼𑀓𑁆𑀔𑀺𑀧𑀦𑀁 𑀯𑀺𑀬. 𑀲𑀫𑁆𑀫𑀸𑀯𑁄𑀤𑀸𑀧𑀦𑀮𑀓𑁆𑀔𑀡𑁄𑀢𑀺 𑀚𑀻𑀯𑀫𑀸𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲, 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀯𑀸 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀯𑀼𑀢𑁆𑀢𑀺𑀬𑀸, 𑀆𑀚𑀻𑀯𑀲𑁆𑀲𑁂𑀯 𑀯𑀸 𑀲𑀫𑁆𑀫𑀤𑁂𑀯 𑀲𑁄𑀥𑀦𑀁 𑀯𑁄𑀤𑀸𑀧𑀦𑀁 𑀮𑀓𑁆𑀔𑀡𑀁 𑀏𑀢𑀲𑁆𑀲𑀸𑀢𑀺 𑀲𑀫𑁆𑀫𑀸𑀯𑁄𑀤𑀸𑀧𑀦𑀮𑀓𑁆𑀔𑀡𑁄. 𑀅𑀣 𑀯𑀸 𑀓𑀸𑀬𑀯𑀸𑀘𑀸𑀦𑀁 𑀔𑀦𑁆𑀥𑀲𑀦𑁆𑀢𑀸𑀦𑀲𑁆𑀲 𑀘 𑀲𑀁𑀓𑀺𑀮𑁂𑀲𑀪𑀽𑀢𑀫𑀺𑀘𑁆𑀙𑀸𑀆𑀚𑀻𑀯𑀧𑁆𑀧𑀳𑀸𑀦𑁂𑀦 𑀲𑀫𑁆𑀫𑀸𑀆𑀚𑀻𑀯𑁄 ‘‘𑀯𑁄𑀤𑀸𑀧𑀦𑀮𑀓𑁆𑀔𑀡𑁄’’𑀢𑀺 𑀯𑀼𑀢𑁆𑀢𑁄. 𑀲𑀫𑁆𑀫𑀸𑀯𑀸𑀬𑀸𑀫𑀲𑀢𑀺𑀲𑀫𑀸𑀥𑀻𑀲𑀼 𑀯𑀢𑁆𑀢𑀩𑁆𑀩𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯.

𑀧𑀜𑁆𑀜𑀸𑀬 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀼𑀩𑁆𑀩𑀗𑁆𑀕𑀫𑀪𑀸𑀯𑀢𑁄 𑀲𑀩𑁆𑀩𑁂𑀧𑀺 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀢𑀲𑁆𑀲𑀸 𑀧𑀝𑀺𑀧𑀓𑁆𑀔𑀸𑀯𑀸𑀢𑀺 𑀯𑀼𑀢𑁆𑀢𑀁 𑁋 ‘‘𑀅𑀜𑁆𑀜𑁂𑀳𑀺𑀧𑀺 𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑁂𑀳𑀺 𑀲𑀤𑁆𑀥𑀺’’𑀦𑁆𑀢𑀺. 𑀅𑀣 𑀯𑀸 𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑀸 𑀤𑀺𑀝𑁆𑀞𑁂𑀓𑀝𑁆𑀞𑀸 𑀅𑀯𑀺𑀚𑁆𑀚𑀸𑀤𑀬𑁄 𑀧𑀜𑁆𑀜𑀸𑀬 𑀉𑀚𑀼𑀧𑀘𑁆𑀘𑀦𑀻𑀓𑀪𑀸𑀯𑀢𑁄. 𑀧𑀲𑁆𑀲𑀢𑀻𑀢𑀺 𑀧𑀲𑁆𑀲𑀦𑁆𑀢𑀻 ¶ 𑀯𑀺𑀬 𑀳𑁄𑀢𑀺 𑀯𑀺𑀩𑀦𑁆𑀥𑀸𑀪𑀸𑀯𑀢𑁄. 𑀢𑁂𑀦𑀸𑀳 𑁋 ‘‘𑀢𑀧𑁆𑀧𑀝𑀺𑀘𑁆𑀙𑀸𑀤𑀓…𑀧𑁂… 𑀅𑀲𑀫𑁆𑀫𑁄𑀳𑀢𑁄’’𑀢𑀺. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀻𑀦𑀁 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀸𑀤𑀬𑁄 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀸𑀢𑀺 𑀆𑀳 𑁋 ‘‘𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀬𑁄…𑀧𑁂… 𑀧𑀚𑀳𑀦𑁆𑀢𑀻’’𑀢𑀺. 𑀢𑀣𑁂𑀯𑀸𑀢𑀺 𑀇𑀫𑀺𑀦𑀸 𑀅𑀢𑁆𑀢𑀦𑁄 𑀧𑀘𑁆𑀘𑀦𑀻𑀓𑀓𑀺𑀮𑁂𑀲𑁂𑀳𑀺 𑀲𑀤𑁆𑀥𑀺𑀦𑁆𑀢𑀺 𑀇𑀫𑀫𑀢𑁆𑀣𑀁 𑀅𑀦𑀼𑀓𑀟𑁆𑀠𑀢𑀺. 𑀯𑀺𑀲𑁂𑀲𑀢𑁄𑀢𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀯𑀼𑀢𑁆𑀢𑀓𑀺𑀘𑁆𑀘𑀢𑁄 𑀯𑀺𑀲𑁂𑀲𑁂𑀦. 𑀏𑀢𑁆𑀣𑀸𑀢𑀺 𑀏𑀢𑁂𑀲𑀼 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀻𑀲𑀼.

𑀏𑀲𑀸 𑀲𑀫𑁆𑀫𑀸𑀤𑀺𑀝𑁆𑀞𑀺 𑀦𑀸𑀫𑀸𑀢𑀺 𑀮𑁄𑀓𑀺𑀬𑀁 𑀮𑁄𑀓𑀼𑀢𑁆𑀢𑀭𑀜𑁆𑀘 𑀏𑀓𑀚𑁆𑀛𑀁 𑀓𑀢𑁆𑀯𑀸 𑀯𑀤𑀢𑀺 𑀫𑀺𑀲𑁆𑀲𑀓𑀢𑀸𑀪𑀸𑀯𑀢𑁄 ¶ . 𑀢𑁂𑀦𑀸𑀳 𑁋 ‘‘𑀧𑀼𑀩𑁆𑀩𑀪𑀸𑀕𑁂’’𑀢𑀺𑀆𑀤𑀺. 𑀏𑀓𑀸𑀭𑀫𑁆𑀫𑀡𑀸 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑁆𑀢𑀸. 𑀓𑀺𑀘𑁆𑀘𑀢𑁄𑀢𑀺 𑀧𑀼𑀩𑁆𑀩𑀪𑀸𑀕𑁂 𑀤𑀼𑀓𑁆𑀔𑀸𑀤𑀻𑀳𑀺 𑀜𑀸𑀡𑁂𑀳𑀺 𑀓𑀸𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀇𑀥 𑀦𑀺𑀧𑁆𑀨𑀢𑁆𑀢𑀺𑀢𑁄, 𑀇𑀫𑀲𑁆𑀲𑁂𑀯 𑀯𑀸 𑀜𑀸𑀡𑀲𑁆𑀲 𑀤𑀼𑀓𑁆𑀔𑀸𑀤𑀺𑀧𑁆𑀧𑀓𑀸𑀲𑀦𑀓𑀺𑀘𑁆𑀘𑀢𑁄. 𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀢𑀺 𑀤𑀼𑀓𑁆𑀔𑀧𑀭𑀺𑀜𑁆𑀜𑀸𑀤𑀺𑀘𑀢𑀼𑀓𑀺𑀘𑁆𑀘𑀲𑀸𑀥𑀦𑀢𑁄. 𑀢𑀻𑀡𑀺 𑀦𑀸𑀫𑀸𑀦𑀺 𑀮𑀪𑀢𑀺 𑀓𑀸𑀫𑀲𑀗𑁆𑀓𑀧𑁆𑀧𑀸𑀤𑀺𑀧𑁆𑀧𑀳𑀸𑀦𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀢𑁄. 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 (𑀯𑀺𑀪. 𑁭𑁦𑁩 𑀆𑀤𑀬𑁄) ‘‘𑀯𑀺𑀭𑀢𑀺𑀘𑁂𑀢𑀦𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀸 𑀘 𑀥𑀫𑁆𑀫𑀸 𑀲𑀺𑀓𑁆𑀔𑀸𑀧𑀤𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀺, 𑀢𑀢𑁆𑀣 𑀧𑀥𑀸𑀦𑀸𑀦𑀁 𑀯𑀺𑀭𑀢𑀺𑀘𑁂𑀢𑀦𑀸𑀦𑀁 𑀯𑀲𑁂𑀦 ‘‘𑀯𑀺𑀭𑀢𑀺𑀬𑁄𑀧𑀺 𑀳𑁄𑀦𑁆𑀢𑀺 𑀘𑁂𑀢𑀦𑀸𑀤𑀬𑁄𑀧𑀻’’𑀢𑀺 𑀆𑀳. ‘‘𑀲𑀫𑁆𑀫𑀸 𑀯𑀤𑀢𑀺 𑀏𑀢𑀸𑀬𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀣𑀲𑀫𑁆𑀪𑀯𑀢𑁄 𑀲𑀫𑁆𑀫𑀸𑀯𑀸𑀘𑀸𑀤𑀬𑁄 𑀢𑀬𑁄 𑀯𑀺𑀭𑀢𑀺𑀬𑁄𑀧𑀺 𑀳𑁄𑀦𑁆𑀢𑀺 𑀘𑁂𑀢𑀦𑀸𑀤𑀬𑁄𑀧𑀺. 𑀫𑀼𑀲𑀸𑀯𑀸𑀤𑀸𑀤𑀻𑀳𑀺 𑀯𑀺𑀭𑀫𑀡𑀓𑀸𑀮𑁂 𑀯𑀺𑀭𑀢𑀺𑀬𑁄, 𑀲𑀼𑀪𑀸𑀲𑀺𑀢𑀸𑀤𑀺𑀯𑀸𑀘𑀸𑀪𑀸𑀲𑀦𑀸𑀤𑀺𑀓𑀸𑀮𑁂 𑀘𑁂𑀢𑀦𑀸𑀤𑀬𑁄 𑀬𑁄𑀚𑁂𑀢𑀩𑁆𑀩𑀸. 𑀫𑀕𑁆𑀕𑀓𑁆𑀔𑀡𑁂 𑀧𑀦 𑀯𑀺𑀭𑀢𑀺𑀬𑁄𑀯 𑀫𑀕𑁆𑀕𑀮𑀓𑁆𑀔𑀡𑀧𑁆𑀧𑀢𑁆𑀢𑀺𑀢𑁄. 𑀦 𑀳𑀺 𑀘𑁂𑀢𑀦𑀸 𑀦𑀺𑀬𑁆𑀬𑀸𑀦𑀲𑀪𑀸𑀯𑀸. 𑀅𑀣 𑀯𑀸 𑀏𑀓𑀲𑁆𑀲 𑀜𑀸𑀡𑀲𑁆𑀲 𑀤𑀼𑀓𑁆𑀔𑀸𑀤𑀺𑀜𑀸𑀡𑀢𑀸 𑀯𑀺𑀬 𑀏𑀓𑀸𑀬 𑀯𑀺𑀭𑀢𑀺𑀬𑀸 𑀫𑀼𑀲𑀸𑀯𑀸𑀤𑀸𑀤𑀺𑀯𑀺𑀭𑀢𑀺𑀪𑀸𑀯𑁄 𑀯𑀺𑀬 𑀘 𑀏𑀓𑀸𑀬 𑀘𑁂𑀢𑀦𑀸𑀬 𑀲𑀫𑁆𑀫𑀸𑀯𑀸𑀘𑀸𑀤𑀺𑀓𑀺𑀘𑁆𑀘𑀢𑁆𑀢𑀬𑀲𑀸𑀥𑀦𑀲𑀪𑀸𑀯𑀸 𑀲𑀫𑁆𑀫𑀸𑀯𑀸𑀘𑀸𑀤𑀺𑀪𑀸𑀯𑀸𑀲𑀺𑀤𑁆𑀥𑀺𑀢𑁄 ‘‘𑀫𑀕𑁆𑀕𑀓𑁆𑀔𑀡𑁂 𑀯𑀺𑀭𑀢𑀺𑀬𑁄𑀯𑀸’’𑀢𑀺 𑀯𑀼𑀢𑁆𑀢𑀁.

𑀘𑀢𑁆𑀢𑀸𑀭𑀺 𑀦𑀸𑀫𑀸𑀦𑀺 𑀮𑀪𑀢𑀻𑀢𑀺 𑀘𑀢𑀼𑀲𑀫𑁆𑀫𑀧𑁆𑀧𑀥𑀸𑀦𑀘𑀢𑀼𑀲𑀢𑀺𑀧𑀝𑁆𑀞𑀸𑀦𑀯𑀲𑁂𑀦 𑀮𑀪𑀢𑀺. 𑀫𑀕𑁆𑀕𑀓𑁆𑀔𑀡𑁂𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑁄. 𑀧𑀼𑀩𑁆𑀩𑀪𑀸𑀕𑁂𑀧𑀺 𑀫𑀕𑁆𑀕𑀓𑁆𑀔𑀡𑁂𑀧𑀺 𑀲𑀫𑁆𑀫𑀸𑀲𑀫𑀸𑀥𑀺 𑀏𑀯𑀸𑀢𑀺 𑀬𑀤𑀺𑀧𑀺 𑀲𑀫𑀸𑀥𑀺𑀉𑀧𑀓𑀸𑀭𑀓𑀸𑀦𑀁 𑀅𑀪𑀺𑀦𑀺𑀭𑁄𑀧𑀦𑀸𑀦𑀼𑀫𑀚𑁆𑀚𑀦𑀲𑀫𑁆𑀧𑀺𑀬𑀸𑀬𑀦𑀩𑁆𑀭𑀽𑀳𑀦𑀲𑀦𑁆𑀢𑀲𑀼𑀔𑀸𑀦𑀁 𑀯𑀺𑀢𑀓𑁆𑀓𑀸𑀤𑀻𑀦𑀁 𑀯𑀲𑁂𑀦 𑀘𑀢𑀽𑀳𑀺 𑀛𑀸𑀦𑁂𑀳𑀺 𑀲𑀫𑁆𑀫𑀸𑀲𑀫𑀸𑀥𑀺 𑀯𑀺𑀪𑀢𑁆𑀢𑁄, 𑀢𑀣𑀸𑀧𑀺 𑀯𑀸𑀬𑀸𑀫𑁄 𑀯𑀺𑀬 𑀅𑀦𑀼𑀧𑁆𑀧𑀦𑁆𑀦𑀸𑀓𑀼𑀲𑀮𑀸𑀦𑀼𑀧𑁆𑀧𑀸𑀤𑀦𑀸𑀤𑀺𑀘𑀢𑀼𑀯𑀸𑀬𑀸𑀫𑀓𑀺𑀘𑁆𑀘𑀁, 𑀲𑀢𑀺 𑀯𑀺𑀬 𑀘 𑀅𑀲𑀼𑀪𑀸𑀲𑀼𑀔𑀸𑀦𑀺𑀘𑁆𑀘𑀸𑀦𑀢𑁆𑀢𑁂𑀲𑀼 𑀓𑀸𑀬𑀸𑀤𑀻𑀲𑀼 𑀲𑀼𑀪𑀸𑀤𑀺𑀲𑀜𑁆𑀜𑀸𑀧𑀳𑀸𑀦𑀮𑀓𑁆𑀔𑀡𑀁 𑀘𑀢𑀼𑀲𑀢𑀺𑀓𑀺𑀘𑁆𑀘𑀁, 𑀏𑀓𑁄 𑀲𑀫𑀸𑀥𑀺 𑀘𑀢𑀼𑀚𑁆𑀛𑀸𑀦𑀲𑀫𑀸𑀥𑀺𑀓𑀺𑀘𑁆𑀘𑀁 𑀦 𑀲𑀸𑀥𑁂𑀢𑀻𑀢𑀺 𑀧𑀼𑀩𑁆𑀩𑀪𑀸𑀕𑁂𑀧𑀺 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺, 𑀧𑀞𑀫𑀚𑁆𑀛𑀸𑀦𑀲𑀫𑀸𑀥𑀺 ¶ 𑀏𑀯 𑀫𑀕𑁆𑀕𑀓𑁆𑀔𑀡𑁂𑀧𑀺, 𑀢𑀣𑀸 𑀧𑀼𑀩𑁆𑀩𑀪𑀸𑀕𑁂𑀧𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺, 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀥𑀺 𑀏𑀯 𑀫𑀕𑁆𑀕𑀓𑁆𑀔𑀡𑁂𑀧𑀻𑀢𑀺 𑀅𑀢𑁆𑀣𑁄.

‘‘𑀓𑀺𑀁 𑀧𑀦𑀸𑀬𑀁 𑀫𑀕𑁆𑀕𑀥𑀫𑁆𑀫𑀸𑀦𑀁 𑀤𑁂𑀲𑀦𑀸𑀦𑀼𑀓𑁆𑀓𑀫𑁄, 𑀓𑁂𑀯𑀮𑀁 𑀯𑀸𑀘𑀸𑀬 𑀓𑀫𑀯𑀢𑁆𑀢𑀺𑀦𑀺𑀪𑀸𑀯𑀢𑁄, 𑀉𑀤𑀸𑀳𑀼 𑀓𑀜𑁆𑀘𑀺 𑀯𑀺𑀲𑁂𑀲𑀁 𑀉𑀧𑀸𑀤𑀸𑀬𑀸’’𑀢𑀺 𑀯𑀺𑀘𑀸𑀭𑀡𑀸𑀬𑀁 𑀓𑀜𑁆𑀘𑀺 𑀯𑀺𑀲𑁂𑀲𑀁 𑀉𑀧𑀸𑀤𑀸𑀬𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 𑁋 ‘‘𑀇𑀫𑁂𑀲𑀽’’𑀢𑀺𑀆𑀤𑀺. 𑀢𑀢𑁆𑀣 𑀪𑀸𑀯𑀦𑀸𑀦𑀼𑀪𑀸𑀯𑀸 𑀳𑀺𑀢𑀨𑀮𑀸𑀬 𑀲𑀸𑀢𑀺𑀲𑀬𑀁 𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀲𑀫𑀢𑁆𑀣𑀢𑀸𑀬𑁄𑀕𑁂𑀦 𑀲𑀩𑁆𑀩𑀲𑁄 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑁂𑀦 𑀬𑀸𑀣𑀸𑀯𑀢𑁄 𑀥𑀫𑁆𑀫𑀲𑀪𑀸𑀯𑀩𑁄𑀥𑀦𑁂𑀦 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀩𑀳𑀼𑀓𑀸𑀭𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑁂𑀦𑀸𑀳 𑁋 ‘‘𑀅𑀬𑀁 𑀳𑀻’’𑀢𑀺𑀆𑀤𑀺.

𑀢𑀲𑁆𑀲𑀸𑀢𑀺 ¶ 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸. 𑀩𑀳𑀼𑀓𑀸𑀭𑁄𑀢𑀺 𑀥𑀫𑁆𑀫𑀲𑀫𑁆𑀧𑀝𑀺𑀯𑁂𑀥𑁂 𑀩𑀳𑀽𑀧𑀓𑀸𑀭𑁄. 𑀇𑀤𑀸𑀦𑀺 𑀢𑀫𑀢𑁆𑀣𑀁 𑀉𑀧𑀫𑀸𑀳𑀺 𑀯𑀺𑀪𑀸𑀯𑁂𑀢𑀼𑀁, ‘‘𑀬𑀣𑀸 𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀯𑀘𑀻𑀪𑁂𑀤𑀲𑁆𑀲 𑀓𑀸𑀭𑀓𑁄 𑀯𑀺𑀢𑀓𑁆𑀓𑁄 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀯𑀘𑀻𑀪𑁂𑀤𑀦𑀺𑀯𑀢𑁆𑀢𑀦𑀧𑁆𑀧𑀯𑀢𑁆𑀢𑀦𑀸𑀓𑀸𑀭𑀸𑀬 𑀲𑀫𑁆𑀫𑀸𑀯𑀸𑀘𑀸𑀬𑀧𑀺 𑀉𑀧𑀓𑀸𑀭𑀓𑁄 𑀏𑀯𑀸𑀢𑀺 𑀆𑀳 𑁋 ‘‘𑀲𑁆𑀯𑀸𑀬𑀁…𑀧𑁂… 𑀲𑀫𑁆𑀫𑀸𑀯𑀸𑀘𑀸𑀬𑀧𑀺 𑀉𑀧𑀓𑀸𑀭𑀓𑁄’’𑀢𑀺. 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄 𑀳𑀺 𑀲𑀘𑁆𑀘𑀯𑀸𑀘𑀸𑀬 𑀯𑀺𑀭𑀢𑀺𑀯𑀸𑀘𑀸𑀬𑀧𑀺 𑀯𑀺𑀲𑁂𑀲𑀧𑀘𑁆𑀘𑀬𑁄 𑀫𑀺𑀘𑁆𑀙𑀸𑀲𑀗𑁆𑀓𑀧𑁆𑀧𑀢𑀤𑁂𑀓𑀝𑁆𑀞𑀓𑀺𑀮𑁂𑀲𑀧𑁆𑀧𑀳𑀸𑀦𑀢𑁄.

𑀲𑀁𑀯𑀺𑀤𑀳𑀺𑀢𑁆𑀯𑀸𑀢𑀺𑀆𑀤𑀻𑀲𑀼 𑀲𑀫𑁆𑀫𑀸 𑀯𑀺𑀤𑀳𑀦𑀁 𑀓𑀫𑁆𑀫𑀦𑁆𑀢𑀧𑁆𑀧𑀬𑁄𑀚𑀦𑀜𑁆𑀘 𑀏𑀓𑀦𑁆𑀢𑀸𑀦𑀯𑀚𑁆𑀚𑀯𑀘𑀻𑀓𑀸𑀬𑀓𑀫𑁆𑀫𑀯𑀲𑁂𑀦 𑀇𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀯𑀺𑀭𑀢𑀺𑀯𑀸𑀘𑀸𑀯𑀲𑁂𑀦 𑀲𑀁𑀯𑀺𑀤𑀳𑀦𑀁 𑀯𑀺𑀭𑀢𑀺𑀓𑀫𑁆𑀫𑀦𑁆𑀢𑀲𑁆𑀲𑁂𑀯 𑀧𑀬𑁄𑀚𑀦𑀜𑁆𑀘 𑀦𑀺𑀤𑀲𑁆𑀲𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀁 𑀳𑀺𑀲𑁆𑀲 𑀲𑀫𑁆𑀫𑀸𑀯𑀸𑀘𑀸𑀬 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀲𑁆𑀲𑀸𑀧𑀺 𑀩𑀳𑀼𑀓𑀸𑀭𑀢𑀸 𑀚𑁄𑀢𑀺𑀢𑀸 𑀲𑀺𑀬𑀸. 𑀯𑀘𑀻𑀪𑁂𑀤𑀦𑀺𑀬𑀸𑀫𑀺𑀓𑀸 𑀳𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺 𑀓𑀸𑀬𑀺𑀓𑀓𑀺𑀭𑀺𑀬𑀦𑀺𑀬𑀸𑀫𑀺𑀓𑀸𑀬 𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺𑀬𑀸 𑀉𑀧𑀓𑀸𑀭𑀺𑀓𑀸. 𑀢𑀣𑀸 𑀳𑀺 𑀯𑀺𑀲𑀁𑀯𑀸𑀤𑀦𑀸𑀤𑀺𑀫𑀺𑀘𑁆𑀙𑀸𑀯𑀸𑀘𑀢𑁄 𑀅𑀯𑀺𑀭𑀢𑁄 𑀫𑀺𑀘𑁆𑀙𑀸𑀓𑀫𑁆𑀫𑀦𑁆𑀢𑀢𑁄𑀧𑀺 𑀦 𑀯𑀺𑀭𑀫𑀢𑁂𑀯. 𑀬𑀣𑀸𑀳 𑁋 ‘‘𑀏𑀓𑀁 𑀥𑀫𑁆𑀫𑀁 𑀅𑀢𑀻𑀢𑀲𑁆𑀲…𑀧𑁂… 𑀦𑀢𑁆𑀣𑀺 𑀧𑀸𑀧𑀁 𑀅𑀓𑀸𑀭𑀺𑀬’’𑀦𑁆𑀢𑀺. 𑀢𑀲𑁆𑀫𑀸 𑀅𑀯𑀺𑀲𑀁𑀯𑀸𑀤𑀦𑀸𑀤𑀺𑀲𑀫𑁆𑀫𑀸𑀯𑀸𑀘𑀸𑀬 𑀞𑀺𑀢𑁄 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑀫𑁆𑀧𑀺 𑀧𑀽𑀭𑁂𑀢𑀺𑀬𑁂𑀯𑀸𑀢𑀺 𑀯𑀘𑀻𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺𑀬𑀸 𑀉𑀧𑀓𑀸𑀭𑀺𑀓𑀸.

𑀬𑀲𑁆𑀫𑀸 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺 𑀦𑀸𑀫 𑀤𑀼𑀲𑁆𑀲𑀻𑀮𑁆𑀬𑀧𑁆𑀧𑀳𑀸𑀦𑀧𑀼𑀩𑁆𑀩𑀺𑀓𑀸, 𑀢𑀲𑁆𑀫𑀸 𑀲𑀫𑁆𑀫𑀸𑀯𑀸𑀘𑀸𑀓𑀫𑁆𑀫𑀦𑁆𑀢𑀸𑀦𑀦𑁆𑀢𑀭𑀁 𑀲𑀫𑁆𑀫𑀸𑀆𑀚𑀻𑀯𑁄 𑀤𑁂𑀲𑀺𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 𑁋 ‘‘𑀘𑀢𑀼𑀩𑁆𑀩𑀺𑀥𑀁 𑀧𑀦𑀸’’𑀢𑀺𑀆𑀤𑀺 ¶ 𑀯𑀼𑀢𑁆𑀢𑀁. 𑀏𑀢𑁆𑀢𑀸𑀯𑀢𑀸𑀢𑀺 𑀧𑀭𑀺𑀲𑀼𑀤𑁆𑀥𑀲𑀻𑀮𑀸𑀚𑀻𑀯𑀺𑀓𑀸𑀫𑀢𑁆𑀢𑁂𑀦. 𑀇𑀤𑀁 𑀯𑀻𑀭𑀺𑀬𑀦𑁆𑀢𑀺 𑀘𑀢𑀼𑀲𑀫𑁆𑀫𑀧𑁆𑀧𑀥𑀸𑀦𑀯𑀻𑀭𑀺𑀬𑀁.

𑀯𑀻𑀭𑀺𑀬𑀸𑀭𑀫𑁆𑀪𑁄𑀧𑀺 𑀲𑀫𑁆𑀫𑀸𑀲𑀢𑀺𑀧𑀭𑀺𑀕𑁆𑀕𑀳𑀺𑀢𑁄 𑀏𑀯 𑀦𑀺𑀩𑁆𑀩𑀸𑀦𑀸𑀯𑀳𑁄, 𑀦 𑀓𑁂𑀯𑀮𑁄𑀢𑀺 𑀤𑀲𑁆𑀲𑁂𑀢𑀼𑀁 𑁋 ‘‘𑀢𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀽𑀧𑀝𑁆𑀞𑀺𑀢𑀸𑀢𑀺 𑀩𑀳𑀺𑀤𑁆𑀥𑀸𑀯𑀺𑀓𑁆𑀔𑁂𑀧𑀁 𑀧𑀳𑀸𑀬 𑀲𑀼𑀝𑁆𑀞𑀼 𑀉𑀧𑀝𑁆𑀞𑀺𑀢𑀸 𑀓𑀸𑀢𑀩𑁆𑀩𑀸. 𑀲𑀫𑀸𑀥𑀺𑀲𑁆𑀲 𑀉𑀧𑀓𑀸𑀭𑀥𑀫𑁆𑀫𑀸 𑀦𑀸𑀫 𑀬𑀣𑀸𑀯𑀼𑀢𑁆𑀢𑀯𑀢𑁆𑀣𑀼𑀯𑀺𑀲𑀤𑀓𑀺𑀭𑀺𑀬𑀸𑀤𑀬𑁄. 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀦𑀼𑀧𑀓𑀸𑀭𑀥𑀫𑁆𑀫𑀸 𑀯𑁂𑀤𑀺𑀢𑀩𑁆𑀩𑀸. 𑀕𑀢𑀺𑀬𑁄𑀢𑀺 𑀦𑀺𑀧𑁆𑀨𑀢𑁆𑀢𑀺𑀬𑁄. 𑀲𑀫𑀦𑁆𑀯𑁂𑀲𑀺𑀢𑁆𑀯𑀸𑀢𑀺 𑀲𑀫𑁆𑀫𑀸 𑀧𑀭𑀺𑀬𑁂𑀲𑀺𑀢𑁆𑀯𑀸.

𑁪𑁨𑁭. 𑀬𑀣𑀸 𑀇𑀢𑁆𑀣𑀻𑀲𑀼 𑀓𑀣𑀸 𑀧𑀯𑀢𑁆𑀢𑀸 𑀅𑀥𑀺𑀢𑁆𑀣𑀻𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀅𑀢𑁆𑀢𑀸𑀦𑀁 𑀅𑀥𑀺𑀓𑀺𑀘𑁆𑀘 𑀧𑀯𑀢𑁆𑀢𑀸 𑀅𑀚𑁆𑀛𑀢𑁆𑀢𑀁. ‘‘𑀏𑀯𑀁 𑀧𑀯𑀢𑁆𑀢𑀫𑀸𑀦𑀸 𑀫𑀬𑀁 ‘𑀅𑀢𑁆𑀢𑀸’𑀢𑀺 𑀕𑀳𑀡𑀁 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀇𑀫𑀺𑀦𑀸 𑀯𑀺𑀬 𑀅𑀥𑀺𑀧𑁆𑀧𑀸𑀬𑁂𑀦 𑀅𑀢𑁆𑀢𑀸𑀦𑀁 𑀅𑀥𑀺𑀓𑀺𑀘𑁆𑀘 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀸 𑀲𑀢𑁆𑀢𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀸 𑀅𑀚𑁆𑀛𑀢𑁆𑀢𑀁. 𑀢𑀲𑁆𑀫𑀺𑀁 𑀅𑀚𑁆𑀛𑀢𑁆𑀢𑀭𑀽𑀧𑁂, 𑀅𑀢𑁆𑀢𑀦𑁄 𑀓𑁂𑀲𑀸𑀤𑀺𑀯𑀢𑁆𑀣𑀼𑀓𑁂 𑀓𑀲𑀺𑀡𑀭𑀽𑀧𑁂𑀢𑀺 𑀅𑀢𑁆𑀣𑁄. 𑀧𑀭𑀺𑀓𑀫𑁆𑀫𑀯𑀲𑁂𑀦 𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻𑀢𑀺 𑀧𑀭𑀺𑀓𑀫𑁆𑀫𑀓𑀭𑀡𑀯𑀲𑁂𑀦 ¶ 𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻, 𑀦 𑀅𑀧𑁆𑀧𑀦𑀸𑀯𑀲𑁂𑀦. 𑀦 𑀳𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀸 𑀅𑀧𑁆𑀧𑀦𑀸 𑀅𑀚𑁆𑀛𑀢𑁆𑀢𑀯𑀺𑀲𑀬𑀸 𑀲𑀫𑁆𑀪𑀯𑀢𑀺. 𑀢𑀁 𑀧𑀦 𑀅𑀚𑁆𑀛𑀢𑁆𑀢𑀁 𑀧𑀭𑀺𑀓𑀫𑁆𑀫𑀯𑀲𑁂𑀦 𑀮𑀤𑁆𑀥𑀁 𑀓𑀲𑀺𑀡𑀦𑀺𑀫𑀺𑀢𑁆𑀢𑀁 𑀅𑀯𑀺𑀲𑀼𑀤𑁆𑀥𑀫𑁂𑀯 𑀳𑁄𑀢𑀺, 𑀦 𑀩𑀳𑀺𑀤𑁆𑀥𑀸 𑀧𑀭𑀺𑀓𑀫𑁆𑀫𑀯𑀲𑁂𑀦 𑀮𑀤𑁆𑀥𑀁 𑀯𑀺𑀬 𑀯𑀺𑀲𑀼𑀤𑁆𑀥𑀁. 𑀢𑁂𑀦𑀸𑀳 𑁋 ‘‘𑀢𑀁 𑀧𑀦𑀸’’𑀢𑀺𑀆𑀤𑀺.

𑀬𑀲𑁆𑀲𑁂𑀯𑀁 𑀧𑀭𑀺𑀓𑀫𑁆𑀫𑀁 𑀅𑀚𑁆𑀛𑀢𑁆𑀢𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀏𑀯𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀅𑀚𑁆𑀛𑀢𑁆𑀢𑀁 𑀧𑀭𑀺𑀓𑀫𑁆𑀫𑀁 𑀚𑀸𑀢𑀁. 𑀦𑀺𑀫𑀺𑀢𑁆𑀢𑀁 𑀧𑀦 𑀩𑀳𑀺𑀤𑁆𑀥𑀸𑀢𑀺 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀁 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀁 𑀦 𑀳𑁄𑀢𑀻𑀢𑀺 𑀩𑀳𑀺𑀤𑁆𑀥𑀸. 𑀧𑀭𑀺𑀢𑁆𑀢𑀸𑀦𑀻𑀢𑀺 𑀬𑀣𑀸𑀮𑀤𑁆𑀥𑀸𑀦𑀺 𑀲𑀼𑀧𑁆𑀧𑀲𑀭𑀸𑀯𑀫𑀢𑁆𑀢𑀸𑀦𑀺. 𑀢𑁂𑀦𑀸𑀳 𑁋 ‘‘𑀅𑀯𑀟𑁆𑀠𑀺𑀢𑀸𑀦𑀻’’𑀢𑀺. 𑀧𑀭𑀺𑀢𑁆𑀢𑀯𑀲𑁂𑀦𑁂𑀯𑀸𑀢𑀺 𑀯𑀡𑁆𑀡𑀯𑀲𑁂𑀦 𑀆𑀪𑁄𑀕𑁂 𑀯𑀺𑀚𑁆𑀚𑀫𑀸𑀦𑁂𑀧𑀺 𑀧𑀭𑀺𑀢𑁆𑀢𑀯𑀲𑁂𑀦𑁂𑀯 𑀇𑀤𑀁 𑀅𑀪𑀺𑀪𑀸𑀬𑀢𑀦𑀁 𑀯𑀼𑀢𑁆𑀢𑀁 𑀧𑀭𑀺𑀢𑁆𑀢𑀢𑀸 𑀳𑁂𑀢𑁆𑀣 𑀅𑀪𑀺𑀪𑀯𑀦𑀲𑁆𑀲 𑀓𑀸𑀭𑀡𑀁. 𑀯𑀡𑁆𑀡𑀸𑀪𑁄𑀕𑁂 𑀲𑀢𑀺𑀧𑀺 𑀅𑀲𑀢𑀺𑀧𑀺 𑀅𑀪𑀺𑀪𑀯𑀢𑀻𑀢𑀺 𑀅𑀪𑀺𑀪𑀼, 𑀧𑀭𑀺𑀓𑀫𑁆𑀫𑀁, 𑀜𑀸𑀡𑀁 𑀯𑀸. 𑀅𑀪𑀺𑀪𑀼 𑀆𑀬𑀢𑀦𑀁 𑀏𑀢𑀲𑁆𑀲𑀸𑀢𑀺 𑀅𑀪𑀺𑀪𑀸𑀬𑀢𑀦𑀁, 𑀛𑀸𑀦𑀁. 𑀅𑀪𑀺𑀪𑀯𑀺𑀢𑀩𑁆𑀩𑀁 𑀯𑀸 𑀆𑀭𑀫𑁆𑀫𑀡𑀲𑀗𑁆𑀔𑀸𑀢𑀁 𑀆𑀬𑀢𑀦𑀁 𑀏𑀢𑀲𑁆𑀲𑀸𑀢𑀺 𑀅𑀪𑀺𑀪𑀸𑀬𑀢𑀦𑀁. 𑀅𑀣 𑀯𑀸 𑀆𑀭𑀫𑁆𑀫𑀡𑀸𑀪𑀺𑀪𑀯𑀦𑀢𑁄 𑀅𑀪𑀺𑀪𑀼 𑀘 𑀢𑀁 𑀆𑀬𑀢𑀦𑀜𑁆𑀘 𑀬𑁄𑀕𑀺𑀦𑁄 𑀲𑀼𑀔𑀯𑀺𑀲𑁂𑀲𑀸𑀦𑀁 𑀅𑀥𑀺𑀝𑁆𑀞𑀸𑀦𑀪𑀸𑀯𑀢𑁄 𑀫𑀦𑀸𑀬𑀢𑀦𑀥𑀫𑁆𑀫𑀸𑀬𑀢𑀦𑀪𑀸𑀯𑀢𑁄 𑀘𑀸𑀢𑀺 𑀲𑀲𑀫𑁆𑀧𑀬𑀼𑀢𑁆𑀢𑀚𑁆𑀛𑀸𑀦𑀁 𑀅𑀪𑀺𑀪𑀸𑀬𑀢𑀦𑀁. 𑀅𑀪𑀺𑀪𑀸𑀬𑀢𑀦𑀪𑀸𑀯𑀦𑀸 𑀦𑀸𑀫 𑀢𑀺𑀓𑁆𑀔𑀧𑀜𑁆𑀜𑀲𑁆𑀲𑁂𑀯 𑀲𑀫𑁆𑀪𑀯𑀢𑀺, 𑀦 𑀇𑀢𑀭𑀲𑁆𑀲𑀸𑀢𑀺 𑀆𑀳 𑁋 ‘‘𑀜𑀸𑀡𑀼𑀢𑁆𑀢𑀭𑀺𑀓𑁄 𑀧𑀼𑀕𑁆𑀕𑀮𑁄’’𑀢𑀺. 𑀅𑀪𑀺𑀪𑀯𑀺𑀢𑁆𑀯𑀸 𑀲𑀫𑀸𑀧𑀚𑁆𑀚𑀢𑀻𑀢𑀺 𑀏𑀢𑁆𑀣 𑀅𑀪𑀺𑀪𑀯𑀦𑀁 ¶ 𑀲𑀫𑀸𑀧𑀚𑁆𑀚𑀦𑀜𑁆𑀘 𑀉𑀧𑀘𑀸𑀭𑀚𑁆𑀛𑀸𑀦𑀸𑀥𑀺𑀕𑀫𑀦𑀲𑀫𑀦𑀦𑁆𑀢𑀭𑀫𑁂𑀯 𑀅𑀧𑁆𑀧𑀦𑀸𑀛𑀸𑀦𑀼𑀧𑁆𑀧𑀸𑀤𑀦𑀦𑁆𑀢𑀺 𑀆𑀳 𑁋 ‘‘𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯𑁂𑀢𑁆𑀣 𑀅𑀧𑁆𑀧𑀦𑀁 𑀧𑀸𑀧𑁂𑀢𑀻’’𑀢𑀺. 𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑀸𑀢𑀺 𑀘 𑀅𑀧𑁆𑀧𑀦𑀸𑀧𑀭𑀺𑀯𑀸𑀲𑀸𑀪𑀸𑀯𑀲𑁆𑀲 𑀮𑀓𑁆𑀔𑀡𑀯𑀘𑀦𑀫𑁂𑀢𑀁. 𑀬𑁄 𑀔𑀺𑀧𑁆𑀧𑀸𑀪𑀺𑀜𑁆𑀜𑁄𑀢𑀺 𑀯𑀼𑀘𑁆𑀘𑀢𑀺, 𑀢𑀢𑁄𑀧𑀺 𑀜𑀸𑀡𑀼𑀢𑁆𑀢𑀭𑀲𑁆𑀲𑁂𑀯 𑀅𑀪𑀺𑀪𑀸𑀬𑀢𑀦𑀪𑀸𑀯𑀦𑀸. 𑀏𑀢𑁆𑀣𑀸𑀢𑀺 𑀏𑀢𑀲𑁆𑀫𑀺𑀁 𑀦𑀺𑀫𑀺𑀢𑁆𑀢𑁂. 𑀅𑀧𑁆𑀧𑀦𑀁 𑀧𑀸𑀧𑁂𑀢𑀻𑀢𑀺 𑀪𑀸𑀯𑀦𑀸𑀅𑀧𑁆𑀧𑀦𑀁 𑀦𑁂𑀢𑀺.

𑀏𑀢𑁆𑀣 𑀘 𑀓𑁂𑀘𑀺 ‘‘𑀉𑀧𑁆𑀧𑀦𑁆𑀦𑁂 𑀉𑀧𑀘𑀸𑀭𑀚𑁆𑀛𑀸𑀦𑁂 𑀢𑀁 𑀆𑀭𑀩𑁆𑀪 𑀬𑁂 𑀳𑁂𑀝𑁆𑀞𑀺𑀫𑀦𑁆𑀢𑁂𑀦 𑀤𑁆𑀯𑁂 𑀢𑀬𑁄 𑀚𑀯𑀦𑀯𑀸𑀭𑀸 𑀧𑀯𑀢𑁆𑀢𑀦𑁆𑀢𑀺, 𑀢𑁂 𑀉𑀧𑀘𑀸𑀭𑀚𑁆𑀛𑀸𑀦𑀧𑀓𑁆𑀔𑀺𑀓𑀸 𑀏𑀯, 𑀢𑀤𑀦𑀦𑁆𑀢𑀭𑀁 𑀪𑀯𑀗𑁆𑀕𑀧𑀭𑀺𑀯𑀸𑀲𑁂𑀦 𑀉𑀧𑀘𑀸𑀭𑀲𑁂𑀯𑀦𑀸𑀬 𑀘 𑀯𑀺𑀦𑀸 𑀅𑀧𑁆𑀧𑀦𑀸 𑀳𑁄𑀢𑀺, 𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯 𑀅𑀧𑁆𑀧𑀦𑀁 𑀧𑀸𑀧𑁂𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀢𑁂𑀲𑀁 𑀫𑀢𑀺𑀫𑀢𑁆𑀢𑀁. 𑀦 𑀳𑀺 𑀧𑀸𑀭𑀺𑀯𑀸𑀲𑀺𑀓𑀧𑀭𑀺𑀓𑀫𑁆𑀫𑁂𑀦 𑀅𑀧𑁆𑀧𑀦𑀸𑀯𑀸𑀭𑁄 𑀇𑀘𑁆𑀙𑀺𑀢𑁄, 𑀦𑀸𑀧𑀺 𑀫𑀳𑀕𑁆𑀕𑀢𑀧𑁆𑀧𑀫𑀸𑀡𑀚𑁆𑀛𑀸𑀦𑁂𑀲𑀼 𑀯𑀺𑀬 𑀉𑀧𑀘𑀸𑀭𑀚𑁆𑀛𑀸𑀦𑁂 𑀏𑀓𑀦𑁆𑀢𑀢𑁄 𑀧𑀘𑁆𑀘𑀯𑁂𑀓𑁆𑀔𑀡𑀸 𑀇𑀘𑁆𑀙𑀺𑀢𑀩𑁆𑀩𑀸. 𑀢𑀲𑁆𑀫𑀸 𑀉𑀧𑀘𑀸𑀭𑀚𑁆𑀛𑀸𑀦𑀸𑀥𑀺𑀕𑀫𑀢𑁄 𑀧𑀭𑀁 𑀓𑀢𑀺𑀧𑀬𑀪𑀯𑀗𑁆𑀕𑀘𑀺𑀢𑁆𑀢𑀸𑀯𑀲𑀸𑀦𑁂 𑀅𑀧𑁆𑀧𑀦𑀁 𑀧𑀸𑀧𑀼𑀡𑀦𑁆𑀢𑁄 ‘‘𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑁂𑀯𑁂𑀢𑁆𑀣 𑀅𑀧𑁆𑀧𑀦𑀁 𑀧𑀸𑀧𑁂𑀢𑀻’’𑀢𑀺 𑀯𑀼𑀢𑁆𑀢𑁄. 𑀲𑀳 𑀦𑀺𑀫𑀺𑀢𑁆𑀢𑀼𑀧𑁆𑀧𑀸𑀤𑁂𑀦𑀸𑀢𑀺 𑀘 𑀅𑀥𑀺𑀧𑁆𑀧𑀸𑀬𑀺𑀓𑀫𑀺𑀤𑀁 𑀯𑀘𑀦𑀁, 𑀦 𑀦𑀻𑀢𑀢𑁆𑀣𑀁, 𑀢𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀦 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 𑀢𑀤𑀸 𑀢𑀣𑀸𑀭𑀽𑀧𑀲𑁆𑀲 𑀆𑀪𑁄𑀕𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀲𑀫𑀸𑀧𑀢𑁆𑀢𑀺𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀆𑀪𑁄𑀕𑁄 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀸𑀯𑀲𑁂𑀦 𑀛𑀸𑀦𑀓𑁆𑀔𑀡𑁂 𑀧𑀯𑀢𑁆𑀢𑀁 𑀅𑀪𑀺𑀪𑀯𑀦𑀸𑀓𑀸𑀭𑀁 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀇𑀫𑀺𑀦𑀸𑀲𑁆𑀲 𑀧𑀼𑀩𑁆𑀩𑀸𑀪𑁄𑀕𑁄 𑀓𑀣𑀺𑀢𑁄’’𑀢𑀺 𑀯𑀼𑀢𑁆𑀢𑀁. 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀁 ¶ 𑀢𑀤𑀸 𑀢𑀣𑀸 𑀆𑀪𑁄𑀕𑀸𑀪𑀸𑀯𑁂 𑀓𑀲𑁆𑀫𑀸 𑀛𑀸𑀦𑀲𑀜𑁆𑀜𑀸𑀬𑀧𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀅𑀪𑀺𑀪𑀯𑀲𑀜𑁆𑀜𑀸 𑀳𑀺𑀲𑁆𑀲 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺𑀬𑀫𑁆𑀧𑀺 𑀅𑀢𑁆𑀣𑀻’’𑀢𑀺.

𑀯𑀟𑁆𑀠𑀺𑀢𑀧𑁆𑀧𑀫𑀸𑀡𑀸𑀦𑀻𑀢𑀺 𑀯𑀺𑀧𑀼𑀮𑀧𑁆𑀧𑀫𑀸𑀡𑀸𑀦𑀻𑀢𑀺 𑀅𑀢𑁆𑀣𑁄, 𑀦 𑀏𑀓𑀗𑁆𑀕𑀼𑀮𑀤𑁆𑀯𑀗𑁆𑀕𑀼𑀮𑀸𑀤𑀺𑀯𑀟𑁆𑀠𑀺𑀁 𑀧𑀸𑀧𑀺𑀢𑀸𑀦𑀺 𑀢𑀣𑀸 𑀯𑀟𑁆𑀠𑀦𑀲𑁆𑀲𑁂𑀯𑁂𑀢𑁆𑀣 𑀅𑀲𑀫𑁆𑀪𑀯𑀢𑁄. 𑀢𑁂𑀦𑀸𑀳 𑁋 ‘‘𑀫𑀳𑀦𑁆𑀢𑀸𑀦𑀻’’𑀢𑀺. 𑀪𑀢𑁆𑀢𑀯𑀟𑁆𑀠𑀺𑀢𑀓𑀦𑁆𑀢𑀺 𑀪𑀼𑀜𑁆𑀚𑀦𑀪𑀸𑀚𑀦𑁂 𑀯𑀟𑁆𑀠𑁂𑀢𑁆𑀯𑀸 𑀤𑀺𑀦𑁆𑀦𑀁 𑀪𑀢𑁆𑀢𑀁, 𑀏𑀓𑀸𑀲𑀦𑁂 𑀧𑀼𑀭𑀺𑀲𑁂𑀦 𑀪𑀼𑀜𑁆𑀚𑀺𑀢𑀩𑁆𑀩𑀪𑀢𑁆𑀢𑀢𑁄 𑀉𑀧𑀟𑁆𑀠𑀪𑀢𑁆𑀢𑀦𑁆𑀢𑀺 𑀅𑀢𑁆𑀣𑁄.

𑀭𑀽𑀧𑁂 𑀲𑀜𑁆𑀜𑀸 𑀭𑀽𑀧𑀲𑀜𑁆𑀜𑀸, 𑀲𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀭𑀽𑀧𑀲𑀜𑁆𑀜𑀻, 𑀦 𑀭𑀽𑀧𑀲𑀜𑁆𑀜𑀻 𑀅𑀭𑀽𑀧𑀲𑀜𑁆𑀜𑀻. 𑀲𑀜𑁆𑀜𑀸𑀲𑀻𑀲𑁂𑀦 𑀛𑀸𑀦𑀁 𑀯𑀤𑀢𑀺. 𑀭𑀽𑀧𑀲𑀜𑁆𑀜𑀸𑀬 𑀅𑀦𑀼𑀧𑁆𑀧𑀸𑀤𑀦𑀫𑁂𑀯𑁂𑀢𑁆𑀣 𑀅𑀮𑀸𑀪𑀺𑀢𑀸. 𑀩𑀳𑀺𑀤𑁆𑀥𑀸𑀯 𑀉𑀧𑁆𑀧𑀦𑁆𑀦𑀦𑁆𑀢𑀺 𑀩𑀳𑀺𑀤𑁆𑀥𑀸𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 𑀉𑀧𑁆𑀧𑀦𑁆𑀦𑀁. 𑀏𑀢𑁆𑀣 𑀘 𑁋

‘‘𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀭𑀺𑀢𑁆𑀢𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺. 𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀅𑀧𑁆𑀧𑀫𑀸𑀡𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺 ¶ . 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀭𑀺𑀢𑁆𑀢𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺. 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀅𑀧𑁆𑀧𑀫𑀸𑀡𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻’’𑀢𑀺 (𑀤𑀻. 𑀦𑀺. 𑁩.𑁩𑁩𑁮, 𑁩𑁫𑁮; 𑀅. 𑀦𑀺. 𑁮.𑁬𑁫; 𑁧𑁦.𑁨𑁯) 𑁋

𑀏𑀯𑀫𑀺𑀥 𑀘𑀢𑁆𑀢𑀸𑀭𑀺 𑀅𑀪𑀺𑀪𑀸𑀬𑀢𑀦𑀸𑀦𑀺 𑀆𑀕𑀢𑀸𑀦𑀺. 𑀅𑀪𑀺𑀥𑀫𑁆𑀫𑁂 (𑀥. 𑀲. 𑁨𑁪𑁪-𑁨𑁪𑁫) 𑀧𑀦 ‘‘𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀭𑀺𑀢𑁆𑀢𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺, 𑀅𑀧𑁆𑀧𑀫𑀸𑀡𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻’’𑀢𑀺 𑀏𑀯𑀫𑀸𑀕𑀢𑀸𑀦𑀺. 𑀢𑀢𑁆𑀣 𑀘 𑀓𑀸𑀭𑀡𑀁 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀫𑁂𑀯. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀅𑀝𑁆𑀞𑀲𑀸𑀮𑀺𑀦𑀺𑀬𑀁 (𑀥. 𑀲. 𑀅𑀝𑁆𑀞. 𑁨𑁦𑁪) 𑁋

‘‘𑀓𑀲𑁆𑀫𑀸 𑀧𑀦 𑀬𑀣𑀸 𑀲𑀼𑀢𑁆𑀢𑀦𑁆𑀢𑁂 ‘𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻 𑀏𑀓𑁄 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀺 𑀧𑀭𑀺𑀢𑁆𑀢𑀸𑀦𑀻’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀏𑀯𑀁 𑀅𑀯𑀢𑁆𑀯𑀸 𑀇𑀥 𑀘𑀢𑀽𑀲𑀼𑀧𑀺 𑀅𑀪𑀺𑀪𑀸𑀬𑀢𑀦𑁂𑀲𑀼 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀺𑀢𑀸𑀯 𑀯𑀼𑀢𑁆𑀢𑀸𑀢𑀺. 𑀅𑀚𑁆𑀛𑀢𑁆𑀢𑀭𑀽𑀧𑀸𑀦𑀁 𑀅𑀦𑀪𑀺𑀪𑀯𑀦𑀻𑀬𑀢𑁄. 𑀢𑀢𑁆𑀣 𑀯𑀸 𑀳𑀺 𑀇𑀥 𑀯𑀸 𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑁂𑀯 𑀅𑀪𑀺𑀪𑀯𑀺𑀢𑀩𑁆𑀩𑀸𑀦𑀺, 𑀢𑀲𑁆𑀫𑀸 𑀢𑀸𑀦𑀺 𑀦𑀺𑀬𑀫𑀢𑁄 𑀯𑀢𑁆𑀢𑀩𑁆𑀩𑀸𑀦𑀻’’𑀢𑀺.

𑀢𑀢𑁆𑀭𑀸𑀧𑀺 𑀇𑀥𑀧𑀺 𑀯𑀼𑀢𑁆𑀢𑀸𑀦𑀺 ‘‘𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀻𑀢𑀺 𑀇𑀤𑀁 𑀧𑀦 𑀲𑀢𑁆𑀣𑀼 𑀤𑁂𑀲𑀦𑀸𑀯𑀺𑀮𑀸𑀲𑀫𑀢𑁆𑀢𑀫𑁂𑀯𑀸’’𑀢𑀺. 𑀅𑀬𑀁 𑀧𑀦𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀇𑀥 𑀯𑀡𑁆𑀡𑀸𑀪𑁄𑀕𑀭𑀳𑀺𑀢𑀸𑀦𑀺 𑀲𑀳𑀺𑀢𑀸𑀦𑀺 𑀘 𑀲𑀩𑁆𑀩𑀸𑀦𑀺 𑀧𑀭𑀺𑀢𑁆𑀢𑀸𑀦𑀺 𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀺 𑀅𑀪𑀺𑀪𑀼𑀬𑁆𑀬𑀸𑀢𑀺. 𑀧𑀭𑀺𑀬𑀸𑀬𑀓𑀣𑀸 𑀳𑀺 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀢𑀺. 𑀅𑀪𑀺𑀥𑀫𑁆𑀫𑁂 ¶ 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀢𑁆𑀢𑀸 𑀯𑀡𑁆𑀡𑀸𑀪𑁄𑀕𑀭𑀳𑀺𑀢𑀸𑀦𑀺 𑀯𑀺𑀲𑀼𑀁 𑀯𑀼𑀢𑁆𑀢𑀸𑀦𑀺, 𑀢𑀣𑀸 𑀲𑀳𑀺𑀢𑀸𑀦𑀺. 𑀅𑀢𑁆𑀣𑀺 𑀳𑀺 𑀉𑀪𑀬𑀢𑁆𑀣 𑀅𑀪𑀺𑀪𑀯𑀦𑀯𑀺𑀲𑁂𑀲𑁄𑀢𑀺. 𑀢𑀣𑀸 𑀇𑀥 𑀧𑀭𑀺𑀬𑀸𑀬𑀤𑁂𑀲𑀦𑀢𑁆𑀢𑀸 𑀯𑀺𑀫𑁄𑀓𑁆𑀔𑀸𑀦𑀫𑁆𑀧𑀺 𑀅𑀪𑀺𑀪𑀯𑀦𑀧𑀭𑀺𑀬𑀸𑀬𑁄 𑀅𑀢𑁆𑀣𑀻𑀢𑀺 ‘‘𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻’’𑀢𑀺𑀆𑀤𑀺𑀦𑀸 𑀧𑀞𑀫𑀤𑀼𑀢𑀺𑀬𑀅𑀪𑀺𑀪𑀸𑀬𑀢𑀦𑁂𑀲𑀼 𑀧𑀞𑀫𑀯𑀺𑀫𑁄𑀓𑁆𑀔𑁄, 𑀢𑀢𑀺𑀬𑀘𑀢𑀼𑀢𑁆𑀣𑀅𑀪𑀺𑀪𑀸𑀬𑀢𑀦𑁂𑀲𑀼 𑀤𑀼𑀢𑀺𑀬𑀯𑀺𑀫𑁄𑀓𑁆𑀔𑁄, 𑀯𑀡𑁆𑀡𑀸𑀪𑀺𑀪𑀸𑀬𑀢𑀦𑁂𑀲𑀼 𑀢𑀢𑀺𑀬𑀯𑀺𑀫𑁄𑀓𑁆𑀔𑁄 𑀘 𑀅𑀪𑀺𑀪𑀯𑀦𑀧𑀢𑁆𑀢𑀺𑀢𑁄 𑀲𑀗𑁆𑀕𑀳𑀺𑀢𑁄. 𑀅𑀪𑀺𑀥𑀫𑁆𑀫𑁂 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀤𑁂𑀲𑀦𑀢𑁆𑀢𑀸 𑀯𑀺𑀫𑁄𑀓𑁆𑀔𑀸𑀪𑀺𑀪𑀸𑀬𑀢𑀦𑀸𑀦𑀺 𑀅𑀲𑀗𑁆𑀓𑀭𑀢𑁄 𑀤𑁂𑀲𑁂𑀢𑀼𑀁 𑀯𑀺𑀫𑁄𑀓𑁆𑀔𑁂 𑀯𑀚𑁆𑀚𑁂𑀢𑁆𑀯𑀸 𑀅𑀪𑀺𑀪𑀸𑀬𑀢𑀦𑀸𑀦𑀺 𑀓𑀣𑀺𑀢𑀸𑀦𑀺. 𑀲𑀩𑁆𑀩𑀸𑀦𑀺 𑀘 𑀯𑀺𑀫𑁄𑀓𑁆𑀔𑀓𑀺𑀘𑁆𑀘𑀸𑀦𑀺 𑀛𑀸𑀦𑀸𑀦𑀺 𑀯𑀺𑀫𑁄𑀓𑁆𑀔𑀤𑁂𑀲𑀦𑀸𑀬𑀁 𑀯𑀼𑀢𑁆𑀢𑀸𑀦𑀺. 𑀢𑀤𑁂𑀢𑀁 ‘‘𑀅𑀚𑁆𑀛𑀢𑁆𑀢𑀁 𑀭𑀽𑀧𑀲𑀜𑁆𑀜𑀻’’𑀢𑀺 𑀆𑀕𑀢𑀲𑁆𑀲 𑀅𑀪𑀺𑀪𑀸𑀬𑀢𑀦𑀤𑁆𑀯𑀬𑀲𑁆𑀲 𑀅𑀪𑀺𑀥𑀫𑁆𑀫𑁂 𑀅𑀪𑀺𑀪𑀸𑀬𑀢𑀦𑁂𑀲𑀼 𑀅𑀯𑀘𑀦𑀢𑁄 ‘‘𑀭𑀽𑀧𑀻 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺𑀆𑀤𑀻𑀦𑀜𑁆𑀘 𑀲𑀩𑁆𑀩𑀯𑀺𑀫𑁄𑀓𑁆𑀔𑀓𑀺𑀘𑁆𑀘𑀲𑀸𑀥𑀸𑀭𑀡𑀯𑀘𑀦𑀪𑀸𑀯𑀢𑁄 𑀯𑀯𑀢𑁆𑀣𑀸𑀦𑀁 𑀓𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺.

𑀅𑀚𑁆𑀛𑀢𑁆𑀢𑀭𑀽𑀧𑀸𑀦𑀁 ¶ 𑀅𑀦𑀪𑀺𑀪𑀯𑀦𑀻𑀬𑀢𑁄𑀢𑀺 𑀇𑀤𑀁 𑀅𑀪𑀺𑀥𑀫𑁆𑀫𑁂 𑀓𑀢𑁆𑀣𑀘𑀺𑀧𑀺 ‘‘𑀅𑀚𑁆𑀛𑀢𑁆𑀢𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺 𑀅𑀯𑀢𑁆𑀯𑀸 𑀲𑀩𑁆𑀩𑀢𑁆𑀣 𑀬𑀁 𑀯𑀼𑀢𑁆𑀢𑀁 𑁋 ‘‘𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺, 𑀢𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀢𑁂𑀦 𑀬𑀁 𑀅𑀜𑁆𑀜𑀳𑁂𑀢𑀼𑀓𑀁 𑀲𑀼𑀢𑁆𑀢𑀦𑁆𑀢𑁂 ‘‘𑀩𑀳𑀺𑀤𑁆𑀥𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑀻’’𑀢𑀺 𑀯𑀘𑀦𑀁, 𑀢𑀁 𑀢𑁂𑀦 𑀳𑁂𑀢𑀼𑀦𑀸 𑀯𑀼𑀢𑁆𑀢𑀁. 𑀬𑀁 𑀧𑀦 𑀤𑁂𑀲𑀦𑀸𑀯𑀺𑀮𑀸𑀲𑀳𑁂𑀢𑀼𑀓𑀁 𑀅𑀚𑁆𑀛𑀢𑁆𑀢𑀁 𑀅𑀭𑀽𑀧𑀲𑀜𑁆𑀜𑀺𑀢𑀸𑀬 𑀏𑀯 𑀅𑀪𑀺𑀥𑀫𑁆𑀫𑁂 𑀯𑀘𑀦𑀁, 𑀦 𑀢𑀲𑁆𑀲 𑀅𑀜𑁆𑀜𑀁 𑀓𑀸𑀭𑀡𑀁 𑀫𑀕𑁆𑀕𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀚𑁆𑀛𑀢𑁆𑀢𑀭𑀽𑀧𑀸𑀦𑀁 𑀅𑀦𑀪𑀺𑀪𑀯𑀦𑀻𑀬𑀢𑀸 𑀘 𑀢𑁂𑀲𑀁 𑀩𑀳𑀺𑀤𑁆𑀥𑀸𑀭𑀽𑀧𑀸𑀦𑀁 𑀯𑀺𑀬 𑀅𑀯𑀺𑀪𑀽𑀢𑀢𑁆𑀢𑀸. 𑀤𑁂𑀲𑀦𑀸𑀯𑀺𑀮𑀸𑀲𑁄 𑀘 𑀬𑀣𑀸𑀯𑀼𑀢𑁆𑀢𑀯𑀯𑀢𑁆𑀣𑀸𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀯𑀺𑀚𑁆𑀚𑀫𑀸𑀦𑀧𑀭𑀺𑀬𑀸𑀬𑀓𑀣𑀦𑀪𑀸𑀯𑀢𑁄. 𑀤𑁂𑀲𑀦𑀸𑀯𑀺𑀮𑀸𑀲𑁄 𑀳𑀺 𑀦𑀸𑀫 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀯𑀺𑀚𑁆𑀚𑀫𑀸𑀦𑀲𑁆𑀲 𑀘 𑀧𑀭𑀺𑀬𑀸𑀬𑀲𑁆𑀲 𑀯𑀺𑀪𑀸𑀯𑀦𑀁, 𑀦 𑀬𑀲𑁆𑀲 𑀓𑀲𑁆𑀲𑀘𑀺, 𑀢𑀲𑁆𑀫𑀸 ‘‘𑀇𑀥 𑀧𑀭𑀺𑀬𑀸𑀬𑀤𑁂𑀲𑀦𑀢𑁆𑀢𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀯𑀯𑀢𑁆𑀣𑀸𑀦𑀁 𑀤𑁂𑀲𑀦𑀸𑀯𑀺𑀮𑀸𑀲𑀦𑀺𑀩𑀦𑁆𑀥𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀼𑀯𑀡𑁆𑀡𑀤𑀼𑀩𑁆𑀩𑀡𑁆𑀡𑀸𑀦𑀻𑀢𑀺 𑀏𑀢𑁂𑀦𑁂𑀯 𑀲𑀺𑀤𑁆𑀥𑀢𑁆𑀢𑀸 𑀦 𑀦𑀻𑀮𑀸𑀤𑀺𑀅𑀪𑀺𑀪𑀸𑀬𑀢𑀦𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀻𑀢𑀺 𑀘𑁂? 𑀦 𑀦𑀻𑀮𑀸𑀤𑀻𑀲𑀼 𑀓𑀢𑀸𑀥𑀺𑀓𑀸𑀭𑀸𑀦𑀁 𑀦𑀻𑀮𑀸𑀤𑀺𑀪𑀸𑀯𑀲𑁆𑀲𑁂𑀯 𑀅𑀪𑀺𑀪𑀯𑀦𑀓𑀸𑀭𑀡𑀢𑁆𑀢𑀸. 𑀦 𑀳𑀺 𑀢𑁂𑀲𑀁 𑀧𑀭𑀺𑀲𑀼𑀤𑁆𑀥𑀸𑀧𑀭𑀺𑀲𑀼𑀤𑁆𑀥𑀯𑀡𑁆𑀡𑀸𑀦𑀁 𑀧𑀭𑀺𑀢𑁆𑀢𑀢𑀸 𑀅𑀧𑁆𑀧𑀫𑀸𑀡𑀢𑀸 𑀯𑀸 𑀅𑀪𑀺𑀪𑀯𑀦𑀓𑀸𑀭𑀡𑀁, 𑀅𑀣 𑀔𑁄 𑀦𑀻𑀮𑀸𑀤𑀺𑀪𑀸𑀯𑁄 𑀏𑀯𑀸𑀢𑀺. 𑀏𑀢𑁂𑀲𑀼 𑀘 𑀧𑀭𑀺𑀢𑁆𑀢𑀸𑀤𑀺𑀓𑀲𑀺𑀡𑀭𑀽𑀧𑁂𑀲𑀼 𑀬𑀁𑀬𑀁𑀘𑀭𑀺𑀢𑀲𑁆𑀲 𑀇𑀫𑀸𑀦𑀺 𑀅𑀪𑀺𑀪𑀸𑀬𑀢𑀦𑀸𑀦𑀺 𑀇𑀚𑁆𑀛𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀇𑀫𑁂𑀲𑀼 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀯𑀲𑁂𑀦𑀸𑀢𑀺 𑀦𑀻𑀮𑀯𑀡𑁆𑀡𑀦𑀻𑀮𑀦𑀺𑀤𑀲𑁆𑀲𑀦𑀦𑀻𑀮𑀦𑀺𑀪𑀸𑀲𑀸𑀦𑀁 𑀲𑀸𑀥𑀸𑀭𑀡𑀯𑀲𑁂𑀦. 𑀯𑀡𑁆𑀡𑀯𑀲𑁂𑀦𑀸𑀢𑀺 𑀲𑀪𑀸𑀯𑀯𑀡𑁆𑀡𑀯𑀲𑁂𑀦. 𑀦𑀺𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀧𑀲𑁆𑀲𑀺𑀢𑀩𑁆𑀩𑀢𑀸𑀯𑀲𑁂𑀦, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀕𑀳𑁂𑀢𑀩𑁆𑀩𑀢𑀸𑀯𑀲𑁂𑀦 ¶ . 𑀑𑀪𑀸𑀲𑀯𑀲𑁂𑀦𑀸𑀢𑀺 𑀲𑀧𑁆𑀧𑀪𑀸𑀲𑀢𑀸𑀬 𑀅𑀯𑀪𑀸𑀲𑀦𑀯𑀲𑁂𑀦. 𑀯𑀡𑁆𑀡𑀥𑀸𑀢𑀼𑀬𑀸 𑀯𑀸𑀢𑀺 𑀅𑀜𑁆𑀚𑀦𑀭𑀚𑀢𑀯𑀢𑁆𑀣𑀸𑀤𑀺𑀯𑀡𑁆𑀡𑀥𑀸𑀢𑀼𑀬𑀸. 𑀮𑁄𑀓𑀺𑀬𑀸𑀦𑁂𑀯 𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀪𑀸𑀯𑀢𑁄.

𑁪𑁩𑁫. 𑀭𑀽𑀧𑀻𑀢𑀺 𑀏𑀢𑁆𑀣 𑀬𑁂𑀦𑀸𑀬𑀁 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁂𑀦 𑀭𑀽𑀧𑁂𑀦 𑀲𑀫𑀦𑁆𑀦𑀸𑀕𑀢𑁄, 𑀢𑀁 𑀬𑀲𑁆𑀲 𑀛𑀸𑀦𑀲𑁆𑀲 𑀳𑁂𑀢𑀼𑀪𑀸𑀯𑁂𑀦 𑀯𑀺𑀲𑀺𑀝𑁆𑀞𑀭𑀽𑀧𑀁 𑀳𑁄𑀢𑀺. 𑀬𑁂𑀦 𑀯𑀺𑀲𑀺𑀝𑁆𑀞𑁂𑀦 𑀭𑀽𑀧𑀻𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀢𑀤𑁂𑀯 𑀲𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀭𑀽𑀧𑀦𑀺𑀫𑀺𑀢𑁆𑀢𑀁 𑀛𑀸𑀦𑀁. 𑀇𑀥 𑀧𑀦 𑀧𑀭𑀫𑀢𑁆𑀣𑀢𑁄 𑀭𑀽𑀧𑀺𑀪𑀸𑀯𑀲𑀸𑀥𑀓𑀦𑁆𑀢𑀺 𑀆𑀳 𑁋 ‘‘𑀅𑀚𑁆𑀛𑀢𑁆𑀢𑀁 𑀓𑁂𑀲𑀸𑀤𑀻𑀲𑀽’’𑀢𑀺𑀆𑀤𑀺. 𑀭𑀽𑀧𑀚𑁆𑀛𑀸𑀦𑀁 𑀭𑀽𑀧𑀦𑁆𑀢𑀺 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀯𑀼𑀢𑁆𑀢𑀁 𑁋 ‘‘𑀭𑀽𑀧𑀽𑀧𑀧𑀢𑁆𑀢𑀺𑀬𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁬𑁦-𑁧𑁬𑁧, 𑁧𑁮𑁫-𑁧𑁯𑁦 𑀆𑀤𑀬𑁄, 𑁨𑁪𑁪-𑁨𑁪𑁫 𑀆𑀤𑀬𑁄; 𑀯𑀺𑀪. 𑁬𑁨𑁫) 𑀯𑀺𑀬.

𑀲𑀼𑀪𑀦𑁆𑀢𑁆𑀯𑁂𑀯 ¶ 𑀅𑀥𑀺𑀫𑀼𑀢𑁆𑀢𑁄 𑀳𑁄𑀢𑀻𑀢𑀺 𑀅𑀬𑀁 𑀢𑀢𑀺𑀬𑀯𑀺𑀫𑁄𑀓𑁆𑀔𑁄. 𑀇𑀥 𑀲𑀼𑀧𑀭𑀺𑀲𑀼𑀤𑁆𑀥𑀦𑀻𑀮𑀸𑀤𑀺𑀯𑀡𑁆𑀡𑀓𑀲𑀺𑀡𑀚𑁆𑀛𑀸𑀦𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀴𑀺𑀬𑀁 𑀢𑀲𑁆𑀲 𑀩𑁆𑀭𑀳𑁆𑀫𑀯𑀺𑀳𑀸𑀭𑀚𑁆𑀛𑀸𑀦𑀯𑀲𑁂𑀦 𑀆𑀕𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀧𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁. 𑀇𑀥 𑀧𑀦 𑀉𑀧𑀭𑀺𑀧𑀸𑀴𑀺𑀬𑀁𑀬𑁂𑀯 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀦𑀁 𑀆𑀕𑀢𑀢𑁆𑀢𑀸 𑀢𑀁 𑀦𑀬𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀲𑀼𑀤𑁆𑀥𑀦𑀻𑀮𑀸𑀤𑀺𑀯𑀡𑁆𑀡𑀓𑀲𑀺𑀡𑀯𑀲𑁂𑀦𑁂𑀯 𑀲𑀼𑀪𑀯𑀺𑀫𑁄𑀓𑁆𑀔𑁄 𑀅𑀦𑀼𑀜𑁆𑀜𑀸𑀢𑁄.

𑁪𑁪𑁩. 𑀧𑀭𑀺𑀓𑀫𑁆𑀫𑀧𑀣𑀯𑀺𑀬𑀸𑀧𑀻𑀢𑀺 𑀅𑀓𑀢𑀸𑀬 𑀯𑀸 𑀓𑀢𑀸𑀬 𑀯𑀸 𑀤𑀴𑁆𑀳𑀫𑀡𑁆𑀟𑀮𑀸𑀤𑀺𑀲𑀗𑁆𑀔𑀸𑀢𑀧𑀭𑀺𑀓𑀫𑁆𑀫𑀧𑀣𑀯𑀺𑀬𑀸𑀧𑀺. 𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀸𑀤𑀻𑀦𑀁 𑀧𑀣𑀯𑀻𑀓𑀲𑀺𑀡𑀦𑁆𑀢𑀺 𑀦𑀸𑀫𑀁 𑀦𑀺𑀲𑁆𑀲𑀺𑀢𑁂 𑀦𑀺𑀲𑁆𑀲𑀬𑀯𑁄𑀳𑀸𑀭𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁, 𑀬𑀣𑀸 ‘‘𑀫𑀜𑁆𑀘𑀸 𑀉𑀓𑁆𑀓𑀼𑀝𑁆𑀞𑀺𑀁 𑀓𑀭𑁄𑀦𑁆𑀢𑀻’’𑀢𑀺.

𑀲𑀻𑀮𑀸𑀦𑀻𑀢𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀸𑀤𑀻𑀦𑀺 𑀘𑀢𑁆𑀢𑀸𑀭𑀺 𑀲𑀻𑀮𑀸𑀦𑀺. 𑀲𑁄𑀥𑁂𑀢𑁆𑀯𑀸𑀢𑀺 𑀅𑀦𑀸𑀧𑀚𑁆𑀚𑀦𑁂𑀦 𑀆𑀧𑀦𑁆𑀦𑀯𑀼𑀝𑁆𑀞𑀸𑀧𑀦𑁂𑀦 𑀓𑀺𑀮𑁂𑀲𑁂𑀳𑀺 𑀅𑀧𑁆𑀧𑀝𑀺𑀧𑀻𑀴𑀦𑁂𑀦 𑀘 𑀯𑀺𑀲𑁄𑀥𑁂𑀢𑁆𑀯𑀸. 𑀢𑀺𑀯𑀺𑀥𑀜𑁆𑀳𑀺 𑀲𑀻𑀮𑀲𑁆𑀲 𑀯𑀺𑀲𑁄𑀥𑀦𑀁 𑀦𑀸𑀫 𑁋 𑀅𑀦𑀸𑀧𑀚𑁆𑀚𑀦𑀁 𑀆𑀧𑀦𑁆𑀦𑀯𑀼𑀝𑁆𑀞𑀸𑀧𑀦𑀁 𑀓𑀺𑀮𑁂𑀲𑁂𑀳𑀺 𑀘 𑀅𑀧𑁆𑀧𑀝𑀺𑀧𑀻𑀴𑀦𑀦𑁆𑀢𑀺. 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀁 𑀧𑀭𑀺𑀩𑀼𑀦𑁆𑀥𑁂𑀢𑀺 𑀉𑀧𑀭𑁄𑀥𑁂𑀢𑀺 𑀧𑀯𑀢𑁆𑀢𑀺𑀢𑀼𑀁 𑀦 𑀤𑁂𑀢𑀻𑀢𑀺 𑀧𑀮𑀺𑀩𑁄𑀥𑁄 𑀭𑀓𑀸𑀭𑀲𑁆𑀲 𑀮𑀓𑀸𑀭𑀁 𑀓𑀢𑁆𑀯𑀸, 𑀧𑀭𑀺𑀩𑀦𑁆𑀥𑁄𑀢𑀺 𑀅𑀢𑁆𑀣𑁄. 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀲𑀫𑀸𑀧𑀦𑁆𑀦𑁂𑀦 𑀲𑀗𑁆𑀕𑀸𑀳𑀡𑁂𑀦 𑀯𑀸 𑀉𑀧𑀭𑀼𑀦𑁆𑀥𑀺𑀢𑁆𑀯𑀸, 𑀅𑀧𑀮𑀺𑀩𑁄𑀥𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸𑀢𑀺 𑁋

‘‘𑀧𑀺𑀬𑁄 𑀕𑀭𑀼 𑀪𑀸𑀯𑀦𑀻𑀬𑁄, 𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄;

𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸, 𑀦𑁄 𑀘𑀝𑁆𑀞𑀸𑀦𑁂 𑀦𑀺𑀬𑁄𑀚𑀓𑁄’’𑀢𑀺. (𑀅. 𑀦𑀺. 𑁭.𑁩𑁭) 𑁋

𑀏𑀯𑀫𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑀁 𑀏𑀓𑀦𑁆𑀢𑀳𑀺𑀢𑁂𑀲𑀺𑀁 𑀯𑀼𑀤𑁆𑀥𑀺𑀧𑀓𑁆𑀔𑁂 𑀞𑀺𑀢𑀁 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸.

𑀅𑀦𑀦𑀼𑀭𑀽𑀧𑀁 ¶ 𑀯𑀺𑀳𑀸𑀭𑀦𑁆𑀢𑀺 𑀅𑀝𑁆𑀞𑀸𑀭𑀲𑀦𑁆𑀦𑀁 𑀤𑁄𑀲𑀸𑀦𑀁 𑀅𑀜𑁆𑀜𑀢𑀭𑁂𑀦 𑀲𑀫𑀦𑁆𑀦𑀸𑀕𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀲𑀼 𑁋

‘‘𑀫𑀳𑀸𑀯𑀸𑀲𑀁 𑀦𑀯𑀸𑀯𑀸𑀲𑀁, 𑀚𑀭𑀸𑀯𑀸𑀲𑀜𑁆𑀘 𑀧𑀦𑁆𑀣𑀦𑀺𑀁;

𑀲𑁄𑀡𑁆𑀟𑀺𑀁 𑀧𑀡𑁆𑀡𑀜𑁆𑀘 𑀧𑀼𑀧𑁆𑀨𑀜𑁆𑀘, 𑀨𑀮𑀁 𑀧𑀢𑁆𑀣𑀺𑀢𑀫𑁂𑀯 𑀘.

‘‘𑀦𑀕𑀭𑀁 𑀤𑀸𑀭𑀼𑀦𑀸 𑀔𑁂𑀢𑁆𑀢𑀁, 𑀯𑀺𑀲𑀪𑀸𑀕𑁂𑀦 𑀧𑀝𑁆𑀝𑀦𑀁;

𑀧𑀘𑁆𑀘𑀦𑁆𑀢𑀲𑀻𑀫𑀸 𑀲𑀧𑁆𑀧𑀸𑀬𑀁, 𑀬𑀢𑁆𑀣 𑀫𑀺𑀢𑁆𑀢𑁄 𑀦 𑀮𑀩𑁆𑀪𑀢𑀺.

‘‘𑀅𑀝𑁆𑀞𑀸𑀭𑀲𑁂𑀢𑀸𑀦𑀺 𑀞𑀸𑀦𑀸𑀦𑀺, 𑀇𑀢𑀺 𑀯𑀺𑀜𑁆𑀜𑀸𑀬 𑀧𑀡𑁆𑀟𑀺𑀢𑁄;

𑀆𑀭𑀓𑀸 𑀧𑀭𑀺𑀯𑀚𑁆𑀚𑁂𑀬𑁆𑀬, 𑀫𑀕𑁆𑀕𑀁 𑀲𑀧𑁆𑀧𑀝𑀺𑀪𑀬𑀁 𑀬𑀣𑀸’’𑀢𑀺. (𑀯𑀺𑀲𑀼𑀤𑁆𑀥𑀺. 𑁧.𑁫𑁨);

𑀅𑀦𑀼𑀭𑀽𑀧𑁂𑀢𑀺 ¶ 𑀕𑁄𑀘𑀭𑀕𑀸𑀫𑀢𑁄 𑀦𑀸𑀢𑀺𑀤𑀽𑀭𑀦𑀘𑁆𑀘𑀸𑀲𑀦𑁆𑀦𑀢𑀸𑀤𑀻𑀳𑀺 𑀧𑀜𑁆𑀘𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁂. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀪𑀕𑀯𑀢𑀸 𑁋

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀁 𑀦𑀸𑀢𑀺𑀤𑀽𑀭𑀁 𑀳𑁄𑀢𑀺 𑀦𑀘𑁆𑀘𑀸𑀲𑀦𑁆𑀦𑀁 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀁 𑀤𑀺𑀯𑀸 𑀅𑀧𑁆𑀧𑀸𑀓𑀺𑀡𑁆𑀡𑀁 𑀭𑀢𑁆𑀢𑀺𑀁 𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀁 𑀅𑀧𑁆𑀧𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀁. 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀯𑀺𑀳𑀭𑀦𑁆𑀢𑀲𑁆𑀲 𑀅𑀧𑁆𑀧𑀓𑀲𑀺𑀭𑁂𑀦 𑀉𑀧𑁆𑀧𑀚𑁆𑀚𑀦𑁆𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸. 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀣𑁂𑀭𑀸 𑀪𑀺𑀓𑁆𑀔𑀽 𑀯𑀺𑀳𑀭𑀦𑁆𑀢𑀺 𑀩𑀳𑀼𑀲𑁆𑀲𑀼𑀢𑀸 𑀆𑀕𑀢𑀸𑀕𑀫𑀸 𑀥𑀫𑁆𑀫𑀥𑀭𑀸 𑀯𑀺𑀦𑀬𑀥𑀭𑀸 𑀫𑀸𑀢𑀺𑀓𑀸𑀥𑀭𑀸. 𑀢𑁂 𑀓𑀸𑀮𑁂𑀦 𑀓𑀸𑀮𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀭𑀺𑀧𑀼𑀘𑁆𑀙𑀢𑀺 𑀧𑀭𑀺𑀧𑀜𑁆𑀳𑀢𑀺 ‘𑀇𑀤𑀁, 𑀪𑀦𑁆𑀢𑁂, 𑀓𑀣𑀁 𑀇𑀫𑀲𑁆𑀲 𑀓𑁄 𑀅𑀢𑁆𑀣𑁄’𑀢𑀺. 𑀢𑀲𑁆𑀲 𑀢𑁂 𑀆𑀬𑀲𑁆𑀫𑀦𑁆𑀢𑁄 𑀅𑀯𑀺𑀯𑀝𑀜𑁆𑀘𑁂𑀯 𑀯𑀺𑀯𑀭𑀦𑁆𑀢𑀺, 𑀅𑀦𑀼𑀢𑁆𑀢𑀸𑀦𑀻𑀓𑀢𑀜𑁆𑀘 𑀉𑀢𑁆𑀢𑀸𑀦𑀺𑀁 𑀓𑀭𑁄𑀦𑁆𑀢𑀺, 𑀅𑀦𑁂𑀓𑀯𑀺𑀳𑀺𑀢𑁂𑀲𑀼 𑀘 𑀓𑀗𑁆𑀔𑀸𑀞𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀓𑀗𑁆𑀔𑀁 𑀧𑀝𑀺𑀯𑀺𑀦𑁄𑀤𑁂𑀦𑁆𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑁂𑀦𑀸𑀲𑀦𑀁 𑀧𑀜𑁆𑀘𑀗𑁆𑀕𑀲𑀫𑀦𑁆𑀦𑀸𑀕𑀢𑀁 𑀳𑁄𑀢𑀻’’𑀢𑀺 (𑀅. 𑀦𑀺. 𑁧𑁦.𑁧𑁧).

𑀏𑀢𑁆𑀣 𑀘 𑀦𑀸𑀢𑀺𑀤𑀽𑀭𑀁 𑀦𑀘𑁆𑀘𑀸𑀲𑀦𑁆𑀦𑀁 𑀕𑀫𑀦𑀸𑀕𑀫𑀦𑀲𑀫𑁆𑀧𑀦𑁆𑀦𑀦𑁆𑀢𑀺 𑀏𑀓𑀁 𑀅𑀗𑁆𑀕𑀁, 𑀤𑀺𑀯𑀸 𑀅𑀧𑁆𑀧𑀸𑀓𑀺𑀡𑁆𑀡𑀁 𑀭𑀢𑁆𑀢𑀺𑀁 𑀅𑀧𑁆𑀧𑀲𑀤𑁆𑀤𑀁 𑀅𑀧𑁆𑀧𑀦𑀺𑀕𑁆𑀖𑁄𑀲𑀦𑁆𑀢𑀺 𑀏𑀓𑀁, 𑀅𑀧𑁆𑀧𑀟𑀁𑀲𑀫𑀓𑀲𑀯𑀸𑀢𑀸𑀢𑀧𑀲𑀭𑀻𑀲𑀧𑀲𑀫𑁆𑀨𑀲𑁆𑀲𑀦𑁆𑀢𑀺 𑀏𑀓𑀁, 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀯𑀺𑀳𑀭𑀦𑁆𑀢𑀲𑁆𑀲…𑀧𑁂… 𑀧𑀭𑀺𑀓𑁆𑀔𑀸𑀭𑀸𑀢𑀺 𑀏𑀓𑀁, 𑀢𑀲𑁆𑀫𑀺𑀁 𑀔𑁄 𑀧𑀦 𑀲𑁂𑀦𑀸𑀲𑀦𑁂 𑀣𑁂𑀭𑀸…𑀧𑁂… 𑀓𑀗𑁆𑀔𑀁 𑀧𑀝𑀺𑀯𑀺𑀦𑁄𑀤𑁂𑀦𑁆𑀢𑀻𑀢𑀺 𑀏𑀓𑀦𑁆𑀢𑀺 𑀏𑀯𑀁 𑀧𑀜𑁆𑀘𑀗𑁆𑀕𑀸𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑀁 ¶ 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀤𑀻𑀖𑀓𑁂𑀲𑀦𑀔𑀮𑁄𑀫𑀸𑀦𑀁 𑀙𑁂𑀤𑀦𑁂𑀦 𑀘𑀻𑀯𑀭𑀓𑀫𑁆𑀫𑀘𑀻𑀯𑀭𑀭𑀚𑀦𑀧𑀢𑁆𑀢𑀧𑀘𑀦𑀫𑀜𑁆𑀘𑀧𑀻𑀞𑀸𑀤𑀺𑀲𑁄𑀥𑀦𑀯𑀲𑁂𑀦 𑀔𑀼𑀤𑁆𑀤𑀓𑀧𑀮𑀺𑀩𑁄𑀥𑀁 𑀉𑀧𑀘𑁆𑀙𑀺𑀦𑁆𑀤𑀺𑀢𑁆𑀯𑀸.

𑁪𑁫𑁩. 𑀉𑀤𑁆𑀥𑀼𑀫𑀸𑀢𑀓𑀸𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀯𑀺𑀦𑀻𑀮𑀓𑀯𑀺𑀧𑀼𑀩𑁆𑀩𑀓𑀯𑀺𑀘𑁆𑀙𑀺𑀤𑁆𑀤𑀓𑀯𑀺𑀓𑁆𑀔𑀸𑀬𑀺𑀢𑀓𑀳𑀢𑀯𑀺𑀓𑁆𑀔𑀺𑀢𑁆𑀢𑀓𑀮𑁄𑀳𑀺𑀢𑀓𑀧𑀼𑀴𑀯𑀓𑀅𑀝𑁆𑀞𑀺𑀓𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑀢𑁆𑀣 𑀪𑀲𑁆𑀢𑀸 𑀯𑀺𑀬 𑀯𑀸𑀬𑀼𑀦𑀸 𑀉𑀤𑁆𑀥𑀁 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀸 𑀬𑀣𑀸𑀦𑀼𑀓𑁆𑀓𑀫𑀁 𑀲𑀫𑀼𑀕𑁆𑀕𑀢𑁂𑀦 𑀲𑀽𑀦𑀪𑀸𑀯𑁂𑀦 𑀥𑀼𑀫𑀸𑀢𑀢𑁆𑀢𑀸 𑀉𑀤𑁆𑀥𑀼𑀫𑀸𑀢𑀁, 𑀉𑀤𑁆𑀥𑀼𑀫𑀸𑀢𑀫𑁂𑀯 𑀉𑀤𑁆𑀥𑀼𑀫𑀸𑀢𑀓𑀁, 𑀧𑀝𑀺𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀉𑀤𑁆𑀥𑀼𑀫𑀸𑀢𑀦𑁆𑀢𑀺 𑀉𑀤𑁆𑀥𑀼𑀫𑀸𑀢𑀓𑀁, 𑀢𑀣𑀸𑀭𑀽𑀧𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀺𑀦𑀻𑀮𑀁 𑀯𑀼𑀘𑁆𑀘𑀢𑀺 𑀯𑀺𑀧𑀭𑀺𑀪𑀺𑀦𑁆𑀦𑀦𑀻𑀮𑀯𑀡𑁆𑀡𑀁, 𑀯𑀺𑀦𑀻𑀮𑀫𑁂𑀯 𑀯𑀺𑀦𑀻𑀮𑀓𑀁, 𑀧𑀝𑀺𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀯𑀺𑀦𑀻𑀮𑀦𑁆𑀢𑀺 𑀯𑀺𑀦𑀻𑀮𑀓𑀁, 𑀫𑀁𑀲𑀼𑀲𑁆𑀲𑀤𑀝𑁆𑀞𑀸𑀦𑁂𑀲𑀼 𑀭𑀢𑁆𑀢𑀯𑀡𑁆𑀡𑀲𑁆𑀲 ¶ , 𑀧𑀼𑀩𑁆𑀩𑀲𑀦𑁆𑀦𑀺𑀘𑀬𑀝𑁆𑀞𑀸𑀦𑁂𑀲𑀼 𑀲𑁂𑀢𑀯𑀡𑁆𑀡𑀲𑁆𑀲, 𑀬𑁂𑀪𑀼𑀬𑁆𑀬𑁂𑀦 𑀘 𑀦𑀻𑀮𑀯𑀡𑁆𑀡𑀲𑁆𑀲 𑀦𑀺𑀮𑀝𑁆𑀞𑀸𑀦𑁂 𑀦𑀻𑀮𑀲𑀸𑀝𑀓𑀧𑀸𑀭𑀼𑀢𑀲𑁆𑀲𑁂𑀯 𑀙𑀯𑀲𑀭𑀻𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀭𑀺𑀪𑀺𑀦𑁆𑀦𑀝𑁆𑀞𑀸𑀦𑁂𑀲𑀼 𑀯𑀺𑀲𑁆𑀲𑀦𑁆𑀤𑀫𑀸𑀦𑀧𑀼𑀩𑁆𑀩𑀁 𑀯𑀺𑀧𑀼𑀩𑁆𑀩𑀁, 𑀯𑀺𑀧𑀼𑀩𑁆𑀩𑀫𑁂𑀯 𑀯𑀺𑀧𑀼𑀩𑁆𑀩𑀓𑀁, 𑀧𑀝𑀺𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀯𑀺𑀧𑀼𑀩𑁆𑀩𑀦𑁆𑀢𑀺 𑀯𑀺𑀧𑀼𑀩𑁆𑀩𑀓𑀁, 𑀢𑀣𑀸𑀭𑀽𑀧𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀯𑀺𑀘𑁆𑀙𑀺𑀤𑁆𑀤𑀁 𑀯𑀼𑀘𑁆𑀘𑀢𑀺 𑀤𑁆𑀯𑀺𑀥𑀸 𑀙𑀺𑀦𑁆𑀤𑀦𑁂𑀦 𑀅𑀧𑀥𑀸𑀭𑀺𑀢𑀁, 𑀯𑀺𑀘𑁆𑀙𑀺𑀤𑁆𑀤𑀫𑁂𑀯 𑀯𑀺𑀘𑁆𑀙𑀺𑀤𑁆𑀤𑀓𑀁, 𑀧𑀝𑀺𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀯𑀺𑀘𑁆𑀙𑀺𑀤𑁆𑀤𑀦𑁆𑀢𑀺 𑀯𑀺𑀘𑁆𑀙𑀺𑀤𑁆𑀤𑀓𑀁, 𑀯𑁂𑀫𑀚𑁆𑀛𑁂 𑀙𑀺𑀦𑁆𑀦𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀇𑀢𑁄 𑀘 𑀏𑀢𑁆𑀢𑁄 𑀘 𑀯𑀺𑀯𑀺𑀥𑀸𑀓𑀸𑀭𑁂𑀦 𑀲𑁄𑀡𑀲𑀺𑀗𑁆𑀕𑀸𑀮𑀸𑀤𑀻𑀳𑀺 𑀔𑀸𑀬𑀺𑀢𑀁 𑀯𑀺𑀓𑁆𑀔𑀸𑀬𑀺𑀢𑀁, 𑀯𑀺𑀓𑁆𑀔𑀸𑀬𑀺𑀢𑀫𑁂𑀯 𑀯𑀺𑀓𑁆𑀔𑀸𑀬𑀺𑀢𑀓𑀁, 𑀧𑀝𑀺𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀯𑀺𑀓𑁆𑀔𑀸𑀬𑀺𑀢𑀦𑁆𑀢𑀺 𑀯𑀺𑀓𑁆𑀔𑀸𑀬𑀺𑀢𑀓𑀁, 𑀢𑀣𑀸𑀭𑀽𑀧𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁.

𑀯𑀺𑀯𑀺𑀥𑀸 𑀔𑀺𑀢𑁆𑀢𑀁 𑀯𑀺𑀓𑁆𑀔𑀺𑀢𑁆𑀢𑀁, 𑀯𑀺𑀓𑁆𑀔𑀺𑀢𑁆𑀢𑀫𑁂𑀯 𑀯𑀺𑀓𑁆𑀔𑀺𑀢𑁆𑀢𑀓𑀁, 𑀧𑀝𑀺𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀯𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀯𑀺𑀓𑁆𑀔𑀺𑀢𑁆𑀢𑀓𑀁, 𑀅𑀜𑁆𑀜𑁂𑀦 𑀳𑀢𑁆𑀣𑀁, 𑀅𑀜𑁆𑀜𑁂𑀦 𑀧𑀸𑀤𑀁, 𑀅𑀜𑁆𑀜𑁂𑀦 𑀲𑀻𑀲𑀦𑁆𑀢𑀺 𑀏𑀯𑀁 𑀢𑀢𑁄 𑀢𑀢𑁄 𑀯𑀺𑀓𑁆𑀔𑀺𑀢𑁆𑀢𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀳𑀢𑀜𑁆𑀘 𑀢𑀁 𑀧𑀼𑀭𑀺𑀫𑀦𑀬𑁂𑀦𑁂𑀯 𑀯𑀺𑀓𑁆𑀔𑀺𑀢𑁆𑀢𑀓𑀜𑁆𑀘𑀸𑀢𑀺 𑀳𑀢𑀯𑀺𑀓𑁆𑀔𑀺𑀢𑁆𑀢𑀓𑀁, 𑀓𑀸𑀓𑀧𑀤𑀸𑀓𑀸𑀭𑁂𑀦 𑀅𑀗𑁆𑀕𑀧𑀘𑁆𑀘𑀗𑁆𑀕𑁂𑀲𑀼 𑀲𑀢𑁆𑀣𑁂𑀦 𑀳𑀦𑀺𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀺𑀓𑁆𑀔𑀺𑀢𑁆𑀢𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀮𑁄𑀳𑀺𑀢𑀁 𑀓𑀺𑀭𑀢𑀺 𑀯𑀺𑀓𑁆𑀔𑀺𑀧𑀢𑀺 𑀇𑀢𑁄 𑀘𑀺𑀢𑁄 𑀘 𑀧𑀕𑁆𑀖𑀭𑀢𑀻𑀢𑀺 𑀮𑁄𑀳𑀺𑀢𑀓𑀁, 𑀧𑀕𑁆𑀖𑀭𑀺𑀢𑀮𑁄𑀳𑀺𑀢𑀫𑀓𑁆𑀔𑀺𑀢𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀧𑀼𑀴𑀯𑀸 𑀯𑀼𑀘𑁆𑀘𑀦𑁆𑀢𑀺 𑀓𑀺𑀫𑀬𑁄, 𑀧𑀼𑀴𑀯𑁂 𑀓𑀺𑀭𑀢𑀻𑀢𑀺 𑀧𑀼𑀴𑀯𑀓𑀁, 𑀓𑀺𑀫𑀺𑀧𑀭𑀺𑀧𑀼𑀡𑁆𑀡𑀲𑁆𑀲 𑀙𑀯𑀲𑀭𑀻𑀭𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀝𑁆𑀞𑀺𑀬𑁂𑀯 𑀅𑀝𑁆𑀞𑀺𑀓𑀁, 𑀧𑀝𑀺𑀓𑀽𑀮𑀢𑁆𑀢𑀸 𑀯𑀸 𑀓𑀼𑀘𑁆𑀙𑀺𑀢𑀁 𑀅𑀝𑁆𑀞𑀻𑀢𑀺 𑀅𑀝𑁆𑀞𑀺𑀓𑀁, 𑀅𑀝𑁆𑀞𑀺𑀲𑀗𑁆𑀔𑀮𑀺𑀓𑀸𑀬𑀧𑀺 𑀏𑀓𑀝𑁆𑀞𑀺𑀓𑀲𑁆𑀲𑀧𑀺 𑀏𑀢𑀁 𑀅𑀥𑀺𑀯𑀘𑀦𑀁. 𑀇𑀫𑁂𑀲𑀼 𑀤𑀲𑀲𑀼 𑀅𑀲𑀼𑀪𑁂𑀲𑀼 𑀧𑀞𑀫𑀚𑁆𑀛𑀸𑀦𑀫𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀦 𑀤𑀼𑀢𑀺𑀬𑀸𑀤𑀻𑀦𑀺. 𑀢𑁂𑀦𑀸𑀳 𑁋 𑀇𑀥 ‘‘𑀧𑀞𑀫𑀚𑁆𑀛𑀸𑀦𑀲𑀳𑀕𑀢𑀸 𑀲𑀜𑁆𑀜𑀸’’𑀢𑀺. 𑀢𑀣𑀸 𑀳𑀺 𑀅𑀧𑀭𑀺𑀲𑀡𑁆𑀞𑀺𑀢𑀚𑀮𑀸𑀬 𑀲𑀻𑀖𑀲𑁄𑀢𑀸𑀬 𑀦𑀤𑀺𑀬𑀸 𑀅𑀭𑀺𑀢𑁆𑀢𑀩𑀮𑁂𑀦𑁂𑀯 𑀦𑀸𑀯𑀸 𑀢𑀺𑀝𑁆𑀞𑀢𑀺, 𑀯𑀺𑀦𑀸 𑀅𑀭𑀺𑀢𑁆𑀢𑁂𑀦 𑀦 𑀲𑀓𑁆𑀓𑀸 𑀞𑀧𑁂𑀢𑀼𑀁. 𑀏𑀯𑀫𑁂𑀯𑀁 𑀤𑀼𑀩𑁆𑀩𑀮𑀢𑁆𑀢𑀸 𑀆𑀭𑀫𑁆𑀫𑀡𑀲𑁆𑀲 𑀯𑀺𑀢𑀓𑁆𑀓𑀩𑀮𑁂𑀦𑁂𑀯 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑀼𑀢𑁆𑀯𑀸 𑀢𑀺𑀝𑁆𑀞𑀢𑀺, 𑀯𑀺𑀦𑀸 𑀯𑀺𑀢𑀓𑁆𑀓𑁂𑀦 𑀦 𑀲𑀓𑁆𑀓𑀸 𑀞𑀧𑁂𑀢𑀼𑀁 ¶ . 𑀢𑀲𑁆𑀫𑀸 𑀧𑀞𑀫𑀚𑁆𑀛𑀸𑀦𑀫𑁂𑀯𑁂𑀢𑁆𑀣 𑀳𑁄𑀢𑀺, 𑀦 𑀤𑀼𑀢𑀺𑀬𑀸𑀤𑀻𑀦𑀺. 𑀆𑀭𑀫𑁆𑀫𑀡𑀲𑁆𑀲 𑀤𑀼𑀩𑁆𑀩𑀮𑀢𑀸 𑀘𑁂𑀢𑁆𑀣 𑀧𑀝𑀺𑀓𑀽𑀮𑀪𑀸𑀯𑁂𑀦 𑀘𑀺𑀢𑁆𑀢𑀁 𑀞𑀧𑁂𑀢𑀼𑀁 𑀅𑀲𑀫𑀢𑁆𑀣𑀢𑀸.

‘‘𑀭𑀼𑀓𑁆𑀔𑁄 𑀫𑀢𑁄, 𑀮𑁄𑀳𑀁 𑀫𑀢’’𑀦𑁆𑀢𑀺𑀆𑀤𑀻𑀲𑀼 𑀬𑀁 𑀔𑀦𑁆𑀥𑀧𑁆𑀧𑀩𑀦𑁆𑀥𑀁 𑀉𑀧𑀸𑀤𑀸𑀬 𑀭𑀼𑀓𑁆𑀔𑀸𑀤𑀺𑀲𑀫𑀜𑁆𑀜𑀸, 𑀢𑀲𑁆𑀫𑀺𑀁 𑀅𑀦𑀼𑀧𑀘𑁆𑀙𑀺𑀦𑁆𑀦𑁂𑀧𑀺 𑀅𑀮𑁆𑀮𑀢𑀸𑀤𑀺𑀯𑀺𑀕𑀫𑀦𑀁 𑀦𑀺𑀲𑁆𑀲𑀸𑀬 𑀫𑀢𑀯𑁄𑀳𑀸𑀭𑁄 𑀲𑀫𑁆𑀫𑀼𑀢𑀺𑀫𑀭𑀡𑀁. 𑀲𑀗𑁆𑀔𑀸𑀭𑀸𑀦𑀁 𑀔𑀡𑀪𑀗𑁆𑀕𑀲𑀗𑁆𑀔𑀸𑀢𑀁 𑀔𑀡𑀺𑀓𑀫𑀭𑀡𑀁. 𑀲𑀫𑀼𑀘𑁆𑀙𑁂𑀤𑀫𑀭𑀡𑀦𑁆𑀢𑀺 𑀅𑀭𑀳𑀢𑁄 𑀲𑀦𑁆𑀢𑀸𑀦𑀲𑁆𑀲 𑀲𑀩𑁆𑀩𑀲𑁄 𑀉𑀘𑁆𑀙𑁂𑀤𑀪𑀽𑀢𑀁 𑀫𑀭𑀡𑀁. 𑀯𑀺𑀧𑀲𑁆𑀲𑀦𑀸𑀪𑀸𑀯𑀦𑀸𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀫𑀭𑀡𑀸𑀦𑀼𑀲𑁆𑀲𑀢𑀺𑀪𑀸𑀯𑀦𑀸𑀬𑀁 𑀧𑀦 𑀢𑀺𑀯𑀺𑀥𑀫𑁆𑀧𑁂𑀢𑀁 𑀦𑀸𑀥𑀺𑀧𑁆𑀧𑁂𑀢𑀁 ¶ 𑀅𑀲𑀁𑀯𑁂𑀕𑀯𑀢𑁆𑀣𑀼𑀢𑁄 𑀅𑀦𑀼𑀧𑀝𑁆𑀞𑀳𑀦𑀢𑁄 𑀅𑀩𑀸𑀳𑀼𑀮𑁆𑀮𑀢𑁄 𑀘. 𑀫𑀭𑀡𑀸𑀦𑀼𑀲𑁆𑀲𑀢𑀺𑀬𑀜𑁆𑀳𑀺 𑀏𑀓𑁂𑀦 𑀪𑀯𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀧𑁆𑀧𑀩𑀦𑁆𑀥𑀲𑁆𑀲 𑀯𑀺𑀘𑁆𑀙𑁂𑀤𑁄 𑀫𑀭𑀡𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑁄 𑀲𑀁𑀯𑁂𑀕𑀯𑀢𑁆𑀣𑀼𑀢𑁄 𑀉𑀧𑀝𑁆𑀞𑀳𑀦𑀢𑁄 𑀩𑀸𑀳𑀼𑀮𑁆𑀮𑀢𑁄 𑀘. 𑀇𑀤𑀸𑀦𑀺 𑀇𑀫𑀫𑁂𑀯 𑀫𑀭𑀡𑀁 𑀲𑀦𑁆𑀥𑀸𑀬 𑀯𑀺𑀓𑀧𑁆𑀧𑀦𑁆𑀢𑀭𑀁 𑀤𑀲𑁆𑀲𑁂𑀦𑁆𑀢𑁄, ‘‘𑀳𑁂𑀝𑁆𑀞𑀸 𑀯𑀼𑀢𑁆𑀢𑀮𑀓𑁆𑀔𑀡𑀸 𑀯𑀸’’𑀢𑀺𑀆𑀤𑀺𑀫𑀸𑀳.

𑀅𑀲𑀺𑀢𑀧𑀻𑀢𑀸𑀤𑀺𑀪𑁂𑀤𑁂𑀢𑀺 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀧𑁆𑀧𑀪𑁂𑀤𑁂, 𑀅𑀲𑀺𑀢𑀩𑁆𑀩𑀔𑀸𑀤𑀺𑀢𑀩𑁆𑀩𑀲𑀸𑀬𑀺𑀢𑀩𑁆𑀩𑀯𑀺𑀪𑀸𑀕𑁂𑀢𑀺 𑀅𑀢𑁆𑀣𑁄 𑀓𑀸𑀮𑀪𑁂𑀤𑀯𑀘𑀦𑀺𑀘𑁆𑀙𑀸𑀬 𑀅𑀪𑀸𑀯𑀢𑁄 𑀬𑀣𑀸 ‘‘𑀤𑀼𑀤𑁆𑀥’’𑀦𑁆𑀢𑀺. 𑀓𑀩𑀴𑀁 𑀓𑀭𑀻𑀬𑀢𑀻𑀢𑀺 𑀓𑀩𑀴𑀻𑀓𑀸𑀭𑁄, 𑀆𑀳𑀭𑀻𑀬𑀢𑀻𑀢𑀺 𑀆𑀳𑀸𑀭𑁄, 𑀓𑀩𑀴𑀻𑀓𑀸𑀭𑁄 𑀘 𑀲𑁄 𑀆𑀳𑀸𑀭𑁄 𑀘𑀸𑀢𑀺 𑀓𑀩𑀴𑀻𑀓𑀸𑀭𑀸𑀳𑀸𑀭𑁄. 𑀯𑀢𑁆𑀣𑀼𑀯𑀲𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁. 𑀲𑀯𑀢𑁆𑀣𑀼𑀓𑁄 𑀏𑀯 𑀳𑀺 𑀆𑀳𑀸𑀭𑁄 𑀇𑀥 𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑁂𑀦 𑀅𑀥𑀺𑀧𑁆𑀧𑁂𑀢𑁄. 𑀑𑀚𑀸𑀮𑀓𑁆𑀔𑀡𑁄 𑀧𑀦 𑀆𑀳𑀸𑀭𑁄 𑀑𑀚𑀝𑁆𑀞𑀫𑀓𑀁 𑀭𑀽𑀧𑀁 𑀆𑀳𑀭𑀢𑀻𑀢𑀺 𑀆𑀳𑀸𑀭𑁄𑀢𑀺 𑀯𑀼𑀘𑁆𑀘𑀢𑀺. 𑀲𑁄 𑀇𑀥 𑀦𑀸𑀥𑀺𑀧𑁆𑀧𑁂𑀢𑁄 𑀧𑀝𑀺𑀓𑀽𑀮𑀸𑀓𑀸𑀭𑀕𑁆𑀕𑀳𑀡𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀦𑀯 𑀧𑀝𑀺𑀓𑀽𑀮𑀸𑀦𑀻𑀢𑀺 𑀕𑀫𑀦𑀧𑀭𑀺𑀬𑁂𑀲𑀦𑀧𑀭𑀺𑀪𑁄𑀕𑀸𑀲𑀬𑀦𑀺𑀤𑀸𑀦𑀅𑀧𑀭𑀺𑀧𑀓𑁆𑀓𑀧𑀭𑀺𑀧𑀓𑁆𑀓𑀨𑀮𑀦𑀺𑀲𑁆𑀲𑀦𑁆𑀤𑀧𑁆𑀧𑀝𑀺𑀓𑀽𑀮𑀯𑀲𑁂𑀦 𑀦𑀯 𑀧𑀝𑀺𑀓𑀽𑀮𑀸𑀦𑀺. 𑀲𑀫𑀓𑁆𑀔𑀦𑀧𑁆𑀧𑀝𑀺𑀓𑀽𑀮𑀁 𑀧𑀦 𑀧𑀭𑀺𑀪𑁄𑀕𑀸𑀤𑀻𑀲𑀼 𑀮𑀩𑁆𑀪𑀫𑀸𑀦𑀢𑁆𑀢𑀸 𑀇𑀥 𑀯𑀺𑀲𑀼𑀁 𑀦 𑀕𑀳𑀺𑀢𑀁, 𑀅𑀜𑁆𑀜𑀣𑀸 𑀢𑁂𑀦 𑀲𑀤𑁆𑀥𑀺𑀁 ‘‘𑀤𑀲 𑀧𑀝𑀺𑀓𑀽𑀮𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁩𑁦𑁩-𑁩𑁦𑁪) 𑀧𑀦 𑀲𑀫𑀓𑁆𑀔𑀦𑀁 𑀧𑀭𑀺𑀪𑁄𑀕𑀸𑀤𑀻𑀲𑀼 𑀮𑀩𑁆𑀪𑀫𑀸𑀦𑀫𑁆𑀧𑀺 𑀦𑀺𑀲𑁆𑀲𑀦𑁆𑀤𑀯𑀲𑁂𑀦 𑀯𑀺𑀲𑁂𑀲𑀢𑁄 𑀧𑀝𑀺𑀓𑀽𑀮𑀦𑁆𑀢𑀺 𑀯𑀺𑀲𑀼𑀁 𑀕𑀳𑁂𑀢𑁆𑀯𑀸 𑀤𑀲𑀳𑀸𑀓𑀸𑀭𑁂𑀳𑀺 𑀧𑀝𑀺𑀓𑀽𑀮𑀢𑀸 𑀯𑀼𑀢𑁆𑀢𑀸.

𑀉𑀧𑁆𑀧𑀚𑁆𑀚𑀦𑀓𑀲𑀜𑁆𑀜𑀦𑁆𑀢𑀺 𑀧𑀝𑀺𑀓𑀽𑀮𑀸𑀓𑀸𑀭𑀕𑁆𑀕𑀳𑀡𑀯𑀲𑁂𑀦 𑀉𑀧𑁆𑀧𑀚𑁆𑀚𑀦𑀓𑀲𑀜𑁆𑀜𑀁. 𑀲𑀜𑁆𑀜𑀸𑀲𑀤𑁆𑀤𑁄 𑀘𑀸𑀬𑀁 ‘‘𑀭𑀽𑀧𑀲𑀜𑁆𑀜𑀸 𑀲𑀤𑁆𑀤𑀲𑀜𑁆𑀜𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁫𑁭) 𑀲𑀜𑁆𑀚𑀸𑀦𑀦𑀮𑀓𑁆𑀔𑀡𑁂 𑀥𑀫𑁆𑀫𑁂 𑀆𑀕𑀢𑁄, ‘‘𑀅𑀦𑀺𑀘𑁆𑀘𑀲𑀜𑁆𑀜𑀸 𑀤𑀼𑀓𑁆𑀔𑀲𑀜𑁆𑀜𑀸’’𑀢𑀺𑀆𑀤𑀻𑀲𑀼 𑀯𑀺𑀧𑀲𑁆𑀲𑀦𑀸𑀬 𑀆𑀕𑀢𑁄, ‘‘𑀉𑀤𑁆𑀥𑀼𑀫𑀸𑀢𑀓𑀲𑀜𑁆𑀜𑀸𑀢𑀺 𑀯𑀸 𑀲𑁄𑀧𑀸𑀓𑀭𑀽𑀧𑀲𑀜𑁆𑀜𑀸𑀢𑀺 𑀯𑀸 𑀇𑀫𑁂 𑀥𑀫𑁆𑀫𑀸 𑀏𑀓𑀝𑁆𑀞𑀸, 𑀉𑀤𑀸𑀳𑀼 𑀦𑀸𑀦𑀝𑁆𑀞𑀸’’𑀢𑀺𑀆𑀤𑀻𑀲𑀼 𑀲𑀫𑀣𑁂 𑀆𑀕𑀢𑁄. 𑀇𑀥 𑀧𑀦 𑀲𑀫𑀣𑀲𑁆𑀲 𑀧𑀭𑀺𑀓𑀫𑁆𑀫𑁂 𑀤𑀝𑁆𑀞𑀩𑁆𑀩𑁄. 𑀆𑀳𑀸𑀭𑁂𑀳𑀺 𑀧𑀝𑀺𑀓𑀽𑀮𑀸𑀓𑀸𑀭𑀕𑁆𑀕𑀳𑀡𑀁, 𑀢𑀧𑁆𑀧𑀪𑀸𑀯𑀺𑀢𑀁 𑀯𑀸 𑀉𑀧𑀘𑀸𑀭𑀚𑁆𑀛𑀸𑀦𑀁 𑀇𑀥 ‘‘𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸’’𑀢𑀺 𑀅𑀥𑀺𑀧𑁆𑀧𑁂𑀢𑀁.

𑀉𑀓𑁆𑀓𑀡𑁆𑀞𑀺𑀢𑀲𑀜𑁆𑀜𑀦𑁆𑀢𑀺 ¶ 𑀦𑀺𑀩𑁆𑀩𑀺𑀦𑁆𑀤𑀦𑀸𑀓𑀸𑀭𑁂𑀦 𑀉𑀧𑁆𑀧𑀚𑁆𑀚𑀦𑀓𑀲𑀜𑁆𑀜𑀁. 𑀅𑀦𑀺𑀘𑁆𑀘𑀲𑀜𑁆𑀜𑀦𑁆𑀢𑀺 𑀏𑀢𑁆𑀣 𑀅𑀦𑀺𑀘𑁆𑀘𑀁 𑀔𑀦𑁆𑀥𑀧𑀜𑁆𑀘𑀓𑀁 𑀉𑀧𑁆𑀧𑀸𑀤𑀯𑀬𑀜𑁆𑀜𑀣𑀢𑁆𑀢𑀪𑀸𑀯𑀢𑁄, 𑀳𑀼𑀢𑁆𑀯𑀸 𑀅𑀪𑀸𑀯𑀢𑁄 𑀯𑀸, 𑀢𑀲𑁆𑀫𑀺𑀁 𑀅𑀦𑀺𑀘𑁆𑀘𑁂 𑀔𑀦𑁆𑀥𑀧𑀜𑁆𑀘𑀓𑁂 𑀅𑀦𑀺𑀘𑁆𑀘𑀦𑁆𑀢𑀺 𑀉𑀧𑁆𑀧𑀚𑁆𑀚𑀫𑀸𑀦𑀸 𑀅𑀦𑀺𑀘𑁆𑀘𑀮𑀓𑁆𑀔𑀡𑀧𑀭𑀺𑀕𑁆𑀕𑀸𑀳𑀺𑀓𑀸 𑀲𑀜𑁆𑀜𑀸 𑀅𑀦𑀺𑀘𑁆𑀘𑀲𑀜𑁆𑀜𑀸. 𑀢𑁂𑀦𑀸𑀳 𑁋 ‘‘𑀧𑀜𑁆𑀘𑀦𑁆𑀦𑀁 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀉𑀤𑀬𑁄 ¶ 𑀦𑀺𑀩𑁆𑀩𑀢𑁆𑀢𑀺𑀮𑀓𑁆𑀔𑀡𑀁, 𑀯𑀬𑁄 𑀯𑀺𑀧𑀭𑀺𑀡𑀸𑀫𑀮𑀓𑁆𑀔𑀡𑀁, 𑀅𑀜𑁆𑀜𑀣𑀢𑁆𑀢𑀁 𑀚𑀭𑀸. 𑀉𑀤𑀬𑀩𑁆𑀩𑀬𑀜𑁆𑀜𑀣𑀢𑁆𑀢𑀕𑁆𑀕𑀳𑀡𑁂𑀦 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀺. 𑀉𑀧𑁆𑀧𑀸𑀤𑀯𑀬𑀜𑁆𑀜𑀣𑀢𑁆𑀢𑀪𑀸𑀯𑀢𑁄 𑀳𑀺 𑀔𑀦𑁆𑀥𑀧𑀜𑁆𑀘𑀓𑀁 𑀅𑀦𑀺𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀲𑁆𑀲 𑀘 𑀲𑀪𑀸𑀯𑁂𑀦 𑀔𑀦𑁆𑀥𑀧𑀜𑁆𑀘𑀓𑀁 𑀅𑀦𑀺𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀁. 𑀢𑁂𑀦 𑀳𑀺 𑀢𑀁 𑀅𑀦𑀺𑀘𑁆𑀘𑀦𑁆𑀢𑀺 𑀮𑀓𑁆𑀔𑀻𑀬𑀢𑀺, 𑀅𑀦𑀺𑀘𑁆𑀘𑀮𑀓𑁆𑀔𑀡𑀜𑁆𑀘 𑀉𑀤𑀬𑀩𑁆𑀩𑀬𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 𑀲𑀦𑁆𑀢𑀢𑀺𑀬𑀸 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀦 𑀉𑀧𑀝𑁆𑀞𑀸𑀢𑀺, 𑀉𑀤𑀬𑀩𑁆𑀩𑀬𑀁 𑀧𑀦 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀲𑀦𑁆𑀢𑀢𑀺𑀬𑀸 𑀯𑀺𑀓𑁄𑀧𑀺𑀢𑀸𑀬 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀬𑀸𑀣𑀸𑀯𑀲𑀭𑀲𑀢𑁄 𑀉𑀧𑀝𑁆𑀞𑀸𑀢𑀺. 𑀦 𑀳𑀺 𑀲𑀫𑁆𑀫𑀤𑁂𑀯 𑀉𑀤𑀬𑀩𑁆𑀩𑀬𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑀲𑁆𑀲 𑀧𑀼𑀩𑁆𑀩𑀸𑀧𑀭𑀺𑀬𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀅𑀜𑁆𑀜𑁄𑀜𑁆𑀜𑀪𑀸𑀯𑀁 𑀲𑀮𑁆𑀮𑀓𑁆𑀔𑀡𑁂𑀦 𑀲𑀦𑁆𑀢𑀢𑀺𑀬𑀸 𑀉𑀕𑁆𑀖𑀸𑀝𑀺𑀢𑀸𑀬 𑀥𑀫𑁆𑀫𑀸 𑀲𑀫𑁆𑀩𑀦𑁆𑀥𑀪𑀸𑀯𑁂𑀦 𑀉𑀧𑀝𑁆𑀞𑀳𑀦𑁆𑀢𑀺, 𑀅𑀣 𑀔𑁄 𑀅𑀬𑁄𑀲𑀮𑀸𑀓𑀸 𑀯𑀺𑀬 𑀅𑀲𑀫𑁆𑀩𑀦𑁆𑀥𑀪𑀸𑀯𑁂𑀦𑀸𑀢𑀺 𑀲𑀼𑀝𑁆𑀞𑀼𑀢𑀭𑀁 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀧𑀸𑀓𑀝𑀁 𑀳𑁄𑀢𑀺.

‘‘𑀬𑀤𑀦𑀺𑀘𑁆𑀘𑀁, 𑀢𑀁 𑀤𑀼𑀓𑁆𑀔’’𑀦𑁆𑀢𑀺 (𑀲𑀁. 𑀦𑀺. 𑁩.𑁧𑁫, 𑁪𑁫, 𑁪𑁬, 𑁭𑁬, 𑁭𑁭, 𑁮𑁫; 𑁨.𑁪.𑁧, 𑁪) 𑀯𑀘𑀦𑀢𑁄 𑀢𑀤𑁂𑀯 𑀔𑀦𑁆𑀥𑀧𑀜𑁆𑀘𑀓𑀁 𑀅𑀪𑀺𑀡𑁆𑀳𑀧𑁆𑀧𑀝𑀺𑀧𑀻𑀴𑀦𑀢𑁄 𑀤𑀼𑀓𑁆𑀔𑀁, 𑀅𑀪𑀺𑀡𑁆𑀳𑀧𑁆𑀧𑀝𑀺𑀧𑀻𑀴𑀦𑀸𑀓𑀸𑀭𑁄 𑀧𑀦 𑀤𑀼𑀓𑁆𑀔𑀮𑀓𑁆𑀔𑀡𑀁. 𑀢𑁂𑀦𑁂𑀯𑀸𑀳 𑁋 ‘‘𑀅𑀦𑀺𑀘𑁆𑀘𑁂 𑀔𑀦𑁆𑀥𑀧𑀜𑁆𑀘𑀓𑁂…𑀧𑁂… 𑀲𑀜𑁆𑀜𑀁 𑀪𑀸𑀯𑁂𑀢𑀻’’𑀢𑀺. 𑀢𑀢𑁆𑀣 𑀧𑀝𑀺𑀧𑀻𑀴𑀦𑀁 𑀦𑀸𑀫 𑀬𑀣𑀸𑀧𑀭𑀺𑀕𑁆𑀕𑀳𑀺𑀢𑀁 𑀉𑀤𑀬𑀯𑀬𑀯𑀲𑁂𑀦 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑀦𑁆𑀢𑀭𑀁 𑀧𑀝𑀺𑀧𑀻𑀴𑀺𑀬𑀫𑀸𑀦𑀢𑀸 𑀯𑀺𑀩𑀸𑀥𑀺𑀬𑀫𑀸𑀦𑀢𑀸. 𑀤𑀼𑀓𑁆𑀔𑀮𑀓𑁆𑀔𑀡𑀜𑁆𑀘 𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀲𑁆𑀲 𑀅𑀫𑀦𑀲𑀺𑀓𑀸𑀭𑀸 𑀇𑀭𑀺𑀬𑀸𑀧𑀣𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀦 𑀉𑀧𑀝𑁆𑀞𑀸𑀢𑀺, 𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀁 𑀧𑀦 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀇𑀭𑀺𑀬𑀸𑀧𑀣𑁂 𑀮𑀩𑁆𑀪𑀫𑀸𑀦𑀤𑀼𑀓𑁆𑀔𑀧𑁆𑀧𑀝𑀺𑀘𑁆𑀙𑀸𑀤𑀓𑀪𑀸𑀯𑁂 𑀉𑀕𑁆𑀖𑀸𑀝𑀺𑀢𑁂 𑀤𑀼𑀓𑁆𑀔𑀮𑀓𑁆𑀔𑀡𑀁 𑀬𑀸𑀣𑀸𑀯𑀲𑀭𑀲𑀢𑁄 𑀉𑀧𑀝𑁆𑀞𑀸𑀢𑀺. 𑀢𑀣𑀸 𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀤𑀼𑀓𑁆𑀔𑀮𑀓𑁆𑀔𑀡𑀁 𑀦 𑀉𑀧𑀝𑁆𑀞𑀸𑀢𑀺, 𑀢𑁂 𑀘 𑀇𑀭𑀺𑀬𑀸𑀧𑀣𑀸 𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀸𑀫𑀦𑀲𑀺𑀓𑀸𑀭𑁂𑀦 𑀧𑀝𑀺𑀘𑁆𑀙𑀸𑀤𑀓𑀸 𑀚𑀸𑀢𑀸. 𑀏𑀓𑀲𑁆𑀫𑀺𑀜𑁆𑀳𑀺 𑀇𑀭𑀺𑀬𑀸𑀧𑀣𑁂 𑀉𑀧𑁆𑀧𑀦𑁆𑀦𑀲𑁆𑀲 𑀤𑀼𑀓𑁆𑀔𑀲𑁆𑀲 𑀯𑀺𑀦𑁄𑀤𑀓𑀁 𑀇𑀭𑀺𑀬𑀸𑀧𑀣𑀦𑁆𑀢𑀭𑀁 𑀢𑀲𑁆𑀲 𑀧𑀝𑀺𑀘𑁆𑀙𑀸𑀤𑀓𑀁 𑀯𑀺𑀬 𑀳𑁄𑀢𑀺, 𑀏𑀯𑀁 𑀲𑁂𑀲𑀸𑀧𑀺. 𑀇𑀭𑀺𑀬𑀸𑀧𑀣𑀸𑀦𑀁 𑀧𑀦 𑀢𑀁𑀢𑀁𑀤𑀼𑀓𑁆𑀔𑀧𑀢𑀺𑀢𑀸𑀓𑀸𑀭𑀪𑀸𑀯𑁂 𑀬𑀸𑀣𑀸𑀯𑀢𑁄 𑀜𑀸𑀢𑁂 𑀢𑁂𑀲𑀁 𑀤𑀼𑀓𑁆𑀔𑀧𑁆𑀧𑀝𑀺𑀘𑁆𑀙𑀸𑀤𑀓𑀪𑀸𑀯𑁄 𑀉𑀕𑁆𑀖𑀸𑀝𑀺𑀢𑁄 𑀦𑀸𑀫 𑀳𑁄𑀢𑀺 𑀲𑀗𑁆𑀔𑀸𑀭𑀸𑀦𑀁 𑀦𑀺𑀭𑀦𑁆𑀢𑀭𑀁 𑀤𑀼𑀓𑁆𑀔𑀸𑀪𑀺𑀢𑀼𑀦𑁆𑀦𑀢𑀸𑀬 𑀧𑀸𑀓𑀝𑀪𑀸𑀯𑀢𑁄. 𑀢𑀲𑁆𑀫𑀸 𑀅𑀪𑀺𑀡𑁆𑀳𑀲𑀫𑁆𑀧𑀝𑀺𑀧𑀻𑀴𑀦𑀁 𑀫𑀦𑀲𑀺 𑀓𑀭𑀺𑀢𑁆𑀯𑀸 𑀇𑀭𑀺𑀬𑀸𑀧𑀣𑁂 𑀮𑀩𑁆𑀪𑀫𑀸𑀦𑀤𑀼𑀓𑁆𑀔𑀧𑁆𑀧𑀝𑀺𑀘𑁆𑀙𑀸𑀤𑀓𑀪𑀸𑀯𑁂 𑀉𑀕𑁆𑀖𑀸𑀝𑀺𑀢𑁂 𑀤𑀼𑀓𑁆𑀔𑀮𑀓𑁆𑀔𑀡𑀁 𑀬𑀸𑀣𑀸𑀯𑀲𑀭𑀲𑀢𑁄 𑀉𑀧𑀝𑁆𑀞𑀸𑀢𑀺.

‘‘𑀬𑀁 𑀤𑀼𑀓𑁆𑀔𑀁, 𑀢𑀤𑀦𑀢𑁆𑀢𑀸’’𑀢𑀺 𑀯𑀘𑀦𑀢𑁄 𑀢𑀤𑁂𑀯 𑀔𑀦𑁆𑀥𑀧𑀜𑁆𑀘𑀓𑀁 𑀅𑀯𑀲𑀯𑀢𑁆𑀢𑀦𑀢𑁄 𑀅𑀦𑀢𑁆𑀢𑀸, 𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑁄 𑀧𑀦 𑀅𑀦𑀢𑁆𑀢𑀮𑀓𑁆𑀔𑀡𑀁. 𑀢𑁂𑀦𑀸𑀳 𑁋 ‘‘𑀧𑀝𑀺𑀧𑀻𑀴𑀦𑀝𑁆𑀞𑁂𑀦𑀸’’𑀢𑀺𑀆𑀤𑀺 ¶ . 𑀅𑀦𑀢𑁆𑀢𑀮𑀓𑁆𑀔𑀡𑀜𑁆𑀘 𑀦𑀸𑀦𑀸𑀥𑀸𑀢𑀼𑀯𑀺𑀦𑀺𑀩𑁆𑀪𑁄𑀕𑀲𑁆𑀲 ¶ 𑀅𑀫𑀦𑀲𑀺𑀓𑀸𑀭𑀸 𑀖𑀦𑁂𑀦 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀦 𑀉𑀧𑀝𑁆𑀞𑀸𑀢𑀺, 𑀦𑀸𑀦𑀸𑀥𑀸𑀢𑀼𑀬𑁄 𑀧𑀦 𑀯𑀺𑀦𑀺𑀩𑁆𑀪𑀼𑀚𑁆𑀚𑀺𑀢𑁆𑀯𑀸 ‘‘𑀅𑀜𑁆𑀜𑀸 𑀧𑀣𑀯𑀻𑀥𑀸𑀢𑀼, 𑀅𑀜𑁆𑀜𑀸 𑀆𑀧𑁄𑀥𑀸𑀢𑀽’’𑀢𑀺𑀆𑀤𑀺𑀦𑀸, ‘‘𑀅𑀜𑁆𑀜𑁄 𑀨𑀲𑁆𑀲𑁄, 𑀅𑀜𑁆𑀜𑀸 𑀯𑁂𑀤𑀦𑀸’’𑀢𑀺𑀆𑀤𑀺𑀦𑀸 𑀘 𑀯𑀺𑀲𑀼𑀁 𑀯𑀺𑀲𑀼𑀁 𑀓𑀢𑁆𑀯𑀸 𑀖𑀦𑀯𑀺𑀦𑀺𑀩𑁆𑀪𑁄𑀕𑁂 𑀓𑀢𑁂 𑀲𑀫𑀽𑀳𑀖𑀦𑁂 𑀓𑀺𑀘𑁆𑀘𑀸𑀭𑀫𑁆𑀫𑀡𑀖𑀦𑁂 𑀘 𑀪𑁂𑀤𑀺𑀢𑁂 𑀅𑀦𑀢𑁆𑀢𑀮𑀓𑁆𑀔𑀡𑀁 𑀬𑀸𑀣𑀸𑀯𑀲𑀭𑀲𑀢𑁄 𑀉𑀧𑀝𑁆𑀞𑀸𑀢𑀺. 𑀬𑀸 𑀳𑁂𑀲𑀸 𑀅𑀜𑁆𑀜𑀫𑀜𑁆𑀜𑀽𑀧𑀢𑁆𑀣𑀫𑁆𑀪𑁂𑀲𑀼 𑀲𑀫𑀼𑀤𑀺𑀢𑁂𑀲𑀼 𑀭𑀽𑀧𑀸𑀭𑀽𑀧𑀥𑀫𑁆𑀫𑁂𑀲𑀼 𑀏𑀓𑀢𑁆𑀢𑀸𑀪𑀺𑀦𑀺𑀯𑁂𑀲𑀯𑀲𑁂𑀦 𑀅𑀧𑀭𑀺𑀫𑀤𑁆𑀤𑀺𑀢𑀲𑀗𑁆𑀔𑀸𑀭𑁂𑀳𑀺 𑀫𑀫𑀸𑀬𑀫𑀸𑀦𑀸 𑀲𑀫𑀽𑀳𑀖𑀦𑀢𑀸, 𑀢𑀣𑀸 𑀢𑁂𑀲𑀁 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀓𑀺𑀘𑁆𑀘𑀪𑁂𑀤𑀲𑁆𑀲 𑀲𑀢𑀺𑀧𑀺 𑀧𑀝𑀺𑀦𑀺𑀬𑀢𑀪𑀸𑀯𑁂 𑀏𑀓𑀢𑁄 𑀕𑀬𑁆𑀳𑀫𑀸𑀦𑀸 𑀓𑀺𑀘𑁆𑀘𑀖𑀦𑀢𑀸, 𑀢𑀣𑀸 𑀲𑀸𑀭𑀫𑁆𑀫𑀡𑀥𑀫𑁆𑀫𑀸𑀦𑀁 𑀲𑀢𑀺𑀧𑀺 𑀆𑀭𑀫𑁆𑀫𑀡𑀓𑀭𑀡𑀪𑁂𑀤𑁂 𑀏𑀓𑀢𑁄 𑀕𑀬𑁆𑀳𑀫𑀸𑀦𑀸 𑀆𑀭𑀫𑁆𑀫𑀡𑀖𑀦𑀢𑀸. 𑀲𑀸 𑀘𑀢𑀽𑀲𑀼 𑀥𑀸𑀢𑀽𑀲𑀼 𑀜𑀸𑀡𑁂𑀦 𑀯𑀺𑀦𑀺𑀩𑁆𑀪𑀼𑀚𑀺𑀢𑁆𑀯𑀸 𑀤𑀺𑀲𑁆𑀲𑀫𑀸𑀦𑀸𑀲𑀼 𑀳𑀢𑁆𑀣𑁂𑀦 𑀧𑀭𑀺𑀫𑀤𑁆𑀤𑀺𑀬𑀫𑀸𑀦𑁄 𑀨𑁂𑀡𑀧𑀺𑀡𑁆𑀟𑁄 𑀯𑀺𑀬 𑀯𑀺𑀮𑀻𑀦𑀁 𑀆𑀕𑀘𑁆𑀙𑀢𑀺, 𑀬𑀣𑀸𑀧𑀘𑁆𑀘𑀬𑀁 𑀧𑀯𑀢𑁆𑀢𑀫𑀸𑀦𑀸 𑀲𑀼𑀜𑁆𑀜𑀸 𑀏𑀢𑁂 𑀥𑀫𑁆𑀫𑀫𑀢𑁆𑀢𑀸𑀢𑀺 𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑀲𑀗𑁆𑀔𑀸𑀢𑀁 𑀅𑀦𑀢𑁆𑀢𑀮𑀓𑁆𑀔𑀡𑀁 𑀧𑀸𑀓𑀝𑀢𑀭𑀁 𑀳𑁄𑀢𑀺.

𑀅𑀧𑀭𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁯. 𑀓𑀸𑀬𑀕𑀢𑀸𑀲𑀢𑀺𑀯𑀕𑁆𑀕𑀯𑀡𑁆𑀡𑀦𑀸

𑁫𑁬𑁩. 𑀘𑁂𑀢𑀲𑀸 ¶ 𑀨𑀼𑀝𑁄𑀢𑀺 𑀘𑀺𑀢𑁆𑀢𑁂𑀦 𑀨𑀭𑀺𑀢𑁄. 𑀘𑀺𑀢𑁆𑀢𑁂𑀦 𑀨𑀭𑀡𑀜𑁆𑀘 𑀲𑀫𑀼𑀤𑁆𑀤𑀲𑁆𑀲 𑀤𑁆𑀯𑀺𑀥𑀸 𑀲𑀫𑁆𑀪𑀯𑀢𑀻𑀢𑀺 𑀆𑀳 𑁋 ‘‘𑀤𑀼𑀯𑀺𑀥𑀁 𑀨𑀭𑀡’’𑀦𑁆𑀢𑀺𑀆𑀤𑀺. 𑀧𑀼𑀭𑀺𑀫𑁂𑀦 𑀅𑀢𑁆𑀣𑁂𑀦𑀸𑀢𑀺 ‘‘𑀲𑀫𑁆𑀧𑀬𑁄𑀕𑀯𑀲𑁂𑀦 𑀯𑀺𑀚𑁆𑀚𑀁 𑀪𑀚𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂𑀦 𑀅𑀢𑁆𑀣𑁂𑀦. 𑀧𑀘𑁆𑀙𑀺𑀫𑁂𑀦𑀸𑀢𑀺 ‘‘𑀯𑀺𑀚𑁆𑀚𑀸𑀪𑀸𑀕𑁂 𑀯𑀺𑀚𑁆𑀚𑀸𑀓𑁄𑀝𑁆𑀞𑀸𑀲𑁂 𑀯𑀢𑁆𑀢𑀦𑁆𑀢𑀻’’𑀢𑀺 𑀯𑀼𑀢𑁆𑀢𑁂𑀦.

𑁫𑁬𑁪. 𑀫𑀳𑀢𑁄 𑀲𑀁𑀯𑁂𑀕𑀸𑀬 𑀲𑀁𑀯𑀢𑁆𑀢𑀢𑀻𑀢𑀺𑀆𑀤𑀻𑀲𑀼 𑀅𑀬𑀁 𑀧𑀦 𑀅𑀧𑀭𑁄 𑀦𑀬𑁄. 𑀬𑀸𑀣𑀸𑀯𑀢𑁄 𑀓𑀸𑀬𑀲𑀪𑀸𑀯𑀧𑁆𑀧𑀯𑁂𑀤𑀦𑀢𑁄 𑀫𑀳𑀢𑁄 𑀲𑀁𑀯𑁂𑀕𑀸𑀬 𑀲𑀁𑀯𑀢𑁆𑀢𑀢𑀺. 𑀅𑀢𑁆𑀣𑀸𑀬𑀸𑀢𑀺 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀤𑀺𑀅𑀢𑁆𑀣𑀸𑀬. 𑀬𑁄𑀕𑀓𑁆𑀔𑁂𑀫𑀸𑀬𑀸𑀢𑀺 𑀘𑀢𑀽𑀳𑀺 𑀬𑁄𑀕𑁂𑀳𑀺 𑀔𑁂𑀫𑀪𑀸𑀯𑀸𑀬. 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀬𑀸𑀢𑀺 𑀲𑀩𑁆𑀩𑀢𑁆𑀣 𑀲𑀢𑀺𑀅𑀯𑀺𑀧𑁆𑀧𑀯𑀸𑀲𑀸𑀬 𑀲𑀢𑁆𑀢𑀝𑁆𑀞𑀸𑀦𑀺𑀬𑀲𑀫𑁆𑀧𑀚𑀜𑁆𑀜𑀸𑀬 𑀘. 𑀜𑀸𑀡𑀤𑀲𑁆𑀲𑀦𑀧𑁆𑀧𑀝𑀺𑀮𑀸𑀪𑀸𑀬𑀸𑀢𑀺 𑀯𑀺𑀧𑀲𑁆𑀲𑀦𑀸𑀜𑀸𑀡𑀸𑀥𑀺𑀕𑀫𑀸𑀬. 𑀯𑀺𑀚𑁆𑀚𑀸𑀯𑀺𑀫𑀼𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸𑀢𑀺 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀘𑀺𑀢𑁆𑀢𑀲𑁆𑀲 𑀅𑀥𑀺𑀫𑀼𑀢𑁆𑀢𑀺 𑀦𑀺𑀩𑁆𑀩𑀸𑀦𑀁 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀻𑀢𑀺 𑀏𑀢𑁂𑀲𑀁 𑀧𑀘𑁆𑀘𑀓𑁆𑀔𑀓𑀭𑀡𑀸𑀬.

𑁫𑁮𑁪. 𑀧𑀜𑁆𑀜𑀸𑀧𑀝𑀺𑀮𑀸𑀪𑀸𑀬𑀸𑀢𑀺𑀆𑀤𑀻𑀲𑀼 ¶ 𑀲𑁄𑀴𑀲𑀲𑀼 𑀧𑀤𑁂𑀲𑀼 𑀧𑀜𑁆𑀜𑀸𑀧𑀝𑀺𑀮𑀸𑀪𑀸𑀬 𑀧𑀜𑁆𑀜𑀸𑀯𑀼𑀤𑁆𑀥𑀺𑀬𑀸 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀸𑀬 𑀧𑀜𑁆𑀜𑀸𑀩𑀸𑀳𑀼𑀮𑁆𑀮𑀸𑀬𑀸𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀧𑀜𑁆𑀜𑀸𑀯𑀲𑁂𑀦 𑀪𑀸𑀯𑀯𑀘𑀦𑀸𑀦𑀺, 𑀲𑁂𑀲𑀸𑀦𑀺 𑀤𑁆𑀯𑀸𑀤𑀲 𑀧𑀼𑀕𑁆𑀕𑀮𑀯𑀲𑁂𑀦 𑀪𑀸𑀯𑀯𑀘𑀦𑀸𑀦𑀺. 𑀲𑀧𑁆𑀧𑀼𑀭𑀺𑀲𑀲𑀁𑀲𑁂𑀯𑁄𑀢𑀺 𑀲𑀧𑁆𑀧𑀼𑀭𑀺𑀲𑀸𑀦𑀁 𑀪𑀚𑀦𑀁. 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀦𑁆𑀢𑀺 𑀢𑁂𑀲𑀁 𑀲𑀧𑁆𑀧𑀼𑀭𑀺𑀲𑀸𑀦𑀁 𑀲𑀦𑁆𑀢𑀺𑀓𑁂 𑀲𑀻𑀮𑀸𑀤𑀺𑀧𑁆𑀧𑀝𑀺𑀧𑀢𑁆𑀢𑀺𑀤𑀻𑀧𑀓𑀲𑁆𑀲 𑀲𑀤𑁆𑀥𑀫𑁆𑀫𑀯𑀘𑀦𑀲𑁆𑀲 𑀲𑀯𑀦𑀁. 𑀬𑁄𑀦𑀺𑀲𑁄 𑀫𑀦𑀲𑀺𑀓𑀸𑀭𑁄𑀢𑀺 𑀲𑀼𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀽𑀧𑀧𑀭𑀺𑀓𑁆𑀔𑀸𑀯𑀲𑁂𑀦 𑀉𑀧𑀸𑀬𑁂𑀦 𑀫𑀦𑀲𑀺𑀓𑀸𑀭𑁄. 𑀥𑀫𑁆𑀫𑀸𑀦𑀼𑀥𑀫𑁆𑀫𑀧𑁆𑀧𑀝𑀺𑀧𑀢𑁆𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁂 𑀅𑀦𑀼𑀕𑀢𑀲𑁆𑀲 𑀲𑀻𑀮𑀸𑀤𑀺𑀧𑁆𑀧𑀝𑀺𑀧𑀤𑀸𑀥𑀫𑁆𑀫𑀲𑁆𑀲 𑀧𑀝𑀺𑀧𑀚𑁆𑀚𑀦𑀁.

𑀙𑀦𑁆𑀦𑀁 𑀅𑀪𑀺𑀜𑁆𑀜𑀸𑀜𑀸𑀡𑀸𑀦𑀦𑁆𑀢𑀺 𑀇𑀤𑁆𑀥𑀺𑀯𑀺𑀥𑀤𑀺𑀩𑁆𑀩𑀲𑁄𑀢𑀘𑁂𑀢𑁄𑀧𑀭𑀺𑀬𑀧𑀼𑀩𑁆𑀩𑁂𑀦𑀺𑀯𑀸𑀲𑀤𑀺𑀩𑁆𑀩𑀘𑀓𑁆𑀔𑀼𑀆𑀲𑀯𑀓𑁆𑀔𑀬𑀜𑀸𑀡𑀸𑀦𑀁. 𑀢𑁂𑀲𑀢𑁆𑀢𑀢𑀻𑀦𑀁 𑀜𑀸𑀡𑀸𑀦𑀦𑁆𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑀸𑀴𑀺𑀬𑀁 (𑀧𑀝𑀺. 𑀫. 𑁧.𑁧-𑁨 𑀫𑀸𑀢𑀺𑀓𑀸) ‘‘𑀲𑁄𑀢𑀸𑀯𑀥𑀸𑀦𑁂 𑀧𑀜𑁆𑀜𑀸 𑀲𑀼𑀢𑀫𑀬𑁂 𑀜𑀸𑀡𑀁, 𑀲𑀼𑀢𑁆𑀯𑀸𑀦 𑀲𑀁𑀯𑀭𑁂 𑀧𑀜𑁆𑀜𑀸 𑀲𑀻𑀮𑀫𑀬𑁂 𑀜𑀸𑀡’’𑀦𑁆𑀢𑀺𑀆𑀤𑀺𑀦𑀸 𑀜𑀸𑀡𑀓𑀣𑀸𑀬 𑀦𑀺𑀤𑁆𑀤𑀺𑀝𑁆𑀞𑀸𑀦𑀁 𑀲𑀸𑀯𑀓𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀸𑀦𑀁 𑀜𑀸𑀡𑀸𑀦𑀁. 𑀇𑀫𑁂𑀲𑀜𑁆𑀳𑀺 𑀢𑁂𑀲𑀢𑁆𑀢𑀢𑀺𑀜𑀸𑀡𑀸𑀦𑀁 𑀲𑀼𑀢𑀫𑀬𑀜𑀸𑀡𑀸𑀤𑀻𑀦𑀺 𑀲𑀢𑁆𑀢𑀲𑀝𑁆𑀞𑀺𑀜𑀸𑀡𑀸𑀦𑀺 𑀲𑀸𑀯𑀓𑀲𑁆𑀲 𑀲𑀸𑀥𑀸𑀭𑀡𑀸𑀦𑀺, ‘‘𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑁂 𑀜𑀸𑀡𑀁, 𑀲𑀢𑁆𑀢𑀸𑀦𑀁 𑀆𑀲𑀬𑀸𑀦𑀼𑀲𑀬𑁂 𑀜𑀸𑀡𑀁, 𑀬𑀫𑀓𑀧𑀸𑀝𑀺𑀳𑀻𑀭𑁂 𑀜𑀸𑀡𑀁, 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀬𑀸 𑀜𑀸𑀡𑀁, 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁, 𑀅𑀦𑀸𑀯𑀭𑀡𑀜𑀸𑀡’’𑀦𑁆𑀢𑀺 (𑀧𑀝𑀺. 𑀫. 𑁧.𑁬𑁮-𑁭𑁩 𑀫𑀸𑀢𑀺𑀓𑀸) 𑀇𑀫𑀸𑀦𑀺 𑀙 𑀅𑀲𑀸𑀥𑀸𑀭𑀡𑀜𑀸𑀡𑀸𑀦𑀺 𑀲𑀸𑀯𑀓𑁂𑀳𑀺.

𑀲𑀢𑁆𑀢𑀲𑀢𑁆𑀢𑀢𑀻𑀦𑀁 ¶ 𑀜𑀸𑀡𑀸𑀦𑀦𑁆𑀢𑀺 𑀏𑀢𑁆𑀣 𑁋

‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀜𑀸𑀡𑀁, 𑀅𑀲𑀢𑀺 𑀚𑀸𑀢𑀺𑀬𑀸 𑀦𑀢𑁆𑀣𑀺 𑀚𑀭𑀸𑀫𑀭𑀡𑀦𑁆𑀢𑀺 𑀜𑀸𑀡𑀁. 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀜𑀸𑀡𑀁, 𑀅𑀲𑀢𑀺 𑀚𑀸𑀢𑀺𑀬𑀸 𑀦𑀢𑁆𑀣𑀺 𑀚𑀭𑀸𑀫𑀭𑀡𑀦𑁆𑀢𑀺 𑀜𑀸𑀡𑀁. 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡𑀦𑁆𑀢𑀺 𑀜𑀸𑀡𑀁, 𑀅𑀲𑀢𑀺 𑀚𑀸𑀢𑀺𑀬𑀸 𑀦𑀢𑁆𑀣𑀺 𑀚𑀭𑀸𑀫𑀭𑀡𑀦𑁆𑀢𑀺 𑀜𑀸𑀡𑀁. 𑀬𑀫𑁆𑀧𑀺𑀲𑁆𑀲 𑀢𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁, 𑀢𑀫𑁆𑀧𑀺 𑀔𑀬𑀥𑀫𑁆𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀜𑀸𑀡𑀁. 𑀪𑀯𑀧𑀘𑁆𑀘𑀬𑀸 𑀚𑀸𑀢𑀻𑀢𑀺 𑀜𑀸𑀡𑀁…𑀧𑁂… 𑀉𑀧𑀸𑀤𑀸𑀦𑀧𑀘𑁆𑀘𑀬𑀸 𑀪𑀯𑁄𑀢𑀺 𑀜𑀸𑀡𑀁, 𑀢𑀡𑁆𑀳𑀸𑀧𑀘𑁆𑀘𑀬𑀸 𑀉𑀧𑀸𑀤𑀸𑀦𑀦𑁆𑀢𑀺 𑀜𑀸𑀡𑀁, 𑀯𑁂𑀤𑀦𑀸𑀧𑀘𑁆𑀘𑀬𑀸 𑀢𑀡𑁆𑀳𑀸𑀢𑀺 𑀜𑀸𑀡𑀁, 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸𑀢𑀺 𑀜𑀸𑀡𑀁, 𑀲𑀴𑀸𑀬𑀢𑀦𑀧𑀘𑁆𑀘𑀬𑀸 𑀨𑀲𑁆𑀲𑁄𑀢𑀺 𑀜𑀸𑀡𑀁, 𑀦𑀸𑀫𑀭𑀽𑀧𑀧𑀘𑁆𑀘𑀬𑀸 𑀲𑀴𑀸𑀬𑀢𑀦𑀦𑁆𑀢𑀺 𑀜𑀸𑀡𑀁, 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀸 𑀦𑀸𑀫𑀭𑀽𑀧𑀦𑁆𑀢𑀺 𑀜𑀸𑀡𑀁, 𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀜𑀸𑀡𑀁, 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀜𑀸𑀡𑀁, 𑀅𑀲𑀢𑀺 ¶ 𑀅𑀯𑀺𑀚𑁆𑀚𑀸𑀬 𑀦𑀢𑁆𑀣𑀺 𑀲𑀗𑁆𑀔𑀸𑀭𑀸𑀢𑀺 𑀜𑀸𑀡𑀁, 𑀅𑀢𑀻𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀜𑀸𑀡𑀁, 𑀅𑀲𑀢𑀺 𑀅𑀯𑀺𑀚𑁆𑀚𑀸𑀬 𑀦𑀢𑁆𑀣𑀺 𑀲𑀗𑁆𑀔𑀸𑀭𑀸𑀢𑀺 𑀜𑀸𑀡𑀁, 𑀅𑀦𑀸𑀕𑀢𑀫𑁆𑀧𑀺 𑀅𑀤𑁆𑀥𑀸𑀦𑀁 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸𑀢𑀺 𑀜𑀸𑀡𑀁, 𑀅𑀲𑀢𑀺 𑀅𑀯𑀺𑀚𑁆𑀚𑀸𑀬 𑀦𑀢𑁆𑀣𑀺 𑀲𑀗𑁆𑀔𑀸𑀭𑀸𑀢𑀺 𑀜𑀸𑀡𑀁, 𑀬𑀫𑁆𑀧𑀺𑀲𑁆𑀲 𑀢𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁, 𑀢𑀫𑁆𑀧𑀺 𑀔𑀬𑀥𑀫𑀁 𑀯𑀬𑀥𑀫𑁆𑀫𑀁 𑀯𑀺𑀭𑀸𑀕𑀥𑀫𑁆𑀫𑀁 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀜𑀸𑀡’’𑀦𑁆𑀢𑀺 𑁋

𑀪𑀕𑀯𑀢𑀸 𑀦𑀺𑀤𑀸𑀦𑀯𑀕𑁆𑀕𑁂 (𑀲𑀁. 𑀦𑀺. 𑁨.𑁩𑁪-𑁩𑁫) 𑀚𑀭𑀸𑀫𑀭𑀡𑀸𑀤𑀻𑀲𑀼 𑀏𑀓𑀸𑀤𑀲𑀲𑀼 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑁂𑀲𑀼 𑀧𑀘𑁆𑀘𑁂𑀓𑀁 𑀲𑀢𑁆𑀢 𑀲𑀢𑁆𑀢 𑀓𑀢𑁆𑀯𑀸 𑀯𑀼𑀢𑁆𑀢𑀸𑀦𑀺 𑀲𑀢𑁆𑀢𑀲𑀢𑁆𑀢𑀢𑀺𑀜𑀸𑀡𑀸𑀦𑀺.

𑀢𑀢𑁆𑀣 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀦𑁆𑀢𑀺 𑀧𑀘𑁆𑀘𑀬𑀸𑀓𑀸𑀭𑀜𑀸𑀡𑀁. 𑀧𑀘𑁆𑀘𑀬𑀸𑀓𑀸𑀭𑁄 𑀳𑀺 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀲𑀗𑁆𑀔𑀸𑀢𑀸𑀬 𑀞𑀺𑀢𑀺𑀬𑀸 𑀓𑀸𑀭𑀡𑀢𑁆𑀢𑀸 ‘‘𑀥𑀫𑁆𑀫𑀝𑁆𑀞𑀺𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀢𑀢𑁆𑀣 𑀜𑀸𑀡𑀁 𑀥𑀫𑁆𑀫𑀝𑁆𑀞𑀺𑀢𑀺𑀜𑀸𑀡𑀁, ‘‘𑀚𑀸𑀢𑀺𑀧𑀘𑁆𑀘𑀬𑀸 𑀚𑀭𑀸𑀫𑀭𑀡’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁆𑀲𑁂𑀯 𑀙𑀩𑁆𑀩𑀺𑀥𑀲𑁆𑀲 𑀜𑀸𑀡𑀲𑁆𑀲𑁂𑀢𑀁 𑀅𑀥𑀺𑀯𑀘𑀦𑀁. 𑀔𑀬𑀥𑀫𑁆𑀫𑀦𑁆𑀢𑀺 𑀔𑀬𑀕𑀫𑀦𑀲𑀪𑀸𑀯𑀁. 𑀯𑀬𑀥𑀫𑁆𑀫𑀦𑁆𑀢𑀺 𑀯𑀬𑀕𑀫𑀦𑀲𑀪𑀸𑀯𑀁. 𑀯𑀺𑀭𑀸𑀕𑀥𑀫𑁆𑀫𑀦𑁆𑀢𑀺 𑀯𑀺𑀭𑀚𑁆𑀚𑀦𑀲𑀪𑀸𑀯𑀁. 𑀦𑀺𑀭𑁄𑀥𑀥𑀫𑁆𑀫𑀦𑁆𑀢𑀺 𑀦𑀺𑀭𑀼𑀚𑁆𑀛𑀦𑀲𑀪𑀸𑀯𑀦𑁆𑀢𑀺 𑀅𑀢𑁆𑀣𑁄.

𑀮𑀸𑀪𑁄𑀢𑀺𑀆𑀤𑀻𑀲𑀼 𑀮𑀸𑀪𑁄𑀬𑁂𑀯 𑀉𑀧𑀲𑀕𑁆𑀕𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 ‘‘𑀧𑀝𑀺𑀮𑀸𑀪𑁄’’𑀢𑀺 𑀯𑀼𑀢𑁆𑀢𑁄. 𑀧𑀼𑀦 𑀢𑀲𑁆𑀲𑁂𑀯 𑀅𑀢𑁆𑀣𑀯𑀺𑀯𑀭𑀡𑀯𑀲𑁂𑀦 ‘‘𑀧𑀢𑁆𑀢𑀺 𑀲𑀫𑁆𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀨𑀼𑀲𑀦𑀸𑀢𑀺 𑀅𑀥𑀺𑀕𑀫𑀦𑀯𑀲𑁂𑀦 𑀨𑀼𑀲𑀦𑀸. 𑀲𑀘𑁆𑀙𑀺𑀓𑀺𑀭𑀺𑀬𑀸𑀢𑀺 𑀧𑀝𑀺𑀮𑀸𑀪𑀲𑀘𑁆𑀙𑀺𑀓𑀺𑀭𑀺𑀬𑀸. 𑀉𑀧𑀲𑀫𑁆𑀧𑀤𑀸𑀢𑀺 𑀦𑀺𑀧𑁆𑀨𑀸𑀤𑀦𑀸.

𑀲𑀢𑁆𑀢𑀦𑁆𑀦𑀜𑁆𑀘 ¶ 𑀲𑁂𑀓𑁆𑀔𑀸𑀦𑀦𑁆𑀢𑀺 𑀢𑀺𑀲𑁆𑀲𑁄 𑀲𑀺𑀓𑁆𑀔𑀸 𑀲𑀺𑀓𑁆𑀔𑀦𑁆𑀢𑀻𑀢𑀺 𑀲𑁂𑀓𑁆𑀔𑀲𑀜𑁆𑀜𑀺𑀢𑀸𑀦𑀁 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑀝𑁆𑀞𑀸𑀤𑀻𑀦𑀁 𑀲𑀢𑁆𑀢𑀦𑁆𑀦𑀁. 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀲𑁆𑀲 𑀘𑀸𑀢𑀺 𑀦𑀺𑀩𑁆𑀩𑀸𑀦𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀬𑀼𑀢𑁆𑀢𑀢𑁆𑀢𑀸 𑀲𑀼𑀦𑁆𑀤𑀭𑀝𑁆𑀞𑁂𑀦 𑀓𑀮𑁆𑀬𑀸𑀡𑀲𑀜𑁆𑀜𑀺𑀢𑀲𑁆𑀲 𑀧𑀼𑀣𑀼𑀚𑁆𑀚𑀦𑀲𑁆𑀲. 𑀯𑀟𑁆𑀠𑀺𑀢𑀁 𑀯𑀟𑁆𑀠𑀦𑀁 𑀏𑀓𑀸𑀬𑀸𑀢𑀺 𑀯𑀟𑁆𑀠𑀺𑀢𑀯𑀟𑁆𑀠𑀦𑀸. 𑀬𑀣𑀸𑀯𑀼𑀢𑁆𑀢𑀸𑀦𑀁 𑀅𑀝𑁆𑀞𑀦𑁆𑀦𑀫𑁆𑀧𑀺 𑀧𑀜𑁆𑀜𑀸𑀦𑀁 𑀯𑀲𑁂𑀦 𑀯𑀺𑀲𑁂𑀲𑀢𑁄𑀯 𑀅𑀭𑀳𑀢𑁄 𑀧𑀜𑁆𑀜𑀸𑀯𑀲𑁂𑀦 𑀧𑀜𑁆𑀜𑀸𑀯𑀼𑀤𑁆𑀥𑀺𑀬𑀸. 𑀢𑀣𑀸 𑀧𑀜𑁆𑀜𑀸𑀯𑁂𑀧𑀼𑀮𑁆𑀮𑀸𑀬.

𑀬𑀲𑁆𑀲 𑀓𑀲𑁆𑀲𑀘𑀺𑀧𑀺 𑀯𑀺𑀲𑁂𑀲𑀢𑁄 𑀅𑀦𑀼𑀭𑀽𑀧𑀥𑀫𑁆𑀫𑀲𑁆𑀲 𑀫𑀳𑀦𑁆𑀢𑀁 𑀦𑀸𑀫 𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀢𑀤𑀲𑁆𑀲 𑀓𑀺𑀘𑁆𑀘𑀲𑀺𑀤𑁆𑀥𑀺𑀬𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀫𑀳𑀦𑁆𑀢𑁂 𑀅𑀢𑁆𑀣𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀢𑁆𑀣𑀸𑀤𑀻𑀦𑀁 𑀫𑀳𑀦𑁆𑀢𑀪𑀸𑀯𑁄 𑀫𑀳𑀸𑀯𑀺𑀲𑀬𑀢𑀸𑀬 𑀯𑁂𑀤𑀺𑀢𑀩𑁆𑀩𑁄, 𑀫𑀳𑀸𑀯𑀺𑀲𑀬𑀢𑀸 𑀘 𑀢𑁂𑀲𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀆𑀕𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀲𑀻𑀮𑀓𑁆𑀔𑀦𑁆𑀥𑀲𑁆𑀲 𑀧𑀦 𑀳𑁂𑀢𑀼𑀫𑀳𑀦𑁆𑀢𑀢𑀸𑀬, 𑀧𑀘𑁆𑀘𑀬𑀫𑀳𑀦𑁆𑀢𑀢𑀸𑀬, 𑀦𑀺𑀲𑁆𑀲𑀬𑀫𑀳𑀦𑁆𑀢𑀢𑀸𑀬 ¶ , 𑀧𑀪𑁂𑀤𑀫𑀳𑀦𑁆𑀢𑀢𑀸𑀬, 𑀓𑀺𑀘𑁆𑀘𑀫𑀳𑀦𑁆𑀢𑀢𑀸𑀬, 𑀨𑀮𑀫𑀳𑀦𑁆𑀢𑀢𑀸𑀬, 𑀆𑀦𑀺𑀲𑀁𑀲𑀫𑀳𑀦𑁆𑀢𑀢𑀸𑀬 𑀘 𑀫𑀳𑀦𑁆𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀳𑁂𑀢𑀼 𑀅𑀮𑁄𑀪𑀸𑀤𑀬𑁄. 𑀧𑀘𑁆𑀘𑀬𑁄 𑀳𑀺𑀭𑁄𑀢𑁆𑀢𑀧𑁆𑀧𑀲𑀤𑁆𑀥𑀸𑀲𑀢𑀺𑀯𑀻𑀭𑀺𑀬𑀸𑀤𑀬𑁄. 𑀦𑀺𑀲𑁆𑀲𑀬𑁄 𑀲𑀸𑀯𑀓𑀩𑁄𑀥𑀺𑀧𑀘𑁆𑀘𑁂𑀓𑀩𑁄𑀥𑀺𑀦𑀺𑀬𑀢𑀢𑀸 𑀢𑀁𑀲𑀫𑀗𑁆𑀕𑀺𑀦𑁄 𑀘 𑀧𑀼𑀭𑀺𑀲𑀯𑀺𑀲𑁂𑀲𑀸. 𑀧𑀪𑁂𑀤𑁄 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀸𑀤𑀺𑀯𑀺𑀪𑀸𑀕𑁄. 𑀓𑀺𑀘𑁆𑀘𑀁 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀧𑀝𑀺𑀧𑀓𑁆𑀔𑀯𑀺𑀥𑀫𑀦𑀁. 𑀨𑀮𑀁 𑀲𑀕𑁆𑀕𑀲𑀫𑁆𑀧𑀤𑀸 𑀦𑀺𑀩𑁆𑀩𑀸𑀦𑀲𑀫𑁆𑀧𑀤𑀸 𑀘. 𑀆𑀦𑀺𑀲𑀁𑀲𑁄 𑀧𑀺𑀬𑀫𑀦𑀸𑀧𑀢𑀸𑀤𑀺. 𑀅𑀬𑀫𑁂𑀢𑁆𑀣 𑀲𑀗𑁆𑀔𑁂𑀧𑁄, 𑀯𑀺𑀢𑁆𑀣𑀸𑀭𑁄 𑀧𑀦 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 (𑀯𑀺𑀲𑀼𑀤𑁆𑀥𑀺. 𑁧.𑁯) 𑀆𑀓𑀗𑁆𑀔𑁂𑀬𑁆𑀬𑀲𑀼𑀢𑁆𑀢𑀸𑀤𑀻𑀲𑀼 (𑀫. 𑀦𑀺. 𑁧.𑁬𑁪 𑀆𑀤𑀬𑁄) 𑀘 𑀆𑀕𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀺𑀦𑀸 𑀦𑀬𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑀸𑀤𑀻𑀦𑀫𑁆𑀧𑀺 𑀫𑀳𑀦𑁆𑀢𑀢𑀸 𑀬𑀣𑀸𑀭𑀳𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀸. 𑀞𑀸𑀦𑀸𑀝𑁆𑀞𑀸𑀦𑀸𑀤𑀻𑀦𑀁 𑀫𑀳𑀦𑁆𑀢𑀪𑀸𑀯𑁄 𑀧𑀦 𑀫𑀳𑀸𑀯𑀺𑀲𑀬𑀢𑀸𑀬 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀞𑀸𑀦𑀸𑀝𑁆𑀞𑀸𑀦𑀸𑀦𑀁 𑀫𑀳𑀸𑀯𑀺𑀲𑀬𑀢𑀸 𑀩𑀳𑀼𑀥𑀸𑀢𑀼𑀓𑀲𑀼𑀢𑁆𑀢𑀸𑀤𑀻𑀲𑀼 𑀆𑀕𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸.

𑀯𑀺𑀳𑀸𑀭𑀲𑀫𑀸𑀧𑀢𑁆𑀢𑀻𑀦𑀁 𑀫𑀳𑀸𑀯𑀺𑀲𑀬𑀢𑀸 𑀲𑀫𑀸𑀥𑀺𑀓𑁆𑀔𑀦𑁆𑀥𑁂 𑀫𑀳𑀸𑀯𑀺𑀲𑀬𑀢𑀸𑀦𑀺𑀤𑁆𑀥𑀸𑀭𑀡𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀅𑀭𑀺𑀬𑀲𑀘𑁆𑀘𑀸𑀦𑀁 𑀲𑀓𑀮𑀬𑀸𑀦𑀲𑀗𑁆𑀕𑀸𑀳𑀓𑀢𑁄 𑀲𑀘𑁆𑀘𑀯𑀺𑀪𑀗𑁆𑀕𑁂 (𑀯𑀺𑀪. 𑁧𑁮𑁯 𑀆𑀤𑀬𑁄) 𑀢𑀁𑀲𑀁𑀯𑀡𑁆𑀡𑀦𑀸𑀲𑀼 (𑀯𑀺𑀪. 𑀅𑀝𑁆𑀞. 𑁧𑁮𑁯 𑀆𑀤𑀬𑁄) 𑀘 𑀆𑀕𑀢𑀦𑀬𑁂𑀦, 𑀲𑀢𑀺𑀧𑀝𑁆𑀞𑀸𑀦𑀸𑀤𑀻𑀦𑀁 𑀲𑀢𑀺𑀧𑀝𑁆𑀞𑀸𑀦𑀯𑀺𑀪𑀗𑁆𑀕𑀸𑀤𑀻𑀲𑀼 (𑀯𑀺𑀪. 𑁩𑁫𑁫 𑀆𑀤𑀬𑁄) 𑀢𑀁𑀲𑀁𑀯𑀡𑁆𑀡𑀦𑀸𑀤𑀻𑀲𑀼 (𑀯𑀺𑀪. 𑀅𑀝𑁆𑀞. 𑁩𑁫𑁫 𑀆𑀤𑀬𑁄) 𑀘 𑀆𑀕𑀢𑀦𑀬𑁂𑀦, 𑀲𑀸𑀫𑀜𑁆𑀜𑀨𑀮𑀸𑀦𑀁 𑀫𑀳𑀢𑁄 𑀳𑀺𑀢𑀲𑁆𑀲 𑀫𑀳𑀢𑁄 𑀲𑀼𑀔𑀲𑁆𑀲 𑀫𑀳𑀢𑁄 𑀅𑀢𑁆𑀣𑀲𑁆𑀲 𑀫𑀳𑀢𑁄 𑀬𑁄𑀕𑀓𑁆𑀔𑁂𑀫𑀲𑁆𑀲 𑀦𑀺𑀧𑁆𑀨𑀢𑁆𑀢𑀺𑀪𑀸𑀯𑀢𑁄 𑀲𑀦𑁆𑀢𑀧𑀡𑀻𑀢𑀅𑀢𑀓𑁆𑀓𑀸𑀯𑀘𑀭𑀧𑀡𑁆𑀟𑀺𑀢𑀯𑁂𑀤𑀦𑀻𑀬𑀪𑀸𑀯𑀢𑁄, 𑀅𑀪𑀺𑀜𑁆𑀜𑀸𑀦𑀁 𑀫𑀳𑀸𑀲𑀫𑁆𑀪𑀸𑀭𑀢𑁄 𑀫𑀳𑀸𑀯𑀺𑀲𑀬𑀢𑁄 𑀫𑀳𑀸𑀓𑀺𑀘𑁆𑀘𑀢𑁄 𑀫𑀳𑀸𑀦𑀼𑀪𑀸𑀯𑀢𑁄 𑀫𑀳𑀸𑀦𑀺𑀧𑁆𑀨𑀢𑁆𑀢𑀺𑀢𑁄, 𑀦𑀺𑀩𑁆𑀩𑀸𑀦𑀲𑁆𑀲 𑀫𑀤𑀦𑀺𑀫𑁆𑀫𑀤𑀦𑀸𑀤𑀺𑀫𑀳𑀢𑁆𑀣𑀲𑀺𑀤𑁆𑀥𑀺𑀢𑁄 𑀘 𑀫𑀳𑀦𑁆𑀢𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀲𑀪𑀸𑀯𑀸𑀤𑀺𑀢𑁄 𑀧𑀭𑀺𑀘𑁆𑀙𑀺𑀚𑁆𑀚 𑀕𑀡𑁆𑀳𑀸𑀢𑀺 𑀚𑀸𑀦𑀸𑀢𑀺, 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄.

𑀧𑀼𑀣𑀼𑀧𑀜𑁆𑀜𑀸𑀢𑀺 ¶ 𑀏𑀢𑁆𑀣𑀸𑀧𑀺 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀁 𑀧𑀦 𑀯𑀺𑀲𑁂𑀲𑁄 𑁋 𑀧𑀼𑀣𑀼 𑀦𑀸𑀦𑀸𑀓𑁆𑀔𑀦𑁆𑀥𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 ‘‘𑀅𑀬𑀁 𑀭𑀽𑀧𑀓𑁆𑀔𑀦𑁆𑀥𑁄 𑀦𑀸𑀫…𑀧𑁂… 𑀅𑀬𑀁 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀦𑀸𑀫𑀸’’𑀢𑀺 𑀏𑀯𑀁 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀢𑁂𑀲𑀼𑀧𑀺 𑀏𑀓𑀯𑀺𑀥𑁂𑀦 𑀭𑀽𑀧𑀓𑁆𑀔𑀦𑁆𑀥𑁄…𑀧𑁂… 𑀏𑀓𑀸𑀤𑀲𑀯𑀺𑀥𑁂𑀦 𑀭𑀽𑀧𑀓𑁆𑀔𑀦𑁆𑀥𑁄. 𑀏𑀓𑀯𑀺𑀥𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄…𑀧𑁂… 𑀩𑀳𑀼𑀯𑀺𑀥𑁂𑀦 𑀯𑁂𑀤𑀦𑀸𑀓𑁆𑀔𑀦𑁆𑀥𑁄. 𑀏𑀓𑀯𑀺𑀥𑁂𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄…𑀧𑁂… 𑀩𑀳𑀼𑀯𑀺𑀥𑁂𑀦 𑀲𑀜𑁆𑀜𑀸𑀓𑁆𑀔𑀦𑁆𑀥𑁄. 𑀏𑀓𑀯𑀺𑀥𑁂𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄…𑀧𑁂… 𑀩𑀳𑀼𑀯𑀺𑀥𑁂𑀦 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄. 𑀏𑀓𑀯𑀺𑀥𑁂𑀦 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄…𑀧𑁂… 𑀩𑀳𑀼𑀯𑀺𑀥𑁂𑀦 ¶ 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄𑀢𑀺 𑀏𑀯𑀁 𑀏𑀓𑁂𑀓𑀲𑁆𑀲 𑀔𑀦𑁆𑀥𑀲𑁆𑀲 𑀏𑀓𑀯𑀺𑀥𑀸𑀤𑀺𑀯𑀲𑁂𑀦 𑀅𑀢𑀻𑀢𑀸𑀤𑀺𑀯𑀲𑁂𑀦𑀧𑀺 𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺.

𑀧𑀼𑀣𑀼 𑀦𑀸𑀦𑀸𑀥𑀸𑀢𑀽𑀲𑀽𑀢𑀺 ‘‘𑀅𑀬𑀁 𑀘𑀓𑁆𑀔𑀼𑀥𑀸𑀢𑀼 𑀦𑀸𑀫…𑀧𑁂… 𑀅𑀬𑀁 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀦𑀸𑀫. 𑀢𑀢𑁆𑀣 𑀲𑁄𑀴𑀲 𑀥𑀸𑀢𑀼𑀬𑁄 𑀓𑀸𑀫𑀸𑀯𑀘𑀭𑀸, 𑀤𑁆𑀯𑁂 𑀘𑀸𑀢𑀼𑀪𑀽𑀫𑀺𑀓𑀸’’𑀢𑀺 𑀏𑀯𑀁 𑀥𑀸𑀢𑀽𑀲𑀼 𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀢𑀬𑀺𑀤𑀁 𑀉𑀧𑀸𑀤𑀺𑀦𑁆𑀦𑀥𑀸𑀢𑀼𑀯𑀲𑁂𑀦 𑀯𑀼𑀢𑁆𑀢𑀁. 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀜𑁆𑀳𑀺 𑀤𑁆𑀯𑀺𑀦𑁆𑀦𑀜𑁆𑀘 𑀅𑀕𑁆𑀕𑀲𑀸𑀯𑀓𑀸𑀦𑀁 𑀉𑀧𑀸𑀤𑀺𑀦𑁆𑀦𑀥𑀸𑀢𑀽𑀲𑀼 𑀏𑀯 𑀦𑀸𑀦𑀸𑀓𑀭𑀡𑀁 𑀧𑀝𑀺𑀘𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺, 𑀢𑀜𑁆𑀘 𑀔𑁄 𑀏𑀓𑀤𑁂𑀲𑀢𑁄𑀯, 𑀦 𑀦𑀺𑀧𑁆𑀧𑀤𑁂𑀲𑀢𑁄. 𑀩𑀳𑀺𑀤𑁆𑀥𑀸 𑀅𑀦𑀼𑀧𑀸𑀤𑀺𑀦𑁆𑀦𑀥𑀸𑀢𑀽𑀦𑀁 𑀦𑀸𑀦𑀸𑀓𑀭𑀡𑀁 𑀢𑁂𑀲𑀁 𑀅𑀯𑀺𑀲𑀬𑁄𑀯, 𑀲𑀩𑁆𑀩𑀜𑁆𑀜𑀼𑀩𑀼𑀤𑁆𑀥𑀸𑀦𑀁𑀬𑁂𑀯 𑀧𑀦 ‘‘𑀇𑀫𑀸𑀬 𑀥𑀸𑀢𑀼𑀬𑀸 𑀉𑀲𑁆𑀲𑀦𑁆𑀦𑀢𑁆𑀢𑀸 𑀇𑀫𑀲𑁆𑀲 𑀭𑀼𑀓𑁆𑀔𑀲𑁆𑀲 𑀔𑀦𑁆𑀥𑁄 𑀲𑁂𑀢𑁄 𑀳𑁄𑀢𑀺, 𑀇𑀫𑀲𑁆𑀲 𑀓𑀸𑀴𑁄, 𑀇𑀫𑀲𑁆𑀲 𑀫𑀝𑁆𑀞𑁄, 𑀇𑀫𑀲𑁆𑀲 𑀔𑀭𑁄, 𑀇𑀫𑀲𑁆𑀲 𑀩𑀳𑀮𑀢𑀘𑁄, 𑀇𑀫𑀲𑁆𑀲 𑀲𑀼𑀓𑁆𑀔𑀢𑀘𑁄. 𑀇𑀫𑀲𑁆𑀲 𑀧𑀢𑁆𑀢𑀁 𑀯𑀡𑁆𑀡𑀲𑀡𑁆𑀞𑀸𑀦𑀸𑀤𑀺𑀯𑀲𑁂𑀦 𑀏𑀯𑀭𑀽𑀧𑀁. 𑀇𑀫𑀲𑁆𑀲 𑀧𑀼𑀧𑁆𑀨𑀁 𑀦𑀻𑀮𑀁, 𑀧𑀻𑀢𑀁, 𑀮𑁄𑀳𑀺𑀢𑀁, 𑀑𑀤𑀸𑀢𑀁, 𑀲𑀼𑀕𑀦𑁆𑀥𑀁, 𑀤𑀼𑀕𑁆𑀕𑀦𑁆𑀥𑀁, 𑀫𑀺𑀲𑁆𑀲𑀓𑀕𑀦𑁆𑀥𑀁. 𑀨𑀮𑀁 𑀔𑀼𑀤𑁆𑀤𑀓𑀁, 𑀫𑀳𑀦𑁆𑀢𑀁, 𑀤𑀻𑀖𑀁, 𑀯𑀝𑁆𑀝𑀁, 𑀲𑀼𑀯𑀡𑁆𑀡𑀁, 𑀤𑀼𑀩𑁆𑀩𑀡𑁆𑀡𑀁, 𑀫𑀝𑁆𑀞𑀁, 𑀨𑀭𑀼𑀲𑀁, 𑀲𑀼𑀕𑀦𑁆𑀥𑀁, 𑀤𑀼𑀕𑁆𑀕𑀦𑁆𑀥𑀁, 𑀫𑀥𑀼𑀭𑀁, 𑀢𑀺𑀢𑁆𑀢𑀓𑀁, 𑀅𑀫𑁆𑀩𑀺𑀮𑀁, 𑀓𑀝𑀼𑀓𑀁, 𑀓𑀲𑀸𑀯𑀁. 𑀓𑀡𑁆𑀝𑀓𑁄 𑀢𑀺𑀔𑀺𑀡𑁄, 𑀅𑀢𑀺𑀔𑀺𑀡𑁄, 𑀉𑀚𑀼𑀓𑁄, 𑀓𑀼𑀝𑀺𑀮𑁄, 𑀢𑀫𑁆𑀩𑁄, 𑀦𑀻𑀮𑁄, 𑀮𑁄𑀳𑀺𑀢𑁄, 𑀑𑀤𑀸𑀢𑁄’’𑀢𑀺𑀆𑀤𑀺𑀦𑀸 𑀥𑀸𑀢𑀼𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺.

𑀧𑀼𑀣𑀼 𑀦𑀸𑀦𑀸𑀆𑀬𑀢𑀦𑁂𑀲𑀽𑀢𑀺 ‘‘𑀇𑀤𑀁 𑀘𑀓𑁆𑀔𑀸𑀬𑀢𑀦𑀁 𑀦𑀸𑀫…𑀧𑁂… 𑀇𑀤𑀁 𑀥𑀫𑁆𑀫𑀸𑀬𑀢𑀦𑀁 𑀦𑀸𑀫. 𑀢𑀢𑁆𑀣 𑀤𑀲𑀸𑀬𑀢𑀦𑀸 𑀓𑀸𑀫𑀸𑀯𑀘𑀭𑀸, 𑀤𑁆𑀯𑁂 𑀘𑀸𑀢𑀼𑀪𑀽𑀫𑀓𑀸’’𑀢𑀺 𑀏𑀯𑀁 𑀆𑀬𑀢𑀦𑀦𑀸𑀦𑀢𑁆𑀢𑀁 𑀧𑀝𑀺𑀘𑁆𑀘 𑀜𑀸𑀡𑀁 𑀧𑀯𑀢𑁆𑀢𑀢𑀺.

𑀧𑀼𑀣𑀼 𑀦𑀸𑀦𑀸𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂𑀲𑀽𑀢𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀪𑁂𑀤𑀢𑁄 𑀲𑀦𑁆𑀢𑀸𑀦𑀪𑁂𑀤𑀢𑁄 𑀘 𑀦𑀸𑀦𑀧𑁆𑀧𑀪𑁂𑀤𑁂𑀲𑀼 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀗𑁆𑀕𑁂𑀲𑀼. 𑀅𑀯𑀺𑀚𑁆𑀚𑀸𑀤𑀺𑀅𑀗𑁆𑀕𑀸𑀦𑀺 𑀳𑀺 𑀧𑀘𑁆𑀘𑁂𑀓𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀲𑀜𑁆𑀜𑀺𑀢𑀸𑀦𑀺. 𑀢𑁂𑀦𑀸𑀳 𑁋 𑀲𑀗𑁆𑀔𑀸𑀭𑀧𑀺𑀝𑀓𑁂 ‘‘𑀤𑁆𑀯𑀸𑀤𑀲 𑀧𑀘𑁆𑀘𑀬𑀸 𑀤𑁆𑀯𑀸𑀤𑀲 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀸’’𑀢𑀺 (𑀲𑀁. 𑀦𑀺. 𑀝𑀻. 𑁧.𑁧.𑁧𑁧𑁦).

𑀧𑀼𑀣𑀼 𑀦𑀸𑀦𑀸𑀲𑀼𑀜𑁆𑀜𑀢𑀫𑀦𑀼𑀧𑀮𑀩𑁆𑀪𑁂𑀲𑀽𑀢𑀺 𑀦𑀸𑀦𑀸𑀲𑀪𑀸𑀯𑁂𑀲𑀼 𑀦𑀺𑀘𑁆𑀘𑀲𑀸𑀭𑀸𑀤𑀺𑀯𑀺𑀭𑀳𑀺𑀢𑁂𑀲𑀼 𑀲𑀼𑀜𑁆𑀜𑀲𑀪𑀸𑀯𑁂𑀲𑀼, 𑀢𑀢𑁄 𑀏𑀯 𑀇𑀢𑁆𑀣𑀺𑀧𑀼𑀭𑀺𑀲𑀅𑀢𑁆𑀢𑀢𑁆𑀢𑀦𑀺𑀬𑀸𑀤𑀺𑀯𑀲𑁂𑀦 𑀅𑀦𑀼𑀧𑀮𑀩𑁆𑀪𑀫𑀸𑀦𑀲𑀪𑀸𑀯𑁂𑀲𑀼. 𑀫-𑀓𑀸𑀭𑁄 𑀳𑁂𑀢𑁆𑀣 𑀧𑀤𑀲𑀦𑁆𑀥𑀺𑀓𑀭𑁄.

𑀧𑀼𑀣𑀼 ¶ 𑀦𑀸𑀦𑀸𑀅𑀢𑁆𑀣𑁂𑀲𑀽𑀢𑀺 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑁂𑀲𑀼 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀤𑀺𑀦𑀸𑀦𑀸𑀅𑀢𑁆𑀣𑁂𑀲𑀼. 𑀥𑀫𑁆𑀫𑁂𑀲𑀽𑀢𑀺 𑀥𑀫𑁆𑀫𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀲𑀬𑁂𑀲𑀼 𑀧𑀘𑁆𑀘𑀬𑀸𑀤𑀺𑀦𑀸𑀦𑀸𑀥𑀫𑁆𑀫𑁂𑀲𑀼. 𑀦𑀺𑀭𑀼𑀢𑁆𑀢𑀻𑀲𑀽𑀢𑀺 ¶ 𑀢𑁂𑀲𑀁𑀬𑁂𑀯 𑀅𑀢𑁆𑀣𑀥𑀫𑁆𑀫𑀸𑀦𑀁 𑀦𑀺𑀤𑁆𑀥𑀸𑀭𑀡𑀯𑀘𑀦𑀲𑀗𑁆𑀔𑀸𑀢𑁂𑀲𑀼 𑀦𑀸𑀦𑀸𑀦𑀺𑀭𑀼𑀢𑁆𑀢𑀻𑀲𑀼. 𑀧𑀼𑀣𑀼 𑀦𑀸𑀦𑀸𑀧𑀝𑀺𑀪𑀸𑀦𑁂𑀲𑀽𑀢𑀺 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀤𑀺𑀯𑀺𑀲𑀬𑁂𑀲𑀼 𑀇𑀫𑀸𑀦𑀺 𑀜𑀸𑀡𑀸𑀦𑀺 𑀇𑀤𑀫𑀢𑁆𑀣𑀚𑁄𑀢𑀓𑀸𑀦𑀻𑀢𑀺 𑀢𑀣𑀸 𑀢𑀣𑀸 𑀧𑀝𑀺𑀪𑀸𑀦𑀢𑁄 𑀉𑀧𑀢𑀺𑀝𑁆𑀞𑀦𑀢𑁄 𑀧𑀝𑀺𑀪𑀸𑀦𑀸𑀦𑀻𑀢𑀺 𑀮𑀤𑁆𑀥𑀦𑀸𑀫𑁂𑀲𑀼 𑀦𑀸𑀦𑀸𑀜𑀸𑀡𑁂𑀲𑀼.

𑀧𑀼𑀣𑀼 𑀦𑀸𑀦𑀸𑀲𑀻𑀮𑀓𑁆𑀔𑀦𑁆𑀥𑁂𑀲𑀽𑀢𑀺𑀆𑀤𑀻𑀲𑀼 𑀲𑀻𑀮𑀲𑁆𑀲 𑀧𑀼𑀣𑀼𑀢𑁆𑀢𑀁 𑀦𑀸𑀦𑀢𑁆𑀢𑀜𑁆𑀘 𑀯𑀼𑀢𑁆𑀢𑀫𑁂𑀯, 𑀇𑀢𑀭𑁂𑀲𑀁 𑀧𑀦 𑀯𑀼𑀢𑁆𑀢𑀦𑀬𑀸𑀦𑀼𑀲𑀸𑀭𑁂𑀦 𑀲𑀼𑀯𑀺𑀜𑁆𑀜𑁂𑀬𑁆𑀬𑀢𑁆𑀢𑀸 𑀧𑀸𑀓𑀝𑀫𑁂𑀯. 𑀬𑀁 𑀧𑀦 𑀅𑀪𑀺𑀦𑁆𑀦𑀁 𑀏𑀓𑀫𑁂𑀯 𑀦𑀺𑀩𑁆𑀩𑀸𑀦𑀁, 𑀢𑀢𑁆𑀣 𑀉𑀧𑀘𑀸𑀭𑀯𑀲𑁂𑀦 𑀧𑀼𑀣𑀼𑀢𑁆𑀢𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀆𑀳 𑁋 ‘‘𑀧𑀼𑀣𑀼 𑀦𑀸𑀦𑀸𑀚𑀦𑀲𑀸𑀥𑀸𑀭𑀡𑁂 𑀥𑀫𑁆𑀫𑁂 𑀲𑀫𑀢𑀺𑀓𑁆𑀓𑀫𑁆𑀫𑀸’’𑀢𑀺. 𑀢𑁂𑀦𑀲𑁆𑀲 𑀫𑀤𑀦𑀺𑀫𑁆𑀫𑀤𑀦𑀸𑀤𑀺𑀧𑀭𑀺𑀬𑀸𑀬𑁂𑀦 𑀧𑀼𑀣𑀼𑀢𑁆𑀢𑀁 𑀧𑀭𑀺𑀤𑀻𑀧𑀺𑀢𑀁 𑀳𑁄𑀢𑀺.

𑀯𑀺𑀧𑀼𑀮𑁂 𑀅𑀢𑁆𑀣𑁂𑀢𑀺 𑀫𑀳𑀦𑁆𑀢𑁂 𑀅𑀢𑁆𑀣𑁂. 𑀫𑀳𑀦𑁆𑀢𑀧𑀭𑀺𑀬𑀸𑀬𑁄 𑀳𑀺 𑀯𑀺𑀧𑀼𑀮𑀲𑀤𑁆𑀤𑁄. 𑀕𑀫𑁆𑀪𑀻𑀭𑁂𑀲𑀽𑀢𑀺 𑀲𑀲𑀸𑀤𑀻𑀳𑀺 𑀯𑀺𑀬 𑀫𑀳𑀸𑀲𑀫𑀼𑀤𑁆𑀤𑁄 𑀅𑀦𑀼𑀧𑀘𑀺𑀢𑀜𑀸𑀡𑀲𑀫𑁆𑀪𑀸𑀭𑁂𑀳𑀺 𑀅𑀮𑀩𑁆𑀪𑀦𑁂𑀬𑁆𑀬𑀧𑁆𑀧𑀢𑀺𑀝𑁆𑀞𑁂𑀲𑀼 𑀔𑀦𑁆𑀥𑁂𑀲𑀼 𑀜𑀸𑀡𑀁 𑀧𑀯𑀢𑁆𑀢𑀢𑀻𑀢𑀺 𑀯𑀺𑀲𑀬𑀲𑁆𑀲 𑀕𑀫𑁆𑀪𑀻𑀭𑀢𑀸𑀬 𑀜𑀸𑀡𑀲𑁆𑀲 𑀕𑀫𑁆𑀪𑀻𑀭𑀢𑀸 𑀯𑀺𑀪𑀸𑀯𑀺𑀢𑀸.

𑀢𑀺𑀓𑁆𑀔𑀯𑀺𑀲𑀤𑀪𑀸𑀯𑀸𑀤𑀺𑀕𑀼𑀡𑁂𑀳𑀺 𑀅𑀲𑀸𑀥𑀸𑀭𑀡𑀢𑁆𑀢𑀸 𑀧𑀭𑁂𑀲𑀁 𑀧𑀜𑁆𑀜𑀸𑀬 𑀦 𑀲𑀸𑀫𑀦𑁆𑀢𑀸, 𑀅𑀣 𑀔𑁄 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑁂𑀢𑀺 𑀅𑀲𑀫𑀦𑁆𑀢𑀧𑀜𑁆𑀜𑀸 𑀆𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀓𑀢𑁆𑀯𑀸. 𑀓𑁂𑀘𑀺 ‘‘𑀅𑀲𑀫𑀢𑁆𑀣𑀧𑀜𑁆𑀜𑀸’’𑀢𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀬𑀣𑀸𑀯𑀼𑀢𑁆𑀢𑀕𑀼𑀡𑁂𑀳𑀺 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀢𑁆𑀢𑀸 𑀦𑀢𑁆𑀣𑀺 𑀏𑀢𑀺𑀲𑁆𑀲𑀸 𑀓𑀸𑀬𑀘𑀺 𑀲𑀫𑀢𑁆𑀣𑀦𑁆𑀢𑀺 𑀅𑀲𑀫𑀢𑁆𑀣𑀸 𑀧𑀜𑁆𑀜𑀸𑀢𑀺 𑀬𑁄𑀚𑀦𑀸. 𑀅𑀢𑁆𑀣𑀯𑀯𑀢𑁆𑀣𑀸𑀦𑀢𑁄𑀢𑀺 𑀅𑀢𑁆𑀣𑀧𑁆𑀧𑀪𑁂𑀤𑀲𑁆𑀲 𑀬𑀸𑀣𑀸𑀯𑀢𑁄 𑀲𑀦𑁆𑀦𑀺𑀝𑁆𑀞𑀸𑀦𑀢𑁄. 𑀦 𑀅𑀜𑁆𑀜𑁄 𑀓𑁄𑀘𑀺 𑀲𑀓𑁆𑀓𑁄𑀢𑀺 𑀅𑀪𑀺𑀲𑀫𑁆𑀪𑀯𑀺𑀢𑀼𑀦𑁆𑀢𑀺 𑀜𑀸𑀡𑀕𑀢𑀺𑀬𑀸 𑀲𑀫𑁆𑀧𑀸𑀧𑀼𑀡𑀺𑀢𑀼𑀁 𑀦 𑀅𑀜𑁆𑀜𑁄 𑀓𑁄𑀘𑀺𑀧𑀺 𑀲𑀓𑁆𑀓𑁄𑀢𑀺, 𑀢𑀲𑁆𑀫𑀸 𑀅𑀬𑀁 𑀲𑀼𑀯𑀺𑀤𑀽𑀭𑀯𑀺𑀤𑀽𑀭𑁂𑀢𑀺 𑀅𑀲𑀫𑀦𑁆𑀢𑀧𑀜𑁆𑀜𑀸. 𑀇𑀤𑀸𑀦𑀺 𑀧𑀼𑀕𑁆𑀕𑀮𑀦𑁆𑀢𑀭𑀯𑀲𑁂𑀦 𑀅𑀲𑀫𑀦𑁆𑀢𑀧𑀜𑁆𑀜𑀁 𑀯𑀺𑀪𑀸𑀯𑁂𑀢𑀼𑀁, ‘‘𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑀲𑁆𑀲𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁.

‘‘𑀧𑀜𑁆𑀜𑀸𑀧𑀪𑁂𑀤𑀓𑀼𑀲𑀮𑁄 𑀅𑀪𑀺𑀦𑁆𑀦𑀜𑀸𑀡𑁄 𑀅𑀥𑀺𑀕𑀢𑀧𑁆𑀧𑀝𑀺𑀲𑀫𑁆𑀪𑀺𑀤𑁄 𑀘𑀢𑀼𑀯𑁂𑀲𑀸𑀭𑀚𑁆𑀚𑀧𑁆𑀧𑀢𑁆𑀢𑁄 𑀤𑀲𑀩𑀮𑀥𑀸𑀭𑀻 𑀧𑀼𑀭𑀺𑀲𑀸𑀲𑀪𑁄 𑀧𑀼𑀭𑀺𑀲𑀲𑀻𑀳𑁄 𑀧𑀼𑀭𑀺𑀲𑀦𑀸𑀕𑁄 𑀧𑀼𑀭𑀺𑀲𑀸𑀚𑀜𑁆𑀜𑁄 𑀧𑀼𑀭𑀺𑀲𑀥𑁄𑀭𑀬𑁆𑀳𑁄 𑀅𑀦𑀦𑁆𑀢𑀜𑀸𑀡𑁄 𑀅𑀦𑀦𑁆𑀢𑀢𑁂𑀚𑁄 𑀅𑀦𑀦𑁆𑀢𑀬𑀲𑁄 𑀅𑀟𑁆𑀠𑁄 𑀫𑀳𑀤𑁆𑀥𑀦𑁄 𑀩𑀮𑀯𑀸 𑀦𑁂𑀢𑀸 𑀯𑀺𑀦𑁂𑀢𑀸 𑀅𑀦𑀼𑀦𑁂𑀢𑀸 𑀧𑀜𑁆𑀜𑀸𑀧𑁂𑀢𑀸 𑀯𑀺𑀦𑀺𑀚𑁆𑀛𑀸𑀧𑁂𑀢𑀸 𑀧𑁂𑀓𑁆𑀔𑀢𑀸 𑀧𑀲𑀸𑀤𑁂𑀢𑀸. 𑀲𑁄 𑀳𑀺 𑀪𑀕𑀯𑀸 𑀅𑀦𑀼𑀧𑁆𑀧𑀦𑁆𑀦𑀲𑁆𑀲 𑀫𑀕𑁆𑀕𑀲𑁆𑀲 𑀉𑀧𑁆𑀧𑀸𑀤𑁂𑀢𑀸, 𑀅𑀲𑀜𑁆𑀚𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀲𑀜𑁆𑀚𑀦𑁂𑀢𑀸, 𑀅𑀦𑀓𑁆𑀔𑀸𑀢𑀲𑁆𑀲 𑀫𑀕𑁆𑀕𑀲𑁆𑀲 𑀅𑀓𑁆𑀔𑀸𑀢𑀸, 𑀫𑀕𑁆𑀕𑀜𑁆𑀜𑀽 𑀫𑀕𑁆𑀕𑀯𑀺𑀤𑀽 𑀫𑀕𑁆𑀕𑀓𑁄𑀯𑀺𑀤𑁄. 𑀫𑀕𑁆𑀕𑀸𑀦𑀼𑀕𑀸𑀫𑀻 𑀘 𑀧𑀦 𑀏𑀢𑀭𑀳𑀺 𑀲𑀸𑀯𑀓𑀸 𑀯𑀺𑀳𑀭𑀦𑁆𑀢𑀺 𑀧𑀘𑁆𑀙𑀸 𑀲𑀫𑀦𑁆𑀦𑀸𑀕𑀢𑀸.

‘‘𑀲𑁄 ¶ ¶ 𑀳𑀺 𑀪𑀕𑀯𑀸 𑀚𑀸𑀦𑀁 𑀚𑀸𑀦𑀸𑀢𑀺, 𑀧𑀲𑁆𑀲𑀁 𑀧𑀲𑁆𑀲𑀢𑀺, 𑀘𑀓𑁆𑀔𑀼𑀪𑀽𑀢𑁄 𑀜𑀸𑀡𑀪𑀽𑀢𑁄 𑀥𑀫𑁆𑀫𑀪𑀽𑀢𑁄 𑀩𑁆𑀭𑀳𑁆𑀫𑀪𑀽𑀢𑁄 𑀯𑀢𑁆𑀢𑀸 𑀧𑀯𑀢𑁆𑀢𑀸 𑀅𑀢𑁆𑀣𑀲𑁆𑀲 𑀦𑀺𑀦𑁆𑀦𑁂𑀢𑀸 𑀅𑀫𑀢𑀲𑁆𑀲 𑀤𑀸𑀢𑀸 𑀥𑀫𑁆𑀫𑀲𑁆𑀲𑀸𑀫𑀻 𑀢𑀣𑀸𑀕𑀢𑁄, 𑀦𑀢𑁆𑀣𑀺 𑀢𑀲𑁆𑀲 𑀪𑀕𑀯𑀢𑁄 𑀅𑀜𑁆𑀜𑀸𑀢𑀁 𑀅𑀤𑀺𑀝𑁆𑀞𑀁 𑀅𑀯𑀺𑀤𑀺𑀢𑀁 𑀅𑀲𑀘𑁆𑀙𑀺𑀓𑀢𑀁 𑀅𑀨𑀲𑁆𑀲𑀺𑀢𑀁 𑀧𑀜𑁆𑀜𑀸𑀬. 𑀅𑀢𑀻𑀢𑀁 𑀅𑀦𑀸𑀕𑀢𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀉𑀧𑀸𑀤𑀸𑀬 𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑀼𑀔𑁂 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀺, 𑀬𑀁 𑀓𑀺𑀜𑁆𑀘𑀺 𑀦𑁂𑀬𑁆𑀬𑀁 𑀦𑀸𑀫 𑀅𑀢𑁆𑀣𑀺 𑀢𑀁 𑀲𑀩𑁆𑀩𑀁 𑀚𑀸𑀦𑀺𑀢𑀩𑁆𑀩𑀁, 𑀅𑀢𑁆𑀢𑀢𑁆𑀣𑁄 𑀯𑀸 𑀧𑀭𑀢𑁆𑀣𑁄 𑀯𑀸 𑀉𑀪𑀬𑀢𑁆𑀣𑁄 𑀯𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑁄 𑀯𑀸 𑀅𑀢𑁆𑀣𑁄 𑀲𑀫𑁆𑀧𑀭𑀸𑀬𑀺𑀓𑁄 𑀯𑀸 𑀅𑀢𑁆𑀣𑁄 𑀉𑀢𑁆𑀢𑀸𑀦𑁄 𑀯𑀸 𑀅𑀢𑁆𑀣𑁄 𑀕𑀫𑁆𑀪𑀻𑀭𑁄 𑀯𑀸 𑀅𑀢𑁆𑀣𑁄 𑀕𑀽𑀴𑁆𑀳𑁄 𑀯𑀸 𑀅𑀢𑁆𑀣𑁄 𑀧𑀝𑀺𑀘𑁆𑀙𑀦𑁆𑀦𑁄 𑀯𑀸 𑀅𑀢𑁆𑀣𑁄 𑀦𑁂𑀬𑁆𑀬𑁄 𑀯𑀸 𑀅𑀢𑁆𑀣𑁄 𑀦𑀻𑀢𑁄 𑀯𑀸 𑀅𑀢𑁆𑀣𑁄 𑀅𑀦𑀯𑀚𑁆𑀚𑁄 𑀯𑀸 𑀅𑀢𑁆𑀣𑁄 𑀦𑀺𑀓𑁆𑀓𑀺𑀮𑁂𑀲𑁄 𑀯𑀸 𑀅𑀢𑁆𑀣𑁄 𑀯𑁄𑀤𑀸𑀦𑁄 𑀯𑀸 𑀅𑀢𑁆𑀣𑁄 𑀧𑀭𑀫𑀢𑁆𑀣𑁄 𑀯𑀸 𑀅𑀢𑁆𑀣𑁄, 𑀲𑀩𑁆𑀩𑀁 𑀢𑀁 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀺.

‘‘𑀲𑀩𑁆𑀩𑀁 𑀓𑀸𑀬𑀓𑀫𑁆𑀫𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺, 𑀲𑀩𑁆𑀩𑀁 𑀯𑀘𑀻𑀓𑀫𑁆𑀫𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺, 𑀲𑀩𑁆𑀩𑀁 𑀫𑀦𑁄𑀓𑀫𑁆𑀫𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺. 𑀅𑀢𑀻𑀢𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁, 𑀅𑀦𑀸𑀕𑀢𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀧𑁆𑀧𑀝𑀺𑀳𑀢𑀁 𑀜𑀸𑀡𑀁, 𑀬𑀸𑀯𑀢𑀓𑀁 𑀦𑁂𑀬𑁆𑀬𑀁, 𑀢𑀸𑀯𑀢𑀓𑀁 𑀜𑀸𑀡𑀁. 𑀬𑀸𑀯𑀢𑀓𑀁 𑀜𑀸𑀡𑀁, 𑀢𑀸𑀯𑀢𑀓𑀁 𑀦𑁂𑀬𑁆𑀬𑀁. 𑀦𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀦𑁂𑀬𑁆𑀬𑀁, 𑀦𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀜𑀸𑀡𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀜𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑁂𑀬𑁆𑀬𑀧𑀣𑁄 𑀦𑀢𑁆𑀣𑀺, 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄 𑀢𑁂 𑀥𑀫𑁆𑀫𑀸, 𑀬𑀣𑀸 𑀤𑁆𑀯𑀺𑀦𑁆𑀦𑀁 𑀲𑀫𑀼𑀕𑁆𑀕𑀧𑀝𑀮𑀸𑀦𑀁 𑀲𑀫𑁆𑀫𑀸 𑀨𑀼𑀲𑀺𑀢𑀸𑀦𑀁 𑀳𑁂𑀝𑁆𑀞𑀺𑀫𑀁 𑀲𑀫𑀼𑀕𑁆𑀕𑀧𑀝𑀮𑀁 𑀉𑀧𑀭𑀺𑀫𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀉𑀧𑀭𑀺𑀫𑀁 𑀲𑀫𑀼𑀕𑁆𑀕𑀧𑀝𑀮𑀁 𑀳𑁂𑀝𑁆𑀞𑀺𑀫𑀁 𑀦𑀸𑀢𑀺𑀯𑀢𑁆𑀢𑀢𑀺, 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄, 𑀏𑀯𑀫𑁂𑀯𑀁 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀦𑁂𑀬𑁆𑀬𑀜𑁆𑀘 𑀜𑀸𑀡𑀜𑁆𑀘 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄. 𑀬𑀸𑀯𑀢𑀓𑀁 𑀦𑁂𑀬𑁆𑀬𑀁, 𑀢𑀸𑀯𑀢𑀓𑀁 𑀜𑀸𑀡𑀁. 𑀬𑀸𑀯𑀢𑀓𑀁 𑀜𑀸𑀡𑀁, 𑀢𑀸𑀯𑀢𑀓𑀁 𑀦𑁂𑀬𑁆𑀬𑀁, 𑀦𑁂𑀬𑁆𑀬𑀧𑀭𑀺𑀬𑀦𑁆𑀢𑀺𑀓𑀁 𑀜𑀸𑀡𑀁, 𑀜𑀸𑀡𑀧𑀭𑀺𑀬𑀦𑁆𑀢𑀺𑀓𑀁 𑀦𑁂𑀬𑁆𑀬𑀁, 𑀦𑁂𑀬𑁆𑀬𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀜𑀸𑀡𑀁 𑀦𑀧𑁆𑀧𑀯𑀢𑁆𑀢𑀢𑀺, 𑀜𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀦𑁂𑀬𑁆𑀬𑀧𑀣𑁄 𑀦𑀢𑁆𑀣𑀺. 𑀅𑀜𑁆𑀜𑀫𑀜𑁆𑀜𑀧𑀭𑀺𑀬𑀦𑁆𑀢𑀝𑁆𑀞𑀸𑀬𑀺𑀦𑁄 𑀢𑁂 𑀥𑀫𑁆𑀫𑀸. 𑀲𑀩𑁆𑀩𑀥𑀫𑁆𑀫𑁂𑀲𑀼 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀺.

‘‘𑀲𑀩𑁆𑀩𑁂 ¶ 𑀥𑀫𑁆𑀫𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀆𑀯𑀚𑁆𑀚𑀦𑀧𑁆𑀧𑀝𑀺𑀩𑀤𑁆𑀥𑀸 𑀆𑀓𑀗𑁆𑀔𑀧𑁆𑀧𑀝𑀺𑀩𑀤𑁆𑀥𑀸 𑀫𑀦𑀲𑀺𑀓𑀸𑀭𑀧𑁆𑀧𑀝𑀺𑀩𑀤𑁆𑀥𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑁆𑀧𑀝𑀺𑀩𑀤𑁆𑀥𑀸, 𑀲𑀩𑁆𑀩𑀲𑀢𑁆𑀢𑁂𑀲𑀼 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀁 𑀧𑀯𑀢𑁆𑀢𑀢𑀺. 𑀲𑀩𑁆𑀩𑁂𑀲𑀁 𑀲𑀢𑁆𑀢𑀸𑀦𑀁 𑀩𑀼𑀤𑁆𑀥𑁄 𑀆𑀲𑀬𑀁 𑀚𑀸𑀦𑀸𑀢𑀺, 𑀅𑀦𑀼𑀲𑀬𑀁 𑀚𑀸𑀦𑀸𑀢𑀺, 𑀘𑀭𑀺𑀢𑀁 𑀚𑀸𑀦𑀸𑀢𑀺, 𑀅𑀥𑀺𑀫𑀼𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀅𑀧𑁆𑀧𑀭𑀚𑀓𑁆𑀔𑁂 𑀫𑀳𑀸𑀭𑀚𑀓𑁆𑀔𑁂 𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑁂 𑀫𑀼𑀤𑀺𑀦𑁆𑀤𑁆𑀭𑀺𑀬𑁂 𑀲𑁆𑀯𑀸𑀓𑀸𑀭𑁂 𑀤𑁆𑀯𑀸𑀓𑀸𑀭𑁂 𑀲𑀼𑀯𑀺𑀜𑁆𑀜𑀸𑀧𑀬𑁂 𑀤𑀼𑀯𑀺𑀜𑁆𑀜𑀸𑀧𑀬𑁂 𑀪𑀩𑁆𑀩𑀸 𑀲𑀩𑁆𑀩𑁂 𑀲𑀢𑁆𑀢𑁂 𑀧𑀚𑀸𑀦𑀸𑀢𑀺, 𑀲𑀤𑁂𑀯𑀓𑁄 𑀮𑁄𑀓𑁄 ¶ 𑀲𑀫𑀸𑀭𑀓𑁄 𑀲𑀩𑁆𑀭𑀳𑁆𑀫𑀓𑁄 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻 𑀧𑀚𑀸 𑀲𑀤𑁂𑀯𑀫𑀦𑀼𑀲𑁆𑀲𑀸 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀺.

‘‘𑀬𑀣𑀸 𑀬𑁂 𑀓𑁂𑀘𑀺 𑀫𑀘𑁆𑀙𑀓𑀘𑁆𑀙𑀧𑀸 𑀅𑀦𑁆𑀢𑀫𑀲𑁄 𑀢𑀺𑀫𑀺𑀢𑀺𑀫𑀺𑀗𑁆𑀕𑀮𑀁 𑀉𑀧𑀸𑀤𑀸𑀬 𑀅𑀦𑁆𑀢𑁄𑀫𑀳𑀸𑀲𑀫𑀼𑀤𑁆𑀤𑁂 𑀧𑀭𑀺𑀯𑀢𑁆𑀢𑀦𑁆𑀢𑀺, 𑀏𑀯𑀫𑁂𑀯 𑀲𑀤𑁂𑀯𑀓𑁄 𑀮𑁄𑀓𑁄 𑀲𑀫𑀸𑀭𑀓𑁄 𑀲𑀩𑁆𑀭𑀳𑁆𑀫𑀓𑁄 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀻 𑀧𑀚𑀸 𑀲𑀤𑁂𑀯𑀫𑀦𑀼𑀲𑁆𑀲𑀸 𑀅𑀦𑁆𑀢𑁄𑀩𑀼𑀤𑁆𑀥𑀜𑀸𑀡𑁂 𑀧𑀭𑀺𑀯𑀢𑁆𑀢𑀢𑀺. 𑀬𑀣𑀸 𑀬𑁂 𑀓𑁂𑀘𑀺 𑀧𑀓𑁆𑀔𑀺𑀦𑁄 𑀅𑀦𑁆𑀢𑀫𑀲𑁄 𑀕𑀭𑀼𑀴𑀁 𑀯𑁂𑀦𑀢𑁂𑀬𑁆𑀬𑀁 𑀉𑀧𑀸𑀤𑀸𑀬 𑀆𑀓𑀸𑀲𑀲𑁆𑀲 𑀧𑀤𑁂𑀲𑁂 𑀧𑀭𑀺𑀯𑀢𑁆𑀢𑀦𑁆𑀢𑀺, 𑀏𑀯𑀫𑁂𑀯 𑀬𑁂𑀧𑀺 𑀢𑁂 𑀲𑀸𑀭𑀺𑀧𑀼𑀢𑁆𑀢𑀲𑀫𑀸 𑀧𑀜𑁆𑀜𑀸𑀬, 𑀢𑁂𑀧𑀺 𑀩𑀼𑀤𑁆𑀥𑀜𑀸𑀡𑀲𑁆𑀲 𑀧𑀤𑁂𑀲𑁂 𑀧𑀭𑀺𑀯𑀢𑁆𑀢𑀦𑁆𑀢𑀺, 𑀩𑀼𑀤𑁆𑀥𑀜𑀸𑀡𑀁 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀧𑀜𑁆𑀜𑀁 𑀨𑀭𑀺𑀢𑁆𑀯𑀸 𑀅𑀢𑀺𑀖𑀁𑀲𑀺𑀢𑁆𑀯𑀸 𑀢𑀺𑀝𑁆𑀞𑀢𑀺. 𑀬𑁂𑀧𑀺 𑀢𑁂 𑀔𑀢𑁆𑀢𑀺𑀬𑀧𑀡𑁆𑀟𑀺𑀢𑀸 𑀩𑁆𑀭𑀸𑀳𑁆𑀫𑀡𑀧𑀡𑁆𑀟𑀺𑀢𑀸 𑀕𑀳𑀧𑀢𑀺𑀧𑀡𑁆𑀟𑀺𑀢𑀸 𑀲𑀫𑀡𑀧𑀡𑁆𑀟𑀺𑀢𑀸 𑀦𑀺𑀧𑀼𑀡𑀸 𑀓𑀢𑀧𑀭𑀧𑁆𑀧𑀯𑀸𑀤𑀸 𑀯𑀸𑀮𑀯𑁂𑀥𑀺𑀭𑀽𑀧𑀸, 𑀯𑁄𑀪𑀺𑀦𑁆𑀤𑀦𑁆𑀢𑀸 𑀫𑀜𑁆𑀜𑁂 𑀘𑀭𑀦𑁆𑀢𑀺 𑀧𑀜𑁆𑀜𑀸𑀕𑀢𑁂𑀦 𑀤𑀺𑀝𑁆𑀞𑀺𑀕𑀢𑀸𑀦𑀺, 𑀢𑁂 𑀢𑁂 𑀧𑀜𑁆𑀳𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸’’𑀢𑀺 (𑀧𑀝𑀺. 𑀫. 𑁩.𑁫) 𑁋

𑀆𑀤𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑀧𑀸𑀴𑀺𑀁 𑀧𑁂𑀬𑁆𑀬𑀸𑀮𑀫𑀼𑀔𑁂𑀦 𑀲𑀁𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀜𑁆𑀜𑀸𑀧𑀪𑁂𑀤𑀓𑀼𑀲𑀮𑁄 𑀧𑀪𑀺𑀦𑁆𑀦𑀜𑀸𑀡𑁄…𑀧𑁂… 𑀢𑁂 𑀧𑀜𑁆𑀳𑀁 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸 𑀅𑀪𑀺𑀲𑀗𑁆𑀔𑀭𑀺𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 𑀧𑀪𑀺𑀦𑁆𑀦𑀜𑀸𑀡𑁄𑀢𑀺 𑀅𑀢𑁆𑀣𑀸𑀤𑀻𑀲𑀼 𑀧𑀪𑁂𑀤𑀕𑀢𑀜𑀸𑀡𑁄. ‘‘𑀧𑀪𑁂𑀤𑀜𑀸𑀡𑁄’’𑀢𑀺𑀧𑀺 𑀧𑀞𑀦𑁆𑀢𑀺, 𑀲𑁄𑀬𑁂𑀯 𑀅𑀢𑁆𑀣𑁄. 𑀢𑁂 𑀧𑀜𑁆𑀳𑀦𑁆𑀢𑀺 𑀢𑁂 𑀢𑁂 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀁 𑀧𑀜𑁆𑀳𑀁. 𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀡𑀸𑀢𑀺 𑀯𑀺𑀲𑁆𑀲𑀚𑁆𑀚𑀺𑀢𑀓𑀸𑀭𑀡𑀸. 𑀉𑀧𑀓𑁆𑀔𑀺𑀢𑁆𑀢𑀓𑀸𑀢𑀺 𑀪𑀕𑀯𑀢𑁄 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑁂𑀦 𑀲𑀫𑀻𑀧𑁂 𑀔𑀺𑀢𑁆𑀢𑀓𑀸 𑀅𑀦𑁆𑀢𑁂𑀯𑀸𑀲𑀺𑀓𑀸 𑀲𑀫𑁆𑀧𑀚𑁆𑀚𑀦𑁆𑀢𑀺.

𑀪𑀯𑀢𑀺 ¶ 𑀅𑀪𑀺𑀪𑀯𑀢𑀻𑀢𑀺 𑀪𑀽𑀭𑀺. 𑀓𑀺𑀁? 𑀭𑀸𑀕𑀸𑀤𑀺𑀁. 𑀉𑀧𑀲𑀕𑁆𑀕𑁂 𑀲𑀢𑀺𑀧𑀺 𑀢𑀤𑁂𑀯 𑀧𑀤𑀁 𑀢𑀫𑀢𑁆𑀣𑀁 𑀯𑀤𑀢𑀻𑀢𑀺 𑀉𑀧𑀲𑀕𑁆𑀕𑁂𑀦 𑀯𑀺𑀦𑀸𑀧𑀺 𑀲𑁄 𑀅𑀢𑁆𑀣𑁄 𑀯𑀺𑀜𑁆𑀜𑁂𑀬𑁆𑀬𑁄 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀦𑁆𑀢𑀺 𑀯𑀼𑀢𑁆𑀢𑀁 𑁋 ‘‘𑀅𑀪𑀺𑀪𑀼𑀬𑁆𑀬𑀢𑀻’’𑀢𑀺. 𑀓𑀸𑀭𑀓𑀩𑁆𑀬𑀢𑁆𑀢𑀬𑁂𑀦 𑀘𑁂𑀢𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀭𑀸𑀕𑀁 𑀅𑀪𑀺𑀪𑀼𑀬𑁆𑀬𑀢𑀻𑀢𑀺 𑀲𑀸 𑀲𑀸 𑀫𑀕𑁆𑀕𑀧𑀜𑁆𑀜𑀸 𑀅𑀢𑁆𑀢𑀦𑀸 𑀅𑀢𑁆𑀢𑀦𑀸 𑀯𑀚𑁆𑀛𑀁 𑀭𑀸𑀕𑀁 𑀅𑀪𑀺𑀪𑀼𑀬𑁆𑀬𑀢𑀺 𑀅𑀪𑀺𑀪𑀯𑀢𑀺, 𑀫𑀤𑀢𑀻𑀢𑀺 𑀅𑀢𑁆𑀣𑁄. 𑀅𑀪𑀺𑀪𑀯𑀢𑀻𑀢𑀺 𑀲𑀸 𑀲𑀸 𑀨𑀮𑀧𑀜𑁆𑀜𑀸 𑀢𑀁 𑀢𑀁 𑀭𑀸𑀕𑀁 𑀪𑀯𑀺 𑀅𑀪𑀺𑀪𑀯𑀺 𑀫𑀤𑁆𑀤𑀻𑀢𑀺 𑀪𑀽𑀭𑀺𑀧𑀜𑁆𑀜𑀸. ‘‘𑀅𑀪𑀺𑀪𑀯𑀺𑀢𑀸’’𑀢𑀺 𑀯𑀸 𑀧𑀸𑀞𑁄, ‘‘𑀅𑀪𑀺𑀪𑀯𑀺𑀢𑁆𑀯𑀸’’𑀢𑀺𑀧𑀺 𑀧𑀞𑀦𑁆𑀢𑀺. 𑀅𑀪𑀺𑀪𑀯𑀺𑀢𑁆𑀯𑀸𑀢𑀺 𑀘 𑀓𑀺𑀭𑀺𑀬𑀸𑀬 𑀲𑀺𑀤𑁆𑀥𑀪𑀸𑀯𑀤𑀲𑁆𑀲𑀦𑀁. 𑀧𑀜𑁆𑀜𑀸 𑀘𑁂 𑀲𑀺𑀤𑁆𑀥𑀸, 𑀭𑀸𑀕𑀸𑀪𑀺𑀪𑀯𑁄 𑀘 𑀲𑀺𑀤𑁆𑀥𑁄 𑀏𑀯𑀸𑀢𑀺. 𑀲𑁂𑀲𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀭𑀸𑀕𑀸𑀤𑀻𑀲𑀼 𑀧𑀦 𑀭𑀚𑁆𑀚𑀦𑀮𑀓𑁆𑀔𑀡𑁄 𑀭𑀸𑀕𑁄. 𑀤𑀼𑀲𑁆𑀲𑀦𑀮𑀓𑁆𑀔𑀡𑁄 𑀤𑁄𑀲𑁄. 𑀫𑀼𑀬𑁆𑀳𑀦𑀮𑀓𑁆𑀔𑀡𑁄 𑀫𑁄𑀳𑁄. 𑀓𑀼𑀚𑁆𑀛𑀦𑀮𑀓𑁆𑀔𑀡𑁄 ¶ 𑀓𑁄𑀥𑁄, 𑀉𑀧𑀦𑀦𑁆𑀥𑀦𑀮𑀓𑁆𑀔𑀡𑁄 𑀉𑀧𑀦𑀸𑀳𑁄. 𑀧𑀼𑀩𑁆𑀩𑀓𑀸𑀮𑀁 𑀓𑁄𑀥𑁄, 𑀅𑀧𑀭𑀓𑀸𑀮𑀁 𑀉𑀧𑀦𑀸𑀳𑁄. 𑀧𑀭𑀕𑀼𑀡𑀫𑀓𑁆𑀔𑀦𑀮𑀓𑁆𑀔𑀡𑁄 𑀫𑀓𑁆𑀔𑁄, 𑀬𑀼𑀕𑀕𑁆𑀕𑀸𑀳𑀮𑀓𑁆𑀔𑀡𑁄 𑀧𑀮𑀸𑀲𑁄. 𑀧𑀭𑀲𑀫𑁆𑀧𑀢𑁆𑀢𑀺𑀔𑀻𑀬𑀦𑀮𑀓𑁆𑀔𑀡𑀸 𑀇𑀲𑁆𑀲𑀸, 𑀅𑀢𑁆𑀢𑀦𑁄 𑀲𑀫𑁆𑀧𑀢𑁆𑀢𑀺𑀦𑀺𑀕𑁆𑀕𑀽𑀳𑀦𑀮𑀓𑁆𑀔𑀡𑀁 𑀫𑀘𑁆𑀙𑀭𑀺𑀬𑀁. 𑀅𑀢𑁆𑀢𑀦𑀸 𑀓𑀢𑀧𑀸𑀧𑀧𑁆𑀧𑀝𑀺𑀘𑁆𑀙𑀸𑀤𑀦𑀮𑀓𑁆𑀔𑀡𑀸 𑀫𑀸𑀬𑀸, 𑀅𑀢𑁆𑀢𑀦𑁄 𑀅𑀯𑀺𑀚𑁆𑀚𑀫𑀸𑀦𑀕𑀼𑀡𑀧𑁆𑀧𑀓𑀸𑀲𑀦𑀮𑀓𑁆𑀔𑀡𑀁 𑀲𑀸𑀞𑁂𑀬𑁆𑀬𑀁. 𑀘𑀺𑀢𑁆𑀢𑀲𑁆𑀲 𑀉𑀤𑁆𑀥𑀼𑀫𑀸𑀢𑀪𑀸𑀯𑀮𑀓𑁆𑀔𑀡𑁄 𑀣𑀫𑁆𑀪𑁄, 𑀓𑀭𑀡𑀼𑀢𑁆𑀢𑀭𑀺𑀬𑀮𑀓𑁆𑀔𑀡𑁄 𑀲𑀸𑀭𑀫𑁆𑀪𑁄. 𑀉𑀦𑁆𑀦𑀢𑀺𑀮𑀓𑁆𑀔𑀡𑁄 𑀫𑀸𑀦𑁄, 𑀅𑀩𑁆𑀪𑀼𑀦𑁆𑀦𑀢𑀺𑀮𑀓𑁆𑀔𑀡𑁄 𑀅𑀢𑀺𑀫𑀸𑀦𑁄. 𑀫𑀢𑁆𑀢𑀪𑀸𑀯𑀮𑀓𑁆𑀔𑀡𑁄 𑀫𑀤𑁄, 𑀧𑀜𑁆𑀘𑀓𑀸𑀫𑀕𑀼𑀡𑁂𑀲𑀼 𑀘𑀺𑀢𑁆𑀢𑀯𑁄𑀲𑁆𑀲𑀕𑁆𑀕𑀮𑀓𑁆𑀔𑀡𑁄 𑀧𑀫𑀸𑀤𑁄. 𑀪𑀯𑀢𑀺 𑀅𑀪𑀺𑀪𑀯𑀢𑀺 𑀅𑀭𑀺𑀦𑁆𑀢𑀺 𑀪𑀽𑀭𑀺 𑀅𑀲𑀭𑀽𑀧𑀢𑁄 𑀧𑀭𑀲𑁆𑀲 𑀅𑀓𑀸𑀭𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸. 𑀢𑁂𑀦𑀸𑀳 𑁋 ‘‘𑀅𑀭𑀺𑀁 𑀫𑀤𑁆𑀤𑀦𑀺𑀧𑀜𑁆𑀜𑀸𑀢𑀺 𑀪𑀽𑀭𑀺𑀧𑀜𑁆𑀜𑀸’’𑀢𑀺. 𑀪𑀯𑀢𑀺 𑀏𑀢𑁆𑀣 𑀣𑀸𑀯𑀭𑀚𑀗𑁆𑀕𑀫𑀦𑁆𑀢𑀺 𑀪𑀽𑀭𑀺 𑀯𑀼𑀘𑁆𑀘𑀢𑀺 𑀧𑀣𑀯𑀻 𑀬𑀣𑀸 ‘‘𑀪𑀽𑀫𑀻’’𑀢𑀺 𑀪𑀽𑀭𑀺 𑀯𑀺𑀬𑀸𑀢𑀺 𑀪𑀽𑀭𑀺𑀧𑀜𑁆𑀜𑀸 𑀯𑀺𑀢𑁆𑀣𑀢𑀯𑀺𑀧𑀼𑀮𑀝𑁆𑀞𑁂𑀦 𑀲𑀩𑁆𑀩𑀁 𑀲𑀳𑀢𑀸𑀬 𑀘. 𑀢𑁂𑀦𑀸𑀳 𑁋 ‘‘𑀢𑀸𑀬𑀸’’𑀢𑀺𑀆𑀤𑀺. 𑀢𑀢𑁆𑀣 𑀧𑀣𑀯𑀺𑀲𑀫𑀸𑀬𑀸𑀢𑀺 𑀯𑀺𑀢𑁆𑀣𑀢𑀯𑀺𑀧𑀼𑀮𑀝𑁆𑀞𑁂𑀦𑁂𑀯 𑀧𑀣𑀯𑀺𑀲𑀫𑀸𑀬. 𑀯𑀺𑀢𑁆𑀣𑀢𑀸𑀬𑀸𑀢𑀺 𑀧𑀚𑀸𑀦𑀺𑀢𑀩𑁆𑀩𑁂 𑀯𑀺𑀲𑀬𑁂 𑀯𑀺𑀢𑁆𑀣𑀢𑀸𑀬, 𑀦 𑀏𑀓𑀤𑁂𑀲𑁂 𑀯𑀢𑁆𑀢𑀫𑀸𑀦𑀸𑀬. 𑀯𑀺𑀧𑀼𑀮𑀸𑀬𑀸𑀢𑀺 𑀉𑀴𑀸𑀭𑀪𑀽𑀢𑀸𑀬. 𑀲𑀫𑀦𑁆𑀦𑀸𑀕𑀢𑁄𑀢𑀺 𑀧𑀼𑀕𑁆𑀕𑀮𑁄. 𑀇𑀢𑀺-𑀲𑀤𑁆𑀤𑁄 𑀓𑀸𑀭𑀡𑀢𑁆𑀣𑁂, 𑀇𑀫𑀺𑀦𑀸 𑀓𑀸𑀭𑀡𑁂𑀦 𑀧𑀼𑀕𑁆𑀕𑀮𑀲𑁆𑀲 𑀪𑀽𑀭𑀺𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 𑀢𑀲𑁆𑀲 𑀧𑀜𑁆𑀜𑀸 𑀪𑀽𑀭𑀺𑀧𑀜𑁆𑀜𑀸 𑀦𑀸𑀫𑀸𑀢𑀺 𑀅𑀢𑁆𑀣𑁄. ‘‘𑀪𑀽𑀭𑀺𑀧𑀜𑁆𑀜𑀲𑁆𑀲 𑀧𑀜𑁆𑀜𑀸 𑀪𑀽𑀭𑀺𑀧𑀜𑁆𑀜𑀧𑀜𑁆𑀜𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀏𑀓𑀲𑁆𑀲 𑀧𑀜𑁆𑀜𑀸𑀲𑀤𑁆𑀤𑀲𑁆𑀲 𑀮𑁄𑀧𑀁 𑀓𑀢𑁆𑀯𑀸 ‘‘𑀪𑀽𑀭𑀺𑀧𑀜𑁆𑀜𑀸’’𑀢𑀺 𑀯𑀼𑀢𑁆𑀢𑀁.

𑀅𑀧𑀺𑀘𑀸𑀢𑀺 ¶ 𑀧𑀜𑁆𑀜𑀸𑀧𑀭𑀺𑀬𑀸𑀬𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀧𑀜𑁆𑀜𑀸𑀬𑀫𑁂𑀢𑀦𑁆𑀢𑀺 𑀧𑀜𑁆𑀜𑀸𑀬 𑀏𑀢𑀁. 𑀅𑀥𑀺𑀯𑀘𑀦𑀦𑁆𑀢𑀺 𑀅𑀥𑀺𑀓𑀁 𑀯𑀘𑀦𑀁. 𑀪𑀽𑀭𑀻𑀢𑀺 𑀪𑀽𑀢𑁂 𑀅𑀢𑁆𑀣𑁂 𑀔𑀦𑁆𑀥𑀸𑀤𑀺𑀓𑁂 𑀭𑀫𑀢𑀺 𑀲𑀘𑁆𑀘𑀲𑀪𑀸𑀯𑁂𑀦, 𑀤𑀺𑀝𑁆𑀞𑀺 𑀯𑀺𑀬 𑀦 𑀅𑀪𑀽𑀢𑁂𑀢𑀺 𑀪𑀽𑀭𑀺. 𑀫𑁂𑀥𑀸𑀢𑀺 𑀅𑀲𑀦𑀺 𑀯𑀺𑀬 𑀲𑀺𑀮𑀼𑀘𑁆𑀘𑀬𑁂 𑀓𑀺𑀮𑁂𑀲𑁂 𑀫𑁂𑀥𑀢𑀺 𑀳𑀺𑀁𑀲𑀢𑀻𑀢𑀺 𑀫𑁂𑀥𑀸, 𑀔𑀺𑀧𑁆𑀧𑀁 𑀕𑀳𑀡𑀥𑀸𑀭𑀡𑀝𑁆𑀞𑁂𑀦 𑀯𑀸 𑀫𑁂𑀥𑀸. 𑀧𑀭𑀺𑀡𑀸𑀬𑀺𑀓𑀸𑀢𑀺 𑀬𑀲𑁆𑀲𑀼𑀧𑁆𑀧𑀚𑁆𑀚𑀢𑀺, 𑀢𑀁 𑀲𑀢𑁆𑀢𑀁 𑀅𑀢𑁆𑀢𑀳𑀺𑀢𑀧𑁆𑀧𑀝𑀺𑀧𑀢𑁆𑀢𑀺𑀬𑀁 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀘 𑀬𑀸𑀣𑀸𑀯𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑁂 𑀧𑀭𑀺𑀡𑁂𑀢𑀻𑀢𑀺 𑀧𑀭𑀺𑀡𑀸𑀬𑀺𑀓𑀸. 𑀇𑀫𑁂𑀳𑁂𑀯 𑀅𑀜𑁆𑀜𑀸𑀦𑀺𑀧𑀺 𑀧𑀜𑁆𑀜𑀸𑀧𑀭𑀺𑀬𑀸𑀬𑀯𑀘𑀦𑀸𑀦𑀺 𑀳𑁄𑀦𑁆𑀢𑀺.

𑀧𑀜𑁆𑀜𑀸𑀩𑀸𑀳𑀼𑀮𑁆𑀮𑀦𑁆𑀢𑀺 𑀧𑀜𑁆𑀜𑀸 𑀩𑀳𑀼𑀮𑀸 𑀅𑀲𑁆𑀲𑀸𑀢𑀺 𑀧𑀜𑁆𑀜𑀸𑀩𑀳𑀼𑀮𑁄, 𑀢𑀲𑁆𑀲 𑀪𑀸𑀯𑁄 𑀧𑀜𑁆𑀜𑀸𑀩𑀸𑀳𑀼𑀮𑁆𑀮𑀁. 𑀢𑀜𑁆𑀘 𑀧𑀜𑁆𑀜𑀸𑀬 𑀩𑀸𑀳𑀼𑀮𑁆𑀮𑀁 𑀧𑀯𑀢𑁆𑀢𑀺 𑀏𑀯𑀸𑀢𑀺 𑀢𑀫𑀢𑁆𑀣𑀁 𑀧𑀜𑁆𑀜𑀸𑀕𑀭𑀼𑀓𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀯𑀲𑁂𑀦 𑀤𑀲𑁆𑀲𑁂𑀦𑁆𑀢𑁄, ‘‘𑀇𑀥𑁂𑀓𑀘𑁆𑀘𑁄 𑀧𑀜𑁆𑀜𑀸𑀕𑀭𑀼𑀓𑁄 𑀳𑁄𑀢𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀇𑀥𑁂𑀓𑀘𑁆𑀘𑁄𑀢𑀺 𑀧𑀼𑀣𑀼𑀚𑁆𑀚𑀦𑀓𑀮𑁆𑀬𑀸𑀡𑀓𑁄, 𑀅𑀭𑀺𑀬𑁄 𑀯𑀸. 𑀧𑀜𑁆𑀜𑀸 𑀕𑀭𑀼 𑀏𑀓𑀲𑁆𑀲𑀸𑀢𑀺 𑀧𑀜𑁆𑀜𑀸𑀕𑀭𑀼𑀓𑁄. 𑀧𑀜𑁆𑀜𑀸𑀬 𑀘𑀭𑀺𑀢𑁄 𑀧𑀯𑀢𑁆𑀢𑀺𑀢𑁄 𑀧𑀜𑁆𑀜𑀸𑀘𑀭𑀺𑀢𑁄, 𑀧𑀜𑁆𑀜𑀸𑀬 𑀘𑀭𑀺𑀢𑀁 𑀧𑀯𑀢𑁆𑀢𑀁 𑀅𑀲𑁆𑀲𑀸𑀢𑀺 𑀯𑀸 𑀧𑀜𑁆𑀜𑀸𑀘𑀭𑀺𑀢𑁄. 𑀅𑀦𑀼𑀮𑁄𑀫𑀺𑀓𑀔𑀦𑁆𑀢𑀺𑀆𑀤𑀺𑀯𑀺𑀪𑀸𑀕𑀸 𑀧𑀜𑁆𑀜𑀸 𑀆𑀲𑀬𑁄 𑀏𑀢𑀲𑁆𑀲𑀸𑀢𑀺 𑀧𑀜𑁆𑀜𑀸𑀲𑀬𑁄. 𑀧𑀜𑁆𑀜𑀸𑀬 𑀅𑀥𑀺𑀫𑀼𑀢𑁆𑀢𑁄 𑀢𑀦𑁆𑀦𑀺𑀦𑁆𑀦𑁄𑀢𑀺 𑀧𑀜𑁆𑀜𑀸𑀥𑀺𑀫𑀼𑀢𑁆𑀢𑁄. 𑀲𑀫𑀼𑀲𑁆𑀲𑀺𑀢𑀝𑁆𑀞𑁂𑀦 𑀧𑀜𑁆𑀜𑀸 𑀥𑀚𑁄 𑀏𑀢𑀲𑁆𑀲𑀸𑀢𑀺 𑀧𑀜𑁆𑀜𑀸𑀥𑀚𑁄. 𑀧𑀜𑁆𑀜𑀸𑀓𑁂𑀢𑀽𑀢𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀁. 𑀧𑀜𑁆𑀜𑀸𑀦𑀺𑀫𑀺𑀢𑁆𑀢𑀁 𑀆𑀥𑀺𑀧𑀢𑁂𑀬𑁆𑀬𑀁 𑀏𑀢𑀲𑁆𑀲𑀸𑀢𑀺 𑀧𑀜𑁆𑀜𑀸𑀥𑀺𑀧𑀢𑁂𑀬𑁆𑀬𑁄. 𑀧𑀜𑁆𑀜𑀸𑀲𑀗𑁆𑀔𑀸𑀢𑁄 𑀯𑀺𑀘𑀬𑁄, 𑀥𑀫𑁆𑀫𑀲𑀪𑀸𑀯𑀯𑀺𑀘𑀺𑀦𑀦𑀁 𑀯𑀸 𑀩𑀳𑀼𑀮𑀁 𑀏𑀢𑀲𑁆𑀲𑀸𑀢𑀺 𑀯𑀺𑀘𑀬𑀩𑀳𑀼𑀮𑁄 ¶ . 𑀦𑀸𑀦𑀧𑁆𑀧𑀓𑀸𑀭𑁂𑀦 𑀥𑀫𑁆𑀫𑀲𑀪𑀸𑀯𑀯𑀺𑀘𑀺𑀦𑀦𑀁 𑀩𑀳𑀼𑀮𑀁 𑀅𑀲𑁆𑀲𑀸𑀢𑀺 𑀧𑀯𑀺𑀘𑀬𑀩𑀳𑀼𑀮𑁄. 𑀑𑀓𑁆𑀔𑀸𑀬𑀦𑀁 𑀬𑀸𑀣𑀸𑀯𑀢𑁄 𑀥𑀫𑁆𑀫𑀸𑀦𑀁 𑀉𑀧𑀝𑁆𑀞𑀸𑀦𑀁 𑀩𑀳𑀼𑀮𑀁 𑀏𑀢𑀲𑁆𑀲𑀸𑀢𑀺 𑀑𑀓𑁆𑀔𑀸𑀬𑀦𑀩𑀳𑀼𑀮𑁄. 𑀧𑀜𑁆𑀜𑀸𑀬 𑀢𑀲𑁆𑀲 𑀢𑀲𑁆𑀲 𑀥𑀫𑁆𑀫𑀲𑁆𑀲 𑀲𑀫𑁆𑀫𑀸𑀧𑁂𑀓𑁆𑀔𑀦𑀸 𑀲𑀫𑁆𑀧𑁂𑀓𑁆𑀔𑀸, 𑀲𑀫𑁆𑀧𑁂𑀓𑁆𑀔𑀸𑀬 𑀅𑀬𑀦𑀁 𑀧𑀯𑀢𑁆𑀢𑀦𑀁 𑀲𑀫𑁆𑀧𑁂𑀓𑁆𑀔𑀸𑀬𑀦𑀁, 𑀲𑀫𑁆𑀧𑁂𑀓𑁆𑀔𑀸𑀬𑀦𑀁 𑀥𑀫𑁆𑀫𑁄 𑀧𑀓𑀢𑀺 𑀅𑀲𑁆𑀲𑀸𑀢𑀺 𑀲𑀫𑁆𑀧𑁂𑀓𑁆𑀔𑀸𑀬𑀦𑀥𑀫𑁆𑀫𑁄. 𑀲𑀫𑁆𑀧𑁂𑀓𑁆𑀔𑀸𑀬𑀦𑀁 𑀯𑀸 𑀬𑀸𑀣𑀸𑀯𑀢𑁄 𑀤𑀲𑁆𑀲𑀦𑀥𑀫𑁆𑀫𑁄 𑀲𑀪𑀸𑀯𑁄 𑀏𑀢𑀲𑁆𑀲𑀸𑀢𑀺 𑀲𑀫𑁆𑀧𑁂𑀓𑁆𑀔𑀸𑀬𑀦𑀥𑀫𑁆𑀫𑁄. 𑀲𑀩𑁆𑀩𑀁 𑀥𑀫𑁆𑀫𑀚𑀸𑀢𑀁 𑀯𑀺𑀪𑀽𑀢𑀁 𑀯𑀺𑀪𑀸𑀯𑀺𑀢𑀁 𑀓𑀢𑁆𑀯𑀸 𑀯𑀺𑀳𑀭𑀡𑀲𑀻𑀮𑁄𑀢𑀺 𑀯𑀺𑀪𑀽𑀢𑀯𑀺𑀳𑀸𑀭𑀻.

𑀢𑀘𑁆𑀘𑀭𑀺𑀢𑁄𑀢𑀺𑀆𑀤𑀻𑀲𑀼 𑀢𑀁-𑀲𑀤𑁆𑀤𑁂𑀦 𑀧𑀜𑁆𑀜𑀸 𑀧𑀘𑁆𑀘𑀸𑀫𑀝𑁆𑀞𑀸, 𑀢𑀲𑁆𑀫𑀸 𑀢𑀢𑁆𑀣 ‘‘𑀧𑀜𑁆𑀜𑀸𑀘𑀭𑀺𑀢𑁄’’𑀢𑀺𑀆𑀤𑀺𑀦𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀸 𑀧𑀜𑁆𑀜𑀸 𑀘𑀭𑀺𑀢𑀸 𑀕𑀭𑀼𑀓𑀸 𑀩𑀳𑀼𑀮𑀸 𑀅𑀲𑁆𑀲𑀸𑀢𑀺 𑀢𑀘𑁆𑀘𑀭𑀺𑀢𑁄 𑀢𑀕𑁆𑀕𑀭𑀼𑀓𑁄 𑀢𑀩𑁆𑀩𑀳𑀼𑀮𑁄. 𑀢𑀲𑁆𑀲𑀁 𑀧𑀜𑁆𑀜𑀸𑀬𑀁 𑀦𑀺𑀦𑁆𑀦𑁄 𑀧𑁄𑀡𑁄 𑀧𑀩𑁆𑀪𑀸𑀭𑁄 𑀅𑀥𑀺𑀫𑀼𑀢𑁆𑀢𑁄𑀢𑀺 𑀢𑀦𑁆𑀦𑀺𑀦𑁆𑀦𑁄 𑀢𑀧𑁆𑀧𑁄𑀡𑁄 𑀢𑀧𑁆𑀧𑀩𑁆𑀪𑀸𑀭𑁄 𑀢𑀤𑀥𑀺𑀫𑀼𑀢𑁆𑀢𑁄. 𑀲𑀸 𑀧𑀜𑁆𑀜𑀸 𑀅𑀥𑀺𑀧𑀢𑀺 𑀢𑀤𑀥𑀺𑀧𑀢𑀺, 𑀢𑀤𑀥𑀺𑀧𑀢𑀺𑀢𑁄 𑀆𑀕𑀢𑁄 ¶ 𑀢𑀤𑀸𑀥𑀺𑀧𑀢𑁂𑀬𑁆𑀬𑁄. 𑀧𑀜𑁆𑀜𑀸𑀕𑀭𑀼𑀓𑁄𑀢𑀺𑀆𑀤𑀻𑀦𑀺 ‘‘𑀓𑀸𑀫𑀁 𑀲𑁂𑀯𑀦𑁆𑀢𑀁𑀬𑁂𑀯 𑀚𑀸𑀦𑀸𑀢𑀺, 𑀅𑀬𑀁 𑀧𑀼𑀕𑁆𑀕𑀮𑁄 𑀦𑁂𑀓𑁆𑀔𑀫𑁆𑀫𑀕𑀭𑀼𑀓𑁄’’𑀢𑀺𑀆𑀤𑀻𑀲𑀼 (𑀧𑀝𑀺. 𑀫. 𑁧.𑁧𑁧𑁪) 𑀯𑀺𑀬 𑀧𑀼𑀭𑀺𑀫𑀚𑀸𑀢𑀺𑀢𑁄 𑀧𑀪𑀼𑀢𑀺 𑀯𑀼𑀢𑁆𑀢𑀸𑀦𑀺. 𑀢𑀘𑁆𑀘𑀭𑀺𑀢𑁄𑀢𑀺𑀆𑀤𑀻𑀦𑀺 𑀇𑀫𑀺𑀲𑁆𑀲𑀸 𑀚𑀸𑀢𑀺𑀬𑀸 𑀯𑀼𑀢𑁆𑀢𑀸𑀦𑀺. 𑀇𑀤𑀸𑀦𑀺 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀦𑀺𑀤𑀲𑁆𑀲𑀦𑀯𑀲𑁂𑀦𑀧𑀺 𑀤𑀲𑁆𑀲𑁂𑀢𑀼𑀁 𑁋 ‘‘𑀬𑀣𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀫𑁂𑀯𑀦𑁆𑀢𑀺𑀆𑀤𑀻𑀦𑀺 𑀤𑀲𑁆𑀲𑀺𑀢𑀩𑁆𑀩𑀦𑀺𑀕𑀫𑀦𑀁.

𑀲𑀻𑀖𑀧𑀜𑁆𑀜𑀸𑀢𑀺 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀲𑀻𑀖𑀧𑁆𑀧𑀯𑀢𑁆𑀢𑀺𑀓𑀸 𑀧𑀜𑁆𑀜𑀸, 𑀬𑀸 𑀲𑀫𑀸𑀭𑀤𑁆𑀥𑀸 𑀅𑀢𑁆𑀢𑀦𑁄 𑀧𑀜𑁆𑀜𑀸𑀓𑀺𑀘𑁆𑀘𑀁 𑀅𑀤𑀦𑁆𑀥𑀸𑀬𑀦𑁆𑀢𑀻 𑀅𑀯𑀺𑀢𑁆𑀣𑀸𑀬𑀦𑁆𑀢𑀻 𑀔𑀺𑀧𑁆𑀧𑀫𑁂𑀯 𑀲𑀫𑁆𑀧𑀸𑀧𑁂𑀢𑀺. 𑀢𑁂𑀦𑀸𑀳 𑁋 ‘‘𑀲𑀻𑀖𑀁 𑀲𑀻𑀖𑀁 𑀲𑀻𑀮𑀸𑀦𑀺 𑀧𑀭𑀺𑀧𑀽𑀭𑁂𑀢𑀻’’𑀢𑀺𑀆𑀤𑀺. 𑀢𑀢𑁆𑀣 𑀲𑀻𑀖𑀁 𑀲𑀻𑀖𑀦𑁆𑀢𑀺 𑀩𑀳𑀽𑀦𑀁 𑀲𑀻𑀮𑀸𑀤𑀻𑀦𑀁 𑀲𑀗𑁆𑀕𑀳𑀢𑁆𑀣𑀁 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑀁. 𑀲𑀻𑀮𑀸𑀦𑀻𑀢𑀺 𑀘𑀸𑀭𑀺𑀢𑁆𑀢𑀯𑀸𑀭𑀺𑀢𑁆𑀢𑀯𑀲𑁂𑀦 𑀧𑀜𑁆𑀜𑀢𑁆𑀢𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀸𑀦𑀺, 𑀞𑀧𑁂𑀢𑁆𑀯𑀸 𑀯𑀸 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀁 𑀢𑀲𑁆𑀲 𑀯𑀺𑀲𑀼𑀁 𑀕𑀳𑀺𑀢𑀢𑁆𑀢𑀸 𑀇𑀢𑀭𑀸𑀦𑀺 𑀢𑀺𑀯𑀺𑀥𑀲𑀻𑀮𑀸𑀦𑀺. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀦𑁆𑀢𑀺 𑀘𑀓𑁆𑀔𑀸𑀤𑀻𑀦𑀁 𑀙𑀦𑁆𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀭𑀸𑀕𑀧𑁆𑀧𑀝𑀺𑀖𑀧𑁆𑀧𑀯𑁂𑀲𑀁 𑀅𑀓𑀢𑁆𑀯𑀸 𑀲𑀢𑀺𑀓𑀯𑀸𑀝𑁂𑀦 𑀦𑀺𑀯𑀸𑀭𑀡𑀁 𑀣𑀓𑀦𑀁. 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀺𑀢𑀧𑀭𑀺𑀪𑁄𑀕𑀯𑀲𑁂𑀦 𑀪𑁄𑀚𑀦𑁂 𑀧𑀫𑀸𑀡𑀜𑁆𑀜𑀼𑀪𑀸𑀯𑀁. 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀦𑁆𑀢𑀺 𑀤𑀺𑀯𑀲𑀲𑁆𑀲 𑀢𑀻𑀲𑀼 𑀓𑁄𑀝𑁆𑀞𑀸𑀲𑁂𑀲𑀼 𑀭𑀢𑁆𑀢𑀺𑀬𑀸 𑀧𑀞𑀫𑀫𑀚𑁆𑀛𑀺𑀫𑀓𑁄𑀝𑁆𑀞𑀸𑀲𑁂𑀲𑀼 𑀘 𑀚𑀸𑀕𑀭𑀢𑀺 𑀦 𑀦𑀺𑀤𑁆𑀤𑀸𑀬𑀢𑀺, 𑀲𑀫𑀡𑀥𑀫𑁆𑀫𑀫𑁂𑀯 𑀓𑀭𑁄𑀢𑀻𑀢𑀺 𑀚𑀸𑀕𑀭𑁄, 𑀚𑀸𑀕𑀭𑀲𑁆𑀲 𑀪𑀸𑀯𑁄, 𑀓𑀫𑁆𑀫𑀁 𑀯𑀸 𑀚𑀸𑀕𑀭𑀺𑀬𑀁, 𑀚𑀸𑀕𑀭𑀺𑀬𑀲𑁆𑀲 𑀅𑀦𑀼𑀬𑁄𑀕𑁄 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑁄, 𑀢𑀁 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀁. 𑀲𑀻𑀮𑀓𑁆𑀔𑀦𑁆𑀥𑀦𑁆𑀢𑀺 𑀲𑁂𑀓𑁆𑀔𑀁 𑀯𑀸 𑀅𑀲𑁂𑀓𑁆𑀔𑀁 𑀯𑀸 𑀲𑀻𑀮𑀓𑁆𑀔𑀦𑁆𑀥𑀁. 𑀏𑀯𑀫𑀺𑀢𑀭𑁂𑀧𑀺 𑀔𑀦𑁆𑀥𑀸 𑀯𑁂𑀤𑀺𑀢𑀩𑁆𑀩𑀸. 𑀧𑀜𑁆𑀜𑀸𑀓𑁆𑀔𑀦𑁆𑀥𑀦𑁆𑀢𑀺 𑀫𑀕𑁆𑀕𑀧𑀜𑁆𑀜𑀸 𑀘 𑀲𑁂𑀓𑁆𑀔𑀸𑀲𑁂𑀓𑁆𑀔𑀸𑀦𑀁 𑀮𑁄𑀓𑀺𑀬𑀧𑀜𑁆𑀜𑀸 𑀘. 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑀦𑁆𑀢𑀺 𑀨𑀮𑀯𑀺𑀫𑀼𑀢𑁆𑀢𑀺. 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑀦𑁆𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁. 𑀲𑀻𑀖𑀧𑀜𑁆𑀜𑀸𑀦𑀺𑀤𑁆𑀤𑁂𑀲𑀲𑀤𑀺𑀲𑁄𑀬𑁂𑀯 𑀮𑀳𑀼𑀧𑀜𑁆𑀜𑀸𑀦𑀺𑀤𑁆𑀤𑁂𑀲𑁄, 𑀢𑀣𑀸 𑀳𑀸𑀲𑀧𑀜𑁆𑀜𑀸𑀦𑀺𑀤𑁆𑀤𑁂𑀲𑁄. 𑀚𑀯𑀦𑀧𑀜𑁆𑀜𑀸𑀦𑀺𑀤𑁆𑀤𑁂𑀲𑁄 𑀧𑀦 𑀓𑀮𑀸𑀧𑀲𑀫𑁆𑀫𑀲𑀦𑀦𑀬𑁂𑀦 𑀧𑀯𑀢𑁆𑀢𑁄. 𑀢𑀺𑀓𑁆𑀔𑀧𑀜𑁆𑀜𑀸𑀦𑀺𑀤𑁆𑀤𑁂𑀲𑁄 𑀯𑀻𑀭𑀺𑀬𑀲𑁆𑀲 𑀉𑀲𑁆𑀲𑀼𑀓𑁆𑀓𑀸𑀧𑀦𑀯𑀲𑁂𑀦, 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸𑀦𑀺𑀤𑁆𑀤𑁂𑀲𑁄 ¶ 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀲𑀜𑁆𑀜𑀸𑀯𑀲𑁂𑀦 𑀧𑀯𑀢𑁆𑀢𑁄. 𑀢𑀢𑁆𑀣 𑀢𑀼𑀭𑀺𑀢𑀓𑀺𑀭𑀺𑀬𑀸 𑀲𑀻𑀖𑀢𑀸. 𑀅𑀤𑀦𑁆𑀥𑀢𑀸 𑀮𑀳𑀼𑀢𑀸. 𑀯𑁂𑀕𑀸𑀬𑀺𑀢𑀢𑁆𑀢𑀁 𑀔𑀺𑀧𑁆𑀧𑀢𑀸.

𑀳𑀸𑀲𑀩𑀳𑀼𑀮𑁄𑀢𑀺 𑀧𑀻𑀢𑀺𑀩𑀳𑀼𑀮𑁄. 𑀲𑁂𑀲𑀧𑀤𑀸𑀦𑀺 𑀢𑀲𑁆𑀲𑁂𑀯 𑀯𑁂𑀯𑀘𑀦𑀸𑀦𑀺. 𑀅𑀣 𑀯𑀸 𑀳𑀸𑀲𑀩𑀳𑀼𑀮𑁄𑀢𑀺 𑀫𑀽𑀮𑀧𑀤𑀁. 𑀯𑁂𑀤𑀩𑀳𑀼𑀮𑁄𑀢𑀺 𑀢𑀲𑁆𑀲𑀸 𑀏𑀯 𑀧𑀻𑀢𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀲𑁄𑀫𑀦𑀲𑁆𑀲𑀯𑁂𑀤𑀦𑀸𑀯𑀲𑁂𑀦 𑀦𑀺𑀤𑁆𑀤𑁂𑀲𑀧𑀤𑀁. 𑀢𑀼𑀝𑁆𑀞𑀺𑀩𑀳𑀼𑀮𑁄𑀢𑀺 𑀦𑀸𑀢𑀺𑀩𑀮𑀯𑀧𑀻𑀢𑀺𑀬𑀸 𑀢𑀼𑀝𑁆𑀞𑀸𑀓𑀸𑀭𑀯𑀲𑁂𑀦. 𑀧𑀸𑀫𑁄𑀚𑁆𑀚𑀩𑀳𑀼𑀮𑁄𑀢𑀺 𑀩𑀮𑀯𑀧𑀻𑀢𑀺𑀬𑀸 𑀧𑀫𑀼𑀤𑀺𑀢𑀪𑀸𑀯𑀯𑀲𑁂𑀦. 𑀲𑀻𑀮𑀸𑀦𑀺 𑀧𑀭𑀺𑀧𑀽𑀭𑁂𑀢𑀻𑀢𑀺 𑀳𑀝𑁆𑀞𑀧𑁆𑀧𑀳𑀝𑁆𑀞𑁄 𑀉𑀤𑀕𑁆𑀕𑀽𑀤𑀕𑁆𑀕𑁄 ¶ 𑀲𑀫𑁆𑀧𑀺𑀬𑀸𑀬𑀫𑀸𑀦𑁄 𑀲𑀻𑀮𑀸𑀦𑀺 𑀲𑀫𑁆𑀧𑀸𑀤𑁂𑀢𑀺. 𑀧𑀻𑀢𑀺𑀲𑁄𑀫𑀦𑀲𑁆𑀲𑀲𑀳𑀕𑀢𑀸 𑀳𑀺 𑀧𑀜𑁆𑀜𑀸 𑀅𑀪𑀺𑀭𑀢𑀺𑀯𑀲𑁂𑀦 𑀆𑀭𑀫𑁆𑀫𑀡𑁂 𑀨𑀼𑀮𑁆𑀮𑀺𑀢𑀸 𑀯𑀺𑀓𑀲𑀺𑀢𑀸 𑀯𑀺𑀬 𑀧𑀯𑀢𑁆𑀢𑀢𑀺, 𑀦 𑀏𑀯𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀢𑀺.

𑀅𑀦𑀺𑀘𑁆𑀘𑀢𑁄 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 ‘‘𑀔𑀦𑁆𑀥𑀧𑀜𑁆𑀘𑀓𑀁 𑀅𑀦𑀺𑀘𑁆𑀘’’𑀦𑁆𑀢𑀺 𑀯𑁂𑀕𑀸𑀬𑀺𑀢𑁂𑀦 𑀧𑀯𑀢𑁆𑀢𑀢𑀺, 𑀧𑀝𑀺𑀧𑀓𑁆𑀔𑀤𑀽𑀭𑀻𑀪𑀸𑀯𑁂𑀦 𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀲𑁆𑀲 𑀲𑀸𑀢𑀺𑀲𑀬𑀢𑁆𑀢𑀸 𑀇𑀦𑁆𑀤𑁂𑀦 𑀯𑀺𑀲𑁆𑀲𑀝𑁆𑀞𑀯𑀚𑀺𑀭𑀁 𑀯𑀺𑀬 𑀮𑀓𑁆𑀔𑀡𑀁 𑀅𑀯𑀺𑀭𑀚𑁆𑀛𑀦𑁆𑀢𑀻 𑀅𑀤𑀦𑁆𑀥𑀸𑀬𑀦𑁆𑀢𑀻 𑀅𑀦𑀺𑀘𑁆𑀘𑀮𑀓𑁆𑀔𑀡𑀁 𑀯𑁂𑀕𑀲𑀸 𑀧𑀝𑀺𑀯𑀺𑀚𑁆𑀛𑀢𑀺, 𑀢𑀲𑁆𑀫𑀸 𑀲𑀸 𑀚𑀯𑀦𑀧𑀜𑁆𑀜𑀸 𑀦𑀸𑀫𑀸𑀢𑀺 𑀅𑀢𑁆𑀣𑁄. 𑀲𑁂𑀲𑀧𑀤𑁂𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀏𑀯𑀁 𑀮𑀓𑁆𑀔𑀡𑀸𑀭𑀫𑁆𑀫𑀡𑀺𑀓𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀚𑀯𑀦𑀧𑀜𑁆𑀜𑀁 𑀤𑀲𑁆𑀲𑁂𑀢𑁆𑀯𑀸 𑀩𑀮𑀯𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑁋 ‘‘𑀭𑀽𑀧’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀔𑀬𑀝𑁆𑀞𑁂𑀦𑀸𑀢𑀺 𑀬𑀢𑁆𑀣 𑀬𑀢𑁆𑀣 𑀉𑀧𑁆𑀧𑀚𑁆𑀚𑀢𑀺, 𑀢𑀢𑁆𑀣 𑀢𑀢𑁆𑀣𑁂𑀯 𑀪𑀺𑀚𑁆𑀚𑀦𑀢𑁄 𑀔𑀬𑀲𑀪𑀸𑀯𑀢𑁆𑀢𑀸. 𑀪𑀬𑀝𑁆𑀞𑁂𑀦𑀸𑀢𑀺 𑀪𑀬𑀸𑀦𑀓𑀪𑀸𑀯𑀢𑁄. 𑀅𑀲𑀸𑀭𑀓𑀝𑁆𑀞𑁂𑀦𑀸𑀢𑀺 𑀅𑀢𑁆𑀢𑀲𑀸𑀭𑀯𑀺𑀭𑀳𑀢𑁄 𑀦𑀺𑀘𑁆𑀘𑀲𑀸𑀭𑀸𑀤𑀺𑀯𑀺𑀭𑀳𑀢𑁄 𑀘. 𑀢𑀼𑀮𑀬𑀺𑀢𑁆𑀯𑀸𑀢𑀺 𑀢𑀼𑀮𑀸𑀪𑀽𑀢𑀸𑀬 𑀯𑀺𑀧𑀲𑁆𑀲𑀦𑀸𑀧𑀜𑁆𑀜𑀸𑀬 𑀢𑀼𑀮𑁂𑀢𑁆𑀯𑀸. 𑀢𑀻𑀭𑀬𑀺𑀢𑁆𑀯𑀸𑀢𑀺 𑀢𑀸𑀬 𑀏𑀯 𑀢𑀻𑀭𑀡𑀪𑀽𑀢𑀸𑀬 𑀢𑀻𑀭𑁂𑀢𑁆𑀯𑀸. 𑀯𑀺𑀪𑀸𑀯𑀬𑀺𑀢𑁆𑀯𑀸𑀢𑀺 𑀬𑀸𑀣𑀸𑀯𑀢𑁄 𑀧𑀓𑀸𑀲𑁂𑀢𑁆𑀯𑀸 𑀧𑀸𑀓𑀝𑀁 𑀓𑀢𑁆𑀯𑀸. 𑀅𑀣 𑀯𑀸 𑀢𑀼𑀮𑀬𑀺𑀢𑁆𑀯𑀸𑀢𑀺 𑀓𑀮𑀸𑀧𑀲𑀫𑁆𑀫𑀲𑀦𑀯𑀲𑁂𑀦 𑀢𑀼𑀮𑀬𑀺𑀢𑁆𑀯𑀸. 𑀢𑀻𑀭𑀬𑀺𑀢𑁆𑀯𑀸𑀢𑀺 𑀉𑀤𑀬𑀩𑁆𑀩𑀬𑀸𑀦𑀼𑀧𑀲𑁆𑀲𑀦𑀸𑀯𑀲𑁂𑀦 𑀢𑀻𑀭𑁂𑀢𑁆𑀯𑀸. 𑀯𑀺𑀪𑀸𑀯𑀬𑀺𑀢𑁆𑀯𑀸𑀢𑀺 𑀪𑀗𑁆𑀕𑀸𑀦𑀼𑀧𑀲𑁆𑀲𑀦𑀸𑀤𑀺𑀯𑀲𑁂𑀦 𑀧𑀸𑀓𑀝𑀁 𑀓𑀢𑁆𑀯𑀸. 𑀯𑀺𑀪𑀽𑀢𑀁 𑀓𑀢𑁆𑀯𑀸𑀢𑀺 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀦𑀼𑀮𑁄𑀫𑀯𑀲𑁂𑀦 𑀨𑀼𑀝𑀁 𑀓𑀢𑁆𑀯𑀸. 𑀭𑀽𑀧𑀦𑀺𑀭𑁄𑀥𑁂𑀢𑀺 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀦𑀺𑀭𑁄𑀥𑀪𑀽𑀢𑁂 𑀦𑀺𑀩𑁆𑀩𑀸𑀦𑁂. 𑀔𑀺𑀧𑁆𑀧𑀁 𑀚𑀯𑀢𑀻𑀢𑀺 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀯𑀲𑁂𑀦 𑀚𑀯𑀢𑀺 𑀧𑀯𑀢𑁆𑀢𑀢𑀺. 𑀇𑀤𑀸𑀦𑀺 𑀲𑀺𑀔𑀸𑀧𑁆𑀧𑀢𑁆𑀢𑀯𑀺𑀧𑀲𑁆𑀲𑀦𑀸𑀯𑀲𑁂𑀦 𑀚𑀯𑀦𑀧𑀜𑁆𑀜𑀁 𑀤𑀲𑁆𑀲𑁂𑀢𑀼𑀁, 𑀧𑀼𑀦 ‘‘𑀭𑀽𑀧’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀜𑀸𑀡𑀲𑁆𑀲 𑀢𑀺𑀓𑁆𑀔𑀪𑀸𑀯𑁄 𑀦𑀸𑀫 𑀲𑀯𑀺𑀲𑁂𑀲𑀁 𑀧𑀝𑀺𑀧𑀓𑁆𑀔𑀲𑀫𑀼𑀘𑁆𑀙𑀺𑀦𑁆𑀤𑀦𑁂𑀦 𑀯𑁂𑀤𑀺𑀢𑀩𑁆𑀩𑁄𑀢𑀺 ‘‘𑀔𑀺𑀧𑁆𑀧𑀁 𑀓𑀺𑀮𑁂𑀲𑁂 𑀙𑀺𑀦𑁆𑀤𑀢𑀻𑀢𑀺 𑀢𑀺𑀓𑁆𑀔𑀧𑀜𑁆𑀜𑀸’’𑀢𑀺 𑀯𑀢𑁆𑀯𑀸 𑀢𑁂 𑀧𑀦 𑀓𑀺𑀮𑁂𑀲𑁂 𑀯𑀺𑀪𑀸𑀕𑁂𑀦 𑀤𑀲𑁆𑀲𑁂𑀦𑁆𑀢𑁄, ‘‘𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓’’𑀦𑁆𑀢𑀺𑀆𑀤𑀺𑀫𑀸𑀳. 𑀲𑀫𑀣𑀯𑀺𑀧𑀲𑁆𑀲𑀦𑀸𑀳𑀺 𑀯𑀺𑀓𑁆𑀔𑀫𑁆𑀪𑀦𑀢𑀤𑀗𑁆𑀕𑀯𑀲𑁂𑀦 𑀧𑀳𑀻𑀦𑀫𑁆𑀧𑀺 𑀅𑀭𑀺𑀬𑀫𑀕𑁆𑀕𑁂𑀦 𑀅𑀲𑀫𑀽𑀳𑀢𑀢𑁆𑀢𑀸 𑀉𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀅𑀦𑀢𑀻𑀢𑀢𑀸𑀬 𑀅𑀲𑀫𑀽𑀳𑀢𑀼𑀧𑁆𑀧𑀦𑁆𑀦𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀇𑀥 ‘‘𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁. 𑀦𑀸𑀥𑀺𑀯𑀸𑀲𑁂𑀢𑀻𑀢𑀺 𑀲𑀦𑁆𑀢𑀸𑀦𑀁 𑀆𑀭𑁄𑀧𑁂𑀢𑁆𑀯𑀸 𑀦 𑀯𑀸𑀲𑁂𑀢𑀺. 𑀧𑀚𑀳𑀢𑀻𑀢𑀺 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀧𑀚𑀳𑀢𑀺. 𑀯𑀺𑀦𑁄𑀤𑁂𑀢𑀻𑀢𑀺 𑀔𑀺𑀧𑀢𑀺. 𑀩𑁆𑀬𑀦𑁆𑀢𑀺𑀁 𑀓𑀭𑁄𑀢𑀻𑀢𑀺 𑀯𑀺𑀕𑀢𑀦𑁆𑀢𑀁 𑀓𑀭𑁄𑀢𑀺. 𑀅𑀦𑀪𑀸𑀯𑀁 𑀕𑀫𑁂𑀢𑀻𑀢𑀺 𑀅𑀦𑀼 𑀅𑀪𑀸𑀯𑀁 ¶ 𑀕𑀫𑁂𑀢𑀺, 𑀯𑀺𑀧𑀲𑁆𑀲𑀦𑀸𑀓𑁆𑀓𑀫𑁂𑀦 𑀅𑀭𑀺𑀬𑀫𑀕𑁆𑀕𑀁 𑀧𑀢𑁆𑀯𑀸 𑀲𑀫𑀼𑀘𑁆𑀙𑁂𑀤𑀯𑀲𑁂𑀦𑁂𑀯 𑀅𑀪𑀸𑀯𑀁 𑀕𑀫𑀬𑀢𑀻𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀓𑀸𑀫𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀓𑀸𑀫𑀯𑀺𑀢𑀓𑁆𑀓𑁄. ‘‘𑀇𑀫𑁂 𑀲𑀢𑁆𑀢𑀸 ¶ 𑀫𑀭𑀦𑁆𑀢𑀽’’𑀢𑀺 𑀧𑀭𑁂𑀲𑀁 𑀫𑀭𑀡𑀧𑁆𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄. ‘‘𑀇𑀫𑁂 𑀲𑀢𑁆𑀢𑀸 𑀯𑀺𑀳𑀺𑀁𑀲𑀺𑀬𑀦𑁆𑀢𑀽’’𑀢𑀺 𑀧𑀭𑁂𑀲𑀁 𑀯𑀺𑀳𑀺𑀁𑀲𑀸𑀧𑀝𑀺𑀲𑀁𑀬𑀼𑀢𑁆𑀢𑁄 𑀯𑀺𑀢𑀓𑁆𑀓𑁄 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄. 𑀧𑀸𑀧𑀓𑁂𑀢𑀺 𑀮𑀸𑀫𑀓𑁂. 𑀅𑀓𑀼𑀲𑀮𑁂 𑀥𑀫𑁆𑀫𑁂𑀢𑀺 𑀅𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑁂 𑀥𑀫𑁆𑀫𑁂. 𑀢𑀺𑀓𑁆𑀔𑀧𑀜𑁆𑀜𑁄 𑀦𑀸𑀫 𑀔𑀺𑀧𑁆𑀧𑀸𑀪𑀺𑀜𑁆𑀜𑁄 𑀳𑁄𑀢𑀺, 𑀧𑀝𑀺𑀧𑀤𑀸 𑀘𑀲𑁆𑀲 𑀦 𑀘𑀮𑀢𑀻𑀢𑀺 𑀆𑀳 𑁋 ‘‘𑀏𑀓𑀫𑁆𑀳𑀺 𑀆𑀲𑀦𑁂 𑀘𑀢𑁆𑀢𑀸𑀭𑁄 𑀅𑀭𑀺𑀬𑀫𑀕𑁆𑀕𑀸’’𑀢𑀺𑀆𑀤𑀺.

‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸 𑀤𑀼𑀓𑁆𑀔𑀸 𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀸 𑀲𑀗𑁆𑀔𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀸 𑀔𑀬𑀥𑀫𑁆𑀫𑀸 𑀯𑀬𑀥𑀫𑁆𑀫𑀸 𑀯𑀺𑀭𑀸𑀕𑀥𑀫𑁆𑀫𑀸 𑀦𑀺𑀭𑁄𑀥𑀥𑀫𑁆𑀫𑀸’’𑀢𑀺 𑀬𑀸𑀣𑀸𑀯𑀢𑁄 𑀤𑀲𑁆𑀲𑀦𑁂𑀦 𑀲𑀘𑁆𑀘𑀧𑁆𑀧𑀝𑀺𑀯𑁂𑀥𑁄 𑀇𑀚𑁆𑀛𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀓𑀸𑀭𑀡𑀫𑀼𑀔𑁂𑀦 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀁 𑀤𑀲𑁆𑀲𑁂𑀢𑀼𑀁 𑁋 ‘‘𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀉𑀩𑁆𑀩𑁂𑀕𑀩𑀳𑀼𑀮𑁄 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀉𑀩𑁆𑀩𑁂𑀕𑀩𑀳𑀼𑀮𑁄𑀢𑀺 ‘‘𑀲𑀩𑁆𑀩𑁂 𑀲𑀗𑁆𑀔𑀸𑀭𑀸 𑀅𑀦𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 (𑀥. 𑀧. 𑁨𑁭𑁭) 𑀦𑀬𑁂𑀦 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀪𑀺𑀡𑁆𑀳𑀧𑁆𑀧𑀯𑀢𑁆𑀢𑀲𑀁𑀯𑁂𑀕𑁄. 𑀉𑀢𑁆𑀢𑀸𑀲𑀩𑀳𑀼𑀮𑁄𑀢𑀺 𑀜𑀸𑀡𑀪𑀬𑀯𑀲𑁂𑀦 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀩𑀳𑀼𑀲𑁄 𑀉𑀢𑁆𑀭𑀲𑁆𑀢𑀫𑀸𑀦𑀲𑁄. 𑀢𑁂𑀦 𑀆𑀤𑀻𑀦𑀯𑀸𑀦𑀼𑀧𑀲𑁆𑀲𑀦𑀫𑀸𑀳. 𑀉𑀓𑁆𑀓𑀡𑁆𑀞𑀦𑀩𑀳𑀼𑀮𑁄𑀢𑀺 𑀲𑀗𑁆𑀔𑀸𑀭𑀢𑁄 𑀉𑀤𑁆𑀥𑀁 𑀯𑀺𑀲𑀗𑁆𑀔𑀸𑀭𑀸𑀪𑀺𑀫𑀼𑀔𑀢𑀸𑀬 𑀉𑀓𑁆𑀓𑀡𑁆𑀞𑀦𑀩𑀳𑀼𑀮𑁄. 𑀇𑀫𑀺𑀦𑀸 𑀦𑀺𑀩𑁆𑀩𑀺𑀤𑀸𑀦𑀼𑀧𑀲𑁆𑀲𑀦𑀫𑀸𑀳. 𑀅𑀭𑀢𑀺𑀩𑀳𑀼𑀮𑁄𑀢𑀺𑀆𑀤𑀺𑀦𑀸 𑀢𑀲𑁆𑀲𑀸 𑀏𑀯 𑀅𑀧𑀭𑀸𑀧𑀭𑀽𑀧𑀧𑀢𑁆𑀢𑀺𑀁. 𑀩𑀳𑀺𑀫𑀼𑀔𑁄𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀢𑁄 𑀩𑀳𑀺𑀪𑀽𑀢𑀁 𑀦𑀺𑀩𑁆𑀩𑀸𑀦𑀁 𑀉𑀤𑁆𑀤𑀺𑀲𑁆𑀲 𑀧𑀯𑀢𑁆𑀢𑀜𑀸𑀡𑀫𑀼𑀔𑁄. 𑀢𑀣𑀸 𑀧𑀯𑀢𑁆𑀢𑀺𑀢𑀯𑀺𑀫𑁄𑀓𑁆𑀔𑀫𑀼𑀔𑁄. 𑀦𑀺𑀩𑁆𑀩𑀺𑀚𑁆𑀛𑀦𑀁 𑀧𑀝𑀺𑀯𑀺𑀚𑁆𑀛𑀦𑀁 𑀦𑀺𑀩𑁆𑀩𑁂𑀥𑁄, 𑀲𑁄 𑀏𑀢𑀺𑀲𑁆𑀲𑀸 𑀅𑀢𑁆𑀣𑀻𑀢𑀺 𑀦𑀺𑀩𑁆𑀩𑁂𑀥𑀺𑀓𑀸, 𑀦𑀺𑀩𑁆𑀩𑀺𑀚𑁆𑀛𑀢𑀻𑀢𑀺 𑀯𑀸 𑀦𑀺𑀩𑁆𑀩𑁂𑀥𑀺𑀓𑀸, 𑀲𑀸 𑀏𑀯 𑀧𑀜𑁆𑀜𑀸 𑀦𑀺𑀩𑁆𑀩𑁂𑀥𑀺𑀓𑀧𑀜𑁆𑀜𑀸. 𑀅𑀦𑀺𑀩𑁆𑀩𑀺𑀤𑁆𑀥𑀧𑀼𑀩𑁆𑀩𑀦𑁆𑀢𑀺 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀅𑀦𑁆𑀢𑀁 𑀧𑀸𑀧𑁂𑀢𑁆𑀯𑀸 𑀅𑀦𑀺𑀯𑀺𑀤𑁆𑀥𑀧𑀼𑀩𑁆𑀩𑀁. 𑀅𑀧𑁆𑀧𑀤𑀸𑀮𑀺𑀢𑀧𑀼𑀩𑁆𑀩𑀦𑁆𑀢𑀺 𑀢𑀲𑁆𑀲𑁂𑀯 𑀅𑀢𑁆𑀣𑀯𑀘𑀦𑀁, 𑀅𑀦𑁆𑀢𑀓𑀭𑀡𑁂𑀦𑁂𑀯 𑀅𑀧𑁆𑀧𑀤𑀸𑀮𑀺𑀢𑀧𑀼𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀮𑁄𑀪𑀓𑁆𑀔𑀦𑁆𑀥𑀦𑁆𑀢𑀺 𑀮𑁄𑀪𑀭𑀸𑀲𑀺𑀁, 𑀮𑁄𑀪𑀓𑁄𑀝𑁆𑀞𑀸𑀲𑀁 𑀯𑀸.

𑀓𑀸𑀬𑀕𑀢𑀸𑀲𑀢𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨𑁦. 𑀅𑀫𑀢𑀯𑀕𑁆𑀕𑀯𑀡𑁆𑀡𑀦𑀸

𑁬𑁦𑁦-𑁬𑁧𑁧. 𑀦𑀢𑁆𑀣𑀺 ¶ 𑀏𑀢𑁆𑀣 𑀫𑀢𑀁 𑀫𑀭𑀡𑀁 𑀯𑀺𑀦𑀸𑀲𑁄𑀢𑀺 𑀅𑀫𑀢𑀁, 𑀦𑀺𑀩𑁆𑀩𑀸𑀦𑀦𑁆𑀢𑀺 𑀆𑀳 𑁋 ‘‘𑀫𑀭𑀡𑀯𑀺𑀭𑀳𑀺𑀢𑀁 𑀦𑀺𑀩𑁆𑀩𑀸𑀦𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑀻’’𑀢𑀺. 𑀅𑀫𑀢𑀲𑁆𑀲 𑀯𑀸 𑀦𑀺𑀩𑁆𑀩𑀸𑀦𑀲𑁆𑀲 𑀅𑀥𑀺𑀕𑀫𑀳𑁂𑀢𑀼𑀢𑀸𑀬 ¶ 𑀅𑀫𑀢𑀲𑀤𑀺𑀲𑀅𑀢𑀧𑁆𑀧𑀓𑀲𑀼𑀔𑀧𑀢𑀺𑀢𑀢𑀸𑀬 𑀘 𑀓𑀸𑀬𑀕𑀢𑀸𑀲𑀢𑀺 ‘‘𑀅𑀫𑀢’’𑀦𑁆𑀢𑀺 𑀯𑀼𑀢𑁆𑀢𑀸. 𑀧𑀭𑀺𑀪𑀼𑀜𑁆𑀚𑀦𑁆𑀢𑀻𑀢𑀺 𑀛𑀸𑀦𑀲𑀫𑀸𑀧𑀚𑁆𑀚𑀦𑁂𑀦 𑀯𑀴𑀜𑁆𑀚𑀦𑁆𑀢𑀺. 𑀯𑀺𑀭𑀤𑁆𑀥𑀦𑁆𑀢𑀺 𑀅𑀦𑀥𑀺𑀕𑀫𑁂𑀦 𑀯𑀺𑀭𑀚𑁆𑀛𑀺𑀢𑀁. 𑀢𑁂𑀦𑀸𑀳 𑁋 ‘‘𑀯𑀺𑀭𑀸𑀥𑀺𑀢𑀁 𑀦𑀸𑀥𑀺𑀕𑀢’’𑀦𑁆𑀢𑀺. 𑀆𑀭𑀤𑁆𑀥𑀦𑁆𑀢𑀺 𑀲𑀸𑀥𑀺𑀢𑀁 𑀦𑀺𑀧𑁆𑀨𑀸𑀤𑀺𑀢𑀁. 𑀢𑀜𑁆𑀘 𑀧𑀭𑀺𑀧𑀼𑀡𑁆𑀡𑀁 𑀦𑀸𑀫 𑀳𑁄𑀢𑀻𑀢𑀺 𑀆𑀳 𑁋 ‘‘𑀆𑀭𑀤𑁆𑀥𑀦𑁆𑀢𑀺 𑀧𑀭𑀺𑀧𑀼𑀡𑁆𑀡’’𑀦𑁆𑀢𑀺. 𑀧𑀫𑀸𑀤𑀺𑀁𑀲𑀽𑀢𑀺 𑀓𑀸𑀮𑀩𑁆𑀬𑀢𑁆𑀢𑀬𑁂𑀦𑁂𑀤𑀁 𑀯𑀼𑀢𑁆𑀢𑀦𑁆𑀢𑀺 𑀆𑀳 𑁋 ‘‘𑀧𑀫𑀚𑁆𑀚𑀦𑁆𑀢𑀻’’𑀢𑀺.

𑀅𑀫𑀢𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀫𑀦𑁄𑀭𑀣𑀧𑀽𑀭𑀡𑀺𑀬𑀸 𑀅𑀗𑁆𑀕𑀼𑀢𑁆𑀢𑀭𑀦𑀺𑀓𑀸𑀬-𑀅𑀝𑁆𑀞𑀓𑀣𑀸𑀬

𑀏𑀓𑀓𑀦𑀺𑀧𑀸𑀢𑀯𑀡𑁆𑀡𑀦𑀸𑀬 𑀅𑀦𑀼𑀢𑁆𑀢𑀸𑀦𑀢𑁆𑀣𑀤𑀻𑀧𑀦𑀸 𑀲𑀫𑀢𑁆𑀢𑀸.

𑀧𑀞𑀫𑁄 𑀪𑀸𑀕𑁄 𑀦𑀺𑀝𑁆𑀞𑀺𑀢𑁄.